Keima_Pu:Sir Sawmtea BY Cck Lalchhuanawmi (Completed)

[Ngaia]

Keima Pu: Sir Sawmtea
Chapter-19
Ziaktu: Cck Lalchhuanawmi

A thinrim nge a lawm tih pawh hriat lohin, au dur dur karah min en kar reng a. En ve kar mah ila, a rilru awm ang tur ka hre thei der lo.

Darthlalanga inen pahin ka nui ver ver, ka va han sual thiam tak. Eng emaw hleka min hauh ziah vang a nih kha.

A wifey ni tak tak phei ila chu aw, min ṭhen rang chiang ang chu aww, ṭhen chhanah pawh 'ṭawngtheih vang' a ni hrim hrim bawk ang a.

"A nuam ve reng reng e", ka ti zawi sap a. Ka la innuih vur vur, A hlimawm ve reng reng alawm. Bathroom aṭang ka chhuak a, lehkha zir ka thatchhe leh sawt tih ka inhrechiang ngang mai bawk.

Chuti chung chuan, ka mu leh hmak. Zing thawh ka hre bawk si lo, nakinah ring tawk tawkin ka la chhiar leh ang.

"Bawihte, Nu ho Melte Chhawmdawlna inah kan kal dawn a, ka lo haw har dawn a nia",

"BKHP(Baptist Kohhran Hmeichhe Pawl) ho maw?", ka ti a. Ka nu a bu nghauh nghauh. Doormat hnuaiah chahbi a dah tur thu a sawi a. "In ban hma pawhin kan lo haw leh thut mai thei bawk", a ti muang leh charh.

School panin ka kal a, ka pa erawh a kal tawh thung. Nimin avangin ka puin engtinmah min ti êm lo ang chu ah. Tih theih vak pawh a nei lo ang.

'Sir Sawmtea wifey' nih han tum ngawt mai pawh chuh, a ṭha ve hrim hrim e.

"Wifey, wifey", Zamin min kuaikun nghek. "I va thleng hma ve", ka ti a. Hnung lam aṭang min nam bu leh dawrh. Ka pai deuh chawn chawn lehnghal, ka hnung lam ka hawi thuai a, Hmangaiha a lo khi ṭhaw.

"In va ninawm tak", ka ti hlak a. "Sir Sawmtea future wifey", min ko san euh euh chungin Hmangaiha chusn a ti a. A hnungah ka chum chawrh.

Classroom chhungah ka lut a, min chhaih nghal sup sup. "Sir Sawmtea wifey", min tih loh leh, "Sir Sawmtea future wifey", min hmu apiangin min chhaih tiin, ka sawi sual lo ang.

Kan class chauhin an hria maw tih laiin, class dang dang pawhin an hre chhawm zel a, school pum puiah a darh thuai. Ka chal ka beng dat dat ringawt, ṭawngthei hlawm lutuk mai.

"Sir Sawmtea ai ka lo lut aw", Miss Lâpuii chu a nui kur kur a. "Niminah aim in life ropui deuh deuh in phawrh chhuak hlawm a ni maw?", a ti a.

"Third year-i aim in life a ropui ber", Chban nui huah huahin a ti a. Ka pen ken laia va vawm chawrh ka châk lutuk.

"Tu nge chu chu?", Miss Lâpuiin a tih chuan, "U Dindini", an ti rual dual. Dawhkan ka bawh ringawt, an sual thiam tak tak a ni. Miss pawh a nui huah huah.

"Takah, Sir Sawmtea wifey nih tum in awmin ka hria", ka beidawng lutuk chu ka thaw chhuak hawk. "Dindini kha ngati nge a bawh daih a?", Miss Lâpuiin a ti lang lang.

"Dindini, ding lawk rawh se", ka ding a. Miss pawh a nui kur kur, ka aim in life ber kher kha, a fuh lutuk nge, a fuh lo lutuk pawh ka hrethiam tawh lo.

Class dang ho lah, min chhaih tur ringawtin an lo dak. Kan school-ah chuan, lar tawh vet vet tak ka ni. Pu David-an a hre tawh ngei ang a, ka nu leh pa pawhin an hre ṭep tawh bawk ang.

Chu loah, Vanropuian a hre ngei ngei dawn, ka patea a hrilh ang a, ka pa an lo hrilh ve leh ang a. Kan veng aṭanga school kal an awm ve thli thluah a, an chhungte bulah ṭheuh an sawi ang a, kan venga lâr bak hmabak ka nei tawh lo, Hui haa.

"I aim a ṭha bik sia, hlawhtling ngei ngei la ka ti",

"I ninawm, i ṭawngthei lutuk", ka ti hlak a. Hruaii a nui hak hak. An ninawm lutuk ah. "Third Year, i aim a hlawhtlin hun chuan, a lawmnaah min sawm ve ngei ngei rawh aw", Chba chu ka melh rawm rawm.

Chba kan tih chhan pawh hi, Chhurbura a nih vang a nia. "Sawm dawn chiang lutuk, pu man i ei nghal bawk ang", ka ti a. A nui vak vak.

Ka pu class-ah pawh ka ṭi dâk tawh, aim in life chungchang vel a sawi ve lo a. Mahse, an hrethiam vek tho, a rukin ka bula ṭhu te hian min chhaih leh zeuh ṭhin. Class aṭanga ka chhuah duh ṭum ber a ni ang mawle.

"Vawiin chu, Man in Black chiah chiah, en mah teh", ti pahin, Hruaiin min kuai dak a. Ka mit ka chhing tlat thung, mit sir pawha en ngam loh nak laia.

"En chhin mah rawh, i aim in life saw", Zami pawh a lo phun sap. "Ka hnek ang che u", phun hlakin, ka kut hum ruhin an hmaah ka lek a.

An hmui hupin an nui kur kur, kan inhlau lo hlawm ve bawk sia maw. Nilengin School nuam ka ti lo, school nuam lo ka tih ṭum vawikhatna.

Chawhnuah, Boys' Hostel kawtah Volleyball kan beng a. Class-12 Arts-A leh Class-12 Science-B te, first game-ah kan intum a.

"Sir Sawmtea future wifey kha ṭang rawh", kan class ho an lo au lauh lauh. Ka duh loh chung min tel tir manah, ka khel ṭha dawn lo reng reng.

"Sir Sawmtea wifey kha, hei, min timualpho suh a ti che nia, i hubby hian", Pu David-an a lo tih chuan, hmai hupin ka ṭhu thla hnawk.

Nui ri thawm chuan, min thlawhbo tir châk vawng vawng. Thla neih ka châk zia chu ah.

Ka tho a, nui ho zawng zawng hi ka chhinchhiah vek ang a, a mal te tein ka hrankhum dawn mawni. "Aim in life atana Sir Sawmtea wifey han thlan mauh mai chu", Pu David-a bawkin a ti.

Ka zahna lamah ka kut te a khawr vek a, ka khel ṭha thei lo. Chu loah, nuih lamah a kal tawh a, fiamthu kan thawh hi a ni ringawt, kan ben ṭhelh nawk nawk mai ni.

Kan class mipa leh 12 Science-B mipa an inkhel ve leh a. Science chut ho mai mai te chu, kan hneh ve mai mai kha. Mipa lamah pawh hian kan chak ngei ngei ang.

Mipa tih takah, an viak ṭha bawk a, hmeichhe ho inkhei ai ngawt chuan, a hmuhnawm narawh e.

"U Dindini vangin kan chak",

"Hnek i duh mi?", Hmangaiha chu ka kut hum ruhin ka tin uaih. A nui huah huah a, nakinah, Remruata a la thlak ang. A inkhel ka hmu châk ve mai mai.

"I hubby saw, vawikhat tal chu a lamah sawn i mit lên ve teh, a en char char che nia, a khawngaihthlak lutuk", Hruaiin a ti nang nang.

Ka lu ka thing nawk nawk, en chu sawi loh, ka induh khum ngar ngar dawn. "Saw, a lo hawi leh nia, tunah khan han hawi thut teh, a lawm ngawt ang", Hruaii chu a phun sar sar.

Ka hawi dawn lo reng reng hi a ni ringawt, "I va luhlul tak", Hruaii chuan a ti hlak a, ka nuih sak ringawt.

"Lalchb, ṭang rawh, ṭang rawh", tiin, a au zui tuar tuar. A ṭhut aṭang a tho a, hmalanah dingin a zuar tawr tawr a, a au tuar tuar mai bawk. A rawl a ring ṭha si, kan class ho chu an au nasa ngang mai.

Kimkimi pawh, thlan tla phungin a zuang a, ṭan a nâ a ni e. Ka tho chhuak ve lem lo a, ka insiam ṭha mawlh mawlh. Uniform nen ka inkhel tawp a, kekawrbul ka hak thuah a, a tihzia tak tak a ni.

Midang erawh chuan, teacher-te sawi angin inthlakna tur an keng a, ka tel ve ka rin loh avangin ka keng duh lo kha a ni a. Hmangaiha vang vek.

Keipawh chu ka ṭang tawh lutuk, ka ṭhutna aṭang ka au ve tuar tuar. Chban a hlap lai te chuan, ka lo au nghek. "Lo kal rawh", Hruaiin min lo hui a, an bulah ka va ding ve.

Science ho ai pawhin kan au ring zawk. A tawpa tawpah kan chak ta, Science ho mai mai, an chut man an hmu chiang khawp.

Kan class mipa ho chu kan class awmna lamah an lo tlan khawm a, Hmangaiha pawh a thlan nasa mai. Hruaiin rawmawl a pe a, "Eeee", kan lo ti dual.

Chutia kan nuih ho dar dar laiin, teacher-te ṭhutna, Hostel kawt chu ka va hawiphei a. Ka pu leh Vice Principal chu inbiain an nui dun hak hak. Ka pu a lo hawi chuan ka hawisawn leh daih, phakar min ti ngawt ang.

"Group-ah, Science ho kan rel hrep dawn nia", Hmangaihan a tih chuan, "Eng group?", Hruaii leh Zami te nen kan ti rual ṭhawt.

"Ni tak, group-ah in la awm ve lo tak e", Hmangaiha chuan a ti a. Baby-in pen a keng hlauh a, a kutphahah kan pathum number a ziak a. Hruaii leh Zami te nen pawh chuan, number kan han inpe ve leh.

Ka inbual fai a, bathroom aṭanga ka chhuak chu, khumah ka let der. Ka chau tih piah lam a ni, rin loh deuhin ka tha ka hmang nasaa, ka sil nasa teh ang chu. Naktuk, inrinni a ni hlauh a, a mut rei theih dawn a, a ṭha phian.

*third year-i vang chauhin kan chak a, a lawmawm tak tak a ni*

*sir sawmtea future wifey a ni miau alawm*

*a hubby-in timualpho lo turin a lo auh lawm lawm kha*

*mark tihṭhat kha a ngai miau a*

Group message ho chu ka chhiar thla den den a, keimahin ka nui vak vak. Ka pa tv en lai pawh ka hre chang tawh lo.

Sofa chungah ka bawk a, ka nu te erawh BK ho, tu leh fa ṭawngṭai zan a ni a. Vawiin lama an kal chhuah report-te an pe leh hrep ang a. Chau deuhin a lo haw dawn a nih kha.

"Bawihte, thingpui han chhuang lawk teh", ka pa'n a tih chuanṭ choka lamah ka phei a. Ka ṭawng ve miah loa, an thusawi ho ka nuihpui char char.

Hruaii leh Zami te nen pawh number kan in save tawn tawh a, status an up tam mai zia chu, ka view seng lo a, a laihawlah ka tawp san daih. Broke video hlir la ni zui.

Nga-ki ka biaa, kan inbiak lohna a rei lo nachungin min ngaihzia hlir a sawi. Ka inthlahrung zawk, ṭhian inngaih dan angin min ngai loah ka ngai tlat pek! A dik ngei pawh ka ring.

Chhuanlam siamin, kan inbiakna ka titawp a. Ka pa hotspot off tirin, ka mu daih. Ka chau ve bawk a niang, ka meng thei lo nghal, ka mit a inkharpui hmak.

Ka harh leh meuh chuan, khua a var tawh ropui. Lukham hnuai dap rak rakin, phone-ah dar zat ka en a, dar sawm.

Ka ṭhu chhuak hlawl, "Ka va han mu rei em em", ka ti chhuak tawp. Room aṭang ka chhuak a, ka nu leh pa ka hmu mai lo.

Ka ko vak a, pawn lam aṭang min lo chhang. Pawnah an lo ṭhu a, "I tho ve thei maw?",

"Ngati nge min kaihthawh loh?", ka lo zawt let zawk. "Nimin lamah i inkhel chau sia kan ti, lo ṭhu ve teh", ka pa chuan a ti a.

Ka ṭhu ve mai bawk, "Chaw te va ei phawt rawh", ka nuin a tih chuan, ka rilṭam loh thuin ka lo chhang. Chaw ei châkna pawh ka nei lo.

"I pu David-a a lo kal a, Sawmtea nen in inngaizawng ni maw?", thutak fein ka pain a ti a. Ka meng phar kâwk. "Tu Sawmtea?", bah nawkin ks ti a.

"In sir Sawmtea", ka nuin a lo ti hlak a. Ka nui hak ringawt, "A awihawm lo em mai a, dawt a nih kha a sawi", ka ti nuah nuah. Mshse, ka tlanchhia tih chu an hre tho ang.

Pu David-a pawh chu, nge maw a lo sawi thawt thawt le aw. "Bawihte, ṭhen mai rawh, zirtirtu nena inngaihzawn chu a ṭha lo em mai. Chubakah, in kum a inthlau lulai bawk em mai", ka pa chuan a ti chharh chharh.

Ka hnual rawih nghal thei, inngaizawng tak tak ta ila, an phal dawn lo nasa tihna a nia. "Pa, fiamthu mai mai a nih kha, kan inngaizawng lo nasa em mai", ka ti nuah nuah.

Kan inngaizawng lo reng bawk a, thudik chu ka sawi ve tlat a ni. "Sawmtea chu fel viau mah se, makpa atan chuan ka duh lo, bialpa tur atan pawhin ka duh lo", ka nu chuan a ti leh kharh kharh.

"Ngati maw?", ka ti chuai raih tawh. Dik tak chuan, ka rilru a lo nâ. Keiin, min lo pan hun ka nghak ve em em a, ka nu leh pain an duh loh thu leh, ngaizawng lo turin min ti mauh mai sia.

"Aa, ka duh lo a ni tawp mai ni", ka nu chuan a ti hmak. No chance a ni ringawt, A rukin boruak ka hip let kâwk kâwk.

"Ruah hi a sur hnai leh em ni aw, khua a dur khup mai sia", Van lam hawiin ka pa chuan a ti a. Ka nui lui sak sak, khaw dur leh ka hmel dur chu hmuh hmaih theih a ni hauh lo ang.

Mahse, hmel dur te chu a la hliahkhuh theih tal a, a la zia zawk alawm. "Inchhungah lut ang u, kan huh vek mai ang", ding hluaiin ka ti a.

Inchhungah ka lut nghal zat, ka hnungah min lo zui lut ve a. Kei erawh, choka panin chawbel ka hawng rak rak.

Chawhmeh ka chhuang leh te tea, ka rilru nâ bengdai tumin, chaw ka bar lui nghek nghek. Awmzia awm lo teh e, ka helh awl awl!

"I u te ho, recharge tir mai teh, phone i khawih duh tho sia", ka nuin a ti lang lang. A inthlahrunawm zawk e ah, "A ho mai mai, i hmang tak tak chuang lo, a uiawm zawk", ka ti lui ve ngat a.

Ka hmansak hem hem tho, nikhatah 50% pawh an hmang ngai lo. Recharge loin ka hmansak char char zawk dawn.

School kal pawhin, wifey tih lam a ri lutuk tawh lo a. Khami aṭang khan, ni li lai chu a liam ve leh reng tawh a. Mahse, ka mutthluk pawhin ka puin min hau tawh lo a, min en loa, min be ngai tawh lo bawk.

Ka ngaihbel vang nge phei chu ka hre lo, class-a ka inhlei lai min hmuh fuh pawhin min hau loa, min kalpel mai mai tawh. A nuam lo ka ti letling zawk hial, ka nu leh pain, kan inngaizawng tak takah ngaiin an lo hau nge mawni te ka ti tawh.

Chutianga an tih ka ring chiah si lo, a chhan chu, pu David-a pawhin fiamthu a ni tih a hrilh nghal vek dawn tho a. Chutih laiin, Nga-ki lahin beiseina a tisang ve sauh sauh bawk.

Ka rilru ka hrilh chian tawh pawhin, a tawp duh bawk si lo. "Aw le", tia chhan ka duh loh avangin, ka hnial ve ṭang ṭang.

Nga-ki vangin ka rilru a buai leh tawh zawk. Mahse, ka ṭhian a nihna chuan min hneh zawk a, ṭha takin ka dawngsawng thei mai mai zawk a ni.

"Dindin, Dindin?", Hruaiin min sâwi dat dat a. Bangbo deuhin ka en hû, "I ṭha em?", a lo ti zawi sap a. Ka lo bu zeuh. Ka ngaihtuahna ka kal thui tir mah mah a ni.

"Hmangaiha nen engtikah nge in nih dawn?",

"Ka hre lo, aa, sawi tawh lo ang u", Hruaiin a ti nang nang. "Ka tihpui ang che, i duh em?", ka ti leh a. Nui hakin, a lu a thing nar nar.

"Amah zawk hian, min duh loin ka hria, mi polite tak a nia, chumi vang chuan min duh ve maw ka ti ringawt a", Hruaii chusn a ti leh nang nang.

"Aww, chu chu ka zawt reng dawn alawm", ka ti leh a. Zawt lo turin min ti. Ka zawh sak tho tho ang.

"Guys, Lianzuala hi motivate a ngai a nia, nizanah hnawl a ni", kut beng hlakin, Hmangaiha chuan ding chhuak meuhin a ti a. "E he! Chu nu chu tu nge, ka thin a va rim ve", Chba chu a inhrosa thur thur nghal.

Kan lo nuih hak hak a, "Heng, ka unau tu emaw ber chunga, thil tisualtu chu hrem lohin an chhuak lo ang", a kut pahnih pharin Chba chuan a ti a.

Ka lo nuih kur kur, hepa harh ṭhat dan hi aw, "Baby pasal nih tum kha chu, lo ngawi se", Kimkimin a ti a. "Puan ṭhuitu leh designer inanna pawh hre lo kha, lo ngawi ngam se", Chban a lo ti ve leh.

Kan lo nuih vak vak ringawt. Kan inngam tawk hlawm maw. "An sawi Pialralah khian, kan tan hmun a awm tawh lo", Hmangaihan bul a ṭan leh.

Kan zai leh dual dual, kan inlungrualna hi ka duh, kan inhnial fiam ngamin, kan infiam dan lah inhuat tawn kan hmang bawk si lo.

