DEAR PAIN BY Brigida Hugo (Completed)

[Ngaia]

DEAR PAIN
Chapter-25




By : Brigida Hugo



Inneih boruak a zova, ṭhenawm khaw veng min lawmpui a rawn chuangkai pawh an reh ta duk mai. Mahlimi chu a mawng a zâng bawk a, kawng engkimah min chhawk zangkhai a ni ber, ka theih ang ang erawhin ka phe kual ve vat vat reng tho bawk a.






Ka pitei'n an haw hma zana a thu min chah "I awmdan uluk viau ang che. Mahlimi a sual ka tihna ni lovin, chhangchhe bakberhin i let leh a ni a. I theih ang angin engkim ti ṭhin rawh, ilo buai deuh anih pawhin tawrh lam chak la. Midang ring a i nun nasat poh leh hnawksak i ni thuai dawn a nia" a tih kha ka hre thar reng mai, awm awl mai mai bik chu ka tum lo.






"Ka nuam sam lo riau mai, vawiin chu dawr lamah in nupa in va kal mai ta che u. I hna ila chawl tho a, Mahlimi pawhin thawmhnaw te pawh a duhzawng thlang ve se la" chaw kan ei laiin ka nu in Mampuia hnen ah a ti dam dap a, a hmel en pawhin a nuamsam zân lo tih a hriat theih.





"Engnge i ngaih dan?" Mampuia chuan an nu a melh pah rulh a. Mahlimi pawhin a hnial lem lo; a phur viau tih a hmel ah a lang reng.





"Zothan, Inchhung sekrek khawih kha chu i kutah awm rih mai rawh se. Nau nen dawr nghak ah in laktlak dawn mang si lova" ka nu chuan a tih zawm hlak a. Kei min biak ve hi chuan a ti deuh hlak zel hrim hrim.





"Nidangah pawh a tih vek ṭhin tho alawm, â û hi awm lo sela chuan kan buai thei viau ang" Diktea chuan a lo ti ve khauh a. Ka nu chu a ṭawng zui ka rin tehreng nen a ngawi reng chu mak ka ti hial zawk. Bawihtei pawh a fel ve tawh, ṭhutthlenga a nau mu a lo veng ve thei tawh. A nau ṭe ṭhet ṭhet rual chuan min rawn ko thuai a, keipawh rang takin ka kham zui ta thuai a; hnute ka pe zui nghal mawlh mawlh a.






"U, kan kal ania. Thleng chu sil turin kan dah mai" Mampuia chuan a rawn ti lûng lûng a, an chhuak zui ta nghal a. Zing kara ka in sûk sa phochhuah turin ka la chhuak mek a; Bawihpuia tlei tha a tho loh avangin ka awi pah reng bawk.






"Thleng chu ka lo sil mai ang, naute kha a damlo em ni? A va tlei lo em em?" tih pahin Diktea chuan min rawn pan nghal a. Bawihpuia pang chu a khawih kual ve dun dun a, pangngai taka a khawih vawikhatna ni hialin ka hria.






"A pang chu a sa lo, nawm loh rûkna a nei a ni mai thei. Nachhawkna ka pe tawh a, muhil se a zia mai ang. Thleng pawh ka sil thei reng, hei hi ka han zar chhuak phawt ange" ka lo ti sawk sawk a. In chung chhohna ka thlen rualin thleng sil thawm ka hre zui nghal zat a. Diktea hi zakzum dûk e tilo hian a fel ve riau zel.






Nileng deuh thawin Bawihpuia a tlei lo zui a, tlai lamah phei chuan a khua a rawn sik ta hluah mai. Ka nu a nawmsam bik loh avangin a tho chhuak peih meuh si lova, nau paw chungin eirawng ka bawl zo hram a. Bawihtei pawh ama awm awmin a lo in awm tlei ve a, chhuatlaiah a toys ho an darh pheng phung bawk.






Mampuia te rawn haw laiin uar fahran in Bawihpuia chu a ṭap a, 'na dang a nei em mawn le?' ka ti hial tawh. A ṭap ban tir tumin hnute pek ka tum a, a duh miah lo leh nghal; a awmdan avang chuan keimah zawk chu ka ṭah a chhuak rum rum tawh.






"Kan tlangval tê chu engatinge ni vak vak? Khawi maw ka lo pawm teh ang" tih pahin Mampuia chuan a rawn pawm zui vat a, ding chungin an in awi nghal durh durh a. Mahlimi chu ka nu mutna lamah a lut zui tharh a, a thawmhnaw lak te a entir dawn a nih ngei ka ring. Mampuia chuan Bawihtea chu a thlek vat vat reng a, "Damdawiin lamah kal mai a ṭha lo maw?" a ti chu ka hnial duh lem lo. Zan lamah kan buai vak ka hlau. Ka in siam zui sawk sawk a, ka nu chu chanchin ka hrilh ve nghal thuai bawk a.






"Damdawi lei nan hei hi hûm hrim hrim rawh"' tih pahin ka nu chuan cheng sangkhat min pe a. Mahlimi pawhin min pek a tum viau nangin ka la tel duh ta lem lo. Bawihtei chu a pi bula lo awm turin ka ti a. Mahlimi'n "Ngaihtuah suh, ka lo awm pui ange. A chaw eitur te ka lo siamsak ang" a lo ti zung zung a, ka thla a muang huai mai. Bawihpuia chu paw ṭha in kan chhuak zui ta thuai a.






Casualty ah kan tlanluh pui thuai a, a la ṭap nasa ngei mai. Ka zâm ru deuh tlat a, Mampuia chuan min laksak in Doctor in a en vel chhung zawng pawhin a pawm tluan ta ṭhak a. Naupang enkawl lamah hian nawi ruk deuhna ka nei a, vaccine an lak dawn pawhin ka pawm ngam ngai lo. Uar fahrana an ṭah tlawk tlawk phei chuan ka mangang lutuk hi keimah thleng hian kan ṭap vek lo chauh zel.






Thil hlauhthawnawm engmah a lo awm lo hlauh a, a khawsik tlem a awm tih loh chu harsatna lian tham a awm lo hlauh. Damdawi min chawh te chu Canteen ah ka lei a, kan zia chhoh mai rinna lian tak ka neih avangin ka thaw ru huai mai. Chaw kan la ei loh avangin ril a ṭam viau tawh bawk a, kan tlan haw leh ta vang vang a. Bawihpuia pawh an damdawi lo eitir chu a ngeih dawn a nih hmel, zan mut hun thlengin a harh leh ta miah lova, hnute pe tur pawhin barh chawp a ngai hial. Buaina dang nei lovin zan hun pawh kan hmang thei ta hlauh e.






Hun hrang hrang kan hmachhawn chho ve nawk nawk a. A chang chuan hun hlimawm tak takin min hmuak a, a chang leh rilru na a rûm vawng vawng chang pawh ka nei ve ṭhin.






"Ka nu... Mampui.... lo kal teh u" tia Mahlimi rak chul thawmah chuan kan phawk hru hlawm a. Mampuia chu an room lam panin a tlan zui puat. "A eng chu ni maw?" tih nuah nuah pahin ka nu pawh a kal zui ve thuai a, kei erawh naupang mut fel tir tawhin panhnah ka khawih leh mek thung.






"U.....naute kan nei ve dawn. Pa ka ni ve tawh dawn a nia" tih pahin Mampuia chuan ka hnung lam aṭangin min rawn kuah vak vak a, min sawi nawk nawk bawk nen ka thil ken lai pawh ka thlauh darh phung mai.





"Khawi nge... i mawl vak vak. Kha... chinai i rap" ka tih mek laiin a rap pherh ta duai a, ka sawi tur pawh ka sawi zo hman lo. Mahlimi leh ka nu nui sângin an rawn in zui chhuak ve mek bawk a. A hming phuah an in chuh nghal nak nak a, "Pa ber ka nia, a hmasa ber chu ka chanpual" Mampuia chuan thutak fe in a lo ti hmiah mai. Eng eng emaw sawiin an ri zui barh barh a, a khât tawka ka lo tuihnih ve leh zauh ṭhin tih bak chu an thil sawi ka ngaithla a ni ber.






Mahni hna ṭheuhah kan buai chho nawk nawk a, ka nu pawh tunlai chu dawr lam a ngaihven uluk ve leh deuh tawh e. Diktea pawh B.A final exam nei turin a inbuatsaih ve mek a, School ban a tumna a rei tawh nen rin ai daihin a tui chho leh ta phian a. Mampuia erawh nitin hna kalin a chhuak a, Mahlimi nau pai pawh huat a ngah chho viau mai. Chaw a ei hlei thei lova, a ei theih tur zâwng dapkhawm in Mampuia leh ka nu an buai thei hle. Keini nufa pawh kan awm ve nawk nawk a, ka fate hi dam ṭha em em mai se a nuam a ni zel mai e.






"A mak e, tunge ka bawnghnute dah daih hi lo ti baw ṭhen leh tawh a? Ruthi, nangmah em ni"? Mahlimi chuan ati bawrh bawrh a, ka hmunphiah lai chawl dat in Bawihtei chu ka en zui vat a. Ani lah chu a pitei ṭawng pawh hre âwm in a awm lova, ka phone en in a ngawi rân mai.





"A va buaithlak ṭhin.... Bawihte... i pitei bawnghnute dah i khawih em ni? tiin ka zawt zui thuai a, min en mang lo in a lu a lo thing ringawt thung.





"Thil han dah mai pawh hi a ngam awm loh ṭhin" ti a phun zui hlak hlak in bawnghnute chawi chung chuan an room lamah a lut zui ta daih a, nuam lo ka ti ru ngei mai. Bawihtei chu pan hnaiin a phone ken lai chu ka laksak a, chiang deuhin min en ve nghal ran bawk.





"Thil khawih mai mai loh tur aw, thil ṭha te ilo khawih chhe palh ang. I hrethiam tiraw?" ka ti dam dap a, a mit khap fak fak in a lu a bu leh nghat a. Naupang ninhlei rual lek a la ni ve si a, thildang ti a ka buai phei chuan ka lo en zui reng hman bik lo nen; kan in veng seng meuh lo a ni ber. A nau muthilh chian ve leh khumah ka mut tir a, awih mut kher a ngai ṭhin hian chet a ti sawt lo ṭhin bawk. Buh ka ṭhap zui ta mawlh mawlh a.






Zanriah kan kîl laiin ka nu in bungraw la a zin a duh thu a sawi malh malh a, a ṭhiante'n an sawm nasat thu te chu a sawi zui mawlh mawlh a. Nau pawm chungin chaw ka ei a, chaw ei hunlai hi naupang hian an hre riau ṭhin lehnghal a; muhil tui em em mah se an rawn harh ve leh nulh zel. Mahlimi erawh chaw a ei peih loh avangin room lamah a awm thung.






"U.... Bawihtei hi veng uluk deuh rawh aw.... A pitei thil a lo khawih ṭhin a, thil pawimawh te a lo khawih chhe palh ang tih a hlauhawm a nia. Kan la cheng ho rei lova, atan chuan han khak te a nuam dawn lova. A chetna lam apiang thlithlai nghal zel i lo tum dawn nia" Mampuia chuan a ti sup a, ka an tui hawp tum chu ka ṭhulh chiang ngei mai.






"Vawiinah dawhkana a bawnghnute dah a lo ti baw deuh anih hmel, ka lo en zui reng hman bik si lova. Naupang harh rual a ni ve bawk sia, a khawih phak loh ah hian dah zel ila a fuh ber" ka lo ti let ve thuai a.






"Ti lo tura hrilh chuan an ti lo ve mai, hrilh tam an ngai alawm" a ti leh hram a, ka ngawi zui ta daih a. Ka chhungril lam erawh thil eng emaw in min ṭham tâwk ang hian a awm. Ka fanu chu hnawksak an tih hmel riau a hriatna ka nei tlat pek a. Mampuia'n ka fate a duat ṭhin zia ka hriatchian em avangin ka ngai kawi lui nge pawh ka hrethiam lo.







Tleipuii ten kan nufa in chaw ei ah min sawm a, min sawm ngun tawh viau nangin chhangchhiat chuan chhuah mai a lo harsa ṭhin khawp mai. Pathianni a ni a, Mampuia te nupa in Mahlimi te In lamah chaw an ei ve dawn bawk a. Eirawngbawl hun hmaa thlen phei ve ngei ka duh avangin kan in siam mawlh mawlh a, Mampuia te an chhuah ve hma a inthlah tir ka duh bawk nen ka che pawh ka hmanhmawh viau mai. Bawihtei'n a nau khuma mu chu a lo khawih ṭe ve sek bawk a, ka hau pah leh hlak hlak zel nen ka hmanhmawh ang pawhin ka che hlei thei lo. Tunlai chu a harh a chhuak a, a awm hle hle thei lo. Midang tan a hnawksak ang tih hlau in a che vel reng reng chu ka enzui deuh reng a ni ber.






Kan in siam zawh veleh Mampuia chu ka au lang lang a, an room aṭangin a rawn tlanchhuak zui vut a. "Khawnge ka chahbi kha? Bawihpui, ka chahbi i dahṭha em?" tiin an nu a zawt zui vat a, Mahlimi pawh a rawn chhuak zui ve zat.






"A mak e, ka nu ten min rawn call zing tawh sia. Ka cousin te ho an rawn tel ve dawn a, thleng phei vat se min ti asin maw le" a rawn ti barh barh a, ka lo ding ngawi reng thung.





"Ka u te kalna tur a hla chuang lova, ka rawn let leh vat ang. Khawnge chahbi chu?" Mampuia chuan a ti nawn leh a, "Kha" tih hlak pahin a bag aṭanga chahbi lachhuakin an pa lamah chuan a theh phei deuh ṭhuai a, "Taxi a lo va kal mai ka duh" tih leh hmak pahin room lamah a lut zui leh ta daih. Mampuia hmel a nuam tihlohna chu ka hmu reng, a nupui a duh hneh zia ka hrechiang a; an nu a lungawi loh chuan a buai leh chung dawn tih pawh ka hmu sa vek bawk.






"Ṭhenawm te taxi ka be mai ang, va kal hma zawk mai rawh u. Haw lam ah chuan U Rinpuia'n min rawn thlah thei tho ang" tih pahin Bawihtei ka kai a, kan chhuak zui ta daih a.





Tunlai kan Inchhung boruak chu langchhuak chiah silo hian a rit ru riau ṭhin. Mahlimi chu a hranpa a a sualna va sawi fak tur awm silo hian ngaihbel theih tur ting a ṭawngkam neih zauh a ching riau a, a raino thinchhiat vangah ngaiin ka ngawi liam mai zel thung.






Kan ṭhenawm tlangval a lo hman hlauh a, kan tlanchhuak zui ta vat a. Traffic jam a awm lo bawk nen kan thleng phei thuai a. Tleipuii'n an kawmthlang ah min lo hmuak a, motor aṭanga kan chhuah fel veleh Bawihpuia a lo chuh nghal tharh a. Kal man te pe felin inchhung lam kan pan zui thuai a, Nu Zami eirawng lo bawl mek lam chu ka pan phei nghal thuai a.






"E he..... Bawihtei te chu in va fel ve. Tikhan lo inkawm rawh u. Engmah tih tur ṭul a awm lo a nia. Thei te kha in ei duh chuan fridge ah khan a tam kha, in duh duh kha lo dap mai teh u" Nu Zami'n a lo ti nghal bawrh bawrh a, nu fel tak hi chu a ni chiang a ni. Kan tih fo ṭhin dan in Tleipuii room lamah kan lut zui ta diak a.






"Mampuia'n min lo thlah dawn i ti sia, engatinge?" thil engkim hriat kilh kelh duh a nihna a lang leh ta.





"Mahlimi nu ten chaw ei ah an sawm a, an kal ve a ngai leh sia" ka ti liam puat a, ka ṭhian ṭha ber mah nise thil zawng zawng sawi nghal zuah zuah kha ṭha berin ka hre lo deuh. Ani pawhin thudang a sawi zui ta daih a, a bialpa nena an chungchangah bawk kan lut dun leh tawh.






"Remsanga chuan palai rawn tirh ve tawh mai ka duh a tia. Mahse, pasal nei tur em chuan ka la in peih lo deuhin ka hria" a ti niah niah a. Bawihtei te unau khuma an inchhaih chu a fiam pah ve reng bawk a.





"Ka hrethiam bik lo, kha chu nangma tih dan dan ni rawh se. Pasal neih chungchangah chuan rawn tlak ka awm loh zia i hriat kha. Mahse, Remsanga hi chu a sual ka ring miah lo" ka lo ti zui ve vat a. Kan sawi dun zel a, ala in peihloh zia chu a thil sawi dan hmangah pawh a lang reng. "Anih chuan ṭhiannu, hmanhmawh lo in rilru fim tak pu chungin thuthlukna siam rawh" tiin ka chah zui ve ta mawlh mawlh a.







Kan zanriah kîl boruak pawh a nuam viau mai. U Rinpuia lah hi hmeichhia in an zar nasat tehreng nen nupui neih a tum miah lo em mawni? Ka fiam pah leh zuk zel a. "A hmanhmawh thlak loh, i ṭhiannu hi han hralh hmasa te te ila; ka nupui tur tana hrawn tur an tam loh hunah ka la nei ve ang" nui kur kur chunga a ti chu Tleipuii chuan a run viau mai. Nupui pawh lo nei se, a nau hi a sual dawn lo tih hrechiang tu ber erawh a ni thung ang. Titi hrang hrang vawrh pah zel in kan ri zui luam hlawm a, Bawihtei pawh a pi leh pu te inkarah ṭhu ât in chaw a ei ve puk puk a. Tleipuii te chhungkaw bula khawsak hahdamthlak zia hi ka hre hneh viau tawh nangin, ka hriat belh zel chu anih hi.







U Rinpuia'n min thlah haw leh thlap a, leng leh thuai turin min sawm bawk. Bawihtei chuan a tlan liam thlengin a ban a vai zui lauh lauh reng a. An duat bawk a, a ngampa nghal sarh mai.






Inchhung kan luh chuan a lo reh ṭhap a, Mampuia te an lo la haw lo a nih chu ka ring nghal a. Diktea chu a room lamah a chhukthla leh tawh a nih ngei pawh ka ring. Ani zawng a room hi a khawvel a ni ber e. Inthlak turin room lam kan pan zui a, Bawihtei thawmhnaw ka thlak sak zui mawlh mawlh a. Bawihpuia khum ah a lo leng ve fat fat bawk a, a hriselna a ṭha chho ve ta bawk a; a changkang chak viau mai.







Ka phone ri chu ka ngaihven zui vat a, ka bag chhungah ka lo la dah daih. La chhuak vatin ka en zui a, ka ner nawk mai. 'Engnge maw sawi a rawn tum leh tak ni?' ti rilru niap niap in ka rik ral tir ta daih a, khumah lawn kaiin naupang ka mut pui zui ta daih. Rei vak lovah a rawn ri leh a, ning zetin ka ṭhuchhuak hluai a. Ka phone chu tuai puat in "Engnge? Thil pawimawh sawi tur engmah i nei lo, mi rawn call sek suh" ka ti nghal hlur a, Hriathlua nui ri huk ka hre zui nghal zat.






"Pawimawh ve bawk e maw le, ka fate pawh ka ngai ve a..... Bawihtei ka lo be teh ang, âpa hian a ngai teh mai ania" a rawn ti ham ham a, a ṭawngdan aṭang chuan a harhfim lo tih ka hrechiang khawp mai.





"An muhil tawh, biak pawh a be chak nek lovang che. Chhuanlam fahrah te te siamin rawn call sek lo la a nih chu" ka lo ti leh hmak a, a rum ri nghut mai.






"Ka fate hi kei aia hmangaih an awm lo tih hre rawh. Ngaihzawng nei kual a pa dang neih tir te kha i lo tum ringawt ange? Khang Malsawma tih ang reng te khan an rawn birh leh tluk tluk tawh lo che maw? Ka thisen, ka fate kha midang hnimhnaih tir i tum a nih vaih chuan kei aia rapthlak an awm dawn hlek lo a nia. I enkawl dan kawngah pawh min haw tur zawngin i fuih fo in ka ring a ni" a rawn ti leh pung pung a, a va ṭawngthei ziah zuah tak.






"I rilru ang lek a rilru chhia hi ka pu ve lo tih hria la, ka enkawl dan erawh chu ka thu thu. An mamawh lei nan chengkhat pawh i seng tawh em? Mahni zu in tur leina man tur pawh thawkchhuak hlei thei lo khan ka awmdanah thuneih rawn tum lo mai rawh. I fanu hian engkim a hria, ka fuih leh chuan hi a ngai lo. I awmdan in a zir loh avanga an lo hua che a nih pawhin ka enliam mai mai ang. I hmangaih loh zia chu i khawsak danah a hriat reng alawm le. Vawikhatmah mi rawn be tawh suh" tih hlak hlak pahin ka dah ta zui ta daih a, a fate a ngaih vanga min rawn bia a nilo tih ka hrechiang lutuk ringawt. Ani ngaihtuahna vak kual, rilru chhe zet bunkhawmna nih chu ka tum teuh lo. A tello a kan hlim zawk zia hi ka la hmuh tir thuai bawk ang. Mampuia te rawn haw thawm pawh ka hre reng, zing thawh hma ka ngaih leh dawn avangin ka mu zui ve ta daih a.







Eirawng ka bawl rak rak a, ka chhungte erawh an la reh diak thung. Bawnghnute kan ṭheka na nu in a man a khawn tel avangin ka nu mutna lam ka pan thuai a, 'Mahlimi tan' tiin bawnghnute sawr thar ngat a laksak kha a nia; an in duat nufa viau mai.






Phak chuap a rawn thochhuakin pawisa min pe a, ka chhuak zui leh ta vat a. Chawhmeh ṭhing rin tur kan neih loh avangin a thar diai in ka siam a, ka nu hian chawhmeh a duh tui ṭhin avangin ka bei uluk ṭhin viau bawk. Eirawng ka bawl zawh lamah Mampuia te nupa an rawn thochhuak ve a, Bawhtei te unau ngaihven turin room lam ka pan zui ve vat a.







Tukṭhuan kan kîl laiin Mahlimi chuan "Hmanni a ka nu dawra kawr ka lak tharah khan chewing gum a lo kai ṭeuh a. Ruthi hi chewing gum eitir tawh suh u. A chang leh ṭhutthlengah te a lo dah ringawt a, vawi hnih lai ka ṭhut tawh; ka kekawr pawh pahnih ngawt hak tlak lohin a awm phah a. A harh ve bawk si" a rawn ti nghat a, ka lo ip deuh chawih a. Bawihtei ka en nghal vat a, inthlahrun hmel zetin hnuai lam a bih ngar a; a chaw pawh a ei chhunzawm ngam lo niin ka hria.






"A mak ngawt mai, fate sulhnu chhui i chaklo riau mai a. Heti ringawt te chuan midang tan in hnawksak lutuk alawm. Mahni ringawt in ngaihtuah lo hian midang pawh ngaihtuah tel nachang hriat ve tur. Mahlimi thawmhnaw lak phei chu a ṭha ber chi ania, a to tehreng nen" ka nu in a lo ti zui ve zat a, a ṭawngkam chuan min vit na kher mai. Ka fanu inthlahrung hmel kimki dai ka hmuh phei chuan ka in pet ruh fan fan a, ka chaw ei a tawp chiang kher bawk.






"Tuaii, i pitei thil khawih tawh suh ka ti che a ni lawm ni? I khawih leh chuan keima'n ka hrem tawh dawn che ania" Mampuia chuan Bawihtei en rûn chungin a lo tih zawm ve leh bawk a. Bawihtei rawn ṭap chhuak ta hawk chu ka pawm bet nghal vat a. A putea hnen aṭanga duatna tinreng lo dawng ve tawh tu chuan tuna a ṭawngkam dawn zawh chiah kha a tuar na tih ka hre reng. Thawhpui vatin ka intihfai pui a, a la in hnit feih feih chu ṭap tawh lo turin ka thlem pah mawlh mawlh bawk a.






"Naupang a nia, tunlai phei chu a harh a zual a. Inchhungkhur sekrek khawih tur a tam deuh phei chuan ka lo umzui reng hman si lova. Mahlim, i kawr chu i lo dahchhuak dawn nia, tihfai ka lo tum ange" tiin ṭhutkhawmna lam ka pan pui a. Mampuia'n "Fate chhan hi tihnat hlur loh tur, kan zilh a kan hauh ngam loh te hi chu hmangaih an har teh ania" a ti zui pawh ka hrechiang hle bawk.







