DEPUTY_COMMISSIONER By_CVL_Awmpuii (Completed)

[Ngaia]

#PROLOGUE

Thinrim ru tunin kan inhmuhna hmun tura kan sawi lawk lam chu ka pan a. Ka scooty khalh lai pawh chuan ka inseh ruh teuh thei.

Eng ang hmeichhia ah nge maw min ngaih le? A duh duha a tihkual theih tur angah min ngai anih chuan a tisual hle ang.

Ka va thlen chuan tukverh bul thutnaah a lo thu fel der tawh a. A phone-ah mi a bia niin ka hria. T Shirt var thianghlim sar leh Cotton kekawr dum a ha a, a palian bawk a , a thutna chair chu a luah khat hneh khawp mai.

Ka va pan hnai a, min rawn hmuh veleh a mi biak hnenah chuan "Nakinah kan sawi tha leh dawn nia" tiin a phone chu a dah a.

Chutia ka ding khawng reng chu mitmeng dam thlupa min melhin "Lo thu la" a ti sup a.

Thinrim tunin a epa thutna awmah chuan ka thu thla hnawk a.

Rei fe chu rum zet hian ka melh a, mitmeng dam thlupin min lo melh reng thung.

"Eng nge min hmuh duh chhan chu le?" a rawn tih takah chuan "Engvangin nge ka pa bulah nupui atan min lo dil ve ringawt?" ka ti nghal deuh tawl a. A mitmengah chuan danglam a awm eih lo. Chu te hlei hlei chuan ka thin a tirim zual.

"Neih che ka duh alawm" a lo ti mai a, a hmel a dam deuh thlup bawk. "Ka nei ve duh lo che" ka lo ti bak hlak a. Min melh run run chung hian "I bialpa hlui khan a lo tibuai lehzel mai ang che. Keiin nupui ka mamawh tawh a, nangin inphenna tur pasal i mamawh bawk" a rawn ti nghet charh a. Eng nge maw a hriat hrep le !?

Chîk fê a melhin "Min lo ngaizawng thin em ni?" ka ti nghat a. "Ngaizawng lo e" a lo ti leh mai a. Chutia awlsam lutuk a min ngaihzawn loh thu a rawn sawi chuan min ti dang lel zawk alawm mawle. Ka zak chem chem mai.

"Anih chuan tinge nupuia min neih i duh ve ringawt" lawm lo zet hian ka ti leh hlur a. Ka lawm loh zia chu a hriatthiam ve tho ka ring.

"Ka nu in a duh che alawm" a ti awlsam et mai anih chu !

_____________________________________

Kan veng thenawm lawkah hian an in chu a awm a. An sawi danin a nu hovin an chêng a. Unau pahnih chauh an ni. Amah hi a upa zawk ania, tlangval naupang zawk zawk chu a ni tawh mawlh lo. A nau hmeichhia pawh nula senior a ni tlat tawh a. A hnathawhna avangin Aizawlah a awm ngai mang lova. Lawngtlai Deputy Commissioner(DC) a ni a. A hnathawh that te avang leh a huaisen em avang hian mi vengva deuh chin chuan an hre vekin ka ring, kei ngei pawhin ka hria. Ralkhat atangin ka lo ngaisang ve em em thin. Amah hretu ngaisang lo tunge awm ang? Kan Zoram tan hian a hlu em ani !


DEPUTY COMMISSIONER
By C.V.L.Awmpuii


Chapter 1


Thli a thaw vûk vûk a, khawpui a ri dur dur bawk a. Chhun lama ni sa tha viau si kha tlai lam a nih meuh chuan khua a dur leh viau tawh. Chhûm chhah mup mai chu ruahtui pai tih hriat zet hian a duk deuh ruih a.



Bazar tawt zetah chuan mipui chu ruahsur hmaa in chinfel tum tih hriat zet hian an inhnawh tup tup a, an ri deuh nuaih nuaih bawk.


Keipawh ka dawr thil pawn lama ka pho chhuah ho te chu hmanhmawh zet hian ka senglut zung zung a. Vawiin chu Aruati a hman loh avangin keimah chiahin dawr ka nghak a, customer thathnem vanglai tak a lo ni bawk nen buai a na duh zek mai.


Pawn lama ka jacket pho chhuah ho ka senglut fel chiah tihah ruah chu a rawn baw nghal hawk a, a tihzia phian mai. Bazar tawt zeta inhnawh ho chu an te nghal chûl mai.



Vawiin lama ka inhralhna pawisa ka chinfel lai chuan nu pahnih hi an rawn inzui lut a, an rawn phun deuh hlak hlak bawk.



Pakhat zawk chuan "Tunlai ruahsur peih lutuk hi chu a ninawm ngawt mai" a rawmawla inhruk hul pah chuan a ti hlak hlak a. "Mami ruahsur chhung chu kan lo awm rih lawk mai aw" a rawn tih zawm leh zat a. Nui sâng chungin "Tehreng mai, kha chair-ah khan lo thu rawh u" tih pahin thutna ka lo kawhhmuh vat a, an thu thla ve nghal mai bawk.



An titi chhunzawm leh a "Kan tunlai khawvel hi chu hmanlai ang khan ruah hian hunbi pawh a nei tawhlo, thal lai te'n a sur leh nawlh thin a. Fûr ah khua a ro leh em em ang lawi a. Mihring tan pawh inralrin vak ngaihna hi a awm tawhlo" nichin ami bawk khan a ti leh zung zung a.



Chutah pakhat zawk chuan "Ni chiah mai, tihian naktuk lamah chuan nî a sa leh vur awm tho sia" a lo tih zawm ve zat a.



Mihring hi chu kan mak ve ngawt mai. Ni a sat viau laiin kan phun phun a, boruak tidai turin ruah sur se kan ti ngawih ngawih a. Ruah a sur lahin kan sawisel bawk a. Pathian pawh hian kan chunga rorel dan tur hi a hrethiam lo ve ngawt thinin ka ring.



Ruah a hân deuh hnu chuan an inzui chhuak leh a. Ka pawisa chhiar lai pawh ka zo vel chiah bawk. Bawm chhunga ka dah leh dawn lai tak chuan ka phone a rawn ri a. Caller ID ka hmuh rual chuan atthlak zetin ka lei ka chhuah tet a. Thil theihngilh ka nei tih ka hrechhuak nghal zat bawk.



Ka phone ka ban rual chuan "Aw, pi..." ka tih zawm zat a. "Engtikah nge min lo lam dawn?" a rawn ti nghal var a. Ka lo theihngilh palh chu pawi ti lutukin ka chal ka dawm vang vang phawt a, ka va inthiamlo tak. Vawiin hi a in check up ni a ni a. Ka hruai kher hi a duh thin avangin dawr lama kan buai châng pawhin a in check up ni ah hi chuan dawr ka khar hmak zel.



"Dawr ka khar dawn chiah, ka lo lam nghal ang che" ka ti vat a. "Aw...lo hmanhmawh lutuk lo la, tum dang aiin i rei a, eng emaw i tawk anih ringin ka lo call tawp che anih hi" a rawn ti zung zung a.



Ka pi hi chuan min hmangaih a, keipawn ka hmangaih. A tu hmuh hmasak ber ka nih vang pawh a ni mai thei, ka unau dangte ai hian min hmangaih chu ka ti miah lo, mahse min duhsak bik hlein ka hre thin. Ka unau dangte paw'n thik enah min en hran lo bawk.



Hmingmawizuali ka ni a, ka naupang chhe zawk zawk tawh viau lo, kum 28 lai ka ni ve tawh. Tunah hian Aizawl ah ka pi, ka nu leh pa leh ka nau mipa te pahnih nen kan chêng mek a. Chhungkaw eizawnna lamah chuan Pathian zarah kan harsa lutuk lo. Ka pa hi PWD - ah J.E in a thawk ve a, ka nu pawh private school changtlung takah zirtirtu niin a thawk ve mek bawk. Ka nau chiah Puia nen hian kum 5 laiin kan inthlau a, tunah hian doctor nih tumin coaching a kal mek a, a tum a ruh bawk a, a hlawhtling ngeiin ka ring. Kan naupang ber Rina hi tunah kum 20 a ni ve mek a, ani chu college a la kal thung.



M.A ka zawh khan B.Ed ka training a, ka zir zo ve ngei a. Ka nu anga zirtirtu nih hi ka thil châk ber a ni thin. Mahse chutiang lam reng chu ka hawi thei meuh tawh rih lo. Ka ka nu û fanu U Vensangi'n pasal a neih dawn khan a dawr, tuna ka luah tak hi 'I inzir zawm zel nan i duh leh intuak nan hmang la, ka rochun daih ang che' min ti a. Ka luah tirh kha chuan chhungte tibuai lova ka mamawh ang lo phuhruk ve nan chauha luah ta kha ka nia. Mahse sumdawn nuam ka lo ti phian a, ka lo zeihawi ve zek si a. Tiral lovin tihian eizawn nan tak ka hmang ve ta chu ania.



Ka chhungte chuan an sawisel hran lova. Mahse ka nu hi chuan zir zawm se min ti tih a tawngkam atang hian ka hai bik lo. Chutihrual chuan zir zawm turin min tur lui ngai lem lo bawk.



Chhungkaw khawsak harsa tak ni lem lo mah ila puitling nih tawh chuan mahni intun din ve hi ka duhthusam a ni a, a turah ka ngai nghet hmak bawk. Tunah chuan hlawk thamin ka sumdawng thiam ve tlat tawh a. Mi pawhin ka dawr hi an hre lar ve viau tawh.



Hmanhmawh zetin dawr chu ka khar zung zung a. Ka scooty dahna lam ka pan lai chuan bazar information mic atangin thil bo chhar thu an rawn puang a. Hetiang thil thleng hian min lo tilawm ve veng veng thin.


Thil bo chhar tu chuan duh chu nise a thil chhar chu mi hriat lohin a nei thei dawn lutuk. Mahse amaha Mizo - na kha a rawn che a, nei lovin a neitu dik takin a hmuh leh ngei theih nan a puanzar tir tihna ania.


Mi thenkhat hian Mizoram chhiat tawh zia sawi fo mah se mi tha tlem te vang pawh hian kan ram hi a la rawn indin thar leh ngeiin ka ring thin.


Inchhung ka luh rual chuan ka pi ka au nghal lang lang a. Choka lam atang chuan "Mamte" a rawn ti a. Min rawn auhna lam chu ka pan ve nghal vat bawk. Thingpui sen hang a lo in a. Ka nuin eirawng a lo bawl mek bawk.



Ka nu chuan "I rawn lam har thu a lo sawi char char tawh a" a lo ti a. Ka pi bula thut thlak phah chuan "Vawiin chu keimah chiahin dawr ka nghak sia, ka lo buai deuh a" ka lo ti ve vat a. Ka pi chuan "A pawilo, a la tlai chhe chuang hlei nem" a thingpui dawt pah chuan a lo ti a.


Ka pi hmel chu ka en deuh vang vang a. Kum 80 lai a ni ve tawh a, a taksa chak vak tawh lo mah se a la fingin thil a la hre thei em em a. Tar phunchiar kan tih ang phei hi chu a ni lo nasa mai. Lungawilo lutuka a phun hi vawikhat mah ka la hrelo. Ka nu hian kan unau bulah "Dam rei a, fin in duh chuan i pi hnungzui rawh u" a ti fo thin.


Ka piin thingpui a in zawh chuan inthlak tawh lem lovin check up tur chuan kan inzui chhuak nghal a. Scooty a han inphurh chi a nih loh avangin tum dang ang bawkin kan in piah lawka taxi chu kan hmang leh a. Inhre sa kan ni bawk nen kawng tluan chuan an tih thin dan angin ka pi nen an titi tui leh viau tawh.


Clinic kan thlen chuan a tlai ve tawh bawk nen mi an lo awm vak tawhlo a. Card kan lak hnu rei vak lovah kan lut nghal a. Doctor chuan check ngai ang chu a check nghal zung zung a.


Ka pi hi BP sâng nei a ni a. A hma chuan damdawi nen in lamah awlsam takin kan inenkawl mai thin a. Mahse tun hnai hian a kum a lo upa ve tawh bawk nen lu hai a han dam sam loh hi a ching riau a. Doctor kan panpui chuan a BP adjust char char a ngaih tur thu min lo hrilh a. Tichuan, kum 2 vel liam ta atang khan thla tin check up turin kan kal ta ziah a ni.



Doctor chuan a hma aia hma a sawn thu min hrilh a. Ka pi pawh a lawm ve khawp mai. Damdawi ei turte min ziah sak hnu chuan kan inzui chhuak leh ta a.


"Nu Siam" damdawi lei tura kan din lai chuan ral lehlam atangin ka pi chu an rawn au a. Ka pi nen chuan âw lo chhuahna lam chu kan hawi vat a. A hmel ka hmuh rual chuan ka lo nui nghal var var mai.



Nu Malawmi a ni a, thla hnih thum vel liam ta a ka hmelhriat thar a ni. Ka pi check up tura ka kalpui tumin a fanu nen a pumpui thalo in entir turin an lo kal ve a. Ka hmuh tirh leh ka hriat tirh phat atang khan nu ngainatawm leh fel tak niin ka hria. Nu lian lutuk lo, mahse tê chhe lo a ni thung a. A hmel atang chuan ka nu ai kum 10 emaw a ai tam mahin a upat zawk ka ring.



Ka pi nen an titi a inrual a. Tum hnih chauh la inhmu mah se an inti hmelhriat lutuk tlat.


Kawngpui an rawn cross lai chuan ka pi chuan a lo en reng a "Mamte, tunge a? ka va hre mai lo, ka hmu fiah silo" a rawn ti a. Nu Malawmi anih thu ka sawi rual chuan a nui nghal hak hak a. Nu Malawmi chuan kan bul a rawn thlen zawm nghal zat bawk.



"In in check up zo tawh ami?" a rawn tih chuan ka pi chuan a lo chhang vat a. "In lo kal dawnlo emaw ka ti hman tawh a, keipawh ka zo chiah a, thil ka ei lawk e ka tia" a ti leh zung zung a. An inbiak lai chuan damdawi vel chu ka lo lei fel zung zung a.



Ka tihfel hnu chuan an inbiakna chu ka va pawh ve vat a. "Vawiin chu hruaitu i neilo a nimaw?" ka va tih chuan "Aw, Faktei a buai deuh hlek a. Naktuk lamah a û a lo haw dawn a, room a tifel a" a lo ti zung zung a. Faktei a tih chu a fanu, kan inhmuh hmasak ber tuma clinic a lo hruaitu kha a ni a. Ani pawh amah ang chiaha nelawm leh fel hi a ni. Kan inhmuh hmasak ber atangin min be nghal siam siam a. An fel nufa ka ti tak tak a ni.



Chutia kan inbiak lai mek chuan ruah a rawn sur leh ta mai a. A hân hun kan han nghak leh ren rawn a, mahse ruah chuan lungawi mai a la tum hmel loh khawp mai. Khawpui a la ri dur dur a, a sur uar telh telh emaw tih mai tur a ni.


Nu Malawmi chuan "Haw hma ka ngai asin mawle" a ti deuh halh a. Ka pi chuan "Tihian a baw hawk ang a, a hân veleh thuai mai ang" a lo ti vat a.


Nu Malawmi phone chu a rawn ri a, a pick up rual chuan "Aw, Fakte..." a ti zui nghal zat a. "Ka han nghak leh deuh ang a, hruai ka ngaih chuan ka lo call leh mai ang che" a ti a, phone chu a titawp zui nghal a.


"Min lo hruai a tum a, mahse in la haw theih hmel bik si lova, tihian ka lo awmpui rih ang che u" a ti zung zung a. Ka pi chuan "I duh leh i fanu chu in hruai tir rawh, keini pitu chu kan hmanhmawh hran hlei nem" a lo ti vat a.


Keipawh chuan "Nia...Nu Malawm, keimahni vangin inti khawtlai duh suh, i duh leh U Faktei chu in hruai tir daih rawh" ka lo ti ve vat a.


Chutah Nu Malawmi chu thil ngaihtuah chhuak thut ni awm tak hian a rawn phul hluai a. "Aww...ka van mawl tak, kan vaiin haw tlang ta mai ila. Lawk, Faktei chu ka'n bia ang e, car in min lo hruai awm tho sia, kan leng vek alawm" a rawn ti hluai a. "In thlah kual leh vel kha in tan a buaithlak ang" tiin ka lo khap vat.



Mahse Nu Malawmi chuan "Buaithlak na tur a awm lo, kan veng a inhnaih tho kha" tih pahin a phone chu a phawrh a. Ka piin "A tihzia dawn hlauh chu" a lo tih takah chuan ka hnial zui duh tawh bik lo.



Rei vak loah U Faktei chu a lo thleng a. Kan pitu min hmuh chuan a rawn nui nghal var var mai. Ruah pawh a sur buan buan tawh bik lova, mahse han do mai chi chu a la ni chuang lo.



U Faktei car ah chuan kan chuang ta dial a. "Malawmi chu fanu i nei hmeltha sia i fapa pawh a hmeltha ngawt ang a" ka pi chuan a rawn ti a. Nu Malawmi chu a nui nghal hak hak a "Tunu i nei hmeltha sia i tupa te pawh an hmeltha ngawt ang" a rawn ti veleh a. Ka pi pawh a nui ve nghal hak hak mai.



U Faktei chuan "Pi, U Mama chu kei ai daihin a hmeltha ania aw, ka tluk lo lutuk. Ka û mah nise hmeltha ka ti ve tlat" a rawn ti a, nui mah se a âw atang chuan a thutak viauin ka hria.


Ka pi chuan "Nang aia a hmelthat phei chuan in hmeltha unau viau dawn anih chu" a lo vat a. "Mamtei pasal atan ka lo hual ang" a rawn tih zawm leh zat a. Kan nui ho ta dar dar a.


Chutah Nu Malawmi chuan "Mamtei chu mo atan ka iai miah lo ania" a rawn ti veleh a. Ka nui veleh tak nain ka lai ru tlat anih chu.


Kan veng kan thlen chuan kan in awmna lai kan sawi a. Rei vak lovah kan thleng ve nghal mai bawk. Ruah pawh a lo bâng der tawh.


Car atanga kan chhuk rual chuan ka pi chuan "In hmanhmawh bawk sia ka sawm lut lui lo mai ang che u, mahse kan in awmna in hre ta bawk a. In lo la leng ngei ngei dawn nia" a ti zung zung a. An nufa chuan lo la len ngei an tum thu an lo sawi ve vat bawk.



Inchhung kan luh ruala ka mi hmuh avang chuan ka ner nghal nawk. Nu Muani a lo lêng, ka van hne tak.


Ka pi nen kan inzui lut min hmuh chuan min lo be nghal vat a "In pitu in check up chu eng nge in an a?" a lo ti nghal a. Ka pi chuan doctor in a lo tihdan te chu sawiin a chhang nghal zung zung a. An bulah a thu thla ve nghal zui zat bawk.



Room lama chhoh mai ka tum chu ka pain "Mamte, i Nu Muani hi thingpui lo lum lawk la" a rawn ti a. Phur lo lutukin choka lam ka pan nghal hnak hnak mai.



Ka thingpui lum lai chuan Nu Muani tawng zat zat ri chu ka hre pha vek a. Hriat loh theih pawh a nilo, a tawng ring bawk si. Thil dang ngaihtuah tum paw'n a thusawi ri bawk chu ka bengah a lut zel.



Thenawm khawvengte a rel leh zat zat tawh a. Mi fate ninhlei zia thu a sawi a, a fate an fel bik tawp si lo. Amah hi a inchei fai vur a, hmuhsitna leh rilru chhiatna lam ni lo se a fate an balin an tawp thei tawp. Chu chu thuhran, mi fate hi sawisel kher lo se a fate pawh ka enliam ve thei nimai tur ania. Mi a rel peih lutuk ber hi a fate leh amah engmah a nih bik loh avang hian a hneawm zual.



Ka thingpui chawh lai chuan Rina a rawn lut a. Nuihza insum zet hian min rawn nuih put put a. Fridge a hawng a , tui a in nghal khawlh khawlh a. A dah luh leh rual chuan "I bestie thingpui tur ami?" a rawn ti a. "Ka hne zia hi" ka lo ti nghal hlur.



Nu Muani ka nin zia a hria a, a lo len tawh chuan "I bestie" a ti ve ziah. Huat enah pawh ka en lo, mi ka rel ngai loh nen Nu Muani kher kher hi chu Rina bulah hian ka rel hrep zel. Ka hne ve thawkhat viau ani.



Dining chair a rawn thut thlak pah chuan a phone a hmet mual mual a "I duh ve em?" ka tih chuan lu a lo thing mai a.


Nu Muani thingpui tur ken pah chuan thutkhawmna lam chu ka pan phei a. Rina min nuih put put na pawh chu ka haider hmak.



"Awi...Mamtei chu thingpui te i lo lum a, a ngai kher lo asin mawle" a lo ti hluak a. 'A tirah te khan i duh loh tak tak chuan ka duhlo ti ta che' ka lo ti rilru hmanhmawh. Ka van sual tak.



"Pasalte hi nei vat vat rawh, i upa tawh si" heihi ania ka nin lehzual na em em chu ! A rawn len apiangin he thu hi ka hnenah a sawi ve ziah. Tinge maw mi pasal neih leh neih lohah hian a lo buai em em zel ni.



Ka awmdan hrethiam zetin ka pi chuan "Kan la phallo" a lo ti vat a, a nui lui deuh hak hak bawk. Inthlak turin room lamah ka luhsan ta daih.


Ka bag chu khumah ka theh a, ka kawrte pawh chu ka hlip deuh sawk sawk a, Nu Muani hmel ka mitthla a, ka thinrim hlur thei. Bathroom ka luh dawn lai tak chuan ka phone a rawn ri a, khuma ka bag chu ka ban leh rih.


Number hlang atangin a ni a, thil pawimawh anih ringin ka pick up a "Amâmte" aw zawi ruihin a rawn tih ri ka hriat rual chuan ka sa chhuak pup thei. Tunge a nih ka hrechiang lutuk. Kum hnih lai liam tawh mah se a âw hi chu ka hai lo nasa.


"Amâmte" a rawn tih leh takah chuan rang zetin phone chu ka hmet tawp nghal hmak. Ngaihtuah zawm duh lovin bathroom ah chuan ka lut nghal daih a. Ka mittui rawn hnâm ringawt chu ka duhlo kher mai.


"Engtikah nge he ka natna hi a reh ang le?" keima hriat tawk lek chuan ka phun sap a. A hunlai ang mai khan ka na thar leh vawng vawng mai. Mahse tah chu ka duh miahlo. Khapa vang khan ka tap tawh tur a nilo.



Inhnuaia ka chhuk thlak leh chuan Nu Muani pawh a lo haw tawh a, ka thaw huai mai. Ka chhungte chu an lo awm kim thap tawh a. Chhung inkhawm hmang turin min lo nghak reng tawh zawk hi a lo nia. Nu Muani len rei vangin chaw kan ei tlai phah dawn ta anih hi.




Ka pain hun a hmang a, 'Nunhlui inrah behtir reng tur a nilo' tih thu vel a sawi a. Hetiang lampang a sawi hian ka rilru a ti thar zawk daih.


Chhung inkhawm kan hman zawh chuan kan unauin chawei kan siam a. Rina chu a tawng pah mawlh mawlh a, ka lo zawm ve zeuh zeuh bawk. Puia erawh a dân ngai tein rengin chawhmeh a suak mawlh mawlh a. Ani hi chu ka pa ang chiah, a tawng mawh thin khawp mai. A tul tê lo chu a sawi ngailo reng reng. Mahse keini a chhungte lakah chuan a nelawmin a fel viau tho.



Chaw kan eikham fel hnu chuan thutkhawmna ah kan thu thap a, chanchin thar kan ngaithla a. Ka pi dar ka hmeh sak pah bawk a. Puia chuan phone a hmet mual mual mai. Midangho zawng chuan chanchin thar chu uluk em emin kan ngaithla a.


Lawngtlai lamah damdawi tawlh ruk a hluar thu leh vawiin lamah tam tham zet an man thu an rawn puang a. An man theih chhan pawh an bawrhsap(DC) finna vang anih thu an sawi tel bawk. Tunlai chu Lawngtlai DC hian a hnathawh thatte avangin Mizoram dung leh vang a fang chhuak hneh tlat.





Kan veng thenawm lawkah hian an in chu a awm a. An sawi danin a nu hovin an chêng a. Unau pahnih chauh an ni. Amah hi a upa zawk ania, tlangval naupang zawk zawk chu a ni tawh mawlh lo. A nau hmeichhia pawh nula senior a ni tlat tawh a. A hnathawhna avangin Aizawlah a awm ngai mang lova. A hnathawh that te avang leh a huaisen em avang hian mi vengva deuh chin chuan an hre vekin ka ring, kei ngei pawhin ka hria. Ralkhat atangin ka lo ngaisang ve em em thin. Amah hretu ngaisang lo tunge awm ang? Kan Zoram tan hian a hlu em ani !



Amah tak phei chu a takah ka la hmuh awm ka hrelo, a chhungte pawh ka hre hran lo. Mahse sawi tawh ang khan ngaihsanawm ka ti ve thlawt a ni.



Chanchin thar puan zawh veleh Rina chuan Lawngtlai DC chungchang chu a sawi zawm leh nghal zat tawh. A ngaisang ve chiang ania. Rina hi chu ram leh hnam hi ama tawkah a vei ve hrim hrim bawk a. Mizoram tana hnathawk thate hi chu an hming a lo hre ve nghal zung zung zel.




"Mizoram hi chu tun ang renga kan kal chuan kan la ral ngei ngei ang" a ti hluk hluk a. Ka pa in a lo sawipui leh vat tawh. Pafa tih takah an titi hi a rual thin ania.



"Lawngtlai DC hi a ngaihsan awm ngawt mai. Dik ni a a hriat hi chu huai takin a ti pawp zel mai a. Hmanni pawh sawrkar laipui nen buaina an neih phah hial a ni awm e" a ti leh zung zung a. A inchhiar zau bawk a thilte hi a hre thei ania.


"Tunlaiah sawrkar hnathawk ei ru an tam a, an inthurual nasa dawn sia. Anni ang dikna ngaina mi hi chu huat rawn an hlawh dawn tih a chiang sa" ka pa chuan a lo ti ve vat a.



Politics chungchang an sawi chho tan a, ka nuin a lo zawm ve zeuh zeuh bawk a. An tui chho tan viau mai.



Chutia an titi vel lai chuan ka pi nen thu dang sawiin kan lo titi ve a. Puia chu a room ah a chho leh daih tawh a, lehkha a zir dawn anih ka ring. A lehkha zir ang hian inzir ila chu ka â vek tawhin ka ring.



Chutia ka pa te an titi lai chuan ka pi nen kan lo titi ve a. A titi ka ngaithla a ni zawk mah. Hmanlai chanchin, rambuai lai vel bawr te chu tui zetin a sawi siam siam a. Uluk deuhin ka lo ngaithla a. Ka pi titi hi chu ngaihthlak nawm ka ti hrim hrim a, a sawi ngai sawi nawn tlut tlut chang nei mah se ka ning ngailo hrim hrim.



