Chapter-31
(Last Chapter)
By: Brigida Hugo
Ka va han harhchiang ber mai tak; Sana ka en thuai a. Hmanhmawh takin Khum aṭangin ka chhuk nghal thuai a. Ka sira ka fate tui taka muhil hnâr sêk sêk chu ka melh zauh a, 'kaihthawh ve nghal tur nge la muttir tur?' tih chu keimaha ka in zawhna awm hmasa ber a ni.
Ka thawmah an harh pawhin pawi tihna ka nei lutuk lo bawk a, thawm dim lem lo takin ka tho phei nghal a. Ka thawh dawn khan Sana ka en tawh tho na a, ka chhuah phei rual chuan kan In banga Sana lian intar chu ka melh leh hmasa ber tho. Engmah thil danglam a awm lo 'thawh ka hai' tih zawng chu tuk dang aia thil danglam awmchhun a ni.
Hmanhmawh takin ka che sawk sawk a, eirawngbawl hautak nilo mah se kan hun hman tur inchhawp ka ngaihtuahin thawhhai tuk loh tur ṭum tak niin ka hre thung. Ka phe sawk sawk hi a ni ber a. Thildang zawng aia ka buaina ṭhin a rawn thleng nghal zat! Hetianga hmanhmawh ngaih em em hunah hian ka Ek a chhuak tlat zel. Min hnawh rûn in ka hria a, kawngka bula hmunphiah chu engmah phiat chuang hlei lovin vawi thum ngawt ka ban thlawn tehreng zui anih chu! Ka che phelh nuaih a, ka inthiamlo dawn viau na a, khawvar lama ruah rawn sur cherh cherh khan mut a tinuam bawk em a ni.
Chaw chhum ka chhuangkai fel chiah tihin "Anu....anu...." tih thawm ka hria a. "Aw, Bawihte...rawn tho rawh u. I nau a harh tawh em?" tih pahin a hma aia hmanhmawh mahin ka che sawk sawk reng a. Pindan lamah phone lo ri bawk, a nau zawk ṭap ṭhet ṭhet ri ka hre zui nen ka phi sawk sawk a. Hmanhmawh takin pindan lamah chuan ka lut nghal rawk rawk a.
Lukham bula ka phone dah chu ka ban thuai a, "Aw..ka pa, in rawn chhuak tawh em ni?" ka ti nghal vat a. "Kan rawn chhuak chiah e. In tho nuam em?" ka pa aw ngei maiin a rawn tidam thluam mai chu ka phi hah nen ka hahdam suai in ka hria.
"Hei thawh kan hai pek anih hi...an unau in an rawn harh ve chiah e" ka ti zâng vah a.
"E khai, in mutui hle tihna anih chu...a lawmawm lutuk alawm" a tih lai te chuan ka lo nui ver ver a. Ka pa chu motor ah a chuang tawh tih hriat zetin motor thawm leh midang ṭawng ri nawk nawk ri ka hre bawk a, ka thaw huai mai.
Ka pa rawn zin tur chu ka helhhawlh ni berin ka hre bawk. A fanu te Inneihna hmang turin a rawn chhuk tih ka hriatna chuan keimahah thlamuanna tam tak a rawn theh lâwk a ni ber e. Bawihtea te unau kai chungin pindan chu kan chhuahsan a, ka pa nen ka inbe pah reng bawk. Bawihtea ṭap ṭhet ṭhet ri a hriat rual chuan, "E khai...tlangval an ṭap mai mai ngailo ania. Thil ṭha tawk ka rawn hawn ang che" a rawn tih rual chuan a pu thusawi chu ka hrilh nghal vat a. A pu thil rawn hawn tur a ngaihtuah a ni chêk ang chu; lungawi hmel zetin a ṭhu ngawi ta rân a.
Ka pa nen kan inbe zo a, phone charge tuma Charger ka ban mek lai chuan ka phone chu a rawn ri leh a. Ka bih nghal vat a, ka nu number a ni tlat! "Aw..hello"
"Bawihi, in tho nuam em?" ka nu aw dam dap chuan ka ngaih a ti ṭhalo nghal em em thung. Ka pa aw nem dam dup mai ka thlamuanpui em em lai boruak chu a rawn vawrh darh chuai ni mai hian ka hria. "Kan tho nuam e, engnge ni ta zing kar kara min rawn biak teh nawlh?" nui hak chungin ka lo ti vat a.
Ka nu thawm chu a reh ta hmuk a, ka ngaih a ṭha lo zual ting bawk. A aw a rawn thian ri kharh kharh a, "Bawihi...eng lo ania. Mampuia te nupa an in hau nasa deuh nge ni, nizan ti ila zing lam a ni tawh ang chu, dar hnih vel khan a rawn haw phei a..." a rawn tichuai ruih a.
Mampuia chu ka lainat viau na a, ka nuih a za ru tlat pek anih chu! Ka nui tih chu ka nu pawhin a hai lo nasa, "Engnge nuihzatthlak thil awm a?" a rawn ti bak hlar a. "Aaaa...eng nilo e. A mipa zawk tlan ngai ta kha maw le" ka ti ve deuh ngat a. "Nakinah amah nen pawh inbe ve hrim hrim ula a ṭha ang" ka nu chuan a rawn ti leh thuai a. Ṭha takin kan inthlah a, kei erawhin ngaihtuahna ka hmang nghal viau thung.