Ka fanu hi a diklohna ah ka ṭan a ni reng reng lova, an hriatloh lamah hian ka theihtawpin thu ṭha tinreng pawh ka fah ve nameuh mai. An khak na nazawng ka huatpui lova, an tunu a ni a, an zilhin an hau fovang. Naupang an nih avangin thil hriatloh leh tihsual chang erawh an nei ve ṭhin bawk. Chumi avanga ka nu meuhin 'midang tana hnawksak' min ti kha ka la na a ni ber zawk. Bawihpuia chu pawmin hnute ka pe a, Bawihtei chu min si chial in a ṭhu ve khar bawk a. Ka ngaihtuahna kil tinah a vak kual a, a nau a rawn ṭhanglian chho ve anga; mipa phei chu hmeichhia aiin an lo harh nge nge bawk si a, kan nufa chuan hnawksak nih kan hlawh nasa dawn hle in ka hre bawk.







Tuna kan inchhung boruak angah chuan naupang pahnih harh ve thawkhat tak chu hnawksak an ni fo dawn tih ka hria. "Ka fate nen hian Indang ila, ka in khawl ve sa tlem te hian reilo te chhung chu min daih ve thei mai anga. A ṭul a nih phawt chuan ka pa pawh a in huam viau kha maw...." ti rilru nauh nauh chungin In luah tur zawn mai chu ka rilruk ta ut ut a.







Ka nu leh Mampuia chu an hna lamah an kal a, Mahlimi pawh a nu te In lama kal turin a chhuak zui ve ta daih a. Diktea chu zingkarah khan thil pawimawh buaipui tur a neih avangin a chhuak tawh a, tlai lamah chauh a lo let leh ka ring. Mahlimi kawra chewing gum kai chu ka en thuak a, a sawi uar tehreng nen a lo kai mang hauh lo. Khawnvartuiin a kaina lai chu ka chiah a, awlsam te in ka tifai a. Ka su zui leh thlap a, an room lam hnaih ah ka zar sak ta thlap a. Kan In aṭanga hla ve deuh takah Nu Tluangpuii te In hnuai zau lem lo tak a ruak tih an sawi thawm ka hria a, va en thlithlai mai mai ka duh tet tet a. Bawihpuia pua in Bawihtei ka kai a, muangchangin Nu Tluangpuii te In lam kan pan zui ta a.







In chu a lo ruak ngei a, a zau lem lo viau na a room pakhat chu a awm ve thlap mai. Eirawngbawlna hmun zau vak lo hi a hran deuhin an pingdang ve bawk a, ṭhutkhawmna leh room lam chu bangin daidangin ṭhutthleng pawh pahnih chu a hun ve theih ang. A In in a zir vak tawh loh avangin luahman pawh an ti sang lem lova, tui connection erawh a awm ṭha viau thung.






Nu Tluangpuii chuan "In dan in tum em ni? Nang tehdaihin i rawn en ve teh mial?" mak tih hmel deuh takin a lo ti sawk sawk a.





"Ka ṭhiante tan ka rawn ensak deuh maw le, ka phûr thut chuan keimahni pawhin kan rawn luah duh thut mai thei bawk" fiamthu ti tak deuhin ka lo ti thuai a, ka nui lui nghek bawk.







Mi ngaihah chuan kan nufa a kan indang a nih chuan mak tih kan hlawh ngei dawn, mo kan nei fel ve deuh awrh a ni a, min sawi zuina tur a tam viau ang. Mahse, Inchhung a hnawksak nih ai chuan mi sawina mai mai chu tawrh ka thlang fe zawk. Midang en ve an la awm lem lo bawk a, min lo dah awl sak tura tiin chanchin ka hrilh leh thuai tur thu ka hrilh mawlh mawlh hnu chuan kan in thlah leh ta rih a.







Nilengin kan buai leh nawk nawk a, dam hi chuan a awm âwl mai mai theih meuh lo. Hriathlua nena kan inneih lai hun te ka ngaihtuah kir a, Mahlimi chu mo zawng zawngah a âwl ber hial in ka ring. Ṭawngkam a thiam a, ka nu duhzawng leh tuina zawng apiang phur takin a sawipui thei zel bawk a. Ka nu pawhin a tan ui a nei lova, an in mil ngawih ngawih a ni ber.







Ka nu awmdan a ṭha lo ka lo tih ve ṭhin lai te chu 'changkanna' tiin a fakmawi pui thei zel a, pakhat lahin a thusawi apiang a lo lem duak duak bawk. Mampuia mizia danglam ta viau pawh ka hmuhmaih hauh lo, nupui hlau nih chu a duh dawn miah lo nangin a awmdanah chuan a hlau hle tih a lang reng. Ka thuneih phakna piahlam thil a nih avangin ṭha lo ka tih zawng pawh ka enliam ve mai mai tawh a, puitling rilru fim pu chin vek tawh zingah kei a kara nuthlawi fa pahnih pawm thusawi hian awmzia a nei dawn lo tih ka hrechiang em em bawk.






"Zothan, lo kal vat teh. Hei Lalmuanawmi'n chhuatlaiah tui a tih buak leh tawh hi. A pitei a tawlhthlu ṭep alawm mawle" ka nu in a tih ṭhat ri ka hriat rual chuan ka pan zui nghal thuai a. Bawihtei chu a tuino nen chhuat laiah a lo ding reng a, a bul lawkah Mahlimi a âwm dawmin a lo ding ve reng bawk.






"Ava buaithlak ṭhin.....Bawihte, tui kha keng kual suh ka tih che kha. Kalsawn teh, ka rawn hru dawn" tih pahin ka kai sawn thuai a, chhuat hrukna la turin ka kal zui ta vat a. Mahlimi ber kherin Bawihtei sulhnu a lo pal hmasa ber ziah hi a pawi ṭhin, an tei tam dun ve ve lutuk hi a buaithlak a nih ber hi.






Chhuatnawhna nen ka let zui leh vat a, ka hru zui nghal sawk sawk a. Mahlimi chu a ṭhat leh ṭhat loh ka zawt zui pah vat; min chhang duh eih lo leh nghal. Ṭhutthlengah a ṭhu tum bur a, Bawihtei chu thip zetin a melh leh râm râm ṭhin tih pawh ka hmu reng. Diktea chuan kan boruak nuam lo zet chu a hrethiam tih hriat takin Bawihtei chu a room lamah a hruaithla ve nulh a, lo zu in awm ve naw naw teh se.






"Naupang hi thil ṭha hrilh tam rawh, ka sawi ngun tawh. Naupang te si hian pawi a khawih reng ringawt mai. Hmeichhia leh nghal, a khawsak dan hi hmeichhe mizia tur pawh a nilo" ka nu chuan a ti hlawih hlawih a. Mampuia inbual zo pawh bathroom aṭangin a rawn chhuak ve mek bawk. "Engnge ni leh ta? In rik hlut zel le?" a lu hrul hul mawlh mawlh pahin a rawn ti a.






"Ka hlauthawng lutuk. Ruthi-i'n chhuatah tui a leihbua a, ka tawlhthlu ṭep. In sawh palh ta ila, awiii..... ka ngaihtuah zawng ringawt paw'n ka rap e a" Mahlimi chuan a lo ti nghal par par a, Mampuia hmel chang nghal rut pawh chu ka hmuhhmaih lo. A nupui thil sawi uar thiam zet thusawi chu a lem thla nghal duak tih lah ka vawikhat hmuhna a ni hek lo.







"A hrim hrimin ka nu pawh engmah i ti chuang lova, i awm ve lai te chuan naupangte pawh min lo enpui ve ṭhin la. Mi nu leh pate chuan an tute thupuiah an nei a, an duhlo chung chung pawh an pawm bet lui a ni ngai a. Nang chu In a i awm ve pawh hian min enpui ve ngailo reng reng, tih tur a tam ve ṭhin si; ka in daih vek bik lo alawm" ka ti ve ta hmiah a. Ka ngawih rengna hian rah ṭha a chhuah pawh ka hre lova, thil nihdan ka sawi avanga ka sual tak viau lah ka hre hek lo. 'Ka rilru a awm ka sawi ve mai a ni, anni pawhin min vengthawng miah lovin an sawi tho alawm le' ka ti rilru pah reng a.






"I va zaklo reuh e, nitin hnathawkin kan chhuak. Nangni nufa chawmna tur ngai bawk, in eiral tam zia te hi chhut ve ta che. In lamah lehzel min phut reuh le, nangni nufa chawm tel ngailo ula ka duhzawng apiang ka lei thei ang chu" ka nu ṭawngkam kha zet chuan min deng dawt dawt a ni ber.






"Chu hnawk min lo va ti awm ve? In lamah heti khawp hian âwl lo che ila i hna hi i thawk thei kher bik lovang. Thil tam takah chuan kan ti hek ngei che u; mahse, ka ṭangkai ve na lai pawh hmu duh lova hnawk min ti reng hi i fanu pawh hi ka ni meuh em maw ni le? He Inchhungkhur a ka lal loh zia hi ṭhenawm khawveng thlengin an hria. Dik tak a sawi chuan he In hi ka pa In a la ni reng a nia, min tihdan hi hria se a lawm lo viau ang" ka ti let ve ta hmiah a. Ka in sum theihna te an puakkeh zo ta a ni ber mai. Ka nu chu ka zah lutuk; mahse, mo te leh nau te hriat laia 'hnawk' min ti kher zel hi ka tuar reng thei bik lo a ni.







"I pa, laktlak lo zet kha sawi ve lo mai teh, chutia i ngaihlu viau a nih leh a bulah chuan awm daih ula ti nia. In tello hian kan awm thei em mai" ka nu chuan a rawn ti leh hmak nia! Ka in hum ruh nasa ngar ngar kher mai. Ka nu ka en ngarna aṭanga ka hawisawn zeuh chuan Mahlimi nuisak ka hmu tel hram bawk. Mampuia pawh a ngawi thei hi ka ti khawp a, nidangah chuan ka nu in ka pa a hmer tel zauh chuan a ngawi ngai lo kha ania. Tunah chuan engkim a lo danglam zo ta a nih hi.






"A ṭha anih chu, keini pawh in tello in kan awm ve thei ngei ang" ti let ve hmakin ka kalsawn zui ta daih a, ka tha te chu a khur der der mai. Ka nu la ang zui hmawk hmawk pawh ka hre reng, ka tawt up up a; ka duhtawk boruak hip tur pawh he Inchhungah hian a awm ta lo hial in ka hria.







Room ah ka lut a, ka fapa khuma tui zeta alo muhil sak sak chu ka thlek ngawih ngawih a. Tunah chuan kan nufa in kawnghran kan zawh ve a ngai dawn ta. Ka fate hi mi neih ang zawng zawng pe ve tur chuan ka dinhmun aṭangin a theih ve loh tih ka hria. Mahse, rilṭamin ka dah bik lovang tih erawh ka hrechiang viau thung. Ka phone chu ban nghal zatin Nu Tluangi number chu ka hmetchhuak a, ka bengah ka chuktuah zui ran a. Reilo te ah min lo chhang zui ta thuai.






"Nu Tluangpui, naktukah kan nufa in kan rawn in suan lut ang aw? Ka ṭhiante sawmkhawmin kan rawn inbuaipui fel thei mai in ka ring" ka ti nghal zat a. Anni lamah chuan buaina a awm lem lo. Kan thawmhnaw bawm chu hawng rawk rawk in ka in dahchhuak zui ta mawlh mawlh a. Ka pa In aṭangin kan nufa in kan indang dawn chu a ni ta reng mai.







(to be continue........)


Show post links
Top

[Ngaia]

DEAR PAIN
Chapter-26



By : Brigida Hugo






Kan nufa za chuan kan indang chu a ni ve ta reng mai. Tleipuii te chhungkua chu kan tan an ṭangkai em em reng a, kawng engkimah min buaipui vek bawk. Kan chhungkaw boruak pawh zep nei lovin ka sawi ta vek a, Nu Zami pawhin min thinrimpui ve kher mai. An In lam hnaih a awm turin min duh viau a, In ruak luah tur a awm mai rih loh avangin tuna kan awm na ah hian kan awm phawt anga; Tleipuii te hnaih dan kan la dap chho ve zel ang chu.






In aṭanga ka chhuah dawn tak tak meuh chuan ka nu pawh a ṭawng nasat leh viau kha. "Mo kan nei fel ve chauh a, a rilru kawih thlak lutuk. Mi ngaiah pawh i mualpho nasa hle ang. Mo pawh hrawn hlei theilo khawpa sual nih kha i hlawh tur a ni mai. Hetiang em em a tihmawh mai, eng rilru hi nge maw i put bik le? I fate pawh engtinnge chawm i tum? Chhangchhe bakberh khan engtinmah in in enkawl hauh lo ang" min ti deuh hrep a. Ka rilru ah erawh hnawk min tih thu a sawi te kha a rawn ri nawn awn awn thung.






Mampuia pawhin "Chhungkua chu in hauh chang te, boruak fuh loh changte pawh a awm a ni ngai a. A in ti mualpho zawnga chet lak kher a ṭul em ni?" min ti deuh hmak kha ania. Kan nufa chunga an khawsak dan hre duh miah lova thiamloh min chantir phet an tum chuan min run hle bawk. Mahlimi erawh a ngawi tlat a, miin kan chanchin an sawi huna hmingchhiat tel ve a hlau te pawh a ni mahna; ngawih chuh hun a hre khawp e.






"Ka fate hi mi neih ang zawng zawng chu ka pe thei kher lovang. Mahse, Pathian zarah ka nghei pui hauh lo ang. Helai hmuna hnawksak nih reng ai chuan rethei tê pawh ni ila zalen sela an seilenna kawngah pawh a ṭha zawk fe ang" tih bakin ka chhang duhlo. Thu tam tak sawiin awmzia a nei tawh lova, 'kan nufa hma hun atan theihtawp chhuah ka ngai' tih chiah chu ka rilru ah ka sawi mawlh mawlh awmchhun a ni.






"Thil zawng zawng hi ka hai bik lo, exam zo fel ila ka pa bulah ka kal ang. Kan Inchhung boruak hi zêp ṭhen awm hauh lovin ka sawi anga, ka pa In a nih angin a ni in ro rawn rel rawh se. Mualpho tih te mai mai, in cho chhuah a nih kha. Ka u te pawh indang rawh se, in kianga khawsak ve hi a harsa em mai. Keipawhin ka pui ve thei reng" tih pahin Diktea chu a tho tharh a, lungawilo tih hriat zetin pindan kawngkhar a khâr ri zui bur a.







Panhnah bakah kuhva rah ka la tel ta bawk a, ka buai a thuahhnih ta viau mai. Bawihtei chu phone te en in a in awm tlei thei mai a, a nau zawk erawh hna pakhat a neih ngai a la ni reng. Kan In nei tunu Nu Tluangpuii hi kan lakah a ṭha em em a, ka buai zual chang chuan Bawihpuia pawh min lo lakchhawk ve lawp lawp ṭhin. Kan chhungkaw dinhmun pawh ka hrilh hre ve vek a, min khawngaih ve hle bawk. An pa hian nikum hmasa lamah khan Cancer vangin a boralsan tawh a, fa pahnih neiin a fanu chu phai lamah hnathawk in a awm ve mek bawk. A fapa High School kal lai mek nen an khawsa ve mek a ni.







Zanriah tur ka bawl mek a, kan bungbel hman tur te pawh Tleipuii te'n min ngaihtuah sak vek a, Inchhung bungrua kan mamawh tur ang ang min dap khawm sak vek bawk. An ni chhungkua hi awm lo ta sela kan nufa chan chhiat dan tur chu ngaihtuah ngam pawh a ni lo hial. Kan ei a tlem bawk a, eirawngbawl pawh a hautak lo kher mai. U Rinpuia'n Bawihpuia walker a leisak a, kan hmang rim tlauh tlauh viau. Walker a chuan lai chuhin ka che sawk sawk ṭhin. Bawihpuia chu a harh ve tawh a, Walker ah kalkual in ban theih a pui a ngah tawh a. Thil pawi thei tur ang chu a khawih phak loh ah ka dah kâng vek bawk. Chaw eikham lama khawih chhunzawm turin panhnah ka sil pah mawlh mawlh a, Bawihpuia che kual chu ka mitmei pah reng bawk.






"Zothan, hei hi lo hmeh ve teh u. Chawhmeh siam hi ka thiam mang lova, a tui kher lo mai thei a ni" Nu Tluangpuii chuan plate a thil rawn chawi luh va va pahin a rawn ti thuai a.





"Awi, kan va han lawm ṭhin tak. Mahse, kan tibuai ṭhin em mai che u" lawmthu sawi mawlh mawlh chungin ka lo laksak thuai a. Bawihtei te unau ṭhutchilhin rei fe mai a chhaih zui a, a awm lai chuhin ka lo che zui sawk sawk bawk a. Tunlai chu ka hah deuh vang aniang, ka taksa te chu a rawl ṭhem ṭhum a; damloh mai te pawh ka hlau rum rum mai, damlo hman ka ni der silo.







An unau in chaw ka hrai a, Bawihpuia pawh naute chaw pe hran lovin chaw pangngai ka pe ta bawk a. A hautak lo thei ang bera khawsak ka tum hram hram a, a chang chuan ka fate ka khawngaih avangin an hmuh loh tura ka ṭah tak nghek chang te pawh a awm. Tun ang laiah an rualpui tam zawk te chu an duh duh ei leh in thei in an awm a, nu leh pa thlazar hnuaiah thlamuang takin an awm ṭhin. Ka fate erawh thil tuihnai ṭha pawh ei phak lovin nitin an khawsa ve naw naw a, a ṭha ber pek ve an phu teh lul nen kan dinhmun in a zir rih miau si lova. Hmangaihna leh khawngaihna mit in ka thlir a, tui taka an unau a an muhil sek sek ka en changte hian dan zawh loh khawp a tam ka mittui a a luang fo, kan nufa hian 'hun' kan mamawh a; chu erawh a kalmuang em thung si.






Chaw ka ei ve dawn chiah tihin Diktea a rawn lut hlawl a, polythene in thil a rawn khai bawr lak bawk. Bawihtei chuan pan vatin a malpui ah a lo kuah nghal châk châk a. Diktea chuan eitur chi hrang hrang a rawn kensak a, an lawm kher mai.





"I va haw tlai ve, khawnge i chhuah a?" ka lo ti thuai a. Chair pakhat chu la in a ṭhu nghal hnawk a, a ṭhut paha a ṭhen deuh sak chu ka lo en reng bawk.





"Sawlai lawkah sawn hna kan thawk a, cement work a nia ka sil ṭhum mai" tih pahin a mal te chu a chum nawk nawk a, "Chaw ei ve nghal mai ta che" ka lo tih zawm thuai a.





"Tlai lam deuhah khan chaw kan ei a, ka la puar lutuk. Exam a hnai tawh sia, haw har thei pawh ka ni lo. Hei hi lo hmang rawh" tih pahin a kekawr ipte aṭangin pawisa a rawn phawrh a, mak ti fe in ka lo en hâ thung.





" A ngai lo, nangma'n hmang rawh. I thawh hah tehreng nen, kei chuan hman tur ka la nei" ka lo hnar vat a.





"Hnathawh te chuan kan hah ve bawk ang chu maw le. Exam zo tawh ila chuan thawh tur pawh ka hre ṭeuh. Ni thum ka thawk tawh a, kei chuan ka ngah mai" tih pahin ka kutah a hmehbel nawk nawk a, a nui pah sak bawk a. Engang pawhin la duhlo viau mahila min ti lui tlat dawn tih ka hria. Lawmthu sawi mawlh mawlh chungin ka la ta nge nge a, ka hnuk te a ulh hial.






"Ti hian lo khawsa ve naw naw ula. Sawlai ramhuai pûk a khawsak ai chuan a hahdamthlak zawk. Nakinah engkim a la fel vek mai ang, theihtawp kan chhuah dawn nia" a ti ve nuap nuap a. Ka nau hi a lo puitling ve tawh tak tak a nih hi. Lehkha zir tur a ngah bawk si avangin min hawsan zui ta thuai a, kei pawhin Diktea ngaihtuah zui neuh neuh chungin chaw ka ei zui ta thuai a.






Bawihtei te unau an mut hma chuan hna a sawt tak tak ṭhin lo. Hma takah muttir in ka hna ka chhunzawm mawlh mawlh a. Ka hun kal tawh tam tak ka chhuikir pah neuh neuh reng a. Kan chhungkua hlim tlang taka kan awmkhawm lai te leh ka pa thlazar hnuaia felfai taka kan awm hun lai te chuan ka ngaihtuahna a luah thar veng veng mai.







Tunah chuan khang hun te kha mumang ang lek a lo ni ta chu a nia. Tuna kan boruak tawn mek hi ka pa hnenah ka la sawi lova. Hnathawk a an riahchhuah daih avangin a ṭhiante zingah rilru nuam lo taka a awm ka hlauh vang a ni pakhat bawk a. Thil tam tak ngaihtuah nachang hria niin, ka nun kha lo uluk viau ila tun ang teh nuaih hian ka awm hauh lo tur hi a nia. Mahse, thil kal tawh avanga inchhir in sawtna a nei tawh lova, siam ṭhat theih tawh loh thil avanga in dawmkun mai mai hman ka ni hek lo. Zing lam dar hnih pelh rawk thlenga ka ṭhutchilh ngar ngar takah chuan ka in khawih zo ve ta hram e. In ti fel zui thuaiin ka mu zui ve ta vat a.







Kan nufa khawvel chu a zim kher mai. Panhnah leh kuhva rah la tura ka chhuak tih lohah chuan pawn ka chhuak zen zen lova, ka fate pawh kan In zimte ah chuan an tawm ve ngat ngat a ni ber. Vengchhungah nasa taka sawi zui kan hlawh a, a hmingchhe nasa ber erawh keimah ka ni. "A fate pahnih nen a let leh a nia, inthlahrung dêk awm si; mo te pawh a mil thei lo chu ania" tih chu mi tam zawk te min sawi dan a ni. Ka thiam thu sawi tum na ka nei lova, thudik erawh lanchhuah hun a la awm ve ngei ka ring thung. Nu Tluangpuii bawk hian min lo tha nat pui ṭhin a, kan sawi dun ve chiam tak ṭum pawh a awm ve ṭhin. Kan pahnih kara kan thusawi erawh khawiahmah a chhuak tawh ngai lo thung.







Pathianni zan a ni a, naupang an mut tawh avangin ka phone a zai ngaithla chungin kuhva rah ka thel malh malh a. Kawngkhar rawn kik dat dat thawmah chuan ka hawichhuak nghal vat. "Tun ang hun ah.. Diktea em mawn le?" ti nang nang chungin ka tho zui thuai a, rang takin kawngka kalhna ka hawng zui ta vat a. Kawngkhar nem hawn pahin "I va tlai ve?" ka ti nghal deuh tâwng a. Diktea hmel hmuh in beisei zetin nuih sâng pahin ka hawichhuak a, ka nui zuilo chiang hle, ka chip nghal hmak.






"Engnge i duh?" ti ram hmak chungin kawngkhar chu ka pawt nghal ṭung a, ka chet dan tur hre lawk ni awm hrimin a lo vuan ve nghal chat bawk.





"Ka fate ka rawn hmu dawn. Khawnge an awm?" a rawn ti let ve hmuk a, ka lo melh râwm râwm thung. Engtinnge helai hmunah hian kan awm tih pawh a lo hriat reng reng ni?





"An mu tawh, naupang men hun pawh a nih tawh loh hi... Haw rawh" ka ti let hlar a, thawm bengchheng siam ka hlau viau bawk.





"An muhil pawh an hmuh theih tho alawm maw le" tih pahin min nek sawn rawk a, Inchhung a rawn lut zui nghal chu a ni der. A hawi kual vut vut a, a ner suk hmel pawh ka hmuchiang kher mai. Zu rim a nam lo ve tehmial chu mak tih tham a tling bawk.







Min en leh zukin room lam chu a bih duk duk a, a lut mai dawn emaw ka tih laiin ṭhutthlengah chuan a ṭhu ta zawk a. Ngaihven duhlo in ka thil tih lai ka chhunzawm a, ka hmel landanah ka lawm lo hle a ni tih a hmuh chuan a kal zui ve mai ka ring kha a nia; ngawi reng a ṭhu in min la en ngur ngur reng a.





