Keima_Pu:Sir Sawmtea BY Cck Lalchhuanawmi (Completed)

[Ngaia]

Keima Pu: Sir Sawmtea
Chapter-35 Last
Ziaktu: Cck Lalchhuanawmi

"Kar leh lamah khian, Felicitation hman a ni dawn a, min thlahna hun nen hman kawp a ni dawn a. First-a i pass ve avangin, i kal ve a ngai. Lawmman dawng turin",

"Kal duh lo ta ila",

"Ka hnuk tho tho ang che", a tih chuan, ka melh ralh. Sualthiam lutuk, mawi hnai deuha han inchhân ve awm.

"I kal ve a ngai ka tih chu aw, i kal lo thiang lo",

"In lamah, ka nu leh pa te chauh an awm dawn a, tuin nge ei rawngbawl ang a?", ka ti a. Inngaihtuah ni awm takin, a ngawi vung vung a, kâwng dawm meuhin hnuai lam a bih ngur.

A inngaihtuah nasa mai mai, dawhkan ka hru fai zo, thleng sil turin ka kalsawn a, ka lehhawi hrâm, chair pawt chhuakin dawhkan chungah a kiu a nghat a, a ṭhu vâng mai.

Nui var chungin thleng ka sil a, thawm engmah a la neih loh danah, a la inngaihtuah char char a nih ka ring.

"Tihian, Hallelui suit nen i awm nileng dawn chu ni sia", necktie suih pahin ka ti a. Ka kâwngah a kut pahnih suihin, kan insi chêt bawk a, a lûngphu ri ka hre thei!

"Zirtirtu ka nih lai kha ka ngai", thaw halhin a ti a. "Tunah pawh, zirtirtu i ni reng tho lawm, Sir Sawmtea i ni kumkhua dawn lawm", ka ti a. A nui suk.

"Chawhnuah ka lo hruai ang che, lo insiam rawh aw",

"Khawiah nge kan kal dawn?",

"Damdawi inah", ka lo bu zeuh a. Kan inentir dawn a ni hrim hrim. Motor-a a luh hmain, ka hmui a rawn tawk zeuh a, amah zawk chu lâi deuha ṭhu lutin, a tlan chhuak zui a.

Puitling viau ṭhin mah se, a che ṭhing ve thei tawp hi a ni mai. Ka pa bulah, huan thlo fai tura hlawhfa chhawrh a ṭhat ka rin thu ka sawi a.

A lo pawm ve lutuk, mahse, ka pu hrilh zawk turin min ti khauh. "Tunah chuan, he in chhunga pa ber hi a ni tawh a, a hnena thu thlen zel hi a finthlak tawh zawk ang", ka pain a tih chuan, za vak loin ka nui ringawt.

Ka pa chu, a fapa chungah rinna a nghat ngam tih a chiang reng mai. Ka pu kutah, he in chhunga chengte, awmdan tur a kawltir hmak ni maiin ka hria.

Ka pu lahin, a mawhphurhna a hai dawn lo tih lah a hriat. Thingpui in zawh chuan, ka insiam nghal sawk sawk.

Rei loah, ka pu pawh a lo thleng, "Ka inthlak dawn, a hrehawm lutuk", a coat phelh nghal mawp mawpin a ti a. Khum chungah a vawm ṭhuai.

Ka lo nuih hak a, suit nen, smart deuhin a awm nileng ngai si lo a, hrehawm ti tur reng pawh a ni. Ka zirna chungchang vel hi, inentir zawhah sawipui ila ṭha ang.

"I chhul a fual tawh lo a, mahse, naupai thei tur chuan, tlema la nghah deuh a ngai ang",

"Damdawi ka ei duh tawh lo nia", ka lo ti thuai. Doctor chu a nui sak a, "Damdawi ei a ngai tawh lo, mahse, naupai tak tak tur chuan, in chawlh deuh hlek a ngai ang", inthlahrung deuhin, zawi sap hian a ti a.

Ka hrethiam deuh reuhin ka hria, ka zak lutuk chu, khûk ral daih ka duh lutuk. "Eng chawlh maw?", bo hû hian ka pu chuan a ti a. A ke ka rap chawrh. Muangchangin, ka lam a lo hawi a, ka lo melh ralh.

"Chawlh hlek a ngai a ni mai, chawlh rei a ngai chuang lo. Kar nga vel a ni mai",

"Kum khat chhung ti law law la", Doctor melh ralh chunga ka puin a tih chuan, ka kâ hupin, ka nui char char.

