DEAR PAIN BY Brigida Hugo (Completed)

[Ngaia]

DEAR PAIN
Chapter - 19




By: Brigida Hugo







Zan dang ang a nilo, ka phi ru cheng a. Ka pa biak thuai thuai ka duh. Thil tih tur awm ang ang ka ti sawk sawk a. Ka nu chhuak tur ka lawm ber zan a ni hial ang. Mampuia lah hi tunlai chu engnge ni a hriat tehreng ni? Zawhna mak pui pui min zawt leh nulh nulh ṭhin. "Hmeichhia hian mipa in va vei veng veng dan hi engtinnge?" a ti thul; a chang leh, "Mipa in va ngaih veng veng nachhan ber engnge? Engtia an awm in nge in ngaih ber?" te min ti leh nulh ṭhin a. A nau Diktea lah hian, "Ka awmdan ang hi a ni mai" a lo ti ve tei vet leh nghal a.







Panhnah ka khawihna vel ka singsa fel zung zung a. "Ka chhuak lawk dawn a nia" tih pahin Mampuia chu pindan aṭangin a rawn intuai chhuak mawlh mawlh a. Ding meuhin ka en reng a, "Engnge? Ka hmai a paw rual lo em ni?" a rawn ti he haw a. Nuih sak pahin, "I mawi, confi hle rawh" ka ti vat a, nuih vur vur pahin, "Ka kal, ka leng rei lo ang" tih pahin a chhuak zui nghal a.






Diktea lah chu pindanah vei neih loh hmel zetin a zai ṭial ruan ruan reng a. In khat a khawsa ṭheuh ṭheuh pawh ngaihtuahna hrang hrang kan put nasat hlawm zia chu ka hmuchiang viau bawkin ka hria.





"Dikte.. Dikte..." ka ti lâng lâng a, min rawn chhân rual chuan, "Pindan lamah ka awm dawn ania. Helamah hian va zai rawh" ka ti thuai a. Pindan lam chu ka pan zui a, khum chu ka pawtmar zui nghal sat sat a. Khum mar ṭha tak a nih loh hi chuan ka mu thiam lo reng reng.






Khumah chuan ka tluzal zui a, ka rit ve ṭan tawh nen hman deuha tlukzal nuam ka ti sawt viau bawk. Ka pa min rawn biak hun nghakin phone chu ka thlek sek reng a. Keimah chuan biak hmasak mai ka duh rum rum tawh. Chhun lamah ka che chau ve deuh bawk nen mutchawlh takah chuan mutchhuak in min rawn zem chiai chiai a.





Ka hla duh em em ngaihthlak pahin ka mu rem sat sat a. Ka meng hlei thei tawh lo, ka chhîng diar diar tawh tihah ka beng bul lawka phone let bal chu a rawn ri ta! Ka va harhchiang ber mai em... Rang lutukin ka ban thuai a, engchiang mang lo chuan, "Hello" ka ti thuai a.




"I mu tawh em ni Bawihi?" Hriathlua aw ngei a ni.



"Engnge min rawn biak?" ka ti ram hmak a.




"I mut tawh leh tawh loh kan hre lawk duh a" a rawn tidam thluam a.





"Engnge chu chu a ṭangkaina? I bula ka awmlai zawng khan ka mut ṭhat leh ṭhat loh te, ka chau lutuk kha ka mutchhuak tawh em tih te kha ngaihtuah tur che a nia" ka ti zui teh hrep a.





"Ka tihpalh a ni, anih leh kan dah leh mai ange. Rinrina hian ila mut loh chuan a hmuchak che a, rawn Video Call nghal ngawt che kan ngam lo deuh a. Tui deuhin mu rawh khai" a rawn la tidam thluam tho nia.




"Rinrina a la meng a maw?" ka ti nghal thuai a.




"Aw, a muhil thei lo a? A hmuchak che a" a rawn tih rual chuan Sana ka bih vat a. "A mut a la hun lo hrim hrim anih hi" ka tizui leh thuai a. Rinrina hmel te, a awmdan tur te, a ṭhu ngui nghiai tur ang thlengin ka mitthla kual zung zung a. "Rawn call sela, ka lo be zuai ange" ka ti zui leh thuai a.





Phone chu a tawp nghal hmak a, a rawn ri zui leh thuai a. Ka lâk rual chuan Rinrina hmel a rawn lang zui nghal. "Anu, ila mu lo maw?" a rawn ti nghal var a.





"Mu lo e, i va meng rei ve Bawihte?" ka ti thuai a. A bul ah, lang thei lo tawkah a pa a ṭhu tih ka hrechiang hle bawk. "I damṭha em?" ka tizui leh thuai a.





"Hmanah apa nen kan leng a, nangmah ang deuh ka hmu a" a rawn ti teh daih a. 'Hmanah' a rawn ti deuh ngei a, ka nui hak hak a. "Keimah ang deuh an lo awm ve anih dawn chu" ka ti zui thuai a.





"Anu, engtikah nge i lo haw dawn?" a rawn ti chu ka nui lai ka tawp chat a. "Bawihte, ka buai lawk dawn a, remchangah kan inbe leh dawn nia aw? Mu tawh rawh aw? A tlai tawh ania" ka ti thuai a.





"Aw" a rawn ti hniam raih a. Ka lainat takzet, a rilru ka tihnual hle tih ka hria. Thil awmzia a hrethiam ve ngei chuan ka ring. Chuti chung chung pawhin min ngaihzia a tilang ve hram hram chu a ni si a. Nge, a pa in a rawn tih tir zawk ni ang?





Phone kan dah a, ngawi rengin phone chu ka en tlawk tlawk a. Rinrina dinhmun chu thui tak ka ngaihtuah a. Ka hrin, ka thisen pal ni lo mah se ka hmangaih takzet tih ka hria.





Ka phone rawn ri leh chu ka en leh thuai a, ka pa ngei a ni tawh e. "Aw, ka pa" ka ti nghal thuai a.





"Mâte, ila mu lo maw? I pa Ropuia a rawn leng a. Kan titi luam a, ka rawn be lawk hman lo che a ni" a rawn ti thuai a.




"A pawi lo, i hman hun hun kha a ṭha ber alawm"




"I nau nen hmanni khan kan inbe zuai a. Kimchang lo deuhin i chanchin min rawn hrilh zuai a. I ṭha em?"




"Ka ṭha ania, min lo ngaihtuah lutuk ange. Nangmah zawk kha i ṭha em? I hrisel lo si, hna i thawk nasa mai sia"





"Kan hnathawh dan a hahthlak hleih nem...khawl vekin kan thawk tawh a, a zia viau ania" a rawn ti tak na a, a hah em em dawn tih chu ka hai chuang lo.




"Pa, engnge in inṭhen chhan hi ni hrim hrim a? Mampuia te unau lahin engmah hriat an nei bawk silo" ka ti ta tawl a.




Ka pa chu a nui huk huk a, "I nu khan inneih a peih tawh lo aniang" a rawn ti hluk a.




"In fate hian hriat ve kan phu viau chuan ka hria" ka ti ve leh ngat a.




"Ni e, ka rawn biak nachhan tak che pawh a ni. Hman deuh aṭang khan i nu mizia hi a danglam riau a. Zanah programme pawimawh chhuahna tur chhuanlam a rawn nei haw fo bawk a. Khami chho vel aṭang khan kan boruak kha a ṭha lo chho ta deuh a ni" a rawn ti ta chiah e, ka lo rin ang thil vek a ni.




"Tunah pawh Mampuia te phun tam na ber a ni" ka ti ve leh thuai a.




"Nia, i nu chu a luhlul em mai. Pasalte min zahna a nei bawk silo. Keia thusawi ve khan awmzia pakhatmah a nei bawk si lova, hetia awm hi a ṭha ber. Engpawh ni sela, ka fate mamawh ngaihtuah turin ka damṭha a nia. Theihtawp ka lo chhuah anga, nangpawhin i nau te tan theihtawp i lo chhuah zel dawn nia" ka pa thusawi chuan min dek zar mai. Ka mitthla ah ka nu a rawn lang a, ka tawt up up bawk.





"In dim la aw? Hna te chu damchhungin kan thawk reng dawn a, chintawk neih thiam a, mahni in duat thiam ve tur ania" ka ti ve leh zung zung a.




"Remchangah kan inbe leh dawn nia. Karleh aṭangin thingzai in kan riak lut leh ang" a rawn ti leh a.




"Pa, indim viau rawh aw? I hrisel lo ropui si" ka thinlung chhungril berah hian ka na veng veng. Ka pa dinhmun chu ka ngaihtuah zui neuh neuh a, ka nau te lah hian a ziktluakin thil an hre lova. Hrilh ta ila, an hrethiam thei ange maw?






Ka pa hi In pui nghak tura ka pu khan a duh ber a ni a. Mahse, ka nu hian Khawpui lamah eizawnna a awlsam zawk a ring tlat si a. Ka pi leh pu remti lo chung chungin ka naupan laiin kan khua kan chhuahsan kha a nia. Ka pa lah hi mihring mize ṭha lutuk a lo ni bawk nen, engkim mai hi a dam zawng leh kan lungrual tlanna tur zawnga thil ngaihtuah ṭhin a lo ni bawk si. Tunah pawh chhungkaw pa zawk a chhuak ta zawk anih hi. Kawng engkima a fate min la ngaihtuah zia chu kan hria in kan hmu reng bawk. Tunah pawh ṭha taka nau ka neih theih nan theihtawpin hna a thawk a, thlamuang taka awm hahdam turin min la rawn ti ṭawk ṭawk reng anih hi...






Ka pa nena kan inbiak zawh hnu chuan ka thaw huai a. Ka pa chu ka ngai thar veng veng bawk. Engtikah tak min duatna aw ri kha hmaichhanah hre leh tak ang i maw? Ka nu rawn haw thawm ah chuan ka tho thuai a, inbe lovin kan inpel satliah teh ngawt a. Ka hmai ka va phih teh ngawt bawk a. Ka nu chu ngawi rengin pindan lamah a lut tlang zui nghal a. Keipawh ka pindan lam ka pan a, Mampuia rawn haw hma chu ka mu nghet leh dawn chuang lo tih hria in Khumah chuan hla ka ngaithla zui vang vang a.






Hun a kal ve zel a, harsatna em em nei lo in Nau neih thla kan chuangkai ve ta reng mai. Theih ang angin Nau neih hun leh a hnulam ami tur kan in lam khawm ve tawh bawk a. Nau neih pawh kan inpeih ve tawh hle. Tleipuii pawh a rawn phei ve deuh reng a, naute hmel hmuh hun min nghahhlelhpui ber te zing ami a ni.






Zing dang ang lo takin ka thochhuak chu ka awm a nuam hlei thei meuh lo. Ka nu lah a dan pangngai in zing ah a chhuak a. Eirawngbawl a han chet vel pawh chu a nuam hlei thei meuh lo. Ṭhutthlengah chuan ka ṭhu kun chal a, ka pum ka tuai leh hauh hauh ṭhin.






Mampuia rawn thochhuak chuan thingpui in pahin min en reng a. "I tho nuam lo deuh em ni?" tih pahin min rawn hnaih thuai a. Ka chal chu a rawn dek teh ngawt a. Mampuia hi a awm lo ang tih hi ka hlau ṭhin. Diktea pawh hian a theih leh thiam ang angin min ngaihsak ve em em tho a. Mahse, mahni mum mum a mum tawp chi a lo ni bawk nen, ka awmdan danglam hi a hmuthiam ve ṭhin lo.





"Nia, tukin chu ka awm a nuam hlei thei lo. Ek chhuak in min hnawh ûl a, inthiar ka tum a, ka va ṭhu hlawhchham ṭhak zel thung a" ka lo ti thuai a.





"Lo ṭhu rawh, ka rawn chetzawm ange. I duh leh va mu leh daih la?" tih zung zung pahin a thingpui in na No chu a tleuhfai zung zung bawk a. "Dal hi kan tur nge?" tih pahin a hawikual that that a.





"Mampui, lo tiduh suh. A la hma alawm, ka rawn ti mai ang" ka lo ti thuai a.




"A ngai lo, a har lo em mai. Dikte, ka nu va phone teh, rawn haw rawh se" a ti leh zung zung a.





Ka tho nghal thuai a, "A ngai lo, a buai dawn tehreng nen...ka nuam leh mai ang. Naupai lai te chuan nuam dam deuh a awm a hat alawm, neuh neuh a awm reng zel alawm" ka lo ti ve thuai a.






Ka thusawi ve chu ka nau Mampuia zet chuan a ngai pawimawh hran lem lo hle. Ka hmelah a hmu in a hrethiam hle bawk a. Keipawhin tlawmngaih chhuah reng ka tum lui ta bik lo. "Mampui, anih ka va tluzal leh lawk aw? Ka awm rem thei lo" ka ti ta tawp a, pindan lamah chuan ka phei zui nghal a.






Mut nawm chu sawi loh, a hma aiin ka nuam lo zual telh telh thung a. A chang leh ka ṭhu a, Khum aṭanga chhuk in ka veikual kûn de de bawk a. Mampuia thawm chu ka ngaithla kar reng a. A thiam ang tawkin a che kual nasa dawn tih lah ka hai lo.






Tleipuii pawh ka be ta ringawt a. Hmanhmawh takin a rawn phei nghal bawk a. Diktea'n ka nu a lo be bawk a, ka nu pawh Dawr kharin a rawn phei ve nghal a. Tleipuii pawh a rawn thleng phei har lo. Thiam a nei dawn lo tih kei a ṭhiannu kumhlun hian ka hai lo. Mahse, ka bula a lo ṭhut ringawt pawh chuan min thlamuan takzet thung.





Mampuia chuan ka zak tawn tawnah vuanin min pawt tho uaih a, kei ka lo ṭhen tlawk tlawk thung. "Motor chu va châng hmasa ta che" tiin ka vîn hrawk a, a buai phili lutuk chuan tih hmasak tur pawh a hre lo a ni ber. "Aw, tikhan lo ṭhu leh lawk la. Ka rei lovang" tiin dim takin ṭhutthlengah chuan min nghat leh a, rang zetin pawnlam a pan nghal rawk rawk a. Ka pum dawmin ka ṭhen chak chak a, ka nu biak ka duh viau nangin ka phone awmna mai ka hre lo. Tleipuii lah chu a lo ding khawng ve reng ringawt a, "Ṭhiannu, tuar ṭang ṭang rawh" a lo ti ringawt a. Diktea nen an in ang reng, Diktea pawhin min lo en dêk dêk ringawt.







Kawngkhar a rawn ri rawk a, Mampuia a rawn tlan lut puat a, a hnung lawkah ka nu a rawn lang ve nghal zat a. "Mâte, engtinnge i lo awm?" rawn tih sawk sawk pahin ka bulah a rawn ṭhu nghal thuai a. "I rawn thlenna a rei tawh em?" Tleipuii a biak chhunzawm zat a. Mampuia chuan, "Kal ang le, i kal thei angem? Ka pawm mai dawn che em ni?" a tih rual chuan min pawm fel der a ni ber e. Hmanhmawh takin min chhuahpui dawr dawr a. Kawngpui kan hnaih vak lo nen Taxi awmna thlen hma in vawi li ngawt kan chawl thla hman a. Ka nu leh Tleipuii pawh kan hnungah an rawn in khai bawr hle bawk.






Taxi driver chuan kawngkhar a lo hawng vat a, ka ṭhutna turah ṭhelretpuan a lo phah sa diam bawk. Rem taka min ṭhutfel tir hnuah kan bungraw ken tur chu a khung fel sawk sawk a, kan tlanchhuak zui ta thuai a.






Ka awmdan apiang chu a hrehawm em em vek a ni ber, driver ṭhutna hnunglam vuanin ka kûn ngal a; a khât tawkin ka húi leh pap ṭhin, ka thlanfim a tla zaih zaih a. Ka nu lahin ka awmdan min lo zawt sek a, ka chhâng ṭha peih tawh lo. Tleipuii leh Mampuia erawh min hrechang leh tawh lo ang maiin an inkawm leh luam tawh.






"Kan thleng e" Mampuia'n a tih rual chuan ka dakchhuak vat a, kawnglakah kan ding zeuh zeuh a; damdawiin hlat ber ṭum ni hial in ka hria. Muangchangin ka pên chhuak a, ka nu chuan min lo chelh thuai a. Engang a boruak ṭha lo pawh lo nei ve ṭhin mahila Nu te nge nge chu kan lo thlamuanpui ber zel anih hi.






Hlauthawng lo turin min fuih mawlh mawlh a, a ban bulah uaiin muangchangin nau neihna lam kan pan phei chhat chhat a. Tleipuii leh Mampuia chuan kan bungraw ken ang ang te chu kan hnungah an rawn khai phei ve thuai bawk a. Kan ṭhenawm hnai lawka Nurse Senior pahnih U Mamuani leh Nu Sangtei an lo duty a, ka nu in a va be nghal vat a. Anni pawhin min lo ngaihven zui thuai a, tukverh bula khum âwl ah chuan min muttir zui thuai a.






"Tukin lamah pawh ila in sawisel mang si lova, a mak teh thut mange. Tuar hram hram la, ṭha takin i nei ngei ngei ang" tih pahin ka nu chuan ka hnungah min chul sak hliau hliau a. U Mamuani'n ka banah venflon a lo vuah ve mek bawk. A na a zual apianga ka thawchham lek lek fo chuan min ti awm nuam lo ru riau a, ka sawi duh lem lo thung. Tuarzuau anga lan ka hlau em em bawk. Saisir zawngin ka mu ngât a, ka ngawi hle hle a, a khât tawkin ka ṭhen leh chât chât ṭhin a.






Ka mutna khum bul lawka mu ve chu a in hnit deuh faih faih reng a, an pa ni awm tak chuan a lu lamah kuahin a lu a chul sak hliau hliau a; a ngaihsakzia a mitmengah a langchiang hle bawk. Hriathlua ka ngaihtuah chhuah rualin ka lu ka thing nawk a, ani chuan a fa ah pawh a ngai lo anihbkha. Chutiang ngaihsakna dawn te chu ka tan chuan van a rah ang a ni, ka mit ka chhing zui ta daih a. Ka taksa pum mai chuan ka na ngawih ngawih a, 'hei aia na hi a awm thei tawh lo ang' tih mai tur a ni.






Mampuia chuan Tleipuii bulah a hlauhthawn zia a sawi uar ngang mai. Tleipuii va chhuak rawn let leh chuan Eitur a rawn khai bawr leh ṭeuh a, rasgulla chu min eitir ngei a tum tih ka hria; min duhsak em em rualin tun dinhmunah chuan engmah ka lem thei in ka ring lo. "A tui tal in tum la, nau i sang chhuak zo lo ange?" a ti sek sek reng a; ka nat dan chu a hrethiam miah lo niin ka hria.





"Ka peih lo, nakinah" ka ti thâm chhal a, "Mâte, tlem tal ei tum rawh, taksa chak a pawimawh ania" ka nu in a lo tih zawm ve zat a. Mampuia chuan min ṭhut rem tir a, ka hnungah ka nghen theihin a rawn ṭhu zui nghal vat bawk a. Ka nu in fiante in min barh nghal mawlh mawlh a, ka luakchhuak hlui nen lem a sak ṭalh mai. Ka mu leh tur ka insiam rem mek chu ka au deuh ṭhat a, ka hawi phawk nghal hrâ bawk.





"Nu, a lum pup mai. Tui a bua a niang" ka nu chu ka en nghal hâw a, ani pawh a che zui nghal vat. "Tui bawm a keh anih hi, nau i har dawn lo tawp mai. Hlauthawng lo la, Mamuani te ka va ko ange" tiin duty room lam a pan zui thuai a, Mampuia leh Tleipuii ten min lo ṭawng thlamuan ve nghal mawlh mawlh bawk.





"Nau neihna room lamah lut zui mai ang aw. E khai, nau neih i awlsam dawn hi le. Nang aia lo awm hmasa ho neih khalh vek la a ni mai alawm" tih pahin U Mamuani chu a nui var var a, a hmel hmuh nuam em em leh min ngaihsakna chuan thlamuanna tam tak min pe bawk. Natna khuma mu mek te tan pawh U Mamuani te ang a fel leh hmel hmuh nuam hi chu dam sawng sawngna tham an ni ni ngei ang.





Ka nu ka kuah a, muangchangin kan kal phei chhat chhat a; ka serh bawr ah chuan engemaw hlawm lian tak rawn chhuak tur ang mai hian min kam deuh rûn a, ka naute chu a rawn tla tawp mai ang tih hlauin pen pawh ka pen ṭha ngam meuh lo.





"Hetah hian lo mu rawh le, i nu hi lo va chhuak se la tiraw? Hei, i u Mamuani nen kan awmpui dawn tho che a" Nu Sangtei chuan a lo ti zangkhai vah a, ka nu chu melhin ka lu ka bu zauh a; a chhuak zui thuai a. Ka mutna tur chu a nuam ka ti lo chiang kher mai, a awih deuh vut mai bawk nen; a mawng lamah chuan ka tawlhthla daih ang tih hlau zetin ka in vuan bet ṭai a. Ka nau veina nâ nen, ka tlak hlau in dawm bet nen; hahdamna reng reng a awm lo.





"Khawi le, i mal ti kau la" Nu Sangtei chuan a rawn tih leh vat a, ka zak ta tlat pek anih chu; ka mal chu ka ti chîp tawlh tawlh a. "A zahthlak loh ania, kan endik vat che a ngai alawm" U Mamuani chuan a lo ti ve thuai a, ka dulah chuan a lo chûl hliau hliau bawk a.





"A zahthlak e, tumah hrilh miah suh ang che u" ka ti chhuak ṭawk ṭawk a, za em em in an nui dun hawk hawk a. Nu Sangtei chuan min han endik ta thuai a, ka kumkuruh a lo kau full ṭep tawh zawk a lo ni, "San a rawn pek leh veleh i sang dawn nia aw?" a ti a, a sawi zawh rual deuh thaw chuan san a rawn pe zui a; ka kâ a boruak hip lut nghek in, san dan tur ni anga ka hriat dan chuan ka sang zui ta nghek a.





"Zothan, vawikhat leh chiah aw? A chhuak fel dawn e, sang rawh le...sang rawh le" Nu Sangtei chuan a ti mawlh mawlh a, ka lu hai mup mup chuan min ti vai ruai a; ka mut a chhuak em em bawk. Theihtawpa ka san leh hnu chuan naute ṭap thawm a rawn awm a, ka na zawng zawng chu lak bo ang duak a ni bawk.





"Aw, kan nula tê reuh chu a va ṭap vîn ve le.... A nu tetlai a chhun dawn a ni ngei ang" Nu Sangtei a nui hak hak a, fanu ka nei ta. A lai hrui chep chatin puanin an tuam zui mawlh mawlh a, ka piah lawka naute mutna an siamah chuan an pawm phei a; ka en zui ṭawk ṭawk mai. Drip min khai sak nghalin min buaipui zui nghal sawk sawk a. Ka inhliamna an ṭhui lai te chuan ka fanu mutna lam ngawt chu ka lo en a, nâ pawh ka hre chang tawh meuh lo.





