I Ninawm BY Cck Lalchhuanawmi (Completed)

[Ngaia]

I Ninawm
Chapter-1
Ziaktu: Cck Lalchhuanawmi

"Awiii, ka thik che e, thluak i nei bik tak tak a ni, i thluak chanve kha min lo pe ve teh", a ti nang nang a. Hmui tipawrh tarhin, a ṭhu tûm luau mai.

Ka kaitho a, naupangchhia thei lutuk mai. "Naktukah kan haw tawh dawn kha, bazar vat ila, haw vat teh ang", a darah ka kuah a. A la riat nawk nawk.

"Takah, Venpui, MZU-ah em ni admission i tih ang?",

"Ka hre lo le, a nih tawh mai loh chuan, Bangalore-a zir chhunzawm ka châk tawp",

"Min hruai ve rawh aw", a lo ti vah a. Ka nui hak, "I tel lo te chuan, khawiah mah ka kal dawn hleinem", ka ti a. Min beng hlakin, a nui zui huah huah.

BA result a chhuak a, ka chhan dan ngaihtuah chuan, ka pass ṭha phian lehnghal. Haw ve leh, Bangalore-a zir ka duh thu, ka chhungte ka la hrilh ang.

Bazar vat vatin, inah kan haw a, engmah phei chu kan lei lo, naupang ho lawm tur bak, lei tur ka hre thlawt lo.

"Venpui, Mawia nen in chanchin eng nge ni zel?",

"Kan inrem tawh", ka ti a. A ner salh salh, "Ṭhen turin ka tih che kha, ex a ngah chu thuhran, cousin a ngah lutuk. I hlauthawng ve lo nge mawni, tuna in busina pawh, a cousin vang a ni lo em ni?", thinrim ṭeuh chungin a ti hlak hlak a.

Ka lam hawiin, a bek a kuta dawmin, min en chhuk run a, a thinrim mitmeng kual vel hi chu, hlauhawm tham ve tak chu a ni. Kei aiin a tawi a, ft5 awrh chauh a ni.

A thinrim phar kual, a kâwng a dawm phei hi chuan, thingpui no chiah chiah a ni mai. "A zei êm alawm", ka ti sap a.

Ka rin ang ngeiin, "Chhahi", ti pahin, ka chal a pen fawk. A kutthlak te lah hi, a nâ thei si. Ka tuai vât vât ringawt.

"Mawia nen innei thei pawh ni ula, kei chuan ka ring chuang lo. Ex leh cousin a ngah êm mai, ka mi rin zawng a ni ve hlawl lo", a ti kharh kharh.

Ka hui pap ringawt a, Mawia ka star thu ka hrilh aṭang rengin min support tawh lo. Kan inngaihzawn hnu aṭang phei hi chuan, ṭhen turin min ti ziah.

Kan inngaizawng tih a hriat tirh phei chuan, thla thum chuang ka thlêm. A tet ang ang hian, a luhlul, ngeng ṭha tak a ni.

"Lalvenpui, Mawia fa han pai vaih teh aw, ka that chiang khawp ang che",

"I tiawm lo thei lutuk, fa pai theihna turin engmah kan ti ngai lo", ka ti ve hlak. Thu awihawm lo deuh deuh hi, a sawi ziah mai. Min en kur a, min ring lo nge mawni.

"Khati khan min en suh, engmah kan ti ngai lo tak tak alawm", ka ti leh sap a. Engmah chu ti ve ngai tho, mahse, fa neihna tur kan ti ngai lo.

"Ka hriat lohin, in awm dun nasa thei lutuk, i virgin hawngtu a ni tiraw?", a tih chuan, ka âng phuau.

Ka beng hlak hlak a, "Awiii, i ngaihtuahna hi a mak thei êm mai, kan la, ih, sex kan la hmang lo, i rilru a hmul thei êm mai",

"Ka awih chuang lo, Mawia tih hming pu reng reng, anmahni thlahtu te chenin ka ring lo. Ka sawi kha, cousin a ngah lutuk, a zei thu te i sawi lehnghal a, inven theih loh chin i nei dawn a nia, i hria em?", min sâwi nawk nawk.

Engtin nge maw, ka hrilhfiah tak ang aw? "Mu ang, zingah kan chhuah dawn kha", ka ti ta ngawt a. Puanin ka inkhuh nghal daih. Amahin a phun bul bul.

*ka ngai tawh lutuk che, lo haw vat vat rawh* ka nui sun sun a. Ka haw vat tur thua chhangin, kan inmangṭha zui a.

A message ringawt pawhin min tihlim a, a bulah hlei hlei ka hlimzia Ngheti hian, min hriatthiampui pha lo zawk. Ex leh cousin ngah mah se, keimah chauh min hmangaih!

Aizawl kan thleng a, "Shillong ka van ngai tak êm!", a ti lang lang. Kan awm rei lo mai pawh a, keipawhin ka ngai ve reng.

"Kan inah lo peng phawt rawh",

"Lo peng suh pawh ti la, ka lo peng dawn tho", a ti a. Ka lo nuih sak ringawt. Taxi kan chang a, ding chungin a muthlu lâwp lâwp, ka khawngaih reuh lutuk.

Ka kuah ta ngawt a, ka darah pawh a lu a nghat thei lo, tawi leh hle mah se, ka ṭhian leh ka unaunu neih chhun a ni ve tlat.

Taxi lah, a vang êm êm zui. Nghetin Mawia call lo turin min ti tlat a, chuti ni lo se chu, in kan thleng daih tawh ang. Nghetin a huat êm êm chhan hi ka hre bik lo.

"Venpui, i ni tiraw?", ka veilam ka hawi vat a, ka pa rual tur vel hian nui sangin min lo en a. Ka nu rual awm tho nen kan lam an lo pan.

"Thlalak aiin i hmelṭha zawk daih a nih hi", ka pu chuan a ti leh a. Ngheti chu, ka sik hlak. "A nâ", a rawn au chhuak ṭhawt a. Ka mitmeiin ka pu te chu ka kawhhmuh vat.

Ka mi hriat ngai an ni lo a, anni erawhin min hria chu mak ka ti zawk. "In inah kal kan tum tho a, kan rualin lo kal ta che", ka pu chuan a ti leh a.

"Mahse, tu te nge in nih a?", Ngheti zawk chuan a ti a. Ka pa te nen ṭhian ṭha tak an nih thu ringawt an sawi.

Ngheti chuan kal a rawt a, ka hriat ngai ni lem lo han zui tawp chu, ka hreh deuh. Nghetin min tûr nasat êm avangin, 'aw' ka pawh ve ta chauh.

Ngheti a mutthluk leh avangin, inthlahrung deuhin ka ṭhu ngawi reng a, min lo biakin a rul tawk chauh lekin ka lo chhang. A ṭawng thei ber hi, a mut a chhuak êm a ni.

