DEAR PAIN BY Brigida Hugo (Completed)

[Ngaia]

DEAR PAIN
Chapter-13




By: Brigida Hugo






In rel ah ding in van lam ka thlir vang vang a, Arsi de neuh neuh te chu ka rilru in ka be mawlh mawlh bawk. Ka rilru hrehawmna te chu min hriatpui in min hmuhpui vek ni mai in ka hria. Kawngpui lam chu ka bih deuh reng a, Tleipuii nen kan in be leh tawh lo nângin a rawn kal ngei erawh ka ring. Ani lo chu ka manganna hrilhhriat tur lah ka nei hek lo.






"Anu, engatinge pawnah i awm reng a?" min rawn pan pahin Rinrina chuan a rawn ti lâng lâng a, ka hawi let vat a.





"A lum lutuk a, lokal ve rawh" tih pahin ka bân ka lo phar chhuak vat a. Min ngaina ve dawn chauh a, ka awm loh san leh daih tur chu hrehawm ka ti viau bawk. Rinrina chu naupang mai a la ni. Mahse, chu Inchhung ah chuan enkawlna ṭha tak a dawng lo tih pawh ka hmu in ka hrechiang takzet. A lakah chuan mawhphurhna sâng tak ka nei in ka hria. Mahse, tuna ka rilru ah erawh Rinrina ka lainatna aiin bum ka nihna chuan min hneh zawk miau si.




"Apa in 'i nu ko rawh' a tia, room ah a mu a" tih niah niah pahin min chhoh melh kar a. Kan dinna bul lawk a rawra darh niaih chu chhar khawmin Inchhung lamah a tlan lut zui leh ta daih a. Thaw hak chungin ka lut zui ve nghal thuai a.





Ka nu in thingpui a lo thli mek a, ka pa in TV ṭhutchilh in vai lâm avlo thlir dauh dauh a. Tlai dang chu nise ka fiam leh zauh ngei ang, a in hmehlo ti viau mahila keimahah hian nuih châkna a awm lo. Rinrina chuan a lung chharkhawm chu a motor lem hnungah a lo rem tlar mek a. A bulah chuan ṭhutchilh in ka rem pui ve nghal zung zung a. Inchung lama Hriathlua phone hmang thawm chuan ka beng a verh zar mai, ding hluaiin ka tlanchho zui nghal thuai a.





"A rawn sawi uar ve deuh bawk aniang, eng boruak ṭha lo mah kan nei lo. Lo kal buai duh suh u" a tih mek lai chuan a phone ken lai chu ka phih thlak sak lawp a. Tleipuii hming lo lang kalh ka hmuh chuan rum zetin Hriathlua chu ka melh hrâwk a.





"Lo kal rawh, ka haw dawn. Bum kual mai mai reng tur khawp a nêp ka ni bik lo e" ka ti nghal hmawk hmawk a. Engtinmah min chhâng lo in a ngawi reng a. A thaw ri halh erawh ka hre pha...




"Aaaaa.... ṭhiannu, ṭha deuh khan sawidun ula. I chhungte bulah i haw ngam rih dawn chuang lova. Kan bula i awm kan phal lo tihna ni lovin mi in i chanchin hria se, i thang mawi lo lutuk ange" Tleipuii chuan a rawn ti dam dap a. Ka sa nghal phat thung, Hriathlua leh Tleipuii chu an ṭangdun ni mai in ka hria.






"I ṭhiannu rilru natna aia min bum tu te i ṭanpui duh zawk a thu le" tih pahin phone chu ka hmet hlum nghal hmiah a. Ka thinrim lutuk chu ka ṭah te a chhuak rum rum em em bawk.





Ka ṭawng zâwi lem lo bawk a, ka nu in kan thawm hria in a rawn tlanchho zui ve vat a. Chhuatlai a in hmatawn a kan ding rân chu a ngaihna hriat loh hmel fe in min entawn zak zak a, "Engnge ni teh hluai? Buaina in nei em ni?" a rawn ti hâ a.






"Buaina tih tham a ni lo. Thil hriatsual palh vang mai mai" Hriathlua chuan min melh ngur pahin a lo ti hmuk a, Khum ah chuan a bawk zui nghal daih a.





"Thil hriatsual anih loh kha, hre lo law law ila a ṭha zawk tur a nia. Min bum leh dawn hunah chuan in fimkhur tawh dawn nia" ka ti let ve leh deuh kher a. A thîkthu chhiat tehreng nen, ka lungawi lohna a palzam bik lutuk chu ka haw hlur mai.






"Eng in bumna maw?" ka nu chuan min melh ngar a. A kuhva ei na a kamsir a kai sen luai leh a hmel a mak tihna lang chuan ka nuih a ti za lek lek zawk. Kuhva hi a heh si, a ei berh thei ropui bawk si. Ka nu hmel mitthla hi chuan a kuhva ei sei luai hi mitthla ah a lang nghal zat zel.






Hriathlua te min bum dan chungchang vel chu ka sawi zui hmiah a, in sawi thawl ka mamawh piahlam ah ka nu chuan a fate chetdan chu hre ngei sela ka duh. Uluk takin a lo ngaithla a, a khat tawkin Hriathlua a melh leh zeuh ṭhin a.





"Kan in hriat hma thil kha chu ka tel ve miau loh avangin ka enliam thei vek. Mahse, ka awm ve reng laia hetiang mai mai a min ti hi chu enliam a har ka ti. Nangni in a ho ti viau mah ula, thil ho tê ang a lang aṭang hian thil pawi zawk a thlen theih avanga ngawi bo thei lo ka ni" ka thusawi khâr nan ka ti zui leh hmak a. An duh duh dana nêk chi ka nilo tih chu hre ve sela ka duh. An tih ang hian a chungah ti ve ila, a ngawih bo pui dawn bik lo tih ka hrechiang em em bawk.





"Kan Lalhruaii pawh chu a va ti mak ve? Keima'n ka lo zilh ange. Lalhriathlu, nang pawh hi i khawsak dan fimkhur rawh. Chutianga lo la kal ngam tur chuan i siam a ni lo maw? I be ṭhin em ni?" a tih zawm zat a. Htiathlua chu thaw huk in a rawn ṭhuchhuak nghal vut a.





"A va mak e aw...., a rawn kal tih pawh ka hre lo. Thildang chhuanlam in anih kha min rawn koh chhuah. Biak pawh kan in be ngai lo" a ti rum ûl a, biak chhunzawm leh huphurhawm khawpin a hmel a tur ngun bawk.





"I tun hma nunah khati khawp khan i tal hiar tawh a, tunah chuan a theih tawh loh tih hria la. Hei, i fapa pawhin nikhua a hre chho ve tial tial a, a entawn turin nun hmang ang che. Zothani bak hi chu kan Inchhungah i nupui hming pu a rawn lut an awm tawh tur a ni lo" a ti khauh fang mai. Keimah zawk chu ka awmdan a laklawh deuh hû thei in ka hria. A thilsawi te chu lo pawmpui hle mah ila, lo tih lan tehchiam chi ni hek lo. In hnuai lamah ka chhuksan ta daih a, reife chu an pahnih in pindanah chuan ah an awmdun; an in zilh ve viau in ka ring.






Ka thil tum ber a theih leh tak si lovah chuan zing lam atan eirawng ka bawl lâwk ta ringawt a. Thawh hlim hlawt aṭanga buai nghal chûk chûk ai chuan a hahdamthlak in ka hria. Rinrina zan men thei lutuk hi kan buai fo mai, tunah pawh ṭhenawm nau te ho chu an thâwm a reh leh dak tawh; ani chu a toys zawng zawng chhuatah bun chhuak in a la thehdarh chuai chuai a, a tute mah hian kan hau phal lem lo. A dinhmun tê hi a lainatawm reuh em a, a awmdan ang ang hian kan enliam mai mai a ni ber. School a lut ve ṭan tawh a, lehkha zir em em tur an la nei lem lo bawk a, kan dah zalen rih viau mai.





"Mami, engtin nge i chhungte lam hi kan tih ang aw? Naktuk zan lamah hian kan va leng dawn em mawn le?" ka pa chuan a rawn ti deuh nghut a, ka nu a rawn chhuk thla ve mek bawk.





"A.... ka hre nang. Engtia tih nge ṭha ang?" tiin ka zawt let zat a.





"Kan reh rei ta viau mai a, kan awmdan lo chiang lo nuaih bawk nen. Mumal taka thupha chawi te pawh a ngai a ni. Keimah hi va kal tel bawk ila, i pa Dinpuia hi tel ve thei bawk sela. Min lo chhân dan chu engpawh nise, kal ngei chu kan ngai ang" a ti leh dap dap a. Kei pawhin ṭha ka ti. Ka chhungte rilru hriat ve te pawh a ṭha hrim hrim a. Chubakah, kan awmdan teh ngawt chu a zahawm lo ka ti ru viau tawh.






Ngaihdan kan sawi khawm laih laih a, kal ngei chu ṭha kan ti tlang. Ka chhungte va hmachhawn tu nih erawh a nuam lem lo khawp ang. Hriathlua erawh pindan lamah a la tawm ngar ngar a, kan thusawi te erawh a hriat vek ka ring.






Dar sawm a pel duai tawh a, mut a chhuak ṭan. Rinrina pawh Api in a pawm bet lui a, a tirah duh lo viau mah se a meng thei tawh ngang lo, phun niah niah chungin a muhil zui ve mai a. A tal hnawkna vel tifel zung zungin hmun ka phiat leh a, room lam ka pan zui ve ta thuai a. Hna hahthlak thawk ve lem lo mahila, ka rawl ve ṭhum zel tho mai. Amuani leh Siamtei rawn tel ve ṭhin lo phei se chuan chêtna tur a tam ve ṭhin si a, ka chau thei viau in ka ring.






Hriathlua chu a vâng zawgin khumah a lo bawk phek thlur a, a muhil niin ka hria. Pan hnaiin ka bih dek dek a, tui em em in a lo muhil der tawh. A darah ka sawi dat dat a, a rawn rum ṭuah ṭuah a. "Mutna tur pawh ka nei ve hlei nem, mu ṭha rawh" ka ti sar sar a. Ka inthlak zui a, mutna ah hian kawr nghawng zim deuh ka ha thiam tlat lo; ka nghawng zar tu a awm chuan muthilh har ka ti ṭhin. A in siam rem sut sut a, puan sinin bang lam hawiin a mu zui nghal thuk a. Ka sam chu chhip a bawk khawm leh te te in ka mu zui ve thuai a, lehlam hawiin ka mu ve hmak. In sik hlau taka mu te pawh kan ang, pawi pawh ka ti lem lo. Puan sin ṭha sauh sauhin ka chhing zui ta vang vang a.






Mangang takin ka hawi ruai ruai a, ka hnung lama min rawn um tu te chuan min rawn nangching ṭep tawh. Thing lianpui, ka ke delh bet tlat tu chu nemsawn tumin ka bei a; chet pawh a che eih lo. Ka ke chu a na ngut ngut bawk. Ka awmna lam a pa lianpui rawn tlan phei chu hmu in ka au nghek a, ka harh hlawl mai; ka mumang teh hrep chu.






Hriathlua chuan nghet zetin min lo kuah a, ka ke a lo khan bet tlat bawk; a hit mu kham ut ut mai. 'Hei vang lek hi anih hi a" ti sap in a ke chu ka tlawh sawn sak a. A mutui bawk a; ka tlawh sawn ang angin a thaw zui sûk sûk a.





Khua a var uar tawh a, a la hma viau thung. Mut leh dawnin a laklawh tawh bawk si, peih lo ru zetin ka tho chhuak ṭaih ṭaih a. Thawmhnaw pangngai pawh inbel peih rihlo in puanhlap ka bih a, ka kawrbah hak lai pawh thlak chuang lo in Inhnuai lam ka pan thla chhat chhat a. Tukverh te hawngin zing boruak thianghlim tak chu ka hîp vang vang a, ka hrisel dawn riau a hriatna te ka nei.






In phih fai zuiin muangchang in thingpui tur ka chhuang kai a, kawngka kalhna hawngin pawnah ka chhuak zui zat a. Sava thlawk neuh neuh te chu thlirin ka hawi kual vat vat a, thlawh ve theih te pawh ka chak rum rum nia. Kawmchhak lam aṭang chuan, "I va tho hma ve?" rawn ti lauh tu chu ka en vat a, U Puitea lo ni reng chuan....Airgun a ak rân bawk a.





"Ka tho ve chiah, nangpawh chu i va tho hma ve?" ka ti let ve thuai a. A Airgun chu beng thak thak in "Sava ka veh a, in pa a la tho lo em ni?" a rawn ti let ve leh thuai a. Mi reh ṭhep ṭhawp laia kan in au deuh lung lung chu zia lo ka ti ru deuh; 'an thawh hma ve ṭum a hriat' min lo tih palh te pawh ka hlau a, ka ngaihtuahna ṭûl lo zet chu ka nuihpui hak a.






"A thawh a la hun lo lutuk, thingpui rawn in la?" ka ti let ve leh lâng lâng a, ṭhenawm te In lam ka hawi pah deuh zak zak a.




"Mu chi te'n sa an ei an tih kha maw....ka haw tlang ange. Chhun lamah ka rawn kal zâwk dawn nia" tih pahin a kal zui nghal a, ka lu ka bu nghat ringawt. Ka thingpui chhuan chu hrechhuak in rang zetin ka tlan lut thuai a. Ka pa chu Gas bulah dingin a lo off diam tawh.





"Ka theihnghilh pek alawm mawle, ka lo siam nghal ang che aw?" ka va ti nghal zung zung a. Zing thawh hma hi ka ngeih vak dawn lo riau in ka hria, ka haihawt phah tlat.





"A sen hâng khan aw, Puia em ni rawn au lung lung kha?" a lo ti nghal zat a. "Aw" tih pahin ka lu ka lo bu nghat a.




"Sava a veh leh pek a ni maw? A kapthla thei mang si lova, a peih ve phian mai bawk sia" a nui kur kur a. Thingpui pek pahin "Nangpawh i kap thla thei bik em ni?" ka lo ti vat a, ka nui hak hak a.





"E khai, hna hi han âwl deuh ila, sava sa hlir kan hmeh ang" a lo ti fiamthu ve vat a. Ka pa thusawi chu ring lo zetin ka nui khek iarh a; kan pahnih chauh pawh chuan kan bengchheng viau mai. Thingpui in paha hna hmabak en thlithlai tumin pawn lam a pan a, chaw chhum tur ka siam zui ve vat. Hna kan ngah si a, chaw ei hma kan duh ṭhin bawk a; a la hma viau na a ka che zui sat sat a.






Kawtkai a Balu darh niaih te chu ka phiat khawm a, Rinrina hi Balu a chên a ching a, a darh leh nuaih ṭhin. Vawiin lam erawh School a kal dawn a, a felfai rei ve deuh turah ka ngai.






Inchhung ka luh leh lai chuan ka nu in Phone ah mi a lo be mawlh mawlh a. An ṭawngkam hman danah ka pi chungchang an sawi tih ka hria. In pui a kan luh chhoh tukah khan thingtlang lam a zin thawveng ve turin ka Nî in an khaw lamah a hruai chho a. Keini lam lah In sak buai in kan buai a, ani tan chuan hmun reh lama awm chu a nuam zawk ang. A kum a tam ve tawh viau nangin a hriselna a ṭha hlauh a, zin veivah lamah pawh harsatna a nei lem lo.






Ni Sangkungi hi Hriathlua te Ni neihchhun a ni a, a landan maiah chuan Nu fel tak niin ka hria. Thingtlang lamah pasal neiin fa pathum an nei a, an fate erawh ka la hmu ve lo thung. Thlai hmun zau tawk tak neiin a khât tawkin Aizawl lamah a rawn phur thla ṭhin a, an tluang in an taima bawk a, an hlawkpui ve viau pawh chu an lawmpui awm takzet.






Ka chaw chhum phit sar sar chu ka ngaihven zui vat a, gas ka herhhniam zui zat. Rinrina rawn tho chhuak ve chhat chhat chu thingpui ka lo siam vat a, a hmeh tur nen dawhkanah chhawp sakin Chair ah ka ṭhut tir a; a bul maiah ṭhu ve in a thil ei vel chu ka en reng a. Zing thawhhlim ah chhang ei lo in a awm thei lo a, chaw ei a thlahdah phah ziah thung. Chu chu ṭha ka ti lo viau na a, ka sawisel hreh viau thung.





"A va buaithlak e aw..... I Nî pawh chu lo tlang ve lawk mai tur a nia, tih tur kan ngah vei nen" thingpui thlit karh karh pahin ka nu chuan a ti hlak hlak a, thingpui hi a ngaina ve thlawt a ni.




"Engnge ni a ka nu?" ka lo ti thuai a.




"I pi rawn hruaithlak a tum a ni awm e, a khua a har deuh tawh aniang. 'Ka rawn thlah hman lo ang, Counter-ah min lo nghak rawh u' a rawn tia. 'Thil tih tur hmanhmawhthlak ka nei' a tih leh tawh kha. Hmanhmawh reng reng hian a rawn kal a. Bawihte School kal hruai a ngai dawn nen a buaithlak nuaih mai" a ti zui leh barh barh a.





"Rinrina chu ka lo buaipui mai ang. Amuani te hi rawn kal an tum em le? Hnathawk eitur lo siam thei sela a ṭha tur" ka lo ti ve leh vat a.





"Ka hre lo, ka'n bia ange" tih pahin a Phone chu a thai malh malh a, ngaithla vang vangin a be zui nghal mawlh mawlh a. Phone dah pahin "An rawn hman dawn anih chu, duh leh inhlawh angin kal ve mai sela. Min pui ngun tawh em mai, a nuam lo" a ti leh zung zung a. Keipawhin ka nu thusawi chu a dik ka ti. Tunlai ah mi kan buai tawh a, chhungte pawh nise a thlawn a in chhawr reng chi a ni bik lo.






Hriathlua pawh a rawn thochhuak ve a, ngawi rengin thingpui ka lo siam vat a. "Ka pi a rawn haw dawn em ni? Ka nu nen khan in sawi deuh hluai in ka hria" ka dar a kuah in ka beng bulah a rawn ti sur sur a, ka lo bu nghat ringawt.





"Ka rin ai in a awm rei peih phian zawk a. In hi a chhuahsan zen zen lova, a lung a leng tawh viau ang" thingpui lem khulh pahin a ti zui zat a, dawhkan kîl in a ṭhu hâm bûi bûi a. "I mut tam nen" tih ngheng ka chak.





"Rinrin, vawiin chu keima'n ka hruai ang che aw? Api a hman dawn si lova" Rinrina rawn zuang lut thauh thauh chu ka lo be nghal vat a. Min en vang vangin a lu a bu zauh a. Vawikhatmah ka la hruai ngai lova, mak a ti ve deuh te pawh a nih ka ring.





"Kan zuk thlah dawn nia, banah kan lam leh anga. An kal chhung zawng nghah a ngai hran hlei nem" Hriathlua chuan a lo ti ve vat a, a pawi ka ti lem lo. Zan lama kan boruak fuh vak lo chu hre âwm ang pawhin a awm leh tawh lo, a duhna ah hi chuan a haider lui thei khawp mai. A thiamlo zawkah a in ngai deuh anga, sawi chhunzawm a hlau te pawh a ni mahna. Kei pawhin tharthawh leh ka tum bik lem lo, in khak reng pawh Nu leh Pa te hmaizah an na duh em mai.






Rei vaklo ah chaw ei kan siam zui thuai a, naktuk lamah Slab chhung hman tura in buatsaih a ngai a; vawiin lam phei chu hnathawh ṭan viau a ngai ang. Kan chaw ei hun chhung pawh hi hnathawh dan tur rel fel nan kan hmang a ni ber a. In sak hi a hautak ve em a; rilru zawng zawng pek a ngai. Sak zawh hun a nghahhlelh awm rum rum tawh mai.







Rinrina ka siam zui thuai a, lirthei a kal tur ni mah ila a tawt theih em avangin kal hma a ngai ṭhin. School ṭan hun an ti hma lutuk hi ka lo ning ve em em zel. Alu chop leh Chow tiffin atan a duh avangin dawrah te pên kawi kan la ngai dawn bawk. Kan insiam zawh veleh a pa a au lang lang a, hnathawh thawmhnaw nen Inchung aṭangin a rawn chhuk thuai a.





"Âpa, kha kha ha lo la" a chal ti chuar nâng in a lo ti nang nang a. Hriathlua chuan a thawmhnaw hak chu a bih kual thuak thuak a, ka lo nui sak a.





"Engnge a pawina? Kan thlah lawk che anga, hnathawk tura haw lehnghal ka ngai alawm" a lo ti nghut. A fapa kianga a ṭawngkam bûl thei hmek hmuk lutuk hi sim sela ka duh.





"Kal ang ule, kan tlai palh ang" tih pahin Rinrina bag chu ka khai a, amah kaiin ka chhuahpui nghal thuai a. Hriathlua chuan min rawn kal pel thuakin a bike awmna lam a pan nul nul a, a tukhum lam aṭang chuan ka melh hrep ringawt.





"Chuang rawh u" a rawn ti nghut a, eng hria a tum bur nge anih pawh ka hre lo. Rinrina chuan a hma a chuan a duh tlat avangin ka hlang zui tharh a, Hriathlua hnungah ka lawn kai zui ve vat. A bike chu ti rûm vung vungin a phit chhuak dawrh a, eu zawkin ka au ṭhat. A hnunga chum thawr pahin "I mawl ami?" ka ti nghek, tla thla ila chu a na viau ang.





"Min ngailo em anih kha, tlak i duh loh leh min kuah la" a ti lûng lûng a, kan pangchanna lantir ve dan ve chu leh! Kuah duh lo in kan inkarah Rinrina bag chu ka dah zui hmak a, side glass aṭangin a nui suk chu ka hmu hman. Lei ka chhuah khum vak ringawt.






Thingpui dawr kawtah kan ding a, hmahmawh takin ka chhuk vat a. Tiffin phawrh zui zatin Alu chop leh chow chu ka thun tir zui thuai a. "Hetiang a pai duh a nih chuan In lamah siamsak tawh ila a ṭha ang, sum a hek lo daih zawk ang" ka ti rilru melh melh a.






Kan kal zui leh thuai a, naupang thlah tur lirthei vak vel an tam kher mai; kan kal sawt hlei thei lo. An school kawtah an zirtirtu ten an lo hmuak thlap a, Private School a ni bawk a; an zirtirtute pawhin ṭan an la viau tih a hriat. A luh fel thlengin kan thlir zui a, kawngka a luh dawn chuan a ban a rawn vai lauh lauh a; ka lo vai let ve thuai a. Ka naupan lai ka lo ngaihtuah chhuak leh hmanhmawh. School ka luh ṭan tirh chuan nghah zel ka ngai ṭhin. Ka nu te ka hmuh loh chuan uar fahranin ka ṭap vak a; kan zirtirtute nen khan kan buai luih luih fo mai.





"Haw leh nghal mai ang hmiang" tia Hriathlua min biakna avang chuan ka in thing harh nawk a, bike ah ka lawn zui thuai a. Kan kal lam anga a tih leh vak ka hlauh avangin a kawngah ka kuah ṭai a, pangngai takin a tlanchhuak ve mai bawk.






In kan thlen leh meuh chuan Amuani leh Siamtei an lo che dun malh malh tawh a. Chaw pangngai an ei dawn avangin chaw an lo chhuang kai tawh a, chawhmeh tur an lo buaipui mawlh mawlh bawk. Anni hian min rawn tihpui zel lo sela chuan kan che hlei thei meuh pawhin ka ring lo.






Hriathlua rawn lut chuan a phone ken lai chu min rawn pe a, "An be duh che" a ti nghut a, a chhuak zui leh vut a. Phone hmaia ka nu number lo lang vâ chu mak ti deuh in ka melh reng a, Inchung lama chhoh pahin "Aw, hello" ka ti hniam raih a.





"Mi mawl nu, chanchin mi hrilh hriat nachang pawh i hre lo. I ṭha em?" a rawn ti rum âl nghal âl mai. Ka nu thinrim han biak vel hi chu phurawm tak a ni lo a ni.





"Aw, ṭha e. Nangni in ṭha zawk em?" ka ti let vat a. Ka ṭi deuh dûk a, hmelhriat satliah bia te pawh ka ang hial in ka hria.





"Kan ṭha, i pi te khuaah kan zin dawn, i pi a damsam hlei thei lo a. Naktuk lamah kan kal ang" a rawn ti let ve leh thuai a, a bul rawn ṭanna ai chuan tlemin a ṭawng ki a danglam deuh ta.





"E hee...A eng ber nge a sawisel a? A na viau em ni?" ka ti let chul a, ka chi âi ti tih nghal der.





"Chutia na bik em em sawi tur pawh a awm chuang lo. Tar chak lo an ni ve tawh a, hote ah pawh an bet mai zel" a rawn ti sam leh êt lawi a.





"Rawn kal ve a ṭhat chu le" ka ti hniam raih a.





"A ṭul lo, tu rualin nge i kal ve ngawt ang? Hriathlua te kha in hruai tir i lo rilruk ngawt ange? Khati khawp a min ngai pawimawhlo tu te kha ka hnimhnai châk miah lo ania" a rawn ti chang fak a.






"Zanin ah rawn len an tum tak asin" ka hriatchhuah thut avangin ka ti let leh vat a.





"Chutiangte nangin a mi hrilh tur pawh a nilo. Min zah der ve nise anmahni lam te pawhin min rawn be ve ang chu. Tikhan i awm mawl ve tawp a, ngaihtuahna pangngai reng reng pu phak lo mai. Eng hi nge maw i hriat a, i ât viau mai ni? Zin tura inbuatsaih kan ngai, zan lamah i patea te In lamah te kan kal a ngai bawk a. Khati zat hun awm a, buai lai ber kher a lo len tum pawh a ngai lo. Ka dah dawn, tikhan chanchin lo hre ve la a ṭha a ni mai" ti zui bawrh bawrh in Phone chu a dah zui hmak a. Ka nu hi chu a rilrem loh zawng sawifuh palh chuan a ri hluai zel; ṭawngkam lah hi a a nei na viau zel bawk.






Bai chu ka siam turah an dah deuh niin ka hria, vawikhat an tem fuh tawh a; an zawngchhang riau mai. Bai bel tur ka chhuangkai a, hmarchapui chan sa chu ka chhûng lut nghal bâwrh a. Siamtei lo chek tlak tlak chu ka melh ralh a, ka bel chhuan chu a lo melh ngar mai. "Engati nge?" fianpui lek kang uaih chung chuan ka ti hê haw a.






