DEAR PAIN BY Brigida Hugo (Completed)

[Ngaia]

#Prologue:
Hmeichhe pakhat thinlung chhungril hmangaihna rûk sak a ni a. A hmangaih, a in pumpêkna leh a theihna zawng zawng a hlanna chuan chu 'Hmangaihna' chu infiamna lekah a chhuahsak si.
"Ka rawn leng ringawt pawh chu ka va hnawk awm ve? Hriathlua vang kha a nih chuan engahmah ka ngai lo. Ka kawng dal turin a nep lutuk" tih pahin a khi suk a, a hmel a Hriathlua tham lohna lang chiang lutuk chuan min vit zawk thei hial.
"Sawi ve khanglang lo mai rawh, i lêt in a ṭha. Ani in min ngaihsakna chanve ang pawh hi i lakah khan ka dawng ve ngai lo e. Enteh, thei ber emaw hi in ti suh. Nang ang mai mai nilo hi an tam ve a nia" ka ti let leh tâwn tâwn a.
Hmangaihna in a hliam chu duhthlanna kawng pêngṭhuam ah ding in kawng thliar sung chu a thlir reng a. A hmangaih chu tihnat ve theihna tur kawng a zawng a, a rin kawng zawh turin ke a pên ṭan ta.... a thlan kawng chuan a hmangaih chu a tina ang nge, atan natna a rawn thuah hnih zawk dawn?
"Kal vat ang" tih pahin hmanhmawh takin Bike hnungah chuan ka lawn zui zat a, hnunglam ka hawi pah zak zak bawk. Ka thinphu chu a su dup dup a, ka thin dawm in Hriathlua hnungah ka bei thlawp a. Bike ti nungin a tlanchhuak zui thuai a, ka phone ah lai chu phawrh sawk sawk in ka simcard ka phawi zui zat; ka hlauhthawnna chuan min man hneh bawk a, ka khur der der mai.
Hmangaihna hian mihring nunah hlimna, lawmna leh beiseina a siam a, hringnun a khalh ngil theih viau laiin he Hmangaihna vek hian nun beidawnna, manganna leh nun thlakhlelh lohna hial a pe thei tho si...


DEAR PAIN
Chapter-1



BY : Brigida Hugo






Zanriah eikham in kan chhungkua in kan titi laih laih a. Ka nausen laia ka khirh zia leh enkawl ka hautak zia Ka Nu in a sawi chu ka nau te chuan uar fahranin an lo nuihpui bâwk bâwk. Ka Nu chuan a sawithiam kher bawk a, kei erawhin awihlo zetin ka lo ner khum leh nâng nâng ṭhin.






Aizawl Chanmari ah kan khawsa a, ka nu leh pa te hi an la ṭhalai hle. Ka Pa hi Thansanga a ni a, ka nu hi Vanlalruati a ni. Unau pathum kan ni a, kei hi an fa upa ber leh hmeichhe awmchhun ka ni bawk. Ka pianhlim hian hming sei deuh ka nei a, ka Pi sak a ni nghe nghe awm e; Ka pa hian ka hming chu a pawm hleih theih ngang loh avangin, 'Birth Certificate an lak dawnin ka Pa in a thu in a thlak hmak,' an ti; 'Zothansangi' tih chu ka pu zui ta zel zawk. Ka pi in ka hming a sak chu ka zawt ṭhin a, ka pa chuan a sawi ṭha duh der lo. 'Van thengreng lam a kawk ruih,' a ti mai ṭhin a, ka zawt beidawng a ni ber.






Unau zingah ka upa ber a, Kum 24 ka pum ve tawh. Ka nau te hi an tet laiin ka awm tam bawk a, min ngaiin min zahder thiam ve hle. Ka chhang chiah hi Ruatmawia niin, "Mampui" tiin kan ko a, a kum phu lovin a rilru a puitling; kan naupang ber Ruatdika erawh a la naupang chhia ve a, kan in khing tawk ṭhin hle. A naupan deuh lai chuan, "Di-dik" tih loh chuan a eih ṭha duh der lo ṭhin. Tunah erawh, "Dikte" tih a duh leh ta zawk.






Ka Graduate hnu ah zirna chhunzawm tawh lo in ka nu thawmhnaw dawr ka nghah pui zeuh zeuh a. Hmeichhe dang, Inchhung a che tur kan awm loh avangin In lamah ka awm tam zawk thung. Ka pa hi Mistiri a ni a, a kut hnu a mawi em avangin a âwl hman meuh lo; veng ṭhenawm mai ah Workshop a hawng ve bawk. Mampuia hi college lut ve ṭan in, Diktea'n pawl 11 a zir ve mek thung.






Chhun lama ka insûkna ka kâwng a kham riau a, mutzal mai mai tumin room lam ka pan zui ta daih a. Khum a let thla zui tawp in ka bawk ar ar a, ka kâwng kham a zia huai huai mai. Ka phone charge chu pawt phawiin Whatsapp ah ka lut zui zat a, en tur em em pawh ka hre chuang lo. Chhungkaw group leh kan ṭhianho group bak ah Online Shopping ah ka awm leh tawp a, chungho lah chu a reh ṭhap.






Mi status ka en kual mai mai a, ka nui leh kur kur ṭhin. Ka enthla zel a, ka mit la riau thil ka hmu fuh ta chat. Malsawma leh hmeichhe pakhat in kuah riala an dingdun lai a ni. Malsawma hi ka bialpa hlui a ni bawk. Kan inṭhen aṭangin kum chanve lai a liam ve tawh, a hun lai khan ka duh thei hle a; tun thleng pawh hian ka la theihnghilh thei lo. A number pawh paih duh lovin ka kawl ta reng a, ani pawhin ka number chu paih a tum bik chuang lo ni hmiang; hei a status pawh ka la hmu ve zel chu ania.






Ka en vang vang a, an inhmeh ka ti. An hlim dun hmel hle bawk. Malsawma nena kan inzui lai khan tih takzetin ka hmangaih a, ka ngaihsak em em reng a; ka theihtawp ka chhuah ti ila ka sawi sual in ka ring lo. Ani erawh a awmdan pangngai rengin a awm a, min ngaihsak ve teh lua chuang pawhin ka hre lo. Ka hlim nan tia ka duhzawng min tihsak pawh ka hre hek lo. Mahse, a mizia ve rêng ah ngaiin lungawilohna ka nei ngai lo. Tuna a status ang te hi ka lakah khan a hmang ngai hleinem; atan khan ka lo pawimawh tawk lo tih hi ka hrechiang tulh tulh zel anih hi.





Ka phone chu ka âwm ah dah in ka thaw halh a, chu hmeichhia chu ka thîk ka tih dawn chuan tlawmah ka la bawk si. A nihna takah chuan ka thîk a ni ber ang chu! Mitchhing vang vangin kan nunhlui ka chhui let a, ka ngai thar veng veng mai. Ngaihtuah thui ka duhlo, nâ hi a awm veng veng zel. Rilru lak pen nan You Tube ah Mukbang ka en ta daih a.






Ka room kawngkhar kik dat dat thawmah chuan ka harh a. Ka nu min koh lâng lâng ri chu ka hre zui thuai a. A tirah khan ka tho buai lek lek a, ka mutna sir maia ka Phone let bal chu ka en thuai a, zanah khan ka thil en lai ka muthilhsan tih ka hrethiam nghal. Tho chhuak zui thuai in ka hawng vat a, ka nu a rawn lut zui zat. Bungraw lo thleng tur a awm thut avangin dawr lamah kal a ngai a lo nia; kal turin min duh deuh zawk a nih hmel hle bawk. In phihfai zui thuaiin ka in siam vat a, thingpui pawh in hman lo in phak zetin dawr lam ka pan zui ta thuai a.






Dawr kawt a bungraw phur motor lo ding vâng chu ka pan hlawk hlawk a. Zing dang aia ka tlai deuh avangin thupha ka chawi nghal mawlh mawlh bawk. Dawr hawng zui vatin ka nu thawmhnaw lak tur ho chu an hlang thla zui zung zung a. Vawiin chu hna a tam leh dawn tih pawh an rawn hlan thlak lai chuan ka lo ngaihtuah roh roh reng a. Hna a hautak deuh Ni hi chuan ka nu hi âwl hram ka duh ṭhin bawk a, dawr lamah ka chet nilen a ngaih leh hmel ta riau mai.






Pawisa te in pe fel zuiin an kal leh nghal thuai a. Kei pawh a theih ang angin ka in rem ṭha zui nghal thuai thuai a. Thingpui pawh in hman lo a kal ka nih avangin ka ril a ṭam raih tawh mai. Kawngchhak lama an chhangkan rim chuan kaw ruak a rawn belhchhah zat bawk. Ka bag chuh tharh in ka tlanchho zui thuai a. In hnawhpuar phawt ila, hna te pawh a sâwt zawk mahna.






Thingpui tui tak leh chhang kan tharlâm tak ka ei hnu chuan ka harh sawng sawng in ka hria. Pi Puii hi chu eisiam a thiam hrim hrim; a pasal fanau te an tlai thei ngawt ang. Dawr pan thlak leh pahin ka nu ka bia a, ka tlang nghal law law tur thu ka hrilh nghal thuai a; haw buai leh ting tang kha ka peih tawh lo.






Ka che nasa bawk a, ka rawl ṭhüm thei in ka hria. Chawhma chhung chu ṭhut chawlh pawh nei hman lovin ka phi buai a, thawmhnaw hlui dah fel leh a thar ho chhawpchhuah chu ka hna ber a ni. A khât tawkin min dâwrtu an awm ve reng bawk a. Chawhnu lamah chuan ka ṭhu ve hman ta hram e.Chair hnung ngheng in ka ṭhu ar ar a; mi lah chu an reh teh ṭhiap hlawm a. Tlai office ban hun velah erawh ka buai leh hle thung ang, Office bân paha rawn lut hi an awm ve nawk ṭhin.






Ka phone la chhuakin Fb ah ka lut a, Story chhiar tur ka zawng kual nghal dan dan a. Story chhiar hi ka peih khawp a, chhiarloh mang pawh hi ka nei tawh lo a ni ber; changtupa te zûnah hian uai delh delh ila nun hi a nuam ve em em mai chu anih hi. A tak rama zawn rûk dû dû ka chîng fo erawh sim ka duh hle thung.






Rilru pe zeta ka chhiar laiin Whatsapp lamah message a rawn lut zut zut a. Mak ti fê in ka en nghal thuai a. Group thar ah min dahlut a lo ni. 'Tunge min dahlut ve ringawt?' tia ka en chu khaw hran daih a ka ṭhiannu Baby a lo ni. School kan kal ve lai khan kan ṭhenawm mai ah in an rawn luah ve a, kan in kawm nasa viau ṭhin. Chhungkaw harsatna avangin a kal chhunzawm thei ta lova, kan in hmuh lohna pawh a rei ta viau mai; Phone ah erawh kan la.in be pawl ve reng. Min lo welcome thlum vel lutuk chu ka nui hak, "Ka lawm,"' tih zawng sawiin ka chhuak zui leh daih a. Thu pangngai tak an sawi dawn lo tih ka hrechiang a, nawi kual chiam hi ka peih ve lem lo bawk.






Dawrtu neuh neuh ka nei ve leh ṭan bawk nen Story lam pawh ka ngaihtuah zui hman tawh lo. Dawr khar hun thlengin ka buai tluan ta zak a ,ka in hralh ṭha thawkhat viau bawk. Taxi la in ka haw zui thuai a, ka ril a ṭam tawh hle. Chaw ei ah min lo la nghak ṭhap a, ei zui thuaiin vawiin lam ka in hralh dan ka sawi zui mawlh mawlh; ka nu paw'n min fak ve luam.






Inbual pahin hla ka ngaithla a, ring zetin ka sak pui lâng lâng a, ka chhungte hian, 'Bathroom singer' min ti fo mai. Kawngkhar rawn kik ri dat dat chuan ka zai lai min ti tawp chawt. Beng ka dawh hâ a, Diktea a lo ni. Rei min ti leh hle tawh ngei ang. Che zui thuai thuaiin ka chhuak zui vat a, min lo melh rûn rûn pah chuan "Nangma pual hian bathroom nei hrang la a ṭha ang," ati nghut a, ka duhthusam a ni.






Tleipuii bia in thawmhnaw thar kan neih thu te ka hrilh a, rawn kal vat a tum thu a sawi ve nghal zat bawk. Ani nen hian tet tê aṭanga inkawm kan ni a, veng ṭhenawmah in lian tak sa in kum tir mai khan an in sawn ani. Thawmhnaw uar ngang hi a nia, a rawn lawr leh vat ang. Mu chungin phone bawk ka en leh a, zan lamah hi chuan tih tur a awm em em lo bawk nen phone ka khawih nasa thei hle. Group thar pawh a lo lûn khawp a, ka lut ve leh chhin mai mai. Rik ve hluai erawh ka tum lem lo.






Ka enthla dan dan a, hmeichhe pakhat bialpa ṭhen hlim an hnêm hlawm niin ka hria. Ho ti zetin ka enthla ve ta zel tho a, ṭhiannu Baby pawh a hnem nasa ber tu te zingah a tel. Number pakhat aṭang chuan a rawn lut ve leh a, "Nakinah ṭha deuh i nei leh mai ang, ṭawngṭai ṭha la; keipawh min lo dil kep ve la" tih a ni. Ka nui hak a, ngaihzawng te in dil kep tur a han tih chu; mipa lehnghal. Ka en rei peih lo, You tube lamah bawk ka ṭuan zui leh daih.





"Mi thar nu, ri ve ta che?" ka message dawn chu tunge a nih hriat tumin ka en vat; ngaihzawng dil kep ngai pa kha a lo ni.




"Sawi tur ka hre ve lo," tih tawp in ka chhâng let thuai, hre ve miau hek lo le.




"I rilru a lang ang ang kha sawi ve tawp la, kan lo chhunzawm luih luih mai ang," rawn ti ve leh in nui lai emoji a rawn dah tel tuarh a.



"Engmah a lang lo, a lan hun ah le," ka ti ṭha ve leh mai bawk a.




"Ni rawh se, a lan hun ka lo châng reng a nia," emoji nen bawk a rawn ti leh a, ka chhang zui peih tawh lo. Ka chau ve riau a,mutchhuak in min zêm chiai chiai mai. Muthilh mai tumin ka in siamrem a, ka chhîng zui nghal vang vang a.





Ka muhil tui hle a niang, ka harh leh meuh chuan zing Dar 8 a lo pel duai tawh. Inrinni a ni bawk a, min kai tho hma duhlo te pawh a niang. Ka tho zui thuai a, a lo reh duk. Pawn ah chhuak in ka hawi kual a, ka pa chemte lo tât mek chu ka hmu thuai. Ka pan hnai thuai a,rawn hawi chhuak in ka nu leh ka nau te chawhmeh lei tura an kal thu min lo hrilh vat a. In phihfai turin ka lut leh a, rawngbawl an lo peih diam tawh bawk nen hmanhmawh lem lo chuan ka in tifai zui a.






Ka nu te bazar pawh an lo thleng har lem lo, zingah dawr kan hawn loh avangin chaw ei vat a hawn vat a ngai. Keimah bawkin ka nghak leh dawn a nih hmel, chaw kan ei zui thuai a; Mampuia'n min puih a tum a ni awm e. Class an kal loh ni chuan dawr lamah a ṭangkai ṭhin hle.






Kan unau a in zuichhuak hnak hnak in Taxi remchang kan melh pah reng bawk a. Inrinni hi chuan motor ruak a vang ve deuh ṭhin. A ruak rawn tlan pakhat chu hmu fuh hlauh in kan lut zui thuai a. Ka hmanhmawh ru hle; zing kar mi bazar huna kan in hawng lo chu ka ui a ni. 'Min lo kaitho se ṭha mai tur a nia,' te ka ti leh hnuhnawh.






Kan in hawn tirh phat aṭangin rawn lut an awm zui nak nak reng a. Mampuia pawh a phe buai ve char char hle. Ka nu hian midang chhawr vel hi a a duh tlat lova, kan hah phah deuh ṭhin a ni. Hmeichhe thawmhnaw hi hralh a nuam viau, mamawh lem loh thleng a lei hram tum tawk an lo awm ve zel bawk a; keini tan lah hlawkna a lo ni ve zel bawk.






Zan Inkhawm kan duh avangin kan in khar har lo, Inkhawm hi kan ngaipawimawh ve viau a; harsatna lian tham a awm a nih loh chuan kan ṭhulh mai mai ngai lo. Sunday chhun a eitur in Noodles leh chhang vel kan lei haw pah a, kan in khai bawr ṭeuh mai.






In kan luh rual in ka nu âng hlak hlak thawm kan hre nghal a, ka nau nen chuan kan in melh ralh ralh a. Dawhkan kîl in Diktea a lo ṭhu tûm bûr bawk. Eng emaw thu ah an lo in hnial leh tawh ani ngei ang; ka pa erawh in bengkhawn lo zetin TV a lo en mai mai thung. "Engnge ni a?" Mampuia'n a tih rualin ka nu chuan, "Kha, School bân a tum leh tawh a nih kha," a lo ti hlak hlak a. Diktea lehkha zir peihlo lutuk hi kan buaina a ni fo. A khât tawk in School bân a sawi fo mai, a puitlin loh thlak ṭhin mange.






Zanriah kan kîl laiin ka pa in a zilh hlak kha. A ngawi reng a, chaw a ei mawlh mawlh. Kan unau zingah a luhlul fal nalh, kei phei chuan tihngaihna ka hre ṭhak lo. Chaw eikhamah Inkhawm turin kan in siam sap sap a, thurual pui tur em em ka neih ṭhin loh avangin ka nu nen kan kaldun leh mai aniang chu; a bulah ka ṭhu ve mai zel.






Inkhawm a rei lo, kan thusawitu khan sawi em em tur a hre lo a ni mahna; a bei tawi ṭha tek tawk khawp mai. Kei erawh ka muthlu hman lek lek tho, ka chau ve deuh ania nge. Kan haw tlang nghal nal nal a, mut thlawp ka châk; ka period hnai bawk nen ka na ṭhêm ṭhûm mai.





Ṭhut pawh ṭhu zui peihlo in ka mu lut nghal daih a. Ka phone charge ka phawi a; ka enkual nghal den den a. Thil danglam tehchiam hmuh tur a awm lem lo. Private message ka dawn chu ka hawng zui zat a, a hma ami tho kha a lo ni.




"I rilru a chak vaklo a ni maw?" a rawn ti deuh tâwng a, teh ngawt chuan...




"Engvangin?" ka ti let vat a, a en mai lo. Group a min add na lam erawh an ri char char thung, sawi tur an hre khawp mai.





Ka story chhiar hmabak chhiar in a mood ah ka chêng chho leh ṭan, ka ṭahbelh riau a; changtunu te chan hi keimahah in hmehbel vak ka ching fo. Ka ṭahpui nasat avanga zing a lu na bur a ka thawh chang lah a tam, a ziaktu te'n an thiam ṭhin bawk em a ni. Ka message tone a rawn ri leh tlang mai, notification ah chuan a rawn lang zui bawk; kha pa kha a ni tih ka hria.






Ka chhiar lai chapter ka chhiar zawh ah ka hawng ve ta chauh a. Ka zawhna pawh chhâng lem lo hian fiamthu tawi te te a lo awm thla ṭeuh. Ho ti zetin ka chhiar thla zel a, ka nui leh hak ṭhin; a ho hlawm lutuk chuan ka nuih a ti za a ni ber.




"A va ho hlawm tak" tiin ka chhâng zui a, tun ṭum chu a lo en rang viau.




"I va chhiar rei ve? ABC i zir chawp nge?" a rawn ti ve leh; mai mai chuan...




"Ka ngaihpawimawh zawng ka chhiar hmasa a," ka ti lêt deuh kher a, ngeiawm chhuah châkna rau in min man tlat.




"Khawvel thil ah hian buai viau teh suh u" a rawn ti. Hmm..ve lutuk chuan.... A thil rawn thawn ho khan thutak an pai bik der silo a.




"I thu lo," tih ringawtin ka chhâng leh hram, han ngawihsan ve mai awm; ngawi zawk nih ka tum bik der lo.




"Khawi veng nge in nih ve a? Nangmah chauh hi ka hre lo. Keini chu 'Leihlawn piah ah' kan awm" a rawn ti leh, chutiang veng a awm âwm pawh ka hre bawk silo.





"I hriat ngai se ka hrilh tawh ang che, mu rawh" tia chhâng lêt in ka chhuahsan ta daih a. Ka mut a chhuak, muthilh tumin ka in lukhup zui hmak a.





Zing hma tak ah tho in Buhfaiṭham ka khawn a, an thawh tam thei sia; kal nawn a ngai ve ziah. Step kal ngai a nih phei chuan tlem te chauh thawh se te ka ti ṭhin, a rit thei si. Ka nghawng te hi a tawi vek zelin ka hria. Khua a dur deuh khup bawk a, fur in ṭan chho dawn tawh si; rin aiin ruah a sur ṭha duh lo. Ruahtui tlem kum a ni dawn anih rinna ka nei, khua a ṭha rei tawh em mai.






Hmanhmawh takin ka tlan haw a, chaw ei hma a inbual ka duh. Tui min lo lumsak sa vek bawk a, ka in tleuh puat a. Ka inbual zo, bathroom aṭanga ka chhuak chu ruah a lo tla sep sep a. Khaw duai duk nen, mut mai mai a chakawm mai dawn dawnin ka hria. Ka in tihfel hnu ah chhung Inkhawm kan hmang a, chaw kan ei zui thuai a. Ruah pawh a tla tam telh telh a, Inkhawm kal dawn laia a sur vak ka hlau ngei mai. Khaw chêng tur ang maiin khua a dur nghet tlut bawk, a mak teh thut mange.





Ka puan bih tur a ka lakchhuah vek tawh pawh ka thlak leh daih a. Rin aiin ruah chu a sur duh ta phian a; min ti phûr lo zo vek. Nihliap khumin kan kal a, thli a thaw tel deuh bawk nen; hul kim a har viau. Biakin bathlar ah in siamfel in ka lut zui thuai a, kan ṭhutna lam pawh a la thawl viau. A hnunglam chuh in ka ṭhu zui thân a, an khuang vuak ri te chuan ka mut an ti chhuak nghal rawih rawih in ka hria.





Zirlai kan zir chhung zawng ka muthlu a ni deuh ber a. Khaw awmdanin a zir bawk a, ka riak lut a ni ber e. Ban hla erawh uar fahran a ka sak ve leh tak kha.





Ban veleh kan haw rual ṭhap a, ka nau te pawh an leng peih bik lo aniang. Kan noodles lei sa te chhum in kan unau in kan ri laih laih a, thak hi ka ngam sia; anni thung chuan tui nen ṭangkawp in an si pui hluam hluam. Kei erawh ka duhthusam zân a siam ka ni bawk a, ka ei tui viau. Chawhnu Inkhawm kan tum lo tlâng a, ka nu leh pa erawhin Inkhawm leh hram an tum. Ka pindan lam panin ka mu zui ta daih a, tun dinhmunah chuan ka châk ber a ni bawk.





Ka phone ka en a, whatsapp ka lut fel chiah tih in message ka dawng nghal zat. "Inkhawm ve ṭhin la?" rawn ti ringawt tu chu ka hrechiang tawh hle.




"Inkhawm zawk ta che? Mi Inkhawm leh khawmloh enthla ni awm hrim a," ka ti let nghal zat. He pa bulah hian ka ngawi mai mai thei lo. A hmaa hming dahlo khan a lo dah ve tawh bawk, Hriathlua...





"Ka lo enthla reng che aniang, kan tlar ṭhutna a chhia a; ṭhutna tur kan nei ve lo a," a rawn ti let zawt zawt, hnial khân te hi a hria a nia.




"I chhuanlam a fahrah em mai, i peihloh vang a nih kha," ka ti leh hram a, a typing mawlh mawlh laiin Tleipuii call a rawn kal ve chiah a; ka laksan ta daih.




"Awi, rawn len ka tum a..khua hi ka ngei lutuk" a rawn ti nghal bawrh bawrh a.




"Nia, a chhe ringawt a; ngeiawm tak tak. Lo lêng tho la?" ka ti let thuai.




"Aaa, chhuah peihawm loh tawk lek in a sur bawk sia; naktukah a zia deuh leh dawr lam ah ka la rawn kal zawk dawn nia," rawn ti ve leh in eng eng emaw kan sawi leh hnu ah kan in biak na kan ti tawp ta chauh a.





Message a lo awm leh vâng tawh, "Ka chhuanlam lo, a chhe tak tak,"



"Sawi tur i hre leh tawh lo ani maw?"



"Min lo ngai lutuk lo la, zanah ka lo be leh ang che"




Zet zawt hian, chhang let peih tawh lo in Story ka chhiarsan ta daih a.





Ka lo muhil daih chu niin, ka thawh leh meuh chuan tlai Ni tla tur a lo lang suar suar a; lung a ti leng veng veng mai. Ni tla tur ka hmuh hi chuan hmana ka lo thlir liampui ve tawh ngei kha ngaihtuah chhuah chang ka nei ṭhin. Hlim takin a nun a hman ngei ka ring, ka ngaihtuah thui duh lo. Tho chhuak thuai in choka lam ka pan vat a, ka nu a lo che fel leh diam tawh. A theihna ang ang ah hi chuan min duat in min âwl hneh ṭhin teh e. Mahse, inchhung chet leh hmeichhe thiam tur thil ah erawh min thiam tir vek thung.