In chhunga kan lut chu, ka pain kan inleng tur te chu, a be nghal bawrh bawrh. Ka nu pawhin kei ai pawhin a ngaihsak. Ngheti nen kan ding zum zût ringawt.

Inchungah kan chho ta ringawt a, "Tu te nge a?",

"Ka hre bik nang, i bulah tho nih hi ka awm?", ka ti a. "Ni ve tho", ti nuah nuahin, khumah a bawk thlawp. Ka nu leh pa ṭhiante an nih chuan, inkawm bawrh bawrh rawh se, tibuai lo ila a ṭha zawk ang.

Bathroom-ah lutin, ka inbual a, ka dai sawng sawng. Ngheti erawh a la muhil a, sumo-ah lah a muhil tluan zak tawh bawk a, mut a thei reuh tak tak a ni.

Mawia ka call a, ina kan awm tawh thu ka hrilh, "Ka lo kal nghal dawn", a rawn ti a. Phone a off nghal daih, a rawn kal tak tak ngai si lo.

Kan inah vawi khat mah a lo la kal lo a, tun ṭum erawh, lo kal tak tak sela ka ti. "I van timtui tawh êm êm", tep chuap chuapin a ti a.

A chilthli a uai duah duah, "Va intifai nghal rawh, tenawm lutuk", towel-in ka vawm nghal a, Bathroom-ah ka nam lut, tenawm thei lutuk mai.

Ka sam ka chhem ro a, "Ina inbual ka duh zawk, ka hmai chauh ka phih", a rawn ti chhuak a. Tukverhah towel a bang nghal zat. A tlak vaih chuan aw, a chhar leh nghal ang.

A bag nen in hnuaiah kan chhuk a, ka pa ṭhian te kha an la awm. Chokaah kan kal a, ka nu bulah, "Nu, tu te nge a?", ka ti sap a. An ṭhian te an nih thuin min lo chhang.

Ngheti pawn thleng ka thlah a, ti kha chuan, amahin inbuaipui ve tawh rawh se. "Nu, keiman ka lo ti ang, va kal ve rawh", ka ti a. "A ho lutuk, chaw an ei dawn a, inkawmna hun a la tam dawn lutuk", a ti liam puat a.

"A va rimtui chem chem ve",

"I lo kal duh a nih kha, va ṭhu hle hle rawh", ka nuin a lo ti vat. Ṭhian ni ve siah chuan, an inbiak dan chu ka lo helh deuh.

Inhre ṭan tir inbia ang mai an ni, nge ni a, ṭhian an ni lo tak tak zawk ni? Ka nu te chu an titi siam siam a, ka lo ngaithla ve kar.

Ṭhian an ni ngai miah lo ang, an inbiak dan a hel êm mai. Inhriatchian tuma inbia an ang zawk alawm.

Chaw ei tura kan ṭhu fel chiah tihah, ka pa chuan ka pasal tur nu leh pa te an nih thu min hrilh ta mai!

"Pa, fiamthuna hun pawh a nih loh hi", nui lui sakin ka ti a. A mitmeng aṭangin, a fiamthu lo tih a hriat nasa ropui.

"A fiamthu lo, tak tak alawm", ka uin a lo ti ve leh a. Ka melh hrawk, ka nu pawhin a hre ngei ngei ang. Min rawn miah loin, ka pasal tur an lo sawifel vek tihna maw?

Engmah sawi loin ka tho a, inchungah ka chho nghal nal nal. Ka room ka kalh hmak a, khum chungah thinrim ṭeuh chungin ka ṭhu a. Ka thinrim lutuk chu, ka puak keh mai dawnin ka hria.

Ngheti ka call a, engkim ka hrilh nghal vek. "Ka lo kal nghal dawn a nia", a rawn ti a. Ka mittui a tla tawh, "Venpui, lo hawng teh", ka pain kawngka a lo kik a.

Khum chungah ka la ṭhu reng, Mawian min lo call ve leh chiah, "Duati, Lo chhuak rawh, in in kawtah ka awm", tlanbo mai ka duh.

"Venpui, lo hawng teh ka ti", ka pa bawk a ni. Ka va hawng a, "Lo chhuk rawh, ṭha takin i sawi teh ang u", a ti a. Ka bag leh phone lain ka chhuk thla ve nghal a.

Kawngkhar lam ka pan ding nghal chu, ka uin ka chhipah ṭhamin, chhuatah min theh thlu let tawp.

"Hmangaihzau", ka pain a vin nghal hrawk a, ka nu pawhin a hau nghal mawlh mawlh. "Eng nge i pawi ka sawi?", tho vutin, ka u chu a kawr nghawngah ka va ṭham.

Ka nuin min lo pawt a, ka uin min beng thlu leh chawrh. Ka uin min ben theih nan, ka nuin min man bet ni maiin ka hria.

"I âwki min sân khum ngam ve elaw, mawh?", ti pahin, ka pum a pet chawrh chawrh. A nâ lutuk chu, ka vial ngawih ngawih.

Ka nu leh pain, ka u laka min chhan ngam ṭhin lo hi, ka huat êm êmna pakhat.

"I duh emaw duh lo emaw, Biak in chhungah ka hnuk lut tho tho ang che", ka u chuan, chhuata ka vial ngawih ngawih tawh chu, min chhir leh pawp a.

Engmah ṭha deuha min hrilh loa, hetia min ti ringawt hi ka hrethiam thei lo. "Chhungkaw hausa tak in chhungah i lut dawn a, lawm hle tur i ni. Duh loh kual kha, a ṭha miah lo ang aw", a ti kharh kharh a.

Ka nu leh pa erawh, an ngawi tlat. Ka u lamah an ṭang tih hai rual a ni lo. "Nanga zurui thlê mai mai thu kha, ka zawm hauh lo ang", sehchilh nawkin ka ti a.

Kutthlak tumin min lo pan leh a, mahse, ka nu leh pain an lo dang hrâm. "In awm- E he, Venpui, ngati nge?", Ngheti hmel ka hmuh chuan, ka thaw huai huai.

Min lo panin min kuah a, ka lungchhe sawt a, ka ṭap nghal tlawk tlawk. "Nutê, patê, eng nge thil awmzia?",

"A thuawih loh man a nih kha", ka uin a lo ti hlak. "Chu pawh nise, hetia tih a ngai êm ni, i farnu leh unau i neih chhun a nih hi, kutthlak reng mai", Ngheti chuan, ka u a vin nghal hlawih hlawih.

Ka u laka, min ṭantu ber a ni a, keimah angin ka u a hlau ve lo a, insual pui mai pawh a hnial ngai lo.

"Ka pa, lo hrilhfiah ang che u, a nei ngei ngei tur a ni ringawt", ti hlurin, a chhuak zui a. Zu in tur a zawng leh dawn a ni chêk ang chu.