Rilru tinâ thei tur angin kan infiam ngai lo bawk a, chu zawng ai chuan, kan inhnêm tawna, kan inlungrual hi a ni.

"U, byee", Vanropuia chu ka vai lauh lauh a. An inah school ka khan ka awm ṭhin a, ka patea fapa ni mah se, ka pa zawk hi a chhun ka ti, ka pa hlimthla ṭhenkhat ka hmu thei.

Waiting shed-a ka mi hmuh avang chuan ka nui tawp riai riai. Kal pelh mai ka tum a, "Lalte", tiin, min lo ko. Min koh dan chuh, ka duh lo kher mai.

"Eng nge i duh?", inherin ka ti hmuk a. Min lo nuih sak. "Ka be lawk duh che", a ti zawi sap a. A dinnaah chuan kalin, a hmaah tak chuan ka ding a.

"Eng nge?", ka ti ram hmak. Tunah tak hi chuan, biak ka châk zek zawk lo. Ka hmaa a din theih danah hian, a la haw lo tihna a ni phawt a, ka pu chenna a hre dawn tih chu chiang sa, a lo zin tawh tlat a.

"Sawmtea bulah eng nge i sawi?", a tih chuan, ka nui hak. Inbe ngai lo chuan, eng thu nge maw sawi se min tih le.

"Engmsh ka sawi lo, kan inbe tawh ngai lo bawk", ka ti a. A hmaah mualpho taka siamin ka awm a, engah nge ka tlawm ang. Kei aia upa daih mah nise, ka tlawm dawn lo hrim hrim.

"Chu chiah chu mi i hriat duh? A nih chuan, kan inbe tawh ngai lo tih ka sawi leh e. Ka kalsan ang che", tiin, ka inher a.

"Kar chuang fe chu kan inbe tawh lo", a tih chuan, ka kal lai ka tawp chawt. "A ben zan che aṭang khan kan inbe tawh lo", a tih leh chuan, ka insehruh ṭeuh ringawt.

A ben zan che han tih kher. Muangchangin ka inher a, "Eng nge i duh?", ka ti hlak.

"I hmaah mualpho takin min siam leh se tih em ni?",

"I tidik, a mualpho thei ang bera siam leh tur chein ka duh. Nangmah vangin min hlat a, amah vang liau liauin ka engkim ka kalsan a, ka lo pan vang vang asin", ṭah âw ṭuau chungin a ti a. Ka ner sawk.

Keimah aiin a mualpho zawk a nih hi, "I phutawk chiah", ka ti ve khauh. "Eng maw?", a lo ti a.

"Bul ṭan ṭha leh turin i lo pan a, a ngaihdam che avang khan a hmangaih thar chein a lo pawm leh che i ring em ni? I nâtna chauh i hmu a nih kha, ka pu hi ngun deuhin en rawh, nâtna tam tak i pe chung pawha a la ngaihsak zia che hi.

A hmangaihna vang che hian, tun thlengin a la tuar asin. Hmalam pan thei loin i siam a, vawi engzah nge a indawmkuna i rin? Vawi engzah nge, a hmangaih luat vang chea a ṭah tawh pawh i hria em ni? ", ka ti a.

Ka thaw kâwk kâwk, amah chauh a inngaihtuah tih ka lo hre lo reng reng. "I chhungkua kalsani i lo pan a, thil ṭha tiah i inngai mai thei. Fahrah i siam tih i hria em? I hma chauh i sial a, nangmah vsng hian mi engzat nge mualphoa, ṭap?", ka ti leh tawn tawn.

"Ka duh vsng a ni hleinem, ka inchhir bawk asin. Bul ṭan ṭhat leh chu a pawi em ni?",

"A pawi ka tih thu ka sawi lo, mahni hmasial tak a ni. Chu chauh chu ka sawi ang, ka sawi chhan pawh i hre vek. Ngaihtuah ve tawh mai rawh", ka ti a. Christina chuan a mittui a hru tawk tawk.

Kei ai pawhin a ṭahbelh, "Sawmtea hian a hmangaih theih che i ring em ni? Ṭhalai i nihna angin i ṭhatna chauh chên duh ta se", nui lui saka a tih chuan, ka nui chhuak hawk.

"Vawi tam tak, a thinlung hliam sak lo ni tawh chuan, ka ṭhatna chauh hi a chên duh ka ring hauh lo. A dam lehna tur hmangaihna zawng a ni a, keiin chu chu lo pe ta ila, ka pe thei bawk", ka ti ve chharh chharh a.

Ka ṭawngtheih ngaiin ka la ṭawngthei reng tih ka inhre chhuak. "A nih, in inngaihzawnnaah hian in chhungten an pawm che u i ring em ni? Pafa chiah chiah in nih hi", Christina chu a nui lui leh sak.

Ka khawngaih tawh zawk, a bulah va kal hnaiin, "Oh, a ni maw, i sawi a ka hre chiah, pafa chish chiah kan nih pawh ka lo hre ve hleinem. Takah, Kan inngaihzawnnaah hian min pawm vek, ka pu pawh hian min ring alawm.

A chhan chu maw, kei chuan a chhungte ka timualpho ve lo a, tin; ka pu nen kan inhmuhthiam loh lai pawhin, a ṭhian ṭha sex ka hmanpui ve lo", ka phun sar sar.

Min nam dawrh a, ka nui sun sun. A tlawm duh loh man a nih kha, nge maw thu lawilo pui pui a sawi vei.

"Naupang tê tê si, zak thei lo lutuk", min vin ṭhawt a. Ka nihna a nia, ka pawisa teuh lo.

"Ka kal hmain hei ka sawi leh ang, thawnthu leh film-ah te chuan changtunu nunnêm leh hawihhawm takin hnehna an chang ṭhin a, mahse; he thawnthuah hi chuan kei, misualnu leh, zahna nei lo, kawlhrawng tak hian hnehna ka chang dawn. A chhan i hre duh em, hei hi ka thawnthu a ni tlat", nui sakin ka ti a.

Inherin ka kal nul nul, ka hawi let tawh lo. Hawi let pawh a ṭul tawh lo, inhmuhchhuah nan lo hmang ve tawh rawh se.

A sawi hmangah kha chuan, ka puin a be tawh lo tihna a ni phawt a. An inhmu lo a, an inchulnel lo tihna a ni bawk a, a nih chuan, ka pu a lo kir thei tawh tihna a ni msi ang em?

Sir Sawmtea pov...
"Eng lo, ka lo kal hi pawi i ti em?",

"Ti lo e, lo ṭhu rawh", nuih sukin ka ti a. Ṭhutthlengah a ṭhu thla nghal a, damdawi in aṭang a chhuak tawh tih hre tho mah ila, hetianga a hmel a dân(dâng) ka ring miah lo.

"Ka message i chhang duh lo a, call i chhang duh bawk si lo, ka lo kal tawp", a ti nang nang a. Ka kun ngaih, ka en duh lo, a hmel ka hmuh ringawt pawhin ka nâ ngawih ngawih zel tawh.

"Ka sawi kha, ṭul fe loah chuan min lo biak ka duh tawh lo. Hma lam pan tumin ṭan ka la mek a, min hriatsak turin ka hrilh bawk che kha", ka ti a.

Kum tam ka lo hmangaih tawh a nih avang ngawtin, ka pawm leh tur tihna a ni tawh lo. Ser min hnutchhiah nasa tawh lutuk.

"Mimi tet laia kan awm ang khan awm leh ang, tunah chuan ka let tawh miah lo ang, khatih lai pawh khan, nangman min let tir miah lo la chu, tunah te hian hlim deuhin kan awm tawh ang", min lo panin, ka hmai a chul kual riak riak a.

"I hriat kha, kei ai nasain Mawitea khan a hmangaih che", a kut manin ka ti a. A kut a la sawn a, "Sawmte, tun chiah min ring leh rawh",

"Ka thutlukna chu ka hrilh tawh che, tunah chuan kal tawh rawh. Nun thar neih ka duh a, hmangaihna thar ka duh ve tawh", ka ti a.

A insut faih faih, "Mahse, ka hmangaih che", a ti zawi sap a. "Min hmangaih ti chung siin, ser dam thei lo min siam sak a nih kha", ka ti a. Ka kut ka hum ruh sauh.

Ka sawi duh lo ka sawi a, ka ngaihtuahna chu ka duh lo takzet bawk.

Thaw chhuak hawkin, "Kal tawh rawh", kawngkhar thlengin ka kai a. Tunah chuan, tawk tawh rawh se, ka kham tawh lutuk.

Kawngka kharin ka kalh hmak a, chuti chungin kawngka hmaah ka la ding reng. Ka mittui a hnâm sawk a, ka ngaihtuah chhuah apiangin, patling pui pawh ka ṭap lo thei lo ṭhin lo.

Inphatsannaah pawh, inphatsanna nâ ber a ni. Ka ngaihtuah tlem luatah ka tih duh ngai hauh lo ka tih phah nasa.

Ngaihzawng ka neih reng rengin, an hmuia fawh bak ka ti ngai lo a, an kawr leh kekawr chhung zen phei chu ka ti ngai lo, ka duh lo bur.

Chu aia ka duh lo ber chu, hmeichhe kutthlak, ka farnu te takngial pawh kut ka thlsk ngai lo a. Laltei erawh, ka harhfim loh luatah kut ka thlak phah.

Tun thlengin ngaihdam ka la dil lo tih ka hria, ks dil ngam lo a ni zawk mah. Min pui turin ka duh a, thu min pe se, Christina theihnghilh turin min pui se tih kha ka duh ber a ni.

Mahse, keimaha ti turin min kalsan a, ngaihzawng min la neihsan zui. Ka nui chhuak hawk a, "I la hre khawp ang", ti supin, inthlak turin room lam ka pan a.

Computer hmaa ṭhua Zumba a khelh lai a lo lang uar uar, khum chunga ka ṭhut lai chuan kan chet dan a lo lang uar uar bawk a.

Mi mak tak a ni, min tizauthau tel tlat lehnghal. Ka lu ka thing nar nar a, "Sir Sawmtea wifey", a tih laia, ka insum nasat dan kha hria se chu, min khawngaih ngei ngei ang.

Classroom ka chhuahsan ve leha ka nuih nasat dan kha, ka hauh avangin khatiang khan min ṭawngkhum tih ka hria.

Ka wifey ni thei dawn lo mah se, chhungril erawh a hlim veng veng tho.


Show post links
Top

[Ngaia]

Keima Pu: Sir Sawmtea
Chapter-20
Ziaktu: Cck Lalchhuanawmi

Ka wifey ni thei dawn lo mah se, chhungril erawh a hlim veng veng tho.

"U, ka lo kal dawn a nia",

"Duati",

"Khatah Christina a awm tih hre chungin, ka awm hle hle thei hleinem", a lo ti hlawih hlawih. "I ngaih angin engmah a awm lo, Mawitea pawh a lo thleng tawh alawm", ka tih pawhin, ka thusawi a ngaithla duh lo.

A tawpah, ka hmin thei ta hram. Phone ka dah a, ka ei rawngbawl ka chhunzawm leh.

Wallpaper ka thlak tawh a, Christ-i nena kan thlalak dun leh, a thlalak ho pawh ka paih vek tawh. A number erawh ka paih lo a, biak chhan tur ka nei tawh chuang hleinem.

School kal turin in aṭang ka chhuak a, waiting shed ka thlen chuan ka ding leh ren rawn. Cctv ka lak thlakna a rei tawh ang huin, vuahin a la awm lo. Keimahin ka vuah leh a ngai dawn a nih hmel.

"Morning, Sir Sawmte",

"Morning, morning", nui sangin kan inchhawn hlawm a. School thlen hi chuan, khawhar pawh a zia deuh.

Class-11 room-a ka luh dawn chuan, Laltei nui hmel ka ngaihtuah rauh rauh a. Boruak hip let kâwkin ka lut.

Classroom aṭanga ka chhuah lehin, hallway-a Laltei kal nghauh nghauh ka hmu a, break a la ni bawk si lo.

Min hmuh ve leh, a meng phar awk a, a tlanchhe zui. Ka nuih hak a, class bunk ṭhat lohzia a hriat theih nan, Sir David-an la man se ṭha ang.

Office panin ka chho leh hnak hnak a, chair-a ka ṭhut thlak rualin ka ngheng nghal. Ka phone ri tleng tleng chu ka en a, Duati bawk a ni.

"U, ka nu a dam ṭha lo a, ni rei lo te tal chu lo haw lawk teh", a lo ti. "Ka nu chu, tunah eng nge a an?", ka ti chuai raih a. Dam ṭha tura ka hrilh nasat nen, huanah te khan a kal leh vak vak ang a, ruah do te khan a kal leh pek a ni chek ang.

"A ṭha, mahse, a lam a lam che. 'Kan ko haw ang aw' tih lahin min hnial ziah a. A rukin ka lo hrilh che, lo haw lawk mai rawh", a lo ti lang lang.

Ka nui hak hak, ka nu pangchang ṭhin lutuk hi chu ah, "Aw le, ka lo haw dawn nia", ka ti a. Call ka titawp.

Principal hnenah kalin, chawlh ka dil nghal a, naktuk zinga chhuaha, tlai lama lo phei lehnghal turin. Aizawl leh Lunglei te chu, chil chhak phak lek alawm le.

Class ka nei rih lo a, lunch break a la hun chiah lo nen, phone ka khawih nuap nuap ringawt. Ṭhiante titi ka ngaithla pah tho a, a changin ka zawm ve pah zeuh.

*ka farnu chungah engthil mah ti suh aw* Hlima message ka hai chhuak nawlh.

Min hrilh tlai lutuk, a thleng tur chu a thleng vek tawh a, mahse; a thleng nawn leh tawh lo ang.

Hlima mai bakah, a nu leh pa ka zah em avangin, Laltei pawh ka ngaihsak tawh lo a. A hma ang kha chu nise, a muthlu te kha, chalk-in ka vawm leh tawh ang.

*midang hmangaih i harsat tawh tih ka hria, ka farnu chutiang mi bula a awm reng ka duh lo* phone off-in, dawhkanah ka dah a. Technology sang chho zel pawh hi, lungngaihna mai a ni.

Ka ngaihsak ṭhinna te pawh, ka ṭhiana farnu a nih vang chauh a ni a, chubakah, a mize lawmawm lutuk vang hian a bula awm min tichak bawk.

Mahse, ka tum loh deuhin ka awm ta si a, amahah ka rilru pawh a cheng tial tial. Buaina lo thleng lo se chu, tunah hian engtin tak la awm zel ang maw?

"Sir Sawmte, i wifey nih tum an awm mauh mai sia, ruai kan ṭheh huk mai dawn mawni le", Sir Ruatan a tih chuan, ka nui hak hak ringawt.

"Kan fate ho hi chu, an bawn thei em", ka ti a. Zirtirtu ka nihna angin ka fa kha a ni tel ve tlat bawk a ni. Laltei aim a ropui ber.

"Sir Sawmtea wifey nih a nuam dawn bawk em a ni", Sir Ruata chuan, nui huah huahin a ti leh a. Zirtirtu dangte pawh, an lo tuihnih ve leh a, kan nui ho leh dar dar.

Laltei pawh chuan, a engti tia, "Sir Sawmtea wifey", ti reng reng nge maw a nih le? Ka hauh avanga thinrim pawh nise, khatia tih kha a ṭul lo ve em bawk a ni.

A mize ngeiawm ve tak si hi lawm, ka ngainat em em chhan. Hlima khan a sawi dik chiah, ka bula a awm reng chuan a nâ reng a ni mai. Hetia kan awm pawh hi a ṭha e.

Classroom-ah lutin, kan in lama ka haw lawk tur thu sawiin, ka period-ah Miss Sangtein a hnawhkhah tur thu ka sawi a. Laltei erawh, a ṭhu kun leh ngaih, a bunk ka hmuh avangin a inthiam lo deuh a niang.

"Thil min lo hawn", an lo ti sup sup. Ka nui suk suk a, kum tin hian min ngaina der tu te hi an awm ve zel mai a.

Zirtirtu ni lo ila chu, ka nun khawhar dan tur pawh hi ka hrethiam lo. Naupang ho bula awm hi a nuam em asin. Heng ho hi chu, naupang tih rual ni chiah tawh lo mah se, kan tan chuan naupang an la ni ve tlat bawk a ni.

Ka rilru kal ding lutuk tur ven nan, ka chhungte ka biaa, "Naktukah ka lo haw dawn", ka ti a.

Ka nuin, "A, a, a ngai lo", a ti bah nawk a. Ka nui hak hak, a lawm ber berah a ṭang tih ka hria lawm.

Dar kua a pelhah kan inbiakna kan titawp a, ka nu chu, "Ka dam nghal sawng sawng mai", te a lo ti a.

Naktuka min hmuh hunah phei chuan aw, a a dam zual chiang ngawt ang.

Bathroom aṭang phone ri tleng tleng ka hriaa, ha nawhna pet kawh vû chungin ka chhuak a. Sir Ṭana chu, "Hello, Sir, eng nge ni ta?", ka ti vat a.

A mangan thu min lo thlen, "Ka fanu dam lo kha, thisen a mamawh a, A-positive i ni tiraw? Ka lo be tawp che", thaw hluam hluam chungin a lo ti a.

Serkawn Hospital-a awm an nih avangin, jumper banin in aṭang ka chhuak thuai. Damdawi in kawtah Sir Ṭana chuan min lo nghak a.

Hb leh Bp check khawtlai tawh loin, Sir Ṭana fanu bul lawkah chuan ka mu nghal.

Rasgulla min ei tir a, ka lu a la hai deuh chhap em avangin ka la mu leh rih. Ka la tho kang thei rih lo.

"Sir Sawmte, ka lawm tak tak a ni. Zawn chawp ngai loin ka lo be tawp che a nih kha, pa tan chuan hlauhthawn hi a nâ em a ni", ka bulah ṭhuin, Sir Ṭana chuan a ti dap dap a.

"A ho lutuk, pe theia kan awm te pawh a ṭha zawk alawm le, a dam ṭha vat mai ang", meng diar diar chungin ka ti a.

Unit khat lek min laksak mah se, ka lu a la pangngai thei lo. Inenkawl ṭhat ka mamawh tih ka hre chiah.

"Ti khan, la mu deuh vang vang rih rawh", nurse pakhat hian a lo ti a. Rasgulla ka hmawm leh zeuh ṭhin bawk, a thawk ṭha lo teh e.

Nurse hnena dar zat ka zawh chuan, "Dar sawmpakhat a ri ṭep, i haw thei ṭep tawh ang", a ti dam thlup a. A ṭawng ngaihthlak a nuam si a, thawk thar a nih ngei ka ring.

Mahse, naktuk chu ka haw thei dawn mawni aw...

Dindini pov...
Insut faih faih chungin ka kal hnak hnak a, ka mittui luang zung zung pawh chu, ka hru leh tawk tawk.ṭhin.