Zanriah kan kil laiin Diktea'n Bike a ngen leh mauh mai. "School ka kal zawm dawn chuan kalna tur ka duh ve," tih ṭan in a ṭang ngar mai a. Mampuia erawh a ngawi reng thung, ani hi chu a puitling ka tih kha. Ka nu in ṭul a tih loh zia thu a sawi khum hrep hnu ah titau chungin a thleng a chawi nalh, a hahthlak ṭhin teh e. Ka pa erawh a ngawi reng thung a, a theih chhung chu ka nu kutah hian min dah deuh tawp a, ka nu in tihngaihna a hriat loh tâwp ah a in rawlh ve chauh ṭhin. Ka pa a inrawlh ve tawh erawh chuan thu tawp a ni tih kan hria, kan zawm ngei ngei ṭhin bawk.






Zan Inkhawm pawh ka peih leh lo, Korean serial en in ṭhutthleng ah ka bawk zâl mai mai a. Ka nau te erawh Games an khel in ka hria, pindan lamah an tawm thung. Ka message tone bawk a rawn ri leh; mahse, ka rin loh deuh in Malsawma a lo ni. Ka hawng zui vat a, "Bhabi, i damṭha em?" tih ka chhiar rual chuan ka nui hak a. Malsawma nen hian hming pangngaiin kan in ko ngai lo a, 'Bhabi' min tih chuan 'Bhai' ka ti ve mai zel.





"Dam ṭha alawm, in ṭha zawk maw?" ka ti let thuai. Han chhan duh loh kual vel ai chuan engahmah ngailo ang taka ka lan khan ka ropui riau in ka hre tlat.





"I ngaihawm ṭhin, ka ṭha a ni mai," a rawn ti let ve leh a, ka chawl det. 'I ngaihawm ṭhin,' tih lai chuan min dek zar mai. Ka la ngaih ruk ve veng veng ṭhin kha a ni miau a, ka indem hran lo.




"A lawmawm a nih chu," ka ti leh tawp, ka biak vak chuan ka lung a leng dawn tih ka hria. Ani pawh a reh zui ve leh mai bawk.





Ka film en pawh ka en tui tawh lo, rilru a rawn ti peng zo vek. Pawnlam a ruah tla seng seng thawm nen chuan lunglen a kal kawp a, ka ṭah te lam lam a chhuak in ka hria. Tho hluai in ka phone ka hmet êng leh zat a. Malsawma ka ngaihna chu thaibo ka duh a ni ber. Whatsapp ah lut zui zat in min rawn be ve fo tu number zawn ah chuan ka tawp chat a. "In bia ang," ka va ti thâwr, a online reng; a en har hrep lehnghal.






Tui in turin choka lam ka pan a, ka phone chu ka bih deuh sek bawk a. Chutia ka va ti ringawt chu ka in thiamlo leh hnuhnawh a, zaklo riau hian ka in hre bawk. Delete leh mai ka tum lai takin a rawn en ve chiah ta bawk nen ka awmdan a laklawh kual ta vek. A rawn typing chu ka nghak ta ngawt a, ka zak ru chem chem bawk.




"Min lo ngai lutuk suh ka tih kha, min lo nghak ve ṭhin la?" a la rawn ti zui, ka zah a ti zual.




"I chhia," tih ringawt thawn letin dawhkan ah ka phone chu ka dahthla hmak a. Engvanga lo va be thawt thawt nge maw ka nih? Ka mizia a ka duhloh ber chu ka thil ngaihtuah chhuah thut tih nghal rum rum ka chîng hi a ni. Ka inchhîr fo rêng bawk a; tunah pawh ka inchhîr leh mek chu a nih hi.





Kawngkhar a rawn ri rak a, ka nu leh pa an rawn lut zui zat. An Inkhawm ta hram kha ania; a vawt anti ve viau ang. Thingpui lum turin min tir zui nghal zat a, ka chhuang nghal sawk sawk a. Ka message tone ri pawh ka hre reng, ka en duhlo lui a ni ber. Thingpui tak ṭha ngek ngawk a ka siam hnu ah ṭhutkhawmna lam ah ka chawi phei zui thuai a, ka nu leh ka pa an lo titi dun barh barh a; Ar vulh chungchang an sawiin ka hria, ka bengkhawn peih chi a ni lem lo.






Ka phone ri chu ka pan zui thuai a, min lo call tu ka hmuh rual chuan ka ner lui sak a. Chhâng duh lo in ka rik ral tir ṭhak a, sawi tur ka hre dawn chuang lo bawk a, rik ral tir kha pawi tihna ka nei lo. Mahse, a rawn ti nawn leh, room lam panin ka kal zui thuai a; huphurh ru zet in ka la ve ta hram, "I la duh lo lui a ni maw?" a la rawn ti zui, ka ṭah a ti chhuak zawk.




"Engnge min lo call ve ringawt?" ka ti hlar rual chuan a bul lawkah zai thawm a awm tih ka hria.




"Min ngai sia, ka rawn hnêm lawk ang che ka ti," a la rawn ti zui tak deuh deuh a. A "aw" chu ka rin aiin a thûm lo. Story-a a changtupa te "aw" ang turin ka lo ngai leh hmanhmawh.



"Ka ngai lo nasa lutuk che, ka rawn tisual anih kha," ka ti ve leh hmiah, keipaw'n ka awih lo.




A nui huk a, "Zandang ah chuan ka rawn be hmasa zel tawh ang che," a rawn ti ve leh, ka nui ve hak. Phatna tur dang ka hre tawh lo, ka dang chiang lutuk tlat. A bul vela zai ho lah chu an thiam em em lo bawk nen chhuanlam ah hmangin ka nuihpui ta chiam a; ka rin ai daihin ka hlimpui ta phian lawi a.





Eng eng emaw sawiin kan in be ve ta reng a, "Ka zai ngaithla rawh" a ti thul. A zai ṭhang a niang, a thiam phian. Midang ho te chu a cousin te an nih thu te a sawi, mipa hlang an ni ngei ang; an thawm a ṭha mam mam khawp mai.





Mut hmunah chuan ka ngaihtuah neuh neuh a, zahna bawkin min rawn tuam nawn leh a. Ka hriat ngai miah loh mipa lehnghal ka vawikhat biakna a ni bawk, zak theilo ka in ti ngawih ngawih pawh chu a awm viau. Malsawma ka ngaih veng vengna erawh a zia huai thung a, 'zahna phêna malsawmna' te ka ti kual ta mai mai, ka in hnêm chawp a ni ber.





Zan danga ka mut hun aia rei ka meng tawh, ka mit a thîp ṭhûm tawh bawk. Ka naupan deuh laiin mitna nasa zet mai ka kai a, khata ṭang khan ka mit hi a thîp na ngut ngut fo ta mai. Ka mengrei hlei thei meuh lo ṭhin. In khuh ṭha sauh sauh in ka mu tawm chal a, mumang nuam tak neih in beisei rân in ka chhîng zui ta vang vang a.






Zing Ni chhuak hmuh tur a awm lo, khua a dur khup a; a hneawm ṭan ta viau. Zing a dawr hawn pawh kan peih ta lova, chaw eikham lam ah muangchangin kan in hawng ta fo mai. Ka nau te erawh School chawl thei an ni lo a, Diktea tûm bûra a chhuak chu ka khawngaih ru reuh. Ani hi chu a tê ber tih takah kan lo duat ṭhang ve a, keimah hian ka awm tlei a ni deuh ber bawk. Han sual ve deuh ṭhin mah se ka haw phal meuh lo. Mampuia erawh sawisel ngaiin a awm ngai lo thung. Ka nu leh pa te pawh a lakah hian an innghat ru hle tih ka hria.






Chaw ei kan siam laiin ka phone charge a ngai tih ka hrechhuak a, room lamah ka lut leh rih. Charger a vuah chungin ka enkual thuak, message lo awm vâng chu ka hawng nghal vat bawk.




"Morning, Bawihi," Hriathlua message a lo ni. Ka phu deuh dawt in ka hria. Engtin emaw deuh hû hian ka awm in ka hre bawk. "Bawihi" tih lai chu ka chhiar ngun viau mai.




"Morning" ka ti let ve a, ka hmet thim zui bawk. He pa nen hian duh aiin kan in be tam ta, ka duhloh ruk deuh erawh ka ngaina dawn tlat a ka in hria chu a ni. 'Ka hriat ngai loh mipa hi ka ngaina tur a ni ngawt lo,' tiin ka in fuih mawlh mawlh a.






(to be continue.......)


Show post links
Top

[Ngaia]

DEAR PAIN
Chapter-2




By : Brigida Hugo






Dawr lamah bawk ka awm leh a, Tleipuii a rawn kal mek tih ka hriatna chuan tlêmin min ti zângkhâi hawk. A thawmhnaw duhzawng tura ka rin ho chu ka lo dah hran sak thlap bawk a. Hriathlua nena kan in biak hluai zan aṭang khan zan hnih a liam leh tawh, zing tin 'morning' a rawn tiâwl lova; ka chhâng lêt tawh ngai lo thung. Ngainat vak ka hlauh vang te pawh a ni mahna!






Nu upa lam thawmhnaw lei tum ka enpui mawlh mawlh laiin Tleipuii a rawn thleng a. Chips leh Fanta bur lianpui a rawn khai lut ṭun mai. Min nghak lawk tura hrilh in thawmhnaw chu ka enpui zui leh thuai a, a duh khirh reuh phian leh nghal a; a tawpah chuan kawrlum phiar fual nalh zet chu a thlang ta nge nge e. Ka thaw huai mai, sawisel tur kha a hre ve bawk a; a ṭawngkam hriat a nuam lo lek lek ṭhin.






Tleipuii tana thawmhnaw ka lo dah hran sak ho chu pawm bawr ṭân in a hma ah ka theh thla hnawk a, a lo en nghal thuai a. Engpawh ha se a pian a nalh a, a hleitling zuaih bawk nen a mawipui em em zel. Ngaizawngtu hi a nei thei em em a, ani erawhin a ngaihsak lem lo. "Ngaihzawng neih loh a nuam zawk," a ti ve tlat a, a dik viau in ka hria.






Uluk taka a thinkual chiam hnu ah pahnih chu a la hrang tharh a, a inhmeh lehpek viau. A chips rawn ken chu hawng mawlh mawlhin a chawhpawlh kual vel a, kan awmdun hi chuan a tur ah kan ngai; nepnawi ei pah a titi vel mai mai hi nuam kan tih zawng a ni ve a. Sawi tur kan ngah leh pek viau tawh a, kan pahnih chauh paw'n ṭawng hi kan in chuh deuh reng zel.





Malsawma chanchin a rawn sawi chhuah zeuh chuan ka beng a ti vir, zawh zui vak ka duh bik silo a; hriat zui zel erawh ka chak hle thung. A bialnu nen an inṭhen a, a la na viau a ni awm e. Kei min ṭhen khan na âwm ang pawhin ka hmu lo. A ngaihsakna tak tak kha ka dawng phak lo a; a rilru chanve in min ngaizawng ni berin ka hria. Natpui viau nachhan tur kha a nei lo tlat a, tunah erawh a lo la thutak ve ta viau a ni mahna.






An veng ami, mi ang pha zân lo in a ngaihzawn thu a sawi chu kan nuihpui nasa hle. A nupui chei deuh ti tih a ni awm e. A sawi thiam vei bawk nen, kan nui nasa viau. Kan dawr kawt a lokal te pawh in ṭhen ṭha in min pel zel mai. A khât tawkin dawrtu kan nei a, min lo pui ve zel bawk a, ka hahdam phah viau. Chawhnu lam ah erawh an In a chaw eitur an neih avangin min hawsan ta a, mahni chauh in ka ṭhu leh ta rân a.





Khua a dur leh khup tawh a, Van ah chhûm dum chhah zet a kal mup mup a; ka hlau deuh hial. In dah ṭha deuh sawk sawkin dawr leh lamah ka phei ta daih a. Kawngka bul aṭangin dawr chu ka vil pah thei maiin ka ring. Nu Muani puan ṭhui chu ka va thlek ve thuak a. A ṭhui thiam bawk a, miin an pan nasa a, âwl lai a nei meuh lo. Keipaw'n a kutchhuak hi ka nei nual tawh.





Ruah mal lian zet zet rawn tla phuar phuar chu kawngkhar nghengin ka thlir reng a, kan dawr lam chu ka mitmei pah reng bawk. Ka nu in min rawn bia a, in khar hma mai turin min rawn ti; ruah bân fel veleh a ka haw daih chu ka rilru hmasa ber a ni nghal. Nu Muani chu a titi siam siam a, a fate ṭawmkai loh zia a sawi mawlh mawlh a, a hah ve ṭhin viau dawn tih pawh ka hrethiam. Ka phone ri chu ka ngaihven zui vat a, Hriathlua bawk; engnge maw a hriat a min rawn biak a tum leh tak ni?





"Hello" zawi sap in ka ti a, thâwm ri rawk rawk ka hre zui zat




"I va reh thei ngar ngar ve? In sûm suh," a rawn ti nghal phawr phawr a, ka ner sak mai.




"Ka thâwm rîkna lamah i awm ve lo tihna anih chu" ka ti let hmak a.




"Leihlawn piah aṭang chuan i thawm ri hriat a har," tih pahin a rawn nui hak hak a. Khawilai leihlawn nge maw a sawi ve ziah ni? Thu ho deuh deuh a rawn sawi nghek a, tum loh deuh in ka nui ve lek hak ṭhin. Ruah a hân ṭan a, Nu Muani chu zaizir in ka phei tur thu hrilh in dawr lam ka pan zui nghal thuai a. Ka biak lai mek pawh a la ri phar phar reng tho.





"Ka in khâr fel dawn a, ka dah ange," tih pahin ka in siam zui rak rak a, a ngawi det. "Zanah ka rawn bia ang che aw, pangngai ve deuh in," a rawn ti nghut chu ka lo nuih hak a.





Thu pangngai sawi tur a hriat ring lem lo zetin, "Aw le," ka ti liam puat a. Ka rilru ah chuan, 'Rawn call buai lo mai rawh,' tih a awm lian hle a. Mahse, chu thu chu ka sawi ta lem lo. Kan in biakna ti tawp in Dawr chhung ka enfel zui thuai a, ruah sur leh hma a haw hman ka duh avangin ka in kalh ṭha sawk sawk a, ka haw zui ta thuai a.





Inchhung ka lut chu ka thla a muang huai mai. Fur lai hi chuan ka dawih tluan parh a ni deuh ber. Ka nu in thingpui tui zet min siamsak a, ka dam sawng sawng in ka hria. Ka pa pawh tunlai chu In lamah hna a thawk a, In hnuai ah khawl nen a la ri vut vut a. Khua nuam lo viau mah se a hna a laklawh chuan a zawh hma chuan a khawih dawn tho tih pawh kan hre vek. Ka in hralh zat ka ziahna chu ka nu pe in room lamah inthlak tur in ka luhsan a, in thuam lum ka châk tawh hle; ka hnar a thîp hlur mai.






Ka inthlak zo, pindan aṭanga ka chhuah lai chuan ka nau te pawh an rawn thleng ve chiah a, an rawn khûr lut bauh bauh mai. Thli a thaw tel bawk nen khua a vawt viau. Ka nu rawngbawl chu pui zui ve in Vaipaden siam ka rawt a, kan ei khât deuh tawh a, ka ei chak riau; ka nu siam ngei hi a tui bik bawk.





Kan rawngbawl zawh hnu ah ka pa pawh a rawn bâng ve hram e. A in tihfai laiin chaw ei kan lo siam a; Vaipaden chu ka tem pah zauh bawk a. Kan chaw ei chhung zawngin ka pa in kan unau in min zilh malh malh, ka nu in a lo tuihnih ve reng bawk. An fate ah hian beiseina sang tak an nei ve a, holam taka kan khawsak hi an hlau ṭhin hle. Kan unau tan zantin an ṭawngṭai a, kan tan theihtawp tak meuh an chhuah tih ka hria; ka lawm rualin ka zah em em bawk.






Tumah han ṭhu rei peih pawh kan awm lo, mahni mutna lam kan pan diak a; ka in khuh lum hlân mai. Ka phone chu ka melh leh ṭhin a, nghah ka nei ru ve ringawt. Ka nghah rûk erawh a reh vang vang thung si. Ear phone vuahin hla ka ngaithla a, suangtuahna ram ah ka leng delh delh a. Ka hla ngaihthlak chu a rawn tawp hmak a. Rang takin ka en nghal vat, amah a ni.





Ka nghak det a, ka la ta chauh. Lak nghal tawp kha amah ka lo beisei ru reng tih a hriatthiam palh ka hlau a ni. "I mu tawh em ni?" a rawn ti vat a.




"Ummm....ka mu deuh chiah, a vawt lutuk a" ka ti lêt thuai a. Ka thinphu dup dup chu a chhan pawh ka hrelo e a.




"Ka chaw eikham ka lo muhil pek a, ka harh rual in ka rawn be nghal che, ka fel em?" nui huk chungin a rawn ti leh thuai a. "Aw, i fel" tih pahin lei ka chhuah zauh, ka lâi ru ṭût nia.






Hundang a kan inbiak ai chuan a rawn pangngai ta deuh ngei e. Ka hming te chiang zawkin min zawt a, ani pawh a rawn in sawichiang pah zung zung bawk a. Kan titi dun thei ve ta viau e. Kan inbiak rei takah chuan keipawh ka ṭawng ve ta duah mai. Kan veng awmna te kan in hrilh tawn a, ani chuan a lo hre vek tawh zawk; Baby a lo zawt a nih hmel. 'Zu a in ṭhin em?' tih te thlengin ka zawh tak vak kha!! A in ṭhin thu leh a in duh tawh loh thu in min chhâng thuai a. Engtin emaw tak hian ka awm a lo nuam ve huai ringawt.






In hmuh a chak thu a sawi erawh ka chhâng mumal lo, ka zak tlat. Chhuanlam ah 'leihlawn piah' a tih ve ziah kha ka zawt a, "Kan in bul step ka sawina" tiin min chhang; ho ti zetin ka nui nghek a. Rei tawk fang kan inbiak hnu ah chuan kan ti tawp ve ta hram e. Ka hlim ru veng veng chu mak ka ti. A ruk in ka lo ngaihven sawt hle tih erawh ka in hrechiang. Phone kaltlang a ka biak mai mai mihring, ka ngaihven ru tlat chu nuam ka ti chiah lo thung.






A tuk zingah chuan rinloh deuhin Ni a sa uarh a, zing thawh pawh a nuam hle. Vawiin chu In lamah ka awm ve thung dawn anih hmel, ka lawm ru hle bawk. Ka nau te tiffin tur ka siam sawk sawk a, Artui leh Tomato ka kan pawlh sak. Diktea hritlang khuh bur bur chu ka nu in sawhthing leh khawizu denpawlh a ei luih tir mek bawk a. A hmel nin hmel zet a ner nâng nâng chu ka nuih ru tat tat a. Mampuia'n min lo pui ve in salad a lo siam ve bawk a, kan phe suau suau a ni ber.






Chaw ei zui thuai in an chhuak rual ta diak a, thleng sil pahin ring deuh deuh in ka zai vak vak a. Min ngaithlatu an awm lem lo bawk a, ka au ṭial nasa ve hle. Inchhung tifai chhunzawm in ka che zui leh char char a. Ka nau te room ka khawih zo chu khum ah ka bawk thlawp. Mipa room hi chu dah fel in ti ve viau mah se a phuailuai ṭhin a; hmuhmawh tur a lo in dawt zut ṭhin.





TV bula ka phone charge chu a ri tlang tlang a, rang takin ka pan thuai a. Hriathlua hming lo in ziak kalh chu ka melh reng a, thaw hak in ka la kâng a; lâk ka tum lai takin a tawp hman. Reilo tê ah a rawn ri nawn leh nghal zat a, ka lo chhâng ta thuai a.




"Dawr ah i awm em?" a rawn ti lâwng lâwng a, thâwm a tam hle bawk.




"Vawiin chu In ka nghak, ka nu a kal a" ka ti let ve zat a.




"A va pawi tak, ka hmuh châk che nen; i awm tâk in ka ti maw le" a rawn ti leh nuah nuah a, a ṭawng thlûk aṭang chuan pawi a tih hmel tak tak hle bawk.




"Ka nghak vak ngailo zawk a, tunlai tê hi ka kal ngun ve deuh zawk mai mai alawm" ka ti ṭha ve leh thuai a.




"Ok, a pawi loh chu!! Ka bazar lawk e ka tia, a remchang êm a tih thu ah maw le" a rawn ti let zung zung a. Dawrah awm pawh ni ila, 'ka awm lo' ka ti tho in ka ring; a zahthlak duh awm em mai.





A dah tawh mai dawn emaw ka tih laiin zana rawn lên a châk thu a sawi leh mauh mai. Chhan dan tur ka va hre lo tak. Ka ngawih rauh rauh lai chuan, "Ka hmuchak che e....." a rawn ti hniam ruih a, ka mûr er er in ka hria. A aw hniam ruih kha cool ka ti riau pek.





"Lo len i phal em?" a rawn ti nawn leh a, "Aw" tih ka hreh a; "Aih" tia chhân ka hreh tho bawk.




"A zahthlak e..." ka ti niah niah a.



"Lo len i phal loh leh ka lokal anga, in In bulah lo awm la, ka rawn hmu zuai che anga; ka haw leh nghal ang" a la rawn ti hram. Chu em em chu chhânna pek loh ka hreh hluah hluah tawh, 'Aw' ka pawh ve ta ringawt. 'Hmuh ve lawk a ni mai a' tiin ka in thiam chawp ta ngawt a.





Ka che rêng rêng chu ka phî deuh cheng a, ka lungphu te chu a rang leh zaih zaih ṭhin a. Ka che phelh phung mai. Tih tur ṭul zual ka ti fel zo tawh bawk a, ka inbual zui ta nghal a. Rawngbawl ṭan zui lehnghal in ngaihtuahna ah thil pakhat chauh a lang, ka thil siam ho pawh chu a tui leh tui loh pawh ka hre lo.





Mampuia a rawn haw hmasa ber a, inbual a duh thu sawiin tui lum ka siam sak nghal vat. Ka nau te hi ka lakah hian an pangchang ve riau a; keipaw'n ka phak tawkah chuan ka duat ve viau ṭhin. A khât tawkin ka phone ka bih deuh sek a, a reh vang vang thung si. 'Tleipuii ka hrilh ve dawn em?' tih ka ngaihtuah. Mahse, ka awmdan chu ka zah deuh avangin ka hrilh leh ta lo; kan in hmuhdan boruak a zirin ka la hrilh zawk mai ang.






Pawnlam ah chhuak in ka hawi kual that that a, zan lam hun tur ringawt in ka rilru a luah. 'Khawilai ah hian nge ka lo nghah ang aw' tiin ka kal kual vel a. Miin min hmuh ka hlau hle lawi bawk si. Gate bul a Kawlthei kung sang vaklo bul chu ka pan a, ka duh aiin a hnah te chu an buk lo. Ka thaw hak a, a engamah hma a ka lo buai ru cheng chu mawl ka in ti bawk. "In hmuh pangngai mai a ni dawn alawm," tiin hahdam luih ngial ka tum a, ka hlawhchham chiang hle thung.






Ka nu rual in Diktea a rawn haw ve a, pheikhawk thar a rawn lek haw va va mai; Dawra a kal kawi ve hi chuan thil thar neih a tum ziah. Ka pa pawh reilo te ah rawn thleng zui ve leh in a in tifai ve nghal thuai a. Khua a duai deuh ruih mai; ruah a sur vak ang tih mawlh ka lo hlau. Kan in peih tlan hnu ah chaw ei siam in kan ei zui thuai a, ka helhhawlh nasa lutuk chu ka puar leh puarloh pawh ka hrelo.






Ka awmdan chu a lo lang deuh a ni ngei ang, Diktea'n, "Engnge i phi cheng a? I hawi ang zek zek a" min ti ta ngei; za lo zetin ka nui vak a; mawl min tih hmel zetin min ner khum vak. Thleng ka sil mawlh mawlh laiin ka phone a rawn ri a, ka kut hru hul nawk nawkin ka en zui vat.




"Chaw in ei tawh em?" a rawn ti zâwi sup, ka lo ṭhen vak ringawt.




"Thleng ka sil mek a" hawi kual thuak chungin ka ti lêt thuai a. Thil sual ti ang maiin ka ṭi deuh dûk bawk.




"In awmna lai kha chiang deuhin Whatsapp ah min rawn thawn la, ka rawn chhuak nghal deuh mai ang" a rawn ti leh a. Ka thawn tur thu sawiin ka dah nghal thuai. Kan awmna lai leh a kaldan vel message a sawi zui nghal in a lo en nghal vat, ka sawichiang tawk in ka hria; a bo em lo ang chu maw. "Ka lo chhuak nghal dawn e" tih a rawn thawn let ve leh a, ka chhâng tawh lo.Hmanhmawh taka thlengsil chhunzawm in ka ri deuh rum rum a.





Thawmhnaw ka ngah nen hak tur ber te ka hre lo a; ka va han buai tak. Zan anih bakah kawt mai a lo nghak tur ka ni bawk a, inchei vakin awmzia a nei vak lo tih ka hre reng; ṭhing deuh a lan ka hlau em em bawk si, a va hahthlak mai mai tak.





