MI PASAL BY Ruati Renthlei (Completed)

[Ngaia]

MI PASAL



Chapter-7



By Ruati Renthlei




Chhun lamah Jeremy te thianho chu an rawn kal tak tak a, in ti hmelhriat deuhin an dawhkan lam ka pan vat bawk.



"Nu la tak tak i ang ve tawh anih kha" ka form hak thlek ha pahin Jeremy chuan a ti sup a, ner khum nang in "I awmloh hlan khan ka lo nulat San che alawm" ka ti ve nghal zat a, dar a lo kan ak ringawt.




"Engnge in ei ang?" tia zawh pahin an dawhkanah chuan ka kut ka nghat a, ka in nem khalh anih ber chu.





"Jennifer" rawn ti hluktu vang chuan ka phu dawrh a, ka kut pawh ka la let rang viau mai. Ka ding khawng nghal at a, boruak rih nghulh chhan chu ka bul lawka rawn ding pa vang hi a ni tih ka hre bawk.





Ka chungah lungawilohna nasa tak nei hmel pu hian min melh khui lehnghal a, ka Tim nghal dai mai.





"Customer te dawgkan dawhin order I la amaw?" a tih chuan "Engmaw?" ti vatin ka melh chho ha a, min la en rum ngang mai.




"Ka,,, ka tihpalh" ka tih chuan Jeremy a lo in rawlh a, "Customer satliah kan ni hleinem, thian kan nia" tiin ka thlavang chu lo hauh ve bawk mah se ka awm a la nuam chuanglo, engtik laiin nge restaurant a rawn thlen tih ka ngaihtiah kual phei chuan ka tawt nghal up up thei tak tak.




"Office ah min rawn hnu ang che" tiin min kalpel a, ka thaw chhuak hak mai. Restaurant mah ni se a lianin a changkang a, Pu Rina pawh hian office hran a nei thlap. A lian lo na in a felfai thlup a, vawi khat chiah ka la lut bawk, mikhual zahawm deuh a neih changin chutah chuan chaw a ei pui thin.





"Thanpui, order hi lo la mai rawh aw" zuai deuha tih pahin ka thiante chu ka melh zawk a, "Hlauthawng suh, buaina a awm chuan ka pui dawn che nia" ti sup Tu Jeremy chu buk khum nghatin phurlo deuhin office lam chu ka pan ve ta nge nge a.





Kawngkhar chu ka kik dat dat a, chhangtu ka neih lawk loh avangin muangchangin ka hawng zui a, dawhkanah a kiu nghatin min lo en run a, ka pawh ngam lawk loh avangin kawngkhar ngheng chuan ka la ding zum reng tho.





"Rawn thu teh" ti supin a hmaa chair chu a melh zawk a, ka thutthlak pah chuan "Ka tihpalh" tiin ka phun ve sup bawk.




"I tihpalh a ni lo" a tih chuan phawk hra hian ka melh a, a hmelah danglamna engmah hmuh tur a awm ve lo.




"Hetah hnathawk tur in I rawn kal, thian kawm tur in I lo kallo" a ti leh a, he mihring hian ka thiante hmanga min zilh hau phet a tum ni berin ka hria.




"Ka hna chu ka hria alawm Sir, ka tih sual chu min hrilh la, insiam that ka tum ang" ka ti ve fak a, a lungawiloh chhan chu sawi mai se, a ti kual a ti kual a, a ninawm.




"An dawhkan I bawh laia I landan kha I in hria em?" a ti leh daih a, ka sawi kha maw, a sawi kual kher thin hi ka hne.



"Aww sawi kual vaklo in I duh tak chu sawi mai la" ka ti nang nang a, office chhunga ka awm rei lutuk chuan Nu Rinengi te ho ngaih a lo tha lo leh ang tih te pawh a hlauhawm.




"Hneichhe lepchiah tak I ang" a tih chuan ka melh kawk a, a hmel pandan leh mitmeng atang engmah ka hrethiam ve theilo hi alawm buaithlak thin chu, a uang leh a thutak tih a hriat theih ngailoh.





"An dawhkan bawha I nuih khan hmeichhe tenawm tak I ang ka tih a nih chu aw, kha kha awmdan tur a ni lo a, ching nawn tawh suh ang che" a ti nawn leh a, vin hauhlo na in a ngainat awm hlawllo.





Ka thiltih kha a lo mawilo viua a ni thei a, ka pawm thlap mai. Mahse hmeichhe tenawm,,,lepchiah han in tih kher chu na ka ti ve ani.



"Enteh Pu Rin, I hnuaia hna thawk ka ni a, kan in tawn dan, ka sawi awmzia chu kan inkara thil thleng chu kan hriat dun kha, kha thil vang khan min hmu tleu viau a nih pawhin a pawilo, ka thianghlim tawhlo a, ka in pawm thlap, mahse I ngaih ang em em a hmeichhe nasa leh tenawm chu ka ni biklo ania" ka ti ve duah a, ka sawi awmzia ber pawh hi ka hre biklo.




Ka ngaihdan chuan min mutpui tawh vang maiin hmeichhia, mipa mamawh leh ngai ngawih ngawih tur ah min ngai ve ringawt a, insawifiah chiam ka tum a nilo a, a awih kherin ka ringlo bawk, mahse a hun leh a hmun thliar thiam rual ka ni tawh a, a duh duha a deu theih ka ni biklo, nupui nei reng chunga hmeichhe dang mutpui duh mihring a ni ve tho!




Kan ngawih reng lai a a phone rawn ri chu ka lawm khawp mai, a phone a en zawk hnuah keimah min rawn en leh a, "I ngaih ang kha ani lo, kal tawh rawh, thleng nawn tawh suh se" a ti sup a, ka tlan chhuak titih a ni ber.




Ka awm dawma thaw chhuak ham ham pah chuan midang chu ka va pawh ve nghal a, "Tinge a koh che a?" tiin Mimii chun min lo hnaih nghal sawk sawk a,Thanpuii pawhin a lo bengkhawn khawp mai.




"Dawhkan ka bawh deuh kha min hau" ka ti zawi sap a, mood a ti khawlo vek takngial dawn alawm.




"A va han ho ve chiang tak e aw, keichu U Rema ka hmuh atang phei kha chuan Rinsangzuala hi ka ngei zo vek tawh, ka star peih tawhlo, in la cool si, khirh bawk si, ka lo hne pui che" Mimii chuan a ti hlawih hlawih a, "A lo hria ange" tiin kan lo hawi zuk zuk thung.




"A nia lawm, chhelo viau mah se a hahthlak ve thlawt, a hauhna chhan chebpawh chu a ho e" a ti leh hram a, "I thiante khan an la nghak che" Thanpuii'n a ti thung.




Jeremy te dawhkan lam chu ka pan leh vat a, an lo la awm ve tak tak, an thianpa Zuala an tih chuan "Boss chuan a lo hau che ami?" a rawn ti lauh a, pakhatin a lo nghawk zauh chu ka hmu reng.




"Haulo e" ka ti mai a, "A haulo tak tak che maw?" min ngaihtuah hmel takin Jeremy chuan a lo ti leh a, nui lui sakin ka bu nghat.




"In ei puar em?" Ka tih chuan a mawl ber tura kan ngaih Petera, nizana bialpa ka neih leh neihloh min zawttu khan irh awk in "Puar" a ti hluai a, table dang a mi te pawh an rawn hawi phawk hra hlawmin ka hria.




"Va thing thei tak" ti hlukin Jeremy chu a rawn tho a, "I haw dawnah min lo call la, ka lo hruai ang che" a ti sup a, ka hniallo law law, ka duhlo pawh ti ila a lo kallui dawn tih ka chiang em ani.



Pu Rina hmel ka hmu leh tawhlo a, a haw lai pawh ka hrechuanglo. Mimii'n awm tlang a rawt leh deuh na in kan ban hma in naupang ho an rawn thleng a, kan thawh khalh leh an hlau a ni khawp ang.




Kan chhuah dawnah in ti thu zetin Mimii chuan "Nu Rinengi thu lo awih ang che u" a ti hram a, ngawi renga an rawn kallo tawp kha a la ngei ve ngang a niang.




An veng in ang biklo mah se Thanpuii nen an in phur haw a, kawtah Jeremy nghakin ka la ding rih thung.




A rawn thlen hnuah in lamah min phur haw a, a thianten an nghah avangin inchhungah chuan a rawn lut kawi lo.




An in kawta U Chhuahpuia lo thu hnawk nuai chu inchhung ka luh hma in ka thlek leh te te a, pheikhawk chhia a in chhawp niin ka hria.




Zawt chiang duh lemlo in ka luhsan a, ka pa pawh a lo haw tawh a nih hmel e.



A rui vaklo a ni tih hria in "Vawiin school I kal em?" ka ti a, "Kal e" a tih chuan ka chhang tawh lemlo.




"Mambawih" a tih chuan melh zawkin ka mithmul ka kan ak a, "Min ban a" zawi deuh hian a ti a, miin thawng lutuk anga lan ka duhloh avangin "A va zialo ve" ka ti liam puat a, pindanah ka luhsan nghal daih bawk.





An han ban tak meuh chuan rilru ah eng eng emaw chu a awm ve a, chutihrualin min thawng vaklo tak tak bawk a. An ban tir har tawh zawk ngawt ka lo tia...





Pindan atanga ka chhuah leh pawh chuan a lo la thu kun ngal a, cooker sil fai mawlh mawlh pah chuan "I hlawh te kha I la lawk sia" ka ti a, "Chutak chu ka buaina" a lo ti ve nghut.





"Hna I thawh a ngai anih chu, inhlawh la, nangman rul ang che, zu in nann I hmang zo vek a, I zumana chu ka peksak dawn miahlo che" ka ti fak fak a, a dil ngamloh tura awm law law hi a tha mai, in hauhna a tlem phah ve deuh ang.





Zanah Bawiha nen kan inbia a, nuam a tih thu a rawn sawi nasa ngang mai, Bawihbawihii a awm ve hlauh a, keipawh ngaihtha deuhin ka awm theih phah anih hi.


"Tak in maw Thiannu, Jeremy lo haw kha I hria em?" ka ti chiah chu a rawn te chul a, "Ka hmu ve chak tawh" a tih loh leh "Min rawn be rawh se" a ti a, a phi cheng hi ka dem hauhlo, kei kha chuan beiseiloh deuhin ka hmu thut a, inrin lawkna hun chu nei ve ila ka thiani ang tho hian ka phul ve hlut tho ang.







Kan inbiak zawh chuan dar 9 a lo hnai leh der tawh a, ka pa pawh chhuak lohin thim hlim atang khan khumah a mu hmak tawh, mu tura ka in buatsiah laiin "I mu tawh em Afer" tiin Nu Siami tawngri ka hria a, a rawn luh ruala ka la mulo tih a hriat chuan thaw huai hmel te pawh a pu.






"A tlai a tlaiin ka rawn lut leh anih hi, I mu duh tawh em?" tih pahin ka epchiaha thutthleng seiah chuan a rawn thu ve a, zial a zu khu hlat hlat a, meizial zu ve fo e tilo hian kuhva erawh chu a ei miahlo thung





Mut chu tum tawh tho mah ila"Duhlo e" ka ti mawi ve a, "Kan Lalchhuahpuia pawh hna a vang si a, hna rum thawka inhlawh ai chuan tiin pheikhawk chhe siam ka zir e a tia, thiamthil a ngah thu i hrilh kha a la hre ve a niang chu" a ti a, a fapa chu a ngainep hmel khawp mai.




"A tha lawm, a hlawk ve phian asin" ka tih chuan a Sam kir chiat chu hui thuakin "Ni e, han ti ve phawt se la, a hmawnraw man engkim ka tumsak vek a, eng anih leh siloh cbuan ka thim nek ang" a ti hlut a, a in sawi thinrim leh ringawt tawh em mawni.





"Kuri a fel maw" ka tih chuan beidawng hmel deuh hian min rawn en a, a fello a tih ka ring sa.



Mahse "Fel e, a fel mah mah a, kan buai anih hi" a ti tlat pek a, "Engnge awmiza" nui deuh chung hian ka lo ti a, "Maian han hik ila, a vaia kan hih zawh hun a nghak hmanlo, pakhat kan tihna kha a lo chhar zel a, bawlhhlawh bawmah a lo va paih thin, tichuan I hrethiam em?" a ti a, insum buai lovin ka nuihpui vak vak ringawt.






"A buaithlak dawn anih chu" ka ti a, ka nuih tawp hleihtheihloh laiin a nui tha ve duh derlo, "Hmanni ah pawh inchhung bang ka hawl fai e ka tia,inthlahrunawm khawpin ka hawl thlak apiang a lo phiat fai zung zung a, heiha, kan buaithlak anih hi keini zawng" a ti hap a, ka han nuihpui chiam tak na in ka khawngaih ve thin.






****





"Vawiinah Bawiha te an lo haw dawn a, Bawihbawihi nen Airport ah min nghah pui rawh aw" ka tih chuan a lo bu ve nghut nghut a, "Hmangaihzuali chu ka sawisa chak tawh lutuk" a tih zawm zat bawk, Bawihbawihi kan han ti tak na a Jeremy hi chuan a hmingpum in a ko kher zel.





Nilengin kan buai leh a, Sunday bak chawlh kan neihloh avangin zawi hnawk khawpa chauh changte pawh ka nei thin a, mahse hna ka neih avang hian ka lawm a, ka la vui chhin ngai lo.





Rinsangzuala a rawn kal khat viau laiin Marini erawh a rawn lawr sek a, a pasal nena kan inkara thil thleng kha a hrechhuak ta mai em mawni tih tur khawpin ka chungah a khawsa ka ti mai, min hmuh tirha min biakthat ang hu in tun hnua a lo kal hian min be ngai tawhlo a, in be fo turin thian ni lemlo mah ila ka thawhpui dangte a be tha em em vek a, min ngei a nih ka ring ve tawp.




Nu Rinengi lahin a fak thei si, ka lo ning thin.



"Eheu, Pu berin vawiin chu a rawn hruai dawn a ni maw" tia an lo chhaih fiam lam chu ka hawi ve vat a, Pu Rina lo lut lai chu ka en ve reng tak na in min hmu ang pawhin a awm ve lo, a nupuite awmna lam chu a pan ding nghal chat bawk.





A tlai tawh a, keini pawh haw turin kan in buatsaih tan tawh.
"Lo kal kher a ngailo ka tih kha, driver ka ko mai dawn alawm" no duaia a lo tih te chuan an hmuhloh lama ka lo ner ru ve nasa, a chhan pawh ka hre biklo, ka ngaina lo a ni tawp mai.




"Afer, Pu te rual hian haw ve mai ila, kawng chanve lek ke loa kal pawh a hahdam alawm" Mimii chuan a rawn ti lang lang a, an vai mai chuan min en thap ni berin ka hria.





"Jeremy-an min lo hruai dawn a" tiin dawt ka sawi a, dar 6 ah daih airport kal tur ka nia, tunah dar 4 chauh la ni mah se an ruala haw hi ka chak miaulo a ni.





Min chhuahsan ta diak a, customer leh hna thawk dangte chu la awm tho mah se a reh huai hian ka hria. Minute 10 vel dawr chhunga ka nghah hnuah haw tur in ka tho chhuak ve chiah. Jeremy nen chuan kan in be ngei a, mahse hruai ka ngaihloh thu ja hrilh thung. Kartluanin min thlah loh leh min rawn hruai a, ka thawhpuite phei chuan ka bialpa emaw an ti vek tawh, mahse ka thianpa mah ni se ka inthlahrung ve thin a ni.






