Keima_Pu:Sir Sawmtea BY Cck Lalchhuanawmi (Completed)

[Ngaia]

"Ka naupanlai ka ngai",

"I va han zak lo tak aw, sanghnih kumah chauh nih kha i pian, keini sangkhat zakua kuma piang pawhin kan naupanlai kan ti kan ti lo, ka beng dawn che mile?",


Keima Pu: Sir Sawmtea
Chapter-1
Ziaktu: Cck Lalchhuanawmi

Driver, U Dama bul chiahah ka ṭhu a, ka hnung lamah mi pali an ṭhu ve bawk. Kan tlem bawk a, kan duh duhnaah kan ṭhu.

Kei, a ṭawngṭhei ber tih takah, hla play karah ka ṭawng bawrh bawrh reng a, sawi tur apui lah hi ka ngah. A changin kan hla play ka zaipui rat rat pah bawk a.

Tumahin min khak lo a, ka thusawi lah an ngaihsak lo tih hriat takin an ngawi diak a, 'aw', 'nia' pawh an ti lo. Ka hnung lam ka hawi zeuh zeuh reng a, an muhil bawrh bawrh. Shillong aṭang Lunglei kan pan a, tlai dar ruka chhuak kan ni bawk a.

Zan zinkawng hi a nuam ka ti, khaw lum lai phei hi chuan zana zin chhuah hi a nuam. Thla han êng phei se chu e, nuam tak a ni, nuam tak.

Mahse, tun ṭum erawh Thla a êng lo a, a nawm tur angin a nuam lo. Mahse, a nuam tho.

"Move back, move back, ka sawi sak mai dawn che aw, sawi ka chak tawh em mai, fak tawp theih loh lengnghathu rawt a tui ber mai, move back, move back", tia zai lang lang pahin, ka ṭhut hmunah ka insáwi nghawng nghawng. Ka kut te ka phar thul.

Young Fella rap lai pawh, ka rap pui zawt zawt thei. "Move back, move back", ka ti lang lang mai ni.

"Dindin, i thawm dim deuh tawh la, an muhil thei lo ang e", U Dama chu a rawn au lauh lauh. "Aw le", ka lo ti dam duai a. Ka rilruin ka zawm rat rat tho. Hla dawt leha B.O.G te, 'Krista Pan La' a'n ri leh chiah chu, ka ngawi leh thei tawh lo.

U Dama thaw ri hrawih hrawih pawh ka ngaipawimawh thei tawh lo. Shillong aṭanga Lunglei, Lunglei aṭanga Shillong kal dawn hi chuan, U Dama Sumo khalhah ka kal ziah a. Ka ngawi hle hle thei ṭhin lo tih chu, a hrechiang berte zinga mi a ni tawh.

An rap te ka zawm a, a bikin Ricky Drac-a rap bik hi a nalh ka ti. A âw a nalh si, rap pawh ka hnehsawh tawh lutuk. "U Dam, thla êng se i ti ve em?", kan hla play ka tizawi deuh a. Van lam ka thlir doh doh.

"Ti vak lem lo, hetia a thim khuih hian a nuam ka ti zawk", a lo ti a. Ka lo nuih hak hak. Mi fiam hi a peih ve si. Dik tak chuan, a thim khuih hian a hlau zawk tlat pek. Chuang kan tlem ṭum phei hi chuan, thla êng hi a awt ngawih ngawih zel.

"U Dam, kan inah lo thleng ta che",

"Venglaiah mi i awm leh dawn?",

"Ni tawh dawn lo, kan inah", ka lo ti a. Min lo en zeuh a, hma lam a hawi lehnghal. "E, i U te bulah i awm tawh dawn lo em ni?", a rawn ti a. Bu nghut pahin, "School kal chhung chauh alawm ka awm, bakah, ka hne ve tawh", ka ti nang nang a. Min lo nuih sak.

"Kumin chu, i pass tawh ang tiraw?", nui huah huah chungin U Dama chuan a ti a. Ka lo ner salh salh. He zawhna hi vawi engzah nge ka dawn pawh ka hre tawh lo. Result chhuah hma chu ka dawng leh mawlh mawlh dawn a nih hmel e.

A pawi hleinem, han dawng mawlh mawlh reng ila, inringtawk takin 'pass dawn' ti thla zel bawk ila, a ni mai. Kum hnih chuang ka fail tawh a, kumin te chu pass ka inring ve tawh em em a ni, tling lo tak chungin.

"Pass e le, Top 10-ah min lo zawng dawn nia", hmai zangthal hain ka ti a. U Dama a nui vak vak. "Nia, han pass ve tawh teh, kum hnih chuang lai i hun i hlauh tawh a, ka fapa takngial pawhin a uipui tawh che", a ti dap dap a.

Ka lo nui sun sun. Tua te mai pawh hian min ngaihtuah tlang a ni e. "Hla hlui lam te hi play tur a awm lo em ni?", hnung lam aṭangin a lo ti thum dut a. Ka hnung chiaha ṭhu a ni bawk a, Ka melh no lo chiang teh asin. Sumo chhung a thim avangin a hmel ka hmu thei lo.

Mahse, a âw aṭang chuan upa ve tawh tak chu a ni ang, hla hlui a tih aṭang reng pawhin a hriat. U Dama lam chu tum bur chungin ka hawi leh a, steering a her kual zut zut a, hmalam a en ngur. "Awm tehreng e le, kan lo play dawn nia", U Dama chuan a ti lauh lauh a. Ka rin dan vel a ni.

Ṭeng deuhin, "Thinlai rukah reng hian e, ka han dawn vel ṭhin a", seat ka ngheng thla chawrh. Aw Lalpa, min hruai chho ve daih mai teh.

"Zin hi chuan, hla hlui ngaithla pah ila, zinkawng a nuam bik, thla han êng phei se chu, a nuam leh zual ang", a lo ti thum dut dut. Inkuangkuahin ka mit ka chhing daih. U Daman, "I tidik chiah, lungngai reng reng suh, hla hlui hlir awmna pendrive ka vit lut tawh alawm", a ti chharh chharh a. Ka lo ner sawk.

Ngaihthla peih lo pawh ni ila, a in play miau chuan, ngaihthlak loh theih lo bawk si. Bengin a hre ve kur mai bawk sia maw. Mahse, ngaithla ve ta reng reng chuan nalh ka ti ta phian, "Rairah tan zawng", a tih lai phei chu, a âw zawng zawng nen, inhmeh ka ti ta lutuk a, min hneh ta riau.

"U Dam, eng hla nge?", ka phone ka phawrh sawk sawk. "K.Lalchamliana-Rairah tan zawng", ngaihna hre lo zetin a lo ti a. Google-ah ka zawng thuai. La ngaithla ngai lo khan, hla thu en pahin ka'n sakpui mai a nih kha.

U Dama a nui huah huah a, ka pawisa teuh si lo. A thluk ka kalsan a, a satupa ai tein ka lo sa hmasa. "A thluk thar i siam a ni ringawt alawm le", U Dama chuan a lo ti a. "Nalh ka ti reuh tawp", ka lo ti a. A nui zui huah huah.

Hla hlui lam hi ka ngaina tehchiam lo a, ka ngaithla lutuk ngai lo. Mahse, ka hriat fuh tawh vek vek hi chu, ka thlah tawh ngai lo thung. A hranpa tak hian ka ngaithla ngai lo a ni ber.

Hla hlui hlir awmna pendrive na na na chu a hlui reng mai a. U Dama hnenah hla hming ka zawt a, ka Google a, ka sakpui hlarh hlarh zel bawk. U Dama a nui kur kur zel a, "I vawikhat ngaihthlaknaah pawh i sakpui thei a nia, i bawn ngawt mai", a ti deuh chhen bawk a.

Nia, ka bawn alawm. Vawikhat ngaihthlaknaa sakpui theih nghal te chu, "Mi bawn, Laldintluangi", U Daman nui kur kurin a lo ti a. Ka nui chhuak hawk hawk. "Ka hming thar tihna ni maw?", ka lo ti a. Nui var varin a bu nghauh nghauh.

"Ṭhianpa, a bawn i ti ngawt lo maw? Kan zinkawnga Dindini a tel ve tawh chuan hla hlui kan ngaithla ngai meuh lo. Zanin hi amah a awma hla hlui kan ngaihthlak vawikhatna. Chuti chung chuan, a sakpui thei a nia", U Dama chuan nui var varin a ti a.

A hlim thei a nia, ka hnunga mi chuan, "A lawmawm e", a ti thum dut. Ka ner sawk nghal. Google-a hla thu en pahin ka sakpui a, muthilh ka tum tehreng nen, ka muhil leh thei dawn lo. Ka muhil ngai lo hrim hrim. Zin hi chu a nuam a ni. Thla êng phei se chu awww!

Hla a tawp a, music a rawn rik leh rual chiah chuan phone ka off a, mike atan ka hmang zui a, a chhan chu kan ngaihthlak leh tur hi ka hrechiang lutuk tlat. "Duhthu ai ang ka sam vel chang hian, i sakhmel leh hming a lo lang ṭhin", ka'n sakpui al al nghal a. Siampuii Ralte, 'Thawnthu tawp thei lo tur' kha a ni miau a ni.

Urhsun theitawpin ka sa a, he hla hi chu ka duh tawp thei dawn lo, a chhan chu ka ex nen, hmahun kan ngaihtuah dun ve rauh rauh kha a ni a, Pialral te kan han ti dun ve khanglang kha a ni a. Tunah erawh, Pialral chu khawilamah, Delhi tlangah a leng ziai ziai tawh. Ka zak zawk e a.

Ka ngaihtuah hian a lo âtthlak ka ti. Mahse, a hunlai kha chuan a boruak khan min uap hneh ve em a ni.

"Thawnthu ngaihnawm ber, kan thawnthu hi, ziak tawp thei turan ka phal mawlh lo", ka zai rat rat a. A hla thu-a ka chên lutuk vang nge ni, nge ni a, ka hnunga mi hian a lo chênpui ve veng veng zawk ka hre lo. "Play nawn leh teh u a", a tawp hnuin a lo ti a.

Nui var varin U Dama chuan a play nawn a, ka lo zaipui leh al al. Min hau lem lo bawk a, kei lahin tawp ta'nge ka ti chuang lo bawk. Ka hnunga mi chuan nalh a tithlu ve ngang a niang, play nawn turin a lo ti chhen a. U Dama phei chu a nuih a za tawh. "Aizawlah peng ila, Siampuii kan va sak tir mai dawn mawni le?", a hnung bera ṭhu, hmeichhe pakhat hian a lo ti lang lang a.

Ka hnunga ṭhu, U Dama play nawn tir chhen tu chu a nui hak hak. "A ṭha ngawt ang, U Dam, peng lawk ila", U Dama lam hawiin ka ti a. Ka nui ṭhaw mai bawk.

"Nia, kan peng dawn nia", U Dama chuan a ti a. Sumo-a chuang ho an muhil vek emaw tih laiin, kan nui ta uar uar. "A hmaa ṭhu kha zaithiam ka ti zawk e, Siampuii Ralte a dah nil chiang khawp mai", a hnung bera ṭhu pakhat, mipa pakhat pawhin a lo au lauh lauh. Kan nui bâwk bâwk a.

A der mah nise, a lawmawm ve hrim hrim. Ka zaithiam lo tih hre tho mah ila, keima tawkah chuan ka zaithiam ve em.

"Ka lawm e", ka ti sap a. Thawnthu tawp thei lo, vawi sawmhnih chuang kan play nawn hnuah hla dangah kan pakai thei ta chauh. Dik tak chuan, ka ui ve reng. Haw hunah aw, ka nuin, "Off teh, off teh", a ti hlur leh dawn a ni.

"Ngati nge i va ngawi ta ve?", U Dama chuan a lo ti lauh lauh a. "Ka chau", ka ti zawi ruih. Seat ka ngheng awl awl a, ka lu ka nghat hmak bawk. Ka rilru erawh chuan a la peih reng a, ka âw ber hian a tlin tawh lo.

Ka chau tawngkhawng ve tawh bawk a ni e. "Reilo te muhil la, i chak thar leh sawt sawt mai ang", nui varin a lo ti leh a. Chhang tawh lem loin ka lo bu nghat nghat. Ka mit ka chhing a, ka thaw huai huai. Mutchhuakin min zêm chiai chiai ve nghal mai bawk. Han muhil poh ila ni mai lawm.

Ka tukkhumah sam ka bawk a, sam chhawlleng ho ka kilhbet vek bawk. Khaw lum nen, sam tlahnawk nuaih hi chu a inrem lo lutuk. Ka nuin tan phal se chu, Nipui a inṭan rual rual khan ka tan leh daih tawh ang. Result a la chhuak bawk si lo a, mahni thua lo tan daih chu ka inthlahrung ve deuh.

Result han chhuak se, ka'n pass ngei tawh ang a e, ka nawr kawlh ang mawle!

"Zunram thiar te i duh em?",

"Duh e le", ka lo ti a. Min zawt har ka ti tawh reng a ni. U Dama chuan kawng sirah Sumo chu din tirin, "Midang ho hi ka'n kaitho ve ang e", a ti a. A kaitho a, an tho ve sang sang hlawm mai bawk.

Kan lo tlan tawhna lamah ka let phei a, thla êng lo chuan a ti hlauhawm lek lek. Kawng sir thlang deuh, zawl si-ah ka kal a, ka zung huau huau. Chutah, ka hnung lamah thawm hriain rang lutuk tak maiin, "Move back, move back", ka ti a. A nui chhuak hawk.

A nuih danah chuan, ka hnung chiaha ṭhu kha a niin ka hria. Kalsawn loin a la ding tlat zui. Min hnungchhawn zawngin ding mah se, ka awm a nuam lo tho tho. Hmeichhia te kan ni ve a, nge ni a, min veng tihna reuh mawni le?

Ka zung zo, ka ding hluai a, ka kekawr te ka siam ṭha leh te te. "Ka zung ve duh tawh a nia", a lo ti a. Ka nui var ringawt. "Va zung rawh", ka ti a. "Aw le, tikhan lo ding tlat ang che", a tih chuan ka nui hak a. Ka kâ ka hup rang lutuk. A hlau tihna mawni le?

"Ka lo kalsawn lo ang", nuih insum deuh takin ka ti a. Bu nghatin a kal ve mai bawk. A hlau chiang mai. "E, ka lo zawng che a", a ti lang lang. "Zung an awm a", ka lo ti thuai. A bu zeuh a, ka bulah a ding ve. "Kan zin apiangin lo tel ve ziah la ka ti ngawt mai, zin boruak i tinuam tawp", nui sangin a ti a.

Nui varin ka lo en a, ka nutei nen an inrual ngei ngei ang, a hmelṭhain a la upa chhe lo tih a hriat. "Ka va lawm ve, in nin ka lo hlau zawk a. Kei chu, ngawi hle hle thei lo hi ka nia, ka nuin min hau nasa thei lutuk", ka ti nuah nuah a.

A nui bâwk bâwk a, engmah pawh sawi loin a zung zo chu a kal nghal nul nul. Ka thlir zui reng a, ka bula dingnu chuan, "A zung i veng tihna em ni?", amah en zui pahin a ti a. Ka lo bu nghat nghat. "A nih, min lo veng ve, ka'n zung ve nghal ang e", a ti a. Ani pawh a liam ve nghal.