Ka phone ri chu ka la vat a, a awmna hmun a rawn sawi leh kan In awmna chu a in persan daih. Engtin nge maw a rawn kal ni? Ka hrilh chiang viau sia. Hrilh ṭha leh in pawna lo awm tur in min ti a, dawr kal chhuanlam in ka chhuak zui vat a. A thimlai deuh chuh in ka ding ta vâng a, ka hawi kual zak zak reng bawk. Rei vaklo ka din hnuah ka piah deuh lawk a Bike ri lam chu ka hawi vat a, amah anih ka ring nghal; ka thin a phu rang sauh.






Ka hma ah rawn ding chat in a helmet a la thla zui zat a. Ka lo en ṭha ngam lo, ka dinglam sir a Zawhte bawk khar chu ka melh lui ngar ngar. "Ka bo deuh alawm mawle, pên tur i tihna lai ah khan ka lo tlan tlang alawm" a ti sup a, Bike ah a la ṭhu reng.





"Ka sawi chian tehreng nen" tih pahin ka melh ralh a, min lo en rûn avang chuan hnuailam ka bih leh nghal daih; a nui huk zui leh nghal.





A zak ve deuh tho in ka hria, phone-a a rîk zawt zawt ang a ni bik hauh lo. Kan ngawi a, in en in kan nui leh ringawt ṭhin. Zu rim nam deuh hak a ka hriat avangin hnaih deuh in ka hnar ka lên zui zat. A lo nui huk a, a perfume rim a nih thu a lo sawi thuai a, ka va zak mai mai tak. Dawr kal tur ang chauh a ka chhuah avangin ka chhungte'n rei min tih ka hlau viau, in thlahrung ru deuhin ka sawi a, a lo hrethiam ve mai bawk a. Dawr lama la rawn lên a tum thu a sawi zui ve zat bawk.





Bike ti nungin tlanchhuak mai thei turin a in peih at tawh, "Lut hmasa la, ka lo thlir ang che" a rawn ti sup a. Ka ka bu nghat a, ka in her zui nghal zat. Ka pen ṭan chiah tih in "Lawk aw" a rawn ti leh a. Ka ding leh dat a, Bike aṭanga chhukin min rawn pan hnai a. Ka hmaah tak a rawn ding a, ka lo melh khiau a. "Zothan, ka duh che a nia" a rawn ti zâwi sup a, a rawn sawi dan teh tawp chuan min ti hamhaih hle.





"A...min duh ve ringawt suh" ka ti bah nuaih, sawi tur dang ka hre lo. Ka bing mum mum in ka hria.




"Thu khuh mawi vak dan ka thiamlo, ka hrilh har zawk che. Ka hmuh hma che khan ka duh tawh che a. Tunah ka hmu che a, ka duh zual che" a rawn tizui leh nghal zat. Ka ngawi reng a, ka ngaina ve tho tih chu ka hria; ka duh leh duhloh chu ka hre lo thung. Nui huk in "Hmanhmawh suh, ka lo nghak ang che" tiin ka chhîp ah a rawn fawp zeuh, ka mit ka chhîng sawk a, ka ding khawng reng; kal mai nachang pawh ka hre lo. Amah zawk chu muangchang in a tlanchhuak ta zawk a, a liam thleng in ka thlir zui ta reng a.





In chhung ka luh leh chuan min lo en ṭhap a, chhuanlamah ka nui lut var var a. Ṭhenawmte in a lut kawi angin ka in sawi ta ringawt. Min ringhlel hmel an pu lo chu ka thaw huai huai thei hial. Dawt ka sawi kher erawh nuam ka ti lo hle thung. Ka room lam panin ka kal zui ta daih a, ka awmdan a la pangngailo hle tih pawh ka in hrechiang viau bawk. Lên min dil lai khan engvanga phal mai lo nge ka nih tih ka ngaihtuah. 'Kan In kawt lawk ah ka in hmuhpui tho si' te ka ti leh hnuhnawh a. Ka la hmuh ngai loh inleng neih kha engemaw riau in ka ngai te pawh a ni mahna.






Rei fe hnu ah a thlen tawh thu min rawn hrilh a. Min ngaipawmawh riau a hriatna ka nei thar ta bawk. Min duh thu vel engmah a sawi zawm tawh lo a, a hmaa a mize ngai kha a pu leh tawh. Tuna a mizia hi ka ngaina mah zawk, min duhthu sawitu bulah kha chuan ka nunphung a buai zo a; sawi ve tur pawh hrelo in ka buai zo a nih kha. Thil ho te te sawiin kan phûl leh hlut a. Min rawn call a tum a, ka phal lo tlat a; a ti lui bik lem lo. Mutchhuak in min rawn zem chiai chiai a, ka mangṭha zui ta thuai a.





Ka pa tuboh chhu ri bur bur thawmah ka harh zawk a. Zing kar karah engnge maw a chhut rik bur bur ni? Muthilh leh na hun a ni tawh chiah lo bawk nen ka thochhuak zui ta zawk a. Kan kawngkhar kawpza a lo nghet lo hi a nia, ka pa hi chu hna khek thiam lo tih takah a hmuh rual in a che zui nghal mai ṭhin. Thingpui siam sa chu thli ve in ka in zui mawlh mawlh a, Vawiin chu dawr lama awm ka duh; ka dawr awm hun nghak an awm tih ka hre ru kar. Ka thinlung hian hnaih duhna a nei tam tial tial a, chuti khawp a min hîp chu mak ka ti bawk. Kan hma hun tur erawh ka hre miah lo thung.






Ka nu in mithi râl a duhthu a lo sawi ve bawk a, chu chu remchangah ka lo la thuai a. Nidang zawng pawh a dawr kal zawk thlang ngailo in vawiin taka ka duh zawk thu ka sawi thut chuan min ringhlel ang tih ka hlau ve hle thung a ni. Malsawma nena kan in ngaihzawn lai khan min hriatpui vek a, Inchhungah chhungte hriatpui thlap in kan in kawm ṭhin. Tunah erawh engmah in ngaihzawnna boruak a awm hma hauh in pawnlam ah a rûkin ka in hmuhpui a, Hriathlua hi ka tan eng chiah nge a la nih dawn tih ka ngaihtuah nasa nghal hle bawk.





Ka nau te tiffin ka siam sak leh thlap hnuah chaw ka ei hmasa ta thuai a, ka hmanhmawh ru riau tlat a ni. Ka in siam chhung pawh a rei, nidang a ka chhuak tur ai chuan in uluk tak ka ni; ka in siam pahin Hriathlua ka call a, Message pawh ka chhu hman lo; ka hmaiah cream ka hnawih pah mawlh mawlh a. An ṭawng ri laih laih thawm chu ka ngaithla reng a, Sangha tih lam te an sawi in ka hria.




"Ṭhian ho a lui kal kan lo rel a, i tho ṭha em?" a rawn ti nghal vat.




"Aw, ka tho ṭha e. Lui kal chu a nawm dawn chu. Dawrah ka kal dawn a, ka rawn hrilh ve mai mai che" ka ti zui ve leh vat a, ka hnual deuh ringawt bawk.




"I va rawn sawi hun ve" tiin a ṭhiante a koh nghal zat, lui kal a tum chu a ṭhulh fel nghal der bawk. Keiin ka thil tihlai chawl meuh in ka phone ka lo melh hâw thung. Chutiang maia a ṭhulh phal pawh ka lo beisei lo kha a nia.




"Ka rawn leng dawn, ka pui nileng thei che tihna" a rawn ti zui leh vat, ka lo nui hak a. A awmdan a min ngaihpawimawh hmel zet mai hian min hip telh telh tih ka hria. Kan inbiakna ti tawp zuiin In aṭangin ka chhuak zui ta vat a; ka ke pên a zâng haih mai.





Dawr ka thlen veleh thawmhnaw ka khai chhuak zui thuai thuai a. Nu Muani pawh alo thleng fel ve chiah a; thingpui sen in turin min lo sawm zui vat a. Flask lianpui hian thingpuisen hi a in chhawp reng a, nikhatah hian a in tam ṭhin ngawt in ka ring. Ka in tihfel zawhin Hriathlua ngaihchan pahin ka va in sak ve a, ka in tui phian leh nghal.





Candy Crush khel in ka phone ka bih ngar a, customer an tam vak lo. Thla tawp lamah hi chuan in hralh a har ve tawh ṭhin a, kan âwl thei viau mai. Ka ṭhutna bul dawhkan chung a chahbi rawn tla ri kauh chuan mi hawichhuah tir thuai a. Hriathlua a lo ding ngawi rûn a, min lo en ngur mai. Ding chhuak ve hluai in ṭhutna tur ka pe zui sawk sawk, alo luh lai pawh ka hre miah lo nia.





"Thawm iva dim thiam em em?" ka ti teh ngawt a, a lo vei nuih suk ringawt a.




"I phone ah i rilru i pe êm mai a, i hrelo mai mai anih kha; ka rawn auh lûng lûng che kha" a lo ti zung zung a, ka va awih lo tak.




"Daw suh, ka beng a chhêt lo. Min ko ni la ka hria ang" aw ki sang fê in ka ti let zui thuai a.



"Nia, a chhêt miah lo" ti in min tih el deuh in a nui huk a. Min koh ri chu ka lo hrelo tak tak em mawn le?





An sangha man tum a ṭhulh ringawt kha nuam lo ka la ti reng. Ka sawi lang ta ngei bawk a; ani erawh in hundang a la tam thu in min chhang thung. Lui kal chungchang sawi zui duah in a sawi thiam nasa mai si a, lui a kal min ti chak ve rum rum mai. "A remchan ve leh ka la hruai ve ang che" a tih lai chuan ka lo nui sen sen a, ka kal ve theih tak tak erawh ka ring miah chuang lo.






Eng eng emaw sawiin kan ri dun ve barh barh a, ṭawngkam a thiam in fiamthu sawi tur a hre bawk nen ka nui deuh reng mai. A kiu veilam a ser lianpui awm chu ka en vang vang a, na deuh a inhliamna hnuhma ang ka ti; ka zawt dawt hreh deuh si. Ka hmel landanah a hrethiam a ni chêk ang chu, an hnathawhna hmuna a chetsualna a nih thu a rawn sawi thuai a. A chetsual dan vel a sawi mawlh mawlh laiin nula pahnih an rawn lut a, thawmhnaw te chu an enkual dan dan a. Tho chhuak vatin ka lo dawngsawng zui thuai a, an duh zawng an sawi ang chu ka lakthlak sak thuai thuai a.






Chutia kan in enpui mawlh mawlh lai chuan Hriathlua phone a rawn ri a, pawnlam ah a chhuah pui zui nulh. Ka ngaihven lem lo, a pawimawh viau te pawh a ni ange. Kan nula pahnih te paw'n an T-Shirt duh zawng pakhat ve ve la in a man kan in pek fel laiin Hriathlua pawh a rawn lut ve leh mai a. A ṭhutna ngaiah ṭhu in meizial a lachhuak a, a ṭan zui nghal zat a.





"I va in hralh thei ve?" tiin a nui suk a. Vawiin Ni ah tun ṭum bak kha ka la in hralh lo tih a hre ve reng. Rum zetin ka melh nghek a, min en duhlo lui tlat lehnghal. Chhun thingpui in a hun chho tawh a, a duhzawng te zawtin ka chah zui thuai a. A bula awm a hahdamthlak viau mai, Nu Muani pawh rawn dak phei ve zawkin an titi dun nghal bawrh bawrh thei a; a mi kawm te awmdan ang tawk zela a in siamrem thei zel te chu ka lo fak ru ve em em bawk.





Dar 4 bawr vel ah dawr khar in min thlah haw a, kan In thlen hma deuhin ka chhuk a. Ka chhungte hmuh tur a han awm vel kha ka zak deuh tlat, ani paw'n ngaih loh lamah a ngai bik lem lo. Zana min lo biak tur thu sawiin a tlan haw zui ve nghal a, mak deuh in ka ngai ru nghal veng veng mai. Kan inkarah engmah thil danglam thleng a la awm lo a. Mahse, kan awmdan aṭang erawh chuan kan in haw lo tih a langchiang viau thung.






Nitin zantin in kan in bia a, kan thil sawi pawh a danglam chho ve hret hret zel. Kan inkar chu in ngaihzawnna boruak in a rawn thlak chho a. Min ngaihsakna ka dawng mawlh mawlh a, ka nun ah bu a khuar nghet sauh sauh tih pawh ka hrethiam. Ka mimal nun thlengin a hre fai kêlh a, zêp leh thup ṭhen ka nei ngai lo. In laichinna nghet zawk kalpui kan tum a nih phei chuan a hnu lawka a hriat leh tho tur thil zep buai kha ka duh lem lo bawk. Ani pawhin a sawi ve mawlh mawlh fova, ka ringhlel ngai lo a; a sawi apiang chu ka awih fai vek.





Pathianni chawhma Inkhawm ban a ni a, ka lu a na deuh fuk fuk mai. Inkhawm ban veleh In ah ka haw tlang nghal a, ka chhungte erawh khawilam ah nge an pen kawi zawh pawh ka hre lo. Ka inthlak zawh ah thingpui lum pahin phone ka en pah a. Hriathlua message a awm ka beisei laiin engmah a lo awm lo. A Inkhawm a nih ka ring bawk. Zingkara min lo biak khan Inkhawm a tum thu a sawi a, an la bâng ve lo anih ka ring nghal.






Thingpui in pahin kan chhungkaw ho group ah chuan ka lut a, thlalak an lo post thar ho chu ka en kual ta mai mai a. Thingpui ka in zawh chuan mut zal mai mai tumin ṭhutkhawm na lam ka pan a. Hriathlu a message tur ka chhu pah mawlh mawlh bawk. Ka thawn hma chiah in a thlalak hman a rawn inthlak a, hmeichhe pakhat nena an thlalak a rawn lang kalh mai.





Chiang zawkin ka en a, chu thlalak chu lakdun ni lovin dah dun chawp a ni tih chu ka hrethiam; mahse, keimahah a thawhdan a dang tlat. Ka message chu paih leh in
"I inkhawm em?" tih ka thawn ta zâwk a, rang takin a lo en nghal vat a. A rawn 'typing' chu nghak in phone ka melh reng a, engtin maw deuh tak hian ka awm bawk; ka awm a nuam lo riau.





"Tunge i nih? Ka bialpa hi mi nazawng biak ka phal lo a nia" tih thu chuan min deng chawrh ni maiin ka hria. Chhanlet mai dan tur hre lo in ka phone chu ka melh vang vang a.




"Tunge ka nih chu ka number a save danah a lang vek ang chu" tiin ka chhang lui zui ve a, ka sa deuh pup pup bawk.




"Number hlang tawp chu hriat a har ve alawm, a muhil mek. A pawimawh viau chuan ka lo hrilh sak mai ang che, i sawi duh chu sawi rawn" a rawn ti hmak a.





Ka thu dawn te chu ka chhiar nawn leh ṭhin. Inkhawm tura ka ngaih reng lai khan hmeichhe bulah hun a lo hmang mai mai chu a ni phawt anga. 'Ka hriat phak piahlam ah hian bum in ka lo awm reng aniang' tih chu ka ngaihtuahna luah tu ber a ni. In kawp tih vel hi ka duhzawng a nih ngai loh avangin ngaihzawng ka kawp ngai lo, kawp nih pawh ka duh hek lo. Min bum nia ka hriatna chuan min ti na ngut ngut a, nizan thleng kha chuan ka tan a la rinawm hle si kha a nia. Ka ngaihtuahna a tawi tuk a, ka chapona a kai chhuak bawk.






"Lalhriathlu, darkar khat hun ka pe ang che. Chumi hnu a in sawifiahna ṭha tawk i nei a nih loh chuan kan tawp ang. I in sawifiahna pawh ka awih kher angem ka hre lo. Ka hun pek chhung che a i muhil i harh hman lo anih pawhin kan tawp tho ang" tih chu ka thawn ve ta ngat a. 'Seen' a ni ngei mai a, a chhanlet na erawh ka dawng lo thung. Min rawn betu tana thawn ka nilo bawk a, a lo hriatthiam ngei pawh ka ring.






Tlai rawng ka bawl zawh thlengin chhanna engmah ka la dawng lo. Ka mood chhiat dan chu pui tak a ni, ka naute pawhin min en leh hrek hrek ṭhin tih ka hria. Ka thil ti reng reng chu a rîk hian a ri chawrh chawrh a, ka rawngbawl te pawh an tui nek lo ange. Chaw pawh ka ei tam lo. Ka nu in a chhan min zawh chuan ka nawmsam loh thu in ka chhang a, Inkhawm pawh peih lo in ka in tihfel hnu ah pindan lamah ka tawmbo leh ta daih a.





Rilru tâwt ru ṭeuh chungin khumah ka ṭhu ngawi reng a, thil hrang hrang ka ngaihtuah kual. Hriathlua nen pangngai taka kan inzui aṭangin rinhlelh turin a awm ka hre ngai lova, a hun awl zawng zawng ka tan a pe tih theih a ni. Mahse, chuti chung a khatiang message, ama phone aṭang lehnghal a ka dawng khan awm nuam in min awm tir thei lo. A phone hmeichhe dangin an khawihsak theih tur khawp khan engtinnge a muthilh theih, ka thin a rim thar ut ut bawk.




Ka message tone ri ka hriat rualin ka en vat a, Hriathlua ngei a lo ni, ka hawng zui vat bawk a.




"Bawihi, i va reh nileng ve? Ka ngaih tehreng che nen" tih thu chu ner sak chungin ka chhiar a, engmah hrelo anga a khawsa chu a huat in ka hua.




"Dp i nei mawi hle mai" tih chauh in ka chhang a. A typing lai mekin ka out san hmak a, ka thin a rim laklawh. Rawn in sawifiah pawh nise ka awih dawn chuang lo a, tuna ka awmdan aia min ti hrehawm leh zual tur thu ka hriatbelh ang tih ka hlau bawk.






Malsawma hnen aṭang khan ngaihsakna tak tak ka dawng ngai lo a, kan inzui ve reng chung khan khawhar rûkna nen ka nun ka hmang a ni ber. Tunah Hriathlua nen bulṭan in ani hnen aṭang erawh chuan ngaihsakna tam tak ka dawng a, ka ring em em bawk. Chutiang anih lai kara hetiang boruak lo thleng thut hian min ti chiâi a, hun hlimawm tak ka tawn mek chu vawilehkhata bo vek tur angin ka ngai bawk. Rilru pik ṭûnin tukverh ah ka dak a, Van lam hawiin ka hlimna min laksak lo tura dilin ka phun sep sep a.






(to be continue.......)


Show post links
Top

[Ngaia]

DEAR PAIN
Chapter-3




By : Brigida Hugo






Zan ka mu ṭha lo bawk a, ka tho rit lûk mai. Nizan khan Hriathlua message kha ka en duh ta lo kha ania, min rawn call na pawh ka chhang lo. Ka switch off zui daih a, tun thlengin ka la On leh lo.





Rilru a vei nei rûn in ka awm a, ka awmdan chu a nuam thlawt lo a ni tawp. Diktea te School ah Parents Meeting an koh avangin ka nu a kal a ngai a, keiin dawr ka nghak thung ang. Mampuia'n a college T-shirt a hmuhloh avangin zawnsak turin an room ah ka lut a, an khum an lo la siam fel loh te chu ka siam fel sak mawlh mawlh bawk a. Faifuk rût rût in Mampuia a rawn lut ve a, chîk fahranin min en deuh rûn a, keiin mak ti fê in ka lo melh hâw bawk. "Engnge khati vak a min en?" ka ti ram hmak a, ka mood chhe lutuk chu ka thunun thei lo lek lek.





"Duhloh rai ang mai, i tum lian si. Tunge hau che a?" a ti hû a, a hawi deuh hû bawk sia; a ât hmel tawp.




"Tuma'n min hau lo, ka mood a chhe ve mai mai. Kha, in siam rawh" tih pahin a T-Shirt ka ken lai chuan ka vawm a, "Ka lawm e, Û fel em em" tih pahin a pawtthla nghal zat. Ka nui sak a, Mampuia thil tihsak hi chu a lawm thiam ṭhin a, tihsak man a awm hle ṭhin. Kan Lalruatdika erawh a lawm ve nge lawm ve lo tih pawh a hriat ngai loh, a nunphung reng reng hi luhlulna a khat a ni tawp.





Chaw ei ka siam zui thuai a, kartluan a hmanhmawh reng reng a chet ngai hi ka ning ṭhin. Tun hma phei chuan zingkar hma takah ka nu hi dawr hawng turin a chhuak daih ṭhin a, ka buai a thuah hnih thei hle. Ka pa in 'i fate i ngaihsak ṭha hman lo, chaw eikham lamah che chhuak chauh tawh ang che' a tih tak avangin zingkar aṭanga dawr hawn a sim ta hlauh.






Diktea school kal ve kher a ngaih loh avangin thleng sil turin ka nu in a tir a, ngawi rengin a sil ve mual mual a. Kan chhungkua ah hian kan mipa te hi an awm ve mai mai ngai lova, kan naupan tet aṭangin kan unau hian ka nu in tih tur min sem thlap ṭhin. Kan thiam emaw thiamlo emaw kan ti ve nawk nawk a, a hnuah a ti ṭha leh mai ṭhin. "Ram palailengah pawh thlak tawp che u sela, in damchhuahna khawp thiam thil in nei tur a ni" tih hi ka nu thu rolum a ni.





Ka in siam chhunzawm a, ka phone ka ti nung leh tawh bawk. Hriathlua message erawh ka la ensak duh chuang lo. Tleipuii'n an huana kal ve tura min sawmna chu ka hman loh thu in ka chhang let thuai a, min rawn thawn hun ka en in an kal daih tawh in ka ring bawk. Makeup tlem ka hmang ve bawk a, ka mut ṭhat loh avangin ka hmel a lang bawrchhawr riau a. Ka lan ziaawm theih takin tih thu ah ka in tât ve nawk nawk a ni ber.





Taxi in ka kal leh a, ka chhuak tlai deuh bawk nen ka hmanhmawh ru tawh hle. Dawr kawtah chuan nufa hi an lo ding rân a, a fanu tê chuan dawr kawngka chu a kik leh karh karh ṭhin bawk. Ka chuan man pe felin ka pan zui thuai a, thawmhnaw en duh an nih ngei pawh ka ring.





"Thawmhnaw en in duh em ni?" ka ti nghal thuai a, an duh thu an lo sawi lai chuan kawngka kalhna chu ka hawng rak rak a. Kan in zui lut nghal dial a. Anu in thawmhnaw a enkual chhung chuan chu hmeichhe naupang te chu fel ât in Chair ah a lo ṭhu ve rân a, a mitmeng fin hmel zet chu a lên kual ve vat vat reuh a. Anu in kawr a hâk chhin lai te chuan a kut zungpui a lo ti pir ve vauh a, a awmdan te chu ka lawm zawng tak a ni. An duhzawng tak lei in lungawi hmel zet in an chhuak zui leh ta a, hmeichhe naupang tê chuan min 'bye bye' zui lauh lauh a.





Fur khua a la zo lo nângin ruah erawh a sûr tam lo khawp mai. July thla tir kan kai hlawt a, fur hun chhung erawh a la rei dawn hle thung. Hanger âwl ah thawmhnaw ka khâi a, mi mit la tura ka rin deuh te chu a langsar tur lai ah ka khai pah zel bawk. Ka in khâi fel meuh hi chuan bân a kham ve urh zel.





Thawmhnaw bâwm ruak te la khawm zung zungin parcel ah ka dahkhawm a. Chutia ka buai mawp mawp lai chuan "I awm maw?" tih pahin Hriathlua a rawn lut hlawl. Ka thil tih lai châwl dat in mak ti deuhin ka lo en hâ a, a kiai suk mai. Dawhkan bul chair ah ṭhu nghal zat in a kuta a chehbeh mek Meizial chu a ṭan zui zat a. Hawisawn in ka thil tih lai ka tih chhunzawm san leh daih, ngaihsak hluak ka tum lo. A hmel ka hmuh phei chuan ka thinrimna a rawn thar leh in ka hria.





"A ṭullo chin thleng a tih kher i tum anih kha" a rawn ti sup a, ka ner sak. A hnaih ah ka la awm lo, amah hlat thei ang berah tih tur ka dap kual lui a ni ber. Chhâng duh lo in thawmhnaw ka khai ṭhat sa te chu ka sawn kual leh vel a, ka mitsir erawh in ka mitmei pah reng thung.





"I hah lutuk ang, rawn ṭhu ve mai mai teh" a rawn ti leh nghut a, ka awmdan teh tlat chu a ning ve deuh tawh tih a ṭawng hmuk dan ah a lang reng. Ka chetdan ngaiin kan la che lui zel tho, nem nghal mai kha ka tum lo ve bawk a. "Bawihi" a rawn ri fân leh ruih a, pâwr zetin "Bawihi min ti suh, mi ngaihzawng in min koh duat ve ngawt hi ka ngai thei lo a nia" ka ti nghal hlar a. Hahthlak min tih hmel zetin a hmai a tuai puat a, thâwk a la halh bawk.





"Thil sawifel tur kan nei, rawn ṭhu lawk la" dam deuh zawkin a rawn ti leh a. Keipawh ka thiltih lai chawl in amah ngaih pawimawh loh hmel zetin ka ṭhu zui ve vat; ka ke a kham tawh lutuk a, ka ṭhu chu ka dam huai huai in ka hria.





"Nimin thil chungchang kha sawi a ngai. Message i en duh lo a; call i la duh bawk silo. Hmaichhan a sawi fel mai angai" a rawn ti zui sup sup a.




"Sawi zui tur a awm em ni? A chiang viau alawm" ka lo ti hmak thung.