"Kan zo fel e, i khum lamah kan sawn phei che anga; naute hnute hnek tir ang aw?" U Mamuani chuan min nuih var var a, hun harsa lai ber ka paltlang ta. 'Tunah chuan Nu tak tak ka ni ta' ka ti rilru mawlh mawlh a, lawm avangin mittui a tling pam mai.





Ka fanu, ka naute, ka pumchhunga a awmlai aṭanga theihtawp chhuah a ka enkawl ngei mai chuan ka hnute a hne ve ta dek dek chu a ni si a. Mumang a ang te ka ti rum rum mai. Mampuia chuan a rawn bih sek reng a, Tleipuii lahin kil hrang hrang aṭangin thla a la sek bawk a. "Ka status châk tawh bawk a, kan Lianṭhuami chu kan hmang vak ange?" a ti mawlh mawlh a, a nui har har bawk a.






"Awi, nang hi chuan a hming i sa lo khawp ang" tih pahin ka melh ngheng a. Kan nui dar dar hlawm a, ka nu lah chuan, "A nalh viau lo maw? 'Ṭhuamte' kan ti anga, a inhmeh dawn asin" a lo ti ve sek leh nghal a. An vai mai chuan ka fanu, engmah la hrethiam lo, hnute hnek leh ṭah chauh la thiam an fiam sek chu ka lai a na ru riau leh nghal. "Ka fanu, hming mawi tawk mai kan sa dawn nia. I inhmeh em em tur" tih pahin dim tê in a biangah chuan ka piai zauh a.






Ka nu leh Mampuia chu an haw phei phawt anga, Tleipuii'n min awmpui rih ang. Ka nu in kan dinhmun a zirin Tleipuii a rawn thlak ve thung ang. An haw hma in Mampuia chuan vawi thum lai a rawn bih leh hman nia. Mipa si chuti tak maia nau a lo lawm em em mai chu mak ka ti a, ka lawm em em bawk.






Ka nu te haw hnu chuan Tleipuii chu ka bulah a rawn ṭhu a, "Enteh" tih pahin a phone chu a ka hmaah a rawn lek vâ a. Hriathlua status a thu inziak chu ngun takin ka chhiar a, ka chhiar nawn leh a, 'I lakah ṭawngkam ka thlahdah a, thil pawi tak ka ti a, ka nghahhlelh leh huphurh em em Ni a rawn thleng ta... Engang takin min la ngai ang che maw? Mahse....' tih zawng a ni na a, a sawi zawh loh ah khian thu tam tak a inzep ṭeuhin ka hria.





"Ka status a hmu reng sia, engmah a rawn sawi miah lo" Tleipuii chuan a rawn ti nghat a. A hmelah chuan engang chiahin nge Hriathlua chu a ngaih ang tih rinthiam a har ka ti hle bawk.




"Engnge rawn sawi sela i tih? Khati khawp a boruak kan neih tawh hnu ah?" ka lo ti hmak a. "A ninawm, thildang sawi ang" ka tizui leh hmiah a.






Engkim tihfel a ngaih thu te, Damdawiin chhuahsan hmaa Birth Certificate siam a ngaih thu te chu min hrilh hre zung zung a. Keipawhin ka fanu hming chu ka sak ngei a ngai tih ka hria. Ka nu pawh ka va be thuai a, "Nu, naktukah kan rawn chhuah phei theih hmel tho si a. Tleipuii hian 'a buaithlak mai mai, min rawn thlak buai duh lo mai rawh se' a ti anih chu" ka va ti thuai a.





"Anih tak chu, naute dinhmun a ṭha tihna a ni mai a. A lawmawm lutuk alawm. Engtinnge Bawihtei hming chu?" a rawn ti vat a.




"Ruthi Muanawmi" ka lo ti vat a. Tleipuii pawhin min en rang hle. "Awi, fanu ka neih hunah ka sa ang ka lo tia" a lo ti niah niah a.





"A nalh lutuk alawm. Hei, Mampuia lah chuan, 'An rawn haw hunah pindan a fai lo palh ang' a tia, i pindan a tifai nasa mai" a rawn ti chu ka hnuk a ulh lek lek hial. Mampuia lakah hian bat ka va ngah tak.






Ka nu nen kan inbiak zawh rualin Tleipuii chuan, "Hei min rawn zawt sia, ka hrilh mai a nia" tih pahin Hriathlua nena Message an inthawnna chu min lo hmuh thuai a.






"Engnge maw i hrilh kher? An lo buaina tur a awm lo em mai, ka duhna hmun hmunah ka nei ang" ka lo ti nghat a. Tleipuii tan a nawm loh ka hlauh deuh avangin, "A pawina em em a awm chuang lo, chung te em em a ngaihven ve loh te chuan a mihrin loh zia a belhchhah lutuk ange" ka ti leh ta thuai a.





Ka chau ve bawk nen ka muthlu diar diar a, Bawihtei lahin hnute a hne dek dek reng a. Tleipuii chuan thil hrang hrang a sawikual reng a. "Tumah hi mi famkim kan awm lo. Mihring siamṭhat nan khawdur a ngai an tih ṭhin maw..." a tih te chu hla taka rawn ri veu veu ang in ka hria. A bak chu engmah ka hre tawh lo, ka muhil zui bawrh bawrh a.






Ka harh leh miah chuan ka tho â lek lek zawk. Tleipuii chu ka sir ah chuan rem leh rem lo in a lo muhil ve sêk sêk bawk a. Bawihtei chu ka en a, a va han fel tak; a nu Tleipuii ang maiin a muhil sêk sêk a, "Ka fanu, i va han fel em em ve maw le? Ânu hi a chau sia, tihbuai i hlau em ni?" thâwm dim takin ka be sep sep a.






Zankhua in engmah harsatna kan nei lem lo. Nurse duty an felin min rawn kan khât tawk reng bawk a. Thlamuang takin kan pathum chuan kan muhil siai siai a ni ber e.






Bawihtei'n Ni thar boruak a hip hmasak ber a rawn thleng a. "Morning ka fanu" tih pahin a biangah ka chul zeuh a, a tal ve set set mai. Chawhma lama chhuah hman kan in beisei avangin Mampuia pawh a rawn thleng phei thuai a. Tleipuii nen engkim an buaipui a, Bawihtei Birth Certificate chu lungawi zetin ka ennawn sek a. 'Ruthi Muanawmi' tih chu ka va chhiar nawn ngun tak....






Engkim peih fel a ni a, Doctor in uluk takin kan pahnih chuan min endik leh vek a. Kan hriselna a ṭha em em te chu Pathian min venna liau liau a ni. Mampuia pawh a phur hle mai, Tleipuii chuan dim takin nau a pua a, Mampuia'n kan thawmhnaw ak bawr luai chungin muangchangin min chhawm chhat chhat a.






Damdawiin Gate kan chhuak chiah tihin ka ding chat mai. Hriathlua leh Rinrina chu min tâwk zawngin an rawn kal a, kan in en ngar mai. Rinrina chu a rawn tlan phei thuai a, "Anu....kan rawn kal ve a..." a rawn ti phei lauh lauh a, ka lo nui lui sak a.






Hriathlua pawhin min rawn pan hnai chhat chhat a, Mampuia thil ah bawr laih chu a rawn ban nghal a. "A ngai lo, kan ti thei...hun harsa zawng zawng kan paltlang tawh" ka lo ti hmak a. "Kal ang" tih pahin ka pên zui chhat a. Rinrina lu a tuai zauh pahin, "Bawihte, kan va haw phawt ange. Mut hahchawlh ka duh a" tih pahin ka nuih lui leh sak a.






Ngawi rengin kan kalsawn a, Rinrina hrilhhai hmel erawh hmuh hrehawm ka va ti tak. Hriathlua chuan engtinmah min hnial lova, engmah a sawi hek lo. "I ho em mai, ṭha taka biak theih reng" Mampuia chuan a ti sup a.






Ka bân a rawn chelhtu chu rang takin ka en vat a, Hriathlua chuan mitmeng hnual raihin min lo melh khiau a. "I fapa saw uluk takin enkawl rawh. Keipawhin fanu enkawl tur ka nei tawh, kan hmalam hunah tih tur kan ngah dun viau in ka hria" tih pahin ka kut a rawn chelhna chu ka dahsawn sak a. Muangchangin kan kalzui leh ta nghal a. Tleipuii chuan Motor chhung aṭang chuan min lo en vang vang a...







(to be continue......)


Show post links
Top

[Ngaia]

DEAR PAIN
Chapter - 20



By: Brigida Hugo





Ka fanu mu chu ka en reng a, a tal chân chân reng a. Chhaih leh lawm a hrethiam ve tawh a, ka nun a va tihlim tak. Hriathlua pawh tunah chuan ka ring ve deuh tawhin ka hria. Nitin ka fanu chanchin min rawn zawt reng ṭhin a. Rinrina lahin Video Call nen lam a nau a rawn fiam ve lâwp lâwp reng bawk a. U Mama te nupa pawh an bâng lo. Min rawn be reng hlawm a, Hriathlua nun inthlak nasat tawh zia chu an chawtui ber a ni fo bawk.






Kan In ah chuan a rawn leng ngam em lova. Mahse, phone ah erawh nikhatah vawi hnih vawi thum min rawn biak châng a tam mai. A hma angin ka haw em em tawh biklo tih chu ka awmdanah ka hai miah lo. Mahse, chhungrilah erawh hlauhthawnna lian tak ka nei thung.






Ka pa pawh a khât tawkin ka be ve reng a, ani pawhin hun remchang hmasa berah a tunu rawn tlawh ngei min tiam a, ka hahdam sawng sawng mai. Ka nu erawh a mizia a danglam telh telh thung a. A châng hi chuan, "Kim lohna riau hi i nei nge mawn le? Doctor bulah hruai che ila a ṭha ang" te ka ti rilru fo mai.






Bawihtei diaper thlak pahin ka zai rât rât a, pindan kawngkhar rawn kik dat dat ri chuan ka zâi lai a titawp chat a, "Lo lut rawh" tih pahin ka hawichhuak pah vat bawk. Mampuia chu a rawn nui lut var var a, rang takin Khum lam a rawn pan a. Bawihtei bula rawn bawh thlawp pahin, "Ka naute tuai lian, hmelṭha suk suk nu" a rawn ti nghal luam a. Bawihtei pawhin a putea chu a lo nuih ve sen sen mai.





"I rawn haw chauh em ni?" tih pahin Sana ka bih nghal zat a. "Ka nu a lo haw tawh em?" ka tizui zat a. Zan dar 10 a pel tawh na a, ka nu chu a rawn la haw ka ring chiah lo.




"Aw, haw tawh. Pindanah phone a hmang" tih pahin Mampuia chuan Bawihtei chu a biangah a hnar in a nawr ne ne a.




"Tu hi nge maw a biak ṭhin em em ni?" tih pahin Diaper hlui chu ka tawmtel zui niap niap a. Ka thaw halh a, "Mampui, nang tal hian ka nu hi khak rawh. Ṭhenawm khawveng min sawi duh dan tur te hi in thlir pha ve lo emaw ni?" ka ti leh niah niah a.




"Engahmah a ngai dawn chuang lo, ka in rawlh buai peih lo. Mahni pawh kan in buaipui fel hlei thei lova" a lo ti teh hmuk a. "Nupui neih ka hun ve tawh tho em?" tih pahin min melh rulh a.





"I naupang chhe viau tawh lo" tih pahin ka lo nui sak a. Amah ber chu a lâi leh ringawt tawh. "A neitu tur berin i cho tawh a thu a ni mai alawm" ka tihlai chuan a phone a hmet nuap nuap a. "Hei" tih pahin hmeichhe pakhat thlalak chu ka hmaah a rawn phawrh vâ a. Ka en a, ka ennawn leh a. "Mahlimi a ni maw?" ka ti sap a.






Mampuia chuan mak tih hmel zetin min thlek hû a, "I hria a maw?" a rawn ti thâwp sut a.




"Zohminga nau Mahlimi anih chuan ka hria" ka lo ti thuai a.




"Aw, a u chu Zohminga" a lo ti thuai a.




"Ka hria alawm. A u te nen khan College kan kalho ṭhin. A la dam a ni maw?" ka ti ban chat a.




"Aaa....a dam chu a ni mai" a tih fân ruih danah ka hriat Zohminga, ruihhlo duh kim zet kha a ni tih ka hria. "Anih Mahlimi hi i hre hrim hrim a maw? Zohminga nen chuan in in ngaizawng tawh a nilo maw?" a rawn ti leh chu ka nui hul hak a.





"Ngaihzawng teuh lo mai, kan ngei theih nak alai a. Mahlimi hi a u buaipuiin a rawn kal ziah a, chuta ṭang chuan ka hria. College Gate bulah te hian a lo nghak ṭhin. A tir chuan a bialnu emaw kan tia, kan lo ui lutuk a" ka ti ta mawlh mawlh a.




"A hmelṭha sia tiraw?" phûr zetin a lo ti thuai a, "Nia" tih pahin ka nui lui sak a. "Remchangah kan la sawidun ṭha leh dawn nia" ka tih hnu chuan Bawihtei chu a fawp nawk nawk a, min chhuahsan zui ta nghal a.






Mampuia awmlai khan ka phone ah message a rawn lut tlang tlang a. Hriathlua ngei anih pawh ka ring. Bawihtei bulah chuan ka mu a, hnute ka pe zui thuai a. "Ka naute hmelṭha...ka fanu lian...muhil leh tawh rawh le" ka ti sawk sawk a. Ka phone chu ban nghal thuai in ka message dawn chu ka hawng zui nghal vat a.




"Kan mu thei em aw?"

"Bawihi...min la ngaidam thei lo em ni?"

"Vawiinah ka inhlawh leh a, Bawihtei thil tur ka lei nual a..."





Phone chu ka hmet thim a, ka thaw deuh hak a. U Mama te nupa lahin Hriathlua nun in thlak nasat zia an rawn sawi reng kha a ni si a. Tumah hi mi famkim kan awm lova, in ngaihdam tawnna tel lo chuan he khawvelah hian chenho a harsa hle tih lah ka hai bik lo. Mahse, Hriathlua laka nêm tak nih nghal erawh ka duh chuang lo. Ka chhungte ngaihdan hriat hmasak te pawh a ṭhat ka ring bawk.





Chhun lamah ka che hah ṭhin bawk nen mutchhuak in min rawn zêm chiai chiai a. Bawihtei muhil bêm chu ka thlir reng a. Muangchangin ka tho a, pindan kawngkhar chu ka va kalh zui zat a. Khumah bawk chuan lawnkai zui in, Bawihtei chu ka khuap a, muthilh tumin ka suangtuahna ka kâwm zui neuh neuh a.





Khua a dur khup khup a, hmanhmawh takin Inchung lamah chuan ka tlanchho hlawk hlawk a. Bawihtei puan ka pho tlardal chu ka phihthla sawk sawk a. Ruah mal lian pui puiin a rawn tla fuap fuap tawh bawk a. Hmanhmawh takin ka chhuk thla leh thuai a.





Bawihtei chu khum ah a lo ṭap pâr a, Ṭek tla ri tuarh in a rawn zui zat a. Rang lutukin Bawihtei chu ka pawm thuai a. Ka paw bet nghal sawk sawk a, hmanhmawh takin pindan aṭang chuan ka chhuahpui zui nghal a.






Tlai dar 3 a pel awrh chauh na a, engmah a hmuh theih tawh loh, a thim phui khup a. Current a rawn thi zui bawk nen, hmanhmawh takin Inverter awmna lam ka pan thuai bawk a. Inchhung a êng kulh na a, pawnlam erawh a thim phui mup a, thli a thaw hum hum a, kâwl a phe êng zawr zawr bawk a. Bawihtei chu hmalamah ka pua a, ka kuahbet tlat bawk a.






Tukverh bulah ka ding a, pawnlam chu ka thlek sek a. "Bawihte, i pa chu aw...ka va ngaihtuah tak. A rawn haw thei angem le?" tih pahin hlau chung chungin phone chu ka hmet êng zui nghal thuai a. Ka beng bulah pawh ka dah ngam lo, a ri ral ral chu ka ngaithla reng a. Min chhângtu a awm lo, hlauthawng ru zetin ka tinawn leh a, engmah chhânna ka la dawng chuang lo.




"A rawn haw mek anga, thli thaw ri nasa nen a hre lo aniang" tih chu ka in hnemna awmchhun a ni. Tukverh bulah chuan ka ding hnai ngam tawh lo. Ṭek a tla êng leh zuai zuai ṭhin a, ka phone pawh chu ka hmethlum nghal thuai a.






Midang tumah ka hmu miah lo chu mak ti takin ka enkual thuak thuak a. Rinrina hmel hmuh tur awm miah lo te chuan min ti hlauthawng zual sauh bawk. Sana ka en sek a, rilru ṭawngṭaina ka neih nasat ber ṭum a ni hial awm e.





Hlau chung chungin ka phone chu ka ban a, banga Sana intar chu ka melh leh ngar bawk a. A rawn thlen a hun tawh takzet tih lah ka hai lo nasa mai. Ka ngaithla leh vang vang a, chhânna ka la dawng chuang lo. Ka thaw halh a, "Bawihte, i pa hian harsatna a tawk a ni ngei ngei ang" ka ṭap lek lek bawk.





Bawihtei chu muhil daih sela ka duh a, ka awi kual ngat ngat a. Mahse, min rawn enchho khiau reng a, muthilh tum âwm pawhin a lang lo. Pawnlam rawn êng uarh chu en tumin ka phei thuai a. Tukverh aṭang chuan ka en thuai a, a lo êng vek tawh a. Mi an lo vei nuaih nuaih a, engmah thil thleng awm ang pawhin a lang lo. Khati khawp a ruahsur nasa si kha khawi lai mai pawh chu a hul phuk vek bawk si. Ka kalsawn a, a ngaihna hrelo zetin kawngkapui aṭang chuan ka ennawn leh ngat bawk a.






Bike ri dut dut ka hriat rual chuan ka thaw nghal huai mai. Hriathlua Bike ri a ni tih ka hai lo nasa mai. A rawn lan hun nghakhlel takin ka lo thlir reng a, a rawn lang zui ve nghal zat a. Mahse, ka nui tawp chiang hle. Hriathlua rawn phurh haw chu tunge a nih ka hrechiang takzet. Rinrina nu chuan min rawn nuih sâwng a, ka lo en tlawk tlawk thung.





Rinrina chu a laiah a rawn chuang a, a nu a chhuk rual a zuangthla thoh a, hmanhmawh takin a rawn tlanphei zui a. Ka lo en reng a, min en miah lo. Hmanhmawh takin min tlanpel zui daih a. Rinrina nu chu muangchangin a rawn pên phei chhat chhat a, engamah hma chuan ka lo inhûm ruh hle. A rawn kal hnai zel a, a hnungah Hriathlua chu a rawn phei ve chhat chhat bawk a.





Rinrina chu a rawn let thuai a, ka bulah chuan a rawn ding a, "Anuuu...." a tih rual chuan ka en thuai a. Nidanga min melh kar ṭhin khan min en reng reng lo. Nui var var chungin kan lam pana rawn kal chu a lo en khiau a. Rinrina chuan a kutah a lo ban chat a, a nu chuan min rawn nêk salh a. Inchhung lamah chuan an inkai lut zui a.






Ka dinna ngaiah chuan ka la ding reng a, Hriathlua rawn phei chu ka en reng a. Ka bulah chuan a rawn ding chat a, "Engnge i la en reng?" a rawn ti hmuk a.




"I mak...i lo va mak em em..." tih bak ka sawi thei lo.




"Ka fanu hi dah la, chhuak rawh" tih pahin Bawihtei chu a rawn ban a.




"Khawih hlek suh, nangni ang bula seilian tur hian ka phal i ring em ni?" tih pahin a kut chu ka beng per nawk a.




"Eng maw i sawi?" tih pahin min rawn rek zui nghal zat a. Inchhung lamah chuan min nawr lut phei rawk rawk a. Bawihtei chu a rawn ban zui a, puakpuan chu a rawn phih zui a. Kei lah ṭan tak te in ka ṭang bawk. Bawihtei chu a ṭap tuarh tuarh a, ka va harh chiang ber mai tak...






Bawihtei chu a lo ṭe ṭhat ṭhat a, "I harh lo a mawn le?" ka nu aw ka hre nghal zat bawk. Rang takin ka tho a, Bawihtei chu ka dap nghal that that bawk a. Tlaiah khan a tlei lo em em a, a ṭap ṭhet ṭhet reng a, a pum a nuam lo anih rinna kha ka nei a, ka ringsual lo viau bawk. A rim a na em em bawk a, hmanhmawh takin ka che sawk sawk a.





Pindan lehlam aṭang chuan, "Nau han pawm tlak pawh hi in ni ve lo. Mahni fa, bula mu reng ṭap tuarh tuarh pawh hre thei lo" ti barh barh ri lo chu thawm dang a awm lo, a reh ṭhiap a. Bawihtei chu ka thlak mawlh mawlh a, pindan lehlama âng thâwm hrelo tura muthilh leh thuai ka duh bawk.





Bawihtei chu a muhil leh thuai a, dimte in ka mut ṭhat tir a. Ka phone chu ka bih zuai a, zing dar 4 a lo ri ṭep tawh. Message a awm tih pawh ka hria. Mahse, ka khawih peih rih lo. Ka mumang chu ka ngaihtuah zui ta neuh neuh a. Hetiang lam thleng thleng a suangtuahna ṭul lo zet zet ka kawm fo vang hi anih ka ring, mumang lam thleng thleng a min umzui ni. Mumang mah nise Rinrina ka hmuhdan khan min tina em em thung.





Pindan kawngkhar ri dawt dawtah chuan ka harh zawk a, "A mak em em lutuk em mai. Zan mu ṭhalo pawh ni mang silo, chuti chen chen han mut theih" tih thawm chu ka bengah a kiu vawng vawng mai. Ka tho nghal vat a, Bawihtei a harh hlau zetin ka aw ka thian kharh a. Ka phone ah Sana ka en thuai a, dar 6 a la ri lo hret. Thosilen chu tiphui ṭha in ka tho phei nghal thuai a. Ka nu chu a lo inchei mawlh mawlh a, ngawi rengin ka che zui nghal sawk sawk a. "Ka kal a nia" tih pahin a chhuak zui a, ngawi rengin ka thil tihlai chu ka tizui mawlh mawlh reng a.






Nilengin ka buai leh dawn tih hria in ka tih tur inchhawp chu a hmasak dan indawt deuhin ka ti zung zung a, Bawihtei lo harh veleh tawh nen hna erawh a sawt leh tawh lo hle. Diktea pawh chaw ei lova chhuah a ngaih avangin a rawn tho thuai a. Mampuia erawh chawhnu lam chauha a chhuah dawn avangin chaw ei thleng a nawrthawh a ngai dawn tih pawh ka hrechiang em em bawk.






