DEPUTY_COMMISSIONER By_CVL_Awmpuii (Completed)

[Ngaia]

DEPUTY COMMISSIONER
By CVL Awmpuii




Chapter 19



Nî a ral a, kar a ral a, kan nupa inkar chuan ziaawm lam a pan zel a tih theih ang. Kan inpawh pangngai viau a, chutihrual chuan nupa nun kan la hmang chuang miah lo tih kan sawi tel hram ange.



Ka rilru hi ka hrethiam chiah lo, nupui ka nihnaah ka chiang tawh a. Ka inpumpek fel chiah thei em tih erawh ngaihtuah tham fe a ni. Khum khatah kan la mu zel a, mahse Vanmala chuan vawikhat pawh min la khawih lo thung, min khawih tum ang pawhin a la awm ngailo.




Tunlai a hnaah a tul zual em em a. Damdawi tawlh ru man an nei leh zeuh thin a. Heng vangte pawh hi a nimai thei. Khaw mipuite'n hmanhmawh taka hma la turin an lo nawr ve sek bawk nen a hah zual thei hle a. Zanah pawh kan mu rual mang ngailo, lo nghah ve ngei chu ka duh thin a. Mahse mut ka lo duh bawk si, ka hriat loh lai bian ka lo muthilhsan leh daih thin a.




Zing ka harh hmasak zâwk chang chuan min kuah chial hian a lo muhil thin a. Ti harh lovin ka tho mai zel. Pangngai takin kan khawsa dun a. Sawi tur em em hre dun lo mah ila kan inpawh ve tawh viau chuan ka hria.





Bawihbawihi te nufa chu an rawn lang leh ta miah lova. Mak ka ti ang reng viau, Vanmala hian an chungchang a sawi ngai hran lova. Hre chak viau mah ila sawi hmasa tu zâwk nih erawh ka duhlo bur. Heti hian kan la hlim ve rih viau chuan ka hria.




Ka nu leh U Faktei te nen pawh kan inbe âwl lova. Pathian zara dam chuan thla leh lamah lo zin an tum a, ka lawm khawp mai. Mahni chauha in lo nghah chu a khawhar thlak a. Pa Chhuana a awm hlauh zawk a, chhun lamah chuan a duty naah ka va kal a, kan inkawm ve thei viau.




Ka pi chanchin pawh phone kaltlangin ka hre ve zel a. A hriselnain that lam pan hluai lo mah se a zual em em lova. A dinhmun a pangngai viau a, a lawmawm lamah ngai zel phawt mai ang.



Chhunah chuan ka tih dan ngai têin Pa Chhuana kawm turin ka chhuak leh a. Ka thingpui lum sa leh bakery chhang ka kensak bawk. Hetia chhun thil ka pek hian a lawm thiam ve thei lutuk a, tih thanah ka nei tawh.




Ka va thlen chuan chanchinbu a lo chhiar a, min hmuh rual chuan a lo ding hluai a. "Chhunah hi chuan ka lo beisei tlat thin tawh che" tiin a lo nui huah huah a, keipaw'n ka nuih let ve var var mai.




Ka thutna tur a lo la chhuak vat a, ka thil ken laite chu a dawhkan tê ren rawnah chuan ka dah thla a, a tawng leh nghal suam suam tawh.




Ka hmazawnah chuan thuthmun a rawn rem ve nghal a. A dan ngai têin a tawng leh bawrh bawrh tawh.



"Tunlai chu Bawihbawihi te nufa an reh khawp mai tiraw" a ti lung lung a, ka lo nui tawi tak ringawt, sawi zui vak ngaihna ka hrelo.



"In nu chu eng nge a an a?" ka ti ta daih a. An nu chungchang chu a sawi zui veleh nghal daih mai bawk a. Hmanni khan a dam that loh thu leh in lama an buai viau thu min hrilh kha ania. Tunah chuan a sawi kalhmangah a dinhmun a ziaawm phian anih hmel e. Ka lawmpui khawp mai.




Pa Chhuana te hi chhungkaw khawsak awlsam lo ve tak an ni a,harsa lutuk lo mah se an chhungkaw dinhmun a sang lo ve ang reng a. A nupui hi a bawrhsawm em em a, fapa rualbanlo pakhat an nei a. Chumi chu an nupain an tul pui ve a ni awm e. An dinhmunte ka hriat avangin theihtawpin heta a awm chhung chuan ka lo kawm hlim ve thin a, amah pawh hian nuam a ti ve viau chuan ka hria.




Tin, sawi hmaih theih loh chu Vanmala hian a ngaihsak em em a, Pa Chhuana pawhin chu chu hriain Vanmala tan a thawk deuh bur mai ni.




Ka mimal chanchinte min zawt ve luam a, tum dangah chuan hetiang lam hi kan sawi ngailo a. Tun tum chu kan mimal chanchin kan sawi ve nasa khawp mai.



Zirna lama ka dinhmun min zawh chuan tha takin ka sawi ve mai a. B.ed ka zawh thu ka sawi chuan a rawn phul hluai a "Taka, kan vengah hian substitute teacher an mamawh asin. B.ed zir zo ngei an duh sia, vengchhung ah an duh ang an awm si lova, a lo zir tawhte pawhin hna nghet an lo nei zel sia. Thla 1 chhung kal tur an mamawh a, kal la a tha ngawt ang a" a ti zung zung a.




A thusawi chu ka beng verh zawng tak ani. Ka zâwt chiang ta vat a. English substitute teacher an mamawh hi a lo ani a, an zirtirtu chuan a chhungte dam lohna avangin thla khat chhung chawlh a la hi a lo a ni a.




Pa Chhuana chuan "I theih a, Vanmala'n rem a tih phawt chuan kal ngei ngei rawh, hetia in lo nghah ngawt ngawt ai chuan i tan pawh a nuam zawk ang. Zing dar 9 ah an tan a, tlai 2:30 ah an bang a. Inchhung khur pawh i enkawl hman vek ang. Nangmah lam ai mah chuan an tan i tangkai dawn em a, an mamawhna che a nasa sia" a ti leh suam suam a.




Ka ngaihtuah zui rauh rauh mai. Zirtîrtu nih chu hman atanga ka lo châk tawh, tun thlenga ka tih hlawhtlin theih si loh a ni a. Tih hlawhtlin theih pawh ka inbeisei tawhlo chu ania. Mahse tun hun hi chance tha tak niin ka hria. Chutihrual chuan lo insawi ve ta ila min duh kher ang em ka hrelo. Ka pasalin nihna a lo nei bawk nen. Thawk reng tur pawh ni lo mah ila thla khat chhung tal experience neih ve hrim hrim chu ka chak.




"Class engzat nge an nih hlawm a?" ka tih chuan "Kg1 atanga Class 8 thleng an nia, i zir sang bawk sia i tan thil har a awm teuhlo mai" a ti leh zung zung a.



"A va tha dawn ve" ka ti leh hliai a, min lo sawi phur pui leh hlut a "Tha dawn lutuk, tlaiah Vanmala sawi pui nghal la, a remti lutuk ang" a ti leh hlut a.




"Awi...mahse Pa Chhuan, thawk turin min la duh ngawt dawn mi?" ka ti nang nang a, mahse Pa Chhuana chuan "An headmaster saw ka hmelhriat tha ania, a bulah ka lo sawi chhin ang. I kal duh huam anga lang si lovin nangmah hi ka lo kawhhmuh dawn nia" a ti leh zung zung a. Ka lawm kher mai.




Ka phur thar sarh a, Vanmala pawhin thla khat chhung lek kal ve chu a remtih ngei ka beisei. Chu mai bakah Pa Chhuana sawi hmangah khan zirtirtu an mamawh hmel hle si a. Chutiang zawng zawng chu ka sawi ang a, a remti ve mai turah ka ngai.





Tlai eriawngbawl hmain kan inkawta plants ho ka tifai hlawm a. A then chu ka duh danina ka hung sawn vel a. Kan awm tirh khan a lo awm sa nual a, nakinah a dang lei belh leh te ka rilruk. Hetiang lam hi ka buaipui vak ngai lo nain tun hnu, heta kan awm hnu hian aniang chu, ka buaipu thar ta riau a. Hun khawhralna tur tha tak niin ka hria a, a tihzia phian mai.




Chutia ka tihfel mawlh mawlh lai chuan compound ah motor lo tlan lut thawm ka hria a. Ka hawi nak chuan Vanmala a lo nia. A lo haw hma lutuk chu mak ka ti viau mai.




Motor te a hun that hnu chuan min lo pan vat a, ngainat awm zet hian min lo nuih a "Eng nge i lo tih a?" ka bul a rawn thlen rual chuan a ti sup a. Coat suit a inbel leh thlup tawh a, a lang lianin a zahawm leh khup tawh.





"Hei, plants vel ka lo tifai e ka tia. I va lo haw hma" ka ti hliai a, a kiai suk a, tawitea a nuih hian a pa zual ka ti. Ka ngaihtuahna zet chu !




"Vawiin chu kan buai zualpui a reh a, office kan khar hma hlauh a" a ti tha ve mai a. Ka plants tihfai sa ho chu an phei diat diat a.




"Anih chu, hei ka zo tep a, thingpui i duh chuan flash ah khan siam sa ka dah a, i lo inbuaipui mai thei ang em?" ka han ti ve ngial a. Min rawn melh a, a nui leh suk a, ka lo nui ve tawp ringawt. Ka mawl hmel ngawtin ka ring.




A bu nghut a, ka samah a rawn tuai zauh a "Lo lut har lo la" a ti sup a, ka lo bu ve mai a.




Ka bianga rawn piai zeuhin inchhungah chuan min luhsan ta a. A chatdan hi a chang chuan a naupangchhia thin ngawt mai. Tun hnai phei chu ka bianga min piai a chîng thar a,ngaiah ka nei lek lek tawh. Ka dara min kuah mai te, ka chala fawh mai te a chîng bawk a. Ka hmuiah chuan fawh tak takin vawikhat chiah min la fawp, chu pawh Bawihbawihi chungchang kan sawi dun zan kha. Khami bak kha ka hmui a tawk leh tawhlo.





Plants ho chu ka remfel leh zung zung a. Rinaiin khawih chhung a lo hautak zek a, ni sa hnuaiah ka tilo hlauh zawk a. Chuti chu nilo se ka hah zual viauin ka ring.




Ka khawih fel zawha inchhung ka luh chuan ka hmu mai lova. A la intifai anih ka ring. Keipawh intifai turin room lam ka pan ve nghal a.




Room ka luh rual chuan Vanmala saruak thaw thanga a lo awmlai ka hmu nghal. Rang zetin kawngkhar ka khar leh a, ka petek chhuak leh nghal dawrh hi a nimai. A nui hawk ri ka hriat zawm zat bawk.




Towel pawh veng lovin underpant nen chauh wardrobe bulah a lo ding a, ka mitthla let zawng ringawt pawhin ka sa hat hat thei. Ka zak lutuk !




Kawngka bulah chuan ka awmdan thunun tumin ka ding ta reng a. Rei vak lovah room chhung atang chuan min rawn au a, mahse ka chhang thei der lo. Ka dang a ro vek.




Vawihnih min lo auh hnu pawha ka chhawn tak si lovah kawngkhar chu a rawn che dat a, Vanmala ngei mai chu a rawn dak ta a. Nuihza insum zet hian min rawn melh a, zam lutukin ka melh let ve tawk tawk. A inha fel vek tawh ang chu tihnaklaiin boxer chauh a lo la ha a. Mahse hei chu ka pawm dam thiam deuh, a hma pawhin ka lo hmu fo tawh a.




Nuihza insum set hian "Lo lut rawh" a ti sup a, ka zak lutuk chu ka hmai a sen vekin ka ring.



"Aih, inthlak zo la, ka lo nghak ang che. Ka inbual ve duh a" ka tih bah nawk a. Mitmeng tawrhhlelhawm zeta min melh chung chuan "Ka inthlak chhung pawhin i inbual thei reng alawm, lo kal rawh" a ti dam thluam a.




Ka insangmar sauh sauh a, kawng min lo kian vat a, ka lut ve mai bawk a.



Ani pawh wardrobe lam bawk a pan leh a, keipawh inbual turin ka intintuah ta nghal a.



Towel leh hak thlak pawm tun chungin bathroom ah ka lut a, Vanmala nuih ka tiza khawp mai. A inthlak pahin min nuih hawk hawk mai. Ka haw reuh tak tak ani.



Ka inbual zawh chuan room chhungah a lo awm tawh lova. Inhnuai lamah ka chhuk thla vat a, chokaah thingpui a lo in a. Ka lai thar tlat pek a, a zialo tak tak ani.



Chokaa luh ve pah chuan ka zahzelah Fridge chu ka'n hawng ngawt a, ka mitsirin min lo melh tih ka hmu thei. Chawhmeh dahna bawm chu ka hai a, thlai chi hrang hrang a awm.




Amah pawh en chuang lo chuan "Zanriah atan eng nge ka siam ang?" ka ti a, min chhan mai loh avangin ka va melh a. Min lo melh run tho, lai zet hian ka meng kalh ralh a, a lo nui hawk mai.



"In date ila" a rawn ti thut a, ka hamhaih lek lek. "In date maw?" ka ti ha a, buk nghut pahin "Kan dine out ang a" a ti leh zel a. Ka melh deuh awk chuan "Zanriah buatsaih a ngailo, dine out ang. Tunlai ka buai thei sia, vawiin tlai chu ka chhuah harh pui ang che" a ti dam leh thluam a.




"I sawi lawk bawk si lova" ka ti hliai a, a thingpui in na no silhmuna dah pah chuan "Suprise a nimai" a'n ti vel ngei a. Keimahin ka nui ta tawp.




Dine out tur chuan kan insiam nghal a, smart pants ka ha a, ka tawnzau var chungah kamis bantlawn var ka ha leh a, sneakers ka bun leh tawp a, ka inchei dan chu a tawk viauin ka hria.




Vanmala chu a chhelo lehpek khawp mai, cotton kekawr dum a ha a, Tshirt var sar mai a ha bawk a, sneakers a bun leh tawp a. A inchei dan hi simple viau thin mah se a inhmeh thei thlawt a ni.




Car chhunga kan chuan hnu chuan "I chhelo lutuk" a'n ti vel ngeiah, a thusawi chu a inhmeh lo lutuk a, ka nuih a tiza deuh. "Nang deuh" ka ti ve ngei a, za zetin a rawn nui chhuak hawk hawk mai.




"Khawiah nge kan kal dawn?" ka tih leh chuan "Khawiah nge kal i duh?" a lo ti let khauh a. Ner nang chungin "Zawhna hi zawhna bawkin chhang thin suh" ka ti hlak a. A nui leh hawk hawk tawh.



"Hmasawnna hi a zuanin a zuang ani" a rawn ti leh daih a. A sawi tum ka man lehpek tawhlo.



"Hmasawnna ti ve ziah" ka tih hlak chuan "Hlawhtlin hun a la awm ang" a lo ti leh daih a. Ka hrethiam thei thlawt thinlo. A titi ka pawh thiam leh tawhlo.




Tukverh lam chu ka melh leh ta daih a. Ka pi ka hrechhuak zawk mai. Tunlai chu ka ngai thar em em a, a dam that thu sawi fo mah se ka ngai thei lutuk hi ka ngaih a thalo. Hlauhthâwn viau khan awmzia a awmlo tih chu hre tho mah ila ka inthunun thei bawk silo.




"I pi nen in inbe thin em?" Vanmala chuan a rawn ti chhuak nawlh a, ka melh nghal vat. Ka ngaihtuahna hi a hre thei anih ka ring tak tak tawh.




"A van mak" ka'n ti ngawt pek a, "Eng maw?" a lo tih chuan "Ka ngaihtuahna hi i hre thei em ni? A hma atang daih tawh khan ka ngaihtuahna zul zuiin thil i lo sawi ziah zel. Tunah pawh ka pi ka ngaihtuah lai takin i rawn sawi chhuak a" ka ti malh malh a.




Pa zet hian a kiai suk a, mitmeng tawrhhlelhawm zeta min rawn melh chung hian "Ka nupui i nia lawm, pumkhat kan nih hi" a rawn ti ril ruih a. A thusawi chu tam viau lo mah se thu tam tak pai a ni tlat.




Nupa tih awmzia hi pumkhat tih hian a sawifiah nghal em em a. Thinlungah a chiang nghal ngawih ngawih bawk. Chutihrual chuan awmze thûk tak nei a ni thung a. Engkim, thil engkim a chhia a tha intawm a, hmachhawn dun tura Pathian suihzawm kan ni a. Hun nuam leh hun hrehawm pawh paltlang zel tura thlun zawm tlat kan ni.




Chu chu Vanmala nen kan nihna tur pawh a ni.




Mahse tunah rih chuan nupa tak tak kan la ang thei meuh chuanglo chu anih hi.




Vanmala chuan ka chhan mai loh avang chuan "I pi chu?" a rawn ti leh sup a, "A...aw, inbia e...kan inbe ve reng alawm. Tunlai chu ka ngai thei lutuk a" ka han ti ve ngial a. Min rawn melh leh zawk a, a bu deuh nghut a, "Kan buai zualpui hi reh sela kan zin vat dawn nia, reilo te tal châm tur pawhin" a han ti ve ngial a. Ka lawm viau nain kan zin vat erawh ka ringlo. A chhan pawh Vanmala hi a la buai dawn chauh tih ka hria.





Pa Chhuana sawi kalhmangah phei kha chuan tun thla hnih thum chho hi hna an ngah zual dawn niin a sawi a. Damdawi tawlhruk hluar hunlai ber leh dan kalha thil ti an tam hunlai ber niin a sawi. Chuvang chuan Vanmala pawh hian theihtawp chhuahin a buaipui leh dawn tih ka hria.




Reilote hnuah chawei tura min hruaina hmun chu kan thleng a. A pawn lam atang ringawt pawhin Lawngtlaiah chuan restaurant nuam ber pawl anih ka ring. Hmuh a nuam nghal em em mai ni.




Dawr chhung kan luh dawn chuan ka kutah min chelh leh hmak tawh. He thil hi tun hnai tea a thil chin thar zinga ka nuam tih ber pawl a ni. Nupa tak tak kan ang vea min inngaih tirtu a ni bawk.




Waiter chuan kan thutna hmun tur min lo kawhhmuh vat a. Min lo buaipui vat danah Vanmala chuan a lo hauh lawk sa diam tawh anih ka ring.




Kan thutfel hnu chuan "Min hruai i tum lawk chiang mai" ka han ti ngawt pek a, a lo nui mai a. Kan thil eiturte kan chah hnu rei vak lovah a lo thleng nghal a. A tihzia khawp mai.



Ka ril a lo tam tawh hle aniang ka beisei ai daihin ka ei hnem a. Vanmala pawhin a ei ve teuhin ka hria.




Thil kan eizawh hnu chuan kan haw mai dawn emaw ka tih laiin "Khawnge kan len ang?" a la ti ta deuh deuh a. "Ka hrelo e a, nangman i hre zawk ang chu" ka lo ti vat.




Car chhungah kan lut a, "Anih chuan ka duhnaah ka hruai leh mai ang che" tiin a car steering chu a herh kual nghal a.




"Kan la haw dawnlo maw?" ka tih leh chuan "Len i duh lo em ni?" a lo ti sup a. Kar 1 chuang awm ve tawh mah ila ka chhuak ngai silo a. Lawngtlai ka vawikhat kalna a lo ni bawk nen han lenkual vel pawh chu ka pawiti lo khawp mai.




"Duh e, leng ang" ka lo ti hluai a. Tuna kan pahnih awmdan vel hi tleirâwl inngaizawng te pawh kan ang lek lek mai. A nuihzatthlâk zawk.




Tichuan Vanmala chuan min lenkual pui ta a, hmun hrang hrangah min hruai kual a. Park ah reilote kan thu bawk a. A bak chu kan tlan kual mai mai a tih theih ang. Kum hial lo awm tawh mah nise ka rin aiin lenna tur a lo hre vak biklo. Mahse nuam ka ti khawp mai.





In kan thlen leh meuh chuan zan dar 11 a lo ri tep tawh. Kan chhuak nasa bawk nen ka chau ve hnawk thei.



Ka intifai leh zung zung a, chumi chhung chuan Vanmala'n hna tlêm te tihfel tur a nei a, a lo tifel bawk a. Ka inbual zawh veleh a lut ve nghal a.




Ka sam chu hair dryer in ka chhem ro tir vat a, tuna ka chak ber chu mut hahdam sawng sawng a ni tawp mai.




Vanmala inbual zawh hmain ka lo mu fel than tawh, mutchhuak viau si kha ka muhil thei lawk lo lehnghâl a.



Ka bula rawn mutthlak ve pah chuan "I chau viau emaw ka tia, i lo muthilh tawh ka ring a" a ti sup a. "Ka chau tho nain ka mutchhuak a reh daih" ka lo ti ve mai bawk a.




A rawn tawlh hnai sut sut a, ka kawnga a rawn kuah chuan engtin mah ka lo awm lo, zantin a tih thin dan ania ngaiah ka nei tawh.



"Pa Chhuana nupui chanchin i hria em?" a tih chuan vawiina Pa Chhuana nen kan titi kha ka hrechhuak zawk a. Substitute teacher a kal chungchang vel kha.




"Aw, Pa Chhuana sawi dan kha chuan a tha tawh khawp mai" ka lo ti vat a.



A lam hawi tur chuan ka inher a, a lo insiam rem ve vat a. Inhmatawnin kan mu ta ran mai, ka kawngah a la chelh reng bawk.



"U Vanmal" ka tih rual chuan "Eiah" a lo ti vat a, min nuih vur vur avangin ka han lai leh khanglang a. A hunlo thei thin mange.




Ka kawng hmer salh pah chuan "Sawi ta si che" a ti sup a. Pehhel buai tawh lovin vawiin lama Pa Chhuana nen kan thusawi te chu ka hrilh ve luam a. A lo bu nghut nghut a.




"Nangman i chak hrim hrim em?" a tih chuan "Ka chak vangin alawm ka hrilh che" ka lo ti vat a. Ka sama chul pahin "I chak apiang chu tih phal sak i ni, ka nupui i nihnaah chiang em em la" a ti dam thluam a, a nupui ka nih chungchang a sawi tel kher chu ka man pha leh pek lo.



Phur zet hian "Takt tak" ka ti hluai a, "Umm...i duh a, an lo duh phawt che chuan i kal dawn nia" a ti dam leh thluam a, ka kuah let ve nghal thawk mai. A nui hawk hawk a "I va hlim ve " a lo ti sup a, "Hlim rapthlak, zirtirtu nih hi ka chak thei lutuk a" ka ti leh hluai a.



Chutah nui vur vur chung hian "I nulat laia i thiltih chak kha ka nupui i nih hnuah i ti hlawhtling dawn ta anih chu" a ti sup a. Ka melh leh ha a "Min lo duhlo ta se" ka tih chuan "An duh em em ang che, Miss Mamte" uang thuang zet hian a ti a. Kan nui dun hawk hawk mai.




Zanin kan nupa boruak chu a zangkhaiin a hlimawm phian mai.




Ka chau bawk a, ka lo muhil zui daih a. Ka harh leh chuan keimah chiahin ka lo mu tawh. Room chhunga ni zung rawn lang riai vang chuan sana ka en vat a, dar 8 a lo ri tawh ! Ka tho kang nghal zawt a.




Vanmala mutna lamah chuan lehkha them hi a lo awm a, ka en nak chuan Vanmala hnutchhiah a lo ni a.




*I mutui lutuk a, ka tiharh duhlo law law ta mai che anih kha. Hna hmanhmawh thlak a awm thut a, ka tum ai hmaa chhuah ka ngai ta sia. Eirawng ka bawl tawh a, i duh hunah chaw i lo ei mai dawn nia* tih hi a lo inziak a. Ka nui var var mai. Ka tan pasal tha tak a nih zia ka hmu chiang telh telh mai.




