DEAR PAIN BY Brigida Hugo (Completed)

[Ngaia]

DEAR PAIN
Chapter-7



By : Brigida Hugo






"Mama, kawngkhar lo hawng teh" kawngka kik dat dat in Hriathlua chuan a U chu a ko mawlh mawlh a. Kawngka lamah thawm rawn awm in kawngkhar a rawn ri rak a; rawn in hawng zui in mipa pianṭha zet mai a rawn chhuak zui zat. Kan pahnih chuan min thlek tawn zuk zukin a khi suk a, lut tur a min tih rualin amah chu a lut zui nghal a. Inchhung a kan pênluh rual chuan ka hawi kual deuh zak zak a, an In luah chu zau lem lo mah se a nuam tawk reuh hle. A landan ah hmeichhe che fel takin a enkawl tih a hriat theih bawk.






"Engtin nge awm in tum? Inpui lamah luh in tum nge?" meizial lak kai pahin a U chuan Hriathlua chu a melh pah rûn a. Kei erawh ka hawichhuak ngam tawh lo, ka kut ka sik niap niap a; ka zâm hle tih ka hmelah pawh a lang hial ang.





"Zanin chu hetah kan riak phawt ang, khua te var phawt se; boruak a zir te pawh aniang chu" Hriathlua'n a lo ti let ve thuai a. Room lam aṭang chuan ham bai bai chungin kan U rual tur awm vel hmeichhia a rawn chhuak ve chhat chhat a, kan thawm ah a harh tih ka hrethiam nghal.





"Lalhriathlua ve ngawt zel hi!! Rûk rûk i va hrat reuh ve maw le" tiin a sahdah hum lai chu a phelh zui mawlh mawlh a. Hriathlua u nupui a nih thu min hrilh pahin "U Marem" min ti mai rawh a rawn ti zui zat; chutia a landan mai aṭang chuan hmeichhe khirh tak a nih hmel lem loh.





"Ni e, zan a rei tawh Bawihi, mutna siam sak la; mu phawt ang u" tiin U Mama chuan an nu chu a tir zui zat a, ani pawh room lamah lut leh nghal vat in mutbu a rawn pawm chhuak lûk lûk a; a thingpharh zui nghal mawlh mawlh a. Chet ve mai dan tur hrelo zetin ka lo ding kawisawi ve reng a, lo chet ve nghal bawrh bawrh kha ka zak deuh tlat; awm tawp chu nuam ka ti chuang bawk silo. Ka awmdan chu a laklawh kual vel vek.






U Maremi'n kan mutna tur a siam zawh chuan an nupa in room ah an lut zui leh nghal thuai a, an mutui lai kan kaitho ngawt mai nen ka in thlahrung ru viau. Hriathlua chuan chawhmeh bel hawng kual in ka rilṭam leh ṭam loh min zawt a, ka ril chu a ṭam ru reng na a ka rilṭam loh thu in ka chhang ta zawk a. In phihfai lawk ka duh avangin bathroom lam ah ka lut zui ta zawk a, ka intifai zui nghal thuai a. Hriathlua chuan mut pahin TV a lo en a, a ban lehlam kham in a mu zangthal duai a. A bula ka mu tur chu ka zak deuh tlat, muhil daih se te ka ti; ala meng fiah nasa mai bawk si.





"Khatia tawi khawmuang sek lo khan lo mu mai mai teh, in tih lum te i ngai a nia; i hritlang mai ang" TV en reng chung chuan a rawn ti dût a, chhuanlam ah ka bag ka lo hai kual sek thung. Thawmhnaw hakthlak ka keng em em lo a, vawikhat in thlakna tur chauh ka keng. Bawr zeta kal kha buaithlak riau dawn a ka hriat vang a ni pakhat bawk. Tleipuii hnen aṭangin tihdan a awm mai turah ka ngai; Underware erawh ka keng nual thung, ka kalna apianga ka ken duhâm ber thil a ni ziah bawk.






Hraithlua ban lehlam kham in ka mu tawm kak a, ani erawh chuan a film en lai chu hmuhnawm ti zetin a en ngar thung. Ka phone kha ka la ti nung leh lo a, zing lam dar hnih a pel duai tawh. Zing khua a var anga, ka chhungte hrilhhai dan tur ka ngaihtuah chuan ka thin a tawt up up a. Engang in nge min rawn tihzui ang tih chu ka rilru luah ber tu a ni bawk. Ka pa aiin ka nu a che na zawk ngei ang tih pawh ka hria; a lo hmachhawn tu tur nih chu thil chakawm zawk zawk loh tak a ni.






"I mut a chhuak em ni?" tih pahin ka sam a rawn hui kiang a, ka lo maimitchhing tlat thung. A nui hak a, a lama min pawh hnaih salh pahin nghet zetin min kuah hlu hlu a; lo kuah let ve nghal thuai in a âwm ah ka hmai ka phum zui kak a. "Hrehawm i ti em? Khua var se In pui lamah kan chho dawn nia" ati leh sup a, "A zahthlak awm e" ka lo ti thuai a. A nu leh pa han hmachhawn chu ka huphurh takzet, min lo hau hrep mai ang tih te ka hlau em em bawk.






Ka khabe ah rawn tuai zeuh in dimte in min kuai dak a, ka meng siar siar a. Ka mit ah chiang zeta min en in a hmui in ka hmui a rawn si de de a, muangchangin min fawp zui a. A duhthawh tawlh tawlh a, a kut a hlei ṭan viau bawk. "Fawh nuam nu" ti sup in a thaw hulh a, min fawp zui leh bawrh bawrh in a in nem kang a, zangthal zawnga min dah remin min rawn bawhthuah nghal zat a. A ngawng ah lo kuah zui ve in ka thiam ang ang in ka lo chhanglet ve mial mial a, a thaw a rang sauh bawk.






Min fawhna aṭanga in la hrang hlek in a hmui ka hup sak chat a, mitmeng phelh phungin min en rûn a. "Hriathlu, englo....ka virgin tawh lo tih i hriat kha" inthlahrung zetin ka ti sap a. Ka in thlahrung em em a, a tan hlu lo dawn riau a ka in hriatna chuan min kap tlat. Malsawma lakah khan ka thianghlimna pawh hum zo lovin ka in pumpek fai vek kha a nia, Sex hmang zui tawh miah lo mahila ka hlutna ve ber erawh a bo hlen ta tho.





"Ka hre vek Bawihi, KS pawh ni mahla ka hmangaih miau che chuan hmeichhe dang ai in ka tan i thianghlim zawk; i in thlahrung hmel hi zanin bak ka hmu duh lo ania" ti sup in min fawp zui leh tawn tawn a. Kei pawh min kap tlat tu ka sawichhuah takah chuan ka thawl huai in ka hria. Ka bawp kuai kak in a rawn tlazep zui zat a, a mipatna ruh ṭung a min rawn nawr tâwk rual chuan ka lo thaw hak a. A chet zawnga a khûr deuh dar dar chuan min mamawh zia a ti langchiang hle.






Ka thawmhnaw hlip in min hrawm pah nawk nawk a, a che reng reng chu a phelh deuh phung bawk. Ka mit a chiang tak a en chung a ka taksaa a rawn luhtir rual chuan ka lo âng pam a, nui sak in a chet zawm mawlh mawlh a. Thawm chhuah rin hlau zet in ka hmui ka pet ngar ngar a, ani erawh a che uar sauh sauh tawh hle.






Thaw hawk in a rawn bawk zui thlawp a, a tukhum ah ka lo chul sak hauh hauh. "Bawihte, ka hlim takzet" tiin min rawn fawp zui leh tawk a; ka lo nuih var var a. A hmel a lungawina ka hmuh rual chuan ka hlim veng veng.





Thawmhnaw ha ṭha in, in kuah rialin kan mu zui a, ka mut a chhuak tawh viau bawk. Ka chalah fawp zeuh in muhil turin min ti sap a, nghet zet a kuahin a âwm a hmai phum zui zatin ka chhing nghal diar diar a. Kan hmachhawn tur boruak la rit viau mah se ngaihtuah duhlo luiin min kuah mektu pang tilum thar thar nek talh talh chungin mangram ah ka lut riai riai a.






Ui bauh ri ring zet ah chuan harh hlawl in ka hawi kual ruai a, ka awmna chu ka hai ṭhelh nghe nghe; banga Sana in tar chu ka en nghal vat a. Zing lam Dar 5:42 chiah a ni. Ka bula tui taka muhil mek chu ka en reng a, a biangah dawmin a chalah ka fawp zeuh a; hmuhnawm ti zetin ka en zui ta reng a. "A la hma a nia, muhil leh rawh Bawihi" a rawn ti zawi ruih a, a lo harh ru reng tawh zawk nge ni? "Ka mut pawh a chhuak tawh lo, thawh mai ka duh" ka ti let sap a, chhuat a mu kan nih avangin thawh tlai ka hlau a, ka muhil zui ngam tawh lo.





"I mu tlem si, i chau lutuk ange?" tih pahin a rawn meng zui duar duar a. A mitmeng sen râm ah chuan a mut la chhuah zia ka hre thei. "Thawh tlai ka hlau, a zahthlak alawm. Muhil leh rawh, ka lo meng ang" ka ti ve bawk nangin ka rilru ah erawh 'muhil tawh bik lo se' ka ti thung. Ka rilru hria ni awm takin a rawn in beng kang a "Anih, kan tho dawn nia, midang lo thawh ve hmaa inbual te i duh em? Tui lum ang aw?" tiin a ham zui bûi bûi a.






Rice Cooker a tui lum min chhuan sakin keiin thingpui ka lo lum ve bawk a. Kan awmdan chu nuam tih riau na ka nei, min duatna a tihlan dan te chu uchuak silo a hmuhhmaih harsa tak a ni thung. Ka ruala inbual ve a duh thu a sawi erawh ka hnial fithla ṭhak, midang lo thochhuak ve se mak min tih ka hlau; min sawi zuina tur thil a awm palh ang tih ka hlau ru viau bawk. Thingpui kan in zawh ah kan mutna tifel zuiin inbual turin bathroom lam ka pan zui a, tuilum pawh min lo siam sak fel diam tawh.






Rawng kan bawl chhunzawm a, kei erawh ka che tlem viau. Chawhmeh siam tur awm nual mah se an duhdan in ka siamlo ang tih ka hlau, ka rilru a awm ang pawh ka che ṭha vak ngam lo. Sangha rep leh thlai bai pawlh tur chu kan buaipui mawlh mawlh a, ka rin aiin Hriathlua chuan chet vel a thiam; rawngbawl pawh kei aiin a thiam hmel fe zawk. Tui dai ah thlai rah te chu thlakin a chawk zui rak rak a, a sir ah kut kuangkuah at a ding in hmuhnawm ti takin ka lo thlir reng a, min melh zauh in a kiai leh sak ṭhin. A che vel reng reng chuan ka mit a tlung ngawih ngawih.






Dar 7 pelh ah an rawn thochhuak ve hlawm chauh a, U Maremi chuan, "Choka lama eirawngbawl ri rak rak ri ka hria a, thlamuang deuhin ka muhil leh daih alawm" a rawn ti bai bai a. Chet chhawk tu a nei dawn silo a; tuk khat lek awl pawh atan chuan a thlakhlelhawm viau ta ve ang. Fa naupang te te pathum an nei a, an hmelṭha hlawm em em leh nghal. Naupang chhawnchhaih dan ka thiam vak lo bawk nen, mak tih hmel deuh a min en hâ ha te chu ka zak deuh tlat. U Maremi chuan, "A nute' ti rawh u," a ti awlsam puat a, a ri phawng phawng a; a nuih lah in a bei ring thei em em khawp leh nghal. Naupang ho pawh chuan min ko zui ve mai bawk a, lai zet in ka lo chhâng ve sap zel; Hriathlua'n min nuih ruh ruh ṭhin chu rum zetin ka melh leh hrawk ṭhin bawk a. A fanu Emily chuan min nel reuh phian a, ka sam min khuih sak in ka bulah a tap deuh chawt a ni ber e.





Tukṭhuan kan ei a, naupangte erawh School an kal tawh thung; U Maremi'n a thlah fel vek hnu ah chaw kan ei ve ta chauh a. Ka chhungte pawh zingkar ah khan Tleipuii'n chanchin a hrilh tawh a, ka nu a âng nasa viau niin a sawi nghe nghe; Amah Tleipuii thleng chuan a hmer tel vek a ni awm a, Tleipuii lakah pawh ka inthlahrung takzet. Ka phone ka la off tlat a; mahse, chutia engmah hre thei lo a awm ringawt pawh chu a dik ber chuang lo. Engtia min tih zui nge an tum tih tal ka hriat ngei ngei a ngai.





"In puiah chuan chho rih lo mai ula ka ti, hetah hian awm rih mai rawh u. Mami tan pawh mi hran hran hmelhriat thar sek kha a zak ve rih ang" U Mama chuan a rawn ti sup a, ka lo pawm hmin hmak; In pui lam chhoh kha ka huphurh ru reng a ni.





"Nia, zingah te min thawh chhawk anga. Rei deuh deuh mut ve te pawh ka chak, awm rawh u" U Maremi lah chuan nui uarh uarh chungin a lo ti ve thuai bawk a. Nui hak in Hriathlua ka en a, a chawthleng chu ngawi rengin a lo melh vung vung a. A hmelah chuan vei nei a ang; ka nghawk zauh a, ka mit ka san khum pah âk bawk a. Nuih suk pahin, "Nia, heta awm rih hi a ṭha zawk ang" a rawn ti nghut a.






Khawlai ti nal tawk lek in ruah a sur cherh cherh a, mut a chhuak ruih bawk. Ṭhutthleng ah Hriathlua ngheng in ka ṭhu âr âr a, ani in ka phone ah Sim card a vuah mek; ka phone ka en chak loh ṭum ber a la ni hial ang. Amah chuan a en zui nghal a, Tleipuii messange a chhiar dan dan a; a hlauhthawn thu leh ka nu in a hmer tel ve dan te a rawn sawi nual. Keimah vanga hmer tel a ni ve chu nuam lo ka ti takzet.






"Kha, hei chu mahni a chhiar chi" tiin phone chu ka kut ah a rawn bel chawt a, in siamrem in ṭhutthleng ah chuan a mu zui daih a. Malsawma message lo awm chu ngei lutuk in ka melh vak ringawt a, awmzia erawh a nei viau lem lo. Hawng lo a delete mai ka tum laiin ka en chak leh tlat pek a, Hriathlua chu ka melh zawk a; a mit a lo chhing daih thung.





'I ti ta nge nge maw, i kawng thlan chu fuh mawlh rawh se. Ṭha deuhin awm reng ang che u' tih chu vawi tam tak ka chhiar nawn, ka thlan zawk kawng ah hian hlim takin awm ila ka ti; ka hlim lo a nih vaih chuan Malsawma lak ah ka hawi sang thei nang. Amah ka hriatrengna te pawh chu bo thuai se ka ti bawk, ka chhungrila amah ka ngaih veng veng na erawh a bo hmak thei lo; zawi zawi in a reh chho ve mai tur ah ka ngai. Hriathlua tana rinawm em em chu ka tih tur lian ber ah ka ngai nghet hmiah bawk.






Hriathlua chu a thinrim ka rin nen, ka rinloh lam daih in a awm zui ta daih; ka thaw huai mai. Chhuah thawven ka duh leh duhloh min zawt a, chhun êng a chhuah erawh ka zak; "Zanah kan lengkual dawn nia" ka ti ta zawk a. Ka chhungte an la reh reng chu ka ngaih a ṭha lo, an rawn ri buaih mai ang tih pawh ka hlau ru viau bawk.






Chhun thingpui kan in zawh ah a farnu te In ah kal lawk a duhthu a sawi a, a hla vak lo a tih avangin ka zui ve a. Kawngpui pangngai kal ngai lovin kawng pen hleh deuh a lo awm hlauh a, ka lawm ru viau; khawlai a kal hrim hrim chu ka hreh ru deuh tlat, hmelhriat kan hmu nawlh ang tih te ka hlau em em bawk a. Step tlem te kan chhukthlak leh hnu ah a farnu te In kawt kan thleng a, naupang pahnih pawnah an lo in khuallem a; chirhdiak nen an lo in hnawih berh nasa mai. Hriathlua chuan an biang a piai sak zeuh pahin a nu a awm leh awm loh a zawt pah a, a te zawk chuan a awm thu in a lo chhang thuai a.





"Awi, ka lokal ang ka ti reng a. Thil tih tur a tam leh sia, naupang lo in khawih berh nen; lo ṭhu phawt mai teh u" a farnu chuan chet sawk sawk pahin a lo ti thuai a, kan ṭhu zui nghal thuai a. A farnu chu Hruaitluangi niin, a pasal chu Ṭhazuala a nih thu te; fa pathum an neih tawh thu te chu kalkawngah khan min hrilh diam tawh. "U Hruaite ti mai rawh, i duh leh 'Mami' ti la" a ti kha a nia. Ka bo hu hu loh nana ka zawh kher ngai lova min hrilh thlap chu a nachang a hria ka ti viau mai.






"Ka nu te nen in in hmu tawh em?" U Hruaitei chuan kan bula rawn ṭhut pahin a rawn ti nghal siam siam a. Ka lu ka lo thing nâ na a; mawi ti leh chiah lo in kan la in hmuhloh thu in chhâng zui leh thuai a. "Engtinnge i duh zawk le? A hmelchhiat chhiat nen" min en ran in Hriathlua lam a hawi pah zauh a, ka lo nui hak ringawt.





"Khai khai, khatiangin hmelchhia min ti fo suh; ka luck vanglai a ka thlan a nih kha. Min phu lo zawk" Hriathlua lahin a rawn ti zawm ve zat, an unau chuan an in hnial bap bap a; ka lo nui leh hak hak ṭhin. Ka rin aiin a unaute bula awm a nuam phian zel, U Mama lah 'engpawh ṭha' tia thlir liam mai chi a nih hmel a; a farnu pawh chu a chet vel dan en in mi khirhkhiap tak a ni lo tawp ang.






U Hruaitei chu a titi siam siam reng a, in thlahrung lo a mi siam a thiam hle bawk. A khat tawkin a fate a thlithlai reng a, a zuan zang reuh bawk a; a chevel hmuh a nuam ka ti takzet. Thu tak fe in Hriathlua chu puitling taka awm tur in a zilh malh malh a, kan boruak tawn chhoh turah pawh rilru fim taka engkim ngaihtuah hmasa zel turin a chah mawlh mawlh bawk.






Ṭawng zawm leh tuma a ân leh zuau laiin Hriathlua chuan "Ka zun a chhuak" tih pahin Bathroom lam a pan zui a. Melh zui râm râm in U Hruaitei chuan "Thu tak sawi dawn hian chhuanlam siam in a inthiarfihlim daih zel. Rik buan buan a ching a nia; nakin zelah pawh veng ru deuh ṭhin ang che. A puitling lo bawk si, a hahthlak dawn teh a nia" a rawn ti zui leh mawlh mawlh a, ka lo bu ve nghat nghat ringawt a. Ka hriat ve chin ah chutiang zawng a Hriathlua a awm ka la hre ngai lo a, a sawi ang chu a thlen ka ring lem lo bawk.





Hriathlua rawn chhuah leh rual chiah chuan kawngka lam aṭangin Nu lian vak lo a rawn lut ve mek bawk a, keimahah a mit a rawn fu nghal chat. Kan bul ṭhutthleng ah chuan a rawn ṭhu ve nghal a, Hriathlua rawn kal hnai ve mek chu a melh khai khai bawk. Hriathlua chuan ka bana min rawn kai deuh lawp in "Phei ang" tih pahin pawnlam ah min kaichhuak nghal dawr dawr a, a awmdan teh thut chuan min ti hrilhhai viau bawk.





Step a min kaih chhoh dawr dawr lai chuan ka pawt let vak a, a ding chawt. "Engnge maw i hriat teh thut le?" tih pahin ka melh kal a, ka hah lutuk chu ka thaw hlawi hlawi bawk.





Thaw hak in a hmai a tuai puat a "Ka nu a nih kha" a ti zawi sup a, ka meng deuh âwk nghe nghe. U Hruaitei te In lam melh zauh in "I nu a nih te chuan pangngai deuh te paw'n min hmelhriat tir ve ta che? Mawl min ti ngawt ang" ka ti niah niah a.





"Kal phawt teh ang" tiin ka hnunglam aṭangin min nem chho dat dat a, zawi zet in ka pen chho chhat chhat a. Ka ke ah hian tha a awm hlawl lo ni maiin ka hria. Kan hun tawn chhoh mek chuan min ti chau takzet.





In kan thlen chuan U Maremi chuan in leng a lo nei a, amah ang rual tur vel hmeichhe ngo zet nen chuan an lo ri dun barh barh a. Kan lut thawm hria in an rawn hawi rual zawk a, chu nu chuan Hriathlua chu melh ran in a nui deuh pât pât a. " I chhe lutuk, khatiangin mi nuihsawh hmel kha pu suh" tih pahin Hriathlua chu a nui vur vur a.





"Lungleng an awm ang a, rilru na deuh a ṭap mek te pawh an awm ka ring" chu nu chuan nui ar ar in a rawn tih zawm zat a, ka lo nui ve sak ringawt. "Thil âwm ang lo deuh hi sawi hlut zel suh" tih pahin Hriathlua chuan ka ban ah min kai a, room lamah min luhpui ta daih a. U Maremi ṭhiannu nui zui vak chuan min ti awm nuam lo hle bawk. A lo fiamdan nen ka ngaihtuahna a hruai kawi ṭep in ka hria. Tum deuh barin khumah chuan ka ṭhu thla hnawk a, ka kuangkuah at bawk.





"Kan thinrim em ni?" Hriathlua chuan nui huk huk in a rawn ti leh a, ka hma ah tak a rawn ding zui zat. Rum zeta melh in a ngal ah ka lo pet chawrh a, a ke a khai nghal vaw vaw a, na tih hmel zeta a ner kual vel chu rum zetin ka la melh ngar a. "Mi fiamthu mai mai tum pui bur bur suh, min fiam thiam ve dan a nih kha; i pet na ropui si. Khawi mu hahdam teh ang" tih pahin a rawn bawk thla thlawp a, kei erawh ka la ṭhu fel at thung.





"I nu khan mawl min ti awm, i ti mak e" ka ti zui leh nang nang a. Ka rilru ah a ri lian em a ni, kan in hmuh hmasak ber na a awmdan tur atan chuan a mawi lo ka ti ve em a ni. Zangthal zawng a rawn in let thak in "I la hre dawn chauh alawm, muhil daih ang. Ka mut a chhuak" tiin thudang a sawi zui daih a. A ngaihsam lutuk chu ka ngei viau bawk.






Pindan kawngka an rawn kik dat dat a, ṭhut ṭhat pahin lut tur in ka lo chhang zui thuai a. Hriathlua nu rawn lut hlawl chuan min tiphu deuh zawk nghe nghe. Hriathlua chu ka kheuh zeuh a; a awmdan ngai reng in a la awm reng lehnghal a.





"Engvanga tlan chhiatpui daih nge maw i nih le? Mi te pawh hmelhriat tir ve ta che. Tho teh" a nu chuan a ban ah a pawt zui zat a. Rawn tho chhuak ve in ka dárah min rawn kuah a, a hâm lui bûi bûi a. ABnu chu melh zawk pahin "Hei hi ka nupui, a ruk a ka ruk chhuah Zothansangi anih hi" a ti nghut a. "Bawihi, hei hi ka nu Lalparmawii anih hi.... 'Nu Parte' ti rawh" a ti zui hmuk. A ṭawngkam hman dan mai mai chu leh; a nu chu awm lo sela ka chum zawt duh ang.





A nu chu thaw hak in ka bulah a rawn ṭhu thla ve a, kan veng leh ka nu leh pa hming te min zawt pah mawlh mawlh a. Kei pawhin ṭha tak in ka lo chhang let ve thuai a. Hriathlua bawk rawn in rawlh leh in "Zawhna zawh vak vak a ngai lo, ila hre hlei hlui dawn" a rawn ti leh sup a, rum zet in ka lo melh leh hrawk a; A nu bula a khawsak dan chu ka ngei ngawih ngawih tawh.





"Kan hriatchian ve te pawh a ngai alawm maw aw.....thupha chawi a kal te pawh a ngai anga. Nangmah ngel ngul hian engmah min hrilh nachang i hre lo a, i u ka aṭangin kan hre ve chauh a. Tukin zingah te khan va kal daih tawh tur kan nia, a chhungte pawhin mawl min ti ru viau tawh ang chu; Zanin lamah i u leh i pa Ruata va kal rawh se. Nangni pawh Inpuiah rawn chho ang che u" a nu chuan a ti zui leh thuai a. A sawi chu dik ka lo ti viau mai; ka chhungte lam pawhin an lo beisei ru ve reng tawh ang chu.





"Ka han haw chho ange, rawngbawl a hun dawn. Chaw rawn ei chho zawk ula" a nu chuan min nuih sâng pahin a rawn ti leh a. Hriathlua chu mitmei in ka râwn zauh a; chhoh mai pawh chu pawi ka ti lem lo.





"Chaw eikham lamah kan lo chho zawk ange, chaw kan ei puar ngam lo ang" tih deuh kher pahin a mu zui leh nghal daih a. A nu pawh a chhuak zui nghal a, choka lamah U Maremi nen an ri dun zui barh barh.





"I nu i chhang pawlawh em mai a, kei chu i nu kha ni ila ka vaw zawt zawt ang che" ka ti zui malh malh a.





"Ka muhil leh lawk dawn, ka meng hlei thei lo" tih pahin lehlam a hawi zui daih a.




"Muhil teh, thil sawipui i har em mai" tih nghat pahin ka tho a, U Maremi bulah ka phei zui ta daih a. Rawngbawl turin a lo in ruahman mek a, ka pui zui ve nghal thuai a. U Maremi hi a ṭawng duh a, nuih a heh hle bawk; a bula awm chu a hahdamthlak ka ti viau mai. Naupang ho in Computer ah games an khel a, a khat tawkin an in ti ṭe deuh reng bawk a, U Maremi chuan a chalrem deuh reng mai.





Zanriah kan kil laiin U Mama chuan kan in lama kal an tum thu chu a sawi ve leh a. U Maremi'n ka chhungte zai ngai tak a ṭawngkam thlah turin a lo ti zui ve mawlh mawlh a; hmeichhe fing thawkhat tak a ni tih a langchiang hle. Keini pawh chaw eikhamah Inpui lamah kan chho dawn tih Hriathlua'n a sawi ve bawk a. U Mama chuan buaina siam lo zawnga awm tura a rawn ti leh chu ka hrethiam chiah lo; boruak eng emaw tak an nei niin ka hria.





Hriathlua chuan ngawi rengin chaw a bar mawlh mawlh a, a hmel hmai lan danah chuan eng emaw in mung mek awm in ka hre deuh tlat, hahdam takin ka awm thei lo. Chaw eikham ah in tifel zui thuai in U Mama te nen kan chhuak rual a, Garrage kawtah ding in an Bike ve ve an la chhuak a; kan kalna tur lam a in ang lo bawk a, kan tlanchhuah san zui thuai a.