"Sawi tur tam tak a awm, nimin khan ka nuamsam chiah lova; ka Inkhawm leh ta lova. Mahni chauh a awm ai chuan tiin ka u te In ah ka chhuk thla a, Bawiha te khumah ka tlu zâl a; ka lo muhil zui daih. Ka phone kha khumlu bul Plug ah ka vit bawk a, ka muthilh hnu ah Siampuii te kha an lokal ve abnih hmel" a tih mek lai chuan "Siampuii pawh ka hrelo e a" ka lo ti leh hmanhmawh.





"Nia, i hriatloh vanga sawifiah tum ka ni alawm. Siampuii hian hun rei tawh tak aṭang khan min ngaizawng a, kan veng ṭhenawm mai a awm an ni bawk. Ka u nupui nen an inkawm ve ṭhin a, chuta ṭanga hria chu ka ni. Min duh tih a tilang fova; mahse, ka ngaihsak lem lo thung. Nimin khan ka mut hlanin ka phone charge kha a lo khawih aniang. Mahse, a rawn tihdan che erawh ka hre miah lo thung" tiin a phone a phawrh a. Whatsapp ah lut in a rawn lek kâng vâ; kan inbiakna kha a awm miah lo.





Ka phone la ve zatin chu nu nena kan inbiakna chu ka entir ve nghal zat a, bih ngur chungin a ner sak. "Zahloh theihna hi a ngah ve a, engmah kan in karah a awm lo" tih pahin ka phone min pe let leh vat. "Dp te kha" ka ti zui leh hram, ka rilru a la kap miau si.





"A remkhawm chawp vel aniang chu, engmah ka hrelo tak tak. Ka harh leh chuan an lo awm tawh lo, ka harh veleh ka rawn be nghal che a. I lo thinrim em em mai bawk sia, min ti mangang alawm" tiin ka kut a rawn hûm chat a.




A thusawi chu ka ringhlel lo, a hmel ah a tih tak zia a lang reng bawk. Mahse, ka la thinrim chak tho. "I phone khawih mai mai theih in dah mah ta che, zak theilo deuh deuh hi an tam ania; Pattern te dah mai la" ka la ti hram.





Nui suk in a phone chu ka kut ah a hmehbel a "Nangma'n dah la" a ti dam dup. Ka thinrim hlei thei tawh lo. Ka thinrim chhan ber a sawifiah tawh bak ah amah a dam dup tawh si a; lo tûm luih ngat ngar kha a sual thlak riau in ka hre tawh.





"I thinrim chu i 'den' ngei mai, hun lah chu min lo pe tlem ropui mai sia" tiin a nui ruh ruh a, ka vo na ṭawngkam ka hrechhuak zawk mai. Nui hak in a hnungah ka chûm ri dawp a, na tih hmel fahranin a kûn ngawih ngawih. Over ti lutuk a melh chungin ka chûm zui awk awk a, ka nui ar ar bawk. Thu tak deuh zawkin "Eng buaina pawh awm se ṭha taka sawifel tum phawt tur a ni ngai, mahni zeldinna kalpui chiam kha sim tur aw?" a rawn tidam leh thluam a. Ni e, a sawi dik; ka in thunun theihloh avangin rilru hrehawm in ka awm a, ka la mut ṭhat theih loh phah zui bawk.





Nilengin dawr min nghahpui a, kan boruak pawh a ṭha viau e; tlaiah pawh min thlah leh thlap bawk. Thudik ka hriat takah chuan ka thawl huai a, ṭullo a ka in tihah vak erawh mawl ka in ti zui hle thung. Zanriah kan ei laiin ruah a tla cherh cherh a, mut a ti nuam leh ngawt ang chu. Chaw eikham ah Diktea lehkha zirna bulah awm in ka lo be deuh sek a, a zir peihloh sa naklai a ka lo be sek chu a ning ngang aniang; ka nu te room lamah a in sawn phei nulh a.





A chhuak fel chiah tih in Mampuia a rawn tlan lut thuak a, min si chêt in a rawn ṭhu. A phone a thai kual malh malh a, rawn thaw chhuak hluai in a aw a thian kharh a; a awmdan chu mak ka ti deuh. "Engnge?" ka lo ti deuh hâ a, a tukhum tuai hauh hauh in "Englo, bialnu ka nei dawn" a ti teh ngawt a; ka lo "Awi" deuh râih a.





"Mahse, pahnih an nia" a la ti tak deuh deuh a, mak ti zeta en hâw in "I kawp vel a? I va lerh ve a?" ka lo ti zêk a.




"Kawp lo, kawp lo...Min duh ve ve a, min thlanpui teh" a la ti ham ham zui; â ti zetin ka en heu a. "Khatin min en kur suh, hei en la" tiin a phone a hmeichhe thlalak a dah dun chu min entir a, "Khawnge hmelṭha zawk?" a rawn ti sûrh sûrh a. Ka endun vang vang a, an hmelṭha ka ti ve ve; Mampuia hian a phulo ve ve zawk ka ti.





"Aaa...an ṭhat ve ve kha. Mahse, hmel landan aiin thinlung a pawimawh tih hria la" ka ti ve vat, a lu a bu ve nghut tak na a, a ngaithla liam mai niin ka hria. A ngawih vang vang hnuah "Mahse U...hmel hi a pawimawh ve tho asin, saw Sawmi te ang saw chu ka duh bik miah lo" a rawn ti leh hlawl a. Sawmi ka mitthla ah a lang nghal zawk, ka nuichhuak ta chiam a. Sawmi hi kan ṭhenawm lawk a awm an ni a, a fel zawng a fel na ngiang mai; mahse, amah paw'n 'hmelchhe lalnu' a in tihdan ah ṭha a inti vak bik lo tih a hriat. Mittui tla phungin ka nui a, thutak deuh zawk a ngaihzawng thlan chungchang a fimkhur tura chah ve leh mawlh mawlh in ka room lam ah ka pheisan ta a.





Khuma ka phone dah ri tawp chiah chu ka hre hman, ka pan hnai vat a; Hriathlua'n vawi thum lai min lo call tawh a lo ni. Rang takin ka call let nghal vat a, a la rang kher mai. "I va buai awm ve? Nge, inleng i nei ṭha deuh em ni?" a rawn ti nghal zat.





Ka nau nena kan inkawm mai mai thu ka hrilh let ve thuai a, lo lên a châk thu a sawi nuah nuah a. Ka khawngaih ve deuh, lo lên a duh thu a sawi ve apiangin ka phal lo ziah; a lungawilo ve lek lek ṭhin nangin a thinrim hluai duh ngai lem lo. Naktuk zana lo leng turin ka ti ta nge nge a, zanin ah chuan a lo kal chhung nen a tlai mai dawn; a lawm viau tho chuan ka hria.





A tukah pawh nilengin dawrah ka awm leh, tunlai chu ka nu in pangpar a atchilh ve tlat a; dawr lamin a rilru a luah teh chiam lo. Kei ka lo awm ve bawk a, min ring deuh chawt a ni ber. Nu Muani a lokal lova, khua a har duh viau mai. A fapa accident damdawiin ah a awmpui a ni awm e. A fate vang hian a buai ve ṭhin khawp a; fapa pahnih neiin ruihhlo lakah an fihlim lo ve ve a, a pasalin a boral san tawh avangin a ko a rih tur zia chu ka hmu thiam.





Thli thaw deuh vûk vûk chuan awm a ti nuam lo deuh a, shawl a in tuam hlânin ka ṭhu tawm chal a; kawngpui a veivak ho pawh an kal dawr dawr hlawm. Reilo tê ah ruah a rawn tla pheuh pheuh a, tho thuaiin dawr kawngkhar chu ka pawt khar zui deuh a; thli a thaw tel bawk nen thawmhnaw a hnawng chuap zel. Ka ṭhut fel leh mek laiin ka phone a ri a, ka en zui vat. Thingtlang lama ka unaunu a lo ni, ka la zui thuai.





"Dawr i nghak em ni, kan va in be khat tak" a rawn ti lâng lâng a, thawm dang a tam kher mai. An ri deuh luai luaiin ka hria.




"Nia,min rawn be duhlo em alawm; in va bengchheng ve?" ka ti let ve thuai




"KṬP kan hnatlang a, rawra kan chhu
a. Dam chuan karthar ah lo chhuk lawk ka tum a, ka rawn hrilh lawk che" a rawn tizui leh vat a.




"Awi, a nuam dawn e. Hmundangah thlen tum miah suh, engnge ilo tih dawn?" ka ti thuai a, a lo zin tur thu ka hria chu ka lawm hle bawk.
A mit entir a ngaih thu te sawiin 'awm no ka duh' te a ti fiamthu a, inbe zui bawrh bawrh in kan nui dun hak hak a; a lokal hun a hmuak ngei ngei turin min chah ngun viau. Zanlam a min rawn biak leh tur thu sawiin kan dah zui ta a.





Ruah chu a baw hawk hawk a ni ber, ka nu in min rawn bia a; min ngaihtuah lo turin ka lo ti vat. Dawhkan ah bawk in ruahsur chu ka thlir reng a, ka mut a ti chhuak ruih mai. Hriathlua a reh vang vang a, hna an thawh tur thu zingah khan min hrilh a; khawchhia nen hnathawh a nuam vakin ka ring lo. Hriathlua hi kutthemthiam tak a ni tih ka hria, Inchhung bungrua a siam nalh tak tak te a phone ah min entir tawh a; hna pawh a thawh sen loh a hmu ve ṭhin. A kum a la upa vak bik lova, chutianga mahni puala eizawnna a nei thei chu ka chhuang ru ve viau ṭhin bawk.





Ka lo muthlu sek hman, "Mipa T-shirt var in nei em le?" tih thawmah chuan ka harh zawk. Kawngka a rawn dak lut dêk dêk ka hmuh rual chuan ka khêk râih a; Tleipuii a lo nui var var mai. Tho chhuak thuai in kawngka ka hawng zau zui vat a, ruah pawh a lo hân fel tawh. Mutthluk mai hi ka awlsam viau, Biakin a mutthluk ka hrat lutuk erawh ka nu in min khak reng a, ka zia tawh viau.





"I rawn sawi lâwk si lova, ka lo beisei miah lo che" tih pahin a ṭhutna tur ka pe zui vat a. A kawr beng thuak thuak in a ṭhu zui ve nghal a, "Tum loh deuhin ka rawn chhuak, ka nu in Bank ah min tir a; ka rawn kal kawi mai mai" a lo ti thuai a. Thingpui a in duh leh duh loh ka zawh chuan engmah a la ei loh thu a sawi vat a. Keipawh ka ril a ṭam tawh, eitur ka chah zui thuai a.





Sanpiau sa ṭha ver vawr chu tui ti zetin kan ei dun mawlh mawlh a, kan titi siam siam reng bawk a. Hriathlua nena kan chanchin ka hrilh lai chuan ner sak sak chungin min melh ngar a. Ka hrilh har avangin a thinrim lek lek bawk. Kan inhriat chhoh dan te ka hrilh chuan a awih lo deuh a. Whatsapp Group pakhat ve mai aṭanga ngaihzawng ka nei chu mak a ti ve deuh tih ka hria. Keipaw'n mak ka ti fo ṭhin, ngaihzawng ka nei ve dawn anih pawhin hriatchian loh chu ka duh ngai lo kha a nia.Hriathlua erawh a danglam ve chiang a ni.





A thlalak te ka entir a, ṭha lua tia sawi tur chu a ni lo; mahse 'a pa ee' a ti thung. Hmeichhe duhzawng chi hi a ni ve a, a luck viau tih pawh ka hria. A phone ka ensak chang paw'n tih tauh bûr bûr na tur ka hmu ziah. Mahse, an biakna rul tawka a chhânna bak ka hmu ngai chuang lo. Zanin a rawn len a tum thu te chu ka hrilh ve a, vawikhatmah ka la len tir lo chu mak a tih rual in mawl min ti bawk. Tun aṭang chuan rawn leng ve zeuh zeuh ṭhin tawh mah se pawi ka ti lem lo, inleng nei rual kan ni tawh a; chhungte pawhin an hrethiam viau. Malsawma pawh a rawn leng lut fo alawm le, Hriathlua anih avanga ka phal loh tlat nachhan tur ka hre lo.





Zanriah kan ei laiin Mampuia'n ngaihzawng a neih thu a sawi a, ka nu a phûr viau; Nuchang pui e ti lo hian a fate chungchangah hian a phûl leh hlut ṭhin. A bialnu thar chu 'Thartei' a nih thu a sawi a, a tu zawk kha nge pawh ka hre lo e. A fak nasa bawk a, a fel viau turah ngai ang. Ka pa in kan unau in min zilh zui leh nghal mawlh mawlh a, nupui pasal zawn kawnga fimkhur viau turin min hrilh thar leh mawlh mawlh a. Kan hriatchian fe loh chuan kawppui nei mai lo turin min hrilh thar leh a. Hriathlua nena kan inzui chhoh dan hria se chu min khak ngei ka ring, ka sawi ri ngam teuh lo.






Ka nu in Diktea chu fiamthu in bialnu a neih ve leh neih ve loh a zawt thuphung a. Diktea kan en ṭhap. "Ka peih teuh lo, nupui pawh ka nei peih ve lo. Mi fate chawm ai chuan mahni a nuamsa deuh a awm ka duh fe" a ti bak hluk a. Kan in en hrek hrek a; kan nui tet tet hlawm a. He nau hi chu a piang maksak ve a ni. In leng ka neih tur thu ka sawi ri ve zauh a, sawi lâwk lova neih deuh thut kha nuam ka ti chiah lo a ni.





Chaw eina ka tihfel zawh ah ka in tifai thuak thuak a, a vawt reuh phian leh nghal. Zan dang zawng aiin darthlalang hmaah ka ṭhu rei, lan mawi loh ka hlau ru ve em em tawp; ka bialpa a lo leng dawn miau alawm le. Chaw kan ei hma khan a rawn kal thuai tur thu a sawi a, a rawn lang vat in ka ring. A lo thlen hmaa lo in tihfel zawh hman vek ka duh, ka zâm ru ve deuh leh nghal.





Ka nu leh pa te ṭhenawm pitar damlo kan tur in an chhuak a, ka thaw deuh huai. Ka nu hian inleng te thil zawh chîk vak a ching ta ṭhin a, engtia in hmelhriat nge kan nih tih te a zawt fuh palh reu reu ang tih ka hlau. Mampuia'n min lo chhaih deuh sek a, "Haw hun a hriat loh chuan ka melh rum vak ang" a tih loh leh, "Ka kâwm chiang hmasa phawt ang" a ti thul. Ka kalna lam apiangah min zui kual a, "I sam hi ṭawn zawk la, heti hian ti la?" a lo ti ve sek a; kan in nam kat leh dawr dawr ṭhin.





Lo nghah pahin TV ka en mai mai a, Sana ka en deuh sek tawh; ka rin aiin a lo thleng har. Ka helhhawlh nge ni, ka ṭhu mai mai pawh chu phi deuh chengin ka in hria. Kawngka kik ri dat dat thawm chu ka chhâwn vat a, kawngka lam ka en reng bawk. Kawngka a lo pên lut mek chuan min ti phu zawk, Malsawma a rawn lut nawlh mai. Ka lo en hû ringawt a, ani ber kher chu ka beisei loh ber te zing a mi a ni.





Ka ṭhutna lam rawn panin a rawn ṭhu ve nghal a, ka en reng na chu ngai pawimawh lo zetin a meizial a phawrh a, a zu khu zui luih luih.
"Engnge i rawn tih dawn a?" ka ti nghal tâwng, mak ka ti em a ni. Min melh zawkin "Ka rawn lêng" a ti bung nghut a, TV lam chu a melh zui ngur a. Diktea tui thun tur rawn chhuak in a hmuh chuan mak a tih ve hmel deuh, a mit ko a rawn san âk a, ka lu ka lo thing zeuh thung. A tu a te mah chuan kan beisei lo a ni ber.





Sawi vak tur kan nei lo dun aniang, ngawi rengin TV chu kan melh dun tlawk tlawk a. Ka naute room lamah an tawm bo daih bawk nen kan TV en thâwm bak thâwm dang a awm lo. Chutia kan ṭhut ngawih reng lai chuan kawngka kik thâwm bawk a rawn awm leh a, lut turin ka chhang nghal vat. Hriathlua a rawn pen lut ta thauh mai, lo nuih sak in ṭhu turin ka lo ti nghal vat a. Ka bula ṭhutna âwl chu melh zauhin Malsawma a melh leh zauh, kan ṭhutna ep chiah a ṭhutthleng chu a pan zui ta daih. Nuam tih lohna nasa tak ka nei nghal pang mai.





"I chhungte an awm nange?" a rawn ti zui zat a, ka nu leh pa damlo kan a an chhuah thu leh ka nau te room lama an awm thu ka hrilh nghal thuai a; ka ṭawng pah chuan ka che deuh sek bawk. Malsawma chu TV lam melh rûn in a ṭhu ngawi reng a, Hriathlua rawn lut pawh vawikhatmah a la melh lo; a awmdan chu a mak ka ti. Ngaihven anga lan erawh ka tum hauh lo thung, a lo ṭhu ngawi ve reng mai aniang chu.






Hriathlua chu ka be zui ta daih a, an hnathawh chungchangte ka zawt luam a; ṭha tak chuan min chhang ve zel bawk a. Mampuia rawn chhuak chu lo ṭhu ve rih se ka duh; ka mitmei ta zauh a. "U Malsawma chu, i rawn lên ve teh mial a; i dam ṭha maw?" a rawn ti zui nghal vat a, kei ka lo thaw huai thung. Malsawma paw'n ṭha takin a lo chhâng ve mai bawk a. Mampuia ṭawngkam chuan a rawn leng fo lo a ni tih a ti langchiang viau in ka hria; Hriathlua pawh chu be zui ve nghal zatin an awmna te a zawt zui tak luam a. Mampuia hi chu titi te hi a thiam riau a; an titi dun thei viau. Kan boruak ni deuh churh pawh a zia ta hawk in ka hria, min chhandam a ni hawt e.





Malsawma chu a ding hluai a, haw mai a tum thu chu a sawi nghal a. Pawi ka ti lo nasa, a awm ve khan boruak a ti nuamlo ru riau. "A la hma alawm, la ṭhu ve rawh" te chu ka ti khawmawi ve a; a ṭhut leh mai tak tak erawh ka hlau ru viau thung.





"Zan dangah ka lo la leng leh zawk ange" tih pahin kawngka lam a pan nghal nul nul a, ka ṭhut hmun aṭangin ka 'mangṭha' liam ta ngawt a. Hriathlua Thingpui lum sak turin choka lam ka pan zui vat a, a lokal hma khan "Ka tuihal a reh thei lo, thingpui sen hang min lum sak vat rawh aw?" a rawn ti lâwk diam kha a nia.





Thingpui chu ka lum so thuai a, kurtai nen ka chawi phei nghal vâ vâ a. Air Gun chungchang sawiin an lo ri dun ve nasa, ramvah lam te a ni an lo sawi; khawiah nge maw an ramvah ngawt ang ni? Mampuia'n a sava kahthlak zat a sawi chu mak ti zetin ka lo en reng ringawt, a kahthlak lai ka hre miah lo; He pa hian 'ka bâwl e' a ti ve khanglang emaw ni? Pakhat lahin âwih hmel zetin a lo bûk khum nghat nghat bawk. Ka nui chhuak ta chiam a, a ngaihna hriat loh hmel zetin min en dûn hû hû a.






Thingpui kan in zawh chuan Mampuia chuan lehkha zir lawk a duh thu sawiin a tho zui thuai a. Hriathlua chu rawn leng fo tura hrilh in room lam a pan zui ta daih a. Mampuia a luh fel rualin min si chêt in Hriathlua a rawn in sawn a, in en in kan nui dun sak. "I va rawn kal har leh si ve?" chhuahchhal ti tih in ka ti zui zat a. Min chhâng mai lovin ka kut la in a khâl zui niap niap a.






"In aṭanga ka rawn chhuahna chu a rei tawh, ka nu in min tir kawi leh alawm maw le," a rawn ti ve sup. A nu hian a tir nasa ve ṭhin hle aniang, chhuatnawh leh in sûk te thlengin a tih tir ṭhin tih a sawi tawh tlat a; ka nu ang tur riâk ah ka ngai ve hmiah.





"In lêng te i lo nei a," kiai suk in a ti leh, ka nuih a za ve mang ṭhak lo. Rawn lên min dil apiangin ka phal lo ziah a, zanin a rawn lên hmasak ve ber ṭumah Malsawma a lo awm khur bawk nen; ngaihloh lama a ngaih ka hlau ru viau mai. "A rawn leng ve hlawl anih kha... Zan dangah a lokal ngai miah lo" ka chhânna chu pawm se ka ti takzet.





"I nau ṭawngkamah khan ka hrethiam ve alawm. Chubakah nula in nia; inleng te chu nei ngei ngei tur in ni zawk. Lerh lo la a ṭha a ni mai" a ti dam dup a, ka thâwl huai in ka hria. Ka hlauhthawn rûkna te chu lâkbo ang huai in a kiang duak mai.



"Chaw pawh ka ei mang lo" a ti nghut a.



Mak tih hmel zetin ka melh vat a, "Engatinge?" ka lo ti thuai a.




"Ka hmu châk tawh lutuk che a," tih pahin min melh rulh a, a mit min siai zauh. Ka nui sak a, lâi zetin ka hawisawn thuai a.




Min rawn nâwk salh a, "Engnge?" tih pahin ka kiai sak a.




"Min duh ve tak tak tiraw? Rinhlelhna ka nei ṭhin" a ti dût a.




Ka ngawi vang vang a, ka melh ralh a, ka nui leh ringawt a. "Mawh?" a rawn tihzawm leh a. "Ka awmdanah a langin ka hria" tih pahin ka hmer salh a.




Muangchangin min rawn kuai her a, ka lo nui sak a. A rawn hnaih lehzual danah chuan a beisei ka hai lo nasa. Min rawn fawp zui zat a, ka tîm ru deuh, ka nu te an rawn haw thut ka hlau viau.




"Duhtawk ang, a hunlo em mai. Ka nu te pawh an rawn haw dawn tawh ang" tih pahin ka ṭhu ṭha nghal a.




Ṭhut ṭhat sut sut pahin, "Min duh tak tak rin lohna lian zet ka nei ṭhin" a rawn ti leh ngut a. "I ho" tih pahin ka chûm taih a. Hriathlua nena kan hun hman chuan pâr a chhuang ṭan mek tih ka hai lo.




"Ka phei phawt ang, i nu te rawn haw hma in ka phei ange" tih pahin a ṭhu ngil nghal a.




Ka nu te hnenah engkim ka sawi vek tawh a. Rawn haw pawh nise ṭha taka kan lo inkawm te chuan pawi tihna ka nei hran lo. Mahse, ka sawi vek hnu pawha haw a tum ṭâlh takah chuan ka dang ṭung ta bik lo. Kawngka thlengin ka thlah a, min rawn fawp leh zeuh a, ngaihawm tawka khawsak a thiam dawn riau in ka hria.





Hun pawh pangngai takin a kal ve zel a, ka hun hmandan pawh a ngai reng tih theih a ni. Chhun lamah chuan dawr ah ka awm chawt a, ka pa a hnathawhna lamah a kut a tihhliam nat deuh avangin ka nu nen In lamah an awm deuh chawt a. Ka nu in In lam chet ah min âwl hneh bawk a, keipawhin theihtawp chhuahin dawr lam chu ka enkawl uluk ve viau bawk. Ka nau te pawh an zirlai ah a bur dun ve ngat ngat a, Diktea erawh in thlahdah chang a nei leh zauh ṭhin; ka nu in dan pangngaiin a khak deuh reng bawk.





Hriathlua pawh a rawn leng ve ta fo a, ka pa nen an kalna lam a in ang bawk a; an titi a rual ṭhin viau. Ka nu leh ka nau te pawhin an be chhe lem lo, ka nu erawh chuan thu ṭha min hrilh fo. "Hmeichhiat mipatna lam kawngah fihlim la, rilru nei ranin ngaihzawng nei ang che" tih chu min chah ngun ber a ni. Ka theih ang tawk chuan ka zawm ṭha ve viau in ka hria.






A chang chuan zanrei tak tak thleng te pawhin kan mengdun ve fova. Ṭhiante In a chaw ei chhuah dun te pawh kan nei ve ta zeuh zeuh mai. Hriathlua ka fak em em na chu, mipat hmeichhiatna lamah theihtawp chhuahin ka in vawng tih a hria a. Min venpui zawk ni maia hriat chang te ka nei ṭhin. In ngaizawng ta chu hun fialral hman chang kan nei fova, kan pahnih chauha kan awmdun chang a awm ve zauh zauh ṭhin. Chung hunah pawh chuan kuthlei zawngin ka bulah a khawsa ngai lo.






Ka nu hian min ngaihtuah em em a, min chah nawn fo ṭhin. "Kan hmangaih, kan pasal tur ngei ngei emaw kan tih te hi an nilo fo a nia. Mipa in i thianghlimna khawih bawrhban sak duhna che rilru a put tawh chuan hmangaihna aiin i taksa mawina a dah lian zawk tihna a ni" tih te chu ka hriat bel hun khawpin min hrilh taima.





