DEPUTY_COMMISSIONER By_CVL_Awmpuii (Completed)

[Ngaia]

DEPUTY COMMISSIONER
By CVL Awmpuii



Chapter 25


Vanmala chu biak pawh ka tum thin a, a la ring ral thak thak mai. U Faktei phone call ka dawn leh takah chuan ka pick up ta nge nge a, a rawn buai ngang mai.



"Lawngtlai i thleng tawh em? Eng nge Mama hi a awmzia?" mangang zet hian a rawn ti nawk nawk a. Thil awmzia ka hriat bik loh zia chu hria se min khawngaih zawk ngawt ang.



"U Fakte, engmah hi ka hrethiam lo" ti a bul tanin Vanmala ka biak tlang bik theih loh thu te, kan compound chhunga mipui pungkhawm luai te chu ka sawi ta zung zung a. A manganna ka belhchhah vekin ka ring.




Chutah U Faktei chuan "Amah hrim hrim hi a biak tlang theih si loh a, min thawng emai. Ka nu phei chu a buai vek tawh" a ti halh a, a ipik hmel kher mai.



Police pakhatin min lo pan takah chuan "Nakinah kan inbe leh dawn nia, thu chiang ka'n hre phawt ange" tiin min chhan let lehna pawh ngaichâng lo chuan ka dah ta a.




Police chu a rawn thlen chawpchilh nghal a. "Kan DC nupui kha i ni tiraw?" a tih chuan "Aw ni e" ka lo ti vat.




Tunah hian phili lova thil engkim hriatchian tuma ka beih a ngai tih ka hria. Rilru fim put tumin ka insangmar vat a.



"Eng nge thil awmzia hi le?" pangngai tak chuan ka ti leh a, Pa Chhuana pawh kan bulah a lo la awm ve reng a. Kan thu a lo ngaichâng ve a ni.



Chutah Police chuan "Hei, a zialo khawp mai. Pu Vanmala kha pawngsual case vangin Police Station ah an hruai teh thut a. Social Media lamah a lar chak ngang si a, mipui thinrim heti hian a rawn pungkhawm ta hluai anih hi. Aizawl atanga i lo haw tur thu an sawi a, kan lo ngaichâng che anih hi" a ti luam a.




Mak ti lutuk hian "Vanmala chu tunah Police Station ah an hruai a maw!" ka ti he haw a, a lo bu nghut.



"Tunah ka hmu duh" ka ti nghal tawl a, mahse Police chuan "Chutiang ngawtin a hmuh theih rih loh ang. Nang pawh Thana lamah kan hruai nghal che a ngai dawn. Mipui thinrim sosang hian tih hreh an nei dawn silo" tiin a thian dangte chu a kutin a hui a. Police form ha ve tho mi pahnih hi an rawn kal phei nghal zat.



Mipuiho chuan min rawn uksak vak lova, an ri nuaih nuaih a, an ang tun tun a, thinrim inhrosa kuk kuk te pawh an awm nawk mai. Police ho nen an innawr ngat ngat bawk a, a thawpik thlak kher mai.



Police pa chuan "Pî hi Thana lamah him dam takin va hruai ula, in lo let lehnghâl dawn nia" tiin a koha te pahnih kha a be zui a.



Ka lam rawn hawi lehin "Ka pi, ka naute pahnih hi zui phawt la, helai boruak hi tih daih kan lo tum ang a, a ziaawm hnuah kan rawn hruai leh ang" a ti dam thlap a.




Inah sawn va kalin luh luih tum ta ila buaina liantham zawk a chhuah ka ring. Chuvangin Police pa thu awih mai loh chu tih theih ka neilo. Thil engmah ka la hrechiang bawk silo.



Gypsy ah ka bungrua zawng zawng nen chuan Thana lam panin min phur ta a. Pa Chhuana'n min vei liam a "Hahdam deuhin awm tum la, engkim a tha leh vek mai ang" a ti ve ngial a. Mahse tun dinhmunah chuan boruak a sosang lutuk ringawt.




Ka phone ka phawrh a, thil awmzia hriat chian tumin Facebook ah ka lut nghal a. Ka pasal chungchang chuan group tin a luah khat nghal a ni ber.




Deuh zeta a nuihsawhna te, thinrim taka hmeichhe dikna chanvo an ziah kur duahna te, mi hausa leh rethei inkar zau tawh zia tilangtu anih thu te...a tam mai, en vek sen pawh a nilo.




Ka pasal chu thil tisualtu ni ngeiah an ngai nghet hmak tih a hai theih lo.



A tawp nan tak tak tiin Vanmala chu ka call leh hram pek a, a la la thei chuanglo.





News ah khan pawngsual tawka ber chanchin engmah ka hmu lova. Ka hrechiang duh tawh bawk si ka bula min thutpuitu Police pa chu ka zawt ta ngawt a.




Chutah Police pa chuan "Keipawhin ka hrechiang vak biklo, thil hi a thleng rang teh thut lutuk a. An sawi danin hmeithai fanu, rethei ve tê an tite khan ka hria a, engmah ka la hrechiang bik lo. Hetiangah hi chuan mualphona liantham a thlen loh nan a tuartu hi an thup thin a" a lo ti tha ve mai a.



Reilote ah Thana chu kan thleng a, Police lo duty te chuan min rawn buaipui nghal vat a. Ka pasal case nei mek a ni a, chuti chunga tha taka min buaipui chu ka lawm khawp mai.



Min hruaitu te kha chu an let leh nghal a, Police ho bulah chuan ka thu ve ta reng a. Hnaah an buai ve tho a, min vil reng bik lo.



Ka rilruah Vanmala a awm reng a, ka hah ngawih ngawih. Amah biak vat a, thil awmzia hriat chian vat ka duh. Pawngsual tih vel chungchang ah chuan ka ringhlel eih lo.




Tunah hian engtin nge a awm ang? Police te chuan dâwpin an lo sawisa mai ang em le tih te thlengin ka ngaihtuah a, ka mangang zual kher mai.




Ka phone rawn ri ral ral ka hriat rual chuan ka ipte ka hai rak rak a, ka pa a lo ni. Min ngaihtuah ang a, an mangang dawn tih ka hriat avangin ka la ve ta nge nge a. Mahse ka nû aw zawk ka hre ta thung.



"Tinge phone call i lak theih miah loh a?" a rawn ti nghek a, a thinrim hmel ngang mai. A awm tho e, min ngaihtuah em em laiin ka chhang duh tlat silo a.



Ka lo thaw chhuak hak a, ka nu chuan "Vanmala kha eng nge thil awmzia min timangang lutuk. Biak pawh theih lohin i awm zui nghal bawk si. Chanchin a darh chak viau lehnghâl. Kan mangan zia hi i hria em?" a rawn ti leh hlawk hlawk a.




Chuti taka a rawn thinrim nghal tawp mai chu ka hrilhai lek lek. Mi mah ka mangan ve tehlul nen.




"Nu, inbengdai rawh" ka ti teh ngawt a. Ka pa âw zawk ka hriat zawm ta daih "Mamte...eng nge ni thil awmzia hi?" a rawn ti dam thluam a, ka nû aw ai chuan hriat a nuam daih zawk.



Ka thaw chhuak halh a "Pa, engmah ka hrethiam rih biklo..." ti a bul tanin Lawngtlai ka thlen tirh atanga Vanmala chanchin ka hriat dan zawng zawng leh Banglaa mipui lo pungkhawm te, Thana a ka awm rih thute chu ka hrilh fai ta kelh a. Ka chhûngte ka biak takah chuan ka mangang thar ngang mai.




Ka pa chuan "Vanmala chu engtin nge a awm reng reng a?" a lo ti sup a, "Khawi Police Station emaw berah an hruai an ti, engmah ka la hrechiang biklo. Ka be tlang thei silo" beidawng zet hian ka ti a.




Police pakhatin min rawn ko zui a, "Pa...hei min ko lawk a, nakin chanchin chiang zawk ka lo sawi ang, ka dah phawt ang aw" ka ti a. Ka pa pawh chuan "Awle, kan ngaihtuah si che a, kan lo ngaichâng reng dawn che nia" a ti ve vat a.



Min lo kotu Police chu ka zui ta vat a, ka bungruate chu min lo laksak vat a. "Bangla a mipui pungkhawm te chu an khap dai tawh a, tunah hian kan dah che ang a, hlauhthâwn tur a awm lo ania. Venhimna khauh tak kan kalpui dawn a" a ti zung zung a.



Pawnah kan inzui chhuak a, ka bungruate chu motor chhungah dahin ka luhna tur min hawnsak thlap a. A che reng reng chu a hmanhmawh vut vut bawk si a, a tih ang ang chuan ka lo awm ve tawp a.



Kan tlanchhuah hnu chuan "Engtin nge ka pasal a awm?" ka ti ta tawp a, min rawn melh zawk a "Ka hre bik lo le, thuneitute'n ti tûra min tih chin chauh kan ti a nimai keini lam chuan" a lo ti pangngai ve mai a.




Ka rilru a van buai tak e aw.




Bangla kan thlen chuan Police thenkhat in Gate pawnah an lo hual thap a. Pa Chhuana ka zawng ru deuh a, ka hmu tawh miah lo.




Police pa in min kalsan leh hma chuan "Heta min dah lo hian ka pasal bulah min hruai zawk rawh" ka ti teh ngawt a, "Ka pi chutiang a theih hlei nem, ka sawi tawh ang khan i pasal chinchang hi heta mite hi chuan kan hre bik lo ani" a ti dam thluam a. Tihtheih ka neilo lutuk chu hrehawm ka ti a, ka tawt tun mai.




Beidawng zet hian inchhungah chuan ka lut a, kawngka min khar hnan hmak. Ka hmeichhe nihna a rawn lang a, ka rilru no a rawn chhuak thut a. Lawngtlai ka let hma khan inthlahlel takin kan inbia a, inhmuh vat kan beisei kha ania. Kan nupa kar a ziaawm chho a, tunah hetiang hi kan tawk leh a. Ka tah a chhuak tun mai.




Inchungah ka bungruate chu ka khai chho a, Vanmala chu awm se min lo hmuak awm si a tihte chu ka ngaihtuah neuh neuh a, ka tap lo chauh tawh.



Kan room ka lut a, a lo ruak huai a, ka hawikual a, Vanmala hmuh ka inbeisei tlat pek a, mahse a reh duk mai.



Eng khaw sawi set set lovin khumah chuan ka bawk thlawp a, ka tap ta ringawt. Ka ipik lutuk tihngaihna hre bawk silo chu ka tap ta ni berin ka hria.



Vanmala rinhlelh te chu a teuhlo mai, ka ngai a, ka thlahlel em em zawk. Tunge hetiang thil tenawm lutuk a lo puhtu chu ni ang.



Rei tawk fang ka tah nghek hnu chuan ka phone ka phawrh a, Facebook ah ka lut a. Ka pasal an diriamna leh deuhsawhna hlir a ni. A hma zawng khan an fakin an ngaisang em em thin kha ania. Tunah lem an dem rawn a, an tlukna lamah an tlu leh dual dual a. Na ka ti thlawt a ni.




Comment pakhat ka hmuh chuan ka mit a la ta zar mai. Ka chhiar chiang a *A pawngsual nu hi a lainatawm tak tak a ni. Mi pangngai pha leh tur chuan a beih let fe a ngai ang. Hmeithai fanu mai a ni a, nuthlawi a lo ni veleh zel bawk nen. A hmain DC hian a pui thin a. Chumi chu chang chawiin DC pa hian diriam takin a pawngsual zui ta ani. Hei baka hmeichhia te chunga hleilenna hi a awm chuang bik dawn em ni? Mi rethei leh hausa te inkar zauh zia a lang leh ta anih hi. A hmeichhia kha a khawngaih thlak bawk si. DC Vanmalsawmhlua hi na takin hrem rawh se* tih hi a lo inziak kur duah a. An reply na pawh thahnem tham tak a awm.




Ka rilruin tin zawn a nei nghal, chu chu Bawihbawihi a ni. Vanmala hian Bawihbawihi a pawngsual ang maw? Awihlo lutuk hian ka nui lui hak a, thil awih awm loh lutuk a ni !




Pa Chhuana call ka dawng zui a, ka la nghal vat. Thil awmzia a hriat tawh thu chu min rawn hrilh zung zung a. Ka lo rin lawk ang ngeiin Bawihbawihi chu a lo ni tak tak. Pa Chhuana pawh chuan mak a tih thute hahipin a rawn sawi ve a. Mahse Vanmala a rin tlat zawk thu a rawn sawi duah a, lam tang pakhat tal ka nei a, a thlamuan thlak viau tho e.




"Pa Chhuan, engtia tih chi nge ni ang le aw?" ka ti vawng vawng a, tih vak ngaihna a hre awm tawp bik silo. Ka zawhna chu âtthlâk ka ti leh hnuhnawh khawp mai.




Pa Chhuana chuan "Tikhan lo nghak rih tawp mai rawh. Vanmala hi ka ring tawk a, nangpawn ring la ka duh" a rawn ti tawp a. A thusawi chu tawi viau mah se tun dinhmunah chuan min thlamuan pha tho mai.




Ka nu (Vanmala nu) nen kan inbe leh a, kei ang thovin a mangang ve a, ka han hnem veleh chhawng a. Hrehawm a rawn tiin a inthlahrung bawk si nuamlo ka ti hial zawk.



"Mamte, nang tal chuan Mama hi i ring ang tiraw?" aw khur dar dar chung hian a rawn ti a. A ngenngawl lutuk chu ka lainat kher mai. "Nu, ka pasal hi ka ring tawk alawm. Lo mangang lo la, engkim a tha leh vek mai ang" ka ti nghet charh a. A thla a muan hmel ta deuh chuan ka hria, a aw pawh a zangkhai lehnghal viau mai.



A rilru tur ka ngaihtuah a, a fapa in case lian lutuk a awrh ta si, ka mitmei a veng lo thei dawn silo. Ral atang chuan inngaihtuah a na bawk si. A rilru chu a hrehawm ngawtin ka ring.




Ka nu nen kan inbiak zawh chuan khumah ka thu leh hnawk a, ka chau nghulh mai. Thlan rim ka nam huam a, khua a lo lum bawk nen ka thlen veleh atangin kan buai ta nuaih sia intihfaina hun pawh ka la neilo kha ania.




Phur lo lutukin ka intifai a, rilruah Vanmala ringawt a awm bawk si. Zaninah hian a lo haw ang em tihte ka ngaihtuah a, mahni chauh chuan ka khua a har dawn lutuk.



Ka inthlak zo chu beidawng lutuk hian khum bulah ṭhingṭhi in ka ṭawngṭai ta tawp a. Chham tur hlawl ka hrelo. Mahse Pathian chuan ka rilru a hre vek tih ka ringhlel lo. Ka mittui a luang ngiai ngiai a.



Heihi ka hria a ni, tap zawih zawih chunga "Lalpa..." tih ringawt kan sawi pawh hian chunglamin min ngaihthlâksak a, kan manganna hi min hriat sak vek tih ka hria.



Ka ṭawngṭai zo chu ka thawven phah sawt ka hre chuang lo, mahse hna a thawk ngei ang tih ka ringhlel lo.



Inhnuaiah ka chhuk thla a, tukverh parda chu keuin pawnlam ka bih a, duty an awm thap a. Chhuah chî zia zang a nilo tih ka hria. Sana ka en chuan zan dar 7 chiah a la ni a, keimaha zan han tum tawi chu ka zuam thlawt lo a ni ber.



Pâwnlamah chuan thawm a rawn awm a, mipui au rual thawm a ni. An au hla chu tum dangah pawh ka lo hriat ve tawh thin, college ka kal velai pawha ring taka ka lo au pui ve tawh thin a ni.



"Hmeichhe chunga hleilenna hi kan duhlo" tiin an au rual thap thap a. Hmeichhe dikna chanvo hi ka ngai pawimawh a, hmeichhe chunga hleilenna hi ka haw bawk. Mahse tuna an au chuan ka tan bengchheng a siam a, ka thinlung hi a na ngut ngut mai.




Hrehawm ti lutuk hian inchungah ka chho leh a, ka rilru tawt lutuk chu ka au chiam a "Vanmal..." ka ti vak a. Tunah hian amah tal ka bulah awm sela ka hrehawmna pawh hi a zia deuh tur ania.




Rilru na lutuk hian "Ka lo haw tawh hi" ka ti leh tiau a, ka thawm bak hriat tur a awm lo. Mipui au thawm lah chu pâwna va chhuah lawka va khap mai ka duh ut ut.



Ka phone lah chu a lo ri ve sek a, Vanmala anih beiseiin ka en vat zel a, amah a ni thei bawk silo. Midang phone call hrim hrim chu ka la duhlo ani tawp. Ka thawpik an tizual.



Mipui au rual thawm chuan zan dar 10 vel thleng a awh a, awmngaihna hrelo vin khum bulah ka lo thu sawp ngar ngar tawp. An reh ta diak a, thawk khat chu a veng ta deuh. Vanmala a lo haw ka beisei tlat a, tih theih ka neilo lutuk chu ka thin a rim takzet.



Police Station a va zawn mai chu ka rilruk ta tawp a. Ka tho uaih a, keimah mai chuan ka kal thei dawn lo tih ka hria. Thurualpui neih ka ngai, mahse tunge ni ang? Ka ngaihtuah vang vang a, thian ka lo siam hman lo lutuk chu ka inchhir vawng vawng mai.




Ka ngaihtuahnaah Sir Hma-a a rawn lang zawk a. Beiseina ka nei thut a ni ber. Ka pi boral vanga Aizawl kan kal thu kha Vanmala vekin min hrilh sak a, ka chawlh rih tur thu pawh min sawi sak anih kha. Tukinah Lawngtlai ka let tawh tur thu kha ka hrilha, chu chu kan inbiak tawpna ber a ni.




A puihna va dil tawp mai chu ka hreh viau nain a tulnain min tur thlu ngang si a. Eng ang pawhin min ngai dawn mah sela ka zah theih lohna zawng zawng sawm khawmin a puihna dil mai chu ka titlu ta a. Ani lo pun tur dang ka hre miau lo a ni.




Khuma ka phone dah chu ka ban vat a, ka call dawn lai mekin room kawngkhar a rawn ri a, ka hawi rual chuan Vanmala hmel pawr fap ka hmu zui nghal a.



Ka phone chu ka thlauh ri nghal bal mai. Hrehawm tih hmel lutuk hian mitmeng thûk ruihin min melh a.



Khati khawpa a lo haw hun nghakhlel si kha ka chesawn thei der lo. Ka melh ngawt ngawt tawp.



"Mamte..." a lo tih tak hulhah chuan rang zetin ka va pan a, ka che rang lutuk, a awmah ka nam nghek a, a che ve det tih loh chu a ding khawng luah mai.



"Min timangang lutuk" ka ti nghek, ka mittui a luang thla nghal pap bawk. Ka chûm zui leh dawt dawt a, min dang lova, ka kutthlakna chu a dawh mawl tawp.



"Ka lo phone che a, mahse min chhang lova" ka ti leh nghek a. Ka mangan zia ka ngaihtuah let a, amah thlahlel viau e tilo chuan kut ka thlak nghek nghek mai.



A hnu deuhah chuan ka kut chu a rawn man bet ta a, a âwmah min kuah khawm nghal vek a. Lungchhe zet hian ka insut ta hlap hlap a. Naupangchhia ang mai hian ka tap rawng rawng a.




Ka ngai bawk si, min timangang lutuk chu ka haw tho bawk si. Ka kawchhung tawt lutuk paih thawl tum ang hrim hian ka tap rawng rawng a.



Ka hnungah chul hauh hauhin ka sam a fawp leh tawk thin tih loh chu engtin mah a awm lo, engmah a sawilo bawk.



Chau lutuk hian ka zawi hnawk a, phun hlukin min pawmkang nawlh a. Ka la insut feih feih tho.



Khumah thuin amah hmachhawn zawng chuan min pawmbet a. Ka hnunga chul hliau hliau pah chuan "Hahdam tawh rawh le" a ti dam dup a. Ka thlamuanpui leh viau tawh lawi a.




Lungchhe lutuk hian "Ka phone call tal kha la ta che, min tihrilhai emai" ka ti leh a, ka tap tha leh chu a ni der mai. A lakah ka lo pangchang ve laklawh tawh bawk si.



Hrehawm tih hmel lutuk hian a thaw chhuak hulh a "Ka thiam loh a ni" a ti ringawt. Ka lo lungawi der lo "Ka mangan zia hi engmah i hrelo" thinrim lutuk hian ka ti tial leh ruai a. Ka bekah a lo fawp tawk ringawt.




Chutianga rei tawk fang kan awm hnu chuan "I zia deuh em?" a ti sup a, ka kawchhung tawt lutukte pawh kha ka thawl ta hawk a. Ka mamawh ber chu amah a lo nih chiah hi.



Nghet zet hian a zakah ka kuah let tai a "Khati khan vawikhat mah awm tawh suh" ka ti zawi raih a. Ka biak pawh theih loha a awm kha hrehawm ka ti em a ni.




Ka bekah rawn fawp leh tawkin "A thleng nawn tawh lo ang" a ti sup a. Min dah hran a tum chuan duhlo zet hian ka kuah bet tlat a.



Za lo zeta nui hawk chung hian "Ka beisei loh dan deuhin min lo dawngsawng a" mawlmang deuh hian a ti a. "Min lo dawn sawn dan hi ka beisei biklo" ka lo ti ve khauh. Min thawng em asin.




Chutah Vanmala chuan "Nang chuan min ring ang tiraw" chau rau lutuk hian a ti a. Ka inlahrang hlek a, a mitmeng tak ngul mai chuan min lo en a. Inrintawk hmel tak thin kha a tîm ru tlat a, ka khawngaih letling zawk.




A biangah ka kut te takte chuan ka dawm a "Ka pasal hi ka ring tawk che" ka lo ti hmiah. A thaw chhuak ham ham a, ka kut chu rawn vawn hnanin a fâwp tawk a "Engkim ka siam tha vek ang" a ti nghet ta charh a.




Thil awmzia chu ka zawt chiang a, a sawi zawnga a rilru hrehawm hmel lutuk chu ka hmuh hmaih loh kher mai.




"Sangsangi ka lo va thlah ta kher kher kha buaina bul intanna chu a nia. Bawihbawihi a lo awm a, Nu Biaki erawh ka hmu lo thung. Khatia Sangsangi ka dah hnu khân let leh nghal mai ka tum a. Mahse Bawihbawihi khan min lo dang a, a fanu chu room ah luh tirin thlem chikimin min thlem ka ti mai" ten hmel zet hian a ner nawk a. A thlem dan tur kalhmang chu a hmel awmdan atangin ka hrethiam nghal mai.




Sawi zawm lehin "Bawihbawihi chu ka hnar a, tun hnuah min ti buai tawhlo tur leh ka hlata awma Sangsangi ngaihsak turin ka ti nghe nghe. Ka chhuahsan khan engmah pawh ka ngaihtuah zui hran lo. Mahse Office a ka let leh chiah tihah Police Station atangin phone call ka dawng a. Station a kal turin thupek ka dawng a, ka va thlen chuan Bawihbawihi leh a nu an lo awm a, Bawihbawihi lah chu a lo tap nasa mai a. Ka va bangbo hle nghe nghe. Police Officer in thil awmzia min hrilh takah chuan ka awihlo lutuk chu phat ngaihna pawh ka hrelo hial zawk. Bawihbawihi lah chuan lem a chang thiam mai si a. Midang tana awihawm deuh deuh turin min puh thiam a, mak ka ti hial zawk. Tichuan, tikhan Social Media ah a rawn darh zui a, engtin nge a lo darh hman pawh ka hrelo. Dik tak chuan Police Officer in min lo koh chhan pawh hetianga social media lama kan alh hluai a hlauh vang a nia. Mahse a darh ta tho a, beisei aiin a lo khirh ta zek si a. Dân in hmeichhia te a humhalh zia chu i hre ve tho in ka ring" a ti duah a.




"Bawihbawihi chuan tum sa neiin Sangsangi kha a hmang tangkai aniang" ka lo ti ve vat a. A bu nghut a "Chu chu thil chiang sa alawm, keipawh lo inrinlawk tur asin mawle. Ka mawl vang vek a ni. Mahse lungngaihna tur a awm lo ania, Bawihbawihi ber khan thisen test neih a duh tlat lova, min puh pumhlum theu biklo. Finfiahna engmah a awm chuang lova. Mahse pawi ta ber chu Social Media lama kan alh hluai hi ania. Thu chiang hre hmasa hawt lovin mipui thinrim an phul hluai tawh si a. Ka dikna chu hailan a la ngai tho ang. Ka phone pawh min hren sak rih a, chuvang ania i call ka lak theih loh. Mahse ka pawiti lo, engmah hmuh chhuah tur an nei chuang lovang. Bawihbawihi ber hi rilru lama buai ta vek anga a lan chuan a khirh zual dawn" a ti leh dap dap a. Ka lo hah vek.




A tan chet lak mai pawh a harsa viau ang. A hnathawh vangin mite hriat lar a lo ni veleh zel bawk nen. Bawihbawihi lainat tawk an lo thahnem dawn bawk si.



"Engpawh thleng se kei chuan ka ring che" ka lo ti ve charh a. Ngaih that hmel fe hian "I ngaihdan tur kha ka venthawn hmasak ber a ni a, nang berin min rin chuan ka tan a tawk lutuk" a ti ve sup a.



Case buaipui turin Lawyer a lo hruai a, inhnuaiah chuan kan inzui thla ta nghal a. A lawyer rawn hruai pa chu a la upa lutukin ka ringlo. A hmel en reng reng pawha fin kar hmel hi a pu a, Vanmala'n eng thil mah a tih loh zia chu an fiah theih ngei ka beisei.




An sawi dun chhung chuan chokaah U Faktei ka lo bia a, ka nu erawh ka be duh rihlo zawk. U Faktei hian thu a dawngsawng thiam zawk ang. Vanmala rawn haw tawh thu leh case chungchang te chu a tawi thei ang berin ka hrilh ve luam a. A rawn thinrim ngang mai. Keipawh ka thinrim thar a, Bawihbawihi chu ka haw takzet.



U Faktei chuan lawmthu te a rawn sawi leh hnuhnawh a, ka lo nui liam tawp. "Zanin chu kan in bulah pawh mipui thinrim an rawn inhrosa a" hrehawm tih hmel zet hian a rawn ti a. Aizawl lam thleng thlenga a nghawng nghal chu rang ka ti kher mai.