An veng chu ka vawikhat kalna a ni bawk a, kan thlen chin apiang chu hriatchian tum in ka en uluk viau zel. Aizawl a awm ve e tilo hian dawr lama ka awm a nih ngawt loh chuan hmundang ah ka chhuak vak tam lo a, kal ngai lohna veng ka la ngah mai. A tlan chak bawk si, ka duh ang pawhin ka thlek kual hman lo. In pakhat zawn ah ding dat in "Lut kawi lawk ang" a ti a, ka chhuk zui vat. Kawngka kik in lut tur a sawmna kan dawn hma in a pawt hawng rawk a, a lut zui vut; ka zui lut ve nghal thuai a.





Ṭhutkhawmna ah chuan patling rual card dengin an lo ṭhu bial laih a, kan luh rual chiah chuan current a rawn thim hmuk leh nghal. Pen zawm ngaihna hrelo in ka ding dat a, Hriathlua kut ah ka vuan zui chat; nghet zetin ka kut a lo hum zui ve vat bawk a. Solar light an ti eng zui thuai a, Chair la zui vat in min ṭhut tir a, ka bulah dingin ka sam ah a chul hauh hauh a.






An zing a pa cher sang deuh chu rawn ding chhuak in min rawn chibai a. Hriathlua en in a nui vur vur a. "Lalhmuzova ni la a ṭha ang" tih pahin a nui huk a, midangte pawh chu an lo nui ve ham ham bawk.





"Ngawi mai teh, thu tak hi pai ve deuh teh u" Hriathlua chuan a ti let ve vat a, a nui pah hawk hawk a. Min fiam zui laih laih a, " Ani nei tur chuan hrisel ṭhat a ngai a nia. A boruak hap a sang si; Zakhaw râwi-a anih hi" tiin an nui zui ham ham reng a. Chhang ve lem lovin ka nui ve sak ringawt; diktak chuan nuam ka ti lo. Zu rim nam rum rum leh meizial rim in chawhpawlh te chuan ka luak an ti chhuak hlui a.





"Kan kal tawh mai dawn em ni?" tih sap pahin ka ding zui at a, chulai hmun chu chhuahsan vat vat ka duh. "Kan kal ange, Inpui lamah min nghak mek a" tih pahin ka darah min kuah a, la awm ve rih turin min lo ti sap sap hlawm; "Niidangah kan la rawn leng leh dawn nia" tih pahin pawnlam min pan pui a, kan chhuak fel chiah chu ka thaw huai.






Bike a tih nun rual chuan ka lawn kai ve nghal thuai a, a dawk chhuak nghal puat chu a hnung zangah ka chum dawp; nui ri hawk in a tlan muang zui ve mai bawk a. Thui vak lo kan tlan hnu in kawng chhak lam ah Bike a ti ding a, a bula in rel chu kawk in an In sak lai a nih thu min hrilh nghal zat a. Thlalak ah kha chuan min hmuhtir ve tawh a, a hmun a han hmuh takah chuan ka rin aiin a pui daih. Step ah chuan chho in In rel chu ka en chho pah zel a, chhawng li lai a ni. A chung berah chuan an In hlui choka lam chu la dingin chu pawh chu a chhawng tho a lo la ni, ṭhiat ṭhen in an sak zawm a; a remchang viau.





Kawngka a kik dat dat a, rei vak lo ah kawngkhar a ri rak a. A nu in rawn hawngin kan lut zui nghal thuai a. AnnIn chu a lian lem lo a, a thlanglam bang chu ping chawp in chumi bak zawng chu Inrel chuan a zawm thla vek a; slab an chhung tawh a ,a zawl thla duai mai.





Ṭhutthleng sei ah chuan kan ṭhudun a, In chunglam aṭangin pa la valai tak a rawn chhuk ve mek bawk. Hriathlua nu chuan thingpui a thli zui mawlh mawlh a, kurtai nen a rawn chhawp thuai a. A pa hmel ka hmu ta chu ka zâm ru viau, Chair la in kan hmazawnah chuan a nu nen an ṭhudun a; ka khur ru der der in ka hria.





A pa chuan a 'Aw' thian khurh in ka hming min zawt a, ka chhang zui vat. A mit mengah chuan min chîk hle tih ka hria, ka va zâm mai mai tak; ka thaw zeuh zeuh chauhin ka hria. Hriathlua lam hawi zuiin a melh ngur a, ka lo en tawn ru deuh zak zak reng a. "Lalhriathlu, i thil tih hi i hrechiang meuh maw? I mawhphurhna i hlen zo meuh ang maw?" a ti ram hmuk a, ka lo ip deuh chawih a.





"Ka hlen loh tur mawhphurhna ka lak duh i ring em? Chutiang em em a mawl chu ka la ni bik lo a nia" tih pahin a kiai suk a. Amah hringtu pa a chhanlet dan chu ṭul lo ka ti kher mai. A pa hmel ah chuan thinrimna a rawn langchhuak nghal zat a, Hriathlua lam hawiin a in siam rem sauh sauh bawk a; ka lo khur ru der der tawh.






"I mawhphurhna ṭha taka hlenchhuah dap i nei tawh em le? Nu leh Pa min zahna pakhatmah i nei lo bawk. Thu ṭha a zilh dawn in i ngaithla peih lo a, i chapo em em reng mai te hi engnge maw chhuan tur i neih fakau le? Tun thil thu ah pawh engmah min hrilh hre duh lo a, kan la ngaihtuah zui ṭawk ṭawk che anih hi.... Min zah lo taka ṭawng tur i ni lo tih hre rawh" a ti ta khur khur a, kan boruak chu a rit kher mai. A nu chuan awka dam zawkin a lo zilh ve mawlh mawlh reng bawk a.





"Min zilh tur hian eng i nih vak bik ka hre lo e. Kan naupanlai aṭangin Zu bel bulah min seilen tir a; i khawsak dan zawng zawng te kha ka la theihnghilh bik lo e" Hriathlua chuan a ti leh nia... Khap tumin a banah ka vuan chawt a, na zetin a lo thing nawk a. Mangang ru zetin a nu chu ka va melh a, ani erawh in Hriathlua a lo melh ngar thung.





"A ṭha e, kan tun boruak ah pawh ka kut ka sil ni rawh se. I U Mama ho a in in chinfel theih leh in chingfel ula, in inbe rem ta a man hlan te in lo tum a nih pawhin min rawn pun buai suh ang che" a pa chuan a ti ta hmak mai. Ka bing mup mup in ka hria, an ṭawngkam tin te chuan min deng dawt dawt a; an pafa inbiak dan chu ka rinloh lam hlir in a kal bawk.





"Ka mamawh em em lo che, min hnawtchhuak tu kha i nia; ka rawn pun che ring suh" tih nghut pahin Hriathlua chuan min pawt tho lawp a, min kai chhuak dawr dawr a; ka ipik lutuk chu ka thin a rim hlur bawk.





"I pa anih kha....engvanga khatia zah lo taka bia nge i nih a?" ka ti tuarh a. Khawlai chu a reh ruih tawh a, Current a thim avangin min lo hmu tu an awm leh awm loh pawh a hriat theih loh. "Ka pa pawh nise zahtlak ni miau hek lo. A nun a entawn tur nei lek lo khan ka zilh e te min tih ve khanglan ni? Ka mamawh ther te lo e" tih ngal ngal pahin a Bike seat chu a chum bur a, ka phu zawk.





Kei hi eng buaina ah nge ka in ham luh tak? Ka hriat ṭhin Hriathlua kha tunah chuan ka hmu tawh lo, tun ami hi chu midang daih a ni tawh. A thinrim in hrosa vel chu ngawi reng a ding in ka en reng a, a au kuk kuk reng bawk a. Ka kawng thlan hi ka thlang sual dawn nge? Ni thar lo herchhuak lehin engkim felfai takin a rawn awm leh mai ang? Ka ngaihtuahna buai zet avang chuan ka ṭhu hnawk a. Ka bula thinrimna hrithla mek thawm chu ka beng ka hup san a, ka chhungril tawt lutuk chu ka mittui in a rawn luanchhuah pui ve nghal zat bawk. Eng thil nge ka la hmachhawn zel dawn tih chu rin lawk ngaihna ka hre lova, ka ngaihtuah lawk thiam hek lo.







(to be continue.......)


Show post links
Top

[Ngaia]

DEAR PAIN
Chapter - 8



By : Brigida Hugo



Zankhua in thinthi in ka mu miah lo a ni ber e. Zing khawvar hma aṭangin fiah takin ka meng kar reng a. Ka ngaihtuahna zawng zawng chu keimahah hian a luang lut kim vek ni mai hian ka hria. Ka bula mu chu ka thlek leh zauh ṭhin a, ka hriat ṭhin Hriathlua tho kha a ni. Mahse, a mizia erawh hmuh tel loh inthup ka hmu in ka hria.





Ka thaw halh a, thawm dîm takin ka tho a. Tukverh bulah chuan dingin Parda chu ka keu dêk dêk a. Pawnlam boruak thim chhah mup chuan ka ngaihtuahna tawi tuk mai chu a rawn belhchhah sauh niin ka hria. Ka hawi let a, Khum a tui taka Hriathlua mu chu ka en tlawk tlawk a. Ka thlakhlelhna mitmengin ka en hauh lo, mak tihna hlir keimah aṭang chuan a chhuak ni mai hian ka hria.





Zing khawvar tur rawn inṭham ṭan thlengin ka dinna ngaiah chuan ka ding tlawk tlawk a. Ka ngaihtuahna leh suangtuahna kaldun chuan engmah dang a thlen em em lo. Keimahah zawhna chi hrang hrang a thlen mawlh mawlh a ni ber.




Choka lama thawm a awm rual chuan ka in beng kâng vat a. Rang takin ka thochhuak zui nghal thuai a. Choka lam pan chuan ka pên phei sawk sawk a. U Maremi tho hlim hmel phak chuat ah chuan lungawina hmel hmuh tur a tam lo viau bawk. Hriathlua khawsak dan khan a thin a tirim viau dawn tih pawh ka rin ngheh sa a ni bawk.




Ngawi rengin ka che nghal sawk sawk a. U Maremi chuan, "A la harh nange kan mihring pa chu?" a rawn ti hluk a.




Ka melh ralh a, ka chaw sil lai chhunzawm mawlh mawlh pah chuan, "A harh daih tawh ang. A îp lui ṭhin alawm," ka lo ti ve nghat a. Tun dinhmunah chuan Hriathlua chu hau hrep tu tur awm se ka ti ber rih mai.




"He mihring hi chuan min va tizak hnem tak, zilh loh fa ang chiah," ti hlak hlak pahin a hmai a hru ro pah zung zung a. U Mama rawn thawhchhuah rual deuh thaw in Hriathlua pawh a rawn thochhuak chhur chhur a.





U Mama hmaa Hriathlua ṭhu kun chhal chu ka melh leh ralh ṭhin a. U Mama lahin tho fuhlo hmel pe na zetin Hriathlua chu a zilh mawlh mawlh a. Hmun dang ka hawi eih lo, ka hma zawna ṭhu kun chhal chu chiang zetin ka melh kar reng a. U Mama zilhna erawh ka duhkhawp lo, ka ṭang ṭêuh mai.





Hriathlua en reng chungin ka ngaihtuahna chu kan In lamah a peng leh daih tawh thung a. Ka chhungte'n engmah thawm ri va an la rawn nei miah lo. An thinrim em em a, ka nu phei chu a âng nasa hle tih pawh ka ṭhiannu Tleipuii hnen aṭangin ka hre leh diam tawh. 'A awm awm in awm rawh se' min ti a ni awm e. Kha thu ka hriattirh khan ka lawm viau a, a thawventhlak huai in ka hria a. Mahse, Hriathlua chungchang ka ngaihtuah kawp phei chuan ka chhungte thu min hnutchhiah chu ka hlimpui ta hauh lo. Keimah vangin zak takin an awm dawn tih ka hria, engang pawhin ka lakah rilru pu mah se vui thei ka ni lo tih pawh ka hrechiang takzet bawk.





"Zothan, thingpui lo chhuang rawh. A hmeh tur ka han lam lawk ange," U Maremi chu a chhuak nghal vut a. Thingpui chhuang turin ka phei zui nghal a, Hriathlua chuan min lo melh ngur a. Ka melh zawk a, tûm deuh hmak chungin ka kal pel nghal thuai a.





Zan lama kan boruak tawn teh hrep avang khan Hriathlua chu han biak a, hmel hlim hmuh ka chak hlawl lo a ni ber e. Thingpui ka vil lai zawng pawhin lungawi lo zetin ka la in seh ruh ṭêuh reng a.





U Maremi rawn haw lai chuan thingpui ka lo siam zo ve chiah bawk a. Thingpui chu ka chawi phei zui nghal a, U Maremi chhang lo dahna bulah chuan ka hûng zui nghal vat a. Hriathlua chuan "Thingpui in zo ila i chhuak harh lawk teh ang" a lo ti nghut a.





U Maremi chu a chek ri hlak a, "Chhuak lo ang, In ah awm hle hle rawh u. Nizan lama i boruak chheh alh khan sawi a hlawh leh tawh viau ang. Khawlai a chhuah te ila sawi ngam zawk ania, zah pawh i zak lo'm ni?" a lo ti nghal ngheng a. Ka va lawm tak, U Maremi chu ka melh ralh ralh a, ka thaw huai bawk.





U Mama thung erawhin, "E khai, han lengkual rawh u. Boruak thar te han hîp ula, in rilru puthmang te pawh a danglam mahna" a lo ti dam duai thung a. U Maremi chu ka melh vat a, tûm deuh bâr chungin a tho zui daih a. Hriathlua chuan min chhuahpui ngei dawn tih ka hrechiang nghal viau bawk.





Thingpui No ka sil laiin Hriathlua chu a in phihfai sut sut a. Ka tha a za hlawl lo, In ah chuan tawm mai mai ila, tumahin min hmulo sela ka duh takzet bawk. Pindan a ka va luh leh meuh chuan a lo insiam peih at tawh. "Hmai pawh ka la phih ve hlei nem" tih pahin ka tûm bâr a. "Nalh vak tum a ngai lo, mipa dangin an lo melh tai lutuk ang che" tih pahin a nui huk a. A fiamthu tih hrereng mahila ka nuih a za hlawl lo.






Hriathlua hnungah chuan ka kal dat dat a, Step min kalpui leh ngheng tawh. Step kal ngai hi ka thil hne em em a ni bawk. "Helai hi alawm Leihlawn piah chu," tih pahin ka kutah a rawn chelh a. Ka lo phih sawk a, ka nuih a za lova, chulai 'Leihlawn piah' a sawi fo ṭhin hmun chuan ka tan hlutna a nei rih miah lo bawk.





Ka kalpel nghal vat a, ka hnungah hmanhmawh takin a rawn pên pâwk pâwk tih ka hria. A hmaa kan inbiakna a ka hlimpui em em thu te chu a rawn sawi chhuak leh a, a nui pah huk huk bawk a. Nuihpui a hnêk in ka tûm kawh tawh viau thung. Midang hmuh laia a laka thinrimna tihlan ka hreh avangin ngawih kha ka chuh ṭang ṭang a. Tunah chuan kan pahnih chauhin kan ni bawk a, theihtawpa ka lungawi lohna tihlan chu ka tum ber bawk.






Min rawn umpha a, ka banah a rawn pawt chawt a, ka ding chiang hle. Ka thaw halh a, rum zetin ka lo melh khâi khâi a. "Bawihi, i lungawilo hmel hmuh ka duhlo. I hnunglam aṭang pawhin hmuh i nuam chuang lo" tih pahin a nui var a.




"Nizan ang khan han khawsa leh na teh. Thuleh awm lo in ka tlan hawsan nal nal ang che" ka lo ti nghat thung.





A nui hmel chu a rawn inthlak nghal hlawk a, "Thil tam tak ah hian lungawi lohna ka ngah ve lutuk, sawichhuak lem lovin ka pai liam mai zel a; a puak keh anih kha" a rawn ti bûl hmuk a. Engtinmah ka chhâng lo, ka in her a, kan hmalam chu ka en ngar reng a.






Ka hriat ve loh lam, an chhungkaw boruak chu sawi na hun pawh a la awm lo. 'Min hnawtchhuak' a tih danah khan boruak ṭha lo tak a awm ang tih erawh ka ring thiam ve viau thung. Hunthawl ṭha ka hmuh veleh engkim chipchiar taka hriat ka mamawh tih chu ka in hrechiang hle bawk.





"Lawn rawh, ka ṭhianpa te In ah han leng lawk ang" tih pahin Bike ah a ṭhukai nghal a. A Bike seat chu a beng dat dat a, nuih vur vur pahin, "Lokal rawh le ka lalnu" a ti sup a. A hmaa kan thusawi dun leh ka lungawi lohna ka lantir ve te chu a ngai pawimawh lem lo in ka hria. Lungawilo ru zetin ka ṭhukai ve nghal a. Muangchangin min tawlhchhuahpui nghal a. Ka lungawi lohna zawng zawng te, zan lama amah hringtu chunga a khawsa zia zawng zawng chu vei lo ni âwm hrimin a zai pah rût rût a, ngei zetin a tukhum lam aṭang chuan ka melh ngheng ringawt.






Zana min luhpuina In zawn kan thlen rual chuan, "Tlan tlang rawh, ding tawh hlek suh" ka ti chang fak a, engmah sawi lovin a tlan tlang ve mai bawk a; ka thaw huai mai. A chhak deuh lawkah chuan a ding a, a ṭhianpa te In chu min kawhhmuh zui nghal vat a. Ka hawi chhoh lai chuan ka thu hriat chuan ka beng a verh zar mai, "Lalhriathlu, i fapa in a koh mawlh mawlh che chu maw le. Ngaihsak ve ta che, nikhualo lutuk mai," tih ri chu ka ngaihven nghal vat a. Kan hawi rual ṭhawt a, Nu thau lampang ka va hmu nghal.






Kan lam pana Mipa Naupang rawn tlan phei mek chu ka en ngar a. Motor lem a rawn pawm phei bawk a, kan bul a rawn thlen rual chuan Hriathlua mal ah a rawn vuan chat a. "Apa, thil min lo lei" a rawn ti ta!





Mak ti zeta ka en ngawih ngawih lai chuan, "Bawihte, i va bâl reng reng ve? In ah awm ta che, i hritlang leh vek mai ang" tih pahin Hriathlua a chuan a Lu ah a lo tuai sak a. Ka bing mup mup in ka hria, fapa a neih ka hre bawk silo. A rawn au tu nu lah khan, 'I fapa' a ti chiang hle mai bawk si. Chu Mipa Naupang lah chuan nel takin a rawn vuan nghal chat bawk a. Keimahah chuan mak tihna hlir hi a in thuah tup tup ni mai hian ka hria.





Mipa naupang hmel chu ka ennawn sek reng a. An hmel erawh in anna hmuh tur a awm miah lo thung. A u fate tu emaw berin 'apa' an ti ve mai anih rinna ka neih chu thudik ni hlauh se ka ti. Hriathlua hi naupangin an nel em em tih erawh ka mit ngeiin ka hmu tawh a. Chung amah nel em em tu zing ami anih rinna ka neih rualin thudik tak hriat tumna ka nei lian viau thung.





"Bawihi, thil ka va lei pui lawk ange" tih pahin ka mal ah a rawn hmer salh a. "Hetah hian Bike hi kan dah dawn nia. Ke a chhoh a ngai tawh hrim hrim a" a tih te chu mumang ang ruaiin ka hria. Rang takin ka chhuk thuai a, Dawr lam pana an inzui phei hnak hnak chu ka en tlawk tlawk a, ka ngaihtuahna vak thui lutuk tur chu duhlo in ka Lu ka thing zui nawk bawk.






Dawr aṭang chuan an rawn inzui chhuak a, mipa naupang ngawt chuan ka mit a la leh nghal zar mai. Eitur hrang hrang a pawm bawr ṭai a, lungawi tih hriat zetin ka lam pan chuan a rawn nui phei var var a. Ka bul an rawn thlen chuan Hriathlua chu a ṭhuhniam vat a, mipa naupang hmai chu a tuai sak puat puat a.






Min rawn chhoh melh pah zak zak pahin, "Apa, engtikah nge i rawn haw dawn?" a ti hnual raih a.





"Bawihte, ka rawn haw thuai ang. Chuan, hei hi ka nupui ania. A awmzia chu, 'i nu' tihna anih chu aw?" Hriathlua'n a tih rual chuan an pahnih in min rawn enrual nghal vat a. Ka lo nui lui sak a, mipa naupang mitmengah chuan zawhna tam tak ka hmu in ka hria. "Bawihte, haw tawh rawh le. I pa Puitea te In ah kan han leng lawk ange" a tih rual chuan Mipa naupang chu a in her vat a, min rawn melh leh ralh a. In lam panin a tlan haw zui nghal a.







"Ka fapa Rinrina anih kha" a tihlai te chuan keimaha zawhna awm zawng zawng nen Mipa naupang chu ka thlir zui vawng vawng a. "Fapa i nei tih ka hre miah lo" ka ti sap a, ka en ngai chu ka la en ngar bawk.





A rawn ding chhuak a, zawhna pek leh ka tum lai takin, "Khita rawn chhuk mek khi ka pi anih khi" a lo ti leh daih thung a. Zanah khan ka hmu ve miah lo, a mut hnu in kan kal te pawh a ni mahna le!






Ka thin zawna vit ngut ngut tu Mipa naupang hmel mitthla chung chuan zawhna ka insiam nghal mawp mawp a. Kei hian thudik hriat loh tam tak ka nei ngei tih ka hai lo. 'Engvanga heng zawng zawng hi ka laka zêp tlat nge a nih ang?' tih ka in zawh mek lai chuan, "Kal ang" a ti nghut a. Ngawi rengin ka zui ve nghal vat a. Mahse, chu mihring chu ka kal hnaih duh lo. Ka thil hmuh leh hriat thar leh te avang ringawt pawh chuan Hriathlua chu ka haw thar ngawih ngawih.






In hmun rem zet leh thengthaw nuam em em hmun kan thleng chho a. Thli thaw heuh heuh te chuan a hmun vel chu a ti nuam lehzual in ka hria. In pahnih a ding a, pakhat zawk chu tê fel ren rawn a sak a ni; chumi lam pan chuan a kal zui a, kawngka a kik nghal dat dat a. "Lo lut rawh u" tia mipa aw in min lo chhan rual chuan kan lut zui nghal vat a.






Kan luh ruala ṭhutthleng a mu thur bum rawn thochhuak hmel chu a ngainatawm fahran lo hle bawk. Ṭhutna ah chuan kan ṭhu nghal thuai a. Hriathlua chu ṭhut hnaih pawh ka duh lo. "I mak hi ka ti a ni. Nupui hmelṭha em em Zothansangi ka rawn hruai haw a, min lawmpuitute zingah i hmel hmuh hmasak ka in rin tehreng nen" Hriathlua chuan a ti nghal phar phar a.






"Ka nuam sam lo lutuk a, khawiah mah ka chhuak peih lo a tin a ni. Chubakah, engmah pawh min hrilh bik hlei nem" U Puitea chuan a lo ti let nuah nuah a. Eng eng emaw sawiin an ri dun barh barh reng a, lui kal te pawh an sawi; ngawi rengin ka lo ṭhu ve ngat ngat ringawt a. U Puitea chuan min melh leh rulh ṭhin a. Hlim hmel ka pu lui hram hram a, ka chhungril nuihza lo lutuk erawh keimah leh keimah chu ka in lainat viau bawk.






"In pa hian sûn tu a ngah teh mai ania aw? Tunah te hian an ṭap chuah chuah in ka ring" nui hawk hawk chungin U Puitea chuan a rawn la tihzawm tak deuh deuh a. Hriathlua chu ka melh vat a, ani pawhin min lo en ve chiah, a nui huk a, "Tuma'n min sûn lul lo ange, sawi loh loh hi sawi fo suh" a lo ti zui hmuk a.






U Puitea lah chuan, "Hlo thlawh te i thiam ve em? A hma ami kha chuan a hnehsawh teh ania aw?" a la rawn tihzawm tak deuh deuh a.






"Lalrinpui, ngawi mai mai teh"
Hriathlua chuan a lo ti hlur a. An ṭhiandun fiamthu te chuan awmzia a nei vek in ka ring, thil eng eng emaw chu hriat chhoh tur a la awm zel turah ka ngai hmiah bawk. Ka ngaihtuahna erawhin hmun hran hran a lo chhui kual zung zung thung.






Eirawngbawl chhuanlam in haw ka rawt a, min kap ru reng tu Mipa Naupang chungchang kha chiang kek kâwk a zawhfiah vat ka duh. Hriathlua chuan min en vung vung a, ka ngaihtuahna a awm tur âwm ang a hrethiam a ni fa hmiang, a Lu a bu nghut a. "Kan zuk haw thla phawt ange" tih pahin a tho nghal nulh a. Rang takin keipawh ka ding ve nghal zat.






"A mak teh thut ṭhin e aw?" tih nuah nuah pahin a ṭhianpa chuan min rawn zui nghal a. "Remchangah chaw lo la ei ula?" tih pahin min rawn bêng thuk a, ka ngaihtuahna ka lo kâwm nasa bawk nen ka phu zuk nghe nghe.






Kawng tluanin thil min hrilhin min kawhhmuh thla pah reng a. Ka 'aw' liam vel mai mai a ni ber. A thusawi chu pakhatmah ka ngaihtuahna kaipeng thei a awm lo. 'A fapa maw? Fapa a nei tawh a maw?' chu zawhna chu ka in zawt a, engkim thudik hriat ka duh rualin ka huphurh em em lawi si. Ka zawhna pek tur in dawt dan tur thlengin ka ngaihtuah chhuak hman vek a, felfai takin zawhna ka pek tur chu ka chhawp thiam chuang der lo thung. Mahse, buarchuar tak chung pawhin thudik hre tura engkim hmachhawn erawh ka in huam em em lawi si.





In kan luh rualin Hriathlua chu naupangin an lo bawh leh nghal zat a. An in chhaih ṭe leh teng tung tawh. U Maremi chu hmanhmawh takin a lo che sawk sawk a, chulam pan chuan ka phei nghal vat bawk. "U Marem, Hriathlua saw a fal a biak lawk ka duh" ka ti nghal tawl a. Mak ti taka min en ka rin nen a lo bu nghat ringawt.






Ka in her a, hmanhmawh takin ka phei a. Hriathlua chu a banah ka pawt sawk a, "Kan inbiak lawk a ngai" ka ti ram hmak a. Pindan lamah chuan ka pawt phei dawt dawt a. Naupangho chuan mak ti takin min en ṭhap tih pawh ka hria, ngai pawimawh hman ka ni hek lo.





Pindan kan lut a, kawngka ka kalh zui nghal a. A mitah tak en rân chungin kawngka bulah chuan kuangkuahin ka ding kawh lah a. "Thudik tak chiah hriat ka duh. Engnge thil awmzia?" ka ti chang fak a.