"A thak awm mai mai, kan ei ve ngam dawn em ni?" a lo ti hluai a. Nuih hak hak pahin "I ei ve lo anga ani mai alawm" ka ti chu a rawn tho phat a, ka fianpui ken lai chu phihthla sawkin hmarcha chu plate ah a suakchhuak nghal mawlh mawlh a. "Hei hi a tawk chiah" tih pahin bel chhung chu a bih leh thuak a, plate chu pawnlam ah a chawi chhuak zui daih a. Hmarcha la bâng chhun chhun te chu lâng liau liau tham chauh an ni tawh. Kan in ngamtlak tawh a, an duhloh zawngah chuan min ti bawrh bawrh ngam tawh bawk. Keiin nuam ka lo ti letling viau thung.






Amuani'n fa neih a chak thu a sawi siam siam a, "Awt ngawih ngawih kan awm laiin ṭhenkhatin duh lo in an lo ti tla a, hetiang ho ai te hian pai thei zawk ila" a ti chu ka khawngaih kher mai. Siamtei te fapa tê zawk hi an buaipui sak deuh chawt a, a mamawh tam zawk hi an tum sak a ni ber. Siamtei pasal U Lâna hi Zu in ve zeuh zeuh a hrat a, a ruih apiangin inchhungkhur ah buaina a siam fo mai. A fate mawmawh pawh buaipui hlei thei lo khawp a khawsak a ching a, Zu a in loh erawh chuan 'pa rilru nei ber a ni' tih tur khawpin a awm leh hlauh thung.






Hriathlua te hnathawk pawh an ṭang bawk a, meizial zuk chhung takngial pawh an chawl hman meuh lo. Ka pa hi a hna lak a na a, nikhata tih tur ruahman fel sa hlen ngei ngei tum chi a ni bawk. Chhun chawlh hun a nih meuh chuan hna zatve vel chu an zo fel der mai.





An eitur kan lo buaipui nghal mawlh mawlh a, an ei zawh meuh chuan Rinrina School bang lam a hun leh vel chiah ang. Hriathlua a buai em avangin "Keimahin ka lo zuk hruai mai ang" ka ti na a, min hruai hman tho thu a sawi teh tlat thung a. A hla ve deuh bawk a, ka hnial ṭalh duh lem lo.






Ka bai siam chu an fak ve luam a, ka duh anga thak khan siam ila chu an fak kher lo mai thei. An ei lai mekin U Puitea a rawn lut ve a, ei ve turin kan lo sawm viau na a, a ṭang ṭung mai. Zinglama a sava veh chungchang vel a sawi suam suam a, ka pa nen in en in kan nui vur vur a. Hriathlua chuan a ei tam lo leh viau mai, mipa ah chuan thil ei nep pawl tak a nih ka ring. "U Puite, lo ṭhu rawh aw? Rinrina kan zuk hruai lawk ange" ka ti zung zung a, in phihfai na hun pawh awm miah lo in a chhuak zui vut chu ka um zui nghal thuai a.






"I hmanhmawh leh sia, hmai tal phih ka duh asin le" a hnunga zui dat dat chungin ka ti niah niah a. "I phih leh phih loh a danglam lo, i hmel landan angai reng" tih pahin a nui huk a, lungawi lo zetin ka ner khum nâng nâng a. Bike ah lawn zui zatin kan tlanchhuak nghal a.






School kan thlen chuan nau hruai tur an lo awm ṭeuh tawh. Gate hma ah lo ding farin naupang hming lam hun an lo nghak ṭhap a. Chhuk ve vatin ka pan hnai ve nghal thuai a kawngka aṭanga naupang lo chhuak diah diah chu ka lo en reng a, an kutzungchal an hmuiah an dah far a; an hmuhnawm reuh. Rinrina lo chhuak chu lo kai vatin a pa awmna lam kan pan zui thuai a, a hmaah bawk chuan tir lehin kan tlan haw zui thuai a.






Ka nu te pawh an lo thleng fel tawh a, ka pi nen pawh kan in be ve luam a. A beng a chhêt miah lo te hi a vannei ka ti, a kum angah chuan bengchhet ngei ngei tawh tur anga ngaih a ni ve tawh a; ani erawh zawng zawi tê tê a kan ṭawng sep sep pawh a lo chhunzawm ve thei zel mai. Thil engkim min lo khawihpui a tum erawh kan buai phah viau thung. "He Inchhung ah hi chuan ka thu viau ania" a ti deuh chhen bawk a. Amuani'n "Bang kilah ka hûng mawi dawn che em mawn le?" tih paha a nuih ngheng ngheng chu a lawm lem lo viau tih hriat takin a tûm bâr a, a phun zui hlak hlak a. Naupang rilru pu ṭha a ni bawk a, dawhtheih a ngai viau dawn in ka hria.






Tlai hna ban hnu a in senghawi lai vel in Hriathlua leh U Puitea an in bekbawr sar sar reng a, min en deuh zuk zuk bawk. Ka chet ngaiin ka che zui reng a, mau bung let pheng phung te chu cement bag ruakah ka thunkhawm zung zung a. "Bawhi, U Puitea chhuahpui lawk ka ngai, in tihfai hmain kan kalpui law law lawk ang aw?" a rawn ti nuah nuah a, ngaihṭhat lohna riau ka nei tlat. "Khawiah maw?" ka lo ti let vat a.







"Kan rei lo ang, ka tlan loh ni a ni bawk sia. Lo phal hram teh" U Puitea chuan nuih sun sun pahin a rawn ti ve thuai a. Lo hnial ṭung nuam tawh hek lo, an kal liam lai chu ka thlir zui reng a. Inchhung lamah an ri laih laih a, thingpui an la in khawmuang hlawm a. Eirawngbawl tur ka buaipui zawm nghal a, inbualna tur tui ka lum pah bawk. U Lâna'n ka mau bung ruhkhawm te chu "Ka hawn dawn" a ti teh tlat a, an nu erawh in ṭul a ti lo viau mai. In hnial hlak hlak chungin haw turin an in zui liam ta diak a.






"Kan Hriathlua chu thil ṭul lo lutuk ah a chhuak a, Puia a rawn kal hi chuan a lungngaihthlak ṭhin" ka nu chuan a ti hlak hlak a, ka bangbo deuh. Ka pa chuan "Chutia midang va dem ngawt, i fapa pawhin a zirlo a ni mai" a lo ti hluk te chuan min ti hawihai zual. An pahnih chuan melh tawn zak zak chungin, "Engnge a awmzia? U Puia kha a fel vaklo em ni?" ka lo ti hâ a.






"An in kawp chuan zu in an ching a, tunlai hi a rawn lawr lo mai mai zawk anih hi. Zingkar aṭangin an chhuak dun a, zu an in lahin hnathawh an tum bawk silo. Nilengin an mu a, tlai ah Zu in tur zawngin an chhuak bo leh a. Hetiang hi chuan awm tawh lo hram se ka duh ngawt mai" ka nu in a rawn tih takah chuan zawhna dang ka nei tawh lo, ka hrethiam fiah nghal em em bawk.






Kan inrûk zan leh Nu Mami te In a kan awm laia a in bak kha ka hriatah chuan a la in leh hauh lova. Chutiang khawp a nasa in Zu a lo in ṭhin ang tih rinna lah ka nei hek lo. Chutiang kawng a zawh leh anih vaih chuan a pawi teh ang chu.






Ka nu nena kan inbiakna kha ka sawi zui ve zat a, ka pi damloh chungchang pawh min zawt luam nangin ka hre thui vak bik lem lo. "Hun remchang hmasa ber a kan kal mai a ngai anih chu" ka pa chuan a lo ti dam thluam a.





Khua a thim chiang viau tawh a, Hriathlua thawm hriat tur a la awm miah lo chuan min ti mangang viau tawh. Pawnah chhuakin kawngpui lam ka thlir leh vang vang ṭhin a, khawi lamah nge an kal tih takngial pawh ka hre silo. Ka nu thusawi te ngaihtuah letin ka awm hle hle thei meuh tawh lo.






Thaw hakin In chhunglam pan turin ka in her a, ka pen ṭan chiah tih in kawmthlang lamah bike chak zeta rawn tlan thawm ka hria a, ka ding nghal dat a. Kan In zawnah chuan rawn ding ri hrawih in thawm a reh zui duk a. Ka ngaihthla deuh vang vang a.






"Ka nupui hmelṭha, Zothansangi khan a pasal leng haw lo hmuak rawh se" rawn ti ri lûng lûng ah chuan ka in her zawk a. Ka thlang kawngpui lam hawiin ka dak zui vat a. Hriathlua, thei leh thei lo a step a rawn kal pai chawn chawn chu ka zum hmu zui thuai a, hmanhmawh takin ka tlanthla nghal vat a.






A bul ka zuk thlen thlak lai chuan a lo ṭhu sawp deuh nuaih a, tihngaihna hrelo zetin ka en reng a. "Min kai chho mai teh" a ti sup a, a banah ka chelh zui thuai; a zawi deuh nguai bawk nen, ka pawt tho zo meuh lo. "I va han tlaw ve? Bawihte Nu i tluk dawn lo tawp mai. Kalsawn teh" tih ṭhat pahin ka ban a vai per lawp a. A thusawi duh dan kher kher chuan min vit zawk mai, ngawi renga dingin a kal pai chhat chhat chu ka thlir reng a.







(to be continue.......)


Show post links
Top

[Ngaia]

ODEAR PAIN
Chpater -14



By: Brigida Hugo






Mit thial urh chungin eirawng ka bawl mawlh mawlh a, ka mu ṭha lo lutuk chuan min ti harh vang lo takzet. Zan lamah Hriathlua Zu rui in min ti muhil thei lawk lova, "Bawihtea Nu ka ngai" tih a ruih ṭah tlaivarpui a ni ber a. Ruih lai thil sawi mah nise a lo ngaithlatu tan chuan thu ngaihthlak nuam tak a ni lem lo. A ruiha a thusawi tam ber, a ânhla tam zawk aiin chu thu tawi te chu ka tan ngaihthlak ninawm tak a ni. Ka pa pawhin a kamkhat nghe nghe.






Inrinni a ni bawk a, chawhmeh lei turin ka nu leh pa an zing chhuah a, Rinrina an hruai ve bawk. Slab chhung tura kaichhan kan sawm nual avangin chhun lama ei siam tur pawh lei nual a ngai ang. Ka pi rawn tho chhuak ve chuan a mut ṭhatloh thu ringawt a rawn sawi ve bawk a, ka hriat ve chinah erawh chuan tui takin a mu kha a nia; thingpui siam sak in ka pe zui thuai a.






Alu ka kang leh hluah mai, ngaina ve lem lo mah se chawhmeh sawisel an hrat lem lo. "A bawltu thu thu a ni mai" an ti mai zel ṭhin a, heti kawngah hi chuan an fakawm phian. Kei pawh ka in thlahrung duh vak bik lo.





"Bawihi, tui min lo pe lawk" Alu kan ka chawh mawlh mawlh laiin Inchung lam aṭangin Hriathlua chuan a rawn ti a. Inchunglam hawiin ka meng rum zui ngheng ringawt a. Fridge a tui vawt chu la chhuakin ka pên chho hlawk hlawk a, khum bul ka thlen rual chuan "Kha" tih pahin Hriathlua mu dawrh huang sirah chuan ka theh thla hmawk a. "I va thinrim hmel ve a?" tih pahin a rawn ṭhuchhuak nghal a, engtinmah a chhang lem lo in ka chhuksan zui leh nghal daih a.







Chawhmeh vil pah rengin ka nu biak ka tum a, rei fe a rik hnuah Mampuia'n min lo chhang. Kan in ruk hnua kan in biak leh na hmasa ber a ni, ka zâm ru takzet. "Engnge ka pi chu a an? In damṭha hlawm hrim hrim em?" ka ti sap a. Mampuia chuan ka pi in ziaawm lam a pan thu a rawn sawi chu ka hahdam huai huai mai. "Karthar lamah lo haw an tum anih hmel" Mampuia'n a rawn tih rual chuan, "Mampui, Phone ka neih loh avanga in biak a buaithlak ṭhin lutuk a. Ka phone kha ka nu te hnenah khan min lo dil sak teh" ka lo ti nghal zat a. "Ka lo sawi dawn nia" a rawn ti awlsam ve puat mai bawk a. Mampuia'n a sawi chuan min pek ve mai ka ring viau bawk.






Eirawngbawl ka peih fel hnu lawkah ka nu te bazar pawh an lo thleng a, Vawksa an rawn lei ṭeuh mai. An thil hawn te dah fel zung zungin chaw ei ka siam zui thuai a. "Rinrin, i pa han ko rawh le... Chaw kan ei dawn" tih pahin chaw ka khawrh pah zung zung a. Rinrina pawh rang takin a tlanchho nghal thuai a. A rawn chhuk thla leh thuai a, "Nu, a rawn chhuk dawn" a rawn ti thla pah lauh lauh a. Hriathlua chu hmel bui lukin a rawn pen thla ve chhut chhut tih chu ka hria, melh pawh ka melh eih peih lo e.







Chawei laiin ka pa in Hriathlua chu a melh ngur a, "Nizan ang khan khawsa tawh suh ang che. Thil ṭullo pui pui sawi reng mai" a ti nghut a. "Ruih laia thusawi mai mai te chu" a lo ti ve hluk a. Ruih lai thil mah nise, paidam har ka la ti viau.





Ka nu chuan, "A hrim hrimin Zu in hi sim tawh rawh. Tlangval hawklak anga khawsa rual i ni tawh lo. Nupui fanau nei i nih tawh hi" a lo ti ve mawlh mawlh a. Kei erawh ka ngawi rân a; Nu leh Pa in an zilh laia lo in rawlh ve kha ṭul ka ti lem lo. A nunah erawh a nupui hlui chuan nihna pawimawh tak a la chelh tih ka hrethiam ve mai, chu chu keiin ka vuak ṭhiah sak thei angem ka hre hek lo.







Kaichhan an lo kal ṭan a, a lo kal hmasa apiangin chaw eikham thingpui an rawn lam a; ka lum sa in a daih zo hlawm meuh lo. Hriathlua ṭhiante pawh an rawn thleng ve sap sap a, "I cher dûk mai" tiin min fiam deuh chhen hlawm a. Ka pi in ka thingpui chhuan lai a lo vil ve ran bawk a, engmah ti lova awm mai mai hi a thiam meuh lo. A tiang nena in hawl kualin eng eng emaw hi a lo khawih kual ve reng zel a, a chang chuan a buaithlak zawk lek lek ṭhin; hman leh mai tura dah te hi a lo dah bo leh daih mai ṭhin a, kan in zawng buai chuk chuk fo mai.






U Maremi ṭawng lawng lawng thawm ka hria a, pawnlamah ka tlanchhuak thuai a. Naupang school kal hruai a ngaih ṭhin avangin a buai ve ṭhin viau mai, hmuh pawh kan in hmu zen zen lo. U Mama'n Emily a rawn kokichhuan a, min hmuh rual in min rawn au chûl a, "Mambawih..... lo ding lawk teh" U Mama chuan a ti sup a, U Maremi erawh Inchhung lamah a lut zui nghal daih a.






"Nimin tlai khan in pa ka hmu a, a rui viau in ka hria. Inchhung lamah buaina a siam em?" a rawn tih rual chuan buaina a siam lem loh thu in ka lo chhang thuai a. Hriathlua zu in hian buaina a siam fo anih ka ring, a hmel a hahdam huai hmel chu ka hmuchiang hle. "A nupui hlui a ngaih thu a sawi a" ka ti hram a.






"Mawla chu, a kam nam ve hi a chimawm teh mai nia. Ngaihthlak liam chin i neih loh chuan in buai fo ang, dawh hram hram ṭhin rawh aw?" U Maremi chuan a ti zui leh luam a. Ṭawngkam ngaihthlak nuam em em lo, ngaihzam fo mai chu a har dawn hle in ka hria.






Hna an ṭan a, hmeichhe ho pawh eitur siamin kan buai zui nghal mawp mawp a. Amuani leh Siamtei an rawn tel ve leh thei hlauh a, anni hi chu tel ve ngei ngei tur hian rilru in a dah nghet tawh. Hnathawk ho thawm pawh a ṭha laih laih viau mai, an ṭawngdan leh thawm aṭang chuan Cement chawh ah an in el niin ka hria. Tlai khaw hnuah U Hruaitei te an rawn lang ve bawk a, a hmel a ṭi deuh duiin ka hria. Khatia dawt min hrilh hnuah khan ka thinlung taka pawh har ka ti tawh, ka lo ngainat ve na te kha a bo duak ni mak hian ka hria. Midangte hriat ah erawh tihlan loh hram ka tum thung a, a mawi tawk chuan ka be ve ta tho.





"Zothan, tih tur ṭul em em a awm tawh chuang lo bawk a, ka lu hi a thak lutuk, min lo keu sak teh" tih pahin U Maremi chuan pawnlam ah Chair a chawi chhuak a, ka zui ve nghal thuai a. Ani hi chu boruak man thiam ngang hi a nia, U Hruaitei bula khawsak vel chu nuam ka ti zân lo tih a hmuthiam leh vek tawh a nih ka ring.




"Engmah sawifel a awm hma hauh aṭangin buaina neuh neuh in tawng ta nual mai a, i chhel a ngai dawn hle mai. Hriathlua thinlungah hian a fapa nu hi a thi hmiah thei dawn lo niin ka hria; chu chu nang pawhin i hre tho ang. Tawrh hrehawm khawpa a khawsa a nih erawh chuan i thlavang hauh turin kan awm reng a nia" U Maremi chuan a ti sar sar a.





Ka lungawi lohna te chu ka sawi zui ve barh barh a, a bulah hi chuan ka thawl huai zel. Mo ve tho a nihna laiah ani pawhin sawi tur chu a nei ve nual bawk a. Mahse, pasal chhungte lan mawi loh rawkna tur khawp thil erawh a sawi duh hauh lo thung chu a finna em em a ni. "I la hre chho ve mai ang" a ti lek chauh a. Siamtei rawn kal hnai mek chu melh zauhin kan thusawi lai kan thlak ta thuai a, thil ho mai mai sawiin kan ri zui ta hlut a.






Hna a laklawh avangin a hun takah pawh an chawl hman meuh lo, an hah hlawm viau ngei ang. Hriathlua ka biak tha a tho lo laklawh a, ka ngaihsak teh chung peih hek lo. Tunlai ka awmdan hi a chiangkuang lo riau a, luakchhuak ut ut leh luhai muai muai ka nei fo mai. U Maremi bulah a ruk deuhin ka sawi a, "Nau i pai a ni lo maw? In test vat rawh" min lo ti thuai a. Ka ngaihtuah a, ka period hun a pel fe tawh, rang lama in test ngei chu ka tum ruh hle.






Ka pa chuan, "Zothan, eitur lam buatsaih ṭan a va hun ve..." a rawn ti lâng lâng a. U Maremi te nen chuan kan che zui nghal sang sang a. Kan indaih bawk a; kan siam peih zui thuai a. Hmabak a la tam viau mai a, zan lam thlenga thawh a ngaih an rin thu an sawi sap sap mai. In lian ve tak a ni bawk a, tha pawh a heh viau mai.






Hriathlua ṭhianpa Siamkima chuan ka pa bula ṭhutna rem pahin "Tlai lam hah chhawkna tur te hi ngaihtuah ve la?" a ti ham ham a, midang ho in an lo tuihnih sap sap bawk. Ka pa pawhin sawi nawi nei miah lo in ka nu hnenah pawisa a dil nghal zat a. Keia lo sawi nawi chi ni miahlo mah se kawng engkim maia Zu an chelek fo mai chu ka ngaihdan a nilo viau bawk. "In pa nen lo ngaihven mai ta che u Zothan?" ka pa in a rawn ti chu hnial hreh viau mahila ka hreh em avang chuan, "Hriathlua khan a ṭhiante tu emaw ber kalpuiah sawm mai rawh se" ka lo ti tîm dai a.





Hriathlua chuan rum zetin min melh ngur a, eitur an ei zawh rual chuan ka pa pawisa pek chu la in ka bânah a rawn kai a. "Kal lawk ang" a ti nghut a, min kai zui nghal hlawk hlawk a. U Maremi chu ka melh pah thuai a, a mitko min lo sânkhum âk a.





Rangvamual kawng lamah bawk kan liam dun leh ta, tun ṭum bak chu he kawng hi zawh tawh loh hram ka duh takzet. A hmaa kan kal tawhna In ah bawk khan kan lut leh a, an pa ber chuan min lo chhâwn thuai a. An nupa in ti thiam lo in Nu ber a lo haw daih chu niin, Pa ber pawh chu a hma a ka hmuh ai nasa in a taksa a lo chhe tawh bawk. Rei tak dam thei hmel pawh a pu tawh lo, 'Ruihhlo hi chuan mihring te hi min tichhe hneh teh mange' ka ti rilru niap niap a. A chhiatpui mek te lahin hrereng chungin an thlah hlei thei chuang si lova, hrereng chungin tlanmual lam kan panpui nguah nguah reng mai a nih hi.






In lamah nghaktu an awm avangin Hriathlua pawh a muang sur sur bik lo hlauh a. An in tihfel chhungin pawnlam ka pan zui ta daih a, Inchhung uap churh leh Zu rim nam huam te chuan ka luak a ti chhuak ngawih ngawih. Pawnlamah chuan chutiang huna hmeichhia chulai hmuna awm tak chu mak min ti deuh nge ni, min thlek hâ hâ tawk lah bo lo. A rukin ka zak ngawih ngawih a, chulai hmunah chuan Zu leiin hun ka hmang ang tih hi vawikhatmah ka suangtuahna leh mitthla ah a la awm chhin ngai lo.






Kan chhungkua hi kan vannei a, ruihlo vangin kan buai ngai lova. Ka pa te chhunglamah hian zu han lem ve thei mai chu awm mah se kan in hnimhnai teh chiam lo bawk a; kan tan hnawksak in an awm ngai lo. Ka nu te lam erawh an fihlim ṭhiau thung a, Kohhran leh khawtlangah phak tawka in hmang leh nihna pawimawh chelh an ni ve fur mai.






Zu rui bula awm te hi ka thiam lova, an rim ringawt pawh hi ka hre peih lo a ni mah zawk. Mahse, kan hma hun tuma'n hre lawk hek lo le. Tunah chuan kan in hnimhnai ṭan ta viau mai, chutiang boruak chu ka tawng chho ṭan ta chu ania. Ka duhthlanna a ni a; midang va dem ngawt thei ka ni lo tih ka hrechiang hle bawk. Dinhmun a zir zela in siamrem thiam mai chu ka ko a tla hmasa ber a ni tih ka hria.






Hriathlua tan bag han ah puar ûl a rem ta lo riau a, hreh ru zetin ka ak a; a rit phian leh nghal. A chhunga awm ka hriatchian em avanga ak hreh deuh kha ka nia, min lo man palh te reu reu ka hlau bawk. Midang hmuh turin hmel hlim lo ti langlo mahila, kan pahnih chauha kan han tlat hran takah chuan kan in be tam lo khawp mai. A ṭawngkam te ka hrechhuak thar leh a, ṭha taka biak a har ka ti. Ka period mumal loh chungchang leh in test ka duh thu pawh ka la hrilh lo, a bulah hian engmah ka sawi chak rih lo a ni ber.







Vaivakawn kan thlen chhoh lai chuan, "A rit em? A hrehawm em?" a rawn ti sup a, "Hrehawm lo e" ka lo ti liam puat a, In kan thlen thlengin kan in be zui leh tawh lo. Ka luakchhuak hlui reng chuan ka awm a ti nuam lo hle reng a, hmun reh deuh leh dai ruih a ṭhut hahchawlh vang vang ka châk ber.






Inchhung kan luh rualin ka bag ah lai chu min laksak thuai a, pindan lamah a khai chho nghal vut a. Rawn chhuk leh thuaiin hnathawhna lam a pan zui nghal vut a. Hmeichhe lam pawh ka nu hovin an lo titi barh barh hlawm a, thingpui bel an lo chhuang hluah bawk. An bulah ṭhu ve nghal zatin ka kutin ka hmai ka zâp hauh hauh a. Khua a lum mai bakah kan thil zuk tih chuan ka taksa a chiah lum pup pup a ni ber. Kan kalna chanchin min lo zawt teh luam a, sawi em em tur erawh a awm lem lo. U Hruaitei nuam tih loh hmel zeta a che kual sek chu ka nuih lui sak a, thil diklo tih chu a hnulam thlengin nun a ti nuam ngai lo tih ka hmuhchian berna a ni awm e. A tih loh tura mawi a tih avanga nuam lo ti leh ṭi dêka a khawsa chuan ka awm a tih nawm loh phah ve der si lova, ka chhungril a ka rilru chhiatna a chhuak pek a, hmuh nuam ka ti tlat pek anih chu!!






"I pa hêrh hurh hi alawm, mi in han bekbawr se a lo phur surh a. Amah pawh hian a ngeih lo maw le, rei tak chhung Zu in lo a awm thei tawh kha, a chhunzawm leh zât anga, a ṭul lo ngawt mai" ka nu chu a phun hlak hlak a.






U Maremi chuan, "Zu man a in insen ral tam tawh zia hi aw, bungbel changkang tak tak chu in lei thei daih tawh ang. In khawih hmabak ala tam si, hetiang ringawt chuan duhthusam pawhin in pum thei meuh lo ang" a lo ti ve barh barh a. A hma lam thil engmah ka hriat ve lem loh avangin ka tan chuan thu thar a ni zo vek zel.





Hnathawh ban hun pangngai ang velah pawh kan la vanglai viau mai. Slab chhûn hi chu laklawh taka dah chi ni hek lo, an hah tlang viau tawh ngei pawhin ka ring. Khawthim thlenga thawh ngei kan ngaih dawn avangin U Mama chuan pawnlam a chhit tur in Current hrui a zam mawlh mawlh a, keini pawhin tlai lam eitur kan siam leh mek bawk.





U Maremi leh U Hruaitei erawh In lamah chhawk tu tur an awmloh avang leh naupang an kalsan avangin an haw tawh thung a. Amuani leh Siamtei erawhin min pui tlang thei dawn thung a, a zia viau e. Siamtei fate chu pi In lama riak turin an kal daih bawk a, chu chu ka tan tak a lawmawm, an awm hian ka thla a muang viau zel.







Zan dar riat pelh ah an zo thei ṭawk a, Amuani leh Siamtei te pawhin an pa te an ngaihven nghal vat a; ka pa chau lutuk pawh chhuat lawngah a ṭhu ngawi hle hle mai. Hriathlua te ṭhian ho erawh an in hawrkhawm lêt lêt a, an phun sar sar hlawm. Inchung lam ah a tlanchho vut a, hah pawh a hre lo emaw tih mai tur a ni.