Dar 8 leh a chanve a rik dawn chuan mut a duh tawh thu a sawi a. A thawh dawn chuan ka lo pui vat.


"Taka Mamte, ka puan bah hi vawiin tlai khan ka hmu ta miah lova, kan in entir dawn khan ka batin ka hre bawk sia. In entir naah khan ka theihngilh emaw nile?" a ti nuah nuah a.



"I keng lo zawk a nilo maw?" ka pa chuan a lo ti ve vat a. "An chhuak tur kha ka hmu a, a bât ngei alawm" ka nu chuan a lo ti ve vat. Thutkhawmna ah chuan kan han zawng kual a, kan hmu ta mai si lova.



Clinic kan awm lai kha chuan a la bât ve ngei a. Ka mitthla in kan kalna ho zawng zawng chu ka chhui let a. U Faktei car a kan luh dawn thleng khan a la bât chuan ka hria.



"Pi car ah khan i theihngilh aniang a..." ka tih chuan hrechhuak thut niawm tak hian "Ni dawn tak, ka phelh tak alawm, a ni ngei ngei ang" a lo ti nghat nghat a.



"Khawi car ah maw?" ka pa chuan min lo zawt a. Ruah a sur avanga kan haw dante chu ka hrilh a. "Anih dawn chu" a lo ti ve mai bawk. "An phone number te in nei em?" a tih zawm leh zat a. "Nei miah lo" ka lo ti hap.


Ka nu chuan " Engtin nge in inbiak leh ang a?" a lo ti a. Ka pi chuan "Tih dan a awm mai ang. In entir leh hunah te pawh " awlsam zet hian a lo ti a.


Ka pi mut hnu chuan midangho pawh room lam kan pan ta vek a. Khuma ka mut fel hnu chuan ka phone ka check a, number hlang atangin message tam tham zet a lo awm a.Vawiin-a phone call ka dawnna atang khan a ni tih ka hailo.


Ka hawng ang nge hawng lovang tih ka inngaihtuah lai tak chuan U Vensangi hnen atangin phone call ka dawng a. Ka pick up nghal vat.


"Mamte, Lalrinmawia kha a lo kal em?" a rawn ti a, a aw atang chuan a mangan hmel hle bawk.


"Kal lo aniang, kan mu vek tawh" ka lo ti vat a. "A tihzia hlauh chu" a rawn ti nghal halh, a thaw huai bawkin ka hria.


Tim deuh dai hian "Tinge a?" ka ti sap a. Rinmawia chungchang ber kher min rawn zawt chu mak ka ti. Kei ai mahin a haw zawk emaw tih mai tur a ni sia.


"Nichinah khan i chanchin min rawn zawt a. In in-a a kal tur thu in min vau a" a ti a. Ka lo inhum ruh vak ringawt. Tinge maw min la tihbuai tlat mai le.



"Mamte, ka ngaihtuah riau che ania. Tunlai chu zu a in nasa bawk sia, buaina siam a hreh si lo. Pehhel dan kawng dap hram hram rawh aw" a rawn tih zawm leh zat a. Mit ka chhing deuh sawk a "Ka hrethiam alawm" ka lo ti nghet charh.


"A la rawn be buai thin reng reng che em?" a rawn tih chuan vawiina phone call ka dawnte leh a message te chu ka ngaihtuah let a. Mahse "Aih" tiin ka chhang daih thung. Min la tibuai thin tih a hriat chuan awmze nei lovin a lo mangang leh vak ang tih ka hlau.



U Vensangi nen kan inbiakna kan tihtawp hnu chuan phone pawh khawih zawm tawh lovin ka mu meng kar a. Ka hun liam tawh te ka ngaihtuah let a. A hunlai ang em kha chuan na tawh lo mah se keimaha natna châm bang la awm tlat hi a reh hlei theilo. Ka na nawn leh thin.



Ngaihtuah duh tawh lo zetin lu ka thing nak a. Phone bawk ka ban leh a. YouTube ah news ngaihthlak tur ka zawng a.


Recommend ah chuan Lawngtlai DC Vanmalsawmhlua chungchang deuh hlir a rawn lang nghal tuarh a. Drugs man chungchang te, rangkachak tawlh ruk man chungchang te, sawrkar laipui nen an buaina te, Lawngtlai mipuite tana a thil tih zawng zawngte tih vel a ni.




Vawiin lama drugs an man tak chungchang vel chu ka ngaithla a. Lawngtlai khaw luh dawn tawntirh ah an man hi a lo ani a. Police ho checking neihna a tlawh kual tum a lo ni bawk nen police te chu a pui ve a. Chutiang vel atanga an man chu niin a lang.



Comments ho chu ka chhiar thla dan dan a. "Lawngtlai DC Vanmalsawmhlua ang hi Mizoram mamawh tak chu a ni. Huaisen takin bei zel rawh se" tih tein an fak liam liam a. "A kuang lo a nawr a ni" ti a lo sawisel tawkte pawh an awm ve nawk bawk.



Ka lo muhil daih a, zing ka harh chuan dar 7 a lo pel tawh a. Hmanhmawh zetin ka inphih fai zung zung a. Dawr hawn a hun daih tawh.


Inhnuai ka chhuk thlak chuan ka chhungte chu an lo tho vek tawh a. Ka pa leh Rina'n chanchinbu an lo chhiar a, Puia chuan lehkhabu a lo chhiar leh tawh. Ka nu leh ka pi chu choka lamah an lo awm a.



"Nimin lamah nangmah chiahin dawr i nghak sia, i chau anih ka ring a. Ka kaitho duhlo che anih kha" ka nu chuan a lo ti vat a. Ka pi chuan a thutna bula thu turin min lo hui vat a.



Ka thut thlak ve rual chuan "Ka puan bah chu engtin nge kan tih ang aw" a lo ti vang vang a, a ui hmel hle bawk. Puan bah satliah a ni lova ka puin a boral hmaa a thil leisak hnuhnung ber a ni a, a tan chuan a hlu em em a. Khawi ilo vah chhuahna apiangah a bat thin a. A roh takzet bawk.


"Tih dan kan ngaihtuah dawn nia" ka lo ti vat a. Dik tak chuan tih vak ngaihna ka hre biklo. A ngaihthat nan ka sawi a ni pakhat. Nizan lamah kha chuan 'Tih dan a awm mai ang' ti ve bawk tak mah se tih vak ngaihna a hriat hmel loh.



Kan inhmuh hnuhnun ber tum khan Nu Malawmi lah khan 'Check up ka ngai tawhlo mai thei' a ti bawk si a. Beisei a bo viau mai.



Ka tlai ta sa sa tiin chawei khamah dawr chu ka hawng a. Aruati a awm tawh bawk nen buai pawh a zia chho viau mai.



Customer an awm loh lai chuan chaw chhun kan ei dun a. Nimin lama a hun hman dante chu min hrilh seuh seuh a. Kan nui dun leh hak thin.



Thian hi ka kawm tam vak lo a, thian ti a han sawi tur chu ka nei ve nawk. Mahse thian tha tak tak anga chhal ngam hi ka nei mang lo. Kan tette atangin U Vensangi nen kan inkawp chawt a, kei ai kum 4 laiin upa mah se kan inkawm tawk viau a. A puitling a, naupang zawk ka nihna angin min dawm thiam hle bawk. Mahse pasal a neih hnu hian kan inkawm tam hman mang lova. Nau a pai zui nghal mai bawk nen chhangchhe nu a ni nghal a. Tunah chuan fa pahnih a nei ve tawh a. A pasal U Mapuia hi a fel a, ka va leng lut fo a. Nau ang tak hian min en avangin keipawn û neihin ka nei ve a. Kan inpawh viau bawk.



Tichuan Aruati hi chu ka dawr a thawk a ni a. Kum 3 chhung a rawn thawk ve tawh a. Ka mi chhawr ang pawhin ka ngailo, nau enin ka en a, ani pawhin û angin min en vein ka hre bawk. Sawi tur ka hriat loh viau lai pawhin ani chuan sawi tur a hre zel a. Min tihlim thei viau mai.


"U Mamte, ngaih loh lamah lo ngai lo la. Niminah chuan Feli nen kan inhmu a" a rawn ti zawi deuh hliai a. Ka thil ei lai chu ka tawp deuh dat, mahse engah mah ngailo angin ka nuih sak a.



"Ani maw..." ka ti ringawt a, a inthlahrun hmel hnuhnawh lutuk chu ka khawngaih deuh. Mahse "Khawiah nge in inhmuh a?" ti a ka zawh takah chuan tha deuhin min rawn chhan zawm a "Kan vengah an nufa in an lo kal a, kan inhmu pawh a ni chiah lo, kawngah kan intawk fu ve satliah a nimai" a ti ta zung zung a. A fanu chu a lian ve tawh ngawtin ka ring. Kum hnih lai a liam ve tawh si a. An chungchang hi ngaihtuah loh ka tum pawhin an rawn inlar leh thin a. Ka tan pawh hian a harsa ve lutuk.



Sawi zawm ka duh vak lo tih chu ka awmdan atangin a hrethiam aniang titi dang a rawn vawrh ta daih a. Ka thaw huai mai.



Tlai dar 5:30 velah dawr kan khar a, Aruati ka thlah hnu chuan in lamah ka inkhalh haw zui ve nghal a. Rinai takin traffic pawh a thawl viau mai. In ka thleng har lo.



Inchhung ka luh chuan an lo ri deuh hlut a. Thutkhawmna ah ka chhungte chu an lo awm kim thap a. Ka chhungte mai bakah min hnungchhawn zawnga mipa pakhat lo thu rûn chu hmuh hmaih a har kher mai.



Ka piin min rawn hmuh chuan "Mamte" tiin an zinga kal tur chuan min lo hui vat a. Chu veleh mipa lo thu run pa chu a rawn leh hawi vut a. Lawngtlai DC Vanmalsawmhlua a ni tih ka hriat rual chuan ka lo phawk hle ringawt. Kan inah a rawn lang teh nawlh chu a mak em ani.


______________*_____________*_____________


(Ti thleng hi ni phawt rawh se aw)


Love covers all hmangin Pathian hmangaihna (Agape) ah kan inchiah hneh tawh bawk a. Tunah chuan ram leh hnam hmabgaihna (Patriotic) lamah kan inchiah veleh delh delh dawn nia. Tin, a romantic viau turah ngai bawk ang aw.


Show post links
Top

[Ngaia]

DEPUTY COMMISSIONER
By CVL Awmpuii


Chapter 2


Ka mak ti chu chet lawk nachang ka hrelo a, kawngka bulah chuan ka ding ren rawn a. Ka piin "Mamte, lo kal vat teh" a rawn tih leh takah chuan harh chhuak thutin thutkhawmna lam chu ka pan ve nghal a. DC pa lah chuan min melh zui ve reng bawk a, ka zam titih ringawt nia. Rina'n min lo nuih leh hmanhmawh tawh tih ka hria, chu erawh ka hai der hmiah thung.



Ka pi bulah chuan ka thu thla a, chutah ka pi chuan "Heihi ania ka tunu Mamtei chu" min chhuang zet hian a rawn ti hluai a, ka kut a rawn chelh nghal bawk. Ka zak ve ringawt nia.


DC pa chu a bu nghut a "Ka nuin a sawi thin che a" min en reng chung chuan a ti sup a, han sawi mai tur a hre bik lo aniang. Keipawh chuan han chhan vak ngaihna ka hrelo a, za lo deuha nui sak chungin ka bu nghat ringawt.


A hmel chu TV ah leh phone ah te lo hmu ve bawk tawh mah ila a takah a lo palian daih zawk. Hmeltha han tih vût tur chu ni lo mah se hmelchhe miah lo. A vun a uk deuh kharh a, ka sawi thiam dan ber chuan a mipa hliah hliah. Kamis pawl duk a ha a, a ban a thlep chho a, smart pants dum hain smart shoe a bun a. A banah chuan sana a bun bawk. En thuak pawha ennawn leh tur ang chi kha niin ka hria.



Ka pa chuan "I pi shawl theihngilh a lo dah a" a rawn ti a. Engtin nge ka pi shawl chu a lo kawl teh daih ka hrethiam lo kher mai.



Ka nu chuan ka rilru a hrethiam a ni ngei ang. "I pi in theihngilh na car kha an ta ania" a rawn ti a. Ka la hrethiam chiah chuanglo. Ka pi chuan lo sawi zawm vein "I Nu Malawmi fapa, Faktei û kha DC hi a lo ni reng a. Mak i ti ve tho em?" a rawn ti a. Ka meng deuh awk a, "A va mak ve" ka lo ti ve ngawt a. Ka awmdan chuan Lalrinkima nuih a la tiza ngang mai. Nuih insum hmai sen teuhin a lo awm ve char char.



Tichuan an bulah chuan ka thu ve ta reng a, ka chesawn ngam tawhlo a ni ber. An titi chu ka lo ngaithla ve a, zahzelah ka phone ka tuai tuai mai.


Rina chuan "I hna hi a hahthlak ve ngawt lo maw" tiin a zawt a. A mi ngaihsan em em kha tunah kan inah a lo lang hlawl a, zawhna a ngah ngawtin ka ring.


DC pa chu a khuh deuh kharh a "A hahthlak chang chu a tam, mahse thahnemngaihna avangin nin ngawih ngawih ang hi ka la nei ngailo" a lo ti tha ve mai a.


Ka pa chuan "I chanchin kan lo hre thin a. Nangni ang hi chu ram tan in hlu ania. Tunlaiah fel leh tha nih kan tum lutuk na lamah sual kan vulh lian fo a. Midangin min ngei ang, min ning ang, tih vang te hian dikna pawh kan tan ngam mang tawhlo hlawm a. Mahse nang chu huaisen takin ke i pen zel a, tha ni a i hriat chu i ti tawp mai zel a. Khatiang zel tur kha a ni" a lo ti dap dap a. Midangho pawh chuan ka pa thusawi chu an pawmpui hmel viau e.


Chutah Vanmalsawmhlua chuan "Dik lohna in bu a khuar nasa tawh lutuk a, dikna hi a langsar tawh mai mai zawk alawm. Ka thawh that bik vang a ni hran lo. Dik tak chuan dikna in rorel zel chu ni ila, sual a langsar ang a, hnathawh pawh a awlsam sawt tur ania" a lo ti nghet charh a. A âw atang chuan a inringtawk thawkhat viau tih a hriat theih.



A thusawi chu Rina pawm zawng tak a lo ni a, "Ni chiah mai. Kan ram chu sual kan palzam sawt lutuk a. Thil tha lo anga va lang em em si lo, thil tha ni chuang si lo hian min la ei chhe khawp ang. Tun ang renga kan kal chuan kan hnam hi kan la boral ngei ngei ang" a lo tih zawm ve zat a. A titi tui ber a ni miau a, sawi tur pawh a hre zulin ka ring.



Tichuan ka pi, ka nu leh pa, Rina leh Vanmalsawmhlua te chu Mizoram inrelbawl dan chungchanga an vei zawngte sawiin an titi a. Kei leh Puia chuan sawi tur kan hriat ve loh avangin kan lo ngawi tawp a, phone kan tuai tuai mai. Ka phone khawihah chuan rilru ka pe hran lo, an titi chu ka ngaithla a ni zawk mah.



Vanmalsawmhlua chuan "Mizoramah hian thalai ram hmangaih tak tak, vei tak tak hi kan tam tawh. Mahse tuna kan politician te hian politics hi tenawmah an chhuah zo a, an vai chuan ka ti lo. Mahse huang tau takin dik lo takin an che chhuak ngam tlat a. Hei tak hian thalaite rilruah politics chu thil tenawm ang maia ngaihna a tuh a. Mi tha tan politics chu zuan luh ve thiang loah kan ngai a. Hlawkna ûm a mi pam ham te ho bawkin an rawn luah lan leh a. A tha lo takzet ani" a ti dap dap a.



A thil thlir dan chu ka lo ngaihtuah ve rauh rauh thin, ka sawi chhuah thiam si loh a ni a. A thusawi atang chuan a hnaah a chiang hlein ka hria. An titi chu ka ngaithla ve ta zel a. A ngaihdante chu a fingin ram tan thahnem a ngai hlein ka hria. Ka ngaisang zual sawt mai.



A haw hnu pawh chuan ka chhungte chuan an fak zawm mawlh mawlh a. Kan chawei laiin ka pi chuan fiamthu ti tak deuh hian "A palian sia, a takah a hmeltha khawp mai" tiin a fak hlak a. Rina chuan "U Mamtei pawh a lai chhe lo chauh mawle" a lo ti uang a. Ka meng no lo teh e.


Chawei thleng ka sil zawh chuan inkhawm dar hmasa alo ri vel chiah a. Nilai zan a ni a. Keipawh inkhawm turin ka insiam nghal zung zung a. Kohhran inkhawm hi chu a theih hram chuan ka thulh ngailo tluk a ni. Kan chhungkua hian kan ngai pawimawh hrim hrim bawk a.



Ka pi hian "Kan dam tha a, eng emaw rokhawlhna riah a awm te anih loh chuan inkhawm hi thulh mai mai loh tur" a ti bur thin a. Keini pawhin chu chu kan zawm vek.


Ka insiam zo inhnuai ka chhuk thlak chuan ka nau te pahnihin min lo nghak reng tawh a. Thian ka kawm tam lo tih an hria a, inkhawm pawh unauin kan kal rual mai zel a.


Ka nau te ka fak ve na deuh chu tlangval an ni ve uaih tawh a, û te nena inzui reng pawh an ning ve thinin ka ring. Mahse ka awm nawm lohna turin vawikhat mah an awm ngailo. Ka chungah an zawldawh em em zawk a. Ka vannei takzet.


Biakin kan thlen chuan U Mawia'n min lo fiam zuk a "I nau te zui kual reng lo hian zui kual tur dang zawng ve tawh rawh" a lo ti a. Ka lei ka chhuah khum a, ka kut hum ruhin ka tin nghal uaih a. A lo nui nghal hawk hawk. Keipawh ka nui veleh tho.



U Mawia hi kan kohhran KTP hruaitu a ni a, min fiam peih em avang hian ka nel ve a. A fel ka ti hle bawk. Kan inah pawh a lo leng lut ve zeuh zeuh thin.


Pawnah awm khaw tawi tawh lovin Biakin chhungah chuan kan lut nghal a. Ka nau te chu mipa thutna lenah an thu dun a. An thutna zawn chiah hmeichhe lenah ka thu thla ve nghal bawk.


Kan kohhran hi chu inkhawm boruak a tha thin a. Kan hlim deuh reng a, lamtual pawh a mawi tawkin luah lum tu an awm reng thin. Keichu Biakin a han lam vel hi ka zak tlat a. Zai erawh chu nuam ka ti a, ring taka zaia kut ben hi ka tih ve theih tawk chu a nimai.



Inkhawm kan ban chuan dar 8 a pel deuh hret tawh a. Haw mai tuma bathlara kan din lai chuan KTP hruaitu te'n "Mamte, zanin chu kan sawi lawk lo nain i hla sak tur kha ennawn ila" an rawn ti a.



Karleh lamah hian KTP in Bial meet kan nei dawn a. Chutah chuan fellowship naah hruatu te'n zai turin min ruat tlat mai a. A tirah chuan ka pha nasa hle a, ka titau lek lek hial. Veng chhungah han zai châng nei mah ila bial huap angah chuan ka zam a ni ber. Mahse ka piin "An ring tawk che a, zai ngailo pawh i ni lova zai ve mai rawh" a tih takah chuan ka pha ngam tawhlo a ni ber.



Ka nu hi a nulat laiin a zai ve thin a. Zaithiam lar vut ni lo mah se veng chhung leh bial chhung angah chuan zaithiam hriatin an hre ve a. Chumi chu chang chawiin sunday school a kan zirtirtute'n ka tette atangin special item ah min zai tir ta thin a. Ka zaithiam leh thiam loh phei chu ka hrelo. Mahse zaithiam min titu chu an awm ve nawk thin. Min fak der ve pawh a ni mahna.



Chutia hla ennawn an tih takah chuan ka hnial lo khawp mai. Inpuahchahna hun a tlem tawh sia, theih ang anga inbuatsaih ve ka duh. Ka naute chu lo va haw hmasa mai turin ka ti a. An kal ve mai bawk a.



U Mawia'n min ho a, a kar lakah fiamthu a lo thawh leh thin a. Kan nui kan nui mai.



Kan chawlh lai chuan a bula thutna awl chu a lo beng thuk thuk a, thu turin min mitmei a, mipa dangho chu meizial zu turin an chhuak thung.


Ka va pan ve mai bawk a. A bula ka thut thlak rual chuan a nui suk suk a. "Eng nge...?" ka ti ha a. A lu a han thing nghut ringawt a. Min en a, a nui vur vur zel bawk sia ka ngaih a titha lo.


"Eng nge a...?" ti hlak pahin ka nam dat a. Chutah thu tak zet hian "Rinmawia nen hian in inbe tha leh deuh ami a?" a rawn ti a. Chutia Rinmawia hming a rawn sawi takah chuan ka lo ip chawih mai. Tinge tun thleng hian a hming an lam hlek pawhin ka chhungrilah danglam a la siam tlat le.



U Mawia chuan min en run a, ngaihsam hmel zet hian "Teuh nang" ka lo ti nghat a. "A tha" a lo ti nghut, a nui leh suk a. Ka ner deuh nang a "Eng nge nuihzatthlak awm a? Nichin atang khan min nuih char char tawh" ka ti deuh nang nang a.



"Ka sawi chuan i zai duh tawhlo palh ang" a lo ti a. Ka zai lai viau emaw nile tiin ka lo ngaihtuah hmanhmawh. Theihtawp chhuahin ka zai ve a, ani lahin min lo nuih char char a. A va han sual tak.


"Eng nge sawi ve mai la, ka zai lai ami?" ka tih chuan a lu a lo thing leh mai a. A nuih a la zat hmel tho mai. Ka lei ka chhuah khum leh ringawt tawh. Za zeta a nuih leh tak kha.


Midangho an lo luh leh takah chuan ka tho tharh a, vawikhat kan ennawn leh chhin a. Live music in kan perform dawn a, tihsual palh pawhin tihdan a awm ve maiin ka ring.



Ka haw dawn chuan U Mawia chuan "Ka lo thlah ang che" a ti a. Sana ka en a, dar 11 a lo ri thuak tawh. A tlai tawh avangin mahni a haw chu ka ngam chiah lova ka lo hnial ta bik lo. Ka chhungte'n hla kan ennawn tih an hre tho a, min lo ngaihtuah lutuk lo turah ngai ang.



"In in kawng leh kan in kawng a inang si lova, ka ti tlai duai palh ang che" ka han ti mawihnai ve a. A ni reng bawk a. Biakin chhak lam hi an in kalkawng a ni a, keini thlang lam daih a ni bawk si.



"Mahniin i haw ngam ami?" a ti hluk, nuih tlawn pahin "Ngam chuang lo e" ka lo ti leh mai a. "Khatia inthlahrun der vel kha a ngai lo, kal mai mai teh" tih pahin ka darah chuan min nem kal dat dat a, ka lo nui hak hak thung.



Kal pah chuan thu ho tete kan sawi a. Lalrinmawia chungchang a rawn sawi leh takah chuan ka kâ ka lo chip hmak.


"Mipa pakhatin a bum vang chein mipa zawng zawng hi i lo ngai khawlo zo ange. Khatiang kha kan ni vek bik lo ania. Ngaihzawng thar neiin nun bul tan leh tawh rawh. Kum 2 lai a vei tawh a, hmalam pan tawh rawh" a ti charh charh a. Min duhsakna âw ka a ni tih ka hria. Mahse hetia min sawipui zel hian a sâwt fahran lo. Min hriatchhuah tir mai mai thin.



A chang chuan mihringte hian thurawn tha tak tak min petu aiin ngawi renga kan dinhmun min thlir thiam saktu kan mamawh fo !



"Ka thusawi chu i hrethiam tiraw" a rawn ti a, a ding deuh dat a. Min melh deuh run bawk. "Ka hrethiam alawm" ka ti halh a. Ka samah tuaiin "I nula ve tawh lutuk " nuihza aw deuh hian a ti a. Ka ner zui nawng.


Nula senior tih theih ka ni ve tawh a, min chhaih uanna a ni tih ka hria.



Kan in gate bul kan thlen chuan U Mawia nen chuan kan inmangtha a. Inchhung ka luh chuan an lo reh thuap tawh a, an mu vek tawh anih ka ring. Keipawh tawi khawmuang tawh lovin room ah ka chho nghal a.



Mu tura ka inbuatsaih lai chuan ka room kawngkhar an rawn kik a "Mamte i mu tawh em?" ka nu âw ka hre nghal zat. Ka rizai pharh lai chu dahin ka va hawnsak a. Min lo nuih var var.


Ka room chhungah chuan kan inzui lut a "Rin aiin i lo haw har a" a ti nghal zat. "A hnai tawh sia kan zir âm ve deuh a" ka lo ti ve vat a.


Ka khumah chuan a thu a, side table a kan chhungkaw thlalak ka hûn chu a ban nghal zat a "Chhungkaw thlalak hi lak that leh a ngai tawh a ni" tiin a dah let leh a.


Darthlalang hmaa ka sam khuih lai chu min melh deuh vang vang a. A thaw chhuak leh hak thin. Zan tlai tawh a ka room a a rawn luh chuan chhan a awm a nimai. Mahse a sawi hma chu zawh ka tum hran lo.



"Mamte" a rawn ti halh a. Ka sam khuih chu chawlh san chuang lovin darthlalang atang chuan ka va melh a, nui var var chung chuan "Aw, nu sawi la" ka lo ti vat.



"Rinmawia chungchang ka sawi duh" a rawn ti sap a. Ka melh zawk a, ka sam khuih lai ka chawl nghal dat bawk. Tinge maw tunlai hi mi zawng zawng hian Rinmawia chungchang min sawipui an tum hlawm le.


"Anih chuan sawi la" ka ti zawi sap a. Ka âw a lawi lek lek bawk. "Hetiang dinhmuna in din atang hian vawikhat pawh a chungchang i bulah ka la sawi ngai lova. Mahse kum hnih lai a vei tawh a. Sawi a hun ve tawh viauin ka hria" a ti charh charh a.



A sawi dik chiah. Ka nu hian Rinmawia chungchang hi kan inthen atang khan ka bulah a la sawi leh lo hrim hrim. A tirah pawh mak ka ti hial anih kha.


Chair ah chuan ka thu thla a, ka nu thusawi tur chu ka ngaichâng ran a.


"Mâmte, tunah hian ngaihzawng lam i ngaihsak ta miah lo em ni?" tiin min zawt a. Ka ngaihtuahna hriat tum ni awm takin min melh kal bawk. "Chutiang lam pawh a nilo" ka ti hap.