Muangchangin Khum lam a pan a, a ṭhu thla hnawk a, kun chal in a tukhum ah a kut pahnih suih in a thaw pah hawk a. "Bawihi, fapa ka nei. Tlangval ka ni hlei nem, pathlawi alawm ka nih" a rawn ti ta nghut a.






Chu thu chu chhânna min pek tur anih ka rinna aiin bum ka nihna tur kha ka in khawngaih em a, ka ring lâwk phal lo mai zawk a ni. Mahse, a ka aṭang ngeiin chu thu chu a rawn phuhchhuak ngei bawk si. Ka thaw halh a, ka en tlawk tlawk a. Ani erawh a awmdan ngai rengin a la awm thung.






Ka tawt up up a, ka bing mup mup bawk. Ka ngawi vang vang a. Mahse, engkim thil nihna tak hriat vek ka duh thung. "Khawnge a nu?" ka ti nghat a.


"Thingtlang ah pasal dang a nei tawh"


"Engtik in nge in in ṭhen? Kum engzat nge in inneih?"


"Kum nga kan innei a, kan inṭhenna kum hnih a liam ve leh tawh"





Keimah ah chuan zawhna awm thei zawng zawng hi a rawn lut mawp mawp ni mai hian ka hria. Thil tam tak zawhna nei siin sawi tur ber erawh ka hre miah lo thung. Ka thin zawn a thîp ngur ngur a, au tuarh tuarh ka châk ber te'n ka hria.





Khang hun kal tawh, hlim taka kan inbiak ṭhin lai zawng zawng khan thurûk lian lutuk neiin min lo bia anih chu! Keiin engkim ka hrilh a, harsatna chhe tê pawh nei ila ka hrilh hmasak ber a ni ṭhin. Mahse, ka mi rin em em; ka chhungte pawh thlahlel zo lova ka pan chuan ka lakah thurûk satliah pawh nilo, thurûk lian tak a lo nei reng si. "Hriathlu, min bum a ni" tih pahin ka thaw hawk a.






Ka thinrim leh rilru na lutuk avangin thu tam tak sawi duh mahila ka thei lo. Ṭawng chhuak turin kâ ka âng zo tawh lo. Ka ding khûr dar dar a, ka mittui ka khap per sak sak a.






"Bawihi, a pawi ka ti. Engkim hrilh che ka duh a, thudik hrilh ka duhna che aiin chân ka hlauhna kha a chak zawk a ni" tih pahin muangchangin a rawn hawichhuak a. Ngun zetin a mitah tak chuan ka lo melh ngar a. Ka mittui rawn hnâm ṭiam ṭiam chu ka hru pah zauh a.




"Thil dang zêp ila nei anih chuan min hrilh vek law law rawh. Engkim hriat ka duh" tih pahin Khum bul Dawhkan chunga ṭhu in min chhânna ka nghak rân a.




."Aw le, engkim ka sawi ang. Engpawh kan inkârah thlen phah mah se ka hmangaih che tih hria la" tih nghut pahin a thaw hulh a, a ngawi zui ngur a, kei lahin engtinmah a chhâng lo in ka lo melh khiau reng a.





"Bawihtea nu nen kan inṭhen khan ka tuar khawp mai, ka hnathawh hlan in min lo chhuahsan tawp a. A hma in boruak chhia engmah kan nei bawk si lova, ka hrilhhai khawp mai. Theihtawp chhuah a ka enkawl ve na te kha a duhkhawp lo a ni mahna" tih pahin a rawn tho chhuak a. Tukverh lam chu a pan a, tukverh bula dingin pawnlam a en ngur a, "Kar khat chuang In ah ka in khung a, a hma in zu ka in ngai lo; khami ni aṭang khan ka khawhar hnem nan Zu ka hmang a, Chaw pawh ka ei ngai hek lo; chatthla hmawk khawp in ka in a, ka harh ve leh ka in leh zel a ni mai" a tih mek lai chuan "Zu i in ṭhin tih pawh chu ka hre chuang lo" ka lo ti nghat a.





"Ni e, ka zah em che a; Zu pawh in tawh loh ka tum" a ti bul nghut a. "Thildang sawi suh, i sawi tur sawi zo rawh" ka lo ti nghat thung.




"Bawihtea nu nen kan inṭhen hnu khan hmeichhia kha infiamna ang lek ah ka ngai a, a tam thei ang ber rilru na a siam ka tum tawp" a tih mek lai chuan "Hmeichhe dangin i pawi an sawi em ni?" melh râm râm pahin ka lo ti vat a. Keimah ngei pawh chu ka in lainat ngawih ngawih. A hmeichhe hmangaih laka phuba lak nana hmeichhia a hman zingah chuan ka ding ve reng chu a ni si a.





"Sawi lo e, ka na em a; hmeichhe dang tihnat châk na khan ka khat a ni ber. Zu ka in tam telh telh a, pawisak ka nei lo telh telh bawk. Kum hnih chhung ngaihzawng pangngai anga kawp nei lovin ka awm a, chumi hnu ah min atchilh em em tu ka tawng a; ani chuan hmangaihna nen ka sual em em chung pawh khan min dawm ṭang ṭang a. Kei mi ṭawmkailo em em pawh min thlah duhlo tu kha kei pawhin ka pawm a, chuan......kan innei" tih pahin Khum ah chuan a ṭhu thla ruai ruai a.




"Engtin maw? Eng maw i sawi? Nupui pahnih i nei tawh maw?" tih pahin ka âng pam a, phâwk zet in ka melh ngar bawk.





"Bawihi, ka nunhlui ah chuan mi ṭawp tak ka ni. Ani kha ka ti rethei teh asin; man kan inhlan zan khan ka rui em em a; din pawh ka ding ngil thei lo. Kan hun hmandan kha mumal tak pawh in ka hre hek lo. Man hlan a zawh khan ka ṭhianpa khan lenchhuah a rawt a, ani chuan a peih ve ta lova. An ṭhenawm nula pahnih in min zui a, pakhat zawk kha ka ṭhianpa khan a ngaizawng em em a. A u zawk khan a veng deuh niin ka hria; khawpui pawn lamah kan in khalh chhuak a; zu kan in ho leh a...." a thaw hawk a. Min en vung vung a, a hmel ah chuan thil sawi huphurh tak nei hmel a la pu, ka hmuh hmaih hauh lo.







"Chhunzawm rawh" ka lo ti ram hmak a, ka in seh ruh ṭêuh bawk. Keimahah hian chu mihring chu lainatna pakhatmah a awm lo. Ka thlakhlelhna te kha an thlawkbo zo vek ni mai hian ka hria.






"A u zawk chu i hria, kan inbiak tirh lam a rawn be tu che kha ania. Ka Whatsapp Dp pawh lo thlak tu kha a ni. Rei fe min ngaizawng tawh a; mahse, ka duh thei ngang lo. Kha zan khan engnge ka hriat tehreng ni, hmeichhe laka ka theihna kha lantir leh ka chak ta tlat a. Ka nupui man tur kan hlan zawh hlawt ah kha nu kha ka ru haw leh anih chu" a sawi zawh rual chuan min melh rulh a, a thaw huai bawk.





"Lalhriathlu....mi tenawm pa. Mipa laktlak loh leh tenawm tak i ni" ka ti ṭhawt a, ka in sum theihna a puakkeh chhe vek. Ka tha neih zawng zawng a ham bawrh bawrh a, a rem lai laia chum chawrh chawrh ka châk ber mai.




"Ni e, ka tenawm. Ka laktlak loh a, ka tenawm takzet. Chuvang alawm engmah ka hrilh ngam loh che. Min kalsan kha ka hlau em a ni Bawihi. Khawngaih takin min ngaidam rawh Bawihi. Khang hun zawng zawng ah khan mumal nei lovin hun ka lo hmang ṭhin a, ka khawsak dan kha tun hnua ka ngaihtuah let leh hian ka zak ngawih ngawih fo asin. Sawi chhuah nawn tlak loh khawp a nun ṭawp khan vawi tam tak hrehawm in min siam a, ka tihsual in min vuaklet hun tur kha huphurh tak in ka nghak tlawk tlawk mai ṭhin. I bulah hian vawi tam sawi ka tum tawh ṭhin a. Mahse, chân che ka hlauh em avangin huaisenna ka nei lo a ni" a ti zâwi ruih a.





"I man hlanna nu chu engtin nge a awm zui tak?" ka ti nghat a, min chhânna tur chu ka hrechak hran lem lo. Mahse, engkim a vai a hriat law law ka duhna chuan min nawr na em em bawk si; engkim mai chu a hrehawm vel vek a, ka na ngawih ngawih bawk.




"Engkim i hriat vek law law a ṭha in ka hria" tih pahin a tho a, tukverh bulah bawk chuan a va ding zui leh a. Engtinmah ka chhâng lova, ka lo belhchhah hek lo





"Kan leng haw kha kan in zui haw ta kha ania, ka ṭhianpa te In lamah chuan kan in zui haw a. A tuk zingah kan chhungte lo kal in min hruai haw ve ve a, Inneihna pawh a thleng ta tho. Mahse, rei erawh kan Innei lo; ani khan natna khirhkhan tak mai a nei a; nau pai pawh phalsak a ni lo.Thu nawi te te nei chho in kan in ṭhen leh ta anih kha." a rawn tih zawm leh sup a.




"I sawi awlsam hle mai, mipa tenawm tak i ni" ka ti rilru niap niap a. Ka ngaihtuahna avang ringawt pawh chuan ka sa pup pup thei hial bawk. "Kei chuan i lakah engmah zep ka nei ngai lo. Tunah hian ka dinhmun ah hian ding zawk ta la, engtin tak min ngai ang che maw?" ka ti lui nghat a.





Ka rin em em, ka nun pumpui hmanpui tura ka zui chuan hetiang khawp a thu lian tham hi ka lakah a lo zêp reng a. Engkim ka hrilh a, ka rin em em ang khan a hma in min hrilh vek nise chuan 'a nunhlui a ni tawh alawm' tiin rilru na tak chung pawhin ka pawm dam thei zawk mahna! Mahse, tuna kan dinhmun ah zawng engkim mai chuan min deng dawt dawt a ni ber mai. A sawi hnuhnun apiang chu mak tihna in ka khat a ni ber e.






"Bawihi, a pawi ka ti takzet. Khawngaih takin min kalsan suh aw? Nang hi chân che ka hlau a, a hma zawng aiin ka hlau tawh bawk. 'Ka nunhlui kha min theihnghilh sak rawh' ka ti ngam lo che a. Mahse, nun thar nei turin min ṭanpui hram rawh" tih pahin min rawn pan a, ka hmaah chuan a rawn ṭhingṭhi hnawk a.





"Ka hrelo, engmah ka hrethiam lo. I mak ka ti" ka ti tawl a. Sawi tur ka hre lova, rilru siam dan tur pawh ka hre rih lo. Ka rilru a awm ang ang sawi chhuak a, ân chiam dawn lahin midang mitmei ven a ngai bawk si. Ka awmdan chu a hahthlak takzet.






Room kawngkhar a rawn ri dat dat a, U Maremi'n chaw ei a peih thu a sawi zui zat. Kan boruak a talâng in dar zat en nachang pawh ka lo hre lo. Eirawngbawl pawh ka pui ta miah lo ania; ka in thlahrung ru viau.






Pindan kawngkhar chu hawng in ka
chhuak phei zui nghal a. U Maremi chuan Naupang ho chaw a lo chhem daih sak mawlh mawlh a, thleng pakhat chu la in ka chawk dai ve nghal thuai bawk a; Chaw rim ka hriat te chuan ka ni nghulh thei hial in ka hria.






Chaw ei a sak ṭalh mai, ka thai let vel mai mai a ni ber. Ka hmel landan aṭangin U Maremi chuan kan boruak a fuh vaklo tih a hrethiam hle ang. U Mama an hnathawhna lamah a hmanhmawh thlak avangin Tiffin paiin a chhuak tawh a. Ani tal awm sela chuan boruak a zap dai leh thiam hle ngei awm sia.






Hriathlua chu a ngawi run a, chaw a bar mawlh mawlh a; chutiang boruak kara a la ei miah miah thei chu tlawh zawt te ka chak. Rei pawh kîl lo in ka tho ta daih a, ṭhutkhawmna lam ah ka ṭhu zui daih. U Maremi leh Hriathlua ṭawng sap sap ri chu ka hria a, engnge an sawi tak erawh va hre chiah thei lo mahila kan chungchang a zawt nasa hle dawn tih erawh ka hrechiang thung.






Chaw eina kan tifel zung zung a, thleng sil tur chu ka dahkhawm zung zung a. Ka phone ri chu ka ngaihven nghal thuai a, "Aw, hello" ka ti vat a.






"Engnge in an? I reh char char a.... Min rawn be ve ṭhin la, in ti pasal nei lutuk" Tleipuii chu a rawn nui nghal ar ar a, ka khi ve sak.






"Kan ṭha e, kan In lamah i kal ngai em?" ka ti nghal vat a. Ka bul lawk a Hriathlua ding rûn chuan kan thusawi a bengkhawn ru hle tih ka hria. "Ka chhungte khan min lo hruai rawh se" tih mai châkna ka nei lian em em bawk.





"Kal ngai vak lo, kal ve fe hi a ngai bawk sia; ka hman lo ve em alawm. Chubakah, i nu hian min lawm vak lo, min ngei riau in ka hria" a rawn ti thuai thuai a.



"Engnge nang a lo ngei ve ngawt ang che? He thilah hian tel ve na i nei lo. I ngaihdan mai mai aniang" ka ti thuai a. Ka nu chuan chutiang rilru a put ka ring chiah lo, Tleipuii chuan in rawlhna a nei miau lo.




Thildang sawiin a peng kual leh duah a, ka lo nui leh hak hak ṭhin a. Ka phone hmang min vil rûn tu pawh ka nuih tak reng avang chuan a ngaih a ṭha tawh aniang, TV hma ah a va ṭhu ta daih a.





Hriathlua chungchang ka va hriatchhuah chu Tleipuii hnenah chuan sawi vek ka duh viau na a, keimah ah nuam tih loh na lian tak ka nei tlat. Mi chanchin chhe lai sawi zuah zuah hi ka chin ṭhan anih loh avangin nuam ka ti lo; tuna mi phei chu midang ni lovin ka pasal chungchang a ni bawk nen sawi loh mai ka duh ta zawk a. Tleipuii chu hrilh ngat ila chuan haw turin min tih ngei pawh ka ring bawk. Ka hlimna leh lawmna chauh nilo, ka lungngaihna pawh min ṭawmpuitu a ni tlat. Kan in biak tawp thlengin ka hlim der hram hram zawk a ni ber.





Hriathlua chu ṭhutthleng ah mu in TV a en a, a hmet kual deuh sek reng a. A engmah chuan ka rilru an la peng eih lo thung. Nilengin zing lama kan thil tawn chuan min hual mup mup a ni ber. Hriathlua chuan min be sek na a, chhânna mumal tak ka pe ngai lo. Ka rilru tur âwm ang a hrethiam hle aniang chu, min nawrlui leh lungawilo hmel a pu hauh lo.






Naupang an rilṭam tawh nen U Maremi nen chuan kan che sawk sawk a. Zanriah kan eilai chuan kan awmdan engmah hrelo ang takin U Maremi chuan boruak zangkhai takin thil hrang hrang a sawi kual leh duah a. Kei ngei pawh chu ka khi leh sak ṭhin. Hriathlua nena kan inkar boruak chu U Maremi chuan a hrechiang em em ang tih ka hai lo. Mahse, U Maremi chuan engmah a sawi lova, boruak thlakthleng tumin thildang hlir a sawi leh daih tawh.






U Maremi'n pindan lamah Naupangho lehkha a zirtir a. Hriathlua chu Inkhel en in TV hmaah a mu leh awr awr tawh a. Kei erawh pindan lamah lutin Tukverh bulah ka ding a, hmun hla tak en in ka thil tawn mek chuan ka ngaihtuahna a luah mup mup reng a. Ka thu hriat te avang khan thinrim thar leh hluai te pawh ka chak em em bawk.







Keimah tê chuan tu hriat hleih loh in ka in sawh ka in sawh ringawt a; ava hahthlak mai mai tak. Hmun thengthaw nuam deuh ah mahni chauh a awm ka châk a, chutiang hmun a kal turin a khawilai hmun mah ka la hrechiang bawk silo; ka ṭah a chhuak ngawih ngawih bawk. Min ti thinrim zual tu ber chu Hriathlua'n a thil min hrilh te vei zui awm lo fahran mai a awm zui hmak chu a ni. Ka lo rindan chuan ka lungawi nan eng eng emaw sawiin min thlem lungawi a tum tur ah ka lo ngai ve ngawt kha ania; chutiang engmah a thleng si lo chuan min ti thinrim takzet. Engmah vei zui nei lo tih hriat takin TV hmaah hlir hun a hmang a, chu chuan min ti thinrim takzet.







Pindan aṭanga ka chhuak pawh chu vawikhat pawh min lo melh chhin eih lo. Tui awmna lam chu ka pan a, tui chu ka lem zui khawlh khawlh a. Pindan aṭangin U Maremi pawh a rawn chhuak a, sana melh zauh pahin, "I u Mama pawh chu a va rawn haw har ve maw le?" a rawn tichhuak niah niah a.







Kawngkhar ri rak thawm ah chuan kan hawichhuak vat a. U Mama in khai bawr lûk in a rawn lut ve chiah; ka ṭhutna aṭanga tho chhuak thuaiin ka lo buaipui nghal sawk sawk. U Maremi'n a hmanrua te chu a lo dahfel sak nghal sawk sawk a. Keiin chawhmeh te ka lo chhuang lum ṭha leh thuai bawk a. "Zothan, naktuk lamah ka nu in rawn len thlak a tum a; lo hrilh lawk rawh a ti anih chu" U Mama chuan a rawn ti sup a. Ka lo bu nghat a, eng thu tak rawn keng ang maw?







Kan tih nek nek chhungin mut a lo hun der mai, ka va mu châk lem lo tak. U Mama te nupa in chhuat a mut an chuh tlat a, mutna zau ṭha zet in an phah duai mai. Naupang ho lah chuan nuam an ti zek a, an tlan kual pap pap reng a. Lukham a in vua in an rak tuarh tuarh a, a sir ah puitling ho kan ṭhu ṭhap bawk a. A naupang ber a ṭah tak awl awl ah chuan U Maremi chu a che vat a, muthilh tir tum in a awi zui nghal sawk sawk a. "Chintawk hi in hre ṭhin lo alawm" a tih laiin a nau puak chu a la ṭap uar nasa mai a. "Ṭap tawh suh, muhil rawh" tih pahin a mawng ah a beng ri thâwr thâwr bawk a. U Mama hnathawk a chau hle dawn a, lo ṭhut hnawk ve teh tlat pawh a dik chiah si lo. Phur lo zet in room lam ka pan a, tukverh bulah Chair -hûngin ka ṭhu zui nghal a.






"Bawihi, i hlim lo hmel hmuh nilen chu a hrehawm khawp mai. Engkim siamṭha thei ila ka ti, nangmah vang pawh hian khang hun kal tawh zawng zawng kha siam ṭhat leh ka chak takzet" ka hnunglam aṭanga min rawn kuah pah in Hriathlua chuan a rawn ti sup a. Engtinmah ka chhâng lo, a hma zawng aia pangchang taka lungawi lohna tihlan zui zel ka châk sauh bawk. Mahse, ka ngaihtuahna chhungril ber chuan 'hun kal tawh a ni alawm' a ti dam thliam lawi si. Chuti chung chuan a lang a hrethiam tak anga awm erawh ka hreh em em thung si.





"Min mutsan rawh, ka la mu peih lo" tih pahin ka in her san hmak a. Min thlek vang vang a, min biak zui vak a hreh aniang; khum lam pan zuiin in a mu ta thuai a.






Rei fe ṭhu in thil tam tak ka ngaihtuah a, kei ngei pawhin nunhlui ka lo nei ve tawh; ka nunhlui ah tihsual tam tak ka nei ve ṭhin bawk. Chung zawng zawng ka ngaihtuah chuan in ngaihdam tawnna chauh in rah ṭha a chhuah tih pawh ka hrechiang hle. Hriathlua mu tawm chal chu ka thlir reng a, huatna aiin khawngaihna in hmun a chang tam zawk. A nupui in a kalsan hlim chuan Malsawma nen kan inṭhen hlim a ka nat ang tho khan a na ve angem? Nge, kei aia nasa fe in a na zawk ang? Anni chu nupa niin fa hial an nei hman a, a tawrh chu na dawn hle in ka hre bawk. Chung thleng thleng a ka ngaihtuah takah chuan Hriathlua chu ka lainat ru em em leh lawi si. Muangchang a tho in a bulah chuan ka va in thawlh ve sat sat a, a hnunglam aṭang chuan ka kuah de de a; a tukhum ah ka fawp pah zauh a.






A muhil tawh emaw ka tih kha a lo la muhil bik miah lo. Ka lam rawn hawi in nghet zetin min kuah a. "Bawihi, ka hmangaih che" a ti thawp sut a. Chu thu tawi te chuan khawngaihna a khat thinlung chu a ti tuiral zo leh ta si. "Kei pawhin ka hmangaih che" ti ve sap in a âwm ah ka bei hle hle a, ka mit ka chhîng zui ta vang vang a.




Naupang thâwm ri lê lu ah chuan ka harh zawk a. Thawh mai tum in ka che hrat a; min kuah mek tu chuan ka ke lam ah min khan bet tel tlat. Sawi che dat in thawh ka duh thu ka sawi a, a ke chu dahsawn in min kuahna erawh a nghet zual sauh thung. " Khawi maw....chu an thawh vek tawh chu; a zahthlak lutuk" tih pahin ka tal zui vak a. Nui suk in ka chalah a rawn fawp tâwk a, "Nizanah tu emaw ni in min muthilh san a, min hrem tel bawk. A muhil lai ka thlir na lamah ka tlaivar ṭep; reilote ka mu leh lawk ange" tih pah in min kuahna a phelh thawl zui a, a bawkkhup zui daih a, nuih hak pahin ka thawh san ta thuai a.





Chhuat a mutna in phah te chu a lo darh pheng phung a, naupang ho an lo infiam nasa mai. U Maremi chuan eirawng a lo bawl mawlh mawlh tawh a. "Thawh ka va hai chiang ve le" a bul a din pahin ka ti zui zat a.




Nuih var var pahin "I boruak tawn a rit em mai a, hahdam i mamawh anih kha" a lo ti thuai a. U Maremi rilru zau leh zaidam lutuk hi chu fel ka va'n ti tak. Mi hriatthiam na a ngah em em a, a pasal fanaute a enkawl danah leh In chhung a enkawl danah sawisel tur engmah ka hmu lo, a bu ang thlap a ni.






Rei lo te ah tukṭhuan kan peih zui thuai a, Hriathlua ka va kaitho nghal thuai a, a meng sen urh mai. Zan lama chaw ka ei ṭhat loh avangin ka ril a ṭam tawh viau mai. U Maremi'n ka thinrim chaw ei dan a zir vel chu a nui uar uar ah ka ṭang a, kan boruak zâng leh ta huai chu ka lawm em em bawk. Kan hun lo kal zel turah hian eng thil in nge min hmuak ang ka hre lo. Hriathlua nunhlui chuan min rawn um zui tawh lo tur ah ka ngai; helhkham nei run a nun hman hahthlak zia ka hre chho ta zut zut a, kan hun tawn ang zel a in siamrem thei tur a ka in puahchah lawk a ngai dawn hle in ka hre bawk.






Chhuat ka nawh laiin Nu Partei a rawn thleng a, chhun thingpui hmeh tur atana a tih a rawn khai bawr laih te chu dawhkan ah a dah zui thuai a. 'Ka nu' tia koh ka la hreh deuh ṭung a, 'Nu Parte' tih ngawt lah chu a diklo viau in ka hre bawk si, a mawi chiah lo tih hrereng chungin ka mawl biak leh tawp zel.





Hriathlua chu pindan aṭangin kawh takin a rawn chhuak a. "Ṭhenawm te In ah ka va kal lawk ange" tih pahin a chhuak zui daih nghal daih a.




"Amak a nia, thil sawipui duh pawh hian thep bo na tur hi a zawn hian a zawng a; rorel pui theih reng reng loh mai" Nu Partei chuan a ti hlak hlak a.




"Engmah i sawipui thei chuang lo ang, nangni chu thil in sawi ve in in hauh nghal zel in tum a; engmah hi in sawi ho ve thei lo" U Maremi chuan a lo ti ve zat bawk.




"A pawi lo, Zothani zawk hi biak ka duh a, ka rawn len chhan ber a awm chuan a tawk mai" Nu Partei chuan a ti dam ve leh thluam a. Kei erawh in ka lo huphurh ru nghal em em thung. Hriathlua pawh chu lo awm ve mai mai tur hi a nia, hetiang hun a in thiarfihlim daih a ching hi sim se ka duh ru hle.




"In pa hi chu a buaithlak dawn ania aw? Nakin zel ah pawh i dawm thiam a ngai viau dawn ania. Unau zing a naupang ber anih na laiah kan lo dimdawi rei lutuk a, a rilru te hi a puitling thei lo. A nun hmalam engkim i hre tawh tih ka hria a, chuti chung pawhin a kiang ah i la awm tlat chu a nia. Zothan, i chungah hian ka lawm rualin nangmah ah beiseina tam tak ka nei a nia" Nu Partei chuan a ti dap dap a, a hmel ah chuan tih takzet na ka hmu thei. Nu hmangaihna hi zawng a ropui em a, an fate tan hian an hlu takzet.





"Nu Parte, thil zawng zawng ka hre lo a. Chhungkaw lamah hian buai rûk riau na hi in nei em ni? Hriathlua hi in laka hel tlat a ka hriatna hian min ti awm nuam thei lo lutuk a" ka zawt fuh lo ang tih hlau ru zet in ka ti let ve a, chu zawhna chhânna chu hriat ngei ka duhna in min nawr na ve bawk si.






Nu Partei chu a thaw halh a, "Ni e, a pa nen hian in mil thlawt hek lo; engmah hi an sawi dun thei lo. Hriathlua lah hi naupang zawk ka ni e ti a dawh tu nih a tum lova, a pa lahin fate zilh thiam hek suh. Thil ho te pawh hi an rik pui leh hluai mai ṭhin, ka tan hian a hrehawm thei ṭhin teh asin. Ka fapa leh ka pasal inkarah ka din fo a ngai a, kan boruak hi a hahthlak ṭhin teh a nia. Thla kal ta khan a pa in In aṭangin a hnawtchhuak a, chu pawh thu ho te a an in bak kaih vang a ni. Engpawh sawi se a tawp thlen an duh zel a, kan buai luih luih fo mai. Min hrechiang zel anga, kan chhungkaw zahawm loh zia pawh i hre telh telh ang. Mahse, ka fapa hi khawngaih in kalsan lo hram rawh, a bula ding a thlamuan tu hi a mamawh ve takzet a ni" a rawn ti ta mawlh mawlh a. A thusawi tawp lamah phei chuan lungchhe aw ri a tel nghe nghe. Nu Partei rilru tur awm ang chu ka hrethiam ve ruak in ka hria.