Ka thiante chu an tlanliam chiang tawh ngawt ang tih rilru pu a chhuak ka ni a, Rinsangzuala hmel hi hnuh hi ka inring lo reng reng.





"Ehee in haw tawh sia" ban charh hian ka ti a, ka chhuah rual chiahin dawr hma zawnah tak a car a lo dah a, car chhung atangin min en run bawk si.




"Rawn lut rawh" nem lemlo zeta a tih hnu ah "I thianpa chuan a rawn hruia theihnghilh che ani maw?" a ti leh a, ngeiawm deuhin a thenzui sak bawk.




"Theihnghilh lullo, min rawn hruai leh suh ka tia, chutah chuan lo buai suh" ti ve hlak mah ila minute 10 chhung lek khan engtinnge a hmeichhe phurhte kha a thehthang bo tih ka ngaihtuah tel ran tho.






"Rawn lut vat rawh" a ti leh hlak a, ka hnung lama dawr chhung a thlek chhen danah midangin an hmuh a hlau a ni khawp ang.





"Ka rawn lut bawk lo ang, I thlah ka ngai lo e" ka ti leh a, engtikawng pawn he motor ah hian chuan ka tum lo hrim hrim a ni tawp.





"Lalrinnung, I rawn lut dawn em?" Tiin min zawt leh ngat a, a vin hauhlo na in a nelawm loh nasa lutuk.





"Dawnlo" ti fakin ka kalpel a, a car kawngkhar in hawng ri chu hre reng mah ila ka pen lai ka chawl eihlo.




Ka banrekah rawn manin min pawt her lawp a, "Engnge i buaina chu ni a?" ka tih khum nghal tuar!




Ka tawng ring bawk aniang a chhing sawk a, kawnga kalte pawh hian min en hrek hrek hlawm tih ka hre reng.





"Helai hmunah hian ennawm siam i duhloh chuan min zui mai rawh" a ti sup a, chungte mai mai chu pawi la ti teuhlo, kei ai chuan amah hi hmuhnawm an ti daih zawk ang tih a chiang reng, ka mualpho aia nasa fe in a mualpho dawn tih ka hre ve.






"Jennifer" ti leh hlukin ka ban chu a hmer na salh a, "Pawi ka ti reng renglo" ka chhan na chuan a ti hawihai ve deuhin ka hria.




"I hna hi chan I duh em ni?" fiak thawta a tih leh tak ah chuan a tlawm zawka ka tan leh a ngai tih ka hrethiam a, ngeiin haw ve viau mah ila ka hna hmanga min vau meuh chuan ka tan chet lak ngaihna a awm ve leh tawhlo...
Ka lak atang hian eng chiah nge maw a beisei le!






CONT...
NOTE:Theihse chuan ziaktu lam pawh hian regular taka zan tin dah theih hi kan duhthusam ani a, chutih rualin mihring theuh theuh, buaina leh harsatna eng eng emaw a awm ve reng a, chuvangin dah hun bik te kan han siam a, eng emaw harsatna liantham deuh a awm kan dah theilo palh anih chuan whatsApp group lamah kan in hriat tir ve thin e aw...


Show post links
Top

[Ngaia]

MI PASAL


CHAPTER-8


By Ruati Renthlei




"Engtinnge midang ho kha I tih a? I thlah hman vek em ni?"
Kan in kawtah kan ding ran tawh a, kawng tluanin kan in be lo ve ve, ka zawhna chu ngai pawimawh lo zetin "I thianpa chuan in kawtah pawh a lo nghak chuanglo che anih hi" a ti kher a, ka sa leh phat tawh.






"Thianpa thianpa ti reng lovin ka zawhna chu min chhang rawh, engtinnge minute 10 chhung lekin an vai khan I tih?" Ka ti leh a, "I buaina tur anih loh chu" a la ti duh lek chauh.




"A tawk anih chu" ti hlakin car nghenchhan chu ka tauh lui dawt a, a thaw chhuak hluai tak na in engmah phei chu a sawi tawhlo.




"I nupui thil ei mai mai rawn hruai tur in I rawn kal a, engnge keimah ah hian buaina I la siam talh a?" ka ti leh a, keimaha a buai tlat chhan hi ka hre duh a ni.




"I thik ani maw?" nuihza hmel zeta a tih chuan ka melh vak a, "Ka thik lullo aw, thik na chhan tur a awmlo bawk a, a,, I awm dan hi ka hrethiam thlawtlo, mi pasal i nih hi aw" ka ti deuh ruai tawh a, min ti â thei tak tak mai dawnin ka hria.




"Chutak chu ka buaina?" a tih chuan "Engmaw? Mi pasal i ni chu maw?" ka hau in ka ti vat a, ka vin tawhlo bawk.




"Kal tawh rawh, ka hmanhmawh" a ti leh tlat tawh a, zawhna ngah viau si hian kan zawhna a namnul thin lutuk hi chu ka haw ngawt mai.




Car atanga ka chhuah rual chuan na zetin ka nam phui leh nghal a, a tlan liam leh nghal vut mai.




Nu Siami leh U Chhuahpuia chu an kawtah an lo in hau leh tawh a, pheikhawk chhe karah U Chhuahpuia chu a thusawp nuai a, a bulah Nu Siami chuan a kawng dawmin a dinchilh run bawk.




"Tangkaina reng reng neilo ringawt mai, neih zawng zawngin hmanrua leh thil charna tur te kan lei ve a, hmantlakloh leh lutuk mai" a ti hlawih hlawih a, "Hetiangin a chhe mai dawn tih ka hre bik hleinem mawle, a rimtui an tia ka hnim ve mai mai alawm, ka chhinpui lo tih pawh ka in hrelo" pakhat chuan a ti ve niah niah mai, pheikhawk charna tura an lei denrite kha a lo hnim leh hman a ni pek ang.



"Enkawl ngaihna che pawh hi ka hre tawhlo, insawn chhuak ang che u, in duh leh Lalnguri bulah awm ula, in chhungkua in zu chhuang ula a ni mai, Kuri pawh hrilh ang che, a rang thei ang berin chhuak ang che u" a ti leh tan tan a, ka inrawlh ve na chi nia ka hriat loh avangin ka va pawh duh lemlo.




Inchhung ka luh rualin zu rim ka hip lut nghal kawk a, ner sawkin chaw ei dawhkan kila lo thu ka pa leh hmeichhe pakhat te chu ka melh nghal vat.




Min zahna nei hauhlo in dawhkana zu an thlit chhuah sa chu min lem khum sak sak a, "In va han zaktheilo tak, tunge hmeichhia hi" tiin ka pan hnai hrut a, zu a in ve mai theih dan atang hian mi tha tak chu a ni biklo tawp ang.



"I nu tur anih hi" ka pa'n a tih chuan hul zet hian ka nui chhuak hak a, "Ka nu tur a?" ngainep zet hian ka ti nawn leh kher bawk




"Eirawng bawl nghal rawh" ti hlukin a no ken lai chu dawhkanah a nghat chawrh a, "Ka bawl dawnlo, I duh chuan i nupui hi bawl tir la ti nia" ka ti a, ka tawng zawh rualin a rawn che leh phut a, ka nghawngah min rek bet anih chu!




"Awi khatiangin ti suh U Muanpui" tiin hmeichhia chu a lo rak chul a, banga min nawr beh rualin a khup ah tak ka pet sak pawp a, min thlah rang viau mai.



Boruak chu duhthawh zetin ka hip lut nghal kawk kawk a, "Mi hi hnial ve ziah suh aw Lalrinnung" tiin pawisak neilo hmel zet hian a kutzungchalin min kawk pah sawk sawk a, a mak ka ti!





Zu in a ngaihtuahna a chawh buai sak nasa tawh a, kan unau tana buaina belhchhah tur in hmeichhia a rawn hruai lut leh a, min thah hial pawh a pawisa tawhlo chu anih hi!




"I rapthlak emai, I hmel pawh hi ka hmu peihlo" tih leh kan in atanga tlan chhuah ka rual a, pan tur ber pawh rhe chuanglo in ka ngah chuan ka kal tawp a, ka tap lo a, ngaihtuahna mumal pawh ka pu theilo.




Ka pa hian kut min thlak fo a, mahse hnuk hnaih tak in khatiang khan min la khawih ngailo reng reng, chuvang tak chuan ka hrilh hai a, awmdan tur leh ngaihtuah tur ber pawh ka hrelo.




Khua a tlai ruih tawh a, ka hnathawhna ang angin ka la in thuam bawk nen ka tawp ru phian a, hmai phihna tur tal awm se ka ti khawp mai.





Kawng sir a thutna an siamah chuan ka thu chawl a, ka rilrua lo lang hmasa ber Jeremy ka call ta ringawt bawk.




"Aw baiqhte" a rawn ti dam thluam a, tawng lawk lo in ka nui hmasa leh rih, Bawihte min tih duai duai lai hian Bawihbawihi chu a hmingpum in a ko lawl lawl zel a, fiamthua min ngei chang pawh a tam mai.





"I buai em?" ka tih chuan Zuala te inah bawk a awm thu a rawn sawi leh a, han sawi tan dan tur mai pawh ka hrelo.




"In atang ka chhuak a" ka ti sap a, "Lawk aw" a tih hnuah thawm chu a reh vang vang a, "Pawnah ka chhuak a, sawi rawh le khawiah nge i awm" a rawn ti a, ka hrilh hnu ah a rawn kal tur thu sawiin kan in biakna chu kan ti tawp a.




Ka sawi ang khan k rilru a buai ka ti dawn nge, rilru na ang pawn ka awm lo a, ka thinrim ka hrelo bawk a, engkim chu ka nghilh dup ni berin ka hria.





Jeremy chu ka nghak ngawt ngawt a, nghaktu tan chuan a rei duh khawp mai. A rawn thlen meuh chuan a khua a thim lek lek tawh a, ka lo thinrim tun tawh.




"I rei lutuk" ka lo ti nghal hlak hlak a, "Traffic alawm" ti supin a Sam chu a tuai zauh a, "Nakinah min hrilh vek dawn nia, khu a thim dawn, lo chuang phawt rawh" a ti sup a, a bike hnunga ka lawn rualin min tih lawm tum ni awm tak hian a tukhum in min rawn tauh dat a, "Tikhan tum bur thin suh, ka lo hmanhmawh ve teh mai nia" a tih hnu ah helmet chu a khum a, kan kalna tur chu ka zawtlo a, a sawi bawk lo a, ngawi rengin kan in phur anih ber chu.




An in kawtah min dinpui a, engtia rei nge ka kal tawhloh pawh ka hrelo, a hnungah ka zui lut a, Jeremy nu Nu Puitei chuan min hmuh a in ring bik lo aniang min en phâwk emai, "Ehe Hei chu Aferi em ni?" ban charha a tih chuan ka lo bu nghat a, "I lo dam maw?" tiin kan in chibai a, a pindan lamah min hruai chho nghal bawk.




"I nu chu a la ngai reng mai" ti hapin khumah chuan ka thu a, "Tunlai a hrisel vaklo" tih pahin a wardrobe chu a hawng a, "I in ti fai hmasa duh em?" tia min rawn en chuan ka lo bu nghat a, towel leh thuamhnaw min pek pahin a pindan bathroom chu a kawk zauh a, ngawi rengin ka lut nghal.





Kan veng a in anloh avang hian duh angin kan in kalpawh thei thinlo zawk a, nilo se chuan kan riak khawm reng zawk mai thei a ni.



Ka in ti fai sawk sawk a, a tshirt min pek chu ka ha thei mai a, mahse a pajama min pek chu ka ti lui thei hlawllo, a kawngah ka thawl rapthlak lutuk.



Bathroom kawngkhar chu hawngin "J.. " ka ti sap a, "Kekawr hi ka thawl" ka tih chuan thaw chhuak hawkin 'hui' a ti hluai a, min rawn en in a nui suk lehnghal.


"I kawng te lutuk hi chu a buaithlak ve ngawt mai" tiin a nu a ko zui mawlh mawlh a, a tawpah chuan Nu Puitei kekawr ka ha daih.





"Khawnge i u te?" inchung atang a kan chhuk lai chuan ka ti sap a, "Ka awm lai an chuh a, an zin" a lo ti mai a, Jeremy te unau hi pahnih chauh an ni a, a pa a thih tawh avangin a u hmeichhia leh a pasal te hian Nu Puitei an awmpui a, fa an nei theilo in ka hria.



Nu Puitei chuan chaw ei ah min sawm ve tak na in ei lo bawkin kan chhuak leh a, bike keng tawhlo in taxi in airport lam kan pan thung.



"In atanga i rawn chhuah daih chhan chu sawi rawh le?" ka darah min kuahin seat hnung chu a ngheng dar dar a"Ka pa" ka tih chuan "A hau che ami?" a lo ti vat a, "Min thah a tum" ka tih chuan a meng phawk ngang mai.



Za lo deuh hian ka nui lui hak hak a, "Ka fiamthu anih kha, nupui a rawn hawn a, ka hmu peihlo cheu ka tia ka chhuak" ka tih chuan chik zet hian min en a, ka thaw chhuak ham ham mai.




"I haw hreh em?" A tih chuan "Hreh lemlo" ka ti mai a, ka hlau hauhlo mah se kan in a haw hi chu ka chak hlawllo a ni.


Airport kan thlen chuan rei pawh kan nghah hma in an lo thleng a, kan ri hlut hlawm mai. Taxi in kan haw leh dial a, Bawihbawihi titi kan ngaithla a ni ber mai. An ina kan dah hnuah kan in lamah kan tlan leh a, ka naua chuan min ngai ve tawh ngang a ni ang, min kai tlat a, a ma tawkah sawi tur a ngah hle bawk.





"Ka lo lut ve ang" a tih tlat avangin Jeremy ho chuan kan in zui lut a, ka pa leh a nupui tharte chu thutthleng seiah an lo mu der der mai.





"Apa" tih pahin Bawiha chuan a pan nghal vat a, "Apa i van rimchhe ve" a ti a, naupang tan pawh a zu thing rim chu hai rual ni heklo.




"Enrawh Bawihte, hei hi anu thar tur a nih hi aw, anu han ti chhin teh le" tih pahin a malchungah a pawm kankang a, pan hnaiin a kut atang chuan ka pawt hrang nghal hmak.





"Khatiang zawng khan naupang hi thlem tum hauh suh, I duh chuan nei la, ka dallo ang che, mah se hre rawh, Nu atan kan duhlo" ka tih khum fak fak a, ka rilru tak tak ka sawi bawk.




"I va zaktheilo em em ve Lalrinnung" ti hlukin a kut a phar uai a, Jeremy awmlo se chuan min beng thal leh tawp tawh ang.





"Ka nupui anih chuan I nu a ni tihna a ni mai" a ti leh khur khur a, a zaklo lutuk hian ka nuih a ti za zawk e a.




"Nu te chuan an fate an hmangaih thin a sin, nangmah ang tho a zu duh hian a fate angin min enkawl thei lullo ang" uar zet hian ka tih khum leh tan tan a, "Nangmah hringtu nu ngei pawn a hmangaih zo lo che ania, ka hmangaih bik vakna tur che ka hrelo e" titu chu ka melh vak ringawt, a va han zaklo hluah hluah tak.


Ka pa'n "A dik chiah" tia a lo thlawpna tawngkam chuan min vilh ngut ngut a, ka nghing lawih ni berin ka hria.