"Mahse ngaihtuah awm kan nilo ania" a rawn ti veleh ngial a. Ka ngaihtuah loh phah bik der lo. Hmeichhe pahnih chauh an ni sia, an mangang ve dawn lutuk.



Vanmala leh Lawyer chu an inbe rei ta phian a, lo mutsan mai tura min tih chuan ka hnial ve tlat. Ka pasal a buai lai em em a hahdam taka lo mut heuh heuh chu ka duh biklo. Mahse ka chau ngang mai.



An bula lo awm ve kar chu ka hreh si a, chokaah dawhkan bawhin ka lo muthlu a, ka taksa kang lawp chu ka manghriat ruai ruai tawh.




Zing ka harh chuan khumah ka lo mu fel diam a. Ka hawikual a, Vanmala ka hmu lehpek lo. Mangang lutuk hian ka inperh tho awt a. Mahse a mutna bula lehkhathem ka hmuh rual chuan ka thaw huai mai.



*Lawyer nen kan chhuak lawk a, ka lo haw har lovang. Mipui an lo pungkhawm leh awm si a, chumi hma chuan ka lo haw ang* tih hi a lo inziak a. Kan nun chep ta lutuk chu ka hah vek.




A sawi ang ngeiin Vanmala chu a lo let leh har lo. Eirawng ka lo bawl peih fel diam tawh a, chaw kan ei nghal a. Kan hun tawnin a zirlo em a, kan ei tlem dun kher mai.



A chhuahna chanchinte chu ka zawt a, Vanmala chuan "Thil hi awlsam hmel deuha lang siin a khirh ru zek dawn tlat. Bawihbawihi ber a ngawih tlat chuan chet lak a har a. Rilru nat vanga biak pawh theih loh ang maiin a awm a. Mipuiin an lo lainat ve tum hrang bawk si. Dan in thiam min chantir mah se mipui laka thiam ka chan si loh chuan thiam channa famkim a ni dawn lova. An ngaihdan sawhsawn tir thei khawp finfiahna ka neih a ngai" a ti duah a. Tih theih em em nei ve so lovin ka rilru a lo hah ve em em ringawt a.




"Puih theihna che ka nei em?" ka tih chuan "Tunah chuan tihian ka lam tangin lo awm tawp rawh, min tichaktu i nih hi" a ti tlang rawt a. A sawi ang chuan lo awm phawt mai ang.




A tul phat phat bawk a chawei kham hnuah a ruk thei ang berin a chhuak leh a. Engtin nge Police Duty te hi a pumpelh theih ka hrelo, nge a lam an tang vek zawk pawh ka hrelo. Tihsual a nei miau lova chuvangte pawh chu a ni mahna.



Tukin a lo haw khan a phone a rawn hawn tawh bawk a, chanchin kan inhrilh zel thei tawh dawn tho a, ka mangang lutuk tawh biklo.




Ka nuin min rawn call zin em avangin ka pick up ta nge nge a. A rawn thinrim leh viau tawh. Haw leh mai turin min rawn ti lawm lawm a. Vanmala chu a lo ring ve miahlo.



"I pasal vangin i mualpho tel ve thei tih hria la rawn haw vat rawh" a rawn ti a, mak ti lutuk hian phone chu ka melh nghek. Vanmala'n hetiang thil rapthlak lutuk a tih a lo ring ve zawk emawni.




"Ka rawn haw ngawt thei hlei nem" ka tih chuan "Hmingmawizual, ka ngaihtuah vang che anih hi hre rawh. Pawngsualtu nupui nih reng kha i duh em ni?" a rawn ti ta khawl mai. Vanmala chu a ring miahlo tihna a lo nih hi.



"Vanmala hi ka ring tawk, min mamawh ber lai a ni a, phatsan ka tumlo" ka lo ti ve hmak a. Mahse ka nu chuan "Nupa nun in la hmang hman lote kha Pathian remruat vek alo nih dawn hi. Lo haw la, sum kan chhuah nghal ang. Pasal criminal case nei kha i neih reng ka remti lo bur" a rawn ti ta phiarh phiarh mai.





A ngaihdan chu mak ka ti lo theilo. "Nu..." ka tih lai mek chuan "Min hnial suh, Vanmala chu keiman ka be mai ang" a rawn ti ta nghat a. Vanmala bulah tuna a thusawi kha a va sawi ang tih ka hlau lutuk. Ka lakah inthiam lo lutukin min then daih ka hlau ta ber.



A ngaihdan mawlh kha, min thawng a ni tawp. Min ngaihtuah lutuk ka hlauh vanga a phone call pawh la tha duhlo kha ka nia. Min ngaihtuah ngei alawm, mahse min ngaihtuah dan hi ka duhzawng a nilo.




Tlaiah Vanmala chu a rawn haw a, thil ngaihtuah mûk deuh hmel hi a pû, a rilru a hah hmel kher mai. A chhuahna chungchang chu hre duh viau mah ila zawh chî a ni rihlo tih ka hria.




Zanriah kan ei lai chuan "Mamte...naktukah Aizawl ah haw turin insiam ang che" a rawn ti ta mai. Bangbo fe hian ka melh haw a, a chaw bar lai a lo bar zawm mawlh mawlh thung.




"Eng nge i sawi awmzia?" ka ti nghat a. Min melh eih lo hian "I haw a ngai, chu chu a nimai" a ti nghut.



"Ka nuin a rawn bia che em ni?" ka ti fak a, a awmdan ngai renga awmin "Zawhna min zawt suh, haw ang che" a ti churh.



Lungawi lo lutuk hian ka tho nghal tharh a, ka thleng pawh seng lovin silhmunah ka kut chu ka va sil zung zung a. Vanmala chuan min ngaihsak lo tih hriat lutuk hian a chaw bar lai a bar zawm mawlh mawlh a, ka lungawilo takzet.




Inchungah ka chhohsan nghal hmak a. Nghakhlel lutukin nilengin inah ka lo awm a, a rawn haw a, haw turin min rawn ti ringawt a. Ama thuin min ti dawn lo tih ka hria.




Ka nu ka call a, a pick up rual chuan "Eng vangin nge Vanmala i lo biak?" tiin ka chhuahchhal nghal tawl a. "Ka sawi kha, i rawn haw dawn" a lo ti kha fak. Ka nu ka huat ber tum a la ni ang.



Be zui duh lovin phone chu ka dah hmak a. Vanmala lakah pawh ka thinrim, bungrua ang maiin an duh duh danin min tihkual an tum a ka lawm lo.



Bathroom ah lutin ka insilfai sawk sawk a, Vanmala lah chu a lo la chho thei der lo. Ka sawi pui leh khawp ang, ka hawsan dawnlo a ni tawp mai.



Room atanga chhuah a zuk biak pawh leh vel chu ka duh ikhaw tawh bik silo. Lo lut rawh se, ka be khawp ang.



Ka sam khuih laiin a rawn lut a, chumi rual rual chuan a lamah inherin "Vanmal, ka haw dawn miahlo ania" luhlul zet hian ka lo ti nghal tawl a. A ngawi ngul a, min ngaihsak lo lutuk hian wardrobe a hawng a, a chezia chu ka lo en reng. Towel lain bathroom min luhsan hmak. A awmdan ngeng ngel ngul lutuk chu ka run kher mai.



Samkhuih chu dawhkana dah tau sawkin bathroom kawngkhar chu ka melh ngar a, ka hua a ni tawp mai.



Nge ni a, inthen chu a lo cho viau zawk ni. Kei chuan then ka duhlo bur. Ka rilru hi ka hrethiam chiah lo, mahse Vanmala duhna a intuh chho mek tih erawh ka hrechiang ta hle thung.


Ni e, Vanmalsawmhlua hi ka duh tan mek a ni.



Bathroom atanga lo chhuah leh thleng chuan ka lo la ding ngar a. Min ngaihsak lo zet hian a inthlak zui mawlh mawlh a. Awm ve lo ang maia min haider na te chuan ngei lam ai mahin ka rilru a tina ta tlat a.




Rilru na zet hian "A tha e, ka hawsan khawp ang che" ka ti salh a, ka hrawk a na ngut ngut mai. Ka ngaih viau lai hian min lo ngai ve miahlo ania nge. A hun harsa paltlang pui tur takngial pawhin min mamawh lo chu a ni sia.




Khumah chuan a sir thei ang berah ka mu nghal a. Ka nu thusawite kha ka ngaihtuah let a, Aizawlah ka haw anih chuan Vanmala nen hian kan inthen loh ka ring miahlo. Ka nu rilru len zia hrechiang tu ka ni a, a tih tawh vek vek chu ti hlur, a tih loh vek vekah chuan nawr luih theih loh mihring ani.




Vanmala chân tur anga ka inngaihtuah zawng ringawt pawhin ka zuam tawhlo a ni ber. Ka pi ka ngaihtuah chhuak lo thei lova tun dinhmunah te hian min hrethiam leh bik ngawt ang.




Khum rawn hniam sûtah chuan Vanmala a rawn mu ve tih ka hre nghal mai.




Ka beisei loh deuh hian ka hnunglam atangin min rawn kuah nghal hlun a. Ka biang a rawn lum thla nghal pap mai. Hepa hi ka chân duhlo.



"Tun atan chuan i haw rih a tha ber, i hrethiam ang tiraw" a ti dam thluam a. Haw tur chuan min duh viau ania nge, "Imm...ka haw ang, ka rawn let leh tawhlo ang" ka lo ti tial ruai a, talsawn ka tum a, mahse min kuah nghet lutuk.




A rum chhuak hawk a "Thil engkim ka chinfel hnuah ka lo hruai leh dawn che alawm" a ti hawk a. A thusawi chu hrethiam se min tih hmel hle.



Ka rilru lungpuam laklawh chuan "Aih, kan inthen vang vang ang. I duh ber ani lawm ni, i nun atangin ka kal bo vang vang ang" hrawk na teuh chung hian ka lo ti let tiau a.




Hrehawm tih hmel lutuk hian a rum leh hawk a, a lam hawi turin min kuai her a, ka khabeah dawmin amah en thei tur chuan min kuai dak a, ka mittui luang ngiai ngiai a hmuh rual chuan hrehawm tih hmel lutuk hian a thaw chhuak leh hawk a.




"Inthen sawi tawh suh, ka then dawn lo che. Buaina hi ka thlen reng zel mai che a, tun chiah min hrethiam la. Hei bak chu hlimna hlir ka thlen tawh ang che" a ti nghet charh a, ka chalah a rawn fawp vang vang a.



Ka rilru no laklawh chuan "Aizawlah ka let leh chuan ka nuin sum chhuahte a sawi alawm, min inthen tir a tum alawm " a ti leh tiau a.




Ka nu thil sawite kha ka ngaihtuah let a, nupa nun kan la hmang miah lo tih a hre si, chu tak chu ka buaina a ni pakhat. Pasal dang min neihtir vat ka hlau a, ka ngaihtuahna a vak thui ngang mai.




Vanmala chuan "Pathian hmaah thu kan tiam tawh a, i nu pawh then mai mai theih kan nilo" a lo ti hluk, a thinrim lo tih erawh ka hria.




Kei lah ta pek chuan a awma hmai nawr vak chung hian "I nû sawi vang mai maia min nei i nih kha" ka lo ti hmanhmawh, a phun hluk a.



Min kuai dak leh salh a "Khatiang ngaihtuahna kha tun atang chuan paih bo tawh ang che. Ka nu thû vang chauha nupui nei ka nilo. Eng ang pawhin ka nu chuan duh che mah se ka neih duh miau loh che chuan ka nei lovang che. Ka nei duh che a,ka nei ta reng che anih hi" a ti duah a.



Tichuan, ka huaisen na zawng zawng sawm khawmin "Anih chuan i nupui angin min en tawh rawh" ka ti ta a, mit ka chhing sawk a, ka âw chu a ri chang chang. A rum chhuak hawk a.




Ka hlauthawng alawm, Aizawlah a ngai ngaia ka let leh anih chuan ka nuin mipa dang min zawnsak nghal ang a, ho lam deuha Vanmala nen kan tawp mai ka hlau. Chumi dang tur chuan ka pasal hnenah ka inpumpek a ngai.




Vanmala chuan ka khabe chelh ngheh sauh pah hian "Min en teh" thupe aw zet hian a ti a, zak lutukin ka meng chhuak a. Mitmeng thim khap, de sawr sawrin min lo melh a.




Mitmeng pawi sawilo zeta ka melh kiau takah chuan a rawn che thut hi a ni ber. Min fawp zui nghal tawn tawn a, a chet dan teh thut chuan min thawng kher mai.



Thaw chham dawn khawpa min fawh hnu chuan a inlahrang hlawk a, "Ka nupui i nih nî khan ka nupui angin ka en daih tawh che. I pasal anga min en hun ka nghak mai chauh ani" a ti hul hawk a.



A rawn tho chhuak vut a, ka chungah rawn lawn kaiin ka taksa chu a rawn kapkalak a, thingthiin ka hmai zawnah a rawn kûn hniam zui a, a kutphah hlai zet chuan ka biang a rawn khuap nghal run a. Min melh ngur a.




A mitmengah chuan phurna, awih lohna, tisa châknate a inchawhpawlh nuk mai.



"Zaninah hian ka ta, ka taah ka siam dawn che. Vanmalsawmhlua nupui i nihzia i hre dawn" ti khur hlukin min rawn fawp zui a. Zah hun a nilo tih ka hria, ka cho chhuah a ni a, ka pasal a nihna chu nemnghet mawlh teh se.



Tichuan Vanmala chu duhthawh zet hian ka lo fawp let ve tan tan a.




________________*_______________*____


(In va han ui dawn tak em chhiar rih tum lo ho ka lo hlep daih ang)


Show post links
Top

[Ngaia]

DEPUTY COMMISSIONER
By CVL Awmpuii



Chapter 26



Thla 1 chuang teh meuh innei tawhin nupa angin kan lo khawsa ve tawh a, mahse kan la nemnghet silo. Miin hria se mak an ti ngawt ang, an awihlo hial zawk ang.



Chutia duhthawh zeta ka fawh let ve tan tan takah chuan a rawn duhthawh zual sauh a. Ka tiphur zual sauh tih chu hai rual a nilo.



Ka awmbawr chu rawn tham salhin ka Tshirt chu hnawk ti lutuk hian ka lu lam atangin a rawn pawthlip tawk a, ka lo hup nghal tai a. Mahse mitmeng de sawr sawra min rawn melhin ka kut chu min laksawn sak a.



Min rawn fawp zui leh ngawng ngawng a, ka thiam ang tawkin ka lo chhang let ve a.



Ka taksa a chûl kual lai chuan ka lo chhing diar diar a, ka sama rawn tham salhin "Mamte, i mit chhing suh" a rawn ti nghut. Mitmeng phelh phang hian ka lo melh let ve ngar a, ka thawk rang dan chu pui tak a ni, min rawn fawp lehin chêt a la zui leh ta a.



Nupui ka nihna chu hlenchhuak in ani pawhin ka pasal a nihna chu a nemnghet ta a. Vanmala chu mipa dik tak a lo ni ngei e.



A chêt dan ngaihtuah chuan engtin nge khang thla 1 chhung zawng khan a lo insum theih le ka ti hial zawk ! A chêt dan chu ka sawifiah thiam phak bak ani !



Chau zet hian a âwm ruak kangah chuan ka bei hle hle a, ka thawk a la pangngai hlei theilo. Ani chu a pangngai leh vek tawh.



Ka samah rawn fawp tawkin "A na em?" a rawn ti zawi sup a, a sawi awmzia ka hriat lutuk avang chuan ka sa hat hat mai. Zep nak emaw ka na thûm mai. Ka chau hle bawk.



Chhang lovin ka ngawi kar a, ka hnungzang ruak kanga chûl hauh hauh pah chuan "Ka lawm e aw...ka beisei lo asin" a ti thum bal a.



Ka han melh chho vat, mitmeng thûk ruih hian min lo melh a, "Min lo van ngai mak" ner nanga ka tih chuan a nui hawk a, ka hmuia rawn fawp zeuhin "Chutiang lam a nilo, Rinmawia nen kha chen in lo inzui tawh a, tunlai chhanah chuan ka ngaihdan hi a âwm lo hran miah lo ania" a ti thluam a.



A ni thei lutuk ang, Rinmawia nen khan kan inzui nasa ve em a. Ka nu pawhin tum khat chu sex hmang tawh ang maiin min ringhlel hial anih kha. Min zilh phah nek lehnghal kha ania.




A âwma bei leh pah chuan "Ka chau" ka ti sep a, a lo nui huk "Keichu ka inpeih reng" a lo ti uang a. Ka nui ve ta tawp.



Kan ngawih dun vang vang hnu chuan "Naktukah chuan tlai lamah helicopter in a rawn hruai ang che" a ti nghet charh a. A sawi zawh rual chuan ka lung a chhe lehnghal vek.



Ka inbengkang uaih a, a mitmeng tak nguk a melh kalh pah chuan "Ka hawsan dawn lo che" luhlul zet hian ka lo ti fiah fak a.



Ani chuan zaidam taka ka sam rawn chûl thuak pah hian "Mamte, i hriat thiam a ngai, i let rih hi a tha zawk" a ti dam thluam a. Duhlo lutukin ka lu ka thing nghek a.



"Min then i tum em ni?" ka ti tiau, a lo thaw chhuak hawk a. Rawn inbengkang vein min pawt hnai salh a, "Ka sawi tawh kha, engtikah mah ka then dawn lo che. Tun atang ngat phei chuan inthen duh pawh ni la ka phal dawn lo. Ka ta i ni tawh" a ti nghet churh a.




A âwmah min kuahbet leh a, "Min haw tir talh chuan ka lo let theih tawh pawh ka ringlo" rilru na lutuk hian ka ti halh a. Ka nu sawi kalhmangah khan min let tir duh tawh ka ring miahlo.




Vanmala chuan "Hetah chuan mipui thinrim a sosang rih si a, keimah vanga i tawrh phah ka duhlo. Ka ngaihtuah lo thei si lo che a, ina nangmah chauha ka kalsan che hian ka ngaih a tha ngailo. Chuvangin Aizawl chu boruak pawh a zia deuh ang a, i tan a him dawn a" a ti dam leh thluam a.




Ka la lungawi thei chuang lo. Harsatna a tawh laia lo tlan bosan daih chu ka duhlo bur. Pathian hmaah hrehawm lai leh bawrhsawm lai pawhin tiin kan lo tiam tawh a. A hunlai khan a hming chauha intiam mah ni ila chhawm nun tlat ka tum thung.




"I tel lova let chu ka duhlo" ka ti leh hram a, hrehawm tih hmel lutuk hian a thaw chhuak hawk a. "Case hian a lo berah kar hnih tal a awh ka ring a. A khirh deuh phei chuan thla khat hial pawh a ni mai thei. Ka chakna ber i nih rualin ka chak lohna i ni tel bawk tih hria la. Ka venthawn ber i ni a, heta i lo awm ve chuan rilru hahdam takin ka chhuak thei lova. Mipui thinrimin an lo khawih mai ang che tih hlau reng rengin ka awm a. Chuvangin tun atan chuan ka hlata i awm rih a tha ber" a ti leh dap dap a.




Min ngaihtuahna zâwn chu ka hrethiam lutuk. Mahse a bula awm lo tur anga ka inngaihtuah ringawt pawhin ka thawk a pik vek thei.




"Ka ngai che alawm, i hlata awm ka duh tawhlo" ka ti ta thlawt a. A rum hawk mai, "Min en teh" a ti nghut a, ka khabe ah rawn chelhin min kuai dak salh a.



Mittui tling pam hian ka melh ngat ngat a, ka biangah rawn khuapin "Ngailo che ka ni lo, ka ngai ber che. Mahse tun atan chuan kan awm hran hi a tha ber. Buaina zawng zawng ka chinfel vek hnuah ka rawn hruai leh dawn che" a ti nghet charh a. A thusawi chu ka ringhlel hauh lo. Mahse ka pawm thei ngang lo ani ber.




Ka mittui a rawn luang leh zung zung a, ka nuin min pawh then a tum tlat hi ka hrethiam theilo. Vanmala a ring miahlo te kha ka thanat pui lutuk.



Kei a nupui ngei lakah pawh thla khat chhung a insum thei ania. Bawihbawihi chu a khawih ka ringlo mai a nilo, a khawih dawn miahlo tih ka hrechiang lutuk.




"Ka nuin lo be lo che sela chu hetiang rilru hi i pulo ang" luhlul zet hian ka ti nghat a. "I nu chuan min lo be ngei a, mahse min lo biak vanga haw tir tum che ka nilo. I rawn thlen rual khan let leh turin ka duh tawh che. A chhan chu ka sawi tawh kha" hrethiam tura min duhzia chu a âw ngenngawl lutuk atang chuan a chiang ngawih ngawih.




"Ka nuin min pawh then tum ta se engtin nge ni ang?" insut hraih chung hian ka ti leh hram a, ka nêp lutuk chu ka inhaw ngawih ngawih.



Mitmenga thûk ruih a min melh chung hian "Min ring em?" a ti churh a, "Ka ring che a, mahse..." ka tih mek lai chuan min lo pawtchat a "Min ring a, a tawk lutuk. A dang ngaihtuah buai suh, ka chingfel vek dawn" a ti nghet churh a. A thusawi chu pawm loh theih pawh a ni tawhlo.




Heta ka lo awm ve reng chuan a hna ka tih sâwt loh ka hlau bawk si, ka haw chuan ka nuin min pawh then ka hlau bawk si. Ka rilru a phîr nuaih mai. Mahse ka hriatchian tak em em chu ka pasal hi ka rin hlawm tawp phawt a ngai.



A âwmah chuan ngawi rengin ka bei ta hle hle a, ka hnungzang ruak kang chu a rawn chul leh hauh hauh a, "Tunah chuan kan hlimna chauh hi ngaihtuah rih teh ang. Hetiang lo deuh hi ni thei se chu ka duhthusam a ni a. Mahse ka lawm e aw...i thianghlimna min hlan avangin" thu khuh nei map lo hian a rawn ti ril ruih a.




Sawi ve mai tur pawh ka hrelo, mahse amah bawk chu a rawn tawng leh a "Ka lawm zia hi i hrefiah thiam pha kher lovang" a ti leh a. Ka pasal tana ka thianghlimna ka lo hum tang tang chu ka inchhir lo takzet.




Chau hle mah ila thlanin min bual huh dap si a, "Ka intifai lawk duh" tiin inlakhran ka tum a, mahse min lo kuahbet tlat a. "U Vanmal..." ka ti nang nang, nui hawk hawk chung hian "Ka la duh tawk miah lo ania" a ti hul hawk a, ka melh nghek. Thutak zet hian min lo melh leh daih tawh.




"Thla 1 chhung ka nghak che a, hma kan sawn mawh si. Tunah chuan ka hun a ni ve tawh. Ka thla 1 hlawh kha ka la dawn" fiamthu thutak deuh hian a rawn ti a.




Run zet hian ka lo melh ram ram a, nui hawk hawk chungin a malchungah min hlangkai nawlh a. Thawmhnaw kan la inbel silo, kan taksa chu ngialngan lutukin a insi nghal chawt a. Ka lo ip chawih chu awmze nei lutuk hian a rum zui hawk a. Ka lungphu a rawn rang nghal dawt dawt mai.




"U Vanmal..." tiin ka phun sep a, min rawn fâwp zui nghal hmiah. Zei lutuk hian a chêt zawm lehnghal a. Chau viau e tilo chuan ka thiam ang tawkin ka lo pui ve vat a. Ka zei hlawl lovang tih ka hria, mahse ka theihtawp erawh ka chhuah thung.




Kan chêt zawh meuh chuan thlan tla dapin min rawn bawh zui hnawk a, kan khur dun ngat ngat mai.



Ka âwmah a hmai a rawn nawr vak a, ka inveng hman lo ka lo rum chhuak hak mai. A rawn nui lum hawk a, ka biang a sa hat hat mai.




Rawn dak chhuakin dam zet hian min rawn fawp leh a, ka hmui hnuai chu rawn fâwp dek dekin a inlahrang hlek a, ka hmui la si reng chung chuan "Ka zawng chhang khawp ang" a rawn ti zawi thum bal a, nuihza hmel deuh hi a pû a, ka lo nui ve ta ngawt.




Zanin zet chu ka mood a inthlak zut zut mai ! A châng leh ka tap pur a, a châng leh hlim zetin ka nui leh hawk hawk a. Vanmala erawh a ngai reng thung.



Kan thâwk a pangngai hnu chuan bathroom ah min pawm lut a, ka chau lutuk chu chet pawh ka che hlei thei tawhlo. Vanmala erawh chau hmel pawh a pu ve lo reng reng.




Kan inbual zawh meuh chuan a lo tlai tawh kher mai. Mu turin kan intintuah ta a, a âwmah chuan ka bawk thlar a, ka samah rawn fawp zeuhin "Muhil tawh rawh, i chau lutuk ang" a ti sup. Ka chhawn peih tawh der lo, ka mit a kawpza rul mai. Ka chau lutuk pawh chu a âwm tho e.




"Min thawhsan suh aw..." pangchang zet hian ka ti hrâm a, ka âw chu a ri chang chang. Ka hnunga chul hauh hauh pah hian "I thawh ruala i hmuh hmasak ber ka ni ang" a lo ti nghet charh.




Nui var var chungin ka chhing zui ta chial a, Vanmala chu ka thlamuanpui hliah hliah !




Zing ka harh rual chuan a sawi lawk ang ngeiin a hmel ka hmu hmasa ber. A kiu a inbengkang meuhin mitmeng de sawr sawr hian min lo thlir reng a. Ka harh tih a hriat rual chuan ka biang a rawn chûl hauh hauh a. Mut la kham lo lutuk hian ka nuih seih a, ka la meng hlei theilo.




"Duhawm lutuk" ti supin ka chalah a rawn fâwp vang vang a, "Ka meng thei thlawt lo..." zawi lutuk hian ka ti a, a lo nui hawk mai.



"Muhil leh rawh, i chau hle anih kha" a lo ti dam thluam a, min rawn kuah zui chial a. Pangchang zetin ka lo kuahlet ve tai a, lungawi tih hriat lutuk hian a nui hawk hawk mai.




Zing dar 8 velah kan tho chhuak ta chauh a, min dim dawih thar ta lutukte chu ka pangchang zual sauh mai. Heti khawp hian nupa nun hmanin nghawng a nei dawn tih hria ila chu a tir atang khan ka lo inpumpek daih tawh ang.



Ka pasal hi a duhnaah chuan a lo zei vel lutuk tlat.



