DEPUTY_COMMISSIONER By_CVL_Awmpuii (Completed)

[Ngaia]

DEPUTY COMMISSIONER
By CVL Awmpuii



Chapter 13



Scooty chu ka tinung ta vat a, ka inkhalh chhuah hnu thleng pawh chuan ka ngaihtuahna ah thil dang a awm theilo.



Ka ngaihtuahnain thil ni thei tur awm ang a chhui thleng zut zut a. An thusawi awmzia kha eng nge ni ang.



Bawihbawihi te nufa chu Vanmala te inah an awm dawn tihna em ni ang? Vanmala khan a nu bulah a dil ang a, Nu Malawmi khan a lo remti lo em mawni dawn le? Ka ngaihtuahna a bing mup mup a. Thil awmzia hriat chakna hlirin ka khat.




Eng pawh chu nise eng vangin nge Vanmala khan a nu bulah Bawihbawihi te nufa chu an ina awm tura a dil? An inlaichinna hi eng chiah nge ni ang? Inngaihsakna satliah ringawt chu ni theiin ka hre tawhlo.




Ka hnunglam atanga "Thiannu, i site ah tlan rawh" tia min rawn auhna ri chuan ka ngaihtuahna kal ding lutuk atangin min thing harh nawlh a. Ka hmaa motor lian lo tlan mek nen chuan kan lo insu tep a. Ka site ah ka tlân ta vat a.




In ka thlen hnu thleng pawhin ka ngaihtuahna a buai. Vanmala reng reng pawh helamah a lo haw tih ka hrelo hrim hrim a. Ka lo rindan chuan Lawngtlai ah awmin hna a thawk ngawrh hle turah ka lo ngai a.




Chutia ka ngaihtuah buai em em lai chuan a hnen atangin call ka la dawng zat zui.



Thinphu dep dep chungin ka pick up a "Hello" ka ti zawi rat a. "Hei ka lo haw a, zaninah ka lo leng dawn nia" a rawn ti teh tawp a. A nu nen an inbiak laia a aw nen chuan a danglam leh daih tawh. Nichina a nu a biak dan kha chu dam thlup mah se a tak run a, a luhlul hmel hle bawk anih kha.




"I lo haw tih pawh ka hrelo a" ka tih chuan "Ka lo sawi chauh alawm hei" nui ri hawk chung hian a rawn ti a.



"Vawiinah i buai em?" a rawn ti leh daih a. "Vawiin chu dawr ka hawng lova in vengah thil pawimawh tiin ka lo kal a" ka lo ti tha ve mai a. An in a ka kal kawi thu leh a nu nen an inbiakna ka hriat thu kha chu sawi chhuah chi pawh va ni suh.




"Min lo tlawh kawi lo anih chu mawle" a ti nuah nuah a. "Nia..." ka ti zawi sep ringawt.



Kan inbiak zawh chuan ka thaw huai mai. Ka pasal tur chu a ni si a, a chungchang hriat loh ka ngah bawk si. Kawng diklo zawh mek niin ka inhre ta hial mai.



Zanriah eikhamah ka pi nen a room ah kan inkawm a, ka rilru hah chang hian a bula awmin hahdamna ka hmu thin. Ka rilru hahna sawi vek kher lo mah ila hre vek niawm fahran hian thurâwn tha tak tak min pe fo mai. Chutiang beisei chuan ani tunah pawh a rooma ka kal.




"Pi.... Vanmala hi i rin zawng a ni em?" ka han ti teh ngawt a. A khumah chuan ka thu tha sauh sauh a. Min rawn melh ran a "I ring vak lo em ni?" a rawn ti let daih a.



Ka lo meng buai nak a, mahse thudik taka chhangin "Ka ring vak lova, amah hi ka hrechiang si lova" ka lo ti hap. Chutah ngainat awm zet hian min nuih ta var var a.




"I inngaihtuah buai ve hle a nimaw? A âwm ve tho. In inhriatna a la rei loh mai bakah i pasal tur a ni dawn a. I damchhung kawppui tur a ni dawn tlat a. Ngaihtuahna sen chu a awm lutuk. Kei ka ngaihdanah chuan Vanmala tluka i tana tha tur an awmin ka hrelo. Hrechiang lo mah ila kan hriat chhunah a thatna bak hriat tur a awm rih lova. Chanchin chhe tak nei chu nise a ni ang mi nawlpuiin an hriat hi a hmingchhe ve tawh ang. Mahse tun thlengin amah fakna hlir hmuh tur a awm ania. A ngaihsan awm zawk ngawtin ka hria" a ti dap dap a.




A thusawi chu pawm ka duh a, mahse tum dang angin ka thinlungah a thawk na thei tlat lo. Vanmala chanchin chhe zawng ka chân ruk vang pawh a nimai thei.




"Mahse, chanchin eng emaw tak chu a nei ve awm e" ka la ti hram pek a. Chutah ka pi chuan "Nangpawh chanchin eng emaw chu i nei ve tho alawm. Mi tupawh hian chanchin tha lai leh chhe lai kan nei a. Nunhlui kan nei theuh bawk. Kan nunhlui kha kan tun hun nen kan tehkhin zel dawn anih chuan hmasawnna a awm thei ngai lovang. Nangpawh Rinmawia nen in chanchin kha rawn ngai pawimawh viau zel sela chuan huat tur a ngah ve ang. Dik tak chuan i hmingchhiat vanglai tak a ni zawk hial a, mahse amah nei turin a kar ngar ngar che ania. Ani pawhin nunhlui a nei dawn a. Rinmawia nen i chungchang nilo zawnga miin an sawi ang chiah khan a chungchang nilo zawnga sawitu pawh an awm ve mai thei. Chumi hunah chuan in tanrual hle a ngai tawh zawk ang" a ti leh dap dap a.




Tun tum a thusawi chuan ka ngaihtuahna a tithui ta khawp mai. Ka pi hi chuan ka tana tha tur anih chuan a ruh lang rawt rawta thu min hrilh a hreh hran lova. Ka haw ngai miahlo bawk. Rinmawia a rawn hmer tel pawh chu ka haw hran lo.



Thutkhawmna pindan lamah Vanmala thawm kan hre ta a, chu veleh ka pi chuan "Hawh, i va chhuak teh ang" a ti hluai a. Ka ding zui ve nghal mai bawk.




Vanmala miziaa mak ka tih leh deuh chu, ngainatawm vur angin lang lo mah se ka pi han biangbiak dan vel hi a thiam riau a. Ka pi kher lo pawh, mi tupawh biangbiak a thiam hrim hrim. Kei erawh hetiang lam hi chu ka pachhiatna lam tak a ni. Ka hmelhriat sa ngei ngei te pawh min biak hmasak loh chuan ka be lum lam thiam lo.




Ka pi nen kan inzui chhuah chuan ka pi zawk chu a be nghal vat a. A fing ka ti dawn nge pawh ka hrethiam lo, kei ai ka chhungte a tilawm thiam tlat.



Ka chhûngte nen an inkawm lai chuan thingpui ka lo lum sak a. Rina'n min lo pui bawk a, min fiam reng a, a nghal bawk si. Ka ning lek lek zel.



"Senior tawh lamah U Vanmala te ang i hmu zo ve ania, i va han vannei tak" tihte min chîng a. Vanmala a ngaisangin a dah chungnung vel thin lutuk hi ka hua. Eng a nih bik ka hre tawp silo. Tunah tak phei chuan ka lakah thup a ngah ropui si.




"Min pui lovin i duh leh va kawm ve rawh" ka ti ve hmak a, engah mah a ngai duh der lo lehnghâl.




Mahse a hnuah thutak zet hian "Chhaih thinrim hi i nuam ve hrim hrim a. Tak²a U Vanmala hi i phu lo bik lo, a tan nang tluka tha tur an awm bik lo. Khawvela thil tha ber ber i phu" a han ti ve ngial a. Ka nuih a tiza leh reuh sia, ka han nuih leh rih a. Min melh rum ve ta thung.




Thingpui chu ka va sem a, Vanmala chuan min lo melh leh vung vung thin a, nuam ka tilo. Tum danga a lo leng leh tun tum a lo leng chu keimah ka dik loh vang nge ka thawk a pik tun mai. Thil hre deuh reuh hrechiang si lovin ka awm a, a hrehawm.




Thingpui ka sem zo chiah tihah door bell a rawn ri a, ka lo chhawn vat a, U Mawia a rawn lut teh nawlh a. "Ehee...ve teh nawlh chuan" ka lo ti hluai a, a rawn nui vur vur mai.



"Lo leng rawh, U Mawi" ka lo ti zangkhai vah a. Vanmala ep chiahah chuan a rawn thu thla a "I thingpui lum ka chân chiah chiah a nimaw" nui vur vur chunga a tih chuan "Kan lum tha leh dawn nia" ka lo ti var a. Ka chhungte pawhin an lo be ve vat a.




Ka mitsirin Vanmala chu ka va melh a, tum danga a mitmeng ang ni lovin min lo melh tur khui a. Tihsual ka neih awm ka hre der silo. A mitmeng a thim khap mai. Melh tha ngam lovin chokaah Thingpui lum turin ka lut leh nghal daih. Rina chu an zingah thuin a titi ve mawlh mawlh tawh thung.




Ka zun a chhuah avangin ka zung leh tete a, ka zun zawh chuan thingpui no khat lek ka lum nawn leh a. Gas bulah dingin a so hun chu ka nghak ran a. Thutkhawmna lam chu an ri nak nak mai.




Thingpui a rawn so chuan ka off vat a, chini thluma ka chawh mek lai chuan ka hnung lam atang hian "Ka haw duh tawh" a rawn ti nghut a, Vanmala a ni.



Rang zetin ka lehhawi a, min melh run a, ka awm a ti nuam lo lek lek mai.



"Aw, anih muttui mai" ka han ti ngawt pek a, a lo rum nghut.



"Pawn thleng min thlah rawh" a ti hluk a, min melh rum ul bawk. Hetia a rawn awm teh thut chu a hrilhai thlak duh kher mai. Tihsual neite pawh ka ang alawm mawle.



"Lawk aw, tikhan lo thu la, heihi U Mawia kha ka va pe lawk ang" tiin thingpui chu ka lekkang a. A lo rum nghut.



Lungawi lohna tur ka bawk silo, chutia awm vel chu ka run ta tlat a.



A ngaihna hrelo fe hian ka melh nghek a, a aia mitmeng tawrhhlelhawm in min lo melh let khui a.



Mahse "Va pe rawh, ka lo nghak ang che" a ti hluk a. Dawhkan bula chair chu a pawt tawlh a, a thu thla chawrh mai. Ngaihven zui duh lovin thutkhawmna lam chu ka pan ta daih a.



U Mawia chuan min lo nuih vur vur a "I nulat laia i thingpui lum ka in hnuhnun ber a ni tawh mai thei ani" tiin min lo fiam zuk a. Ka lo ner nang ringawt.



Ka pa chuan "Vanmala khan haw a ti deuhin ka hria" a rawn ti a. "Aw, chokaah min nghak" ka lo ti vat. Ka pa chu a bu nghut a, ka nu zawk chuan "A hmanhmawh ang, va thlah vat rawh" a lo ti var a. Choka lam chu ka pan veleh mai bawk.



Ka va let leh chuan chair nghengin a lo thu awn duai a, mit a chhing vang vang a. A muhil lo tih chu ka hria.



"U Vanmal" ka tih chuan a rawn meng chhuak nghal a, min melh rum leh hle tawh. Eng chu a hria nimaw.



"Ka hman tawh" ka tih rual chuan a rawn tho chhuak vut a, ka lo phu nghek lehnghal. "Kal ang" a ti nghut a, a kal zui vut bawk. A awmdan mai mai chuh!



Ka zui chhuak a, midangho chuan min ngaihsak vak hmel loh.



A car dahna thleng ka zui a, a pen zau bik bawk si, a kal chak si a min tihah hman vek.



A car bul a thlen chuan lut ta mai lo hian a ding chut a, a rawn lehhawi vut a, a car ngheng chung chuan inkuangkuah hlun chungin, a bul ka thlen thleng chuan min lo melh reng a.




A bul ka thlen chuan a lut nghal mai dawn emaw ka ti a, mahse mitmeng hriatthiam harsa zet hian min melh ngur a. "Eng nge"? ka tih chuan min melh tur leh khui tawh.




A tawng tha duh bawk silo, lungawi lohna nei angin a awm bawk si, a awmdan vel chu ka haw ta tlat a "Eng nge i hriat a?" ka ti ta nghek a. A lo rum leh nghut tawh.



"Khatia rum nghut ringawt lo khan eng nge i awmzia sawi rawh" dawhthei lo zet hian ka ti hlur a. Ka ning tlat alawm, ka rilru a tihbuai sa tawh tehlul nen hetia a awm kual leh vel hi ka hne.




Insehruh teuh chung hian "Mawia kha tinge a lo len?" a ti ta khauh a. Min melh run a, a mitmeng chuan min dem ngawih ngawih a tih theih ang.


Kei lah chuan a zawhna chu ka lo hrethiam lo hle thung a. Mawia rawn len avanga thinrim chiamna tur ka hrelo a tin ani.




"A rawn leng duh a nimai lawm" ka lo ti awlsam then a. Min rawn hnaihchilh nghal ruak a, ka lo tawlh hnung nghal dawrh.



Mahse ka kawngah min rawn manbet nghal a. A hnaih zetah min pawt hrawk a, a insehruh nghal teuh mai.



"Min chhang tha rawh" a ti nghut a, kan inmelh hnaih lutuk avang chuan ka lo zam daih thung. Ka chil ka lem ri khawlh a. "Ka hre bik hlei nem" ka ti zawi niai a, ka dang a ro vek.



Min kuah nghet salh a, inbengdaih tum niawm tak hian mitchhing chungin a rawn thaw chhuak suai suai a. Ka chalah a hmui a rawn nawr nghal vang vang a. A awmdan in min thawn lutuk avang chuan ka lo ding mawl tawp thung.




Ka chala fawp reng chung chuan zawi tein a phun sup a, eng thu nge a sawi phei chu ka hrelo.




Chutah inlahrang hlekin nghet zet hian min rawn kuah nghal hlun a. Ka bengah a fawp tawk bawk. Hahdam tum niawm tak hian a thaw ham ham reng a. Tlanga min hruai tum kha ka hrechhuak lo theilo. Khamah ka tla tep a, a hlauhthâwn lutuk avanga min vin vak tum kha. Min kuah a, ka bekah a fawp bawk anih kha.




A awmdan teh tawp chuan min tihrilhai a, "U Vanmal..." ka ti zawi sep a, ka bekah lo fawp lehin a nui ri suk a. Ka lo ip chawih mai.



Min kuah khawm hneh bawk si, a thaw lum hak te chu ka hriat hmaih bawk silo, ka zam leh viau tawh.



"Ka nupui tur i nih hi" a rawn ti zawi ruih a, a nui ri leh suk tawh.



A awmdan a thlak kual hnehsawh lutuk chu mak ka ti.



Rei tawk fang min kuah hnu chuan "Miin min rawn hmu ange" ka ti zawi sep a. Thaw chhuak hawkin a inlahrang vut a, a thinrim dawn emaw ka ti hman, mahse ngainat awm zet hian min lo nuih a. Eng ka hria nimaw ka lo nuih let ve sak a.



"Mawia saw a lo leng ve mai mai tiraw?" a ti leh hram a, a hmel chu a ngenngawl takzet. Naupang dilchhut deuh, a thil hriat loh hriat ngei ngei duh hmel hi ka chan ber.




"Imm, a lo leng ve mai mai nih saw" ka tih takah chuan thaw huai hmel a pu leh rauh a. Hetianga a awmlai hi ka la hmu ngailo a, mak ka ti.




Ka inrin hmain ka hmuiah a rawn fawp zauh a, mahse a inlahrang leh nghal vat. Ka tek chhawk maiin ka hria.




"Ka kal phawt ang e, muttui" tih leh a car chhung luh a rual nghal a. Ka lo ding khawng lah thung.



A car tlan liam thleng chuan ka thlir zui a, ka hmui chu ka kutin ka dek zeuh a, mipa la fawp ngailo ang mai hian ka ngawng chhu mai. Khatiang infawp pawh a nilo naa Vanmala thiltih a nih vang nge min thawng leh viau tho mai.




Vawiin hi ka man hlanni a ni tawh a. Tu mai pawh chu an phur em em vek a. Ka phur ve em pawh ka inhrethiam lo. Ka awmdan ka sawifiah thiam lo.




Vanmala nen kan inkar chu a pangngai reng a, Bawihbawihi te nufa in ka rilru an kam thin hle a. Han zawh dawt kha ka ngam bawk silo, ka dawih lutukte chu ka inhaw hlur mai.



Nu Malawmi emaw tu emaw ber zawh ka duh a, mahse thil ni thei niin ka hre ngang bawk silo. Nuamlo ka tih em em chhan pawh Rinmawia nen kan chanchin an hria a, chuti chung chuan min zawt sek bik lova. Vanmala nuna hmeichhia lo awm ve pawh chu zawh buai ka inthlahrung a ni ber.



Man hlanna hun chu tluang takin kan hmang zo a. Programme kan hmang rei vak lo. A chhan pawh ka man eitute an tam fahran lova. Thenrual tha kan ngah lo tihna erawh a ni hauhlo.




Ka pain "Tunlaiah man hlan te hi hautak lutukin an ti thin a. Tul ka ti ve lo. I man eitu turte pawh laina hnai tak tak, i thian hnai tak takte chauh ni rawh se. Mi nazawng, hmelhriat pangngai nazawng eitîr duah tur a ni ngailo. Khuareiah kan inngaihsak tak tak chuang lova. A hautak zawnga inthlah vak kha a tul lo. Zahawm takin, mawihnai tawk takin ni sela a tawk chiah" a ti a. Ka lo thlawp khawp mai.




Tunlaiah man eitute an intlar thla duah mai zel a. Midangin an lo ti anih chuan ka sawi phak a awm lova. Laina hnai an ngah uchuak pawh a lo ni mahna. Mahse keichuan ka man eitu turte chu ei awm hliah hliahte an ni tur a ni ka ti ve tlat. Chu loah mi kan tihek mai mai niin ka hre pah bawk.




Kan inneihni chu a lo thleng ve ta reng mai. U Vensangi ka dinpui a, Vanmala'n an venga a thianpa Buanga a hmang bawk a.




Pasal tak tak nei tur ang pawhin ka rilru a awm lova. Reilote mipa pakhat nena chengdun ve mai mai tur ang hian ka inngai tlat a. Ka la urhsun theilo anih ber chu !




Mahse lak lap viau ka tum tihna erawh ani chuanglo. Ka thutak ve hle tho.



Inneih thutiam kan chham lai chuan Vanmala chu a thutak hmel hle a. Min hmangaih a, min nei te pawh a ang lek lek mai.



Thlalak chhung chu rei ka'n ti mai mai khawp a. Ka ke a kham vek tawh. Vanmala hian hmelhriat, thenrual tha a ngah a. Thlalak chhung an ti rei ngat ngat khawp mai.




Vanmala chuan thla kan lak laklawh lai chuan "I chau tawh em?" a rawn ti sup a, ka zep buai peihlo "Ka hah" ka lo ti sap a. "A zo tep tawh ang" a han ti ve ngial a. Min ngaihtuah hmel ve reuh lutuk.




Thlalak zawh chuan joint receiption hun tawite kan hmang leh a, a hnuah chuan Vanmala te inah ka lawi lut ve ta ran mai.



Thil danglam deuh mai chu, ruai kan buatsaih lo. Vanmala duh dan a ni. A tirah chuan ka nuin a hnial deuh a. A fanu neihchhunin pasal ka nei dawn a, ruai buatsaih lova min thlah liam chu a hreh a ni ber. Ropui taka ka hun pawimawh min lawmpui chu a duh a. Mahse Vanmala hian zawldawh takin a duhdan a hrilh.




Ruai kan buatsaih loh chhan chu eng dang a nilo Vanmala'n "Ruai buatsaihna tur pawisa chu ka nei lutuk. Mahse buatsaih loh ka duh zawk. Midangte tihhmuhtu ni zawk ang. Inneih hautak lutuk hi inneih reina pawh a ni chuanglo. A ti te chuan lo ti tho sela, mahse keini chuan mi zawng zawng mil theih turin kan ni ropui ber hi siam zawk ang " a ti kha a ni a. Khami tum khan ka ngaisang thar ngawt mai.




Ka nu pawh kan hmin thei hram kha ania.




Zan dar 11 a lo rik meuh chuan kan nupa room ah kan pahnih chauhin kan awm ta ran mai. Tihtur ka dap ka dap kual a, Vanmala chu a inphelh thawl a, khumah thuin a phone a tuai mual mual a.




Ka bungrua ho chu peih lo chung chungin ka remfel a, ka chau a, mut ka duh tawh. Mahse ka la mu ngam thlawt lo a ni ber. Vanmala lah chu chetsawn a tum hmel bawk siloh, hrehawm ka van ti tak.



Dar 12 rik dawn tepah chuan "Tikhan dah rih la, va intifai tawh rawh. Naktukah kan tifel dawn nia" a rawn ti dam thluam a. A pawilo khawp ang.




Ka tho nghal vat a. Ka towel dahna chu ka hai rak rak a. Vanmala chuan min rawn ngaihsak vak hmel loh, a phone ah thil dang a la buaipui anih hmel.



Bathroom ka luh rual chuan ka thaw chhuak nghal ham ham a. Ka mit thip zet chu ka chhing nghal vang vang bawk. Ka mut a chhuak tawh lutuk.



Ka inbual lai chuan vawiina kan hun hman dante chu ka ngaihtuah let neuh neuh a, ka hmangaih tak pasalah nei ila chu ka hlim viauin ka ring.



Bawihbawihi te nufa ka hrechhuak zawk a, an reh ta hmak a. Vanmala leh a nu inbiakna vel khan awmzia a nei ta vak lo niin ka ngai a. Ka ngaih a tha pum hlum tihna erawh a ni chuang lo.




Ka inbual zawh chuan kawr hak thlak ka ken luh sa chu ka inthawlh sawk sawk a, Vanmala chu a intifai ve duh ngei ang a chumi chhung chuan lo muthilh daih ka duh.




Ka sam hru mawlh mawlh pahin ka va chhuak a, towel chauh vengin a lo awm tawh. Min rawn melh zawk a, ka lo meng awk a, laih tut tut kha ka duh tawh biklo. A lo nui mai a.



"Ka va inbual ve ange" tiin a tho vut a. Min rawn kalpel fua a. Bathroom chhung a luh rual chuan ka intifel sawk sawk a, rang zetin khumah ka lawn ta tharh a. Lo muhil hmak ang.



A inbual ri sur sur ri chu ka hria a. Muthilh chhuak viau si kha ka harh ta hlauh thung a. Ka va inhaw tak.



Zan hun chu engtin nge kan hman ral theih ang tih ringawt ka lo ngaihtuah lai chuan bathroom kawngkhar a rawn ri khep a. Ka mit ka lo chhing nghal vat.



A che sut sut ri chu ka hre thei, a inthlâk anih ka ring. Ka la harh tih hi a hre tur a nilo.


Khum chu a rawn hniam nghal duk a, a rawn mu ve anih ka ring. Kan mutdun kher a ngai emawni le tiin ka ngaihtuah a, ka tang nghal teuh mai.




Ka mutdan kha ka siam rem hman silo a, ka nghawng a rawn kham a, ka chesawn ngam tawh bawk silo.



Vanmala chuan ka rizai sin lai chu a rawn pawt ve a. Rizai insin tawm thei kan nilo, ka thu chhuak nghal zawt a, ka inveng hman lo ani ber.



"Couch ah sawn ka lo mu ang" ka ti ta tawp a. A ngaihna hriat loh hmel fe hian min melh a, kawr ha lovin a lo la mu zui.



"Engvangin nge couch ah i mut ngawt ang, nupa kan nih hi" a lo ti nghut. A khum hi a zau thawkhat a, zankhuain insi lo pawhin kan mu thei ang tih ka hria. Mahse puan kan insin tawm dawn anih chuan ka tîm tlat.



"U Vanmal...nupa ni tawh mah ila..." sawi zawm tur hre chuang si lovin ka ti nawi niaih a. "Nupa chu kan nia lawm" a lo ti khauh a. Ka rilrua awm chu ka sawi thiam chiah bawk silo.