Bumna lian tham zet tawk tawhtu tan chuan midang rin leh hi a harsa lutuk. A tawng tawhtu tan lo chuan hriatthiam a harsa ang.


Ka nu chu a thaw chhuak deuh halh a "Mipa dang ngaihsak a hun leh tawh viau ania aw Mamte. I thil tawnte kha a harsa hle ang tih ka hria. Mahse hmalam pan lova awm reng tur a ni ngailo. Mipa pakhat vangin na mah la mipa pakhat vang bawkin i dam leh thei ania" a ti dap dap a. A thusawi chu zawm ila min tih hmel hle bawk.


Ka nu chuan thu tha tinrengin min fuih a. Hmalam ka pan chu a duhthusam ber a ni. Keipawn chu chu ka duhthusam ani. A hma ang em chuan na tawh lo mah ila hma lam pana ke han pen leh mai ka harsat tlat a. Mahse hmasawn tawh tak chu ka ni.


Ka nu chhuah hnu chuan khumah mu chungin ka inngaihtuah vang vang a.



Lalrinmawia hi ka ngaihzawng hmasa ber a ni a. Mipa hi ka ngaihsak ngai mang lova, mahse college te ka han rah ve hnu khan kan intawng a. Min rawn bia a, a tirah chuan mipa dang ang bawkin ka ngaihsak lem lo. Mahse thla thum vel dawn min rawn biak tak ngat ngat hnu chuan ka ngaina chho ve tan a. Kum khat kan inhriat hnuah kan inngaizawng ta kha ania.



Mipa cher sang lampang, vun hang lam aia ngo lam pawh mah mah, hmeltha vur mai hi a ni a. Lo ngaizawngtu pawh an tam. Mahse ka tan a rinawm ve viauin ka hre thin.


Buaithlak deuh chu zu a in ve thin a. A ruih tawh chuan a hahthlak thei lutuk. A thik thu a chhe thar em em a, a thinchhe em em thin bawk. Awmze neilo leh chhan awm loin a thinrim leh ringawt zel. Mahse a harhfim hunah ngaihdam min dil a, ka lo hmangaih viau ania nge ka ngaidam leh mai thin.



Hei vang hian kan inzui tih ka chhungte'n an hriat tirh phat atangin buaina kan tawk chho zeuh zeuh a. Midang chuan engmah an sawi hran lova. Ka pa pawhin min duhpui viau lo mah se then turin min ti ngai hran lo. Mahse ka nu ber hi a buaithlak thin.


Hmeichhe lu zo veh vawh tak, thil diklo chu sawisel hreh lo. Mahni tawka induhtawk ve em em a ni a. Chapo ti a han sawi tur ni em lo mah se nu inngaitlawm tak a ni hran lova. A hrechiang lo tu tan chuan chapo han tih mai pawh a awl ve thin ang. Mahse amah hrechiang tute chuan an nel a, an ngam em em thung. Chutiang chu ka nu mizia a ni a. Chuvanga Lalrinmawia pawh hi min duh pui thei miah lo kha ania.



"An chhungkaw khawsak harsa lo mah se aman thawh chhuah engmah a nei lo, a pa sum vek alawm. Zu a la in thin lehnghal. Amah hretu apiang te'n fakna aiin sawiselna an phuh chhuak hnem zawk a. I kawppui atan ka duh lo. Mamte inngaihtuah chiang la, then la i tan a tha ber ang" tiin ka roomah tum khat phei kha chu min ti thlawt a. Mahse ka lo hmangaih ve laklawh tawh si a, ka then ta chuang lo kha ania.



Ka nu pawh nu mawl tak a ni lova, Rinmawia lo len chang pawhin a be chhe ngai hran lova. A be tha hluak tihna erawh a ni hauh chuanglo.



Kan induhtawn em em a, inzui pawh kan inzui rei, kum 5 lai kan inzui ve hman. Kan inkawp tih pawh thup sen a ni lova, min hretu apiang te chuan kan inneih loh an ringlo, inneih turah min ngai vekin ka ring. Keipawn ka pasal tur emaw ka lo ti thin.



Chutia kan inzui tha hle hle emaw ka tih lai chuan bumin ka lo awm reng a.



Rinmawia hian ka chhungte'n an lawm vak lo tih a hai bik lova. Ka bulah pawh a sawi fo, inthen rawt chang pawh a nei ve zeuh tawh. Mahse ka duh em a, keimah zawk hian tlawm pawh dâwn lovin ka chelh hram hram thin.



Tum khat chu inruk puiah min sawm a, min tur tut tut a ni ber. Ka tan khan hnial a van harsa tak. "Heti zawng lo deuh hian ti ila, inneih i duh anih chuan mi tihdanin palai te lo tir la" tiin ka thlem a. Mahse a lu a thing nghut a "I chhungte'n min lawm lo tih ka hre ve vek a. Kan hlawhtling chuang lovang, chuvangin inruk nghal mai a tha" a ti nghut a. A lungawi lo leh ringawt tawh tih ka hre nghal.


Chumi zan a lo len tum chuan min thlem titih a. Mahse ka thei tlat lo. Ka pi min fuihna hi ka hre reng thin "Pathian tello in chhungkaw bul tan tur a ni ngailo. Chuvangin pasal i nei duh anih pawhin inngaihna suala tluk hmasak zet te, inruk te hi ti reng reng suh ang che" tih hi min hrilh fo. Chu mai bakah dan thianghlim lova pasal neih chu ka zuam lo hrim hrim. Pathian lakah ka inthiam thei ngaiin ka ringlo.



Inruk te pawh loh theih loh ngang a awm ve tih chu ka hre ve tho a. Mahse a engamah hmaa han inruk ngawt chu ka duhlo a ni.



Min thlem thlu zo ta ngang si lova. Thinrim deuhin a haw ta a. Chumi zan chuan call ka tum ngat ngat a, a pick up duh thak lo. A tawpah phei chuan a switch off hmak a. Ka mangan zia chu.



A tuk zingah chuan a message a lo awm va a. Phur zetin ka hawng a, mahse a thu rawn sawi chuan min ti hnual nghal rawih thei.



*Ni thum chhung inngaihtuahna hun ka pe ang che. Chumi hma chu min lo biak tum tawh suh* a rawn ti hmak. Ka va tlawm tak !


Chuti na na na chu tiin ka be zui duh ta bik lova. Ka rilru chu a buai ve reng. Chân ka hlau a, mahse Pathian duh loh zawnga awm ka hlau ve tho bawk si.


Ni thum a ral hnu chuan ka call ta a, a lo pick up vat. "Eng nge i awm duh dan chu?" a rawn ti nghal sup a. Ka thaw chhuak ham ham phawt a. "Rinmawi..." ka ti fan raih a, ka hmui ka pet fan fan bawk. "Palai lo tir zawk mai rawh" ka ti leh thlawt. Hetiang tak hian ka la inphah hniam ngailo.



A rum nghut a, "Tawk rawh se" ti hlukin phone chu a hmet tawp a. Ka rilru a na vawng vawng mai, ka mittui erawh a hul hlauh thung.


Chumi tuk dawr ka kal chu Aruati a lo awm reng tawh a. Dawr ka thlen rual chuan ka bulah a rawn kal nghal hlawk hlawk a.



"U Mamte, chanchin ka lo hria a, a van zialo tak" a rawn ti ngawt a. Lainat hmel zetin min melh bawk.



A ngaihna hrelo fe hian ka melh a, a thusawi awmzia ka hrethiam lo tih a hria aniang "Chanchin kha i la hre ve lo zawk em ni?" a ti hluai a. "Eng chanchin maw?" ka lo ti ha, a chek deuh hlak a. Ka hawi kual a, Feli ka hmuh mai loh avang chuan "Khawnge Feli hi?" ka ti a. Aruati chu a la mengphawk tak deuh deuh.


Tichuan Feli rai thu leh Rinmawia fa anih thu a rawn sawi ta mai. A tirah chuan engtin nge ka awm pawh ka hre lo. A hnu deuhah chuan ka ding khawng awt a, ka ngawng vek. Ka chhungril a che nghal dawt dawt a. Ka awmdan chu ka sawifiah thiam lo a ni ber.


Feli hi ka dawrah kum 1 chhung a rawn thawk ve tawh a. Kum la naupang tê a ni a, an chhungkaw khawsak a harsat avangin duhsak pawh ka duhsak. Nula ngawichawi leh dam diai mai a ni a. Rinmawia hian dawra a rawn kal chang hian fiam zuk zuk a ching a. Ka lo ngai thutak hran lova. Mahse heti hian an lo khawsa reng a.



Na leh chuang tur pawh awm lo khawpin ka na tih hi ka sawi thiam dan ber a ni. Zanah Rinmawia phone call ka dawng a, ka pick up lo chiang asin. Ka chhungte chuan ka dinhmun an hrechiang a. Tlaiah pawh chawei lovin dawr atanga ka haw hnuin room ah ka la tawm char char a. Tuman min rawn tibuai lo. Hun thawl ka mamawh zia an hria ni hmiang ka ti mai.



Kar tluanin engmah ka ti theilo a, nep ka inti a. Mahni inkhawngaih a, mawl intih lutuk chang pawh ka ngah. Ka chhungte chuan ka awm ang angin min enliam tawp a. Ka pi hi chuan min tihhlim tumin ka room a rawn lut awl lova. Ka tan a hlu takzet.


U Vensangi lo len tum chuan a vawikhat nan mipa vangin ka mittui a tla ve ta ! A awmah beiin ka tap hawm hawm a. Bum ka nih tirh khan ka mittui a hul hmak a. Mahse ka awmah hian inhnawh tawt a awm thin. Khang inhnawh tawt zawng zawng tih thawl tum khan ka tap a. Ka tah chhung zawng U Vensangi chuan ka hnungah a lo chul hauh hauh a.



A ni hi chu engtik lai pawhin ka lam a tang thin a, ka unaunu leh ka thiannu nih a kawp a. Ka thuruk tawp khawk pawh ka hrilh ngam a ni a. Ka tan a hlu takzet.


Rinmawia leh Feli te chu Rinmawia nu leh pa te'n fate tih fahrah chu a tha ngai love tiin an inneih tir a. An inneih dawn zan thlengin Rinmawia chuan min lo call a. A tawp nan tiin a call chu ka pick up a.


A rawn insawi thiam nasa mai. Tin, inru turin min la sawm ngat ngat bawk a. A ruih laia Feli nen an chetsual mai tak dan zawng zawngte chu min hrilh fai vek a. Mahse ka tan pawm zam theih thil a ni lo.


A duh a sawi zo tawh a ka hriat hnu chuan kan inbiakna chu ka titawp a. Ka rilru natna kha huatna ah a rawn inlet a. Insawi thiam a tum tlatte kha ka hua. Ka thinlunga a tan hmun la awm erawh chu nawh reh mai a harsa tawh ang.



Ka ngaihtuahna chu duh lo zetin ka inthing harh a. Mahnia awm melh melh ka duh loh chhan chu hetia inngaihtuah let ka chin vang hi ania.


Tunah chuan Rinmawia chu mi pasal a ni tawh a, an fanu pawhin kum2 a tling ve tep tawh.



Khang hunlai, inruk puia min sawm lai khan lo zui ngat ila chu tun ai hian ka rilru a na zawk ang. Kan lo inru ve tingtang tawh sia nga, sawn a thlak tih hre leh siin ka thianghlimna lo hlan hman tawh si ila ka na dawn lutuk. Tun hnua ka ngaihtuah let hian min neih a duh tak tak vanga inruk puia min sawm ni pawhin ka hre ta lo. A thil tihsual ka man hmaa a thanga min awhtir a tum ni berin ka hre tawh.



Feli nen an inneih tirh thla khat vel kha chu a reh vang vang a. Keipawn dam lam ka pan ve zel a. Mahse a hnuah min rawn tihbuai leh zeuh hi a nei thin a. Tunah a reh tawh dawn emaw ka tih laiin tunlai te hi min rawn be thar leh a. Ka rilru a let ve tawh a, inngaihzawn leh chu sawi loh biak tumna ka nei tawhlo hrim hrim. Ka natna erawh a la dam var thei lo.


Hunin a liampui ve loh natna tuam dam tum chu har tak a ni.


Zan ka mut that loh avangin zingah chuan thawh ka hai lehpek a. A zialo, tunlai hi thawh ka hai reng mai.


Dawra ka kal dawn chuan ka nu bulah thawh ka hai palh chuan min kaitho zel tawh turin ka chah nghal zat a.


Dawr ka va thlen chuan Aruati chu a lo buai zak zak viau tawh. A âwm ve tho, zing dar 10 a lo ri tep tawh a.


Aruati chuan min lo nuih var var a "Thawh hai kan awm leh tawh a nimaw" tiin min lo fiam a. Ka bag dahfel pah chuan "Tunlai chu a mak tak tak. Thawh ka hrelo reng reng" ka lo ti nang nang a. "Mut tam hi a hrisel alawm" a lo ti leh vat.



Toilet ka hman lawk hlanin âw ka hriat tawh hnu ang deuh mai hi ka hria a. Ka va chhuah chuan kan dawr chhungah Nu Malawmi a lo ding vang mai.


Min hmuh chuan a rawn phul hlut a, keipawh chuti tho. "Ka hmu teh hlawl che a" ka tih lai chuan "Heihi i dawr ami?" a lo ti thung a. "Anih ve hi" tiin ka lo chhang vat.



Chuveleh pawn lama jacket lo enkual dun dun pa chu "Mama" tiin a au lauh a. Vanmalsawmhlua chu a rawn hawi nghal vut . Mit tizim sun hian min rawn melh a. Nu Malawmi chuan "Lo lut teh" tiin a hui a. Thuawih deuhin a rawn pen lut vut. Jacket dum, cotton kekawr leh sneakers a bun a. A lang lian zual ngei mai.


"I duh zawng i hmu em? Kan dawr ngei ngei a ngai. Mamtei dawr a lo ni reng a" a ti zung zung a. A nui deuh hak hak bawk.


"I pi a dam tha em?" ka lam hawiin a rawn ti leh daih a . "Aw, a dam that lai tak ani" ka lo ti ve vat.



Vanmalsawmhlua phone chu a rawn ri a, a nu lam hawiin "A pawimawh tlat, ka'n chhang lawk ange" tih leh chhuah a rual a. A pen zau thei ngei mai.


"In bazar nge?" tiin Nu Malawmi chu ka zawt a. Thutna ka kawhhmuh ah chuan a thu thla nghal zat a "Aw, helama a awm remchan lai hian thawmhnaw lakkhawm sak ka duh a. Amah chauh hi chuan a ngaihsak lk ve sia" a ti zung zung a, a nui leh hak hak tawh.


"Khawnge U Faktei?" ka tih chuan "Tunlai chu office ah an buai lutuk a, hnaah a kal" a lo ti tha ve mai a. "Hmanni khan lo kal ve ka duh tehlul nen tlai lam kha ka buai ta sia. Mama ka lo tir tawp anih kha. Nakinah a hranpain ka lo la leng ang. I pi a ngaihawm tlat" a ti leh zung zung a.



"Ka nauin a ngaisang thei lutuk a. I fapa a ni tih pawh kan lo hrelo a" tiin Vanmalsawmhlua phone hmanna lam chu ka melh a. Nu Malawmi chu a lo nui hak hak a "Tunah chuan i hre tawh alawm" a lo ti var a.



Vanmalsawmhlua a rawn luh leh tak avang chuan kan lo ngawi leh rih a.


A phone a kekawr ipte a dah duh pah chuan "Hna thil ania" a rawn ti sup a. Nu Malawmi chuan "Jacket chu pangngai deuhin en teh ang u" tiin a tho tharh a. Pawnlama an inzui chhuak chu ka zui chhuak ve nghal a.



Nu Malawmi chuan nalh a tih ho panga a thlang chhuak a. Vanmalsawmhlua chuan a ha chhin hlawm a, a inhmeh zel nia mawle.


"Engzat man nge a?" min rawn melh run a, ka dang a ro nghal ringawt. "1700 man ania, mahse nangni in ni bawk a ka tlawm ang che u" ka lo ti vat. Nu Malawmi chuan "Chuti anih chuan lei teuh ang" a ti fiamthu a, kan nui dun nghal hawk hawk a. Vanmalsawmhlua erawh nuihza hmel pawh a pu ve lo. A mi tak deuh run mai.



"Ka mamawh tam hran lo ania" a nu bulah chuan a ti sup a. Chutah Nu Malawmi chuan "Kan lei leh mai mai hman tawh awm si lova, hnaah i buai thei bawk si. I nupui neih hma daih tur lei ang" a ti a, a thusawi tawp lam chu a uang viau tawh.



Vanmalsawmhlua chu a lo rum nghut a, a nu nuih a za zual sauh mai. Za lo zetin ka lo then ka lo then ve ringawt.


Jacket 4 zet min dawr a, cheng 300 laiin ka tlawm. Kan inhriatna la rei lo mah se Nu Malawmi kan chungah a tha em a, chumi vang chu a ni pakhat.


Dawr atanga an chhuah veleh Aruati chuan "In inhria ami?" a rawn ti hluai a, a phur hmel kher mai. "Hre em em hran lo, Nu Malawmi doctor leh ka pi doctor hi thuhmun an nia. In check up na atangin kan inhre satliah " ka lo ti tha ve mai a.



"DC pa kha a takah a chhelo tawp" a tih chuan ka lo nui mai a.


Zanah U Vensangi te inah ka leng a, leng tura min sawmna a rei tawh a. Ka hman lawk loh avangin ka leng tlai mai mai zawk.


An fate pahnihin min lo bawh nghal chuk chuk a. An la te dun bawk sia, an lawmawm tak tak ani.


U Mapuia chu Kohhran committee a awm avangin inah a lo awm lova. U Vensangi chuan "Sawi dun tur kan ngah lutuk" a rawn ti nghal a. Keipawn sawi tur ka ngah viau tawh.


Naupang kan timu hmasa a, an muhil har lo. Dar 8 rik hmain an muhil der tawh.



U Vensangi nen chuan chokaah thingpui in pahin kan titi a. A vawi tam takna atan Lalrinmawia chanchin bawk a rawn sawi veleh a.



"Feli a tlan kha i hria em?" a rawn tih chuan ka hawi hai hle. "Hre miah lo" ka ti hap a. A chet hlak a "A tlan pawh a ni chiah lo, Rinmawia'n a hnawtchhuak titih a ni awm e, mi sawi danin" a rawn ti leh a.



U Vensangi hian mi chanchin hi a sawi vak ngai lova. Lalrinmawia hi chu keimah vang hian a haw ve thlawt a. Nu Muani ka ngei tlat ang vel hi a nimai thei.



"Awi...Mamte, in inneih hman lo kha a lawmawm tiraw. Innei ta pawh lo ni ula in hlim chuangin ka ringlo. Pathian remruat thiam zia hi chu a " a tih zawm leh zat a.



Sawi sual a inti leh deuh nge a lei a chhuah tet a " Ka sawi awmzia chu bum a i awm kha a tha tihna lam ni lovin a bum tluang zel ang che tih ka hlauh vang zawk a nia" a tih zawm leh zat a. "Ka hrethiam alawm" nui sak chungin ka lo ti vat.



U Mapuia a lo haw hnu chuan an nupain min thlah haw ta nghal a.


Inrinni tuk a ni a, tukin chu ka nu a awm a nawm loh deuh avangin Thakthingah chawhmeh leiin ka bazar a. A tawt ang reng khawp mai.



Ka nu'n lei tur a ziah sa ho ka lei zawh hnu chuan ka ril a tam tawh em avangin dawrah ka chawl nghal a.


Ka thil chah ka nghah lai chuan dawr chhungah midang an rawn lut ve a. Ka melh zawk a, ka phone ka bih leh nghal mai a. Mahse ka ennawn leh sak. Vanmalsawmhlua bawk. Mahse amahin a ni miah lo hmeichhe naupang kum 7 awm mi vel hi a rawn pawm lut a, a hnungah chuan hmeichhe pakhat ngo ving veng, te fel ren rawn, la upat hmel vak lo hian a rawn zui a.


Ka thutna dawhkan bul chiah dawhkan hranah chuan an rawn thu thla ve nghal a.


Hmeichhe naupang chuan "Anu, apa hian naktukah min lenpui dawn aw?" tiin a nu lam chu a hawi ha a.


Ka bo map mai.


___________*___________*___________

(Chhuanlam siam reng a, thupha chawi reng pawh hi a inthlahrunawm zozai. Tun kar chhung chu ka la buai dawn a. Good Friday leh Easter Sunday a lo indawt chho ve zut bawk nen mahni tawkah tihtur ka ngah ve lutuk a. Chuvangin tun kar chhung chu a thar lo beisei tawh rih lo mai ru aw. Pathian zara dam chuan kar leh lam atangin regu deuha dah kan tum chho leh tawh dawn nia)


Min lo chhiar sak ve thin avangin ka lawm e


Show post links
Top

[Ngaia]

DEPUTY COMMISSIONER
By CVL Awmpuii


Chapter 3



Vanmalsawmhlua chuan jacket pawl tak, ka dawr atanga an lei kha a ha a, cotton kekawr dum dak tha zet a ha bawk a, sneakers pangngai tak a bun leh tawp a. A dan ngai tein a lang lian leh khawp mai.



Naupangtê chu duat hmel zet hian a melh a, an ep chiaha thu hmeichhia, naupangtê in 'Nu' ti a a koh khan hmuhnawm tih hmel zet hian an pahnih inchhaih vel chu a en vang vang bawk a. Ka tehkhin ber chu chhungkaw inhmangaih tak an ang takzet.




Chutia ka en reng lai chuan Vanmalsawmhlua chuan ka lam a rawn hawi thut a, ka phu chiang kher mai. Rang zetin ka hawi sawn a. Ani pawh a hawi sawn veleh nghal mai tih ka mitsirin ka va hmu thei.



Ka thil ei pawh chu tui ti takin ka ei thei tawhlo. Ka bul ami te chuan engtin emaw tak hian ka ngaihtuahna an la peng a. Anni chu min ngaihtuah ve âwm pawhin an lang chuang lo. Nichin a a lo hawi vut khan min la hre ve ang em? Mahse min la hria sela chu min be ve tal anih loh pawhin a hmelhriat ka ni tih lantir nan min en ve deuhte ka ring a. Ka ngaihtuah ve em em ringawt mai.




Chu dang zawng zawng aia ka rilru tibuaitu chu engvangin nge naupangtê khan 'Pa' ti a a koh le? Ka buai lohna turah ka ngaihtuahna ka lo sêng ve vak ringawt mai ni!



Thil ka ei zawh chuan hmundanga pengkawi tawh lovin in lam ka pan nghal a. Ka thlen chuan chawei a lo hun der tawh. Ka ril a tam lem loh avangin ka thil lei te ka dah fel zawh ah dawra tlang nghal mai ka rilruk a.



Ka chawhmeh lei ho chu ka nu nen kan rem tha mawlh mawlh a. Chutih lai chuan Rina hi choka ah a rawn lut a. Dawhkana tui chu a in zui khawlh khawlh a.



Vanmalsawmhlua ka ngaihtuah chhuak thut. "Rina Lawngtlai DC kha tlangval a la ni em?" tiin ka ngaihtuahnaa zawhna awm chu ka zawt zui nghal phawng a. Engvanga hre chak et et nge ka nih pawh ka inhrethiam tawh bik lo.



Rina hi chuan sawi tawh ang khan a ngaisang a, a chanchin pawh a hrechiang in ka ring. Chuvanga zawt chu ka ni bawk.



A tui in dawhkana dah thlak pah chuan "Ni e" a ti tha ve mai bawk a. Ka lo bu nghat nghat a, "Tinge?" a rawn tih zawm leh chuan han chhan vak ngaihna ka hrelo. Dawra ka thil hmuh kha sawi tul fahranin ka hrelo bawk. "Ti vak mah ka zawt mai mai che" ka ti ta ringawt a.



Chutah ka bula rawn kal hnaiin chiang zetin min rawn en a, nui put put chung chuan "I star a ni maw" a rawn ti a, ka nu a lo nui hak. Rum zeta melhin " A teuhlo" ka lo ti nghal hlur a. Ka nu nen min la nuih hawk hawk zui.



Min chhaih zui zel dawna ka hriat avangin dawra ka thil hmuh chu ka sawi vek ta law law a. Chutah Rina chuan "A unaunu te nufa pawh an ni thei alawm" ngaihsam zet hian a ti a. "Nau pakhat chiah a nei" ka lo ti hmanhmawh.



"I lo van chîk awm em em. Kei ai i lo ngaisang anih hi" tiin ka lu ah min nam dat a. Ka tawng sual leh tawh tih ka hriat chhuah rual chuan min chhaih leh zawr zawr tawh.



"Chutiang lam a nilo" ka ti hlur a. A awih hmel fahran lo khawp mai. Mahse a hnu deuhah chuan "A cousin te pawh an ni thei alawm. Tlangval pangngai a la nia, nupui nei se chu ka hria ang" tiin thutak zet hian a rawn sawi ta a, choka atangin a chhuak zui nghal daih bawk.



Ka nu chuan "Mamte, mipa hi chu an mak khawp a. Fa nei reng chungin a lo inthup reng pawh a ni thei. A hriat miah loh ania" a ti nghal zung zung a. Ka nu hi chuan mi rin aiin rin loh a ngah zawk a. A mi rin tawh vek vek erawh chu a ring bur thung.



Nu lu zo veh vawh, mahni induhtawk tak. Nu dâwn thui tak a ni. Chu chu ka nu ka ngaihdan a ni.



Dawr ka thlen chuan a ngai têin Aruati a lo buai leh hle tawh a. Inthiamlo zet hian ka tlai lutuk chu thupha ka chawi nghal zung zung a.



"Tikhan ti ve ziah suh, ka dawr emaw ka ti tep tawh. Thu zawk ka ang thin" tiin a lo nui hak hak a. Ka lo nui veleh tawp ringawt.


A sawi dik ve viau chuan ka hria. Dawr ah hian eng eng emaw vangin tlai zeuh chang ka nei thin a, chutiang hunah chuan a dawr neitu zawk e ti lo hian ka inthiamlo em em zel a. Thupha ka chawi fo thin.



Mihring hi inhmuhsit chuang tur kan awm lova. Inmamawh tawn vek kan nia. Officer hian officer a nih vang maiin a hnuaia thawk te chungtlak zawngin a khawsa tur tihna a ni lo. A hnuaia thawk awm lo se a buai zual sauh dawn.



Chuvangin mi tumah hi hnehsawh deuh leh hmusit taka chet khum tur a ni ngailo. Chu chu ka chang vawn ve pakhat a ni.



Kan buai nileng ta thak a, Aruati ka thlah leh a, kan in ka pan ve meuh chuan khua pawh a thim tawh. Inkhawm dar a rik chuah chuah danah dar 6:30 a ri der tawh tih ka hre nghal a. Inkhawm hmana in thlen hram chu ka tum dan a la ni.