Sumo panin kan pahnihin kan kal hnak hnak a, "I harh tawh bawk a, bengchheng leh viau rawh aw", nui kur kurin a ti a. "Aw le", nui tawi takin ka ti a. Bengchheng min ti nasa tih ka hrethiam mai, ka va han ngawi chiang tawh dawn tak. Ka nuin, "Hmaichhana min fak luam hi chuan, insiamṭhat kan ngai a ni mai", a tih ka hre chhuak zawk.

Ka ṭhutnaa ka ṭhut fel rualin ka phone a lo ri, ka nutei, tun ang hunah te, "Aw, nute", ka ti nghal vat a. Min ngaihtuah thu a lo sawi leh bawrh bawrh. U Dama ka pe a, ka nutein khalh fimkhur turin a hrilh leh mawlh mawlh. "Aw le, aw le", a bu nghat nghat a.

U Daman phone min lo pek kir chuan, "Tun ṭum chu ka ngaihtuah lutuk che, bengchheng vak vak lo la, kawng lakah zun chhuak ti sek lo bawk la, i chuanpuite khak ngaiin awm hauh suh ang che", a ti lang lang a. Min ngaihtuah thlu ngang a niang, tun ṭum chu min lo call tlat.

Ṭum dangah te chuan in ka thlen ve leh, keimah zawkin ka call ṭhin zawk a ni a. "Nute, ngaihngam deuhin awm rawh, tui deuhin i lo mu dawn nia. Feltea kha min lo biak dawn nia", ka ti a. Phone ka dah hnuin, "I nutei hmelṭhat reuh dan hi chu aw, a fel si", U Daman a lo ti nghal vat.

"Ka hria lawm, keipawh min en la, ka nutei nen kan inang reng", ka biang dawmin ka ti a. Ei lo tawkin a ner sâwng. Nui var varin ka lu ka thing nar nar. Ka nutei te Colony-ah U Dama pawh hi a nupui leh fate nen an awm a. Ka nutei hian a ring tawk em em bawk. Chubakah, inngamtlak turin kan inhrawn rei thawkhat ve tawh bawk a.

Zing Var ṭianah pawh ngawi rengin ka awm a, U Dama hian, "I va ngawi ve", min ti deuh chhen a, ka chauh thuin ka lo chhang ve zel mai bawk. Dik tak chuan, ka insum nasa lutuk, bengchhen hi ka hobby a nih miau avangin, insum kar hlek loa bengchhen hi ka koa tla, mawhphurhna, Pathian min pek liau liau a ni!

Tlawng kan thleng a, nî a tlangsang tawh em em. Mit chhingin ni lam hawiin ka dak vah a, ka zi mar ar ar. "I hmai a chhe vek mai ang", min nam bu lawp. Ka tlu ṭep chu ka pai chawn chawn a. "Ka tluk ṭep kha", ka ti a. Nui sukin min la en zui. "Vitamin ka dawn tur min tihchhiatsak daih alawm", ka phun sar sar.

Ka chalah min kuk fawkin, "Tun angah Vitamin an dawng ngai lo, ni chhuah ṭan tirha mi hi an dawng ṭhin", a ti a. Ka chal ka tuai vat vat. "Ka pu, min dim lo em mai aw", ka ti hlak a. A nui lai a tawp chawt. "Ka pu ah?", a ti ha a. Ka pu tih kha a lawm vak lo niang.

"Koh dan tur che ka hre hleinem, ka pu ka tih mai loh chein", ka ti vah a. Kei aiin a sang vei nen, ka dak vah mai. Kei ai chuan, a sang tam pui vak lem lo zawk. A âwm chu ka chen vein ka hria, ka chen chiah chiah zawk. "Aw le, mahse; ka pu tia inkoh kha chu a mawi vak lem lo ang aw", ka lu-ah a kut nghatin a ti a. A nui suk.

"I sam te kha siam ṭha rawh, ber bur a che", a ti a. Ka sam hui ṭha sawk sawkin ka bawk ṭha a. "Ka va han nawr kawlh chak tak", ka ti nang nang a. Ka bawk zo chu, ka thaw huai huai thei.

Ka pu chu, a kalsawn tawh emaw ka tia, ka hawi chhuak chu min lo en run, "Ngati nge, min en reng a?", ka ti hliai a. "Hmeichhia i nih kha, lu nawr kawlh te i sawi ka ti", min hlau ta emaw ti ang hrimin min melh kur lehnghal.

"Ka duh a ni mai lawm", ka ti hlak a. A pawi ka sawi ta mai ang hrimin, Ner zui sawkin a kalsawn daih. Ka lu thaklo pui ka hiah phah ringawt alawm.

A ṭhenin chawhmeh te an lei a, kei chu Sialsuka ka lei hi ka duhtawk em em ringawt. Chakai awm se chu, tumahin lei tur an nei lo ang, ka lei zo vek ang.

"Engtikah nge i lo kal leh ang?",

"Ka hre lo le, kum tawpah pawh a ni mai thei", ti sapin ka chhuk a. Ka hnunga ṭhupa pawh a chhuk thla ve! Kan hawna tur kawng a inang a ni hrim hrim.

"Hawi, ka pu, ka bag hi min lakthlak sak ve lawk teh", ka ti a. Min melh zawk a, a kal nghal nul nul. A va han sual tak.

U Dama a lo thle bak a, ka nui ringawt. Keimah pawhin ka la thei reng a, han hrilh kher. Keipawh hi ah!

U Dama leh midang ho nen kan in bye bye hlawm a. Bak akin, chawhmeh ka khai bawr luah mai bawk a, ka chau chhe mai dawn lawm le. Ka pu chu a kal nul nul a, bag zang tawk a ak ve a ni mai a, a awm tho. Kawng hnuai zawkah a kal ta thung a, kei erawh kawng chung zawkah ka kal thung.

Kawng a chho mai bawk sia, ka bawkvak lo chauh. In ka thleng a, chhuatah ka bag leh chawhmeh ka lei ho ka dah thla sawk sawk a, ṭhutthlengah ka bawk thlawp nghal.

"E kha, i lo haw tawh maw?", meng mang hlei loin ka nu chu, "Thleng", ka lo ti a. "Chawhmeh i va lei nasa ve", ka rin dan vel a ni.

"Inbual fai la, i mu leh dawn nia", choka aṭangin a lo au lauh lauh a. Vawiin aṭang chuan kan inân siak leh dawn a ni.

Ka tho ṭual ṭual a, muangchangin ka pindan lam ka pan. Towel lain bathroom-ah ka lut thuai a. Shower ka inphuh tir seng seng nghal. Ka harh kâwk kâwk mai lawm.

"Bawihte, chaw ei tur", min sáwi dat dat a. "Nakinah ka ei mai ang", phak chuapin ka ti a. Ka nu chu a kal ve mai bawk.

Ka lu dawm vung vung chungin pindan aṭangin ka chhuak a, "I tho thei maw, i ril te ṭam viau tawh lo maw?", ka pa chuan min lo be nghal bawrh bawrh a.

"Ṭam ve tawh reng, khaw'nge ka nu hi?", ti né né chungin chokaah ka phei a. Chawhmeh bel ka hawng rak rak. "Tu leh Fa puala ṭawngṭai inkhawm a nia, a kal a nih kha", ṭhutkhawmna pindan aṭang a lo au lauh lauh. Ka lu ka thing nar nar a, "Tun ṭum chu, chakai lei tur a awm lo lawm le?", ka ti nang nang a.

Chaw ei ka châk lo ngei mai. "A ho lutuk, tlem tal kha ei rawh, pum ruaka awm a ṭha ngai lo a nia", ka pa chuan a lo ti a. Thlengah chaw tlem leh chawhmeh ho ka suak nghek. "I nutei te chu an dam ṭha maw?",

"Aw, dam ṭha e", ka ti a. Ka lu a nâ bur lehnghal. "Pa, kan chuanpuipa a dawih rap, ka zunpui mawle", nui hak hakin ka ti a. Ka pa pawh a khi ṭhaw. "Mipa naupang i sawina te hi a ni mai lo maw?", min ringhlel deuh takin ka pa chuan a ti a. "A teuh lo, a upat hmel lutuk. Upa tih lemah, kum sawmli chu a la ni em lo ang a, ka hre bik lo, a pel tawh mai thei bawk a", ka ti lang lang a.

Ka pa a nui huah huah. "Kan hlauh zawngte hi a inang lo ṭhin a nia", a ti dam thluam a. "Chanchinthar ngaithla ila", ti pahin tv a on a, chanchinthar ngaihthlak hi ka ning. Ka tet lai phei chuan, chanchinthar kan ngaihthlak loh nan, tv remote ka thukru hmiah zel. Ka thuhruk hmain ka channel duhzawng ka hmet hmasa phawt a.

Ka u te nen kan inhau nasa thei lutuk. Hmeichhia e ti lo chuan, ka u te nen kan insual buai buai zel mai bawk. Ka u te hi mipa vek an ni a, a naupang ber leh hmeichhe awm chhun pawh min dimna chang an hre chuang lo.

Mipa kara seilian ka nih vangte hi niang, ka nu zawk zawk lem lo a, ka ṭawngthei tel lehzel nen, ka nu phei chuan ngaihzawng ka nei te hi mak a ti thei lutuk.

"An ngaihzawn nan che i vo ṭhin a ni lo maw?", ka nuin min ti ziah. Ka vo ngai lo hrim hrim. "Hmeichhia ka nia, hmeichhia ka nihna angin min ngaizawng duh an ni ve mai a", ka ti let ṭhin a. Ka nu hi a nuih a za thei lutuk.

Ka pa pawhin, "Fapa hlir nei angah ka inngai", min ti ziah bawk. Chuvang chu nia, ka haw te hian min hmuah ngai loh, min ring em em a, "Harsatna i tawh ai chuan, midang ho hatsatna i tawh tir zawk ka ring", nui huah huahin ka pain a ti ṭhin.

A sawi dik chiah, ka bula awm te reng reng hian, "I va han ṭawngthei tak", min ti ngei ngei. Chuvang a niang, ṭhian ka ngah theih loh. Ramnghaka tih loh chu, ani nen hi chuan kan inthlah thei lo a ni ber. Kei ai mahin a ṭawng thei zawk.

(Kan duhzawng a ni dawn awm em???)


Show post links
Top

[Ngaia]

Keima Pu: Sir Sawmtea
Chapter-2
Ziaktu: Cck Lalchhuanawmi


Ka pain chanchinthar a ngaihthlak zawh hma chu, tum luau chungin a bulah ka ṭhu a, tv ka melh ngawt ngawt.

Vanlalchhuangi âw mawi hle mah se, chanchinthar a nih vang hrim hrimin ka beng a kham. "A tawp ṭep tawh, nghak fan fan rawh", ka pain a ti zawi sup a.

Ka nui tawi tak. "I duh chen chen en rawh", ti sapin, sofa pakhat zawkah ka bawkkhup a, phone ka en daih. Ramnghaka contact-ah lutin *eng nge i tih?* ka va ti a. A online reng chungin min la chhang lo.

Group lamah a nawi leh vak a ni hrim hrim. *group ami pakhat nen kan inhnial a, a ṭawngthei nia aw, i puihna ka mamawh dawn nia aw* minute sawmhnih lai liam hnuah min lo chhang chauh. Ka lu ka thing nar nar a, tun ṭum chu ka pui peih lo tlat.

*group-ah pawh ka awm ve loh kha, Shillong aṭang ka lo thleng chauh a, ka chau rih em mai, naktuk aṭang ka pui dawn che nia* ka va ti a, a seen rang lutuk.

*awiiii, Vanladingdong, i lo haw maw? Eng nga ti nge min hrilh ve loh, ka beng dawn che mile?* thinrim tawkin min lo chhang leh thuai. Ka nui kur kur a, a thinrim te hi ka hlau tawp si lo, a thinrim poh leh a cute turh turh thei em mai.

*inhnial competition-ah i tel kha, in zawh ve leh kan inbe dawn nia* ka va ti a. *aw le* a lo ti ve mai bawk.

Ka awmna group velah ka lut mai mai a. Zan dang ang chu nise, keipawh Nghaka angin a mimal taka inhnialpui ka nei leh tawh ngei ngei ang.

Zin hi chuan a chauhthlak ve em bawk a ni. "Pa, ka nu ka nghak lo mai ang, ka mu dawn nia", ham bai bai chungin ka ti a. Ka pa pawhin a lo pawm ve mai bawk.

Khumah ka let nghal thawr a, ka muthilh tak tak hmain Nghaka hnenah min call lo turin message ka thawn a. Phone ka off a, ka ṭawngṭai a, lukham ka deh rual rualin ka chatthla nghalin ka hria!

"I mutui em?",

"Tui lutuk, nu, nutei ka call theihnghilh daih", ham bai bai chungin ka ti a. Mut ka kham lo velin ka hria, "Keiman ka call tawh kha", ka nuin a lo ti a. Ka bu nghat. "Ka la awm duh asin le, ka chhuk thla chiah a, min lo ko haw nghal daih a", chair pawt chhuakin ka ṭhu nghal zat.

Maian tel dawhkana lo thehthla ṭhuai pahin ka nu chuan, "I U Siami an khaw lamah a haw a ngai sia, inchhunga che tur an awm si lo alawm", a ti lang lang a. Zingkar aṭanga mut hma chu kan bengchheng leh dawn e.

"Chu pawh nise, ka lo haw kher a ngai em ni?", ka ti nang nang a. Ka lungawilo ve reng, U Siami a haw vang maiin ka chawlh hmanna ata ka haw a ngaih phah a.

"Mahni ina haw te chu a thlakhlelhawm alawm le, i U te pawh lo haw an chak mah nak laia", fianpui keng vû vû chungin ka nu chuan a ti a.

"A awihawm lo em mai a, ka u te ho chuan ina lo haw an thlahlel awkawnglo mai ah", ka ti lang lang. Ka sawi dik chiah, an awmna hmunah nuam an ti em mai. Kan upa ber phei chuan awmchilh a duh mah nak laia.

"Thu lawilo hlir hi sawi ṭhin suh", min melh khà khà zui a. Ka nu hi chu, ka sawifiah thiam ber chuan, 'Ralte bengchheng' tih hi a pu zo hliah hliah. Ka khing lehlam Ralte a nih vang nge ni, ka ṭawng theih em em.

"Ka sawi bawk lo", ka ti a. "Ṭalh ah", ka nuin a lo ti. Ka ngawi ta daih a, chuti a nih loh chuan a fianpui kenin min khawng ṭawlh leh palh ang.

"Inchunga pangpar awm ho khi i lo singsa dawn nia", ka nuin a tih chuan ka thaw chhuak hawk. "Vawiin chu mut nilen ka tum asin, hnathawh nghal te chu aa", ka ti nang nang a. 'I thu lo' tih mellhin ka nuin min melh. "Aw le", ka ti sap a. Ka chaw ei a tui lo nghal vek.