Pehhel tawh lovin "Sex kan hmang thei lo" ka han ti ngawt pek a. Chu veleh a rawn nui chhuak ta hawk a.



"Sex hmang turin ka sawm che em ni?" a rawn ti dam ruih a. Hahdam hmel zet hian lukhamah a ban chu a kham hnan a. Min nuih vur vur bawk.




Ka thusawi chu pawi ka ti lutuk. "Aaa...min sawm lova, mahse mutdun ka duhlo ani tawp" ka han ti nawi leh nak a.



A rawn tho uaih a, thawk lehkhatah khumah chuan min nambet a, min rawn bawhbet nghal run a. Ka khek tuarh mai.



Mahse a mitmeng fiah lutuk chuan min aikaih ani ber, ka ngawi leh nghal dak mai. Phawk zeta melhin chil ka lem khawlh a.



Chutah ngainat awm zeta min melhin "Lungngai suh, mipat hmeichhiatna kawngah hian ka insum thei fu ania" a rawn ti dam thluam a. A inlahrang leh nghal vut a, ka sirah chuan a rawn mu thla a.



Mit a chhing nghal daih a, ka lo en vung vung ringawt.



"Muhil rawh, i chau ang" mit chhing reng chung chuan a rawn ti leh a. Ka mu tha vat a, mit ka chhing nghal vat bawk.



A rawn la nui chhuak huk zui a!


_____________*_____________*_____________

(Pathianni chu chawlhni a nih kha aw)


Show post links
Top

[Ngaia]

DEPUTY COMMISSIONER
By CVL Awmpuii



Chapter 14



Chiang lo ruaiin ka harh a, ka meng chhuak dawn thin a, mahse ka mit kham thum avang chuan ka meng hlei thei der lo. Chet sawn ka tum a, ka tha a zawi nghiai mai.



Ka mutna khum chu tum danga ka mutna nen inang lo riaua hriatna ka nei a. Ka ngaihtuahna a rawn fim tial tial a. Ka harh chhuak nghal zawk mai.




Rang zetin thawh phan awm lek lovin ka meng kawk a, ka thu chhuak nghal zawt bawk. Ka hawi kual ruai a, Vanmala room ah ka awm tih ka hrechhuak nghal a. A mutna ka en chuan a lo ruak huai tawh.



Sana ka bih leh vat a, zing dar 6 a lo ri tawh a, a tlai chhe viau love. Khum atang chuan ka tho chhuak a, ka ham zui bai bai bawk.



Khum tifel nghal mai lovin darthlalangah chuan ka in en vang vang a. Tunah chuan Hmingmawizuali hian pasal a nei ve ta. Ka pasal neih hun tur ka lo suangtuah ve fo thin a. Tunah ka nei ta chéng a, ka lo suangtuah thin dan nen chuan inepersan tak a ni. A hmasa berah chuan ka pasal chu ka hmangaih vanga nei ka nilo a, min hmangaih bik hek lo. Nimin pawh kha ka lo suangtuah thin dan nen a inang lo takzet ! Mahse sawi buai theih ka nei si lo.




Chutia ka lo inngaihtuah lai chuan bathroom kawngkhar a rawn ri khep a, rang zetin ka hawi vat, Vanmala a rawn chhuak hlawl a, a tho chhuak tawh emaw ka lo ti hman a. Mahse hetia a lo la awm chu ka lawm ngang mai. Mahnia inhnuai chhuk chu ka zam ve tlat atin ani. A hmingin ka mo thar tuk kha a ni ve miau a.



Min rawn melh a "I va tho hma ve" a rawn ti sup a, "Min thawh khalh zawk kha" ka lo ti pangngai ve mai a.



"I chauh ka ring a, ka kaitho duhlo che anih kha" a ti sup a. Wardrobe lam a pan a, a va hai nghal ruk ruk a. Keipawh chu khum lam panin kan mutna chu ka siam nghal mawlh mawlh a. Kan lawithat zan hman dan chu a ho ang reng hle mai tih ka ngaihtuah nghal rauh rauh mai.



A kawr a thlak a, min rawn melh a "I thleh fel zawhah kan chhuk thla dawn ania" a lo ti vat a. "I thawhna a rei tawh em?" ka tih chuan "I muhil lai kha darkar chanve vel ka thlir hman che" ti a a nuih suk rual chuan ka lo ip chawih mai.



Ka hawi sawn nghal vat a, a la nui ri hawk zui a. Hepa hi a nghal ru zek dawn niin ka hre ta.



Ka inphih fai ve sawk sawk a, inhnuai lamah chuan kan inzui thla ta a. Vanneih thlak lutukin Nu Malawmi leh U Faktei an lo la tho lo hlauh.



Vanmala chuan "An chau ve viau aniang" a ti sup a. Choka lamah kan inzui phei nghal a. Ka chet ngai lohna a la ni bawk si a, chet thiam a har fu mai thei.



Rice cooker chu ka on hmasa tete a, Vanmala chuan Fridge hawngin tui a in zui khawlh khawlh a. "Thingpui i duh em?" ka tih chuan "A sen hangin aw" a lo ti sup a.



Dining chair ah chuan a thu thla zui nulh bawk. "Eirawng bawl vak a ngai lovang, nimin lama kan chawhmeh ei bang kha a la thahnem viau in ka hria. Inleng neuh neuh kan la nei ve awm si a, chet nghal zung zung chu a pawi miah lovang" a ti zung zung a. Ka lo bu nghat nghat.



Thingpui kan in dun tete a, ka beisei ai daihin kan awmdan a pangngai a, kan inngeih rih viau, inhauhna tur awm hek lo le.




Ka chetna bulah chuan a lo awm ve ta reng a, min lo pui pah bawk a. Ka beisei ai daihin choka lamah a che zei riau. An thil dahna ka hriat lohte chu min hrilh zung zung a. A tih zia viau mai.




Rei vak lovah Nu Malawmi a rawn tho a, choka a rawn luh rual chuan "In va tho hma awm ve" a rawn ti var a, a nui nghal sang bawk. Ka inrin hmain "Nu Malawm, thingpui ka lo pe ang che aw" ka ti pek a. Ka koh dan avang chuan ka harh chhuak zui zat. Pawiti lutuk hian "Oh ka tihsual" ka ti nak a. Mahse a mitmeng hahdam zeta min melh chung hian "A pawilo, a la harsa ve dawn em a, mahse i inzir chu a ngai ve dawn nih kha" tiin a nui hak hak a. Za lo lutukin ka lo nuih let ve tawp.




Vanmala chuan min lo melh reng a, hahdam rawh ti ang hrim hian min melh ka ti mai. A hmel a dam dap a, a thlamuan pui awm viau e.




U Faktei a rawn tho chhuak zui ve zat a, a rawn tawng nghal bawrh bawrh a. Nimin inneih boruak te chu nuam a tih thu leh ka mawi zia te sawiin min han fak ve luam a. A lawmawm ve duh khawp mai.



Nu Malawmi nen chuan ka eirawngbawl min pui nghal zat bawk a. Inhre sa kan ni hlawm bawk a, kan hlim tlang ta phian mai. Vanmala erawh a nu leh nau te an lo thawh takah chuan hnathawh tur a neih thu sawiin room ah a chho leh ta kha ania.



Nu Malawmi chuan "Chawei tlai chu a buaithlâk ang, inleng an lo la awm ve nak nak awm si a, kan peih tawh chuan i ei vat ang u" a ti a.




Chawei siampui ve nghal mai ka tum lai chuan Nu Malawmi bawk chuan "Mamte, in pa han ko zawk rawh, Faktei nen chawei chu kan lo siam ang" a ti leh zung zung a. 'In pa' tih tawngkam a hman chuan engtin emaw riau hian min tilai.





Vanmala ko tur chuan ka kal ve ta nghal mai bawk a. Room kawngkhar chu ka kik a, chhunglam atanga min chhawn ri ka hriat rual chuan ka hawng vat a. Vanmala chu a computer hmaah thuin thil a lo type neuh neuh a. A rawn hawi miah lo bawk.




"U Vanmal, chawei kan tia" ka tih chuan a rawn hawi vut a, a khabe a tuai thuak a. "Hetah lo kal phawt teh" a ti sup a, a kutin min hui zauh bawk. Ka va pan ve mai bawk a.




A thutna hmaah chuan ka va ding zum zat a, min melh vung vung a, ka zam titih leh der tawh.




"Mamte..." a ti sup a, "Aw" ka lo ti vat, mahse ka melh miah lo thung. A rum nghut a "Khatin inthlahrun hmel deuh khan awm suh" a ti hluk a. Ka lo thaw chhuak hak "Engtin nge ka awm a?" ka ti nawi niai a. "Huh...min hlauh hmel thei lutuk" a tih chuan ka melh vat a. "Chutiang engmah a awmlo" ka ti nghal vat.




Ka hlau pawh a ni hran lo, a awmdan, che zia hrim hrim hian min ti zam tlat zel alawm. A chang lah hian ka ngam sak sak viau zel tho bawk si.




"Chawei turin ka rawn ko che a" pangngai tak chuan ka ti leh a. "Ka hria alawm. Kan chhuk dawn nia. Mahse chumi hma chuan thil sawi lawk ang" a ti sup a. A computer chu a hmeh zawm leh mual mual a. "Hna hmanhmawh thlak a awm thut a. Ka hnathawhna hmun Lawngtlaiah kan tum ai hmain kan let a ngaih hmel" a ti leh zung zung a.




Ka melh vat a. Kan inneih hma khan kar hnih chawlh a lak lawk thu min hrilh a. Aizawlah kar hnih chhung kan awm theih tur thu a sawi kha ani a. Ka chhungte hnaihah ka la awm rei thei dawn ni a ka hriat khan ka lawm hman viau kha ania. Tunah let hma kan ngaih thu a sawi leh thut bawk sia.




"Engtikah nge?" ka tih chuan "Ni thum hnuah kal nghal mai a ngaih hmel" a ti sup a. A computer chu a off nghal zat bawk. Min rawn melh a, ka lo ding ngui nghal nghiai mai. Ka huphurh nghal lutuk tlat.




"I duh chuan helamah i lo la awm rih ang a" a han ti leh sup a, ka melh zawk a, mitmeng dam ruih hian min lo melh a. Heta lo awm mai chu ka pawiti lo lutuk. Nikhat pawh la innei tling em lo mah ila Vanmala nena kan pahnih chauha hmelhriat pawh awm ngai lohna hmuna awm chu a khawhar thlak dawn emai. Mahse nupa kan ni tawh a, ka chhûngte'n amah chauha kal tir chu an rem tih ka ring lo.




"Ka hrelo le" ka ti ta ngawt a. A rawn tho chhuak vut a, ka dara rawn kuah thuk pah hian "Zu chhuk phawt teh ang, nakinah kan sawi tha dawn nia" a ti dam thlup a. Ka dara min kuah reng chung chuan inhnuai lamah kan inzui thla a, chawei pawh an lo siam peih vek tawh.




Ka chhungkaw thar te nen chuan tukthuan kan han kil ho ve ta thap chu ania. Ka tan chuan thil thar vek ania, an tan pawh a ni tho. Chaw chu tlemte ka ei a, ka ei tha thei tlat lo atin ani, Nu Malawmi chuan "I kham hma e, i puar hman em ni?" a lo ti hliai a, "Ka ril a vak lova" ka lo ti tha ve mai bawk. Vanmala chuan min melh zui reng tih ka hria.




Nu Malawmi tih reng chu a fuh viau lo niin ka hria a, 'Ka nu' tia koh ngei a ngai tawh. Mo tha lo leh mawl deuh nih ka hlawh dawn tlat.




Chawei khamah chuan U Faktei'n hmun a tifel a, keiin ka lo sil thung.



Mi an lo lenglut veleh tan a, U Vensangi pawh a rawn thleng tep tawhin ka ring. Ka bungrua remfel ngai thenkhat a la awm a, chumi chu min rem fel pui ang.



Thleng ka sil zawh veleh thingpui ka lum zung zung a. U Faktei chu an hnaah an buai a, nimin chauh kha chawlh an pe thei a, hna a kal leh der tawh.



Ka nu leh Vanmala te chuan inlengho chu an lo be sawm vel a. Vanmala pawh an fiam nasa viau, choka atangin ka lo hre ve vek zel sia. A tak taka innei chu ni ila ka hlim pui phian ang, mahse chutiang chu a ni silo, ka zak hle ringawt.




Thingpui ka va pek laite chuan min lo fiam ve nak nak hlawm a "Fa in neih hunah a hmeltha ngawt ang, senior fa chu an hmeltha duh" te an lo ti a, an nui dar dar a. Vanmala nen chuan kan in melh zawk a, kan rilru kan inhre tawnin ka hria. Fa neih chu hlat tak kan ni.




Thenkhatin min lo fak ve luam hlawm a, Vanmala vanneih an tih zia te, ka hmêlthat thute an sawi ve nak nak hlawm a. Chu erawh dawnsawn a nuam ta viau mai.




Kar lovah U Vensangi te pawh an lo thleng a. An chhungkuain an lo kal a, U Mapuia chuan inhnuai lamah naupangho a lo awmpui a, Vanmala nen an inkawm pah bawk. Inleng dang pawh an la awm ve nuk.




Ka thuam chhawm leh bungrua vel ho chu kan rem fel zung zung a. Vanmala room a zau bawk a, kan chep phah chuang lo reng reng. A hma aiin tlemin bungrua a pung ve deuh a nimai.




U Vensangi chuan hriat chak neih hmel fahran hian "Nizanah in ti em?" a han ti ngawt pek a, min fiam ve deuh tih dawnin a la thutak em em zui a. Ka lo sa hat hat mai, ka meng nghal awk bawk.



Chutah U Vensangi chuan "Ka hrethiam mai, engmah a thleng lo a nimaw" a ti hlak a. Zep buai lovin ka lo bu nghat. A rawn thaw chhuak hak a.




"Mamte, nupa in nia, khati ngawt tur a ni hlei nem" a ban a phar hluai a, min melh ngar bawk. Kan inneih zana nupa nun kan hmang lo chu ka thiam loh hul hual te pawh a ang zawk alawm mawle.




"Aaa...kan inhrethiam tawn viauin ka hria" ka ti nawi niai a. "I rin aiin mipa hian beisei an ngah ang" a lo ti hlak thung. A sawi awmzia chu ka hrethiam lo kher mai.



Ka hmel a hmuh chuan a chek hlak a "Thil hi i man lo ve thei bawk sia. Inhmangaih vanga innei ni lo mah ula i pasal a nihna ang khan beisei a nei ve dawn, chu chu ring tawp rawh. Nakin atan a la pawi thei ania aw" a ti nang nang a. Ka hmui ka lo pet vak a.




"Min khawih a tum hlei nem, chuloah ka la duhlo, ka la inpeih lo alawm" ka lo ti ve vat a. Ka ngaihtuah a, Vanmala khan nizan khan min khawih tum sela ka dang zo ang em?




Rinmawia nen khan kan inngaizawng rei a, inngaizawng kara thleng tur ang zawng zawng kha chu a thleng ve nual. Kan infawp a, ka awm bawr khawih chang pawh a nei. Mahse ka kawr chhanah vek a ni thung. Min nawr luih dawn chang khan ka insum vat thin a. Nula thianghlim ka la ni, nilo, Vanmala nupui thianghlim a nih tawh ber chu !




Vanmala chuan ka pasal a nihna angin min khawih theihna dan a nei tawh a, mahse ka la inpeih hlawl lo ti ila a dik ber ang. Inpeih hun ka nei ang em tih pawh ka hrethiam rih lo.



U Vensangi chuan "Khawih tum lo tih ringawt, Vanmala te ang mipa hi chuan maw, signal i pek loh chuan a khawih mai mai lovang che" a ti nghat a. Ka melh nghek. A hmeichhia zawkin lo nawr te chu ka duh teuhlo mai. Min nawr pawh nise ka duhlo zawk ang tih naklaia.




"Thil dang sawi ang" ka ti ta daih a. Mahse U Vensangi chuan "Pum pelh tum buai duh suh, a taah inpe vat mai rawh. Chu chu i himna ber tur anih chu. Nupuite hi chu pasalte hnenah intulut zel ila, nupa kan hlim a nimai. Sex hi a pawimawh ber ka ti hran lova, mahse kan inlaichinna tinghettu hi a ni ve ania" tiin min zilh zawm ta malh malh a.



Ka ngaithla liam ringawt nain ka ngaihtuahna chu a luah rauh rauh thung. Mahse tunah tut tut chuan Vanmala hnenah inpek tawp chu a harsa rih ang. Inpek theih ni ka neilo mai thei bawk. Hmalam hunin a hril tawh ang chu.




Tlai dar 3 rik dawn tepah kan intifel zo ta chauh a. Inhnuaia kan inzui thlak leh chuan naupangho pawh an lo tlei khawp mai. Inleng an la awm ve nual bawk a. Ka chhungte ka beisei ru ve deuh ania, mahse an lo la lang miah lo. Ka lunglen an hlau ang a, an lo kal duh lo pawh a ni mai thei.





A âwm ve tho mai, ka pasal neih dawn zan khan ka pi bulah ka tap ringawt a. Min lainat hmel viau bawk anih kha. Midang hi chu ka ngai lo tihna ni miah lovin ka pi hi engtik lai pawhin ka ngai zual bik a. Pasal ka neih hreh chhan kha a ni ve bawk a.




Uang thuang zeta "Inneihna hi thulh leh mai ka duh" ka tih tum khan ka pi chuan "Ka thih hma hian i neih ngei ngei a ngai" a lo ti khauh kha ania. Tun hnai hian thihna chungchang a sawi fo a, ka hlauhthawn zual phah a. Mahse a that lai tak a ni lawi a.



U Vensangi te chhungkua chu chawei turin kan sawm nasa viau a, Vanmala pawhin ei ve nghal mai turin a ti a. Mahse min hnial tlat a, kan chelh lui thei ta bik lova an haw ta chu ania.




Inleng dangho pawh an haw ve ta pheuh pheuh a, eirawng ka bawl dawn meuh chuan ka nu leh Vanmala te nen chauh kan awm leh der tawh. U Faktei tal chu awm se hei ai hian nuam ka ti deuh tur ania. Ka nu chu a fel viau nain ka zah lutuk a, ka awm pangngai thiam lo a ni ber.




Ka nu nen chuan eirawng kan bawl dun a, Vanmala chu thutkhawmna lamah a thu thung a, a phone ah thil pawimawh a ti leh tawh aniang a hmet leh mual mual tawh.



Ka nu chu a titi bawrh bawrh a, ka lo zawm ve zeuh zeuh a, a hma anga pawh harsa ka ti tawh tlat hi hrehawm ka ti. Ani chu a awmdan a pangngai reng a, keimah zawk hi ka danglam tlat.



Chaw ka chhum hmain Vanmala a rawn kal a, "Chaw kha chhum hnem deuh a ngai ang, chawei tur panga kan neih belh dawn aw" a rawn ti sup a. Ka lo 'aw' ve mai bawk a. A thiante chaw rawn ei tur an awm anih ka ring ve ngawt a. A chhan pawh nimin lamah inneih ruai kan buatsaih si lova, chumi denchhen deuh reuh chuan chaw an lo ei dawn anih ka ring ve nghal ringawt a. Vanmala pawh chu dining chair ah chuan a lo thu ve ta reng a.




Ka nu chuan "Mamte, a tlai tak tak hmain ka va inbual lawk ang aw" tih leh thawh a rual a. Pawi ka tilo zawk daih, a lo awm ve reng khan ka awm a nuamlo zawk. Ka ning tihna lam ni lovin ka zam tlat. "Aw, lo ngaihtuah duh suh, keimah pawhin ka ti thei alawm" ka lo ti ve var a.




Ka nu kal hnu chuan Vanmala chuan "Chawhmeh kha chu Fridge ah bawngsa leh vawksa lei a awm a. Bai tur pawh a la awm nual" a ti leh zung zung a. A tho vut a, fridge chu a va hai nghal a. Chaw chhum tur ka lo siam belh thung.




Door bell a rawn rik chuan min rawn melh zawk a, ka lo melh ve chiah bawk. Ngainat awm zet hian "Va chhawn rawh" a lo ti sup a. Eng emaw ngaihtuah ni awm tak hian a nui zui suk a, ka hrethiam der lo.




A thiante an nih ringin ka intuai fai thuak thuak a, thutkhawmna lama ka va phei chiah chu kawngka bula ka chhungte lo ding kim thap ka va hmu a. Ka phul nghal hlut mai "Awi..." tiin ka va pan nghal vat a. An lo nui zui hawk hawk mai.




Ka pi chu ka kuah nghal vat a, midangho chuan min lo nuih hawk hawk a. "In lo kal pawh ka lo ring tawhlo a...ka va lawm tak" ka ti hliai a. Chutah ka pi chuan "Chaw kan rawn ei dawn lawm" a ti awlsam then a. Mitmeng nung sarhin min melh bawk.




Ka hnung lam atangin Vanmala chuan "Lo lut rawh u" a lo ti vat a. Ka hawi let chuan ngainat awm zet hian min lo nuih a. Ka pa ka melh leh chuan "Vanmala hian chawei ah min lo sawm a" a lo ti var a. An rawn lut zui nghal a.




Choka bula Vanmala ding reng chu ka va melh leh a, hlim zet, awihlo bawk si hian ka nuih nghal var var a. A lo bu nghut. Mitmenga lawmthu ka sawina chu a hrethiam ni hmiang ka ti mai.



Thutkhawmna lamah chuan an thu thla zui nghal a. Ka pi ka kai nghal chawt a, Puia leh Rina nuih ka tiza aniang "Pasal nei ve tawh si, naupangchhia deuhin mahni pi te i la kuah heuh heuh a" an lo ti a. Ka chhiah khum vak ringawt. Puitlin hi a lo har ania nge.



Vanmala chuan ka chhungte chu a han be ve luam a, a duhnaah hi chuan mi biangbiak dan hi a thiam tlat.





Rei vak lovah ka nu inbual pawh a rawn chhuak veleh a. Ka chhungte lo awm reng chu mak a tih hmel ve miah lo, a lo hre lawk sa vek aniang chu.



Chutia ka nu ber a awm takah chuan eirawngbawl zawm ka ngaih avangin choka lamah ka phei lehnghal a. Vanmala'n min lo zui ve vat bawk.



Ka chaw chhum tur ka buaipui leh hma chuan "Ka lawm lutuk aw" ka han ti hliai a, ka khi thaw bawk. Min han nuih vur vur a "I lawm phawt chuan ka lawm" a lo ti ril ruih a, ka va han hlim tak.



Vanmala chuan eirawng min bawlpui a, U Faktei pawh a lo bâng tawh a, min rawn pui ve nghal vat a. Kan ri ve le lu mai.



Chhungkua kan inhre pawh tlang sa vek bawk a, thil thar engvak mah a awm lova. Inpawh takin kan titi thei a, hun hlimawm tak chu a ni ve reng reng e.



Zanah chuan ka chhungte chu rei vak lo an awm leh a, an haw leh ta a. An awm laia hlim viau si kha ka khua a har leh nghal veng veng mai. Kan kar hla lutuk lo mah se ka ngai tho.



Kan mut dawn chuan Vanmala bulah lawmthu ka sawi leh mawlh mawlh a, min nuih min nuih mai. Zanin chu ka hmu hmeltha zual kher mai.



Khumah chuan ka mu zangthal diai a, ka hlat deuh takah a ban lukhamin a mu ve bawk a. A lam hawi chuan ka inher deuh a, chunglam a melh vung vung a.



"Eng nge i ngaihtuah a?" ka ti ta sep a, min rawn melh zawk a, min nuih nghal suk, ka lam hawi chuan a rawn inher ve a "Mamte..." a ti ril leh ruih phawt a. Tun tuma min koh chu nuam ka ti tlat.



Nichina ngainat awm zeta min nuihna kha a bo tawh a, a hmel a tak leh run tawh.



"Naktipah chuan ka rualin Lawngtlaiah i lo kal ve ang tiraw?" a ti ta sup a. Ka beisei loh lam daih a lo sawi leh. Ka pasal a ni a, a awmna chu ka awmna tur a ni tih ka hria, mahse ka hreh rih bawk si. A tawng dan kalhmangah chuan zui ngei turin min duh tih ka hai silo.