Ka tumthuan ei laiin Pa Chhuana a lo lut teh nawlh a, chaw ka ei min hmuh chuan "Nakinah ka lo kal leh mai ang, ei phawt rawh" a ti zung zung a. Mahse "Thutkhawmna ah lo awm la, ka kham chu a nimai" ka ti ve vat a.




Pa Chhuana chuan "A...a ngai chuang lo, anih tihian ka'n sawi mai ange. Headmaster kha ka lo biak sak tawh che a, i remchan dawn chuan naktuk atangin i zawm thei dawn anih chu. I chanchin ka hrilh khan a lo amen khawp mai" a ti ta zung zung a. Ka chawei lai ka hak lo chauh, ka van lawm tak.




"Tak tak maw" ka han ti hluai a, nui vur vur chung hian "Tak tak e, i kal thei ang em?" a tih chuan ka lo bu nghat nghat a "Umm, U Vanmala nen pawh kan sawi dun tawh a, a remti akawm" ka lo ti ve var a. Ka chawei pawh ka kham chawpchilh nghal a.




Pa Chhuana chuan nui huah huah chungin min lo fiam a "I helhhawlh anih kha, i hlawh min sem then ve ang, thla1 chhung atan hna ka hmuh sak si che a" a lo ti a. Ka nui ve hak hak mai.




Tlaiah Vanmala a lo haw chuan ka hrilh ve vat a, min lawmpui ve hmel khawp mai. Ka awmdan vel hi hna tak tak hmute pawh ka ang. Ka hlim lutuk vang ni berin ka hria.




Zanah hna pawimawh khawih tur a ngah avangin ka lo mut san a. A chang chuan ka khawngaih thin khawp mai. Han puih ve dawnin chin chang engmah ka hre bawk silo, a thawkrim mai bawk si a, ka lainat thin.




Zing ka harh chuan min kuah chialin a lo muhil leh tawh. Thawm dim zetin, tihharh hlau lutukin ka tho them them a, zan lamah a hah si a, a theih chen chen mu sela ka duh.




Eirawng ka bawl zo tep tihah a lo tho chhuak a, a tho hlim hmel pawh a hmeltha tho. Tunlai chu a thatna hlir ka hmu mai. Kan inneih tirh ngawt ai kha chuan min hip hle tawh. Ka duh em phei chu ka hrelo.




Chaw kan ei hma a, kan chawei lai chuan "Ka hna kal rualin ka thlah che ang a, ka ban hmain in ban hmel si a, driver ka lo lam tir mai ang che aw" a ti dam thluam a, ka lo pawm khawp mai.




Chawei kham veleh kan nupa chuan kan insiam a, eng a hria nimaw ka kawr hak turte min han thlan sak vel ngei a. Ka kawrfual smart zet, kan inneih hmaa ka nuin min lei chu a rawn la chhuak a "Heihi ha rawh" a ti sup a, a lungawina tur anih chuan tiin ka lo ban ve mai bawk a.




Thla 1 chhunga ka sikul thawhna turah chuan ka thleng ve ta ran mai. Vanmala chuan a lo hre lawk vek a, mak pawh ka ti hran lo. Helai hmuna a awmna a lo rei tawh bawk a, a hre ve turah ka ngai sa hrim hrim.




Kan in bye bye a, a kal leh dawn lai tak chuan ka hnunglam atang hian "Pa..." tia ring lenglawnga au ri ka hria a, ka hawilet nak chuan Sangsangi hi uniform nen, bag ak chungin a lo ding teu mai a.




Vanmala chuan car chhung atang chuan min rawn melh zawk a. Sangsangi chu kan lam panin a rawn tlan a, ka zawn a thlen chuan min rawn nek salh a, Vanmala car tukverha rawn dak bulhnaiah chuan a kal vat a.




"Apa..." phur zet hian a ti a, Vanmala erawh chuan nui hmel pu miah lo hian min lo melh vung vung a. Ka lo melh let ve kar bawk.




Sangsangi chuan "Apa, kan sikulah i lo kal thut a" a ti hluai a. Vanmala chuan Sangsangi chu a melh ve ta nge nge a.



Thu tak zet hian "Sangsang" a ti sup a, "Apa...kan class thleng lo kal ve rawh" tiin Sangsangi lah chuan kaih chhuah a tum a.




Chutah Vanmala chuan "Sawmsang" a ti fiah ta fuk a. Hetiang hian vawikhat mah Sangsangi a la ko ngai lo, tuna a mitmeng ang te hian a la melh ngailo, tuna a awki angte hian a la be ngai hek lo.




Sangsangi pawh a bangbo hle ni tur a ni, min rawn melh zawk a. Min melh dan chu naupangtê mitmeng atan chuan a nasa reuh mah mah ani. Rum zetin min rawn melh a, chutah Vanmala lam chu hawi lehin "Apa..." a ti tiau a, a hmel landan a inthlak leh vek tawhin ka ring.




Mahse Vanmala chuan aw ki dam deuh zawk hian "Sangsang, i pa chu vanah a awm tawh a, keichu i pa Vanmala ka nia. Ka sawi tawh kha, i hrethiam ang tiraw, naupang fel i nih kha" a ti dam thluam a, Sangsangi sam chu a chûl bawk a.




Vanmala hmel chu hmuh hrehawm ka lo ti hmanhmawh. Sangsangi a duat zia ka hria a, hetia han sawi mai hi a tan chuan a harsa viau ang. Ka mitmei a veng bawk si, Sangsangi a khawngaih bawk si hmel chu hmuh hrehawm tak a ni.



Ka beisei loh lutukin Sangsangi chu a rawn tap chhuak ta ruah ruah mai. Vanmala chu a thaw chhuak hawk a, min rawn melh a, Sangsangi chu a melh leh a "Sangsang..." a ti sup a.



Mahse Sangsangi chuan "Apa...nangmah alawm apa chu..." tiin a tap hliam hliam a. Vanmala chuan hrehawm ti lutuk hmel hian min rawn melh a.




A thaw chhuak leh hawk a "Mamte, ka kal ang aw ka tlai dawn" tih leh a car tukverh chu up a rual a. Sangsangi tap rawng rawng pawh chu ngaihsak zui tawh lovin a tlanchhuak nghal a. A tlân liam thleng ka thlir a. A hmel landan hmuh hrehawm lutuk kha ka khawngaih, a vawikhat nan ka hmaah Sangsangi a hnar chu khawngaih viau mah ila ka lawm tho bawk si. A rilru chhiat thlak ang reng.




Vanmala tlan liam hnu chuan Sangsangi chu a tap bang ta a, a rawn lehhawi a. Tur zeta min rawn melhin a rawn tlan phei a, "Apa kha min laksak anih kha, nangmah vang vekin min duat tawhlo" tiin a tha tawp tih hriat lutuk hian min rawn nem vak a. Naupang tha mah nise ka lo ding nghet lo bawk nen ka kat ve nawk thei. Mahse ka tlu lo thung.




"Sangsang..." ka tih chuan rum zetin min melh a, a bula lungte awm chu chharin ka lamah a rawn vawm ta mai.




____________*_____________*___________




________________*_________________*_______


Show post links
Top

[Ngaia]

DEPUTY COMMISSIONER
By CVL Awmpuii



Chapter 20




Ka hriat leh hmasak ber chu ka chal a rawn thîp nghal zawk a, ka kutin ka dawm nghal vat. Ka tuai a, ka kut ka en leh chuan a lo thi lo hlauh. Mahse a hnu lawkah ka mitko a rawn lum thla pap a, ka chal bawk chu ka tuai leh a, ka kut ka en leh chuan thisen a lo awm ta mai.




Sangsang lam chu ka hawi a, hmel pha dui hian min lo melh a, a hlauhthâwn hmel kher mai.




Ka rawmawl ka la chhuak nghal vat a, ka chal chu ka dawm a, ka rinaiin thisen a chhuak duh daih mai. Min vawmna lung kha a len viau pawh ka hre si lova.




"Sawmsang" tiin ka hmaa hmeichhe naupangte ding khawng lah chu ka au a, ka âw a nem fahran lo. Nutling puiin naupangtê khin reng mai chu a mawilo tih ka hria. Mahse naupangtê ina hetia kut min thlak ngam hi mak ka ti.




Sangsangi chuan rang fahran hian min rawn tlanpel a, rawn hawilet leh tawh miah lovin School building chhungah chuan a lut nghal daih.




Ka chal tuamna rawmawl chu ka lasawn a, ka en leh chuan thisen a lo kai niai tawh. "A va zialo tak" tiin ka phun nang nang a.



Ka chal chu ka theih ang angin ka hru leh a, chutia ka lo inbuaipui lai chuan ka sir lam atangin mipa âw hian "I tha em?" a rawn ti sup a, ka hawi nak chuan mipa pakhat chêr sang lampang, hmel fai vang mai hian min lo melh run a. A landan atang chuan kum 40 ral kai tawh a ang. Smart zetin a inchei a, pa chêr lampang mah nise a lang zahawm deuh khup mai.




Min rawn pan hnai vat a "I chal a thi anih kha?" a ti sup a, ka lo nui lui seih a, "Ka rinai daihin a thî duh, chutiang pawhin a na vak lo ania" ka lo ti sep a.




Chutah mipa chuan "Lo kal rawh, office chhungah kan inbuaipui dawn nia a zialo emai" tiin an office lam chu min pan pui vat a. Ka hnungah min nawr dat a, ka kal zui ve mai bawk a.




'Staff Office' tih inziahna ah chuan min luhpui a. Midangho pawh an lo vei suau suau a. A lo awmte chu a tlangpuiin Zirtirtu an nih ka ring, nu leh pa thenkhat pawh an awm ve nawk mai. An landan atangin a tin zawn theih.




Mipa chu zirtirtu dangho chuan an lo wish sap sap a, zirtîrtu a nih ka ring ve tawp. Mahse office chhunga room dang pakhata min luhpui lehnaah chuan 'Principal Office' tih a lo inziak a. Chupa chu ka melh ha a, hmalam a lo en daih thung.




Room chhung min hruai luh hnu chuan dawhkan hnuaia drawer chu a hai nghal ruk ruk a. Lawpua, band aid leh damdawi hnawih tur hi a rawn la chhuak a.




Ka lo din reng lai chuan "Lo thu rawh" a ti sup a, ka chal dawm pah chuan ka bula chair awmah chuan ka thu thla ve mai bawk a.



Min rawn pan leh vut a, lawpua chuan ka chal chu min rawn hruk sak mai a tum a,mahse ka lo dang vat a "Keiman" ka lo ti vat. Ani pawh chuan min pe ve mai bawk a.




Thisen lah chu a chhuak duh zek lehnghal, ka hruk zawhah damdawi chu ka hnawih ta nghal a. Darthlalang min lo pe vat bawk.



Ka chal chu ka en a, a lo kak deuh raih a, mahse a kak thui lutuk lo, a thûk phian a nih ka ring. Ka chal ka ti tak nain ka chhîp a ni zawk mah, ka sam a han hrut pha lek lek mai.




Ka inbuaipui fel hnu chuan lawmthu ka hrilh ve luam a. "Engtin nge maw i in tih nat reng reng le?" a ti sup a. Ka lo nui ringawt. Mahse amah bawk chuan "Sangsangi tlan lai kha chu ka rawn hmu a, ama tihnat che chu a ni em lovang chu maw?" a ti nuah nuah a.





Kan awmdan tlemte chu a rawn hmu ve hman anih hmel.




Min melh run avang chuan ka sawi tlang ta tawp a "Sangsangi khan min vawm a" ka ti ta nge nge a. Chutah ani chuan "A tihpalh anih dawn chu, naupang fel leh lehkha thiam thei deuh mai ania. A nungchang a mawiin a fel thin hle si a, a tihpalh liau liau aniang" a ti ta duah a. Han sawi vak dawnin, mihrang a ni si a, ka sawi zui duh ta lem lo law law mai.




An sikula ka kal chhante min zawh chuan ka sawi ve ta vat a. Chutah ani pawh chu lo insawi ve nghalin Pu Hmachhuana , he sikul Headmaster ngei mai hi a lo ni a. Pu Hmachhuana ka ti tak nain a sawi kalhmangah tlangval a la ni awm e.




A room ka chhuahsan dawn chuan "Sir Hma min ti mai zel a, chutiang chuan min ko ve mai dawn nia. I lo awm hlauh chu a tihzia khawp mai. Pa Chhuana'n i chanchin a sawi khan kan mamawhna a sang tawh bawk nen ihe lovin ka lo pawm nghal a, ka tisual lo turah ka ngai. Hlawh velte pawh nakin lamah kan sawifel dawn nia aw, thla1 chhung chu tha taka kan thawhho theih ngei ka beisei. Harsatna i neih chuan min lo hrilh dawn nia" a ti duah a.




Nelawm hmel em em lo mah se mi khirh khan lutuk anih chu ka ringlo. Ka lo beisei ve dan chuan, an headmaster chu kum upa ve deuh tawh turah ka lo ngai a, mahse a ni miah silo. Mak ka ti ang reng. Naupangtê a headmaster ni thei chu a bawn ve viau aniang.




Principal Office atanga ka chhuah rual chuan zirtirtu dangho chuan min lo be nghal bawrh bawrh a, min lo hre sa tawh hlawm a ni hmel.




Ka thutna tur min lo kawhhmuh zung zungin, routine te chu min hrilhfiah zung zung a, an polite hlawm khawp mai.



Ka thutna bul chiahah chuan Miss Eli a thu a, min titipui nghal mawlh mawlh a. A fel suah suah khawp mai. A sawi kalhmangah pasal nei lai fa pawh 4 lai nei tawh a ni awm e. Amah a la naupan hmel nen kum 38 lai a lo ni tawh a, en tawp chuan kei aiin kum li nga vel bakin a upat hmel loh mawle.




"Min lo hre nghal ve mai a, mak ka ti tawp" ka tih chuan "Tunge kan DC nupuite chu hrelo ang" tiin a nui hak hak a, ka lo nui ve ta tawp.




Ka chal hliam bawk chu a hmu langsar a, a chhan min zawt sek a, ka tlusual tiin dawt ka hrilh ta ngawt. A naupang thu hla ang reng sia, thudik ka sawi lo ta law law mai. Principal erawhin a hriat tho kha maw.



Ka class hmasa ber la tur chuan ka han intintuah ve a. Ka zam ve ang reng. English hi chu, grammar a ni emaw thawnthu a ni emaw ka harsat em em lova, tuna ka zirtir turte an pawl a la hniam bawk a. Ka tling tlak ve theih mai ka ring.



Class kan lak tak tak hmain Principal chu a rawn chhuak leh a, inhmelhriat tirna te min neih tir a. Ka chungah an fel hlawm khawp mai.



Class VIII ah ka lut hmasa ber a, naupangho chuan min la hriat than loh vang nge an felin an polite khawp mai. Tumah kawhmawh bawl ang pawh an awm lo.




Tichuan ka ni hmasa ber chu class pali ah lutin ka tlingtla ve mai a. Ka beisei phak bakin nuam ka ti. Naupangho an fel a, min tihlim takzet.



Tlaia ka haw dawn chuan Vanmala a rawn lang teh nawlh a. Office chhunga ka la awm lai ania, zirtirtu la awmho chu an lo phul hluai mai. Nel takin an lo be nghal bawrh bawrh a, thla an lakpui thul.



Kei erawh hamhaih deuh reuh, pangngai tak siin ka lo ding ve ran a. Ka lam a rawn pan rual chuan ka chalah a mit a fu nghal chat mai.




Min rawn dinchilh rual chuan "Tinge i chal?" a ti sup a, min ngaihtuah hmel takzet.




Ka chal chu ka khawih vat a, band aid ka bel bawk sia a langsar viauin ka ring.




Midangho chuan "In nu kha hau rawh, a fimkhur lo aniang 'ka tlu sual' te a ti mai mai a" tiin min lo fiam a. Vanmala erawh chuan chîk zetin min melh a, min ngaihtuah hmel lutuk chu nuam ka tilo.




Ka nui lui seih a, ka chal khawih zeuh pah chuan "A na vak lo, nakinah kan sawi dawn nia" ka ti halh a. Min la ngaihtuah hmel viau tho mai.




Car chhunga kan thut luh rual chuan "Min lo lam hman dawnlo emaw ka tia " ka ti sep a. Car steering hneh zeta herh pah chuan "I ni hmasa ber ani sia, ka rual lova i haw ka remti lo" a ti sup a, ka lo nuih liam mai lai chuan a thutak hle thung a.




Ka hna thar chungchang te chu min zawt a, phur zetin ka sawi a. Min lo nuih suk suk tih loh chu thil sawi vena hun pawh a chang lo. Ka sawi phur bawk nen min ngaithla uluk khawp mai.



"In bang hma tihna em ni?" ka tih chuan a lu a thing vut a, "In thleng ka thlah che ang a, ka let leh ang" a lo ti sup. Min hruai tur ngawr ngawr a a lo kal chu ka lo lawm ru veng veng mai.




In kan thlen chuan Office lamah a let leh nghal mai dawn emaw ka ti a, mahse a rawn chhuk ve nulh a. Eng emaw thil pawimawh lak lawk tur a nei anih ringin biak pawh ka be lem lo. Mahse room thleng pawh chuan min lo zui ve ta zel.




A ngaihna hrelo fe a ka mit ka kan ak chuan "I chal chu engtin maw i tihnat a, tukin thleng kha chuan i la pangngai vek si a" a ti sup a. Ka sawi ang nge sawi lovang pawh ka hrethiam tawhlo.




Naupangtê vanga pasalte bula zualko zat zat chu ka tha a na ve deuh bawk si. Chuloah Sangsangi nen an inkar tichhe vek angah ka inngai a, nuam ka tilo ani pah bawk.




"Zirtirtu dangho sawi ang kha a nimai" ka ti ta ngawt a. "Tlu sual turin i thuamhnaw a balh ngawt loh kha" a lo ti hmuk.



"Aaa...ka tauh palh a" ka ti nawi niai a, min melh tur khui tawh. Min melh dan chu thil sual tak ti te pawh ka ang hial zawk.




"Dawt sawi suh" a lo ti hluk. Thudik a hriat hma chu a chesawn dawnlo ni a ka hriat avangin tukin min thlah a, a kal leh hnua Sangsangi chetdan zawng zawng chu ka hrilh ta tawp a.




"Sangsangi'n chutiang chuan a ti che a maw" a ti hul hawk a. A awih lo hmel lutuk chuan ka thin a tirim.




"Ka sawi ang chu ania lawm" ka lo ti nghat a, an inkar tichhia anga ka inngaihna vanga ka inthiam lohna te zawng zawng kha a bo leh nghal vek.




Towel ka la chhuak a, inbual turin ka intintuah nghal daih bawk. Vanmala erawh kawngka bulah a la ding reng a, ka thusawi kha a awihlo anih ka ring. Engmah sawi zui tawh lo mah se a tawngkam tawp ber kha min demna aw niin ka hria. Min rin loh hmel bawk si.




"Ka inbual dawn ania" tiin bathroom ah ka luhsan ta daih a. A chesawn eih lo.




A kal chhuah leh hun tur ngaihchanna ni pah fawmin rei fahran ka inbual a. Ka duh ang ngeiin bathroom atanga ka chhuah chuan a lo awm tawhlo. Ka lawm viau dawn emaw ka tia, mahse ka lungawi chuang miahlo. Ka laka lawm lo chunga a chhuak leh anga ka hriatna chuan min ti lawm lo.



Inhnuaiah chhukin eirawng ka bawl ta nghal a. Chaw ka chhuang zo chiah tihah U Vensangi call ka dawng a. Tunlai chu U Mapuia nu a dam loh avangin a buai ve em em a, ni hnih chhung ngawt kan inbe tawhlo.




Phur zet hian ka pick up a, biak pawh a har lutuk avangin thupha a rawn chawi nghal mawlh mawlh a. Hrethiam takin a nu chanchin ka lo zawt ve vat a. A that tawh viau thu a sawi chuan ka lo lawm ve khawp mai.




Sawi tawh ang khan thian bul fuk ka nei silo a, U Vensangi hi ka neihchhun tak meuh meuh a ni ve a. Biak pawh theih lohva a awm chuan hrehawm ka ti thin.




Tin, Vanmala leh Bawihbawihi te nufa chanchin pawh kha hmanniah ka hrilh ve nual a. Bawihbawihi'n pawngsual a tawh thu vel leh a kaihhnawihte erawh kha chu ka zep thung. Vanmala a rawn dem khawp mai a, an lo inngaihzawn tawhna lam ai mah chuan tun hnu thlenga heti taka a la ngaihsak hi min lo tha nat pui a ni pakhat.




Ka rin ang ngeiin Vanmala leh Bawihbawihi te chanchin min rawn zawt leh a. U Vensangi bulah hi chuan zep sit set ka nei peihlo. Ka huat zawng pawh hre vek mah se ka pawiti hran lo. Ka bulah zep a nei lo bawk a.




Chuvangin vawiina ka thil tawnte chu ka hrilh ta vek a. A lo chek tlak tlak mai "Mamte, keichuan Sangsangi chuah hi anih pawh ka ringlo. A ni naupang mai chu a thuin i lakah a hel ngawt lovang. Bawihbawihi khan a fuihpawrh aniang" a rawn ti hlawk hlawk a. Heti zawng hi chuan ka lo la ngaihtuah ngai miahlo.




Chu mai bakah Bawihbawihi kha va ngaina viau lo mah ila mahni fate a sual zawnga fuih tur ang hmeichhia ah ka ngailo. Naupang sual leh tih mawh hi an awm ve hrim hrim in ka hria.



"Ani em em dawn em ni?" ka tih chuan "A ni thei dawn lutuk. Ngaihtuah chiang la, Vanmala'n a fanu a ngaih pawimawh zia a hria a, hmanruaah a hmang tihna a nimai lawm" a rawn ti leh hlawk hlawk a.




Mahni fate em hmanruaa hmana nun kawng sual zawh tir a, tawngkam mawilo leh an rilruah mite huatna han tuh sak em chu a thalo khawp ang. Chutiang lampang a lo nih vaih zawngin Bawihbawihi rilru chu mak ka ti viau ang.




"U Vensang, ka ti mah mahin i hria em? Sangsangi leh U Vanmala hi ka pawt hrang tlatin ka hria a. Ka inthiamlo tawp. Sangsangi hian a pa en ve tlat tawh si a. Tuna ka inngaih dan ber chu naupang, pa mamawh ngawih ngawih chhuh sak ang mai hian ka inhria" inthiam vaklo chung hian ka ti a.




U Vensangi chu a rawn teu hlar mai "I ngaihdan kha sawh sawn ang che. Sangsangi chuan pa en pawhin lo en thin mah se a pa a ni chuang hlei nem. Entir nan Bawihbawihi hi hmeichhe pangngai, i pasal ex chu lo ni kher lo sela chuan thuhran ania. Mahse i pasal ex ania, a fanuin pa tia a koh tlat chu thil nih phung pawh a nilo. Sangsangi hi midang fa, pa pawh hrelo niin Vanmala hi pa tiin ko ta sela chuan ngaih khatah kan ngai thei mai ang. Nang pawh inngaihtuah ta la, ka sawi ang chu ni ta sela i lungawi lo kher lovang. Sangsangi hi i lainatin nû chan pawh i chang duh ngei a" a rawn ti duah a.





Kan inbiak zawh hnu chuan a thusawite chu ka ngaihtuah let rauh rauh a. A thusawi khan ka ngaihtuahna a tithui khawp mai. Thil ni thei tak tur ani. Naupang hi ngaina hluak lo mah ila ka haw ngawt ngailo, mahse Sangsangi te hi chu a mitmeng te hi a mak ram ram thin si, min melh tur ve zek zel si a. Ka ngaina lo a ni ber.




