TUAMDAMTU BY Kimkimi Tlau (Completed)

[Ngaia]

Thlifim lo thaw heuh heuh chuan min ti hahdam thei meuhlo, hrilhhai avanga nunna hi tawp nghal thei nise tunah hian thawk la leh thei chuang ka awm tawhlo ang



" I fa anih hi " Harsa ti zetin ka ti chhuak halh a, Ka bula mipa ka bialpa leh ka mipa hmangaih ka thianghlimna hial ka hlan mipa chu ka en ngawih ngawih, ani erawh chuan luhlul zetin ahmalam a en vang vang a




" Fa neih kala duhlo, ti tla rawh " Ati leh tawp a, chu chu ka rai thu ka hrilh tirh a athusawi kha ani, hmeichhe dang chunga thleng ṭhin ka tawn ka rin ngailoh chu tunah ka tawng mek ani




Ka hming chu Lalhlimpuii ani a kum24 kani, Unau pahnih kanni ṭhin a mahse, Vanduaithlak takin ka u chuan accident in nikum hmasa khan min boralsan tawh a, Kanu leh pa fa neihchhun kani tihna anih chu, Nurse ka training zo tawh a, nikum khan Sawrkar damdawiin ah hna ka hmu ve nawlh a, ka tuina tak ani bawk nen ka hna chu anuam kati ve viau, kapa hi Doctor ani a kanu erawh House wife ani thung, mahni tawkah ka nun chu ahahdamin ahlimawm ve takzet, Lawmkima nen hian kum3 chuang kan inzui ve tawha kan inngaizawng tih hria an awm nual tawh, kan inah pawh vawikhat chu alo leng ve tawh nghe nghe. Ka bialpa hmasa ber ani a amah lah mipa chhelo leh hmelṭha vur chi ani bawk, min duat thiam a ka rilru hneh chu athiam lutuk, hmeichhe dawntawi tih takah Ka thianghlimna hial pawh ka hlan reng a inchhir loh hram erawh ka tum mahse, vawiin hian ka inchhir takzet ani, siamṭhat theih ngai tawhlo tur thil avangin ka inchhir ngawih ngawih, Min hmangaih ve viau emaw ka tih laia chuti maia ka nau pai ti tla tura min ti chuan min ti na ngawih ngawih



" Engtin nge chutiang ka tih theih ang, ka pum chhungah ka thisen ring in aṭhang ve mek asin " Beidawng zetin ka ti a, ani erawh chuan melh pawh min melh duhlo




" Ti tla rawh, i paitlang duh anih pawn minti buai suh, ka hming alang tur anilo " Ati a, ka chhungril na veng veng chu tuar har tak ani



" Innei ang " Ka tlawm hi ka inti ngawih ngawih, ka chan chhiatdan ka ngaihtuah a, ka pum chhunga naute hi tih tlak ka duhlo mahse, ka paitlang anih chuan sawn pai mai kani dawn a, ka fa lah sawn tiin miin an sawi zui dawn bawk, chutiang ka ngaihtuah thlen chuan ka tlawm lam ka ngaihtuah theilo, ka naute tan ka tih ngei angai ani




" I titla dawnlo anih chuan kan inkar hi tawp rawh se, kan inkarah tisa thil bak inlaichinna a awmlo, nangpawn i hrechiang ani lawm ni " Ading hluai a, bangbo leh chiai zetin ka awm thung, ka hmahun chu athim mup mup a, nau ka pai tih ka hriat tirh khan ka hlim ve viau asin, Kima pawh alawm ka rin tehlul nen min dawnsawn dan chu ka beisei loh dan vek ani, engtin nge kanu leh pa te ka hrilh tak ang, an fanu an chhuan leh an neihchhun hian sawn ka pai tih hria se kanu daw rawm lutuk khan adawngsawng thiam kher ang em




" Kal ang " ati nghut a, chesawn turin tha ka neilo hrim hrim, a dawhthei ta nganglo ani mahna min pawt tho deuh lawp a




" Sawn pai iduh emni? Nangpawn pasal neih ila ngaihtuah ngai loh kha titla rawh, chuan pangai takin kan inkar pawh a awm leh thei ang, ummm " Min hmin tum zetin ati a, a aw pawh anem khawp mai mahse, ka chiai na te leh ka natna te chu thinrimna ah a inthlak a, ka saw bulh ni maiin ka hria min chelhna chu ka thing thla a.




" Mipa tenawm leh nep ber inih hi, ka nun iti chhe vek " Ka ti hrawk a, ka aw chu a khur deuh a, ka hlauh vang anilo ka thinrim lutuk vang zawk ani






" Min puh hauh suh, tih luihna ka hmang ngailo " Ati salh salh a, ka nui ro hak, An sawi ṭhin Hmeichhia in mipa rinawmlo an tawn fuh chuan an nun a chhe vek ṭhin ' an tih chu tunah hian ka hre thar a, Ahun lo a sex hman pawizia pawh ka hrechiang khawp mai, Lawmkima'n ' Inngaihzawnna ah chuan sex te chu ngei ngei alawm ' atih khan alung tih awi loh ka hlauh luatah ka zahawmna ka thianghlimna ka hlan a, eng nge min pek let hi. Alung tih awi loh ka hlauh luata ka thil tih avangin ka nun kati chhe vek anih hi, Ni e keima tihsual liau liau ani, tumah puh tur an awmlo





" Engmah kan sawifel dawnlo, hawng ang " Bike a ti nung a, aruala hawn chu duhlo teh mahila hawnna tur dang ka nei chuanglo, ahnungah chuan ka lawn a, insi lek lek in awm mahila kan rilru erawh a inhlat em em thung. Kan in thleng min thlah a, be zuilo in ka hnungchhawn nghal hmak, He mipa hi ' Mipa rinawmlo ' tiin ka hre reng tawh ang, ka thinlung ati kehsawm a, chhar khawmin tu in emaw rem khawm leh ta pawh nise engtik lai pawha kehchhe thei ani reng tawh ang, achhan chu rem khawm chawp chu apangai ang ani thei tawhlo ani, inchhung ka luh dawn chuan ka mittui tlakna ka hmai chu ka tuai thuak thuak a, thawk kala ham ham bawk





" Ka fanu, ilo hawng tawh maw? " Kanu in min lo nuih var var a, kanu nuihmel mawi tak hi lungngaihna in ka chantir thei dawn emni? A nunrawng thlak lutuk




" Diklo a awm emni? " Min thlek kual pahin ati a, lu thingin kanu chu ka kuah a




" Engmah diklo a awmlo " ka ti chhuak sep a, kanu bulah hian engkim hrilh a ṭah vak vak ka chak





" Bawiha alo leng a " Atih chuan ka inla hrang a, Bawiha atih hi Ka u ṭhianpa Udampuia ani a, ka u nen khan ṭhianṭha tak anni a ka u thih pawh khan atuar ve viau, ka u awm loh hnu thlengin min ngaihsak a, kan tan Fapa leh nuṭa nih atlin takzet, Ka u boral aṭangin kanu hriselna atla hniam a, Udampuia hi awmlo se kanu hi tiang hian a pangai leh thei pawn ka ringlo




" Ani maw! Tinge min hrilh lawk loh " UDampuia lo kal chu ka hlim mahse, ka hun tawn mek nen chuan a inremlo ani, tunah tak chuan mahni a awm a in ngaihtuah ka chak




" Hei, alo inla naute lutuk a " Kapa te ṭhutna kan phei chuan kanu in nui har har pahin ati a, Udampuia pawh alo nui sang a, amah hi a palian a ataksa inphut mawi tawk lutuk te, ngo vur silo in adum chuang miahlo, ahmel lah achhia tih tur ani chuanglo, amah nen a inrem tur in Sport minister ani leh zel a, Zo lanu te lu ati hai ve ṭhin viau




" Lokal teh " Udampuia bulah chuan ka ṭhu thla a, ka kut avawn chuan engvang nge ka hrelo ka ṭang nghal ṭung a, ani pawn ka awmdan chu ahria tih ka hailo, min melh deuh run a, ahma pawn ka kut te chu akhawih fo a tiang hian ka awm ngailo, ka pum te chu ano nghulh a ka luakchhuak et et chu ka insum hram hram ani.





" I chau em? " Engmah min zawt zuilo chu ka lawm ngei mai, ka chauh loh thu in ka chhang a, ka kut chu ala thlah chuanglo, Sport minister anih aṭangin abuai ve a kan inhmu ngai mang tawhlo, Udampuia Nu NuRamtei leh kanu hi ṭhianṭha deuh anni a mahse, kan awmna a inhlat tawh avangin duh angin an inkawm thei tawhlo thung, ahma chuan inṭhenawm lawkah kan awm ṭhin a, kan inkal pawh reng zel. Hna aneih thu sawiin reilo ah hawn arawt a, kanu te chuan leng hrih turin duh viau mahse, hna anei ve tlat tawh avangin an ui lui bik lo, pawn thleng ka zui chhuak ve ngei a


" Diklo a awm em? " A car bula kan din hnuah chuan lut mailo in chik fe in min en a, min en chik lutuk chu min hmu tlang vek thei hialin ka hria




" Aih, awmlo e " Zangkhai thei tur ber chuan ka ti a mahse, keimah hi ka rit in ka pik ngawih ngawih a, ka ṭawngchhuak pawh a zangkhai thei lo




" Ka lakah engmah zep tum suh, buaina i tawh chuan min hrilh rawh " Ati nghet churh a, hrilh vek ka tum ut ut a mahse, Udampuia pawn engmah tih theih anei chuanglo





" Engmah athlenglo, vawiin lam ah ka chau deuh anih hi" Awih ngei turin ka duh


" Aw le, ka hman veleh kan vaiin kanlo leng dawn nia " Atih chuan phur hmel deuhin kalo nui a, angaihṭhat loh ka hlau ani, Udampuia tlanliam chu alan theih thleng ka thlir a, inchhung luh pawh chu ka chaklo, tunah tak hi chuan ral riai riai a bo vang vang ka chak, kanu leh pa te mit a lungngaihna lang chhuak tur chu kei hian ka hmu thei dawn emni, Kima sawi ang khan ka ti tla zawk dawn nge, ka rilru hi abuai lutuk. Inchhung ka luh leh hnu chuan kanu in Udampuia chungchang chu hlim deuhin asawi a, inthlak turin ka room ah ka luhsan. Khumah ka ṭhu hnawk a ka dul chu ka kuah bet tlat bawk, Pai tlang ta ila Pa neilo tiin an sawi chhunzawm tur hi kei hian ka enliam in ka ngaithla liam thei meuh ang em? Tunah hi chuan ka thawpik lutuk leh ka hrawk thip hlur te avang hian Aw rawl chhuah a ṭah hawm hawm ka chak, ti chuan tlemin ka thawl ve deuh ang. Lawmkima nen kan hun kal tawh ka ngaihtuah let a, Ka rai thu ahriat hma zawng kha chuan ka tan mipa ṭha ber anih lohna a awmlo, min duat em em ṭhin tu kha ala ni reng a mahse, ka rai thu ahriat hnuah erawh min thlathlam nghal thei, engtin nge atheih zawk le. Ka room kawngka alo ri dat dat a, kanu in min ko nghal lang lang ' Kalo chhuak ang ' ka tih chuan a reh ve leh mai a




" Tinge Ila inthlak loh " Kanu chuan phawk deuhin min en a, ka inen ve vat keihi! Ka thawmhnaw kala thlak lo reng reng anih hi, ka ngaihtuahna ka kawm nasat vang ani, zalo zetin ka nui a chhuanlam tur ka dap kual pah bawk, kanu lahin chik zetin min en a



" Ka muhil a, min lo koh khan ka harh alawm " ka ti nawi niai a, abuk nghat chuan ka thaw deuh huai thei



" A hahthlak viau ami? " Chaw hmeh asuak a, asuah sa chu dawkanah kalo dah ve zel a, azawhna chu a hahthlak loh thu in ka chhang, kan siam zawh chuan kapa ava ko a, kei erawh uak lo turin ka insum ṭang ṭang, Purun var rim chu ka ti thei derlo, ka hmui ka hup a kanu te lokal hma chuan choka Washroom ah ka tlan lut vat, tui ka herh haw hnuah ka uak tuarh a, engmah luak chhuah tur a awm chuanglo. Rai haw tur chi ka ni dawn leh nghal inthup angai si, engkim mai chu beidawn ngawih ngawihna tham vek ani
Washroom aṭanga ka chhuah chuan kanu te chuan min lo ngaihven vat a



" I damlo ami? " An tih chuan ka thin aphu nghal dawt dawt, ka uak ri kha an hria ami




" Da..dam e, tinge?" ka ti bah nawk a


" I hmel kha i chauh hmel em a " Kanu in ati a, ka thaw deuh huai mai, chaw chu ka kil a, Purunvar rim bawk chu ka hip fuh leh tawh. Kanu te chu an titi a min ngaihven teh chiamlo chik deuhin min en selang chuan an hrethiam maithei ani, hmanhmawh deuhin chaw chu ka ei a, kua ano nghulh bawk nen avan hreawm tak



" I puar ami " Ka thleng chawiin ka tho a, kapa zawhna pawh chu ṭawngkaa chhanglo in ka bu nghat ringawt, ka ṭawng leh rual rualin ka uak nghal ani mai, hmanhmawh ru deuh chungin kapa te hmuh lai chuan pangai deuhin ka kal a, min hmuh theih loh chinah erawh atlan in ka tlan thung, bathroom ah chuan ka uak nghal tuarh a, ka chaw ei ve te chu ka luak chhuak leh nghal vek, chau zetin toilet bulah chuan ka ṭhusawp niai a, bang chu ka ngheng a thawk kala ham ham, ka chau lutuk chu engmah ka ti thei tawhlo, rei fe hnuah ka inbual ve ta chauh a, ka mutkawr ha in ka mu nghal a inhnuaiah pawh ka chhukthla peih tawhlo. Ceiling chu ka melh vang vang a, rilru akalthui leh dawn a ka hriat avangin phone chu ka khawih ta zawk, ṭhiante msg leh grp msg alo awm nual mai. Youtube ah ka luh chuan Home ah Udampuia alang chuai a, news hrang hrangin vawin lama ahun hman dan leh athil tih an ti chhuak chuai hlawm mai, ka ṭah nasat bakah ka luak chiam bawk nen ka chau a, phone pawh ka khawih rei theilo avawt ka tih deuh avang chuan puan chu ka sin hlun bawk a, ka mutchhuak lutuk chu ka menglui theilo.