"A ni tak e mawle, naktuk lamah te ti rawh se, a chauh a la reh lo ang", ka pain a lo ti dap dap a. Min chhan ve chu a ni si a, awmzia a awm ngai tawp si lo. "Ti rawh se ka tih chuan lo ti mai rawh se, mu mai mai hman a ni lo", ka nuin a ti kharh kharh.

Ka pa nen inenin ka pa a nui tawp. "Han pass te te ila e, ka u bulah Chennai-ah ka awm daih ang", ka phun bul bul. "I pass phawt chuan, USA-ah te pawh i awm dawn nia", min ring lo lutuka ka nuin a tih chuan, "Tak tak aw, i thu i zûk leh vaih", ka lo ti hluai. Chennai-a awm ai te chuan, USA-a awm ka duh daih zawk.

"Aw, aw, result han chhuak phawt teh se", nui kur kurin ka nu chuan a ti a. Ka pa pawh a nui huah huah. Min ring hlawllo a ni e. Tun ṭum te chu ka pass ve tawh awm em mai.

Chaw ei kham aṭang ka che char char, ka nu leh pate dam lo kanin an chhuak daih a. Inchunga pangpar awm ho singsain ka buai nasa mai. Hla ka ngaithla pah a, ka zaipui rat rat bawk. Lukhum khum tho mah ila, ni sa hian ka lu a tipuak thei takngial dawn.

"Dingdong, Dingdong?", lei lam ka bih thla dek dek a, kan in kawtah a scooty a hung ṭha sauh sauh. "Inchungah aw", ban vaiin ka ti a. A lo dak chho vah mai. Gate hawngin, in chung lamah a lo tlan chho hlawk hlawk a.

A lo thlen chuan kan inkuah chung chung nghal, inkuah chungin kan zuang tawr tawr a, "Dingdong, ka ngai tawh lutuk che", min beng hlak hlak pah bawk a.

"Keipawhin ka ngai tawh lutuk che", ka ti a. "Eng nge min lo hawn?", a ti nghal zat. Pawisa ka neih loh thu ka hrilh a, lungawi chiah loin a pawi loh thu a sawi ve niah niah. Ka hawn sak reng sia, nakinah ka pe ang.

Ka pangpar singsak ho min pui ve nghal a, sawi dun tur apui kan ngah bawk a, kan ṭawng bawrh bawrh. Kan zawh chuan a ding hluai a, "Ramzotlang boruak hi chu a nuam a ni", a kut phar kualin a ti a. Ka ner salh salh ringawt.

Kan veng hi chu nuam a ti thei e, inhnuai lamah kan chhuk a, inchhung chu a dai deuh bawk a, ka hahdam sawng sawng.

Kan insil fai a, inchhung tihfel chiah ka hmabak tawh. Kan room tihfai vel chu Thawhṭan lamah ni tawh rawh se, vawiin atan chuan chhuat ka nawt ang a, ka duhtawk ang.

"Nga-ki, Sprite bur kha lo la chhuak rawh, in ang", ka ti a. Bu nghatin a lo la chhuak, Ramnghaka hi Nga-ki tiin ka ko ṭhin. Ani'n, Dingdong min ti ve thung a.

"Kan College-a i lo kal ngei ngei a ngai, ka riang thei lutuk a, a nuam lo. Hmanniah pawh, canteen-ah hmeichhe pakhat hian min chhuih thlu a, senior a nih avangin tumahin an ti ngam si lo a. Ka star nuin min hmu ve kur zui, ka zah zia chu aw, Laldingdong, khami ni khan ka ngai zual lutuk che", a ti lang lang a.

Dawhkanah no nghat chawrhin, "A van zak lo ve, senior a nih vang ringawtin chutianga tih theihna che a awm lo. Awm ila chuan, ka kek bawrh bawrh ang mawle", sehchilh nawk nawkin ka ti a. Nga-ki a lo ṭang lutuk.

"Chu reng chu, mipain hmeichhe kutthlak ngawt te a mawi si lo a, ka sawi chu, ka star nuin min hmu ve kur, ka zak lutuk. Engtin nge ka tih ang?", dawhkan hnuaiah a ke a léng vak vak.

"Awiii, a zahthlak dawn e, star te hmaah lehnghal", ka ti vawng vawng a. A zahthlak dawn lutuk. "A hmaah tak ka la tlu bawk thlawp lehnghal",

"Tu hmaah maw?",

"Ka star nu hmaah", min beng hlak chunga a tih chuan ka au ṭhawt. Ka khawngaih lutuk. "Nga-ki", ka ti zawi sap a.

"Khami ni tang khan ka la pehhel char char, ka hmu ngam tawh lo reng reng", a ti nuah nuah a. A sawi zawngte chuan a hmai a sen awp awp. A la zak takzet dawn a nih hi.

"Lungngai reng reng suh, ka lo haw tawh alawm. Chhuih thlu tu che chu nakinah min la hmu rawh, a sam ka pawt kawlh vek nghal ang, sual lutuk mai", ka ti lang lang a. Ka ṭhianpa chutianga lo tih, ka thah nghal lo ah!

"Thawhṭanah khian lo kal ta che, i biru ang a, chubakah tumahin an hre lo ang che. Zirlai lut thar angah i insawi zel ang a, an awih mai ang", Nga-ki chuan a ti leh dap dap a.

Ka lo phur thak lutuk, "I ti tak tak em?", a lo bu nghat nghat. "Mahse, ka pass chuan USA-ah ka awm daih dawn sin", ka ti chu, za lutukin a nui nghek nghek. "Nangmah hi maw?", min kawk zeuh a, dawhkan beng vak vakin a khek tuar tuar.

"Ka nu i zawt dawn nia", ka ti hlak a. A nui lai tawp chatin, "Kan College-ah lo kal hle hle rawh, min ngaihtuah ve lo mi mawh?", min en kiau chungin a ti a.

Ka hnung lama er ngawngin, "Move back, move back", ka lo ti a. A ṭhutna aṭanga thoin ka lu-ah min kuk fawk, "Lo kal hle hle la ni mai", lungawi lo tawkin a ṭhu hmuk.

"Thawhṭan chu aw", ka ti a. A lo bu zeuh. "Ka zak e", a ti leh a. Dawhkanah a bawk thlawp. Ka thiam ang tawkin ka hnem a, Thawhṭanah chu nu chu a chak lo ngawt ang. Ka'n che tak tak ang a e, ka ṭhianpa hi tumahin an tibuai ngam miah lo ang.

Ka'n che tak tak ang a e, ka ṭhianpa hi tumahin an tibuai ngam miah lo ang.

Ka pheikhawk phelhin ka khai a, lei sa viau mah se, inrahkhalh sân(sâng) reng ai chuan ka duh zawk. Ka puan bih ka chawi deuh hlek bawk a, ka bag ka zakzeh hmiah bawk, a hrui sei vuah duh pawh ni ila, inah ka dah daih.

"Dindin, engtikin nge i lo haw a?", ka ding deuh chawt a, ka hnung lam ka hawi let, "Hmanni khan", ka ti a.

Min lo pan chharh chharh. "Induhnu, i lo haw thu te chu min hrilh ve tur alawm", ka darah min beng deuh hlak a, ka nuih tawi tak.

"Chawhnu fellowship lo kal ve rawh aw, ka lo sawm ang che", Sangi chuan a ti zui a. Ka lo aw ve mai bawk. In ka thleng a, sofa-ah ka ṭhu thluang zuarh nghal. Phone ka phawrh a, Nga-ki missed call a lo awm ṭeuh. Inkhawm lai hi chuan, phone ka silent daih zel a, inkhawm laia phone ri tih vel ka nei ve ngai lo.

Ka call let nghal a, "Dingdong, Venglaiah kan mamawhna che a sâng chhuk chho lutuk", a lo ti nghal zung zung. "Dindini maw, hey, Laldin, helamah lo chhuk rawh, tlar hma bera ṭhua, muthlu duai duai tur pawh kan nei tawh lo", Lalrintluanga lo au lang lang chu, "Nga-ki, khapa kha lo beng chawrh teh", ka ti a. A ri thlawrh nghal.

Ka nui hak hak a, "Laldin, lo chhuk la a ni mai, kan ngai che", Rintluanga chuan a lo ti nang nang. Midang ho pawhin min ngaih thu sawiin, an ri hut hut.

"Aw, engtikah emaw ka lo chhuk leh dawn nia, fel deuh khan lo awm ang che u", ka ti a. Thuawih takin an lo aw sup sup. An fel ṭhin mang e. Hmeichhia ai mah chuan mipa ka kawm tam zawk a, anni pawhin mipa ang tak hian min treat ṭhin a.

Ka u te mipa vek an nihna hi ka ṭangkaipui ka ti mai, a ṭul hunah chuan ka sualpui ang lâwp lâwp zel a. Mi hnek te lah hi ka hnehsawh phian zui.

"Nu, fellowship turin kan kal dawn aw", Sangi nen kan chhuak zui a, ka nu min chhanna pawh ka hre lo. A phal tho, a ho lutuk. Biak In Hall-ah ṬKP(Ṭhalai Kristian Pawl) ho kan inkhawm mai zel a, Biak inah tak hi chuan KNP(Kristian Naupang Pawl) ho an inkhawm thung a.

Eng emaw changa, Veng dang Ṭhalaiin min lo tlawh hi chuan, KNP ho nen inkhawmna kan inthlak ṭhin. "Sang, eng group-ah nge ka awm?", veranda-ah kan ṭhu hahdam phawt a. Ka group awmna pawh ka hre lo.

"Marka group-ah, kan group a inang. Kan Leader chu e, Tlangval Senior tawh azawnga ṭha famkim uchuak hi a ni tawp mai. U Sawmtea nia, BH-ah sawn a thawk a, awiii, Laldin, min tihpui rawh aw", Sangi chu a phun sar sar a. Ka nui hak.

"Tlangval senior ngaihzawn kher a ṭul lo e, kan kum rualpuiah pawh ngaihzawn tur an tam nen", ner salh salhin ka ti a. Ka hnungah min chum awk a, hmalamah ka eu awk. Tu te mai pawh hian min ben loh leh, min chum a, min kuk loh leh min khawng bawk a. Hui, khuang pawh ka ni tawp si lo.

"Ṭawng tam miah suh ang che, che sek bawk lo la, a pawimawh ber muthlu hlek suh ang che. U Sawmtean khuang vuaknain i lu-ah a lo khawng chawrh a ni mai", min kai dawr dawr pahin Sangi chuan a ti a.

Mutthluk hi chu ka inthunun theih loh thil pakhat a ni, inkhawm laia mutthluk phei chu ka sim thei lo. Chubakah, Biak in chhungah kan thla a muang tihna te a ni ve a.

"Saw, saw, U Sawmtea chu", ka beng bulah a lo phun sar sar a, a hlim em em lehnghal. U Sawmtea a tih awmna lam a kawk a, ka hawi phei chu, "Ka pu chu!", ka ti sap. Umm, kum sawmli chu a la ni lo tawp a nih saw, kum sawmli chin aṭang chuan Ṭhalaiah a awm theih tawh loh.

Ka pua kha ni rengin, "I fiamthu lo tiraw?", Sangi chu ka en hû a, min sik hlak a, ka ṭhen sak. Hei lawm hmeichhia kawm ka peih loh chhan. "En la, kan Tlangval Senior ho zingah pawh a danglam fal nalh bik saw", Sangi chu phur lutukin a ti leh bul bul a.

A hlim lutuk awmngaihna hre lo chu kei hian ka Sepui ruah tawrh tlawk tlawk. "Engtin nge i duh theih zawk a?", ka ti zawi sap a, min beng hlak. A ninawm e.

"Ngawi mai mai rawh", a ti bul hmuk. A dawihzia te hria se, a duh tho ang em le. Amah pawhin a zung ngam lo a nia, kan U Sawmtea chu.

"Kan Unit Secretary hi a ni pah bawk a, ka ngaihtuah a, school thil nen, Ṭhalai thil nen a buai dawn lutuk, ka khawngaih zawk", kan haw kawngah pawh Sangi chuan a la sawi char char. "Han pui vel ṭhin ila", a kâ hupin a zuang tawr tawr.

Ka thaw halh halh ringawt. Ka pu kha, a ṭhat em emna pawh ka hre ve lo e a. Sangi hi chu a phusa chi a ni ve hrim hrim.

"Pu Kima te in a luah a, Pu Kima fanu U Maria kha i hria em? Kha khan a kherh ve ngat ngat a nia aw, zak thei lo ka ti rap. Vawiin te khan i hmu em, a bialpa ang maiin a cheibawl kha, a zak thei lo tak tak a ni", a ti leh lang lang.

Min vaw thlu mai teh u. Sangi love story ka ngaithla leh char char dawn a nih hi. Awi Lalpa, i van cube reuh tak, Sangi ang ṭhian min pe a!

"Ka lo haw e", ka ti lut a, ka pain min lo chhawn vat. "Ka nu a lo la haw nange?",

"La haw lo a nih hi", ka pa chuan a lo ti a. Inthlak sawk sawkin choka-ah ka ṭhu run a, cooker phitin min tiphu nghek lehnghal, ka phone ka thlauh lo chauh alawm.

"Kar lehah pawl sawm result a chhuak dawn an tih kha", ka nuin a tih chuan ka thin a phu dup dup. A va han hlauhawm tak, tawpna ni a hnai ta khawp mai a, Awi, kadreiiii!

"Chhuak rawh se, Bawihtei pawh USA-a a awm chak tawh alawm", ka pa chu a nui zui var var. Ka nuih tawi tak ringawt.

"Han fail leh na teh aw, pasal i nei chiang tawh khawp ang", ka nu chu a âng hlawih hlawh a. Ka fail tawh awm tawp si lo. Ka chhang ṭha em mai a. Top 10-ah pawh ka lang pha hial ang chu mawle.

"Nu, âng hlawih hlawih ziah suh, result chhuah hnaih tawh phei chuan", ka ti a. Ka nuin min melh no lo teh e. "Engmah ka sawi ve tawh lo ang a, a ni mai. Engpawh sawi ila, âng min tihsak ziah. Âng leh âng lo pawh hre hlawm lo", ka nuin a ti a. Ka pa erawh a nui ringawt.

Thleng ka sil a, inkhawm turin an insiam mawlh mawlh. Zan lam inkhawm hi chu ka misa lo hrim hrim.

Nga-ki nen kan inbia a, naktuka kan awmdan tur kan rel, "Ka lo hruai ang che, e chuan maw, ka star nu chu hre'm, kan senior zingah a u a awm ve a, chu chu hre'm, ih maw; bem la",

"Lalramnghak", ka au nghal ṭhawt a. A tiawm lo thei lutuk. "Eng nge, ka tan pawhin kawng a awlsam thei lawm, ka tan i ti dawn tiraw, Dingdong?", ngen ngawl zet hian a lo ti a.

Ka chal ka beng dat ringawt. Eng ngaihtuahna hi nge a neih bik ṭhin le aw? "Min hriatchian em kha, engtin nge bem thlu thei ila mi tih reng reng?", ka ti a. "Hmeichhia i nih kha, i zei lutuk, hmeichhe power i hmang mai dawn alawm", a lo ti khauh.

Ka thaw kâwk ringawt. Hmeichhe power te han tih, hman dan pawh ka thiam dawn mawni. Eng nge hmeichhe power chu ni reng reng?