Bag rawn khai thlak pahin a rawn nui thla vur vur a, ṭhuthmun aṭangin ka lo en ve reng a. Zu hmelin chuti tak maia hlim hmel a siamsak chu ka rilru a na em em bawk. Mahse, an awm ang tawpa enliam mai chu ka duh ber. Hriathlua chhuah rualin ka pa pawh a tho ve vut a, a chhuak zui ve nghal thurh a. Ka nu chuan "An zingah khan va ti ve miah suh, i inti zahawm loh vek ang" a ti zui thuai a, ka pa erawhin a rawn chhang zui lem lo.






U Hmaa chuan haw mai a rawt a, ani hi chu a fel viau mai. A rilru a puitling a, a nelawm em em bawk. Amuani tana thlamuanna leh rintlak nih hi a tum tlat a, a nupui a hmangaih zia hi a hmuhhmaih theih loh ṭhin. U Lâna thung erawh Hriathlua te kalkhawmna lam chuan a rilru a pawt pêng hle tih chu a men dan zek zukah chuan a lang reng. Siamtei chuan a pawt bet a, an in chelh hneh meuh ta lo; an in ti thinrim lek lek mai.





Pawn lamah an ri laih laih a, a khât tawkin an nui leh dur dur ṭhin. Ka pa erawh an mutna lamah in chhawp lutin a bo zui daih a. Amuani te haw ka thlah zawk chhung pawhin an Zu in thawm chu ka hne in ṭhenawm khawvengte ka hmaizah ngawih ngawih bawk.






Tui vawtin ka inbual a, ka hahdam sawt in ka hria. Ka nu hnenah zun test ka duh thu ka hrilh a, a hawi heu mai. "Nau pai hma chi i ni dawn aniang a, in sak zawhah rai chauh ta che?" a ti hê haw a. Nuih hak hak pahin "Ka tha chhawr duhthawh viau suh, ka rai thu pawh ka sawi loh chu" ka lo ti let ve hlar a, kan nui dun nasa mai. Ka nu lakah hian ka pangchang ru viau zel, ka chhungte lam an lungawi miau loh avangin kan in be tam thei si lova; ka hmuh tam zawk bulah hian ka rilru a no lo thei lo a ni ber e.






"Awi, kan buai âwm mange, ka huphurh lâwk..." thutak zetin a ti leh hluai a, a engamah hmaa a lo buai em em mai chu ka nuih a ti za viau zel thung.





Hriathlua inbualna tur tui ka chhuansak zui a, In chunglama Rinrina games khelhna ah ka han ṭhu ve ta daih a. Pawnlamah thawm a ṭha tawlh tawlh a, mahni In lam pan tum pawh an awm lo ni maiin ka hria. Ka nu in a hau leh ṭhat ṭhat ṭhin a, hauh lai chiahin thawm an dim a. Kan che nasa ve bawk a, ka mut a chhuak ruih mai. Rinrina'n a thil tih lai te chu min hrilhfiah zat zat a, a awmze hre mang lovin hrethiam âwm takin ka lo bu liam vel mai mai thung.






Rei vak lo ah Rinrina chu a mut a chhuak zui thuai a, Inhnuai lamah kan in hruai thla zui vat a. Ka pa chuan Hriathlua ṭhiante ho chu a hnar haw ta tawp a, anmahni chuan tlaivar pawh an huam ang tih mai tur hian an khawsa a. Inbualna siam sak in Hriathlua chu a inbual puat a, a kal pai deuh chhar chhar bawk a.






Hriathlua phone rawn ri chu ka ngaihven viau a. Min melh rulh pahin, "Kha....be rawh" a rawn ti nghut a. Khumah chuan a mu zui thlawp a, "Duh hun huna rawn biak tum mai" a tih nuah nuah lai chuan Phone chu ka chelh a, "Hello" ka ti nghal thuai a. Ka nu aw hriat ka inrin tehreng nen Mampuia aw ngei mai chuan, "In la mu lo maw?" a rawn ti chu ka thaw huai mai.





"La mu lo deuh, mu turin kan lo in tintuah mek" ka ti nghal thuai a.




"Ka rawn be zuai che"




"Phone chu i lo sawi em?" tih pahin Hriathlua chu ka melh rulh a, engmah hria ang pawhin a awm lo, Khumah chuan a bawk phêk thlur a.




"Sawi na hun pawh a la awm lo, kan buai nuaih mai"




"Eng thil nge ni a?" hlauthawng si, ṭawng ring ngam si lo chuan ka ti nghal thuai a.




"Ka nu te hi maw le...tunlai chu an inhnial thinrim reng mai. Zingkar aṭangin boruak fuh an nei ngai lo. Tunah pawh In a rawn thlen hma hawtin ka pa nen phone ah an in hau leh tawh" a rawn ti zung zung a.






Mampuia chu engtianga chhân tur nge ka hrethiam lo. Kan Inchhung ah chuan thuneihna ka va nei ngam hek lo. Mahse, Mampuia rilru hah chuan chanchin min rawn hrilh ve chu a ni si a. "Engkim a ṭha leh mai ang. Mahni thu duh ve ve an nihna a lang lawk anih kha" ka ti ta ringawt a.





"Ni e, beisei phawt ang. Anih, tui deuhin mu rawh u. Ka rawn hrilh che tih sawi chuang suh aw?" a rawn ti leh thuai a.




"Aw le, tui deuhin in mu dawn nia. Remchang hmasa berah kan inbe leh dawn nia" ka ti ve mawlh mawlh a. Phone chu a tawp a, a reh nghal tlawk tlawk a. Ka bengah ka la chuktuah reng a, Hriathlua hnâr ri kûk kûk bak chu thawm dang ka hre lo.





Muangchangin Khumah chuan ka ṭhu a. Mampuia thu rawn sawi ringawt chu ka rilru luahtu a ni. Hriathlua hnar ri leh Zu rim nam hum hum ka ngaih pawimawh loh ber zan a ni hial ang. Khum kil lamah chuan ka mu zui a, ka ngaihtuahna chu kan Inchhungah bak a awm lo.






Zingkarah ka pi thawm ri rak rakin min ti harh a, ka tho zui thuai a. Hna kan awl rih dawn a, kan hahdam deuh rih dawn tih ka hre bawk a, engto leh rilru kap hmanhmawh tu awm lo in ka che zui sat sat a. Rinrina tiffin turin chow ka siam bawk a. Ka nu chuan rawn thawh chhuah pahin, "Ka mu sil urh mai, i pa kam nam ve hi chu a mangchhe thei lutuk a. Mut pawh a tui thei lo" a rawn ti nghal nang nang a. Ka pi pawhin a dân pangngaiin a mut theih loh thu a lo sawi ve leh thuai a. Ka nu nen in en in kan nui sen sen a; a hnar barh barh zan pawh hian a tuk lamah chuan a mut theih loh thu a sawi ve ngei ngei tho.





Hriathlua phone ri reng chu a chhân mai loh avangin Inchung lamah ka tlanchho thuai a, a lo la mutui nasa mai. Phone chu ka la nghal vat a, U Hmaa a lo ni. "Lui kalpui ah rawn sawm ka tum a" a rawn ti nghal vat a. "A la tho pek nange?" tih pahin a rawn nui huah huah bawk a.





"In chauh âwm tehlul nen, awm hahdam ve mai mai teh u" tih pahin Hriathlua chu ka sawi nawk nawk a. "Ka kaitho zo lo, nizan lamah an che na bawk a; a thawh hunah ka rawn biak tir dawn che nia" ka ti leh thuai a. U Hmaa pawhin phone chu a dahzui nghal a.





Ka rawngbawl lai chu ka nu in a lo chhunzawm avangin pawnlam ah ka che zui ta zawk a. Zan lama an ṭhutkhawmna lam chu ka pan a, an sulhnu pawr zet ka va hmu chu thâwk halh pahin ka ding dat a. Tui bottle te chu an lo let rem rum a, fridge a ka tui dah sa zawng zawng an thiarchhuak zo vek tih ka hmuthiam nghal. An no hman pawh an seng lova, a seh hmeh an chhawp na plate thlengin a darh niaih nuaih mai. Phun hlak hlak in ka sengkhawm a, In ah ka chawi lut a, sil hmunah ka dah ri rum rum a. An zu in na sulhnu chhui chu ka tha a na ru viau bawk. Hriathlua bulah chutiang a awm tawh lo tura ṭha taka sawi ka tum bawk.






Ban te chu tui ka pe kual leh a, ka nu leh pa boruak vel ka ngaihtuah pah a talangin ka rei ta phian a. Ka nu in chaw ei siam tawh turin min rawn ko lâng lâng a, ka lut zui thuai a. Hriathlua ka kaitho a, "U Hmaa'n a rawn phone a, lui kal puiah rawn sawm che a tum a" tih pahin mutna chu ka siamfel sawk sawk a. A peih ka rin loh nen a lo phur phian a. In sakna lamah ringawt an chetla bawk a, boruak dang han hip ve pawh a chak ve a ni mahna. Kan chhuk a, chaw ei ka siam nghal zung zung a.






"Bawihtea hruai pahin zun test na chu ka lo lei mai dawn em ni?" ka nu chuan a rawn ti hluai a. Ka pa leh Hriathlua chuan min en nghal hâ mai. "Chu, i ruak lo in i hria em ni?" ka pa chuan a rawntih zawm zat, ka nu chu ngei ru zetin ka melh râm râm a. "Ka hre bik lo, ka in rinhlel deuh a" ka lo ti sap a.





"Engmah min va hrilh ve lo ve?" Hriathlua chuan a rawn ti nghut a. Ka chhan hma in ka nu a lo in rawlh thuai a. "Thu pangngai sawipui tlak pawhin i khawsa hlei nem maw le. Nangni pafa hi zu in hi sim rawh u. In ching dawklak leh dawn tlat. Hmabak kan ngah em hi, rui thlep mai mai hman in ni lo. Pafa a ruih reng mai te hi zah pawh in zak lo em mawn le?" a lo ti hlak hlak a.






Engtinmah an chhang lo ve ve a, ngawi rengin an chaw eilai an ei chhunzawm dun mawlh mawlh a. Ka pi chaw helh nasa ṭhin lutuk hi kan buai fo mai, tui suah sakin a hnungah ka chum dat dat a. Kan titi kal lai pawh kan tawpsan ta daih a. Ka nu chuan kamkhat zui leh se ka tih tehreng nen...






Ka nu te School kal turin an in zui chhuak a, Hriathlua'n a mamawh tur te a en fel ve mek bawk. Ka pa in 'Lên' ṭet lai a lo ṭhui ve mawlh mawlh bawk a, han awm ho takah chuan rin aiin an in ngeih phian lawi a. Engemaw han in bakkaih zeuh hi chu awm lo thei lo a ni ve bawk a, boruak ṭha tak kan neih zui zel beiseina sang tak ka nei bawk.






Amuani chuan Hriathlua a rawn bia a, an In a leng ve turin min lo sawm a lo nia; kan pa hnena sawi hmasak nachang a hria chu fing ka lo ti leh hmanhmawh tawh. Tlai lamah an in a chaw ei a, an lui kal lo nghah pah a lo awm ve rih turin rem an lo ruat fel diam a. Len khawthawn na hun ka neih loh avang leh hmelhriat em em ka neih lem loh avangin In lamah ka tawm chawt a, han chhuah thawven ve te pawh ka chak viau mai. Ka pa hnenah kan ruahmanna neih ang ang chu ka sawi melh melh a, rem a lo ti em em bawk. "E khai, va chhuak harh rawh. I hah bawrh bawrh em mai. Boruak dang hîp ve te pawh a ṭha ania" a lo ti dam duam a. Lawm zetin Hriathlua ruala chhuak ve turin ka in siam sawk sawk a.






Kalkawng tluanin Hriathlua chuan Rinrina nu a rai tih a hriat hlima a lawmzia thu a sawi luam a, 'Kei hi rai ve ta ila, chutiang tak chuan a lawm ve angem?' tih ngawt chu ka lo ngaihtuah daih thung. Engmah phei chu ka sawichhuak lem lova, mahni a rilru kawm rih mai chu a tawk viau in ka hre bawk. Amuani te In lah chu a lo hla phian a, veng mawng lam In fal zet chu kan thleng a. Ke hlir in an lo kal ṭhin ni khan a sawi a, an hah ṭhin dan tur ka suangtuah thiam viau.






An nupa in kawtah an lo ṭhudun a, an lo nui dun kar kar mai. An nupa hian an in kawmngeih a, an hlim dun thei viau mai; an hmuhnawm ka ti ṭhin. "In awmna chu chawfun a kalna tham lawih a nih hi" ka ti lâng lâng a, ka nui hawk hawk bawk. Thingpui te an in khawmuan leh hnuah kal turin an in zuichhuak ta nghal a, "In pa hi min lo ngaihtuah leh viau ange? Hahdam deuhin lo awm rawh" Hriathlua chuan a rawn ti mawlh mawlh a. A tirah chuan a fiamthu emaw ka ti a. Mahse, a hmel chu ka en a, a thutak viau chu mak ka ti ru viau bawk. Tui ka ngainat loh zia a hrechiang bawk a, ka lo phi ruai a hlau a ni ngei ang






Thil tih tur em em a awm lo bawk a, Facial te kan ti ta mai mai. Amuani hi beautician a lo training chhuak ve a, sam te min khawihsak bawk a; ka lang thar sur mai. Hahdam taka hun ka hman lohna chin pawh ka hre tawh lo, Vawiin na nâ na chu rilru thawveng taka awm ka tum. A phone hman sakin Mampuia biak ka tum a, a la har hrep leh nghal. Vawi li zet ka call hnuah aw phak chuap in min rawn chhâng ta hram a, mu tho hlim a nih hmel viau.






"I va la har ve? Engtinnge ka phone chu?" ka lo ti nghal thuai a, a hâm bûi bûi thawm ka hre bawk.





"Ka rawn pe peih lo che ania" a rawn ti bûl hmuk a, a awmdan chu mak ka ti deuh.




"Aw, ka nu in a phal chuan a ṭha. In pek dan tur chu nakinah ka lo ngaihtuah ang. I nuam sam lo em ni?" ka tizui ta daih a.





"Nuam e, kan in ṭhen" a ti leh nghut ringawt a, mak ka ti viau. Mampuia hi a lerh lem lo a, ngaihzawng ti a sawi tur pawh hi a nei vak lem lo. A neih ve chhun ah erawh a la viau thung. An nghet ve viau khan ka hre sia, mak ka tih deuh avangin, "Engatinge? In inkawp nghet viau emaw tia?" ka ti thuai a.





"Hmeichhe ho hi in mak em mai, in lerh si" a ti leh hmuk ringawt a, ka hnâr ka lo tum ri dat a. Thartei chuan a lo kawp a nih hmel viau, a fel hmel hle khan ka hria a; mihring hi chu kan landan ang mai hi kan lo ni ṭhin lo a ni. Mampuia mizia ka hrechiang a, ka fuih mawlh mawlh bawk a. A lungleng in tih thawven luih tum hian a ni lo lam kawng a zawh palh ka hlau zek zek bawk.







"U Malsawma hian i chanchin a ngaihven viau ania, phone i kawl loh avang hian a rawn be pawp lo mai chauh che niin ka hria" a rawn ti teh daih a, ka rin loh lam thil daih a ni. "A ho em mai, a mawiah a ngaihven ve a nih chu" ka lo ti let hmak a.





"Ani lo, a awmdan hi a mak ka ti. Vawi tam tak i chanchin min zawt tawh, U Tleipuii bulah pawh a zawt fo anih hmel. U Hriathlua a venthawn avangin a rawn sawi ngam lo mai mai anih kha" a la rawn ti leh zel a, chulam chu sawi tam ka duh lo. Chhuanlam siamin phone chu ka dah ta daih a.






'Chhungkaw chanchin ka zawt ang' ka tih ve te pawh Malsawma chungchang a rawn sawi tak avangin ka zawt ta lo. Ka ngaihtuahna a peng zo a, Hriathlua lakah ka in thiam lo nghal em em bawk. Ani hi ka theihnghilh tak tak thei dawn lo em ni? A hming ringawt pawhin min la ti danglam chu a nia. "Malsawmzual, i mak mange!" keima hriat tawk lekin ka ti sap a.






Nupa rek a awm tih takah an felfai thlep a, an In zau lem lo ah chuan engkim a awm. An inchhung khur changtlung zet chuan U Hmaa'n a mawhphurhna a hlen zawh zia a ti langchiang a, an bungbel fai sar leh an bungraw hnum hlarh te chuan Amuani hmel a tilang mawi em em bawk. Tlai lam eirel in kan che dun mawlh mawlh a, kan chhungkaw chanchin te min zawt pah reng bawk a. Ka sawi chhung chuan lunglenna in min rawn tuam veng veng a, ka chhungte ka ngai thar kher mai. Ka pian seilenna Inchhung boruak leh tuna ka khawsak tâkna chhungkaw boruak inthlau lutuk chu ka ngaihtuah thui ngam lo, ka hnuk a ulh dawn tlat zel.






"In chhungkaw zia leh helai chu a in persan hle ang. I awm rei anga, engkim i hre chho anga; tawrhchhel viau a ngai dawn a nia. Keini chuan kan hre hlei hlui tawh a, itan erawh thil thar tam tak a awm dawn. A chang chuan ka ui ṭhin che" a ti malh malh a.





Ka lo nui hak a, "Ui nachhan bik tur ka awm loh hi, engmah ka ni lo" ka lo ti vat a. Chhungkaw thil a nih avangin a sawi thui duh lem lo, an in neih tirh a an khawsak harsat zia te a sawi zui siam siam a; ngaihnawm ti zetin ka lo ngaithla kar reng a. Tun dinhmun thleng tura an beih nasat tur zia ka lo ngaihtuah rauh rauh thung.






Khawthim rual deuhthaw in chaw kan ei a, chhun lamah engvakmah kan ei loh avangin kan ril a ṭam dun bawk a, kan ei tui dun hle. Kan chaw eikham rual in ka pa a rawn lang hlawl a. Eng eng emaw sawiin kan ri ve luam a, a ruk tak chuan Hriathlua te ka ngaihtuah viau tawh. Rilru khauh leh inti pa chi a ni ve a, a chetna tur ngaihtuah chiang mang lova chet buan buan a ching hian ka ngaihtuah a ti zual ṭhin. A bula han sawi lah hian a ngai ho thei viau a, 'Mipa ramchhuak te chu ni thum vel an reh hnuah zawn chauh tur' te a ti liam puat a; kan ngaihtuahna hi a in ang lo ṭhin si a, ka hah ru ngawih ngawih ṭhin.





Zan dar 10 a ri thuak tawh, kawt a bike ri hlat hlat thawm ah chuan ka tlanchhuak thuai a. U Hmaa chuan nui sangin "I va rawn tlan chak ve? I lung a lo leng hman a ni maw?" a lo ti fiam hluai a. Inchhung lamah kan in zui lut thuai a, an vur bawm ken chhuat a dah pahin U Hmaa chuan, "Zothan, han hawng rawh le" a rawn ti nghal a; rang takin ka hawng nghal thuai. Sangha lo awm khat ṭan mai chu ka khêk pui hlut a, ka khawih let zung zung hlawm a. Amuani'n chawhtawlh rawn la vatin kan bun thuai a, kei a phur pheng chuan chawhtawlh khup thawkin ka dai baw pek a; Sangha dim ngai bawk nen kan rutkhawm rei viau mai.






A zatve a sem in hawn turin kan dah fel diam a, chaw ei kan siam sak zui thuai a; an ril a ṭam tawh viau ka rin avangin ka che sawk sawk a. Ka pa in an kalna chanchin te a lo zawt luam a, ram chin a hre bawk a, kal ve ang mai a ni.






Khawpuiah hetiangin Lui an kal ṭhin tih ka la hre ngai lova, mak ka ti viau bawk. An chaw eikham ah rei vaklo kan ṭhut khawmuan leh hnuin haw lam kan hnaih ta thuai a, In lamah Rinrina'n a pa a lo nghak tlat a, Sangha a hmuh chak avangin a mu duh lo a ni awm e. Ka pa a awm ve avangin kan pathuam in kan in phur haw ta a, puitling ṭhiau pathum kan in hnawh takah chuan hawi pawh ka hawi ṭha hlei thei lo. Ka pa tla teuh ṭhin lutuk leh min rawn kuah hreh deuh bawk si chu ka nuihpui vak vak a, zan reiah khawlai dungah kan ri chho bâwk bâwk a.







In kan luh rualin Rinrina chu a rawn tho nghal thuai a. Sangha kan bun rualin Rinrina chu a ṭe teng tung a. A la dam ho chu lakhawm in burah a khawi a, hmuhnawm ti zetin a thlek hâ hâ reng a. "Apa....a nu te in man tel em? Khawi hi nge hemi nu hi?" tih pahin a kawk kual dan dan a. "A nu in man tel loh chuan a nu chu a lungleng khawp ang" tih pahin chhuat a bawk meuhin a Sangha khawi, tui a leu kual zar zar chu a en deuh deuh reng a.






Hriathlua inbualna tur ka siam sak zui a, a inbual chhungin a hmanraw ken te ka lo chingfel leh zung zung a. Rinrina hlim lutuk chuan mutna nachang a hre leh pek lo, a hritlan kan hlau bawk si; Api in a paw lui ta a, a ṭap deuh pur nghe nghe. Hriathlua inbual zawh veleh mu turin pindan lam kan pan zui a, a chau ve em mai a, ṭhut khawmuan leh pawh a peih meuh lo.






"I in test dawn lo em ni?" tih pahin puan a sin ṭha sut sut a, ka harh zawk. Ka lo theihnghilh hmin der mai. Inhnuai lamah chhuk leh nghal thuai in ka nu hnenah Zun test na chu ka zuk dil nghal thuai a. A tihdan tur min hrilh hnuah Bathroom lamah ka lut zui vat a. Rei fe ka nghah hnuah mit siai chungin ka en a, rin sen pahnih a lo lang kalh mai; "Nu ka ni ve tak tak dawn ta" ka nui hak a, ka ding a, ka âwm chu ka kut pahnih a dawmin ka thaw ham ham a.






Ka thinphu dup dup chu ka dawm vang vang a. Ka nu in min rawn koh takah chuan rang takin ka chhuak zui vat a, ka thil ken lai chu ka entir ve nghal a; hmel hlim sarh in min en vang vang mai. Ka pa lah chuan min chibai teh ngawt bawk a.






Inchung lamah phûr zetin ka chho zui leh a, ka phi chung a ni ber. Hriathlua mu zangthal duai chungah chuan ka thil ken chu ka theh thla tap a, rang takin a lo la vat a, a en nghal vung vung a. Keiin beisei nei zetin ka lo en ve rân bawk. Rinrina a nu in a pai tih a hriat hlima a lawmzia a sawi kha ka hre ve kar. Rei fe a thlek hnuah min pe lêt vut a, a mit a chhing nghal daih a; kei ka lo hawi hai thung.





"Engatinge? I lawm ve lo em ni?" ka ṭawng ri chu a zâwi hle, ka beisei ang thil ka tawn loh vang a ni mahna.





"A ṭha viau alawm, lawm loh pawh ka hre lo. Ka chau lutuk, mu ang" tih pahin a saisir zui nghal thuk a, a puansin laiin a in lukhup zui hmak bawk. A awmdan chuan min ti hrilhhai takzet, ka lo rindan chuan phur takin a lawmzia a sawi anga; duat takin min kuah ka lo ring kha a nia. Chutiang boruak reng reng ka tawng ta lo chuan min ti na ngut ngut bawk. A fa pai tur hian min duh lo nge ni ang? Kei nena fa neih ve hi a duh lo zawk?






Ka pum chu ka dawm rân a, ka pum chhunga naute in siam ve ṭan mek chuan a pa lawm a hlawh ve tehchiam lo tih ka hriatna chuan min ti na em a ni. Ka mittui ka khap hnâm sak a, ka chhungril na veng veng chuan thâwk ngaihna hrelo khawpin min ti na bawk. Hriathlua hian eng rilru chiah nge a put ang le?








(to be continue..........)


Show post links
Top

[Ngaia]

DEAR PAIN
Chapter-15




By: Brigida Hugo






Kan hun hmandan a ngai deuh pât reng a, danglam awmchhun chu Hriathlua a ni. Nau ka pai tih ka hrilh zan aṭang khan kar khat zet a liam leh tawh a, ka nau pai chu a hua emaw tih mai turin a ni telin a nung ho tawlh tawlh a; rilru na vawng vawnga a lengchhuak tur ka thlirliam Ni a tam ta hle.






Kan In sak pawh kan chhunzawm ve reng a, ka awm nuam lo deuh nghulh reng chuan chet vel kawngah pawh min ti hnufûm deuh; ka awm âwl deuh lahin ka rilru kâwmin thil ṭha lo pui pui ka ngaihtuah a, chumi tih reh nan chuan hah hnêp a chet ka duh lawi bawk si. Ka nunphung chu a buar ru takzet a ni.






Ka pi hriselna a ṭhat vak loh avangin hna kan chawl a, ka nu leh pa ten in entir turin Damdawiin lam ah an hruai a; Rinrina nen in kan nghak thung. A chhun ei tur ka siam mawlh mawlh laiin Hriathlua a rawn haw a, a zing tho a chhuak nghal kha ania; chaw pawh a la ei lo. Ṭhutthlengah chuan a rawn bawk zawi nguai a, zu rim a nam rum rum bawk. Rinrina chuan lo ṭhut hnaih vatin a motor lem ke thlawn chu a lo hmuh vat a, "Apa, hei hi a chhe daih a, min vuah sak teh" a lo ti nghal zat a. "Khawi nge....kalsawn teh" a lo ti hlur a, rang fe in Rinrina chu ka lamah a rawn kal nghal vat a; a hmel chu ka lo en reng a. A pa, a pa diktak ngei chu a hlau hle tih chu a mitmeng ah chuan hai rual a ni lo. "Bawihte, hetah hian ṭhu rawh" tih pahin Dawhkan kîlin ka lo ṭhut tir nghal vat a.







"Ka ril a ṭam, eitur ngaihtuah teh" bawk thlur chung chuan a ṭêng chhuai a.





Rum fe in ka melh ngheng a, "Chaw i ei duh em?" ka lo ti vat a. Rinrina noodles eitur ka suah sak pah nghal bawk.





"Thingpui lum rawh, a hmeh tur dawrah zuk en bawk la" a rawn ti leh hluk a, In-a a awm hi chuan ka ṭhu hman meuh lo a ni ber e; a len bo daih hian ka hahdam zawk fo mai.






"Bawihte, hei hi lo ei la. I pa eitur ka zuk leisak lawk ang aw?" tih pahin ka Noodles chhem daih mek chu Rinrina hmaah chuan ka dah thuai a, ka chhuak zui nghal thuai bawk a. A duh tura ka rin deuh te chu ka en kual thuak thuak a, Cold drinks ka lak tel sak bawk. Hmanhmawh zetin ka haw leh nghal a, a lo mu hnar tlur tlur mai; ka thil khai lai chu chhuar ah ka dah lut vat a; Chair ah ka ṭhu zawi hnawk. Khawlum leh Hriathlua rim chu ka rui ni mai in ka hria, Chair nghenchhan chu nghengin ka chhîng vang vang a; ka pum no nghulh reng chuan ngaihtuahna a la peng thei meuh lo.