"Ka hrethiam lo e a" ka han ti leh ngawt pek a. A lo thaw chhuak suai suai a "Eng kawngah mah nawr luih che ka duhlo, mahse nupa kan ni a. Min lo zui nghal loh chuan mi ngaih kan ti tha lovang tih a hlauhawm a. Chu mai bakah ka nu ngaihdan a nih ka ring chiah lova. Mahse i duhlo chung chu min rawn zui turin ka tilui chuang lo che ania" a ti ta duah a.



Engtin emaw ni hian ka awm, ka rilru a na nge ka hrethiam lo. Midang ngaihdan tur leh a nu ngaihdan tur a ngaihtuah vang chauha a bula kal nghal tura min sawm a ni. A nupui ka nih vang leh min thlakhlelh vang a ni hran lo tihna ania. Ka va han mawl tak, engvangin nge min thlakhlelh ngawt ang, a nupui tak ka ni hlei nem.




"Khati khan inngaihtuah buai vak vak suh, i thu thu a nimai. Tunah tut tut thutlukna siam a ngailo ania. Naktuk te pawh a la awm a" a ti dam thluam a. Ka bu ta nghat ringawt. Tlaia ka hlimna te khan a daih rei lo ngei mai.



Zingah hma deuhah ka tho a, Vanmala chu a lo la mutui kher mai. A muhil hmel chu ka thlir vang vang a, ka pasal chu a ni ve mai si a. Ka la pawm thiam zan lo chu a ni e.



Inhnuaiah ka chhuk thla a, ka nu a lo tho tawh a, min hmuh rual chuan "I va tho hma thei ve" a lo ti hluai a, "Ka tih than dan ania" ka lo ti ve mai a. Thingpui min lo pe vat a, lawmthu ka hrilh nghal vat.



Ka nu nen chuan eirawng kan bawl a, kan chet dun mawlh mawlh laiin ka nu chuan "Mama lah kha a chawl rei leh dawn mang bawk silo a. Naktukah Lawngtlai ah in let nghal mai a ngaih hmel sia, i huphurh em?" min ti khauh a. A lo hre veleh vek tawh.



Min zawh dan vel atang chuan kal ngei ngei turah min dah nghal niin ka hria, ka huphurh tung mai bawk si a, a van hrehawm reuh tak.



Mahse "Huphurh vak lo e" ka lo ti ro halh a. Ka rilru ang hian ka lang chhuak phawng ngam thinlo. Heihi a thatna aiin a that lohna lai a tam zawk.



Rilru anga lang chhuak pawp ngam lo mi chu kan rilru a tawt duh a. A inhnawh tup tup a, keimahni bawkin kan hahpui a. Kan bula awm a hahthlak thin. Hei vang hi aniang thian bul fuk ka neih theih loh te ka ti rum rum thin.



Vanmala leh U Faktei te pawh an lo tho chhuak ve vat a. Chaw kan ei nghal chu a nimai.



Chawei lai chuan ka nuin "Vawiin chu in mamawh tur ang te lam khawm ula, naktuka Lawngtlai let leh mai tur in ni sia, inrinlawk a tha" a ti zung zung a. Vanmala nen chuan kan in melh zawk a.




Chutah Vanmala chuan nizana ka rilru hrehawmna te kha a lo hrethiam aniang ka beisei loh zet hian "Mamtei chu helamah awm rih mai se ka lo tia. Lawngtlaiah chuan a khua a har lutuk ang. Thian kawm tur a nei rih dawn silo" a ti dam thluam a. Ka lo ip chawih mai.




Mahse ka nu chuan "Inneih hlim hlawt in nia, han awm hran nghal ringawt chu a tihchi loh. Mamtei tan pawh i tel lova helama awm chu a hrehawm zawk ang. Pasalte bula awm si loha an chhungte bula awm chu eng em em awm lo mah se a hrehawm ru duh ania" a ti leh zung zung a.




Min ngaihtuah vanga tawng chhuak ve ve an ni tih ka hria a. Ka lo inthlahrung ru leh viau tawh.




Vanmala chuan "Heta a awm rih a tha zawk ang" a ti leh sup a. Ka rilru nawmna tur a ngaihtuah lutuk vanga a nu thu a hnial chu ka inthiamlo nghal em em ringawt.



Ka nu chuan mitmeng thip zet hian Vanmala chu a melh ta mai a "Mamtei tana ti i ni pawhin ka hre lo, i tan zawk niin ka hria. Bawihbawihi..." a tih lai mek chuan U Faktei'n "Ka nu..." tiin a lo khap vat a. An vai chuan min rawn melh nghal vek a.




Tunah khan ka nuin Bawihbawihi hming a lam leh tawh, chu pawh nelawm loh zet bawkin.



Ka nu chu harh chhuak thut ni awm tak hian min nuih lui a "Mamte, Mama chu i zui ve nghal dawn nia lungngai lo la" a rawn ti ta daih a. Hmel ngainat awm zet kha a pu leh tawh. Mahse chaw kan eikham fel hnu chuan Vanmala chu a ko hrang ta a. A room a an luh hnuin U Faktei chuan "An tih ve dan ania" min nuih lui deuh chung hian a rawn ti a. Rilru nuam lo viau mah se ka lo nui lui ve tawp.




U Faktei hna kal tura a insiam lai thleng pawh chuan ka nu roomah Vanmala chu a la awm a. Eng ka hria nimaw , room kawngkhar bulah chuan an thusawi hriat tumin ka va ding a. Ka awmdan chu a mawilo tih ka hria. Mahse ka hre duh miau si a ni.




Ka nu tawng ri chu ka hria a "Vanmal, inngaihtuah harh rawh. Bawihbawihi te nufa hi ka pawmlo ka tih tawh kha, ka rin zawng an nilo" a ti kha fak a, ka lo ip chawih mai. Vanmala chuan "Hei, i duhdan chu ka zawm tawh alawm" a lo ti mai a.




Chutah ka nu chuan "I la zawm famkim hlei nem, an nufa hian thlauh thla rawh. Tunah phei chuan Mamtei a awm ve tawh a, thil kalphung hi hria se a lungawi miah lovang" a ti leh a. Vanmala chuan "Lungawi lohna tur a awm hlei nem, nunhlui chu nunhlui alawm. Mamtei hi mi rilru chhia a nilo" a ti ve hluk a.




An thusawi awmzia chu ka la hre pawh chiah lo.




Ka nu thusawi ka hre zawm leh a "Bawihbawihi hi i nunhlui mah nise a la zar hneh lutuk che alawm. Heti ringawt chuan Lawngtlai pawh in nupa tan a him lo. In inkar a chhiat phah mai tur asin. Bawihbawihi nen in lo inngaizawng kher kher kha a pawi" a ti ta mai. Ka phu dawrh maiin ka hria.



Vanmala leh Bawihbawihi te hi an lo inngaizawng reng thin a maw ! Tichuan chutah chuan eng nge ka tel ve na.



Ka rilruah thil tam tak a lo lut a, hmanrua mai niin ka inhre nghal. Vanmala leh Bawihbawihi te inkar thup nana Vanmala nupui !



U Faktei'n ka hnunglam atanga "Mamte" a rawn tih chuan ka phu chiang kher mai, ka au chhuak thawt lo chauh.




Mitchhing sawkin ka lehhawi a, a nu leh a nuta pa inbiakna ka lo ngaithla ru tih a hrethiam nghal vekin ka ring.



"U Fakte" ka ti hliai a, ka hrawk a inhnawh a, ka tawng chhuak tha thei der lo. Ka beisei loh zetin lainat hmel deuh hian min lo melh a. A thaw chhuak hak a.



"An inbiakna kha i hria em ni?" a tih chuan ka zep buai duh ta lo "Aw..." ka ti lawi rat a, ka tah a chhuak pawh a ni hranlo. Ka tawng ring thei der lo.




Chutah U Faktei chuan "A zialo hle mai, Mama'n engkim a sawi lawk vek em?" a tih chuan bangbo zet hian ka melh a. A hrethiam aniang "Ka ring rengah" a ti halh a.




Ngilnei zeta min melh chung chuan "Ka hnen atangin i hre duh ang em? Ka hriat ang zawng zawng ka hrilh ang che. Thil zep reng hian hmalam hun thil tha engmah a hring chhuak dawnlo" a ti ta a.



Duhthlan tur dang ka neilo, engkim ka hre duh, Bawihbawihi te nufa chanchin kha ka hrechiang vek duh ani .



Ka bu ta nghat a.




_________________*_______________*________

(Tunlai chu a boring chho viau zelin ka hria, amaherawhchu ziah tluan parh reng hi a harsa thin a. A point tak kan bo lo turah ngai ang. In lo chhiar ve thin a ka lawm)


Show post links
Top

[Ngaia]

DEPUTY COMMISSIONER
By CVL Awmpuii



Chapter 15



U Faktei chuan a room lamah min hruai chho a. Ka nu leh Vanmala thusawite avang khan ka la bing mup mup a. Ka rilrua chiang ta ber mai chu, Hmingmawizuali hi bum a ni leh ta !



Room chhung kan luh rual chuan couch ah kan thu thla nghal zat a. U Faktei mitmeng atang chuan min ngaihtuah zia ka hre thei. Ka awmdan hrilhai hmel lutuk chu ka siam tha ve vat a. Heti renga ka awm chuan a awm ka ti nuamlo vat ang. A nu leh a nuta pa an ni ve tho si a.




U Faktei chuan "Mamte, ka hriat chhun chhun te ka hrilh che ang a, mahse Mama hi i then tur a nilo" a ti phawt a, a aw a ngenngawl hle bawk.




Vanmala then lo tura min ti nghal pang mai chuan a thil min hrilh tur chu thil ho lam a nih loh zia a tichiangin ka hria. Kan nupa inkar nghawng thei thil a ni tih phat rual a nilo.




Tichuan Vanmala leh Bawihbawihi te inlaichinna zawng zawng a hriat chhun chhun te chu min hrilh fai ta kelh a.




"Mama hi Lawngtlaiah hian kum 3 a awm tawh a. Thil thenkhat chu i lo hriat ve tho tawh ka ring a. Mahse tuna ka hrilh tur che hi chu i tan thil thar vek a ni ang. Bawihbawihi leh Mama te hi Lawngtlai atang chauha inhria an ni lova, kum 10 liam ta khan an inhre daih tawh" a tih lai chuan ka lo meng kawk a, min lo nuih sak thung.






A sawi zawm leh a "Chung hunlai chuan Mama hi kum 26 a ni a, Bawihbawihi erawh tleirawl tê a la ni, kum 15 ni ta in ka hria. Mama graduate hnu, DC a nih hmaa Zirtirtu hna a thawh thin lai ania. Chung lai chuan Bawihbawihi hi a zirlai ania. Khang hunlai khan kan khawsak kha a pangngai ve viau tawh a. Mama hi mi khawngaihna ngah lutuk mihring ania, ka pa kha a chhun a. Midangte tan a theihtawpin malsawmna a ni thin. Bawihbawihi te kha an khawsak a harsa em em a, a pain zu a in thin a, a nu a sawisa thin a. Chutiang karah chuan a seilian a. Mama hian mi thenkhat kâ atangin a lo hre ve a. Tichuan, an dinhmun te chu a han chhui chiang a, Bawihbawihi ngei pawh ko hrangin a zawt tawp a. Chuta tang chuan puih duhna thinlung a nei ta a. Bawihbawihi'n an in chhungah lehkha a zir that theih loh thu a hriat chuan kan ina zir turin a sawm a, a lo hnial bik lova. Tichuan, tlai tin an rawn inzui haw a. Mama hian a thlawnin tuition a pe a nih ber chu. Keini pawh Bawihbawihi dinhmunte chu min han hrilh a. Kan lo lainat a, tha tak takin kan lo dawngsawng a. Ka nu phei chuan a duat lutuk. Engkim thil tha tinrengin a thuam mawi a, an inngaina hman hle" a tih lai chuan a phone a rawn ri ral ral a.





A en chuan "Kan pu te lam atangin anih hi, ka'n be lawk ang aw" tih leh a room balcony lama chhuah a rual a.




Kei chuan a thu min hrilh chhunte chu ka lo ngaihtuah zui neuh neuh a. Ngaihdan ka la siam thiamlo, tunah rih chuan a dawt lehzel hriat chaknain ka khat a ni ber.



U Faktei chu a rawn lut leh vat a, pawi tih hmel lutuk hian "Mamte, office kal vat a ngai, hna hmanhmawh thlak a awm thut a" a rawn ti zung zung a. A bag leh a thil ken tur ho chu a la sawk sawk bawk.



Ka lo tho ve uaih a, a thusawi chhunzawmna tur chu hre chak hle mah ila a hna kal tur em pawt buaia lo zawh sek chu thil ni thei a ni bawk silo.



"Aw,va kal rawh, a pawilo" ka lo ti ve vat a. A kal hma chuan "Nakinah kan la sawi chhunzawm dawn nia" a rawn ti leh ngial a. Ka lo nuih sak a. A room atang chuan kan inzui chhuak ta a.



Inhnuaiah chuan Vanmala a lo tei kual vut vut a, U Faktei nen chuan kan inen vat a, ka bengbulah chuan "Ka thil hrilh che kha hria angin awm suh aw" a rawn ti zawi sep a, ka lo bu nghat.




Vanmala'n chutia kan inzui thla min hmuh chuan min rawn pan vut a "Ka zawng che a" a rawn ti sup a. U Faktei chu a melh zawk a "I kal tawh emaw ka tia" a tih chuan "Ka kal dawn chiah" U Faktei chuan a lo ti ve vat a, a chhuak zui nghal daih bawk.




Vanmala chuan min melh vung vung chung hian "I hmel awmdan kha a diklo" a rawn ti sup a. Ka lo ngaihtuah nasa lutuk a nimai thei. Amah ka hmuh leh chiah hian ka tih ru nghal tlat a tin ani.




Ka nui lui a, "Engmah a nilo ang" ka ti ngawt a. A ngaih chu a la that loh hmel tho mai. Ka thil hriat a la tlem rih em a, a chungchangah ngaihdan ka la siam thiam lo. Mahse Bawihbawihi laka inphen nan min tum nia ka hriatna chuan min tina pha tlat. Vawihnih bum tawh chu ka duhlo.




"Naktuk lamah kan phei tawh dawn si a, vawiin chu mamawh leiin bazar zuai ila ka ti a. I peih loh pawhin keimahin ka bazar thei tho a" min ngaichâng deuh hian a ti a.




A sawi kalhmangah chuan Lawngtlaiah chuan ka zui ve ngei ngei dawn niin ka hre tawh. Ka rilru a insual buai hle a. Tunah rih chuan a thu hi zawm phawt ila, zanah thil dang ka hriat belh leh hunah ngaihdan ka siam nghet chauh ang ka ti rilru ta a.




Kan insiam nghal zung zung a, bazar tura kan chhuah dawn chuan ka nu pawh thutkhawmna ah lehkhabu chhiarin a lo thu a. A hmel chu ka en a,a pangngai viau, Vanmala nen pawh pangngai takin an inbia. An lemchanna nge phei chu ka hrelo. Tunah rih chaun an pahnih tawp hian rin harsa ka ti ve ve.




Bazarah chuan kan han inzui chhuak ve ta poh a. Sawi tur kan hrelo dun thei bawk si, a hahthlâk lampang hret chu a ni. Nupa ngawichawi ber kan ni hial awm mange ka ti. Tunah tak phei hi chuan sawi tur ka hrelo lehzual. Ka ngaihtuahnaah Bawihbawihi te nufa chiah an awm. Ka pasal nunah hian eng ang taka pawimawh nge an nih ka hre duh takzet.




"Mamte, i dawr hluiah khan kal ila tiraw?" a tih chuan ka melh vat a. Ani chuan hmalam a lo melh daih thung. Car a park tawh a, kein kan inzui ve hnak hnak a. Miin min en duh em em mai lehnghal a.




"A pawi miah lo" ka ti sep a. Kan inneih hma khan ka dawr chungchang chu kan tifel vek tawh a. U Vensangi lak atanga ka rochun a ni bawk nen a hriatpuina lova thil tihdanglam chu ka hreh si a. Ka han rawn ve a. Ani chuan tiral mai turin thu min rawn a. A chhan pawh Vanmala hna avangin helamah ka awm nghet thei dawn chuang lova, awmzia a awm dawn loh vang ani. Aruati bulah ka sawi a, ani lah chuan 'Rem i tih chuan keiman ka lo luah chhawng ang' a lo ti hlauh a. Hmelhriat loh laka tihral ai chuan ka duh daih zawk. Ka lawm tak tak ani.





Tichuan, Aruati kutah ka dah ta a. A man hû ang pawh laksak lovin ka tlawm duai a, a lawm thiam ve khawp mai.




Ka dawr kan thlen chuan Aruati chu a lo awm ngei a, min lo lawm thiam ngang mai. A lo buai lutuk lova, a tihzia tak tak ani.




"I inhralh tha em?" ka tih chuan "Vawiin chu inhralh a har ang reng" a lo ti vat a. Kan thutna tur a rawn la vat a, kan thu thla a.




"Tunlai sum a vang em a, chuvang aniang" Vanmala pawh chuan a lo ti ve sup a. Chutah Aruati chuan "Ni chiah e mawle, sum leng vak a tlem lutuk a, inhralh that ngaihna a awmlo alawm. Sawrkar hnathawkin hlawh an la hlei thei bawk silo" a ti nghat nghat.




Vanmala chuan "Mizoram chu sawrkar in sum a neih loh chuan kan che buai nghal vek zel a ni ber. Tun dinhmunah chuan sawrkar hna lo chu innghahna bul fuk a awm lo niin a lang a, heihi ram rethei zia ania. Sawrkar a hausak loh chuan kawng hrang hranga eizawng tute sum hmuhna a buai nghal vek thin a. Sawrkar hi sum hnar a nihna lai chen a awm ve a. Eiruk leh hlem hlet a hluar deuh deuh bawk si. Hetiang do ngam sawrkar hi kan mamawh. Chuvangin ram hruaitu tha, mi fing, Pathian tih mi kan mamawh anih ber chu" a ti dap dap a.



A duhna ah hi chuan sawi tur hi a hria mawle. A vei zawmg tê ah chuan a tawng ve duah thin.



Aruati chuan thlawp zet hian "Chu chiah mai, mimal sumdawnna te hi buaipui ve tak tak dawn pawh ni ila, sawrkar a buai si chuan chet chhuah a harsa thin. Ram hausa kan la ni ve tak tak bawk si lova. Sum leng vak a tlem si, a nei te'n an îp tlat bawk sia, a hahthlâk anih hi" a lo ti ve bawrh bawrh a.




Chutiang lampang chu an sawi kai ta duah a. Ka beisei ai daihin an titi thei zek a. A lawmawm lamah ngai ang.



Chutia an inbiak lai chuan dawr thil vel chu ka lo enkual thuak thuak a, bungraw thar a la nual hlawm a. Tha tak tak a awm ve nuk mai.




Aruati chuan "U Vanmal, in lo kal manah min dawr ve ru. U Mamtei dawr a nih lai chauhin min la dawr a. Tunah chuan nupa in nihna angin min dawr ve ru" a ti ham ham a. Vanmala chuan min rawn melh zawk a.




"I u Mamtei hian a duhzawng en sela" a lo ti sup. Mamawh ka neih em em ka hre hran lo, ka mamawh zual pui chu kan inneih hma khan kan lei vek tawh.




"Nangmah khan duh zawng i neilo em ni?" ka lo ti vat a. A lu a lo thing mai a "Mamawh i nei zawk ang, lak sak ve reng reng rawh" a ti sup a. Hnial tung chi a ni silo, Aruati hlawkna tur a ni mai tiin ka han en kual a.




Tichuan, kawrfual par sen, hak nawm hmel zet hi ka thlang chhuak a. "Heihi ka lo la mai ang" ka ti a. Aruati chuan "Aw, i inhmeh dawn lutuk" a lo ti vat a. Min pack sak nghal vat bawk.




Pawisa chu Vanmala'n a pe, pek ka tum buai duhlo law law mai. A luhlul ve sia, ka tang hneh dawn chuanglo.



Bazar tura chhuak ve hlut si kha thil kan ei zawhah eng em em lei si lovin kan haw leh nghal daih a. Kan vei hah ringawt a nimai.



Kawrfual min leisak tih loh chu a thil tur kan lei ve pawh ka hrelo. Ka rawt chhuahin ka nu leh U Faktei kawr tur kan lei sak ve bawk a. Chawhmeh kan lei tun bawk a, chu zawng chu a nimai.




Haw kawngah hla kan play a, min biak ka hlauh avangin mutchhuak ang deuhin mit ka chhin san daih. Min be tha reng thin si a, a rilru ka hre bawk silo. Ka inven lawk ve reng a ngai.




In kan thlen chuan ka nu in min lo chiau au vat a. Kan thil lei sak te chu ka han pe a, a lawm thiam ngang mai. U Faktei thil tur chu ka dah tha , zan hun awlah vawiina a thusawi bak kha zawh leh pahin ka pe ang.



Ka intifai thuak thuak a, inhnuaiah eirawng bawl turin ka chhuk thla a. Vanmala chuan hna pawimawh khawih tur a neih thu sawiin computer hmaah a bur leh nghal chawt tawh.




Ka nu nen eirawng kan bawl a, a titi leh suam suam a, a hma ang khan ka ngaina chho leh tawh viau. Chutih rual chuan Vanmala nen an inkar ka ngaihtuah chang erawh chuan ka tim leh deuh thin.





U Faktei pawh a rawn haw a, a chauh hmel ngang mai. Ka nuin a lo be vat a "Han intifai vat la, chaw kan ei dawn nia" a lo ti var a. A bu nghat a "Ka chau lutuk" ti hapin a room lam a pan zui nghal zat.




Keipawh Vanmala ko turin ka chho ve nghal zat a. Room kawngka chu kik ka tum zet a, mahse a thusawi ka hrechhuak zawk "I room a ni ve tawh a, kik tawh suh. Mahni room an kik kurh kurh ngailo" tiin nizanah khan min hrilh a. Chuvangin dimtein ka hawng ta zal zal a.




Ka va hmuh chuan computer bulah a lo thu tawh lova, khumah a vâng zawngin , bawkkhupin lo mu a. Ka va pan hnai vat a, a hmel chu ka en a, mit a chhing chial a, a muhil niin ka hria.



A muhil hmel hmuh hahdam zet chuan ka rilru no a rawn ko chhuak ngawt pek a. Min neih a duh thu a sawi tirha a thusawi zawng zawngte kha ka ngaihtuah let a. Ka tana innghahna tlak a nih tur zia te, amah ring tawp tura min tih laite, pasal tha tak anih tur thu a sawi lai te kha! Tunah hian a rinawm reng em? Ka tan rintlakin a awm em? Ka tan innghahna tlak a ni em? Ka tan pasal tha tak a ni chiah em?




Chung ka ngaihtuahna te chuan ka lung a tichhia a. Ka biang a rawn lum thla pup a, rang zetin ka mittui luang chu ka kutin ka tuai thuak a. Mahse a hmel ka en chuan ka na zel. Ka thlir ngawih ngawih a, ka na ngang ani tawp mai. Ka mittui bawk a rawn luang leh tawh.



A rawn che tual tual a, chuveleh ka mittui chu ka hru leh tawk a, ka hnungchhawn nghal vat bawk. A thawm atang chuan a rawn harh tawh tih ka hria.




"Mamte" a ti sup a, ka hnungchhawn tlat a, ka mittui tei vet lah chu a!




Tah insum zet hian "Chaw kan ei tawh dawn a, ka lo ko che" ka ti lawi rat a, ka thaw nghal hraih bawk. Kal mai ka tum lai chuan ka banah min lo chelh hman a. A che hrut a , min hmachhawn zawngin a rawn ding ta run mai. Min melh chhuk run a, keiin hnuai lam ka bih daih thung. Ka biangah ka mittui a la pherh nuaihin ka ring. Tinge maw ka tahbelh em em mai le.




Min kuai dak deuh a, ka tang tung nain ka hmel chu a hmu hman ta tho mai. Chutah min ngaihtuah hmel zet hian "Mamte..." a ti chhuak hulh a. A âw te chuan ka tah a tichhuak vek. Ka inkhawngaih lutuk vang ni berin ka hria.




"I tap" a ti leh sup a, kei erawh tah chhuah hlau lutukin ka insehruh vak a, ka insum nasa bawk a, ka hrawk a inhnawh a, ka tawt up up mai.




