DEPUTY_COMMISSIONER By_CVL_Awmpuii (Completed)

[Ngaia]

DEPUTY COMMISSIONER
By CVL Awmpuii



Chapter 37



Vanmala leh U Faktei te vitamin min lei sak chu tha takin ka ei a. Ka ngaihbel nge tukinah pawh ka pum a la che leh ta miah lova. Vawi hnih chauh ka la ei si a, ka that pui dawn pawh a ni mai thei. Chutihrual chuan rai no luak chhuak vel hi chu nau paiin a ken tel a ni a, a reh mai dawn lo tih chu ka hre tho.




Nilengin Vanmala'n computer ah eng eng emawni a chhu leh a, file chhah zet a sign mawlh mawlh bawk a. Ka nu nen kan inkawm nileng leh a. U Faktei erawh hna ah a kal tawh thung.



Zanah chuan Vanmala nen ka nu chungchang kan sawi dun leh a.



"Tukina kan inbiak khan a inthlahrung ve hle in ka hria" ka ti hap a. Tunlai chu ka rilru a thil awm awm hi ka pasal bulah ka sawi chhuak zung zung zel a. A hmaa thil vei nei renga sawi chhuak ngam lo ang kha ka ni tawh lova. Lehlam takah chuan a thawven thlak phian mai.




Vanmala chuan ka sama chul hauh hauh pah hian "Nak zan lamah kan va leng phei dawn em ni?" a lo ti sup a. "Ka pa nen lo len an tum alawm, ka nu chuan a sawi a" ka lo ti vat.




A lo bu nghut a "Lo leng rawh se, ka nu te nen pawh han inhmu tawn sela an inbe pangngai chho leh thei mai ang. Râl atang ringawt hi chuan engmah a fel tak tak theilo. Hmaichhana thil sawi ho te hian a chiang a, thu inhmuh lohna te pawh a fel duak duh zawk" a lo ti dap dap a. Ka lo bu nghat nghat mai.




Zingah chuan tum lawk em em lovin Vanmala nen chawhmeh bazar in kan chhuak thut a.



U Faktei chu zingkarah khan hna thil vangin a chhuak daih tawh a. Ka nu lah chu chawhmeh bazar a han chhuak tur êm chuan ka khawngaih ve deuh bawk si. Kei lah min ngaihtuah em em a, min tir phal si lo. Vanmala a âwl ta ber a, ka nu in a tir ta kha ania.



Dik tak chuan amaha kal tur ania, mahse ka khawngaih ve deuh tlat a. Patling pui amaha chawhmeh a han en kual vel tur ka ngaihtuah, ka lainat tlat pek a, ka zui ve ta chu ania.




Bazar ah chuan kan inzui ve dat dat a, ka kutah nghet zetin min chelh run a. Rin ai takin chawhmeh chu a en kual thiam zek lehnghal a.




Bazar nu ho biak dan te chu thiam tak a ni, ka kalpui ve tak nain amahin engkim a lei fel vek a tih theih ang.



Chawhmeh te chu a en kual a, ka hmazawnah rawn lekin "I ei châk em?" a ti leh thin a. "A tui ngawt ang" ka tih apiang chu a lei miah miah mai ni.



Darkar 1 vel hnuah chuan kan in lei fel ve thei hlauh a. Kan chawhmeh lei a thahnem bawk a, bawr tak kan ni.



Vanmala'n thil ei a rawt zet na in chawei a hun tawh tho a, in lama ei turin kan haw ta zawk.


Kan haw tur motor dahna kan pan lai chuan Rinmawia kan hmu nawlh mai a, a fapa a lo pawm bawk a. Vanmala chuan ka kut chu a lo chelh nghet sauh a.



Rinmawia chuan min rawn melh vung vung a, "Helamah in awm elo?" pangngai tak hian a ti a. Ka chhan hma hauhin ka pasal chuan "Chawlh kan rawn hmang anih hi" a lo ti churh a. A aw chu a nelawm fahran lo.




Rinmawia chu a hma zawng aiin hmuh a nuam ti tawp mai ang. A cher zawr deuh kha a lo thau veleh deuh tawh a. A vun te pawh a hma ngawt ai kha chuan a lo nung viauin ka hria. Ka engmah a ni tawh lo bawk a kan inhmu thut pawh chu chutiangin ka danglam eih lo.




Vanmala hmel chu ka en a, a nelawm fahran lo khawp mai. Chutihrual chuan Rinmawia erawh a hmel a pangngai hle thung a, a fapa nen chuan an inang hliah hliah.




"In bazar em ni?" a tih leh chuan "Aw..." ka lo ti tha ve mai a. Vanmala chuan ka kut a chelh hneh tawh lutuk.



"Kan va bazar ve ang e, anih phawt u" pangngai tak hian a ti leh a, a fapa pawm tha sauh sauh chung chuan min kalsan ta a.




Vanmala hmel tak nguk chu hmuh a hrehawm lek lek. Rinmawia kan hmuh thut vang khan a awmdan a danglam pawh a ni mai thei. Mahse amah ber hian a sawi tawh a, ka engmah ni lo chu a rilruah an thawk pha lo. Rinmawia kha ka engmah a ni tawh miau lova, a engamah hmaa min rin chhiat ngawt loh hram ka beisei.




Kan motor dahna kan thlen thleng pawh chuan kan inbe tawh lo.



Motor a kan chuan luh hnu chuan "I ril a tam tawh em?" a ti sup a, a hmel lan dan aiin a âw a dam zek a.



"A tam lek lek, mahse ei tur lei a ngailo. In thleng vat ila, chaw kan ei zawk dawn nia" ka lo ti ve vat a. A bu nghut a, tlan chhuak zui nghal a.




In kan thlen hma chuan kan inbe leh tawhlo.



In kan thlen chuan ka nuin min lo chiauau vat a, kan chawhmeh lei te chu a lo la chhuak zung zung a. Vanmala chu room lamah a chho nghal daih a. A ngaihna ka hre lo kher mai.




Ka nu chuan "Han thu thlan dai ula chaw kan ei dawn nia" a lo ti vat a. Ka pasal inchung lama chho mek chu ka lo en daih thung.




A hmel awmdan a dik loh em avangin um zui chi ah ka ngai lova, ka nu chawhmeh rem tha chu ka pui ta zawk a.



Kan tifel zo, chawei kan siam tur chu ka phone a rawn ri a, ka en chuan Vanmala lek a lo nia. Eng nge maw a hriat ni?




Ka la ve mai bawk a, ka chhâwn hma hauhin "Room ah lo chho lawk teh" a rawn ti sup a, hnial zuina hun pawh awm lovin a dah nghal daih bawk si.




Ka nu bulah chuan chhuanlam siamin kan room ah chuan ka han chho ta pauh a.



Room chhung ka lut chiah chu ka petek dawrh a tih theih ang. Ka kat nghal nawk a, ka khek nghal thawt mai.



Mahse hmui lum thar tharin ka hmui a rawn si zui nghal a. Ka meng nghal kawk, ka pasal hmel ka hmu zui a. A mit chhing chung chuan duhthawh lutuk hian min fawp tawn tawn a. Ka tal phat a, mahse min lo kuah nghet sauh a.




Vanmala chu a duhthawh lutuk ringawt, lo dawn sawn ngaihna pawh ka hrelo.



Chutia rei tawk fang min fawh hnu chuan a inlahrang ta hram a. Ka thaw chhuak nghal ham ham mai, ka thawk a chham lek lek hial.



Hnai set sawtah ka pasal chuan min lo melh run a "Vanmal..." ka ti hliai a, a awmdan khan min thawng lutuk. Ka phut nasat lutuk avangin ka lungphu lah a la dik thei der lo.




Min rawn fawh leh a tum lai chuan lawm lo lutuk hian "Eng nge i hriat a?" ka ti nghek a. Hlim deuhin kan bazar a, in kan thleng ta cheng a, a mood a inthlak kual leh daih a. A awmdan hi ka ngei tlat.



Thinrim lutuka ka lo melh lai chuan a nui suk a, a hmelah hlauhthawnna ka hmu zui ta daih. Nichina dawhthei lo hmel leh a hmel ngainat awm loh lutuk kha a lo reh daih tawh. Ka inthiamlo leh ta deuh a "Tinge khatianga i awm a?" ka ti chuai raih a, khatiang khan vawikhat mah a la awm ngai si lova min thawng lutuk.




"Theihngilh rawh" za lo zeta nui chung hian a ti sup a, ka darah min rawn kuah thuk a "Chawei a hun tawh" ti leh supin min kalpui mai a tum a.




Mahse ka lo duh bik lo "Vanmal..." ka tih chuan "U Vanmal tirawh" a lo ti leh sup a. Û loh hi a duhlo reng reng.



A thusawi ngai pawimawh lo zet chuan "Tinge khatianga i awm thut a" ka ti leh hram a. A mood inthlak kual vel hi ka hriat loh a ring anih chuan a ti sual hle ang.



Min chhang lovin min nuih suk ringawt a, "Ka fawp chak thut che a" a tih chuan awihlo lutuk hian ka melh a.



"Hetianga awm kual vel rual hi i ni tawhlo. Thu dik sawi rawh" ka ti nghat a. Zep loh chuan Rinmawia vang kha a nih ka ring. Mahse Rinmawia vang pawh lo ni ta se a hma zawng pawhin a thîk ngai lova, min chhan char char zawk thin kha a ni a.




Tukinah ngat phei chuan Rinmawia khan pangngai takin min bia a, min tihbuai loh tum tak a la ni zawk ania. Vanmala danglam ta daih zawk hi ka hrethiam lo.




"A ho lutuk theihnghilh rawh" ti tungin min chhuk thlak pui a tum lui a.



Ka sawi hmasak loh chuan a sawi duh dawn lovin ka hre ta a "Rinmawia vang kha em ni?" ka ti ta nghat a. Chu veleh min melh chhuk nghal ngur a.



"Amah vang kha a ni em?" ka lo ti leh salh a, "Mamte..." a ti sup, "Sawi rawh" ka lo ti vat thung a.



"I la duh em ni tinge i rawn sawi chhuah" a lo ti daih a. Awihlo lutuk hian ka lo melh a, ani erawh a thutak hle thung.




"U Vanmal..." ka ti chiam a, tun tum a hmel landan ang hian vawikhat mah ka la hmu ngai lo. Mahni inringtawk lo hmel hi a pu a, eng emaw hlauh nei riau hmel a pu bawk.



A zawhna chuan ka thin a tirim viau dawn nain a hmel ka hmuh chian chuan ka khawngaih ta lek lek a.



"U Vanmal, i ti awm ang lo emai, ka duh i la ring em ni?" pangngai tak hian ka ti a. Min melh ngur ngur a. "Nang ka neih tawh che hi engvangin nge mipa dang ka ngaihtuah ang" hahthlak ti lutuk hian ka ti chhuak hak a.




Ka sawi zawh rual chuan ka pasal chu thaw huai hmel zuk pu a mawle. Rinmawia ka la duh a hlau lutuk chu a khawngaih thlak hial zawk.



"Ni chiah, mipa dang an ngailo" a lo ti nghut a, ka samah rawn tuaiin ka chal a rawn fawp tawk a.



"I engmah nilo chu ka riruah an thawk pha lo' te i ti vel a, i inlak thikthuchhiat loh ve nen Rinmawia kan hmuh vang mai maiin min ringhlel ania" ka ti hlak hlak a.



Chutah Vanmala chuan "I engmah a ni thin alawm" a lo ti nghut a, ngei zet hian ka melh a. Han phat viau dawnin a sawi dik miau si a. Ka bialpa hlui a nihzia min hriatchian pui tlat a ni.




"Chu pawh nise" ka lo to hram pek a. Vanmala chuan thaw chhuak ham ham chung hian "Dik tak chuan inhmangaih vanga innei kan ni si lova, kan inneih dawn thlengin Rinmawia kha a la rawn inrawlh si a. Inla inthlah fel hlei theilo a ang ve em alawm. Amah theihngilh nan min nei te pawh a lo ni thei a" a ti nuah nuah a.




Chutah ner nawng chung hian ka melh a "I ti mak e a, mi pakhat theihnghilh nan mai maia pasal ka neihte i lo rin le" ka ti nghat a.



"Mak hlei nem, thil ni thei ve deuh asin. Ka confi loh thin zia hi i hrethiam pha kher lovang" a lo ti sup a, a thusawi chu atthlak tih hmel lutuk hian a nui ro hawk a.




"I lo thik thin a nimaw" fiam pah deuh hian ka ti a, "A hma in ka duh hlei nem che" a lo ti khauh a. Ka zak chem chem mai.



"A hmaa engtin mah ka awm ngai loh chhan kha chu ka duh ngai loh vang che ania. Mahse tunah chuan duh chu sawi loh ka hmangaih tawh si che a. Rinmawia kan hmu leh ta kha i rilru a pelhe ka hlau nghal vek alawm" thutak zet hian a rawn ti leh a.




A dinhmun tur chu ka hrethiam mai e. Ka pasal hian min chân a lo hlau hle a ni mahna. A ngaihthat thlak hliah hliah mai.




"Hlauthawng duh suh, ka nuna i rawn lan hma khan ani chu ka lo thlah fel daih tawh. Tunah ngat phei chuan ka nei tawh che a, midang ka ngaihtuah ring suh" thu tak zet hian ka ti ve ta nge nge a. A ngaih that hmel ta kher mai.




Chawei tur chuan kan chhuk thla ta a, ka nû in a lo siam peih fel leh diam tawh.




Zanah chuan ka nu leh pa te chu an lo leng ta ngei a. Puia leh Rina te chu an lo kal remchang ve rih lo a ni awm e.




Ka nu hmel chu rin ai takin hmuh a nuam a. Inthlahrung leh ti duk hmel a pu hran lova, mahse a hma zawng aiin a nelawm thung.



Heihi ka nu ka duhna tak a ni ve tlat, eng dinhmunah pawh ding se a nihna, amah a nihna hi a lang tho tho zel. Nu inthunun thei tak leh mahni inringtawk tak a ni ka tih tawh kha.




Ka nu(Vanmala nu) leh U Faktei te pawhin tha takin an lo bia a. Kan boruak chu a zangkhai vah mai.




U Faktei nen ei tur kan siam a, kan hlim dun kher mai. Midangho pawh thutkhawmna lamah an titi suam suam a. Eng pawh sawi se an thu a inhmu tlang thei zel a, a ngaih that thlak hliah hliah.




Vanmala mawlh mai hi ka fak thin ! A tir te, kan inhriat tirh te atanga tun thleng hian ka nu leh pa te a biak dan a la ngai reng a. Mipa mize nghet tawk tak a nih zia a lang chiang ngang mai.




U Faktei nena kan thilsiamte chu tui ti takin kan ei tlang a. Ka nu te chu dar 11 dawnah an haw ta chauh a. Zanin chu nuam ka ti kher mai.



Aizawlah chuan kar thum dawn kan cham a. Vanmala duh ang ngeiin inchhung khur boruak kan chingfel a, tunah chuan a hmaa inpawh tlang tak ang kha kan ni leh tawh.



Nuam ka ti chho leh tak tak dawn chauh a, hna lamah Vanmala a lo tul chho veleh tawh si a. Kan haw chhan ber kan ti hlawhtling tawh bawk a. Vanmala chuan naktip lama haw a rawt ta a, ka lo hnial bik lo.



Kan haw hma tukah chuan pa pathum hi kan inah an rawn kal nawlh a. An inthuam dan leh an thil ken vel atang chuan media lam atangin an nih ka lo ring ve ngawt a. Camera leh eng eng emawni an lek fur mai.



Vanmala nen chauh inah kan awm a, ka nu in check up ni a nih avangin U Faktei'n clinic ah a hruai a. Nichin deuh lawk khan an chhuak chiah.




Kan inlengte chu ka lo chhawn vat a.



"Pu Vanmala hi a awm em le?" an tih chuan inchung lama hna a thawh thu ka lo hrilh vat a. "Kan va hmu duh ve aw" an tih chuan "Ka han ko ang, lo thu rawh u" ka lo ti ve vat.




Vanmala ko tur chuan ka chho ta nghal a. Room chhung ka luh rual chuan a lo hawi vut a, min lo nuih suk a.



"Hetah lo kal teh" ti a min lo hui chuan ka va pan ve mai bawk a. Chair a thu chung chuan ka kawngah min lo kuah vat a "Inleng i nei ania" ka tih chuan pangngai tak hian "Tute nge?" a lo ti sup.



Ka dulah a hmai a rawn phum vang vang a, a thaw chhuak suai suai a. A sam a tham sak salh pah chuan "Ka hre mai lo, media ho an ang ka ti" ka tih chuan a rawn hawi chhuak vat a.



"Khawi lam inleng tak chu ni ang maw?" ti supin a inlahrang a. Inhnuai lamah chuan kan inzui thla nghal a.




An inbiak lai chuan choka lamah thingpui ka lo lum daih a. An tawng thum bul bul chu ka hre pha, mahse eng nge an sawi tak phei chu ka hrelo.




Ka thingpui chhuan lai a so takah chuan ka siam zui nghal a. Va pek tum a try ka chawi dawn lai tak chuan Vanmala a rawn lut a.



"Thingpui lo pek che u ka tum a" ka lo ti vat, mahse Vanmala chuan "An haw tawh" a lo ti awlsam then a. Fridge a hawng a , tui a in zui khawlh khawlh a.



"An haw tawh a!" mak ti zet hian ka lo ti ha a, a lo bu nghut. Ka try chawi zet tawh chu ka dah thla leh a.



"A va zialo tak, thingpui in lova han haw tir ngawt mai chu aw" ka ti hliai a. Vanmala lah chuan "A ho lutuk, an lo kal chhan a ho emai thingpui in pawh a ngailo" ngaihsam zet hian a lo ti a.


A thusawi duh dan mak ka tih em avang chuan ka zawt chiang "Tute nge an nih a, media lampang an nih chuan news chungchang em ni?" ka lo ti zung zung a.




"YouTuber an nih kha" a lo ti nghut, ka lo meng awk nghal awk a




"Eng nge an lo tih a?" ka tih chuan "YouTube Channel hung zet neitute an nia, an tih ber chu chanchin thar lak khawm a, an channel a upload ania. Case chungchang velah khan min rawn biak chian an tum a, ka lo hnar anih kha" a ti ta zung zung a.



A ngaihsam hmel ang reng bawk sia, kei lah chuan ka lo ui pui khawp a.



"Aww...chutiangte chu i dikna lan tir ve nan pawh lo rem tih tur alawm. Mipui nawlpuiin an ngaihdan che pawh a danglam ang a, tunah hian hnehna chang tawh mah ila mi thenkhat hi chuan an la dem nasa che si" ka lo ti ve duah a.



Vanmala lah chuan "A tul ka ti vel lo e a" a lo ti bul hmuk a. Hahthlak ti lutuk hian ka melh ngat ngat a "A va buaithlak tak" ka ti nghat ringawt.



Mahse a hnu deuhah chuan "A hunlai khan dik ni a an hriat an lo theh darh tawh a. Thu kal lam leh haw lam pawh ngaihtuah lo lekin dik ni a an hriat an lo post tawh a. A sarhu lai, court a hnehna kan chan hma daih khan min rawn kawm tum sela chuan ka hnial lovang. Mahse tunah engkim, thu dik a lan vek tawh hnu ah min rawn kawm an tum tha leh a. Hetiang vel hi ka ngaina lo. Pathian leh court hmaa hnehna chan a, dikna puanzar a ni kha ka duh tawk viau" pangngai tak hian a ti ta duah a.




Ka dang ta lel mai, chhan let ngaihna ka hre lehpek tawh lo.



A thusawi chu dik lo pakhat mah a awm bawk silo. Ka ngaihtuahna pawh a thlak danglam hlawk mai.




Ka pasal hian a sawi dik chiah!




"Eng channel neitu te nge ni reng reng a?" ka ti veleh hnuhnawh a, an channel hming a rawn sawi takah chuan a lo hnial fithla thak kha ka lawm letling ta zawk.



Vanmala hmingchhiat tirha dem vak vak tu, a channel hmanga mipui rilru suk thlek kuai her lawp lawp tu kha a lo ni reng a.



Tun ataka Vanmala interview a rawn tum te chu zak lo ka lo ti letling hial zawk. A channel tih lar a tumna leh a sum duh vang bak va ni suh.




Lawngtlai kan let ni chuan kan chhungte'n min rawn thlah kim thap a. A vawikhatna a ni hialin ka hria.



A hmaa beihvai taka Lawngtlai ka let ni nen kha chuan inang lo tak a ni. Min hringtu ka nu chuan min kuah vang vang a, in enkawl tha tur in min chah mawlh mawlh a. A remchan veleha an lo zin tur thu a sawi bawk a, ka lawm kher mai.




Ka pa pawhin "Nau pai lai i ni tih inhre reng la, in dim la. I pasal tan nupui tha tak ni ang che aw" a ti ve ngial a. Thu tam sawi lo mah se min chah ang chuan awm ngei ka tum.




Ka nu leh U Faktei te paw'n inenkawl tha turin min chah mawlh mawlh a. Ka tana tha tur duh vek te an ni a. A hahdam thlak hliah hliah mai.



Lawngtlai kan thlen thlak zanah chuan Vanmala nen a hna chungchang chu kan sawi ta a. A thawh zawm zel leh thawh zawm zel loh tur thu ah min râwn a ni ber.



"Hetianga DC meuh ni tur chuan i bei nasa hle dawn tih ka hria. I tan chuan hna hlu leh ram tana i tih theih sang ber a ni. I hmingchhiat tawhna chu eng pawh lo ni sela, thu dik a nilo a. Engkim a lang chhuak vek tawh a. Chuvangin he hna hi thawk zui zel la ka duh. I hming hliau tawh nate thai bo tur in hei ai hian ram tan thawk nasa zual sauh la ka duh " tiin ka lo fuih duah a.