Tunah chuan, kan inṭhianna pawh a tawp tawh. A thu awihin, ṭawiawm ka duh vang chauhin, ka nu leh pa mut fel fe hnuah, tukverh aṭang ka chhuak ru a.

A birthday pawh, ṭha takin a lawm ve thei reng si a. Thil ṭul lo tak a ni, a bialnu ka ni ngai lo ang!

Ka hmaah tak a lo ding a, car aṭanga lo chhuakin, "Dingdong, ka tihpalh", min lo panin a ti a. A tihpalh tak tak pawh ka ring lo.

"Min lo hnaih suh, tun aṭang chuan kan inṭhianna pawh hi tawp tawh rawh se", ka ti hlak. Car ke a chhuih chawrh chawrh.

Ka hriat ṭhin, kum chuang fe, innel tak leh inpawh taka ka lo biak ṭhin, Nga-ki kha a ni tawh lo. A inhrosa thur thur a, ka hlau tawh zawk.

Ka kalsawn tur chu, min man chawt a, bangah min nam betin, ka khabe a hmer vak. "Kalsawn rawh", sehchilh nawka tiin, ka tal laih laih a.

"Ka birthday-a nang ka dil che chu, eng nge i huat em em?", a ti chang fak. Ka hlau tih bak hian sawi ngaihna ka hre tawh lo. "Nga-ki, ka, ka hlau che nia", ka ti sap a.

A birthday wish tur mai mai ka ni lo a, chutiang tur atana kal pawh ka ni lo. A ṭhiante hmaah, a ngaihzawng ni turin min sawm a, amah ai chuan ka zak fe zawk.

Min thlah chawrh a, "Ka hrilh tawh che kha, nang chu ka ṭhian chauh i ni, eng rilru dang mah ka pu thei lo", ka ti chharh chharh. Zan a rei tawh a, mi veivak hmuh chu sawi loh, an mu vek tawh zawk.

Hmeichhia lehnghal, a rukin ka chhuak a, ka inchhirin ban a pel tawh. Inah lo awm hle hle ila ṭha tur.

"I ṭhianten an nghah che kha, va let rawh", ti bah nawkin, ka kalsan a. A tlanin ka tlan ni ber. Nga-ki hmelah, ramhuai ka hmu thei. A nunrawn(nunrawng) hmel lutuk.

Min lo umzui tawh lo se ka duh ber. Ka kaihza tha te chu, a khur hlawk hlawk. Min tikal ṭha thei lo. Hlauhnain min ṭham er er reng lehnghal.

In thlen thuai thuai ka chak tawh lutuk ringawt. Ka pain ka chhuak ru tur kha, min lo hmu hmanin, min vaw hrep se tih pawh ka duh tawh zawk.

Damdawi in ka tlan pel a, waiting shed ka thlen chuan dingin ka thaw huai huai. Kan in a hla tawh lo e!

"Dingdong", car a tihdin rual rualin tlan leh mai ka tum. Nga-ki lo chhuak ka hmuh chuan, inher vutin ka tlan nghal.

Min lo umin min pawm bet a, ka tal vak vak a, ka kâ a hup bet tlat bawk a. Ka hlau tawh lutuk chu, ramhuaiin min pawm betah ka ngai hmiah tawh.

Car hnung lamah min theh lut ṭhuai a, car kawngkhar hawngin chhuah leh ka tum chu ka keah a lo man a, tlawh tumin ka ke ka lo lêng vak vak.

"Nga-ki, ka haw duh ania, i awmdan hi a dik miah lo. Nangmah kha i ni tawh miah lo", tiin, ka au khum vak vak a. Ka mittui avangin ka hmu vai ruai mai bawk a, ka inhru tawk tawk.

"Keimah kha ka la ni reng alawm", mitmeng ling hlarin min en a, min nuih suk a. A nuih dan lah, a hlauhawm lutuk. Ka thin a phu dup dup a, "Ka hlau che a nia", ka ti chhuak ṭawk a.

Engahmah a ngai tawh lo, Nga-ki kha a ni tawh lo. "Tuin nge hetianga awm tura min siam i hria em? Nangmah hi i ni, ka birthday-ah hian, i duh emaw duh lo emaw ka taah ka siam dawn che", ka meng phar kâwk.

Min ṭhut bet a, tal chhuah tumin ka bei ve fat fat bawk. "Che suh", ti hlakin min beng a, ka mit ka chhing sawk.

Ka tal leh laih laih a, tunah chuan ka au chhuak tawh, "Min pui r'u", tiin, ka au vak vak a. "Bengchheng suh", ti pahin min beng leh.

Tal leh vak vakin ka au leh nghek, ka tlawm mai mai dawn bik lo. Ka chungah engthil mah a ti lo ang.

A t-shirt phelhin ka kâah a hnawh a, ka lu ka thing nawk nawk. Ka kawr a pawh ṭeh rualin ka khawng awt. "Dingdong, putar mai mai pawh i inkhawih tir duh a ni lawm ni. Putar ai chuan ka ṭha fe zawk", lo kun hniamin, ka hma zawnah a nui vur vur.

A kawchhungah ramhuai a lut, ka kut pahnih man betin, ka kekawr a phelh mual mual a, ṭap hawm hawmin tal chhuah tumin ka bei fat fat.

Mipa pawh insualpui tawh ka ni a, min hneh ngai lo bawk, tun ṭumah pawh min hneh miah lo ang.

Ka tha theitawpin ka ṭang ve bawk a, a thinrim chu min beng leh nghek zel. Ka âwm a ṭham tawn tawn a, a nui zui uar uar bawk. "A rei dawn hleinem", a ti sup a.

Thawmhnaw engmah inbel ka nei tawh lo tih ka hre thei, ka tal laih laih pawh chu ka tawp a. Ka taksa a khawih kual a, ka rilru nâ lutuk chu ka mittui a tla zawih zawih.

A ṭhian ka lo nih ve tawhna aṭang pawhin, hetiang hi ka chunga a tih ka ring ngai lo. Mahse, tunah!

"Dingdong, ka ta i nih theih dawn loh ai chuan, tu ta mah i ni dawn bik lo", min bawhin, ka beng bulah a phun sup.

Ka pu ka hre chhuak zawk, "I ṭhian mipa ring lutuk suh", a tih kha. A dik zia ka tem mek a ni. Ka rilruin ka pu ka au lawm lawm, min chhan turin lo kal hlauh se!

"Dingdong, a rei miah lo ang", a ti sup a. Ka kut a thlah dul deuh a, remchangah lain ka tal leh phut.

Ka kut chu a man bet lehnghal a, min beng leh chawrh, saruaka ka awm pawh ka pawisa lo. Ka duh ber chu, he hmun aṭanga chhuah hi.

Au chungin ka tha tawpin ka tal leh a, ka kap chhunga thil sakhat lo lut nghal hrawih avang chuan ka tawp chawt.

Ka thlarauin min chhuahsan nghalin ka hria, tifuh inti taka nui thawm chuan hremhmunah min hnuk lut nghal vawng vawng mai bawk.

"I chhungah ka ti tla lo a nia, mahse; nakinah ka la ti tla ang, nangmah leh keimah ang chiah chiah an lo chhuah theih nan", a nui zui suk a.

Ka ro vek a, ka hul vek bawk. Mittui tla tur pawh ka nei tawh lo.

Muangchangin ka ding a, ka kap bawra thisen leh tuihnâng inpawlh nuaih chu, ka zu khawih. Ka kuta kai chu ka en a, mihring ni tawh loin, thlarau pawh ka ni tawh chuang lo!

Ka thawmhnaw ṭet hnuang te chu, muangchangin ka inbel ṭhaa, ka kut bawk chu ka en leh.

"Lalte, Lalte, nangmah i ni em?", ka inher ṭual ṭual a, "Lalte", hlauthawng lutukin min lo pan nghal.

"I ṭha em? I, i, i thawmhnaw, i hmai, thisen, i chungah eng nge thleng?", ka dara sawi dat chungin a ti a.

"A nâ lutuk", ka ti chhuak thei hrâm. Mittui tla tur ka nei tawh si lo, ka mittui tal chu tla zawih zawih se, tun ai hi chuan ka zia ngei ngei ang.

"Lalte", ti supin, min kuah a. "Awww, ka naute, min ngaidam rawh, ka thiam loh vek a ni, min ngaidam rawh", nghet taka min kuahin, ka hnung a beng thek thek.

"Ka, ka, pu", ka ti a. "Aw, sawi rawh, tu nge min hrilh rawh",

"Ka au lawm lawm che a", ka ti lâwi rat.

Min kuah leh hlun a, "Min ngaidam rawh, ka thiam loh vek a ni", a âwmah min bei tir a, ka hahdam nge hahdam lo pawh ka hre lo.

Ka mumang pawh a ni mai thei asin, mangchhia, mangchhia!


Show post links
Top

[Ngaia]

lKeima Pu: Sir Sawmtea
Chapter-21
Ziaktu: Cck Lalchhuanawmi

Ka mumang pawh a ni mai thei asin, mangchhia, mangchhia!

Shower her hawin a hnuaiah ka ṭhu a, ka thawmhnaw ho chu ka hmaah a inchhawp hnuk mai bawk.

Ka taksa khawilai pawh ka ṭham tawn tawn a, ka lo ṭang tawk lo kha ka inhaw ngawih ngawih. Ka thinrim zual sauh bawk a.

Ka âwm chhung a tâwt ngut ngut. Chu zawng ai chuan, ka ṭap thei lo hi ni, ka nâtna zawng zawng ṭah chhuah vek ka duh!

Bathroom aṭang ka chhuak a, ka puin puanin min lo tuam nghal. "Mu hahdam rawh", dam diaiin a ti a. Min mutthlak tir riai riai a, mihring leh thlarau pawh ni tawh lo chu, tu nge ka nih tak?

"Lalte, i mit chhing rawh", ka biang chul heuh heuhin a ti a. Ka mit ka chhing duar duar. Thaw hlawp hlawpin ka meng phar kâwk kâwk a, rapawm lutuka Nga-ki nui ri leh ṭawng te chu, ka bengah an kiu vawng vawng.

"I ṭha nia", ka puin a lo ti nghal a, a kut nghet deuhin ka chelh vat. Ka pu kut chu ka hmer ngawt ngawt a, sawi tur tam tak ka nei, ka âng zuau zuau a, eng thu mah ka sawi chhuak thei lo.

"Hahdam tum rawh, engthil mah a thleng lo a nia", ka pu chuan a ti dam leh thlup a. A thleng tur chu a thleng vek tawh!

"Lalte, muthilh tum rawh le, mangchhia i mang a nih kha", ka mit ka chhing leh vang vang a. Ka taksa, duh tawka suasam a nih lai leh, au chhuah tuma ka tha tawp ka hman lai te chuan, min kaitho leh!

Thaw hlawp hlawp chungin ka meng kar a, inchung ka melh ngawt ngawt. Eng nga tinge ka ṭah theih loh? Ṭah ka duh, ka mittui hi luang zawih zawih sela, ka nâtna zawng zawng hi, luanral tir ka duh!

"Bawihte, i tho tawh em? School kal i ngaih kha", room kawngkhar kik dat dat chungin, ka nuin min lo ko al al a. School kal chakna pawh ka nei lo.

"Bawihte, i tho", ka pa âw ka hriat chuan ka chhing sawk. "Bawihte, i ṭha em? I dam lo em ni? Hlima nu, lo kal teh", ka chala a kut nghat vang vang chungin ka pa chuan a ti a.

Ka pa kut chu, ka dampui sawng sawngin ka hria. "Eng nge ni ta?", ka nuin a lo ti lut a. "A pang a sâ vur mai, damdawi lo la teh, hmanhmawhin", ka pain a ti leh zung zung a. Ka pa âw-ah, hlauhthawnna nasa tak ka hre thei.

Ka nuin min kaitho a, damdawi min ei tir, "Bawihte, mu leh rawh, i dam vat mai ang", ka sam chul hliau hliauin, ka nu chuan a ti a.

Engkim hrilha, min kuahin, a âwma beia ṭah hawm hawm ka chak lutuk. Mahse, ka ṭap thei bawk si lo. Ka kehchhe ngawih ngawih.

"David-a ka'n phone ang e, vawiin chu school chawl mai rawh se", ka pain a tih chuan, "Naktuk nen chawlh dilsak mai rawh", ka nuin a lo ti ve vat.

Ka nu chuan min mut ṭhat tir a, "Ruah i do awm pawh ka hre si lo, zanlaiah lah inbual i ching si, thu i awih lo lutuk a", ka nuin a ti hlak hlak.

Zanlaiah ka inbual ngai lo, ruah do nuam ti viau mah ila, ka do lohna pawh a rei tawh lutuk. Ka nuin min hauh zawm hmain ka mit ka chhing daih.

"Office kal a ngai sia aww",

"Va kal rawh, va kal rawh, damdawi a ei tawh a, a ṭha chho mai ang. Ruah a do leh a niang, thu a awih lo ve pakhat lutuk a", ka nuin a ti nang nang.

Mit chhing mah ila, ka nu leh pa te titi chu ka hre ve thei vek. Room kawngkhar inkhar thawmah, ka nu leh pa an inzui chhuak tih ka hre thei a.

Muangchangin ka meng, nizan lam ka ngaihtuah a. Nga-ki birthday party-a ka kal kha, ka tihsual lian ber a ni.

Muthilh tuma ka mit ka chhin rualin, chiang takin ka hmaah a lo lang zel a, ka harh phah leh nge nge zel.

Ka puan sin lai hlipin, ka ṭhu chhuak a, thawmhnaw ka inbel thlap tih ka hriat chuan, mak tiin ka inkual dû dû ringawt!

Ka pu khan, min haktir nge mawni dawn. Amah lo chu, midang an ni thei lo. Engtikah nge a hawn ang le? Nizanah khan a lo thleng tlai lutuk a.

Bathroom-a thawmhnaw ho chu ka hmer khawm a, polythene-ah khungin bawlhhlawm bawmah ka paih hmak. Hmuh leh ka duh tawh lo.

"I lo tho chhuak peih maw, chaw ei rawh, thu i awih lo ṭhin lutuk a, ruah do ṭhin lo turin ka hrilh ngun lutuk che", ka nuin min hmuh chuan a ti hlak hlak nghal.

Ka ngawi reng a, châk lo chung chungin chawbel ka hawng. Thlengah tlem ka dah a, chawhmeh pawh a hming chauhin ka suak chhuak.

Ei ka han tum a, ka kâ chhungah chuan a awm ve ngei, mahse; ṭhial sawm tur pawhin chakna ka nei lo a, lem tur phei chuan chakna ka nei lo lehzual. Ka thawhpui ta daih a, ka paih ringawt.

Khum chungah ka ṭhu a, ka ngaihtuah ber chu, 'engvang nge?' tih a ni. Ka chungah kher, eng nga tinge ka chungah kher a thlen bik? Nga-ki kha, engvanga khatia che nge a nih? Zawhna hlirin ka khat.

Heng zawng zawng aia ka zawhna pawimawh ber leh, chhanna dik tak ka duh ber chu, pawngsual ka ni em tih hi!

Ka taksa chauh suasam ni mah se, pawngsual ka ni ve tho em? Ka pu kha, lo thleng har se chu, min pawngsual hman ngei ngei ang.

Chhanna erawh ka hmu chuang lo, ka sual vang leh ka thuawih lo vang ti ila, tukverh aṭangin ka chhuak a ni mai a.

Ka inthuam dan lah, chutia uchuak a ni lo, chumi vang ringawta Pathianin min hrem ka ring bawk si lo. Nga-ki min hmuh dan a dik tawh lo hrim hrim.

Pathian chungah pawh ka thinrim tawh, "Nangmah aia min ṭanpui tura ka pu ka auh vang zawk em ni?", ka rilruin ka ti mawlh mawlh.

Eng nga ti nge? Engvang nge? Kei kher, midang chungah a thleng ve tho ang em? Nge ni a, ka chungah chauh a thleng bik? Zawhna ka va ngah tak, tuin nge chhanna min pe ta ang?

Ka beng ka hup a, ka benga kiu vawng vawng, rapawm lutuka nui ri hi tihbo ka duh! Puanin ka inkhuh a, a bo thei chuang lo. Au vak vak ka duh ber.

Lukhama innawrin ka au vak a, ka chhungril tâwt lutuk a thawl thei chuang lo. Nga-ki, ni lo, Lalramnghaka ka haw ngawih ngawih. Keimah nen lam ka inhuaa ka inten bawk.

Hmeichhe chak lo takah min chhuah a, nuam a ti viau nge, a hlim tawh viau mai thei sin. Nuam a tiin a hlim tawh ngawt ang. Mahse, engtikah mah a ta ka ni ngai lo ang.

"Laldintluang", au tuarin ka nuin min beng hlak a, ka phu nasa lutuk chu ka kat dawrh, "I alu kan hi, ngaihtuah ta che, khawiah nge i rilru i dah ṭhin?", ka nu chu a vin tuar a.

Gas off-in thleng silnaah thirbel ka chawi phei nghal. "I thiltih lai ngaihsak ṭhin rawh, in hi tihkan i tum em ni?", ngawi rengin ka che mial mial.

Nidang ang chu nise, ka chhang leh tawh hrim hrim, ṭawng chakna pawh ka nei lo. Ṭawng lo law law ila ka duh zawk.

School kal turin ka insiam a, chawlh hlen theih chu nise, chawlh vang vang ka chak.

Khawvel hi chawl thut se, engkim mai hi ngawi ṭhuap mai bawk se, keimah chauhin awm ila, tukverh bulah dingin boruak lo lut chu ka hip lut vang vang.

"Bawihte, i inpeih tawh em?", ka pain a tih chuan, ka lo bu zeuh. Car-ah lutin, car hnunga suasam ka nih lai, ka mitthlaah a lang leh uar uar.

"I ṭha em?", min sâwi dat chunga ka pain a tih chuan, ka phu zuk. "Aw", ka ti chhuak thei ṭawk hi a ni ber.

Ṭang ṭung chungin seat ka ngheng a, waiting shed pawh a lo lang tawh, kan tlanpelh ngei a ngai dawn.

Waiting shed thlen hma hauhin au ri nen, nui ri nen, ka bengah a kiu vawng vawng a, kan hmaah chuan Nga-ki nen kan inbakkaih lai a lang a, a chiang em em mai leh nghal. Ka thaw halh halh.

Waiting shed kan thlen chuan ka mit ka chhing a, mit chhin pawhin awmzia a awm lo. Ka mit ka chhin sek leh, ka hmu chiang tawlh tawlh hi ni ber. Ka beng ka hup ringawt.

"Bawihte, i ṭha em?", ka thaw kâwk kâwk a. Ka thinphu a rang em em mai bawk. Mangchhia, mangchhia!