Chaw ei ka siam zui a, chaw kan ei lai chuan an unau chuan ka melh leh ralh ralh ṭhin a. Rsa bawk ka mitthla ah a rawn lang zat a. A thisen kai miah lo, ka fate min hmangaihpui thiam em em te chu ka hlimna belhchhah tu an ni. "Bawihte....vawiin chu kalchhuah lawk ka ngai dawn a. I nu Tleipuii hovin In lo nghak lawk rawh u aw?" ka tizui siam siam a. Bawihtea chuan min ngen a chak tih ka hrethian mai. Mahse, naupang kalna awm leh awm loh ka thliar sak nasat ṭhin avangin engtinmah phei chuan a awmdan a ti danglam zui ta lem lo.
Chaw eina ka sengfel laiin Tleipuii a rawn thleng phei der mai. A rawn ri lut nghal bawrh bawrh a. Naupang lahin an lo bawh nghal chat bawk. "Awi...Bawihte...chhun thil ei tur ka rawn lei nghal miah lo. A pawi lo, nakinah kan lei mai dawn nia" tih pahin a bag a hai rak rak a. "Thil leisak zawngchhang suh, i ti pangchang" ka tihlaiin an unau chuan an ei duhzawng an lo thlang leh hman daih tawh. Tleipuii lahin ka thusawi chu a ngaih pawimawh hmel lem lo bawk.
Ka insiam sawk sawk a, ka phone ah Rsa message eng emaw tal a rawn thlen tawh ring ru deuhin ka bih pah zuai a. Ka nu message thar a lo awm vâng mai. Ka kheuh hawng nghal zat a, "Tlaiah emaw zan lamah emaw i hman remchan chuan rawn lang phei lawk teh" tih zawng a ni na a, thu tam tak a rawn keng tel thungin ka hria. "Ok" tih zawngin ka chhâng a, ka insiam zui leh mawlh mawlh a.
Ka insiam zo a, Bawihtei te unau chu engkim ka hrilh sa tawh bawk a, min ngen buai dawn lo tih ka hriat avangin a rûk a chhuahsan ka ngai lem lo. Tleipuii hovin an ri laih laih a, nui sak sak chungin an infiam thawm chu ka ngaithla reng a. Muangchangin pindan aṭang chuan ka chhuak phei a, "Fel deuhin lo awm rawh u aw? Ka rawn haw leh vat ang" tih pahin Bawihpuia biangah chuan ka fawp pah zauh a. Bawihtei lah pek chuan, "Anu hi pa Rsa nen in leng dawn chiang mai" a rawn ti khauh pek a. Tleipuii za fahrana a nui lai chu ka melh ngheng a, "A teuh lo mai...Bazar ah ka va kal lawk anga, ka rawn haw leh vat ang" ka lo ti thuai a. Naupang tê mah nise min fiam zauh na thu chuan awmdan min ti haihchham ve lek lek nia. Pawnlam pana ka ke chhep mek te chu a bah nawk ni mai hian ka hria.
Pawn ka chhuak chu ka thaw halh a, nui sak chungin Rsa ka ngahna tur lam chu ka pan thuai a. Phone ka phawrh zui a, ka kalna tur en ngar chung chuan biak ka tum zui zat bawk a. Mahse, vawi li ngawt ka tih hnu pawhin min chhâng lo. Ka hlauthawng ru deuh viau nghe nghe a. Mahse, a rawn tlan lawklawh anga, a phone ri a hrelo anih rinna lian tak erawh ka nei ve tho.
Darkar chanve dawn ka din hnu chuan hlauhthawnna lian tak ka nei zui a. Phone chu ka en ngar a, 'biak tumin ka bei zui leh ang nge, ka nghak ngawt ngawt ang?' tih chu midang awm velo mah se zawhna ri ring tak niin ka hria. A tawp a tawpah chuan ka nghak thei tawh lo, ka beng bulah phone chu chuktuahin ka ngaithla vang vang a. "Hello" rawn ti ri ka hriat rual chuan ka thaw huai mai. Ka thinphu dut dut chu ka dawm vang vang a. "Engatinge?" ka ti ringawt a, ka thaw leh halh a.
Phone chu a tawp hmak, rang takin ka phone chu ka bih thuai a. A ngaihna hrelo leh hlauthawng ru zetin ka ennawn leh a. Kan inbiak laklawh laiin a hmet tawp hmak tih chu ka hriatchian em em a ni rih mai. Zan lama lehkhabu lungchhiat thlak em em mai, hmeichhe pakhatin a hringnun kawng zawh tluang lo em em mai, natna hrang hrangin a luhkhungna a ziahna, 'Dear Pain' tih chu ka rilru ah a rawn lang zawk a. Ka ngaihtuahna ṭha lo lama vak thui zet chu duhlo in ka lu ka thing nawk nawk a.
