DEPUTY_COMMISSIONER By_CVL_Awmpuii (Completed)

[Ngaia]

DEPUTY COMMISSIONER
By CVL Awmpuii



Chapter 31



Vanmala thil rawn leite chu a inbual chhungin ka lo dah fel zung zung a. Vitamin ringawt pawh chu chi 5 vel a rawn lei a. Thei ringawt pawh a thahnem tawh tehlul nen thil man to hmel zet zet, chaw tha tinreng a rawn lei nual bawk a. Ka dahfel laite pawh chuan ka nui ka nui mai.



Ka indah fel zawh chuan dawhkana ka phone lo let ngât chu ka la ta a. Data ka on chiah chu message a rawn intlar thla nghal dul mai.



Group hrang hrang atangin a ni châwk a, mimal atang chuan a tam vak lo. Sawi tawh ang khan thian ka kawm tam lova, ka chanchin ngaihven viau tur pawh ka nei hran lo.




U Vensangi message chu ka hawng vat a, a hun ka en chuan nichin lawka min lo thawn anih hmel.



'Phone i kawl veleh min lo be rawh aw' tihte mai hi a lo thawn a. Biak nghal ut ut ka tum nain zan lama ka biak tur thu ka hrilh ta zawk a.



Vanmala ka hmuh tak avang chuan ka phone pawh chu ka dah zui ta daih a.



"Thil i lo lei hnem em em lutuk a ,khatiang chu ka ei sêng lovang" ka lo ti zung zung a. A nui suk suk duh lek chauh.



Eirawng kan bawl dun a, vawiin lama a hun hman dante chu min hrilh pah luam bawk a. Uluk zetin ka lo ngaithla kar a.



"Bawihbawihi hi pawngsual anih thu ka hrilh tawh che kha i la hria em?" a tih chuan ka lo bu nghauh nghauh a, khatiang thil theihnghilh theih pawh va ni suh.



"A pawngsualtu pa chu jail chhungah a boral tawh ka tih kha. A chhûngte kan va hmu a...an sawi kalhmang atangin Bawihbawihi hian dawt hmangin a lo puh ni ngei tur ani. Ka ukil khan case kan chhui tak zelah chuan engkim hai lan vek a duh a. Kan chhui kual ta zel a, keimah ang thovin Bawihbawihi hian midang pawh a lo puh chhe tawh anih hmel. Chu chu Sangsangi pa hi a ni. Ka case nena a danglamna chu Sangsangi pa nen chuan an remtih tawnna in sex an hmang dun a, kei nen chuan sex kan hmang lo thung. A chhungte sawi dan chuan Sangsangi pa hian a âtchilh em em a, nau an keng tih a hriat khan a hlim khawp mai. Neih ngei pawh a tum, mahse Bawihbawihi zawkin heti zawng hian a puh ta sia. Jail hial a tâng ta a, a â zui ta mai bawk nen a rilru buai kha jail chhungah a inawkhlum a ni awm e" a ti duah a.




Mak tih lutuk avangin ka lo ka hau mai. Bawihbawihi hi chuti em em a rilru chhia pu turah ka lo ngai miah lova. Tin, Sangsangi pa a puh kual vel dan pawh chuan min thawng a ni tawp.



Pasal nei lova fa a pawm dawn anih chuan mipa aiin a chan a chhe zawk dawn tih a hre vek awm si a. A mipain neih a duh chung pawha a duh miahlo chu ka hrethiam lo kher mai.



"Chutianga a tih chuan eng hlawkna nge a neih ang a?" ka lo ti ha a. Chutah Vanmala chuan "Engkim hi sum vang alawm, a pam ham lutuk vang a ni ber. A mipa kha a duh tak tak hran lova. Nawmchen nan chauh a duh anih ber chu, a hmeichhe rilru lo khawp mai tiraw. Khatia nau a pai takah chuan a mipa khan a lo âtchilh si a, a ni lahin eng teh ualah a lo ngai si lova. A mipa khan a veh ta tlut tlut mai a, a ni lahin a lo duhlo nasa si. Heti zawng hian a che ta anih hmel. Bawihbawihi hi a thluak a tha zek a, pawngsual case anih chuan a sum chan tur ang zawng zawng pawh a hre ve vek a. A mipa dahthat rual khan a sum chan turte pawh hi a ngaihtuah tel vek ang" a ti leh duah a.



Mak ka lo ti telh telh a, hmeichhe naran ve maiin hetiang rilru hi pu thei turah ka lo ngai miah lo.



"Anih chuan Sangsangi hi a hring tho bawk sia" tiin ka zawt leh hram a. Chutah Vanmala chuan "A hmanrua tho anih hi. Sangsangi enkawlna tur sum hi a mipa chhungte atangin a dawng char char tho alawm. Chumi piahlamah chuan mite khawngaih a hlawh theihna remchang a lo ni lehzel bawk a. Chung zawng zawng hnuah chuan an khua chu kalsanin Lawngtlai ah hian an inbengbel ta a. Nun thara bultan te pawh a tum ve ani mahna, a chanchin hi tu vak mahin an hre hran lo. Nuthlawi, hmeithai fanu satliah ang vekin an hria ang. Kan lo intawng leh ta kha a pawi ber mai" a ti leh duah a. Ka beisei ai daihin thil a sawi tha duh.




Chutiang khawpa a che anih chuan Nu Biaki hian a hriatpui thlap ka ring. Mahse nu dinhmun atang chuan a fanuin chutiang em em thil tih duhna thinlung a neih ringawt pawh chuan dan awm tak ania.




Vanmala bawk chu ka zawt leh a "Nu Biaki hian engmah a hre ve lo nge, a thlawp em em zawk?" ka ti ha a. Chutah Vanmala chuan "Ka hre tawh bik lo le, mahse ka rindan chuan a hriatpui vek bik lovang. Nu mawl mang ve te mai hi ania. A phawvuakah hian a lam a tang hlur ang a, mahse hetiang thil mak zet zet hi chu a hre ve kher lovang " a lo ti tha veleh mai bawk a. Ka lo bu ve mai a.



Mahse ka dilchhut a kaltluang ngang si a, "Engtin nge Sangsangi pa te lam chu i hriat daih daih a, khang zawng zawng kha engtin nge i hriat?" ka la ti hram a.



A alu vel lai dah meuh chuan gas bula ka ding chu min rawn melh vung vung a, a nui suk a.




"I dilchhut sâwt mange" a tih chuan ka lo ner nang a. Lungawi hmel zet hian min melh ta vung vung a "Case kan chhui kual kan chhui kual a, file pawimawh zawng zawng te kan la khawm a. Pawngsual case a lo nei tawh tih ka hre ve kur a, chutiang vel atang chuan a nimai. A tawi zawngin ka sawi anih chu, sawi dawn chuan sawi tur a tam lutuk. Tun atana pawimawh ber chu kan zalen tak tak tep tawh. Kar leh lamah case close a ni tawh ang ka tih tawh kha" a ti ta zung zung a. Ka zawt zui duh tawh biklo.



Eirawng kan bawl zawh veleh zanriah kan ei nghal a. Chawei lai chuan "Awmpui lak ngei kan ngai tawh dawn anih hi. In dim i ngai dawn a, chu mai bakah a hma pawh khan nei daih tawh tur kan nia. 'Ka che thei' i tih avanga hnar ta kha ka nia. Tun dinhmunah chuan min hnial tawh suh aw" a ti dam thluam a, tul ka lo tilo lehpek.




"Tun ang dinhmunah chuan a la ngailo" ka lo ti tlat tho a. Mahse Vanmala chuan "A ngaih hunlai tak a ni zawk alawm. Mi rinawm leh fel deuh ka lo zawn tir dawn nia" a ti tung a. Hnial zui chiam chi pawh a ni tawhlo. A luhlul ve thawkhat bawk si.




Zanah chuan phone ka hmang ta a, U Vensangi nen rei tawk tak kan inbia a. Vanmala'n ka chanchin a lo hrilh vek tawh anih ka ring min rawn ngaihtuah khawp mai. A puihnaa Lawngtlai kal ta kha ka ni si a, kawnglaka ka tawhsual tawh chungchangah te khan a rawn inthiam lo lutuk a, ka inthlahrung lek lek zawk.




Ka nau pai chungchâng chu sawi chi a ni ang em ka la hrethiam chiah lo. Keimah hi ka la inringhlel deuh tlat a, thla khat a liam hma chu ka ring tawk rihlo a ni ber. Engtin mah ka danglam em em pawhin ka hre si lova.




Mahse U Vensangi chu ka hrilh ta tho a, a rawn phul hlut a ni ber. "Hun harsa tak karah hetiang thil lawmawm in tawng ania, in vannei lutuk. Ka lawmpui emai che u" a rawn ti ve luam a. Min lawmpui tak tak tih chu a tawngkam phur zet atangin ka hre ve vek.




Kan inbiak zawh chuan Vanmala hi a benga phone dah reng chungin room ah a lo lut a, a phone kenlai chu ka hma zawna rawn lek chhuakin "Ka nu in a be duh che" a rawn ti sup. Rang zetin ka lo ban vat a.




Vanmala chu bathroom ah a lut zui nghal daih.




Ka nu chuan min rawn ngaihtuah ngang mai. Vanmala'n naute chanchin a lo hrilh vek tawh anih ka ring. A rawn sawi nghal pang a, a âw phur zet atang chuan a hlim zia ka hrethiam ve vek.




A fanu ang takin min ngaihtuah tih ka hria a. Ka nuin khati fakau a a tawngkhum tawh chung pawha min la be tha em em te chu mak ka ti hial zawk. A rilru that zia a lang chiang uarh ka ti mai.




Inthlahrung deuhin U Faktei chanchin ka zawt a, chutah ka nu chuan "Lungngai suh Mamte...a thinrim rih ve mai mai anih kha. Tunah chuan nau i pai tih a hria ang a, i chungah a lungawilo reng bik lovang. I nû a tawngkhum dan avang khan pawi ka ti lutuk. I lo hrethiam dawn nia aw" a rawn ti zung zung a. Hriatthiamna min rawn la dil zawkte chu ka inthlahrung zual sauh mai.




"A thiam loh a ni hlei nem, ka nu vang vek anih zawk kha. Ka nu tawngdan avang khan ngaihdam dil zawk tur ka nia" ka ti zawi sep a, a nuamlo duh kher mai.




Mahse ka nu chuan "Nu dinhmun atang chuan a âwm ve lutuk alawm. Tunah chuan Vanmala bulah i awm leh tawh a, boruak a tha chho vek mai ang" tiin min rawn hnem veleh ngial a.




Khawvela mo vannei ber ka ni ka ti lo theilo.



Ka nu nen kan inbiak zawh chuan darthlalang hmaah dingin ka tshirt chu ka hlim a, ka pum chu ka han enchhin vel ngial a. Naute awm tur anga ngaihtuah mai hi ka la thiamlo.




Ka zût a, a thêp zaih mai bawk sia. Nakinah a lo puar ve ngei awm sia tia ka ngaihtuah chuan keimahin ka nui ka nui mai.




Bathroom kawngkhar inhawng thawm ka hriat rual chuan ka hawi vat a, ka pasal chuan min lo nuih suk a. Rang zetin min rawn pan a, ka dul chu a rawn khawih ve nghal zat a.




Ka hnunglam atanga min rawn kuahin darthlalang atang chuan min melh run a, naute chungchang a sawi lehpek dawn emaw ka tih lai chuan "I îtawm mange" a lo ti daih a. A mitmeng tawrhhlelhawm zet avang chuan ka sa nghal hat hat mai.




Ka hmui ka pet ka pet ringawt a, min nuih suk suk chung hian ka bek chu a rawn fâwp tawk a. Ka lo ip chawih mai. Tinge maw tun thlenga ka la zam em em reng mai ni. Ka kumin a chal delh ve viau tawh nain tleirawl hlim hlawt ang maiin ka pasal bulah chuan ka la lai tlat zel chu anih hi.




"Ka nu chuan eng nge a lo sawi a?" a tih chuan tlemin ka inthlahdul ta deuh a. "Min rawn ngaihtuah lutuk a, a inthlahrun awm lek lek zawk" ka lo ti tha ve mai a.



Ka bek nawr reng chung chuan "A fapa duatlai ngaihtuah em em kha i ni miau a" tiin a nui suk a. Ka lo nui ve hak mai.



Phone call a dawn leh tak avangin balcony ah a va be leh rih a. Chumi chhung chuan khumah ka lo mu fel than a. Facebook ah lutin tunlai titi tui ber ka pasal chungchang an sawina bawk chu ka en leh hram pek a.




Mihringte pawh hi kan mak ve ngawt mai, min tina tur thil kan hriat sa ngei ngei pawh hi kan tilui tlat zel a. Ruihhlo te pawh thil tha a nilo tih hre reng chungin kan ti tho a. Pangang hlau deuh deuh pawh hian pangang awmna hmun tur awm anga an hriatah chuan an zawng duk duk zel tho nia mawle.




Ka phone chu rei pawh en duh tawh lovin ka dah ta daih a. Ka pasal dikna hailan anih hunah chuan tuna helh em em tute ho hian an tlawn leh huam tho awm si a. Chumi zingah chuan ka nu pawh hi a tel ve ngei ka ring.




Vanmala phone hmang zo a rawn luh leh chuan ka lo mu fel than tawh. A ni pawh chuan thil dang ti buai tawh lovin a tshirt haklai leh a kekawr tlawn haklai chu a hlip tawk a. Boxer nen chuan ka bulah a rawn inthawlh ve nghal thân a.





Min rawn kuah nghal run a, ka bekah rawn fawp lehin "I la chau em?" a ti sup a, a mitmeng ka hmuh rual chuan a beisei ka hrechiang lutuk. Ka lo ner nang a, a nui huk a.



"Ka mitmeng te hi i chhiar thiam sawt ka ti" nui huk huk chunga a tih takah chuan ka lo nui ve ta tawp.



Dam zetin min rawn fâwp a, ka kawr chhung chu a rawn dap nghal ruk ruk a. Min thlakhlelh ngawih ngawih ang chiah hian ka thlahlel ve ngawih ngawih a, lo dan chu ka tum lo nasa. Ka lo pui ve sauh sauh a. A lungawi hmel chu hmuhnawm tak a ni.



Chau zetin a âwmah chuan ka bei thler a, ka hnungzang ruak kang chul hauh hauh pah chuan min ngaihtuahna a khat hian "A la na em?" a ti zawi sup a, ka zak leh viau tawh. Zak chung chungin ka lu ka lo thing a.




Chutah nghal zet hian "A nuam i ti viau in ka hre reng ani" a ti pek a, sawi awm leh awm lo hi a hre miahlo emaw tih mai tur ani. Min tih zah a tum vang ani tih chu ka hrechiang lutuk tho.



"Nangmah fe..." ring zet hian ka ti chiam a. Chutah nui hawk hawk chung hian, thutak deuh tho siin "A nuam em alawm" a lo ti khauh a. Keimah bawk ka zak leh tawh.



"Naktukah pawh kan ti leh ang" a tih leh chuan a awmah chuan ka chûm taih a, a lo nui hawk hawk mai.



Zingah Puia'n min lo bia a, min rawn ngaihtuah khawp mai. An thawm atang chuan a bulah Rina a awm ve ngei niin ka hria.




Puia chuan "Ka nu lung a awi lo lutuk a, mahse ka pain a khap hlauh zawk a. Nizanah pawh an inhau buai deuh a" a rawn ti sup a, keimah vanga an inhauh buai chu ka duh miah lo asin mawle.



"Eng nge an sawi a?" ka tih chuan "An thusawi pawh ka hre em em hranlo. Mahse nangma chungchang chu a ni chiang a. Ka nu hian heta awm turin a duh bur che a. U Vanmala kha a ring thlawt lo a ni ber. A mizia chu i hriatchian kha, a tih tawh lamah vek vek hi chuan a luhlul lutuk. Ka pa dawhtheihna in a tlin ta vak lo aniang, a khak zui a. An inhau buai deuh mai mai mawle. I ngaih phei chu ti thalo duh suh. Ka nu chuan ka pa thusawi a tawn lui ngam tawh bik lovang" a rawn ti duah a. Ka lo tang teuh mai.



Ka pa hian ka nu hi a hmangaih zia ka hria a, a hau mang ngailo a tih theih ang. Mahse keimah vanga an lo inhau chu ka inthiamlo kher mai. Chutihrual chuan ka thlavang a lo hauh ve chu ka lawm viau lawi a.




Tukthuan eikhamah Vanmala chu a chhuak leh a, phone ka kawl tawh bawk a. A chinchang hre turin ka inbe pawp reng thei tawh dawn tho a. Ngaih tha deuhin kan inthlah a.




Ka theih ang angin in ka tifel a, Police hovin kan in chu an la hual bet thut reng a. A thlamuan thlak pawh ka ti hran chuanglo, chêp ngawih ngawih ang hian ka inhre zawk ti tawp mai teh ang.




A hma ang khan mipui hovin kan in leh a chhehvelah lungawi lohna an lantir tawh hran lova. Chutihrual chuan social media lamah beih kan tawk nasa a, a thenin fiamthu thawh nante min lo hmang thûl. Vanmala chauh ni lovin keipawh min sawichhe zawm ve zel a.




Chu pawh chu Facebook atanga ka hmuh tho ania. Comments pakhatah hian 'Nupui a nihna chu lo dah tha ta ila, hmeichhia a nihna ang hian a hmeichhiatpui thlavang te chu hauh ve zawk awm a ni a. Pawngsual tu nupui nih reng a la thlang fan a, eng teh ual a ni lovang' tihte a lo inthai kur duah a. Like tu lah chu an thahnem em em zui a. Reply tu pawh an tam mai.




Kan ramin Social Media kan hman dan hi chu a la fuh tawk lo deuh a ni.



Chhunah chuan ka pa in min rawn be ve teh nawlh a. A âw a dam khawp mai. Min rawn ngaihtuah hle a. Vanmala bawkin naute chungchang pawh chu a lo hrilh hman aniang. A rawn sawi nghal chat a.




"Nau pai lai chuan in uluk hle tur ania. Khatiang dinhmunah khan i ding tih chu hria ila, i nu hi ka lo khap hma deuh tur ania. Ka lo ngawi rei mah mah a, a zialo tak tak ani" a rawn ti luam a.



Ka pa chu ka dem hran lo. Pa ngawi thei leh zawldawh lutuk a ni a. A tih tur chin chu a ti zel tho in ka hre ve tlat.



"Ka nu chu a la thinrim viau em?" ka tih chuan "Zep lovah chuan a la lungawi zan lo alawm. Mahse lo lungngai lutuk suh, case te hi an chingfel vat sela a lungawi chawp veleh mai ang" a rawn ti vat a.





Case chungchang a rawn sawi rual chuan ka thinrim veleh deuh tlat pek a "Vanmala hi a ring miah lo thei ania. A dik zia a hriat ve hunah chuan a inthiamlo ngawt ang. Vanmala hi chuan a haw hran chuanglo tih ka hria a, mahse khatiang teh thlawta kan nupa chunga a che kha ka lungawi lo" ka lo ti ve hmarh hmarh a.




"Ekhai Mamte...khatiang rilru nu te lakah an pu ngailo, a ngaihtuah vangah che ngai hmiah rawh" a rawn tih lai mek chuan "Min ngaihtuah nise ka duh dan min zahsak ang" ka lo ti hmanhmawh a.




Mahse ka pa chuan "I nu a nihna angin a che chhuak ve tawpah ngai la, i tan pawh a hahdam thlak a nimai. Nu te hi chu fate tana thil tha an duh lutuk na lamah an mit a del châwk ania" a rawn ti chuar chuar a. Hrethiam se min duh lutuk tih chu a âw ngenngawl zet atang chuan ka hre ve vek.



Mahse tunah rih chuan a awm dan a la siam tha chuang lova, ka la haw tho tho. Ka nu a nihna erawh ka la hre ve reng thung.




Vanmala chu tlaiah a lo haw a, eirawng ka lo bawl tan mek laiin a ni a. Awmpui lak chungchang bawk a sawi leh a. A sawi kalhmang ah chuan a hmu tawh anih hmel "Naktuk atanga rawn zawm turin kan inbe rem aw" a tih chuan kan hun tawn mek ka ngaihtuah a. Kan inchhunga midang han lakluh chu kan boruak nen a hrisel viau lovin ka hria a. Mahse Pa Chhuana te chhungkhat laina, dinhmun harsa ve tak an ni tih a sawi takah chuan ka hmin der mai. Kan chungah an tha em em dawn tih ka hre nghal tlat. Pa Chhuana reng a fel emai.



Zanah chuan Vanmalsawmhlua duhthawh lutukin a che lehpek a, a thusawi tawh reng reng chu a ti hlawhtling ngei ngei thin ka tih tawh kha. Nizan lama a sawi lawk ang ngeiin a che lehpek a.




Chau lutuk hian a âwm ah ka bei thlar a, min biakna pawh chu ka chhâwn peih meuh lo. Amahin a nui a nui a, a lungawi hmel thin bawk sia. Ka pasal ber a lungawi miau chuan a tawk mai e.




"Ka muhil dawn" chau zeta ka tih chuan a nui suk suk a, "Ka tihpalh" nuihza insum deuh hian a ti a. Ner nang hian ka han melh tawk tawk a "I tih luih anih kha" ka ti hlak a, chutah nui hawk hawk chung hian "Insum a har em alawm, naktuk chu chawlh ka pe ang che" a la ti ta deuh deuh a. Ka va han ngei mai mai tak.




"Zanin bak chu ka tih pui tawh lovang che" ka tih chuan a nui ta hawk hawk a. Intithei zet hian "Nupui neih hi a lo nuam anih hi" a ti hlut a, chau viau e tilo chuan ka nuihpui ve ta hak hak a.




A nupui ka nih avanga ka pasal inchhuang vel lutuk chu ka hlimpui a ni ber.



Kar thar kan chuangkai a. Ka nu(Vanmala nu) leh U Vensangi te nen kan inbe awl lova. Ka pa leh ka nuta te nen pawh kan inbe zeuh zeuh a, min hringtu ka nu erawh Lawngtlai ka let leh atangin a reh ta hlauh a. Lawm viau tur ka nih laiin ka lawm chuanh miahlo. Min ngaihsak lo nia ka hriatna chuan fanu ka nihna angin min tina a. Ka laka huamhauh taka a khawsak leh kha ka duh tihna erawh a ni hauhlo.




Ka dam tha em tih talte chu min lo zawt ve se ka ti takzet a. Kan nufa inkar hla ta lutuk chuan min tina a ni ber.



Vanmala sawi ang ngeiin awmpui thar chu kan nei ta ngei a. Tleirawl tê a ni dawn emaw ka tih laiin nutling a lo ni a. Nutling tih lemah nula senior a ni zawk mah ang chu. Ka lawm letling phian. 'Nu Zo' tiin ka ko mai zel a, Pa Chhuana te nen an inchhun vang ni maw ka ngaina nghal em em a. Ka tana chawhmeh tha tur a hriain a thil siam reng reng a tui thei em em a. Vanmala chhuah chang pawhin ka khua a har loh phah sawt a, a lo awm ve chu a lawm berah ka tang tawh.




Naktuk lawk hi case close ni tur a ni tawh a, Vanmala pawh a tul vut vut viau mai a. Tukin pawh chawei kham veleh a chhuak nghal a. Inah a awm tam thei lova ka lakah pawh a inthlahrung thin khawp mai "Case chinfel zawhah chuan ka awm nileng thin ang che" a ti ve ziah a. Ka khawngaih letling thin zawk.




Ina a awm chang chuan min duat hliau hliau viau mai a. Zanah phei chuan sawifiah thiam phak bakin min duat thiam thin. Thu tam sawi lo mah se a chetziain min hmangaihna leh min duatna a lantir thin a. Ka lawm tawk viau ani.




Thei thur ka ei châk em avangin Nu Zovi nen chuan nimbu kan sawh a. Kan siam lai te chuan ka lo tem ka lo tem a. Min nuih min nuih mai.



"Ka rai ve chhin mai dawn mawni" uang thuang zet hian a lo ti a. Kan nui dun hak hak mai.



Thei thur ei pah chuan TV ah YouTube connect in mukbang kan han en ngei a. An thil ei ang te chu awm hmun atangin kan lo zeldin ve nasa mai.



Video pahnih kan en zawh hnu chuan en tur dang zawngin kan hmet kual leh a. Content pakhatah chuan 'Lawngtlai DC pawngsual case chungchang chanchin thar ber' tih hi a lo awm a, 30 minutes ago chauh a la ni zui.




Eng ka hria nimaw, ka en duh tlat pek a. Nu Zovi pawh hian engkim a hre ve vek a, mahse kan sawi dun ngai lem lo. Vanmala hi a rintawk thu erawh vawikhat chu min hrilh ve tawh. Mak pawh ka ti hran lo, Pa Chhuana'n a rin em vangah khan ka puh hmiah.




"U Zo, enchhin ang aw" tiin TV chu ka mitmei a, a lo hrethiam aniang, a lo bu ve nghat a.