Eirawng ka bawl lai te chuan ka hnungah min si chetin a lo ding ve zel a, mun rawn kuah leh thuk thin. Min thlahlel nghal ngawih ngawih nimai hian ka hria. Kei lahin ka lo ning phal silo.



Phone call a dawn takah chuan thutkhawmna ah a va bia a. A tawng thum bal bal chu ka hria a, a thusawi tak phei chu ka hre pha hran lo.



Rei vak lovah a rawn let leh a, a mitmeng a thim khap a, a bek pawng tawlh tawlh atang chuan a thinrim hle tih a hriat theih.



Tim dai hian thil awmzia ka lo zawt a, "Rin aiin case hi a hautak dawn tlat" a ti chang bal a. "Tinge?" ka lo ti hmanhmawh.



A thaw chhuak hulh a, "Bawihbawihi hian thisen test a duh tlat lova, mental disorder nei ang maiin a khawsa a. Chu chu a chunga ka thiltih vangah an puh a. A lawyer lah kha women empowerment chawi san duh lutuk mi leh mi dik inti lutuk ang chi kha ania. Thisen chu test thei ni ila kan tan thil a awlsam sawt tur a nia. Ngaihchan rih turin an ti ta ngawt a. Heti chuan a buaithlak telh telh dawn" a ti duah a.




Rilru hah zet hian ka lo thaw chhuak ve hak a "A test luih theih loh em ni?" ka ti ngawt a, a lu a lo thing nawk a "A lawyer ber khan thil a ti khirhkhan zo vek a. Hetiang dinhmunah chuan tihluih theih an ni lova. A rilru dam zan hunah bak a test theih loh tur thu an sawi alawm. A buaithlak khawp mai. Finfiahna dang kan dap mai a ngai ang" a ti leh chuar chuar a.




Ka pasal tana tih theih ka neilo bîk lutuk chu nêp ka inti ngawih ngawih. Chawhnu lamah Aizawl ka la let san daih dawn lehnghal ! Nupui nêp tak chu ka van ni tak.



"A va buaithlak dawn ve" ka lo ti hap a, han tih vak ngaihna ka hre bik hlawl lo atin ani.



Min rawn pan hnai a, "Lo ngaihtuah hah lutuk duh suh, thudik hi thup hlen theih a ni hlei nem" a ti veleh ngial a. A aw pawh hriat a nuam ta deuh e.



"Ka mawl ngawt mai tiraw?" a rawn ti leh daih a, "Engvangin maw?" ka lo tih chuan "Hmeichhe pakhatin heti khawp hian min bum kual thei ania, vawikhat mai pawh nilo in vawi tam tak min bum thei ania" a ti chuai raih a.





Ka lu ka lo thing vat "I mawl vang a ni reng reng lo, i rilru that vang zawk anih kha. An sual em vangin i rilru thatna an hmang tangkai alawm" hnem tum tak chuan ka lo ti ve a. Ka rilru tak tak a ni bawk.



Ka pasal hi a mawl reng reng lo, misualin a rilru thatna an lo hmang tangkai mai ani.



A rum chhuak hawk a "Nang talin min ring a, ka tan a tawk" a ti hmiah.



Tukthuan kan eikhamin lawyer a rawn kal leh a, pawn lamah mipui an rawn pungkhawm lehnghal bawk a. A thawpik thlak lampang hret chu a ni.



Thingpui ka lum sak a, news mak sak zet zet ka hmuh hreh avangin phone ka khawih lohna a rei tawh a. Ka phone chu ka en veleh ngial a. Ka pasal chungchang chhe zet zeta an ziahna a ni fur mai.




Ka nu missed call lah a thahnem na ngiang mai. Ka haw rih em a, lak pawh ka la duhlo kha ania. A naupangchhiat thlak ka ti viau nain ka tih theih tawk a ni bawk si.




Ka nu(Vanmala nu zawk) ka be ta daih a, min lo ngaihtuah ngang mai. Vanmala'n min be rih lo turin a chah hi a lo nia,ka ngaihtuah lutuk a lo hlau veleh chhawng a. Ka pasalin min lo vengthawng lutuk te chu ka hnuk a ulh tun mai.



Ka ngaihtuahna a let zawk a. Pasal nei tawh ka ni a, ka haw anih pawhin ka in hluia ka haw chhan tur ka hre ta lo. Ka haw anih chuan ka pasal in, ka in dik takah ka haw turah ka ngai. Vanmala erawh ka hrilh hauh lovang, a remti dawnlo tih ka hria. A thusawi kha ring tho mah ila ka nuin a lo biak vanga min haw tir tum a ni pakhat tih chu ka hai biklo.




Ukil nen an inbiak lai chuan thingpui ka lo va pe a. Kal leh mai ka tum lai chuan Vanmala'n thu ve turin min lo mitmei a, ka han thu veleh rih a. Min inhmelhriattir a, ukil chu Zama a lo nia. A la naupan hmel ngaihtuah chuan a tawngdan vel chu a puitling khup a, a zahawm ru zek mai.



Zama chuan case chungchang chu a sawi zui a "India danpui hian hmeichhia a humhalh nasa si a, eng ang pawhin thiam chang mah la neuh neuh chu a awm reng lo thei dawn lo. Tunah hian finfiahna tha tak kan mamawh. Bawihbawihi ber hi chu a tawng chhuak duh dawn miah lo tih a chiang sa a. A hnaih vaih ami te hi kan biak thiam a ngai dawn. Fing taka kan awm a ngai" a ti thluam a. A thusawite chu uluk zetin ka lo ngaithla ve a.




Vanmala chuan "Ka tan chuan engkim a harsa rih a, chhuah lailawk mai chauh ka ni si a. Hei takte hi mipuite min chhilh rawnna ber chu ania. Mi hausa leh rethei inkar ang ten an lo chhuah thul. A manganthlak lampang hret chu ani" a ti hulh a.




Ka lo lungawi lo ve em em ringawt. Vanmala ka khawngaih bawk si. A hna zawng zawng nen a tawrh phah a. Mipuite pawh ka dem takzet, heti khawpa ram tana hna tha thawk tawh ani a. Vawilehkhatah thu chiang pawh hre hawt lovin an dem rawn luai luai a. Tilang hluak lo mah se a ruk tak chuan hrehawm a ti dawn lutuk.



Zama chuan "Kan dikna kan hrechiang hle nachung hian thil a harsa chho riau a. Mahse Social Media a an sawi ang em em hi chu a ni lo mawle. Social media lamah thu diklo an lo vawrh vir vak vak hian mipuite a nawr lo thei lova, mipui thinrimin sawrkar an lo nawr veleh zel bawk nen. Thiam reng chung siin thiam loh chan a hlauhawm riau a. A phaw vuakah mipui an incho phur nasa tawh mai si a" a ti leh dap dap a.




Heihi Mizoram kan buaithlak na em em chu ania. Kan vei tawh kan vei tlurh a, a hunlaiin kan ti nghek a, mahse kan zuzi ral leh nge nge zel tho. Dik tak chuan Vanmala case pawh hi a sarhu lai ani a, nakinah chuan an sawi zui peih tawh kher lovang. Chutihrual chuan Vanmala hian a tihsual ni miah lovah tuna mipui awmdan vang hian a tawrh phah ve thei tlat.



Vanmala chuan "Ka khawih lo tih hrechiang bertu chu amah kha a ni ang mawle" a ti hluk a. Zama chuan "A dik zawk kan nih miau chuan hailan hun kan nei em em ang. Sawi leh sawi hnu thil reng reng hian alh hluai lai a nei ve a, mipuiho pawh hi nakinah chuan an rawn tei reng peih bik lovang" a ti ve chuar chuar a.





Zama chuan phone call a dawng zui a, a biak lai chuan Vanmala nen kan lo ngaichâng ve ran a.



"Tunah maw" a ti hluai a, "Aw, awle" ti leh mawlh mawlhin a phone chu a dah nghal a. Vanmala nen chuan min melh tawn zak a, chutah "Vanmal, chhuah dun lawk kan va ngaih hmel ve" a ti sup. Vanmala chuan min rawn melh zawk a, ka lo bu nghat. Ka hriat ve tur a ni rih lo ania nge. Case chungchang anih ngei ka beisei.



An inzui chhuah hma chuan Vanmala chuan "Kan reilo ang, lo insiam la, dar 3 velah helipad ah ka thlah ang che" a ti zung zung a. Min melh vung vung a, kan ngaihtuah a thuhmunin ka hria. Tun atanga darkar reilotê ah hian kan inthen hrang dawn.



Zama chu a hmanhmawh hmel si a, inbe tawh lem lovin an inzui chhuak chu pawn thleng ka thlah a. Mipuiho chuan chhun chawlh an nei nge ka hrelo, an reh ta diak mai. Kan in erawh Police hovin an la hual thup thung a. Vanmala chhuak vel hi an dang lem lova, an khap lem lovah ka lo ngai tawp mai.



Phur lo zet hian ka thawmhnaw chu ka pack a. Ken hnem vak ka tum hran lo, Vanmala hian min rawn lam leh vat ka ring tlat a. A tel lova awm rei chu ka duh hek lo. Kan in tak taka let tum ka ni lova, ka nu leh U Faktei bula let tum ka nihna chuan chakna min pe hram hram. Eng ni bik lo mah ila an bula ka awm chuan min lo thlamuanpui ve mial mai thei asin tihah ka innghat tawp.




Ka insiam peih tawh a, Vanmala erawh a lo la let lo. An rei loh tur thu min hrilh si kha darkar khat a liam hnu pawhin a rawn la let mai lova. Ka ngaihtuah tawh khawp mai. An kalna tur ka lo zawt lo chu ka inchhir lek lek.



Kan room chu ka enkual a, nizanah khan hlim takin kan nui dun a, hun hlimawm tak, chhinchhiah tlak zet kan hmang dun anih kha. Tunah ka chhuahsan nghal mai dawn chu ani sia. Zanin atang chuan amah têin kan khum zau duaiah chuan a mu ang a. A mal lutuk tur chu ka lainat lutuk. Haw loh dawn lahin a remti dawnlo nasa si.




Vanmala chu tlai 2:30 velah a rawn let ta hram a. Ka hawsan mai dawn si a, eitur ka siamsak e ka lo tih lai tak ani.



Chokaah chuan rawn lutin min rawn melh vung vung a, "Eng thil nge ni a?" ka tih chuan a lu a lo thing mai a.



Min rawn hui zauh takah chuan ka va pan ve mai a, nghet zetin a âwmah chuan min kuahbet ta hlun a. A awmdan chu ka ngaih a titha lo lek lek mai.



"Vanmal..." ka tih chuan "Shh..." tiin min lo khap vat. Ka ngawi leh nghal dak a.



"Ka hmangaih che" a rawn ti chhuak sup a, ka kawchhung a che awk mai. Min kuah nghet sauh pah hian "Ka hmangaih che" a rawn ti leh a. A âwmah ka nawr vak tawp ringawt.



Vanmalsawmhlua hian min hmangaih anih chu!



A inlahrang tur chu phal lovin keimah zawk chuan ka lo kuahbet tlat ta zawk a. Ka kalsan hun tur ka ngaihtuah a, ka ngai lawk emai.



Chuti chuan rei tawk fang kan awmdun a. Kan hun tawnin a zir hlawl silo. Helipad lam pan tur chuan hreh chung chungin kan inruahman ta a.




Ka suitcase lo pack fel sa chu zo zet hian a khai nawlh a, room kawngkhar a pan lai chuan khum bulah ka lo ding ngar a. Ka zui tak mai si loh avang chuan a rawn lehhawi zawk a, "Mamte...lo kal rawh le" a ti sup, a hmel atang chuan min kaltir a hreh ve zia ka hmu thei.




Lungchhe lutuk hian "I bulah ka awm ve thei mai lo em ni?" ka ti leh thlawt a. Ka kal hreh em ani. Eng emaw hian min mawlh tlat a, kan inthen hlenna tur ang mai hian ka hria atin ani.




Vanmala chuan "A harsa zawngin awm lo la, ka tan paw'n kaltir che hi a awlsam bik lo. Mahse i kal a ngai" a ti bur mai si.



Ka mittui bawk a rawn tla leh tawh. Chuveleh Vanmala chuan min rawn pan hnai a, ka kutah rawn chelhin "Kal ang le " a ti sup a, ka zui mawl tawp.



Helipad kan thlen te chuan ka mittui hi a dirin a dir zung zung a ni ber. Vanmala chuan min tih vak ngaihna a hre biklo. Min hnem chuang lo hian a ngawi tawp a. Hrehawm a tihzia erawh a mitmeng atangin ka hmu thiam ve vek.



Helicopter a rawn thleng a, ka kal tak tak tur chu a tuar thei ta ngang biklo aniang. Eng khaw sawi set set lovin ka hmuiah min rawn fawp tawn tawn a, mittui luang ngiai ngiai chungin ka lo chhanglet ve a. Kan inhmuh leh hma zawnga a tawpna tur ani tih kan hrechiang dun bawk a, kan duhthawh dun ngang mai.




Kan inthlah meuh chuan kan thaw chhuak ham ham mai. Ka chala rawn tauh bap chung hian "Ka tan hmeichhe hmasa ber i ni tih hria la ka duh. Tu hmeichhia mah ka kut hmawr pawhin ka la khawihlo. Ka tan hmeichhe hmasa ber leh a awmchhun i ni" a ti nghet churh a.




A thusawi chuan min thawng tih piahlam a ni. Ka makti lutuk chu a hrethiam aniang, a nui suk a "I tana mipa hmasa ber ka nih ang chiah khan ka tan hmeichhe hmasa ber i ni, a awmchhun i ni bawk ang" a thusawi nemnghehna ang hrimin a ti leh churh a. Ka ringhlel ta miah lo anih chu !





Vanmalsawmhlua tan hmeichhe hmasa ber ka lo nih chu ! Heti hi chuan ka thianghlimna ka lo hlan kha a tan a hlutzia ka hriatthiam pui ta uarh mai. Ka tan mipa thianghlim a ni ve miau si a.




Min rawn fâwp leh a, tun tum chu a dam ta raih mai. Inthlahlel tawn takin kan infawp a, he hun hi ral theilo se ka ti takzet. Tun atanga reiloteah kan inthen hrang mai dawn si a.



A inlahrang a, ka bianga la khuap run chung chuan "Ka hmangaih che" a ti leh a, a vawi thum sawina a ni tawh. Ka mittui luang ngiai ngiai chu min hruk hul sak a. A hlim bik vang ni hauh si lovin min nuih a, "I thlen veleh min lo bia la. I bulah awm lo mah ila ka hmangaihnain a umzui zel dawn che tih hria la. Engkim ka chinfel hunah ka lo hruai nghal ang che. Chhungkaw tak tak kan din tawh ang" inringtawk zet hian a ti leh a.




Ka pasal hian a mawhphurhna a hlen lo ngailo, a sawi tawh chu a ti ngei ngei dawn tih ka hria.




Helicopter ah chuan ka chuang lut ta a, ka mittui lah a hul thei der lo. A rilru tihhrehawm lutuk hlauin insum ka tum ve tak nain a lo tla zel bawk sia, ka dang buai peih tawhlo.




Tichuan ka pasal chuan min vai liam ta a, inhmu tawhlo tur ang mai hian ka thlahlel a, kan thlawk chhuak chiah chu insum hman lek lovin ka tap chhuak hlap hlap a. Vanmala ka ngai nghal vawng vawng mai.



Aizawl helipad kan thlen chuan ka beisei loh lutukin Puia'n min lo hmuak a. An bula haw ka tum der silo.



Lainat hmel zet hian min lo en ngur a, ka tap chiam tih ka hmel atang chuan a hriat theih vekin ka ring.



A bul ka va thlen chuan "Inah ka rawn let dawnlo" ka ti teh tawp a. Min melh vung vung ringawt.



"Pasal nei tawh ka ni a, hetah ka awm dawn anih chuan ka in dik tak ka pasal te inah ka awm tur ani" ka ti hriam leh hrak a. Ka nu vangin helai ka thleng tawh a. A thu zawm zel chu ka tum tawh hranlo.




Chutah Puia chuan awlsam zet hian "Ka va thlah ang che" a lo ti thên a. Ka hamhaih letling zawk "Puia..." ka tih chuan "Ka hria, keichuan U Vanmala hi ka ring, Rina nen pawh kan lo sawi dun a, khatiang thil tenawm kha a tilo ang" a lo ti ve duah a.




Ka nauin ka pasal a lo ring ve thlap chu ka lawm kher mai.



A motor dahna lam pan chuan kan inzui ta a "Ka nuin a rawn tir che em ni?" ka tih chuan a lo bu nghut a, "Vanmala hi tinge a rin ve miah loh le" ka ti leh a. "Nû anih hi, ka nu mizia hi ngaihtuah la, heti hian awm chiam lo se chu a mak ngawt zawk ang" a lo ti ve hluai a. Ni e, tuna a awmdan hi ka nu mizia nen chuan a inhne rem thlap.




Nu pakhat hi a ni ve a, mahni lu zo veh vawh tak, a tih tawh lam chu ti tuk mai chi kha. Vanmala a ring miahlo erawh ka laam lo hlawm tawp.



Puia chuan ka pa car a lo keng hi a lo nia, ka bungrua te chu seat hnungah min dahsak a. Kan chuanglut zui nghal a. Vanmala biam nghal ka tum ut ut a,mahse ka intuhfel vek hnua biak ka thlang ta zawk.



"Ka nuin a hau che ange" Puia bula ka tih chuan "Puitling ka nih tawh hi" a lo ti duh lek chauh. Puia'n min lo hruai hlauh chu ka lawm letling ta phian mai. Chuti ni lose motor nghah leh chhung nen ka tlai duai awm si a.




Vengchhung kan luh dâwn chuan Puia chuan "Niminah khan in inkawtah mipui an pungkhawm ve nual a" a ti supa , min rawn melh zawk a hawisawn lehnghal. Aizawla kan in a sawina a ni tih ka hria.




"Helama ka nû te lehzel chungah pawh an lo tuan a maw!" Ka tih chuan a bu nghut a. "MHIP ho an nia, in inkawtah lungawi lohna lantirin an au rual a. A lo dawngsawng tu tan chuan a hrehawm ngawtin ka ring" a ti veleh duah a.




Kan inbiak lai khan ka nuin a sawi si lo, U Faktei lah khan chutiang lam reng reng min hrilh lo bawk a. An zavai mai hian min lo vengthawng em em vek chu a ni sia. Chuti chung chuan ka nu lahin Vanmala a lo ringlo ve khanglang a. Ka thanatpui thlawt ani.



Kan in kan thlen chuan Puia chuan min hawsan zui nghal a, min ngaihtuahna tilang hluako mah se min ngaihtuah zia ka hai biklo. Ka nuin a lo hauh chiam erawh ka hlau khawp mai. Helamah min hruai zawk ta daih sia.




Inchhung ka luh rual chuan ka nu ka au lang lang a, room atangin U Faktei an rawn lang nghal a. Min hmu thut chu mak an tih hmel kher mai.



Ka nu chuan "Mamte..." a ti hluai a, ka lo nui lui var var. "In in lamah i haw dawn emaw tia" U Faktei zawk chuan a lo ti ve hluai a, ka thawng dun hle niin ka hria.




Ka nui lui var var a "Hei ka lo haw reng alawm" ka lo ti sam thên a. U Faktei chuan ka bungrua te chu min lo khai chhohpui vat a. Ka nuin thil awmzia min zawh chuan "Sawta ka awmchhan tur ka hrelo, heihi ka in alawm. Nge min duh tawhlo zawk em ni?" ka ti nang nang a, hlim hmel put luih ka tum hram hram.




Chutah ka nu chuan "A teuhlo mai, helai chu i in a ni ve tawh ngei alawm. Mahse Vanmala khan saw lama in in zawka i awm rih tur thu a sawi si a" a ti thliam a. A
Hetiang taka min lo hriat danah an lo inbe pawpin ka chungchang te pawh an lo sawi nasa ve hle anih dawn hi!




"Hetah alawm ka awm dawn, dik tak chuan lo haw hi ka duh miah lova mahse U Vanmala'n a ti tlat sia, ka hnial seng biklo alawm" tiin ka nu bulah chuan ka zualko ve ngial a. Min lo hrethiam khawp mai, chutih rual chuan Vanmala ang chiahin heta ka awm rih chu thil tha ber anih tur thu a sawi.




Ka nu chuan "Han intifai zung zung la, chawei kan peih tawh a, kan ei zui dawn nia" a ti zung zung a. Kan nupa room lamah chuan ka chho zui ve nghal mai bawk a.




Ka nu call ka dawng zui a,ka la duh bik teuhlo. Heta ka awm thu a hre vek tawhin ka ring. A bula awm tura min tih ka hlauh luatah a phone call reng reng chhan ka tum lo bur.



______________*_____________*_______

(Naktukah a awm lo mai thei aw...)


Show post links
Top

[Ngaia]

DEPUTY COMMISSIONER
By CVL Awmpuii



Chapter 27



Ka nu te'n chawei turin min nghak tih hriain hmanhmawh zetin ka intifai zung zung a. Vanmala pawh ka la be ta miah lo ania. Ka nu zawkin a lo bia ang a, hetah ka haw daih tih lo hrilh ta se, ka chunga a lungawi loh ka hlau takzet. Mahse pawi ka tilo, heihi ka in a ni miau a. A duhdanin Aizawlah ka haw tawh a, chu chu tawk ka ti viau.




Ka intifai zo, bathroom atanga ka chhuak chiah chu ka phone ri a lo tawp chiah. Ka va pan hnai a, ka rin ang ngeiin ka pasal a ni. Call back ka tum lai takin a rawn ri leh a, ka pick up vat "U Vanmal..." ka tih rual chuan "Tinge khatah i haw daih a?" a lo ti nghut, a âw a lungawi lohna chu ka hrechiang ngang mai.




Ka lo thaw chhuak hak a "I duh angin ka haw tawh a, ka haw na tur in lehzel chu ka thu a ni. A thu hrimah ka inah ka haw a ni ve mai a, chu chu thil sual a ni em ni?" ka lo ti ve nghat a.




Rilru pik hmel zet hian a rawn thaw chhuak huk a, "Mamte..." a rawn ti hulh, ka lo ngawi ngar a. Amah bawk chuan hahthlâk tih hmel lutuk hian "A harsa zawngin awm lo la" a rawn ti chuai raih a.




A awmdan chu ka ning ve ta takzet, a hlatah min dah tawh a. Heta ka awmna tur lehzelah ro rawn rel a tum a. Ka nu bawk a inrawlh leh tawh tih ka hria. Ka lawm ta lo khawp mai.




Ka ngawih ngar hnuah chuan lungawi lo lutuk hian "Tinge ka nu thusawi apiang i awih duam duam zel a. Amah vangin min tir haw a, i thu awihin ka haw a, ka haw na tur lehzelah pawh ka nu thu ang bawka min kaltir leh i tum a, ka ning" ka ti ta chiam a.




Ral atanga inhauh chu ka duhdan a ni bik lo. Mahse a awmdan leh min tih dan hian ka lung a ti awi ngang si lo a ni.




"Engkim hi i tana tha tur zelin asin ka tih, nakin zel atana kan hlim nan. I hrethiam thin bawk si lova aw..." a rawn ti vawng vawng a, kei ang lo takin a âw a dam thluam mai.




Keipawh chuan thinrim insum teuh hian "Ka tana tha tur chu ka hre ve tawh alawm. Hetah ka haw a, lungawi ve mai rawh. Hmundanga ka haw chhan tur ka hrelo. Ka nuin a lo biak leh che pawhin lo chhang let ve hmak tawh rawh. A lung tih awi tum kher a ngailo. Tuna kan buaina tawh pawh hi i that leh lutuk vang anih hi" ka ti vei pang pang a. Ka duhai ka tawng tam hret.




A ngawi vung vung a, a rilru a hah dawn tehlul nen chutia ka lo ti chiam mai chu ka inthiamlo leh hnuhnawh, mahse ka sawi vek tawh sia.




"A pawi ngawt mai" a rawn ti tawi tuk a, hrehawm a tih ka hlau kher mai.



"U Vanmal..." inthiam vak lo hian ka ti hliai a, sawi belh tur ka hria pawh a ni hran lo.



Chutah Vanmala chuan aw hriat nuam zet hian "I sawi awmzia ka hrethiam alawm. Ral atanga inhauh chu ka duhlo, ka duhdana awmtir che ka lo tum mah mah a, ka thiam loh ani. Tikhan i duhna takah lo awm la, ka rawn lam thuai ang che" a rawn ti ta nge nge a. Ka hahdam huai mai.




"Ka nu chuan a rawn ankhum vak che em ni?" ka ti hram a, an inbiak dan ka hre duh em atin ani. Tawngkam mei nei leh hriat nuam lo zet zeta a lo tawngkhum ka hlau.




Vanmala chuan "Ânkhum lo e, a hmangaih hle mai che" tih chiah a rawn sawi. Zawt zui ngat ngat pawh ni ila a sawi zui duh dawn lo tih ka hria a. Ka zawt zui duh ta lo law law.




Ka ngawih kar lai chuan "Mamte...ka ngai che" a rawn ti ril ruih a. Tunah hian amah têin kan inchhung zau deuhah khan a awm âwm si a. A khua a har ngawtin ka ring. Ka khawngaih lutuk chu ka lung a chhe lek lek mai.




"Keipaw'n ka ngai che" ka lo ti ve sep a, a rawn thaw chhuak ham ham a. "Ka lo haw tir khe kher che ani" a rawn tih rual chuan "Ka lo let leh mai dawn em ni?" ka lo ti hmanhmawh, ka phur nghal et et lehnghâl a. Mahse a rawn nuih tak hawk hawk ah chuan a fiamthu tih ka hria. Ka nguai leh nghal vek mai.




"Khatiang khan min fiam tawh hlek suh, ka lo let leh duh tak tak mai ang" lunghnûr zet hian ka lo ti hlak a, a lo nui huk huk mai.



"Khatah i awm dawn ro ro anih chuan inthlahrung dêkin awm reng reng suh ang che. 'Ka in' tiin i haw ve thlap tawh a, i in anihna ang tak khan i in tak tak angin ngai tawh ang che. Mamawh i neih chuan lo sawi hreh lo la" a rawn ti dam dap a. Râl atang pawhin min rawn ngaihtuah viau mai.




Vanmala nen kan inbiak zawh chuan inhnuaiah ka chhuk thla ta vat a. Ka nu leh U Faktei chawei lo siam mek chu ka pui ve nghal zat.