Ka thaw halh a, ka mit aṭangin mittui a rawn far zâwih nia. Kalsan nawn leh nia ka inhriatna chuan min fan chhuak vek ni mai hian ka hria. Hriathlua a laka ka natna, engkim liam tawh ka hriatchianna aiin tuna ka natna hi a na zawk fe ang tih chu engmah ka hriatchian hma hauh a ka natdan chuan a tarlang chiang viau in ka hre bawk.
"Kal ila?" rawn titu lam chu ka hawi thuai a. Rsa ngei mai chuan nui sâng chungin a kut a lo phar chhuak vah a. Kan awmna hmun chu khawlai a ni a, mi an vei suau suau tihlam reng reng ka ngaihtuah tawh lo. Ka pawm thlawp a, nghet zetin ka kuah a, "Misual...misual pa" ka ti thâm ṭiak a. Ka ṭah nuih a ni ber zawk mah ang chu!
Kan inkai rial a, min kaihna lam lamah chuan ka kal a ni ber e. Kan inhmuhna tura kan intiamna chhak kual, kan inhmuhna tur hmun tura kan intiamna aṭanga lang phak lo chiah ah chuan a Bike a lo hûng a. A ṭhu kai zui nghal a, ka lawnkai chiah chu ka kut a rawn man a, min kuahtir zui thlawp a. Khaw eng zah pe na chi tak ka nih avangin ka hawi nghal zak zak a. Tlanchhuah pahin, "Engahmah ngai suh, 'chumi te nupa chu an in thlahlel hle mai' ti rawh se" a rawn ti nghut a. Ka kuah nghet salh a, "Ka hua che, misual pa...ka tha a la khûr" ka tihlai chuan motor karah chuan min thlehluh pui nghal zawk a. "Hey...khatiang kha ka duhlo" tih pahin ka ṭhâm tâwk a. A nui huk ka hriat rual chuan a hma aia na a ṭhâm nghek ka chak takzet bawk.
Kan Inneihna a pawimawh tur nisi, hautak lo thei ang berin kan mamawh kan enkual a ni ber e. Inneih zungbun erawh a duh uluk viau thung a, chu erawh ka hnial duh ta bik lem lo. Inneih thutiam nena chham hna ni rihlo mah se ka kutzungṭanga Zungbun awm vâ chu lungawi zetin ka thlek that that a. "A mawi i tihzawng a ni em? I lungawina ber kha thlang rawh" tih pahin min melh ngar a, ka lo nui sak ringawt thung.
Zungbun hrang hrang chu ka bun chhin kual dan dan a. Rsa'n nalh a tih ber chu ka bun chhin nawn leh a. Kei pawh chutah chuan ka lungthlu ta deuh ber in ka hria. "E he...Zothani teh nawlh chu?" rawn titu lam chu ka hawi thuai a. Hriathlua te ṭhenawm nula lo ni reng chuan in, za lo deuhin ka nui lui sak a. "Nang pawh" ka ti liam satliah deuh ngawt a.
"Nia, kan han enkual ve chhin anih hi" a tihlai chuan a bula mipa sang lam, sa pan ve lam chu ka lo melh pah ralh a. "Thla thar lamah aniang" awmze nei zetin Mahmingi chuan a bula mipa chu a melh zawk a. Ka lo nui sak a, Rsa melh ralh pah chuan, "Keini pawh thla thar tir te, Ni 4 ah" ka lo ti thuai a. "November Ni li" ka lo tizui leh a.
Mahmingi chuan nui var var chungin min rawn hnaih a, Rsa chu a chibai zui nghal a. "Hriathlua ai chuan a in nghahna tlak hmel deuh alawm" a rawn ti deuh kher a. Ka nui tawp chiang viau bawk. "Ani hming lam ri kher lo khan a chibai theih in ka hria" ka lo ti deuh hmak a. "Kan inhmu leh dawn nia..." tih pahin Rsa chu ka kalsawnpui ta nghal a. "Engahmah ngai suh aw?" inthlahrung zetin ka ti lâi rût a. Engtinmah ṭawngka chuan min chhâng hran lo, a lo bu nghut ringawt a. Pawisa a pek fel lai pawh chuan Mahmingi te dinna lam chu ka melh leh zuk ṭhin.
Dawr kan chhuahsan chu ka thaw huai mai. Ka ngaihtuahna ka kawm zui leh nghal mawlh mawlh a. Rsa nen chuan nun bul kan ṭan dawn teh meuh mai. Mahse, kan hmalam hunah engnge kan tawn dawn ka hre lo. Rsa hian rilru natna tur tam tak a tawng chho ang tih chu ka hlauh ber a ni. Keimahni nufa, kan hun kal tawh avanga natna a tawn chu ka hlauh ber a ni. Ngawi rengin a kut chelhin ka kal ve reng na a, ka ngaihtuahna erawhin hmun tin kil tin a fangkual thung.
"Theihnghilh rawh, khatiang ṭawngkam mai mai avanga thlah tur che in ka duhthlanna ka siam lo ania" a rawn ti nghut chu ka harh zawk mai. A kutah chuan ka hmer salh a, "Ka lawm e aw?" ka ti sap a.