"Bawihi, min ngaidam rawh" a rawn ti thawp sut a, ka thil tih lai ka chawl dat. Thaw hakin amah pawh en chuang lo chuan ka tih zawm leh mial mial a, a thusawi chuan ka thinlung a nghawr nghing pha eih lo.






"Ka thiam loh vek a ni. Hetianga dinhmun chhe lutuk a ding tur hian ka fate ka phal lo. Lo haw ula, ṭha takin kan awm tawh dawn nia. Kan fate hian hei aia nuamsa a awm hi an phu asin" a rawn ti leh a, ka lo nui hul hak thung.






"I piangthar leh ta em ni?" ngeiawm zetin ka lo ti let a, mak tih hmel deuh in min en nghal rûn rûn bawk. A bek pawng nghal ṭawlh ṭawlh ah erawh a in seh ruh nasa hle tih a lang reng.






"I lo danglam tawhin i ṭawngkam te pawhin mei a nei ta fak fak hle mai. Mihring ve tho ka ni a, tihsual chang te chu ka nei ve thei a ni lawm ni? Nge, min ngaidam tur khawp in min lo hmangaih ve lo zawk?" a rawn ti zui leh deuh ngat a.






"En teh, Hriathlu.... Ka hmel ah ka lawm loh zia che i hmuh chuan thu tam sawi ngai lova i kal mai ka ring a nia. Ka sawi kher i phut a nia nge. Keipawh mihring ka ni, ka ti sual thei a.. nang ka lo pan thawt thawt che kha ka tihsual lian ber a ni ta reng bawk. Ngaihdamna chungchangah chuan vawikhat ka ngaidam tawh che, ka ngaihdamna che kha min hmuhsit nan i hmang zui ta emaw tih tur khawp in a hma aia nasa in ka lakah i sual a. Ka hmangaih vang che khan i ṭhat leh mai ringin engzat a tam nge na ka tawrh a, chhungril rum vawng vawng a ka awm i hria em? I lak aṭanga ngaihsakna ka dawng miah lo chung pawhin khati khawp khan ka dawh thei ve che. Mahse, tunah chuan ka â nawn tawh dawn lo. Chuan.... danglam tawh min ti maw? Ni e, ka danglam tawh. Tunah chuan ka fate tan Nu leh Pa ka ni tawh miau a, nasa takin ka la danglam zel bawk ang. I lak a ka thutiam hnuhnung ber 'eng ang paw'n piangthar sawmsarih mahla, i kiangah hian ka rawn let leh tawh ngai lovang' ka tih kha a la pangngai reng e" ka tih khum ve ta sak sak a, ka sawi hnem lutuk chu ka thaw te a chham dawn hial in ka hria.






"Kan fate fahrah tur hi i phal bik chu a ni phawt anga. Hmeichhia pawh hi in lo in ang lo mange. Ṭhenkhatin an fate fahrah hlauin an pasal te sual chung chung pawh an vuan lui hram ngai a nia" a ti leh bul bul a, ka sa zak mai.






"Kan fate fahrah hi pawi tihna i nei miah lo. Pawi ti nila ngaihzawng i nei dawn em ni? Ni e, hmeichhia kan in ang lo. Ka fanu rehhlum tum tu bulah kei leh ka fate kan khawsa lul lovang. I duh leh khatiang chunga vuan char char thei tur che chu lo va zawng zawk rawh. Haw rawh, vawikhat pawh lo kal leh tawh suh" tih hrâwk pahin kawngka lam ka kawk vâ a.






Muangchang a ding ṭuah ṭuah chungin "Lo in ngaihtuah ang che, ka fate hi helai hmuna awm an in hmeh lo" tih nghut pahin kawngka lam a pan zui ta vut a. Zaklo ti zetin ka melh nghek ringawt. A tumdan leh a beisei ang mai mai chuan kan awm tawh hauh lovang.







Hun pawh muangchangin a kal ve bek bek zel a. Kâwl a Ni alo chhuah apiangin beseina tam tak ka nei thar zel bawk. Diktea'n a khât tawkin min rawn tlawh ve reng a, a exam lai anih avangin tunhnai ah erawh a rawn lang tam thei lo thung. Ka nu leh Mampuia te nupa erawh an reh ta vang vang a, kan chhungkaw boruak an sawi sep sep pawh a zia ve ṭan viau tawh. Ka fate hriselna a ṭha hlauh a, buaina lian tham tawk lo in kan la awm chho ve zel e. Bawihpuia pawhin thla sarihna hmel a hmu ve ta a, a inti fing ve ṭan viau mai.







Tleipuii ten an In lama chaw ei turin min ti ve reng a, ka hna a bahlah ka hlauh avangin inthahrung ru deuh chungin ka hnial fo mai. Vawiin ni erawh a birthday anih avangin ka hnial thei ta lo thung. Bazar a chhuah lawk a min rawn hruai pah dawn avangin In ah kan lo nghak rân thung a. A lo thlen hma a lo inpeih fel ka duh avangin ka che sawk sawk a, ka panhnah roll sa te pawh ka dah fel diam tawh bawk.






"Awi.. ka hah lutuk. Ka thil lei duh ber ka hmu lawk lova. Ka tei kual ta hrep alawm maw le" Tleipuii chuan a rawn ti lut bawrh bawrh a, a hah viau aniang; a thaw hlawi hlawi mai.






"I duh khirh thei em anih kha. Hahchawl phawt la, keini chu kan in peih tawh ania" ka lo ti ve vat a. A thil khai zinga pakhat chu min pe zui nghal thuai a; engnge anih hriat tumin ka lo ban zui ve zat a.





"Ka nalh tih ho ka la tawp, rawn video call che ka tum viau nangin a rei mai mai ka tia" a tih lai mekin a thil min pek chu ka lo phawrh ve mek bawk. Naupang thawmhnaw mawi zet zet chu ka phawrh chhuak ta mawlh mawlh a. Lawm avanga nui hakin ka ṭhiannu chu ka en zui vat a, maimitchhingin a lo ṭhu hle hle thung.






"Awi.. engatinge hetiang te i rawn lei? Vawiin ni ah te chuan ka hnen aṭanga present dawng tur zawk i nia" ka ti niah niah a. Bawihtei lo thochhuak ve vatin hmeichhe naupang kawrfual nalh zet chu a rawn phihthla zui thuai bawk.





"Birthday anih avanga thil in pek kher a ngai lo. Dam taka ka thleng thei hi ka lawm tawk viau a ni. Mahni puala thil dawn ṭun ṭun ai chuan midangte tana luanchhuah hi a hlawk fe zawk lawm ni?" rawn meng chhuak diar diar chungin a ti sap a. Ka ṭhiannu rilru ṭha lutuk hi chu ropui ka ti ve thlawt. Lawmthu ka sawi ve na te chu ngaihthlak pawh a ngaithla ṭha duh hlei lo a, naupang ho a chhaih zui ta daih a. A hahdam tak hnu chuan kan chhuak zui ta diak a.






"Saw, en teh..... Kan raipuar nu pawh in la no fahrana a kal leh ṭuang ṭuang tawh saw. Ka va hnuk hrep zawk dawn em maw ni?" tih hlak hlak pah chuan a kawk zauh a, a kawhna lam chu ka en zui ve vat a. In lam pana Mahlimi kal phei mek chu ka va hmu ve nghal zat a, ka nui hak ringawt. Vengchhung a kan chanchin a darh chiam tak nachhan kha a kam tam luat vang tih Tleipuii hian a hre ve reng a, huat tak te in a haw zui ta reng bawk.






"A ho em mai, khin tlak pawh a nih loh saw. Kal vat ang" tiin a banah ka pawt zui dawr dawr a, ani erawh chuan Mahlimi ringawt a la en zui ṭawk ṭawk reng thung. Hmeichhe zaidam leh nungchang ṭha zet a ni chung hian a tih loh lamah erawh kawlh ve ṭek ṭek tak a ni. Taxi ruak lo tlan chu ka lo phar vat a, kawngkhar hawng zui vat in ka nem lut zui rawk rawk a, kan kal vat loh chuan a hmel aṭangin a in sum rei thei dawn lo tih ka hmuchiang em a ni.







An In kan thlen thleng pawhin a la phun zui ve hlak hlak reng a. Thildang ka lo sawipui daih zel thung. Nu Zami'n eirawng a lo bawl sat sat a, tihpui ve ka tum chu a lo phal lo nasa mai. Bawihtei'n nuam ati leh pek. A tlan kual zung zung a, a nau in thei leh theilo in, bawkvak in a lo zui ve zel bawk a; kan thawm pawh a ṭha leh ṭan viau tawh.






"Zothan.. i va han cher em em ve le... Mut i hmu ṭha lo em ni? Kha i hmel te kha a dik lo. Hna i thawk a nih pawhin chintawk nei in tih tum rawh, ti ringawt kha chuan i daih rei lo tawp ang" Nu Zami chuan rilru nat hmel fe in min en vang vang a. A hmel a min lainatna chu ka hmuhhmaih hauh lo.






"Ka ṭha lutuk. Ka hmel te hi chu a ṭha lo sa ve hrim hrim" tih pahin ka nui hak hak a, ka biang chu ka tuai zui vat vat bawk a. Ni e, tun hma nen a khaikhin chuan chhe tawh tak ka ni. Zanah ka fate an muthilh lai hi ka hnathawh theih hun a ni miau a, chhun lamah hah viau ṭhin mahila ka mu hman ngai meuh lo. Kawl en ṭan det det a mut hman chauh ṭum ka ngah a, ka men tlang tak pawh sawi tur a awm fo. Ka fate tan theihtawp chhuah a beih ka ngai miau si a, hah hman ka ni lo. In tuai hnûmna hun nei ta lo chu ka hmel pawh a pawr fap tawh a, ka lan mawina aiin ka fate kawpuarna ka ngaihtuah a ngai zawk si a; ka dam chuan a ṭha a ni mai e.







Hlim tlang takin zanriah kan kil ho a, kan nufa chauh a eitur kan siam ve ṭhin hi chu a tui tham mawlh lo. Nu Zami eisiam tui tak ka ei meuh chu ka harh sawng sawng in ka hria. Chaw eikham ah Cake te kan zai ve leh a, Bawihtei'n a chuh ta tlat pek a; a birthday kan lawm a ni ber zawk e. Ka fate an en hrang ngai miahlo hi ka lawm em em ṭhin, min hmangaih pui zia hi ka hmuhchian em avangin ka hnuk a ulh hial zawk. Ka nu khan Nu Zami'n ka fate a duat ang chanve pawh hian min duat pui ve meuh pawhin ka hre ngai lo. A laka ka beiseina te a tawp chiang ta bawk a, ka nu mah nise hriatchhuah loh Ni ka nei ta fo mai.







U Rinpuia'n a ṭhianpa thawhna Vety Department-ah Peon hna a ruak tih a sawi a, dil ve tura min duh thu a sawi nghal zat bawk. Kan sawi chho ta zel a, Tleipuii phei chuan a nawr in min nawr nghal tet tet a. Nu Zami te pawhin ngaihven turin min lo ti ve mawlh mawlh bawk a, "Ka lo in ngaihtuah ange" tiin ka chhang ta rih ngawt chu a nia. Riak turin min sawm nasa viau mah se ka hna khawih lai chhunzawm ka la ngaih avangin zan rei tak tak hma a haw kan tum ta zawk a. U Rinpuia bawkin min thlah ka ring sa ve tawp. An In a kan thlen phei tawh hi chuan kan haw leh lam hi chu a kutah a ngai ve hmiah mai a, a fel ve riau a ni.







Kan haw hma in Nu Zami'n an room ah min ko lut a, ka va luh chuan envelope hi min lo pe zui thuai a. A ngaihna hrelo zet a ka thlek kual lai chuan "Tam chu a nilo na a, in mamawh zual chu a phuhru ve mai ang. Zothan, tuar hram hram la. Tawrh chhuah hun ila nei dawn a nia. Beiseina nei tlat ṭhin ang che. Harsatna i neih chuan rawn sawi hreh lo la aw?" tiin ka sam ah a chul heuh heuh a. Lawm luatah hian mittui a lo tla thei tih ka chiang ta kher mai. Min hmangaihna leh min duhsakna an ti lang mawlh mawlh mai hi ka tan chuan a va hlu tak em!






"A ngai lo asin" tiin ṭang ve viau mahila, "In nufa tan liau liau a i pa nen kan dah hran anih kha. I hnathawh pawh chintawk nei tawh ang che. Kal teh, i chhuak phei ang. I U Rinpuia'n a nghak reng tawh ang che u" tiin a kal zui ta daih a, lawm avanga ka mittui parawl ṭeuh chu tuai fai sawk sawkin ka chhuak zui ve ta thuai a. U Rinpuia pawh a lo in peih at tawh a, Bawihtei a lo pawm leh ât tawh; Bawihpuia pua in kan in zui chhuak a, kan tlanliam thlengin Tleipuii chuan a ban a rawn vai lauh lauh reng a.







Kawng tluanin U Rinpuia chuan thu ṭha tinreng min fah mawlh mawlh a. Beidawng ngailo tura min duh thu a sawi nawn ngun hle. Ka nu leh Mampuia te pawh haw zui reng lo turin min ti bawk a, "Khawvel hi a vir kual reng angin mihring tumah hi kan dinhmun ngai rengah kan awm ngai lo. Nangpawh engtik niah emaw chuan dinhmun ṭha takah ila chuangkai anga, i dikna rahbeh sak i nih te pawh lanchhuah hun a la awm ang. I chunga diklo taka ti tu te hian in hmuhchhuah hun an la nei ngei anga, inchhir ngawih ngawihin an la awm ngei dawn. Chutiang hun a lo thlen hun ah pawh ngaidamtu ni zel ang che. Ngaidamtu nih aia ropui a awm lo a nia" a ti dap dap a, uluk takin ka lo ngaithla ve ran bawk. Kan In bul kan thlen rual chuan, "Thingpui rawn in chawl lawk la" tiin ka sawm zui thuai a. "In û tur ka va rim lawk ange" tih pahin a nui suk a, a tlanchuak zui ta zawk a.







Bawihtei te unau an mu har lova, an tal hah ve deuh vang te pawh a ni ngei ang. Keipawh ka hna ngai bawk ka chhunzawm leh a, ka kâwng kham ṭhin lutuk hi hrehawm ka tih ber a ni. Panhnah roll chungin U Rinpuia hna sawi te chu ka ngaihtuah pah neuh neuh a. Kei sawipuitu pawh nei lo tan chuan hmuh ve kher pawh ka ring lem lo. Tun ang laiah hna hniam tê a kan ngaih thlengin kan bawr luih luih tawh a; chuta karah sawipuitu neih ṭhat a la ngai leh zel bawk. Thiamna avanga hna nei aiin sawipui tu neih ṭhat avanga sawrkar hna chelh an tam ta. Ṭhenkhatah chuan in sawipuina ringawt khan thiamna a chhawm tel si loh avangin mahni hna ngei pawh a nihna anga thawk zo lo te pawh an kat nuk ta ve ang. Kan ram ve hi zawng hetiang renga kan kal anih chuan kan la tlachhe duai duai dawn a nih hi.







Vanneih thil thu ah lo hmu ve ta tehreng pawh ni ila, ka fate hi tu in nge lo enkawl ang? Nitin zantina ka enkawl, ka hlat a awm ngai hauh lo te hi midang kutah ngaihngam takin ka dah ngam kher awm si lova. Thil thui tak ngaihtuah in tuna ka eizawnna ringawt hi chuan min chawm hneh loh hun a la awm ngei dawn bawk si. Ngaihtuahna mumal put dan tur ber pawh ka hre mai lo. "Engkim Pathian kutah kawl tirin ṭawngṭai ila, kan kawng tur chu min ruatpui mai ang" ti chungin ka thil tih lai chu ka chhunzawm leh ta mawlh mawlh a.







Rei vaklo ah ka zo ve ta mai bawk a. Ka mut hma in Nu Zami envelope min pek chu ka hawng hmasa leh te te a, ka enchian nak chuan cheng singkhat lai a lo ni. Ka beisei loh lutuk a nih avangin ka melh tlawk tlawk a, lawm luatah mittui a lo far bawk. Kan nufa tana Pathianin miṭha ṭha tak tak min lo ruahman sak ṭhin hi kan tan a va hlu tehlul em!!





Mut hmunah pawh U Rinpuia hna min kawhhmuh chungchang ngawt chu ka ngaihtuah zui reng a. Ka in let leh thak thak ṭhin a. Ka fate, tui taka an muhil sêk sêk lai chu tihharh hlau zetin ka fawp vawng vawng a. "Bawihte....in tan ka bei zel ang. Mahse, nangni pawhin tawrhchhel in zir a ngai dawn a nia" ka ti rilru melh melh a. Chu hna chu dil ve chhin phawt a ṭha in ka hre ta ber mai.






"Kha chu ha suh, khawinge zei lo nu..... Hei hi a ṭha, a zahawm bawk" tiin Tleipuii chuan ka kawr hak tum mek lai chu min phihthlak sak nawk nawk a, kamis var ṭhui nalh zet mai chu a rawn lek lang va va a.





"Awi, a var ser sur si. Ka thû chil chel si, ka ha zak e a" tiin ka lo hnial ve thung. A mawi chu ka ti reng mai; mahse, ka vun thu thet nen chuan in hmeh dawnin ka hre lo em ani.






"I zak em? Ha mai mai rawh. Mi dum paw'n a var an hak chuan an langsar vah mai asin" tih pahin a nui zui awr awr a, min perh zeuhna chu duh lo zetin ka tlawh zui pawp.







U Rinpuia hna sawi kha ka bawhzui ve dawn chu ania, eng tak kan ang ve ang maw? Tleipuii'n ka fate a lo awmpui dawn a, zing karah rawn pheiin chaw a rawn ei nghal bawk. Vawi tam tak ka ngaihtuah a, ka ṭawngṭai apiangin ka chham tel ziah bawk a. A tawp a ka thuthlukna chu 'Dil ve hrim hrim ila, ka hmu ta lo anih pawhin ka fate ka uap thei a ni mai' tih a ni. Tleipuii a phur sakhai a, "Hlawh i lak ve leh thil min lei ang che" ati nghal ringawt te chu kan nuihpui leh rih a, a ruk tak chuan huphurh tak ka ni thung.







Dar 10 ah interview ṭan tur a nih avangin ka chhuak zui ta vat a. Bawihtei te unau pawhin min ngen buai lem lo. Tleipuii bulah chuan an ngaihtuahawm dawn miah lo tih ka hriat avangin ngaihngam takin ka kalsan a, ka vawikhat kalsanna a niih vang erawh chuan ka ni deuh huih in ka hre thung. Ka in chei khât vang nge ni ka thawmhnaw hak te chu in hmeh ta lo riau in ka in hria a, ka in pawt sek reng a. Ka kamis var hak chu ka smart pants ah chuan ka bilh lut thlap a, pheikhawk ke artui sang lo tê ka bun bawk a. Ka hmel hnuh nawm ve deuh nan tiin make up tlem ka in hnawih ve bawk a, ka sam sei tak chu sang takah ka ṭawn vah bawk. Ka bag rei tak ka ah chhuah tawh loh pawh ka ak chhuak ve leh ta ngei e, inringtawk taka awm erawh har ka ti viau mai.







Taxi la in Vety Office lam chu ka pan ta nal nal a, Jam ah kan tang zeuh zeuh bawk. Ka thlen ve meuh chuan an lo zi hut hut tawh a, ka kalna ber tur ka hriat loh avangin midang ka zawt chawp pah zel bawk a. Hna dil tur te chu an lo awm ṭhap tawh a, hmel zahawm pui pui pawh an lo kat nuk mai. Thiamna lamah pawh ka phak dawn lo tih ka hriatchian em em te nena ṭhutthleng pakhata kan ṭhu ho zet chu zam luatah ka khur chhe lo chauh a ni ber e. Luh hmasak dan tur in dawtin hming an lam ṭan a, ka khur der der tih reh tumin ka kut te chu ka nuai leh nawk nawk ṭhin.






"Zothansangi maw i hming?" Ka hma a ṭhu pa sa ṭha nelh nawlh chuan a rawn ti thum dut a, ka lo chhang let ve nghal thuai a. Interview ka hmachhawn hmasakna ber a ni a, ka te chem chem in ka hria. Ka hma a ṭhu te chu mi pali an ni a, hmeichhe pakhat kum upa tawh lam a ṭhu tel ve bawk a; a bak zawng chu pa valai tak vek an ni.







Ka lehkha pawimawh ken te chu pe turin min ti a, zawhna eng eng emaw min zawh leh hnu ah phone call ngaichang tura min tiin ka chhuak zui leh ta thuai a. Zawhna min zawt hmasa ber tu kha an hotupa ber a ni tih ka chhuah hnu in ka hre ve leh chiah bawk.







In lam ka ngaihtuah avangin ka haw zui leh ta vat a, chhun thingpui hmeh tur te lei kawi leh in hmahmawh takin ka kal zui ta dawr dawr a. In ka thlen chuan Bawihpuia a lo muhil tawh a, Bawihtei erawh Tleipuii phone en in chungin ṭhutthlengah a lo mu thung. Tleipuii chhuat lo nawt mek chu dah turin ka ti nghal vat a, alo che viau a ni tih hriat takin Inchhung a fai vûk mai. "Ka pasal neih hun atan ka lo in zir a" alo ti ham ham a, inthlak turin ka luhsan zui ta daih a.







Hna ka dil aṭanga kar khat lai aliam leh tawh, ka hna dilna lam an la reh vung vung avangin beisei pawh ka nei zui tawh lem lova; ka hna ngai ka chhunzawm reng bawk. Nilaini zan a ni a, kuhva rah ka thel mawlh mawlh laiin ka phone a rawn ri ral ral a, hmanhmawh takin ka la zui thuai.






"Hello.. Zothansangi a ni em?" Mipa aw thum dut in a rawn tih chuan ka nih thu in ka chhang zui vat a.






"Naktukah office ah i rawn kal dawn nia" tih puat pah min biakna chu a ti tawp zui nghal daih. Ka hamhaih deuh nen ka ngawi zui vang vang a. Ka in ngaihtuah fim hnuah ka hna dil chungchang ka hrechhuak leh ta chauh a. Beiseina ka neih tawh loh hnua chutiang thu ka hre leh chu ka lawmna a sang ngei mai.







Ka kâwng kham leh ka taksa rawl ṭhem ṭhum te pawh ka hrechang tawh meuh lo. A la tlai lo bawk a, Tleipuii chuka be zui ta vat a. Phone a lak rualin ka call dawn thu ka sawi a, a ri nghal chel chul mai. "Naupang kha chu ka kutah dah hmiah rawh, zing ah chaw ei turin ka rawn phei ang" alo ti nghal phar phar a. Thawk khat chu a veng leh ta huai e, rei vaklo in be leh in kan duhtawk ta a. Keipawh ka hna hmabak chu khawih leh zung zungin zanlai pelh deuh ah ka mu ve hman ta hram e.







"Sawi puitu hran pawh i nei lem lova, he hna hi engang chiah a mamawh nge i nih le?" Pu Hmingliana, Vety Office a an hotupa ber chuan min zawt dam dup a, a office ah in hmatawn rân in kan ṭhu mek.






"Ka pu, ka fate pahnih enkawl in harsa takin ka chawm ve a. Hna ṭha zawk beiseiin sawipuitu pawh nei lemlo in ka rawn dil ve tawp a ni" ka ti let ve thuai, ka aw chu a khur ru deuh tih pwwh w a hre ngei ang.






"Um.. dil tu tam tak in awm a. Thiamna lama sang tak tak leh sawipuitu nei ṭha tak tak hlir an ni bawk. Chung zingah chuan koh i ni ta a, i hmel ka hmuh tirh khan ka rilru ah i tla na riau a; chuvanga rawn ko che kan ni e" a ti dam leh thluam a. Hmel hlim sarh in ka lawmzia thu ka lo sawi mawlh mawlh reng bawk.






"Mahse, thil pakhat...... I hriat angin hna hniam tak ni mah se mi tam tak in chuh a ni tih chu i hmu ve vek a" tih pahin min en kual dun dun a, ka amâwm zawn a en laia a mitmeng in thlak ta hlawk pawh chu ka hmuhhmaih lo chiang kher mai.