"Tinge i tah?" a ti leh sup a, ka han melh chuan a ngaih a that loh hmel kher mai. A mitmengah chuan min ngaihtuahna tam tak ka hmu a, mahse sawt vek niin ka hria. A mitmeng chuan min ti na ting a nimai.




Ka nui lui a, "Ka tap hlei nem, ka mit a thip deuh a. Chawei kan peih tawh a, ka lo ko che" ka ti zung zung a. Ka rinai takin ka âw chu a pangngai ta deuh.




Ka thusawi chu a awih hlawl lo tih hriat zet hian a thaw chhuak hulh a. "Keimah vang em ni?" a han ti ngial a, a inthiam loh hmel hle bawk. Ka lo khawngaih ngawt pek a. Hetiang hmel a put hi ka la hre ngailo. Min ngaihtuah takzet a ang ber.




Ka lu ka thing a, "Chhuk tawh ang" ka ti daih a, ka nem dat a. Mahse chîk zeta min melh chung hian "Naktuka ka ruala lo kal ve chu i hreh viau chuan i duh leh hetah i lo awm dawn nia" a ti sup a.



Min ngaihtuah ang deuhin tawng mah se ka ngai kawi ta tlat. Bawihbawihi te nufa nen hun thawl zawk neih a duh avangin hnawk min ti a, hetah min hnutchhiah a tum angah ka lo ngai daih. Ka rilru a na hle bawk. A tan chuan hmanrua ang mai ka lo ni ania nge.





"Chutiang lam pawh a nilo, chhuk ang" ka ti daih a, ka kalsan a, min dang tawh bik lo, mahse a thaw chhuak hawk ri chu ka hre hman hram.




Zanriah kan eilai te chuan min lo melh leh vung vung thin a. Ka nu leh U Faktei chu an titi bawrh bawrh a, min ngaihsak dun lem lo.



Chawei kham veleh U Faktei nen hmun tifelin thleng kan sil leh a. Vawiina a sawi bak kha ka zawt chak leh et et tawh. Ka rilru natna tur pawh ni mah sela engkim hriat vek ka duh.



Tunah hian a hming chauha Vanmala nupui ka la ni a, kan inakarah sex a la awm lo bawk a. Ka thianghlimna ka lo hlan hman lo chu ka lawm ru viau. Eng emaw pawh lo thleng thut sela him pialin ka chhuahsan thei ang a tih chu ka rilru a ni. Amaherawhchu, pasal nei ve ta cheng a, then leh nghal mai tur chuan ka inngaihtuah phal miah lo thung lawi a.




U Faktei chuan ka ngaihtuahna hria ni awm tak hian "Mamte, zaninah kan sawi bak kha kan chhunzawm leh dawn nia. In hawng deuhin kan sawi ang a, zawhna i neih pawhin min zawt tawp tawp dawn nia. Ka hriat zawng anih phawt chuan ka hrilh zel ang che" a ti ta duah a. Ka va han lawm tak.




Ka thleng sil lai hmanhmawh sauh pah chuan "Aw, ka sil zo vat vat ang a, i room ah ka lo zui chho ang che" ka lo ti ve var a. A bu nghat a, thutkhawmna lamah min phei san ta a.




Hmanhmawh tawkin thleng chu ka sil a, a fai hman turah ngai ang.




Thutkhawmna lama ka va kal ve chuan U Faktei chu a lo awm tawh lova. Ka nu leh Vanmala te'n TV an lo en a, inchung lama chhoh san nghal daih chu ka hreh ve bawk si a. Vanmala lah chuan ka chezia reng reng chu chik zet hian min lo melh zel bawk si. Ka awm a tinuam lo.




An bulah chuan ka han thu khaw mawi veleh tete a, TV en pahin an titi leh zeuh thin a, ka nuin min lo biak changa ka chhanglet tih loh chu ka tawng ve mang lo.




Thingpui ka lum sak leh a, ka pek zawh chuan ka mutchhuak chhuanlamin inchung lamah ka chhoh san ka tum ta a. Ka nu chuan min lo hrethiam khawp mai. Vanmala erawhin min en chik leh tawh viau. Ka kawchhung en tlang a tum emaw tih mai tur ani.



Ngaihsak duh lo luiin ka chhoh san ta tho a. Min hmuh phak loh chinah chuan hmanhmawh zetin U Faktei room lam chu ka pan a. Kan room leh U Faktei room hi room pakhatin a daidan a, kan inhlat lem lo.





Kawngka ka kik chuan min lo chhawn vat a. Ka hawn nak chuan khumah thuin laptop a lo hmet mawlh mawlh a. Min rawn hmuh rual chuan min lo nuih var var a, ka nuih let ve sak a.




"Lo kal rawh, ka bulah hian lo thu la" tih pah chuan a laptop chu a dahfel zung zung a. A khuma ka thut thlak ve rual chuan "I awm dan i tidanglam duh kher a, tumah vengthawng duh chuang suh aw. Chawei laite khan i inthlahrun hmel lutuk a. Mama hian a hrethiam vek zawk mai ang" a ti tete a. Chawei laia ka bet zan lo te kha a lo hre vek tihna anih chu.




"Mak ka ti ve lutuk a" ka han ti ngial a, a lo bu nghat nghat a "Umm, ka hrethiam lutuk tho che alawm. Khawi atang nge kan sawi zawm ang" a ti nghal zat a.




Vawiina a thusawi tawpna kha ka hrilh a, tichuan min hrilh zawm leh ta mawlh mawlh a.



"Khatia Bawihbawihi a lo hruai ziah takah khan kan hriat lohin an lo inngaina chho a. Mama hian a duat thiamin a dawm thiam em em a, Bawihbawihi pawh khan nuam a ti ve hlein ka hre thin. Hmangaihna hian kum bi a lo thliar lova, kum inthlau deuh deuhte pawh an lo inneih fo tawh hi. Khatiang chiah khan Mama leh Bawihbawihi te pawh thla khat chhung an han inzui chawt takah chuan an inkarah hmangaihna a lo piang a. Ka sawi thiam dan ber chuan Mama'n a khawngaihna kha hmangaihna ah a inthlak ni berin ka hria. A atchilh em em a, khang hunlai khan hlim pawh a hlim thin reng a. Ka nu nen pawh kan sawisel hran lo. Mama hi zirlai atchilh rum rut thin a ni a. A chut miah lo nain a hmeichhe mi lo riau a. Khatia hmeichhia tih takzeta ngaihsak a nei ve kha kan lawm mah zawk. Bawihbawihi, kan mi ngainat em em sa a lo ni bawk a, kan lawmpui takzet zawk. An inzui nasa bawk nen an inhmangaihna kha a zual zel a. Chutihrual chuan mite mithmuhah mawilo khawpin an khawsa ngai miah lo thung. Sikul lamah pawh an inlaichinna kha tuman an hre ngailo"




Chutia Vanmala'n Bawihbawihi a atchilh zia thu leh an inkar hmangaihna a sawi chuan min lo tina hmanhmawh. Vanmala ka va duh vang lam ni lovin ka pasal a nihna vang zawkin a ni.




U Faktei thusawi chu ka ngaihthlak zawm leh a "Mahse khatia inzui nasa ta chu Bawihbawihi nu leh pa te khan an lo hre ta a. Ka sawi tawh kha Bawihbawihi pa hi zu ngawl vei, misual lutuk a ni a. A fanuin an zirtirtupa nen inlaichinna an nei tih a hriat khan thil reng reng chu a kawi zawngin a la ta vek a. Mama hi mahni zirlai naupang khuaikhem ang thin te'n a lo sawi a. Tum khat pawh zu rui chungin kan inah a lo âng nghe nghe. Tawngkam chhe tinrengin Mama chu a rawn ankhum a, ka nu pawh a sawichhe nek mai. Chumi hnu chuan Bawihbawihi hi a inthlahrung ta tawp a, kan inah pawh a lo lenglut ngam tawh lova. Keini chuan khatiang pa a nei kha kan lo lainat zawk a, mahse a zak chung chung lo kal tura tih sek chu a tan a nuamlo zawk dawn tih kan hria a, kan nawr ngailo. Mama nen an inkar erawh a tha reng a, mahse khang hunlai khan a rilru a hah thin lutuk tih ka hria. Ka nu bulah nupuia neih a duh thu te pawh a sawi hial nghe nghe a. Mahse Bawihbawihi a la naupang bawk si a. Tih theih vak a awm bawk silo" a ti dap dap a. A chawl dat a, khum bula a tui dah chu a in khalh khalh a.




A sawi chinah chuan Vanmala ka ngei na kha a reh tial tial a, ka khawngaih hman hle tawh. A hmangaih hmasa ber nena an inhmangaihna kawng lo bumboh ve zia chu ka ngaihtuah a, ka khawngaih takzet!




U Faktei chuan nui var var chung hian "I ngaithla ning tawh em?" a rawn ti a, a hmel landan atang chuan a uang tih ka hria. Ka ngaihthlak uluk zia a hrechiang miau a.



A sawi zawm leh ta a "Tichuan, Bawihbawihi pa khan Mama hi a rawn vau ta a, chhungkua kan awm kim thap laiin ania, a fanu a thlah lo anih chuan kum tling lo khuaikhem thubuai a awrh tir tur thuin a rawn vau khur khur a. Chu mai bakah a hna leh hmalam hun zawng zawng khawih chhe thei thil a nih tur thute a sawi vek bawk a. A haw hnu khan Mama chuan engah vak a ngailo, mahse ka nu leh kei chu kan lo hlauthâwng hman viau. Bawihbawihi pawh khan a pa vauna avangin a rawn be tha ngam tawhlo a. Mahse Mama hi a duhnaah chuan a luhlul khawp a, a be lui a, Bawihbawihi'n a lo thlahlel ve bawk nen an inthlah hlei thei ta tak tak lova. Mahse Bawihbawihi pa lo kal hnu kar hnihna velah chhui zui theih awm miah lohin Bawihbawihi te chhungkua chu an bo ta daih a. Khang hunlaia Mama awmdan kha chu ka hmu leh duh tawhlo. A lainatawm lutuk. A hna pawhin a tawrh phah a, a bang ta reng kha ania. Bawihbawihi te in luahna te kan zawh lah chuan an pem na tur an hriat loh tur thu an sawi bawk si. An awmna chin hre tur thian hnai vai a lo nei bawk silo. Tikhan an tawp chu a ni ta mai" a ti halh a.




Vanmala chu ka lo lainat telh telh, keimah ang chiahin hmangaihnain a lo hliam tawh chu a ni sia.




"U Vanmala chu a va khawngaih thlak tak" ka lo ti halh a. Min lo nuih lui seih a "Khawngaih thlak lutuk. Tun hnuah heti hian an han inhmu leh ta ania, a tan chuan thlah a har ve ang..." a tih lai mek chuan sawisual inti lutuk hian inthiamlo hmel deuhin min rawn melh a, ka khawngaih letling zawk "A ho lutuk, U Vanmala awmdan tur chu ka hrethiam alawm" ka lo ti ve vat a.




"Mahse ka hriatthiam loh chu chuti khawpa inhmangaih si, U Vanmala hi chuan kha chen hmeichhia a ngaihsak lova, a tlangval rei a, mahse Bawihbawihi chu fa a pawm hma ang reng sia" tiin ka ngaihtuahna tibuaitu ber chu ka sawi chhuak leh a.




U Faktei pawh chuan "Keipawhin chu chu alawm mak ka tih. Bawihbawihi ka hmuh pangngai theih tawh loh chhan pawh hi ania, ka nuin a ngainat tawh loh chhan pawh hi niin ka hria. Mama khan a tawrh nat tehlul nen Bawihbawihi ve chu a heti ta daih sia. Chuti nilo se tunah hian an innei..." sawi sual inti lutukin a then sawk a "Awi...Mamte ka tihpalh" a ti leh sap a, ka lo nuih var var a "Ka hrethiam lutuk alawm. Bawihbawihi hian fa lo pawm lo sela chu hlim deuhin an inneih mai tur ania. An hlim dawn sia" ka lo ti ve vat a. Ka sawi zawng erawh chuan nuam ka ti fahran lo.




U Faktei chuan "A... Pathian ruat an nilo aniang, chuloah Mama nupui i ni hi ka lawm daih zawk. Tun hnua Bawihbawihi awmdan ngaihtuah phei chuan an lo inthen te kha ka lawm fe zawk" a ti leh hlak a.




A ngaihna hrelo fe hian "Bawihbawihi chu engtin nge a awm a?" ka lo ti a. Chutah U Faktei chuan "Chutin a sual ta pawh a ni chuanglo, mahse a hma ang khan ka ngaina tawhlo. A tleirawl lai ang kha a ni tawhlo ka ti mai. A tira an inhmuh leh thu ka û in a rawn sawi pawh khan kan lawmpui viau a, fa a lo neih tawh thu a rawn sawi pawh khan kan la pawm zam thei mai a. Mahse engtin min ti pawh a ni hranlo, ka ngaina lo telh telh a nimai. Ka nu lah hian a haw tlat bawk sia, hei tak hi chu a chhan ka hre biklo" a ti leh duah a.




"In inah an lo kal leh tawh em? Tun hnuah?" inthlahrung zet hian ka ti a, ka hre chak tlat atin ani.



U Faktei chuan awlsam zet hian "Kal leh tawh ele, an inhmuh leh hnu rei vak lovah Mama hian a lo hruai a, an nufain. E chuan mak leh deuh chu Bawihbawihi fanu Sangsangi kha... naupangtê si, a zia kha a zahpuiawm reuh lutuk. Mi hi a melh kal a, tawngkam a bei mawilo thei bawk si" a ti leh hlak hlak a. Sangsangi chu a ei vak loh hmel.




Kan sawi pawp ta sa sa tiin "Bawihbawihi pa chuan hetah an lo kal tih a hrelo em ni?" ka ti leh a. "Bawihbawihi sawi danin an pem hnu lawk khan a thi alawm. Helama lo let leh daih a duh thute a sawi a, mahse a nuin a pa thlarau tal zah sak tûrin a ngen a ni awm e. Chuvanga lo let leh lo ni chuan a insawi" a ti tha veleh mai bawk a.




"Anih leh Sangsangi pa hi?" ka tih leh chuan "Hei chu ka hre tawh biklo. Mama hi chuan a hria ang, ka nu nen kan zawh ngial pawhin a sawi duhlo. Kan hriat tura a duh chin chiah min hrilh a ni ber. In inneih hma, a la hriat ve hma che khan Bawihbawihi te nufa chanchin kan sawi ve hi a khap bur a. Ka nu pawhin Bawihbawihi kha a haw chho tan ni tain ka hria. Ka nu nen hian ka hriat ve loh thil hriat an neiin ka hria. Mahse ka zawt lem lova, an sawi duhin ka ringlo bawk" a ti leh duah a.




Ka thawk a ipik leh vek tawh. Pawi ta bera ka hriat chu Vanmala ka lo nei kher kher hi a ni. Mi inhmangaih tak inkar tichhetu niin ka inhria a, a hrehawm takzet.




U Faktei chuan ka ngaihtuahna hria ni awm fahran hian "Mamte, mahse ka hriatchian em em chu Mama hian Bawihbawihi hi a hmangaih tawhlo. Chu chu ring tawp rawh" a ti nghet charh a. A thusawi chuan ka rilru a tibuai telh telh.



Hmangaih tawh lo nise heti em em hian a ngaihsakin ka ringlo. A zah em em a nu nen pawh an inhnial buai phah kha ania.




Ka awih chiah lo nain U Faktei chu ka hnial duh ta lova.



Kan room lam ka pan meuh chuan dar 11 a lo ri tep tawh. Thawm dim zetin room kawngkhar chu ka hawng de de a, Vanmala chu a lo mut daih tawh ka rin tehlul nen computer hmaah hna a lo thawk mawlh mawlh a.




A thiltih laiah a ngaihtuahna a pe hle ni tur a ni. Ka va lut tih hre awm pawhin a awmlo.



Ngawi rengin ka face towel ka la, bathroom ka luh dawn chuan a rawn hawi vut a. Chik zet hian min rawn melh a, mit ka lo kan ak chuan min nuih suk a. "Va inphih fai phawt la, kan mu dawn nia" a ti ringawt a. A ngaihna ka hre bau lo.




Bathroom ka luh hnu chuan ka thaw chhuak halh a. U Faktei thu min hrilh ho kha hria angin ka awm tur a nilo tiin ka infuih ru mawlh mawlh a. Ka awmdan thunun chu a har viau mai thei.



Ka chhuah leh chuan khumah a lo mu thluang duai tawh a, min rawn nuih leh suk tawh. A awmdan hi ka hrethiam hlawl thin lo.



Ka hmaiah night cream ka hnawih a, min melh lovin a phone a lo en tawh thung a. Ka thaw huai mai.



Ngawi rengin a mut lohna lam sir tê ah chuan ka va inthawlh ve a. Chu veleh a phone chu side table ah a dah thuk a. Ka lam a rawn hawi a, kan mit a intawng chiang kher mai.



"Lawngtlaiah min lo zui dawn em?" a tih chuan ka ngaihtuahna a tibuai ta map mai.



Ka zui dawn nge dawn lo tiin ka rilru a insual buai nghal hle ringawt. Ka chhanna a ngaichâng tih hriat zet hian min melh run bawk si a.



Engpawh chu nise nupa kan ni tawh a, inthen leh tur pawhin kan la innei rei lo lulai bawk si. Chuloah Lalrinmawia ka ngaihtuah a, Vanmala ka zui ve vat lo anih chuan ka buai dawn.




Ka chhan hma chuan "Ka bulah i awm ve ang tiraw?" a rawn ti zawi ruih a, a mitmenga beiseina te, a bula kal ve tura min duh zia ka hmuin ka hria.



Min thlahlel hmel ngawih ngawih hi a pu a, ka vawikhat hmuhna ani. U Faktei nen kan thusawi te kha ka bengah a rawn ri nawn tlut tlut a.



Vanmala chu ka lainat thar leh tlat pek a. Ka tana a thiltihte ka ngaihtuah a, Lalrinmawia laka ka him nan min nei ve tho a ni a. Hnial thei niin ka inhre ta lo.



Chuloah nupa kan ni a, awm hrang thei kan ni tawhlo. Chu chu mi zawng zawng ngaihdan tur pawh ani.



Ka pasal a ni tawh a, min hmangaih lovin hmangaih bik chuang lo mah ila a bula awm theihna dân ka nei tlat.



"Ka lo zui ang che" ka ti ta a. A nui suk a, "Ka mitmeng hi en la, min chhiar la, min zir la, engkim i hrefiah mai ang" a ti ta daih a. He thu hi a hma pawhin a sawi tawh. Mahse min la ti bangbo tluang zel chu a ni e.




___________*_____________*_____________


(In ngaihdan lo sawi leh sap sap ula aw)


Show post links
Top

[Ngaia]

DEPUTY COMMISSIONER
By CVL Awmpuii



Chapter 16



Zanlaiah ka thang harh hlawl a, thawh phan awm lek lovin min kam tu awm ang mai hian ka harh kawk a. Vanmala mutna lam ka en chuan a lo ruak hiau a.




Zanlai laiah khawihah nge maw a kal ni ka tih rilruk neuh neuh lai chuan thlang lam veranda atangin a tawng bul bul thawm ka hre ta a.





Thawm dim zetin ka tho chhuak them them a, parda phen atang chuan ka va hmu ta a, phone a hmang niin ka hria. Tun ang hun tawhah tu tak bia ang maw?




Hriatchian ka châk tlat pek a, ka ngaithla ru ta a, ka awmdan chu a mawilo tih ka hria. Mahse ka hre chak miau si a ni.




"Bawihbawih, inbengdai rawh" a ti dam thlup a. A mi biak hming ka hriat rual chuan ka thin a na nghal zawk mai. Ka chhungrilah hian sawifiah theih si lohin na ngut ngut a rawn awm a. Tun ang hunah eng ang fakaua thu pawimawh nge an sawi ang.




"Ka nupui a ni a, ka bula awm tur ania lawm" tih te a sawi lehzel a. Ka chungchang an sawi avang chuan kalsawn tum buai lovin ka ngaithla zui ta zel a.




"I hriatthiam a ngai, in nufa nena kan inkar a nghawng buai lovang" a ti nghet leh charh a. Eng nge an sawi tak va hre ve kilh kelh lo mah ila ka chungchangah an inhau buai deuh niin ka hria.




Hrehawm ka tihna ai mahin ka rilru natna a nasa zawk. Ka pasal a ni tawh a, mahse hmeichhe dang a la buaipui tlat si.




An thusawi chu ngaithla zawm duh tawh lovin ka mutna ngaiah bawk ka va mu leh a. Ka mut a chhuak tawh hlawl lo a ni ber.





Ka ngaihtuahna a buai nuaih a. Vanmala hian kei min nei reng chung siin Bawihbawihi hi kawp a tum tluang zel niin ka hre tawh. Ani chuan engmah hrelo angah min ngai awm si a, mahse ka hre vek bawk si.




An inkar hi ka hrefiah ve pha tak tak lo, U Faktei khan U Vanmala'n a hmangaih tawh loh thu min hrilh mah se ka ring chiah lo. A la hmangaih hle zawk niin ka hria. A hmangaih hmasa ber a ni a, a tan a hlut tur zia chu ka ngaihtuah ve phak pawh a nilo ang. Tunah fa a pawm tawh chung pawhin a la ngaihsak em em tho a. A fanu pawh 'Apa' a intih tir hial thei ania.




Kei hi an tan ka lo hnawksak mai mai zawk lo maw tiin ka inngaihtuah a. Vanmala hian engvanga min nei kher nge a nih ang? A nu thu a awih vangah pawh lo puh thlu ngawt dawn ila a dam chhung nghawng thei thil a ni ve tho si a. A nu chu a hnial ngam ve turah ka ngai, Bawihbawihi chungchangah pawh khan a hnial ngam tho si a. Inphen nan min hmang tur em chuan ka ring phal leh bawk silo.




Ka nu hian Bawihbawihi huat chhan a neih ka ring ta tlat a. Eng ang pawhin nuthlawi lo ni mah se ka nu mizia ngaihtuah hian va hmusit a, va en tleu tur ang mizia kha a pu hlawl lo. Huat chhan chu a nei em em ang, chuti ni lo se a fapa nupui tur tan pawh a iai ka ring chuanglo.





Chutiang zawng zawng karah chuan kei hian eng nge tih ve tur ka neih. An chhungkua ah min lawm lut a, ka hriatpui ve loh thil a tam bawk si.




Rinmawia nen kan inkar buaina kha hmang tangkaiin remchangah an rawn la ni ta berin ka hria. Chuti ni lo se keipawh hian Vanmala hi ka nei kher lovang.



Vanmala a rawn luh leh lai chuan ka lo muhil der vat a. A ri sut sut a, khum rawn hniam tak sawtah chuan a rawn mu thla veleh nghal tih ka hre mai.



Chutia tang tunga ka lo mut lai chuan a rawn tawlh hnai a, a kutin ka biang a rawn tawk de de a, ka thawk ka lo ip ngar ngar thung.




A kut chu a lum vung vung a, ka biang chu a rawn chul hauh hauh a, ka chalah rawn fawpin a thaw chhuak suai suai a. "Buaina a ka hnuh luh che avangin ka tihpalh ani" a ti dam thluam a. A thusawi awmzia chu ka hrelo kher mai.




Eng buainaah nge min hnuh luh ? Bawihbawihi nen an inkar a sawina em ni ang?




Ka hmui chu a kut a rawn tawk leh zauh a, "Duhawm lutuk mai" tiin a phun sup a, ka muhil der tih a hriat loh hram ka beisei.



"I inpeih hma chu ka nghak ang che" tiin a phun leh sup a, a inlahrang ta vat a. A hriat hlau zetin zawi tein ka thaw chhuak suai suai a. A huhang a na mah mah ani.




Ka ring chhe viau dawn thin a, mahse min ngaihtuah ber niawm takin a awm leh thin lawi bawk si. Ka ngaihtuahna a insual buai nuaih zel.



Zinga ka harh chuan a lo mu tawh lova. Ka inphih fai hnuah inhnuai lamah ka chhuk thla nghal a. Ka nu leh U Faktei te an lo tho tawh mial a, thawh ka hai ti dawn ila dar 6 vel chiah a la ni bawk sia, an lo tho hma hrim hrim ah ka ngai mai.