Kan in gate ka tlan luh dawn chuan gate bul, thim lai chinah hian mi pakhat hi a lo ding rûn a. Ka hlau hman lek lek , mahse ka scooty headlight in a chhun rual chuan min hnungchhawn zawnga ding mah nise tunge anih ka hai lo nasa.



Ka thawm a hriat rual chuan a rawn hawi ruai ruai a. Mit tizim sunin min rawn en a, zan mu thalo tih hriat zet hian a mit a khuar duk a, a sen deuh ram danah zu a in anih ka ring ve ringawt.



TShirt sen duk a ha a, kekawr bul khup chen vel a ha a, chapal a bun leh tawp a. A landan chuan khawlaia tei rawlai, in pawh nei mumal lova vak kual mai mai hi a ang ber. A hmaa ka hmuh thin dan leh tuna ka hmuh dan chu inpersan tak ani.



Gate chhunga tlan luh mai ka tum chu min rawn pan nghal vut a. Eng ka hria nimaw ka te chhuak that, ka inthunun hman lo a ni ber. Inthiamlo zetin a tawlhhnung leh dat a.



"Amâmte..." a ti zawi raih a, ka duhdan ni miah lovin ka kawchhungah che a siam leh tawh.



Enga tinge mihringte hian kan hmangaihna phû miah lo hi kan hmangaih tlat thin le? Min hmangaih em em tute pawh kan hmangaih let hleih theih loh laia min hmangaih miah lotu kan hmangaih tlat thin hi hmangaihna ropui zia lantirtu a ni lawi a.



"Amâmte ..." a rawn ti nawn leh sup a, chiang zetin kan inmelh kal a. Ka thaw chhuak hak "Eng nge i duh?" rin aiin ka âw chhuak chu a pangngai.



Min rawn pan hnaih leh a tum rual chuan "Tah khan ding rawh" ka ti chang fak a. A kut a rawn lek chhuak vut a, mit ka lo chhing sawk. Mahse ka biangah a rawn tawh rual chuang rang zetin a kut chu ka vai per lawp a. Za lo tih hriat zet hian a nui suk a.



"Ka khawih pawh i duh tawh lova" tiin a kut chu a en a, a nui leh suk. "Mipa dang i nei tawh em ni?" a ti chang nghal bal a. A âw chhuak zawi sup kha a reh nghal vek bawk.



A ke bula lung chu a chhir pawp a. "Tinge min hriatthiam i tum miah loh a" a au nghal tuarh hi a ni ber, ka la phu dawrh zui. Mahse a zurui thinrim, tum danga ka hlauh thin ang khan ka hlau miah lo.



"Eng nge i hriat a?" ka ti chang fak a.Kan bul velah midang an awm lo hlauh a, a thawm chu an hriat ka ringlo, a tihzia hlauh.



Scooty ah ka la thu reng a, ani pawh ka bul hnaiah a la ding reng bawk.



Min melh tur khui a "Min nei rawh" a ti nghut. A zak lo ka van ti tak. Ka chunga a thiltih zawng zawng te vanga ngaihdam min dil chu sawi loh amah nei turin min ti khanglang ania. Ka van haw tak.



"Min phû in i inhria em ni?" ngeiawm zet hian ka nui chhuak hak a. Ka tawngkam chu a ngeiawm viauin ka ring. Ka pian ahnu lamah hetiang hian mi ka la deuhsawh ngailo.



Ka thusawi chu a run hle ni tur ani a rum nghut a. "Engkim ka siam tha tawh, Feli ka then tawh. Kan innei thei tawh" a la ti deuh deuh a. Chhan enah pawh ka en tawhlo. A zaklo ka ti em em a nimai.



Min rawn pan hnai leh a, ka kut lehlam chu a rawn chelh a, a biang min dawm tirin "Min nei rawh" a ti leh a, a tlawm hmel ta deuh. Mahse tlawm reng ka tum tawh bik lo.



Ka kut chu ka la thla a, min dang bik lo. Chiang zetin min melh a, tuna a landan hi chu a lainat awm hial zawk.


"Rinmawi, Feli nen in inthen emaw inthen lo emaw neih che ka tum lo. Hmalam ka pan tawh, min rawm tibuai tawh suh" dam zet hian ka ti a. A ngaihdan a ni leh tawhlo aniang, lung a chhir leh pawp a.



"Hmeichhe dang sex ka hmanpui satliah ve a nimai a, ka vanduai a, a lo rai a ni mai , chu chu eng nge i lak nat em em a" a rawn ti nghut anih chu !


Rapthlak ti zetin ka melh a, engtin nge hetiang mihring hi inlaichinna ka lo siam pui theih tih ka inngaihtuah hial mai. Ka scooty la ri vut vut chu ka off a.




Rinmawia chu ka melh kal a, ani pawhin min melh ve reng bawk. Insawi thiam a la tum tang tangte chu ka hua. "Hmeichhe dang sex hmanpui kha thil satliah i ti maw? A lo rai kha i vanduainaah i ngai a. Ka rilru na hi min dem maw? A tha e, kei chuan maw, sex hi thil satliah ah ka ngai ve lo. I laka ka lo him pawh kha Pathian malsawmna a ni e. Feli'n i fa a lo paitlang ngam te kha ka chhuang zawk hial mai. Nang ang mipa tlaw lutuk vang hian eng ang taka rilru nain nge a awm ve ang tih pawh ka ngaihtuah thiamlo zawk. Ka rilru a lo na viau pawh kha ka in dem, nang ang mipa mai mai vanga rilru na lutuka ka lo awm kha ka mawl khawp mai. Mahse tunah chuan ka dam tawh. Rawn let tumna ka nei tawhlo. Mipa tha taka awm tum la, Feli tan leh i fa tan tha taka nun tum ve tawh teh. Chutiang chuan ka hmu pangngai veleh deuh thei ang che" ka ti ta duah a. Ka thusawi tawp lam chu a nem ta deuh.



Scooty chu ka tinung a, hawilet duh tawh miah lovin gate chhungah chuan ka tlan lut a. Min dang lova side glass atanga ka melh zawk chuan lei lam bihin a la ding ngur a, mahse ka ngaihtuah zui duh tawh bik lo.



Inchhung ka luh chuan a lo reh thiap a, ka chhungte chu an inkhawm vek tawh anih ka ring. Dar an nawn tawh a. Rinmawia kha lo awm lo sela chu ka inkhawm hmanin ka ring.



Ka inkhawm hman tawh lo ta sa sa tiin ka che hmanhmawh duh ta lo law law a. Muangchangin ka intifai a, vawiin lam chu kan buai zual a, ka taksa a na thum a. Tuilum a ka inchiah chuan ka dam sawng sawng maiin ka hria.



Chaw te eia ka intihfai hnu chuan ka chhungte inkhawm pawh an lo bang zui ve mai a. Thutkhawmna pindan ah ka lo mu dar dar a. Ka piin min rawn hmuh chuan "Vawiin chu in va buai awm ve Mamte" a rawn ti dam diai a. "Nia, tlai lamah khan kan buai thut a, inkhawm hmana haw ka lo tum nen ka hman ta ngang lo anih kha" ka lo ti ve zung zung a. A bu nghat nghat mai.



Midangho chu room lamah inthlak turin an lut sap sap hlawm a. Rina chu ka mutna bulah a rawn thu thla thurh a, "Û..." a rawn ti zawi sup, a lam ka hawi chuan thutak zet hian min lo melh kal a.



Ka thu vat a, mit ka kan ak, "Inkhawm kan kal dawn khan gate bulah U Rinmawia kha ka hmu a" a ti a, ka ngaihtuahna hriat tum ni awm takin min melh vung vung a. "Keipawn ka hmu alawm" ngaihsam hmel zet hian ka lo ti mai a. Mahse thu tak deuh hian " In inngaizawng leh tawh em ni?" a rawn ti a. "A teuhlo" ka lo ti vat. "I ti awm ang lo lutuk" ka ti leh hlak a.



Min melh leh vung vung hnuah a tho thurh a , "Ka ring che ania. A lo bem leh che paw'n duh tawh miah suh. A phulo che" a ti hluk a. Room lam a pan lai chu ka melh zui vawng vawng a. Ka nui nghal sak. Ka nau hian min ngaihtuah ve hle niin ka hria.



U Mawia'n hla zir turin min rawn sawm a, KTP bial meet kha naktip zan mai a ni tawh dawn a. Inkhawmpui ang bung bung a ni hran lo a. Kan bial hian kum khatah KTP bial meet vawikhat tal kan hmang thin a, KTP inkhawm zanah kan hmang mai zel. Bial hruaitu te'n inkhawmpui piah lama thalaite kan inpawh tlan zawk nana rawtna an siam a ni a. Kum 5 chhung chu he hun hi kan lo hmang ve tawh a. Bial chhung KTP pawh kan inpawh tlan phah ve viau chuan ka hria.



Inbuatsaihna hun a tlem tawh a, naktuk Pathianni a ni sia, kan zir tha hman awm si lova tiin zanin chu kan âm ve viau.



Scooty ka ken avangin U Mawia'n min thlah leh a tum pawh chuan ka lo hnial vat a. Min tilui bik lo.



Kan in leh Biakin hi a inhlat lutuk hran lova, mahse tun ang zan rei tawha mah nia kal aralah chuan a zuamawm fahran lo.


Zan a rei tawh bawk a, mi an reh thuap tawh a. Muangchangin ka inkhalh phei a. Kan in thlen hma, kawngkawi laiah chuan ka scooty chu a thi ringawt a, a ngaihna ka hrelo kher mai.



Ka start tha leh a, a ri vut vut a, ka tlan chhuah dawn chuan a thi leh nghal daih a. Chutiang chuan vawi5 vel ka ti a, mahse ka tlan chhuak thei thak lo. A ngai tê in a thi leh nghal zel.



Ka hawi kual a, street light tih loh chu êng dang a awm tawh lova, mi an mu reh deuh vek tawh a nih ka ring.


Scooty atang chuan ka chhuk thla a, ka thiam ang angin ka han enchhin vel a. Tih vak ngaihna ka hrelo. Kan in a hla tawh vak chuang lo bawk a, ke a haw mai ka lo rilruk rauh rauh lai chuan ka hnunglam atangin mipa âw hian "A nung thei nange?" a rawn ti a. Ka phu nghal dawrh.



Ka hawi let vat a, Vanmalsawmhlua chuan min lo melh rûn a. A lo kal lai ka hre miah lo. Kamis dum leh smart pants grey a ha a, smart shoe a bun bawk a, a inthuam dan atang chuan a inkhawm bang a la haw lo anih ka ring ve tawp.


Chutia ka en reng lai chuan "I scooty chu engtin nge a awm a?" a rawn ti leh sup a, ka scooty lam a melh pah bawk. Ka inthing harh a, "Ka hre bik lo, a rawn thi ringawt a" ka ti sap a.



Ka lam panin a rawn kal vut a. Scooty a rawn khawih chuan ka lo tawlh sawn vat a. "Khawnge chabi?" a tih chuan ka kuta chabi ka hum lai chu ka lo pe vat a.



Scooty chu a tinung a, a han race chhin vel a. A chuang a, tlan chhuah a tum rual chuan a ngai tê in a thi leh nghal hmak, a phun hluk a, eng nge a sawi phei chu ka hrelo.


"Petrol in a zo tawh lo anih hi" a rawn ti leh sup a. Ka han en ve chuan mawl inti zetin ka chal ka beng dat. Vawiina petrol thun ka tum kha kan buai em vangin ka theihnghilh tih ka hrechhuak chiah.


"Ka van mawl tak, vawiinah thun ka tum a ka theihngilh daih alawm" ka ti nang nang a. "Heti hian kawngsirah sawn nawr ila, hnutchhiah rih i pawiti viau em?" a ti sup a, chiang fahranin min rawn melh bawk. "Aw" tia chhan mai loh chu kawng dang a awm lo.



Kawngsirah chuan min nawr phei sak a, tihtheih nei si lovin a bulah chuan ka lo kal ve zel a. A din that tir hnu chuan "Mahniin i haw thei mai ang em?" a rawn ti leh sup a. Zep lovah chuan ka hlau ve reng, a dawih chi ka lo ni veleh zel bawk nen a pawi tak tak. Mahse ka rilru ang lo takin "Hlauhna tur a awm hlei nem, kan in a hla tawh chuang lova ka haw thei mai ang. Ka lawm lutuk e" ka han ti mawihnai ve a.



Chumi rual chuan kan dinna piaha thingkung zar chu kawngthlang lamah a rawn tla ri thawt a, ka au chhuak nghal thawt. Mit ka chhing sawk a, ka âwm ka dawm a, ka thin a phu zui nghal dawt dawt.



Ka men leh rual chuan Vanmalsawmhlua, min lo melh vung vungtu chu ka hmu nghal a. Ka insiam tha vat, zahzelah "Ka phu nasa lutuk" ka ti ringawt a.



"Ka thlah ang che" a lo ti thung. Ka hlau em a, hnial enah pawh ka en tawh lo.


"Motor ka keng lova, ke a kal i pawiti viau em?" a ti leh a, ka lu ka lo thing nghal vat. A thusawi engpawh awih mai loh chu tih theih dang ka neilo.



Ke chuan inhnaih vak lovin kan kal dun ta hnak hnak a, kan taksa a insi leh thin a, chumi rual chuan ka tawlh sawn deuh vat thin a, ani chu chutiang ngaihtuah ve âwm pawhin a lang lo.



Min hre tawh lo tak tak anih ka ring a, hria anga awm chu ka duh bik lo. Ngawi rengin kan kal a ni ber.



A hnu deuhah chuan a rawn khuh kharh a "I pi a dam em?" a rawn ti zawi sup, ka melh nghal vat. A ni chuan hmalam a melh ngur a. Min lo la hre ve tho anih hi.



"Dam a nimai, mahse a kum a upa tawh a, dam var ang hi chuan a awm thei tawhlo" ka lo ti ve zung zung a. A bu nghut nghut a, sawi tur a hre biklo anih ka ring.



"Nu Malawmi a dam tha zawk em?" ka tih chuan "Dam tha alawm" a lo ti tha ve mai a. Min chhang bul ang reng, sawi duah tur a awmlo ve em bawk ani.



Inbe lova kaldun reng chu ka awmdan a lai êm a "Engtikah nge Lawngtlai ah hna i zawm leh dawn?" ka ti ta ngawt a. Amah ngaihven lutuk anga ka lan loh hram ka beisei.



"Karleh Nilaini ah ka zawm leh ang" a lo ti tha ve mai a. Ka bu nghat nghat, sawi zawm tur ka hre leh tawh chuanglo.


Inbe em em lovin kan in chu kan thleng ve mai a. Ka thaw huai mai.



"Min thlah a, ka lawm lutuk e aw" ka ti a, ka nui deuh sâng bawk. A bu nghut a, gate ka hawn dawn chuan "Engtin nge ka koh dawn che?" a rawn ti zawi sup a. Ka hawi let leh ren rawn a "Hmingmawizuali ka nia, Mamte min ti mai rawh" ka ti ro halh a. A bu leh nghut "Anih nang?" ka tih chuan "Vanmala" a lo ti vat. Ka nui a, mawi zetin a rawn nui ve suk.



"I jacket zawrh kha a tha khawp mai" a rawn ti leh a, ka ngaihbel nge ka hrelo a zah hmel deuhin ka hria. "A lawmawm" ka lo ti ve vat a.



Chutah "Lut tawh rawh, i chhungte'n an ngaihtuah tawh ang che" a rawn tih chuan ka bu nghat a "Anih ka lawm lutuk e aw" ka ti leh hram a. A bu nghut a. Nichina a zah hmel ka tih kha a bo leh nghal vek tawh.



Thawhtanni zan a ni a, KTP bial meet kan neih hun a ni tawh a. Inkhawm kal hma ka duh avangin dawr pawh kan khar hma a. Chawei kham veleh ka insiam nghal sawk sawk a.


Ka pain chhung inkhawm ah tha taka ka chanvo ka hlen theih nan min hlan thlap a. Ka zam lutuk tur pawh a zia ve hawkin ka hria.


Kan Biakin a hun kan hmang tur kan nih avangin kan veng chu kan kal hma hlawm hle a. Biakin kan thlen chuan dar a ri ve chiah a, mahse an lo awm ve nual tawh.



Midangho chuan duhsakna min hlan sap sap hlawm a. Inkhawm chhung chu a rei hran lo. Bial leader in thu a sawi a, thusawi thui tak ni lo mah se a sawi tha takzet.



Fellowship tur chuan kan inruahman nghal a. Sunday School hall ah hun kan hmang dawn a. Chhunah programme kan hmanna tur chu an lo chei fel vek tawh a. Light leh sound check bak chu kan inpeih a ni nghal mai.




Ka kal dawna ka zam vak si lo kha a hun a lo thlen tak tak dawn chuan ka zam chhe lo chauh. Ka bula ding mek, ka nau Puia bengbulah chuan dingdihlip ak akin ka han phun sap a "Puia, ka zam e...ka zam telh telh" ka ti zawi sap a.



Ka dara rawn kuah thuk pahin min rawn melh chhuk run a, a nui suk a "Zam duh suh, i zaithiam em kha" a ti ringawt a. A tawng tam lova, min han fuih dan tur vel a hre lo tawp ang.



Veng dangho chuan Faklam te, Drama hmuhnawm deuh, hlimawm bawk si te an rawn chang a, mipui lam an au dur dur a, ka nui ve thei tawhlo. Ka zam lutuk a ni ber. Programme sheet a a landan chuan a tawp berah ka zai dawn a. Tichuan hun tawp dawnah chuan min sawm ta a. Tha khur dar dar chungin ka va chhuak a.



Stage a ka din rual chuan U Mawia hmel ka va hmu a, a kutzungpui a rawn tipir vah a.



Ka zai rual chuan kut an beng nghal dur dur a. Ka zam lutuk pawh a zia ve telh telh a. Tha tak chuan ka hlen chhuak vein ka hria.



Fellowship banah refreshment tuihnai zet kan changho leh a. A thlengtu kan nihna angin keimahni vekin kan buaipui a.



Chutia refreshment kan buaipui lai chuan Biakin gate bula Vanmala leh Rina ding dun chu ka va hmu nawlh a. Bial khatah kan lo awm reng tih ka hrechhuak nghal zawk bawk. Mahse a hmain ka hmu ngai chuang miah lo.



Ka thil sem lai chuan ka va hawi leh zawk thin a, eng ka hria nimaw. Vanmala hi hmuhnawm ka lo ti viau pawh a ni mai thei.



Kohhran thil tih nikhuaa ka zui ve ber Lianpuii chuan zun pui turin min sawm a, ka kalpui nghal vat . A zun chhung chuan zunin pawnah ka lo nghak a.


"Mamte..." ti ri ka hriat rual chuan sir lam ka hawi vat a. Vanmala chu ka lam panin a rawn pen nghal vut.


A kut a rawn lek chhuak a, a ngaihna hrelo fe a ka en chu "Zaithiam khawp mai" tiin a nui suk a. Ka zak nghal chem chem mai. Ka zai kha a lo hre ve ngei awm sia. A kut rawn lekchhuah chu ka lo chelh ve nghal vat a. "Ka lawm e" ka ti ro halh, ka nui hlei thei meuh lo.



Ka kut chelh reng chung chuan a nui suk a, a bu leh nghut tawh. Awmze nei lo zet hian ka nui ve tawp a, a lu a thing nghut. Ka kut a chelh reng chu ka la let a, min thlah ve nghal mai bawk. Tinge hepa hian min tih zam em em reng mai le.



"Phei ila" tiin midang lo awmna lam chu min mitmei zauh a. "Ka thiannu ka nghak" tiin zunin lam chu ka lo mitmei ve thung a.



Chumi rual chuan Lianpuii zung zo chu a lo chhuak ve chiah a. Chutia Vanmala nen kan ding dun min rawn hmuh chuan min rawn melh tawn zak zak a. Mahse a reilo, kan lam a rawn pan a. A rawn nui nghal var var bawk.



"Vanmala teh hlawl chu! Helamah i awm tih pawh ka lo hre hlei nem" a rawn ti hluai a, Vanmala chuan "Ka rawn haw ve zawk anih hi" a lo ti tha ve mai a. An inbiak danah an inhre sa anih hmel.



Vanmala chuan min rawn melh leh pah hian "Ka phei san ang che u" a rawn ti a, a kal nghal vut bawk.



Chutah Lianpuii chuan ka bana min rawn kuah pahin "In inhre tha em?" a rawn ti sar sar a, "Hre tha hran lo" ka lo ti tha ve mai a.



Midangho awmna lam kan panlai chuan Vanmala a ngaihsan zia a sawi siam siam a. Ka nau Rina ang chiahin a fak viau mai.


Ka lo ngaihtuah chu Vanmalsawmhlua hian ngaisangtu a lo ngah anih hi ! A tute mai pawh hian an fak em em reng a. Amah lah chu a nun ngai rengin a nung tho a.



Biakin tual zawl kan va thlen chuan min lo chibai sap sap hlawm a. Ka hmelhriat te, ka hmelhriat lem lohte pawhin min fak ve laih laih a. Zaithiam ka intih loh nen min fak ve viau chu ka lawm ve reng.



Veng dangho haw hnu chuan kan veng bik chuan kan chet tlatna te chu kan tifel nghal zung zung a. Mipaho an zuan a zang bawk a, kan zo har hran lo.



Ka nau te nen bawk kan haw tlang leh dawn a. An pahnih chuan inthurual ni awm ang fahran hian ka zai dan an zir vel a, an chimawm ve thin ania. Ka chum dun awk awk a. An la nui hawk hawk zui. A hnuah chuan keipawh ka nui veleh tho.



Biakin gate kan chhuah rual chuan Vanmala a lo la awm reng a, min lo melh reng, kan unau infiam lai chu kan tawp nghal chat a.



Rina chuan "U Vanmala chu i lo la awm ve reng elo?" a ti hluai a. A han biak dan vel chu an inhriat that tawh hmel kher mai. Puia erawh a dân ngai tein a ngawi leh tawh.



Vanmala chuan min rawn melh zawk a, Rina zawhna chu chhang ta lo chuan "Ka lo thlah ang che u" a ti nghal vut.


Ka naute chuan min melh tawn zak zak a. Vanmala awmdan chu ka hrethiam lo kher mai. Inhre ngai kan ni hran lova, tun hnai tê ah kan inhre ve a nimai. Min nel tak angin a awm chuang lova, kei phei chuan nel lo tak ka ni.



Mahse zanin hian mak deuh deuhin ka chungah a khawsa tlat, ka inngaihbel nge phei chu ka hrelo. Eng a hria nimaw?



Rina chuan ka awmdan lai zet chu a hrethiam aniang tawng chhuak hmasaah a tang a. "I va tlai duh awm ve" a ti sup a.



Vanmala chuan a lu a lo thing mai a "Motor ka keng alawm" a ti leh mai a. Han hnial tung chi ni hek lo, min thlah ta poh a. Rina lawmah a lo tla a, kawngtluanin politics an sawi tak kha.



Vanmala chuan min rawn melh leh zawk thin a, ka lo melh let fu thei em em zui. Ka za hat hat mai.



Inchhung kan luh rual chuan Rina chuan nui vur vur chungin min melh a "In inngaizawng chiang" a ti nghal tawng a. Ka ner nasa ngang mai. "Kha phat i tum miah lo" a tih leh chuan a darah ka beng pawp a. Puia nen chuan min nuih nghal hawk hawk.



Ka nu leh pa an lo la meng a, ka pi chu a mut a hun tawh . Ka pa chuan nui vur vur chung hian "Inchhung in rawn luh rual rualin in rawn ri nghal chul a. In va hlim awm bik ve" a rawn ti a. Ka nuin a dar a lo hmehsak mek bawk.



Rina chuan "Ka û hian ngaih..." a tih lai mek chuan dingdihlip chungin a ka ka hup sak a, min la nuih nasa em em zui. Puia paw'n kan chezia chu min lo en ve reng a, a nui a nui mai.



"Lalrinkim, ni lo deuha min puh tum suh" ka ti ngawt pek a. A kâ ka hupna kut chu dahthlak a tum a, mahse ka hup bet zual sauh a. Mipa tha na na na chu ka hneh lo, ka kut chu min lak thlak sak a. Ka nu leh pa chuan engmah hre chuang lovin kan chezia ringawt chu min lo nuihpui ve reng a.



Chutah Rina chuan "Engmah ka sawi dawnlo, ka thup pui hram hram ang che" thil inti hre zet hian a han ti vel a. Ka huat tawk a tling leh em em mai ni. Ka van haw reuh tak.



Thutkhawmna pindan ah reilotê kan thu a. Kan hun hman dante chu ka pain min zawt dap dap a, Puia chuan tha taka ka zai thu a sawi ve mai a. Rina erawhin ka zai dan uar fahranin a zir a, a nghal thin a ni. Huat enah pawh ka en lo.



Thawhlehni tukah chuan hma zetah dawr ka thleng a. Aruati pawh ka thlen khalh. Thuamhnaw ho chu a theih ang ang pawnah ka pho chhuak a.



Aruati pawh a rawn thleng har lo. Kan che dun nghal sawk sawk a. Dar 8 a rik chuan ka tho hma bawk nen ka ril a tam ngang mai. Ka pum a ri ruk ruk a. Aruati chu thil eipuiah ka sawm a, min lo hnial bik lo.



Dawr kalsan chi a nih loh avangin eitur kan chahna thin ah chuan kan chah leh a. A lo thleng harlo khawp mai.


Thil kan eilai chuan Aruati chuan "U Mamte, thil kha i hre ve em?" a rawn ti a, a ngaihna hrelo fe hian ka melh a. "Eng thil maw?" ka tih chuan "Ka sawi ang a, ngaih loh lamah ngai suh aw" a ti leh tete a. Rinmawia chungchang bawk a sawi dawn tih ka hre nghal. Ka hre peih fahran lo.



Mahse "Sawi la" ka ti ta tho a. "Englo ania, hmanni khan Feli a tlan tih i hria em?" a rawn ti tete a, U Vensangi'n min hrilh tak kha. Ka bu nghat a. Chutah Aruati chuan "An lo inhruai leh tawh a" a rawn ti a. Keimahah danglam a awm tawhlo. "Anih chu" ka ti ringawt a.



Mahse Aruati chuan sawi zawm lehin "Feli hi ka rin ai daihin a lo mak" a rawn tih zawm leh zat a, a ner deuh nang bawk.



Mitko ka sân ak a, "An sawi danin U Rinmawia kha a lo zar buai nasa thin viau a ni awm e. Nangmah nen in inngaizawng tih kha a hre ve reng sia. Chuti chung chuan heti hian a lo bum reng che ania" a rawn ti leh a.



A ngaihdan chu a dikna chen a awm a, mahse Feli ai mah chuan Rinmawia ka la thiam loh zawk tho tho.



Hmeichhe dangin lo pak huam mah se mipa chu kawppui nei lai anih chuan a kawppui tan a rinawm mai tur a ni ka ti ve tlat. Chutiang bawkin hmeichhia pawh.