Diktea chu a insiam sawk sawk a, Bawihtei chu a ralkhat chhaih zuk zuk a. Mampuia nen hi chuan an danglam takzet a ni. Mampuia ve thung chu khap ngai khawp leh Bawihtei tana ninawm khawpin a khawih peih thung a. Diktea hian pangngai taka a pawm pawh ka la hre lo. A lawm lo a nilo, a ti vel thiam hlawl lo a ni. Diktea chhuah hnu chuan chaw ka chhuangkai a, chawhmeh vang nen thildang tih tur tam bawk nen; eirawngbawl hunlai hi chuan ṭah a chhuak rum rum ṭhin.






Chaw ka chhuangkai thuai a, phone chu ka ban thuai a. Bawihtei lahin min lo chhaih ve sek reng a. Hriathlua message a lo tlar thla dal tawh. A hnuai chiah a Malsawma message chu hawn loh zawk ka duh rualin ka chhiar chak em em lawi si.





Phone chu ka dah zui daih a, chaw phit sar sar lam chu ka pan thuai a. Mampuia a rawn tho nulh chu mak ti zetin ka lo en reng a. Ani erawhin Bawihtei lam a pan a, ṭhutthlengah chuan a ṭhu nghal thuai a. Rei an in awm tlei dawn lo, a tiza in a ṭhuai leh nawk nawk dawn tih ka hrechiang bawk. "Lo ti ṭap miah suh ang che" tih pahin ka che sawk sawk a. Ka sawi zo chauh a, ka rin ang ngeiin an inti ṭe leh tawh.






Chawhma chhung zawng mawng pawh hûng hman lovin ka che a. Bawihtei muthilh lai chuhin ka insu a, chhungkaw thawmhnaw bal zawng zawng suk nen Bawihtei thawmhnaw ka uluk bawk nen ka insu chawhma leh nge nge ṭhin.





Chhun lum laiin Bawihtei ka bualfai a, a fai ver vawr tawh bawk a. Tui deuhin a muhil thei tawh ngei ang. Mampuia pawh a chhuak tawh bawk a, kan nufa khawvel zim zia ngaihtuah neuh neuh chungin Bawihtei chu ka ti muhil zui a. A mufel chiah tihin thawmdim takin ka tho a, Panhnah khawih sawk sawk ka ngai. A hma anga tam ka khawih ngam rih lo a, ka hlawk tur ang pawhin ka hlawk pha meuh lo a ni ber e.





Kawngka kik dat dat thawm chu ka chhâwn thuai a. Malsawma rawn lut hlawl chu mak ti zetin ka lo en reng a. Mahse, ka in thunun nghal thuai bawk. "I va buai awm ve?" a rawn ti nghal var a.




"Nia, buai ve mawp mawp reng mai" ka lo ti thuai.



"Ka message i en duh bawk si lova...."



"I message hmuh fo hi ka duh lem lo"



"A ni maw...ka tihpalh anih chu" a ti nghut a.





Ka melh ralh a, min lo en reng. "Diktak chuan maw...nangmahah hian engmah beisei ka nei tawh lo. I laka ka nihna ṭhin zawng zawng pawh i hriat kha; mahse, khang hun kha an liam tawh. Nangmah vanga ka tawrh ve na zawng zawng kha tawk tawh rawh se. Tunah chuan ka fanu chiah ka ngaihtuah" ka ti ta ngheng a.





"A ni maw....ka lo hrereng ange" a ti bûl nghut a. A lungawilo hle tih pawh a ṭawng bûl nghut chuan a hrilhfiah chiang hle bawk.




"I lungawilo viau em ni?" tih nghat pahin ka melh pah zauh a.





"Diktak chuan ka tihsual ka hria. I lakah hian ka inthlahrung ngawih ngawih bawk. Tunah chuan khang ringawt ngaihtuah nawn kha ka peih tawh lo. Pawmlai neiin i awm lova, tun dinhmunah chuan hnaih che ka inthlahrung lo... Zothan, ka hmangaih zia che leh min hmangaih zia ka hmuthiam har a, min ngaidam ang che" tih pahin a rawn tawlh hnai hrut a.






Ka thil tihlai dah meuhin ka melh ngar a, "Malsawm, ka hrilh nawn leh ang che" tih pahin ka ngawi dat a. "Engkim a tawp tawh" ka tizui hmak a.





Ngeiawm fahranin a nui lui huah huah a, "Nuthlawi i ni a, i dinhmun hniam zia i hria. Kei hian ka rawn ngaihven zui ang che tih pawh ka in ring bik lo. Chulai karah..." a tihlai chuan, "E he, min lo va hmu hniam em em ve le.... Malsawma, ka beidawn san mihring kha ka lo hmuh ṭhelh lo che" ka ti ve ta ngheng a. "Nuthlawi ka nih vang maiin min zuam hlek suh ang che" ka tizui leh hrâwk a.





"I hmalam hunah engang chiah a harsa nge anih i hria ang chu!" tih pahin a tho nghal a.





"Lungngai suh, enganga harsatna lian pawh tawk ila ka hrilh hre hauh lo ang che" ka lo ti ve hmak a. "Pangngai takin i rawn leng lut emaw ka lo ti a, i hmel hmuh nawn leh ka beisei tawh lo ania" ka ti ve ngat. A chhuah hnu thleng pawhin vawikhatmah ka hawichhuak tawh lo, ka kûn ngal a, ka in sûm nasa lutuk chu ka hah vekin ka hria.





Malsawma ngawt chuan ka ngaihtuahna a luah zui a. Kan hun bulṭanna aṭanga a tawp thlengin ka la mitthla kim barh thei bawk. Malsawma kha ka thinlung zawng zawngin ka hmangaih niin ka hria. Sumdawnna chhe tê ka buaipui ve a, ka hlawkna zawng zawng erawh amah khan a chang vek a tih theih ang. Thil man to tak tak a duhin a ngen reng a ni mai a. Sana mawi leh nalh aṭanga thawmhnaw leh pheikhawk manto tak tak thlengin ka lakah a phût a, ka tana harsa leh phurrit lam a ngaihtuah ngai hek lo. Khati chung chung pawh khan a duh leh ngen ka tih hlawhtlinsak lo ngai lo.






Ka tana harsa ber, ka neih a zawnga hlu ber, ka thianghlimna meuh pawh chân ka hlauh avangin ka hlan a. Ka nuna ka hun kal tawha ka tihsual lian ber a ni. Kha aia hlu pek tur pawh awmse ka pe duh hial ang tih tur khawpa ka hmangaih em em khan a nun nawmna atan bak min hmang lo tih kha rilru na tak chungin ka pawm a ngai si.






Ka nawrkal theih nan engtinnge hma ka lak? Pasal ka um kha ka duhthlanna a ni reng reng lo. Mahse, kha zanah pawh khan ka runluih tumna khan awmzia pakhatmah amahah a nei chuang lo. Phal takin ka kut a thlah thei anih chu!






Tunah chuan engkim a tawp tawh, an ral vek tawh. "Vawikhat pawh ka hmu nawn duh tawh lo che" keima hriat tawk lek chuan ka ti mawlh mawlh a. Engvang mahin ani hnena kir leh chhan tur kha ka nei hek lo. Khang hun zawng zawngah khan a kutah in nghahna ka nei lo a. Mipa ṭangah lungmuang taka an bei laiin engkimah khan ka kut vek a ni zawk mah; chung zawng zawng ka ngaihtuah kim hnu phei chuan ka hun kha ka ui thar ngawih ngawih bawk. Min hmangaih miahlo tu tana ka thilpek zozai khan min ti thinrim em em bawk a, keimah chu ka in haw thar ngawih ngawih bawk.






Nileng maia han buai hi chuan tlai eirawngbawl zawhah meuh hi chuan ka ṭhu zawi hnawk zel. Bawihtei ka fiam a, khumah kan tluzal a, "Ka khawvel i nih hi hrereng ang che aw Bawihte... I va han hmelṭha tak" tih pahin a biangah chuan ka fawp nawk nawk a.





"Bawihte...kan nufa hmalam hun hi hrilh lawk che ka thiam lo. Eng chiah nge kan nufa tan ṭha ang tih ka hrethiam chiah lo. Helai hmunah hian hnawksak mai kan chang thuai ang tih erawh ka hlau" ka ti leh mawlh mawlh a.






Mampuia zawhna min pek kha ka ngaihtuah chhuak zawk mai. A bialnu te chhungkaw chanchin kha ka hrechiang teh meuh mai. Tleipuii te In bul lawkah In an luah ṭhin a. Mahlimi kha a naupang ber a nia, a u te hmeichhia pathum an awm a, pasal an nei vek tawh. An pasalte chhungkaw chawkbuaitu an ni vek bawk. Mahlimi nu leh pa te hi sum bak buaipui lem lo an ni bawk a, sum pawh an nei viau mai. Mahse, chhungkaw enkawlna lamah erawh an hlawhchham viau thung.






Mampuia hian nei ta sela Mahlimi hi kan chhungkaw tan a ṭha ber a ni dawn lo tih ka hria. Chutihrualin, engmah sawisel sak erawh ka tum hauh lo thung. Remchang hmasa berah ka hriat ang ang erawh hrilh ka duh a, tun erawh sawina hun a la nilo in ka hria.






Zan dang ang bawkin ka nu chu a rawn haw har leh hle a. Diktea leh Bawihtei nen ngawr kan awm leh tawh. Mampuia hi chu ka hrethiam em em. An buai zual chang phei chuan zanlai pelh a rawn haw chang te a nei ṭhin. Ka nu ber hi hriatthiam a har ka ti ṭhin. Sawisel emaw chhungkaw nu ber awmdan tur han sawihnan tur khawpin ka huaisen chuang bawk silo.






Kawngka a rawn ri rak a, Bawihtei a muhil fel tawh bawk a, rang takin ka tho thuai a. "Mampuia a la haw lo em ni?" tih hluk pahin a thil hawn chu a remfel sawk sawk a.




"Nichin mai khan ka bia a, a rawn thleng ṭep tawh ang. Chaw i ei dawn em?" ka lo ti thuai a.




"Ka ei tawh" tih nghut pahin a tho zui a. "Vawiin chu ka ngaihtuahna a vak nasa khawp mai. In nufa chungchang thlengin" a rawn ti tak rûn a. Englam hawiin nge ngaihtuahna a sêng ang hrelo mahila rindan tenau deuh chu ka nei tho. Kan nufa hamṭhatna tur thil a tam lo hle ang tih pawh ka hria.






Engmah dang phei chu a sawizui lem lova, pindan lamah a lut zui daih a. Ka ngaihtuahna erawh a vak thui em em thung. Ni e, he Inchhung ah hian kan nufa hian kan leng lo lam hret niin ka hre ṭhin. A chang chuan ka pa bulah chho ila, harsa deuh pawh ni ila ngaihngam taka khawsak theihna aia hlu a awm lo tih chu ka ngaihtuah nasat em em a ni ṭhin.





'Mampuia chu Khumah mu chungin ka nghak mai ang' ti rilru chungin pindan lam ka pan zui a. Ka phone lo êng phât phât chu ka hmu a, ka pan nghal thuai a. 'Ka pa' tih ka hmuh rual chuan ka chhâng thuai a, "Aw...pa" ka ti vat a.




"Naktukah i nutei te an rawn zinthla dawn a. Chawhmeh tlem a zawng leh pawisa ka rawn thawn dawn che a. Diktea emaw i lo ngaihven tir mai dawn nia aw?" a rawn ti nghal thuai a.




"Ka pa, engmah a ngai lo. Rawn thawn buai duh suh. Pawisa phei chu kei aiin i mamawh zawk daih ang" ka lo ti vat a.




"I nu in hrelo sela ka duh ania" a rawn ti leh nghut ringawt a.




"Pa, hah deuhin hna thawk tawh suh. Hahdam deuha awm tum rawh" ka ti leh sawk sawk a.




"Bawihtei chu a fel tawh viau lo maw? A la hla deuh na a, Krismas rawn hmang ula a ṭha ang, ka pawm chak tawh em mai" a rawn ti zui leh thuai a.




"A mihring tawh teh ania..." ka tihlai chuan, "Engmah sawipui hleih theih reng reng loh mai. He In hi Hotel a nilo ania, mu reng ringawt, eitur ei leh ringawt hian khawsa suh u" ka nu ṭawngkam na zet chu ka pa ṭawng dam thluam aiin ka bengah a ri ring zawk a, min fan hneh zawk.






Ka pa pawhin a hre pha a ni ngei ang, "Naktuk lamah kan inbe leh dawn nia. Muttui em em ule" a rawn ti thuai a. Ka mangṭha rualin a reh zui hmak a.




"Nangmahni in awm hrang dawn ula engnge in ei ang? He Inchhung hi chu rilru hahna hlir mai anih hi..." a ti leh hmawk hmawk a. Ka nu thusawi chuan min deng dawt dawt a ni ber e.





Pindan kawngkhar ri ṭhuai chu ka hrechiang viau bawk. Pindan lehlama phun ri hluk hluk chu hrechiang hle mahila engnge a sawi tak erawh ka va hre thei lo. Kan nufa chanchin bak a sawi ka ring hek lo.





Ka phone chu a rawn nghawr dat a, ka en thuai a. Hriathlua message thar a ni. Ka en thuai a, "Bawihi...khawngaihin chhungkaw thar nen hmalam pan i tum ang. Khawngaihin min ngaidam rawh" tih rawn thleng thar ber chu ka en vang vang a.





"Engmah ka hrethiam tawh lo. Ka duhdan nilo zawk kawng ka zawh leh te pawh a ngai mahna" ti sap chungin ka phone chu lukham hnuaiah ka thawlh a, Bawihtei en reng chung chuan suangtuahna lipui thûk zet lamah chuan ka bir thla ngur ngur a.







(to be continue.......)


Show post links
Top

[Ngaia]

DEAR PAIN
Chapter - 21




By: Brigida Hugo







Hun kal zel chuan kan Inchhung boruak ziaawm lam a rawn herchhuahpui lem lo. Ka nu mizia hi hriatthiam a har ka ti ṭhin. A chang leh duat theihtawpin min duat a. Mahse, a ṭawngkam ka hriat tam ber erawh phun thawm a ni tho. Kan nufa hian kan hnawk ni berin ka hre tawh a, kan nufa hmalam hun ka ngaihtuah chuan ka thaw a pik hluah hluah zel.






Pindanah Bawihtei ka thlak fel mawlh mawlh a, ka nu Dawr kal tur insiam chu a âng hlak hlak reng a. Zing dang ang tho anih avangin ka ngai pawimawh lo lui ve tlat tho. Bawihtei lah chu a nuamsam lo nge, a ṭe ṭhat ṭhat reng a. "Bawihno....i engnge na? Nawm lohna i nei em ni?" tih pahin a taksa lang thei lai chu ka thlek kual zung zung bawk a.






"Nau pawm si hi engtinnge heti chen chen in mut theih ni? In unau tet lai zawng zawngin vawikhatmah mutmu ka tuah ṭha ngai reng reng lo. Engkim ka kut vek a nia, i pa lah 'Kohhran ah ka in hmang e, Khawtlangah ka in hmang e' atia, ka hahpui zia che u kha. Min zah em em tur in ni ringawt" a ti buan buan a.





"Ka nu, engtiang chiaha khawsa tur hian nge maw min beisei? Ka zah lohna che lah ka hre hek lo" ti rilru niap niap chungin Bawihtei chu ka pawm a, kan chhuak phei zui nghal a.





"Nizanah i pi nen kan inbia a, 'Helamah rawn awm chho sela, khawsak pawh a awlsam deuh zawk ang maw le' a rawn ti ve niah niah a" a rawn ti chu ka thaw ru halh. "Ka nu, heti em em hian a ni maw i fanu te nufa hi min lo huphurh le? In lamah hian theihtawp ka lo chhuah ve asin le. Ni e, kan nufa tan chuan helai hmun a awm reng theih a ni ve dawn lo anih hi" ka ti rilru mawlh mawlh a.





"I pi te lah kum upa lam an ni ve tawh a, an hulhar tawh nen an khua pawh a har viau ta ve ang" a rawn ti leh chiah chu ka insum thei tawh bik lo. "Ka nu, khilaia dinhmun chhe leh zual a awm ai chuan kan haw phei leh ange" ka ti ve ta hmak a.





"Zothansang, tunah khan eng maw i sawi? Kha mihring....nilo, mihring pawh a nilo. Ani hnena haw leh duhna ila nei chu a mak ka ti zawk" a ti nghal tâwn tâwn a.





"Ka pi te pawh mihring an ni meuh a mawn le?" ka ti ve ngat a. Ni e, ka hrechiang takzet. Kan nufa chuan min lo lawm em em ang. Bawihtei pawh an duat em em bawk ang. Mahse, hun rei a awh dawn lo tih ka hria. Ka pa awmlai leh hriatlai chiah a duat kan hlawh anga, ka pa awm loh lai erawhin Ramhuai pûk a khawsa ang vel kan ni dawn tih ka hria. Engvanga ka pi pawh chuan ka nu chu a rawn biak vel kher? Ka pa nen inzawmna pawh an nei tawh lo a, rawn biak zui zel nachhan tur a nei lo. An inbiak tak tak pawh ka ring hek lo.





"Saw mihring bula i let leh a nih ngat zawngin kan in be zui lo viau ang" tih pahin min melh ngheng a.





"Helai hmunah kan hnawk hle tih ka hrethiam ve bawk a. Kan nufa ngawtin engmah kan la ti thei bawk silo. Ka pi te bula khawsak ai chuan saw mihring bula khawsak saw kan nufa tan chuan a hahdam zawk mahna!" ka ti ve leh ngat a.






Ka nu chuan engtinmah min chhâng tawh lo, ngawi rengin min melh ngheng a. Helai hmun a hnawk min tih ruk zia ka sawi ve ngat chuan chhânna a pe thei lo ni berin ka hria. Pawnlam aṭanga chhungkaw pangngai leh felfai ṭhuau anga lang si, chhungkaw hnawk ru zet kan ni si te hian min ti hah ngawih ngawih.





"Ka kal a nia" tih pahin kawngka a khar ri ṭhuai a, ka thaw huai mai. Chutihrualin, ka ngaihtuahna erawh ka va seng hnem tak. Kan nufa hmalam hun chu thui tak ka ngaihtuah a, Bawihtei hmalam hun zawng zawng nen; tupawh hian tlin lohna lai kan nei vek a. 'Mihring siamṭhat nan khawdur a ngai' an tih ang khan kan inṭhen te kha a ngai anih ka ring ta hial mai.






Bawihtei ṭhutthlengah ka mut a, a tlak loh nan tlakdal ka siam bawk a. Eirawngbawl turin ka in puahchah nghal sawk sawk a. Ka tih tur in chhawp thuah ṭûn chu ka ngaihtuah nawn zung zung bawk. Pindan lama ka phone rawn ri chu ka pan thuai a, U Mama bawk a ni.




"Aw....U Mam...."



"In tho tawh maw?" a rawn ti thuai a.



"Aw, tho tawh e. Ka mu rei ngai reng reng em mawn le?" nuih hak hak pahin ka ti thuai a.




"Englo ania, nizanah chhungkua kan in hmukhawm a, palai rawn kal kan rawt deuh maw le...harsatna riau te a awm angem? Ka rawn zawt thâwr mai che" a rawn ti deuh tawl a.




"Aaaa.....U Mam...ka nu in a remti dawn chuang lo. Rawn kal mualpho lo mai rawh u" ka ti ve nghal tawp bawk a. Thudik tak sawi mai chu a ṭha zawk a ka hriat vang a ni.





"Anih leh, engnge i rilru ni hrim hrim?" chu zawhna chu min zawh ka hlauh ber a ni. Ka ngawi reng a, "Engpawh nise, Hriathlua nen pawh inbe ve leh hrim hrim ula a ṭha ang" a rawn tizui thuai a, engtinmah ka chhâng chuang lo.






U Mama nena kan inbiak hnu reilo te ah Hriathlua chuan aw zangkhai leh dam vahin min rawn bia a. Keipawhin nidang anga bung nghut in ka chhâng tawh lo tih ka hria. Ka nu ṭawngkam thin khei fek fek ṭhin chuan ka lo ngaihtuahna leh duhthlanna tam tak a rawn su danglam vekin ka hre ber.






Hmanhmawh takin ka che sawk sawk a, engkim ka tihfel hnu chuan Bawihtei tlei lo lutuk chu ka buaipui zui leh thuai a. Mawng hung a hahdam taka ṭhut hahchawlhna hun hi ka nei hlei thei reng reng lo a ni ber e.





Nilengin ka buai a, Hriathlua nen a khat tawkin kan inbe reng bawk. Ka rilru in duhthlanna fel a siam tawh chin reng reng bawhzuina lamah ka chak mah mah ṭhin hi ka buai zuina a ni ṭhin. Mahse, tuna ka duhthlanna erawh thlang lo thei lo nia ka inhriatna chuan min hnem ber mai.






Tlai ah pawh ka nu ângthawm nen hun kan hmang a ni ber a. Chhun lama a inhralh ṭhat hi chuan tlemin lo hmachhawn a nuam ṭhin. Chutiang anih loh hlauh erawh chuan beng a rim viau thung zel.





Hriathlua nena ruahmanna kan neih chu ka hre kar reng a. Sana ka bih zauh zauh reng bawk a. Zan dang zawng a lengchhuak ngai hlei lo Diktea lah chu a lengrei phian a. Midang kan mu vek tawh tihah pawh Diktea thawm reng reng ka la hre lo. Ka rilru a hmanhmawh ang aiin ka che sâwt thei lo thung. Ka phone ah message a rawn lut reng bawk a.




"Bawihi, a rei tawh ka ti...ka hmuchak tawh lutuk che u"



"Bawihtei chu a la tlei lo viau em? Rawn kal tawh mai ka duh"



"Bawihi...a tlai tawh a nia...ka nghakhlel tawh lutuk che u"






Ka chhiar lai chuan ka lo nui leh ver ver ṭhin tih a hnu ah ka hria. Sana ka en sek a, Bawihtei chu a awm a nuam lo tih ka hria. A mu nghet thei lo, a ṭe ṭhet ṭhet reng a. Diktea rawn haw thawm ka hriat rual chuan ka thaw huai a, Hriathlua chu message ka thawn nghal thuai bawk a.






Rei fe ka awih hnu chuan a muhil ve ta hram e, a suakbak a chhuah hi chuan a harsa lam mah mah ṭhin a ni. Tun ṭum phei chu a awm nuam lo, panglum ther ther nen a hautak takzet. Ka thlan a tla bawrh bawrh a, ka hnung leh ke a kham em em bawk.