"Hmangaihzaua tak hi chu aw", Ngheti a chek tlawk tlawk. "Bawihi", ka pain a tih chuan, "Pa, ka nei duh lo a nia, pasal ka nei dawn a nih chuan, Mawia chauh a ni ang", Ngheti rinchhan chungin ka ding a.

Ka pum ka dawm ngawih ngawih, a nâ lutuk. Ka mittui lah ka hru seng lo. Ka insut hlawp hlawp a, ka pa hmel ka enin, bei a dawng ngawih ngawih.

Ka mi hriat ngai loh leh, vawikhat pawh ka la hmuh loh nena inneih tur chuh, ka ngaihtuah ngam lo. "Bawihte, ṭhu phawt rawh", ka nuin min lo kuah a.

Sofa-a kan ṭhut hnu chuan, "I u zin chhuahnaah an intawng a, an fapa tan nupui tur an zawng a, i u khan a sawi a, i thlalak hmuh tirin, an duhzawng tak i ni alawm mawle", ka hmaa ṭhu, ka pa chu beidawng zet hian, ka en ringawt.

"Pa, engtin nge in theih zawk, Mawia nen kan inngaizawng tih in hriat ve reng kha?", ka ti chhuak ṭawk a. Ka pum nâ leh, ka thinlung nâ hian min ti thaw ṭha hlei thei lo.

"I u te chu i hriat kha, a tih tawh chu a ti bur ṭhin a", dam thlupa ka nuin a tih chuan, "In fapa a ni lawm ni, engvangin nge in hlauh êm êm? Nge ni a, kei hi in fanu tak tak ka ni lo zawk?", ka ti a.

"Venpui", ka pain min lo khak nghal vat. An fanu tak tak ni loah ka inngai, "Min rawn loin thu in lo titlu ringawt a, pasal ka nei dawn a nih pawhin, Mawia bak a ni lo ang ka tih kha", ka ti a.

Inchungah pum dawm kun chungin ka chho a, Ngheti erawh, ka nu leh pa bulah a la awm. Eng thu tak sawi ve ang maw? Inneihna a awm loh nan, min sawifel sak hlauh sela aww!

"Venpui, i ṭha êm?",

"Ka nei duh miah lo nia aww",

"Engmah la sawi rih suh", min lo kuah a. A âwmah ka hmai phumin ka ṭap tlawk tlawk. Ka thinlung a rûm êm avangin, ka taksa nâ pawh ka hre chang tawh lo.

Ka u hi mechanic niin, ama pualin dawr a nei ve a, chu chuan kan chhungkua min hrai a. Ka pa pension hlawh pawh hi, a kutah a awm a.

Ka pain a ring leh lutuk a, a buaithlak zo vek. Tunsh chuan, a thu pawh an hnial ngam tawh lo.

A zin chhuah naa, a mi tawn te fapa nen min sawi rem ve ringawt erawh, ka ngaidam ngai lo ang.

"Venpui, i ṭha tawh em?",

"Umm, ṭha tawh lutuk. Mawia kha, kan in kawtah a awm asin, ka kal a ngai",

"Lawkin, haw turin ka hrilh tawh", Nghetin a tih chuan, "Nangpawh chuh, ka thu loa chutia i lo tih ngawt?", ka ti hlak.

"Pawna chhuak thei pawh i nih loh hi, awm mai mai rawh", min nam thlu a, puan min sin tir nghal sawk sawk.

"Muthilh tum rawh, hui, ka rilru a va hah tak. Nangmah vang hian, ka â zo takngial dawn", ka va ngei mai mai tak.

Ka phone ka ban a, Mawia message a lo tlim hmur. *naktukah inhmu ang, hrilh tur che ka nei* ka va ti a. A la online lo bawk a, tick pakhat chsuh a awm. A last seen pawh a la rei lo.

"Nghet, va haw tawh rawh",

"Ka duh lo, ka riak ve dawn", ka bulah a lo mu thla nghal a, phone min en san nghal char char.

Muthilh tumin ka mit ka chhing a, ka mumang ni hlauh se ka ti lutuk.

Ngheti nen inhnuaiah kan chhuk thla a, ei rawng kan bawl. Ka nu lo tho pawh, chokaah a lo kal a, en pawh ka en lo.

Ngheti nen an titi siam siam a, chawhmeh lam an sawi daih chu, ka lawm angreng. A ṭhing rim nam huamin ka u a lo kal.

"Awi, awi, awi, va inbual nghal rawh, a kal pawh lo kal suh, i zak lo mi?", Nghetin a lo hau nghal. "Ka in a nih hi, pawn lam miin khatia min ânkhum a ngai lo", ka u lahin a lo ti.

An pahnih chusn an inhnial zui chu a ni mai, a tawpah, "I tet tet nen, lei li ṭha phian lehnghal a", ti lang langin, ka u chu a kalsawn a.

A rukin ka nui kur kur, Ngheti hi ka u nen innei daih se chu aw, ka u hi a thaibawih chiang ngawt ang. Mahse, Ngheti duhzawng a ni bawk si lo, ka u lah, zu a duh ropui si.

Chaw ei laiin, inneihna lam reng engmah sawi a ni lo a, Ngheti a ṭawng char char. A awm lo ang tih, ka va hlau tak.

"Lalvenpui, Mawia nen inṭhen nghal ang che u, zaninah palai an lo kal dawn", ka kut ka hum ruh nghek ringawt.

Kan in aṭanga thui kan kal hmain, Mawia nen kan intawk. "Hepa ve lah hi", Ngheti chu ka beng hlak.

"Ka sawi kha, fimkhur hle ang che", a phun sap a. Nuih varin ka bu zeuh. Duh lo viau mah ila, Ngheti chu kan kalsan leh ta phawt, ka inthiam lo ve reng.

An veng lamah a tlan a, an inah min hruai leh. Tumah an awm lo a, a chhungte awm laiin min hruai ngai lo, a chhungte hmuh ka châk ve thei tawp, thlalakah bak hian ka la hmu lo.

A room-a kan luh rual rualin, ka hnung aṭang min kuah a, "Ka ngai tawh lutuk che", ti zawp supin, ka nghawng a nûl thuak thuak a. Ka inbual fai chu, ka lawm ang reng.

"Lawkin, hrilh tur che ka nei ka tih kha, duhtawk lawk ang",

"Nakinah kan sawi dawn nia, ka nghei rei tawh lutuk",

"Mahse", ka ti hman ṭawk, ka hmui a khar nghal hmak. Min fawp bawrh bawrh chungin ka thawmhnaw a phelh a, a thawmhnaw ka phelh sak ve leh.