"In ti mah mah a nia aw" tiin ka hmaah Jeremy a rawn ding a, ka ngawi reng tawh, min hringtu ngei pawhin min kalsan lai hian midang hnen atanga hmangaihna dawn ka lo in beisei reng reng em mawni le....





Jeremy chu haw tur in ka ti a, min hnial deuhna in ka nawr luih tlat avangin min haw San a, Bawiha chu a chau ve aniang a muhil thuai a, hah tak in a zin a, a lo haw velah buaina in a lo hmuak leh a, ka khawngaih reuh a nia aw.





Zan reiah pawh ka pa nupui rawn hawn chu a nui har har reng a, hriat nuam tak a ni hauhlo. Min hmai zahna pakhat mah a nei lo a, zah taka biak ka tum bik hauhlo bawk.





Khawvar hma deuhin ka muhil thei ve chauh a, ka harh leh chuan lu a na bur thei. Ka bulah Bawiha a lo mu tawhlo a, dar zat ka en chuan zing dar 8 a lo ri tep tawh.




Sunday a ni a, ka inkhawm leh peih pawh ka ringlo, pindan lehlama ka pa hnar ri thlurh thlurh chu ka hre reng a, ka thawh chhuah rualin Nu Siami ang ri ka hre zui nghal bawk. Kan inchhung chauh pawh nilo, kan veng chhungah hian hahdamna a awm hlawllo anih hi!




Zu rui pahnih te chu an la rawn tho chhuaklo ve ve a, kawtah Bawiha alo thu a, thingpui pe pahin a bulah chuan ka thu thla ve a, "A u, apa hian nupui dang a nei dawn tak tak ami?"tiin min zawt a, ka mitah tak min en kiau bawk.
Thawk ka la vak a, " A duh chuan nei rawh se" ka ti thei chauh.





"Mahse a sual hmel e, min duatlo hmel si" a ti leh a, "Duat lo ang, min duat tur in beisei lo tawp la a ni mai, Nu tih pawh a ngailo, be lo tawp la a ni mai" ka ti mawlh mawlh a, ka insawi thinrim leh thei mai dawnin ka hria.





"Ei rawng i bawl tawh em?" tih ri lo chhuahna lam chu hawi pawh ka hawi peihlo. "Jennifer" a rawn tih leh tak ah chuan muangchangin akathutna atang ka tho a, inchhung ka lut chu min lo en chiang ngang mai.





"Ka tho chiah" tih zanwgin ka chhang a, "I pa nen hian kan chau ania, rawng chu bawl zung zung rawh" tiin thu min pe anih chu!




Ka nui ro hawlh a, "Khatianga thu min pe tur khan tumah i nilo, ka nau nena kan ei tur chu ka siam ang, I duh chuan rawng bawl ang che" ka ti fak fak a, min chhan tuma a ang zuau tawh chu lo tawng khalh lehin "Ka pa hi ka hlau emaw ti reng renh suh, hna a neilo a, ka chawm leh ka hrai a ni tih hria ang che, hebina awm ve reng i duh chuan min chhiahhlawh chei tum lo la, nangmah kha chhiahhlawh anga awm i in huam hle a ngai zawk ang" ka ti leh a, chaw chhum chu ka siam nghal mawlh mawlh.




Bawiha a inkhawm a, ka pa te chu khawi lamah nge an chhuah pawh ka hrelo. Keimahin in ah ka awm a, inhnial pui tur awmlo mah se khaw lum lutuk chu ka thinrim pui hlur tho.




Jeremy message chu ka hmu a, zingkar ami daih tawh lehnghal, a inkhawm ja rin avangin ka reply lemlo a, ka seen tih a hriat chuan min lo call mai ka ring a ni.




Chawhma inkhawm banah Bawihbawihi ho in an rawn in zui lut tham tham a, chawhnu pawh inkhawm tawhlo in akn in ah ka mu thlur hlawm.




"Zan inkhawm banah ka lo kal ang" ka beng bulah Jeremy chuan a rawn ti sup a, ka bu nghut chu nui sukin ka Sam a tuai zauh a, "I pa vangin lo lungngai duh tawh suh" a tih chuan ka nui mai a, a tawngtu nih loh chuan kan tawrhna hi hriatthiam pui kan har em a ni.




Chaw ei dawnah ka pa te chu an lo haw chauh a,a rawn rui nasa leh pek, "Chaw ei min han siam teh Awmte" a ti tuah hum reng a, a nupui thar chu Awmtei maw!




Min rawn melh zawk a, dar kan akin "Kan ei vek tawh, siam sak ve mai rawh" ka ti hmak a, zinga ka tawngkhum dan vang khan min hlau deuhin ka hria, a tha, min hlau rawh se.







*Lo chhuak teh*
Number hlang atanga ka message dawn chu reply lovin ka en reng a, amah ka hriat theihna tur thlalak leh hming engmah a dahlo.



*In in kawtah ka awm Jennifer*
a rawn ti leh a, *Tunge?* tih zawng ka thawn let *Rinsanga* a rawn ti chiah chu aka thu chhuak nghal hluai a, phun nuah nuah chungin ka chhuak leh ta tho.





A car hmalam nghengin a lam ka pan lai chu ngun deuhin min lo en run a, a thim deuh avangin a hmel pawh ka hmu chiang theilo.
Ka kal hnaih deuh hnua a hmel ka hmu chiang chiah chu ka pen tawp dat a, pan hnai leh vatin a hmai duk leh kamsir thi ser ser chu hnai zetah ka en a.



"Engatinge i hmai hi?" ka tih chuan min kuah nghal thlawp a, kuah let vat lo ila chuan kan tlu chiang ngawt ang.





Ka beng bulah zawi te in "Ka ngai che" a ti sup a, a hnunga ka dawmna kut ka en chiang chu thisen hlir alo ni!






Ka au thawt a, mit ka men rualin kan in chung ka hmu nghal bawk.




Ka lungphu rang zet chu ka kawr chhan ah ka dawm vang vang a, ka thlan chhuak nasa lutuk vanga ka kawr hak pante ka taksa a bet thler pawh chu ka ngaihven theilo.





Chu mumang zet chu le'h!!
Mangchhia a ni khawp ang!






CONT....


Show post links
Top

[Ngaia]

MI PASAL



Chapter-9

By Ruati Renthlei




Sana in a ban a vai ve reng a, ni a liam ve zel bawk a, thenkhatin hma an sawn a,an hlawhtlin duai duai laiin keichu hmasawn thei hauhlo a dang bettu ka nei a, thiante awmdan ang zela awm ve thei ka ni lo tih in hre mah ila an nun hi ka awt fo tho, ka nuna lungawilohna tur tam bik lutuk vang hian Pathian ka dem a, a hming ka lam lohna chin pawh ka hre tawhlo!





Pathian awm hi ka ringlo a ni lo a, a,,,, a awm lutuk zawk ang, mahse keichu he Pathian hian min ensan a, ka awm awma awm tawp turin khawvelah hian min dah ni berin ka hria.





Ka pa leh Awmtei chu an la khawsa dun ve zel a, ka nau hi awmlo se chuan ka chhuahsan vang vang tawh zawk ang.




Ka inchhung chu a hma aia nasa in a hrehawm lehzual a, ka pa a harhfim hmanlo tluk a ni a, a nupui lahin a thuhnuai hneh si, luhlul viau lo ila chuan min hnawtchhuak duh zawk hial ang.





"In awm maw?" kawngkhar in hawng ri ka hre zui a, ka pa thawhna thin school principal Sir Tetea leh mipa pakhat te an lo ni.



Tha tak in ka lo dawngsawng a, thu lawmawm tak an rawn ken luh chu ka ring hauhlo thung.




"I pa a awm em?" an tih chuan a awmloh thu in ka chhang a, pindan atanga rawn chhuak mek chu melh zawkin "A nupui anih hi" ka ti liam puat a, sawi zawm ka chaklo tih an hrethiam a niang engmah phei chu min zawt zuilo.




Awmtei pawh chu ka bulah a rawn thu thla ve nghal a, "Nia hei kan lo len chhan chu, I hriat pui tho in kan ring a Afer, I pa khan a thla khat hlawh kha a la lawk a, tihian a chawlhsan a ngai leh ta si a,, private school kan ni si a, sum kan ngah lo bawk nen, ka sawi awmzia chu i hrethiam ang tiraw" a ti dap dap tak na in a ruh lang rawta sawi chu a hreh ve ani ang.





"Hrethiam lutuk e, ka pa chu ka lo sawipui dawn nia" ka tih hnu ah rei pawh thu lovin min haw San leh mai a.





"Cheng 5000 aiin a tam hret mai thei, I pasal chu lo hrilh la, engmah ka peksak dawnlo che u" ka phone khawih pah chuan ka ti nghal hmak a, engtinmah min chhanglo.





Zanriah ei dawnah ka pa a rawn haw a, tun tum chu a rui chhe vaklo anih hmel, thil thleng chu ka sawi ngai lovin a nupui chuan a lo hrilh nghal zat zat a, peksak ka tumloh thu ka sawi thleng chuan a hrilh nghal vek.




Ka pa'n min rawn en rual chuan ka hawisawi vat a, "Mambawih" a ti hman tawk tihah Awmtei bawk chuan "I fanu hian engmah peksak che a tumlo ka tih chu" mei nei zet hian a lo ti leh a, ka then sak ringawt.





"A dik, ka sawi lawk tawh kha, I zu man atana I hmanral pawisa te kha ka rulh sak dawnlo che, hna thawk ve rawh u" ka tih khum fak a, ka nau mitmei ven a ngaih thin avang hian duh ang tak pawhin ka tawngkhum thei ngailo.




"A rang lama pek ngei a ngai anga, eng hna ber nge ka thawh ang tih pawh ka hriatloh lai hian engtinnge maw ka han rulh ang le" zawite tak tak hian ka pa chuan a ti a,hetianga in thiamlo hmel taka a awm changa ka nem leh mai thin hi ka duhlo tak zet, mahse ka pa a ni miau mai si a.





Bawiha lehkha zir ka en pui laiin Jeremy-an min rawn call a,ka tawng ve hma in "Naktuk chu leng kual ang u, I hman ang em?" a rawn ti nghal thawr a, "Hna ka nei alawm" ka lo ti nang nang




"Naktuk chauh chu chawlh dil mai la, ka chhuk tawh dawn asin" a tih chuan ka thu khawng nghal awt mai.





"Chhuk I van tum hma" ka tih chuan "Nia" a ti deuh hap a, "Khulamah tihfel tur a la tam deuh a, dam chuan ka lo chho leh harlo ang, in boss chu I dil hreh em? Ka dil pui dawn che em ni?" a rawn ti nghal zung zung a, ka kal ve theih na tur anih phawt chuan engmah tih hreh leh zah a nei leh miahlo ang.




"Ka lo be chhin ang" ka ti ve tak na in ka huphirh thlawt. Mut naah pawh ka ngaihtuah reng a, Pu Rina phone number chu nei ve mah ila vawi khatmah phone in kan la in be lo, ka mumangah tih loh kha chuan...




Thaw chhuak hakin ka phone chu ka hmet eng a, A number chu hmet chhuak reng mah ila call loh bawkin ka ti thim leh thin.




Message ka thawn ta ringawt a, a seen reng a mahse min reply duh thaklo.
*Jenniferi ka nia*
Ka va ti leh a, question mark zawng a rawn thawn let!


Thinrim hmasa lo tur in ka in hrilh mawlh mawlh a, tun ang kuma in lak lowkey viau hi a tul ber em mawni. Message chuan kan sawifel har dawn lutuka ka hriat avangin ka call ta nge nge,

"Sawi rawh"
A rawn ti thum dut a, hrechiang lo tan chuan ngawi renga off leh hmak na tham a ni.




"Naktuk chauh chu ka chawl thei angem le" ka ti sap a, "Engvangin?" a tih chuan zep lemlo in a chhan ka hrilh a, a thaw hak ri chu ka hre pha reng.




"Ka phallo ni rawh se" a tih chuan rang zetin "Engmaw?" ka lo ti vat a, "Chawlh ka phallo, a tha em?" a ti dam dap tak na in ka ngei lutuk ringawt.




"A pawimawh asin, min hrethiam hram la" ka ti leh talh a, "I hna aia pawimawh chuan hlawh a pe ve che me ni?" mei nei zet hian a ti a,"I hna chan I duh chuan I kal thei ang" a tih zawm leh bawk a, ami vau dan hi ka huat zawng tak a ni.




"Midang hriatthiam na I neilo hle mai" ka ti hlak a, "A dik alawm" awlsam deuha a tih te chuan ka thin a ti rim zual sauh.




"Nu Rinengi ka lo hrilh anga, ka tel lo pawhin an buai lutuk chuanglo ang, naktuk chauh chu min hrethiam mai rawh aw ka pu" luhlul chhuahin ka ti leh ngat a, a phal hma chu dil ka tum a ni tawp mai.




"Ka hrilh che chu, rem ka tilo ka pi" a rawn ti ve nghal zat a, min fiam ve khanglang em mawni le




"I phal hma chu ka ril dawn che, a tul anih leh naktuk ka hlawh chu I cut anga" ngengngawl zet hian ka ti leh a, a uang ve deuha ka hriat avangin tullo deuhah ka keh hui mai.





"Min mutpui leh thei dawn em ni?" a rawn tih chuan ka nui tawp hmak a, ka lungphu a pangai lo a, 'ka hlau' tiin ka awmdan chu a hrilhfiah ber ang.





Engmah sawi tawh lovin phone chu ka off a, ka tha khur dar dar chu duh lo mah ila ka ti reh ngawt theilo. Rapthlak ka ti a, a ngaihtuahna tenawm zet vang khan ka haw ngawih ngawih bawk.





***



"Ka lo kallo mai ang ka tih kha J,, chawlh a remlo lutuk a" kan in kawtah a bike nen an ding van tawh a, phone ah ka kalloh tur thu ka hrilh vek tawh sia, "Ka dilpui leh ang che" a ti nghat a, lu ka lo thing nak nak thung.



"Pu ber a thinrim zual ang, lehlamah chuan thil pawimawh lutuk a ni bawk silo a, an phallo hi a awm ve tho" ka tih chuan a nui tawi tak a, "Kei aia pawimawh dang an tam tawh em ani" a tih chuan hrethiamlo zet hian ka melh chho ha a, "Chutiangin ngailo la, nangte chu I pawimawh reng alawm, midang ngaihdanah chuan a ho hmel a" ka ti niah niah a, a la lungawi chuanglo in ka hria.




"Ka tihpalh" ka ti ta ringawt a, nuamlo duh tak chu a ni. "Ban hma dil tal rawh, ka nu'n chaw ei khawm a rawt" a tih chuan "A ni maw?" ka lo ti vat a, min en run mai.




"Dar 3 ah ka rawn lam dawn che, in pu chu lo hrilh rawh" tih leh a helmet khum a rual a, "I rilru ti hrehawm lo la, fimkhur ang che, zanah kan leng mai dawn nia" ti supin a seat hnung chu a beng thak thak a, ka lawnkai hnu ah dawr lam min pan pui a, thian tha neih man hi a awm thin a nia, a lungawi vaklo chung pawhin min ngaihtiah em em tho a, a bulah hi chuan ka pangchang thin reng ani.




Restaurant kawtah chuan Rinsangzuala leh a nupui bakah Remlelfaka te an lo ding a, U Rema'n nui vur vura min en laiin a û te nupa chuan min melh no lo khawp mai.