Ka thawmhnaw khungkhawm sa te chu ka en fel leh zung zung a, Bawihtei mamawh a tam em avangin Suitcase lian pahnih ah a thawmhnaw ka khung leng ṭawk a ni. Ka thawmhnaw erawh bag pakhatah ka mamawh zual tur ang ka dah ve bawk.






Ka phone nghawr dar dar lam chu ka pan thuai a, Hriathlua hming ka hmuh rual a ka lungphu rang zaih zaih chu ka hrechiang viau. Ka la zui thuai a, "In In piah deuhah kan awm tawh aw?" a rawn ti dam dup a. "Engtinnge i rawn chhuah ang?" a rawn tizui thuai bawk a.






Ka bungraw ken tur te chu ka hrilh vat a, mahni maia in khaichhuah theih a nih dawn loh avangin Siamtea a rawn tir phei dawn anih hmel. Amah lo kal a tum lo chu ka ngei ru viau nangin, thlahlel lutuk anga lan ka hlau bawk si nen, "Rawn kal vat rawh se aw? Thawm dim sela" tih pahin phone chu ka dah zui thuai a, thaw hawkin Bawihtei chu ka paw ṭha sat sat a.





Kan Inchhungah ngei kan nufa a kan hnawk thu ka nu ka aṭanga ka hriat tak fo avangin he In ah hian kan awm ve reng a rem lo tih ka hria, chiang taka sawi fak duh si lovin mei nei zet zetin a ṭawng reng a. Ka nau te pahnih erawh ka lakah an ṭha em em thung. Nu ber zilh tur meuh erawh chuan huaisenna an nei bik lo tih ka hria. Ka pa awm nise hetiang boruak hi kan tawng dawn lo tih ka hrechiang viau bawk a, ka pa ka ngai ngawih ngawih ṭhin.






A vawihnih nan Hriathlua chu ka zui leh nge nge dawn e, eng boruak nge kan tawn chhoh dawn tih hrelo mah ila 'hnawk' nih ai chuan in thiarfihlim mai kha ṭha zawk a ka ngaih vang a ni ber. Nasa takin a danglam tih thu ka hrereng bawk a, kei ngei paw'n ka hmu in ka hre bawk; a zawng zawngin thlamuang famkim lo mahila tunah chuan ka rin mai a ngai tih ka hria.






Kan pindan kawngkhar chu zawite in ka hawng de de a, thawm ka ngaithla nghal deuh vang vang a. Thawm dang ka hriat tak loh ah chuan bungrua te chu kawngkapui lam panin ka thiar phei de de a, ka thin phu dawt dawt leh ka khur der der chuan ka chet a ti bahlah lek lek bawk. Mahni infuih sauh sauh chungin ka che zawm zel a, ka thawmhnaw bag ka khaichhuah leh rual chuan kawngka chu ṭha takin ka khar a; kan nufa a kan mutdun ve na chu kan kalsan dawn ta.






Thawm dim takin kawngkapui chu ka hawng a, pawn lama Siamtea lo ding reng chu ka hui zauh a, rang taka lo kal thuaiin suitcase pahnih chu a khai nawlh a; ka bag khai lai nen chuan hmanhmawh takin ka zui ve nghal thuai bawk a. Pawn lam aṭangin kawngkhar chu ka khar ṭha a, "Mampui...Dikte...min ngaidam rawh u. Hlim takin awm ang che u" ka tizui sap a; ka kal zui ta dawr dawr a. Gate bula Hriathlua lo ding rûn ka hmuh chuan ka thaw deuh huai thei, tunah chuan a ni bak rinchhan tur ka nei lo tih ka hria; beiseina sang tak ka nei bawk.






Ka bag khai lai min lo lak sak vatin motor an dahna lam kan pan zui thuai a, motor hnungah kan bungrua te chu dah lut rawk rawkin kan tlanchhuak zui ta thuai a. Kan veng kan tlan pelh hma chuan thlamuang pawhin ka ṭhu thei lo, ka hawi zawk zawk reng chu min hnem tum tih hriat takin ka kutah a hûm vang vang a; ka thlamuan phah sawt erawh ka hre chuang lo. Bawihtei chu hmalamah ka sawn a, motor seat nghengin ka chhing vang vang a.






"Ka lo pawm dawn em ni?" Hriathlua'n a rawn tih chuan ka lo en vat a, uluk zetin a fanu chu a lo en vang vang a. Puakpuan phelhin dimte in a malchungah ka nghat zui de de a, a harh hlauin ka beng zui det det a; rum ṭiah ṭiah in a tal bet bet a, a muhil zawm ve leh mai bawk a. An pafa a an inpawm chu ka en reng a, Hriathlua hmela lungawina lo langchhuak chu ka hmuhhmaih hauh lo, a fanu vang tal pawhin ṭha taka a awm zui zel ka beisei tlat a ni.






Zan rei lama kal kan ni bawk a, kan tlanmuang lem lo bawk. Zing dar 12 a ri dawn thuak tawh tih ah kan thleng a, rinloh deuhin an lo la meng ṭhap mai. Rinrina'n min hmuh ve leh rang takin ka lam panin a rawn tlan thuai a, min rawn kuah thlawp chu duat takin ka lo luah let ve nghal vat. "Anu, in lo haw tawh dawn ami?" tih pahin min melh khiau a, ka lu bu nghatin a biangah ka piai zeuh a; a hmel hlim sarh chuan ka hnuk a ti ulh lek lek mai. Kei ve tehlul min thlahlel lutuk chuan ka thinlung chhungril ber a khawih pha tlat.






Ka nu in Bawihtei a lo chuh nghal tharh a, ka pa in a sir aṭangin a lo thlek ve duk duk bawk. Rinrina chuan a biangah a lo khawih ve sek bawk a, "I ti harh ang" tih pahin ka nu chuan a din pui ta daih a. In tharah an in suan lut tawh a, kan room tur pawh a zau nuam viau mai. Kan bungrua te chu ka dah lut zui vat a, Hriathlua chuan ka chetna lam apiangah min zuiin min lo pui ve nghal thuai zel a; a danglamna kawngkhat chu ka hmu nghal pang mai.






Bawihtei chu a laiah mu in a thaw sêk sêk a, Hriathlua chuan "Ka fanu bula tui taka muthilh hi ka suangtuahna a rei tawh lutuk, ka pangsi hian mu rawh se" tih pahin a kuah hlu hlu a; ka lo suangtuah ve rauh rauh ṭhin an pafa a an mudun rial chu hmuhnawm ti zetin ka en reng a; mutchhuakin mi zem tak chiai chiai takah chuan ka chhing riai riai a, "Ka nupui hmelṭha chu a mut a chhuak a ni maw? Tui takin muhil rawh se" tih sup pahin ka hmui a rawn fawp zeuh chu ka mang hriat ruai a, mumang ramah ka cheng zui ta delh delh a.






Ka malpui za mer mer chu ka kuta zuk huisawn ka tum chu ka va phu chiang tak. Rang takin ka meng thuai a, thawmhnaw engmah inbel lovin min lo nuih sâng a. "Bawihi, ka mamawh tawh lutuk che" a lo ti thâm ṭuak a. Ka taksa hnuailam ah chuan engmah ka lo inbel tawh reng reng lo. Rûm ṭiah ṭiah chungin Bawihtei ka melh thuai a, "A mutui lutuk, ka veng char char alawm" a lo ti nghut a.




"Ka va mutui awm em em...engmah ka hrelo reng reng?" tih pahin ka nui sak a.




"Bawihi....engkimah khan min ngaidam rawh" tih pahin a rawn bawk a, duhthawh zetin min fawp nghal bawrh bawrh a.






Nghet zetin ka lo kuah a, a tukhum sam chu ka ṭhâm zauh a, a tiphûr hle tih lah a chet lak zui danah chuan ka hai lo. A in beng kâng a, ka kawr chu a rawn phelh zui nghal thuai a. "Bawihtei ka ṭawmpui dawn amawn le" tih pahin ka hnute chu a rawn tuai zauh a.





"Hei chu Bawihtei ta bik" tih pahin ka kiai sak a. Ka pawm leh thuai a, ka malpui karah rawn tlazep in a kutah a chil a hnawm zui zauh a. A chetlak dan ang ang chuan ka lo in siamrem thuai a. A duhthusam ramah kan lut a, a duhthawh em em a, a hmel chu ka en a, a mitmeng a min mamawhna langchiang lutuk chu ka hmuh hmaih lo, ka pawm vawng vawng a, "Ka hmangaih che" a rawn tih rual chuan min rawn fawp zui leh bawrh bawrh a.






A khur hlawk hlawk a, a rawn bawk zawi hnuang a, nghet zetin ka pawm nghet leh salh ṭhin bawk a. "Bawihi, muhil tawh ang" tih pahin a tho zui a, Bawihtei tihharh hlau zetin a insawn phei zui thuai a. Keipawh ka in ha ṭha thuai a, Bawihtei lu chungah chuan kan kut in si rengin muthilh tumin kan chhing zui vang vang a.




"Amâ...., tho rawh" ti dut dut ri ah chuan ka meng siar siar a, an pafa in an lo in pawm leh rân tawh. "Dar engzat nge?" ka ti sap a, ka hâm bai bai bawk. "Dar riat a ri ṭep" a tih chuan ka ṭhuchhuak zawk mai. "Min kaitho ta che maw le, i mak e" ti chungin ka thochhuak hluai a; a lo nui kur kur chu ka melh zui hrep.





"Inrinni a nih hi, engmah hmanhmawhthlak thil a awm lo. I fanu hi hnute pek a hun viau tawh a nia" tih vat pahin Bawihtei chu ka pawm theih turin a rawn dah rem a, ṭhu ṭha lehin hnute ka pe zui ta vat a. Ka hnung lam aṭangin min lo kuah ve hlu hlu a, a fanu hnute hne lai chu a biangah a lo piai sek bawk. Kan hun hman mek chuan chhungril ah hlimna min pe a, Hriathlua danglamna chu ka hmu mawlh mawlh a ni ber.







Kan tho chhuak a, Bawihtei chu a pu in a lo ban thuai a. Ka nu chuan, "In mutui maw?" tih pahin min lo nuih var a. Chawhmeh siamin a lo buai hle bawk a. "Ka mutui mah mah anih hi, thawh ka hai chiang hle mai. Ka nu, keima'n ka lo tihzawm ange" tih zung zung pahin ka pan phei thuai a





"A ngai lo, lo ṭhu mai mai rawh. Bawihtei chu a khua a sik zui em lo maw?" a ti leh thuai a. Khawih chhunzawm chu tum viau mahila min dang ṭang reng a. "Ka lawm tak tak, a reh dawn aniang" ka lo ti thuai a, Bawihtei te putu ṭhutna lam pan chuan ka lêt nghal thuai a.





"Chaw ei ang u, chaw ei ka peih e" ka nu in a rawn tihzui takah chuan Bawihtei fiam zauh pahin ka tho zui leh thuai a. Ka nu chu ka pui nghal sawk sawk a.






Chaw kan ei lai pawhin ka pa chuan, "Ei hmasa rawh u, ka ril pawh a ṭam lo, Bawihte hmelṭha em em nu hi ka lo awm ange" a lo ti thuai thuai a. Chu Inchhung boruak danglam hneh leh lutuk chu ka ngaih a ṭhalo hial zawk. Ka pa chu hnathawh a tum tih ka hriat avangin hmanhmawh takin ka ei sawk sawk a, Hriathlua lah chuan, "Hmanhmawh suh, muangchangin ei rawh. Bawihtei chu ka lo awm dawn nia..." a lo ti ve thuai bawk a.





"Bawihi, i phone a ri reng a. Lo chhâng lawk mai rawh" ka thlengsil lai chuan min rawn au lang lang a, ka zawh ṭep tawh avangin ka tih zawm mawlh mawlh thung. Ka nu in Bawihtei ṭhenawmah a lenpui a. Ka pa leh Rinrina pawhin an zui ve leh tawh; a hlatah an awm thei meuh lo.





"Tunge a?" tih pahin ka kut ka hru hul sawk sawk a, ka phone charge lai chu ka va en zui vat a. Ka nu miss call lo awm tuar chu en in ka thaw hak. Biak ka chak lo viau nangin ka biak ngei erawh a ngai tih ka hria, ka call let ta thuai a. A rik rualin a lo la nghal vat, ka biak hun a lo ngaichang reng anih pawh ka ring.





"Zothansang, mi hur nu..... Kha mihring laktlakloh zet kha i pan nawn leh ngat a nia, eng rilru nge i put a?" a rawn ti nghal tawn tawn a, a ṭawngkam hman chuan min vit na ngâng ngâng kher mai. Hriathlua TV en rûn chu melh zawkin pawnlam ka pan ta daih a, ka nu nena kan inbiak dan chu hre lo se ka ti ber.






"Ka nu, hnawksak nih reng hi tuma'n nuam an ti ngai lo. I ṭawngkam mei nei leh kha zet zet te kha hrethiam lo tur khawp a mimawl ka ni bik lo. Heti em em a i danglam mai hi i mak ka ti" ka ti let ve ta sak sak a. Ka lo in up khawl rei tawh bawk a; hmaichhana inbia kan nilo bawk nen, ka khawlkhawm sa zawng zawng chu sawi vek ka tum a ni tawp.





"Ka awmdan nanga sawi phak a ni love, man nei lovin tikhan i awm leh anga. Nupui hming pawh pu pha lo, chhiahhlawh ang lek a khawsak kha nuam i ti zawk a ni chêk ang chu. I duhthlan ah khan inchhir hlek suh" a rawn ti zui leh hmuar hmuar a.





"Hetiang dinhmun a ka din leh chhan hi nangmah vang a nih hi. Mahni fate pawh hnawk ti em em reng Nu hi tumah an awm ve pawh ka ring lo. Ka pa in a kalsan che pawh hi ka dem ta lo e" ka ti ve leh ngat a, kan inbiak dan chuan chhungrilah min ti na veng veng. Nufa inbiak dan tur atan chuan a rapthlak lam mah mah a ni.






"Khanglang che chuan, min mamawh hun a lo thleng thuai ang. Min rawn pun buai miah suh ang che" a rawn tih leh chuan ka nu lak aṭangin beisei ka nei thiang lo tih ka hrechiang viau, ka chapona erawh a lian tawlh tawlh thung. "Aw le" tiin kan in biakna chu ka ti tawp zui hmak a. Kan inbiakna chuan eng thil ṭha mah a chhuah dawn lo tih ka hriatchian em avangin in biak thui loh kha a ṭha zawk. Pawnah chuan ka ṭhu zui vang vang a, ka pa number chu hmetchhuakin ka call zui leh ta vat.






A lak rual chuan kan chanchin te chu ka sawi zui mawlh mawlh a, ka nu awmdan te leh kan inbiak zawh chiah dan te chu ka sawi fai ta vek. Ka thawl hawkin ka hria a, ngun taka ka thusawi min ngaihthlak saktu ka pa a awm tih ka hriatna chuan nasa takin min thlamuan bawk.






"Ka fanu neihchhun leh ka tu hmuh hmasak ber pawh Inchhung a leng ve lo khawp a siam tu chu eng mihring nge maw anih le? Ngawi tak rawh Mâte, i pa ka la dam hi maw le. Lungngai lo la, in tan ka awm reng dawn alawm" tiin min ṭawng thlamuan dap dap a, ka hnuk no a kaichhuak chiang ngei mai. A awmna hmun apiangah kan tan a bei zel dawn tih min hrilh thung.






"Ka nu hi chhuak zawk tur a ni sia" tia ka zawhna erawh, "I nu hi ka hmangaih a, atana ṭha ber tur ka duhsak em em reng. A tan bul ṭan leh a harsa dawn a, kei chu ka thawm ṭha anga; engkim ka nei leh mai ang. Ka fate'n Nu in mamawhna a thuk zia ka hria a, chuvanga keimah zawk in thiarfihlim chu ka ni bawk. Ka rinloh lam boruak in tawng chho ta zel erawh a pawi vawng vawng anih hi, theihtawp ka chhuah zel ang" tia min chhang chu ka natpui vawng vawng lawi si. Ka pa chu mite tana nuihzatthlak khawpin awm mah se a chhungril hmangaihna nasa tak chu a ropuina ber niin ka hre ve thung. Duhsakna min hlan mawlh mawlh a, inbe leh turin kan in thlah zui ta a.






Kan nitin hun hmandan a hahdamthlak a, kan la hlim tluang zel. Chhun lamah Hriathlua'n hna a thawk nitin a, ṭhahnem a ngaiin a thawh theih ang ang chu a thawk zo vek a ni ber. Ka nu leh pate pawhin an duat a, Rinrina pawhin a ngai em em reng bawk. Kan nufa in In kan nghak deuh chawt a, kan chet a sawt lo ṭhin viau mai. Bawihtei a in tifing tawh em em a, ka pang a sîk loh chuan a awm ṭha duh der lo leh nghal. Midangin an la hrang hlei thei lova, a pa erawh a duh em em a, chhun lamah hnathawk in hah viau mah se a pa rawn haw hun ka nghakhlelhna pakhat a ni.







Ka nu nena kan inkar chu sawichhuah a rem chiah si lova. Keimahin ka pai ṭûn a ni ber a, chu chuan min ti hah ru ngawih ngawih ṭhin. Mahse, Bawihtei pa berin nunphung pangngai a zawh tawh a, chu chuan min ti thlamuang em em thung.





"Zanin chu min malis la a ṭha ang, ka taksa a na ṭhûm mai" tih pahin ka bula min kuah hlu hlu tu chuan a rawn ti sur sur a.





"Lo ṭawng sek suh, i aw a hre ropui si...a muhil ṭep" tih pahin ka nghawk salh a. Bawihtei hnute hne chu hmuhnawm ti takin ka en reng a. Ka hnunglam aṭanga min rawn kuahtu chuan beisei nei takin ka mawng a rawn ṭhâm leh zauh ṭhin a. Ka chet ṭhat ngam loh lai a rawn chuh kher chu ka thin a tirim riau bawk.






Bawihtei a muhil fel a, dimte in ka in her a. Rang takin min lo kuah nghet vat a. "Kan awmdan hi sawichian a ṭha in ka hria. I nupui ka ni famkim miah lo ania" tih pahin ka thaw halh a.





"Ka hria alawm Bawihi....remchang hmasa berah palai kan kal dawn nia. Tun kan boruak chhia te hi han reh deuh phawt sela" a rawn ti thuai a.





"Ni e..." ka ti sap a, ka biangah a rawn fawp nghal vawng vawng a. "Ka duat, ka nupui niin kumkhua in ka bulah in awm reng ang" tih pahin ka chungah a rawn bawk kai thuai a. Kan mit ve ve intawng in chiang takin kan in en reng a, "Ka hmangaih che Bawihi....engkimah khan min ngaidam ang che" a rawn ti leh rual chuan ka kuah nghet salh a. A tukhum ah vuan in ka pawt hnai a, a hmuiah chuan ka fawp ta vawng vawng a.....







(to be continue.........)


Show post links
Top

[Ngaia]

DEAR PAIN
Chapter - 22



By : Brigida Hugo






Hun leh kum a kal a, kan nupa inkar pawh thil thleng danglam a awm hran lem lo. Mahse, engmah in sawirem kan neih loh avangin keimahah hian kimlo riau a awm ṭhin. Hriathlua hnena ka sawi lahin a ngawi a, a ṭawng hmuk hmuk ṭhin bawk si. "Hetiang lam hi chu sawichhuah rih loh a ṭha anih hi" tihah ka tlâk leh ringawt ṭhin.






Bawihtei pawh tunah chuan kan chhungkaw engkim a ni tawh a. Ṭhenawm vela an hruai phei lawk chhung pawhin kan zawng ruai hman zel chu a ni ber e. Ka pum kiar luah tawh chuan min tihlim em em reng a. Ka vanneihna em em chu Naupai hrehawm ka hre em em lo hi a ni. Mahse, ka awm tinuamlo tu leh min kap rún tu a awm a. Nau ka pai hmasak ang tho in ka pasal hian a lawm lem lo tih ka hria.






Hun kal fe tawh a min hringtu ka nu ṭawngkam te kha ka hrechhuak thar uaih uaih a. "Mahni nupui te rai chunga lawm nachang hre lo. Mahni fa ngei pawh midang fa a puhtu mipa hi kan chhungkua nen hian suihzawm ka rem ti lo" a tihlai te kha ka bengah a rawn ri nawn awn awn ṭhin. Mahse, chung thu hla avanga ka pasal chu kalsan nachhan tur ka hre chuang lo; ka hmangaih lutuk vang te pawh a ni mahna le! 'Ka pasal' tih lai tak hi ka tîm ṭhin. A bulah pawh vawi tam ka sawi tawh a, tun hnaiah hian, "Nau han nei fel la, i che thei deuh tihah kan in kutsuih ve thei tawh ang chu! Tunah chuan Inneih thlalakah i nalh lo lutuk palh ang" a ti ve ta zuk zuk a. Hei mai hi ka in thlamuanna thu a ni rih.






Bawihtei mutna chu a lo ruak leh hiai tawh a, a pi leh pu thawmah a harh anga, a tho chhuak anih ka ring. A pa a lo tho leh tawh zel chuan ka ngaih a ti ṭhalo a, rang takin Sana ka en thuai a, zing dar 7 a lo pel awrh chauh a. Kum thum chhunga Bawihtei pa thawh hma ber ṭum a ni hial ang. Zan lamah hnathawh tur an neih a sawi si lova, chuvanga vei ngur lo chu ka ni bawk a. Chubakah, ka rit ve deuh tawh bawk nen; zan lamah Nau che nasa lutukin min ti mu ṭha thei ṭhin lo.






Ka pasal hnathawk haw a hun tawh tih hria in pawnlam ka melh sek tawh a. Mahse, a reh tlawk tlawk mai. Bawihtei chuan a Barbie chu ṭhutthleng ah khâl in min be deuh sek reng a. Ka ṭawng pui mawlh mawlh na a, ka rilru erawh pawnlamah a awm reng thung. Thawm ka ngaithla ru kar reng a. Mahse, ka pasal rawn haw thawm chu ka hre der silo.






Ka pum che nasa lutuk chuan ka zun a tichhuak em em a. Hmanhmawh takin Bathroom lam ka pan thuai a, Bawihtei chu fel taka lo awm turin ka chah leh te te bawk. Ka zung zo chu ka thawl huaiin ka hre nghe nghe.






Ka chhuak leh chiah chu Hriathlua Bike ri ka hre nghal zat a. Hmanhmawh takin kawngkapui lam chu ka pan thuai a. Kawngka ka hawng chiah chu ka ding chawt mai. Ka pasal, a nun siamṭha a, nitin zantin zaidam leh nem taka haw tura min rawn ngen lawm lawm ṭhintu kha a lo meng thîp rûm a.