"Keimah hmasa aw", a tih chuan, ka lo bu zeuh. Kan hmui kan inchip tawn nghal ve ve leh a. Ka kut manin, a boxer chhungah min zen luh tir a.

Keimah hian engmah ka ti ngai lo, ka kut chu a thunun vek tho. "Duati, i kum lum ther ther ka ngaih hman zia i hria em?", a rûm dar dar a.

Ka tilawm tih ka hriat hian, ka lo hlim ve veng veng zel. Ka taksa a sâwngbawl hun a thlen chuan, ka dawh mawl tawp ringawt. A zei ka tih tawh kha, lo ṭanpui dan tur hi ka hre thlawt ṭhin lo.

Class-11 aṭang school khatah kan kal ho a, khata ṭang ka star tawh. College pawh a luhna kherah ka lut a, min hmelhriat ve ṭanin, ka star tih hre miah loin, min bem a, ka chhang rang teh asin!

Thla thum chhung Ngheti ka thlêm a ngaih phah, ka hnar phal teuh lo mai. Ngheti thu ka zawm loh awm chhun, Mawia a ngai thei lo êm êm ringawt hi, ka hrethiam lo.

"Sawi tawh la",

"Pasal ka nei dawn",

"Duati, fiamthu ṭhin lo teh", a nui hak a, min fawp leh nghal zat. "Ka ti tak tak, ka hriat lohin, an lo inbe fel vek a, zaninah palai an lo kal dawn",

"Zaninah a?",

"Aw, tihian ka awm tlang mai ang, ka haw duh tawh lo", khum aṭang a tho a, chhuatah a tei a tei mai. Keipawh ka tho a, puanin ka la inkhuh, ka thawmhnaw ho chhuatah a let phung mai.

"Mawia, ka haw duh tawh lo ka tih kha aw", ka ti sap a. "Lo ngawi rawh", min vin nghal hrawk. Ka phu uih a, ka chil ka lem dâwk.

Ṭawngkam vin min la hman khum ngai lo, dik lohna eng nge a neih? Ka thusawiah thinrimna tur a awm pawhin ka hre si lo.

"Duati, i awm tlang thei lo, i haw a ngai",

"Mahse, Palai an lo kal dawn ka tih kha, ka chhungte nen inbe rem sa vek an nih avangin, inneih nî tur nen lam an sawi nghal vek ang",

"I haw a ngai ka tih chuan, haw mai rawh", ka hmai a rawn hmer vak a. Thinrim ṭeuh chungin min la en zui.

A mizia danglam thut chu ka hrethiam lo, "I awmdan hi a mak lutuk a nia", ka ti sap a. Min hmer nâ êm êm lehnghal.

"Ka nih dan reng alawm a nih, tunah haw tawh rawh", min thlah a, ka thawmhnawin min lo vawm.

"Ka haw tawh dawn lo", ka ti ve hmak. "Hetah ka awm tawh dawn, ka haw tawh dawn lo", ka ti leh a. Mit sen rumin min en, ka hlau duh ve ṭhak lo.

"A hmeichhia zawkin chutia han tih, hetah i awm dawn lo, inha rawh", ti hmukin, room aṭang a chhuak a. Mak ti deuhin ka en ringawt.

Ka haw duh loh thu ka hrilh chuan, a lawm zawk ka rin nen, mahse, a mizia a inthlak hlawk zawk. Ka hrethiam thei lo.

Palai te nen ka chhungte an inbia a, ka room-ah Ngheti nen kan awm daih. Chokaa awm ringawt pawh ka duh lo, an tifel nghal vekin ka ring bawk.

"Ṭap tawh teh suh",

"Ka tum alawm", ka ti ṭiau a. Mawia awm dan a mak si, tun thlengin min lo la be lo.

" A chhiat loh zia hi, Police a la ni zui, a hmeltha êm êm lehnghal. Mawia ai chuan a tha fe zawk",

"A hming pawh ka hre ringawt em ni?", ka ti hlur a. Thlalak pawh chu, ka en duh lo.

" A hming chu, Lalzahngaia, fb-ah ka stalk nasa nia aw, a chhelo thei lutuk, I vannei bik e, nei ngei ngei ang che", ka lam tang tura ka tih ber, Ngheti pawh chu, ka haw tan tawh.

"Engtin nge i hriat leh hman a?",

"Hriat loh ka nei hleinem, an sawi dan chuan, ṭhian kawm ngai lo, mahnia awm chawt ṭhin an tia. Hei, nerd an tih ang chi hi", nui sângin Ngheti chuan a ti a.

Tunah tak hi chuan, Ngheti nen kan dinhmun hi inthlak thei ila ka ti.

"Nghet, Mawian min lo la be miah lo",

"A sawi pawh sawi suh, ṭah pawh ṭap reng reng suh, khapa khan i mittui te hi a phu reng reng lo. Ngaihtuah tawh suh, i pasal tur chauh hi ngaihtuah tawh rawh, a chhe lo eee, a pa tih a hriat ngawih ngawih bawk si. Police form nen, ka hmu châk, awiiii, ka thi thei hial ang", Ngheti chu, lukhamin ka vaw chawrh.

"Ka hmangaih alawm",

"Chhahi", lukhamin min vaw ve chawrh.

"Ani pawhin min hmangaih",

"Vanlalchhah", lukhamin min vaw leh chawrh. "A hmangaih lo che, hmangaih che sela chu e, ka haw duh tawh lo i tih khan, ram dangah a kalbopui nghal ang che", a ti a.

"Kha pa khan, nawmchenna chauh a hmangaih, i chhah tep tup êm mai, a ex hoin an la zar buai reng chhan te hi ngaihtuah rawh, ka hrilh nasa tawh lutuk che, nang chauh hi a hmeichhe mutpui loh awm chhun i ni ang. Ka ring lo ka tih kha, tunah pawh hian tu hmeichhia ber nen nge, an ṭe vak vak lo ang tih tuman kan hre lo",

"Ngheti", ka ti chuai raih.

"Eng nge? Tun ṭum chu ka thu i zawm ve tawh ang, Lalzahngaia hi nei ngei ngei ang che, a duat zawk bawk ang che. Nerd ho hi chu an zei lo naa, mahse, mi care an pe nâ lutuk a nia",

"Ka lamah i ṭang dawn maw tia?",

"He thilah kher kher hi chuan, i lam ka ṭang thei lo. Mawia theihnghilh hmak ang che", a ti chharh chharh a.

Ka thaw halh halh ringawt, ka beidawng takzet.


Show post links
Top

[Ngaia]

I Ninawm
Chapter-2
Ziaktu: Cck Lalchhuanawmi

Inneih a hnai tawlh tawlh a, ka rilru lah a hah ve tawlh tawlh. Ka u lah hi, a phur ber berah a la ṭang zui.