"Kalsan ka tum hlei nem, theihtawp kan chhuah anga. 'Ka fel in ka ṭha tawk e' ka ti hauh lo; mahse, Hriathlua pawh ka theih chin ah kawng ṭha lam zawh pui ka tum zel ang" ka huaisenna zawng zawng sawmkhawm in ka ti ve leh sap a. An chhungkaw boruak buai ru tak chu kei a siamṭhat rual nilo mah se Hriathlua awmdan thlak danglam sak chu ka tih makmawh a ni tih ka hrechiang thung.





"Ka lawm hle mai, ka thawveng huai mai. Nangmah te pawhin In pui ah lo leng chho la, chaw te pawh lo ei rawh. In thlahrunna tur a awm miah lo a nia. I pa pawhin belhchian che a chak viau asin" nui var var in a rawn ti leh a, a hma ai chuan a hmel hmuh a hahdamthlak ta deuh e.





Kan ri zui luam a, ka phone ri hria in pindan lam ah ka tlan lut thuai a. Ka nu hming lo lang kalh ka hmuh chuan ka chil ka lem dawk hial a, ka khûr der der thei hial in ka hria.





"Rawn hruai che kan tum, lo in peih ang che. Zaninah erawh kan hman dawn lova, naktuk lamah kan lo kal ang" a rawn ti nghal pâwng pâwng a. A aw ri ah chuan ngaihnobei na pakhatmah hriat tur a awm lo. Min hringtu Nu ka nel loh ber ṭum a la ni hial ang.




"Ka sawi i hria em Zothansang? Eng emaw ruahmanna dang neih te kha i lo tum ange, tun ang mai mai hian ka enliam tawh dawn hlek lo che a nia" a tih hmuk rual chuan phone a dah zui hmak a.




Hlauhthawn na in min tuam nghal a, ka nu ṭawngkam khauh fang mai chuan buaina rim a nam tlat in ka hria. Ka thutiam zawh chiah ka ngaihtuah let a, Hriathlua ka mitthla ah a awm zui nghal zat bawk; rilru thlamuang a ka awm laiin boruak rit takin min rawn chiah leh ta. Ka tawn tur tih hre sa tho mahila a tak ram han thlen meuh chuan in peih tak tak a awm thei lo. Rilru ipik zetin khumah ka ṭhu hnawk a, kan hun tawn buarchuar zet chu engtiang chiah a hmachhawn tur nge pawh ka hrethiam tawh lo.






(to be continue......)


Show post links
Top

[Ngaia]

DEAR PAIN
Chapter-9




By-Brigida Hugo






Khawvar dawn hnaih chauh a muhil ka nih avangin ka thawh chhuah rual chuan ka lu a hai hle a, ka mit a thial ûrh bawk. Zankhuaa mu mang lova ka thil ngaihtuah ve kha engmah siamṭha nghal tur thil a awm hauh thung lo.






Pindan aṭang chuan ka tho chhuak phei a. Naupangho lo infiam ri teng tung chu ka nuih var var a. Emily chuan, "Anute, i mit kha a thi ania, a sen vek" a lo ti vat a. A unaute chuan mak tih hmel zetin min en nghal ṭhap a.





"A thî hlei nem, ka mit a na a, nakinah a reh leh mai ang" tih pahin Emily biangah chuan ka piai zauh a. U Maremi chuan hmun phiah sawk sawk pahin, "In toys kha remṭha rawh u ka tih kha," a lo ti vîn hlar a. Rang takin an toys chu an rût nghal sat sat a, ka mit lam an rawn buaipui zui lo chu ka thaw huai mai.






"Engtin nge Hriathlua chuan a tih?" U Marem chuan min melh rân pahin a rawn tih zawm zat a. Ka nu te'n min rawn hruai tur thu ka hrilh khan "I lo kir leh an phal tawh lo ang" tiin haw a phal lo deuh ṭung a, keipawh a ruk tak chuan ka hlauthawng ve tho; mahse, tuna kan awm dan ringawt hi chuan kan awm reng thei dawn chuang lo. "Ka haw leh phawt anga, engkim felfai takin kan ruahman anga. Kumkhuaa i bula awm turin ka rawn let leh dawn alawm" ka tih pawhin hlauhthawnna in a khat kha a nia. Thil hrang hrang sawi kual in kan meng ta reng a; ka tello a reilo te chhung awm pawh a hreh thu a sawi reng bawk.





"A rem ti chiah lova. Mahse, hetiang a awm reng chu a dik chuang silo a" dawhkan a bawk zawi ngiai chung in ka ti let sap.





"I ngaihdan chu a dik chiah. A nih tur ang nih vat mai kha a ṭha. I chhungte pawhin hetiang in ni ta sâ sa, rem han tih loh bur na tur a awm dawn em mawn le? Hriathlua pawhin a Nu leh Pa te tih lungawi lo tum ve sela, engkim fel fai takin a kal thei zawk ang" a lo ti ve siam siam a. U Maremi bula awm hi chuan rilru ipik lutuk pawh a bo duak zel.






U Mama hnathawk tur a chhuah a ngaih avangin chaw kan ei zui thuai a, chaw ei a sak ṭalh mai. Ka bul lawk a ngawi reng a chaw bar mial mial chu ka melh leh zauh ṭhin a, a hmel a lungngaihna in phum ru chu ka hmuhhmaih hauh lo. Ka chhungte'n Hriathlua te chhungkaw chanchin an lo hre vek tawh a, tunge an zawh pawh ka hre lo. An ngaihdan tur awm ang pawh ka hrethiam ruâk mai, in sawirem mai chu kan hlat viau ka ring thiam bawk. Mahse, ka sawi lang duh lem lo.






Nu Partei pawh alo thleng thla ve thuai a, "Ka va huphurh tak. Nangmah ah hian beiseina sang tak ka nei. Kan fapa hi nang talin kawng dik i kawhhmuh theih ka ring" tih mawlh mawlh pahin ka bul sêtah chuan a ṭhu a. "Palai nen kan rawn umzui thuai ang che. Engkim a fel vek mai ang" a tih zawm mawlh mawlh a.







Chutia kan rik nak nak lai chuan kawngka lamah thawm a rawn awm a,luh dil ri in a rawn zui nghal zat. U Maremi chuan a lo chhâwn thuai a. Kan ṭhenawm pa, Pu Thara leh ka pa an rawn in zui lut nghal zat. Pa Thara chuan boruak tih zangkhai tum zetin, "Kan rawn thleng chauh na a, a changtunu khan thingpui hâng han lum phawt sela," a rawn ti fiam bawrh bawrh a, lâi ru zet in ka che nui tawi tak tak a.







An rawn kal chhan ber kan chungchang te sawi zui luam in Nu Partei leh ka pa chu an ri dun mawlh mawlh a, ka pa ṭawngkam neih dan ah chuan ka thla a muang deuh huai ngawt a. Thingpui an in lai mek in Hriathlua a lo lut ve a, ka bulah rawn ṭhu in ka kut a rawn dawm chat a. Ka pa chuan chîk zet a lo en reng a, engnge a ngaihtuahna ah awm ang tih ka hrethiam lo. "Mate, in siam fel la, In lamah i nu te'n min lo nghakhlel lutuk ange" a rawn ti thâwp sut a, ka hnîm nghal ruih thei in ka hria.






Pindan lamah ka lut zui nghal a, Hriathlua chuan rang takin min rawn zui lut nghal a. Min kuah vawng vawng a, ka mitah chiang tak a min en chungin "Engpawh thleng sela ka thlah hauh lo ang che" ti sap in min fawp nghal vang vang. Ka ngai hle dawn tih ka hria, engtia rei nge kan awmhran leh rih ngai dawn tih erawh ka hrelo thung; kan awmhran chhung a boruak duhawm loh a thlen loh nan Hriathlua chu ka thiam ang angin ka fuih ve mawlh mawlh a.Ka bag la in ka en fel thuak thuak a, Tleipuii'n thawmhnaw min rawn pek tam vak lo chu hawn buai ka tum lo. Diktak chuan ka chhungte chuan min suihrem ka ring lo bur. Eng emaw a thlen leh palh takin ka thawmhnaw chu hawn vek ka tum lo a ni ber.






Pindan aṭanga kan chhuah hma in Hriathlua chuan min pawm bet châwih a. Nghet zetin ka kuah lêt a, kumkhuaa inṭhen hlen tawh tur ang hrimin ka pawm nghet ni mai hian ka hria. "Engpawh thleng sela ka bulah i awm leh thuai ang. I tel lovin ka awm thei lo ania" a tih lai te chuan ka lo pawm nghet salh salh a, sawi duh tam tak nei mahila engmah ka sawi thei miah lo thung lawi si.





"Mate, i inpeih em? I phei dawn ang u hmiang" ka pa in a rawn tih takah chuan kan in thlah a, Hriathlua chu a tawlh let a, Khumah chuan a ṭhu hnawk a. Hreh zetin ka pên a, pindan kawngka hawn pahin ka hawi lêt a, hmel ngui nghiai in min lo en reng a. Tlan lêt a, va kuah vawng vawng ka châk ber; mahse, ka kal phawt a ngai.






"Kan kal dawn ange, nangni pawh dam takin lo awm ula. Engkim ah in rawn tawn in kan ngaihtuah ho zel ang chu" tih pahin ka pa chu a tho zui nghal a. Min thlah turin Nu Partei leh U Maremi'n min rawn zui ve nghal zat a. Hriathlua chu hmanhmawh takin a rawn chhuak a, ka kutah a rawn dawm chat a. Nghet zetin min chelh a, a hmer nghal vawng vawng a. Hriathlua kut chu thlah ka tum bik lo; ka ngai dawn em a zah pawh ka dawn zo tawh lo a ni ber.






Nidanga Step kal ka nin theih tehreng nen, tun ṭuma kan kal chhohna Step erawh a tawi ta riau a hriatna ka nei tlat nia. Ka kuta chelh rengtu chuan a hma ai mahin min chelh nghet telh telh bawk. Min hmer leh salh ṭhin a, ka melh nghal vat ṭhin a. Mahse, min lo en ve miah lo, kan hmalam chu a en ngar a, a hmel a lungngaihna chu ka hmuh hmaih lo nasa mai.






Pa Thara chu Motor ah ṭhu lutin a tinung nghal hlarh hlarh a, ka pa pawh a hmaah a ṭhu lut nghal thuai bawk. "Fel deuhin lo awm rawh aw? Engkim a kal dik vek mai ang, ka ngaihtuah reng dawn che tih hria la aw?" tih pahin a kut chu la kângin ka fawp zauh a.






Ka hawilêt thuai a, Nu Partei leh U Maremi chu an lo nui sen sen a. "Nu" inthlahrung zeta ka ti chu Nu Partei hmel chu ava in thlak nasa tak. Min rawn hnaih thuai a, "Zothan, lungngai reng reng suh. Kan rawn hruai vat dawn che alawm. An lo hau che anih pawhin ngawih chuh thiam la, engkim kan kutah dah rawh, kan rawn lang thuai ang" tih pahin min rawn bêng thak thak a.






"A nih phawt u, kan kal ange" tih pahin Pa Thara chuan motor chu a ti lir zui nghal a. U Maremi chuan ban a rawn vai lauh lauh a, keipaw'n ka vai let ve lauh lauh bawk a. Kan liam dawn thlengin Hriathlua chu a din ngai renga dingin min thlir liam a, ka hmuh phak loh chin ah chuan ka ruak huai ni ber hian ka hria. Traffic Jam- ah kan tang zeuh zeuh a, Message lam ah Hriathlua'n min ngaih thu leh ka tel lova In a awm a peih loh thu te a rawn sawi luam a, keipawh In a haw ka phûr loh ber ṭum a la ni hial ang.






Kan In kawtah kan ding a, kan In lam chu ka hawi phei thuai a. Inchhung lama ka nu lut tur ka va hmu chiah chu ka thinphu a rang nghal sawt bawk, ani hi ka hmachhawn huphurh ber a ni. Ka pa hnungah chuan tîm dai in ka phei ve chhat chhat zel a, ka huphurh em avangin 'kan kalna kawng chu rawn chim huk sela, lei hnuaiah min pil pui vek se' tih thlengin ka ngaihtuah hman vek; kan In thlen a, ka nu hmachhawn chu ka huphurh takzet a ni.






Inchhung kan luh rualin thingtlang lama ka pa u fanu Kimtei ka hmu thut chu ka va lawm tak; hmun phiah dârh dârh pahin min lo nuih var var a. "Kimte, i rawn zin a ni maw?" ka ti nghal thuai a. "Anih hi, ilo bo daih leh nghal a" midang hriat hlau takin a rawn ti lêt thuai a, a la nui var var zui. "Ngawi hmak rawh" ka tih rual chuan midang hriat hlau zetin kan nui dun hak hak a.






Ka pa te chu ṭhutkhawmna pindan lamah an inkawm zui mawlh mawlh hlawm a. Pa Thara chu leng ve reng rih sela ka ti em em bawk. Mihrang an awm loh veleh ka nu a ri ṭhak dawn tih ka hriat sa na chuan midang awm min thlakhlelh tir a ni ber. Mahse, Pa Thara pawh kalchhuah leh na tur nei anih avangin ṭhumuang reng hman a ni bik lova, "Anih ka va phei ange aw? Chanchin kan in zâi zel dawn nia" tih pahin a rawn chhuak phei a. Min rawn nuih suk pahin, "I lo lungleng phar var vak ange, fel deuh khan lo awm la" a rawn ti fiamthu zuk a, ka lo nui sak ringawt.






Pa Thara a kalliam deuh chauh tihah, "Zothansang, rawn ṭhu phei teh" ti fiak ṭhat ri ka hre nghal, ka thin a phu nghal zawih zawih mai. Muangchangin ka tho chhuak a, Kimtei lah chuan min hlauhthawnpui hmel zetin min lo melh zak zak a, "U, ngawi reng rawh. Engtinmah chhâng miah suh" a lo ti vat a. Mampuia leh Diktea hmel ka hmu miah lo, Holiday te a ni bawk a, khawiah emaw an kalchhuak a nih ka ring nghal teh ngawt a.






Ngawi rengin ṭhutthleng ah chuan ka ṭhu zum dâk a. Ka nu chuan mit khap lêk lovin min melh ngar tih ka hria. Ka pa erawhin ngawi rengin TV a en ngar thung a. Hun reilo te chhung a reh tlawk tlawk ni mai hian ka hria. Ka nu chuan a thu phuhchhuah tur a fawnkhawm mek ang tih ka rinna chuan min ti zâm zual a, chu hun reh em em mai chuan min ti khawhar lo chiang hle thung. "Engvanga mipa ûm ve ngawt nge i nih? Thu ṭha kan in hrilh hnem tehreng nen, min tih zah zia hi i hria em?" a rawn ti chang fak a. Engtinmah ka chhâng lo, ka ngawi ngal a, ka rilru in Hriathlua ka au mawlh mawlh reng thung. "Ka zawhna chu i hria em Zothansang?" rawn ti fiak zui ṭhat chuan min tiphu zawk thei hial..






"Hriathlua te chhungkaw chanchin zawng zawng kan hria, i hriat aia tam kan hre bawk. Pasal atana neih chi ziazang a ni lo. I putea kawngah a rawn thang mek a, naktukah i pi te khaw lam ah i chho ang. Kum khat te han awm bo la, rilru pangngai te pawh i rawn pu ve leh thei mahna" a rawn tih zawm leh hmiah. Chutiang em em chu ka rinphak loh thil a ni. Ka lo suangtuah lawk ang lo takin kan boruak chuan ṭhat lam a pan dawn hauh lo tih chu ka hmuthiam nghal mai. Ka pa lah a ngawi leh reng tawh lawi a, an lokal hma in engkim an sawifel vek tawh tih a chiang reng.






Ka nu âng zui hmawk hmawk reng chuan ka ngaihtuahna a ti peng zo tawh miah lo thung. Thil awmdan Hriathlua hrilh vat ka duhna chuan min tur ut ut a; ka tho chhuak ngam der bawk silo. "Khawi maw i phone te kha rawn la teh, thil ṭangkaiah i hmang lo. Ruahmanna fahrah tê tê siam nan te khan hman in lo tum leh ange, kan thu hi awih la i vannei a ni mai" tih pahin ka nu chuan a kut a rawn lek nghal va a.





"Ka hriat miah loh in ka awm bo nan rem in ruat a, ka phone leh zel chu engatan nge min chhuhsak i tum a?" ka ti let tuarh a, ka rilru ipik lutuk chuan ṭawngkam nêm pawh min hman tir thei lo.






"Ekhai leh! Zothansang..... Ṭawngkam vîn te min hman khum ngam tawh a ni maw? I zak chai nange? Pasal laktlak loh zet nei tur hian ka hring lo che" a rawn ti vîn ve hrawk a. Ka pa pawhin kan boruak sang chho ta deuh chu a hriat hmaih hauh lo, a TV en chu rang takin a hmet hlum nghal thuai a, kan lam hawiin a rawn in siamrem ve nghal zat bawk a.






"Tumah famkim an awm lo, nang pawh i famkim bik em ni?" ding phat chungin ka ti let ve leh sak a. Ka nu chu rang takin a rawn thochhuak nghal a, ka biang ri zui chawrh avang chuan ka thle sawk thei nia. Thinrim sen awp awp leh kut khur dar dar in ka nu chuan min kawk vâ a, "Khatiang a zah lo taka min ṭawngkhum tur khan Hriathlua chuan a fuih che em ni? I va huaisen salh salh ve le. Hre rawh, vawikhat pawh hi in in hmu leh tawh lo ang; awm bo vang vang ang che" a ti khûr dat dat a.






"Khatia rik hluai a ngai lo, in zahpuiawm lutuk. Thu ṭha tak a sawi theih reng hi in rik pui hlut zel mai. Ṭhu rawh u" ka pa chuan a rawn ti chang fak a. A thu zawm loh ngam ni hek lo le, muangchangin ka ṭhu nghal riai riai a; ka biang chu a sa hat hat mai.






"Zahpuiawm lutuk, hetiang chung pawhin min la ṭawngkhum ngam ania" ka nu chuan a la ti bal bal reng a, ṭhut pahin min rawn melh râm râm bawk. Ka pa chuan ka awm bo rih chu ka tan a ṭhat zawk thu dam dap in a sawi a, kei erawh ka nu min tihdan avangin ka rilru a hel zual sauh thung. Ka pa ṭawngkam tin te chu ka rilru in ka lo hnial fithla ṭhak ṭhak a, zawm tumna engmah ka nei hek lo. Ka tana ṭha tur pawh ni engang mah se keimahah eng thu mah chu a tla na chuang lo.






"Va chawl hahdam rawh, i putea pawh a lo thleng ṭep tawh ang" ka pa chuan a rawn ti dam leh thluam a, rang tak in ka tho vat a; ke ka pen ṭan chiah tih in ka nu bawk chuan "Khawi i Phone chu rawn la rawh" a la rawn ti leh hram a.






Thinrim zetin ka bag chu ka hai sawk sawk a, Phone chu la chhuak in a ṭhutna bulah chuan ka vawm thla chawrh a, ka kal zui nghal nal nal a. Pindan ka lut chiah chu Khum ah ka bawk nghal thlawp a, ka mittui a dir zawih zawih mai. Ka thinlung in tlawm zawk nih tum lo mah se tun dinhmunah erawh kawng sah tur ka hre hlawl lo thung. "Ka kawng in dâl lo ang'' ti chhuak sap in Hriathlua chu ka mitthla ramah ka chentir veng veng a.






"Zahpuiawm lutuk,hetiang chung pawh a min la ṭawngkhum ve ngam le" Ka nu chuan a la ti bal bal.Ka pa chuan ka hmakhua lo awm tur atana ka awm bo rih chu a ṭhat zawk thu dam dap in a sawi a,kei erawh Ka nu min tihdan avangin ka rilru a hel tawlh tawlh thung.Ka pa ṭawngkam tin te chu ka rilru in ka lo hnial fithla ṭhak ṭhak a,zawm tumna engmah ka nei heklo.






Zan lama ka mut ṭhat loh a lang a, mutchhuak in min rawn zem chiai chiai a. Hriathlua be mawlh mawlh chungin ka biang thîp sa hat hat chu ka dawm vang vang a.






"Ka ngai lutuk che a, ka rawn kal tawp. Rawn hawng vat teh" tukverh rawn kik dat dat lam chu ka hawi thuai a. Hriathlua ngei mai chu a rawn nui var var a, ka va lawm tak. Hmanhmawh takin tukverh chu ka hawng thuai a, "Rawn lut rawh" ka ti nghal thuai a. A rawn lut chauh tihin ka lo pawm nghal thuai a, ani pawhin min lo pawm nghet salh salh a.






"Bawihi, min kalsan tawh suh, i tel lovin ka awm thei lo. Ka ngai hman lutuk che, ka bulah awm reng rawh" tih pahin a rem lai laiah chuan min fawp nawk nawk a.






A hma aia nghet mahin ka pawm chêih chêih a, "Keipawhin ka ngai lutuk che. I bulah lo chuan ka awm thei lo. Ka ngai lutuk che" ka ti ve mawlh mawlh a.





"Min ngai hlawl lo, min kalsan" tih fiamthu pahin ka lu ah a sawi nawk nawk a. Ka va harhchiang tak. Ka men rual chuan Mampuia leh Diktea hmel ka hmu nghal, ka phu deuh zawk nghe nghe. "In lo haw tawh a ni maw?" hâm bâi bâi chungin ka ti nghal vat a.






"I rawn haw laiin kan awm peihlo anih kha. Anu kha a in hrosa nasa mai sia, kan ngaithla peihlo alawm" Diktea chuan a rawn ti deuh phawng a. Ani hi chu engmah hi a zep mawi hnai ve ngai lem lova, a nihna ang hian a sawi mai zel bawk a. Dawt a sawi lo tih chu ka hria, ka tawng zo chiah a, ka biang a na sa hat hat rêng bawk.






Mampuia chu ka bulah a rawn ṭhu a, "Engnge maw in inrûk ve ngawt reng reng ni? In in ngaihzawnna la rei loh nen, hriat pawh i hrechiang reng reng em ni?" a rawn ti deuh nghat a.




"Ka hre biklo, kan in ru ve ringawt" ka lo ti deuh ngawt a. Dawt ka sawi lo, chhân dan tur lah ka hre hek lo.





Mampuia bawk chuan, "Tumah hmu hniam thei chu kan ni miah lo na a, an chhungkaw chanchin kan hriat khan a buarchuar riau a; i ngaihtuahawm lutuk alawm" a rawn ti leh khauh a. Nau zawkin min fuih malh malh chu ka zak ang reng viau bawk. Engtinmah ka chhâng lo, Mampuia thusawi chu pawmin ka lo bu nghat nghat a.






"Apî te khua ah chuan i han awm dawn ta em ni?" Diktea chuan a lo ti daih thung. Mampuia chuan a melh hrâwk a, a hrethiam lo tih chu ka hre nghal mai. A u melh let ngheng chungin, "Atan a ṭha zawk ang chu" a rawn tihzawm tak deuh deuh a.






Chu thu chuan min ti thinrim thar leh at bawk, "Engnge ka awmbo kher chu a ṭhatna ni reng reng a? Min dahbo a duh ve hrim hrim anih kha" ka ti nghal tân tân a.






"I tan a ṭha ber turah an ngai a ni ange; an thu zawm phawt mai rawh. Tirawh u, chhuak ang u, Putea pawhin a hmu chak tawh ang che" tih pahin Mampuia chu a tho zui tharh a. Putea hmuh pawh chu ka chak falua lo. Phur lo zetin ka chhuak zui ve a, Diktea'n ka hnunglam aṭangin "Hauh i dawng double dawn" a rawn ti sur sur a, ngei zet a melh hrawk pahin a ngal ah ka chhir sak pawp a; huphurh rûk tawh sa nen chutiang thu hriat belh ka mamawh lo.






Ka nu chawhmeh lo chawk mek chu a hnunglam aṭangin rum zet in ka melh teh ngawt a. Tun dinhmunah chuan min be peih dawn lo tih ka hria, kei pawhin min biak peihloh tluk zet in ka be peih bik lo. Ka Putea chu Bathroom aṭangin a rawn chhuak ve chiah a, be hmasatu nih ka hreh avangin pawnlam pan in ka kal zui ta daih a. Kan In ah chuan rukru ang mai in ka ṭi dek a, ka chung a lungawi lo hlir bula khawsak chu a ipik thlak ka ti takzet. Pawn ka chhuak chiah chu Kimtei ṭhenawm te In aṭanga a rawn chhuak mek chu hmu in ka pan thuai a.





"Nau, i phone ka lo hmang lawk ang. Mahse, ka nu te hrilh lo la aw?" a bân a vuan ṭai chungin kan In lam ka hawi pah zak zak bawk a.





"Ka ring rêng a, engmah ka sawi dawn lo, hlauthawng suh. Kha kawl rih mai rawh" tiin a Phone hum lai chu ka kutah a rawn hmeh bel zui zat a, ka lawm lutuk chuan ka kuah nawk nawk mai. "Mahse, tunah chuan a tih chi rih dawn em ni? Ka hlauhthawn pui che a nia" a rawn tih zawm zat a.





"Chaw eikham ah a ni mai, kha i duh leh kawl leh rih zawk rawh" tiin Phone chu ka pek let leh ka tum a. Mahse, Kimtei chuan, "A ngai lo, hmanna tur ka nei lo. Hun remchang deuh i hmu mai thei asin" tiin min hnial teh tlat a; ka lam ṭang an awm tih ka hriatna ringawt pawh chuan min ti hahdam huai thei nia.






Ka kekawr kawng hnung lamah Phone chu zep in ka kawr chuan ka khuh thân a. Engmah thleng lo ang mai in Kimtei nen chuan Inchhung lam panin kan ṭawng lut dun bawrh bawrh a. Kan luh rual chiah in ka Putea chuan ṭhutkhawmna lam aṭangin min lo ko nghal chat. Ka pehhel reng thei dawn chuang lo tih ka hria a, a bulah chuan ka va ṭhu vat a. A rawn kalna kawng lam chanchin te ka zawt nghal luam a; thuawih taka awm chu ka tan a pawimawh ber rih tih ka hria. Mahse, ka putea chuan ka zawhna a chhâng lo, a rilru ah a awm lo tih ka hrechiang em em bawk.







"Ka rinloh lam daih thu in min deng a, hetiang a awm duh tur ang in ka ngai miah lo bawk che a, mak ka ti viau mai. Mahse, nula in ni ve tawh a, thil thleng ve thei tho erawh a ni tih ka hria. I nu leh pa ka aṭangin an chhungkaw chanchin pawh ka lo hre ve nual tawh a, tumah han iai thei kan ni hauh lo nangin an felfai tawk lo deuh em aw chu ka lo ti ve mai mai a. Hriathlua em ni khah?" tiin zawhna min zawt daih. An rawn kalna kawng lam chhânna chu a ngaihven rih lo hle. Min zawhna chhân nan ka lo bu nghat a.