Mak ti takin ka melh ngawt ngawt a, ka lam a rawn hawi zawk a, a mitmeng nelawm ṭhin tak kha a hmaa Hriathlua mitmeng nelawm loh zetah khan a inthlak leh tawh. Ka lam panin a rawn phei a, ka lo dawngsawng thuai a. Mahse, ka awm ve tih leh min hmu ang pawhin a khawsa lo. A ngaihna hrelo zetin ka umzui in zawhna tinreng in ka chhu zui a. Mahse, lungtum biak ang vel a ni. 'An hnathawhna lamah boruak ṭha lo tak a tawng a ni ngei ang' ka ti rilru thla ta ngawt a.






Zanah pawh ngawi rengin a chhuak a, a rawn haw har em avangin keimaha zawhna in pe ṭeuh chungin ka mutsan ta nge nge a. Eng hunah nge a rawn haw ka hre lo a, zing ka harh erawhin a lo muhil ve tlûn tawh.





Kawmthlang kawng a bike ri hrâwk thawmah chuan ka thochhuak vat a, tukverh hawngin ka dak thla nghal thuai a. Hriathlua chu kawngpui lai takah a bike nen an lo let dun reng a, hmanhmawh zetin ka tlanchhuak zui dawr dawr a. Ka hnung chiahah ka nu a rawn tlan ve hlawk hlawk bawk a, a ri nghal teng tung bawk. Ka rit ve deuh tawh bawk nen chet ran a har viau leh nghal.






Kan ṭhenawm tlangval Michaela'n a lo buaipui sawk sawk a. Zan rei lam a ni tawh bawk a; vei vak an awm tawh lem lo. An bul ka thlen rual chiahin zu rim nam huam chu ka hip lut a, ka ner nghal sak. Kaihthawh mai tumin a banah ka vuan a, na zeta lo phih sawkin min melh rum nghal ûl a. A zu rawn pai haw baw nuaih chuan a thawmhnaw a ti huh deuh hnuang bawk.






"I na em? Fimkhur ta che maw le..." ka nu chuan dinhnaih pahin a ti hlak hlak a. Michaela'n a zak tawn tawnah vuanin a tung tho mek bawk a, a din pawh zuk ding ngil thei lova. Kawngsir lam panin ka nu nen kan kai sawn a, Michaela'n a bike chu In hnuaiah min hun rem sakin min hawsan zui ta nghal a. Hriathlua hmel phelh phung leh meng thip zet chu a ngainatawm fahran loh hle, 'Eng thu nge a rawn ânpui leh ang?' tih ngaihtuahin ka huphurh lawk em em bawk.






Ṭhutthlengah a mu zawi nguai a, step a kan in kaih chhoh chhung ringawt pawh rei tak a ni. Ka nu in a ankhum hlak hlak reng a, hria ang pawhin a awm hlei lova. Chaw ei siam turin min tir zui zat a, ka che zui nghal sawk sawk a. Chaw ei ah ka lo la nghak reng nangin dawhkan kilpui ka chak hlawl lo. A eitur chauh chu ka siamsak a, bu lûk lûk chungin a ei nuap nuap a; a khât tawkin chawhmeh a sawisel reng bawk.






Chhungkua hlim takin kan awm chho ve zel dawn emaw tih lai mekin thawklehkhatah Hriathlua mizia a danglam thut a, min ti hrilhhai takzet. Tlai khat a hnathawk rawh haw chu biak ṭawng zawhloh in a awm teh tlat a, ṭha taka a chhan ka zawh pawhin lungtum biak ang maiin ka zawhna chhânna engmah ka dawng lo. 'A hnathawhna lam ah harsatna a nei aniang' tiin ka ngawi zui ve mai a, a chhan min hrilh hun ka ngaichang reng thung.






Zan a lo thleng a, engmah sawi lovin a chhuak nulh a, zanlai pelh ah rui chhe zetin a rawn haw a; a awmdan teh thut chuan ka rilru a tihnat em avangin ṭap pur chungin, "Engnge i awmzia? Ka zawhna engmah i chhâng duh bawk silo" rilru na tak chunga en reng pahin ka lo ti thuai a. Min melh rulh a, "I hriat a ngai lo" ti hluk bakin min chhâng chuang lo. Khami zan aṭang khan zanin thlengin nunphung pangngai pelin a khawsa leh mek chu a nih hi.





"Ka sawi chu i hre lo em ni? Mi â ang mai hian hawi vung vung zel suh" a tih hrawk rual chuan ka phu zawk a, ka en nghal hâ bawk. "Engmaw i sawi?" ka ti let thuai a, ka pan hnai zui thuai a.





"Thusawi te hi ngaithla ṭhin ta che, ka sawi nawn peih tawh lo" tih hmuk pahin a tho ṭuah ṭuah a, a kut sil tur pawh a bei rei ngei mai. A ding bu luk luk chu ka mitsir in ka hmu reng a, ka buaipui duh lo lui ve tlat thung. A chaw eina ka seng fel mawlh mawlh a, a kut chu towel ah hru thuakin room lam a pan nghal chhut chhut a; ka in tihfel chhungin lo muhil hman se ka ti em em bawk. Ka nu chuan rum zeta melhin a lo ner nâwng nâwng reng a.






Bawihtei muhil thaw sek sek chu kuahin ka fawp zauh a. A pa khawsak dan chu a hrethiam ve a ni tih hriat takin a hnaih ṭha duh ngai hauh lo. Hetianga a awm fo avang hian, "I fuihpawrh a nih hi" min ti âwl lova, chhe tinreng hian min puh nitin a ni ringawt.






Khati chen ṭha takin a awm a, an pafa in an in zui kawi reng a; Bawihtei pawhin a pa chu a ngai em em ṭhin. A pa rui hmel ṭi dêk a en chunga a hlat hret hret ṭhin te chuan min ti nâ a, Bawihtei hlauthawng hmel ka hmuh apianga ka chhungril natna chu nasa ṭhin tak a ni. A thlamuanpui em em ṭhin a pa chu râl melh taka melhin nitin a hlat telh telh a, chu erawh Hriathlua tan engtihnamah a ni lo thung. A fanu ṭi ru dêk hian a chhungril chu sawi loh, a ngaihtuahna chhete pawh a luah eih lo tih ka hai miah lo bawk.






Muthilh tumin ka chhing fel chiah tihin Hriathlua phone chu a ri tlang a, a lukham sir mai ah a dah tih ka hria. Ngaihsak lem lovin ka awm ngaiin ka awm reng a, a rawn rik nawn leh takah chuan meng lehin ka ban zui zat a. Whatsapp message lo awm vâng chu ka hawng zui zat.




"I thleng tawh em?"



"Ka ngai leh nghal che, min rawn biak hun ka nghak reng a. I mu nghal daih ami?" tih thu chu vawi engzatnge ka chhiar nawn ka hre lo.






'Zualbawihi' tih hming chu ka ennawn sek bawk a, hlauhthawnna nasa takin min tuam nghal mup mup bawk. Rindan pakhat chiah ka nei, 'Kei hi bum nawn ka ni'. Ka thinphu dawt dawt chu tih reh tumin ka dawm vang vang a, engtianga rei nge an lo inbiak tawh ang tih chu ka ngaihtuahna luah ber tu a ni. Ka ngaihtuahna kil khatah chuan chu nu chu biak a, ankhum hrep ka duh a, rilru fîm tlemte ka la neih ve chhun chuan ri buan buan lova thil engkim chiang zawk hriat duhna a nei thung.






A message chu paih sak hmakin a phone chu a dahna ngaiah ka dah leh a, kawisawi zeta a mu hnar bur bur chu tlawhthlak zawt châk zetin ka melh ngheng a; keimaha thinrimna leh rilru natna in mung mek chu nasa tak a ni. Ka mu thei chuang dawn a ka hriatloh avangin tukverh hawngin Chair ka la a, ral hla tak thlirin ka ṭhu zui ta vang vang a. Chu zan zet chu rei ka va ti tak, ka pum mai hian ka na takzet a; ka chhungril natna chhawktu tur engthil mah awm in ka hre hek lo.






"Anu, thingpui min lo siam" tia Rinrina rawn au lang lang chu bengchheng lo turin ka lo vai vat a. Bawihtei a la muttui em avangin a tih harh ka hlau a ni. Dawhkan kîlin ka ṭhuttir vat a, thingpui siamsak in ka pe zui nghal thuai a. Zan lamah vawikhatmah ka chhin loh avangin ka lu a hai muai muai reng a, ka naupai taksa chaklo nen ka boruak tawn chu a in remlo takzet.






"In checkup ka hun leh tawh a, vawiin chu ka va kal dawn em mawn le?" tih pahin ka nu rawn thochhuak mek chu ka lo be thuai a.





"E khai, va kal ngei ngei rawh khai...." min lo ti ve nghal thuai a. Rawng ka bawl zui sawk sawk a, Bawihtei ka hruai tel ngei a ngaih dawn avangin a hma thei anga kal ngei ka duh bawk. Hriathlua chu min hruai a, min kalpui turin ti engang mahila ka phut chhuak zo dawn lo tih ka hrechiang a, ka beisei peih buai lo law law bawk. Ka inpeih fel meuh chuan dar kua a lo pel duai tawh a, Bawihtei siam zui thuai in ka in tuaifai ve leh nawk nawk a. Hmanhmawh zetin kan chhuak zui ta dawr dawr a.






"I Hb a hniam lutuk, in enkawl ṭhat i ngai a nia. Rit chawi tam lo la, i naupai hi a fual lek lek bawk. Hahdam thei ang bera awm i mamawh a nih ber chu" tiin ka hmaa ṭhu ka Doctor râwn mek chuan ka awmdan diktak chu a sawi mawlh mawlh a. In lama ka hahdam hmanloh zia ka lo ngaihtuah daih thung. Ka damdawi tur chu lehkha ah a ziak mawlh mawlh a, a eidan tur a sawi pah zel bawk a. Bawihtei chuan dawhkana thil eng eng emaw chu a lo ban kual ve sek bawk a, veng pah reng chungin Doctor thil sawi chu ka ngaithla kar a. "Ka theih tawkin ka in dim tawh ang" ka ti rilru ve mawlh mawlh na a, ka duhdan angin ka awm hahdam thei dawn lo tih erawh ka hrechiang em em thung.






In lama haw tlang mai ka peih loh avangin U Maremi te In lam kan pan a. Hriathlua zu rui bula awm reng ai chuan len bo rih chu ka hriselna atan pawh a ṭhat zawk ka ring. Amah chauhin a lo awm a, Inchhung a lo sing sa hnawk leh nuaih tawh. Min hmuh rualin U Maremi chuan, "I va cher em em ve? Rawn ṭhu teh" a lo ti sawk sawk a. "Bawihte, ka duatnu" tih zawm pahin Bawihtei biangah chuan a rawn piai zauh bawk a. Rilru a hahdam miau loh chuan thau kung kung a har ve bawk a ni.






"I rai hi Hriathlua hian a ngeih lo aniang a? Nau i pai ve apiangin a nun a ho ziah mai, duat i mamawh hun lai taka hetianga a khawsa ziah hi kei chu vuakthluk tawp ka chak a nia" ati zui bawrh bawrh a, ka nui hak ringawt. A zat vanga nui ka ni hauh lova, Hriathlua khawsak dan ka ngaihtuahin vawthlu tawp mah se a danglam phah ka rin chuan loh vang a ni.






"U Marem, Hriathlua hian ngaihzawng a nei in ka hria" ka ti sap a, Bawihtei a fing ve kar tawh a, thusawi a hriatthiam ve tawh avangin ka vengthawng ru viau bawk.





"Eng a ni? Ta deuh deuh chuan..... I man chhuak em ni?" a thil tih lai chawl meuhin a ding chhuak hluai a, ka chhan let hun a nghak tih hriat takin min en kar bawk.






Zan lama a message dawn leh a rawn thawntu hming te chu ka sawi zui malh malh a, uluk zetin min lo ngaihthlaksak khiau bawk. "A va han zak thei lo ve le? A number te i nei lo em ni kan mihring nu pawh chu?" a ti zui nghal tawn tawn a. Bawihtei chuan a nu Maremi ṭawng chu mak tih hmel zetin a en hâ a, U Maremi chuan in thiamloh hmel zeta Bawihtei chu nuih leh var varin a pawm nawlh a; eitur a dap sak nghal ruai a. Dawhkan kîl a thil a eitir chhungin kan lo sawi dun zui leh malh malh a, "A aia chiang zawk in thil awmzia leh nihna tak hriat thuai tum ang che" a ti leh mawlh mawlh a. Keimahah chuan a chiang sa reng tawh. Mahse, chhungte duhlo chung a pan leh ka nihna chuan min dâl hneh rih em a ni. "An awmdan a zirin chet lak ka tum ang" U Maremi'n a rawn tihzawm lai chuan ka lo bu nghat nghat a. Engtin chiah nge tih a tum ang tih erawh ka hrethiam pha lo.






Eirawngbawl hun hma deuhin kan haw chho a, ka ipik ṭun chu ka thawl deuh huaiin ka in hria. U Maremi hian thinlung takin ka awmdan hi min hriatthiampui ṭhin tih ka hria a, ka mangan buai apianga ka ngaihtuah chhuah hmasak ber a ni fo bawk. Mopui ang pawh hian min en meuh lo a, a nau tak tak anga min en tlatna hian a lakah min ti pangchang ni berin ka hria; ka tan hian a ṭha takzet a ni.






Hriathlua'n In a lo nghak teh mial a, a hmai bui lûk chuan a ti lang nelawm loh zual kher mai. A hmai chu a puâm ṭan tih ka hria, a taksa lam erawh a cher khuam thung. Kan kalna chanchin min lo zawt ve luam a, ṭha takin ka chhang ve mai bawk a. Ka damdawi khai haw melh zuk zuk pah chuan, "Engnge maw damdawi ei ngai vak le? In ah hahdam takin i awm a, i hrisel em em tho a" ṭul tih loh hmel zetin a sawisel leh tak tho kha.






Ka mamawh a tlem tehlul nen naute ṭha taka ka pai zel theih nana ka damdawi eitur thlenga a sawisel chu ka thin a rim ru viau bawk. Rilru hahdam in min dah nise hetiang kher a in enkawl ka ngaih ka ring bik hauh lo. Engtinmaha chhang zui duh lem lovin Bawihtei thawmhnaw thlak turin pindan lamah ka kai lut a, a la phun hluk hluk ri chu ka hrereng. In hnial pui turin a lakah engmah sawi tur ka nei lo, ka hul hiau a ni ber mai.






Room aṭanga kan chhuah leh rual chiahin a phone hum lai mek chu a ri ve chiah a, min rawn melh zuk in rang zetin pawnlamah a chhuahpui zui ta daih a; 'a pawimawh viau a niange' ti rilru chungin ka nui lui sak a. A ṭawng ri bul bul chu ka hre reng a, ngaihsak awm anga lan erawh ka tum hauh lo thung. Bawihtei chu ka be lui vak vak a, thil ho te te a sawi ve niah niah chu ka nuih luih pui vak vak bawk. Ka pasal, ka innghahna leh hmachhuan ve berin hmeichhe dang a hnimhnai nia ka hriatna chuan chhungril lamah na takin min kher ngawt ngawt a; nâ anga lan erawh ka duh hauh lo thung. 'A khawsa diklo zawk pawh a nuih theih laia ka lo ṭah bik te'n le, a engamah hmain ka tlawm tihna a ni dawn asin. Ka fate tan chhel taka ka awm a ngai' tih chu ka in hrilh nawn mawlh mawlh reng a.






Zanriah ei na ah pawh Hriathlua a tel lo leh tawh. A phone hmang zo kha a ṭhianpa harsatna tawh chuanlamin hmanhmawh zetin a tlanchhuak a, ngawi rengin ka thlirliam ta ngawt kha ania. Engzat a tam nge min bum a, engtia rei nge min lo bum tawh tih chu engmah ka hre lo. Rilru fim taka engkim hmachhawn chu ka tih tur a ni tih chiang takin ka hria, chuta din ngheh tlat chu ka tum ve tawp a ni ber.






Rinrina school kal tur ka siam mawlh mawlh a, Bawihtei'n min lo pawt buai ve sek bawk a. Zing lamah hi chuan kan buai deuh nuaih reng mai, ka nu in chawhmeh kharchhawngin a zuar ve bawk a; nitinin ka buai a zual telh telh a, Ni in min daih loh chang a tam ta ngei mai. Ka nau pai pawh thla 7 lai a ni ve tawh a, ka dul len danah mipa anih an ring deuh fur hlawm a. Ka rilru tak chuan mipa chu ka awt ve viau nangin ka ti lang chiam duh lem lo. Eng mi pawh nei ila, ṭha taka ka nei thei anih chuan a lawmawm em em tih chu ka pawm hmak bawk.






"Ka pa....kan kal dawn ania" tih lang lang pahin kan chhuak zui nghal a, ka kal chak hlei thei meuh si lova; hma takah muangchangin kan nufa za in kan kal ve bek bek ṭhin. Hriathlua nun thlahdah a zual tawlh tawlh a, Rinrina School kal tur te chu han thlah ve mai ṭhin se atan a awlsam tehlul nen; engahmah kan phut chhuak zo der si lo. Zanah kan mut hmaa alo haw hman leh kan mu rual a, kan lo mutsan ṭum a tam mah zawk. Zing lamah School kal.a kan inthlah chhungin a lo chhuak bo leh a, a tlatna chin ka hre ngai hek lo. A awmdan apiang chu enliam tawp tum a ni ber rih a, a khawsak dan hian ngaihven hluak a phu lo ve bawk a; a duh dan dan in a awmkual a ni ber.





"Anu, apa hi a sual ka ti bik e. Mite chu an pate'n Bike ten an thlah a. Apa ve chu bike a nei ve reng sia, min thlah ve duh chuang lo reng reng...." Rinrina chuan a ti ve niah niah a, ka bulah bak hian a phunnawi vak ngam lo bawk. Lainat taka en chungin ka thiam tawkin ka hnem malh malh a, a phunnawi na ang ang a ka phun pui ve mai chuan a pa hi a haw hlen thei mai ang tih ka hlau a ni.






Bawihtei engmah hrethiam lova zuang lauh lauh te chuan ka rilru a ti kal thui em em vek a, thil engkin a rawn hriatthiam chhoh ve hma ngeiin Hriathlua chu in siamṭha se ka ti em em bawk. Eng engemaw ka ngaihtuah kual neuh neuh chhungin school kan thleng ve der mai, Rinrina chu a luh thlenga thlir zuiin kan haw leh nghal vang vang a.






Insuk tur vûm hnuk chu ka thliar malh malh a, tui haw buaipui ngai nen ka buai leh viau mai. Kan nufa chauhin kan awm a, Bawihtei phone pe in khumah ka entir a; ka buai a zual hi chuan ka ngaihsak hman meuh ṭhin lova. Phone en chunga a lo muthilh tak daih chang lah a tam. Khawlah thawmhnaw vawmlut in ka nuai tir nghal thuai a, Bawihtei ngaihven turin pindan lamah ka lut zui leh thuai a. Ka rin ang ngeiin a lo muhil leh bâm tawh. A mut dan siamrem sakin a biangah ka fawp vang vang a, naupang khirh tak a nilo hi ka tan chuan vanneihthlak tak a ni.






Mampuia number hmetchhuakin ka call zui zat a, a lo la rang viau mai. An dam ṭhat leh ṭhatloh te ka zawt nghal luam a, a hritlang khawsik a mu mek tih min lo hrilh chu ka thaw halh a. In entir turin ka ti zui vat a, a aw liam zung zung nangin in entir a peihloh zia ka hrechiang bawk a; a kal kher erawh ka ring hran lo.






Ka nu chanchin ka zawhna min chhandan chu ka rin lawksa ni mah se ka nu chuan a ti ve mah mah niin ka hria. In lamah a awm hman meuh lova, a ṭhiante nen zan tairek thleng thlengin khawi hmunah emaw leng kualin pawnlamah a tal tam viau a nih hmel. Ka nu hi ka nu a ni ta lo emaw tih mai tura a khawsa tlat hian min ti na ru veng veng fo mai. A hmuhsit em em Hriathlua nen an khawsak dan te hi tehkhin chang ka nei rum rum fova, Inchhungkhur nu ber awmdan tur pela a khawsak tlat nachhan hi hriat ka chak em em bawk.






"Nupui te hi neih ve mai ka duh tawh, kan inchhung hian hmeichhia a mamawh. Ka nu hi engahmah a laktlak hlawl loh, a dawr lam pawh a ngaihsak hek lo" Mampuia chuan a rawn ti ram hmuk a, thil tamtak ngaihtuahin a rilru a buai ve ṭhin hle dawn tih ka hria. Ka nu ka demna a nasa tawlh tawlh bawk. "Mampui engkim fîm taka ngaihtuah hmasa vek chungin thil ti ṭhin ang che" tiin ka chah mawlh mawlh a, keimah ber chuan ka thilsawi chu ka zawm lo hle tih ka in hre ru kur bawk. Ka insuk nuai lai a zawh tak avangin kan inbiakna ka ti tawp zui ta thuai a.






"Hriathlu, heti em em a ka laka khawsa tur hian i eng pawi nge ka sawi a? Ka naupai apianga ka fa a nilo i tih tur khawp hian engtinnge ka khawsak? Ngaihzawng i nei tih hi ka hriat loh ring miah suh" tiin khuma ṭhu kun chul ka pasal chu khur hlak hlakin ka ânkhum tawn tawn a, ka puakkeh chiang khawp mai. Min chhang lovin a awm ngaiin a awm ngur reng a, ka thinrim so bulh bulh avang chuan ka duhkhawp pawhin ka thaw hlei thei lo hial.






Zan tirah rui zetin a rawn haw a, a chatthla zui nghal hmak bawk. Ngaihsak lem lovin Rinrina lehkha ka zirtir a, Bawihtei a pi in an mutna lamah tih mut tumin a paw ve mek bawk a. Ka pa in uluk zetin Chanchinthar a lo ngaithla dauh dauh a. Room ah ka damdawi ei tur la in ka lut a, Hriathlua phone lo ri tawp chiah chu ka hre hman. Ka pan hnai vat a, 'Zualbawihi' tih bawk kha a lo ni. Phone chu la kangin ka enkual zui zat a, whatsapp ah Zualbawihi hming bawk a lo awm vang a. Message in hawng sa vek anih avangin ka en zui ve vat a. Karei leh... an inbiakna ka chhiar zet chu luhai in ka tlu lo chauh, sawichhawn leh tur pawha zahthlak khawp inbiakna a lo tlar dul mai.