Ka nu leh pa pawh, an hlim tih hai rual a ni lo, chumi vang pawh chuan, mahni hma chauh ngai thei ka ni lo.

Mahse, ka hmangaih chu Mawia chauh a ni a, ani nen kum hnih chauh la inzui mah ila, ka thinlung hian a kalsan thei tawh lo, chubakah, thil tam tak kan thlen tir nasa tawh lutuk.

"Nghet, zanin chu min lo riahpui teh",

"Aw le, chaw ei khamah ka lo kal nghal ang",

"Muang suh aw", ka ti a. Ka bulah awm reng se ka ti. Tunah tak phei hi chuan, ka mamawh lutuk.

Ka chhungte nena inbiak ṭhat loh thu chu sawi loa lum a nia, Mawia nen kan inbiak lohna a rei tawh lutuk.

Ka call leh message a chhang ngai lo a, *pasal chu nei rawh, duhsakna ka hlan che* hemi min lo thawn aṭang phei hi chuan, a reh nghal vawng vawng.

Min block lo a, keiin ka block bawk loh avangin a status ka view thei a, hmeichhia nena inhnaih tak taka an pic hi a up ṭhin a, hei hian min tibuai thei lutuk.

"Venpui, ka lo thleng a nia",

"Nghetpui", tiin, ka kuah nghal thlawp. Thei leh thei loin ka hnung a chul hliau hliau. Ngawi rengin khumah kan mu a, a kut ka chelh tlat a, ka mittui lah ka hru seng lo.

Mawian eng thu hla a neih loh avsngin, duh lo eng ang mah ila, pasal ka nei dawn chu a nia! Ka ngaihtuah zawng ringawt pawh hian, min râp.

"Ngheti, i muhil em?",

"I Vantirhkoh hi ka muthilh a thiang hleinem", a ti sap a. Ka ṭah nuih hak hak. "Venpui", ka mittui a lo hru tawk tawk.

"Pasal ka nei duh lo", ka ti a. Â min ti tih hriat reng hian, min melh ngur. "Naktukah kan sawi dawn nia, muhil rawh", a ti a.

Engmah ka sawi leh tawh lo, muthilh tumin ka mit ka chhing a, a sâwt chuang lo. Zan a rei poh leh, ka harh ting emaw tih tur a ni.

Kar leh Chawlhni aṭang chuan, kan inneihna tur pawh, Kohhranah an puang tawh dawn.

"I la pawm thei ngang lo em ni?", beidawng taka a tih chuan, muangchangin ka bu nghauh nghauh.

"I nu leh pa ka sawipui a, an khawngaih tho che, mahse, i tana ṭha tura an rin avangin, an sût thei lo a ni. Mawia ai chuan, a ṭha zawk sia", ka kun ngaih ringawt.

A chhe zawnga Mawia an sawi ṭhin hi, ka duh lo bur, ka haw(hua) ngawih ngawih. "A thlalak hi en ve teh mah, i rilru i thlak chiang ngawt ang", a ti leh a.

"Pawn lam landan ngawt a ni lo, lo sual viau ta sela, kutthlak ching mi ni ta se",

"Mipa lerh ai chuan a ṭha zawk", a ti lang lang. "Tun thilah hi chuan, i lam ka ṭang dawn lo ka tih kha, a tir aṭang Mawia ka duh lo. Tun ṭum chu, i nu leh pa bakah, ka thu pawh zawm ve tawh rawh", Ngheti chuan, a ti leh nuah nuah.

"Chhuk ang", thaw halhin ka ti a. Inhnuaiah ka chhukpui daih. Ka nuin ei rawng a lo bawl mial mial tawh. Kan titi rei ve em bawk a ni.

Ngheti leh ka nu chu, an titi leh siam siam a. Ka pa pawh a rawn lut hlawl, a lengchhuak nge mawni dawn.

"Kan nula pahnihte chu, in tho thei maw?", ka pain a tih chuan, "Thawh theih loh ten, nula kan ni ve a", Nghetin a lo ti lang lang.

A thawh har theih ṭhin nen, "Hmangaiha hi a la tho nange?", hawi kual zuk zuk pahin, ka pa chuan a ti leh a.

Ka nuin, a la thawh loh thuin a lo chhang thuai, a lo thawh hunah chuan, zu rim a nam leh huam huam ang chuh.

"Venpui",

"Pa, pasal neih ka duh lo nia", ka lo ti vat a. Ka pa chu, hrihhai deuhin a meng kual rak rak ringawt. "Venpui, i tana ṭha tur vek a nih hi", thinrim ni si lo, mahse, ka chhan chuan thinrima âng buan buan thei tura inring sain, ka nu chuan a lo ti ve leh.

Ka ngawi ta reng a, ka ṭah hi a chhuak ngawih ngawih. Rin ang ngeiin, rimchhe lutuk pu chungin ka u pawh a room aṭang a lo chhuak ve leh ta.

Ngheti chu haw lo turin ka chelh tlat a, amah a awm hi chuan, ka thla pawh a muang deuh.

"Ka bulah hian awm char char rawh aw",

"Tehreng, ka lo insawn daih dawn", a ti a. Ka nui tawi tak. Inah ka awm chawt a, pawna chhuah pawh ka peih lo.

Phone ka khawih a, Mawia status chu view loh tum mah ila, ka view ta nge nge. Ka view rual rualin chhuatah phone ka paih chawrh.

"Venpui, ngati nge?", bathroom aṭang Ngheti a lo tlan chhuak vat. "I phone hi ngati nge, Venpui?", min sâwi nawk nawk.

Ka rilru nâ lutuk chu, ka ṭhu thla hnawk. "Venpui", kawngka a rawn hawng ṭhuai nghal. "Insiam rawh, Damdawi inah kan kal dawn?", ka u chuan a ti hlak a. A kalsawn lehnghal.

"Venpui, eng nge thleng a?",

"Mawia bula kal ka ngai", ka ti sap a. A phal loh thu a sawi nghal thuai. "I phone chhiat chhan saw, sawi phawt teh", a âwmah ka bei a, ka hnung a chul hliau hliau.

"Mawia nen an inkuah, kawr an ha miah lo", ka sawi zawng ringawt pawhin, ka nghing lawih lawih thei.

Ka thik a, ka thinrim a, ka nâ ngawih ngawih bawk. "Thih mai ka duh", Nghetin min beng hlak nghal.

"Lalvenpui, i va rei ve", kawngka a rawn hawng leh ṭhuai. "Khatia inkuah inkuah lo khan, insiam vat rawh, Damdawi ina kal a ngai ka tih chu", a ti kharh kharh.

"Khawiah mah ka kal dawn lo", ka ti ve ngat. "Eng maw i sawi?", ka inring hman lo, ka chhip samah min ṭhamin, chhuatah min paih chawrh.