____________*____________*__________


(Pathian zara dam chuan kan regu chho viau tawh turah ngai ang aw. In lo chhiar ve thin avangin ka lawm a. In ngaihdante kha lo sawi hreh lo ula aw.


Show post links
Top

[Ngaia]

DEPUTY COMMISSIONER
By CVL Awmpuii



Chapter 4



Thil kan ei zawh chuan customer an lo awm veleh tawh bawk nen engmah sawi zawm lovin kan che leh nghal sawk sawk a.



Pathian zarah kan dawr hi a lûn ve riau a. Kan thil zawrh te a quality a that bakah a man hi a to lutuk lova. Hei tak hi midang pawhin min rawn bawr ve chhan niin ka hria.



Inkhawm zan a nilo bawk a tiin dawr pawh khaw thimah kan khar chiah a. Dân ngai tein Aruati ka thlah leh a. In ka thlen chuan dar 7 a lo ri thuak tawh.



Ka intihfai zawh chuan ka piin min koh avangin a room ah ka va lut a. Khumah thuin Bible a lo chhiar mek a.



Kum upa a ni tawh a, a mit a châk tawk tawh lo, mahse Bible chhiar hi a thulh ngai lo. Ka pi hi ka ngaisang a, ka tluk lo takzet bawk.



Ka va lut min hmuh chuan min lo nuih var var a. "Mamte, ka vawthlep kha min han lak nghal teh" tiin room kawngka bula a chapal chu min lo kawhhmuh a. Ka lak sak nghal a, khum bula ka dah chuan a rawn tho chhuak a. Chapal chu a rawn bun zui nghal zat a.



"Eng hi ti thim la, thlang lamah khuan thu ila, titi mai mai ang" tih leh a room veranda lam pan chu a rual a.



Light chu ka off a, ka pi chu ka zui ve nghal zat.



Ka pi hian a theih chin chinah Mizo tawng a humhalh tlat a. Mizovin a awlsam zawk vanga sap tawnga thil kan han sawi mai angte pawh hi Mizo tawnga kawih her a tum hram hram thin.



'Light' pawh 'Êng' a ti mai a, slipper pawh 'vawthlep' la ti ngat mai kha ania. Kan inleng thenkhatte chuan a Mizo tawngkam thenkhat hi an hrethiam lo fo. Mahse keini chuan ngaiah kan nei tawh a. Mizo tawng ngaihhlut nachang kan hriat phah bawk.



A bula ka va thut thlak chuan a lo khuh barh barh a, a hnung ka chûl sak nghal vat. "Tui ka va la ang aw" ka tih chuan a lu a lo thing mai a "Ka hrawk a za thut alawm" a ti a, a khuh chhunzawm tawh bik lo.



"Tunlai chu i buai thei lutuk a, kan inkawm tam hman lo" a tih chuan dik ka ti khawp mai. Ka pi hian ka ngaih ang chiahin min ngai ve a. A tan hun insiam hram hram ka tum thin a. Mahse tunlai chu ka buai zual ve em ani.



"Kar leh lam atang chuan kan buai zual pui pawh a reh tawh ang" ka lo ti vat a.



Ka pi nen chuan thil chi hrang hrang kan sawi a. Hmanlai chanchin te kan sawi a, sawi tur ka hre ve em em lo nain a thusawi ka lo ngaithla ang.


Anni ang rual hi chuan titi pui tur ai mahin ngaithla tu tur an mamawh tawh a. An thusawi ngai sawi nawn reng mah se dawhthei taka ngaihthlak sak hian an lawm a, an hlim ve em em mai ni.



Ka chhuahsan dawn chuan min fuih leh sauh sauh a "Mamte, eng thil pawh kan chungah thleng se Pathian lakah hian vui vai reng reng loh tur aw. Kan lo vui anih pawhin A malsawmna kan dawnte hi theihnghilh reng reng loh tur" a ti leh dap dap a. Ka lo bu nghat nghat.



He khawvelah hian ka pi tunu ni tura ka lo piang kher kher hi ka lawm takzet.



Mut hmunah chuan phone ka khawih melh melh a, U Vensangi'n WhatsApp ah min lo bia a *Naktuk zan chu lo leng la Mamte* a rawn ti a, kan inhmuh lohna a rei veleh deuh hlek tawh a. A chhangchhe zawk a ni a, lo leng tur a phut buai chi a ni lo tih ka hria. Chuvangin ka remchan chuan ka len tur thuin ka chhang a.



YouTube ah thil ka en mai mai a, ka nui ka nui leh thin.



Zingah hma taka thovin dawr ka kal nghal a. Kan buai leh pek hle.



Chaw chhun kan ei hmain Rinmawia nu a rawn lang hlawl a, lo chhawn vak ngaihna ka hrelo kher mai.


Rinmawia nen kan inzui rei ve em avang khan kan inhre tha ve viau hman a. Ka zep lo, a awmdan leh min chei bawl dan atangin mo atan min iai bik lo tih ka hria. Amah pawh nu sual tak a ni lova, nu ngainatawm leh rilru tluang deuh mai hi ania. Kei ngei pawhin ka ngaina hman hle.



Mahse khatia Rinmawia nen kan tawp tak atang khan kan inhmu ngai ta mang lova. Kawng laka kan intawh dawn changte hian keimah zawkin ka pehhel hram hram thin. A hlim chhawn khan tum khat chu min rawn bia a. An fapa in ka chunga a thiltih avangin ngaihdam min rawn dil. Keipawhin tha takin ka lo chhawn ve mai a. Mahse chumi hnu chuan kan inbe leh tawhlo.




Ka dawr chhungah chuan a rawn nui lut var var a. "Bungraw thar i la a nimaw?" tiin kan lo indah hnawk deuh niai chu a melh a. "Aw" ka lo ti ro halh ringawt.



Ka awmdan chu Aruati'n a lo hrethiam thuai a "Eng lam nge i duh ang?" a lo ti vat a. Mahse Nu Kimi chuan "Thil lei tur em em pawhin ka lo kal lo" a ti a, ka lam a rawn hawi a. "Mamte, inbe lawk ang hmiang" a rawn ti a. Ka kawr khai tha lai chu ka tawp chat a, ka en deuh ha. "Eng nge ni ta?" ka ti sap a.



Dawr chu a melh kual tete a "I hman chuan sawlai dawrah sawn thil sawi dun lawk ila" a ti ta a. Sawidun tur kan neih ka hre hran lova, mahse ka hnial ta biklo. Aruati chuan a thiltih lai tihzawm pah chuan min rawn melh tawn hrek hrek a.



"Ka va zui lawk ang aw" ka ti a, a lo bu nghat.



Tichuan, Nu Kimi nen chuan kan inzui chhuak ta a.



"Tunlai in inhralh tha em?" a tih chuan "Hralh tha ve pangngai a nimai" ka lo ti tha ve mai a.



Thingpui dawr kan thlen chuan a sir kil deuhah kan thu a, "Eng nge i ei duh?" min tih chuan "Ka ril a tam hran lo" ka lo ti vat a. Zep lovah chuan a tam tawh, mahse Rinmawia nen inzawmna nei apiang chu rei tak an bul hnaia awm ka duh tawhlo.



"Anih chuan thil tuiril lam in mai ang aw" a ti a, ka hnial ta bik lo.



Kan thil in tur chu a chah nghal a, eng thil tak sawi tum ang maw tia ka lo ngaihtuah mek lai chuan a âw a thian kharh kharh a.



A thusawi tur chu ka lo ngaichâng rân a. "Mamte, Rinmawia nen in lo la inbe thin tih ka lo hre miah lova" a rawn ti sap a. Ka lo meng nghal awk. A ngaihna ka hrelo kher mai.



Ka chhan hma chuan kan thei tui chah chu a rawn thleng a, a tem sak a "A zialo ka ti ang reng lutuk a" a rawn ti leh a. Ka mitah min en kal a, min huat hmel hran lova mahse a lawm hmel fahran lo bawk.



"Kan inbe tawh ngai hlei nem" ka ti fiah fak a, thu dik tak ka sawi. Kum 2 liam ta atang khan pangngai takin kan inbe tawh lo hrim hrim a. Min rawn biak tum châng a ngah. mahse ka lo be duhlo zel zawk anih kha. Chutia inbe pangngai leh ang hrima min sawi chu ka lawm fahran lo.




"Zep duh suh, i tan chuan kalsan nghal mai a harsa ang tih ka hrethiam lutuk. Ka fapa mah nise a thiam lo zawk ani tih ka pha lo. I chunga a thiltih avang khan kei ngei pawhin ka hau nasa. In inhmangaih zia pawh ka hria. Mahse Mamte, mi pâ a ni tawh a, a lo biak leh che pawhin lo be tha tawh suh aw" a ti dam dap a.



Nu Kimi chu ka melh reng ringawt. Han sawi ve mai tur pawh min ti hrelo hial. A sawi zawm leh a "Tunlai an nupa an inkhak reng a, han inthen mai dawnin karah fa a lo awm ve tawh sia. Keini nu leh pa te chuan inrem takin awm se kan duh a. Mahse Rinmawia hian a la vei êm che a, a lo be leh thin che anih kha. Khatah tak khan nangmah zawkin lo be tha duh tawhlo la. Pangngai taka a awm ve theih mai kan ring a" a ti leh dap dap a.



Ka nuihzat vang ni miah lovin ka nui ro halh a. Eng ang hmeichhia ah nge min ngaih chiah ka hrethiam lo khawp mai.



Ka âw ka thian kharh a "Nu Kim, Rinmawia nen kan inbe tawhlo. Biak leh ka tum tawhlo bawk. Kan inbiak thin thu chu khawi atanga i hriat nge ka hrelo a, mahse kan inbe tawhlo tih erawh hria la ka duh" ka ti chang fak a.



Chutah Nu Kimi chuan "In la inbiak thin thu Feli'n a sawi vek alawm. Lalrinmawia lahin phat a tum bawk si lova. Mamte, Rinmawia tan hian ka duh thin zia che chu i hria ang a, mahse tunah chuan thil a danglam tawh a. An pahnih hian inngeih takin awm se ka duh" a la ti deuh deuh a.



Ka thawk a tipik vek. Lalrinmawia vang hian engtia rei nge ka buai dawn le? Hetiang boruak vel hi ka hne tawh takzet.



"Chiang deuhin ka sawi ang, kan inbe tawhlo. Min rawn be thin, mahse ka chhang let ngai lo. Nu Kim, mihring ve tho ka nia dawhtheih chin ka nei ve ania. Hetia i fapa vanga buai reng hi ka ning tawh, ka hne tawh lutuk. I ngenna chu zahawm ka ti a, mahse kan inbiak tawh ngai miau si loh chuan tih theih ka neilo. An nupa inkara ka lo buai ve chhan tur ka neilo bawk. Mahni tawkah ka buai ve viau" ka ti ta nghat nghat a.



"Kan buai sia, i sawi duh i sawi zawh tawh chuan ka kal mai ang" tih leh thawh ka rual a. Min en reng a, ka ngai pawimawh peih tawhlo.



Thinrim zetin ka dawr lam chu ka pan hlawk hlawk a. Feli chungah pawh ka thinrim, engvanga a pasal nen la inbe reng tura min ngai nge anih ka hrethiam lo. Ka thinrim hlur mai.


Nu Kimi ka chhan dan avang khan ka inthiamlo dawn dawna mahse min tihdan kha ka lawm vak bik lova ka inthiam chawp leh ngial a.



Dawr ka thlen chuan ka thu thla hnak a, ka thaw chhuak nghal ham ham. Aruati'n "Tinge a?" a rawn ti vat a, nui lui sak chungin "Ka thinrim lutuk" ka ti hlak a. Ka inhum ruh vak ringawt.



"Engtin nge a lo tih che a?" a tih chuan "Ka haw lutuk" ka ti leh hlak a, ka sa ham ham thei. Aruati chuan min en reng a, ka pangngai deuh hnu chuan "Rinmawia nen la inbe thin angah min puh tlat a" ka ti ta a. A lo ner nasa mai.



"A va ti awm ang lo ve" a lo ti ve hlak, a mitmeng atang chuan min thinrim pui ve hle niin ka hria.



Ka mood a fuh tawhlo laklawh a, chaw chhun kan ei zawh chuan dawr khar ka rawt ta ngawt a. Aruati chuan "I duh leh haw hma la keimah pawhin ka lo nghak thei tho alawm" a ti a. Mahse "Aih, a ngailo. Vawiin chu kan chawl ve tihna a nimai. Haw daih ang" ka ti a.



Chutia ka tih takah chuan phur deuhin dawr chu kan khar nghal sawk sawk a. Bazar nghal daih a rem em avangin a bazar ta daih a.



Scooty ka tinung a, ka inkhalh chhuah hmain U Vensangi ka call a, "Inah i awm em?" ka tih chuan "Aw awm e, naupangho nen" a rawn ti zang vah a. "Ka lo kal dawn" tih leh phone dah ka rual a.



U Vensangi bulah inbun ruak vek ila ka zia deuh ang.


An in ka va thlen chuan an fate pahnih chu anmahni tawkah an lo ri ve chûl a. Ka han pawm tete a, U Vensangi chuan "Dawr i hawng nange?" a lo ti vat a. "Ka khar a, ka lo kal daih" ka lo ti vat.


An fapa tê zawk ka pawm lai chuan a û zawkin ka phone a lo ban a, a nuin a lo khak nghal a. Mahse nui var var chungin phone chu ka pe ta tho a. Sofa ah chuan mi dar dar chungin YouTube a en nghal zat.



"Zanah i lo kal zawk dawn emaw ka tia" U Vensangi chuan a lo ti hap a. "Keipawh, mahse ka thinrim lutuk a ka rawn hrechhuak zawk che a. Ka lo kal nghal vang vang" ka ti zung zung a. Bawihpuia chu ka pawm tha sauh sauh a. Ka kawr hma a thil lem awm chu a khalh nghal melh melh mai.



"Engin nge i thin lo tirim a?" nui hak hak chung hian a ti a. Rinmawia nu lo kal thu leh kan inbiak dan zawng zawngte chu ka hrilh ta vek a. A lo chek hlak hlak mai.



"Feli pawh chu a va ti mak ve mawle" a ti hlak a. Pawm zetin ka lo bu nghat nghat a "Ni chiah mai, a rin thuin thil a lo sawi mai mai aniang. Ka thinrim zia hi a" ka ti leh hlak hlak a.



U Vensangi chuan "I han ngaihtuah tawh loh vei nem engah nge an la tihbuai fo che le? Rinmawia pawh tih tawh naklaiin a nu lehzelin a rawn bia che ania" a ti ve hlak hlak a. Chutah inthiamlo ru deuh hian "Nu Kimi ka chhan dan vel chu a mawilo viau em?" ka ti hap a. Ka thinrim lutuk na lamah ka lo chhang bung deuh nghat sia min ngai mak vek ang tih ka hlau.



"Mawilo lo e, a tihdan che a dik bik hlei nem. Tha taka thudik i hrilh tawh ber chuan awih ve hle hle mai tur ania. A la puh chhe talh che a. I dikna i sawi ve a nimai" a ti dap dap a. Tlemin ka rilru chu a nuam ve ta deuh.




Dawr ka khar ta sa sa tiin U Vensangi te inah chuan rei deuh ka leng a. Eirawngbawl dawn hnaihah ka haw ta chauh. Thu tam tak kan sawidun a, ka thawl deuh hawk mai.



Zanah ka pi pum a na vak mai a. Kan chhungkua in kan buai ta chûk chûk a. Damdawiin hnai ber kan pan nghal a. Puia erawh in lo nghak turin kan ti a. Midangho zawng chuan damdawiin kan pan nghal a.



Ka pain motor a khalh a, a hmaah ka nu a thu a. An hnungah ka pi pum na chu mangang zet hian ka lo buaipui a. Rina chuan kan hnungah scooty in min lo zui thung.



Ka pi pum chu ka chûl ka chûl a, a na ti lutuk chu a thlan fim a tla tiam tiam a. Tih theih ka nei silo ka va mangang tak. Ka tap lo chauh tawh.



Damdawiin kan thlen chuan nurse leh doctor ho chuan min lo buaipui vat a. Emergency ward ah an nawr lut nghal a. Luh ve an phal bawk silo, tih theih ni si lovin kan vei tawn sek hlawm a.



Ka pa chu a mangang ve hle tih a awmdan atang chuan ka hre thei. Ka dem hran lo, ka pu boral khan an la tê ve em a. Ka pi hian rethei takin a hmeithai pui a. Mi sawi ka hre fo thin "I pi hi chu nu chhel leh hriam tak ani" tiin ka pi chanchin an sawi hi ka hre fo mai.



Darkar chanve vel hnuah chuan doctor a lo chhuak a, chanchin kan ngaihven nghal vat. "Nachhawkna in kan chiu rih a, tunah chuan a harh mai lovang. Zing lamah a lo harh chauh ang. Kan admit rih che u a ngaih hmel. Test chi hrang hrang kan nei ang a, a chanchin chiang zawk chu a sawi theih chauh ang" a ti dap dap a. Ka thla a muan phah chuang hauh lo.




Ward pangngai ah an dahlut a. Kan chhungkua chuan kan inzui ve zel a. Ka pi hmel chu ka en a, a mu bam a. Tun hnai hian a lo tar ve tawh zia ka hrechhuak uar uar mai. A sam var vo chu duat zet hian a tuai mam sak a. Ka lainat a ni tawp mai.



Ka nu chuan "Mamte , i nau nen hian haw ula, i pa nen kan awm tho a. Phone hmangin chanchin kan inhrilh zel dawn nia" a rawn ti dam diai a. Mahse ka lu ka thing nghal nawk nawk. Khawiah mah ka kalsan lovang.



Ka pa pawh chuan "Mamte, i nu thusawi chu awih la. Kan awm tam avang khan engmah tih theih tak tak a awm chuang lova. Lo va haw rawh u" a rawn ti ve dap dap a.



Mahse ka tang ve tlat a "Kei chu ka haw dawn lo, haw ula ka lo awmpui zawk ang" ka ti tung a. Ka âw a khur ringawt bawk. Ka pi na hmel hi ka hmu thei ngailo. Tum khat a dam loh vak lai pawh khan ka tap chiam tawh.



Ka chhungte chuan ka hnial tlat dawn tih an hrechiang aniang ka nu leh Rina zawk an haw a. Ka pi chu ka pa nen kan awmpui ta a. Tumah kan tawng lova, ka pi khum bulah chuan ka thu tlat a. Ka pa chu ka hnung chiahah a lo ding ve reng tih ka hre thei.



A hnu deuhah chuan "Mamte, couch ah sawn va mu rawh, i menrei chuan i chau lutuk ang" ka hnungah rawn ben dat dat pah chuan a rawn ti a. Ka tawng thei tawhlo, hmui pet fan fan chungin ka lu ka lo thing nak nak ringawt.



Ka mittui rawn tla tur chu ka khap per sak sak a. Tinge ka pi chungchang anih hian ka rilru a no nghal tlat zel ka in hrethiam theilo. Ka ngaih em vang pawh a ni mai thei.



Ka pa chu a thaw chhuak hawk a "Zingah a rawn harh mai ang an tih kha mangang lutuk suh" a rawn ti leh a. Ka tap chhuak nghal hak ringawt.



Ka pa chuan "A va buaithlak thin e aw" a ti zawi sup a, ka hnungah a chul hliau hliau a. Min han hnem vak ngaihna a hre bawk silo, ka tah chhung chuan ngawi rengin ka hnungzang a lo chul hauh hauh a.



"Rilru tih no lutuk tur a ni ngailo. A kum a upa tawh a, engpawh a tawk thei tawh. Chuvangin kan rilru hi lo buatsaih lawk ve tawh tur" a ti nghet charh a. Ka lu ka thing nghal nak nak a.



Ka pi hi thi tur anga ka ngaihtuah zawng ringawt pawhin awmngaihna ka hre hlawl lo a ni ber mai.



Ka lo muhil daih a, ka lu ah min rawn sawi dat dat chuan ka harh nghal hlawl a. Ka kut a mu nghal chum chum bawk.



Ka pi chuan nui var var chungin min lo melh a, a khum bawkin ka lo muhil chu niin.



"Pi..." ka ti nghal hlawl a, chutah ka pi chuan "I murei tawh lutuk a, ka khua a har tawh sia ka lo kaitho tawp che" a lo ti zung zung a. Nizana a na hmel hmuh hrehawm lutuk kha a awm tawh lova ka thaw nghal huai mai.



A pang ka dek nghal a, a lo dai dap a. "Min ti mangang lutuk" ka ti zawi sap a. A lo nui mai a.



Ka hawikual a "Khawnge ka pa?" ka tih chuan damdawi a lei thu a lo sawi vat a. Ka lo mutui hman viau a nimai thei. An thawm pawh ka lo hre miah lova.



Ka pi chu a titi nghal siam siam a, a tawng nasat deuh hian a hrawk a za a, a khuh leh vak zel a. Han khap vak dawn ila ka ning emaw a ti ang tih ka hlau ve tho sia. A hnu deuhah chuan "Nakinah kan sawi leh dawn nia. I tawng nasat lutuk chuan i hah palh ang" ka ti a, a ngawi ve mai bawk a.



Ka pa chu reilote hnuah a rawn let a, ka nu leh ka naute pahnihin an rawn zui lut ve nghal bawk a.



Ka nu chuan ka pi chu a rawn buaipui vat a, a awmdan te a han zawh chuan ka pi chuan "Ka tha tawh lutuk, min buaipui vut duh suh u" a lo ti vat a.



Ka pa chuan "Ka nu, hei Rempuii te an lo thleng tawh bawk a, Mamtei nen kan va haw ve lawk ang aw" a rawn ti a. Ka pi chuan haw turin min lo ti ve thuai a. Kalsan ka hreh viau nain intihfai ve ka ngai bawk sia ka pa nen chuan kan haw ta a.



Haw kawngah chuan ka pa chuan min fuih dap dap a "I mangang hma lutuk thin a, tikhan a rawn tha veleh mai lawm. Hlauthawn lutuk tur a ni ngailo. Engpawh tawk ila insiamrem theih zel hi mi puitling zia ania. Chuvangin puitling leh pachang taka awm tum thin tur. Puitlin hmel deuh si hi i no ru leh riau thin a" a ti dap dap a. Car tukverhah chuan ka dak a, ka ngawi reng ringawt.



Ka pa hian a sawi dik chiah. Ka kum hi upain mi chuan puitling viau ah min ngai mah se nawi rukna deuh hi ka nei a. Ka puitling tak tak hlei theilo. Thenkhata chhel viau si hian chak loh rukna ka nei tlat thin.



In kan thlen chuan kan intifai sawk sawk a, damdawiin ah kal leh nghal ka duh avangin ka che reng reng chu ka hmanhmawh vek a ni ber.



Ka inpeih hnu chuan inhnuaiah chhuk thlain ka pa intifai lai chu ka nghak a, rei ka ti hman ngei mai.



Darkar 1 leh a chanve velah damdawiin chu kan va thleng leh a. Ka pi awmna cabin lam chu kan pan leh nghal a.


Kan va luh rual chuan an lo nui dar dar ri chu ka hre zawm nghal a. Ka chhungte mai bakah Nu Malawmi leh Vanmala ka hmu hlawl mai.



Ka nu chuan min rawn hmuh rual chuan "In lo va let leh hma ve" a lo ti vat a. Vanmala, couch-a thu chunga phone lo khawih mek chu a rawn hawi chhuak vut a, kan mit leh mit a intawng siah mai. Rang zetin ka hawisawn a. Tinge hepa ka hmuh hian ka awmdan a danglam tlat thin le?



Ka pa chuan "Mamtei a hmanhmawh em alawm" tiin nui vur vur chungin ka nu chu a lo chhang vat a.



Nu Malawmi chuan "I pi a damlo tih kan hriat rualin kan lo kal nghal a" a lo ti zung zung a. "In va ti lawmawm ve" ka lo ti ro halh.



Ka pi damlo an lo hre lehzel chu mak ka ti a, mahse ka sawi chhuak lem hlei lova.



Tichuan Nu Malawmi te chu an awm ve ta reng a. Ka chhungte nen an titi a, ka pi pawhin nuam a tih hmel kher mai.



Keichu couch-a thu run pa vang chuan ka awm a nuam hlei thei meuh lo. Min rawn melh leh zawk thin a, kei lah hian a rawn hawi apiangin ka lo melh fuh ve thei zel bawk si. A manganthlak tak tak ani. Ka lai huih ringawt mai.



A hnu deuhah chuan ka nu chuan "Mamte, i naute nen chhun thil ei tur zuk lei ula" a rawn ti a, ka thaw huai mai. Ka van lawm tak ! Helai hmuna awm reng hi nuam ka ti tlat lo. Ka tang tung reng a, a hrehawm tlat.



Ka nu chuan pawisa min pek a tum a, mahse ka lo dang vat "Pawisa ah lai ka nei alawm" ka lo ti vat a.



Ka naute pahnihin dawr kal tura min rawn zui chhuak mai tur chu Nu Malawmi chuan "Mamte, kha hei hi ka lo pek belh ang che" tiin a kuta cheng 500 chu min rawn pek a tum a. Mahse ka lo dang vat. Ka pa pawh chuan "Pek belh a ngailo Malawm, i ti awm ang lo emai" a lo ti ve vat a. Ka nu paw'n a lo tuihnih zui ve zat a. Min pek luih a tum ta bik lo.



Cabin atanga kan chhuah dawn chuan Vanmala chu a rawn tho ve nghal vut a "Ka lo kalpui ang che" a rawn ti sup. Ka nau te chuan min melh tawn zak zak a, ka chhungte chuan min rawn ngaihsak hmel tawhlo. Thu dang sawiin an titi zui nghal daih tawh.



"Puia, Rina lo awm ru. Keiman ka lo kalpui ang. Pawisa indaih loh thut takin" a ti leh sup a. Puia chu ngawi rengin a thutna ngaiah a va thu leh nghal daih a. Rina chu min kalpui turin ka mitmei a, a haider hmak. "A tihzia hlauh chu kan lo awm mai ang" a ti awlsam then a. Ka va ngei reuh tak.



Nu Malawmi chuan chutia kan lo la ding reng chu min rawn hmu a, kan thusawi lai mek hre awm ang hrimin "Vanmal nangmah khan Mamtei chu zuk kalpui la" a rawn ti a. Pakhat pa lah chu a bu nghut a, a chhuak zui nghal daih a.



Rina chu ka va melh a, hawi pawh a rawn hawi duh tawhlo. Hnuai lam bihin a nui put put ringawt a.



Tih theih dang nei hek lo le Vanmala chhuak vut chu ka zui ve nghal a. Amah vangin pawn lam boruak hip ka duh a. Ka bul hnaiah bawk a awm leh tho sia.



Pawnah chuan min lo nghak a, muangchangin ka kal a, a zawn ka va thlen chuan min nuih suk a, ka nui veleh ringawt. Tinge pangngai taka awm ka harsat em em mai le.