Hriathlua ka fak em em na ṭhin chu, hnathawh kawngah a taima a, a theihtawp a chhuah ṭhin. A hnathawh ah a chiang a, a rintlak em em a. Thil reng reng phuailuai takin a ti ngai lo. Buai leh hun neilo chung chung pawhin a hun neih ang ang ah chuan min ngai pawimawh thiam em em a, kei lah tihtauh ka chîng thar riau leh nghal. Dam dup leh ṭha takin min sawipui lui thei zel a, a tawpah lungawi takin min chhuah thei ziah bawk.






Mipa leh hmeichhe inkâr a dah zau ve ngai lova, hmeichhia a dah pawimawh thiam em em a. Hmeichhe dinhmun khirh zia a hriatthiam ang chiahin hmeichhe pawimawhna a hrechiang hle bawk. Thil a sawi liam ve puat ngai lova, a sawi tawh chu hlen loh a neih ka hre ngai lo. A bula chuan thilsawi tur finkhur a ngai zawkin ka hria. Thil hote anga lang pawh a bula ka sawi rik zeuh tawh chu min tihsak ngei ngei ṭhin.





Min ngaih thu a sawi khu chûk ve ngai lova, chetzia in a tilang ṭhin. Kan inhmuh a, kan awmdun tawh chuan engmah dang thawk ngai lo, keimah chiah ngaihtuah ngar ngar ni ang hrimin keimah bak buaipui a nei ngai miah lo. Ngaih loh pawh tum ila a har em a ni.





Tlin lohna tam tak ka nei tih ka hria, insitna tur pawh ka nei ve ṭeuh. Inthlahrung taka ka tihsual ngaihdam dil pawh ka ngah viau. Mahse, a theihnghilh liam mai dawn lo tih hriat reng pawh hi a haider lui fova, engkim ka siamṭha thei tih min hrilh âwl lova. Harsatna ka tawh chhe tê pawh nise ngaithla liam satliah lovin ka hmachhawn theih thu te, ka hneh theih thu te in min fuih lo ngai lo. A bulah chuan ka thla a muang hliah hliah a, ka famkim riau hian ka hre ṭhin.





Nilenga ka hmuh loh te hian ka ngai leh veng veng ṭhin. Amah suangtuahna nen ka en ngai ka lo en leh veng veng ṭhin te chu keimah ngei pawhin mak ka inti thar viau. Engkim ah, ka thil tih engkimah a tel ve vek niin ka hria; amah Hriathlua ngei kha.....






(to be continue.......)


Show post links
Top

[Ngaia]

DEAR PAIN
Chapter - 4




By : Brigida Hugo







Zirtawpni a ni a, Mampuia piancham a ni bawk. Kum 21 a pum ve dawn ta reng mai, hun hi a kal chak teh e. Tlai lamah Thartei chaw ei tura a sawm thu a sawi bawk a, ka nu leh pa te pawhin an rem ti thlap mai. Zing karah tlailam chawhmeh tur leiin kan chhuak dun a, Vawksa leh Arsa kan lei a, Vawksa bik hi a hmaih ngai meuh lo. Bai tur enkual leh in amahin a thlang vek, ka zui kual satliah ve a ni ber.






Kan in lei fel zawh ah kan haw leh nghal nal nal a, chaw ei zui thuaiin Mampuia nen bawk kan chhuak rual leh a. Kâwn thleng kal dunin, Taxi la in dawr lam ka pan zui thuai a, haw tlailo turin min chah ngun viau mai; keipawhin ka haw vat tur thu ka hrilh thuai a.





Dawr ka thlen phei ve meuh chuan kan bul vel dawr chu a lo in hawng kim vek tawh. Kan in hawn hnu fe a in hawng ve ṭhin U Matlani tak ngial pawh a lo in pho fel diam tawh; ka che zui ve nghal sawk sawk a. Vawiin lamah Hriathlua te lui kal an tum a, biak theih anih dawn loh thu zingkar ah khan min hrilh lawk tawh bawk; an kalna tur lamah Signal a awm dawn lo tih a sawi. Ruah a sur thut thut fova, fimkhur turin kan in chah uluk viau.






Chawhma lam chu dawrtu ka nei vak lo, Nu Muani puanṭhuina bulah ka tâp kual vel mai mai; a khât tawkin dawr lam ka ngaihven pah reng bawk. A fapa accident kha a in hliam na riau a, In lamah a la tawm deuh chawt a ni awm e. A fapa naupang zawk lah a laktlak bik chuang si lova, a rilru hah ṭhin zia a sawi mawlh mawlh bawk. A nun a hahdamlo tih a landan pawr fap ah chuan a lang reng, ka khawngaih ru viau bawk. Keini chhungkua hi kan vannei a, ka nau te hian ruihtheihthil lam an hawi lo rih chu ania; a chhun a zana rui reng mai bula awm chu a hahthlak viau ang le.






Chawhnu lam erawh dawrtu ka nei ve ta nak nak a, ka buai leh ta viau mai. Ka duh ang a hma pawhin ka in khar leh hlei thei lo. Mampuia'n min rawn call deuh chhên tawh a; In lamah an awm tawh a nih hmel. Dar 6 rîk dawn hnaihah ka in khar fel thei ta chauh, haw pahin Mampuia Present tur ka enkawi a; Sana leh Perfume ka lei sak. Ka tuam tir laiin vawikhat chu min lo call leh hman hram. Taxi ruak a rawn tlan hlauh a; phar vatin In lam panin kan tlan zui nghal thuai a.






In chhung ka luh rual in Mampuia'n choka lamah min kuah phei zui dat dat a, dawhkan kîl a chawhmeh lo chan mek hmeichhe hmelṭha zet chu min chibai tir nghal zat; Thartei a nih thu a sawi nghal bawk. A thlalak ai khan a hmelṭha ka ti daih zawk. Hmeichhe tam tak chu Phone ah an hmelṭha em em a, hmaichhanah hmu ila kan la hmuh ngai reng reng loh emaw tih tur khawpin an danglam thei; kan ṭhiannu pakhat pawh hi a ni chiah! Amah be tam em em pawh hian an inhmuh fuh pawhin an hre ngai mang lo. Phone thlalak a chhelo, nui sâng leh vun nung tak kha, a takah erawh a letling hlauh thung. Thartei erawh hi chu a thlalak aiin a takah a hmelṭha ka ti zawk. A nui var var reng a; a hmel hmuh a hahdamthlak hliah hliah. In thlak turin room lam ka pansan leh rih a, Present pawh nakin lamah ka la pe chauh ang.






Ka nu in bai a siam a, a tui leh dawn nasa; kan bai siam thiam em em kha a ni tlat. Kan ri ve laih laih mai, Diktea hmel ka la hmu miah lo; ani hi chu mi hrang deuh an awm chuan a tawmbo tlat zel. Ka pa in Thartei a fiam zauh zauh a,Thartei hmai a sen leh ṭan ṭan ṭhin; ka nu in a khak leh fak tawh. Chaw ei kan peih a, kan siam zui nghal zung zung a, Mampuia chu a inla patling ve ringawtin ka hria. Bialnu te chaw ei ah a sawm ve dêk dêk a, a chetzia thleng in zu in la patling ve ringawt a.






Kan zanriah ei boruak pawh a nuam kher mai. Mampuia'n Thartei a vil hneh hle a; a zah hlau in chawhmeh a suah sak deuh reng a, an in melh rum leh rân rân ṭhin chu ka hmuhhmaih lo nasa mai. Ka nu chuan a rûk in a chîk hle tih ka hria, ani fimkhur ta reng reng tan chuan a tih awm tak a ni reng bawk. Thartei'n thleng sil a chuh teh tlat a, ama tan pawh chet ve bawrh bawrh kha a nawm zawk ka ring; ka hnial duh ta lem lo.






Rei vaklo kan ṭhutkhawm leh hnu ah Mampuia'n Thartei a thlah a, Diktea'n uluk zetin lehkha a zir ve teh mial anih chu! Ka nu leh pa in TV an endun a; ka pa hmetsawn kual peih lutuk ka nu in a ânkhum leh hlak hlak ṭhin. Ka pa bula TV en chu kawlphe en ang vel hi kan nia, a tui theih tak tak loh. An pahnih a in tur thingpui ka lum sak hnu ah pindan lamah ka luhsan zui ve ta daih a.






Nilenga Hriathlua a biak theih loh avangin ka ngai deuh veng veng tawh, ka ngaihtuah hle bawk. Tui hi ka hlau bawk a, ka ngaihtuah lo thei lo. Tleipuii biak ka tum a, a la thei miah lo leh nghal. Chhun lamah chetna hun ka neih loh avangin ka thawmhnaw bawm te chu ka tifel ta vel mai mai a. Ka chet mawlh mawlh laiin ka nu in min rawn ko lang lang a, rang takin ka chhuak vat. Ka nu te kiang mai a lo ṭhu ve ka hmuh chuan ka ding dat a; ani pawh ka thawm hria in min rawn en ve vut.





Ka pa chuan "Hei, Malsawma a rawn lang hlawl mai, lo inkawm teh u; mut zal mai mai ka duh e" tiin ka nu mitmei in a sawm pah zauh a. Phur fahran lo in ka pan phei a, a bulah pawh ṭhu hnai duh lovin ṭhutna dangah ka ṭhu zui daih a; engnge maw a rawn lan ve chhen ni? Ka nu leh pa pawh room lamah an lut zui nghal a, ka nu chuan a thawh pahin a en chîk viau tih ka hria.





Remote la in TV chu ka hmetkual zung zung a, biak hmasak hlut ka tum bik teuh lo. Min en reng tih ka mitsir in ka hmu tho, ka melh ngai ka melh ran thung. "I lo mu hman em ni?" a ti sup a, ṭawngchhuak hmasa ah a ṭang ta nge nge.




"Room ka ti fel vel mai mai, engnge i rawn tih dawn?" ka ti bul hmak.



"Nula In a kan len in engnge kan tih ṭhin? Ka rawn rim che" a ti bung zui ve nghut. Kan inbiak vel dan chu naupang chhia ka ti; mahse, biak ṭhat hurh ka tum bik lo.



"I bialnu rim ve la a ni mai alawm" ka lo ti leh hmak a, ka thin a rim ru deuh ṭeuh tawh.





A ngawi reng a, a melh ngai a melh ngur reng a, eng tak ngaihtuah ang maw? A thaw chhuak huai a, a chal a tuai puat bawk. "Bhabi, ka ngai ṭhin che" a rawn ti chhuak sup. Ka en vat a, thutak fahran in min lo en a; ka thin zawn su deuh dup chu ka hre reng bawk.




"Malsawm, thu awmze nei lo sawi sawi suh. Ngaihzawng nei reng chunga khatiang thil sawi te kha a zahthlak a nia" ka ti kha fak.




"I lakah thil tam tak ka tisual tih ka hria, ka inchhir hle bawk. Mahse.." tiin a ngawi dat a, ka lo en reng. "Ka hmangaih che" a ti ri chu zawi tê mah nise ka bengah chuan a ri ring hle thung. A thusawi apiang chuan min deng dawt dawt a ni ber. Malsawma ka hriat ṭhin kha chuan min hmangaih thu a sawi ngai lo a; ka beisei ngai hek lo. Keima'n ka duh hneh em avang khan inngaizawng hming kan pu ve mai mai chauh zawk niin ka hria.





"Chutiang tunah sawi hun a ni lo, kan inkarah engmah a awm tawh lo" ka ti chhuak hap, ka aw pawh a dik hrep lo e. Diktak chuan khati khawp a ka duh a, ka atchilh lai te khan heng thu hi sawi nise kei aia hlim an awm bik nang. Mahse, a ngaihsakna pawh ka hlawhchhuak zo mang lo chu anih si kha.





"Bhabi, i mitmeng a min ngaihna la chambâng te hi ka hmuhthiam loh i ring em ni? 'Ka hmangaih che' tih hi kan kar a tawp hnu ah khan ka hrethiam chauh. Nang anga min ngaihsaktu ka la tawng lo a, ka tawn leh pawh ka ring tawh bawk hek lo. Bul kan ṭan ṭha leh thei angem?" ati zui leh sup. A "Aw" ah chuan ngenna a lang tel, thûk ruih in min en reng bawk.





Kei erawh ka thin a sa phat, a duh duh a va kawp kual hnuah ka ngaihsakna leh ka duhna a hrechhuak ve chauh a. Chutah bul ṭan a la sawi tel cheu, min ngaihnep zia a lantir ni mai in ka hria. "I duh huna i kalsan a, i duh hun a let leh mai mai tur ka ni em? Min ngaihnep zia ka hrethiam chiah e" ka ti ram hmak a, ka tawt ṭun bawk. Ṭawng rin vak chi a ni lo bawk nen, kan boruak chu a ipik ngawih ngawih.






Min en vung vung a, keipawhin ka melh let kar. Chutia kan in melh ngar lai chuan Mampuia a rawn zai lut rut rut a, Thartei a thlah kha a rawn let chiah anih hmel. Keini pahnih hmel tak ran a lo awm chu mak tih hmel zet in min melh tawn zak zak a, ka mitmei in room lam pan tur in ka ti nghal thuai; bu nghatin a lut zui nghal nalh. A lut fel chiah tihin Malsawma chu a ding hluai a, min chhuk melh rûn bawk. "Ka tihsual siamṭhat na hun min pe rawh Bhabi... Hmangaihna nen bul ṭan leh ang, lo in ngaihtuah la aw? Ka haw phawt ang" ti pahin a tho thurh a, kawngka lam a pan zui nghal nul nul a. Ka thlir mawl tawp, a awmdan hian min ti hrilhhai chiang bawk em a ni. Tho zui ve in kawngka ka kalh sawk sawk a, room lam ka pan zui ve ta daih. Ka thawmhnaw phawrh darh ho pawh chu ka khawih chhunzawm peih tawh lo, Almirah ah hnawh lut zung zungin ka khar zui ta ngawt. Tihfel ka tum hma ai pawh khan a hnawk zawk.






Khumah ka bawk thla thlawp a, kan boruak khan min hmet chau. Malsawma thil sawi zawng zawngte ka ngaihtuah let phei chuan ka awm a nuam lo rum rum thei hial. 'Hriathlua reng reng pawh hi a la haw lo emawni?' ti rilru chungin ka phone ka ban thuai a, ka hmet eng nghal pap; ka meng kawk mai. Min rawn biak a tumna chu a lo tlar thla dal a, ka phone ka lo kalsan daih chu mawl ka in ti hle bawk.






Rang takin ka Call let vat a, reilote ah min rawn chhang zui vat. "Biak i va har ve, i mu tawh em ni?" a rawn ti nghal zat. In thiamlo deuh chungin ka lo muthilh sek thu ka hrilh; ka awm a nuam lo nghal veng veng bawk. Malsawma nena kan chanchin hi a hma in min zawt tawh a, zep neilo in engkim ka hrilh vek. Zanina alo len thu ka sawi chuan a lungawiloh phah nan a hman ka hlauh vang a sawi ngam lo ka ni bawk.






An hlawhtlin thu sawi zui mawlh mawlh in, naktuk lamah kan ta tur pawh dawr lamah min rawn pek tur thu a sawi. Hnial viau mah ila
"Nang berin i ei loh in, kal hah man a awm nang" a ti deuh tlat si. Lawm takin "Aw" ka pawh zui thuai ta zawk a. Min ngaih pawimawhna ringawt pawh a hlu takzet. An la ri deuh liai liai a, thingpui an in mek tih ka hrethiam mai. An la buai deuh bawk nen a tuk lama inhmu tur a inti in kan in biakna chu kan ti tawp zui ta thuai a; a chauh viau pawh ka ring.






Whatsapp ah lut zuiin Malsawma message lo awm vâng chu ka hawng nghal zat, "Muttui aw..Bhabi. Ka hmangaih che" tih a lo dah vâng mai. He pa tehhrep hi a, tun a taka min hmangaih thu pawh chu a sawi tak zut ni; Delete hmak in ka chhuak zui ta daih. Zangthalin in chunglam ka melh ran a, ka ngaihtuahna ah chuan Malsawma leh Hriathlua an lang tawn sek bawk a. Malsawma aiin Hriathlua chuan kawng tinrengah min ngaihtuah zawk tih ka hria, a phak tawkin min ngaihtuah em em reng a; a lakah vuivaina tur ka hmu lem lo. Mahse, Malsawma khan sawi dik chin a nei, amah ka ngaih veng veng na kha a la reh fel vek bik lo.






Kan hun hmandun tawh te hriatchhuahna tur thil a awm zut a, theihnghilh nghal vek theih a ni bik lo. 'Vawilehkhat ah reh duak thei lo mah se zawi zawiin a la reh ve mai ang' tiin amah hriatrengna nen nun ka hmang a; nat vawng vawng chang lah ka ngah. Amah ka ngaih em em ṭhin lai khan hmeichhe dang bulah hlim takin a awm a, tunah lêm hmalam ka pan ve ṭan chauh a; bul ṭan leh turin min sawm leh si. Amah avanga Hriathlua kalsan chu ka tum lo bur, 'ka hun kal tawh ami ai chuan ka tun hun ami hi ka vuan tlat tur a ni' tiin ka infuih sauh sauh a.






Tukṭhuan kan ei laiin ka nu in Malsawma chungchangah zawhna a nei ta chat mai, a ngawih liam mai kha ka ringlo sa reng a ni. Min zawh dan velah chuan min ringhlel deuh niin ka hria. Mahse, kan tawp hlen tawh thu chiang taka ka sawi takah chuan a ngawi zui ve leh mai bawk a. Malsawma nena kan inṭhen tirh lai boruak vel kha a hre ru kar tih ka hria, ka natzia kha ka thup hlei thei meuh lo anih kha. Khatiang boruak hrehawm zet kha ka tawn tawh lohna turin rilru pek dan chintawk nei thiam turin min hrilh ṭhin, min venpui vek a ni ber e.






Chaw eikham veleh dawr kal turin ka insiam a, Mampuia'n min nghahpui tum viau mah se ka hnial ta mai. Hriathlua'n lo kal a tum bawk nen, ka pa Ar In sak tum Diktea nena lo pui zawk turin ka ti hlauh a.





Bus in ka kal a, Traffic Jam ah kan tang deuh reng; ka thil nin em em zing ami a ni. Dawr ka thlen chuan Nu Muani a lo la in kalh ṭhiap mai, tun ang hunah pawh a lo la awm lo chu harsatna engemaw a nei leh tawh anih ngei pawh ka ring. In hawng zui sawk sawk in thawmhnaw ka pho chhuak zui mawlh mawlh a, ka phone a rawn ri ve chiah bawk. Hriathlua a lo ni, dawr a ka awm tawh thu lo hrilh vatin a rawn kal ve nghal tur thu a rawn sawi vat bawk a.





Thawmhnaw en an awm khât tawk ve reng a, bungrua pawh lak a hun leh tawh. Kan dawr hi kan tluang ve riau a, chu erawh ka nu vang a ni thung; mi duhzawng tur âwm thlan hi a thiam riau. Min dawrtute nen kan in tihfel lai mek in Hriathlua a lo thleng a, Polythene a rawn khai puar âl mai. Ṭhutna ka pe thuai a, ka pawisa kir tur ka daih loh avangin pawisa thleng nawina tur zawngin ka chhuahsan leh rih. Kan thlang fe Whole Sale dawrah ka zu thleng thei hram a, Hriathlua tan Energy Drinks ka leisak nghal bawk. A chau dawn em a, duat ve deuh a ngaiin ka hria.






Hmanhmawh takin ka chho zui leh thuai a, min dawrtu nu leh Hriathlua chu an lo titi dun barh barh a. Nuih sakin pawisa ka kir zui zat a, min chhuahsan zui ta nghal. Thil in tur ka leisak chu pek pahin a bulah ka ṭhu ve nghal a, a lawm thiam em em leh nghal. A Polythene rawn khai luh chu min pe ve vat a, hawng nghal in ka en vat; hnah a in fun thlap in a lo awm. Sangha bakah Kaikuang a lo ti tel a lo nia, ka pa alawm viau ang; Lui lam sa hi ka pa ngainat ber a ni.






An lui kalna chanchin te ka zawt zui a, min hrilh chipchiar lutuk chu kan nui leh rih; a ṭhianpa kut a hling an khei dan thlengin a sawi vek. A bula awm hi a nuam ka ti hle ṭhin,sawi tur a hriat bakah fiamthu a duh hle a; ka nui deuh reng zel. A awm ve ta reng a, chhun thil kan ei laiin Tleipuii'n min rawn bia a. Hriathlua a awm ve thu ka sawi ri zauh, a hmuh ve chak thu sawiin lokal a tum chawp chuk chuk a. "Lo la haw tir miah suh, ka hmu ve duh" a rawn ti thuai. Hriathlua ka hrilh chuan a hmanhmawh loh thu a sawi liam puat a, ṭhuâwn duai in a mit a chhing vang vang a.






A phone ri ah chuan rawn ṭhu ngil in a la zui vat a, a be zui mawlh mawlh a. "Zan lama mi tur chu lo buaipui mai rawh, ka bialnu ka awm" tih pahin min rawn melh zeuh, ka lo lai deuh ṭut. An inbiak zawh chuan a ngawi vang vang a, a ham bai bai bawk. Tleipuii bula a awm thu ka lo sawi ta kher chu pawi ka ti leh hnuhnawh, haw mai tur in lo ti ila; hahdam deuhin mu mai mai zawk se te ka ti rilru leh hnuhnawh chûk chûk a. Mahse, 'tun hun hi inhmelhriat tir nan chuan a rem ber' tiin ka in thiamchawp leh ta ngawt a.






Tleipuii rawn thlen lai in dawrtu ka lo nei a, thawmhnaw ka enpui mek lai a ni; Hriathlua chuan a phone a bih ngur bawk a. Kawngka bulah dingin Hriathlua lam a melh a, min rawn mitmei pah zauh bawk. Ka lo bu nghat a, pawh ngam chiah silo in en leh zauh zauh ṭhin. Min dawrtu nena kan in buaipui fel veleh ka in hmelhriat tir ta vat a, an in chibai pah chuan Hriathlua'n "Zum dêk a i dinglai kha ka hmu reng che" a ti kauh, Tleipuii a hawi â heu mai. Ngei hmel zet a melh ram ram in "A chimawm chi maw i nih dawn a? Sawisel deuh reng i ngai dawn a nih hi" tiin a nui ar ar mai.






Innel deuh in an in be zui nghal bawrh bawrh a, an titi duh zawng pawh a in mil ta phian. Football lam an sawi lai chuan an sir ah ka lo ṭhu ngawi kar a. Tleipuii pawh chu hmeichhia e tilo in a hre reuh phian a. Hriathlua, ṭawng paha a hmui pet sawi leh zeuh ṭhin chu hmuhnawm ti zetin ka lo en leh veng veng ṭhin. A khât tawk a min kiai khum leh sak ṭhin te chu luanliam ngawih ngawih na tham a tling zel mai. Keimahah nuam tih ruk veng vengna a awm a, ani nen hian in tawnglo ila engtin chiah nge hun ka hman ang tih te ka ngaihtuah kual mai mai. Ka tan chuan a ṭha ber a ni ka ti ngam sak bawk.






Dawr khar hma deuhin Hriathlua chu a haw hmasa ta a, min thlah a tum viau nangin a chau tih ka hria; haw mai zawk tur a tiin kan in thlah liam ta rih. Tleipuii erawhin min nghah law law a tum a nih hmel, "Amah ang kha ka duh ve, min zawnpui ve la?" a ti deuh reng a. A fiamthu na phenah chuan tih tak takna ka hmu thei. Ni e, Hriathlua ang mipa hi alawm hmeichhia ten kan lo suangtuah ruk ṭhin chu. Ka tan hian a la hlu tawlh tawlh dawn niin ka hre bawk.






In ka thlen rual in ka pa ka au nghal lang lang a, an room aṭangin a rawn chhuak nghal thuai a. Ka polythene khai chu pe in hawng nghal tur in ka ti a, a ngaihna hriat loh hmel tak a thlek kual thuak thuak in a hawng zui rak rak a; hnah a in fun chu la chhuak in a hawng zui malh malh. A meng phar deuh âk chu ka lo nuih var var a, Hriathlua min rawn pek a nih thu phur zet in ka sawi nghat zat. Ka nu ko zui thuai in Sangha chu chhum nghal turin a ti zui thuai a, a dahṭha rei thei dawn lo tih ka hre sa reng. Kaikuang te chu a thai let sek a, ka nu in laksak in fridge ah a dah luh sak ta daih. Khi var var in inthlak turin ka luhsan zui ta thuai a.






Kan zanriah ei pawh kan puar tlang viau mai. Ka pa in Sangha tui a hawp apiangin a tui zia thu a sawi tel zel bawk; a manhla viau e. Mampuia'n "U Hriathlua chu makpa interview a tling a va nih hmel ve?" nui huk chunga a ti chu dawhkan hnuaiah ka va tlawh nghek, a sawi dan kher kher chuan min ti zak ru chem chem mai. Ka nu ka melh zawk a, a lo khi ve sang hmel ka hmuh chuan ka thaw huai thei.






Ruah a hmi seng seng a, chhum a zing chiai bawk a. Hriathlua la reh char char chu mak ka ti ru deuh, 'ka lo bia ang che' ti khan min thlah kha ania; a muhil tui ta viau a ni ngei ang. Khum chunga ṭhu in ka diary hlui ka keu kual mai mai a, ka hun lo hman tawh ṭhin dan chu ka chhiar let malh malh a. Ka ziah ṭan tirh Ni aṭangin a phek tinah chuan Malsawma hming a lang zing malh malh hle, a hunlai khan ka vei na ngang bawk a; ka tih lam ka ti bur ṭhin hi ka tan a ṭha nge ṭha lo tih hi ka hrethiam lo fo ṭhin.