Ka so bulh a, Hriathlua muhil lai chu a sam ah ka ṭham nghek ringawt a. A rui hneh ngang aniang, a rum ri nghut a; a hnar chhunzawm leh nghal burh burh a. Thinrim mangkheng a melh nghek in ka in seh ruh ṭawlh ṭawlh a, ka chhungril natna in mung nen ka puakkeh lo chauh a ni ber e. Engnge tih hmasak ber tur pawh hre lovin ka phone in charge lai chu ka phawi hlawk a, Hriathlua phone nena entawn sekin ngaihtuahna fim neih hram tumin ka thaw leh hawlh ṭhin. Ka theihtawpa ka in bengdaih hnuah Zualbawihi number chu ka phone ah ka chhu lut zui zat a, ka save ta phawt. Hriathlua phone a message te chu screenshot leh pawp pawpin ka in thawn chhawng vat a, ka zawhfiah hunah a pha nawi anih chuan a finfiah nan hman ka tum nghet hle.






Ka nu leh pa te bulah thil awmzia ka sawi fai kelh a, boruak eng emaw thut kan neih pawha an hrilhhai lutuk loh nan ka ti a ni pakhat bawk. Ka pa thinrim chuan a muhil lai chu ṭham thawh nawk mai a duh hial a, ka nu nen kan khap bet hram hram thung; an pafa a inchinfel an tum zawngin boruak chhe leh chhawng kan hmachhawn dawn tih ka hrechiang em em a, keimah ngeiin hmachhawn ka duh zawk bawk.






"Bawihte....api bulah lo mu rih rawh aw? I pa ka buaipui lawk ange" ka ti chu naupang fing kir ker tikah a hrethiam nghal em em a. Hriathlua harh hun nghakin khum kotlangah ka ṭhu ta ran mai. Ka rilru buai nuaih avang chuan a lo harh huna ka ṭawngdan tur pawh ngaihtuahna sen fe tham a ni. Darkar thum dawn ka ṭhu ang tihin a rawn rum ṭuah ṭuah a, tui a rawn lam chhunzawm zat. Tui pek thuai pahin, "Ka be lawk duh che" ka ti chang fak a. A rawn tho chhuak ṭuah ṭuah a, khumah chuan a ṭhu tum bur a. Ka rilru a awm hmasa apiang chu ka zawt mawlh mawlh a, a chhanna erawh ka dawng lem lo anih hi....





"Ngaihzawng min neihsan tur khawp hian engnge ka lakah hlim lohna i neih a?" melh ngawt ngawt chungin ka ti sap a, ṭawng ring tur pawhin chakna ka nei tawh lo. A 'Aw' then khurh pahin nin hmel zetin a thaw hulh a, ka lo en kar thung.





"Kan in ngaizawng lo, khatiang hmeichhe khawlo lutuk te chu ngaihzawn chi pawh a ni em ni? Ka fiam ve mai mai anih kha" a ti bung ngut a, zangthal zawngin khumah a let zui thuk. "Ka fiam mai mai i tia law? I fiam mai mai loh zia chu in inbiak danah ka hmu vek. Hmeichhe khaw lo i tih kha i hmangaih hle a ni lawm ni?" ka ti khur dat dat a, ka ṭah a chhuak up up bawk.






"Ka nih lohna a min puh thluk phet tum suh. Mi rinna neilo lutuk hi chu in dikloh vang abni zawk tlangpui ania" a rawn ti leh lek phei chu ka sa pup mai, a diklohna a min puh let a tum tih ka hria. "Hriathlu, i mak ka ti ngei mai. Nang ang em em a mihring mak hi ka la hre ngai love. I duh chuan i nei thei ang, ka hnawksak lo khawp ang. Nei ngei ngei ang che" ti tuarhin pindan aṭangin ka chhuak zui ta daih a.






Ka thinrim lutuk chu ka thaw a chham thei mai dawnin ka hria. Kawngka kalhna hawng rawk rawkin pawnah ka chhuak zui thuai a, boruak chu duhthawh zet a hîp kâwk kâwkin vanlam hawiin ka dak zui vang vang a. Ka bek a mittui rawn luang ngiai ngiai chu hru tâwkin "I lakah hian ka beidawng ta takzet"' tiin ka phun zui mawlh mawlh a.






(to be continue.........)


Show post links
Top

[Ngaia]

DEAR PAIN
Chapter - 23




By- Brigida Hugo





Ka pum a na a, ka thaw hlawp hlawp a. Thlanfim in min bual pap pap bawk a. Nau ka vei tih chu ka in hrechiang takzet. Zingkar aṭangin ka pum a na riai riai tawh a, a reh leh hmak si avangin ngaihṭha in ka awm ta kha a nia. Ka nu lah chawhmeh la turin a kal liam deuh chiah a, ka pa hnathawkin a chhuak tawh bawk. Room lam panin muangchangin ka kal chhet chhet a, ka hui pap pap reng bawk a. Khum a Bawihtei muhil bal chuan min tibuai ru hle bawk.






Ka phone ban zui thuaiin ka nu ka call nghal a, a la thei miah lo leh nghal. Hriathlua ka call zui leh a, a lo la ve teh mial a. "Nau ka vei a nia, rawn tlan haw rawh" ka ti hrâwk a, a ngawih reng danah a hamhaih ve deuh a nih hmel. "Ka sawi i hria em? Hmanhmawh rawh" ka tih leh tuarh takah chuan, "Ka raw haw nghal ang" a rawn ti ve thuai a. Thei leh thei lovin ka mamawh tur ang chu ka khungkhawm a, naute thil vel erawh ka siam lawk vek tawh avangin khai chhuah mai theih in a awm tawh.






"Engtin nge kan tih dawn?" Room kawngka a rawn in hawn rawk rualin Hriathlua'n a rawn ti bah nuaih a, a hmel buai nuaih chu a thlamuanpui awm loh ber awm e.





"Ka nu kha call leh chhin teh, Bawihtei amah a kalsan chi a ni silo" ka lo ti vat a, ka in seh ruh ngar ngar mai. An in be mawlh mawlh a, an thil sawi pawh ka ngaihven hlei thei meuh lo. "A awmna aṭangin damdawiin a pan nghal dawn anih chu, Bawihtei awmpui a ngaih bawk si chuan ṭhenawmte ka va be lawk ange. Damdawiin ah chuan hruai phei mai che sela a ṭha angem?" a ti leh zung zung a, chubak duhthlan tur ka nei chuang lo. Rang takin a tlanchhuak zui leh thuai a.






Rei vak lovah Nu Thiangi te nufa leh Hriathlua chu an rawn in zui lut a, Nu Thiangi chuan min kalpui ve thei dawn anih hmel a; ka thla a muang huai mai. A fapa Mafaka chu motor lachhuak thuai turin hrilh a, a kal nghal thuai bawk a. Nu Thiangi leh Hriathlua'n kan bungrua khaiin kan in zui chhuak thuai a. Kan tlanchhuah dawn thlengin Hriathlua chu Bawihtei enkawl ṭha turin ka chah lawm lawm a, a fanu buaipui tur pawhin ka ring zo ta meuh lo a ni ber e.






Kawng tawt leh khaw lum uap churh hnuaiah rei fe kan tlan hnu in damdawiin kan thleng ve ta hram a, ka nu pawh a lo vei tawn sek tawh. Damdawiin chhung lamah lut zui thuaiin tihfel ngai ang ang min buaipui sak nghal sawk sawk hlawm a. Ka mutna tur khum ka thlen meuh chuan na tawh tak a ni, ka khaw hmuh te chu a phe deuh ruai a; ka taksa chaklo nen ka buai ru nuaih mai.






Nu Thiangi chuan, "Zothan, tlai lamah chaw ei chhuahna tur kan nei si a, eng eng emaw tihfel ngai kan nei a, kan hawsan mai ang che u. Ṭha deuhin i nei mai ang" a rawn ti zung zung a, ka nu chuan lawmthu a lo hrilh mawlh mawlh a. Bawihtei ka ngaihtuah reng a, a mu tho tawh ngei anga; engtin tak in awm pafa ve ang maw? Ka pum na lutuk avang chuan ka awm hle hle thei lo, khum tlang bawhin chhuatah ka ding a; rizai ah ka hmai phumin ka ṭhen tlawk tlawk reng a. Rei a ni ta lo, nau neihna pindan lamah min luhpui ta...





"Sang rawh, a chhuak dawn e" Nurse in a tih rual chuan ka theihtawpin ka sang vak a, naute ṭap ri in a rawn chhunzawm nghal zat. Thaw hawkin ka chhing vang vang a, ka taksa na reh huai huai chu ka hrechiang hle. "Muhil miah suh aw, in ti harh rawh" tiin Nurse pakhat zawk chuan ka hmaiah tuiin min theh ṭhet ṭhet a, ka mutchhuak lutuk chu ka meng hlei thei der lo.





"In ti harh rawh, i fapa hnute pek te ila ngai dawn ania" tiin puan huhin min rawn hru leh thuak thuak a, 'Fapa' a tih ri chu ka beng ah a ri ring ngei mai. Naute mutna lam chu ka melh zauh a, "A pian a ṭha em?" tiin ka zawt zui zat. "A ṭha e, a duhawm teh ania. Kan buaipui zo che anga, hnute i pe vat dawn nia" tiin min buaipui zawm malh malh a, ka rilru in ka ṭawngṭai mawlh mawlh a; ka awh em em fapa ka nei ta e.





Chulai hmunah chuan hlimna famkim nen hun ka hmang ni berin ka hria. Min buaipui sawk sawk in ka sir lawk a ka fapa ṭap ṭhat ṭhat pawh an buaipui sawk sawk bawk. Engkim an buaipui hnu chuan ka fapa pianna hmun chu kan chhuahsan ta!





"Karei, ka tupa hmelṭha chu khawi maw?" ka nu in naute chu lo banin a lo ti nghal chûl a, keiin pawm lo turin ka lo ti thung. Bawihtei pawh kha a pianhlim aṭangin a pawm nasa lutuk a, pangtilum a hre chho a; kan buai phah vak tawh. Ka thusawi erawh a ngai pawimawh lem lo, a pawm zui hle hle tho. Hnute hnektir turin a rawn muttir a, ka lo in siamrem zui ve vat a. Ka chhungril chu a hlim veng veng a, ka fapa hnute fawp dek dek chu hmuhnawm ti zetin ka thlir reng a.





"Api, ka nau chu a mutui e...." Bawihtei ṭawng ri ka hriat chuan ka meng diar diar a, kan mutna bul ṭhutthlengah chuan Rinrina nen an lo ṭhu dun rial a, an nau pianghlim chu uluk fe hian an lo thlek dun dauh dauh mai.





"Bawihte, in lo kal elaw? Tunge lo hruai che u" hawi kual pahin ka ti vat a, midang hmel ka hmu miah lo. "Anu Maremi rualin kan lo kal" Rinrina'n a lo ti vat a, Bawihtei erawhin rum fe a min melh pahin, "Ka muthilh laiin i bo daih a, tinge min hruai ve loh?" a lo ti ve niah niah thung a.





"Khawnge i pa a awm?" tiin ka zawt vat a, "Kan hre lo" tih thu in min chhang anih chu! Ani pui roh hian a fate pawh a lo buaipui miah lo tihna em ni? Ka ṭawng leh dawn lai takin U Maremi eitur khaibawr luih in a lo thleng a; Bawihtei te unau eitur a pe zui thuai bawk.





"Engtin nge i rawn kal theih zawk a? I buai dawn tehreng nen... Kan In ah i chho em ni?" ka lo ti vat a, a lu bu nghatin "In pa in min rawn bia a, 'Bawihtei a tlei duhlo' a ti sia, hmahmawh baklengin ka tlanchho maw le. A hrim hrim in nau lah hi i awl phian a, i na hlek a i nei nghal zel mai. Nang ang chu ni ve ila pariat vel ania ka neih dawn ni" tiin a nui sawng a, ka hmui ka tih pawrh khum nghek ringawt.






Zan kan riah a ngaih dawn avangin Bawihtei te unau chu U Maremi te bulah an riak dawn thung. "Bawihte, i pa bula mu mai ula?" ka ti chu a lo duhlo nasa mai; min vuan bet nghal ṭai mai a. U Maremi chuan a thlem zui ta vat a, ani hi a awm lo ang tih ka va hlau ṭhin tak. Haw turin an insiam zui a, kawngka an chhuah dawn thlengin Bawihtei chuan min rawn en zui ṭawk ṭawk a. Ka tello in a la mu ngai si lova, ka ngaihtuah kher mai. Pa laktlak loh lutuk an neih avangin ka thinrim ṭun bawk a, phone ah tak ngial pawh ka be peih lo. 'Ka nu in a biak tho kha maw' tiin ka ring ve hmiah.





Birth Certificate lak nghal a ngaih avangin naute hming sak a ngai a, ka nu nen chuan uluk zetin kan ngaihtuah dun ve rauh rauh a. Bawihtei hming kha ka sak tawh avangin tun ṭum chu midang ka kian rilru ve deuh; mahse, ka bula awm ber ka nu lah chu a hul hiau mai si a. U Maremi bawk ka ngaihtuahna ah a awm leh nghal a, ka phone zui ta vat a; a lo phur phian leh nghal a. Ka fapa chuan hming a nei ta, "Amos Zodinsanga" tih chu ka va lungawipui tak. "I hming ṭawm deuhin ka ti, a pa hming lam chu a lan tel ve a ngai lo" a ti hmak a, ka lo nui hul hak a.






Ka fapa chu ka sirah tui takin a thaw ve sek sek a, ka en ning thei mawlh lo. Ka nu in pawm a tum teh sek a, a khât tawkin kan in vîn leh hlak hlak ṭhin. Bawihtei te ka ngaihtuah avangin ka phone ta thuai a, ka rin aiin an fel phian mai. An ri laih laih a, biak pawh min be ṭha hman meuh lo zawk a ni. Ka ngaihtuah lutuk na tlemin a zia deuh e. Hriathlua'n vawikhatmah min la rawn be lova, biak ka tum bik hek lo. A awmdan sawisel ka tum lova, ka rilru ti paukhauhin a awmdan apiang chu ka chhinchhiah nghauh nghauh thung. Ka natna ka up beh ṭang ṭang hian puakchhuah ni a la nei anga, chutih hunah chuan ka hawikir leh tawh ngai dawn lo tih pawh ka hrechiang viau bawk.






"I u Mama'n ka rawn kal ange a tih kha, Lalhriathlua laktlak loh lutuk hi engtinnge maw kan tih dawn ni?" tiin ka nu chu a âng hlak hlak a, Naute hnute ka lo pe mek thung. Harsatna dang kan neih lem loh avangin min chhuah tir dawn a, ka thaw ru huai mai. Bawihtei hmu pha a ka awm tur ringawt pawh chu ka lawm takzet. Kan bul vela nau nei ve dang te chu an pasal ten theihtawp chhuahin an buaipui a, an nupui te ai mahin an buai emaw tih tur a ni. Keini ve chu ka bula awm chu sawi loh, kan chanchin ngaihven turin vawikhat pawh min rawn be miah lo ania. A nun a mithar a tawn chuan a tihlim viau a ni ngei ang, kei erawh a lak ah ka hel tawlh tawlh thung.






"Duh angin ka rawn chhuak hma thei lo alawm mawle, khawimaw ka fapa thar chu ka lo pawm ve phawt teh ang" U Mama'n a rawn ti bawrh bawrh a, ka nau pawmlai chu min rawn laksak zui nghal zat a. Khum bulah dinpui in a su hluau hluau a, a palian roh sia an in pawm zo ngei mai. Ka nu in "I sawp khaw lo ang, kal vat zawk teh ang u" tiin a laksak ta vat a. U Mama'n kan bungrua te khai zui zatin muangchangin kan in zuichhuak ta a.






Ka pa in In a lo nghak a, Bawihtei te unau erawh U Maremi'n a rawn hruai chho mek thung. Room ah naute nen kan mu lut zui a, room kawngkhar kan hawng huau thung a. Hriathlua hmel hmuh tur a awm lova, khawilai ah emaw chuan a ri leh huau huau tawhin ka ring.






"Ka pa, Nau-a awmdan hi a dik lo. A nupuiin nau a nei a, vawikhat pawh an chanchin hre tur in a be miah lo ania. Patling khawsak dan tur a ni lo reng reng" U Mama chuan a ti bul hmuk a, a hmelah a lawmloh zia a langchiang hle bawk.





"Nizanah pawh a rawn haw lo. Hetiang em em a fapa nep ka nei hi ka zak hluah hluah mai" ka pa in a lo ti ve nghut bawk a. A chungchang sawiin an ri zui bawrh bawrh a, Home a dah hial te an rel in ka hria. 'Home ah pawh dah se, ama'n tumna a neih loh chuan awmzia a awm lovang' tih chu ka ngaihdan nghet bur a ni.






U Maremi te an lo thleng a, kan ri zui ve laih laih a. Naupang ho in naute an vil deuh chawt a, "A te reuh e" an ti deuh reng bawk a. An khawih nat ka hlauh avangin ka veng reng a, naute ai mahin a û te ho in min ti hah niin ka hria.






'Naute thar lawm nan' tiin ka pa in Ar a lei rup mai, U Hruaitei te chhungkua pawh kan hrilh tawh a, an rawn chho ve mek bawk. U Hruaitei hian min pawh ngam tak tak lo tih ka hria, a inthlahrung duk zel. A lakah thinrimna hranpa ka nei tawh lem lo a, ṭha tak takin ka be reng tho nangin ani erawh ka lakah a zûm duk ta reng a nih ber hi. Amuani leh Siamtei te pawh kan hrilh ve nangin an remchang rihlo anih hmel a. Anni pawh kan in hmuh lohna a rei leh ta vang vang viau mai, an ngaihawm ve viau tawh.






Eirawngbawl a an chet sap sap laiin Hriathlua leh a ṭhiante an rawn lut huk a, an hmel en reng reng pawhin an harhfim lo tih a hriatreng mai. "Khawimaw ka fapa duat chu, ka lo awi mu teh ang" a rawn ti phar phar a, rum zetin ka lo melh nghek. A ṭhiante ho lah chu an rawn in luh chhawk ve sek bawk a, an thawm a nat em avangin U Mama'n a khak ta fak a; Hriathlua mitmeng rum nghal ûl chuan min ti hlauthawng nghal bawk.





"Ka fapa ania, kan lawm ve a ni mai. Midangin engmah lo sawi suh u" a ti ta khur khur a, boruak a tichhe zo leh tak ngial dawnin ka hria.





"Chuti taka i ngaihlu a nih chuan ngaihven ta rêng che. I nupuiin nau a vei lai leh a mamawh ngawih ngawih lai che khan khawiah nge i awm?" U Mama chuan ati hrawk a, an in dinchilh nghal tau mai.





"Ka awmna i hriat a ngai lo, mi zilh ve tum khanglang suh" Hriathlua chuan a ti bung leh nghut a. U Mama a in seh ruh nghal ṭalh ṭalh bawk. "In zak lo unau em mai a, in tihbuai na hun pawh a nih loh hi. Awm mai mai teh u" tiin U Maremi'n U Mama chu a kai hrang vat a, ka pa in ṭawngkam na tak a nei zui bawk. Ka pa meuh a ṭawng takah chuan Hriathlua pawh a ngawi zui ve ta hram a, a ṭhiante ho pawh an zum dâk mai. Haw vek se ka ti ngawih ngawih bawk.






Boruak zangkhai lo ru tak hnuaiah zanriah kan kîl a, boruak tih daih tumin U Maremi a ṭawng siam siam reng a; a awmlo ang tih mawlh hi ka hlau ṭhin. Rei pawh kîl lovin ka kham zui vat a, room lamah ka mu lut leh ta daih. Ṭhut a harsat bakah Hriathlua hmel ka hmuh ringawt pawh a ka thinrim hluah hluah chuan min ti hah ngawih ngawih bawk.






Ṭhutkhawmna lamah an titi zui laih laih a, Hriathlua pawh a ṭawng tam berah aṭang leh tawh. A phone ri riai riai chu ka ban zui vat a, a rawn call tu ka hmuh rual in ka sa nghal zak. In ngaihtuah fimna hun pawh ka nei ta lo, rang takin ka la zui ta vat a.





"I lo kal dawn em? Ka nghak reng che ania" a rawn ti nghal zat zat a, ka kut hum ruh ṭalh ṭalh chungin "I biak tum hi ka pasal a ni tih i hria em? Eng beiseiin nge i rawn biak sek a?" ka ti vin nghal tuarh a, ṭhutkhawmna lam thawm pawh a reh nghal dak mai.





"Ka be hmasa a maw? A hminga a nupui kawl ve mai mai i nih kha. A fapa te kha lo tiduhdah tawh miah suh ang che" a rawn ti let leh zat zat a, a thil sawi danah chuan Hriathlua'n a bula min sawidan tur ka hrethiam mai.





"Naupang ka ti duhdah ngai love, ka awmdan tur rawn sawi ve turin tunge i nih?" ka ti let ve leh hmak a, Hriathlua rawn lut zui puatin phone chu min rawn phih thlaksak sawk a; a dah zui hmak bawk.





"Khawi maw i phone kha, Lalhriathlu.... I va han zak theilo em em ve" tih hlak hlak pahin U Maremi chuan a phone chu a rawn chhuhsak a, hmet eng zui pah in a bengah a chuktuah nghal ran bawk. "Nula lo ngaithla chiang hle rawh, i biak ṭhin hi nupui fanau nei a nih hi. Tun chinah vawikhatmah rawn be tawh suh ang che" ati nghal bawrh bawrh a, Loud speaker a On zui zat bawk.






"Tunge maw i nih le? Lo ngaithla zawk rawh. Kei min hmangaih zawk anih chuan ka siamṭha thei, a nupui fanaute chu enkawl ṭha turin ka lo ti dawn nia" a la rawn ti let ngam nia. Ka tê chem chemin ka hria a, ka tlawm ngawih ngawih bawk. Ṭawngchhuak ve turin chakna ka nei lova, ka fapa muhil thaw sek sek chu ka melh ngawt ngawt ringawt.





"Zak teh, ka rawn hnuk hrep mai ang che. He mi laktlakloh ruala he Inchhung i rawn dai luh hi kan rem ti chuang lo" tih pahin phone chu a dah ta hmak a. Hriathlua lam hawi a in her remin a kawk zui sawk sawk mai. A ṭawngkam pawh a na thawkhat viau bawk. U Maremi'n Hriathlua a enkawl nasat zia an hre vek a, tumah an in rawlh lo. Hriathlua pawh a ding ngawi kur mai.






An zilh ta sap sap hlawm a, ka pa chuan "Tun ang reng a i khawsak dawn chuan In ah hian i khawsa ve thei lovang" a lo ti bawk. Zan rei lamah an ṭîn darh a, kan nufa in khumah kan mu ran a; Hriathlua chu ṭhutthlengah mut tum in a puan sin tur a pawm chhuak ṭun a.