Ka ngaihdan dik tak ka sawi a ni. Vanmala tluka Mizoram tana mi hlu hi an awm kherin ka ring lo. A tel lo chuan kan ram hi chhe vek turah ka ngai tlat tawh. Ka pasal hi ka lo ring tawk hle tawh a ni mahna.




Vanmala chuan lungawi hmel zet hian min melh ta vung vung a. "Heihi ka nupui awm dan tur dik tak chu a ni" a lo ti nghet churh a. Ka lo nuih var var tawh thung.




"Dik tak chuan case kan chinfel zawh hlim khan ka hna hi bansan nghal mai ka rilruk a. A chhan pawh khati khawpa ka hmingchhiat hnuah khan mipui rinna hlawh chhuak leh thei tawh lo turah ka inngai a. Ka inrintawkna a pelhe deuh a nih ber mai chu. Mahse ka ngaituah zui fe hnu ah ram hian min la mamawh tlatin ka hre si a. Keipawhin ka ram a nihna angin ka hmangaih a, ka mamawh bawk. Chuvangin thawh zui zel ka tum nghet bur a. Chutihrual chuan ka nupui i ni a, ka hmangaih che a. I ngaihdan ka ngai pawimawh si a, chuvanga zawt che ka nia. Bansan tura min duh a nih chuan bansan a, hemi hna kaltlang kher lo a ram hmasawnna tura beih ka la tum fan a. Mahse chutia lungdam taka hna zawm min rem tih pui takah chuan ka rilru pawh a nuam huai mai" a ti dam leh thluam a.



"I sawi fo thin kha, pa ber thû te chu ka hnial ngam nang" ka lo ti uang a, kan han nui dun leh rih.




Ka nau paiin thla nga hmel a hmu chho a, ka dul pawh a puar ve lah tawh. Darthlalang a ka in en hian mak intih chang ka la ngah. A hmaa dul thep zaih thin kha a lo puar ta lutuk a.




Raino luak chhuak a reh tawh bawk a, tunah chuan thil ka ei thei em em a. Ka rilte hi a tam huam huam zel. Vanmala lah hian ka ei chak zawng apiang chu min leisak a lo inpeih at thin a. Helaia awm lo ei chak tlat chang ka ngah a, ka duh apiang min leisak inpeih at thin ka pasal hian min chah sak zung zung zel a. Min duat hlawm tawp hi a ni ber mai.




Nu Zovi lahin min ngaihsak em em a, Vanmala hna kal chhungin kan lo in awm nileng thin a. Thei thur min sawh sak ziah a, kan ei teuh zel.



Aizawl lama kan chhungte pawhin min rawn be awl lova, video call ten kan inbia a, min inhlim tir kung kung zel a. Ka dul than dan min ensak hi a ni hawt mai.



Tupawhin mipa ka neih an ring vek a. Ka dul a kawh em em a, ka nu phei chuan "I dul a lian chak sia, hring tawh mai tur i ang" min ti fo mai.



Ka pasal pawhin mipa a nih a ring bur a. "Ka fapa tur" a ti reng zel. A lo pian hma hawt atangin pa hmangaihna a dawng nghal a.




A rawn chêt vawikhatna ah phei chuan ka pasal lawm lutuk chu a mittui zu han parawl hial thei a mawle.



Thla 5 a rawn tlin chhoh tak hnu hian a rawn che nasa zual a. Vanmala hian "Inkhelh nuam a ti dawn anih hi" a ti ziah. Naute chungchang hrim hrim hi chu a zeldin peih zel.



Zan muthmunah ka pasal chuan ka dul puar luah chu a zut leh hauh hauh a, a be zui leh sup sup tawh. A lo chhuah hun a nghakhlel lutuk hi a lainat awm zawk.



"Thla li chiah nghah a ngai ta" tiin ka dul chu a hmuiin a rawn nawr zui vawng vawng a.



"I nghakhlel lutuk hi a ngaihthat thlak loh lek lek" ka lo ti nang nang a. Min rawn melh run a "Chutiang an sawi ngailo " a lo ti sup.




Ka ngaih a ti tha lo tak tak alawm. Mi pasalte hi hetiang em em an ni ang em aw ka ti hial thin.




Ka nau paiin thla 7 hmel a rawn hmu chho a, ka ngaih that loh ang ngeiin harsatna kan tawk ta tlat mai.



Vanmala rilru hah hmel leh hrehawm ti hmel hmuh chu ka natna tawrh zawng zawng ai hian tawrh a har zawk !




_______________*________________*______


Show post links
Top

[Ngaia]

DEPUTY COMMISSIONER
By CVL Awmpuii



Chapter 38




Ka pum rawn na leh tial tial avang chuan ka thaw chhuak hawk a, ka thawk zawngte pawh chuan a na vek tawh maiin ka hria.



Na ti lutuk hian ka pasal kut chu ka hmer ngawt ngawt a, "A va hrehawm ve" a lo ti hawk a. Na tiin hrehawm ti hle mah ila a hmel a min ngaihtuahna leh lungngaihna inpawlh nawk chu ka lo hmuh hmaih loh kher mai.




Ka inthiam lo tel tlat bawk, a chhan pawh tun dinhmun kan thlen chhan hi a thu ka awih loh vang ani ka ti lo theilo.




Ka nau pai a hram chhoh tak hnu khan inchhung chet leh ilo vel min khap bur a. Ka tih theih tawk ka lo ti ve thin erawh min sawisel em em hran lo.



Mahse tukin zing khan Nu Zovi eirawngbawl ka pui a. Dawl rep bai ka ei chak thu ka sawi chuan "Kan siam dawn nia" a lo ti var a.



Toilet a luh chhungin dawl rep bai na tur vel chu lo buatsaih ka tum a. Chhuar ah kan dah mai thin a. Ka kuta han ban ka tum khan ka ban pha mai si lo. Ṭhutthlêng dawhin ka han lawn ta a. Ka ban fuh chiah tihah khan ka ke a phet thut a, ka dul a lian tawhin ka lo intha zo lo ve tawh bawk nen chhuat ah chuan ka bawk thla ta hnawk a.



Vanneih thlak takin ka ti dawn nge ka pum lam chu a na miah lo, mahse ka kiu a na vawng vawng mai. Han thawh chhuah mai ka tum a, ka pum puar luah nen chuan a harsa ve det. Ka kut tha a lo zawi bawk nen.




Ka thawm hriain Nu Zovi chuan toilet atangin min rawn au a "Nu Zo, ka tlu sual ania" ka lo ti vat.




Nu Zovi pawh chu reilote ah toilet atang chuan a rawn chhuak nghal a. Hmanhmawh lutuk hian min rawn buaipui nghal sawk sawk a.




"Engtin nge i awm? I pum a na em?" a rawn ti nghal chul a, "Aih, ka pum lam chu a na lo...ka kut hi...a na, ka kiu a na vawng vawng mai" ka lo ti ve nghal zung zung a.



Nu Zovi chuan min kaihthawh mai a tum a, mahse min chelh a tum na ka kut ber lah chu a na tlat bawk si.



Chutah Ni Zovi chuan "Vanmala ka han ko ange" a ti hluai a, ka lo huphurh nghal tung mai. Mahse tih theih dang awm hek lo le Vanmala ko tur chuan kan room lam a pan chho nghal hlawk hlawk a.




Nizan lamah hna a thawk rei deuh a, tukinah pawh 'Chawei dawn hnaihah ka kaitho mai ang' ti rilru chungin ka thawhsan kha a nia. Tum dangah chuan kei ai a tho hma ziah.




Vanmala te rawn thlen thlak hma chuan thawh chhuah mai ka lo la tum fan a, mahse ka rinchhan ber tur ka kut chu a pahnihin ka hmang thei tlat lo. Ka delh sual deuh pawh a ni mai thei.



Ka pum chu lian viau tawh lo se ka tho chhuak thei maiin ka ring a, mahse min kam ve ul tawh bawk si. A na lo hlauh erawh ka lawm fu mai.




Hmanhmawh lutuka ka pasal tho phang hmel rawn kal chu ka lo en a. Min rawn hnaih chawpchilh nghal a, "Engtin nge i awm?" mangan hmel lutuk hian a ti hluai a.



Nu Zovin a lo hrilh vek tawh a ni mai thei, min kaihthawh tum lovin zo zet hian min pawm kang ta nawlh a. Ka kut chu tihnat belh hlau zet hian a dim hle bawk.




Khuma min muttir hnu chuan Doctor a be nghal a. A che zia chu ngawi rengin ka lo en mawl tawp ringawt. Ka inthlahrung ru tun bawk si, hrehawm tak tak ani.



"I pum a na em?" a tih chuan ka lu ka lo thing vat a. Zawhna chi hrang hrang min zawt a, na ka neih leh neih loh min zawt a ni ber. Zawhna chin chiah ka chhang, ka tawng belh ngam lo. A hmel atangin a lungawi lo tih ka hre miau si a.



"U Vanmal, engtin mah ka awm lo ania, ka kut na pawh a reh tial tial mai" ka ti dek dek a. Min melh nghal ngur a.



Min han zilh tak tak mai anih kha "Che kual ve sek tawh lo turin ka ti fo che a. Thil tul lo lo hi i lo ti thin a. Tunah khan pawi lian tham a thleng lo a ni mai thei, mahse eng emaw lo thleng ta se" tiin a thaw chhuak hawk a. Thil thleng tur ngaihtuah ni awm tak hian a phun zui hluk a.



"Tun atang chuan fimkhur leh zual tawh ang che, dawl rep bai i ei chak anih pawhin Nu Zovi a awm a, a siam thei reng. Engmah i tih buai ve ngai lo turin kan buaipui nasa che a, i lo che ve sek zel a" a ti nghut nghut a.





Min ngaihtuah vang a ni tih ka hria a, ngawi dak chungin ka lo ngaithla mawl tawp. A ni pawh a lungawi lo rei bik lo.



Doctor lo thlen a, min en lai te chuan min ngaihsak leh tawh lutuk, min duatna aw bak ka hre leh tawhlo.




Doctor chuan "Nau te chu vânneih thlak takin a tha hlauh e. I ban na pawh hi i tisual ve deuh mai mai anih hi. Ni hnih thum ah a ziaawm chho mai ang. I nau pai a rit tawh si a, fimkhur zual ru aw. Ngaihthat nan hrim hrim naktukah damdawiin lamah in rawn in check up dawn nia" a ti dam thluam a. Min haw san zui ta a.




Nilengin harsatna dang ka nei hran lo. Mahse zan a lo ni a, tukthuan kan ei kham ka inbual tur kha ka thî a rawn put ta mai. A hnu lawkah ka pum a rawn na zui a.



Tichuan heti rum rum hi kan lo ni ta ani.



Damdawiin kan thlen chuan min enkawl zui nghal zung zung a, ka thi put pawh a reh zui ve mai a. Mahse ka pum na mawlh chu tawrh har tak a ni.



Nichin lawkah khan Doctor a chhuak chiah a, ka pasal hnena a thusawi chu heihi a ni "I nupui hi kan zai vat a ngai dawn a, a nau pai hian thla sarih hmel a hmu ve hawt chauh a ni a. A thî a lo pût bawk nen a serious ang reng a, naute leh a nu ah hian duhthlan a ngai dawn. An pahniha chhan kan tum anih chuan an boral phah ve ve thei a. Chuvangin lo inngaihtuah lawk la, form fill up ngai ho kan lo va buaipui ang a, kan rawn let leh hunah chuan thutlukna i lo siam fel dawn nia" tih a ni tawp mai.




Ka mittui a rawn luang thla ngiai ngiai a, ka pum na lah chu a zual zel bawk si. Vanmala chu rilru hah hmel lutuk hian a rawn thaw chhuak leh hawk thin a. A mit a chhing vang vang a, ka kut chu a hûm zui vawng vawng bawk.




Ka pum na chu a rawn zia deuh a, ka pasal pawh a rawn meng chhuak ta a. Mittui luang ngiai ngiai chung hian ka lo melh a "Ka tihpalh aw..." ka ti zawi tiau a. Ka inthiamlo em a ni, kan naute lo pian hun tur nghakhlel takin a lo thlir thin a. Tunah lem dinhmun harsa lutukah ka din tir ta si a.




Chutah ka pasal chuan "Khatiang zawng khan tawng suh, in pahnih chungah hian engmah a thleng dawn lo" a ti nghet bur a. Tun tum zet chu ka pasal hnenah ka rinna ka nghat pum hlum theilo.




Keimah emaw naute emaw, a tu emaw zawk zawk chuan naktuk kan hmu ve dawn lo.



"U Vanmal, vanramah in pafa in ka lo nghak ang che u" lungchhe lutuk hian ka ti a. Ka dinhmun chu hrehawm ka van ti tak ! Ka pasal ka la thlakhlelh na leh kan naute hian khawvel eng hmu ve se ka tihna chu a inchen thuak mai.




Ka pum chhung ami hi ka thisen ringa lo nung ve a ni a, a awm ve tih ka hriat tirh phat atang khan keimaha nu hmangaihna awm zawng zawng hi a nei nghal vek. Chuvangin he khawvel eng hi lo hmu ve ngei sela ka duh. A tan ka nunna hlan hi ka pawiti lo.




"Tumah ka chân dawn lo che u" Vanmala chuan a lo ti leh bur a, hrehawm tih hmel lutuk hian ka chal a rawn fawp zui tawk a. Ka na tawrhte avangin ka thlan dap tawh a, ka rimtui lo viau in ka ring.




Ka pum bawk chu a rawn na leh ngawih ngawih a. Doctor leh nurse te an rawn lut zui a, Vanmala chuan a tawp nan zawhna chhan harsa tak a dawng leh ta "Naute nu nge naute, eng nge i thutlukna chu ni ta le? Hetiang dinhmunah hi chuan a tlangpuiin nû tan dam chhuahna chance a sang zawk a, mahse duhthlanna chu i kutah a awm e" a ti dap dap a.




Vanmala chu inngaihtuah nawn leh ni awm tak hian a ngawi ngul a, kei lah ka pum a lo na nasa tawh mai si. Ka rum ham ham hi a ni hawt mai. Ka inthunun theilo, a na em a ni.



Tichuan Vanmala chuan thutlukna a siam fel ta a, a thutlukna chu heihi a ni "Ka nupui leh naute hi ka duh ve ve, duh ka thlang theilo. An pahnihin ka duh" a ti bur mai.



Doctor chuan buaithlâk tih hmel fe hian "A risky viau ania aw, tu emaw zawk zawk thlang mai rawh" a ti sup a.



Mahse Vanmala chhanna chu a ngai a ni "An pahnih in ka duh ve ve" tih chu !




Ka pum na lutuk avang chuan ka mit a vai riai tawh a, engtin nge an inbiak zui pawh ka hre mumal tawhlo. A hnu deuhah phei chuan ka mit deuh sulh a, a thim nghal mup mai, ka nghilh dup hi a ni ber.




Ka harh chhuak hlawl a, ka meng nghal kawk, mahse ka pum na in a rawn zui leh nghal a. Doctor leh nurse te chuan min buaipui zung zung a. Ka pasal ka bula awm reng emaw ka tih kha hmuh tur reng reng a awm tawh lo.



Ka pum chu ka dawm vawng vawng a, a puak chhuak dawn emaw ka ti hial. Mit ka chhing ngat ngat a. Hmeichhe aw in "A rawn harhin ka hria" a tih ri chu ka hria a, ka meng chhuak leh tawk tawk a.




Ka sira Doctor rawn ding hnai chu ka hmu zui nghal a, ka meng phe ruai leh tawh thung. "Kan zai dawn che a, hlauthâwng suh aw, i pasal duh dan kha kan zawm dawn ania. Tunah..." a tih ri chu ka hre ruai ruai tawh. Ka harhfim lo takzet. Ka taksa chau lutuk avangin ka mit leh sulh a.




Ka harh chhuak zo tawh pawhin ka ringlo. Mumang leh tak ram inchawhpawlh nuk hian ka awm ka ti mai. A chang leh harh tur angin ka awm a, a chang leh thi tawh ang mai hian ka awm bawk a.



Ka pasal hmel chu chiang lutuk hian ka mitthla ah a rawn lang a. Ka la thlahlel ngawih ngawih. Hlauhthâwn na tam takin min rawn tuam zui a. A bak chu engmah ka hriat zawm ta lo. Ka ngaihtuahna leh engkim, a thim ta mup a.




Eng emaw ri rak rak thawm hi ka hria a, ka mit men mai ka tum a, mahse ka meng thei mai lo. Ka kut lah chet ka tum a, a zawi vek bawk si.



Rilru fîm put tum in ka mit chu ka chhing vawng vawng a, hahdam tum tak hian ka thaw chhuak siai siai bawk a.



Vanmala hmel ka mitthlaa a rawn lan rual chuan thil thleng zawng zawng kha ka hrechhuak in dawt zut mai a. Ka mit chu ka meng chhuak riai riai a.



Chhing leh sawkin ka han meng tha leh a, ka mutna khum mawng lama ka pasal drawer lo hai ruk ruk chu ka hmu ta a, min hnungchhawn avangin min rawn hmu ve mai lova.



Chutia ka lo melh vang vang lai chuan a rawn leh hawi vut a. Ka lo en tak kal si ah chuan hamhaih lutuk hian min rawn pan vut a. Ka bul chu a rawn thleng rang lutuk mah mah a ni.



Ka biang a rawn khuap nghal run a, "Mamte..." a rawn ti chhuak nghal hulh. A hmelah chuan hlimna, phurna leh hmangaihna, min duatna te ka hmu indawt zut mai.



Ka ngaihtuahna a rawn let zawk a, thei leh theilo hian ka pum chu ka zuk en thla a, a lo thep vek tawh.



Thlabar lutuk hian Vanmala min lo melh runtu chu ka melh let ve a, "U Vanmal..." chiai lutuka ka lo tih lai chuan mitmeng hahdam zet hian min lo melh a.




"Hahdam rawh...engkim a tha vek, in chungah engmah ka thlen tir dawn lo ka tih kha..." a ti dam ruih a.




Hlauhthâwnnaa a khat hre chak bawk si hian "Anih chuan...naute" ka ti bah nawk a, chutah Vanmala chuan "Fapa duhawm lutuk min pek avangin ka lawm e" a lo ti sup a, a kiai zui suk bawk a.




Ka mit ka chhing nghal sawk a, ka biang tawn tawnah mittui a rawn luang lum nghal pap a. Ka rilruin Pathian hnenah lawmthu ka sawi zui nghal mawlh mawlh a.



Ka pasal chuan ka chal ah a rawn fawp vawng vawng a. "Engkim a tha vek dawn ka tih kha" a ti zui sup a.



Kawngkhâr inhawng thawm a rawn awm takah chuan a inlahrang vut a. Kan chhungte an rawn inzui lut nghal duah mai.




Lawm lutuk avanga lungchhe bawk si hian mittui parawl kuang chungin ka lo melh hlawm a.



Min hringtu ka nu leh pa, ka naute pahnih leh ka nu leh U Faktei te chu an rawn inzui lut hlawm a. An rawn inkhai bawr tun hlawm mai.



Min hringtu ka nu in min rawn pan rual chuan thei leh thei lovin mu chung chuan ka lo ban vat a.



"Nu..." tih bak ka sawi thei lo, zu han tap ringawt a mawle !



Ka nu chuan min lo nuih var var a. Ka kuta min chelh ngheh salh pah chuan "Fapa i neih tawh kha, tap pur pur suh" nui hak hak chung hian a lo ti a, midangho pawh an lo nui dar dar mai.



"Ka lawmpui lutuk che ka fanu" a ti leh charh a, mittui parawl kuang chungin ka lo nuih let ve var var a.



Vanmala chuan thil awmzia a lo sawifiah zung zung a. Kan fapa chu thla kim lova piang a nih avangin an up rih a. Chu mai bakah khatiang rum rum lo piang a nih avang khan a serious reuh phian a. Kei emaw naute emaw zawk zawk duhthlan tur a nih laia kan pahniha kan dam chhuak thei mai chu a vanneih thlak tawh hrim hrim.





Chutihrual chuan ka fapa chu ka ngaihtuah lo thei lo.




Mahse Vanmala chuan "Doctor sawi kalhmangah dam taka a lo pian tawh ber chuan harsatna lian tham lutuk a awm tawh lo turah ka ngai a. 'Hetiang meuha naute leh a nu an him ve ve tawh anih chuan an him tlang thei mai ang. A neih dawn lai tak vel kha a hautak a, a serious bawk a. Risk sang tak la in Pathian zarah an dam chhuak ve ve hlauh a. Kar khat vel ral phawt sela, in dinhmun chiang zawk pawh a sawi theih ang' tih khan min hrilh a. Hlauhthâwn lutuk tur a awm rih lovang" a lo ti dap dap a. Tlem chuan min thlamuan deuh.




Chutihrual chuan kan fapa chu kar khat pawh a dam tlin loh mawlh ka hlau. Mahse ka pasal ber a thlamuang em a, min thlamuan tel ve lo theilo.



Kei emaw naute emaw duhthlan tur a nih lai pawh khan kan pahnihin min thlang a, tichuan tihian fapa ka hring thei a. Tunah pawh ka pasal inrintawkna hi ka tawm pui hmiah a ngai tih ka hria.




Nilengin ka chhûngte'n min rawn awmpui ve a. Khatiang rum rum kan nih takah khan chanchin mumal pawh kan lo sawi hman lova. Vanmala takngial pawh a lo hamhaih lutuk a, chhungte hrilh hriat nachang hre lo khawpin min buaipui a. Mahse Nu Zovi a lo bengvâr hlauh a, ka nu a lo han hrilh hria a. Chutiang vel atang chuan an lo in hrilh darh hlawm a.




Vanmala nen an inbiak leh hnuin Helicopter in Lawngtlai an rawn pan ta hlawm a ni awm e. Ka pasal chhungte lam atangin kan fapa chu tu hmuh hmasak ber a ni a, ka chhungte lam atang pawhin a lo ni veleh zel bawk nen min rawn ngaihtuah tlang hlut a ni ber mai.