"I fate chawm nan eng anga thui nge i in huam?" tiin zawhna min zawt leh a, a thu min zawh dan dang ta deuh chu mak ka ti ru deuh.





"Ka pu, ka fate tan a nih chuan ka theih na bak bak pawhin ka ṭang ang" ka ti let ve thuai a. A nui sun sun a, a lu a bu nghut nghut bawk a.






"Anih chuan zanin tlaiah zanriah ei chhuak ila, zan hun reilo te min hmanpui bawk la.... Hna chu i nei a ni mai" tih pahin a chair nghenchhan chu a ngheng zui a. Ka taksa a melh kual dun dun danah chuah a sawi awmzia chu ka hrechiang kher mai.






"Ka pu, he hna hi ka tan a pawimawhin ka mamawh takzet. Mahse, ka zahawmna tih bawrhban phah nan em chuan a hlu tawk love. Ka dam anga, he hna tel kher lo pawh hian ka fate chu ka chawm thei tho in ka ring. Min hrethiam la, ka kal ange" tih hmak pahin ka tho zui tharh a, ka thinrim ut ut bawk.






"Engmah ni mang si lova i chapo ar khan engmah sawtna a nei lo ania. Vawiin hun ka pe ang che; i thuthlukna min rawn hrilh leh dawn nia" ka chhuah hma deuh chuan a la rawn ti zui hram nia. Ka ding dat a, eng emaw tak sawi zui ngei ka duh avangin ka in her leh a; a mitah chiang takin ka melh ngar bawk.






"Ka pu, engmah nilo mahila ka zahawmna hralh duh mi ka ni love. Ka rawn biak leh kher che ngai lovin ka hnawl ni rawh se" tiin ka chhuak zui ta hmak a. Pawn lama mi lo zi hat hat te chu hmufiah mang lovin ka kal pel pawp pawp a, kawtlai ka thlen ve leh duhthawh zetin ka thaw hawk hawk a. Ka mamawh em em mah nise kawng diklo zawh a ka fate chawm ai chuan rim taka ka thawhchhuah tlem te hmang a nun ve ṭawk ṭawk chu ka thlang zawk fe a ni.






(to be continue.........)


Show post links
Top

[Ngaia]

DEAR PAIN
Chapter-26



By : Brigida Hugo






Ka seilenna inchhung aṭanga kan nufa a kan awmhranna pawh kum thum zet a liam ve ta reng mai. Ka pa pawhin vawi thum lai min rawn tlawh ve tawh a. Diktea hian lungawi lohna a neihin ka pa hnenah a thlen ngheng zel bawk a. Mahse, ka pa hi ka hriat ṭhin ka pa ngei kha a ni reng. Dam dupin Diktea pawh a chhâng thei zel a. A fate tan engkim a hlan a ni ber mai.






Phone rawn ri chu ka en thuai a, ka number hriat ngai loh hnen aṭangin a ni. Hriathlua a nih mai rinna nen, "Hello" ka ti nghat a.






"Zothan....min hre nghal mai em? I nu Rinsiami" a rawn ti nghal vat a. Tunge anih rin chhinna hun pawh min siam lo chu mak ka ti hran lem lo. Kan khaw lama ṭhenawm nu, Nu Rinsiami; nu phawk, a bula awm nuam leh fel em em kha a ni miau a.





"Awii....teh hlawl che chuan?" ka ti ve leh nghal thuai a.





"Enteh Zothan, i pa hi rawn bia la....khalamah khan in entir duh sela ka ti" a rawn ti chu ka nui tawp chiang kher mai. "Engatinge?" ka ti nghal thuai a.






"I pa hian engmah a sawi ngailo mai mai anih kha...a hrisel lo lutuk. Hna a thawk nasa si...'I in thawk silawng ange?' kan tih pawhin 'ka fate dinhmun siamrem sak thei lo mahila eng emaw chen ka pui thei ang' a ti zel a.... Kar hmasa te khan khawsik chungin thing an zai char char alawm" a rawn ti chu ka ding ngawi reng. Ka mit aṭangin mittui a rawn hnam ṭiam ṭiam a. Ka mitthla ah ka pa nuamsamlo chunga hnathawk tur hmel bak a awm lo.






"Damṭha viau turah ka lo ngai a..." ka ti thâm chhalh a. Kar hmasa lawka pawisa kan mamawh thu ka han hrilh te kha ka inchhir thar ngawih ngawih. "Ka pa...engatinge?" keima hriat tawk lekin ka phun zui sep a.







Phone ah chuan message a rawn thleng tih ka hria. Ka bih zuai a, nidanga ka hawn phur theih nen chulam chu ka rilru ah a awm rih lo. Ka pa hmel tla bai tur ang hlir in ka ngaihtuahna leh mitthla ah a awm nghal char char a. "I pa chu nangma'n i ti thei ber ang. Rawn be ngei ngei ang che" Nu Rinsiami'n a rawn tih te pawh chu ka mang hriat ruai a. "Aw le, ka rawn be vat ang" ka ti bah deuh nak a. Kan inbiak zawh tawh hnu pawhin phone chu ka beng bulah ka la keng reng a. Ka ngaihtuahna a va vak thui tehreng em....







Muangchangin ka ṭhu riai riai a, ka pa ringawt chu ka mitthla ah a awm reng. Ka nu ka haw thar ngawih ngawih bawk. Diktea pawh hrilh thuai ka duh. Ani hi a mawl ṭhin si, thilho mai mai ngen in a lo han be leh sek ang tih ka hlau.





Message tone a rawn ri leh a, muangchangin ka phone chu ka thai hawng a.



'Nizan ka mumangah ka hmu nasa che'


'I buai deuh em ni?'




Chu message chu pahnih lek mah nise a inkar a zau hle in ka hria. Min tinui sak a, "Mihring....mood off lai pawh a nuihpui theih pa" ka ti sap a. Chhan nghal mai ka tum laiin pawnlamah Bawihtea ṭap thawm ka hriat avangin ka dah thuai a. Hmanhmawh takin ka tlanchhuak nghal a. "Awiii...engatinge chemte khawih suh u ka ti a ni lo'm ni?" ka ti nghal tuarh a. Bawihtea kut thi zar zar ka hmuh rual a ka hlauhthawn zia kha...






Hmanhmawh takin Inchhung lamah ka pawmlut thuai a. Ṭhutthlengah ka ṭhut tir vat a...a tuamna tur ka zawng nghal chung a. Ani lah a hma ai zawngin a ṭap uar sauh bawk. "Bang rawh, khawih suh u ka ti mawlh mawlh alawm. Thu in awih lo ṭhin a" ka ti hmawk hmawk a. A u lah chuan in thiam loh hmel zetin min lo melh zek zek a.






Bawihpuia chu a kut ka tuamsak chhung pawhin ṭap ala ṭap fap fap a, a thiam ang angin a û a puh let ve ngar ngar bawk. Bawihtei a lo in sawithiam ve zat zat reng bawk a, thubuai rem hi kan nitin nuna bet tel tlat a ni ve reng reng; an pahnih chuan an hriatthiam tur tawkin ka zilh zui malh malh a. Pawn lama awm ka rem tih tawh loh avangin chhuatlai ah toys an bun hnawk leh nghal rum tawh. An tleina a nih a, hna ka thawh theihna anih chuan Inchhung hnawk mai mai chu ka enliam thei khawp mai.






Ka message dawn pawh ka lo mangnghilh zui daih tih ka hrechhuak leh hnuhnawh a, ka phone chuh tharhin ka chhiar nawn leh ngat. Nui sak in a chhan letna tur ka type ve nghal zat a.





"Engtin nge i mumangah chuan min hmuh a? I mang a va chhe awm ve" tiin emoji nui lai ka dah a, ka chhan letna a lo nghak reng emaw tih turin a en nghal zat bawk.





"Engtin vak mah. I buai viau anih hmel, ka message in chhanna a hmu har em mai" a rawn ti let nghat a, ka khi var var mai.






Titau rilru pu ve deuh si a tihlan ṭhat duhloh hi a zia a ni ve hrim hrim a, ka chhanlet mai loh chhan te ka hrilh ve nghal thuai a. Pangngai taka thil han sawipui hi chuan a lungawi zui ve mai ṭhin a, a chang phei chuan 'a thinrim ve thei lo aniang' ka ti hial ṭhin. Hnathawh laklawh lai a lo neih avangin a hman veleh a min rawn biak tur thu a sawi a, keipawh ka hna ngai bawk chhunzawm turin ka in chhawp hnawk ve nghal zat a. Bawihtei te unau an tlei bawk a, ka hun hma lam chhui zui neuh neuh pahin panhnah chu ka roll mawlh mawlh a.







Ka messenger tone rawn ri tlangin ka message dawn chu ka phone hnuai lam kilah a rawn lang nghal va a, ka story chhiar lai a laklawh avangin ka thai liam puat a. Ka chhiar hmabak tlem te la awm chu ka chhiar zui leh malh malh a. Rilru tih thawven nan tiin hna ka awl deuh changin story chhiar ka hrat thar leh a, ngaihtuahna kal bing ngut ngut tur lakah min hruai peng a; a ṭha ka ti viau mai.






Ka chhiar zawh veleh message chu ka en zui ta vat a, messenger lam ka hman ngai loh avangin tunge a nih ang tih pawh rinlawk dan ka nei teh chiam lo.






"I hman lutuk" tih ringawt chu a lo awm vang a, zan a rei ve deuh tawh bawk. Tunge a nih hriat tumin ka en zui nghal zat a; a hming ringawt zawng ka lo ralkhat hriat ve nasa. Sumdawn na thil eng eng emaw group a ka awmna a awm ve leh an biak rawn ber a ni ve ṭhin. Messenger lam daih a min rawn bia chu mak ka ti deuh.





"Hman e" tih ringawtin ka chhang let a, a en nghal vat bawk. A rawn typing lehnghal avangin ka lo ngaichang ve deuh ran a.





"In pa in a ning lo em ni?" a rawn ti let leh zat, ka khi deuh sak a, " Ka hre miah lo, kan awmna a in hlat em a" tiin ka chhang zui ve leh thuai.






"In inṭhen tawh em ni?" tiin zawhna a rawn nei zui a, kan inṭhen tawh thu ka lo hrilh ṭha ve leh mai bawk. Eng eng emaw min zawt zui mawlh mawlh a, a rul tawk zelin ka lo chhang ve zel.






"I duh chuan i sawi vek thei aw, ka rintlak viau ania" a rawn tih leh chuan rinhlelhna engmah ka nei lo. A chanchin ka lo hriat ve danah mi rintlak tak a ni tih ka hria a, mi tam tak a lo pui tawhin an harsatna ah pawh theihtawp chhuahin a lo fuih kal tawh ṭhin tih ka hria. Mahni tawka rilru hahna leh in bunruahna mamawh ve em em ka lo ni ve bawk nen, kan in be zui ta reng a. Kan inbiakna kan tih tawp meuh chuan dar thum a lo hnai kuar tawh mai. Ka mu ṭha zui ta thuai a.






A tuk zing ka thawh hlim ah pawh morning wish a lo awm leh vang tawh, "A va tho hma ṭhin awm em em...." ti niah niah chungin ka wish let ve thuai a. Zan lamah pawh a ngai ang te bawkin kan in be zui leh ta chiam a.






Hun a kal zel a, kan in be tam tial tial a. Ani pawhin a nuna harsatna a tawh hrang hrangte min hrilh ve in min fuih nan a hmang pah zel bawk a. Duhsak taka min fuihtu ka nei ta chu keimahah pawh danglam a awm tih ka hrechiang hle. Thil tam tak ka lo beidawn ruk tawhna ah pawh beiseina ka nei thar ve leh hret hret a. 'Kan inbiak apiangin ka chak thar' ti ila ka sawi sual in ka ring lo.






Hunawl apiang a in be ta na nâ na chu kan lo in ngaina chho ve ta viau mai. A hming pangngai a tarlan loh avangin ka zawt ta chawt a, a ui viau nge mawni a pehhel kual rei ngei mai. A tawpah erawh a sawi ve ta hram e
" Lalruatsanga" niin "RSA" tia an koh ṭhin thu a sawi a, kei chuan "Hming rangkachak" tiin ka lo fiam zui hlak a. A hming sawi nan hun a duh rei ve em bawk a ni.






Vawiin ni thlengin kan la in be chho zel a, ka chanchin tam tak a hria a. Ka harsatna tawh mil zelin a harsatna lo paltlang tawh te leh a thuruk tawp ber thleng a min hrilh in min fuih nan a hmang reng ṭhin. Ka dinhmun chhiat zia hrereng chunga min en hniamna a nei miah lo leh a inngaitlawm em em reng mai chu amah ka ngainatna ti zualtu ani.






Mipa thenkhat, 'Nuthlawi' tih hming put tak avanga hmeichhia te va zuam a, ṭawngkam dukdak lo zet a va biak nghal tawp ching an tam viau lai in, chutiang mi ṭhian ṭha tak ka tawng fuh hlauh chu ka lawm ru veng veng ṭhin. Min fuihna zawng zawngte pawh hmasawn pui nan hman ka tum ruh viau mai.





"A va han mak, koh pawh i hriat theih miah loh le" tiin Nu Tluangpuii'n ka hnungah a rawn beng karh a, ka ngaihtuahna a ṭangin ka harhchhuak nghal zawk a.





"Tui a haw dawn ania, lo in ring lawk deuh teh. Pipe chhe lai zawm tur i tih kha han en la, naupang ka lo en hman lai anih hi" a ti zung zung a, keipawh ka thil tih lai dah vatin tuizem awmna lam ka pan zui ta thuai a.






Nilengin ka buai chhunzawm a, ka pa ka bia ang ka tih pawh hun ka la nei thei lo. Tlai eirawngbawl pahin kuhva ka khawih zo a, ka in bual zui ta vat a. Chaw ei ka siam laiin Bawihpuia a lo muthlu diar diar a, kai harh vatin chaw ka pe zui sawk sawk a. Chhun lamah an tal hah ve ṭhin bawk nen, zan lamah an meng rei ngai meuh lo. Bawihtei School luh a hun ve tawh avangin kan in admit ve a, thla thar aṭangin a ṭan ve dawn bawk. Ka buai a zual viau dawn tih chu ka hmuthiam sa reng a, mi fate aia a hnufual tur ka ngai ngam bik silo. Engkim huamin kan in kal tir ve dawn chu a ni phawt mai a, Pathian zarah kan dam anga; kan khawsa chho ve leh naw naw thei mai in ka ring.







Chhun zan zawm a kuhva hlir buaipui hi a chang chuan ka hne ve hlui ṭhin. Ka fate enkawl paha ka thawh theih awmchhun anih miau avangin ka ti lo thei silo. Ka pa in a khat tawkin kan mamawh leina tur pawisa min rawn thawn reng a, Diktea'n min pui ve reng bawk. Anni in min pui lo se ka fate hi an rethei zual viau ngei ang. Tleipuii te chhungkua pawhin min thlahthlam ngai lova, puih ka ngaihna apiangah min pui ve reng bawk. Ka tan an hlu takzet.







Naupang an mut fel veleh ka pa chu ka be zui ta thuai a, hritlang aw zetin min lo chhang a. "I dam sam lo em ni? Nu Rinsiami'n min rawn bia a, i dam ṭhat loh thu a sawi a. Min hrilh ve ṭhin tur a nia" ka ti zui nghal mawlh mawlh a, a khuh bawrh bawrh avangin min chhang lawk thei lo.






"Ka ngaihtuahawm loh, hritlang khawsik ka kai ve deuh a. Naupang an mu tawh em ni?" tiin min rawn zawt zui zat a.





"Aw, an mufel chiah a, ka rawn be nghal che. Naupang pawhin an sawi ve reng che a, in entir pahin rawn zin khawthawng la a ṭha ang" ka ti zui nghal zat. Nu Rinsiami rawn sawi danah khan ka pa hian hritlang khawsik ringawt nilo nawmlohna dang a nei a ni tih ka hrethiam reng.






"In entir ka ngai hlei nem, a hautak mai mai. Ka ṭha leh vat mai ang" a lo ti thuai a, ka rinlawk sa ang chiahin min rawn chhâng bawk. Inentir hi thih hreh tak hian a hreh a, 'Natna mak deuh te an lo sawi palh ang' tia ṭankhawh tlat chi kha a nia, nawr kal mai chu a harsa viau ang le. Thildang hlir a sawi zui tak avangin a sawi ang apiang chu ka lo zawm ve zel a, rei fe kan in biak hnuah kan ti tawp ta hram.






Ka pa nena kan inbiak hi chuan sawi tur kan ngah thei bawk a, kan ri leh hluai ṭhin. Ka nu ka ngaihtuah kai a, kan in biak ngai loh zia ka hre zui rauh rauh mai. Engemaw changa chanchin min rawn zawt ve tih bak chu kan in be ngai lova, Mampuia te nupa nen phei chuan kan chhuah aṭang khan kan la in be leh ta miah lo bawk.






Ka messenger tone ri tlang chu phur zetin ka en zui vat a, midang biak ka neih ngai loh avangin tunge a nih ka hrechiang hle bawk. "I mu tawh em?" tia min zawhna chu ka la mut hman loh thu in ka chhang let vat a, vawiin lama a hnathawh leh chet velna zawng zawng kimchang takin min hrilh leh ta dap mai.






Kan in karah inngaihzawnna lam hawi zawng sawi rik a ni ngai lova, chhungril takah erawh kan hmin dun viau tih erawh a langchiang ṭhin. A hmaa ka lo tihsual nasat tawh em avangin ka fimkhur em em reng a, kha ka kawng bumboh zet kha zawh nawn leh tur chuan huaisenna ka nei tawh lo. Mahse, Rsa erawh ka thlamuanpui em em thung lawi si. Kei aiin kum 8 laiin a upa a, mi ngaihah chuan 'Val Senior' a ni ve ṭan der tawh, a puitling in a êng zawnga thil thlir tlat mi a ni a, chu chu a nuna ka entawn nasat ber a ni mek bawk.







Ka hna ka zawh hnuah pawh rei fe kan in be leh a, keini pahnih hi chu mi zawng zawng mut rêm hnuah bul kan la ṭan ve dawn chauh ang vel a ni ṭhin. Titi a thiamin sawi tur a hre thei si a, ngaihnawm ti zetin ka lo ngaithla dauh dauh zel. A chetchhiatna a sawi ṭhin zan erawh chuan zan rei pawh sawi lova nuih chiam tak lah ka ngah mai. Ka mood a chhe deuha a hriat chuan thil hlimawm lam a sawi thuai a, ka mood a ṭhat ve leh thu ṭha tam tak min hrilh zui leh ṭhin. Chhungril aṭanga ka ngaih veng veng zel nachhan hi ka hrethiam chiah lo, ka laka a ṭhat em vang a ni mahna.






Kar thar kan chuangkai a, Bawihtei school kal ṭanni a lo thleng ve ta bawk. Zingah hma takah tho in ka che nghal par par a, zan ka men rei ṭhin avangin ka lu a rit luk mai. Chhun lam hna tur zan lamah ka khawih lawk nual a, darkar khat ṭha vel bak ka mu hahdam hman meuh lo. Eirawng ka bawl zawh veleh chaw ei ka siam zui thuai a, kan chaw ei chhung te hi a rei ve ṭhin a; Bawihpuia'n a duh zawng apiang a sawi ve thei tawh a, chaw eilai hi a ṭawng duh hun lai a ni mauh zel bawk. Ei thuai turin kan in tur sek sek fo mai.






"Ama, Ruthi kawr ang ka duh ve" tiin Bawihpuia'n ka kawr tlang a lo pawt sek a, Bawihtei pawh a uniform ha in mawi in ti zetin darthlalang hmaah a vir kual pap pap a.





"Bawihpui, a û tih tur. Hmeichhe kawr a nih saw, mipa in an ha ve ngai hlei nem. Nakinah mipa uniform ila ha ve dawn nia aw..." tiin kan inhrilhfiah leh te te a, Bawihtei'n "Hmeichhe kawr ha chu Tuai" a lo ti ve zat zat bawk a; insiam pawh a sawt hlei thei ṭhin lo. A hrethiam ve ni hmiang, a ngen zui bik lem hlei lova. Ka inpeih veleh Bawihpuia pua in School lam panin kan chhuak zui ta thuai a.






School kan thleng chu naupang an lo zi niaih niaih a, nu ho an lo awm ve nual bawk. Sawrkar School anih avangin naupang pawh an tam teh chiam lova. Mahse, an zirtirtu tur te an thiam zia ka hrechiang a, ka rilru in Private School a awt chhin miah lo bawk. Kan dinhmunin a zir loh em avangin ka beisei chhin miah lo ani mah zawk. Bawihtei chu a ṭhutna tur te enpui in awmdan tur ka hrilh zui mawlh mawlh bawk a. An ṭan hma chu awmpui ve ṭha a ka hriat avangin kan awm ve ta rih a.






Ṭan dar a ri a, classroom pakhatah an lutkhawm ta diak a. In lamah hna ka la ngah avangin an zirtirtunu bulah hawsan mai ka ngaih thu ka sawi a, ngaihngam taka awm turin min lo ti mawlh mawlh a; biak vel pawh an nuam kher mai. Mahse, ka beisei angin thil a kal zui ta hauh lo, Bawihtei chu a ṭah thu an rawn sawi a; an rawn kaichhuak zui nghal bawk. A in hnit hlap hlap a, nghet zetin min kuah nghal thlawp mai.






"Engatinge i ṭah a? An hau che em ni?" tiin ka lo zawt thuai a, a lu alo thing nar nar a. "A ṭap ringawt, tuma'n an hau lo. Anu bulah atia" tiin amah rawn hruaitu hmeichhe naupang lian ve tawh tak chuan a lo sawipui nghal zung zung bawk a.






Ka fate hi rualpawl tam lo leh In a tawm reng ṭhin an lo ni bawk nen, chumi rah chu kan hmu chho dawn niin ka hria. In lamah felfai thlap mah se midang zingah erawh a zum dêk reng a, 'fahrah' dinhmun an lo sawi ṭhin ang chu kan tawng chho ve dawn ta anih hmel. Ka fate hian hmabak leh zir tur an va ngah bik tak.






An ban hma zawng kan nghak ta reng a, a hmuh theih a awm reng a ngai bawk nen an class room bulah kan awm tluan ta parh a. Chutiang reng reng chuan engmah ka thawk hman dawn hauh lo tih lah a lang chiang reng mai si a, rilru a buai duh kher mai. Ka tih tawh lam tih tlang tum tlat mi ka nih avangin kal chhunzawn tir zel erawh ka tum ruh viau thung a, hun âwl nei dawn miah lo mahila hmasawnna hmuh vat beisei in ka rilru erawh sawhsawn ka tum der lo.







Tlai lamah U Maremi'n min rawn be teh nawlh a, a khât tawk in kan in be ve fo ṭhin nângin tun hnaiah erawh kan in be mang lo tih theih a ni. Naupang chanchin te min zawt luam a, mamawh an neih leh neih loh te pawh min zawt bawk. Ani hi zawng mi rilru ṭha ngang kha a ni a, thil engkim hi a ngaihtuah kim vek a ni ber. Hna a kal leh tawh avanga a buai zia thu te a sawi luam a, a hma kha chuan aikal a la mai ṭhin kha a nia; an hotute lam aṭangin aikal tirh phal a nih tawh loh thu an chhuah ta si a, a buai ve vat vat viau ang. Naupang mamawh chungchang erawh ka sawi duh ta lem lo thung, 'ka theihtawp ka chhuah chuan a awm ve zel mai ang' tih ringin anni lam tihbuai chu ka tum lo bur bawk.







Rsa nen pawh kan la in be tluang ve zel a, hmaichhanah vawikhatmah kan la in hmu lo nângin kan in pawhna a thuk sawt viau tih ka hria. Aizawl khawpui ah amah ngeiin sumdawnna ngelnghet tak a in din thei hi ka chhuang em em bawk. Rei tak kan inbiak tawh hnuah khan an awm na veng te ka zawt ve a, min chhang hram anih kha.







Sawrkarah hna sang chelh hauh lo mah se a thawhrim rah liau liau a dinhmun ṭha tak a nei thei te chu ropui ka tiin keimah ah chona lian tak min pe a, thawhrimna zawk hian mihringte hi dinhmun ṭha min pe in mi zahawm takah min lo siam mai zawk a ni tih chu amah aṭanga ka hmuhchian em em a ni bawk.