Kut lum vung vungin ka chal alo deh chuan ka harh a, ka meng siar siar Udampuia ka hmuh chuan ka mit vai emaw kati a mahse, anilo Udampuia chu ka sirah ṭhu in ka chal adek a, min en run bawk




" Udampui " Ka ti ṭiak a, ka aw chu ari che che chauh ani, vawt in min ṭham er er bawk si



" I khuasik " Ati hmuk a, a aw ri ah chuan min ngaihtuah zia hai chi pawh anilo



" Avawt " Ka ti sep a, ka chal a akut chu ala sawn chuanglo, ahawng tawh sia alo kal leh tihna emni le



" Dar engzat nge " ka tih sep chuan, akut chu ala sawn vut a



" Dar9 " Ati a, thawh ka tum chuan aphallo



" Mu rawh, nachhawkna kalo lak ang che " Ati a, Ka naupai dinhmun hi ka hrechiang miahlo a, nachhawkna ei chu achi pawn ka hrelo, atho tur chu ka chelh a, ache lai chu atawp chut




" Ka ei theilo, ihh englo amum dawlh chu ka hlau " Ka ei theilo ka tih tawp chuan zawhna anei dawn tih ka hria



" I thil zep hi eng nge " ati hmuk a, chiang deuhin min melh bawk, sawi chhuak lo turin ka insum hram hram ani




" Engmah ka zeplo, Nachhawkna mum chu ka dawlh theilo tak tak alawm " Ka ti leh nawk nawk a, akut ka chelhna kut chu ahum bo nghal vek, ka khur der der chu ahrethei ngei pawn ka ring



" I damlo alawm " Ati leh a, ka mit ka chhing tawp, ahma zawng aiin tunah hian avawt kati bawk, ka ṭah chhuak et et te chu ka rai avang ani tih ka hria, rai lai hian rilru ano a duat kan mamawh zual bik bawk, Lawmkima ka ngaihtuah chhuak lo theilo a, ka ngai ngawih ngawih ka hua mahse, ka ngai tho bawk si ka ṭap mai ang tih ka hlau bawk ka insum hram hram ani, Udampuia hian min chhuahsan se kati keimaha awm ka chak




" Udampui ka ṭha, ka taksa chak loh deuh vang mai mai ani, ka ṭha leh mai ang min ngaihtuah su " ka ti a, ka inhersan daih, anih loh chuan ahmaah hian ka inṭap mualpho thei takngial dawn, ka ṭah chhuah hlau zetin ka kut ka seh a, kawngkhar arik ta rak ah chuan a chhuak tih ka hrethiam mai. Am zetin boruak ka hip lut kawk kawk a, ka thawk sak ṭalh ṭalh chu thil hreawm tak ani, ka awm chhung hi arit ngawih ngawih, ka ṭap reng mai chu ka duhlo chak lo takin ka awm tur anilo, tiang te chuan engtin nge ka pum a naute tan hian nu in nghahna tlak ka nih theih ang, ka mittui chu ka hru hul a khum lu nghengin ka ṭhu bawk. Ka room kawngka arik leh rak rualin Udampuia alo lang leh nghal, ka en reng a ani pawn chiang zetin min en run bawk



" Ka Chiu ang che " Syringe chu min hmuh a, ka hnial tawh biklo ka lu arit bur bawk nen nachhawkna chu ka mamawh ani


" Ka banah aw " Ka tih chuan a kiai suk a, ka nui ve tho



" I mawng ah kher ti ila, i duh dawn silo a " Ati a, Ka ṭap tih ahre reng mahse, ka hrilh loh chuan min zawtlui dawnlo tih ka hria, Ka banah chuan a chiu a, inchiu hi chu ka hlau lemlo, min chiu zawh chuan atho vut a, syringe chu bawlhhlawh bawm ah paihin ka closet ah alut a, a chezia chu zawi deuha mu chungin ka en reng, puan pawm chungin alo chhuak a




" I khur der der ania, mu rawh le puan ka sin belh tir ang che " Duat deuha min biakna chuan ka rilru ati no leh nghal ringawt, ka mu ṭha sat sat a puan min sin belh tir hnuah ka sirah bawk aṭhu leh



" Ka lawm e " Ka ti sep a, angaihdan anih loh hmel lutuk, tawi te in ka nui thung




" Lawmthu min hrilh suh " ati nghut a, ka mit ka chhing tawh thung, ka khawsik avang a ka kut vawt thler chu ahum lum vang vang a, engmah ngaihtuah leh hrelo a mutthilh ka chak ber.



Cont..


Show post links
Top

[Ngaia]

Ka harh leh meuh chuan khua alo eng uar tawh a, U dampuia pawh a awm tawhlo, ka ṭhutchhuah rualin ka uak nghal tuarh a ka inring hmanlo, hmanhmawh zetin Washroom ah ka tlan lut a, luak chhuah tur engmah ka nei pawh chu ani silo, ka chau hnawk mai. Ka intih fai hnuah inhnuai ah ka chhuk a, kanu chu eirawngbawlin alo buai leh tawh viau, choka ka lut min hmuh rualin min lo nuih var var a




" Coffee nge thingpui pangai i duh " Alo ti var




" Ka lo insiam ve mai ang " Ka tih chuan alo phallo a, thingpui ka duh zawk thu ka hrilh leh ta nge nge, Ka nau paiin rilru a kap a ka hahdamlo, ka hriat loh karin ka ṭang leh ṭung zel a, ka hah vek thei



" I night dawn tiraw " Kanu chu ka melh zawk a



" Umm " Ka ti sep, tuna ka awmdan nen hi chuan night duty chu ka phurlo lutuk



" I dam chiang silo, in thleng pui tur an awmlo ami? " Min ngaihtuah zetin ati leh a




" ka ṭha alawm, chhun ah ka mu anga bakah, chutiang in ahahthlak loh " Ka ti a, ka huphurh zia sawichhuah kher pawh ka duhlo




" I nu Ramtei'n chaw eiah min sawm a, i thei ang tiraw? An in aṭangin i hna ah chuan i kal tlang mai ang a " Ati a, aphur hmel khawp mai, ka thei ang ka ti ta tawp a, eirawngbawlpui angaih loh vangin room ah bawk ka chho leh, Room a ka luh rualin ka phone alo ri ve chiah a, phone screen a hming lo lang ka hmuh chuan ka thinrim nghal ṭun thei



" Eng nge " ka ti ram hmak


" Eng nge i thuthlukna chu, chiang deuhin i ngaihtuah ang chu tiraw " Alo la ti ngam mawle! Mahni mawhphurhna pawh hlen zolo mipa hi ka ngainep lutuk



" Eng nge i sawi awmzia " ka tih chuan a chek hluk a



" Min fiamkual itum emni Lalhlimpui " Ati chang bawl



" Ka fiamkual lo che, min fiamkual tu zawk chu nangmah ini, Naute chungchangah chuan lo inrawlh ve duh suh, i hming alang lo ang chuan engmah sawi ve tur i nei tawhlo tihna anih chu " Ti hmawk hmawk in phone chu ka dah a, khatiang huaisenna kha khawi aṭanga ka neih nge ka hrelo, Pathian duh loh dana nungin thil ka ti sual a, ka thil tihsual thup nan a thilsual dang tih leh chu ka ngam tawh thlawt lo, engpawh huamin ka pai tlang dawn. Nilengin room ah ka awm a, ka mutchhuak ngawih ngawih reng a ka mu tam khawp mai, ngaihtuahna kawm ngut ngut lo a ka mu thei chu ka lawm viau bawk. Tlaiah chuan kapa hna ban hnuah Nu Ramtei tein ah chaw ei turin kan kal a, min hmuh rualin Nu Ramtei chu alo ri hlut




" Awi, Bawihte kan inhmu khat si " Ati chul a, min kuah vang vang, Udampuia te unau hi Pathum an nia mipa vek anni, hei avang hian Nu Ramtei pawn min ngaizual bik ṭhin, a fate lahin nupui neih an ngaihsak lo ve bawk a, Udampuia hi an unau ah a upa ber a, an milai nen kan in rual ve thung




" Bawiha a awm na nge " Kanu in ati a, kapa leh Pa Zuala chu thildang sawiin an ṭhu Hrang daih a



" Alo hawng ṭep ang, tunlai chu abuai thei lutuk " Nu Ramtei chuan ka kut ala thlah lo hrim hrim, kan sawi lai mekin U Dampuia pawh chu alo hawng ve a, Anu aiin kanu chu a be hmasa zawk, U dampuia hmuh chu ka hreh deuh tlat. Chu ai mah chuan chaw ei hun chu ka huphurh a, ka ei lo mai ang tih chi lah ani tawh bawk silo, chaw ei turin kan ṭhu ṭhap a, vawksa chhum rim chuan ka kua ati let leh but but tawh, insum avan har chiang tak ka hmui chu ka hup leh tawp zel, Kanu leh pa te chu an titi tui a tuman min ngaihsak lemlo, Zorina(Dampuia nau ) pawh chuan a chaw eilai bak angaihtuah lo tuh hriat takin ahawi chhuak lo a, an naupang ber Remrema erawh chu aṭhiante inah chaw a ei chhuak ve thung, chaw chu harsa zetin ka ei a, ka inrin hmaa ka uak tuar loh nan ka insum ṭang ṭang, ka bulah U dampuia aṭhu bawk si chutia ṭang ṭeuh a ka awm reng lai chuan, ka chaw thlenga chaw chu U dampuia'n alo la a, mak ti zeta ka en laiin ani erawh in a chaw thleng chiah a en thung, a tihchhan lam ka ngaihtuah hmanlo, ' Ka puar e ' ti sep in ka tho a, silhmun lam ka pan nghal




" Chaw i ei tak tak miahlo ania aw " Nu Ramtei chuan ati a, an ngaihṭhat loh hmel hlawm lutuk mahse, insawifiah chiam hman pawh ka nilo, choka chhuahsanin Common Washroom ah chuan hmanhmawh deuhin ka lut a, tui herh haw in toilet ah chuan ka luak nghal chiam a, ka chaw ei chhun te chu ka luak chhuak leh nghal vek, toilet a ka kun lai chuan ka chal ah min dawm tu an awm a, mak kati lutuk mahse, ka la uak zel tho a ka hnungah achul pah bawk. Ka luak zawh chuan ka ṭhu sawp leh niai mai, ka luh dawn khan kawngkhar ka kalh emaw ka ti asin, ka bulah chuan alo ṭhu hniam a, tak ngal a min en chuan ka zam lutuk chu sawi mai tur ka hrelo




" I kam ṭhuah rawh " Tui min pek pahin ati a, asawi ang chuan ka ti ve mai, min zawt se engtin nge ka sawifiah ang, ka ding tur chu min pui a




" Ka " Ka tih lai chuan ka ṭawng pawt chatin " Lawmthu min hrilh suh " ati nghut a, ka ṭawng zui tawhlo, Lawmthu hrilh leh ka tum miau alawm




" U dampui " Ka ti sep a, engmah asawi bawk silo te chuan ka awm ati nuamlo lutuk




" Kan inbia ang, a chiang em? " Atih chuan ka ip chawih thei, a aw chu hriatnuam lutuk ani lo tlat alawm, tun hnaite phei chu eng emaw hlekah ka phu dawrh zel, ka hlauthawng hma bawk




" Ka night dawn a, ka kal ahun ṭep tawh alawm " Ka tih chuan aphun hluk a




" Nangpawh enkawl i ngaih laiin midang i enkawl thei ang maw? I ṭhiannu kha be rawh " Ati hmuk a, kalu ka thing thung




" Aih, ka thil ei ka ei fuhlo mai mai alawm, ka ṭha " ka tih chuan angaihdan anih loh hmel nasa, min melh ngur a



" Mi mawl ah min ngai ami? Ka sawi ang chuan ti rawh, tih luihna min hman tir kher suh " Ati hluk a, mangang zetin ka en thung




" U dampui khawngaihin, engmah sawi tur ka neilo " ka ti chuai raih a, hlauhthawnna leh hreawm tihna in min tuam hlup hlup a ka taksa te chu an khur der der tawh, ka darah avuan a. Chiang zetin min melh ngur, ka rilru pangai loh zia chu ahmu chiang viau ang





" Engvang nge, hetiang hian tunge siam che " Sehchilh rapin ati hluk a, ka chungah athinrim lo tih hre mahila ka hlau tho




" Sorry " kan ngawih reng hnuah ati sup a, Ka hlauhzia chu ahrethiam ani mahna min kuah a, min tih ang ang chuan ka awm tawp




" Duty ka ngai " Mumallo zetin kati leh a



" Damdawiin ah chuan ka thlah ang che mahse, thudik ka hre duh zanin atan chuan ka zawt lui dawnlo che, hahdam rawh " Dam dap in ati a ka inthlah dul ve riai riai, ka insehruh nasa lutuk chu ka biang akham vek thei, ka zawi deuh hnawkin ka hria, Washriom aṭanga kan chhuah meuh chuan inpui ah kanu te anlo ṭhu ṭhap tawh a, kan awm rei ve viau aniang





" Khatah inlo awm daih ani maw " Nu Ramtei chuan ati hluai a, tawi te in ka nuih




" Damdawiin ah kava thlah ang e " Udampuia chuan ati sup a



" Aw le, va fimkhur ula " Kanu te chuan anti Nghal luam, U Dampuia chuan ka bag chu la in pawnlam apan a, keipawn ka zui chhuak ve nghal, kawngka min hawnsak ah chuan ka lut a, motor a alo ṭhut luh ve chuan body ahniam sawt a, hneh zeta stearing her kualin Damdawiin lam kan pan a, motor chhung boruak chu areh duk a arit ru hle bawk, hmalam a en ngar a min biak loh avang chuan keipawn ka ngawi reng





" Thil thleng a awm chuan min hrilh ang che " Damdawiin kawtah kan ding a, ka lut tur chu min chelh ding leh hrih




" Aw le, min ngaihtuah suh " Ka nui lui var var a, min ngaihtuah suh ti mahila min ngaihtuah dawn tih ka hre tho, ka lut hmasa a kan duty na tur room ah chuan ka tlang nghal, Ka ṭhiannu in min hmuh rualin alo ri chul a




" Awi, iva tlai ve eng nge awmzia " ati a, min en chik vel lutuk min melh pah ram a




" Ka ṭha reng alawm " Ka ti a, min awih hmel loh mahse, asawi chhunzawm tawh biklo a, Damdawiin rim chuan ka kua ati no leh nghulh tawh ka chau bawk nen chairah thatchhe deuhin ka ṭhu a, Mahriati erawh chuan damlo te damdawi pek tur asiam mawlh mawlh a, damdawi pakhat rim chuan ka kua ati let but a ka inrin hma in ka uak ṭhat, ka ka hmui ka hup a, phawk zetin Mahriati chuan min lo en, ka uak nawn ta biklo mahse, Mahriati hnenah insawifiah ka ngai dawn, dawt ka hrilh chhunzawm ang nge thudik ka hrilh ang




" Ka ngaihtuah ang hi ani lo tiraw " Ati a



" Damdawi kha va pe phawt rawh, hrilh duh che ka nei " ka tih chuan abu nghat a, Damdawi pe turin achhuak a, alo let leh chuan ka bulah aṭhu a chik zetin min melh reng





" Ka rai a " Ka tih chuan arin sa tawh anih vang nge mak ti hmel apu lo



" Lawmkima i hrilh tawh em? " Ati nghat a, Lawmkima hi mim duhpui ngailo mahse, keiman ka duhin ka atchilh em a asawisel reng ngai lo thung




" A duh lo a, titla turin min ti a " ka tih chuan athinrim hmel khawp mai




" Kan mi tenawmpa mai mai chu " ati hmarh a, kei chu lainat hmel zetin min en




" Engtia tih nge i tum " Atih chuan, ' Ka hrelo ' ka ti zuai raih a




" I nu ten anla hrelo tiraw " Atih leh chuan ka bu nghat, Thil thleng vel chu ka hrilh ve malh malh a, UDampuia'n min ringhlel tih pawh ka sawi tel bawk