"Ni e, Hriathlua pawh kum upa a la ni lova; puitlin lam kawng zawh tur tam tak a la nei ngei ang. Tuna an chhungkaw boruak te hi a ṭhat phawt loh chuan rorel ngaihna pawh a awm chuang lova, anni lam an in chinfel hmasak a ngai tih pawh i hrethiam ve ngei in ka ring. Nu leh Pa bul aṭang lo chuan atan pawh engmah tih theih a ni chuang dawn lova, heti hian hmabak nei in ni tawh a; anni lam pawh felfai takin an awm chho turah ngai ila, chumi hun nghah chhungin kan bul lamah lo awm ve rih la kan ti a ni. I pi leh pu te nen pawh in in hmu khat tawh alawm le, pasal i neih daih phei chuan in tlawhpawh te pawh a har tawh dawn a nia." a tih zawm leh nghal mawlh mawlh a, ka hmin deuh duak in ka in hria. Ka Putea hi chuan mi hau ve chiam ngai lo hrim hrim a. Ṭha tak, zawm loh har em em si hian thu min fah ṭhin; ka nu nen chuan in ang lo vang vang tak an ni.







Zanriah kan ei zui thuai a, kan chaw ei chhung zawng chuan ka beng a tlai malh malh hle. Ka ngawi reng a, puar pawhin ka in bâr meuh lo e. Ka thleng chawiin ka tho tharh a, ka rilru hmanhmawh tet tet tawh avang chuan ka chhungte ho chaw ei pawh chu an ei rei ka ti tawh.






"I thawmhnaw lo va siam rawh, thleng seng ah chuan kan lo awl ang che. Theihnghilh te kha i nei leh rem rum ange" ka nu chuan aw ngaihno bei lo zetin a rawn ti chang fak a. A lo ṭawng ve hi chuan ka haw deuh hlur tawh, thuawih ka châkna te pawh a bo leh duak in ka hria.






"A hmanhmawhthlak loh em mai, zin mai mai tur in ken vak pawh a ngai lo" ka ti let ve ngat a. Amah pawh en duh miah lo chuan ṭhutkhawmna lam ka pan zui daih a. Chaw an eikham pawh chuan ka pui ta chuang lo, ka kekawr kâwnga ka zeh mek Phone chuan ka rilru zawng zawng a luah; Hriathlua biak thuai duhna in min nawr tet tet tawh.






An in tifel zo chu TV hmaah an rawn ṭhu ṭhap a, chanchinthar an ngaithla pah bawk. Ka nu phun thawm hriat leh ka hlauh avangin in siam chhuanlam in pindan lamah ka luh san thuai a; kawngkhar chhunglam ah kalh in Phone chu ka hmet eng nghal pap a. Hriathlua Number chu chhu zui nghal mawlh mawlh in ka Call zui zat a, min chhâng dawn lo emaw ka tih hnu ah, "Hello" a rawn ti ta hram e. A aw ri ka hriat rual chuan ka dam sawng sawngin ka hria. Mahse, a aw chu a pangngai lo viau tih erawh ka hria.






"I rui a ni maw?" ka ti nghal tâwng, a reh zui vang vang hnu ah "Umm" a rawn ti zâwi sup a. "I mak, engvangin nge i zu i in a? A hun lo em mai" ka ti zui nghal mawlh mawlh a. Ni e, kan in kalsan dawn pawhin theihtawpin ka fuih a. Amah vangin kut ka tuar bawk a. Theihtawpa atana beih ka inhuam lai a ka thusawi a ngai pawimawh lo lutuk chu ka rilru a na a, ka thin a rim em em bawk.






"Ka ngai che a, in hnemna tur dang hre hek lo" a rawn ti bah nak a. Chutiang lam sawipui a, in tih thinrim ka hman lo tih hria in ka Putea lo kal thu leh an khaw lam a min hruai a tum thu chu ka sawi zui nghal mawlh mawlh a, ngawi rengin ka thusawi chu a lo ngaithla reng a. Ka sawi tawp lamah erawh thaw deuh hak in "Engtinnge kan awm dawn?" a rawn ti bûl hmuk a.






"Bawihi, neih tlak ka ni lo aniang. I chhungte min iai na thu hi ka hre tam ve asin. Mahse, i tel lova awm erawh har ka ti bawk si. Tun a ka dinhmun hi ka duh vang reng a ni bik lo asin" a rawn ti ban zui charh a, keimahah khawngaihna bawk a rawn awm leh tawh.






"Ka hria alawm, engkim huam in pan che ila i in siam ṭha ang tiraw? Min ti beidawng lo ang tiraw?" ka ti let leh sap a. Beiseina leh hlauhthawnna keimah a in pawt tawn mek chuan ka taksa pum a fan a; ka chau nghulh thei hial. Kei mai hian ka siamṭha thei angem ka hre lo. Chutih rualin hmangaihna in engkim a siamṭha thei tih erawh ka hrechiang viau si. A tel lova awm ka zuam hlawl bawk silo. Ni e, ka hmangaih em a ni.





"Min rin ngam phawt chuan theihtawp in itan ka bei ang, ka chakna i ni asin" a rawn ti let thuai a. A aw ah chuan a thusawi chu ring se min ti tih a hriat theih.





"Aw le, khawiahmah ka kal lo ang, i bulah ka awm ngei ang. Mahse, zaninah chuan ka chhuak thei lo ang, ka rawn hrilh leh ang che" ti in ka chhang let leh vat a.





"Bawihi, rei suh aw? Hmuh thuai che ka duh ania. Ka ngai tawh lutuk che, i tel lo chuan engkim mai hi a ninawm a, Khawvel hi a ruak vek ni maiin ka hria" a tih mawlh mawlh lai chuan ka lo nui sen sen a. Mahse, ka nui rei lo kher mai. "Zothansang, kawngkhar lo hawng teh" tiin ka nu in kawngka a rawn chûm dawt dawt a.






Kimtei phone ka hmansak chu a hrechhuak ngei a nih rinna ka nei lian nghal hle. Engkim a buar zo vek dawn tih ka hrethiam nghal, min enthla reng tawh dawn tih ka hria. Chu chuan min ti hlauthawng zual sauh bawk.






Phone chu lukham hnuaiah rawlh lutin ka tho nghal thuai a. Kawngka chu ka hawng zui thuai a, ka nu nen kan in hmachhawn leh ta rân mai...





(to be continue.......)


Show post links
Top

[Ngaia]

DEAR PAIN
Chapter - 10



By: Brigida Hugo






Ka Putea motor hru fai mek chu thingpui ka pe a, chawhma lamah kan chhuah hman dawn loh thu a lo sawi chu ka lo thaw huai thung. Ka pitei thil lei lawk tur a neih thu a sawi zui phei chu lawm tak ka ni. Zan lamah ka nu in Mampuia ka pindanah a rawn riah tir a, Kimtei Phone pek let pawh harsa tak a ni; hunawl min siam sak miah lo tluk a ni ber a. Kimtei hnenah chuan engkim ka hrilh a, Hriathlua bulah ka Phone min laksak thu leh ka awmdan tur ka hrilh leh tur thu min lo sawisak tur in ka chah thlap a. Engkim mai chu Kimtei chungah ka nghat a ni ber mai. Ani hi lo awm lo ta sela ka tan kawng sial a harsat dan tur pawh ka hmuthiam vek.







Ka pa hna a chhuah ngei ngei na tur a neih avangin chaw kan ei zui vat a, min thlahliam hman lo tur chu pawi a tih thu a sawi deuh reng bawk. Ka nau te Class kal an ngai bawk a, ka nu chauh chu Kimtei min puihna in ka paltlang thei mai turah ka ngai nghet hmiah bawk. Chaw pawh ka ei ṭeuh, 'ka haw leh mai mai tawh loh takin' tiin ka ei lui ve deuh bawk a ni. Chaw eikham veleh che zui sawk sawk in ka inbual a, chhuah dan tur ka ngaihtuah rauh rauh bawk; engkim chu Kimtei ah ka nghat vek a ni ber.






Ka Putea chhuak tur chu ṭha takin ka thlah a, "Ka lo in siam fel diam ange" ka ti pah mawlh mawlh a. Ka awmdan chu keimah ngei pawhin ka in ngei ru viau. Ka nu nen erawh kan la in be tam lo viau reng tho a, min zilhna ka lo hnial ve deuh avang khan a lungawi thei thlawt lo ni berin ka hria. Ka thawmhnaw khungkhawm sa te chu ken ngaihna a awm dawn loh avangin ka Almirah sir kil lamah chuan ka rem fel thlap a, hun remchang a awm anga, ka la lachhuak thei turah ka ngai ve ngawt bawk.






Pindan kawngkhar rawn kik dat dat lam chu ka hawi thuai a, "Rawn lut rawh" ka tih rual chuan Kimtei chu a rawn nui lut var var a. "Enteh, engkim a fel thei mai ang. Hriathlua hnenah thil awmdan ka sawi vek tawh" a rawn ti lut sar sar a.





"Kimte, nang awm lo la chuan engmah ka ni dawn lo. I kutah ka in nghat tawp a nia" tih pahin Khuma a rawn ṭhu fel hlawt chu ka lo chelh thuai a. Ka thawmhnaw siamfel sa chu ka kawhhmuh nghal zat bawk a. "Zanah in pek dan kan zawng mai dawn nia. I pindan lamah lo va dahṭha mai rawh" ka tih rual chuan a tho thuai a. Ka thawmhnaw siamfel sa, ka khung fel thlap chu a pindan lamah hmanhmawh takin a kengchhuak nghal a.







Pindan aṭangin ka chhuak phei zui ve nghal a, ka nu chuan min lo melh rulh a. "Motor ruih lohna tur damdawi ka zuk en teh ang. Ka rui leh dawn chiang sa" tih pahin chhuah nghal ka tum a. "Kimi, rawn kal lawk teh. I u hi dawr ah zuk kalpui lawk rawh" rang fahran a ka nu au ṭêng ri ka hre nghal. Ka ding dat a, ka nui sak bawk a.






Kan in zui thla nghal hnak hnak a, kan In lan theih lohna chinah chuan Taxi kan châng dun rân a. Taxi rawn tlan chu kan thlek dun hâ hâ a, ka lo phar nghal thuai a. Kan bula Taxi a rawn din lai chuan Kimtei chu ka thlêk vang vang a, ka rilru hrethiam takin, "Kal rawh, min ngaihtuah suh. Nangmah kha va in ngaihtuah rawh" tih pahin min nuih var var a. "Kimte, engkimah ka lawm em em ania. Chanchin kan in hrilh thuai dawn nia" ka tih lai chuan min nem dat dat a, a hawi zak zak bawk a. Hmanhmawh takin Taxi chhungah chuan ka ṭhu lut thuai a. Kimtei chu ka en vang vang a, a Lu a lo bu nghat a.






"Ṭhiannu, khawi lamah nge ni ang?" Taxi driver in a rawn tih rual chuan, "Mission veng lamah" ka lo ti thuai a. A tawlh chhuak zui nghal a, Kimtei nen chuan kan in vai zui lauh lauh a.





Ka thinphu rang lutuk chu ka dawm leh vang vang ṭhin a. Ka thaw leh halh ṭhin bawk. Taxi Driver chuan mak ti takin Motor chhung darthlalang aṭang chuan min rawn thlêk leh zauh ṭhin tih pawh ka hria. Inthup tum zetin pawnlam ka hawi nghal daih a. Mahse, ka hahdam hlawl lo, ka thaw leh hawk ṭhin.





"Ṭhiannu, harsatna i nei em ni? I awmdan a dik lo riau in ka hria" a rawn ti ta nghut a.




"Ka tlanbo dawn...hmanhmawh ka ngai ania" ka lo ti nghat a.




A rawn hawilet rang kher mai, "Engatinge? Engvanga tlanbo tum nge i nih?" a rawn ti thuai a. Ka hmanhmawh tehreng nen, a tlanmuang zui nghal a. Ka awmdan ah hlauhthawnna a nei anga, kawng lakah min chhuk tir mai ang tih hlauhna ka nei bawk. "Englo ania, kan in ru dawn. Ih... nau ka pai a. Ka chhungte an rem thei bawk si lova" ka ti ta ngawt a. Dawt ka sawi mai loh chuan kawng lakah min chhuktir ka hlau takzet.





"Anih chu, a zialo hle mai. Mahse, fate tih fahrah ai chuan in rûk hmiah mai tur. Theihtawpin kan hmanhmawh dawn nia" a rawn ti chu ka thaw huai mai.





Ka in dap that that a, ka purse ka ak miah lo tih ka hriat rual chuan hlauhthawnna in ka khat nghal. Khum a ka dah kha ka la lo anih ka ring. "Ṭhianpa, khawngaihin i phone min lo hmantir lawk mai teh. Ka purse ka hmu zo miah lo" ka ti chuai raih a.





Phone min pek rual chuan Hriathlua number ka hmet nghal mawlh mawlh a. Ka ngaithla nghal vang vang a. 'Switch off' tih ri ka hriat rual chuan ka manganna a va thuah hnih chiang tak. "I be thei nange?" tih pahin Darthlalang aṭang chuan min rawn melh rulh rulh a. "Aw" tih sap pahin, "Ka lokal ania, ka purse ka theihnghilh daih. Taxi ka rawn hmang ania" tih chu Hriathlua chu ka thawn hram a. A lo hmuh hlauh rinna ka nei hram bawk. Message ka thawn leh a number ka chhut luh chu ka paihbo zung zung a, Phone pek let leh pahin lawmthu ka sawi pah mawlh mawlh a."Hlauthawng suh, i kal duhna hmun thleng in ka hruai ang che" a rawn ti chu ka va lawm tak, ka thaw huai a, "Ka lawm e" ka ti zui leh sap a.






Traffic jam ve sek chu ka haw takzet. Hmelhriat hmuh palh hlau in ka dakchhuak ngam si lo, ka ṭhu kawm chal a. Thlen phei thuai thuai ka nghakhlel takzet.





Hriathlua khan a Patea te In lama a riah thu Kimtei bulah khan a sawi a, chutah chuan a la awm ka ring deuh ngawt a. U Maremi te In nen a in hlat lo bawk a, kan thlen phei hunah buaina awm lo tur ah ka ngai teh ngawt a. Mahse, ka hun hman mek chu a hahdamthlak loh takzet.






Ka nu khan a hre tawh ngei anga, midangte pawh a hrilh hriat vek tawh ka ring; min rawn umzui ka hlau et et a. Kimtei ka ngaihtuah thar viau bawk. Ka nu khan a lo ankhum hrep ang tih ka hlau em em bawk. Ka hun tawn mekah ka hnuk lut ve chu pawi ka ti takzet. Mahse, a tello in engmah ka ti thei bawk silo. Mission veng kan lut ṭan a, tlem chuan thawpik zualpui a kiang deuh. Kan kalna tur lam kawh hmuh zelin Hriathlua Patea te In lam pan phawt chu ṭha berin ka hria.






Motor a ding dat a, ka chhuah rual chiah in step ah Hriathlua a rawn chhuak chho ve chiah bawk. Min hmu chu mak ti hmel pawh a pu lo, thinrim hmel a pu zawk daih chu mak ka ti viau. Min rawn pan hnai in min rawn kuah thlawp a, ka hnungah a chûl heuh heuh a, nghet zetin ka lo kuah let ve bawk.





"I chhungten min ko, ka kal dawn" a ti chang fak a, mak ti zetin ka ding ngawi reng a.




"Engvangin nge an rawn koh che?" mak ti leh hlauthawng zetin ka ti thei hram.




"Ka hnen a i rawn kal leh kal loh min rawn zawt a, ka phone a thi daih bawk nen engmah hre bik hek lo. I lo kal loh thu ka sawi a, an awih bawk si lova. Ka ngaihṭha lovin phone ka charge chawp a, ka tih nun rualin i message lo thawn kha ka hmu chiah. Nu Mami a rawn chho dawn a, i kal man pawh a rawn pe ang; chanchin ka rawn sawi anga, kal bo a ngaih pawhin Siama ka hrilh tawh kha. A lo buaipui zel mai ang che" tih pahin a Helmet a khum a, ka chhungte a va hmu tur chu ka ngaihtuah takzet.






"Kal kher a ngai lo, ka bul ah awm zawk rawh" tih pahin ka pawt deuh ṭung a.




"Ka kal dawn Bawihi, hmaichhan a inbiak a ṭha; min ngaihtuah lo la, ka lo haw leh vat ang" tih pahin a nui lui sak a. Taxi Driver, mak ti hmel zet a min en reng lam chu a pan a. "Ka lawm lutuk ania, kan buai deuh hlek a, min lo hrethiam lawk la, min lo nghak lawk rawh" a ti nghal zung zung a. A bike ti nungin chak zetin a tlanchhuak zui nghal puat a.






Nu Mami rawn thleng chho ve in Driver chu pek tur zat te a zawt zung zung a. Driver chuan midang hmanna aia tlem daih a lo laksak leh nghal a. Ka kal hnaih thuai a, ka thiam tawk in lawmthu ka sawi ve mawlh mawlh a. Ka lawm zia chu ka hmelah pawh a hmuchiang viau ang. "Lawmthu sawi a ngai lo ania. Tupawhin harsatna chu kan tawk thei vek alawm. Hlim deuhin in awm dawn nia. Chuan, naute pawh ṭha takin nei ngei ang che" a lo ti ve sawk sawk a. Kan in vai liam zui thuai a, a tlan liam tur chu ka thlir reng a. Naute ka chhuanlam tel chu nuam ka ti lo ru viau na a, chu Driver fel tak nen chuan kan in hmuh zui tawh loh erawh ka beisei.






Nu Mami hnenah chuan thil awmzia ka hrilh zui mawlh mawlh a, a hrethiam khawp mai. Ani anga Nu zaidam hi ka hmu khat viau, ṭawngkam vîn a hman ve pawh hi ka hre ngai lo. 'A thinrim ve ngai lo aniang' tih hial tur a ni. Fapa pathum an nei a, an fel hlawm em em leh nghal a. Tuna In a min lo nghak mek tu hi a fapa upa ber Siamtea a ni. " Zothan, lo zuk haw thla mai ta che. Mithi râl turin ṭhiante nen kan lo in zái fel tawh si a, ka kal loh ngawt chuan a diklo ang. Bawiha a awm tho bawk a, ka ngaihtuah lo che u ania" a rawn ti dam thluam a. "Aw le, ngaihtuah kan ngai lo ania" tih thuai pahin an In lam pan chuan ka chhuk zui nghal a. In chhung ka luh rual in Siamtea'n min lo fiam nghal zat a, keiin ka hlauhthawn thu hlir ka sawi chûl thung.






Chanchin ngaichangin kan ṭhu ngawi rân reng a, rilru a hadam lo takzet. "Siamte, han Call chhin teh. Buaina a va tawk vak te hi a ni ange?" ka ti sek reng a. Siamtea lah in, "Pawimawh a awm chuan a rawn sawi em em ang, lo nghah tawp a fuh zawk. Min rinhlelhna tur thil te kan lo va ti mai mai ang" a ti deuh tlat bawk si. Ka ṭhu hle hle thei tawh lo, ka tei kual chhen reng a. Ka chhungte thinrim hian Hriathlua lakah thil ṭha lo tak an lo ti ang tih ka hlau ber a, Kimtei number ka lo vawng lo chu pawi ka ti hnuhnawh takzet. Ani tal kha be pawp thei ila, thil awmdan zawh theih sela a zia deuh tur hi a nia.






"Hei, message a lo thawn e" Siamtea'n a tih rual chuan rang takin ka pan hnai nghal thuai a. 'Zothani kha kalbo pui rawh,;a chhungte'n min rawn zui dawn' tih thu ka chhiar rual chuan ka phi nghal chung a.





"Khawnge kan kalbo anga? Amah chu a ṭha angem? Kal na tur i hria em ni?" tih sek sek pahin Dawhkan a ka bag dah chu ka ak nghal sawk sawk a. Kawngka lam ka pan pahin, "Kal vat ang" ka ti zui leh vat bawk a.






"A mak chung chung lutuk. Hahdam deuh khan awm rawh, kan lengbo daih dawn nia. Tumahin an rawn hmu lo ang che. Ka nu ka Phone lawk ange" nuih suk suk pahin Siamtea chuan a lo la ti dam thluam a. Rilru hmanhmawh tawh nen a nu nena an inbia chu ka melh ngheng ringawt a.





Phone dah pahin a tho nghal hluai a, "Kal ang le, ka ṭhiante in ah leng ang; buai chûk lo la aw?" tih pahin Siamtea chu a chu a chhuak zui vut a, ka chhuah fel ve rual in kawngka a kalh zui zat bawk a.





"Kei chu khawchhung a awm pawh ka duh lo. Ramhnuai ah kal ang" amah en hê haw chung chuan ka lo ti thuai a, a nui ri huk a. "Engnge? A nuihzatthlak loh lutuk" tih pahin ka che sek sek reng a.





"I va ho mai mai tak, khawilai ramhnuai ah nge kan kal anga? Chutiang em em in an zawng buai peih lo ang che" tih pahin ka dar ah a bêng thak thak a, a nui vur vur bawk a. Kei erawh a der takngial pawhin ka nui thei tawh lo, ka hlauthawng takzet.





"Ka thla a muang lo, ramhnuai ah kal ka duh" ka la ti deuh ṭung a. Min en vang vang a, ka hmel a hlauhthawn na te chu a hmuhhmaih lo aniang chu! "Aw le....mahse, a hla teh mai ania aw? I hah viau dawn a nia. Mahse, i thlamuanna tur a nih te chuan kan kal mai aniang chu, ramhnuai kal pawh a khat alawm..." tih pahin a nui vur vur a. A in her vut a, rang takin ka ûm nghal dat dat a; a pa len lem loh nen a kal chak reuh zek leh nghal.






Veng mawng lam pan in kan kal zel a, ka vawikhat kalna vek anih avangin mahni a haw leh tur ni ila ka bo thei hial ang. Siamtea chuan kawi tin deuh thaw ah hmelhriat lo au tu a nei deuh zut reng bawk a. An veng chhung a zau tehreng nen; hmelhriat a ngah ve hrim hrim a ni. Ṭhenkhat in "Kha kha em ni?" an lo ti deuh sek hlawm bawk a, in en in kan nui leh thul ṭhin. Kan pan mek lam chu ka thlamuanna hmun tur anih miau avangin hah pawh sawi lo in min kalpui ania, ka lawm takzet.






Mimal huan ni awm tak kan zuk pawh thla a, Gate lian tak lo awm in a inkalh tlat bawk. A sir kawng tereuh te chu kan zawh chho a, hmun zawl nuam tak a lo awm a, chutah chuan kan ding ta chat a. Aizawl Veng ṭhenkhat lang pe iarh chu ka thlir vang vang a, "Hetah hian awm mai ang, ka kal peih tawh lo" tih pahin lei ah chuan ka ṭhu thla hnawk a, ka thaw hlâi hlâi mai.





"I thlamuang tawh ang maw?" nuih huk huk pahin ka bulah a rawn ṭhu nghal a. Ka tui a hal huam huam a, tui lah ken nachang kan lo hre der silo; awm rei a ngaih phei chuan a hrehawm duh viau ang le. Meizial a ṭan kai a, hla tak thlir in a fawp vang vang. Kan bul velah Thosi a rawn thlawk ve sek bawk a, ka kut chu ka vai kual leh thuak thuak ṭhin. "In hahthlak ve ngawt mai" Siamtea chuan a ti sup a, ka en nghal vat. A nui ruh ruh lai chu a hnungah ka bêng thâwr a, "I nupui rûk ve hun ah ka pui ve ang che" ka ti teh ngawt a, za fahranin a nui hawk hawk a.





"Nang anga dawihzep hi chu ka ru ve peih lo, a tlanbopui tu tur te ka khawngaih" tih pahin a nui dîr chur chur a, rum zet in ka melh vak a.




"A hlauhawm em alawm, tihnawn zen zen chi pawh a nih loh tawp hi" tiin ka nui ve ta chiam a, ka dawihzep rûk zia ka hre thar uarh uarh bawk.





Eng engemaw sawi in kan ri zui mawlh mawlh a, Thosi tam chak lutuk chuan min ti buai ṭan lek lek. Siamtea chuan thingzar thliak in a vai kual leh pap pap ṭhin a, pakhat min hûm tir ve rân bawk. Kan thlang lam aṭanga rawn kal thawm ka hriat chuan ka ding chhuak zawk a, tlanchhiat ka in peih nghal at mai. "Hahdam rawh, helaiah i chhungte an rawn kal lo ang" tih pahin a bih deuh dûk dûk a. "Nangni lek chu niin, khawnge in kal a?" a lo ti sawk sawk a, a hmelhriat te an ni tih ka hriat rual chuan ka thaw huai mai.





Tleirawl pahnih berh zeta rawn lang hlawl te chu ka lo melh ve rân a, anni lah in mak tih hmel takin min en ve zak zak bawk a. "Nula i tlanbo pui a ni maw, i va bei hla mai mai ve?" tih pahin an nui ṭhâ a, kan bulah chuan an rawn ṭhu ve nghal zat bawk. Khua a tlailam tawh a, reilo te ah khua a thim vat dawn tih pawh ka hmuthiam ve vek bawk. Hriathlua a la reh vang vang mai chuan ka awm a ti nuam tawh chiah lo.





Kan tleirawl pahnihte chuan Siamtea chu meizial dil in an pak khu talh talh a, haw mai tum in an thochuak zui zat a. An mau put tam vak lo chu a hmawr ve ve ah zawn in an kal zui ta thuai a, "Che nasa lutuk lo ula" tiin an la rawn nui zui hram a. Engtinmah Siamtea chuan a chhâng lo, min en a, a nui suk ringawt. "In zakthei lo" ka ti zui ve hram a, an nui zui hak hak pawh chu ka hre pha reng.




"A mak chen chen e, kei chu ka ngaih a ṭha tawh lo. I nu te emaw tal biak tum teh, anni lam talin hriat an lo nei mai thei asin" ka ti mawlh mawlh a.





Phone chu a lachhuak in a bih ngur a, "Signal a va ṭhalo ve, ka battery lah chu aw..." tih nuah nuah pahin a Phone chu min entir a, a lo battery chu a sen vû mai. "Charge ve ta che? Khatiang te chuan khua a thim zual anga; êng chhit tur pawh kan nei nang" ka lo ti bak hlur a. Ka thusawi chu hria âwm ang pawhin a lang lo, Phone chuktuah in a ngaithla vang vang a.




"Hello, ka nu.... U Hriathlua chanchin hriat in nei em?" a tih rual chuan, "Loudspeaker ah dah rawh" ka lo ti thuai a.




"Engmah kan hre bik lo, amahin a la rawn be lo che u em ni? Khawnge in kal reng reng a?" Nu Mami chuan a rawn ti let vat a. Siamtea chuan kan awmna te chu sawiin Hriathlua kan nghah tawp thu chu a sawi nghal mawlh mawlh a.