Mampuia te fapa birthday a ni a, kum li lai a lo ni ve ta reng mai. Ka nu in min rawn bia in an In lama chaw ei turin min rawn sawm a, phur lo viau mahila kal loh a mawi hauh si lo. Muangchangin kan in siam a, Bawihtei erawh a phur sakhai a. Kan in peih veleh kan kal zui ta vat a, Mahlimi chhungte lam pawh an rawn phusa leh viau in ka ring. Present tur ka lo ngaihtuah lawk loh avangin toys dawrah kan lut kawi a, a duh tura ka rin ber chu la in kan tuam tir a; Bawihtei'n a khai zui lah lah mai.







In kan luh hma hauh aṭangin Inchhung thawm ṭha zet mai chu a hriat theih a, ka phurlo telh telh bawk. A tirah chuan kal loh mai kha ka duh rum rum kha a nia, Rsa ka hrilh ve lah khan "Tumah famkim kan awm loh hi. I thisen zawm te hlat zawnga i awm zel chuan nakinah inchhir hun ila nei thei. Ṭhatna in hneh tum la, ka ring tawk che" tiin min chhang let kha a nia, 'Ṭhatna a hneh tum' tih lai ah chuan ka hlawhchham tawh in ka hria. Mahse, min fuihtu ka zah em avangin ka kal hram a ni ber.






"In va tlai ve, kan lo buai tehreng nen. In ṭuan te hi a fûm ṭhin bik lutuk a" Inchhung kan luh rualin ka nu in a lo ti nghal zat zat a, an lo awm vel danah chuan buai viau hmel pawh an pu lem lo. Chhang let chuanglo in ka ṭhu zui hmak a, Bawihpuia ka puakna ka phelh zui mawlh mawlh a. Bawihtei'n Eddie-a present a pe nghal vat bawk. Ka vah neihchhun a ni nângin vawikhatmah min la ko lova, min mawl biak mai ṭhin. Chumi kawngah erawh amah enkawltute ka dem em em thung, naupang chu zirtir chawpa khawvel dai ve an ni a; a hriat tur in an hrilh miah lo tih a langchiang reng, ka vui chuang hauh lo thung.






Bawihpuia pawh a tei kual ve zung zung a, naupang awmkhawm na nâ na chu an inkawm hlim thei zel mai. Kei erawh ka michuang awm ve deuh mai mai a ni ber e. Mahlimi unau te ho an awm khawm let let a; ka nu in bai siam tura min tih avangin choka lamah ka che zui ta mawlh mawlh a. A khât tawkin Diktea a rawn tei lut ve tih loh chu ṭhutkhawmna lamah an ri dar dar reng hlawm mai.






Bawihtei ṭap thawm ka hriat avangin an lam panin ka tlan zui vat a, Diktea'n min zui ve nghal vut bawk. Varanda ah chuan toys a let rum a, naupang ho chu an lo ding khawm ṭhap a.





"Engatinge i ṭah a? I in tipalh em ni?" tih pahin Bawihtei chu ka pan thuai a. Bawihpuia pawhin a ú kutah kaiin a lo in hnit ve fap fap a; a û ṭap hi ṭahpui ve mai a ching ve hrim hrim.





"Ama'n min ti hmasa a nih kha" tiin ka sir lawk a Mahlimi u fanu chu alo ṭawng nghal zat zat a, chutih lai chuan Inchhung lama awm ho pawh an lo chhuak ve mek bawk.





"Anu, pa i nei ve lo min ti.." tih pahin Bawihtei chu a ṭap uar sauh a, a thil sawi chuan min chhun zawk mai. Bawihtei chu bang turin ka thlem zui mawlh mawlh a. Bawihpuia a lo ṭap ve pur chu Diktea'n a lo pawm kang vat a.






"A ho em mai, naupang infiamna a puitling kan in rawlh zel te chuan naupang tan awm ngaihna a awm nang. Ṭahbelh deuh te chu an ṭap rawng rawng a, an inkawm ṭha leh mai alawm" Hlupuii aw ngei a ni, a fanu in ka fanu a ṭawngkhum dan chu pawi abtih loh hmel kher mai. Muangchanga dingchhuak in ka melh ta rân a.






"I fanu hi nungchang mawi hrilh ang che. Ka fanu a tih dan kha thil ṭul lo lutuk anih kha" tih nghat pahin Bawihtei chu ka kai a, kalsawn pui mai tumin ka pen zui zat. Mahse, a thu rawn sawi leh avang chuan ka ding chawt mai.






"Ka fanu khan dawt a sawi em ni? Khawnge an pa chu?" a rawn ti chang fak a, ka nui hul hak.





"Anu aṭang rengin nungchang ṭha tak nei chi a nih loh tawp hi. In inchhun fuh khawp hi a" ka ti let ve leh hmak a. Ka fate hi anni ho hmuhsit mai mai atan chuan an hlu mah mah a ni.





"I zak lo mange Zothansang. In rawn kal ve hian buaina a awm ziah mai, lo hrilh loh tawp tur che u a nia" ka nu in a rawn ti chu mak ti zetin ka en nghal tlawk tlawk a. A tunu hmuhsita a awm mek hmuh kânin a monu û fanu mittui ti tla der vel chu a ngai pawimawh zawk anih chu.






"Chuti a ni maw? Rawn kal hi ka chak viau i ring em ni? Hengho nena hun hman ho hi ka chak miah hlei nem, ka vahpa ka ngaih pawimawh avanga rawn lang ve hram chauh ka nih hi. I tunu mittui tla aiin khalai naupang nungchang chhe zet mittui ti tla der vel kha i ngai pawimawh zawk a maw?" ka ti let ve hmak a, ka thinrim dan chu namen lo tak a ni.






"Khanglang che chuan..... Nangni nufa ai fe in kan ṭangkai pui zawk. Nangni hian engnge min tihsak ve?" tiin min kawk zui sawk sawk a, ka natna ai mahin ka mak tihna chuan min chiah hneh zawk in ka hria. Ṭawng leh mai nachang pawh hre lovin ka melh ngawt ngawt a.






"A tawk viau e, Nu.... Eng rilru nge in put le? I tute aia i ngaihpawimawh zawk chu kuah kumkhua la ti nia. He In hi heng ho nawmchen nana ka pa din a ni hauh lo, an duh dan dan in an rawn awm a; mi hmaizahna lah an nei hek lo. Nang lah an uite ang mai in an sawi apiang ilo lem duak duak a, Nu nep tak i lo nih hi" Diktea chuan a rawn ti chang ve ta bawl mai. Ka nu thinrim hmel rapthlak zia chu le....






"In va nasa unau ve le, mi zahna pawh in neih hauh loh chu le" ati khur hlak hlak a. "Zahtlak in i nun i hmang miau lo alawm le" Diktea bawk chuan a lo ti let ve leh hmak. Mampuia Cake vel lam tura a chhuah lai a ni a, awm ve se kan boruak a sang viau in ka ring; ani pawh ka nu ang chiah a Mamhlimi te lam ṭang a ni tih a chiang sa reng bawk.






"Kan haw ange, vawikhatmah kan rawn kal leh tawh ngai lovang" tiin Bawihpuia chu Diktea pawmna aṭangin ka la zui vat a. Bawihtei kai in Inchhung lamah ka lut zui hmak a, ka bag vel chu lakhawm in nau ka paw ṭha sawk sawk a, pawn lama an la ding khawm tel chu hmu lo ang hmakin kan kalsan zui ta hmawk hmawk a. Thu tam tak sawi a, ka rilru natna te pawh sawichhuah ve phiar phiar ka chak reng; mahse, ka nu aṭanga ka beisei loh tawp thil ka dawn avangin ka na em mai a; ka sawi tur te pawh an bo zo vek.






"Kei pawh ka awm peih lo. Misual awmkhawm zingah chuan thawk ngaihna pawh kan hre ve dawn hlei nem" Diktea'n a ti zui lawng lawng thawm pawh ka hre reng, a ṭangkaipui te ho nen chuan lo awmkhawm mawlh teh se.







In kan thlen thlengin ka ṭawng zui ta miah lova, Bawihtei pawh ka kaih ang angin a kal ve mawp mawp a ni ber. Bawihpuia chhuk tirin an toys ka chhawp nghal vat a, naupang na nâ na chuan engmah ngaihtuah zui mang lo in an khalh nghal mawlh mawlh a. Room ah lut zuiin khumah ka ṭhu thla hnawk a, ka rilru natna te chuan min rawn tuam leh nghal mup mup bawk. Ka phone lo ri ve sek chu ning zetin ka en nghal thuai a, tun dinhmun a ka mamamwh loh ber Hriathlua a lo la ni zui.







Vawi tamtak ka hmeh tawp sak hnuah pawh a la rawn ti nawn cheu a, a tawp chuan ka la ta nge nge a.. "Engnge i rawn call sek a, ka be peih lo che tih hrethiam lo tur khawp in ilo mawl a ni maw?" ka ti nghal tuarh a, amah vanga Bawihtei hmuhsita a awmna lo natpui sa nen; ṭha taka biak chu hla tak a ni.





"Engnge maw i bak hlawr reng le? Ka fate ka be duh" a rawn ti pawr ve hlur a, a harhfim lo leh pek tih ka hre nghal.





"An be peihlo che, nangmah vanga ka fate'n hmuhsit an tawk ṭhin hian ka huatna che a ti zual tawlh tawlh. 'Pa' tih tlak pawh i lo nih hrep loh hi" ka ti leh nghek a, ka ṭawng thawm pawh a zawi lo viau mai. Ka thinrimna zawng zawng chu Hriathlua laka bunruah vek ka tum ni berin ka hria.






"Ka fate nen hian min dah hran tum miah suh, an tan chuan an 'Pa' neihchhun ka ni. Kei aia hmangaihtu an awm lo. Ka dam ve ṭek ṭek chhung chuan an hrehawn ngai lovang" a rawn ti leh phar phar a, ka ner nawk mai.






"I fate tana i sen aia i zu man tur duh zawk i nih kha..... I hmangaih ve dan hi a mak em mai, kan hrethiam ve lo. I dam leh damloh hian an tan awmzia pakhatmah a nei lo, i fate lakah hian mitthi tawh nen in tih a in ang reng; nang chuan natna tam tak ila pek belh bawk. Min rawn be tawh suh ang che" tiin ka dah zui ta hmak a. Ka ṭawngkam chu a mawi lem lo tih ka hrereng nângin ka boruak tawn mek nen ka in sum hleithei meuh lo a ni.






Ka che vel pawh chu ka ni bûr mai, ka thil tih engmah ka tui thei meuh lo. Zanriah kan eikham veleh naupang an muhil nghal a, keimahin ka che zui leh ta mawlh mawlh a. Ka phone rawn ri riai riai chu ka ban vat a, Rsa hming lo lang kalh ka hmuh chuan ka hahdam sawng sawng thei hial in ka hria. Ka la zui ta vat a.






A hun hmandan tlangpui a sawi zawh hnuin kan kalna chanchin te min zawt zui thuai a, a kianga in bunruah ka lo chak tawh bawk a; zawh nawn pawh ngai lovin ka sawi nghal par par a. Ka thinrimna leh ka rilru natna in ka chilh zui nghek bawk. Ka sawi chhung zawngin min lo ngaihthlaksak reng a, "Ummm" a tih bak chu zawhna pawh a neih belh lem lo. Ka duhtawk a ka in sawi thawl meuh chuan ka rilru natna zatve chu bo hmak tawh ang a ni.






"A zialo hle mai a, kal tur khan ka lo nawr ve sek che bawk sia; ka thiam loh tak pawh a nih chu. Engpawhnise, hmalam hun atan bei ṭang ṭang phawt mai teh. Engtikniah emaw chuan an chungah i la lêng anga, an mamawh zawk a i ṭan ni a la awm ngei ang. Hlawhtling taka i awm kha an laka i phuba lakna tur ṭha ber a nih kha" a ti dap dap a. A bulah hi chuan thinrim reng hi a har ṭhin.






"Zothan, harsatna zawng zawng hi vawilehkhatah an bo duak thei lova. Hmachhawn tur tam tak i la nei ngei bawk ang. Chung hun a lo thleng a nih pawhin i hlat ah ka awm ngai lovang, thil zawng zawng ka tihsak thei lo che tih ka hria; mahse, min rin chhung chuan i tan rintlak in ka awm anga. I kianga kal i phal chhung chuan ka kal zel anga, ka vuan reng ang che. Beidawngin in dawmkun hauh suh ang aw, i fate tan an khawvel i nih kha. Chak tak leh huai takin bei zel rawh aw?" tih thu a sawi chuan ka pum in min fanchhuak vek a ni ber.






Rsa hian engang chiahin nge min lo ngaih ve ang tih chu ka hrechiang ngam hauh lo. Mahse, tuna a thusawi kha chuan thil tam tak ken tel a nei tih ka hre thung. Ka thinphu dap dap chu ka dawm vang vang a, ani nen hian eng kawng nge kan zawh dun zel ang tih chu ka ngaihtuah zui vang vang a. Engtiklai pawha beiseina leh huaisena min pe reng ṭhintu hi ka thlah phal tawh kherin ka ring hauh lo. Ka tan a hlu em em si a.







(to be continue........)


Show post links
Top

[Ngaia]

DEAR PAIN
Chapter-28




By: Brigida Hugo







"Awi....ṭhiannu, i vannei e. Chhuah miah suh aw... i tan liau liau a Pathianin a lo ruat sak che aniang" a hmel a phûrna nasa tak lo langchhuak chu ka lo nuihpui sak a, ka biangah te chuan min piai nawk nawk bawk a.






"Awi... khawinge, khatin phi cheng zel suh Laltleipui.... A engamah hma in i lo phur hluai zel. Kan inkarah ṭhian nihna bak engmah a awm lo" ti let vatin thingpui lum turin ka thawhsan nghal vat a. Bawihtei te unau pawh phone en in ṭhutthlengah an mu dun rial a, ṭhian dang hi an ngai lem lo; an unau tê hian an in kawmngeih ve em em reng mai.






"Mipa leh hmeichhia ṭhian a nih reng theih loh. In inbiak dan aṭang khan boruak danglam a awm vat ang. Nangmah i in hung bik hlur na te kha lo ṭhiat lâwk ang che. Hriathlua leh Malsawma ang mai mai a ni dawn lo tih ka chiang" a rawn ti leh zat zat a, chhang let tawh lo in ka nui hak ringawt a.







Ka hun hmasa lamah thil tam tak ka lo tisual tawh a, ka rîk but ṭhin avanga tun dinhmun thleng ta hi ka ni tih pawh a hrechiang ber tu ka ni. Tu emaw ka hmangaih luat avangin tih nat ka tum a. Mahse, a tawpna chu ka beisei loh ang zawngin ka khar ta anih hi. 'Nuthlawi' dinhmun hi ka ta ni ve turah ka ngai ngai lova, tunah erawh chu dinhmun ngei chu ka luah ve ta reng mai. Hriathlua nen kan inzawmna a tawp Ni aṭang khan mipa lam hawiin ka rilru ka dah ngai lova. Amah ah beiseina ka neih reng avanga chutiang rilru pu ta erawh ka ni hauh lo. Hmeichhia leh mipa inkar a 'Hmangaihna' an sawi fo hi ka chan ve tur niin ka hre lova, mahni maia nun hman chu ka tan a ṭha ber a ka hriat tak vang zawk a ni.







Chutih laiin ka beisei loh lamah Rsa a rawn lang a, hun rei lo te chhungin ka in hung bikna kulhbang chu min ṭhiah sak riai riai a, ani nena kan boruak tawn chhoh mek chu a zangkhai in a hahdamthlak hliah hliah a ni ber. A theih ang angin ka tan hun a pe a, min ngaih pawimawh em em reng na chuan min hneh ni ber in ka hria.







Chhun lamah erawh a buai ṭhin avangin nileng a inbiak loh chang te pawh kan nei ve fova; zan lamah erawh chau ve viau ṭhin mah se min biak nan hun a insiam hram ṭhin. Harsatna ka neih leh neih loh min zawt âwl lova, ka lungawi lohna tam tak a hnena ka thlen hian ka dam sawng sawng ṭhin. Min hnemna ṭawngkam khat lek pawh ka tan chuan a thlakhlelhawm em em reng a, beiseina tam tak min neih tir tu a ni reng ṭhin.







Kan inkarah boruak tharlam engmah thleng rih lo mah se kan in ngaihsak tawn tih erawh a lang chiang viau thung a. Kan hmalam hunah engnge kan tawn chhoh dawn erawh ka hre lo. Ka dinhmun vang bawk hian beiseina sang tak ka nei ngam lova. Min khawngaih avangin min puih a duh mai mai pawh a lo ni thei, chu a duhna rilru chu keiin kawng hran a lo herkual in, beiseina dang ka lo nei ang tih chu ka hlauh ber thil a ni.







Ka pa nen pawh kan in be pawp reng a, a hriselna a pan rih em avangin hna pawh a thawk ngai meuh lo. Min ngaihtuahlo tur in ti mahila ka pa kha a ni miau a, a thei dawn lo tih ka hrechiang hle thung. Diktea'n karthar lamah han tlawh a tum a ni awm e. In entir tura kan tih lahin a duh tlat silo a, Diktea a kal theih chuan a rawn hruai thla thei mai turah ka ngai. Ka pa hian hrisel takin rei tak min dampui reng se tih hi ka duh ber a ni.







Zing hma takah tho in eirawngbawl pahin kuhva ka khawih mawlh mawlh a, ka messenger tone rawn ri tlang chu ka en zui nghal thuai a.





"Morning, i mutui em?" tih chu nui sak in ka chhiar a, a chhan letna tur ka type zui ve nghal malh malh a. Zingkar aṭangin nui var varin hun ka hmang leh ta. Ka chhan letna a en mai loh avangin ka thil tih lai bawk ka chhunzawm leh a, Bawihtei school kal a ngaih avangin a tam thei ang ber in hmakhua lawk ka ngai ṭhin.






"Anu, min nghak dawn em?' Bawihtei rawn thochhuak hlimhlawt zawhna avang chuan ka nui sak a. Kar thum zet School a kal ve tawh a, a kal tirh ni ang reng kha a la ni. Ṭhian nei ve nual tawh mah se min hmuh loh chuan a ṭap zel mai si a, 'Fate thlamuanna tur a nih phawt chuan..' tiin an kal chhung chu ka nghak tluan parh ṭhin.






"Ka nghak dawn che Bawihte.... I nau ala muhil em ni?" ka tih chuan room lamah a tlan let leh thuai a, a nau a kaitho dawn a ni ngei ang. Bawihtei a thawh hma theih viau laiin a nau erawh mut a duh viau thung.






Chaw eikham ve leh thleng pawh sil hman lovin kan in siam nghal chûk chûk a, an unau chaw ei chhung rei ṭhin lutuk hian hun min paihsak leh duai ṭhin. Kan chhuah hma khan Rsa'n min rawn bia a, a buai leh viau dawn tih a rawn sawi chu ka ringhlel hek lo. Mahni intodelh tum ran reng mi a nih avangin mi nawlpuiin kan en liam mai ang hi atan chuan thil pawimawh an ni vek reng mai.






School kan thlen hma deuh in min tawk zawngin ka nu a rawn phei hnak hnak a, a lang pawr deuh fap chu mak ka ti deuh. Chîk deuh zawk a ka en laiin ani pawhin min rawn hmu ve chiah a, ka hawi sawn zui nghal thuai a. Min ṭawngkhum hrep Ni aṭang khan ka la tlawh leh ta lova, ani pawhin engnge kan an tih hre tur pawhin min rawn be bik hek lo. Ka rilru natna kha a thuk ve em a, min mamawh lo lutuk anga a awm tlat hian ka chhungril ah natna thuk tak min pe a; hriatreng loh tum mahila ka ti hlei thei meuh lo chu a ni.






"Bawihte, School i kal dawn em ni? I va mawi ve. Bawihpuia pawh chu i va fel ve aw..." a rawn ri teh luam a. In be miah lova kan in pel mai tura ka ngaih laia ṭawngkam nem tak mai nena Bawihtei te unau a rawn be ve nawlh chu mak tih tham a tling. Bawihtei chuan ṭha takin a lo chhang nghal thuai a, kei erawh ka ngawi reng thung.







A bag hai rak rak in Rs. 500 note a rawn lek chhuak vah a, "Hei hian an eitur i leisak dawn nia" tiin ka kutah a rawn hmehbel zui zat a, "In lamah min nghak sia, ka va haw vat ange. Bawihte, ṭha deuhin lehkha zir ang che aw?" ti zui leh puatin a kal zui dawr dawr a, a chetdan in min tih hamhaih em avangin a liam thlengin ka thlir zui vang vang a. Ka nu mize danglam reng mai hi a chang chuan ka hrethiam lo lek lek ṭhin a ni. Bawihtei'n ka bana min pawh dat dat takah chuan harhchhuak zawkin kan kal zui ve leh ta thuai a.







School kawt a Bawihpuia tlan kual pap pap reng chu ka veng pah reng a, tluk mai mai a hrat avangin a ninhlei ve deuh hi chuan ka en zui reng ṭhin. Ka phone ri chu phur zetin ka en zui vat a, ka rilru in beisei ruk a lo neih vang a ni mahna; min rawn phone tu hming ka hmuh chuan ka ner nawk a, ka ak ṭha leh ta daih a. Hriathlua hian a fate chhuanlam a mi rawn biak teh hi a tum fova, ka laksak duh ngai lem lo thung. Ani nen sawidun tur kan nei tawh lova, a thiam zawk nih tum a mi puh let a tum ngar ngar hi ka huat tawk a tling em em a ni.







Office ah tui in turin kan lut a, zirtirtute hian min duhsak em em reng a. Hrehawm kan tih hlau in ṭawngkam ṭha tak takin min dawr reng ṭhin. Keini nufa za chunga an ṭha em em reng hi mak ka ti zawk hial ṭhin. Ka phone bawk chu a rawn ri leh a, phun hlak chungin ka en zui leh thuai a; ka number save loh anih avangin 'pawimawh a awm aniang' ti rilru chungin ka la zui ta vat a, a reh hmuk avangin ka phone chu ka melh leh hê haw a.






"Ka call i lak duh miah loh le, min biak pawh chu i va hreh awm ngar ngar ve?" Hriathlua aw pêr chhuai chu ka hre zui ta thuai a. A mak ṭang ṭang mange.






"Biak chhan tur che ka nei hlei nem maw le" ka ti let ve hlar a, Bawihpuia kaiin Office aṭangin kan chhuak zui ta thuai a.





"Ka fate pawh ka biak i phal lo ania, i nunrawng kher mai a" a rawn ti leh chu ka nui hawk mai, a nihna reng mi puh let a thiam lutuk hi mak ka ti.





"A nih chu, mahni hi in en let nachang hriat tur a nia" tham lo deuhin ka ti leh ve nghal zat a.





"Bawihi, lo haw tawh ula... Ka ngai tawh che in ka mamawh takzet che. Kawng tinrengin ka mamawh che. I pangti lum ka dek leh chak tawh" a rawn ti sup a, ka rinloh lutuk lam thil a sawi ta daih chuan min ti hamhaih letling.





"I va zaktheilo tak e aw.... I mamawh apiang pe tur che in ka piang love" ka ti chang fak a, a nui ri huk te chu ka ngei hluah hluah mai.





"I lo danglam ta hle mai. I mi tawn thar chuan kei aiin nawmna a pe tam zawk che em ni? Ka bul a hun hman nge ani bula khawsak kual vel chu nuam zawk a?" a rawn ti leh kher chuan ka dawhtheihna a ṭhiat darh leh ta.





"Ngaithla rawh... Hriathlu. Mi zawng zawng hi nang ang an nilo a nia. Ka tawn thar lam chu engtin chiah nge i lo hriat ve ka hre lova, ka ngaihven hek lo. Ani chuan nang ang lo takin tisa thil ringawtin min hmangaih ve lo. Nangin a min ngaihnep em em lai hian ani chuan ka tana ṭha tur kawng tinrengin a ngaihtuah ṭhin. I rilru bawlhhlawh zet ang kha a pu ve hauh lo ania, a nê pawh i ek love" ka ti let leh fak a, min ngaihnep hmel zeta a nui ri huk huk chu tenawm lamah a kal.