Naupang pakhat chungchang mai a ni satliah lo, kan nupa nun nghawng thei thil a ni tlat bawk si.




Zân dar 7 velah Vanmala a rawn haw a, zan dang zawng aiin a rawn tlai. Ka chungah a lungawi lo niin ka hria a, va biak hmasak a, a chanchin va zawh vel pawh kha ka ti ta lo law law kha ania. A chungah ka lungawilo ve tho bawk si.




Zanriah ei tur erawh chuan ka lo nghak ve thlap a. Thutkhawmnaah TV ena ka lo thu chu min rawn melh zawk a, min be lem lovin inchung lam a pan nghal daih. Ka rilru a na veng veng mai. Mahse ka intih chhel ve tlat a ngai.




Reilote hnuah a rawn chhuk thla leh a, inbual nghal lovin a inthlak ringawt anih ka ring. A kutah hian eng emaw hi a rawn keng thla a. Ka lo ngaihsak lo lui ve tlat.



Mahse ka bula a rawn thut tak thurhah chuan ka lo melh ve ta nge nge a, mitmeng dam thluama min melhin "I chal chu khawi maw" tiin ka chal chu a rawn tawk nghal a. Ka lo tawlh dawrh mai.



A ngaihna hrelo fe hian min melh run run a, "Engtin mah ka ti dawn lo, damdawi ka hnawih dawn alawm" a ti sup a. A kutah chuan Betadine leh lawpua a lo keng ran a.




Vawiinah ka chunga lungawi loh hmel zetin office ah min let san daih a, tun ataka min ngaihtuah ber awm ang zia zanga a awm vel chu ka haw tlat.




"I buaipui ka ngailo, keimah pawhin ka ti ve thei reng. A thu hrimah damdawi hnawih tur pawh ka nei ve tho" ka ti hmarh hmarh a.




A lo nui hawk thung, hetia thinrim deuha ka an hlaih hlaih chang hian min nuih daih zel a, chuan ngei ngeiin hmasawnna thu a sawi ziah bawk.




Ka lo ngaihtuah lai mek mek chuan "Hma kan sawn viau e" a ti lehpek tawh. Ka haw tawp hi a nimai.



Melh duh eih lovin TV lam chu ka hawi leh daih a, a khawih leh hlau ang hrimin ka chal na pawh chu ka kutphah in ka dawm nghal daih.



"Mamte..." a rawn ti hulh a, ka bengkhawn duhlo lui ve tlat.



"Nu-i" a rawn tih leh chuan ka sa chhuak pap mai. Ka melh zawk a, a uang ve deuh reuh emaw ka tia,mahse a lo thu tak hmel ngang mai. Ka thinrim zual sauh thung.




Ka lamah a rawn tawlh hnai leh a, tawlh sawn leh ka tum lai chuan min lo manbet vat a, ka chesawn thei tawh derlo.



Rum zetin ka melh a, mitmeng dam thluamin min lo melh thung.



"Kal teh" ka ti hlur a, mahse min ngai pawimawh duh derlo. Ka kut pahnih chu lain min pawthnai zual sauh a, ka tang tha thei lo.



"I lungawi miahlo" a ti sup a, a hre ve chauh emawni. "Lo ngai pawimawh suh" ka ti nghat a. Mahse "Ka nupui lungawi lohna chu ka hre duh" a lo ti sup a. A aw a dam thluam a, duat hmel lutukin min melh ka ti mai, min melh dan chu a ril ruih mai. A ngaihtuah tur awm ang erawh hriatthiam a har hle thung.




Ka thusawi tur ngaichâng tih hriat lutuk hian min melh run a, kei erawh tawng chhuah ka tumlo nasa.




Ka chal chu a rawn tawk zauh a, ka chet leh dawn chuan "Lo che suh" a ti sup a. "Ka inbuaipui..." ka tih lai mek chuan "Kha...a thi dawn ania" a rawn ti sup a. Ka bandaid bel a la thla nghal bawk. Keipawh ka chesawn tawh biklo.




Betadine chu hnawihin lawpua a rawn nawr chilh a, bandaid min bel sak nghal bawk. A thî a ti ngawt tak nain thisen hmuh tur reng reng a awmlo, chumai bakah a na zual chuang miahlo. Dawt min hrilh chiang lutuk.




"A thî loh tawp hi" ka tih chuan a lo nui mai a. Rum zeta ka melh chuan "Tikhan kan zo ta e" a ti sup a. Ka chesawn tur chu ka kawngah min kuah nghal hmiah. A kut chu ka sik vak a, na ti hmel pawh a pu lo.




Ka samah a rawn fawp tawk a "I thinchhe thar lutuk hi tha ka tilo, insum thin rawh. Naupang mai mai thîk duh tawh suh..." a tih lai chuan thinrim zet hian ka tal vak a. Mahse min kuah nghet lutuk.




Naupang mai mai a tih khan pa tiin a ko a. A nupui hi min ngaihtuah miahlo tihna em ni? A tan keimah hiana awmzia ka nei ve lo ania nge.




A phun hluk a "A mak, ka thusawi ngaithla rawh. Sangsangi pawh ka hauh tawh kha. A la naupang a, thil a hrethiam tak tak lova. Pa ti a a koh hmasak ber ka ni a, a tan chuan i thik awm ve tur zia hi hriatthiam tum hram hram la. A puitling zawk i ni a, dawhthei taka i awm chuan i tan a nuam dawn a. Kan tha tlang mai ang" a ti dam thluam a.



Sangsangi chu a lo hau ve ngei anih dawn chu ! Mahse min demna a la tawng chhuah pui tho a, ka lawm chuanglo. Ka insiamthatna tur min hrilh a, dawhthei turin min la ti ta deuh deuh a, ka dawh reng bik chhan tur ka hrelo.




"Engmah i hrelo" thinrim zet hian ka ti chiam a. Ka âw ka vin lutuk chuan a thawng ve hle aniang min melh haw mai.



Ka thinrim laklawh tawh bawk si chu sawi tur ber pawh hre lovin ka tawng chhuak nawk nawk a "Ka rilru tur pawh i ngaihtuah ve lo. Min hrethiam lo anih kha, insiamthat ka ngaihna lai min hrilh a, ka tih tur te min hrilh vel a. Insiamthat pawh i tumlo. Kan inhriat tirh atangin Sangsangi khan pa tiin a ko che a, Bawihbawihi fanu kher chu nilo se ka helh vak lovang. Mahse i bialnu hlui fanu anih kha. An thil tawrh tawhte ka ngaihtuah a, ka lainat ve tho. Mahse thil hi a lutuk a awm ve alawm. Kei aiin i ngaihsak a, Sangsangi'n a koh che chuan min hre chang tawh ngailo. Ka chan hi i chanah dah ve chhin ta che. Rinmawia fa khan nu tiin min ko ve ta tlat se i lawm bik dawn mi. Engah mah i ngailo anih chuan i nupui ah min ngailo tihna a nimai. Ka pasal chu nilo la heti tak hian ka rilru a awm lovang " ka ti chiam a.




Ka sawi hnem bawk a, ka thaw chhuak nghal ham ham mai. Chutah Vanmala pawh chu rawn thaw chhuak ve hawkin "Ka tihpalh ani" a ti ngawt pek a, a inthiamloh hmel hle bawk. Kei lahin ka lo duhkhawp der silo.




"I duh leh an bulah khan kal law law rawh, engah nge nupuia min neih buai kher ni" tham lo fe hian ka ti a. A lo rum nghut mai.



"Ruih i neilo tiraw?" a rawn ti teh daih a, kan thusawi lai nen a inpersan khawp mai.



"Ka harhfim" ka ti nghek a. Min melh run run a "Engtia enkawl chî nge maw i nih le " min tia nih chu.



Thinrim lutukin a âwmah chuan ka nam nghek a "Vanmalsawmhlu..." ka ti nghek.




Ka kut chu rawn manin amah hmachhawn zawnga ka awm lai chu remchangah lain min kuah nghal hlu hlu a. Ka thinrim lutuk chu ka tah a chhuak tun thei.




Ka tha a zawi lutuk a, tan pawh ka tang buai peih tawhlo. Ka hneh dawn chuang lo bawk a.



Ka sama rawn chul heuh heuh pahin "Ka thiam loh anih chu, ka insiamtha tawh ang. Mahse zanina i thinrim chiam kher hi chu hriatthiam a har hret ani. Inhauh buaina kan nei sa pawh a ni silo a" a ti sup a.



Kei lah chuan "Tlaiah engmah sawi lovin i chhuah leh nghal daih kha. Tunah pawh tum dang aiin i rawn haw tlai" ka lo ti nghat a.




Vanmala chuan "Ekhai aw, tlaia engmah sawi lova ka chhuak kha i laka ka lungawi loh vang a ni hlei nem. Sangsangi te inah ka zuk kal a, ka zuk zilh alawm. A pi leh a nu te pawhin pawi an ti khawp mai. A nu phei chuan kut a thlak lo chauh a. Khatiang khan vawikhat mah a ti leh tawh lovang che. Chuan, zanin ka lo haw tlai chhan chu ka lo hruai avang che khan darkar 1 hna ka thawh belh a" a ti zung zung a.




Ka thinrim lutuk pawh a zia ta deuh e.




Chutia min kuah hlu hlu lai chuan door bell a rawn ri a. Ka inlahrang tur chu min la kuahbet tlat a "Door bell a ri" ka ti sep a, min kuah ngheh sauh pah hian "Ka hria alâwm " a lo ti sup.




"Min thlah la " ka ti leh sep a, chutah uang thuang zet hian "Ka la ngai che asin" a ti huk a. Ka ner nghal nang mai "Khawi maw" ka tih chuan min thlah tha ve mai bawk a.



Door bell ka va hawn nak chuan nulian lampang, ka nu te nen an inrual vel ang tih tur hi a lo ding a. A mangan hmel hle bawk.




"Vanmala hi a awm em?" a rawn ri khur dar dar a, "Aw, awm e, lo lut rawh " ka lo ti vat a. A mangan hmel lutuk chu a lainat awm zawk.



Nutling pawh chu a lo lut ve nghal mai a. Vanmala a hmuh rual chuan tap chhuak hawk chung hian "Vanmal, min pui teh, Bawihbawihi awmdan khu a diklo ania. A khûr char char a, a harh thei bawk silo" a ti zung zung a.



Vanmala chu a lo phawk kher mai. Mahse dam ruih hian "Eng nge i sawi awmzia?" a ti sup a.



"Chawei hmaa a mu kha a mu rei ta lutuk a, chaw a la ei bawk silo a tiin kaihthawh ka tum a,mahse a room ah khur dar dar chungin a lo mu a. A thlan a tla nasa bawk si, ka auh ka auh pawhin min chhang theilo" a ti zung zung a. A mangan hmel kher mai.




Kei pawh kawngka bulah ka lo ding khawnv ve lah mai.



Vanmala chu a rawn tho kang vut a, "Nu Biak, mangang suh,a tha leh vat mai ang, damdawiin panpui vat a ngai anih chu" a ti zung zung a.




Kawngka bula ka lo ding ngawi reng chu min rawn melh a, "Mamte..." tiin min ngaichâng a. Hetiang chu a serious lutuk tlat, keipawh ka lo hlauthâwng ve vek thei. Mihring thih leh dam inkar niin ka hria.




"Damdawiin panpui vat chu a tha ang" ka lo ti ve vat a. Vanmala chu a che nghal vut hi a nimai, mahse mangang leh chiai hmel a pu miah lo thung. Kawngka bula a car chabi khai chu a rawn la a.



"Ngaih kawih tur engmah a awm lo ania. Puih an ngai a, ka pui mai dawn ani. I hrethiam ang tiraw" a ti sup a, min vengthawng ta lutuk chu ka inthlahrung leh hnuhnawh. Pasalte huam hauh lutukte pawh ka ang hialin ka ring.




"Ka hrethiam alawm, hmanhmawh rawh" ka lo ti ve vat a. Nu Biaki nen chuan an inzui chhuak ta a, Nu Biaki chu Bawihbawihi nû ah ka lo ngai nghal hmak.




Vanmala chu a rawn lehhawi vut a, "Lo kal ve rawh" a ti ta sup. Keipawhin ihe lovin ka zui chhuak ve nghal mai bawk. Ka chiai ve vekin ka hria.




Kawngkhâr chu chabia kalh lem lovin ka kharpui ringawt a. Pa Chhuana a awm tho bawk a, a ngaihtuah awm loh turah ka ngai.



Car chhungah chuan kan lut vat a, Bawihbawihi te inah chuan kan thleng thla nghal a.



A bulah Sangsangi a lo tap hliam hliam a, vawiina kan awmdan te ka ngaihtuah let a, ka lainat lutuk.




Ka inthiamlo a, hrehawm ka ti hle bawk. Bawihbawihi chungah hian eng emaw thleng ta se ka inthiam thei tawh ngai miah lo ang. A chungah thil thalo ka ti hran lo, mahse an nufa lak atangin Vanmala ka la hrang miau si a.




Ka ngaihtuahna chu duhlo zetin ka lu ka thing a. Vanmala hi ka laksak a nilo, ka pasal a ni a. Ka hauh na ve a nimai tiin ka inthiam chawp leh a.



Ka rilru a buai nuaih mai.




______________*_____________*_____________


Show post links
Top

[Ngaia]

DEPUTY COMMISSIONER
By CVL Awmpuii



Chapter 21




Bawihbawihi khur ngawt ngawt mai kaihthawh tum chuan kan han bei leh a, kan auh lawm lawm pawhin min chhang theilo. A awmdan chu a thalo takzet.



Sangsangi lah a lo tap pur tawh bawk si, Ni Biaki pawhin tihngaihna hre lo thlabar bawk si hian a au lawm lawm a, a chhang theilo.




Tichuan Vanmala chuan "A tha dawnlo tawp mai" a ti sup a, Sangsangi lah chuan "Anu..." tiin kaihthawh a han tum ve ngial a, a harh zo lo.



Vanmala chuan a pawmkang ta nawlh a, "Mamte...min lo zui chhuak ula, motor lo va hawng rawh" a ti sup a. Hmanhmawh zetin ka tlanchhuak ve nghal a.




Motor chhunga kan indah fel hnu chuan Nu Biakin a thut luhpui nghal a.




Vanmala chuan "Engtin nge kan tih ang aw? I lo kal ve peih em? Nge ni a Sangsangi hi i lo awmpui mai dawn em ni?" a ti sup a, Sangsangi tap hlawp hlawp chu ka melh a, vawiina thil thleng zawng zawng nen kan pahnih chiaha awm chu ka duhlo.




"Kan lo kal ve zawk ang " ka ti ta a. Vanmala chu a bu nghut a. Sangsangi pawh a nu leh api te thutna bulah kan chuan tir ve nghal a. Kan nupa chuan motor chhungah kan lut ve ta nghal bawk a.




Damdawiin kan thlen chuan nurse hovin min lo buaipui vat hlawm a. Emergency room ah an nawr lut ta nghal a. Nu Biaki leh Sangsangi chu an inpawm chilh chial a, an ti mangang lutuk chu an lainatawm zawk.




Ka lo rindan chuan Bawihbawihi nu hi nu chêr lampang, an khawsak a harsat ve em avanga bawrhsawm hmel deuh turah ka lo ngai a. Mahse a lo ni miahlo, a nulianin a hmeltha vung mai. Bawihbawihi nen pawh inanna tam tak an nei.




An buaipui chhung chuan pawn lamah Doctor chu kan lo nghak ve ren rawn a. Vanmala chu a awmdan a pangngai reng, han hlauthâwng a thlabar hmel pawh a pu ve eih lo.




Nu Biaki te pitu bula ka lo ding ve reng chu min rawn pan hnai vut a, "Thu la, vawiin i chauh awm tehreng nen a zialo khawp mai" a ti sup a. Amah zawk hi a chau daih zawk ang.




"Chau lo e, nangmah zawk kha" ka ti sep a, a lu a lo thing mai a.




Sangsangi chuan a pi pawmna kar atang chuan mittui tling pam hian min rawn melh a "Anu Mamte, anu hi a thi dawnlo tiraw" a rawn ti tiau a. A rilru tur ka ngaihtuah a, thil dang chu engpawh lo ni se, tunah chuan ka khawngaih ang reng khawp mai.




A sama tuai zeuh chung hian "A tha leh vat mai ang" ka lo ti sep a. Kan innel hranpa em em bawk silo han hnem vak ngaihna ka hrelo.




Doctor chu rei vak lovah a rawn chhuak a, Nu Biakin chanchin a lo zawt nghal vat. Doctor chuan "Tunlai a mu tha lo, a chau tawngkhawng anih hi. Tin, a pumpui lam hi ngaihtuah uluk rawh se aw. Heti chuan dehydrate a hlauhawm tlat. A pumpui a chhia a, thil a ei mumal loh mai bakah tui a in tam lo anih hmel. Tunlai khua a lum si a, hna a thawk anih pawhin hahdam hun nei rawh se. Tunah chuan Nachhâwkna a chiuin drip kan khai a, a tha leh vat turah ngai ang" a ti zung zung a. Ka lo thaw ve huai mai.





Doctor in a hmuh nghal theih thu a sawi chuan kan inzui lut ta a. Bawihbawihi chu khumah a lo mu dang bel mai. En reng reng pawhin a taksa a chaklo tih a hriat ngawih ngawih.




Vanmala chuan "Tunlai eng nge a tih thin a?" tiin Nu Biaki chu a zawt sup a. "A buai ve ang reng a, tunlai ka awm a nawm loh avangin bazar ah min thut chhawk thin a, zan lamah puan a thui bawk nen a mu tha mang ngailo" a lo ti ve zung zung a.




Vanmala chu a lo bu nghut ringawt. Chutia Bawihbawihi ber a ziaawm takah chuan reiloteah Vanmala chuan haw a rawt ta a.




Nu Biaki chuan lawmthu min hrilh nasa khawp mai. "Nangni in lo awm hlauh a, a lawmawm ngawt mai. Midang han pun buai mai tur ka hre si lova ka lo pun tawp mai che u anih kha. Ka lawm takzet ani" a ti ve luam a.




Vanmala chuan tawng chhuah a tum tawh hmel miau loh avangin keimah zawk chuan "Min tibuai hlei nem, tikhan in lo dam dawn nia" ka ti tha ve mai a.




Vanmala nen chuan kan inzui haw leh ta a. Boruak hrang hrangin min chîm buai nuaih zel mai a. A hahthlâk lampang hret chu a ni.



In kan thlen veleh a inbual nghal a, keipawh mu turin ka insiam nghal zung zung a.



Damdawiin atanga kan let leh atang khan kan inbe mumal tawhlo. Thil ngaihtuah run hmel hi a pu a, biak pawh a inthlahrun awm lek lek zawk. Ka tawng chak bik vak lo bawk nen ka be zui duh ta biklo kha ania. Bawihbawihi te nufa hian kan nupa inkarah boruak hrang hrang min siam sak fo mai. Awmdan tur min ti hre thin lo.




Bathroom atanga a rawn chhuah leh chuan ka lo mu fel than tawh. A tihdan ngaitein a rawn mut thlak rual chuan min rawn kuah leh nghal hlun a, ka muhil tawh emaw a tiin ka hria.




Ka samah a rawn fawp vang vang a "I rilru ka tibuai thin ngawt mai tiraw" a ti sup a, min bia pawhin ka hrelo, amah leh amah inbia a ang zawk mah.



Nghet zeta min kuahin a thaw chhuak suai suai a, "Thla hnih vel min nghak leh la, engkim ka chingfel vek ang" a ti leh sup a. A thusawi awmzia ka hrelo.



Zing ka harh chuan Vanmala'n min lo la kuah run a. Dim tea chein a hmel hmu thei tur chuan ka inher rem a, a muhil hmel chu ka thlir vang vang a.




Ka lo enchiang ngai miahlo a, kan inneih tirh ai khan a mitmeng a tla deuh hlek a, hnaah an buai si a. A chau ve thei ngawtin ka ring.




Dik taka sawi chuan ka rilru hi a inpeih ve thawkhat tawh niin ka hria. Mahse Bawihbawihi te nufa bawk hian min tibuai leh thin. Amah Vanmala zawk hi a rilru a la hmin lo niin ka hre thin a. Kei chuan ka pasal ang takin ka en tawh viau chuan ka hria.




Sana ka en a, 6:30 a lo rik tawh avangin thawm dim zetin ka thawh san a. Inti faiin eriawng ka bawl nghal zung zung a. Vanmala pawh a rawn tho chhuak har lo.




Chokaa ka lo chet mawlh mawlh lai chuan min rawn panin ka chalah a rawn fawp tawk a, "I mu thei em?" a ti sup a, ka lo bu nghat ringawt. Nizan kan haw tirh ai kha chuan a hmel pawh hmuh a nuam tawh lutuk.




Chaw kan ei nghal zung zung a. Sikulah min thlah kawi leh a, kan awmdan chu a pângngai chho viau.




Office ka thlen chuan zirtirtu dang lo awm tawh ho chuan min lo wish sap sap a, nimin atangin ka zawm ve chauh a, chuti chung chuan ka chungah an thain min be nel nghal em em a. Nuam ka ti nghal viau mai.




Class kan lak hmain Principal in puan tur tul ho a puang leh te te a. A thusawi reng reng a fiah fuk zel mai a. A zahawm ru zek bawk. Zirtirtu ah hian amah aia upa pawh an awm nual hmel a, mahse an zah em em tho. Principal a nihna ngawr ngawr chu lo dah tha ta ila, a nungchang leh chet phungin a zir vangte pawh a ni mai thei.



A room a a luh leh hma chuan ka thutna bulah a rawn kal a, ngainat awm zet hian min nuih a "Nimin chu eng nge i an a? Harsatna te i nei em?" a rawn ti sup a. Lo nuih let var var pahin "Nuam ka ti lutuk, harsatna pawh ka nei hran lo" ka lo ti var a. A bu nghut a "Buaina i neih chuan engmah sawi hreh lo la aw" a ti sup a, ka buk nghat takah chuan a kal zui veleh mai bawk.




Class la tura ka intintuah lai mek chuan zirtirtu hovin Bawihbawihi te nufa chanchin an rawn sawi chhuak nawlh a. Kal ta mai lo chuan ka thutnaah ka thu thla leh a. Ngaihsak vak lo anga lang siin ka beng ka lo chhi kar a.




Ka sir chiaha thu chuan "Sangsangi nû dam lo chu a lainatawm ngawt mai. An khawsak a harsa ve sia. Sangsangi lah naupang fel lutuk a ni bawk sia an khawngaih thlak mange" a ti siam siam a.




A dawt chiaha thu chuan "Ni ngawt mai, keini lam pawh hian kan dan tur ngaihtuah ila a tha ang. Tih theih em em neilo mah ila a sum pai ang zawngte hian tanpui ve thei ila" a lo ti dap dap bawk a.




An thusawi atang chuan Bawihbawihi te nufa an lainat zia leh fel an tih zia a hriat theih.




Ngaithla zui duh tawh lovin class ka la ta daih a. An nufa hi misual tak an nih chu ka ringlo. Mahse ka ngaina lo a ni ber. Ka khirh vangte pawh aniang.



Puan lawk pawh awm lovin kan bang hma thut a, tlaia bang tur kha chawhma chauh kan kal a. Vanmala ka call a, a pick up theilo.



Zingah khan min lo lam hman tawh rih loh tur thu leh driver a rawn tirh mai tur thu min hrilh a. Tunah kan ban a la hun si lova, driver chu a rawn tir rih miah lovang.




Ka call nawn leh a, mahse an buai viau anih ka ring, a pick up thei der lo.



Taxi ka la mai ang ka tih rilruk lai mek chuan "Mamte" tia min auh ri ka hria a, ka haw nak chuan Principal a lo nia.



"Haw na tur i nei nange?" a ti sup a, "U Vanmala'n phone call a chhang thei lova" ka lo ti tha ve mai a.