"Hmangaihzau, eng nge maw i hriat le?",

"I lo inrawlhna tur a awm lo, haw rang rawh",

"Ka haw rang lo ang, ṭha deuha sawifel theih turah, kut thawh reng suh", Ngheti leh ka u chu an inhau tawh. Ka uin kut a thlak ve mai ang tih ka hlau.

"Lalvenpui, ka hruai tho tho dawn che", min phih tho leh lawp. "Damdawi inah chuan eng nge tih tur?", Ngheti zawkin a ti a.

"I hriat a ṭul lo", ka uin a ti ram hmak. "Lo kal rawh", ka chhipah ṭhamin, min chhuk thlak pui hlawk hlawk.

"Ngati bawrh bawrh nge?",

"Damdawi inah kan kal dawn?",

"Damdawi in a? Engvangin?", ka pa pawh chu a hamhaih lutuk. Damdawi ina kal chhan tur kan nei lo hrim hrim.

Nghetin min kaitho a, ka lu a nâ ut ut. "Ka pa, Ngaian thisen test turin min lo ti a, result a duh alawm", ka uin a tih chuan, "Tuin maw?", ka nuin a lo ti vat.

Thisen test turin min duh maw, min lo va hlau awm em em. "Chu chu ṭha deuhin i sawi thei lo em ni, a kuh thawh zawnga che reng mai?", ka pa pawh a thinrim tawh.

"Ṭha taka sawiin awmzia a nei lo",

"Nei thei turin sawi ṭhin ta che", ka pa chuan ka u chu, a beng dawn ta mai emaw ka ti hman.

"Thisen test chu eng nge a ngaih chhan?", dam deuh zawkin ka pa chuan a ti a. "Tunlai chhanah, thisen test result hi a pawimawh tawh lutuk", ka uin a ti lang lang.

"Natna ṭha lo tak an lo vei thut thei a, Lalvenpuii pawh, pawn lama a awmdan kan hre kil kel hleinem", ka thinrim lutuk chu, ka insehruh ṭeuh a, ka u chu ka tha tawpa va ben pawp ka châk lutuk.

"Venpuiin, natna ṭha lo a vei i tihna em ni?", ka nuin a tih chuan, "A vei ka tih loh kha, thut thei ka ti mai chauh lawm. Chu loah, hriat ve hrim hrim pawh a ṭha", ka uin a ti chharh chharh.

"Venpuii hi ka hrechiang, natna ṭha lo vei tur khawpa awm herh a ni lo", Nghetin a ti ve leh. Ka uin a en rum ngang mai, "Haw turin ka tih che kha, kan chhungkaw mi ni lo, lo ṭawng ve zuah zuah suh", Ngheti ṭawng tum chu, ka khak vat.

"A mipa lamin an lo ngiat a nih chuan, va kal rawh u",

"Pa, ka kal dawn lo", ka ti lui ve ngat. Ka u bawk a lo inrawlh leh, "I kal khawp ang, i kal duh lo lui tlat a nih chuan, natna ṭha lo i veiah ka ngai ang",

"Ka u", rapthlak ti zetin ka melh ngawt ngawt. Min ring chhe lutuk chu, mak ka ti zawk. "I mipa kawp aṭang rengin, hman aṭang ka ring tawh lo che", ka âng phuau ringawt.

"A ṭha lawm, thisen chu test ila, mahse, thisen test min phut pa pawh chuan, a thisen test tir ve rawh se", ka ti vei hmak.

Ka u chuan damdawi inah min hruai a, Ngheti erawh, a lo kal ve thei ta lo. "Venpui", ka kut a rawn vuan a. Sual viau mah se, ka u a nihna a bo chuang bawk si lo.

"Kut a thlak ṭhin che a nih chuan, i lo haw dawn nia", a ti dam thlup a. Ka nu leh pain kut min thlak ngai lo a, ka u char char hi ni mai.

Ṭha deuha thu inhrilh ai chuan, a kut hi a thawh mai zel, ka pa pawhin a hau nasa, a sim thei chuang lo.

"Result a ṭha e", ka u kutah, test result chu an hlan nghal a. Ka thinrimna a la dâi thei lo, min ring chhe nghal ringawt a.

Ka ai chuan, test tura min lo titu lam, ka ngei zawk. A ṭha zawng pawhin ka ngaihtuah duh lo, thisen te in test tir reng reng.

In chungah chho nghalin, ka inkalh khum hmak. Ka phone ka vawm chhiat daih avangin, Ngheti pawh ka call thei lo.

Khumah ka inlet ka inlet a, a status aṭang khan a chiang tawh viauin ka hria. Min hmangaih thu min hrilh pawh kha, a sawi ve mai maiah ka ngai tawh.

"Venpui, keimah Ngheti", kawngka ka hawn thuai a, a lo kal ka lawm lutuk chu, ka mittui a tla thei hial.

"En teh hei, makpa test result, ani pawh a ṭha vek, in pahnihin in ṭha ve ve, hlauhthawn tur a awm miah lo nia", ti dap dapin, ka kutah a lo hmehbel nghal a.

En pawh en duh loin, chhuatah ka theh thla. Ngheti a thaw ri hrawih, an lu hi chu, ka tihai ve chiang alawm.

Inneihna hmang turin Shillong-ah kan chhuk thla a, Shillong an chenna a nih avangin, Aizawlah kan innei thei dawn lo, Man Hlanna erawh, kan inah ngei kan nei, ka nuih luihna lamah, ka biang a kham vek thei.

Chumai la ni lo, inneih zawh ve leh, Punjab-ah kan la awm daih dawn zui. IPS a ni a, a post a ni tlat si a.

Naktukah kan innei dawn a, chuti chung chuan eng ang hmel pu nge a nih ka la hre lo. A thlalak min hmuh tum lui ngar ngar mah se, Ngheti a beidawng ṭhak.

"Naktukah, pasal i nei dawn chu ni sia, ka ngai dawn che e, Punjab daihah i la awm dawn zui",

"Kan bulah lo awm ve daih la",

"I ti awm ang lo thei lutuk, ka lo awm ve chuan, in nupa kar ka tibuai mai mai", a nui zui kur kur a. Ka en mawl tawp.

Ka nuih lohna chin pawh ka hre tawh lo, "I chhungte vang tal pawhin, i tihpuitlin a ngai a nia aw", a ti a.

Ka ngawi reng ringawt, ka u kha chuan, kut min thlak a nih chuan haw turin min ti a. Kan inneih aṭang a rei berah thla khat liam se, kut min thlak thu sawiin ka haw daih ang!

"Awiii, Lalvenpui, i mawi lutuk", ṭap pur chungin a ti a. A mittui a hru mawlh mawlh, a mit an hnawih nalh tawh tehreng nen.