"Nga-ki, eng nge hmeichhe power chu?", a thaw ri hrawih. "Hmeichhe power chu maw, zei deuha i awm kha a ni mai. Nangma nangmaha hmeichhia kha lantir la a ni mai", a rawn ti lang lang a. Ka la hrethiam chuang lo.

Keimaha hmeichhia lan tir, heti hian hmeichhia ka nihna chu a lang reng lo mile? Ka ṭhiana hi a ngaihtuahna a buai tawh a niang, a rilru te hi a hah a ni ve chek ang.

A star nu u chu, ka bem dawn mawni le? Hmeichhia zawkin mipa han bem, "Hmeichhia zawkin bem hmasak ka duh lo ti hlek suh ang che, Zoa kha tu bem thluk hmasak nge?", nui huah huahin a lo ti leh a.

Ka awm hmunah ka ner salh salh ringawt. Kan hriatna te lah hi a ṭha thei mai bawk sia maw. "Dingdong?", a lo au tuar a, ka phone ka la sawn chiang lutuk. Speaker-ah ka dah a, "Naktuk thleng phawt rawh se", ka ti a. A lo pawm ve mai. Mahse, a hmelṭhat dan azir chauhin ka bem ang, mai mai salaa.

"Lehkha ka'n zir lawk ang e", tiin, call kan titawp a. Nawina tur group ka zawng rak rak. 'I nawi tlang ang u' tih group-ah ka lut a, pakhat nen chuan kan han inchip leh hrep tak kha. A nuam ve em em mai a ni.

Ka nu leh pa thawm ka hre naa, ka tho peih tawh lo. "Ka mu mai aw", ka room aṭang ka au tuar a, "Aw le, muttui le", ka pain a lo ti a, "Muttui u", ka ti let ve bawk.

Phone-ah bawk ka bur leh a, Shillong-a ka ṭhiante ho nen, group kan siamah kan nawi tlang a, Shillong-a ka ṭhian tam zawk te pawh mipa deuh vek an ni. Mahse, College kal te an ni nawk tawh hlawm a, a ṭhen te erawh College pawh kal loa hnathawk te an kat nuk ve tho.

Mizorama ka ṭhian tam zawk pawh mipa deuh hlir an ni a, College kal te leh, Mistiri-a kaisang te an ni hlawm. Ka room-a bathroom pawh hi, ka ṭhian Mistiri ho ka pain a chhawr ten an siam.

Keimah chauh hi, result la nghak reng awm chhun ka ni bawk, Khawvel hi chu aw!

"Bawihte, hei han en teh, khawi hi nge kan chah ang?", phone ka en a, thawmhnaw ni dawn maw tih nak laiin pangpar lek. Ka nu ka melh ralh nghal a, "Chah chah a ngai lo, kan ngah tawh lutuk, ka buaipui reng peih lo", ka ti hlak a.

"I thu lo em mai a, ka duh duh ka chah dawn", a ti a. A phone a khawih mual mual. Bai ka chawk rak rak a, ka chawk baw nghe nghe dawn mawni. Ka hahna tur mai mai a ni, pangpar ngainalo chu ka ni lo, ka ngaina lutuk. Mahse, ka buaipui reng bik a ngai ziah hi ka ning ṭhin.

"Eng nge in lo sawi a?",

"Ka nu hi, ka buaina tur hlir a buaipui a", ka pa bulah ka ti nghal a. Ka pa a nui ringawt. A nui ringawt zel te hi, ka haw lek lek zel. "Nui reng zel suh, ka nu hi hrilh ve rawh", ka ti a. Ka pa a nui kur kur.

"Nu te thu an hnial ngai lo", ka pain a tih chuan, "Ralte pasalah ka nei ang a, zing thawh hlim aṭanga zan mut hma chu ka ânkhum reng ang a, ka tir kual zet zet reng ang a e, buai theitawpin ka siam ang a, ka vaw ziah bawk ang, ka rilru hi a nâ thawkhat ve tawh em!", ka ti hlak hlak a.

Ka pa a nui huah huah, ka nu a meng rang nasa mai, "I va han ṭawngthei zit zet tak, tunge maw i chhun le?", ka nuin a tih chuan, "Nangmah", ka ti a. Ka lu a ri fawk nghal.


Show post links
Top

[Ngaia]

Keima Pu: Sir Sawmtea
Chapter-3
Ziaktu: Cck Lalchhuanawmi

Ka pa a nui huah huah, ka nu a meng rang nasa mai, "I va han ṭawngthei zit zet tak, tunge maw i chhun le?", ka nuin a tih chuan, "Nangmah", ka ti a. Ka lu a ri fawk.

Ka lu ka tuai vat vat a, ka melh nghek ringawt. A kuta awm remchang apiangin ka lu-ah min khawng ziah mai. "Nangmah vangin ka phone pawh a chhiat phah ṭep alawm", ka nu chuan a ti nuah nuah a. Phone ai chuan ka lu a pawimawh fe zawk.

"Phone ai chuan ka lu a pawimawh zawk, ka luin hna a thawh theih loh vaih chuan aw, in buai khurum rum mai tur asin", ka ti nang nang a.

Lu-a inben emaw inkhawn vel hi chu ka ngaithiam thei ṭhak lo. Kan lu hnathawh chhe palh vaih se aw, a chi lo lutuk.

"Vawiin chu ka leng nileng dawn nia", ka ti hlur a. Ka nuin, "Khawiah mah lenna tur i nei lo", min lo ti thuai. "Lenna tur te chu ka chham lo lutuk, khawiah pawh ka leng vek", ka ti lang lang a. Ka nuin min hnial zawm nghal char char. Ka lo chhang ve zel a.

Chaw ei chhung chu kan inhnial a ni ber, min hnial peih an awm chhung chu ka inpeih reng, ka hnial hneh mah chu ka tlawm mai mai ngai lo bawk. Ka nu ka chhun vang vek.

Ka sam ka bawk a, crop top var ka ha a, cotton jeans dum ka ha bawk a, converse ka bun bawk. Ka mit ka hnawih dum deuh hlek a, lipstick a peach rawng ka hnawih a, rawng sen hi ka ngaina tehchiam lo a, ka inhnawih lutuk ngai lo.

"Nu, Dingdong-i a inpeih tawh em?", ka lu ka thing nar nar. A rawl hi a ring ve chiang e. "Wowww",a lo ti lut a. Ka lo in pose kual vel nasa. "I inpeih chuan kal ang, kan thlen hma leh kan tan a ṭha a ni mai", a ti nghal zung zung.

Ka bag ka la a, room aṭang kan chhuak. Ka nuin min hmuh chuan, "Lo haw nghal vat ang che, inah tih tur a tam lutuk", a ti nghal bawrh bawrh bawk.

"Aw le", ka ti sap a. Nga-ki nen kan chhuak vat. Kan awm rei chuan ka nuin min zilh leh hrep mai ang. Nga-ki pawh hian a hrechiang tawh lutuk.

Ka nu awm laia a lo len phei chuan ka nu nen an inhnial ve ngei ngei ziah. Mipa e ti lo hian a hnial ve ropui si.

Gate ṭha deuhin kan khar a, Scooty-a ka chuang tur chu, "Dindin?", min lo au leh. Ka hawi kual a, Nu Jenny kan lam pana lo kal hnak hnak chu ka nghak leh rih.

Kan bul a lo thlen chuan a thaw halh halh a, "Chhuah i tumin ka hria, hei hi Dindin, i pu David-a min pek sak lawk pah mai teh", ka hmaa file lek kang chungin a ti a.

Ka hmanhmawh ve tawh tho nen, file chu ka ban ve mai bawk. "I nu a awm em?",

"Awm chiang e, va leng rawh, vawiin chu ka leng chhuak dawn sia, lo inkawm rawh u", ka ti a. Nu Jenny pawh a nui kur kur. Kan inah a lut ve mai bawk. Scooty-ah ka chuang fel tawh tihah, "Dindin, engtikah nge i lo haw?", School bar aṭang U Ruatin min lo au zui lang lang.

Nga-ki a thaw halh halh ringawt. Ka haw hun te ka hrilh a, School-ah kal leh turin min ti nghal zat. Ka bu ve nghat nghat. Kan hmanhmawh thu hrilhin kan tlansan a.

"Nga-ki, BH-a pen lawk a ngaih kha aw", ka ti a. "Aw le, Office-ah ka U tiffin pek a ngai ve a", hmalam aṭangin a lo au a. Ka lo bu zeuh.

Baptist Office kawtah a ding a, kei School panin ka kal hlawk hlawk. Stepah ka chhuk thlaa, gate hawnga School Office compound-a ka lut chiah chu ka pu kha a lo chhuak ve mek bawk. Lehkhabu a keng a, class a nei dawn a nih hmel.

"Ka pu", ka ko a, a lo hawi vat. Min hmu chu mak a ti deuh hlek nge ni, che chang loin a ngawi ren rawn a, min en hû. Keimah zawk chuan ka va pan a, "Ka pu, hei hi khawngaihtakin Sir David-a min lo pek sak. Kan venga mi, Nu Jenny pasal kha, lukawlh sual hmel deuh kha", ka ti nawk nawk a, ka nui sang mai bawk.

Pu David-a chanchin sawi hi chu a nuam thei e. A thaw ri hrawih a, a kutah file ka hmehbel nghal. "Ka ring che", ti sapin ka inher nghal vut a, ka kalsawn tur chu ka kutah min lo man chawt. Ka hawi nghal vat a, "Khati khan khawia kal nge i tum?", min kawk zeuhin a ti a.

A lungawilo hmel reuh em em lehnghal, "Ka, ka leng dawn, ngati nge?", ka ti a. Ka dak chho vah, "I hmai kha, i chei nasa mah mah nih kha, nidangah chuan khatiangin chei nasa tawh miah suh ang che", a ti dam thluam a. Hrilhhai deuhin ka en ringawt.

Ka inchei nasat pawh ka hre si lo, "Aw le", ka ti sap a. "Va kal tawh rawh, ka lo pe dawn nia", min kuai herin min nam kal dawt dawt a. A chet dan chuan rilru fim min put tir thei dawn lo alawm le.

Ka inher leh ngat a, bridge lam panin a lo kal nul nul tawh. Harhchhuak zawkin step-ah ka pen chho pawk pawk a, a hahthlak lutuk. Baptist Office kawt ka thlen chuan boruak ka hip let kâwk kâwk.

"I va rang leh si ve", nui deuh sáwngin a lo ti a. "Kal tawh ang", ka ti a. Bu nghatin scooty a tinung a, pawna lo chhuak ka pa ka hmu leh nghal zat, "Pa", ka ko a, min hmuh chuan min lo nuih sun sun. Va pan a, biak leh chuan kan tlai tawh dawn em mai.

Ka kut ka vai lauh lauh a, min lo vai let ve lauh lauh. College veng panin kan tlan thla a, kawng chhuk deuhah kan tlan mai nih kha, a hrehawm dan chu pui tak a ni. College kawtah kan ding a, ka kal vawikhatna a ni bawk a, ka hawi hru hru ringawt.

"Dingdong", ka darah nghet zetin a hmer a. "Fighṭing", a tih chuan ka nui chhuak hawk. Ṭ a telh kher, ṭul lo lutuk. A kut a la thlaa, kei ai pawhin a zam zawkin ka hria. "Hey, min ring lo mi?", ka ti a. A lu a thing nawk nawk.

A class awmna lam panin min kai dawr dawr a, min en duh hlawm zek lehnghal. Engdang vang a ni lo, ka ṭhiana hi a chhe lo ve chiang em a ni. "Tah hian lo awm tlat rawh, lo bengchheng miah suh ang che", a ti zawi sup a, ka lo bu zeuh.

Library-ah min awm tir a, class nei lo ho an awm ve thli thluah a, ka hlauthawng em em bik lo. Lehkhabu ka intichhiar kual daih a, tumahin min rawn be em em chuang lo bawk. A reh lutuk a, ka mut te a chhuak dawn.

"Canteen-ah kal ang", ka beng bulah Nga-ki chu a lo phun hluk a. Min kai leh dawr dawr. Canteen-ah kan awm tawh a, ka hnung lam hawi turin a lu hmangin min ti zeuh. Ka hawi a, Nga-ki chu ka en leh vat. "A beng sen saw a ni tiraw?", ka ti sap a. A lo bu nghauh nghauh.

Nui varin ka kutzungpui pahnih ka tipir vah a, a lo lâi chhe nasa lutuk. A cube ter tur thei e. "Chuan?", ka mit ko ka san euh a, "Lunch ei hun a la nih chiah loh avangin tun ang hunah hi chuan a lo kal lo ang", a ti a. Ka lo ner deuh sawk.

Ka kal thlawn a ni ringawt alawm. "A awmnaah min hruai rawh", ka ti sap a, "Ka ngam lo e a", a lo ti sup. Ka beng hlak a, a la phu uih zui. Dawih lutuk mai.

"A nih chuan ka haw dawn, ka intinalh thlawn a ni ringawt alawm le", ka ti nang nang a. Inah awm ila, ka hlawk zawk daih ang. "Nghaka?", kan pahnihin kan hawi rual nghal vat. "Aw, aw", Nga-ki chuan a ti bah nawk a. Dawhkan hnuaiah ka ke a lo tlawh chawrh.

A nâ phian lehnghal a, ka ṭhen sak ringawt. "Hmannia Library aṭanga i lehkhabu hawh kha, i dah kir hmain ka lo hawh leh chhawng", nui sangin a ti a. Ka mit mei erawh a veng deuh kar, a fing zek lehnghal a.

"Ka dah kir tawh asin", Nga-ki chuan a ti a. A ke ka va tlawh ve chawrh, zei lo thei lutuk mai. Pawi tih hmel deuhin Nga-ki chuan min lo en a, "Va hawhpui leh rawh, keipawhin ka duh ka tih mawlh mawlh kha", dawhkan beng chawrhin ka ti a. Nga-ki a eu dawrh.

"Aw le, aw le, kal ang", a ding nghal hluai a. A star nu nen chuan an inzui dun hnak hnak. Ka nuih var var, kha kha ni mai lawm, plate-a eggroll awm chu banin, keipawh chu ka ding hluai a, ka ṭhutna aṭang kalsawnin eggroll ei ka tum chu ka tlu bawk thlawp!

Ka ṭhen sak sak a, ka khup a nâ ngawt ngawt nghal. Nui ri uar uar ka hre zui a, ka thinrim lutuk chu ka tho chhuak chiang teh e. Ka hmachhawn nghal vat a, kei aiin a la sang zui.

Pawi chai hleinem, kei aia a san zawk avangin ka hlau tur tihna a ni lo a, khatianga a pawi pawh sawi lo min ti ringawt tur a ni lo hrim hrim.

"I pawi ka sawi em ni?", ka ti vah a. A nui hak, "Engtin maw min tih ah?", zawk zamah chuan ah. "I pawi ka sawi leh sawi loh ka zawt che nih chu, khatianga i pawi pawh sawi lo te, i thinrim hrikthlakna tur ka ni lo aw", inkuangkuah thanin ka melh chho kiau a.