Bazar ah chuan kan inzui kawi dawt dawt reng a. Kan hah dun viau tawh tih pawh ka hria. "I rilṭam tawh em?" tih pahin min rawn melh zuk a. "Ṭam em em lo na a, chawlh chu ka chak tho mai. Ka ke a kham" ka tih rual chuan, "Ka lo paw dawn che em ni?" a rawn ti fiamthu zui nghal zat a. "Min zo awm lo em mai" tih pahin ka nui hak a. A bulah hi chuan mûk deuh si, rilru thawveng deuh si, hlim veng veng hian ka awm ṭhin. Engtin min ti hliau chuang pawh a nilo. Mahse, keimahah hian thawven rûkna riau te, hlu ve riau ta a in ngaihna ka nei ṭhin. Ka tan a hlutna hi amah ngei pawh hian a hrefiah phak lo hial ang.
Kan chawlhna Restaurant chu ka vawikhat chawlh luhna a ni. A hmun chu a biru viau na a, a lûn viau thung. "Hmun i hre nuam thei si" tih pahin kan ep chiah Bawngkawn lam te, Durtlang lam lang ruih te chu ka thlir vang vang a. "Khilai tlang pawng chho khi 'Pi Hangi Lunglentlang' an tih kha a ni em?" ka ti zui zat a. "Aw, anih khi" a lo ti nghut a. Kan eitur chah rawn thleng chu a ban zui zat a, ka hmaah ka chah ho chu a rawn hûng hnai zat bawk a.
"Khilai hmunah khian ka kal ve chhin chak" tih pahin ka en leh reng a. Ka kut chu a vuan a, "Kan la kal dawn nia. Keipawh ka la kal miah lo" a rawn ti leh sup a. Nui var var chungin a mitah tak chuan ka en reng a. Ka lungawi nan leh ka lawm nan a ṭawng liam ve puat dawn lo tih pawh a mitmeng ah chuan ka hmuh hmaih lo chiang viau bawk.
Sana ka en a, tlai dar 3 a ri ṭep mai. Ka rilru a hmanhmawh tawh tehreng nen Traffic Jam lah a nasa kher mai bawk si. Two wheeler tan pawh a pumpelh mai theih a ni lo. Muangchangin kan tawlh det det a. Kan ding leh chiah tih in ka phone a rawn ri a, Bawihtei te an nih tawh ngei ringin ka phone ah chu ka phawrh thuai a. Ka number hriat loh a ni, "Hello" ka ti nghal vat a.
"Mihur nu....ka fate kha rawn dah ang che. Pasal neihsan a, fahrah a ka fate siam turin eng mihring nge i nih a?" Hriathlua aw ngei a ni. Ka nghilh deuh dup in ka hria, phone chu ka hmet hlum hmak a. A rawn tinawn leh nghal dawn tih ka hriat avangin phone chu richhuak lo turin ka dah nghal thuai bawk a.
"Tunge?" chu zawhna chu min zawh ka rin sa a ni. Dawt han hrilh ngawt chu ka hreh bawk si; Mahse, thudik hrilh ila engang chiahin nge amahah a thawh ang ka hre bawk silo. "Number hlang, a ngawi reng" ka ti ta ngawt a. Keimahah chuan inthiam lohna lian tak a awm nghal zat bawk. Ka phone hûm chu ka bih zauh a, kha number bawk khan min biak a rawn la tum tih chu ka hmuchiang hle bawk. Ka awmdanah a hriat hlau tak chungin thâwk ka la ru halh a, ka thaw a ipik hluah hluah bawk. In a ka awm lai nise, Rsa chu awm lo bawk sela, duhtawka ankhum ka châk dan chu pui tak a ni.
"Naupangho chu an tlei ang chu maw?" tih pahin hmalam min panpui zui leh a. "Tleipuii bulah hi chuan min ngai lo khawp mai. Ka ngaihtuah em em hran lem lo" ka lo ti thuai a. Engmah dang a rawn sawi zui lova. Ka ngaihtuahna ah Hriathlua bak a awm lo. Ka thinrim lutuk chu ka thaw te a sa pap pap hialin ka hria.
"I rawn lut kawi dawn lo em ni? Chaw te ei ve nghal la, ka pa pawh a rawn thlen tawh ka ring" ka ti sawk sawk a. "Zanah rawn phei ka tum zawk ange. Ka ṭhianpa dawr ah pênkawi lawk ka ngai" tih pahin min melh ngur a. A mitmengah chuan eng emaw inthup awm a hriatna ka nei na a, in zawhna hun leh hmun a ni lem lo tih ka hria. "Anih, zanah chuan rawn leng ngei ngei ang che" tih pahin ka vai zauh a. Kan In lam pan chuan ka kal zui a, ka hawi let ngun viau bawk. A tihdan ṭhin ngaiin min la en ngar reng a. Ka hmu pha lo ṭep tihah chuan ka zuk vai leh hram a, ani pawhin a kut a rawn vai ve lauh a. Lungawi veng veng chunga Hriathlua huatna pai ṭûn chung chuan In lam chu ka pan ta sawk sawk a.