"I duh chuan ka rualin lo haw la" a ti leh sup, ka melh deuh ha a "Kan haw na lam tur a inang awm silo " ka tih chuan "Kan in thleng tur chuan Bangla tlanpel a ngai alawm" nui var var chung hian a ti a.



"Aa..." ka tih leh lai mek chuan "Lo kal rawh, ka thlah kawi ang che, a harsa hlei nem" a lo ti leh hmanhmawh.




A car awmna lam a pan vut a, a remchang bawka tiin ka zui ve ta tawp.




Car chhung kan chuan hnu chuan a titi nghal suam suam a. A hmel en tawp aiin a lo tawngduh daih mai. A nelawm a, a zahawm tel bawk.



Dawr pakhat zawnah hian motor chu a tiding a, "Lawk, ka reilo ang, thil lam lawk ka ngai a" a ti sup a, ka lo bu ve mai a.




Motor atang chuan a chhuak zui nghal a, ka phone ka ban vat a, Vanmala'n min lo call back ka ring ania, mahse missed call engmah a awm lo.



Reilote ah Sir Hmaa pawh chu a rawn let leh vat a, paper bag a rawn khai lut a, motor hnungah chuan a dah lut nghal a. "Ka nu thil min chah ania" a ti sup a.



Motor a tinung a, a tlan chhuak leh tur chu tukverh ah ka lo dak chhuak a. Ka sir lawk dawr kawt atang hian Vanmala min lo melh vung vung chu ka hmu ta nawlh mai.




Kan mit leh mit a intawng siah a. A mitmeng chu ka chhiar thiam lo. Kan tlan chhuah zui tak avangin side glass atang chuan ka melh leh hram a, kan lan theih chhung chu min melh zui vung vung mai.




A buai viau anih ringin phone call pawh a chhang theilo ah ka ngai a. Mahse dawrah a lo awm daih lawi a. A mitmeng vawt raih kha hriatthiam a har khawp mai.



Motor kan chuan chhung zawng chuan Sir Hmaa chu a la titi suam suam a. Mahse ka ngaihtuah thei der tawh lo. Ka ngaihtuahnaah Vanmala ringawt a awm tawh. A mitmeng kha ka hrethiam lo.




Kan in kan thlen takah chuan lawmthu ka hrilh ve luam a, "Engmah a nih loh kha, tum dangah pawh i duh chuan ka thlah kawi thei reng che" a ti ve vat a. Ka lo nui tawi tak ringawt.




Inchhung ka luh hma in Pa Chhuana'n min lo be leh tete a, "Mamte, nichinah khan Pi Biaki a lo kal a, mahse sikul i kal thu ka lo sawi a, a han nghak ren rawn na chein i rawn haw hma deuh lawk khan a haw ta anih kha" a lo ti zung zung a.




Eng vanga lo kal nge mawni? Kan inah a lo kal leh thut chu mak ka ti viau. Bawihbawihi a zual emawni ka ti hman hial a. Mahse chutiang chu ni sela chuan kalsan lova a bula awm zawk tur a ni bawk si.




Engpawh nise a haw leh tawh tho a tiin ka ngaihtuah zui duh lem lo.




Ka intifai zung zung a, ka chau ve deuh bawk nen tlai eirawngbawl hmain ka chhing sek a, ka harh leh chuan dar 4 a lo ri va tawh.




Ei ka rel zung zung a, chawhmeh ka vil laiin Vanmala a rawn haw a. Tum danga a lo haw ang lo takin a hmel ngainat awm zet kha a bo a, tunah chuan a tak run mai.




Choka luhka a dingin min rawn melh run a, thil tisual ang mai hian ka hmel chu a pha dai in ka ring. Min melh run si a, melh pawh melh tha duh lovin gas lamah ka inher daih a. Ka chawhmeh chhuan lai hmin tawh, suan mai tawh tura ka ngaih chu ka chawl let ka chawk let ringawt a. Ka hnungzang za mer mer atang chuan la kalsawn lovin min la melh reng tih ka hre thei. Tin, a kalsawm thawm a la awm eihlo.




Ka rilru a let zawk a, thil tisual pawh ni hlei lo engvanga tîm ve ringawt nge maw ka nih le tiin ka lehhawi ta nge nge a. Mahse ka te chhuak that mai, ka phu nasa lutuk.




Vanmala chu min hnaih chêtah a lo ding run tawh. Min melh ngur bawk a, ka te chhuak that chu duhlo fe hian a rum nghut a. Rum zeta melhin "Thâwm nei ve ta che" ka ti hlak a. Mahse ka inring hman lo. A dawta thil thleng leh chuan min thawng lutuk.




Vanmala chuan thaw chhuak hawkin min fawp zui nghal tawn tawn anih chu ! Thinrima min fawp chu a ang silo, mahse a duhthawh lutuk ringawt.



Kei erawh a thiltihin min thawn lutuk avangin ka ding khawng lah a, chawhmeh chawhna fian ka la keng zui !



Ka biang tawn tawnah chuan dawmin min fawp ngawng ngawng a. Chetsawn a, han nemsawn nachang pawh ka hrelo. Ka ngawng chhû mai.



A hnu deuhah chuan a chet dan duhthawh lutuk kha a thlak ta a. Dam raih, duhthawh ru zek si, min hneh tum lutuk hian min fawp ka ti mai. A zei lutuk !



Engtik laiin nge ka lo chhan let hman ka hrelo, a nghawngah kuahin dingdihlip ak ak chungin ka lo chhanglet ve a.



Mahse a tawp thut mai, ka bianga la khuap reng chung chuan a thaw chhuak hawk a. Kei erawh eng nge ka ngaihtuah pawh ka hrelo, kham lo lutuk hian ka hnaih leh sauh a. A inlahrang deuh chu duhlo lutuk hian fawh leh mai ka tum a. Mahse ka biang a khuap hneh lutuk.



A rawn meng chhuak a, a mitmeng ta run chuan min thunun ka ti mai, ka ngaihtuahna chu a rawn fim tial tial a. Tuna zak thar ta ngang mai.



Vanmala chuan ka biang la khuap reng chung chuan "Tinge khapa motor ah khan i chuan?" a ti sup a, a âw chu a zawi thum bal mai. A sawi tum ka hria, vawiin tlaia Sir Hmaa nen min hmuh chungchang kha a ni ngei ang.




Ka melh let ve kiau a, chhanna duh tih hriat lutuk hian min melh a. "Kan bang hma thut a..." ka tih lai mek chuan "Chu pawh nise" a lo ti nghut. Thinrim lutuk ni si lo, titau hmel hi a pu deuhin ka hria. A landan chu a duhawm ru zek lehnghal a.




Thaw chhuak halhin ka melh nghek a "Zawhna min zawt a, ka sawi zawh hma hmain min lo dang chat a" ka ti nghat a. Min melh run run a, a kutzungpui a ka hmui hnuai tawh zeuh pah chuan "Anih leh sawi rawh" a ti nghut. Kan la inhnaih mai bawk si a, ka thaw a chham lek lek mai.




Keipawh chuan pangngai tak hian "Kan bang hma ta thut sia, driver i lo la tir rih dawnlo tih ka hre sia. A remchang bawka min lo thlah ta mai anih kha" tiin a tawi zawngin ka sawi a.



"Min lo hrilh thei reng" a lo tih nghut chuan "Ka call i chhang thei lo anih kha" ka lo ti ve nghat. A ngaihna hrelo fe hian min melh a. Chumi hnuah inlahrang hlekin a kekawr ipte a dap a, "Ka ak reng emaw tia" a tih sup lai chuan tifuh inti lutukin "Ka sawi kha maw" ka lo ti salh.



Chutah min rawn en leh run run a, "Ka tihpalh anih chu, min lo hmuhna dawr ah khan hna thil vanga kal a tul sia. Office ah ka phone ka lo hnutchhiah daih anih dawn kha. Tunah let tawh lovin ka lo haw tlang leh daih bawk sia" a ti ta duah a. A aw pawh ngaihthlak a nuam ta khawp mai.




"Imm...han inthlak la" ka ti tha ve mai a. Mahse tur zeta min melh chung hian "Midang rawn inthlah haw tir kher tawh suh ang che" a rawn ti nghut anih chu !




Keilah chuan awlsam fe hian "Ka rawn inthlah haw tir pawh a ni hran lo, kan inhmu fuh remchang anih kha" ka lo ti mai a.



Min rawn hnaihchilh leh nghal ruak a, hnai set sawta min dinchilh chung chuan "Hmuh fuh remchanah pawh chuang hlek tawh suh, ka awm, driver ka rawn tir mai ang" tiin a inlahrang leh nghal vut a. Choka atangin a chhuak zui nghal nul nul anih chu !




A awmdan teh ngawt chu ! Naupang thinrim, lanchhuah tir dan hre chuang silo hi ka chan ber. Ka ngai thutak thei der lo. Ka hlauh em em phah pawh ka hre chuang lo. A thuhrimah Sir Hma-a min thlah kha a sualna ka hrelo hrim hrim.




Chawhmeh ka suan thlak lai mek chuan door bell a rawn ri a, ka laklawh deuh avangin va kal lovin lut turin ka chhawn ringawt a, a hriat phak mai ka ring.




Chawhmeh ka hun fel chuan thutkhawmna lam chu ka va pan a, Nu Biaki inchhung lo lut chiah ka hmu nghal. Eng thu tak rawn kenglut leh ang maw?



Chauh hmel zet hian min rawn nuih a, ka lo nuih let ve mai bawk a. Dik tak chuan an chhungkua hrim hrim hmachhawn hi ka tan thil nuam tak a ni lem lo.



"Vanmala i hmu duh em ni?" ka lo ti nghal tawng pek a, kei min hmuh duh chhan tur ka hrelo em bawk atin ani.



A hawikual thuak a, a zawng deuh niin ka hria, a hmu duh anih chuan ka zawhna kha chhan ve mai awm ania ka lo ti rilru hmanhmawh a.



"Inchungah a inthlak" ka lo ti vat, ka aw chu a bul tha tak tak viauin ka ring. Hetia ka awm ve reng laia a hawikual hrek hrek chu ka awm a tinuam lo alawm.




Min nuih leh ang var var a, "Vanmala chu a lo chhuk tep tawh ang em?" a ti lehzel a. Ka dawhtheihna a pan ta viau "I hmuh duh chuan sawi la, ka han koh sak theih che" nelawm vak lo hian ka ti ta nghat a.



Ka awmdan chu a haider lui nge ka hrelo, nelawm zet hian min la nuih zui reng a. "Aih, a ngailo, Mamte...nangmah zawk hi ka be duh che a" a ti ta a. A âw ka atang chuan a zawldawh leh viau lawi a.




Kei min hmu duhin Vanmala awm leh awm loh hriat kher a duh ania. Vanmala hriat loha min biak a duh vangah ka ring ta ngawt. Mahse sawi dun tur kan neih awm ka hre bawk silo.



Min be duh na na na chu tiin ka ko lut ta pauh a, kimki deuhin inchung lam a la melh hrek hrek a. A awmdan chu ka awm a tinuam lo vek thei.



Thutkhawmna ah chuan inepin kan thu ta ran mai. A thusawi duh chu ka ngaichâng ran a, inchung step lam melh leh zeuhin "Vanmala chu a lo chhuk mai lovang tiraw?" a han ti tete a. A chhohna kha a la rei lutuk lova, a inbual chhung nen chuan a lo chhuk hman pawh ka ringlo.




"A lo chhuk mai lovang" ka ti tha ve mai a. A thaw chhuak huaiin ka hria. Nizanah lem Vanmala a rawn zawng chuk chuk a, tunah kei min rawn hmu duh leh a. Eng tak chu ni ang maw?



"Mamte..." a tih chuan a thusawi tur chu ka lo ngaichâng ran a. Rilru bet zan lo tih hriat lutuk hian inchung chu a melh leh sek a.



"Thil ngen duh che ka nei a" a rawn ti leh ta a, ka lo meng nghal awk. A thil duh ka neih awm ka hre silo, eng a sawi tumna nge mawni?



"Eng thil maw?" ka ti sep a. Chutah rawn thaw chhuak hakin "Khawngaih takin Bawihbawihi damdawiin awm chhungin Sangsangi hi in lo awmpui thei ang em?" ngenngawl zet hian a rawn ti ta mai.




A thil min ngen mak ka tih lutuk avang chuan ka lo ka hau ringawt. A ngaihna ka hrelo, Bawihbawihi damdawiin awm chhunga Sangsangi lo buaipui maw !




Awihlo lutuk hian ka melh a, mahse a thutak ang reng bawk sia, fiamthu mai mai chu a anglo.




Ka hamhaih lutuk chu a hrethiam ve aniang "Ih englo ania... Bawihbawihi hi Doctor te sawi danin ni thum vel tal chu damdawiin ah a awm a la ngaih hmel sia. Chuti chen chen Sangsangi sikul chawlh tir chu ni theiin kan hre silo a. Keiin Bawihbawihi chu awmpui ka ngai sia. Midang kuta han dah maina tur kan hre bawk si lova, nangmahni bak han rin ngam kan nei lova" a ti ta duah a.




Mak ka la ti reng tho mai. Kan awmpui tura Sangsangi rawn dah an tumna rilru pawh chu mak ka ti. A fanu leh ka pasal nunhlui nei tawh an ni a, chumai bakah a tunuin ka pasal ber Pa tiin a ko bawk ania ! Chuti chunga hetiang thil serious lutuk min lo ngen hi mak ka ti.




An harsatna te, an dam lohnate hrethiam lo ka nilo, ka hrethiam lutuk. Ka dinhmun hian a zir lo zawk a ni. Hmanni lawkah Sangsangi'n kut min lo thlak kher bawk nen ani enkawl a, lo awmpui chu ngaihtuah ngaihna pawh ka hrelo.



Tihngaihna hrelo fe hian "Vanmala bia la" ka'n ti ngawt pek a. Inchung step melh leh zeuh chung hian "Ka be tawh alawm" a ti zawi raih a. "A remti lo em ni?" ka tih chuan a lo bu nghat.



Mak ka van ti tak ! Puih an ngaihna apiangah a pui thin kha ania. Tunah a hma zawng aiin puih an ngai zual a, a hnar leh ang lawi a.



"A... Vanmala berin rem a tih si loh chuan tih theih ka neilo" ka lo ti hliai a. Mahse Nu Biaki chuan ka kutah a rawn chelh a, ngenngawl lutuk hian "Khawngaih takin Mamte... Vanmala chu hmin la, a remti mai ang" a han ti ngial a.




Tihngaihna hrelo fe a ka melh reng lai chuan Vanmala'n "Nu Biak" a rawn ti vawt raih a, Nu Biaki chu a inlahrang nghal nawlh a tih theih ang. A che rang lutuk.



Nu Biaki chuan mitmeng pha dai hian "Vanmal..." a ti hliai a. Vanmala chuan min melh tawn zak zak a.



Chutah Nu Biaki chuan hmanhmawh zet hian a bag a la sawk sawk a, "Ka haw mai ang" a ti bah nawk a. A chhuak zui nghal daih.



An awmdan ka hriatthiam loh lutuk avang chuan chesawn lovin ka lo thu reng a. Nu Biaki chhuak lai pawh kha ka thlir liam tawp.



Vanmala chuan ka bulah rawn kalin "Eng nge a rawn sawi?" a ti sup, thaw chhuak hakin "Sangsangi chungchang kha" ka lo ti tha ve mai a. A hrethiam nghal vekin ka ring.




Vanmala chu a phun nghal hluk a "Ka hrilh chiang viau sia" a ti nghut. Tim deuh chung hian "I lo remti lo em ni?" ka ti zawi sep a, a lo bu nghut mai.



"Tinge?" ka lo ti leh hmanhmawh, ka bulah a rawn thu thla thuk a "I hria alawm" a rawn ti daih. Ka lo melh deuh ha chuan ka hnarah a rawn tawk zeuh a "Hmasawnna a kal muang tlat" a lo ti leh daih. A sawi tum hi hriatthiam a har thin ngawt mai.




"Sangsangi chu engtin nge a awm ang le?" ka lo ti halh a, ka ngaihtuah ve tak tak. Naupangtê mai a la ni a, a nu a damlo bawk si. Damdawiin ah a awm ve reng tihna a ni awm sia. Heta a awm ve remti lo mah ila mihring mihrinna a ngaihtuah chuan ka lainat ve tho.




"Ngaihtuah hah duh suh" a lo ti dam thluam a. Kha chen ngaihsak hluak thin si kha tun ataka hetia a inthlak nghal hlawk hi ka hrethiam lo. Ka lawm lo pawh a nilo, mahse awm a tinuam lo vek. A thleng teh puat lutuk a. Ngaih a ti thalo lek lek mai.




Ka lu ah a rawn tuai thuak a, "Thil tam tak i ngaihtuah a, i buai anih kha!" a rawn ti sup a. "I mak" ka lo ti halh ringawt, a nui suk a "Ka hrilh mai mai ang che. Kei aiin Bawihbawihi te nufa hi i ngaihtuah zawk" a rawn ti nulh a.




A thusawi awmzia ka man lehpek lo, "Engah chuan maw?" ka lo ti vat. Chutah thutak zet hian "An nufa i ngaihtuah lutuk naah hian ka rilru lo pui pui min puttir thin" a lo ti khauh. Ka ner nghal nawng a.



Mahse nui hawk hawk chung hian "Ka sawi dik alawm, ngaihtuah chiang mah rawh. Mihring mihrinnaa ka puihnate hi ilo ngai kawi zel a, kha vang khan awmze nei lovin i rilru a hah ziah. Anmahni lo, midang chungah hetiang hi thleng ta se heti tho hian ka ti ang. Ka dem che tihna chu a ni hauh lo ania. Hetia i awm hian ka tan hmasawnna a ni a, a lawmawm zawk" a ti ta duah a.




Ka ngaihtuah zui a, thil ni thei lutuk tur niin ka hre ta. "Mahse tinge tunah i danglam daih si" ka ti leh hram a. "I danglam nan" a lo ti leh daih. A thusawi awmzia hrelo lutukin ka ner nawng ringawt a.




Chutah nui huk chung hian "Ka sawi ve duah thiam lo, tikhan ka sawi thiam dan kha remkhawm i lo tum ve thin tawh mai dawn nia" a ti dam thluam a.




Ka pasal hi ka hrethiam thei ngai dawnlo anih hmel.




Ka phone a rawn ri ral ral a, ka en mek lai chuan Vanmala pawhin a lo bih ve a, 'Sir Hmaa' tia ka save chu a lo hmu hman aniang a rum nghut mai.




"Be rawh" ti nghutin min thawhsan zui nghal nulh a, chokaah min phei san daih. Phone call chu ka pick up nghal vat a, Sir Hmaa chuan naktuk sikul kan chawlh tur thu min rawn hrilh a. Zirtirtu te meeting neih a ngai dawn a, kei erawh kal ve ka ngai dawnlo. Naktuk chu a ai ka kalsak nu kha a hman dawn ani awm e. Ka tan chawlh a nimai a, pawi ka ti hranlo.




Chawei a hun tawh avangin kan inbiak zawh chuan choka lamah ka va phei a. Vanmala chu dawhkan bulah thuin a phone a lo bih ngur a.



Ka va lut min hmuh rual chuan chiang zeta min rawn melhin, "Mipa dang reng reng hnaih suh, ka thik" a ti ta hmiah mai.



Chutia thu khuh nei lek lova tlang lutuk a thil a sawi avang chuan ka lo meng awk a, ka kawchhung a sa chhuak nghal pup maiin ka hria.



A rawn tho chhuak vut a, min rawn hnaihchilh zui nghal ruak a, ka tihngaihna hre lo bawk si chu "A....Sir Hmaa te chu..." ka lo ti nawi niaih a.



Ka biangah a rawn khuap leh run tawh "Mipa dang hmanruaa hmangin keimaha thikthuchhiatna awm hi cho chhuak suh ang che" a ti khawl mai. Ka chunga a thinrim vanga sawi erawh a nilo tih ka hria.




Sawi tur hrelo lutuk hian "Chutiang pawh a nilo..." ka ti nawi niai a, a awmdan hian min aikaih a ni ber, ka chesawn thei bawk silo.



"A ni tur a nilo" ti sup in ka hmui a rawn khar chilh leh nghal hmiah. A rawn haw tirha min fawh ang chiaha duhthawh khan min fawp leh tawn tawn a.




Chhan let ngaihna pawh ka hrelo, chutah inlahrang hlekin "Nichin ami ang kha ka duh" ti khur hlukin ka hmui chu a kutzungpui in a tawk leh zeuh a. A sawi tum ka hrechiang lutuk. Nichinah khan fawh let tumin a inlakhran hnu pawh khan ka kuai let tawk tawk anih kha !




Min rawn fawh zui leh takah chuan rang zetin ka lo chhanglet ve vat a. Chu veleh a aia duhthawh lehzualin min rawn fawp leh a. Tun tum hi Vanmala nen tih takzeta kan infawhna hmasa ber a ni. Chu pawh kan inneihna atanga kar hnih vel liam hnuah chauh !




Min fawh reng pah chuan ka awmbawr a rawn tham zui ta salh a, ka lo phu awk mai. Ka hmui la si reng chung chuan a nui ri suk a, mit ka chhin tlat avangin a hmel erawh ka hmu theilo.




Min chawikang ta nawlh a, dawhkanah min hlang zui nghal nalh. Ka bawpin ka lo kherh bet ve chial a. Duhthawh dun tak kan ni.




Chutia kan infawh ngawng ngawng lai chuan ka pum a rawn ri rawk a, ka la irhfiak awk zui. Ka inlahrang nghal vat a, Vanmala erawh a thaw ri chu ring tak ani. Mit chhing reng chung chuan a thaw chhuak ham ham a, ka dârah a hmui a rawn nghat nghal ngawt ngawt mai.




Tawng ka tum lai mek chuan ka irhfiak leh a, ka pum riin a zui leh nghal bawk. Vanmala chu a rawn nui chhuak huk a , ka lo sa hat hat mai.



Ka kawngah min la chelh reng a, ka darah a hmai a la nawr reng bawk.




"I ril a tam anih kha" a ti sup a, a ni thei lutuk ang. Chhunah khan engmah ka ei lova, riltam chu a hun tawh viau ani.




Mak ve deuh chu ka ril a tam hian ka irhfiak tlat zel. Midang irhfiak ve chu an puar lutuk vangte a ni chawk a. Ka danglam bik thin teh e.



Kan insiamthat hnu chuan chawei min siam pui nghal a. Ka che lai tlat pek a, min nuih leh huk thin. A nuamlo duh teh e. Mahse ka hlim tho sia.



'Mipa dang reng reng hnaih suh ka thik' a tih kha ka ngaihtuah zui a. Vanmala hian a thik anih chuan min duh tihna em ni? Min duhlo se a thik ngawt awm silo. Mahse min duh thu a sawi chuang silo. Tun atan chuan ngaihtuah buai rih lo phawt ang. Ka hlim rih emai.




Zan mut hmunah chuan Bawihbawihi te nufa chanchin kan sawi leh a. Thil hriat chak ka neih tlat vang ani.



Ani chuan sawi zui tul a ti tawh lo viau nain ka hre châk miau si a.



"Vawiinah chuan engtin tak nge Nu Biaki ngenna chu i lo hnar a?" ka ti a. Ka kawnga min kuah ngheh salh pahin "Hnaah ka buai em em a, nang lah sikul i kal lai a lo ni ve bawk a. Chutiang vel chu ka sawi. A thuhrimah a pawng ataka ka ngaihsak viau chhan tur a awm lova, min tilui turin eng dan mah an neilo" a lo ti tha ve mai a.




A lama inher deuh pah chuan "I tan a hrehawm viau em? An nufa hnaih lo tur hian ka nawr thin si che a" ka ti zawi sep a. A ngaihdan ka hriat duh tak tak vang ani.