"Nangmah i mawi zawk daih",

"Awihawm lo lutuk, i hleitling bawk si, GAC Miss ni thei ngat kha i ni miau a",

"Ngawi mai mai teh", ka lo ti hlak. Engle khaw le, a mit mai bakah, a hmai an chei ṭha leh.

Ṭhian atan amah bak thlan tur dang ka nei chuang lo. Heel a bun a, keiin a flat, chuti chung chuan ka dâr a chen ṭawk ṭawk.

"Venpuiii",

"Eng nge, rak vak zel suh",

"Awiii, ka thi dawn, ka thik lutuk che", a ke a per chhak chhak. A phone a en vung vung.

"I uin kan makpa tur thlalak min lo thswn a, Lalvenpui", min beng chawrh chawrh. Ka kawr hak a beng chhe vek ang tih a hlauhawm.

Ka en tura a phone ka hma zawna a lo dah chuan, ka mit ka chhing hmak. "I la hmu dawn tho tho, thidang lo turin inveng hle ang che", a tih chuan, ka nui hak ringawt.

Ka kawr hak pukin, parh chuai lo mah se, a fual leh mah mah a, kal paha chawi zel a ngai. Biak in kan thleng hnai telh telh a, ka khur nasa telh telh.

Biak in kan thleng kan chhuk chiah tihah, "Venpui", ti fiak ṭhak ri ka hnung lamah ka hre thut! Min kotu âw chu ka hrechiang lutuk ringawt.

Ka hnung lam ka hawi vat a, Police pahnihin an lo chelh bet. "Mawia", ka phun sap. "Venpui", ka uin min vuan tlat lo se chu, ka va kuah tawh ang.

"U", mittui parawl kuangin ka en chho a, min kal tir a tum lo nasa mai. "Min lo zui lo turin ka hrilh mawlh mawlh tawh asin mawle", a ti chang fak.

"Kalbo pui rawh u", ka u chuan a ti a. An kalsawn pui. Min lo en ṭawk ṭawk, sawi ṭeuh tur nei hmel a pu. Ni e, a ngah ngawt ang le.

"Kal a hun a nia, i mittui titla reng reng suh ang che", ka u chu, ka en mawl tawp ringawt. Ka ban rek a hmer nâ bawk si.

Biak in kawt kan thleng a, an khat vek. "I mittui kha", ka beng bulah a phun sup a. Ka mittui a tlak loh nan, ka khap fap fap.

'Lalzahngaia Weds Lalvenpuii', riru nâ deuhin ka thlir ngawt ngawt ringawt. Inneih niah chauh, kan inhmu dawn chu nia, ani erawh chuan, ka thlalak a hmuh tawh ngei ka ring.

Engvanga Mawia khan, min lo zui nge maw nih ang le? Min lo hruai tura lo kal a ni ang em le?

Ka uin Biak in chhungah min luhpui a, ka hnungah Nghetin min zui. Ka tlanbo hlau niawm hrimin, ka uin min vuan nghet mah mah.

Maicham hmaah, a hmalama a kut pahnih suihin a lo ding khawng at mai, Police an ti em ni kha?

A sam veilamah a pial thân a, necktie ni loin bowtie zawk a awrh a, a kamiz tih chauh lo chu a dum vek. A kut dinglamah sana dum a bun bawk.

A kut a lo phar a, ka uin ka kut a pe. Maicham hmaah min dinpui a, kei aiin a sang a, a inkhaithli vei phian.

Inhmatawnin kan ding a, muangchangin ka hawi chho, min lo en chhuk ve run a, a nui suk. Mahse, ka pasal hmelah chuan Mawia hmel zawk ka hmu ta tlat!

(Hemi story bik hi, zan tin kan dah dawn nia aw)


Show post links
Top

[Ngaia]

I Ninawm
Chapter-3
Ziaktu: Cck Lalchhuanawmi

"Eng nge a an?", tim daiin ka zawt a, ka ṭhen sak sak. Ngawi vung vungin min en a.

A tui loh thu a sawi ang tih mawlh ka hlau, a hnuah, "A zia deuh e", a ti sup a. Ka thaw huai mai. Ei rawng bawl ka thiam ve hle maw ka tia, thiam lo min ti hmasa bertu a ni.

"Ka la thiam chho ve mai ang", bah nawkin, inthlahrung deuhin ka ti a. Ka zak chu, ka sa pup pup. Ka la zak zel dawn a nih hmel, puar taka chaw a ei ka la hre lo.

Bâr hnih thum a bar a, a tho daih zel. Kei lah pawh hian, ka chawhmeh siam a changin a al êm êm a, a changin a hâng êm êm lawi bawk a.

Ka hrethiam thei lo reng reng, inah te chuan, ka bawl tui thei lutuk asin le!

"I hman veleh insiam nghal rawh aw", ka hawi phei a, a lo insiam fel vek tawh. Sofa-ah a ṭhu thla a, Magazine a chhiar nghal.

Form a ha lo chu, min tihrilhhai. Thleng sil zawh ve leh, bathroom-ah ka lut a. Ka hmai te phihin, hâ ka nawt a. Ka chhuak chu, sofa-ah a lo ṭhu tawh lo.

Hawi kualin ka zawng nghal ruai, pawnah ka chhuak a, a lo awm hlauh. Police motor bulah a lo ding.

Bedroom panin ka insiam nghal sawk sawk a, ka duh angin ka hmai pawh ka chei hman lo, rei min ti ngawt ang. Ka sam pawh ka ṭawn ṭha hman lo, ka thlah ringawt.

"Station-ah kan kal lawk ang a, chumi hnuah bazarah kan kal chauh dawn nia", hnung lam lo hawi zeuh pahin a ti a. Ka lo bu nghat.

Thil pawimawhah bak, a ṭawng ka hre ngai lo. Zawhna ka neih emaw, ka biak chauhin min chhang a, chumi bak, kan inbe chhunzawm tawh ngai lo.

A nui hmel ka hmu ngai lo a, thinrim emaw lungawilo emaw pawh ni si loin, smiling face a nei lo ve hrim hrim, a khawharthlak zawk.

Station pawnah ka lo nghak a, pangpar bulah ka ṭhu. Pangpar pawh a ni lo, Forgetmenot kung tê tak te te hi a ni a, an chep rual hmar lehnghal.

"Kal ang le",

"Aw le", ka zui a. Driver-in min lo zui tawh lo. A hmaah ka ṭhu a, amahin a khalh, a khalh thiam lo turah ka lo ngai ngawt a.

Form a ha si lo a, silai a keng tho ang em le, tih ka ngaihtuah. Ahmedgar-a Station hi a post a ni a, quarter-ah kan awm a, in luah man tih ang te chawi a ngai lo a, a ṭha phian.

Mall-ah kan lut a, Inrinni a nih vang nge, ka rin ai daihin vei vak an tam. A hnungah ka zui ve ringawt.