Ka phone la in Hriathlua ka call zui zat, midang ka ngaihtuah kai na chuan rinawm lo riau a in hriatna min neih tir tlat a; ka in thiamlo ru nghal veng veng mai. Vawi hnih lai ka call hnu paw'n chhanna a awm thei lo, a ṭhiante nen an in hmukhawm dawn tih kha a sawi ngei a; a mut reng chu ka ring tawh si lo. 'A buai rih ania nge' tiin ka in hnem chawp a, rilru kil khatah erawh min mawlh tu a awm tlat thung; chu erawh englam hawi zawng a min mawlh nge pawh ka hre miah bawk silo. Thaw hak in ka mu rem sat sat a, rilru bet lo zet a mu in ka tal ka tal a; Hriathlua min lo biak hun ka nghak ru ran bawk. Ka awmdan chu nuam ka ti hauh lo, ani nena kan inzui tirh aṭangin tun anga rilru kap run tu nei hian ka la awm ngai lova; ka ni deuh nghulh thei in ka hre hial.






Zing hma takah ka harh a, ka phone ka bih leh nghal chat; Hriathlua chanchin hriatna tur thil engmah a la awm chuang lo. A 'last seen' ka en pawhin nimin lam a la ni daih, keimahah chuan nawm loh rawih rawihna thil a in mung mek a; a fiahna ka mamawh tih ka hria, fiah tur in tih hmasak ber tur erawh ka hre chuang si lo. Awm nuamlo run in ka tho chhuak a, ka chhungte erawh an la reh ṭhap thung. Thingpui lum in chawhmeh siam tur ka en zui rak rak a, chawhmeh siam tur awm del dul te chuan min ngei zo vek ni berin ka hria.






Ka nu rawn thochhuak chuan mak min tih hmel hle, chutiang hun a ka lo che mawlh mawlh tawh chu a mak ve bawk reng a. Ka hmelah vei ka nei tih a hrethiam mai ang tih hlau takin ka nui lui deuh reng thung. Ngaihtuahna hran pu a in tih thawven luih hi ka thiam loh tawp thil a ni bawk nen, ka hah hluah hluah thei. Chawhmeh ka siam zawh in chaw chhum ka siam leh zung zung a, in tihfai chhuanlam in ka kalsawn ta daih a. Ka hlim der theihna in a tlin dawn ngang lo a ka hriat vang a ni.






Chaw pawh ka ei tam lo kher mai, keimah te chu nêp ka in ti. Zankhat inbiak loh vang mai mai a chutiang a ka awm nghal ringawt chu zahthlak ka ti ru viau. Hriathlua chuan hria se min en dan a hniam phah rawih rawih ka ring bawk. A tello a awm thei lo lutuk anga min ngai tur chu ka duh lo a, ka in thunun fe a ngai tih ka hria. 'Min lo bia pawh nise engahmah ngai lo ang taka ka lan a ngai' tiin ka infuih ru mawlh mawlh reng a, ka thei leh pek ang emaw? Rei pawh kîl zui peih lo in ka tho zui ta daih a, ka kut sil nawk nawk in insiam turin room lam ka pan zui nghal nal nal a.






Ka kal hma bawk a tiin in tih thawven nan ke in tawi te tal kal ka tum, zawi zet in ka kal hnak hnak a; ka phone chu ka hum ran bawk. Foothpath a ka kal tur chiah chu ka bulah bike a rawn ding dawt a, phu zawk in ka hawichhuak vat. Hma lam melh ngur, Malsawma chu ka melh hê haw a, "Lo chuang la?" a ti thum dut a, a bike hnunglam a melh pah zauh. "Ke a kal lawk ka duh, pen kawina tur ka nei" tiin kal ṭan leh mai ka tum a, ka banah a rawn man chat a.





"I mitmeng a daw ve ngai silo a, min pehhel reng tum duh suh" a ti leh nghut. Ka ban a chelhna chu a hma aia na in a hmer nghet sauh bawk.




"Malsawm, i duh duh a i tihkawi theih ah min ngai ania nge, kan hun kal tawh lamah khan lo duh hneh viau ṭhin che mahila tunah chuan ka ni tawh lo ania. Min thlah rawh" tih pahin ka ban chu ka pawt vak a, a lo chelh nghet kher bawk nen a na zawk mai, ka au ṭhat.





"Bhabi, Sorry..a na em?" tih pahin a kut a la let vut a, Bike aṭangin a rawn chhuk zui nghal zat. Ka ban tha chu a rawn pawng ṭawlh ṭawlh a; a sen chur bawk. Kawngkal ve dangte'n min thlek deuh hâ hâ tih ka hria, mittui tling pam in ka kun tlat bawk. Malsawma chu a kalsawn vut a, khawilam nge a pan pawh ka hre lo. Ke a ka lo kal kher kher chu ka inchhir tawh takzet.





Ka phone a rawn ri a, ka kut lehlam chuan ka bag ka hai nghal rawk rawk a. Hriathlua tih ka hmuh rual chuan rang zet in ka la nghal vat, "Hello" tih khawmawi pawh tum lo chuan "Engnge i reh ngar ngar a?" ka ti nghal tâwng; Tuna ka awmdan mek nen phei chuan ka boruak hap a fuh viau bik lo.




"Nizan khan ka phone ka lo keng chhuak lo pek a, room lamah ka lo dah bawk nen; lo chhang turin ka chhungten an lo hre biklo aniang" a rawn ti zâwi ruih, tho hlim hlawl a ang.




"I reng vang vang a, i chhuah dawn vel tal pawhin chanchin te rawn sawi tur alawm. Ka ngaih a ṭha lo hman lutuk a" ka ti let ve zat.




"Ṭhiante an rawn kal thut a, min rawn tur ta chung alawm mawle" a tih lai mekin "Khawi i ban kha lo dah hnai teh" Malsawma'n a rawn ti ve chiah. A kutah chuan damdawi hmehchhuah chi a keng vâng bawk.




"Tunge ni? I ban te chu engatinge?" Hriathlua'n a rawn ti nghal zat. Malsawma melh zauh pahin ka intihpalh thu ka sawi thuai a, ngeiawm zetin a lo ner suk.




"A va zialo ve, i chhuak tawh em ni?" a rawn ti ve leh thuai a, ka kal mek thu ka sawi ve vat bawk. "Khawi, damdawi chu hnawih ang" tih pahin Malsawma chuan ka ban chu a rawn pawt hnai deuh a, a hnawih zui nghal zung zung a; ka biak mek thawm erawh a reh hmak thung.





"Hello" ka tih rual chiahin "Buaipuitu i neih ṭhat kha, lo in buaipui dun teh u" ti nghutin phone a tawp nghal hmak. Min va ti hrilhhai tak, Malsawma chu rum zeta melhin ka bân chu ka thingtla nghal zat a.





Hriathlua awmdan teh hmuk chuan min ti awm nuam lo, ka bula Malsawma lo ding khawng reng chu rum zeta melh nawn pahin "Ka hmuhphak ah hian rawn lang ve ziah suh, nangmah vanga buaina ka tawk a nih ngat chuan i hre viau ang" tiin ka kalsan nghal hmawk hmawk a. Hriathlua chu call tumin ka phone ka hmet eng nghal zat bawk. Ka hnunglam a rawn ṭawng leh avang chuan ka ding dat a, muangchangin ka inher a; chiang zetin a mitah tak ka melh ran. "I sawi huai mah mah lo maw Malsawm? I ngaih anga awlsam kha ka ni lo aw? I hnen a ka rawn let leh tur thu huai taka i sawi ngam kha zak rawh. Zothansangi i hriat ṭhin kha ka ni tawh lo" chang fakin ka ti let zui nghal zat. A hnen a let leh mai tur anga min sawi kha ka ngai thei miah lo.





Hriathlua'n phone a la duh ta miah lo bawk. Taxi ka phar ding a, kan tlan nghal vang vang. Motor darthlalang aṭang chuan kan hnunglama Malsawma la ding reng chu ka va hmu thei, ka hawisawn hmak bawk. Ka zingkar boruak chuan min hmet chau takzet, ka ṭhutna nghengin ka maimitchhing vang vang a; ka hahdam lo ngawih ngawih. Hetiang boruak ka tawn dawn vang hi em ni nizan aṭang tawh a mawlhtu nei reng a ka awm le?






In ngaihzawnna in karah chuan boruak a ṭha reng thei lo tih ka hria. Hriathlua rawn thinrim chhan pawh kha ka laka a thîkthu a tihlan ve na ang ah ka ngai; Malsawma a ni tih erawh a hriat loh hram ka beisei. Chutihrualin Malsawma vang hian boruak ṭha lo kan nei fo ang tih erawh ka hlau hle thung, a mizia ka hrechiang a; awlsam tak chuan a inthiarfihlim mai lo ang tih ka hre bawk. Bul ṭan leh tura min sawmna kha Hriathlua ka hrilh lo a, hrilh ta ila ani'n chinfel dan kawng a hre zawk angem?






Engkim mai chu a buai nuaih a, kan boruak kaltluang lai chuti teh thuta a in her danglam ta chu hahdam taka thlir mai mai a har viau thung. Thaw hak in ka meng riai riai a, 'he boruak thawveng lo zet hi ka chinfel vat a ngai a ni' tiin ka in hrilh mawlh mawlh a.






(to be continue........)


Show post links
Top

[Ngaia]

DEAR PAIN
Chapter-5




By: Brigida Hugo







"I tiffin tur kha lo buaipui tawh la, i tlai bik ange. Nghah ngai a awm te hi a ṭha ngai lo" choka a rawn luh pahin ka nu in a rawn ti mawlh mawlh a. Sana ka en thuai a, ka insiam leh chhung tur nen ka muangsual ṭep. Tiffin la in chaw ka dah lut nghal thuai a, Artui leh bai thak ka fun tel bawk; a bak chu awmsa rin a ni mai. Tleipuii te huan ah sangha man turin kan kal dawn a, in tih thawven ka mamawh lai tak a ni bawk nen; ka phur viau.






Ka thawmhnaw ka thlak mek laiin min lo call a, min lam tura an lo kal mek thu a rawn sawi thuai a. Che vat vat in ka hmai leh ka bân ah Sun Screen ka in chulh zung zung a, ka racksack khai chu pawtthla lawk in choka lam panin ka tlan nghal puat a. Ka pa chuan min lo melh ngur a, nui vur vur chungin, "Khati taka hmanhmawh leh tur te chu nimin khan in siam lawk tur alawm" nui vur vur in a lo ti sup a. "A tir aṭang hian in muang delh delh zel a" ka nu chuan a lo ti ve zat bawk. Tiffin leh tui chu ka bag a thun in pawnlam ka pan ta vat a, Gate bulah ka lo ding lang nghal vang a.






Kan In piah lawka motor rawn tlan mek aṭang chuan Tleipuii'n ban a rawn vai lauh lauh a, a rawn rak chel chul bawk. Nui var varin ka lo pan hnai ve thuai a. Ka bul lawka an rawn din dat rualin a rawn chhuak nghal vat a, U Rinpuia pawh a lo nui var var mai. U Rinpuia hi Tleipuii U chiah ania, kan naupan deuh laiin ka 'star' ṭhin. "Tunge i bialpa?" an tih pawhin 'U Rinpuia' ka ti lauh lauh zel. Ka naupan lai bialpa kumhlun a ni ve tlat, tun hnu hian min fiam nan tak a la hmang fo leh nghal. U Rinpuia motor ah chuan kan pathum chauhin kan chuang dawn a lo nia, midang kal ve tur te chu kan hnunglam ah an la rawn kal ve dawn a nih hmel. A hnung ah Tleipuii nen kan ṭhulut dun nghal a, kan ri nghal bawrh bawrh; sawi tur hi a tam ṭhin a ni.







Thil hrang hrang kan sawi dun mawlh mawlh laiin Hriathlua nena kan chanchin min zawt hluai a, a hmel a thutak nghal ran bawk. Malsawma nena kan in hmuhfuh zing aṭang khan kan inbe ṭha hlei thei meuh lo, thinrimna tur a zawng char char ni maiin ka hria. Ṭha zai in a bulah engmah a sawi theih loh a, "Buaipui tu i nei ṭha" tih ringawt hi vawi tam kan buaina a ni ziah. Malsawma tih a hriat ka hrelo a, a sawi ri ngai lo bawk. Chuti teh fakaua a thinrim pui reng chu ka ning ve deuh bawk nen, biak loh ah ka tlak ta rih. In sawifiahna ngai hlir sawi reng kha ka peih reng bik lo ve bawk a ni. Tleipuii chu engkim tlang takin ka hrilh sar sar a, U Rinpuia chuan motor chhung darthlalang aṭang chuan min rawn bih leh zuk ṭhin.





"A in hmeh lo e, chutiang te thinrim pui reng. I duhzia a hria a, a in duhkhum mah mah che anih chu; be hmasa reng reng suh" Tleipuii chuan a ti deuh hmarh hmarh a, a dik ka ti viau bawk. Min biak ṭhat hma loh chu biak hmasak ka tum tawh lo hrim hrim kha ania, tunah phei chuan fuihtu ka nei leh nghal a; ka rilru pawh a páwr thar nghal hlur in ka hria.






U Rinpuia hla play chu ṭial zet zet in kan zaipui a, kan ri teng tung mai; Kan thawm ah chuan pahnih lek kan ni tih hriat a har ve khawp ang. Kan tlanpelh tak ten min en leh hâ ha ṭhin te chuan kan phusa viau tih a tilang reng. Huan kan thlen dawn hnaih ah "In chau hman vek ang a? Ka beng dar a na" tiin U Rinpuia'n a beng a tuai nawk nawk a, keini ṭhiandun erawh kan nuih zui leh uar uar tho. Ka rilru pik ru zet te pawh a kiam duak mai, 'ṭhiante hi an lo hlu ber mai' tiin ka ngaihtuah pah neuh neuh a.






Tleipuii Nî fate pahnih Tepuia leh Kimtea te bakah a nu leh pa leh U Rinpuia nen kan ni deuh mai a, a nuam tawk viau thung. Thlam nuam deuh an nei a, 'riah duh chang a awm thei' tiin mut pindan an dah hrang deuh thlap bawk; In pangngai ang taka an cheibawl avang hian a ti nuam leh zual. Sangha man tur in kan in siam zui mawlh mawlh a, kan ṭangkai nep dawn viauin ka hre bawk; mahse, a boruak hi a nuam ve hrim hrim. Phur zetin dil lam kan pan thla a, kan ri lê lu bawk.






A man na tur an buaipui mawlh mawlh laiin a sir velah kan lo tei kual ve sek a, kan lo phi ve ruai a ni ber. Thlam lam ah chuan bike ri hlat hlat thawm a awm a, kan hawi chho ṭhap mai. "Tute nge mawn le?" U Rinpuia'n chuan a ti sup a, midang kan beisei lo tlang tih kan hmelah a lang vek. Kan la hawi chhoh ṭhap lai chuan Malsawma leh Tleipuii cousin Ruathlui an rawn lang nawlh a, Tleipuii nen kan in melh zawk; hmui ti pawrh tarh in a lu a thing nghat a.






"Min sawm ve ta che u, ka kal ve chak ka ti reng a. Hei, U Malsawma ka rawn sawm chawp tawp, ani a lo hman hlauh a" Ruathlui chuan a rawn ti thla lang lang a. Nu Zami chuan nui hak hak in "Kha, i rawn kal tho kha maw, kan lo in puahchah vel mek. Malsawma a awm chuan i patea te pawh an in daih deuh ang chu" a lo ti zung zung a, anni pawh an rawn thleng thla zui ve nghal thuai a. Pa Zuala lah chuan Malsawma chu a lo ko peng nghal zat bawk.





Ka hlimna a chuai rawih rawih ni maiin ka hria, nuih pawh ka nui ṭha peih meuh tawh lo. Malsawma chuan min en leh vung vung ṭhin tih ka mit sir in ka hmu reng, ka hrelo der ngar ngar thung; Amah vanga kan boruak nuam zet khaw lo ta hian ka huatna a ti zual.






Sangha lian ṭha tak tak an man a, a kotlang aṭangin kan lo khek ar ar a. Ruathlui phur pheng chu dil ah a lut thla ve ta ngawt a, kut lawng mai a man tumin a bawh leh khat khat ṭhin a; a ṭuan in pha mawlh hek lo, hah hnepa a tal kual hnu ah thaw hlawi hlawi in a rawn chhuak a, kan lo nuih pui tlawrh tlawrh thung. Hmuhnawm tih hmel zeta Malsawma'n min lo en rûn ka hmuh chuan ka tûm leh hmak a. A nui suk chu ka hmu hman vek, rawn kal ve lo sela chu hei ai hian ka hlim leh zual ngei ang.






Rei fe dil a kan awm hnu ah thlam lam kan pan chho leh dial a, Sangha te chu bucket ah dah in Malsawma leh U Rinpuia'n an khai chho lawp lawp a. Chaw fakna a hmeh tel atan tiin Tleipuii nu in a lo buaipui nghal zung zung a, kan thiam ang angin Tleipuii nen chuan kan lo pui ve vat bawk. Tepuia'n sangha chu lo rem kual velin a chhep hrang pah zel a, chhungkaw tlai zet tur chuan kan in sem thei vek dawn anih hmel. Hralh se cheng tam man tur anih vei nen, ui na nei miah lova chutiang min sem ve zel te chu ka lawm takzet.






Kan chawfak pawh kan puar tlâng a niang, mahni ṭhutna ṭheuh ah kan ṭhu ngawi hle hle hlawm a. Khua a rawn dur deuh khuih a, ruah erawh a sur anih pawhin a tam em em lo turah kan ngai. Ka chhak deuh a bang ngheng a chhing tlat Malsawma chu ka han melh zauh a, a ṭhi awrh lai chuan ka mit a la fuh nghal chat bawk. A hma khan ka lo enchiang lem lo a, a kawr hak khan a lo hliah pawh a ni mai thei; tawnzau chauh a ha tawh a, a langchiang hle bawk. He ṭhi ka awrh tir lai khan "Tunah chuan min thlungbet ta hmak e" tiin a nui var var anih kha, a hma zawng khan a awrh ka hre tawh ngai lo a, tun a taka a awrh leh kher chuan engtin emaw ni tak hian min dek zar mai. A dar a chet zeuh rual chuan ka hawisawn vat a, pawnlam boruak ka thlir zui ta daih a.






Rin aiin khua chu a rawn dur chak a, thlam kawt a Nu Zami thing pho ro chu kan seng lut nghal zung zung a; thli a thaw deuh vûk vûk bawk. Pa Zuala chuan khaw hawi kual pahin vawiin ni ber kher a chutia khaw awmdan rawn in thlak thut chu hun lo a tih thu a sawi bal bal reng a. A la hma tho bawk a tiin khaw awmdan ngaihchan phawt a, muangchang a haw a fuh zawk a rin thu a sawi zui mawlh mawlh bawk; pawi kan ti lo tlang a nih hmel.






Ruathlui meilum ai chu tho hluai in a bag a hai rak rak a, "Thla la ang u, dil a kan awm lai te khan lo lak hlawm tur ania" tih pahin a phone a khawih zui malh malh a, ding chungin kan vai a langkim thei turin a lek kang zui zat. Kimtea lo in siamchhe ziah chu a vin leh hlak hlak ṭhin a, ani lahin a ai uar in a in siamchhiat khum zel bawk; kan nui tlang leh dar dar ṭhin. Tleipuii pawhin a phone phawrh in thla a la zui ve zat a, "Ka status dawn" a tih leh tawh kha.






Ruah a rawn tla ṭan a; fang lian pui puiin a rawn tla fuap fuap a. A chung rangva a nih avangin ṭawng pawh a hriat hleih theih meuh tawh lo. Kan inbia te chu kan au deuh lawng lawng hlawm a; boruak a vawh deuh nghal surh avangin meilum lam ka hnaih zui nghal thuai a.






Ruah a sur tam telh telh a, tumah in be lovin kan ṭhutna hmunah chuan kan ngawi ṭhap hlawm a. Ka meilum âi chuan ka mut a ti chhuak lek lek, ka bul lawka Tleipuii ṭhu pawh a kun lap mai. Ka phone a rawn ngawr der der a, rang takin ka en nghal thuai; Hriathlua hming lo lang kalh chu ka en reng ringawt a. Thaw halh in ka la zui a, a reh vung vung leh lawi si. Rei fe ka ngaihthlak hnu ah chuan a rawn ṭawng ri sup a, ruah a sur tam bawk si avangin engnge a sawi erawh ka hre thei lo.





"I ṭawng ka hre thei lo, sawi ring deuh teh" ka ti zui lang lang a, bang lam hawiin ka in her zui zat.





"Khawnge i awm a? Malsawma te nen engnge in tih?" a rawn ti tuarh a, ka phu deuh zawk. Ka hawi kual nghal vat a, Kawngka biang ngheng a ṭhu in Malsawma chuan min lo en ngur a, hawi sawn vatin "Tleipuii te dil ah Sangha kan man" ka ti thuai a. Ka ṭawng chu a hria em pawh ka hre lo, ṭawng rik lawng lawng na chi ni hek lo.





"Kha mihring bula i awm duh vang khan em ni min biak ṭhat duh loh?" a rawn ti hluk a, awih lo zet in ka rum hak.





"Nangmah anih kha min be ṭha duh lo, i thinrim chhan mumal takin i sawi duh lo bawk. Ka biak che apiangin thu pakhat bak chhuanlam tur i hre lo" ka ti let ve ta ngat. A nilo lam daih a min rawn puh let chu ka la na viau bawk.





"Kha pa mitmeng aṭang khan a rilru tur ka hriatthiam loh i ring em ni? Mipa ka nih hi, mipa awmdan chu nang aiin ka hrechiang zawk. Ka hriat ve loh lamah in lo in hnimhnai leh tawh viau zawk nge?" ngeiawm rawng kai lek lek in a rawn ti leh kher chu ka sa ve ta phat.





"I ngaihdan ang chauh khan thil a kal lo tih hria la. Thil awmzia engmah sawipui theih loh a awm zawk i nih kha i in hrechiang viau ang, min la rawn puh let hlauh zawk a nia" ka ti let leh barh barh a. Tleipuii chuan ka nak ah min rawn kheuh zauh a, a lam hawiin lu ka thing zauh. Midang chuan min ngaihven lem lo in ka hria, Malsawma te nen kan awm ho tih pawh chu engtin nge a lo hriat reng reng ni?





"Zanin ah ka rawn kal dawn, pawnlam ah min lo nghak ang che. Engkim chinfel a hun tawh viau a ni" rawn ti leh hmuk in phone a dah zui nghal hmak a.






Engkim ka thiam loh anga a sawi vek chu ka la na viau. Malsawma hmuh lai a thinrim hmel hmai put te chu ka zak ru chem chem bawk. Bul ṭan leh tura min sawmna ka hnar hnu a chutiang boruak a hriat lai a kan nei chuan min ti awm nuam lo, a tello a ka hlim theih zia hmuh tir ve zel ka duh lai a boruak chhia in min bawh reng mai chuan ka ṭah te a ti chhuak rum rum thei hial.





"Hriathlua a ni maw? Engnge a rawn sawi?" Tleipuii chuan rawn tawlh hnaih sat sat pahin a rawn ti sawr sawr a. Ka sawi nghal bawrh bawrh a "Malsawma nen in awm ho tih engtin nge a hriat?" hawi deuh hâ in a ti zui nghal vat.






"Ka hre bik lo" tih pahin ka ngawi vang vang a, ka mood a chhe hneh lutuk ringawt.
"E heeee! Ka status kha" tih pahin Tleipuii'n a phone a hmet eng zui nghal zat, a status entu zingah Hriathlua a hmasa ber. Malsawma nen chuan kan in awm hnaih miah lo; mahse, kan lang dun miau a. Tleipuii in thiamlo hmel chu hmuh nuam ka ti lo, a ngaihtuahna ah a lang phak bik lo tih ka hria. "A pawilo, engkim a ṭha vek mai ang" tiin ka hnem zui nghal vat a, boruak tih danglam tumin titi dang ka vawrh zui nghal thuai bawk.






Vawiin hun Malsawma te nen hmang ho mah ila engemaw zawng a awm kan nei lova, min be lo a; ka be bik lo bawk. Ka hlat ru deuh zel tih hrethiam turin a fing tawk a, ani pawhin min hnaih luih a tum bik lo; beidawng ṭhak se tih chu ka duhthusam a ni. Ruah a hân chho ṭan a, Pa Zuala'n haw mai tura in puahchah turin min ti zui nghal vat hlawm a. Kan tho chhuak sang sang a, kan Sangha hawn tur ṭheuh te Nu Zami'n min pe dan dan a, mahni bag ah ṭheuh kan khung zui nghal mawlh mawlh.






Kan kal lam ang bawkin haw lam ah pawh chuan Tleipuii nen U Rinpuia'n min phur leh dawn a, ruah rawn tla chuan pawnlam boruak chu a tifai deuh sur in ka hria. Motor kawngkhar hawng a ka lut tur chiah chu Malsawma'n min rawn kal pelh thuak pahin "Ka sawmna che kha a la ngai reng" a rawn ti sup a, a bike lam pan in a kaltlang nul nul. Ruathlui'n a umzui dat dat bawk a. Rum zet a melh in ka ṭhu lut zui nghal vat a, kawngkhar ka khar deuh bur chu ka in thiamlo leh hnuhnawh; U Rinpuia ka hmaizah ngei mai.