Min tham lo tih hriat zet hian a nui hak hak, "I senior te khatianga min ti ngam tur i ni lo aw", a ti hlak a. Ka nui chhuak ve hawk. Ka tham bik lo tih lan tir nan ka nuih ve hak hak.

"I senior nihna chu i va chhuang ve, i senior tawh lutuk avangin pasal tur i hmu zo lo hi College-ah i inla luling tihna nge?", ka mit ko san euh euh chungin ka ti a. Min melh rum ngang mai.

A rum deuh nghut a, min lo keh thut pawha ka lo hnek hmasak zawk theih nan, ka inring nasa mai. "Nuihzatthlak a awm em ni?", hawi kualin a au tuar a. "Ka hek khawp ang che, senior zahna chang i hre lo a", hmai sen awp awp khawpin min ânkhum a. Ka mit ka khap eih lo a, ka che chang bawk hek lo. Ka hlau lo em mai a.

"Pawi hleinem, min hek la, senior ten junior zawk te an ragging tih hre ta se",

"Khatiang kha ragging a ni lo, naui; i inchhiar zau hlek chu a ngai lo ang maw?", inkuangkuah thanin min lo ti ve nghal thuai. Ragging a ni lo tih hre ve tho mah ila, ṭanchhanah ka nei laklawh tawh. A thuhrimah, ragging-a chhiar theih a ni tho tho.

"Khatiang bak baka ragging, i pawisawi lo pakhat chu min chhuih thlu a, cheng sawmthum man engmah loah min chhuah sak zui", leia eggroll tla darh nuaih chu ka melh zawk a.

Min elsen tih hriat reng reng, pawi tih hmel deuh hian min en a, ka hnek chak tawh khawp mai.

Nui hakin, "Lungngai suh, cheng sawmthum mai mai, nuai thum ka pe dawn che", a kutzungṭang pathum ka hmaah a lek kang va va a. Ka kut ka hum ruh nasa tawh lutuk.

"Dik lo taka i lakluh min pek dawn ai chuan, lawm takin ka lo hnawl mai ang e", nui sakin ka ti a. A insehruh nasa mai. Henu hi tu nge maw a nih le? A tlawm duh ṭhak lo lehnghal, ka chak zawk dawn a ni hrim hrim.

"Nang te-reuhte hian min tihthinrim i duh tak tak ni maw?", a ti bah nawk a, ka en chho vah, "Dingdong", min pawt leng dawr nghal a. "Ka tihpalh lutuk", ti supin min kalpui leh nghal dawr dawr.

"Buaina siam lo turin ka tih che kha", a phun sar sar a, ka en tawp ringawt. "Ka thlah thei dawn lo che a nia",

"A pawi lo, ka haw thei alawm. Mahse, a la zo lo, khanu kha ka la tibuai leh khawp ang, min chhuihthluk man a la hmu khawp ang", ka ti chharh chharh a. Ka la thinrim ṭung.

"I tibuai hmasa a niang chu", min awih lo zetin a ti a. Ka âng phuau, "Engtinmah ka ti lo, ka khup te hi a la nâ ut ut", ka ti a. A inthiam lo deuh nge ni, a thaw hawk. "A ṭha e, mahse; a ruk thei ang berin kal chho rawh aw", a ti a. Ka bu nghat.

"Buaina i tawk lo ang tiraw?", ka ti sap a. Ka ngaihtuah hnuhnawh leh tawh. "Tawk dawn lo e, zanah kan inbe dawn nia, a lo lan leh hmain kal vat zawk rawh", Nga-ki chuan a ti a. Min ngaihtuah lutuk chu ka ngaihtuah let zawk. Eng buaina mah lo tawk lo teh se.

Canteen-a thil thleng chu ka ngaihtuah rauh rauh a, vawikhat na na na chu ka la kal leh khawp ang. Takin, result a chhuak ṭep tawh lawm, USA-a awm aiin kha College ngei maiah khan ka kal ang a, kha nu kha ka tibuai nasa thei ngawt ang.

Mahse, senior an nia, keimah zawk hian buaina ka tawh hnem hmel zawk. Pawi lo em mai a, ka hlau bik lo, senior nih vang ngawtin inlak VLTF viau tur tihna a ni chuang lo.

Ka nu leh pa inkhawm bang lo haw chuan, "Ka mu dawn", ti hmukin room-ah la luhsan daih a. Room kawngkhar aṭang dak chhuak lehin, "Muttui ule, ka mutsan mai ang che u", nui sangi dam thlupin ka ti a. Khumah ka lawn kai nghal vat.

Ka pass dawn chiang sa bawk sia, College-ah suahsual rawng ka va han bawl chiangkuang dawn tak em, a va han nuam dawn tak. Keimahin ka nui kur kur a, ka nu phei chuan min hmu se, "I â te nih loh chuan nui tawh suh", min tiduh leh ngei ngei ang.

Nga-ki chuan min lo call a, buaina a tawh zui leh zui loh ka zawt vat. A tawh loh thua min chham chuan ka thaw huai.

"Remremi u ka tih chu maw?",

"Tu nge Remremi?", ka lo ti hmanhmawh.

"Ka star nu kha, vawiinah pawh i hmuh kha", a lo ti hlur nghal. Speaker-ah ka dah a, chuti lo chu ka beng a chhe palh ang.

"Ka hria e, sawi rawh",

"Remremi u leh, vawiina i intihbuaipui senior kha maw, Carolyn-i nia, khanu leh Remremi u chu an inhnimhnai riau a, kan inrawlh hi a ṭha lo zawkin ka hria. Bem tura ka tih che kha, ka kanṭhel aw", a lo ti a.

Ka ner nung ringawt, duh leh lo inhnimhnai mai mai se, nge pawi vak. "An duh chuan lo inhnimhnai se, ka tihtur min dal lo em mai. O2, Chhim tlang ṭhami, Dingdi parin a bawm khah ṭuk, Leitlangpui, Lunglei chhul chhuak Laldintluangi hi tlawm mai mai ṭi ka ni bo lo", ka ti kharh kharh a.

Nga-ki a lo nui hak hak, "Chutah chuan buaina a awm em ni? Buaina a awm em?", ka inhrosa thur thur a. "Buaina a awm em? Tu nge buaina a awm lo ti, buaina a awm lo. Het, tu nge buaina a awm lo ti?", a lo ti ve chharh chharh.

Kan pahnihin kan nui dun hak hak a, "Eng nga ti nge, Lunglei ho hi Ṭ uar min tih em em le, Ṭ kan hman awm pawh ka hre ngai si lo", a lo ti a. "Ka hre bik lo, i thusawiah hian i telh zauh zel", nui hak hakin ka ti a.

Keipawh hei hi ka ngaihtuah ve fo, Ṭ kan uar em em pawh ka hre tawp si lo. Uar min tih hlawm vang hian, kan hmang lui ve mai mai niin ka hria.

"Kei ai pawhin i hmang uar", min lo ti a. Chhang tawh lem loin ka nuih ringawt. Lehkha a zir dawn avangin kan inbiakna kan titawp a. Muthilh hma tiin rei lo te ka online a. WhatsAap-ah ka lut leh a, group tharah min lo add. Marka group tih a lo ni a.

ṬKP-a ka group awmna, min add tu a la lan theih avangin ka en a, ka hriat ngai mi a ni lo a, a number hi ka save miah lo bawk. A dp lah ka hmu thei lo zui.

Group chu a ruak huai a, ka awm ṭan chauh avangin, group information ho vel pawh engmah ka hmu thei lo.

Min add tu ka ngaihtuah rauh rauh lai chuan, min add tu a lo typing nghal vat. Ka nghak leh te te a, eng thu tak sawi ang maw?

Min welcome-na tur chuan a typing rei em mai. Information tur pawh a ni mai thei a ni. Ka out daih a, lukham hnuaiah phone dahin bathroom-ah ka lut a.

Ka ha ka nawt a, ka hmai te ka phih leh te te. Ka inhrukhul hnu chuan pyzama ka inthawlh a, ka ṭawngṭai zawh hnuin lukhamah ka lu ka nghat a, ka thaw huai huai.

Ka mit ka chhing tawh zet naa, lukham hnuaia ka phone dah chu lain group-ah chuan ka lut leh a, like a lo awm tuar. Min add tu typing pawh a lo zo tawh a, a message chu an lo like tuar hlawm chu niin.

*Junior ṬKP kan ni tawh lo a, ṬKP pangngai kan ni tawh a, tuna kan nundan ai hian kan nun uluk lehzual ang u. Kan inchei dan te thleng hian kan inuluk a ngai. Kan leng dawn a nih pawhin, inchei nasat lutuk tur a ni lo, kawr chhing deuh deuh te hain, kan mit tidumin kan hmui tisen uchuak lo bawk ila, nula ho ka sawina che u nih chu aw* tih a lo ni a.

Ka chhiar chhung zawngin ka khi ṭhaw, a thu hi a ho teh tuh lutuk ah. Admin a nih danah kan group Leader tu emaw ber chu a ni dawn chiang sa. Like ka'n pek ve ngei kha.

Sangi message a lo thleng nghal a, *U Sawmtea thusawi ṭhat dan kha, awiii ka thidang* ka nui chhuak hawk. Phusa thei lutuk mai.

*i dawheh reuh e a* ka va ti a. *dawt an ei ngai lo* a lo ti, ka lu ka thing nar nar ringawt. *U Sawmtea kha i number ka pe a, a lo add nghal che kha aw* a lo ti leh a. Min add tu chu ka ve en leh ngat a, a number screenshot-in Sangi ka thawn a.

*U Sawmtea number a nih kha* a lo ti. A nih chuan, min add tu chu, min add zawh hnua a thusawi te kha, awiii aww.

Keimah min tihchhan ni maw, zinga mi kha a la lungawilo reng tihna ni maw? Khatiangin kawr chhing deuh ka ha lo a, ka mit a dum lo a, ka hmui lah a sen bawk si lo.

Ale le le le, va inuluk a va ngai dawn ve. Engtin nge kan hmachhawn ngam ang le, khatiang pawh inchei nasa min ti a, engtianga inchei turin nge min duh ang aw?

Ka pu tak chu aw, kan va inthunun hneh dawn ve, kan khirh dawnin a lang tlat.


Show post links
Top

[Ngaia]

Keima Pu: Sir Sawmtea
Chapter-4
Ziaktu: Cck Lalchhuanawmi

Ka pu tak chu aw, kan va inthunun hneh dawn ve, kan khirh dawnin a lang tlat.

Zing thawh hlimah pawh, ka khi ṭhaw reng a, kan pu Sawmtea khan min ngaihtuah chiang mai!

Group-a a message kha ka star mark a, a bak chu ka clear vek. A message kha a cial em mai.

Kan in bul lawka Primary School-ah ka kal nitin a, zirlai an tlem avangin Zirtirtu te pawh tlemin an awl deuh ṭhin.

U Ruati hian a ai class-ah min luhtir ṭhin a, "Good Afternoon U Dindin", an lo ti dual zel. Miss min ti ngai lo reng reng. Thaw hawkin, "Misual ho, ṭhu r'u", ka tithlarawk zel a. Tu mah mah kan inhaw lo reng reng. Naupang bula awm hi a nuam.

Zing lamah hi chuan ka kal vak ngai lo, chawhnu aṭang hian school ban thleng hi ka awm ve ṭhin. Chawhma lam hi chu ina ka nu nen inhnial a ni mai.

"Phone in khawih a, in mu tlawn zuarh reng bawk a, in ei a, in in a, in mu leh nghek a. In mit te lah a ṭha reng reng, phone chuk reng mai", sofa-ah bawkkhupin phone ka khawih mual mual a.

Ka nu chu ka bengkhawn lo lui ngar ngar. Kan mu reng lo a, phone kan khawih reng bik tawp si lo. Kan chet zawh hnua mu te kan ni ve ṭhin tho sia.

"Alu kang ila a ni mai", ka ti nang nang a, khaw lum nen. "Lockdown vel aṭang khan alu pawh ka hne zo vek tawh", ka nuin a lo ti. Ka thaw halh a, ka chhang buai duh ta lem lo, ka kang tho ang.

"Naktukah pawl sawm result a chhuak dawn sia, i nau te ho hi an ngaihtuahawm em lo ang chu maw?", chaw ei laiin ka pa chuan a ti dap dap a. An ngaihtuahawm ka rin loh thuin ka chhang, an ngaihtuahawm lo tak tak ang.

"I fanu hi nih hi ngaihtuahawm zawk chu ni", ka nuin a lo ti lang lang. Ka nuih pawh a za lo e a. "Ani chu ka ngaihtuah lo, kumin te chu a pass tawh hrim hrim", min lo en zeuhin ka pa chuan nui sangin a ti a. Ka nui var var, a nuam e.

Ka pass dawn sia aw, ka nuin ka fail chuan pasal min neih tir te a tum a, USA-ah ka awm daih dawn sia le.

"Felte, nangni lam hi engtikah nge in result a chhuah dawn?",

"Ka hre rih lo, kumin chu Mizoram lam kha in result in tichhuak hma tawp, Shillong lam aiin a chhuah tlai thei ṭhin nen", a lo ti lang lang. Mizoram aiin HSLC hi an tichhuak hnuhnungin ka hre sia. Ka hresual zawk nge mawni?

"Nangni engtik nge?",

"Pawl sawm chhuah hnu lawkah a chhuak ang, a ni thumna emaw ni lina velah a chhuak ṭhinin ka hria", ka ti nang nang a.

Ka huhphurh leh huphurh loh min zawh chuan, "Result nghah te chu, ka koa mawhphurhna tla pakhat a nia, ka huphurh lo rapthlak lutuk", ka ti a. A nui vak vak.

Result nghah te chu, ka koa mawhphurhna tla pakhat a ni hial tawh. Kumin chu, ka va han pass tawh dawn chiang tak.

*i mu tawh em, ka lo call dawn che nia* Nga-ki message ka hmuh rual chuan keimah zawkin ka va call a, min chhang rang chiang teh e.

"Sawi rawh", ka ti thawr a, "Remremi u chu maw, Jonathan-a nia, chuan maw, Inṭeresṭing Fak, Ralte a ni aw", a tih chuan ka au ṭhawt.

"Ralte maw, i fiamthu lo tiraw?", ka ti a. Ka mu tawh chu khum chungah ka ṭhu chhuak nghal vat. A va tihchi dawn tak, Ralte, Ralte.

"Ka fiamthu lo, i hneh theih i ring em?",

"Min lo en rawh, min thihchilh lo chauhin ka siam ang", inringtawktakin ka ti a. Min lo nuih hak. "Nge i nuih, ka siam tak tak dawn alawm, Ralte Perfect a ni tiraw?", ka ti leh a. "Ralte Perfect, Ralte Bengchheng ngat ni e", a lo ti khauh.

Ka lawm lutuk chu ka ke ka ke ka lêng vak vak. Ka nu ka hrilh chak tawh lutuk, a thinrim ang chu awww.

Ka thaw halh a, College-ah result chhuah hmain vawikhat tal chu kal leh a ngai a ni. Ka kal leh hun chuan, engkim a fel vek tawh ngei ngei bawk ang.