"Anu, apa hi a sual tiraw?" Rinrina chuan a pa tih harh hlau zetin a rawn ti sa sa a.




Ka meng nghal zawk a, min lo en kar mai. "Engatimaw?" ka ti nghal thuai a. Apa in a vin na kha a la na deuh ni berin ka hria.




"Zu a heh si, kei chu ka len hunah ka in ve miah lo ang" a ti zui leh niah niah a, a bula tui ka chhawp chu a in zui khawlh khawlh bawk a.




"Zu in chu a ṭha lo, in ve duh miah suh. Miin 'misual' an ti ve mai ang che" tih sar sar pahin a plate ruak chu ka seng sak thuai a, ka sil zui mawlh mawlh a.






Pher phah in a toys khalh tur ka bun khawm sak rûih a. Ṭhian a kawm tam loh avang hian in lama a in awm tleina tur toys a ngah viau mai. Ṭhutthleng pakhatah chuan ka mu zal ve a, Hriathlua mu hnar bur bur chu rum zetin ka melh leh ngheng ringawt ṭhin. Nau ka pai tak avanga chuti teh hrepa a nungchang danglam ta chuan min ti lawm lo hle bawk a. Rinrina toys khalh lai chu ka en vang vang a, vannei bik riau ten ka hre leh hnuhnawh a. Anu in a pai tirh a Hriathlua lawm dan kha ka la hre reng, kei erawh chu ngaihsakna leh duatna vawikhat pawh ka la dawng ve lo thung.






Hmanhmawh zetin ka pa a rawn lut hlawl a, ka nu leh ka pi hmel ka hmuh tel loh avangin ka ngaih a ṭha lo nghal viau mai. "I pi an admit a, mamawh zual lam turin ka lo haw lawk. Puan sin tur te kha han dap khawm la" a ti nghal zung zung a. Kei pawh hmanhmawh takin ka che zui nghal sawk sawk a.






Ka pa sawi danin ka pi chu Damdawiin ah a lo chau zual a nih hmel, In lama in enkawl ai chuan in admit mai kha an duh tlang zawk anih hmel. Ka nu in a riahpui dawn avangin a mamawh nia ka hriat te chu bag ah ka dah sak nual a, Rinrina lo phili ve sek chuan min tibuai letling; a pi a riah bo dawn avangin a thlaphang deuh niin ka hria. Ka pa chuan Rinrina chu thil awmzia ṭha takin a hrilh malh malh a, a zia ta deuh e.






"Kan Lalhriathlua laktlak loh lutuk lah hi, hei a chatthla leh ringawt tawh a ni maw?" min melh zawk pahin ka pa chuan a ti nghut a, ka lu ka lo bu nghat a. Tun hnaia chhungkaw tan a ṭangkai loh zia ka hria, keimah thleng chuan nuam tih lohna hian min tuam rûn reng mai. Ka pa kal leh nghal a ngaih avangin thingpui ka siam sak thuai a, tlai chaw erawh U Hruaitei'n ka pi chanchin ngaihven pawhin a pe dawn a, ka thawveng huai mai. Hriathlua hi hetiang mihring nep lutuk hi nilo sela chuan In lam nen buai kawp pawh ka huphurh hran chuang lo.






Rinrina'n a pu kal tur thlah a duh tlat avangin thui lo te kan kal ve a. Taxi ruak lo tlan chu phar in a chuang lut zui thuai a. "Rinrina pa kha kaitho rawh u. Tun ang hunah ruih hun pawh a nilo" a ti nuah nuah a. Engtinmah ka chhâng hran lem lo a, kaihthawh pawh ka rilruk hek lo. Muhil reng sela ka tan chet a nuam in a hahdam zawk bawk.






In kaiin In lam kan pan dun hnak hnak a, dawr kawt zawn kan thlen chuan an dawr nghaktu Pa Peka chuan "I mei a ni ringawt kha kha, ka rin ai daihin a nel che a. I duat viau a nih hmel kha" a lo tih teh luam a, nui var varin Rinrina chu ka en a, "Amah tê hi, a fel reuh lutuk. Min nel nghal em em a, min ko mawlh mawlh a. Ngainat loh a har riau asin" ka ti let ve vat a. Keima tumna ringawt chuan hetiang a inpawhna hi kan inkarah a awm thei lo tih ka hrechiang hle. Naupang lâwmna siam kawngah ka pachhiat zia ka hre hneh viau bawk. A pu pawisa pek in thil a lei zui zat a, kan haw zui ta nghal a.






Eirawngbawl nan a la hma tho bawk a tiin pawn lam hnawk deuh te chu ka thian fai leh a, khawlum nen thlan a tla bat bat mai. Zu bur ruak let pheng phung ṭhin hi ka ning ṭhin viau. Hriathlua leh a ṭhian te'n zan lamah In rel hi awmkhawm nan an hmang fova; an sulhnu a pawr thei si, a thianfai tu nih a hautak ṭhin viau mai. Bawlhlawh hal tur ka chhekkhawm mawlh mawlh laiin Hriathlua min au ri ka hria a, ka thiltih laklawh lai dah in Inchhung lam pan in hmanhmawh takin ka tlan vat a.






"Ka ril a ṭam, khawnge i eitur lei te chu i dah?" a lo ti rum ul a, a ṭhu tum bur bawk.




"I lo muhil leh hman sia, chhuarah khan ka dah luh kha" tih pahin in her leh mai ka tum a, "Rawn la ta che maw le, ka ṭamchhawl dawn hi... Mi ngaihsakna reng reng nei lo mai" tih pahin a per ri ṭhuai a.





"Ka thil tih lai a laklawh deuh a, chuvang maw le" tih thuai pahin chhuar lam ka pan a. Eitur chu ka chhawp nghal thuai a, Cold drinks chu hawng zui in a in khawlh khawlh a; a ner zui sawk. "Hetiang ai chuan thingpui ka ngeih zawk ang" tih pahin Cold Drinks bûr ruak chu chhuatah a paih ri ṭhak a. Engkimah hian phunna tur a zawng a ni ber. Ka chhang zui duh ta lem lo. Ngawi rengin thingpui chu ka siamsak zui thuai a.






"Ka pi an admit a, eng emaw thut tawk thei reng kan nih hi. I zu in lutuk te hi sim ve deuh teh" ka pi chanchin ka hriat ang ang chu ka hrilh zui a, engah vak a ngaih loh hmel hle leh nghal.





"Buai nuaih khawp in ka in chuang em ni? Chungte chu a tirah min hrilh ve ta che u. Tumah hian mi in ngai pawimawh lo" a ti hluk hluk a.





"I muhil daih alawm, harhfim khan awm ve reng rawh" tih ve nghat pahin pawnlam ka pansan zui daih a. A bula ka awm reng hi chuan ka thaw a ipik ngawih ngawih zel, lungawilohna leh vuina a ngah em em a; a in hrikthlak ngam ve na tawk ka nih avang hian ka chungah hian a leihbaw ṭhin ni maiin ka hre tawh.






Barel chhia ah bawlhhlawh ka hal a, Rinrina phur phengin a lo hawlh sek bawk. A in tih kan palh ka hlauh avangin ka kai sawn dawr dawr a, Inchhung lamah luhpuiin ka in silfai thuak thuak a; eirawngbawl turin ka in ruahman zui ta nghal a.





Hriathlua pawnlam pan leh mek chu ngawi rengin ka thlir liam a. Ka thusawi te'n amah ah awmzia a nei lem lo tih ka hria; a duh anga a awm pawhin lungawilohna a zawng reng a, lo khap beh chiam tum kha buaina a thleng tam mai mai tih ka hre bawk. Nunphung pangngai a neih leh hun tur chu nghakhlel takin ka thlir tawp a ni ber mai.






Eirawng ka bawl zawh tawh lamah U Mama hnathawk haw a lo peng kawi a, ka pi chanchin hriatchian tumin min rawn zawt nghal zung zung a. Ka hriat ang ang chu ka lo hrilh ve leh a, ka pa a lo haw mek tih a hriat takah chuan nghah ve law law a tum ta bawk a. Thingpui ka lum sak a, kei pawh ka insiam kep a, thingpui in pahin kan titi dun ve barh barh a. Hriathlua chanchin min zawt uluk viau mai. Kei pawhin U Mama bulah chuan ka thup mawi duh bik lem lo; a Zu in ka nin zia thlengin ka sawi bawrh bawrh a, in bunruahna tur ka mamawh ve bawk a ni.





"Hetianga a nun tlat ṭhin vang hi alawm buaina a tawh fo reng, a nupui hmasa te paw'n an kalsan nachhan chu...." a tih lai chuan zawhfiah chak ka neih avangin, "U Mam.... 'Rinrina nu khan ka hnathawh laiin min hawsan ringawt' a tia, a ni tak tak em?" tiin ka lo pawtchat thuai a.





U Mama chu a nui huk huk a, "Zanah an in hau vak alawm. Hriathlua thikthu chhe lutuk maw le. An nu kha chhun lamah Nu Mami te Inah a leng a, tlai chaw eitur in an sawm nasa bawk nen a ei nghal a. Chaw eikham veleh a lo haw nghal mai a. Chu chu a nilo lamah a kai peng a. A âng tun tun reng a, a nupui kha uire ang hial in a chhuah a. Haw tur te khan a tia, chhuah a tumin a phal leh chuang bawk si lova; kut te hial a thlak a. Ani lungawi bik lo khan a hnathawh laiin a hawsan anih kha, a awm laiin haw san theih hek loh" a ti ta mawlh mawlh a, ka chil ka lem khawlh mai.






"Tunge a thik ber chu?" ka ti leh hram a. U Mama hmel chu ngun takin ka melh kar a. Rinrina chuan kan thusawi lai chu a bengkhawn em tih ngaihvenin ka thlêk dêk dêk a. A pa chanchin kan sawi hi a hrethiam ve tawh em em a, a hriat laia a pa chanchin mawi lo lam a hriat hi ka duhlo viau bawk.





"Awwww..... Siama saw. Thil awm ang lo lutuk maw le. U te nupui tiin an duhsak em em a. Hriathlua rilru hi a chhe em a ni" a ti zui hmuk a. Hriathlua sawi dan nen chuan a dang ta hlak mai. Thil tam tak min hrilh a, ka lo awih nghal em em zel kha a nia. Thildangah pawh thudik tawk lo min hrilh fo in ka ring ta rum rum mai.





"A ti ve mah mah a nih chu. A nu tel lovin Rinrina Anganwadi a hruai te a ngaih phah a; nu ho kara awm ve kûk nuam a tih loh tehreng nen" ka ti zui leh hlak hlak a. Pangngai taka zawh tawp ai chuan amah Hriathlua ṭawngkam hmang ngei a thudik hriat ka duh bawk. Thudik zawk a awm ka rinna erawh a lian hle thung.





U Mama nui khur dut dut chu ka en reng a, ka nui sak. "Khai a" tiin U Mama chu a nui ring zual sauh a. A sawi zawm tur nghakhlel takin ka lo nghak ru ngar thung. "Chutiang chuan a sawi em ni?" nuih huk huk pahin min melh zuk a, a la nui huk huk reng bawk.





Lu bûk nghut pahin thingpui no sengin ka tho zui daih a. "Vawikhatmah a fapa hruai hian Anganwadi a la rap lul love, a ngaihtuah lo hrim hrim. Ama thên thên in a thên kual a, fapa a nei tih pawh a in hre meuh em maw ni le? A fapa in zan ṭah a vei lai te khan a ning lutukin a riah chhuahsan fo alawm. Rinrina pawh hi a nu bulah khan awm tlang mai se ka duh zawk a. Ka nu leh pa hian 'a tel lo in kan awm thei lo' an ti deuh tlat a; an va dil ngawih ngawih a, an hruai haw leh anih kha" a tih lai chuan ka nghilh deuh dup in ka hria.






"A va mak ve a, a sawi danah kha chuan a nu te khan an ngai a, riak turin an hruai phei a; a mu duh ngang si lova, an buai leh ta sia. An rawn phone a, hruai haw leh mai turin an rawn ti leh ngawt kha ania. A nu in a enkawl thei meuh lo niin ka lo ngai a" ka lo ti thuai a.





U Mama chu a bu nghut nghut a. "Thudik tâwk lo tam tak i hria a nih chu" a tih mek laiin pawnlamah thawm a rawn awm a. Kan hawi rual nghat vat a, ka pa a rawn lut zui nghal a.





"Engnge ka pi chu?" ka lo ti thuai a. Ka pa chu a ṭhu thuai a. A hmelah chuan a hah hle tih ka hmuthiam. "Thingpui ka rawn thli ang aw?" ka tizui thuai a. "Engnge i thawh a?" ka pa chuan U Mama chu a zawt zui nghal daih thung a.





"Pu Thanseia te In thar ah kan va thawk maw le.." U Mama'n a tihlai chuan ka pa bawk chuan, "Saw, anni saw an rawn che thei sawt riau mai. Eng emaw Dan phal loh thil te hi an khawih a nilo maw?" a lo ti deuh hlut a.





"Chulam zawng ka lo bengkhawn lem lo khawp mai" U Mama'n a tih sup lai chuan ka pa chu thingpui ka pe a, an bulah chuan ka ṭhu ve nghal vat a. Ka pa leh U Mama chuan Hriathlua chanchin te an sawi luam a, a nupui awm ve reng lai mah nise engkim hmu a hre ve vek ka nih avangin min hmaizah em em hran lo.






Zan boruak a thiang kâk a, engkim ka khawih fel hnu chuan Rinrina bulah chuan ka ṭhu a. Ka ngaihtuahna luah bertu chu Rinrina mutna tur ber a ni. A pu bulah a mut duh ka ring chiah lo bawk si. "Bawihte, api kha Damdawiin ah a riak daih dawn sia. Zanin chu kan bulah riak mai ta che?" ka ti seuh seuh a. A ngawi reng a, min chhânna nghakin ka ngaichang reng bawk.





"Apu bulah ka riak mai ang. Apa in min hau ang" a rawn ti chu ka nui tawp chiang hle. Rinrina chuan min ngaina ve em em a. Kan bula riah a hreh ka rin loh tehreng nen a pa vangin a hreh tih ka hria chu ka rilru a na ngawih ngawih bawk. Ka ngaihtuahna a vak kual zau nghal hle bawk a. A nu in a pai tih a hriattirh pawha a lawm em em a fapa pawhin a ngaina lo anih chuan, ka puma awm mek hmalam hun chu a thim viau in ka hria.






Ka pa thimhlim lengchhuak a rawn haw a. Rinrina a rawn chhawnchhaih danah tlem a va lem tih ka hrethiam nghal vek bawk. Rinrina nen chuan an inthlem a, pindan lamah chuan an in luhpui thei ve mai bawk a.






Sana ka en a, zan dar 10 a pel tawh. Hriathlua thawm a la reh tlawk tlawk a. Khum bul tukverh bulah chuan ka ding a. Pawnlam boruak chu ka thlir kual reng a. Ka hun kal tawh te ka chhui let a, helai hmun a ka hun hman mek te ka chhui thleng a. Ka hun hmandanah chuan inchhirna ka ngah telh telh bawk.






Inhnuai lama kawngka rawn in hawng ri rawk chuan ka beng a verh zar a. Ka pasal thawm chu a rawn ṭha haw hle tih pawh ka hai lo nghal viau bawk. Muangchangin pindan aṭang chuan ka chhuak a. "I rawn haw tawh maw?" ka tih rual chuan min lo melh rûn a. "Helai hmunah hian min lo nghak thei hlawl nange?" a rawn ti nghut a. Engtinmah ka chhâng lo, ngawi rengin ka pan thla chhat chhat a.





"Mu ang" tih pahin min rawn kal pelh pahin min su her deuh nawk a. Kawngkapui pawh a kalh miah lo tih ka hria. Ka enfel zung zung a, kan pindan lam chu phûr lo zetin ka pan chho zui ve chhat chhat a.






Pindan kawngka ka hawn rual chuan Khum a ṭhu chungin min lo melh ngur a. "Bawihi, min va ngai lo ve?" a lo ti nghut a. Engtinmah ka chhâng hran lo. A lakah hian enganga rilru put tur nge tih pawh ka hrethiam tawh lo ni berin ka hria.






Khum ah chuan muangchangin ka ṭhu a. Min rawn hnaih nghal thuai a. "Engnge lungawi lohna i neih? Ka rawn haw tawh hi" tih pahin min rawn kuah a. Ka biangah rawn fawp zuiin ka hnute a rawn ṭhâm tâwk a. Thil ho te te ah pawh lungawi lohna nei reng leh zawng reng anih avangin min khawih ang ang chuan ka awm tawp a ni ber. "Bawihi...ka ngai tawh lutuk che a. Ka rawn haw nghal sawk sawk" a rawn ti zui nghut a, ka nghawng ah a rawn fawp du du bawk a. Min ngaih avangin zan dar 10 pelh tawhah a rawn haw anih chu!






A zawhna te leh min thlakhlelhna a lantirna chu pakhatmah ka chhâng lo. Ngawi rengin min khawih ang angin ka awm a ni ber mai. Muangchangin a tho ṭuih ṭuih a, a thawmhnaw a hlip thla zui sut sut a. Ka hmaah chuan saruak ngal ngatin a rawn ding a. Ka tukhum sam ah rawn ṭhâm in min chhuk melh ngur a. Ka hnathawh tura a bituk chu ka hai lo nasa mai. Ka taksa chau leh ka pum chhunga naute in siam ṭan tir ṭham vel avanga ka pum no nghulh luak chhuak nen chuan a in rem hlawl lo.






Ngawi rengin ka melh chho ngar a, "Che ta che..." tih hrâwk pahin a hma aia na mahin min ṭhâm zui a. Ka pasal zu rui duhthusam chu ka tihsak a. A thaw hulh hulh karah ka mittui luang ngiai ngiai chuan ngaihven a hlawh lem lo. Ka uak leh ṭhawt ṭhin a; mahse, a tiphûr zual sauh lawi si.





Khumah chuan min thehphei ṭhuai hi a ni ber a. Ka mittui chu hrufai thuai in ka mit ka chhing nghal vang vang a. Min rawn hnaih mai emaw ka ti kha Khum sir lamah chuan a ri rawk rawk a. Muangchang a ka mit ka men rual chuan puan hlai tak nen Khum ah a rawn ṭhingṭhi kai ve leh mek thung.





Ka kawr chu phelh ṭhat a phelh a awm lo. A phih sawk sawk a ni ber a. A thaw huam huam bawk a. A puan rawn ken phei chu a vial fîp nawk nawk a. "Engnge i tih dawn?" hlauthawng ru zetin ka lo ti zuai raih a. "I hre mai ang" bung zeta min chhânna chu min duatna ṭawngkam ah ka ngaih mai a ngai.





Ka taksa a inbel hrim hrim chu a phih sawk sawk a ni ber a. Engmah in bel ka nei tawh lo. Ka pasal hmaa chutianga awm chu nilo ila ka zak viau ngei ang. Ka dul zawnah min kap kalak in a rawn ṭhingṭhi a. Ka kut pahnih chu la in ka lu chung lamah a la chho a. A puan rawn ken chuan nghet zet maiin a ṭawn ta mawlh mawlh a. "Engnge? Engatinge hetia min tih?" hlauthawng zetin ka ti khûr dar dar a.






Chhanna ka dawng lova, a takin a che salh salh thung. A duhtawka nghet a min phuar hnu chuan a rawn bawk a. Dimna tel hauh lovin ka taksa chu a rawn chên zui ta! Ka biangah te chuan a bêng leh sawk zel a. Na takin min beng lo mah se min ben chhan avangin hrehawm ka ti takzet. A thaw huam huam a, rang taka ṭhingṭhi chungin duhthawh zetin a che zui a. Ka nghawng ah rawn rêk in a thaw leh hawk ṭhin.






Lukham bula a phone dah chu a rawn ri a. Rang takin kei pawhin ka thlek ve vat a. 'Ka nu' hming in ziak kalh chu ka hmu. Phone chu a ban thuai a, "Hemi te chhung lah hi engnge rawn biak an tum sek le? An fanu pasal ka nih angin min zah rawh se" tih deuh hluai pahin Phone chu a Switch off zui hmak a. Ka rilru ah zawhna tam tak a rawn lut nghal zut zut a. Mampuia khan ka nu leh pa inkar ṭhat loh thu a sawi zuk zuk a. Eng emaw a thleng anga, chanchin min rawn hrilh an tum anih ka ring. Ka rilru chhungril ber chuan ka chhungte chu a au lawm lawm a. Mahse, ka tun dinhmun mekah chuan sawi rîk ngamna chi ah pawh ka ngai lo.






Nupa nun min hmanpui dan chu hrehawm ka va ti tak...ka mittui luang tur chu ka dang hram hram a. "Engnge i ngawih reng a? Nang hi chuan min tiphûr thiam hlawl lo anih hi...ṭe rawh" tih pahin ka malpui pahnih chu a ṭhâm zui tâwk a.






Ka pasal tih lungawi nan chuan chu hun, nuam ka tih reng reng lohna hmunah ah ngei chuan a beisei angin thâwm ka chhuah lui anih chu! A duhdan danin min kuai let kual a. A lungawina tur tâwk a chet thawh tir chu ka hna a ni tih zawng min hrilh bawk. A duhtawk a ngah a, Khumah chuan a bawk nghal thlawp a. Ka kut pahnih phuar kawp reng chung chuan theih ang tawk in ka mu kawm chal a. Ka mittui dan beh reng kha a kuang ah a leng tawh lo ania nge, ka mittui chu a rawn luang zâwih a.






Min phuarna a phelh hnu chuan ka in ha sawk sawk a. Ani erawh a dan pangngaiin biak zui tlak a awm lo, a hnâr zui kûk kûk a. A bulah ka khawsa ve a ni tih hria âwm ang pawhin a lang leh tawh lo. Muangchang leh thâwm dîm takin ka tho a. Ka taksa chu na lo lai pawh hi a awm lo ni ber hian ka hria.





Tukverh bulah bawk chuan ka ding leh a. A kut a ka kap vel a suasam na chu a thîp na ṭhûm a. Ka tâi a rawn na ṭawlh ṭawlh bawk. Ka pum chu ka dawm vang vang a. Kan khawsak dan rapthlak zet leh ka pum chhung ka fa insiam mek chu an inrem lo hle tih pawh ka hai hek lo.






Ka mittui a rawn luang ngiai ngiai a. Ka rilru ah zawhna tam tak a rawn lut zut zut bawk a. Engvangin nge he hremhmun ah hian ka awm reng? An fanu atan min duh nise ka zahawmna dah pawimawh in Palai te an kal tawh turah ka ngai. He mihring hian a duh duh dana bungraw pakhat ang maia min hmang chu ka na ngawih ngawih bawk. Ka hmangaih em em Malsawma tihel nana kha rilru ka lo siam kha inchhirna tawp thei lo in min zui nghal chu anih hi.






Khum lam chu ka hawi a, chu mihring chu Setana hmuh tluk hialin ka hmu nia. Muangchangin ka pan a, Khum bulah chuan ka ding ngawi vang vang a. Ka huaisenna hian tlin sela chuan chil chak ṭhawt ṭhawt a, a nghawng ah chuan reh bawrh bawrh ka chak takzet. Mahse, hmeichhe dawihzep tak ka nihna hi a lang leh ṭhin.






Lukham bula Phone let bal chu ka ban de de a. A hnâr kûk kûk tawh bawk a, a harh leh rinna ka nei lo. Phone chu ka hmet nung nghal a, ka han enkual chiah chu ka chhungte'n min rawn biak an tum nasa hle tih ka hmu nghal. Ka pa ngei pawhin min rawn biak a tum tih ka hmu a. Hlauhthawnna in min phuar nghal mup mup a. 'Ka chhungte'n min rawn biak an tum tih te chu a rawn haw tirh te khan engvanga min hrilh lo nge a nih? Engvanga ka chhungte lakah hian min dah hrang tlat nge a nih?'






Mampuia chu biak tumin Phone chu ka ngaithla vang vang a. A reh tlawk tlawk a, ka nu leh ka pa pawh huphurh ru zetin biak ka tum leh nghal a. Mahse, an vai a min chhânna awmchhun chu Phone ri tlang tlang chiah chu a ni. An mutui viau tawh emaw chhungkaw boruak fuhlo lutuk avangin an la buai hle emaw a nih ka ring.





Tleipuii biak tumin a number ka chhu leh mawlh mawlh a. Ka beidawng hman ṭep tihin phak zetin, "Aw...hello" a rawn ti ṭuak a.




"Ṭhiannu, kan inbiak lawk a ngai" ka ti sa sa a.



"Engnge ni ta? Eng thil nge?" a ṭawng rawn fiah nghal zat danah hlauhthawnna nen a harh kâwk tih ka hre mai.




"Naktukah min rawn hmu ngei ngei rawh. Ka mamawh che. Ka dah aw?" Hriathlua in let rûm ṭuah ṭuah en chung chuan ka ti sawk sawk a. Phone chu ka hmet hlum nghal hmak bawk a. Ka chhungte biak ka tumna te, Tleipuii ka biakna te chu ka paihbo zui thuai a. Rang takin ka Switch Off zui hmak a. Lukham bulah, a dah dan ang chiahin ka dah zui thuai a, ka thaw huai mai.





Zankhua in vawikhatmah ka chhîng lo hrim hrim. Hriathlua rim tak ṭha zet chuan ka Lu a tina ngut ngut bawk a. Khum tlâng sîr tê ah chuan mu in suangtuahna hrang hrang ka kâwm kual a. Ka pa ka ngai veng veng a, a bulah engkim sawi vek a. Thlamuang taka nun ka châk takzet.






Zing khawvar tur rawn inṭham vel chu thlir tumin ka thochhuak a. Ka lu a rit bûr a, ka meng thial ûrh bawk. Thawm dim takin pindan ka chhuahsan a. Kawngka chu dîm tê in ka hawng a, ka chhuak zui nghal a. In rel ah chuan chho in, ka hawi vang vang a. Zan boruak rit leh uap churh mai luahlan tura Kâwl êng rawn inṭham in Van boruak a ti êng no nghulh ṭan chu boruak thar hîp veng veng chungin ka thlir vang vang a.