" U dampuia chu hrilh rawh, ani chuan i nu pawh adam deuh zawngin hrilh dan pawh ahre zawk ang " Ati a, min kuah leh tawp zel




" Tihtheih neih ka van chak tak, ka lainat lutuk che " ati sep sep a, ka mittui a tla leh pur tawh, tiang reng reng hian ka ṭahbelh ngailo. Zanah chuan buaina em em athlenglo a, Mahriati'n min awl hneh khawp mai, ' Va mu mai mai rawh' ati tlat a, mut ka duh lai tak ani bawk nen, ka mu char char, Zingah min thlak tu tur anlo thlen chuan hawng turin kan inbuatsaih a




" U dampuia chu hrilh ngei ngei rawh aw " Ati leh ṭhin a, ka lo ' aw ' ve mai mahse, ka hrilh hreh thung, Damdawiin kawtah chuan Udampuia car ka hmu a apiah deuhah chuan amah pawh ka hmu, nizan khan ka ṭhat leh ṭhat loh min zawtin min lo txt a, ka ṭhat thu ka hrilh hmuah areh leh vang vang, ka hmu thut chu mak kati




" U dampuia anih saw " Mahriati'n ati hlut a, zinglam in entir tur an tam a, tun ang ah chuan lo kal kherlo se kati asin, min hmuh rualin kan lamah alo pen phei pawk pawk a



" I chau em? " ka bula adin rualin ati sup a, ka lu kalo thing tawp



" Ka enkawl ṭha lutuk " Mahriati'n ati a, Udampuia pawh anui suk



" Kan rualin lo kal vela " atih chuan Mahriati chuan scooty akeng thu asawi a, awmze nei deuhin min melh ralh bawk, kei erawh zam luatah thawpik deuhin boruak ka hip leh ṭawk zel, U Dampuia hi mi pangai chung lam anih avang nge min en hrek hrek hlawm a




" Kal ang " Atih chuan, hmanhmawh deuhin ka zui a



" Kan inah min hruai dawnlo ami? " Kan kalna lam chu kan inkawng anilo tlat ani



" Chaw i eitheih loh kha " Min melh zawk a, sawi mai tur hrelo in ka ṭhu ngawi kar tawh thung



" Khawnge kan kal dawn " Kan ngawih reng hnu chuan kati a, min chhang dawnlo emaw ka tih hnuah



" MSL Finale ania, kan en ang chu " Ati dam thlap a, aruala kal ve chu atih chi pawn ka hrelo




" Aa, nangmah in kal mai rawh " ka ti nang nang a, social media a chak tawh si, Ani lah Sport minister lai ani a, tlangval chhelo tak ani bawk, kan pahnih a min hmu dun an awm chuan kan lar hluai ang tih ka hlau




" Intih harh i mamawh, eichak i nei em? " ati leh daih a, eichak em em ka neilo



" Ice cream ani mai emaw lays " Ka tih chuan aner nak chu ka hmu reng


" Ka va lei ang e, ilo chhuk ve kher duh em " Motor chu kawng sir awl laiah ahung a, kan hma deuhah dawr a awm bawk, motor a ṭhut chu ka peih biklo ka chhuk duh ka tih chuan alo phal ve mai a, Dawrah chuan kan inzui lut a. Dawr nghaktu chuan alo chhawn ṭha khawp mai, Sport minister anih avang nge a polite avang hrim hrim tih chu ka hre chuanglo




" Puite, i duh chu la khawm la " Ahnungah kimki deuh taka ka ding chu min lo en a, keipawh chuan ka eichak chu ka enkual ve nghal, Dawr nghaktu chuan afak deuh luam reng a, ka rilṭam ve bawk nen ka la khawm ṭeuh a




" I ei zo thei dawn mi? " Ka thil ken ho chu minlo laksak a, Dawr nghaktu chuan Sarangah alo dah nghal zung zung




" Ka pumpui alian alawm " Ka tih chuan min nuih a, keipawh alem ni miahlo in ka nui ve var var mahse, Dawra lo lut mekte ka hmuh chuan ka nui tawp riai riai a, anni pawn minlo hmu ve chiah





" Awi Hlimhlim, tunlai kan va inhmu khat ve " Anui sang a ka nuih let ve hauhlo




" I hmelhriat emni? " U dampuia chuan min en ran chungin ati a, Lawmkima hi chu ahre reng





" Umm,, hmelhriat satliah " ka ti ve mai a, Lucy nui hmel chu areh deuh riai riai




" I damṭha maw? Lawmkima hi a inla cool lutuk a, ka vah harhpui anih hi " ati leh zung zung a, vak harh satliah chu anni hauhlo ang, Lawmkima chu a ngawi reng thung





" Ka damṭha e " Ka ti sep a, U dampuia ban ah chuan ka vuan nghal chawt, ani pawn a hrethiam ani mahna




" Kan kalsan ang che u " ati nghut a, dawr aṭang chuan min chhuahpui nghal, ka tha khur ru der der chu ahrethiam ang em ka hrelo, ka haw viau asin mahse, rei tak chhung inzawmna ka siampui leh ka tana mipa hmasa ber ani a, theihnghilh nghal hmak chu thil harsa tak ani, ahmel ka hmuh ringawt pawn nasa takin ka chhunglam thlengin min la nghawng thei





" Basketball en tur chuan kal tawh ang aw, ithil eitur kha chu ahmunah i ei dawn nia " ati a kalo bu nghat nghat, ka rilru kawm tamlo ila ka tan chuan aṭha ber, ahmun kan thlen chuan an ri nuai nuai tawh a, ka kutah chelhin ka eitur dahna sarang chu aman akhai daih a, Mizoram pawh hi infiamna lamah hian kan duai tawh biklo, ka tuina lam anilo a engmah ka hre chiang ve lem chuanglo, min hruaina ah chuan ka kal ve zel a, min en duh hlawm lutuk chu a awmlo hranlo ka kalpui pa hi Sport minister ani tlat.





" Kan lo beisei ngamlo che a " Ka hriat ngai mi pawh anni lo, a buaipuitute an niang, an inchibai chhung tih loh chu ka kut a thlah lo



" Hunawl ka nei hlauh a, thusawina hun kha min siamsak kher suh u, ka nihna avangin kalo kallo, vawiin chu pangai taka en turin kalo kal " ati mai a, an inbiak leh luam hnuah, min kalsawn pui veleh ta chauh a





" Ahmunah i en ngailo tiraw? " Kan ṭhu tawh a, ka mal chungah ka thil eitur chu adah bawk, kan bul velah chuan midang pawh anlo ṭhu ve sap sap a, min melh leh zeuh zeuh ṭhin chu anuam pawh ka tilo, kan thlang lama tleirawl ṭhu ho lah chu ṭul hlei lo ah anlo hawi chho sek zel a, an in hrilhru sur sur zel bawk




" Kan thlang ami te khuan an star chiang che " A bengbulah chuan ka ti sar sar a, ka thusawi chu ho ati deuh aniang anui huk a




" I inti thei vel ami? " ka tih leh chuan atthlak ti zetin alu athing, An ṭan a, boruak aṭang nghal at mai, finale anih vang te pawh aniang, U Dampuia chu ka melh zeuh ṭhin a, ani erawh chuan hmuhnawm tih hmel zetin ahmalam chu a en ngar thung, hmuhnawm ka tih vak loh avangin eitur chu ka ei mial mial a, tun ṭum chu pum nuamlo nghulh ang kha ka neilo, cold drinks ka in dawn chuan ka kheuh hawng mai theilo a, midang an au luai luai laiin kei erawh ka buaina adang daih thung, U dampuia lah hmuhnawm atih hmel si tihbuai ka duh silo, dah let ka tum lai chuan min laksak a, mak ti deuha ka en chuan ahmalam ngawt a en tho, ani chuan awlsam zetin a kheuh hawng a, a hawn hnu chuan min pe leh a min ngaihven lo emaw ka tia, ngaihtuah zawm tawh lemlo in ka in khalh khalh a. Nileng ka hun hman dan chu tun hnai chho a ka hun hman nawm ber ani hial ang, asawi lawk avang nge thusawi tur chuan an sawm lo a mahse, lawmman sem tur chuan an ko chhuak tho, U dampuia neitu hmeichhia chu a vannei viau ang, mize nghet churh anei a, aṭawng tamlo in adawhthei viau bawk.





" Anuam iti em? " Kan inkawtah kan awm a, motor aṭangin kala chhuaklo




" Umm, anuam lutuk " Kalo ti ve vat a ka nui var var bawk, angawih tak rengah chuan chhuk ka tum a mahse, min dang leh tho




" Min hrilh turin ka duh che, i buaina ka hriat loh chuan ka chinfel sak thei dawnlo che ania " Ati sup a, chhuah tum buai ta biklo in ka ṭhu ṭha veleh mai, chiang deuha min en tu chu ka melh let ve kar a, thutawi te mah nise ka thusawi tur hi ka sawi hreh lutuk tlat mahse, ka sawi ngei angai ka inhum ruh a, ka aw ka then kharh hnuah



" Ka rai " ka ti chhuak sep a, Boruak chu areh nghal duk, U dampuia hmelah chuan mak tihna alang lo mahse, amitmeng ah chuan eng emaw alang chhuak thung chu chu ka chhiar thiamlo.


Cont..

Chapter ṭhensa vek ani a, in duhthusam in athui lo maithei mahse, zantin kalo dah dawn a, min hrethiam ve aniang chu. Story hi kala ziak tam bik lutuk lo a, ka tih dik loh lai pawh min sawisel hreh lo ula, dm lamah pawh min lo hau bawrh bawrh rawh u. Mizo ṭawng hi kan ṭawng mah nise ziah ahar a, keini ang zir sang lemlo tan phei hi chuan abuaithlak ṭhin, ka inzir ve pah zel a, chhiardan pawh min thiamsak hram ka beisei.


Ka ti ve duah anih khi


Show post links
Top

[Ngaia]

" Tunge apa " A ngawih vang vang hnuah ati sup a, chhan ka tum lai tak in



" Sawi angailo ka hria, kan mitenawmpa mai mai chu " Ati hluk a, U dampuia chu ka en tawhlo



" Engtia tih nge itum " Atih leh chuan, rilru tawt zetin thawk kala hawk a, ka hmahun tur hi ka ngaihtuah thiam lo



" Ka hrelo, kanu te kala hrilh ngamlo a, naute tih tlak ka ngam chuang bawk silo " ka tih chuan arum nghat a, car chhung boruak chu anuam lemlo khawp mai




" Tih tlak chu ngaihtuah suh " ati a, atir ai chuan aṭawngkam pawh adam ta deuh




" Mahse, ka hlauthawng U dampui, ka tihsual avang ani tih chu ka hria mahse " Ka ti deuh nawk nawk a, angawi leh vang vang tawh, ka hlauthawng tak tak alawm mahni inrintawkna ka nei theilo




" Min nei rawh " A ngawi vang vang a, thu mak deuh deuh alo sawi chhuak leh thut ṭhin, afiamthu anih ring in ka en a mahse, a hmel chu athutak lutuk tlat




" Thudik ka hrilh che ilak aṭangin engmah ka beisei lo, ka tihsual ah ilo tuar ve chhan tur a awmlo bawk " Ka thinrim et et thei, thudik ka hrilh avang khan min nei turin leh mualpho thup nan hman ka tum reng reng lo, hmanhmawh zetin ka chhuak a, kan in lam panin ka kal nghal hlawk hlawk, ka incheck up ve phawt anga chumi hnuah kanu te pawh ka hrilh ve ang





" Vawiin chu anuam em? " Inchhung ka luh rualin kanu in alo ti var a, min nuih leh sang tawh




" Umm, nuam ani mai " Ka ti a, kapa pawh chanchinbu alo pharh leh duai tawh




" Ka han inthlak teh ang aw " Ka ti a, ka room ah ka chho nghal, ka intihfai hnuah ka mu nghal a, ka taksa kham deuh urh chu adam suai suai thei, Mahriati ka bia a, doctor min hmuhpui tura ka sawm chuan, alo inhuam veleh khawp mai, harsa viau mahse, ṭhian min hrethiamtu kala nei tal alawm, ṭullo deuh ah U dampuia thusawi 'Min nei rawh ' atih chu ka ngaihtuah chhuak leh a, avan ṭullo tak engtikah mah thlenglo tur ani, rilru hahna leh hreawmna neuh neuh nei mahila zan mut erawh buaina ka neilo a, ka mutui thei lutuk, zan ah mu theilo leh zel ilang chuan ka taksa a chhe chak ngawt ang.


Kan tum lawk tawh angin Mahriati nen chuan hmeichhe doctor kan pan a, ka naupai chu thla1 leh ni3 ani, damdawi te min chawh a, kan kal leh hun tur min hrilh thlap bawk



" I nu te chu i hrilh dawn ta ami? " Restaurant ah kan chawl a, ka kua no nghulh pawh azia tawh lutuk mahse, tih fuh loh hi chu kala nei ṭhin, chaw ei lai mawlh hian insum angai thei lutuk.




" Ummm, ka hrilh ang zep reng theih ani dawnlo a " ka ti sep a, ka eitur chu ka en mawlh mawlh




" Ni e, inu leh pa pawn an hrethiam em em ang, an neih chhun ini alawm " ati a, kanu te chuan an hrethiam ang ka chungah thinrimna an ti lang dawnlo mahse, ka hriat loh a an rilru nat tur dan hi ka hethiam pha ve ruak a, an fanu tan hian aṭha ber an beisei laiin kei ve thung chu nau ka pai a naute pa lahin apawm duh lo lehnghal, chungte chu kanu'n ahriat hunah chuan min khawngaih lutuk avangin nikhaw hrelo in atlu thei hial ang, kanu der dep lutuk avang hian ka sawichhuak hreh ngawih ngawih ani.