Kan enna YouTube Channel nei tu chu Mizorama news channel hlun ve ber pawl a ni a. A hma daih atang tawhin a content te hi ka lo en ve tawh thin . A bengvarthlakin a thu lak dan pawh hi hriat a nuam a, a huaisen ka ti thin hle bawk.




Tichuan, U Zovi nen chuan kan ngaithla ta a.



Tun tum, a news chhuah zet chu ka pasal chungchang anih vang nge mawni ka pawm dam thei der lo.



"Lawngtlai Deputy Commissioner pawngsual case chungchang kha kan la hre theuhin a rinawm a. Naktuk mai hi case final ni a ni tawh dawn a. Pawngsual tawktu hian a dikna chanvo a hmuh ngei theih nan mipuite'n tan i la ve ang u" tih chu bul tan nana hmangin mipui boruak ti sosang zual thei tur thil a sawi zui teuh a.




Mi hausa leh rethei inkar zauh zia te, mi hausate chu thil tisual pawh nise zalen taka khawlaia an la len mai mai theih thute sawiin, chumi avanga a rilru nat zia te chu a sawi kur duah a.




Kan han ngaithla zo chiah chu U Zovi a mangang nghal kher mai "Mipui hian la theihnghilh lo mah se na takin an che chhuak tawh lova. Mahse hemi vang hian an rilruah a rawn thar leh ang a, a buaithlâk mai thei ani" a ti hluai a. Ka lo ngaihtuahna chiah a ni.



Tinge maw dikna duh inti chung si hian thu chiang awm hawt si lova sum duh leh hre ber nih duh vanga thudik tawk lo kan vawrh kual chiam thin le?



Heihi Mizoram than mawh bawk ber niin ka hria. Social Media kan khawih a, mipui lah hian chanchin thar kan lawm si. Thil mak leh rapthlak pui pui hriat duhin kan phi cheng a. Kan âwnna lamah kan âwn duai duai a. A rei deuh a, kan theihnghilh veleh mai thin bawk a. An rawn thar thawh lehin kan han phûl leh hlut a.




Nu Zovi chuan a phone a tuai nghal mawlh mawlh a. A rawn chet hlak a, "Ka rindan tawk vel" tih pah hian ka hmai zawnah a phone chu a rawn lek a.



Ka lo en vat a, 'Naktuk hi kan khawtlang mi leh sa Lalrinnungi pawngsual case final nî tur a ni a. Lawngtlai NGO hrang hrang te buatsaihin naktukah hian court tualzawlah Lawngtlai mipui a thei apiangte, pawikhawihtuin a phu tawk hremna a hmuh ngei theihna turin sitting demonstration neih tur ani' tih a lo inziak kalh mai a.




Ka rilru a lo buai ve ta map mai. Hahdam takin case close a ni thei ang chu tih laiin hetiang dinhmuna kan din chuan thil a harsa zual mai thei.



Vanmala hian thudik hailangin thiam chang ta tehreng pawh nise mipuiho rilru hi a dam mai maiin ka ring tawhlo. An rinna hlawh chhuak leh tur chuan a beih fe tawh a ngaih ka ring.



Tlaiah chuan chauh hmel zetin a rawn haw a, choka ah Nu Zovi nen kan lo awm lai ania. Inthlak tura room lam a pan tur chu ka zui chho ve vat a.



Ngainat awm zet hian min la nuih hram a, mahse a mitmeng chauh hmel zet chu kei a nupui hian ka hmuh hmaih lo nasa.



A kamisz haklai chu ka phelh sak thlap a, ka kawngah min lo hmer salhin lungawi hmel zet hian min en vung vung a.



"Vawiin lam eng nge chanchin?" ka tih chuan "Naktukah chuan kan zalen thei tawh ang. Thudik kan hailang vek tawh ang" a lo ti nghet churh a.



Ka thil hriat zep theilo lutuk chuan "Vawiinah YouTube Channel pakhat ka en a, i hre ve em?" ka ti teh tawl a. A lo bu nghut a, "Ka rin lawk sa a ni tho alawm. Lungngaihna tur a awmlo, case hi an tidanglam thei chuanglo" pangngai tak hian a ti a.




"Mipuite rinna hi i tan hlawh chhuah leh a har tawh viau ang" ka tih leh chuan a hmui a lo pet zauh a.



"An rinna hlawh chhuak lo mah ila ka dikna ka hrechiang alawm. Thu dik hi hai lanin awm phawt sela, a dang chu a tlachawp zelin a kal tluang purh tawh mai ang" hahdam hmel zet hian a ti a.



Ka pasal chiai ve ngai miah lo leh a ngaihtuahna puitling khup thin hi chu ka man pha ve ngai dawnlo anih hi.



_________*___________*____________


Show post links
Top

[Ngaia]

DEPUTY COMMISSIONER
By CVL Awmpuii



Chapter 32




Vanmala intihfai zawh hnu chuan zanriah ei turin inhnuai lamah kan inzui thla leh nghal a.



Nu Zovi hi a zuan a zângin a che fel khep thin a. Tunah pawh chawei min siam sak nghal zung zung a. A che zung zung bawk si, ka pui hman lo a ni ber e.



Zanriah ei lai chuan Vanmala'n "Nu Zovi chu kan nupa tan hian i awm lovang tih a hlauhawm ngawt mai. Kan mamawh ber lai che in min tlanchhiatsan lova, kan lawm takzet ani" a ti ve ngial a.




Ka pasal chungchangah hian mak ka tih ve deuh chu, a tawngtam miah lo na-in midang fak hi a hreh ngai miah lo. Ka bulah pawh a sawi fo 'Kan hnathawk te an ni emaw, mi tu pawh nise an thil tih thatah chuan fak hreh loh tur. Mihring kan inti phur tawn a ni tih hi hriat reng tur' a ti fo mai a. Chu chu amah pawh hian a nun pui ka ti lo theilo.





Pa Chhuana chungah pawh khan a tha thin em em a, a nihna bak baka fak chuang hauh si lovin, tawng chuangliam lutuk ni bawk si lo hian a âwm tawk tein a fak ve fo thin.




Nu Zovi chuan "Mai mai a, kan mamawh ber lai chein i tlanchhe bik ngai hlei nem. Tunah pawh sum kan mamawh na avangin kan rawn bêl leh chawt che a. Heti hian inhlawhna tur min buaipui sak leh thlap a. Kan awm zawk daih" a lo ti ve mawlh mawlh a.




An tawng dan atang chuan an lo inhre tha sa hle tawh tih a hriat mai.



Lawmthu an inhrilh tawn mawlh mawlh a. Kan boruak chu a nuam phian mai.



Heihi ania mihringte nihna chu, that leh that kan inlawm tawn chuan thil tha a lo chhuak mai zel. Chutihrual chuan kan chunga tha em em te pawh hi mi rilru chhe nangiang chuan an thatna hmang tangkai a a chhe zawnga beih let an hreh lo. Chung mite chu Bawihbawihi te ang hi an ni.




Mi kan chunga an that em em laia thatna kan lantir let ve thei lo anih chuan piansualna chi khat a ni.



Zanah chuan hma deuhah kan mu a, Vanmala pawhin a tih dan ngai tein min kuah leh run tawh a. Ka dûl thêp zaih mai chu a chûl hauh hauh a, zawite te hian a be mawlh mawlh a, ka lo nuihpui hak hak mai.




"Apa hian ka hmangaih lutuk che ania aw..." a ti ril ruih a, ka dul zawnah chuan kun hniamin ka mutkawr pan thler a kawnga suihna awm chu a pawt phelh a, a kut lawng chuan rawn khawihin a fâwp zui vawng vawng a. Nuam ka lo ti leh em em tawh.




"Anu nen hian ka hmangaih che u..." ti lehin min rawn melh chho a. A mitmeng hmangaihna leh min duatnaa khat chuan min thlamuan hliah hliah mai.



Rawn tawlh chhovin ka hmuiah chuan min rawn fâwp vang vang a. Tun tum min fawhna chu zan dang zawng aiin nuam ka ti zual. Ka sawifiah thiam lo, ril zet hian min fawp ngawih ngawih a.



Inlahrang hlekin ka chal la si reng chung chuan "Naktuk atang chuan tun ai hian ka duat leh zual che ang a. Pawngsual case rit tak awrh mek pasal ni lovin pasal dik tak i nei tawh ang" a ti nghet churh a.




"Tuna ka pasal pawh hi mi dik a nih lohna a awm chuang lo" ka lo ti ve vat a. Lungawi hmel zet hian min melh ta vawng vawng a. Ka pasal lungawi hmel hi ka thil hmuh nuam tih ber pawl a ni.




A inlahrang a, ka sirah chuan rawn mu thla lehin min kuah leh nghal run a "Zûn hi chu i nei mawle" a rawn ti chhuak leh hlawl a, za zetin ka lo nui chhuak hawk hawk a.



Chutah amah bawk chuan "Min ti lungawi thin ngawt mai" a ti leh churh a. Ka mut dan chu siam remin a âwm ah chuan pangchang zet hian ka bei nghal kak a.



Vanmala lah chuan lungawi em em hian min lo kuah nghet sauh sauh a. "Zanin chu chawlh ka pe leh phawt mai ang che. Chuti lo zawng naktuk court hunah kan zan hun hman ngaihtuah chungin thil ka ti theilo mai ang" fiamthu ti tak deuh hian a ti a.



"I mi chhawr ang mai hian min ngai suh" ka lo ti ve hlak a, thinrima sawi erawh ka ni hauh lo. Chutah Vanmala chuan nuihza insum deuh hian "Khumlaizawlah chuan ka thû ber, pâ ber ka nih hi. A bakah chuan i thu vek" a han ti vel ngei a. Kan room chhung chu kan nupa nui riin a luah khat leh nghal der tawh.




Hun harsa tak paltlang mek ni mah ila, kan nupain kan tâwn tlang zel a. Nupa kan nihna angin kan bei dun a, kan tang dun a, hei hian tun thlengin chhelna min pe niin ka hria. Vanmala lam hi tang lovin ring ta miah lo ila a tan nupui tha ka ni lovang a. Nupui ka nihna anga ka mawhphurhna ka hlen loh avangin keipawh ka hlim chuang bikin ka ring lo.



Zingah chuan hma takah kan tho a, ka pasal che zia reng reng chu a dam thlup mai a. Kei erawh vawiin court final ni a ni si a, ka lo zam ru ve teuh mai.



Tukthuan pawh hma takah kan ei a, court tan hun chu tlai dar 2 daih ni mah se Vanmala chhuah hma a ngai a.



A insiam mawlh mawlh lai chuan "Ka lo kal ve kher a ngailo tak tak maw?" ka ti leh hram a. Nizanah khan kan sawi dun a, case final ni a nih avangin ka pasal bula lo din ve chu ka duhthusam a ni a. Mahse amah hian a remti tlat lo "In hi i tan a him zawk, Court tualzawlah mipui an pungkhawm dawn si a, thiam kan lo chang ta anih pawhin an chet dan tur kan hre rih si lova. Chuvangin i lo kal ve ka remti lo" a ti bur mai si a.





A thusawi chu a dik ve vek bawk si, ka hnial ta lo kha ania. Mahse tunah tak hi chuan a bula lo awm ve a, hnehna chang ngei tura tichaktu lo nih ve ka duh.




"I bulah awmin hnehna i chan ngei theih nana fuihtu che lo nih ve ka duh alawm" ka ti veleh ngial a.




Chutah Vanmala chuan lungawi zeta min rawn melh chungin "Ka hmuh phakah awm lo mah la ka thinlungah hian i awm reng alawm. Min rin tawkna ringawt pawh hi ka tan chakna a ni tawh. Chuvangin ka thusawi kha hrethiam la, in lamah Nu Zovi nen chanchin in lo ngaichâng zawk dawn nia" a tih leh tak tho si ah chuan ka hnial lui duh tawh bik lo.



A kal hmain kan pahnihin room ah kan tawngtai thlap a. Ka pasal dilna chuan min hneh khawp mai, Pathian hnenah thil tam a dil miah lo. "Lalpa, i thu a kan hmuh angin nang chuan rorelna dik i duh thin a. Chuvangin tuna kan hun tawn mekah hian dikna rawn lanchhuah tir ang che" tih zawng a dil.




A dikna chu Pathian hmaah a kun pui hmiah mai a. Dikna duh em em tu Pathian khian a chhan loh hi ka ringlo reng reng.




Vanmala chhuah hnu chuan Nu Zovi nen kan awmdun leh nghal chawt a. Tum danga case chungchang sawi ngai zen si lo kha tun tum chu case chungchang bak kan sawi theilo.




Ka lo zam ru em em a, thil a kal sual ang tih mawlh ka hlau. Ka pasal kha ka ring tawk lo a nilo. Bawihbawihi rilru chhe tawp khawk lutuk hian thil nihna bak bakin a kal kawih tir ang tih ka la hlau tlat ani.




Mi sual tam tak hian mi tha an hliah khuh châwk si a.




Tlai dar 2 a rik dawn phei chuan ka lo awm hle hle thei tawhlo. Vanmala chuan min lo call a, "Lo mangang lo la, engkim hi Pathian remruat angin a kal vek mai ang" tih zawngin min rawn hnem. Thu tam ni lo mah se ka tan chuan thlamuanna tham a tling lutuk tho.





Aizawl lamah pawh case an lo ngaichâng ve reng a. Zingah pawh khan ka nu(Vanmala nu) leh ka chhungte lam atangin chanchin an rawn ngaihven hle a. Min hringtu ka nu erawh a reh hlauh thung a, chutiang bawkin U Faktei pawhin a hranpa takin min rawn be lova. Vanmala nen an inbiak thu erawh Vanmala'n min hrilh miau avangin ka hre thung.




Court tualzawla mipui hovin sitting demonstration an neih chu TV ah an live. Nu Zovi nen chuan changchin ngaihven pahin kan lo thlir ve reng a.




Court tan tak tak hmain an lo au rual a. "Hmeichhe chunga hleilenna hi kan duh lo"
"Mi retheite rah beh hi Pathian pawi khawihna a ni" tih tein an au rual thup thup a. A thawpik thlak duh kher mai.



Ka ngaihtuahna a thil lo awm ta chu, retheihna chapo pui hi an lo thahnem hlein ka hre ta a. 'Keini chu kan khawsak a harsa a, kan rethei' ti reng chung siin thinlung chapo tak neih hi lo awl deuh tur a ni ka ti ta.




Tun dinhmunah chuan mi retheite hian mi hausa zawkte an retheihna hmangin an rap bet ka ti ve tlat. Mi retheite han tih chu a mawi lo mai thei, mahse anmahni in 'mi rethei' an inti miau a. Chutihrual chuan keinin 'mi rethei' tiin sawi ve dawn ila an duh leh awm der si lo.



Vanmala leh a ukil te rawn thlen lai chu a rawn lang ve zawk a. Mipuite chuan ka pasal diriamna leh deuhsawhna te, huatna te chu an lo chhak chhuak mawlh mawlh a.



"Mi hur"
"Nang ang hnathawktu hi mipuiin kan duh tawhlo che"
"Hmeichhe duhlo chung khawihtu chu mipa pawh i ni love" tih te in an lo au el a.




Ka sawi seng lo zawk, an lo rak nuaih nuaih hi a ni ber. Vanmala leh a ukil chu court chhung an luh hma zawngin Police hovin an veng a.



Ka pasal mahni inrintawk hmel zeta court chhung lut ta chu a kal liam hma zawngin ka lo thlir ve ta reng a. Mipuiin khawih tumin an lo ban ve zuau zuau bawk a. Mahse a vengtu Police te an chhah em a, eng em a thleng lo.



Court chhunga an inzui luh fel hnu chuan ka lo thaw huai mai.




Mipuiho pawh chu an inbengdai veleh mai bawk a. An banner ken laite nen chuan a rem rem ah an thu veleh mai bawk a.



Banner ah chuan pawngsual an duh lohna thu leh ka pasal an demna thu a inziak kur duah a.



"Rorelna dik thleng rawh se" tih inziak kengtute ni mah se rorelna dik lanchhuah hun nghak zo lova tan lam nei sa te an ni fur a. Dikna duh inti em em siin a dik lo zawk thlavang hauhin mi dik zawk chu an mawh chhia a.




An dinhmunah chuan an rindan te chu a âwm ve lutuk. Chutihrual chuan case nihna tak hre hawt si lova pawngpawrh taka an che ham ham mai chu ka lo haw ve takzet.



Vanmala te ber court chhungah an lut ta bawk a, TV pawh chu en rei duh tawh lovin kan off ta daih a.



Nu Zovi chuan min tawng thlamuan ve mawlh mawlh a "Hlauthâwng duh reng reng suh, dikna chu thup hlen theih a ni hlei nem. Vanmala te ang mi tha lutuk phei chuan a dikna chanvo hi a hmu ngei ang" a lo ti ve mawlh mawlh a.



Ka rilru mangang leh ta viau mai chu tawngtai bak ka rilruah a lang thei tawhlo.




Nu Zovi bulah chuan "Room ah ka han chho lawk ang aw, ka rei lovang" tiin chhuanlam ka siam ta a. A ni pawh chuan "Aw, i chhoh chhungin chhuat hi ka lo nawt dawn nia" a lo ti ve vat a.




Room chhung ka thlen rual chuan khum bulah ka thingthi tawp a. Ka manganna ber pawh chu Pathian hnenah ka thlen thiam chuanglo.



Mahse Pathian chuan min chhang dawn tih ka ring ve tawp. Ka pi thusawi hi ka hre reng thin "Pathian hi kan kar a, kan dil ngat ngat anih phawt chuan kan duh angte tihlawhtling turin a hmanhlel em em ania. Kan tana tha tur chu min pe ngei ngei thin" tih thu hi a sawi fo thin a.




Tuna ka dilna te leh ka dil chhan te hi tu tan pawha tha tur niin ka hre ve tlat a. Kan nupa bik leh kan chhungkaw tan chauh pawh nilo, kan ramah dikna in bû a khuar theih nana thil tha lo irh chhuahna tur niin ka hre ve tlat a. Dawt haw em em tu Pathian khian kan dikna ah chuan a thiltihtheihna a lantir ngei dawn tih ka hria.




Ka theih ang tawka ka tawngtai zawh hnu chuan inhnuai lamah ka chhuk thla lehnghâl a. Nu Zovi pawhin chhuat a lo nawt fel diam tawh.




TV hmaah thuin TV chu a lo en leh kar tawh a. Case chungchanga khawtlang hruaitu te an biangbiakna leh NGO hrang hrang hruaitute an biangbiak laite chu an rawn tilang a.




MHIP President pawhin a sawi duhthawh khawp mai "Hmeichhe chunga hleilenna hi kan duhlo tak zet a. Thil tisualtu chu mi thil tithei leh hausa pawh nise a zalen bik chhan tur kan hrelo. Mipa leh hmeichhia te hi Pathianin inang tlang vekin min siam a. Dân hnuaiah phei chuan dikna chanvo inang nei vek kan ni. Chuvangin tunah pawh hian MHIP ang zawnga lo che chhuak te pawh kan ni a. Kan hmeichhiat pui chunga thil rapthlak tak thleng hi keini chuan kan duh lova, kan dodal a. Hetiang thil tenawm a bo theih nan hian tunah pawh hian dikna lantirin awm ngei sela, pawngsualtu chu eng mî pawh nise hrem lohin chhuak lo se tih hi kan duhthusam a ni" a ti dap dap a.




Midang tan chuan a sawi tha hle mai ti a lem duak duak theih a ni ngei ang. Mahse thlirna tlang lehlam atanga lo thlir tu, dik lo zawk ni a an puh dik zia lo hretu tan chuan a rum mah mah a ni.



Dikna duh thû tlang aupui siin âwn lam neiin an awm tlat a. An thinlungin mi dik zawk ni a an hriat lam chu an tan vek tawh tho si a.



Darkar hnih dawn hnuah ka pasal phone call ka dawng a, rang zetin ka la a. Case chinfel a nih thu leh hnehna an chan thu min rawn hrilh rual chuan dan rual lohin ka mittui a rawn luang thla nghal pap a.




"U Vanmal, ka hmangaih che" ka ti ta thlawt a, ni e ka pasal hi ka hmangaih thlawt a ni. Vanmala chu a rawn thaw chhuak hawk hawk a.



"Sawi leh teh" a rawn ti hawk, ka hmangaih thu mawlh chu ka sawi leh a. Sawi tur dang pawh ka hrelo, ka tap zui hlap hlap a. Nu Zovin min rawn buaipui vat.



A mitmeia chanchin min rawn zawh chuan "Hnehna kan chang" zawite hian ka lo ti a. Min lawmpui ve kher mai.



Tunah hian ka pasal chauhin hnehna a chang lova, keipawhin hnehna ka lo chang ve ani. Ka pasal hnehna chu ka hnehna a ni miau a.




Inbiak rei hman a nih loh avangin Vanmala chuan "Ka hmangaih che ania aw, ka lo haw vat ang. Kan chhungte chanchin ka han hrilh ve ange" a rawn ti ril ruih a.




Kan inbiakna kan tihtawp rual chuan chunglam hawiin ka rilruin Pathian hnenah lawmthu ka sawi mawlh mawlh a.



Nu Zovi chu ka kuah chûk chûk a, "Ka rindan sa ania, ka danglam ve vak lo" a lo ti dam raih a. Ka tap hlap hlap chu ka hnungzangah min lo chûl hauh hauh a. Min lawmpuina vangin a nui deuh hak hak bawk.



Tuna ka mittui luang hi chu lawmna mitttui a ni. Ka hlim a ni tawp mai. Ka pasal chu lo haw vat se, a bulah hahdam taka awm ka chak veng veng tawh.



TV pawh chu kan off ta daih a, kan tan en reng kha a tangkaina a awm tawh lo. Ka pa call ka dawng zui zat a. Min rawn lawmpuiin min rawn thlamuan khawp mai.



"I nû rilru pawh a buai khawp mai" a rawn ti hulh a, ka nu awmdan vel tur chu ka ngaihtuah a. A makpa, rin a hun ber laiin a ring duh miau lova. Thudik a lo lan tak si ah chuan a inthiamlo ve khawp ang le.



"Engtin nge a awm a?" ka tih chuan "Eng vak a sawi hran lova, a awmdan chu a ngai reng tho. Mahse a rilru chu a buai dawn tih hi ka hrechiang. Rawn biak pawh che pawh a duh ang, mahse a ngam rih lo mai thei. Nangmah zawkin i lo dawn sawn thiam a, i rawn biak hmasak pawh a ngai mai thei. I nu mizia chu i hriatchian kha" a rawn ti chuar chuar a.




Ka nu mizia chu ka hrechiang a, inthiamlo eng ang mah se a zâm ka ring chuang miah lo. Nu inringtawk leh mahni induh tawk ve tak kha a ni miau a. Mahse a rilru chuan a inthiamlo hle dawn tih ka hria. Chutihrual chuan ka pa sawi anga va biak hmasak vel kha ka tum hran lo. Hun harsa ka paltlang laiin ka hrehawmna min belhchhah sak miau a, ka rilru a la dam thei bik lo. Kan nufa inkar chu hunin a la hril ang chu ka ti ve hmak mai.




Ka pa nen kan inbiak zawh chuan U Vensangi nen kan inbe leh a, min rawn lawmpui ve ngang mai. Dinhmun hrehawm leh khirh tak kan tawh laia kan nupa lam tang tlattu a ni a, min lawmpui ve takzetin ka hria.




Ka phone chu a rawn ri deuh sek a, Rina'n min lo call ve ngei bawk a. "Ka nu a inthiamlo rap mai, a lan chhuah tir hlut lo na-in a awmdan atangin kan hrethiam ve vek a. Ka biak pawhin min chhang tha duh mang lo, a hmel a tim deuh dai a. Room ah a inkhung char char a. 'U Vanmala chu i ringlo bawk a, dik zawk a nihna a hailang ta bawk sia' ka tih khum ve kher a. Engtin mah min chhang chuang lo" a rawn ti vel ham ham a.




Ka thlavang a lo hauh thiam danin a che ve tih chu hre tho mah ila, chutianga ka nu a lo tawngkhum kher chu tha ka ti lova.




Rina chu ka thiam ang tawkin ka zilh let ta zawk a "Engtin mah lo tawngkhum duh suh, ama tawkah a inthiamlo dawn tih chu hriat sa ania. Kan nu ania, ka tana tha tur a ngaihtuah vang tih ka hria a. Dik vek bik lo mah se hriatthiamna tam tak ka nek ve ania. A inthiamlo lutuk tur vengthawng tak khan lo titipui zawk rawh" ka ti ta malh malh a.




Haw viau mah ila ka nau te lehzel in an lo dem ve kha tha ka tilo.



Nu Zovi nen chuan Vanmala in rawn thlen hun kan lo nghak ta reng a. Ka thu mai mai thei tawhlo, ka vei tawn sek a, ka phî cheng mai.



Ka phone a rawn rik leh rual chuan hmanhmawh zetin ka pick up a, Vanmala chuan "Mamte...ei châk i nei em?" a rawn ti dam thluam a. "In lo haw mek em ni?" ka tih chuan "Umm...ei châk i nei em?" a rawn ti leh sup a.