Ka nuin "In pa nen in inbe tawh em?" a rawn tih chuan kan inbiak tawh thuin ka lo chhang vat a. Chutah amah bawk chuan "Mamte, i nu hian Vanmala hi a ring miahlo tiraw" a lo ti khauh, ka nu chu ka melh vat a, min lo melh ve kal bawk. U Faktei erawh a ngawi reng, nuamlo tih hmel lutuk hian min lo melh tawn sek a.




"Nu..." sawi belh tur hre silo in ka ti hul hak a. Chutah ka nu chuan "Mi kâ atangin ka lo hre ve mai mai a. Ka awih vak lo nain heti hian i rawn haw leh ta rum rum sia. Vanmala nen kan inbiak khan i nu nen an inbiak thu a sawi a, engmah min hrilh hran lo. Mahse ka hre ve thei tlat" a ti duah a.




Ka tan a nuamlo duh kher mai. "Aa...ka hrethiam tawh biklo" ka ti ta ngawt a. Chutah ka nu chuan "I hrehawm tihna turin ka sawi hauh lo ania. Thu kalphungin zawt mai mai che anih kha. I nu pawhin a lo ringlo anih chuan ka dem em em hranlo, Vanmala mizia a la hrechiang tawk lovah ka ngaihsak thei ang. A lam tang ve tura ka ngaih laia a lo ring tlat lo chu ka tha nat rual rualin heta i lo haw daih hi ka lawm ania. Ka thlang sual lo che tih ka hria alawm" a ti leh duah a.




U Faktein titi dang a rawn vawrh tak daihah chuan kan sawi zui leh tawhlo. Ka nu pawh pangngai takin a awm leh nghal a, chutiang bawkin keipawh. Heta ka awm chhung reilo te hian chhungkaw inpawh tak kan nih hram ka beisei.




Chawei khamah U Faktei nen in kan tifel a, "I hnaah i kal dawn lo em ni?" ka tih chuan vawiin chawlh a lak thu a lo sawi vat a. Ka lo lawm ve em em ringawt. Ka nu hovin inah kan awm tlang thei ang a. Inhriatchian nan leh inpawh zual nan hun kan hmang ang a, a hlimawm phian in ka ring.




Chutia ka ngaihtuah mek lai chuan ka nuin "Mamte, i duh leh in in lam va tlawh ve zuai la" a rawn ti a, "Ka duhlo" rang zet hian ka lo ti vat. U Faktei nen chuan min melh phawk hra a, ka hrethiam lutuk. Tu mo in nge mahni in tlawh chu duhlo ang ni. Ka chhang rang em lah tak bawk a.




"Ka hmanhmawh lova, nakinah hun a la awm dawn tho alawm. Vawiin chu heti hian inkawmho rih zawk ang u" nui lui var var chung chuan ka ti leh ta zawk a. An ngaih pawh a that leh hmel ta deuh e.




Tichuan kan nufa thum chuan nilengin kan inkawm ta a. In kan tifel ho a, veranda te kan tifai a, plants ho pawh kan hung tha vek hlawm a. Kan hun tawn harsa hle mah se mahni tawkah kan hlim theuhin ka hria. Vanmala erawh ka rilruah a awm reng a, ka ngai takzet.




Eirawng pawh kan bâwl ho leh dial dial a. Hetah ka awm reng thei dawn anih chuan ka lo haw daih chu pawi ka tih rual rualin a tha tihna lai chen ka nei ta tlat. Heti hian inpawh takin ka nu leh U Faktei te nen pawh kan inkawm tlangnel theih phah a. Hei baka hun tha chu a awm bikin ka hrelo.




Eirawng kan bawl buai lai takin Vanmala call ka dawng leh a, dawhkana ka phone dah chu rang zet hian ka ban a. U Faktei'n caller ID a lo hmu hman si, ka hmanhmawh lutuk chu min lo fiam zui a "Kan phone a ri khat tawh bik dawn mange" a lo ti zauh. Lai zet hian ka nui ringawt a.



Ka nu chuan "Chhang vat vat rawh" a lo ti ve hluai a, an nui zui hak hak mai. Lai zet hian "Ka'n chhang lawk ange" tiin choka atang chuan ka chhuahsan a.




"Hello" ka tih rual chuan "Eng nge i tih?" a lo ti dam thluam a, ka nu te nen eirawng kan bawl ho thu ka hrilh chuan "In va tangrual sawt ve aw..." a rawn ti chuar chuar a, ka lo nui hak hak mai.



"Eng nge i tih zawk a?" ka han ti veleh a, "Keipawh eirawng ka bawl" a rawn ti tha ve mai a. Kan choka a Vanmala chetla vel tur chu ka mitthla a, a palianin a che ve vut vut awm sia, a inhmeh letling phian ang.



"Eng chawhmeh nge i siam a?" ka tih chuan a ri sut sut a, "Artui ka kang dawn" a lo ti ve ngei a. Insum hman lek lovin ka lo nui nghal hak hak.



"Ka van ei ve châk" ka tih chuan "Ka bula i awm leh hunah ka siam sak ang che. I duh apiang..." thutak zet hian a rawn ti sup a, ka ngai nghal vawng vawng mai. A bula awm ka thlakhlelh dan chu pui tak ani.




"Eitur te kha ei tha la, mahnia awm chuan ei a châkawm loh viau ang. Mahse ei in chu thulh miah loh tur aw. Chawhmeh pangngai deuh te ei la, artui ringawtte kha hmeh suh. A dang hrisel deuh deuh pawh ei rawh aw. Eirawng i bawl peih loh pawhin dawr ami te chah mai la, mahse pum lamin a huat chu ei lo la. Inenkawl tha hle ang che" ka ti duah a. Ka ngaihtuah tak tak ani.




"Ka hria e, ka hria e...Nangpawh in enkawl tha hle ang che. Ka bulah awm lo mah la ka ngaihven reng che tih hria la. Harsatna i neih chuan rawn sawi hreh lo la. Râl atang pawhin i pasal hian i tan engkim ka tithei ania" a rawn ti ve duah a. Ka rilru a tino leh vek tawh. Insum tum sateh mah ila a har thin zawng anih hi.





Kan ngawi dun ta reng a, kan rilru erawh kan inhriatsak tawn viau chuan ka hria.




Mipa âw in a rawn ko ri hi ka hria a. Chuveleh Vanmala chuan "Mamte...zanah ka lo be leh ang che, dah phawt ang aw" hreh hmel zet hian a rawn ti sup a.



"Aw...anih" ka lo ti ve vat. Mahse ka dah hma chuan "Lawk" a rawn ti leh a, a sawi tur chu ka lo ngaichâng ran a.




Chutah Vanmala chuan "A pawimawh ber chu ka hmangaih che tih hi hre reng rawh aw" a rawn ti ril ruih a.



Vanmalsawmhlua zet hi, ka ngai thlawt ani !



"Anih ka dah aw..." a rawn tih chuan "Umm..." tah insum teuhin ka lo ti ringawt. Kan inbiakna kan tihtawp hnu chuan ka thaw chhuak zui ham ham mai. Heti em em a pasal te han ngaih tawp mai chu aw...a tha lamah ngai phawt mai ang.




Insiam tha sawk sawkin ka nu te eirawng bawl chu ka va pui veleh vat a. Ka nu chuan "Eng nge a lo sawi a?" a lo ti vat a, sawi chhawn chî engmah a rawn sawi hran si lova. Han chhan mai dan tur ka hre silo chu "Eng vak mah pawh a rawn sawi hran lo..." ka ti niai ringawt a.



U Faktei'n a lo hrethiam ngang mai, ka nu bulah chuan "I fapa tlangvala kha a ni tawh hlei nem, nupui nei te a ni ve tawh a. Eng eng emaw te chu an sawi ve ang chu..." a lo ti nang nang a. Ka nu pawh chuan a hrethiam aniang, min nuih rah rah a. A zahthlâk thin reuh mange.




Zanah kan beisei loh lutukin ka nu a rawn lang hlawl a. Ka chungah a lungawi lo tih hriat lutuk hian min melh thîp râm a. Ka nu(Vanmala nu) leh U Faktei te chuan pangngai takin an lo chiau au a, kei a fanu ber hian ka helh tlat pek a. Min lo hruai a tum anih vaih chuan a hlawhchham chiang viau ang.




Ka nu pawh nu mawl a nilo a, a fanu pasala nu leh farnu chungah chuan awmze nei lova sual chhuah a tum bik lo.



Thutkhawmna ah kan thu tlang a, ka nu bulah thu lovin U Faktei bulah ka thu thla tharh a, ka nu chuan midang hriat ve theih si loh hian min melh leh khai thin. Tha takin an inbe hlawm a. Kei erawh ka lo ngawi kar thung.



Vanmala case chungchang engmah an sawi lo chu ka lo lawm ru phian mai. A tu a mai pawh chu kan inveng tawn a, kan sawi turah kan fimkhur tlang khawp mai.




Ka nu (Vanmala nu) in "Fakte, i nu Rempuii hi thingpui lo lum rawh" a tih chuan keimah zawk chuan "Keiman ka lo lum ang" tiin U Faktei chu ka thawh khalh tharh a. An bula awm ve reng kha ka tang ru teuh a, ka nuin thil pawi a sawi ang tih hlauthâwng reng rengin ka awm a. A hrehawm tlat.



Thingpui chu ka va lum ta ngei a, WhatsApp ah U Vensangi nen kan inbia. Inhmuh a rawn rawt chuan ka lo hnial lo khawp mai. Vanmala a rin thu leh pawngsual phei chu a tih a rin loh bur thu a rawn sawi ve chamchi a. Kan lam tang tlemte zing ami anihna ang pawhin ka ngaihlu tlat.



Thingpui ka thlit chhuah vel lai tak chuan U Faktei a rawn kal a, min lo pui vat "Keiman ka va pe ang" a tih chuan ka lo pawm ve mai a. Thutkhawmna lamah kan va inzui chhuak leh a. Ka beisei loh zetin ka nu te chu hlim taka inkawmin an lo nui hak hak a. Ka bangbo hle ang reng nghe nghe.




Ka nu chuan a rilru a thlak ti dawn ila, a mitmeng atang chuan min huat hmel bawk si.



Thingpui in zawhah a haw ta a, tha takin kan inthlah a. Kan inthlah tih lemah ka nu nen tho an inthlah a ni mah zawk. Min melh rum em a, ka nu mah nise ka tim tlat atin ani.




U Faktei chuan "Nu, Mamtei nu khan i rin ang rilru kha a pu lem lo aniang, a rawn pângngai khawp kha" a lo ti hliai a. Chutah ka nu chuan min rawn melh zeuhin U Faktei chu ka melh leh a "Nu rilru hi chu hriatthiam har deuh mai ania" a lo ti daih.




U Faktei nen chuan ka hrethiam ve hlei lova.




Ka pa a lo kal velo chu mak ka ti ang reng, nge min ngaihsak miah lo zawk ni. Ka nu ai mah chuan lo kal se ka ti a. Ka chhûngte hrim hrim chu an lo kal ka beisei a ni ber. Mahse ka beisei loh ber ka nu a lo kal daih lawi a. Buaina liantham a chhuak lo hlauh a, ka lawm tho mai.




Ka mut dawnah Vanmala nen kan inbe leh a, video call ngatin kan inbia.




Zanin chu sawi tur a rawn hre ve zek a, fiamthu a thawh reng a. Min tinui reng mai. Tuna a awmdan en tawp hi chuan harsatna nei hmel a pu lo. Mahse a ko a rit hle si a.



"Nupui ka neih hma chuan tumah ka thlahlel ngai miahlo" a rawn ti vel a, awihlo lutuk hian "Daw suh" ka lo ti bung nghat.




Mitmeng tawrhhlelhawm lutuka min rawn melh chung hian "Ania lawm, nangmah chiah ka la thlahlel che mawle" a rawn ti leh a. Awih sak loh chi pawh a ni tawhlo, a tang na ve sia.




"Keichu a fair lo ka ti e" a rawn ti leh daih a. Ka phone lek kan sauh sauh pah chuan "Eng maw?" ka lo ti hâ.



A nui suk suk a, a hmui hnuai lam a seh zauh bawk. "Eng maw fair lo?" hre chak zet hian ka lo ti leh.



"Ka sawi duhlo e a" a lo ti daih thung a, rum zeta ka melh lai chuan "Ka nupui i ni a, ka ta i ni ta chêng a, engmah ka bawhzui leh thei si lova" thutak zet hian a rawn ti ta a.




A sawi tum hrethiam lutuk chuan "I dâm lutuk" ka lo ti hlak, a lo nui suk suk a "Dâm lam pawh a nilo...tih laklawh tawh chuan zawngchhang a lo awl dawn anih hi" a la ti ta deuh deuh a. Min tizak lek lek mai.




"I mak" ka la ti hram pek a, chutah min melh run run chung hian "Anih ka ring, ka lo insum rei thei emai" a la ti ham ham zui !



Zanin zet chu, thu dang reng reng a sawi theilo. Thla 1 chhung a lo insum thei kha mak a tih thu leh a lo nawm zia ringawt a sawi a. A lo dawngsawngtu tan a zahthlâk bawk sia, a hre chang ve tawh der silo. A kum leh a thusawi ngaihtuah chuan a inrem thlawt lo.




Kan inneih hma khan tlangval senior innocent zet a lo ni anih dawn hi!



Mutchhuak in min rawn zem chiai chiai a, a tawngduh a kaltluang bawk nen a thusawi ka ngaithla a. Ka lo muthlu leh lap lap thin a. Mutthluk san reng ai chuan tiin "Kan dah mai dawn mi, ka meng hlei thei tawh lo" ka ti ta tawp a. Mahse Vanmala chuan "Muhil rawh, i muhil hmel ka lo thlîr ang" a lo ti thung a.




Chuti na na na chu tiin mit ka chhing zui chial a, a nui huk ri leh "Ka hmangaih che, i mumangah min lo hmu la..." a tih chu ka hriat hnuhnun ber a ni. Insum thei tawh hek lo le,ka muhil nghal bawrh bawrh maiin ka hria.




Zing ka harh chuan ka phone pawh a lo thi tawh a. Engtia rei nge ka muhil hmel kha a thlir ang phei chu ka hrelo, mahse ka battery low vek danah rei tak chu a ni phawt ang.



Ka muhil hma bawk a, zingah pawh ka harh hma khawp mai. Ka nu leh U Faktei te ka thawh khalh a. Rice Cooker ka on nghal a, thingpui ka lum laiin U Faktei a rawn tho chhuak a.




Ham bai bai chung hian Fridge a hawng a, tui bottle pakhat lak chhuah pah hian "Ka mit a la kham thum sia, ka mut a chhuak tawh bawk silo" a ti hliai a. Tui chu a in zui khawlh khawlh a.




"Thingpui aw?" ka tih chuan a lu a lo thing vat, a thingpui tur thlit chhuah ka tum zet tawh chu ka dah let leh a.



"Mamte, tukin chu chawhmeh leiin kan va bazar dawn mi ni ang? Second Hand thin pahin" a tih chuan ka lo bengkhawn kher mai. Niminah nilengin inah ka tawm a, Lawngtlaiah lah khan inah ka tawm chawt bawk a. Ka chhuak vak khat viau mai a, han chhuah pawh chu ka pawiti vaklo.




"A tha tak ang a, mahse ka nu" ka ti ban chhalh a. Amah chauha ina han kalsan chu ka inthlahrung deuh. Mahse U Faktei chuan "Nizanah ka hrilh lawk tawh alawm, a thawh hunah eirawng chu a lo bawl mai ang. Chawhmeh siam ngai em em a awm hran lo bawk a, chaw chhum a ni mai a, a harsa lovang" a tih tak zung zungah chuan ihe lovin bazar tur chuan thu kan tithlu ta a.




Inchungah chho in ka thawmhnaw tuihnai ve deuh hlek, inchei chuang si lo chu ka ha a. Second Hand thinna tur pawisa tlem azawng, ka haw hmaa Vanmala min pêk zing ami chu ka ak tha ve thlap a.




School a ka thawhna pawisa kha ka la dawng miahlo tih ka hrechhuak nghal zawk. Ka pi boral leh tuna kan hun tawn hi a indawt chho zut ta sia. Ka kal zawm leh ta miahlo kha ania. Vanmala chuan Sir Hma-a min biak sak thu kha min hrilh a, a hrethiam tluang zel aniang chu ka ti mai. Nakinah a hranpain keipawh hian la biak leh hrim hrim chu ka duh. Ka ngawi reng a, ka nikhualo ru tlat.




U Faktei nen chuan kan inzui chhuak ta a, a car kan keng a. Car khalh na na na chu a hnehsawh ngang mai. A steering herh kual dan vel pawh ka rin zawng tak a ni.




Parking ah motor kan dah hnu chuan chawhmeh zawrhna lamah kan inzui thla a. Laizawn ka neih loh vang nge U Faktei hi ka laizawn en ve hle a, ka ngaina viau bawk.



Ka ngaihbel nge ka hrelo, mi reng reng chuan min lo melh hrek hrek hian ka hre thin a. U Faktei chuan a ngaihtuah vak hmel loh nain kei chuan ka haider thiam lo. Ka awm a nuamlo teuh thei.




Ka pasal lar vanglai tak a lo ni bawk nen min melh hrek hrek tute pawh chu an demawm hran lo.



Chawhmeh kan lei zo, second hand kan thin lai chuan ka aw hriat tawh hnu hian hnunglam atangin min rawn au a, ka hawi nak chuan Nu Muani a lo ni a. A va han hunlo tak aw...



Haider tumin hmalam ka hawi leh vat a, kalsawn dawnin U Faktei leh dawr neitu nu chuan pawisa an lo inpe fel mek si a.



Ka hlauh ang ngei ngeiin Nu Muani chuan min rawn hnaih chilh nghal a. U Faktei te pawisa inpe pawh an lo intifel zo chiah a.



U Faktei'n "Kan kal thei e" a tih chuan zui mai ka tum a. Mahse Nu Muani chuan min lo ko ding leh rih.



U Faktei'n a lo bengkhawn ta vat a "I hmelhriat em ni?" a tih chuan hreh lutuk hian ka lo bu nghat.




Chutah Nu Muani chuan "I pasal DC nen khân in inthen ta em ni?" a lo ti phawng a, U Faktei chuan min rawn melh nghal tih ka hria.



"Inthen nang" ka lo ti tawi tak a, kalsawn vat vat ka duh. Kal mai ka tum chu "Ehee...i va la nei duh zawk ve" a la ti ta deuh deuh a, min demna aw ka hre thei.




U Faktei nuamlo ti hmel chu hmuh hrehawm ka van ti tak.




"Inthen chhan tur kan nei hlei nem Nu Muan" ka ti nghat a, a lo chet tlak tlak mai. U Faktei melh pah chuan "Kal ang" ka ti sep a, ka nui lui var var bawk. Ka rilru erawh nuam lo tak ani.




Kan kal hnu pawh chuan Nu Muani la phun bal bal ri chu kan la hre pha cheu a "Pawngsual tu pawh han then phal loh tawp mai chu..." tihte a sawi. U Faktei mawlh chu ! Ka melh zeuh a, hrehawm ti tak tak hmel a pu.



Kan kal hlat deuh hnu chuan "Mamte, a zialo hle mai" a ti ban chhalh a, ka melh ha chuan lainat hmel lutuk hian min lo melh a.




A sawi tum ka hrethiam lutuk tlat, "Nu Muani kha chu a ri ve phawng phawng zel a" ka han ti ve ngial a. A lo nui tawi tak tak khawp mai.



"Engah mah ngai lovang" ka ti leh a, U Faktei chuan "A pawi ngawt mai, Mama hmingchhiatna hi reh vat se aw..." a ti vang vang a. Kan inhmuh hnua case chungchang kan sawi vawikhatna a ni.




Kan dinhmunin a zir ta si lova, second hand pawh thin zui ta lem lo chuan kan haw ta daih a. In kan thlen chuan ka nu pawh a lo tho tawh a, chaw a chhum hmin tawh a. Chawhmeh thing a lo chhuang mek.



Kan bazar chanchin te min lo zawt ve hliai a, kan thil tawnte theihnghilh tum chuan a nuam lai chin ka han sawi ve luam a. Ka second hand thin pakhat, a ta tura ka tih rilruk deuh chu ka pe a, TShirt ania, a ha chhin a, a lo tawk chiah zui. A lawm thiam ngang mai.



"Ka fapa nupui hnen atangin thilpek ka dawng ta vel ania, ka lo upa ve tawh e" nui hak hak chungin a han ti vel a. U Faktei nen pawh kan nui ve hak hak mai.



Tukthuan eikhamah chuan U Faktei chu hna kal turin a chhuak nghal a. U Vensangi nen inhmuh kan tum kha ania, mahse zing lamah ka lo chhuah tawh mai bakah ka nu amah chauha kalsan chu ka hreh tlat pek a.




U Vensangi chu biain ka pha ta ngawt a, a chhan ka sawi chuan min lo hrethiam ngang mai. "Nak zan lam hi ka hman ka ring a, ka lo leng zawk ang" a rawn tih chuan aw ka lo pawh rang kher mai. Pawn lamah inhmu lovin kan ina a lo kal theih chuan a tha zawk daih ang.




Tukin atang ngat phei kha chuan pawn chhuah pawh ka phur tawhlo.



Nilengin ka nu nen kan inkawm a, a hnungzang khamte ka hmeh sak a, anin ka sam min oil sak bawk. Nufa tak takte pawh kan angin ka hria. Kan inpawh phah sawt bawk a. Hun harsa tak karah thil tha pawh kan tawng tho anih hi.




Vanmala chuan zingkar atangin min rawn be leh ta miah lova. Va biak dawnin a buai lai anih ka ring zel bawk si a, ka be buai duhlo ani pakhat. Min lo biak hun ka chang deuh tawp a ni ber.




Zan thleng pawha min lo biak tak lovah chuan ka ngaih a tha ta ngang lova. Ka nu leh U Faktei phei chu ka hrilh chuanglo.




Tichuan Vanmala chu ka call ta tawp a, a la pick up thei thak lo zui a ! Ka ngaih a tha vak tawhlo nain ka buai phah duh chuang lova.




Ka nu leh U Faktei an la men ve avangin room a tawm san reng chu tha ka ti lova. Inhnuaiah ka chhuk thla leh a, chanchin thar a lo chhuak dawn chiah. Zan dangah chuan kan en ngai miah lo ania.



Ka zuk thut thlak ve rual chuan Vanmala chungchang an rawn puang ta mai. Ka beisei loh lam thil a ni leh tlat tawh.



Chanchin Thar puangtu nu chuan "Lawngtlai bawrhsap Pu Vanmalsawmhlua pawngsual case thubuai kal zelah finfiahna hmuh a ni ta. Kar kalta khan Lawngtlai bawrhsap Pu Vanmalsawmhlua hian Lalrinnungi D/o Biakthuami chu a pawngsual niin thu a thang chiam mai a. Tunah chuan thu thang mai ni lovin thu dik ngei a ni tih finfiah a ni ta. Lalrinnungi thisen hi test niin hetah hian Pu Vanmalsawmhlua chuan a pawngsual ngei a ni tih fiah a ni" tiin a puang ta dap dap mai. A thusawi dang pawh chu ka hre mumal tawhlo.



Ka thu ngawt ngawt a, U Faktei a che hluai a, a phone banin a hmet mawlh mawlh a, Vanmala call a tum anih ka ring. A la thei lo tih hriat zet hian U Faktei chu a phun hlak a. Ka nû lam ka hawi a, beidawn hmel lutuk hian U Faktei che vel chu a lo melh ve reng bawk.




U Faktei chuan "Vawiinah in inbia em?" a rawn ti a, ka lu ka lo thing mawl tawp. Rilru hah hmel lutuk hian "Engtin nge ni ang aw?" a ti halh a, ka nu chuan "A pawi emai...engtin nge maw heti em ema an mawh chhiat theih le " a lo ti vawng vawng ringawt.




Rilru fim put tumin ka insangmar vak a, ding hluaiin ka pasal chu call ka tum veleh a, ring pawh a ring theilo.



Kan pathum chuan kan beidawng tlang a ni e.



U Faktei chuan "Mamte...nang chuan Mama'n hetiang thil hi a tih i ringlo tiraw?" beidawng lutuk hian a rawn ti a. Ka lu ka lo thing nawk nawk "Vanmala chutiang mi a nio, hmeichhe duhlo chung khawih tur khawpa mipa nêp a nilo" ka lo ti ve charh.




Ka nu chuan "A nupui talin i ring a, a tihzia e" a lo ti hak a. U Faktei chuan "Zama ka'n be chhin ange" a ti a. Chu chu Vanmala ukil kha niin ka hria.



Ka nu nen chuan kan lo ngaichâng ran a, a ring ral thak anih hmel. Engmah tih theih kan nei bawk silo, kan va beidawng tlang tak !


Ka phone a rawn rik rual chuan kan phawk hra hlawm a. Vanmala anih kan rin laiin ka nu a lo ni daih a. Ka la duh ang em pawh ka hrethiam tawhlo. Tunah phei chuan Vanmala hi a ring tawhlo bur ang.




Mahse ka la ta tho a, ka lak rual rual chuan "Lo insiam ang che, kan rawn hruai dawn chtw" a rawn ti ta mai. Hnialna hun awm lek lo hian phone chu a dah nghal hmak a.



Ka nu leh U Faktei te chuan min lo melh reng a, ka nu thusawi an lo ngaichâng ve tih ka hria.


Ka nuin "I nu chuan eng nge a lo sawi a?" a tih chuan han chhan mai dan tur ka van hrelo em!


Ka dinhmun a harsa leh ta talh mai.





____________*_____________*___________



(Pathianni chu chawlh anih kha aw...)


Show post links
Top

[Ngaia]

DEPUTY COMMISSIONER
By CVL Awmpuii



Chapter 28



Ka nu chuan ka chhanna ngaichâng in min melh ran a, U Faktei pawh a bâng bik lo.



Hrilh tlang tawp law law chu thain ka hre ta zawk a "Nu, min lo hruai an tum tlat a, mahse hetah ka awm duh, in bulah" ka ti ta tawp a. Ka inthlahrung ru khawp mai. Mahse an lo kal a, min rawn hruai an tum hunah inphenna tur ka duh dawn si a, hrilh tlang hi a tha mai.




Ka nu chu a hamhaih ang reng khawp mai. a awm tho e, nizan lawkah ka nu ngei a lo leng, tha te tein an titi a. Tunah min lo hruai an tum thu ka sawi leh ta bawk si a.




Chutah ka nu chuan "Tunah lo hruai che an tum a maw?" a ti halh a, "Aw mahse ka duhlo" ka lo ti vat. Ka phone a rawn rik zui leh tak avangin ka ngaihven nghal vat a. Number hlang atangin ani.