"Bawihte, i ṭha em ka tih chu?", ka pa chu enin, ka bu nghauh nghauh. A thaw huai a, a hmelah erawh a ngaihngam lutuk lo tih erawh a hriat hle thung.

Kal lam hi chu, ka pa rualin ka kal thei mai a, haw lam thung hi. Engtin nge ka awm tak ang le?

"Dindin, Dindin", ka phu nasa lutuk, ka chil ka lem dâwk dâwk. "Miss-in a ko che", Hruaii chuan a ti a. "Dairy i lo keng em?", a ti a. Bu zeuhin dairy ka phawrh a, ka va hmuh.

School hian dairy a nei a, kan chawlh chhan leh, kan chawlh nî, kan chhungten ziakin signature an pe thlap bawk a. Chu chu, school kal theih hmasak berah kan hmuh ṭhin.

"I dam ṭha tawh em?", Miss Sangtei chuan a ti a. Ka bu leh zeuh. Pawn lam lan danah chuan kan dam ṭha vur a, chhungrilah erawh dam lohna hlir a ni thung.

Tumahin min hmuhpui tawh si lo, min hriatpui lo a, a nât dan tur lah kan sawi chhuak thiam lo ang chiahin, min dawnsawn sak thei dawn hek lo.

"Kan school hi, Christian Higher School an tih lai khan Zirtirtu leh zirlai inngaizawng an awm tawh asin",

"Engtin nge i hriat?",

"Ka nuin a sawi ṭhin a, Zirtirtu chu Siaha lam mi nia, hmeichhia a ni nghe nghe. Miss Kimi a tiin ka hria. Zirlai chu mipa a nia, hemi school-ah chuan hrem zin ber pawl a ni ang a ti ka nuin. Ka nu chuan, Sir David-an a hrechiang ber ang a ti nghe nghe",

"Engtin nge an awm zel?",

"Ka hre bik lo, ka nu chuan Miss Kimi chu a bang daih a, tun thlengin a chin an hre tawh lo. An awm zel dan ka hre chak lutuk",

"Keipawh", an ti sup sup a. Dawhkan bawhin ka mit ka chhing vang vang a, an thusawi ho chu ka lo ngaihthla ve kar.

Miss Kimi leh zirlai inngaizawng an tih chu, an zeldin zel a. Hruaii leh Zami pawh a phur ber berah an ṭang. "Laldin, helamah lo ṭhu ve rawh", Hruaiin min lo hui a, ka lu thingin ka inlukhuh daih.

Ka bulah an lo ṭhu khawm tuau tuau a, an zeldin ngai bawk an zeldin leh. "Dindin, i dam ṭha lo leh em ni? Damdawi kan va dil ang aw?", Hruaiin a phun sap a.

Hawi chhuakin ka lu ka thing nawk nawk. "A nih, lo ngaithla ve rawh aw", Hruaii chuan a ti leh a, ka mit ka lo khap fap ringawt.

An zeldin thui zel a, "Miss Kimi chu an hnawtchhuak a ni hrim hrim, mipa chu a hmingchhe tawp nang. Hmeichhia zawk zel hi hmingchhia kan nia", Zami chuan a ti lang lang.

Zami thusawi chu ka ngaihtuah a, Nga-ki nen kan inkar kha sawi chhuak ta ila, hmingchhe tur leh mualpho tur chu keimah.

Min sawisel nghal sup sup bawk ang a, a tuartu nih tawh mah nak laiin, a thawh hnihna atan tuartu zawk ka ni leh ang a, sêlna zawng zawng ka chang vek ang a, Nga-ki erawh, "Mipa a nia", tiin, an thup bo daih ang.

Hmeichhia nih vang ngawtin, a chhia zawng zawng kan chungah a langsar bik a. Mipa nen kan tihsual inang rengah pawh, hmeichhia kan langsar zawk ziah bawk.

"Hey, hey, i him a nia", muangchangin min dintir a, ka beng ka la hup char char. Min kalpui hnak hnak a, ka thaw mang tawh loin ka hria.

"Lalte, Lalte?", ka kut a la thlaa, "Min en teh", ka biang tawn tawnah a dawm a, muangchanga mengin, hmel thlamuanthlak lutuk tak maiin, min en chhuk run.

Ka âng zuau zuau a, "I ṭha nia", a ti zawi sup a. Min nuih suk bawk. A nui thei te chu, ka thinrim hlur. "I chungah engmah a thleng lo nia", a ti zawi leh sup a.

Ngawi rengin ka en tawp, ka pu chu zawhna tam tak zawh tur ka nei. Engtin nge, khatiang zan rei tawhah kha hmunah khan a lo kal theih?

Nga-ki kha engtin nge a tih ang? Inah engtin nge ka awm? Engtikah nge a haw? "In thleng ka lo thlah ang che", a ti a.

Ka kutah chelhin, muangchangin min kalpui. Ka kut chelh a nih avangin, kan mi tawh te chuan min en hrek hrek tih ka hre thei.

Ka kut laksawn ka tum a, a lo chelh nghet sauh. Ka thing leh sawk a, min hmer salh, "Ngawi rengin kal mai mai rawh", a ti zawi sup.

Ka chil ka lem dâwk a, ka chhung lamah ka khur der der. Ka dawih em em tawh mai pawh chu, ka inhrethiam tawh bik lo.

"Va lut rawh le, ka lo thlir ang che", a ti a. Hnial loin ka kal nal nal, kawngkhar ka hawng a, inchhunga ka luh hmain ka hawi let zeuh.

Nui sangin a kut a lo vai a, ka luhsan ta daih. Ka room-ah ka lut nghal a, ka inthlak sawk sawk.

Ka awm awl lutuk chuan ka inngaihtuah ngut ngut a, a ṭha dawn loin ka hre tawh. Ka inthlak zawh ve leh room aṭang ka chhuak a, tihtur zawngin ka che nghal char char.

"Zanin chu, Oscar-a tan Maria-i dil turin kan Palai dawn", ka pain a tih chuan, "Aww, Sawmtea lakah a beidawng tawh tihna em ni?", ka nuin a lo ti vat.

U Oscar-a leh U Maria-i te, ngati nge le? "Takah, Nghaka damdawi inah a awm. Bawihte, i hria em?", ka nuin a tih chuan, ka chil hakin ka khuh kharh kharh.

Tui banin ka in khawlh khawlh, "A birthday zan khan, mi tu emawin an sawisaa, a birthday an lawm tih pawh a nu leh pa pawhin an hre lo, car te a keng chhuak a, amah lah chu damdawi inah a let der mai sia", ka nuin a ti lang lang. Ka pu chuan, a va han sawisa nasa awm em em.

"Zinga a lo kal khan, lawm lo ang a ti mai bawk sia", ka pain a ti a. Ka rilruin ka chhui neuh neuh, ka chhui thlen thui ber pawh, ka room tukverh aṭanga ka zuang chhuak tur kha. A bak chu, ka chhui duh tawh lo.

"Bawihte, i hre lo em ni?", ka nuin a ti leh a. Ka bu nghauh nghauh. "Engtin nge i hriat loh zawk a?", ka nuin a ti leh. "Phone", ka ti hmuk. "Ni tak", ka nu chuan a ti a.

"Va kan ve a ṭha ang, a khawngaihthlak reuh em mai", ka nuin a ti nang nang. Misualpa a khawngaih thu ka nuin a sawi te chuan, a rukin ka ṭang ṭung.

Thinrimnain min tuam nghal hlup hlup a, Lalramnghaka thah chaknain ka khat, chemte ban lawka vih chawrh chawrh mai ka nâp tawh!

Tukverh bulah ka ṭhu meng rum al, a changin thâwk ka la leh halh ṭhin a. Mahni inkhawngaihnain min chenchilh reng bawk a.

Dam thlakhlelhna pawh ka nei tawh lo, ka nu leh pa ka hrilh ngam lo a, ka hrilh a nih vaih zawngin, keimah chauh thiam loh min chan tir zawk dawn tih ka hria. A chhan chu, hmeichhia ka ni zawk tlat a!

"In awm em?", ka phu nasa lutuk chu, ka ṭhutna chair chawpin ka thal ṭhuai. Ka ṭhen sak sak a, tukverh aṭang nuih insum zetin, ka puin min lo en kiau.

"I tho thei em?", a lo ti sup a. Ka melh rawm rawm ringawt. Ka mawng a nâ ngut ngut, tukverh aṭang chuan lo lutin, min kaihthawh tuma min lo tawk chu ka phu dawrh!

Keimah zawk chu ka tho thuai a, chair tung ṭhain ka ṭhu leh zat. Khatia min lo tawh khan, car chhunga thleng bawk ka hre chhuak leh.

Ka ṭhu ngawi leh reng a, ka ngaihtuah ber pawh ka hre tawh lo. Ka ngaihtuahna a nû vek, a fîm lo, fîm lo tak a ni.

Tho lawkin bathroom-ah ka lut a, shower ka herh haw a, a hnuaiah ka ding ngawi vang vsng. Ka rilruah chemte a lo lang a, tihtur nen lam a lo lang.

Ka ti duh ang em tih ka ngaihtuah leh vsng vang phawt. Ui tu ka neih ve paw'n ka inhre lo, bo vang vang pawh chu a ṭha mai thei a ni!

Ka mu meng kar a, ka puin eng eng mawni a sawi nuah nuah. Ka bengah a lut lo reng reng.

"Lalte", ka mit ka khap fap a. Min ngaihtuah tih hriat taka min ko te chu, ka haw hlur. Aukhum nghek min tichâk.

"Muthilh tum rawh", a ti dam thluam. Muthilh theih chu nise, muthilh hlen ka châk mahna laia.

Ka kut a vuan a, a chul leh heuh heuh ṭhin, a changin ka biang a lo chul. Min ngaihsakna avang pawh hian, mittui tlakna tham a ni tawh.

"Pu", ka ti zawi sap a. Ka âw chu, ka hre thei ṭawk ṭawk. "Aw, eng nge ni? Eng nge i duh, puak i duh em? Ei tur emaw in tur emaw te i duh em?", a lo ti nghal zung zung.

Ka inpuaktir dawn mawni, "Ka, ka hua che", ka ti ṭawk a. A nui chhuak hawk. "A lawmawm e, min huat thu sawi turin i lo ṭawng chhuak tal a", a ti sup.

Ka va han ngei tak, "A nâ", ka ti chhuak leh a, "Khawi lai?", a lo ti leh vat.

"Ka thinlung", a ri thei ché ché, ka pu phei chuan min hre thei miah lo ang. "Ka hria lawm, keima thiam loh vek a ni", a ti a. Mit chhing sawkin, ka meng leh.

A thiam loh thu sawiin, ngaihdam min dil mawlh mawlh a. Ka ngawi reng tawh. Ngaihdam mim dil ngawt chhan hi ka hrethiam lo zawk.

"I muthilh hma chu ka haw dawn lo nia, chuvang chuan, i duh chen chen meng rawh", a ti nuah nuah. Muhil tura min duhzia tih ka hre vek.

A duh hun hunah a haw thei alawm. Meng reng chung pawhin ka phu leh zuk ṭhin a, "Lalte", ka puin min ko vat zel bawk. Eng nga tinge, ka chungah a thlen bik le?

Nilengin chetna tur hlir ka zawng a, school chawlh a ni bawk a, awm hle hle ka tum lo bur. Ka pu pawh kan inah a awm reng. Min veng ka ti mai, ka chetsualna tur lakah min veng hi a ni deuh ber.

"Lalte, i hah tawh ang, chawl tawh rawh", a lo ti a. Ka lu thingin, ka che sek tho. Tunah chuan, hahdam tih hi ka hmelma a ni rih. Hahdam ka tum poh leh, ka hahdam lo telh telh zawk.

Inkhawm turin an chhuak a, ka room-ah ka inkhung hmak. Inkhawm ka chak zawk zawk lo. Engvang nge, ka inzawt mawlh mawlh.

"Lalte, Lalte, lo hawng teh", ka che chang lo a, ka room kawngkhar ka en mawl tawp. "Lalte, lo hawng teh", a chum vak vak. Inkhawm a tum lo nge mawni.

"Lo hawng teh ka ti, ka tihchhiat hma hian", a rawn ti leh. Khum aṭang thoin ka va hawng a. Min kuah nghal thlawp.

"Ka va lawm tak, vawikhatmah khatiang khan awm tawh suh ang che", hlauthawng tak hian a ti chharh chharh a. Min kuah nghet sauh sauh.

"Ei chak te i nei em?", ka lu ka thing nar nar. Khum bulah chair hungin a ṭhu a, ka kut a chelh reng. A ngawi ve reng a, engmah a sawi chuang lo.

Min fuihna thu pawh, beidawng lo tur takngial pawhin min ti lo reng reng, ka phut sang ve deuh a ni mahna.

"Lalte", ka kut a vawn chu, a chul heuh heuh. A khat tawkin ka phu zuk zuk reng a, a va han hrehawm tak.

Ka nu leh pa hriat hlau takin, zan lamah pawh a lo kal leh a, ka nu leh pa an awm chuan, room-ah a lo lut thei lo tlat a ni.

Kha zan aṭang khan, kar khat chuang a liam tawh a, chuti chungin ka la pangngai thei lo. Inah leh school-ah ngawi rengin ka awm a.

Ka phu zuk zuk reng mai bawk. Pangngai taka awm ka la thei lo, ka rilru lah a mang telh telh emaw tih mai tur a ni.

Chemte leh hruihrual a inlan chhawk zut reng a, ka puin min veng hneh lutuk a, tun thlengin ka la awm ve ché ché chu ni mai.

Darthlalangah ka inen a, keimah ni loin midang daih hmel ka hmu! "Tu nge i nih?", ka ti chhuak sap a.

Inrintawkna pawh nei lo, dawih hmel tak, mitmeng zâm tak, ṭanpui ngai ngawih ngawih, beidawnga thi lo chauh, keimah ngei chu ka ni bawk si!

Tukverhah ka zuang chhuak leh a, waiting shed panin ka kal hnak hnak. Hlauthawnga au ri leh rapawm lutuk nui ri te chuan min lo hmuakin, ka thlen hma hauhin min tibuai tawh.

Vawilehkhatah, tu emaw hian min pawt her lâwp a, kan inmelh chiang teh e, "Khawia kal nge i tum?", sehchilh nawkin a ti a. A thinrim hle bawk.

"Eng vsnga hetia inthuam nge i nih?", a ti ram hmak. "Min lo zui teh", ti hlakin, min pawt kal dawr dawr a.

Ṭang ṭungin, a kut ka thing thla sawk, "Kalbo rawh", ka ti a. Ka ngawih vang vang hnua ka ṭawng chhuah chhun.

Inherin ka kal leh nal nal, ka beng ka hup a, he hmun hi kal tlang harsa ka la ti reng. "I va han luhlul tak", ti pahin min kuah a.

"Khawia kal nge i tum ka tih chu?", a ti ram leh hmuk. "Ka, ka duh duhnaah", ka ti ve tlat bawk. Ka hawi chhuak a, waiting shed pawh ka thleng lo chu, ka nuih te lam a za.

"Tun ang zan laiah khawia kal maw i tum?", a ti leh. Ka kun ngaih, ka dar a hmer salh salh a, kalna tur pawh ka hre lo. Khawia kal nge ka tum?

"Lalte, min chhang rawh, khawia kal nge i tum?", min sawi nawk nawk. "Intihlim turin ka kal dawn, a ṭha em, i hlim tawh em?", ka ti tawn tawn.

Min thlah a, "A ṭha lawm, intihlim ila", ti supin, min lo fawp nghal bawrh bawrh. Ka tal laih laih, min thlah a, "Engthil nge i tih hi?", a âwmah ka chum vak vak.

"Intihlim tura kal i tum ni lo mi, keipawhin intihhlim te chu ka duh ve tho lawm, kan pahnihin kan intihlim dawn a nih hi", a ti hlak.

Ka chil ka lem khawlh a, "Khatiang kha intihhlim dan a ni lo", ka au khum nghek a. A nui chhuak hawk, "Kha kha, intihhlim dan dik tak a nih hi, khabak khan i va intihlim dawn chuang lo", a lo ti ve leh.

Ka hnung lamah ka tawlh a, "Lo kal rawh, kan pahnihin kan intihlim ang", ti pahin, ka kutah a man a, a lamah min pawta min fawp leh bawrh bawrh.

Ka taksa a ṭham nawk nawk bawk a, kha zan bawk kha namen loin ka hrechhuak a, khami zana let leh ang maiah ka inngai. Ka tha tawpin ka bei let ṭang ṭang.

"Eng nge a an?",

"Ka hua che", ka thaw hlawp hlawp. Hlauhna nemen loin min luahkhat nghal.

Ka ban bul retah a chelh a, "A nuam i ti em? I ti lo, a dik em? A nih chuan, engvangin nge belhchhah tura i kal? Chak taka tho leh tura i tlukna hi, tlu hlen tura i tluk nawn leh a ngai lo. Tumshin an kaitho dawn lo che, nangmah ngei ina i thawh a ngai, tumahin tlu nawn turin an ti lo che, nangmzh bawkin i tluk nawn lehna tur i siam mai a ni", ka hmui hnuai seh niah niahin ka en a.

Min thlah chawrh, "Kal rawh, intihlim tura kal i tum ni lawm ni?", a ti hlak a. Min hnungchhawn zawngin a kal nul nul.

Ka dinnaah ka ṭhu thlaa, ka bengah an lo kiu leh vawng vawng. Ka beng ka hup aka khur hlawk hlawk mai bawk.

Rilru fîm put tumin, boruak ka hip let kâwk kâwk a. Ka pu khan a sawi dik chiah, keimah ngeiin ka beia, ka hnsh ngei a ngai a ni.

Musngchsngin ka ding a, ka hmalamah chusn pen khat zelin ka pen chhak chhak. Khur hlawk hlawk chungin waiting shed ka thleng a, a laiah ka ding tawh.

Ka mit ka chhing sawk sawk a, ka ṭhen sak sak mai bawk. Boruak kham lo niawm takin ka thaw hlawp hlawp a.

Chuti chungin ka ke pen ka chawl lo. Ka pen ka pen a, a tawpah ka kal pel thei ta. Ka nui sak.

Ka inher a, a ngai te bawkin waiting shed chu ka kal pel leh. Chutiang chuan vawi eng emaw zah ka kal a, hlauhna, ri bengchheng tak tak te chuan min la kalsan lo mah se, ka kal tlang thei tawh.

A tawp nan tiin, vawikhat ka kal leh a, ka let leh lamah pawh, ṭha takin ka kalpel thei tawh.

Keimsh ngeiin ka beia, keimah ka nih avangin engtikah emaw ka la hneh ngei ngei ang.

Ka beng hupin ka ṭhu thlaa, min lo kuah khawm tu chu, tu nge a nih ka hre chisng lutuk. Min lo thlir reng tihna nge mawni?