"Aih lo haw vat rawh" ka lo ti nghal tawng a, ri meuhin a nui chhuak hawk a. A nui ri ah chuan lungawina tam tak ka hre leh ta.



"Kan lo thleng har tawh lovang, ei châk chu i nei lo maw?" a rawn ti leh hram a. "Ka ei châk zawng zawng chu kan kawl vek alawm, nangmah chiah i kim tawhlo" ka lo ti zung zung a. Lungawi hmel zeta a nui ri bawk ka hriat leh tak kha.



Nu Zovi chuan ka phi cheng chu min lo khap leh thin a, mahse min khap dai seng meuh lo chu a ni. A hnuah phei chuan min nuih min nuih ta tawp a.



Kan in kawta motor thawm ka hriat rual chuan rang zetin kawngkhar ka hawng a, inring hman lek lovin ka va tlan chhuak nghal a.



Ka nghahhleh em em ka pasal ngei mai chu car atang chuan a rawn chhuak a. Chutia ka va tlan min lo hmuh chuan a lo nui chhuak hawk hawk a.



A bul ka va thlen rual chuan ka kuah nghal thak a, nui hawk hawk chungin nghet zet hian min lo kuah ve nghal a. A palian bawk si a, min kuah hneh takzet.



Ka thla a muang leh nghal hliah hliah tawh.



Ka sama fawp vang vang pah chuan "Min lo va ngai tawh âwm ve" a ti sup a. "I rin phak bakin" ka lo ti ve vat.



A inlahrang turte chu phal lovin ka la kuahbet tung a, a lo nui leh hawk hawk a. Chutah ka bengbul chêt ah chuan "Hun lo deuhah chêt ka la palh hlauh ange" a rawn ti khawl a, ka biang a sa nghal hat hat mai.



Inlakhran ka tum chu amah zawk chuan nui hawk hawk chungin min han kuah leh rih a. Kan bul vel ami te chu kan ngaihtuah tawhlo reng reng.



Rei tawk fang chutia kan inkuah hnu chuan kan inthlah ta hram a. Vanmala hmel ka hmu chiah chu zawhna in ka khat nghal.



A bekah chuan bandage a lo inbel var han mai a. Ka kawnga min la kuah run chungin min nuih var var a, a bek kawh zeuh pah chuan "Tinge?" ka ti ha a. A bek chu a khawih ve zeuh a, a nui suk ringawt a.



Ka tal deuh aih a, "Vanmal, tinge?" ka ti leh hlak a, "Inchhûngah lut phawt ang u" tiin ka zawhna ngai pawimawh lo deuh chuan min nawr kal ta dat dat a. A bek chu ka melh tawk tawk a, "Vanmal..." ka tih leh pawh chuan min lo nuih mai a.




Inchhûng kan luh rual chuan ka zawt nawn leh sak a. A driver leh ukil te pawh chuan min lo zui lut ve a. Nu Zovi pawhin Vanmala beka bandage inbel chu a lo hmu ve nghal a, kei ang thovin zawhna a lo zawt ve nghal bawk.



Chhang ta mai lo chuan driver leb ukil te bulah chuan "Ka nupui nen hian kan han inthlak lawk ange, lo awm r'u aw" a ti sup a. A mi biakte pahnih pawh chu an lo bu ve nghut a.



Room lam pan chuan min kai chho ta dat dat a, a bek mawlh chu ka lo melh leh tawk tawk thin a.



Room kan thleng chiah chu kawngkhar a kalh nghal hmak a, a bek chu engtin nge a tih zawh tumin ka âng leh ziau hman a. Mahse Vanmala chuan ka bek tawn tawnah rawn dawmin koham zet hian min fâwp nghal tawn tawn a. Ka hamhaih lutuk avang chuan chhan let ngaihna pawh ka hrelo.




A ni lah chuan duhthawh zet hian min fawp tawn tawn a, ka kawngah rawn chelhin a lamah min hnuk hnai salh a, a taksa si thlawp chuan min fawp zui leh tawn tawn a.




A duhthawhin a chêt dan chu a koham bawk si a, lo chhan let ve ngaihna pawh ka hrelo. Maimitchhîng chungin ka lo dawh mawl tawp a.



Chutia rei tawk fang min fawh hnuah chuan dîm zetin ka hmui hnuai chu a ranw pet ta fan fan a. Ka lo thaw halh halh mai. Ka lungphu ri chu ring tak a ni.



A duhtawk a ngah hnu chuan a inlahrang ta a, min fawp duhthawh bawk a, ani pawh a thaw chhuak zui ham ham mai.



"Phone a i rawn sawi kha sawi leh rawh" a ti sup a, a tawng zawng chuan ka hmai a lum hak mai.



Hrethiam lo fe a "Eng maw?" ka tih chuan "Min hmangaih thu kha" a lo ti vat a. Ka ngawih tak daihah chuan "Sawi leh rawh" thupe aw zet hian a rawn ti leh churh a.



"Ka hmangaih che" a mita en reng chung chuan ka lo ti ta sap a. Chutah lungawi hmel em em mai hian ka hmui a rawn khar chilh leh hmiah a, tun tuma min fawh dan chu a dam ta raih mai. Keipawhin ka lo chhang let ve vat a. Kan infawp ta vawng vawng a.



A kamisz ka phelh sak lai chuan ka kawnga min kuah run chungin min lo melh ngawih ngawih a.



A beka bandage inbel mawlh chu ka ngai mawh em avangin a chhan ka zawt leh hram a.



Min chhang dawn tawhlo emaw ka tih hnuah "Mipui thinrim ka tuar ve hlek a" a lo ti sup a. Ka melh nghal kawk a, "Kut an thlak che a maw!" ka ti chiam a.



Chutah Vanmala chuan dam zet hian "Thlak êm lo e, car a ka lut tur kha nu pakhatin lungin min lo vawm fuh a" a tih chuan ka va han thinrim tak!




"Eng nge chutianga an tih ngawt che a?" lungawi lo lutuk hian ka ti chiam a. "An tih theih tawk anih hi" a lo ti sam et mai a. Kei ka lo lungawi thei der lo.



"Police in an man em?" ka tih chuan a lu a lo thing mai a "Hetiang a ho lutuk" a tih chuan a âwm ah ka nem chawrh a.



"Man tir ta che, dikna a lang chhuak tawh chung pawhin tinge an la bi tum talh che a" lungawi lo lutuk hian ka ti a. Ka thinrim rilru na bawk si chu ka hrawk a na vek thei. Ka tah a chhuak tun bawk si.



"Hunin a la liampui ve mai ang" awlsam zet hian a lo ti leh mai a. Ka thinrim lutuk chu ka ke ka lo per vak a. Ka chetdan chuan a ti hamhaih ve deuh a ni mai thei, min rawn melh hu a.




Chutah thinrim lutuk hian "An tih dan che hi ka lawm thlawt lo" ka ti chiam a. Ka thinrim luatah ka mittui a rawn tla ringawt a. Ka van ngei tak !



Ka beisei loh zet hian Vanmala chu a rawn nui suk a, min rawn pan hnaiin dim zet hian min rawn kuah a. Kei lah ka thin a lo rim nasa mai si.



"Police te kha tihlet tir ve ta che" ka lo ti hlur a. Vanmala chu a nui hawk hawk tawh "Raino symptoms a lo lang tanin ka hria" a tih chuan ka tal vak a. Mahse ka talsawn theilo, min kuah nghet lutuk tlat.




A tuartu zawk khan min hnêm ta zawk a. Ka pasal bek hliama a rawn haw chu ka lawm thei ngang lo a ni ber. A dawhthei lutuk chuan ka thin a tirim hlur mai.




A zawldawhna vang hian midangin an zuam ni berin ka hre tawh.



"Dawhtheih lutuk hi a tha lo ania, i dikna i hai lan tawh berte chuan engtin mah an ti theilo che. An tan i thawk hram hram a, heti hian an rul let che a. Keichu ka lawm miah lo" ka ti hlak hlak a.



A lo nuih in ka thinrim zel bawk sia, min nuih duh ta bik lova. "Case ber kan chingfel tawh a, ka hna chungchang hi chu ka kutah a innghat tawh. Nakinah kan la sawi dun dawn nia" pangngai taka a tih takah chuan ka thinrim rei duh tawh biklo.




A bek chu a nat leh nat lohte ka han zawt leh hnuhnawh a "Chawei ti tui tham lek anih hi" a ti duh lek chauh.




Inhnuai lama kan inzui thlak leh hnu chuan case review te kan nei thuak thuak a.



Nu Zovi nen chuan Zama thusawi chu uluk zetin kan lo ngaithla ve a.




"Tunah hian Lalrinnungi hian defamation case(midang puh hmingchhiat tumna) a awrh mak bakah kum 8 liam ta a midang a lo bum tawhna pawh kha hailan vek a ni a. Pawisa fai cheng singnga chawi tura tih a nih bakah kum 14 chhung lungin tang tura tih a ni a. Kum 7 chu case hmasa lama midang a lo puh hmingchhiat tawhna kha a ni a, kum 7 dang leh chu tuna Pu Vanmala puh hmingchhiat a tumna hi a ni leh a. A vaiin kum 14 tihna anih chu. Heihi case rit ber a awrh theih dan chu a ni a. Lungin atanga a chhuah hnuah pawh enthlak zui reng theih a ni tawh dawn a. Tun tum chu sawrkar mi pawimawh meuh a phih âwk vangin a case a rit zual khawp mai" a ri dap dap a.



Kum 14 chu tlêm ka lo ti mah mah, ka rilru chhiat vang pawh a ni mahna. Mahse ka pasalin a chunga that a lo chhuah tawhna te a rulh let dan avang pawh hian rei tak lungin tân chu a phûin ka hre hrim hrim.



"Engtin nge awlsam taka in hneh mai theih zawk le? Hetiang case hi chuan a lo berah kum 2 te a awh thin sia" Nu Zovi chuan a lo ti he haw a. Keipawh hei tak hi ka rilrua zawhna awm reng ania.



Case hi beisei aiin an chingfel hma tlat ani.



Zama chuan "Sawi leh sawi hnu, Pu Vanmala te ang hi chu sawrkar mi pawimawh chin an ni a. A case lah a lo serious bawk si. Hetiangah hi chuan court lam pawh a hmanhmawh thin a" a lo ti vat a.



"Finfiahna in hmuh hnuah Bawihbawihi chu a inpuang ve mai em ni?" ka tih chuan Zama chu za lo zet hian a lo nui hawk a, a lu thing nghutin "A luhlul ngang ngang khawp mai, finfiahna atang leh thuhretu te pawhin a thiam lo zawk a nih zia an lantir chung pawhin a tihsual a pawm duh thak lo. A fanu ngei ngei chungah pawh rawva takin a che duh ania" a lo tih hluk chuan "Sangsangi a awm ve maw?" ka lo ti haw a.




Vanmala zawk ka melh avang chuan a lo bu nghut a "I awm loh chhung zawng zawng khan thudik a sawi theih nan kan lo bei alawm. Ka kawm chiang a...ka hmuh thin thu pawh ka hrilh duh ta kher lo che anih kha" a lo ti vat a.




Zama zawk chuan "A fanu khan case chinfelna kawngah min pui nasa alawm. Lalrinnungi khan a lo vau bet thin a, a ni naupangtê lah khan a nu a nihna zawnah a lo hlau bawk si. Keini pawhin kan hmin thei lawk lova magistrate in a zawh chianna atangin kan fiah thei ta chauh alawm. Case bultan nia Pu Vanmala leh Lalrinnungi te bula awm ve chu a fanu chauh kha a ni sia" a lo ti veleh dap dap a.




Ka hrefiah ta uar uar mai. Aizawl-a ka awm chhung khan rilru an lo sêng nasa hle anih dawn hi.



Zama chungah chuan lawmthu ka lo sawi ve mawlh mawlh a. A haw dawn chuan Vanmala bulah "In duh chuan sawrkar ah sum in claim thei ania aw. Hetianga sawrkar mi leh sa thubuai awrh tir a, an lo dik leh si chuan an hnaa an suspend na leh ukil rawihna zawng zawng, an sum senso zawng zawng hi sawrkarah an dil leh vek thei ania. Mahse kha chu in duh leh duh loh a nimai" a ti dap dap a.



Vanmala chuan min rawn melh zawk a "Kan lo ngaihtuah dawn nia" tih zawngin a chhang.




Zama chu pawn thleng kan va thlah a, Vanmala chuan driver a thlah haw tir leh thlap a.



Inchhûng a kan inzui luh leh hnu chuan Zama thusawi kha bawhzui turin ka ti a. "Sum hi kan mamawh ber a ni chuang hlei nem" chal chuar tapa a lo tih chuan ka lo hnial vat a.



"Kan mamawh chu ka ti hran lo, mahse a lungawi thlak loh emai. A nihna tur ang takin hma la la, sum chu claim ve hrim hrim ang. I dik zia lan a zel a nimai" ka ti hlak hlak a. Min nuih suk suk ringawt a. A bawhzui tak tak pawh ka ringlo.



Mahse "Nu berin i tih tlat chuan le" a lo ti fan ruih a. Min nuih reng bawk si. Nu Zovi pawh a lo nui ve hak hak mai.



Zanriah kan han ei te chu tum dang zawng aiin kan hlim a tih theih ang. Nu Zovin zalen lawm na ang reng deuhin chawhmeh tui tawk tawk a siam a. Kan dawhkan pawh tum dang aiin a khat dul a, keipawhin ka ei hnem khawp mai.



Zan muthmunah chuan case chungchang bawk kan sawi dun leh a. Chumi piah lamah chuan Sangsangi chungchang ka lo zawt zeuh bawk a.



"Engtin nge a awm dawn?" ka tih chuan "Pî a nei alawm" tih zawngin min chhang.



"I khawngaih em?" ka ti leh hram pek a. A khawngaih viauin ka ring. A nuna ka lo lan ve hma zawngin fanu ang takin a lo enkawl tawh si a.



"Dik tak chuan khawngaih e" a ti zawi sup a. Huat enah pawh ka en tawhlo. Keipawhin Sangsangi tak chu ka khawngaih em ani.



"Tih sak theih nei ila tiraw, a khawngaih thlak sia" ka tih chuan "A hmaa ka lo tih tawhte kha tawk rawh se. Tun atan chuan engmah tih sak a ngailo" a ti hmak mai.



Ka mut dan chu siam remin a hmel landan chu ka han en chho ha a, a mit a lo chhing daih a.



Heti hian ka ngaihtuah ta a, ka pasal hi mi khawngaihna ngah tak ni mah se a tih loh chinah chuan mi paukhauh tak, luhlul tak niin ka hre tawh.



_______________*_____________*________


Show post links
Top

[Ngaia]

DEPUTY COMMISSIONER
By CVL Awmpuii



Chapter 33




Zing ka harh chuan ka pasal âwm ruak kangah ka lo la mu thlar mai a. Tho ta mai lo chuan ka pasal lungphu ri dup dup chu ngawi rengin ka ngaithla kar a. Thawhhlim a hriat atan chuan duhthusam ani.



A thawk dan atang chuan a la mutui hle niin ka hria. Min kuahna kut chu dim te a lasawnin a hmel en thei tur chuan ka inbengkang a.



A sam , a tawk chauha buk deuh laih te. A hnar ngul invuah fuh lutuk leh a mitmeng khuar dakte chuan a ti lang pa zual ngawih ngawih. Tum dang zawng aiin a hahdam hmel a, a zalenna chuan hahdamna tak tak a pe niin ka hria. Min lo ti hahdam ve veng veng mai.




A biang chu dîm tein ka han chûl a, a harh phah chuang miah lo. A mutui hle niin ka hria.



Sana ka en chuan zing dar 6 chiah a lo la ni a. Hun rei tak chhung case chungchang ah a lo buai tawh bawk a, tukin chu a theih chen chen muhil sela ka duh.




Nui sak chungin a âwm ah bawk chuan ka bei leh thên a. A kut chu lain a hmaa min kuah ang chiah khan ka inkuah that tir leh a. Lungawi zetin min ka chhing leh nghal chial a.



Ka pum chûl hauh hauhtu an awma ka hriat avang chuan ka harh hlawl a. Ka men chhuah rual chuan ka pasal hmel ka hmu nghal zat, hnai set sawtah min lo thlir ngawih ngawih a. Inbengkang meuh hian min lo melh a, a kut lehlam chuan ka dul a lo chûl hauh hauh bawk a.



Nui sak chungin ka chhing leh nghal daih a, a lo nui hawk mai.



"Anu hi a mut a la chhuak anih hi" nuihza insum zet hian a ti sup a. Ka mit la chhing reng chung chuan ka lo nui ve sak a.



Vanmala chu a rawn mu tha leh sauh sauh a. Ka pum bawk chu a chûl zui leh hauh hauh a. Kei lah chuan pangchang zet hian ka lo hnaih ve sauh sauh a. Ka lo kuah nghal thak a, a nui leh hawk hawk tawh.



Ka dula a kut vahkual tir reng si kha a rawn khawih fet telh telh a. Ka âwm bawr a rawn khawih leh zet zawng ka thawk ka lo ip ve ngar ngar kha a puak keh ka ti mai. Ka lo thaw chhuak hak a, min la nuih hawk zui a.



Ka hmui a rawn fawh rual chuan rang zetin ka lo chhang let ve nghal a. Ka âwm bawr pawh a rawn tham na zual sauh a. A duh ang thalin chêt a lak zawm nghal zat a.




Thlanin min bual huh dun dap hnu chuan bathroom ah min pawm lut zui leh a. A mitmeng atang chuan a tih leh tur ka hre vek. Zei chi tinreng a chhuah leh tak kha.




Inhnuaia kan inzui thlak meuh chuan dar 8 a lo ri thuak tawh. Nu Zovi pawhin eirawng a lo bawl peih fel vek tawh a. Hetiang ti tura kan chhawr mah ni se ka tihpui loh avangin ka inthlahrung ru khawp mai.



Mahse Nu Zovi chuan ka rilru hria ni awm tak hian "Niminah khan chawhmeh kan siam hnem bawk a, eirawng pawh bawl vak a ngailo. Chaw ka chhum tlawng a, chawhmeh chhuan lum leh a nimai" a lo ti zung zung a. Tlem chuan ka awmdan pawh a zia deuh e.




Chawei kan siam laiin Vanmala chuan thutkhawmna lamah phone a bia a. Ka hriat sual loh chuan ka nu nen an inbiain ka hria.



Rei vak lovah a lo let leh a, chawei pawh kan lo siamfel hman chiah.


"Naktukah hian ka nû te an rawn zin dawn nih chu" nui vur vur chung hian a ti sup a. Ka lo phûl nghal hlut mai "I ti tak tak em?" ka tih chuan a lo bu nghut a, min nuih vur vur a.



Chutah phur zet hian "Ka van lawm tak" ka ti hliai a. Mahse U Faktei nen kan inkar ka hrechhuak a, ka down nghal rawih mai. Engtin tak min lo la ngai ve ang maw? A lo kal ve ngei awm si a.



Vanmala chuan ka rilru hria ni awm tak hian "Engkim a fel vek tawh bawk a, chhungkua awm khawm rih kha tha ka tia" a lo ti sup a. Za lo zeta nuiin "Ni e..." ka ti sep a. Ka awm a nuam tawh chiah lo.




U Faktei lo kal ve tur chu ka huphurh em em pawh a ni hran lo. Mahse kan inthlah dan khan a zir miau lova, min ngaih dan tur ka hrelo tlat atin ani.



Tukthuan ei lai chuan Nu Zovi bulah Vanmala chuan "Nu Zo, vawiin chu i duh leh leng chhuak ve rawh. Inah kan awmpui deuh chawt che sia, i ning ve tawh ang" a to dam thluam a.



"Han chhuah vahna tur em em pawh ka hre hran lo. In hi chu ka ning lo nasa" a lo ti ve vat a.



Mahse Vanmala chuan "Vawiin chu Mamtei ka lo awm chhawk ang che, i duh duhnaah i leng dawn nia" a ti tung a. A nui vur vur lehnghal a. Nu Zovi pawh chu a lo nui ve hak hak a "Chutiang a nih dawnte chuan leng chhuak tehreng e" a lo ti ve hluai a.



Kei erawh Vanmala thusawi dan vel chuan min tizak thar ngang mai. Ka lo sa hat hat thei hial.



Tukthuan eikham veleh Nu Zovi chu a che nghal sawk sawk a. Vanmala a awm tlat si a, ka pui ve ngam mang lo.



Inchhung sek rek ka khawih hi min hmu thei lo ti tawp mai ang. Nu Zovi hi ring tawp turin min ti fo a. Chu chu Nu Zovi duh dan pawh ani.



Dar 10 velah Nu Zovi chuan leng turin min chhuahsan ta a. Vanmalsawmhlua zet chu ka bulah a tap nghal chawt a.



Khumah kan inawm nghal heuh heuh mai. A châng leh lehkhabu min chhiar sak a, a châng leh ka dul la thêp zaih chu chûlin a be sek a. Ka lo nuih apiangin min rawn fâwp leh vawng vawng thin a. Kan lungawi dun hliah hliah ti tawp mai ang.




"Titi mai mai ang" ka tih takah chuan ka bulah a rawn mu thla nghal zat a. Ka kawngah nghet zetin min kuah lehnghal chial a.



"Eng nge kan sawi ang?" a tih chuan ka ngawi leh vang vang lawi a. Sawi tur chu ka hre teuh a, mahse engtia bultan tur nge ka hrelo a ni.



Ka âw ka thian tê tê a, Vanmala chuan min lo ngaichâng nghal ran a.



"U Vanmal..." ka tih chuan "Sawi la, nu-i" uang thuang zet hian a lo ti a. Kan han nui dun leh rih.



Mahse a hnuah chuan thutak deuh hian "Sawi tawh rawh le" a ti sup a. Ka samah a rawn fawp vang vang bawk a.




Chutah ka rilru kap rengtu chu ka sawi ta phawng a "U Faktei hian min la ngei reng ang em le?" ka ti teh tawl a.



"A ngei che em ni?" Vanmala chuan a lo ti fan ruih. Min ngei leh ngei loh chu ka sawi chiang thei der chuang lo. Mahse a hma ang kha chuan min ngaina tawhlo alawm. Tunah hian khatiang rilru kha a la pu reng ang em tih phei ka hre lo.




Vanmala en thei tur chuan ka han dak chho ha a, min lo melh chhuk ve run a. Ka zawhna khan a thawng tih ka hrethiam ve nghal mai. U Faktei nen kan tun dinhmun a hre miau lova, a awm ve tho mai.




Tuchuan Vanmala chu thil engkim ka hrilh ta vek law law a. Ka nu nen an inhnial dan leh an in ka chhuahsan tak dante chu zep nei lovin ka hrilh fai ta kelh a. A bulpui berah chuan ka nu ka puh hmiah, thil nihna tak pawh a ni reng a.



Ka sawi zawh chuan ka thawl nghal hawk mai. Vanmala thusawi tur chu ka lo ngaichâng ve ta ran a.



Thil ngaihtuah zui ni awm tak hian a ngawi vung vung a. A âw a then kharh takah chuan thurawn tha tak min pe dawn e ka lo ti rilru a. Mahse Vanmala chuan "Keini pahnih hi kan vannei ngawt mai" tih zawng a rawn sawi a.




A ngaihna hrelo fe a ka han melh chuan "Kan chhungte ve ve hian min ngaihtuah êm a, kan buai ve ngai miah lovin an lo buai em em zawk a. Min hmangaih luat vang anih hi" a lo ti ta daih a.



Ka rin loh lam takin thû a la ta daih a. Mahse a thusawi chu a dik fu bawk sia. Ka nu hian min ngaihtuah luat vangin dik ni a a hriat danin a che chhuak tawp a, U Faktei lahin a nuta a ngaihtuah luat avangin a nu rualpui a lo hnial ve zek bawk a. Mahse a tuartu chu an mi ngaihtuah te ve ve kan ni tho si a.




A bul tumtu chu ka nu a ni ka la ti fan a, khatiang khan ti lo se U Faktei pawh ka chungah a la tha em em ang.



"U Faktei awmdan hi chu a âwm hliah hliah alawm. Mahse ka nu chu a diklo alawm" ka lo ti veleh hram a.



Mahse Vanmala chuan "I nu dik lohna hi hmu lian lutuk tawh suh Mamte, a ngaihtuah vang che tih ka hrethiam alawm. Faktei'n min ngaihtuah vanga i nu a lo hnial i pawm thiam ang chiah khan i nuin a ngaihtuah luat vang che a min ring miah lo kha ka pawm thiam lutuk ania" a lo ti leh dap dap a.




A thusawi apiang chu han hnial viau dawnin a dik thlup zel bawk si a, han hnial ngaihna pawh ka hrelo. U Faktei hmel hmuh ma hrehna erawh a kiam phah chuang silo.