'Engvangin nge helai hmunah hian bungraw pakhat ang maia ka khawsak ve reng? Ka hlutna chhe tê mah hmuthiam miah lo bulah hian engvanga khawsa lui tlat nge ka nih? Thil ṭha leh lawmawm lam beisei tur awm chuan miah lohna hmun ah hian engvanga engkim khawih a phar buai em em nge ka nih? He ka khawvel zîm tak hi engvanga kuahkhawm tlat nge ka nih?' Zankhua a ka ngaihtuahna luahtu chu thu hrang hrang chu ka inhrilh nawn leh a. "Ka thei tawh lo...ka thei tawh lo...ka tlin tawh lo" ti sap sap chung chuan ka thaw chhuak siai siai a.






Khua a rawn var chiang ta a, ṭhenawm hnaiah pawh thawm a rawn awm ṭan a. Hmanhmawh takin Inchhung lamah ka lut zui nghal a. Ka hmai ka phih chhung zawng pawhin ngaihtuahna hran ka pu hlei thei lo. Ka chhuak thuai a, Thingpui ka chhuangkai sawk sawk a. Hmai hruk hul tumin pindan lam ka pan thuai a. Pindan kawngkhar ka hawn rual chuan Hriathlua ṭawng ri nuah nuah chu ka hria a. "Bawihtea nu...engvangin nge...min kalsan reng reng a? " a tih chu chiang taka hriat tlak awmchhun a ni a. A thusawi dang erawh a riat nuah nuah ringawt a. Mahse, a thusawi ka hriat theih chhun erawhin ka ke pên a titawp chiang hle thung.






Ka ding ngawi tlawk tlawk a, Hriathlua ṭawngvai riat nuah nuah chu ka melh ngar a. Ka thaw hawk a, Towel bânna lam chu ka pan zui ta nghal a. "I rui mumang lamah tal khan lo intawng nawn leh teh u" tih pahin ka chhuahsan zui ta nghal a.






Zing dang ang tho in kan rualin chaw pawh a rawn ei leh pek tawh lo. Mahse, tunah chuan ngai ah ka nei tawh. A tel lova chaw ei nuam ka tih zawk chang a tam mah tawh zawk bawk. Ka pa chu zingkar pum a Phone hmang kual a ni bawk a. Ka nu te Damdawiin lama an khawsak dan pawh a sawi chipchiar thei viau mai. Ngawi rengin ka pa thusawi chu ka ngaithla kar a. Rinrina ka be leh zeuh ṭhin tih loh chu Tleipuii rawn thlen huna ka thusawi dan tur ngaihtuah in ka ngawi rân reng a.






'Tun bak hi helaiah hian chaw ka ei tawh lo mai thei' tih ngaihtuahna chu hun chu ka hmang mek a. Rinrina baihvai zia tur te ka ngaihtuah thleng daih lawi a. A chaw eilai chu ka lo thlir leh veng veng ṭhin. A nu ang tak takin min en niin ka hria a. A theih leh thiam ang tawkin ka lakah ṭhat chhuahin kawng tinrengah min duhsak ve em em a ni si a. Rinrina vang erawh chuan chulai hmun kalsan chu harsa ka ti ru takzet. Mahse, zankhuaa mu miah lova ka thil suangtuah chuan min rawn luah zui leh in Hriathlua huatna in ka khat leh nghal a. Ka pum chhung a naute chu ṭha takin rawn piang pawh nise a pa hming leh hmel pawh a hriat ka duh lo.





'Ni thar rawn thleng chuan engang chiahin nge keimah leh chu chhungkaw inkarah chuan boruak danglam a thlen ang?' tih ngaihtuah neuh neuh chungin ka pa leh Rinrina chaw ei lai chu ka melh tawn zak zak reng a.






(to be continue.......)


Show post links
Top

[Ngaia]

DEAR PAIN
Chapter-16




By: Brigida Hugo







Chaw eina ka sengfel sawk sawk a. Rinrina School kal tur ka siam zui leh sawk sawk bawk a. Ka hlauh ber chu Rinrina ka hruai hlanin Tleipuii a rawn thleng hman ang tih mawlh chu a ni. Ṭhiannu Tleipuii lah hi thil engkim mai a ṭha zawng a her rem tir duh tlat mi a ni a. Ka tawrhna te, ka harsatna te a rawn hmu thiam leh ngût lo ang tih ka hlau em em bawk. Hriathlua nen an lo inkâwm anga, ani ṭawngkam thiam zet hmachhawn turin Tleipuii hi ka ring zo lo a ni ber e.






Ka pa chuan phone a hmang mawlh mawlh reng a, ka pi chanchin chu ka nu nen phone ah an sawi bâwng bâwng a. Ka nu thu rawn sawi chu hrekim lo mahila ka pa in a chhânna ṭawngkam aṭang chuan ka pi chu a harsa hle tih ka hrethiam mai. Damdawiin chu a ning tawh hle ang tih chu ka ring thiam sa bawk.





"Tirawh le, kal ang" tih pahin Rinrina kawr nghawng chu ka siamṭha pah mawlh mawlh a. "Ka pa, kan kal ania" tih pahin ka melh zauh a. Ka pa chuan a bân a rawn phar zauh a, kan chhuahsan zui ta nghal a.






Taxi kan châng a, School kal hunlai a ni bawk a, an rawn khat ṭhap zel mai si. Sana ka bih ngun tawh viau a, rilru hmanhmawh in awmzia a nei chuang der bawk silo. Ka bâna pawh sek sek pahin Rinrina chuan, "Anu, ke in kan kal mai dawn em ni?" a lo ti ve sek reng bawk a.






Taxi rawn tlan leh pawh chu a rawn khat viau tho mai. Ka lo bih zawk a, Driver chuan min rawn melh vung vung a. "Kan la leng ve em?" ka lo ti thuai a. Motor chu a ding a, Driver chuan hnunglam chu a hawi nghal that that a. "Tlem lo tawlh rem lawk mai ang aw?" tih pahin min rawn melh leh rulh a, "In tlai mai dawn, ka hnawh lui mai ang che u. In nufa khan in inpawm mai dawn nia" a rawn tizui leh thuai a. "Kan lawm lutuk e" tih pahin kan ṭhu lut zui ta nghal a.






Rinrina chu ka nghak rân a, nidangah chuan ka duh aiin hun an hmang rei lo ṭhin. Tun ṭum erawh ka rilru a hmanhmawh takzet. An kal rei ka tih ber Ni a ni hial ang.Tleipuii chanchin hre turin biakpawhna tur ka nei bawk si lo. A rawn thleng tawh anga, zankhua a ka ruahmanna lo siam ve tawh chu a sukuk vek ang tih ka hlau hliah hliah.






Rinrina rawn chhuak chu ka lo vuan thuai a. Hmanhmawh takin In lam panin kan haw zui thuai a. Taxi ah chuan ngawi rengin ka ṭhu a, Rinrina erawhin an lehkhazir chanchin min hrilh melh melh thung. "Anu....naktukah pawh min hruai leh rawh aw?" tih pahin min ngheng ar ar a. "Aw le" ka ti ringawt a, ka ngaihtuahna erawh a vak thui viau thung. Rinrina hian hmangaih tak leh duat taka kuah a, enkawltu a mamawh em em tih ka hria. Mahse, ani avanga a pa min nghaisakna chu tuar reng thei niin ka inhre bawk si lo. Rinrina chu ka kuah ringawt a, ka hmelah thil diklo a hmu ang tih ka hlau em em bawk.






In kan thleng a, ka hlauh rûk ang ngeiin Tleipuii leh Hriathlua chu an lo ṭhu dun rân mai. Ka thin a phu ru zaih zaih a. Mahse, keimaha thil danglam an hmuh erawh ka duh miah lo thung. Hriathlua chu a la meng phelh phung a, a rawn thawhchhuahna a la rei lo tih pawh ka hrethiam nghal vek.






"Bawihte, i inthlakna ka la lawk ange. Khatah khan lo ṭhu rawh" tih pahin ka tho nghal thuai a. Pindan lamah lut in Rinrina inthlakna chu ka la nghal sawk sawk a. Ka chhuak leh chiah chu, "I pasal rilṭam em em in ka awm a, min ngaihsak lo hle mai" Hriathlua chuan a lo ti hmuk a. "Aww....lo nghak ve lawk la maw le. Rinrina ka thlak zo anga, i ei dawn nia" ka tih rual chuan, "I ṭhiannu a awm avang hian zah viau turah che min ngai suh" a rawn ti ṭêng chhak a.






Tleipuii chu ka melh thuai a, phone bihin a lo kûn ngar a. Hriathlua rawn kal phei mek chu ka melh pah ralh bawk a. Ka bul a rawn thleng a, ka bek ah a rawn nem sawk a. "Ka fapa i tih ṭhat hliau hliau avang khan i tihsual ngaidam turin min beisei suh" a ti chiah chu mak ti zetin ka melh reng a. "Engnge? Engnge min en reng?" tih pahin min melh dur khup a.






Keimahah chuan zawhna leh thusawi tur tam tak a awm. Mahse, ngawih hun a ni tih ka hai lo. Tleipuii hriat hlau tih hriat zetin, "Eng ruahmanna nge in neih ni? Ka hriat loh hian thil hi in sawi hnem viau ang ka ring. Min rêl ngei bawk anga" a rawn ti zui sup a. A ṭawng zawi viau na a, Tleipuii chuan a hriat phak tho chu ka ring.





"Bawihte, i kekawr kha lo hlip rawh. I pa chaw ei tur ka siam lawk ange" tih pahin ka tho nghal thuai a. Chaw ei siam pahin Tleipuii chu ka melh leh ralh ṭhin a. A hmelah eng emaw tak hmuh theih ka beisei tehreng nen ani lah chu phone hmetin a lo la kûn ngar reng a.





"Va ei rawh" ti ram hmak pahin Rinrina ṭhutna lam chu ka pan nghal thuai a. "Ṭhiannu, i rawn thlenna a rei tawh em? I va fel em em, i rawn lên teh hlawl a?" engmah hre miah lo ang chiahin ka be zui nghal a. Inchhung luh rual a boruak chhe nghal lutuk khan ka ṭhiannu lo lawm dan tur pawh min mangnghilh tir vek bawk a ni.





A rawn hawi a, a nui lui sak a. "Ka rei hman lo, In lamah tih tur ka ngah lutuk a. In kawmchhak lawkah khian ka kal a, ka rawn lut kawi lawk maw le. In lo School daih bawk sia, ka tum aia rei ka ṭhu tawh zawk maw le" mitko sân âk âk chung chuan a rawn ti ve thuai a.





Ka thlak zawh rual rualin, "Anu, pawnah motor lem ka khalh lawk dawn" tih pahin Rinrina chu a tho zui a. Kawngka sira a Motor lem dah chu la in, a pawmchhuak zui nghal a.






"Khawvel chawhmeh ah hian a tui lo ber ang" tih paha thleng ri bawl chuan Tleipuii biak zawm ka tumna chu a rawn ṭhelh rêm chiang hle. Ka hawi let thuai a, kam ṭhuah puat puat pahin hriat tham mang si lohin a phun nuah nuah reng a. Chung thil zawng zawng chu ka ṭhiante leh ka chhungte hmuh ah ka duh ngai lo. Mahse, tuna thil thleng zawng zawng Tleipuii'n a hmu ve vek chu ka lawm takzet.






Ka tho thuai a, Tleipuii chuan min en reng tih pawh ka hria. A chaw tihbuak nuaih te chu ka phiatkhawm zung zung a. "Mihring ei chi pawh va ni suh" a tih hluk hluk lai te chuan chhânna tur ka va hnawh tawt tak; puakdarh sela, duhtawka in hrosak kâwk kâwk ka chak ber in ka hria.






"Eitur siam thiam lutuk ka hria alawm, rilṭam nen a inmil lo em mai" tih pahin pindan lam chu a pan a. "Hmeichhe pangngai, chhun a lengkual zuk zuk pawh ka hre ngai lo" a rawn ti kher chu ka sa zak mai. Ka lakah hian enganga ṭawngkam na leh tlahawlh pawh hmang sela pawi tihna ka nei ngai tawh lo. Mahse, tun maia a ṭawngkam hman erawh inthlahrung taka ṭhu ngawi ve rân, ka ṭhiannu Tleipuii a ṭawngkhumna a ni tih ka hrethiam chiang hle bawk.






"Khati khan engkim i hmu thiam em?" Tleipuii bula ṭhut pah chuan ka ti sar sar a. A lu a thing mât mât a, "Ka rin phak bak a ni ṭhiannu" a rawn ti sap a.






Inchung lamah chuan thil ri ṭhuai ri ka hria a, ka ding nghal vat a. "Lo ṭhu lawk rawh, ka han kal lawk ange" tih pahin Inchung lam chu ka pan nghal a. Rinrina chuan min lo melh zak zak a. A pa thawm chu ngaihnawm ti takin a ngaithla lo tih chu a mitmengah chuan ka hmuh hmaih hek lo.






Pindan ka lut chiah chu kan Khum chu pawhhlîm nuaih in ka hmu nghal. Min lo melh ngur a, a hmel chu hmuh a hrehawm takzet. "He khum, kan nupa khum ah hian kha mihring kha ilo khawsakpui a maw? I pasal hian i mamawh ka pe zo lo che em ni? Min kham khawp zo lo a maw?" tih pahin a vei kual nghal thuak thuak a. A hmelah chuan pawisawi châk hmel ka hmu.





"Tunge i sawi a? Nang lo tunge ka khawsakpui chu?" ka ti ve nghat a. Engkim hmachhawn ka huam a ngai tih lah ka hai lo nasa mai.






A ding chawt a, ka lam rawn hawiin min kâwk khur dur dur a. A mitmeng sen rûm a min melh ngur chung chuan, "I pum a naute pawh kha ka fa a ni meuh maw? Ka ring nek lo e" a rawn ti chiah chu ka en ngai ka en tlawk tlawk ringawt. Ka rin phak bak ka pasal chuan thu min fah; Chutiang thu em em chu ka pasal hnen aṭang hian dawn ka in ring ngai miah lo bawk. Ṭawngkam chhe tak tak a hmang fo tih chu ka hria a, ka tawng mawlh mawlh bawk. Mahse, ama fa ngei pawh midang fa a puh duh tur khawp mihring anih ka ring lo.




"Eng maw i sawi?" ka ṭawng ri chhuak mang lo, a ri se se a ni ber.




"I hriat vek kha, a tak ngeiin i khawsak pui a, chumi hnuah ka thusawi hrelo der buai suh" a bula Zu no chu a dawm a, a lem zui khulh a.





"Hetiang ang em em a rilru chhia hi i nih ka ring ngai lo reng reng. I mak" tih bak ka sawizawm thei tawh lo. Hmanhmawh takin ka chhuak a, ka mittui a rawn luang nghal zawih zawih bawk. Ka khawhmuh a fiahlo thla ruai a, Rinrina chuan hlauthawng takin min lo en reng tih pawh ka hmu phe ruai ringawt.






Ka hnung a hmanhmawh taka rawn chhuk hlawk hlawk chu ka ngaihven tawh lova, a ke pên ri chu ka hlau tawh lo a, ka ten vel vek tawh zawk. Ka pa rawn lut chiah chuan ngun takin min lo melh ngur a, kan nupa boruak a fuhlo hle tih chu a hrethiam em em dawn tih lah ka hai hek lo.






Helmet a la a, kawngka bula a Bike chahbi inkhai chu a ban zui a. "Lalhriathlu, ṭhu rawh. Khawiahmah kal suh ang che" ka pa aw ri chu a nêm lo viau bawk.





"I fanu hur zet nen khan lo inkâwm rawh u, hun ka nei lo" tih pahin a chhuak a, kawngka a khar ri zui ṭhuai a. Ka pa chu a tho nghal at a, kawngka lam a pan tur chu a kutah ka lo chelh thuai a. "Kal tir rawh" ka ti zuai raih a, "A tawk tawh, kal rawh se" ka tihzui rual chuan Tleipuii bulah chuan ka ṭhu thla hnawk a. Rang takin min lo kuah a, ka mittui ka dang thei tawh lo. Rinrina hmuh laia mittui tih tlak ka duhloh tehreng nen min hliamtu a na em mai a, ka mittui ka dangzo tawh lo a ni.






"Engnge thil awmzia? Eng thu nge a huat?" ka pa chuan min melh ngur a, ka melh zawk chhung pawhin zawhna a ngah hle tih ka hrethiam nghal. 'I fanu hur zet' tih ṭawngkam a hman tel miau avangin ka pa chuan zawhna a ngah hle dawn tih ka hrethiam chiang viau bawk.






"Hriathlua hian ṭawngkam chhe tinreng in min puh fova, ka tuar a, ka tuar zel tih pawh in hmu fo bawk. Mahse, ka pum a naute insiam mek hi midang a puh anih chu! Hei kher hi chu palzam a har ka ti" tih bawrh bawrh ka duh, ka rilru chuan chu aia tam mah chu a la sawi zui cheu. Mahse, ṭawngchhuak turin ka lei a khawng a, ka hrawk ah min hnawh phui tlat a, ka thin zawn a thîp vawng vawng bawk a. Ṭawngchhuak turin chakna ka nei lo.






"Min lo nghak lawk rawh" tih sap pahin Tleipuii chu ka thawhsan a. Hmanhmawh takin kan pindan lam pan chuan ka chho sawk sawk a. Ka thawmhnaw chu ka thehkhawm zung zung a, Bag ah chuan ka hnawh lut nawk nawk bawk a. Ka mittui luang chu ka hru deuh sek bawk a, "I rilru a va lo chhe em em..." ti rilru pah chungin ka pheikhawk te chu ka hnawhlut leh nawk nawk a.






"Anu....khawnge i kal dawn?" ka hnunglam aṭanga min rawn betu aw chu a zâwi sîn viau na a, ka bengah erawh a va ri ring tak. Ka thawmhnaw khung lai chawl meuhin ka ngawi rân a. Thawmhnu chu khung zawmin ka in her zui thuai a. Rinrina chuan hmel ngui riai chungin min lo en reng a.






Muangchangin ka pan phei chhat chhat a. Ka ṭhu hniam a, Rinrina chu nghet zetin ka kuah a, ka ṭap chhuak hawk nia. Rinrina, engmah la hrethiam lo bulah lek pawh chuan inbunruah ka chak takzet. Ka mittui hru hul thuaiin a lu ah ka tuai ne ne a. "Bawihte, i pa hi a sual em mai a, ka hrem lawk ange" ka tih chu engkim hmuthiam leh hrethiam tih hriat tak hian min rawn pawm chawt a, "Kal daih rawh, a sual em mai" a rawn ti leh kher erawh ka hnuk a ti ulh zual sauh thung si.






Ka pa chu a rawn kal hnai a, "Engpawh nise, in thu leh hla ka hre hran lova. Heti khawp hian i dawh tawh a, kan fapa laktlak loh zet hian a chantawk hmuh a phu e" a rawn tidam dup a. Ka thaw huai mai, ka pa a awm bawk a; Rinrina ka ngaihtuahna pawh a ziaawm sawt e.





"Bawihte, fel deuhin lo awm rawh aw? Naupang fel i nih kha" tih pahin ka Purse chu ka hai rak rak a. "Nakinah thil tui deuh deuh ilo lei dawn nia" tih pahin pawisa ka pe a, nidanga a hlimpui theih tehreng nen; a hmelah hlimna hmuh tur a awm lo.






Hriathlua a rawn haw leh hman ka hlau a, a rawn thlen leh hman chuan kan buai nuaih dawn tih pawh ka hrechiang viau bawk. "Kal ang hmiang" tih pahin Tleipuii chu ka melh ralh a. Ani pawh a rawn ding thuai a, ka pa chu ka melh zui ralh a, a lo bu nghut a. Ka pa hi chuan engkim a hria in a hmuthiam ngei anih pawh ka ring.





Rinrina lo ding zum ve zât chu pan lehin a biangah ka fawp zauh a, rang takin pawnlam ka pan zui thuai a; a hmel a min thlakhlelhna lang reng kha ka en reng chuan ka thil tum min ṭhulh tir mai ka hlau a ni.






Step tawpah chuan kan ding dun rân a, kawng kal vel apiang chuan mak tih hmel takin min thlek leh hâ ha ṭhin a; hnuai lam bihin ka ding kûn ngar reng a. Taxi lo tlan chu Tleipuii chuan a lo phar vat a, a hnungah chuan ka bag khai lai nen kan lut zui rawk rawk a. Kan In lam ka pan mai ngam loh avangin Tleipuii zui haw phawt a ṭha berin ka hria. Kan tlanchhuah rual chiah chuan ka ipik lutuk chu a reh huai theiin ka hria, Hriathlua hlat a awm ka lo chakzia ka hre nawn uai uai mai.






Traffic Jam-ah kan tang zeuh zeuh a, Tleipuii leh Driver chu an titi dun bawrh bawrh a; ngawi rengin ka lo ngaithla reng na a, an thusawi erawh sawi nawn dawn ila hriat mumal erawh ka nei hauh lo thung. Ka ṭhiannu te In ah chuan ka awm reng thei dawn lo tih ka hria, thleng phei phawt ila ka awmdan tur chu a chiang mai tur ah ka ngai. Ka thaw halh a, ka pum chu ka dawm vang vang a. Ka fa lo piang tur tan theihtawp chhuah ka ngai tih ka hria. A fa ni lo hial a ngai tu Hriathlua hmuh phak ngai reng reng loh tura seilen tir chu ka tum nghet hmiah bawk.






Tleipuii te In kan thleng a, U Rinpuia'n In a lo nghak teh mial a. Bag nena ka in khai luh deuh rup avangin mak tih hmel zetin min lo thlek vung vung a. Tleipuii'n thil awmzia a hrilh nghal zung zung a; bûk nghut nghut pahin "A nih chu maw le. Inthlahrung reng reng suh. A ṭul chuan hetah pawh i awm rih anga a ni mai alawm. Mahse, i chhungte chanchin hrilh erawh a ṭha ang" a lo ti zung zung a.






Tleipuii mut pindan lamah kan in dah fel zui a, khum ah chuan ka bawk zui thlawrh a. "Hriathlua rapthlak zia kha aw... khatiang mipa kha ka hlauh zawng tak an ni. A zia a lo va thup thiam em em ve le" Tleipuii chuan a ti tlawk tlawk a, ngawi rengin a thusawi chu ka ngaithla reng ringawt a.






"I chhungte chu kan hrilh vat zawk dawn em ni? Engtia tih nge i duh?" a ti zui leh zung zung a, chu tak chu ka lo ngaihtuah mek lai a ni. Engmah hrilh lova awm ringawt chu ṭha ka tih loh rualin, engtinnge min lo dawnsawn ang tih chuan min kap deuh rûn bawk. Mampuia biak mai ṭha in ka hria a, Tleipuii phone aṭangin ka call zui ta vat a.





"Aw, U Tleipui" a rawn tih rual chiah in "Mampui, keimah zawk. Ka lo haw a, Tleipuii te In ah ka awm rih a" ka lo ti nghal vat a; a ngawi deuh vang vang mai.





"Biak i va har em em ve? Chanchin engmah hrilh theih loh in i awm tlat a?" a rawn ti hmuk a, a lungawi vak lo tih a ṭawng hmuk dan aṭang chuan ka hre mai.





"Phone ka neih loh hi, ka nu te'n engnge an tih?" ka tih zawm zat a, a thaw hawk ri ka hria. "Kan Inchhung boruak hi a hahthlak takzet, i hriat ve loh hian thil tam tak a thleng. Ka nu leh pa an inṭhen" a rawn ti zawi sup a, a ṭawng ring lo na a, ka bengah chuan ring tak a ni thung.





"Engnge i sawi awmzia? Engtikin?" tih pahin ka ding hluai a, ka ṭawng pawh a zawi fahran lo viau bawk. Tleipuii chuan min lo en hâ bawk a, melh zawk pahin lu ka bûk khum zauh a.





"Nizan hmasa khan rawn biak che kan tum nasa; phone in chhâng thei bawk si lo a. Ka pa chuan Diktea nen kan kutah In leh lo a dah a, 'boruak dang hip turin ka zin bo rih dawn' atia; nimin zingah khan a chhuak" a rawn ti leh a. Ka thu hriat chu ka rin loh lam daih thil anih avangin ṭawng leh mai nachang pawh ka hre lo. "Ka nu hi a mak sawt lutuk, a hmaa ka nu kha a ni tawh lo" Mampuia chu a hnuk a ulh hle tih pawh ka hria.






"Ka pa chu engvangin nge a chhuah? In ṭhen pawh nise ka nu kha chhuak zawk tur a ni" ka ti chang fak a. Ka nu In lama a awm lai a, ka pa zawk a chhuak daih chu ka ngaithiam thei meuh lo.






"Engmah hi ka hrethiam tawh bik lo, engtia awm nge i tum?" tiin min zawt zui ta daih a. Kan chanchin chu hmaih nei lovin ka hrilhfai vek a. A lungawilohna ah pawh ṭawngchhuak chiam chi a nih loh avangin thu tam a sawi lo, a lungawi lo hle tih erawh ka hrethiam. Ka nu leh pa boruak chhiat laia kei leh zelin buaina ka lo nei chu ka inthlahrung ngawih ngawih a, chhungkaw boruak hre lo lêk a ka awm chu ka in thiam lo hle bawk.






"Engpawh nise, i u Tleipuii nen kan han sawidun anga. Ka awmdan tur chu kan in hrilh ṭha leh mai dawn nia" tiin kan in biakna chu kan ti tâwp ta rih a. Tleipuii phone chu ka pe lêt leh a, zawhna ngah hmel zeta min lo en reng chu mak ka ti hran lo.





"Ka nu leh pa an inṭhen" ka ti mawl teh tawp a, ani pawh a meng zau kawk mai. "A va mak, engatinge?" min zawt let nghal thuai a, chhânna erawh ka nei tam bik lo hle. Chutiang teh nuaih kan nih takah chuan In lama haw mai ṭha in ka hria a, kan ṭhiandun chuan kan sawi dun zui ve niah niah a, "I haw dawn pawhin zanriah eikham lamah i haw phei dawn nia" min ti ta deuh tlat a. Kei pawhin pawi ka ti em em hran lo. Ka boruak nen, chhungkaw boruak lo chhe bawk nen; ka nu hmachhawn chu a huphurhawm zual leh ta sauh mai.






Zanriah kan ei laiin Hriathlua nena kan chanchin leh kan chhungkaw boruak te chu Tleipuii nu leh pa ka hrilh ve mawlh mawlh a. Min fuih a, pawi min tihpui em em bawk. Kawng engkim a min thlawp tlat tur thu min hrilh chu ka lawm a, ka thla a muang hliah hliah bawk. U Rinpuia chuan min thlah phei tum viau mah se ka nu min lo lawm loh tur zia ka hriatchian avangin Mampuia chu min hruai turin ka duh zawk.