" Kanu chungah thil thleng awm tase, engtikah mah ka inthiam thei dawnlo " Ka ti hap, ka thil ei pawh chu atui tawhlo lutuk





" U dampuia chu i hrilh em? " Ati daih a, thusawi thlak kual hi chu athiam asin




" Ka hrilh alawm, 'Min nei rawh' ati anih chu, ati anglo ve e" ka ti chiam a, ka sawitel kher chhan pawh ka hrethiamlo





" Nei maila, i mualpho tur pawh azia dawn asin " Mahriati chuan ka hmakhua angai tih ka hria mahse, ka tumlo bur ka tihsual avangin U dampuia'n atuar ve zel ang maw, chutiang thlen tir tur khawp chuan ka sual biklo




" A hmangaih tak neih a phu, keimah avanga anun atihchhiat ve kher angailo " Ka ti hmuk a, Mahriati pawh abu nghat nghat




" Engpawh nise thleng tur chu thleng phawt se, hringnun hi daipelh laklawh chuan kawng dik tak hmuh leh aharsa tawh a, adik emaw ti a kan zawh ṭhin te hi adiklo leh ṭhin mahse, kawng diklo kan zawh ṭhin na hian kawng dik min kawhhmuh a, dai ve pawp pawp ila kawngdik chu ala lang mai ang " ati a, ka pawm zawng tak ani, diktak chuan tunah hian ka tana ṭha ber tur ka hrethiamlo, hmalam hun ngaihtuah dan ka hrelo bawk, hetiang hi ni mahse, beidawn erawh ka tum chuanglo, ka nun nen a ka tehkhin ber chu ruahthimpui ani, tunah hian ka nunah ruahthimpui sur mahse, ala reh anga chhimbal mawi tak ala lang leh ang, chu chu beiseina ani thung





" I awmlo ang tih ka hlau " Ka ti a, Mahriati hi awmlo se hreawm kati zual ngawt ang, nilengin kan awmdun a, kan lengdun khawt tawh bawk nen, kan bazar kual a ka rilru pik deuh pawh azia ve deuh, Naute thil an zawrhna ah chuan min luhpui a, min pawt lut ti zawk teh ang




" Hey, eng nge itih dawn " ka ti hlar, tiang hi chu lei hun pawh kala tilo



" Naute thil lei hmasa ber tu nih ka duh alawm " Ati tlat bawk si ka hnial lui ta biklo, ahma aṭangin naute thawmhnaw leh pheikhawk te hi chu cute ka ti thei lutuk, pheikhawk tetak te cute zet chu ka en reng a, ka mittui tla tur chu ka khap let sak sak



" Ka inpeih e " Ka banah min kuah a, dawr aṭang chuan kan inzui chhuak leh hnak hnak, athil lei min pek chuan lawmthu ka hrilh a, ' Lawmthu min hrilh suh, i inla hrang emai ' ati hlur a, engmah ka sawi zui tawhlo. Chaw eitur in min sawm a, ka hnial thung mahse, ' Keimah chiahin ka ei dawn a ' atih tlat avang chuan ka hnial lui ta biklo, asawi ang tak tak in a chhungte an awmlo vek a, chaw pawh chu rin ai takin ka eitui, ka rai tih ka hriat hnua ka ei pangai ber ani hial ang. Chaw kan eikham hnuah kan inthleng min thlah leh a, leng tura ka sawm ve chuan ' ka chhungte anlo hawng ṭep' ati ve tlat a ka sawm lui biklo, Mahriati chu ka thlir liam a




" Inbe teh ang " Gate ka lut tur chu Lawmkima alo lang nawlh a, mak ka tihzia chu thup theih pawh ani lo




" Eng nge sawitur kan la neih " ka ti hlak a, ṭawngkam ṭha in ka be thei derlo





" Naute chungchang kha " ati nghut a, athim lai ah chuan ka nawr phei a, ka tih ang chuan a awm ve mai





" Sawi tur i nei ve tawhlo ka tih kha, engmah sawi tum ve tawh suh " Ka ti hmarh hmarh a, ka thinrim hlur mai




" Inu te hrilh itum emni? " Ani erawh aṭawng adam thlap thung




" Ka hrilh dawn, lan chhuah hun a awm dawn tho alawm " ka ti hmiah a, asam tuai puat chungin athaw halh a




" Tunge a pa itih ang, pa aneilo iti ang maw? Hlimpui thil ti harsa lovang, ti tla rawh senso chu ka tum vek ang nula ang in awm leh rawh, tinge mualpho i thlan tlat a, athup theih reng alawm " Ka rilru hneh tum zetin ati leh a, ka dar ah avuan bawk. Ka hmakhua ngai te pawh a ang ve lutuk mahse, a hmasial lutuk vang zawk ani, Lawmkima hi ka hrechiang ve viau emaw ka ti a ka lo hrechianglo lutuk zawk ani




" I mualpho i hlauh vang anih kha, lungngai suh i hmimg alang lo ang " Kati kha fak a




" I dawn tawi lutuk hi abuaithlak, i thluak kha hmang ta che " Ati hluk a, ka ter ve nghal at




" Ni e, ka mawl ka thluak ka hmang ngailo chuan ka dawntawi bawk, lawm hle zawk ta che fing kar ni ila kha chen i duh dan danin min hrual thei tawp nang " ka ti ve salh salh a





" Lalhlimpui " engmah asawi belh tur ahre tawp silo a





" Kal tawh rawh, iduh ang takin nun hmangla keipawh ka duhdan in ka awm ang, inti buai tawn tawh lovang " Ka ti sep sep a, Lawmkima hi theihnghilh aharsa dawn tih chu ka chiang lutuk mahse, hun in ala liampui ve mai ang, inzawmna ka siampui hmasak ber ani a, ka tan chuan amah nen kan thil tih dun apiang ahmasa ber ani zel, ka mittui lo luang ngiai ngiai chu ka hru hul thuak a. Ka chhungril hian a ui ka zeplo, ka thinrim laiin haw ṭhin mahila ka luhlul tluan thei ang em ka hrelo. ka kalsan a chak deuh in ka pen pawk pawk



" Kalo hawng e " Ti lang lang chungin Sitting room lam ka pan a mahse, ka beisei loh lutuk in U dampuia alo ṭhu ve kur a mak ti zetin ka melh tawp, ka mak tihna chu hlauhthawnna in athlak a, achhan pawh kanu hmel dang lap leh kapa hmel thutak run chu ani, U dampuia alo kalin kanu hi anuisang ṭhin a, kapa pawn tiang hmel hi apu ngailo




" Lo ṭhu teh " Kapa chu a thinrim nge thinrim lo ka hrelo, tim daiin ka ṭhu a, boruak chu a rit ngawih ngawih tuman ṭawng an tum bawk silo





" Thil thleng a awm emni? " Ka ti sep a, kanu in min melh reng pawh chu nuam ka ti tawh miahlo, kapa chuan a hrawk athian kharh a, ka thinphu arang nghal dup dup




" Dampuia hian alo sawi a " Ati charh a, Udampuia chu ka melh nghal kawk




" Inneih ka duh thu ka hrilh " Atih chuan awihlo lutuk in ka melh tlawk tlawk




" Nau hial ilo pai tawh a, tinge atir khan min hrilh loh " Kanu in zawi tein ati sep a, U dampuia ka huatzia chu sawi ngaihna pawh ka hrelo, min rawn miahlo a kanu te alo hmu chu ka thinrim hlur bawk



" Ka.. englo " Sawi belh tur hrelo zetin ka ti nawi niai a




" Papui, ka va hawng tawh ang e, sawi ho te pawh induh ang " U dampuia chu ading vut a, min lo en chuan ngei zetin kalo melh let ve kar, a chhuak tur chu ka zui chhuak ve nghal a





" Engvangin nge tiang khan itih, ka duhlo ka ti ani lawm ni" Pawn kan thlen rualin ka ti nghal tawn tawn a, min lo hnaih ruakin ka hmui a hup a



" Ṭawng ring suh, kanu te khan an hria ang e " Ka hmui ahup na akut chu ala thla a, am zetin boruak ka hip lut kawk kawk




" Ka rai thu ka hrilh che khan engmah phut ka neilo, Ka u awm loh hnuah ka tan ka u ang mai ini a, chuvang chauh chuan asin ka hrilh che" duhthawh zetin kati a, hetiang hi ka beiseilo tak tak



" I beisei loh avang alawm ka tih, I u ang chiaha min en chuan ka thuthlukna hi pawm rawh " Ati nghet charh a, ka lu ka thing nawk nawk thung




" Aih, Ka thil tihsual avangin i nun ka tichhe theilo, Nupui ṭha tak neih i phu, tiang ang mai mai nilo hian " Ka ti chul a, a rilru thlak se ka ti ngawih ngawih



" Ka nun iti chhe hauhlo, tiang chuan ngai suh, i rai tih leh ka fa ani ka tih khan Nupuii saw adang lawp lawp asin " Ati chhuak hawk a



" Dawt hian rei tak adaihlo, thudik hrilh ila nakinah kan buailo ani mai " Ka ti ve hmak a, tunah dawt sawi ila nakinah hrechhuak leh ta si se, kanu hian atuar thiamlo zawk daih ang




" Puite, tunah hian va lut la ka fa anih loh thu va sawi leh la, Nupuii dinhmun saw a chhe viau ang, thu dengkhawng hre chi anilo tih kan hre ve ve, keipawn vawiin nilengin ka ngaihtuah asin risk ka la a, nikhaw hrelo a atlu lo saw thil lawmawm ani " Ati a, thu dengkhawng ahre zo chiah a, thildang hrilh leh chu thil tih chi anilo tih kei tluka hrechiang an awmlo ang, beidawng zetin thawk kala a, ka thil tih mek avang hian engtikah mah ka inthiam thei ngai lovang, U Dampuia ka hrilh ta kher kher chu ka inchhir hnuhnawh a mahse, engkim athleng vek tawh nilo athleng duak duak zawk anih hi.




" Nutei te pawh " Ka ti halh laiin ka chhunglam asa pup pup a vawi leh khatah ka kua alet thut, ka inrin hma in ka uak nghal tuarh a inchhunga tlan luh hman ni tawh heklo, tlansawnin kan insir ah chuan ka luak tawp, Ka chalah U dampuia'n min dawm a, vawiina ka thil ei ve te chu ka bun chhuak leh vek hi ani ringawt, ka luak te chu aten velo ami le, ka chal adawmna laksak ka tum chuan akut chu adahsawn duh miahlo, ka luak zawh meuh chuan ka chau hle hnunglam aṭangin min kuah a, U dampuia tha ringin ka ding ve ṭawk ṭawk ani.





" Kanu te chu ka hrilh vek tawh, engmah ngaihtuah hah suh, min ring rawh " Ka sam achul a, ka chhungrilah hian inthiamlohna nasa lutuk in min tuam hlup hlup




" Kal tawh rawh " ka inla hranga, tha pawh ka nei veleh deuh tawh





" I naute tan khan hahdam i mamawh ania, i ngaihtuahna kawm ngut ngut suh " Ati leh sup a, mittui tling pamin ka melh chho kar, ka mittui avangin U dampuia chu ka hmu phe riai a




" Ṭap teh suh " Ati nghut a, ka mittui luang ngiai ngiai chu ka biang a khuap run chungin atuai hul a, Lawmkima chuan a thisen ngei a fa chungah pawh mawhphurhna alak ngam loh laiin U dampuia chuan a fa ni miahlo lakah mawhphurhna lak atum a, an in anglo takzet ani. Keihi! tinge maw ka tehkhin chiam chiam le





" Ka lut dawn " ka ti a, inla hrangin ka kalsan hmawk hmawk a, kanu leh pa te pawh anlo awm tawhlo, naktukah erawh sawi tur tamtak a awm ngei ang. Ka intih fai hnuah Mahriati chu chanchin te ka hrilh ve a, sawi tur angah leh khawp mai, zan dang anglo takin ka muhil theilo a, ka pum chu ka chul ka chul a, thawk leh khata ka nun danglam dawrh chu amak ani, thil thlen mek dan chu adiklo ti mahila engtia tih tur nge ka hre chuanglo, Ruahthimpui sur karah hian eng ber nge kawng dik ka hre theilo ani.





Zingah pawh ka tho tlai hle a, kanu te pawn min kaitho miahlo, zing kar luakchhuak ala rehlo a, ka luak zawh meuh chuan toilet bulah zawi deuhin ka ṭhusawp leh niai, ka mittui aluang zung zung bawk a, mahni inkhawngaihna ka nei chu duhlo viau mahila ka thunun thei der lo, vanduai bik viau a ka inhriatna chuan ari meuhin min ṭah tir thei, 'ka tihsual man hi engtia rei nge kala tuar dawn?' Tiin zawhna chhanna awmlo chu ka inzawt leh a





" Bawihte " Inhnuai ka chhukthlak rualin kapa in sitting room ah min ko a



" Pa " Ka ti sep, kapa hmuh te chu ka inthlahrung ngawih ngawih


" Palai anlo tir dawn a, rem lohna a awmlo bawk a, ka hrilh hre hrim hrim che " Ati dam thlap a, thil thlen dan vel engmah min zawt lo leh min hau miahlo chu amak kati, ka ngaihtuahna hria niawm tak chuan




" Thil thleng tur chu athleng vek tawh a inthlahrung tak khan awm suh, hauh chiam che avanga thil hi pangai leh thei tur nise chuan, ka hmangaih che vang in ka hau ang che, ka vaw zawk hial maithei che ani, Inhauh avanga danglam tawhlo tur thil avangin ka fanu neihchhun hi hauh kher che ka tumlo, rilru dam takin awm la ka duh " ati chuar chuar a, ka mittui atling leh pam tawh ka ṭahbelh zia hi.





" Ka tihpalh pa " Ka ti ṭiau a



" Dai dik turin dai sual angai, chu chu tihpalh ani mahse, angai bawk dai nawn leh erawh hi chu tihsual ani thei ngailo, i hrethiam ang tiraw? tunah chuan kan inchhung chhuahsanin midang chhungkua i fin ve tawh dawn a, kan in lokal chhen te amawi tawh dawnlo, i puitlin hle angai dawn i pasal tur lah Sport minister ani a, i ṭawiawm ṭhat angai dawn bawk, mawhphurhna lian tak inei ania " Ati leh dap dap a



" Abak chu inu in ahrilh ve tawh ang che, kan khua har dawn lutuk a, inu phei chu aṭap reng mai " ati a, anui hak hak bawk zalo zetin kanui ve, choka ah ka lut a kanu chuan tum hmarhin eirawng alo bawl




" Nu " Ka tih chuan hrelo ang hmakin a awm a, hreawm kati lutuk



" Nu, ka tihpalh " ka tih leh chuan ache lai atawp chat a, min em ve ta nge nge




" Inu angin min la ngai maw " atih chuan hrilhhai zetin ka en reng



" Nu, chutiangte engtin nge i sawi theih " ka ti ṭiak a



" Ipa i hrilh ngam loh pawn keital hi min hrilh theilo emni? Thil hrilh tlak loh khawpin kalo in hawng tawklo zawk nge, engpawh min sawipui theih nan ka inhawng ve viau chuan ka hria asin " Ati hlak hlak a, amah a indem hlauh chu ka duh miahlo



" I hriselna in atuar ka hlau em ani Nu, ka hrilh chak thei lutuk che, ka mood danglam sek lai te khan i bulah awm a, chhan awmlo ka ṭah chhuah ngawih ngawih lai te khan i malchungah ṭah vak vak ka chak asin " ka tih chuan kanu chu aṭap chhuak hak a, kalo kuah vat thung ani pawn nghet deuhin min kuah let a, aṭap khur dar dar ka bang chuang biklo




" Arukin ituar dawn chu ani sia, Bawihte inu hian rinhlel ngaihna pawh ka hrelo, Nu nep tak kani tiraw? Nau pai lai phei chuan rilru hahdam kan mamawh a, duat tu kan mamawh asin " min khawngaih zia a aw ri aṭangin ahriattheih vek, kanu hian min hrethiam dawn tih ka hria lawm, dawrawm viau mahse, a angchhung hi ka thlamuanpui ber tho, ka rilru no a chhuah changa kanu malchunga ṭah vak vak ka chak theih zia kha.




Cont..