Mahse Vanmala chuan a lu thing nghut pah hian "Hrehawm lo e, a hrehawm chhan tur a awmlo bawk. Mahse Sangsangi tê hi..." tiin a ngawi dat a, inthiamlo hmel a pu deuh "Sawi rawh" ka lo ti vat a.




Chutah thaw chhuak hulh pah hian "Bawihbawihi hi chu mihring pakhat ah lo dah ta ila. Sangsangi mawlh mai hi ka lainat a, i hrelo mai thei, ka pa hian amah ang rual ka nih laiin min boral san a, engmah pawh ka la hre mumal lo. Ka pa kha keimah vanga boral a la ni zui a..." inthiamloh hmel lutuk hian a ti zawi ruih a. Zanin chu thil thar ka hre leh dawn anih hmel e.




Vanmala chuan sawi zawm lehin "Kan inneih hmaa, tlanga ka hruai tum che kha i la hria em?" a ti sup a. Ka hria, ka chesual tep a, a vawikhat nan min vin phah hrep anih kha.



Ka lo bu nghat a, chutah thaw chhuak zui leh hawkin "Khami hmun kha ka pa boralna hmun anih kha" a ti hulh a, ka lo ip chawih mai.




"Ka tetlai, tuna Sangsangi ang rual ka nih lai vel hian kan chhungkua in kan kal a. Naupang â mai ka la ni sia, ka sahawk lutuk kha ka tlan kual vak vak a. Min chhan a tumna lamah a tla ta ani. Chuvang ania i chetsual tep pawh khan ka hlauhthâwn hman em em ni" a ti leh a. A aw a na tuar ri chu ka hriat hmaih loh kher mai.




"Pawi ka ti lutuk" ka lo ti sep a, za lo zet hian min lo nuih suk a. "Ka sawi tum tak ka'n sawi tawh ang e. Pa ka la mamawh lai ngawih ngawih in ka pain min boral san a. Chuvanga Sangsangi pawh hi lainat em em ka nia. A pian tirh atangin pa tia koh tur a nei lova, chuvanga pa min ti pawh kha hawlo ka nia. Chuan, Mamte, i hriat leh tur chu Sangsangi'n lunga a vawm chungchangah che khan a thiam chu ka tilo, mahse Bawihbawihi'n 'I pa chhuhsak che a tum a' tia a lo sawi vang anih kha" a ti leh duah a.




"Maw?" ka lo ti vat, ka kawng hmer leh salh pahin "Ni e, Sangsangi ngeiin a sawi alawm, dawt a sawi dawn lo tih ring tawp rawh. Ka naupang hriatchian a ni a, naupang rilru thianghlim in khatiang kha ama thu ngawtin a ti dawnlo tih ka hria. Ka thusawi i ngaih kawih loh hram ka beisei" a ti dam leh thluam a.




Mak ti zet hian Vanmala chu ka melh ha a, ka chala lo fawp zeuhin "A ni lo zawngin Sangsangi rilru hi hruai pen a tum tlat a, chutah tak chuan kan inven a ngai. Sangsangi pawh ka hnar tawk tawk a ni a. Bawihbawihi hi hnaih miah suh ang che" a ti vawt raih a.







______________*______________*___________


Show post links
Top

[Ngaia]

DEPUTY COMMISSIONER
By CVL Awmpuii


Chapter 22



Thawhtanni tûk a ni a, tûk dang ang bawkin Vanmala chuan sikulah min thlah leh a. Sir Hma-an min thlah tuma mipa dang hnaih tawhlo tura min tih atang khan kan nupa inkar a ziaawm leh sawt a tih theih ang.




Tunah kar khat a liam leh tawh a. Min hruai haw turin driver alo tirh mai tawh tur thu a sawi tak nain aman min hruai haw leh zel tho. Sawi chhuak dawt lo mah se Sir Hma-a khan min thlah leh a hlau ni berin ka hria.



Tum khat phei chu min nghak tura a lo kal tumin Sir Hma-an "Ka lo thlah kawi thei tho asin" a lo ti a, mahse Vanmala chuan "Ka nupui chu ka rawn hruai thei alawm" a lo ti nghut. Khami tuma Sir Hma-a chunga ka inthiamloh zia kha !




Ka chungah a sual bawk silo, Vanmala lah hian a ngaina lo tih a hriat bawk si. Min lo nghah changa Sir Hma-an tha deuha a lo biak pawh hian a chhang bung nghut nghut zel a, ka awm a lo nuamlo vek zel.




Vawiinah class1 class teacher a lo kal remchang lova, kei substitute a kal ka lo ni bawk nen roll call turin min hmehbel deuh chawt a, ka kal ta pauh a.



Ka va luh chuan ring fahranin "Good morning Miss" an lo ti thlûk duai a. Ka nui nghal var var mai.



Roll ka call tan nghal a, an class ka luh vawikhatna a ni sia an lai huih mai, an lawmawm hlawm tak tak ani.



Roll ka call zawh chuan English chhiar ka zirtir a. Chutia an thiam ang anga an chhiar malh malh lai chuan a tlar hnung ber kilah chuan Sangsangi hi ka va hmu nawlh a. A thiam ang angin a lo chhiar ve a. Ka melh ta reng mai.




Nu Biaki tum khat a lo kal bak kha chu an reh ta vang vang a. Mahse Pa Chhuana sawi kalhmangah Bawihbawihi chu damdawiin atang hmanni lawk khan a chhuak a ni awm e.



Sangsangi tana a nu pawimawh zia tur ka ngaihtuah a, pâ a nei bawk silo. Hrisel takin awm hlawm sela tih chu ka duhthusam ani. Chutihrual chuan han puih a, han biak lum lam vak kha ka tum hran chuang lo. Ka laka Bawihbawihi rilru puthmang ka hre tawh a, a fanu a fuih danah rilru tha a pu lo tih hriat reng reng. Mahse an lakah rilru chhia erawh ka pu ve miahlo thung.




Puih an ngaih lutuk naah chuan tlanchhiatsan ka tum bik lo. Kan nupa mawhphurhna an ni miah lo nain mihring mihrinnaa inpuih tawn chu ka pawiti lo thung.




Pawngsual a tawh chungchang Vanmala nen kan sawi tum khan 'Kan nupa mawhphurhna an ni tawh ang' ka ti tak nain khatiang rilru kha ka pu reng tawh biklo. An rilru ka hre tawh a, ka rilru her danglam ve hret a ngai tih ka hai biklo.




Vanmala'n Bawihbawihi hnaih tawhlo tura min tih chhan kha ka va hre thûk lutuk lo nain ka hnaih loh hi thil tha ber tur niin ka hria. Ani pawhin a ngaihven zui vak loh hmel. Chutihrual chuan Sangsangi tak hi chu a la ngaihtuah ve hle thinin ka ring tho.




Period tawp dawnah Sangsangi chu a thutna atangin a rawn tho tharh a, min melh lem lo hian min rawn pan a. Ka lo melh reng thung.




Ka dawhkan zawnah a rawn ding a, min rawn melh ta kiau a, tawng mai a tum loh avangin "Eng nge ni Sangsang?" ka lo ti dam dap a.



Kun ngal chung hian "Anu Mamte..." a rawn ti zawih raih a. Mitmeng rum deuha min melh thinna te kha a bo vek tawh.



"Sawi la" ka lo ti vat a, sawi hreh hmel deuh hian min rawn melh leh a, a mitmeng dul raih te chu a lainat awm reuh tak tak a ni.



"Apa khan min duh tawh lo tiraw?" a rawn ti zawi ta raih mai. Ka bing deuh mup a, han chhan mai dan tur ka hrelo. Ka melh ta reng a, mittui tling pam hian min lo melh let ve kiau bawk.




"Sangsang" ka ti ro halh a, sawi belh tur erawh ka hre chuang lo. Chutah Sangsangi chuan "Anu sawi kha a dik tak tak aniang, nangmah vang hian apa khan min duh tawhlo aniang" a rawn ti leh a.




Engtiang takin nge a nu hian Vanmala leh ka chungchang a lo hrilh thin chu ka hrelo. Mahse ka dem takzet, a fanu rilru hruai kawi thei zawnga thu a lo vawrh vir vel chu mak ka ti a, a fanu a tihrehawm mai mai tih a hre der silo.




Bell a rawn rik zui takah chuan "Sangsang, ka chhuak tawh phawt ang aw" ka ti ta ngawt a. Han chhan mai dan tur ka hrelo em a ni. Ani pawh chu a thutnaah mittui la tling reng chung chuan a let veleh mai bawk a.



Ka ngaihtuah zui ta rauh rauh a, ka ti lutuk em ni aw ka ti hial. Sangsangi hian thiam lohna pakhat mah a nei lova, a nuin a lo fuih thin hi buaithlâk ta ber chu a ni.




Ka dinhmun a tikhirh zual a, a hma ang khan min hua se ka tan a nuam zawkin ka ring. Khatianga lainat awm lutuka ka chunga a awm reng chuan ka inthiam lohna tur khua a tisei mai mai dawn tlat.




Bawihbawihi fanu kher chu lo nilo se ka tan pawh han ngaihsak a awl deuh tur ania. Tin, heti em em hian Vanmala pawh ka hauh bikin ka ringlo.




Tun atan chuan an nufa tawp lak atang hian inthiarfihlim ka mamawh ber. Ka tanghma ka hai ve a ngai rih tlat.




Vanmala'n sikul ban dawn tepah min rawn lam leh a. Ka la hman loh deuh avangin ka bulah a lo thu ve run a. Sir Hma-a lo awm lai tak a ni bawk nen a mitmeng a no fahran lo khawp mai.



Sir Hma-a chuan a lo be nghal suam suam a, a dan ngaitein a chhang bung leh nghut nghut tawh viau mai. Sir Hma-a lah chuan a tilui deuh emaw tih turin zawhna a chhan loh theih loh tur a zawt sek a, ka nuih an tiza dun ang reng viau.




Ka hman veleh kan haw ta nghal a, Vanmala chu a ngawi ngul mai.




"U Vanmal" ka tih pawh chuan min chhawn duh eih lo. Thinrimah pawh ka la lo, ka nuih a za tlat pek a. A awmdan chu a lawmawm ka ti. Sir Hma-a a thik tih ka hria a, ka ngaih a tha tlat.




Lungawi lo ang deuh hian "Sir Hma-a chuan sawi tur a hre teuh thin a, min thlah tum pawh khan a titi ka ngaithla char char a. Naktuk atang chuan ka inthlah tir leh tawh ang" ka ti ve kher a. A ngaihdan ka hre duh atin ani.



Min rawn melh zawk a, motor khalh lai anih avangin hmalam a melh leh nghal a. Chutah "Khapa kha sawi pawh sawi tawh suh" a rawn ti hluk a, a bek a pawng nghal tawlh tawlh mai.



"Eng nge ka biak che pawhin min chhang duhlo anih kha" ka ti ve nghat a. Chutah naupang chhia zet hian "Anih chuan min be tha leh rawh" a rawn ti ve nghut. A awmdan chu a va lawmawm reuh tak.




Nuihza insum teuh hian "U Vanmal" ka ti leh a, "Eng nge ni ka nupui?" a rawn tih chuan ka biang a sa nghal hat hat mai. Min chhang tha mai dawn emaw ka tih laia 'ka nupui ' a rawn ti tel kher chu ka lai vek.




Amah zawk chu a nui ta suk a "Ka nupui, eng nge ni?" a rawn ti uang veleh ngial a, a rawn hawi zawk a, ka lei ka lo chhuah vak ringawt. A nui ta hawk hawk a, keipawh ka nui veleh tho.



In thleng min thlah a, ani chu office ah a let leh nghal. Heti hian buai chung chungin min rawn lam kher zel a, driver bula haw ka pawitih loh thu ka sawi pawhin a pawm duh thak lo chu ania.



Eirawng ka bawl nghal zung zung a, a kal leh hma khan a lo haw har loh tur thu a sawi a, chaw pawh kan ei tlai lo turah ngai ang.



Ka eirawngbawl lai chuan ka phone a rawn ri a, U Vensangi a lo nia, rang zetin ka pick up a.



"Hello" ka tih rual rual chuan "Mamte, i rai tawh em?" a rawn ti nghal tawng pek a, a ngaihna ka hrelo lutuk chu ka lo ka hau mai.



"Maw..." ka ti ha a, a thusawi ka hriat loh vang pawh a nilo. "I rai tawh em ka ti?" a rawn ti leh a, "I ti awm ang lo e" ka lo ti vat.




Chutah U Vensangi chuan "Eng nge ka tih âwm ang lohna, a mak lutuk chhun ka mu kha ka mumangah i lo rai puar luah mai a. Ka hman veleh ka lo zawt nghal che anih hi" a rawn ti zung zung a.




Ka lo nui nghal hak hak mai. Ti awm ang lo lutuk, a mumangah ka rai a, min rawn zawt nghal chawt chu a ni sia.



"Mawh...i rai em?" a rawn ti leh hram a "A teuhlo mai" ka lo ti vat. Rai chhan tur nei hek lo le.




"A van mak em em" a rawn ti leh deuh deuh a. "Eng nge a mak vakna, ka rai lo, i mumanga ka lo rai vang maia a tak emaw han tih" ka lo ti nang nang a.




Chutah U Vensangi chuan "Ka mumangah hian mi 2 an rai tawh a, a hnuah chu mite chu an lo rai tak tak zel a" a rawn ti tha veleh mai a.




Ka lo nui ta tawp, rai ka la hlat zia chu hria se a awihlo zawk ang. Thla khat dawn kan inneih tawh a, rai chhan tur engmah kan la ti miau silo.



U Vensangi nen kan inbiak zawh hnu chuan ka pi phone call a rawn thlen zawm veleh a.



Phur zet hian ka chhang nghal vat a. Ka pi chu a rawn vui nasa nghal khawp mai.




"Tunlai hi biak hmasak loh che chuan min rawn biak nachang i hre thinlo, min ngailo riau mai" a rawn ti nghat nghat a.




Ni e, a sawi dik ang. Hna ka lo kal rih ve bawk nen biakna hun ka nei mang ngai lova, biak tuma ka rilru ka siam lai tak hian min lo call hmasa khauh zel.



"Chutiang lam pawh anilo pi, ka buai ve lutuk a. Chuloah ka lo biak dawn veleh che hian min lo be hmasa ziah zel" ka lo ti ve vat a.




A rawn nuih rik hak hak danah a thinrim lo tih ka hre thei.



A hriselna chanchin ka zawt vat a, ka pi chuan "Tunlai chu ka tha khawp mai, ka dam veleh tak tak dawn anih ka ring. Ka chawei pawh a tui ve tawh lutuk" a rawn ti zung zung a.




Ka nu ka zawh pawh khan a that vanglai tak niin a sawi a. A lawmawm viau mai. Ral atang chuan inngaihtuah a na thin si a, dam takin awm zel se tih chu ka duhthusam a ni.



Vanmala lo haw veleh chaw kan ei nghal a. Chawei kham hi chuan ka tan tih tur em em a awm tawh thin lova. Dar 8 velah hi chuan khumah ka mu fel than tawh thin.




Vanmala erawh computer hmaah thuin hna a thawk leh mawlh mawlh tawh.



Hna a thawk nasa a, thingpui ngaina viau tura ka ngaih lai hian a ngaina vak lova. A hnathawh laia han chhawp sak a, han lum sak chu duh viau thin mah ila tui a ngaina zawk tlat a. "Engmah ti lovin lo mu mai mai rawh" min ti thin.




Room chhungah a thawk vek zel tho a, ka lo be buai leh zeuh thin tih loh chu a hnaah rilru a pe thei lutuk.




Khumah chuan muin phone ka lo hmet mial mial a. Video nuihzatthlâk deuh deuh ka en a, za zetin ka nui leh awr awr thin a. Vanmala pawh a lo nui veleh suk suk thin. Ka nuihza lutuk hi min nuih lehchhawng thinin ka hre ta ber.




Dar9 velah chuan mu turin a rawn intintuah ve ta nghal a. A rawn mutthlak rual chuan eng ka hria nimaw zan dang ang lo takin keimah zawk chuan ka va hnaih vat a, ka va kuah nghal chung mai. A lo nui hawk hawk a.





"Hetiang tur tih hria ila ka lo mutna a rei tawh ang" uang thuang zet hian a ti a. Nghet zetin min kuahbet nghal bawk.



Ka lo nui ve var var a, ka samah a rawn fawp tawk a.



"I mut a la chhuak lo em ni"? a tih chuan "A la chhuak eihlo" ka lo ti vat. "Nangmah kha muhil tawh rawh i chau ang" ka tih zawm leh zat a, a rawn nui ri suk mai.




Kan ngawih vang vang hnuah chuan "Vawiinah Sangsangi ka hmu a..." a rawn ti zawi ruih a. Ka lo ip chawih mai.



"Chuan..." ka lo ti vat a, a rawn thaw chhuak huk a "Ka rawn haw kawngah, ka motor khalh laiin ania, kawngpui ân atangin min rawn au a, amahin bag ak chung hian a lo kal hnak hnak a. A zawnah chuan ka va ding a, 'Apa Vanmal' tiin min au tawh a, reilote kan inbia a, ka rawn kalsan zui ta daih a" pangngai tak hian a ti a.






A hmel en tum chuan ka lu ka kan ak a, a mit a lo chhing daih thung.




"I phur haw ve mai lo anih chu" ka lo ti a, mahse keimah ber hi hnaih tawh lo tura nawrtu kha ka ni sia. Tunah lem hetiang rilru ka pu leh daih a.




"A nu bula kal tur ania" a lo ti tha ve mai a. Kan ngawih leh rauh rauh hnuah vawiina thil thlengte chu ka hrilh ve ta ngawt a. Ka sawi zawh vek hnu ah chuan min kuah nghet salh a.



"Ka ti mah mah i ti em? Sangsangi chungah hian, naupangtê mai a la ni sia" ka ti ta thlawt a. Mahse Vanmala chuan "Ti mah mah lo e, ka nupui i nia, i dinhmun atanga thlir chuan a awm lutuk alawm. A lakah rilru chhia i pu lo tih ka hria alawm" a lo ti tha ve mai a. Ka thlamuang sawt mai.




"Sangsangi hi chu ka khawngaih ve reng" ka ti sep a. Vanmala chuan "Khatiang rilru kha pu thûk lutuk duh suh, a nuin hmanrua ah a hmang zel alawm. Keimahah pawh ani chiah reng a. Vawiina ka hmuh thu ka hrilh chhan che pawh hre ve hrim hrim la ka duh vang chauh ania. I rilru a lo nawm loh phah ange" a ti luam a.




"Ani hi chu a rilru a la thianghlim asin mawle" ka han ti veleh ngial a. Chutah Vanmala chuan "Bawihbawihi ber hi ania" a han ti veleh a.




Thil zawh belh ka chak leh ta tlat pek a, kan sawi ta sa sa tiin ka huaisenna zawng zawng sawm khawmin ka zawt ta a.



"Bawihbawihi nen khan tinge in inthen leh kher a? Ih...nu a nih tawh hnu pawh khan in inngaizawng leh tho kha a ni sia" ka ti ta tawng a.



Min chhang tawh dawnlo emaw ka tih hnuah "Mipa dang a mutpui akawm" a rawn ti hul hak mai.



Ka inbeng kang uaih a, Vanmala chu ka melh vat a, mitmeng dam ruihin min lo melh thung.




"Engtin maw?" awihlo zet hian ka ti phawk hra a. Vanmala chuan "Mipa dang a mutpui alawm, ka phawk chiang khawp mai" pangngai tak hian a lo ti leh mai a.



A mitmeng atang chuan tuar vak awm pawhin a awm lo, rilru na hmel phei chu a pu lo nasa.



"A va mak ve" ka ti hliai a. Vanmala chuan a sawi zawm leh ta a "Kum a vei veleh tawh, a tirah chuan ka na khawp mai. Mahse ka rilru damna tur khan thla hnih vel bak ka mamawh lo, keipawhin mak ka ti" a ti dam leh thluam a.



A âwmah chuan min pawt mu leh a "Chuti chung chuan i la pui zui tho sia" ka lo ti a. Ka hrethiam lo alawm. Phatsan anih hnuah pawh amah phatsan tu a la pui cheu thei ania. Eng rilru pua tanpui reng nge maw anih le?




Vanmala chuan "Keimahah hian a awmdan hrim hrim hian hna a thawk tawhlo a ni ber. Sawi leh sawi hnu Sangsangi bawk hi ania, ka puih zui chhan pawh. Naupang mai a la ni a, a nu nen kan inkar a la hrethiam ve tak tak lova. Chuvanga pui zui ta zel kha ka nia. Bawihbawihi chungah hian la thinrimin rilru nain la awm reng ila chu tunah hian ka pui thei hauh lovang, keimahah hnathawh a la neih tlat vang a ni dawn a. Mahse tunah awlsam taka ka puih theih chhan chu min phatsanna khan keimahah nghawng a nei zui vak talo. Ka engah mah a thawk tawh miau lova ka pui satliah thei mai" a ti ta duah a.




A thusawi chu thil ni thei lutuk tur ani. Sawi ve tur mai hrelo in ka ngawi ta kar a "Rinmawia kha i la hua em?" a rawn ti teh daih a. A ngaihna hrelo fea ka melh chuan chhanna duh tih hriat lutuk hian mit a lo kan ak a.




Ka lu ka lo thing vat "Huat pawh ka hre tawhlo" ka lo ti tha ve mai a. Ni e ka haw tawhlo tak tak alawm, ka engah mah a thawk pha tawhlo ni berin ka hria.




Chutah Vanmala chuan "Khatiang chiah kha a nimai. Rinmawia kha la haw ta tlat la chuan nangmahah hnathawh a la neih vang tihna a nimai. Tunah chuan amah kha engah mah i ngai tawh lova, huat takngial pawh i haw thei tawhlo anih kha" a ti dam leh thluam a. Ka fiah ta kuar mai.




Vanmala chuan a sawi tui laklawh aniang, a sawi leh zel a.



"Mi tu emaw in a block che chuan lungngaih phah nan hmang duh reng reng suh, atan block tham khawpin a thinlungah i tla na tihna a nimai. Ngaihtuah chiang la, i engah mah thawk pha lo chu i block peih chuang lovang. Inngaihzawnnaah te pawh an rilru a nat chuan an in block fo hi, block tham khawpin an inhlut tihna ania. Chuti chuan i fiah deuh kuar em?" a han ti veleh ngial a. A sawi thiam vel lutuk chu a inhmeh lo lek lek mai.




A thutak ren run lutuk chu "Ka fiah kuar e" uang thuang zet hian ka lo ti a. A nui ve ta hawk hawk mai.



Min kuah nghet leh salh chung hian "Muhil tawh rawh le" a ti dam thluam a, ka samah a rawn fawp tawk bawk. Keipawh chu ka chhing zui ve mai bawk a.



Pathian zara dam chuan hunte hi a lo kal chak, vawiin hi kan inneih thla khatna a lo ni ve der tawh.




Kei tak phei chuan ka lo hrelo pek a. Ka harh rualin Vanmala'n ka chala rawn fawp zeuh pahin "Happy Monthsary" a rawn ti sup a. Ka hamhaih hmel lutuk a hmuh chuan "I hre miah nange" a ti sup a.



Inthiamlo lutuk hian ka lo nui tawi tak a, "Ka tihpalh" ka ti zawi sep a. Mahse Vanmala chuan "A pawilo" ti sup in ka chalah a fawp leh vang vang a. Ka inthiam lohna chu a reh phah chuang der lo.




Amah pawhin a lo hriat laia ka hrelo chu ka inthiamlo a ni ber. A lo chhinchhiah ve kiau chu a ni awm sia, keilah ka lo bo nasa si.