"Pu", ka ti chhuak ṭiau a. Ka mittui pawh a tla thei tawh. "I ti thei tih ka hria lawm", ka hnung beng thek thekin a ti a. Ka mittui a sur zung zung.

"Eng tin nge i lo lan theih ka ti a?", ka ti a. Ka insut faih faih.

"Damdawi in kawt aṭang ka hmu che, Sir Ṭana nen kan inbiak laklawh avangin ka lo umzui thuai thei lo che a, ka thiam loh liau liau a ni. Khatiang kha i chungah a thleng ang tih rin ngaihna ka hriat loh vang a ni", a ti dap dap a.

A âwmah ka hmai phumin ka ṭap chhuak hawm hawm. A tawpa tawpah, ka ṭap ve thei ta lawm.

Mittui hian, ka nâtna zawng zawng hi luanralpui vek se ka duh.

"Haw ang aw", ti pahin, min pawm kâng lâwp a, a ṭhen sak. "Ee khai, i va han rit em em ve", a ti a. Min enin a la nui suk zui. Min penpui chhak chhak. Ka mittui luang pawh chu ka hru seng tawh lo.

"Ka, ka pu?",

"Min ngai a nih ka ring, min ko zing mawlh mawlh em mai", nui sun sunin a ti a. Ka thinrim dawn nge dawn lo pawh ka hre lo.

Leiah min nghat a, min hmachhawn zawngin a ding, "Aw le, i sawi duh chu sawi la, mahse; inah i haw ngei ngei a ngai",

"Ih, pawngsual ka ni em? Ka sawi awmzia chu, ka taksa ringawt khawih mah se, ka ni tho em?", beiseina sang tak nen ka zawt a.

Mahse, ka mittui kar aṭang pawhin, pawi tih hmel deuha min en chu ka hmuh hmaih lo nasa lutuk.

Ka hmai ka hup tawp, a âwmah min kuah bet a. Min chhan dan tur a hriat loh danah!

"Lalte, min ngaidam rawh, lo umzui vat tur che ka nia", ka lu ka thing nawk nawk.

***Hey, tuna tuar chhuak tura i beih ṭang ṭangna kha, a thlawn dawn lo a nia. Nghak rawh, nitin i chakzia lantir deuh deuh zawk la, inhnuaichhiah tir lo la, hnuaichhiah zawk rawh. I tuar chhuak ang a, i la tuar chhuak dawn. "Ka hneh ta", tiin, i la au chhuak ang***


Show post links
Top

[Ngaia]

Keima Pu: Cck Lalchhuanawmi
Chapter-22
Ziaktu: Cck Lalchhuanawmi

"Lalte, min ngaidam rawh, lo umzui vat tur che ka nia", ka lu ka thing nawk nawk.

School kal turin ka insiam a, kar chuang fe a liam leh tawh a, pangngai taka nun erawh har tak a la ni.

Ka puin min ngaihsak em em reng a, a rukin a ni zawk mah. Ka nu leh pain Lalramnghaka an kan ṭumin ka kal ve lo a. A chhan min zawt sek a, ka ṭhian a nih tawh loh thu bakin ka chhang ngai lo.

"A birthday lawmnaa a sawm ve loh che avangin, i la lungawi lo reng em ni? Mi kut a tuar a, i khawngaih zawk lo em ni, vawikhat tal chu va kan ve rawh, phone aṭang pawhin i be thei tho alawm", tihian, ka nuin min ti ziah bawk.

A birthday lawmnaah min sawm reng sia, ka chungah mawi lo takin a che tih hre ve ta se, ka nu hian engtin tak ti ang maw? Nge, keimah min hau zawk dawn? Mahse, hetianga an ngai pawh, ṭha ka ti zawk.

"Bawihte, ka rualin i kal dawn em?",

"Kal lo ang", tiin, ka lo chhang a. Ka pa chu a tlan liam nghal. Kar khat chhung, kan school-in Gospel Meeting kan nei dawn a, Zirtawp thleng kan nei dawn. Lang Camping angin ka ngai mah zawk.

Tiffin leh Bible chauh ken tur a ni a, pen leh notebook pawh a duh chuan a ken theih. Bible leh tiffin chauh ka keng.

Kan school chhak lawk hi, Serkawn Biak in a ni a, chutah chuan a class te tein kan ṭhu a, thusawitu tur pawh, Team an ruai a.

Ka rilru a la hel em avsngin, ka rilru ka pe tak tak lo a, attendance lak zel a nih dawn vang leh, kal lo chu pawisa chawi a ngaih dawn avangin, a hming chauhin ka kal ve ringawt.

"Zir rawh, zir rawh",

"Zir a har e", ka ti nang nang. Ka room-ah a lo kal ziah a, tukverh aṭangin a lo zuang lut nawlh zel.

"Nangmah vangin, ka tleirawl ṭha leh hi a ni ringawt", min ti ziah lehnghal. A tleirawl ṭhat leh pawh ka hre tawp si lo.

Khum chungah ṭhuin, lehkhabu a chhiar ṭhin a, kei, chair-ah ṭhuin, dawhkana lehkhabu ka bih ngut ngut zel thung. Ka lehkha zir min vil hi a ni ringawt, min vil reng tawh zawk.

"Ka pu, tun kar chu, lehkha zir ka peih lo, kar leh aṭang ni rawh se, lehkha pawh kan zir lo", ka ti nang nang. Ka thaw halh halh a, min bengkhawn pawhin a lang lo, lehkhabu a bih ngut ngut.

Dawhkana lehkhabu bawk ka bih leh a, ka rilruah a lut chuang lo. A ruak vek.

"Lalte", muangchangain ka inher a, "I hmui tikhan ti tawh suh ka tih che kha", a phun zui hlak. Ka hmui ka tisawi niah niah zual sauh a. Min melh sala ṭha nasa mai.

Ka nui zui sang a, "Awm ṭha rawh", a ti leh hlak. A ding hluai a, "Kar leh aṭang chuan, lehkha zir chauh ngaihsak ang che", dam diai hian a ti a. Ka bu nghut.

"Muttui", a ti a. Tukverh aṭang a zuang chhuak. Ka nuih zui hlak a, mi hmuh hlau deuhin a kal hnak hnak. A hawi kual rak rak reng bawk a, ralmuang lo a inti ve ṭhin ngawt ang le.

Tukverh kharin, bathroom-ah ka lut a, darthlalanga ka inen lohna chin pawh ka hre tawh lo. Ka hmai ka phih zawha chhuakin, ka inhrukhul hnuah khumah ka lawn kai nghal.

A ngai te bawkin ka inngaihtuah leh a, ka ṭhian neihchhun ka chân a, chumai ni lo, keimah ngei pawh, ka inhalral tawh!

Gospel Meeting-ah pawh, Hruaii te chu an ṭap hluam hluam a, Speaker thusawi te chu, ṭha an tihzia an sawi chamchi mai bawk.

Kei erawh, ka chunga thil thleng avangin, ka mang vek a, ka chhungril ruak lutuk hi hnawhkhah ngaihna ka hre bawk si lo.

Beisei takin, Speaker thusawi ka ngaithla ve ṭhin a, mahse; min pui thei tur a sawi chhuak ngai si lo. Eden Huan aṭang, Mosia leh Tuipui Sen kan thu.

Ka beidawng ngawih ngawih, chuti chungin ṭanpuitu tur auh ka hreh a, a rukin min ṭanpuitu tur ka zawng ruai zel mai bawk.

Ka hmuh phakah ka pu awm reng mah se, ka thin tirimtu mai a ni. Tun thlenga ngaihdam min la dil lo te, mualpho taka Christina hmaa min siam leh, ka hmuh lai renga, amah tinâ ngawih ngawihtu a pan te kha.

Min beng tur khan tihsual ka nei lo sin, a ṭhatna tur chauh ka duh a, indawmkun reng lo tura ka duh vang zawkin, ka um zawk kha a ni a. Lalmalsawma tih reng reng, laktlak pakhatmah awm lo.

Lalramnghaka nen an inang chiah, min chhan avangin lawmthu hrilh tur ka ni tih ka hria. Ngaihdam min dil hma chu, ka hrilh bik lo ang.

Tukverh bulah ka ṭhu leh a, a chunga thinrim hle siin, ka pu lo kal hun ka nghak zan tin. Gospel Meeting kar, lehkha zir loh ka sawi zan aṭang a lo lang leh tawh lo reng reng.

School-ah leh Biak inah ka hmu lo tluk a ni, ka hmu ngai miah lo zawk. Ka zawng ru deuh reng ṭhin a, ka zawn rukna lamah ka nghawng te a kham vek thei.

Zirtawpni kan thleng a, Speaker chuan ka rin ang ngeiin Sawmna a siam.

Music an tûm ri vû vú a, a damin a fawn delh delh a, thinlung hi a tuiral zawih zawih thei. Mitchhing vek turin min ti a, "I tlai hma ngei hian Isua rawn pan rawh", mic a ring ṭha si, a âw a tithum kual nen.

A hlsuhawm zawk, "Tunah hian, I Lal leh Chhandamtua Isua i pawm chuan, i ṭhutna aṭangin lo ding chhuak rawh", a tithum leh dut dut.

Kei erawh, ka tuang ka tichhah lui ngat ngat thung. Speaker âw thum leh, music fawn delh delh, "Khawvel hi bo mah se, Isua ka nei", an zaipui hlarh hlarh te chuan, ka chhungril hi an tikhurin, ka tlai inrinna leh hlauhnain min khei ve ngut ngut bawk.

Mahse, Pathian lakah ka la hel a, ka chunga thleng kha ka la hrethiam thei lo. Speaker-in, "Lalpa remruat kan tan a ṭha ber a, a remruat a nghing ngai lo. Chatuan lungpui a ni a, inphenna atana ṭha tak a ni. Kan chunga thleng te hi, Pathian remruat a ni a, kan tana ṭha tur vek a ni", a tih te chu, ka tan chuan, thinrim ngawih ngawihna a ni.

Pawngsual ka tawk kha, ka tana ṭha tur a nihna ka hre thlawt lo. Pathian remruat a nih chuan, pawngsual ber kher ang nga ti nge min tawh tir.

Eng nge tihsual ka neih, ruihhlo ka khawih lo a, nawmchenna lamah ka tlan lo bawk. Ka phak ang tawkin Pathian ka fak ve a, amah hre lo khawp khawpin Khawvel lamah ka tlan bawk si lo.

A nih chuan, pawngsual ka tawk chu, ka tan eng nge a ṭhatna? Ka ṭhian neihchhun ka chân bakah, keimah ngei pawh ka inchân phah hial zawk si a! Eng nge a ṭhatna?

Sawmna ka chhang lo a, keimah chauh hi dingchhuak lo ka ni hial mai thei. Pawi ka ti lo, tumahin ka nâtna tawrh mek hi min hriatpui tak tak lo.

Thinrim ṭeuh chungin waiting shed ka kal pel a, vuak chhiat vek mai nia ka duh. Eng nga tinge? Eng nga tinge? Tawpin tai a nei thei dawn lo.

"Bawihte, kan va inkhawm ang e aw", ka pain a tih chuan, "I inkhawm ve dawn maw?", ka lo ti hû.

"Kei chu, i pu Hminga ka va kan ang", ka pa chusn a ti a. Ka bu zeuh. Kawngka khar ṭhain ka room-ah ka awm a. Khumah ka mu zangthal duai.

Ka pu a lo kal mial mahna tiin, tukverh ka hawng a. Ka thlahlel hle chung hisn, a chunga ka thinrimna a zual ting ve mai bawk si.

Ka phone ri chu, mak ti deuhin ka la chhuak a, recharge a la ni lo a. Chutia call ka dawng chu mak ka ti lutuk.

Ka U Hlima a lo ni a, "Bawihte, ka recharge sak che a, thla thum damin aw", a lo ti.

Ka u âw ka hria chu, ka mittui a tla nghal zawih zawih. Ka hmui hupin ka ṭap khur dar dar a. Min biakna te pawh chu, ṭap ṭeuh chungin ka chhang ve zel.

"Ka ngai che a", tiin, ka ṭah chhan min zawhin ka chhang tawp. Ka ngai ve êm bawk a ni. Tunah tak phei chuan, ka bulah awm se ka ti ngawih ngawih.

"Aw le, zanin chu buai a zual deuh dawn a, phone hi ka dah phawt ang aw, lo inenkawl ṭha la",

"Umm, nangpawh, inenkawl ṭha rawh aw", ṭap ṭuau chungin ka ti a. Ṭah chhuah ka duh bawk si lo, ka âwm ka chum vak vak.

Ka chhungril tâwt ut ut pawh a zia deuh a, ka u âw ringawt pawh ka thlamuanpui a, a hmel han hmu thei ngat phei ila chu!

Ka mit a thip hlur a, ka meng ṭha thei lo zawk a ni. Ka la insut faih faih reng tho a, ka mittui a tla leh zeuh ṭhin bawk.

Phone chu la kangin data ka on a, ka on rualin ka âwmah ka nghat nghal. Message tone a ri tleng tleng a, ka hriatchian em em rawh, mi pakhat message a awm tawh dawn lo tih chu a ni.

Mimal message ka dawn nitin ṭhin chu, amah chauh kha a ni a, ka pinned nghe nghe. Message dang chu, group message vek a ni dawn a.

A tel lo chuan WhatsAap pawhin awmzia a nei dawn lo, ka khua a har dawn lutuk. Tunah pawh, a har sa tawh!

Whatsaap-ah ka lut a, ka rin ang chiah, group message vek a ni. Number ka pinned chu block-in ka delete nghal. A va han hrehawm tak, phone ka dah thla leh daih a.

Ka mittui ka hru tawk tawk, eng rilru pua khatia che nge maw a nih le? "Ka nghak thei che", ti reng chung siin, a birthday zanah!

Intipachangin whatsaap-ah ka lut leh a, a khawharthlak ngawih ngawih. Group message ho chu ka clear pawp pawp. A tawpah, ka pu message ka hmu hlawl!

*ka haw lawk a, eng nge ka lo hawn ang che* Thawhlehni daih mi a ni tawh. Gospel Meeting neih laiin, a va haw tihna ni maw.

*nangmah* ka va ti a. Tick pakhat chauh a la awm. A last seen pawh, tlai dar thum daih a ni a, a buai pawh a ni mai thei a ni.

Data off-in, phone chu lukham hnuaiah ka dah leh hmak. Ka mu ṭhaa, muhil thei tawh mah ila, zanlaia ṭhanharh zeuh ka la nei ṭhin tho. Min la kiansan tak tak lo a ni.

"Hminga chu aww, min kalsan mai ang tih a hlauhawm tawh alawm le", chaw ei laiin ka pain a ti lang lang. A dinhmun a derthawng viau tawh a nih ka ring ve hmiah.

"Cancer hi chu, a runthlak ve êm bawk a ni", ka pawh chuan a ti nsng nang. Cancer vanga boral hi kan tam tawp.

Thingpui so hun ka nghah chhungin, phone ka en a, ka pu chuan min la chhang miah lo, tick pahnih a awm ve kar tawh a, mahse; a last seen erawh, tlai lam dar thum tho a la ni.

Whatsaap-ah a lut lo hrim hrim nge mawni dawn? Group pakhata an fiamthu chuan ka mit a la nghal zat.

*Sex in hmanin, i thawmhnaw a phelhpui ang che, mahse; a hak leh lam chu i chan a ni. Chumi awmzia chu, nangmah ngeiin i beih a ngai* an nui uar uar a.

Fiamthuah ka ngai ve thei hauh lo tlat, "I thingpui bel chhuan kha", ka nu au lang langah chuan ka harh zawk.

Thingpui in zawhah, "Nu, ka tei harh lawk dawn", ka ti a. A lo phal ve teh khiah. Ka u te room pawh ka tifai vek a, chuvang pawh chu a ni mahna.

Waiting shed-ah ka ṭhu a, ka hma lam chu ka en ngawt ngawt. He hmun ṭihbaiawm tak hi, engtikah mah a bo thei dawn lo, a bo theihna awm chhun chu, ka rilru aṭang hian a ni tawh.

Keimah ngeiin, thawmhnaw pawh ka ha ṭha a, keimah ngeiin ka hneh a ngai dawn. Ka tawrh dan leh ka nât dan min hriatthiampui tu ka nei dawn lo.

A dik, keimah ngeiin ka beih a ngai dawn a ni. Eng anga harsa pawh nise, hei chen ka thleng thei alawm. Ka hneh ngei ngei ang.

"Lalte", ka hawi chhuak a. Ka puin min lo en kiau. "Ngati nge hetah i awm?", a ti a. Min lo pan ve nghal mai bawk.

Air bag a ah(ak) la thlain, ṭhutnaah a dah a. Ka bul chiahah a lo ṭhu. "I haw tih ka hre miah lo", ka ti zawi sap.

"Hre lo ang, message i chhang si lo", a ti khauh. Ka phone recharge a ngaih thu leh, recharge ka duh loh thu te chu ka sawi a. Ka uin min recharge sak lo se chu, a message pawh ka hmuh miah lo tur thu ka sawi dap dap.

A nui hak hak a, "Tun thlengin ka message min la chhang lo", ka ti ve a. "Kan inrul tawk chiah", a lo ti.

A biang velah a hmuihmul a ṭo siar siar a, rilru hahna a tawng a ni ngei ngsi ang. A va haw a, a chhungte bakah, lo thei loin mi pakhat a hmu ngei ngei dawn.

"Ka pu",

"Umm", hmalam a en ngut ngut. "Ka inhlan ve miah lo", hmalam en chungin ka ti a.

"Eng chu maw?",

"Gospel Meeting-ah khan",

"A pawi hleinem, mahni inhriatchian tluk a awm lo", a ti a. Ka thaw huai huai.

"Ka pu",

"Umm",

"Min hrilh tawh rawh", ka ti a. Min lo en, ka sawi awmzia a man nghal vek. A thaw halh a, "Thil ṭhenkhat hi chu, kan hriat ṭul lo te pawh a awm ve tho a nia", a ti dam thluam.

"Ka hre duh alawm", ka ti a. A thaw ri hrawih, "Sexual Harrasment-ah hian, pawngsual, taksa inkhawih sak leh ṭawngkam mawi loa inchhaih te a huam a. Nang chu, pawngsual leh inchhaih chu i ni lo phawt", a tih chuan ka mit ka chhing sawk.

"Ka la virgin i tihna maw?", ka ti chhuak thei ṭawk. Ka mittui a hnâm ṭiam ṭiam a, ka lawm a ni tawp. Pawngsual chu ka ni lo.

"Inneih zanah i la hre mai ang", a ti sup a. Ka melh rawm rawm, a hnungah ka chum awk a, "Fiamthuna chi a nih loh hi", ka ti ṭuau.