Show post links
Top

[Ngaia]

Hre vek tawh mahse, chaw eilai chuan ka inthup leh hram hram a, kanu te chaw ei ka ti tuilo ang tih ka hlau ani, chaw chu ka eitam lo leh khawp mai, hna kal turin ka insiam a, Udampuia chu areh vang vang thung, ka rilru hi ala mumal bik miahlo, engtia awm chhoh zel nge ṭha ang tih pawh ka ngaihtuah thiamlo, Nu Ramtei chuan min lo bia a, an in lama leng phei turin min sawm bawk, a phur hmel lutuk ka beisei loh dan deuha a awm chu amak kati, a lungawi loh ka ring kha ania ' In inzep char char a, tu kan hmu ve dawn tawh chu ani reng sia ' alo ti hlut kha ania. U Dampuia chuan a chhungte pawh dawt ahrilh tih ka hrethiam ta mai, keimah avangin a chhungte hial dawt ahrilh angai a, hetiang tur hian ka duhlo asin, tlanbo zawk ila tih te chu ka ngaihtuah a. Chhunah ka duty a, thil ka eiṭha lo bawk nen ka zawi ngawih ngawih, vawiin phei chu enmergency a awm neuh neuh a, thisen ka hmuh te chuan ka kua alet leh but but tawh, Mahriati a awm bawk silo nen midangin ka rai tih an hre lo nen abuaithlak




" Puipui, Doctor saw va pui lawk ta che " Aduhi'n atih chuan Doctor awmna lamah chuan ka kal ve mai a



" Awi " ka tih rualin ka hmui ka hup nghal, thisen tam zet chu hmuh nuam anilo ve em alawm, ka kua let nghal but but te chu ahreawm lutuk




" Thisen achhuak tam mai mai anih hi, tihfai na tur kha min lo pela " Doctor Mahlima chuan nelawm zetin min nuih a, a buaipui mek nupui ni ngei tur kan sira lo ding ahmel en reng reng pawha hlauthawng tih hriat lutuk te chu ahnem pah sup sup bawk, kan hming a in ang a, hei vang te hi aniang min biak neuh neuh hi apeih a, a damlo te lakah lah adawhtheiin hmel hlim sarh apu reng thei.






" Iva nawm loh hmel ve " Hnaih vak lo ah chuan ka ding a, thisen kha hmuh vak ka duhlo, ka awmdan chuan a ngaih ati ṭhalo deuh aniang




" Zingah chaw ka eilo a, ka pum adiklo mai mai " Dawt muhlum chu ka sawi bik miahlo, abu nghat a




" Kapu, ana em? " Ati daih a, Putara ti ila pa valai tak ala ni thung, ahming pawh ka hre chuanglo




" Na em em lo, a chawmawlh tawk zawk pawh aniang " Ati ve chuar chuar a, anupui chu hahdam rawh ti ve ang hrimin abuk khum nghat




" Kan zo ta e, ka admit lo mai ang che u mahse, dressing tur chuan inlo kal angai dawn a, Damdawiin ah vawi3 vel kan dressing hnuah chuan inlam ah pawh tithei an awm chuan atih theih tawh ang " Doctor chuan ati leh zung zung a



" Kan lawm lutuk e " Hliamtuarpa nupui chuan ati a, a hahdam suai suai hmel chu hmuhnawm kalo ti, ahmangaih viau aniang apasal chuan akutah alo vawn sak a, chumi te nupa chu ka en reng a, ka dul ka chul zeuh bawk ' Naute chhungkua chu ka dinsak thei ang che mahse, hmangaihna erawh atel ve dawnlo thung ' ka rilru chuan ati a, tawi te in ka nui, Doctor nen chuan kan inzui chhuak hnak hnak a



" Chaw i ei silo a, thil kan eidun dawn mi " Atih sup chuan chhan mai dan tur ka hrelo



" Aaa, ka ril pawh aṭam chuanglo " Ka ti sep a, ka huphurh lutuk tlat




" Chutiang ringawtin anti ngailo, Canteen ami chu atuilo pawnlam ah eichhuak ila " Ati sam then a, ka chhanlet leh hma chiahin ka phone alo ri a, Screen ah Udampuia hming a lang va va



" In chawl tawh em? " Hello pawh ka ti hman lo



" Ummm, kan chawl dawn " Ka ti ve mai a



" Pawnah ka awm, thil eidun ang " ati leh charh a, phone ka benga chuktuah reng chungchuan Dr Mahlima chu ka en zawk a, min lo nuih var var, U dampuia helai thleng alo kal a bakah ka rai thu ahre tawh bawk, Inthup ṭit ṭet a ei ai chuan U dampuia ei chu azia zawk ang, ka rilru chu abuai ve khawp mai




" Puite " Ka ngawih reng takah chuan alo ti cool ruih a, a aw chu adamin hriat anuam takzet




" Umm, kalo chhuak ang " ka ti a call adahzui, Doctor Mahlima chu inthlahrung deuh takin ka melh a




" U dampuia alo kal a, thil eidun aduh a " ka ti sep a



" Aw, apawilo inthiamlo suh keini te chu kanla inhmu reng dawn alawm, helai thleng lo kal tawh te chu azahawm " Ati hlut a, anui reng bawk si abula awm hi anuamlo ngailo




" Chhuak dun tal ila " Atih chuan ka hnial tawh lemlo, thil ho deuh deuh asawia kalo nuihpui hak hak, Damdawiin kawtah chuan U damluia ka hmu nghal a, Doctor nen chuan chik zetin min lo en ngur




" Anih ka kal mai ang aw " Ka tih chuan min vai zeuh a, nui sangin kalo vai let ve




" Ilo kal kher duh a " Nuamlo ti ru deuhin U dampui chu ka melh a, ani erawh aka achip hmak thung, akal a ka zui ve dat dat



" Athlangah khuan ei mai ila, Chawlh chhung areilo si " ka ti nang nang a, akal chak si apen zau bawk si, apen pawk pawk a keiin ka um dat dat thung, kan kalpel tak ten min en zui leh vang vang zel bawk si




" Naaa, U dampui ka ke akham " Ka tih nang nang chuan ading chut a, alo leh hawi vut bawk




" Ka kal chak deuh emni? " ati anih chu! Huiham kal chak deuh pawh nilo in akal chak lutuk zawk ani




" I pen pawk pawk a, ka um zel che angai alawm " ka ti hlar a, ka ke chu akham et et thei, min kiai khum suk a




" Thinchhenu " atih chuan ka ngawi reng, tunah khan ka vin ve chiam a, vin tur kani miahlo




" Ka tihpalh " ka tih chuan anui hmel abo hmak a,arum nghut, ka kutah chelhin ka zai ngai deuhin akal tawh a




" Tihpalh tih leh ka lawm e tih hi bansan teh, ka lakah hmang uar lutuk teh suh " Ati hmuk a, ka chhanglo




" Hruaina tur che ka nei a mahse, tlaia kalo hruai hunah che ni zawk rawh se " Ati leh mai a, bangbo zetin ka melh chho



" Tlaiah min lo hruai leh dawn mi? " Ka tih chuan abu nghat a




" Keimah pawn ka hawng thei alawm, inti buai duh kher suh " Hna angah zia ka hre ve a, lo tihbuai ve chhen kha ka duhlo




" Doctor kha inthlah tir i tum tihna ami? " Ati deuh hmuk a



" Aaa chutiang pawh anilo " Ka ti sep a, dawr kan luh tak avangin kan ngawi dun reng, akil lam ah chuan min kalpui a, ka ṭhutna turin chair min pawhchhuah sak thlap




" I duh duh chah la " Ati a, menu chu ka bih ve na in eichak ka neilo ' Ser ka eichak zawk daih '



" Engmaw i sawi " U dampuia chuan ati sup a, ka en chuan chik zetin min lo en, ka rilru in ka sawi emaw ka tih kha kalo sawichhuak ani hrim hrim, zalo zetin kanui lui a





" Engmah " Ka ti hluai a, aremchang ber chu ka chah ta tawp, ka eichak em em pawh anilo




" Zanah palai anlo kal dawn a " Atih leh chuan ka thil eilai ka tawp deuh chawt




" U dampui, tiang hian tilo la kati, ka inthiam thei dawnlo " ka ti hap a, midang dawt hrilh chungin ka hlim thei dawn emni?




" I rilru ti hah lutuk suh ka tih kha " Engmah thlenglo ang maiin athil ei lai a ei zawm mawlh mawlh a, keichu ka thil eichak na abo leh vek tawh, thil kan ei zawh ah Damdawiin kawt thleng min thlah leh a, lut hmasa rawh min tih tlat avangin ka lut hmasa a, duty na ka thlen leh meuh chuan Nurse duty ve te chuan min lo bawr huk a




" Sport minister nen khan in inhria ami? " Tih te min zawt a, mak ti zetin kalo en haw, U dampuia chungchang min zawt nual a, kan inngaizawng em tih te min zaw hlut hlawm ' kan inhre satliah ' ka tih chuan an awih hmel vaklo mahse, min zawt zui ta lo ka lawm daih zawk, thawp anti ipik tlat alawm, Tlaiah chuan U dampuia hnen aṭang bawkin call ka dawng leh a



" Pawnah ka awm a, i hawng hman tawh em? " ati thum bal a



" Umm, hman ṭep " ka ti a, kalo nghak ang che atih hnuah phone adah leh daih a, min chhawk tur anlo thlen chuan muang lemlo takin ka inthlak a, U dampuia'n min nghah avang chuan rilru ahmanhmawh viau tawh, Hmanhmawh deuhin ka chhuak a, Damdawiin kawtah chuan ka hawikual vual vual, U dampuia ka hmuh mai loh avang ani mahse, thingbuk hnuaiah chuan a car ading a, a awm ngei ringin ka pan hnai, ka kal hnai zel a amah pawh ka hmu min hnungchhawn zawngin ading a, adinpui pa chu ahnunglam aṭang pawn ka hai lo nasa Lawmkima ngei ani, thawm ka dim zual sauh a



" I fa ang chuan i pawm thei ang maw? " Lawmkima chuan ati hmuk a, ka kawchhung hi aso nghal bulh bulh in ka hria, engtin nge hetah te lo kalin U dampui alo hmuh ngam zawk



" Nangnen kan in anglo " U dampuia chuan ati hluk a, thaw dep dep in an thusawi chu ka ngaithla ran, Tlai lam anih tawh avangin mihring pawh an tam tawh vaklo



" Anih chuan ka hming alang tur ani lo, Nupui ka nei dawna, Hlimpuii rai hi ka tan apawi teh mai ania " Ka awm thip vawt chu engvang ber nge ka hrelo




" Khawvel hmeichhiaa duat phu ber chu Puitei hi ani, mipa chauh kutthlak ṭhin nilo ilang chuang ka kut ituar tawh ngei ang, sawisak chiam che ka chak zia hi, Hlutna neilo ang maia in ngai hmeichhia saw ahlutna diktak ka hmuh tir dawn, i kalsan avangin inchhir hlek suh ang che, Puitei te hmuh theih ah lo inlan tawh suh " U dampuia ṭawng tam ve ber ani hial ang, athusawi mal tin te chuan min khawih ngawih ngawih, Lawmkima tan lah a thanat thlak dawn, A inlak pa ve tehlul nen U dampui'n mipa ang pawn angai loh thu sawi dawt lo mahse, mi pangai tan hriatthiam loh chi ni heklo.




" U dampui " Thleng chiah ang deuhin ka pan hnai sauh a, Lawmkima chu hmu thut angin mak ti hmel ka pu lui



" I hman tawh ami? " Dam dapin ati a, Lawmkima chu angaihsak zui lo hrim hrim, ka thlen ve hma khan eng tak sawi ang maw, ka luhna tur kawnga min hawn a ka ṭhuh luh hnu ah alo lut ve nghal a




" khawiah emaw ka hruai ang che, i remti em? " Ka en zawk a, khawiah nge maw min hruai atum ni




" Apawi hleinem mahse, reilo ang aw ka ke akham lutuk " Ka aw ah chuan pangchanna ari tel, chik fe lo pawn an hrethiam ang, U dampuia chu hahdam zetin anui hak a, aṭhutna sir lam chu a zen rak rak a, ka en reng lai chuan ka hmaah sarang alo khai lang va a, amah ka en chuan hmalam a en ngur bang bo deuhin kalo laksak a, a chhung a awm ka hmuh rualin ka khek deuh chul



" Awi! Ka lawm lutuk " ka ti chiam a, ka nui var var bawk, Sarang chhungah chuan Nimbu leh theihai bakah thei dang alo awm nual a, Chhunah khan thei ka ei chak thu ka sawi kha ahre chiang alawm, ka lawm lutuk chu ka mittui a hnai kuar mai



" Ṭap miah suh " ati nghut a, mittui tling pamin ka en tawh tho tho




" Ka lawm vang alawm, ka luak chhuak tet tet ṭhin kha azia deuh a, eichak ka nei ve ṭan a " Kati niah niah a, engvanga chutiangte chu sawi nge maw ka nih le




" I eichak chu sawi zel rawh " ati a, min en zeuhin hmalam bawk a en leh a, kei erawh thei eitur ka hmuh chuan min ti hlim lutuk tlat



" Kan thleng e " Motor ati thi duk a, ka hawi chhuah chuan kan awmna chu kala hre ngai miahlo




" Khawiah nge kan awm " Ka ti hliai, thei eitur ngawtin rilru aluah a, kan awmna chu ka hre miahlo




" Chhuk phawt la " Ati sup a, In lian lemlo tak ani a mahse, achangkang viau thung, abul hnaiah inding a awm vaklo a, hmuh theih chang chang ah in pakhat chu a awm, helai kan tlan lai ka hrelo reng reng





" Awi, avan daifem em em " Ka ti chiam a, Motor kawngka chu ka hawng rawk rawk a, ka chhuk thla nghal tharh bawk



" Mi chimbuai lutuk hi ka ning ṭhin a, ka riak zeuh zeuh " Inchhungah min hruai lut a, pawnlam landan ai daihin achhung chu achangkang zawk




" Mahse, afal e ahlauhawm lo mi " Kan thlen hlima ka rilru a lo awm ani



" Hlauhawm maithei mahse, mipa ka nih hi " Ati cool ruih a, min melh dan chu'h




" Okk, mipa ini " Ka ti a, choka ah ka lut tlang a, afelfai thlap mai ka hawikual vual vual a, chemte chu ka hmu hlauh




" Kan inneih hunah hetah hian chen iduh em? " Nimbu kawr vel pah chuan ka en chho ralh a, Choka luhna ah ban nghengin ading awn deuh a, alan dan chu a cool




" Ka sawi kha, afal si nang chu mipa keichu hmeichhia " ka chhanna chuan anuih tir hak hak a, ka che vel chu min en reng, ka zam chhe mai dawn alawm le




" Insa tur an awm alawm, ala lun leh dawn " Ati sup a, ka chhang tawhlo, chi awmna ka zawh chuan a kawk zeuh a, plate teah chi la chhuakin chair a ṭhu chung chuan ka ei hmarh hmarh a, awii atui lutuk tiang reng reng hian thei thur tui kala ti ngailo





" Atui viau ami? " Ka bul hnaiah alo ding reng tawh a, alo kal hnaih lai ka hrelo reng reng, ka thil eiin ka rilru aluah lutuk avang pawh ani maithei