Ngaihtuahna tam tak ka seng a, ka unaute leh ka chhungte thlengin ka ngaihtuah kual vek. Ka nu min ṭawngkhum na te kha mênah lo thlak mai mai ila, tun anga buarchuar hian ka awm dawn tawp silo. Mahse, a hunlai boruak ah khan thil danglam tam tak a thleng miau a, beiseina sang tak kha ka nei lo thei bik silo a ni. Whatsapp ah ka lut a, Mampuia lo la online va va chu ka hmu nghal chat. Nau ka neih zawh hnu lawk khan chanchin ka hrilh ve a, kan la inbiak chhunzawm leh ta miah lo.





"I va mengrei ve?" tih ka thawn rual deuh thaw chuan a en nghal vat a, min rawn chhanlet mai ringin ka ngaichang deuh bawk. Phone call a rawn kal zui ta zawk a, ka lo la nghal thuai a.





"U, nupui ka ru a nia" a rawn ti sur sur a, ka lo nui hak thung. "I awih loh leh rawn video call la...." a rawn ti leh zat a, kan inbiakna chu dah vat in ka video call zui ta a. A lak rual chuan Mahlimi nen an rawn lang dun ta ran mai, ka âng deuh pam chu min nuih hawk hawk a.





"Ve ringawt a che, engnge i hriat a?" ka ti zui thuai a, ka hmelah erawh nuihzatna a lang chiang viauin ka ring.





"A hun ve tawh alawm, tiraw My Dear" tiin Mahlimi chu a nek salh a, hmui ka lo tih pawrh khum nghek. Mahlimi chu a lai ve deuhin ka hria. Kan boruak tawn mek te sawina hun a nih rih loh avangin hlim hmel ka pu lui hram hram a, puitling taka awm turin ka chah zui ve malh malh bawk a. Rei vaklo kan inbiak leh hnuin kan ti tawp ta a, mu rem ve nghal in naute hnute ka pe zawm zat a. A mutui thei lutuk hi hnute barh luih a ngai hial ṭhin. Ka fate pahnih chu ka kuah rân a, zan reh ruih chuan ka natna te an rawn belhchhah ni maiin ka hria. Ka beka ka mittui luang thla ngiai ngiai chu hru tâwk in "Nangni mai mai vang hian ka ṭap lul lovang" ti sapin ka chhing zui ta hmiah a.






Hun kal zelin kan buai ve mawp mawp a, Hriathlua pawh In lamah a tal deuh chawt a. Ka fapa pawh thla hnih a pum ve ta hial mai. A pian hlim aṭangin zan mut duhloh leh khawlhkham zawngin a awm ngai lova, Bawihtei'n a thîk ve deuh ṭhin tih lohah chuan buaina em em kan nei mang lo.






Rinrina pawh In lama a lehkha zir ka enpui leh zauh ṭhin tih lohah chuan ka nu in min awl hneh viau mai. Mampuia nen kan in be ve reng a, ka nu pawh a khawsak phung a la ngai reng tih te min hrilh fo bawk a. A dawr lam pawh a ngaihthah viau a nih hmel, tun ang renga a khawsa a nih chuan a la thlachhe vatin ka ring. "Diktea hian kan rualin chaw pawh a kîl ṭha ngam lo, kan nu a hmaizah deuh tlat a" Mampuia'n a ti chu ka nuihpui nasa hle, a zakzum em em reng mai hi a sim hlei thei meuh lo chu a ni.







Nilaini tlai a ni a, Hriathlua chu eirawngbawl laiin a tei chhuak nulh a. Rei tak In lama a tawm ve tawh avangin a ning ve tawh viau ka ring, ka enliam satliah mai bawk. Khatia kan buai nuaih zan aṭang khan a zal ta deuh a , zilhna a dawng malh malh bawk nen a inthlahrung ve deuh chuan ka hria. Zanriah kan ei dawn thlengin a la rawn haw lova, a tih fo dan a nih avangin chaw kan eisan a.






Ka nu in Bawihtei leh naute an khumah a mut zal pui a, naute chhaihin an thawm pawh a ṭha hle. Rinrina nen chawei dawhkanah lehkha kan zir malh malh a, ka pa chu a tih fo danin TV hmaah a ṭhu leh ran tawh bawk. Kawngkhar rawn in hawng ri ṭhuai ah chuan ka dak chhuak zawk a, Hriathlua chu a rawn pai lut leh ta chhur chhur mai. Rinrina nen a kan ṭhudun ran chu nelawm loh zeta min rawn melh run in pindan lam a pan zui a, 'muhil nghal daih se' tih chu ka rilru a awm lian ber a ni nghal.






Dar 8 pelhah kan zir zo thei hram a. Rinrina hi lehkha zir a sak deuh tlat a, kan bei rei ṭhin viau mai. Bawihtei a lo muhil bâm tawh a, kan khum lamah ka sawn phei zui vat a. Naute ber a la meng kar a, ṭhutkhawmna lamah kan in pawm a; chhaih a hre ve reuh tawh bawk a, kan in chhaih nui ve leh ver ver ṭhin.






Ka nu leh pa te pawh an mu zui mai a, ka fapa chu pua in ka awi darh darh a. "Tui min rawn pe teh" tih thawm ah chuan ka chawl dat a, muhil tlang se ka tih tehreng nen ka ngei ru hle. Frigde a tui chu la zui vatin ka pe a, a mimeng rum ûl reng chuan min ti awm nuam lo viau bawk; engemaw tak buaina awm tur ni hian ka hre tlat a, ka thaw dep dep mai.






"Nang hian min ti mualpho hle tih hria ang che. Ngaihzawng nei chhuah in min chhuah a, kalna lam apiangah nuihzat ka hlawh. Pasal te ti mualpho duh khawp a rilru chhia i lo nih hrep hi" a ti chang rût a, ka awm nawm lohna chu a rawn thleng chawpchilh nghal e.





"Ka ti mualpho che em ni? Inchhunga kan sawi bak khawiahmah ka sawi hauh lo. I bialnu kha a zak thei lo em a, a sawi pung zawk aniang chu" ka ti let ve fak a.





"Ka fiam mai mai ka tih kha maw le. Uire hnam ka ni love, i dawt phuahchawp vangin khua pawh ka hawi ngam loh hi" tih pahin a tui bottle ken lai chu chhuatah a vawm pawp a, Bawihtei ka en nghal vat; a lo la mutui viau tih ka hmuh rual chuan ka thaw huai mai.





"I rui anih kha, mu mai mai teh. Naute ka awi mu dawn" tiin pen sawn mai ka tum a. Ka banah min pawt nghek in khumah ka let thla tawl mai. Bawihtei muhil lai a rawn harh hlawl a, kan lo awmdan avang chuan a mangang hle tih ka hmu thei bawk. Ka lamah pawt hnaiin ka kuah bet vat a, a nau zawk lo ṭap mek bawk. Room kawngka chu a kalh zui hmiah a, kan lam pana chak zeta rawn pheiin ka naupuak lai chu mi rawn chuh a. Ka tlukna lamah ka puakpuan suih a lo phelh daih bawk nen, a pawm kang ta daih a.






"Khawi, hnute ka pe dawn. A mut a chhuak tawh lutuk" ka tih lai mekin ka nu in kawngkhar a rawn chum a. Hriathlua chuan a lo hrawk zui hrep a. "Ka fate nu ni tlak pawh i ni love, mahni pasal te pawh ti mualpho duh" tiin Bawihpuia chu a pawm ṭha sawk sawk a, a ṭah nasat tawh em avangin laksak ka tum ve mek bawk.






"Ka fapa hian i hnute tui kha a ring hlek lovang, tenawmnu" a tih rual in ka bek a ri chawrh a, a thapui tak meuh in min hnek tih ka hria. Ka hlawm tawp a, Bawihtei a ṭe zui nghal tuarh tuarh bawk. Kawngkhar chu a ri bur bur tih ka hria, ka luhai lutuk avang chuan ka tho chhuak thei mai bawk silo. Bawihtea hnute hne chak ṭap rawng rawng nen, ka chhungril chu vih thler vek ang maiin a na vawng vawng a.






"Nang pawh chu i lo rak ve sek le" tih pahin Bawihtei lam chu a pan a. Hriathlua hi ramhuaiin a luhchilh a ni hial ang. A fanu hrawk ah rekin "Ka rek hlum mai ang che" a ti anih chu! Ka theihtawpin ka in beng kang a, kawngkhar a rawn in hawng ve chiah bawk. Ka nu rawn tlan lut thuaiin Naute chu a chhuhsak a, Bawihtei a pawt hrang nghal bawk. Ka pa chu thinrim hmaisen in a rawn lut bawk a, Hriathlua chu a thûm zui pawp pawp mai. Tun kan dinhmunah chuan vawthlu tawp mah se pawi tihna pakhatmah ka nei lo. Pawnlamah ka pa in a hnukchhuak zui ta vat a.






"Engnge a hriat a, khati tehchiam a tal le?" ka nu chuan a ti hmawrh hmawrh a, ka ṭawngchhuah rualin ka ṭap nghal dawn tih ka hria. Ngawi rengin a nau pawm lai ka laksak a, hnute ka pe zui ta daih a. Thinrimna, rilru natna leh ka fate ka lainatna keimaha in belhkhawm nasa lutuk chuan awmngaihna reng reng min hriattir lo. Ka mittui a luang zung zung a, ka hmui chu ṭhuibeh ang hmiahin ka chip hmak bawk.






"Rawn haw tawh ngai suh ang che" ka pa in a ti ṭhawt thawmah ka nu chu a tlanchhuak thuai a, ṭhenawmte pawhin kan thawm chu an hre vek in ka ring. Ka bek na ngut ngut chu haider luih tum viau mahila a na lam mah mah a ni. Bawihtei la in hnit faih faih chu ka kuah bet ran a. Ka fate chu an pa bulah meuh pawh an him zo tawh lo tih ka hriatna chuan min va ti na ngawih ngawih tak.






"Bawihte, i nau hi ka paw ṭha lawk anga. Sawtah a putea te bulah kal daih ang aw?" ka ti sap a, Bawihtei pawh a bu ve nghat nghat mai. A nau chu ka pawṭha sawk sawk a, kan thawmhnaw bawm hawng rawk rawkin ka in khungkhawm zui mawlh mawlh a. Ka nu leh ka pa rawn luh leh lai pawh chuan ka chet dan ngai rengin ka che zawm zel. Ka beidawn tawp a thleng ta bawk a, 'enganga piangthar sawmsarih pawh nise ka damchhungin ka let leh tawh lovang' ka ti ru mawlh mawlh bawk.






"Mambawih, i vanduai a ni. Hetiang em em a mihring nikhua lo i zui hi a pawi ka ti. Keini thlengin min ngaihdam kan ngai a ni" ka pa chuan a ti zuai ruih a, ka chhanglet miah lo thung. Ka pa lakah chuan sawi tur engmah ka hre tlat lo a ni. Ka phone chu chuh tharh in Mampuia ka call zui zat a, rei fe a rik hnu ah thophang aw ṭial ruanin min rawn chhang ve hram.






"Min lo hruai rawh, heta kan awm reng chuan nungdamin kan chhuak lovang" tiin ka ṭap zui hawk a. Mampuia hi ka nau mah nise upa zawk anga ka en hial chang a tam, a lakah pawh ka no ru em em fo. Thil awmdan min zawt in a ri zui rawk rawk a, a thuphungin thil awmdan chu ka hrilh zui nual a.






"Kha mihring kha ka rawn sawisa khawp ang, engnge nia a in hriat khanglan chu le" tiin phone a dah daih a, a rawn kal nghal dawn tih pawh ka hria. Ka chetdan apiang chu ka nu leh pa te chuan min enliam a, ka rilru ka thlak dawn lo tih an hriatchian em avangin min dang khawmawi duh lo tih pawh ka hrechiang. Ka insiam fel zawhah khumah ṭhu ran in Bawihtei ka pawm bawk a, Mampuia lo thlen hun chu kan nghak ta ran a.






"Pa Zual, ka hmaizah viau che u nangin hei erawh ka sawi ve ang. Hriathlua hian tun chinah ka u te nufa hi a rawn ti buai tur a ni lova, a fate pawh a rawn hmuh ka rem ti dawn hlek lo ania. 'Ka pa' tia an koh pawh hi ka remti lo hial mai thei, min dem suh u. Ka u in nau a pai apiangin 'ka fa a ni lovang' tiin a ringhlel a, a ring chhe ta sa sa; rawn hnimhnaih tum buai suh se. A tello hian kan enkawl thei tih hi hria sela, buaina a rawn siam a nih vaih chuan kan thleng thui khawp ang. Ka u in lo duat em em na ah erawh in chungah ka lawm em em ania" Mampuia chuan a ti chang fak a, ka pa pawh a bu nghat nghat mai.






"Engkimah min ngaidam rawh u. Nu leh pa nih kan tlin lo te pawh a ni ange. Kan fapa khawsak danah in mi ngaihdamna sang ber kan dil e" ka nu leh pa chuan min pawt ṭai bawk a. An mittui tla chu ka hmuhhmaih reng reng lo. Mahse, ka thei tawh lo. Tunah chuan engkim ka tuar chhuak tawh. Kir leh tawh ngai lo turin chulai In chu kan chhuahsan ta...






Diktea'n min en apianga a bek pawng ṭawlh ṭawlh chu ka hmuhhmaih hauh lo, ka nuṭa te hian min lainatin min hmangaih em em tih ka hria. Tunah chuan eng harsatna pawh tawk ila he In ah hian ka kir leh tawh ngai dawn lo tih chu ka hming ka hriatchian tluk zetin ka hrechiang bawk.






Mampuia ṭhianpa in motor in min lo nghak reng a, kan bungrua kan hlang zui mawlh mawlh. Motora kan luh hma chuan ka nu leh pa te chuan an tute chu an kuah a, an fawp mawlh mawlh bawk a. Ka nu phei chu a ṭap chhuak hial, Rinrina a lo in hnît ve faih faih bawk a. "Bawihte, ṭha deuhin lehkha lo zir la; thu lo awih rawh aw....." tiin a hnungah ka beng thak thak a. Chulai hmun chu ka damchhung a rap nawn leh tawh lo turin kan tlanchhuahsan ta vang vang a.






(to be continue......)


Show post links
Top

[Ngaia]

DEAR PAIN
Chapter - 24




By : Brigida Hugo







In lama kan let leh aṭangin kar khat a liam ve leh der tawh a. In chhungkhur boruak pawh a zia rih viau. Kan haw zanah khan ka nu in ṭawngkam hriat nuam lo zet mai a chhak chhuak leh a, ka rin lawk sa thil anih avangin ka pawm dam thei viau thung. A tuk zingah erawh Mampuia'n "Ka nu, thil tisual thei vek kan ni. Nang pawh tun ang reng a i khawsa anih chuan tlakchhiat hun i la nei dawn ania" a ti ta fawk a, dik a ti ve a ni mahna; a ngawi reng a. Bawihtei hian a pi hi a ngaina phian a, an in kai kawi ve reng bawk.






Mahlimi pawh an In lamah a haw ve leh rih a, palai tir in kan umzui ve nghal bawk. Zanin hi an kal leh hun tur a ni a, Mampuia pawh a phi cheng mai. Ka nu pawh a ṭhiante'n chhuahpuiah rawn sawm nasa viau mah se a hnar fithla ve ṭhak a, khawilai hmun emaw a chhuahvah kha a rem lo bawk em a ni. Mo nei tur dinhmuna a din meuh chuan a mizia pawh a danglam ve deuh chuan ka hria. Diktea pawhin theihtawp in min duat ve a, naupang han chhawnchhaih vel erawh a ngaihna a hre miah lo thung.






"Khu ruai suh, mi te paw'n palai an tir ngai. Nang ang cheng chungin an awm lo" ka nu in a ti hlak hlak a, Mampuia chu a lo nui khêk rûih a, awmze nei zetin min melh zuk zuk bawk a. A awm hle hle thei lova, a khât tawkin Mahlimi a va be leh sur sur ṭhin. Zan dar kaw pelh ah kan palaite an rawn haw ta a, an hmel hlim sângah chuan thu lawmawm an rawn hawn tih hai rual a ni lo.






Ṭhutkhawm na ah kan ṭhu ṭhap a, Pa Thara chuan Mampuia chu a fiam kual leh zet phawt a, Mampuia lah an thu hawn hriat chak reng reng a lo khawsa a ni vei bawk nen; a bak hlur tawh mai. Thingpui lum pahin Mampuia leh Pa Thara han in hnialfiam bap bap chu ka nuihpui sak sak reng a.






Pa Muana chuan an thu rel ang te chu a sawi dap dap a, "Inneihni atan khan thla thar Ni 12 kan rawn ruat fel ta mai" a tihlai chuan thingpui ka pe kual den den a. Mampuia chu ka melh zuk a, min lo melh ngheng a, ka nui phuh ṭhat nghe nghe. Ropui taka tih hluai kan duh lo ve ve bawk a, chhungkhat hnaivai leh ṭhenrual ṭha an kim chuan a tawk kan ti viau mai. Rei vaklo kan rik leh luam hnuah kan palai te chuan min ṭin san ta a, keini nufa pawh mu turin room lam kan pan zui ta thuai a. Mampuia leh ka nu chu eng eng emaw sawi dunin an la ri bal bal reng a. Ka rilru ah ka pa a rawn awm nghal zat a, ka ngai thar veng veng mai. Hun ropui tak kan thleng dawn a ni a, ka pa awm ve lo tur chu a hmunruak a zau viau dawn in ka hria. Amah chuan rawn kal a, a fapa hun tawn ropui tak chu rawn chhim a duh ngei ang. Mahse, a rawn lan ka ring lo.






Bawihtei tui taka a mut tawh hnuah pawh a nau erawh ka la awi ta ngat ngat a, ṭap chuang silo hian a meng kar reng mai a; rei fe ka awih hnuah a mu ve hram zel chauh a ni. A chhing ṭan diar diar tihin ka phone a ri tlang tlang a, phun hlak hlak chungin ka pan hnai ta vat. Min rawn call tu hming ka hmuh rual chiahin ka ner sak a, engtinnge maw min rawn biak a la tum ngam zawk ni? Hmet tawp hmakin ka silent zui ta daih a. 'Eng anga piangthar sawmsarih pawh nise ka let tawh ngai dawn lo' tih chu ka thuthlukna a la ni fan. Bawihpuia a muthilh zui ve tak avangin ka mut ṭha ta vat a, kan nufa hmalam hun tur ngaihtuah rauh rauh chungin ka chhing zui ve ta vang vang a.






Zingkar boruak vawt sûng chuan chet a ti nuam lo viau mai. 'Ber' thla han chuankai meuh hi chuan a ken tel boruak vawt ver hi ka ruh hian a hre hma viau mai leh nghal a, thlasik chhung zawng chu ka buai ru leh ngei dawn tih pawh ka hrechiang viau bawk. Thingpui ka lum zawh vek tawh hnuah pawh tumah an la rawn tho chhuak lova, zawitê a zai rât rât in eirawng ka bawl zawm nghal mawlh mawlh a. Mampuia'n bai thak a ei chak thu a sawi reng avangin uluk takin ka siam zui malh malh a.






"Bawihtei te unau an la tho nange?" ham bai bai chungin ka nu in a rawn tichhuak a. "Aw, an la mutui ve reuh lutuk" ka lo ti nghal vat a. Khua a vawt bawk a, mu reng rih mah se pawi ka ti lem lo.





"Diktea room tur hi buaipui a ngai dawn a ni. 'In hnuai khu ping mai ang u' a ti deuh chhen bawk sia, tunge maw kan khawih tir dawn ni?" a ti zui mawlh mawlh a. Tunah tak hi chuan hmana ka nu diktak kha a ni leh tawh. A phone en zui mawlh mawlh in a bengah a chuktuah nghal zat a, a biak dan aṭang chuan kan veng mistiri hlun Sangliana a bia tih ka hria. Ka pa ka lo ngaihtuah thleng leh daih a, awm se chu midang biak buai kan ngai dawn miah lo. Ka nu leh pa te hi theihtawp chhuaha suihzawm leh ngei ka tum nghet bur. Hun erawh a duh ve deuh ka ring thung.






Chaw ei kan peih meuh chuan a tlai duai tawh, kan che zui nghal sawk sawk a. Sangliana kha hna ah a âwl lai tak a lo ni hlauh a, In hnuai a rawn khawih ṭan thei nghal dawn hlauh a, thaw a veng ru huai mai. Diktea'n a tihpui thei dawn a, ka buai ve vak a ngai dawn lo hlauh bawk. Ka nu dawr kal tur chu Bawihtei'n a ngen tlat avangin an in kaichhuak ve ta kha a nia, an inti buai viau ang tih erawh ka hlau ru deuh. Bawihpuia ka awi mu a, insuk tur awm ang ang ka la khawm nghal zung zung a. Tleipuii rawn len a tum bawk a, a lo thlen hma a lo in tihfel hman duak ka duh a ni.






Ka phone ri reng chu phun hlak hlak chungin ka pan phei a, Hriathlua bawk chu! Vawi tam tak a rawn call a, ka dah sak hmak zel kha ania. Tun ṭum erawh chhân deuh fak ka duh avangin ka la ta thung, hlau ang hrim a lak duh loh reng kha tlawmah ka lak deuh vang a ni pakhat bawk.






"Ka fate ka rawn la dawn, engtinmah i enkawl ṭha lul lo ang" a rawn ti nghal phawr phawr a, za lo fahran in ka lo nui hak.





"Mi nuih khanglang a ni maw? Engnge ka tih theih lo en rawh. Ka fate hi mi tenawm bula an khawsak ka phal hauh lo" a rawn ti leh zawt zawt a, ka sa ve ta phat mai.





"I va han zak thei lo zawt zawt tak. Hmeichhe ân cheh ang mai a i rik bawrh bawrh le. En teh, i fate hian an mamawh miah lo che. I ngam anih phawt chuan rawn lak chu tum chhin la, i duh duh ti rawh. Nangmah kha in en la, i fate hian i bula awm hi an thlang dawn lo nasa a nia. Mahni fate pawh reh hlum tum hial mihring kha tuma'n an ngai huam huam lovang che. Hmeichhe rilru ang pawh pu phak lo khawp a mipa nep i nih kha hre ringawt rawh" tih khum nghek in kan inbiakna chu ka ti tawp ta hmak a. Ka sa pup pui thei hial.






Ka tei kual sek a, ka thaw leh hawk ṭhin. Hriathlua'n a mah in en let duh miah lova a chhia zawng zawng min burbun let daih chu pai dam harsa ka ti ngang ngang hle. Diktea chuan min rawn au lâng lâng a, "Tui vawt in tur min rawn pe lawk teh" a rawn tih leh rual chuan ka kal zui nghal thuai a. Thleng silna bula tui khal bûr a hûn tui chu ka la vat a, ka pe zui ta vat a. Kan In hnuai hi ka pa hnathawhna ṭhin kha a nia, eng eng emaw tihfel tur a tam viau mai. Mampuia te Inneih hma chuan kan in peihfel hman mai turah ka ngai.