In ka luh rualin naupang ṭap thawm ka hre nghal chat. Hmanhmawh takin pindan lam ka pan a, Tleipuii chuan, "A mak mange aw....lo inhau suh u ka tih kha" Bathroom aṭangin a rawn ti lâng lâng a. Ka hmel a hmuh rualin Bawihpuia chuan min rawn pan nghal thuai a, "Anu....a û hian ka barbie khalh lai a paih" a rawn zualko nghal chat e.
"Engatinge unau in inkawm theih loh ziah mai aw...? A hrim hrimin mipa in Barbie tih ziah loh tur ka tih kha..." tih pahin a mittui chu ka hruk sak sawk sawk a. "Bang rawh le, mipa an ṭap mai mai ngai lo" ka ti leh sawk sawk a.
Tleipuii chuan pindan rawn luh pahin, "I nu te Bazar chuan eng tak lei maw?" a rawn tilut nghal bawrh bawrh a. Ka lei ka lo chhuahkhum zuk a, "Enteh, ka ngei zia chu.... Hriathlua'n min rawn bia anih chu" ka ti zâwi sap a. Bawihtei chuan ka thusawi chu a rawn ngaihven nghal hle tih pawh ka hmu nghal zat bawk. "Nakinah..." tih pahin ka mitmei ka hmuh zui zauh a. Tleipuii pawh chuan a hrethiam em em bawk. Thildang kan sawi zui ta luam a. "I pu hi engnge a chanchin le? Vawiinah ka be thei miah lo" tih pahin Phone chu ka phawrh zui leh nghal a.
Ka pa chuan min rawn biak a tum nasa tih ka hmu nghal. Rang takin biak ka tum nghal a. A ri ral ral a, "Hello" fiahlo zetin a rawn ti a. "Engnge in chanchin? Ka rawn be dawn ṭhin che a, i biak tlang theih miah loh a?" ka ti nghal zung zung a.
"Kan motor a chhe pek alawm maw le. Kan chhiatna lai lah kha signal a awm miah lo leh nghal a. Zan dar 8 velah chuan kan rawn thlen hman hmel e" a rawn ti chu ka thaw huai mai. "Tluang deuhin rawn kal rawh u. Naupang lahin an nghakhlel tawh mai si che a" ka ti ve leh thuai a. Ka pa nen kan inbiak zawh rual chuan Tleipuii chu ka pa te chanchin chu ka hrilh ve leh nghal zung zung a. Chaw ei ve nghal turin ka sawm ngawrh viau na a, zan lamah KṬP in tih tur pawimawh an neih thu in min hnial ta ngar sia, keipawhin ka chelh lui duh ta bik lo.
Bawihtei te unau chu ka chhuahsan ngai lo bawk a. Nileng deuh thaw a ka chhuahsan chu an pangchang dun viau mai. Engmah pawh ka ti sawt hlei thei lo, min nâwk dun reng a ni ber e. Ka chhang hawn ei an ngen tlat a, an ril a ṭam lo nasa dawn tih ka hriat avangin muangchangin eirawng ka bawl a. Ka ngaihtuahna ah Rsa nena kan hmalam hun a awm a. Chutihrualin, Hriathlua min rawn biak leh hun huna chhânna pek dan tur pawh a awm tel bawk.
Bawihtei pu nghah pahin ka mu zal a, an unau in phone an en a. Phone entir phal hi chuan min kherh buai lo viau mai a. Mahse, an mit tan a ṭhalo tih ka hriat avangin ka pe thlazen lo khawp mai. Kawngka kik thawm a awm avangin muangchangin ka tho a. Pawnlam chu a lo thim mup tawh tih tukverh aṭang chuan ka hmu thuak bawk. Pindan aṭanga chhuah pahin banga Sana intar chu ka melh pah zauh a. Zan dar 7 a lo pel hret tawh.
Kawngka ka hawn rual chuan Rsa a hmel ka hmu chu ka thaw huai mai. Rin aiin a rawn hma ve riau mai chu a inhmeh lo riau in ka hre thung. "Lo lut rawh" ka tih rual chuan Inchhung lam a melh kual a. "Pindanah phone an en" ka ti sar sar a. Inchhung rawn luh pahin min kuah nghal a, nghet zetin ka lo kuah let nghal a. "Ka rawn hma ve lutuk. Nilengin kan inzui a, ka ngai zual sawt che a..." a ti sû sû chu a hnarah ka piai tâwk a. "Ka duhpa..." ka ti sap a. Duhthawh zetin kan in fawp zui nghal vawng vawng a.
Thawm kan dim viau na a, Bawihtei beng erawh a var em em ṭhin. Pindan lama thawm kan hriat rual chuan kan inthlah nghal thuai a. Bawihtei chu pindan kawngkhar aṭangin a rawn dâk dêk dêk a. "Spy-i" nuih suk pahin a lo ti chu ka nui hak. "Bawihpui, apa Rsa a lokal" ka ti chu an unau in an rawn in um chhuak a ni ber e. Rsa bul an thleng thuai a, a malchung an chuh nghal zat bawk. "A mak bawrh bawrh, i pa Rsa kha in bawh bal vek ang" ka lo ti thuai a. Amah Rsa ho chuan ka thusawi chu an ngai pawimawh hlawl lo, an in dêk nui leh iarh iarh tawh.