"Bawihte, i u te room i tifai tawh em?", ka ner sawk. Ka tifai peih teuh lo mai. "Nakinah ka tifai dawn nia", ka au lauh lauh a, gate bula pangpar kan dah ho ka singsa leh hlawm. Kan pangpar te lah hi, keima buaipui vek a ngai.

Ka nu lah hian, enkawl dan turah a la duhkhirh em em zui. Saron kung te tak te te ho, inchungah kan dah a.

Gate bulah hi chuan pot-ah ni loin, leiah Hnahsin ho ka phun a, rawng chi hrang hrang par pawlh nuaih hi a mawi ka ti leh tlat pek a.

Ka zawng khawm nasa bawk a, an par a hun hi chuan rawng chi hrang hrang awm khawm tih takah, an nalh thei a nia aw.

"Nakin, nakin in ti a, in ti leh tak tak ngai lo, ka tih leh vek tho a ngai", ka lu ka thing ringawt. "U Dindin?", gate hawngin ka chhuak a, "I lo kal ṭep tawh em?", an lo ti luih luih a, ka nuih ringawt. School barah an lawn kai a, U Ruati pawhin a hmu reng, a hau chuang lo.

"Ka hman ṭep, tiffin in ei zawhah ka lo kal leh ang", ka ti a. Min lo bye bye liam liam.

"I u te room pawh i tifai ngai lo ni maw, a bal khu rem rum lutuk", ka nu chuan a ti nuah nuah. A tifai a ni chiang mai. Bal khu rem rum mah se, pawi lo em mai. An lo haw khat tho alawm le ah.

In chung lamah ka u te room a awm a, in hnuai lamah ka room leh ka nu te room a awm ve thung. Ka u ten ka nu te room in chungah awm se an ti tak naa, "Chho chhuk sek ka peih lo", ka nuin a ti tlat pek ah.

"Aṭṭa ka lo kang ang, va inbual fai rawh", ka ti a. Phun nuah nuah chungin a kal hram.

"Kan School-ah hian lo thawk daih ta che i graduate hnuah", Principal-in a tih chuan, "Zirtirtu hna hi ka taimaknain a tlin chi a ni lo", ka ti a. An nui tliar tliar. "Tunah pawh i tlin em hi?", Sir Zuian a lo ti a.

Miss Mahruaiin, "A lo kal tawh chuan, naupang pakhat tal hi chu an ṭap ngei ngei", a lo ti ve bawk. Ka zaidamna hian a tlin ṭhin lo a, ka kut a rang ve bawk nen, ka hriat loh karin lehkhabuin an mawngah te ka lo vaw leh chawrh ṭhin a.

Primary kal rual te chu, an la tet bakah, ṭahbelh chin ṭhah kha an la ni a. A buaithlak ve thei tak tak a ni.

Chuti chung chuan min ngaina ve hlawm em em chu a ni si a. Ka ti ṭap reng reng chuang lo a, Miss Mahruaiin a sawi uar mah mah ve bawk.

Naupang bula awm te chu a nuam a, tihparat hi an nuam hlei hlei. "Miss min ti duh ṭhak lo hlawm lehnghal a, an sual hlawm tak tak a ni", ka ti lang lang a. Min nuih ringawt zel.

"Dindin, lo thawk tak tak rawh", Principal-in a ti leh. "Post ruak a awm loh te chuan, ka lo thawk thei ringawt hleinem", ka ti a. "Kan siam chawp mai dawn lawm", a la ti ta deuh deuh.

"Ka peih teuh lo ka tih kha, zirtir hna hi ka chem kalna a ni lo", ka ti nuah nuah. Naupang zirtir reng chu e, ka peih thlawt lo, chubakah ka zaidamnain a tlin si lo, an nu leh paten an lo complain reng mai ang.

Tuna hetia reilote U Ruati ai ka zirtir pawh hi, ka hne thawkhat tawh. Lenna tur dang ka hre bawk si lo.

Ka phone a ri tleng tleng a, "U", a insut faih faih. Thil dik lo a awm chiang a ni. "Lawk rawh aw", ka ti a. Ka haw tawh mai tur thu hrilhin ka chhuak zui a. Anni pawh chuan result an check sang sang hlawm.

"Ka fail", a rawn ti ṭiau a. Ka thaw hawk. In chhungah ka lut a, "Siamtei chu a fail, midang chu an pass a", ka nuin a lo ti sap. "Siamte, i rilru a nâ em?", ka ti a. "Nâ e", a rawn ti hliai a. Ka lei ka seh ringawt.

"I zir nawn leh dawn em?",

"Zir nawn pawh ka phur lo, ka zir ṭhat nen, pass ka inring sin le", a ti chuai ruih a. Awm ka tihpui lutuk, Siamtei hi chu kan en ve ber kha a ni a, a taima bawk nen, a fail hi keipawhin mak ka ti.

"Siamte, zir nawn leh rawh, keipawh min en la, kum hnih nih hi ka zir nawn",

"Ka zak alawm, ka ṭhian te ho chuan an subject duhzawng an zir tawh dawn bik a", a lo ti nang nang. A insut faih faih pah a, ka hriatthiampui lutuk.

Zahthlak tihpiah lam a ni. "Siamte, zak duh reng reng suh, i ṭhian pass ho te kha e, i la kalsan ve vek thei, tuna an pass-na aia ṭha khan nakumah pass i tum dawn alawm", ka ti lang lang a. Ngati nge maw, ka thawven bik em em mai le?

"Siamte, ka sawi chu i hria em? I zir nawn leh ang a, nakumah chuan e, i Topper var var zawk mai ang", ka ti a. Ka nuin min lo en kiau.

"Ka pa te hi", a lo ti a. "Ka patea chuan engpawh sawi se, ngawi mai mai la, i rilru kha i tipaukhauh tlat dawn nia", ka ti a.

Ka patea chuan engpawh lo sawi se, a thleng tur chu a thleng vek tawh, a bul aṭanga ṭan ṭhat leha, a hma aia sang zawka thlen tuma bei leh a ni mai.

Ka nau te ho zingah Siamtei chauh a fail a, ka nau pass ho te chuan min umpha mai dawn lawm le. Ka fail leh phei chuan, awi kadreiii!

Mahse, lo fail leh pawh ni ila nge pawi, khawvel a tawp dawn pawh ni hlei lo, School pawh kal thei lo, Board result nghak chu sawi loh, exam thei lo pawh an kat nuk laia, fail pawh kan vannei daih zawk.

"Siamtei chu aww, a lainatawm mang e, a pa bulah pawh hau miah lo turin ka tih kha", ka pa chuan a ti a. A tuarpui tih a lang ve reng. "A thiam thei ber a nih vei nen, a pawi tak tak a ni", ka nu pawhin a ti a. Ka pain ka patea hnena Siamtei hau lo tura a ti chu ka lawm angreng.

Kei hi, fail ta ila, engtin tak min ti ang maw? Ka nu hian pasal min neihtir a tum tak tak reuh phei chuan, a chi dawn lo e. Ka pass dawn, chu chu a ni mai.

Hui, pass kan lawm nghal a, Siamtei ding zum zut ka hmuhin ka khawngaih lutuk. Ka bulah char char ka awm tir a, a rukin a mittui a hru leh ṭhin. Ka hrethiam lutuk, kum hnih chuang result ka nghak a, ka la fail zui.

Pawn lamah chuan ṭha deuh angin awm mah ila, chhung lamah chuan ka nâ veng veng tho. Kei ai mah chuan ka chhungte ka khawngaih zawk.

"Lockdown vang vak, online class an tia, phone an kawl a, remchangah lain class aiin online an ti tam zawk a", ka nuin midang bula a sawi te khan, a rukin ka ṭap ṭhin.

Min hmuhah erawh chuan ka nui liam mai mai a, mahse; nâ ka ti ve thei lutuk. Lockdown hun a ni kher bawk nen. Mahse, remchangah lain class aiin online kan ti tam chuang lo. A hunah chuan lehkha kan zir ve tho.

"Dingdong, i huphurh em?",

"Teuh lo nasa", ka ti vah a. A nui duh ṭhak lo. "College va kal rawh, attendance i ui lo em ni?", ka ti a. A lu a thing nawk nawk. Kan result a chhuak dawn a, zing chaw ei kham aṭang kan inah a awm tawh.

A che sek a, kei ai pawhin a huphurh zawk. A result kan nghak zawk te hi a ang. Siamtei pawh fel deuhin school a kal leh a, "Kan class-ah ka upa ber dawn maw ka tia, hmeichhe pakhat nen kan kum a inrual a, kan inkawm chawt nghal", a ti a. Ka lawmpui angreng.

Kan result a chhuak ta, Nga-ki a meng phawk nasa mai. Ka ṭhu kun ngaih. Ṭap lo turin ka insehruh fan fan bawk. A ni em em tawh lo!

"Dingdong", beidawn hmel zetin Nga-ki chuan a ti a. Sawi mai tur pawh ka hre lo, ka nun hi ka ning.

"Kum sawmhnihpakhat i ni tawh, i ṭhian ṭhenkhat te chuan pasal an nei tawh a, i la fail leh nghal. Pawl sawmpahnih pawh kum thum i beihna tur a ni tawh", ka nu chu a âng leh hlawih hlawih a. Ka duh vanga fail ka ni tawp si lo.

"School ka kal tawh dawn lo a nia aw, pasal min neih tir i tum kha",

"Khawilama pasal neih, tumahin an duh lo che, ṭawngthei ropui si, in chhungah lah che ṭha duh bawk si lo. Mu zen zuan reng mai, i duh emaw duh lo emaw school i kal dawn tho tho. Pawl sawmpahnih i pass chhuah hma chu i kal dawn", ka nuin a tih chuan ka lu ka thing nawk nawk.

"A awihawm lo em mai a, open-in ka exam mai ang, ka duh tawh zawk. Uniform-te haka, School kal leh ka peih tawh miah lo a nia", ka ti lang lang a.

Ka nuin min melh rang nasa mai, school kal ka duh tawh teuh lo mai. "I Pu David-a thawhna, BH-ah sawn i kal tawh ang", ka nuin a ti leh kharh kharh a. Ka pain a mitmeiin ngawi turin min lo ti.

"Ni e, Bawihte, kumin chu han bei leh hram mai teh, Siamtei nen in ṭang ang a, kumin chu in chhuak tawh em em ang", ka pain a ti dap dap a. Boruak ka hip lut ngheng ngheng ringawt.

Ka room-ah Nga-ki nen kan lut a, chaw pawh a ei ve nghal. Ka ṭhiana hi chu ka va fak tak.

"Hey, a ṭha vek dawn a nia", ka dar tawn tawna vuanin a ti a. "Ka vanduai thei bik e, ka pass hi a rem lo a niang a", ka ti a. Ka mitttui a hnâm ṭiam ṭiam.

"Rem e a, kuminah chuan i pass tawh ngei ngei ang, han bei leh hram rawh aw", a ti a. Ka lo bu nghat nghat.

Feltea a pass a, class 11 a zir tawh dawn, min umpha ṭep lehnghal. Feltea chu ka nutei fapa a ni a. Ka nuin a fak char char, a nau fapa fak chu a tihtur tak pawh a ni.

School panin ka kal hnak hnak a, ka pain a ruala kal turin min ti naa, car nen chuan kan thleng hma dawn lutuk a, ka duh lo.

"Lalte", ka bag a pawh avangin hnung lamah ka eu dawrh. Laltei maw?

Ka hnung lam ka hawi nghal vut a, "Ka pu", ka ti chhuak hliai a, a nui lai a tawp chawt.

"Class-ah awm ṭhat tur aw, kei chuan bengchheng ka ngai thei miah lo a nia", a ti sup a. A nui sak lehnghal.

"Ka pu, kei chuan History lawm ka lak", ka ti a.

"Ka pu tia koh rual ka la nih loh hi", a ner zui sak lehnghal. A sirah ka kal ve hnak hnak a, "Tu nge History teacher, mipa nge hmeichhia, a thinchhia nge a fel?", ka ti a.

A lu thing nar narin a nui suk suk. "History teacher chuan a class-a bengchheng a ngai thei lo", a ti sup a.

Ka ner sawk. "Ka pu, nangmah hi maw?", ka ti a. A thaw ri hrawih. "Sir tiin min ko tawh rawh aw", ka chalah min pen fawk.

A nâ lutuk chu ka tuai vat vat a, amah lah chu a la kal nul nul zui. Min ngaihtuah tawh lo reng reng. History teacher maw a nih, Science teacher a nih ka lo rin nen, a awmdan leh hawiher leh hmel en chuan a ngawichawi sia, Science lam nen a inhmeh dawn sin le.

Mahse, a ṭha vek e, ka kum rualpui chu an awm tawh lo phawt ang a. Pawi hleinem, ka thu ber ang a, a nuam dawn lutuk.

BH-ah hian ka kal vawikhatna tur a ni a, a nuam turah ngai phawt ang.

***Kan result nghahah chhanna duhawm tak kan dawng lo pawh a ni thei, mahse; kawng tawpna a ni lo a, kan kawng bul ṭanna tur chauh lek fang a ni. Mi hlawhchham tiin min kawk mah se, an hriat hauh lo chu, kan hlawhtlinna chu a inṭan der tawh zawk tih hi a ni. Beidawnna pawh a beidawn rak khawpa beih fan fanna hi a hluin a mawi a, a par chhuak a rimtui zawk fo bawk***


Show post links
Top

[Ngaia]

Keima Pu: Sir Sawmtea
Chapter-5
Ziaktu: Cck Lalchhuanawmi


BH-ah hian ka kal vawikhatna tur a ni a, a nuam turah ngai phawt ang.

Class 12A room zawn buai chung ngai loin ka hmu nghal vat a, classroom chhungah an lo zi mum mum. A thawipikthlak lutuk.

Min en duh hlawm em em lehnghal. "Vawiin aṭangin ka lo kal dawn, a hnung berah sawn ka ṭhu dawn a nia", ti pahin tlar hnung ber awmnaah ka kal nghal a.

"Kan ṭhutna a nih kha", ka thlen hma hmain min lo ti nghal a. Bengkhawn loin ka kal nul nul tho.

A kil bera bag chu dawhkan chungah dahin ka hnawl phei a. Ka ṭhu nghal zat a, "Tun aṭang chuan hetah hlir hian ka ṭhu tawh dawn", ka ti a.

Bag neitunu chuan min melh rum nasa lutuk. Midang hoin mak ti deuhin min en luih luih a, zak thei lo min tih hmel deuha min en tawk lah bo lo, an inhrilh ru sar sar hlawm bawk. Engahmah ka ngai tawp si lo.

Open-a exam an phal lo vei a nih kha, suahsual rawng ka bawl hrep ang a, a ni mai alawm. "Dar engzahah nge dar a rik dawn?", bag neitunu melh ralh pahin ka zawt a. "A rik hunah", a lo ti hlur. "Naupang te te si, i van zak lo tak", ka ti hlak a.

"I zak lo fe zawk, repeater ve mai mai, thuneih rawn tum ngawt suh", a ti lang lang. Ka lairil a nâ ve det. "I thu lo, repeater tur pawh ni ila, nang ai ka upa, aia upa zahna i nei lo lutuk", ka ti let a. A ner salh salh.