Zanriah ei hun hma hretin an haw ta diak a. Kan inah an lo va innghat hmasa a, Nu Zovin a lo buaipui vek a ni awm e. A lâwmawm takzet.




Kan naute chu an up avangin kan la hmu thei lova. Zan khuain kan nupa te rek chuan cabin ah kan awm chawrh chawrh a.




A lo pian chhuah hun nghakhlel em em in kan awm a, tunah a lo piang chhuak ta cheng a, kan hmuh a la rem si lo. Ka rilru a na lek lek mai. Pathian ka va demna lam ni lovin a mihring takin kan fapa chu ka lainat a. Nû ka nihna ah ka manganv takzet.




Ka pasal chuan ka ngaihtuahna lak pen tum in min be reng a. Kei tak pawh hi in enka uluk ka ngai a, drip kan la khai char char a. Chaw ka ei mumal thei si lo. Ka rilru hahna zawng zawng nen ka chau reuh riau a.




Vanmala hmel chu ka en thin a, a mit khuar dak leh a hmel pawr fap atang chuan a chauh zia ka hai lo. Mahse a chau tih pawh hriat loh tur khawpin min ngaihsak a, min duat a, min enkawl tha takzet.




Ni hnih a liam leh meuh chuan kan fapa hmel kan hmu thei ta. Ka la chetsawn theih loh avangin ka pasalin an up na ward atangin ka awmna cabin chhungah chuan a rawn pawm lut a.




Ka pasal hlim hmel mawlh chu! Engtikah mah ka theihnghilh thei tawh lovang.




A mittui a tling hial thei nia mawle. Ka mutna ah kan fapa chu a rawn mut a, a hmel ka hmu chiah chu ka mittui a luang nghal zawih zawih mai. Kan pian hlima nû dinhmun tur hi ka hrethiam ve ta chiah.




Naute piang hlim dang zawng zawng aiin a tê bik emaw tih mai tur a ni a. Mahse a hmeltha lutuk. Kan fapa tluka naute hmeltha chu an awm bikin ka ringlo.




Kan chhûngte pawh chuan lawm zet hian an rawn en kual dan dan a. Ka nu leh U Faktei te mawlh chuan ngaih an ti tha hliah hliah. An sawi kalhmangah Vanmala tetlai nen an inang viau a ni awm e.




U Faktei chuan "Mama thlalak naktukah ka lo keng ang, inang i ti ve tho ang" a ti hlut a. Ka nu lah chuan an inan thu hahipin a lo sawi ve bawk a. Ka pasal lungawi hmel lutuk mawlh mai chu hmuhnawm tak a ni.




Kan chhûngte haw hnu chuan kan chhungkaw bil te chuan kan awm ta a. Kan fapa vhu nurse te'n hnute tui pe tûra min tih avângin ka thiam ang tawkin ka hrai ve a. Vanmala'n min lo pui bawk a, ka zeilo lutuk bik lo.



Ma pasalin lungawi hmel lutuka kan fapa hnute hne a thlir lai chu nû tan chuan hmuhnawm tham a ni.



"A chhun viau che in i hre ve em?" ka lo ti sep a. Vanmala chuan min rawn melh zawk a, a fapa en leh pah chuan "Chhun tur dang awm hek lo kei min chhun mai loh chuan" a lo ti hmiah.



Ka lo nui hak hak a, "A siamtu chu chhun tur alawm tiraw ka fapa" a ti zui leh sup a, a nui suk suk a. Awmze nei lutuk hian min rawn melh a, ka lai thar leh ngang mai.




Kar khat tha zen zawn damdawiin ah chuan kan awm a. Doctor leh nurse te'n min ngaihven em em reng a. Kan nufa tha taka kan han awm chho thei ta chu kan naute zai chhuak tu Doctor pawh a lawm ngang mai a.




Ward a rawn fan apiangin "Mi vannei tlemte zing ami in ni" a ti deuh reng a. Vanmala hian "Pathian hnenah kan dil alawm" a lo ti ve ziah zel bawk.



Hetia kan that chhoh tak hnu hian ka pum nat vak laia a tawngtai mawlh mawlh thu min hrilh a. Ka kut chelha mit a lo chhin char char te kha a lo tawngtai char char vang a ni awm e.




Kan ina kan haw dawn ni chuan Vanmala a phur ber a tih theih hial ang. A thawhpuite zawng zawng chawei ah a lo sawm pek a, "Ka fapa pian lawmna leh Pathian hnena lawmthu sawina pual in chawei khawm tur" a ti bur mai a. 'Fapa neia' a ni tawh bawk a, a lung dam zan na turin che rawh se ka lo ti tawp.




Kan chhungte pawh an la awm kim vek a. Damdawiin atanga kan chhuah ni, ina kan haw ni chuan kan room an lo chei chuai mai a. Thil engkim chu a uchuak vel vek a ni tawp mai.




Min hringtu ka nu leh U Faktei phur lutukin an lo chei a ni ber.




Zanriah ei hun hnaihah chuan Vanmala thawhpui te pawh an lo thleng khawm tan a. Tumah kutruakin an rawn kal lo, thilpek eng eng emaw an rawn keng vek a. Kan room chu kan fapa tana thilpek hlirin a khat nghal nuk mai. Heti khawpa min duhsak tu kan nei hi a vanneih thlak takzet.




Ka pasalin hunserh a hmang a, a thusawi chuan min hneh khawp mai.



"Pathian khawngaihnain hei kar kal ta ni 3 khan fapa duhawm tak mai kan nei ve hlauh mai a. In hriat theuh angin a lo pian chhuahna kawng hi a hautakin a harsa ve em em a. Kan nghahhleh viau rual khan a la hunlo tih kan hre ve kar si a, kha khan rilru hah lutukin min siam a. In hre theuh ang a, ka fapa thih suala a lo pian chhuah dan chu sawi duah ngai pawhin ka hrelo. A tawi zawngin han sawi ta mai ila, hetianga ka koh khawm kher chhan che u hi chu vawiin ni ah chhungkaw thar ka din ve tak tak tawh dawn a ni a. Thenkhat chuan ho lam deuhah pawh min lo ngaihsak deuh mai thei, mahse ka tan chuan chhungkua hi a pawimawh a. Ka hna aia ka ngaih pawimawh te an ni a. Chuvangin he ka chhungkaw thar din chhoh tur hi ka hnathawh pui te'n min hriatpui ula ka duh a. 'Mite pawhin fa an nei ve tho a, mahse hetiangin an ti ve chiam lo' in lo ti rilru pawh a ni mai thei. Mahse ka tan chuan a lawmawm danglam em a. Kum 36 chhung baih vai lutuka lo maltlat thin kha ka kawppui awm tak Hmingmawizuali Pathianin min pe a. Chu achhapah kan inneih cham pawh a la thlen hma emin fapa pekin kan han awm leh nghal a. Pathian hnena lawmthu sawi mawlh mawlh tur kan nihna hi ka hrechiang a. Chuvangin vawiin damdawiin kan lo chhuahsan ni hi Pathian hnena lawmthu sawi na hun atan a tha ang tiin ka rilrua a thawh danin heti hian chawpchilh takin chaw ei khawm ka rawt ta a ni. He chhungkaw thar ka dinna tur hi min hriatpui ula,min lo tawngtaipui zel turin ka sawm che u" a ti ta dap dap a.




Hetiang pasal ngaihtuah kim lutuk leh mi puitling , lu zo veh vawh ka nei hi ka vannei takzet. Kan inneih tirh phat atang khan ka vanneih zia ka hriat belh chho mawlh mawlh chu anih ber hi.




Ka nu(Vanmala nu) chuan naute hning chu ka pa phuah turin a ti a. Mahse ka pa chuan lo kian ve tlat thung a "A mipa lam in nia, i fapa fapa a ni a, i phuah a mawi zawk e" tiin a kian a.




Tichuan ka nu chuan kan fapa hmingah chuan Pathianin min chhanhim sak anih avangin 'Vanlalchhanhima' tih hming a sa a. Kan fapa Vanlalchhanhima chu eng dinhmunah pawh Pathianin min chhanhim sak zel ka beisei.




Pathian zarah kan fapa chuan harsatna lian tham em em a tawk zui lova. Thla kim lova piang a nih vang hian a la tê zual em em a. Thla 2 hmel a hmuh pawhin chuti lutuka duhawm turh han tih tur ang kha a nilo. Mahse a vun a no in ama tawkah a lawmawm ve thin khawp mai.




Kan fapa chuan ka pum chhunga a awm tirh phat atangin a mamawh ang zawng zawng a nei kim nghal vek ti ila ka sawi sual lovang. Mipa a nih an rin vek avangin mipa thil hlir an lo lei thin hlawm a. Thla kim lova piang mah nise a mamawh tur ang chu a nei kim nghal vek. Thawmhnaw leh ilo velah phei chuan buai lo tak kan ni.




A pa hian a âtchilh hlum lo chauh a, a ngaihsakin a duat em em a. Hnaa a kal chhung tih loh hi chu an inpawm chawt a. A muthilh chhung zawng pawm tluan thak tumte a nei a. 'Ka fapa' hi a ti deuh chhen mai a. An Office lamah phei chuan "Fapa neia" an lo ti uang thin a ni awm e. A ni pui lah hian nuam a lo ti sauh emaw tih tur a ni, "Fapa ka nei miau sia lawm" a ti ta thin a. Office lamah pawh an lo hlimpui phian thin a ni awm e.




Zanah chuan khuma mu chungin an pafa inpawm muhil lai chu ka thlir reng a. Ka phone lekchhuakin thla ka lak sak zui a. Ka gallery te hi an pafa thlalak deuh hlir a ni tawh. Chutiang bawkin ka pasal pawh a gallery chu kan nufa thlalâk deuh hlir a ni mai.





Ka thlalak sak chu U Faktei ka va thawn nghal a. Min rawn reply har lo, hahipin a vahpa tana a thil awh deuh deuhte a rawn sawi leh tawh, a lo lei lehnghâl vek dawn tih ka hria. Ka pawisaa ka fapa thil tur ka lei ve pawh ka la hrelo, a pi te pahnih leh a ni hian an rawn leisak hneh lutuk. A putea te atang pawhin thilpek kan dawng zeuh zeuh bawk. An tupa hi an rawn ngaihsakin an phak ang tawkin an rawn duat ve thin.




"A mu nghet tawh em?" an pafa inawi hluau hluau en pah chuan ka pasal chu ka zawt a, a lo bu nghut a. Thil buaithlâk deuh pakhat chu kan fapa hi a harh vang ang reng a, thawm ri hlekah chuan a harh nghal zel a. Tin, a lungphu hi a dik chiah lo bawk nen thawm dim a ngai thin khawp mai.




Vanmala chuan ka sirah dim zet hian a rawn mutthlak tir a. Puanin ka lo khuh tha vat a. A fapa chu rei tawk fang a en leh zet hnu ah ka bulah chuan a rawn mu thla ve ta a. Min rawn kuah nghal hlun a.



A hmel en tûra ka inher rual chuan min lo fawp nghal a, beisei nei lutuk hian min thunun tum deuhin min fawp a. Ka lo chhanlet ve rual chuan a duhthawh zual sauh a.




Ka naupaiin thla 5 hmel a hmuh tak hnu khan nupa nun hman kawngah kan insum nasa zual a. Insum zawh loh chang a thleng leh zeuh thin tih loh chu nupa nun kan hmang ngai tawh mang lova. A rawp ve tawh te pawh aniang, zep nak emaw kei tak pawh hian ka pasal a nihna angin ka thlahlel ve tawh.





Tunah chuan kan fapa pawhin thla 3 a tling tep tawh a, a pawi lutuk tawh lo turah ka ngai.




Chutia ka chhan let zel tak si ah chuan ngampa lutuk hian min zut kual nghal dun dun a. Ka lo rum hak chu ka hmui a rawn hup vat, "Bawihpuia a harh a nge" zawi si, khur deuh dur dur chung hian a rawn ti a.




Ka hmui a hupna kut a laksawn rual chuan ka inpet ruh fan fan a, min khawih velna lo dawnsawn chu tawrhhlelhawm tak a ni. Thawm chhuah ka hlau bawk si.



Chau zet hian ka pasal awmah chuan ka bei ta thlar a, a che duhthawh lutuk a ka zawi vek maiin ka hria. Lungawi hmel lutuk hian a nui suk suk a. A ngaihthat thlak thin teh e.




Bawihpuia a mutui bawk a kan awm hahdam deuh hnu chuan bathroom ah inbual turin min pawm lut leh a. Thawmhnaw engmah kan la inbel silo, a hmel atang chuan eng thil emaw tak, ka dan zawh loh thil a ti leh dawn tih ka hria.




Kan chhungkua chu keimahni tawkah kan hlim chho ve hle a. Ka pasal hnathawh hlana Nu Zovi nen chauh awm thin kha tunah chuan kan pun belh ve tawh bawk a kan fapa chuan min tihlim thin khawp mai.



Chutia kan hlim chhoh lai tak chuan kan fapa thla 5 tling tawh chuan harsatna a tawk leh ta tlat mai.



Tuk khat chu kan kaitho dawn a, a meng thei reng reng lo mai a. A pa in a mar a dek a, a awm vek bawk si. Hmanhmawh lutukin damdawiin ah kan tlan luhpui nghal rum rum a.




Doctor in a han check vel chuan ril phir a lo ni a, "Tunah zai nghal tur" a ti hmiah mai.



A pian hlim hlawt atanga thih sual khan thla 5 a nih hnu thleng pawhin thih a sual leh dawn ta. Ka mangang leh hle tawh.



____________*____________*_________

(In ning tawh em thenkhat hian la tawp lo turin in duh sia, tin ziah lan duh ka la nei bawk si a, ka la chelh kual vel anih hi aw)


Show post links
Top

[Ngaia]

DEPUTY COMMISSIONER
By CVL Awmpuii




Chapter 39



Natna khum a ka fapa mu dang bel chu ka thlir ngawih ngawih a. A kut tereuhte ah chuan Doctor te'n hriau an vit lut a, drip an khai a. Hahdam hmel lutuk hian a thaw siai siai a, a natna tawrhte hrethiam lo lekin a mu siai siai si a, ka lainat hial zawk.



Vanmala chuan an zai na tura form fill up ngai ho buaipui turin Doctor a zui chhuak a. An lo let leh tep tawhin ka ring.




A kut, drip an khai lohna lam chu ka hum vang vang a. Naute harh lo leh zum dak, thawm nei em em ngai lo hi a ni a. A muthilh laia bengchhen erawh chuan a rawn harh mai thin a. A bakah hi chuan naute harh vang lo ve tak a ni. A tap khat em em a, a mu tho hlim pawh hi a ngawi dak zel.




A pian tirha harsatna kan tawh bak kha kan tawk zui leh lova. Mahse tunah hetiang dinhmun khirh lutuk hi kan thleng leh ta chu ania.



Kawngkhâr a rawn ri rak a, ka pasal a rawn lut zui nghal a. A ni pawh a rilru a hah ve hmel khawp mai.



Kan nufa bulah chuan rawn kalin Bawihpuia kut tereuhte chu a rawn chelh ve nghal run a. A en ngawih ngawih a, "Engtin nge Doctor chuan a lo tih a?" ka tih chuan min rawn melh zawk a.




"Zai nghal rum rum an tum na in a taksa hi a chau rih reuh riau a, heti hian drip an khai rih ang a. Eng emaw harsatna riau te a awm anih loh chuan tlai dar 5 ah an zai ang" a lo ti sup a.




"A hlauhthâwn awm viau lovang tiraw" rilru hah lutuk hian ka lo ti zawi sep a. Ka beidawng ngawih ngawih mai. Zai pui tawk tur chuan a la sên lutuk.



Vanmala chuan min hnem tum tak hian ka sam a rawn tuai zauh a, "Hlauthâwng lo phawt ang. Ril phir zai hi chu an awm ve nawk ania. Vawiinah rum rum khawih an duh chhan pawh a ril phir hi a lo puah hman an hlau a. Khawih vat kha a tha zawk daih ang a. Pathian zarah a dam chhuak em em ang" a lo ti zung zung a.




Ka lo thaw chhuak hak a "Thla tin check up turin kan kal ziah sia, engtin nge kan hriat miah loh theih zawk le. A lo tuar rei tawh ngawt ang" kan fapa lainat lutuk chuan ka ti zuai raih a.




Mahse Vanmala chuan "Doctor sawi dana chuan a intanna a la reilo a ni awm e, a rawn lang chhuak rang mai mai niin a sawi a. Hetia kan hre vat hi a vanneih thlak zawk, enkawlna a dawng hma zawk dawn a. Engkim a tha leh vek mai ang. Ril phir zai te chu thihpui aiin dam chhuak an tam zawk daih alawm" tiin min han hnem leh ngial a.





Tlem chuan ka ngaih a tha deuh, chutihrual chuan ka rilru hrehawmna chu a la ngai reng thung.




Theih nise a natna tawrh zawng zawngte hi tawrh sak vek ka pawiti lo asin.



Vanmala chuan a phone a phawrh zui a "Ka nu te chanchin engmah ka la hrilh lova, ka'n hrilh hre ve lawk ange" a ti sup a. Ka lo bu nghat a, ka phone ka phawrh zui ve nghal a "Ka pa te ka'n hrilh ve ange" ka tih chuan min lo khap vat a. "Keiman ka lo bia ang, tikhan Bawihpuia hi lo awmpui la, pawnah ka va be hlawm ange" a ti zung zung a. Ka phone pawh chu ka dah zui ve mai bawk a. Pawnah chuan a va chhuak zui nghal a.




A chhuah hnu rei vak lovah Bawihpuia chu chauh hmel zet hian a rawn meng diar diar a, ka lo ngaihven nghal vat.




A kut a rawn chet deuh a, drip kan khaina lam a nih avangin ka lo chelh bet nghal vat.



"Bawihpui..." ka tih chuan chauh hmel zet hian min rawn nuih seih a, ka va lainat reuh tak. A chawrche in a te reuh em em a. Heti chung hian nuih a duh a, lawm a hre em em a. A pa in a chhaih chang phei chuan thawm chhuah meuhin a nui ve ruah ruah zel.





A rawn harh chhuak a tap miah lote chuan ka lung a tichhia a, ka lainat zual a ni tawp mai. Damdawiin kan thlen rual khan an jection nghal a, drip an khai zui rum rum kha a ni a. A chau lutuk a ziaawm ve deuh tawh pawh a ni mai thei.



"Bawihpui" ka tih leh chuan min rawn nuih leh heu mai a. "Na na i tia, damdawiin ah kan hruai daih che a. Apa nen khan kan ngaihtuah lutuk che a. I dam tep tawh ania aw" tiin ka be sep sep a. Hrethiam lo mah se hetia biak fo hi kan chîng a, a lo nui ve heu zel.




A men deuh pual pual ka hmuh rual chuan hrehawm ti lutukin ka thaw chhuak hak a. A biangah chuan ka chul vat a, "I eng nge na Bawihpui?" ka lo ti vat.




Vanmala a rawn lut zui a "A lo harh tawh elo?" a tih chuan ka lo bu vat a. A fapa chu a rawn hnaih nghal ruak a. "Ka fapa duat, i lo harh tawh a nimaw" a rawn ti nghal hlut a. A fapa taksa chu a rawn dek nghal vat.



Bawihpuia men pual pual pawh chu a hmel a rawn pângngai leh vat a. A pa chu a melh nghal vung vung a. "Apa kha min lo ngai tawh a nimaw" a tih chuan a rawn nui leh seih a.




"Nurse ka va ko chhin duh ang em?" tiin Vanmala chu ka râwn a, "Ka va ko ang e" a tih chuan "Aih, lo awmpui rawh keiman ka va ko ang" ka ti a. Ka tho zui nghal a, min lo dang bik lo.




Dik tak chuan reilote chhung keimaha lo awmpui tur ringawt pawhin ka zâm. A nâ a rawn zual ang a, a tap ang a, awmngaihna ka hrelo ang.




Chhungkhat hnai vai te natna chungchâng ah hian ka zam hma a, dam lo awmpui vak chi pawh ka nilo. Ka pi dam loh lai pawh khan ka ni chiah. Awmpui kha ka chuh ve chawt zel a, mahse a na a rawn chhuah chang khan ka buaipui hlei thei thin lo. Ka chiai a, ka zam vek zel anih kha.




Nurse ka va koh chuan min lo zui vat a. Cabin kan va luh leh chuan Bawihpuia chu Vanmala'n a lo mutpui hem mai.



Nurse nen kan inzui lut min rawn hmuh rual chuan a rawn tho kang dawn uaih a, mahse nurse in a lo khap vat "Mutpui rawh mutpui rawh, i dip dal loh chuan a pawilo ania" ngainat awm zeta nui var var chung hian a ti dam diai a.




Mahse Vanmala chu a rawn tho chhuak ta tho a "A tap dawn tlat a..." a ti zawi sup a. A sawi tur hrelo nimaiin ka hria, nurse pawh chu a lo nui ve tawp ringawt.



Bawihpuia chu a en zung zung a, Vanmala nen chuan kan lo ngaichâng ve ran a. Chutia nurse in a han en kual vel lai chuan a rawn tal deuh bat bat a, a rawn tap chhuak ta ngak ngak a.




Nurse chuan "Bâng bâng, tlangval fel tah loh tur, ka en kual ringawt dawn che alawm" a ti mawlh mawlh a. Vanmala chu ka han melh a, a fapa tap chu a melh ngur a, hrehawm a tih hmel takzet.




Chutah Vanmala chuan "Ka lo pawm mai dawn em ni?" a ti teh thlawt a, nurse chu a rawn hawi zawk a. "Umm, a pawi miah lo. A tal zel chuan ka en hlei thei tlat lo" a lo ti vat a.