Choka ka luh chuan min lo be leh nghal bawrh bawrh a. Ka nu chuan "Vawiin chu hmanhmawh vut vut lovin kal ula tiraw, chawhnu her lamah pawh kal ula a pawi dawn emawnile?" a ti zung zung a.



"Nia, U Vanmala pawh khan 'Tlai dar1 velah chhuak ila, zanah kan thleng ang a, a hahdam thlak zawk ang' a ti a" ka lo ti ve vat a.



Ka hawi kual a, Vanmala chu ka zawng ru deuh a, mahse hmuh tur a awm miah lo. Ka nu chuan ka awmdan chu min lo hrethiam aniang "Thil hmanhmawh thlak a awm a, i la mutui bawk sia kaitho lo chein a chhuak lawk anih kha. Chawei hunah chuan a lo let leh mai ang" a lo ti zung zung a. Ka lo bu nghat nghat.




Ka rilru erawh a nuam vak lo, Vanmala rinhlelhna hlirin ka khat tawh.




Chawei hun awm velah chuan a lo let leh ta ngei a. A rilru a hah hmel kher mai. Min be lova, ka lo be bik lo. Ka nu nen erawh an inbia a, kan kal hun tur vel an sawi.




U Faktei chuan"Mamte, i in pack fel tawh em?" a lo ti var a. "Tlem chu pack tawh, mahse chawhnu lam kan tin zawn avang khan ka lo hmanhmawh vak lova" ka ti ve vat a.




Inneih hlim hlawt kan la ni a, ka bungrua vel chu a la in pack fel sa thlap a, Lawngtlai lama ken tlang nghal tur anih avangin kan khawih che vak duhlo kha ania. In pack buai chuk chuk a ngai dawn lova a zia phian mai.




Chawei kham, thleng ka sil laiin Vanmala a rawn kal a , "I sil zawhah room lamah min lo zui chho lawk rawh aw" a ti sup a, ka melh vat a, a mitmeng a thu tak run a, a nelawm loh hle bawk.




Ka lo 'aw' ve mai a. Tukin atanga a vawikhat min biakna a nia, a la nelawm loh em em zui a. Zingkar karah a mood tichhetu an awm a nimai thei. Ka chungah a hrik thlak loh hram beisei ang.




Thleng ka sil zawh chuan room lamah ka chho ve nghal zat a. Room chhung ka luh chuan a suitcase chhungah a kawr a lo dah lut mawlh mawlh a, a lo insiam ve niin ka hria.




Ka thawm a hriat chuan min rawn melh zawk a, "Lo lut la" a ti sup a. Ka lut ve nghal mai bawk.



"I lo insiam duh anih kha ka buaipui thei alawm" ka han ti ve ngial a. Nupui tih tur pawh niin ka hria, a nupui ka ni tawh a, amah buaipui chu ka tih ve turah ka dah.



"A harsa hlei nem" a lo ti mai a, a che zui leh mawlh mawlh a. A bulah chuan ka lo ding zum reng a, min ko luttu a ni a, mahse engmah a sawi zui leh bawk silo. Ka awm a tinuam lo khawp mai.




A suitcase a zip fel hnu chuan min rawn melh vut a, ka lo ip chawih mai. Mahse ka inthunun hram hram a, ka hmelah danglam a awm loh hram ka beisei.




"Mamte" a ti sup a, nichina a âw nelawm loh lutuk kha a reh leh daih tawh. A hmel hmuh pawh a nuam ta deuh.



"Inthen leh mai mai turin ka nei lo che tih i hria ang tiraw?" a ti sup a, ka beisei loh lam daih a rawn sawi.



"Eng nge i sawi awmzia?" ka ti sep a, ka bangbo viau mai.




"Eng dinhmunah pawh ding ila, engpawh tawk ila, min hmangaih thei lo mah la engtikah mah ka then dawn lo che ania. Min nei tura thutlukna i siam ni atang khan ka rilru ka siam fel vek tawh. Ka then dawn lo che" a ti ta duah a.




Chutiang thu a sawi teh ngawt chu, min tihrilhai khawp mai. Then tumna rilru ka pu azeng pawh a nilo a. Mahse amah zawk a rawn insawi khalh vek lawi a.




Rin dan mak sak zet ka nei a, chu pawh Bawihbawihi te nufa bawk ani! Bawihbawihi nen la inzui in, ngaihsak zui reng mah se inphen nan min neih char char tur thu a sawina angah ka ngai. Ka ngaihtuahna chu duh lo zetin ka lu ka thing nawk a. Vanmala hi mi rintlak tak a nih rinna ka la nei cheu nia! Ka ngai chhe phal der lo.





"Kan awmdan a zir te pawh a ni ang chu" ka ti zawi sep a. Min melh ngur a "Eng tiang pawhin awm ila kan inthen lovang" a ti bur mai. A awmdan mak sak zet zet hi ka hrethiam ve lo.




Kan insiam peih hnu chuan ka chhungte hmu turin min hruai a "Hna ka buai chho char char tawh dawn a, kan haw mai awm si lova. Chuvangin kan kal hmain va tlawh ang" a ti a. Ka lawm zia chu !




Vanmala mak veleh na deuh chu ka chhungte hi min ngaihtuah pui em em a. Hei tak hi chu kan inneih hma atang khan a in tan tawh. Chuvang aniang ka chhungte pawhin makpa atan an iai loh em em ni. Leh lam kawng zawng taka ngaihtuah chuan ka chungah a tha em em a, ka chhûngte chungah lehzel pawh a tha a. A puitling in thil a ngaihtuah kim viau thin.





Ka pi nen kan han inhmu leh chiah chu kan phul hluai mai. Nimin lawkah pawh kan inhmu reng a, mahse kha chen lo in awm chawt thin kan ni a. Tunah chuan kan inhmu leh mai mai tawh awm silo, ka ngaihtuah zawng ringawt pawhin ka lung a leng lawk.




Puia chu a coaching kal, an exam lai a ni a, a thulh thei loh avangin a lo awm lova. Rina pawh college a lo kal daih. Ka pa chuan kan kal dawn tih a lo hre lawk a, hna a lo chawl a. Vanmala'n a lo hrilh leh diam tawh anih ka ring. Ka nu erawh khatia ka pi a dam loh takah khan amah chauha in awmtir tha a tilo a, awmpui laka an kuta dah ngawt chu ni theiin a hre si lova. Ka pa nen an sawi dun hnuah a hna a bansan ta tawp a, a ui ve hlein ka ring. Mahse ka pi a ngaihtuah vang ani tih hriat chuan a hahdam thlak thung.





Ka nu leh pa leh Vanmala te chu thutkhawmna ah an lo inkawm a. Ka pi nen erawh a room ah kan inkawm a, thu tha chitin reng min fah leh mawlh mawlh tawh.




"Hei, puitling ve tawk takin pasal i nei a, chutihrual chuan i kum phu lovin naupanchhiatna lai hi i nei reuh a, insiam that ngaihna pawh tam tak i nei ang. Engpawh nise pasal nei tawh i nihna angin i pasal tan nupui tha tak nih tum ang che. Inthen tih lam phei kha chu ngaihtuah pawh ngaihtuah loh tur. In la innei hlim hlawt a ni a,i ngaihtuah chuang lovang tih ka rin rualin nakin hun zel tur ngaihtuah in ka sawi anih chu. I pasal hi i tana Pathian ruatah pawm tawp la, a hahdam thlak a nimai" a ti dap dap a.




Ka lo bu nghat nghat a, nupui tha tak nih chu ka tum ngei alawm, mahse ka thei kher ang em ka hrelo. Vanmala awmdanin a zir si loh chuan keiin theihtawp chhuah mah ila awmzia a awm lovang.




Ka pi chuan "Nau pai vat la a fuh ang" a rawn ti leh teh daih a. Ka chil ka hak thelh, nupa nun pawh kan la hmang lo ania, nau pai chu la hla vet vet tak ani.




"Aa...a hmanhmawh thlak hlei nem" ka han ti ve ngial a, ka âw a zawi khawp mai. Chutah ka pi chuan "I pasal kum ngaihtuah la, i kum ngaihtuah bawk la. Fa neih vat vat chu in tan a tha ve ve" a ti leh mawlh mawlh a. Ka chhang zui tawhlo.





Nau pai kan la hlat zia a hrethiam lo ani.




Thingpui kan in zawh chuan haw turin kan intintuah ta a, ka nu nen pawnah kan lo va chhuak hmasa a, ka nu chuan "I piin a hrilh teuh tawh chein ka ring a, ka sawi ve duah lo mai ang. Mahse i pasal hi a hnathawhna kawng tinrengah thlawp tlat ang che. Zahawm taka i awm chuan i pasal zahawmna i belh chhah dawn ania" a han ti ve ngial a. Ka lo bu ve nghat nghat.





Ka pa te an lo inzui chhuah ve takah chuan thil dang sawiin kan titi leh tawh a.




Kan haw tur ka pi nen kan in bye bye chu ka mittui a tla tep lehnghal a, ka va inhaw tak. Ka tah belh thar em em mai hi a thalo takzet, naupangchhia pawh ka ni tawhlo.




Vanmala sawi ang ngeiin tlai dar 1 chiah chiah ah kan chhuak a. Kan in a rawn kal a, min thlah liamtu pawh an awm ve nual. U Vensangi chu an fate an dam that loh avangin min lo thlah ve thei lova, thupha a rawn chawi nasa viau mai. A inthlahrung lutuk a, a khawngaih thlak zawk.




Vanmala leh Bawihbawihi chanchin chu hrilh ve ka rilruk a, mahse kan nupa kar a ni a. Ka ring lo tihna ni lovin midang hnena han sawi kha kan mualphona mai mai tur niin ka hria a. Thurawn ka mamawh hunah U Vensangi chu ka hrilh chauh ang.




Vanmala nen chuan zinkawng thui tak kan zawh dun dawn a ni sia, a khawhar thlak lawk. A tawng tam lo ve bawk sia, kan inkar a tha chiam bawk silo, ka huphurh khawp mai.




Aizawl khaw chhung kan chhuahsan rual chuan "Pangngai taka kan tlan chuan zan dar 9 velah kan thleng thei mai ang. Lawngtlai thlen hmain hotel ah chaw kan ei ang a" a ti sup a, ka lo bu nghat nghat.




"Tunah khan i ril a tam em?" a ti leh sup a, min rawn melh zawk bawk. "Aih tam rih lo" ka lo ti vat. Kan ina kan len lai khan chhun thil kan ei a, ka la puar rih viau.




"I duh leh hla kha play la" a ti leh sup a, min ngaihtuah ve niin ka hria. Ka awm nawm loh a hlau te pawh a ni mahna.




Ka phone la chhuakin bluetooth chu ka on a, ka connect ta vat a. Zai nuam ka tih avangin hla save sa hi chu ka nei ve nual. Mizo hla ka neih ang ang chu ka play a, ka zai pui veleh zeuh zeuh thin.




Chutah U Vanmala chu a lo nui suk a, ka melh ha a, min rawn melh ve chiah bawk. Hmalam a en leh vat a "Joint Fellowship kan neih zana i zai kha ka hrechhuak" a rawn ti sup a.




Taka , khami zan khan a awm ve tak alawm. Ka zak thar leh chem chem mai.




"I zai thiam kha ka ti khawp mai a" a ti leh a, nuihza insum zet hian min melh a. Rum zeta melhin "Min fak der kher suh" ka lo ti hlak.



Pangngai deuhin min han fak ve sela chu ka awm a nuam deuh tur ania. Mahse a nuih a zat hmel si, zai thiam lo min ti zawk hle ah ka ngai.




"Ka fak der hlei nem che" a ti dam thluam a. "Zai tur an awm loh vang anih kha ka zai" insawi thiam tum zet hian ka ti nang nang a.




"A hma pawhin i zai fo kha" a lo ti khauh, phawk zet hian ka melh a. Engtin nge ka zai thin tih a lo hriat, ka ngaihtuahna chu a hrethiam aniang "Ka hriatna che a rei tawh ania" a ti leh daih a. Mak ti zeta ka lo melh lai chuan a nui suk a.




Chutah uang thuang zet hian "Nupui zaithiam ka nei tawh sia, zanah i zaiin min awi mu thin ang" a han ti veleh ngial a. Insum hman lovin ka lo nui chhuak ve hak mai.




Ka beisei ai takin kan boruak chu a zangkhai a, Bawihbawihi te nufa pawh ka ngaihtuah hman mang lo. Hetia kan hlim ve lai hi chuan ngaihtuah buai pawh ka duhlo.




A titi mawlh mawlh laiin ka lo muthilh san daih aniang ka harh leh chuan khua a lo thim tawh a. Ka che sat sat a, ka harh tih a hriat rual chuan "Ka thusawi laiin min muthilh san daih a" a lo ti sup a.



"Dar engzat nge?" ka lo ti daih thung.




"Dar 8 a ri tep, kan chawei na tur pawh kan thleng tep aw" a ti leh sup a. Ka ham zui bai bai a, motor chhungah thlamuang taka ka vawikhat muthilhna a ni hial ang.




"I ril a tam chuan khata kha eitur ka dah" tiin car hmaa polythene chu min mitmei zauh a. Ka pum a rawn ri nghal rawih rawih a, zak deuha ka va melh chuan a lo phun hluk a "Eitur chu i ei ngei a ngaih hmel, ei vat rawh" a ti sup a.




Ka mutui lutuk a, ka riltam zia pawh ka lo hrelo ani.




Polythene chu ka la a, momo 10 vel hi a lo awm a, alu chop a lo awm tel bawk. Tui ti zetin ka ei ta a. "I duh ve em?" ka tih chuan a lu a lo thing mai a.




Kar lovah kan chawei na tur hmun pawh kan thleng a, thil kha ei zuai mah ila ka puar tak taklo, ka ril chu chaw tamin a tam hlur tawh mai.




Car atanga kan chhuk rual chuan Vanmala chuan ka kutah intitatu zet hian min rawn chelh vat a, ka melh deuh ha chuan engmah ti lo ang maiin hmalam a melh daih thung.




Ka kut pawh chu lasawn bik lem lovin hotel ah chuan kan inzui lut a. Ka thutna tur min pawh chhuah sak thlap a, eitur chu a en zung zung a. Ka lama rawn nawr pah chuan "I ei chak zawng sawi la, kan chah dawn nia" a ti sup a. Ka lo ban vat a.




"Tunah chuan engpawh ka ei thei vek ang" ka tih hluai chuan a nui hawk a "Ka nupui hi a ril a lo tam viau a nimaw" a ti sup a. 'Ka nupui' min tih chuan engtin emawni riau hian nuam ka ti veng veng mai. Ka pasal ani hliah hliahin ka hria.




Kan eitur chahte a lo thlen hnu chuan kan ei zung zung a. Vanmala chu a riltam viau ka rin nen eng tham mah a ei lo. Kei lah chuan ka ei duak duak a, ka ril a tam tawh em ani.





"I ril a tam ve lo em ni?" ka tih chuan "Mipa ka nih hi" a lo ti daih a. "Mipa pawh ni la i ril a tam ve thei tho alawm" ka lo ti hlak a, a nui hawk a. "Tun ang reng hian ka lakah awm ang che. Inthlahrun hmel deuhin awm tawh suh. Ka tan a hrehawm ania, inhawng takin awm rawh" a ti ta daih a. Ngainat awm zet hian min nuih bawk a. Ka nuih let ve ta tawp.




Ni e, a tan pawh hian ka awmdan hi hriatthiam ka har ve viau ta thin ang.




A awmdanin min tih hrilhai thin tluk zet hian ka awmdan hian a tihrilhai ve fovin ka ring ta. Ka pasal awm nawmna tura ka awm thiam ve a ngai fo dawn tih ka ngaihtuah ta a.




Keima lam buaina chauh ka lo ngaihtuah a, amah pawh hian buaina eng emaw tak chu ka chungchangah a nei ve fovin ka ring.




Lawngtlai DC quarter chu Vanmala sawi ang takin dar 9 velah kan thleng ta a. Guard a lo awm thlap a, kan bungrua te min thiar luh pui a.



Vanmala chu a che nghal zung zung a. Kei erawh kan thil ei zo motor ka chuang leh kha ka chuang sual pek a, ka chau nghulh mai. Quarter hmun hma vel pawh chu thleng hlim hlawt e tilo chuan ka enkual peih mang lova.




Inchhung kan luh rualin ka insum zo lo chu bathroom awmna ka zawt nghal a, min kawhhmuh rual chuan ka tlân phei a, ka luak nghek mai. A zialo tak tak ani.




Vanmala chuan ka hnungah a lo chûl a, min lo umzui tih pawh ka hre miahlo.




"Motor kha ka khalh fimkhur viauin ka hria asin le" inthiamlo zet hian a ti sup a, ka nuih lui seih a, "Thil kha ka ei hnem sia, ka chuang sual ve anih hi" ka han ti ve ngial a. Ka tho tur chu min lo pui a, min ngaihtuah hmel lutuk chu nuih a tiza zawk. Ka lawm viau thung.




Guard pawh a lo la awm ve a, "Ka pi, muhil vat la a zia mai ang" a lo ti ve ngial a. Min koh nana 'Ka pi' tih a han hmang kher chu nuam ka tilo. Kei ai a upat hmel daih bawk sia.




Vanmala chuan "Pu Chhuan, kan lawm lutuk e, tihian kan lo inbuaipui ve tawh mai ang. Nang pawh va kal leh tawh rawh" a ti sup a.




Pu Chhuana chuan "Min mamawhna in neih chuan min lo ko vat dawn nia" a ti zung zung a, a chhuak zui ve nghal mai bawk.



Ka chau lutuk chu Vanmala nghen chhanin ka ding tawk tawk a, motor ka chuanin heti hian ka la awm ngailo asin mawle.



Vanmala chuan zo zet min pawmkang nghal nawlh a, ka dang buai peihlo. Min ngaihtuah tih hriat lutuk hian "Kan mu nghal daih dawn nia" a ti sup a, a pen zui pawk pawk a, khawi lam nge min pan pui pawh ka hrelo.




Khum dup nuam zetah hian min mut a, puan min sin tir thlap bawk a. Ka lo nuih lui hram hram. Ka meng hlei thei der lo. Ka chau a ni tawp mai.




Ka chalah rawn fawp zauhin "Lo mu lawk rawh, bungrua ka zuk la ang a, ka lo mu ve nghal ang" a ti sup a. Chhan pawh ka chhanglo.



Room atanga a chhuah rual chuan ka muhil zui ve nghal nimaiin ka hria. Engmah ka hre zui tawhlo.



Mahse ka muhil emaw ka tih reng laiin ka taksaah danglam a rawn awm a. Vawt tih lutuk avangin ka thang harh hlawl a. Ka khur zui nghal dar dar bawk. Ka thawk a sa huam a, ka lu a na ngut ngut bawk.



Ka che dawn a, mahse ka khurh nasat lutuk avangin ka che hlei theilo. Vawt ka ti lutuk bawk nen a hrehawm duh kher mai.



Vanmala mutna lam chu ka va en a, tui zetin a lo muhil a. Tih harh ka hlau bawk si, thei leh thei lovin thawh chhuah ka tum a.



Ka thawmah a lo harh ta tho aniang, chutia ka lo khur dar dar min hmuh chuan min rawn hnaih ta vat a, ka pang a rawn deh rual chuan "I khua a sik, i tlun anih hi" a ti hluk a. "A vawt" ka lo ti khur hlak bawk.



Rang zetin a tho chhuak a, kei erawh ka lo thu ngawi reng tawh thung.



Wardrobe atang chuan rizai pahnih hi a rawn la chhuak a, ka lo thu reng chu min rawn muttir leh phawt a. Rizai chuan min rawn khuh a "Min kaih thawh mai tur che ania" a ti zui hluk bawk.



Khum bula drawer chu a va hai leh rak rak a, damdawi leh tui a rawn la zui nghal a. "Ei la, i zia mai ang" a ti sup a. Inben kan ka lo tum lai chuan a thil ken lai chu dahin min pui leh vat a.



Damdawi chu ka ei a, tui pawh chu ka in zui khawlh khawlh bawk.



Min mut that tir leh thlap a, mu ve tawh lem lovin ka bulah chuan a rawn thu ta run a. Min ngaihtuah hmel bawk si a va nuamlo duh tak.



Nileng deuh thawin motor a khalh a, a chau ve dawn lutuk tih ka hria. Heti hian buaipui ngaiin ka awm zui ta bawk sia, ka inthlahrung kher mai.



"U Vanmal, mu rawh, ka tha mai ang" ka tih chuan a lu a lo thing nghut a "Muhil phawt rawh" a lo ti sup. Min melh zui vung vung bawk sia nuam ka tilo.



Ka vawt ti chu ka la khur der der a, ka lum zo vak lo ani.



Ka kutphah chu a rawn chelh a, a thawk khum zui ham ham a, a nuai zui neuh neuh bawk a. "Heti hian a zia deuh em?" min ngaihtuah hmel lutuka a tih chuan ka lo nui tawp. Heti em em a min ngaihtuah chu ka ring pha miahlo.



"U Vanmal, ka tha ang, lo mu ve tawh rawh" ka ti leh sep a, ka tiril a la khur dar dar mai.



A rum ta nghut a "Ka thiltih tur hi min dang suh ang che" ti hlukin a kawr haklai chu a phelh zui ta mai. Mangang lutukin ka puan sinlai chu ka lo man khawm vat a.




Ka bulah a rawn inthawlh a, ka puansinah chuan rawn inthawlh ve in a taksa si chetin min pawt hnai ta dawrh a. Ka lo la tal chiam zui a.




A phun leh hluk a "Engtin mah ka ti dawn lo che, ka taksa lumin ka ur dawn che anih hi, i khur a reh theilo emai" a ti nghut a. Ka thaw huai mai. Ka dam loh lai remchangah lain min khawih a tum emaw ka lo ti hman thelh alawm.




Ka ngaihtuahna hria ni awm tak hian "Min ngai sual viau teh suh" a rawn ti hluk zui a. Ka chesawn ngam tawh eih lo.




U Vanmala taksa lum thur thur deka mut chu thil hrehawm tak a ni hranlo, a zamawm viau e tih mai loh chu.




A awm pharh hlai tha zetah chuan ka lu ka nghat, min kuah hlu hlu a, ka taksa khur nasa lutuk leh ka awmdan hrehawm lutuk pawh chu a zia huai maiin ka hria.



Ka hnungzang a chul zui hauh hauh a "I zia deuh em?" a tih chuan "Umm..." ka lo ti zawi raih a.




Ka hnung a chul hauh hauh reng bawk nen mutchhuak in min rawn zem chiai chiai a , ka muhil zui ta veng veng a.




Ka beng zawnah lungphu ri dup dup ka hriat rual chuan ka harh tial tial a, ka bawh beh mek taksa chu a lum tha lutuk. Ka che zeuh a, U Vanmala chuan "Mamte i harh em?" a rawn ti sup a. Ka then nghal chak chak mai, nizanah khan a taksa dek chungin thlamuang takin ka mu tak alawm.





"Umm..." ka ti sep a, ka samah a rawn fawp nghal tawk a. Ka pang a rawn dek leh a, "I khawsik tlem a la awm anih hi" a ti sup a. Ka inlahrang hlek a, min lo dang bik lo.




Lukhamah chuan ka lu nghatin ka va melh a, min ngaihtuah tih hriat lutuk hian min lo melh ve run bawk a. "Kan in entir dawn em ni ang?" a tih chuan "A ngai lovang, ka motor chuan ka zawh loh vang mai mai anih hi" ka ti ve ngial a.




A tho chhuak vut a, a âwm chu ka lo en hmanhmawh. Mipa tih hriat lutuk hian thau ni miah si lovin a inphiar fat a, sek tung tenawm deuh ang kha a ni chuang bawk silo.




Damdawi leh tui min rawn lak leh a, min buaipui zei vak lo nain min ngaihsak viau tih ka hria a. A thiam ang tawk chuan nizan atang tawh khan min buaipui ve niin ka hria.




Ka thawh chhuah theih miau loh avangin eirawng a bawl vek a. Kan thlen zan atangin buaipui ka ngai nghal pang mai chu a nuam fahran lo.



Chaw pawh room ah a rawn keng chho a, eng tham mah ka eilo. Ka pang a dek sek a, ka khua chu sik hluai tawh si lovin ka khawsik a reh hlei thei bawk silo a rilru a buai hmel kher mai.