Inchhung ka luh leh chuan Tleipuii a lo ṭhu reng tawh a, a phone a lo bih ngar a, "I lo thlen na a rei tawh em? In hnuaiah hna an thawk a, ka zu kal lawk maw le" ka ti nghal bawrh bawrh a, min chhang lo in a phone en chungin a khi vur vur ringawt. "Hmuh ṭha i hmu em maw'n le? Mi â ang mai" ka ti leh hlak a.






A phone chu ka en theih turin a rawn dah zui vat a. Pawhthlak sak zui vatin ka en zui ve vat a, karei... a bialpa nena an inbiakna ho zet chu ka nuihpui hak. A mizia nena in rem zet mai bialpa a nei fuh hlauh mai a, a hlimpuiin a chanchin lo chu sawi tur pawh a hre meuh lo. Ka lo lawmpui ve em em ṭhin. Ka ṭhiannu tal hi chuan kei ang mai mai nilo a nun hlim tak a neih ka duhsak em em a ni.







Hriathlua nena kan chungchang sawi zuiin a ang bawrh bawrh a, "Vawikhat tê mah saw ramhuai pa bulah sawn let leh tawh ngai suh ang che" a ti mawlh mawlh reng a. Ka thil sawi ṭhenkhat chuan a mittui a ti parawl kiang thei hial, thinlung takin min tawrhpui tih ka hria a; ani ang ṭhian ka nei hi ka lawm vawng vawng ṭhin. Kan titi tui laiin Bawihpuia muhil a tawn harh a, "Fa ka neih ve hun atan ka lo in zir lâwk ange"' ti chungin min buaipui sak ta vek a. A zeilo lutuk chu ka lo nuih pui nghek thung. Mampuia te Inneih hun tur te sawi kai zelin a phur surh surh kher mai. Kan kawr hak tur nen lam a rel fel leh vek tawh, engkimah hian a in ti neitu ve em em a; ka nau te pawhin an u en ve hliah hliah bawk. Tlai eirawngbawl hun hma deuhin min haw san ta a, a reh nghal ruih mai. Tleipuii bulah lo chuan rilru tawt bunruahna tur ka nei bawk si lova, a bula awm ka nghahhlelh leh thlakhlelh ang aiin a awm rei hman ṭhin bik si lova. Min kalsan hian ka tawt leh nghal up up ṭhin ni mai hian ka hria.







Kan ṭhenawm nu in panhnah khawih turin min rawn be leh a, buai viau dawn mahila kan nufa mamawh tlem a zawng tal ka lo phuhruk theih beisei in ka in la khawm leh ta poh chu a nia. Ka theih ang ang a in hmakhua in ka che chhunzawm mawlh mawlh a. Bawihtei chauh anih lai kha chuan chet a awlsam viau a, tunah chuan nausen buchip pawm chungin a ṭul ṭul ah ka phêt dawr dawr a ngai tawh. Ka fate bak damchhan neiin ka in hre lova, an tana theihtawp chhuah chu ka tih makmawh a ni tih lah ka hai lo. Kan hmalam hun la ko viau mah se engtikniah emaw chuan ziaawm hun kan nei ve ngei ang tih chu ka beisei lui ve ṭang ṭang a ni ber.







Ka nu leh Bawihtei pawh an lo haw hma viau mai, min ngai tih chu min sîk nghal char char danah ka hrethiam mai. A la tal hrang tam lo bawk a, min hmulo in a la awm nileng thei meuh lo. Diktea te hnathawk pawh an bang zawm ve thuai a, Sangliana chu a hna a chak bawk a; nikhat na ah pawh a hnathawh a lang nghal kuarh mai.







Nitin buai phar dawr dawr chungin hun kan hmang ve zel a, Mampuia nupui neih hun pawh ni hnih chiah in min dang ta. Bawihtei pi leh pu te pawhin min be âwl lova, min rawn tlawh an duh ve viau ṭhin nangin kan boruak avang khan ka chhungte an hmaizah ve em a; an rawn leng lut ngam chiah lo thung. Ka nu pawh kan han awm rei leh deuh takah chuan phunnawina tur a hmu tam leh viau tawh mai. Ka panhnah khawih ka la chhunzawm reng a, ka fate buaipui leh inchhungkhur hna nen ṭhut awl pawh ka nei hman meuh lo. Diktea room tur pawh an peih fel tawh a, Mampuia pawh a vir vut vut reng mai.






"I putea te lo thleng tur kha lo buaipui la, ka chhuah ngei ngei a ngai. Thil tih fel tur a tam bawk si, ka tlin lo lek lek ṭhin a ni" in siam pahin ka nu chuan a ti hlak hlak a, a che reng reng hi phun pah lo chuan a che thei lo emaw tih mai tur a ni. Nau paw chungin panhnah ka roll a, Bawihtei'n min lo khawihpui ve sek bawk.






"I thil tih lai te kha duhtawk rih rawh, chhungkaw buai lai laia mahni thil tih ringawt lo buaipui mai. Kan in daih loh em hi maw le" min melh râm râm pahin ka nu chuan a rawn ti leh hlak hlak a. Ka thil khawih avanga ka tibuai viau pawh ni hlei lo, ka ngei ve lek lek ṭhin. Hmanhmawh zetin a chhuak zui ta dawr dawr a.





"Anu, apa bulah khan kan awm tawh dawn lo tiraw?" Bawihtei chuan min en khiau chungin a ti a, ka lo bu nghat a.




"I awm leh chak em?" tih pahin chiang zetin ka melh ngar a.




"Aih, ka duh tawh lo, ka hlau" tia min chhâng chu min chhân dan tura ka rin sa mah nise a mitmeng hlauthawng zet ka hmu tel chuan min vit na veng veng mai. Fa te meuhin an hlauh khawpa khawsa thei chu "Pa" tia koh tlak a ni pawhin ka hre lo hial.







Ka thil tihlai ka zawh fel meuh chuan a lo tlai leh duai tawh. In dah fel zui thuaiin lak mai theih turin ka dahfel thlap a, ka chhunzawm thei rihlo tur chu ka ui ru viau mai. Nau pawm chunga ka thawh ve theih tawk a ni si a, hlawk viau lo mah se mamawh zual a lo phuhru ve kha ka tan chuan a hlu ve em a ni.






Dar thum pelh hret ah ka putea te an rawn thleng a, an chhungkua in an ni bawk a kan ri nghal nak nak mai. Naupangin motor an ruih deuh avangin an mu zawi ngiai hlawm a, Bawihtei'n a khât tawkin a bih leh dâk dâk zel. Ka pitei'n chawhmeh rêp eng eng emaw a rawn keng nual a, ani hi chu a bengvar bawk a; a lo kal tel ve hi a lawmawm bik ṭhin. Bawihpuia chu min lakchhawk nghal vat a, a awm chhung chuan ka zangkhai viau dawn tih ka hria. Ka putea inbual hlan in Hriathlua nena kan chanchin min zawt sar sar a, a tlangpui ka hrilh thuak thuak a.






"Chutiang mihring te an lo awm thei ngai a ni maw? A nun zawng zawng chu dawt hlir zu ni chuan..... In lam let tawh miah suh, ani aia ṭha pawh i la hmu dawn lutuk" a ti bawrh bawrh a. Tuna ka dinhmun nen chuan midang ngaihven chu a theih loh tluk a nih rualin ka tum miah lo bawk. Ka fate bak ngaihtuah tumna ka nei lova, kan nufa a rahbi rem zawk kan rah theih nan ka nun zawng zawng ka hlan a ṭul tih chu keimah leh keimah ka inhrilh thar mawlh mawlh a.







Ka putea hi nupui nei har tih takah an fate pawh an la nau viau mai a, Bawihtei te nena in kawm rual lek an la ni. Kum chhirin nau an nei a, hmeichhia ve ve an ni hlauh a, an harh zawk zawk lo hlauh. Bawihtei pawhin a nel zui thuai a, an motor rui chau zual a zia tawh bawk a; an ri lê lu tawh mai. Rawng ka bawl chhungin ka pitei'n naute a lo chang chawt a, a hahdamthlak ngei mai.






Ka nu chhuak pawh a rawn haw zui ve ta bawk a, a buai zia thu a sawi uar hle; a tihdan ngai te bawkin thil a rawn khai haw leh luk luk a, leitur neuh neuh hi a hrethei phian a. Ka putea ho in mipa lamin Uisa an lo siam ve bawk a, kan eirawngbawl boruak pawh a nuam tham laih laih viau mai.






Naupangin chaw an eikham zawh ah puitling lamin kan ei ve leh nghal a, Bawihpuia pawh ṭhutthlengah muttir in a u te ho in an lo veng ve thei a; hahdam takin chaw pawh ka kîl ve thei e. Ka putea'n Mampuia chu a zilh malh malh reng a, chhungkaw pangngai tak din a puitling taka awm turin chah mawlh mawlh bawk. An ṭawng kâr laka ka nu in min rawn hmer tel zauh kher erawh ka chaw ei ti tui lo tham a ni.






"Zothani pawh nu leh pa zilhna ngai pawimawh nise chu tun ang mai mai hian a awm lo tur ania, tunah chuan 'nuthlawi' tiin an sawi zui reng tawh anga; ṭhenkhat tan phei chuan a nihna aṭang ringawt pawhin a zuamawm nghal sarh tawh ang chu. Fa pahnih chhawm bawk chung chuan khawilai pasal ṭha tak mah a hmuh a rinawm tawh der si lova" ati hlang hlang a, ka nihna mah nise ka nu ka aṭanga chhuak a nih meuh chuan ka la na viau mai.





"Engkim a nih tur ang a ni vek tawh a, naupang han lian deuh sela Matei pawh rilru puitling takin a awm anga; dinhmun te chu a inthlak thei alawm, a la zia chho ve leh mai ang" Pitei chuan a lo thung a, ka nu ner nawk chu ka hmu reng. Ka chaw ei pawh a tui nek lo, ka kham zui ta daih a. A tuk mai man hlan hun a ni tawh a, boruak ṭha lo neih ka hlauh avangin ka ngawi hram hram a ni. Ka dinhmun ah hian ka nu hi ding ve nise, tuna a ṭawngkam ang kha chu a natpui ve viau tho in ka ring. Chaw eikham a an in kawm khawm na ah pawh tel ve peih lovin kan mu zui ta daih a.






Man hlanna hunserh kan hmang mek a, tu te pawh chu kan hlim tlang hle tih a hriat. Mahlimi man ei tu an ṭhahnem viau mai a, vengchhungah pawh mi hlun kha an ni ve a; an phuisui viau mai. Ka pitei leh Tleipuii te ho nen tlar hnung lamah kan ṭhu ṭhap a, Mampuia lâi deuh chu kan lam hawiin a rawn khi leh suk ṭhin a, ka pitei'n rum zetin a lo melh leh kha kha ṭhin. Kan hma chiahah Diktea leh ka putea an ṭhu ve bawk a, Tleipuii chuan Diktea beng bulah "I hmabak ve tho anih saw, engkim saw lo chhinchhiah uluk hle rawh" a ti sur sur a, Diktea chu a rawn lehhawi zuk a, a rûm nghut a. Ngaihzawng a neih pawh hi ka la hre lo, hmeichhia hi a hlau ni berin ka hre tawh.






Tleipuii chu riak ve nghal turin ka sawm a, a lo in peih nghal at mai. Ka pitei hovin eirawng kan bawl a, naupang in kâwmkhawm thawm nen kan ri chel chul mai. Ka pa ka be zuai a, "I rawn kal ve theih ka rin tehreng nen" titau aw ki lam mahin ka ti hlak a.





"Nia, min dem pawl pawh an awm ngei ka ring. Mahni fapa te nupui neihna em pawha rawn lang thei lo nih chu a hrehawm viau mai. Mahse, rawn kal loh ka thlang ta zawk anih hi" a aw ki chu ka hai lo, a inthlahrung ngawih ngawih tih pawh ka hrethiam mai.





"Awm vela ka ti em em a ni mai, ka kim lo" ka tihlai chuan ka hnuk a ulh ru ṭêuh bawk.





"Engpawh nise Mami....mamawh leh ṭul in neih chuan min rawn hrilh hre ve hrim hrim zel dawn nia" a rawn tih hnu chuan a buai deuh thu a rawn sawi zui zat a. Ka thusawi in a rilru a dek ru hle ang tih ka hria. Mahse, min hmangaih zia ka hriat hian atan thil tam tak tih sak ve ka chak ṭhin.






Kan chaw ei boruak pawh anuam laih laih viau mai. Zing lamah thawh hma kan ngaih dawn avangin mahni mutna hmun ṭheuh kan pan zui thuai hlawm a, Tleipuii chu kan khum bul chhuatah mutna zau takin ka phah sak duai a. Kan bula mu ve tura ka tih lahin, "Naupang ka delh khaw lo palh ang" a ti teh tlat bawk sia. Naupang an mut fel veleh a bulah ka in sawn ve ta daih a. A bialpa nen an chanchin te min hrilh ve melh melh a, a sawi danah chuan a fel hmel viau mai a. Pasal ṭha tak nei se ka ti ber mai.






Tleipuii muthilh hnu pawhin ka hun hman tawh leh tun hun, kan nufa hmalam hun thlengin ka ngaihtuah zui neuh neuh reng a. Kan nufa min ngaihtuah ber ṭhintu Mampuia berin nupui a neih phei chuan kan nufa hmalam chu a thim viau in ka hria..






Zing thawhhlim aṭangin kan phi ruai hlawm a, ka nu chu a buai ber ah a ṭang leh a. Mampuia pawh kan veng beautician U Lalnuni'n a hmai vel a khawih sak a, a nui kur kur reng chu a ngaihna hrelo zetin kan en leh hâw ṭhin. "Mipa zawk pawh chei kan ngai ta a nia, i ti ta sa sa paw pheu tur khan min hnawih law law rawh" a ti zuah zuah a; kan nui leh ham ham ṭhin. A tet te aṭanga a kawm chhoh ngar ngar Hruaitluanga'n a dinpui dawn a, coat suit an ha dun rual mai chu an mawi dun viau mai.







Dar 11 Inneih ṭan hun a ni a, kan chhangchhe deuh bawk nen Tleipuii'n U Rinpuia a bia a, min rawn hruai ta hlauh a. Biakin khat tlatin lawmpuitu kan nei a, inkhawm ho zawng zawng chu kan mawi tlang hlawm ngei mai. Mampuia'n ring zetin Inneih thuchham a sawi a, "A ngheh hmel bik" Tleipuii'n a lo ti leh hmanhmawh a. Kan chhungte hmun hran hran aṭanga lo kal khawm te nen hmun khatah kan ṭhu ho ṭhap a, rilru in ka pa a hre rauh rauh reng mai.






Ka hawi kual vel a, kan piah kil khata Malsawma lo ṭhu ve kur chu ka va hmu fuh kher a, Mahlimi te lamin an sawm a ni mai thei. Min en reng chungin a khi suk a, ka hawisawn nghal thuai a. A hmaa min ṭawngkhum dan kha ka la hrereng a, min lo ngaihnep ruk zia ka hriat takah khan vawikhat pawh ka ngaihtuah leh tawh ngai lo. Ani chauh pawh nilo mi tam tak hian Malsawma min endan khan min en dawn tih ka hria, theihtawp a nun uluk ka tum tlat bawk.







Inneih hunserh a zova, Bawihtei pawh flower girl ah aṭang a; nuam a ti viau mai. Thla la turin kan ding ṭhap a, ka pheikhawk bun chuan ka ke a ti na tawh kher leh nghal a, Bawihpuia a muhil daih a; thlalakna ah pawh a lang ve ta lo. Mahlimi te lam aṭang pawhin thla la an awm nual bawk nen kan lakpui zawh veleh Tleipuii leh pitei te nen In lam kan pan ta daih a, ka nu leh a ṭhiante ho erawh an la in hawrkhawm lêt lêt hlawm a. Tlai lamah min lawmpuitu te nena chawhlui kîl ho tur kan buatsaih ve bawk a, ṭhenawm khawveng hnai a kan ngamtlak deuh te fatu turin kan sawm a; anni pawhin an hna an tlin par par hlawm khawp mai. An hah hlawm ngawt in ka ring, an Kuhva ei tur te chu ka lam sak sawk sawk a. An lo lawm thiam ve em em bawk.







Kan inthlak fel a, in leng ho lo chhawn turin ṭhutkhawmna lamah kan ṭhu a; an rawn lut khawm zui ṭak ṭak a, ka pitei'n a lo chhawn zung zung hlawm. "I nu pawh hi vawiin angah te chuan In lam ngaihven ve tur ania, chuti chen chen a khawmuan tur a ni hlei nem... Mi ngaihah pawh a zahthlak alawm, a khawsa zia dang ta hlawk hi engnge maw awmzia ni?" Pitei chuan a ti hlak hlak a, an ṭhian ho khan an la rawn haw ve miah lo tak a. A chang chuan ka nu hian ngaihzawng a nei ni mai hian ka hre ṭhin, a in chei hliau hliau reng mai te hi ka hmu hne leh thut zel. A kum leh a inchei duhdan pawh a in mil tawh lo, ka lo zah rûk chem chem chang a tam ṭhin.







Mo hruai a lo hun chuan an kal ta duak a, Bawihpuia mu tho a suakbak tlat pek a; room lamah kan in buaipui ta chawt a. Hmel hrang hrang a hmu kha a tlei loh phah ni ten ka hria, Mampuia'n 'a damloh phah ang, tih tur ṭul dang a awm chuang lo; lo awmpui mai mai rawh' min ti bawk a, inthlahrung lo takin khum ah hnute pe in ka mutpui ta hle hle a.






Ka lo chhing sek aniang, min sawi nawk nawk tu an awm takah chuan ka ṭhuchhuak hlawl a; Tleipuii'n min lo melh tûr khai a, " Engnge maw i lo muthilh ngawt le? I ti awm ang lo lutuk. Tho la in ti fel rawh. Mo hruai an lo thleng a nia" a lo ti bak hlar a. Rang takin ka thochhuak zui vat a. Bawihpuia pawh mu tho suakbak e tilo chuan a muhil leh daih a, mut a lo kham miah lo anih hmel.






Mahlimi chuan bungrua pawh a rawn keng ṭha hlawm khawp mai, tih mai mai pawh ti ila tunlai angah chuan a kalpah mai theih tawh bik loh chu a ni. Chhungkaw lam aṭanga thusawina te kan neih ve ve hnu ah chaw ei turin kan inbuatsai zui a, ka nu pawhin thu ṭha fe fe a sawi ve leh tak duah kha. Kan ei siamtu ten an uluk bawk a, chaw pawh kan ei ṭeuh hlawm mai. Bawihtei'n pitei a bel tlat a, ka buai loh phah viau mai.






Kan ṭhenawm pa, Pa Thara'n Mahlimi chu a fiam zuk zuk reng a, 'I chet chhiat hun ka chang dawn' tih fiamthu pahin a kalna lam apiangah a en zui ngur reng a, kan nuihpui leh bawk bawk ṭhin. A tam zawk an ṭin tawh ang tihin an present dawn te kan hawng a, an dawng ṭha hlawm khawp leh nghal a. Mahlimi chuan ka nu nena kan puan tur a hran in a lo keng tel reng a, a man pawh a tlawm lo viau in ka ring. Hruaitluanga leh Mahlimi ṭhiannu in an mutna tur an siam fel sak diam a, zan a rei ve deuh tawh avangin min ṭin san zui ta hlawm a.







Mipui huhâng hi ka zo meuh ṭhin lo, ka chau nghulh mai. Bawihtei pawh a tal hah ve ngang aniang, tui takin a muhil sêk sêk a; a nau zawk erawh ka la awi mek thung. Tunah chuan mo nei kan ni ve ta a. Mahlimi chu sual em em turah ka dah lem lo. Mahse, ka fate nen kan nih ve diah tawh avangin inthlahrun erawh a na duh viau in ka ring thung.






Duhthusam leh beisei tam tak ka neih ve te hi puitlin ve tur chuan hun a kal ve fe a la ngai dawn a, a kar lakah eng boruak nge kan la tawn dawn tih hriat a ni lo bawk. Thil tam tak ka ngaihtuah chang chuan Hriathlua ka huatna hi a zual zel a ni ber, kan hawsan dawn zana kan boruak tawn ka ngaihtuah chhuah chang phei chuan ka lo in seh ruh leh ngar ngar zel. Bawihpuia a muthilh tak avangin kan mu ṭha zui ta thuai a.






"Tho rawh u, Zothan..... A mak chen chen thei mange aw..." ka nu in a tih lawng lawng thawm ah ka harh a. Ni a lo tlangsang viau tawh leh nghal a. Kan nufa chuan thawh kan hai chiang viau mai. Bawihtei te unau an la muttui em avangin ka thochhuak zui vat a, mo kan neih tuk mai a thawh ka hai kher chu ka in hau ru mawlh mawlh bawk.






"Kha..... Mahlimi kha lo pui thuai rawh. Chetna tur a la tam si, thawh hma ve tur che a nia" ka nu in a lo ti bawrh bawrh a, min in ti thlahrung zual. Mahlimi nen chuan bai tur an lo chan mek a, bai bel tur ka chhuang zui ve ta nghal vat a. Nimin tlai lama kan chawhmeh bang a la tam bawk a, Hruaitluanga leh Mahlimi ṭhiannu te chaw ei ah kan sawm ve leh bawk a. Bai ka vil mek laiin Bawihpuia a rawn ṭap ngak ngak a, Pitei chu kan pindan lamah a tlan lut zui vat a; a awm hian nuam ka va ti tak.






Chaw ei kan peih fel a, kan ei zui ta thuai a. Ṭhenawm khawveng hnaia kum upa lam rawn leng lut an awm ve deuh reng bawk. Thingpui kan lum reng a, Mahlimi chu a mawng a zâng vat vat hle mai. Ka putea te nupa pawh a ko ve nghal mawlh mawlh a, anni pawh an lawm ve viau in ka hria. Hmeichhe ṭhenkhat hi chu kan sual riau a, mahni pasal nu leh pa te ngei pawh ko duhlo hi ka hriat ve chinah pawh an awm nual mai; nuam pawh hi an ti em maw ni?







Kan chhungkua a boruak tharlam rawn thleng chuan tu te pawh min ti hlim a, ka nu âng reng pawh a zia deuhin ka hria. Keipawh ka panhnah khawih ka chhunzawm leh a, kan vai mai chuan mahni tih tur ṭheuh tiin kan phe kual leh sang sang tawh. Ka rilru ah erawh kan nufa hmalam hun atana inbuatsaih lawk dan tur ruahmanna ka siam ve reng a, midang tana hnawksak a awm loh hram chu ka tum ngar ngar a ni ber. Boruak ngai reng kan hip lo ang bawk in kan inchhungkhur boruak pawh chu danglam thut thei a ni tih ka hria. Engpawh tawk in hmachhawn dawn ila ka fate tan innghahna tlak nih chu ka tum ber a ni.







(to be continue.......)


Show post links
Top