Chu veleh rang fahranin Bawihpuia chu a va pawm nghal a, a dim dawih em em bawk. Kei erawh chet chan nachang pawh hre lek lovin ka lo ding mawl tawp a. Ka rilru erawh hrehawm tak a ni.



Chutia a pa in a pawm takah chuan nurse en vel na pawh chu a dawh ve ta hle hle a. Naute mak ve tak chu a ni.



An in check fel zawh chuan kan dinhmun chiang zawk min hrilh leh ta a "A taksa chau pawh a ziaawm deuh a, kan zai dawn hunah chuan a chak tha vat mai ang. Engmah hlauhthâwn tur a awm rih lo aw" nurse chuan a ti zung zung a. Ding zum reng chung chuan ka lo bu ve nghat nghat a.




Vanmala chuan "In zai na ah chuan kan luhpui ve thei lovang tiraw" a ti sup a. Nurse chuan a melh deuh ha a, "Thei lo" a lo ti ban chhalh. Chu chu zawh ngai lova chiang sa a ni.




Nurse chhuah hnu pawh chuan an inpawm ta reng a. "Ka lak tlak loh thin ngawt mai tiraw" ka ti sep a, ka inthiam lo lek lek. Nû zawk ka ni a, mahni fate chu buaipui thei zawk awm tak ka ni. Mahse ka thei der si lo.




Vanmala chuan "Lak tlak lohna a awm lo, mihring kan inang lova. Kan thil hmachhawn thiam dan te, kan thil thlir dan te a inang lova. Hetiangah pawh hian a zâm hma chi leh zei hawi lo chi hi awm ve alawm. I rilru tihah duh suh, a tha leh vat mai ang" min hnem tum tak chuan a ti duah a.




Tlai a lo thleng a, Bawihpuia an zai hun tur chu a lo thleng ta. Inzai na room a an luhpui dawn lai chuan ka mittui ka dang zo ngang lova. Mahse Doctor leh Nurse te hmuh lai chuan ka tap duh miah lo thung.




Ka pasal chu ka en a, Bawihpuia an nawr liam lai chu a lo thlir ve reng a. A hmel lan dan chu ka chhiar thiam lo, rilru hah hmel lutuk ang kha a pu ve chuang lova, mahse hmel hmuh nuam tak erawh a ni chuang lo.




Inzaina room a an luhpui fel chiah chu ka baw hawk hi a ni ber, hrehawm ti lutuk hian ka inhnit hraih a. Ka pasalin ka darah min lo chelh vat a, ka bek a rawn fawp tawkin "Mangang suh" tih zawng a sawi.




An zai chhung zawng chuan a pawnah kan lo nghak a. A tu amah kan tawng lo. Mahse ka pasal chuan ka darah min kuah reng thung a, min hnem tum tak hian ka hnung a chul leh hauh hauh thin.




"Ka nu te chu i be thei em?" ka ti sep a, zing lama a biak lai khan Bawihpuia a lo harh zui tak avangin ka lo ngaihven zui ta miah lo kha ania.



Vanmala chu a lo bu nghut a, "An mangang ve viau ang" ka ti tial ruai a, an tupa neihchhun a ni ve si a. An duat rawn ania, a tu mai pawh chu an mangang vekin ka ring.




"Ka nu chu tunah hian Biakinah a awm mek ang. A lo ṭawngṭai tur thu a sawi alawm" a ti sup a. Ka lo nui ro hak a, a ngaihna hrelo fe a min lo melh chuan "Naute pawi sawi lo ania, a pian tirh ata harsatna a la tawk char char ania. Pathian pawh hian..." ka tih mek lai chuan ka ngawi leh daih a.




Pathian ka dem dawn zet a, ni theiin ka hre si lo. Keini aia harsatna tam tak tawk an awm laia chutia lo dem bik chu ka hreh leh deuh a. Mahse ka rilru tak chuan demna chen ka nei bawk si. Hrehawm ti zet hian ka thaw chhuak hak a.




Vanmala chuan "Pathian dem nachâng kan la hriat hi chuan a ngaih that thlak ania" a lo ti sup a. Sawi tlang vek lo mah ila ka sawi tum chu a lo man tho niin ka hria.




Mahse a thusawi duh dan mak ka tih em avang chuan "Eng nge i sawi awmzia?" ka ti sep a, za lo zet hian a lo nui tawi tak a.




"Pathian pawh dem ngaihna hrelo khawpa natna kan la tawk lo tihna ania. Kan la dem thei anih chuan a awm ngei a ni tih kan la ring tihna ani mai. A la ngaih that thlak ka ti anih chu" a lo ti dam dap a.




Ka pasal chu ka melh ta reng a. Eng dinhmunah pawh ding ila, thil ni thei deuh deuh hi a sawi leh chut zel.




"Pathian dem chu i pawiti vak lo em ni?" ka lo ti leh haw a, a sawi tum chu ka man tawhin ka hria. Mahse ka la fiah chuang lo. A lu a lo thing vat a.



"Eng dinhmunah pawh Pathian thatna la hmu tlat thei te hi mi awhawm an ni. Pathian kan dem hma hian kan tana thil tha a lo tih tawh zawng zawng te ngaihtuah ila, dem thei kan nih loh zia kan hre thar zel mai. Demna tur aiin lawmthu sawi na tur kan ngah miau si a. Kan dinhmun pawh hi chhut chiang ila, nupa inhmangaih tak kan ni a. Pathian zarah ei leh in kan nghei ngai lova. Tin, fanau rochan hlu lutuk Lalpa'n min pe bawk a. Fa enkawl ve tur duh ngawih ngawih an awm laia enkawl tur kan nei bik te hi a hlu a, Pathian malsâwmna anih hi. A hnenah a lo hruai ta anih pawhin ama min pek ania, amah vekin a hruai leh a nimai" a ti ta duah a.




Ka lo thaw chhuak nghal ham ham a. Hetiang lam hi kan sawi dun khat a, chutihrual chuan Kristian Chhungkaw tha tak chu kan ni ve. Ka pasal lu hi Krista a ni tih ka hrechiang em a. Chu chuan amah zahna leh hmangaih zual zel na min pe ka ti lo theilo.




Ka ngawih tak rengah chuan amah bawk a rawn tawng leh a "Bawihpuia hi Pathian hnena kal nghal turin ka phal ta tihna a ni lo ania. Baptisma a chan ni a kan intiamna te kha tih hlawhtlin ka duh a. A lo puitlin thlenga Pathian hriatna kawnga kaihhruai ka duh a, hmangaih leh duat taka enkawl ka duh bawk. Chutihrual chuan a chhe ber ka ngaihtuah thleng lawk tihna anih chu. A chhe ber ka tih pawh chu a lo thleng anih chuan a tana tha ber tur a ni tho ang" a ti leh duah a.




Engpawh thleng se, ani chuan a hmachhawn thiam dawn anih hmel. Mahse kei ve hi, hmachhawn ka inzuam chuang lo. Chutihrual chuan ka pasal ber a inhuam chuan ka rinchhan ve tawp a ngai tih ka hria.



Ka mit ka chhing vang vang a, Pathian hnenah ka fapa tan ka dil a. Ka pasal chuan min kuah reng chungin ka hnungzang a lo chul leh hauh hauh a. Chu ringawt pawh chuan min thlamuan lutuk.




Doctor a rawn chhuah rual chuan kan lo ngaihven nghal vat a. Hlim hmel pu zet hian kan nupa chuan min melh a "Pathian zarah kan hlawhtling e. A lawmawm khawp mai" phur zet hian a ti a. Vanmala nen chuan kan inen a, kan inkuah nghal thlawp a, Doctor pawh a khi vur vur mai.




Ka pasal chu a nui chhuak hawk hawk a, keipawh mittui tla pur chungin ka lo nui ve hak hak a.



"Kan hmu thei tihna em ni?" ka pasalin a tih chuan "Hmu thei rih chuang lo e, zanin chu fimkhur thil thu ah ICU ah dah rih a ngai dawn a, a dinhmun te pawh chiang zawkin a hriat theih ang a. Tichuan, a tha vek anih chuan zing lamah cabin pangngai ah kan indah lut leh nghal dawn nia" a lo ti zung zung a.





Ka hnual nghal rawih thei, zai hlawhtling mah se ka hmu nghal thei lo tur chu ka lunghnûr a ni ber.




Vanmala chuan "A dinhmun chu a tha meuh maw" ngaih tha vak lo hian a ti leh hram a. Chutah Doctor chuan "Tha rih e, kan hlawhtling viau chuan kan hria a. ICU a dah tur kan tih avang khan hlauthâwng suh u. Kan damdawiin kalphung pakhat a ni ve a , dam lote dam zanna tur hi kan duh a, kan fimkhur bawk a. Engmah ngaih that loh lutuk tur a awm lo ania" a ti leh zung zung a.




Vanmala chuan a lo hrethiam khawp mai. Doctor kal liam hnu chuan Bawihpuia cabin lamah kan inzui phei leh hnak hnak a. Zanin chu kan nupa rekin kan riak dawn anih hmel e.



Kan damdawiin awmna hi damdawiin changtlung tak a ni a. An inrelbawlna leh engkim hi a fel fai thlarh mai a. A mi thawkte pawh biak an nuamin an fel em em a. In enkawlna lah a tha bawk si, sawiselna tur a awm lo. Awm man leh ilo vel pawh a to khawp mai. Mahse kan in senso ang hu inenkawlna kan dawng thung a, a thanat thlak loh.



Vanmala chuan ka hnung lam atangin min rawn kuah run a. Damlo khum a mu lovin couch ah kan mu dun a. Puan pante kan sin bawk. Khua a vawt lova, a nuam tawk vel chiah.




Ka muhil theilo chu ka khap fak fak a, ka fapa ka ngaihtuah lo theilo. Vanmala'n "I mu thei lo em ni?" a rawn tih thum dut chuan a lam hawiin ka inher vat a. A ni pawh a lo insiamtha ve vat a, inhmtawn chuan ka kuah bet ve hlan a.



"Bawihpuia chu a tha ang em le?" ka tih chuan ka sam ah a lo fawp vang vang a "Zai pui ber a paltlang tawh a, Pathian zarah a tha em em ang" a lo ti nghet charh a.



"Ka muthilh theih pawh ka ringlo" ka ti ro halh a, ka hrawk a na ngut ngut a, ka mittui rawn tla tur chu khap let fak fak a. Hmeichhia hi chu kan rilru te hi a no a, min duat a min ngaihsak tute lakah ngat phei chuan kan pangchang zual a, ho te ah pawh kan mittui a tla sam em em a. Tunah pawh ka rilru no a rawn chhuak leh der tawh.




"Rilru hrehawm deuhin awm suh, min tihrehawm thin ania" ka pasal chuan a lo ti dam thlup a, a awmah ka hmai ka nawr nghal vak a.




"Tinge fa kan lo neih kher kher le?" atthlak zet hian ka ti hap a. Ka pasal chu a lo nui nghal huk a "Kan inhmangaihna rah anih hi" a lo ti sup.




"Chu pawh nise natna tuar tur mai maiin ka lo hring chhuak kher a" hrehawm ti zet hian ka ti halh a. Ka pasal chuan min lo khap nghal vat "Mamte, i tawng malsawm lo emai. Tunah nung damin a la awm a, hei ngawt pawh hi lawmthu sawi na tham a tling ania. Bawihpuia hi piang lo tur angin sawi tawh miah suh" a lo ti dap dap a.




"Chupawhnise ka khawngaih alawm" ka ti leh hram a, ka ngaihtuahna chu a naupangchhia tih pawh ka hria. Mahse ka khawngaih tak tak miau ani. He khawvela kan fapa ni tura a lo piang hi ka lawm a, Pathian hnenah pawh lawnthu ka sawi mawlh mawlh thin. Chutihrual chuan hetiang natna hmachhawn tur chuan a lainat awm reuh em a, lo piang ta lo law law se a tan a nuam zawk ang. Mahse piang lo tura ka ngaihtuah zawng ringawt pawh chuan ka phal leh chuang lo.




Ka pasal chuan thu tawite hi a rawn sawi a, chawplehchilhin ka ngaihtuahna rit lutuk chu a ti zang hawk nimai hian ka hria.



"Thil tam tak i ngaihtuah a, i buai anih kha, Pathian chinfel turin dah rawh" a lo ti hmiah mai.



Mak tak maiin chu thu chuan min thlamuan nghal tlat pek a. Khuarkhurum thuk tak ata kaihchhuah zawk ang mai hi ka ni. Tin, thil rit tak min delh bettu laksak ang mai hian ka thawl zui hawk a, ka zang deuh vah mai.




"U Vanmal" ka tih chuan "Aw, nû-i" a lo ti vat a. Ngunthluk zeta ka auh changa min lo chhawn ziah dan a ni a,ngaiah ka nei tawh.



"Khatiang khan i ngai em ni?" ti a ka han en ha chuan mit a lo kan uk a "Tuna i thusawi ang khan i ngai em ni?" ka tih leh chuan mitmeng dam zet hian min lo melh a "Umm...ka ngaih ang chuan ngai ve tawp la i hahdam a nimai. Thil engkim hi Pathian chinfel tura kan dah chuan a fel duak mai ni. Chutihrual chuan mihringte hian tih tur kan nei ve a. Amah rin leh thil thâ tih a nimai" a lo ti dam thlup a.




Ka pasal thlamuanna ang chu ka duh ve avangin rilru tawngtaina ka nei zui nghal a. "Lalpa, Bawihpuia chu i kutah ka dah e" ka ti rilru mawlh mawlh a.




Zan mu thei lo tura inngai kha tui zetin ka muhil ta siai siai a. Ni zung eng atin ka hmai a rawn chhun siar siar takah chuan chiang lo ruai hian ka meng chhuak a. Ka awmna ka hai thelh.




Ka meng chhuak nghal a, ka mit ka nuai leh chat chat a. Ka pasal chu a lo tho daih tawh. Ka thawh chhuah rual chuan bathroom kawngkhar inhawng thawm ka hre zui a. Vanmala a rawn lang zui a.



Ngainat awm zet hian min rawn nuih a "Ka rin aiin ka mu tui" ka lo tih hliai chuan a nui suk a "Ka kaitho duhlo che anih kha" a lo ti sup.




Ham bai bai chungin ka zi mar talh talh a, "Va inphihfai la, Bawihpuia an rawn sawn dawn ania" a tih chuan ka meng phawk nghal hra a. "Tunah maw" phawk zeta ka tih chuan nui suk chungin a lo bu nguut a.




Phur zet hian ka tho nghal a, bathroom chu ka pan nghal rawk rawk a. Vanmala nui hawk hawk chu ka hre reng. Ka chetdan naupanchhiat zia lah ka hai lo. Ka che zia thenkhat hi chu ka kum nen a inmil thlawt lo. Nutling ve uaih tawh si hi naupangchhia ang maiin ka che leh khut khut zêl a. Ka thanlenna chhungkua nen pawh a inpersan hret zel.




Bawihpuia chu an lo sawn ta ngei a, tui zet hian a muhil a. A hnar leh a banah thil an la vuah tup a, ka hlauthâwng leh deuh nain Doctor in "Hlauhthâwn tur a awm lo ania, zai pui hmachhawn zo hlim a ni a. A tur ve reng a nih hi" a tih chuan ka ngaih a tha zui ve mai bawk a.





Vanmala chuan kan chanchin chu Aizawl lama kan chhungte a hrilh nghal zung zung a. An lo hahdam ve huai turah ngai ang. Kan chanchin an hriat tirh khan ka nu te pahnih lo kal mai an tum nghal rum rum a. Mahse Vanmala'n a khap a "Kan tam leh tlem khan engmah tih theih a awm dawn chuang lova. Min lo ṭawngṭaipui tawp mai rawh u" a ti a. An hnial bik lo kha ania.





U Zovi pawh chanchin kan hrilh ve nghal a, a ni chu vawiin lamah a lo kal dawn. Bawihpuia damdawiin ah kan nupain kan awmpui chawt si a, in lama tul zawng zawng a lo buaipui vek a. Awmpui ang pawhin ka en lo, kan chhungkaw zing ami angin ka en ve vek. A mizia in a zir bawk a, ngainat leh rin chu har lo tak a ni.




Damdawiin ah kar thum dawn kan awm a. Dik tak chuan Bawihpuia chu a tha chak viau mai a, mahse Doctor in check hrang hrang neih a la duh avangin kan chhuak har mai mai zawk a. Pathian zarah dam tha ve tawh tak kan ni.





Damdawiin atanga kan chhuah nî chuan Vanmala'n a thawhpui thenkhat, a kawm hnaih zual bikte chaweiah a sawm leh pek a. A fapa hian a thunun hneh thlawt a, a thawhpuite pawhin an hrechiang a. Kan sawm chin chu kokim takin an rawn kal.





Pathian hnena lawmthu sawi ngai pawimawh mi ngang a ni a. Ka pasal mizia ka chhar thar leh pakhat chu Pathian fak nun a nei tlat ! Ka nihlawh leh sawt tihna anih chu.




Pathian zarah Bawihpuia chu a hrisel chho ta phian mai a. Thla 10 a tling chho phei chu a taksa a marin a chum buang mai a. U Zovi hian "A va thang tha tak e aw" a ti leh hluai thin a.



Keipawhin mak ka ti, a piantirh leh a natna tawrh te, a hrisel loh dante ngaihtuah chuan tuna a taksa chum buang te hi a awihawm loh hial zawk.



Ka nu te nen pawh video call in kan inbe fo a, Bawihpuia dam kawr vel khan an lo zin zuai a. A bak chu kan inhmu lo leh ta vang vang chu ania. Tuna a chum buang te hi phone-a an hmuh ringawt pawhin mak an tia, a takah rawn hmu phei sela chu mak an ti zual ngawt ang. An lawm zual viau pawhin ka ring.




"A hrisel ta em em te hi a mak tiraw" Nu Zovi bulah chuan ka ti hliai a, Bawihpuia chu ka pawm tha sauh sauh a. Chutah Nu Zovi chuan "A pain Pathian thu a awih em alawm" a lo ti daih.



A thusawi chuan engtin emaw tak hian min hneh. Ka pasal Pathian mî a nih zia a lo hre ve reng te chu ka lawm. A dik lah tak bawk a. Khatia Bawihpuia a rawn dam chhoh leh takah khan ngaihtuahna thar a nei a. A pualin missionary pakhat kan chawm nghal a. Fa kan la nei lehzel te anih chuan an pualin kan chawm belh zel dawn a ni awm e.




Chu mai bakah Bawihpuia hi Bible society ah life membership leh patron membership ah a dah nghal a. Kan nupa pawhin kan ni ve thlap. Pathian rawngbawlna kawnga a theih ang zawng zawng chu a ti vek ti ila ka sawi sual lovang.




A fapa chu a duat heuh heuh khawp mai a, rin ai tak hian a zei hawi zek a. Kei ai mahin a awm thiam thin emaw tih mai tur a ni. A tah vak tum te hian a pa in a pawm tawh chuan a bang hmak zel a, ka fapa mah nise ka ngei lek lek zel.




Tum khat chu zan muthmunah Bawihpuia piancham lawm chungchang min sawipui a. A duh ropui hem hem khawp mai. Chhungkhat laina leh a thawhpuite bakah thenawm khawvengte sâwm vek a rawt a. Tul ka lo ti chiam lo. Ka sawisel deuh hlek a. Mahse "Kan neihchhun a nih rih hi" a ti vei tung a.




Kan inneih ni a ruai theh pawh duh hlei lo kha a fapa pianchamphaphaka ropui taka ruaitheh a duh tihna chu a ni sia.



Ka inneih dawnte kha chuan 'Ti ve thei lo mi tam tak an awm a, a hautak lo zawngin tih ka duh' te a ti ve a. Tunah lem hetiang zawngin a khawsa leh a.



Kan inneih ni a ruai theh chungchang a sawi dan vel chu ka sawi khum leh a. A ngawih run run hnu ah "Kan neih phawt chuan ropui taka lawm a sual chuang hlei nem. Ka fapa neihchhun anih hi. A lo pianchhuah dan leh kum khat tling tura a beih nasat zia hriate chuan min dem lovang. Pathian malsâwmna vek ania, lawmthu sawi nan pawh ropui taka lawm ve tur alâwm" a ti tung a. Ka hnial zui peih tawhlo. A ti dawn tho tho tih ka hrechiang em a ni.




"I mak mange" ka ti ta ngawt a, lungawi zet hian a nui suk suk a. Min rawn kuah nghal run a "Tunlai chu ka tan hun pawh i neilo" titau aw deuha a lo tih chuan ka lo ner nawng a "Nangmah anih kha a, i fapa bak i ngaihsak lo" ka lo ti hlak a. Min hnial ngaihna a hre bawk silo chu min nuih tlawn ringawt a. Ka sawi dik em atin ani. A fapa atchilh miau hek le.




"Ngaihtuah la, ka senior fa anih hi, ka rualpuite zawng zawng aiin ka âtchilh tlai zawk alawm" a lo ti hram a. "Nupuite ngaihsak lo leka âtchilh kha a tha chuang ami" ka lo ti hlar a. Chutah a lo nui chhuak hawk a, keipawh ka nui veleh tho. Ka thusawi kha chu ka sawi ve mai mai ani, a fapa mai bakah a nupui hi min ngaihsak lutuk tlat. Chu chu kan hrechiang dun viau bawk.




"Bawihpuia Birthday ah chuan i zai ang" a lo ti leh daih a. Ka han melh chhoh chuan hun kal tawh ngaihtuah ni awm tak hian a lo nui suk suk a. A awmah ka nawr vak ringawt a, ka zah zia chu ! Ka nulat laia KTP intlawhpawh a ka zai kha a ngaihtuah let tih ka hrechiang em a ni. Ka sa chhuak nghal pap pap mai.




"Nû zaithiam deuh a nei ve reng a, a pianchamah tal i zai sak loh chuan a len hunah a la ngei palh ang che" a lo ti thum dut a, ka va ngei tak. A aw a nuihza aw chu ka hai bik silo.