Hna thawh tur pawimawh a nei nghal si a, hreh zetin min chhuah san a, a zawh veleh a lo haw nghal tur thu min hrilh bawk a. A rilru nawm loh hmel lutuk chu ka khawngaih a min ngaihtuah lo turin ka chah ve ngial bawk.



Engmah pawh buaipui hlei thei lovin khumah chuan ka mu ta reng a. Ka chau ngawih ngawih ani ber. Tun hnai ka hriselna pan chho ta lutukte chu ka thin a rim hlur mai.



Room kawngka inkik ri ka hriat rual chuan Vanmala anih ringin chau zet hian ka meng chhuak a, "I lo va haw hma leh si ve" ka ti chhuak sep a.



Mahse kawngka bula Bawihbawihi te nufa lo ding reng ka hmuh chuan ka hamhaih kher mai.



Ngainat awm zet hian min lo nuih sang a "Kan lo lut thei ang em?" a tih chuan inthu nun tum takin ka bu nghat a. Hetah eng thil nge an rawn tih dawn ka hre hauh lo mai.




A fanu chuan min lo nuih sen sen a, chutiang bawkin Bawihbawihi pawhin. A ngaihna ka hrelo kher mai.



"Eng nge i an tawh a?" khum bula rawn din pah chuan a ti sep a, min nuih var var bawk. "Ka tha tawh lutuk" ka ti sep a. A lo bu nghat nghat a.



"Eng nge in lo tih dawn a?" ka ti ro leh halh a. Ka awm nuamlo zawng zawng pawh a bo vekin ka hria. Heta an rawn lang thut chuan min thawng em ani.



"E...taka lo sawi nghal awm tak ania. U Vanmala'n min lo tir a,i dam loh thu min rawn hrilh a. Vawiin tlai chu eirawng ka lo bawl sak dawn che u" a ti zung zung a. Mak ka ti telh telh.



Vanmala reng reng pawh min hrilh lawk ve awm ania, min ti hamhaih zo leh vek tawh. Bawihbawihi te nufa an lo ni kher bawk nen a nuam fahran lo.




Bawihbawihi chu a titi nghal siam siam a, a fanu chuan min lo nuih ve sang reuh bawk a.




"Hetah hian a hma khan ka thawk thin a, mahse eng emaw harsatna avangin kumin atangin ka kal ta lova. Ka tan thil harsa a awm lova, tikhan rilru hahdam deuhin i lo mu dawn nia" a ti mawlh mawlh a.




Quarter chanchin leh U Vanmala hnathawh that vanga Lawngtlai mipuiten an hlawkpui zia te chu hahipin a sawi a. Hetia nupuia min neih tak avanga a lawmzia te pawh a sawi nawk mai. Ngainat awm zet hian min be seuh seuh reng a. A titi ka ngaithla a ni ber.




A hnu deuhah chuan "Eirawng chu ka zuk bawl tan ang e, tikhan mamawh i neih chuan min lo ko rawh aw. U Vanmala khan lo ngaihtuah tur chein min ti nasa sia" tiin a nui hak hak a.



"Bawihte, tihian Nu Mamtei hi lo mu rih rawh se eirawng zuk bawl ang" tih leh a fanu kaih chhuah chu a rual a.




An chhuah hnu thleng pawh chuan mak ti lutukin ka en zui ta reng. Ka lo rin lawk dan chuan Lawngtlai ah hian buaina tam takin min lo hmuak dawn niin ka hria a. Mahse buaina min thlentu tur ber a ka rin Bawihbawihi lah chu khati kha a ni a. Ka chungah a rawn tha em em mai bawk si a.




Kan awm zel dan tur chu rin thiam ngaihna pawh ka hrelo.



_____________*______________*_____________


(WhatsApp group kha a la join zel theih e aw...)


Show post links
Top

[Ngaia]

DEPUTY COMMISSIONER
By CVL Awmpuii



Chapter 17



Vanmala leh Bawihbawihi chungchang ka ngaihtuah neuh neuh lai chuan ka phone a rawn ri a, ka la phu zawk zui a.



Ka ban vat a, Vanmala a lo ni. "Hello" ka ti zawi sap a. "Eng nge i an tawh a?" a rawn ti sup. Min ngaihtuahna âw ka hre tel bawk.



"Ka zia tawh lutuk" ka lo ti tha ve mai a. Bawihbawihi te nufa lo kal thu sawi ka tum lai tak chuan "Bawihbawihi kha a lo thleng tawh em?" a rawn ti ta zawk a. Chutia awlsam lutuka a rawn sawi chu mak ka ti ang reng.




"Umm..." ka ti ringawt, min hrilh lawk bawk silo a, ka lungawi vak lo. Khati teh tawpa midang lo tirh kha ka tan a hrilhai thlak. Tha takin min hrilh se, ka hnial bik dawn pawh a ni lova. Mahse min râwn hmasa miah lova a rawn tir teh tawp chu ka lawm lo.



Bawihbawihi nen an inkar ka hre vek tawh tih a hriat loh avangin a ngaih a lo sam viau pawh a ni thei tho.




A rawn thaw chhuak huai a "A that hlauh chu, i thawh kan peih ka ring lova. A hmaa ka lo awmpui sa, thiltih dan tur engkim hre sa vek a ni tho a. Chawpchilh deuhin ka ruai ta tawp anih kha" a rawn ti luam a.




"Pawi i ti em lovang chu..." a tih zawm leh sup a. Engkim a tih tawh vek hnuah pawi ka tih leh tih loh min rawn zawt chauh ania. Pawi ti viau pawh ni ila awmzia a awm tawh chuang lo.




"A pawi hlei nem" lungawi vak lo hian ka ti nghat a. Chutah "I thinrim em ni?" a rawn ti ta chiah rêng a.




"Thinrim chhan tur a awm em ni?" ka lo ti nghat thung. Chutia ngam pa lutuka ka ngaihdan ka sawi chhuak ve ngam ta mai chu mak ka inti.




A rawn nui chhuak ta hawk a, a ngaihna hrelo fein phone chu ka hma zawnah ka lek a, ka melh nghal nghek bawk.




Ka bengbula ka dah leh rual chuan "Ka hrethiam e" a rawn ti sup a, hriatthiam tur a awm pawh ka hre silo. Min ti bangbo leh viau tawh.




"Eng nge?" ka ti hlur a, ka thin a tirim tlat. "Hma kan sawn viau e" a rawn ti leh daih a. Ka hne, a awmdan vel hi hriatthiam a har thei si ka ning tlat.




"Ei chak i nei em?" a rawn ti dam leh thluam a, a thusawi inpersan hlawm lutuk chuan min tihrilhai.



Lungawi lo zet hian "Neilo, ka dah" ka ti ta hmak. Thinrim khum viau dawn lahin min nuih daih a. Pangngai taka titipui dawn lahin a thu tak leh mah mah zel bawk si. A chang leh a bulah ngampa deuhin ka awm ngam lova, ka zah a, ka rilru pawh ka sawi chhuak ngam ngai lova. Ani chu a pangngai fu zel bawk sia. Vanmalsawmhlua hian awmdan tur pawh min ti hrelo.




Bawihbawihi amah chauha kan inchhunga a chetla vel tur ka ngaihtuah chuan ka ngaih a ngam ngang lova. Ka pasal bialnu hlui a lo ni kher bawk sia, nakin zel atan a thalo ang tiin peihlo chung chungin ka tho chhuak a.





Kan nupa room chu ka hawi kual a, Aizawla kan room nen chuan a inthlau viau, mahse ka pawiti lo zawk. A tawk felfai viau chuan ka hria.




Ka inphih fai hnuah damdawi ka ei leh a, inhnuaiah chuan ka zuk chhuk thla ta a.




Thutkhawmna a sofa ah chuan Sangsangi a lo mu dar dar a, phone ah thil a en bawk. A awmdan atang chuan helai hmunah hian a tlangnel sa viau niin a lang.





Choka ah ka phei a, Bawihbawihi chuan alu a lo vel mek a. Min rawn hmuh chuan ngainat awm zet hian min rawn melh a, "I lo chhuk thla peih elo?" a lo ti var a. Ka pasal bialnu hlui anih vangin kan haw viau dawn pawh ni ila min be tha em em bawk si. Han chhan hmuk hmuk kha ni theiin ka hre bik silo "Ka zia tawh lutuk" ka lo ti tha ve mai a.





Min be tawh lem lovin a alu vel lai chu a vel chhunzawm mawlh mawlh a. Kei erawh nizanah khan ka chauh em avangin in leh a chhehvel pawh ka la thli thlai hman lova. Thlang lam veranda ah chuan ka chhuak tharh a. Ka hawikual a, thingkung buk pathum vel hi a ding a. A hnuaiah chuan thutna daihlim duai mai a awm bawk. Nipui nisat lai tak takin thlifim dawng tura thut mai mai na atan a îtawm takzet.






Rei awm lovin inchhungah chuan ka lut leh vat a. Bawihbawihi chuan alu a lo vel zo tawh a. Kan mai theih turin a dahfel a, Fridge a va hawng a, min rawn melh zawk a "Alu hi kan kang ang a, bai leh tlak kan siam leh ang a, a tawk mai ang chu maw? Ei chak te i nei em?" a ti leh zung zung a. A landanah chuan ani hi chhungpui nu a ni a, kei ve chu an mikhual ang mai hian ka inhria.




"Neilo e" ka lo ti tha ve mai a. A chezia chu ka thlir reng a, min ngaihsak ve vak hmel loh. Ka rin aiin a ngampa ang reng.



"Ei chak i neih loh chuan ka duh duh ka siam tawp mai ang aw. Mahse i neih chuan U Vanmala kan chah dâwn nia" a tih zawm leh zung zung a. A alu kanna tur tel a chhuak pah nghal bawk.





Tha deuhin min be mah se min tih dan vel chu ka run deuh tlat pek a. Vanmala chu ka pasal a ni a, ka ei chak zawngte chu ka chah ve thei reng si a. Mikhual ang maiin min lo dawngsawng niin ka hria.




Choka kawngkhar bula ka lo din reng lai chuan a fanu chu thutkhawmna atangin a rawn tlan lut thawr thawr a, anu bula a phone lek va pah chuan "Anu...apa in a be duh che" a rawn ti a. Bawihbawihi chuan min rawn melh zawk a, ka lo melh ve kal bawk.





Sangsangi'n 'apa' a tih chu Vanmala bak a nih ka ringlo. Zah lam ai mah chuan ka thin a rim.



Inthlahrun hmel deuh hian phone call chu a chhang a "Aw...U Vanmal..." a ti ta reng a, ka rin lawk mah nise a lo ni tak tak chu mak ka ti. Ka lungawi lo zual hle bawk.




Sangsangi chuan min rawn nuih leh sang tawh, ani chu naupang mai a la ni a. Engmah a hrethiam ve awm der si lo, huat ve ringawt chu ka duh lo. Za lo deuh hian ka lo nuih let ve a.




Bawihbawihi chu ka melh leh a, min rawn melh tawhlo hrim hrim. Lehlam atanga âw chu hre ve theilo mah ila "Ei chak em em pawh ka neilo" a tih vel danah a ei chak a zawt anih ka ring. Ka tha na lutuk leh thinrim lutuk chu ka inhum ruh vak ringawt.




"Aw...i lo thlen dawnah min lo hrilh leh dawn nia, chuan ka thil chah che kha aw" te a ti vel a. Ka hriat lai ngeia ngampa lutuka a be ngam chu mak ka ti.




An inbiakna ngaih pawimawh loh hmel zet chuan thutkhawmna lamah ka chhuak ta daih a. Kawngkapuiah chuan chhuakin kan compound te chu ka thlek kual a. A fai veng reuh a.




Nizana kan bungruate min lak luh puitu, Pa Chhuana khan min lo hmu a, a thutna atang chuan ban min rawn vai lauh lauh a, nelawm zetin min lo nuih bawk. In te reuhtê, security duty na tura an sak ni awmah hian a lo thu a.




Ka va pan hnai a, a lo chhuak ve chiah bawm. A zawn ka thlen rual chuan "I zia deuh tawh em ni?" a lo ti var a, "Aw, zia deuh chu a nimai. Ka khua a sik zui a" ka lo ti tha ve mai a. Ka thutna turin chair a rawn lachhuak vat a. Min pek rual chuan ka lo thu ve vat a. A thutna tur la lehnghalin ka bulah chuan thut hmun a rawn rem ve nghal bawk.




"Vanmala'n min sawm ve nasat tehlul nen helam lo buaipui a ngai sia, in inneihna pawh ka lo telpui thei ta lo che u a" a ti chuar chuar a, ka lo nui mai a. A sawi kalhmangah Vanmala nen chuan an innel pangngai turah ka ngai.




"Hetah hian i thawhna a rei tawh em?" ka tih chuan "Vanmala lo awm hma khan ka thawk tawh a, kumin hi ka thawh atanga a kum 5 na a ni ve tawh" a lo ti tha ve mai a.




Ka lo bu nghat nghat a. Lawngtlai chanchinte chu min hrilh luam a. Amah pawh Lawngtlai a piang leh sei lian a ni a. An khaw chanchin sawi chu nuam a tih hmel khawp mai.



"Anih leh ka pi, Vanmala nen hian in inzuina a rei tawh em?" a tih chuan "Min pi suh" ka lo ti vat a. Mahse ani chuan "Keini chu hetiang hi kan tih than dan ania, ngaiah kan nei tawh. Lawngtlaiah chuan sawrkar hnathawk chin hian zah an kai lutuk. Chuvangin kan pu mai zel a, an nupuite chenin kan pi a. Naupangtê pawh nise kan pi luah mai" nui fun fun chung hian a ti a.




A kekawr iptea a kuhva dah chu phawrh chhuakin a siam zui nghal mawlh mawlh a, ka lama a rawn lek chuan lu ka lo thing vat. Pathian zarah zuk leh hmuam, ruihtheihthil vel lakah hian ka fihlim hlauh. Kan chhûngkua hrim hrim inthlah chhawn ve niin ka hria. Kan chhungkuaah zuk leh hmuam emaw ruihtheihthil ti an awm miah lo. A ruka an lo ti anih chuan thuhran ania.




A kuhva hmawm pah chuan "Engtin maw, Vanmala nen hian in inzuina chu a rei tawh em?" a ti leh suam suam a. Han chhan mai dan tur ka hrelo, kan inngaizawng miau lova. Inzui han tih tur ang khan kan awm lo atin ani.




"Rei ve tawh tho" ka ti ngawt pek a, ka hmel a pha duiin ka ring. Mahse pa ngaihsam ve ang reng tak ania nge engmah hre awm pawhin a lang lo.




"Anih chu...i huat thu suhah Bawihbawihi nen hian an inchenchilh tam si a, an inngaizawng emaw ka lo ti char char a" a ti leh zung zung a. Ka chil ka lem khalh a, an lo inzui nasa viau anih dawn hi. Hetiang em ema a ngaih theih danah.




"A nimaw" ka ti hul hak a. Sawi zui vak ka duhlo tih a hriatthiam ka rin tehlul nen a sawi zawm leh ta zel a. "Sangsangi hi a duat bawk sia, a hma daih atanga inhre nel sa tawh emaw ka lo ti hman a. Bawihbawihi lah a hmelchhe lova, a fel at reuh bawk sia. An inzui turah ka lo ngai ve char char a. Mahse heti hian nupui a nei ta thut che a" nui sun sun chung hian a ti leh a. Pa tawng liam ve puat thin anih dawn hi.





Midang rilru ngaihtuah lem lova puak chhuak phawng phawng ang chi kha anih ka ring nghal ngawt a. Pa sual tak erawh a ni hauh lovang.




A sawi ta sa sa tiin Bawihbawihi te chungchang chu ka hriat belh chak ta tlat pek a. Ka zawt ta a "Sangsangi pa hi tunge a?" ka ti sap a, ngaih loh lamah a ngaih ka hlauh tehlul nen awlsam zet hian "Ka hre ve chiah lo. Anmahni hi Lawngtlai mi leh sa nghet an ni lova, Vanmala rawn awm hma lawk hian an lo pem a, quarter thlang lawkah khuan an awm. Chunglai chuan Sangsangi pawh hi a piang tawh" a ti zung zung a.




Ngaihtuahna thar ka nei ta, heti hian Pa Chhuana hi ka hriat duh ang ang chu zawt ta ziah ila a tha ngawt ang. Engmah sawi hreh sit set a neih hmel si loh a. Keiin thil hriat loh ka lo ngah bawk si. Bawihbawihi te nufa chanchin pawh ka hre chiang thei deuh mahna.





Thil dang zawh leh ka tum lai tak chuan car a rawn tlan lut a, Vanmala a ni tih ka hre nghal.



Min rawn tlan pêlin garrage lam a pan nghal a. Ka lo en reng a, Pa Chhuana chuan "A va lo haw hma ve" a lo ti zui nui nui a.



Motor a hun that hnu chuan paper bag khaiin a rawn chhuak a, kawngka atangin Sangsangi'n "Apa..." a lo tih ri ka hriat chuan ka hawi vat a. Vanmala lamah chuan a tlan zui nghal zat bawk. Vanmala pawh chuan ngainat awm zet hian a lo nuih a. An in pawm chilh nghal chial mai.




Ngawi rengin ka thutna ngaia thu reng chung chuan ka lo melh reng ringawt. Pa Chhuana chuan "Pafa tak tak hi an ang thin" a lo ti khauh a. A ngaihsak zui hmel vak loh.




Vanmala chuan nui hawk hawk chungin a thil khai lai chu Sangsangi hmaah chuan a lek va a, Sangsangi chuan a lo ban vat a. "Yess...." ring zetin tiin Vanmala chu a kuah leh chuk chuk a. An hlim dun hmel kher mai.




Chutih lai tak chuan min rawn hmu ta chat a, a hmel a buai nak chu ka hmu hman, mahse a insiam tha leh vat a.




Kan lam panin Sangsangi pawm chung chuan a rawn pen pawk pawk a "Nichin khan ka hmu miah lo che" a ti sup a, Sangsangi chuan Vanmala thilpek chu a hai rak rak a, min ngaihsak vak hmel loh.




"A ni tak ang" ka ti nghat a, ka tho tharh a, Pa Chhuana chuan "In pafaa in awmdun tawh hi chuan midang ngaihsak nachang in hre thin lo alawm" nui huah huah chung hian a lo ti a. Kan boruak man pha ve hek lo le.




Vanmala chuan "Eng nge i lo an?" a ti sup a, min ngaihtuah hmel deuh a pu. "I hmuh ang hi ka nimai" ka ti nghat a, ka kalsan nghal nal nal. Ka lungawi lo em a ni. Khati khawpa langsarah ka thu a, min hmuh hmaih thei ania. A bialnu hlui fanuin a auh rual rualin a nui hawk hawk tho sia. Ka thin a rim hlur mai.





Inchhung ka luh rual chuan chokaah ka tlang nghal a, Bawihbawihi lah chuan min lo nuih leh sen sen tawh. A fel hmel bawk sia, ka rilru chhiat vang nge ka ngei deuh reuh bawk si, a sual thlak ang reng viau.




"U Vanmala a lo thleng tawh em ni?" nui sang chunga min zawh chuan ka bu nghat a. "Sangsangi'n a auh ri kha ka hria a" a ti veleh mai a. Han ngaih that loh viau dawnin thil a sawi awlsam thei ang reng bawk sia. A mizia hi rin dan pawh ka thiam lo.




Vanmala leh a fanu duat lai Sangsangi chu an rawn inpawm lut a, melh pawh ka lo melh tha peihlo. Fridge chu hawngin tui ka in zui nghal khawlh khawlh a.




Bawihbawihi chuan nui var var chung hian "Ka thil chah che chu" a lo ti var a. Vanmala chuan "Sangsangi ken lai hi" a ti sup a. Sangsangi chu Vanmala pawmna atang chuan a inlahrang a, chhuat a rah takah chuan a nu a pan vat a, "Anu...apa hian ka duh a hre rap mai" a ti hluai a, a âw atang ringawt chuan a phur zia a hriat theih.




Bawihbawihi chuan "Kan va lawm thin tak, U Vanmal" a ti hliai a, a âw nem diai te chu ka haw reuh tlat. Kalsawn mai lo chuan ka awm ve tlat a.




Paper bag atanga Vanmala thil lei an phawrh chhuah rual chuan ho ka ti ang reng. Barbie leh naupang toys neuh neuh hi a lo nia. An thil chah chu a ho khawp mai. Sangsangi tan chuan a lawmawm viau ang, naupang lawm a ni miau a. Mahse Bawihbawihi'n Vanmala a chah vel kher chu tul ka ti lo. A fanu toys lehzel pawh a chah vel ania.




Ka dam tha lo bawk nen ka rilru a chhe hlur mai.




Vanmala chuan "Lawmthu sawi a ngai thin lo" a ti dam thluam a, ka va haw tak. Bawihbawihi te nufa hi a tan an pawimaw viau a ni mahna.




Sangsangi chuan a barbie velte chu a han thlak kual nghal vel a, a nuin a lo pui bawk a. Min ngaihsak ve vak hmel loh.




Vanmala chuan min rawn melh run a "Min lo zui chho la" a ti sup a. Bawihbawihi lah chu a lo hawi ve nghal hra a, Vanmala nen chuan min lo melh tawn ve sek a.




Tih luih nan hrim hrim tiin "Aw" ka ti tawi tak a. Min melh run run leh phawt a, "Kal ang" a ti sup a, ka zui ve nghal zat a. Bawihbawihi chuan min lo en zui ve reng tih ka mitsirin ka hmu. Pawi pawh ka ti nek love.





Room chhung kan luh rual chuan a necktie a pawt thawl nghal a, "I lo tha takzet maw?" min ngaihtuah hmel zet hian a ti sup a, "Tha lo ila min tia mi?" ka ti lo nghat, a rum nghut a.



Mahse zaidam deuh hian "Room ah i lo la mu ang chu ka ti a" a ti dam thluam a, "Mut reng ka peih bik hlei nem" ka ti leh hlur a. Ka thinrimna pawh a hrethiam lo aniang, hepa ngel ngul hian !




"I lungawi lo anih kha" a ti sup a, a kamiz hak lai chu a phelh zui mual mual a, kawngka bula ka ding reng chu min ngaihsak hmel pawh a rawn pu lem hlei lova.




"Ka chhuk dawn ania" ka tih chuan "Lo la awm ve rih rawh" a ti sup a. Ning zet hian "I ninawm" ka ti ngawt pek a. A rawn nui chhuak hawk a, ka melh ram ram lai chuan "Bawihbawihi te nufa kha chu thik duh suh, anni aiin ka duat zawk daih ang che" a ti dam thluam a. Ngainat awm zet hian min rawn nuih a, ka dang leh der mai.




A thusawi inepersan zet zet hi ka hrethiam thin lo. "Ka thik lo" ka han ti ve ngial a, ka thik lo bawkin ka hria. Ka lungawi lo mai mai alawm. A kamiz a phelh rual chuan ka hawisawn nghal daih a, min nuih suk tih ka hria. A kekawr hak lai a phelh leh a, boxer nen chauh a ding teu mai. En duh lo mah ila ka mitsirin ka hmu thei tho sia.




Wardrobe a towel chu lain a bat zui nghal a "I duh leh lo zuk chhuk mai rawh, ka intifai lawk ang a, ka lo chhuk thla ve vat ang" a ti tha veleh mai a. Ka chhuak zui nghal nal nal.




Bawihbawihi te nufa chu thutkhawmna sofa ah thuin an lo inchhaih nui awr awr a, an hlim dun hmel kher mai.




Min rawn hmuh rual chuan Sangsangi chuan "Anu Mamte, apa thil min lo lei hi lo en ve teh, a tha hlawm teh mai nia" phur deuh hian a lo ti a. Bawihbawihi chuan inthlahrun hmel deuh hian "Sangsang..." tiin a lo khap vat a. A rilru tur chu ka hrethiam ve deuh.





Tha tak takin min bia a, ka lo chhang bul mah mah thin chu ka inthiamlo veleh deuh a. Sangsangi pawh naupang rilru thianghlim a la ni a, kan cheng a man ve dawn miahlo tih ka hria.




An bul hnaiah chuan ka va kal a, Sangsangi chuan min lo nuih leh var var tawh. A nu a chhun em em a, naupang hmeltha tak ani.