Doctor pawh chu a nui tawp, "Kar hnih chhung ti mai ang", nui vara Doctor-in a tih leh chuan, "Kum hnih chhung ti law law rawh", ka puin a ti leh.

A la lungawi lo ni ngei tur a ni, a ngawi ngul a, a tûm deuh bur. "U tûm sa i ei em ni?", a hmaa ka kut vaiin ka ti a. En pawh min en lo a, a nui duh ṭhak lo lehnghal.

MC garage chhungah tlan lutin, a ding a, "Bazar ang", ti supin, a chhuk nghal. Motor kal hualin, kawngkhar min lo hawn sak a, ka chhuk fel ta maw tihah, a khar chawrh.

Doctor thusawi khan, a tithinrim nge mawni? "Helai hi chu, a man a to thei lutuk a, secondhand thin tur zawng zawk ang", pawt dingin ka ti a.

"Engmah kan lei dawn lo, 5D kan en dawn, ka thluak tihthawl ka duh", ka ner sawk. Min tizak thei lutuk mai.

"I thluak chu, a thawl ṭha tawh em?", ner salhin ka ti a. A lu a thing nawk nawk. A thawl ka ring lo reng a ni. Inkuangkuahin a ṭhu khawng at a, engtin nge, a thawl theih reng reng ang ni?

MC-a kan awm takah chuan, u Sangtei ka hre chhuak zawk. "Takah, ka pu, u Sangtei dawrah lut lawk ila?", ka ti sap a. Min chhang loin, a ner nûng a.

A hnungah ka nam ṭang ṭang tho. Engti ti emaw chuan, kan thleng hrâm. U Sangtei a lo awm lo, "A pa a boral aṭang khan, dawrah a lo kal tawh ngai lo",

"A van pawi ve, ama pa nge, u Ess-a pa zawk?", ka zawhna mawlmang lutuk avang chuan, ka ip chawih. A âtthlak zia ka hre chiah bawk.

"Ess-a pa zawk, Sangtei chu, a tet laiin, a nu leh pain an boralsan tawh lawm", dam diai hian a ti a.

"A nih chu mawle, a van pawi tak. Engtikah nge a lo kal leh ang?", tim dai hian ka zawt leh a. Ruati chuan, "Ka hre lo le, in lamah a buai thei lutuk a, chubskah, a pa boral a nuin a tuar lutuk a", a ti a.

Kan tawrhpui takzet thu min hrilh sak tura chahin, kan kal ta a. U Sangtei nen inhre ṭha tak ni kher lo mah ila, ka khawngaih!

A tet laiin, a nu leh pain an boralsan a, tunah, a pasal pain a boralsan leh zui a. Ka khawngaih ngawt mai, a chanchin hriat zui zel ka va châk tak.

A number dilna chang pawh ka hre miah lo, va âtthlak ṭhin tak. "Secondhand chu, kan thing dawn em?",

"Thing tawh lo mai ang, ei rawngbawl a hun dawn sia, school-a kal leh i ngai dawn em?",

"Ngai tawh lo, Principal a awm alawm. Ka duh chuan inah ka awm mai mai thei", intithei zet hian, a ti lang lang.

"Chuti, inah awm char char la ni mai lawm",

"Chiah maw, Remthanga hrin chhuah zawt zawt i duh chuan ni mai",

"Lalmalsawm", ti hlakin, a banah ka va tlawh chawrh a. Ka ke a lo man hman. "Kan accident ang e, ka ke kha thlah rawh", nui huah huahin, ka ke a rawn zût chho chu, ka ke ka lêng vak.

A vawn ngheh êm avangin, ka ke a tal chhuak zo lo. A mal chungah a dah a, a kutin a tlin tawk thleng a zût chhuk chho a. Ka melh rawm rawm, engahmah ngai loin, a la nui hak hak zel zui.

Ka âw thian kharhin, ka ke ka tiche a, ka ke man leh chawtin, a thlê bak. Ka ke pakhat zawk hlang chho lehin, ka tiche leh dat dat. Ka ke pahnih chu, a kut pakhat chauh chuan, a man khawm thei teuh lo.

Maneskin-Beggin' hla play-in, ka zaipui rat rat a, ka ke ka tiche ve zel bawk. Rum nghutin min lo en a, nui varin mit ka lo siai zeuh. A phun zui hluk.

A insum hmel chu, ka khawngaih rualin, a cho chhuah liau liau. Bek pawng ṭawlh ṭawlh chungin, steering a her kawi a, din lailawkna tur a zawng tih ka hre ru reng, a hmu mai bawk si lo chu, steering a chum leh pawp zel.