"A pawi e..." ka ti leh nang nang a, a lo nui mai a. A mitmeng atang chuan nuam a ti chiah lo tih ka hai bik lo. Ka ngaihtuah lo lutuk anga a ngaihte ka hlau a, hrehawm ka ti khawp mai.



Tukthuan min siam pui a, pangngai takin min bia a. Keimah zawk ka pangngai lo lehpek a, Vanmala chuan a lo hai lo nasa mai "Khati khan inthiamlo lutukin awm suh, i hrelo kha ka dem lo che ania. Khatia i awm reng khan ka tan a nuamlo daih zawk" a tih takah chuan ka rilru pawh a nuam ve ta deuh.




Office kal pahin sikulah min thlah leh a, vawiin chu kan ban hma ni ania. Ka hrilh lawk diam tawh a, min rawn lam tur thu a sawi.




Chutia kan Monthsary a nih ve takah chuan thilpek ve ngei ka rilruk ta a. Ka ngaihtuahna a buai nghal hle. Neih loh a nei bawk silo, han mamawh ngawih ngawih leh duh ngawih ngawih a neih ka hre silo a. Pêk mai tur ka hrelo.



Third period ka awl avangin chumi chhung chuan lei ka rilruk ta a. Principal ka dil a, a lo hrethiam khawp mai. Min la fiam zuk zuk lehnghâl a. Ka nui ve hak hak mai.




Kan sikul atanga hla lo tê, Kamisz dawrah chuan ka lût a. A kamisz rawng neih ho te ka mitthla zut zut a. A ngah viau nain a pawl dal a la nei lovin ka hria a, a pawl tak chu a nei tho nain a la mamawh zel dawn tho a tiin ka laksak ta a. Kha chen inchenchilh tawh kan ni ve bawk a, a size chu ka hre ve.




Phur zet hian sikul lamah ka let leh a. Class ka la zui leh nghal a. Ban a hun tep tawh tihah Vanmala chu a rawn thleng a. Pangpar bawr mawi zet hi a rawn kenglut a. A palian bawk si, zirtîrtu dangho chuan an lo hmu duh ngei mai.



Phawk fea ka lo melh chuan "Happy Monthsary" ti supin a pangpar kenlai chu min pe a, a lai ve deuhin ka hria. Keipawh chuan lai zetin ka lo ban ve vat a. Kut an lo beng dar dar mai.




"A van mawi...ka lawm e aw" ka ti hliai a, "I mawi zawk" a han ti ve ngei a, ka nui hak hak mai. Midangho chuan an lo hre pha ve kher lovin ka hria.




Sikul pawh chu kan bang zui nghal a. Ka thil pek tur chu la pe mai lovin paper bag ah ka la khai reng a. Car chhung kan luh rual chuan ka pe a.



Min melh vung vung phawt a "I va zeihawi reuh" a ti ringawt anih chu ! Awmdan pawh min ti thiam lehpek lo. A fuh chho vel viau tawh kha ania a tawngkam thiamlo lutuk hi a khawngaih thlak zawk. Thildanga tawngkam thiam fu si hi !




Ka thilpek lak pah chuan "Ka lawm e" a ti sup a, mawi zet hian a kiai suk bawk. Hetianga nuih hi a inhmeh bik hliah hliah.



Car steering her kual pap pah chuan "Inah kan haw zuai ang a, kan insiam ang a, kan lengkual mai mai dawn nia" a ti dam thluam a.




"Office" tia ka lo melh ha chuan "Ka bang tawh" a lo ti sam then mai.



Ka pangpar kenlai chu ka en vang vang a, rose sen tak bawr laih mai hi ania. A mawi tham ngei mai. Ka hlim lutuk chu ka nui leh var var thin.




Kan inneih dan ka ngaihtuah a, keimah chauh hi pasal neih thla khatna thleng pawha la virgin ka nih ka ring.



Ka rilru a inpeih diam tawh a, mahse a mipa zawkin chet lak a tum miau si lova khata kara a hmeichhia zawkin lo tih huam kha ka duh silo. Nge ni a, min ît miah lo zawk pawh ka hrethiam tawhlo.




Min fawp a, a duhtawk viau zel. Chet lak zawm a tum ngai miahlo. A pa lo ti dawn ila a pa tho bawk sia. Ka ngaihtuahna chu duhlo zetin lu ka thing a. Tun hun chauh ngaihtuah rih ang.




In kan thlen chuan kan inthlak zung zung a. Phone call a dawng leh rih, pawnah chhuakin a va bia a. Ka inpeih hnu chuan a rawn let leh a. A hmel landan a diklo nghal vek.




Thinrim hmel a pu lova, min melh deuh tlawk tlawk a "Mamte...in pack kan ngai" a ti sup a, rilru tawt hmel zet hian a thaw chhuak hawk a.



"Engtin maw?" ka lo ti ha, a sawi awmzia ka hre miau lo ani.



Min rawn pan a, min rawn kuah hlun a, a awmdan chuan min ti hamhaih kher mai.



"Eng nge?" ka tih chuan ka hnunga chul hauh hauh chung hian "A pawi ka ti lutuk, i pî a awm tawhlo" a rawn ti ta mai.



___________*____________*__________


Show post links
Top

[Ngaia]

DEPUTY COMMISSIONER
By CVL Awmpuii



Chapter 23



Ngawi rengin ka ding khawng lah a, Vanmala chuan ka hnungzang ah min la chûl hauh hauh a. Engtin nge ka awm pawh ka hre chiahnlo. Ka ngaihtuahna a bîng mup maiin ka hria.




Vanmala chuan inlahrang hlekin "Tunah Aizawl kan pan nghal a ngai dawn a, insiam ang aw" a ti dam thluam a. Ka kutah min chelh a, ka lo melh reng ringawt.



Khum lamah min kai phei a, khumah chuan min thuttir a, a tih ang ang chuan ka awm tawp. Ka chesawn thei der lo. Eng ber nge ka ngaihtuah pawh ka hrelo. Ka ngaihtuahna hi a mang vek a ni ber.



Vanmala che zia chu ka lo en reng a, wardrobe chhunga suitcase chu rawn lachhuakin thawmhnaw a pack zui mawlh mawlh a. Che chang lek lovin khuma thu chung chuan ka lo melh reng ringawt. Ka chesawn theilo a ni ber.



Ka kawr bawm a hai laite chu ka hmu reng a, ka panty leh brazier a pack lai te pawh ka hmu vek. Mahse engtin mah ka chesawn theilo. Ka lo melh mawl tawp ringawt.




Amahin a tawng mawlh mawlh a "Kawr hi ken tam vak a ngai hran lovang. Keimah tak phei chu ka châm rei hman dawn lova. Mahse nang chu i la awm deuh a ngai awm si a" a ti zawi sup sup a.




A hnu deuhah chuan ka bulah rawn kalin ka hmaah a rawn thingthi rûn a, ka kutphahah rawn chelh lehin "Mamte...ka thusawi i hria tiraw, tunah hian i pî vuinaa tel turin Aizawl pan vat kan ngai" a ti dam leh thluam a. Lainat hmel zet hian min melh a.




A thusawi chuan min thawng pawhin ka hrelo. Rilru na ngawih ngawih, hrehawm ti ngawih ngawih, tah chhuak ang pawhin ka awm lo. Mahse ka ngawng vek thung.




Ka awmdan hrethiam tak chuan Vanmala chuan "I pâ in min lo call a, a thawng viau ang che tih ka hria. Mahse tun atan chuan a rang thei ang bera Aizawl pan kan ngai. I hrethiam ang tiraw?" a ti leh sup a, ka lo bu ve mai a. Mahse ka chesawn thei chuanglo.




Vanmala chuan nghet zetin ka kutphah chu a chelh a, min kaitho a, suitcase chu a la a. Room atang chuan min hruai chhuak ta a. Motor a kan chuan lai leh in kan chhuahsan lai pawh ka hre mumal lo.




Vanmala chuan min be leh zeuh thin a, ka chhang ve mai zel chuan ka hria. Mahse ka harhfim lo ani ber. Ka nghilh dup hi a ni ringawt mai.



A phone a rawn ri a, a chhang zui vat a. An tawng kalhmangah ka chhungte nen an inbia tih ka hre nghal mai.



Min rawn melh zawk a "A thâwng khawp mai, a la chechang thei der lo. Mahse lo ngaihtuah suh u, kan rawn thleng thei mai ang" a ti zung zung a.




An inbiakna an tihtawp hnu chuan kawngsirah motor a tiding dat a. Min rawn melh vung vung a. Hmalam ka lo melh char char thung. Ka mitsirin a mitmeng dam thlup leh min lainat hmel lutukte chu ka hmu thei.




"Mamte..." a ti fan ruih a, zawimuangin a lam chu ka hawi a. A rawn che hrut a, min rawn hnaihin a kut pahnih chuan ka biang a rawn khuap run a "Harhfim i ngai" a ti sup a, mitmeng fiah kel kawl hian min melh a, "Tunah hian harhfim taka i awm a ngai, anih loh chuan nakinah a buaithlak dawn ania. I tuar thiam lo lutuk ang" a ti leh a.




A thusawi chu hrelo ka nilo, mahse ka tawngchhuak thei der lo. Ka pi thih thu min hrilh kha ka hria, mahse engmah ka ngaihtuah zui thiam lo. Ka mang vek.



"Kal vat ang" zawi sepin ka ti ringawt a, sawi belh tur pawh ka hre chuanglo. Vanmala chu a thaw chhuak hawk a, ka chalah rawn fawp tawkin "Ka awm a, engkim a tha vek ang" a ti sup a. A âw nghet churh chu a inrintawk hmel khawp mai.



Motor a tinung a, kan tlan chhuak lehnghal a, car tukverhah chuan ka dak chhuak a, khua a la tlai chhe lutuk lova. Tlan pangngaia kan tlan chuan zan dar 10 velah Aizawl khawchhung kan lut thei maiin ka ring.



Mit ka chhing vang vang a, ka mitthla ah ka pi a lo lang nghal a. A nui hmel te, duhthawh taka a tawng ve barh barh lai te, urhsun taka thurawn min pek thin laite, ka mithlaah a rawn indawt zut zut a. Ka thin ah hian vittu awm ang mai hian a na ngut ngut mai. Mahse ka mittui a hul hlauh thung. Ka hrawk a na ngut ngut bawk si, ka na a ni tawp mai.




Vanmala phun sup ri chu ka hria a, "Mamte..." a rawn ti zawi leh sup a, ka melh chuan "Thil ei lawk rawh aw" a ti sup a. Ka lu ka lo thing vat, engmah ka ei chaklo atin ani.




Min rawn melh zawk a "I taksa a chau lutuk ang, thil tlem tal ei i mamawh" a ti leh sup a. Ka lu ka lo thing mat mat a, "Ka ril a tam lo" ka ti ro halh. Min rawn melh vung vung tih ka hriat chuan mit ka chhin san lehnghal daih. Tun ang dinhmunah hian engmah ka ei thei dawn chuanglo.




Vanmala pawh chuan "Umm...anih chuan Aizawl luh hmain kan ei mai dawn nia. Thil ei lova awm chu ka remti lo" a ti leh sup a. Ka ngaithla liam vel mai mai tawh. Ka kaah hian engmah a luh theih ka ringlo.




Mit ka chhing kha ka lo muhil zui daih a nimai thei. Ka mumangah ka pî ka hmu a, min kalsan lo turin ka ngen lawm lawm a. "Ka chungah engmah a thleng lo, ka hlim lutuk ania" tih ringawtin min lo chhang mawlh mawlh a.



Ka mittui min hruk hul sak thintu khan amah ngaia ka tah te chuan nui sang hian min lo melh vawng vawng a. Min hnem a tum si lo. Ka tap nasa lutuk chu ka thaw chhuak hlei thei lova, ka awm sep dawrh dawrh khawpin thawk ka la tawk tawk a, ka awm a na ngut ngut mai. Ka mittui lah chu a surin a sur hi a nimai.




Hla tak atangin "Mamte....Mamte..." tia min ko ri chu ka hria a, ka hrechiang lutuk. Vanmala âw ngei a ni, mahse ka harhchhuak thei der lo.



Ka dara min rawn sawi tak nawkah chuan ka meng nghal kawk a. Ka thaw chhuak zui nghal kawk kawk mai. Ka hrawk a inhnawh nasa lutuk, ka mumang ang chiah khan. Mahse ka mittui far khat pawh a tla lo.




Vanmala chuan hnai set sawtah min lo melh a, fiah kek kawkah ka melh let takah chuan a âwmah nghet zetin min pawm chilh a, "Min tihlauthawng lutuk" a ti khur hluk mai. Ka samah thamin a thaw chhuak zui ham ham a. A lungphu dup dup chu ka hre thei.




Ka thawk a la pangngai chiah loh avangin ka nam deuh dat a, a lo hrethiam khawp mai, a inlahrang hlek a, ka hnungah a chul zui hauh hauh a.




"I zia deuh em?" a tih sup chuan chhang mai lovin ka la thaw chhuak ham ham mai. Ka hrawk inhnawh tup leh ka awm inhnawh tup chu a hrehawm lutuk.




Minute 10 vel min buaipui hnu chuan ka awmdan a rawn pangngai chho tan a. Ka thawk lak pawh a pangngai chho viau. Vanmala pawh chuan hrethiamin ka hnung min chulna chu a chawl dat a "I zia deuh em?" a ti leh sup a, ka lo bu nghat.




Car pawn lam ka melh chuan khua a lo thim tawh tih ka hre ve chiah. Vanmala chuan kawngsirah motor tidingin ka thutna lamah a lo kal phei hi a lo nia.




Ngaihtuah hmel zet hian min melh reng a "Dar engzat nge a?" ka tih sep takah chuan a inlahrang a, ding chhuak vutin a bana a sana bun chu a lekkang vut a, "Dar 9 a ri tawh , Aizawl khawchhung kan lut tep" a ti sup a.




"I lo chhuk ve lawk duh em?" a tih chuan ihe lovin ka insiamtha a, ding sawn deuhin ka kut a lo chelh vat a. Motor chhung atang chuan min kai chhuak a. Ral lehlama Aizawl pe tuarh chu a hmuh theih tawh.




Kham chhawrdawhah min dinpui a, a hmaah min dintirin ka hnunglam atangin min rawn kuah hlun a, ka sam a fawp vang vang bawk.



Ngawi rengin kan ding dun reng a, "Chhel taka i awm a ngai dawn nia" tih bak engmah a sawi bik lo. Mit ka chhin apiangin ka mitthlaah ka pi ka hmu zel a, hrehawm ka van ti tak.



Vanmala chuan "Kal vat tawh zawk ang" a ti sup a. Ka samah rawn fawp leh tawkin a inlahrang hlek a, ka kutah min chelhin car lam min panpui leh nghal hmiah.



Min thut luh tir a, seat belt min hren zawh tir hnuah a lo lut ve chauh a. Motor a tinung a, kan tlan chhuah leh hma chuan seat hnungah eng emaw thil fun hi a rawn lachhuak a, ka lamah rawn lekin "Chhang hi ei rawh, eng emaw tal i ei loh chuan i taksain a tawrh phah ang" a ti sup a, ka lu ka lo thin chuan rum nghutin motor a tihnun vut vut tawh chu a off hmiah a.




A thil kenlai chu phawrh chhuakin Donut pakhat hi a rawn lachhuak a, ka hmai zawnah rawn lek lehin "Ei rawh" thupe aw zet hian a ti nghet charh a, min melh run bawk.




"U Vanmal..." ka tih lai mek chuan "Mamte...ei rawh" ngenngawl zet hian a lo ti veleh thung a, a mitmeng zawng zawng nen a tankawp takah chuan ka hnial zui thei ta biklo. Ka kuta lak mai ka tum lai chuan "Tikhan ei rawh" a ti sup a, ka melh kiau hnuah ka kâ ka ang zui ve mai bawk a. Pakhat chu min barh zo thak a, a dang min pek leh a tum chuan ka lo hnial ve tlat tawh a. Ka luak a chhuak vek. Min tilui tawh biklo.





Aizawl thlen hma chu tukverhah dakin thlifim thaw heuh heuh chu ka inchhem tir a, ka rilruah engmah a awm thei tawhlo. Ka mumal thlawt lo a ni ber.




Aizawl khawchhung kan lut a, kan tlan a, kan tlan zel a, motor vei vak dang pawh a la awm nual a, mahse an tam lutuk lo.



Kan in chu kan thleng ta !



Kan inkawtah chuan mipui an lo kat nuk mai a. Ka tha a rawn khur nghal titih der mai. Vanmala chu a chhuk vut a, ka thutna lam panin car chu a rawn hel kual pawk pawk a. Car kawngkhar chu min rawn hawnsak a.




Ka kutah a rawn chelh leh hmiah, mitmeng dam raihin min melh a "Ka nupui hi chhel taka awm turin ka duh" a ti nghet charh a. Car atang chuan min kai chhuak a. Pawnlama lo awm dangho chuan min lo buaipui vat a.




Tu tu nge an nih pawh ka hre hlawm lo, ka hmu hlawm tak nain a tu amah ka va chîk theilo a. Ka ngaihtuahna mang vek vang pawh a ni mai thei.



Car hnunga kan suitcase dah chu an lo la chhuak a. Kan in gate pawn atang chuan kan in chu ka thlir vang vang a, Vanmala chuan ka kut a rawn hmer nghet salh a "Kal ang le" ti supin gate chhungah chuan min luhpui ta a.




Kawngkapui bulah ka pa a lo ding a, min lo melh reng a. A mitmeng a dul ve raih mai, a chauh hmel hle bawk.



A bul kan va thlen chuan "Ka fanu..." a lo ti sup a, sawi tur hlawl a hre bik lo aniang. Mipui zai ri a lo awm nghal a, ka hla ngainat loh ber mai lusun hla an sa a, ka thin a na nghal ngut ngut mai.




Ka pa chuan "Vanmal, in rawn tluang maw?" a ti leh sup a, Vanmala chuan "Tluang a ni mai e...ka pi chu a zialo hle mai" a ti zui ve vawng vawng a.



Ka pa chuan "Hawh u, i lut ang u" a ti sup a, kan inzui lut ta a. Vanmala chuan ka kut a thlah hma chuan "I tan ka awm reng dawn" a rawn ti zawi sup a.



Tap ri rawng rawng ri ka hre zui a, ka pi khum awmna lam kan pan mek tih ka hria.



Ka nuin min rawn hmuh rual chuan "Ka nu, i tunu a lo thleng tawh ania" tiin ka pi ruang chu a kuah a. Chutah ka pi ruang awmna chu kan va thleng ta a, ka pî hmel ka va hmu chiah chu ka â vek maiin ka hria.




Ka puak chhuak ta nge nge e !



Ka biang a rawn lum thla pap a, ka nu chuan min lo kuah a, ka nî te ho pawhin min lo kuah a. Min lo tahkhum a, ka hrawk inhnawh tawt lutukte kha a rawn puakkeh ni berin ka hria.




Rilru na lutukin ka pi chu ka au a, mahse tum dang angin min chhâwn tawh silo. Min hmuh changa hlim deuha min chhawn thin kha a lo reh hmak a, nui hmel pu reng thin khan nui hmel reng min hmuh tawhlo. A hmêl dâng bel te chu ka lainat a ni tawp mai.




Ka inchhung, hlimna nui ri a khat thin kha tahnain a khat zo a. Inkawm hlim bawrh bawrh thin kha ka pi chu lo tawng ve tur a awm ta lo.




Na ti lutuk hian ka pi mu dang bel chu sawi harh ka tum a, a harh thei silo. Ka mangang lutuk.



Kut tha chak zet hian ka darah a rawn kuah a, Vanmala a ni tih ka hailo.



Vanmala chu beiseina sang tak nen ka han melh chho a "U Vanmal...ka pi hi min kaihthawh sak rawh" a ti thlawt a, lainat hmel lutukin min lo melh ringawt.



"Ka pi hi ka ko a, min chhang duh tawhlo" rilru na zet hian ka ti a, a âwmah hmai phumin ka tap chhuak rawng rawng a. Vanmala chuan nghet zetin min lo kuah ngawt ngawt tawp.



Ka khur a, ka tha a zawi ta hnawk a. Ka rilru chu a fim vek, mahse ka chesawn thei tawhlo.



Vanmala chuan "Mamtei awmdan hi a tha lo tawp mai" a ti sup a. Ka nu leh Puia'n min rawn buaipui vat a, ka zawi hnawk ka ti tak nain ka kut chu a khawng tlat a, Vanmala chuan min nuai sak nghal a. Ka nu leh Puia pawh chuan ka kut lehlam chu an lo nuai ve nghal a.




Ka pa a rawn inrawlh ta vat "Heti chuan a tha dawnlo tawp mai. Vanmal, a room lamah han hruai chho mai rawh. Ruang hi lumen tur a ni si a, naktukah Vuina programme kan hmang leh dawn bawk si. A taksa a chau lutuk ang" a ti nghal zung zung a.



Vanmala chuan min kaihthawh a tum a, "Ka pi ka kalsan dawnlo" ka lo ti zawi raih a, a thaw chhuak hawk mai "Hetia awm tur hian a duh miahlo ang che" a lo ti sup. Ngaihtuah hmel lutuk hian min melh bawk.




Ka mittui luang ngiai ngiai chu min a kut dam zet hian min tuai hul sak a. "Reilote chawlh hahdam i mamawh" a ti sup a. Min kaihthawh mai a tum chu ka tha a zawi bawk nen ka ke pawhin ka ding theilo.




Tichuan Vanmala chuan min pawm kang ta nawlh a, midangio pawh chuan ka dinhmun hrethiamin mak an tih hmel hran lo. An zai zui mawlh mawlh a, an zai ri te chuan ka thawk an tichham zual.




Ka nuin min lo zui chho a, room kawngka min hawnsak a, ka zawi ngawih ngawih mai.



Khumah chuan min mut a,engmah ka sawi zui lo, tawng chhuak tur pawhin ka kâ ka ang thei rihlo ani ber.



Vanmala chuan ka nu bulah chuan "I lo awmpui zawk dawn em ni ang? Inhnuai lamah chetna turte a awm takin min mamawh awm si a" a ti luam a, mahse ka nu chuan "Nangman awmpui rawh, nangpawh i chau lutuk ang, in rawn tlanna a hla si. Zingah bak lo chhuk tawhlo se ka duh. Ruang a hmuh leh chuan a buai leh vek palh ang" a ti zung zung a.




Vanmala chuan "Ka chau hran lo asin mawle...inhnuai lamah tihtur a tam awm si a, heta lo awm bo daih chu a..." a ti leh nuah nuah a. Mahse ka nuin "Che tur an tam alawm, i rilru tibuai duh suh, tikhan lo awm ula, naktuk lamah tih tur ang chu i ti ve zawk mai dawn nia" a tih tak tlatah chuan a hnial zui bik lo.





Ka nu chu a chhuak zui nghal a, Vanmala chu a rilru a buai ve ngawtin ka ring. Inhnuai lamah makpa chet hun tak a lo ni ve bawk nen hetah kei buaipui ngaiin ka lo ve bawk sia. Mi mitmei ven pe na chi a ni lehzel bawk si, a awm ka tinuamlo ngawtin ka ring.




Zawi nghiaia ka mutna bulah chuan a rawn thu thla a. Ka samah a rawn chûl hauh hauh a, duat hmel lutuka min melhna te chuan min tipangchang zual a, ka zuau zual sauh maiin ka hria. Ka mittui luang chhuak ngiai ngiai a hmuh chuan a thaw chhuak hawk a "Min ti hrehawm hle mai" a ti hul hawk a.



Ka tawrhna hi min tawrhpui ve takzet tih ka hria.



Ngawi rengin ka mittui tla chu min thlir tlawk tlawk a, tih thei a nei bawk si lo chu hrehawm tih hmel lutuk hian a thaw chhuak leh hawk thin.



A che hrut chu a kalsawn dawn emaw tiin "Min kalsan suh" ka ti zawi sep a, ka âw chu a ri chang chângin ka ring.