Chaw eina kan tihfel laiin Mampuia pawh a rawn thleng phei tawh a. "Ka che sawk sawk ange, lo ṭhu rawh" tih pahin ka che zui sawk sawk a. Tleipuii lah chuan, "Hmanhmawh chung suh, ila ngaihawm alawm" a lo ti sek reng a. Kan In lama ka hmachhawn tur boruak chu a hrechiang hle tih pawh ka hria.






Engkim hmachhawn tura haw phei vat law law chu a ṭha zawkin ka hria. Tleipuii te chhungkua chuan min ngaihtuah em em a. Eng ang boruak pawh tawng ila ka lama an ṭan tur thu min chah mawlh mawlh hlawm a, kan in vai liam ta nge nge e.





"Mampui, engnge ka nu te chu an buaina bul ni reng reng?" tih pahin Mampuia chu ka ṭhut hnaih salh a. A tlan muang vak lo bawk nen ka beng ka dawh hnai zual nghal zat a.




"Engnge an boruak bul ber ka hre lo. Kan hriat ah an buaina lam hi chu an sawi ri ngai lo. An thu a tawp chiang viau tih erawh ka hria" a ti ve nuah nuah a.





Ka thaw halh a, ka nu te chanchin chu ka ngaihven ru viau reng a. Mampuia hnen aṭang hian eng emaw tak hriat theih ka in beisei tehreng nen, ka lo râlkhat ngaihven ang leh hriat tum ang aiin hmasawnna erawh ka hmu lem lo.





In kan thleng a, ka Bag chu a rit sâwt riau in ka hre bawk. Mampuia hnungah chuan muangchangin ka kal hnak hnak a. Mampuia chuan ka Bag khai chu min chuh viau na a, kut ruak ringawt a Inchhung luh chu ka huphurh bawk si. Chhuanlam atan ka Bag khai chu ka mamawh tih ka in hria, nghet takin a bag hrui ah chuan ka chelh a.






Mampuia pên lut mek chu thawpui la halh chungin ka zui lut ve ta a. Thawm a reh diak a, hriau pawh tla se a ri a hriat theih ang tih tur khawp in a reh. Ka hawi kual thuak a, ka pa hmel hmuh tur a awm lo tur chuan ka lungno a kaichhuak a; ka mittui a tling nghal pam mai.





"Room ah an awm aniang, ka nu ka va ko ange" tiin Mampuia chu ka nu te pindan lam panin a pên zui nghal pâwk a, ṭi ru deuh in ṭhutkhawmna lam ka pan zui ve thuai bawk. Kan inchhung ngeiah mikhual ang maia zum dêkin ka awm ang tih chu mumang lamah pawh ka la man phak loh thil a ni. Ka nu te room kawngka rawn in hawng thawmah chuan ka hawi chhuak zawk a, ka thin a phu rang nghal zaih zaih hle.






"Hmm.... i thuawih loh rah chu engnge ang i tih?" ka nu ṭawngkam rawn chhakchhuah hmasak ber a ni. Ka kut ka hûm ruh ngawt ngawt ringawt; Mampuia thaw ri hak pawh ka hria.





"Man nei lovin mi In ah i va awm mualpho a, i chhungte min ti mualpho bawk. I khawsak duh dan en hian man nei lova awm mai mai awm tawk lek i lo nih hi" a rawn tih chhunzawm leh nghal zat, a ṭawngkam na tak phena min hmuhsitna a tilang kher chu na ka ti ngang mai.





"Nu, engkim a nih tur ang a ni vek tawh. I ṭawngkam a kha mah mah e" Mampuia'n a lo ti ve thuai na a, ka nu chuan a ngai pawimawh lem lo tih hriat zetin a khi sâwng mai. Ka nu lo danglam tawh zia chu mit ngeiin ka hmu ve ta chiah e.






Ṭawng tuma ka âng zuau chu ka nu kut rawn lek chhuak avang chuan ka tawp chawt a, a hmel nelawm loh tak chu ka melh rân thung. "Keini aia i thlan zawk chuan engtin tak maw a lo enkawl che?" a rawn ti ram leh hmak a. Ka hun tawn zawng zawng chu hrilh pawh ni ila min nuihzatna ti zual tu lek a ni dawn tih a lang reng.





"Ka pa nen chuan engvanga inṭhen maw in nih a?" ka ti chang ve ta fak a. A beisei loh danin ka ṭawngchhuak tih a mitmeng alh phatah chuan ka hmu nghal.





"Chung thil ah ilo buai ve a ngailo e. I pa hi in lo chhun khawp a nih hi. Mi pangngai reng reng awm hlawm lo mai" a rawn ti hluk hluk a.





"Ka pa dawhtheih zia i hriat kha, kalbo vang vang a duh nachhan hi nangmah vang bak a ni lo ang. Ka pa hian thiam lohna a nei miah lovang" ka ti ve leh ta piap a. Ka pa thlenga a hmer tel chu ka tei thei ṭhak lo.





"Zothansang" tih tuarh pahin a ding uaih a, a hmel rum zetah chuan kut min thlak mai duh hmel a pu. A mitah tak ka lo melh let ve rân a, kan nufa boruak zahpuiawm zet chu tlawmsan tu nih ka tum chuang der lo thung.





"In zahpuiawm mange, hetiang reng reng chuan mi nuihzat chhungkua kan ni thuai ang" Mampuia'n a lo ti hrâwk a, ka nu nen chuan rum zetin min melh tawn sek bawk.





"He mihring nu in pasal a um ni aṭang khan mi nuihzat chu kan ni daih tawh" ka nu chuan a ti rum leh âl a, chhanlet ka chak viau rualin Mampuia hmel a hrehawm tih lang chiang zet chuan min ngawih tir leh ta zawk.






Ka bag khaiin pindan lam ka pan ta hmak a, ka nu la ang zui reng chu ka haider lui hmiah bawk. Ka nu a nihna ah ka zah em em a, ka thil tihsual avangin an lakah hrehawm ka ti bawk. Ka lo chhanglet ve ta mai pawh chu ka in thiamlo nghal em em bawk. Mahse, kan boruak rit zet kha ka ngawih liam pui mai thei bik lo a tin a ni.






Khum chungah chuan ka ṭhu zawi ngiai a, ka luakchhuak ru reng chuan min rawn hnawh up up bawk. Tukverh te chu hawngin ka dak vang vang a, ka thil tawn zingah ka pa hmel hmuh tur awm lo chuan min ti na ber hial in ka hria. "Pa, engatinge min lo kal bosan daih? I zilh hauna leh i thurawn te ka mamawh asin" tiin ka phun chhuak sap a, ka mittui a dir nghal zung zung bawk a.






Ka room kawngkhar kik karh karh thawm ka hriat chuan ka in tuai fai sawk sawk a, Diktea a rawn pen lut zui zat. A hmel ngui nghiai chu ka lo en reng a, ṭah chhuak hmel te pawh a pu ve in ka hria. "Lehkha i zir em ni?" ka lo ti vat a, a lu a thing zauh ringawt a.





"Eng tih mah hi ka tui tawh lo, chhungkaw boruak a rit si. Kalbo ve daih ka chak" a ti hul hak a, lainat takin ka en tlawk tlawk ringawt a. Unau zinga naupang ber anih avangin a pangchang rei a, nu leh pa thlazar hnuaiah thlamuang takin a awm ṭhin tih ka hria. Vawilehkhat a kan boruak tawn thut chuan a nun zawng zawng a vaw chau zo tih ka hmuthiam reng, keiin ka lo belhchhah ve zel erawhin min ti tîm dui a, ka hnem tumna ang pawh ka chhâk chhuak ngam lo.





"Dikte, engkim a ṭha leh vek mai ang. Naktuk lamah ka pa pawh biak ka tum ve chhin dawn nia" tih pahin ka en reng a. Min rawn melh zuk pahin muangchangin a inher a, "Mu hahdam rawh" tih sup pahin min chhuahsan zui nghal a.






Khum bul tukverh ka hawng a, Thla êng in min rawn chhun ruih avangin êng ka ti thim a. Thlifim rawn thaw lut heuh heuh chu ka in chhêm tir a. Ka ngaihtuahna chuan hmun tin a fangkual a ni ber.






Hriathlua kha a haw tawh angem? Engang takin min sawi zui ang maw? Rinrina ka ngaihtuah kai nghal zat a. Min ngai em em dawn tih pawh ka hria. A pa a hlauh avangin ka chungchang erawh a sawi ri ngam miah dawn lo tih nen lam mit a fiah taka kan va hmuh ang hian keimahah a chiang em em lawi si.






Ka pum ka tuai a, "I pa in a fa atan a pawm duhlo che ania. Mahse, lungngai suh aw? I nu hian ka chelh reng ang che. Ka thlah dawn hauh lo che ania" ka ti mawlh mawlh a. Ka biangah mittui a rawn luang leh tawh; ka pasal tan khan theihtawpin ka hun leh tha, ngaihtuahna zawng zawng ka sêng ve chuan ka hria. A hlim loh leh lâwm loh ka hlauh avangin nuamsam lo chung chung pawhin a hlimna siamsak ka tum hram hram ṭhin. Mahse, nitin ṭawngkam chhe tinrengin min thungrul a. Chuti chung chung pawh chuan 'beiseina' chhe tê nen ka nghak ṭang ṭang thung.






'A fa hmel in a rilru a thlak anga, duat taka kuahin min hmangaih zia lantir hun a nei ang' tih ka rinna zawng zawng kha a ṭawngkam hnuhnung khan a thai chhe hneh hle bawk.






Ka tho a, tukverh chu ka khâr fel sat sat a. Khumah chuan ka lawn kai leh thuai a. Lukham pakhat chu ka pawm ṭha sat sat a. Kan chhungkaw hmalam hun leh keima hun tawn tur ngei pawh chu ka thiam ang tawkin ka ngaihtuah neuh neuh a. 'Engkim hmachhawn thei turin ka paukhauh a ngai a, huaisen leh chak taka ka awm a ngai' tia infuih thar mawlh mawlh chungin muthilh tum chuan ka mu ṭha zui sat sat a.






(to be continue........)


Show post links
Top

[Ngaia]

DEAR PAIN
CHAPTER-17



By: Brigida Hugo






Motor horn ri bengchheng zetin min ti harh hlawl a, kawl a êng ṭan det det tawh; ka mutna ka hai ṭep leh nghal. Ka ṭhuchhuak uaih a, ka room ah ngei, keima Khum ngei ah ka mu tih ka hriatchian rualin thlamuang takin ka mu thla riai riai a.






Zing thawh hlim a boruak thianghlim zet, zu ṭhing rim nam lo han dawn a, han hîp luh veng veng chu a nawmdan a dang zar mai. Hriathlua ka ngaihtuah chhuak nghal zat a, engtin tak awm ve ang maw? Chhungkaw buai lai taka ka haw tak daih avangin ka pa pawh a buai viau ang tih ka ring. Rinrina school kal tur buaipui ringawt pawh a tan chuan a hautak tham hle dawn a; damdawiin lam ngaihven reng a ngai dawn bawk.






Rinrina ka ngaihtuah chuan mittui a hnai kuar mai, a pa in a ngaihsak dawn der lo tih lah ka hrechiang em em bawk. A khua a har viau ang tih lah ka hmuh phak mai a awm ang maiin ka hrechiang. Naupang rilru thianghlim tak a ni chunga a hun tawn mek te avang chuan keimah a lainatna awm zawng zawng hi amah ah a luangkhawm vek a ni ber. Ka ngaihtuah thui zel chuan ka ṭahpui thei mai dawnin ka hria a, ka tho chhuak ta thuai a.






Tukverh hawngin pawnlam thlirin ka ding zui ta reng a, duhthawh zetin boruak thar chu ka hip lut vang vang a. Ni chhuak turin kâwl a chhun sen phut chu ka thlir reng a, ka tana hlim na Ni a rawn chhuahpui dawn lo tih erawh ka hrechiang hle.






Ka nu nen boruak ṭha tak kan nei rih dawn lo tih ka hrechiang em em a, ka pa ka ngai ngawih ngawih bawk. Hlim tlang taka kan chen hona ṭhin kan Inchhungkhur boruak danglam ta hlawk chu hriatthiam har ka la ti reng a, siamṭhat leh nan engtianga hun tam nge ngai dawn lah ka hre hek lo.






Ka pum let but avangin room aṭangin ka tlanchhuak vat a, bathroom ah lut nghalin ka uak nghal tuarh tuarh a. Ka luakchhuak hlûi chuan min hnawh up up a, mittui tla phunga ka uak hnu pawhin luakchhuah tur erawh ka nei lem lo. Khûr dar darin ka dingchhuak a, bang nghengin ka ding zawi ngiai a. "Min hrem rei lutuk suh aw Bawihte, anu hi chak taka awm ka ngai a nia" tiin ka phun sap a, ka pum chu chûlin ka chhîng vang vang a. Ka hmai phihin ka chhuak zui vat a, thingpui tur ka chhuangkai zui vat a.






Mampuia a rawn thochhuak ve a, walk a tum tih hriat zetin track suit nen a rawn inthuam ap a. "Ka nu nen lo in khak tawh suh u aw? Ngawih san mai mai rawh" tih pahin ka dârah chuan a beng thak thak a, a chhuak zui nghal vut a. Ka nau te hian kan Inchhung boruak chu hrehawm an ti ve hle tih ka hrethiam a, keipawhin a belhchhah tu nih loh hram ka tum ruh ve hle bawk.






Chawhmeh siam vak a ngaih loh avangin chaw ka chhuang zui a, a la hma viau mai. Pawnlamah ka chhuak ve a, khawlai pawh a la reh dak a. Zing tina ka pa ṭhutna ṭhinah chuan ka ṭhu a, "Khawiah tak awm ang maw? Engnge a tih ve ṭhin ang?" tiin ka ngaihtuah zui rauh rauh. Ka phone ka kawl veleh biak thuai ka duh, min chhâng ṭha duh kher angem tih ka hre lo thung. Chaw phit ri ka hriat rual chuan rang takin ka tlan lut thuai a, Gas bulah ka nu a lo ding rân mai.






"I eirawngbawl ngaihsak ta che" tih ram hnak pahin min lo melh kul a. Engtiklai paw'n ân a in peih reng emaw tih mai tur hian a khawsa ni berin ka hria. Ka ngawi reng a, ṭawngkam khat lek pawh chhâk chhuak ila kan in hnial leh nghal dawn tih ka hria; zing kar aṭanga boruak ṭha lo neih ka duh loh bakah Mampuia chhuak turin min chah kha ka hriat reng avangin hmun ka phiahsan zui daih a. A che ri sawk sawk chu ka hre reng a, an nupa boruak lo chhe ve bawk nen; hriatthiamna tam tak erawh ka nei tho.






"Nu, khawnge ka kamis i suk kha i dah a?" tiin Diktea chu a room kawngkhar aṭangin a rawn au lûng lûng a, zingtin a in zawn buai chûk chûk hi a inhmeh ve hrim hrim.





"I thawmhnaw bâwm kha en ta che, i in zawng buai reng ringawt mai" ka nu chuan a lo ti let ve thuai a.




"Ka hmulo alawm, ka en vek tawh" Diktea'n a rawn tih rual chuan ka nu chu a chek zui hlak a. A room lam pan chuan ka kal vat a, ka zawnpui ngial pawhin kan hmu zo lo. "A haihawt sia, a ṭang na ve thei fu bawk si" phun bal bal pahin Diktea chuan a hai kual rawk rawk reng a. Keipawhin ka lo la zawng kual reng bawk; drawer ah in thlep fel diamin a lo awm a, pek pahin ka chhuak zui thuai a.






"Dawr kal i tum em?" biak loh reng aiah ka nu chu ka be hram, "Aw" tih zawngin min chhang. Diktea tiffin tur ka siam mek laiin Mampuia a rawn haw a, "Ka inbual chhungin chaw ei lo siam mai rawh u" min tih avangin ka che zui nghal sawk sawk a.






Chaw ei chhung zawng pawhin tumah kan ṭawng lo, a hma kha chuan in zilh nan leh titi ho na hun atan kan hmang ṭhin kha a nia; ka pa awm lo chuan kawng tam takah chhungkaw boruak a her danglam chho zel dawn niin ka hria. Kan chaw ei pawh a tui lo tlâng aniang, kan kîl rei lo tlang hlawm kher mai.






Diktea leh Mampuia an chhuak a, ka nu pawh a in siam mek. Ka phone dilchhuah ngei ka duh avangin an room ah ka lut a, phone ah mi a lo be mawlh mawlh a; min hmuh veleh a dah thuai a. "Nu, ka phone min lo pe. Tleipuii biak ka duh" zum dâkin ka ti a, chiang zetin min lo en rân thung.





"Kha mi laktlakloh pa kha biak lunglen leh i tum a ni zawk lo maw?" a ti kher chu ka ngei tawk a tling leh tawh viau; ka nu mize danglam lutuk hi ngaiah neih a har dawn riau in ka hria. "Engvangin nge ka biak ringawt ang? Ani kha biak nachhan tur ka nei lo" ka ti let ve hmak a; a ner sawk danah ka thusawi a awih lem lo tih ka hria.






Almirah chu a hawng zui rak rak a, ka phone chu rawn lek chhuak va a "Thil ṭul lovah i hmang tih ka hriat chuan ka la leh nghal ang" a la ti hram. Kei erawh ka duh ber ka kuta a awm tawh avangin chhan let ka tum tawh lem lo; phone chu On zuiin ka chhuahsan ta daih a, awmdun tam lo ila kan in hau lo a ni mai.






Tleipuii ka be nghal zat a, rei fe a rik hnuah min rawn chhang hram. Ka phone lah chu Battery a tlem em em zui a. Chaw a eikham ve chiah a, leng turin ka sawm zui vat a. "Ka tum sa hrim hrim, hrilh tur che ka nei" a rawn ti sar sar a, ka lo zawt zui thuai a. "Ka lo thlen hunah" a tih tlat avangin ka zawt lui duh lem lo. "Rawn kal thuai ang che" ka ti thuai a, kan inbiakna ka ti tâwp a; a lo kal hma ngei a tih tur awm ang ang te lo tih zawh hman ka duh avangin ka che zui ta sawk sawk a.






Ka nu pawh a chhuak fel ve chiah a, a in thuam dan ka en chuan ka ner ru sak a. A makeup in hnawih ve te chu hun dang ang chu nise ka nuihpui bâwk bâwk ngei ang, tun dinhmunah erawh kan nufa chuan nuihdun lam chu kan hlat vang vang hle thung. Ka pa biak ka tum zet nângin Tleipuii a rawn thleng ṭep tawh si a, zan hun âwl ah biak ka tum ta zawk a; zawh duh leh hrilh tur ka ngah lutuk a, hman ver vawr a biak kha a nawm zawk ka ring.






Thil tih tur a tam lem lo bawk a, ṭhutthlengah ka bawk zâl a; ka taksa a kham urh mai. Sub-centre ah te in report ve ngei a ngai anga, ka huphurh ru viau mai. Ka hnung lam aṭanga sawi sep ka hlawh zui dan tur te ka ngaihtuah kai a, Hriathlua chu ka haw thar leh ngawih ngawih. Mawhpuh fai vek ka tum lahin ka thiam lohna chin tam tak a awm ve a, a chanchin engmah hrechiang îk lova ka zui ringawt na rahchhuah ka têl mek a ni ber e. Min ṭawngkhum dan zawng zawngte ka bengah a rawn ri nawn leh a, nimin thil mai a nih avangin ka la hrechiang hlawm viau bawk; hun tam tak liam ta pawh nise ka theihnghilh thei mai pawhin ka ring lo.






Kawngka kik dat dat thawm chuan ka ngaihtuahna a la peng thuai a, lut turin ka au zui lâng lâng a. "Ka hah lutuk, a lum si" Tleipuii'n a rawn ti lut bawh bawrh a, eng emaw hi a polythene dumah a khai deuh lûk bawk. "Engnge i khai chiam?" ka lo ti thuai a.






"Thil eitur i mamawh ka ring a" tih pahin a nui hak hak a. Amah zawk hian ei tur a mamawh fe zawk. Ei leh in a uar ang hian thau phei sela chuan mawilo khawpin a thau tawh hial ang. A thil khailai dawhkan chunga theh rawk pahin min si chetin a rawn ṭhu zui a, min en vung vungin a khi zui sak a; a khawsak dan chuan ka ngaih a ti ṭha lo deuh, "Engnge i hriat a?" a chala nem dak awrh pahin ka lo ti thuai a, a nui chhuak ta chiam chu mak ti zetin ka en hâ reng a.






"I va han thawveng tak, enge maw i hriat reuh le? Khawinge...." tih pahin ka nem sawn lawp a, a zawi lui tlat chu ka ngei reuh hle bawk. Hun rei tak in kawm mumal thei lo in kan awm a, biak takngial pawh kan in be hlei thei lo anih kha. Vawiin hun kan hman dun dan erawh hmana keimahni ang chiah kha kan ni leh tawh, ka chhungril hlim veng veng chu ka hmelah pawh a langchhuak hial ang tih ka ring.





"I lung leng hi i thinchhe riau mai" min ti leh kher chu ngei lutuk in ka melh râwm râwm a, za taka a nuih tak chiamah chuan keipawh ka nui ve hawk hawk a. "Tak takin nizanah Malsawma a rawn leng lut hlawl a, kan ṭhenawm lawkah thil pawimawh a ti aniang; a rawn lut kawi a" a rawn tih zawm zat a, a ṭhu rem nghal sat sat a.






"A ho e, a rawn kal kawi a ni mai alawm" ka lo ti bûl hmak thung.





"I chanchin pawh min zawt chîk nasa mai. Enteh ṭhiannu, a hma pawh khan min zawt fo asin" thu tak zetin a ti leh a, ka lo en reng ringawt; Malsawma chanchin sawi vak chu ka phur tehchiam lo.





"In inkar boruak tawp dan ho zet kha mak ka lo ti ru deuh a, i duh zia leh i atchilh zia ka hria. Khati maia in tawp kha ka ring miah lo" a rawn ti leh zel a, ka "Aw" then kharh pahin "Min treat dan i hriat vek kha, a serious ve lo alawm" ka lo ti ve sap a; ka mitthla ah chiang takin Malsawma hmel a rawn lang nghal chat bawk.






"A mizia ve hrim hrim niin ka hria, a duhloh vang che a ni lo ang; tihlan viau dan a thiam lo mai zawk ah ka ngai. Han ngaihtuah vang vang la, in inzui chhung khan phatsan zawng che in a khawsak miah loh kha. I duh khawp ngaihsakna i dawng lova, kha khan a ti lungawi lo che ni berin ka hria" a tih zawm leh zat zat a, thil dang ka lo ngaihtuah daih thung.





"Ka rawn haw tih i hrilh em?" ka ngaihtuahna a awm mek chu ka zawt zui ta daih a, a bu nghat a; ka lo thaw halh mai. "Hrilh a pawi hlei nem, kha Hriathlua ve teh thlawt ai kha chuan a la ṭha fe zawk" a ti chang nghal fak a; Hriathlua hming a lam ruala a hmel rum nghal âl chuan a huatzia a ti lang chiang hle bawk.





"Engpawh nise, heti hi ka ni zo tawh. Malsawma a ni emaw, midang pawh ni rawh se; inngaihzawnna lam hawiin tumah ka melh thei tawh lo. Tunah chuan kan nufa hma hun tur ka ngaihtuah a ngai a, kan chhungkaw boruak hrehawm zet hi a ṭha lam zawng a her a ngai bawk. Ngaihtuah tur ka ngah lutuk" tiin ka pum chu ka chûl hauh hauh a, ka naute lo piang turah chauh hian ka ngaihtuahna dah ka duh; a behbawm a buai kual hman ka ni tawh lo.





"Anih leh engvanga Hriathlua kha nei teh thut nge i nih? In in ngaizawng rei lo viau lo maw?" tih pahin min melh kar a.





"Nia, engkim kha a thleng thut vek a ni ber mai. A chhan ber pawh Malsawma vang tho a ni ber" ka ti chu a ngaihna hriat loh hmel zetin min en reng a. "Malsawma lakah khan beiseina sang tak ka nei a. Mahse, a lakah khan beidawnna bak ka hmu lo. Ka rilru na lutuk khan tih el dan ngawt ka ngaihtuah a. Ka tihel khan ka hlim veng veng dawn emaw ka ti. Mahse, ka duh aia thui ka kal a ni ber" ka tih pawh chuan ka sawi duh ang ka sawi chhuak pha lo. Tleipuii'n hrethiam pha chiah lova min en reng pawh chu ka hai lo; mahse, hrilhfiah turin chubak a fiahin ka sawichhuak pha chuang lo






Thil chi hrang hrang kan sawi dun a, ka nu leh pa inkar chhe ta thut chu mak a tih zia a sawi luam a. A thiam ang tawkin min fuih ve sauh sauh a, engpawh thleng se ka tan a awm reng tur thu a sawi chuan ka hnuk a ti ulh hial; ka tana a hlut zia hi ka hre tam telh telh a nih ber mai hi. A thil lo ken te chu kan eidun a, ka zing thawhhlim luakchhuak ka neih bak hi chu harsatna em em ka nei lem lo; ka thil ei pawh a la tui viau zel mai. Tlai eirawngbawl hma in min haw san ta a, a reh nghal duak mai. Eirawngbawl turin ka in ruahman zui ve ta thuai a.






Mampuia leh Diktea an lo haw ve ta bawk a, Mampuia chuan ka eirawngbawl min pui ve a; Diktea erawh dawhkan kîlin a lo ṭhu ve reng thung. Ka nu leh pa buaina bul te chu chiang zawkin ka zawt malh malh a, sawi fak tur an hre em em lo na chungin ka nu vak chhuak tam lutuk ka pa in a kamkhat deuh reng a nih hmel ta ber e.






"Kan hriat lai tak hi chuan an in hau ngai lem lova, kan hriatloh ah erawh an in hauh fo ka ring. An inṭhen hma zan pawh khan zan rei tawh takah ka zun zung turin an room a an inhnial thawm ka hria. Ka pa hi a ngui em em reng a, a hmaa hlim hmel a put sarh ang kha tun hnaiah hian a bo ta vek a. Mahni chauh a awm a, ngaihtuahna kawm vung vung te a ching a, ka nu lah bungraw buaipui chhuanlam in a chhuak deuh reng bawk a. I awmloh hnua kan inchhung boruak chhe hret hret kha a tawpah chuan heti hi a lo ni ta anih hi. A zahthlak ka ti, kan puitling ṭhuau tawh a; Nu leh Pa an han inṭhen leh rih a nia, ṭhian kawm pawh a nuam tawh lo" Mampuia chuan a ti ve nuah nuah a, a thusawi chu uluk zetin ka lo ngaithla kar thung.





"Keichu ka zah ber chu ka pa zawk a kalbo daih hi a ni" Diktea chuan a lo ti ve khauh a, Mampuia nen kan melh dun zawk a.