"Fimkhur ang che" ti leh supin Jeremy chu a tlan chhuak leh nghal a, phur lemlo deuhin ka hmaa dingte chu chibai ka'n buk mawi ve a, "I bialpa in a rawn thlah che ani maw?" uang zetin U Rema chuan a ti a, ka nui tawp.





"Lo nghak rawh u, office ah tihtur ka nei" tiin pakhat chu a in her vut a, a luh hnua luh ve mai ka tum chu Marini thil sawi vang chuan ka ding leh dat.



"Ka pasal I melh dan hi ka hailo ania Jennifer" a ti a, a tawngkam te chu a dam dap a, mahse a thil sawi mei nei zet chu pal zam a harsa khawp mai.




"Engtinngw ka lo melh a" ka ti let ve sak a, min ngaitheilo mitmengte chu engatan mah ka ti biklo.




"Hrelo der suh, in ban hnuah I inthlah tir kher thin tih pawh ka hre vek, a nupui ka nia, i huang chin I pel a nih chuan ka nasa viau ang" a ti leh a, a tawngring hranlo. Kan piah lawka ding a unaupa chuan a phone ngawt a en a, kan thil sawi chu hria ang pawhin a awmlo.





Ka nuih sak a, pan hnai hrutin a mitah tak en pah chuan "I pasal hian min thlah a lo chak viau zawk thei asin, I duh chuanamaha kha zawt chiang rawh" ka ti let a, hetiang mai maia buai hman ka nih loh vei nen, awmze neilo zeta ami puhna hi palzam mai mai ka tum bik reng renglo.






"An lo thleng" tiin U Rema chu a che phat a,kawngpuia bolero atang chuan lum upa lam tawh tih hriat tak pitar pakhat leh nu valai lam an rawn chhuak a, lehlam atang pa tling pakhat a rawn chhuak ve bawk, an chhungte an nih ka ring.





Ngawi rengin ka luhsan a, a office atang Pu Rina a rawn chhuak ve chiah bawk. Kan in kalpelh lai chuan hmu lo ang hmakin ka awm a, a rimtui in kah chu chiang zetin ka hip lut leh pek, a pa thlawt a ni!




A fal deuha dawhkan kan dah chu an kil ho a, pitar leh Rinsangzuala chu thu tlangin an in ngaina hmel bik khawp mai.




"Tute nge?" Engkimhriata ve duh Mimii chuan a rawn ti nghal sar sar a, Nu Rinengi chuan eitur siam mawlh mawlh pahin "Marini nu leh pate an nih saw, Rinsanga hi chu a nu leh pa te phaiah an awm a, a pi nen chauh sawn an khawsa in ka hria" a lo ti a, ei tur pe tura min tih pawh chuan ka hnial tlat a, ka ai ah Thanpuii ka tir ve leh chhawng.





Rinsangzuala hmel ka hmuh apiang sawn ka mumang kha ka hrechhuak ve ziah a, mumang mai mai mah nise ka awm a nuam thei chuanglo. Hliam nei tur ang tlat te hian ka ngai a, a hmuhloh lam ah chiang deuhin a hmel chu ka lo en leh thin.






"Awi awi, an pirar saw a khirh hmel lutuk, " Thanpui rawn let leh chuan a rawn ti sar sar a, kan thawhna restaurant neitute an ni bawk a, an chanchin chu kan ngaihven khawp mai.




"A khirh dawn tih ka hre sa, ei tur ka chhawp laia min en dan te kha, awi a thip vaet vawt thei" uar zet hian a ti a,kan lo ner khum nang nang ringawt.





" A hau hrep che emaw tia" Mimii'n a tih chuan "Min hauh ngawt chhan tur nei heklo, nei se chuan min hau na ngawt ang, a melh ringawt pawh kha a na ania, a hauh phei chu a na dawn lutuk" pakhat chuan a la ti fan fan a, an inhnial tawk khawp mai.





An chhuah dawn chuan kan lam panin Rinsangzuala a rawn kal a, ka awmna lai ah chuan tihtur dang ka zawng nghal ruai ringawt.



"Ka pi sawn in soup siam kha hawn a duh a, lo pack sak lawk rawh u" a rawn ti a, Nu Rinengi ka va melh tawk tawk a, a thil tih laiah a la buai hmel mai bawk si.




"I hman chuan lo siam lawk mai rawh" tiin keimah chu min rawn en a, bu nghutin ka che nghal sawk sawk. Ka pack fel thlap hnu chuan ngawi rengin a la a, nizan thilte kha chu hria angin a awm leh tawhlo reng reng.




Sana ka en sek a, Pu Rina chu biak loh law law pawi ka ti tawhlo, a remti dawn chuanglo a, tihian a mah ber a chhuak tawh bawk a, a harsa vaklo turah ka ngai.




Nu Rinengi chu haw hma ka dil a, a chhan ka sawilo thung, a lo phal khawp mai, dar 3 rik dawnah Jeremy-an min lo call a, ka hlauh ber a awm chuanglo a ka thaw veng huai thei tak tak.



"Eirawng an bawl tan tawh a, dawrah kawi lawk ang aw" a bike hnunga ka lawn rual chuan a lo ti sup a, MC lamah min tlanpui a, sana dawra min luhpui chu ka hrethiamlo khawp mai.


"I duh ber thlang rawh, ka leisak ang che" a ti sup a, engmah min hrilh lawk bawk silo, hrilh hai deuhin ka ding reng a, "A ngailo" ti mah ila a thu lui tlat bawk si, a tawpah amah bawkin min thlansak leh ta nge nge.






"A ngai kherlo a sin le" inthlahrung deuh hian ka ti sap a, "Ti bo lo la a ni mai" tih pahin ka Sam a tuai zauh a, ka nuih var var rinvawt, dawr atanga kan in zui chhuah ruala ka mi hmuhte vang chuan ka nui tawp chiang lutuk.



"Ehe Jenniferi chu, hna I thawk emaw tih laiin " Marini chuan a ti hlut a, min en dan chu ka hrethiam chiahlo.


"Nia englo ka... "
Pu Rina chu ka melh zawk a, a hmel thutak run chuan sawi tur min ti hrelo zo, engmah hrilhlo in ka chhuak tawp bawk si a, ka thianpa awm lai hi chuan min ban lo se ka ti khawp mai.





"Min dillo in I lo bang hma ve ringawt em ni a?" Marini bawk chuan mei nei zet hian a ti leh a, "Min dil alawm" tia lo chhangtu chu Marini chauhlo, keimah tak pawhin phawk zetin ka en a, ka lungphu rang lutuk vang chuan ka kawr tlang ka hner ngawt ngawt a, chil ka lem zawngin ka hrawk chhung ro rap chu a na thei hial.




"Chuan I lo phal mai maw? En ta che, a len kual mai mai tho hi" a pasal banah chuan vuanin a sawi deuh nak nak a, min ngaina lo sa bawk nen a lungawi lo hi chu awm ka tih pui tho.



"Kal ang" tih pahin min kalpel vut a, min hau miahlo chu ka thawk chhuah pui ham ham mai.



"Kan va in hmu fuh thei ve" Jeremy pawh chuan a ti hap a, dil chu ka dil a, mahse a phallo kha a nia, engtinmah min ti lo chu lawmawm viau mah se ngaihtha taka awm chu a har talh tho.





Jeremy te in kan thlen chuan Bawihbawihi nui ri kan hre hmasa leh ber a, a thianpa te nen khan an lo inkawm nel leh hman viau tawh ani phawt ang, nilo se chuan a nuih dan style hian a nui ngam teuhlo, a thing si.




Eirawng kan bawl zung zung a, Zuala leh Petera te chu an tangkailo dun khawp mai, sitting room ah guitar perhin thiamlo deuhin an zai lung lung reng a, chokaah Nu Puitei ho in eirawng kan bawl thung.





"I nu chanchin te kha ka lo hre thawi ve a Afi, a zia lo hle mai" Nu Puitei chuan a ti hap a, "Nia" ban charha tiin ka nui tawi tak ringawt.





"I pa lah a laktlak tawh mang silo a, I buai thin awm mange aw" a ti leh a, "Buai ve tho, tunah tak phei chuan nupui a rawn hawn a" ka tih chuan phawk ang reng tak hian min en a, nui lui sakin "Amah ang tho mawle, zu in bak thiam an neilo" ka ti a, ka aw ri pawh chu ngaihthlak a nuam viaulo mai thei.





"A zia lo ngawt mai, nau kha I nei a ni lawm ni?" a ti leh zel a, Bawihbawihi chuan nuam a ti chiahlo aniang chhuanlam siamin a salad siam tur nen mipa ho awmnaah a in chawi phei a, gas bulah chawhmeh vil pahin kan ding dun ran thung.





"Aw nei e, a lian ve tawh lutuk" ka ti sap a, "Kan in ah i lo awm ve mai dawn em ni?" fiamthua a tih chua kan han nui leh rih a, ka nau han sawi tak ah chuan ka ngaihtuah ang reng khawp mai.





"Khawiah nge Jeremy hi le" tih pahin ka au a, pawn lam atang min rawn chhang pawr ngang mai. A rawn luh ruala ka nau hmel ka hmu tel ve chu ka meng kawk a, "I hriatchhuah hnuah va hruai rawh min ti dawn tho sia, I sawi hma in ka va hruai anih hi, I lawm awm mange" a lo ti nghal zat a, a sawi dik chiah.




Mahse ka nau hmel chu a dik chiahlo, "Engatinge I hmai hi? School ah in insual leh em ni?" tih pahin ka pan hnai a, a lu a thing ringawt. A mit veilam a duk deuh a, a hmui a vung deuh bawk.




"Lo kal teh" tiin Jeremy chuan min hui zauh a, ka naua chu ka phone pe in Bawihbawihi te awmna lama kal ve tura ka hrilh hnuah Jeremy chu ka zui chhuak a, "A hmai duk chhan kha I hriat pui em?" pawna thutthleng sei an hun ah chuan ka thu thla ve a, "Hria ang" a tih chuan ka melh vat.





"I pa nupui khan fa a nei tih I hriatpui em?" ka mitah tak min rn chung hian a ti sap a, "Engmaw?" ka ti chiam a, ka nui ve tak na in a za thlawtlo.




"I hriat ka ringlo reng a ni, fapa rawlthar tawh a nei anih hmel, a ngeng rual tak tak anih ka ring" a ti leh a, kan tawng ringlo dun na in a thil sawite chu ka hrechiang khawp mai.





"Ka nau hi a khawih tih sawi miah suh" a mita en ran chung chuan ka ti let a, thaw chhuak hakin ka darah min kuah a, "Ka hmu alawm Bawihte" a tih chuan rei tawk thaw tawhlo ang maiin ka thaw chhuak halh!




Ka thin zawn a rawn na ngut ngut a, ka rilru natna ai chuan ka thinrimna chu a nasa zawk daih ang. Awmtei fapa khan ka nau kut a thlak ania, chutih lai chuan ka pa'n engnge a lo tih ve?!







CONT.....
Ads vawi khat click bakah comments kha aw


Show post links
Top

[Ngaia]

MI PASAL


Chapter-10

By Ruati Renthlei



Zanah pawh chuan ka duh leh tum angin ka hmang nuam ve thei tawhlo a, Bawiha hmel ka hmuh apiangin Awmtei fapa in kut a lo thlak tur lai ka mitthla zel a, ka lung a awi thei thlawtlo.




Zana lenchhuah an sawi pawh chuan ka nau chhuan lamin haw mai ka duh thu ka sawi a, Jeremy-an min thlah thlap bawk.




"Luh pui in ngai angem?" kawngka in khar thap chu a melh zawk a, lu thing nar nar pahin "Ngailo ang, nuam deuhin va lengkual vel rawh u" ka ti a, ka nui lui sang tak na in min rawn dinhnaih a, nghet zeta a awmah min kuah betin "I thianpa hi ka awmloh hnu ah pawh chhel deuhin lo awm zel ang che" a ti sup a, a farnu ang maia min ngaihtuah thin vang hi anih ka ring, a bulah chuan ka pangchang thei emai.





"Nangpawh Au thu lo awih ang che aw" tiin ka nau samah chuan a tuai sak zauh a, min rawn en leh in "Naktuk dar 10 am ah ka flight a chhuak dawn a, ka kal hma in dawrah ka rawn hmu zuai ang che" a ti a, ka buk nghat hnu ah a tlan liam lai chu kan thlir leh a, ka nau kut chu nghet zeta kaiin kawngkhar chu ka pawt hawng a, thutthleng seiah ka pa a lo mu zuar a, min rawn melh zawkin a TV en lai bawk chu a en leh a,

"Awmtei fapa pawh kan hnenah a rawn awm ve tawh dawn kha" tiin ka zawh ngai lovin a lo sawi nghal a, "Tu thu in?" ka tih chuan min lo en leh rang khawp mai.




"Tu thu in nge a lo awm ve ringawt a? Neih em pawh in la innei lo va, Awmtei nen chauha chawm pawh in harsat vei nen a fapa lehzel awmpui i lo tum amaw?" ka ti nghal hlak hlak a, "Aw a nu ber ka neih chuan a fapa pawh a rawn awm ve a ngai alawm" a ti dam vei thluam a, ka nuih a ti za zawk.





"An chhungte bulah a awm thei tho ang chu,, heta a rawn awm hmaa a awmna thin ah te" ka tih leh laiin an nufa chuan pindan atang an rawn in zui chhuak a, min rawn melh rum leh pek khawp mai.




"Min lo va han huphurh thin awm em em ve Afer, I hmuh hma tangin ka fapa i haw nghal hlur ringawt mai" a rawn ti nghal tan tan a, "Ka nau hmai hi han en la, Tu pawi mah sawi ngailo ka nau hian a vawi khat hmuh naah i fapa kut a tuar nghal ania" tiin ka ner khum sak a, en reng reng pawhin a fapa chu a ngeng tih a hriat reng, ka nau aiin a upat hmel fe tawh a, engkim hrethiam rual a ni tawh bawk ang, ka thil sawi leh tawngkam te vang hian min haw hle bawkin ka ring...





"Pawi sawi ngai lo te i tih vei, a awm mai mai lai ka fapa hian kut a thlak ngawt bik lo aw" pawr zet hian a rawn ti ve leh a, Pa ber hmaah kan in din chilh ran mai.




Bawiha chu en in thil thlen dan dik tak ka zawt a, "Ka choco-pie ei lai min laksak a tum a" a tih chuan ihe lovin ka awih nghal hmak, he naupang hian a thil ei lai laksak a tum a, ka nau hian a lo dang ve tihna a ni mai.




"I fapa hi mi thil neih laksak tur in I zirtir thin em ni a? In nufa khan hre rawh u, he inchhungah hian in awm ve ani mai thei, mahse keimah emaw, ka nau hi in kut hmawr pawhin min tawk hlek suh ang che u, kan thil neih leh kan thuamhnaw tiamin" ka ti fak fak a, ka pa'n min rawn khap chu ka lo nuih pui hak ringawt.




"Nangpawh hi tullo a I fapa kut a thlak lai khan eng nge maw I lo tih ni? Ni tak, che thei hauhlo in I rui thle leh bur a niang chu mawle, fapa te thlavang pawh hauh theilo tur khawpa han ruih thin mai chu le'h" tiin Pa anihna chu ngainep zet hian ka tih khum a, "Lalrinnung" ti hlukin a thutna atang chuan a rawn ding leh hluai tawh.