A rawn thaw chhuak hawk a, "Khawiah mah ka kalsan dawn lo che" tiin ka chalah a rawn fawp zui vang vang a. Inlahrang hlekin "I thuamhnaw hi thlak lawk ang aw" a ti sup a. Dine out tur khan ka insiam fel vek tawh a, jeans leh kamis ka ha a, ka la inthuam tup anih ber chu !




A kalsawn tur chu ka lo dang ta biklo. Kan suitcase kha ka room ah an lo dah fel diam tawh a, an buaipui lai pawh engmah ka hre ve lo.



Suitcase a va hai ruk ruk hnu rei vak lovah a rawn let leh a. Ka kawrfual deh nuam zet, ka hak zin em em hi a rawn keng phei a.




Kei erawh ka rilru a lo buai leh hle tawh. Ka chauvin ka che chang thei der silo, ka tan thawmhnaw thlak ngaihna a awmlo.



Vanmala chu ka bul a rawn thleng chawpchilh nghal mai a, "I inhlip thei ang em?" a ti sup a, ka melh vang vang hnuah amah bawk chuan "I che hlei thei si lova keiman ka thlak mai ang che, i pawiti em?" a ti leh sup a. Ka hriat sual nge ka hrelo,a âw a lawi deuh rut mai.



Ka la chhan mai tak loh avang chuan "Keiman ka thlak mai ang che" a ti leh sup a, ka kamisz hmawr chu a kutin a rawn chelh nghal a. Tun ang hunah rilru kawi a pu dawnlo tih ka hria a, ka lo remti ve ta tawp. Engmah sawi lovin zawi deuhin ka lo dawh tawp a. Che thei chuang hek lo le.




Ka jeans a phelh lai erawh chuan ka zak ve ngei mai. A hnuaiah divide ka ha hlauh zawk a ! Chuti nilo se chuan ka zak zual ngawtin ka ring.



Vanmala chu ka lo en reng a, ka mita min melh lem lo hian a thiltih lai chu a tihzawm mawlh mawlh a. Ka lo chîk ve hle a, mitmeng danglam a pu eihlo.




Ka mal lang var ve haih te, ka âwm bâwr kawh ve lah te chuan a tidanglam pha eih lo anih ka ring. Hun lo hle mah se chutiang lam chu ka ngaihtuah lo theilo.




Min thlak zawh chuan ka bulah a rawn thu leh a, ka lo melh reng lai chuan min rawn melh ve ta chiah a "Mamte, i theih chuan muhil daih la ka duh khawp mai" a ti dam thluam a. "Ka muthilh chu a chhuak lo, mahse ka zawi" ka lo ti tha ve mai a.




Ka chalah a rawn fawp leh zauh a, "Inhnuai lamah lo zuk chhuk ila i pawiti em? Tih tur neuh neuh a awm âwm si a, midang ka lo tir chho zawk ang a" a ti luam a. Mahse ka huaisenna zawng zawng sawm khawmin "Aih, ka bulah awm ve rawh" ka ti ta thlawt. Ni e,min kalsan daih chuan ka khua a har lutuk ang.




Tichuan Vanmala pawh chuan lungawi hmel deuh hian min melh vung vung a. Chutah ka mutna bulah chuan rawn tluzal vein min rawn kuah a, a pheikhawk bunlai pawh chu a tlawh phelh zui nghal a.




Ka hnunga chûl hauh hauh chung hian "Anih chuan muhil daih la, naktuk hun hman tur a la hautak si a, hahdam i mamawh" a ti keh sup a. Min awih mut tum ni awm fahran hian ka hnung chu inhnuai lama an zai milin a beng dat dat a.





Mahse ka mut a chhuak thei der lo, ka pi ringawt ka ngaihtuah a. Zanin leh naktuk chawhma chauh a hmel hmuhna hun ka nei tawh dawn tih ka hria. Muthilh chu a har khawp mai.




Mihring hian kan thih leh dam kar hi kan va hrelo tak em aw ! Ka nuin tukinah lawk khan ka pi chanchin min rawn hrilh a, check up a an kal tur thu leh a dam chak ziate a rawn sawi a. Tunah lem he khawvela awm ve tawh ngailo turin min chawlhsan ta chu a ni si a. A rang teh thut lutuk a, heti teh thuta a kal ta mai hi engmah thu chiang zawk pawh kan la hre ve lo.




Ka muthilh theih ngang loh avangin Vanmala bulah chuan inhnuaia chhuk ka dil leh ta ngawt a. "Hei bak chu ka pi hmuhna hun ka nei tawh dawnlo a, engtin pawn awm ila min enliam rawh" ka tih tak thlawt ah chuan min chhuk thlak pui leh ta tawp a. Kein ka kal thei tawh a, thâ pawh ka nei let leh ta alawm.




Ruang chu ka kil ve ta reng a, ka mittui a luang reng a, hruk pawh ka hru hul duhlo. Ka pi hian sûn a phu a, ka mittui zawng zawng pawh hian ka sûn seng chuang lovang.




Vanmala chu pawn lamah eng eng emaw a tiin ka hria, ruang pawh a kil ve hman meuh lo. A buai buaiin a lo buai ve turah ka ngai mai.




Vartian a rawn intan a, zing dar 5 a rik tawh chuan tho ngei ngei thin ka pi kha tho tur a awm tawhlo. Ka rilru a rawn na zual a, ka nu leh ka nî te pawh an tap tha leh hawm hawm hi a ni ringawt.




"Pi...i thawh a hun tawh ania" ka tih chuan min chhang tur a awm tawhlo. A taksa chu a vawt vek tawh a, a khawng vek tawh bawk. Mahse a hmel chu a tha telh telh emaw tih mai tur ani. Ruang dai mai mah nise a hmeltha thlawt !




Tukthuan ei a lo hun a, eirawng min bawlsaktuten an peihfel tawh thu an rawn sawi chuan ka chhungte chuan puitling takin tukthuan ei tur chuan an intintuah a, mahse kei chuan ei ka tum bau lo. "Ka piin a ei velo" tiin tan ka khawh tlat a, Vanmala chuan rilru hah hmel lutuk hian min lo melh mgawt ngawt tawp!




Ka pain "Mamte, ei duhlo mah la tlem tal ei tum rawh, i chau lutuk ang" a tih pawh chuan ka zawm theilo.




Ka tan tlat avang chuan min tilui ta biklo a. Vanmala pawhin a eilo ve ringawt "I ei hma chu engmah ka ei bik lovang" a ti bur a, min nawr a tumna a ni tih ka hria a. Ka ei thei miau silo, kan nghei dun ta pauh chu ania.



Chhun dar 12 ah ka pi chu he khawvela hmu leh tawh ngailo turin kan vuiliam ta. Chhungkaw aiawhin ka pain thu a sawi a, ka pi chu nu hriam leh chhel tak a nih thute, pa tellova a fate a chawi len thu te, Pathian hnena thilpek a ngaih pawimawh zia te, a tam mai. Ka pi chu a chawimawi a ni tawp !




Tin, sawi hmaih theih loh chu, amah uina thusawi an awm nual a, a chanchin an sawite chuan ka pi lo ropui zia min hriat nawntir awn awn mai.




Nu Muani pawhin a rawn tah ve rawng rawng a, tun tum chu ka haw thei biklo. Ka pi hi a ui ve takzet niin ka hria. A âwm ve reng bawk a. Ka pi hian a dawhtheiiin a kawm thiam em atin ani !





Kan vui zawh chuan mak tak maiin ka zang hawk mai. Ka ngai ta lova, a tello a awm ka zuam ta tihna lam ni lovin dam hlen tura a kalna khan min thlamuan ka ti tawp mai.




A dam loh lai zawng zawnga ka mangan thinnate kha a bo zo a, thlamuang taka a chawl ta nia ka hriatna chuan ka rilru a tidam tlat. Chutihrual chuan khawharna nasa lutukin min la chîm dawn chauh tih ka hailo.




Vanmala chu a felin a bengvar em em a, mikhual lo chhawn te leh chet kual ngaihna apiang ah a che kual a, a mawng a zangin a thu hman meuh lo. A chauh awm tehlul nen ka khawngaih lek lek mai.



Pawnlama thutthleng inrem thleh sung a lo tihfel lai chuan a bulah ka va kal a "I chau tawh ang, chawl tawh rawh" ka va tih chuan "I tha em?" a lo ti daih thung. Nui lui seih chung hian "Ka rilru a dam" ka lo ti vat a.




Min melh run run a, kiai suk chung hian "Ka nupui chu Khatiang tur kha a ni" a ti sup a. Mitmeng tawrhhlehawm zet hian min melh bawk. Min hîp a ni tawp mai.



Inchhung ka va luh leh chuan ka chhungte pawhin Vanmala chu an lo fak khawp mai. Rin ai takin kam boruak a zangkhai ta phian a. Chhiat tawh meuh hi chuan chhungkhat laina inhmukhawmna hun hi a nihna chen a awm ve a. Kan chhungte ka la hmuh zen zen loh pawh an awm ve nawk mai.



Ka nuin min inhmelhriattir zel a, hmeltha min tih thute an sawi sap sap a,thil dawnsawn hrehawm a ni hran lo. Ka intihtheih rûk deuhna pakhat a awm, ka pasal an hriat chuan an fak hlawm zel a, ka pasal chu ka chhuangin ka lo intithei em em tawp mai ni.



Zanriah pawh beisei ai takin ka ei thei ta a, Vanmala pawh a lawm khawp mai. Ka taksain a tawrh lutuk a hlau kha ania, ka rilru a dam ta phian sia.



Zanah chuan khawhar inleng rinai takin an rawn thahnem a, an zai ri te chuan nizan lam ang lo tak khan min hnem a, ka dawngsawng thiam viau tawh.



Inleng tin darh hnu chuan mu turin kan intintuah ve ta a, ka pain chhung inkhawm a hmang a. Tawngtai rual a rawt a, kan zavaiin kan tawngtai rual a, kan tap hawm hawm bawk.




Ka ni te ho leh chhungkhat laina neuh neuh riak tur kan nei nual a. Kan in hi a zau ve pangngai a, mikhual room 1 kan nei a, chhuatah pawh a mut theih mai ang a, an inhnawh leng maiin ka ring. Keini nupa erawh ka nulat laia ka khumah khan kan mu thung a.




Vanmala inbualna tur tuilum ka siamsak thlap a, a chau awm si a, tuilum hian inbual se a harh hawkin ka ring. A inbual chhungin mutbu vel ka lo la chhuak a, ka lo phah tha a. Khumah ka lo mu fel than mai.




Ka chau deuh bawk nen muthilh theih inring miah lo kha Vanmala inbual chhung chuan ka lo chhing sek a, a inthlak thawmah ka harh a "Ka lo muthlu alawm le" ka tih sep chuan "I theih phawt chuan muhil rawh, i tap nileng zankhua a, i taksa a chaklo dawn lutuk " a ti sup a.




A inthlak zo chu ka bulah a rawn inthawlh ve nghal a. Min rawn kuah nghal hlun a.



"Engtikah nge Lawngtlai kan let leh ang?" ka tih chuan "Ka inthlahrung viau nain keihi awm rei chi ka ni dawn lova. I hriat kha hnaah kan buai lai tak a ni bawk sia, naktip lamah chuan ka let a ngai ang a. Nangchu i duh leh i la cham rih dawn nia" a ti zung zung a, ka lo buk nghat lai chuan "Mahse rei deuh cham chu ka remti lo" nui suk chung hian a ti a. A sawi tum ka hrethiam, min thlakhlelh na tawngkam a ni tih ka hria.




Kan chau dun ve bawk aniang rei vak lovah kan muhil a. Zing ka harh leh chuan Vanmala chu a lo la mutui ngang mai . A chau tih ka hria a,tih harh hlau takin ka tho chhuak a. Inhnuai ka chhuk thlak chuan midang pawh an lo tho nual tawh.




Nilengin kan buai leh a,inleng kan nei awl lo bawk. Vanmala bawk ka fak lehpek, a bengvarin thingpui lumnaa senso ngai angte a lo buaipui zung zung a. Zanriah te pawh a lo buaipui tel vek. Thlan hungnaah a kal thlap bawk a. Ka chhungte tan chuan makpa rangkachak a ni ringawt.




Tin, sawi hmaih theih miah loh chu ka nu (Vanmala nu) leh U Faktei pawh an felin min rawn tuam mawi hneh lutuk a ka lawm. Ka pi ruang awm ni phei kha chuan ka nu (Vanmala nu) pawh a rawn tap hawm hawm a,a hma daiha lo innel tawh, induhsak em em kha an nia. A awm lo hran lo. U Faktei lah thingpui lum leh sem ilo velah a tangkai si. Ka lawm takzet hi a ni tawp mai. Ka lo be lumlam thiam vak lo nachungin anmahni zawkin min buaipui hneh lutuk tlat.




Ka pain kan awm chen tur min zawh chuan Vanmala chuan a chhang zung zung a. Nizana ka bula a sawi ang tho khan a sawi.



Mo ka ni tawh si a, ka pasalte in pawh kan veng thenawm lawkah a awm tho sia. Kan ina riah zel chu ka inthlahrun tehlul nen ka nu (Vanmala nu) chuan "Mamte,kan mitmei veng duh reng reng suh. Chhiat tawh hi chu a dan a dang a. Helamah tun tum chu riak tlang law law mah ula a pawilo. Kan in pawh i in a ni tawh a, in duh leh in rawn riak tho ang a" a ti zung zung a.




Vanmala chuan "Ka nu, naktuk maia kal lehnghal ka tum sia, zanin chu hetah kan riahpui veleh ang a, Mamtei'n a duh chuan zandangah kan in lamah a riak veleh thung ang a" a ti ve luam bawk a. Ka pasalte chhungkua hian ka thla an timuang thlawt.




Zan kan han mu chu ka ngaihtuahna a danglam ta tlat a. Vanmala chu ka thlahlel ti ila a dik ber awm e.



Min kuah chialin a mu leh a, ka bengkawm a fawp kual dun dun a. Mahse min kuah reng chung chuan a hmui min nawrna te chu a inla hrang leh vat zel.



"Naktuk chu ka ngai ngawt ang che" a han ti ve ngiala , ka melh chho ha a, ka hmuiah a rawn fawp zeuh a "Min ngai ve dawn em?" a ti sup a. "Ka ngai dawn che" ka ti ve ta nge nge.




Min kuah ngheh salh pah hian a thaw chhuak hawk a "Muhil ang" a ti sup a.



Kei lah ta pek chuan eng ka hria nimaw "U Vanmal" ka ti hluai a. A rawn meng leh duar duar a.



"Eng nge ni ka nupui?" a lo ti sup, ka sawi hreh leh deuh sia ka ngawi leh ta daih a. "Sawi la" a rawn tih leh tak supah chuan "Min ît miah lo em ni?" ka ti ta phawng a.



Ka hre chak em ani. Khum khatah hei chen kan mu ve tawh a, thla khat chhung khan min khawih a tum eih silo, a pa lo emaw ka ti hial zawk.



A rawn nui chhuak huk a, "Eng zawhna nge ni ngai?" nui huk huk pah hian a ti leh a. Ka ngaih a ti thalo telh telh tawh.




"Min ît miahlo tiraw?" insit zet hian ka ti leh a, ka ngui nghal vek.



Ka khabeah a rawn dawm a, kan mit leh mit a intawng siah mai "Ka ît che" a ti ril ruih mai. Ka beisei ang chhanna ka hmu, mahse ka zak ngang mai. Ka biang a sa hat hat mai.



"Anih leh tinge i nupui anga min en si loh?" ka ti leh tawng a. Chutah thutak zet hian "Ka taah siam tur chein min duh tawh em ni?" a rawn ti churh a.



Ka melh ren rawn a, eng nge ka hriat pawh ka hrelo "Aih" ka lo ti tawl mai !




Kan boruak ka tikhawlo zo vek. Tlang deuha sawi ka ngam silo, a thuhrimah a mood ah ka cheng chiahlo.



Vanmala chu a thinrim ka rin tehlul nen a nui chhuak ta hawk hawk a. Ka sama rawn fawp tawkin "Ka nupui tluka ît ka neilo, i ngaihtuahna kha buai viau tawh suh se" a ti sup a. Ka lai ngang mai.



"Muttui le" a tih tak supah chuan mu tha sat satin "Muttui" ka ti ve sap a.



Kan chhing zui ta vang vang a. Ka inpeih tawh tehlul nen boruak ka chawk ho zo leh ta vek sia, a zialo tak tak. A pawi lo e, ka la virgin rei deuh dawn tihna a nimai.




Tukthuan eikhamah Vanmala chuan Lawngtlai lamah min letsan dawn a, ka ngaih tur zia hi ka sawifiah thiamlo zawk. Mahse zui ve nghal tur erawh chuan ka pi ka sûnna hi ziaawm deuh phawt se ka ti bawk si.





Vanmala chuan a kal hmain ka roomah min hruai chho a, kawngka kalhin koham zet hian min fawp a, keipawhin uar zetin ka lo chhang let ve tan tan a. Kan duhthawh dun ngang mai.



Ka âwm bawr te chu a tham salh salh a,ka lo thaw halh halh thung. Bangah min nawrbetin min fawp zui leh tawn tawn a, a duhthawh lutuk chu chhan let ngaihna pawh ka hrelo.



Rei ngial min fawh hnu chuan a inlahrang hlek a, hmui huh hliama min melh chung hian a kiai suk a. Ka kawngah nghet zeta chelhin amah si chet chuan min pawt hnai a, min han fawp zui leh ngawng ngawng a, tun tum chu dam raihin min fawp tawh thung. Ka lo chhanglet ve zel bawk.




Min thlah thei tawh dawnlo emaw ka tih hnuah ka hmui hnuai pet leh zeuhin min thlah ta hram.



Chutah Vanmala chuan "Lawngtlai i lo let leh veleh ka ta i ni tawh ang. Ka nupui i nihna ka nemnghet tawh ang" a ti nghet ta churh a.



____________*____________*___________


(Tlai mah ila, a thui vawng vawng )


Show post links
Top

[Ngaia]

DEPUTY COMMISSIONER
By CVL Awmpuii




Chapter 24



Vanmala tlan liam lai chu ka thlir zui reng a, ruak ta huai ang mai hian ka inhria. Ka ngai nghal veng veng mai.



"I ngai nghal em ni?" U Vensangi âw ka hria a, ka lehhawi chuan ka hnung lawkah a lo ding ran a. Min lo nuih var var bawk.



Ka pan phei vat a, "Ka lung a tileng e a" ka ti halh, ka zêp sit set peihlo. Ka ngui nghal nghiai a, ka tawng ring peih der lo. Heti tak hian pasal ka lo nei anih hi ka ti rilru neuh neuh mai.




U Vensangi chu a lo nui hak hak a, "In inneihna a la rei si lova in inthlakhlelh vanglai tak a ni awm si, ka dem hran lo che. Mahse in hun tawnin a zir rih lo em a, i kal veleh vat dawn tho alawm" min hnem tum tak hian a ti ve luam a. Inchhung lamah kan inzui lut nghal a.




Inleng neuh neuh kan nei zui a, ka nu leh U Faktei te pawh an rawn lang leh va va tawh. Ka chhungkhat lainate pawh an be lum lam thiam viau a, keimah hian ka lo dawngsawng thiam vaklo zawk a. A zialo tak tak a ni.




An mo ka ni tak nain kan inhrawn tam hman lova, kan inneih atanga kar khat em pawh a liam hmain Lawngtlaiah ka pasal ka zui nghal daih si a. Tunah tak hian pawi la ti tawp. Ka nu leh U Faktei te nen hian kar khat tal lo inhrawn ve ila awmdan tur pawh ka thiam ang a, tun ai hian ka pawh tur ania. An lakah mikhual ang riau hian ka inhria a, mahse anni chuan chutiangin min ngaih ve hmel loh.




Ka pain zanriah ei ve nghal turin a sawm a, an hnial sateh nain an hnial seng bik lova. Zanriah ei tur chuan kan tithlu ta nge nge a, U Faktei bawk a fakawm leh thin ! Chêt ngaihnaah midang a pui zung zung a. A zuanzangin hmangchang a hre si. A thiltih chu a felfai duak duak mai. Ka chhungte pawhin an fak khawp mai.



Inlengho haw hnuah chaw kan ei zui a, zanin hi YMA hun hman tawp zan tur a ni a. Inleng pawh kan nei ve nualin ka ring.



Tunah chuan khawhar lunglen ka la hre lutuk lo, kan la ri laih laih a. Mahse nakinah chuan ka pi hi ka la ngai zual viauin ka ring. Tunah chuan ka intiharh lui a, hrehawm ti lutuka ka awm hun tur chu ka huphurh lawk kher mai.



Zan dar 9 velah hun kan hmang zo a. Ka nu leh U Faktei te pawh an haw ve chiah. Min ngaihtuah em em tih ka hria a, keimah hian ka lawmna te ka tilang thiam vaklo zawk a.



Naktuk lama chawei turin min chah a, ka lo hniallo khawp mai. Helamah ka awm reng chu ka inthlahrung lek lek zawk.



Ka mut hmain Vanmala nen kan inbia a, video call in min rawn be vel ngei a. A thlen tirhin min lo be tawh a, ka buai lai tak a ni bawk si a, kan inbe rei hmanlo kha a nia.



Boxer chauh hain a mu a, a landan pâ lutuk chuan ka hrawk a ti ro vek. A tawngkamah a lung a leng ve viau niin a lang.



"I awm lova, engtin emawni hian ka awm, ka ruak vek" a han ti ve ngial a, a tawngkam chu a inhmeh lo bawk sia, a lawmawm rualin ka nuih a tiza lek lek.




"I thleng tluang em?" ka lo ti daih a, "Tluang a nimai, a khawhar thlak deuh e tih mai loh chu" a rawn ti tha ve mai a.



Nui hak hak chung hian "A hma pawhin nangmahin i kal fo a, tun ataka a khawhar thlak chhan tur a awmlo" ka lo ti fiam a.



Chutah Vanmala chuan thutak zet hian "A hma te chuan khawhar chhan tur i awm tlat hlei nem. Nupui nei tih inhre ve reng chunga mal deuha zinkawng thui deuh zawh rauh rauhte chu khawhar thlak deuh mai asin" a rawn ti thluam a. A sawi dan atang chuan a khawhar ve tak tak niin ka hria.




Sawi mai tura hrelo a ka hmui ka peh fan fan lai chuan "Ka ngai nghal viau che ani" a rawn ti ril leh ruih a. Ka kawchhung a che dawt dawt mai.




Ka ngawi ren rawn a, amah bawk chuan "Min ngai ve tih ka hre mai" a rawn ti leh churh a. Khumah mû in a ban lukham chung chuan min melh ngur a, ka lo nui ta tawp. A ni pawh a nui ve suk suk a, sawi tur hre em em si lovin kan inmelh a, ka lai em em ringawt mai ni. Ani pawh a lai ve viauin ka hria, a tilang tha duhlo mai mai ani.





Kan inbiak zawh dawn lamah chuan chawei tha tur leh tha taka in lo nghak turin ka han chah ve ngial a, sawi tur hlawl ka hrelo atin a ni.




"Thil dang i sawi kual duah a, i rilrua awm ber min ngaih thu i thup daih lawi a" a lo ti bauh a, ka lei ka chhuah vak ringawt. A la nui hawk hawk zui a !




Chutah thutak zawk hian "Lo haw vat la, ka duat ang che " a ti nghet churh a, ka nui var var mai.




Kan inbiak zawh chuan muthilh tumin mit ka chhing vang vang a. Ka mut a chhuak silo, ka ngaihtuahnaah ka pi a lo lut lo theilo a.




Tunah te hian awmdun thei ni ila, ka muthilh hma chu min vengin ka muthilh theih nan thil chi hrang hrang min sawi pui leh awm si a.