"Kan lo thlir aniang chu. Nang nuthlawi mai mai kha nawmchen nan bak a duh lovang che. A duhtawka a chen zawh hunah che a la kalsan mai ang che. I inchhir hma leh i nat hma in lo let mai rawh" a la rawn ti cheu nia.






Rsa nen kan inbiak dan te leh ka chunga a ṭhat zia te ka ngaihtuahin Hriathlua'n a rawn puh chhe ve nghal ngawt chu ka run kher mai. "Nang anga hmeichhe mamawh huam huam a ni ve love. I lo en dawn nia" ti hmakin ka dah zui ta daih a.







Kan inbiak hmaa ka mood nuam zet kha a chhe zo leh ta vek mai. He mihring lakah hian hlimna hmuh tur a awm ve ngai thlawt lo a nih hi. Chutih rualin Rsa nen kan inkar ka ngaihtuah a, 'ṭhian' hming chu kan in pe ve ngei a, chu aia thui zawk inzawmna sawi tur kan nei hauh lo tih ka hria. Ka tana a inhuam zia ka ngaihtuah chuan 'ṭhian hlu ber' a ni tih ka hrechiang hle thung. Ka ngai veng veng ṭhin erawh hrehawm tih chang ka nei fo mai.







Diktea zin tur thlah turin Sumo Counter lam kan pan a, ka thlah kher a phut miau si a; bawr ṭeuhin kan kal a. Kalkawng tluanin ka pa hnena a thu thlen dan tur leh ruahmanna a neih ang te a sawi mawlh mawlh a, Taxi Driver chuan mak ti hmel a pu deuh ṭhin tih ka hria. Kan chhungkaw awmdan hi tu tan pawh mak tih tham a ni ngei ang, kei ngei pawhin mak ka ti ṭhin. Tun hmaa kan chhungkaw awmdan leh kan tun hun boruak chu khaikhin ngam pawh a ni lo. Mampuia mize danglam ta lutuk te hi a chang chuan ka natpui vawng vawng ṭhin. A lakah beisei ka neisan em vang te pawh a ni mahna.







An tlanliam thlengin kan thlir zui a, ka pa chu inentir a duh theih nan theihtawp chhuah turin ka chah lawm lawm a. Kan chhuak ta sa sa tiin bazarah kan kal kawi a, ka fate ka chhuahpui tam lo bawk a; nuam an ti kher mai. Min ko ri ka hriatna lam chu ka hawi thuai a, Nu Muani kan lam pana rawn kal hlak hlak chu ka hmu nghal thuai a.






"Awi...Zothan, in hmuh a va khat ta ve? I ngaihawm ṭhin reuh mange. I fate em ni?" tih pahin Bawihtei te unau chu a nuih var var a, nui var var chungin ka lo bu nghat nghat a.






"Hun i neih chuan thingpui in lawk ang u, hrilh tur che ka ngah nasa a nia" tiin a hawi kual nghal that that a. Kan hmanhmawh lem lo bawk a ka hnial duh lem lo. Thingpui dawr lam panin kan kal zui ta thuai a.







Kan chhungkaw chanchin te min zawt luam a, a hriat atana ka duh chin chu ṭha takin ka hrilh zui malh malh a. Nu Muani hi chu kan in hrechiang ve bawk a, khawiahmah a sawichhuak dawn lo tih ka hrechiang viau bawk, uluk takin a lo ngaithla kar a.






"A pawi ngawt mai, tun hmaa in chhungkaw boruak a nawm theih tehreng nen. I pa pawh chu inenkawl vat thei se a ṭhat chu maw le. I nu mize danglam ta lutuk hi mak ka ti fo ṭhin. Tun hma kha chuan kan dawr awmna lai bawr velah pawh inkawm bik ṭhin kha kan nia, tunah chuan biak pawh kan in be ngai ta meuh lo. In dawr pawh saw lûn tawh lo tak a ni. Mi chi hran hran an lengkhawm a, an khat mup mup reng mai a. In monu in dawr a nghah ve ni phei chuan a chhungte rawn kal in an duh duh saw an la ni maiin ka hria. Ka lo sawi ve tur chu awm miah lo mah se an awmdan hi ṭha ka ti lo. Sawtiang ringawt chuan eng ruai an ang lo tawp ang" a ti zui barh barh a.






"Ka nu leh pa inṭhen aṭang hian engmah hi a kal fuh thei tawh lo. An inṭhen chhan pawh hi chiang tak pawhin ka hre lo, ka nu hi a thiamlo zawk a nih ngei erawh ka ring a. Tunah phei chuan kan lo indang ve tawh a, engmah va sawi theih ka nei tawh lo. Rilru chuan vei ve em em mah se tih theih ka nei miau si lova, an awm ang ang a lo thlir liam ve tawp hi ka theih tawk a nih tawh mai hi maw..." ka ti ve sap sap a, kan bul velah ṭhu ve an awm nual avangin kan ṭawng pawh a zawi dun kher mai.







Bawihtei te unau thil ei nghah pahin thil tam tak kan sawi dun a, ani pawh a fapa naupang zawkin a lo boral san a ni awm e. A hmel lang tar bâwih te chu lainat zetin ka en leh vang vang ṭhin a, rilru hah hi mihring hian kan lo haw ber anih dawn hi. Kan nufa chuan chaw ei ah te min sawm ve bawk a, hun ṭha a awm veleh a kan tlawh tur thu in ka lo chhang zui ve thuai a. Dawr hawng tur a la nih ve chauh avangin kan chhuak zui ta thuai a, in be leh tura in tiin kan inṭhen zui ta a.







School chawlh ni hian ka buai a zual ṭhin. Nitina Bawhtei hruai ka ngaih ṭhin avangin insuk tur pawh ka khawl rem rum fo. A hlawm in kartawp ah ka su a, ka hna khawih tur lo awm ve nen ka chau hnawp zel. An unau in ka bualfai hmasa a, chhuatah pher phah sakin an khalh tur ka bun khawm sak ruih a. Ka phone rawn ri tlang tlang chu rang takin ka pan zui vat a.






"I buai viau em? Ka be chak tawh lutuk che a" ka lak rualin Rsa'n a rawn ti zui nghal zat. Tunlai tak hi kan in be mumal meuh lo. A hna pawimawh ah a zin kual deuh reng a, kei ka lo buai ve ṭhin bawk nen; message vela chanchin kan in hrilh ṭhin tih loh chu kan inbe khat viau mai.






"Ka buai nasa lo, engnge i hna lam te a an a?" ka lo ti let thuai a, buai viau pawh ni ila hun ka in siam tho ang; ka be chak ve em em reng si a.





"Ka zo fel deuh duak tawh e, ka tluan chuan naktuk velah chuan a fel maiin ka ring" a rawn ti zui dap dap a. A thil buaipui mek hi sumdawnna lam thil a nih avangin a hmanhmawh chûk theih lova, tluang takin ti thei se ka lo ti ve em em ṭhin.






"Engnge an pa lam te? A rawn ri leh luam tawh em?" nui huk huk in a rawn ti a, min perh zeuh nan tak hian a hmang a, ka haw lem lo thung.






"Ri chel chul e maw le, a ninawm tak tak a ni. Ṭha zai a inbiak awm bawk silo, min rawn biak hnuhnun ber phei chuan ngeiawm tak hi a ni ringawt" tiin kan inbiak dan te chu ka sawi zui ta duah a, engkim hrilh hi ka chak zek zek zel ni maiin ka hria. Uluk takin min lo ngaihthlaksak leh dawn tih ka hriatchian vang te pawh a ni bawk ang.






"A zia lo ṭhin hle mai. Engpawhnise, nangmah kha chiang la. I fate pa a ni a, han tihchhiat em em theih lohna chin a awm ang. Mahse, i zahawmna tichhe tur lakah khan in veng thiam la. Thil tam tak sawiin kan in hrilh ve ṭhin kha maw!! Ka sawi zawng zawng kha a dik vek bik e ka ti lova; mahse, ka lo tawn tawh aṭangin thil tam tak hi ka pal ve a. I zahawmna humhim pui che leh dinhmun ṭha zawk a i din ve theihna tur hi ka duh ber a ni" a rawn ti zui leh dap dap a, ka hahdam sawng sawng ṭhin. A ṭhianten an rawn koh tak avangin laklawh deuhin inbiakna kan ti tawp a. Pangngai taka inbiak na hun kan nei pawh chu ka hlimpui tawk a tling leh viau mai, mi ṭha tak hi chu a ni chiang a ni.







Zanriah eikhamah Diktea'n min rawn bia a, a thlen tluan thu leh ka pa pawh a tum aia a hmuh ṭhat thu a sawi a; ka thawveng huai mai. Naupang infiam chau ṭhutthleng ah an mu hle hle a, mu hma se ka tih avangin ka be harh duh lem lo. Bawihpuia kum khat a tling hnai ve tawh a, ropui takin lawm sak thei lo mahila a mawi tawk tal a lawm sak ve ka duh avangin ka in khawl ru ve keuh keuh reng a. Tleipuii'n 'Amosa Birthday Cake chu ka siam kan hmang ang' ati mauh mai a. Vawikhatmah la siam ngai lo khan engtin chiah nge tih a tum ka hrethiam hauh lo; ka hriat miah lohin a lo in zir a ni mahna. Ka hna tur chhawp chhuak in phone ah naupang thawnthu ka ngaihthlak tir a, reilote ah an muhil leh thuai dawn tih a lang reng mai.







Panhnah ka rool zova, ka kut te pawh an chhe zo tawh. Kuhva rah ka inchhawp leh mek laiin ka phone a rawn ri a, Rsa a nih ka ring nghal hmiah. La kang vatin ka en a, number chu ka hre ngai lo. Lak loh ka tum uk tawh nangin, secondhand zawrh chhawn tur nei ka biak te kha an nih ring leh deuhin ka la zui ta vat a.





"I dam maw? Naupang an ṭha em?" A 'Aw' aṭang chuan tunge a nih ka hai lo nasa mai. Malsawma ani





"Ka dam, engnge i duh?" ka ti bûl hmak a, ka beisei loh ber a ni tlat alawm.





"Duh ka nei hran lo, ka be chak che a. Khawilai takah nge in awm? Lo len ve te pawh ka duh" a rawn ti let leh vat a, a ṭawngchhuak a dam thlup mai.





"I hriat kher a ngai lo, rawn len pawh a ngai bawk lo. Pawimawh a awm loh chuan ka dah ange" ti a hmeh tawp mai ka tum chu a thil rawn sawi leh avang chuan phone chu ka beng hnaihah ka dah leh vat a. "Sawi nawn leh teh" ka ti chang nghal fak.





"Min hua ang taka lan phet hi tum suh, ka hrechiang che em mai. Khati khawpa min atchilh tu khan engtinnge min huat theih tehlul ang ni?" a rawn ti nawn leh sup a, zakthei lo ka va ti mai mai tak.






"Nangmah vanga hmalam hun chhe vek tawh kha... Nangmahni ang mipa laktlak loh vang bawkin huaisenna leh tawrhchhelna a nei tawh. Kan hun kal ta avanga thlah thei lo che angah min ngai anih chuan i tisual viau ang. Ka rahbi ṭan tharah hian ka mamawh miah lo che, nang chu ka nunhlui i ni. Piang nawn leh thei ni ila, vawikhatmah ka thlan nawn leh tawh ngai loh tur zingah i tel. Vawikhatmah min rawn be tawh suh" tiin phone ka dah zui hmak a. Tunlai hi engatinge maw ka hnuchhawn tawh lam te an rawn lan sek ni? Ka dinhmun hria in min zuam viau pawh a ni mahna. An mi ngaih ang mai mai ka nihloh zia hi hmuhtir ngei ka tum ruh tlat bawk.







Pathiani a ni a, kan nufa ho in inkhawm turin kan in zui chhuak ve a. Kan indan tirh khan kan thangmawi lo em a, Kohhran lamah thlengin ka tlangnel lo zo vek kha ania; Inkhawm pawh kan thlahthlam zui ta viau a. Ka fate'n nikhua an rawn hre chho ve a, nu leh pa kara an awm loh pawh tih naklaia Kohhran bel lo lutuk a an seilian tur ka ngaingam lova. Mi min sawi sepna te chu haider lui hram hramin ka tuang ka ti chhah lui a, Biakin lam chu ka pan pui ve leh ta chu a nia.







Mi nawlpui zinga kan han khawsa leh ṭan chu mihring hi kan makzia ka hrechhuak uai uai mai. Kan tana ṭangkai miah lo pawh kan lo sawi peih zia te chu a tak ngeiin ka hmuchiang hle. Ṭhenkhatin thudik hrulah dawt an lo phuah belh a, a sawichhuak hmasa tu te sawidan leh an phuahchawp inbelhkhawm chu nasa tak a ni tawh ṭhin. A boruak tawng tu te ngei pawhin kan hriat miah loh thil te chu kan tih te a lo ni leh reng mai ṭhin a. Mahse, chutiang avanga ka fate nun bo lutuk tur chu ka phal hauh lo. Anni min sawina mai mai ai chuan ka fate nunkawng hi ka tan chuan pawimawh zawk tak a ni.







Inkhawm chhung zawng chu pawn lamah hun kan hmang a ni ber a. Bawihpuia Inchhung lamah a awm duh tlat lo. In lama tâp mai mai ai chuan Biakin hungchhunga awm pawh a ṭha reng reng e. Mahlimi te nufa pawh an in um zui ve dâr dâr reng a, kam khat mahin kan in be lo thung. Ka vahpa che vel chu a rukin ka thlir reng a, naupang duhawm tak a ni.







Chhungkaw pangngai tak kha la nei ila chuan in pawhna ṭha zawk nen hun kan hmang ngei ang. Ngaihtuahna a vak thui leh dawn tih ka hriat avangin ka fate awmna lam ka pan zui ta vat a, kan tun hma hun ka ngaihtuahna hian min ti na vawng vawng fo mai. A theih hram chuan ngaihtuah let loh na tur hi ka dap ruai zel a ni ber.







Inkhawm ban rualin kan haw zui thuai a, ka nu leh midangte hmuh ka peih loh vang a ni pakhat bawk. Mi hrang min sawina hi chu ka pal liam thei mai a, thisen zawm te nen ngei maia in do ruk ṭhum hi a hahthlak ka tih ber a ni. Tlawm hmasa zawk niin boruak siam ṭha tu nih duh mah ila, keimaha chapona awm ve hian a thei bik hauh si lova. Dinhmun en a engmah lo pawh hian chapona chu hneh har kan lo ti ve em em reng tho a nih ber hi.







Ka fa te eitur ka siam sak a, Sunday hi chuan thil tuihnai ve deuh hlui hram ka duh ṭhin. Thil man te a sang tawh a, mi ei nang zawng chu ka pe thei lo. Mahse, ka theihtawp a ka tihsak aia hlimna hi ka nei chuang bik hauh lo thung. Nghakhlel takin dawhkan kîl in an lo ṭhu dun ran a, an duh dan te an lo sawi ve niah niah reng bawk a. Kan nufa maia chim buai tu nei lova kan awm hian kan lo hlim tlang ber mai in ka hria.







Kan in eipuar hnu lawkah Rsa'n min rawn bia a, nimin lamah khan a lo let leh tawh a; a chauh deuh avangin nizan lamah pawh chanchin kan in hrilh zuai bak kan in be zui ta lo kha a nia. Sawi tur neuh neuh kan ngah duh leh hman tawh viau ang.






Rinlawk ang ngeiin a zinna lam chanchin a sawi zui ta mawlh mawlh a. A nuna bet tlat 'Chetchhiatna' pawh a nei leh ngei e. Mittui tla phunga ka nuih laiin thudang a rawn sawi ta daih a, chu erawh chuan nuihza a ti tawp chiang kher mai.






"Zothan, kan pahniha bul ṭan hi i duh em?" ti a min zawhna chu chhan mai ngaihna hre lovin ka ngawihpui vang vang a, a lak aṭanga ka beisei ngam loh a nih avangin ka hamhaih a ni zawk mah.






"Min chhan a har viau aniang maw? Ka sawi loh tur ka lo sawi palh a nih chuan min hrethiam la. Mahse, hei erawh hria la ka duh. In zawmna mumal tak neih a i kianga kal ve reng ka duh" a rawn tih zawm leh a, ka ṭek chuai thei in ka hre hial.






"Rs, ka dinhmun i hriat kha. Nang chuan nula hnahkhat pawh i hmu dawn lutuk. Min en ta che, nuthlawi a kara fa pahnih pawm; engtiklai pawh a buai reng reng a hun hmang ka nih hi. I lungawina tur khawp hlimna ka pe ve thei dawn hauh lo che tih i hriat kha" ka ti let sap a, chumi ka sawi laia ka chhungril mangan ruk zia chu tuma'n min hriatthiam pui kher lovang. Ani ang mipa in nghahna tlak leh ka tana hlu em em beisei ngam lo tu dinhmun khirh zia chu...






"Dinhmun vanga in zawm tur ni ila, ka nunhlui tam tak i hre ve bawk. I dinhmun avang khan in sit ngai suh ka tih fo kha. Tumah hi duhdan leh beisei angin a awm theih loh. Kan nun hi dik se engkim a tluang a ni mai. I nunhlui chhe ber thlenga theihnghilh tir vek tu che nih ka duh a, i hmalam hun atana i rinchhan tur nih ka duh bawk. Thil sawi liam puat lo khan in ngaihtuah la aw, tunah i thuthlukna min hrilh nghal turin ka ti dawn lo che. Uluk takin in ngaihtuah la, i chhanna ka lo nghak reng ang" a rawn ti dam leh dap a, ka hnuk a ti ulh lek lek zawk. Hetiang em em a mipa fel leh ṭha hi an lo piang ve reng chu ania. 'A nunhlui ami te khan engtinnge an kalsan phal zawk chu aw....' ka ti rilru vang vang mai.







Thildang sawiin titi dang a vawrh ta daih a. Ka rilru a buai dawn hle a ni tih a hrethiam aniang, thil hlimawm lam sawiin a nui hak hak reng a. "Hmuh pawh kan la in hmu si lova" tiin thudang ka lo sawi leh daih thung.






"Kan in hmu dawn alawm. Naktuk zanah rawn tlawh che ka tum. Chutah chuan i chhanna hriat ve ka duh ang aw? Ka nawrlui lo che a nia, mahse ka duh takzet che tih erawh theihnghilh lo la" a rawn ti let leh thuai a, 'Naktuk zan' tih hlir chu ka bengah a ri nawn tluk tluk a, ka mumang ang riau ten ka hre hial.







Rei in be zui tawh lovin kan ti tawp ta thuai a, kei erawh ka phi nghal cheng mai. Ka mu tawh chu ka tho leh hluai a, tih tur ber hre lovin ka thawmhnaw bawm te chu ka hawng leh ringawt ṭhin a. Ka nuna hun danglam lo thleng mek chu lo dawnsawn dan tur ka hrethiam chiah lo. 'Kan in hmuh hunah chuan engtinnge chhanna ka pek ang?' tih ngaihtuah in chhuatlaiah chuan ka tei kual sek reng a....








(to be continue........)


Show post links
Top

[Ngaia]

DEAR PAIN
Chapter- 29




By: Brigida Hugo







"Anu chu i va buai em em.. tinge a?" Bawihtei'n min en hâ chunga a tih takah chuan ka kal kual sek lai chu ka ding chawt a, ka thaw hawk ringawt.






Ka phili chiam pawh hi ka in dem hran lo, Rsa rawn len a tum miau alawm. Kawl ên tirh ah ka thochhuak a, ka helhhawlh vangin ka muhil thei meuh lo a ni mah zawk. Inchhung ah bal hnawk alo awm palh ang tih hlauin ka che zui nghal zung zung a, thawhphan pawh ka nei hman lo. A lo len laia buaina dang neih ka duh loh avangin ka hna pawh eirawngbawl pahin ka khawih zung zung a, zan lama ka lo in hmakhua lawk tawh bawk avangin ka zo ta thuai a.







Phone kaltlangin engkim kan sawi a, kan in nel em em tawh. Mahse, kan vawikhat in hmuhna tur a nih avangin ka zam chhe hneh kher mai. Chaw eikham ve leh ka fate ka bualfai a, room lamah an in awmtleina tur dah sakin kei ka in buaipui chhunzawm ve leh nghal zung zung a. Darthlalang hmaah thawmhnaw tam tak ha in ka in en kual a, in chei vur anga lan ka duh silo, awmhmun inthuamna ang tawpa lo hmachhawn lah ni thei chiah in ka hre bawk silo. Ka thawmhnaw bawm te chu an ruak huai tawh a, khum lamah erawh a vum hnuk thung.







A tawpah chuan kawrfual rawng hmuh nuam deuh tur chu ka thlang ta a, ka hmai lamah ka buai chhunzawm leh nghal. Hmeichhe make up in bel tam lutuk a ngainat ngai loh thu a sawi fo avangin engmah in hnawih loh aiah tiin Sunscreen leh lipstick tlem te in ka in hnawih a. Zan lama ka men rei ṭhin avangin ka cher deuh kuam a, ka lang ṭha tehchiam lo kher mai. Ka hmai a lan sin lutuk loh nan tiin ka sam chu ka bawk khawm ta vek a. Chutianga ka phi ruai mai chu atthlak ka ti ru viau nangin, ka awm hle hle thei chuang silo. Ka chhungril aṭanga min hnawh up up tu lah chu ka ti bo hlei thei hek lo.






Ka phone ri ka hriat veleh ka pan thuai a, Rsa call a lo ni. Rang takin ka la a, ka thawmhnaw te chu a bawmah ka theh lut pah nawk nawk bawk a.






"Ka lo chhuak chiah e, in veng ka rawn thlen hunah ka lo be leh dawn che nia" tiin phone a dah zui leh ta daih a, ka khur ti tih deuh ngawt leh nghal. Bawihtei chu in leng kan neih tur thu ṭha takin ka hrilhfiah a, awmdan tur pawh ka hrilh tam hman viau mai. A nau erawh hrilhfiah vakin awmzia a la neih loh avangin a awm anga en tawp a ngai thung. Room lama awm an duh zawk avangin ka chhuahsan a, ṭhutthlengah chuan ngil auh in ka va ṭhu ta ngawt a. Ka sa pup pup reng mai chu tih reh theih ka chak hle bawk.







Kawngka kik karh karh thawmah chuan ka ding hluai a, kan In kalkawng kha Video Call in kan in hrilh ta ngawt kha a nia. Lo han hmuak kual vel tur khan chhuah ka harsat bak ah ka huaisenna in a ngam thlawt si lova. Kawngka rawn in hawng riai riai chu ka lo en kar a, ka lungphu chu a chhuak mai ang tih hlauhawm khawpin a phu rang bawk.






"A va lum ve le" tiin a helmet khai lai chu dawhkanah a dah zui zat a, a racksack ah lai chu la thla in a hawng zui rak rak a. Kei erawh ngawi rengin ka din dan ngaiin ka lo la ding reng. Ka ka te chu a ping ta vek emaw tih turin ka chip hmak a, ka awmdan chu duhlo viau mahila sawi tur ka hre lawk si lo.






"Khawnge naupang te chu? Hei hi an duhzawng a ni angem aw..." tiin eitur eng eng emaw a rawn phawrhchhuak ṭun a. A hawi kual deuh vat vat bawk. A mitmengah chuan a zam ve tho a ni tih ka hrethiam. Mahse, ka lo awmdan teh hû avang zak lo thei zawk ah a ṭang hram niin ka hria. Keipawh in ti huaisenin Bawihtei te unau chu ka ko lang lang a, rang takin an rawn tlanchhuak zui ve nghal zat a. An la hmelhriat ngai loh an hmuh rual chuan kei ang tho in ka bulah an rawn ding ngawi ve nghal ngal mai. Kan nufa khawvel chu zâmna hlirin a khat a nih ber chu.







Mi puitling tih takah Rsa chuan a be nghal seuh seuh a, a thil lo ken te pe in a hmel hlim sarh a hmuh reng bawk. Chutianga be reng tu na nâ na chu ka fate pawhin an nel ta thuai a. A rei deuh hnu ah erawh eitur kengin room lamah an lut zui leh ta daih a. Kan pahnih chauha kan ṭhudun boruak chu a uap churh ni mai in ka hria.