" I ei ve duh em? " Tih pahin lep khat chu alamah ka lek kang a, alo ner nung mai




" Theihai hi i ei tel dawn em? " Ati sup a, ngaihtuah lemlo in ka bu nghat




" ka vel thei reng alawm " Theihai vel atum chuan kalo dang a mahse, ati lui tho



" Sport minister ini a, kan inneih tur thu chu mizoram mipui ten an hrelo thei dawnlo a " Ka ti niah niah a



" Chuan eng nge? Buaina a awm emni? " athil vel lai chawl eih lo in ati nghat a



" Englo nangmah kha " Sawi ber tur ka hrelo, a duh reng vanga min nei tur ani bawk silo a, eng ber nge ka hlauhthawn ka hrelo




" Sawila, Tlangval ka nia nupui ka nei tur te chu thil diklo pawh ani lo, Pasal nei dawn ila chuan amawilo a " Tur zetin ka en a, a uang ve ngei aniang anui ruh ruh mai



" I over e " Kati hluai a, ser pum khat chu ka ei zo diam tawh


" Anilo ami? " Amit ko ati che ralh a, lai zetin ka hawisawn




" I tum loh dan in ka awm tir che a, Nupui neih chu duh tawh mahla kei nen kher chuan i suangtuah ka ring biklo a" ka ti leh sep sep a, ka ṭawng ring hranlo





" Ka tana remruattu hian thil ṭhalo chu min ruatsak ka ringlo " ati sup a, Atheihai vel zawh sa chu eitheih turin azai lep a, min pek takah chuan ṭawng tawh lemlo in ka ei leh mawlh mawlh





" fa ka neih hunah min ṭhen leh dawn nia, inṭhen chhan chu phuahchawp tur a awm mai ang " Ka ti lar lar a, thawveng ang deuhin sawi chhuak mahila 'inṭhen' ka sawi khan ka awm anuamlo, thilsawi nuam tak anilo




" Inṭhen sawi lang hlek suh " Ati chhum hmak a, ka enlo lui tlat chu a dawhtheihna in atlinlo nge Chair ri hrawk khawpin min kuai her a, ka khabe ah na zeta chelhin min kuai dak salh bawk, a chetdan chu ka beisei loh lutuk thil anih vang nge mak ti zetin ka en tawp




" Ṭhen leh mai mai turin nupui neih ka tum hauhlo, Inṭhen thu sawi tawh ngai suh ang che " athinrim ve ngang aniang amitmeng chu athim khup a, abeka thisen zam chu apawng ṭalh ṭalh bawk, chu ai mahin ka khabe achelhna hi ana lutuk, ka duh loh deuhin ka mittui aluang ngiai ngiai a





" Puite " Thaw hrawih pahin ati a, ka khabe achelhna athlah a, min khawih atum leh chuan talsawn ka tum a mahse, min kuah lui leh tho, tal vak vak mahila tha ah ka hneh lo lutuk, tal buai pawh ka tum tawhlo ka ṭap chhuak hlawp hlawp thung a, eng ber khan nge min vel ṭap ka hrelo, Min hrawk avang khan nge ka khabe ahmerna zawk kha ka hrelo, ka chhipah a fawp a ka hnung achul heuh heuh bawk, chungte chuan ka ṭah anti chhuak zual sauh a, uar zetin ka ṭap hliam hliam




" Ka tihpalh Duatte " ati leh hulh ṭhin, a inthiam loh dan chu a aw ri aṭang pawn ka hre thei mahse, ka ṭap tawp maithei biklo, Duat taka min kuah tu ka mamawhzia ka hrechiang zual, tianga ṭah chhuah hawm hawm ka chak ṭhinzia kha, tu mitmei mah veng lo a ṭah vak vak kha ka chak ṭhin. Tuna ka awmdan avang hiam kala zak dawn tih ka hria mahse, tunah chuan achhuak em a chutiang lam ka ngaihtuah duhlo.






" I thawl huai em? " Kan in lam panin kan tlan leh mek a, ka ṭah chiam avang khan ka zak mek ani, en pawh ka en ṭha ngam derlo mahse, ka thawpik zet te kha chu akiang ta deuh




" Puite " ati leh sup a, ka khabe chu khawih zeuhin ' Aw ' ka ti tawi tak a, engmah sawi lo in kan ngawi dun vang vang




" Naktukah lunglei ka zin angai dawn a " Atih chuan ka en vat



" Umm, i rei dawn em? " Ka ti ve mai a



" Ni 2 vel aniang, hei bak chu zin angai hrih lo ang " Atih chuan ka chhang tawhlo, kan in pawh kan thleng ve thuai a, amawi ah lut tura ka sawm chuan ' Palai anlo kal dawn, kalo lut kawi lo zawk ang ' ati mai a, ka luhsan leh ta nge nge, ka rilru hi ahmin lo ka ti dawn nge, ka hun tawn mek hi kala pawmthiamlo pawh ka hrelo, keimah hi ka vai riai a alo thleng ang ang hi ka sawisello a ka duh lutuk pawn ka hrelo.




Cont...


Show post links
Top

[Ngaia]

Karhnih meuh aliam leh hnu chuan kan inneih hun tur pawh ruatfel diam ani tawh a, Zep theih ni heklo Sport minister nupui neih tur chu Zoram ah athangchhuak hneh khawp mai, Fb ah lah min troll zui tu an awm a, mak antih thu an sawi chamchi hlawm bawk, aṭhenin ' Arai lawk vang mai mai alawm ' anti a, nia an sawidik alawm mahse, naute pa pawh ani chuang hleinem, Lawmpui tu tam tak zingah sawichhe hram tute anla awm a, fb pawh ka luh tam loh phah, Ig ah pawh Milarte news ah kan inneih tur lawmpuina post an siam a, atam zawk comment na chu ' Min ṭhawng e, damlai lu kan sun ani ringawt, mipa inthup thei tak ani ' tih te chu ani, Damdawiin ah kala kal ve reng a, luakchhuk et et kha ka nei tawh ngai biklo mahse, ka taksa erawh aṭhat phah lo rilru hi adamlo a, ngaihtuahna ka kawm nasa a, thil ka eiṭha chuanglo rilru adam loh chuan taksa hi aṭha mawh khawp mai.




" Bawihte, lo ṭhu phei ve lawk teh " Inchunga chhoh mai ka tum tawh chu sitting room ah chuan ka phei leh ta zawk a




" Sawi duh i nei ami? " ti pahin kanu bulah chuan ka ṭhu a




" I hna hi engtia tih nge itum? " A zawhna chu mak kati deuh a, ka chhang mailo



" Nu, eng nge i sawi awmzia, luakchhuak et et kha ka nei tawhlo a, kala thawk zel dawn " ka ti chiam a



" Bang rawh tih ka tum hleinem " Dam dapa kanu in atih chuan ka inthiamlo leh hnuhnawh




" Tihpalh " ka ti sep a




" Apawilo, ka hrethiam che alawm " ati dam leh thlap



" Ini Thani fanu Zamtei khan Nurse a training zo tawh a, hnathawh mai tur ahmulo a, Ini lah adam thei silo an mangang ve riau bawk nen ' Matei'n pasal anei dawn tho sia, nau aneih hma chu Zamtei hi chhawr ve hrih se' alo ti a, i duh loh chuan ka ti lui chuanglo che " Ka ngawi reng, Pasal ka neih sarhu lai chuan ka buai ngei dawn chawlh lak ka tum zawk a mahse, Zamtei ai akal theih dawn chuan chawlh lak kher pawh chu angai lovang chu





" Thla hnih vel chu atheih ang mahse, chubak chu keimah kal ka duh " Ka ti a, In ah awm reng ka duh reng renglo, hnathawh a rilru kawm loh ka duh ber




" I hahdam zawk dawn a, kalo duhsak pui zawk che a " Kanu chuan ati dam diai a, kanu min ngaihtuahna hi a awm lutuk mahse, keichuan engmah ngaihtuah hmanlo a nilenga buai reng pawh hi ka duh zawk, ngaihtuahna ka kawm nasat chuan thil ṭullo pui pui ka ngaihtuah ṭhin a ka duhlo




" Ka han chho tawh ang e " ka ti ta zawk a, ka ding nghal hluai bawk




" Zamtei pawh chu lo hrilh maila, karthar aṭangin zawm se, Bazar te ala ngai dawn sia kar leh chu ka hman lovang " Ka ti leh a, kanu pawn kalo bia ang ati a, room ah ka chho hnak hnak, ka dawtsawi avang hian kanu te bulah pawh awm nuam kati ṭhin lo, room ah ka luh hnu chuan kanu ka chhan dan vel chuan awm nuamin min awm tirlo, ka u awm loh hnuah kanu hi arilru ano zual a, ahriselna apan zual viau bawk ṭawngka vin in kan be ngailo a, kei phei chuan ka theihtawkin ka duat mahse, ka thil tuhsual teh hrep hian ka chhungte lak aṭangin min la hrang ni maiin ka hria, ka chau a, ka hah a, ka ipik em em bawk. Khumah chuan ka ṭhu reng a, vawi leh khatah ka awm atawt tup tup a, ka thaw thei tawh dawnlo hial in ka hria, ka lu hai lutuk chuan thil min hmuh phet tir vek a, kanu te auh ka tum a ka aw achhuak thei miahlo bawk, ka awm dawmin ka thaw hrawk hrawk, chhuatah chuan ka ṭhhingṭhi thla hnawk, ka vai riai ni maiin kahria ka awmdan chu ka hrethiamlo ka rilru pawh afim lo tulh tulh in ka hria





" Engthil, Duatte " Kawngkhar ri dawt ka hriat rualin ka bulah U dampuia lo ṭhingṭhi ve rawp chu ka hmu phe riai a




" Hahdam rawh Duati, zawi muangin thawk la rawh le " Min kuah a, asawi ang chuan zawi muangin thawk lak chu ka tum asak ṭalh ṭalh khawp mai ka biang alum thla leh pap ṭhin, ka hnungah achul a zawi tete in aphun sup sup




" Iṭha deuh tawh em? " Tlem chuan ka thawk lak pawh a pangai ta deuh a, ka lu hai chhalh erawh ala reh miahlo, dim te a min kaitho in khumah min ṭhuttir a, ka kut ka hum ruh ngar ngar alo khawih chuan ka enthla ve vat a




" Eng nge awmzia " Ka phun sep, chemte ka keng tih ka inhre miahlo, ka khum bul table ah hian chemte ka inchhawp a, achhan pawh zanah ser te ka ei chak thup ṭhin a chuvang ani, nichin khan chemte ka khawih lai ka hrelo, ka kut aṭang chuan thisen alo chhuak ṭiam ṭiam a, ahriam lam ka hum tel ani ngei ang, nichin khan na ka hrelo a mahse, tunah chuan athip tih ka hre tawh, U dampuia chu athaw hrawih a, ahmel chu athim khup a, min sawisa nek duh hmel apu




" Ka ken lai ka hre miahlo " Ka tih chuan ka kut a en na aṭangin amit ala sawn ve chiah a, chiang fahran a min en takah chuan ka khur ru der der thei



" Duati, min ti mangang ṭhin " Ati hulh a, min kuah leh pawh chuan ka hamhaih avang aniang min tih ang ang chuan ka awm tawp, inthunun tum takin thawk ala ham ham a




" Ka rilru ka kawm nasa deuh a, ṭullo pui pui ka ngaihtuah vang anih hi " Ka ti sep a, ani tak tak awmzia awm miahlo in ka hmahun tur ka ngaihtuah chiam a, kha khan min ti ipik tup tup ni maiin ka hria.






" Min ring rawh ka tih kha, i rilru ti hahdam hram teh " min thlah dul takah chuan ka inla hrang vat a, ka kut laksawn ka tum chuan a chelh tlat thung




" First aid box i kawl em? " Atih chuan pawhdawh ah a awm thu ka hrilh ve mai, atho vut a a chetla chu hmuhhmaih nei miahlo in ka en chiang, ka kut min tuamsak mawlh mawlh a, ka rin aiin akut adam daih. Nichin maia ka awmdan kha ka duh loh tawp thil ani, mahni intih nat te phei chu ka duhlo hul hual



" I thinrim ami? Nichin thil thleng kha ka hrethiam biklo " Ka ti a, angawi run reng a ka awm ati nuam thei thlawt lo






" Ana anih pawn tuar rawh, ala dam mai ang " Ati sup a, angaihna hrelo zetin ka en reng



" Ana kati hleinem " Ka tih chuan, thawk ala hak a



" Lawmkima nupui neih tur kha ania ka sawi " Ka mitah chiang zeta en chungin ati nghat a, ka nui tawi tak tak khawp mai




" Ka ṭha, amah avang ani chiah pawn ka hrelo " ka ti lawi rat a, amah avang ani lo pumhlum chuanglo, Ka hmangaih a, atan ka theih tawp ka chhuah ṭhin, tunah hian amah ka hmangaihna te kha reh fai vek se zawng, kati mualpho ngei ang, ka thei ve reng alawm mahse, chutiang chuan ka tilo achhan chu mualpho turin ka duh loh avang ani, haw viau tur ka nih laiin ka haw tak tak theilo a, ngaih ngawih ngawih chang ka nei ṭhin, ani aiin keimah hi ka inhaw daih zawk, U dampuia chu angawi reng tawh a, ka kut atuam zawh chuan athil hman vel chu adahṭha leh mawlh mawlh a




" I hna hi " Atih sup chuan ka en rang lutuk, ka hna pawh chu engvanga min sawipui tum vek nge maw an nih le





" Eng nge ka hna chu " Ka ti hmuk a, ka lungawi lo nghal tawp thei




" Nupuii nen kan sawi zawk a, ai kal chu tir mai la " Ati leh a, thawk kala hap




" Ka tir ang mahse, thla hnih vel bak ka tir dawnlo, hna ka thawk dawn, ka hmahun ka hrelo hlawh tlem te lak reng ka duh dawn hleinem " Ka ti hlak hlak a, U dampuia mitmeng erawh adam thlup thung





" Engtia hma hun hrelo nge i sawi, Inṭhen i ngaihtuah thleng leh nghal emni? " Atir chu dam mahse, atawp lam chu a au ṭhawt ni berin ka hria, a taksa ṭang ṭung chu ka hmuthiam vek




" Chutiang anilo, hna thawh loh chu ahreawm dawn em a, chuvang alawm " Ka ti sep a




" Ni rawh se " Ti hmakin room aṭangin a chhuak a, ka en zui reng, mamawhtu zawk kani chungin mamawh lo ang maiin ka awm ziah a, Mipa dang nise zawng min neih an tum buai miahlo ang, a mawhphurhna ni miahlo ah mawhphurhna ala dawn a, atan thil awlsam tak ani dawnlo, atlawm thlak em em dawn tih la ahriat reng, mipa dang fa mahni fa anga pawm angai tur chu ka chanah ka dah a keichuan ka thei dawnlo tih ka chiang lutuk tlat.





...