Ka hlau lo a, ka nuih a za zawk. Mipa ho chu, an lang chiang thei ropui si, motor chhung a ni hlauh a, ka hmuh ang hi tuma'n an hmu ve lo zawk mai mai pawh a!

Ka ke a dahsawn pawhin, ka dah lui ngat zel tho. In kan thleng a, a thaw huai mai. Seat a nghêng al al, nuih hakin ka chhuk a. Ani pawh a lo chhuk ve thuai, ka beng a lo.pawt chu, ka inring lo nen, ka rak ṭhat.

"Min thlah rawh",

"Kei ai chuan, a hrehawm lo fe zawk ang", sehchilh nawkin a ti a. Ka nuih vak vak. Ka beng pawt chungin, in chhungah min luhpui.

"Engti zia nge ni ngai?", ka nuin min hmuh chuan, a lo ti thuai a. "Ka nu, min chhan rawh", ka ti chu, "I va han daw thei tak", ti hlakin, min thing nawk nawk.

"A khaih, khatin an ti ngai lo, ṭha deuh khan sawi fel rawh u", ka nu chuan a lo ti dam thluam. Ka puin min thlah ve mai dawn maw tih laiin, ka beng a la pawt char char.

"Chaw chhum chiah a ni tawh mai, chawhmeh ka siam zo tawh a, inchungah i pa nen, Pangpar kan hang singsa lawk ang e, i pa phei chu a chho tawh", nui varin, ka nu chuan a ti a.

Inchungah a chho zui nghal. Mak ti deuhin ka en reng ringawt, ka nu awmdan chuan, ka ngaih a tiṭha lo lek lek.

"Lo kal teh", ti supin, room-ah min pawt lut a. Ka beng a thlawn mai dawn. Khumah min theh thla ṭhuai. A thawmhnaw a hlip nghal sawk sawk a, ka chil ka lêm dawk.

Tlanchhiat tuma, khum sir aṭang ka kalsawn tur chu, min manin min bawh chawrh. Min va han dim lo tak.

"Tho teh, i rit si, chaw chhum a ngai", a âwmah ka nam ṭawk ṭawk a. Hmeichhe tha ngang chuan, ka nam sawn zo lo.

"I ba i tlak phawt a ngai",

"Eng ba mah ka nei lo e ah",

"I nei lo maw, motor khalh laia min tihdan kha, i tlak a ngai", a ti sup a. Ka kekawr a ṭham nghal vak.

Tal laih laih nghalin, "Doctor thu zawm a ngaih kha aw", ka ti a. A nui chhuak hawk. Eng nge maw tih a tum le?

"Tho teh, a nih loh chuan, ka kalsan daih mai ang che", ka sawi zo hman, inchhirin awmzia a nei leh ta lo e!

Gas bulah, inthiam lo deuhin ka tei sek a, bathroom bulah lah ka tei awl lo. A va hrehawm tak, kalsan tih ṭawngkam hmang miah lo tur ka ni asin mawle.

Chaw a hmin, ka suan thla chiah tihah, bathroom aṭang ka pu a lo chhuak ve nghal a, room a pan ding nghal.

Ka umzui vat, ka va kuah a, "I va rimtui êm êm!", nui varin ka ti a. Khum chungah lawn kai nghalin, "Khawi keiman, ka lo hru ang", ti pahin, a towel ken ka chhuh a.

A lu hruk pahin, "I rimtui lutuk a, ka ei châk lutuk che", a biang ka seh a. A nui hak, remchangah lain, "Pu, ka tihpalh lutuk aw", a biang tawn tawnah dawmin, a hmuiah ka fawp zuk zuk a.

A ngawi reng, a nuam ka ti lo. A titau nge a thinrim tih ka hre si lo a, a titau a nih chuan, tihdan dan a la awm. A thinrim erawh chuan, tihdan a awm lo, a tawp a ni mai.

Mahse, a la nui tal alawm, engmah sawi lo mah se, ka lawm tho tho. "Pu, min ngaidam rawh, i thinrim hian nuam ka ti miah lo, vawikhat mah khatiang thu kha ka sawi tawh miah lo ang", a âwmah ka hmai ka phum a.

Ka mittui a tlak loh nan, ka dang hrâm hrâm. "Lalte",

"Khati kha chuan min ko suh, a ṭhing ka tih tawh kha", ka ti nang nang a. Hetianga min koh hi chuan, a ṭhing ka ti pawh a ni lo. Mahse, ka ngaih a ṭha lo ṭhin, nautê tia min koh hian, ka ngaih a ngam.