"He inchhunga thu neitu chu keimah ka ni, I duh duhin min tawngkhum hlek suh, ro chu ka rel mai ang" a ti khur khur a, ka engahmah a thawk der silo.





"I inchhung chu I enkawl zo hle mai" ti hmakin ka nau chu pindanah ka kailut a, chhungkua pawh kan anglo, kan inchhung hi chu hremhmun ai pawhin a hrehawm nep bik chuanglo ang!




"A u?"
Ka nau chu ka mutpui a, ka phone en ran pah chuan "Umm" ka ti mai a, "Hmun danga awm daih ka chak" a tih chuan ka melh rang khawp mai.




"Engatinge?" tia ka zawh chuan thaw deuh hakin ka kawng a kuahna chu a ti nghet sauh a, "Kan in hi a nuamlo, apa a sual bawk si" a ti tiau a, rilru dawih chi anih avangin tah te hi a awl Sam a, a rilru no lutuk hi kan buai phah fo reng ani.





A samah chuan ka chul sak hliau hliau a, "Awmna tur dang ka zawng dawn alawm, ka hmuh velah kan insawn chhuak daih dawn nia" ka ti sap a, a mutthilh hnu ah pawh ka la meng kar.

Ka nau hlimna hi ka duh ber a, chu chu he inchhungah hi chuan a hmu ngai dawnlo, ka ngaihtiah ngial hnuah pawh insawn chhuah mai bak chu tih theih vak a awmin ka hrelo, hna ka neih chhung hi chuan ka nau chu ka chawm zo em em ang!





**



"Sangpui nangpawh, I tlangval tawh a, tha tak in awm tur, naute duat nachang te I hria ang a" zing kara ka pa thil sawi chu ka bengkhawn teh chiamlo, Awmtei'n eirawng a lo bawl ve teh mial a, tukin chu keimah ber hi ka tho tlai, hmai phih turin bathroom lamah ka lut tlang a.




"Zilh vak duh suh, naupan lai atanga zilh loh fa tih hriat rengte chu I zilh fing tawh teuhlo mai" pindana ka luh dawnah chuan ka ti leh hram a, Awmtei ang ri chu engatan mah ka tilo.





Ka naua uniform chu ka nawhsak leh thlap a, "Min lo nawh ve" tih paha Awmtei fapa Sangpuia'n a form a rawn theh thlak ve rual chuan ka lo nui hul hak a, naupangchhia anih tawhloh avangin dim ka tum biklo, an nufa hian ka haw hluah hluah tih hi hre tawp rawh se.

"I lian tawh a, nangmahin nawt ve mai rawh" ti hmakin ka thawh San a, chaw ei naah Awmtei chuan ka pa bulah a sawi leh hram tho.



Hei tak hi ania mak ka tih thin chu, ka awmloh laiin min relin min sawisel bawrh bawrh se chuan ka hrethiam a, ka awm lai ngeia a sawi thin te hi a sual thlak ka ti ngawih ngawih.






"Nangpawh chu lo nawhsak ve mai tur che alawm" ka pa'n a tih chuan ka ner khum nang a, "Hna kal ka ngai ve tho a, ka hman biklo, bakah a lian tawh a, hmeithai rai rual zet tawh chuan am ah a in buaipui thei tur ah ka ngai" ka ti kher a, high school kal lai vel anih ka ring a, heti khawpa ka huatna ka tih lan hnu pawha min la tir ngam te kha a mak zawk ngawt alawm, a nu siar!





Nidang zawng aiin in atang ka chhuak hma a, nimin thil thleng vel vang khan hnathawh chu ka phurlo viau thung.


Rinsangzuala kha a ngawi ngul tak naa, ka chungah a thinrim leh viau tho in ka ring, zin daih se ka ti e...




"Hello hello"
Bolero glass chu down in Remlalfaka chu a rawn nui vur vur a, ka hmu thut chu ka hamhaih letling zawk.




Tawi te in ka nuih suk ringawt a, "Lo lut rawh, keipawh zing chaw ei tura lo kal ka tum" zangkhai vah hian a ti a, mahse hnaih vakloh hi ka duh ber thung.




"Chaw kan zuar hleinem" ka ti fiamthu a, za vaklo in ka nui lui hak hak mai.


"Lo lut mai mai teh" a tih tlat avangin bet lo deuhin ka thu lut ve a, "I van hma ve" a tih chuan "Nia" tih zawngin ka chhang a, "Bialpa I nei em khah?" a tih chuan ka meng phawk ngang mai, a nui zui hawk hawk tak na in ka chhang lem lo a, ani pawhin min zawt zui chuanglo.




Kan pahniha kan in zui lut chu kil khata thingpui in pahin Rinsangzuala chuan min lo en run a, rei pawh en lovin inthlak tur in ka kal tlang a, kal hma ka in tih ve tehreng nen ani pawh chu a va han kal hma teh vut ve mawle.




"Awi awi U Rema a lo kal ania, keima chanpual anih saw, tuman min lo kal khalh suh u" Mimii rawn thleng chuan a rawn ti nghal zat zat a, kan lo nuih liam ringawt. A sawi ang tak tak in a in thlak zawhah a va pan nghal chat a, reilo te ah Jeremy a rawn thleng ve nghal mai bawk.




"Thingpui I in hman em?" ka tih chuan lu a thing a, "Lo kal lawk teh" tih paha ka ban rek rawn vuanin ka sana bun a hmuh vang chu nge a nui pah suk a, mi tam vak lohna hmuna min hruai hnu chuan thaw chhuak hawkin min hmernachu a ti nghet salh a, midang mitmei ven ka ngaih avangin ka hawi kual zawk zawk reng thung.




"Ka thlen velah ka lo be dawn che nia, chhel deuhin lo awm la, lo tuar tang tang ang che aw Bawihte" a ti dam vei thlup a, min naupangchhe chei leh lutuk chu ka haw lek lek zawk.




"Chhel viau lo ila chuan ka in khai hlum daih tawh ang chu" ka lo ti nang nang a, ka fiamthu tih hria in a ni pawh a nui mai a, thil dang sawi tuma a ang leh zuau tiha rawn tawng khalh Tu vang chuan mit chhingin ka lo thaw hak a, a rimtui inkah atang chuan a hmel hmu miahlo mah ila tunge anih ka hrechiang lutuk ringawt.




"In ding fal rei deuh" a rawn ti thum dut a, ka hawi chhuah rualin a mitmeng nelawm loh zet nen chuan kan in melh fuh nghal siah a, ka hawi sawn rang lutuk.



"Thil pawimawh" Jeremy chuan a lo ti ve nghut a, "A work hour loh hun ah sawi fel mai ula a that ka ring, I hna va thawk rawh Jennifer" tiin keimah chu min rawn en a, ka boss anih miau avangin ka hnial ngam der bawk silo, bakah lo ngam pawh ni ila helai hmunah hi chuan mi mitmei ven tur a tam hrim hrim.





"Kal rawh, keipawh Airport ah ka tlang ang" Jeremy chuan a rawn ti sup a, a bula ding pa chu melh zawkin min rawn din hnaih suah a, ka darah dawmin "Ka lo bia ang che, fimkhur la" a tih hnuah ka chhip a tuai leh zauh a, a chhuak zui nghal bawk.




Rum theih tawpa Rinsangzuala ka melh hnu chuan kal mai ka tum chu ka darah lo man in min pawt her leh lawp a, "Engnge?" ka ti hlar ringawt.




"Sawi dun tur kan nei" a tih chuan thaw hakin "Eng?" ka ti leh hmuk a, "Niminah ka thu lovin I bang hma" a tih chuan ka dang leh der si.

"Khate chu Nu Rinengi ka hrilh vek alawn, darkar khat bakin ka haw hma chuanlo" zawite tak tak hian ka ti niah niah a, thiamthu sawi tur ka neilo leh lutuk chu a hrehawm zawk.




"Chhuah ka ngai a, tlai lamah ka rawn let chauh ang, I haw hma in office ah min rawn hmu ang che" a tih hnu ah min kalsan a, ka thaw chhuak ham ham ringawt.




Nilengin ka awm a nuamlo a, ka hna hi ka chan mai ang tih ka hlau bawk si.


"In luah tur tha deuh te hi in hrelo maw?" kan chhunchawlh laiin ka thawhpui te chu ka zawt druh thut a, a chhan min zawt nghal sup sup mai.


"Independent deuha awm ka duh" fiamthua ka tih chuan engah vak min ngaihsak hlawm lo.


Thanpuii chuan "Kan in hnuai chu a ruak a, mahse in awm theilo ang, sazu an tam lutuk" a ti a, beisei a bo ve khawp mai.





"Min lo ngaihtuah pui ve ula" ka tih chuan an bu nghat nghat hlawm a, kan sawi zawm tawh lem lo.


"Enteh Afi, zinga I bialpa nen in din reng lai khan U Rema'n a lo en ve reng cheu a, ka hmu vek alawm, a star che amawn le" Mimii chuan a rawn ti pek a, "Teuhlo lutuk" ka lo ti hluk chu phawk deuh hian min en a, "Min star ngawtna chhan tur a nei lo ve e, bakah a lerh hmel si" ka ti leh a, "A star che chuan ka kuk fawk ang che maw le" min ti anih chu.. Ka ner khum nawng nawng a, min thlah tih phei chu hria se min haw leh zual dawn lutuk ringawt.





Chutah nui kur kur chung hian "I bialpa Jeremy pawh kha a chhe lo" a ti leh a, ka lo thaw hak mai,chhelo buai in a buai tak tak henu hi chu "Ka bialpa emaw hi in ti vek hlawm a, ka thianpa anihkha, thian satliah nilo, thian tha over ang hi" uar zet hian ka ti a, "Ehhh thian satliah nilo" tiin min la chhaih zui hram a, ka hnial peih tawhlo.







"In veng lamah kual ka tum asin, I lo chuang ve nghal duh em?" Thanpuii chuan a bag hrui siam tha mawlh mawlh pah hian a ti a, "Ngawrawh Pu in min ko a" ka tih chuan a rawn hawi phawk nasa mai.




A chhan min zawh chuan ka hmui ti sawi zeuhin "Min hau leh dawn aniang chu, nimin tlaia ka haw hma khan MC ah kan in hmu hlawl alawm" ka ti nang nang a, "A buaithlak thei" ti hapin min chhuahsan a, kan tawng hre pha vektu Nu Rinengi chuan min rawn kheuh zeuhin "Rinsanga hian a ngaina hmel riau che" a ti leh tawh a, a ni leh nilo angin a nui var var leh nghal, hetiang lam a sawi te chuan a thutak thei hle si a.


"Min ngaina lo leh lutuk zawk anih hi, ka ning ania" ka ti hap a, "Hei a Pi khan soup kha a duh leh a, keng lut nghal mai teh, vawiin atangin chef thar a rawn thawk ve tawh dawn a, zan lamah chuan ka awl ve tawh ang" tih pahin a soup pack sa chu min hmehbel nghal chawt a, siam ve thei vek mah ila Nu Rinengi hi a senior ber tawh a, engkim ah kan ring a, chhun zan zawma thawh reng chu atan pawh a hahthlak ve ngawt ang.





Naupang an rawn thleng tawh a, phurlo deuhin soup khai chung chuan office kawngkhar chu ka kik dat dat a, chhunglam atang "Lo lut rawh" a rawn tih chuan ka hawng a, amah chauhin a awm emaw tih laiin Marini a lo thu ve reng a, min melh ralh hnuah a hawisawn leh nghal daih bawk.



"Lo va haw rawh, zanin chu ka lo haw tlai ang" tiin a nupui chu a melh zawk a, "Ka nghak thei che ka tih kha, agency lamah phei ve leh tho ka ngai dawn a, I rualin ka let mai ang" a tih lai te chuan kil khatah ka la ding zum reng a.


"Motor I keng a ni lawm ni, kan haw rual thei dawn chuanglo, lo va kal hmasa rawh' pakhat chuan a ti leh nghut a, lungawilo tih hriat zetin Marini chu a tho a, min kal pelh dawnah ka dar a rawn nek kher lehnghal.





"Thu rawh" a ti leh tawp a, a dawhkana ka thil khai nghat pah chuan a hmaah ka thu ve a, "Nu Rinengi'n min rawn tir a, I pi ta tur" ka ti sap a, a pen hum lai chu dawhkanah dah in chiang zet hian min en a, na deuhin min tawngkhum leh dawn emaw ka tih laiin "Engtinnge ka hauh ang che" a ti mauh mai.





"Engmaw?" ka ti let he haw a, a mithmul a lo kan uk duh lek chauh.


"A.. Min hau lo mai la" tih pahin ka nuih tlawn titih a, "Ka nupui awm lai chuan ka haulo reng che alawm" a ti sup a, "Tinge?" ka lo ti leh hmanhmawh.
"A nuihzat ang che tih ka hlau" a lo ti leh mai a, min la en reng bawk si, ka biang a rawn sa nghal pup pup a, ka dang a ro leh vek tawh bawk.




"Sawi duh I nei em?" a lo ti leh a, "Ka tihpalh" ka ti ta ringawt. A nui ri suk chu phawk deuh hian ka en a, a hmui chu a chip leh rang viau mai.




"I kal thei e, mahse thleng nawn tawh suh se" a tih chuan bu nghatin ka thutna atang ka ding a, "I bialpa kha rawn hruai tawhlo bawk la" a tih leh chuan ka che tawp phat a, ka melh vak ringawt.



"Ka bialpa a ni hleinem" ka ti hap a, mak deuh maiin a mitmeng danglam zawk chu ka hrethiam a, ka ngaihbel nge ka hrelo na in hahdam sawt hmel te pawh a pu alawm le...


"Kal tawh rawh" ka din reng avang chuan a ti leh sup a, a office ka chhuahsan chiah chu thawk ka la hluai a, ka veng hawk a ni ber.




Ka bag la in haw tur in ka chhuak nghal a, lawm loha ka nui leh ringawt thin chu duh lo mah ila ka hriatloh laiin ka lo nui leh thin.


Min hau in min vin hluk hluk thin mah se a tul hun ah chuan min pui leh mai a, tuna ka hna hi ama min pek liau liau a ni bawk a, engpawh chu ni se a nupui awm laia min hau duhlo kha ka lawm a, a puitlinna ti lang chiangtu a ni ve pakhat bawkin ka hria. A hnuaia hnathawk ka nih avanga min en hniamna leh hmuhsitrna a nei ngailo a, min vau ve zeuh zeuh tih loh chu, ngei viau thin mah ila a awm lo ang tih hi ka hlau!




Ka tlai deuh tawh avangin ka pen hlawk hlawk a, haw lama taxi hman vel hi pawisa ka ui avangin ka duh chiah bawk silo, a hahthlak ve thin khawp mai.




"Afi.. "
Ka ding chawt a, ka vei lam atanga min rawn ko tu aw chu rei tak chhung hre tawhlo mah ila tunge anih chiang tak in ka la hria a ni.
Ka kut chu ka hum ruh vak a, zawi muangin ka in her riai riai bawk.
Dawr kawtah chuan a lo ding ngei a, a dawldangin a cher hle a, en mai pawhin ei leh in a hmu tha tawklo tih a hriat reng mai.




"Nu"
Ka phun ri chu a hre pha kher angem ka hrelo, min rawn pan hnai a, a kut cher riaka ka kut a rawn vawn rual chuan ka hit chhawk thei hialin ka hria!