"Mahse, eng lo, a chhungah ka ti tla lo te a tiin ka hria",

"I ngaihtuahna a nih chuh, ka lo thlen khan a lo tipuitling hman ṭep. I chi-ai bakah, i rilru a mang vek dawn a, thil ni lo pui pui i ngaihtuah zui tihna nih chu", a ti a.

Awih tur nge awih lo tur pawh ka hrethiam lo. "Keimah ka ni tih i hria em?", ka tih chuan, a hriat loh thuin min chhang.

"Nangmah i ni tih ka hriat hnua ka that lo kha ka inchhir tawh zawk", a tih chuan, ka mit ka chhing sawk. Ka hnung a lo chul heuh heuh nghal.

"Ka chungah engmah a ti lo tak tak maw? Ka la virgin tak tak maw?", mittui parawl kuang chungin ka en a.

"Inneih zanah i la hria ang ka tih kha",

"Fiamthu ziah suh, pasal neih ka duh lo",

"Min nei duh lo maw, a van pawi", ṭhan saka a tih chuan, ka meng phar kâwk. "Eng, eng maw?", ka ti hliai a. "I hriat ang kha ni mai, mshse, pasal neih i duh si lo a, ka leng tar mai ang", thaw halhin, a ti nang nsng.

"Nupui atan min sawm tihna mi?", ka ti hluai. "A nih deuh ber chu", min lo en zeuhin, a ti hmuk. Ka nui chhuak hawk a, "Ka lo thleng chauh sia, mut hahdam ka duh", tiin, a tho a. A bag akin a kal nal nal.

Engthil nge maw a sawi nuah nuah kha, inneih zan te a ti, nupui maw? Nupui atan min sawm tihna maw? A awihawm lo lutuk chu, ka nui hak ringawt.

"Ka pu", ka um a, a kal chak phian lehnghal. In a hawn dawn lai velin ka nang hman hrâm.

In chhungah kan lut a, ka ngai hman. "Eng nge i lo tih dawn?",

"Ka lo leng dawn", ṭhutthlengah ka ṭhu thla nghal a. Inthlak turin room-ah a lut daih. Kawngka ka va hawng thut a, a phu nasa ngang mai.

Kekawr chauh a lo la ha a, t-shirt a ha dawn mek. "Chhuak rawh, mi inthlak lai laia", a ti hmuk.

Kawngka ka khar a, ṭhutthlengah ka ṭhu leh. "Va haw rawh, mut hahdam ka duh", a lo chhuah rualin a ti nghal zung zung.

"Ka thil chah che chu", ka ti a. "Eng nge min chah?", min la ti let zawk. Room-ah a lut leh a, Dairy milk chocolate, a lian chi kengin a lo chhuak.

"Kha hei, i haw thei", ka hmaa chocolate lek vâ chungin a ti a. Ka ner sawk.

"Hei hi a ni lo mi?", a ti a. A phone en turin ka lo ti. "Ka peih lo, Lalte, rei lo te ka mu lawk ang, lo va haw rih rawh", a ti a.

A ham zui bai bai, "I va chau awm êm êm", ka ti a. "Ka nu damdawi inah ka awmpui a, ka tlaivar ziah a lawm", a ti nang nang.

"Chu chu maw, i haw chhan? A dam ṭha tawh em?", ka lo ti thuai. Nu te dam ṭha lo hi chu, a manganthlak duh êm asin.

"Tunah chuan, ṭha tawh lutuk. Haw lawk rawh le, ka mu lawk ang", a ti leh a. "Kawngka lo khar ṭha mai rawh aw", ti zuiin, room-ah a lut lehnghal.

Khumah a bawk thlawp a, a muhil zui nghal ni tur a ni. A thaw ri sât sât mai.


Show post links
Top

[Ngaia]

Keima Pu: Sir Sawmtea
Chapter-23
Ziaktu: Cck Lalchhuanawmi

Kawngka ṭha takin ka khar sak a, in lam panin ka kal hnak hnak.

Tukverh bulah ṭhuin, dawhkana chocolate ka dah chu ka en vang vang a, ka kiai deuh sak nge nge zel. Chocolate ber kher inhawnsak.

"Lalte, Lalte", thaw hlawp hlawpin ka meng chhuak a, a tawpa tawpah ka harh chhuak thei hrâm. "I mangchhia a nih kha", a ti zawi sup a.

Min hru pah mawlh mawlh, mittui kar aṭang ka lo en a, "Eng, engtin nge i lo awm theih?", ka tih chuan, "Tukverh i hawng a, ka ngaihtuah che lawm", a ti a.

Tukverh lam ka hawi phei a, khar loin ka muthilhsan tih ka hre chiah. "Zan dangah chuan khar ziah tawh rawh, misual pawh an lo lut thei", a ti dap dap a.

"Nangmah ang hi maw?", ka tih chuan, a khi suk. A lu a thing nar nar a, "Changtupa min tih kha, misualah min chhuah tum reng reng suh", a nui suk suk a.

Ka thâwk pawh a pangngai tawh a, ka hlauhna pawh an bo tawh. "I ṭha tawh tiraw, ka va haw tawh ang e", din a tum chu, a kut ka lo man.

"Rei lo te, rei lo te tal la awm rawh", ngen ngawl takin ka ti a. "Aw le, mahse, rei lo te tak tak", a sana bih zeuh pahin a ti a. Ka lo nuih sak.

Ngawi rengin kan awm a, zanrei a nih avangin, zawi tein kan ṭawng emaw tih pawhin a ring ṭha thei riap riap si a. Chumi vang pawh chu a ni mahna, ka pu pawh a ngawi reng.

A hnuah, "I muthilh hnuah ka haw ang, le; muthil tum rawh",

"Engtin?",

"I mit kha chhing la", puan min sin ṭhat tir pahin a ti a. "Ka u min hrilhsak thei ang em?", ka tih chuan, a chek nghal tlawk tlawk.

"Ka chhungte pakhat talin hre ve ka ti a, u Hlima min hrilhsak rawh", ka thusawi chu, keimah ngei pawhin ka hre thei chang chang.

"Naktuk lamah kan ngaihtuah dawn nia", a ti a. Ka lo bu zeuh. Pawngsual chu ni lo mah ila, pawngsual si per ka tuar tih ka hria, ka nu leh pa ka hrilh ngam lo a, ka u te phei chu ka hrilh ngam lo.

Engtiang chiahin nge min en ang, farnu laktlak lo takah min chhuah ka ring.

Phur lo zetin inkhawm turin ka insiam a, ka nu leh pa rualin ka kal daih. Thlarau pawh nei tawh lo nafam chu, a hma angin ka rilruah a lut thei tawh lo.

"I mu nasa thei lutuk", ka lu dawmin ka bula ding chu ka en chho vah a. "Ka lu hi khuang a ni lo nia", ka ti nang nang.

"A ni ka tih loh kha", min la ti let zawk zamah. Ka hui pap ringawt. Ka pu kalsawn hnu lawkin Sunday School dar a ri a, inkhawm ban aṭanga minute thum pawh tling loah Sunday School dar a ri nghal zel.

Ka nu leh pa te, pu Hminga kanin an kal leh a, ṬKP fellowship naa kal turin ka puin min hrilh a, ka hnial avangin min lo call tlut tlut.

Ka chhang duh der lo, ka silent chuang lo a, ka ringtone te ka thlak thul. "Laldintluang", ka tv en tui lai laiin.

"Eng nge, khati teh vaka i lo au?", ka ti hlur a. "Min la vin let zawk ka ti, engvangin nge call i chhan loh, ka ngaihtuahna lamah che ka thi lo chauh tih i hria em?", bek pawng ṭawlh ṭawlh chungin a ti a.

"Min ngaihtuah tak tak maw?", nui var chungin ka ti a. A rum nghut nghut. "Ka pu, min ngaihtuah tak tak maw?", ka nuih var var a.

"Ka ngaihtuah lo che", a ti hmuk. "Min ngaihtuah avangin i thih loh chauh thu i sawi kha?", ka ti leh a. "Chutiang ka sawi lo, i mumang a nih chu", a kâwng dawmin a ti ram leh hmak.

A sawi tih ka chiang ve nasa ropui sia. A hmel a tlanchhe char char tho. "Tui in tur a awm em, ka tuihal", choka lamah a kal nghal a, fridge hawngin bottle a la chhuak a, a in khawlh khawlh nghal.

Nuih sakin tv ka ensan leh daih. En hma hmain F4 a tawp daih a, ka thinrim tak tak a ni.

"Hey",

"Hming ka nei aw", ka ti zui ve hmsk. "I kal dawn lo maw?", ka bula lo ṭhu thla pahin a ti a. Dik tak chuan, hetia kan inhnaiha kan inngam mah mah hian, min tizak tlat zel.

"Kal lo ang ka tih kha", ka ti né né. "A ṭha, zirlai la nih chhung chu, inkhawm kim loh pawh a ṭha tho", a ti siam siam.

"Ka pawm zawng tak a ni e", nui vara en chungin ka ti a. Tv a lo en a, a bu nghut. Thingpui a beisei avangin ka siam a, biscuit kan neih tawh loh avangin, chaw ṭhing a hmeh tawp.

A ei ṭeuh nghe nghe, "Kan naupan lai te chuan, kan chhun hmeh a ni ṭhin alawm", a ti nuah nuah a. Ka nuih hak hak, "Ka naupan lai i tih ve reng kha", ka lo ti a. Min melh ralh nghal.

"Nang ai chuan ka naupan lai ka ti chu, a la mawi zawk alawm", ṭalh ṭhin chuan. "Thingpui hi a sen thlum ni thei se, a ṭha hlei hlei. Mahse, a paw pawh hi a ṭha tho", a ti leh nuah nuah.

"Thingpui i inin chhang ni loin, chaw ṭhing i hmeh ṭhin tiraw?", ka ti a. Min lo en zswkin a bu nghauh nghauh. A hmaah ka ṭhu a, tui tih hmel deuhin thingpui a ri hrawih hrawih a, chaw ṭhing lah a keih hlawk hlawk.

A ei pawhin a ei lo, a keih hlawk hlawk. "Chhunah pawh nise, chaw tlang kan keng a, chaw chungah chi kan phul a, ṭhian hoin inkawm naah kan ei tuam tuam zel", nui var varin a ti a.

A hlim êm avsngin a hmel pawh a nung sâr, a naupan lai hun a sawi a, hetianga hlim deuha a thusawi hi ka la hmu ngai lo. Dawhkanah ka kiu nghatin ka biang ka dawm a, ka thir doh doh.

"Thingpui i duh leh em?",

"I siam peih chuan", a lo ti a. Thoin thingpui ka siam leh. A naupan lsi hun bawk a sawi a, chezia zawng zawng nen a sawi a. A nuihzatthlak thei si, ka lo nuih vak vak zel.

"I va han nghal tak", ka ti a. Ka pu a nui chhuak hawk hawk. "Naupan lai hun hi a duhawmin, a hlimawm êm asin", thutak fe hian a ti a. Min lo en a, ka lo nuih sun sun.

Amah avangin ka nui nasa bawk a, ka thawl hawkin ka hria. Nuih hi a lo hrisel a nih dawn hi. Mahse, ka puin a naupan lai hun a sawi khan, "Ka nu nen", vawikhatmah a ti lo. "Ka pa nen", a tih pawh kha, vawithum bak a ni lo.

A nu nen hun an hmang dun ngai lo mawni, ni tak, Sangi khan Office-a thawk a tia. Chumi vang chuan, an awm dun khat pawh a ni mai thei a ni.

Chutiang pawh nise, tlaiah te, zanah te, zingah leh chawlh apiangin an awmdun thei reng awm si a. Hun a tam tehreng nsn, a nu nen an inkar a ṭha lo zawk nge mawni le?

"Oscar-a leh Maria-i te pawh, nakum lamah an innei dawn e", chaw ei laiin, ka pa chuan a ti a. "Innei rawh se, an kum a tam ve tawh lawm", ka nuin a ti lang lang.

"Pa, an inngaizawng em ni?", ka ti a. "Ngaizawng lo e, kan va be ve tawp a nih kha", ka pain a lo ti. U Oscar-a khan a duh ve deuhin ka hria, engpawh nise, tluang takin innei thei se, hlim deuhin awm kumkhua rawh se.

Lehkha zirin, school kan kal ṭan leh tawh a, tun ṭum erawh, Top 10-a lan ka tum ve bur. Chuvang chuan, ka zir ve nasa reng bawk a.

Class-ah erawh, ka mu zeuh zeuh. Ka zir hnu tih vang hian ka ngaihsak tawk lo leh ṭhin.

"Ka pu",

"Umm",

"Kan inngaizawng em?", ka ti a. Muangchangin min lo en a, a msng rum nasa mai. "I va meng rum", hlau eih loin ka ti a. Min tihhlauh a tum chiang a ni.

"Maw, kan inngaizawng em?", ka ti leh a. A lu a lo thing nawk nawk. "I va han sual tak, vawikhat mah ka inkhawm tawh lo ang", ka kut ka thing thla sawk nghal.

Min lo chelh leh vat tho, "Ngaihzawng neih kual duah ka peih ve lo, nupui neih a ngai dawn tho a, chuvang chuan, ka nupui nih duh loh chu ka ngaizawng peih lo", ti nuah nuahin, ka kut chu a thlah a, a kal nul nul.

Ka nui hak a, ka u min hrilh kha ka hre chhuak nghal zat bawk. Tlanin a hnungah ka zuang a, "Ka tlu dawn lawm", a ti hlak. Min paw ṭha a, "I zâng lutuk, chaw ei ṭeuh ṭeuh rawh", min la ti zui.

"Chaw ka ei ṭeuh ṭeuh chuan, insawizawi ka peih bawk si lo, ka thau ang a, ka dul te a kiar dawn a, ka duh lo reng reng", ka ti nsng nang. A nui hak hak.

"Pasal i neih hunah, i duh emaw duh lo emaw, i la thau dawn tho tho",

"Aww, nangman min enkawl ṭha tihna a ni mai lawm", ka ti a. A kal lai a tawp nghal. "Eng maw i sawi kha?", thle bakin a ti a.

"Engtikah nge kan inneih dawn, exam zawh hunah nge, naktukah?",

"Naktukah", ti pahin ka mawng a ṭham a, ka ip chawih. A nui hak hak. "Pu, khatia min khawih khan, ka la hlau", ka ti a. Leiah min nghat nghal.

"Ka tihpalh lutuk, ka ti tawh miah lo ang", min kuah hlun nghal a. Ka lu-ah a hmui a nawr vang vang. Ka hahdam ta hle bawk.

Naktuk aṭang School sport kan ṭan dawn a, Chawlhni zanah ka inkhawm ve a, ka pu nen kan haw dun a. Mi haw fe tawh hnuah min haw pui ve chauh, a phakar a nia.

"Lalte, min ngaidam thei em?",

"Nichin vang khan maw, ngaihdam fel vek i ni tawh e", dingdihlipin a biang ka tawk zeuh. A nui hak a, "Va lut tawh rawh, ka lo veng ang che", ka hnar piai piai sawkin a ti a.

Ka ner sawk, "Tihian, kan inngaizawng tiraw?",

"Pasal neih i duh si lo a", ka hmui ka tisawi niah niah. "Khatin, i hmui ti tawh suh", a ti hlak. Gate hawngin min nam lut a, min pawt chhuak leh.

"Muttui", ti supin, ka hmui a rawn tawk zeuh. Nui sukin min en a, min nam lut lehnghal. "Tukverh khar tawh ang che", a ti a.

Nuih varin, in chhungah ka lut. Kawngka ka kalh nghal a, light ka off nghal zung zung. Room-ah lutin, ka hmui ka khawih né né a, ka nui var var.

Thaw halhin ka inthlak a, ha ka nawh lai pawhin ka nui var var. Ka pu nen kan inngaizawng chiang a ni. Sawi ṭha duh lo mah se, kan inngaizawng chiang alawm.

Ṭhuamluaia Mualah kan kal khawm a, a ṭan ni leh a tuk hi, mualah kan hmang ang a. A bak chu, school-ah a ni tawh ang.

Sport ṭan hma ni thum vel kha chu, lehkha pawh zir loin, Parade te kan zir ṭhap ṭhap a. Green House-ah ka awm a, Hruaii leh Zami te pawh an ni ve hlauh.

Kan House rawng ang hi, t-shirt kan nsi vek a. Green house ho chuan, nilaini leh zirtawpniah t-shirt hring, school logo inchhu kai kan ha vek a.

Chutiangin, house dangte pawhin an mahni house rawng tshirt an ha ṭhin. Kum tir aṭang min ṭhen nghal vek a, school-ah tshirt pawh kan lei.

Parade-a tel ve tur ka ni a, mahse, ka inhnukdawk leh daih, ka thiam thsih loh em avangin, ka per dik thei lo ṭhin.

Parade-in Sports bul kan ṭan a, khuallian atana kan sawm pawh hi ka hre lo e ah. Kan house aiawha chhuak apiang kan lo au phur a, kan leader-te pawh an ṭang nasa lutuk.

"Sir Sawmtea wifey a awm em?", ka ke ka per chhak. Pu David-a hriatna ṭha lutuk hi chu, ka ngei tak tak a ni.

"Nsngmah a sawina che ni maw?", nui huah huahin Zamin a lo ti. "Ni lo, ni lo", ka ti hlak hlak. "Sir Sawmtea wifey hi, eng house nge a nih ve reng reng, green maw?", kan house member ho an khêk tuar tuar a.

Ka ṭhu tûm hmak, sual thiam lutuk, "Dindin, lo kal rawh, saw an tlan ṭan a nia", Hruaiin min lo hui a, ka va kal ve leh. Tlan ho kan au vak vak a, an chak nge nge.

Football an khel dawn a, kan house leh Purple house ten bul an ṭan dawn. Fisrt half-ah tumahin, goal an la khung lo a. Kan house an che ṭha zawk bawk, house lehlam keeper a ṭhat vang mai mai a ni.

"Dindin, squash hi va pe ang u", kan leader nu chuan a ti a. Hruaii leh Zami te nen inzuiin, kan leader nu hoin field sir lamah kan kal a.

Kan leader pa pawh a thlan a tla nasa mai, ruah sur tumin a inmûng khup khup a. A ṭha, ni a sa lutuk a, ruah sur hnuaia inkhelh a ṭha zawk ang.

Chau hnawkin khumah ka mu a, kan house kan tiṭha em em vek a, football-ah pawh kan chak. Pakhatna dinhmun kan hauh loh leh, pahnihna dinhmun kan hauh ngei ngei.

Engamah tel ve lo mah ila, ka hah zawk. Ka au nasa em a ni, an chak theih nana lo auphurtu te hi kan hah thei daih zawk.

"Sir Sawmtean ka pen pek a hmang", Zamin a lo ti lang lang. A nui ṭhaw mai bawk a, a lassi lei chu min pe a, ka fawp nghal.