Damdawiin kawngah chuan kein kan inzui thla hnak hnak a "Damdawiin pawn lam ami lei zawk ang aw. A tui zawk ang" a ti sup a, ka lo 'aw' ve mai bawk a.



"I pi hi kum 80 a tling tawh em?" a tih chuan min rawn melh zawk a, "Aw, kumin hi a 81 na tur" ka lo ti tha ve mai a. A bu nghut nghut a.



Damdawiin atanga hla vak lo, dawr pangngai ve takah chuan eitur ho chu kan pack tir a. Ka pi ei turin papawr kan ka lei sak a. Hetiang kam ram mai mai hi a ngaina ve riau a, dawr atanga ka haw pawh hian ka leisak thin.



Pawnah min lo nghak a, order ho an pack fel hnu chuan inkhai bawr tunin ka va chhuak a. Ka hmuh mai loh avang chuan ka hawi kual a, dawr sir ah chuan phone a lo hmang a.



Han auh mai ka hreh sia ka nghak ren rawn a, a hnu deuhah chuan min rawn hmu ta a. Chuveleh a phone hman lai chu a dah a, a kekawr ipteah a thun lut nghal a.



Ka lam panin ke a rawn pen pawk pawk a, a kal ringawt pawh hi hmuhnawm tham . A palian sia, a pen hlawk bawk si. A rah a na ngawt ang. Ka ngaihtuahna avang chuan ka lu ka thing nak a.



Ka bul a rawn thlen rual chuan "Min lo au mai lova" a ti sup a, ka lo nui mai a. Ka thil khai ho chu min laksak nghal a. "Khawiah nge bill?" a tih chuan "Ka pe tawh" ka lo ti vat. A rum nghut a.



A thil khai lai chu kan awmna bula thutna awmah chuan a dah thla ren rawn a, a kekawr ipte atanga wallet a rawn phawrh rual chuan "Hey...min pek tum suh aw, ka duh miah lo ania" ka lo ti vat.



Ka thusawi ngai pawimawh lo zet hian cheng 1000/- a rawn phawrh a. Ka hma zawnah rawn lekin "Kha la rawh" a ti sup. "A ngailo ka tih kha" tiin ka lo hnial vat thung. Min melh run a, ka lak hma chu min pek a tum dawn tih hriat fahran hian min melh a.




Mahse lak ka tum bik lo, ka thil lei ho hi cheng 1000/- man a tling lo hrim hrim bawk a.



Ka kut chu a rawn chelh a, pawisa a rawn hmehbel nghal chawt a, ka lo tang ve nghal tung a. Min pe mai thei bik lo.



"Mamte, la rawh" a ti leh sup a. "Vanmal" ka lo ti ve chiah bawk. Kan in en a, "U Vanmal ti rawh" a rawn ti sup, a nui zui suk a, ka kutah chuan pawisa chu a hmehbel nghal chawt a. "Hetiang man zat em em ka lei lo, cheng 500/- vel chiah alawm" ka tih pawh chuan "A bâng kha chu i pi ka kan ve na ani mai" a ti tlat a. Hnial zui zelin awmzia a nei dawnlo tih ka hriat avangin ka hnial duh tawh bik lo.



Kan thil lei ho chu a va khai leh vut a. Kan inzui leh dawn chiah tihah ring leng lawnga "Hmingmawizual" ti thawt ri kan hria a, Vanmala chuan ka hnunglam chu a en nghal vut a, keipawh ka lehhawi nghal vat.



Lalrinmawia chu a rawn pen phei pawk pawk a, mangang zet hian Vanmala chu ka melh a, min lo melh chhuk ve run bawk.



A ri bur a, ka khek nghal tuarh. Vanmala chu a pai khut a, a kam sir a rawn thî nghal ser ser bawk. A thil khai ho pawh a thlauh nghal vek a. Lalrinmawia lam chu ka hawi leh a, thinrim zet hian a thaw kawk kawk a.




A kut a lek chhuah leh rual chuan Vanmala chu a lo in dang vat a. Ngawi rengin an inchai buai a. Mahse Vanmala chuan a khawih let miah lo thung.



Rinmawia chuan chutia a khawih nawn theih tak mai si lovah chuan ka lam a rawn pan vut a, mit ka lo chhing sawk. Ka darah na zetin min rawn hmer a "Hepa vang hi em ni ka lam reng i rawn hawi duh tawh loh" a ti tuarh a. A au ring bawk a, ka hmai a thaw vawk thei. Chuan, zu rim a rawn nam nghal huam bawk.



Chu veleh Rinmawia chu a hnunglam atangin an rawn pawt let nawk a, rawn pawt nawk tu chu tu dang ni lovin Vanmala a ni.



Tlangval pahnih chu ka hma zawnah incho em em hian an indinchilh ta ran mai. An insual buai mai ang tih ka hlau takzet.


Rinmawia chuan Vanmala kawr awmah chuan a tham chawt a, deusawh zet hian "Nang hian ka bialnu hi lo hnaih ve tawh suh" a ti hluk a. Ngeiawm zetin Vanmala chu a nui suk, Lalrinmawia thinin a tuar leh tawh silo, a kut lek chhuah leh mai a tum a. Mahse Vanmala chu a lo indang leh hman hram. A kut a hnungkhirh sak a "Thianpa, mi awm tha hle hle lai kut han inthlak ngawt chu i ti awm ang lo hle mai" a ti dam dap a. A tawngkam dam lutuk chu mak ka lo ti hial.



Lalrinmawia chuan tal chhuah tumin a bei fat fat a, mahse a chelhtu chuan a chelh nghet lutuk tlat. A thlah anih loh chuan a tal chhuak thei hauh lovang.



Thaw dep dep a ka lo din khawng reng lai chuan Vanmala chu ka lam a lo hawi vut a, mitmeng dam zet hian min rawn melh a. Ka mita hlauhthawnna chu a rawn hmu thiam aniang "Hlauthawng suh" a ti zawi sup. Ka thla a muang nghal em em ringawt.



Ka hawi kual a, miin min lo en thup tih ka hmuh rual chuan ka zak chem chem mai.



Vanmala chuan a thlah ta a, Rinmawia chu a pai nghal khut mai.



Vanmala chuan Rinmawia melh pah chuan "Min rawn tibuai tawh suh ang che" tih leh ka lam pan a rawn rual a. Ka kutah min chelh a, ka lo en reng ringawt. A kam sir thi chu ngaihtuah hmel pawh a pu lo, hre awm pawhin a lang lo.



Lalrinmawia chuan a hneh dawn lo tih a inhre chiang aniang min rawn umzui leh tawhlo. Khati teh thut a a rawn che kha ka zak a, Vanmala lakah pawh ka inthiamlo takzet.



Damdawiin lam pan chuan min kai phei nghal dawt dawt a, a pen hlawk bawk si, ka tlu lo chauh.



Gate kan luh dawn chuan inthlahrung zet hian "Kan thil lei ho kha" ka ti hap a, a ding chawt a. Min rawn melh chhuk run a "Damdawiin canteen ami kan lei mai dawn nia" a ti sup a. Ka kuta a rawn chelh leh rual chuan ka lo tang vak a.



A ngaihna hrelo fe a min rawn melh chuan a kam sir melh pahin ka kut chuan ka kawk a "A thî ania" ka ti zawi sep. A phun hluk a, a kamsir chu a khawih a, a kut chu a en leh a, thisen a hmuh rual chuan a phun leh hluk.



A kut lehlamah chuan keimah zawkin ka kai nghal a, min lo zui ve mai bawk.



Vei vak an awm vak loh naah chuan ka kai phei a, thingkung bula thutna nawm hmel zet lo awmah chuan ka thuttir a. Ka bag a rawmawl chu ka la chhuak a, ngawi rengin ka chezia chu min lo en reng a.



A kuta rawmawl hmehbel pah chuan "Hru fai rawh" tiin a kam sir chu ka melh a. A nui suk a, nuihzatthlak a awm ka hre der silo.



"I bialpa chuan tlawm a inti viau ang" a ti sup a. Ka lo ner nak "Ka bialpa a ni bawklo" ka lo ti hlar a. "A ngaizawng che em ni?" a tih chuan ka lu ka thing nak nak a. "Anih i eng nge a nih a?" a ti sup a. Han chhan mai dan tur ka hrelo "Ka engmah a nilo" ka ti ta ringawt a. A awih hmel loh kher mai. Mahse min zawt zui tawh bik lo.



A kam sir chu a hru fai a, a phun leh hluk thin. Ka thin a rim thar thut a "I cho lo em ni khapa kha?" ka ti hlur a, a khawih let ve miah lo kha ka tha a lo na tlat.


Min melh rûn a, "Hnek let ve hrep ta che" ka ti leh hlur a, Lalrinmawia kut thlawn a tuar kha ka tha nat pui tlat. Vanmala chu a rawn ding chhuak vut a. Rawmawl leh ka kut chu a rawn hmehbel a, min melh rûn a.



"Eng nge?" ka tih chuan min kal pel nghal vut. "Khawnge i kal dawn?" tiin ka au let a, a rawn hawi nghal vut. "Khapa kha ka va hnek ang chu ka ti " a rawn ti hluk anih chu!



Chu veleh hmanhmawh zetin a lam chu ka va pan nghal a. Phawk zeta en pahin "I ti tak tak em ni?" ka tih chuan "Ka fiamthu lo" a lo ti hluk.



Ka thusawi atthlak zet avang khan ka inchhir vawng vawng mai. A va ti let veleh anih vaih chuan kan buai zual mai mai ang.



"Ka cho lutuk" a ti leh hluk a. Cho lo anga lan chu a hreh ve hle ni tur ani. Insum hman lovin ka nui chhuak ta hak hak a. A ngaihna hrelo fe hian min melh a.



"Pawiti suh, i va tihlet chuan a hneh lo lutuk palh ang che a khawngaih thlak" ka ti ta ringawt a. Ka nuih tlawn deuh titih a. Ka ti tak tak, Vanmala hian khawih let duh sela chu a hnehsawh dawn lutuk.



Min melh rûn chung hian "Khawih let ka duh loh chhan alawm" a rawn ti veleh hluk a, ka lo nui ta tawp.



Kan thutna ngaiah chuan ka kai phei leh a, a kamsir la thi ser ser chu keimah zawkin ka hrukfai sak ta a, ngawi rengin a lo dawh ve hle hle mai bawk a.



Kan kal dawn chuan ka hmazawnah a phone a rawn lek chhuak a, "I phone number min pe rawh" a ti sup a, min melh ngur a, ka zam leh em em ringawt tawh.



Min dil miau si chuan inpek loh ngawt thu a awm si lova ka number chu ka pe ta a. "Lawngtlai ka let leh hunah ka lo bia ang che" a ti a, a lungawi hmel viau. Chhan enah pawh ka en hran lo.



Canteen ah chuan thil kan lei tha leh a. Vanmala pawisa min pek kha ka hmang a, min pek leh talh a tum a, mahse ka dang thei hram. Amah bawkin eitur ho chu a khai leh a. Kan inzui leh hnak hnak a. Mi lah chuan min lo en hrek hrek hlawm a. Keimah tak phei chu min en vak lo, ka bula kal hian mi mit a la viau a ni mahna. A hnathawh avangin a lar thawkhat ve em a.



Ka pi cabin awmna lam kan pan lai chuan "Tinge khapa khan min rawn tihbuai ngawt a?" a rawn ti zawi sup a. Ka chhanna ngaichangin min melh run bawk.



Han chhan mai dan tur ka hriat loh avangin uang thuang zet hian "A thik che aniang" ka lo ti sam then a.



Mahse Vanmala chuan thutak zet hian "Khatiang thik thu a nilo, hmasialna anih kha" a lo ti hluk.


Sawm zawm lehin "Thik thu hi chu inhmangaih tak tak inkarah chuan a hlu a, inlaichinna a tinghet a. Mahse khatiang kha chu thik thu a nilo hmasialna anih kha. Thik thu ni sela chu midang awm loh laiin tha takin a sawipui ang che. Khatianga a rawn chet avang khan a ti zahawm lo che a. Mi mithmuhah pawh a mawilo. Ngaihtuah chiang mah rawh, i zak viau ang" a ti duah a.



A thusawi chu a dik vel vek, han sawisel eih tur ka hrelo. Ka zak tak tak reng bawk a.


Hetiang em em hian ka fiamthu kha a lo lak thutak ka ring miah lova. Mahse ka fin belh phah sawt a, a tha tho e.


Ka hriatchian tak em em chu a hmaa Lalrinmawia ka chunga a lo thinrim thinna te kha thik thu a nilo, a hmasial vang mai mai a lo ni.



Mipa dang ka hnaih dawn a a hriat apiang khan amah ka thlang lo nia a inhriat avangin tlawmah a la a, min ta chei a. Min hmangaih vang a nilo, a hmasial vang a ni.



Min hmangaih ni se min phatsan hauh lovang.



___________*___________*__________


Show post links
Top

[Ngaia]

DEPUTY COMMISSIONER
By CVL Awmpuii



Chapter 5



Cabin chhung kan va luh rual chuan ka nuin "In va rei ve" a lo ti vat a. Chhuanlam han siam dan ka hre si lova, ka lo nui tawi tek ringawt.



Kan thil lei ho chu Vanmala'n dawhkanah a nghat thla a. Ka lo sem vat thung.



Ka pi chuan ka papawr lei sak chu a ei ri rap rap a, Nu Malawmi'n a hmu duh ngang mai. A nuih a nuih mai.


Couch ah thu a thil ka ei lai chuan Nu Malawmi'n "Mama, tinge i kam sir kha" a tih ri ka hria a, Vanmala lam ka hawi vat a. Ka ip nghal chawih. A kam sir atangin thî a lo chhuak leh ser ser tawh. Rinmawia khan a lo khawih na viau a nimai thei.



Vanmala chuan a kam sir chu a tuai a, min rawn melh zawk a. Nu Malawmi a chhan dan tur chu thaw dep depin ka lo ngaichâng ran a. Thudik a sawi ka hlau takzet.



"A pilh satliah anih hi" a ti zawi sup a, a ngaih a sam hmel viau bawk. Ka lo thaw huai mai.



"Khawi maw lo kal teh" a tih chuan ngawi rengin a nu lam chu a pan ve mai a. Nu Malawmi chuan a rawmawl in a lo hruk sak a. "Engtin nge i tih reng reng a?" a ti hlak a. Vanmala chuan a mit sirin min rawn melh a, ka lo melh ve reng bawk.



"Ho tê mawle" a ti leh mai a. Nu Malawmi pawh chuan a zawt zui tawh bik lo.



Naktukah Vanmala hna lama a let tawh dawn avangin rei an awm ta lova, kan thil ei zawh hnu rei vak lovah an nufa chuan an haw ta a. Ka thaw nghal huai mai.



Chuveleh ka pi bulah chuan thu thlain "Engtin nge i dam lo tih an hriat a?" ka ti ha a, nichin atang khan zawh ka duh tawh a, hun thawl a la awm loh vanga zawt rih lo chauh kha ka nia.



"I nu Malawmi khan min lo phone a, rawn len a tum thu a sawi a, ka lo hrilh alawm" a ti sam thên a. Zawhna dang ka la nei "I phone number a nei em ni?" ka ti leh ha a. Chutah ka pi chuan "Vanmala'n ka puan bah min rawn pek tum khan number kan inpe alawm" a lo ti leh mai a. Ka bu ta nghat ringawt.



Ka pi chu kar khat tha zen zawn damdawiinah a awm ta a. Ka kalsan duh tlat loh avangin keiman ka awmpui a. Intifai turin ka haw zawk tih loh chu a bulah a tap chawt a. Ka dawr erawh khar rih mai ka tum laiin Aruati'n a lo enkawl theih tur thu a sawi a. Ka lawm takzet.



Ka pi chu lehkhabu te chhiar sakin YouTube-ah Pathian Thu ka ngaihthlak pui thin a. Pathian zarah khawsik nat hluah hluah, mut theih loh ang kha a nei miah lova. Mahse zan lama a pum rawn na thin chu kan manganna ber a ni.




Chhun lamah test chi hrang hrang kan nei thin a. Doctor te'n result mumal tak min pe thei tlat lo. A natna tak an hrechhuak thei lova. Mahse an rinhlelh dan chuan pumpui cancer a nih an ring a. Kei chuan a cancer chhan tur ka hriat loh avangin han mangan vak ngaihna ka hrelo a. Thu chiang a awm hma chu ka pawm ve theilo a ni ber.



Natna tihbaiawm tak tak te hi midang chunga a tlak chuan lo pawm dam pui a awlsam viau a. Mahse keimahni chungah, kan chhungkua ah a lo tlak meuh chuan awih a harsa a. Eng anga ringtu tha nih pawhin thinlungah nghing dawt a awm ve lo theilo.



Vawiinah a thisen kan test tha leh dawn a, CT Scan leh a tul ang ang pawh a tum thum nan kan ti tha leh dawn a. Doctor te'n an bei nasa bawk a, a natna tak pawh an hmuh chhuah ngei ringin beiseina sang tak kan nei a. Mahse ka zam a ni. An rin ang kha lo ni ta se, ani ang kum upa tawh lutuk tawrh atan chuan ka phal lo.



Test kan neih hma chuan bathroom ah ka luhsan zawk a. Ka zam lutuk chu ka tawngtai ta tawp a. Ka mittui ka dang zo leh pek lo. Tinge ka nep em em mai le ?



Ka intihpaukhauh luih hram hram a ngai tih hriain ka mittui rawn tla leh tur chu ka hru tawk a. Ka pa ka call a, an lo thlen tep tawh thuin min chhang a.



Ka pi hi kan neihchhun tak meuh meuh a ni tawh a. Tupawh mai hian kan ngaihtuah vek a. Kan buaipui khu chuk chuk vek a ni ber e.



Rei vak lovah ka pa te pawh an lo thleng a, ka naute pahnih chu class kal lai leh traning lai an nih avangin chhun lam an hman ve chiah lova , an lo kal lo thung.



Ka nî te pahnih an lo kal ve bawk a. A damlo ber ka pi chuan a lo chhawn vat a. A nat loh lai hi chuan tha vur angin a lang a, mahse a na tlat bawk si.



Nurse te an lo kal takah chuan test nei tur chuan kan innawr chhuak ta a. Amah lah chu hlim em em hian a nui hak hak reng a. Ani tu leh fate timangang duh reng reng lo, phurrit nih duh reng reng lo ta chu min tihlimti ber berah a la tang a. Ka hnuk a ulh teuh ringawt.



Tluang takin test chu kan nei zo a. Ward a kan luh leh hnu rei vak lovah a chu a rawn na leh vak mai! Hetianga a awm hmasak ber tum a ka mangan ang chiah khan ka mangang leh a. Ka pa chuan nurse te chu a va ko vat a. Ka ni te pahnih pawh an mangan zia hai theih a nilo.


Ka nu chuan ka pi pum chu a lo chûl a, lainat lutukin an bulah tih tur hre si lovin ka lo ding khawng reng ringawt. Chêt ngaihna reng reng ka hrelo.



Nurse te chuan nachhawkna in an rawn chiu a, a chhawk ta deuh aniang rei vak lovah chuan a muhil ta siai siai a. Ka lo hahdam huai mai.



Doctor in min rawn koh chuan ka pain a zui chhuak vut a. Ka pi natna chungchang an sawi dawn ani tih ka hai lo.



Room chhungah chuan kan thu ngui bam hlawm a. Zawi tetein ka pi natna chungchang vel chu ka nu leh ni te chuan an sawi a. An bulah mit chhing vang vang chungin ka lo thu ngawi reng ringawt.



Ka phone a rawn ri ral ral a. Caller ID ka en chuan number hlang atangin a lo nia. Ka pi dam lo awmpuitu ber ka nih avang hian mi hrang hrangin a chanchin min rawn zawt awl lova. Chuvangin phone call pawimawh anih ringin cabin atanga chhuah pah chuan ka chhang nghal vat a.



"Hello..." ka ti zawi sep a. A reh deuh vung vung a. "Hello..." ka tih leh rual chuan âw a rawn thian kharh a. "Ka tawng i hre thei em?" ka ti leh a. Damdawiinah hian signal a tha vak lova, ka tawng a hre tha theilo anih ringin pawn lam ka pan nghal a.



"Mamte..." a rawn ti zawi ta ruih a, ka ke penlai chu ka ding nghal chawt. Ka hriat sual loh chuan Vanmala âw ngei a ni. A âw hre hrang tur khawpin kan la innel lo, mahse ka hre si chu anih hi !



Ka ngawih reng avang chuan "I dam tha em?" a rawn ti zawi leh ruih a. Ka lo bu nghat, chumi rual chuan min hmu theilo tih ka hriat zawm leh zat a. Atthlak ti lutukin ka lu ka thing nak a "Aw dam tha e" ka ti hul hak.



A rawn thaw chhuak hawk a.



"Ka thawng viau che ani maw" a rawn ti zawi leh ruih a, a âw dam dap mai chuan engtin emaw tak hian min fan ti ila ka sawi sual lovang.



Han chhan mai dan tur ka hriat loh avangin "Eng nge ni ta?" ka han ti ngawt pek a. A reh vung vung a. A dah tawh emaw tiin ka phone chu ka melh a, a la pangngai vek bawk si.



Ka bengbula ka dah leh rual chuan "Vanmal" ka ti zawi sep a, ka tawng a hre tha theilo a nimai thei, signal a tha vaklo ka tih tawh kha. Mahse "U Vanmal ti rawh" a rawn ti sup a , a âw ah chuan nuihzatna a lang tel bawk.



Ka ngawi ta reng a, amah zawk chuan "Ka lo bia ang che ka tih kha" a rawn ti dam leh dap a. A sawi dik. Ka number min dil tum khan min lo biak tur thu a sawi tak alawm. Mahse kan buai ta nuaih a, min lo biak leh biak loh pawh ka lo ngaihsak lo reng reng.




Sawi tur hrelo zet hian "Nia..." ka ti ringawt a, a rawn nui ri hawk. "Min lo beisei vak nange?" a tih chuan "Chutiang lam pawh a nilo" ka han ti mawihnai ve ngial a.



Zep loh chuan ka beisei miah lo, ka ngaihtuah lo a ni mah zawk ang chu. Hriat pawh ka lo hre leh tawh lova.



"I pi eng nge a an a?" a rawn ti daih a, insawi thiam vel ngai lova thu dang a rawn sawi daih chu ka lo thaw huai mai.



Ka pi dinhmun te chu ka hrilh ve luam a, a kar lakah zawhna min zawt leh zeuh thin tih loh chu amah hmu theilo mah ila min lo ngaithla uluk ve hlein ka hria.



Ka sawi zawh chuan ka thaw chhuak ham ham a. Chutia inhawng taka ka pi chanchin ka hrilh nghal vek thei chu mak ka inti hial zawk. Ka hmelhriat tha pawh ni si lo laka ka la tawng hnem ve ber tum a nimai thei.



"I rilru a va hah dawn ve chu" a rawn ti sup a, min han hnem vak ngaihna a hre bik lo aniang.


"Hah khawp mai" ka ti halh a, "A kum a tam tawh a, tlang deuhin sawi ila, hun a nei tlem tawh a..." a rawn tih lai mek chuan "Khati zawngin sawi suh" ka lo ti vat. Tunah chuan a hnual zawngin thil ka ngaihtuah duh lo bur.



"Mamte..." a rawn ti hulh a, ka hming a lam ri ka hriat rual hian ka lo ip chawih thin. Midang min koh dan ni tho mah se aman min koh hian engtin emaw tak ka awm zel. Zawi ruih, dam dap, fiah tak si hian a lam thin ka ti mai. Ka hriatna tha zam a fan rang thin.



"Thil reng reng hi a hunlai chuan kan paltlang thei dawnlo emaw kan ti fo a. 'Ta se' tihah hian kan buai fo. Mahse a taka dai buak chuan a lo paltlang ve theih mai zel ania. Mihringte hi na hle thin mah ila keimahniah hian natna hneh thei chhelna a awm vek ania" a rawn ti dam dap a. Sawi ve tur rêng ka hre leh tawhlo.



Tawngkam thiam loh hmel deuh si hi a thusawi a dik thlup zel a. Reilotê chauh kan la inhria a, chuti chung chuan mi fing leh thil thlir dan thiam tak mi niin ka hria.



"Ka thusawi chu i hrethiam tiraw?" a rawn ti leh sup a, "Ka hrethiam alawm. Mahse tunah rih chuan a hnual zawngin engmah ka ngaihtuah duhlo" ka lo ti ve vat a.



"Umm...beiseina neih hi a pawimawh ber" a rawn ti veleh ngial a.


Vanmala nen kan inbiak zawh chuan ka pi cabin lam chu ka pan lehnghal a. Rin aiin kan titi thei ta phian a. Min hnem dan thiam lo mah se min thlamuan ve em em ringawt. Mi hneh theihna riau a nei aniang, a thusawi te, a thil thlir dan te khan min hneh a, ka pi natna chungchanga ka ngaihdanah pawh ka rilru chu a dam ta deuh.




Cabin chhunga ka va luh leh chuan ka pa pawh a lo let leh tawh a. Ka pi mutna khum sir deuhah chuan ka nu leh ni te ho nen an lo ding khawm thap a. Ka ni te pahnih leh ka nu te phei chu an lo kun lap a. Ka pa erawh mipa ngang a ni a, a pangngai hmel viau.



"Pa eng nge chanchin?" ka tih chuan ka pa chuan a aw a han thian tete a.



"Mamte, i pi chu a pumpui a lo cancer anih hmel" a ti dam dap a. Kan lo rinlawk sa mah ni se min den dan a nat loh phah hauh chuang si lo.



"Result a chhuak hman em ni?" ka ti halh a, ka pa chu ka en deuh ha bawk. "Chhuak chiah lo, mahse a chiang viau tawh. Doctor min hrilh dan kha chuan" a ti leh sup a. Lo dawn sawn ngaihna pawh ka hrelo. Hei erawh ka hrechiang ka rilru a na vawng vawng mai.



Ka pa chuan "A rang lamin chhungkua inrâwn khawm a ngai dawn a. A natna chungchang pawh hi sawi viau a ngai ang. Kan hrilh hriat dawn leh dawn lohte pawh. Doctor khan a sawi dan chuan tunhnai maia na ni mah se an lo upa ve tawh bawk nen a serious viau a ni awm a. Engmah zep tur a awm lova tlang deuha sawi chuan hun a ngah tawh vaklo anih hmel " a ti dap dap a. Ka lo tang nghal teuh mai.



Ka pi a rawn harh hnu chuan tute pawh chu pangngai taka awm kan tum vek a. Keimah ber hi ka buaithlak thin. A hmel pawh ka en tha ngam lo, ka tap dawn nghal zel a. A manganthlak tak tak ani.



A result chu min zawt a, a la chhuah loh thuin ka chhang. "I dam tha leh vat mai ang" ka ti tlat a , ka beiseina erawh a chau rau viau.