Kan In kawt ah chhuk in lawmthu ka sawi zui mawlh mawlh a. Tleipuii nen zan lam a inbe tura in ti in kan in vailiam lauh lauh a; rang takin In lam ka pan zui thuai a. Ka nu in eirawng a lo bawl ṭan tawh a, a bulah ka pa in thingpui a lo in ve mek bawk. Phur zet in ka Sangha hawn te chu ka phawrh zui thuai a, ka chhungte pawh an lo lawm thiam khawp mai. Tui lum a lo awm sa vek bawk a, inbualfai vat a in hak lum ka chak tawh; pindan lam pan zui zatin inbual turin ka insiam zui nghal mawlh mawlh a.






Ka inbual pahin Hriathlua min rawn biak dan kha ka ngaihtuah zui neuh neuh a, a sawi ang khan engkim sawifel ṭha in ka hria. Malsawma a la beidawng miah lo tih ka hre thar bawk. Amah avanga buai zui chu ka duh miah lo. Hriathlua'n eng thu nge a rawn kalpui dawn ka hre hek lo; in ti paukhauh ve hle mahila ka ngai hle tih chu ka in hre kar. Pawnlam a inhmuh a duh danah thu ho mai mai kan sawi dawn lo tih ka hrechiang hle bawk. Hunthawl deuh zawk ka neih theih nan ka chhungte bula chhuanlam siamdan tur ka ngaihtuah zawm leh nghal char char a. Engkim siamṭhat chu ka duh ber a ni a, Hriathlua chan hlen ka lo hlauh zia ka hre thar uai uai bawk.






Zanriah kan kîl laiin ṭhenawm lawk a U Mawitei secondhand en lawk ka duhthu ka sawi a, ka sawi laiin ka hawichhuak ngam miah lo thung; Ka nu hian ka mitmengah dawt ka sawi tih a hre ngei ngei dawn. Mampuia'n sangha dil neih ve a chak thu a rawn sawi zui hlut a, Tleipuii te dil neih ṭhat zia thu in ka lo chhunzawm ve vat, ka hlauhthawnna boruak pawh a reh deuh e.






Ka rilru tak erawh chuan ka helhhawlh a, min delh rit deuh lûk tu boruak chu bo tawh se ka ti em em bawk. Diktea'n "T-shirt a neih chuan min lo en kep ang che" a lo ti ve bawk a. Ka chhuanlam siam chu a fuh nge fuhlo pawh ka hrethiam lo; engpawh nise, Hriathlua nen kan inbiak theih dawn chuan a ṭha ah ngai phawt mai ang.






Kan chaw eina ka tifel a, thleng ka sil zui nghal sawk sawk a. Ka thawk te chu a sak deuh ṭalh thei hial in ka hria, thil sual tak va ti tur ang mai a ka awm deuh run reng chuan min ti hahdam mawlh lo. Ka phone chu ka ban phak mai ah ka dah reng a, ka melh ngun hle bawk. Ka in rem fel mawlh mawlh laiin a rawn ri ve chiah a, rang takin ka la nghal vat a; a rawn chhuah dawn chiah thu sawiin a dah leh nghal daih. Engmah pawh ka sawi ve hman lo, ka che reng reng chu a phelh nghal phung thei; ka thin a phu dup dup bawk.






Room ah in tuai thuak thuak in ka chhuak leh vat a, ka nu bulah ka kal tur thu ka hrilh a. Chaw ei laia ka sawi lawk tawh anih avangin rem lohna em em a awm lo, kan In kawt a inhmuh chu ka chhungte'n min hmuh mai ka hlau ve deuh bawk nen inkhawm na lama ka ṭhutpui ṭhin Zuitei In lam ka pan thla ta daih a; chuta ṭang chuan ka be tawh mai ang.






In lianpui pui a ding phei khup a, light êng erawh a tam lem lo. Mi kawm kar a kalna tereuh te ah chuan dîm tak in ka kal phei ṭhem ṭhem a, min hmutu an awm em tih ka enkual zak zak bawk. Zuitei te In piah deuh ka thlen chuan ka thaw huai mai. Tengtere kung sang vak lo awmna bulah chuan ka ding ran a; ka phone ka phawrh zui zat. Vawi thum ka call hnu ah pawh a la thei lo, a rawn tlan laklawh viau anih ka ring thla ngawt bawk a.






Ka chhak kawng pangngai ah chuan thawm a rawn awm mam mam a, ka awmna lai palchhuak zawng in an rawn kal ang tih ka hlau hle; ka ngaithla vang vang a min hlat zawngin an kal niin ka hria. Ka phone rawn ri ve chiah chuan min ti phu dawrh a, rang takin ka la zui vat. Kan In lam panin a lo la tlan mek a lo nia, ka awmna hmun hrilh zung zungin a lokal tur thu a sawi hnu ah phone chu silent ah ka dah zui hmak. Thil sual ti tur ang mai a chutia ka awm vel chu mawl ka in ti ru viau. Mahse, pawnlam a inbiak a duh zawk miau si a; hmun remchang dang ka hre mai bawk silo, kan in sawifel thei ngei tur a ka ngaihna chuan chulai hmun thleng thleng chu min hnuk kal anih ber hi....






Rei vaklo ah ka lam pan a ke pen thawm a rawn awm a, ding ngil auh in uluk zetin ka lo en kar a. Min rawn hnaih tial tial a, perfume rim ka hriat ṭhan zet chu ka hip veng veng, ka mur deuh seng seng thei hial in ka hria. Ka bul rawn thleng in a jacket ipte zen in a ding khawng lah a, Van lam a en vang vang bawk. Kan inbiak ṭhat lohna a rei tawh bawk nen, han biak hmasak pawh chu ka lai thar leh deuh ṭut tawh. Ngawi rengin kan ding dun a, ka melh leh zauh ṭhin; a 'Aw' thian kharh in min rawn en ta ran mai. Kan in hmuh hmasak ber ṭum ang mai khan ka zâm a, kan boruak chu a rit ru hle bawk.






"Engtin maw Malsawma chu?" a rawn ti dût a, a bul ṭanna aṭang reng chuan boruak a sak nghal ṭung mai. Theihtawp in boruak ka hip lut a, muangchang in ka thaw chhuak zui siai siai a, ṭha taka inbiak ka duh avangin thinrim ve lo turin insum ka ngai nasa dawn tih ka hre kar.




"I hriat vek kha, engmah kan inkarah a awm tawh lo. Engatinge i sawi reng a?" tih sap pahin ka melh ngar a.




"Nangin awm lo ti mahla amah ah a la awm tho si a nih hi" a rawn ti nghut a, ka thaw hawk.




"Amah ah awm mah se keimahah a awm tawh chuang lo. Pakhat chauh in a duh avangin inngaihzawnna a awm thei hlei nem. Chumi avang ringawt a thinrim reng kha a puitlin loh thlak i ti ve lo em ni?" ka ti ve leh ngat a.





"Ni e, ka puitling lo Bawihi. Malsawma hi ka thîk hle tih i hre lo ania nge. In thlalak ho na ka hmuh hnu phei kha chuan thinrimna leh thîkna in min tuam mup mup a. In awmna hmun thleng rawk a rawn kalchilh mai che u kha ka duh hman hial asin, ka insum nasa hle bawk" tih pahin a lamah min pawt hnai a, min kuah nghal chawt a. Rang taka lo kuah let ve in a hnungzâng ah ka chul hauh hauh a, chuti taka Malsawma a lo thîk chu ka ring pha chiah lo a ni.




"In thurual a kal pawh kan ni lo, Ruathlui a rawn hruai ve mai alawm. Biak pawh kan inbe lo hrim hrim, ka rilru ah nangmah bak ka ngaihtuah lo. Ka hmangaih che tih i hriat kha" ka ti sep sep a, min kuahna thlah dul deuhin ka biang tawn tawnah a kutin min chelh rân a; ka hmuiah dim te in a rawn fawp zui de de a.





"Chân che hi ka hlau a, midang nena hlimdun turin ka phal miah lo che. Ka bulah hian hlim takin i awm ang, Bawihi min zui rawh" a rawn ti leh sup. Ka meng deuh âwk a, 'min zui rawh' tih ṭawngkam chuan min dêng dawt. Hriathlua hian in ruk puiah min sawm tihna a ni thei angem? Chutiang lam erawh ka la ngaihtuah thleng pha ngai hauh lo thung.





"Engtia zui in?" ka ti tham ṭiak a, ka hrethiam lo a ni lo, ka sawi mai tur hrelo in ka hriat sa ka zawt nawn mai a ni.




"Ka nupui ni rawh, ka bulah i hlim ang. Min hmangaih a, keiin ka hmangaih bawk che. Harsatna kan nei lo a ni lo'm ni?" hnai zet a min en in a ti zui leh sup a. Chil ka lem ri khawlh a, ka beisei loh lam daih a kan in biakna kal zui ta chuan min ti hamhaih nasa hle. Ka rilru chuan in ruk kher chu ṭul tih lohna tam tak nei mahila mak deuh in hnial erawh ka hreh em em thung. Hnai zet a min en na mitmeng dam ruih chuan min hneh mah mah a ni mahna le.




"Ka hrelo..hetiang lam hi chu ka la ngaihtuah chhin ngai miah lo" ka ti bah deuh nak a, ka thaw te chu a chham lek lek thei hial.




"Min ring tawk lo tiraw? I rin aia nasa hian ka hmangaih che asin. Nang nena chhungkaw din hi ka duh ber leh vawi tam tak ka suangtuah ṭhin a ni. Mahse, ka rintlak tawk loh te pawh a ni ange" tiin min vawnna chu a thlah a, thaw hawk in lehlam min hawisan nghal daih. A thinrim nia ka hriatna chuan min ti hrehawm in nuam lo ka ti zui nghal veng veng.





"Hriathlu, a hma pawhin hetiang thu hi kan la sawi ngai si lo a, ka rin loh vang che a ni lo. Mahse, sawi rual a tih nghal mai theih thil a nilo tih i hriat ka ring. I bula awm hi ka chak loh i ring bik em ni?" ka ti let leh sap a, hrethiam se ka ti takzet bawk.





"Ni e, i sawi dik; Mahse, lo in ngaihtuah la. Dan thianghlim tih vel hi ka ngaisang ve lem lo a, Inneih hlenna a ni lo; a hautak mai mai. I thuthlukna hriat vat ka duh ania aw" tih pahin min kuah leh vawng vawng a. Hun a kal tam tawh viau in ka hria, ka chhungte hnena ka chhuanlam siam dan hrilh in let leh tawh mai ka duh thu ka sawi zui nghal vat a.




"Lo in ngaihtuah la aw?" ti leh sup in min fawp zui zat a, a hma ai chuan a duhthawh hle bawk. Ka thiam ang tawk a lo chhang let ve in kan thaw dun ham ham a, min hrawm deuh nawk nawk bawk. Kan piah lawk In aṭanga naute ṭap thawm lo chhuak chuan min ti harh zawk a, kan awmna hmun hrechang lo lêk a ka awm chu mak pawh ka in ti lo; ka bula awm mek zûnzam hian min fan hneh ve em a ni.






Tawi te min thlah in a bak chu lo kal ve tawh lo mai turin ka hrilh a, miin min hmuh ka hlau ru zek zek; ho te a mualpho theihna a ni tih ka hria. Ka chal ah a hmui lum thar thar chuan min fawh leh zeuh a, a kal zui ta thuai a. A kal liam thleng a thlir zui in, chak zetin ka haw zui nghal hmawk hmawk a. U Mawitei te In kawt ka thlen chhoh chuan ding meuh in ka thaw hlawi hlawi mai, ka thaw seng lo lam mah a ni. Muangchang a kawngkhar lam pan in ka kik zui karh karh a, lut tura sawmna ri ka hriat ve leh rang takin ka lut nghal thuai a. A secondhand lo chap darh nuaih chu en bik pawh nei lem lovin ka thing kual vel a, ka chhuanlam chauh a nih avangin ka rilru ah a tla na viau lo. Diktea duh awm deuh tur en zui in T-Shirt pathum chu ka thlang chhuak a, rei pawh awm tawh lovin In lam ka pan zui ta thuai a.






In ka thlen chuan Mampuia'n thingpui a lo chhuang ruk ruk a, a faifuk rut rut bawk. Tunlai a nun hi a hlim riau a, a bialnu nei hi a fuh viau aniang chu maw.. Ka nu leh pa TV lo en mek chu ka pan hnai thuai a, kan titi kual duah avanga duh aia ka rei tak thu ka sawi zui nghal zat; ka rilru erawh a nuam chiah lo. Ka thawmhnaw hawn chu ṭhutthleng nghenchhan ah zar pharh in ka tlar dal a, Diktea ka au zui vat. An room aṭanga rawn chhuak nghal vat in ha chhin turin a luhpui lehnghal nulh a, lawm hmel pawh a pu leh tawh lo; engmah hian a ti phur ve tak tak lo ni berin ka hria.






Muhil theilo in ka in let sek a, ka ngaihtuahna a vak thui hle bawk. Hriathlua thusawi chu ka bengah a ri nawn tluk tluk a, chuti teh thut a inruk a sawi chu mak ka ti bawk. Ka nu leh pa ten min zilhna reng rengah kan theih hram chuan Biakin hawng ngei a nupui pasal nei turin min chah mawlh mawlh ṭhin, kan nupui pasal tur te erawh kan duhthlanna ah an dah hmak thung. "In thlan thiam loh leh in rethei a ni mai dawn a, chumi avang chuan hriatchian mang loh phei chu neih tum loh tur. Kum hnih khat ah pawh mihring mizia tak tak hi a langchhuak zo vek thei ṭhin lo a nia" tih thu te chu kan hriat tam ber te zing a mi a ni.





Hriathlua chanchin zawng zawng hi ka hre fai kelh lo tih ka hria, ṭul a tih chin min hrilh ah hian ka lungawi tawk viau ṭhin; a bak zawh belh leh han chîk viauna engmah ka nei lo. Ka rilru ang pu turah ka dah hmin hmak a, rinhlehna pawh ka nei ngai lo. An chhungkaw khawsak chungchang min hrilh ve zuai tawh a, a pa pawh kut themthiam tak niin hnathawh sen loh a hmu fova, tun hnu ah erawh a theihna apiangah âwl ve zel a duh tih a sawi; a nu erawh sumdawnna lam ti mi tak a ni tih a sawi bawk. Chhungkaw khawsak harsa tak an ni dawn lo tih chu a sawidan aṭang chuan ka hrethiam ve mai a, ka hriat theih ve chinah a thîk thu a pe chhe ve hle tih loh ah chuan mi tawh khirh tak a niin ka hrelo bawk; Chiang taka ka hriat tel bawk chu ka hnial fithla ṭhak thei dawn lo tih hi a ni. Keimahah hian dinhmun sang tak a luah mek a, chu chu ka bula a awmdan leh a ṭawngkam mal tin ten min hneh dan ah a langchiang hle bawk.





A zawhna chhanna erawh ka nei hlei thei meuh lo thung, ka duhna leh ka hnar duhna a in buk tawn a; buk rit zawk a awm thei lo. Rilru fim tak a ngaihtuah ngai thil a ni tih ka hria, chu rilru fim hmang thei tur chuan Hriathlua hian keimah ah hna a thawk na em a, ka buai ru nuaih bawk si a ni. Ka phone rawn êng pap chu ka ban thuai a, Hriathlua call na ka hmu nghal zat. Ka la zui vat a, ka lak rual a, "Bawihi, i thuthlukna hriat ka chak tawh hle mai. Ka ngai em em bawk che" a rawn ti thawp sat ri chuan min fan nghal raih raih.





Amah a ka luanliam na kaitho zual tur tawk leka a thusawi zawm zel dan te chuan a lam ah min pawt nghet zual a, chhing diar diar chungin a thusawi te chu ka lo ngaithla. Amah aṭanga ṭawngkam ngainatawm tak tak rawn chhuak te chuan min fan riai riai mai. Rei tak kan in biak hnu ah kan dah ta chauh a. Suangtuahna ah hma hun hlimawm ngaihtuah zui veng vengin ka mu ren ta sat sat a.






(to be continue......)


Show post links
Top

[Ngaia]

DEAR PAIN
Chapter-6




By : Brigida Hugo






"Tho teh, hmanni a ka kekawr bul i suk kha khawnge i dah?" ka room kawngka kik dat dat pahin Diktea'n a rawn ti lang lang a, peihlo zetin ka tho ṭiah ṭiah a. Ni a lo tlangsang tawh viau.





Kawngka hawng rawkin ka ding âwn tlai a, phak zetin ka hawi kual thuak. "I thawmhnaw bawmah ka dah reng kha, va en ṭha leh rawh" tih pahin khar leh mai ka tum a, a lo pawt bet tlat.





"Ka hai vek tawh, ka hmu lo. Nangma'n va en mai teh" a ti bul hmuk a. Zing thawh hlima a tum bur hmel hmuh chu mood tichhe tham ani. "Ninawm, engmah hi i hmu thei lo" tih pahin an room lam ka pan a; a thawmhnaw lo hai darh nuiah te chu chhuatah an lo darh pheng phung a, la khawm zung zungin khumah ka vawm kai hnawk a, a thawmhnaw bawm chu ka hai zui malh malh a.





"Hei hi maw i hmuh loh? I hmu duhlo lui a ni lo maw?" tih pahin a hmai zawn ah ka vawm phei nawk a, min lo tum khum let ve ngat te chu thawhphan nen a in mil viau lo. Ngawi rengin a ha zui mawlh mawlh a, rum zeta melh in ka chhuahsan zui nghal a. Bathroom ah lut zuiin ka in phihfai zui mawlh mawlh a, ka sil deuh ṭhum bawk. Sangha dil vela kan tal kualna kha anih ka ring, dawr nghak a ṭhut nen chuan a in ang lo ve deuh bawk a ni.






Ka nu in In lama lo awm zawk tura min ti chu ka lawm hle, thawmhnaw chah a duh thu a sawi a; amah ngeiin a chah hian phunnawina a awm lo deuh. Ka pa in hna a thawk ve leh thei tawh bawk a, chaw ei a duh thu a sawi zui thuai. Chaw ei siam zui nghal in ka sangha hawn te kha an lo siam a, tui ti zetin chaw ka ei ṭeuh. Ka chhungte chhuak turin an insiam zui sap sap a, keiin muangchangin thleng ka sil thung a. Vawiin chu ka chet tha a tho vak dawn lo tih ka hria, tih tur ṭul em em a awm lem lo bawk a; hahdam deuh a awm mai mai ka tum.






Ka nau te room ka chinfel sak a, reilo te chhung pawhin an bei hnawk hman ṭhin hle. Mampuia hi chu a che fel viau a, Diktea hi 'vawm hlawm tawp policy' in a kal thung. An khum phah te thlak sakin suk turin ka la khawm a, nidangah ka la su mai ang; in sukna tur tha pawh ka nei rih lo. Ka tih ngei ngei ṭhin chhuat nawh tumin hmun ka phiat leh a, bal viau lo mah se ka nawh kher loh chuan ka awm thiam lo deuh tlat ṭhin.






Kawngka kik ri dat dat thawmah chuan ka hmunphiah hûm lai chu dah in kawngka lam chu ka pan nghal thuai a, ka kawngka kalh chu ka hawng zui rak rak a. Ka dak chhuak vat, Malsawma lo ding run chuan min ti phu deuh zawk thei; ani ber kher chu ka beisei hauh lo.





"Engnge i rawn tih dawn?" ka ti nghat a, kawngka chu ka hawng zau zui vat a. "Ka rawn leng dawn, a theih loh em ni?" a ti sup. Tun ang hun a lo len nachhan tur a neih ka hre lo. A helmet ken loh na lam chuan eitur chi hrang hrang a khai bawr lûk a, a hmaa a tih ṭhin dan a ni. Chhun eitur siamdun te nuam a ti a, noodles chhum a hrat hle bawk. Ka siam thiam vak lo a ti ṭhin a ni ngei ang, ama'n siamin a bulah min din tir a; tihdan tur min hrilh pah zel ṭhin. Kan inṭhen hnu ah hian noodles ka ei khat ta viau tih ka hrechhuak zui zat.






"Lo lut rawh" tiin ka kalsawn zui a, ka hmunphiah lai ka chhunzawm leh nghal zat a. A eitur khai te chu dawhkan ah dahin ṭhutkhawmna lam ah a ṭhu zui a, ka tih tur ka tihsan miah miah thung. Ka rinloh dan deuh hian a rawn khawsa leh thut zel, a la beidawng lo tih a sawi kha rawn bawhzui a tum a ni ngei ang. Chhuat ka nawh mawlh mawlh lai chuan ṭhutthleng ah mu chungin a phone a en a, ka be lem lova, ani pawhin min be hran lem lo. Hriathlua'n hria se a lungawi lo leh nasa viau ngei ang, a ṭhianpa te In sakna lamah a puih dawn thu a sawi a; a reh tak vang vang danah an buai deuh a nih ka ring.






"I inleng ngaihsak nachang pawh i hre lo" tih pahin ka chhuatnawhna chu a rawn phih thla sawk a, ka nawt zo tawh reng; a bul hnaia ka awm peih loh avangin ka nawh tawh hnu ka hrut kual leh vel kha a nia. Bathroom chhung ah lutin a va tung ṭha ta daih, a chetdan chu kan inzui lai hun ami ang mai a ni.





"Malsawm, engnge i hriat a? I huangtau mah mah lo maw?" Bathroom aṭanga a lo chhuak leh mek chu ka lo tihkhum tuarh a, ani pawhin ding chawt in min en run mai. "I khawsak dan hi ka duh lo aw? I bialnu ang mai a min cheibawl tum hlek suh" ka ti zui leh zat. A thaw hawk a, na zet a min melh in Fridge lam a pan zui daih a. Ka thusawi ngaih pawimawh loh hmel zeta a awm tlat chuan ka thinrimna a chawk tho ṭha kher mai.





"Haw rawh" ka ti zui leh nghek a, muangchanga rawn in her in a tui bottle ken lai chu dawhkan ah a nghat ri chawrh a. "Ka rawn leng ringawt pawh chu ka va hnawk awm ve?Hriathlua vang kha a nih chuan engahmah ka ngai lo. Ka kawng dal turin a nep lutuk" tih pahin a khi suk a, a hmel a Hriathlua tham loh na lang chiang lutuk chuan min vit zawk thei hial.





"Sawi ve khanglang lo mai rawh, i lêt in a ṭha. Ani in min ngaihsakna chanve ang pawh hi i lakah khan ka dawng ve ngai lo e. Enteh, thei ber emaw hi in ti suh. Nang ang mai mai nilo hi an tam ve a nia" ka ti let leh tawn tawn a.





Malsawma nen hian thinrim taka in hmachhawn kan nei ngai lem lo a, chân ka hlauh luatah khan vuivaina tam tak nei ve ṭhin mahila ngawih ka chuh hram ṭhin. Tunah chuan kan inkarah eng thil mah a awm tawh lo bawk a, hlauh tur ka nei tawh bik lo.





"Ka ngaihsak tawk loh ṭhin che avangin pawi ka ti rêng alawm. Mahse, ka phatsan ngai lo che. A hma aia hlim khan siam che ka duh, chuvanga bul ṭan ṭha leh tur a sawm che ka ni bawk. Hriathlua hian engtiklai aṭang khan nge ka hmun hi a lo luah teh hrep ni?" a rawn ti let hrawk a, ka che dawt. 'Ka hmun' a tih chuan ka laka a inrintawk zia a tilang ni mai in ka hria.





"I hriat ve ṭullo thil a nih chu, nangpaw'n ngaihzawng i neih theih chuan ka neih theih lohna tur bik ka hre lo" ti chungin ka pen sawn zui nghal a. Sawi duh leh sawi tur tam tak ka nei ve bawk; mahse, ka sawichhuak thiam zozai lo.






Ka hnung lam aṭangin min pawt let dawrh a, a âwm ah min pawm betin a ban lehlam in ka kawngah nghet zetin min kuah bet nghal hmiah a, ka dar ah a lu nghatin a thaw zui hawk; a chetdan chuan min ti hamhaih deuh bawk nen che châng lovin ka ding khawng reng a. "Bhabi, min hrereng chung hian midang lakah hlimna i nei thei chuang em ni?" a ti zawi sup a, ka chhing sawk. Min kuahna aṭanga talchhuah tumin ka che zui vat a, a nghet mah mah chu a ni.






Ka tukhuma a âwm a tauh datin "Malsawm, ka hriatreng lohna tur che a nih dawn phawt chuan pasal pawh ka ûm zawk mai ang. Beidawng taka min siam tawh tu ring leh turin ka chak tawk bik lo" ka ti let sap a, ka ṭawng chu ring lo mah se a hrechiang tih a thawk lak hulh danah ka hria. Min thlah thut a, min kawih her lawp pahin "Zothansang, i tih miah loh tur thil sawi suh" a ti khur khur a.






A mitah chiang taka en in ka nui sak a. "Ka ti ang, ka paihbo theihna tur che anih phawt chuan engpawh ka ti thei" ka ti let leh tuarh a, kan boruak zet chu ka kham hluah hluah. Tawlh hnung hretin a in seh ruh ṭawlh ṭawlh a "Aw le, a ṭha.Ti rawh, ti mawlh ta che" tiin kawngka lam pan in a pên zui pawk pawk a, a helmet khai chu phih thla sawkin a chhuak zui nul nul a. Kawngkhar in khar ri chawrh chuan min ti phu zawk a, ka bula ṭhutna ah chuan ka ṭhu thla hnawk. Keimah a ruak deuh huai awm tlat chu duh lo zetin ka thin zawn chu ka chum dawt dawt a, na zetin ka thaw chhuak hawk. Malsawma khan a sawi dik, ka theihnghilh ngai lo. Ka luhlulna ka in thunun tir hneh em a, ka pal lui hram hram zawk mai a ni.