"Ka lo be ve dawn chhin ange, in ril te a ṭam tawh awm sia; lo haw ṭan rawh u. Zothani pawh hlauthawng lutuk suh se, i pa pawh a lo haw tawh a; kan awm alawm.. Eng êm kan ti lo ang" a rawn ti leh zung zung a, ka thaw huai mai.




"Chanchin kan in hrilh zel dawn nia. Mahse, ka phone hi ka lo charge lova, battery ka nei tlem teh mai a nia. Min biak theih loh palh thut pawhin ngaihṭhat loh nan lo hmang lo ula" tih leh zung zung pahin Phone chu a dah zui a, a hawi kual pah vat vat bawk a. "Khawthim chhah lutuk hma in kal ṭan ang hmiang, kan buai lutuk palh ange" tih pahin min melh rulh a; chulai hmun a awm reng chu awmzia a awm lo tih hria in ka ding nghal thuai a.






Kan chhak lam kawngah chuan chho zui in muanchangin kan kal a. Phone light chhit tham a awm loh avangin thla êng deuh ruai ring chuan kan in dap chawp chho a; kal chak a harsa viau mai. "Ka ṭhiante In ah pawh khan kal ila i chhungte chuan an hre âwm tawp si lova" ka hnunglam aṭangin Siamtea chuan a rawn ti nuah nuah a. Kei pawhin mawl ka in ti; ramhnuai ringawt khan ka rilru a luah a, a ṭhiante pawh an rawn hre ve dawn chuang tawp silo.






"A hla viau em, helai kawng aṭang hian?" tih pahin ka chawl dat a, ka thaw hle hle bawk. "Hla ve bawk ang chu...kan kalna kawng zawng zawng kha ngaihtuah la; Mahse, kan kalna lam ai chuan a thui lo deuh ang" a lo ti let thuai a. Kawng a chho in a chhe bawk si, Thosi te chu an tam khawp a; an thlawk ri mum mum ni mai hian ka hria.






Ṭawng pawh kan ṭawng ṭha peih tawh lo, thui fe chho zawng a kan kal ṭang ṭang hnuah chuan Current êng va va ka hmu thei ta; ka thaw huai mai. In awmna lam chu kan pan chho zui thuai a, an kawmthlang a chuktuah huan zau vak lo awmna bulah chuan Barrel a lo awm rân bawk. Ka tui a hal tawh bawk a, pan hnai thuai in tui a awm leh awm loh hriat tum in ka herh zui zat; vanneihthlak zetin a lo awm hlauh. A thianghlim em tih pawh ka ngaihtuah hman lo, ka in nghal khawlh khawlh a; ka tui in tawh a zawng ah a la tui ber hial in ka hria.






Rei pawh chawl lovin kan chho zui leh a, In mal din lam chu pan in a bula kawng laihchawp zau vak lo chhak a tlâng pâwng tê ah chuan kan ṭhu dun leh rân a. Mi veivak an awm zeuh zeuh avangin a biru thei ang ber in hnim buk lo ṭawi deuh laih phenah chuan Siamtea chu ka pawt lut nawk nawk a, ka la hlauthawng reng tho mai.





Ṭawng ri nak nak thawm ka hriat te chuan ka hawi leh ruai ṭhin a, ka chhungte ang turah ka ngai zo leh vek tawh.bA phone bih reng chungin Siamtea chuan "U Hriathlua a lo kal dawn, i chhungte khan an rawn zui leh lo aniang" a rawn ti zâwi sup a; lawm avangin ka au chhuak lo chauh a ni. Rei vak lo ngawi reng a kan ṭhut leh hnuah kan lam pan a Bike rawn tlan thawm kan hria a, kan tawmna hmun aṭang chuan kan chhuak zui ve nghal thuai a.






Kan awmna zawn kawngpui a Hriathlua rawn ding chat ka hmuh rual chuan ka tlan thla zui thuai a, a bul ka thlen rualin ka kuah chawt a. Bike aṭangin a la chhuk fel hman lo bawk nen rem lo zetin min lo kuah let ve a; in siamrem deuh in a âwmah min kuah bei hle hle a, ka sam ah a chul heuh heuh bawk.





"Engtinnge thu in neih? I va han rei em em ve? Kan ngaih a ṭha lo hman alawm" Siamtea chuan kan bula rawn din pahin a rawn ti nuah nuah a.





Hriathlua chuan "An lo in ko khawm a, ka thleng phei kha zawhna min lo zawt nghal zung zung a ni ber. Kan in chhâng ve deuh bawk a, ngawih chuh reng kha ka tum lo ve hrim hrim bawk" a ti deuh nghut a.





Min kuahna chu thlah dulin, "I nu te khan min rawn zui an tum a, 'In duh phawt chuan min zui rawh u' ka ti ve hmak bawk sia. A ṭhen in, 'zui a ngai lo' an ti bawk a, anmahni kha an in hnial buai rei lutuk a. Phone hman pawh a buaithlak, min en zui reng a; i lo hlau viau em ni?" tih pahin ka biang tawn tawnah a dawm a, min khawngaih hmel fe in min en vang vang a.





"Hlau e, ka ngaihtuah bawk che" ka ti sap a, a kiai sak a, "Min ring rawh, i hmaah ka ding zel ang" tih leh pahin ka biangah a rawn fawp zauh a. Kan bul lawk a ding, Siamtea chuan "Rual min ti awt, min rûkpui ve nghal law law dawn nge ni?" nuih huk huk pahin boruak dang a rawn siam ta vat a, kan nui ho ta dar dar a.





"In ril a ṭam tawh ang, haw dawn ang u. Bawihi, Siama te In ah hian riak nghal mai ang aw? Min lo nghak reng a nia" Hriathlua chuan ka ngaihdan hriat tumin min melh ngar bawk a. "Engmah hlauhthawnna tur a awm lo ania" a rawn tizui leh a. Ka hlauhthawnna chu bo vek lo mah se ka bula awm hi ka ring tawk a, a hma ang em chuan ka hlau tawh bik lo.





Bike ah chuan kan pathumin kan in phur a,ba laiah ṭhu in Hriathlua chu kuah in a hnungah ka hmai ka phum tlat a. A khat tawk a Siamtea'n ka nâk a min rawn kheuh leh zauh ṭhin chu za tiin ka khêk leh ṭhat ṭhin a. Kan tlu palh ang tih hlau in engtinmah ka ti let ve ngam bawk silo. A phone rawn ri chu a chhang ta hlauh a, a bialnu ni ngei tur a be zui mawlh mawlh a. Ka kuah mekna kut lehlam chu la in a hûm vang vang a, a fawp zui zauh a. Chu ringawt mai pawh chuan thlamuanna tam tak min pe thung si. A hma aia nghet a kuah in a hnungah chuan ka bei a, ka chhîng zui vang vang a.





In chhung kan luh rual a Nu Mami lo nui chiam chu hrethiam lo zetin ka melh ralh ralh a, min rawn ennawn leh in a nuih a za tawlh tawlh bawk si; mittui tla phunga a nuih hnu chuan "Nang ang rêng a ramhnuai ngaina ka la hre lo" tiin a nui leh chiam a. Kei pawh nui ve hak hak in "Ṭhiante In tih vel khan min thlamuan eih lo" ka ti ve thuai a, kan vai mai chuan kan nui dar dar hlawm a.






Chaw ei ah min lo la nghak ṭhap chu inthlahrun a na duh viau. Pa Dinpuia chuan Sangha rêp a siam thu a lo sawi siam siam a, ka in thlahrun an hlau hle tih hriat zetin fiamthu nen min be bawrh bawrh hlawm a. An chhungkua hi an in kawmngeih hlawm em em a, fiamthu thawh in an nui ho dar dar ṭhin. Siamtea nau te pahnih Chhuantea leh Felpuia pawh an fel in, Inchhung chet vel ah pawh a theih ang ang in a nu an pui a; hmeichhe tih tur ang chi pawh an khawih pui vek zel. Siamtea hian a chang a Zu han in ve zeuh a ching a, a nau te erawh meizial takngial pawh zu lo an ni thung.






Puar takin chaw ka ei a, ka harh sawng sawng mai. Thlengsil ka tum chu Felpuia'n a chuh tlat a, Siamtea'n min man bet in a pindan lamah min nem lut zui ta daih a; hmeichhe awm reng laia mipa zawkin thleng an sil tur chu nuam lo ka ti viau mai. Khumah chuan Hriathlua a lo mu zangthal duai a, meizial a zu khu hlat hlat bawk. Siamtea uang in pawnlamah kawngka a kalh zui daih bawk nen kan nui dun var var a. A lama min lo hûi rual chuan ka pan phei vat a. Khum a ka ṭhu chiah chu a âwm ah min pawt bei thlawp a. A kuhva ei rim leh a meizial zuk mek rim in pawlh chu rimtui ka ti tlat pek, ka hîp lut riai riai a.





"I chau em? I kal thui ropui sia" a ti dam dup a, ka ke kham ut ut chu ka hre zui nghal zat. "Ka ke a kham, kal lam kha chu a zia a; kan rawn haw na kawng kha a chho em alawm" ka ti let ve sap.





"Khawi, lo mu rawh. Ka lo kuah dam vek ang che" tiin a in siam rem sat sat a. A bulah chuan ka mu zui ve zat a, duat taka min kuahna avang chuan ka dam sawng sawng in ka hria.





"An lo thinrim nasa em? Engtin nge an lo tih che?" tiin ka zawt zui thuai a, a mit ah ka en kar bawk a.




"Thinrim ve e, a âwm rêng bawk a. I putea khan nangmah ang deuh hmu in a umzui hrep a, dawr pakhatah a va nangching a; i lo ni leh si lova, khângte khan a ti thinrim zual aniang. I nutei erawh ka chhâng ve deuh, a ṭawng hlawk em a; ka ngawi thei bik lo anih kha" tiin ka biang a piai zauh a.





"Engnge a sawi a?" ka lo ti thuai a, chu erawh a sawi ṭha duh der lo. "An tih tur an ti a ni mai, sawi zui a ngai tawh lo e; thlamuang takin awm tawh la aw?" tih pahin ka biangah a chûl a, a nui var var bawk a. Kei pawhin zawh zui zel ka tum bik lo, thu ngaihthlak nuam tak a awm dawn chuang lova; ka hriat ve loh khan ka hahdam phah zawk in ka ring.




"Engtinge i chhungte lam hi ni dawn? In boruak a la ṭha lo zel em ni?" ka ti leh sap a. Keini lam buai bawk nen; anni lam leh zel an lo buai chuan hma hun a thim riau in ka hria.





"A ṭha mai ang, chhungkua kan nia; buai chang te chu awm ve tur alawm, ngaihtuah hah suh" a lo ti liam puat a.





"Tlawm zawk nih hreh lo la, Nu leh Pa te laka hel tlat hi a ṭha lo ania. Kan mamawh ber tur an nih hi" ka ti leh hram a. Ka thusawi chu pawm hmel zetin a lu a lo bu ve nghat a.





Thildang sawiin a pakai zui ta daih a, chhungkaw lam thil chu sawi a duh vak lo tih ka hrethiam. Kawngka ri rak thawm ah chuan in siam ṭha in lehlam ka hawi zui ta daih a. Siamtea lo lut chu ka lo melh kar a, a jacket hâk chu hlip in zu bur a rawn lek lang va a, a nui sun sun bawk.





"Hahdam huai huaina" tih pahin khum mawngah chuan a rawn ṭhu a. Hriathlua chu muangchangin a tho zui ve bawk. "I pa te'n an hmu lo maw? A nuam miah lo ania" a ti sur sur a. Engkim an in hriatpui tih chu ka hrethiam mai.





"In in dawn em ni? A ṭul lo nasa ang" ka lo ti ram hmak a. "Ka ram vahna ka chau lutuk, chau tih rehna alawm" Siamtea chuan nuih suk pahin a lo ti ve leh nghal zat a, ani nen hian kan in hnial peih dawn riau in ka hria.





Hriathlua chuan inthlahrun hmel zetin "Bawihi, zanin chauh kan kan dawm dun ange. Rilru te pawh a thawveng deuh ang chu" min melh zuk pahin a lo chhunzawm ve zat bawk. Ṭul lo ti viau mah ila kan In lamah eng boruak nge a va tawn tih ka hre mang si lova, ka in thlahrung ve deuh bawk nen ka hnial ṭung duh ta lem lo.






Khum mawng lamah chuan an ṭhu dun a, zawi te te in an phun dun sep sep a. Chaw eikham phat aṭangin room ah ka tawmbo daih ta sia, ka in thlahrung deuh chu tho chhuak in ṭhutkhawmna lam ka pansan ta daih a. An zu in na bula lo awm ve reng kha nuam pawh ka ti lo. Nu Mami meizial lo zial mek bulah chuan ka ṭhu ve a, Pa Dinpuia'n sarangah a lo thun zel thung; Dawr a zawrh turin an pe kual ṭhin tih ka hrethiam nghal mai.





A zial lam ka thiam ve lem loh avangin ka lo pack pui ve thung a, kan pathum chuan kan titi siam siam hlawm a. Room lama tawm te pawh an tlei hle aniang, rei fe hnu ah pawh an rawn dik dak eih lo. Nu Mami chuan Siamtea pindan lama riak turin min ti a, keiin ṭhutthlengah pawh kan mut theih thu in ka lo hnial ve thuai bawk. Kan tihbuai tawh nak a lai a, a pindan la luah sak zui chu nuam lo ka ti takzet.






Hriathlua te thawm a reh rei em avangin ngaihven turin pindan lam ka pan a, an ṭhutna ngaiah an lo la bûr ngar ngar nia; Zu erawh an in tawh lo thung. Ka luh fel rualin a bân a lo phar chhuak vat a, ka pan hnai thuai a. Siamtea chu a lo bu deuh lâk lâk a, a mitmeng a phelh phung mai. Hriathlua erawh a rui chhe lem lo aniang, danglam em em âwm pawhin ka hmu lo.





"Siamte, i u te kha mu tawh rawh se; lo chhuak phei tawh rawh" Nu Mami chuan a rawn ti lâng lâng a. "A ngai lo, keimahni kan rawn riak ang" ka lo ti thuai a. "Mu mai mai teh u, a rûk chuan i mu chak fe zawk" Siamtea'n a lo ti buh nuaih a, a hnungzang a ben rik thlawp pahin
"Mi bula min rel nan i hmang reuh ange" ka lo ti ve zat a. Hriathlua lo nui kur kur lam chu hawiin "Tiraw Duata?" ka ti leh vat a, ani erawh chuan "Ṭhutthlengah mu rawh se, a mutna pawh a hrechiang chuang lo ang" a lo ti sam êt a; Siamtea kal zui chhat chhat chu ka en liam ta ringawt.






Puan sin tur siam ṭha in kan mu zui ta thuai a, zan a rei lam tawh bawk a, thâwm dîm takin kan mu rem sat sat a. In hmatawn a mu in kan in kuah chial a, Hriathlua pangtilum chuan min ur ham ham mai.




"Bawihi, engkim huam a min pan avangin ka lawm e. Rintlak in ka awm ang" a ti sup a, a mitah tak en chungin "Ka ring che" ka ti let ve nghal sap a. Ka biangah dim te a chul in a hmui in ka hmui a rawn si nghal chat a, duhthawh zetin min fawp nghal mial mial a. Kei pawhin uar zetin ka lo chhang let ve nghal thuai a.





A thawk dan danglamin mitmeng phelh phangin min en a, ka lo en let ve khiau bawk. A mitmeng a min mamawhna lang chiang zet chu ka hmuh hmaih lo nasa mai, tlanchhiatsan ka tum hauh lo bawk. Duhthawh lehzual a min fawp in a uar telh telh a, ka kawr hak lai chu chunglam ah hlim chho in a phelh zui nghal zat a; min khawih dan ang ang chuan ka lo in siamrem ve zel bawk a.






Thaw hawk hawk chunga "Ka hmangaih che" a ti ri chuan min fan raih raih thei nia. Ka chungah bawk zawi hnawk in nghet takin min kuah a; a hnungah ka lo chul sak ve hauh hauh reng a, "Hlimna tam tak min pe a, ka lawm e Bawihi; itan theihtawp ka chhuah zel ang" a ti thâm ṭuak a, ka sirah a let thla zawi hnawk a. Nghet zeta min kuahin "Muhil tawh rawh Bawihte.... Tui deuhin mu ang che" tih pahin ka hmuiah dîm te in min fawp zauh a, thlamuan hmel zetin a chhîng zui vang vang a. A hmel hmuh nuam zet chu en reng chungin "Muttui le" tiin ka tawlh rem sat sat a.








(to be continue.......)


Story kan chhiar paha ads kan click zeuh hian writer ten hlawh an lo nei ve zel a, kan writer te tan ads i lo click ve thin dawn nia


Show post links
Top

[Ngaia]

DEAR PAIN
Chapter -11



By: Brigida Hugo





Zing nichhuak kang at chuan ka hmai a rawn chhun a, ka meng siar siar a. Nghet taka min kuahtu chu en in a biangah ka fawp zauh a. Rûm ṭuah ṭuah chungin a thaw hawk a, zangthal zawngin a mu zui nghal zat a. A rawn meng ve mai dawn emaw ka tih nen tui takin a muhil zui leh nghal nia. Ka en reng a, nuih sak pahin, "Tui deuhin mu teh ka Duatpa" ka ti sap a.






Nu Mami'n Pa Dinpuia a au lawng lawng thawm ka hriat rual chuan ka tho chhuak vat a. Nu Mami chu polythene khai in pawnlam pan in hmanhmawh zetin a tlanchhuak hlawk hlawk a. Ṭhutthleng a Siamtea kawisawi zeta a lo mu chu en in ka nuih var var a, a puan te chuan chhuat lamah an tlaksan vek tawh. Bathroom lam pan zuiin ka in phihfai sawk sawk a, ka chhuak zui leh thuai a.





Nu Mami lo lut leh mek chu ka lo nuih var var a, a kawr haklai in a hmai a hru puat a "I pa Dinpuia haihawt lutuk hi chuan min ti hah thei ania" a rawn ti lut bawrh bawrh a. A hah tih hriat zetin a thaw deuh halh halh a.





"Zingkar karah khawnge a kal dawn?" ka lo ti ve vat a.




"Lung rem tur a hmu a, a hmanrua tuaihriam a tum anih kha. E taka Zothan, Hriathlua hi thawk ve se a ṭha lo maw? Siamtea pawh a thawk dawn alawm " min en hâ pah chuan a ti hluai a, a remchang dawn viau in ka hria.





"A pawi lo khawp ang chu, ka va hrilh chhin ange aw?" tih leh rang zeta pindan lam pan ka rual a, a lo la mutui nasa mai. "Hriathlu, harh teh" tih pahin ka sawi nawk nawk a, a rawn meng duar duar chu a mit ka lo keu zau sak pâwk a. "A nâ" tih ṭhat pahin a rawn ṭhu hluai a, ka lo nuih kar kar a.





"Pa Dinpuia'n lung a rem dawn a, thawk ve la? Pawisa in ven na tur kawl kan ngai ania" ka ti zui zat a.




A mit nuai sut sut pahin "Hnathawh thawmhnaw pawh ka kawl loh hi" a ti nghut a.




"A ho em mai, i haklai nen khan kal mai rawh. U Mama te In ah i hakthlak ka lo zuk la ange. A hrim hrimah engatinge hetah kan awm daih a?" tih pahin ka melh ngar a.




"Nu leh Pa ang tak tak a min ngaihtuah vang maw le. Eng thil pawh thleng sela an in nghahna tlak zawk" a lo ti nghut a. Nu leh Pa, unau thisen zawm te awm reng laia hmun hrana kan awm daih chu nuam lo tih rukna riau ka nei ṭhin. Mi min ngaihdan tur ka thlir a, an chhungkua chu an hmu zahawm lo dawn hle tih pawh ka hmu thiam em em bawk.





Chulam chu sawipui vak hun a ni lem lo tih ka hria. Ka tho a, nuih sak pahin a biangah ka chûl thuak a. "Aw le, lo tho chhuak la aw?" tih pahin ka kûn hniam a, a biangah ka fawp leh zauh a. Ka kut man tuma a bân a rawn phar chhuah mek lai chuan rang zetin ka tlanchhuah san zui daih a, a phun hluk ri chu ka hre hman tho.






Nu Mami nen eirawng bawl in kan che zui sawk sawk a. Ṭawng siam siam pahin a che zung zung a, a chang leh hmuhnawm ti takin ka lo en leh deuh deuh ṭhin. Siamtea zu in ṭhin chu a vei hle tih ka hria, a nau te an fel tehlul nen; ani tê hi a danglam bik tlat.






Pa Dinpuia rawn let leh chuan chaw ei kan lo peih diam tawh. Nu Mami chuan, "Siama pa, Hriathlua hi in hnathawhna ah inhlawh ve se a ṭha lo maw? Rem ka lo ruatpui teh ngawt a?" a lo ti siam siam a.





"A ṭha khawp ang chu, Siama nen lo kal sela, midang zawn buai a ngai lo a ni mai alawm" a lo ti sam êt a, ka thaw huai mai. Chaw ei kan siam zui thuai a, vengchhung a thawk tur an nih avangin ka ngaihtuah dan a nep deuh.






Chaw eikhamah rei vaklo ṭhu muangin kal turin an in zui chhuak thuai a, kawngpui thleng thlah tumin ka tho zui ve va a. Hriathlua bân a vuan in step ah chuan kan in zui chho a. Siamtea chuan nuih kur kur pahin "I lo ṭap mai mai ange. Tlai ah kan rawn haw leh dawn alawm" a rawn ti deuh kher a. Kan in chûm ri leh dawp ṭhin.





"Thawhdan tawk thiam la aw? A hahthlak deuh lai chu Siamtea hi tih tir zel la aw?" ka ti chu an nui dar dar a.




"Chhuk tawh rawh, Nu Mami kha i thiam ang angin i lo pui zel dawn nia" tih pahin ka sam a tuai zauh a, an kal zui nghal a. An liam thleng a ka thlir hnu in, In lam panin ka tlan thla hlawk hlawk a. Nu Mami huan tihfai tum chu puih ngei ka duh.





A puan lukhum khum mawlh mawlh pahin "Zothan, lo ti ve lo mai rawh. Ni a sa ropui si, chubakah i thiam ve lo ang" Nu Mami chuan a lo ti vat a. Ngai pawimawh lo zetin ka insiam ve mawlh mawlh a.





"A har awm lo em mai, kan pahnih in tidun ila kan zo vat dawn alawm. Khawnge ka hman ve tur?" tih pahin ka hawi that that a. Gas dahna hnuai chu hai rak rakin chemkawm hriam hmel zet mai a rawn lek chhuak va a, lo laksak zui thuai in huan lam panin ka chhuak zui nghal daih a. Huan kawngka chu pawt tawlh in dim te in ka pên lut a. Hnim ṭo lian vak lo chu a lo awm ve nual; a khawi ber nge thlai ṭiak ka hre ta hauh lo.






"Lo la thlo suh aw, Anṭam ṭiak te kha i lo paih tel ange" Nu Mami'n a rawn tih rual chiah chuan ka hma a lei chu ka lo rit tâwk hman a, leichhuah zauhin ka ding ngil nghal awt.





Rang zetin a rawn pên lut pâwk a, "Kha.... khangte kha Anṭam chu ania" a rawn ti chûl a, ka lei rih khawk chunga ṭo sep sep chu a rawn kawk kual nghal zat zat a. In thiamlo deuhin ka lo nui vak ringawt a. "Hei enchiang teh, Anṭam chu a hnah hi a kâk deuh hi" tih pahin hnai takah min entir nghal a.





"Thlo lo in pawt zawk mai rawh. A ṭha zawk ang ka ring" a tih leh rual chuan ka chemkawm ken lai chu ka thehsawn lawk a, ṭhu hniamin hnim chu ka pawt nghal zat zat a; ka bulah chuan rawn kûn hniam ve in a thlo zui ve malh malh a, min veng ru deuh ṭung tawh ni mai in ka hria.





"Zothan, i Nu leh Pa te hian an la rawn be miah lo che em ni?" tih pahin a hma zawn chu a thlo ri karh karh a.




"Min be duh lo ang, an thin a rim dawn em mai. Kei pawhin ka be ngam lo hrim hrim" ka lo ti let thuai a. Ka nu phei chu ka be ngam lo lehzual, min ankhum nasa dawn tih ka hria.





"Hriathlua te chhungkaw buai nuaih mai hi a pawi a nih hi. A tu te mah hi in phah hniam tum an awm bawk si lo. I chhungte chuan an ngaihtuah ru viau ang che" a ti leh barh barh a, chu chu keipawhin ka vei ruk em em a lo ni ve bawk. Keimah ngei chu an Inpui a han kal a, a Nu leh Pa te chu han biak mai te chu ka duh ut ut tawh. Mahse, thil tih chi niin ka hre chiah bawk silo. Eng engemaw sawiin kan ri dun ve barh barh a, Nî a sa ṭha bawk a, hnim te pawh an vuai sawn sawn mai.






Chawhma ṭha zet kan beih hnu chuan kan zo ta duak a, "Zothan, lo han haw chho la, lo han inbualfai rawh. Ka rawn chho ve nghal ang. I peih leh thingpui te kha lo lum la, thingpui in a hun tawh alawm" Nu Mami chuan a ti siam siam a. "Thlai chi tlem thlak belh leh hlek ka duh a, ka rawn chho thuai ang" a rawn tizui leh a. Ka thiam ve leh dawn chuang lo bawk a, hnial buai lo in ka chhoh san ta nge nge a.





Thingpui ka lum a, ka siam peih vek hnu in Bathroom lamah ka lut zui ta nghal a. Ka taksa sa huam huam, tui vawt raih a ka in leih chu ka dam sawng sawngin ka hria. Hriathlua te hnathawhna tur ka ngaihtuah a, ka khawngaih takzet. Nisa hnuaia nileng a hna a thawk tur chuan min ti hrehawm ṭûn thei.





Ka in bual zawh chuan Hriathlua thawmhnaw hakthlak tur la turin U Mama te In lam ka pan zui a. A hla lem lo bawk a, ka thleng thla thuai a. In chhung ka lut chiah chu Emily'n min lo pan vat a, ka malah a lo kuah nghal chûk chûk a. Nu Partei lo ṭhu ve reng ka hmuh rual chuan ka hawibuai ṭep a, ka in siamṭha nghal thuai a. "Nu" tih pahin ka pan nghal vat a.





"Awi, rawn ṭhu teh. Nangni pahnih khawsa ho lutuk hi in manganthlak em mai" a lo ti hluai a, "Engnge?" ti let hlar chungin ka nui hak hak a, a bulah chuan ka ṭhu zui nghal vat a.





"Engatinge in lo in rûk leh rik ngawt a? Thil a fel zawngin kan kalpui ang chu tih laiin a harsa leh khawlhkham zawng ringawt in inlo khawsa a" tih pahin ka hnungzâng ah min bêng thâwr a, ka lo ṭeu hlar thung. Kan inruk hmasak ṭuma inpawh taka thil kan sawidunna khan Nu Partei nena kan inkar boruak hi min pawt hnai sawt ni hian ka hria, nufa in pawh tak ang mai kan ni.