Ka nuin "Mamte, zanin chu ka lo riahpui ve tawh ang. I awmpui rei tawh a, i chau tawh ang" a rawn ti a, ka lo hnial leh tlat a. Ka pi chuan "Ni e, Mamte ngaihtuah awm ka nih loh hi zanin chu i nuin min riahpui sela i duh leh naktuk lamah i lo kal leh vat zawk dawn nia" a lo ti ve vat a. Ngaihtuah awm nilo ang te'n a inngai a, a dinhmun a tha hauh silo.



Ka hnial tlat avang chuan ka pain thu tawp a siam ta a. Ka pi hlat deuh hlekah chuan min kal hranpui a. "Mamte, i mangang hma thin si a. I pi i timangang zual mai mai ang tih a hlauhawm. Chuvang chuan zanin chu i nuin riahpui se naktukah ka rualin i kal leh zawk dawn nia" a tih takah chuan hnial zui chi ah ka ngai tawhlo.



Ka pa chu ka zui haw ta a. Ka ni te kan thlah kawi a. Ka pi riahpui chu duh ve viau mah se mi mo an ni tawh a, chhungkua an lo buai ve bawk nen kan phut buai duh lova. Hrehawm pawh an tih hmel viau.



In kan thlen veleh tuilumin ka inbual nghal a. Ka zâng deuh hawkin ka hria.



Ka inthlak lai chuan khuma ka phone dah chu a rawn ri a, caller ID pawh en lo chuan ka chhang nghal a.


"Amamte..." Lalrinmawia âw ka hriat rual chuan ka inhumruh nghal vak. Ka kawchhungah danglam a awm vang ni tawh lovin thinrim vang zawk ani. Hepa hi ka ning tawh takzet.



Vanmala a hnek tum kha kan inhmuh tawpna ber leh min rawn biak tawpna ber a ni a. Ka lo thawven ruk ve tawh viau laia min rawn be leh hram chu ka run kher mai.



"Amamte, hmannia thil thleng vang khan ka tihpalh. Ka hmangaih lutuk che a, chuvangin khaw hmu lek lovin i bula mipa kha i bialpa anih ringin khati khan ka rawn che ta anih kha. Ka tihpalh takzet. A thleng nawn tawh miah lovang" a rawn ti vei luam a, insawi thiam tumna bawk a ni.



"I thiam lohna i hriat chuan a tha anih chu" ka lo ti nghat a. A rawn thaw chhuak hulh a "Amamte...khawngaih takin chance min pe leh rawh. Ka tum ve nasa, theihnghilh che hi. Mahse ka theilo, ka hmangaih che" a rawn ti leh ngial a. A aw rik dan phel phual atang chuan zu a in leh tawh a ni mai thei.



Phone chu dah ka tum a, mahse min rawn tibuai zel dawn tho ni a ka hriat avangin off ta mai lo chuan ka mute hmak a, sound ka tizawi a, khumah chuan ka theh phei hmak. Tikhan a duh duh chu lo sawi sela keiin ka duh ka lo ti ve thung ang.



A peih chen chen han insawi thiam teh se.



Ka inthlak zawh chuan lehkhabu bawm ka hai rak rak a. Ka naupan têt atanga ka lehkhabu ngainat em em 'Kristiana vanram kawng zawh' chu ka phawrh chhuak a. He thawnthu hi chu ka duh ve thlawt a ni.



Ka tet zual deuh lai khan ka piin min leisak a, a bula ka riah changin min chhiar sak thin a. Ka lo puitling a, lehkhabu tam tak chhiarin upa ve uaih tawh mah ila tun thlengin ka lehkhabu ngainat ber a la ni.



Ka lehkhabu keng pah chuan khum lam chu ka pan vat a, phone ka en chuan phone call a lo la kal mek a, Lalrinmawia chu a la beidawng duh chuang lo anih hmel.



Lehkhabu chu ka chhiar ta a. Tui ti takin ka chhiar dawn chiah tihah ka mitthlain ka pi ka hmu zel a, ka chhiar hlei thei lo.



Ka phone bawk chu ka la leh a, vanneihthlak zetin Lalrinmawia chuan a lo dah tawh a. Ka thaw huai mai. Khati kha chuan min lo be buai zel peih tawh bikin ka ringlo.



Ka nu ka call a, ka pi chanchin ka zawh chuan a muthilh tawh thuin min lo chhang vat a. A pum na pawh a awm tawh rihlo a ni awm e. Thawk khat chu a veng ta huai.



Kan inbiak zawh chuan WhatsApp ah ka lut a, ka beisei loh lutukin Feli hnen atangin message ka dawng nawlh a.



Rinmawia nen an inneih hnu pawh khan a number hi chu ka delete lova, mahse status vel kan inhmu thei tawhlo thung. Amah zawkin ka number a delete pawh a nimai thei.



Message chu ka hawng a, thu tam tham zet hi a lo intlar thla tuarh mai.


*U Mamte, i chunga ka thiltih te kha a âwm ang lova, ka thiam loh liau liau a ni tih ka hria. A hunlai khan ngaihdam dil che ka duh thin a, mahse ka huaisenna khan a tlin thlawt lova. I zahawm ka ti a, ngaihdam pawh dil ngam lo che kha ka ni reng bawk a. Min ngei la, min hua la, min rawn ankhum bawrh bawrh pawh ni la ka dem lovang che. Mahse U Mamte, zak theilo pawh min ti mai thei a. Mahse khawngaih takin U Rinmawia nen hian lo inbe tawh lo hram teh u. In inhmangaih zia ka hria a, lo tlazep ve tur ka nih loh zia pawh ka hria. Mahse tunah chuan ka pasal a ni tawh a, a nupui ka ni tawh bawk a. Khawngaih takin in inkar hi titawp tawh hram teh u. Kan fa vang tal pawh hian ka ngen che anih chu. Fahrah a nih ka phal lo. Mi pâ ngaizawng duh tur khawpa hniamah ka dah lo che a. Chuvangin khawngaih takin kan pa nen hian lo inbe tawhlo hram ru aw. Ka ngen tak meuh meuh che ani.*



Ka chhiar zawh chuan ka inhum ruh vak a. Eng ang mi fakau ah nge maw min ngaih le. Thinrim ngaihna pawh ka hre tawhlo hial zawk. Ka zak a, awmngaihna min ti hre hlawl lo a ni ber.



Lalrinmawia chhehvel te hian min la chim buai reng hi ka kham takzet tawh ani.



Feli message chu ka chhiar a, ka chhiar nawn leh thin. Ngenna nge indeuh sawhna nge thupek pawh ka hrethiam teh nuaih lo.



Chhan let tumin ka type zet a, mahse ka clear leh nghal daih. Ka thiam lohna ni miah lova insawifiah reng hi ka ning ve tawh. Mi fel famkim ka ni bik lo. Chuvangin dawhtheih chin ka nei ve.




Engtin mah chhang let lovin a message chu ka delete nghal daih a. Ka pi vanga ka rilru a buai sa nen anni vang chuan ka intihah buai duh tawhlo.



Ka mut hmain ka khum bulah thingthiin ka tawngtai a, Pathian hnenah ka pi tan urhsun takin ka dil a. "I remruat engpawh pawm thiam thei turin min pui ang che" tih theih ka duh, mahse ka theilo. Ka pi damna tur ngar ngar ka dil a. Ka beiseina tlem te hi hlawhtling se ka ti ngawt mai.



Kum 2 liam taa ka chunga thil thleng te, tuna ka thil tawn mekte chu lo dawn sawn thiam dan ka dil a. Dawhtheihna leh chhelna ka dil uar hle bawk.



Rei tawk fang ka tawngtai hnu chuan ka mu ta a, rinai daihin ka la mutui zui. Zing thawh pawh ka hai nghe nghe a. Puia'n min rawn kaitho hial.



Ka thawh chuan eirawng an lo bawl peih vek tawh a. Ka naute pahnih ka fak veleh na deuh chu mipa mah nise inchhung chet an hreh lova. Eirawngbawl pawh an thiam ve ve.



Ka pa hovin chaw chu kan ei ta a, mipa pathum chawei pui chu an ngawi ngur hlawm bawk sia a reh duh tlawk tlawk kher mai.



Hmun kan seng fel lai chuan Rina'n YouTube ah news a ngaithla pah a. "Lawngtlai bawrhsap Vanmalsawmhlua..." an rawn tih chuan ka beng a lo verh nghal zar mai.



Rina'n awmze nei deuh hian min rawn melh a, mit min rawn san khum awk awk a, melh rum ka tum viau laiin ka lai daih a. Ka va inhaw tak.



Ani nghal lutuk chuan "A lai ringawt nia..." nui hawk hawk chung hian a rawn ti a. Ka hmunphiah chelh lai chu ka dah thla sawk a. Ka kut phar uaih chungin Rina lam chu ka va pan a, a lo la tlanchhe hman zui.



"Lalrinkim, hneawm viau suh aw..." lai huih chung hian ka ti a. Ka awmdan chu ka va inhaw tak. "I lai tlat kha ka thiam loh ania mi" a la ti khanglang zui.



Dawhkana a phone dah chu a ban vut a, choka atanga chhuah mai a tum chu va umin a hnungzangah ka va beng chawrh a, na ti awm pawhin a lang lo, min la nuih hawk hawk zui. Tun hnai hian enga tinge a nghal thar em em mai le.



Damdawiin a kal tura ka insiam laiin Puia a rawn lang teh nawlh a. Ka room hi a tul fe anih loh chuan a lo kal ngailo. Ka nau a ni a, ka nel loh vang ni miah lovin a tawng tam loh avang hian kan inkawm khat a, unau inpawh lo tak kan ni tihna erawh a ni chuanglo.



Ka khumah chuan a thu a, a phone chu a tuai vir a tuai vir a. Ka insiam zui mawlh mawlh a, ka mitsirin ka va melh leh thin a. Thil sawi duh nei, sawi hreh si hi a ang ber.



"Û..." a rawn tih chuan a lam ka hawi vat a "Eng nge ni?" inhawng takin ka lo ti vat.



A ngawi leh daih a, a kun deuh lap a. Heti taka ka nau hmel ngui hi ka la hmu ngailo. A bulah chuan ka va kalhnai a, a sama tuai zeuh pah chuan "Sawi la" ka ti var a. A rawn thaw chhuak hawk a.



A sam tuai puat pah chuan "Ka bialnu a rai a..." a rawn ti ta mai ! Phawk zetin Puia chu ka melh a, ani chuan hnuai lam a bih tlat thung. Bialnu a neih âwm ka hre lova. A thuhrimah Puia hi chu bialnu nei tur ang pawhin ka lo ngai ngai lo hrim hrim.



Tichuan tunah a bialnu rai thu min hrilh ania. Mak tih loh chi pawh a nilo.



"Bialnu i nei tih pawh ka lo hre miah lova" ka ti hap a. "Kan la inngaizawng reilo" a lo ti vat.



"Û engtin nge ka tih ang?" min melh zawk a, hnuailam a bih leh nghal daih. Han tih vak ngaihna ka hre bik si lo. Ka han ngawi ren rawn a.



Ka nu leh pa te'n an hriat hunah chuan Puia hian nupui a nei ngei ngei dawn. A fa paitu chu a neih a ngai dawn. An sawi fo thin "Thianghlim taka ngaihzawng neih tur. Hetiang kan sawi chung pawha in lo dai zual a, inngaihna sualah in lo tlu a, in kawppuite an lo rai anih chuan in nei ngei ngei tur ani" tih hi an ngaihdan nghet tak a ni a.



Keipawhin ka nu leh pa te ngaihdan chu ka tawmpui. Hmeichhia ka nihna angin ka naute'n sawn an lo thlak anih chuan a hmeichhe dinhmun hrethiam takin an nei mai turah ka ngai.



"Ka nu leh pa te kan hrilh dawn nia" ka tih chuan a lu a rawn thing nghal nak nak a. "Ka pa te ka hrilh ngam loh vangin alawm nangmah ka hrilh che" a lo ti sup.



"Kan hrilh lohte chuan engtin nge ni ang a?" ka ti a, a ngawi reng. Ani pui hian a mawhphurhna tlanchhiatsan a lo rilruk emaw ni dawn le? A fa paitu chu a nei duhlo a nimai thei. Chutiang rilru a lo pu a nih chuan ka nau mah nise a lam ka tang hauh lovang.




"Puia, i mawhphurhna tlanchhiatsan i tum em ni? Hetiang chungchangah hi chuan ka nu leh pate ngaihdan chu i hriat kha" ka ti ta fak a. An ti ngam anih chuan mawhphurhna pawh an la ngam turah ka ngai. Mahni mawhphurhna pawh hlen chhuak ngam lova tlanchhiatsan na tur zawng thin ho hi mipa ah ka chhiar tel ve theilo. Ka nutapa hi chutiang mi chu a nih ka duhlo bur.




Puia chu a ding vut a, a hmai tuai puat pah chuan "Ka fa a pai hlei nem" a ti nghut. Mak ti lutukin ka en leh a, inchung lam hawiin a hmui a hup a, a rilru nat hmel lutuk chu ka hmuh hmaih lo. Ngawi rengin ka nau chu ka en ta reng ringawt a. Ka ngaihtuahna ah thil tam tak a rawn lut nghal zawt zawt a.



Chutia ka en reng lai chuan min rawn melh a, za lo tih hriat lutuk hian a rawn nui suk a "Û, i ngaihtuahna kha a dik. I chunga thleng ang chiah kha ka chungah a thleng ve" a rawn ti ro halh.



Kum hnih liam taa ka natna angte kha tawng ve tur chuan ka nau hi ka phal lo. Paltlang tur a tam in, dam fel tur chuan hun a duh rei lutuk.



"Ka nu leh pa te ka hrilh duh loh chhan ania, nangmah an buaipui nasa tawh bawk si che a, an mangan thin zia ka hrechiang a. A lo paltlang tawh i ni a, ka rilru a tawt lutuk a ka hrilh tawp che anih hi" a rawn ti dam dap a.



Ka nau bulah chuan engkim min hrilh turin ka ti ta a.



Tichuan thil thlen dan kimchang chu min hrilh fai ta kelh a. Hmeichhia a ngaihsak ngai lova, mahse chunu chu a lo duh ve hle ni tur ani a thiam ang angin hma a lo la ve a. Chunu pawh chuan a lo iai bik lo aniang an inngaizawng ta a. Thla 8 chhung an lo inzui ve hman a ni awm e.



Sex hmang duh sela chu fianrial hun an neih ve zia te min hrilh a. Mahse ka pi leh nu leh pa te thusawi zawm tlat a duh avangin chutiang chu a thleng lo.



A bialnu chu tun thla tir mai khan a lo rai a. Puia puh a duh avangin a lo thlem hial a ni awm e. Mahse Puia'n inngaihna suala tluk a duh si lova an inthlem thlu zo ta ngang lova. A tawpah a bialnu thiannu kaltlangin a man chhuak ta a ni awm e.



Ka nau chu lainat zetin ka en a, a rilru na hmel mawlh chu hmuh harsa ka ti. Nâ a tih dan tur chu a lo tawng tawhtu ka nih avangin ka hriatthiampui takzet.



"Lungngai suh, i bulah ka awm zel dawn. Chu hmeichhia chu i tan a thalo tihna a nimai. Keipawh Rinmawia kha ka tana tha ber tur angah ka lo ngai thin a. Mahse hei tunah chuan thil a danglam nasat tawh em hi. Keimah hi min en la, hmangaihna vang hian na mah ila kan dam leh thei. Kan thil tawnte hian natna bakah chhelna min pe fo ania" ka ti ta duah a.



Tawngkam ka thiamlo, mahse ka theihtawpin ka hnem ve a. Ka khawngaih lutuk chu sawi vak ngaihna pawh ka hrelo.



Ka room atanga a chhuah dawn chuan "Min ngaihtuah lutuk phah suh aw. I tawrh te nen chuan tehkhin chi a ni chuang miah lo ania. U Rinmawia nen kha chuan in inngaizawng rei a, mi pawhin an dem rawn viau hman che u anih kha. I natna ai khan ka natna hi chu a la nep lutuk. Mahse inbunruahna tur ka duh em a, ka lo hrilh tawp che anih chu" a han ti ve ngial a.



Natna hi a tawngtu azir a ni a, a tawngtuin a lo dawnsawn danah hian a innghat thui lutuk. Mi in holam taka an ngaih kha mi tu emaw tan chuan na tak a lo ni thei a. Natna tawpkhawk tuar ni a kan hriatte pawh an lo dam khawchhuak leh fo a. Natna ang em em pawha kan lo ngaih loh hi mi thenkhat chuan thihpui nan an lo hmang ve mek bawk. A lo dawngsawng tu dawnsawn danah a innghat thui viau tihna anih ber chu.




Puia chhuah hnu chuan ka tha a zawi nghal vek. Ka khawngaih bawk si, tih theih ka nei tlem bawk si chu ka hahpui em em ringawt.



Damdawiin kan va thlen chuan ka pi pawh a lo harh tha ang reng hle a. Doctor in a sawi dan chuan han inenkawl vak ngaihna a awm rih lova, naktip lamah chuan damdawiin atangin kan chhuak thei tawh dawn anih hmel. In lamah damdawi hmangin kan inenkawl ang a, check up nei tur chuan kal reng a ngai tawh thung ang.



Ka pi chu keiman ka riahpui leh tawh dawn avangin tlai lamah ka nu leh pa pawh an haw ta a.


Ka beisei loh zetin U Faktei a lo lang hlawl a, eitur tam tham zet a lo keng bawk. Ka pi ei theih tur chi hlir a la ni zui.



U Faktei chuan "Kan rawn lang leh ta miah si lova ka nu a inthiamlo lutuk a, rawn kal turin min tur sek a, ka lo kal vat thei lova a zialo tak tak. Ka hman veleh ka lo kal nghal anih hi" a rawn ti zung zung a.



"Aww... Malawmi thin hi a...min ngaihtuah lutuk anih kha doctor pawhin naktip lamah ka chhuak thei tawh dawn a ti a. Ka dam tha tawh lutuk ania" ka pi chuan a lo ri vat a.



U Faktei leh ka pi chu an titi melh melh a, Nu Malawmi te nufa hi an fel ka van ti tak. I chhungkhat hnaivai leh inhre tha em em pawh kan ni lova. Ka pi check up vel atanga inhre chauh kha kan nia. Chuti chunga an rawn ngai pawimawh em em thin hi ka fak thlawt a ni.



Rei awm hman anih loh avangin U Faktei chu a haw leh thuai a. Cabin pawn thleng ka thlah a, ka thiam ang angin lawmthu ka sawi ve luam a "U Faktei chu i buai awm tehlul nen min lo ngai pawimawh thin a, kan lawm lutuk" ka han ti ve ngial a. "I pi te chu ngaih pawimawh loh chi a ni hlei nem, ka nu hian a nêl riau a. Kan pi neihchhun angah kan lo ngai ve tawp" nui hak hak chung hian a ti a.



A kal dawn zet tawh a, mahse rawn hawi let leh a "Mamte..." a rawn tih chuan "Umm" ka lo ti vat. "Mama'n a lo bia che em?" a rawn ti a, ngainat awm zet hian min nuih a. Ka chil ka hak lo chauh.



U Faktei chu ka en ha a , ka mawl hmel ngawtin ka ring. "A lo bia che em?" a tih leh takah chuan a hmaa min lo biak avang khan "Aw" ka lo ti ringawt a.



Chuveleh min nuih nghal var var a "A that hlauh chu" tiin a kal zui nghal daih. Ngawi rengin U Faktei kal lai chu ka en reng ringawt.



Ka kuta ka phone humlai chu a rawn ri a, ka la phu zawk zui. Caller ID ka en chuan Vanmala a lo inti kalh a, phone ka thlauh lo chauh.



__________*___________*__________


(Ka hma tur leh ka tlai tur hi chu ka hre lawk bik lova, ka lo dah tho chuan buai lo tlang mai ang u aw a changin kan hma ang a, a changin kan tlai ang aw, chuti chuan a nimai)

Hmanhmawh lovin kan ti bek bek dawn nia. Zanin chu changtupa a lang tlem sia boring in ti mai thei. Chapter dawt leh atang chuan kan ti deuh thuai thuai tawh ang

Ka ennawn hman thin si lova spelling mistake/ tawngkam hman dik loh ka lo neih chuan min lo hrilh zel dawn nia. Comments lamah i inhmu tlang dial dial ang u hmiang zanin / tukin chu


In lo chhiar ve thin avangin ka lawm


Show post links
Top

[Ngaia]

DEPUTY COMMISSIONER
By CVL Awmpuii



Chapter 6



Phone call ka lak hma chuan ka âwm dawmin ka thaw chhuak ham ham phawt a. Phone chu ka bengbulah dahin "Hello..." ka ti zawi sep, ka âw chu a ri chang changin ka ring.



"Mamte, i dam lo em ni?" a rawn ti hluai a, a ngaihna hrelo fein phone chu ka melh a, "Dam e" pangngai tak chuan ka ti a. A thaw chhuak huai ri chu ka hre thei.



"I âw kha a diklo lutuk a, i dam lo anih ka ring hman a" a rawn tih chuan ka lo nui ri hak a. "Ka dam tha alawm" pangngai tak chuan ka ti leh a.



"Eng nge i tih a?" a rawn tih chuan damdawiin a ka awm thuin ka lo chhang vat a. Ka pi chanchin min zawh zawm leh zat a. Tha takin ka lo chhang a. U Faktei'n a lo kan thu leh ei tur tam tham zet a lo ken thu te chu ka hrilh a. Lawmthu ka sawi ve luam bawk.



Kan inbiak tawp dawn lamah chuan "Karlehah ka lo haw dawn a" a rawn ti sup a, han chhan vak ngaihna ka hriat loh avangin "Anih chu..." ka lo ti ringawt a.


"Eng nge ka lo hawn ang che?" zangkhai zet hian a rawn ti a. Ka tawng chhuak leh thei tlat tawh lo. Thil min lo hawn tur em chuan inlaichinna tha kan neih awm ka hre hauh si lo.



Ka chhan mai loh avang chuan "Ka hre leh si, thil tha deuh ka lo hawn ang che" a rawn ti a. Ka hamhaih hle ringawt. Pangngai takin min lo bia a, ka pangngai ve thei tlat thin lo hi ka hrethiam lo.



"Mahse...i bialpa kha a hlauhawm ve sia" a rawn tih leh chuan "Vanmal" ka lo ti hlak. "U Vanmal ti rawh" a lo ti ve hluk.


Ka û bik chhan tur ka hre tawp silo, ka upa ve tawh tho sia. A hminga ka koh apiangin U Vanmal ti rawh min ti fo mai a. Kei ai a upa tih chu ka hria , mahse a inti upa lutuk chu ka ngei tlat.


"Kum engzat fakau nge i nih a?" ka tih chuan a rawn nui chhuak hawk a. "Mawh...kum engzat fakau nge i nih a?" ka ti leh hlak.



"Han ring chhin la" a tih chuan "Sawi mai teh" ka lo ti hlak. A nui ri leh huk a. "Kei ai i la naupang hle tih kha hre tawp mai rawh " a rawn ti a. "Ka kum zat i hre bik ngawt lo" ka lo ti nghat.



"Kum pawh i tling ve tawh em ni?" nuihza insum zet hian a rawn ti a. "Ve lutuk a che , vote pawh vawihnih lai ka thlak tawh aw" ka lo ti ve hlak a. A inla upa vel lutuk chu ka haw tlat.



"Vawi hnih chauh maw?" ngaihnep hmel zet hian a rawn ti vel a. Hepa hi ka rin aiin a chimawm zek mai.



Ka tih vak ngaihna hrelo chuan "I ninawm" ka ti hlur a. Chutah thutak zet hian "Mamte, min û rawh. Nangai kum 9 in ka upa. Mi zingah 'Vanmal' min tih chuan 'He nau chu a va chaltlai reuh e' an ti mai ang che" a rawn ti sup a. A nui ri suk ri ka hre zui bawk.



A thusawi dan vel chu ka la run tho tho. "Aw, anih chuan ka pu ang che" ka ti hlak a, a rawn nui chhuak ta hawk hawk. Keipawh ka nui veleh ta tho.



"Nula senior kum 27 mi i ni tawh tih chu ka hre ve tho ania. Tun atanga kum 3 velah chuan mi zawng zawng û i ni mai ang" a rawn ti zawi ruih a.



Min chei naupang vel lutuk kha ka run viau nain chutia senior deuh ang hrima min chhuah chu ka run tawk a tling leh viau tho. Chuan thil pakhat, engtin nge ka kum zat a lo hriat theih !



"Ka kum zat i hria maw?" ka ti ha a, a nui ri suk ringawt. "Kum 27 nula hian kum 36 tlangval chu min û tur ani" a rawn ti vei sup a. Ka ner nasa ngang mai. Vel lutuk hian a!



Mahse hnial buai tawh lovin "A tha alawm" ka ti nghat a, a nui ri leh suk tawh. Tun tum kan inbia hi a hlim viau aniang a nui duh khawp mai.



Kan inbiak zawh chuan cabin chhungah ka lut leh nghal a. Ka pi chuan Nu Malawmi fel a tihzia thu leh chhungkaw puitling an nih zia chu a sawi malh malh a. A ngaihdan chu ka lo tawmpui ve khawp mai.



Pathian zarah ka pi chuan that lam a pan ve zel a. Damdawiin kan chhuahsan tawh a, in lamah theih ang angin kan inenkawl a. Nitin kantu kan nei ve reng bawk a, ka pi damlo an rawn ngaihtuah chu ka lawm takzet.



Dawr ah ka kal lohna a rei tawh avangin vawiin chu dawr lamah ka kal dawn a. Ka kal hmain ka pi ka tlawh leh zuai a, ngaihtuah awm anih loh thu leh rilru thlamuang deuha dawr ngaihtuah turin min chah a.



Puia bike a chhia a, chuvangin ka scooty a hmang a. Taxi lain dawr lam chu ka pan ta vat a. Ka va thlen chuan Aruati a lo awm tawh a. Min hmuh rual chuan a lo nui nghal var var a. A chungah hian ka lawm takzet. Amahin thla khat dawn chu a lo buai char char awm sia. Chumi chhung chuan ka awm lohna tur angin tawngkam vawikhat pawh a chhak chhuak lova. Ka mi chhawr ang mah nise a lakah hian ka inthlahrung ve thin a, mahse ka awm nawm lohna turin a awm ngai miah lo thung.




Chhunah chuan U Mawia a lo lenglut hlawl mai a. A rawn ri nghal lung lung a, chauh pawh sawi hlei thei lek lovin a fiamthu chu kan nuihpui a. Min rawn tihlim takzet.



U Mawia hi chuan a hun leh hmun a hria a, hetia a rik phawng phawng vang hian tuman kan zuam phah chuang lo. Fiamthu a duh a, mahse a nun hi a ho miah lo thung.



Ka TShirt zawrhte chu a inthawlh chhin vel a, uang thuang zet zet hian a sawisel a. Huat enah pawh kan en lo, kan lo hlimpui em em zawk.