Kan mi hmangaihte tana thil tha kan duh luatah hian anmahni ngeiin an lo tuar phah fo a. Hei hian inlaichinna ah khî a lo siam mai thin.



Heihi ka nu leh U Faktei te chetdan chungchanga ka ngaihtuah chhuah tak chu ani.




Ka ngawih tak rengah chuan Vanmala bawk chu a rawn tawng leh a "Engkim dang zawng zawng aiin chhungkua hi ka ngai pawimawh a. Tunah phei chuan ka nu te chu an lo zin ngei ngei a ngai anih tawh zawk chu. Faktei nen in inkar siam thatna hun a ni bawk ang a. Lungngai reng reng suh, a haw teuhlo mai che. Engkim a tha leh vek mai ang" a ti dap dap a.




Ka pasal min hnemna hi chuan min thlamuan thin teh e.



Tlai eirawngbawl hun awm velah khum chu kan thawhsan ta chauh a. Ka mu sil vek maiin ka hria. Mut hi nuam viau mah se nilenga mut em em chu ka na zawk daih.



Inhnuaia kan inzui thlak leh chuan Nu Zovi pawh a lo che leh sawk sawk tawh a.




"I lo va let hma awm ve" ka tih chuan "Hma vak lo, ka lo thleng veleh deuh chiah" a lo ti vat a. Vanmala'n min vil deuh run si a, chet pui ngam chi pawh a nilo.



Mahse tim dai hian alu ka lo velpui ve a, Vanmala pawh chuan min khak ta em bik lo. Tih tur awm reng laia lo thut bik mai mai chu ka thei tlat lo ani.




Zanriah ei hma chuan kan beisei loh lutukin Pi Biaki te pitu an rawn lang hlawl mai a. Vanmala thinrim insum hmel chu a rapawm hial zawk.



Mahse a hmel landan nena inpersan zet hian "Eng nge ni?" a lo ti dam thluam a, ka lo thaw huai mai.



Nu Zovi nen chuan kan inmelh tawn zak zak a, ani pawh a hamhaih ve hle anih hmel.



Tunge an lo kal ngam ring bik ang ni? Case chinfel tuk lawkah lehnghal, an thisen hi sang ka lo ti khawp.



Mahse Sangsangi inthlahrung hmel chuan ka rilru a tina veng veng mai. Ka lainat takzet.



A hmaa Vanmala a hmuh ruala "Apa..." ti a au lang lang thin khan tunah chuan Vanmala chu hmelhriat loh ang mai hian a en tawh a. He inchhunga ngampa taka awm thin kha a tim dai tawh bawk a.



Ka lainat dawn viau laiin Bawihbawihi thil sual tihte ka rilruah an rawn lang thar leh a. Ka intihpaukhauh thei hram hram.



Nu leh fa chu inzawm tlat kan ni a, nu in thil a tihsual miau chuan fate ah a lo tla lo theilo.



Tunah pawh hian hmeichhe naupangtê Sangsangi hian a nû tihsual rah chu a seng ve mek niin ka hria. Naupang rilru thianghlim a nih awm vei nen. A nu vangin kei ngei pawhin ka be tha thei lo chu a nimai si a.



Nu mawhphurhna san zia ka ngaihtuah thleng lo theilo.



Pi Biaki chuan inthlahrun hmel fe hian Sangsangi kut chu a chelh nghet sauh sauh a "Vanmal... khawngaih takin Bawihbawihi case hi sût hram mai teh, kan pitu hian a tello chuan awm zel dan tur pawh kan hrelo" a ti ngawih ngawih a.



Vanmala chhan dan tur chu ngawi rengin kan lo ngaichâng hlawm a. Sangsangi inthlahrung dak hmel chu a melh vung vung a "I tunu tan hian nû tel lova than len a tha zawk" a ti hmak mai.



Pi Biaki chuan mittui luang ngei nguai chung hian a ngen leh hram a. Mahse Vanmala chhanna chu "Aih" a ni tawp mai.



Ka pasal rilru paukhauh lutuk chu kei ngei pawhin ka awihlo hial zawk. Mipa khawngaihna ngah lutuk a nihna kha suahsualna i'n an ei chhe vek ka ti lo theilo.



Pi Biaki te inzui haw hnu chuan Vanmala chuan "Chaw ei ang u" a ti tawi tuk a. Nu Zovi nen chuan chawei kan siam nghal zung zung a. Ka che vel pawh chu min khap tawh biklo.




Zanriah ei lai chuan kan ngawi reng hlawm a, tumah kan tawng chak lo anih hmel. Pi Biaki te pitu rawn kal khan kan mood a rawn tichhe tlang ania nge.



Kan mut hnu thleng pawh chuan Vanmala chu a tawng zui lova. Zan danga min si cheta mu thin kha khum sir te ah a mu a, min hnungchhawn zawngin a mu daih bawk.



Keipawh a lehlam sir tê ah ka mu a, Pi Biaki te lo kal vanga a mood chhe lutuk chu ka chungah a lantir ni mai hian ka hria a, ka ngei ta lek lek mai.



Lehlam hawia a mu ngul pawh chu en rei duh lovin lehlam ka hawisan ve hmak a. Ka mu tau sawk sawk a ni ber.



Thinrim ru tuna ka mut lai chuan a rawn che sut sut a, ka hnung lam uap nghal churh atang chuan a rawn tawlh hnai tih ka hre thei.



Ka kawngah min rawn kuah nghal thuk a, keia ngaihdan a lo ni tawh silo ka tal nghek a, a lam hawia inherin a âwm ah chuan ka nam chawrh a.



"Min rawn si hlek suh" ka ti hlur a, nichin lawka a awmdan vel kha ka haw lutuk. Tun ataka min rawn hnaih leh ruak pawh a ngailo.



A ngaihna hrelo fe hian "Mamte..." a ti dam ruih a, rum eltiangin ka lo melh thung a.



"I lung ka tiawi lo em ni?" chal chuar tap hian a lo ti hulh a. Ka thinrim a kal tluang bawk nen "Bawihbawihi nu leh fanu lo kal vang mai maiin i mood chhia ka chungah i hrithla a. I duh leh an pitu khan i zui haw law law lo anih kha" ka ti chiam a. Ka thinrim lutuk chu ka thin a sa phat phat mai.




Vanmala lah chuan awihlo hmel fe hian min lo melh a "Eng nge i sawi awmzia?" a la ti hu zui a, ka va han haw tak.



Thinrim zet hian ka ankhum leh tan tan a "An haw atang khan biak pawh min be duh tawh lova. Khum kil chetah i mu a, kuah pawh min kuah duh loh kha" ka ti khur hlawk hlawk a.



Khum mawnga rizai chu pawt chho in ka intuam zui nghal hmak a. Chutah Vanmala chu a lo nui chhuak ta hawk hawk a.



Ka thinrim zual sauh mai "Ka then khawp ang che" ka ti ta hem mai. Chumi rual chuan Vanmala chu a nui hmel tawp thakin a tum nghal hmuk mai.



"Han tum chhin la" a ti hluk a. Chutah ngei zeta melh chung hian "Ka then khawp dawn che hre rawh" ka ti leh chiam a.



Cho zeta ka melh thip ram lai chuan a rawn che chhuak thut a. Ka lo indang hman lo ka bekah dawmin ka hmui a rawn khar chilh hmiah a. Duhlo zeta ka tal vel na te chuan awmzia a neilo kher mai.



A la duhthawh em em zui a, a inlakhran rual chuan a chalah ka tauh pawp a. A phun zui hluk.



"I va kawlh sawt tak" a tih chuan rum eltiang hian ka melh leh a. Ka beisei loh zet hian a lo nui huk a.



Keia lungawi bawk silo chu mu tau leh sawkin ka puan pawmbeh tun chuan ka inkhuh zui leh nghal hmak a.



Vanmala chuan ngawi rengin ka puansin chhanah chuan min rawn kuahbet a. Ka mittui a rawn hnâm ta tiam tiam mai. Ka thinrimna kha rilru natnain a rawn thlak a. Ka tap khur ta ngat ngat mai le. Ka awmdan chu ka va han haw mai mai tak.




Ka puansin rawn pawh hlim a tum chuan ka lo pawt bet ve tung a. "Mamte..." rilru buai hmel zeta a rawn tih pawh chuan ka la pawt tung tho a.



Min ngaihtuahna aw ria khata "Duatnu...i tap em ni?" a rawn tih leh zet chuan ka tum loh lutukin ka insut ri ta faih a. Vanmala chu a rawn thaw chhuak nghal hawk mai.



Ka puansin a rawn pawt hlim leh tur pawh chu ka lo dang buai tawh lo.



Ka mittui tla a rawn hmu chiah chu hrehawm tih hmel lutuk hian a thaw chhuak hawk a.



"Duatnu..." min duatna a khat hian a rawn ti hawk a, a âwmah chuan min kuahbet nghal hlun a. Ka lo tap chhuak hlap hlap tawh thung.



Ka hnungzang ah chuan chûl hauh hauhin ngaihdam min dil mawlh mawlh a.



"Min be duhlo anih kha" pangchang zet hian ka lo ti tiau a, ka bekah dawmin a hmel en thei tur hian min pawt chho a. Lungawinaa khat mitmenga min melh chung hian "Ka thiam loh vek anih chu, bang tawh rawh le" a ti sup a.



Min duatna aw ka hriat hnem poh leh ka zuau zual a, ka tap lehnghal pur a.



"Ka biak duh loh vang che a ni hlei nem, ka ngaihtuahna a buai em alawm. Sangsangi i lainat hmel kha ka hmuh hmaih si lova. Zep nak emaw keipawhin ka lainat a, mahse inhnamhnawih ka duh tawh lo bur si a, ka buaina chu i hrethiam ang chu maw " a ti fan ruih a. Ka lo lungawi leh em em tawh.



Mahse "Chu pawh nise i awmdan kha..." ka la ti leh hram a, "Umm...ka thiamlo, ka ngai viau che ania, i tah pur pur chuan nuam ka tilo " a lo ti zung zung a. Ka mittui luang ngiai ngiai chu a kutin dam zet hian min tuai hul sak zung zung a.



Minute rei lote a liam leh meuh chuan min chhaih nui leh ar ar tawh. Ka awmdan atthlak lutuk kha ka zak leh hnuhnawh viau mai.



Vanmala sawi lawk ang ngeiin tlai lamah chuan ka nu hmel kan hmu ta ngei a, mahse U Faktei a lo tel ve miah lo.



Ka nu chuan "Hna thilah a buai leh thut sia, a lo kal ve hman ta lo alawm" a ti hlut a. Ka hnual nghak rawih mai. A lo zin ve thei anih chuan kan inkar ka siam tha thei ang a tiin duhthu ka lo sam ve nia.




Ka nu chu phur takin ka lo dawngsawng ta tho a, Vanmala erawh office ah tih tur pawimawh a neih avangin a kal zuai a ngai a. A hna hi a bansan dawn leh dawn loh kan la sawi dun lo nain office lam hian case chinfel anih rual khan an ko zui lawm lawm a. Niminah kha chuan a kal duhlo kha ani a. Mahse tun tum chu a tul tak meuh meuh anih ka ring. A kal hmain a rei loh tur thu chu min hrilh hram a. Mahse ka rin ai daihin a rei tawh.




Ka nu bungruate chu Nu Zovi nen kan thiar luh pui ve vat a. Kar khat chhung chauh rawn cham tur a ni a, bungrua pawh a tam fahran lo.



Nu Zovi nen pawh an titi thei nghal fu mai a. Ka rindanin ka nu hi Nu Zovi aiin kum li nga vel emaw bakin a upat m ringlo, an inkawm tawk khawp mai.



Vanmala pawh zanriah ei dawn tepah a rawn haw ta hram a. A rei avangin thupha a chawi mawlh mawlh a, keipawhin huatah ka lo la bik lo.



Ka nu chu U Faktei chungchang a zawt vat a, min chhan dan ang chiahin a lo chhang ve vat a. Vanmala chuan min rawn melh zawk a, kan rilru a inhmu viauin ka hria. Kan inkar siam that hna chu nakin lamah la thawh a ngaih hmel.



Zanriah eikhama TV kan enlai chuan ka nu chuan "Mamte, niminah khan i nuin min lo bia a" a ti hlawl mai a. Ka thin a lo phu nghal dup dup mai. Engti hawi zawng takin lo bia ang maw.



"Eng nge a lo sawi a?" ka lo ti ro halh a, "Ngaihdam chu min dil chiah lo nain a inthiamlo hle niin ka hria. 'Kan fanu hi in la iai lo anih chuan a hma ang khan kan awm leh thei ang' tih zawng a rawn sawi a. Pehhel taka in inneih zel a duh thu a rawn sawi naah ka lo ngai hmiah mai" nui var var chung hian a rawn ti a.




Kei erawh ka lo zak chem chem mai, ka nu tawngkam teh kher chuan mei a nei ka la ti tho mai. A chapona a la phah hniam thei chuanglo ania nge.




"Nu, a hmaa ka nu tawngkhum dan che avang khan ka tihpalh aw" ka ti ta ngawt a. Ka inthiamlo em ani. A hunlai khan engmah ka sawi hman ta si lova.




Ka nu chuan ngainat awm zet hian min lo nuih a "Tihsual nei miah lova tihpalh tih chu a zialo emai. Khatiang engmah a nih loh kha. Hei tluang takin in awmdun zel a, heihi a hlu lutuk. Thil dang kha chu engmah a nilo" a lo ti zung zung a.




Ka chunga a thatna hian min inthlahrung zual thin.



Ka nu chu a rawn zin chau ve bawk nen mu turin a room lam a pan vat a. Kan nupa pawh tawi khawmuang tawh lovin kan room lam kan pan ve vat a.




Khuma kan mut rual chuan Vanmala chuan min kuah leh nghal run a, a thlamuan thlak thin ania.



Phone ah YouTube kan endun a, case chungchang update a lo la awm hram a. "Ti chhin ang" ka tih tlat avangin Vanmala chuan a ti ve mai bawk a.



"Thudik tawk lo avangin a tuartu zawkin thiam loh a chang" tih vel hi an lo sawi kur duah a. Phone chu keimah zawkin ka hmet tawp nghal hmak a. Vanmala chu za lo zet hian a lo nui hawk a.



"Tinge thudik a lan hnuah pawh an la ngaih sual tlat che a" lungawilo zet hian ka ti a. Vanmala chuan "Bawihbawihi ber khan a tihsual a pawm duh si lova, a la inpuan loh vang mai mai anih hi" a lo ti sam then a.




"Chu pawhnise thudik zawk a lang tawh reng a, mipuiho pawh hi ngawih mai tur alawm. YouTuber thenkhat lah hi sum duh luatah contents dik zik tluak lo hi an upload fo mai a " ka ti leh hlawih hlawih a.




Vanmala chuan "Hunin a la liampui ve mai ang, an la hre chhawm ve zel mai ang" a lo ti duh lek chauh.



Zingah chuan ka beisei loh zet hian ka nu phone call ka dawng a. Ka dawng tih lemah Vanmala phone kaltlangin min biak duh thu a rawn sawi a ni zawk mah.




Ka chungah engtiang pawhin lo che tawh mah se ka nu a nihna a bo lova, ka ngai ve reng mai. Mahse tih lan erawh ka duh rih hauh lo thung. Inthiamlo ve rih se ka ti tlat pek a.



"Hello" ka tih rual chuan engmah thleng lo ang mai hian "I dam tha em?" a rawn ti var a, a hmaa a awki zang vah thin kha a la danglam eih lo. A awhawm letling hial zawk.




"Dam e" ka lo ti tawi tak a. Zawhna min zawt a, ka chhang zel a ni ber. Han biak lum lam vak kha ka duh rih bik der lo.




Naupai laia chaw tha te chu a rawn sawi luam a, 'keipaw'n ka pai lai che chuan' a rawn ti deuh sek a. Min pai lai chanchin ka ngaithla a ni deuh ber e.



Kan inbe zo, Vanmala phone ka pe let leh chiah chu zawhna mitmeng hian min lo melh a "In hmu chhuak ve deuh rawh se" ka lo ti hlak a. Ka beisei loh zetin a lo nui chhur chhur a "Reuh che hian a" a ti sup ringawt.



Vanmala chu a dan ngaitein office a kal leh a, Nu Zovi a awm a, ka nu a awm ve tawh bawk nen kan pathum chuan in kan lo nghak thin a. Pawna pangpar te chu kan hung tha hlawm a. Kei tak chuan eng vak ka tilo, indim turin min ti hlawm reng miau a.




Zan muthmunah Vanmala nen chuan chhungkaw din chungchang khunkhan deuhin kan sawi ve ta a.



"Fa hi engzat nge i duh?" ka han ti vel ngei a, a lo nui huk a "Engzat nge min hrin sak i inhuam?" a tih chuan "Engzat nge i duh sawi la?" ka lo ti leh fan a.



A ngawih run run hnuah "Pathianin rem a tih chuan...a tlem berah panga tal ka duh" a ti hul hawk a.



"Chutiang em em..." ka lo tih lai chuan min lo pawtchat leh rih a "Ka duhdan min zawt a, thudikin ka chhang mai che alawm. I inhuam chin chin kan nei dawn nia. Pathianin rem a tih chuan..." a lo ti leh zung zung a.



"I va han duh hnem ve" ka tih hluai chuan a lo nui mai a. Mahse a hnu deuhah chuan "Pathian zarah kan khawsak a harsa lutuk lo bawk a, fa chu a tam thei ang ber neih ka duh. Mizoram dinhmun hi ngaihtuah la, inthlah pun kan mamawh alawm. Inthlah pung satliah ni lovin mi chhawr tlak kan hrin teuh a ngai" thutak zet hian a ti ta mawlh mawlh a.




Chutia ka pasal meuhin thutak zeta a tih takah chuan ka lo thlawp veleh tawh khawp mai.



"Fa panga ai tam ka hrin sak theih nan che min duat viau a ngai ang" ka tih takah chuan lungawi zet hian min melh ta vung vung a.




"I hria maw? Pathianin rem a tih chuan a tlem berah fa panga tal hrinsak che ka duh dawn si a, mahse min duat viau a ngai dawn anih chu" ka ti tha leh sauh sauh a.




"Ka duat viau ang che" a lo ti nghet churh a. Ka pasal hi ka ringhlel hauh lo.




A sawi tawh chu a ti ngei ngei thin.



Ka nu kar khat chauh châm tura lo kal chu kan chelh khawtlai a, kar hnih tal châm turin ka han tahawh leh tak meuh meuh a. Ka ngaiin ka thlahlel ve si a, ani pawhin a lo hrethiam khawp mai. Kar hnih cham tur chuan thu a titlu ve ta tawp a. Ka lawmzia chu !




U Faktei pawh a han hrilh nghal a, a ni lah chuan "I zin khat emai i peih chen chen châm rawh, min rawn ngaihtuah suh" a lo ti sam et mai sia.



Doctor in check up tura min tih nî pawh a lo thleng ve ta a. U Zovin in a lo nghak a,midang zawng chu damdawiin lamah kan kal ta vek a. Ka nu leh Vanmala chu an phur harh mai a, keipawh ka phur ve khawp mai.




Doctor chuan min han check ta zung zung a, kan naute chuan thla khat a lo pum vel chiah a. Vanmala chu a nui a nui mai a. Ka nu pawh a hlim khawp mai. Thla khat chiah a la nih avangin ultrasound chu kan la ti êm lova,thla 3 vel a tlin hunah kan ti chauh dawn a ni awm e.




Zanah chuan Vanmala inbual laiin darthlalang hmaah ka dul bawk chu ka lo en leh a, a la thêp zaih sia, naute a awm ve mai chu a ni bawk sia. Mak ka ti si ka lawm bawk si chu ka nui ka nui mai.



Vanmala inbual zo rawn chhuak pawh chuan min rawn kuah leh nghal run a. "Doctor khan thla 1 a tling vel chiah a ti tiraw" a tih chuan ka lo bu nghat a.




Chutah inlahrang vutin khum bul dawhkan tea kan calendar hûn chu a va keu thuak thuak a, a melh run run a. Thil chhut ni awm tak hian a phun sup sup a.



"Ka rindan vel chiah" a rawn tih chuan a ngaihna hrelo fe hian ka lo melh a "Eng maw?" ka tih chuan a nui suk suk a.



Min rawn pan hnaiin ka kawngah chuan min rawn kuah a, a lama min hnuk hnai salh pah chuan ka bengbul chetah a rawn kun hniam a "Kan vawikhat tihna ah i ruak lo nghal ania" a lo ti sup a, ka sa nghal pap mai.



"Vanmal..." zak lutuka ka tih chuan nupa nun kan hman hmasak ber nî rawn sawi chhuakin vawiin nî nen lam a rawn sawi chhuak a "A thla khatna chiah" a rawn ti ta deuh deuh a.




Ka pasal mah nise ka van zak tak.



"I lai thei sia..." min chhaih ni pah fawm hian a rawn ti sup a, ka zak lutuk chu lei ka chhuah leh ta vak ringawt a, a lo nui hawk hawk mai



_____________*____________*____________

Ads click hi ti hram hram ang u aw, ads kan click atang hian writer ten hlawh an lo neih ve phah thin a, story min ziahsak man lawmthu sawinan ads kan click theuh dawn nia



Show post links
Top

[Ngaia]

DEPUTY COMMISSIONER
By CVL Awmpuii



Chapter 34



Pathian zara dam chuan hunte hi a lo kal chak khawp a. Ka nû pawh naktip maiah Aizawl lam panin a haw leh tawh dawn a.




Vanmala office kal hlanin Nu Zovi te nen kan pathumin kan lo inkawm chawt hlawm thin a, a haw hunah chuan ka lung a leng viau in ka ring.



Vanmala chuan zantin ka dul la thêp zaih chu a chûl hauh hauh thin a, a be leh mawlh mawlh thin a. Kan nupa chuan kan hlim hle ti tawp mai ang.




A hna chungchang erawh chu kan sawi leh ta miah lova. Hotute lam pawhin engmah an rawn sawi bawk lova, mahse Vanmala chuan "Kan duhthlanna a ni tawh mai" tih zawng min hrilh thin a. A inpeih thlap hunah kan la sawi dun turah ka ngai.




Naktip maiah ka nu chu a haw dawn avangin chhungkuaa hun hmanna hun kan nei khat tawh dawn si a. Vanmala chuan vawiin tlaia chhungkaw chawei chhuah a rawt a, hotel ah kan ei dawn ani awm e.




Tlaiah hna ban veleh min lo lam nghal a. Car-a min luhtir hnu, seat belt min hrentir lai chuan ka nu te hriat loh turin ka hmaibul chetah hian "Chhelo nu" a ti sup a, a nui suk suk bawk si, lai zet hian ka lo ner nang ringawt a. Ka hmuiah a rawn fawp nghal zauh a, ka lo meng awk mai. Rang zet hian ka nu te awmna lam ka hawi a, mahse min lo ngaihsak lo hlauh.




"A hunlo lutuk" ka ti hlak a, "Itawm nu" min han ti leh hram a. A âwm ah ka chum dat a, thaw hawk chungin a inlahrang ta hram.



Ka nu leh Nu Zovi lo luh hnu chuan kan tlan chhuak ta nghal a. Khua chu lum hle mah se ka kawr hakin a zir bawk a, a hrehawm lutuk hran lo. Kan bazar tum a Vanmala min lei, kawrfual sen duk deh nuam deuh mai hi ka ha a. Ka nu leh Nu Zovi te pawh ka thiam ang tawkin ka chei ve ngei a, anmahni tawkah an nalh ka ti ve khawp mai.



Vanmala chuan ka nu te awm lai pawhin min ngaihsak em em a. Nu te hmuha mawi lo ni silo, zahawm em em siin min ngaihsakna a tilang a. Nihlawh ka inti thar leh ngawih ngawih mai.



Zanriah kan ei zawh chuan ka nu leh Nu Zovi te chuan zun ram thiar turin washroom lam an pan a.




Ka nuin "Pawnah min lo nghak mai ru" a tih avangin Vanmala nen chuan kan inzui chhuak a.




Ka pasal chuan intineitu zet hian ka kutah min chelh rûn a, lungawi hmel zet hian min nuih leh suk suk thin a.



Kan bul vel ami te chuan min melh hrek hrekin an inhrilh ru leh sep sep zel a, an thu chip tur ka hrechiang a. Ka ngaihtuah zui vak duhlo. Ka pasal, ka kut chelha min kalpui dat dat tu chiah chu ka ngaihtuah duh.



Hotel pawna kan lo din lai chuan ka beisei loh lutukin Sir Hmaa ka hmu hlawl mai a. A ni pawhin min rawn hmu ve nghal chat a.



Chutia min rawn hmuh takah chuan ngainat awm zeta min nuihin kan lo din na lam chu a rawn pan vut a. Vanmala chu ka melh zawk a, Sir Hmaa chu a lo melh ve run mai.




Kan bul a rawn thlen rual chuan Sir Hmaa chuan "In vâng hle mai" a lo ti sup a, ngainat awm zetin min la nuih reng a.