"Min dah bo an tum si alawm, tihngaihna dang awm hek lo" ka ti let ve thuai a. "Chupawh chu lo nise, chanchin min hrilh lah in tum hek lo. In lum lumin in lum mawl tawp a, hmundangah in awmzui daih lehnghal. A zahthlak teh ania" a ti hmarh hmarh a. U Maremi rawn ṭhu ve chu lo melh zauh in " Hriathlua'n In lama min rawn hruai a tum bik si lova, keimah chauha lo kal te chu ka zak va tho alawm. Ka pa a hlauhawm ropui si, tiraw U Marem?" tih pahin U Maremi chu mitko ka sân khum âk a.





"Aaa.... in mawl hrim hrim. Hetah rawn luh leh mai tur alawm. Hriathlua reng reng pawh Zawhte no nei ang mai, engnge a awm kual pui dûm che ni? In mawl em mai, in dam rei lo ang" U Maremi chu a nui zui uarh uarh a, ngei zetin ka lo melh râwm râwm thung a.





"Tak takin maw Nu, kan awmdan hi keipawh zahthlak ka ti. Hriathlua hi nangmah hian biak tum teh. Ka chhungte ngaihdan tur pawh hi dâwn tel a ngai ve tho a, hetiang mai mai chuan kan in sawirem har viau ang" thutak zawkin ka ti leh vat, sawi hun lai tak niin ka hria a, ka zaklo lui ve ngar ngar. Diktak chuan kan awmdan hi a hrehawm ru ngawih ngawih.






"A buaithlak a ni, an in chhûn pafa lutuk a. Mi in ang, ze in ang hi an inngeih thei lo. In pa chu khawnge a awm reng reng?" ka nu chuan a lo ti leh thuai a. "Pa Dinpuia hnathawk a zui a, lung an rem" tiin ka lo chhang vat a. Ka hmel chu enchiang ngat sela, ka pasal hnathawk a chhuak chu ka chhuang ru hle tih an hmuthiam ngei ang.





"A ṭhat chu, hna te hi thawk mawlh mawlh rawh se. Zu te a in em? Zu in ve tlak a ni miah lo ania" a tih leh lai chuan zan lama Hriathlua te zu in lai kha ka mitthla ah a rawn lang nghal zat a. Mahse, chulam chu ka sawilang duh ta lem lo thung. A theih anga ranga biak a tum thu a sawi a, rilru hah a awm lo turin min ti chah mawlh mawlh bawk a. A nu berin chutianga thu min thlah takah chuan tlem in ka awm a nuam deuh.






U Maremi chuan chaw ei ve nghal mai turin min sawm nasa viau a, Hriathlua hna a thawh daih avangin ka ṭang khawh tlat thung. An rawn bang ṭep tawh turah ka ngai a, an lo haw lai a In a lo awm ngei ka duh bawk. A thawmhnaw te chu enkual in tlem a zawng chu Bag ah ka thun a, "Ka han chho ange, an hnathawk an rawn haw dawn tawh ang. Nidangah min la sawm tho tak leh kan la rawn ei dawn nia" tih pahin ka nui sak a. U Maremi pawh a nui var var a, min thlah turin min zui chhuak nghal a.






Nu Mami pawh a lo in bualfai diam tawh a, thingpui a lo in mek. Rawngbawl nan a la hma deuh bawk a, hahchawlh pahin TV kan endun a. Hriathlua te lo haw hun tur ka zawt sek chu a nuih a za ṭhin viau, "Naupang, Nu leh Pa ngai rual lek ang mai, a lo haw em em ang" tih pahin a nui hak hak a. Dik tak chuan kan in rûk aṭangin nilenga in hmu lova kan awm vawikhatna a ni bawk a, ka ngai ru veng veng.






Dar thum pelh hretah eirawngbawl kan ṭan zui a, bai tui taka siam tumin ka in chhawp hnawk nasa hle. Nu Mami erawh a meizial zawrh tur buaipui in a bûr nghal chat a. Ei rawngbawl chu ka kuta dah turin ka ti thung, ka thiam leh theihna apianga ka âwl ve hian awm ve pawh a nuam deuh. Khua a lum bawk a, hnathawk ho inbualna tur tui lum a ngai lem lo turah ka ngai a, ka thil siam turah rilru ka pe thei lehzual deuh ang chu!






Ka bai chhuang zo chu ka ri chûl mai, ka rin ai in a hmel a mawi a; keimah ber chuan a tui viau turah ka ngai thla ngawt. Chawhmeh dang siam a ngai lem lo bawk a, Chaw ka chhuangkai sawk sawk a. Hriathlua hmuak turin kawngpui lam ka pan chho vat.






Kawng chhuah chhoh mai a mi bathlar ah chhuan ka lo nghak rân a, kawngkal vel te chuan min thlek leh hâ hâ ṭhin. Reife ka nghah hnuah Pa Dinpuia rawn kal phei hnak hnak chu ka hmu a, ka lo ding nghal vat a; Hriathlua te hmel erawh hmuh tur a awm lo. Ka bul a lo thlen rual chuan, "An la rawn haw ve dawn lo em ni?" ka lo ti vat a. "I nu nen kan in tawk a, biak lawk a duh thu a sawi a; an ding khawmuang lawk anih kha" a ti chu ka thaw huai mai. Ka Nu chuan theihtawp in a rilru hminsak a tum ngei ang tih ka ring. Hriathlua pawh in phah hniam ve se ka ti ngei mai.






Pa Dinpuia chuan min chhuksan zui thuai a, kei erawh ka dinna ngaiah ka la ding reng. An in biak dan ka hre chak lutuk chu ka phi cheng a ni ber, ka tei kual sek reng a. In her thut in kawngah chuan chak zetin ka pen chho zui hlawk hlawk a, thui erawh ka kal hman lo. Hriathlua leh Siamtea rawn in zui phei mek chu ka va hmu thuai a, ka lo ding leh rih a. An ni pawhin min rawn hmu ve thuaiin an rawn nui var var mai. An rawn hnai zel a, Hriathlua hmel chu chîk zetin ka lo en kal a. A hmelah lungawilohna hmuh tur a awm loh avangin ka thaw halh a, inhnial buai lovin an in be ṭha tih ka hrethiam mai. Lungawi lohna nei se zawng a mitmeng a thîp leh râm tawh ngei ang.




"I chau em?" ka bul an rawn thlen veleh ka lo ti thuai a, a thil khai lai chu ka laksak zui zat bawk a.





"Chau lo e, nang engnge i lo tih ve a?" min zawt let ve thuai a. Nu Mami nen huan kan thlawh fai thu chu phûr zetin ka hrilh nghal zung zung a. "I fel lutuk" a ti sup a, nuam ti zetin ka lo nui var var a.






"In tenawm, in innei bik leh lutuk" Siamtea chuan a lo ti hluk a, Siamtea chu runluih ka chak tlat. Hriathlua kal lai chu pawt ding datin a biangah ka fawp zeuh a, ani erawh a nui huk. Siamtea uak der vel chu ka nuih zui chiam a, ka nem kal zui dawt dawt a. Ani hi ngaihzawng a ngaihsak tehchiam lo in ka hria, a hmel a chhe hran lo; ngaihsak ve deuh sela chuan a hmu zo hle ang.






In kan thlen thlak ve meuh chuan khua a thim deuh ruai tawh a. Siamtea chu inbual turin Bathroom ah a lut zui vat a, Hriathlua erawh chaw eikham lamah in tihfai a tum thung; pawi ka ti lo khawp mai, ka ril a ṭam ru veng veng tawh. Chhuantea leh Felpuia an lo thleng zui ve bawk a, chawhmeh chhuang lum turin ka tho zui vat. Chawhmeh vil pahin Hriathlua phone chu ka khawih kual mai mai a, a Whatsapp messange ka en zui vat. 'Bawihtea Nu' tih zawnah chuan ka chawl dat a, a hma in ka hmu ngai lo; ka hawng zui vat.






Ka chhiar chhung zawng chu ka thaw em pawh ka hre lo. A nupui hlui in ngaihdam a rawn dilna chu a in tlar thla pût a, a chhanlet na erawh a tawi thei viau. Ka thai thla zel a, "Min ngaih ni chuan ka awmna i hriat kha" tih zawn ah chuan ka tawp leh dat. Hriathlua chhânna chu mak ka ti, chu ai mah a mak ka tih zawk chu an inbiak hun chu a ni. Nizan lama thil thleng a ni. Ka mut hlan in an lo in be fe tih ka hrethiam in ka hmu thiam mai. Mahse, engvang a paih lo a la dah nge anih erawh ka hrethiam hauh lo thung. Ka rilṭamna zawng zawng pawh a reh vek thei hial nia. Hriathlua, chhuat a ṭhu thluang duai chu ka en vang vang a; min bum ni a ka hriatna chuan min kher ngut ngut mai.





"Zothan, i chawhmeh chhuan kha" Nu Mami'n a rawn ti chûl a, hawi thuai in Gas lam chu ka pan thuai a, ka off zui vat a. Ka kut ka la lêt leh lam chuan Gas thuk bula thingpui in na No chu ka khak thla tel palh a, chhuatah a tla darh chuai mai. Ka mumal lo nuaih a, ka che te chu a phelh pheng phung mai.





Rang takin ka chharfai nghal sawk sawk a. "I kut a ât ange" tih pahin Hriathlua chuan min rawn pan hnai thuai a. Rum zetin ka lo melh a, hriatthiam loh hmel fê in a mit ko min sân khum âk a. Min ngaihtuahna ṭawngkam a hmang te chu lawm a hnêkin ka haw hlur tawh. Midang mitmei ven ngai lo sela, ka rilru a lang hmasa apiang chu au chhuahpui tâwn tâwn ka châk ber mai. No kehthem chu chhar zung zungin bawhhlawh bawm ah ka paih a, pawnah chuan ka ding vang vang a. Ka thinrimna in sûm ngai leh Hriathlua ka huatna in belhbawm chuan ka ṭah te a ti chhuak thei hial, in seh ruh vak in ka thaw hawk a; chaw ei siam thawm ka hriat zui tak avangin ka lut leh nghal thuai a.






Ka chaw ei tawh a zawng a ka eitui loh ber ṭum a la ni hial ang, ka khal kual vel mai mai a ni ber e. Midangte chu an titi bawrh bawrh a, a tuk leh lama an hna tur chungchang te an sawi luam a, kei erawh chu ka message chhiar tak ringawt kha ka rilru ah a awm thung. Rei pawh kîl lovin ka tho zui thuai a, ṭhutkhawmna lamah ka ṭhu ta daih a. Hun thawl neih a zawh fiah thuai chu ka châk et et mai.





"I va ei tlem ve Bawihi? I chaw ei a tui nange?" tih sup pahin Hriathlua chu ka bulah a rawn ṭhu ve a, engtinmah ka chhâg lo. Tukverh ah dak in ka melh ngai ka melh ngar a, thil hrang hrang ka ngaihtuah kual a, hun remchang awm se anni pahnih chu awmdun leh thei mai dinhmun ah an ding nia ka hriatna chuan min chhun na ngat ngat hle. Hriathlua chhan let na khan kei hi min paihbo mai a hreh miah lo niin ka hre bawk.





"I fapa nu nen chuan in in kar a ṭha leh ṭan a ni maw?" ngawih reng ka thei tawh lo, ka ṭawng ring ngam lo thung.




"Eng maw? Engnge i sawi awmzia?" min melh ngur a, engmah hre lo ang mai a min zawh let na chuan mi run hle bawk.




"Bawihtea Nu nena in inbiakna kha engvanga paih lo nge i nih? A hranpa a min chinfel kher ngai lo turin ka hmuh atan i dah hrim hrim a ni lo maw?" ka ti khûr dat dat a, ṭawngchhuah chintawk hriat loh hlau a ka in sûm nasa lutuk chu ka hah ngawih ngawih.





"Pindan ah lo kal teh" tih pahin ka bân a la lawk a, min kai nghal dawr dawr a. Nu Mami te chaw lo la kîl mek chuan mak tih hmel zetin min lo en ṭhap hlawm a, Hriathlua lahin hrelo ang hmakin pindan kawngka a hawng rawk a; a theh in min theh lut nghal nawk a.





"Ani nen chuan min ringhlel deuh tihna a ni maw?" tih nghut pahin min melh khur a. A mitmeng chu min dinriamna in a khat ni mai hian ka hria, ngei zet in ka melh kar a, rinhlelh leh vak ngai lo in a lang chiang reng in ka hria.





"Rinhlelh kher in ngai em ni? A lang vek alawm. Ka hriat loh hlanin engtianga tam nge in inbiak tih pawh ka hriat loh hi" ka ti let ve ṭhawt a. Kan boruak âwm ang tur a lang vek tawh tho a; ka in sûm buai peih tawh lo. Kan nih ang ang nih mai duhna in ka khat bawk.






"I hriat ve loh tur thil nise ka paih ang chu, i hmuh hlau ni ila ka paih nghal ang chu" a rawn ti vîn hrâwk a. A thinrim zawk ah a la ṭang zui nia.




"I chhan let dan khan awmze thui tak a nei, lo kir leh duh nise i hnar dawn lo tih a chiang reng. Khatiang boruak nei reng chung khan engvangin nge kei hi i nunah min seng luh tel ve kher?" ka ti ta hmawk hmawk a. Ka sawi zawh rual chiahin ka biang a ri thlawp. Hriathlua'n min beng, chu pawh a nupui hlui nena an inbiak vang in; Min benna chu ka thinlung na lutuk lakah chuan na nep tak a ni zawk.






Kawngka a rawn ri dat dat a, Nu Mami chuan "Rawn hawng teh u, engthil nge ni chiam chiam? Hriathlu, rawn hawng vat teh" a rawn ti chûl a, Hriathlua chuan min melh râm râm pahin kawngka lam a pan a, a hawng zui nghal a.





"Eng thil nge ni, in rik pui hluai a?" tih pahin min rawn pan hnai a, ka mittui khap per sak sak pahin ka ding ngawi reng a, ka ṭawng chuan ka ṭah ka hlau. Ṭap lo turin ka hmui chu ka pet fan fan bawk a. Ka diklohna ni miah lo a kutthlak ka ni chuan min ti na nawih ngawih, hmeichhe der dep tak anga mittui luan tir erawh ka tum miah lo thung.






"Bawihtea Nu nen min ringhlel anih kha, mai mai hian" tih pahin a chhuak vut a, Pa Dinpuia ṭawng thawm ka hria; chumi rual chiah a kawngkapui in khar ri dawp chu ka hre zawm zat. Khumah ka ṭhu thla hnawk a, a thiamlo zawk ang hrim a min chhuah avang chuan ka na ngawih ngawih.





"Zothan, han sawifiah teh. I biang chu a va sen nasa ṭel ṭul ve, kut a thlak che em ni?" tih pahin Nu Mami chu ka bulah a rawn ṭhu ve nghal vat a. Ka lo kuah thlawp a, ṭah vak ka chak ngei mai. "Whatsapp-a a nupui hlui nen an inbiak na ka chhiar a. Lawk aw, nangma'n chhiar ve zawk rawh, i hrefiah zawk ang" tih pahin ka tho thuai a. Hriathlua phone chu ka va zawng kual nghal vat a, vanneithlak takin a lo keng lo hlauh.






Nu Mami'n a chhiar zo chu a thaw hak a, "Rinrina nu reng reng pawh chu tun a taka ngaihdam a rawn dil thar chiam ni. Hriathlua chhan let dan hi a ṭul miah lo bawk. Lo mut hahdam san daih rawh, a lo haw pawhin lo ngawi reng la; i Pa Dinpuia nen kan lo zilh ange" tih pahin Phone chu min pe a, ka hnungah a chul hauh hauh a, min chhuahsan zui ta thuai a. Nu Mami chhuak chu ka lawm ru viau, keimah a awm ka chak ber.






Khumah ka bawk thlawp a, ka biang chhah deuh mup chu ka kutin ka dawm vang vang a. Mahni in khawngaihna in min rawn tuam a, ka mittui a dir nghal zung zung a. Ka lo rindan chuan ka zawhna kha ṭha takin a chhang anga, ka lungawi loh rûkna te pawh tih reh tumin min thlem ve turah ka ngai. Kei ai maha a thinrim kha engnge a awmzia pawh ka hrethiam nek love. 'A nupui hlui vangin kut min thlak' tih chu ka hre nawn awn awn mai. Tlawm ka in ti a, ka zak a, ka na vawng vawng bawk.







Ka lu a na ngut ngut a, ka awm a nuam lo ru ser ser bawk. Chhunlam ah nisa ka do ve bawk nen, zanlam boruak chhia in a chhunzawm bawk; khumah chuan ka mu rem sat sat a. Hriathlua chu khawi lamah nge a thangbo tak pawh ka hre lo. Sai sir zawnga mu in a hmawr thei ang berah ka mu a, Hriathlua si phak a mut ka tum lo hrim hrim. Nu Mami te nupa chu an la titi dun bal bal a, Hriathlua chungchang an sawi ni ngeiah ka ngai. Ka mit chu chhing zui hmakin ka ngaihtuahna luah ngut ngut tu thil chu thai bo tumin thil hlimawm lam ka ngaihtuah ngar ngar a. Mahse, ka hlawhchham chiang hle thung.







"I nupui hlui ania, khatianga in inbiakna hmuh tawh hnuah tunge thinrim lo ang ni? A hrim hrimin nangmah vanga Zothani dinhmun inthlak nasat zia hi ngaihtuah rawh. Mahni In ah duh ang tawk a nuamsa in a awm ve thei, nang a hmangaih vang che a hetiang dinhmun a ding anih hi. In pui takngial pawh luhpui hlei thei lo in i khawsa a, i kalna apiangah a zui che. Hmeichhe tam tak nise hetiang in an nei duh teuh lo mai che. I chapo lutuk te hi in hnukhniam ve la, nun pangngai a nun hi tum ve rawh" tia Nu Mami ṭawng bawrh bawrh thawm chuan min ti harh a. Sana ka en chuan Dar khat a lo pel duai tawh. Ka mu kha ka lo muhil zui daih a nih hmel. Tho duh lo in ka mut hmun ah an thawm chu ka ngaithla kar a, Hriathlua phun bul bul thawm pawh ka hria, a sawi erawh ka hre thei lo thung.






"Zu te i in a, ṭangkaina a awm miah lo. I nun hi i siam fe anih loh chuan ila tla hniam tawlh tawlh dawn ania. In bual la, mu rawh. Thinrim tawh reng reng suh, a thiam lo zawk nih laia kut i thlak te kha i zak chai lo em ni? Khatiang kha ching tam suh ang che" Nu Mami chuan a ti leh hmawk hmawk a. Ke pen thawm awm zuiin Bathroom kawngka a ri zui rak a.






Pindan a rawn luh rual chuan ka chhing zui vat a, ka be chak hlawl lo. Khumah a rawn ṭhu a, a reh deuh vang vang hnuah a rawn mu zui a. Ka lama rawn tawlh hnaiin a reh leh vung vung a, hnai zetah min en tih hriat takin a thaw lum ham ham pawh ka hre thei. A zu in rim nam leh hak ṭhin chuan ka luak te a ti chhuak, chaw ka ei ṭha lo bawk nen; ka pum ruak lai tak ablo ni bawk si. Ka uak tuarh loh nan ka in hûm ruh ngar ngar a, ka men chuan kan in hau leh ang tih ka hlau bawk si.






A zangthal zui hnawk a, a 'Aw' a thian kharh kharh a. A ri rak rak a, meizial a ṭan ri zui khauh a. Chumi rual chuan phone a ri riai riai a, kan lukham in karah chuan dahin a ti zâwi hret a.
'Di hlui' tih hla min ngaihthlak pui ngat a nih chu! Ka ngaihthlak ve fo ṭhin ni mah se tun dinhmun ah chuan ka ngaihthlak chak loh ber a ni thung.






Ka rilru thlamuang lo zet chu tihreh huai dan awm se ka ti, a nupui hlui nen ka in khaikhin a. A fa neihna anih bakah rei tak nupa niin an lo khawsa dun tawh a, amah ah chuan a buk rit zawk ngei in ka ring. Kei ve thung erawh ka chhungte ka ti lungawi lova, vengchhung ah ka chanchin sawi neih neuh a ni ngei bawk ang. Chutiang zawng zawng huam a harsa tak chunga ka pan hian eng kawng nge min zawh pui dawn le?






A chhungkaw kehdarh hnu remkhawm tumin rilru a siam mek ang nge? Chhungkaw thar din turin hmalam kan pan dun zel dawn? A hla ngaihthlak lai chuan 'a hun liam tawh thlah liam pui se' tiin rilru na tak chungin duhthu ka lo sam kual ve reng bawk a.








(to be continue.......)


Show post links
Top

[Ngaia]

DEAR PAIN
Chapter- 12




By: Brigida Hugo






Hnathawk ho eitur in Maida ka hmet a, ka nu in a lo nuai ve mek bawk. Ka bul maia Rinrina lo in khawih paw ve nuaih chu en in ka nuih var var a, ka rin aiin min ngaina a; ka kalna apiangah min zui kawi deuh reng a. "Â Nu" min tih hmasak ber ni khan eih mai nachang hre lovin ka hawi â deuh hû a, min koh duh pawh ka rin loh laia min ko ta mai si khan min tih hlim em em laiin min ti zâm em em bawk. Naupang enkawl harsa a ni lo bawk a, kan in hrawn thei viau dawn in ka hria.






Hriathlua nen kan boruak a fuh vak loh tukah khan Hriathlua nu a rawn kal a, In lama haw turin min rawn ti a. Pa Dinpuia te nupa nen ṭangrualin Hriathlua rilru an hmin thei hram a. Ka huphurh ang aiin eng boruak ṭha lo mah a thleng zui ta lo hlauh a. Ka pa pawh in a theihtawp in min duat ve niin ka hria. In sa lai an nih avangin kan buai mawp mawp reng a, Hriathlua pawhin hna dang a thawk hman meuh lo. A nupui hlui nen an inbiak chhunzawm lova, nasa takin ngaihdam min dil bawk nen kei pawhin ka ngaidam a. A nunhlui avanga ka kawng zawh lai mek tawp san chu ka tum bik ther tê lo mai.






"Mambawih, tuiin tur kha min lo lak lawk ta che" ti a Ka pa in min rawn kohna chu chhanglet thuaiin tui vawt nen ka tlanchuak zui thuai a, ni a sa ṭhin bawk nen; tui vawt a hek par par ṭhin hle. Hriathlua'n ban tur cement a chhung mek a, ngun zetin ka thlek dauh dauh.
"I thiam ve dawn em ni?" Ti a ka zawh khan ner sak in, " Naktukah i hmu dawn lawm" tiin min chhang ringawt kha ania; a tihdan vel ah chuan a ti fo ṭhin tih ka hre mai. Ka rin ai in thiam a lo ngah phian.






"I va en uluk ve, i ring vak nange?" tih pahin hnathawk zinga pakhat, Hriathlua cousin U Hmaa chuan ka dár a rawn bêng thak thak a. Hriathlua chuan nuih suk pahin min rawn melh ve chiah a. "Ring e, a thiam em a; a hmuhnawm alawm" nuih sen sen pahin ka lo chhang thuai a. Kawng engkimah ka rin zia ka tihlan hian ani pawhin a aia ṭha zawk a tih duhna rilru a neih phah ka beisei tlat ṭhin. Hriathlua pawh ka laka lungawi hmel zetin a nui vur vur a, min rawn melh zawk chhung pawh chu ka tan chuan hun nuam tak a ni.





In chhung ka luh leh rual chuan hmeichhe pahnih leh ka nu lo titi bawrh bawrh chu ka melh nghal vat a. Tu te nge an nih ka hriat loh avangin ngawi rengin tui dah vawh tur ka thun zui nghal a, ka hmehriat ngai loh te bula ka zum dûk ṭhin hi sim ka duh ṭhin viau na a, mi han biak hmasak mai te hi ka harsat reng tho. Anmahni in min be tlangnêl a nih erawh chuan a ṭawng tam berah ka ṭang leh hlauh zel thung. Min nel tawh thung erawh chuan ka bula awm nuam an ti em em thung ṭhin.





"Mami, hei i û te an nih hi. Hei hi I u Hmaa nupui Amuani a nia, hei hi I u Lâna nupui Siamtei. An pahnih hian unau an ni bawk a" ka nu chuan min rawn hmelhriat tir ta thuai a. Ka lo nui ve var var; han biak zawm nghal mai ngaihna ka hre lem lo.





Amuani chu a upa zawk a ni a, an la upa em em bik lo nangin kei ai chuan an u fe tho ang. Mi biak tlangnel dan an thiam bawk a, chawhnu lam a nih meuh chuan fiamthu thawh in kan nui ho dar dar thei tawh. Hmelhriat thar ka nei chu ka lawm hle, han kawm mai tur ka hriat ṭhin loh avangin ka khua a har ru ve viau ṭhin. Tunah chuan hunâwl neih changa han lên luh mai na tur pawh ka nei ve ta ah ka ngai a, ka lawm ru takzet.






Hriathlua rawn lut mek chu en pahin Amuani chuan "Engtin nge sawtiang chhe lutuk te i neih duh le? A hmel te saw en teh, Chhimbuk sakham lo a ang si" tih pahin a ner deuh nâng nâng a, a nui duh miah lo leh nghal. A fiamthu tih hre tho mahila a nui bawk si lova, keimah ber chuan nuam lo ti ru zetin ka melh tawn ralh ralh a.





Hriathlua chuan nûr deuh nâng chungin, "Lalmuanzual, iak iak suh. Ka luck vanglai a ka thlan anih kha, a vannei teh asin" a rawn ti ta kher a, kei ka lo ner ve leh nâng thung.






"Awi...awi, i zak lo. I vau beh ṭhin vangin an duh lo ngam lo mai mai che anih kha. Zothan, a vau ve che em?" Siamtei chuan nui hak hak chungin a lo ti zui ve thuai a, kan nui zui dar dar a. A rawn ṭawngchhuak hnuhnung apiang chu enkual in ka lo nui tlawrh tlawrh a, Hriathlua nen kan in rûk aṭanga ka nuih nasat ber ṭum a la ni hial ang.





"Ngawi mai mai teh u, thingpui hâng kha lo thli leh rawh u. In hman lutuk, awm ngaihna in hre lo anih kha" tih hmuk pahin Hriathlua chuan perek bawm chu a chawi chhuak zui vut a. Rang takin ka tho zui thuai a, thingpui ka chhuang zui nghal zat a. Pasal te hnathawk thingpui han pek vel te chu nuam ka ti riau.






Hnathawk an ban thlengin Amuani leh Siamtei pawh chu an awm ve a. Thil tih tur ṭul apiangah min pui zung zung bawk a. Kan awm ve hma pawhin ka nu puitu ber an lo ni fo tawh a ni awm a, an fel ka ti ngei mai. "Chaw chu ei ve nghal ang che u. Chawhmeh lam erawh kan nei ropui viau lo nachungin" ka ti thuai thuai a. Chaw ei ve nghal tura kan sawm na erawh an hnial fithla ṭhak thung. Siamtei te hian fa pahnih an nei tawh a; In lamah an awm a. Amuani te erawh naupai lamah harsatna an nei a ni awm e, an in enkawl nasat thu te min hrilh a; pai ve thuai se ka lo ti ve hle.