"I ninawm" ka laih luat vanga ka tih takah chuan a lo nui chhuak hawk hawk a. Bawihpuia a rawn te tak thatah chuan kan ngaihven vat a.



Ka pawm kan rual chuan "I pa hi a bengchheng lutuk a" ka ti hlak a, chutah Vanmala chuan "Tunah khan kan pahnih chiahin kan awm emaw ka ti hman alawm" a lo ti sup a. Atthlak ti zet hian amah leh amah chu a in nuih leh hawk a. Bawihpuia a theihnghilh tak tak anih ka ring.



"I ti mak ve e" ka tih chuan "I itawm em alawm" a lo ti leh daih tawh.




Tlai khat a office bang a lo haw chu guiter a rawn hawn pek a "Eng atan nge?" ka lo tih chuan "Bawihpuia Birthday a i hla sak tur ka zirpuina tur che anih hi" a lo ti sam then a. Ka malchunga Bawihpuia ka pawm lai chu min rawn lak sak hmak a, Bawihpuia lah chuan a pa chu a lo ban ve nghal ruak a.




"U Vanmal...hman zana i sawi kha i ti tak tak em ni?" ka tih chuan "Ka tih tak tak loh tur ka sawi ngai em ni?" a lo ti khauh. Hahthlâk ti lutuk hian ka melh he haw a "I ti awm ang lo e" ka tih chuan "I zai ka ngaihthlak lohna a rei tawh alawm. Kan nulat tlangval lai daih tawh kha ania. I zaithiam ka ti tak tak alawm. Bawihpuia Birthday ah chuan i zai ngei ngei a ngai" thutak zet hian a lo ti a.




"I ti zahthlâk e" ka tih leh pawh chuan min ngaihsak zui tawh lo.




A lo thutak ta phian si a. Bawihpuia Birthday lo thlen hma chu hla min zir pui ta tlauh tlauh a. Ka hnial zo lo a ni ber. U Vensangi ka hrilh lahin "A va tih chî tak, nachang a hre hle mai. Keini pawh kan lo kal remchang thei dawn a. A tha hle mai" a lo ti daih a. Chuti na na na chu kan zai ve ta poh aniang chu.




Ka hla sak tur pawh aman min thlan sak thlap a. "Ka lawm e Lalpa i malsâwmna vangin" tih kha ka sa dawn a. He hla hi chu ka nulat lai pawha la lo sak ve tawh kha a ni a, ka thiam ve viau chuan ka hria. Tin, a thu hi a tha em em a, kan chhungkaw hun tawn zawng zawngte nen pawh Bawihpuia piancham a sak atan chuan a tha viau in ka hria.




Naktuk lawk hi Bawihpuia Birthday a ni tawh a. Aizawl lama kan chhungte pawh a thei ang ang an lo kal a. Kan in a zau thawkhat bawk a, an rawn thleng khawm vek a. Puia leh Rina te chu an lo inti sial pek a, hotel ah an thleng deuh kher a, ka va han ngei tak. Vanmala erawhin a lo hriatpui thlap thung.




Zanah chuan Bawihpuia mut hnuah hla chu kan zir leh a. Ka pasal chuan min fak leh teh e. Ka zaithiam ve tak tak te pawhin ka hre lek lek tawh.



Bawihpuia Birthday ah chuan zingkar atangin kan buai a, catering tih vel ai chuan mahni a siam ngei a tuihnai zawkin kan hria a. Fatu te ruai chawpin kan han ti ve lawp lawp a.




Bangla kawtzawl chu cheiin programme hman nan kan hmang a. Thlifim leh thingkung a tam avangin nisa kan tuar mang lo.




Min bialtu Pastor thar in hunserh a hmang a. Pastor Zosangzuala ania, chuti lutukin kan va innel lo na in Pastor na na na chu kan lo hre ve a. A palianin a hleitling em em a, a zahawm deuh khup bawm a. En tawp pawha thlamuanpui awm hliah hliah mipa ang kha ani.





A nupui fanaute pawh kan sawm ang ngeiin an lo kim ve thap a. A nupui hi Zuali an ti mai a,a hmingpum chu ka hre lo. Thla khat vel chiah an lo la awm a, inhriatchian ngaihna a la awm rihlo ve em bawk a.




Fapa pahnih leh fanu pakhat an nei a, an landan atang chuan ninhlei rual lek an la ni a. Mahse a nu bulah an thu fel than hlawm reuh e. A pa a chhun deuh vek a, a hmeichhia ber chuan a nu a chhun ve lek lek a, mahse a pa lamah a kal deuh tho. Chutia thuawih deuha an awm reng thei chu mak ka lo ti khawp mai.



Kan programme hruaitu in zai tura min rawn koh chhuah takah chuan Bawihpuia ka pawm lai chu ani Faktei ka pe vat a. Vanmala nen chuan kan inzui chhuak nghal a. Kum khat tal tap ka zai tawhlo a ni a, la rei lo viau mah se ka zam lutuk tlat.




Vanmala'n guiter a lek rual chuan min rawn hnaih hrut a "I zaithiam ka tih kha tha deuhin aw" kiau suk chung hian a lo ti a. Ka lo bu nghat.



Ka pasalin duhsakna min hlan bawk a, rilru leh tih takzeta zai chungin ka tlingtla ve ta hram a. Ka hla sak chuan min hneh let takzet.




Ka zai zawh chuan kut an lo beng dar dar a, zai tha ah ka inngai hmiah mai. Vanmala pawh chuan kan thut fel hnuin ka bengbul cheta rawn kun hniamin "Zaithiamnu" a lo ti sup a, ka lo meng kalh ralh a, lungawi hmel zet hian kan nufa chuan min en ta vawng vawng a.




Programme kan hman zawh chuan ruai theh turin kan intintuah ta hlawm a. Bawihpuia chu a tlei tak vak loh avangin mipui zi nuaih nuaih kar atang chuan inchhung ka luhpui ta daih a. Nilengin a tal hah ve a , a chau ve tawh pawh a nimai thei. Inchhungah chuan ka awi darh darh a. Pawnlam thawm chu a la tha viau mai.



Kawngkhâr lama thawm a rawn awm takah chuan ka lo hawi vat a. Kan Pastor leh a nupui an rawn inzui lut a, Zuali chuan a hmui a hup tlat a.




"Enga tinge a?" ngaihtuah zet hian ka lo ti vat a, Zuali chuan inthlahrun hmel fe hian min lo melh a, a tawng dawn a, mahse pastor zawk chuan "Washroom kan lo hmang lawk teh ang a" a ti dam thlup a. "Aw tehreng mai" tih pah chuan Washroom lam awmna ka kawk nghal vat a. Hmanhmawh zetin an inzui lut nghal a. Uak ri ka hre zui nghal zat a, ka ngaih an va ti tha lo tak.



Rei vak lovah an rawn inzui chhuak ta a, Zuali hmel chu a dang bel mai. A landan atang chuan rin ruk deuh ka lo nei nghal a.



Inthlahrun hmel deuh hian min lo melh a, a hmelthain a hmel atang ringawt pawh chuan a zaidam tih a hriat ngawih ngawih. A nû hnâp a, mipa tana ngaihzawn awm hliah hliah tur ang chi hi niin ka hria. Heti em em a chiang hian ka lo la hmu ngai lova, a hnaiah a hmeltha zual khawp mai.




"A zia lo hle mai" a ti zawi sep a, pastor a lo rum nghal nghut "A inthlahrung thei lutuk a" pangngai tak hian a lo ti sup a. Ngainat awm zet hian ka lo nuih var var a "Engmah inthlahrunna tur a awm hlei nem, eng ati teh thut nge a?" ka lo ti hliai a.




Ka rin ang ngeiin pastor chuan "Raino awmdan chu i hriatthiam ka ring" nui suk chung hian a lo ti a. Ka lo phul ve hlut a "Ka lawmpui che u, engtia upa nge" ka lo tih chuan "Thla khat leh tlem" Zualu zawk chuan a lo ti vat a.




Chutah Pastor chuan "Tun tum chu raino a haw zual lutuk a. Ruai kan kil tur kha a pum a let but pek alawm mawle. Vanmala'n min sawm uluk si a, chhungkaw kim a rawn telpui hram che u kan duh sia" a lo ti leh zung zung a.



"In ti lawmawm hle mai. In duh chuan inchhung lamah hian lo kil daih ula, U Zuali tan pawh a nuam zawk ang" ka lo ti ve sawk sawk a.



Mahse Zuali chuan min lo hnial nghal vat "Naupang nen kan ni ve nuaih sia, ka va ei ve thei naw naw mai ang" ngainat awm zeta min nuih chung hian a ti a.




"Pawnah naupang kan rawn kalsan daih sia, kan va chhuak leh tawh ange, chuan ka lawm lutuk ania aw" a tih leh tak zung zungah chuan "Awle awle" ka lo ti ve vat a. An inzui chhuak chu ka lo thlir reng a.




Pastor chuan a darah a kuah run a, a bengbulah a phun sup sup bawk a. Ka en zui reng tih an hrelo anih ka ring.




Bawihpuia chu ka awih zawm leh darh darh a. Vanmala a rawn lut zui a "Ka zawng che u a" a rawn tih chuan "A chau ve deuh ani mai thei, a tlei duhlo" ka lo ti vat a.



Ka puak mek lai chuan pawm tumin a kut a rawn phar a "Pawn lamah mikhual ho lo va buaipui la, Bawihpuia chu keiman ka lo pawm ang" a ti sup a. Ka lo hnial bik lo. Hetia a tlei loh chang hi chuan a pa in tih dan a thiam ber.




Pawna ka chhuah hnu chuan Pastor te chhungkua bawk kha ka va hmu fuh leh a. An fapa upa ber ni awm tak chuan antlak a lo hawp ri khur khur a, ka nuih a tiza ang reng. An fate chu an hmuhnawm sip sep reuh aia. Pastor chuan an fate chu a ngaihsak em em a, a nupui lam hawi chuan a nui leh suk thin a. Eng emaw sawi hian a phun sup a, Zuali chuan a darah a beng dat a, a lai niin ka hria.




An hmuhnawm chhûngkua tak tak ani.



___________*_________*_________

(A thui vawng vawng. U Sangzuala ka ngai lutuk a, tum loh deuhin ka lo zep. He thawnthu hi tawp thei reng tawh a ni a, mahse thil thai lan duh ka la nei a. Chapter hnih vel daih hi ka thluak chuan a la awm a, mahse in duh dan anih chuan chapter khat chauh pawhin a tawp kan khar thei tawh aw. In duh dan lo sawi ula, chapter khat nge chapter hnih in la duh. Chuan, naktuk hi lo dah ka tum rum rut a, mahse ka û hian interview a nei dawn a, a aiin dawra ka thawh lawk a ngai dawn a. Ka lo dah hman dawn lo aw. Wednesday ah kan inhmu leh vek dawn nia. Pathian zara dam chuan)


Show post links
Top

[Ngaia]

DEPUTY COMMISSIONER
By CVL Awmpuii




Chapter 40




Ral atanga U Faktei min rawn ko ri ka hriat takah chuan ka va pan vat a. Min lo pan ve nghal zat bawk.



"Khawnge Bawihpuia?" a ti deuh lang lang a, kan intawh chawpchilh nghal mai avang chuan "Inchhungah U Vanmala'n a pawm, a tlei tawh vak lova" pangngai tak hian ka lo ti vat a.



A lo bu nghat nghat a "Naute engmah hrelo tan chuan a ninawm ve hman dawn em ani. A tlei rei zawk phian alawm" a lo ti nghat nghat a.




Ka nu in kan pahniha min rawn koh leh takah chuan kan va pan vat a. Chet ngaihna apiangah kan che sawk sawk a, hahthlak tham erawh a nilo.



Ruai theh tur apiangte chu hlim hmel pu takin kan lo nuih sang hlawm a. Hlim tak tak hi chuan hlim hmel put te hi a har lo.



Pawn a ka awm rei tak deuh avang chuan inchhung lama Vanmala te pafa chu ka ngaihtuah ta deuh hlek a.




Ka nu bulah chuan ka sawi zung zung a "Inchhungah an pafa khan ka kalsan daih sia ,ka va ngaihven lawk ange" ka ti a, kal ka rual nghal a.



Inchhung ka luh chuan an lo la in awi durh durh a. Vanmala chuan paw mai lovin a pawm hlu hlu a, Bawihpuia lah chu a bei hle hle a, mahse a meng kur thung a.



"A muhil tawh ang chu ka tia" ka va ti var a, ka thawm hriain an pafa chuan an rawn hawi vat a. Bawihpuia pawhin min rawn melh chiang ngang mai.




Chutah Vanmala chuan "A mut a chhuak lo aniang " a lo ti sup a, a pawm tha zui nghal bawk.



"Khawi ka lo pawm ve tawh ang, a rit tham si a, khatia ding chunga pawm reng chu i kut a kham awm emai" ka ti zung zung a. An lamah ka ban ka phar zui nghal bawk a.



Vanmala chuan "A duh ang em aw" a ti fan ruih a, kan han inhlan tur chu kan fapa tereuh chuan "Papa..." a ti tung a.




Kum khat tling ve tawh na fam chu tawng a zir chho ve tan a. Papa tih leh Mama tih hi kan thiam viau a, a bak hi chu kan la riat nawk nawk a ni deuh ber mai.



Hahthlak ti zet hian ka fapa chu ka en a. A pa awmah a hmai a phum ru kak a, a pa lah chu lungawi hmel deuh hian a nui suk suk a. A fapa samah chuan a chul thuak a.




"Ka lo la pawm rih mai ang" a tih chuan "Pawn lamah i thawhpui ten i hming an lam an lam tawh sia" ka lo ti halh a. A ni lah tak bawk a. A thawhpuite nen innel ve viau tawh mah ila amah ber a awm si loh chuan a nuam tak tak theilo.



"Anih chuan chhuak tlang ila a nimai lawm" a lo ti sam then a, a fapa chu a pawm tha nghal nawlh bawk a. Bawihpuia lahin a chhaih dawn emaw tiin a lo nui ri hak a. Kan han nui leh rih.




Pawnah chuan kan inzui chhuak ta a, "Mi bulah a tlei lo leh tho ang" ka ti chhuak nang nang a. Mahse Vanmala chuan "A fel tawh ang" a lo ti tlat thung.




A pa sawi ang ngei ngeiin ruai theh chhung zawng deuh thaw chu a tlei ve ta phian a. Naupangho chuan an lawm si, an chhaih nui uarh uarh a. Pawm an tum veleh rang deuhin a pa a ban leh rawk rawk zel a. An ngei thei ania aw.




Kan awmna lama pator te chhungkua lo inzui phei chu nui sang chungin ka lo melh a. An va hmuhnawm chhungkua tak.



Kan bul an rawn thlen chuan "A va tlei tawh ve" Zuali chuan a lo ti var a. "A pa hian a awm thiam zawk a" nui hak hak chung hian ka lo ti vat a.




An nupa chuan an inmelh ralh a, kan pastor intithei hmel ka hmu nghal zat. "Keipawh kan fate hian min ngaina zawk alawm" nui suk suk chung hian a lo ti a. Zuali pawhin a lo nuih tawp.




"Haw mai te kan lo rilruk tawh a" pangngai tak hian Pastor chuan a lo ti leh sup a. "In ei puar meuh maw" Vanmala zawk chuan a lo ti vat a.




"Kan puar lutuk, naupang phei chu an irhfiak awk awk mai" tiin an lo chhang vat a. Kan han nui ho dar dar a.




Pastor chhungkua tih takah an bula awm a nuamin a thlamuan thlak kher mai. An dam nupa dap mai a. Naupangtê a bial rawn vawng si an phui sui viauin ka ring.



Kan han titi khawmuang leh rih a. Pastor chuan an fapa naupang ber chu a pawm a, a upa te pahnih lah chu a te a tein an lo inchhaih ve reng bawk a. An lawmawm tak tak a ni.



An haw dawn hnaih tak takah chuan Zuali chuan a bag khai atangin envelope hi a rawn phawrh a, ka lama rawn lek pah hian "Mamte, piancham lawmpuina aw" a lo ti var a, ngainat awm zetin min nuih bawk a.



"A ngai kher lo asin" ka lo ti hap, chutah Pastor chuan "La rawh la rawh, kan tih ve theih tawk anih kha. Kan lei rohlu ten kum khat hmel an han hmu thei ringawt pawh hi a hlu ania. Kan lawmpuina che u anih kha" a lo ti zung zung a.



Vanmala chu ka melh zawk a, a lo buk nghat takah chuan rilru nuam lo deuh hian ka la ve ta nge nge a. "Anih leh in ti lawmawm, kan lawm lutuk e aw" ka ti sap a.




Chutah Zuali chuan "Thil dang han in leisak a chakawm viau nain a chawpchilh ang reng si a. A sum pai zawngin kan lo lawmpui ta mai che u anih hi. Eng tham mah phei chu a nilo" a lo ti zung zung a.




"Aaa...engpawh chu nise in ti lawmawm hrim hrim. Kan sawmna te in ngai pawimawh a, kan lawm tawh sa nen" ka lo ti ve hliai a. Tawngkam ka thiam lutuk hran lova. Lawmthu sawi vak ngaihna pawh ka hrelo.




Engmah sawi lovin min lo nuih var var tawh thung a. Pastor in "Kan kal ange" a tih takah chuan an inzui haw ta a. An zahawm chhungkua bawk si, an awhawm takzet.



Zanah Bawihpuia birthday present dawn hote chu kan hawng a. Amah pui lah chu a muhil duh der lova, a thilpek dawnte chu a lo la ve zung zung a. Hrethiam ve ni awm tak hian a tal nawk nawk a. A lawmawm tak tak ani.




Beisei phak bakin thilpek a dawng hnem a. Kan phu loh mite duhsakna kan dawng mawlh mawlh a ni ber e.



Envelope te pawh kan hawng hlawm a, Pastor te envelope chhungah chuan cheng sanghnih lai mai a lo awm a, min duhsak ka lo ti khawp mai. A inthlahrun awm lek lek zawk.



Zan dar 11 velah kan mu hman ve ta hram a. Bawihpuia chu a niin a awi mu tawh a, a tihzia phian mai.



Ka pasal nen chuan taks insi chetin kan mudun a. Bawihpuia chu a chau ve hle ania, a muhil bawrh bawrh mai.




Vanmala chuan inbengkang uaihin ka sira kan fapa muhil thaw sak sak chu a rawn en leh te te a, a samah chul zauhin a nui suk a. A biangt puar ak te chu a tuai hauh hauh a.



"I ti harh ange" ka tih chuan "Nang ai a harh ka hlau fe zawk" a lo ti thum dut a. "Anih chuan khawih tawh suh" ka lo ti hlak a. A nui suk duh lek chauh.




Ka taksa chungah a ban a rawn phar duai si a, min si chet bawk si ka thawk a ti chham lek lek.



"Mu tha rawh" ka tih leh takah chuan min rawn bawhkan deuhin a fapa biangah a fawp zauh a. A rawn mu tha veleh mai bawk a.




"Nang ai a harh ka hlau fe zawk" a lo ti thum leh bul bul a, "Ka hria" ka tih hlak rual chuan zawite hian a nui ri a. "A chhan min zawt dawn lo em ni?" a lo ti dam thlup a.



"A ho emai" ka lo tih lai mek chuan "A harh chuan chance kan nei dawn lo asin" a lo ti pek a. Ner nang hian ka han melh chho a, mitmeng dam thlupin min lo melh thung a.



"Ka ti tak tak alawm, Bawihpuia vang hian duh ang pawhin kan inngaihsak tha hman lova. Kei chuan heihi tha ka ti miah lo ania. Kan fapa a ni a, kan ngaihsak tur a ni. Mahse kan nupa bila hun nei lo khawpa ngaihsak uchuak chu ka duhlo. Fate hian nu leh pa inhmangaih an phuar nghet sauh tur a ni zawk" a lo ti zung zung a.




A sawi dik ve tho mai. Bawihpuia a lo hrisel lo bawk nen kan ngaihsak khu chuk thin a. Tunah a lo dam ta deuh a ,mahse hlauhthawnna kan nei lo thei lova, kan ngaihsak bang lo. Kan nupa bil pawhin hun kan hmang dun khat ta viau mai. Chutihrual chuan kan inhmangaihna a va tla hniam ta e tihma erawh a nilo.




"Min ngai tawh lo em alawm" uang thuang zet hian ka lo ti a, ka han melh chuan a lo nui duh der lo. Thutak runin min lo melh a, a aw thian kharhin min kuah tha sauh sauh a. Ka bawp a rawn kherh bet nghal chial a.




"Fiamthu pawhin khatiang kha sawi tawh suh. Ka ngai ber zel che ania. Inneih rei tak avanga nupa inhne ang kha keini nupa hi chu ni ve lovang. Miin 'Inneih tirhte chuan tupawh kan inngai vek alawm, mahse a lo rei a, fate kan han nei a. Kan buai chho telh telh a, inneih rei poh leh kan inhne ve tial tial mai' an tih ang kha chu ka ni ve duh miah lo ania. Kan innei rei telh telh ang a, kan inhmangaihna pawh a zual zel tur a ni" thutak zet hian a ti ta dap dap a.




Kan nupa inlaichinna a lo ngaihtuah nasa ve hle tih a hriat mai e.




"Anih chuan min hmangaih zual zel ang che" ka lo ti nang nang a. "Ka theilo " a tih tawi tak rual chuan inbengkang meuhin a hmel ka han en a. Fiamthu hmel a pu si lo.



Mitmeng buai naka ka han en lai chuan min lo nuih suk a. Chutah thutak zet hian "Hei aia nasa hi chuan ka hmangaih thei tawh lo che. Ka hmangaihna neih zawng zawng hi ka hmangaih tirh atang che khan ka pe vek tawh che, inhmangaih zual vak ngaihna a awm tawhlo. Mihringin a hmangaih theihna sang berin ka hmangaih si che a" a lo ti charh charh a.