A barbie ken lai chu ka hmazawnah a rawn lek va a "Apa hian a lei thiam tiraw" a ti hluai a. A barbie min pek chu lak sakin "A thiam hle mai" ka lo ti tha ve mai a.




Dik tak chuan Sangsangi'n Vanmala apa a ti tlat chu nuam ka tilo. Ka dinhmunah hian midang pawh ding se nuam an ti bikin ka ringlo. Ka pasal bialnu fanuin ka pasal chu 'Apa" tiin a ko tlat mai ania. Ngaih tha viau ila chu a mak zawk ang.




Bawihbawihi chuan "U Mamte, eirawng ka bawl zo tawh a, kan nufa chu kan haw tawh mai ang" a ti sep a, a inthlahrun hmel ta lutuk chu ka khawngaih tlat pek a. Vawiin chu ka rilru a inthlak thawk thawk mai.





"Ei ve nghal mai ula" ka han ti mawi hnai ve a, ka rilru tak erawh chuan haw mah se pawi ka ti vaklo. Mi fel famkim ka ni bik lova, ka pasal bialnu hlui te nufa nena chawhlui kilho teh thlawt chu ka duh bik lo.




Chutihrual chuan ka khawngaih deuh reuh tho bawk sia.




Sangsangi pawm nawlh pah chuan "Ni dangah ni zawk rawh se, ka lo kal chhan ber i rawn tho chhuak peih ta bawk a, kan haw zawk mai ang" a ti zang vah a, ngainat awm zet hian min nuih leh tawh.




Kawngka bul thleng ka thlah ve a, Sangsangi lah chuan "Anu Mamte, naktukah kan lo leng leh ang aw" a ti tak deuh deuh a. Naupang a la ni bawk a, ka umm e liam mai mai.




An kal liam hnu chuan chokaah lutin Bawihbawihi chawhmeh siam ho chu ka en a, alu leh dal, bai leh tlak a siam bawk a. A tawk viau mai. A la tui hmel hlawm em em mai lehnghâl a. Chawhmeh siam a thiam zek dawn anih hi ka ti rilru ta neuh neuh a.





Thutkhawmna ka pan leh dawn lai takin ka phone kenlai chu a rawn ri a, U Vensangi a lo nia. Ka pick up vat a "Hello" ka tih rual chuan "I damlo nghal elo?" a rawn ti hluai a. "Engtin nge i hriat a?" ka lo ti let thung.




"Nizânah khan ka lo call a, U Vanmala'n a lo la a, min hrilh a" a rawn ti zung zung a. Ka phone ka lo check miah lova , Vanmala lahin a sawi bawk si lo min lo call tih pawh ka lo hrelo reng reng.





"Ka tha tawh lutuk" ka han ti ve ngial a, a rawn thaw chhuak huai a. "Pasal neih hlima han dam loh nghal ngawt mai chu aw..." a rawn ti fan raih a, ka lo nui mai a.




"Eng emaw i ngeih lo a nilo maw?" uang thuang deuh hian a rawn ti a, ka lo nui hawk. Min chhaih tih ka hria. Vanmala nen kan awm dân chu hria se a awihlo ngawt ang.




A rawn nui ve hawk hawk tho, mahse thutak deuh zawk hian "A ni thei tak tak ania aw, hmeichhia in kum 25 rala pasal kan neih hian eng emaw kan zo lova, a dam loh tak tak theih ania" a rawn ti a. Ka nuih liam duh ta bik lo. Mahse chutiang lam a nilo tih ka hrechiang lutuk thung.




"Chutiang a nilo ang" ka lo ti tha ve mai a. Lawngtlai nawm leh nawm lohte min rawn zawt nghal pang a. Sawi tur alawi ka la hrelo, ka la chhuak miau lova.




Kan inbiak lai chuan Vanmala pawh a lo chhuk thla a. Jogger pants Grey leh Tshirt dum a inbel a, bata chapal a bun bawk. Amah a palian bawk a, a thawmhnaw inbel apiang chu a inhmeh em em vek zel.





Hmui phunin tunge ka biak min rawn zawt a, ka hawisawn san nghal daih. A lakah ka la lungawi thei thlawt lo. Ka titau rilru deuh niin ka hria.




U Vensangi nen kan inbiak chhung zawng chuan ka bulah a lo ding ve run a, ngaihsak awm lo takin ka nui hawr hawr vel a. Min melh leh ngur ngur thin.




Kan inbiakna kan tihtawp rual chuan "Vensangi em ni?" a rawn ti khauh a, engtin nge maw a lo hriat hman ni.




"Aw" ka ti tawi tak a, ka samah a rawn tuai zeuh a, min nuih suk a "Hma kan sawn khawp mai" a ti leh sup tawh. Eng ang hmasawnna nge a sawi ve ziah hi ka hrethiam lo.




Zanriah kan ei nghal a, Bawihbawihi chawhmeh siam tui tih hmel zeta a ei te chuan ka thin a tirim leh tawh. Naktukah a aia tui ka siam khawp ang ka ti rilru neuh neuh mai. Riltam ve deuh si kha a siamtu vangin eng tham mah ka ei lo. Ka riltam pawh a reh vek.




Hmun ka tihfel dawn chuan min lo dang vat a "Keiman ka lo ti ang,i dam tha silo, lo han mu rawh" a ti sup a. Hnial ka tum zet a, mahse ka thinrimna ka ngaihtuah let a, hremna ni pah fawmin tifel ve reng reng rawh se tiin ka kalsan hmak.




Room ka thlen rual chuan ka phone a rawn ri leh ral ral a, U Faktei a lo nia, ka rilrua a awm lai tak a la ni zui ka van lawm tak.




Ka pick up vat a, "I dam lo nghal ringawt a" a rawn ti a, nui hak hak chungin "Ka tha tawh lutuk" ka lo ti var a. A lo chek hlak a "In kal veleh i dam lo sia, a hrehawm duh ngawt ang. In pahnih tê chauhin in awm awm sia" a rawn ti zung zung a.




Bawihbawihi eirawng bawl tura Vanmala'n a lo tirh thu sawi nghal ka tum lai mek chuan "Bawihbawihi te nufa an lo kal tawh em?" a rawn ti zawk hlauh a.




Zep buai lovin zanriah min buatsaih sak thu te chu ka hrilh ta vek a. A lo thaw chhuak hak a.




"Mama hi chu a rilru tha lutuk hian khua a hmu lo thin a, i ngaihdan turte pawh a ngaihtuah miah lovang. In tha reng emaw a ti mai ang,lo hrethiam hram hram rawh aw" a rawn ti ve ngial a. A nutapa vangin thupha a rawn chawi ve luam mai.




"Imm... Bawihbawihi chu misual tak anih hmel loh" ka lo ti sap a, ka ngaihdan dik tak pawh a ni. Ka hriat chinah chuan min be tha em em a, inthlahrunna lai chen a nei bawk a, a sual viauin ka ringlo. Mahse ka hriat chin pawh vawiin chauh kha a la nia.




U Faktei chuan "Keipawh misual tak chu a niin ka hrelo, mahse a hma ang khan ka ngaina thei tawhlo, a mak lutuk. Mama pawh hian a hma ang kha chuan a hmangaih tawh biklo tih ka hrechiang. Amah ngei pawhin a sawi, thil dang vanga pui a nih thu a sawi a. Mahse a chhan tak a sawi duh chuanglo" a rawn ti leh zung zung a.




A thusawi chu dik tih chen ka nei. Vanmala'n heti tak maia a la buaipui chhan pawh hi hriat ka duh. A la hmangaih vang ti dawn ila a hmangaih miau chuan kei aiin neih zawk awm tak ani a. Chutihrual chuan keipawh hmangaih miah lovin min nei tho bawk si. In phen nan mai mai atan chuan min hman ka ringlo ka tih tawh kha. Ka ngaihtuahna buai sa a rawn belhchhah leh sauh mai.




"A la ngaihsak em em chhan hi ka hre châk e" ka ti zawi raih a. Chutah U Faktei chuan "Zawt ta mai la...a tha tak ang. Kan bulah engmah a sawi duh lova, mahse nangchu a nupui i nia, a hrilh duh em em ang che" a rawn ti ta khauh a.





Zawh chu ka duh,mahse ka ngam ngang thin lo. A chungchang ngaihsak awm ang deuha awm kha ka hreh a ni ber. Chuloah a hmaa Bawihbawihi chungchang ka zawh pawh khan dawt min hrilh tawh a, ka ring thei tawh kherlo mai thei.





Kan inbiakna kan tihtawp hma chuan min rawn fuih chiam a. "Mamte, eng pawh thleng se Mama kha i pasal a ni tawh a. Thlah duh miah suh aw... Bawihbawihi pawh lo inrawlh ta se, ani ai chanvo i nei lian zawk ania. A nupui ni lo zawk mahin a rawn tih hleuh hleuh ngam chuan a nupui zawk phei chuan ti hleuh hleuh ngam tur i ni. Pathianin a zawm tawh che u a, tu pawh then theih mah in ni tue a nilo" a rawn ti chiam a. Min rawn fuih huaisen sauh mai.





A sawi dik chiah, ka rilru chu ka ti paukhauh lui ve ta a. Kei chu Vanmalsawmhlua nupui ka ni a, Bawihbawihi chu a bialnu hlui. Vanmala lakah chanvo ka nei lian zawk. Pathianin min suih zawm tawh a, a vawn him ve chu kan tih tur a ni.




Khumah chuan ka mu fel ta than a, ka phone ka khawih pah bawk. Vanmala pawh rei vak lovah a rawn lut a. Ngaihsak lem lovin ka phone chu ka tuai tuai a.




News ka en chuan 'Vawiinah Lawngtlai DC Vanmalsawmhlua chuan Lawngtlai sawrkar school pakhatah chhawmdawlna tur a mimal sum a pe' tih hi a lo awm a.




Ka chhiar thuak a, cheng 5000 lai a pek bakah dawhkan 10 zet a pe bawk a. Vawiin hna a kal hma khan hetiang ati dawn tih engmah a sawi si lova. Ka va melh a, wardrobe a lo hai ruk ruk thung.




Ka pasal hnathawh chu politician te tih âwm zawk tak ani. Sawrkar tih atan a awhawm khawp mai.



Thil zawng ni awm tak hian wardrobe chu a la hai ruk ruk a. Ngaihsak loh tawp chu ka hreh veleh deuh a "Eng nge i zawn a?" ka tih chuan a rawn hawi vut a. "Thil" a ti ringawt. Min chhang tawi tha tek tek khawp mai.





Lungawi vak lo hian ka ner nawk a, ka phone ka melh san leh nghal daih. Ka lo ngaihsak a, ka lo be vel kher chu ka inchhir ram ram mai.




A hnu deuhah chuan ka mutna khum sirah hian a rawn ding run a. Ka melh chho ha a "Eng nge?" ka lo ti nghat. Chutah banbun nalh zet hi a kut atang chuan a rawn uai thla hnalh a.



Ka lo melh reng lai chuan "I ta tur" a lo ti sup. Hamhaih lutukin ka lo melh reng a, nui suk chungin ka phone ken lohna lam zawk ka kut chu a rawn la a, min buntir zui nghal zat bawk.




"Hmeichhia te hian thilpek in lawm tiraw?" a ti ngawt pek a, chhan ngaihna pawh ka hrelo e a.




Ka kut chu ka en a, a ban bun min pek pah chu a nalh hrep lehnghal. Silver sîn tê, locket mawi deuh awm hi a ni a. A changkang ru zek, a to phianin ka ring.



"Mawi i ti em?" chutia ka en reng lai chuan a lo ti sup a, ka mutna bulah a la ding ve reng a, ka melh chho ha a "Immm...ka lawm e" ka ti ve ta nge nge.





Nui suk chungin a kalsawn a, ka mutna bulah chuan a rawn inthawlh ve nghal zat a. Ngawi rengin mit a chhing nghal daih, a chet thin dan hi a mak thei ngawt mai.




A muhil lo tih ka hriat avangin "Vawiina i thiltih ka hria ania aw" ka ti zang vah a. A rawn meng chhuak leh a, mitmeng hahdam zet hian min melh a "Eng nge ka tih a?" a tih chuan a hmaizawnah ka phone chu ka va lek va a. "Media lah hi an che chak tawh si" a lo ti hluk.




"Hetiang te chu thup theih a ni hlei nem" ka lo ti ve vat a. "I ti tha hle mai" ka tih zawm leh zat a. "Thil nihna tur ve reng anih kha" a lo ti thung.




Intihfel a tum vang leh mite hriata hmungthat nan a ti a nilo tih ka hria. Vanmala hi chu a fel ve hrim hrim, U Faktei sawi dan takah a rilru a tha a, thil tha tih nuam a ti ni berin ka hria. Mi thenkhat te chu nise Media ho hruaiin an tanpuina kha chanchin tharah tihlan an tum leh ngei ang a. Ka va sawisel pawh a ni hran lo, mahse hetia a ruk deuh taka tih a tum hian mite fak duh vanga ti a nilo tih a hriat bik hliah hliah.




A mit a chhing leh nghal mai a, kei erawh phone bawk ka en leh a. YouTube ah thil nuihzatthlak deuh deuh a en a, ka nui kar kar mai.




Vanmala chu a muhil tawh emaw ka tih laiin "I muhil thei nange?" a rawn ti tham tuak a. Ka melh vat a, mit a la chhing tho.




"Vawiinah khan ka mu hnem lutuk a" ka ti tha ve mai a, a rawn meng chhuak a. Mitmeng dam ruih hian min lo melh a "I khua a sik leh ange?" a ti sup a, "Ka dam tha tawh viauin ka hria" ka lo ti thung.




A muhil mai dawn emaw ka tih laiin ka bulah a rawn tawlh hnai hrut a, saisirin ka kawngah min rawn kuah nghal thuk. Ka lo la tang teuh zui a. Inlakhran erawh ka tum miah lo thung.




Ka darah a rawn fawp tawk a "Vawiinah khan i lungawi lo tiraw?" a rawn ti ta sup a. A hmel ka en chuan mitmeng thuk ruih hian min lo melh ka ti mai, ka sawifiah thiam lo.





Bawihbawihi te nufa vanga ka lungawi lohna kha a lo hai bik lo ani tih ka hrethiam nghal.




"I mitmeng atang khan ka hai biklo ania" a lo ti sup a. Zep buai duh tawh bik lovin "Ka lungawilo alawm" ka ti ta nghat a.



A rawn thaw chhuak hawk a, ka beisei loh zet hian min nuih suk a, ka hmui hnuai chu a kut zungpuiin a rawn tuai a. Ka phone en lai pawh ngaihsak thei tawhlo.




Tang teuh chungin Vanmala chu ka melh kiau reng ringawt.




____________*_____________*____________




(Hahai....heti thleng hi ni phawt rawh se aw, in va ui dawn tak)


Show post links
Top

[Ngaia]

DEPUTY COMMISSIONER
By CVL Awmpuii


Chapter 18




Vanmala chuan hnai zetah min rawn melh run a, a mitmeng chu a dam thlup thung a. Ka hmui hnuai chu a rawn melh leh vung vung a, amah melh reng chung chuan ka lo îp ngar ngar thung.




Ka hmui melh reng chung chuan a rawn nui suk a, "Ka thil tih châk i hre duh em?" tiin min rawn melh a. Mitmeng fiah kakin ka lo melh reng ringawt tawp, chhan nachang pawh ka hrelo.




Ka âw ka thian kharh a, ka nghawngah a hmai phumin min rawn delh hnawk a, a thaw chhuak zui ham ham bawk.



Chutia rei tawk fang a awm hnu chuan "U Vanmal..." ka ti sep a, ka sawi dat a. Chutah inlahrang hlekin min rawn melh leh a.




Nelawm zeta min nuih chung hian "I duh duh min zawt thei ang, i hriat duh apiang" a ti dam thlup a.




A inlahrang ta a, min hlat leh mai dawn emaw ka tih lai chuan a mut dan siam remin ka kawngah nghet zetin min rawn kuah leh thuk a. Ka lo la îp chawih tho mai.




Ka sama fawh zeuh pah chuan "I lungawi lo tih ka hria ka tih tawh kha. Chuvangin i duh duh min zawt thei ang. Chhanna ka pe vek ang che" a ti leh duah a.




Chutia ka laka a inhawng thar ta em em chu mak ka ti. Ka lungawi lohna ka tilang viau chuang si lova. A lo hre ve mai pawh chu min lo chîk ve hle anih ka ring ta ngawt.




Tun baka hun tha a awm chuang lo tiin ka inthlahrung duh ta lova. A hma a ka lo up beh tawh zawhna zawng zawng chu ka zawt vek ang.




Ka awmdan chu ka siam rem te te a, ka han melh chho deuh ha a, min lo melh ve rûn a. A hmel hmuh a nuam hle thung.




"Bawihbawihi te nufa chungchang ka zawt duh che a" ka han ti tete a. A awmdan hriat tumin ka han melh leh kher a, mahse a hmelah thil danglam a awm eih lo.




"Mak i ti lo em ni?" ka tih chuan "Ka rin lawk sa alawm" a lo ti mai a. Ka samah a rawn fawp leh zeuh a. Zanin a awm dan vel chu mak ka ti kher mai.



"Sangsangi kha..." ka ti leh a, ka melh leh phawt a, "Pa a ti che a" ka ti ro halh a, ka âw a lungawi lohna in mung ru chu ka thup theilo.



"Kha chu a hmain ka hrilh tawh che kha" a ti sup a. Thil ka hrechhuak zawk, a hmaa Bawihbawihi te nufa chungchang ka zawh khan dawt tam tak min hrilh kha !




"A hma khan dawt i sawi" ka ti chang bal a. A lo thaw chhuak hulh a, a thinrim dawn emaw ka tih lai chuan awlsam deuh hian "A hma khan ka nupui i la ni hlei nem" a lo ti daih thung.



"Eng nge i sawi awmzia?" ti a ka han melh chhoh deuh ha chuan min lo melh chhuk ve rûn a. A âw a thian kharh a "Vanmalsawmhlua hi min neih duh loh ka hlau alawm" zam âw lek lek hian a rawn ti a. Hetianga a zâm âw, mahni inringtawk lo âw hi ka la hre ngailo.




Za lo zet hian a nui hawk a "Thudik zawng zawng ka hrilh fai kelh che chuan min nei duh dawn lo asin" a ti ro hawlh a. A sawi dikin ka hria. Bawihbawihi nen inzawmna thuk tak an lo nei tawh tih hria ila chu amah nei tur hian thuthlukna ka siam miah lovang.




Ka ner nang a "Chu pawh nise dawt min hrilh tho tho alawm" ka ti nghat a, "Thudik vek tho alawm, ka hrilh kim lo mai chauh che ani" a ti dam thluam a. A sawi dik leh thlap tho bawk sia, hnial zui vak ngaihna ka hrelo.




Ka ngaihtuahna a let zawk a, engtin nge kei hian Bawihbawihi nen an chungchang thudik ka hre tawh tih a hriat! Hria angin insawi dawt lo mah se dawt min hrilh avanga ka chhuahchhal khan a tang miah lova, mak ti hmel pawh a pu miah lo.




Mak ti zet hian "U Vanmal..." ka ti hliai a, chutah hahdam hmel zet hian "Faktei nen in inbiakna kha ka hre vek alawm. Bawihbawihi nen kan chungchang a hrilh che pawh kha... hriat loh ka neilo" a ti fân ruih a.




Mak ka ti kher mai, engkim a lo hre vek a. Mahse a awmdan ngai patin a awm tho a. Vawiina Bawihbawihi a lo tirh te khan ka rilru tur a hrethiam nghal vek awm si a. Ka hre vek tawh tih hre reng chungin a be tha tho bawk sia. Rinhlelhna ka neih a ring miah lo zawk emawni.




"Chuti si tinge hrelo ang maia i awm a? Vawiinah Bawihbawihi i rawn la tir deuh deuh lehnghal a. Ka rilru tur i ngaihtuah miahlo" thinrim zet hian ka ti hmak a. Inlakhran ka tum nghal bawk. A phun hluk a, mahse a thinrim lo tih ka hria.




Ka kawnga min kuahna pawh thlak ka tum lai chuan nui hawk chung hian nghet lehzualin min lo kuah a "Hma kan sawn khawp e" a ti leh tawh. Engvanga he thu hi sawi ve ziah nge maw a nih le?




Rum zeta ka melh chuan hahdam hmel zet hian min lo nuih thung a. Min kuahna tihngheh leh sauh pah chuan "Faktei nen in thusawi kha min zawh fiah hun ka lo nghak alawm" a ti dam thlup a.



Ka talsawn tum pawh chu ka tawp nghal chawt, a thusawi hi hriatthiam mai a harsa thin. Kei thil man chak lo lutuk ka lo ni bawk nen.




Zawhna mitmenga ka lo melh chuan "Faktei thu hrilh che kha a dik vek aw. Thudik tak vek ani. Hria anga ka awm duh loh chhan chu ka nupui hian a pasal ka nihna anga ngampa taka min zawh theih hun ka nghak alawm. Tichuan tun hun hi ka lo nghah hun chu niin ka hria" a ti ta duah a.




Vawiina ka hun tawnte ngaihtuah chuan zanin zet chu ka beisei loh lam daihin thil a thleng.




"Anih chuan a bak hriat belh leh ka duh. Engkim ka hre vek duh, U Faktei min hrilh bak zawng kha" thu tak zet hian ka ti ta a. Inhmangaih tawh lo angin sawi mah se tuna Vanmala'n a ngaihsak dan em em hi chu thil fel hlel a awm chiang alawm.




Thil thui tak ngaihtuah ang mai hian ceiling chu a melh vung vung a. "Bawihbawihi kha ka hmangaih thin asin..." a rawn ti fân ruih a. Ka tha a zawi vek maiin ka hria. Ka rilru a na pha tlat. Ka pasalin midang a hmangaih thu min hrilh chu ani sia.




Mahse ka intihpaukhauh lui a, pangngai tak hian "Anih chuan tinge i neih mai loh?" ka ti ro halh a. Min rawn melh zawk a "Hmangaih ka tih loh kha, hmangaih thin ka tia lawm. Hmanlai thil a ni..." a ti zawi sup a.





A awmdan hian ka rilru a tina, kum tam tak liam taa a hmangaih tak a chân avanga rilru na lutuk ang maiin a awm.




"Chu pawh nise kei ni lovin amah kha i nei thei reng sia" ka ti leh hram a. Ka rilru natna chu thup ka tum hram hram ani.




"Ka hmangaih tawh hlei nem" a tih chuan "Min hmangaih bik chuang hlei nem" ka lo ti hmanhmawh. A rawn thaw chhuak hawk a "Ka nu lung i dum tal alawm" a rawn ti sup a. A nu vanga min neih thu bawk a sawi leh tawh. Tlem talin ka lakah rilru a pek ve ka lo ring hman ania. Ka ngaihtuahna hrep chu aw...




Ka awmdan thunun tum tak chuan "I hmangaih tawh lova mahse heti em emin i la ngaihsak tho sia" ka lo ti leh sep a.



Min kuahna tih ngheh salh pah chuan "Ngaihtuah chhan lian tak ka nei alawm" a lo ti mai a. Min chhang tawi thei lutuk chu ka thinin a tuar pek lova. Rum chhar chhar chung hian "Heti hian ka zawhna tete chauh min chhang a. Min chhang tawi thei si, zawh sek ngai lovin sawi ve thin mai la" ka ti nghat nghat a.




A rawn nui chhuak hawk hawk a "Zanin zet chu aw...hmasawnna kan ngah hle mai" a ti leh daih tawh. "Eng hmasawnna nge i sawi ve ziah hi? Ka ning, hriatthiam i har thei lutuk" ka lo ti hlar a.




Chutah thu tak zet hian "I rilru hneh tura hmasawnna" a lo ti khauh a. A thusawi chu tawi viau mah se ka lawm ru tlat. Ka rilru hneh a lo tum ve ngei tihna a lo nih chu ! Ka zak lek leh reuh sia, ka tawng chhuak leh mai dawn a, sawi tur ber hre lovin ka riat nawi ta mai mai a.




Ka awmdan a lo hrethiam leh vek tawh, lungawi hmel zet hian min nuih vur vur a. Ka sama chul pahin "Ka tur hmanhmawh vut vut dawn lo che, i rilru dam zan hun chu a la awm mai ang" a ti dam thluam a.