Vanmala mitmeng tak deuh ngul avang chuan ka tim deuh a, mahse miin tha te tein min bia a, lo biak chhiat ngawt thu a awm silo. "Nangpawh" ka lo ti ve vat a, ka nuih let ve var var bawk.




Chutah Sir Hmaa chuan "Hna lah kha thla 1 em pawh i lo kal hmain i chawlhsan a tul ta sia. Kan ui tak tak che a ni, substitute teacher kan rawih tawhah chuan kan la ui ber ang che" pangngai tak hian a ti a.




"Aaa...eng kan nih loh kha, zialo ka ti tak tak ani. Mumal lo deuh khan ka chawlhsan a tul ta sia. Hlawh min pe ve vek tho sia, a inthlahrunawm zawk emai" ka lo ti ve vat a.



Vanmala chu a ngawi ngul bawk sia, ka awm a nuam zan tawhlo. Sir Hmaa a thik zia ka hre ve kar si a.



Sir Hmaa lah chuan "Vanmal, nang i tha maw?" a lo ti lehzel a. Ka beisei loh deuhin Vanmala chuan "Tha a nimai e, i tha zawk maw?" pangngai tak hian a ti let ve a. A hmel ka en chuan a landan a pangngai hle a, ka tang tung pawh kha ka inthlahdul thei ta deuh e.




Sir Hmaa chuan "Keipawh ka tha a nimai" a lo ti vat a.




Chutah Vanmala chuan ka dara min rawn kuah thuk pah hian "Kan hmanhmawh deuh a, kan kal mai ang" a ti dam thluam a. Sir Hmaa pawh chuan "Tehreng mai, keipawh ka kal nghal ange" a ti vat a.



Ngainat awm zet hian min nuih leh a, "Anih u aw" tiin min kalsan ta zawk a. A kal liam hnu chuan inthlahrung deuhin Vanmala chu ka han melh chho ha a, min lo melh chhuk ve run bawk a.



"I thin a rim em?" ka han ti ngawt pek a, min melh ngur a "Eng vang ngawt chuan maw?" a lo ti hluk.



"Aaa...ka hre chuanglo...ih...Sir Hmaa kha..." ka ti nawi niai a, a thin ka tih rim ka hlau letling zawk. Tawng sual ka hlau vek tawh a ni ber.




Vanmala chu a lo rum nghut a, "In inkarah awm a awm em ni?" a lo ti nghut a, kei lah chuan rang zet hian "A teuhlo" ka lo ti nghal chiam.




Chutah Vanmala chuan "A nih a hnu thinrim chhan tur ka nei hlei nem. Tuna i hmel landan kha chu uire man chhuah hlauthawng lutukte pawh i ang alawm" a lo ti fan ruih a.



"I ti awm ang lo e" ner nang chung hian ka lo ti vat a. Mahse Vanmala chuan "Ania lawm, i landan atang kha chuan i ang em alawm. Mipa dang bula i awm avangin ka tawng pawng thinrim ngawt turah ngai tawh suh. I engmah ni lo mipa lakah ngat phei chuan rilru ka nei pha lo" a lo ti awlsam then mai a.



Tunah tak hian a hmaa Vanmala rilru tur kha ka man pha ta chiah mai. Ka mithmuh lai ngeia Bawihbawihi te nufa a ngaihsak thinte kha ngaihsakna leh khawngaihna satliah mai anih zia tuna a awmdan hian a nemnghet ka ti mai.



An laka rilru danglam a put loh lutuk avang khan thîk pha miah lo turah min lo ngai a ni mahna.



Ka laka engmah nilo mipa laka rilru a neilo ang chiah hian a laka engmah ni lo hmeichhia lakah chuan rilru ka nei bik tur a nilo.



Vanmala min hmangaihna hi hmangaihna satliah a nih loh zia ka hrefiah telh telh dawn niin a lang. Thikthuchhiatna chu awm mah se hmasial taka thikthuchhiatna, mihring nun tichep khawp ang kha engmah a awm ve lo. Min ti zalen a, zalen takin ka hmangaih let theih phah bawk a. A awmdan engkim hian min hîp telh telh mai.




Ka nu leh Nu Zovi te lo let hnu chuan in lam panin kan tlan ta nghal a.




Hun hlimawm tak kan hmang ho thei a, Lawmawm ka ti takzet. Kan haw chhung chuan ka nu leh Nu Zovi te chuan kan hun hman dante kha an thlir letin an sawi zui nasa mai a. Keipawhin ka lo zawm ve zeuh zeuh a. Nuam an ti lutuk chu kan chhuah pui lovang tih ka hlau leh hnuhnawh hial zawk.




In kan thlen chuan kan chau ve hlawm baw nen tawi khawmuang lovin mahni room lam kan pan ta nghal vek a.



Vanmala'n inbual rual a rawt a, ka hnial deuh nain a tang tung si a, ka hnial seng ta lova. Kan inbual dun ta poh a.



Ka dul ruak kang chu a chûl a chûl a, "Nakinah chuan a la puar lian dawn sia" tiin a nui suk suk a. "Ka chhe per pur ngawt ang" ka lo ti uang a.



"I îtawm tho ang" a lo ti lehpek a. Lai duh tawh bik lo hian ka ner nawng a "Ti ve ziah suh" ka lo ti hlak.



Vanmala chuan "Ania lawm, ka nupui niin ka khawih theihin awm mah la ka ît ngar ngar che" a lo ti veleh a. A thusawiin a zir bawk a, a mitmeng chu tawrhhlehawm tak ani.




Kei lah chuan thutakah lo la duh lovin "Thla 1 chhung khum khatah kan mu a, chuti chung chuan min khawih pawh i tum ngai loh kha. Mipa i ni lo emaw ka ti hman hial zawk a. Hmeichhia angin min en miah lo emaw ka ti thul" ka ti duah a.



Chutah Vanmala chu a lo nui ta huk huk a "Anih leh mipa chu ka ni em?" a ti hniam ruih a, ka awm bawr a rawn tham salh bawk a. Ka lo rak nghal that.




Ka kawchhung a sa nghal pup pup mai. Ka nghawng chu a hmuiin a rawn nul thuak a, panty nen chauh ka awm a, ani chu boxer nen a awm thung a. Saruak thaw thanga ka awm chhan pawh amah bawk hi ania. Min phelh sak vek !



Ka nghawnga rawn nul leh dun dun pah chuan "Mawh...mipa chu ka ni em?" a rawn ti lum leh ham ham a.



Ka tawngchhuah chuan ka aw khur a hriat ka hlau sia a hriat tawk tur lek hian "Umm..." ka ti lawi rat a. Ni e, ka pasal hi mipa a ni miau alawm. Min tidanglam hneh lutuk tlat.



Vanmala chu a rawn nui rum hawk a "Îtawm nu" a ti leh hluk pek a. Ka pasal berin îtawm min tih miau chuan ka lo inpawm ta hmiah mai. Midang îtawm ti daih se ka lawm dawn lo nasa lutuk.



Kan inbual zawh chuan kan mu ta nghal a. A âwm ah min pawm bet leh hlu hlu a, tlaia kan chhuah avang khan ka chau viau dawn emaw ka ti a. Mahse ka harh kar lawi a.



"I mut a la chhuak nange?" ka pasalin ka sama fawp tawk paha a rawn tih chuan "Aw, ka harh telh telh mai" ka lo ti ve vat a.




Kan ngawih dun leh vang vang hnu chuan Vanmala bawk chuan "Mamte...naktipah hian ka nu hi zui chhoh ve i peih ang em?" a ti sup a.



Rang zetin a hmel en thei tur chuan ka inbengkang nghal a. Mitmeng dam ruih hian min lo melh a, ka sam tla hniang chu ka bengah min lo zehsak nghal vat bawk a.




A tel lova haw tir leh min tum a ka hriat avang chuan "I tel lovin khawiah mah ka awm duh tawhlo ka tih tawh kha" lungawi lo zet hian ka ti nghal hlur a.



Mahse Vanmala chuan "Aih, chutiang zawngin ka sawi hlei nem. Kan pahnihin zui chho ila ka tihna zawk anih chu. Mahse i thu thu nise, i peih loh pawhin a ngai chuang lova" a lo ti dam thluam a. Ka lo thaw nghal huai mai.




Keimah chauha Aizawl min lettir leh ka hlau hman em ani.



A âwmah chuan ka bei leh nghal thak a, Vanmala pawh chuan min lo kuah leh nghal hlun a.



"Enga ti teh thut nge?" ka tih chuan "Tun hnai maia ka ngaihtuah pawh a ni hran lo. I peih chuan ka nu haw tur hi zui ve ila ka duh a. Kan inneih hnuin pangngai takin kan la haw miah lova" a lo ti zung zung a.




Ka ngaihtuah chuan keipawhin zui haw chu pawi ka ti em em lo. Mahse U Faktei nen kan boruak ka ngaihtuah chuan ka hnual nghal rawih thei.




Vanmala chuan ka rilru hria ni awm tak hian "Faktei nen in inkar hi siam that ka duh" a lo ti hulh a.



Ka tawng chhuah tak mai loh avang chuan amah vek chuan "I hreh viau anih chuan kan haw lo thei tho ka tih kha aw. I rilru tibuai suh" a lo ti leh zung zung a.



Ka lo thaw chhuak hak a. Ka pasal chuan ka ngaihdan hre duhin min râwn ve a ni a. Chutihrual chuan a thil duh a sawi ani pakhat ve bawk a. A duh dan chu ka zah sak ve turah ka ngai.




"Zui haw ve pawh a pawi hlei nem, mahse i hna hi?" ka tih chuan "Hnâ te chu dam chhung thawh tur a awm reng dawn alawm. Chhungkua erawh chu dam chhung piahlam thil ania. Vanrama kan chhawm theih turte an nia. Chhungkua ah ber khî a awm tawh chuan thil a felhlel tawh thin, khî a awm rual hian siam that vat tur. Chuti anih loh chuan khi chat lian zawk a insiam ang a. Mimal nun leh hna thlengin a la nghawng thei zawk a" a ti dap dap a.




Inlahrang hlekin Vanmala chu ka en ta reng ringawt a. Ram hmangaihtu a ni a, chhungkaw hmangaihtu a ni bawk a. A mimal nun, a hna leh chhungkua a thliar hran dan chu a inhnerem vek a.




Ka ngaihtuah tak a chu, mimal nun, chhungkua leh hna hi a lo inkungkaih vek mai. Chu chu ka pasal Vanmalsawmhlua nunah hian ka hmu tlat.



Mihring pakhat nih hi a tling ta ngawih ngawih bikin ka hria. A nupui ka ni thei hi vannei ka inti takzet.



"Vanmal..." sawi tur pawh hre chuang si lovin ka ti ta thlawt a. "U Vanmal ti rawh" uang thuang zet hian a lo ti thung a. Kan han nui leh rih a.



"U Vanmal..." ka tih leh takah chuan "Eng nge ni nu-i?" a lo ti vat a, min nuih suk suk bawk a.



"Ka hmangaih che emai" ka ti ta thlawt a, a hmel a rawn tak nghal run a. Mitmeng tawrhhlehawm lutuk hian min rawn melh e. Ka sam karah a kut rawn rawlh lutin a lamah min hnuk hnai a, ka hmui a rawn khar chilh rual chuan duhthawh lutuk hian ka lo fawp let ve nghal tan tan a.



A taksa chungah lawnkaiin duhthawh lutuk hian ka fawp ve tan tan a. Ka chetdan duhthawh lutuk chuan a tihrilhai a ni mai thei, min fawhna chu a tawp chawt a. Kei lah chuan tawp ve ta mai lo chuan a hma aia duhthawh zawkin ka fawp uar sauh a. Min lo chhang let veleh nghal vat a. Duhthawh dun tak kan ni! Mahse tisa châkna lam a ni miahlo.



Thaw chham dawn lek lek a kan infawh hnu chuan kan duh tawk ta hram a.


Ka bianga rawn khuap run chung hian mitmeng phelh nuaihin min rawn melh a, a hmelah chuan phurna, mak tihna te a inchawh pawlh nuk mai.



Ka chala tauh bawp chung chuan "Min va thawng ve" a ti khur hluk a. Ka lo nui hak a, "Khatiang chiah khan khumlaizawlah kawlhrawng tawh ang che" a ti nghet churh a. Ka kawchhung a lum nghal pup mai.




Kan muthilh hma chuan Aizawl haw chungchang chu kan sawifel ta a. Ka pasal duh ang ngeiin kan haw dawn, chu chu keima duh dan pawh ani.



Vanmala'n "Chhungkua siam tha turin kan haw ang. Faktei nen in inkar kan siam tha ang a, chutiang bawkin i nu pawh. In inkar that vek hma chu hetah kan let lovang. Hna chuan min lo nghak thei, chhungkua erawh chu kan siam that vat loh chuan a chhe telh telh ang" a tih kha ka tawmpui thlap.



Ka pasal engkim rel fel thin hian a rel fel leh vek dawn tih ka hria. Hmeichhe lu chu mipa a ni a, mipa lu chu Krista. Ka pasal lu chu Krista anih miau avangin Pathianin engkim min rel fel sak ang.





Zingah tukthuan ei laiin Vanmala chuan kan thil tumte chu ka nu a hrilh ve luam a. A ni pawhin min lo pawm pui ve khawp mai.




"Mamtei lo haw laia kan boruak kha chu kan hre theuh ang a. Chuvangin in nupaa lo haw ve pawh chu a tha khawp ang. Nakinah chuan Mamtei dul a la lian ang a, a zinkual mai mai thei tawh âwm si lova. Nang lah office lamah i buai chho awm si a, tun hi hun tha tak ani" a lo ti ve zung zung a.




Tichuan naktuk lama ka nu zui haw ve tur chuan thutlukna kan siam fel ta a. Kan phur tlang khawp mai.




Chutihrual chuan Nu Zovi chuan a lunglen tur thu mawlh a sawi a. Ka nuin a han sawm ve ngial tak na in "Helamah tihfel ngai ang ang ka lo tifel ang a, in ka lo nghak zawk ang" a ti deuh tlat a. Ka nu pawhin a tilui thei ta bik lo.




Vanmala chuan "Nu Zo, kan awm loh chhung chuan i lo chawl tawp dawn nia. In in lamah i lo awm rih ang a. Helai chu ngaihtuah vak a ngailo" a lo ti vat a.





Ka lo tuihnih ve vat a "Nia, kan awm loh chhungin i lo chawl hahdam rih dawn tihna a nimai, kan pawt phar buai hneh si che a" nui var var chung hian ka lo ti ve a.




Nu Zovi lah chuan "Engmah hna hahthlak ka thawh ngai loh hi a, min chhawr nasa lo emai" a lo ti ve vat a.




Inpawh tlang takin kan titi hlawm thei a, a tihzia thin khawp mai.



Tukthuan ei kham chuan ka pasal hna kal tur insiam lai chu ka pui a. A kamisz ka kilh pum sak lai chuan ka kawng rawn chelhin min melh run chung hian "Vawiin chu min lo zui ve ta che" a ti sup a.



"A chi nang" ngaihtuah chiang mang hlei lo hian ka lo ti awlsam et a. Vanmala chu a lo rum nghal nghut "Eng nge a chî lohna?" a ti thum bul a.



A hmel ka en chuan min lo la melh run a, "Aww... hnathawhna lehzela lo inzui te chu a, a mawilo emai" ka ti nghat nghat a.



Mahse Vanmala chuan "Min zui chu eng nge a mawi lohna?" a la ti hram a. Hahthlak ti zet hian ka melh kal a "Miin ti lutuk min ti ang asin, chuloah hnathawh tur i ngah awm si, ka lo awm ve khan ka tibuai mai mai ang che. I thawk vat vat ang a, i lo haw vat dawn nia" ka ti zung zung a.




Lungawi hmel vak lo hian a hmui a chîp nghal hmuk a. A kamisz ka kilh zawm leh tur chu ka kut a lo beng per nulh a, "Keimahin ka insiam thei" a ti hmuk anih chu !




Ngei zet hian ka melh a, a ni pui roh lah chuan min ngai pawimawh lo zet hian darthlalang lam a pan ta daih a, a kamisz chu a kilh tha zui mawlh mawlh a.




"Office a inzui kha a mawi lohna pakhat mah a awm lo. Miin min sawisel sep sep dawn tihna pawh ni hlei lo. Ka office pawh min la hmuh pui lova..." tiin a phun hluk hluk a. Min bia pawh a ang lo, amahin a phun mawlh mawlh ni maiin ka hria.



Hetianga a awm lai hi vawikhat mah ka la hmu lova, min ti hawi hai khawp mai.




A kamisz a kilh zawh chuan a sam a tuai tha leh zung zung a. Wardrobe bula ding reng chung chuan ka lo en mawl tawp ringawt.



"I duh leh min chhuk thlak san rawh, keimahin ka insiam vek thei" mitmeng tur zeta min melh khui chung hian a ti hluk a. Hepa pui roh hi a titau zawk emawni?




A hmel tak run chuan ka nuih a tiza tlat pek a.




"U Vanmal" nuihza insum zeta ka tih chuan min ngai pawimawh duh der lo.



Chutia ka pasal ber a tih tauh phah tak si ah chuan a duhdana zui ve mai pawh chu ka pawiti ta lova. A sawi dik bawk lah tak a, a office vawikhat mah ka la hmuhpui ve lova, va zui ve pawh chu thil sual niin ka hre bik lo.




Wardrobe chu hawng pah chuan "Anih chuan ka lo zui ang che" ka ti pangngai ve mai a. Ani pui roh lah chuan "A ngailo, keimahin ka kal thei" a lo ti hmuk. A lungawi lo laklawh tawh ni berin ka hria.




Ka thawmhnaw hak tur chu ka lachhuak ta tho a "Ka lo zui duh che alawm" ka ti ve tlat a. Engmah sawi tawh lovin ka insiam zui ve mai bawk a.



Min ngai pawimawh miah lo angin lang mah se a pheikhawk hrui suih mawlh mawlh pah chuan min rawn melh zawk zawk thin tih ka hre ve reng a. A awmdan chuan ka nuih a tiza ang reng khawp mai.




A insiam zawh hnu chuan bathroom ah a va lut leh a. A lo chhuah leh hmaa insiam zawh tum chuan ka lo hmanhmawh ve sauh a.



A rawn chhuah leh chuan ka sam ka lo tawn dawn mek a, min rawn melh zawk a. Drawer a a file pawimawh dahte chu a la chhuak nghal zung zung a.



Ka insiam zawh chuan file a lo la hai mek a, a hmaah dingin "Ka mawi em?" ka va ti kher a, min ngai pawimawh duh der lo. A awmdan chu a va inhmeh lo tak e aw.




Nuihza insum deuh hian "U Vanmal..." ka ti leh a, min la melh duh chuang eih lo.



Chutia a hmaa ka din tak reng si ah chuan min melh lem hlei lo hian "Lo kal ve a ngailo" a ti bul hmuk a. Thinrim ah pawh ka la theilo, ka nuih a la za tlat.



"Hey ...i palian ropui si titau bur bur suh, i nuihzatthlak lutuk" ka ti ta a, ka nui hak hak tawh mai.




Chutah Vanmala chuan tur zet hian min rawn melh a "Tunge tau a?" a ti hluk, amah hi a ni reng sia.



"I nu hah anih dawn kha" ka tih chuan min rawn melh run run a. Rilru buai reng2 leh taksa pawh hahdam hman mang lo in a awm a, nau kan lo keng zui veleh bawk nen nu hah in a zui ve dawn pawh a ni mahna.



Min buaipui reng rengin a khawsa a. A buai viau lai pawhin ka tan hun a insiam hram hram thin a. Duat let ve hi a phu viau chuan ka hria. "Khawi, i tlai dawn. I file ho kha dahtha vat rawh. Office ah chuan ka lo zui dawn che" pangngai tak hian ka ti leh nghal zung zung a.




A file pawh chu ka lakkhawm pui zung zung a. Engmah a sawi tawh biklo.




Inhnuai kan chhuk thlak chuan ka lo insiam ve ap si a, ka nu leh Nu Zovi te chuan min lo melh ang he haw a. Min zawh hma hauhin "Nu, Nu Zo, vawiin chu U Vanmala office ka va hmuhpui ve ang e ka tia, in lo buai phah lutuk lovang chu maw. Kan sawi lawk si lova ka tum deuh thut a" ka ti zung zung a.




Ka nu chuan a lo phal khawp mai.




"A ni teh tak e a, va kal ru va kal ru, rawn hmanhmawh duh su aw. In lam chu Zovi nen pawh kan lo nghak thei alawm" a lo ti zung zung a.




Vanmala chuan ka chezia chu min lo melh run run ringawt a, a hmui a chip hmuk thung a.




Pawnah chuan kan inzui chhuak a, ngawi rengin garrage a car chu a lachhuak a. A sir deuhah chuan ka lo nghak ve ran a. Biak tawng a har si a, biak rih loh tawp a tha ber rihin ka ring.




Ka lo dinna zawnah chuan a rawn ding ve mai bawk a. Car kawngkhar ka hawng mai tur chu rawn chhuak vutin min rawn hawnsak a, ka lo nui var var mai. Vanmala erawh a hma angin a la tak run tho.




Car-a ka luh fel hnu chuan seat belt min hrentir mawlh mawlh a, a thutna lama a rawn thut luh leh hnu chuan kan tlan chhuak nghal mai dawn emaw ka ti a. Mahse min rawn melh leh ta run run a.




"I lo kal ve dawn tak tak em ni?" a tih chuan ner nang chung hian "I phal leh si nange?" ka lo ti nur nang a.




A nui suk a, "Nuam i ti viau ang" phur zet hian a ti ve ta nge nge a. A tawngkam bul hmuk hmuk kha a reh tawh a, ka lo thaw huai mai.




Chuan, Vanmala hi a nuhah deuh anih ka ring tak tak. Hetiang hian a la awm ngai si lo, nichina a awmdan kha chu mipa rilru tê, tih tauh hrat deuh hi a ang ber. Tunah chuan a phur leh tawh surh surh lutuk tlat.




Office kan thlen chuan hnathawk ho chuan min lo chibai sap sap hlawm a. Thenkhat chu kan inneih ni a lo kal te kha an nih avangin ka hre ve nuk hlawm a. Thenkhat erawh chu ka vawikhat hmuhna te an ni thung.




Ka lo kal ve ta chu ka inchhir lo khawp mai. Tupawh mai chuan min lo be nghal luam a, an ngainat awm hlawm si. Pasalte zui kual peih deuh anga lang tura ka inngaihna pawh an awmdan chuan min thiah sak vek. Ka chungah an tha vek em em miau si a.




Vanmala office chhungah chuan kan inzui lut ta a. A lo zau ang reng phian a. Sofa dup nawm hmel zet ah chuan min thuttir thlap a. Ka hawi kual nasa ngang mai.




Banga thil intar te leh bungrua eng eng emawni awm te chu hmuhnawm tham a ni. A bengvar thlak nghal hle bawkin ka hria.



Vanmala chuan a hnathawh dawhkan lam a pan vut a "Khati khan ka hnathawk lai min lo en la, i duh leh i lo muhil daih dawn nia" pangngai tak hian a ti a.




"Ka lo pui ve dawn che em ni?" ka tih chuan atthlak tih hmel zet hian min nuih a. "Signature pek ngai file a tam khawp mai" a tih chuan lei ka chhuah vak ringawt. Puih theihna tur ka neilo, ka signature kha a tangkai ve na tur a awm miau si lova.




A hnathawh lai chuan ka phone ka lo en a, a chang leh office chhungah chuan tei kualin banga thil intar te chu ka chhiar a. A chang leh ka lo mu thûl. Tihtur a awm lo ang reng sia, chutihrual chuan hrehawm ka ti chuang miahlo.




Vanmala chuan a hnaah rilru a pe hle a ni ang, ka awm ve pawh chu hre awm pawhin a lang lova. A chang leh phone a hmang mawlh mawlh a, a chang leh file tam tham zet hi a sign mawlh mawlh a. Min theihngilh emaw tih dawnin min rawn be leh nawlh nawlh lawi a.




Chhunah chuan ei tur tuihnai tak tak min chahsak a. A chawlh chhungin kan ei dun a, ka puar khawp mai.




Chhun thilte kan ei zawh chuan a hnathawhna bula lo awm ve reng ai chuan pawn lama hnathawk dangho bula lo awm ka dil a. Min melh run run hnu ah a lo remti ve mai bawk a. Mahse a rei berah darkar khat chauh hun min pe thung.




Hnathawk dangho bulah chuan ka va tap ve ta chawt a. Min lo be tha hlawmin ka chungah an tha si a, ka lawm tak tak ani.



Mahse case chungchang kha an rawn sawi chhuak ta zeuh a, ka lo tang nghal teuh mai. A hunlo ka ti takzet bawk.




Chutihrual chuan ka pasal dem zawngin thu engmah an sawi lova, a lam an lo tan ve zia mawlh thu te chu an sawi hlawm a. A lawmawm lamah ka ngai hmiah mai.