Ka awmdan chu ka sawi thiamlo, ka nun ruak lutuk kha eng emaw hian a rawn hnawh phui nghal mup ni ber hian ka hria a, Nu kutin min han deh meuh chuan kan tuiral zawih zawih lo chauh chu anih hi!





"Nu" ka ti nawn leh a,khawlaiah kan awm tih lam ka ngaihtuah tawhlo, "Ka fanu" tiin min kuah a, nghet zetin kan in kuah hle hle ringawt.





"Engtinnge hetah i awm thut theih a? I damlo em ni? I va cher em em ve" ka ti nghal mawlh mawlh a, min kalsan vang khan ka ngaidam ta tihna a ni lo a, ka la haw lutuk mah se a landan hian ka huatna te tihlan a rem ti lo ni maiin ka hria.



"Ka tha" a ti ve tak na in a thil sawi chu mi â ber pawhin an awih sak lovang.



"Lo kal teh" tih pahin dawr sira inchung lam chhohna step an siam ah chuan ka thutpui a, ka nau ka ngaihtuah avangin thenawm Nu Siami ka call hmasa a, ka haw tlai tur thu leh Bawiha min lo ngaihven sak tura ka chah chuan "Aw aw aw" a rawn tia, thildang ka sawi hma in a off nghal daih bawk.




Ka phone hum ran chung chuan ka thaw chhuak hak a, "I dam tha em bawihte? I nau engnge a an?"tia ka nu'n min zawh chuan "Kan tha lutuk, nangmah zawk hi I tha lo Nu, I awmna chin engmah kan hre ngailo a, engnge I tih thin tih te pawh engmah kan hrelo, tunah kan in hnu thut a, I damlo hmel bawk si" ka ti a, ka sawi leh teuh hman tawh.



"Engkim min hrilh rawh" ngenngawl deuha ka tih leh hnu chuan a mit chhingin a bu ve nghat a, a kut hum reng chung chuan a sawi tur chu ka lo ngaichang ran a.










CONT....


(Changtunu hi a mizia leh tawngkam te a fel teh hawrhlo kan tih kha aw)


Show post links
Top

[Ngaia]

MI PASAL




Chapter-11


By Ruati Renthlei



"Ka awmloh hnu khan engtinnge in awm zel tih hriat tumin vawi tam tak biak che ka tum thin a, mahse ka be tlang thei ngailo che" a tih chuan "Ka sim card ka thlak daih alawm" ka lo ti vat a, kan hma lawka mihring leh motor chi hrang hrang in sul pel zut zut te chu uluk deuh hian a en reng a, "Ka tihpalh Bawihte" zawite tak tak hian a ti sup a, "Nu?" ka lo ti tiau tawh.





"Tunah chuan I puitling ve tak tak tawh a, engkim hriat ve hi I phu tawh ani tiraw" tiin min rawn en a, "Sawi rawh, engkim sawi vek rawh" tih pahin a kut ka vawnna chu ka ti nghet sauh sauh a.




"Ka duh vang renga kalsan cheu ka ni lo asin bawihte, I pa hian leiba tam tak a nei a, kan khawsak a harsa in engtikawng mahin a ba te kha kan rul seng dawn silo a" a tih lai chuan lo pawt chat in "Ka pa hian a harlh che em ni?" ka ti a, ka awm chhung tawt tun vang chuan ka thaw chhuak leh halh thin bawk.




A mit meng dul zet chuan min en leh vang vang thin a, "A leibatna pa hnenah khan min hruai a, a zui haw ve a remti tawhlo, I pa chuan pawisa ka ngaihtuah anga, ka rawn hruai leh vat ang che min ti a, mahse tun thlengin a hmel vawi khat pawh ka hmu leh tawhlo" a ti a, a mittui chu dang zo lo in a hmai hup chuan a tap chhuak hawk a, rilru leh ngaihtuahna a chawmawlh vek a, ka thu hriat in min thawng lutuk chu sawi hmasak ber tur pawh ka hrelo.




Ka nu kut chu ka hum ngawt ngawt a, a nawmsakna tura min kalsan emaw tiin tawngkam chhe tinrengin A thla kha anchhia ka lawh thin a, nu tenawm leh hmangaihma nei miahlo angah ka lo ngai tih anih kha!





"A tawk tawh rih e" tiin ka phun chhuak sap a, "Nu, tunah khawiah nge I awm?" tia ka zawh chuan a thian nu te ina a khawsak ve rih thu min hrilh a, hruai haw ka tum chu a duh tlatlo.





Ka nawr lui duh biklo a, hriat duh tam tak la nei rih mah ila tun atan chuan min thawng thut thei thil hriat belh ka duh tawh rihlo, kan pahnih hian rilru fim kan hman theih nan hun thawl kan la mamawh ve rih a ni.






"Naktukah he lai hmunah hian in hmu leh ang aw, phone I nei em?" ka tih chuan lu a lo thing mai a, chungte mai mai chuan ka tah a ti chhuak tun tawh. Kum upa tak a la ni lo a, phone neiloa leng vel tur ah ka beisei hauhlo bawk, chutah a kum aiin a lang upa daih zawk bawk a.




Ka pawisa neih ang ang chu a kutah ka bel chawt a, "Naktukah chuan lo awm ngei ngei rawh" ti nawn leh in kan in thlah a, ka mittui ti tla lo tur chuan ka in sum tang tang bawk.





Nu Siami te in ah ka lut hmasa a, Bawiha nen chaw ei pahin eng eng emaw hi an lo in hrilh malh malh a, Nu Siami'n min hmuh rual chuan "Ka rin ai I rawn haw hma leh lawi a, lo ei ve nghal mai rawh" tih pahin dawhkan hnuaia stool chu a ke in a rawn tlawh chhuak a, "Chaw ei pawh ka chaklo" tih pahin ka nau awmna lam chu ka pan a, "I lo fel em?" tiin a lu ah ka tuai sak zauh a, a buk nghat hnu ah "Homework pawh keimahin ka ziak zo vek tawh" a lo ti a, a in ti thei ve hmel khawp mai.





"Ka va kal chuan a homework a lo ziak malh malh a, Awmtei fapa khan ring mangkhengin TV a lo en a, a nu a awmlo bawka tiin ka off sak hmak alawm, min melh run run lehnghal a, ka ngei ania" Nu Siami chuan a ti nghal hlaih hlaih a, "A that chu" ti liam puatin in chhung chu ka thlek kual a.




"Khawiahnge U Chhuahpuia te?" ka tih rualin a antui hawp a hak zui bawrh bawrh a, a hawp rik leh hrawih hnu ah "Nichin deuh khan an chhuak ta anih kha" a tih chuan ka meng phawk khawp mai.




"Ngatinge?" ka ti he haw a, chhuak tur in invau ve reng thin mah se an chhuak ngai bik chuanglo a, heti teh thuta a insawn chhuah tir leh si hi a mak ve reng.




"Lalchhuahpuia rui pawh tih tawh nak alaiin, a nupui leh zelin zu rim a rawn nam haw a, ka hnawtchhuak anih kha, ka dawh peih tawhlo, ka hne zozai lutuk" a ti hlak hlak a, chaw te chu a'n bar leh tak na in a chaw ei a tui hmel tawhlo khawp mai.
"A va han zia lo" ka lo ti hap a, sawi tur vak pawh ka hrelo. "Kuri lah hi a fel lah in hneawm khawpin a fel a, ala naupan tehlul nen a fing phakar bawk si, thatchhe bawk, zing thawh bak thawh peih a neilo, rawn haw tawh suh se, mo te rel hi ka thil duhloh ber a nia, mah se ka tlin biklo, Lalnguri bulah awm se la, zu chhuang khu vut vut se an in hmeh tawk chiah" a ti leh hrep a, min hrilh nge amah leh amah a in bia pawh ka hrelo.




Ka nu chungchang chu engmah ka sawi ri duhlo a, vengchhung mite chuan keimah ang tho khan mipa dang um in min kalsan emaw an ti vek a, sawi pawh ni ila an awih rih chuanglo ang, a tul anih leh nakinah ka hrilh chauh ang.





Ka nau chaw ei chu ka nghak ta law law a, Nu Siami'n "Min riahpui rawh se" a ti tak na in a la riak hrang ngawi bawk silo nen kan in zui haw ta tho a, rilru kaptu ka nei tun bawk nen ka nau min biakna chu ka lo hrelo leh thin.




Awmtei chu thutthleng seiah thatchhe zeta lo thu ar ar pahin zozial a lo pak khu hlat hlat a, tui dehna ah thleng silloh in a la awm hnur bawk.


"Khawiah nge ka pa?" ka tih chuan min melh ralh pahin "A mu" a ti a, thim hlima a mut danah a rui a ni khawp ang.




Fim taka in biak ka duh avangin ka kaitho duhlo a, ka inbual zawhah pawh Awmtei chu thutthlengah a lo la mu zal reng a, "Thleng te saw sil ta che, I awmdan hmasa anga tawp taka rawn khawsak tum miah suh" ka ti hlak a, "Mi te chu I vau ve deuh em mawni?" a tih chuan ner sawkin "A nihna ka sawi anih chu, ka nu ka rawn hruai haw leh anih vaih chuan ka sawi ngai lovin ka pa hian a hnawtchhuak val val ang che" uar zet hian ka ti leh a, a mitmenga hlauhthawnna te chu min ti hlim tlat.





"I nu te chuan nangpawh a duhlo che" min tih khum ve siah a, ngeiawm zet hian a nui tel kher bawk.



"Kan la hria ang chu, ka pa hian hlim taka a siam che in beisei suh, pawisa a neilo" ka tih hmak hnu ah pindanah ka luhsan a, ka naua chu lehkha a chhiar emaw tih laiin a lo muhil leh tawh.





Jeremy hnen atang call ka dawng a, khuma mut that sat sat pahin ka chhang a, "Kan thlen hlimah ka lo be hmanlo che a, i mu tawh em?" a rawn ti a, rei fe kan in biak hnu ah signal a rawn chhe ta daih a, a tawng ka hriat theih reng laiin ka tawng a hre ve theilo aniang, a rawn 'hello' tluk tluk a, ka off ta ringawt.




Ka ngaihtuahna chu ka nu ngawtin a luah a, tih theih a la vang rih bawk si. Naktukah chiang deuha biak ka tum anga, a tul anih phawt chuan aman duhlo mah se ka hruai haw leh mai ang, awmna tur mumal neilo a mi ina awm ringawt tur in ka phal reng reng lo.





*I mu tawh em?* tih message ka dawnna hming leh dp chu ka en nawn leh thin a, ka beisei loh lutuk hnen atang anih vang aniang ka lungphu te a rang vel.




*Mu chiah* tiin ka thawn let a, "I lung a leng em?" a rawn ti leh a, hepa hian eng nge maw a hriat ni.


*Lunglenna chhan tur a awm em?* ka ti let ve thung a, rawn sawi ho viau mah se Rinsangzuala hnen atang anih vang aniang ka message type te chu ka khur titih a,ka mut hmunah ka tang teuh ringawt.



*Thla a bial* tiin a bulah thla bial lem a rawn dah ve ngei a, nui ver verin min rawn biak tan dan te chu ka chhiar let leh vel a, kan la in be tawi ropui bawk si.




*Ka lo hre miahlo* ka tih chuan a seen nghal a, ka in rin hma in a call rawn lut nghal a, khum lu lam ngheng chuan ka thu ngil nghal awt mai.




Ka chhang ang nge chhang lo ang tia ka in hnial buai laiin a ring tawp ta daih a, mahse a rawn call nawn leh nghal zat tho.



"Hello" zawi deuh hlek hian ka ti sap a, ka aw khur deuh chu ka duhlo viau mai. Lehlam atang chuan "I zak ami?" a rawn ti nghal thawr a, "Teuhlo" ka tih chuan a nui ri suk ka hre zui a, a hmel landan tur zawng zawng nen ka mitthla nghal vek thei!



"I buai lo maw?" a rawn ti nawn leh sup a, a aw te chu ni dang zawnv aiin a dam zawkin ka hria, thu ho deuh deuh sawia kan in biak ve reng hnu ah "Harsatna I nei em?" a rawn ti thum deuh dut a, kan thil sawi lai nen a in remlo lutuk bawk nen "Engmaw?" ka lo ti leh ha a, "Harsatna, midang hriatpui loha rilru hahna ang chi hi" a rawn ti leh a, "Chitiang te chu tupawn an nei ang chu" ka lo ti nang nang.





"Midang aiin I ngah hmel bik a?" a rawn ti leh hram a, a sawi diklo chuanglo. Ka nu chanchin, keimah chauha ka pai ruk rengte chu hrilh ka chak tlat a, mahse chitiang tur em chuan ka ring ngam bik bawk silo.



"Tinge min zawh a?" ka ti let ta daih a, "Min hrilh duh tak in" a lo ti liam leh mai a, "Ka ring ngam teuhlo che" ka tih chuan za vak tih hriat deuh hian a nui hak a, sawi tur a hre tawh biklo a niang a ngawi daih a, ka in thiamlo leh deuh chuan "I rin tlak viau chuan ka la hrilh ve ang che" ka ti leh hnuhnawh a, Marini aw ni awm tak ka hriat rual chuan "Naktukah kan in hmu dawn nia" ti supina off zui nghal a, ka thaw chhuak hak mai.




Tikhan mi pasal nen kan in be ve reng chu ania, a chhan ka hrelo a nupui aw ka hriat rual khan ka rilru a na deuh tlat a, ka thik ti dawn ila thik ngawt na chhan tur ka nei derlo, ka neilo mai pawh ni lovin mi pasal ngaizawng duh tur khawpa hniamah ka la in dah chhin ngailo a, ka duhlo bawk.





Mahse... Marini pasal hi ka nunah a mikhual lo riau a, kan mutdun tawh vang kha nge chu ka hre biklo le,, a ngaihsak nih nuam ka ti a, aw,, harsatna ka neih leh neihloh min zawh ringawt pawhin a laka feeling ka neihzia in hre thei tur khawpin keimah ah danglam a siam ania..!
Mi pasal zuna ka uai loh nan ka in thunun hram hram a ngai dawn anih hi!






***



"Ka pa a la tho lo?"
Flask atang thingpui ka thli chhuak a, ka zawhna chu hria ang pawn a awmlo. Ka be zui duh biklo a, ka nu hnen atanga thil kimchang taka ka hriat vek hma chuan ka pa chu be rihlo mah ila a pawi rih vak chuanglo ang.





"In awm maw Afer?" tiin Sir Tetea a rawn lang leh hlawl a, a lo kal chhan chu hrilh nawn ka ngailo nasa mai.




Awmtei chu melh zawkin ka pa kaitho turin ka ti a, pindan lam a pan ve nghal mai bawk. Hmai mawm hlup in ka pa nen an rawn in zui chhuak leh a, Sir Tetea chu hmuh a in ring biklo aniang a meng buai nghal tap mai.



"Ekhai a,, Pu Muanpuia chu I va mutui awm ve?" tiin pangai tak in a lo fiam a, phak chualin ka pa chu a la hawi vual vual tho.





Pawisa chungchang an sawi kai chiah chu ka pa'n min rawn melh nghal vat a, ka hawi San hmak thung.

"A rang lamin ka lo ngaihtuah anga, kartawpah chuan kan pe hman em em ang che u" tiin an in thlah a, amah ringawt chuan kartawpah a pe hman teuhlo mai.





Inchhunga a rawn luh leh hnua thutthlenga thu ka nau chu a samah a tuai sak zauh a, ka thutna bulah chuan rawn dingin "Engtinnge maw kan han tih dawn le?" A ti deuh hap a, "Hna thawk rawh ka ti reng che lawm" ka lo ti hmak thung.