"Nautê",

"Ka tihpalh, i thinrim chuan nuam ka ti lo",

"Ka thinrim reng reng lo, ṭap lo la",

"Ka ṭap bawk lo", ka ti hlak a. A nui hak hak. "Ka thinrim lo aw, nautê, mahse; kalsan tih ṭawngkam kha chu, hmang tawh miah suh aw", dam diai hian a ti a.

Ka bu nghauh nghauh, "Ka hmang tawh miah lo ang, fa kan neih hunah pawh ka hmang ngai miah lo ang", ka ti lang lang a.

A nui sun sun, "Min fawp la",

"Maw?",

"Min fawh chuan, ka ngaih a ngam lehzual dawn a", ka hmui ka tisâwi niah niah a. Rei rial loin, min fawp nghal.

Chaw ei laiin, ka nuin Felfeli room-a insawn turin min ti a, ka puin a lo hnial thung. Ka nu pawh chuan, a tilui ta lêm chuang lo a, ka pa pawhin insawn turin min ti ve tho a, ka puin a duh tlat lo thung.

Ka nu âw dam hriat erawh, a nuam tho naa, ngaihṭhat lohna ka nei tel tlat!

"I thinrim em?",

"Engvang chuan maw?",

"Felfeli room-ah insawn ka duh si lo a, mahse, i duh chuan, kan insawm thei tho a nia aw, ka pa hnenah ka sawi ṭha ang a", a ti dap dap a. Ka duh loh thuin ka lo chhang thuai.

"Ka pasal i ni a, Kei chuan, thu ka nei hleinêm, i kuta awm ka nia, i thutlukna ka zawmin, i duhna lama zui zel tur che ka ni zawk alawm",

"Awww, he nautê hi, engtik aṭangin nge, a lo puitlin tak êm êm?", min piai vak vak chungin, a ti lang lang.

"A nâ, min piai vak vak zel suh",

"Ka piai châk che lawm",

"A nâ ve tho lawm, piai vak vak i duh bik em ni?", ka ti hlak a. A ner sawk ringawt. "Ka duh pawh ka tih loh kha", a ti sup a. A tho zui daih, lukham a la a, couch-ah a va inmut tir.

A bulah ka va ding a, a inher hmak. "Heta mut hlen i tum em ni? Lo kal rawh", ka pawt pah a. A kut a la la sawn hmak zui. Puan sir tur pawh a nei tawp si lo.

Ka pe awm lo, a mu tak tak thei dawn nge dawn lo, kan lo en ang. Tihtauh peih lutuk mai, ka u te mangṭha kualin, Nga-ki pawh ka mangṭha a.

Damdawi in kawta ka mi hmuh pain, a number min pe kha, ka hre chhuak zawk. Ka bag-ah khan a la awm ang em aw? Tuna zawn chu, ka peih tawh teuh lo.

Be lo law law ila, a ṭhat ka ring zawk. Pasal nei reng chunga, mipa dang biak chu ah, a awm ang lo em mai.

"Nautê, nautê", ka meng diar diar a, ka muthilh lai ka hre miah lo. "A vawt ka ti lutuk", a ti zawi sup. Tiang khawlum hun laia vawt han tih.

"Nautê, keimah chuan ka mu thei lo, engtin nge i muthilh bawrh bawrh thei zawk a", a ti nang nang.

Chhuatah a ṭhu sawp nuaih a, min en kiau, mipa naupang thuawih thei deuh a ang lutuk. Ka mutna siam ṭha te tein, ka thlir vang vang phawt.

"Nautê", a ti chuai raih a. A mittui a parawl tein ka hria. Ka kut ka phar a, "Lo kal rawh", ka ti sap a. Sawi nawn a ngai tawh lo reng reng, min bawh nghal rawk rawk.

Ka âwmah a hmai a phum a, a hnung ka lo chul hliau hliau, a va âtthlak ṭhin tak. A lu tuai heuh heuhin, ka hmuiin ka nawr leh vang vang ṭhin a.

"Nautê, ka hnung a nâ lutuk",

"I kawr hak hi phelh daih rawh", ka lo ti a. Tho ṭual ṭualin a phelh a, min rawn bawh leh. A accident-na kha a nih ka ring.

"Damdawi hnawih ang aw",

"I kut lum ther ther kha, damdawi chu lawm", a ti sup a. A thaw halh halh. A hnung chhuk thla chu, ka chul thla riak riak a, a changin, a kâwngah tak, ka kut ka nghat leh vang vang phawt ṭhin.

A rum deuh nghut zel a, a nâ viau a nih ka ring. "Ka pu, tuilum-",

"Ka duh lo", a lo ti nghal vat. Ka sawi zawh hma hmain, ka sawi tum a hre lawk vel.