Karkhat aliam leh meuh chuan inneihna vel tur buaipuiin kan buai nitin a, Zamtei pawh ka ai akal tawh, Mahriati ka ti buai viau zel, engkimah ṭhian nih atlin a min buaipuiin min ṭanpui a, keilah azeilo chi leh hetiang lama hriat neilo lutuk kani bawk nen abuaithlak khawp mai, Mahriati awmlo selang chuan kan buai zual viau ang, kan inah man hlanna chu kan siam dawn a naktuk hi ani der tawh, mo kawr pawh kan buaipui fel tawh a, buaipui ngai liantham deuh chu kan ti fel vek tawh. Ka rai miau avangin Biak in hawngin kan innei thei dawn lova, Paradise hotel ah kan innei dawn, Mipa lam in inneihna hmun tur vel an buaipui a, keini lam chuan kan ngaihven lemlo, ka cousin te bakah hmun danga kan chhungte anlo kal ṭan tawh a, kan in pawh alun ṭhin viau mai, kan ri nawk nawk zel mai ani, achang chuan ka zo lo lek lek ṭhin, min ti chau vek thei




" I chau tawh em? " Mahriati chuan min ngaihtuah zetin ati a, vawiin ah ka mamawh tur leiin kan chhuak leh a



" Chau viau nang, i hah zawk em? I bawr bik si " kan thil lei ho ka ken ve aphal vaklo a, amah abawr em em a, anuam chiahlo




" Inthlahrung vak teh suh " Ati hlar a, tianga ka tih apiang hian athinrim ziah, ka chhungte ai mahin abuai zawk



" Khutah khuan lut leh ila, thil kan ei dawn nia " Kan thlanga thawmhnaw dawr chu a kawk zeuh a, kalo bu nghat nghat, kan inzui thla hnak hnak a, ka ke chu avung mar ṭung tawh Mahriati erawh ka hrilh buai duh talo





" In inhmeh hle mai, Innei zawk ula in inhmeh zawk daih ang " Dawr nghaktu chuan ati lang lang a, kan luh ve tawh avangin tute nge inhmeh atih pawh chu ka hrechiang lutuk tlat, U dampuia nen chiang fahranin kan inmelh reng a, abulah a P.A ading reng bawk, Min nuih sawng a ka nuih let ve thei derlo, lo lut lo law law ila ka ti ngawih ngawih, Thinrim deuha ka room achhuahsan aṭang khan pangai takin kan inhmu leh lo hrim hrim. Dawr nghaktu chu atim deuh dui a, a awm reng athusawi zawh chiah kha nuam tih loh nan ahmanglo anih chuan mi pangai aphalo tihna ani mai




" Mamawh innei emni? Lo enkual ru " Ati sawk sawk a, anui lui hak hak bawk




" Kan enlo zawk ang, Puipui kal ila " Mahriati chuan ati fak a, min kaih chhuah leh lai te chuan min kalpui ang angin ka awm tawp, Udampuia khan engmah asawilo a, eng nge sawi tura ka beisei pawh ka hrelo, a PA nen khan sawi sep an kai ve reng ṭhin ahma aṭang tawhin, engtin pawn awm se keichuan enliam mai mai tur kani, achhan chu kan inneihna hi hmangaihna avang pawh ani hleinem




" Duati " Mahriati nen chuan kan ding dat, Dawr nghaktu thusawi kha ka ngaihtuah zui reng a, Innei zawk ula atih danah khan mi nawlpui ngaihdan tur pawh ka hrethiam, kei ai chuan a P.A nen khan an inhmeh zawk alawm





" Eng nge " Ka ti ṭhat a, min koh na kha ka hrelo der a mahse, ka banah min lo vuan hman tho, ka vin avang chuan ka inthiamlo nghal a




" Ka..englo.ka tihpalh " Ka ti nawk nawk a, ka kut achelh loh na zawk Mahriati ka chelhna chu ka ti nghet zual sauh
U dampuia chu arum hrawih a





" Ngaihdam min dil chhan tur i nei emni? " Ati hluk a, min en ngur bawk khawlai ah kan awm tawh a, ennawm siam ka duh miahlo





" Min thlah la, kawtlai ani sia azahthlak " Ka ti sep a



" Ni e, thlah rawh Midang tan ennawm chhuah hun pawh anilo " Mahriati chuan ati hlak a, alungawi lo tih ka hria kei ai mahin alawm lo tih ka hre bawk, U dampuia pawh chuan min thlah ve mai a, hmanhmawh zetin kan kalsan hetiang teh nuai hringnun hi ka mumangah pawh ala thleng ngailo, Ka daisual a, ka ti sual a, Ruathimpui hian ban zai arel theilo, ahma aia nasa in athim zuala asur tam zual bawk, ruah mal te chu ahma ai mahin alian ta emaw tih turin min deng dawt dawt maiin ka hria, ahmaa chuan ka do maithei a mahse, tunah chuan do zawh theih pawh ani tawhlo





" Hetah hian inhnawh puar teh ang " Tih pahin Restaurant changkang ve takah chuan min luh pui a



" I rilru kawm ngut ngut ṭhin suh " Menu bih reng chungin ati a, ka ke mu chuah chuah tawh chu ahreawm lutuk, ka insum thei tawhlo chuan ka chapal bun chu ka hlip a, ka hmet nawk nawk




" I ke avung elaw " Ka ke lo thlek pahin ati hluai a



" Umm, nau pai te chuan a tur ve reng alawm " Ka ti mai a, ani pawh nurse ania ahrethiam ve ang




" Kan hawng tawh dawn nia " Ati leh a




" Ka ṭha alawm " Ka ti sep, eitur a chah a kan nghah chhungin, nichin thil thleng kha aphun pui hlak hlak



" A ho emai, Engkim i hriat kha ka tan chuan enliam vek angai, atih tur ni miahlo ah ka ti buai a, engtin pawn awm se ka enliam ang " Ka tih chuan Mahriati chuan lainat hmel deuhin min melh vang vang a, min khawngaihna chu amit ah alang chhuak vek thei, thildang ka sawi pui ta zawk a, eitur pawh alo thleng ve nghal





" Puipui " Ka hawi chhuak vut a, Vawiin hi ka vanduaina ni ani ringawt, Lawmkima leh anupui tur in min lo pan hnai mek a




" Min ko emni? " Ngaihsam hmel fe in kalo ti




" Min lawmpui dawnlo emni? " Ka thil eilai hian vawm ka chak et et mai




" Ka lawmpuina i mamawh emni? tunlai tak chu ka ṭawng a mawlsawm lo lutuk a, An chhia hlir ka pai " ka ti ve kher a, anupui tur mitmeng ngeiawm zet chu zam map lo in ka melh let kar a, ka duh chuan ka sualthiam ve lutuk tlat, an duh ang mai mai chuan ka insawp tir awmlo emai






" Ila na ani maw? Pasal i neih dawn kha " Ati lar lar a




" La na lem nang, in awm ve tih pawh ka hre hleinem " ka tih chuan, ahma zawng aiin amitmeng arum zual a, ka va hlau lo tak, ṭawng leh atum lai chuan Lawmkima'n a khap a, an kalsawn lai chu ner nang chungin ka en, Mahriati'n kan in thleng min thlah a, angai te bawkin kan ri leh laih laih tawh, room ah ka chho tlang a, tui vawtin ka inchiah, tui vawt hian ka rilru a lakpen ka rin vang ani, ka ring suallo bawk ka rilru pik tup kha azia ve deuh alawm, chaw ei tura ka chhuk zawk tih loh chu room ah ka mu nghal daih a, kanu in ka ṭhat leh ṭhat loh min zawh chuan ' ka nuamlo deuh mahse, ka ngaihtuah awm loh ' ka ti a, reilo te a awm a, inleng kan neih ve neuh neuh avangin min chhuksan leh vat, a chhuah hnu chuan ka ke chu ka tilang ngam chiah a, Drugs eddict te ke ang mai ani avung lian lutuk, hmet ila a khuar duk thei bawk sia, ka rap mah zawk, ka ke ngawt ka buaipui lai chuan room kawngka ari rak a rang zetin ka hawi chhuak, U dampuia lo ding run ka hmu rualin puanin ka ke ka khuh nghal sawk sawk a




" I room anih loh hi, ilo luh hma in kik hmasa ta che " Ka ti chiam bawk, ka ke kha ahmuh hman loh hram beisei ang, engmah sawilo in alo kal hnai zel a




" Ding rawh, ka room ah hian i duh hun hunah lo lut tawh suh " ka ti leh ṭhat a, eng ah mah angailo khum bulah ading run tawh a, ngei zetin ka melh ram ram thung. ka beisei loh lutuk in ka ke khuhna puan chu atheh hlim a, meng phawk vak chunga khuh leh ka tum chuan ka kut alo man bet hmiah




" Eng nge maw itih le? Min thlah rawh " Ka tal laih laih a, min thlah chuang derlo




" Vawiin thil thleng kha " atih sup chuan ka tal lai ka tawp a, ka kut athlah ve bawk




" A pawilo, i duh chuan i kawp chhunzawm thei alawm, keichuan sawiselna tur che ka neilo, sawisel tur che in i tumah ka nilo bawk a, i chungah lawm viau tur ka ni zawk" Ka ṭawng hnem bawk a, thawk kala kawk kawk mai




" Zeldin chiam ṭhin suh, Ka bialnu ani lo " Ati hmuk a, ka nui ringawt thung, ka rilru nawm nan a sawi ve mai mai ani. Ka beisei loh deuhin khumah alo ṭhu kai a, ka ke chu a malchungah ahlang kai bawk, a chetdan chuan min ṭhawng lutuk ringawt, ka ngaihtuahna afim ruala ka ke laksawn ka tum chuan a chelh nghet sauh a, akutṭang sei thlarh chuan dam thlapin ka ke akhawih a ka danglam lutuk, ami khawihna chu adam thlap a, zawi tete a ahmeh phei chuan ka ke kham zia ka hrechhuak, hetiang hian tuman min la tihsak lo a, tu lakah pawh ka inthlahrung vek, U dampuia lak aṭang phei chuan hetiang hi ka beisei lo hrim hrim, ka ke kham urh ahmeh reng takah chuan mutchhuak in min zem chiai chiai a




" Mu pangai rawh " Atih sup chuan ṭha deuhin ka mutdan ka siamrem a




" I hah lo ami? " Ka ti sep, mu chungin ka ke hmet tu chu ka en reng a, hna athawka a chau ve dawn si, hetianga min la ngaihsak hi ka khawngaih





" Hah na tham anilo, muhil rawh " Atih leh chuan ka ngawi ta reng a, mutchhuakin min zem chiai chiai mai, ka menghlei theilo ka mit ka chhing riai riai a, ka hmai lo khawihtu an awm a mahse, ka mengchhuak thei tawhlo engkim chu ka mang hriat vek tawh.





Cont..


Show post links
Top

[Ngaia]

" I van mawi tak " Mahriati chuan ati leh hlut ṭhin, Vawiin hi kan inneih ni ani tawh a, pawn lamah inneih ceremony hman ani dawn bawk




" Nangpawh i chhelo " ka ti sep a, ka tana ni pawimawh ber anih hi, Sawn pai mualpho ta ila tiang hun hi ka tawng ngailo maithei asin, U dampuia chungah ka lawm a, ka lawm reng ang em tih erawh ka hrelo




" In inpeih tawh em? " Kanu alo lut a, min nuih var var



" Kan in peih ani mai, ṭan ahun tawh ami? " Mahriati chuan ati zung zung a




" Umm, pawnah ipa in anghak che " Kanu chuan ati a, min lo pan hnaiin min kuah vang vang, kanu hi eng hunah pawh ka mamawh, ka tar hun thleng pawhin ka mamawh ang, Nu derdep tak ni mahse, ka himna ka hlimna ka inghahna ani, ka mittui hnai kuar chu ka khap let sak sak a




" Nute, iti ṭap leh dawn kal tawh ang u " Mahriati'n ati a, kanu pawn min thlah ve nghal, room kan chhuahsan a pawnah chuan kapa'n min lo nghak ran a, abul ka thlen chuan ka kut alo hum vang vang a



" I hmelṭha lutuk ka fanu, i mawi takzet " Hnukulh ṭeuh in ati a, an fanu neihchhun kani a min kaltir hi harsa anti dawn tih ka hria




" Kal tawh ang u " an ti a, kapa ban vuan chungin ka pen ve chhat chhat, ka khur ru der der a ka hlauthawng takzet bawk, Inneihna hmun tur tualzawl chu mawi tak ani, alai ah kalna tur a awm a, asir tawnah kan inneih min hriatpui tura sawm bik te kan chhungkaw hnai te bakah U dampuia chhung hnai te nen an ṭha hnem ve takzet. Ka pasal tur awmna lam pana kapa in min hruai lai chuan music ari riai riai a, Ka pasal tur U dampuia chu Maicham hmaah dingin a Coat suit dum hak chu a inhmeh takzet aṭhianpa chu asir ah ading a, Mahriati pawn ka hnungah min zui




" Ka fanu ka neihchhun ani tih i hria, nangpawh ka fapa ang maia ka en ini a, ka ring ngam bawk che chuvang chuan ka fanu pawh i kutah thlamuang deuhin ka hlan ani, ka rinna ti chhia a ka fanu hi iti beidawng anih chuan, Fanu damna atana engpawh tih huam Pa i hmachhawn ang " U dampuia kuta min hlan dawn chuan kapa chuan ati a, Udampuia'n' Ka tiam a che, ṭha takin ka enkawl ang ' ati nghet charh, U dampuia nen chuan inhmachhawnin kan ding ran, kan sirah kan ṭhiante an ding ve ve bawk a. Inneih thutiam kan chham dawn chuan ka ipik leh mup mup tawh, ka khur nasa sawt a ka awmdan chu U dampuia'n ahre rang khawp mai, ka kut avawnna chu ati nghet salh a, amit ah ka en chuan hahdam tura min duhzia ahriat theih, hahdam tum zetin thawk kala a, inneih thutiam kan chham zawh chuan mipui lam kan hawi a, kut anlo beng dar dar. Kan inneih dan hi adanglam hret a, Biak in ah kan inneih loh avangin ṭhu kherlo in Maicham hmaah kan ding ta zawk ani, kan inneihna chu pawnah anih avang nge a zalen bik riau in ka hre bawk, anuam ka ti takzet, ka kutṭang a Zungbun man to tih hriat zet a rawlh luh lai chuan mit ka chhing a 'Engtia rei nge adaih ang, kan dawtsawi hi hriatchhuah hun ala awm awm si a' tih vel ka ngaihtuah thlen rualin ṭullo zetin kalu ka thing a, ka men rualin U dampuia mitmeng dam thlap nen kan in melh ran, ani hi Ka pasal ani tawh.