Bawihbawihi te nufa chungchang zawh ka tum leh lai tak chuan amah zawkin "Eng nge kan sawi lai kha?" a lo ti a.



Chutah phur zet hian "Bawihbawihi te nufa i ngaihsak em em chhan?" ka lo ti vat.



Ka han melh leh a, a awmdan a danglam leh vek tawh. A insehruh nghal teuh a, ka zawt sual emaw ka ti hman hial.



A rawn tawng chhua leh chiaha a thusawi chuan min thawng kher mai !




"Bawihbawihi hi pawngsual a ni" a ti hul hawk a. Phawk lutuk hian ka han melh leh a, mit a chhing a, a khabe ruh kual tawlh tawlhah chuan a thinrim hle tih a hriat theih.




A thu rawn sawi chuan min thawng lutuk a, ka tawng chhuak mai theilo. Thil awmdan teh nuaih chuan min thawng tih piahlam a ni.




Bawihbawihi hi pawngsual a lo ni tihna maw ! Anih chuan Sangsangi hi ! Ka ngaihtuahna chu a dik loh hram ka beisei.




Vanmala chu ka melh leh a, min lo melh ve chiah a. Kan ngaihtuahna a thuhmun niin ka hria, a rawn tawng chhuak leh ta a.





"I ngaihtuahna kha a dik e. Sangsangi hi pawngsualna rapthlak tak vanga lo piang ani" a ti nghut a. Mak ka ti lehzual.




Ka hrawk chu min hnawhtu awm ang mai hian a ro vek a. Ka ngaihtuahna a buai nuaih mai. Hetiang thu thin thawng lutuk hi ka lo beisei piah lam daih ani.




Vanmala chu a che hrut a, inlahrang hlekin amah hnaih lehzual tur chuan min pawt hnai sauh a. A âwmah min pawt bei hlu hlu a, ka hnungah a chul hliau hliau bawk. A tih ang ang chuan ka lo awm tawp.




"A tirah chuan keipawh min thawng lutuk. Ka thin a rim a, ka rilru a na bawk. Bawihbawihi ka hmangaih vang chu thuhran nise hmeichhe chunga hleilenna hi ka hua, Mizoram chhunga thleng tur atan phei chuan ka duhlo zual" a ti dap dap a. Tîm deuh hian ka han melh leh a, hun kal tawh chhui kir tih hriat lutuk hian a melh ngai a melh ngur a.




"Min thawng lutuk..." ka ti sep a, Bawihbawihi chunga thil thleng chu ka chunga thleng tur anga ka inchan ve ringawt pawhin ka tim chawih thei.




Vanmala chuan "Lawngtlaia ka thawh tirh hian ka buai thei em em a. Sawrkar leh mipuiah inlungrual lohna nasa lutuk a chhuah hunlai ania. Mipui nuar an lo awm ve reng bawk nen hna kan thawk mumal hlei thei lova. Ka awm tirh phat atang khan eirawngbawl a hnathawk turin mi an lo dah sa a. Mahse khanu kha rei vak lo ka hnena a thawh hnuin chhungkaw lam buaina avangin ban a duh thu a sawi ta a. Lo hnial tung chi ni hek lo ka lo pawm sak ve mai a. Awmpui dang an rawn dah leh hmain keimahin ka inbuaipui ta thin a. Tum khat chawhmeh bazara ka kal chu Bawihbawihi nû hi ka hmu ta hlawl a. Khami tuma ka thin phut nasat zia kha" tiin hun kal tawha chêng ang mai hian a nui hawk a.





Min rawn melh zawk a, a sawi zawm lehnghal a "Insum hman lek lovin ka va pan a. Zep nak emaw Bawihbawihi hi ka hmeichhe ngaihsak hmasa ber a ni a. Ka lak atanga an kal bo hnu pawhin hmeichhe dang reng ka ngaihsak tawh lo. Chumi anih avang chuan a nu ka hmu kha ka lawm em em a. Ka va hnaih chilh nghal ruak a ni ber. A bulhnai thlenga ka koh chuan min rawn melh vat a. A hmel kha mak tihnain a khat ve nghal a ni ber. Tichuan pehhel buai lovin Bawihbawihi chungchang ka zawt ta ngawt pek a. A hmelah lungngaihna thûk tak a rawn lang chhuak nghal a. Mahse a that thuin min chhang tawi tak thung a. Zawh thui leh ka duh viau rualin a inhawng lo riauin ka hria a. A awmna ka hre tawh bawk a tiin ngaihtha deuhin ka kalsan leh mai a. A tukah chuan Bawihbawihi chanchin chipchiar zawk hriat tumin ka va kal leh a. Mahse hmuh tur reng reng a lo awm tawh lova. Ka beiseina te kha a ral leh vek hman tep a ni. Mahse tum khat damdawiina in check up tura ka kal tumin amah Bawihbawihi ngei mai chu ka hmu ta a, mahse naute a lo pawm a, Sangsangi hi a lo nia. Ka va pan nghal a, min rawn hmu chawpchilh ve nghal mai a. Ani pawh a meng phawk khawp mai. Ka va pan rual chuan tlanchhiatna tur a dap nghal ruai a. Chutia min pehhel a tum nghal ringawt chu mak ka ti viau, ka ding chawt nghe nghe. Ka umzui ta tho a, mahse a lo petek bo hman a. Pawiti lutukin damdawiin atang chuan ka haw a. Ka hmuh leh ni atang khan amah hlir chu ka ngaihtuah leh ta a. Kar khat vel tih theih nei si lova ka ngaihtuah ngat ngat hnu chuan ngaihtuahna thar ka nei ta a. Pa Chhuana hi ka zawt ta tawp a. Ani lah chuan a lo hre hlauh a. Ngaihsam deuh hian an in awmna thlengin min hrilh ta a. Bangla thlang lawkah hian an in chu a awm" a ti zui sup a. He thu hi chu Pa Chhuana pawh khan min hrilh tawh.





A thusawi leh tur chu ka lo ngaichâng leh ran a. "Tichuan an inah chuan ka zuk kal chilh ta a. A tirah chuan min lawm teh chiam lo. Kei ngei pawh ka hrilhai viau. A hunlai khan kan inhmangaih em a, min hmu leh mai chu a lawm ve viau kha ka ring ania. Mahse chutiang chu a lo ni lova. A hnuah Pa Chhuana kâ atangin nuthlawi a nih tawh thu leh a nu leh a fanu nen chauha khawsa an nih thute ka hre lehzel a. Ka thâ a na viau mai, a chhan pawh kum 5 pawh a vei hma em a midang laka min rinawm loh san anga ka ngaih vang ania. Mahse ka hriat chian chakna leh ka hmangaihna khan tlawm zawka tan hreh lohna min siam a. Tlawm inti chung chung siin thil zawt chiang tur chuan ka kal chilh ta fo a. Kar khat vel chutia ka tih tak hnu chuan tap zawih zawih chungin a chanchin chu min hrilh ta ani" a ti zui vawng vawng a. Rilru tawt hmel zet hian a rawn thaw chhuak ham ham bawk.




Tim dai hian "Anih leh a pawngsual tupa chu an man em?" ka lo ti sep a. A rawn thaw chhuak hrawk a, "An man a, a thi tawh" a ti chang bal a. "A tihsual rah a seng tak tak hmain a thi" a ti leh nghut a. A insehruh leh tawlh tawlh tawh.




A hmelah chuan phuba lak chakna te, thinrimna te, lungawi lohna te a indawt zut mai. Ka zawhna avang chuan ka inchhir lek lek zawk.




"Bawihbawihi chu a lainatawm hle mai" ka ti lawi rat a. Ka lainat tak tak. Kum naupangtê in thil rapthlak tak a tawk a. A vanduaina belhchhah turin ka ti dawn nge sawi dan tur ber pawh ka hrelo, Sangsangi, amah pawngsualtu fa ngei mai chu huaisen takin a pai tlang ania. A fanu a hmuh chang apiangin a hrechhuak thin awm si a. Ka lainat a ni tawp mai. Vawiin lama ka lungawi lohna ka lo tilang vakte kha ka inthiamlo thar ngang mai.




Mahse ka ngaihtuahna tibuaitu thil dang a la awm. Bawihbawihi a ngaihsak em em chhan chu a rilru that vangah lo dah ta ila. Mahse heti tak maia amahah nghawng a la nei nasa hi a ni. Ngaihsakna satliahah ka ngai theilo. A hmangaih tawh loh thu sawi mah se tuna a awmdan ngaihtuah hi chuan a la hmangaih hmel hle si a.




"Ngaihtuah kual vak lovin i rilru tibuaitu chu min hrilh zel thin rawh" a rawn ti khauh a. Hepa hi! Ka ngaihtuahna a hre vek zel emaw tih mai tur ani.



Ka hrawk then kharh pah chuan "I la hmangaih a ang, i ngaihsak dan em em hi" ka ti bah niai a. Ka rilrua awm hi ka sawi chhuak thiam lo.




"Inngaihsakna leh hmangaihna hi chu thil dang daih ania. Ka ngaihsak avang hian ka hmangaih leh ta tihna a nilo. Mi chunga ngilneihna kan lantir hian an lakah beisei kan va nei kher lo. Inngaihsakna hi hmangaihna a nilo a. Mittui hi chak lohna a ni kher lo bawk. Ka thusawi chu i hrethiam em? Chutiang bak chuan ka sawi thiam lo" a han ti ve ngial a.




A âw a nghet charh a, a inrintawk hmel hle bawk. Bawihbawihi chu a hmangaih tawh lo turah ka ngai nghal hmak mai.




"Anih leh i hmuh leh tirh khan i la hmangaih tho em?" ka ti leh hram a. A ngawih run run hnuah "Zep lovah chuan ka thinlung a la khawih che nasa lutuk. Ka hmeichhia tia ka sawi theih hmasak ber kha a ni ve a. Ka hmuh leh tirh kha chuan ka la hmangaih reng alawm. Ani pawhin rilru min pe leh hman tih ka hria. Kan inngaizawng thar leh chu a nimai. Sangsangin min lo ngaina bawk a, pa hmangaihna a dawn loh zawng zawng pek chaknain ka khat ta a. Ka duat reng bawk a. Bawihbawihi nen kan inkar pawh a nghet chho leh tan viau a. Ka chhungte pawh ka hrilh hria a, pawngsual a tawh erawh ka sawi lo thung. Ka nu pawhin a iai hran lo, a tirah chuan" a ti sup a, a ngawi ta daih a. Ka melh chho ha a "Sawi zawm rawh" ka ti sap a.




Rawn thaw chhuak hulh in "Thil dang a la awm a, mahse Mamte, tunah chuan ka hrilh thei rih lo che. Hei erawh hrechiang viau ang che. Bawihbawihi hi ka hmangaih tawh lova, kan inkarah engmah a awm tawhlo. Chutihrual chuan an nufa hi chu ka mawhphurhna ah ka ngai. Pawi i ti em lovang chu maw..." a ti zawi ruih a.




Bawihbawihi thil lo tawn tawh zawng zawngte ka ngaihtuah a. Vanmala nen an inkar bumboh lutuk te, Sangsangi lo pian dan te. Ka lainat a ni tawp mai. Huat enah pawh ka en tawhlo. Ka pasal mawhphurhna chu ka mawhphurhna ah ka ngai ve ta hmiah. Ka pasal berin a hmangaih tawh chuang lova, a ngaihsaknaah hian lo tawiawm tha em em ila a fu ber zawkin ka ring ta a.




"Tun atang chuan kan nupa mawhphurhna ni tawh rawh se" ka ti ve ta nge nge a. Ka sawi zawh rual chuan a hmai zawnah min pawt chho hrawk a, hamhaih zeta ka en chuan min rawn fawp thut a. Duhthawh leh koham zetin min lo fawp a, chhan let nachang pawh ka hrelo.




Duhthawh zeta min fawh hnu chuan a inlahrang hlek a, phawk zetin ka lo melh a, nui suk chung hian "I rilru thatna hi chhawm nung zel ang che" a ti khur hluk a. Min fawp leh zauh a, a hmui huh hliam chu a hmuhnawm lutuk.




Ka melh reng lai chuan "Muhil rawh, a nih loh zawngin a pawi ang" a ti zawi ruih a. Tim daiin a awmah chuan ka bei leh a, min rawn kuah ta hlu hlu a.




Zanin Vanmalsawmhlua awmdan zet zawng, min tihrilhai, min ti hamhaih, min thawng a ni tawp mai. Mahse nuam ka ti hle bawk si.




Zing ka harh chuan keimah chiahin ka lo mu tawh a. Ham bai bai chungin sana ka en a, dar 6 chiah a lo la ri.




Inhnuai ka chhuk thlak hnu chuan Vanmala ka zawng a. Mahse ka hmu miah lo, nizanah tha te tein thil kan sawi dun a. A tukah hrilhai deuhin min siam zui nghal a. Ka lungawilo nghal ringawt.




Rice Cooker ka on a, ka phone ka keng thla lo tih ka hriat rual chuan inchung lamah ka chho leh vat a. Room kawngkhar ka hawng chiah chu side table a ka phone dah lai chu a lo ri ral ral a.




Hmanhmawh zetin ka va pan hnai a, Vanmala a lo ni. Ka pick up vat a, "I tho tawh em?" a rawn ti sup a. "Aw...i lo awm lova..." ka ti fan raih a.




A rawn thaw chhuak hulh a. "I mutui lutuk a ka kaitho duhlo che anih kha... damdawiinah ka kal a" a rawn tih chuan ka meng awk a. Eng nge damdawiinah a tih ang?



"Tinge?" ka tih hû chuan "Vartianah khan Sangsangi pum a na vak a, Bawihbawihi mangangin min lo call a" inthlahrun hmel tak hian a ti ta sup a.




Nizanah khan kan pahnih a kan mawhphurhna an nih tawh tur thu chu ka sawi ngei a. Amaha a lo buaipui chu ka lungawi lo tlat pek a. A mak tak tak ani.




"Hrilh hmasak che ka duh viau rualin i mutui sia ka kaitho buai duh ta lo che anih kha" a rawn ti leh sup a.




Ka lungawi lohna dah thain "Tunah eng nge a an tawh a?" ka han ti ve ngial a. "A ziaawm tawh e. Nachhawkna in an chiu a, drip an khai mek bawk a. Chumi zawh lamah chuan kan lo haw theih nghal mai ka ring " a rawn ti zung zung a.




Kan tih tawngkam a hman danah a la awm ve zel dawn anih hmel.




"Umm...in lo haw dawnah min lo hrilh leh la" ka han ti veleh ngial a. A ngawih deuh vung vung hnuah "I lo kal ve duh em?" a rawn ti teh daih a. Kal ve pawh chu ka pawiti vak lo. Amah chauha Bawihbawihi te nufa bula awm tir chu eng ka hria nimaw ka tha a na deuh tlat.




"Aw...a theih chuan " ka ti ta nge nge a. "Theih tehreng mai, lo insiam la, driver ka lo tir ang" a rawn ti ta a.




Kan inbiak zawh chuan ka insiam nghal zung zung a. Driver pawh chu a lo thleng chawpchilh ve nghal mai a.




Damdawiin chu a lo hla vak lova, minute 10 hnu velah kan thleng a. Vanmala chu damdawiin kawtah chuan a lo vei vut vut a, min lo nghak anih hmel.




Min rawn hmuh rual chuan a rawn pen phei pawk pawk a "Good morning " pa zeta kiai suk chung hian a rawn ti sup a. Eng ka hria nimaw ka lai ngawt pek a. A va hunlo tak.




"Morning" ka ti ve sep a. Ka kutah min rawn chelh nghal hmiah mai. Damdawiin chhungah chuan min kailut zui nghal zat a. Ka zui ve dat dat mai.




Sangsangi cabin kan luh rual chuan Sangsangi chuan mittui tling pam hian "Apa..." a lo ti tiau a, a kut a rawn phar chhuak bawk a. Chu veleh Vanmala chuan ka kut chu thlahin Sangsangi chu a va pan vat a.




An inpawm chilh nghal chial a. Kei erawh Vanmala'n ka kut a thlah tak chu ka melh a, ka hum ruh teuh ringawt.



Bawihbawihi chuan min lo be nghal vat a "U Mamtei chu i lo kal ve duh kher a" a ti sep a, a chauh hmel viau nain nui hmel puin min lo bia a.




" A harsa hlei nem" ka lo ti tha ve mai a. Nizana Vanmala nen kan thusawite ka ngaihtuah let a, a hmel ka hmuh leh takah chuan ka khawngaih thar kher mai.




Vanmala leh Sangsangi te chu an inbe mawlh mawlh a. Pafa tak tak an ang hial mai. Vanmala hian a duatin a ngaihsak bawk si. Ka ngaihtuahna chu duh lo zetin ka lu ka thing nawk a.




Bawihbawihi nen chuan kan lo titi ve bawrh bawrh a. Sawi tur a hre bawk a, kan inkawm thei phian mai.



Nizan lama U Vanmala nen a chanchin kan sawite kha ka ngaihtuah let a. A hmel ka hmuh leh takah chuan ka lainat zual kher mai. A thil tawn rapthlak takte kha indelh beh tir mai lovin heti taka hlim hian a awm lui thei ania. A fakawm ka ti letling phian zawk.




Reilote hnuah Sangsangi drip khai pawh chu a zo a. Haw turin kan inbuatsaih ta nghal a.




U Vanmala'n car a lak chhung chuan damdawiin kawtah Bawihbawihi te nufa nen chuan kan lo nghak a. Sangsangi chuan min melh hrek hrek a. Tum dangah chuan min lo nuih var var zel kha ania. Tunah tak hi chuan min ngainat loh hmel takzet. Bawihbawihi erawh chuan a dan ngaitein min be leh bawrh bawrh tho.




U Vanmala pawh a rawn thleng chawpchilh ve nghal mai a. Car seat hmaa thut luh mai tuma kawngkhar ka hawn lai chuan Sangsangi a rawn inrawlh vat a. Min rawn thut khalh ta tharh mai.




A ngaihna hrelo fe hian Vanmala chu ka va melh a, min lo melh ve chiah bawk. Inthlahrun hmel ang reng tak hian "Sangsang, Anu Mamtei kha thut tir la" a ti zawi sup a. Sangsangi chuan a lu a thing mat mat a "Apa, nangma bulah ka thu duh alawm" men tiau chung hian a tî a.




Bawihbawihi a lo inrawlh vat, "Sawmsang, hetah rawn thu rawh" tiin a fanu chu seat hnung lamah pawh mai a tum a. Mahse Sangsangi chu a lo tang ve tung reuh a.




Puitling zawk ka ni bawk a tiin Bawihbawihi bulah chuan "A pawilo thu rawh se, a hnungah kan thu dun mai dawn lawm" ka ti ta ngawt a. U Vanmala chu a inthlahrun hmel khawp mai.




Motor kan chuan chhung zawng chuan Sangsangi titi kan ngaithla ani ber. "Apa..." a tih hluai changin Vanmala chuan a lo chhawn vat zel a. Nuam ka ti miah lo. Mahse ka thinrimna erawh lan tir hun a nilo tih ka hria.




Vanmala chuan front mirror atangin min rawn melh leh zawk thin a, rang zetin ka lo hawi sawn daih zel.




Bawihbawihi te nufa chu an in thleng kan thlah a. Lut kawi turin min sawm viau nain Vanmala hna kal a ngai bawk nen, eirawng ka la bawl bawk silo kan lut kawi ta lova. Ani pawhin a hrethiam viau chuan ka hria.




Kan tlan leh hma chuan a rawn hawi deuh a "Hetah lo thu la..." a ti sup a, "Aaa...kan thleng tep tawh tho, tihian a hnungah hian ka thu tlang mai ang" pangngai tak hian ka ti a.




Mahse a rawn thaw chhuak hawk a "Mamte..." a rawn ti ril ruih a, mitmeng ngenngawl zet hian min melh a "Lo thu rawh" a ti leh sup a. A hmel ngenngawl lutuk vang chuan hnial zui chi ah ka ngai ta bik lo. A hmaah chuan ka insawn tha ve mai a.




Tukverhah ka dak heuh heuh a, min rawn melh leh zawk thin tih ka hria. "Mamte..." a ti sup a, a lam ka hawi vat. Min rawn melh leh zawk a "Ka tihpalh" a ti ngawt pek a. A sawi tum ka hria, mahse hrelo ang takin "Engvangin maw?" ka ti salh a.




A rawn thaw chhuak leh hawk a "Nichina thil thleng vang khan" a ti sup. Ka insûm hman lo "Sangsangi kha pâ tiin inkoh tir tawh suh" ka ti ta thlawt a. Amah ka haw ngawr ngawr a nilo, mahse tu nupui mahin mahni pasalte mi fâ in 'Pa' tia an koh chu an duh bikin ka ringlo.





Vanmala chu a ngawi nghal ngul a, ka thusawi chuan awmzia a nei vak lo niin a lang. Kan inhriat ve hmaa lo inhre tawh an ni a, chutia ka ti ngawt chu ka han inthiamlo leh deuh a "Theihngilh rawh" lungawi vak chuang si lo hian ka ti leh nghat a.




Mahse Vanmala chuan "Ka inkoh tir tawh lovang" a lo ti sup lawi a, a hmel ka en a, ngainat awm zet hian min lo nuih a "Ka nupui tih lungawi loh chu ka duh hlei nem" a ti zawi ruih a.




Ka nui nghal var var mai. Ka thu a awih ta lutuk leh min ngai pawimawh thar ta lutuk chu ka lawm.




Chutihrual chuan Sangsangi chu engtin tak nge a chinfel dawn ka hrelo a, mahse a kutah ka dah tawp. Ka pasal hian a chingfel thei lutuk ang.




In kan thlen veleh eirawng ka bawl nghal zung zung a. Ka bulah min pui turin a lo awm ve reng a, kei erawh chuan tul ka tilo thung. Nupui ka nihna angin ka pasal ei leh in tur chu ka buatsaih turah ka ngai.




Bai ka siam lai chuan ka bula ding reng chung hian "Awm pui hi kan la leh duh ang em?" a rawn ti sup a, ka melh vat a. Ani chuan a phone a lo bih daih thung.




Ka thiltih lai tih zawm pah chuan "A ngai ka ti hran lo, engmah tih tur ka nei chuang lova inchhung khur chu ka lo enkawl ve thei mai ang" ka ti ve luam a.



Min rawn din hnaih sauh a, ka melh a, a phone en lai pawh a lo dah sawn tawh. Ka bai siam lai chu a rawn bih a " A va tui hmel ve" a ti ve ngei a, ka lo nui tawp.




"Dik tak chuan awmpui hi chu nei ngei ngei tura ngaih kan ania. Tum dangah pawh an awm ziah a. I hriat angin Bawihbawihi kha..." min rawn melh zawk a, hmel danglam ka put loh vang nimaw a sawi zawm leh a "A hma kha chuan Bawihbawihi ka chhawr kha ania, khatiang deuh reuh tur pawh kha an lak leh theih reng ania" a ti dap dap a.




Bawihbawihi chhawr leh a ngaihtuah niin ka hria. Dik tak chuan nizan lamah khan kan pahniha kan mawhphurhna an nih tur thu sawi ve mah ila ka hmin thei zan lo. Ka rilru a insual buai khawp mai.




U Vanmala chuan "Bawihbawihi kan chhawr leh ang ka tihna anilo ania, midang kan la thei ka tihna zawk ania" a rawn ti leh sup a. Ka thaw huai thei nia mawle.




"I thu thu a nimai, mahse sawi leh sawi hnu, ka hman dawn tho a. Keimah pawhin eirawngbawl leh in tihfel vel hi chu ka ti thei ania. Mahse i thu thu ni rawh se" ka ti ve ta nge nge a.




"Nû berin inchhungkhur i luah lum tluk chu a awm dawn lova..." a ti nuah nuah a, nu ber tih tawngkam a hmang vel chu chhungkaw hung zet din tawhte pawh kan ang. Min melh chiang ngang mai bawk sia ka lai lek lek mai.




"Anih chuan awmpui lak vel chu ti lo mai ang. Ka tan thil harsa a awm chuanglo" ka ti hliai a, a lo pawm ve mai bawk a.


______________*_________________*_______________


(Heti Zawng hi ni rih rawh se Thil thleng tam lo mah se a thui tawp)


Link:
BBcode:
HTML:
Top