Hawisawn thei lek lovin ka thlir ta reng ringawt a. Ka pasal hi min hmangaih zual zel tura phut buai ka tum tawh lo. Tuna min hmangaihna hi hmangaihna tawp khawk anih chu!




Mipa se nghet tak a nihna a lang leh ta. Chutiang chiah chuan a hmangaihna pawh a nghet a, a kiamin a zual eih dawn lo tihna anih chu ! Ka lo pawiti der lo, tuna min hmangaihna ah hian ka lungawi lutuk tlat. Sawiselna tur ka hrelo.




"U Vanmal..." ka ti ta thlawt a, lungawi zet hian min melh a, ka sam tla hniang chu ka bek sama rawn zeh pahin "I nihlawh khawp mai ka hmangaih si che a" a lo ti churh a. Ka nui ta ringawt. Ka nihlawh em atin ani!




Lawngtlaiah chuan kan insawh nghet sauh sauh a. Ka pasal mualphona te pawh kha theihngilh in a awm telh telh a. Ka hriat theih chinah case chungchang kha tuman an sawi leh ta lova.




Vanmala pawhin a hna chu theihtawp chhuahin a thawk zel a. A hmaa a hmingchhiat na te kha a thai bo hneh lutuk tlat. Lawngtlai mipuite fak rawn leh duh rawn a ni chho leh mek a. Chutiang dinhmuna ka pasal a ding chho leh ta chu ka lawm takzet.




Nu Biaki te pitu pawh an reh vang vang a. Mahse Pa Chhuana'n an chanchin a lo hria a, hman deuh lawka ka bula a sawi dan chuan Nu Biaki kha a hrisel lo chho khawp mai a. Sangsangi pawh a pa chhungte lamah a dah ta ngawt a ni awm e. A pa chhungte lah chuan hman atang tawhin enkawl an duh ngawih ngawih hi a lo ni a. Tha te tein an indawr anih hmel. Chutihrual chuan an lak atangin Nu Biaki chuan mimal puihna a dawng hran lo ani awm e.




Sangsangi chu ka lawmpui takzet. Naupang pawi sawi lo a ni a, enkawlna tha thei ang ber dawng sela tih chu ka duhthusam a ni. A pa chhungte lamin an enkawl anih chuan tun aia mize tha lehzual zawk hi a nei thei ngeiin ka ring.




Vanmala ka hrilh ve lah chuan "A that chu" tih zawng a sawi a, Sangsangi ka lainat thu ka sawi lehzel pawh chuan min chhang zui tawh lovin ka thusawi a ngaithla ringawt a. Sawi zui vak a duhlo niin ka hria.





Sawrkar kum thar a lo nih chuan ka pasal hnathawhna hmun chu sawrkar lam atangin an rawn thlak ta a. Aizawl sawrkar office hmunpuia thawk turin an lo duh a, chumi hmunah chuan hna a zawm dawn a ni awm e.





Lawngtlai khawtlang hruaitute leh mipuiten an hriat chuan an lo ui ve em em a. A âwm ka lo ti hliah hliah. An khawtlang tana a hnathawh a ropui em a, ka pasal a nih vang ngawr ngawr pawh ni lovin mipui hnathawk a ni tih a inhriat chianna chuan min ngaihsan tir zual.




Office lamah thlahna hun te an lo hmang a. Chumi ni chuan kan nufa pawhin kan zui ve a, Bawihpuia pawh fiah lo deuh deuh chuan a tawngthei ve tawh a. A lo sual zawk zawk bawk si lo, mi lawm a hlawh em em a. A pa lah hian a chhuang mai sia. An inhmeh pafa an ti fo thin reng a.




Pathian zarah kan dam a, hunte chu a kal duak duak nimai hian ka hria. Tunah chuan Aizawlah kan awm tawh a. In leh lo nghet nei sa kan ni a. Kan inpuiah kan awm a. Vanmala office kalna hi a hlat deuh avangin a tirah khan an office awmna venga in luah mai turin ka nuin min be râwn a, min ngaihtuah vang a nih ber chu. Mahse Vanmala nen kan rilru a lo inang chiah a. Aizawl kan awm dawn ta sa sa anih chuan mahni in kan nei ve reng a, awm hrang lova ka nu te fin kan tithlu ta zawk kha ania. Kan thlang sual lo khawp mai.





A hma zawng aiin chhungkua kan inpawh a, ka chhungte lam pawh an lo lenglut fo a. Min hringtu ka nu hian Bawihpuia hi a ngai em em a, an la phei ve fo bawk a. A hlei kang ve ta bawk a, ngaihtuah awm lutuk a ni tawh hran lo.




Bawihpuia kum li tlin ni chuan kum dang ang bawkin thenawm khawveng leh chhungkhat laina te tan ruai kan buatsaih leh a. Vanmala duh dan bawk a ni leh pek a, a fapa tan chuan a uchuak thei ang berin a che ti ila ka sawi sual lovang. Han khap lah hian "Ka senior fa anih hi" a ti tung zel a. Hnial chi pawh va ni suh.





A duh dan chuan a school luh hma chu ruai nena lawm char char a duh a. Nakum lamah chuan sikul a kal ve thei tawh ang a. Kan lawm bung bung bik tawh lovang.




Zan muthmunah chuan fa dang neih belh chungchang kan sawi dun a. Ka inthlahrung ru teuh mai.



Sawi leh sawi hnu, Bawihpuia hi thla kim lova piang a nih bakah ka neih danin a zir lo em a, doctor pawh khan fa dang neih leh kan harsat tur thu a sawi anih kha. Vanmala pawhin chu chu a hre ve reng a. Hetiang lam hi vawikhat mah min sawipui ngai lo reng a. Mahse zanin chu a vei ve ngang anih ka ring. A rawn sawi chhuak ta nge nge chu ania.




"A hun leh tawh viau chuan ka hria a, nang i inhuam bawk a" tiin min râwn a. Ka âw ka lo thian nghal kharh a "Nia...inhuam chu ka inhuam a" ka ti ro halh a, sawi leh mai tur pawh ka hrelo.



A tlem berah fa panga tal a duh thu min hrilh a, mahse tun dinhmun ngaihtuah chuan kan puitlin theih hmel si loh.




Fa neih chungchangah hian a tu fel loh zawk zawk pawh lo ni se a hmeichhia zawkin kan tuar ziah maiin ka hria. Mipa lam fel loh pawh lo ni ta se hmeichhia zawk kan inthlahrung a, hrehawm kan ti teuh zel tho. Tun tum phei chu keima lam zawk a ni si a. Inthlahrun a na duh kher mai.





Ka rilru hria ni awm tak hian Vanmala chuan "I rilru tih hrehawm nana lo sawi ka ni lo ania. Bawihpuia pian hlima doctor sawite pawh kha ka la hre ve vek. Mahse kha kha indan beh tir a, rilru hrehawm nana hman ka duhlo. Lalpa laka kan rochan turah hian tumahin min dal theilo. Min pe dawn anih chuan min pe dawn tho tho a. Min pe dawn lo anih leh kan tana tha tur a nimai. Kan dil phawt ang a, a tul dan zelin a che mai ang. Pek belh kan nih tak loh pawhin Bawihpuia kan nei tawh tho a. Ka lungawi ania" a ti ta duah a.




Ka pasal hian min va thlamuan hneh tak. "Ka rai theih tawh pawh ka ring chiah lova" ka tih chuan a lo thaw chhuak ham ham a.



"Pathian tan theih loh a awm lo" a lo ti bur a. A rinna ah a chiang thei ngei mai.



A hnuah chuan pangngai deuh zawk hian "Mihring hi beidawng lo phawt mai ila, Pathian khi che lo thei lovin siam ila. Kan duh chu pekin kan awm mai ang" a lo ti leh churh a.




"Pathian i rin dan em em hi aw..." sawi tur hre tawh mang lo hian ka lo ti vang vang a. Ngainat awm zet hian min lo nuih a.



Ka sama chul hauh hauh pah chuan "A thlamuan thlak asin. Amah rin mai hi kan tih tur ania, chu pawh chu kan ti hlei thei lo ania. Rin mai hi a awlsam" a lo ti dam leh thlup a.




Nui var var chungin ka lo kuah tha sat sat a. "Ka fapa chu a muhil tawh ang em aw" Vanmala chuan a rawn ti chhuak hluai a.




A pi leh a niin an riahpui daih a. 'Kum li ka ni tawh a, api leh ani bulah ka riak dawn' a ti ve tung a. A pa in a thlem ngial pawhin zanin kan bulah a mu duh thak lo.



"A inti tlangval tawh e" ka lo ti halh a, kum li chauh la ni mah se duh aiin a inti tlangval a. An tetlai a reilo an tih hi a lo dik tak tak anih dawn hi. A lo pian laite kha hmanni lawk nimaiin ka hria, hun hi a kal chak takzet.




"A chang hi chuan ka enkawl chhoh zel dan turah hian ka rilru a buai ve thin khawp mai" Vanmala chuan a lo ti hulh a. A ni thei dawn hian ka hre lutuk.




Rin ai daihin a fapa enkawl kawngah hian a nem a, ka beisei loh lam daihin a enkawl ka ti mai. Strict deuha a enkawl chhoh ka rin laiin a duh apiang tihsak a tum zel a. A tihsak nge nge zel bawk a. Bawihpuia pawh hian a hlau vak lo, mahse han hlauh vak turin a thinrim khum ngailo hrim hrim a.



Vanmala ka fak leh na deuh chu Bawihpuia bulah hian phone khawih vak a phal lova. "A mithmuha phone kan khawih nasat chuan a ngen ve ang a, nakin zel atan a thalo" a ti a. Chuvangin Bawihpuia bulah chuan phone kan khawih ngai lo tluk ani.




Mahse min hringtu ka nu ten an lak phei zeuh zeuh takah hian a hre ve deuh reuh tan a. Awm tlei nan YouTube an lo enpui thin pek a. Vanmala'n a remti vak si lova inthlahrun a na duh khawp mai. Mahse engmah a sawisel chuang lo.




Ka pasal muk zeta inngaihtuah hmel chu ka han thlir chho deuh ha a, a âwm zawna mu ka nih avangin ka en dawn hi chuan dah chhoh deuh ha hi a ngai thin.



"Fapa chhawr tlak deuhah i chhuah dawn tih ka hrechiang alawm, ka ring thlap che" tiin ka lo nui var var a. A fapa chungchangah hian a inrintawkna a hloh mai ka hlau ani.




"Fate meuh enkawl chu a lo har dawn anih hi, fa te sualna ah nu leh pa te hi dem vak chi pawh an lo ni lo. Fa fel deuh deuh nei thei te erawh an ngaihsan awm" a lo ti dam thlup a. Ka pawm zawng tak a ni.




Pastor hian drugs addict fapa a nei thei a, drugs addict fapa hi Pastor a lo ni ve thei tho bawk. Mihringah hian fel chi an awm ve tawp chu ka ti dawt ngam lo nain mihringah hian chhungkaw enkawlna in a sawi danglam ve em em loh mihring hi an lo awm thei dawn viauin ka hre ta.




"Bawihpuia ringawtah pawh i rilru a hah a, a dang kan neih belh phei chuan i hahna vek a ni dawn anih chu" ka lo ti uang a. A lo rum deuh nghut mai.



"Fa sawm pawh nei ila rilru hah chung chung pawhin tha takin ka enkawl ang, Vanmalsawmhlua leh Hmingmawizuali te fa chu an chhawr tlak tur a ni tawp" a lo ti churh a. Ka lo nui hak hak mai.



A thusawi chu a ti ngei dawn tih ka hria.




Ka muhil tep tawh tihah chuan min rawn be leh a "Muthilh i tum ringawt elo?" a ti he haw a, men pawh meng mang hlei lo hian "Umm...tinge" ka lo ti tiak.



"Bawihpuia a awm loh hi..." a lo ti nulh, ka lo thaw chhuak hak a. A fapa zan khat riak bo lek pawh chu enga tinge maw a vei em em le. Ka nu room lawkah an riak tho sia.




"Kan muhil theilo tihna em ni?" mit la chhing reng chung chuan ka lo ti leh tiak a. Ka mut a chhuak tawh sia, chuta kara Bawihpuia a lo tih tuah hum leh tawh chu ninawm lamah a kal lek lek.




"Muhil theilo" a lo ti bur mai. Chhang duh tawh lovin ka ngawi ta hmak a. Muthilh san tawp ila a dik vek a nimai.



Thawklehkhatah Vanmala chuan min pawt chho ta hrawk mai. Ka meng phawk nghal kawk mai. Vanmala lo nui suk ka hmuh rua chuan thinrim lutuk hian hauh ka tum a. Mahse hnuailama thil min kam runtu avang chuan ka kâ ka chîp nghal hmak mai.



Vanmala chu awmze nei lutuk hian a lo rum chhuak hawk a. "Kum nga dawn kan innei tawh, a beat hi man thin rawh" a lo ti rum hawk a. A taksa chu hnuailam atangin a rawn chet zui a. Ka lo ip nghal chawih mai.




"Bawihpuia a awm lova, kum li hnuah hun thawl lutuk kan nei tihna, i muthilh ring suh" a lo ti khur leh hluk a. "U Vanmal..." ka lo ti hak a, "Sorry, mutchhuak viau mah la ka hma ka sial dawn" tih leh min lehthal a rual a. Khawi lama mutchhuak, a thiltih avang chuan ka harh nghal kawk kawk mai.




Kum li chuang kan innei tawh a, min beisei hian man loh chang ka la ngah khawp mai. Tun tum ang te kha, a thleng leh zeuh zeuh thin. A nuih a za thin hrep lehnghal a.




"Bawihpuia nau tur" chet lak paha a tih chuan ka lo nui hak a. Ka pasal chu engtik lai pawhin a duhthawh thin a, a ze ngai bawk a chhuah leh tak kha.




___________



Thutkhawmna lam atanga ka pasal aw zangkhai vah leh naupangho ri khut khut thawm ka hriat rual chuan lawm lohin ka nui nghal var var mai. Ka antam then lai chu ka thian zawm mawlh mawlh a.



Gas bula chawhmeh vil mek Apuii chuan "Naupangho sikul an lo bang tawh anih chu" a lo ti var a.




A sawi zawh rual rual chuan ka fate chu an rawn tlan lut nghal rawk rawk a. An hnungah ka pasalin a tê ber Zodina pawm chungin a rawn zui lut bawk a. Ngainat awm zet hian min rawn nuih a, ka lo nuih let ve sak bawk.




Sawmpuia chuan min rawn kuah nghal thak a. Sawmhlua leh Sawmzuala te chu dan ngai tein chokaah an inum kual leh nghal a. An ri chel chul mai. Apuiin a lo nuih leh nasa tawh mai.




"Sikul a nuam em?" ka tih chuan Sawmpuia chu a lo bu nghat nghat a. "A û te saw an infiam bal leh dawn nih saw" tiin a u te pahnih in umkawi zawk zawk chu a lo melh vung vung a.



A hnuah ka pum puar lah chu a kut tereuhte chuan a lo khawih nghal a "Ka farnu tur" a ti leh tawh. Sawmpuia tawngkam chu ka lo nuih pui leh hak a. Kum 5 lek ni si hi a inla puitling lutuk a, a nuihzatthlak zawk. Tun atangin unaunu tih aiin farnu tih tawngkam a hmang nghal ania. A kum phu lo hian tawngkam bungrua a nei tha a, khawi atanga a hriat nge mawni.




Vanmala chuan a fate in umkawi zawk zawk chu dam thlup hian a duhtawk tawh turin a ti a. Thuawih deuhin dawhkan bula chair ah chuan an rawn thu thla ve mai bawk a. Vanmala pawh chu Zodina pawm reng chung chuan ka bulah a rawn thu thla ve vat a. Sawmpuia chu ka sir leh lamah a lo thu tha ve nghal sat sat a.



Apuiin an thei tui in tur a lo chhawp chhuah sak nghal a. An thlan a tla hliam bawk si, an hah ve hle aniang an in zui khawlh khawlh a. Sawmhlua leh Sawmzuala te chuan hah hmel zet hian an in ri khulh khulh a. Sawmpuia bawk chuan a û te pahnih chu a en reng a, a theitui in tur chu la in felfai zet hian a in zui a. A û te pahnih duh khawp loh hi a pe na ve a, nuih hi a tiza thin ania.




Theitui an in zawh chuan inthlak turin Apuii ho chuan inchung lamah an chho ri nghal dawt dawt a. Mipa rual an ni bawk a, an thawm hi a zawi theilo.




Thawm a hlat takah chuan ka pasal chuan "I chau em?" a lo ti sup a, ka lu ka lo thing vat a. Zodina'n "Ama...pawm" a tih takah chuan ka lo la vat a. Vanmala pawh chuan min lo pe tha ve mai bawk a.




"I chau viau zawk lo maw?" ka pasal melh pah chuan ka ti leh hliai a. A chau ve thei ngawtin ka ring. Kan chhangchhiain naupangho buaipuitu ber a ni bawk sia.




"Sawm vel la awm belh dawn pawh nise ka la inhuam" a tih chuan za zet hian ka lo nui hak hak a. Ka malchunga thu mek Zodina lah chu kan thusawi hrethiam mang lo hian a lo nui ve ngawt a. Kan han nuihpui leh rih.




Ka pasal chu chhangchhe pa dik tak a ni ve ta. Ka rai thei tawh dawn lo emaw ka intih hnu ah ka rai veleh hlauh mai a. Sawmhlua a pian hian Bawihpuia chu kum 7 a ni tawh a. Sawmhlua rawn piana a pa hlim zia kha ! Neih belh kan inrin tawh loh hnuah nei leh kha kan ni ta si a.




Khata tang khan beiseina thar kan nei lehzual a. Kan beisei ang ngeiin fanau rochanah Lalpa'n kan phu lohin mal min sawm zui a.



Tunah chuan Vanmala duhthusam ang ngeiin fa panga lawih kan nei tawh. Bawihpuia pawh kum 17 a ni ve tawh a, rawlthar a ni ve tawh tihna anih chu! Sawmhlua kum 10, Sawmzuala kum 8, Sawmpuia kum 5 leh Zodina kum 2. Tin, tunah hian nau ka keng leh mek bawk a. Kan chhangchhiat zia chu sawi hian a siak lo a ni ber.




Mipa rual an lo ni lehzel bawk nen buai a na bik a. Apuii hi awm lo phei sela chu kan buai dan a rapthlak ngawtin ka ring. A awm chung pawhin kan fel dai diak theilo chu a ni si a.





Mahse fate vanga buai theia kan awm ringawtte hi Pathian malsawmna ropui lutuk a ni. Hrisel takin fa panga ka hring thei ania, mihring tih a nilo tih hi ka hrechiang lutuk a. Chu chu ka pasalin a sawi fo pawh a ni.




"Chhanhima a rawn haw tawh em?" a tih chuan ka lo thaw chhuak hak a. Kan inchhungah hian rawlthar kan kawl ve tawh tlat a. Eng eng emaw neuh neuh kan nei ve zeuh zeuh tan lo theilo.




"A rawn haw tawh a,a chhuak lehnghal" ka lo ti halh a. Vanmala hmel tak nghal run chu ka hmuh hmaih loh nasa mai.


A fapa rawlthar inla ngeng chho vel hi a la chingfel hlei thei lova, kawng a dap mek tih chu ka hria. Engtin tak han in chingfel pafa ang maw?



_____________*___________*________


(Next chapter ah a hmawr kan bawk ang)


Show post links
Top

[Ngaia]

DEPUTY COMMISSIONER
By CVL Awmpuii



Last Chapter



Bible ah fa enkawl dan tha kan hmu fo a. Tin, fa enkawlna kawnga min pui theitu tur lehkhabu tam tak a lo chhuak tawh bawk. Chutiangte chu chhiarin hre bel hle mah ila mahni kova a lo tlak ve meuh chuan tihhlawhtlin a lo harsa hle tih kan fapa Vanlalchhanhima hian min ngaihtuah tir.




A hmaa fa enkawl dan thiamlo viau a ka lo hriat thinte pawh kha ka dem ta lo. Fate enkawl hi a lo harsa hle tih ka hre ve tawh tlat a.



Mahni kova a lo tlak ve meuh chuan kan buai a, kan rilru a hah a. Enkawl dan tha dang dap ruai mai ni.



Chutihrual chuan keichu ka vannei a, pasal tha tak Pathianin min pe a. An pafa hian an la inchingfel ve vatin ka ring.



"Dar engzatah nge a lo haw?" ka pasalin a tih chuan "Dar 1 leh a chanve rik hma hretin" ka lo ti vat a.



Tunah hian Chhanhima hi pawl 11 a zir ve mek a. Vawiin hi an sikul ban hma ni a ni a, a naute a rawn ban khalh a. Tum dangah chuan a pa in a lam vek thin a. Mahse vawiin chu a dan a dang a, a pa awm loh lai châng ni awm fahranin a chhuak zui nghal daih anih kha.



Naupangho an rawn inzui thlak leh takah chuan sawi zui lovin kan ngawi ta daih a. Zodina pawh a pa in a pawm leh tawh a, room lamah inthlak turin an inzui chho ve nghal a.



Choka an rawn luh rual chuan Sawmhlua leh Sawmzuala chu an rawn inhnial lut nak nak a. Sawmhlua'n "Sawrkar hnathawk ei ru ai chuan hnathawk tha vak lo ei ru lo pawh an tha zawk. Rinawm taka awm hi a tha ber" a tih laiin Sawmzuala chuan "Sawrkar hnathawk ve si, hnathawk tha lo ai chuan ei ru pawh ni se a hna thawk tha se. Chutiang sawrkar hruaitu chu an tha zawk" a lo ti ve tlat a.