"I va ṭawng duh lo em em. Ka hriat ṭhin Zothansangi kha chu ṭawng duh leh nui ring thei tak kha a ni sia" tiin min fiam zui zat a, ka nui ve ta hak hak a.





"A zahthlak ve alawm" tih pahin ka melh zauh a, chiang zeta min lo en reng avang chuan ka hawi sawn leh rang kher mai. 'Zahna hian kum a lo thliar lo a nih hi' ka ti rilru neuh neuh a, ka awmdan chu mawl ka in ti viau bawk.







Ka pa chanchin te, ka nu te lam nena kan boruak te min zawt luam a. Keipawhin tih chûih chûih ka tum tawh bik lo. Phone a sawi vek sen loh thil tam tak awm te chu ka hrilh ve nghal malh malh a. A hmel ka en chuan ka thusawi a ngaihthlak uluk zia ka hai hauh lo. A mitmeng thûk raih leh a ṭawngka chhuak dam thluam te chu thlamuanpui tham an ni in ka hria. Mipa hmelṭha uchuak tia sawi tur a ni hauh lo; mahse, a hmelah chuan lungawilohna hmuh tur a vang hle thung a. A pian pawh vantlang chunglam tia sawi tur a ni hek lo, kei ai erawhin a sang zawk fe tho mai. Mihring chu kan landan mai aiin kan nungchang leh mize put hmang hian min lo chawi ber mai a lo nih zawk hi.






"Zothan, thil pakhat ka zawt ang che aw?" Fiamthu a sawi kara thutak ngala a rawn tih takah chuan ka nui lai tawp hmakin ka en ta rân a, chiang zetin min en ve ngar bawk. "Kei nena bul ṭan hi i duh em? Min ring zo angem?" a rawn tizui leh a. Sawi ring lo mah se ka bengah chuan ri ring tak a ni. Hmaichhanah a ni bawk a, a thutak zia lah hai rual a ni lo. Chhan let mai dan tur ka hriat loh avangin ka ngawi rauh rauh a. Ka ngaihtuahna ah ka fate an rawn lang hmasa ber bawk. Rsa ka rinloh vang ni hauh lovin, 'an pa ngei pawhin a hmangaih hleih theih loh ka fate hi a thisen pakhat pawh tel lo hian hmangaih takin a pawm ve thei angem?' tih chu ka in zawhna hmasa ber a ni.







"Rs, keimah chauh ka ni lo tih i hriat kha. Ka fate hian kei lo chu neih an nei lo. An tan nu leh pa ka ni a, kawng engkimah min mamawh em em bawk. Ka rin loh vang che ni lovin ka fate hma hun hi ka ngaihtuah a ngai si a" ka ti let ve sap a.







"I dinhmun engkim ka hria, chuti chung pawh chuan ka ngaihtuahna aṭang hian ka dah hla thei ngai lo che. Mipa ṭha ber ka ni hauh lo ang; mahse, i fate erawh ka en hrang ngai lovang. Min en ta che, fahrah nun pal zo ṭhak ka nih hi. Tumah hmu hniam a enhrang thei dinhmunah ka ding lo tih i hriat ve tho kha" nghet charh in a rawn ti ve leh a, a thusawi chu ka ring thlap. Mahse, keimaha hlauhthawnna awm tlat hi vawilehkhata bo duak thei a ni bik silo. Ka nun lo pal chhoh tak te khan min lo thunun hneh hle a ni tih ka hre thar uai uai mai.








Ka rilru chhungril ber aṭangin hnar hauh lo mahila a taka va chetchhuah pui nghal mai tur chuan ka inpeih tawk lo a ni ber. Ani pawhin min hrethiam em em a, sawi zui duh lovin thu hlimawm lamah a pakai ta daih a. Lo in ngaihtuah tur erawh chuan min chah ngun hle.







Nilengin boruak nuam leh zangkhai tak nen kan inkawm a, ka fate pawhin an ko lauh lauh tawh. Mi tumah nel ngai mang lo kha an nia, a dawr dan tawk a thiam bawk a; an bawh chûk chûk reng a ni ber. Tlai lam eirawngbawl hun hma deuhin min hawsan ta a, hun remchang a neih apianga min rawn tlawh a tum thu a sawi lai chuan ka lo hlim veng veng. A bula awm hahdamthlak zia ka hre hneh bawk a, hun remchang nei deuh reng mai se ka lo ti hmanhmawh bawk.








Diktea zin pawh a lo haw tawh a, ka pa erawh inentir tur in a rawn hruai thei ta chuang lo. A dinhmunin ṭhat lam a pan ve zel bawk a, ngaihchan rih atan tiin kan sawipui zui ta lo. Diktea chu an result chhuakah a ti ṭha pawl a ni ve hlauh bawk a, hna pangngai ve deuh ngaihtuah ve a rilruk ṭan bawk. Kawng engkimah min ngaihtuah em em reng a, hna ṭha zawk a lo nei ve ta abnih pawhin kan nufa tan theihtawp chhuah a tum zel thu a sawi chuan ka hnuk a ti ulh chiang kher mai. Ka nuṭa te ah pawh ka beisei loh zawkin heti khawp a min buaipui hi mak ka ti fo bawk.







Ka nu a damsam meuh loh avangin min rawn bia a, test chi hran hran an tih hnu ah pawh awmzia a nei hlei thei meuh lo. A lakah han lungawilo ṭhin viau mahila Nu te nge nge chu thinlungin a hmangaih tlat si. Bawihtei School ban veleh an In lam kan pan zui nghal a, ka phur fahran lo kher mai. Boruak chhe tak tak hnuaiah vawi tam kan in ti thiam lova, ka rilru nat vawng vawng chang lah a tam. Mahse, eng emaw thut lo thleng ta se ka inchhir reng tawhna tur thil ka lo ti palh ang tih hlau in ka pan leh hram zel chu a nih ber hi.







Kan va thlen chuan an lo reh diak a, tumah hmuh tur an awm lo. Ka nu mutna lamah chuan kan lut zui nghal a, khumah zangthal a mu in sermon a lo ngaithla a. A mit a chhin tlat avangin a muhil niin ka hria, ka pan hnai thuai a. A hmel tla ve deuh kuam te chu a inhmeh lo ka ti ngawih ngawih. Ka nu hi nu hrisel leh na zen zen lo a ni a. A hmel pawh a mawiin in tuaihnum a peih bawk a, a nalh zak reng ṭhin. Tun dinhmunah erawh chuan a na ve hle aniang, a hmel landan aṭang ngawt pawhin hai chi rual a ni lo. Khuma a mu bâm te chu ka lainat ru ngawih ngawih mai.






"In lo thleng maw..Bawihtei chu engnge a an ve tawh?" a rawn ti sap a, a lo muhil miah lo a nih hmel....






"A fel ve tawh lutuk. In hruai rei kan ngai tawh lovang. Khawnge Mahlimi te nufa an awm a?" ka ti nghal thuai a.






"An In lamah an leng phei aniang, an awm hman reng reng lo mai. Nawmsam loh ve pawhin an len an ṭhulh chuang hlei lova. Mampuia lah in khap a tum bawk silo, hetiang te chuan an awm leh awm loh a in ang reng. In dan tir ila aṭha ang" a ti zui hlak hlak a, kei erawh ka ngawi reng thung. An inkarah sawi ve neih ka tum lova, ka hming a rik tel ve theihna tur chi reng rengah chuan in ven kar tawh ka tum bawk.







Ka nu chuan thil tam tak a sawi a, a hma a ka lo hmuhfiah daih tawh kha a hmuthiam ve ṭan niin ka hria. Mahlimi in lulin zia a sawi uar hle a, Mampuia nep zia thu in a chilh hnan hmak hmak bawk. Tuna an khawsak ho dan thlir chuan chhungkaw phuisui tak din a beiseiawm loh kher mai. Chhungkua ni ve si a rilru hran ṭheuh put te, mahni thu chauh ngaipawimawh rân a midang ngaihdan lak nachang hriat miah lohna te hi chhungkaw tlakranna bul ber pakhat a ni tih chu kan chhungkua ah hian a lang chiang reng. Mahlimi pawhin sawi tur a nei ṭeuh tho in ka ring. Mihring mize in ang lo ṭhiau chenkhawmna ah chuan buaina eng eng emaw zawng thleng ve tur reng a ni. Mahni thu duh hlang ṭhiau an khawsa ho a ni a; engtin tak in chingfel hlawm ang maw?








Pathianni zing a:ni a, zan lamah Bawihpuia a nawmsam vak loh avangin Inkhawm pui ka tum lem lo. Muangchangin eirawng ka bawl a, kan nufa za eitur chauh chu a hmin zung zung mai. Zingkarah khan Tleipuii'n min rawn bia a, an In bul lawkah inruak lian vak lo a awm a ni awm e. A rawn sawi dan hmang ah chuan en thlithlai ve hrim hrim tur in min duh hle tih ka hrethiam mai. Bawihpuia dinhmun ngaihchan phawt a, a nawm chhoh zel chuan va en ve pawh pawi ka ti lem lo. Tuna kan In luah hi a upa ve tawh bawk a, thawm ṭhat ngai a awm ve nual tawh bawk nen Tleipuii te lam hnaih a awm chu ka lo thlahlel ve em em bawk a; rem hlauh se ka ti ru kher mai.







Bawihpuia khua a sik chhunzawm tawh loh avangin chawhnu Inkhawm banah In ruak en tur chuan kan in siam ta a, ka phone ri reng pawh ka ngaihven hman lawk lo. Kan in peih fel hnu ah ka en ta chauh a, Rsa a lo ni. Rang takin ka call let ta thuai a.






"In va buai awm ve? In lengchhuak em ni?" a rawn ti zui nghal zat a. Kan chhuah lawk tur thu leh kan thil tih tur ka sawi chuan lo kal ve a duh thu a sawi mauh mai; pawi ka ti lem lo thung. A lo chhuah nghal tur thu a sawi avangin kan lo nghak leh ren rawn a. A thu min zawh pawh kha a chhanna ka la pe thei meuh lo. Min hrethiam in min nawr duh hauh lova, ka awmdanah erawh ka hnar hauh lo tih erawh a hrechiang viau in ka ring thung. Thil awlsam taka ka tih liam puat zel ṭhinna hian min nghawng na em a, rilru fim tak nena uluk taka ka ngaihtuah fe phawt loh chuan bawh rum rum ka tum tawh hauh lo.








Tleipuii te In kan thlen phei chuan mak tih hmel zetin min lo en hau a. Kan nufa hnunga lo lang tel ve chuan a ti hamhaih tih ka hria. Rsa tan a nuam lo thei tih ka hriat avangin ka inhmelhriat tir ta vat a, Tleipuii phawk a chhuah chhunzawm leh ta. Ka zah rem remna tura thil sawi lah a thiam nasa mai si a, kan in chum ri leh pawp pawp ṭhin. Rsa hmelah erawh lungawina a lang chiang kher mai, a laka ka rilru put dan zawng zawng min puan tu a awm miau a; ka chhanna lo nghak rengtu tan chuan chhanna dang a ngai tam tawh lo viau ang chu....








In ruak awmna lam chu kan pan zui leh ta dial a, a kalkawng vel a kual deuh nangin a hmun erawh a nuam phian mai. In mal din a ni a, a hnuai zawk chu midangin luah ve in bungraw chhekkhawl nan an hmang thung. Tuna kan awmna aiin a zau bawk a, a fel fai thlap mai. A luah man erawh a sang deuh dawn a, ka fate enkawlna tur nen ka thawkchhuak zo angem tihah ka rilru a in sual buai nghal pang. Rsa chuan a enkual zung zung a, ṭha a tih hmel viau bawk. A bul velah thlai chinna tur ram awl a awm duai bawk a, luah thei ila chu duhthusam a ni.








A neitu te In ah kan lut zui a, an In leh lo a changkang kher mai a. An hausak tehreng nen biak vel erawh an nuam em em thung a. Mi hausa tak tak te hi zawng an hausakna an nunpui thiam tawh a, dawr nuam tak an ni zel. Hausa ngai lo hausa ta thut te hian an nun hmalam a an harsatna tawh ve ṭhin theihnghilh hmak in an in dahsang nghal larh duh khawp a, biak an sak deuh ṭalh zel bawk. Tuna kan dawr mek te erawh fel tak an ni. Kan chanchin tlangpui te min zawt ve a, a mawi tawkin ka lo chhang ve zel a. A landan mai aṭang chuan an In ruak luah turin min duhloh hmel an pu lem lo. Chanchin in hrilh leh tura in tiin kan chhuahsan leh ta a, thuthlukna siam mai dan tur erawh thiam a har fat mai.







Kan sawi ho laih laih a, Nu Zami a lo phur ngang mai bawk a. Tleipuii te unau lah nupui pasal ngaihsak reng renglo an lo ni bawk nen, tu mawngben ve chak reng renga an awm laia an bul hnaia awmna tur lo awm hlauh chu a lawm thu a sawi mawlh mawlh a. Ka ngaihtuahna a buai tehlul nen, awm tur chiangsa ah min dah hmak mai.







"In luah man te, ei leh in te chu phang reng reng suh. Kan awm ve alawm maw le, nangni tan kan in senso lohin tu tan nge maw kan hmanchhuah chuang ang ni?" an ti bûl hmak mai. Thu lawmawm tawp ni mah se ka tan erawh inthlahrun ngawih ngawihna tham a tling tho mai.







Zanriah ei ve nghal tura min sawm tlat avangin kan hnar duh ta lo law law a. Rsa pawh mi vengva tih takah a tlangnel nghal thuai bawk. U Rinpuia nen an inkawm zui thei ta phian a, varanda lamah an thum dun bal bal reng a. Nu Zami chuan, "A fel hmel ka ti, a mize en khan mi rintlak anih kha aw? Chhuah hauh loh tur" nui hak hak chungin a lo ti ve sek bawk a, kan nui leh dar dar ṭhin. Ni e, Rsa ang mipa hi an awm lovang ka ti hauh lo. Mahse, tawn fuh chu har tak tur niin ka hria. An fakna te chuan keimahah hlim veng vengna min pe a, ka chhuang ru ve em em bawk.







Zanriah tuihnai tak kan kîl tlang a, kan boruak hip mek chu a nuam ka ti takzet. Bawihtei te unau pawh an hlim a, 'an duh ang ang khan tal tir tur' tih chu Tleipuii te chhungkaw thupui ber a ni. Hetiang em em a min duhsak tute kara khawsak nawm bik zia hi a hrechiang ber tu ka ni hial awm e. Zan dar 10 a hnai thuak tawh tihah kan haw ve thei ta hram a, Bawihtei te unau pawh an tal chau ngang aniang; an ngui nghiai tawh mai.







Rsa a rawn lut kawi ve leh bawk a, Bawihtei chuan a pawm a ngen deuh tlat avangin in pawm mut an tum ve nasa mai. Ka ngaihtuahna ah chuan 'Chhungkua ni ila' tih ringawt a awm a, ka suangtuah zui neuh neuh a, Bawihpuia ka awi pah darh darh bawk.






"I va ngaihtuah muk awm ve? Biak pawh i hre thei lo ania" nui suk chungin Rsa chuan a rawn ti zauh a, ka harh zawk mai. An lo in pawm mu fel der tawh hi a lo ni. Khum lama mut phei tir nghal mai turin ka ti a, an in pawm phei zui ve mai bawk a. Bawihpuia pawh a mutui tawh viau mai, a rit ve nelh nulh tawh bawk nen; ka puak rei deuh chuan ka taksa a na ṭhum ṭhin. A u a mutfel hnu chuan ka muttir zui ve ta thuai a.







Tukverh hawngin chair kan la a, in si rial a ṭhu in ral lehlam a motor tlan phe neuh neuh chu kan thlir dun a; thla a eng deuh ruai bawk. A hmaa ka zam em em ṭhin na kha a bo ve deuh tawh a, tlem chuan hma ka sawn ve deuh e.






"Zothan, ka nawrlui hauh lo che nangin... i chhanna hriat hi ka chak ve tawh viau mai" ka kut rawn hum vang vangin Rsa chuan a ti sup a, ka lo khi sak thung.






"Nia, min nghak rei ve tawh a; a awm lutuk. Ka dinhmun aṭang chuan thil tih zung zung theih a nilo tih i hriat kha. Min hrethiam ṭhin a ka lawm tak tak a ni" ka ti let ve ta duah a.






"Ka hrethiam em em reng che, mahse a nghak tu tan chuan a rei duh ngat ngat khawp mai" tih pahin a nui huk huk a, keipawh ka nui ve hak mai. Thil nghah thei lo ber mai in chuti khawp a rei midang ka innghah tir chu ka nuih te lam a za zawk. 'Kei ni ila ka beidawng tawh ang' tih hnuah pawh dawhthei taka min la nghak fan fan tu hian chhanna duhawm a phu ka ti hliah hliah bawk. Ka dinhmun hrechiang em em chunga min nghak tlat duh hi mak ka ti em em bawk a, kei aia ṭha a hmu tam dawn tih ka hrechiang a; 'keimahah hian eng tak hmu ang maw?' tiin ka in zawt fo ṭhin.







"Rs, engkim i hriat kha. Heti chung pawh a min la pawm thei anih chuan i rual in ke ka pen ve ange" ka ti sap a, ka sa chhuak nghal pup bawk. Ka sawi liam mai mai lova, ka chhungril ber aṭanga sawichhuak ka ni tih pawh a hai hauh lovang.






"Ka va lawm em, Zothan.... Ka lawm" tih pahin min kuah thlawp a, keipawhin nghet zetin ka lo kuah let ve nghal hmiah bawk.






"Rs, midang tam tak i hmu ṭeuh dawn si a. Engatinge kei kher? I tan hian ka tling lo asin...nakin lawkah i in chhir ange?" a beng bulah chuan ka ti sap sap a. Hlauhthawnna ka la nei tlat hi hrehawm ka tih ber a ni. Ka dinhmun aṭang chuan in ringtawk taka awm chu a harsa ve em em mai bawk si. Min kuahna phelhin ka biang tawn tawn ah a kutin min khuap a, chiang zetin kan in melh kal mai.






"I harsatna thuk ber te hian ka duhna che a ti zual a, nangmaha mite'n an hmuh ve loh i chhungril ṭhatna hmutu ka ni bawk. Ka tan chubak thildang a ngai lo.. i nunhlui zawng zawng nen hian 'Ka Hmangaih Che'. I tan ka tih theih zawng zawng ka ti anga, ila tawn ngai loh nun hlimna tam tak ka pe ngei ang che tih ka tiam che" a thutak zia chu mi mawl ber tan pawh hmuhhmaih rual a ni lo. Lawm avanga ka mittui hnam ṭiam ṭiam chu duat zetin min hruk hul sak a, lungchim taka min fawhna chu ka lo chhang zui ve nghal zat a. Ka khawvel parchhuak mek chu a va famkim chiang tak em!..








(to be continue........)


Show post links
Top

[Ngaia]

DEAR PAIN
Chapter-30





By: Brigida Hugo








Kan bungraw in zam hnawk nuaih karah chuan tih hmasak ber tur hre lovin ka hawi kual ruai a, hna a tam dawn kher mai. Kan In luah lai chhuahsanin kan in sawn dawn ta nge nge chu ania, a phurawm rualin hmabak erawh a ko viau thung. Bawihtei te unau an phur em em bawk a, kan ri laih laih mai. Rsa leh Tleipuii te chhungkua in min buaipui reng a; vawiinah pawh an nileng hun min pe leh tawp tawh. Diktea pawh a rawn thleng ve thuaiin ka ring.







"Hmabak a va ko deuh ve... Khawi hi nge ka tih fel hmasak ber ang aw?" keima hriat tawk leka phun sar sar chungin ka kâwng ka dawm vang vang a, ka sir lawk a Rsa lo nui pût pût chu ka mit sirin ka hmu reng bawk. "Nui pêt pût suh. Khawnge Tleipuii pawh chu a rawl bo leh tak? Min ngaihsak lo lêk a âwl bik te hi a lo tum mai mai ange...." tih pahin Suitcase pakhat chu ka khai nawlh a, room tur lamah chuan ka va hung phei ta ngawt a. Inchhung bungrua kan ngah lem lova, kan in tihfel thuai erawh ka ring.







Nileng a kan phar buai hnu chuan a fel ta duak mai. Nu Zami te nupa in an In lamah naupang an hruai phei a, kan chhun eitur min lo ngaihtuah sak vek bawk. U Rinpuia'n 'In thar lawm nan' tiin chaw eikhawm a rawt a, chawhmeh a lo lei lawk diam bawk. Ka hun tawn mek chu ka mumang ang ka ti hial zawk. Diktea'n a pawisa khawl ve a drawer nalh zet min rawn leisak te chu hmuhnawm ka va ti ngawih ngawih tak. Ka dinhmun harsat lai ber pawha min tlanchhiatsan miahlo tu ka nei hi vannei ka in ti em em bawk.







Zanriah kan kîl ho laih laih a, kan eitui hlawm kher mai. Ka fate hlim hmel mawlh chu hmuhnawm ka ti. Tunah chuan an duh hun a an len luh na turin Tleipuii te an awm hnai ta bawk a, nun nuam zawk an neih ve tawh ngei ka beisei. Hun harsa tam tak ka pal pui fova, ka fate hian hlimna tam tak neih hi an phu ve ka ti ngawih ngawih ṭhin. Ka theihtawp chhuah zel ka tum bawk.







Zan dar 10 pelh ah Tleipuii ten mi ṭin san a, Diktea pawh an rualin a chhuak ve nulh a. Rsa nen an in mil phian a, an ri dun ve bawrh bawrh mai. Naupang pawh an tal hah ngang aniang, tui takin an mu siai siai tawh. Rsa nen ṭhutthlenga in si rialin kan ṭhu dun a, ka darah a lu nghatin a chhing vang vang a. Kan inkar boruak a ṭha a, kawng engkimah ka rinchhan ber a ni. Ka tih tur engkim uluk takin min enzui pui reng a, ka ṭawngkam hman dan thlengin min thlithlai kual reng a ni ber. A tel lova thuthlukna siam mai ka hreh ṭhin danah ka rin zia chu a langchiang hle in ka hre bawk.







"Rahbi thar i chuangkai leh ta. Ka lawmpui che a, theihtawp chhuah a i ṭan leh zual erawh a ngai dawn ania. I theihna piahlamah erawh i bulah ka awm reng tih theihnghilh lo la" min ngheng reng chung chuan a rawn ti nghut a, ka lu ka lo bu nghat.






"Engkim hi nangmah vang a ni, i chungah hian lawmthu sawisen loh ka ba. Min fuih kal turin lo awm lo ta la, tun dinhmun hi ka thleng phak dawn lo tih ka hrechiang lutuk asin. Ka sawi thiam phak bakin ka lawm takzet" ka ti let ve sap a, rawn ṭhu ṭha in nghet zetin min kuah nghal hlu hlu a. A bulah hi chuan hah a dam sawng sawng ṭhin. Zan a rei deuh tawh avangin haw ve mai a tum ta a, a haw peih lo hmel mawlh chuan ka nuih a ti za. Pawn thlengin ka thlah a, a kal dawna min fawh vawng vawng na chuan min thlakhlelh ve zia a ti langchiang kher bawk. A kal liam thlengin ka thlir zui reng a, ani ka tawng hi nitinin ka lawmna a zual ṭhin.







Bawihtei School kal hruai a ngaih avangin hma takah ka tho va, a School kalna pawh kan sawn a ṭul ngei dawn tih ka hria. Ka hna ve ber kuhva ka khawihna te nen lah kan in hlat dawn ta viau mai bawk nen, ngaihtuah tur a tam a; thil tih zung zung erawh a har viau thung. Nu Zami'n an ṭhenawm ten lâng a hnathawk tur an duh thu a sawi a, min lo bawhzui sak a tum thu a sawi bawk. Zan lama thawh tel theih tur erawh dap zui ka tum tho, mamawh kan ngah chho ve zel a; awm âwl mai mai nan hun ka nei ve lo tih chu ka inhrilh nawn tluk tluk reng ṭhin.







Ka nu in an In lama peng kawi turin min rawn hrilh ngun bawk a, School ban lamah tlawh kawi ngei ka duh. A nawmsam lohna ten an kiansan ta bawk a, dawr lamah a ṭang hle tih ka hria. An kum a lo upa ve ta deuh bawk a, a ngai reng a nun hman chu a ning ve tawh te pawh a ni mahna. Tun hma anga ka thinlung zawng zawnga ka pawhna bo ṭhen ta duak erawh ka thunun theih piahlam thil a ni. Ka nu a nihna ah erawh ka hmangaihin ka zah em em thung.