Zan dar 8 rik hma hretin ka pa pawh a rawn thleng ve hlawl mai. Amah a damsam lo nen, kawngah an rawn tluang lo bawk nen a hmel a pawr zual in ka hria. "Ka pa, i inbual phawt dawn nge, chaw kan ei phawt dawn?" tih pahin ka tui lum chhuan chu ka suan zui a.
"Inbual te chu a hmanhmawh thlak loh em mai. Chaw ei phawt a ṭha zawk ang. Engpawh ti dawn ila, pum lam hi han puar lah phawt mai sela thil tih a nuam ngai e" a lo ti ve teh duah a.
Rsa pawh a in la mihrang em em lo bawk a. Kan chaw ei chhung pawhin a lo ṭhu ve mai bawk a. Ka pa chuan thil sawi duh tam tak a nei ang tih pawh ka hria. Rsa a awm ve reng bawk a, naupang a be luam ringawt a. Mahse, a mitmeng leh hmel landan ah chuan vei lian tak a nei tih pawh ka hrethiam mai.
Chaw kan eikham a, ka pa inbualna ka siamsak zui nghal sawk sawk a. Chaw eina ka sengfel a, ka sil zui sawk sawk a. Naupang fiam pahin Rsa chuan min melh ru reng tih ka hre ve kar tho. Ka pasal la ni em lo mah se a mit tlun loh ka hlau em em tho.
Naupang an hâm leh bai bai ṭhin a, sana ke melh zauh a. Zan dar 9 a lo ri ve der tawh mai. Zan dang a rawn leng tura a in ṭham hunlai vel chauh a la ni tih ka ngaihtuah tel avangin ka nui sak a. Bawihtei te unau pawh a pu in a be sawm peihin a bawl kual peih bawk a. A pu chu an bawr chawt a ni ber tawh a. A pu in mutpuia a sawm chu ka rin loh takin an lo duh teh mial a. Pindan lamah an inzui lut ta diak a.
Rsa nen chuan kan ṭhudun rân a. Thingpui hâng ka lum sak zawk bak chu in si lek lekin kan ṭhu a, kan inkawm melh melh reng a.
"Engatinge vawiinah khan dawt min hrilh kher a?" tih pahin ka kut a rawn vuan a, min melh ngar bawk a.
"Ka tihpalh" ka ti ringawt.
"Min hrechiang viau tawh turah ka ngai a. I laka ka rilru puthmang ka lo sawifiah tawk lo zawk nge ni?" a rawn ti leh nghut a.
Ka thaw halh a, "Ka tihpalh" ka ti nawn leh a.
"Tihpalh...." a ti nghut a. A ngaihna hrelo zetin ka en reng a. "Kha thu, 'ka tihpalh' tih sawi nana min bum tum zawk kha a ni" a rawn ti chu ka kûn chal a.
"Chân che ka hlau em a ni" ka rilru tak tak a ni ka sawi. Muangchangin ka hawichhuak a, "Nang chân che hi ka hlau a ni" ka ti nawn leh a.
Boruak te pawh an ding ngawi ṭhuap ni mai hian ka hria. Pindan lama mu te pawh an reh ṭhiap mai. Kan ṭhu ngawi reng a, ka mitsir in a chezia ka ngaihven a. Ka thinlung leh ka taksa vai mai chu a ṭawng leh in thu a rawn sawichhuah chu hlauhthawnna in an lo ngaichang vek thung.
"I taksa mawina te, tisa thil te in ka hmangaih ve lo che. I nunhlui a i hun kal tawh te, i hun tawn leh tawh tawh te, tu mihring nen nge hun inlo hman ka ngai pawimawh hek lo. Engang chiahin nge hun i lo hmanliam tih lah ka ngaihven hek lo. Mahse, tun huna kan hun hman mek leh nakin zelah pawh 'dawt' ka duhlo. Dawt hmanga min chelh ai chuan thudik hmang a min chân i thlan ngamna apiangah ka hmangaihna che san zia i hmu zel ang" a rawn ti ril ruih a.
Engmah sawi tur ka hre lo, ka lawm em em rualin ka zak ngawih ngawih bawk. "Ka lawm e" ka ti ta ngawt a. Muangchangin a rawn tawlh hnai a, min kuah hlu hlu a. "Zothan, ka thinlung, i hmuh thiam theih piahlam thleng hian ka hmangaih che" a rawn ti nawn leh chu ka tuiral vek ni maiin ka hria. Ka pawm nghet salh a, min fawhna chu mipa dang fawhna a ang ngai lo tih pawh keimahah hian a chiang em em bawk.