A hnu deuhah chuan pangngai takin kan inbe ta a. "Vawiin in chawl em ni?" ka tih chuan a lo bu nghat a "Ka day off ania, ka rawn inla free ve zuai anih hi" a lo ti tha ve mai a. Ka lo bu nghat nghat.



Customer an awm ve reng avangin inbiak hleih theih pawh a nilo a. Min lo pui ve ta zawk a, tlai dar 3 velah a haw ta chauh a.



Aruati nen pawh khaw thim hmaa haw kan tum a. Ni a tlak hma hretin thuamhnaw, pawnlama kan pho chhuah ho chu kan senglut zung zung a.



Ka haw hmain pawisa vel chinfel ka duh a, chuvangin Aruati chu lo va haw hmasa mai turin ka ti a. A nu a dam sam loh avangin min lo hnial ta bik lo.



Pawisa chu ka chhiar a, ka tifel zung zung a. Haw tura ka intintuah mek lai chuan ka beisei loh leh rin loh zetin U Vanmala a rawn lang hlawl mai !



Dawr pawna ding reng chung chuan mit tizim sun hian min lo melh a, phawk zetin ka lo melh hau thung. Chutah a rawn kiai suk a, mit ka khap sak a, a lo la ding tho.



Tshirt var thianghlim zet hi a ha a, cotton kekawr dum hain sneakers a bun leh tawp a. A kutah chuan thil eng emawni hi a khai tel bawk.



"Ka lo lut thei ang em?" a rawn tih tak supah chuan ka insiamtha vat a. "Lo lut rawh" ka ti hul hak. Ka zam thar leh em em te chu ka inhrethiam lo khawp mai.



Dawr chhungah chuan a rawn lut a, a palianin a mi uap a na bawk si dawr chhung chu a chep nghal vek maiin ka hria.



Ngawi rengin ka ep chiaha thutna awmah chuan a rawn thu a. A kuta sana chu a melh zawk a, a phone a phawrh chhuak a, a hmet zui mawlh mawlh a.



Ka lo melh reng a, min biak zawm tum âwm pawhin a lang chuang bawk si lo. Ka lu thing nakin ka thiltih lai chu ka tih zawm ve lehnghal mawlh mawlh a.



Bawm chhunga ka pawisa dah lai chu ka phawrh chhuak a, ka han chhiar tha leh vel a. Dik tak chuan ka tih tur ka ti zo vek tawh a. A rang thei ang bera ina haw ka duh. Mahse ka hmazawna mipa thu run chuan min tibuai tlat.



Sana ka en a, ka dawr chhunga a lo luh atang khan darkar chanve a liam tep tawh. Ka pawisa dah luh sa ho chu ka phawrh leh ta vek a. A vawi 6 nan ka han chhiar nawn leh a. U Vanmala chu ka melh leh zawk thin a, min ngaihsak ve awm pawhin a lang lo. A lo luh tirh atang khan a phone a la khawih char char.



A haw hun tur chu ka nghak ta tawp a. Sana ka melh ka melh a, a lo kal atangin darkar khat a liam tep tawh. Khua pawh a thim lek lek tawh chu a nimai. Khaw en laia haw hman ka duh tehlul nen.



Tih tur ka hre tawh bawk si lo ka phone chu ka phawrh chhuak a, tihtur ber hre lovin ka tuai tuai a, engmah ka ngaihtuah theilo. U Vanmala haw hun tur chu ka nghakhlel ta ber mai.



Khua a thim tak tak ta, eng ka hria nimaw mutchhuakin min rawn zem chiai chiai a, ka lo bu leh nghauh thin. U Vanmala chu ka en a, haw a la tum hmel hlawl si lo. A ngawi ngul a, phone a bih char char bawk si.



Ka ham ta bai bai a, ka insum thei tawh hlawl lo a ni ber. Min rawn ngaihsak awm pawhin a lang chuang bawk silo. Kan awmdan chu a lai vel vek hi a nimai.



Ka muthlu leh dawn thin a ka hriat chuan ka insik vak a. Ka va inkhawngaih tak.



Ka phone ka tuai melh melh lai chuan ka thutna bula dawhkan chu a rawn ri kauh a, ka la phu dawrh zui. Ka hawi chhuah chuan U Vanmala chuan min lo melh run a.


Ka insum thei tawh ngang lo chuan "I la haw dawn lo em ni?" ka ti ta tawp a. Mit tizim sunin min en a "Ka nghak che alawm" a lo ti sam then mai anih chu !



A ngaihna hrelo fe hian ka melh a "Min nghak maw!" ka ti hap, a lo bu nghat a. Min lo nghah te chuan a tir atang khan sawi ve mai awm ania. Ka lo inhrem char char tihna ania.



"I hman tep tawh em? Khua a thim tawh sia midang pawh an inkhar nual tawh ania. Hna chu ngaih pawimawh tur, mahse a lutuka thawh lutuk loh tur" a la ti vei luam zui a. Kan innghak tawn a ni reng sia. Atthlak lutukin ka lu ka thing nak a.



"Ka hmanna a rei tawh lutuk" ka lo ti sep. "Anih chuan kal ang" tih leh thawh vut a rual a. Ka phone kenlai chu ka bag chhungah ka dah lut vat a.



Dawr ka khar laite chuan ka bulah a lo ding ve run reng a.



Ka khar zawh chuan a haw nghal mai dawn emaw tiin "Anih leh aw..." ka han ti mawihnai ve a, mahse min melh run a. Eng tak chu la ni ang maw tiin mit ka kan ak a "Ka thlah dawn che" a rawn ti sup mai.



"Maw..." ka ti ha a, ka va mawl hmel thei dawn tak !



"Ka thlah dawn che" tih leh ka bag ken lai chu lak a rual a, a kal nghal nul nul. Ka bag ber a ken miau si avangin ka zui ve ta hnak hnak a. A rawn lehhawi vut rual chuan ka ding dat a. Min melh leh reng tawh "Lo kal ta che" a tih tak supah chuan ka pan veleh nghal vat.



Kan kal rual ta hnak hnak a "Khitah khian motor ka dah" a ti sup a, ka lo bu nghat.



Scooty ka keng lo chu pawi ka ti ngei mai. Min thlah kher a ngailo tur ania.



Ka thutna tur kawngka chu min hawnsak thlap a, a polite leh fu reuh sia.



Car chhungah chuan engmah kan sawi hran lova. Min rawn melh leh zawk thin a, kan mit a intawnfuh changin kan nui leh ringawt zel a. Ka lai huih reng zel hi ka duhdan a ni miahlo.


Kan in gate bulah motor chu a tiding dat a. Ka chhuak mai tur chu "Mamte" a ti sup a, a lam ka hawi leh rual chuan dawr chhunga a rawn khai luh paper bag kha ka lamah a rawn lek va a.



"Eng nge a?" ka ti deuh ha, "La rawh" a lo ti sup a. Ka la ve mai bawk a. Paper bag chhungah chuan chocolate leh lollipop tam tham zet a lo awm a. A ngaihna hrelo fe hian U Vanmala chu ka melh a.



"Ka thil lo hawn che anih kha" tiin ngainat awm zet hian min nuih a. Ka thaw chhuak halh a. Miin duhsak takin thil min lo hawn a, pek let leh chi ah pawh ka ngai ta lo. Lawmthu ka hrilh ta zawk a.



Car atanga ka chhuah dawn chuan zana a lo len tur thu min hrilh leh hram a. Mak ka la ti deuh deuh.



Inchhung ka luh rual chuan ka âwm ka dawm vang vang a. Ka thin a phut nasat zia ka hrechhuak nghal zat.



Ka nuin min rawn hmuh chuan "I va tlai ve" a lo ti vat a. "Nia, ka kal lohna a rei tawh ang reng sia. Thil ka tifel a" tiin chhuanlam ka siam ta tawp a. Vanmalan min thlah thu chu sawi ka tum hran lo.



Ka nu chuan min be zui ang tih hkau zetin ka room lamah ka chho nghal vat a. Ka âwm ka la dawm vang vang tho.



Room chhung ka luh rual chuan khumah ka bawk thla hnawk a, ka han tal chiam ringawt a. Chutianga ka awm chhan pawh chu ka hre chuanglo.



U Vanmala thil min pek chu ka en tha leh ngat a, ka nui ta tawp . Chocolate leh lollipop, a tha viau mai zel e.



Tleirawl thar tir ang mai hian ka inngai hial mai.



Thil ka ngaihtuah chhuah rual chuan ka thu chhuak nghal zawt a. Zaninah lo len a tum thu a sawi tak kha mawle! Engtin nge ka awm ang? Min ti thawpik em em ringawt mai ni!



Ka intihfai zawh hnu chuan inhnuai lamah chhuk thlain ka pi roomah ka lut nghal a. Rina leh Puia'n an lo awmpui a, an lo nui ho dar dar a. Eng nge an sawi phei chu ka hrelo. An hlim hmel ka hmuh chuan ka zuk nui ve nghal ringawt.



Ka pi chu a lo tha phian a, a hmel hmuh pawh a nuam tawh khawp mai.



Chaw ka la ei loh avangin an bulah chuan rei awm lovin ka chhuak lehnghal vat a.


Ka chawei laiin Puia a rawn kal a, nuihza lo tih hriat zet hian min lo nuih suk a "I tha em?" ka lo ti vat. Ka ep chiahah chuan a rawn thu thla hnawk a.



Ka chawei lai thial pah chuan ka lo melh reng a "A fa paina pa khan min rawn vau ve khanglang a" a ti hluk a. Thil tenawm tak sawi ang mai hian a ner nak bawk.



"Chuan..." ka lo ti vat a. "Kan la inbe thin turah a ngai mawle. Min phatsan tih ka hriat atangin ka la be leh tawp silo " lungawilo zet hian a ti hluk a.



Ka nau chuan ka dai ang a rawn dai baw chho ve zel dawn a nih hmel e.



"Engtin nge i lo chhan a?" ka tih chuan "Ka insawifiah vel peihlo e a. An duh duh danin awm se ka lo buai vena tur a awm tawhlo. Chhang lovin phone ka dah hmak" a ti nghut a. Kei ai chuan a tuar thei viau dawn anih hmel e.



Puia hi chu mi rilru nghet leh a tih tawh chu ti bur mai hi a ni a. Chuvangin a bialnu hlui pawh chu a biak tawh ka ringlo bur.



Zanah chuan room ah tawm mai lovin thutkhawmna ah chuan ka thu ve ta reng a. Ka zep lo, U Vanmala lo kal hun ka châng ve deuh reuh a ni ber. A lo len tur thu a sawi miau si a. Tlai lama ka mutchhuak pawh kha a reh leh vek tawh.



Inleng pahnih thum vel chu kan nei ve a, ka pi lo kan tute an nia. Ka pi room lamah an awm a, ka chhunte ho pawh an awm deuh vek. Thutkhawmna ah chuan Rina nen kan awm a, YouTube ah eng news news emawni a ngaithla leh tawh.



A lo kal tawh dawnlo anih ringin dar 7 leh a chanve a rik chuan ka pi room lama luh ve mai ka tum a. Ka tho chhuak chiah chu door bell a rawn ri a, ka va pan vat.



Kawngka ka hawn rual chuan Vanmalsawmhlua ngei mai chu a lo ding run a. Jacket dum leh kekawr dum a ha a, sneakers a bun bawk a. Inbual fai zo hlim tih hriat zet hian a sam chu a huh deuh a, a rim a la tui em em zui.



Ka ngaihtuahna avang chuan lu thing nakin kawng ka kian vat a, min melh leh run tawh.



"Lo lut la" ka tih chuan min rawn zui lut ve mai a. Thutkhawmna lamah chuan kan inzui phei a. Rina'n min rawn hmuh rual chuan a phul hluai a. U Vanmala chu a be zui nghal mawlh mawlh a. Ka lo lawm tak tak ani. Keiin sawi tur engmah ka hre silo.



"Tikhan lo inkawm rawh u, thingpui ka va lum ang" ka tih chuan Rina'n min lo dang vat. "Keiman ka va lum ang" a ti zang vah a, mitmeng chimawm zet hian min rawn melh zui a! Ka melh rum vak. Min ngai pawimawh lo zetin choka lam chu a pan nghal a.



U Vanmala lam ka hawi chuan min rawn hmu lo hlauh a, ka lawm tak tak ani.



Ka thutna ngaiah chuan ka thu thla leh a , ka en reng lai chuan ka lam a rawn hawi thut a, ka lo hawisawn vat. A la nui ri suk zui.



"I pi chu eng nge a an tawh a?" a rawn tih chuan a that ve viah tawh thuin ka lo chhang vat a. Ka pi hi a ngaihtuah ve tak tak niin ka hria, a chanchin min zawt peih ve emai.



"Rina hi politician a nih mai i ring em?" a tih chuan tihluih ni miah lo hian ka lo nui hak a. "Ni mai thei ani, a titi duh zawng te hi a politician nghal ruih bawk si" ka lo ti ve vat a.



"A kum naupan ngaihtuahin ram hnuk khawih thil a hria a, vei nachang a hre tlat" a tih chuan ka lo bu ve nghat nghat a.



"A ngaisang thei lutuk che" ka tih chuan thil dang a rawn sawi leh daih a. Han fak vel chu a duh vak lo aniang.



"Ka thil lo hawn che kha i duhzawng ani em?" thutak zet hian a rawn ti a. Min melh leh run tawh a, ka zam leh em em ringawt tawh. "Ka duh alawm, ka lawm lutuk ania" pangngai tak chuan ka ti a. "A lawmawm anih chu" a lo ti sup.



Rina lo let leh hma chu kan ngawi ta reng a, phone a khawih a, keipawhin tihtur em em hre si lovin ka phone chu ka tuai ka tuai ve ringawt a. Rina thingpui chawi chunga a lo let leh takah chuan ka lo thaw huai mai.



Thingpui in lai chuan an titi zawm leh char char a . An tui dun ngang mai. U Vanmala chuan ram inrelbawlnaa a thil vei zawng te a sawi charh charh a. A then chu ka lo ngaihtuah ve ngai miahlo te a ni a. An inkawmna chu finthlak ka ti kher mai.



Ka pi room atanga inlengho leh ka nu leh pa te an lo chhuah takah chuan min rawn be ve luam a.



Ka nu leh pain U Vanmala an hmuh rual chuan an rawn be zui nghal zat a "Vanmala chu i lo leng tih pawh kan lo hre hlei nem" ka pa chuan ngainat awm zet hian a rawn ti a. U Vanmala chuan "Ka lo thlenna a la reilo" a lo ti ve ngial a.



Ka nu chuan min en tawn zak zak a, eng emaw chu a ngaihtuah chiang a ni. A ngaih kawih loh hram ka beisei.



Kan inleng haw turte chuan U Vanmala chu an lo hre ngang mai a. An ngaihsan thu an hrilh nghal mawlh mawlh bawk a. Thla te an lakpui thul. U Vanmala pawh chuan tha takin a lo dawngsawng a. Ngainat awm tawk, zahawm tawk, induh hauh si lovin a chhang thiam tlat a , awmdan a thiam ka lo ti ngei mai.



Inlengho an haw hnu chuan ka pi a mut tawh tho avangin ka nu leh pate pawh thutkhawmna ah an rawn thu chhuak ve a. Puia chu a roomah lehkha a zir leh tawh anih ka ring. A zirna chu a bialnu hlui khan a tihbuai loh hram ka beisei.


Ka nu leh pa leh U Vanmala te chu an titi mawlh mawlh a.



Rina pawh kan bulah a la awm ve reng a. Chuti chung chuan WhatsApp ah min lo text reng a, a va ngeiawm thin tak.


*I inla hmetha vel e*
*Hei vang hi a nimaw, i chawei kham atang tawhin thutkhawmna ah khan i lo thut ve char char*
*Nghah i lo neih vang lêk a lo nia* tih velte a rawn thawn a. Tih theih dang nei hek lo ka va melh rum nghek zel ringawt. U Vanmala haw hunah a châk lo ang.



Rei vak lovah ka pa chuan "Vanmal, lo leng reng rawh aw i nu Rempuii nen chuan kan lo va mutsan tawh mai ang che u" a thutna atanga thawh chhuah pah chuan a ti sup a. Ka nu pawh a tho zui ve nghal zat bawk. Ka nu mitmeng atang chuan naktuk lamah zawhna min zawt dawn tih ka hrechiang lutuk.



Ka pa te room a an luh hnu chuan Rina chu a tho ve nghal uaih a, "Khawnge i kal dawn?" ka lo ti vat , ngaihsam zet hian "Ka mu tawh dawn" a lo ti sam then a.U Vanmala lam chu ka en a, a phone a bih leh ngur tawh a, min rawn ngaihsak vak hmel loh.



Rina chu ka mitmengin kal lo turin ka ti a, mahse a haider hmiah. Mit min siai zeuhin inchungah a chho nghal nal nal. U Vanmala nen chauha awm ka duhlo asin !



Bei lo zet hian thutthlengah chuan ka thu thla leh a. Chuveleh U Vanmala chuan a phone chu a kekawr ipte ah a thun lut zui nghal zat a.


Min rawn en a, a khi suk a, ka lo nuih let veleh tawp. Tuna kan awmdan tak hi a lai tawp !


Ngawi rengin kan awmdun a, "Tawng rawh" a rawn ti sup a, "Sawi tur ka hre hlei nem" ka lo ti nghat. A nui ri leh suk a.



"I hmai a sen vek" a tih chuan ka hmai chu ka khawih nghal vat a, a ha var nalh zet lang thatin a rawn nui a. Atthlak lutukin ka melh rum nghek ringawt.



"I lai anih kha" a tih chuan ka lo rum nghat. Ka run kher mai.



"Lai rual ka ni tawhlo" ka lo ti nghat a. "Anih chuan lai tawh suh" nuihza insum zet hian a rawn ti leh kher a, ka ngei kher mai.



Chutia min chhaih kual reng avang chuan ka insum duh ta bik lova "I haw tep tawh em?" ka ti nghat a, ngeiawm zetin a lu a lo thing mai a. Ka va han haw tak.



Ka melh nghek rual chuan a nui leh suk a. A nuih that duh loh tehlul nen tinge tun hnai hian min nuih reng ka hrethiamlo.



"Haw tawh rawh" ka ti leh nghat a, "Heti chuan i leng tar ngei ngei ang" a lo ti thung a. Ka thutna bula lukham chuan ka tin uaih a, a zam duh thak lo. "Ka thuin ka lo leng a, ka thuin ka haw veleh mai ang chu" a rawn tih zawm leh sup a. Ka va han ngei mai mai tak.



"Tleirawl chhaih kual rual pawh ka ni tawhlo" ka ti ta ringawt a. "Ni e, pasal nei rual i ni tawh" a rawn ti ve nghal zat. Min chhan dan tawk a thiam lutukte chu ka haw hlur tawh.



A hnu deuhah chuan "Anih leh haw turin min duh tawh hmel sia. Ngaihawm tawk vel lekin ka'n haw ange" a rawn ti ta a. A thusawi tawp lam chu ka ngei tawk a lo tling leh em em tawh. Mahse ka hnial peih tawhlo. Sawi tur a hre leh dawn ropui si.



Kawngka bul thleng ka thlah a, thutak zet hian "Muttui aw" a ti zawi deuh ruih a, ka lai leh dawn dawn mai. A hahthlak thin mange.



"Muttui le" ka ti let ve sap a, ka âw chu a ri chang changin ka ring.



A rawn tawlh hnai deuh a, hnai zeta min melh chung hian "Laih hi sim a har ania nge" a rawn ti leh zet zawng ka nam dat a, kawngka ka khar zui nghal hmak. A nui hawk ri chu ka la hre hman hram.



Ka thin a phu dawt dawt a, ka lai bawk si chu ka thin a han rim hlur ringawt a. Ka awmdan zet hi ! Ka va duhlo tak! Hetianga lai rual pawh hi ka ni tawhlo asin le.



Ka muthmunah chuan ka inngaihtuah neuh neuh a, ka mitthla ah Vanmalsawmhlua hmel a rawn lan chang chuan ka lu ka thing nawk a, ka tal leh chiam thin. Khati em em a han chimawm mai chu ! Mahse ka lai zel tho bawk si.



Ka mut mai theih loh avangin phone ka en a, WhatsApp ka luh chuan message pawimawh ho chu ka chhang zung zung a. Lalrinmawia message a lo awm veleh nawlh a. Amah ani tih ka hriat chhan pawh hemi number hian a lo call ziah a, ka chhinchhiah ve ran tawh.



Eng ka hria nimaw a message chu ka hawng a, a tawp nan tak tak inhmuh a duh thu a rawn sawi a. Ka hmu anih chuan min tihbuai tawh loh tur thute pawh a rawn sawi luam a. Thutlukna han siam mai dan tur ka hrelo kher mai.



Hmuh chu ka duhlo, mahse min tibuai tawhlo turin ka duh bawk si. Min tibuai reng anih chuan amah mai ni lo a chhungte thleng thlengin ka buaina an la ni dawn tih ka hria.



Ka inngaihtuah fe hnu chuan thuthlukna ka siam ta a. *Ka remti e, mahse i intiamna angin i awm ve tur ani* tih hi ka va thawn ta a.



A seen nghal vat a , a rawn type zawm nghal zat.


*Ka lawm lutuk, Amamte...naktuk chhunah kan inhmuh thinna cafe ah khan ka lo nghak ang che* tih hi a rawn thawn ta a.


A cafe sawi chu ka hre nghal mai, kan inngaihzawn laia kan kal thinna kha a ni tih ka hria.



Thuthlukna sual ka siam loh hram ka beisei.



Zingah chuan hma deuhah ka tho a, ka inphihfai sawk sawk a. Ka pi room lam ka pan nghal vat. A lo la mutui hle a, a muhil hmel chu ka thlir vang vang a. A hahdam hmel takzet.



Damdawiin atanga kan chhuah hma khan thuthlukna kan siam fel a. A natna chungchang chu thup rih mai kan thlang ta kha ania. Midangho chuan hrilh mai an pawiti lova. Mahse keimah khan ka phal tlat lova. A natna a hriat rualin a nat zual mai ka hlau a. Thih thlamuanna a nei nasa mai dawn si a. Min kalsan mai ka hlau ani ber.



A hnual zawnga ka inngaihtuah dawna ka hriat avangin ka chhuahsan ta daih a. Choka lama ka nu eirawng lo bawl chu ka pui ta vat a.



Dawrah kan buai leh ta char char a , chhun dar 12 a rik chuan ka thiltih lai ka dah vat a. Ka phone ka en chuan Rinmawia message a lo awm leh vang tawh *Ka lo nghak tawh che aw* a rawn ti a. A harhfim hram ka beisei.



Aruati bulah chhuanlam siamin ka chhuak ta a. Rinmawia nen kan inhmuh tur thu chu hrilh ka tum lo. Zawhna a ngah leh dawn lutuk.



Cafe ka va thlen chuan a lo thu vang tawh a, ka han inngaihtuah tha leh te te a. A hmel landan atang chuan a harhfim ve ngei chuan ka hria. Ka va lut ta a, min rawn hmuh rual chuan a rawn nui var var a. A hma ang kha chu nise a nui hmel hi mawi ka ti leh viau tawh mai thei. Mahse tunah chuan thil a danglam tawh.



Dawhkana ka bag dahthlak pah chuan "Hun ka nei reilo aw" ka ti sep a. Menu min rawn pek pah chuan "Eng nge kan ei ang? Kan chah thin tho kha em ni kan chah ang?" a rawn ti a. Min hrechiang lutuk anga a la langte chu ka duhlo.



"Thil ei hman ka nilo, i duh chu sawi la. Ka kal leh vat zawk ang" ka ti fiah fak a. Intih nêm vak ka tum hran lo.



Ka thusawi chu haiderin eitur chu a chah ta tho a. Ka hnial buai peih tawhlo, ka eilo tawp mai ang.



Ka melh kal a, a mitmeng dul ruih chuan min rawn melh let a "Amamte..." a ti zawi ruih a. A hma chuan hetiang âw ri a min koh hian ka nêm nghal duai duai thin. Mahse tunah chuan keimahah danglam a siam pha tawhlo.



Dawhkan chunga ka kut dah chu a rawn chelh a, laksawn ka tum rual chuan a hum nghet zual sauh a. Rum zeta ka melh nghek na chu haiderin "Tun chiah chance min pe leh rawh. Ka siam tha vek ang. Feli hi ka then hlen dawn. Tichuan innei ang" a ti zawi sup a.



Hetiang thu bawk hi a sawi dawn tih hria ila chu ka hmu hauh lovang. Ka va inchhir tak !



Ka kut chu laksawn ka tum a, kei hmeichhe awmnem chuan mipa tha chu ka hneh ngang lo, a hum nghet nasa mai si.



"Rinmawi min thlah rawh" ka ti kha fak a, "Amamte" a rawn ti sup a. Ka tho tur chu ka kutah a rawn fawp zauh a.



Tawng ka tum lai mek chuan ka hnung mai atang hian "Mamte..." ti ri ka hria a, ka lehhawi nghal vat. Nu Muani ber kher a lo ni !



Ka meng buai nghal nak a. Min nuih sawng chungin kan lam a rawn pan a, "Rinmawi i dam tha em?" inla nel zet hian a rawn ti a. Rinmawia chuan a dam that thuin a lo chhang vat a. Ngainatawm zet hian a nui bawk.



Chutah Nu Muani chuan "In pahnih hi chu in lainat awm ngawt mai, ka dem miah lo che u ania. Inthlah a harsa ve dawn em ani" tiin kan kut inchelh reng chu a rawn melh a, lainat hmel deuhin min melh bawk.



Ka hamhaih luatah ka kut Rinmawia'n a chelh reng kha laklet nachang ka lo hre lawk lova. Chutia Nu Muani'n a rawn tih takah chuan rang zetin ka kut chu ka la let a.



Nu Muani chuan "Mamte, lungngai suh kan pathum inkar a ni ang" a rawn ti a. "Nu Muan, i ngaih ang kha a nilo" ka lo tih lai mekin Rinmawia chuan "Min hrethiam a, kan lawm lutuk" a rawn ti sup a.




Ka kha a chhih a, ka hamhaih bawk nen Nu Muani kal liam lai chu ka thlir reng ringawt.



Rinmawia thil chah a rawn thlen zui takah chuan ka harh chhuak zawk a. Ka tho vut a , Lalrinmawia'n min auh letna pawh chu ka haider hmak. Ka hua, ka haw lutuk. Mawl ka inti takzet bawk.



Nu Muani ber kherin min rawn hmu si a, khatiang khan rawn ti vel mah se a sawi darh nghal dawn tih ka hria. A pawi ka ti takzet.



Thil lo thleng leh zel tur phei chu ka suangtuah ngam lo hial zawk !


___________*__________*___________


(In fel hlawm sap sap si, a ngaihnawm loh viaua ka hriat lai pawhin in lo comment zel a, ka lawm thin lutuk )


Show post links
Top