Tlai dar 5 velah office chu an bang ta hram a. In lama hnathawh tur a hawn leh teuh tho. Heti khawpa a buai chung hian hah hmel leh chau hmel min hmuh ngai lova, ka tan a tha in min duat em em a. Pasal tha lutuk min pek avang hian Pathian hnena lawmthu sawi mawlh mawlh tur niin ka inhria.




In kan thlen chuan ka nuin chanchin min lo zawt vat a, kan hun hman dante chu phur zet hian ka hrilh ve a. A tira kal huphurh deuh si kha lungawi deuhin ka haw ta ania. Vanmala pawh a nui suk suk mai.




Zanriah eikham thutkhawmna a kan kim thap lai chuan Vanmala chuan "Naktukah chuan tlai dar 2 velah helipad lam kan pan ang a, dar 3 vela helicopter a chhuak hman turin kan inruahman dawn nia" a ti chuar chuar a. A sawi dan kalhmangah a lo be fel leh vek tawh anih hmel. Ka nu nen pawh chuan kan lo pawm khawp mai.




Naktuk maia Aizawl pan tur kan nih avangin zan hun chu kan hmang âm hlawm ve hle a. Nu Zovi mawlh mai chuan a lunglen tur thu hahipin a sawi a. Kal hlen tur emaw kan inti rum rum mai dawnin ka hria, a huphurh dan em em hi.




Dar 12 dawnah mahni room lam theuh kan pan ta a, ka mut a chhuak ve viau tawh ani.




Mahse ka muthilh tak tak hmain U Vensangi ka call a. Zanah hian a mu hma ngailo tih ka hrechiang ve a, a rawn la nghal vat reng bawk a. Kan haw tur thu chu ka hrilh a, a rawn phur ngang mai. "Ka rai lai experience ka hrilh ang che" inti tawnhriat ngah deuh hian a han ti vel a, kan nui dun hak hak mai.



Vanmala chuan khuma mu chungin ka phone bia chu min lo ngaichâng ve run a. U Vensangi nen pawh chuan rei inbe lovin kan dah ta vat a. Zan a lo rei ve tawh bawk nen inbiak rei viau na hun a ni tawh tlat lo ani.




Khuma ka lawnkai ve rual chuan Vanmala'n min rawn kuah leh nghal hlun a. Khua hi lum viau mah se ka pasal pang deka mut hi chu nuam ka ti reng tho.




"Ka chhungte ka hrilh ve duh ang em?" ka tih chuan "Ka hrilh vek tawh alawm" a lo ti sam et a.



Inbengkang meuhin ka han melh chho a, mitmeng dam zet hian min lo melh thung a.




"Engtik lai khan nge i lo hrilh a?" ka tih chuan "Office a ka awm lai khan, pawna i awm hlanin" a lo ti tha ve mai a.



"Tu ber nge i hrilh?" ka ti leh kher a, ka nu a lo han be hmasa vel ang tih chu ka hlau nghal hlur mai. Ka nu hian rawn be hmasa se, ngaihdam rawn dil ve sela ka duh ber.



Vanmala chuan "I nu leh i pa" a lo ti veleh mai a. Ka thinrim nghal teuh mai. "Ka nu i be tel a maw!" ka ti he haw a. A lo bu nghut ringawt.




Ngei zet hian ka melh a "I chunga a chet dan te, ka chunga a chet dan te kha...keichu ka la ngai thiam theilo. Lo han biak hmasak pawh a ngai hlei nem. Ngaihdam pawh a dil duh lo che a, chutiang bawkin ka nu pawh" ka ti hlak hlak a.




Mahse Vanmala chuan "A rilru tur ka hria alawm" a lo ti khauh a.



Ka lu thing nawkin "Ka nu ania, nang ai ka hrechiang zawk. A mizia chapo lutuk hi reh ve deuh rawh se" thinrim zet hian ka ti a.



Ka rilru tak tak sawi ka ni, a chapo leh lutuk hi hnuh hniam ka chak ber.



Chutah Vanmala chuan "Mamte...ka sawi tawh kha, kan haw chhan tur chu Faktei leh i nu nen in inkar siam tha turin a ni. Tichuan i nu ka biak kha kan bultanna anih ber chu. Khatiang rilru kha pu tlat lo la, rilru hi tih sak lutuk tur a ni ngailo. Engmah sawtna awm miah lova mahni nu te huat tlat tur a ni ngailo. Ngaihtuah la, a hma khan i nu in min ring sual a, ka huat chuang miah loh hi. Nangman i lo haw daih zawk a. Tunah i nu vangin Faktei i lakah a lungawilo a. I laka ka farnu lungawi lohna vangin ka farnu ka huat ve kher loh hi. Chuti zawng chuan ngaihtuah rawh, chhungte laka lungawi loh viau hian rah tha engmah a chhuah lo. Tha taka awm ho a, inhmangaih tlan mai tur" a ti dap dap a.





A thusawi chu a dik leh thlup tawh, hnial ngaihna reng reng ka hre tawhlo.




Mahse "Engkim hi ka nu bul tan vek tho alawm " ka la ti hram pek a. Vanmala chu a lo thaw chhuak huk a.



"Ni lo e, i nu bultan a ni hlei nem, misual chu kan hriat kha. Misual pakhat vanga i nu nen in inkar a chhiat reng hi ka remti lo bur. Engkim ka siam tha vek ang" a ti nghet charh a.




Tun atan chuan ka nu hi la haw rih viau mah ila ka pasal hian a sawi tawh chu a ti ngei ngei thin si a. Tuna a sawi pawh kha a ti leh ngei dawn tih ka hria.




Zingah chuan kan tho hma lo ang reng khawp mai, zan lamah kan mengrei tlang bawk a.




Dar 7:30 velah Vanmala nen chuan room kan chhuahsan ve chauh a. Nu Zovi chuan eirawng a lo bawl leh mawlh mawlh tawh.




"I nû chu a murei ve ang reng khawp mai, a meng rei ve viau aniang" a lo ti zung zung a. Nu Zovi eirawngbawl chu ka pui ve nghal a.



Vanmala erawh chu library lamah a lut zui a "Office loh lai pawhin thawh tur ka ngah dawn" a ti miau a. Hna a thawk leh nghal dawn anih hmel.




Ka nu pawh a lo tho chhuak har lo. Tukthuan kan ei nghal zung zung a. Chhun lamah kan insiam a. Haw tur kan nih vang nge hun chu a kal zung zung a. Kan insiam zawh rual chuan kan kal a lo hun der tawh.




Driver in min thlah a, helicopter a kan haw dawn avangin motor chu helamah an lo kawl dawn anih hmel. Nu Zovi pawhin helipad thleng min thlah a. Kan invai liam hnu chuan kan chhungkua a inrem lohna leh neuh neuh thilte siam tha tur chuan Aizawl lamah kan thlawk haw ta vang vang a.



_____________*___________*__________

(Chapter 35 chu zanrei lamah aw...)


Show post links
Top

[Ngaia]

DEPUTY COMMISSIONER
By CVL Awmpuii

(Zanin chu tum angin a romantic viau lo aw mahse a hlu tawp )

Chapter 35



Helicopter chu motor ai thlawt chuan a rang a. Kan thleng har lo khawp mai.



Thuampui helipad ah U Faktei'n min lo hmuak a. Kan bungruate chu Vanmala'n a hlang thla zung zung a. U Faktei ka hmuh rual chuan ka mitmeng a pha nghal dui a. A lakah tihsual ka nei miah lo, mahse ka inthlahrung em a, ka awm a nuam lo nghal vek thei.




Kan mit leh mit a intawng nghal siah a, kan hawisawn rang dun kher mai. Ka nu leh Vanmala te nen chuan an inbia a, mi chuang liam ang maia ka inhriat dawn laiin Vanmala chuan ka kut a lo chelh vat a. Ka awmdan chu a hrethiam aniang.



U Faktei car a kan lut tur chu U Faktei chuan "I khalh dawn nge?" tiin Vanmala chu mit a kan ak a. Vanmala chuan "Nangman khalh la" a lo ti sup a, a bu ve mai bawk a.




Seat hmaa ka nu a thut rual chuan ka lo thaw huai mai, Vanmala a thut ka lo hlau lutuk a.



Seat hnungah kan nupa chuan kan thu a, Vanmala chuan mitmeng dam thlupin min melh a, engmah sawi rih lo mah se hahdam tura min duh zia ka hmu thei.



Kawng lakah traffic a lo jam ve bawk nen in kan thlen chuan khua a lo thim ve lek lek tawh a. Kan intifel nghal sawk sawk a.




Kan nupa room kan luh rual chuan Vanmala chuan "I chau em?" a lo ti sup a, ka lu ka lo thing nghal vat.



"Inbual hmasa la, i inbual chhungin bungrua ho hi ka lo dahfel ang" a ti dam thluam a, ka hnial lo khawp mai.




Kan intifai a, bungruate kan han dah fel sawk sawk hnu chuan inhnuai lamah kan inzui thla nghal a. A hma lawk khan ngampa deuhin ka awm ve hman tawh a, mahse tunah chuan ka inthlahrung thar leh ngawih ngawih tawh a. Ka hrehawm kher mai.



Ka nu room atangin ka nu leh U Faktei te chu an rawn inzui chhuak a. U Faktei chuan "Eirawng bawl sa vek tawh ania, chawhmeh chhuan lum chauh a ni tawh mai. Ka'n chuang lum zung zung ang a, chaw kan ei nghal dawn nia" a ti zung zung a.




Choka lam a pan rual chuan ka zui lut ve nghal vat a. Vanmala chu veranda lamah a chhuak zuiin ka hria. Ka nu erawh chu a lo lut zui ve nghal a.




U Faktei chawhmeh chhuang so tur chu ka huaisenna zawng zawng sawm khawmin ka lo dang a "U Fakte, ka lo ti ang" tiin a thirbel ken lai chu ka va chelh ve a.



Min melh ngar a, chutah nelawm vak lo hian "Ka ti thei alawm" a ti bul hmak a, ka chuh zui ngam tawhlo. Ka hnual nghal rawih mai.



Ka nu chuan kan inkara thil inmung vel chu a rawn hre ve si se lo aniang Lawngtlai chanchinte chu U Faktei a hrilh mawlh mawlh a.




Kei erawh tih theih em em nei si lovi U Faktei chet velna bulah chuan ka lo ding ve reng a. Ka dinhmun chu dinhmun hrehawm tak a ni.




Vanmala a rawn luh leh takah chuan ka lo thaw huai mai. Min rawn panin ka darah a rawn kuah thuk a, ka lo dang buai duhlo. Ka awmdan chu a nuam lo em ani. Ka nu te awmlaia taksa insik chit chet hi ka duh viau lo nain tun tum chu a danglam tlat.




Ka nu chuan "In nu kha a chau viau ang, nau pai lai a ni bawk si. Nau pai laia zin vei vah hi chu a nuam fahran lo ania. Kan dul a lian emaw lian lo emaw kan khawr tut thin a" a lo ti zung zung a.




Ka pawm pui khawp mai, ka dul la lian lo mah se nau pai ka ni tih ka inhre ve kur a, indim a ngai bawk si. Ka che khawr vek lah tak a.




Vanmala chuan "Fakte, i in chhuan lum zawh chuan ei dawn hnai ila, Mamtei a ril a tam tawh ang" a nau chawhmeh suan mek lam melh pah chuan a ti sup a. Ka hming a lam tel kher chu ka lo ip chawih mai.



U Faktei chuan engtin mah chhang zui lovin chawei a siam nghal mawlh mawlh a. Fridge a chî leh hmarcha inhungte chu ka la chhuak ve hman hram. A bak chu U Faktein a ti vek a, tih ka tum ve viau nain ka chet khalh hman lo a ni ber e.




Chawei laite chuan U Faktei chu ka melh leh thin a, min melh ve lovin a chaw bar lai a bar mawlh mawlh a. Ka chawei pawh a tui lo, ka nu leh Vanmala te erawh pangngai takin an awm a. An titi suam suam a, U Faktei nen chuan kan ngawi kar thung.




Chawei kham veleh hmunphiah ka chuh nghal tharh a. Vanmala pawhin min dang lo, ka rilru a hrethiam ve aniang.



Mahse U Faktei bawk a lo inrawlh leh a, ka hmunphiah ken lai chu min rawn chhuh hmak a. A ngaihna hrelo fe hian ka melh a, chhuat chu a phiat nghal mawlh mawlh a.




Thleng sil tur chuan apron ka hreng leh a, mahse U Faktei bawk a rawn inrawlh leh hman. Ka apron hren lai chu min chhuh sak lem lo hian thleng silna ah chuan min rawn din khalh hmiah a. Thleng chu a sil nghal mawlh mawlh a.




Tihngaihna hrelo lutuk hian a thleng sil chu ka thlir ta tawp a. A sil zawh hma chu a bulah ka lo ding ve reng a. Ka awm ve chu hre awm pawhin a lang lo, min ngaihsak hlawl lo a ni ber.



A thleng sil zo chu kut hrukna a a kut hru hul thuak thuakin thutkhawmna lam min pan san ta daih a. Tihngaihna hrelo lutukin thleng silna bulah chuan ka lo ding khawng lah ringawt.




Kan thlen ni phat atangin ka beidawng nghal ngawih ngawih. Mahse U Faktei chu ka haw miah lo thung. An laka ka nu chet dan ka ngaihtuah a, ka intichhel lui ve hram hram.



Ka ngaihtuah tak chu hmeichhe pasal nei tawhte dinhmun lo harsat zia hi a ni. A chhungte vangin a va mo na chhungte khan a chungah thinurna an lo lek kawh ve thei reng a lo ni a.



Tin, mo chhungte pawimawh na a lang chiang hle in ka hre bawk. Keipawh ka nu in zir sela chuan tun dinhmun hi ka thleng lovang a, ka pasal farnu hi heti tak hian ka lakah a che miah lovang.




Ka apron chu phelhin a awmna ngaiah chuan ka tar tha leh a, thutkhawmna lam chu ka va pan ve ta a.



Ka chhungte chuan TV an lo en thap a, an titi pah bawk niin ka hria. U Faktei chuan a ngaihsak ve vak hmel loh, a phone a khawih mawlh mawlh a.




Vanmala chuan a bula thutna awl chu a lo beng thuk a, a bulah chuan ka va thu thla nghal ve mai bawk a.




"I va lo kal har ve" a tih chuan ka lo nui tawi tak ringawt.




Zan dar 8 velah door bell a rawn ri a, mut kan tum ut ut tawh zawk a. Mahse chutia door bell a rawn rik takah chuan ka tho vat a, mahse U Faktein min lo chet khalh leh tawh, ka thu leh ta ngawt a.




Kawngkhar a va hawn rual chuan thawm a ri hak a. Ka chhungte an lo kal hi a lo nia. Mahse ka nu a tel ve lo thung.




Chutia ka chhungte hmel ka hmu leh ta chu ka hnuk a ulh ringawt pek a, mahse ka lan chhuah tir duhlo bur thung.




Ka nuin ka pa te chu a lo chhawn vat a, ka pa chuan min rawn nuih vur vur a, an lo kal ka lawm zia chu ka sawifiah thiam lo zawk.




Vanmala chuan hre lawk ang hrim hian "Ka beisei aiin in rawn katng har a" a lo ti sup a. Ka pa chuan "Rina hi kan nghak a mawle, project tiin a buai hmasa a" a lo ti ve vat a.




Rina chuan min lo nuih vur vur a, hnuk ulh teuhin ka lo nuih let ve a. Ka tah chhuak ut ut chu a hrehawm kher mai.




Ka chhungte chu an titi nghal bawrh bawrh a, U Faktei chuan a ngaihsak ve hlawm lem lo.




"Thingpui ka va lum ange" ti a ka thawh rual chuan U Faktei bawk a rawn che leh a, min melh mang hlei lo hian "Ka va lum ang" a ti bul hmak a.




Vanmala chu ka en ta tawp a, thu turin min lo ti vat a. Ka thu leh ta ngawt a.



Ka nu chuan "Rempuii hi a rawn remchang ve lo a nimaw" a ti hliai a, ka pa chuan "Nia, an thawhpui nu fapa piancham lawmna lamah a kal a, a lo la haw hman lova" a lo ti tha ve mai a.



"Inhmuh a khat si a, kim thep thawpa inhmuh a chakawm asin le" ka nu chuan a lo ti leh vang vang a. Chutia pangngai taka ka nu chanchin a la sawi thei zawk te chu ka nu tak tak ni lo mah se ka ngaisang fe zawk.



U Faktei chu thingpui nen a rawn inchawi va va a, ka in tur a lo lum tel veleh zel a, inthlahrun a na zual duh ngei mai.



Min pek dawn chuan "Aih, U Fakte...keichu ka duhlo, ka lawm" ka lo ti vat a. Mahse min melh kal chunga "Ka lum kep vek tawh che" a tih bulh hmak takah chuan ka la lo ngam tawhlo.



Thingpui kan in zawh hnu rei vak lovah ka pa te pawh haw turin an intintuah ve ta a. A hmaa ka rilru ang lo deuhin zui haw daih ka duh ve rum rum mai. Ka nau te pahnih chuan in enkawl tha hle turin min chah ve luam a. "Ka tupa tur chu ka duat viau ang" an ti ve chhen lehnghal a. Min phur pui ve hlein ka hria.




Pawn thleng an haw tur chu kan thlah a, U Faktei erawh a tel ve lo thung.



Kan inthlah fel hnu chuan inzui lut leh dial a. Kan thingpui inna no kha sil tumin han seng mai ka tum a. Mahse a lo awm tawh miah lo.



U Faktei chu choka atangin a rawn chhuak zui ve leh zel bawk nen a lo sil vek tawh anih hmel. Ka chhungte hmel ka hmuh vanga ka rilru no a la reh famkim lo bawk nen ka tah a chhuak zual sauh a. Kan inkar chu a khirh hle niin ka hria.




Ka nu chuan "Vanmal, in nu kha mutpui tawh rawh, a chau lutuk ang" a rawn ti vat a. Ka lo thlawp khawp mai, kan zinna lam ai mah chuan kan boruak rit nulh hian min tihah vek.



Room-a kan luh thleng pawh chuan U Faktei chetdan vel kha ka ngaihtuah let a. Ka rilru a na ngut ngut mai.




Vanmala bathroom luh laiin ka lo mu fel thân a. Ka pasal neih tirh khan ka lawi na te'n an zir êm a, vannei ka inti hle kha a ni a. Mahse tunah thla 2 em pawh a la ral lova, hrehawm ka ti ru nghal viau mai. Ka chhel loh vangte pawh a ni mahna.




Chutihrual chuan ka nu leh U Faktei hi an sual ka ti hauh lova, tihngaihna ka hre lo mai ani. Eng ang hrehawm pawh tuar dawn ila Vanmala hi chu then ka tum lo bur thung.



Kan inneihna la rei lo mah se hun harsa hlir kan paltlang chho nghal a. Buaina chinfel vek a nih tawh hnuah pawh buaina dang kan nei lehzel a. Pasal chhungte nena innghirngho hi ka thil hlauh ber pawl a ni a, tunah hian a thleng mek chu a ni si a.




Vanmala hrilh chî niin ka hre bawk si lo, a lakah chuan ka inthlahrung zo zai tawh. Ka rilru no rawn chhuakin ka mittui a rawn tling nghal pam a. Duh lo zet hian ka tuai nghal tawk a. Ka inti paukhauh lui ve tlat tur a ni.




Bathroom inhawng ri khep ka hriat rual chuan ka mit bawk chu ka tuai leh nghal tawk a. Hetianga ka awm hi a hria anih chuan amah zawk zawk hian hrehawm a ti dawn a. Chutiang thil a thlen chu ka duhlo.




Khum a rawn hniam nghal sut a, ka pasal chuan a tih dan ngai tein ka kawngah min rawn kuah leh nghal a. Ka pum chu a chûl leh nghal hauh hauh a.



Ka samah rawn fawp tawkin "Ngaihtuah buai lutuk duh suh, hun a kal ang a, a zia chho ve mai ang" ka ngaihtuahna hria ni awm tak hian a rawn ti sup a. A sawi tum chu ka man ve lutuk.



Chutia a rawn sawi chhuah takah chuan tiin "U Faktei hian min haw hlen daih ang tih ka hlau" ka ti lawi rat a, ka ngaihtuah zawng ringawt pawhin ka thlaphang takzet.




Vanmala chuan "Ka farnu hi ka hrechiang alawm, tunah pawh hian i lakah rilru chhia a pu dawn miah lo. A sarhu lai ania,a la intihpaukhauh ve anih hi. Ka nupui hian hnehna i chang dawn chiang lutuk" a rawn ti hniam ruih a.




"Engtin nge ka tih ang?" ka ti ta thlawt a, tihngaihna hlawl ka hrelo alawm. Chutah Vanmala chuan "Engtin mah tih a ngailo, mahse huaisen hle la ka duh. Tuna i mamawh chu huaisenna chiah" a lo ti churh a. Ka pawm zawng tak ani.




U Faktei nena kan inkar siam tha tur chuan ka huaisen tawk a ngai. Tunah pawh inti hnual thei ka nilo. Ka pasal leh ka nu ka nei a, U Faktei chauh alawm hneh ngai tiin ka infuih tha sauh sauh a.




Zingah chuan hma deuhah ka tho a, Vanmala chu a la muttui hmel khawp mai. Min kuahna a ban chu tih harh hlau zetin ka dah sawn a, a harh lo hram.




Inhnuaiah ka chhuk thla a, tho tawh an awm leh awm loh hriat tum in ka hawi kual a. Ka tum ang ngeiin U Faktei chu ka thawh khalh hlauh e.




A lo thawh hman hlau lutukin eirawng ka bawl nghal sawk sawk a. Fridge a awm ang ang chu tlem a zawng ka siam ve mai a.



Vawksa rep ka hmuh chuan ka la chhuak vat a, a tam tham ang reng bawk a tiin Kg 1 awm vel chu ka la hrang a. Ka siam zui a. Heti hian chawhmeh dang vak a ngai lovang a, a awlsam mai.




Chutia vawksa ka lo chhuan so bawrh bawrh lai chuan U Faktei chu a rawn tho chhuak ta ngei a. Min be lem lo hian Fridge hawngin tui a in zui khawlh khawlh a.



"U Fakte, thingpui in la" pangngai taka ka tih chuan "Ka duhlo" ti ringawtin min chhang. Nimin ai chuan hmasawn ka inti tho tho e.




Ka nu a rawn tho chhuak zui ve nghal a. "Mamte, i va tho hma awm ve" ham bai bai chung hian a rawn ti a. Ka lo nui mai a.




Ka nu chuan min rawn pan hnai vat a "Eng nge i siam a?" tiin ka chawhmeh siam lai chu a rawn bih a.



"Vawksa rep anih hi, a tui viau ang" ka lo ti tha ve mai bawk a.




Chutah U Faktei chu a rawn inrawlh ta vat a. "Fridge ami kha i siam em ni?" a rawn ti hluai a. Kei lah chu hamhaih lutukin ka lo bu nghat a.



Pawi tih hmel lutuk hian a chal a dawm vat a, Fridge chu a hawng a, a hai ri nghal rawk rawk a. Kg 2 awm vel ka la dah ban chu a rawn khai chhuak a. "A va han pawi tak" a ti hlak a.




Vanmala a rawn tho chhuak zui ve nghal a. Chutia U Faktei che rawk rawk chu keini ang thovin a rawn melh ve ta vat a.




Ka nu chuan "Eng nge ni Fakte?" a ngaihna hrelo fe hian a lo ti a.




Chutah U Faktei chuan "Ka thiante Delhi kal turin an rawn lam dawn asin" pawi tih hmel lutuk hian a ti a. Ka pawiti lutuk chu ka chau nghal nghulh thei. Hrehawm ka van ti tak.




Vanmala chuan kan thusawi man chiah lo hian "Eng nge in sawi awmzia?" a lo ti ve sup a. Ka nu chuan thil awmzia a lo hrilh ve zung zung a.




U Faktei chuan "Lengpui ah flight nang hmana an kal ngei ngei a ngai dawn a. Tun atanga dar kar chanve velah hian an rawn lam dawn a" a lo ti zui ve zat a.




Hrehawm ka lo ti hle tawh, "U Fakte...ka tihpalh " tah chhuak teuh hian ka lo ti ta ngawt a. Vanmala a lo rum nghal nghut.



"Fakte, kan lei leh mai dawn nia, chu darkar chanve hun a la awm alawm" a ti zui sup a.




Chutah U Faktei chuan "Lei leh mai loh chuan tihngaihna a awm tawh loh chu" lungawi loh hmel fe hian a lo ti nghat a. Ka inthlahrun zual zia chu aw. Intihfel tum luata ka lo siam ta kher kha a pawi ber mai.




Vanmala chuan "Ka va lei leh nghal ange, Mamte lo kal rawh" a ti sup a, ka zui rang teh asin.


Ka nu pawh chuan "Kha, a dang a la awm tho bawk a. Kg1 vel lei tur chu a awm dawn sa" a lo ti ve vat a.