Zan a tlai ṭan tawh bakah ka pa a hmaizah ve deuh nge ni, zan danga a haw hun nena ngaihtuah chuan haw tum hma tak a ni. Kawngka bul thleng ka thlah a, min pawm hnai a, ka chalah a rawn fawp zauh a. "Ka bulah i awm ṭep tawh ania. Tui deuhin mu rawh u, ka phei ange" a tih rual chuan thlahlel takin a kutah chuan ka vuan ṭai a. "Haw lo mai la...mawh" tih pahin a mitah ka en khiau a. A nui suk a, "Ka hawsan lo ṭep tawh che. Ka phei ange, muttui em em ule" a rawn tih leh rual chuan ka dingdihlip âk a, a biangah chuan ka fawp zauh a, "Muttui le, i thlen hunah rawn sawi rawh aw? Tlan chak miah suh ang che" ka ti ve ta thuai a. A kal liam thleng ka thlir ve ta thung a, a kalliam chiah a ka ruak huai zel hi ka hrethiam ṭhin lo. In hmu zo chiah, awmdun zo chiah e tilo hian ka ngai nghal veng veng zel mai hi keimah pawh hi ka in zahpui ru viau ṭhin.
Kawngka ka khar fel chiah tihin ka pa a rawn tho chhuak a. "I nu va be teh. Vawiinah Diktea khan min rawn be luam a" a rawn ti nghal a.
Mak ti zetin ka pa chu ka en reng ringawt a. Mahse, a pawimawh viau dawn tih chu ka pa meuhin be tura min tih danah chuan a chiang reng mai.
Phone chu ka ban a, Bawihtei te mut dawna ka silent kha ka khawih zui leh miah lova. Ka number hriat ngai loh pathum ngawt in min biak an tum tih ka hmu nghal zat. Hriathlua rui lungpuam awm ngaihna hrelo bak a nih ka ring hek lo. Ka nu chu a la meng dawn tih ka hriatchian avangin biak tum chuan ka in puahchah zui zat a. Ka ngaithla vang vang a, ka pa chu ka melh pah ralh bawk a. Thil tam tak ngaihtuah tih hriat zetin a lo ṭhu ngawi rûn a, hnuailam a bih ngur bawk a.
Kan inbiakna thu chu ka pa chuan hre ve vek sela ka tih avangin phone chu kan inkarah dahin Load speaker ah ka dah zui zat a. "Aw...bawihi, in la mu lo nge?" a rawn ti fiah nghal fak a.
"Ka pa leh naupangho an mu tawh" tih pahin ka pa chu ka melh ralh a. A hmaa a awmdan ngai bakin a awm chuang lo. "I pa chu a rawn thleng tluang maw?" a rawn tih rual chuan, "A rawn thleng tluang e" ka lo ti thuai a.
"Englo maw le...tlaiah khan Mampuia hian biak che a duh lutuk a. I pa pawh engkim hrilh turin ka ti na a, a ngam lo deuh aniang. Diktea nen erawh an inbia a ni awm e" a rawn ti leh zung zung a.
"Engnge ni reng reng a?" ka tihlai chuan Mampuia a au lâng lâng a. Ka pa chu ka va melh leh zawk a, an thusawi chu a ngaithla liam puat dawn lo tih a hmelah chuan a lang reng.
"Aw..hello" rawn titu chu Mampuia ngei a ni. "Ummm" ka lo ti ringawt a.
"I sawi kha diklo pakhatmah a awm lo...ka tisual nasa hle a ni. Ka rin ang mihring a ni lo" a rawn ti nghal bawrh bawrh a. A aw aṭang chuan a pangngai zân lo tih ka hrethiam mai. Ka pa pawhin a hai miah lo ang. "Hmeichhe mak tak a ni" a rawn ti bah leh nawk a.
"Engpawh nise, phone a sawi vak chi thil anih loh chu, naktukah rawn leng phei la, ka pa hovin kan sawiho dawn nia" ka ti fel fak a. A ngawi reng a, "Tunah chuan zan a rei tawh bawk nen mu hahdam phawt la. Naktukah kan la sawi ṭha leh dawn nia" ka tizui leh a. Phone chu a tawp zui hmak. Ka thaw halh a, ka pa ngaihdan hriat tum zetin ka melh pah ralh a. A ngawi reng a, a rilru hriat a har takzet bawk. "Mu dawn ang hmiang, ka zun a chhuak riau mai, ka zung lawk ange" tih pahin a tho zui daih a. Ngawi rengin ka ṭhutna ngaiah chuan ka ṭhu ngawi rân reng a.
Ka phone rawn ri leh chiah chu ka bih thuai a. Number ka neih loh bawk a ni, tun ang hun tawh ah; a pawimawh viau anih ka ring. "Hello" ka ti chiah chu, "Hre rawh....mihurnu... Ka call i chhang duhlo vel a maw? Tunge ka nih chiah i hre lo a ni. Ka fate hruai turin ka rawn thleng thuai ang" a rawn ti ṭêng chhak a. Chhan buai ka tum lem lova, tin ther tiat pawhin chu mihring chu hlauhna ka nei hek lo. "Aw le" tih pahin ka dah zui nghal hmak a.
Ka pa rawn chhuak chiah chu thil awmzia ka hrilh nghal vek a. A mitmeng leh hmel zaidam em em ṭhin inthlak rang lutuk chu mak ka ti hial zawk. A ngawi rûn a, ṭhutthlengah chuan a ṭhu ṭha zui hmak bawk a.