Thil pawimawh anih ringin ka pick up vat a, Vanmala aw ngei mai hian "Mamte..." a rawn ti hulh. Ka lawm bawk si, hamhaih bawk si chu ka nghilh dup thei.



"Khawnge i awm? Tinge i phone?" ka ti nghal zung zung a. Ka nu leh U Faktei te chuan min lo bengkhawn vat. U Faktei zawk chuan "Amah em ni?" a rawn ti vat a, ka lo bu nghat. Thaw huai hmel an put rualin kan inbiakna chu an lo ngaichâng ve nghal ran a.



Vanmala chuan aw dam thlup hian "Ka timangang hle che a ni maw" a lo ti sup a. Ka thaw chhuak nghal ham ham mai.




"Eng nge chanchin thar kha a awmzia?" ka ti teh tawl a, pehhel vak ngaihna ka hrelo. Chutah Vanmala chuan "Lo mangang suh u, a hmawr kan bawk fel tep tawh ania. A rei berah kar hnih vel bak a ngai tawh lovang" a rawn ti daih a, kan hun tawn nena inrem lo zetin a aw a dam thluam a.




A ngaihna hrelo fe hian "Sawi chiang teh" ka ti hliai a, a che deuh sut sut ri chu ka hria a. Ka lo ngaihchân reng lai chuan "Mamte...nakinah ka lo be leh mai dawn che em ni? A pawi viau ang em? Hemi number hi hun reilote chhung ka hmang rih dawn a, i lo chhinchhiah mai dawn nia" a rawn ti zung zung a.



Han hnial zui vakna hun pawh a awm lo, ka chhan hma hauhin a dah zui nghal daih. Ka phone chu ka melh nghek a, ka nu leh U Faktei chuan min lo ngaichâng ve ran bawk si.




Ka nu chuan "Eng nge a lo sawi?" a rawn ti ta chiah reng a. Sawi ber tur pawh hrelo in "Lo mangang suh u ' a ti ringawt" ka ti hap a. Mak tak maiin ka nu chuan hahdam huai hmel hi a pu a. U Faktei pawh chuti tho. Kei erawh ka hahdam chuang hauh lo.




Rilru hah zetin ka vei tawn sek a, ka nu lah chuan "Mamte... Vanmala chu ring tawp rawh, a chingfel vek mai ang" a lo ti sam then a. A ngaih awlsam hmel ang reng bawk sia, kei lah chu ka hahdam thei chuang der lo.




"A hmawr kan bawk fel tep tawh te atia, mahse a la buai chhoh hmel chauh sia" rilru hah zet hian ka ti leh niai a, ka nu chuan "Tum mumal tak a nei ngei ang, ka fapa ania ka hrechiang alawm. Ngaihtuah vak duh suh" a lo ti sam leh then a. U Faktei pawhin a ngaihtuah zui vak hmel loh.



Door bell a rawn ri a, kan inmelh tawn vat hlawm a, ka chet mai loh avangin U Faktei chuan a va hawnsak a. Ka nu hmel ka hmu nghal zat !





Ka lung a rawn phu rang rang dawt dawt a, min rawn hruai tur thu kha a sawi tak alawm. Mahse ka zui lovang. Thuthlukna ka siam fel sa vek tawh.



Ka nu chu ngainatawm zet hian a rawn nui lut var var a, ka hamhaih lek lek zawk.



Ka nu(Vanmala nu) chuan a lo chhawn vat a "Rempuii teh hlawl chu, lo kal rawh" a lo ti zung zung a. Kei chuan ka nu ngainat awm taka nui sang chu ka lo melh kar thung a.




Chutah ka nu chuan "Thu hahdam lo zawk ang, ka hmanhmawh deuh a. Han sawi tlang tawp mai ila, Mamtei hi lo hruai ka tum a" pehhel buai lo chuan a ti tlang pawp a, mit ka lo chhing sawk mai.



Ka nu(Vanmala nu zawk) chuan min rawn melh vat a, ka nu chu melh lehin "A va rang teh thut awm ve" a ti hliai a. U Faktei chu kan bulah a lo ding ngawi ve reng ringawt a, tawng chhuah a tum hmel loh.



Ka nu chuan "Hei, zep nak emaw Vanmala heti hi a ni rih bawk si a. Mamtei tan pawh hun harsa lutuk a ni ve dawn a. Heng buaina awm chhung hi chu kan bulah awm rih mai se ka ti deuh a" a ti dam dap a.



A tawngka chhuak a felfai thlap a, han huat tur leh thin khei zawng pakhat mah a awm lo. Mahse a rilru ka hre ve tlat a, zui haw chu ka tum lo bur.




Ka nu(Vanmala nu zawk) chuan min rawn melh zawk a, "Ka duhlo" ka lo ti nghal pang a. Ka nu zawkin min rawn melh rumna chu ka haider hmiah.



Nui sang chung hian "I pa pawhin a ngai ve tawh che a, hetiang hun chhunga kan in lama i lo awm pawh chu a sual hran hlei nem" a ti leh thliam a. A rawn awmdan vel chuan min ti bangbo lek lek mai. Ka huat zawng tak a ni bawk.



A thiltih dan hian ti ve thiam lo turah min ngai anih chuan a tisual hle ang. A fanu ka ni a, a awmdan ang chuan ka awm ve thiam khawp alawm.




Chutah nui sang chung hian "Nu...ka lo zui dawn lo che. Kan intlawhpawh thei reng tho a, ka pa pawhin min ngaih chuan hetah a lo kal ve thei reng alawm ,i lo kal ang chiah hian" tiin ka nui lui hak hak a. Ka nu nena kan boruak tang tha zet chu ka nu(Vanmala nu) chuan a hrethiam vak lo niin a lang, hahdam hmel taka a landanah a hriat theih mai. U Faktei erawh chuan min melh tawn sek thung a, a man thiam niin ka hria.




Ka nu chu a rum tha ta khawp mai, mahse nu fing tak a ni a. A tilang lem lo, nui hmel a la pu reng tho a. A fanu ka nihna angin a nui hmel phena thinrimna chu ka hmu thiam mai chauh a ni.




Chutah ka nu(Vanmala nu zawk) chu a lo inrawlh ve ta vat a. "Mamte...i zui leh zui loh kha chu i thu thu a nimai aw. Keimahni lamah chuan harsatna a awm hauh lo ania. I chhûngte pawhin an lo ngai dawn che a, i zui kha a tha hlei hlei mai thei" a lo ti ve hlut a. Ka nu thil tum chu a hrethiam lo ani. Heti zawnga chet a la dawn anih chuan a hlawhtling mai ang tih ka hlau. U Faktei te nufa rilru a tha si a, a hneh thuai mai ang.




Chutiang chuan Vanmala nu in sawi mah se ka tanna ngaiah ka tang mar ve tlat a "Ka duh chuan nakinah ka lo la leng ve mai ang. Tunah rih chuan lo zui haw che chu ka tum lo. Midang mithmuhah pawh a mawilo" ka ti vei thlap a. A thinrim tawh viauin ka ring. Mahse a la tilang duh chuang eihlo.




Nu luhlul, mahni thu duh, lu zo veh vawh a nihna a rawn lang a "Malawm, Mamtei hi chu a inthlahrung thin lutuk a, a duhdan pawh a zawm ngam lo anih hi. Mamte inthlahrunna tur a awm hlei nem. Vanmala nu leh Faktei te chu mi rilru tluang an nia. Lo haw pawh ni la, an sawi sep sep lovang che" a ti dam raih a. Ka va han haw tak !




Ka luhlul chhuahin ka tlawm duh bik lova "Nu ka hria alawm, keimah hian rawn haw ka duhlo" ka ti hmak. A dawhtheihna in tlin lo sela a rilru tak tak rawn phawrh chhuakin min hawsan daih se ka ti tak zet.



A lo thaw chhuak hak a, luhlul min tih hmel lutuk hian "Kan ngai ve che asin mawle" a ti fak a, a aw pawhin ngaihno a bei tehchiam tawhlo.



"In lo leng ziah thei alawm" ka lo ti hmanhmawh. Chutah ka beisei loh deuh hian "Anih chuan tihian la awm rih la, mahse lo riak tur chuan kan beisei ve che ania" a la ti hram a. Ka chhang zui peih tawhlo.




Ka nu( Vanmala nu zawk) a rawn inrawlh ta chat a, "Ni e, a lo haw remchan lai a ni ve bawk a, kan lo riah phei tir vat ang" a lo ti ve hlut a. A rilru tha lutuk hian ka nu rilru a man phalo ni berin ka hria.



Ka nu chu tha takin a haw veleh mai bawk a, mahse a mitmengah khan warning ka hmu. Ka hlau bik tur a nilo tiin ka infuih ru mawlh mawlh a. Vanmala bulah awm thei rih lo mah ila a chhungte bulah tal awm ka duh, ka chhûngte an ni ve tawh tho bawk a.



Zan a tlai ve tawh ang reng a, ka nu haw hnu chuan mu turin kan intifel ta hlawm a. Ka nu chuan ka rilru hah hmel lutuk chu min khawngaih viau aniang, min hnem ve mawlh mawlh a "Lungngai lutuk suh, Vanmala hi ring tawp mai rawh" a ti nghet charh a. Ka pasal chu ka ringlo pawh a nilo, mahse ka rilru a tihah em ani. A chanchin engmah a rawn sawi chiang bawk silo.




Ka nu leh U Faktei te hahdam taka an awm thei mai hi mak ka ti hial zawk. Keilah mangang em emin ka awm bawk si.



Room ka luha ka mut hnu thleng pawh chuan muhil thei lovin ka let tawn sek a, ka phone chu ka ngaichâng reng a. Vanmala min rawn biak hun ka châng a ni ber. Mahse ani lah chu a reh hlauh thung si.




Thuchiang zawk hriatchian chaknaa ka khah miau avangin ka insum thei ta ngang lova, lo va call khan ka tihbuai ka hlau bawk si, Facebook ah chanchin hriat duhin ka lut ta tawp a. Ka pasal an puhna chu a diklo tih ka hrechiang lutuk. Mahse titi lengvak ka hre duh a ni ber.



Facebook chu ka pasal case hlirin a khat a tih theih ang. Milar thenkhat te pawhin post meuh siamin ka pasal an demna thu an auchhuahpui a. Ka thawk a lo pik ve tun thei. A thenin fiamthu thawh nante an hmang thul. A hmaa a hna lo thawh that tawhte kha an theihnghilh vek emaw tih mai tur ani ! Chuti taka an dem rawn chu ka hua a, ka pasal chu ka lainat tel hle bawk.




Thuziak thiam tak takin ka pasal an demna thute chu thiam takin an han ziak a, an zeldinna thute chu awihawm tak takin an chhuah bawk a. Kei ngei pawh hian ka pasal chu ni kher lo se ka lo awih ve diak diakin ka ring. Chuti khawp chuan ka pasal dik lohna chu an ziak thiam zu nia mawle !




En pawh en rei duhlo in ka out ta daih a. Rilru hahna mai mai ani.




WhatsApp ah ka lut leh a, U Vensangi message lo awm va ka hmuh rual chuan rang zetin ka hawng vat a.



'Mamte, ka lo kal vat thei lova pawi ka ti lutuk. Chanchin Thar ka lo hre leh a, zialo ka ti khawp mai. Mahse mangang miah suh aw, nangmah ang chiahin Vanmala hi kan ring tlat ania. Pathianin rem a tih a, ka remchan chuan naktuk lamah rawn lenphei ka lo tum dawn nia. Duh ang pawhin ka ngaihsak hman lo che a, a zialo ka ti tak tak ani' tiin message min lo hnutchhiah kur duah a.




Ka thaw huai thei, tun ang huna ka pasal ring tlattu an lo awm ve lehzel thin hi ka tan an hlu takzet ! U Vensangi chu message ka thawn let ve vat a. Inthiamlo lo tirin leh lo leng ngei ngei turin ka han chah veleh a. A mu tawh anih ka ring, a seen tawhlo.




Ka phone ka dah hnu pawh chuan Vanmala ngaihtuah lutukna avangin ka muhil thei der lo. Khumah chuan ka let tawn sek a, thil a harsa chho dawn chauha ka ngaih laiin 'A hmawr kan bawk fel tep tawh' a rawn ti lawi a. Ka ringlo pawh anilo ka ngaihtuahna a tibuai em ani.



Zanah chuan ka muhil miah lo a tih theih ang. Vartianah ka tho chhuak ta tawp a, kan inkawta thutna awmah chuan ka thu chhuak a, ka melh ngai melhin thil ka ngaihtuah leh ngar ngar a. Engtin nge case hi chinfel vat a nih theih ang? Mahni tawkah ka ngaihtuahna chu a buai thawkhat viau ani.



Ka nu a lo kal leh ngei ka ring a, pasal nei tawhin puitling ve uaih tawh mah ila nu te chu nu an lo ni nge nge a. Ka tetlai zawng khan ka sual naah chuan min hau hreh ngai lova, ka zah em em a, a thu zawm lohte kha ka hlau thin. Chutiang rilru chu ka than lenpui anih avangin tunah pawh hian ka tan hnial a harsa thawkhat viau. Vanmala min hmangaihna hian chakna min pek avangin ka la dang thei mai mai chauh ani a. Heti renga a awm anih chuan inphen theih loh hun ka nei thuai ang. Ka awmzel dan tur pawh ka hrethiam lo, Vanmala lah a reh vung vung mai si.



Khua a lo var chian uarh takah chuan inchhûngah lutin eirawng ka bawl tan a. U Faktei pawh a lo tho chhuak har lo. Ka nu erawh tukin chu thawh a hai ve deuh dawn niin a lang, a lo la tho chhuak miahlo.




U Faktei chu tuk dang aiin a hmel a thutak a, a ngainat awm teh chiam lo a tih theih ang. Min be lovin Fridge a hawng a, tui a inzui khalh khalh a. Ka eirawngbawl chu ngawi rengin min lo pui a. Chutia awm reng chu nuam ka tih loh avangin "U Fakte, thingpui i duh em?" ka ti zang vah a, ka nuih var var bawk. Min rawn melh zawk a "Duhlo mai" a ti bul hmak. Biak zui chi pawh niin ka hre ta lo. A tho fuh viau lo anih hmel e.




Tichuan ngawi rengin eirawng chu kan bawl dun mawlh mawlh a. Ka nu a rawn tho chhuak ta chiah chu ka lo thaw huai mai.



A tih dan ngai tein min rawn be leh nghal bawrh bawrh a, kan boruak rit lutuk pawh a rawn ti ziaawm hawk mai. U Faktei erawh a la ngawi reng thung a, ka nuin a biak changin a chhang a nimai.




Tukthuan ei lai chuan U Faktei chuan min be ta chiah a, zawhna min zawt a ni zawk mah "Mama'n a lo be leh tawh che em?" a ti nghat a, a aw chu a nelawm fahran lo.




"Be leh miahlo" ka lo ti tha ve mai bawk a. A thaw chhuak deuh halh a, ka nu chuan "In rilru tihah s'u aw, keipawh heti hian hahdam takin ka awm hi. Vanmala hi ring tawp rawh u. Kan lo buai ve vak khan awmzia a awm chuanglo" a lo ti vat a. U Faktei mood chu a hrethiam pha ve lo anih hmel.




Chawei hmun kan sengfel lai te chuan rilru nuamlo deuhin ka awm a. A duh loh zawngin ka lo awm em ni tihte ka ngaihtuah a. Mahse chutianga ka awm âwm ka hre bawk silo.




Ka phone room ah ka hnutchhiah daih avangin thleng ka sil zawh veleh room ah chuan ka chho vat a. Ka nu leh U Faktei te chu pawn lamah an thu chhuak a, eng nge an tih phei chu ka hrelo.




Khuma ka phone lo let ngat chu ka la vat a. Vanmala phone ka tum uaih uaih a, amah zawkin min lo be rih si lo, a buai lai taka call ka hlau bawk si. Mahse ka insum thei ta ngang lova, nimin lama min lo call na number khan ka call ta a.




A ring fe hnuah a lo pick up ta hram "Aw...Mamte..." a rawn ti dam thluam a, ka lo thaw chhuak ham ham mai.




"I buai em?" ka ti sep a, "Buai lo e, eng nge ni ta?" a rawn ti vat a. Min rawn chhan let dan chuan a lak atanga hrang ta riau angah hian min inngaih tir a. Ka rilru a na veng veng mai.




"A... engmah pawh a nilo...min lo be leh si lova" ka ti ta ringawt a. A rawn thaw chhuak hawk a, a ngawih vung vung takah chuan nuam ka ti ta chiah lo.



"Ka dah" tia dah ka tum mek lai chuan "Mamte" a rawn ti leh hluai lawi a. Ka han ngaichâng leh rih.



"Ka hmangaih che tih hi ringhlel suh aw" a rawn ti churh a, ka ngai leh veng veng tawh. "Tinge min rawn biak i tum miah loh a?" ka ti ta thlawt a. A lo thaw chhuak ham ham mai.



"Ka ngai viau che ania, buaina hi ka chingfel tep tawh a. I rilru rawn tih thar a, tuar zuau taka i awm kha ka duh hlei nem. Chuvanga lo be duh vak lo che ka nia" a rawn ti zung zung a.




"Chupawhnise ka ngaihtuah che alawm, chanchin te rawn sawi ve thin la" ka han ti veleh ngial a. "Kar hnih tha chiah case chingfel tur hian hun ka mamawh tawh. Reilote chiah min lo nghak leh hram hram rawh aw..." a rawn ti dam thluam a.




"Nizanah ka nu a lo kal a, min lo hruai te a tum a, i bulah lo let leh daih mai ka duh" ka ti thlawt a, nizan thil thleng ka ngaihtuah let a. Ka nu hi nu luhlul tak a ni a, min la hruai haw nge nge in ka ring tlat ani. Chu thil chu thleng lo sela ka duh.



Vanmala chuan "In in lama i let rih pawh kha a pawi miah lo asin mawle" a rawn ti sup a, ka nu a thlawp tlat hi ka hrethiam theilo.




"Ka duhdan hi min zahsak ve thin teh u, tinge ka nu hi i thlawp zawk tlat a. Min pawh then a tum alawm" lungawi vak lo hian ka ti a.



"Eng ang pawhin tupawhin min pawh then tum se an thei dawn chuanglo. Nang i awm a, kei ka awm a, pumkhat kan ni a. Tumahin min then hrang dawnlo" a rawn ti nghet charh a, min thlamuan thin alawm. Mahse tun dinhmunah chuan chân ka hlauhna a nasa zawk tlat.




Vanmala nen kan inbe zo chiah chu engtin emaw tak hian ka thawl huai mai. A bula awm ka duh thu ka hrilh erawh chuan min hnial fithla thak a. 'Engkim a fel vek hnuah bak ka rawn hruai dawn lo che ' a ti bur mai si a. A buaina belhchhah tu nih ka duh bawk silo. A thu ngaichâng a ka awm rih tawp a ngai. Min be thin tura ka chah erawh chuan a pawm zawng tak a lo ni a, mahse 'Kan inbiakin i tap tur a nilo, ral atang chuan inngaihtuah a na si a, kan awmdun hunah i duhtawkin i tap dawn nia' a ti hmak. Kan inbiak loh ka hlau em a, a thusawi chu ka lo pawm vek.





Inhnuaiah ka chhuk thla a, ka nu chuan thutkhawmna ah Bible a lo chhiar a, "Khawnge U Faktei?" ka tih chuan pangngai tak hian "Hnaah a kal tawh" a lo ti ve mai a.




"Nu, U Vanmala nen kan inbia asin " phur zeta ka tih chuan a rawn phur ve hluai dawn emaw ka ti a, mahse pangngai tak hian "A insum thei ta lo a nimaw" a lo ti daih. A ngaihna hrelo fe a ka melh chuan min lo nuih sak a.




"Nizânah khan min rawn bia alawm, a ngaihtuah viau che ania. A biak loh chhan che chu i hriatthiam ve tawh mai ka ring " a rawn ti dam dap a. Ka mangan hlauin min lo be duhlo ani tih chu ka hre ve ta lutuk.



Lang lo lam atang nen lam Vanmala chuan min lo ngaihtuah em em ania. Chuti chung chuan ka nu khan a ring miah lo thei ania. Ka tha nat pui ngawih ngawih.




U Vensangi chu a lo sawi lawk tawh ang ngeiin chhunah a lo leng a. Amahin a lo kal a, naupangte chu a nu te in lamah a rawn kalsan anih hmel. Ka nu nen pawh inhre tha sa an ni a, an inbe thei khawp mai.



Ka nu chuan "Tikhan lo inkawm rawh u, ka thil chhiarna ka mit a thîp thum a, ka va mu zal teh ang" tiin a room lamah min luhsan a.




Ka nu a awm lo ta chiah chu U Vensangi chuan ka pasal case chungchang a sawi zui nghal mawlh mawlh a "Nu Malawmi kha a va pangngai zawk ve. Vanmala case hian a rilru pawh a kap hmel loh" a lo ti hluai a. Keipawhin mak ka tih ve kha a ni reng a, a tan phei chuan a mak dawn lutuk.




"Vanmala hi a ring bur a, 'Buaina chu a chingfel vat mai ang' a ti sam then zel. Keipawhin mak ka ti" ka lo ti ve vat a.




Chutah U Vensangi chuan "Mamte...keichu Vanmala case hi rin aiin an chingfel har ka ti. Ka lo hriat danin amah khingtute kha tawngkam mawilo nilo se an bakberh ve viauin ka hre sia. Ani lah DC ve meuh ania, thiam chang zawk a la ni zui. Heti chung hian a che chhuak theilo e" a ti ta mawlh mawlh a. Ka nuamlo ti hmel a hmuh chuan a inthlahrung leh deuh aniang "Tlang deuhin ka ngaihdan ka sawi anih chu aw..." a ti leh hliai a. Ka lo nui lui sak a.




"I ngaihdan chu a âwm lutuk alawm. Mahse Bawihbawihi te hian a nihna tak hi hmang tangkaiin an awhtir ve bawk alawm. Tunah phei chuan mi rethei zuamna leh hnehchhiahna anga ngai an tam asin. Hei tak hian Vanmala tan chet a ti harsa zual a. Dikna duh inti, tan lam tan hlur hi an awm a. Hetiangho lah hian thil hi awm ang deuh deuha sawi an thiam sia. Hengho hian an tipunlun vek alawm" tiin ka pasal thlavang chu ka lo hauh ve vat a.




U Vensangi bula ka thusawi chu ka lo ngaihtuah ruk ve rauh rauh thin kha ani. Vanmala tan hian khawsak phungah ringawt chuan thiam chang awlsam hle tura ngaih theih ani. Mahse Bawihbawihi te hian an retheihna hmang tangkaiin Mizoram mipuite chu an thlavang an hauhtir a. He case hi ngaihtuah chian chuan thil tenawm tak ani. Nakinah Vanmala hian thiam pawh lo chang ta teh reng se mi thenkhat rilruah chuan hausak vanga thiam chang angah an ngai tawh ngei ang.




U Vensangi nen chuan thu tam tak kan sawi a, ka nu ngaihdan te pawh ka hrilh tlang ta vek law law a, mak a ti vak lo. Ka nu zia a hrechiang a, a âwm ve rengah a ngai. Mahse ka nu ka dem lutuk erawh a thlavang a lo hauh ve vat a "I nû a ni a, a thlirna tlang atang chuan thil ni thei ve tak tur ani. Tunah lah medical evidence a awm ta váng mai sia. A hmangaih luatah che khua a hmu lo angah ngai mai rawh" a ti dap dap a.




A ngaihtuah ang chuan ngaihtuah ve thiam ila a ka ti, amaherawhchu ka nu chu ka haw tlat a. Vanmala a ring miah lo kha ka hua a ni tawp mai.



Kan inhmu khat bawk a, U Vensangi chu tlai eirawngbawl dawnah a haw ta chauh a. Kan inthlah turte chu kan la inbe tawk tawk a, kan nuihzatthlak letling zawk.



Ka nu nen eirawng kan bawl a, bawl tur em em erawh a awm hran lo. Zing lama chawhmeh thing a la awm nual a, kan ei in a tam lo bawk nen chaw chhum deuh chauh a nimai.




Chawei hun velah U Faktei pawh a lo haw a, ka nuin a lo chiauau vat. Kei erawh ka kimki ta tlat a, ka lakah a inlahrang tlat bawk si a. A lungawi loh hmel bawk si ka be lumlam ngam rihlo a ni ber.



Ka nû lo kal zan atang khan U Faktei nen kan boruak chu a chhe chho ta zel a tih theih ang. Tunah kar khat a liam leh tawh a. Kan inbe tha leh tawh mang tlat lo.




Vanmala chuan nitin min rawn bia a, case chungchang pakhat mah kan sawi ngailo. Amah zawkin rawn sawi a tum loh chuan ka zawt sek duh biklo. Min hmangaih thu leh min ngaih thu a sawi apiangin ka rilru no lutuk chu ka tah a chhuak ut ut zel a. Mahse tah a phallo tih ka hre ve tlat a, ka insum hram hram zel.




Ka nu erawh a reh ta hlauh thung a. Puia leh Rina te nen kan in text zeuh zeuh a, anni chu mipa an ni a, thu kalphung sawipui an harsa tlat thin a. Mahse ka naute pahnih chuan Vanmala an ring ve bur a, a thlamuan thlak hliah hliah.




Ka pa reh vung vung mai chu ka ngaih a tha lova, Puia ka zawh lah hian "A ngaihtuahna a buai hmel thei khawp mai. Case chungchang ah hian a ngaihdan pawh ka hre ve lo. Engmah a sawi ngailo. Ka nu zawk hi chu i hriat ang kha a nimai. U Vanmala a ring miah lo hi mak ka ti hial zawk. Ka pa hi chuan ka nuin U Vanmala leh nangma chungchang a sawipui pawhin 'Puitling an ni tawh a, chhia leh tha an hre tawh' tih zawng a sawi thin. Ka pa zia chu i hriatchian kha" a rawn ti duah a.





Ni e, ka pa mizia chu hetiang hi ani. Eng emaw rik rum thil pawh lo thleng thut se a mangangin a phi ve chiam ngailo. Dam raih hian a awm thei zel. Kan inchhun fuhna deuh chu kan ngaihdan kan sawi chhuak ve zen zen ngailo hi ani. Keichu ka dawih vang ani a, ka pa erawh chu a rilru puitlin vangah ka puh deuh ber. Thil ngaihtuah chiang hmasain thuthlukna a siam chauh zel.