Kuah nghet sauh sauhin, a hnung chu ka chul hliau hliau a. Ka rilruin ka Ṭawngṭai pah mawlh mawlh. A kâwng ruh vel hi, tliak lo hrâm se!

Thenzawl Hotel-ah chaw kan ei a, leiletah thla te kan la. A Nikon Camera ngat lehnghalin.

Felicitation leh, ka pu thlahna hun hmang turin kan kal a. Ka nu pawhin, awmpui lak a hnial tawh lo a, mahse, ka ngaih hi chu, a ṭha lo reng tho. A fel leh lutuk hi, rinngam harsa ka ti.

Ka nu leh pa ka hmu chu, ka mittui ka dang zo lo. Phone kaltlangin inbe fo mah ila, hmaichhan ngeia inhmuh tluk a lo awm thei lo a nih hi!

"Bawihte, i thau phah pawhin ka hre lo", ka pain a tih chuan, "Pian nalh lo a hlau lutuk hi lawm, a buaithlak lutuk", ka puin a lo ti vat.

"Pasal i nei tawh sia, i thau kung kung kan lo rin nen", ka nu pawh chuan a lo ti a. "Thau chi ka ni lo, chaw ka ei tam pawhin ka thau thei ngai lo", ka ti a.

U Siami hoin min nuih chiam. U Siami chu tv remote ka pe a, ka pain thingpui sen hâng a in duh vangin, u Siami ka awl a.

Ka pa in tur chauh ka keng a, "Ka duh ve nia", tlai khawhnuah ka puin a lo ti ve leh. Ka hriat tawk lekin ka phun bul bul.

Ketli ka chhuan fel hnuah, "Nautê, ka duh leh lo mai aw", tiin, a rawn au rawng rawng. Ka thin a va han rim tak.

"In chau lutuk ang e, va mu tawh rawh u, keini pawh mu tawh ang u, mut a hun der tawh mai", ding hluaiin, ka pa chuan a ti a. U Siami pawh, ham bai baiin tv a off a, mu turin a room lam a pan ve nghal.

Keini pawh, kan room-sh kan lut a. Thaw huaiin khumah ka tlu nghal. Ka room pawh hi, ka ngaih zia ka hre chhuak rum rum.

"I chau viau ni maw?",

"Chau lutuk", ka ti sap a. Men pawh ka meng tawh lo. Ka meng peih tawh lo. Min tung tho a, bathroom-ah min hruai.

Ka hâ min nawh sak a, zung turin min ti a. "Ka zun a chhuak lo", ner salhin ka ti a. Ka kekawr a pawt thla, "I va ninawm tak",

"Zung hle hle mai rawh", min la ti hlak zui. Min ṭhuttir a, ka zung ve mai bawk. Ka zung zo, ka insil zawh hnua ka din leh chuan, ka kekawr a pawt chho leh a.

Nautê angah ka inngai. A ban min kham tir a, a ban ka kham loh zawkin, ka kawr chhung a zen rak rak. "Muttui", ti supin, min fawp zeuh a. Ka mang hriat ruai ruai tawh.

Hruaii leh Zami te nena kan inhmu chu, kan rak chûl. Hmangaihan min lo zawm ve a, Chba pawh kan hmu nghal.

Pakhat pakhatin, kan inko zel a, a tawpah phei chuan, kan ri chel chûl tawh.

Distinction leh First-a pass-te tan a ni a, Distinction leh letter hmu te tan chuan, lawmman thuahhnih an dawng.

Pass ho tana, hun hman zawh a nih ve leh, ka pu thlahna hun hmanin a zawm nghal a. A tawp nan, "Saw tu pu nge, tu pu mah", a sa leh al al.

A hnuk a ulh tih ka hmuh chuan, ka mittui a lo tla thei. Zirtirtu a nih lai a ngaih thu a sawi miau a!

"Sir Sawmtea ka ngai dawn e", ṭap pur chungin Zamin a ti a. Hruaii pawh a inhru fap fap. Principal-in, ka pu hnathawh ṭan ni te, rim taka a thawh ṭhin thu te a sawi dap dap a.

Citation-te an hlan a, ka pu an uizia leh, an fakna thu te, teacher dangte pawhin an sawi liam liam.

Kan boruak chu, a rit ru phian lehnghal. Hlimna leh lungngaihna a inpawlh nuaih nuaih hi a ni mai.

Pu David-a a ding chhuak ve leh a, ka pu a uizia thu te, a fakna thu te a sawi ban charh charh. Kohhran khata awm kan ni bawk a, ṬKP-a a phak ang tawka a inhmanna te a sawi a.