Ka biang a rawn lum thla pap a, ka ngai a ni tawp mai. Ka thu chhuak ta thlawt a, ka mittui luang ngiai ngiai chu ka hru hul nghal tawk a. Chunglam hawiin ka mit ka chhing vang vang a, ka mittui bawk a rawn luang leh ta.




Ka kutphah suihzawmin Pathian hnenah ka tawngtai ta thlawt a "Ka pi chu i hnenah i la tawh a, a tawrh thiam dan tal min zirtir rawh. Ka rilru chu a dam, mahse pawm thiam harsa ka la ti lutuk" tiin ka tawngtai ta thlawt a. Ka zâng hawk phah pawh ka hre chuang lo. Mahse nakin zelah chuan rah tha a la chhuah ngei ka beisei.




Zingah ka nu eirawngbawl ka puih laiin ka pum a che thut a, ka luak chhuak lutuk chu uak nghek chungin bathroom lam ka pan nghal vat.



Bathroom ka thlen rual chuan ka luak nghal bawrh bawrh a, ka pum a let bulh bulh mai. Tunlai thil ka ei mumal loh mai bakah ka pum a tha vak lova, chutia ka luak chhuak ta nghek chu ka zang hawkin ka hria.



Ka inphihfai hnuin bathroom atang chuan ka chhuak ta a. Ka pum ka dawm ngawih ngawih bawk, ka chau nghulh thei.



Fridge hawngin tui ka in nghal khawlh khawlh a, ka che zia chu ka nuin chîk zetin min lo melh reng tih ka hria.



"I tha em?" a rawn tih chuan ka lo bu nghat a "Umm...tunlai ka pumpui a dik vak lova" ka lo ti tha ve mai a. Min la melh chîk ngang mai.




"Nang hi...i rai a ni lo maw?" a rawn ti chhuak hlawl a, ka lo melh nghek. Chutah ka nu chuan "Eng nge khatia mi melh vak, i rai anih ka ring tlat" thutak zet hian a rawn ti leh a.



"I ti awm ang lo e" ka lo ti bung nghat. Rai chhan tur ka neih loh zia ka hrechiang em a ni. Ka nu chuan "Eng nge ka tih awm ang lohna, pasal nei lai i nia, i rai a ni hrim hrim. Rai no awmdan te chu ka hai hlei nem, zingah hian luak a chhuak hlui duh alawm. I hmel te reng reng pawh kha a diklo, i rai chiang lutuk" a ti leh zung zung a.



"Ka railo" ka ti ngawt pek a "I hrelo " a lo ti nghauh. "I hrelo zawk anih kha" ka han ti leh ngial a. Mahse ka nu chu a phur hmel tawh lutuk "Tikhan lo awm rawh, i rai thut thei asin. Test kit ka zuk lei teh ang, rai hlauh la tiraw, lusun mangan laiin hlimna min rawn thlen ang a" ti leh mawlh mawlhin a maian hih lai chu a dahfel zung zung a.




Min timangang hle tawh, ka rai miau silo a.



Choka atanga a chhuah dawn chuan "Nu ka railo" ka ti leh ngial a, chiang kek kawka min melh chung hian "Rai pawh chu i va hreh awm ve" a ti bung nghat a. Rai hreh leh hreh loh lam a ni silo.




A hrethiam dawn lo lutuka ka hriat avang chuan "Rai chhan tur ka nei hlei nem" ka ti ta tawp mai. Ka tah a chhuak lek lek zawk. A fanu hian a hming chauhin pasal ka la nei tih hria se a awih dawnlo lutuk.



"Eng nge i sawi awmzia chu?" a ti ta nge nge a, a hma zawng aia chîk hian min en a, "Nang hi..." a tih chuan "Aw...engmah kan la ti lo" ka ti teh tawp a. Ka sawi tum chu a hrethiam vek ang.



Min rawn hnaihchilh nghal a "Nupa nun in la hmang miahlo a maw" a tih hluai chuan tawng zawi turin ka lo khap vat. Thutkhawmna lamah midang an awm ve si a, kan nupa kar la nghet lo lutuk an hriat chu ka duh biklo.




Ka nu chu mangang zeta melhin ka bu ta nghat a. Awihlo fe hian min melh a, "I ti tak tak em ni?" a tih chuan "Aw" ka lo ti tawi tak.



Min melh leh ren rawn a "A tu zâwk nge diklo che u?" a ti teh tawp a. Han sawi mai tur pawh ka hrelo, tu dik loh zawk nge pawh ka hre miau lova. Vanmala'n min khawih a tum miau si lova, keilahin lo tih hmasak hluak ka duh silo.




Chutihrual chuan Lawngtlai a let hma zana thil thleng te, nimin tuk, a haw hmaa a thu min hrilhte kha ka theihnghilh hauh lo. Ka hriatna thazamah hian a la awm vek.




"Tu dik loh mah a nilo, kan la tilo ve tawp" ka ti ta tawp. Chutah ka nu chuan "Khawih a tum miah lo che em ni?" a rawn ti leh hliai a, ka lo ngawi reng thung. Nizan hmasa khan min khawih chu a tum ve ngei chuan ka hria, mahse keimah zawkin ka tikhawlo zo vek kha ania.




"A pa theilo em ni?" a la ti ta deuh deuh a. Vanmala chu ka lo tan ve ta vat "Pa theilo lam pawh a nilo, kan la ti rihlo ve tawp. Mahse..." ka ti a, sawi zui duhlo in ka ngawi leh daih. Lawngtlaia ka let leh huna thil thleng tur Vanmala'n a sawi lawk kha sawi zui kilh kelh ka duh hran lo. Mahni nu te nen hetiang lam sawi chu a nuam fahran lo bawk.




Chutia ka sawi that duh tak si lohah chuan min zilh ta nghat nghat a. "Pasal neih chuan pasalte tana inpek pumhlum thak tur. Thla khat in inneih tawh a, chuti chung chuan nupa nun pawh in la hmanglo ania. Heihi nupa awm dan tur a nilo reng reng. Vanmala hi mipa fel tak mah nise pasal a nihna anga a chanvo i pek loh chuan in inti vuivai mai ang. Sex hi nupa min phuar nghettu pakhat a ni a. Hmeichhia hi chuan kan ngai pawimawh em em lo a ni thei. Mahse mipa tan chuan kawngro a su lutuk. I pasal kha i lakah rilru nghet tak pu tura i duh anih chuan khum laizawl nun ngai pawimawh ang che" a ti ta duah a. Sawi ve tur reng reng ka hrelo.




Ngui nghiaiin ka lo melh ve tawp, min han melh leh ren rawn a "In inneih hma khan ka lo hrilh tha tawk lo che ani" a han ti leh hliai a. Nupui awmdan tur min hrilh zawm leh nghat nghat a.




Vanmala lakah ka inthlahrung zo vek. Ka lakah beisei a lo nei ve ngei awm thin si a, min ngaihchân lutuk vangin chet a la lo mai maiah ka ngai tawh. Lawngtlai ka haw leh hunah chuan tan ka la ve tawh ang ka ti rilru neuh neuh a. Mahse han tih vak ngaihna phei chu ka hrelo.




Tlaiah ka nuin wholesale dawrah inchhung mamawh lam turin min tir a. Ka nulat laia ka scooty ngei mai khan ka kal a. Ka khalh lohna a lo rei ve tawh deuh bawk nen ka thar sar maiin ka hria. Pasal ka neih tak avang khan Rina'n a hmang zui a, a tangkaipui ve khawp mai.



Ka thil lei ho min pack fel sak lai chuan pawnah ka lo nghak a, ka phone ka hmet pah mawlh mawlh bawk.



U Faktei nen kan in text a, vawiin tlaiah chaw ka ei dawn a. Ka chinchang ka hrilh a, heti hian inah ka haw leh ang a. Intifaiin chawei tur chuan ka kal zui nghal ang. Ka pasalte in hi kan in ti a sawi ka la harsat tlat a, ka cheng tam lo ve em bawk a. Ka demawm hranlo ka ti ve tlat.




"Mamte" ti a min ko ri ka hriat vang chuan ka hawichhuak vat a. Rinmawia nen kan inhmachhawn nghal chawt mai.



A mitmeng a sen rum a, thla khat chhung khan zu a lo tlan nasa hle aniang, a hma zawng aiin a cher kuam mai. A hrisel loh hmel ngawih ngawih.



Biak chu phur fahran lo mah ila engtin min ti bik pawh a nilo a "I dam maw?" ka han ti mawihnai ve a. A nui suk a, tunah tak hi chuan a harhfim in ka hria.



"Dam alawm" a ti tha ve mai a. A hnaiha awm reng chu tha ka tih loh avangin "Ka luhsan ang che, ka thil lei ka nghak a" tiin kalsawn mai ka tum a. Min lo au leh rih.




Ka melh leh he haw a, nui leh suk chung hian "Pasal neih chu i ngeih, i hmeltha zual hle mai" pangngai tak hian a ti a. Eng ka hria nimaw "Ka pasal a fel em a" ka ti kher a. A nui suk a, "Nau i pai tawh em?" min melh run chung hian a lo ti khauh. Min nuihsawh deuh tlata ka hriat avang chuan "Ka pai vat ang" ka ti vei nghat a, a lo ner nawk mai.




Be zui duh tawh lovin ka luhsan ta daih a. Min koh lehna pawh chu ka haider hmak. Aizawl ka awm chhung reiloteah Rinmawia hmuh lehzel hi chu ka peih tawhlo.




Ka thil lei khai chunga ka va chhuah leh chuan a lo awm tawh lo hlauh a, ka thaw huai mai. Buaina min thlen leh ang tih hlau reng reng in ka awm a, ka thla a muang tlat lo ani.




In ka thlen a, ka intihfelfai hnu chuan ka chawei na tur in, ka pasalte in, tuna ka in lo ni ve taa kal tur chuan ka intintuah ta a. Scooty a mahni chauha chhuah chu Rinmawia kha ka hmu leh ang tih ka hlau a, Puia ka inthlah tir daih.



Tukthuan ei lai khan ka pain riak nghal turin min ti a "Pasal nei i ni tawh a, dik tak chuan heta i awm zawk daih hi mawi pawh a mawi lo. I lawina te'n an zir em a, sawisep i kai lo zawk anih hi. Chhiat tawhna lam mah nise heta riah reng kha midang mitmei ven a na ve a. Chuvangin zanin chu riak zui daih la, an lawm zawk viau ang" tiin min chah anih kha. Keipawhin ka pawiti lo khawp mai.




Ka va thlen chuan an lo phul hluai a, ngampa taka awm lui turin ka insangmar teuh. Vanmala a tel ve bawk silo, mikhual riau hian ka inhria a. Chu chu an duhdan a ni miah lovang.




Chutia eirawngbawl hova kan titi zui takah chuan ka inthlahdul ve telh telh a, awm nuam deuhin ka awm ve thei tawh.



Vanmala'n chaw kan ei hmain min rawn bia a, zingah pawh khan vawi thum lai min lo be hman tawh tih ka'n sawi hram ange. Min ngai tih ka hai biklo.



Hetah chaw ka ei tur thu a hre tawh a, "I lo inthlahrung leh ringawt tawh em?" a rawn tih chuan min hrechiang ka lo ti khawp mai. Ka beisei ai daihin ka pasal hian min lo chikin min lo hrechiang anih hi.




"Inthlahrunna tur ka nei hlei nem" ka lo ti ve ngei a, a rawn nui huk a "A dik chiah, engmah inthlahrunna tur i neilo i in anih kha" a rawn ti leh thluam a. Min ti thlamuang thin ngawt mai.



Ka riah nghal daih tur thute chu ka hrilh a, phur hluai angin lang lo mah se a lawm tih ka hria. A tawngkam thiamna zawng zawng sawm khawmin "I fel hle mai" tih chu a thusawi a ni.




Chaw kan eilaiin ka nu chuan "Mamte...han inzawt phawng mai ila, nau in keng tawh em le?" a rawn ti a. Ka chawei lai ka hak thelh. U Vensangi mumang atang khan tu mai pawh hian naupai an lo vei anih hi.




Ka phawk lutuk chu a inthlahrung leh deuh aniang "In pai loh paw'n a pawi chuanglo a. Kan thu a nilo a, mahse ka hre chak a, ka zawt mai mai che" a ti luam a.



Min vêngthawng lutuk chu a nuamlo lek lek zawk "Ka la pailo, kan hmanhmawh vak lova" ka ti ngawt pek a. A rilru tur phei chu ka hrelo.




U Faktei chuan min lo chhawn vatin "Nia, nu tûnlaiah chuan an hmanhmawh tawh vak ngai hlei nem. Kum khat tal tawp hi chu nupa chauha inhmangaih nan hun hman tur. Tibuaitu fate awm lova inawm hliah hliah mai tur" a lo ti ve vat a, a nui hak hak bawk.





Chutah ka nu chuan "Faktei thusawi chu a dik viau mai a. Mahse Mamte, in nu ka nihna angin thurâwn ka pe ang che u. In kum a naupangchhe zawk zawk tawh lova, fa pawh nei ula in châwm zo dawn lutuk. Chuvangin indan tih vel kha chu tih duh miah loh tur. Pathian malsawmna an dang bet tlat ngailo. Ka thusawi chu i hrethiam ang tiraw. In nupa nun ania, ka lo sawi ve vak chu a tha viau lo nain naupai chungchangah hi chuan hmanhmawh rawh u ka tihna lam ni lovin muangchang suh u" a ti duah a, min vengthawng tak siin a ngaihdan a sawi tih ka hria a, ka lo bu ve nghat nghat mai.




Nau pai erawh kan la hlat mai sia.



Ka nu te bulah chuan ka riah tlang nghal tur thu ka sawi a. Chutia ngam taka ka sawi chhuak chu Vanmala ang chiahin an lawm tih ka hria. An laka ka beh loh zia an hai bikin ka ring lova. Keimah zawk hian pawh thiam ve ila, kan dik chho ve zel mai dawnin ka hria.



Zanah mut hmain Vanmala nen kan inbe leh a, sawi tur kan hre vak thin silo. Kan inthlahlel ru ve hle bawk si.



Phone tangkainate a rawn sawi teh daih a "Heti hian phone chu awm lo se ka be thei dawn lo che a. Phone a lo awm hi chu a tangkai ngawt mai. Kan nupa tante hlei hlei hian a tangkai zual" a rawn ti a, a thutak bawk si, kei lah ka nuih a za sia. Han nuih chiam kha ka inthlahrung ve bawk si, ka hmui ka pet ngat ngat tawp.



"Han nawr viau che chu ka hreh hle nain lo let har lo la ka ti" a rawn ti leh daih a. Pehhel deuhin haw tawh tura min duh thu a sawinaah ka ngai.



"Naktukah ka lo let mai dawn em ni?" ka tih chuan "A ngailo" a ti leh lawi bawk si.



"Min ngai tak tak lo a nimaw" ka ti nang nang a, "Ngai e" a ti tawi tuk mai.



"Chuti si naktuka ka lo haw i phal chuang silo" ka ti nghat a, "Ka la inpeih lo" a lo ti khauh. Ka meng awk a "Engah chuan maw?" ka ti haw a, a ngawih run run hnuah "Ka duh angin ka la fit tawk lo" a'n ti ngawt pek anih kha !




A sawi tum ka hai bik derlo "Vanmal...dâm viau suh" ka ti nghal hlar a, nui hawk hawk chung hian "Ka ti mai mai anih kha, zanin la la pawh hian lo haw ni la ka che nghal thei" a rawn ti leh deuh deuh a. Ka va haw reuh tak.



"Ka lo haw tawh miahlo ang" ka ti nghat, mahse Vanmala chuan thutak zet hian "Zep lovah chuan naktûkah lo let thei tawh la ka ti. Heti ringawt chuan nuam pawh ka tilo" a ti hniam ruih a. Ka khawngaih reuh tak tak ani. Keipawhin a bula let vat chu ka pawiti hran lo.




Zingkarah kan in lamah ka phei leh a, ka nu te'n chawei turin min sawm leh viau nain ka hnial ta thung. Vawiina Lawngtlaia let ka tum thute chu ka hrilh ve luam a, U Faktei nen pawh min lo pawmpui khawp mai.



Lawngtlai lama let leh chungchangah chuan ka pa ka rawn ve bawk a, min lo pawmpui ve tho mai. "I pasal amah chauha awm tir chu a thalo" a ti ve thlap.



Ka nu erawh chuan min la thlahlel a, "A chawpchilh emai naktuk lamah te let thei zawk la" a ti tung a, mahse ka lo tum ve laklawh tawh sia min dang lui biklo.




Vanmala pawh ka hrilh tawh a, driver min rawn hruaitir tum viau mah se tul ka ti hran lo. Heta tangin sumo pawhin ka kal thei tho a, hun reilo zawk ka hmang thei bawk ang a. A tha zawk viauin ka hria.




Zing dar 10 a chhuan tûrin ka insiam a, kan kal lama suitcase kan ken bawk kha ka hawn leh dawn. Vanmala chuan a kawr hakthlak ho kha a hawn vek tawh thung.




Ka kal hmain ka pi thlan ka tlawh a, thlana awm chu a inhmeh lo ka ti lutuk. A tawp nan ti ang hrimin ka tap leh chiam a, ka thawl hawk maiin ka hria.



Zing dar 10 chiah chiahah sumo chuan Lawngtlai lam panin kan tlan ta a, chuan pui pahnih chauh ka nei a. Nutling leh a fanu tleirawltê an ni a. Ka hre lo nain min lo hre dun ngang mai. Min hriat dan pawh 'Kan DC nupui' tih ngatin min hria. Ka pasal vanga mite hriat nih chu a hrehawm loh kher mai.




Ka lo chhing sek anih ka ring, ka phone rijn min tiharh a, ham bai bai chunga ka en chuan Vanmala a lo nia, ka la vat a, kan thlen chin min zawh chuan pawn lam ka hawi vat a. Ka hriat chiah loh avangin driver chu ka zawt a,min hrilh ang chuan Vanmala chu ka hrilh veleh chhawng a.




Chutah Vnamala chuan "Englo ania, Sangsangi..." a tih chuan a ngawi dat a, a aw atang chuan nuamlo a ti tih a hai theih lo.




"Eng nge ni?" zangkhai deuhin ka lo ti a, ka laka Sangsangi vanga inthlahrun hmel deuha a awm thin hi ka duh tawh lo. A hma ang kha chu nise ka la lungawi lovang. Mahse engkim min hrilh tawh a, ka dawngsawng thiam tawh.



"An inah thlah lawk i pawiti em? Ka office ah a lo kal tehnawlh a, hnathawh tur ka la ngah si, a tap reng bawk sia" a rawn ti chuar chuar a. Min ngaichâng tih ka hria.




"Eng nge a lo tih teh daih a i office ah te?" ka tih chuan "Ka hre hauhlo mai, min rawn tah khum chiam ringawt a. Midang pawh a ti phawklek zo vek bawk si. Driver thlah tir ka tum ngial a, a tang na ve sia ka tilui theilo. Ka thlah a ngen tlat a" a rawn ti leh zung zung a.




Ka ngawih rauh rauh hnuah "Thlah mai rawh " ka ti ta tawp, kawng dang awm hek lo. Chuloah Sangsangi chu naupang mai a la ni a, a nu zawk a nilo bawk a ka pawm zam thei lutuk.




"I thinrim lo tiraw" a rawn ti leh chawt a, "Thinrim lo e" ka lo ti vat. Thinrim chhan tur vak awm hek lo. Chuloah ka hriat loh pawhin ngawi rengin a thlah thei reng a, min râwn thlap a, ka lawm hrim hrim.




Kan inbiak zawh hnu chuan ngaih tha deuhin ka awm zui veleh nghal mai bawk a. Lawngtlai thleng turin darkar 3 vel a la ngaih hmel a, a rei zawk zawk tawhlo.




Kan tlan tluang ang reng a, Lawngtlai thlen hma hretin zun ram thiarin kan châwl zawk a. Motor rui buaipui ngai kan awm lova, driver nen mi pali chiah kan ni bawk a kan zangkhai ang reng.




Reilote hnuah Lawngtlai khawchhung kan lut ta a, mahni in leh lo tak tak awmna ang mai hian ka thla a muang nghal huai huai mai. Vanmala chu ka lo ngai ve tawh hle anih ka ring.



Nufa te kan thlah hnu chuan kan in lam panin kan tlan zui leh a.




Ka phone ka phawrh a, khawchhung kan luh tawh thu chu hrilh ka tum a, a phone a pick up thei thak lo. A buai anih ringin ka call nawn duh ta lova.



Ka bag a ka phone dah luh leh mai ka tum lai chuan U Vensangi call ka dawng nawlh a, ka pick up leh rih, ka tawng hma hauhin "Eng nge a awmzia Vanmala chungchang kha?" a rawn ti tawl a, a ngaihna hrelo fe hian "Eng maw?" ka lo ti haw a.




"Engmah i la hre nange? Taka vawiinah Lawngtlai i let leh tiraw i thleng tawh em? Vanmala chu in inhmu tawh em?" a rawn ti kawkalh leh nawk nawk a. A hmanhmawh hmel bawk si chhan ber tur pawh ka hrelo.




Chutih lai chuan ka nu call ka dawng zui leh a "U Vensang, a hmanhmawh thlak em? Ka nu phone call a lo lut a" ka ti te te phawt a. Mahse U Vensangi chuan "Kan rawn phone chhan che a inan ka ring. Vanmala chu..." a rawn ti leh nawk nawk a. A phili vek ni berin ka hria.




"Eng nge i sawi tum tak? Engmah ka hrethiam hlei nem, Lawngtlai chu ka let leh tawh a, in ka thleng tep" ka tih lai chuan kan in a lang thei chang chang tawh.




Chutah U Vensangi chuan "Tunah lawk khan Vanmala pawngsual case vangin an man, news ah a darh nghal chuai chuai mai" a rawn ti ta mai.




Kan in kan thleng chawpchilh nghal a, mipui an lo kat nuk a, an bengchheng hle bawk.




Hamhaih lutuk hian kan in chu ka melh a, driver pawh chu kei ang thovin a hamhaih hmel khawp mai.


U Vensangi tawng ri ka hre leh a "Mamte, thil awmzia rawn sawichiang teh" a ti teh tawp a. Engmah ka hrethiam lo. Kei aiin a hre daih zawk.



Pa Chhuanan min hmuh chuan min rawn pan vat a, motor atang chuan hmanhmawh zetin ka lo chhuk ve nghal sawk sawk bawk. Phone pawh chu engmah sawi zui tawh lovin ka dah nghal daih a.



Driver chu chuan man ka pefel nghal a, a tlan zui veleh mai bawk a. Pa Chhuana nen chuan kan inhnaih chilh nghal a.




Chutah mangang lutuk hian Pa Chhuana chuan "Mamte, Vanmala hi min tihrilhai lutuk, pawngsual thubuaiah an man tih thu a rawn thang chiam a. Heti hian vengchhung mi thenkhat hovin Bangla ah min rawn luhchilh nghal a. Police vengtu an rawn thlen chawpchilh nghal avangin an la khawih chhe lo mai mai" a rawn ti zung zung a. A ngaihna ka hrelo hle ringawt.




Vanmala chu call ka tum leh a, a la theilo. Pa Chhuana pawh chuan "Keipaw'n call ka tum nasa tawh, a la theilo. Ka mangang hle mai" a lo ti ve vat a.



Ka phone kenlai a rawn rik rual chuan ka en vat a, mahse Vanmala ni lovin midang daih an ni. A rawn rik zawm leh char char a,ka nu te, ka naute pahnih leh ka pa te pawhin min lo call. Ka nu pakhat zawk leh U Faktei te pawhin, mahse tu phone call mah ka la hmanlo.



Thil awmzia ka hrelo lutuk chu ka bangbo vek.

______________*______________*_________


Show post links
Top