"I van vannei, engtikah nge ka pen pek a hman ve ang le", Hruaiin a ti nang nang. Kei kha chuan, engmah ka pe ve lo a, pawi lo tawh mai rawh se.

Football final khelh chhung zawnga ka au nasat em avangin, ka âw a chhe vek. Kan house leh Red an inkhel a, kan la chak zui, a nuam thei e.

"Third year-i vangin kan chak e, a au nasat manah", kan leader-in a ti lang lang. Ka nuih sun sun a, ani pawh a nui sun sun, a nui mawiin, a hmelṭha rsuh zek lehnghal.

"Tunah, kan sir-te ho an lo inkhel ve ang, ball boot kha lo hawh ula aw", Mam Puii mic aṭang a au lauh lauh.

Ball boot an pe sup sup a, ka pu pawh kan leader-in a pek a ball boot a bun ve. Field-ah an chhuak a, an han inkhel tak tak ale.

Ka puin a pet ṭhelh chiang lutuk, a la tawlh thlu zui. Kan nui vak vak a, ruah a sur deuh seng seng bawk a, a dam loh hrâm beisei sng.

"Sir Sawmtea kha ṭha rawh se, i wifey-in a thlir reng che nia", ka ner sawk sawk. Pu David-a bawk a ni. Ka la hau ngei ngei ang mawle.

"Aw, aw, Sir Sawmte, a dik dawn, a dik dawn, a goal dawn, tlan zel rawh, i tleng ṭep, aw, aw, a goal ta, a goaaaalll", Pu David-a a au lauh lauh a.

Keini pawh kan lo au nasa lutuk, "Sir Sawmtea chuh, Naute pet goal chhuak thei turin, khalh dan a thiam bakah a thun thiam dawn tlat", Pu David-a bawkin a ti leh.

Ka hmai hupin ka ṭhu tawp, Pu David-a sualthiam dan hi aww, "A nuam eee", an ti sup sup. Keimah zawk hian nuam ka ti zawk daih sia, a zahthlak bawk si.

Tuilum pep pep ka in a, ka âw a la dik hleithei lo, kan house kan che ṭha em em reng a, kan ṭan mar pât chuan, kan Champion thei ngei ngei ang.

Room-ah ka lut a, tukverh a lo inkik karh karh, hlau ru tak chungin ka pan hnai a, "Tu nge?", ka ti zawi sap. "Keimsh", a lo tih rual chuan ka hawng nghal.

Nui var varin ka lo en a, a lo lut, keimsh zawkin ka kuah a, "Nangmah vang hian ka sual tawlh tawlh", ka nui hak. A sualna pawh ka hre lo e ah.

"Vawiin khan, i va han che ṭha em em", ka ti a. A khi suk ringawt. "Phuba ka la nih kha", a ti hmuk a.

"Eng phuba maw?", ka lo ti vat. "I hriat ve zel ṭul lo, mipa dang thlêk ngawih ngawih lo la a ni mai", a ti a. Khumah a mu nghal zat.

"Tumah ka thlêk ngawih ngawih lo e ah, mahse, kan leader kha chu, a hmelṭha reuh, a nui mawi si", ka ti chu, khum aṭanga lo tho ṭual ṭualin, "Eng maw i sawi kha?", a ti thum dut.

Ka âng zuau a, "Ka haw dawn", tih leh, khum aṭanga thawh a rual a, tukverh lam a pan. Ka nuih hak hak a, a kawrah ka va pawt, "La haw suh, a la hma em hi, kan inbiak lohna a rei si", ka ti a.

Ka kut a thing thla, "I duh duh mipa i melh thei alawm, hmelṭha i tih apiang chu mit tla lêk loin i thlir ṭhin dawn nia", a ti nang nang a. Tukverhah a zuang chhuak nghal.

Ka nui hak hak a, a titau ve tihna mile, a thik chiang a ni. Ka phone a lo ri a, "Min lo umzui dawn lo mi?", a lo ti chu, ka nui vak vak.

"Ka lo umzui dawn che maw?", ka ti a. "Aw", a lo ti ram leh hmak. Khum chungah ṭhuin ka beng vak vak a, ṭhut pawh ka ṭhu thsi lo, chhuatah ka ṭhu thla hnawk.

A awihawmlo thei e, hmeichhia zawkina han umzui, "I lo kal dawn em?", a lo ti leh a. "Lawk aw", ka ti a. Ka nui vak vak.

Ka pum pawh a nâ vek tawh, a chet dan a naupangchhia lutuk em mai. "Ka umzui dawn lo che",

"A tawk a nih chu, mangṭha", ti hmukin, phone a off daih. Khum kotlang ka beng vak vak a, a lawmawm reuh tak tak a ni.

Ka umzui loh avangin a titau chhunzawm reng a niang, school-a min hmuh pawhin, a hawisawn hmak hmak zel. Ka vawm chak thei a nia aw.

Sports ni hnuhnung ber, Zirtawpni kan thleng a, hemi ni erawh, chawhma lamah, Chheih, solo, band leh dance-te hmanga inelna neih a ni a.

A tawpah, result puan a ni bawk, "Kumin School Sports-a Champion House chuuu, Green House-te an ni e", kan zuang nghal tawrh tawrh a, kan au nasa ngang bawk.

Trophy lian deuh dawng turin, kan leader-te pahnih stage-ah an chho a, kan au zui zel bawk. Trophy-ah chuan Ribbon hring an ṭawn bawk a, nuam tak a ni ringawt.

House thlalakna hun kan nei bawk a, Hruaii leh Zami te nen, a hma lam kan chuh, lan loh kan hlau em.

"Ka mu hma dawn, ka chau lutuk", zi mar ar arin ka ti a, ka ham bai bai mai bawk. Ka chau tak tak, ka auna lamah, ka âw a chhe vek a, ka hrawk a thip em em mai bawk.

Ka pu nen kan inbe lo tluan zak a, message va thawn emaw, va call hmasak ka tum lo bur. Titau zel se ka ti, a tihtauh khan a duhawm hnep hnup lutuk.

Mahse, min lo biak hun changin phone ka bih sek tho, a last seen hi a hla vawng vawng thei lutuk a, a online ngai lo ang a ni. Nge ni a, last seen hi a hide zawk a, gb-te hi a hmang zawk ni.

Ka status update-te hi vawikhat pawh a la view lo reng reng. A hming chuan inngaizawng tih kan pu ve a, inngaizawng angin kan awm pawhin ka hre lo.

Kan awmdan hi a mak reuh e, kan inngaizawng lo ti dawn ila, min tihtauh khum a, kan leader-te a thik ve tumhrang bawk nen. Hriatthiam a har, mahse; a hlimawm phian bawk si.

"Bawihte, in house in chak sia, in lawm dawn em?",

"Lawm dawn lo, kan tam e, pawisa thawh a ngai dawn a, chu loah, khawiah nge kan lawm chuan ang?", ka ti nuah nuah.

Ka pa pawh chu a nui hak hak, kan tam bawk sia e, lawm ngaihna a awm lo.

"In te hi tifai ve ṭhin rawh",

"Chhuat te chu ka nawt daih tawh",

"Chhuat nawh ringawt a ni lo, phone in khawih reng mai", phone ka dah thla hmak. Ka nu hi chuan min tizak reng mai.

"Dawrah ka kal dawn, noodles chhum tur ka lei dawn", ka chhuak zui nal nal. Remchangah lain, ka pu inah ka kal. A chau ve dawn tih ka hria, mut nilen a tum hrim hrim ang.

A nih loh pawhin, a la tho miah lo thei tho bawk. Kawngka hawn mai ka tum a, a la inkalh thlap, call ka tum a, phone ka keng lo tih ka hre chhuak.

Ka kik karh karh a, hre thei tak ang maw. Min lo hawn hma chu, ka kik char char dawn. A hnuah, ka chum vak vak.

Lo hawng ṭhuai pahin, "Tu nge?", a ti hlak. Ka nuih sak a, "Zing zingah eng nge i lo tih?", a tih leh chuan ka ner sawk.

"Ka lo leng dawn", ka ti a. Ka lut nghal, kawngka a kalh leh a, arukin ka chil ka lem dâwk, a thinrim hmel sia, engmah a ti lo ang chu a.

Dawhkanah noodles ka lei chu ka dah a, "Chhum ila, kan ei dawn nia", nuih tlawn titihin ka ti a. A hawisawn leh hmak. A la titau reng nge mawni.

"Ka lo chhum ang, takah, zing a ni tawh lo, chhun a ni tawh, tlai a ni leh ṭep tawh zawk", phelh phangin min en char char.

A hmuihmul pawh a tifai tawh a, a hmelṭha leh sawt. "Ka rilṭam lo", ṭhutthlengah a ṭhu âwn duai a. A mit a chhing duar duar, hahthlak reuh hian.

"Pu, harh teh", ka sawi nawk nawk a. Phu deuh zukin a lo meng, "I mut a va han chhuak awm em em", ka ti a.

"Ka chau alawm", a ti zawi sup. A ṭhu âwn leh a, a mit a chhing leh duar duar. Ka thaw halh a, "Pu, khumah mu rawh", ka sawi leh dat a, phelh phangin min en.

"Ka bulah i mu ve dawn em?",

"Mu dawn lo, ka haw a ngai",

"Rei lo te tal, ka khawih miah lo ang che", meng diar diar chungin a ti leh. Ka nuih hak a, "Ka fiamthu lo", a lo la ti.

Room lamah kan inzui phei a, hetianga chau ngawih ngawih tur hian, engmah a tih ve pawh ka hre si lo.

A kein min khan a, min kuah bawk, min bawh lo chauh zawk. A sawi ang ngeiin min khawih lo tak tak a, ka kawr chhung pawh a zen lo. A mut a chhuak thlu ngang a niang. Ka khawngaih zawk e ah.

Ka mu meng kar a, muthilh tuma ka mit ka chhin pawhin ka muhil ve thei miah lo. Ka nu leh pa chuan, haw har min ti ngawt ang.

"Nu, nu, min kalsan suh", ka meng phar kâwk. Ka pu chu ka sawi a, "Nu, nu", tiin, min kuah nghet sauh. "Ka pu, mangchhia a nih kha", a hnung ka chul hliau hliau a.

A lo harh chhuak thei hrâm, "Mangchhia a nih kha", ka ti zawi sap a. "Mangchhia", a ti zawi ve sup.

A taksa chungah min bawh tir a, min kuah bet tlat bawk. A chhungril khur ka hre thei nia! A lûngphu ka ngaithla a, a rang em em bawk, hlau thlabara siamtu chu, eng mangchhia nge maw ni ang le?

"Pu, i ṭha tawh em?",

"Umm", a lo ti a. Ka thaw huai. A lûngphu pawh a pangngai ṭan a, a khur pawh a zia tawh.

Ka lu a lo chul hliau hliau a, "I haw duh tawh em?", ka lu ka thing nawk nawk. Ka la haw duh rih lo, a ṭha angin insawi mah se, ka ngaih a la ngam thei lo.

"I u chu, ka hrilh tawh aw",

"Engtikah?",

"Nizanah, a lo thleng ṭsp tawh ang", ka zâm chhe nghal thei. Ka u hmachhawn ka ngam lo, ka hlau.

"Min hauh i ring em?",

"A hau hauh lo sng che", a lo ti dam thluam. "Ka haw thei tawh em?",

"Thei tehreng e", min thawhpui a, a mal chungah, amah hmachhawn zawngin min la ṭhuttir leh te te.

"Lalte, i ṭha tiraw?", a ti zawi sup a, ka lo bu zeuh. Ka khabe hmerin a lamah min pawt hnai a.

Ka kawr chhung a zen luh chuan, ka tal laih laih, "Lalte, ka tihpalh lutuk, i ṭha em? Ka tihpalh lutuk",

"Ka, ka hlau",

"A pawi lo, a ṭha vek a nia, ka tihpalh lutuk", kha mangchhia khan, min la tibuai reng chu a nih hi.

"Ka tihpalh",

"Hey, i thiam loh a ni lo, ka insum thsih loh rah i tuar a, min ngaidam rawh", a ti sup a. Nghet taka min kuahin, a âwmah ka bei a, a hmuiin ka chal a nawr vang vang mai bawk.


Show post links
Top

[Ngaia]

aKeima Pu: Sir Sawmtea
Chapter-24
Ziaktu: Cck Lalchhuanawmi

Nghet taka min kuahin, a âwmah ka bei a, a hmuiin ka chal a nawr vang vang mai bawk.

"Inkhawm kan tlai palh ang e, Bawihte, chaw ei siam tawh mai rawh u", ka pain a tih chuan, ka ṭhutna aṭang thoin chaw ei ka siam a.

Ka uin eng thu hla mah a lo la nei lo a, ka pu kha chuan, a lo thleng ṭep tawh ang a ti ringawt a. Ka puin a hrilh hnua, min lo call lo emaw, message tal min lo thawn lo chu, ka hrethiam lo lek lek.

Mahse, a thinrim pawh a ni thei a, min hau turin a lo haw dawn pawh a ni thei. A lo haw hun ka nghahhlelh rualin, ka huphurh ru tho bawk.

"Siami pawh, kar leh lamah chuan a lo chho thei tawh ang", ka nuin a tih chuan, "Pasal a nei dawn i ti emaw ka tia", ka pain a lo ti.

"Fiamthu mai mai a nih kha", ka nuin a ti a. Ka lo lawm ru ve tawp. "Bawihtei pawh, a hah lutuk dawn tawh lo a, a ṭhat chu", ka pain a tih chuan, nui varin ka lo en.

"Siami awm vang ringawtin, awl tluan i tum ringawt ang e, pangpar ho i kutah a awm tih hria la", ka nuin a ti chharh chharh. Ralte ka ngaizawng lo hi chu awww.

"Ka hria e", ka ti ringawt. Awl tluan ka tum tawp si lo, ka patea te ina awm leh daih mai ka duh rum rum. Hei vang hi niang, u Siami pawh a haw ni, ka nu lak aṭanga chawlh hahdam a mamawh vangin.

Ka nu sual tak chu a ni lo a, mahse sawi leh sawi hnu, a âng peih lutuk a. A âw hi a dam loh êm avangin, vin angin a kal tawh ṭhin a, a buaithlak ve êm êmna chu.

Inkhawm turin ka nu leh pa an kal a, sofa chungah bawkin tv ka en a, sir lam zawnga en chuan hahthlak ngat ngat tak a ni.

Message tone ka hriat rualin, ka ke lama awm ka phone chu ka ban nghal a. *inkhawm turin ka kal dawn chiah, lehkha zir nuam* ka puin a lo ti a.

Ka khi ṭhaw ringawt, a lo in report ve thlap tihna chu a ni ve phawt a, lehkha zir nuam a la ti zui. Ka zir peih tawp si lo.

*min lo inkhawm kep rawh aw* ka va ti a. Kutzungpui min lo thawn nghal tuarh, a out zui nghal a. Keimahin ka nui ka nui ringawt, naupanchhiatna mual mual chu a lo nei ve tho a nih dawn hi.

"Bawihte", ka u âw ka hriat rualin ka tho nghal vat a, pawnah ka tlan chhuak nghal. Gate hawngin a lo lut ve mek a, "Bawihte", min lo ko leh a.

Keimah zawkin ka va kuah, "U", tiin, ka ko mawlh mawlh a. "Bawihte, ka tihpalh lutuk aw, ka hre har lutuk a", ka hnung chul hliau hliauin a ti a.

"Min hau dawn em?",

"Hau lo e, hauhna chhan tur che a awm hleinem, tirawh, in chhungah lut ang", kan inkuah lut a. Min hau lo tura ka u lo haw chu, ka lawm angreng.

Chutih rualin, ka u hmel pawh ka zah, ka en ṭha ngam lo. Ka thiam lohna a awm ve tho, chhuak ru lo ila chu, ka u pawh a lo haw a ngai miah lo ang.

Sofa chungah kan ṭhu a, tv ka off hman si lo a, an la ṭawng zuah zuah. "Hey, Bawihte, min en teh", ka lu ka thing nar nar a, ka u chu ka kuah leh.

Ka bulah awm se ka tih êm êm, a awm tawh a, kuah vawng vawng mai hi ka duh. "Ṭap tawh suh le, ka lo thlen tawh hi", ka u chuan a ti dam dup a. Ka lungchhiat min tizual.

"Min en rawh le, ka lo thlen aṭang i hmel ṭha deuh ka la hmu lo a nia", ka hnung beng thek thekin a ti a. Inla hrangin, muangchangin mittui kar aṭang ka en a, "Kha kha ni mai lawm", nui sangin ka u chuan a ti a.

Ka mittui a hru a, "Ka lo thleng tawh a, hlauh tur a awm tawh miah lo a nia", a ti a. Ka bu nghauh nghauh.

Thil thlen dan min zawt a, ka sawi bah nawk nawk msi. Ka nu leh pa hriat lohin ka chhuak ru miau a, ka inchhir kumkhua tawh ang. Ka uin ngawi rengin a lo ngaithla a, ka kut a tuai heuh heuh pah reng bawk.

Ka u a nih avsngin, hlau miah loin ka sawi a, mahse; a mitah tak erawh ka en ngam lo. Min thlamuan pah reng bawk a, ka hriatthiam aia nasain ka u ka thlamuanpui.

"A number ka block a, ka delete daih", ka ti a. "A pawi lo nia", a ti dam thlup a. "Ka ṭhianṭha ber ka chân daih", ka ti ṭawk a. Ka rilru a nâ nghal vawng vawng.

Ka nu leh pa thawm kan hre ta a, ka hmai ka phih sawk sawk. "E he, engtikin nge i lo thlen?", ka nuin ka u a hmuh chuan a ti hluai a.

Ka pa lo lut ve pawh chuan, mak a ti lutuk. "Tun lawk khan ka lo thleng", ka uin a ti a. Ka nu leh pa hrilhhai phena lawm bawk si chu, hmuh a nuam lutuk.

"Nangni unau hi, min hrilh lawk loin in lo haw thut thut zel mai", ka nuin a ti lang lang. "I nau pawh, a lo haw thut a, a kal hma leh em em a", ka nu chuan a ti leh.

"Keipawh, ka awm rei hman dawn lo, ka lo chawl hahdam lawk dawn, kum tawp ka nghak thleng zo ta lo a nih hi", inthlahrun hmel angreng takin, ka u Hlima chuan a ti nang nang.

"A ṭha lawm, in thawkrim bawk a, chawl hahdam tura in lo haw pawh a ṭha hrim hrim e. Keinin kan lo thlahlel ve ṭhin tho che u a", ka pa chuan a ti dap dap a. Thingpui lum turin ka pain min ti nghal zat bawk.

"Bawihte, inbualna tur tui min lo lum ve nghal mai", ka u chuan a lo ti ve bawk. Ka pa leh ka u chu, hna chungchang te an sawi a. A changin ka nu a lo inrawlh ve bawk. Keipawh, ka u bulah ka ṭhu a, ngawi rengin an thusawi ka lo ngaithla.