" I chau tawh em? " Inneihna kan zo a, thlalak na hun kan hmang mek, athawhpuite bakah chhunghnai te'n thla min lakpui vek an duh si a, kan ding rei ngar ngar khawp mai




" Tlem in " ka tih chuan anui suk a, ka kawng achelhna kut chu ati che zeuh bawk, ka taksa akhawih hian ka zam a ka lai chhe tlat zel. Thlalak na kan neih zawh ah cake cut na leh present inpek hun kan hmang leh a, U dampuia nen kan ṭhu dun a, Kan sir ah Kan ṭhiante an ṭhu leh ve ve bawk, Cake anlo nawr phei a engmah chu sawisel tur a awmlo, engkim chu sawisel bo vek ani. Hetiang taka ropui hi ka beisei phalo hrim hrim




" Party a awm dawn lo ta ro ro, hot deuhin hman tum teh ang " Host in atih chuan mipui lam an nui dar dar a



" Cake cut hma in, Mo neitu hi kan sawm thut teh ang, Monu erawh kan khawngaih ang a " Ati leh a, Host chu azei a boruak athunun hneh viau, U dampuia chu mawi zetin a kiai suk a




" Mizoram mipuite hmaah i thukru char char a, kan hriat i phalloh hmeichhe vannei lakah hian engtiang a nasa in nge i luan liam, tawi te kan duh lo " ka cousin te ho an lo au ring hle a, min ṭawiawm tute chu an phur hmel khawp mai, Host lahin midang tih phur athiam mai si, U dampui chu ading vut a, Host in mic alo pe nghal thuai
Ka thaw halh a, eng nge asawi ang ka thinphu chu rang dawt dawt tak ani




" Mipa vannei tak kani zawk a, chu chu inhrelo ang tih ka hlau " atih sup chuan, thawm a awm nghal huk mai




" Hmeichhe duat phu ber ani a, ka theih tawka nasa a duat ka duh dawn bawk, Hmangaihna zawng zawng pek ka chak hmeichhia ani a, ka pe ngei bawk ang. A kut ka vawn changin mipa vannei ka nih zia ka hre thar leh ṭhin, aṭhatna leh mawina ka hmuhthiam anga hmuthiam ve mipa chu ka hmelma anni " Atih chuan, thawm aring ṭha dar dar khawp mai, chawpchilh deuha dawt asawi thei chu amak kati, ka chhungril erawh chuan atak nise ati vawng vawng, atak ani ngai awm silo a




" A hahdamna, a chawlhna, ahimna engtik lai pawha a tlukluhna In nih ka duh a, Engpawh a chungah thleng se tina tu nilo in Tuamdamtu nih zel ka duh Naute nen hian " ka lam alo hawi a, chiang deuhin min lo en, Naute asawi lang kher chu ka beisei loh thil ani akut chu ka lamah alo lek chhuak a, rang deuhin kalo vuan vat. Min pawt tho a ṭah insum zetin ka melh reng




" Kan inneihna min lawmpui tute chungah kan lawm e " ati leh sup, mitmeng dam thlapin min en leh bawk a



" Asawi ril hle mai, tiang tak hian kan sport minister hi alo ril tih kan hre hleinem " Host in atih chuan, an nui leh dar dar a, U dampuia nen chuan kanla ding reng ka kawngah akuah a, kan hmaah cake a awm ran bawk




" Cake ei an chak tawh hmel si a, cake kan cut tir phawt ang " ati leh a, lai zetin ka nui tawp, cake chu kan zai dun a kan inbarh ve ve hnuah



" Monu nu leh pa te kha Mo neitu in a barh anga, mo neitu nu leh pa kha Monu in abarh ve thung ang " Asawi ang chuan kan ti a, thinlung takin ka nui ve tawh. Kanu leh pa leh U dampuia nu leh pa te pawn eilo te te thusawina hun an hmang ve bawk a, Zaithiam an zai bawk nen hun nuan leh hlimawm tak ani.






" Iva chau awm ve " Programe vel azo tawh a, U dampuia tein ah ka lawi lut tawh, inleng neuh neuh anla awm a mahse, Mahriati nen room ah kan chho thung, U dampuia room chu azau a, engkim afelfai thlap bawk ka thuamchhawm chu kan dah hnawk em zawk a




" Chau lutuk " ka ke pawh avung leh tawh, Sofa ah zawi zetin ka ṭhu a




" Hetah inriak lo ang tiraw? " Amithmul ati che ralh a, ka biang asa hat hat thei




" Umm " Ka ti ṭiak, min nuih hak hak a




" Insiam la, kal hma ru i chau viau ang " ti pahin ka bulah alo ṭhu a



" Naute, I nu hian itan theihtawp achhuah ania aw, i vanduai dawn reng renglo, i pian hma hauh aṭangin venghimtu tur pa ṭha tak i nei nghal ania " ka dul chul pahin Mahriati chuan ati sep sep a, ka mittui ka dang hmanlo ka biangah aluang thla ngiai ngiai a, Mahriati'n min kuah a, ka hnungah a chul heuh heuh




" Mi zawng zawngin an dem che anih pawn, keichuan i thiltih hi ka dem ve dawnlo che, i hria tiraw? Inneih thutiam inchham lai khan hreawm itih zia ka hria alawm, mahni indem suh chu chu hrereng la ka duh, Nangmah avang anilo " Ati sep sep a, min chik ru thei lutuk chu ka awihlo hial zawk, ka tana ahlutzia hi





" Ka lawm e, i awmlo ang tih hi ka hlau " Ka ti ṭiau a, anui hak, aṭah nuih ani zawk mah




" Le, bang tawh rawh, Ipasal in ka vel che emaw ati palh ang e, i puan bih kha phelh la, kekawr tlawn ha rawh, inkal hunah i inbual dawn nge hetah i inbual ang " Ati zung zung a, ka chet ai ache vek, ka thawmhnaw hak tur min dahchhuah sak a, keichu ka zawi a ka chau lutuk, ka top hak leh puanchei bih te chuan min ti rit zual




" Hetah inbual ila aṭha zawk ang " Ka tih chuan, inbual turin min ti nghal a, hnial lemlo in bathroom ah ka lut, hmanhmawh ang reng takin ka inbual a. Inthlak sa thlapin ka chhuak, room chu alo reh dak a Mahriati chu inhnuai lamah achhuk ve hrih anih ka ring, Balcony ah chuan ka chhuak a, inhnuai lam thawm chu ahriat chian theih viau, ka inbual zawh chiah avang nge thlifim in min chhem chuan avawt kati, ka dul chu ka khawih a

' Naute, ka ngaihsak lo che iti em? Itan theihtawp ka chhuah ania aw, nangmah avang chauhin vawiin hi ka paltlang ani ' Van thiang kak chu ka thlir chho a, khitiang ang a thiang kak khi ka hringnun ni ve twh se, Ruahthimpui sur bur bur reng hi ahreawm tawh ani. Van timawi tura Arsi pe tuar te chu amawi takzet, ka kawnga min kuahtu an awm avangin ka ip chawih a, ka phu deuh zawk bawk




" Min ti phu alawm " Ka ti deuh hlar a, inlak hran ka tum chuan min kuah nghet sauh a, a awm khauh far ah chuan ka lu ka nghat dawt, talchhuah ka tum tawhlo ka taksa te hi ana ṭhum a, ani nena insual buai ka peihlo






" Ilo inbual diam tawh a, i chau em? " ati sup a, ka beng zawna aṭawng avangin ka mur chhuak vek thei




" Tianga awm kher hi angailo " a zawhna pawh chhanglo chuan ka ti sep a, Innei mahila kan inkar ah engmah a awmlo tih kan hrechiang ve ve alawm, nuamlo ka ti bawk. Athaw hrawih a Min thlah bawk, min thlah chuan ka ruak nghal huai in ka hria, keipawh hi ka pangai tawhlo




" Kal ang " Ati nghat a, balcony aṭang chuan a chezia chu ka en reng, Mahriati'n ka bag ken tur khuma adah chu aban a, kawngkhar hawnna avuan zet tawh chu alo hawi let leh




" Minlo zui ta che " Atih leh nghut hnuah achhuak a, luhlul hun anih loh zia ka hriat ve bawk avangin ka zui chhuak ve nghal thuai




" Inkal dawn emni? " Inhnuai a awmten min hmuh rualin anti luam a, ka chhan hma in U dampuia chuan ' Duati hi a chau deuh a, kan va phei hma ang e, zingah kanlo let leh hma ang ' ati dam thlap a, nichina aṭawng nghut nghut ang kha ani leh tawh miahlo, Kanu te chuan pawn thleng min zui chhuak a




" Nau pai lai anih kha, fimkhur ru aw " U dampuia nu zawkin ati a, keima nu erawh chuan ka kut ahum vang vang




" Bawiha, ka fanu hi ṭha deuhin lo enkawl rawh aw " Ati lawi rat a, U dampuia chuan kanu chu akuah a



" Ka duat dawn tih i ringhlel lo ang tiraw? " Ati nghet charh a, kanu pawn U dampuia kuah let pahin ' Ka ring che alawm ' ati ṭiak, Mahriat te pawn min lo fin a, kan tlanliam thleng min thlir, ka hnukulh ṭeuh chu ka thup hram hram ani, inbe lo chuan kan ṭhu dun reng a, a motor khalh lai chiah angaihtuah tih ahriat, Kan riahna tur hmun kan thlen chuan ka zam thar lutuk, a chhuk a ka bag chu khaiin min ngaihven miahlo in akal daih a, kan awmna areh si daifem ani bawk nen hlau zetin ka um dat dat a, inchhung kan luh chuan step ah apen chho pawk pawk a, abawp asei si step pathum vel akan zel thei bik. Room kan luh hnu pawh chuan ṭi dakin kala awm, U dampuia erawh towel la in bathroom ah alut nghal daih a, lo hmachhawn ka peih tawhlo lo mutsan daih ila aṭha ang tih ka ngaihtuah rualin khumah ka lawn vat vat a, puan sin hlun chungin Bathroom hnungchhawnin ka mu mengkar a, chau hle mahila ka muhil lawk thei silo, Bathroom aṭanga alo chhuah chuan ka mit ka chhing ta tawp a mahse, athawm chu ka ngaithla reng, khum ahniam sat chuan kan mu dun dawn tih hrilh hranpa ka ngailo, mut hran te chu ka sawi ngam tawh teuhlo, puan hnuaia alo inthawlh ve rualin ka ip chawih a mahse, min lo dek miahlo. Lawm tur ka nia lawm, min lo kuah turin ka duhlo, Athawk lakdan aṭangin amuhil tih ka hria a kei erawh ka ke sa chuan min ti mu theilo, asa huam a aza bawk ka tum loh deuhin kati che leh zawk ṭhin, na lutuk nilo ah chuan ahreawm takzet, U dampuia chu tih harh ka hlauh avangin ka tho a, helai kan thlen hnuah kan la inbe miahlo ka thiamloh nge pawh ka hrelo e a, Bathroom ah te lutin ka ke chu ka ti huh a mahse, aro hnuah angaite bawkin asa leh a aza leh ṭhin, hetiang hi chu taksa chak lo ah athleng ṭhin. Vawiin lamah ka chauh tehlul nen zingah thawh ka hai ngei ang, tunah dar1 ari dawn hnai tawh ania. Thawm dim deuhin inhnuai ah ka chhuk a, vanneihthlak takin chawhtawlh te ka hmu hlauh, inchungah ka chho leh thuai thuai a ka hlau rilru bawk nen thawm dim deuhin ka tlan chho dat dat, safa ah ṭhu in chhuatah chawhtawlh ka hunga ka ke chu ka chiah, chiah tak rengah chuan reh hmak ni silo in azia viau a, ka chau bawk nen ka mit akham urh tawh mai remlo zetin ka ṭhu a, sofa nghengchhan nghengin ka mit ka chhing vang vang.




Ṭawng ri leh ser ser ṭhin chuan minti harh a, khumah kalo mu reng tawh nizan khan sofa ah kamu sia, U dampuia hmuh tur a awmlo a, room kawngka chu a inkhar phuilo deuh tih ka hria chuta ṭang chuan ṭawng ri pawh ahriattheih, Mipa chu U dampuia ani ngei a hmeichhia chu ka hre mai lo




" Pangai takin kan awm emaw tih laiin nupui neih itum a, i fa ala pai zui, min ngaihtuah ve miahlo tiraw? Keichuan ifa anih pawh ka ringlo " Hmeichhia chuan ati hlak hlak a, a P.A kha ani ngei ang, an inkarah thil chu a awm ve tak tak ani mahna, keimah hi engkim ti chhe tu ka nih hi, kei aiin U dampuia hian min nei hi hreawm ati zawk daih ang





" Kha thu kha sawichhuak tawh hlek suh, ka fa ani mahni fa hai tur khawp mipa ka nilo " U dampuia chuan ati hrawk a, ka ip leh chawih tawh, Mipa smart leh invawngfel thlap ṭhin dawt sawi mai mai ngailo mihring kha, dawt ka sawi tir ta reng chu anih hi maw, tih theih neilo zetin ka pum chu ka chul a, ka pum chuan eng ber nge ahuat pawh hriat loh alet leh but a, ka inring hman teuhlo ka uak ṭhat a, rang deuhin khum ka thawhsan a ka hmui hup chungin bathroom ah ka tlan lut chawn chawn, toilet ah ka luak leh nghek a, tiang hi kani tawh ngailo asin le eng rim ber nge ka hrelo, U dampuia alo lang ve nghal a



" Iṭha em? " Ti sup in min lo pan a, ka chalah dawmin ka hnung a chul leh tawh




" Tukin chu ka tihsual chiang lutuk, Ka tihpalh " Ka kam ka ṭhuah a, ka thusawi avang nge amitmeng arum sawt




" Tihpalh ti tawh suh kati ani lawm ni? " ati hmuk a, min lo hnaih hretin zawi zet a ka ding chu min pawm kang lawp a, ka inringlo bawk nen ṭe ṭhat in a nghawngah ka kuah rawk rawk a, ka awmdan avang chuan anui chuak huk anih chu!





" Nizanah i mu theilo " Min zo lutuk chu ka nuih aza zawk




" Mu thei e " Ka tih chuan aner a, a chalin ka chal alo tauh bap



" Ana ania " Ka ti lawi rat a




" Min kaitho maithei lo emni? " Khumah min nghatin min bawh titih a, chiang zetin min melh bawk




" I mutui em alawm, bakah engmah tih theih i nei chuanglo a " Ka ti niah niah a, min hnaih lutuk chu ka awm thiamlo





" Engmah ti theilo mahila min kaitho ziah ang che, vawiin ah in check up i duh em? " ati sup a, ka thawk ka ip ngar ngar ka thaw ṭha ngam teuh tawhlo, ka awmdan chu ahrethiam nge a ṭhen sak a





" Thawchhama i thih kala phal silo a, kain la hrang mai ang " nuihza insum zetin ati a, ading mar nghal vut bawk aduhna ah chuan a nghal ve mawle, ading mar tawh chung pawn min en reng avangin thawk kala ṭha ngam miah lo, ka biang te hi asa hat hat tawh in ka hria




" Inhnuaiah kalo nghak ang che " Ka biangah apiai zeuh a, ka chal ah afawp vang vang bawk, Room a chhuahsan thleng chuan che changlo in ka mu reng, ka awm chu ka dawm a ka lung chu asawt chhuak mai ang tih hlauhawm khawp in aphu nasa, let leh tur kan nih avangin muangchang lemlo chuan ka inti fai a, inti fai tih lem ah hmai phih ani mai, nizanah ka inbual fai vek a intih balh na hun a awmlo mahse, ka thawmhnaw erawh ka thlak tho



Cont...


Show post links
Top