Kan chhuah rualin Rsa ka be vat a, kan chanchin ka hrilh thuak a, ani pawh zingkar aṭangin a lo buai leh tawh viau mai. Hun remchang hmasa bera min rawn biak tur thu sawiin kan dah zui thuai a. Nu Zami'n kawng bulah min lo chang a, Bawihtei thil leina tur a lo pai tir thlap mai; a mawhphurah hian min dah pumhlum tawp a nih ber hi. Ka nu te In lama kan kal tur thu te hrilh ve in kan kalsan zui ta thuai a. Bus a tawt em avangin Taxi ka la ta tawp a, School lam panin kan tlan zui ta vang vang a.







School kal chhung zawngin Office ah kan ṭhu a, zirtirtu ten min ngaihsak em em reng a; an chungah ka lawm vawng vawng ṭhin. In luah kan sawn thu leh Bawihtei pawh ka lakchhuah mai a ngaih tur thu te chu ka sawi thuphung a, min ui der ve na ṭawngkam te chu dawnsawn nuam tak a ni. Kan in sawnna tur lamah hian anni tluk hi kan tawng tawh lo mai thei tih ka hria, keipawhin ka hreh ru ve hle bawk.








Kar kalta lawka Bawihtei te zirlaipui boral ta râlna hun an neih dawn avangin an bang hma a, keini pawh ka nu te In lam panin kan kal zui ta thuai a. Dawrah thil eng eng emaw lei in kan peng kawi leh zuai a. Bawihtei'n Freddy-a thil hawn a duh tlat avangin a en kual rei hle mai a. Naupang na nâ na chu an inhmuh chhunah chuan hlim takin an in kawm tlang thei mai a, puitling rilru ṭhankin tawh ah erawh boruak ṭhalo lo neih fe tawh chuan a harsa fat thung. Ni a sa ṭha vawl vawl bawk a, hmahmawh takin kan kal zui leh ta dawr dawr a.







Rinloh takin an lo awm kim teh ṭhap a, naupang ho chu an ri zui nghal chul a. Ka nu te ho hmelah chuan thil fel lo inphum ru awm ni mai in ka hria a, an ngui nghuai ni maiin ka hria. Kan in nghah fel ve leh Mahlimi chu room lam panin a thochhuak nghal tharh a, a hmel a lawm lohna in phum ru chu hmuhhmaih rual a ni heklo. A ngaihna hrelo zetin ka melh kual dan dan a, tumah rengin ṭawngchhuah tum hmel an pu bawk silo chuan min ti hrilhhai tak zet bawk.






"Buaina in nei em ni? In va ngui hlawm em em ve?" an ṭhut ngawih reng hlawm avangin ka ti chhuak ta phawng a. Mampuia chuan min rawn melh rulh ringawt. Diktea erawh vei neih loh hmel fahranin a phone a thai kual nuap nuap reng a, chu huna kan boruak tawn mek chu a nuam lo takzet.






"Hmanni ka damloh laia leng tura ka sawm che u khan thu pawi sawi kan nei em maw ni? Hei ṭhenkhatin lungawi loh nan an hman leh tawh hi.... Keizawng kan chhungkaw boruak hi ka kham em mai" ka nu chuan a rawn ti chuai ruih a. Ka rinloh lam daih thil a nih avangin ka lo hawi phawk deuh nghal hrâ bawk.






"Ka hre nang, engnge a awmzia? tiin ka zawt let thuai a, a ngaihna ka hre lo takzet.







"Hei Ruatmawia te nupa hian min lungawiloh khum anih hi. Thil pawi engmah kan sawilo ka tih lawm lawm pawhin 'Kan in dan theih nan hma in la dun e' an tih chu maw... an mak ania hemi te nupa em em hi chu" tiin ka nu chu a âng zui hlaih hlaih a. Mampuia ṭhu tum hmuk chu ka va melh zauh a.






"Chutiang zawngin engmah kan sawi loh kha, chu chu tu kâ aṭanga chhuak nge ni reng reng?" tiin ka zawt zui ve ngat a.






"Mahlimi maw le, kan titi lai khan a thil theihnghilh lam turin a lo haw a niang. Ka thil sawite kha hre ziktluak si lovin a ṭhen lai chauh a hria a. Lalruatmawia lah mawl bawk, nupui te thusawi a nih chuan a lem nghal duak zel a. Thaibawi an sawi te chu nep te hi a ni ringawt" ka nu chuan a ti leh nghal buan buan a, kan ngawi ṭhap mai. Room lamah Mahlimi a awm ve reng bawk a, ka nu chu in sum deuh se ka lo ti rilru viau bawk.






"Ka lem nghal duak ziah lo. Ka theihtawp chuan ka nupui chu ka enkawl ve, nangmahni hian in mil thei thlawt lo anih zawk hi maw le" Mampuia'n a rawn tih lai chuan ka lo en nghal kâwk mai, keimahni lam lam min burbun a tum chu ka sa nghal phat bawk.






"I zak thei lo e a. Kei aia hrawn nuam tih hi khawiahmah a tawng hlek lovang. A khawsak dan hi en rawh, pasal te Inchhung aiin an In lam ah hun a hmang tam zawk. Mo nei hming pu ve si in Inchhung enkawl turin lânga kal lak te kan ngaih hial hi. I enkawl dan chu hei hi maw ni a? Hetiang reng reng ai chuan Indang tak tak mai teh u. Nitin i chhuak a, zanah i lo haw chauh a. Inchhungkhur thil awmdan engmah hre hlei lovin in nu vuina chauh i hria a. A hahthlak em mai, kei chu ka peih tawh lo. In indang lo anih chuan keimah hi ka indang ang" ka nu bawk chuan a ti leh hlawih hlawih a, a ril rem loh zawng thilah hi chuan a ṭawng duhâm thei pang pang bawk a, chutianga a ṭawng pawh chu mak tihna ka nei hran lo.







"Eheu, tehreng mai. Chuti khawp chuan ni maw kan lo hnawksak a? Kan indang anga a ni mai alawm. In tello pawh hian kan khawsa thei em mai" tiin Mampuia chu a ding uaih a, ka ṭhutna aṭanga thochhuak ve hluaiin ngawi ve ve turin ka ti zui thuai. Mahlimi pawh room aṭangin a lo chhuak ve chiah bawk a, a meng ling hlar mai.






"In nufa hian engtin chiah nge min sawi ṭhin tih hi hrelo turah min ngai hauh suh u. Ka kalna lam apiangah hian mit leh beng ka nei ve, engkim ka hre vek. Min huphurh zia lah ka hre hne hlei hlui" Mahlimi chuan a rawn ti ve ta hmak hmak a, chu erawh ka ngawi thei ta bik lo.






"Mahlim, i rawn mo tirh aṭang khan khawiah mah hian kan la rel chhe ngai lo che. Kan hun hman liam tak zawng zawng kha ngaihtuah rawh, kan chhungkaw boruak chhiat zual em em lai te kha..... Khang hun zawng zawngah khan nangmah aṭang hlirin a ni mite'n thil an hriat zel ni. Kan nihna lo ah hi chuan dawt a min puh tum duh suh, nangni chanchin mai mai sawi hman pawhin ka khawsa lo. Keimah pawh hian buaina tam tak ka nei ve, hetiang zawng a min ti dawn anih chuan ka nasa viau ang" tiin ka ṭawngkhum ve ta sak sak a. Ka ngawi rei tawh bawk a, ka puakkeh ve ta anih ber hi.






"A tawk e, in rilru kan hria. Kan chhuak ang, hetiang hrim hrim te chuan kan awm peih bik falua love" Mampuia chuan a ti bung nghut a, engmah a hrethiam thei lo hi a manganthlak ka ti ngawih ngawih. Tun hma a Mampuia kha chu hlat tawh vang vang tak a ni.






"In va han buai peih e aw.... Ka pa a lokal dawn, he In enkawl tura a duh ber hnenah a rawn dah fel thuai ang. A awm tlak an awm anga, awm tlak lo ho erawh chhuah diak a ni mai. Lo buai ve vak vak suh u" Diktea chuan a rawn ti bul nghut a, ka pa a lokal dawn tih ka hriatna chuan min ti zâng huai mai.





"Nangni pawhin i han kal chhung khan ro in rel fel vek tawh ang chu.... In duhtawk in han khawsa teh u" Mampuia chu a kalsawn nghal nul nul a, an nu in a um zui ve nghal zat bawk.





"I â anih chu" Diktea chuan a ti zui hram a, kan boruak chu a hahthlak kher mai. A ruka ka lo in nghah na ve ber Mampuia rilru kalsual ta lutuk hi pawi ka ti ṭhin. Chu thilah erawh a nupui ka dem hauh lo thung, hmeichhe thuhnuai a kun tawk leh fuihpawrh theih leka a awm chu ama dikloh liau liau a ni. Mipa a nihna angin a nupui enkawl thiam se hetiang teh nuaih hi kan ni hauh lovang.







Chaw ei nghal turin min sawm nasa viau mah se tuna kan boruak thlir chuan a chakawm hlawl loh; kan haw ta daih a, tui takin kan kîl ho dawn lo tih lah a lang reng bawk a, haw mai kha a ṭha zawkin ka hria. Kan haw dawnin kan In luah man tur ka nu in min pe a, hnial duh lovin ka la zui hmiah. Kan hmalam hun tur a hriat loh em a, 'mihrang lak aṭanga dawng pawh ka ni hlei nem' tiin ka in thiam chawp ve hmak. Rsa a la reh zui vung vung a, ka be chak viau nangin tihbuai ka hlauh avangin ka be duh ta lem lo thung.







Nu Zami'n lânga kalna tur min lo biak fel sak diam a, ka thawh chhungin Bawihpuia lo enkawl a in huam thu a sawi ngun hle bawk. Bawihtei pawh a School kalna kan sawn fel a, kum laklawh viau mah se kan dinhmunte sawiin min lo hrethiam em em a. Kan In aṭanga hla lo te ah a kal ve thei dawn ta hlauh a. A kal rualpui theih tura ṭhenawm hnai a naupang dang an lo awm ve leh zel te chu kan vanneihna a ni. Kar thar aṭangin hna ka ṭan dawn a, chumi hma chuan In lama singsak tur hmabak ang zawng zawng chu tihfel hman tumin ka buai ṭhin hle mai. Rsa'n min rawn tlawh âwl lova, ka fate pawh hian an Pa neih deuh ti tih tawh hial in ka hria. A duat in a duhsak em em reng a, anmahni hringtu pa ai fe in an thlamuanpui tih ka hria. Nitinin ka thlahlel zual tawlh tawlh a, sawi lang chiam ṭhin lo mah se ani pawhin min thlahlel em em tih chu a khawsak phung aṭangin ka hai bik lo.








Ka pa a rawn kal dawn avangin chawhmeh leh mamawh ka lam khawm a, hun rei tak hnua kan in hmu leh thei tur chu ka lawm em em bawk. Diktea pawh ka pa awm chhung chu kan In lamah rawn awm phei rih a tum anih hmel. Ka theih ang tawka tuihnai lo hlui ka duh avangin ka in lei duhâm viau mai. Kawng engkima ka hmaih theih miah loh Rsa pawh chaw ei ah ka sawm tel ve a, a lo hreh lem lo hlauh bawk a. Ka pa nen in hmelhriat ve se ka duh vang a ni pakhat bawk a, ka nu pawh hian min zawt ve leh nauh nauh ṭhin nangin ka la hrilhchiang em em rih lo.







Bawihtei te unau in a pu an han hmu chu an tim deuh a, ka malchung an bel deuh tlat a. Thil hran hrana an in thlem hnuah erawh an ngampa ve ta deuh a, nakin lawkah chuan an pawt phar reng dawn tih ka hrechiang hle thung. Kan pafa ho in kan chhungkaw boruak te kan sawi khawm laih laih a, Mampuia te pawh tun thlengin an la indang ta lo. In er ru ṭhum a khawsak ho chu a hahthlak viau ang le.







In leh lo chu Diktea hmingin a awm anga, ka pa chuan keini nufa za let leh turin min duh bawk. Chu erawh keiin ka lo hnial thung a, awm ho thei kan nih tawh loh avanga chhuak kan ni a; let leh mai chu ka tum bik hauh lo. Kan dinhmun harsa viau mah se thlamuang taka kan awm theihna hi kan nufa tan chuan a hlu ber rih a ka hriat vang a ni. Tu te mahin min nawr lui lova, in hrang chan hlen erawh ka pa in a rem ti lo bur thung. A khawsakna lamah In leh lo a din ṭan leh mek a, khawpui nun aiin nuam a ti zawk miau a ni. Hah taka hna a thawh vang a ni mahna, a cher kuam a. A hmel erawh a nung sarh thung. Engtikah emaw chuan a awm na lamah te pawh kan la zin ve mahna le.







Rsa a rawn thlen ve tak avangin titi dang kan vawrh zui ta daih a. Ka pa nen chuan ka lo in hmelhriat tir zui thuai. Ka pa chuan a chîk hle tih a en danah ka hrethiam mai. Naupangin an lo bawh buai leh nghal chung chung a, a thil rawn hawn te phawrh in a pe thuai a. A pek mawlh mawlh lai a ka pa nui suk hmel ka hmuh chuan ka ṭang ṭung chu ka in thlahdul riai riai a, a hriatchian tak tak hunah tun aia lungawina tam zawk hi a hmuh ngei ka beisei tlat bawk.







Naupang hlim zuang kual sek chu ka khap deuh chhen a, ṭhutkhawmna lama Rsa leh ka pa titi múk zet chu ka melh pah leh zauh ṭhin. Engnge an sawi hre pha lo mahila a pawimawh viau ang tih chu ka hrethiam mai. Thingpui ka lum sak a, dawhkan kîl in ka vil pah khar bawk a. Naktuk maiah ka pa a haw leh tawh dawn avangin zanriah kan kîl ho leh a, kan hlim ṭhin viau mai.







Diktea hmingin In leh lo a awm fel tawh a, ka nu hming erawh sawi rik a ni miah lo thung. Mampuia'n ka pa huan ṭhin kha a chang ve bawk anga, kei erawh ka pa leh Diktea'n an mawhphurhna a min lak avangin a hranpa a chan neih ve ka tum lem lo. Mampuia lungawilo ân hla a kha fak fak kher mai. Chu erawh ka pa in khin let a phal lo thung. In dan pawh an rel thlu ta a ni awm e.







Ka nu aṭangin ṭawngkam khat mah a chhuak lova, ngawih hun a hria chu ka lawm ru viau mai. An inkar suihzawm tumin ṭan la viau ṭhin mahila an pahnih hian an in hawi tawh mawlh si lova; hetiang em a an inṭhen chiang mai hi mak ka fo ṭhin. Puitling rilru ṭhan kin tawh thuthlukna sawhsawn tir tum chu lung bang sut ang chauh a nih avangin ka tum buai peih ta lo law law..







Bawihpuia khirh a chhuak a, a mu duh hauh lo. Rsa pawm kher a ngen teh tlat a, ka lai ru rem rem ngei mai. Ka pa ka hmaizah ve deuh bawk a, ani erawh a nui suk suk duh chauh a. Rei vak lovah an in pawm muhil ta der a, haw mai a tum zui ta bawk a. Ka pa a awm tho avangin a Bike dahna thlengin ka va thlah a, ka pa nena an inbiakna ka zawh chuan thildang a sawi daih zel. 'A hunah i hre mai ang' tih bak chhanna ka dawng lo. Ka thinrim lova, thuruk a zep theih zia hrechiang ber tu ka ni tlat.






"Ka fawh vawng vawng chak che nen, hun remchang a awm thei si lova. A kalpui ngaih pawimawh ber an ngai bawk si" tiin a nui huk huk a. 'A kalpui' a tihlai chu man lawk lovin ka hawi deuh hau a. Nui reng chunga "Naupang" a rawn tih takah chuan za zetin ka nui chiam a, kan bul hnai a rawn kal te chuan min thlek hâ hâ mai. "Chhiarkawp chawk ang reng ka ni" a tih zawm leh zat phei chu ṭhu chungin ka nui dir tlak tlak tawh.






"Nangni pahnih kha in bengchheng lutuk. Haw rawh u" Tleipuii aw ring zet lo chhuahna lam chu kan hawi dun nghal zawk a, a room tukverh biang nghengin a lo ding nui ṭhaw a.





"Nei ve lo chilput" Rsa'n a tih zauh chuan a ner nawk a, chhaih thinrim hi nuam a ti laklawh tawh.





"Ka duh hun hunah ka nei thei, ka la peih rih lo mai mai a ni. Nang aia ṭha ka thin chhuah nalh hunah ka nei nghal ang" a rawn ti zat zat a, a hawi vah vah bawk. Reife an infiam kual leh hnu ah Rsa chu a haw ta hram a, ka nuihna avanga ka mittui tla phung chu hru thuak thuakin Tleipuii te In ah ka lut chho zui nghal zat a.






"I va mal ve, naupang an mu leh tawh em ni?" Nu Zami'n a lo ti thuai a, an mut tawh thu in ka chhang zui vat a. Ka pa chanchin te min zawt a, haw a tum tak thu ka sawi chuan Nu Zami a phi leh ruai tawh. Engemaw paipawn haw tir tur a dap tih ka hre mai. Rei vaklo Tleipuii nen kan titi leh hnuin ka haw phei zui ta thuai a, Ka pa ṭhutna lam ka pan zui nghal vat.






"Ka hawsan leh phawt che u a ngai si a, a lunglenthlak dawn khawp mai. Tunah chuan a hma ang em em khan ka ngaihtuah che u a ngai ta lo tih ka hmu thung. Ka ngaihthah dawn che u ka tihna a ni lova, i bul hnaiah mi rintlak tak a awm tih ka hriatna hian min ti thlamuang em em a ni" ka pa chuan a ti dap dap a. Rsa chungchang a sawi tih ka hrethiam mai bawk.







"I dinhmun heti hi a ni a. I chet velna kawng tinrengah hnunglama mit nei ang ran in awm ṭhin ang che. Rilru let buta thil tih nghal chûk zel ṭhat loh zia a takin i tawng tawh a, hun kal tawh siamṭha theilo mahla i hma huna i kawng zawh turah erawh a ṭha ber zel zawh la ka duh. Rsa khan neih che a duh tih a sawi a" a tihlai chuan ka lo meng deuh kawk a, hemi chungchang hi a ni ngei ang khunkhan fe a an lo sawi kha.







"A rintlak ang. Mahse... thil reng reng tih rum rum theih a ni ngai lo tih i hriat kha. Hun te han liam leh deuh se Pathianin hun remchang ṭha tak a la buatsaih sak ngei che u ka ring tlat a ni. Nimin lamah khan In luah man hi thla thum lai mai a pe lawk bawk a, chumi chhung chuan theihtawpin inkhawl ve i lo tum dawn nia" ati leh dap dap a. In luah man a lo pe lawk tih te chu ka hre hlek lo, engtiklai khan nge a lo pek ang tih pawh rindan ka nei thiam lo. Ka lawm em em rualin ka inthlahrung a, a engamah hmaa ka ti buai em em reng mai chu keimahah nuam tihlohna tam tak a awm bawk. Kan in biak hmasak leh ber ah lawmthu sawi paha ti nawn tawhblo turin hrilh ka tum ruh hle bawk. Hmabak tam tak a nei tih hrechiang ber tu te zinga mi ka ni a; keimah avanga a buai tam lutuk hi sim tir deuh a ngai a ni.







Ka pa haw ta chu lung a leng duh vawng vawng kher mai. Nu leh pa te uap na hnuaia awm tluka hahdamthlak hi a lo vang khawp in ka hria. Ka pa khan thil engkimah min pui hauh lo mah se ṭhuttlenga a lo muzal mai mai pawh a thlamuanthlak ka ti hliah hliah ṭhin. Kan nufa thum te chauh a chaw kîl te chu a da duk maiin ka hria a, a khat tawkin Tleipuii'n min rawn riahpui leh zauh ṭhin bawk.







Mampuia te pawh Mahlimi te In hnuaiah an in sawn ta kha ania, engtin tak awm zel ang maw? In dang luah tur pawh an hmu reng a, Mahlimi'n a duh miau loh avangin an In hnuai an luah ta chu a nia. Mahlimi te chhungkua aṭangin kan thang mawi lo hle tih pawh ka hre zut a, engmah ka sawi ve lem lo thung. 'Nakin lawkah thil nihna dik tak a rawn lang leh mai ang' tih chu ka in hnemna a ni.







Lâng a ka kalna te pawh ka chungah an ṭha em em a, Bawihpuia pawh Nu Zami'n min lo awm sak mai ṭhin. Anmahni avanga hnathawk thei liau liau ka nih avangin hlawh ka lak hmasak berah engemaw tal leisak ka tum ve ran bawk a.






"Lo la mu suh aw, ka rawn kal lawk dawn.." dar kua a pel tawh tihin Rsa'n min rawn bia a, a pawimawh hmel riau bawk. Bawihtei uniform nawh pahin ka lo ngaichang a, rei vak lo ah a lo thleng zui ve mai bawk a.






"Ka laklawh lutuk a, lo kal hram ka duh bawk sia. I mut a chhuak tawh em?" tih pahin ka hnung lam aṭangin min rawn kuah nghal hlu hlu a, ka thiltih lai ka zo ve chiah bawk.





"Chhuak lo e, i chau viau ang a?" amah en pah chuan ka ti let ve nghal zat a.





"A hma chuan chau, tunah chuan ka hahdam tawh. Ka damdawi mumlian hi a thawk chak em mai" tiin min kuah vak a, ka lo rak ṭhat.





"A pawimawh hmel sia, engnge sawi vat teh" tiin a hnungah ka beng thak a. Ṭhutthlengah chuan min kai ṭhu nghal zat a.





"Pawimawh viau mai. Ka nghak deuh ang ka ti na a, ka nghak reng thei lo" tiin ka sam chu ka bengah a rawn zep zauh a, zawhna mitmeng nen ka lo en ve reng bawk.





"Englo... nupuiah neih che ka duh. Engkimah kan in hrechiang tawh bawk a, nghah reng hi a rei ka ti" tiin chiang zetin min en a, ka lungphu a rang zaih zaih ngei mai.






"Rs, kei aia ṭha..." ka ti hman chauh a, ka hmui chu a hmuiin a rawn bawhthuah nghal zat. Dam dapin min fawp zui a, keipawhin ka lo chhanglet zui ve nghal zat bawk a.






"Ka tan nang aia tlingzo an awm lo. Zothan, ka thinlung zawng zawngin ka hmangaih che. I duhthusam zawng zawng ka puitlin vek thei lo ang tih ka hria. Mahse, ka theihtawp ka chhuah zel ang. Min nei rawh" tiin ka kut a vuan a, ka chhan letna a nghak tih hriat takin ka mitah min en reng bawk.







Heti khawpa min hmangaihtu, ka nihna zawng zawng a hriat hnu pawh a min thlahthlam ngailo tu hi engtin nge kei tehlul hian ka hnar phal tehlul ang ni? A tello a engmah ka tih theihloh zia lah a hrechiang tu ber ka ni a, ka hma hun lo awm zel turah pawh ka kianga a awm loh chuan ka kal thei tawh lovang tih hial tur khawp a ka rinchhan lo ni ta hi ka hnar phal teuh lo.






"Aw le, ka nei ang che" ka ti let sap a, a mitmenga phurna lo langchhuak chu ka nuihpui var var mai. 'Kei tehlul hi engnge ni a min hriat le?' tiin ka in zawt fo ṭhin. Kei leh ka fate nen lam hian min thlahthlam ngai dawn lo tih chu ka thinlung takin ka pawm nghet hmiah a, ka ring sual dawn lo tih ka hre chiang hle bawk. Ka nun buar taka ka lo pal chhoh tawh zawng zawng vanga ka hahna te chu lakbo in a awm dawn ta. Rahbi sang zawk rapin a thlawh in ka thlawk a ni ber e.







Kan inpawm vawng vawng a, thlamuanna famkim hian min tuam a, hahdamna thli in min chhem heuh heuh ni berin ka hria. Ka kalsan tak ka nunhlui te chimbuai phak loh khawvel thar chu eng ang takin nuam ang maw?






(to be continue.........)


Show post links
Top