Ka zawi sa nak a laiin kan boruak chuan min hmet chau zual, ṭhutthleng ah chuan ka mu kawm chal a. Ka ngaihtuahna ah Malsawma a lang tam lutuk chu duh lovin Hriathlua ka mitthla ah ka dah lui ngar ngar a, ka bansan tawh lama kir leh turin ka chapona a lian mah mah a; hmalam pan zel chu ka tan pawh a ṭha zawk in ka hria.





"U, A û...harh teh" tia min sawi nawk nawk avang chuan ka meng diar diar a, hnai zetah Mampuia'n min lo en kar. Ka lo muhil daih chu niin; Sana ka en thuai a, ka mu rei thawkhat viau tih ka hre mai. "Dawhkan a Noodles vel saw chhum ila, ka ril a ṭam e" tih pahin min tung tho lawp a, ka rak ṭhat. Dawhkan lam chu ka en zui zat a, Malsawma thil rawn ken te chu a ngai ngaiin an lo la let ram hlawm a, ka lo hre leh tawh hauh lo.






"I duh leh siam rawh, Noodles ka nghei" tih pahin ka tho zui a, ka ham zui bai bai a. Mampuia chuan awihloh hmel zet a ner nângin "I mumang chhiat vang anih chu, ka siam anga; a ei tam zawk i ni leh tho ang" tiin choka lam a pan a, a ri zui sat sat a. Ka mit phak chual chu nuai nawk nawk in ka zi mar ar ar a, ka ril a ṭam; mahse, engmah ei chakna ka nei lo thung. Ka nguai bur chu tih reh tumin pawnlam ah ka chhuak a, van lam hawiin ka ding vang vang a. Chhûm dum pan te te in a kal dêl dêl a, a karah Ni a rawn lang leh zauh ṭhin; ruah sur leh mai tur te pawh a ang viau.






Hmunphiah la lawkin kawt vel chu ka phiat kual ta chiam a, ka in tih harh loh chuan ka diklo zo mai dawn in ka hria. Ka nu Pangpar hnah ro te chu ka thian pah mawlh mawlh a, pawnlang zetin ka zâi pah sep sep reng bawk a. Ka rilru luah tlat tu hi ka duh lo, ka ngaihtuahna aṭang hian bo hlen thei se ka ti ngawt mai.





"I phone a ri" ti lang lang ri ka hriat rual in inchhung lamah ka tlan zui vat a. Hriathlua hming lo lang va va chu ka en reng; ka in thiam lo deuh ringawt lehnghal. Ka la zui vat a, an hna a lawklawh avanga an buai viau thu a rawn sawi nghal zung zung a, an chawlh ve hman chiah thu te chu min hrilh leh mawlh mawlh a. A chauh leh chauh loh te ka zawt luam a, a chauh hran loh thu in min chhâng thuak a. Engnge ka tih ve tih min zawhlai chuan ka lungphu a rang zaih zaih hle, engmah hre miah lo mah se ka chhungril ber aṭang hian nuam lo tihna in min zem riai riai a. Rilru nuamlo zeta eng eng emaw ka hrilh zui lai chuan a ṭhian te'n an lo ko ve sek bawk nen zan lama min biak tur thu sawiin kan dah zui ta thuai a. Ka bawlhhlawh phiah khawm sa te chu rut in ka lut zui thuai a, inbual harh ka duh; ka awmdan nuam lo lutuk te pawh a reh deuh mahna.






Mampuia'n Noodles ei pahin phone a lo hmang a, min hmu chiah chu ṭawngkam thlum thei ang berin a chhunzawm vak; he pa hian mi nuihzat ve deuh em maw ni? Nui sâng chungin a mitmeng chuan ei ve turin min sawm zui zat a, lu thing mat mat in ka thawmhnaw hakthlak la turin room lam ah ka luhsan zui daih a. Ka phone ah hla play in a ri ring thei ang ber in ka dah a, tui vawt a ka in leih pawp rual chuan ka harh deuh hawk in ka hria. Reife inbual in ring zet in ka zai vak vak a, ka thin tawt ru ṭun chu auchhuah pui vek ka chak ngawih ngawih. Vawt tia ka khurh bap bap thlengin ka inbual a, ka zâng deuh huai in ka hria.






Ei rawngbawl tumin ka in buatsaih zui a, tlak hang tello hian chaw ka ei hlei thei meuh lo. Ka bazar ve pawhin ka lei duhâm viau zel, behlawi rah lian chi chu la chhuak nalh in ka thian zui malh malh a; Diktea school a rawn bang ve chiah bawk. A rilṭam thu a sawi nuah nuah a, thingpui ka chhuansak leh rih a; School ban rilṭam hi a nei ve ziah. Ka phone ri chu ka pan zui thuai a, Tleipuii a lo ni. Rang taka la zuiin ka thingpui chhuan lai ka vil pah ran bawk.





"Zothansang, pasal ûm i tum em ni?" a rawn ti nghal chiam a, ka lo nui hak. Malsawma thinrim hmel ka mitthla ah a rawn lang nghal zawk.





"A pawi viau em ni? Kan ûm ve bawk ang chu" tiin ka lo nui ar ar a.




"Zak rawh, Malsawma a rawn in bunruak" tih pahin a nui har har a, an In aṭanga a haw chiah thu a sawi bawk. Kan in aṭang khan a kal zui nghal anih chuan a leng rei fe tihna ania, eng tak va sawi ang maw?.





"I lo hnem lo em ni? In bunruah vak na tur pawh a neih loh kha. Keimah zawk hian asin inbunruah mamawh chu" ka lo ti let hlak hlak a. Ka ṭhiannu bula min lo sawikhalh vek chu ka ngei ru viau bawk.





"Enteh, vawiin chu mak ka ti tawp. A thutak ang reng bawk sia, min ti hrilhhai lek lek alawm. Mi hnem ka thiamloh zia chu i hriat kha, in in hau reng reng em ni? Engnge in awmzia hi?" a rawn ti zui zat zat a. Ka thingpui chhuan so mek chu off in ka siam pah rak rak a.





"In hau em em lo e, a rawn leng a. A khawsak tur bakin a khawsa a nih kha. Engkim maia a in ring tawk lutuk hi ka ngai thei lo, a hma ang mai mai tur khan min la ngai aniang chu. A ti sual khawp ang" ka ti let hmak a, ka thinrim thar leh ṭun thei nia.





"Bul ṭan pui leh chu i tum lo tak tak em ni? Hriathlua hi i lo duh viau tak tak a ni maw?" a rawn ti sap a. Malsawma laka ka rilru put dan leh bul ṭan pui ka tum tawh loh thu chu ka sawi zui par par a, Hriathlua a thamloh zia pawh ka sawi tel hram; ka ngei a kaltluang ka ti mai.




"In runluih nana midang kawp te hi a ṭha lo a nia, khati khawp a ilo atchilh tawh leh i hmangaih em em hi kalsan in nunbul i ṭan ṭha leh thei tak tak ang maw? I ti sual palh ange" a rawn la ti hram a, chu thu bawk chu.





"Nang hi tu lamah nge i ṭan a? Malsawma'n min ngaih pawimawh loh ṭhin zia pawh i hre ve reng. A hunlai kha chuan a âng nasa sa i nih kha, tunah lêm khatiang zawng a rawn sawi leh vel" ka ti bawrh bawrh a. Diktea thingpui in mek chuan min melh leh ralh ṭhin tih ka hria. Nau te an ni bawk a tiin ka haider lui, ka rawngbawl lai nen kalsan daih a rem chiah bawk silo.





"Thil tam tak ka ngaihtuah in thil awmthei tur a ka hriat ka sawi ve mai mai ania. I lungdamna kha alawm ṭha ber. Malsawma pawh a hunlai in a khawsa ho lutuk a, ka ṭan lem lo. A tawrh hun a thleng ve ah ngai mai ang. A changtupa chu a damṭha maw?" tiin boruak dang a rawn vawrh ta hlauh.






Hriathlua nena kan inbiakna thu te hrilh zui mawlh mawlh in, in rûk em chu ka ngam loh thu te pawh ka sawi; Tleipuii pawhin a la hun loh thu a rawn sawi thuai a. Ngaihtuahna fim tak hmanga thil ti ṭhin turin min chah uluk viau, ka ṭhiannu hian min hrechiang a; ka thin thawk thut in a nilo kawng ka zawh palh chu min hlauhpui a ni tih ka hrethiam. Reife kan inbiak hnu ah kan ti tawp ta chauh a, chaw chhuankai tur ka siam zui leh mawlh mawlh a.






Zanriah kan kil laiin ka nu in phai lama awm U Maṭhai'n a rawn biak thu a sawi malh malh a, ka chungchang a rawn bia a ni ber. Hnathawh mumal neilo a ka awm chu min lo vei deuh anih hmel, a awmna Dubai lama kal ve turin ka nu a lo sawi hmuh a ni awm e. Kei lah ka lo ṭeu nghal hlar ringawt, Mizoram chhuahsan hi ka la tum chhin lo hrim hrim a; ka dawihzepna lam tak a ni bawk. Ka kal duhloh thu chu ka sawi nasa nghal hle.






"A engamah hma a khatia sawichiam pawh a ngai lo. A rawn sawi tih thu ka sawi chauh anih chu. Ramdang daih a awmtir che u hi ka tum reng reng lo" ka nu chuan a ti leh lawi a, a hma khan min kaltir mai tum hmel tak khan a sawi reng sia. Mampuia leh Diktea chu in melh ralh in hnuailam en in an nui suk suk a. Ka nu hi chu a thiamchang pawl hi a ni hrim hrim, a sawi mam zui thluam thei zel. Ka nau te hian an hrechiang bawk a, an nuih nachhan pawh ka hrechiang khawp.





"Ka fate chuan a him chin ah leh ka hmuhphak ah hian hnathawk zel mai ula ka duh. Sawrkar hna kher hi êm lo ula. Tun ang laiah hna hmuh a har tawh zia in hriat vek hi. Mahni a eizawnna puitling nei thei tur a rilru siam hi a fuh ber, in lehkha zir ve bek bek te hi a ṭangkai zawng a hman tum ula. In nunkhaw nawmna tur ruahmanna kawnga rahbi hmasa ber anih hrereng ang che u. Taimakna leh tumruhna nei ula, engkawng ah pawh teirei peih zir ang che u. Hlawhchham tawp tur hian kan enkawl lo che u ania" ka pa chuan a lo ti zui ve charh charh a, kan ngawi ṭhap. Ka pa in khunkhan taka min zilhna hi chu kan ngai pawimawh viau ṭhin. Thil a sawi ve mai mai ngai lova, a sawi chhun erawh kan tana ṭha ber tur thil a ni vek thung.






Chaw eina ka seng fel mek laiin kan ṭhenawm nu a rawn leng lut a, ka nu chu mithi ral puiah a rawn sawm a. Ka nu pawhin chhun lama a buai ve theih em avangin a lo hnial lem lo. Ka pa lo ding ve uaih chu ṭhenawm nu chuan fiam zui in a nuih zui ar ar a, ka nu a chhuah dawn hi chuan chhuanlam fahrah te te siam in chhuahna tur a lo zawng ve nghal chûk zel. Reilo te ah inpeih in an chhuak zui thuai a, ka nau te pahnih pawh room lamah an tawm leh tlat tawh. In lama an awm ve pawh hian room hi an chuh deuh tlat zel a. Keimah in TV ka en a, Korean serial hlui tawh zet an lo chhuah nawn leh chu hmuhnawm ti zet in ka en; a mood ah ka cheng fuh leh dawn chiang.






A changtunu rethei lutuk ka ṭahpui pur laiin ka message tone a rawn ri tlang a, Hriathlua message a ni; ka hawng zui vat. "Ka ngaih nu, i va reh ve?" tih chu ka mittui tuai fai pahin ka chhiar thuai a, film hi chang ve dawn ila ṭap lai scene hi ka hnehsawh viau in ka ring.




"Nagmah anih kha reh, i lengchhuak em?" tih ka thawn ve nghal zat, a seen rualin a rawn typing zawm leh zat bawk.




"Leng lo, ka sil ṭhum mai. Ka rawn leng ang chu ka ti deuh na a, chaw kan ei tlai leh ta sia. Zanin chu ka rawn leng lo mai ang" a rawn ti leh thuai a. Ka hmu chak viau na in mu hahdam tur a tiin ka ngaih thu ka sawi tel zauh bawk.





A rawn typing leh nghal zat a, ka lo ngaichang ran a; ka rin aiin a rei phian. "Sawi tur a ngah aniang" ti rilru chungin TV lam bawk chu ka ngaihven leh a, a hmaa ka mood erawh a bo chiang hle; a changtupa tak tak a lo lan meuh chuan thildangin rilru a pawt peng zo meuh lo. Message a rawn lut a, ka nghah rei ang aiin a tawi leh si.





"Bawihi, i thuthlukna ka hre chak tawh viau a nia" tih zawng a ni. Mahse, thu sei tak aiin awmzia a nei thui daih zawk. Chhan let mai dan tur hrelo in ka ngawi rauh rauh a, pehhel na tur ka zawng ngat ngat a ni ber. A sawi nawn leh mai hlau a titi dang ka vawrh zung zung te hi a hrethiam ru kar mai thei bawk.






Ngaihtuahna in kiltin a hrut kual ve thiam tawh a, ka nu leh pa min zilhna aṭang ringawt pawhin thil tam tak ngaihtuah kual nachang ka hre ve tawh. Hriathlua te chhungkaw chanchin hi hriat ka nei tam lo hle. Amahin ṭul a tihchin bak min hrilh loh lai a kara lo zawh belh chhen chu ka in thlahrung ve tum hrang a. Chanchin sawi nuam lem lo te lo awm ta se amah ka tih hrehawmna mai mai a ni thei bawk. Ka hriat tlemna erawh chuan min mawlh ve reng thung si.





Ama chungchang ah hrim hrim chuan a sawi zawng zawng hi ka ring thlap. Ka rilru ang pu ve turin ka ngai hmiah a, rinhlelhna ka nei ngai lo. Rinhlelh a hnek in a sawi ang ang hi ka lem duak duak ni berin ka hria. Kan la in ngaizawng rei lo viau a, in ruk rum rum pawh chu kan chhungte lak aṭangin harsatna sawi tur kan nei bawk silo. Kawng tam tak a ka ngaihtuah kual fe hnu pawhin 'In ruk loh' chu ka thuthlukna tawp nan ka hmang leh ṭhin. A chhan ṭha tak sawi tur a awm miau si lova.





"Aw le, ka beisei sang te pawh aniang. Tute emaw angin ka tla na ve tawk lo te pawh a ni ange" ka chhiar zo chu ka thaw hak. Ka rin sa a ni, engemaw lai aṭang khan a lung ni lo zawng deuh a thu a kal apiangin Malsawma a hmer tel ta fo. A hming hmerh in sawi fak lo mah se a ṭawngkam mei nei te hi hrethiam lo rual ka ni tawh bik tlat lo.





"In ruk tawp hi a har ka ti, hmanhmawh em em chhan dang i nei a ni hial lo maw?" tih chu ka thawn ve leh vat a, ka ipik leh ṭun tawh.




"Chhan dang vak a awm lo, ka hmangaih che a; ka thlahlel che. Lehlam ah zar sektu i nei tih ka hriat ve reng na te leh itan mi pawimawh tak a ni ṭhin tih ka hriatna hian awm nuam pawh in min awm tir thei lo a nih hi" a rawn ti deuh duah a. Khawngaih ruk riauna ka nei tlat bawk, a awm nawm lohna a sawi ang hi ka hriatthiam thil, vawi tam tak ka lo pal tawh hnu a ni tlat.





Ka dinhmun chu a lai laklawh in lehlam ve ve aṭanga na tak a pawh tawn in a awm mek ni maiin ka hria. Hriathlua duhdan hnar tawp chu ka hreh takzet, chutih rual in zui mai erawh ka thei chuang bawk silo. Ka hne, 'chhuanlam tur ṭha deuh awm se' ka ti ru hial.





"Muttui le" a rawn tih leh pawh chu ka chhang let tawh lo. A lungawi lo tih ka hria, a lungawina tur ber thu sawi turin ka thei rih bik si lo. Ngawi rengin ka ṭhu vang vang a, ngaihtuah a vak kual zut zut reng a. Mumal taka va ngaihtuah chian fak theih erawh ka nei hauh silo. TV chu off in room ah ka kal ta daih a, Khum lamah te hian ngaihtuahna sawrbing a awl deuh zawk mahna.






"Kal vat ang" tih pahin hmanhmawh takin Bike hnungah chuan ka lawn zui zat a, hnunglam ka hawi pah zak zak bawk. Ka thinphu chu a su dup dup a, ka thin dawm in Hriathlua hnungah ka bei thlawp a. Bike ti nungin a tlanchhuak zui thuai a, ka phone ah lai chu phawrh sawk sawk in ka simcard ka phawi zui zat; ka hlauhthawnna chuan min man hneh bawk a, ka khur der der mai.






Ngaihtuahna tam tak ka sen kual ve fe hnu ah pawh ṭha ka tih loh lam kawng ka la zawh lui ṭalh tho chu ania, tih tak zeta vawi tam min sawmtu hian min hneh em a ni. Ka chhungte ka mitthla ah an lo lang a, ka awmlo tih an hriat huna an hrilhhai dan tur leh pasal ka um mai chu mak an tihdan tur nen lam ka ngaihtuah kim vek, an thin a rim viau dawn tih pawh ka hria. Chumi ka hmachhawn ngam loh avanga ka phone pawh chu tinung ngam lo ka ni bawk. Hetianga thuthlukna ka siam rum rum hi kei pawhin mak ka ti zawk hial, min chenchilhtu thlarau mak tak a awm ni maiin ka hria.





Chak zetin kan tlan a, khawlai dungah motor a tam tawh lo; hun dang chu nise ka hlau hle tawh ang tih tur khawp a chak in min tlanpui a. Mahse, tun hunah chuan kan tlanchak lam chuan ka rilru a luah ber lo, ka thinlung chhungril ber aṭang chuan let leh mai duhna a rawn awm ut ut reng bawk a. Ka rilru a insual buai laiin Vaivakawn kan lo thleng daih tawh. Ka hawi deuh hâ hâ a; kawng sir a dawr te takte bul ah chuan kan ding dat a. Hriathlua chuan In lama haw nghal tawp aiin rilru tih thawven nan lenkual mai mai rih ṭha a tih thu a sawi a, pawi ka ti lem lo. A chhungte hmachhawn ka huphurh ru viau bawk a. Vawikhatmah ka la hmuh ngai loh te bulah chuan ka khawsa thiam ve meuh angem tih te ka ngaihtuah neuh neuh reng bawk a.





"Bawihi, khutah zu tlang lawk ang hmiang" ka beng bulah a rawn ti sup a, rang takin ka en vat a; zawhna nei hmel a ka en hâ na chu hrethiam takin "Rv ah tlang lawk ang, a zamawm ve em a. Zanin chauh chu haw huaina min phalsak la" ka biang a piai zeuh pahin a rawn ti zui leh sup. Ṭul ti lo viau mahila kan hun tawn mek in a zir bawk a, lu bu nghat in tun ṭum bak tih nawn tum lo turin ka ti zui zat bawk.






Muangchang in kan tlan chhuak leh a, khawlai dungah chhuak vak an tam viau mai. Rangvamual kawng lam anih vang a lûn deuh ah ka ngai ve ngawt bawk. Kan thleng thla ṭep tih ah ruah a rawn hmi seng seng a, din lawk ka duh em tih min zawt a ; ka duhloh thu in ka chhang vat. Ruah in min rawn nan sep sep te chuan min ti thawl huai zawkin ka hria.






In hlui ve tawh lam lian zet mai kawtah chuan a ding dat a, ka chhuk nghal thuai a. A bul velah chuan Taxi a ding khup a, rui fe fe hmuh tur an tam bawk. A ṭhen lo in nam kat dawr dawr karah hmeichhia an lo in rawlh ve sek hlawm bawk a, ka rin loh deuh in hmeichhe changkan hmel tak tak pawh ka hmu nual. Hawi chhuak ṭha ngam lovin a hnungah ka zui ve tawp a, inchhung lamah pawh an lo ri laih laih mai. Ka kawr hnawng deuh chuap chu ka beng thuak thuak a, hritlang ka kai ka hlau leh hnuhnawh viau.





"E he, in hmuh a va khât ve le? Helam ah lokal daih rawh u" rawn titu chu ka en reng a, nu hleitling leh hmelṭha zet mai a ni. An choka awmna lam chu min pan pui a, an chawei dawhkan kîl in min ṭhutpui nghal zat. A bul maiah chuan puan zar hliah in khum zau tak an hung bawk. An pa ni awm tak cher chhe zet maiin min rawn pan hnai ve bawk a, min en ngur chungin a nui vur vur leh nghal.





"Tunge hei hi? Hmanni ami kha a ni miah lo" tih pahin an pa zawk chuan a kut a rawn lek chhuak a, ka lo vuan ve mai bawk a. Ka kut chu thing deuh nawk nawk in "Chiang deuh a in chibai hi a ṭha ngai" tih pahin a nui huah huah a. An nu zawk chuan "Engnge ka rawn lak dawn?" a lo tih zawm ve zat a, a nui sâng reng bawk. Hetia han en mai chuan 'Engtin nge an pa chu a duh theih le?' tih mai tur a ni.





"A ngai ang kha" Hriathlua chuan a ti sup a, an inbiak danah chuan vawikhat an in hmuhna lek a ni lo tih a lang chiang reng. Keimahah zawhna tam tak a rawn lut nghal zut zut a, chu nu a biak apiang a "Ka nu" a ti ziah te chuan min ti awm nuam lo hial. Ka hriat ve loh lamah hian thu zep ruk tam tak awm in ka hre bawk.





Dawhkan bulah ka ṭhu ran a, lo lut thar an awm zel a; a lo ṭhu rei tawh ho in ṭhutna kian in an lo in saseng ve zel bawk. An khawsak dan chu in duhsak tak te pawh an ang hlawm. In neitu nu chu 'Nu Marami' a nih thu a sawi a, an in hriat dan ka zawh chuan a ṭhianpa aṭangin a nih thu a sawi; hmundang daih a in hmelhriat ṭan niin a sawi bawk. Nu Marami chu inhnuai aṭangin a rawn chhuak chho a, kal ngaihna a awm lo ang tih tur khawp a zim ah chuan a lut thla deuh sek a; an thil dahṭhatna ber te pawh a ni mahna.






Dawhkan a zu bur in hung chu ka en ran a, engtin emaw tak hian nuam lo ka ti ngawih ngawih. Dispo Cup lian vak lo ah thli in tui a pawlh a, ner sak in a in zo nghal vek; âng deuh pam in ka lo en reng a. In thlahrun hmel zet a min en in a nui tawi tak a, ka bianga rawn khawih zeuh pahin "Zanin chiah" tiin a khi leh suk a.






Kan boruak tawn teh nuaih chuan ngaihtuahna mumal pawh min put tir thei lo, kan chhak lawk a ṭhu te chuan hla an play a; an rak teng tung mai bawk si. Chhuahsan vat ka chak zek zek a, ka tur deuh sek bawk.





"Lal Anu, kan kal ang. Hei kan nu hi a awm ṭhan lohna hmunah a awm a, a ṭap ṭep tawh in ka hria" tiin Nu Marami chu a ko a, ani pawh a lo kal hnai vat a. A nui sâng reng thei chu mak ka lo ti, a boruak ringawt pawh ka nuihpui hlei thei lo ania. Nitin an nunphung a bet anih vang te pawh a ni mahna. Chaw ei ah te chuan min la sawm tak deuh deuh a, Hriathlua'n ṭawngkam ṭha taka chhangin kan chhuak zui ta vat a. Pawn boruak chu ka hip vang vang a, inchhung rim na lutuk khan min ti chau hluah hluah hman. Boruak ṭha pawh an hip hlawm in ka ring lo.





"Haw ang aw, ka rui miah lo a nia" a ti sup a, Bike lam ka pan zui nal nal a. Ka hnungah min rawn zuiin ka kut a rawn vuan a, ka hawilet vat.
"Bawihi, hrehawm i ti tih ka hria, haw vang vang ila; helai hmun hi kalsan daih ang aw?" dam dup in a ti leh sup a, ka hnuk a ulh deuh ringawt. A lamah min pawt hnai a, min kuah zui hlu hlu te chuan ka ṭah a tichhuak zual a, ka mittui a luang nghal zâwih a. Chu hmun ah chuan Hriathlua chu mikhual lo riau a hriatna ka nei tlat a, min delhtu thil rit tak awm ang mai hian ka hria.






Ka chhungte ka ngaihtuah a, ka hmachhawn tur thil tam tak la awm ṭun mai te chu ka paltlang thei angem? Ka thil tih hi ka inchhirna tur a ni angem? Engtinnge kan awm chhoh zel ang? Zawhna hlir a khat ka thinlung chu a rit takzet. Min kuah mektu chu nghet zet a kuah let ve in hahdam tum in thawk ka la kawk a, tun dinhmunah chuan 'amah chauh ka en tur a ni' tiin ka in hrilh mawlh mawlh a.






(to be continue........)


Show post links
Top