"Engkim ka siamṭha ang chu ka ti ngam lova, ka pa pawh zaninah biak a, engkim hriatchian ka duh" tih pahin an pahnih chuan ka melh tawn ralh ralh a.






Mampuia chuan min melh ngur pahin, "Ka nu ber hi a buaithlak, nang pawhin i siam ṭhat theih ka ring lo. Ka pa thusawi pawh zahlo khan engahmah a ngai kher lo ang che" a rawn tih rual chuan ka ngaihtuahna a luah nghal zat. Ni e, tunah pawh mumal takin kan la inbe thei lo ania. Thu ṭha sawipui chu a harsat viau ka ring, an nupa inkar thil phei chu ka sawipui theih ka ring miah lo. Mahse, chung thil avanga ka pa biak ṭhulh erawh ka tum chuang lo.






"Engpawh nise ka pa pawh biak ve hrim hrim ka duh. Ka nu hnen aṭang hi chuan engmah ka hre dawn lo tih ka hria. Chuvangin ka pa hi biak ka duh" ka ti ve leh hram a. Ka nau te chuan min hnial hran lem lo.






Zan boruak a rawn in her thleng a, ka nu a la rawn haw lo. Chaw kan eisan a, ka nu khawsak dan ah chuan ngaihdan nilo tam tak ka nei bawk. Hriathlua nena kan Inneih lai te ka mitthla zui a. Inchhung khur a nupui ṭha awmdan tur diktak nia ka hriat leh ka nu khawsak dan chu a in persan hle.






Mampuia te unau pindan lamah an tawmbo a, keimah in ka ṭhu a, ka ngaihtuahna ka kawm veng veng a. Ka phone rawn ri chu mak ti zetin ka en vat a. 'U Mama' hming rawn lang kalh chu ka en reng a. Hriathlua anih zawk te ka ring hial bawk. "Hello" ka ti sap a.





"E khai, kan damṭha em?" U Mama aw ngei a ni. Ka thaw halh a, "Ka damṭha e. Nangni zawk?" ka ti vat a.





"Kan damṭha e, kan buai em em reng mai. Hman zanah rawn biak che kan tum nasa maw le. Switch off a inti reng a" a rawn ti leh mawlh mawlh a.




"Nia, phone ka nei ve leh chauh alawm" ka lo ti thuai a.




"Anih chu.... Hei, kan inbe reng thei tawh alawm" a rawn tih rual chuan, "Nia" ka lo ti thuai a.




"Zothan, englo ania. Rinrina hi a khawngaihthlak reuh lutuk a" U Mama meuhin a rawn ti chu ka beng a verh zar mai.





"Engatinge?" ka lo ti thuai a. Engmah thil chiang ka hriat hma hawtin Hriathlua chu ka ngei nghal em em bawk.





"A ngai lutuk che hi a hmel ah pawh a lang. A pa pawhin theihtawp chuan a enkawl in a ngaihsak ve khawp maw le" a rawn ti leh thuai a.




"A pa in a ngaihsak maw?" nui hak chungin ka lo ti thuai a.





"Enteh Zothan, khatia i kalsan kha Pathian remruat te pawh a nih ka ring. A mizia a danglam tawh lutuk. Zu pawh a nghei rei tawh khawp mai" a rawn ti chu mak ti zetin ka ngawi reng a.




"A lawmawm lam anih chu" ka lo ti ringawt a.





"Nia, keini pawh kan lawm khawp mai. Mahse, Rinrina ber hi kan buaina chu a nia. A ngai lutuk che hi a buaithlak khawp mai" a rawn tinawn leh a.






"Naupang fel tak kha a ni maw le" ka lo ti thuai a. Pawnlama ka nu thawm chu ka hre nghal zat bawk. "U Mam, remchangah kan inbe leh dawn nia. Ka nu a rawn haw a, ka buaipui lawk ange" tih sawk sawk pahin ka nu in a rawn hriat hman hlau zetin Phone chu ka dah zui nghal hmak a.






Ka nu a rawn lut zui ve nghal a, Polythene lianpui in thil a rawn khai haw bawr hle bawk a. "I nau te an awm nange?" a rawn ti lut nghal zat a.




"Awm e, pindan lamah an awm" ka lo ti thuai a.




Ka bula rawn ṭhut pahin a thil khai chu a rawn phawrh sawk sawk a. "Enteh, ka inhmeh hlawm angem?" tih pahin thawmhnaw chi hrang hrang chu a phawrh zui thuai thuai a. Ngawi rengin ka lo khai parh zung zung a, "In hmeh ang" ka lo ti ringawt a. Ka nu mizia danglam ta lutuk chu mak ka ti ngawih ngawih. Incheina a buaipui em em ringawt te chu mak ka ti ngawih ngawih.




"I rilṭam em? Chaw i ei phawt dawn nge, i in tifai phawt dawn?" tih pahin ka tho nghal a.





"Chaw ka rawn ei tawh, ka ṭhiannu te In ah 'ei ve rawh' anti lui tlat a, ka rawn ei ve nghal" tih pahin a thawmhnaw lei chu a khungkhawm zui leh sawk sawk a.





Keimah min rawn hrilh lo anih pawhin ka nau te pawh chanchin a rawn hrilh thei reng a. Engmah a rawn sawi lo chu ka ngaihdan a ni vak lo. Mahse, engmah phei chu ka sawichhuak hran lem lo. "I rawn haw tawh tho bawk a, ka mu dawn ania" ka tizui daih a. Engtinmah min chhâng lo, ngawi rengin pindan lam ka pan zui nghal a.






Ka pa chu biak tumin a number ka hmet chhuak a, ka ngaithla a. Switch off a inti hmuk mai. Ka putea number chu ka thailang zui leh thuai a, ka ngaithla vang vang a. Ka beidawng hman ṭep tihah chhânna ka dawng ta hlauh e.




"Pute, inla mu lo maw?" ka ti vat a.




"La mu lo deuh, engnge ni ta? Tun ang hun hun ah?" a rawn ti thuai a.




"Ka pa biak ka tum a, ka be thei miah lova" ka ti nghal thuai a.




"I pa Chhuana nen Thingzai in an riak lut in ka hria" a rawn ti thuai a.




"Anih chu maw le...switch off a inti tlat a, ka hlauthawng maw le" ka ti thuai a, a chin ka hria chu ka thaw huai mai.




"In damṭha em?" putea chuan a rawn ti thuai a. Ka nu chanchin chu hrilh hrep ka chak viau. Engkim hrilh ila, putea chuan rawn hau hrep sela tih thlengin ka ngaihtuah kai vek.






Putea nen kan inbiak zawh chuan ka mu ṭha sat sat a. Kan chhungkaw hmalam hun tur ngaihtuah neuh neuh chungin ka mu meng kar reng a. Rilru tawt up up a hun hman reng hi engtikah tak reh ang maw?






Ka Nu chuan kan awmdan ngun takin min enthla fo tih ka hria. Tleipuii nena inzui chawt kan nih avangin ka nu pawhin Tleipuii chu thil a zawt nasa tih pawh ka hria. Mahse, ka thurûk engkim vawngtu hian ka nu lakah a thâwi pawhin engmah a la sawi eih lo thung.






Ka nu khawsak dan chu ka ngaihdan nilo thil a tam viau bawk. Zanah an ṭhianho in eng thil ber nge an buaipui tih pawh hriat lohin zanrei tak tak thleng a chhuahbo châng an nei ta fo mai a. Ka pa nena kan inbiak châng hian zawh ka châk ṭhin a. Mahse, thil hriat châkawm tak anih loh bakah ka thinrim insûm thei lo in ka pa hnenah engkim ka thlen anga; boruak ṭha lo zawk a thlen belh ka hlauh avangin ngawih lamah ka ramṭang leh nge nge ṭhin.







Ka inbual sawk sawk a, Tleipuii'n min lo nghah rei lutuk ka hlauh avangin inpeih thuai ka duh. Ka nu dawr lamah a kal a, ka naute an chhuak bawk a. Keimah chauh in ka awm na a, ka che sâwt thei chuang lo. Inbual turin ka insiam a, Bathroom ka pan chiah tihin kawngka kik ri dat dat thawm ka hria a, ka ding nghal chat a. "Lawk aw" tih pahin kawngkapui lam chu ka pan nghal thuai a. Kawngka chu ka hawng zui nghal thuai a, ka hawn rual a ka hmuh hmasak ber chuan min va ṭhâwng tak; ngawi rengin ka en reng a. Ka in thing harh nghal thuai a, "Lo lut rawh" ka ti sap a.






Min rawn zui lut a, Towel thinbih mai a lo awm ka nih avangin nuam lo ka ti ang reng viau bawk. "Inbual ka lo tum chiah a, ngawi rawh law aw" tih bah nak pahin pindan lam ka pan nghal thuai a. Ka thawmhnaw, suk tura ka vawmkhawm chu ban thuai in ka in ha sawk sawk a. Pindan aṭanga chhuah pahin, "Tleipuii nen chhuah lawk kan tum a, khawnge i kal dawn?" ka ti chhuak nghal a.






"Ka rawn kal ve dawn" tih nghut pahin a nui suk a. Ka melh rang kher mai, "Engnge i rawn tih ve dawn ringawt?" tih pahin ka melh nawn leh zauh a. Ka ṭawngkam hman chu a lo dawngsawngtu tan a mawihnai lo viau pawhin ka hria. Malsawma chu a nui suk ringawt a, engtinmah ka zawhna chu a chhâng hek lo.






"Tak takin khawnge i kal dawn? Ka hmanhmawh deuh a, inbual ka duh" ka ti leh thâwr a. Nuih suk pahin, "Tleipuii khan min rawn sawm a. 'Rawn sawm phei rawh' a rawn ti mai sia" a ti chu ka ngawi reng a. Tleipuii chu hmuh thuai a, a hmai a ham hlawih hlawih ka duh. "Anih chuan lo ṭhu rawh, ka inbual lawk ange" tih pahin ka tho zui nghal thuai a.






Engtinmah min chhâng leh tawh lo, hmanhmawh takin Bathroom ka pan thuai a. "Mawl lutuk mai, engmah ruahmanna siam reng reng suh ang che. Ani nen hian inzawmna chhe tak neih leh ka duh tawh lo" tih mawlh mawlh pahin ka inbual zui nghal sawk sawk a.





Zan lama U Mama min rawn biakna thu te chu ka bengah a rawn ri nawn tluk tluk a. Kha hmun kha kir leh turin ka chhuahsan lo tih ka hrilh lai khan Hriathlua hmel pha dai leh inthlahrung hmel ṭi dai tur kha ka mitthla tel a, lainatna in ka khat ru tho si. Mahse, ka lainatna aiin a laka ka beidawnna erawh a la sang em em thung si.






Ka inbual zo a, Bathroom ah ka inthlak nghal sawk sawk a. Malsawma ṭhut pindan lamah a ṭhu kur tih ka hriatna chuan min ti zâm ru em em bawk. Ka sam hru mawlh mawlh chungin ka chhuak thuai a, banga Sana intar chu ka melh pah ralh a. Dar 11 a pel hret tawh a, hmanhmawh ka ngai tih pawh ka in hrechiang zual sauh. Tleipuii chuan Malsawma hi ka thu hmu lovin a biak ka ring miah lo. Tleipuii nena chhuah kan tum thu ka hrilh kha remchangah a la nghal mai niin ka hre bawk.







Pindan ah ka lut thuai a, ka insiam nghal zung zung a. Darthlalang hmaah chuan ka ṭhu ve tak na a, mawi intih vawng vawng na tur khawpin ka inchei nalh zo pha ve lo. Hmeichhia ni mahila inchei lam kher hi chu ka thiam hlawl lo. Tleipuii bawk hian inchei a thiam. Boruak awmdan a zir te, hun hmandan tur leh hmanna hmun tur a zir te, a taksa inchawih tur thlengin a thlang thiam em em te hi ka fak em em na a ni ṭhin.






"Tirawh, ka hmanhmawh deuh tawh a..." tih pahin chhuah nghal mai in ring deuhin ka ding ngawi zui reng a. Muangchanga rawn din pahin min melh rulh a, "Kan thleng phei har nâng" ala rawn ti tak deuh deuh a. Pawnah chuan ka ding dat a, "I ti tak tak em ni?" tih pahin ka melh ngar a. "Rem i ti chiah lo em ni?" a lo ti nghut a.






"Aaa, kan ṭhiandun in tih tur pawimawh kan neih vang ania" ka lo ti zâwi sap a. "Anih chuan ka rawn tel ve a rem leh lo ah ngai mai ang" a tih takah erawh chuan ka inthlahrung leh hnuhnawh viau thung. Mahse, kan thil tih tum nen a rawn tel ve chu rem in ka hre si lo.






"Hun remchang dang a la awm mai ang" tih pahin ka in her a, "Ka va chhuak phei ange" ka tizui sap a. "Ka phei dawn tho alawm, ka thlah phei ang che" a tih tak tlat avangin ka ṭang lui ṭung duh ta bik lova. Kan inzui phei a, Tleipuii min lo ngahna lam tur panin kan phei zui ta nghal a.





Tleipuii chuan min lo nghak rân tawh a, rang takin ka chhuk thuai a. Tleipuii chuan mak tih hmel zetin min lo en reng a. Ner khum sak chung chuan, "Kal ang" ka tizui a. Malsawma chu ka melh zuk a, "Ka lawm lutuk e" ka tizui thuai a. Malsawma chu a nui suk a, a tlan zui ta nghal a.






"Mawli" ka ti nghal deuh tâwng a. Tleipuii lah chuan a ngaihna hriat loh hmel zetin min en reng ringawt a. "Engnge in rawn in phurh teh ngawt?" a la tizui tak deuh deuh a.





Ding meuhin ka en reng a, "Nangma'n ilo va sawm a ni lo'm ni?" ka ti bak hlar a.



"A teuh lo mai, kan inbe reng reng lo"



"Tleipuii'n min rawn bia a tih si"




"Awii, a zakthei lo e. Engvangin nge maw ka biak ngawt ang?"




"A ho em mai, sawi tawh lo ang" tih hmak pahin ka in her a, ka kal zui nghal a.




"I la thlah thei ngang lo anih hi ka ti" a rawn tih rual chuan ka hawi let thuai a. A dinna ngaiah a lo la ding reng a. "Rawn kal mai mai teh, i ngaihtuah kual peih mai mai e a" ka lo ti bak hlak a. Nui var var chungin min rawn zui thuai a, Taxi ah kan chuang lut zui nghal a.



"Engtinnge kan awm dawn?" ka ti nghal vat a.




"I tih tur ti hmasa ang, kei chu a hmanhmawh thlak loh" a lo ti thuai a. Ka lo bu nghat a, Malsawma chungchang a rawn sawi zui ring chungin a chhânna tur ka lo ngaihtuah zui daih a.




"I hlauthawng em?" a rawn ti daih chu ka thaw huai




"Hlauthawng hran lo e, engmah in sawiselna hran ka nei lem lo. In check up- ve hrim hrim kha a ṭha e tih thu mai ania" ka lo ti thuai a. "Enteh, nizanah U Mama'n min rawn bia a, Hriathlua chungchang a rawn sawi nual mai" ka ti zui zat a.





"Englam zawngin nge a rawn sawi? He mihring hi rin ngam a har dawn riau in ka hria" a rawn ti deuh ngat a.





"Ka chhuahsan tlai khan a âng nasa a ni awm e. Inchhung ah pawh buaina tenau deuh chu an nei a ni awm e. Mahse, khami tuk aṭang khan a la in leh miah lo chu an tia. In siamṭhat a tum ve nasa a ni awm e" Hriathlua laka rinna neilo zet chungin U Mama thu min hrilh chu ka hrilhchhawng thuai a.





Tleipuii chuan pawnlam a en reng a, ka thusawi chu a ngaihtuah zui ngei pawh ka ring. "Anih, i ring em?" pawnlam en reng chungin a ti sap a.





"Ka rin i ring em?" ka tih lêt rual chuan min rawn melh zauh a. A nui lui sak a, "Kei aiin rin lohna tur i ngah viau ang" a ti deuh hluai a.






Kan inzui dat dat a, kan in zui thleng ve mai e. Rin aiin an lo tam phian a, a ṭhen chu rai kawh liah luah te, a ṭhen chu keimah ang maia lang ve ṭan êk êk te an ni fur a. Kei aia rai inhmeh lo ve fe fe ka hmuh rual chuan ka thaw huai mai.





Tleipuii nen chuan mahni Phone ve ve khawihin ka nghak ve ngar reng a. "I pen ve ngai em?" tih pahin ka phone Tleipuii hnaihah chuan ka lek phei vâ a. "Carrom Board lam hi chu ka thiam lo hrim hrim. Mahse, phone ah chuan ka cho che" tih pahin ring lo tê in a nui kar kar a.




"Download rawh, pen chiah ila" tih pahin ka melh pial ralh a.




"Ka peih mai mai lo, lo pen rawh. Kan pa ka be laklawh" nuih sâng pahin a rawn tizui a. "Hmmm...min cho lo anih kha" ka tizui zat a. Phone ka zuk bih leh chiah chu number hlang aṭangin Message a rawn thleng ve chiah. Rang takin ka hawng nghal thuai a.





'Bawihi, min ngaidam hram rawh. I tel lo chuan engkim a hrehawm. Khawngaihin rawn haw leh rawh, engkim ka siamṭha vek ang'





Rang takin ka delete zui nghal hmak a. Ngaihtuah lo lui zetin ka games khelh lai chu ka chhunzawm leh vat a. Mahse, ka rilru ah ka thil tihlai chu a awm hlawl lo. Ka ner sak a, "Min rawn biak pawh a ngai lo" ti rilru neuh neuh chungin ka games khelh ah chuan rilru pek tum zetin ka en ngar a.





"Zothansangi" tih ri ka hriat rual chuan ka hawi vat a. 'Keimah lo midang an nih takin' ka tih rilruk laiin kan veng hming a rawn puang zui leh a. Keimah ngei ka ni tih ka hriat rualin ka tho zui thuai a, Tleipuii chuan min lo nuih sak a. Doctor hmu turin ka kal zui ta nghal a.






Doctor chuan uluk takin min en a, ka awmdan te chu a en ngunin zawhna min zawt kual nasa mai. Ka pasal nena kan inṭhen chhan min zawh erawh chhânna dik leh felfai tak pek kher ka tum lo. A tlângpui thuak bak sawi kher ngaiin ka hre hek lo.






"Engmah hlauhthawn tur a awm lo a nia. Ṭha takin i pai puitling turah ngai ila, in enkawl ṭha em em ang che" a ti dam dup a. A ṭawngkam dam duam ringawt mai pawh chu amah pantu tan chuan dam vawng vawng na a tling in ka hria.





Ka chhuak chu Tleipuii chuan min lo pan thuai a. A mitmeng a zawhna ka hmuh rualin nui sak chungin ka bûk khum zauh a. Ka in entirna lamah dinhmun ṭha tak ka va chang tih a hrethiam ve nghal mai niin ka hria. Lungawi takin kan inzui chhuak a, damdawi min chawh te chu kan lei dun zui nghal a. Kan intih fel zawhin Tleipuii kal duhna hmun chu kan panzui nghal a.






Kan thleng thla ṭep tihah Tleipuii chuan Call a dawng a, kawngsirah kan han ding leh rên râwn bawk a. An inbiak danah chuan a bialpa a ni tih ka hrethiam nghal. Nui var var chungin, "Chhuk ang" a ti sap a, "Kan va phûr thar ta ve" ka lo ti ve thuai a.





Kan thleng thla a, Tleipuii bialpa chu a lo awm vâng tawh. Kan pathum chuan kan inzui kual hnak hnak a. Hnawksak riau a in hriatna ka neih avangin chhuanlam ka siam thuai a. Tleipuii chuan a hrethiam nghal em em tih pawh a ṭawngkamah ka hai lo. A bialpa chuan min chelh der viau na a, Bazar aṭang chuan kan in kalsan ta nge nge a.






In lam pan a haw chu ka châk hlawl lo. Mahse, khawi lam a kal mah ka châk chuang bawk hek lo. Ka ngaihtuahna chu ka in thurualpui theih ber a ni tih ka hria. Suangtuahna khawvel chu ka ṭhian ṭha ber, nileng zankhuaa ka thurualpui theih ber a ni tih ka hrechiang takzet bawk. Ngaihtuahna hrang hrang a kiltin dap chungin kan In lam pan chuan ka haw zui hnak hnak a.....






(to be continue.........)


Show post links
Top

[Ngaia]

DEAR PAIN
Chapter - 18




By : Brigida Hugo







Hun harsa hrang hrang hmachhawn chungin ke ka pên nitin ve reng a. Ka nau te pahnih chuan an theih ang tâwk in min duat ve em em bawk a. Tunah phei chuan ka rit ve tawh viau leh nghal a. Thil rit lam phei chu ka khai leh khawih an remti lo hrim hrim a. In a an awm hi chuan an theih ang angin min âwl vek a ni ber mai.






Hriathlua nena kan inkâr lam hi min zawt ngai lem lova. Kan nupa inkara thil thleng kha an hre hek lo. Ka laka a khawsak dan leh ka chunga a nun rapthlak dan kha hre ngat sela chuan mihring pangngai pha tawh lo tur hialin an sawisa duh ang; a nunna an la duh hial zawk mai thei bawk. Hengte avang hian ka natna tawrh te, ka harsatna tawrh te kha ka sawi ri ngai lo. Ka hun kal tawh avanga ka nau te hun harsa a nawr luh ka duh hek lo.






Panhnah ka roll hlawh avangin ka buai nileng zan rei ve em em reng a. Ka inchhawp hnawk nuaih reng a. Ka pum chhung a ka fa, a nu hmel hmuh tuma ṭhanlenna kawng rawn zawh mek chuan a rawn ṭah chhuah rualin a lungawi nana ngen tur tam tak a rawn nei dawn tih ka hriatchianna chuan ka ke vûng deuh bâr te chu min hmuhhmaih tir vek si.






"Ka nu kha a chhuak tawh em ni? Pawisa dil ka duh asin maw le" tih pahin Mampuia chu pindan aṭangin a rawn chhuak a, a hmai chu a rawn tuai chhuak pah thuak thuak bawk a. "Ka paw em?" a la rawn ti zui. Nuih sak pahin, "I hring nghulh" ka ti chu a meng tâl nghut a, "Maw?" tih pahin pindan lamah bawk a let leh thuai a.





Rang takin a rawn chhuak a, "Ka nu chu ka va ngei mai mai e. Petrol ka nei tlem lutuk a, karlehah hlawh kan la chauh dawn sia" a rawn ti leh mawlh mawlh a.




"Ka nu chu dil buai duh suh, phun leh chiar a tam mai mai. Engzatnge i mamawh a?" ka lo ti sap a.




"Pawisa pakhatmah ka nei tawh lo hrim hrim a" a tihniam ruih a.




"Cheng sangkhat a tlem em?" tih pahin ka panhnah roll hlawh ka khâwl ṭhatna Purse chu ka hái pah rak rak a.




"A ngai lo chiang lutuk. Harsa tak leh awm nuam lo chung chunga i thawhchhuah hram hram hmansak che ai chuan ke in ka kal mai ang" Mampuia chu a ri deuh nghal hlut a.





"In tan, chhungkaw tan pawh ka thawk tel tho alawm. Thil pawimawhah chuan inthlahrun a ngai lo ania" tih pahin pawisa chu a kutah ka hmehbel zui châwt châwt a.





"Anih ka lawm lutuk e, hlawh ka lâk ve leh ka rûl leh dawn che ania" a tih lai chuan rum zetin ka lo melh ngheng a. "Khawi, rawn la leh rawh. Pûk turin ka nei lo" ka lo ti thuai a. Rang takin Mampuia chu pindan lamah a lut zui leh nghal a. Helmet rawn lachhuakin, "Ka kal" tih pahin a chhuak zui ta nghal a.






Diktea a chhuak tawh a, ani hi chu a hmanhmawh ṭhin khawp a. A thawh fuh phei chuan kan hmu hman meuh ṭhin lo. Tlai lam erawh a rawn haw hma ṭhin thung a. Mampuia erawh zanrei ah te rawn haw châng a nei ṭhin.





Inchhung hnawk ka tifel zung zung a, Panhnah roll tur ka inchhawp hnuk bawk a. Mampuia hian, "Kuhva hi pack ve law law la? A hlawk zawk ang" a ti fo ṭhin a. Keimah hian tlin ka in ring lo deuh nen ka ngaihsak vak hran lo.





Panhnah khawih in ka ṭhu leh thuai a, ka bulah Phone chu ka zai tir rât rât a. Hun kal tawh leh ka hun hman mek te chu ka ngaihtuah kual neuh neuh reng a. Ka pum lam chu ka bih leh zawk ṭhin a. Tunah chuan ka pum lam pawh a lang ve tawh viau mai.






Kawngka kik thawm ka hriat rual chuan, "Rawn lut rawh" ka lo ti thuai a. Kawngka chu a rawn in hawng nghal a, ka lo en reng bawk. Malsawma rawn lut mek chu ka en tawh lo, ka hawisawn thuai a.





Ka bulah ṭhuthmun a rawn rem nghal zat a, "I va buai awm ve?" a rawn ti nghal sup a.




"Buai ve reng mai. Khawnge i kal? Nge, i kal dawn chauh zawk?" ka tizui sap a.





"Ka rawn kal" a ti nghut a, engtinmah ka ṭawng zui lem lo. Ngawi rengin ka thil tihlai chu ka tihzawm mawlh mawlh a.





"I mut hahdam mai mai ka ring a" tih pahin a rawn tawlh hnai hrut a, "Ka lo tihpui ang che. A hnah roll kha chu ka thiam lo anga, chinai ka lo tat ang" rawn tihzawm zat pahin chinai chu a ban nghal a.





"A ngai lo, i thiam lo ang" tih pahin ka chhuhsak zui nghal a. Hun kal tawh lam te ka ngaihtuah chhuak nghal zat mai. Engpawh tih tir dawn ila, 'Ka thiam lo' a ti zo vek ṭhin kha a nia. Tunah pawh thiam lo sela ka ti ber zawk.





"Engkimah khan min ngaidam hram rawh. Ka tana i hlutzia ka lo hmu thiam lo a ni" a rawn ti nghut a.





"Tunah i hre chauh em ni?" nuih luih hak pahin ka ti lui ve ngat a. Min rawn kuah a tum ringawt nia, ka tawlh hla thuai a. "Ngawi lawk, i duh duha i tihkual theih ṭhin mihring kha ka ni tawh lo ania. Tuna i bula ṭhu hi chu a fa lo piang tur tana theihtawp chhuah mek hmeichhia a ni" ka ti deuh hrâwk a.