U Faktei lah chuan "Nimina kan lei ho ania, kha kher kha a tuihnai asin" a lo ti nghat a. A van hrehawm duh tak. Ka sa pup pup maiin ka hria.




Vanmala tawng tur chu ka lo khap vat a, a hmel atangin ka thlavang a hauh dawn tih ka hrechiang si a. Buaina lian tham a chhuah ka hlauh bakah a nau nen kan inkarah khi thuk zawk a siam ka hlau.




Ka pasal nen chuan vawksa rep lei tur chuan kan inzui chhuak ta a. Ka thil chhuan lai pawh kha ka ngaihsak zui ta si lova, ka nu khan a lo vil em ang chu maw. Pawi ka ti ngawih ngawih mai.




Vanmala chuan a lo hrethiam ngang mai a "I tihsual palh anih kha, khatiang mi ta tur a ni tih tunge hria ang kan fridge ah a lo awm miau si a. Hrehawm ti suh aw, kan lei leh ang a, a tha leh vek dawn" a ti dam thluam a.




Beidawng lutuk hian "Kan buai tawh sa nen ka inpal hnawk lehzual chu a ni sia" ka lo ti zuai raih a. Mahse Vanmala chuan "Engmah i thiam lohna a awm lo ka tih tawh kha, engkim a tha leh vek mai ang. A thu hrimah Vawksa kg1 hi buaina a tling phalo" a lo ti leh zung zung a.




Min hnem a tum zia ka hria a, rilru mangang lutuk anga awm chu ka duh tawh bik lo. Chutihrual chuan ka hah teuh mai.





Vawksa rep chu kan vengah a lo awm remchang hlauh a, kg1 chu leiin kan haw leh ta a.




In kan thlen pui hnu chuan U Vanmala chuan U Faktei a pe vut a, "I thiante chu an lo thleng hman em?" a ti sup a, U Faktei chuan a lu a lo thing mai a.




Ka nu chuan "Kha...tikhan a fel a nimai lawm, engmah buaina tur a awm tawhlo" a lo ti ve hlut a. Ka thawven phah chuang lo reng reng.




Rei vak lovah U Faktei sawi lawk ang ngeiin vawksa rep chu a thiante chuan an rawn lam ta ngei a. U Faktei'n an vawksa lei kha tuihnai bik riau a a sawi vang nimaw Vanmala chuan thil thlen dan engkim a thiante chu a lo hrilh fai kelh a.




U Faktei thiante chu an nuih a za ngang mai, thawk khat chu a veng ta deuh a. U Faktei thiannu pakhat chuan "In lo lei leh duh kher anih kha, kg2 pawh hi a tawk lutuk ania" a han ti ve ngial a. Ka awm nuam lo lutuk pawh ka dam sawng sawng mai.




Tukthuan kan ei laite chuan ka nu chuan "Vawksa chu i siam tui lutuk, tikhan i lo siam hlauh zawk a, tui deuhin chaw ka ei phah a, a lawmawm zawk" tiin vawksa chu a ei zui mawlh mawlh a. Kei chuan vawikhat pawh ka ei lo thung. Ka inthlahrung vek tawh. Ka chawei pawh a tui nek love.




Chhunah computer hmangin Vanmala'n hna a thawk a, U Faktei hna a kal daih bawk a. Zep nak emaw U Faktei awm rih lo chu ka lawm khawp mai. Ka nu nen chauh inhnuaiah kan awm a, inhawng takin kan titi mial mial a. A tih zia phian mai.




Tlaiah pawh ka nu nen bawk eirawng kan bawl leh a. Vanmala chu nilengin tum thum vel bak inhnuaiah a rawn chhuk thla lo. A chawl ve nain hna a thawk char char tho a, a hna hi a hautak ve hle niin ka hria.




U Faktei chu tlaiah a rawn haw a, chawei kan siam lai chuan "Min siam kep su aw ka ril a tam lo" a ti nghat a, a room ah a lut nghal daih a. A awmdan apiangah ka lo inngaihbel lo thei lova, nuam lo ka van ti tak.



Zanriah ei lai chuan Vanmala'n kan ina len a rawt a, ka lawm khawp mai. Mahse phur deuh anga lan chu ka hreh ve a. Ka nu pawh chuan "Ni e, va leng phei ve rawh u. Nizanah an lo kal thap bawk si a, an zahawm alawm" a lo ti ve vat a. Ngaih ngam deuhin ka awm ve nghal mai bawk a.




Kan ina len chu ka phur rual rualin ka peih lo bawk. Ka nu vangin ka peihlo, min lo dawn sawn dan tur a hriat si loh.




Zanriah eikham veleh hmun ka tifel sawk sawk a, ka remti lo chung ka nu in min lo pui bawk a. Kan zo hma khawp mai.



Kan in lama leng phei tur chuan kan intintuah ta nghal a. Kan insiam zo, inhnuai kan chhuk thlak chuan U Faktei pawh thutkhawmna ah a lo thu veleh vang tawh a. Min rawn melh zawk a, kan hawi sawn rang dun kher mai.




Vanmala chuan ka kuta min chelh chung hian"Nu kan kal aw" tiin ka nu chu a chah a. Kan inzui chhuak nghal a.




Aizawl boruak chu a ziaawm phian mai a, mahse a lum ve tho mai.



Door bell kan hmeh rual chuan naupang ri hlut thawm kan hria a. Hamhaih deuhin Vanmala nen chuan kan in melh a. A chhan chu kan inchhungah naupang han ri hlut rual an awm miau lova.



Kawngkhar an rawn hawn rual chuan U Vensangi fapate pahnih hian ha bal sengin min lo nuih heuh heuh a. Inchhung lam ka hawi nghal vat a, U Vensangi leh U Mapuia te an lo awm ve reng hi a lo nia.




U Vensangi chuan min lo nuih nghal var var a. An fapa û zawk chuan min lo bawh nghal chung chung a, Vanmala'n a lo pawm kang nghal nawlh a "A nutei pawm ai ka lo pawm ang che" a ti sup a, a nui nghak hel hek mai.



Ka chhungte pawh an lo awm kim thap a, kan len tur thu kha kan kal hmain Vanmala hian a hrilh lawk a. Chumi vangte pawh chu a ni mahna.




Ka nu hmel pawh ka hmu a, mahni inrintawk tak kha a la ni reng tih a hmel atangin a hriat mai e.



"In rawn thleng tluang maw?" a lo ti ngial a, ka lo buk nghat laiin Vanmala chuan "Thleng tluang chu a nimai e" a lo ti dam thluam a. A chhang pangngai lutukte chu ka ngei tlat.



U Vensangi nen chuan kan titi nghal mawlh mawlh a. Sawi tur kan ngah dun si, thusawi kan inchuh a ni ber e.



Midangho chu thu inhmu takin an titi hlawm a.




Ka nu in thingpui a lum a, puih pawh ka tum hran lo. Inleng tak tak angin ka inngai hmiah mai.



Thingpui in zawh hnu rei vak lovah naupang ho mut chhuak huai bak vangin U Vensangi te chu an haw ta a. A tê zawk a puak laiin a lian zawk a lo nuar ve bawk a. U Mapuian a lo pawm ve thung a. An chhangchhe kher mai.




Pangngai taka titi a kal chhoh dawn laiin ka nu pek chuan "Vanmal, a hmingchhe zawga puh turin awm tawh suh ang che" a ti nghat a.




A laka a awmdan avanga ngaihdam dil a hneka chutia a ti kher chu ka lo run ngang mai.



"Ka nu..." ka ti pawr chhar a, ka nu lah chuan a ngai pawimawh lo khawp mai. Vanmala erawh pangngai takin a awm a. Ka nu thusawi pawh chu a chhang zui lem lo.




Kan haw hmain ka pa chuan chhung inkhawm hman a rawt a. Ka pî ka hrechhuak tlat pek a.



"Maichâm a mei chu a mit tur a nilo. Khawvel thil hnutchhiah theih che u ka neilo, mahse ka rin Pathian hi ka hnutchhiah thei che u" he thu hi a sawi fo thin. Ka rilru ah a rawn thar a, ka ngai thar takzet.




Ka pa chuan Bible châng tawite a chhiar a, a chhiar zawh chuan thu tawite a sawi zui a.



"Zaninah hian thu tam sawi belh ka tum hran lova, mahse tlawmna nun hi lo sawi ka duh. Kristian dik tak, Pathian ringtu chu tlawm a ngaih hunah a tlawm ngam mai tur a ni. Mi nun tlawm thei te hi khawvela mi hausa ber te an ni. Ro sumin a lei ve theih loh neitu an ni. Mihring chu thil tisual thei vek kan ni a, chuvangin kan sualte hi thupha chawi hreh miah loh tur. Chapona tlanga ding mite chuan nun nuam an hmang ngai lovang" a ti dap dap a.




Ka nu inhmuh chhuah nan a sawi niin ka hria a, ka lo lawm khawp mai. Ka nu nunah thawk sela ka duh hle bawk.



Ka pa chu a tawngtai zui nghal a. Chhung inkhawm kan hman zawh chuan ka nu hmel chu ka va en a, mahse thil danglam engmah a awm lo. Ka pa thusawi kha a thawk vak lo niin ka hria.




Kan haw dawn tep tawh tihah ka pa chuan an room lamah min ko hrang leh tlat a. Ka han zui veleh rih a.



An khumah chuan min thuttirin thutthleng a rawn pawt hnai a, ka hma zawnah a rawn thu ve nghal a.




A ngaihna hrelo fe hian ka lo melh a "Mamte..." a ti sup a, "Umm..." ka lo ti vat. A hmel awmdan chu a thutak ang reng si a. A sawi tur ka hre chak tawh.



A aw a thian khurh khurh a "Tlawmna nun ka sawi kha kan zavai tana sawi ka ni aw" tiin chiang kel kawl hian min melh a.



Ngaihtuah mang hlei lo hian "Ka hria alawm" ka lo ti liam puat a. Mahse ka pa chu a lo thutak ngang mai.



"I nu lakah hian tlawm zir rawh" a tih takah chuan ka lo sa phat mai. "Ama thiam loh zawk anih kha" ka lo ti hlar a. Mahse ka pa chuan "Ka hria alawm, engkim ka hre vek, ka sawi chhan tak chu tlawmna nun hian mi nunah hna a thawk nasa zawk ania. I nu nen hian tlawm tum miah lova in inkar tawn reng chuan eng rah tha mah a chhuak dawn lo. Tlawm takin in dawr tawn ula, a fel vek a nimai" a ti dam thluàm a.



"Ka pasal a tih dan kha ka lawm hlei nem" ka lo ti hmanhmawh. Ka lawm hlawl lo alawm, ka rirlu a dam thei der lo lehnghal.



Chutah ka pa chuan "I pasal tlawmna nun hi chhawm ve rawh. Vanmala hi hetiang tak hian in phah hnuaiin inti tlawm lo sela chuan in innei tawh kher lo mai thei. A nun hi a awhawm asin. Chhut chiang rawh, i nu i haw em em a, nangmah hringtu che a ni. I huat chhan lah chu i chunga a chet dan ai mahin i pasal a rin loh vang kha a ni a. Mahse i pasal, haw tur ngawih ngawih zawk hian tlawm takin i nu hnenah a rawn inphah hniam a. I nu hi huain a hunlaia a rin loh vanga thinrimin nangmah ngei pawh hi a then thei che. Chuti chung chuan in inkar sawh ngheh tumin a bei sauh sauh a. I nû nena in inkar thlengin siam that tumin a bei a. Vanmala nun ang hi nun hlu anih hi. Ka lo chîk thin a, a nu hian engtin nge a enkawl ang aw ka ti hial asin" a ti ta dap dap a.




Ka pa ngaihtuah ang zawng chuan ka lo la ngaihtuah ngai miah lova. Ka pasal rilru thatna leh felna ringawt ka lo hmu a, a nun a hlu ber a tlawmna nun ka lo hmu langsar lova, ka chhawm nun ve atan pawh thil tha tak ani.




"Pa..." ka ti hliai a, sawi tur ka hre chuang lo. Ka pasal nun hi a lo ropui lutuk tlat.



Ka pa chuan "I nu pawh hian i pasal tlawmna nun hi a hmu thiam vek ania. Ama nun ngeiah pawh hna a thawk tan tih ka hria. Midang chuan in hre kher lo mai thei. Mahse ka nupui a ni a, ka hrechiang lutuk" a tih zawm leh zat a. Hlim hmel zet hian min melh a.




Ka pa in chhung inkhawm a a thusawite kha ka nu tan vek ka lo ngaithla a, mahse ka tan a lo ni !



Tlawmna nunin bul ka tan tha leh ang a, ka nu leh U Faktei pawh hi ka hneh khawp ang. Ka rilru chu ka ti paukhauh ta sauh sauh a.



He thil hi keimaha bei tur ka ni lova, ka pasal tlawmna nun ngei maia a nun hmang thin nen kan bei dun dawn a. Ka huphurh hauh lo.




____________*______________*_________


Show post links
Top

[Ngaia]

DEPUTY COMMISSIONER
By CVL Awmpuii



Chapter 36



Kan haw kawngah chuan Vanmala car khalh lai te chu ka lo thlir leh ngawih ngawih thin a. Phû lo inti viau mah ila midang tân ka phal chuang lo.



A nun inngaitlawm lutuk hi ka ngaisang takzet. Duh ni sela mahni tawka induh ve larh thei a ni. Mahse chutianga awm lo chuan tlawm taka awm in ka chhungte pawh a dâwr zel a.




Ka pasal hi ka hmangaih a ni mai lo, ka ngaisang a, ka zah hle bawk.




Tlawmna nun hian mi a lo chawi sang thin.



Chu chu ka pasal nun a ka hmuh lian tak a ni. A tlawmna nun hi nun hausa, amah chawi sangtu a ni.



In kan thlen chuan an lo thim thiap tawh a, ka nu leh U Faktei te chu an lo mu tawh anih hmel. Vanmala chuan car chabi chu kawngka bulah a khai tha nghal a.



Motor-a kan haw loh avangin U Faktei car kan hmang a, naktukah chuan hna kal nan a hmang veleh thung ang.



Room kan luh chuan Vanmala'n "I mu nghal dawn em?" a ti sup a, ka melh vat a. A phone a lo hmet daih thung.



"Mut nghal mai loh chuan, i la mu ve dawn lo em ni?" ka ti ha a, a phone dah pah chuan min rawn melh a "Hna tlem thawh ka la ngai a" a ti sup. Ngainat awm zet hian min nuih suk a.




"Anih chuan ka mut san bik lovang che" ka lo ti var a. A computer a on nghal a, khuma thu chung chuan ka lo thlir reng a.



Heti hian hna thil ah a buai em em a, chuti chung chuan chhungkaw hui khawm hna thawh a lo ngai veleh zel a. A rilru hi a buai ve thin ngawtin ka ring. Chutihrual chuan a hmel ah engmah a ti lang chhuak ngailo.




A file te chu la chhuakin computer ah chuan thil a chhu zui mawlh mawlh a.



Chutia khum a thu chunga ka lo en reng lai chuan min rawn melh zawk a "Hahdam i mamawh, i duh leh min mut san rawh Mamte" a lo ti sup a. Ka lu ka lo thing mai a.



"Anih chuan mu chung talin min lo nghak rawh" tiin a rawn tho chhuak vut a. Wardrobe a ka mutkawr khai chu rawn lachhuak in ka hma zawnah a rawn lek va a "U Vanmal..." ka tih hliai chuan "Ka thu awih rawh le, min lo nghak duh anih pawhin mu hahdam chungin min lo nghak rawh" a ti dam thluam a.



A hna ka ti sawt lo mai mai zawk dawnin ka hria a, a thu chu ka awih ta pauh a. Ka mutkawr ka hak lai chuan computer hma ah thuin a thiltih lai a lo tih zawm leh mawlh mawlh tawh.




Ka lo mu fel ta than a, phone khawih pawh a lang lo. Ka pasal hnathawk lai chu hmuhnawm ti em em hian ka thlir ta reng a. Ka ngaihtuahna a vak thui leh tawh khawp mai.



Ram hmangaihtu a nihna te, chhungkaw hmangaihtu a nihna te, a nupui hmangaihtu a nihna te...a tam mai ka sawi seng lo. Khawvelah hian mi tha famkim an awm lo an tih chu ka hre fo na in Vanmala hi chu a tha famkim thlawtin ka hria.




'Ram hmangaihtu an kiam a, chhungkaw hmangaihna a tla hniam a, chapona i'n mihring kan khat a' heihi tunlai khawvel anga sawi a ni thin. Mahse hetiang ringawt hi kan khawvel hi a ni bik lo. A nih loh zia ka tlangau pui dawn anih chuan ka pasal chanchin hi ka sawi ngei ang.




A hnathawh zawh thleng chuan ka lo men pui ve ta reng a. Darkar khat vel erh awrh chauh a ni a, a rei hran lo.



Computer a off hnu chuan min rawn nuih suk a, ka lo nuih let ve var var a.



A tshirt hak lai leh a kekawr tlawn hak lai chu a hlip zui nghal a. Wardrobe bula kawr khai naah chuan a khai zui a. A chezia chu ka lo en reng a.



Boxer nen chauha min rawn pan lai chuan ka lo melh reng a. A taksa hrawl zet chu hmuhnawm tham a ni. A palianin a taksa ah chuan thau chhia hmuh tur a awm miah lo. A khauh tung a, chutihrual chuan a sek tung chuang bawk silo. Hmuhnawm tham a ni tawp mai.



Khuma rawn lawnkai pah chuan "Min ît a nimaw" a ti sup a, a nui suk suk lehnghal a. Ka lo nui ve hak hak mai.



Min rawn si leh nghal hlun a. Ka mutkawr suihna chu a rawn phelh leh hmiah tawh. Ka dul zawnah chuan bawk hniamin ka pum chhung ami chu a be zui mawlh mawlh a.




Duat zet hian a chul hauh hauh bawk a, nuam ka lo ti leh em em tawh.



Rawn insawn chho hlekin ka âwm ah chuan hmai a rawn phûm zui vawng vawng a, nghet zetin ka lo kuah ve vat a.



A lu ka lo hmet nghal neuh neuh bawk a, a thaw chhuak ham ham mai. A chau thin awm si a, duat let chu a phu ve hliah hliah a ni.




Ka âwm zawn atang chuan min rawn melh chho run a "Rimtui nu" a lo ti sup, ka rim hriat chian tum ni awm tak hian a hnimin min hnim leh vawng vawng a. Ka mutkawr chhana ka hnute a rawn fawh rual chuan ka lo te chhuak that a, a la nui lum hawk zui a. Ka inring hman lo ani.




Chutah awmze nei zet hian ka hnute bawk chu a rawn pet leh pek a, îp ngar ngar chungin a samah ka lo tham salh a. Awmze nei lutuk hian a rawn rum chhuak hawk zui a.



Ka hmuiah chuan rawn fâwp in chet a la zui nghal a. Ka pasal a nihna hi a chiang telh telh zawng anih hi!



Chau zetin a âwm ah chuan ka bei thlar a, lungawi hmel zet hian a thaw chhuak leh ham ham thin a. A lungawina ka ni thei hi ka lawm thin ngawt mai.



"Mamte...Faktei hian a ti hrehawm viau che em?" a rawn ti zuai ruih a, han chhan mai dan tur ka hriat loh avangin ka ngawi kar a.




Vanmala bawk chuan "I dinhmun hi hrethiam lo ka ni lo ania, hun han kal deuh sela a zia chho mai ang. Kan duh nei tur chuan beih a ngai fo a, chutihrual chuan kan duh nei tura nghah a ngaih chang te pawh a awm ve ania" a ti dam thluam a.



A thusawi ka pawm pui tih lantir nan a âwm chu ka tauh deuh dat a. A lo rum hawk zui a, ka ip nghal chawih mai. Min la nuih hawk hawk leh ta nghal a.



"Ka taksa hi i tidanglam hneh lutuk" zep buai lo hian a rawn ti rum hawk a, ka lo îp ngar ngar tawh thung. Ka sa hat hat mai.



Zingah chuan hma deuhah ka tho leh a, tun tum chu Vanmala nen inhnuaiah kan chhuk thla rual a. Tumah an lo la tho lo leh hlauh a.



Rice cooker on in thingpui ka lum nghal a. Vanmala chuan "Pawn lamah hnah thel tla hnawk a awm leh awm loh ka va en lawk ang e" tiin pawnah min chhuah san a.



Fridge chu ka hawng a, chawhmeh siam tur han dap chawp mai ka tum a. Nimin thil thleng vang khan ka tîm vek tawh. Chawhmeh bawm chu ka hai kual ka hai kual ta ringawt a.




Chutihlai chuan ka hnung lamah thawm ka hria a, U Faktei hian chîk zetin min lo en reng a. Ka ding chhuak nghal vat nui lui var var chungin "I tho nuam em U Fakte" ka ti hliai a.



Min chhang mai lo chuan "Eng nge i zawn a?" a ti nghat a, ka hmui pet zeuhin "Chawhmeh siam tur ka lo ngaihtuah a" ka ti ro halh a. Chawhmeh tih lam rik ringawt pawh chu ka harsat. Nimin lama ka thil tihsual a lian mai bawk si.




Chutah U Faktei chuan "Siam tur te chu a tam kha, kha...a awm hner hnur alawm. Khatinga hai vak vak te chu" a ti nghat nghat a, a nuam lo duh kher mai.



Ka ding zum ta reng a, a ngaihdan a nilo lehpek aniang "Khawi maw kalsawn teh, tui ka lo in teh ang" tih leh fridge lam rawn pan chu a rual a. Ka lo ding sawn nghal vat.




Ka thingpui chhuan lai a so zui avangin gas lam chu ka pan vat a, U Faktei lam chu ka hawi leh zawk. Tui a lo in khalh khalh tawh.




Thingpui ka thlit chhuah dawn chuan "Thingpui in ve rawh aw" inthlahrung dek hian ka ti a. Min melh vang vang hnu ah lo 'aw' ve teh mial a. Ka lawm zia chu !



Dawhkan hnuaia thutthleng chu pawt chhuakin ka chetna bulah chuan a rawn thu thla ve a. A phone phawrhin a hmet zui mawlh mawlh a.




Thingpui ka siam zawh chuan Vanmala a rawn lut veleh tawh bawk a, ka lo thaw huai mai. Midang chuan engtin pawhin min ti se Vanmala ka bula a awm chhung chu ka him.




"Fakte, in hna lam in tluang em?" tiin a nau chu an hna lam chanchin te a zawt a. U Faktei pawh chuan a lo chhang tha ve mai bawk a.



Ka thingpui siam chu ka pe dun a, Vanmala chuan "Ka bulah hian lo thu teh" a ti sup a, a thutna bula chair chu lachhuakin ka thu ve mai bawk a.




U Faktei chu kan ep chiahah a thu a, min ngaihsak em em lovin a phone chu a hmet zui mawlh mawlh a.



Vanmala chuan "I kawr hi a hnung i suih tha hlei nem" ti supin ka kawr chu min siam rem sak nghal a. A hnung lama a nghawng zuihna hi ka lo suih lo pek a, ka pasal chuan a lo hmu chat anih dawn kha.


Ka nu a rawn tho chhuak zui a, "A pitar ber hi min thawh khalh hlawm ziah mai a,insiamrem ka ngai ani" ham bai bai chung hian a rawn ti a.



"I mutui em?" ka lo ti nghal var a, "Ka mutui mah mah zel" nui hak hak chung hian a lo ti a. Ka nu hian min thlamuan ve thin ngawt mai. Midang chuan min do mah se ka ber ka lamah a tang a, ka tan a tha em em a. Tun atan chuan chu chu ka tan a tawk lutuk, Vanmala nen hian min tichak thar tu an ni.




U Faktei chu a ding hluai a, fridge chu hawngin tomato hi a rawn la chhuak a, "Tunlai chu hmeh tur a vâng emai, artui leh tomato kan pawlh mai ang u" pangngai tak hian a ti a.




Dawhkanah a rawn dah a, chemte a lak dawn lai chuan ka huaisenna zawng zawng sawm khawmin ka lo inrawlh ta a. A chem lak tur chu lak khalhin "Keiman ka lo ti ang" ka ti hliai a. Min melh leh tete a,alo bu ve mai bawk a.




Tomato ka chan lai chuan chawhmeh thing, fridge a kan dah ho chu a lo la chhuak a. Ka nu pawh gas bulah dingin eng eng emaw a chhuangin ka hria.



Vanmala pawh kan bulah a la awm ve reng a. Nichina a rawn luh rual chuan chnchinbu a rawn kenv lut a, chumi chu a chhiar a. Kan chezia chu min ngaihsak lo ang in lang mah se min rawn melh leh zawk thin a. Min ngaihven hle tih chu ka hria.




Tomato chu ka kang thîm nghal a, a kawi vek hnuah Artui chhu kehin ka thlak veleh mai bawk a. Mahse a rim chu ka ti thei ta tlat lo. Ka pum a let nghal but a, insuam hman lek lovin ka uak tuarh a, ka hmui hupin bathroom ka pan zui vat.