"Hey, ka bulah hian ṭha deuhin lo ṭhu la a ni mai", ka ti a. "Ka ṭhu bawk lo ang", ti hlakin a bag akin tlar hma berah a zu ṭhu tau nghawng a. "Nangni ho kha, in ṭhutna ngaiah hian ṭhu ang che u", ka ti a. Bag neitunu ṭhutpuite an bu nghauh nghauh. Min hlau chiang a ni.

A ṭha, min hlau rawh se. Chutih laiin dar a lo ri a, Nilaini a ni a, kan line-up a nih loh hram ka beisei. Ka bula ṭhu chu a hming ka zawt a, "Rosy",

"A nih, Rosy, engtin nge kan awm dawn?", ka ti a. "Nilaini hi chu mahni class-ah ṭheuh Devotion kan hmang ṭhin a, rollno inkawp te tein kan kaihruai ṭhin a, hmeichhe rollno leh mipa rollno kan inkawp a, chutiang chuan kan ti ṭhin", a ti dap dap a. Ka lo bu nghat nghat.

Line-up a ni lo chu a zia e. Song book leh English Bible te an phawrh chhuak sap sap a, ka hawi ka hawi ringawt. Class Teacher ni ngei tur hi a lo lut a, kan lo wish dial.

"Tu nge?", ka ti sap a, "Miss Sangtei nih saw, kan class Teacher hi a nia, Devotion min lo hmanpui ṭhin", Rosy chu a phun sar sar a.

Devotion kan hmang a, keimah hi ka hul ruih. A hrehawm lutuk, lunglennain min lo tuam hlup hlup nghal a, ka school kalna hmasa kha ka ngai lutuk!

Devotion kan hmang zo a, "Kimkim, ngati nge, a hmasa berah i ṭhut a?", Miss Sangtei chuan a ti a. Tlar hnung ber aṭang chuan ka hmu pha che che a ni. A tawi ve reuh lutuk a.

Miss Sangtei bawk chuan, "Takah, student thar kan nei a, khawnge a awm?", a ti lang lang. Ka ding a, "Eh, a hnung bera i lo ṭhut vang a nih kha, i hming min hrilh la tiraw?", nui sangin Miss Sangtei chuan a ti a.

"Laldintluangi", ka ti a. Miss Sangtein kut ben tur a tih avangin min lawm nan, an beng dual dual. Beng over fal lah an awm.

Mikhual ang mai niin ka inhria, ka riang ngawih ngawih mai ni. Keimah lo repeater dang pahnihin an lo zawm ve bawk a. Zami leh Hruaii. Class dangah pawh repeater dang hoin an zawm ve sup sup tho a. Vawiin hi repeater inthuruala school kal kan ang lutuk.

Ṭhutna kan singsaa, Zami leh Hruaii te nen, a hnung berah chuan kan ṭhu a. Rosy-i leh Kimkimi te ṭhianzaho chuan an ṭhutna an thlak.

"Repeater nih vang maia, inthlahrunawm zawk tak", Rosy-in a ti nang nang. Class CR a ni ve a, a thu ka awih duh si lo, a lungawi lo pawh a awm reng.

"Lalte?", ka hnung lam ka hawi a. Ngati nge maw ka pu hian, hetianga min koh le? Min koh apiangin ka eih ve ziah lehnghal. A ṭhing e, min koh dan ber kher hi.

Ka bul a lo thlen chuan muangchangin kan kal a, "A nuam em?", a ti sup a. Ka melh chho ralh. A period-ah khan min hau tih pawh a hre tawh lo nge ni.

"School ṭan nia inhauh nghal chu a nuam i ti bik miah lo ang", ka ti nang nang a. Inhauh nghal kha chu, a nuam tehchiam lo.

"Angkhatin kan en che u tihna nih kha, repeater nih vangin duhsak bik in ngai chuang lo a", a ti sup a. Ka'n melh chho leh ralh chuan a nui suk. "Ka awih pit lo e a", ka ti hlak a. Ka thaw halh halh.

"Lehkha zirah ṭuan la, i pass tawh hrim hrim", kiai deuh sakin ka lu a chul thuak thuak a. Ka thla a muang huai huai ringawt mawle!

"Kum hnih chuang ka zir tawh a, zir ngai zir nawn leh tlut tlut te chu, ka peih tawh teuh lo", ka ti hlur. Open mawlh chu ni, school pangngaia kal hi chu, ka peih tawh thlawt lo.

"Lalte, chutiang ringawt a ni lo", a tih chuan ka ding chawt a, amah ka en. "Ka pu, khati khan min ko suh, a ṭhing lutuk, a Mizo ngawih ngawih, a ṭhing em mai. Hmanlai huna awm ang maiin ka inngai, khatianga min koh apiang khan hmanlai huna let leh ang maiin ka inngai. A ṭhing lutuk, vawikhatmah khatiang khan min ko tawh suh", ka ti nang nang a.

Ka hmui ka tipawrh tarh. Dawhthei takin min ngaithlaa, min nuih sang. Khatianga inkoh kha chu, ṭhing ka ti ve thlawt. "A Mizo ngawih ngawihte i tih, Mizo i ni lo em ni?", ta lehnghal ah.

"Mizo te chu ni e",

"A nih chuan, eng nge ṭhing te i tih, Mizo kan nih chuan, kan Mizo hminga inkoh te chu a nalh zawk daih alawm", a ti dam dup a. A engamah hmain min hneh em em a, a ṭawngka chhuak leh a chezia te avang chuan ka tuiral nghal ngawih ngawih nia!

"Khawiah mah peng loin inah tlang nghal ang che", ka chal pen tai tai chungin a ti a. Mak ti deuhin ka en ringawt. A nuam phian lehnghal.

Amah zawk chu, kawng hnuai zawkah a kal nul nul a, kei kawng chho zetah ka chho. Ka hmuh theih chhung chu ka thlir zui reng a, ka nui var var.

School kal tinuamtu tur ka chhar ni maiin ka hria, chutih lai erawh, veng khata awm siin kan haw kawng erawh a dang a, mahse; kawng thui lo te kan zawh dun pawh kha, nuam ka ti riau.

"School chu a nuam dawn em?", ka pain a tih chuan ka chhan hma hmain, "Nuam a ti chho zel mai ang", ka nuin a lo ti hmanhmawh. Ka nu hi chu awww.

"Ka mutsan dawn che u", ka ti a. Room-ah ka lut daih. Khumah ka bawk thlawp nghal a, lehkha zir lam reng reng rilruah a lang lo. Surprise ṭest pawh nei dawn ila, ka full mark sa, chutiang vel chuan ka confiṭence level hi a sang em.

Lalramnghaka vang vek, Ṭ hman ka uar lutuk mai ah.

Ha nawtin ka hmai ka phih a, ka duhtawk lo, ka lu tihuh loin ka inbual. A lum em a ni.

Nga-ki nen kan inbe leh hrep a, kan hun hman dan zawng zawng kan inhilh leh vek. Ka va ngai tak, kan kum a inrual bakah, class 7 aṭang kan in classmate char char a.

Class 12 ka nawn laiin College min kalsan a. Mahse, veng khata kan awm avang khan kan inkawm thei tho.

Tunah chuan kan inkawm thei tawh si lo, chubakah school ka la kal leh ta deuh deuh.

Kan inbiak zawh hnu chuan whatsAap-ah ka lut a, group hrang hrangah sang chuang fe message a lo awm hman. A ṭhen chu la typing mek te an awm. Kan Marka Group chuan ka mit a lak ber avangin ka hawng a.

*Kan zinkawngah chauh changte, beidawn changte a awm ṭhin a, chutiang hun a lo thlen pawhin chung lam kan hawi tlat dawn a nia. Min tichaktuah chuan engkim kan ti thei a nia, Philipi 4:4* ka chhiar chhung zawngin ka khi ṭhaw.

A bik taka min fuihnaah ka ngai, ka thaw huai a, ka âwmah phone ka dah a. Inchung enin ka thaw huai huai.

Ka sawi thiam dan berah chuan, ka hlim tih a ni mai.

Lukham hnuaiah phone dahin ka ṭhu chhuak a, ka ṭawngṭai leh te te.

"Lehkha zir ṭha hle ang che, phone ringawt khawih lo la, school-ah pawj fel deuhin awm ang che. I pu David-a ka zawt vek zel dawn nia",

"Ka zir ṭha chung pawhin ka fail tho a nih hi, Examiner ho hi ka ring thei tawh lo, duhsak bik an nei chiang a ni. An tham ṭhin a ni chiang a, kei aia thiam lo ho pawh an pass sup sup a nia, MBSE building saw, ka la bomb darh ang mawle", ka ti lang lang a.

Ka nuin, "I chaw kha ei mai mai rawh, ṭawngthei lutuk mai, school-ah ṭha deuhin va awm la, lehkha zir ṭha la a ni mai", a ti a. Ner salh salhin chaw ka thai ka thai ringawt.

Ka nu hi chuan, âw nêm deuh zawk hi chu min hmankhum ve ṭhin se chu, ka ti thei lutuk. Mizia leh ṭawnghmang ti ringawt lo hian. Mahse, nu te chu nu nge nge an nia, nu dang kan nei tawh chuang lo a.

Mizo period a ni a, dawhkan bawhin ka muhil daih, ka hre hne hlei hlui tawh lutuk. Engkim mai hi ka ning vel vek.

"Ngati nge kan fail bik le?", Zami chu a thaw halh a, "A hrehawm ka ti", Hruaii chuan a ti ve bawk. Kei phei chu kum thumna la ni zui.

"Lungngai mah ta che u, pass ho te khan BA-ah min lo nghak dawn alawm", ka ti a. An pahnihin an nui hak hak. Boruak a thawl deuh e.

Lunch break a nih avangin an phu suau suau hlawm a, canteen-ah lah an tlim hmur. An hlawk ngawt ang, canteen te hi ka nghak ve mai dawn mawni le.

Science Block lamah ka kal a, "U", min lo vai lauh lauh. An classroom chhungah ka lut a, "Eng nge i pai?",

"Artui leh Tomato kan pawlh, i ei ve leh duh em?",

"Duh lo, ka puar, nangmah khan ei rawh, ka kal dawn", ka ti a. An classroom ka en kual a, Science room tih takah, a Science ngawih ngawih vek. Ka nau Vanropuia pawhin class 11Science a zir der tawh.

School khatah kan la kal ho zui, ka nau te reng reng hian min umpha vek mai dawnin ka hria. Chuvang chuan, kumin chu ka pass tawh ngei ngei a. Mahse, lehkha zir chu, rilruah lang leh chuang miah nang.

"Dindin?", Pu David-a chuan min lo hui a, an Office-ah ka lut tawp. Luh ka dil lem lo a, Senior hriin min man tawh niang. Science Block-ah, Science Teacher bik Office a awm a, Math Teacher chhe lo deuh a lo awm zui.

An dawhkan hmaah hian an hming leh an zirtir subject a awm vek a, Physics teacher ho hi an tawhkhirh hmel hlawm lutuk, an mum kâng hlawm a, pakhat erawh a cher.

"A nuam dawn awm em?",

"Ka hre nang, ka kal ṭan ve chiah lawm", dar chhin hakin ka ti a. Pu David-a a nui huah huah. A nuihzatthlakna ka pawh ve lo e a.

Ka pu period a nih avangin a lo lut a, "Good Afternoon Sir", an ding suau a. Ka'n din duh lo tlat leh pek kha. Ka va han sual thiam tak. A ho em mai a, min hmu thei chuang lo.

Mi 115 chuang zirlai kan awm a, Burma Sangha ṭin ang maiin, kan inhnawhkhum ṭun hi a ni ber.

Ṭhu tura a tih chuan an ṭhu leh dual hlawm a, dawhkan ka bawh leh a, a sawi ho tur hi ka hriat sa vek an ni bawk nen, ka rilru ka pe thei lo.

"Sir Sawmtea chu, a ṭhat ngaiin a la ṭha reng nih hi", Zami leh Hruaii chu an phun sar sar a, ka lo khi ve vur vur ringawt.

A âw thum deuh bal chuan min awi mu ka ti mai, ka mit ka chhing duar duar. Thawnthu sawi hi a ang lutuk, History chu thawnthu ang kha a ni ve pakhat tlat a.

"A nâ", ka rak ṭhat a, ka chal ka tuai vat vat a, ka tho chhuak chiang teh e. Kan ṭhutna hma chiahah dingin min lo en kiau a, chalk a vawr a vawr pah. A hmawr a zum leh nghalin ka hria. Chalk-in min vawm a ni maw.

"New Repeater, right?", a thle bak a, mak ka ti lutuk chu ka chal nâ pawh ka hre chang tawh lo. New Repeater te han tih, Min hre lo angin a awm mawle?

A kutin ding turin min ti a, a mitmeng thip zet chu ka en lui ve ngar ngar. "What's your name?", ka nui chhuak hawk. Min melh kar.

"Why are you laughing? Am i joke to you? Awmzia awm lo, ka sawi kha awmzia ka hre bik lo", a ti a. An nui tliar tliar.

Kei erawh, nuihna chang pawh ka hre lo. Min hre lo anga a awm hi mak ka ti ber. "Hey, what's your name?", a ti thum dut a. Ka phu uih lehnghal. Min tihzah a tum deuh nge mawni le.

A awmdan hi a mak lutuk. "Do you know English or, Do you know how to talk?", a ner kual vel a, dawhkan chungah a ṭhu a. An nui ru kur kur hlawm lehnghal.

"Yes, I know how to talk", ka ti bah nawk a, "Good, then, explain Cold War", a tih chauan, "Maw?", ka ti hliai. Cold War te chu Political Science daih alawm.

"Mawh, Cold War chu min han sawifiahsak teh le", dam thlupin a ti a. Ka thaw huai thei nia.

"Political Science daih a nia",

"History a ni ve tho lo em ni?", a ti sup a. A kiai deuh sak lehnghal. Ka va han hnek chak tak.


Show post links
Top

[Ngaia]

Keima Pu: Sir Sawmtea
Chapter-6
Ziaktu: Cck Lalchhuanawmi

"History a ni ve tho lo em ni?", a ti sup a. A kiai deuh sak lehnghal. Ka va han hnek chak tak.

"Cold War chu?", a beng a lo dawh hnai kher, a inkuangkuah hlun mai bawk sia. A intithu tak tak a ni. "Ka hre lo", ka ti bul hmuk a, ka ṭhu thla nghal zat. "Tuin nge ṭhu tura ti che?", ka ding leh chiang lutuk.

"Ṭhu rawh", a ti hmuk a. Ka ṭhu thla riai riai. "Zanin aṭang lehkha zir ṭan ang che", ti chang fakin a kalsawn ve hram. "A tizahthlak thei e", Hruaii chu a phun zui hlak a.

"Engahmah ngai suh aw, a awmdan ve hrim hrim a nih kha, nakinah chuan Hruaii nen hian min kap nasa ngawt ang, class 11 aṭang kan inhrawn tawh a nia, Awmpuia te nen kan pathum phei chuan min hrechiang bik lutuk", a ring rawn fan ṭawk ṭawkin Zami pawh a lo phun sar sar.