A ṭhu ngawi reng a, "Hmana kawng engkim a hriatthiamna nena thlir ṭhintu che. I ngaihsak miah loh lai pawha ngaihsak em em rengtu che kha a liam tawh" ka ti zui leh ngat a. He mihring lakah hian ka in ven a ngai a, a duh duh dana a tihkual theih hmeichhia nih ka tum tawh hek lo.






"Engatinge min hmangaih em em chung si khan pasal i um theih?" a rawn ti nghut a. Keimahah hian fiah fak a sawi theih loh chhânna ka va ngah tak. Ka ngawi reng a, "Kei aia diklo hmasa zawk chu i nih kha.... Tunge ka neihsan che?" a rawn ti leh hmuk a. Chu a zawhna pawh chu chhânna ka pe lo.






Min thlek vung vung a, ka thil tihlai chu ngawi rengin ka ti mawlh mawlh reng a. "Min duh em em a, min ngaihsak em em a, min hmangaih em em a. Mahse, pasal min umsan tho anih ber chu a" tih pahin a nui hul huk a. "Ka phei ange, biak i har em mai" tih pahin a tho nghal nulh a.






Kawngka a thleng ṭep tihin, "Lawk" ka ti sap a. A ding chat a, a rawn hawi let thuai a. Ngawi rengin ka en tlawk tlawk a. Ka chhungril a na veng veng in a hrinchhuah thusawi tur rawn in hnawh tawt ap ap chu khap daih ka tum ngar ngar bawk. Ngawi rengin kal sela, demna tinreng nen min kalsan rawh se.




"Engnge ni?" tih pahin min rawn pan hnai hrut a, "Ka ngaithla e" a ti leh vat bawk a.




"Engmah ni lo e, ka tihpalh" tih zawngin ka chhâng a. A nui hul huk a, "Ka kal ange" a ti leh nghut a, ngawi rengin a chhuak zui ta nghal a.






Ka ṭhu zawi hnawk a, ka tawt up up bawk. Malsawma lakah chuan ka tlawm nawn leh ta ni ber hian ka hria. Mahse, a pawi ka ti lo. Engang pawhin min ngai sela pawi ka ti hek lo. Ka nunah hian natna tam tak in bu a khuar tawh a. A la khuar belh zel zawng anih hi. Na tuar tur a piang nia ka lo in ngaih ṭhin kha dawt a nilo in ka hre bawk.





"Ka thianghlimna min laksak a, kha hun a thlen aṭang khan min enhniam ru hle tih ka hai miah lo asin. I lak aṭang khan hmangaihna, ngaihsakna, duatna leh thlakhlelhna engmah ka dawng lova, ka beisei ve em em ṭhin te khan nangmahah awmzia a nei ve hek lo. Harsa ti tak chungin itan engkim ka hlan che a. Ka zahawm ve na zawng zawng pawh itan ka hlan fai vek anih kha. Chuti chung pawhin kawng engkimah itan ka in hawng em em reng a. I laka ka beidawnna a san tawpkhawk na leh hmalam hun ka ngaihtuah thui tawk lohna a inrual leh zel khan tuna min hmuhsit zualna kha a thlen a nih kha" keima hriat tawk lekin ka phun zui sep sep a.





"Ni e, ka mipa hriatchian loh leh engang mipa nge anih ka hriat loh lakah khan nang tihel kha ka tih tur a ni miah lo tih ka hria. Duhthlanna buarchuar tak ka siam hun aṭang khan tun hun thlengin inchhirna bak ka hmu chuang lo. Mahse, nang ka beisei ber hnen aṭang pawhin natna bak ka hmu chuang hek lo" ka ti zui leh mawlh mawlh a.





"A tawk, engkim a thleng vek tawh. Kan pahnih hian hmalam hun hlimawm tak nei zawk ang" tih pahin ka pum chu ka chûl heuh heuh a.





Hmanhmawh takin ka che sawk sawk a, tih tur ka ngah bawk si. Rilru la peng tu lo awm ve sek chu duhlo zetin ka lu ka thing nawk nawk a. Tlai lamah eirawngbawl ka ngai leh anga. Engmah ka ti leh tak tak hman dawn lo tih ka hrechiang a, hmanhmawh takin ka che zui sawk sawk a.






Ka hun tawn tawh tam tak chuan min vaw chau takzet. Hriatchhuah ka duh tawh loh thil tam tak ka hrechhuak bawk a. Ka nuna bet tura ka duh loh tam tak chu paihbo turin theihna ka nei hek lo. Keimah maia kawng zawh turin ka huaisen tawk lo tih pawh ka hria. Mahse, ka pum a che ve reng chuan huaisenna nen nun min hmanpui beiseina lian tak ka nei thung.






Phone rawn ri chu ka melh vat a. A number chu ka save lo na a, tunge anih ka hrechiang em em thung. Ka rîk ral tir ṭhak a, a rawn ri nawn leh a. Muangchangin ka ban a, "Hello" ka ti zuai raih a. Biak châkna ka neih loh rualin eng thil nge rawn sawi a duh tih hriat erawh ka ngai in ka hria. Keimaha lungawi lohna nei reng reng chuan an lungawina khawp in min ânkhum sela a ṭha zawk mahin ka hre tawh.




"Anu....i dam em?" Rinrina aw ngei a ni. Ka phu zawk in ka hria. "Ka dam e Bawihte...i dam zawk em?" ka ti thuai a.




"Aw, ka damṭha e" a rawn ti leh thuai a.




"Engnge i tih a?" tih pahin ka ṭhu ṭha sat sat a.




"Engmah pawh ka ti lo. Ka awm mai mai" a rawn tifel fak a.




"I va fel em em, min rawn biak nachang te i hre reng reng a?" ka tihlai chuan, "Rawn leng la, ka ngai tawh che ti rawh" ti ri sar sar chu ka hria.




"Anu...rawn leng la?" a rawn ti thuai rêng a.




"Remchangah aw? Lo damṭha em em la aw? Ka buai deuh a, remchangah kan inbe leh dawn nia" ka ti ta thuai a.




"Lawk, ka be lawk duh che" Hriathlua aw ngei a ni. "Engnge?" ka ti hmak a.




"I ṭha maw? In sawiselna te i nei em?" a rawn tidam thluam a.




"Nei hran lo" ka ti hmak a. "Ka buai deuh a, ka dah" tih pahin ka hmet hlum nghal hmak a. Ka thaw huai bawk.





Rinrina chu ka mitthla ah a awm veng veng mai. Min ngai em em dawn tih chu ka hai miah lo. Mahse, min biak duh vanga Rinrina hmatheh atana a rawn hmang erawh ka lawm hran lem lo. Rinrina khan ama duhthu ngei a min rawn bia chu ni sela ka la be char char ngei ang. Mahse, a bul a awm khan bul a rawn ṭan tir tih ka hrethiam mai. Chu chu a ni ka duhloh zawk chu....






Eirawngbawl in ka buai sat sat a, ka phone dawn te chu ka ngaihtuah let neuh neuh bawk a. Rinrina chu ka ngai ru veng veng mai. Ka bulah khan a hlim ve em em ṭhin a. Amah hringtu, a nu tak tak angin min ngai tih lah ka hai lo. Naupang rilru thianghlim tak khan a thiam ang tawkin min ngaina a, min enhranna a nei miah lo tih ka hre bawk.






Diktea chu thlan tla phangin a rawn lut a, eitur a rawn khai haw ṭân ṭân bawk a. "Thingpui lum la, chhang ka rawn hawn. Ka ril a ṭam teh ania" a rawn ti nghal vat vat a. A kawr phelhin Fan chu a in chhemtir zui nghal hlat hlat a.






Thingpui chu ka lum nghal thuai a, keipawh ka ril a ṭam. "Ka pa in min rawn bia a" Diktea'n a rawn ti chu ka en thuai a. "Engtikin? Engnge a rawn sawi?" ka lo ti thuai a.





"I u biak ka tum deuh na a, ka be ngam rih lo. Ram kan riak leh dawn a, ka rawn be lawk che ati" a rawn ti ngat phei chu ka ding ngawi reng a. "Engvangin nge ka pa chuan min biak ngam loh ang? Ka lakah tihsual pakhatmah a nei lova, keimah zawk hian a lakah tihsual tam tak ka nei a ni sia" ka ti rilru niap niap a, ka ngaihtuahna chuan hmun tin a fang a ni ber e.






Ka harhchhuak zawk, hmanhmawh takin ka phone lam chu ka pan a. "Dikte, ka pa nen chuan in inbiakna a rei tawh em?" ka ti pah sawk sawk a.





"Aw, zing chaw eikham bawr vel khan...an kal tawh mai thei" a rawn tih rual chuan ramhnuai ah Signal an nei leh dawn lo tih ka hria a, ka hmanhmawh sauh bawk. In a ka let hnu in mumal lo deuhin kan inbe zawk tih loh chu mumal taka inbiakna kan la nei miah lo. Ka pa hi zawh tur tam ka nei. Ka nu nena an inkar hi engang chiah a kaw zau nge a nih hriat ka duh takzet.






Phone chu ka ngaithla vang vang a, engmah chhânna ka dawng lo. A reh tlawk tlawk ringawt a. Signal lam anih ka ring nghal teh ngawt a. Ka tinawn leh a, a hma anga reh tlawk tlawk ngawt a ni tawh lo. Mahse, beidawnna tichiang turin 'Switch Off' a rawn ti ta chiah e. Ka pa chu ka be leh thei lo vang vang rih dawn tih pawh ka hrechiang em em bawk. Hna a thawk nasa em em a, thla têl teh meuh te ramhnuai lamah Thingzai in an riak ṭhin tih ka hria.




"I be thei nange?" Diktea chuan a lo ti thuai a.




Ka phone chu a awmna ngaiah ka dah let riai riai a. "An kal hman tawh aniang. Remchang dang a la awm mai ang" ka lo ti thuai a.




"Ka inbual ange" tih pahin Diktea chu a tho a, pindan lamah a kal zui ta nghal a. Pindan aṭang chuan, "U, i insu dawn em?" a rawn ti leh thuai a.





"Aw, naktukah ka in su ang. Lo dahkhawm rawh" ka ti thuai a. Ka eirawngbawl chu ka chhunzawm sawk sawk a. Ka pa ringawt ka rilru ah a awm. A hah em em ṭhin dawn tih lah ka hrechiang em em a. A hriselna pan zia lah ka hai hek lo. Ka pa chu ka ngaihtuah takzet bawk.






Ka che sawk sawk a, Diktea pindan lamah phone ah Pasalṭha Thawnthu ngaithla in a muhil a. Tlai lama chetna tur awm ang ang chu ka ti zo tawhin ka hria. Panhnah khawih tur ka la ngah a, Nu Rinfeli lahin min rawn phone sek tawh. An dawr awmna lai a lûn a, kuhva an hralh chak bawk a. Hmanhmawh taka chet zung zung ka ngai tih chu keimahin ka inhrilh nawn mawlh mawlh bawk.





Khua a tlai tawh a, ka nu leh Mampuia an la reh tlawk tlawk a. Diktea rilṭam a iak a iak tawh a. "Ka zo ṭep, kan eisan daih dawn nia" tih pahin ka thil chhawp hnawk chu ka tifel zung zung a. Nilengin mawng pawh hûng hman mang lovin ka buai a, tlai lamah hi chuan ka zawi hnawk zelin ka hria.






Diktea nen chaw kan eisan a, ka pa chungchang ka sawipui dawn ngial a. Diktea hi chu hetiang lam hi a sawipui hleih theih ṭhin loh; thinrimna rûkna riau neiin ka hre bawk. Chung avang chuan keiin hriatchan châkna ka neih belh sauh thung.






"Ka biak fuh theih hun hunah ka pa chu biak ngei ka tum ang. Engkim chiang taka hriat vek ka duh" tih pahin chaw ka bâr mawlh mawlh a.





"Ni e, han be teh. I bulah chuan engkim a sawi duh mai thei asin" Diktea chuan a lo ti ve hluai tak na a, a hnulam zel erawh sawipui a har em em thung. Diktea pawh hian ka awm loh laia thil thleng tam tak hriat a neih ngei ka ring. Ka la hre ve ngei bawk ang.





Zan thimhlim aṭangin Panhnah buaiin ka buai leh char char a. Chhun lama ka khawihsa ho an rawn la leh vek tawh erawh ka thawven phah huai thung. Diktea chu ka bulah rawn ṭhu in Guiter a kuah rân a, sak tur ber hre lo in hla hrang hrang a sa kual sek a. Guiter perh lah a thiam lo nasa mai nen lunglenpui a har viau.






Ka nu a rawn haw hma teh hlawl a, rang takin ka lo buaipui nghal sawk sawk a. Thawmhnaw zuar a nitin ṭhu a ni bawk a, thawmhnaw nalh tak tak pawh a hmu in a hre tam bawk a. Chhungkaw thil sawi aiin thawmhnaw chungchang kan hriat tam ber a ni.





"Mampuia a la rawn haw lo em ni?" tih pahin a hah thu Diktea nen chuan min fah zui leh char char a. "Kan hah loh hmel thei bik ṭhin. Nilenga Dawr daihlim a ṭhut te chu a hahthlak dan a nep awm em mai" tih pahin Diktea chu pindan lamah a lut zui hmak a.






"Ka bia ang ka tia, ka lo mangnghilh leh daih" tih pahin phone chu ka ban nghal a. Mampuia number hmetchhuak tura ka zawn thlak laiin, "Nileng maia mawng hung hman mang lova chet vel hahthlak zia hre hlei lo hian awmhmunah lo pawr ve em em ringawt zel mai" tih hluk hluk pahin a pheikhawk bun hlip in a theh thal ṭhuai a.






"Mampui, engtinnge i awm? I rawn haw dawn tawh em?" ka ti nghal thuai a. "Aw, ka rawn haw hman ṭep e. Kan inti fel mek" a rawn ti chu ka thaw huai mai. "Ka nu pawh a rawn haw chiah a, ka lo nghah tir dawn che...nge?" tih zuih raih pahin ka nu chu ka melh ralh a. Phone bihin a lo ṭhu tûm bûr thung a.





"A ngai lo, kan la rei palh takin a ril a lo ṭam lutuk ang" a rawn tih hnu chuan kan inbiakna chu kan titawp zui ta nghal a.





Mampuia rawn haw hnu chuan ka thaw huai a, hahdam deuhin ka mu ve thei tawh ang. Ka nu lah chu phone buai in a buai a. Mampuia chuan a melh leh râm râm ṭhin. Mampuia inbualna tur ka siamsak sawk sawk a. Tui khai vel erawh a phal lo bur thung. Mampuia a intihfel hnu chuan kan mutna lam ṭheuh kan pan a, Khum a mut zîk ar ar nawmzia chu ka taksa kham lutuk chuan a hrechiang teh meuh mai.






Chhun lamah ka chau deuh bawk a, ka meng hlei thei meuh lo. Lukham sirah phone dahin ka mu ṭha sat sat a. Muthilh hma hi hrehawm ka tih ber ṭhin a ni. Ka hun kal tawh thil tam takin hmun awl rawn luah an ching a. A chang chuan ka mutchhuak lutuk hi a tireh vek zel.






Tleipuii hmanhmawh zetin a rawn lut a, kei lah ka pum na lutuk chu ka lo ṭhen chât chât a. "Motor chu ka rawn kalpui nghal ania, kawng bulah khuan a ding" tih pahin min rawn pan nghal a. "I kal thei angem?" a rawn ti nghal a. "I nau te chu an rawn haw dawn em? I nu pawh rawn phei pahin biak ka tum a, a busy char char a" a rawn ti bawrh bawrh a. Ṭhenawm nu, Nu Tluangpuii ka thlamuanpui ber ṭum a ni hial awm e. Zingah engtinmah in sawiselna ka nei si lova, an chhuah vek hnu ah ka pum a rawn na thut kha a nia. Nu Tluangpuii chuan tih thiam leh theih vak nei lo mah se ka bula a lo ṭhu ringawt pawh kha ka thlamuanpui hliah hliah thung.






Mampuia chu thlan thla phungin a rawn thleng a, "Engtinnge i awm?" a rawn ti nghal sawk sawk a. Ka bulah rawn ṭhu in ka chal a rawn dek teh ngawt a. Tleipuii chu za fahranin a nui a, ka melh ngheng. "Kal ang u, Mampuia hian a chelh hneh deuh ang che" tih pahin a lo nui ṭhaw a. Mampuia lahin, "A khuasik tel mai thei a" nuih hawk hawk pahin a la ti zui. Ka pum na bawk si, ka nuih a za ve tho bawk si. A hrehawm ngar ngar viau.






Mampuia chuan hneh zetin min chelh a, muangchangin Motor dinna lam chu kan pan thla chhat chhat a. Tleipuii pawh kan hnungah a rawn inkhâi bawr nasa ve hle. Ka nu nen an inbe pah mawlh mawlh reng a, "Aw, hei kan rawn phei dawn. Damdawiin lamah chuan min lo nghak mai rawh" Tleipuii chuan a ti zung zung a.






Damdawiin lam panin kan tlan phei nghal a, ṭhut pawh ka ṭhu ngil thei tawh lo. Ka pum chu ka dawm a, awmzia a nei lem lo viau bawk. Ka kap lam rawn lum puat chu a ngaihna ka hrelo viau a, ka sawiri ngam bawk silo. Hlauhthawnna leh manganna in min bual pawp pawp a ni ber.






Damdawiin kan thlen chuan ka vaih ruai ni mai hian ka hria. Ka nu chuan mangang takin ka kutah a lo chelh thuai a. "Ka nu....ka ṭha" ka ti na a, ka ṭha lo.






Doctor leh Nurse hovin min lo buaipui sawk sawk a. Ka thu hriat leh hmasak ber chuan min vit na ngei mai. Ka in nghahna, ka engkim chu engmah lo mai a ni leh si. "A pawi takzet, nau i chhiat palh hlauh mai" Doctor- meuhin a rawn sawi chu dawt a ni dawn lo tih pawh ka hria. Lungchhe zetin ka ṭap chhuak hawk a, ka pum chu ka dawm vawng vawng a. Zan mut dawnah khan duat taka chûl in ka be mawlh mawlh a. Zan dang angin min chhâng lo a, a rawn che miah lo. Mahse, tui takin a muhil a nih ka ring kha a nia.





Tleipuii leh ka nu hmel ka hmu phei chu ka insum thei tawh lo. Ka ṭap chhuak hawk a, ka va harhchiang ber mai tak. Ka ṭhu chhuak hlawl a, ka pum chu ka dawm vat a. Ka mumang rapthlak zet vangin thlan in min lo bual huh phung a. Ka puansin zawng zawng ka lo tlawhtla vek bawk. Puan chu ka pawt chho thuai a, ka ṭhut ngai rengin ka la ṭhu a. Lukham bula ka phone chu ka ban thuai a, Sana ka en nghal vat bawk a. Zing dar 2 a lo pel awrh chauh.





Muangchangin ka mu riai riai a, ka pum chu ngun takin ka dapkual that that a. Engmah che a awm lo chuan ka mumang lam min hriatnawn tir a, hlauthawng zetin ka thaw halh a. Ka dap fuh ta, ka thaw huai mai. "Engatinge i ngawih reng a? Min ti hlauthawng alawm" tih pahin ka pum rawn nâwk che dat dat tu chu ka be mawlh mawlh a.






Vawikhatmah ka chhîng zui leh tawh lo, khumah chuan ka mu meng kar reng a. Ka mumang chu a tak ram ang maiin ka suangtuah zui a, ka hah lutuk chu ka thaw leh hawk ṭhin. Suangtuahna hrang hrang ka kâwm kual a, Malsawma leh Hriathlua te thlengin ka ngaihtuahna an rawn luah a. Rinrina pawhin ka suangtuahna vak kual chu a lo chelh ve chat mai.






Zing khawvar tur rawn inṭham mek chu Tukverh hawng meuhin ka thlir vang vang a. Thlifim rawn thaw heuh heuh leh hmun hla taka Ui bauh lauh lauh chuan chu ka khawharna min hriatpuitu awmchhun a ni ngei ang.






Ni a rawn chhuak a, ka pindan a rawn chhun ta at e. Mit bui deuh lûk in ka tho chhuak a, hâm bâi bâi chungin thingpui ka chhuang kai nghal a. Ka nu tho ri khat khat ka hre thuai bawk a. Zing aṭangin Dawr lama awm a tum tih ka hrethiam mai.






Kan chhung hi kan mu rei ngailo hrim hrim a. Ka nau te pawh hi zan an mengrei emaw reilo emaw zing an tho tlai ngai chuang lo. Ka nu chhuak tur khan Kolasib Sumo lo châng turin min chah nasa mai a. Vahchhuah hi ka peih lo viau bawk. Ka rit ve deuh tawh bawk nen a theih hram hi chuan In a awm hram hram ka duh ṭhin. Mahse, a sawi pawimawh nasa mai si a, ka nau te a tir ngam lo tih pawh ka hria.






Tleipuii ka bia a, chhuahpui ah ka va sawm a. A lo hman lo miau mai si a, keimah a chhuah mai ka ngai dawn. Mahse, chawhnu dar 1 bawr vel daih a rawn thleng tur a ni bawk a, ka hmanhmawh em em hran lem lo.






Ka nau te an chhuah hnu in Panhnah ka khawih leh sawk sawk a. Hunawl ka nei lo lutuk hi a chang chuan mahni inkhawngaih ngawih ngawih chang ka nei ve ṭhin. Mahse, buai em em mahila ka fa lo piang tur tana ka tih a ni tih ka hriatna hian chakna thar min pe ṭhin.






Ka khawih tur ang ang ka khawih zo duak a, ṭhut hahchawlh pawh nei lovin ka insiam zui nghal sawk sawk a. Sumo châng turin ka chhuak zui ta nghal a. Ka message dawn chu ka en thuai a, ka Sumo chân tur hming te, Driver number te a ni nuaih mai.





Sumo Counter ka thleng phei a, ka motor chân tur chu a lo la thleng lo tih min lo hrilh thuai a. Counter kawtah chuan ṭhutna hmun rem deuh lai ka zawng a. Midang pawh nghak an awm ve ṭhup mai.






Phone ka hmet a, ka enkual mai mai a. Traffic Jam nasa zet chu ka melh leh ralh ṭhin a. Motor horn ri tuarh lam chu ka hawi phei a, ka va han phu chiang ber. Hriathlua te pafa ka hmu hlawl mai. Rinrina chu a hnungah chuangin a pa chu a kuah ve rân mai a. Hriathlua chu U Mama rawn sawi ang khan Zu a thlah ve deuh anih ka ring, a hmel a fai vûk mai. Min rawn hmu ve lo chu ka lawm em em bawk.






Ka hawi phei leh chiah chu Rinrina chuan min lo en ve chiah, hmundang a hawi tawh lo reng reng. Min en ngar a, kei erawhin hmun dang ka enkual thuai thung. Rang takin ka kûn a, kûn chungin ka bih phei dêk dêk a. Rinrina chuan a hma ang tho in min lo la en reng tih ka hria. Ka kûn leh thuai a, phone chu ka bih ta ngar ngar a. Muangchang a ka hawichhuak chu ka thaw huai a, Rinrina erawh ka ngai veng veng nia.






Sumo a rawn thleng a, ka nu hming in ziahna parcel chu la in ka haw leh nghal thuai a. Ka ngaihtuahna leh mitthla ah erawh Rinrina chu a awm zui reng. Ka pai a ni lova, ka hrin a ni hek lo. Mahse, ka thinlung takin ka pawh a, ka hmangaih em em bawk. Harsatna tawk ta sela, ka tih theih chin a awm anih chuan ka tlanchhiatsan thei in ka ring lo.






In ka thleng chiah chu Phone a rawn ri a, rang takin ka ban thuai a. Rinrina anih ngei ringin, "Hello" ka ti thuai a.




"Ka rawn be lawk duh che" Hriathlua aw ngei a ni.




Ka nui sâng chu ka tûm nghal hmak a. "Engnge?" ka ti bung nghat a.




"Vawiinah Bawngkawn lamah i chhuak em? Rinrina hian 'ka nu ang deuh ka hmu' a ti reng a, a sawi bâng thei lova" a rawn ti nghal thuai a.




Ka ngawi deuh dat a, a hnulama Rinrina hnen aṭanga zawhna awm thei tur ka hriatchian avangin, "Chhuak lo, min hai aniang" ka ti daih a.




"A sawi reng che a, ka rawn be lawk che maw le. Amah i be duh em?" a rawn tidam leh thluam a.





"Remchang dangah ni rawh se, ka buai deuh a" ka ti thuai a. "Aw le, anih leh le. In enkawl ṭha ang che" a rawn tih chu ka chhâng tawh lo, ka dahzui ta hmak a.





Hriathlua ka huatna hi Rinrina min mamawh leh min ngaih em em na hian a ṭhiat ang tih ka hlau a. Rinrina pawh ngai viau ṭhin mahila biak lunglen loh hram ka duh ṭhin. Rinrina pawh ka ngaihtuah em em kha a reh ve ta deuh; a pa in a ruihsan ngai tawh lo anih chuan nun kawng thar an zawh pafa thei thuai turah ka ngai. Ka pum chu ka chûl thuak a, "Keini pawh nun thar hmachhawn kan ngai dawn a nia" ka ti sap a.






Ka in check up a hun leh tawh avangin vawiinah intihfel duak a ngai tih hria in ka che zung zung a. Ka phone ri pawh chu ka bih lawk hman lo. A ri tawp dawn tawh ang tihah chuan ka ban a, ka en nghal thuai. "Aw..hello pa" ka ti nghal thuai, rang takin ka ṭhu nghal vat bawk a. Ka thin a phu dup dup in ka hria.





"Ram ah kan riak a, hei kan haw mek. Signal awmna lai kan thleng a, kan ṭhu thlandai lawk" a rawn ti thuai a.




"I hah em? I chau em?" ka ti nghal zung zung a.




"Mâte, ka ṭha ania. Nizanah ka mumangah ka hmu nasa lutuk che a, ka rilru ah i awm reng a" a rawn ti teh hluai a.




"Zanah ka rawn be thei ang che angem? Thil zawh tur che ka ngah tawh lutuk" ka ti thuai a, chhânna lawmawm tak ka beisei bawk.





"Aw le, zanah kan inbe dawn nia. Hei, kan han kal leh bek bek ange" a rawn ti chu ka nui sak, ka lawm lutuk chu ka thaw huai huai in ka hria.






Kan inbiak tawp hnu chuan ka pa chu ka ngai thar veng vengin ka hria. Hmaichhan ngei a ka pa chu kawm melh melh ka chak, ka ngai ngawih ngawih bawk. Ka pa bula awm thlamuanthlak zia hrechiang ber ka ni hial ang. "Ka pa, zanah chuan ka rawn be ngei ang che. Kan unau hian hriat duh leh hriatchian chak kan nei tam teh ania" ti sap chungin ka phone chu ka dahṭha sat sat a.







(to be continue.........)


Show post links
Top