"Naupang lo va mutpui rawh, ka lo nghak ange" a ti nghut a. Engmah dang a sawi zui lova, keipawh ngawi rengin pindan lamah chuan ka lut zui nghal a. Mutna ah chuan ka in hûm ruh ṭung a, ka ha chang ka ṭhial ri leh rap ṭhin bawk. Chu mihring nena in hmachhawn chu bikbona zawn chu sawi loh, thleng thuai se ka ti tet tet zawk a ni ber...
Darkar chanve vel a liam ang tih ah kawngka a rawn kik ri dawt dawt a. Chutiang zanrei tawh ah kawngka kik ṭhat pangngai pawh ni lova rawn kik tu awm ang tur chu tunge a nih ang tih chu ka hrechiang em em bawk. Ka tho nghal thuai a, ka pa pawh a ṭhutna aṭangin a lo tho ve chiah bawk. Ka pa chu pindan a lut turin ka zaizirin ka hrilh vat a. Kawngka lam ka pan nghal thung.
Kawngka ka hawn rual chuan ka hrawkah a rawn rek nghal chat nia. Inchhung lamah min nawrlut nghal dawt dawt a. Zu rim nam huam leh chu mihring hmel inhmeh lutuk lam chu ka lo ngaihtuah kual hman vek bawk. Ka pa chu pindan aṭangin a rawn chhuak ve chiah bawk a. Hriathlua meng phawk lutuk chu hmuhnawm a va tling tak, ka lo nui sak a.
"Kan Inchhungah ngei min rawn luhchilhin, ka fanu khati khan i rawn khawih ngam a maw?" a mitmengah chuan nelawmna reng reng hmuh tur a awm lo.
"Ka fate hruai tuma rawn kal mai ka ni" a la ti ngam nia.
Ka pa chu a nui hul huk a, "Engang mihring nge i nih a, ka fanu leh ka tute chungah engangin nge i khawsak ṭhin hrelo turah min ngai em ni? Engkim ka hria a, tunah hian lo awm lo ni ila hmeichhe awmnem zawk chunga i khawsak duhdan tur lah ka hai hek lo" a ti chang rât a. A nui suk hmel phena a fiamthu loh zia erawh Hriathlua pawh chuan a hmuchiang viau ngei ang.
"Ka fate ila rawn ti ngam te hi a mak zawk. Anih leh engtinnge i fanu ngei nisi kha rehhlum i tum theih zawk?" ka aw chu a khûr deuh hlak hlak hial nia. Chulai hmunah chuan chu mihring chu sahsawm vek ka chak hial bawk. Ani aia huat hi he khawvel mihringah hian ka nei lo hial ang.
"Thubuai ah kan la duh dawn nge, ṭha takin i haw dawn?" ka pa chuan a dinhnaih zual sauh a. Hriathlua rawn lut hmel leh tuna a hmel chu danglam tak a ni. Min rawn melh râwm râwm a, "Haw rawh, vawikhat pawh min rawn be tawh lo la, ka fate pawh hi rawn hnaih tum tawh ngai suh" ka lo ti chang fak a.
Hriathlua chu lungawilo zetin a chhuak zui a, hriatchian theih hleih loh in a phunchhuak nuah nuah bawk a. Kawngka ka kalh zui a, ngawi rengin ka let a. Ka pa chuan ngun fe in min lo en reng thung. Ka pa chu ka kuah thlawp a, "Ka pa.....a hun takah i rawn kal a ni. Nang hi lo awm lo ta la...???" ka tih rual chuan ka ṭap nghal hawm hawm a. Ka pa chuan min lo kuah a, ka hnungah a chûl heuh heuh a. "Ka fanu...tunah chuan engkim hmawr i bawk ta! I zalen tawh e, pasal ṭha tak neiin nunphung pangngai i zawh tawh ang" a ti dam thlup a. Kan pafa chuan kan inpawm vawng vawng a...
(THE END)
Thu belh:
Kan story kal lai "DEAR PAIN" chu a hmawr kan lo bawk ve ta reng mai. A tir aṭanga a tawp thlenga min lo chhiarsak tute leh comments lama min ṭawiawm ṭhin tute in zavai chungah ka lawm em em a. Buaina neuh neuh ka neih ṭhin avangin duh ang pawn ka regu hleitheilo anihkha, chutiang hun chhung zawng pawh a min fuih sauh sauh tu te ka tan in hlu takzet. Ka vawikhat ziahna anih avangin a tir lamah khan post dan pawh ka thiam lova, dawhthei taka min hrilhfiah tute leh min dahsak zel ṭhin tute in chungah ka lawm em em bawk e. Ka rinphak bak Likes leh Comments ka dawngte hi mumang a ang rum rum mai. Ka sawi vek senglo, a mimal ang zawnga ka tana hlu em em te pawh in in hriat kha. Kan dam anga, story dang nen kan la in hmu leh turah ngai ila. Nangni pawh lo dam em em rawh u.
Show post links
Top