"Engahmah ngai lo e, min zawt thut sia, min tihamhaih vek alawm", ka ti sap a. An lo nui kur kur. "Hei, a vawmna che", Hruaiin chalk min pe a, ka rin dan chiah, a hmawr a zum. A va'n sual mai mai tak, ṭha deuha inkaihthawh ve mai awm hi a nia.

Keimah tein ka haw ve hnak hnak a, School hian Bus a neih avangin veng dang ho chu Bus-ah an chuang a. School hnaih ami ho hi chu Bus-ah kan chuang khat khawp ang. Ke pawhin haw mah ila, kan hrisel zawk ang.

Ka pu a haw rualpui thei si lo, kan venga school kal ve te nen kan inkawm mang si lo, a hriat pawh kan inhre lo tluk a nia, a khawharthlak ve reng.

"U, bye", Vanropuia chu ka bye bye let a. Nau te ho nena school khata kal chu, a nawm dan a danglam tlat.

"Thawmhnaw te lah hi, hmun tinah in dah a, dah fel kha a har lo lutuk. Hmun te lah a hnawk si", ka thaw halh ringawt. "Nakinah ka lo dah fel mai ang", ka au lauh lauh a.

"Ka dah fel daih tawh", a lo ti. Ka nu tak hi chu aw, U Siami haw pawh hi, ka nu lak aṭanga chawlh a mamawh vang a ni hrim hrim ang.

Thleng sil zawh ve leh ka nu leh pa ei tur Apple ka zai a, kei chuan a pum hian ka keih hmawk hmawk zel. "Ka inkhung dawn a nia", Apple pum khat lak belhin ka ti sap a. Ka room-ah ka lut nghal zat.

Sitting room bul retah hian ka room a awm a, chubakah tukverh leh lei a inhnaih bawk a, a zuanthlak hmiah hmiah theih. A chhuah ruk theih tihna nih chu. A nuam êm!

Lehkha zir turin ka insangmar ṭan, dawhkanah lehkhabu ka dah a, ka note hlui ho ka dah tel bawk a. Pen la chhuakin ka ṭhutna ka siam rem te tea, ka âw thian kharhin lehkhabu chu ka kiau a.

Ka thi dawnin ka hria, dawhkanah ka chal tauh datin ka nghat vang vang a, ka rilruah engmah a lut thei lo. Zir hnu tuh chu ka rilruah ringawt a awm.

"Lehkha ka zir thei lo a nia, engtin nge ka tih dawn?",

"Ṭawngṭai la, i zir thei mai ang", phone ka dah a. Nga-ki sawi angin lehkha zir theihna ka rilrua a awm theih nan, ka ṭawngṭai leh te te.

Chutah, lehkhabu kiau lehin ka ṭhutna ka siam rem leh te tea, "Mohen, Mohenjodaro", ka ti sap a. Ka beidawng lutuk chu, khumah a bawkkhup zawngin ka tlu nghal ṭhuai. A va han hrehawm tak.

Examiner ho hi ka haw ngawih ngawih, duhsak bik an nei a ni. MBSE building saw ka la bomb duh tak tak ang mawle.

Ka hmai ka phih a, dawhkan hmaah ka ṭhu leh, tun ṭum erawh ka ṭawngṭai khan awmzia a nei a niang. Chapter khat lai chu ka zir zo ve thei hram. Ka thaw huai huai a, a lawmawm tak tak a ni.

Ka phone lo ri chuan min tiphu nghek a, ka u ni lah rengin, "Bawihte, naktipah ka lo haw dawn a, eng nge ka lo hawn ang che",

"Ka nu te i hrilh tawh em?",

"La hrilh lo, lo ṭhawn thut che u ka tum a, ka lo thlen hma chu engmah lo sawi suh aw", a ti a. "Aw le, ka sawi lo ang", ka ti sap a. Min lo hawnsak tur min zawt leh.

"Sana ka duh, a dum aw. Pawl sawm ka pass mana min leisak ang kha, Phengphehlep dum awm ngei leh rawh se aw", ka ti nuah nuah a. "Zawn a va hautak dawn ve", a lo ti tham chhalh.

A zawng hmu leh em em mai ang. Mut hmain ka online leh phawt a. Group hrang hrangah ka nawi kual leh vak vak a, Nga-ki nen kan inbe pah bawk. Mi rel tur apui lah hi kan ngah.

A star nu chanchin te kan sawi a. *Dingdong, ka mut a chhuak ṭan, ka mutsan mai ang che aw* a lo ti a. Ka mangṭha zui ve mai bawk.

Dar zat ka en a, dar khat a lo ri der tawh. A tawp nan, kan Marka group ka hawng a, ka pu message lo awm a, an lo like tuar leh hlawm.

*Kan chungah engpawh lo thleng sela, vui mai loin lawm zawk ila, kan chunga harsatna lo thleng te hi mihring kan nihzia tichiangtu mai an ni. Philippi 4:13* tih hi a ni a.

Hetiang hian, group-a ka awm hma pawhin a ti fo ṭhin mile ka ti. Sangi hi a like hmasa tu-ah a ṭang hmasa ve ziah bawk. A duh ngawih ngawih a nih hmel.

Ka pu message chu, *Sawmte, i Bible chang dah leh, i thuziah hi a intu lo deuh hlek em aw ka ti, nizana thu kha zanina Bible chang hi ziah lan awm zawk tak a nia. Zanina Bible chang hi nizana thu nen a inhmeh tlat ka ti* tiin, an lo tuihnih a.

Ka pu lahin, "Bible chhiar ngai lo kan tam si a, Bible kan chhiar theih nan ka ti a nih kha. Lo sawi lo la, tumah pawhin an hriat tawp loh hi* a ti ve bawk.

Like leh nui thler duai duai emoji a tam thlu ngang mai bawk. Nui var varin ka chhiar thla den den a, ka pu hi, a lo lawmawm ru phian. Bible ka en a, a lo ni tak tak, nizana a Bible chang dah kha zanina a thuziah nen a inrem chiah chiah.

Ka ning e, eng emaw kawng zawng takin min hip ru ṭan riau. Ka chal ka beng dat dat a. School-a a mizia te nen, a thuziah te hi, ka sawi thiam dan ber chuan, a hlimawm.

"Bawihte, i phone tui thun a ngai tawh em?",

"La ngai lo, mahse; a ngai ṭep tawh ang. Inhlawhna tur ka hmu thei lawk lo a",

"A ho lutuk, i pa i thun tir ziah dawn nia", ka nuin a tih chuan ka nui zui hak hak. Ka pa pawh a nui kur kur a. "I nu sawi ang khan, i lo sawi zel dawn nia", a ti a.

Ka nu hoin kan nui bâwk bâwk. Âng tam ṭhinin ning viau ṭhin mah ila, nu hmangaihna chuan min kuangkuah leh nge nge zel a nih hi!

School kal tura insiam pahin, Nga-ki hla min lo thawn ka ngaithla pah a. Vawi thum vel ka ngaihthlak hnu chuan ka sakpui thei tawh, a nalh em em lehnghal. A music leh hla thu te chuan min thlawhtir delh delh mai niin ka hria.

Cody Simpson-La Da dee tih a ni a. Cartoon film, Cloudy with a Chance of- eng nge kha aw, Meatball a niin ka hria. Chumi puala an siam a ni a. A nalh tihpiah lam a ni.

"La da dee, La la da doo, La da da me, La da da you, La da dee, La la da doo", ka sam ṭawn pah tein ka zaipui rat rat a. Ka lam zawr zawr pah bawk. Thawh hlim aṭang mood a dik fulfill nghal vek.

Sam ṭawn san an phal loh avangin, tukkhum hnai retah kan ṭawn hlawm vek a, kan pawnfenin kan khup a pel vek a, sun cream tih loh hnawih an phal loh avangin ka da dupin, kan ṭhing ngawih ngawih.

Mahse, a mawipui tura te chuan an mawipui tho tho. Keini ang ve tan hi chuan, inchei fe pawhin kan nalh zo lo a ni a. Kan uniform angte hi chu kan mawipui zo lo pawh a awm hliah hliah.

"Rules chu dan a ni a, dan chu rules a ni", Pu David-a chu a au lauh lauh a. Kan nui vak vak, a uar fal te chu an nui thler duai duai. Rules a tibo vek alawm. Principal-in thu pawimawh a puan lai pawhin ka nui kur kur.

"Lalte", ti supin ka hawi phei a, ka pu chuan a hmui tawkin ngawi turin min lo ti. Ka bu nghat a. Pu David-a thusawi kha a lo lang zel tho a, ka kâ hupin ka nui leh nge nge zel.

Kan tin leh sam ṭawn dan te, mawza kan bun dik nge dik lo tih te, pawnfen chhing leh chhing lo te an check a. Ka pu pawhin a check ve tlauh tlauh. Mipa sam a check mah zawk.

T-shirt dum, a nghawng bial a ha a, kekawr dum a ha bawk a, a pheikhawk pawh a dum. A sana pawh a dum, a sam pawh a dum hlap a. Buk chiah si lo, buk deuh reuh a ni a, a tiphirsi ve hlek lehnghal. Chung zawng zawng chu ka lo check ve nghal vek.

Ka sa pup pup a, kan bula ding, kan class mipa ho sam a lo check-a, a engamah hmain ka lâi ringawt. Ka dinna zawna ding, kan class mipa sam a lo check chuan, ka bul retah a ding bawk nen. Ka lâi chhe lutuk chu ka kut ka tuai ka tuai ringawt. A va hrehawm reuh tak.

"Laltlanhlu, i sam hi vah a hun tawh a nih hi, Sir David-a bulah va in report rawh le, Sipai angin aw",

"Yes Sir", Tlanhlua chuan a ke per chhakin salute chungin a ti a. Kan lo nuih hak hak. Ka puin Tlanhlua thuawih taka kal hnak hnak a lo en zui leh, keiin ka pu en tuma ka hnung kam ka hawi nen, kan mit a intawng siah a, ka mit la sawn vatin ka hmalam ka en ngur.

A zahthlak thei e. Ka ṭhutnaah ṭhu vatin note buin ka inzap hliau hliau a, khaw lum nen, zah avanga sat pup pup nen, a inchawbe lo lutuk. Miss Sangtei roll call turin a lo lut a, a period a nih avangin a awm tlang.

"Miss, ṭhutna hi rotate ang u", Kimkimin a tih chuan ka ner sawk. Ka peih lo reng reng. "In in rotate emaw ka tia", Miss Sangtei chuan a ti hliai.

"CR i nia, i thu thu aw", Miss Sangtei chuan a ti dam thlup a. "Miss, ka thu an awih lo lutuk", Kimkimin a ti nang nang. CR tak tak pawh a ni tawp si lo, Assistance ve mai mai. Ngawi rengin ka lo hnial char char.

"Hmangaih, Hmangaih, ding teh", kan CR tak tak zawk chu a ko a, khi ṭhawin a ding. Chhe zep zuap e. "Miss, kan rel ṭha mek alawm", Hmangaiha chuan a ti ve bawk. "Ex nih vangin inbiak hreh chuang lo tur aw", Miss Sangtei chuan Kimkimi nen en dunin a ti a.

Dawhkan ka beng chawrh a, an pahnih hian an ni tawh tihna ni maw, an va inhmeh dun ve. Kan nui dual a, Hmangaiha ber lah chu a nui uarah a ṭang.

"Hmangaiha hian engtin nge a duh theih zawk le?", nui kur kur pahin Hruaiin a lo ti. "An inhmeh phian ka ti, sawirem ṭha leh ang u", ka ti zawi sap a. "I ti awmang lo em mai", ka mala lo beng hlakin Hruaiin chuan a ti a.

Kan nui huah huah. Ka la sawirem leh dawn khawp. Naktuk aṭang rotate-in kan kal dawn a, Kimkimi ṭawng theih vang vek. Pawi lo, naktukah kan hnungah a ṭhu dawn lawm, ka va han tirethei dawn tak.

Zinga ka hla ngaihthlak chuan min run reng bawk a, ka bu leh dat dat ṭhin a, ka rilruin ka sakpui leh luah luah zel.

"Vawiin hi i nui reng, ngati nge a?", chaw hmuam pungin Zamin a lo ti. "Hmangaiha leh Kimkimi kha mawle", ka tithlarawk a. Hruaii a nui hak.

"Sawirem chi pawh an ni lo, kei chu ka be peih lo, Bus-ah pawh a intithu thei em mai", Zamin a ti leh. Ka lu ka thing ringawt a. Hruaiin, "Kei chu, Hmangaiha hi a fel ka ti", tim daia a tih chuan Zami nen kan lo 'eeee' nghal vat.

"In rilru a kawi lutuk", kun ngaihin a ti a. Zami nen inenin kan ner salh. "Ka star ti ṭha ve hle hle la", ka ti a. Zami a nui zui huah huah.

Chaw ei lai pawh sawi theih tawh lo, "Ka star lo, a fel ka ti ringawt alawm",

"Hmeli, inzep kual lo vel mai teh aw, Dindin, hemi te hi sawirem zawk mai teh ang", Hruaii hnung beng hlak pahin Zami chuan a ti a.

"I tidik, CR ber kan control theih tluka hlu a awm lo", ka ti zawi sap a. Zami a lo bu nghauh nghauh.

Ka u lo haw tur thu ka nu leh pa ka hrilh lo a, a rukin sana ka chah mawlh mawlh. Min lo hawnsak tur hi a ni ringawt. Ka pu nen sana rawng inang ve ve kan nei dawn a, a nuam dawn lutuk.

"Nga-ki?", ka âwm ka dawm vang vang. Khum chungah ṭhuin boruak ka hip let kâwk kâwk a, a dik nge dik lo pawh ka hre lo.

"Ih maw, ka pu hi ka duhin ka hria", ka ti zawi sap. "Tu maw?",

"Ka pu, kan teacher hi",

"Tlangval nge, nupui nei tawh", a lo ti a. Tlangval a nih thuin ka lo chhang.

"In inhriatna a rei tawh em?",

"Rei ve thawkhat tawh, ih maw, Shillong aṭang khan kan lo haw rual a, khatah kha chuan kan inhre lutuk lo, kan veng a inang tih pawh ka hre lo", ka ti dap dap a.

Ka sawi zawng te chuan ka hlim thur thur lutuk. "I duh tak tak mi?",

"Ka hre lo, duhin ka hria", ka hmui ka seh niah niah. "Nga-ki, ka duh tiin i nemnghet thei em?", keimah zawkin ka ti leh a.

"Nemnghet, first at love sight te pawh a awm hi, mahse; i duh tak tak leh tak tak loh fiah nan nghak leh phawt ang, englo, la nemnghet lo mai ang", a ti nuah nuah.

Ka lo aw ve hmiah hmiah. Mahse, vawikhatnaa kan mi hmuh te pawh kan star ṭhin tho a, Nga-ki sawi dan takah, first at love sight te pawh awm a.

Mahse, naaa, nghak leh phawt mai ang. Vawiinah pawh zawhna min zawt miah lo a, ka mu pawh min kaitho miah lo.

Kan mit a la intawng zui, ka ngaihtuah apiangin tu'n min hriatpui lo hian ka lâi ringawt zel lehnghal.


Show post links
Top