Anni pahnih hi chu kum zawna piang ang vel an ni a. An karah kum khat tla ve bawk mah se an inthlau viau lo. Sawmhlua hi December thla ah a piang a, kum khat a liam hnu, January thlaah Sawmzuala hi a piang veleh a. Thla 13 vel chauha inthlau ang an nih ber chu. Hei vang hi ni maw, an inngam em em a, an titi pawh a rual a. An inkawmngeih fal a, an inhnial deuh reng bawk.




Mahse Sawmzuala hian a û chu a zah thiam ve lutuk tho.




Thutkhawmna a an phei leh lai thleng chuan an inhnialna chu ka hre ve zel a. An thusawi chuan ngaihtuah a tithui khawp mai.




Kan Mizoram dinhmun chau rau tawh tak a lantirin ka hria. Sawmzuala rilru mawlh chu, a baihvai thlak ka ti a. Naupangtê mah nise sawrkara a beidawn zia ka hre ve thei "Eirukna hi chu a reh tak tak dawn chuang lo. Chuvangin ei ru mah se hna an thawh that chuan a tawk" a ti hmiah mai.




A ngaihdan chu ka dem hran lo, sawrkar chak, rorelna tha tak nei a duh ve hle niin ka hria. Mahse eirukna ka thlawp tihna erawh a ni hauh lo.



Kan Mizoram dinhmunin a zir lova, eirukna tawp thei tawh lo tur anga a ngai te chuan ka rilru a tina.




Naupangtê mah ni se an pa in a zir bawk a, chawei lai te hian an unauin politics an sawi hmiah zel. Khap ka duh thin viau laiin Vanmala ve thung chuan "Vei rawh se, an tette atangin ram hi vei sela. An lo puitlin dawn meuh chuan ram hmangaihna an thinlungah a intuh chho mai ang" a ti tlat a. Kan khap ngai hran lo.




"An la nau e, an zahpuiawm" ka tih lah hian "Zahpuiawm loh e, an duh anih phawt chuan sawi rawh se. Anni ang rual an nih lai atang hian chher hriam tur. Ram hruaitu tha tak lo chhuahna tur an la ni thei" a lo ti mai a. Pa berin a tih si chuan a tha lamah ka ngai hmiah mai.



Zanriah ei dawnin Chhanhima a lo haw chha chha a, thingpui hang in mek a pa chuan a lo melh ngur a. Ngai pawimawh lo zet hian fridge a rawn hawng a, tui a in zui khawlh khawlh a. Naupangho chu an infiamna room lamah Apuii hovin an awm thung.




"Chhanhim" ka pasalin a tih chuan kan fapa chu a rawn hawi zawk a. Vanmala chuan "Khawiah nge i kal a?" a ti dam thlup a, mahse a âw a khauh hle thung.




Chhanhima chuan "Thiante inah" a lo ti bul hmuk a. Engmah zawh zui na hun pawh awm lovin choka atang chuan a chhuak zui leh daih a.



A hma chuan hetiang em em hi a ni ngai lo, mahse class 10 a pass hnu, Champhai kan awm tak atang hian a mizia a thlak nasa a. A pa hian a enliam rei zawk khawp mai. A enliam rei mah mah a tih theih zawk ang. Kan tlai ta lek lek chu a nih hi.



"A va hahthlak thin ve mawle" Vanmala chuan a ti hluk a. "Nakinah la kawm chiang teh" ka lo ti vat a. Ka pasal chu a lo bu nghal nghut.




Zanriah ei a hun tawh avangin naupangho ko turin infiamna room lamah ka kal a. Vanmala erawh inchung lamah Chhanhima ko turin a chho thung, an rawn inkoh thlak theih ngei ka beisei.




Naupangho awmna ka va luh rual chuan Zodina'n min lo ban vat a, ka lo pawm nghal vat. Naupang ber a la ni rih bawk a, a û te hian an duatin an awm thiam zek a. Unau mipa vek mah ni se an induat thiam hlawm zawk thin khawp mai.




Sawmpuia chuan "Ka û a lo haw tawh em?" a lo ti vat a, fiah zetin min melh kal a. Sawmpuia hi chu a danglam ka tih tawh kha, kum 5 lek ni si thil a lo ngaihtuah kim mah mah thin.



"Lo haw tawh e" ka lo ti ve mai a, a lo bu nghat reuh a. A mak thin reuh ania.



Apuii nen chawei kan siam lai chuan Chhanhima te pafa pawh an rawn inzui lut a. Chaw chu kan ei zui nghal a. Chhangchhiat chuan ngawi renga chawei te hi a theih loh reng reng. Sawmhlua, Sawmzuala leh Sawmpuia te'n sikul chanchin an sawi mawlh mawlh a. Zodina lah chuan engmah hrethiam ve hlei lo hian a û te thusawi chu a lo zawm ve zel a. Kan nuihpui nasa mai. Chhanhima pawh a nui ve suk suk a.




Chutah Sawmpuia chuan "Û, zaninah ka homework min tihpui rawh aw" a lo ti a. Chhanhima pawh a lo bu ve mai a. A naute hi chuan an ngainain an be ve bawrh bawrh thin a. Keini nu leh pa te laka a awmdan ang em hi chuan a naute lakah a ngeng lo.




Apuii mawlh hian a mizia hi mak a ti thin, "U Vanmala hi a dawhthei e" a ti tawp zel. A ngaihdan chu âwm ka tihpui hliah hliah, a fapa hi a hau ngailo reng reng. Hei vangte pawh hi a ni zawk mai thei, hetiang taka a pa laka a awm ngam chhan hi.




Zanah chuan Chhanhima chuan a naute homework chu a tihpui hlawm a. An unauah a upa fal bik a, a naute hi chu a nau te ve hliah hliah an ni a. Duat pawh a duatin a ngaihsak hle bawk.



Naupangho mut fel hnu ah kan nupa pawh chuan kan mu ve ta a. Chhanhima hian amahin room hran a nei tawh a. Sawmhlua, Sawmzuala leh Sawmpuia te room khatah an mu ho a. Zodina chu a la nau deuh a, kan la mutpui thung.




Ka pasal chuan a tihdan ngaite in ka pum chu a zut hauh hauh a, a nui leh suk suk thin a. A fapa Zodina muhil thaw sek sek chu a zuk tawk leh zauh thin bawk a. A lungawi hmel hliah hliah thin.




"Ka fanu tur" ka pum zut pah chuan a ti leh thin a. Za zet hian ka lo nui nghal chhar chhar a. A ni pawh atthlak deuhin a rawn nui veleh a.



Kan rilru a in man hle in ka hria. Ka naupai ah hian Chhanhima chauh kha sawi dik a la nei. Sawmhlua atang hian 'Ka fanu tur' a ti ziah a, mahse hei mipa vek kan la nei zel chu ania.



"Mipa bawk a lo chhuak leh awm sia" nuihza deuha ka tih chuan "Tun tum chu ka chiang" rang fe hian a lo ti a. Ka nuih a za zual sauh. Nau ka pai apiangin a chiang a, mahse a chiang sual ziah, Chhanhima tih loh kha chu.




"Hei bak chu kan tlin tawh lovang a" ka lo ti a, "A siam lam chu tlin e" uang thuang zet hian a lo ti a. A awmah ka chum nghal talh "Dâm viau sel suh" ka lo ti a, a lo nui mai a.




Mahse a hnu deuhah chuan "Ka kum a upa ve tawh a, nangpawh kum 40 ral kai i ni ve tawh bawk a. I tan a hahthlak tawh ang, hei bak chu ka beisei ngam tawh lo. Pathian thu vek anih rualin" a lo ti ve dap dap a.





"Mipa tho anih leh chuan..." ka lo tih lai mek chuan "Fapa paruk kan nei dawn tihna a nimai a" a lo ti sam then a. Dik tak chuan fanu ka awt ve tawh a, ani pawh hian a awt ve tawh tih ka hria. Mahse ka rilru nawm nan min hnemtu zawk a ni ziah. Fa te chu fa te an ni a, engpawh an tha. Mahse rilru hian awh zawng chu a lo nei ve thin.




"Mamte" a rawn tih hluai chuan "Eng nge ni Paa" ka lo ti vat a, kan han nui leh rih. Tunlai chu a tih dan ka la thar a, ani pui lah hian a lo hlimpui thei sia.




"Chhanhima hi phone ka lei mai dawn emawni le ka tia" thutak zet hian a lo ti dam thluam a. A hmel ka han en chuan ngunthluk zeta thil ngaihtuah hmel a pu.




"Tinge?" ka tih chuan "Min dilna a rei tawh a" a lo ti sup. Hamhaih fe hian ka han melh leh a, a lo bu nghut a. Chutiang ka lo hre miah lova.



"Engtikin?" ka lo ti he haw a "Class 10 a pass hlim khan" a lo ti sup. Mak ka ti lutuk pawh chu a awm lo hran lo. Engmah min hrilh ve si lova ka hriatpui ve miau lo ani.




"Tun ang mizia a neih tak chhan hi hei vang hi niin ka hria. Min dil lai khan ka remti lova, class 12 pass hunah tih kha ka ngaihdan a nia. Tette atangin phone pawh kan khawih khum ngam mang lova, mahse tunah a lo duh ve tawh si a. Hetianga a hel reng ai chuan lei sak mai te ka duh tawh" a lo ti leh zung zung a.




Hei vâng hi a lo nih ngei dawn hi hetianga a lo awm. A pa a kar thiam dan danin a lo kar ve ni ta in ka hria. An inchhun pafa na lai tak a ni lehzel a, an tih tawh chu ti bur chi kha !




"Ka hrelo, i thu thu a nimai. Mahse an duh ang nazawng tih sak hi a tha vek kher lo ania. A hma zawng zawngin a duh ang i tihsak zel a. Tunah i tihsak duh lova heti zawng hian a kar daih che anih hi" ka lo ti ve luam a.




A ni lah tak bawk a,a duhzawng tih hlawhtlinsak loh a hlauh thin luatah tun dinhmun hi a thleng niin ka hria.




Chutah Vanmala chuan "Nih chu a no viau mai a, mahse hetiang a a awm reng ai chuan a tha zawk dawnin ka hria. Risk kan la ve dawn tihna a nimai a. Phone chu lei sak ila, mahse lehkha tha deuha zir turin kan phut ve thung ang a. Fa enkawl kawngah hian khauh lutuk pawh a lo tha lo. Zalen an zo lo mai mai dawn. Chuvang chuan tunah pawh ka rilru ka thlak a,kan fate hi eng anga nasa pawhin khawvel thil tha lo atang hian lak chhuah tum mah ila a theih dawn loh. Chu ai chuan khawvel mila tha taka nun dan zirtir zawk ila. Social media pawh an lo hmêlhriat ve dawn tho tho, an hmang lo thei dawn lo. Chuvang chuan kan hriatpuina thlapin social media hman dante pawh zirtir zawk ila a thain ka hria. Kan chhehvel mil a tha taka an nun theih dan zirtir ka duh zawk" a lo ti ta duah a, a fate tan a ni tluka rilru seng nasa hi an awm ka ring lo.





A theih ang angin a fate tana tha tur a dap kual thin a. Keipawh ka hahdam phah reng thin a ni.




"I thu vek a nimai, kei chuan i duh dan apiang tha takin ka lo tawiawm thin ang che" ka lo ti ve charh a. Ka samah a rawn fawp vang vang a "Hmangaih loh hi i har ngawt mai" a tih chuan ka lo nui nghal var var. Pasalte berin hmangaih loh har min tih chuan a ngaih that thlak hliah hliah.



"Naktukah i leisak dawn em ni?" ka lo ti veleh a. "Umm...mahse engmah lo hrilh lo la" a lo ti sup a. Ka lo bu nghat nghat a.



"Heti hian ka sawi ang khan kan enkawl chho ang a, an tana a that tawk loh leh thil dang a aia tha tur, anmahni that pui ngei tur kan dap chho leh dawn nia" a lo ti leh sup sup a. Hahdam deuhin ka lo chhing chial tawh.




Vanmala chuan phone chu a leisak ta ngei a. Chhanhima lawm lutuk chu kan lo lei lovang tih a hlauhawm zawk. A pa chuan "Tikhan titau bur bur tawh lovin tha takin lehkha zir la, a theihna ang angah i nu pui la. Lungawi lo hmel min hmuh tawh bawk suh ang che" a ti churh churh a. Lungawi zet hian a lo bu nghut mai.




Dik tak chuan tleirawl ngeng ngel ngul mah nise a pa fapa duat a ni a, a tette atanga pangchang taka enkawl a nih avang hian a naupangchhia veleh tlat zel.




"I naute mithmuhah khawih tam suh ang che" Vanmala chuan a lo ti leh a. A bu nghat mai.




Kan chhungkua pawh pangngai takin kan awm chho veleh nek nek a. Ka naupai a hram chho veleh tawh hle a. Chhanhima mawlh mai hi a pa chah ang ngei khan a tangkai chho hle a. Apuii eirawngbawl te hi mipa mah nise a pui a. Chhuat te nawtin hmunte pawh a phiat ve vek zel a. Fapa fel tak a ni chho veleh mek a ni.





Tum khat chu an thianho lenchhuahna turin a pa motor hman a dil pek a. Vanmala chuan "Motor khalh rual i la nilo" a lo ti hmak. Mahse "Khalh rual an awm dawn alawm, U Michaela ania, kum 20 a tling tawh" a lo ti vat a.




Mahse Vanmala lah chuan "Motor kan nei rih hlei nem" a lo ti daih. Chhanhima chu lungawi loh hmel tawh tak a ni. Mahse a pa chuan dawt a sawi miau lova. Kar hmasa khan kan car ah fel hlel a awm a, workshop ah a dah a,tun thlengin ala awm. Tuna kan neihchhun chu sawrkar motor kan kawl a nimai.




Chhanhima chuan "Tun ami hi kan hmang thei reng" a lo ti hmiah. A âw chu bul tha tek tek tak a ni.



Mahse Vanmala chuan "Sawrkar motor ania,sawrkar hnathawk i nilo tlat, a hman theih loh. Nakinah hna i thawh ve hunah i la lei ve dawn nia" a lo ti hmiah. An pafa inhnial vel a nauten an hrelo chu ka lawm khawp mai. Toys room a an awm lai a lo ni hlauh a.




Chhanhima chu a titau zui a, a room lamah a chho tau hmak mai. A pa chuan a thlem zui dawn emaw ka tih laiin a thutna ngaiah a thu lui ngur a.



"A va mak thin tak" ka lo ti halh a. Vanmala pawh a lo thaw chhuak huk mai. "Engtin nge i tih dawn?" ka tih leh chuan "Engtin mah, tikhian a awm awmin awm rawh se. Engmah tih theih a nei chuanglo" a lo ti awlsam then a.



Reilote ah Chhanhima chu a rawn chhuk thla leh a, pawn a chhuah zui a tum lai chuan a pa in "Khawiah nge i kal dawn?" a lo ti thuai a, a aw nghet tha churh mai chu chhan loh ngam chi ni hek lo le. Chhanhima chu titau pawh ni se a pa hi a palzam ngam dawn lo tih ka hria.




Ka sawi ang chiahin Chhanhima chuan "Ka chhuak dawn" a lo tu bul hmuk a, hawi pawh a rawn hawi lo. Vanmala a lo rum nghut a "Chu chu ka hria a, khawiah nge i chhuah dawn ka tia lawm" a lo ti khauh a. Chhanhima ning hmel chuan ka nuih a tiza tlat pek, mahse ka nui duh bik lo.





A inla ngeng ve tho sia, a pa hi a zahin a hmangaih ve tho tih ka hrechiang si.




"U Michaela te inah" a lo ti bul hmuk a, ka beisei loh deuh hian Vanmala chuan "Rei suh ang che" a lo ti mial a. A khap ka rin tehlul nen.




Tun hnai deuh atang hian U Michaela hi a ti fo mai a. Tunge a nih phei chu ka hre ve lo. Mahse Apuii hian a hria a, chhungkaw pangngai tak leh amah Michaela pawh mi pangngai tak a ni awm e. Chuvangin an chhuah ho hi chuan ka ngaih a lo tha ve zel mai a. Sual rawng an bawl lo turah ka ngai hmiah mai.




Zodina tap ri kan hriat rual chuan rang zetin a pa a tho vut a, naupangho infiamna room ah chuan ka zui lut ve nghal zat.



A û te'n bawm chhungah an luh tir hi a lo ni a, chhuah a tum chhuak thei bawk silo chu an lo nuih tiah tiah mai. Rang zetin a pa in a va pawm chhuak nghal a.



"Sawmhlu, Sawmzual, Sawmpui... tinge i nau hetia in tih a?" ka lo ti vin nghal that a. Zodina chuan a pa a kuah bet nghal tai a, pangchang zet hian a tap uar nghal sauh bawk.




An unau thum chuan rum zet hian ka melh a, an ding zum zat hlawm a. An nuih a la zat hmel tho mai.



Ka vin leh tur chu Vanmala'n a mitmeiin min lo khap a, heihi a tih ziah dan a ni. Chhangchhiat chuan zaidam te hi a lo har a. Naupang thubuai kan rem fo a, a buaithlak thei ngat ngat hle.




Mahse heti chung hian Vanmala chuan tawngkam vîn hman a phal ngai hauh lo thung. A fate lakah a dam thluam zel a, mahse an zah zawk tho tho.




Chutah Vanmala chuan "Tinge i nau hetia in tih a Sawmhlu" ti dam thluam chungin Sawmhlua chu a melh ngur a. Chhanhima a awm loh chuan û ber a ni a. Chuvanga Vanmala hian zawt chat a ni tih ka hria.




Sawmhlua chu ti dak hian a rawn hawi chhuak a, a nau te pahnih erawh an la kun ngar mai. Zodina pawh pangchang lutukin a pâ awmah a bei kak a, a men pual pual danah a lung a la chhe hle tih ka hre thei.




"Bawm chhungah khan luh a ngen a, kan luhtir a" Sawmhlua chuan zawitê hian a lo ti a. Zodina lah chuan "A nen lo" fiah lo zet hian a lo ti thung a. 'Ka ngen lo' a tih ve na a ni tih ka hria. A tê ber a nihna a hrechiang a, a chang chuan a û te lakah pawh a sual ve lek lek thin.




Vanmala chu a lo thaw chhuak huk a, chhangchhe pa nih chuan a rilru hahthlak ve viau thinin ka ring. Chhangchhe nu nih mah a hahthlak a.




"Umm...a tawk e, tikhan tha deuhin infiam tawh rawh u, in intih tah leh chuan zanah ice cream in ei lo vek ang" tiin a fate chu a zilh dam thluam a. Chutah naupangho lah chuan "Yes, apa kan fel tawh ang" an lo ti vat hlawm a. Zodina pawh a lungawi chawpchilh veleh nghal mai aniang. A û Sawmhlua'n a lak lai pawh chuan a hnial miah lo.





Kan nupa chuan choka lamah kan inzui phei leh a. Ka pasal chuan ka darah min lo kuah nghal a, a nui suk suk a.



"I fate inhau i nuih em ni?" ka tih chuan atthlak tih hmel lutuk hian a lu a lo thing a. A kiai leh suk suk thin a "Eng thil nge ni?" ka tih chuan "An ninhlei ngei mai tiraw " a lo ti hluai a. A nuih a la zat hmel tho mai. Kei lah chuan nuihzatna tur ka hre bawk silo.




"Chuvang chuan i nuih a za maw" ka lo ti ha a,a lu a lo thing vat a. Thutthlenga min thut thlak tir rual chuan a rawn thu thla ve nghal a. "Kan chhangchhe ta hle mai tiraw" a tih hluai chuan a hmel ka en leh he haw a "Zodina bawm chhunga a tâng hmel kha i hmu ve lo anih kha" nuihza insum zet hian a lo ti a. A hmel chu ka en a, ka nuih a tiza tlat pek a. A insum thei lo chu a rawn nui chhuak hawk a, eng ka hria nimaw za zet hian ka lo nui ve nghal a.





"A thlabar hmel sia, a û te lah khan an lo nuihzat mai mai a" a ti leh a. Fate ninhlei lutuk vanga nupa han nuih chiam mai chu a atthlak ang reng. Chutihrual chuan a hlimawm tho bawk sia.



Inchung atanga Apuii puan pho zo a rawn chhuk rual chuan kan insum thei ve ta chiah. Ka nui nasa lutuk a, ka pum a na vek thei.




Zanah ka nu in min rawn bia a, Chhanhima chungchangah ania. A thlavang a rawn hauh pek a. Motor hman an tum a, a pain a phal loh vel kha a pi a lo hrilh a ni chek ang chu. Ka nû chuan "In hman tangkai ve theihna ania, naupangchhia an ni tawhlo bawk a. An mamawhna ah chuan hman tir ve mai ta che u. Vanmala pawh a ti awm ang lo emai" a rawn ti hlak hlak a. Biak zui vak ngaihna pawh ka hrelo.




"Vanmala kha phone pe teh" a tih chuan computer bula thu mek, ka pasal bulah chuan ka va kal vat a, mit a lo kan ak rual chuan "Ka nu" tiin phone chu ka pe nghal a.




Vanmala chuan eng vak a sawi hran lo "Ka remti lo alawm" tih chiah a sawi. Ka nu chuan a ankhum chiam dawn tih ka hre nghal.




An inbiak zawh rual chuan chanchin ka lo zawt vat a, za lo zet hian a lo nui hul hawk ringawt. Ka nu manganthlak na deuh chu a tupa Chhanhima hi a atchilh lutuk a, a duat sual ka ti lo theilo. Aizawlah khan kan awm rei ang reng a. Chhang a neih hnu khan ka nu te bulah a tap chawt a, an nin an lo duatin a duh apiang an lei mai sia. Chuvanga hetia awm hi ni berin ka hria. Kan chunga a lungawi loh chang chuan a pi bulah a zualko vat zel. Tunah pawh a nih leh tawh hi.