Step tawp thleng in ka thlah a, "Naktukah chuan rawn kal leh ngei ngei ang che u. In rawn kal lo ang tih ka hlauh zia hi... Nilenga mahni rilru kawm ngawt ai chuan...." tih pahin an pahnih chuan ka melh ralh ralh a.





"Min chhawr nasa thei em mai" tih pahin an nui dun bâwk bâwk a. Engpawh sawi ila, fiamthu nen min chhang pawlh nuaih nghal zel a. An bula awm a nuam in an rilru a zau a, ka ngainat zawng tak an ni.





Rinrina rawn tlan chho ve mek chu "Khawnge i kal dawn? A tlai tawh asin" ka lo ti vat a. A motor lem hi a pawm reng mai a; a ngaina ber aniang chu!





"Dawrah ka kal dawn, Lollipop ka lei dawn a" ti chungin kal leh mai a tum a, ka lo pawt ding thuai a.





"Ka kalpui ang che, motor in an su palh ang che" tih thuai pahin ka kai ṭha vat a. Kal pahin a zuang lauh lauh a. "Ânu, ka lei ve ang che aw? Hei pawisa ka ngah lutuk" tih pahin Rs.20 hi a rawn lekchhuak vâ a, ka lo nui hak hak a. Mi han enhranna hi a nei lem lova, a theihna apiangah min duhsak ve em em zel. Kei pawhin ka thinlung takin ka ngaina.






A duh zawng a thlang zat zat a, a pawisa ken ai tam a kawk kual. A thlan sa ho ah chuan a duhzual ka thlan tir leh a, kan haw zui ta vat a. In chhung kan luh rual in Hriathlua chuan "Bawihi, inbual nghal ka duh a nia" a lo ti vat a.






Tui lum ka chhuan sa chu Bathroom lamah ka suan phei thuai a, khua a lum viau pawh hian tui vawt a hmang duh der lo. Tui lum siam sak in a Towel hman tur ka chhawp sak a, a thawmhnaw hak tur ka dah chhuah sak leh a, "A inbual theih aw?" ka ti vat a. An hnathawhna hmun hnawk ka tifai leh nghal zung zung a. Ka nu chawhmeh siam rimtui zet chuan ka hnar a verh zar mai, eng eng emaw hi a chawhpawlh a, a tui phian zel.






Chaw ei kan siam laiin ka bulah Hriathlua a rawn tei sek a, "Engnge?" tih pahin ka melh râm râm a. "Min ngai hma viau zel suh" ka ti chu a nui suk a.





"Ka lo endik che" a ti ringawt a, ka hmui ka tih pawrh khum târh a, "E, Hriathlu..... Midang bulah chuan sawi chuang lo la, Alu in hmeh ve ngai lo em ni?" a bâna vuan ṭai chungin a beng bulah ka ti sar sar a, ka nu te'n an hriat ka hlau.





"Hmeh ve ṭhin tho e, a tui lem lo e. I ei chak em ni?" a lo ti let thuai a. "Aw, ka chawhmeh duh ber a nia, ka ei lohna a rei tawh. Ka chiri dawn" tih pahin ka kut ka ti khûr der chiam a. Min nuih suk pahin ka chal dârah mi nem dâk awrh a.





"Ka nu, Alu lei kan ngai. Hei, i fanu Alu ngena a ṭah loh chauh tawh hi" tih lûng lûng pahin kalsawn a tum a. "Awiii..." tih pahin a hnungah ka chûm nghal zawt zawt a. Ka nu leh pa, vawiin lama an ban phun endik a chhuak chu rawn lutin an rawn nui ṭhâ a. Ka nu chuan, "Ava zialo ve aw? Lei nachang kan lo hre ṭhin lo alawm maw le" an rawn ti sawk sawk a. Hriathlua zet zawt vang vek.






Kan chaw ei chhung zawng chu hna hmabak thawh dan tur rel nan an hmang a ni ber a. Ka hrethiam ve lem lo bawk a; ka lo ngaithla kar reng a. Hlawhfa hi pahnih chauh an la a, U Hmaa leh U Lâna chiah an chhawr. Hriathlua leh ka pa in an khawih thiam vek tho avangin midang han lak belh pawh chu 'a sum hek thlak mai mai' an ti fo mai. An chhungkua ah sawrkar hnathawk an awm lem lova, anmahni thawhchhuah liau liau a chutiang In an din thei chu ka ngaisang viau bawk.






Thleng ka sil laiin ka bulah Rinrina'n min vil ran a, eng emaw tih pui atan min duh tih ka hrethiam mai. Ka sil zawh rualin ka bân ah a rawn vuan chat a, Inchung lamah min pawt chho a, a pa a ko tel ve zat bawk. Computer hmaah chuan ṭhu tharh in "Games khel ang u" a ti heu mai, eng Games mah ka khel thiam reng reng lo.





Apa nen chuan a sir ve ve ah min ṭhut tir a, in ti thiam zetin a khawih kual nghal zung zung a. "I Games khelh tum chu, kawlphe kan en ani ringawt alawm" Hriathlua chuan a lo ti nghut a, a nâkah ka va sik hlawk a. A eu zuk a, min melh rulh pahin "Engnge?" a rawn ti nghut a.





Rum zeta melh pahin "Lo ngawi mai mai rawh, a thiam a show ve a ni mai alawm" ka ti hlar a.




"A ho em mai" a ti leh hluk chu ka ngaihven zui tawh lem lo. Rei fe kan ṭhu a, mawng a kham duh ngat ngat kher mai. Rinrina chu a hâm ta bai bai a. "Bawihte, mu tawh rawh. I mut a chhuak tawh anih kha" a pa in a tihrual chuan thuawih takin a tho nghal nalh a. Mu turin a pi te bul a pan zui nghal a. Kan bulah a riak ngai lem lova, a pi tel lova awm hi a harsat viau bawk. A pi hi enkawl seilian tu ber kha a ni bawk a, a âwm viau mai.






Mu turin khum lam kan pan zui ve nghal a, khuma ka lawn ve rualin "Ka kâwng a kham e, min lo hmeh sak teh a" a ti nghut a, a bawk rem nghal sut sut a. A kâwng leh a chawn vel te chu ka hmet kual dan dan a, ka bân tha ṭha lo lutuk hian ka tha pek a ti nêp ṭhin. A lukham bula a phone dah chu a rawn nghawr dar dar a, a en nghal thuai a, keipawhin ka lo melh rang kher mai. Ka thil va hmuh chuan ka tha pek mek chu a titawp chiang viau bawk. 'Bawihtea Nu'





"Engnge?" a ti chhum hmuk a, ka lo ngawi rân thung. Loud Speaker ah a dah zui zat a, ka awm ve avangin min hmaizah niin ka hria.




"Bawihtea ka ngai lutuk a, a biak theih em?" a rawn ti dam dap thung.




"A mu tawh, chubakah rawn biak sek pawh a ngai lo. I pasal te pawh kha zah ve rawh, min rawn call sek suh" a ti chang leh fawk a, ka lo îp deuh.





A hmaa an lo inbiak ṭhin dan ka hre lem lova, kei nena kan chanchin pawh a nupui hlui chuan a hre ve tawh ngei chuan ka ring. Ka fuihpawrh ah a ngai ang tih te ka lo hlau ru thar viau bawk. A rawn ṭawng leh lai tak chuan a hmet tawp hmak a, lukham hnuaiah a phone chu a rawlh lut zui nghal daih a.






"Khati teh bawl a chhan a ngai kher hlei nem, ṭha deuhin a sawi theih reng a" ka lo ti vat a.




"A ho em mai, zankhat pawh riahpui peih lo khan a rawn ngaih thar tak hluai nachhan tur ka hre lo" tiin a zangthal zui a, a bân min kham tirin min kuah zui hlu hlu a.




"Ani nena kan tawp dan chu ka hrilh nual tawh che kha. Bawihtea hi ka nu hian a hnute a hnek tir leh a, anni pahnih pawh an in hmuh loh deuh hlek chuan an in zawn chung zel hi. Ka nu hian a hahpui asin. Zan ṭah a vei lai phei kha chuan kan buai nasa ṭhin, kan in awi ngat ngat zel. A lo leikang ve zel a, Anganwadi kal thei rual a lo ni ve a. Mi fate an nu te'n an kalpui a, an ṭhutpui laiin keini chu kan pafa in kan kal ve a, nu ho zingah khan ka ṭhu ve kuk zel, ka zak lem lo. Mahse, Bawihtea hi ka lainat ṭhin. Zankhat a nu te lo zin lai hian a pu te Inah riak turin an la phei ve a, a mu duh ta reng reng lo a. An mangang in min rawn phone a, kan va hruai haw leh ringawt alawm. A nu hi a sawi ngai lem lo, chuvangin in hmuh tir sek pawh ṭul ka ti hek lo. Tunah nang i awm tawh a, nangmah ah hian a rilru hi bet thlap se ka duh ber. I hrin loh a nihna lai ah harsa tih chang i ngah dawn a, chutih hunah pawh min dawhsak hram hram la ka duh khawp mai. I bulah ka ding reng dawn bawk a, theihtawp min chhuahpui ang che aw?" a ti zui dap dap a. An pafa a Wadi an kal ve tur ringawt chu lo mitthla in, ka khawngaih lutuk avangin ka mittui a lo tling leh hmanhmawh tawh bawk.






"Naupang han tih vel hi ka thiam teh chiam lo, han chhawnchhaih te hi ka thiam loh zawng tak mai ania. Mahse, a enkawlna kawngah chuan theihtawp ka chhuah ngei ang" ka lo ti let ve sap a. Lungawi hmel zet in min en a, "Ka lawm e" a ti sup a.





Ka biangah dim te in a chul a, ka lo maimitchhing diar diar a. A hmui in ka hmui a rawn tawh rualin nget zetin min kuah a, dam dap a min fawhna chu duhthawh takin a rawn thlak nghal zat bawk.






Duhthawh tak a ka lo chhân let na chuan a ti rûm hawk mai, nuih sak in a hmuiah ka seh zeuh a; a thaw hawk. Tho kâng in ka chungah a rawn bawk nghal zat a, ka hnute a rawn ṭham zui nawk nawk a; a dim viau lo bawk nen a na lek lek. Ka kawr chu hlip sawk sawkin khum mawng lamah a vawm thla zui nawk a, ka kekawr hak lai leh ka panty chu dim lo zetin a phelh nghal nawk nawk bawk a. Amah a in phelh ve lai te chuan a khûr dar dar thei hial.






Min fawp reng chungin ka malpui chu a kuai kak ṭhem ṭhem a, dimna tel miah lo in a mipatna chu a rawn thun lut pawp mai. A na ka tih avangin ka ṭe deuh ṭhat a, a ngai pawimawh lem lo. A chet dan ngai a chet zawm mawlh mawlh in rei vak lo ah a rawn bawk zawi hnawk a, a thaw hawk hawk bawk. Ka tai bawr na ṭhum avang chuan ka che châng peih dêr lo. Nupa nunah hian Hriathlua hian min ngaichang ngai lem lo, a duhdan in a che a; keiin a nawmna hre miah lo in ka lo dawh mawl ve tawp thung. Thil nih dan han hrilh dawn in ka in thlahrung ve tum hrang a. Mahse, ṭha taka sawipui a ngai dawn in ka hria.






"Muhil tawh ang aw?" ti sup in ka sirah chuan a let thla zui a, ka lam rawn hawiin min kuah a; chhing zui zatin a thaw nghal sâk sâk a. Mutchhuak in min zem chiai chiai a, ka thawmhnaw te chu khawnge a vawm darh pawh ka hre lo. Ka taksa na deuh ṭhûm avang chuan chet vel ka peih lo zo tawh bawk nen ka awmdan ang ang chuan muthilh tumin puan ka sin ṭha sat sat a.







A tukah pawh In sakna lamah kan buai leh viau mai. Amuani leh Siamtei chaw eikham ah an lo lang ve leh nghal thuai a. Ka nu in tih tur a lo hrilh kual nghal zung zung a. Ka tâi na reh thei mai lo chuan ka awm a ti nuam lo ru viau a, ding chungin ka dawm leh vang vang ṭhin. Ka nu hmunphiat mawlh mawlh lai chu rawn ding dat in "I nuam sam nange, i awm a va nawm loh hmel ve?" a rawn ti ta chat a. Ka awmdan nuam lo chu ka lo ti lang mah mah anih ka ring a, ka in thlahrung takzet.






"Ka tâi a na deuh mai mai, ka period dawn aniang" ka lo ti thuai a.




"I na ve ṭhin a ni maw? A hrehawm teh mai asin. Kha, hmun hi lo phiah chhunzawm la, dawrah Rasgulla ka zu lei ange" tih pahin hmunphiah chu ka kutah a rawn hmer bei zui zat a. "A ngai lo, a reh leh mai ang" ka tih lai chuan a chhuak zui nghal a.





"Khawnge thingpui fe hi a awm a? Ka nutei hi a thil dahna hi a sawn reng mai" Amuani chuan a ti hlak hlak a, chhuar vel chu a hâi pah rawk rawk bawk a. Ka pan hnai phei thuai a, ka va zawnpui ve vat bawk a, kan hmu zo hauh lo leh nghal a.





"Dawrah a kal a, a lo lêt vat ang, tikhan lo chhuang tawp mai rawh" tih sawk sawk pahin ka hmunphiah khawm chu ka rût zui thuai thuai a. Rinrina chu Balu chhûm vûm ah cheng in, a nuam ti chu a ṭe teng tung bawk a. Ka bih zawk a, hmun hlauhawm lamah a awm lo tih ka hriat rual chuan ka kalsawn leh thuai a.





Hnathawk ho bula Siamtei nui khek leh iar iar ṭhin chu Amuani chuan, "Hey, nang nu kha...rawn kal teh. Thil tih tur a tam lutuk, khalai hmun kha i awmna tur a ni lo" a ti tuarh tuarh a. Siamtei rawn lut mek chu Amuani bawk chuan "In pa te hna i ti sawt lo, lo va khêk uarh uarh ziah suh" a lo ti nghal hlak hlak a, ka lo nui var var a.





"Awwww.... chawhphur te pawh an ngai ve alawm. An bula ka lo nuih vel hian an hna a chak sawt zel" Siamtei lah chuan a rawn ti zung zung a. Amuani ner nâng chu en in ka nui chhuak hawk a. An unau mize in ang lo lutuk hian ka nuih an ti za ṭhin. Amuani hi mi chekngel leh thil duh uluk mi anih laiin Siamtei erawh che pawlawh ve tak a ni thung. An in khak fo reng ṭhin na pawh hi an mize in ang lo lutuk hi a ni ṭhin.






Ka nu rawn lut mek chu kan lo en ṭhap a, Alu tam fe a rawn khai tel bawk. "Chaw ei kan siam dawn em ni? Alu i va lei hnem ve?" Siamtei chuan a lo ti thuai a.






Ka nu lah chuan nuih ruh ruh pahin "Zothani hi Alu hmeh chakin a ṭap lo chauh tawh a. Hei hi ring tluk tluk mai rawh se" a rawn ti bawrh bawrh a. Dawhkan ah a thil khai chu a dah zui hnawk a; a tam ka ti ngei mai. Rasgulla chu a bag aṭanga rawn phawrh in min pe zui zat a, kei pawhin lo ban vat in ka hawng zui nghal rak rak a.






Ka nu ho in thingpui fe chu kan zawng luih luih a, a khawih hnuhnung ber tu anih avangin kan lo zawt chat kha ania; ani lah chuan a dahna a hre thei tawh mai lo leh nghal a. Chhuar leh a bul vel zawng zawng kan dap hnu pawhin kan hmu zo ta chuang lo. Amuani chu a thinrim ṭung tawh. "I haihawt dan em em hi, in entir rawh" a ti thul, nui dar dar chungin kan phek buai a ni ber.





"Zawng tawh suh u, ka zuk lei ange. Ka haihawt lutuk hi a buaithlak em mai" tiin a bag aṭangin chahbi a phawrh a; Steel Almirah lam a pan nghal vat a. A hawng zui rak rak a, keini hovin Sawhchiar a siam turin Arsa kan lo chan ve bawk. Ka nu nui khûr dar dar chu mak ti zetin kan en haw hlawm a, a chhan kan hre miah lo nang in a nuih za lutuk chu kan lo ṭhen pui ve sak sak hlawm a.






"En teh u", tih pahin a puan thleh kar aṭang chuan Thingpuife a rawn khai chhuak a. Tumah kan insûm thei tawh lo, kan nui tlawrh tlawrh hlawm a.





"Thil hi lo khawih ve tawh suh, i hahthlak bet bet em mai" Siamtei chuan a lo ti zui thuai a, fiamthu a in sawisa kual in kan che pah mawlh mawlh bawk a. Hlim taka nuih pui bâwk bâwk tur ka nei te, mikhual dûk anga ka in ngaihna te min thai bo sak duak avangin Amuani leh Siamtei hi ka tan an hlu takzet.






Chhun chawlh hun a ni a, eitur lam chu kan buaipui zung zung a. Hriathlua phone ri reng chu pan vatin ka en zui nghal thuai a.





U Hruaitei chuan, "Hriathlua kha, a pawisa hman vel chungchangah ka va be duh ve? A rawn chhuk lawk hman angem?" a rawn ti nghal tâwng a. Eng pawisa chungchang nge a sawi ngaihtuah ru nghal neuh neuh chung chuan "Thil an ei dawn chiah a, ka lo hrilh ange" ka ti sap a, phone lah chu a dah zui nghal daih leh nghal a.






"U Hruaitei'n 'lo chhuk lawk se' atia, pawisa chungchang ania" Hriathlua beng bulah chuan ka phun zui sar sar a, a lo bu ngat a.





Kan eitur siam chu an fak luam hlawm a, keini pawhin ka ei zui ve nghal a. Siamtei eitur chawi lâ lâ chu Amuani chuan a en rân rân a, "Siami, khang zozai kha khawiah nge hnawh zawh i tum?" a lo ti leh pek a. Ka thil ei lai phuh ṭhawt in ka nui chhuak ngheng a. Siamtei che vel hi Amuani hian a en zui kar reng a, a huphurh vang ni lovin a in thlahrunpui ṭhin ni ber in ka hria.





"Ka pumah lo khawnge ka hnawh anga, tunge bengkua ah hnawh ngai?" Siamtei lah a lo ti sam êt a. Ka pa chuan nuih vur vur pahin "Thil ei reng reng chuan dul hmul hi khât phuar mai sela, ngaih a ṭha alawm. Ei ṭeuh ang u" a lo ti ve thuai a. U Hmaa leh U Lâna pawhin kan eitur siam chu tui an tih thu an sawi ve luam a.






A siamtu kan nih vang nge ni, ei tam a har ka ti riau. Ka suah sa pawh ka ei zo peih ta lo. Hriathlua pawh hmanhmawh zet a ei zung zungin a ei zo thuai a. A Bike chahbi la in, "U Hruaitei te In ah kal lawk ka ngai" tih pahin a chhuak zui a. A hnungah zuiin pawn thleng ka kal ve a, "Bawihi, ka rawn let leh vat ang" a ti nghut a, chak zetin a tlanchhuak zui puat a. 'Chuti em em a pawimawh chu eng pawisa tak ni ang maw?' tih ka ngaihtuah zui rauh rauh a. Ka chhungril ah awm nawm loh riau na chuan min ṭham er er bawk.





Hna an thawh ṭan leh fe hnuah pawh Hriathlua chu a rawn lang thei lo. Min mawlh tlat tu chu eng thil nge a nih hrelo mahila ka awm a ti nuam lo tawlh tawlh thung. Ka nu leh Amuani te ho titi a nui bâwk bâwk pawh chu ka zawm thei meuh rih lo. Room lamah chho in Hriathlua phone chu ka keng chho tel bawk a, khumah ṭhu in U Maremi ka Call zui zat a.






"U Marem, Hriathlua i hmu em?" Phone a lak rualin ka lo ti thuai a. Ka zawh dan teh tawp chu a kalna hre miah lo te pawh ka ang in ka inhre hnuhnawh.





"Aw, a lo lut kawi a. I u Hruaitei te In a kal turin a chhuak zui lehnghal. Engatinge?" a rawn ti thuai a.





"A, a rei tawh em a. Hna an thawk ṭan leh tawh sia" ka ti nawi niah niah a. A kal na tur hriatpui miah lo anga ka lang chu nuam lo ka ti thar telh telh bawk.





"Sangsangi kha a kal ve bawk a, engnge maw an tih dawn ni? Ka lo en zui lem lova" a rawn tih leh rual chuan ka ṭhu ngil deuh zawt a.





"Tunge Sangsangi chu?" ka ti let thuai a, ka thinphu a rang nghal hle.





"Awwwww.... a bialnu hlui maw le. Hruaitei nen hian an in kawm ngeih a, a leng fo mai. Vawiin ni taka a rawn len thut nachhan pawh ka hre lo. Hriathlua kha engnge a rawn chhuk ve kher a?" a la rawn ti tak deuh deuh leh nghal a. U Hruaitei'n min rawn biak dan te chu ka hrilh a, "A va ṭul lo mai mai tak" a rawn ti niah niah a.






Khumah chuan ka mu kawm ngal a, Inhnuai lama nui thler duai duai te thawm pawh chu tunah rih chuan ri bengchheng tak a ni. Ka ngaihtuahna in hmun tin kil tin a dap kual a, U Hruaitei chuan engvanga rawn ko chhuak kher nge anih ang tih nen lam ka ngaihtuah kual vek. Ka ipik up up a, ka awmdan apiang chu ka ning em em ringawt bawk.






Kawmthlang a Bike rawn ri dut dut thawm chu ka ngaithla kar a. Hriathlua Bike ri tih ka hria. Che châng lovin ka mut ngaiin ka mu kawm reng a, ka thinlung a thîkna in mung nasa lutuk te chuan min ti zawi ngawih ngawih.





"Khawnge Bawihi?" Hriathlua'n a ti ri pawh chu ka hre reng, ka nu in a lo chhang vat a. In chunglam rawn pan chho thawm ka hriat rual chuan ka mit ka chhîng vat a, ka thâwk sak ṭalh chu duhlo zetin ka thaw lui halh a.






"I nuam sam lo em ni?" tih pahin ka biang a rawn dek a, a kut ka lo vai per nghal nawlh a. "I pawisa ba chu kha nu ta kha em ni?" tih ṭhat pahin ka ṭhu chhuak nghal a, a mitah chiang takin ka melh nghal kal bawk.





"Eng pawisa mah ka ba lo. Thil ṭullo lutuk ah min rawn ko anih kha" a tih rual chuan ka sa zawk mai. "I bialnu hlui nena in in hmuh theih nan i farnu in rem a ruatpui che u ania, kei hi min lo va duh awm lo em em ve? Min ti zak hle mai" ka ti khûr dar dar a. Ka in khawngaih ngawih ngawih bawk.





"I ngaih ang khan engmah a thleng lo ania. Pocket money te min pek a tum mai mai, ka ankhum hrep a ka rawn hawsan" a ti ram vei hmuk na a, a thusawi chuan min tih hahdam chuang lo.





"Hriathlu, i nun ah hian hmeichhia an tam lutuk a. Kan buai nuaih reng fo dawn anih hi. In in hmuh theih nan i farnu te ngeiin dawt pawh an sawi duh zel ania. Kei chu hetiang hi ka peih ve lo" ka ti ram hmak a. Ka thinrim lutuk chu ka buai nuaih ni mai in ka hria.





"Bawihi, min ring rawh. Ka kut hmawr pawhin ka tawk lo ania. Hna ka zu thawk ve leh ange, lo mu hahdam rawh" tih sup pahin ka biangah a rawn fawp zauh a. In hnuai lamah a chhuk zui nghal thuai a. Ka biang chu ka kut hnunglam in ka hru tâwk a, lukham chu la lawk in khum chungah chuan ka vawm tîng nawlh a. Chutiang mai mai a min bum chu pai dam har ka ti viau.






Chulai hmun a tawm bo reng chu mawi ka tih loh avangin darthlalang ah in en in ka in tuai mam thuak thuak a. In hnuai lamah chuan ka chhuk zui nghal a. Ka nu chuan "I nuam hlei thei meuh nange? Khalai chhuar ah khan nachhawkna ka dah kha, hmawm lawk mau rawh" min lo ti thuai a.






Ka rilru natna chu eng damdawi mahin a ti dam zo lo; bum ka ni tih chu ka hrechiang hlur ringawt. Amuani chuan a pangpar pot turin thingphel a zawng khawm a, "Min lo zawn pui teh" a tih tlat avangin phûr lo zetin pawnlam ka pan zui ve thuai a. Siamtei pawh a dan ngai te in hnathawhna lamah a lo nui khêk leh uarh uarh tawh.






Thing in tiang khawm ruih kara a tê deuh ho chu kan pawtchhuak zel a, ka thak nuaih nuaih tawh. Lungphur hi ka haw em em a, Ni thum te ka thak ṭhin. A duhtawk kan pawhchhuah meuh chuan ka pum vual a ni ber tawh. Inbual turin ka tlan luh san vat a, tui vawtin ka inbual nghal phar phar a. Ka khua a sik ur ur thei hial.





Pindan lamah ka inthlak mawlh mawlh a, ka in hiat pah reng bawk. Ka ngaihtuahna vir zawk avang chuan Phone chu ka ban vat a, Tleipuii number chu zawng thla mawlh mawlh in a zawnah ka tawp chat.





"Awi, hmelchhenu. Ka ngei che, engmah mi hrilh pawh i tum lo" a rawn ti nghal bawrh bawrh a. Nidang chu nise a huat tawk lekin ka chhang let anga; ka nuih pui leh vak vak ngei ang. Tun dinhmun ah erawh ka nui lui thei der lo.





"Zanah min rawn hruai rawh u. Ka nu te ka be ngam rih lo. In In lamah ka lo haw rih mai ang" ka ti hnual raih a. A reh duk a, tu mah mah kan ṭawng zawm lo.





Rei fe kan ngawih hnu chuan "Eng thil nge?" a rawn ti ban chat a.




"Bum ka ni" tih zawng a chhangin phone chu ka hmet hlum zui hmak a. Tleipuii chu a hrilhhai viau ka rin rualin ka mizia hrechiang em em tu ania. Tunah hian ka na em em tih a hriatthiam ngei ka ring bawk.





Ka thil tih chu a dik ber em tih pawh ka ngaihtuah zui peih lo. Ka pasal farnu ngei in min bum dan chu na ka ti êm a, ka rilrua a thawhdan ang ang in ka che zui ve a ni ber. "Min bum nawn leh tawh lovang?" ti sap chungin ka thawmhnaw chu ka lakhawm a, Bag- ah khungkhawm zung zung in lak chhuah theih mai in ka dah fel ta ât a.







(to be continue.......)


Show post links
Top