Ka pa sawi ang takin, ka u te ho an lo thlahlel tak tak a nih dswn hi. Ka u Hlima lo haw aṭang an nui sang reng mai a, ka nu phei chuan a thlahlel lehzual tih a hriat, ka u a ko deuh chhen a, a nih loh leh, ka u hlatah a awm ngai lo tluk a ni.

Ka pu pawh ka hrilh tawh a, ka u min hrilh sak avangin lawmthu ka hrilh. *ka fel êm asin* a lo ti. *changtupa a sual ngai hleinem* ka va ti a, *misualnu, mu tawh rswh* ka nui chhuak hawk.

Ka u awm lai chuan, kan inbe khat a, school-ah inhmu reng mah ila, Zirtirtu leh Zirlai kan ni tlat a, inbiak hleih theih pawh a ni lo.

"Ka nu leh pa hian hre ve se i ti em?",

"Ka duh lo, nsngman i hriat chuan ka duhtawk",

"A nih, Nghaka chu engtin nge ni dawn?", ka uin a tih chuan, boruak ka hip let kâwk a, ka thaw chhuak hawk. Ka u a lo nui suk a.

"Ka pu khan, damdawi ina awm ngai khawpin a sawisa a, hrem leh chuan dan tur ka hre lo. Mahse, ngaihdam chu harsa ka la ti", ka kut a lo vuan a. Ka thaw halh halh a, ka ngaidam thei kher ang em tih, ka hre bik lo.

"I hmu tawh reng reng em?", muangchangin ka lu ka thing. "Zanin hian va kal ila?", ka u chu ka en tawp.

"Va hmuh reng reng a ṭha e, kan pahnihin kan kal dawn alawm. Engtin chiah a awm kan en ringawt dawn nia", ka uin a ti dap dap a. A sawi hmangah chuan, ngaidam turin min ti ni berin ka hria.

"Kan kal ang aw, Bawihte, hlauh tur a awm lo nia", ka biang piai zeuhin a ti a. Room aṭangin a chhuak a, a hnu lawkah, "Lo kal rawh le", a lo ti a. Ka la tho mai lo.

"Bawihte, hlauh tur a awm lo ka tih kha aw", ka kutah chelhin, min kaitho a. Min kalpui hnak hnak. Ka u chuan, car chahbi lain, gate ka lo hawng a, Venglsi panin kan tlan nghal.

Waiting shed kan tlan pel a, he hmun pawh hi ngaiah ka nei tawh a, a changa min tibuai leh zeuh tih loh chu. Mahse, ka hneh tlukah ka inngai.

Ka patea te inah kan kal phawt a, ka u an hmu thut chu mak an ti hlawm ve tho. Siamtei pawhin a ngai thlu ngang a niang, a kuah deuh chhen.

Vanropuia pawh a khi ṭhaw, ka u hi chu, kan lo ngai tlang hlawm a ni. Kein, Lalramnghaka te inah kan kal a, ka u kut ka hmer ngawt ngawt.

An in kan thlen hma hauh pawhin, ka thauah min man tawh. Ka uin min vuan tel lo se chu, ka tlu thal tawp tawh ang.

"E he, Hlima chu le, engtiksh nge i lo haw a? Dindini pawh, lo lut rawh u", Lalramnghaka nuin a ti nghal zung zung.

Ka u nen kan lut a, ka u hlir a ṭawng. Ka u ka chelh nghet sauh sauh a, ka hawi chhuak ngam lo, ka ṭi dâk, a hrehawm zawk.

"A room-ah sawn va lut mai rawh u, a ṭawng duh miah lo a, a la ngawi char char. A chunga thilti tu lah kan hre bawk si lo, ṭawng lo na na na chu engmah kan hre lo a nih hi", a nuin a ti siam siam.

Ka u hnungah ka biru a, "Nghaka chu, i va tlangval tawh ve", ka hmuh ve loh avangin engtin nge a awm ka hre thei lo.

"Bawihtei nen kan lo kal a, kan ngaihtuah lutuk che, lo dam ṭha vat vat rawh", a ti dam dup a. Khum bulah a kal hnai a, a hnungah ka biru char char.

"Thil ṭha lo engmah ngaihtuah lo la, kan ngaidam vek che nia, chuvang chuan, intichak la, hetianga awm reng lo hian, tho chhuak tawh rawh. Bawihtei pawhin a ngaidam vek tawh che, a ngaihtuah thei lutuk che a, a sawi reng zel che", a ti zawi sap sap a.

Ka u chu ka haw ngawih ngawih, dawt chiang lutuk a sawi a. Engtiklai mahin, ka ngaihdam thu ka sawi lo.

"Nghaka, lo ṭha thuai thuai rawh aw, kan va haw tawh ang e", ka u chuan a ti a. A hma lamah ka awm daih. Hmuh ka duh lo hrim hrim.

Ka ngawi reng a, ka u pawh a ngawi reng. In kan thleng a, ka nu leh pa an lo la ṭhu meng kar.

Ka u hoin an titi leh phawt a, kei erawh, room-ah ka lut daih. "Bawihte", kawngka a lo kik karh karh a, ka kalh tawp si lo, a lo lut ve thei reng sia.

Puanin ka inkhuh daih a, tawhsual ka tawh aṭang ka room light ka off tawh ngai lo a, a hma chuan ka off vek zel.

"Bawihte", kawngka hawngin a lo lut a. Ka ngaihsak duh lo lui ngat. Ka bulah a lo ṭhu a, puan a lo hawng a, ka mit ka chhing zui.

"I harh tih ka hria nia, thinrim tawh suh le", ka biang a chul heuh heuh. A rilru a ṭha leh lutuk a, engtikah emaw chuan, an la bum phar kual ang tih a hlauhawm.

"I lungawilo tih ka hria nia, i tan leh Nghaka tan, khatia tih kha a ṭha ber. Nangpawh, inhrem reng tawh suh, a ṭha em?", mit chhing chungin, ka lu ka thing nar nar.

A thaw ri hrawih a, "Bawihte", beidawn hmel zetin a ti zui. Sir lam hawi zawngin ka inher a, ka hmaah tak a lo mu thla.

Ka inher leh a, a lamah min pawtin min kuah hlun, "Zanin chu, i bulah ka mu chak, i tet lai kha chuan, ka bulah hlir i mu ṭhin a. Aa, tunsh chuan i lo puitling ve tawh sia, nangmaha mut i duh tawh zawk a", a nui hak hak a.

Ka nuih pawh a za ve lem lo, tunah chuan ka la ngaidam thei lo a, nakin lehzel pawh ka sawi thei lo.

Ka bulah ka u a mut vang nge, zanlaia ṭhangharh miah loin, zingah ka harh! Ka u tihharh hlau deuhin ka tho ṭhem ṭhem a.

Bathroom aṭanga ka chhuah pawhin, ka u a la harh lo. Room aṭang ka chhuak a, u Siami pawh a tho ve chiah.

U Siami pual bikin, room hran kan siam a, a awmna a rei ve tawh bawk a, kan chhungkua hi chu min hrechiang ve tawh ngawt ang.

"Hlima hi, engtikah nge a chhuk thlak leh dawn?",

"Naktukah",

"A va haw hma dawn ve", U Siamin a tih chuan, "Chu reng, kum tawpah a lo haw leh dawn tho a, awm tlang nghal daih se", ka ti nang nang.

"Nupui neih sak ula, a ṭha vek msi ang",

"Ka nu hrilh la", ka ti a. "A ṭul kher lo ang", U Siamin a lo ti vat. Kan nui dun ker ker a, ka nu biak hi, an tuipui loh zawng tak a ni ve a.

Ka u nen school panin kan kal a, ka bag min ah(ak) sak, naupang pawh ka ni tawh si lo. Ka u chungah chuan, lungawi tawh tho mah ila, lungawi anga lan ka la duh bawk si lo. Naktukah, a chhuk thla dawn a, ka ngai leh dawn lutuk.

Waiting shed hmaah kan ding dun a, ka u ka en a, ka khawngaih. Kei ai pawhin a tuar hmel zawkin, a nât ngawih ngawih hmel zawk.

Chuti chungin, ngaihdamna thu a la chhak chhuak thei zawk a nia! Ka u ka chhun lo hi, ka thiam loh nge pawh ka hre tawh lo.

"Class, sit straight", kan ṭhu ngil nghal vek a, eng thu tak chu sawi ang maw? "Thla lehah exam in nei dawn", min vawthlu mai teh u.

Kan hre hne hlei hlui tawh e, "Sir, min tihṭhaih mi?", Hmangaihan a ti a. "Nia", kan lo ti sup sup. Teacher lo lut apiang hian an sawi ziah. Hre lo pawh kan ni lo a.

"Hrilh nawn zel in ngai alawm, in hriat lohna hi a ṭha lo ve si a", kan nui hak hak. "Sir chu, i savage thei e", mipa ṭhenkhatin an ti nang nang.

"Sports boruakah tumah chên tawh loh tur", a ti leh chharh chharh. "Lehkha zirah bur leh nghal chat ula, Baby-i tlak hniam tir ngei ngei tur", nui suk chungin a ti a.

Min fuih pawh ni loin, min fuihpawrh zawkin ka hria. "Fiamthu nih kha, lehkha zir chauh ngaihsak tawh tur aw, kar leh maiah thla a thar dawn a, thla a thar chuan, exam a ni nghal mai", min sawi ṭhaih reng.

Ka pu chhuah hnu chuan, kan thawl hawk ka ti mai, kan ri chel chul. Lehkha zir chungchang sawi zawm chu khawilamah.

"Ultrasound-ah hian, virgin leh virgin loh a hriat theih asin", Jolene-in a tih chuan, "Mawh?", kan lo ti dual. A lamah kan fu nghal ṭhup.

"An sawi alawm", Jolene-i chuan a ti leh a. Kan sawi zawm nghal char char, "Nikumah, ka pum a ṭhat loh avangin ultrasound nei turin mi ti a. Ultrasound kan ti a, Ka zak e", Rosy-in a ti nang nang.

"I virgin tho te chuan, a zahthlakna awm lo e", an lo ti a. "Virgin tho a, mahse; a zahthlak lawm, virgin leh virgin loh a hriat in ti bawk sia", Rosy-i chuan a ti leh nang nang.

"Kei chu, pawngsual ho hi an khawngaihthlak ka ti", Hruaii chu kan en ṭhap nghal. "Kan thupui i thlak daih a", an lo ti.

"Ka hriat pakhat chu, a nun a ho lutuk, a inzuar ṭhin te an tia. Ka nu chuan, a tet lai chuan a fel thei lutuk, mahse; class-10 a zir laiin an pawngsual a, exam pawh a exam tawh lo, chuta ṭang chuan mipa ringawt a buaipui a. Pawngsual tawk lo se chu, tunah chuan pasal ṭha tak pawh a nei tawh ngei ngei ang a ti", Hruaii chuan a ti a.

Ka chhungril hi a khur dar darin ka hria, "Keipawh chutiang chu ka hria, mipa mamawh ngawih ngawih angin a insawi ṭhin a, a chhungte pawhin an hau nasa thei lutuk", pakhat chuan a ti a.

Pakhat pakhatin a sawi zawm zel, "Ka khawngaih, mahse; lo pawngsual pawh nise, ngati nge mipa an mamawh ṭhin le? Ṭha takin an awm chhunzawm thei tho sia",

"Ah, ngaihtuah ula, an duh loh chungin an mutpui a, an tet laia pawngsual an nih chuan, puitlin tak tak hmain an tem lawk tihna nia, kaihruaitu ṭha tak leh puitu an neih ṭhat loh chuan, kalsual a awl dawn e",

"Mipa ho hi, an insum thei lo ve ngawt mai",

"Kei chu ka ngaihtuah a, pawngsual case hi awm ve mah se, chinfel zat hi a tlem ka ti. Chubakah, inngaihdam kan awlsam si a, FIR pawh thehlut loa, palzam mai mai engzah tak awm ang maw?",

"Chu chiah, Christian Ram kan nih hi kan chhuang mah mah a, misual ngaihdam tur tih kan kalpui nasa lutuk a, ṭha ka ti chiah lo",

"Pawngsual tawkte pawhin an sawi chhuah loh, anmahnia tuar tlawk tlawk te hi, an tam ve ngawt ang", a rukin ka lo ip chawih chawih.

Khawi aṭanga an hriat te hi ni ṭhin maw? "Lalte?", ka ding chawt a, ka hnung lam pawh ka hawi chuang lo. Min lo umpha vat tho.

"Engtikah nge Hlima chu, a chhuk thlak leh dawn?",

"Nsktukah, a hrilh lo che mi?",

"A lo thlen hnu hian ka inbe khat khawp", a thaw halh a. "Ka lo hrilh dawn nia", nuih sakin ka ti a. A kiai deuh sak.

"I u a lo haw a, mi pakhat i hlamchhiah nghal der", lungawi lo hmsl tak hian a ti a. Ka nui hak, amah a insawi ve ngei a.

"Chutiangin hlamchhiah ka neih pawh ka hre lo, hlamchhiah tur pawh an awm lo", ka ti a. A rum nghut. A lungni vak lo.

"A ṭha lawm, tumah hlamchhiah tur an awm lo", a ti hmuk a. Min kalsan leh vang vang. "A titau leh ta", ka ti sap a. Ka nuih zui var var. A mipa zawk hi, titau ve ziah mai.

In ka thleng a, u Siami a awm tawh bawk a, ei rawngbawl zui nghal sawk sawk a ngai tawh lo a, a zia phian.

"Bawihte, i uin phone a keng si lo, a lo haw har tawh em mai, va ko mai teh",

"Khawiah nge a kal?",

"Pu Hminga dam lo kan zawhah, Sawmtea ka tlawh zuai ang a ti nih kha, Sawmtea inah kal nghal mai rawh, a awm tawh ang", ka nu chuan a ti lang lang a.

Ka hnial loh zawng tak a nih avangin, ka chhuak nghal. Ka pu in panin ka kal hnak hnak a, step-te chu, ka zuankan thul. Ka la harh ṭha reng a nih hi ah.

"Ka pu", kawngka hawngin ka lut a, a lo awm miah lo. Room kawngka a inhawng huau a, ka va lut. Room-ah pawh a awm lo.

Computer bul hnaia kal ka tum laiin thawm ka hria a, bang ngengin ka ding nghal. Nakinah ka tihṭhaih dawn.

Mahse, amah chauh emaw ka ti a, ka u âw pawh ka hre tel. "Sir Sawmtea wifey tih vel kha, eng nge awmzia?", ka u chuan a ti a. Engtin nge a lo hriat ve theih zawk le? Ka puin a hrilh leh pek a ni hrim hrim.

"Aim in life kan inzawt a, fiamthu mai mai mawle", ka pu chuan a ti a. Chhuak loin an inbiakna ka ngaithla ta kar.

"Ka farnu min hnaih sak lo turin ka ti che a, mahse; tawhsual a tawk ta sia. I khawngaih avanga i ngaihsakna hi, a tak emaw a ti ang tih ka hlau", ka âng phuau. Ka uin eng nge a sawi kha?

"Tunah chuan, hlat leh tial tial tawh zawk rawh, zirtirtu leh zirlai inlaichinna chauh awm turin ka duh",

"I sawi ang zelin le", ka pu chuan a ti a. Va chhuah lawka, an pahniha va ân khum ka chak lutuk.

"Takah, ka farnu min venhim sak a, ka lawm e",

"Ka tihtur alawm", ka ding khawng reng ringawt. Min khawngaih vangin maw, ka bulah a awm?

"Ka va haw tawh ang e, zanah lo leng rawh aw",

"Ka lo tum dawn nia", ka u chu a haw ni ngei tur a ni, kawng inkhar ri ka hre zui zat. Ka chhuak tawh dawn nge dawn lo tihah ka la buai.

"Lo chhuak tawh rawh, a kal tawh", ka phu zuk. Ka awm tih a hria nia mawle!

"Lalte", a lo ti dam leh thluam a. Muangchangin ka chhuak, "Engtin nge ka awm tih i hriat?", ka ti chusi raih.

"Khawi hmunah pawh awm mah la, ka hre thei zel ang", nui varin a ti a. Ka ner salh salh.

"Ka chungah thil thleng awm lo ta se, ka u sawi angin min hnaih dawn lo tihna mi?", ka ti a. "Lalte", a lo ti nghal vat.

"Zawhna ka zawh che chu?", ka ti a. "A dik alawm",

"Ka hua che", ka ti a. Ka tlan chhuak daih, "Lalte, Lalte", ka kut a lo man hman a, ka phih thla sawk.

Min hnaih theih nan, kha thil kha ka chungah a thlen phawt a ngai tih maw? Lo thleng lo ta se, min hnaih ve ngai dawn lo tihna chu a ni phawt a.

A nih chuan, ka chunga thil thleng kha, remruat ngei chu a ni e, ka chunga thil thleng khan, chhan a nei, chhan a nei ve chiang e!

Zana a lo len pawhin, ka ngaihsak lo lui ngat ngat. A hnuah phei chuan, room-ah ka tawm daih. *lo chhuak rawh, a nuam lo a nia* a lo ti a. Ka seen ringawt.

Eng nga tinge, min hnaih theih nan, thil ṭha lo tak kha, ka chunga a thlen kher a ṭulna?

*Lalte, khawngaihtakin* a lo ti leh a. Ka chhang duh ṭhak lo. *a nih, muttui* a lo ti leh a. Tukverh bulah ka ding a, ka u nen an inthlahna thu ka hre nghal.

"Bawihte, muttui aw", ka uin a tih chusn, "Nangpawh le", ka lo ti a. Kawngka a khar a, a room-a a chho ri ka hre theiin ka hria, a kal thawm ringawt pawh a ring thei tak tak a ni.

Tukverh bulah ka ṭhu a, a bul aṭangin ka chhui ṭha leh. Ka thin a rim ngut ngut.

"Hey", ka phu nasa lutuk chu, ka ṭhutna chawpin ka tlu ṭep.

"Eng nge i lo tih dawn?",

"Ka ru chhuak dawn che", ti pahin, ka kâ rawmawlin a lo hup. "I au ang em?", meng phar awk awkin, ka lu ka thing nawk nawk.

A kut a laksawn rualin, au ka tum a, ka pu chuan a lo hup leh hman. "I va han luhlul tak, ka sermon i ngaihthlak zawh hma chu ka kal tir dawn lo reng reng che", a ti hlak hlak a.

Tukverhah min chhuahpui nghal, ka kâ a la hup reng a, ka kut pahnih ka hnunga chelh bet tlat pahin, min kslpui dawr dawr a, ṭanna hun pawh a awm lo.

Ka han tal ve laiha, chak mangkhengin min kalpui, min hnuk lo chauh.


Show post links
Top