"Hna te chu a zawng ve alawm, chuti maia awlsama hmuh theih a ni lo" tiin Awmtei a lo inrawlh a, "Huhh a nih vel chu a" ti hlakin ka thutna atang chuan ka tho a, rawng pawh bawlpui lovin thenawmah ka lensan a, a lo phun nasa leh viau mai thei a ni.





*In kawmchhakah ka awm*
Ka insiam laiin Rinsangzuala message ka dawng leh nawlh a, tullo lutuk in ka lungphu a rang leh nghal vak tawh.


Reply lemlo in in atang ka chhuak nghal a, kan in chhak kawngpui ah a car nghengin a lo ding leh run tawh tak tak.




"Engnge kan veng lamah i rawn tih a?" ka tih chuan "I hriat ve a ngailo" a ti deuh nghut a, "Lo lut rawh" tih pahin amah ber chu a thu lut nghal nulh bawk.




"I nupuiin min phur tih a hriat chuan a lungawilo leh viau dawn ania" engine a tih nun rual chuan ka ti sap a, "I bulah sawi a nei em ni?" ti nghutin min en run a, "Neilo, kal mai mai teh" ti hlakin ka sana bun lai chu ka melh pah zawk a, ka nu ka la hre ve reng mai.





"Kan veng pelh deuha thlang lama hardware dawr lianpui kha I hria em? Tah khan ka chhuk ang aw" ka ti a, "Engvangin?" a lo ti ve sup.




"Ka nu ka hmu lawk dawn" ka tih chuan min en reng tih hre mah ila hmalam ka en lui ve tlat a, "Ka hriat dan chuan I nu in pasal dang a nei" a ti chiah chu ka melh leh ta nge nge.



"Engtinnge I hriat?" ka tih chuan a hmui ti sawi zeuhin "Ka chik che" a ti leh tawp a, a hma pawh khan a sawi tawh tak.




Nimin tlaia kan thutna ah chiah khan ka nu chu a lo thu leh a, "Heta tang chuan ke in ka lo kal tawh mai ang, ka tlai deuh pawn min hrethiam rawh aw" ka tih chuan a lo bu ve nghut a, motor atanga chhuakin ka nu awmna lam chu ka pan nghal a.




Min lo nuih lui hram hram tak na in a hmelah chuan a chau ngawih ngawih tih a hriat a, "I chau em? Chaw te I ei tawh em?" tiin a hmaah chuan ka thu hniam a, "Tunge lo thlah Tu che saw Bawihte?" Tiin ka hnung lam chu a lo thlek zawk a, a kal leh nghal mai dawn emaw ka tih laiin a lo la ding ve reng anih saw.



"Ka hnathawhna restaurant neitu anih saw" ti liam puatin "Chaw chu I ei tawh em?" ka ti nawn leh a, a ei tawh thu sawi mah se eitur mumal ei lo hmel a la pu reng tho.




"Nu, damdawiinah in entir ang aw, ka hruai ang che, damdawi leh taksa ti chak thei vitamin te pawh kan lei nghal dawn nia" ka ti leh mawlh mawlh a, min hnial a tum tih hria in "I hriselna hi a pawimawh ber rih, in luah tur ka zawng mek a, ka hmuh velah ka bulah I awm dawn nia" ka ti a, pu Rina awmna lam chu thlek leh zawkin a la awm tih ka hriat chuan ka pan hnai nghal vat a, "Vawiin chu ka chawl mai thei angem le? Ka nu saw damdawiinah kalpui ka duh a" inthlahrung ang reng deuh hian ka ti sap a, a phal pawh ka rin chiahloh laiin "Ka lo hruai ang che u" a ti sup a, ka melh kawk mai.



"A,, a ngailo, taxi a tam alawm" ka ti ve tak na in amah zawk a rawn chhuak a, ka nu awmna lam a pan nghal vut chu a hnungah ka zui ve nghal a, ka tih ang chiah khan ka nu hmaah a thu hniam ve a, "Rinsangzuala ka nia, Aferi thianpa" ti supin ka nu chu a chibai a, tunah khan thianpa tih a sawi chiang mai, hepa hian engnge maw a hriat le...





"Damdawiinah chuan ka hruai ang che u" tiin keimah zawk chu min rawn melh leh zawk a,ka buk nghat hnuah ka nu chu dim deuhin a kai tho a, a in ngaitlawm vel lutuk chu ngawi rengin ka lo en tawp.





Damdawiinah kan pan lai tenchuan pangai deuhin ka nu chu a titi pui thei a, ka nu, en mai pawha nu changkanglo tih hriat tak a kawm nel thei mai leh deu na tel miahlo a a kut a vuan thei mai te kha mak ka la ti reng mai.





"Kan lawm e aw" ti sepin car atang chuan ka nu chu ka chhuahpui a, "Dawr chu lo ngaihven lo mai rawh, hruai in ngaih chuan min lo be dawn nia" a ti sup a, biak tum lem lo mah ila ka bu ve nghat a, a tlan liam hnuah ka nu'n "I bialpa en ni?" a ti pek a, uar zeta anih loh thu ka sawi hnu ah "A fel hle mai, a duh phawt che chuan ngaizawng rawh" a ti leh a, ka thaw chhuak halh tak na in nupui a neih tawh thu chu ka hrilh duh lem lo.





Lehkha kan lalawk lo bawk nen chawhma chhung deuh thaw kan nghak a, "In entir kher a ngailo asin maw le Bawihte" ka nu chuan a ti leh thin a, "Min hrilh teh, engatinge i thiannu in ah chuan i awm daih reng reng a?" Ka ti a, a chhan a sawi tha duh tlatlo chu ka run viau mai.





Thisen te an han test a, doctor chuan keimah min rawn en in "I hre tawh em?" min ti a, ka hrilh hai khawp mai.


"Engnge hriat tur awm?"Ka tih chuan ka nu zawk chu en lehin "Nang in i hre tawh em?" a ti leh a, ka nu a buk nghat hnu ah doctor chuan "I nu hian thisen cancer a nei a" a rawn ti ta mai a, phawk zeta ka nu en pah chuan "I cancer maw?" ka ti chiam a, ka mang nghal vek mai.




Chiai lo zawk tur leh hnemtu tur zawk ka chiai tlat chu inthunun hram hram ka tum a, "Engtik atang nge?" ka tih chuan doctor nen ka nu chu kan en ran a, "Thla hmasa khan ka hre tawh" a tih chuan doctor chu en leh in "Engtia tih zel chi nge le?" ka ti leh a, ka phili a, ka buai ru zek ti ila a dik ber ang.


Ka nu chu damdawi ei lai a neih leh neihloh a zawh hnu ah "Thisen cancer anih avangin a hlauhawm a, a rang lama kan in enkawl a ngai ang, naktuk chawhnu lamah appointment ka lo siam cheu anga, in lo kal leh dawn nia" a tih hnu ah lehkha ah eng eng emaw a ziak a, "Damdawi hi lo lei phawt ula, a hnung ah hian ka phone number ka ziak tel bawk e" a tih chuan ka lo ban vat a, lawmthu sawia kan chhuah leh hnu ah ka nu chuan " Kan Doctor pa chu a fel hle mai" a ti a.




"Tinge engmah min hrilh loh?" ka lo ti thung.




"Hrilh che ka tum alawm" a tih chuan thaw hakin a kutah ka vuan a, "Hei vang hian ami i awmna pa khan a hnawhchhuah che? I natna vang hi a ni em?" ka ti sap a, "Ni e Bawihte,enkawlna a hautak a, a,,, in enkawl viau pawh tul ka ti hranlo bawk a, thisen cancer chu a darh chak bawk si a, ka thih a hun ah chuan heng damdawi te hian min chhanhim zo dawn chuanglo" a ti a, a mitmenga natna tam tak in phum ru hmu thiam tan chuan tap lo tura insum chu thil harsa tak a ni.



Ka in sut deuh faih a, "Chutiang chuan ngaihtuah tawh miah suh, ka enkawl dawn che alawm" ka ti a, min la dampui ve na tur anih phawt chuan ka theih ang ang ka ti vek ang.





Kan ina hruai haw ka tum chuan a tang leh tlat tawh a, "I pa hmel k hmu duhlo" a tih avangin tih luih zel chi ah kabngailo a, bakah Awmtei te nufa an awm ve tawh bawk nen a rilru a nat zual hlauin ka nawr lui duh lemlo a, ei tur ka leisak hnu ah a thiannu te dawr lam ah ka kalpui leh a, a bula awm reng la duh mah ila tih tur tam tak ka la nei a, ka pawisa kawl remchan ang ang chu pe in inenkawl tha tura ka hrilh hnuah ka kalsan a, restaurant lamah kallo in in luah tur zawngin ka vak kual nghal a, a vang duh khawp mai.





"Jennifer?"
Ka hawi let zawk a, tun ang huna Mabiaki hmel hmuh chu ka in ring hauhlo.



"I dam maw?" tiin min rawn pan hnai a, "Dam e" ka tih hnu ah "Kan in hmuhlohna a rei tawh khawp mai" a ti leh a, "In hmuh chhan tur a vang tawh em a" ka lo ti ve nghat.



A nui a, "Mihring hi chu in mamawh tawn vek kan nia lawm" a tih laiin ka banrekah Tu emaw hian a rawn vuan lawk a, ka hawi chhuah ruala ka mi hmuh chuan Mabiaki ka hmuh tirh ai khan min thawng fe zawk.




"Pu Rin..?" ka ti chhuak sap a, Mabiaki en run chung chuan "Engnge in tih?" a ti thum dut a, "Ehe Nangmah hi i ni tak, hmanni zan ami kha i ni tiraw? Aferi i tih lungawi loh hnuah hmuh zui zel I lo tum tihna em ni a? Nangmahni ho vang hian ania kan sum hmuh tur ang pawh kan hmuh theih thin loh, pawisa in ui leh si dawn anih chuan insum ve mai rawh u" Mabiaki lah chuan a lo ti nghal hlak hlak a, za lo deuha nui chhuak hawkin "Thu awmze neilo anih chu" a ti nghut.



Keimah min rawn en in "Helai hmunah engnge i tih?" a ti nghut a, sawi vak dan tur ka hriatloh avangin "Ka tei kual" ka ti tawp.


"Anih aw Afer" tiin Mabiaki chuan min kalsan a, "Khanu kha engthil nge I lo hrilh a?" ti thum dut Tu chu en in "Engmah ka hrilhlo, a hriat sual anih kha" ka ti a, "Anih leh engvangin nge I hmuh?" ka ban rek a hmer tih nat salh pah hian a ti leh a, thaw hakin "Kan in hmu fu ve mai mai anih kha, tinge ka thil tih apiang hriat ve zel I lo tum a?" ka tih khum vak a, min en run chung chuan "Engatinge i tei kual?" min ti leh a, ben thluk tawp ka chak lutuk ringawt.





"In luah tur ka zawng kual anih hi" ka ti ta nge nge a, "Engatan?" dilchhut zet hian a ti leh hram anih chu!


Hahthlak ti deuha melh chho ha pah hian "Engatan nge ni anga.. Kan luah tur" ka ti vin hlur tawh, dilchhut leh lutuk mai.




"Lo kal rawh ka zawnpui ang che" a tih chuan "Khawi lamah?" ka lo ti vat a, "Min vin pang pang tawhlo la a ni mai, ni a sa si motor ah lut phawt ang" a tih chuan sawi buai lovin ka zui a, luah tur avang si, min puih theih hlauh chuan a lawmawm dawn emai.




"In sawn chhuah i tum em ni?" a tih chuan bu nghatin "Ka nu leh ka nau nen" ka ti sap a, "I nu chu engnge a an?" ti lehin min rawn en a, hrilh tur anih leh nihloh pawh ka la hrethiamlo.



"Naktukah kan kal leh ang" ka ti ringawt a, min zawt zui biklo.


"In luah tur chu min zawnpui thei dawn em?" ka ti leh a, bu nghutin "Apartment ruak pakhat ka hria, luah man a to lo a, tah chuan in awm thei ang" a tih chuan "Tak tak ami?" ka lo ti hlut a, "Engtik atang nge kan awm theih ang?" ka tih zawm leh zat bawk.




"In duh hun hun ah" a lo ti leh mai a, a sawi danin a veng awmna pawh a laili tha a, thawk khat chu a veng huai mai.






"Ehe.. Tun ami kha Marini a ni em?" tiin kan tlan pelh tak lam chu ka thlek leh zawk a, "Kan in phur lai min hmuh fo chuan I nupui hi a lungawi lo ngawt ang aw" ti leh niah niahin amah chu ka en ran a, "Ka then dawn alawm" a tih laia ka hmel landan chu in hmu ve thei ila ka ti ngawt mai, mak ka tih lutuk vangin cheng thir tiat ngawta ka men ka ring!









CONT....

Duh ang leh beisei ang pawn kan kal chak theilo anih hi


Show post links
Top

[Ngaia]

MI PASAL



Chapter-12


Bt Ruati Renthlei



"Engatinge then I tum a? I sawi ve uk a, min hrilh ve law law mai la mawle" ka la ti nang nang a, "I hriat tur chin chu ka hrilh che" ti supin ka biangah min piai tawk a, "I kum ngaihtuahin I puitling" a tih chuan ka biang tuai nak nak pahin "Ka hria" ka ti hmak, ka biang a piai thip vek alawm.





"Mahse I thinchhia" a ti leh hram a, motor a ti ding zui dat bawk.


"Khawnge min hruai?" ka tih chuan min chhang lovin a chhuak nghal vut a, ka chhuah ve hnuah ka dara min kuah uai hnawkin "2nd floor ania, bungrua engkim a awm sa vek" ngaihsam hmel fe hian a ti a, "A van tha" ka lo ti ban charh ringawt, tunah thawt thawt min hruai ang tih ka hrelo a, ka hamhaih letling zawk





"Theih se chuan naktuk atanga luah nghal mai ka duh" ka ti leh hap a, ka uang miahlo bawk. "Lo kal rawh" ti supin ka darah a beng thak a, a hnungah ka zui ve hnak hnak mai.



Luh dawnah duty pakhat a lo awm a, ka kalpui pa chu a hriat chian hmel khawp mai. Chahbi an in pek hnuah 2nd floor lamah kan in zui chho leh a, ka rin aiin a lo zau a, bungrua pawh a khat mawi tawk khawp mai.




Sofa a awm ve thlap a, fridge leh TV a awm sa thlap bawk a, pindan ruak pahnih nen, duhthusam a ni.



"Engzat nge luah man chu?" bathroom vel en kual thuak thuak pah chuan ka ti a, "3000 in a theih ang" a tih chuan ka melh kawk mai.


"A to lo ang I ti ve sia" ka ti vak a, "A to I ti em ni? Bungrua engkim a awm vek hi" a lo ti thung.



"A ni tho a, mahse.. " ka ti nang nang a, mi tam tak tan chuan a to lo mai thei, mahse ka tan chuan 3000 thawh chhuah hi a harsa a, thla tin pek a ngaih dawn phei chuan min hnawtchhuak vat lo ang tih pawh a sawi theihloh.




Thawk a la hawk a, "Anih chuan 2000 ni mai rawh se" a tih chuan "Engtin? I thu ringawt ami?" ka lo ti vat a, "2000, ni rawh se" a ti nawn leh a, ka lo b nghat ringawt tawh. Ama thua a man a hniam ve ngawt danah a neitute hi a hmelhriat hnai tak te an nih ka ring ve ngawt.