Ka ngaihtuah mek laiin ka pa phone call ka dawng ve tehmial a, rang zetin ka pick up a, ka dam that leh that lohte min rawn zawtin mamawh ka neih leh neih lohte min lo zawt a. Ka dam that thu ka hrilh rualin 'Mamawh pawh nei ila pasal ka nei tawh alawm" ka ti vei thlap a. Vanmala nupui ka nih tawh zia chu hre thar se ka duh ni berin ka hria.




Ka beisei loh zet hian a rawn nui huk huk a "A ni teh tak e a, Mamte...kan in lamah i lo phei ve daih duh em?" a rawn tih chuan ka lo hnial rang kher mai "Aih, tuna ka awmnaah hian nuam ka ti" ka ti vat a. Ka nu ang maia min tur ka hlauh laiin ka duhthlanna chu min lo zah sak ngang mai.




Kan inbiak tawp dawnah chuan case chungchang chu a sawi ve ta hram a "Vanmala case hi ngaihdan ka siam thiam ve lova. Mi thiam zawk ten an chingfel mai turah ngai ila. Chutihrual chuan ka fanu i ni a, ka ngaihtuah viau che tih erawh hi chu hre reng rawh aw. Thil reng reng hi a sarhu laia lo phi ve cheng chuan mi rilru kan tibuai zual a. Chuvanga tunah chauh lo bia che hi ka nia. I hrethiam ang chu" a rawn ti dap dap a.




Vanmala a rin thu sawi ve lo mah se a rin loh thu pawh a sawi lo tal a. A thlamuan thlak tho e.



Ka nu chu a reh hlen dawn emaw tih laiin kar khat hnuah a lo kal leh ta tlat mai a. Tun tum a rawn kal dan erawh chu a ri ta thak mai.



Ka nu(Vanmala nu zawk) bulah chuan "Ka fanu hi pawngsualtu nupui ni reng turin ka phal reng reng lo. Tun tum chu hruai haw ngei ngei turin ka rawn kal" a ti ta phiarh mai le!




"Ka nu" ka lo ti that a, mahse a duhtawk thei der lo. "Malawm, i hriatthiam mai a ngai ang. In fapa thil tihsuala ka fanuin a lo tawrh ve zel chhan tur hi ka hrelo. Hei, i fanu chanah hian dah ve ta la i hrethiam ang" tiin U Faktei lo ding ve ngar chu a mitmei zeuh a. Ka nu(Vanmala nu) hamhaih hmel chu ka khawngaih kher mai.




"Rempui, Vanmala chuan hetiang thil tenawm hi a ti lo asin, kan fapa chu i lo ring ve thlap emaw ka tia" a hamhaih hmel bo thak chuan a ti dam dap a.



Chutah ka nu chuan ngai pawimawh lo zet hian "Insiam rawh Hmingmawizual, ka hruai haw dawn che. Naktukah sum kan chhuah nghal ang" a ti chang ta fal mai. Ka nu chu rapthlak ti zet hian ka melh a.



Ka luhlul chhuahin "Ka lo zui dawn lo che" ka ti kha ve fak a. Mahse U Faktei rawn tawngchhuak ve ta chiah chuan ka tha a tizawi vek.



"Ni e, i fanu chu hruai haw mawlh rawh. Ka nutapa ring miah lotu fanu hi mo atan kan duh tawh bik lo e" a lo ti ve ta hmak mai. A nuin a lo khap vat a, mahse a mitmeng ling hlara kan nufa min melh na chu na ka ti kher mai.




Ka nu chuan "Khati khan ti khanglang suh, i nutapa thil tihsual an fiah hnuah pawh heti chena rei in bulah a la awm zawk ania. Ka hruai haw khawp ang, hnawk in lo ti hle anih zawk hi a" a ti veleh phiarh phiarh a.




U Faktei rawn tawng chhuak leh tur chu a nuin a lo khap a. Mahse a khap dai hneh lo a ni ber e "I rilru kawih zia chu tikhan a rawn lang leh mai alawm. Haw vat vat rawh u, hetah hian awm rei tawh suh u" a lo ti veleh nghek a. An awki chu a hniam tawhlo khawo mai.




Heti em em a U Faktei thinrim hi ka la hmu ngailo mai ni lovin heti em em hian a thinrim thei ang tih pawh ka lo hre lo. Tin, ka hlauthawng hle bawk. Heti hi chuan ka nu hian min hruai haw thei mai ang.



Ka nu(Vanmala nu zawk) chuan kan boruak ang lo tak hian "Rempui, chhungkuaah kan insiam tawh a. Kan fate pawh then hi ka remti lo" a lo ti dam dap a. Vanmala hian a lo chhun hle anih dawn hi ka ti ta. A buai ve cheng lo a, tun ang boruak sosang lutukah pawh dam diaiin a tawng thei tlat.




U Faktei bawk a lo inrawlh leh a "Ka nu khatianga tlawm vak kha a ngai tawhlo. A tir atang rengin Mama hi a ring miahlo tih ka hai bik lo. Kan dawh rei ve tawh bawk alawm, an nufa hian haw rawh se" a lo ti nghat a.




Ka laka a inlahrang ta lutuk leh huatna mita min en ta tlatte chu na ka ti vawng vawng mai. Ka laizawnnu ang chiahin ka lo en hman tawh asin !




Mahse U Faktei chu ka dem miahlo, ka nu thiam loh a ni miau a.



Awmdan tur ber pawh hrelo in an inkarah chuan ka ding reng a. Chutah ka nu chuan "Hmingmawizual, rawn kal rawh, i len ve lohna chhungkua ah hian i awm reng a tul miahlo" tiin ka banah min rawn pawt a. Ka lo tang ve tung a,a duh ang ngawt chuan min pawtkal thei biklo.



Ka nu(Vanmala nu) chu ka melh tawk tawk a, "Nu..." ngenngawl zet hian ka ti a, Vanmala nu zawk ka ko ani. Ka nu chuan lainat hmel lutuk hian min melh a 'Rempui, hruai haw suh' ti sela ka duh. Mahse ka nu(Vanmala nu) chuan "Mamte, haw phawt mai rawh" a ti ta tawp a. Hrehawm a tih hmel kher mai.



U Faktei lah chuan mitmeng ling hlarin thinrim tih hriat lutuk hian kan nufa inhruai chhuak tur chu min lo melh ve kal a. A rilru chhiat vang leh min huat hranpa hrim hrim vang a nilo tih ka hria. Engkim hi...ka nu thiam loh vek ani.




Ka mittui ka dang zo ta ngang lo, kan in chu ka thlir tawk tawk a. Ka nu min kaih ang ang chuan ka awm tawp tawh. Nep ka inti a, nupui ka nihna chu hlenchhuak zo lo riau hian ka inhre bawk.



Ka nuin car chhunga min dah luh laite chuan ka muttui a luang ngiai ngiai a, a phun zui hlak hlakte chu engmah ka hrechiang lo. Ka rilru hi a na a ni tawp mai. Ka tha a zawi vek bawk si.




In kan thlen hnu thleng pawh chuan ka tawng chhuak lo. Ka pa hamhaih hmel chu ka hmu reng, chutiang bawkin Puia leh Rina pawh.



Ka nu chuan "Ka va hruai har hret ani, hnawksak an lo ti hle tawh zawk a" a ti hlak hlak a. Ka dawhtheihna in a tlin ngang lo a. Ka theihtawpa ringin ka nu hmazawna ding reng chung chuan "I lawm tawh em? I fanu hmangaih ngawih ngawih tute chu i fanu lak ata i la hrang tawh e. I fanu tan hian anni tluka lawina tur hmun tha i hrelo ang" ka ti nghek a. Ka thaw chhuak nghal kawk kawk thei.




Ka mittui vangin ka meng phe ruai a, khua ka hmu tha hlei theilo. Tunlai thil ka ei tha silo, ka mu thei lo meng rim tawngkhawng bawk nen hetiang thil ka tawk leh ta nuaih bawk si. Ka â thei mai dawnin ka hria.



Thinrim lutuk hian ka nulat laia ka room ni thin lam chu ka pan chho nghal hlawk hlawk a. Room ka luh rual chuan kawngka kalhin khumah bawk nghal thlawp a, ka tap zui hlawp hlawp mai.



Ka dinhmun harsa lutuk leh khirh lutuk hi ka hua. Ka taksa chau zual lutukte hi ka haw ngawih ngawih,chak ka ngaih hunlai berin ka taksa a chau tlat a. Ka thin a rim hlur bawk si.




Vanmala hmel ka mitthla ah a rawn lang a, ka na vawng vawng mai. Hetah hi chuan tuman hlimna min thlen tak tak lo. A bulah ka hlim ber.



Tichuan, thuthlukna ka siamfel ta hmak a. Naktukah Lawngtlai ah ka let ang. Ka chhungte hriat lohin, tuma hriat lohin ka let khawp ang. Vanmala chuan rem a ti leh dawn lo, ka hrilh lo law law ang a, a bula ka thlen tawh ber chuan min tir haw tawh bik lovang.




Vanmala bulah chuan ka let khawp ang.



___________*___________*__________



(Tun kar chu college entrance exam in ka buai dawn a, zan khat danah dah a ngai dawn aw...ka zirna ka ngai pawimawh ve si a. Min lo hrethiam dawn nia... heti hian naktuk zan a awm lovang a, nilai thawhtan zan a awm leh dawn tihna anih chu)


Show post links
Top

[Ngaia]

DEPUTY COMMISSIONER
By CVL Awmpuii



Chapter 29



Ka khumah chuan bawkin ka la tap hlawp hlawp a, ka rilru na lutuk leh ka nu ka haw lutuk chu ka tahpui ni berin ka hria. Tin, Vanmala ka ngai hle bawk.



U Faktei leh ka nu inhauhna te kha ka ngaihtuah let a, ka chungah hian U Faktei hi a tha leh thei ang em tihte ka ngaihtuah a. Ka lung a zîng map thei.



Vanmala bula let ngei ngei chu ka tih turah ka ngai nghet ta bur a. Zaninah ruahmanna ka siam fel ang a, naktuk zingkarah ka nu te hriat lohin ka chhuak nal nal ang tih chu ka rilrua lian ber a ni.



Ka mittui tla reng chu ka tuai hul thuak a, mahse a rawn tla lehzel. Vanmala ka ngai lutuk chu awmngaihna pawh ka hrelo. A hma khan heti em em hian ka âtchilhin ka ngai ang tih rin ngaihna pawh ka hrelo. Tunah zet chuan ka ngai ta takzet ani.




Ka pindan kawngkhar chu an rawn rik ri kauh kauh a, ka lo chhâwn duh thak lo. Khumah chuan la bawkkhup rengin ka mittui a dir zung zung mai.




Ka pa âw ngei maiin ",Mamte..." a rawn tih takah chuan ka mittui dir zung zung chu ka hru hul thuak thuak a, ka thu kang uaih ringawt a, mahse kawngka hawn tumna rilru chu ka la pu chuanglo.




Ka nu thiltih te hi a hriatpui ve vekin ka ring a, chuti chunga hetiang teh tawpa min hnaisa hi ka lawm lo a ni tawp mai.




"Mamte, inbe lawk ang" a rawn tih takah chuan kawngkhar chu ka hawn sak lek lek a, mahse ma la lungawi thei ngang chuang lo.



Ka ngawi kar a, ka melh ngai ka melh ngawt ngawt a, ka mitthla ah Vanmalsawmhlua a rawn lang a. Heta min haw tir ta kher kher kha ka hua a, ka ngai tho bawk si. Ka ngaihtuahna mumal lo lutuk chu ka hrethiam der lo.




Ka pa âw bawkin "Rawn hawng la, inbe teh ang" a rawn tih leh takah chuan ka che chhuak ve ta nge nge a. Hetia awm reng hian awmzia a nei dawn lo tih ka hrechiang em ani. Tin, ka pa tal hi ka ngen ngawih ngawih chuan Vanmala bula ka let min remtih sak mahna.




Kawngkhar ka hawn rual chuan ka pa a rawn lut nghal a. Min melh run a, hlauhawm erawh a ni hauh lo. Ka lo melh let ve kal a.




Ka pa chuan "Engtin maw i nu nen chuan in rawn inhruai haw a?" a ti hu a, a hmel landan atang chuan thil thleng engmah hre ve lo a ang.




Chutah lungawi lo zet hian "A duhthusam ang takin min lo hruai haw anih hi" ka ti nghat a. Ka lungawi loh zia chu a hai bikin ka ringlo.




Ka pa chu a lo rum nghut "Sawi chiang la" a ti sup a. Min rawn hruai haw laia U Faktei nen an inhnialna te kha ka ngaihtuah let a, ka mittui a rawn hnai leh kuar kuar mai. Mahse tun ang huna ka pa bula han tah em zawng ka duhlo.




"Ka duhlo chung min rawn hruai haw...min duhsak em em tu ka pasal nu pawhin tihngaihna a hrelo. Tin, ka pasal farnu U Faktei ngei pawhin ka nu vang hian min hmelma en tawh. A lawm tawh ngawt ang chu" elsen zet hian ka ti a. Chutiang zawnga ka nu chungchang sawi chu ka duh bik lo. Mahse ti lo thei lo dinhmunah min siam miau ani.



Ka pa chu a lo thaw chhuak hulh a "Khatiangin nu te chungchang an sawi ngailo" a lo tih chuan "A nihna a ni miau alawm" ka lo ti hmanhmawh. Eng vanga chaltlai ta em em nge ka nih pawh ka inhrethiam tawh bik lo.



Ka pa chu a lo rum nghut a "Engtia awm zel nge i duh a?" a tih chuan ka ka hãu mai. "Eng nge i sawi awmzia?" ka ti sep a. "I nu chuan i duhlo chungin a lo hruai haw che a maw..." a ti chuar chuar a, "Ka sawi chu" ka lo ti hmak.




A bu nghut nghut a, "I nû rilru hi dâwn thiam ve la, a ngaihdan hi chu a âwm ve fû ania. A mizia zawng zawng nen ngaihtuah phei chuan a awm hliah hliah. A ti mah mah tih chu ka hre ve tho ania. A lo kal dawn tih pawh ka lo hrelo a. Heti hian a lungdam hun nghak ve phawt la chu a tha khawp ang" zawldawh tak hian a ti a. Ka nu duhdana awm tura min tihnaah ka ngai hmiah.




"Ka pasal nen min pawh then talh a tum alawm" ka lo ti nghat a, a bu leh nghut a, ka dara min hmer salh pah chuan "Lungngai mah ta che, in inthen chu ka remti dawn lo. I nu hi chu lo ngai thiam rih hram hram rawh. Tunah pawh hian a thu zawm rih la, heta awm rih pawh a pawi hlei nem" a ti chuar chuar a. Ka lo pawm thei der lo. Mahse ka hnial zui peih tawh lo. Vanmala bulah ka kal dawn a ni tawp mai.




Ka pa chhuah hnu chuan ka inngaihtuah ta ngut ngut a. Keimah mai chuan Lawngtlai pan chu a harsa hlein ka ring. Ka phone lah chu kan hawn der silo, ka bungrua zawng zawngte pawh. Keimah teh tlawng min hruai haw a. Engmah neih ka nei lo.




Zanriah ei tura min rawn koh chuan ka lo hnial fithla thak. Ka nû pawh nu luhlul ngang a ni a "I nghei peih chen chen i nghei dawn nia" min ti hmak mai. Pawi ka ti chai lo ve. A chawei siam ei ai chuan ka thi thak mai ang.




Zanah chuan khumah muin Lawngtlai let dan tur ringawt ka ngaihtuah a. Ka unaute pun em chu ka hreh ve bawk si, ka û te chu nise thuhran a ni a. Ka naute êm tihbuai chu an û ka nihna angin ka hreh a ni ber.




Ka nu nen kan inkar chu a tha leh thei tawh pawhin ka ringlo. Vanmala hian a dikna hailang se, ka nu inthiamlo hmel ka hmu châk hlur tawh.




Heti em em a ka rilru len leh ka luhlul hi ka la hre ngailo. Tunah zet chuan keimah kha ka ang lo hial zawk. Ka nu leh pa te chal tlai tak taka ka chhang kha chu dik ka inti chiah lo, mahse ka inchhir chuang miahlo. An fanu pasal nei tawh min thunun an tum tlat mai hi ka hrethiam lo.




Vartianah ka harh hlawl a, ka lu na lutuk chuan min kai tho a ni ber. Ka thlan a tla hluam a, mahse vawt ka ti hle si. Ka puansin lai chu ka sin tha sat sat a. Tlem chuan a zia deuh e.



Ka lo chhing sek a ni mai thei, ka room chhunga ni zung rawn lutin min kai harh hlawl a. Khua a lo eng uarh tawh tih ka hriat rual chuan rang zetin ka inperh tho a. Mahse ka luhai lutuk avangin ka let thla leh hnawk mai. Ka pang ka dek a, a lo lum vet vet mai. Mit ka chhing vang vang a, ka lu lah chu a hai muai muai mai si.




Kei hi ka damlo anih vaih chuan a pawi khawp ang. Ka thil tum zawng zawngte kha ka ngaihtuah a, hetia awm thei hi ka nilo.



Ka tho chhuak a, khum bula drawer tê chu ka hawng a, ka hai rak rak a, nachhawkna ka hmu mailo. Khumah chuan ka thu thla leh hnak a.




Kawngkhar a rawn ri zui a, ka nu aw ka hre zawm zat "Chaw i la nghei dawn em?" a rawn ri salh a. Ka va han haw tak. Ka nu anih vang tal pawhin hetah min hruai tawh ta sa sa , tha taka min dawnsawn a, min tihlungawi a tum ve te ka lo ring ania. Mahse chutiang chu a ni dawn lo anih hmel.




A zawhna chu ka chhang buai peihlo, a kalsawn ri ka hriat zui takah chuan ka thaw chhuak ham ham a. Ka dang ro hulh te chuan tui ka mamawh zia min hriat thar tir a. Mahse ka luhlulnain min pawt ngang si a, tui in tura zuk chhuk thlak vel chu tlawm ah ka la a ni ber.




Chhunah chuan ka awm awmin ka awm a, a chang leh ka tap a. A chang leh ka thin a rim hlur a. Thil dang zawng zawng aia ka ngaihtuahna luah bertu chu ka pasal Vanmalsawmhlua a ni.




Ka ngai teh thlawt ani.



A bula kal turin ka taksa a chak tawk lo tih ka hria a, tin, ka hriselna pawh hi a tha rih zan lo tih ka hria. Keimah mai chuan eng thil mah ka ti thei lovang. Mi tu emaw pakhat tal min puitu ka mamawh ngei dawn.



Ka rilruah U Vensangi a rawn lang thut a, ka phone ka ngaihtuah chhuah rual chuan ka nei rihlo tih ka hrechhuak lehnghal zawk. Pawiti lutuk hian ka chet hlak a.




Naktukah chuan Vanmala bula let ngei ngei ka tum bur tawh a. Engti kawng pawhin let ngei ngei ka duh.



Heta tangin taxi pawh ka hire tawp mai ang, pawisa kawl lai neilo mah ila ka thlen hunah Vanmala a awm dawn tho a. Min buaipui mai ang tihah chuan ka innghat bur.




Zanriah ei tur pawhin ka chhungte chuan min rawn ko eih lo. Ka lungawi lohna chu rilru natnain a rawn thlak a. Ka nu min tihdan teh thlawt chu ka rilru a na. A fanu ka ni a, ka lungawi loh pawhin min tihlungawi tum hram hram zawk awm a ni a. Mahse chutiang chuan a ti hauh silo.




Zanriah eikham ni ngei turah chuan Puia leh Rina'n ka room kawngkhar an rawn kik a. Ka unaute an ni a, anni chu huatna ka nei hran lo bawk a. Kawngka ka va hawnsak a.




Min ngaihtuah hmel lutuk hian an pahnih chuan min lo melh run a. Puia a phun nghla hluk "I bawrchhawr lutuk" a ti nghut a. A dik ang ka ring, ka awm chawt chawt a, han intuai hnûm vel pawh ka peihlo atin a ni.



Ka room ah chuan an rawn inzui lut a, kawngkhar ka kalh lehnghal hmak.




Rina chuan "Û chaw zuk ei ve rawh" a ti sup a, ka lo nui hak mai. Min ngaihtuah ve hmel lutukte chuan engtin emaw riau hian hlimna min pe. Tun ang huna min ngaihtuah tute chu ka tan an hlu em ani.




Puia pawh chuan "Ni e, lungawi loh avangin chaw ah an tuan ngai lo" a lo ti ve sup a. Ka lu ka lo thing vat a "Ka ril a tam lo" ka lo ti sep.



An lo rum rual nghut a, ka nui leh hak mai. An farnu hi min ngaihtuah ve hle niin ka hria.




Puia chuan "Ka nu pawh hian a ti ve mah mah ani, heti em ema pawh then a tum che u hi a diklo" a ti nghut a, tawngkam thiamlo chung chungin ka lam a tanzia sawi lan a tum ve naah ka ngaihsak tawp.




Rina pawh chuan"U Vanmala hi keini chuan kan ring tlat ania aw. Hetia i awm hi a duh miah lo ang, chaw te ei tha la. Nakinah buaina hi chu a reh leh mai ang" a lo ti ve ngial a.




Puia chuan "Ka nu khan sum chhuahte a sawiin ka hria. Inthen tir che u a tum tak tak emawni" a lo ti ve nuap nuap a, ka thin a sa phat mai. Ka nu chu a kal thui mah mah dawn niin a lang.




"Ka nu pawh then ngawt theih an nilo" Rina chuan a lo ti veleh hluk a. Ka laka ka nu chetdan chu min lungawi pui lo ve hlein ka hria.




Keichuan thil dang daih ka lo ngaihtuah thung a. "In phone ka lo hmang lawk" ka tih chuan a ngaihna hrelo fe hian an pahnih chuan min rawn melh a "I phone pawh i rawn hawn nange" an ti rual hawk. Ka lo nui mai a.




Rina zawk chuan a ipte atangin a rawn phawrh chhuak ve mai bawk a. Ka hmeh mawlh mawlh lai chuan Puia'n "Eng nge i tih dawn?" a lo ti sup a, ka chhang lem hlei lova.




U Vensangi number ka hmuh rual chuan ka call ta vat a. A la tawh dawn lo emaw ka tih hnuin a lo la ta hram.



"Aw, Rina" a rawn tih chuan "U Vensang, keimah Mamtei " ka lo ti sep a. A rawn ri nghal hlut hi a ni ber.



"Tinge biak tlang i va har ve, nizanah chanchin rawn zawh che ka tum a. Phone call i la thei derlo" a rawn ti nghal zung zung a.



A zawhna chhang mai lo chuan "U Vensang, i puihna ka mamawh" ka ti nghal tawl a. Puia leh Rina chuan min rawn melh nghal run a. Ka lo melh tawn ve zak zak mai.




U Vensangi chuan "Eng chungchangah maw?" a rawn tih chuan pehhel buai lovin "Lawngtlai ah Vanmala bula kal ka duh" ka lo ti leh tawp a.




Ka naute pahnih chuan min melh chiang viau tawh.




Keimah bawk chuan "Min pui rawh, sawi tur a tam lutuk. Tunah hian ka nuin min hruai haw daih a. Tihngaihna a awmlo, ka phone leh thuamhnaw pawh, engmah ka kawl lo. I puih ka ngai" ka ti leh zung zung a.




Chutah U Vensangi chuan "I nu chuan a hruai haw ta che maw?" a rawn ti hluai a. Ka thaw chhuak hakah chuan a hrethiam nghal vek ang chu.



"A va timak em em ve...engmah thil awmzia ka hrethiam tawhlo. Zanriah kan ei kham ve chiah a, ka hman veleh ka rawn kal nghal ang, hmaichhanah kan sawi dawn nia" a rawn ti ta zung zung a. Ka lawm zia chu pui tak ani.




Rina phone ka pek let lai chuan Puia zawk chuan "Eng nge i thusawi awmzia kha?" a lo ti sup a, min enchîk hle bawk.



Kei lah chuan "Ka sawi ang kha a nimai, midang bulah lo sawi su aw" ka ti tawp a. Rina chuan min ngaihtuah hmel fe hian "U Vanmala i be tawh em?" a lo ti khauh a, "Aih" ka lo ti hul hak.




Puia'n "Amah tal hrilh rawh " a tih chuan "Hrilh na tur engmah ka neih loh hi, chuloah a remtih ka ringlo. Heta ka lo haw chhan pawh hi amah vang alawm" ka ti ta nghat a.




Ka naute chuan min ngaihtuah ve zia ka hrechiang kher mai. Ka kalna tur nen lam min buaipui an inhuam a,mahse ka tul ti hran lo. Puia a training an tough lai anih bakah Rina pawh an exam mek si a. Midang bula sawi lo tura ka chah bak chu engmah ka sawipui zui duh tawhlo.




Darkar khat vel a liam hnu chuan U Vensangi chu a lo leng ta ngei a. Room-ah a rawn lut tlang nghal a,kan inhmu chiah chu kan inkuah nghal vawng vawng mai.




Ka khuma thut thlak pah chuan "Nutei chu a la lungawi loh hmel khawp mai" a rawn ti halh a, ka lo ner nawk "Kei hi asin lungawilo tur chu" ka lo ti nghat a.




Tichuan U Vensangi'n engkim sawi tura min tih takah chuan ka nu min rawn hruai dan leh U Faktei ka chunga a lungawi loh tak dan zawng zawng te chu ka hrilh fai ta kelh a. A lo chet hlak hlak mai.




Pui tura ka ngenna pawh a lo dawngsawng tha khawp mai. Ka lawm takzet ani.



Tichuan U Vensangi nen chuan ruahmanna felfai tak kan siam ta a. Zaninah taxi hire tur min lo biak sak ang a. Zingkar dar 5 vela heta tanga chhuak thei turin min biak sak dawn anih hmel. Ka lawm lutuk chu ka kuah leh vawng vawng thin a. Ani lah chuan "I ho thei lutuk, i lawm dan hi mi heang inpuitawn te pawh kan ang alawm. Tikhan thil nihna tur ve rengah ngai hmak rawh" a ti hmiah a, ka nui var var mai.




A haw hma chuan thil ei tha hle turin min chah lawm lawm a "I dâng bel mai a, i chêrin i bawrchhawr bawk si, intuai hnum la, thil eitha ang che" a ti mawlh mawlh a. Ka lo bu nghat nghat mai.




A haw tur pawh chu ka nu ka hmuh peih ngang loh avangin ka thlah ta lova. Min hrethiam khawp mai.