Chu erawh, ka lo ip deuh. Kan pahniha kan awm dan ka hrechiang êm a ni. Pathianin min ngaidam mawlh rawh se!

"Kan zirlai te hian, aim in life ropui tak tak an nei ṭheuh a. A ṭhen chu, tihlawhtlin theih loh pawh a ni mai thei, mshse, second choice hi neih zel tho tur. Beidawngin, hnual nghal ngawt suh ang che u", pu David-a chuan a ti a.

Ka bula ṭhu te, an bu nghauh nghsuh. "Mahse, tunah hian, pakhat chuan, a aim in life a hlawhtling nghal der", a ti leh a. Ka lûng a phu dup dup nghal ringawt!

Ka pu a ko chhuak leh a, "Sir Sawmtea wifey nih tum ruh êm êm, a aim in life pawh Sir Sawmtea wifey nih a nia, tunah hian a hlawhtling nghal der mai. Sir Sawmtea wifey kha, lo chhuak rawh le", ka zak lutuk chu, ka ṭhu hniam riai riai.

Ka hawi chhuak ngam tawh lo. An au dur dur a, Sir Sawmtea wifey an hriat chak thu an sawi sup sup hlawm bawk.

"Laldin, lo chhuak vat rawh, hmanhmawhin", pu David-a tak chu aww, ka haw lutuk.

"Dindin, nangmah i ni em?", Zamin a lo ti. "Laldin", pu David-an a lo ti leh. "Nautê, lo chho rawh", ka pu pawhin a lo ti ve leh.

"Dindin, nangmsh maw?", min sâwi nawk nawk a, ka hnunga min chum tawk lah bo lo. Ka chhoh duh loh avangin, ka pu chuan min lo hruai a.

Stage-ah ka kut chelh tlat chungin min dinpui a, min hnêm ni awm takin, a tuai leh heuh heuh zel.

School uniform ka ha a, a zahthlak tihpiah lam a ni. "BH couple tan, kut beng ang", ka pu hnungah ka biru char char.

Ka pu chusn, a hmaah min din tir a, kun hniamin, "Ka hmangaih che", ka beng bulah a phun sup a. Ka mittui a hnâm sawk.

Ka lung a chhe nghal rawih rawih. Kan chet tlatna school ti zawng chuan, ka lung a kuai ta a, tlai khaw hnuah, zirlai leh zirtirtu nia, kan awm lai ka ngai thar leh sawt sawt.

Khang hunah khan, kan let thei tawh si lo. Ka pu âwmah beiin, ka insut hlawp hlawp. Ka rilruin a chhui rauh rauh a, zirlai leh zirtirtu ang chusn, engtikah mah, kan awm thei tawh dawn lo.

Zirlai leh zirtirtu ni chunga kan inchhâi lai mawlh kha, a lo nuam ber a nih kha, ka ngai thar nghal ngawih ngawih.

Mi zawng zawng tana Sir Sawmtea kha, kei ka tan erawh, Keima Pu a ni ve tlat!

"Nautê, hei leh chiah, mawh, hei leh chiah", ka kâ-ah Apple zai lep a rawlh lut nghal.

"Grape ka ei châk zawk, Apple chu ka hne tawh", ka ti nsng nang a. Grape a zawh thu sawiin, a lei nghal vat tur thu a sawi a.

Chhuah a tum chu, ka lo dang, "Ka rei lo ang", tiin, a chhuak zui tho. Tun thla tawp hi, nau nei tawh tura min ti kha a ni a.

Pathian malsawmna kan dawng nasa lutuk, phir ka pai a, hmeichhia ve ve ni tura a duhzia, ka pu phei chuan a sawi nasa thei lutuk.

Nau ka pai ta chu, ka nu pawh, a dang nghal awk awk a. Min ngaihsak a, inchhungah exer min lakpui ṭhin. Zing leh tlaiah, a changin chhunah pawh Inchhungah min kal kual pui ṭhin.

Ka rin ngam lohna te kha, ka nu pawh ka ring tial tial, ka ring sual lo turah ka ngai. Ina awm dun reng ta na na na chu, kan lo inkawm thei phian zui.

"Nautê, ka lo haw nia", thaw hluam chungin, a lo ti lut a. Grape chu sil nghalin, ka bulah a lo ṭhu thla nghal vat.

"I va thlan nasa ve",

"Ei rawh le, a zuartunuin, lawh hlim a nih thu a sawi a, a hmel.pawh hei, a la tharlam lutuk", hah tih hriat zet hian, a thaw halh halh.