"Ka lawm lutuk aw, ka ti buai che bawk si" ka ti sap a, kan kawmchhakah a motor a ding leh van tawh bawk. Ka lawm e tih bak chuan lawmthu han hrilh vak ngaihna ka hre biklo a ni.




Kan in kawt chu ka thlir thla vang vang a, inchhung atanga thawm ka hriat rual chuan ka thu ding nghal ut a, ka bula thu chu ka melh rang viau bawk, thil dang sawi miahlo in car atang chuan ka chhuak a, kan in lam panin ka tlan thla nghal hlawk hlawk.





Inchhung ka luh rualin TV bula ka nau lo tap pur chu ka hmu hmasa ber a, chaw ei dawhkan bulah ka pa leh Awmtei an lo in dinchilh ran bawk.



"Engthil nge thleng a?" ti tuarin Bawiha din na lam chu ka pan vat a, "Tap suh, engtinnge an tih che? An vua che em ni?" ti mawlh mawlhin a mittui chu ka hruk sak a, "Lalrinnung" ka pa'n a Rawn ti hrawk a, "Pindanah lo awm tlat ang che" tiin ka nau chu ka nam lut zui rawk rawk.




Ka pa te awmna lamah chuan ka phei a, inchhung bungrua darh sarh nuai atang chuan bawraw tak in a che leh tawh tih hrilh hran ka ngai hauhlo.




Ka hmai a thip zawk rualin "Jennifer" ti hluk ri ka hre zui a, ka banah vuanin min pawt let dawrh a, min venhim tum ni awm takin ka hmaah a ding nghal khup bawk.




"Mi tenawn, min va han ti zak em em ve Lalrinnung" titu chu ka pa bawk a ni.




Ka biang huh chu tuai hul tawkin Rinsangzuala bulah chuan ka ding leh ngat a, "I tha em?" min ngaihtuah hmel taka a zawhna pawh chu ka chhang lo.




Ka pa nen chuan kan in hmachhawn ran a, rui reng thin mah se kut min thlak zawng hi chuan a awm ngai tawhlo viau asin mawle.




"Engthil nge I hriat?" sehchilh zet hian ka ti chhuak thei hram a, "Ka taksa ka zuar e te I lo tih! I zak chei lawm ni? I nu kha I lo chhun anih hi, in tenawm nufa emai" ti phawr phawrin ka darah min nam leh nawk a, ka tlu tur min lo dang tur in ka bulah Rinsangzuala a awm tawh thung.




A thil sawi chu tu hnen atanga a hriat nge ka hrelo mahse..
Ka thaw chhuak halh a, sawi ve tur ka hre tawh tlatlo.




"I hre sual anih ka ring ka pu" ka bula ding pa chuan ti supin ka dar a vawnna chu a ti nghet salh a, "Ka hre sual aw zawng lo, I nu pawhin pasal dang a um a, nangpawh hi I la bo vat ang, hur herh nufa lutuk mai" min ti leh a, ka insum thei tawh biklo.



Min vawnna atanga tal chhuakin ka pa chu ka dinhnaih sauh a, "Khatikhan ka nu chanchin sawi miah suh aw, engkim ka hre vek tawh, ka nu khan pasal dang min um San lo a, nangpawh a phatsan lo bawk che, I leibatna pawisa ai ka nu kha I pe zawk anih kha, tullo ah pawisa I khawhral a, chu chu mihring ve tho ka nu hmangin I rul felah I in ngai a, mi tenawm diktak chu nangmah I nih kha" ka ti tuar tuar a, ka au khum a ni mah ang chu...





"Lalrinnung" ti leh hlukin ka pa chuan a kut a rawn lek leh uaih a, min chhan tur hrim hrim hrimin Pu Rina hi a lo kal ang ka ti!




Ka pa chu man bet reng chung chuan "Kut I thawh leh anih chuan ka thawh ve tawh ang" chang leh chiang zet hian a ti sup a, ka pa chu rum nghutin chair ah a thu thla a, ka la duhtawk thei chuanglo.





"Thudik hi chu a biru reng thei ngailo, ka nu chunga I thiltih te avang khan hremna I la hmu ve khawp ang, hlim taka I nun bik hi in ring reng reng suh" ka ti leh fak fak a, Awmtei chu melh zawkin "Thu awmze neilo hmangin ka pa rilru hi I lo hmin a ni mai thei a, mahse I hlim bik lo ang tih hre rawh, min beih chhung chuan ka bei let zel dawn che u" ka ti leh a, ka taksa khur ru dar dar leh ka lungphu dup dup te chu thinrim lutuk vang a ni tih ka hria.





"A u" ti tiauin Bawiha chu pindan kawngkhar bulah a lo ding reng a, a tap kha a la bang chuanglo, Pu Rina chuan a va pan hnai vat a, a lo kuah chawt a, zo zetin a pawm kang zui nawlh bawk.





"Min zui duh em?" tiin keimah chu min rawn en a, tawngka in ka chhang tawhlo, kan in zui chhuak a, khua a la thim loh avangin thenawm te chuan an tual atangin min lo thlir leh thap tawh a, kan chhungkua hi chu vengchhung ennawm kan ni ringawt, mahse ka ngai pawimawh lo.




Cara ka thutluh rual chuan duhthawh zetin boruak ka hip lut kawk kawk a, pawnlam boruak ai khan car chhung zimte hi nuam ka ti rih zawk, ka nau kut chu nghet zetin ka hum tlat bawk a.



Ngawi rengin motor ati nung a, kan kalna tur pawh ka zawt chuanglo, tunah rih chuan helai hmun hi chhuah San ka duh rih ber.




Kan kal zawh chiahna Apartment ah bawk khan kan let leh a, sofa ah ka thu thla hnawk a, tumah chu kan tawnglo. Mahni in anga lo khawsa hrep tawh ang maiin Pu Rina chu a che nghal zung zung a, gas ah thingpui ni awm tak a chhuang a, tui in tur min rawn pek rual chuan ka lo ban vat a, Bawiha bulah chuan thu in a rilru lak pen tum ni awm tak hian a phone a game awm te chu a en tir a, naupang na na na chu a nui leh thei mai bawk.





Ka bulah a rawn thu ve leh a, engmah a la sawi chuanglo "Engtinnge ka pa khan... " sawi zawm lovin ka ngawi leh rih a, ka sawi tum chu a hrethiam a ni khawp ang, a aw then kharh pahin "A risk aniang" a ti sup a, ka melh rang viau bawk.





"Risk chi pawh anih loh kha" ka ti hlak a, rilru nawm loh nak alaiin tawngkam lah chu a rawn bei mak si, nuih pawh a ti za lo.




"Tunge hrilh ang?" ka tih chuan ka ngawi deuh vang vang a, "Kan pahnih inkara thleng a nia, midang hre tur an awmin ka hrelo" ka tih hnu ah "Nangmah pui hian I lo hrilh a ni lo maw" tiin ka melh kha kha a, nui chhuak hawkin ka chalah min pen kerh a, "Mawl lutuk" a ti zui hluk bawk a, ka puhna ah chuan a lawm hmel teh chiam lo khawp mai.






"A mak em alawm, a tir kha chuan ka hrilhhai zawk a, inthiam lohna ka nei nghal bawk a, mahse ka nu a hmer tel chiah a, a thil tih ka hre chhuak vek tawh bawk nen ka insum zo thlawt biklo anih kha" ka ti zui leh bawrh bawrh a, ka thaw chhuak zui ham ham bawk.




"I thil sawi te kha ka tum vang nilo in ka rawn hre ve vek sia, min hrilh chiang law law rawh" a tih chuan "Eng?" ka lo ti vat a, "I nu leh pa" a tih chuan ka melh deuh vang vang a, a sawi ang khan a hre thawi vek tawh tho a, zep pawh tum mah ila a theih dawn chuanglo tih hria in ka nu min hrilh ang ang te chu ka hrilh ve ta vek a, ngaih ti tha tur in a kar lakah a lo bu nghut nghut ringawt a, "A zia lo hle mai" tih bak engmah phei chu a sawi zawmlo.




"Chawhmeh leh buhfai engmah a awmlo a, zanin chu dawr ah in ei mai dawn nia, inbual in duh chuan tui a herh haw theih nghal" a ti a, kawnka bulah a kawng dawmin inchhung chu a thlek kual leh thin a, "I van hre em em" ka tih chuan reilo te min rawn en zawkin a hawisawn leh nghal a, "Ka kal thin" tih zawngin min chhang.





Ka phone a rawn ri bawk nen min chhuahsan zui nghal a, Bawihbawihi hming ka hmuh rual chuan ka chhang rang khawp mai.



"In in ah ka lo kal a" a tih chuan ngawi rengin ka thaw chhuak ham ham a, kan awmna ka hrilh hnu ah ei tur kenga a lo kal tur thu sawiin kan in biakna chu kan ti tawp zui a, Bawiha tan pawh TV en tur a awm a, a zia khawp mai.




Thutlukna fel tak ka siam a ngai tih ka hria a, mahse eng atang hian nge ka tan ang tih ka hrethiam lo a ni.
Ka nun buaichuar lutuk ah hian puhmawh tur ka zawng a, a chhan ka in zawt bawk a, a chang chuan Pathian hi awmlo tawp se ka ti zawk thin!

A awm tih ka hria a, mahse min ensan tlat tawhin ka hre bawk si a, a awmlo tih hi pawmin ring thlap thei ila chuan tun ang hian ka dem lo anga, ka thil tawn zawng zawng vang hian ka chhuahchhal vek kherlo ang. A lakah ka in hlan thar tawh ngailo a, tawngtaina awmzia pawh hi ka hrelo, a hnen atangin malsawmna ka dawn hun ka nghak e ka ti hauhlo a, mahse eng emaw tal chu ka la beisei ve tlat thin!




Ka mit ka khap rualin ka biang a rawn lum thla pap a, ka duh ang apiang ti thei tur in pawisa ka nei tamlo tih ka in hria a, ka nu natna in rilru a luah ve reng lo thei bawk silo, ka nu leh ka nau te hi awmlo se chuan Jeremy bula ka sawi ang khan ka in khai duh tak tak ang!





Bawihbawihi hnen atang call ka dawng leh a, pawna ka lo nghah tur thu sawiin ka chhuak zui nghal bawk.




Polythene ah eng eng emaw a rawn khai bawr luk a, inchhunga kan luh rual chuan "Engatinge engmah min hrilh loh" vui awka zet hian a ti nghal a, za lo deuha nui sak pahin "Hun a la awmlo hrim hrim" ka ti sap a. "Ei tur hi siam phawt ang" tih zawm lehin a noodles rawn lei ho chu ka phawrh chhuak a, gas bulah min dinchilh ran mai.





"In ina ka va kal chuan i pa a lo rui over a, Awmtei nen zawk kan in bia" a ti sap a, na zetin thawk a la hap bawk.


"Chuan?" ka lo ti vat a, "I awmna ka zawt a, an chhuak a lo ti ringawt a, ka ngaihtha lo in khawiah ka ti leh hram a, I pa nen in inhauh thu a sawi a, nuam a tih hmel bik chiahlo in ka hria" a ti niah niah a, ka lo nui hul hak ringawt.


"Nuam chu a tilo tawp ang, ka awmloh chuan ei tur an neilo nghal dawn tlat a, naktukah kan thuamhnaw ka la anga, let leh ka tum tawhlo" ka ti hmak hmak a, ka pa hnena min hektu kha Awmtei hi a ni tih ka chiang a, ka pa'n ka nu leh keimah mi tenawm chhuahin min chhuah phah bawk a, engkim bul chu ka pa a ni tih hre mah ila he nu hi ka haw lo thei chuanglo. Ka nun buai chuar lutuk ti buai zual turin an nufa in an rawn lang a, hei vang ringawt pawh hian ka haw lutuk a ni tawp mai.



"Engtia awm zel nge I tum?" a tih chuan ka nu chanchin engmah aka la hrilh ve lo tih hria in ka hrilh a, "Awi" a lo ti dur dur a, min ti thlamuang lo ve khawp mai.




"I thutlukna ang ang kha keichuan ka pawmpui vek mai che, ka nu Ngaihzuali pawh chu ka ngaizual vel tawp, naktukah Bawiha hi school kal tur in ka rawn lam anga, tlaiah ka lo kawi leh ang" tiin a haw dawnah chuan min hrilh thlap a, ka buaina a hre ta bawk a, a theihtawpa min puih ve a tum tih ka hria a, ka thian a nilo ang tih ka hlau ngawt mai.





****



"I nau chu ka hmu ve chak tawh mange aw" ka nu chuan a ti leh halh thin a, "I hmu leh vat dawn alawm" tiin ka phone ka hmet pah mawlh mawlh a, "A tha e Nu, ka phone hi lo kawl la, chawhnu lamah ka thiante phone in ka lo bia ang che aw" tih pahin ka phone chu ka pe a, min hnial a tum zet tak na in "Biak theiha I awm hian ka ngaih a tha dawn a" Ka ti leh a, a bu ve ta nghat.





Hmanhmawh deuhin restaurant lam ka pan a, nizan ka mut tlem avangin zingah thawh ka hai a, ka thuamhnaw thlakna tur la tur tak ngial pawn hun ka neilo. Bawihbawihi a rawn kal hma hlauh a, inthlak turin Bawiha a hruai chhuak nghal a, nilo se chuan school pawh a kal hman miahlo ang.





" I Sam te chu a va thur hing hiang e, I khuih lo em ni a? Tho hlim hlawta lo kal I ang lutuk" Nu Rinengi chuan min lo ti nghal bawrh bawrh a, "Ka nia lawm" ti liam puatin inthlak turin ka lut tlang a, ka chhuah leh rualin Mimii'n min lo pawt hrang nghal a, "Enteh thuruk" a ti leh tawh.



"Eng?" ka tih chuan "Marini a rai" a ti a, ka ngaih ang ngawt ho chu a ni miahlo.




Phawk lutukin kanthiannu chu ka en reng ringawt a, "Thuruk" ka ti nawn sep ringawt.



"Aa thuruk tih lemah, dawra thawkte chuan kan hre vek tawh tho a" a ti leh a, "Engtin?" ka lo tih leh chuan "Ele,, a man nimin ah a sawi vek alawm, nimin nilengin a rawn leng a, I awm bawk silo a, I kalloh chhan min zawt renga, kan hre bik bawk silo, ka hne lek lek alawm" a ti leh zat zat a, ka kalloh chhan a lo zawh chhen nachhan chu ka hre chak viau na in "Amah berin a sawi te chuan thuruk pawh a nihloh chu, bakah rai te chu a zep reng theih chuanglo a" ka lo tih sak a.




"Pu Rina a la hrilh lo a, surprise ka tum te a tia, mi hausa ho tak hi chu a, tikhan party tenau an buatsaih emaw te a ni leh anga,aum hmanna tur hi an hre thlawtlo" a ti leh nek a, ka nui liam ringawt tak na in ka ngaihtuah zui ve reng tho.




Restaurant a ka thawh tirh khan an inneihna a la reilo a, kar hnih khat vel chauh a la ni ang, tunah thla khat awrh chauh ka la thawk a, huhhh a rai hma ve hle mai...










CONT....


Zanin chu a tawi leh tlat mai,, inleng an awm ve nak nak a, type na hun ka nei meuhlo
In fel hle a, in fel zel chuan Sunday tlaiah kan dah leh ang..


Show post links
Top