Zanlaiah ka beisei loh lutukin ka khua a sik lehpek a, ka tai zawn leh ka kawng vel chu a kham thum bawk a. A hrehawm duh kher mai. Mutmu pawh tuah tha hlei thei lovin ka awm a, ka zawi nghiai a, ka ril lah chu a tam eih silo.




Ka taksain a mamawh anih ringin zing dar 3 velah ka tho chhuak them them a, chaw bel ka en chuan chaw thing a lo awm nual a. Ka kuta zenin ei ka han tum a, ka pum chhungin a hua emaw tih mai turin ka ei hlei thei der lo. Beidawng zet hian room ah ka chho leh ta tawp a. Damdawi ei tur ka zawng ngial a, ka nuin room-ah a kawl anih ka ring, ka hmu thei der lo.




Khuma ka lehkual sek chhungin dar4 leh a chanve a lo ri ta thuak a. Thawm dim zetin ka tho chhuak leh a. Damdawi ka ei lo nachungin ka khawsik kha zawi zawiin amahin a rawn ziaawm chho ve ta mai a, a tihzia tak tak ani.



Pawn ka va chhuah chuan kan in gate sir deuhah U Vensangi leh taxi driver an lo awm vang tawh a. Vanmala bula let tur ka nihna chuan phurna tam tak min pe a, chutihrual chuan ka lungchhe tel tlat bawk. A bula ka awm hunah chuan mi tumahin min pawt then tawh lovang.



U Vensangi bulah chuan lawmthu ka sawi mawlh mawlh a. Ka hnuk a ulh teuh mai. Harsatna tam tak ka tawh kar, ka nu ngei pawhin min dodalna karah lam tang tha lutuk ka lo nei veleh zel thei hi ka lawm a ni tawp mai. A lungchhiatthlak lek lek zawk.




Taxi driver chu fimkhur turin a chah mawlh mawlh bawk a. Kan kal hma chuan min kuah leh vang vang a, "I thlen veleh min rawn hriattir leh la aw. Taxi driver hi ka mi hriatchian ania, a rintlak ang" a ti sep a, ka lo bu nghat nghat.




Tichuan, U Vensangi chu mangthain ka pasal bula awm tur chuan kan tlan chhuak tan ta a. Ka thinlungah phurna, lungchhiatna leh hlauhthawnna a rawn inthum rawn tlut tlut a. Vanmala'n min lo dawnsawn dan tur erawh ka ngaihtuah thiamlo.



Driver chuan "Thiannu, i duh chuan lo muhil daih rawh aw" a ti sup a, ka lu lo thing vatin "Ka la harh tha lutuk ania" ka lo ti var a. A hming ka zawh zawm nghal zat. Puia a lo nia, hriat a har viau love, ka nau nen an hming a inang chiah.



Kan tlan tluang anih chuan tlai dar 2 velah kan thleng theiin ka ring a. A la rei dawn vang vang viau mai, tunah kan tlan chhuak chauh ang a la ni si a. Mahse ka duh ber hmun thleng tur ka ni a, ka hlauthawng hauh lo. Ka phur em em zawk.




Puia chu rinai takin a lo tawngduh phian mai a. A taxi khalh chanchin te chu min hrilh luam a. Passenger maksak zet zet a tawn atanga nuihzatthlak thlengin min hrilh a. Ka hlimpui ta phian a. Kan nui dun hawk hawk mai.



Ramhuai chanchin a sawi dawn chuan ka lo khap vat a. Nui ruh ruh chung chuan "I va dawih ve" a lo ti huk a. Ka lo nui tawi tak mai. "I piangthar tha lo a nimaw?" a rawn tih leh chuan ka lo chhang ve ta vat a.




"Chutiang lam pawh a ni hran lo. Dawih thu ah phei chuan dawih lo tak ka ni. Mahni tawkah ka huai ve lutuk, mahse ramhuai chanchin sawi vel hi ka tuipui ve lo. A Pathian thu ang zawng pawhin ka tuipui lo" ka lo ti zung zung a.




Min rawn melh zawk a "Engtia a Pathian Thu zawng nge i sawi a?" a lo tih chuan "Pathian Thu sawi pawh ni lo a ramhuai chanchin sawi chu ka duh teuhlo" ka lo ti tawi tak a. Ka ngaihdan dik tak pawh ani.




Pathian Thu ah kan hmu a, a thiltih makte hi titia nei turin min duh a. Mahse ramhuai chanchin tuipui zawk tlat kan awm thin hi pawi ka lo ti ve em em zel.



"I va fir reuh ve" a tih chuan ka lo nui hak a, ani pawh a lo nui ve hawk hawk mai.



Dar 9 velah chuan kawng laka hotel ah chaw kan ei zawk a, Puia'n a ei a ni zawk mah. Kei chuan engmah ka ei thei der lo, ka ka chhûnga ka hnawh luh dawn apiangin ka pumin a hnar tlat a, ka luak a chhuak phei chu a nilo. Ka pumpui that loh vang anih ka ring ta ber.




Minute 20 vel kan chawlh hnu chuan kan tlan zawm leh ta a. Kan tluang hle dawn emaw kan tih laiin Lawngtlai thlen hma kilometre 30 vel la awmah chuan kan motor ke chu a rawn puak thawt a, kan ding nghal chawt. Hmalamah ka bu lawp a, mahse vanneih thlak lutukin ka insawh hman lo hlauh.




Puia chu a phun hluk a , "Lawk aw" tiin motor atang chuan a chhuak vut a.




Motor ke hnung chu a va en niin ka hria, reilote ah a lo let leh a. Taxi tukverha rawn dak lut chung hian "Perek kan chîl palh ani mai thei, a kê a thep vek,a zialo khawp mai" a rawn ti sup a.



Rang zetin ka chhuak ve ta vat a, motor kehnung chu ka han en ve a. Tlan zui thei chi ziazang a ni tawhlo.




"A van zialo tak" ka ti hliai a, Puia chuan inthiamlo lutuk hian "A ke thlak mai na tur ka nei bawk silo, engtin nge ni ang le?" a ti hulh a. Tih theih dang vak awm hek lo le, a inthiamlo lutuk chu ka khawngaih bawk si. A han en ngial a, mahse tihngaihna a hre bik vak lo niin a lang.




Chutah Puia chuan "A siamtu tur kan ko ang a, min lo nghak lawk mai dawn em ni? Nge ni a taxi dang kan ko zawk mai ang" a ti zung zung a. A inthiamlo hmel lutuk chu ka khawngaih tak tak ani.



"A pawilo, Puia...heti hian motor lo kal an awm ve mai ka ring. Min phar din sak tawp mai rawh, siam chhung nghah leh midang lo kal chhung nghah chuan a buaithlak zawk ang" ka ti ve ta tawp a.




Ka hmanhmawh rilru ve tawh bawk nen hetia ka tih tawp mai loh chuan ka tlai mah mah ang. Ka nû ten ka awm lo tih an hriat hunah phei chuan a buaithlak zual dawn si. Rang taka Vanmala bula thlen vat ka duh.




Minute tam pawh la ral hmain taxi pakhat rawn tlan chu min phar din sak ta a. A driver chu a hmel atang chuan Mizo a ni chiah lo niin a lang. Vai hmel a pu deuh a, mahse Mizo tawng a thiam nal hle thung. Mizorama kum eng emaw zat lo awm tawh anih hmel.




Puia chuan min biak fel sak ta vek a. Pawisa pawh ka neih rih miau loh avangin min pek sak nghal vek. Ka inthlahrung viau nain tihtheih dang a awm si lova. Ka dinhmun U Vensangi khan a lo hrilhfiah vek niin a lang. A tihzia tak tak ani.



Taxi a ka chuan fel hnu chuan Puia chuan "Tluang deuhin i thleng dawn nia" tiin duhsakna min hlan a, "Nangpawh aw" ka lo ti let ve vat.




Puia chuan kan tlan liam thleng min thlir liam a, passenger te ngaihsak thin mi tak niin ka hria. A fel emai.



Ka chuan takna taxi khalhtu chu pangngai takin a hming ka zawt a "Sangvunga" a lo ti tha ve mai a. Mizo hmingte pawh a lo nei ve thlap anih chu. Ka lo bu nghat nghat a.




"Ka hmuh tawh hnu i ang riau" min tih chuan ka lo melh awk a "A nimaw..." ka lo ti sep a, bu nghut chung hian "Khawiah emaw ka hmu tawh chiang che alawm" a ti leh sup a.




Chîk zeta thil ngaihtuah hmel hi a pu. Chutah min rawn melh leh zawk a, ka awm a tinuam lo lek lek.



Hre chhuak thut ni awm tak hian "Ka hre ta chiah che, ka hria che ka hria che" a ti zung zung a. Min rawn melh lehna mitmeng chu ka ngainat zawng a ni ta hauh lo mai.




Ka hlauhthawnna chu thup tum hram hramin ka nuih lui a "A nimaw..." ka ti leh ringawt a. Ka awm a nuam tawhlo takzet.



A motor khalh laite chuan min rawn melh leh zawk thin a, a mitmeng mawlh chu ka ngaih a ti thalo. A hur lutuk ti tawp mai teh ang.




Chutianga a motor khalh laia min melh tak sek ah chuan ka hlauthawng ta takzet a "Ka pu, hetah hian ka lo chhuk mai ang, midang nghah ka ngai a" tiin chhuanlam ka siam ta tawp a. Ka aw a hlauhthawnna chu a hriatthiam loh hram ka beisei.



Mahse mitmeng hur hmel zeta min rawn melh lehin "Min hlau em ni?" a rawn ti thum bul a. Hlau anga ka lan chuan min zuam ka hlau bawk si hlau lo ang taka langin "Hlauh tur i awm hlei nem, khawi tidang la hetah chuan ka lo chhuk mai ang" ka ti leh a. Ka âw a khur ru der der mai.




Chutah driver pa chuan "DC nupui kha i ni tiraw?" a rawn ti ta sup a. A mitmeng chu ka ngaina hlawl lo a ni ber. Min zuam hmel ngawih ngawih a. Eng emaw a ti duh mai dawnin ka hria.




A zawhna pawh chhang lo chuan "Motor hi tiding rawh" ka ti fiah fak a. Mahse min ngai pawimawh lo zet hian a tlan tlang a.




"In pa khan nuthlawi a pawngsual a ni lawm ni, a nupui ka lo khawih ve zeuh chu engah mah a ngai lovang" a rawn ti ta mai. Ka mangang takzet tawh.




"Motor hi tiding rawh" ka ti khur leh dat a, ka awa hlauhthawnna chu ka thunun theih piahlam ani.



Mitmeng rapawm zet hian min rawn melh a, "I îtawm hle mai" a rawn ti leh sup a. A nui hmel chuan min rap lutuk.



Motor chu a khalh chak telh telh a, ka mangang telh telh. Kan awmna lai a fal bawk si, motor dang vai vak an tlem bawk si a. Ka chungah rilru tha a pu mawlh lo tih a chiang reng si.



"Motor hi i tiding lo anih chuan ka au vak dawn nia" ka ti a. Elsen deuh hian min nuih hawk hawk a,a awmdan mawlh chuan min rap.




Kawngsir rem lai deuha motor a tihdin rual chuan chhuk mai ka tum a, mahse ka banah min lo man hman.



"I chhukna turin motor hi ka tiding reng reng lo. Hun hlimawm tak hmanpui tur chein alawm ka tihdin" rapawm zet hian a rawn ti a.




Ka tê nghal chiam a, mahse ka kâ chu hneh zet hian a rawn hup a. A thutdan chu siamremin ka thutna lamah chuan a rawn tawlh a, a thaw huam huam ri te chu ka rap ngawih ngawih.




"A nuam dawn lutuk" a ti khur hluk a, hmeichhe chak lo tak ka nih chu sawi loh chaw ka lo ei that loh avangin ka taksa a chau zual bawk si.



Chu vaipa chuan zu rim a lo nam huam a. Min rawn hnaih chauh hian ka hre thei, a hma zawng khan ka lo hre miahlo.




Ngawi rengin kan insual buai chu a ni ta der mai. Zu in mah se rui chhe lutuk ang khan a awm lova. A hur tawk vel chiahin a in niin ka hria.



A tshirt hak lai chu min nek bet reng chung chuan a phelh ta mai. Ka mangan zia chu pui tak ani.



"Min pui ru" tia ka au te tuarh lai chuan ka hmui a rawn hup lehnghal a. "I bengchheng rei tawhlo tawp ang. Hlauthawng suh, tun atanga reilote ah hian nuam tih lutukna avangin i rak chiam mai ang" a ti khur hlawk hlawk a. A tawngkam bawlhhlawh lutukte chuan ka luak a tichhuak hlui thei.




Ka kekawr kawng rawn phelh a tum rual chuan theuhtawp tak meuh meuhin ka tang a. Kan inchei buaina lamah ka sam pawh a thur vek tawh.



Ka haw lutuk chu ka hmui a hupna kut chu chil ka chhak khum ta thawt a, rang zetin a lasawn vat. A kut a en reng lai chuan ka inveng hman lo, a hmaiah ka chhâk leh thawt a. Mitmeng hlauhawm dur khup hian min rawn melh a, ka nghawng ah rekin hnai ser sawtah hian min rawn melh a "I châk lo khawp ang" tih leh a kut lehlama ka kekawr pawhthlak chu a rual a. Ka lo inveng seng tawh ngang lo ani.



Ka tal leh chiam a,a duh ang takin ka kekawr chu a pawhthla thei biklo. Ka malah a la tawm vek a, mahse ka panty a lang vek thung.



Hnuailam a rawn melh rual chuan ka theih tawp chhuahin ka ke chu ka lo tawm a, ka kap rawn khawih a tum rual chuan a hmaiah chil ka chhak leh thawt a.



Ka biang a ri nghal sawk mai, ka lu a hai nghal chiai chiai bawk.




Ka thutna seat hnung chu ka ngheng dawt a, "Ka duh ang thalin ka che thei tawh ang" rapawm zeta a ti ri ka hriat rual chuan tan leh ka tum ngial a. Ka thâ a zawi vek. Ka bân lah chu a tawn bet nghal hmiah mai bawk si.




Ka kawr a rawn hlip leh lai chu ka hre reng a, mahse tang thei reng ka awm tawhlo.



"Heti hian i pasal nen kan danglamna a awm chuanglo ania aw. Ani pawhin hmeichhe duhlo chung anih kha a khawih" a tih ri te chu ka hre vek a. Ka rilru a harhfim kur si, che thei reng ka awm tawh silo chu ka mangang a, ka rilruin Vanmala ka au a, ka mittui a rawn luang thla nghal zawih zawih mai.




Ka mittui luang chu chupa chuan lo tuai hulin "Tap suh, tap suh, nuam i ti dawn lutuk" elsen zet hian min ti a. A nui huah huah bawk. Ka dul velte chu a kut bawlhhlawh zet chuan a thai kual riak riak a. Tihtheih ka neilo lutuk chu ka rilru hi a na ngut ngut mai. Vanmala ka au mawlh mawlh a, mahse beiseibo mai anih zia ka hrechiang si.




Tisa châkna avanga chupa thaw ri huam huamte chuan min râp a. Theih chu ni ngat se ka that duh ngei ang. Min khawih loh hi ka ring tawhlo reng reng. Ka pasal tan chauha ka vawnhim tur kha tihbawrhban tumin hma a rawn la tan a.




Ka panty tlang hmawr a rawn chelh chiah chu thil ri chawrh hi ka hria a. Mitmeng phe ruai hian ka mengchhuak a, ka hmaah chuan khapa kha a lo awm tawh miahlo. Taxi hmaa mipa ruangam lian zetin a lo hnek chawrh chawrh chu ka va hmu phê ruai a. Min khawih hman loh vanga ka lawm lutuk chu ka mittui bawk a rawn tla leh a. Chetsawn mai ka tum a, mahse ka chesawn thei chuanglo. Ka taksa a zawi lutuk.



Ka mit chu ka chhing ta chial a, ka chau ani tawp mai. Tuihal huam huam ang ten ka awm a, ka lu a la hai chiai chiai bawk. Tin, ka tai bawr hi kam tu awm ang maiin a na ngut ngut bawk a.




Rei vak lovah Vanmala aw ngei mai hian "Mamte...Duati..." a rawn tih ri ka hre ta...kut lum thur thurin ka biang chu a rawn beng thek thek a, mitmeng da va riai hian ka mengchhuak a, ka pasal hmel manganna a khat, pawiti lutuk hmel, min hmangaih leh duat ngawih ngawih hmel inchawhpawlh nuk chu ka mu phe ruai a.



Ka taksa a rawn khuhlai te chu ka hre ruai ruai a, ka biangah min rawn chelh lehin "Duati..." a rawn ti leh sup a, ka biang a rawn lum thla nghal pap mai...



Ka manganna kha lawmnain a rawn thlak a, Vanmala hmel ka hmu ringawtte chu ka thlamuanpui nghal hliah hliah.




A âwmah min kuah bei nghal hlun a, ka samah a fawp vawng vawng a. Tah chhuah hlawp hlawp ka châk ber, mahse chutiang turin thâ ka neilo.




Ka taksa zawi nghiai min pawm kan laite chu ka manghriat ruai ruai tawh. Mahse heihi erawh chiang takin ka hria, ka pasal kiangah ka him dawn tih hi!





____________*_______________*____________


Show post links
Top

[Ngaia]

DEPUTY COMMISSIONER
By CVL Awmpuii



Chapter 30



Vanmala min ko ri te chu ka manghriat ruai ruai tawh. A taksa bet thlawpin min pawmbet a. Midang nen an inbe thawm ka hriat zawm leh zat. Mahse an thusawi tak erawh ka hrechiang thei lo.



Chet ka tum ngial a, ka chesawn thei derlo. Ka dang a ro huam a, ka lu a hai chiai chiai bawk. Ka taksa awmdan chu hrehawm hle mah se Vanmala kiangah ka awm tawh avangin ka thla a muang hliah hliah thung.




Engtin tin nge min buaipui pawh ka hre mumal lo. Chiang lo ruai hian ka harh a, ka meng chhuak riai riai, mahse ka mit kham lutuk avangin ka chhing lehnghal zel. Ka taksa a la zawi hle bawk.



Vanmala âw ka hre zui a , "Mamte...i harh em?" a rawn ti sup, a kutphah hlai zet hian ka kutphah chu a rawn hûm nghet zual sauh a.



Ka tha neih zawng zawng sawm khawmin ka meng chhuak ta riai riai a, Vanmala hmel dam thlup, min ngaihtuahnaa khat hi ka hmu nghal zat a.



Ka kut chu fawp zeuhin "I la chau hle anih kha, muhil leh rawh. Engmah hlauh tur a awm lo ania, i bulah ka awm tlat tawh dawn alawm" a ti nghet churh a, ka chalah a rawn fawp zui nghal vang vang bawk.



Nichin lawka thil thleng kha ka ngaihtuah let lo thei lova. Ka mangan zia leh puitu ka mamawh zia kha ! Vanmala hi rawn thleng ta lo hlauh se engtin nge ka awm ang? Ngaihtuah pawh ka ngaihtuah zui ngam lo.




A rawn lang thut kha ka lawm lutuk avangin ka mittui a rawn hnâm leh tiam tiam a. Mit ka chhing zui chial a, ka biang a rawn lum thla nghal pap mai.




Chu veleh Vanmala thaw hrawk ri ka hria a, ka mittui luang chu a kut dam zet hian a rawn tuai hul a.



"A pawi ka ti lutuk, ka thiam loh vek ani. Engtikah mah khatiang thil kha i tawh leh ka remti tawh lo" a ti leh mawlh mawlh a. A âw inthiam lohna a khat chu hriat hmaih theih a ni lo, a khawngaih thlak letling hial zawk.




Reilotê ka chhing leh sek a, ka harh chhuah leh takah chuan ka mitmeng vai riai te chu a reh vek tawh a. Ka awm pawh a nuam ta sawng sawng mai.



Vanmala'n min lo la thut chilh run a, ka kutphah tereuhte chu a kutphah hlai zetin a lo la hum run a, ka kut chu a lum vung vung thei.



Chutia ka harh leh ta tih a hriat rual chuan min rawn be nghal vat a "I tha tawh em?" a rawn ti nghal sup. Ka lo nuih seih a. A hmel ka hmu leh ta chu ka hahdam sawng sawng mai.



Ngaihtuah hmel lutuk hian min melh ngawih ngawih a, ka kut chu chêt hlekin a biang chu ka han tawk da da a, a kutin ka kut tereuhte chu a lo hum hnan ve hmiah bawk.




"Min timangang lutuk" a ti sup a, ka kut chu chelh nghet sauhin a hmuiin a nawr nghal vang vang bawk. Mittui tling pamin ka lo melh reng ringawt. Ka hlim lutuk chu sawifiah ngaihna ka hrelo.




Rei tawk fang ka kut a fawh vang vang hnu chuan a rawn hawi chhuak a, ka chalah a rawn fawp leh vang vang a. Ka thinlung a che dawt dawt mai.




Ka hawi kual a, kan awmna chu damdawiin a ni tih ka hre nghal mai a. Ka kut lehlamah chuan drip min lo khai sak va bawk a.




Vanmala chuan "I taksa a chak lo lutuk a..." a lo ti sup a, a inthiamlo hmel ka hmu leh tawh.



Damdawiin a min hruai laite kha engmah ka hre mumal lova. Tin, khami hmuna a lo lan thut theih dan pawh kha ka hre hek lo. Ka let dawn tih ka hrilh bawk silo. Engti tiha lo lang thut nge maw a nih le?



"Engtin nge i rawn lan thut theih a?" ka tih chuan a thaw chhuak nghal hawk a. A hmel a chang nghal tawlh tawlh mai, "Vensangi'n min lo hrilh alawm" a ti tawi tuk a, ka lo meng awk a hmuh rual chuan "I motor chuanna hmasa driver khan Vensangi a lo hrilh a, tichuan Vensangi khan min lo hrilh chhawng veleh a" dam deuh zawk hian a ti leh a.




Mak ka la ti tho mai, number thar a hmang tawh si a. U Vensangi nen chuan inbiak pawh ngaihna a awmin ka hrelo.



"Engtin nge a lo biak theih che a?" ka ti leh hap a, "Ka hrelo le" a lo ti hul hawk ringawt.



Lungawi lo hmel leh thinrim hmel a put tlat avang chuan engmah ka zawt zui ngam tawhlo. Ka ngawi ta kar a. Mahse amah zawk chu a rawn thaw chhuak nghal ham ham a.




Che chhuak hmasa zawkah rawn tangin ka kawr haklai chu a kut dam ruih hian muangchangin a rawn hlim tawm a, eng nge a tih dawn tih ngaihtuahin a ngaihna hrelo fe hian ka lo melh reng a, ka dul thêp zaih chu a rawn chûl ta hauh hauh a. Min ti bangbo hle ringawt.




Ka dul chu a kut pahniha chelhin a rawn inbengkang a, a hmuiin a rawn nawr chilh nghal vang vang a. A hmui lum ham hamin ka pum a rawn sik takah chuan ka lo ip chawih mai.




Ip ngar ngar chung hian a sam buk deuh laih chu ka zuk tham salh a, a rawn thaw chhuak hawk mai.



"U Vanmal..." zawite hian ka ti a, a awmdan chuan ka ngaih a titha lo riau.



A hma aia na zawkin ka pum chu a rawn nawr leh vang vang a. Chumi hnuah chuan inlahrang hlekin chiang fahran hian min rawn melh a "I pum chhungah hian ka fa tur a awm anih reuh chu" a rawn ti chhuak hlawl mai.



Hmangaihnaa khat mitmeng hian min rawn melh a. Nichin lawka lungawilo hmel leh thinrim hmel zawng zawngte kha a bo diak tawh.



Hamhaih fe hian ka lo melh haw a, min nuih suk suk a, ka bianga rawn tawh zeuh pah hian "Nau i pai tih pawh i in hre miahlo ania" a ti sup a.



"Eng nge i sawi awmzia?" hamhaih zet hian ka la ti hram a. Ka dang a ro nghal halh mai.



Ka dûl thêp zaih mai rawn chûl leh hauh hauh pah chuan chiang fahranin min rawn melh leh a,a mitmenga hmangaihna, phûrna leh lawmna inchawhpawlh nawk te chu hmuhnawm tham a ni.




"Mamte...nau i pai" chiang fahran hian a rawn ti leh ta a. Ka harh chhuak thut hi a ni ber. Ka lung a rawn phu rang dawt dawt a, ka awmdan chu ka sawifiah thiamlo.



Ka dul thêp zaiha ka pasal kut chu ka zuk hûm hnan a, awihlo leh phûr bawk si hian ka pasal chu ka melh kal a. Ka mittui a tling nghal pam mai.



"U Vanmal..." ka ti tiau a, ka âw a lawi vek. Awihlo bawk si a ka melhna chu "Kar hnih a tling tep tawh" a lo ti sup a. Lungawi hmel hliah hliah hi a pû a, a lawm takzet niin ka hria.



Kei hian nau ka pai tih pawh ka lo inhre miah lo thei ania. Ka hun tawnin a zir lo ve em a,dem theih pawh ka ni hran biklo chuan ka hria.



Lawm zet hian ka tah nuih ta hak a, U Vanmala chuan ka biang a rawn khuap nghal rûn a. A hmuiin ka chal a rawn nawr vang vang a,a thaw chhuak suai suai mai.



"Ka hmangaih zia che hi i hria em?" a ti ril ruih a, min hmangaih lutuk thu a sawi tum vena ni awm tak ani. Chu bak baka chiang chu ka phut bik lo.



A kutzungpuiin ka hmui hnuai chu a rawn tuai hauh hauh a, chutah kiai sukin ka hmui chu a hmui lum thar tharin a rawn nawr chilh nghal hmiah, min fâwp dek dek mai. Duhthawh ru zet si, hmanhmawh miah silo hian min fâwp dek dek a. Nuam ka ti veng veng mai.




A inlakhran hnu chuan ka thaw chhuak nghal ham ham mai. Kan hun tawn harsa zet karah hian he kan fa lo piang tur hian hlimna leh vanneihna min rawn thlen mawlh teh se.




Ka dul chu ka kut pahnihin ka dawm vang vang a, a chhungah hian naute a awm mek chu a ni ve awm si a. Ka ngaihtuah zawng ringawt pawh hian ka hlim lutuk hi ka â thei mai dawnin ka hria.




U Vanmala chuan "Kan fa lo piang tur nen hian tha takin ka enkawl ang che u" inringtawk tak hian a ti nghet charh a. Ka pasal hi ka ring tawk, a thusawi chu a ti ngei dawn tih ka hria.



Doctor a lo luh zui takah chuan chanchin a lo zawt vat a, min rawn check nghal zung zung a.