Zan muthmunah chuan ka pasal chu ka zawt a "Chhanhima hi engtia tih nge tha ang?" ka tih chuan "En liam tawp chi chu a ni tawh lo, Michaela a sawi ve sek kha damdawi a khawih tih ka hre tlat. Chuvang chuan fimkhur a ngai khawp mai" a lo ti hulh a.




"Michaela khan damdawi a khawih maw" hlauthawng lutuk awih lo bawk si hian ka ti a. Dik tak chuan tun hnaiah an inzui nasa si a, kan fapa hian a lo khawih ve mai ka hlau ani. Zep nak emaw Champhaiah phei chuan damdawi a hluar bawk si.




Vanmala chu a lo bu nghut a "Mî sawi ka hriat ania, kei ngei pawh hian ka hre ru deuh bawk. A fiahna tak nei lo mah ila office velah hian an sawi leh zauh thin" a lo ti dam thluam a.



Chutiang anih chuan inkawp reng lo se ka duh, "Chhanhima bulah kawm tawhlo turin ti rawh" ka ti thawr pek a. Hahdam hmel zet hian a lo thaw chhuak suai suai a.




"Mamte..." a lo ti dam raih a, hetianga titi laklawh lai min koh hluai tawh hi chuan thu tha deuh a sawi leh dawn tih ka hrethiam tawh.



"Thian chungchangah hian i ngaihdan chu ka hre ve lo nain, fate bula chumi khami chu kawm suh han tih vel hi ka duh ve lo, a hrisel vaklo ka ti bawk. Ka duhdan chuan kan fate hian tupaw kawm rawh se, a pawilo. Eng ang mi pawh kawm sela anmahniah hian chiang rawh se. Chu chu ka duh ber. Thian sual kawm loh tur te hi kan han ti leh ngawt zel a, an kawm lohin tunge kawm ang. Misual leh misual an inkawm chuan an sual dawn lutuk. Kawm tawh suh lo ti ve ngawt ila kan fate hi mi nu leh pa ten an fate thianah an lo duhlo ve thei tho. Thian sual kawm loh tur tih ai chuan anmahni ah thian tha ni thei turin an rilru tuh nghet ila, chu chu a Kristian zia zawk khawp mai. Chhanhima pawh hi tha takin hrilh ila, amah hi ring tawk lui ve tlat ila. Ka fapa a ni bawk a, kan rin luih tlat chuan min ti beidawng hauh lovang" a lo ti duah a.





Ka sawi reng kha maw, thu tha deuh a sawi leh pek a. Tin, a thusawite chu ka lo ngaihtuah loh lam daih a ni bawk. Hetia thupui fun taka a sawi tawh hi chuan sawi ve tur ka hre tawh thin lo.




"Motor chu i hman tir dawn em?" ka ti ta ngawt a. Zanriah eikham khan Chhanhima chuan a dil tha leh ngat a, chhanna ngai bawk a pe leh kha ania.



Vanmala chuan "Ka dinna ngaiah ka la ding" a lo ti nghet churh a. "A lungawi lo leh viau ang" ka lo tih leh lai chuan "A lungawi hun a lo thleng ve leh vat mai ang" a lo ti dam thluam a.



"Muhil tawh rawh, ka fanu hi a chau tawh ang" ti lehin ka pum chu a rawn zût nghal hauh hauh a. Lo hnaih ve sat satin ka chhing ta chial a.



Chhanhima school kal tur chu kan be tawng zo tha meuh lo a ni ber e. Mahse a pa chu a nek lui ngam chiah chuang silo, a zawhna ang ang chu lungawilo zetin a chhang bul hmuk zel a. Vanmala lah chuan a be lui zel bawk sia. An hahthlak pafa teh e.




Tum danga an unau a thlah vek thin kha Chhanhima chuan "Taxi in ka kal dawn" a ti tlat pek a. Vanmala pawhin a lungawilo tih a hria a, a dang duh bik lo. A unaute erawh Vanmala'n a hruai leh thung dawn a, anni chu tum dang ang bawkin an phur leh surh tawh a. Zodina pawh a pa office zui a ngen leh pek a. Tunlai an buai lutuk lo bawk a, an inhruai leh dawn anih hmel.




Tlaiah chuan Chhanhima titau chu room ah a inkalh hnan hmak a. Motor ber a ken chhuah theih tak si lovah chuan a chhuak dawn ta lo anih hmel. A pa leh a naute ho lo haw pawh chu a rawn uksak ve vak lo.





A sikul ban atangin a la inkalh hnan char char. A pa tello chuan ka buaipui duh chiah lova, chuvangin a pa lo haw hun ka lo nghak a ni ber. Pa ber hi chu an lo pawimawh thin a ni.




Vanmala chu thil awmzia ka lo hrilh vat a, Apuii bulah naupangho lo en lawk turin a chah a. Kan nupa chuan kan fapa Vanlalchhanhima biak tum chuan a room lam kan pan nghal a.




Kan kik a, a lo hawng duh thak lo zui a. Mahse Vanmala'n "Chhanhim, kawngka lo hawng teh" a tih takah chuan rei vak lovah a rawn hawng vat a. Min ngaihsak zui lem lo hian khumah a bawkkhup zui nghal daih a. A pa a lo thaw chhuak huk mai.



"Thu tha la ,i nu te nen thil sawiho lawk ang u" a tih leh takah chuan nin hmel zet hian Chhanhima chu a rawn thu chhuak a. "Eng nge?" a lo ti bul hmuk a.




Ka pasal chuan ka thutna turin chair min lo dah sak vat a ka lo thu thla ve nghal vat. A ni pawh ka bula chair ah chuan a rawn thu thla ve nghal a. A âw a thian te te a, a fapa bulah chuan thil awmzia a sawi ta mawlh mawlh a.




"Motor ka hman tir duh loh vang che a i titau anih chuan titau zui tawh suh. Sawrkar motor a ni a, kan mimal motor a nilo. Chuvang chuan sawrkar thil pawimawh chauha lek chhuah tur a ni a. I lo lek chhuah ve kha thil mawi a nih loh mai bakah thil mawi lo lutuk a ni a. Eirukna chikhat deuh reuh hi a ni. Tunah hian rawlthar i rawn ni ve mek a, i awmdan vel hi ka hrethiam lutuk. Kan lo pal ve hnu tho a ni. Mahse mipa tan tih tauh bur bur hi a mawi miah lo ania. Tuna i thian kawm thinte hi ka hre vek a, an mizia leh tih thinte pawh ka hre vek. Mahse ka fapa i ni a, ka ring tawk che. I thiante'n eng thil sual pawh ti mah se Vanmalsawmhlua fapa hian i ti ve dawn lo tih ka hria. Ka rinna hi i tichhiat ka ring lo bawk. Fapa tha leh fel tak i ni a, i thiante tan pawh thian tha tak i ni thei. Chutiang tur chuan tan la rawh" a ti duah a.





A thusawi chun a huam zau hlawm khawp mai. Vawikhatah thil chi hrang hrang a sawi duah a tih theih ang. A fapa nunah hian rah tha a chhuah ngei pawh ka beisei.



"Damdawi i lo khawih ve tawh em?" ka lo ti ve zet a. Ka hre chak em a ni. Ka hlauthawng tel lo theilo bawk si.



Chhanhima chuan a lu a lo thing vat a "Ka duh teuhlo" a lo ti nghut. Chutiang ka zawt ringawt pawh chu a lungawi loh hmel kher mai.




Chutah Vanmala chuan "Anu chu i ti mak emai, kan fapa anih hi... khatiang ti tur atan chuan a inphal teuhlo" a lo ti vat a. A fapa chu a fuih pah deuh niin ka hria.




Chhanhima hmel tak run chu a ziaawm telh telh a. Tlem chuan a lungawi ta deuh niin ka hria.



Kan chhuah dawn chuan ka pasal chuan "I pa hi min entawn ang che" a ti hmiah mai a. Chutianga mahni fate bula sawi ngam pasal ka nei chu ka inchhung takzet. Khatiang thu kha tu pa mahin mahni fate bula an sawi ngam ka ring ngailo. Mahse ka pasal chuan a ngam tlat!




A thusawi kha tawi hle mah se a huam thui lutuk. Min entawn ang che tih khan a rinawmna te, dikna te, tlawmngaihna te, Pathian tih na te....a huam thui lutuk. Khatiang zawng zawng a sawi tel na kha a ni.





Kan fapa hian a pa a entawn a nih chuan a tisual dawn lo. Pa entawn tlak tak a nei miau a ni. Ka pasal thusawi kha chapona lam ni lovin mahni inrintawkna thuk tak a ni.




A tuk zing atangin kan fapa ah chuan thil danglam a thleng ta nghal a. A hmel hmuh a nuamin a zâng vah a, a pa zawhna te pawh tha tak takin a chhang ve ta. Nizan lama a pa fuihna khan rah tha a chhuah a ni chek ang chu !




Ka hriatchian tak em em chu, a hnual tur zawnga fate hi hau lovin a fuih phur leh anmahni fak zawnga tawng chhuah hian rah tha a lo chhuah viau zawk thin niin ka hre ta.



Kan chhungkua pawh pangngai takin kan nung chho ve mawp mawp a. Thubuai kan rem nitin deuh thaw a, Chhanhima tih loh hi chu an inrual tlang si a, kan buai veleh nak nak thin.




Mahse thil lawmawm deuh chu Chhanhima hian a zir chho viau mai a, a naute ho a kawi khawm a. A naute lahin a thu an lo awih bawk si, an inawm thei hlawm phian mai a. Vanmala pawhin a dah lal thiam khawp a, a û chu zah tak an ni.




Ka nau pai a hram chho tial tial a. Ka nau neih thla chuan Vanmala a phî leh cheng tawh a. Chhanhima ka pai lai khan min duat hle a, ka chhungte thenkhat chuan " A fa tir a nih vang anih kha, a dawt leh atang chuan a buaipui khu chuk tawh lovang che" an ti kha ania.




Mahse chutiang a ni lo reng reng, ka nau pai hlim hlawt atangin min buaipui dan a la ngai reng a. Min duat dan pawh a la ngai reng bawk. A ngai neih hlei thei meuh lo chu a ni.




Chhun pachangah nau ka vei ta alawm le, a pian hun an sawi hma ni 4 la awmah a ni a. Apuiin Vanmala a phone nghal chuk chuk a. A rawn haw nghal a, a mangang leh pek khawp mai.




Vanneih thlak lutukin ka ti dawn nge, nau chu ka vei rei lo hlauh a. Zan tir lamah chuan ka pasal leh midang rin lawk ang ngeiin fanu duhawm lutuk ka hring ta.




Vanmala lawm lutuk awmngaihna hrelo chu kan nuihpui hlawm a. Doctor leh nurse te pawhin min lawmpui kher mai.



A fanu hmingah chuan amah ngeiin "Rohlupuii" tiin a sa a. A pa fanu Rohlupuii em em chu naute tahbelh leh harh vang zet mai hi a ni a.




Hmeichhe awmchhun a ni bawk a, a û te pawhin an duatin an awm heuh heuh reng a. Chhanhima pawhin tlangval ve uaih tawh siin a pawm reng zel a, a paw vel thin anih chu ! An farnu neihchhun chu a pa hovin an atchilh hle a tih theih ang. Tuman an hau phal lova, a tah chang te hian an vaia tangrualin an thlem ngat ngat peih.





Heti tak hian an buaipui khu chuk hlawm si a, a hmeichhe awmchhun hi a la ngaihtuah awm ber loh ang tih a sawi theih loh.




Sawmpuia lah hi a lo inti tlangval thin vel lutuk a, a nau diaper thlak sak thintu ania. Zodina lah a la têt ve em em rual hian a inla nau nei tawh em em a "Ka nau" tiin a muhil laite hi a mutpui reng zel a. A û te sikul kal hlanin amahin a lo awm thin a. Eng emaw ka tih zeuh dawnte hian "I nau lo en lawk rawh aw" ka ti ve mai zel a,a hman tlak ve thin khawp mai.





Kan inneih kum 18 na ah chuan ka pasalin kan nupa chauh a chawei chhuah a rawt tlat a. Naupangho ka ngaihtuah viau laiin an û berin "Ka lo awmpui ang" a ti ve tlat a. Hlupuii a la tê si a, hnute tui ring chauh a la ni bawk si. Mahse ka pasal leh ka fapa ka hnial hneh silo, zanriah ei tur chuan kan chhuak dun ta poh a. Hlupuii hnute tui in tur ka siam sak hmasa zet anih kha.




Hotel changkang zetah min hruai a, chhangchhe nû nih chuan rilru bet deuha thil ei te hi a lo har tawh a. Ka pasal lah chuan a lo hai lo nasa si "Engmah ngaihtuah buai lovin ei hle hle rawh" a ti a, ka lo nui tawp ringawt.



Zingkarah khan silver thi nalh zet leh pangpar bawr nalh zet ka dawng tawh a. Keipawhin sneakers ka pe ve bawk. Tunah tak chuan thil eidun tur hrim hrim in kan chhuak a ni ber.




Thil kan eizawh chuan haw ka rawt nghal a, ka pasal ngaihdan a lo ni der lo. "Min va ngaihsak lo ve" a ti ta hluk reng a. A hmel ka en chuan a lungawi lo tak tak niin ka hria. Ka hmui ka lo pet zeuh ringawt a.




"Haw ang" a ti nghut a, a tho vut a, ka inthiamlo veleh deuh a. "U Vanmal..." ka ti sap a, ka kohna ngai pawimawh lo zet chuan a chhuak zui nul nul a. Hmanhmawh zetin ka ûm ve nghal a. Patling titau rual a ni tawhlo asin mawle. A inti pangchang veleh thut thin hi chu ngaiah ka nei tawh.



Ka va chhuah ve meuh chuan car a lo lachhuak fel then tawh a. Driver seat ah thuin steering a lo chelh run a, hmalam a bih ngur a.




Ka rilru ah thil a rawn lut zawk a, ka nui ta sak. Eng ang takin ngai ang maw.



Car chu hawngin ka thu lut ve nghal a, vung zetin a tlan chhuak nghal a. Tawng tawh lovin ka rilrua thil awm avang chuan ka nui var var a. A lo dawnsawn dan tur ka hre chak tawh kher mai. Min lungawi loh khum rei thei teuh lo mai.



Kan in panna kawng reh lai tak kan thlen rual chuan "Ding lawk teh" ka lo ti vat a. Min rawn melh zawk a "Lawkin" ka tih leh takah chuan kawngsir rem laiah motor chu a tiding ve mai bawk a.




Min rawn melh rual chuan ka lo nuih var var a "I hmanhmawh viau a ni lawm ni" lungawi loh hmel zet hian a lo ti hluk. Chu veleh ka rilrua awm ang chuan ka che ta pawp a. Ka va hnaihchilh nghal ruak takah chuan a lo hamhaih kher mai.



A thutna chep zetah chuan amah hmachhawn zawngin a mal chungah ka thu nghal a. Hamhaih lutuka min lo en lai chuan nui sak chungin a bek tawn tawnah ka vuan a, a hmui ka zuk si nghal hmiah.




Kum 18 kan innei tawh a, ka tan chutiang thil tih chu a harsa hran lo. Mahse hetiang taka chet lak hmasak hi chu ka la nei ngailo.



A hamhaih luatah min chhan let nachang pawh a hrelo, a thu khawng at a. Ka hmui chu la hrang hlekin a mitah tak chuan ka melh a, "Titau bur bur suh" nui var var chunga ka tih rual chuan min lo pawt hnai zual salh a.



"Hmingmawizual" ti khur hlukin duhthawh lutuk hian min rawn fawh zawm ve ta thung a. Ka lo chhang let ve tan tan a. A khur ru dur dur mai, a rum leh hawk thin bawk a. A inthunun theihna a pan hle tawh tih ka hre thei.




Kham lo lutuk hian a inlahrang ta nge nge a "Haw vat chu kan ngai anih kha" a ti khur hluk a, ka lo nui ri hak.




"I duh chuan zanriah kan eina ah khan kan va ei leh thei ania" nghal zet hian ka lo ti a. Lo rum nghutin "Khumlaizawl ah zawk le" a ti hmiah mai.




In kan thlen chuan naupangho an lo la meng thap a. Chhanhiman a lo infiampui a, zan dar 8 vel chauh a la ni a. An lo la mu lo pawh chu a awm lo hran lo. Hlupuii erawh Apuiin a lo awi mu diam tawh thung.




Chhanhima chuan "In lo va haw hma ve" a lo ti hluai a, kan haw hma em lah tak bawk a. Darkar 1 awrh chauh kan thang miau a ni.



Vanmala chu a dawhthei vak tawh lo nge ni a fate bulah chuan "Mut a hun" a ti hmiah mai a. Naupangho lah an la infiam tui bawk si. Mahse pa ber thu chu an hnial bik lo. Vanmala chu ka va melh vak a, a lo ngai pawimawh duh der lo.




Chhanhima pawh chuan a naute infiamna chu a tifel zung zung a. Mu turin mahni room theuh kan pan ta a. Zodina pawh Chhanhiman a pawm nawlh a. Nau a neih hnu hian a û bula mut a ngen ve tawh tlat pek a. Kan bulah a mu tha duh tawh bau lo.




Room kan luh rual chuan ka pasal chuan min pawt hnai nghal hrawk a. A va mak rum rum tak.



"Car chhunga i thiltih rah kha i seng dawn khawp" a ti hmiah mai. A fanu a mutui bawk a, min dip dal tu an awm bawk silo. Duhthawh zet hian a che a, kum 18 meuh innei ve ta chu keipawhin ka lo pui ve vat zel a. A lungawina tawk pek loh hi ka hlauh ber a ni a. Chuvangin zah loh ka chhuah ve nasa thin.





Chau zetin khumah chuan kan mu dun hle hle a. Kan fanu lah chu a mutui mai sia. Ka sam khalh pahin ka pasal pawh chu a tawng sup sup a. Thil ho tete sawiin kan titi a, kan nui dun leh hak thin.




Ka nakin hun tur chu ka hrelo na in tunah hi chuan ka hlim a, nakin zelah pawh ka la hlim zel ka ring. A chhan chu engtik lai pawha min tihlim thei rengtu pasal ka nei miau a. Ka lakah a lungawi em em bawk a. Ka ngaih hi a tha hliah hliah.




Tunah chuan thil engkim pangngai takin a kal tawh a. Rinmawia leh Feli te pawh U Vensangi min hrilh danin an innei tluang ve ta nge nge a, ka lawmpui khawp mai. Bawihbawihi pawh jail atangin a chhuak tawh a, mahse a chhuah hnu rei vak lovah a boral zui tih chu kan hriat dan a ni. Chuti lutukin kan ngaihsak zui hran lova, a thih dan chu a lainatawm hle anih hmel. An sawi kalhmangah OD vangin a boral a, Jail a tan lai khan damdawi a lo khawih tan a ni awm e.





Sangsangi pawh a pa chhungte bulah khan a la awm reng a. Nula pangngai tak a ni chho a, zirna kawngah pawh a hlawhtling viau anih hmel. Chu chu Pa Chhuana te hnen atanga kan hriat dan a ni.




Sawi hmaih theih loh chu U Faktei pawhin tlai khawhnu ah pasal a nei veleh a. Chhanhiman chhang a neih hnu lawkah khan ania. A pasal chu an thawhpuipa niin a aia upa veleh chhawng a ni a, U Vanmala te nen hian an inrual vel ang. Tunah hian fapa 1 an nei a, an neih belh leh vak a rinawm tawh loh. U Faktei a upa tawh emai.




Min hringtu ka nu leh pa leh ka naute ho pawh an dam tha a, ka naute pahnih pawhin nupui an nei tawh a. An la chengho ve laih laih, indan lam a la lang rih lo anih hmel.




Ka nu(Vanmala nu) pawh a dam tha a, a upa ve tawh a, Vanmala hna vangin kan awmsawn reng si a. Kan bula awm tura kan tih lahin in nghah a duh tlat si a. A awmpui tur nula kan la tawp a, a fel khawp mai. Mahse kan tum ruk dan chuan kum thar atangin awmpui tawh ngei ngei kan tum a. Min hnial tawh bikin kan ringlo.





Kan fate pawh Pathian zarah an dam tlang a, Pathian malsawmna kan dawng nasa a. An unau an inngeihin chhungkaw inpawh tak kan la ni zel a. Chhangchhe viau mah ila kan hlim dar dar thin viau mai.



Ka rilruah ka pi kha a la awm reng thin a. Hetia chhungkua ka din ve ta mai te hi la damin min rawn hmuhpui ve se ka ti fo mai. Ka fate hi a duat thin ngawtin ka ring. Ka hlim lai ber pawhin ka ngai thin.




Mahse ka pasal hian ka lunglenna te a hliahkhuh hneh em a. Hei vang hian ka hlim lo thei thin lo.



Min hmangaihna chu a sawi ang tak tak khan a ngai reng a, keipawhin ka hmangaih reng bawk.




Deputy Commissioner a nihnaah a la chiang zel a. Dik takin ro a rel zel a, mi dik lote huat pawh a hlawh thin. Mahse a zam ngailo, "Ram hmasawnna tur leh Pathian duh zawng ang chu ka ti zel ang" a ti hmiah mai.




Hetiang pasal ka nei hi vannei ka inti a, phu lo ka inti phal lo.



A TAWP TA



_________*________*________



A hmawr kan bawk ta nge nge e He thawnthu hi ka thawnthu dangte aiin ka regu lo zual tih ka hria a, kum khat hnu a rawn thar thawh leh ka nih avangin a phelh sawlh nuaih tih pawh ka hria. Chuti chung chunga dawhthei taka min lo nghak thintu te ka tan in hlu a, ka lawm em em vek e.



Tin, he thawnthu hi kumin March ni 4 a min boral san ta ka pi H.Thansiami tan ka hlan e(a thawnthu atang vel hian in hrethiam maiin ka ring, ka pi nen kan inkar chu ! )



Pathian zara dam chuan a remchan veleh thawnthu thar nen kan inhmu leh vat dawn nia.


Show post links
Top