Vanmala min rawn zui nghal fua chauh ka hmu hman. Bathroom ka thlen rual chuan ka uak nghal tuarh tuarh a. Mahse luak chhuak tur engmah a awm lo.



Vanmala'n ka hnung zangah min rawn chûl nghal hauh hauh a, ka uak zui leh tuarh tuarh a, ka pum a so bulh bulh mai.



Ka zia deuh hnu chuan zawi zetin Vanmala chu ka ngheng nghal a. Ka uak nasa lutuk a, ka ni nghulh mai. Ka pum a la inlet but but mai bawk si.



Tihngaihna hrelo lutuk hian "Mamte...i tha em?" a ti sup a,a âw ah chuan min ngaihtuahna tam tak ka hre thei.



"Ka pum a so bulh mai" zawi zet hian ka lo ti a. Ka nu aw kan hre zui a "I raino luak chhuak anih dawn kha, nautein thla khat a pum tawh si a, a rawn lang tan dawn ani mai thei. Khatiang a i vawikhat awmna a ni em?" a rawn ti zung zung a. Ka lo bu nghat a.




"Anih chian chu, tikhan hahdam deuh la, lo inzui chhuak ula, damdawi tha kan ngaihtuah dawn nia" a ti leh zung zung a,a kalsawn thâwm kan hre nghal.




Ka pum inlet but a reh deuh hnu chuan bathroom chhuahsanin choka lamah kan lut leh nghal a.



Vanmala chuan"Room ah awm zawk la" a ti supa , ka lo hnial vat. Eirawngbawl lai ka ni a, room a han awm san ngawt thu a awm si lo a ni.




U Faktei chuan artui leh tomato kan pawlh chu a lo chawk vel mek a. A lo ti fel nghal vek anih ka ring.



Inthlahrung deuhin a eirawngbawl na bulah chuan ka lo thu ve a. Ka hnar lah chuan artui leh tomato kan pawlh rim chu a ti thei der lo, ka pum a la so bulh bulh tlat.



Ka nu chuan rai laia eitur tha te chu min hrilh zui mawlh mawlh a. Rai no luak chhuak hrehawm zia te chu a sawi duah bawk a. Tun hi chu a bultanna chauh a nih hmel. Chutihrual chuan ka lo huphurh nghal tung mai.





U Faktei chuan "Û, room ah han awmpui rawh" tiin U Vanmala chu a melh kal a, min rawn melh zeuh a. Sawi tlang dawt si lovin keimah min sawi na a ni tih ka hria.



"A ngailo, tih tur tul ka lo tihpui ve ang che" ka ti vat a. Hetah a chêt mawlh mawlh laia room a lo awmsan daih chu ka dub bik lo.




Mahse U Vanmala chu a rawn tho chhuak vut a "Mamte, lo kal rawh le" a ti sup a.



"Aaa...ka tha tawh lawm" ka ti hliai a, mahse ka nu thleng thleng chuan awm hahdan turin min ti tlat pek a.




U Faktei erawh a rawn tawng leh tawhlo.




Vanmala chuan room ah min chhohpui leh ta pauh a. Min han dîm em em khawp a, a nuihzatthlak zawk.



Khumah chuan min muttirin ka pang te chu a han dek a "I khua chu a sik si lova, doctor ko ang aw" a ti sup a, a thutak ang reng bawk sia. Ka nuih a za tlat pek a.



Ka nui hak hak min hmuh chuan min melh run run a "Nichin ang khan engtin mah ka awm tawhlo, ka tha vek ania. I hlauthawng mai mai anih kha, raino laia awmdan tur alawm" hre ber awm ang chuan ka han ti vei ngial a.



"A hrehawm em?" min ngaihtuahna a khat hian a ti leh sup a , ka lu kal thing vat. Ka tha leh vek tawh miau ani.



A bu nghut a, "Tikhan awm hahdam vang vang la, ka lo awmpui ang che" a ti sup a. Nihlawh inti lutuk hian ka pasal chu ka nuih ta var var a.



"Min duat bawk sia" ka tih chuan "Hei ai hian engtin nge ka duat ang che aw..." a ti fân ruih a, ka nui hak hak mai.



Zei lo viau e ti lo hian a zei ru riau a, min duat thiam bawk si. Ka pasal thatna hlir ka la hmu zel chu anih hi.



Tukthuan ei dawnah ka nu a rawn chho a, "Chawei turin i lo chhuk peih ang em?" min tih chuan "Peih lutuk e" ka lo ti vat.



Thawh chhuah mai ka tum lai chuan Vanmala'n "Room ah hian ei mai la" a lo ti sup a. Min ngaihtuah hmel thin bawk si. A ngaih ang em em a ngaihtuah ngai ka ni bawk silo.



"A ngailo, ka kal thei reng alawm. I zuk kîl ve zawk ang" ka lo ti vat a. Ka nu pawh chuan "Pum chet bulh chang hi a awm a,luak a chhuah lai hian a hrehawm a. A bakah chuan engmah harsatna em em a awm ngailo ania. I paltlang ve thei mai ang" a lo ti zung zung a.



Tukthuan kan han ei tur chu artui leh tomato kan kha a awm ve ta miah lova. Ka nu chuan "Faktei'n a dah hrang daih anih kha, a rim i haw sia" a lo ti vat a. Ka lo nui var var mai. U Faktei hian tilang duh miah lo mah se min ngaihsak zia ka hria. Chu chu tukin atang khan a lang chiang hle in ka hria.




Nilengin room ah ka tap deuh chawt a,ka duh lo viau na in Vanmala leh ka nu thu ka hnial theilo. Ka nu in min rawn tlawh zeuh zeuh a, Vanmala pawhin computer a hnathawk pahin min ngaihven reng a. Ka nihlawh viau e ka inti tawp mai.




Tlaiah U Faktei a rawn lang ve teh mial a, polythene nen a rawn inkhai bawr tun a. Vanmala chu computer hmaah thuin hna a la thawk mawlh mawlh a.



Chutia U Faktei inkhai bawr zeta lo lut chu ka lo melh ha a, Vanmala pawhin a lo melh ve run mai.



"U Fakte, lo kal rawh" ka ti ro halh a, mahse U Faktei chuan "Ka awm rei hman lo, kha" tiin a thil khai lai chu ka hmazawnah a rawn lek a.




A ngaihna hrelo fe a ka lo melh lai chuan "La rawh, raino laia vitamin tha leh thei hrisel anih hi. Zingah kaw ruak lutukin awm lo la, naute hrisel nan i pum pui i enkawl uluk a ngai ania" a ti nghat nghat a. A âw chu la nelawm viau lo mah se min ngaihsakna niin ka hre tlat.




Nui var var chung hian ka lo la ta vat a "Ka lawm e aw, ka ei tha viau ang" ka lo ti var a. Chutah U Faktei chuan "Ka vahpa tur i pai miau si a, in enkawl tha ang che" nelawm vak lo hian a ti bul hmak a. Rilru nat nan pawh ka hmang duh tawh lo, ka nui var var tawh.




U Faktei chhuah rual chuan ka nui ri ta hak hak a, a thil min lo hawnte chu ka en hlawm a. A hrisel hmel hlawm kher mai.




Vanmala chuan ka chezia chu min lo nuih suk suk a "U Faktei hian min haw tawh miah lo tih ka hre thei" phur zet hian ka ti a. A thiltih lai chu dahin min rawn pan vut a, "Thatna hian a hneh theih loh mihring an awm ngailo" a lo ti churh a, ka samah rawn tuai thuakin ka hlim lutuk chu min han nuihpui veleh rih a.




"I hlim hle a nimaw" a tih chuan ka lo bu nghat nghat a, "Ka thil tih theihna a nih kha" a tih chuan hamhaih fe hian ka lo melh a.



"I rilru te hi a chak lo sia..." nuihza âw deuh hian a ti a. "Eng nge i sawi awmzia?" ka tih chuan "I pum chhung ami kha a ngaihtuah a,chu chuan nangmah ngaihtuah lo thei lovin a siam a. A bulpui be chu tunge ni ta, i pum chhunga naute lo insiam chhan kha tunge" a ti ta duah a, a nui zui suk suk a.




Chutah a thusawi ka man lutuk avangin chuan ka bula lukham chu la lawkin ka vaw pawp a, "Vanmalsawmhlu" ka ti nghal hlar a, a lo la nui hawk hawk zui a.




Keipawh ka nuih a za veleh tho, kan nui dun ta hawk hawk a.



Chumi nî atang chuan U Faktei chu a hmaa U Faktei ang chiah kha a ni chho leh tan a. Ka chungah tha tak anga lan chu a la duh chuang lova. Mahse min ngaihsak zia ka hai bik lo.




Kei lahin raino chu ka haw chho ta phian mai a, tuktin deuh thaw bathroom ah ka tlan lut a, luak chhuak tur awm si lovin ka uak tuarh tuarh zel a. Tih theih em em nei si lovin ka pasal lah chu a lo buai ve vak zel a. Kei ai mah chuan a khawngaih thlak zawk.




U Faktei chu hna atangin a rawn bang hma ta ziah a, eirawngbawl pawh a kutah a dah hmiah mai. Tihpui ka tum apiangin "Room-ah chho la, hahdam rawh" min ti fo a, thu tam a sawi ngailo. Mahse chu ringawt pawh chuan min ti hahdam.




A hmaa ka thil tih tur apiang min tih khalh laia ka rilru ang kha tunah chuan ka pu tawh miah lova. Inthlahrun ai mah chuan nihlawh ka inti viau tawh.



Min hringtu ka nû nen pawh kan inbe awl lova, a hmaa kan nufa inkar tha tak kha a rawn inmung chho leh mek niin ka hria.




Tawngkam feikibar leh mi tih fek fek na kha a nei tawh lova. Vanmala te bulah ngaihdam dil se ka tihna erawh a la reh theilo, ka duh dan a la famkim lo tlat a ni.




Ka raino luak chhuak reh thei lo chu Vanmala a mangang khawp mai a. "Mi te pawh an ni ve tho alawm" ka tih pawhin "Heti em em chuan an hrehawm ve lovang, vawiinah doctor ka va rawn ang e. Phone call ai chuan kal chilh khan kawng ro a su zawk ang. Nge hetah ka ko zawk ang aw" a ti zui vung vung a.



"Koh kher a ngailo" ka lo ti vat, raino luak chhuak vel vanga doctor êm han koh chu a chuangtlai ka ti tlat.




Chutah Vanmala chuan "Anih chuan ka va râwn mai ang" a lo ti sam then a. "Faktei office a châwl dawn bawk a, in pathumin in lo awm thei ang chu" a lo ti leh a.



Dan tum pawh ni ila a ti lui dawn tho tih ka hria a,ka dang buai peih lo. A rilru dam zan na turin min enkawl tawp mai teh se.



Tukthuan ei laiin a thil tum te chu a sawi zung zung a, ka nu pawhin a lo thlawp khawp mai.



"A tûr ve reng mah nise a ziaawm thei si lova, a hrehawm lutuk ang, doctor râwn chu a tih chî viau mai" a lo ti ve zung zung a. U Faktei chuan engmah a sawi ve lo thung.




Chaw pawh ka ei hlei thei meuh lova, bar hnih bar thum ka ei chuan ka duh tawk viau zel.




U Faktei chuan "Chawhmeh ei chak zawng i nei em?" a ti sep a, min melh ngar a. Sawi dawt lo mah se min ngaihsak zia ka hre telh telh.



"Nei lem lo...engmah hi ka ei chak lo" ka lo ti hliai a, a bu nghat ringawt.




Ka nu leh Vanmala lo in nuih ralh ralh chu ka hmu ve reng a, mahse ka hmu lo der hmiah.




U Faktei awmdan vel hi an hrethiam ve vek niin ka hria.



Tukthuan eikham veleh Vanmala chu doctor râwn tur chuan a insiam ta nghal a.



A kal hnu lawk ah U Faktei a rawn lut hlawl a, "Ka û kha a kal tawh em ni?" a tih chuan "Aw..." ka lo ti vat.



Room chu a enkual a, "I thawk a pik thin em, room i awm chawrh chawrh mai sia" pangngai tak hian a ti a.



"Pik hran lo e, mahse a ninawm ve det" ka lo ti hliai a, min lo nuih sak a.



Chutia a din tak rengah chuan "Lo thu la" ka lo ti vat, ka mutna bulah chuan a rawn thu thla ve mai bawk a.



"Mamte..." a ti hluai a, a mitmeng fiah zet chuan min melh kal a. Ka hminga min koh lohna a rei tawh lutuk a, ka hamhaih lek lek mai.



Ka kutah a rawn chelh a, za lo tih hriat zet hian a nui lui sak a. "I chunga ka chêtdan kha a zialo ngawt mai tiraw" a ti hniam raih a. A hmui a pet pah zauh bawk a.




"U Fakte..." ka lo ti hliai a, sawi zui tur erawh ka hrelo khawp mai.



Min nuih var var a "Tun atang chuan a hma ang chiah khan awm leh tawh ang. Inpawh leh innel tak khan. Keipawh ka insiamtha ang" a ti nghat nghat a.



A inthiamlo hmel chu ka khawngaih lek lek. Dik tak chuan khatianga a awm chhanah khan ka amah hi ka dem hran lo. Ka nu tawngkhum dan khan a zir lo ve em bawk a, mihring pangngai tan chuan lo huat loh kha har lutuk tur a ni.




A kut chu ka hum let ve vat a, "U Fakte, ka dem miah lo che ania. Ka nû tawngkamin a zir lo ve êm a, khatianga i awm kha a âwm hliah hliah alawm. Engmah huatna che ka neilo" ka lo ti vat a.




A nui lui leh sak a "Dik tak chuan Mama a ngaihdan kha ka thanat pui tlat a. I hriat angin ka nu hian hmeithai rethei takin kan unau hi min enkawl seilian a. Tunah kan lo ziaawm chho a, Mama phei chu inchhungkhur ngai pawimawh lutuk mi ania. A hnathawh reng reng pawh dik taka ti duh mi, miin sawisel pawh nise huaisen taka thil dik ti thin a ni a. Chuta kara i nû in a lo ringlo leh tawngkam mak tak taka kam chhungkua min tawngkhum kha ka ti thei ta bik lova. Ka nuta neihchhun chungchang a lo ni lehzel bawk nen khtiang khan ka awm ta mai anih kha. Ka nû thleng thlengin a tawngkhum ta si a. Tih sual i neih ve loh tehlul nen i chungah thleng thlengin ka tuan a, ka tihpalh takzet ani" a ti duah a.




A ngaihdan chu âwm ka ti hliah hliah. Ka nuta te hi an nupui chhungte'n ka nû chetdan ang khan lo ti ve ta sela chuan ka thinrim ngawt ang. An nupuite chu then tur pawhin ka duh hial mai thei ani.




U Faktei dinhmunah chuan ka indah a, a rilru chu ka tawm pui pha ve uar uar mai.




U Faktei nen chuan inhrethiam tawn takin kan titi a. Ka sawi fo thin, that leh that inlawm tawn thatna bawk a rawn lang leh tawh.




Chhunah chuan inhnuai lamah kan inzui thla a, ka nu pangpar tui pe pawh a lo lut ve chiah bawk a.



"Mamte, chaw chhunah eng nge kan ei ang?" a lo ti vat a. Engmah ka ei chak si lo, mahse ka ril a tam tho bawk sia.



"Ei chak pawh ka neilo, in duh duh a nimai" ka lo ti vat a. Chutah U Faktei chuan "Kan thiannu pakhat rai puar chuan alu paratha tui a ti lutuk asin, ka siam sak ang che aw" phur zet hian a lo ti a.



Alu paratha ka mitthlaah a rawn lang nghal a, ka ei chak chawpchilh ve tlat mai.


"A...ka tibuai lutuk ang che" ka han ti ngial a. Mahse U Faktei chu a che zui nghal sawk sawk a "Buaina tur a awm hlei nem, lo awm pui tur chein alawm chawlh ka lak" a lo ti awlsam then a.




"Dawr ami pawh a lei theih tho alawm" ka tih chuan "Ka siam sak che, a harsa hlei nem. Chuloah dawr thil ei vak vak ai chuan mahni ngeia siam hi a tuihnai zawk" a lo ti leh tlat si a. Hnial zui ngaihna pawh ka hre tawh lo.





Tichuan ka nu leh U Faktei chu ka thil ei tur buaipui chuan an che nghal sawk sawk a, ka lo puo ve zel bawk a. Nihlawh ka inti kher mai.




Rin ai takin alu paratha chu ka ei tui ta a, an siam tui bawk nen per 5 zet ka ei a. Thil ka ei that lohna kar khat vel zet a ni tawh a, ka nu te pawh chu an lawm kher mai. Kei tak pawh ka lawm, ka pum chhungah pangngai taka eitur a lut leh thei ta chu.



U Faktei lawm ah a tla a "Ka siam sak ziah ang che" phur zet hian a ti a. "I siam tui hrim hrim a, ka ei teuh thei zawk anih hi" ka lo ti ve hlut a. Kan inkar tha leh ta lutuk chu ka lawm veng veng mai.




Kan ei zawh chuan nimbu kan sawh leh a, chu pawh chu ka ei leh teuh mai.



Tui ti zeta ka ei hliam hliam lai chuan Vanmala pawh a rawn haw zui a. Damdawi eng eng emawni a rawn khai haw a, vitamin tih vel bawk a nih leh ka ring.



"Eng nge in ei a?" a rawn tih chuan U Faktei'n a lo chhang vat a "Nimbu kan sawh a" a lo ti vat a. Vanmala chuan min lo nuih var var a.



"A va tui awm ve" ti supin ka bulah chuan a rawn thu thla a, "I duh ve em?" ka tih chuan a lu a lo thing mai a.



Ka nu chuan "Thei thur ei hi a hrisel hrim hrim a, ei duh chuan ei zel mai tur. Nau pai lai phei chuan kan ei chak te hi kan taksa mamawh a lo ni châwk a, ei zel mai tur" a lo ti ve mawlh mawlh a.



Vanmala chuan a vitamin rawn leite chu ei dan tur min hrilh zui mawlh mawlh a. Ka ei lai mekte an ni nawk a, a tam tham mai bawk si.



A thil rawn hawn ho chu ka hai a "Hei chu ka la ngah, hei pawh hi bur khat ngawt a la awm alawm. Hei hi ka luak a ti chhuak" tiin ka phawrh chhuah hote chu ka sawi zui zel a. Pawisa a seng tam awm si, a zialo tak tak ani.




Amah lah chuan "Doctor in tha a tih ho ania, i ei lai te pawh ni se i la mamawh zel dawn tho alawm. Lei teuh kha a pawilo" a lo ti tung a.




Ka nu pawh chuan "A thih hun a la hlat tho chuan thla riat vel i ei a la ngai dawn a, a pawi hlei nem" a lo ti ve bawk a. U Faktei chu a lo nui a lo nui mai.




Zan muthmunah chuan kan nupain kan titi leh mial mial a. U Faktei nen kan inkar a that vek tawh thu te chu ka hrilh a, vawiin lama kan thil sawite pawh ka hrilh ve thuak a. A lo bu nghut nghut mai.



"Rilru nuam deuhin awm tawh rawh" a tih chuan uar zet hian ka lo bu nghat nghat a.



"U Vanmal..." ka tih chuan "Eng nge ni ka nupui" a lo ti sup a, kan han nui leh rih.



A hnu deuhah chuan ka nu chungchang ka sawi veleh ta thung a.



"Engtikah nge a tlâwm ve ang le" ka tih chuan min chhang mai lo hian a thaw chhuak suai suai a.



A ngawih vang vang hnuah chuan "Vawiinah kan inhmu alawm" a lo ti zawi ta sup a, phawk zet hian ka melh nghal a.


"Maw?!!" ka ti hluai "Engtin, vawiinah maw?" ka ti bah nawk a. A lo bu nghal nghut.



"A tawngkhum leh tawh che em ni?" ka tih chuan a lu a lo thing mai a. Ka zawhna chin bak min chhang leh tawhlo. "I nû hi ngai sual lutuk suh" a lo ti sup a.



"Sawi chiang la" ka tih chuan "A nuam lo duh khawp mai" a lo ti hawk a. Ka lo ip nghal chawih. Eng thil tak lo sawi khum leh tawh ang maw.



"U Vanmal..." ka tih chuan "Hahdam rawh, i ngaih ang kha a nilo" a lo ti sup.




Tichuan ka nu nen an inhmuh dante chu min hrilh ta a. A doctor hmu tur kha lo ko pengin cafe ah a luhpui a. Ngaihdam a lo dil a ni awm e. Mak ka ti kher mai.



Vanmala chuan "Ka pi zawn a ni a, khatianga ka laka a inphah hniam kha hrehawm ka ti. Thil nuam a ni miah lo, hun kal tawh chu hun kal tawh a ni a. Tunah pangngai takin kan nung chho leh tawh a, a tawk viauin ka hria" a ti chuar chuar a.



Nuam lo a lo ti let zawk daih chu rilru tha hi ka lo ti leh mai mai khawp a. "Nuam lo ti duh suh, a tih ve tur a ti anih chu. Amah pawh a hahdam huai zawk ang" ka lo ti ve vat a.



Ka sawi dik ngei pawhin ka ring, ni hnih thum liam ta vel atang khan min biak danah a inthlahrung tih ka hrethiam ve a. Ngaihdam a dil tawh ber chuan a rilru pawh a nuam deuh ang.




Mahse ka nu chuan engti tiha ngaihdam lo dil ve ta mai nge a nih ka hre lo. A ngaihdam dil lai vel tur ka mitthla dawn ngial pawhin ka hmu thiam theilo.



"Eng nge a sawi reng reng a?" ka tih chuan "Thu tam kan sawi lo, kan nupa inkar kan sawi a , ngunthluk deuhin ngaihdam min dil bawk a, chu zawng chu. 'Mamtei tan kan lo thlang che kha kan lo ti sual lo khawp mai' te a tia, chu chu a sawi dik ka ti ber " uang thuang zet hian a lo tia.




Ka lo ner nang lai chuan "A ni lawm ni, min thlang hi tifuh i intih viau kha" a rawn ti veleh ngei a, ka nui ta tawp.



Ka chhanna hre lo mah se tifuh ka inti tih chu a hrechiang ber ang. Ka pasal anih vang hian vawi tam lawmthu ka sawi thin miau a.




Ka nu lo inphah hniam ta chu ka lawm takzet !



A tukah chuan ka nu phone call ka dawng a, tum dang zawng aiin kan inbe tha. Min hmuh châk thu a rawn sawi a, leng tura ka sawm chuan min hnial tlat thung a. A inkiltawih ve rih anih ka ring.




A fanu ka ni miau a, ka huatna te kha a bo zo a, ka khawngaih ta tlat pek a.


"Nu lo kal rawh, engmah inthlahrunna tur a awm lo. Ka nu nen chauh alawm kan awm" ka tih chuan a ngawi vang vang a.




"Lo kal rawh aw" ka ti leh hram a, "A...Mamte, i pa ka lo sawm ang a, nak zan lamah ka rawn inthurualpui zawk ang" a rawn ti hliai a.



"Nu... vawiinah pawh i hman chuan i lo leng thei tho alawm" ka ti leh hram a. A rawn thaw chhuak ham ham a "Mamte..." a rawn tih tak hakah chuan a thusawi tur ka lo ngaichâng ran a.



"Dik tak chuan ka inthlahrung ve a, sawi chhuah zen zen pawh hi ka duhlo. A hmaa Vanmala ka ngaihdan chu i hriat kha. Tunah chuan engkim a vel vek tawh a, ka tihsualah khan ka inpawm lutuk. Chutihrual chuan rawn pak hluak ka duhlo. A chhungte pawhin min ngai mak lutuk ang. Thudik lan veleh a tlawn ta hluak kha ka ang dawn lutuk a. A chhungte ngaihah pawh a mawilo alawm" a rawn ti ta duah a. A ngaihtuah thui peih ka lo ti khawp mai.




"Nu, ka pasal chhungte hi chutiang mî an ni hlei nem. Lo kal pawh ni la an ngai kawi dawn lo. Tha takin an lo be mai ang che. Thil ni thei i ngaihtuah nasa lutuk a, i rilru a hrehawm mai mai anih kha" ka lo ti ve luam a. Mahse min hnial ta tho a.




Naktuk zanah ka pa nen an lo len tur thu a sawi ta zawk a. Ka tilui duh tawh biklo.




Ka nu dinhmun tur chu ka hriatthiam pui ve ruak mai. Eng ang pawhin inthiamlo mah se mahni induhtawk tak a nihna kha a la bo bik lova. Ka pasal dikna a lan tak avanga rawn tlawn hluak anga lan a duh lo tihna a nimai.




Mi ngaihah pawh 'A hma zawnga ring si lo, thudik a lan tak veleh a mahni hamthatna tur ngaihtuah nghal' tih ve theih tak tur a ni a.




Mahse hei erawh ka hrechiang, ka nu leh U Faktei chuan Chutiang zawng chuan an ngai hauh lovang. Rilru kawi leh rilru chhia an pu ve tlat lova.



____________*____________*___________


Show post links
Top