"Khaw maw", ti pahin, a kawr hak ka phelh sak a, a thlan hruk nan ka hmang. "Nautê, kha hei, ei tawh rawh", ka kâah a rawn dah lut a, ka lo chip nghal mawlh mawlh.

"Inbual ang che, naktukah chuan, motor saw siam tawh ngei ngei rawh",

"Aw le", a ti a. Grape min ei tir leh mawlh mawlh. Bowl chanve pawh ka ei hmain, ka duhtawk der.

Khumah min ṭhuttirin, inbual turin bathroom lam a pan a. Ka pum a rawn nâ zawk! Boruak ka hip let kâwk kâwk a, nau ka vei chu, a nih loh hrâm ka beisei.

A rawn nâ leh zeuh ṭhin tho a, nau neih thla thleng tawh tho mah ila, ka vei a la hun lo deuh chuan ka hria.

Nau ka pai hma kha chu, ka thau thei lo e. Chaw ei ṭeuh pawh ni ila, ka thau thei lo. Mahse, nau ka pai aṭang erawh, ka thau kung kung. Ka mum kâk mai ni.

"Chhia min ti tawh em?",

"Engvang ngawtin maw?",

"Ka thau tawh ropui sia", ka ti chusi raih. A ruk tak chuan, chhia min ti ngawt ang. Nau ka pai hma angin, ka taksa pawh a nalh thei tawh si lo a.

"Engvsng ngawtin nge, i chhia ka tih ang? I nalh daih zawk, Remthangi te lo chhuak vat vat tawh se ka ti, i tuar rei tawh lutuk a, ka khawngaih tawh zawk che",

"Nangpawh i tuar tel tho lawm, zanlsia ka rilṭamin ka kaitho ziah che a, chubakah, ih, i duh ang tak pawhin, hun ka hmanpui thei tawh si lo che a",

"A ho lutuk, chutiang ngaihtuah a ngai lo. Zan a rei tawh, muhil tawh rawh le", rei tawk fang kan han infawp leh rih a.

Zanlaiah ka chawntha chatin min tiharh leh. Tun ṭum erawh, ka pu ka kaitho tawh lo.

A hma chuan, ka au vak zel a. Ka pu pawh, a khawngaihthlak. Keimah chuan ka tuar tlawk tlawk a, rei vak loah chuan, a reh ve leh mai bawk. Mahse, a nâ a ni, a nâ lutuk!

"Nautê, a nâ viau em ni, i ngawih reng a?", ka mittui a luang a hru fap fap reng a. Nau vei nât zia an sawi ka hre fo a, an lo sawi uar tawk lo ṭhin kha, ka haw hlur tawh.

Nau vei nâ tih vanga, boral te hi an awm phah tawh ang em le? Nâ ka tih êm avangin, ka ṭawng chhuak peih lo hlawl lo.

Ka mu tawp a, inchung enin ka khap fap fap ringawt. Ka mittui a luang ngiai ngiai reng bawk. A nâ tih pawhin a sawi fiah zo lo.

Ka puin ka kut a chelh tlat bawk a, min hnêmna thu sawi ve ṭhin mah se, min hnêm zo ṭhin lo, a nâ lutuk ringawt!

"Ka tuar thei lo, nautê, lo awm lawk rawh aw, damdawi ka va dil ang che", a kalsawn zui. Damdawi eina hun pawh a ni tawh mawni le?

"Bawihte, eng nge i an?", ka nu áw ka hriat rual chusn, ka mittui a surin a sur. Ka nu te pahnih, ka pu nu leh, min hringtu ka nu te ka mutna khumah an ding a.

Duat taka min chul hliai hlisu te chu, ka thlamuanpui ngawih ngawih. Nu an ni a, nau vei ve tawh an ni dawn a, tuna ka dinhmun hi min hriatthiampui berin ka ring.

"Nautê", ka kut a rawn vuan nghal vat. "Nautê, damdawi ei tir che an phal lo a, nâchhawkna mum nga ka ei a, tihian, i kut hi ka vuan tlat ang a, damdawi hnathawh a lo kaltlang ang a, a chhawk huai huai mai ang che", Aw Lalpa leh!

Min vawthlu mai teh u, a va han hahthlak tak, "Ka pu", ka ti ṭuau a. "Aw, eng nge ni ta?", nui sangin min lo en, ka bei a dawng lutuk.

"Damdawi engzah maw i ei a?",

"Mum nga",

"Lalmalsawm leh", ka nu te pawh chuan, beidawng tih hriat zet hian, an thaw halh halh.