Chutah Doctor chuan "Drip khai zawhah hian in haw thei ang. Thla khat han liam se ennawn leh ka duh dawn a. Naute chungchang pawh chiang zawkin a hriat theih tawh ang. Tunah chuan chawlh kar hnih êm pawh a la tling lova, thla te han liam sela chiang zawkin kan sawi thei chauh ang. Lo in enkawl tha ula, in uluk zual a ngai dawn ania. Thil ei loh mai mai te kha tih chî a ni miah lo aw. I rilru pawh hahdam bawk sela a tha ber ang" a ti dap dap a.




Vanmala pawh chuan Doctor thusawi hriat hmaih hlau ni awm fahran hian uluk zetin a lo ngaithla ve a."Pu Vanmal, i nupui hriselna hi ngai pawimawh zual rawh aw" doctor in a tih leh chuan lungawi fahranin a lo bu nghauh nghauh mai. Naupangchhia ni nghal lo chuan.



Doctor chhuak tur chu cabin pawn thleng a va thlah a, eng eng emaw chu an sawi zui hramin ka hria.



Reilotê ah lungawi hmel fahran hian a rawn lut leh a. A khi sûng reng a, Vanmalsawmhlua mi thutak ren run kha a ang lo hial zawk.




Min rawn pan a, thil sawi tuma a ang zuai tawh chu a phone a rawn rik leh avangin a han be leh rih a. Ka bul maia bia anih avangin an tawng ka hre ve pha vek.



"Karleh lamah chuan kan close theih ngei ka beisei tawh ang" a ti nghet churh a, min rawn melh zawk a. Ka lo melh vang vang min hmuh chuan hmui phunin a ukil a nih thu a rawn sawi a. Ka lo tang nghal teuh mai. Case chungchang an sawi tih ka hrechiang êm a.



Chutia ka lo bengkhawn viau tih a hriat rual chuan ka ngaihbel nge mawni a tawng zawi zual sauh a. A phun sup sup ri bak ka hre tawhlo. A hnu deuhah chuan "Nakinah ka lo be tha leh ang che, ka buai rih tlat" a ti ta a. Phone chu a dah zui nghal mai bawk a.




Ka bul a lo thlen leh rual chuan ka lo melh ngar ngar a, mitmeng dam thlup hian min melh a. "I ril a tam tawh em?" a tih chuan "Tinge tun thlengin hetia i la awm theih?" ka han ti ngawt pek a.




Thil mak a ni ve teh tak bawk a. Khati khawp khan a mualpho a, pawngsual phei chu a case a serious ropui mai si. Chanchin tharah zawng zawng nen thiamlo changin a awm vek tawh a
Chuti chung chuan tunah zalen takin a la awm thei a. Zalen lo se ka tihna lam nilo in zalen taka a la awm thei chu mak ka ti em a ni!




Ka pasal chuan min melh let ve ngur chung hian "Bawrhsap meuh ka nih ve hi" a lo ti sup ringawt a. Ka lo duhkhawp der lo.




"Sawi chiang la" ka ti sep a, chutah inngaihtuah ni awm tak hian a han ngawi leh ren rawn a. Min hrilh tlang law law a remti ta aniang. "In kan thlen hunah ka hrilhfiah vek ang che" a ti ta nge nge a. Ka lo phur kher mai.




Drip pawh chu kan khai rei tawh lo, chutia kan khai zawh takah chuan ka chak thar sawt maiin ka hria.



Bill leh tihfel ngai ang zawng zawng a tihfel hnu chuan ka duhthusam ang ngeiin min haw pui ta a.



In kan thlen meuh chuan khua a lo thim lek lek tawh. Chutia Vanmala bula ka awm leh thei ta mai chu ka hlim takzet ! Ka duhthusam ber kha a ni si a.




Ka pasal chuan min dimdawih em em a, min vêng rún a tih theih ang. Ka mutna turte chu a lo dah rem zung zung a, nuih a tiza lek lek mai.



Ka nuih hak hak takah chuan lai zet hian "Ka nupui a la rai ngai lova" a ti pek a, za zet hian ka nui chhuak ta hawk hawk a. Ani pawh chuan a thilsawi âtthlâk zia chu a hrechhuak leh nghal aniang, a rawn nui veleh ta huk huk a.



Min mut rem tir hnu chuan thil ka hre chhuak zawk mai. Vanmala chu ka zawt nghal vat a.



"Engtin nge min khawih tum tupa kha i tih?" ka ti teh tawp a. A hmel dam zet kha a rawn inthlak nghal a, a bek a rawn pawng nghal tawlh tawlh a, a thinrim nghal hle niin ka hria. Chutihrual chuan ka chungah a thinrim lo tih erawh ka hrechiang hle thung.



"Jail ah a awm" a lo ti hluk a, ka mak ti deuh chu a hrethiam aniang "I awmna kha keimah chauhin ka rawn pan hlei nem, mi pahnih ka rawn hruai tel alawm. Ka buaipui lai che khan ka mi hruaite chuan an lo man fel diam tawh" a ti tha veleh mai bawk a. Ka lo bu nghat nghat ringawt.




Ka bul chetah chuan a rawn tlu zal ve a, ka dul bawk a rawn dawm lehnghâl vat a. "Kha ai khan lo tlai ila chu a pawi viau ang, ka inthiam thei tawh ngailo ang" inthiamlo zet hian a rawn ti chhuak hrawih a. A mitmenga pawi tihna chu ka hmuh hmaih hauh lo.




"A hun takah i lo thleng alawm" hnem tum tak hian ka lo ti ve sap a. Inthiamlo lutuka awm tur chuan ka duhlo bur.



A âwm ngheng tura min mut thattir dawn lai tak chuan a phone bawk a rawn ri leh a. Phun hluk chung hian a ban zui zat a, min rawn melh zawk a, chiang fahranin ka lo melh ve bawk a.



"I nu..." a tih rual chuan rang zet hian a kuta phone chu ka chhuh nghal rawk rawk a. Ka off zui nghal hmak, ka chezia chu hamhaih zetin min lo melh mawl tawp a.



Mangang lutuk hian "I bulah ka awm duh tawh" ka ti ta thlawt a. Thaw pik hmel lutukin a rawn thaw chhuak nghal hrawih a.



Min hnar nawn leh ka hlau takzet. Mahse tun tum chu eng dinhmunah pawh dingin min hnar leh mah se kalsan ka tum tawhlo bur. A bulah hian ka hlim ber tih ka hrechiang tawh tlat.




"U Vanmal... Aizawl-ah min dah tawh suh" ngenngawl zet hian ka ti leh thlawt a. Ka nû min pawh then tum dan zawng zawng te ka ngaihtuah let a, ka mangang lutuk chu ka mittui a tling leb teuh thei. Ka rilru no ta lutukte hi ka in hrethiam tawh biklo.



Ka pasal chu ka kuahbet tai a, a âwm khauh tungah chuan beiin nghet zet hian ka kuah thlawp a. A che deuh dat chu inlakhran a tum emaw tiin ka la kuahbet tai a.



"Mamte...min en teh" a tih pawh chuan ka chesawn duh der lo. Ka mittui rawn tla ringawt chu ka haw lutuk.



"Ka duat..." ngenngawl zet hian a ti leh a, a âw a min duatna chuan min ti zuau zual sauh a.



"I hlatah min dah tawh suh" tah insum hrawk na urh hian ka tichhuak hraih a. A âwm ah ka hmai ka la phûm tlat bawk.




"Mamte...min han en phawt teh" thupe aw zeta a tih takah chuan ka mittui tlakna avanga meng phe ruai chung hian ka han melh a.



Phun hlukin ka mittui luang te chu a kut dam zet hian min tuai hul sak a.



Amah en thei tura ka khabe chawisan salh pah chuan "Tunah chuan min ngen ngawih ngawih pawh ni la, i awm hran ka phal tawh dawnlo. Ka rualin i pen ve zel tawh ang" a ti nghet ta churh a, ka hahdam ta huai huai mai.



Tlema ka mut hahdam deuh hnu chuan U Vanmala chuan ei tur min siam sak turin choka lam min pansan ta a.



Chutia keimah chauha ka awm takah chuan ka dul thêp zaih mai chu tîm dai hian ka zuk dek a, ka chûl ta hauh hauh a. Hetah hian kan pahnih fa tur a lo awm reng chu a ni si a. Thil thlen dan zawng zawng hi a rang teh phut lutuk a, a awihawm loh hial zawk.



Tunah chuan tuman min pawt then tawh lovang. Ka nu pawhin hetiang dinhmun ka din takah chuan min pawh then a tum tawh bikin ka ringlo.




U Faktei ka hre chhuak zawk a, tunah hian eng ang chiahin min la ngaih ang tih ka hre thiam lo. A dinhmun atanga thlir chuan khatiang taka min ti kha âwm ka ti hliah hliah. Ka nu ka dem ta ber mai. Ka chunga an tha em em chung pawhin a hel tlat a. A fanu hmakhua tur hi a ngai lo emai.




Rei vak lovah U Vanmala chu ei tur chawiin a lo lut leh a. Min rawn nuih suk a, ka mutna khumah chuan rawn thu vein side table ah a thil lo ken chu a nghat a. Ka tho kang tur chu min lo pui vat.



Ka lo nui hak mai, min dimdawi vel lutuk chuan ka nuih a tiza. A ngaihna hrelo fe a min lo melh chuan "Keimahin ka tho thei reng alawm" nui hak hak chung chuan ka ti a. "Ka hria alawm" tih liam puat pahin min lo pui ta tho.




A soup siam tui zet chu min rawn barh a, thil ka ei mumal lohna a rei ve tawh bawk nen a siam tui bawk a, ka hawp zo vek.



"I duh leh em?" a tih chuan lu ka lo thing vat a, ka puar tawk viau ani. "Nakin deuhah zanriah kan ei dawn nia, thil i ei tha lo viau niin Doctor khan a sawi a. Kan naute tan hian thil ei tam i ngai ania" a ti leh mawlh mawlh a. Thuawih zet hian ka lo bu nghat nghat mai.



Ka awmdan hahthlâk zet avang khan thil ka ei tha thei lova. Ka nu laka ka lungawi lohna te kha châw ah ka lo hrithla mai thin a. Kan naute in a lo tuar char char a, tun atang chuan khatiang mai maia awm thei kha ka ni tawh lo.




U Vanmala chuan "Tha taka ka enkawl che a ngai, tun atang chuan thil i ei teuh teuh ang a. I duh apiang chu sawi zel la, ka tih hlawhtlin sak zel ang che" a ti dam leh thlup a. A thlamuan thlak veng veng mai.




Min chhuahsan a hreh avangin a ukil Zama pawh in lamah a ko tawp a. An inbiak chhung chuan room ah keimahin ka lo awm a. Case kal zel dan tur chu ka hre ve chak zek zek tawh. Min hrilh vek tur thu a sawi kha a ni a, dawhthei taka lo nghah chu ka tih theih tawk a ni.



Nuam lo zawk zawk ka ni tawh lo bawk a, ka tho kang a. Ka thuamhnaw hak lai chu ka ning hluah hluah tawh. Intifai turin bathroom ah chuan ka lut a, tuia ka inphuh tir seng seng takah chuan ka hahdam sawng sawng mai.




Ka inbual zawh chuan ka inthlak sawk sawk a, thawmhnaw engmah keng lo mah ila hnutchhiah sa ka nei nual tho a. Hak tur chu ka haihchham bik lo. Mahse ka phone ber ka keng ta bawk silo a, tihtur a vang duh kher mai. U Vensangi lah kha engmah chanchin ka hrilh zui ta bawk si lova.



Ka sam huh hniang ka hruk mawlh mawlh lai chuan Vanmala a rawn lut a. Ngainat awm zet hian min rawn nuih a, "I lu i su elo?" a tih chuan "A bal lutuk a" ka lo ti ve mai a.



"I hritlang mai tur asin" a tih chuan ka lo nui tawi tak ringawt. Tum dangah pawh zanah ka su fo a, ka hritlang em bik lova. Tun ataka ka hritlan chhan tur ka hrelo.



"Chaw ei ka siam peih tawh ania" a tih leh chuan ka lo ka hau mai. "Min lo hrilh la, ka siam thei reng asin" ka lo ti hap a. Min nuih suk ringawt.



Min rawn pan hnai a, ka kawngah chuan a kut rawn rawlhin a lamah min hnuk hnai salh a "Hmeltha nu" ka hmai bul chetah chuan a rawn ti vut. Ka lei ka chhuah vak ringawt a, a nui ta hawk hawk mai.



Inhnuai lamah chuan kan inzui thla ta a, chawhmeh a lo siam ve dul mai.



"Engtik laiin nge heng zawng zawng hi i lo siam a?" ka ti hap a, a nui suk duh lek chauh.


Ka chawei lai te chuan lungawi hmel zet hian min lo melh leh vung vung thin a. Kan inen a, kan nui kan nui mai.



Chawei hmun tihfel leh thleng sil pawh ka tih a phal thak lova. "I over mange" ka tih chuan a nui huk a "I hrethiam ve pha kher lovang" a lo ti duh lek chauh.



Zan muthmunah chuan case chungchang chu ka zawt fiah ta a. "Medical evidence vel kha eng nge a awmzia?" ka ti thawr pek a, ka ringlo a nilo. Khatiang finfiahna an hmu daih thei kha mak ka ti em ani, amah ka rin lutuk vang zawk anih ber chu .




A saisir zawngin ka mu a, ka hnunglam atangin min rawn kuah rûn bawk a. Ka him hliah hliah mai.



Ka dûl a zût hauh hauh pah chuan ka zawhna chu min chhang ta a "Medical evidence kha an tan finfiahna tha tak angin lang mah se kan tan kawng a ti awlsam daih zawk ania. Kan case khirh lutuk kha a rawn ti awlsam sawt zawk. Bawihbawihi check tu Doctor kha min haw em em tu ania..." a tih chuan ka han melh chho ha a.




Min kuah ngheh salh pah chuan "Mak ti lutuk duh suh, ka hnathawh avang hian haw tu ka ngah alawm. Doctor unaupa kha hmanah, Lawngtlai ka thawh tirh vel hi ni ta in ka hria. Damdawi tawlh ruk chungchangah kan lo man tawh a, case rit tak a awrh phah nghe nghe. Unau inpawh leh inhmangaih tak an ni tih mi sawi atangin ka lo hria a. Heti zawng hian a unaupa tan phuba lak a tum pawh a ni mai thei. Zama nen kan chhui chiang a, Doctor pawh hi a unaupa damdawi tawlh ruk case ah khan a lo inrawlh ngei niin kan hre lehzel a. Pawngsual case ngawr ngawr pawh a ni ber tawhlo, thil dang kan hai chhuah belh lehzel a. Duh chuan tunah hian case hi close fel thei tawh tur ka ni a. Mahse Doctor pa hi awh tel tir ve ngei ka duh, hetiang mi hi ram hmelma dik tak an ni a. Chuvangin chinfel vek law law ka duh" a ti dap dap a.




"Bawihbawihi hi anih leh engtin nge a awm ang?" ka lo ti hap a, a ngawi deuh vung vung a. Ka han melh chhoh leh chuan thil ngaihtuah zui rauh rauh hmel hi a pû a.



"Mamte...i ngaihdan chu ka hrelo nain Bawihbawihi hi case rit tak awrh tir ka duh. Ka rilru a chhia pawh i ti mai thei. Mahse ka dawhtheih chin a pel ve takzet tawh a. Heti hian a theih chin chin ah inpawt fan sela, a âwk buai telh telh tawh dawn tho. Mipuiho erawh an hmin hneh khawp mai. Pawngsual case anih chu thuhran, kei sawrkar hna chelh lai ka lo ni lehzel bawk sia. Boruak a sosang lo theilo a, thudik tawk lo vawrh vir kualtu an lo thahnem bawk nen" a ti ta duah a.




A ngaihdan chu ka lo tawmpui hmiah, Bawihbawihi case rit tak awrh tir pawh chu ka duhthusam a ni. Khati khawp khan ka pasal hian a lo ngaihsak tawh thin a, an chhan let dan hi ka tha nat pui tlat alawm.




"I tihdan kha keichuan tha ka ti vek. Mahse tinge tunah hian zalen deuha i la awm theih zawk a?" ka ti hap a, a lo nui ta huk. Mak ka ti em alawm, Medical Evidence kha a lem a ni emaw a tak a ni emaw pawh nise Police in an man miahlo hi mak ka ti.



Chutah Vanmala chuan "Chanvo ka nei ve alawm, Medical evidence awm tawh mah se court ah dilna kan thehlut a. Hei kher hi chu ka hnathawh vang liau liau a ni ve tlat. Mipui hoin 'Thil a tihtheih avangin zalen takin a la awm a' an tih hi chu a dikna chen a awm ve ania. Thil ka va tithei viau e ka tihna ni lovin ka sawi tum chu i hrethiam ang. Kei kher chu nilo ila zalen ngaihna a awm tawhlo" a ti leh luam a. Nghal zet hian a nui suk suk a. Eng thil tak chu nge maw a lo tih ni.




"Anih chuan engtikah nge case hi kan close theih ang?" ka lo tih chuan "Karleh lamah hian a hmawr kan bawk thei tawh ngeiin ka ring" a lo ti tha ve mai bawk a.



"I hna chungchang hi engtin nge ni zel dawn?" ka tih leh chuan pangngai tak hian "Tunah chuan case awrh lai mek ka nih avangin min suspend rih a, case kan chinfel hunah chuan ka thawh zawm thei maiin ka ring a. Chutihrual chuan a harsa ve det mai thei. Keima lamah pawh hian inngaihtuah ve viau chu ka ngai tawh ang" a ti leh luam a.




"Eng inngaihtuah maw?" ka ti leh hram a, a rawn thaw chhuak hawk a. "Ka thawh zawm dawn leh dawn loh hi mawle. Ka hna nuam tih ber leh ka tette atanga ka lo tum ve rauh rauh tawh kha a ni a. Ram tana ka tih theih tawkah ka ngai ve thin. Mahse tunah chuan mipui thinrimin min chhilh rawn ta luai luai si a. Thiam lo chang ta tehreng pawh ni ila mipui rilru hi a pelhe vek tawhin ka ring a. Min ring tawh mai maiin ka ringlo. An rin miah lo ni chunga an tana thawh zawm zel chu a harsa tawh ang" a ti ta dap dap a.




A ngaihtuahna buai ve tur zia chu ka dâwn thiam pui ve ruak mai. Amah fak em em thin tute khan tunah chuan an do rawn luih luih a. A dikna hai lang pawh ni sela a thiltih theihna vanga zalen taah an ngai mai thei ani.




Zawhna zawh tuma ka ân leh ziau lai chuan amah zawk chuan "Muhil tawh rawh, i chau lutuk palh ang. Nakinah kan sawi leh dawn nia" a rawn ti ta sup a. Tlai lamah khan ka mu hnem lutuk a, chaw ka ei tha tawh bawk nen ka chau viau tawhlo. Mahse a thusawi chu hnial ka tum hran lo.




Tunah chuan a bulah ka awm tawh a, hlauhthâwnna tur engmah ka nei tawhlo. Thlamuang takin Vanmala taksa si thlap chuan ka chhing ta chial a.




Zing ka harh leh chuan a lo awm tawh lova, ka hawi kual nghal ruai a. Bathroom atanga thawm ka hriat takah chuan ka thaw huai mai.



Khum ka siamfel laiin inbual zo hlim tih hriat lutuk hian bathroom atang chuan a rawn chhuak a, "I mutui em?" a tih chuan ka lo bu nghat nghat a "Ka la muttui ber tum a ni ang" ka tih chuan a nui suk suk mai.




Tukthuan ei laiin a hun hman dan turte chu min hrilh zung zung a. Kal chhuan a ngaih tur thu a sawi rual chuan ka ngui nghal nghiai mai. A lo hrethiam hle ni tur ani "Ka rei miah lovang, ka lo let leh vat ang" a ti leh zung zung a. A tih tum tak pawh ti thei lovin ka tibuai lutuk ang tih ka hlau leh hnuhnawh a, hlim hmel ka pu ta hram zawk a.



A chhuah dawn chuan uluk fahranin min fâwp a, ka nuih a tiza tlat pek a. Ka hmui a sik reng lai chuan ka nui hak a, a inlahrang nghal vut "Eng nge nuihzatthlâk?" a tih chuan hmui pet ngar ngar chungin nuihza insum zet hian ka la melh hram a. Ka lu ka thing nak nak a.



Chhanna duh tih hriat zet hian min la melh ngur a, "Nuihzat tur eng nge awm?" a tih leh tak nghut ah chuan "Khati em ema min thlahlel si, Aizawlah te min haw tir vel a" ka ti hlak a. Mit tizim sun hian min melh ta run run a.



Chutah fiamthu ti tak deuh hian "Ka hawsan leh daih mai ang che" ner nang chung hian ka ti leh a.



"Sawi pawh sawi tawh hlek suh, min hawsan han tum vaih teh, ka phuar bet che ang a. Ka kuah char char mai ang che, ka fawp reng bawk che ang a" a ti ta khur khur a. Za zetin ka nui chhuak ta hawk hawk a, ani pawh a nui veleh tho.



Min han fâwp leh ngawng ngawng a, ka lo chhang let ve vat a. Rei tawk fang min fawh hnu chuan kham loh hmel zet hian a inlahrang a, a phun sup a. A thusawi ka hriat chian lutuk avang chuan ka kawchhung a tek chhawk mai. Ka sa nghal hat hat bawk.



Lai zet hian lei ka chhuah khum a, nui hawk chung hian "Zanin chu i mu miah lovang" a ti leh kher a. Ka zak hle tawh.



Min chhuahsan chiah chu ka ruak nghal vek maiin ka hria.



Tih tur em em a awm lo bawk nen TV ah YouTube connect in thil nuihzathlak deuh deuh ka en a, mahni chauha awm e tilo chuan pum na vek khawpin ka nui a, ka mittui a tla phung thei.




Ka beisei ai takin ka rilru a hahdam a, thil dang ka ngaihtuah kual vak duh tawhlo. Ka pasalin a ngaihtuah kim vek dawn tih ka hrechiang lutuk tlat.




Ka lo chhing sek a nimai thei, ka taksa rem zeta min kuahbet runtu an awm avang chuan ka harh chhuak hlawl a. Ka rim hriat than tak rim hi ka hre zui a.



Ka chet deuh dat takah chuan ka pasal âw ka hriat zawm zat a, ka kawnga min hmer ngheh salh pah chuan "I lo muhil daih a" a ti sup a. Hahdam zet hian a âwmah chuan ka hmai ka phum tha sat sat a, a nui huk mai.



"I lo va haw leh hma ve" ham bai bai chung chuan ka ti sep a. Ka beisei ai daihin a lo haw hma.



"Nia, rin ai takin kan thil buaipui kha a lo awlsam ta phian a" a ti sup a.



"Dar engzat nge?" ka tih chuan "Dar 1 pawh a la rilo" a lo ti sup. A âwmah chuan ngawi rengin ka bawk ta hle hle a, a lungphu dup dup ri chu thil hriat hrehawm tak a ni hran lo. Ka kim hliah hliah hiah bikin ka hria.




"I duh chuan muhil leh rawh" tiin ka hnungzang chu a lo chûl hauh hauh a, "Ka mu hnem tawh emai, ka harh vek tawh" ka lo ti vat.



A nui zui huk huk a, a ngaihna hrelo fe a ka han melh chuan "Tih tur tha deuh ka hria" chimawm fahran hian a lo ti a. A thusawi tum ka man lutuk avang chuan "I hur" ka ti chiam a. A nui zui ta hawk hawk mai.



Eirawngbawl a hun hma chu kan mu ta reng a. Kan thutthleng chu a zau tawk bawk a, a chêp hran lo.



"I phone ka lo hawn ania aw" a tih chuan rang zetin ka han melh chho leh haw a "Engtin?" ka ti vat.



Chutah hahdam zet hian "Nizanah khan ka nu nen kan inbia a, min lo thawn nghal alawm" a lo ti sam et a.


Chutiang a nih chuan ka chanchin hi an hre vek tawhin ka ring. Ka chhungte lam pawhin an hriat ngei tawh ka ring tlat.



"Anih chuan keima nu nen in inbe tawh em?" ka lo ti halh a, "A ngaihtuah hle mai che" tih chiah a sawi.



"A thinrim em? A hau che em? Nangmah a mawhpuh leh vek tawh che em?" ka ti zung zung a. Ka nu nen an inbe tawh anih chuan tawngkam hriat nuam lo zet zet a lo fah leh tawh ngeiin ka ring.




Chutah Vanmala chuan pangngai tak hian "A lung chu a awilo khawp mai. Mahse engmah tih theih a nei tawh chuanglo" a lo ti hmiah. Sawi tam lo mah se ka nu nen an inbiak dan tur chu ka tinzawn thiam nghal ruak mai.




"Ka pa hi a ngawi thei i ti em?" ka rilrua a lan ang ang chuan ka ti ta thlawt a. A ngawi thei ka ti em ani. Vanmala chungchanga a ngaihdan te pawh chiang takin engmah min hrilh ve lova. Ka nu in a duh duh danin min tikual zawk a.




Chutah Vanmala chuan "I pa nen chuan kan inbe reng alawm. A ngaihtuah viau che ania" a lo ti sam leh et mai a. "Ka pa nen in inbe reng maw?" ka tih hluai chuan a lo bu nghut a. Zawh zui pawh ka tum tawh hran lo.




Mipa thû hla a ni a, a nawi viau lo turah ka ngai hmiah.



Vanmala chuan thei chi hrang hrang min lo hawn hi a lo nia. Vitamin a lo hawn dul bawk a, dawr thil eng eng emaw a lo hawn nual bawk.



A thil hawnte chu amah chuan a lachhuak zung zung a "Heihi taksa tan a tha an tia" "Hemi hi chumi khami tan chuan a tha" tih velte chu a sawi tel zung zung a. A thil rawn hawn chu a thahnem tham si a, a thusawi nen chuan ka chhinchhiah seng lo.



"Khawi atanga i hriat zozai nge?" ka tih chuan "Doctor ka râwn alawm" a lo ti sam then a. A awmdan helh hawlh lutuk chu khap daih chi pawh va ni suh. Lungawi em em hian ka pasal min ngaihtuah em emtu chu ka melh ngawih ngawih ta tawp.




Ka vannei thlawt a ni e.



____________*__________*_________

(Duh ang taka ziah chhuah hi a van harsa thin tak. Mahse min hrethiam zel a, ka lawm thin ngawt mai. )


Show post links
Top