"A lo chhuak ṭep e, vawikhat han sang leh vak rawh", a au hian ka au ni ber. A vei mah a nât tawh laiin, a hrin lehzel!

Nautê ṭap ri ka hria a, "Hmeichhia a nih hi",

"Pakhat a la awm, han ṭang leh rawh le", ka thei tawh lo. Ka chau lutuk tawh, "Dindin, i harh em? Intichak la, han ṭang leh teh le", ka hmai an beng thek thek a.

Ka vai ruai hian ka hre mai, "Dindin, in pa damdawi ei kha ngaihtuahin, a chhawk cheah ngai la, han intiharh teh le", ka nui hak.

"A lu a lo lang tawh a nia, han ṭang leh ṭang ṭang teh", ka theitawp leh, ka pasal, ka pu theihna leh, a damdawi ei te nen kan ṭang rual a.

Nautê pahnih chu, ka kutah an awm ta vâng mai. Ka hrin chhuah te! Ka mittuiin an kut tê reuh tê chu a far khum a.

Ka chhungte awm kim vek mah se, mi pakhat ka la hmu tlat lo! "Richard-an a buaipui mek, a damdawi ei kha a thawk ṭan a", Felfeli chuan a ti lang lang a.

An nui zui huah huah. Room kawngka a lo inkik a, u Richard-a leh ka pu an lo inkuah lut.

Mittui tla phungin ka pu chusn min en a, insut ri hrawihin, u Richard-a a kuah daih. A hnuah, pai deuh chawn chawnin min lo pan a.

A lo thlen chuan, min kuah nghal chûng chûng, "Ka nautê, keimsh vangin hrehawm i tuar a, min ngaidam rawh aw", a ti a. A taksa zawng zawng a sâ chhuak vek.

Khum chungah ṭhu thlain, ka nu te puihnain nautê kan pawm tir a, ṭhut pawh a ṭhu ṭha hlei thei lo. Nautê nena a tluk pawp loh nan, an veng pah reng bawk.

"An nu an chhun vek a nih hi, ka fanu te chuan", min lo enin, a nui var var. "Fanu leh fapa an nih kha", ka pa, ka pu pa zawk chuan a ti a.

A kâ a âng huau, "Remthanga, Remthanga", tiin, a au hluai. Ka pain a beng hlak nghal, "Ka Idol, u Remthanga", a au leh hluai a.

Kan lo nuih chiam, ka nu te pahnihin, nautê chu an pawm a. Ka pu erawh, a la pangngai hleithei lo.

"Sawmtea khan mut a mamawh, Bawihte, nangpawhin mut i mamawh, in pahnih khan mu hahsam rawh u", ka nu, min hringtu zawk chuan a ti a.

"Nautê, a nâ viau êm?",

"Nâ lo e, i damdawi ei khan min chhawk lutuk alawm", ka ti sap a. A khi suk. Eng rilru puin nge, damdawi a ei reng reng ni.

"Ka nautê, ka hmangaih che, ka thinlung zawng zawngin, min kalsan mai ka hlauh luat avanga, i laka mawi lo taka ka lo che emaw, i rilru tihnâtna ka nei a nih chuan, min ngaidam rawh aw",

"Ka pu, keipawhin, ka thinlung zawng zawngin ka hmangaih che, ngaihdam dilna tur a awm reng reng lo. Nangman, min hrethiamin min enkawl ṭha a, min duat êm êm bawk a",

"Vawikhatah, nautê pahnih lai min pe a, ka lawm lutuk", nui sangin a ti a. Ka lo nuih sun sun.

"Tunah chuan, nautê dang pahnih lai i nei tawh sia, min theihnghilh ta ni maw?",

"Theihnghilh lo e, ka nautê lian zawk hi, ka duat êm êm reng tho ang", ka chalah, a hmui a nawr vang vang.

***TU HRIATPUI LOHIN I TUAR A, THIL TISUALTU ZALÊN TAKA A LÊNG I HMUHIN I NÂ ṬHIN A NI TIRAW? CHUMI VANG MAI CHUAN INDAWMKUN RENG SUH. I CHUNGA SEXUAL HARRASSMENT A THLEN TIR AVANG KHAN, THIANGHLIM LOHAH INNGAI NGAWT SUH. I CHUNGA CHETU ZAWK KHA NI, THIANGHLIM LO CHU. PHUBA LATUIM MIN THLIR RENG E, I TAN PHUBA A LA DAWN ALAWM***

A TAWP TA
(Duhsak taka min chhiarsak tu te zawng zawng, ka thinlung zawng zawngin in chungah, lawmthu ka sawi e.)


Show post links
Top