Cosmetic dawrah min luhpui hmasa ber a, "I mamawh tur thlang rawh le", a ti a. Ka bu leh nghat. Tam pawh ka thlang lo, ka mamawh tur ang tak tak ka thlang, inah tlem ka nei tho a.

"Khang ho kha maw?",

"Aw, inah ka la ngah tho a", ka ti a. A wallet aṭang card phawrhin a pe a, 'click' a inti a, a man a tlak nghal der.

Min khai sak a, Punjabi lu tuam palian lakah a nêp bik hauh lo, a inkhaithli êm êm zawk a, a hmu apiangin an lo en zui vawng vawng ziah zel.

"Saw tiang saw i nei em?",

"Aih, nei lo",

"Lo kal rawh", ka kut a lo chelh a, unau bazar kan ang ka ti. Sam pawh ngilna leh chhem rona chu, a man a zawt a. A card-in a chingfel leh vek.

"Ka lo khai ve tawh ang",

"Ka khai thei", a ti hmuk a. "Min lo zui rawh", dam deuh zawkin a ti a. Ka zui leh hnak hnak. Thawmhnaw dawrah min luhpui a, a nalh hlawm lutuk a, thlan tur ber ka hre lo.

Ka lo ha tawk ve zel bawk nen, "I pian a fuh tawp, model i ni chiang mai", ka nui sak ringawt. "Model chu ni lo e", ka ti a. A awih loh thu a sawi nuah nuah.

"Nort East lam i ni tiraw, khawi State ber nge?",

"Mizoram aṭangin",

A kut a beng a, "Miss Rody kha i hria em, North East model-ah chuan ka duh ber, Miss India-a a participate lai pawh khan, ka lo ṭan thei lutuk. Mizoram hmeichhia ho hi, in chhe lo thei e, in pian a fuh thei si", dawr nghaktunu chuan a ti nuah nuah a.

Ka lo lâi lutuk ringawt, "Mizoram boruak a ṭha a, chuvang lawm", nui sângin ka ti a. "An sawi ziah a, engtikah emaw ka lo la zin ang, i pasal a ni tiraw?", u Ngaia a kawk zeuh a, a nih thuin ka lo chhang.

"Mizoram mipa ho pawh, amah ang vek saw mi, in chhe lo thei e, couple inhmeh tak in ni", ka beng bulah a phun sar sar.

"Mizo hmeichhia leh mipaah chhe lo tak tak awm mah se, keimah anga chhe ve tak tak pawh an awm tho lawm", nui varin ka ti a.

A awih loh thu sawiin, min beng hlak, "Mizoram boruak a ṭha i tia, Mizo hmeichhia leh mipa zawng zawng, in ṭha vek ang", a ti nuah nuah.

U Ngaian card a pek leh chuan, "Mizo Couple inhmeh ber in ni ang", dawr nghaktunu chuan a ti a. "Kan lawm e", u Ngaia chuan a ti sup.

Dawr aṭang kan chhuak a, a inkhai bawr nasa tawh si a, chu loah, pawisa a seng hnem tawh ngawt ang.

Restaurant-ah kan lut a, a vawt ruih lehnghal, menu ka en a, chow satui leih a order theih tawh lo, ka ngai rum rum, Nghetpuii ka hre chhuak nghal zat.

Chow satui leih, plate thum a ei ngei ngei, dawra kan chawlh tawh kha chuan. "Eng nge i ei duh?",

"Momo leh lassi hi ni mai", ka ti a. Paper-ah ziakin, a tho zui a. Ka en zui, a hnuah tray a lo chawi a. Lassi no hnih, momo plate hnih leh, eggroll pakhat a lo awm.

"Straw ka theihnghilh ni maw?", straw lam turin a va kal leh. Lassi chu ka fawp a, a vawt tui êm êm.

"Venpui", lassi ka fawh lai tak, a phone camera a dé chuai nghal. Mak ti deuhin ka en a, "Status-ah ka'n up ang e", a tih chuan, "A ngai lo", a phone ka va ban.

Ka zak hnuhnawh leh chu, ka kut ka la sawn a, "Ka inrin loh lai nia, ka chhe dawn lutuk, ka duh lo", ka ti bah nawk.

"A ṭha lawm", a ti hmuk a. A phone a ak ṭha nghal zat. "Ei rawh", momo plate a lo nawr phei a, eggroll a ei, a thinrim loh hrâm ka beisei.

Pawisa kan hmang nasa lutuk a, ka inthlahrung. "Salute", ke per ri chhakah ka phu zuk. U Ngaia chu ner nûngin, a bu nghauh nghauh.

"I dam maw?", Salute petu pa chuan tiin, an pahnih chuan an inkuah a. A palian si a, a lu a la tuam vei nen, min tihlau.

Min hmuh chuan, "Hei tu nge?", a ti a. "Ka nupui", u Ngaian a tih chuan, a âng phuau. "I nupui maw?", mak ti zet hian a ti a.

U Ngaia a bu nghut, "A nupui tak tak maw i nih?", keimah zawk chu min lo zawt tawh. English-in min bia a, u Ngaia nen erawh kha chuan, Hindi-in an inbe thung.

Ka nih thu ka sawi pawh chuan, a awih loh thu a la sawi fan. "Satel-a hi, engtin nge i neih duh zawk?", a tih leh chuan, ka nui chhuak hawk a, ka inthiam lo chu, ka kâ ka hup rang lutuk.

Satel-a, a inhmeh reuh lutuk. An pahnih chuan an inbe leh mawlh mawlh a, hna lam thil an sawi ka ring, Salute an inpe êm mai.

Momo ka ei zo a, la ei loh plate pakhat chu, mi pawh en loin, u Ngaia chuan ka lamah a lo nawr phei a. Ka ei leh tuam tuam, Ngheti ka ngai lutuk!

"Mamawh dang i nei tawh lo maw?",

"Aw, nei tawh lo",

"A ṭha e", a ti bul hmuk a. A ṭawngkam hi, ngaiah ka la nei thei meuh lo. In kan thleng a, a hnu rei vak loah, dressing table an lo dah.

U Ngaia chuan signature a pe a, bedroom-ah an chawi lut. Lo dahtupa chu a chhuak nghal a, a to ngawt ang.

"I incheina ho kha, i dah dawn nia", a ti a. A inphelh nghal mai avangin, ka lo hawi sawn. Towel a lain ka hria, a inbual dawn a ni ngei ang.

Dresssing table chu ka hru fai a, ka inrem fel zung zung, darthlalang lah chu, ka inhmu hmelṭha hrep lehnghal.

"Naktuk chhunah chauh ka lo haw thei ang aw, tukverh leh kawngka ṭha deuhin i lo kalh dawn nia", Police form a ha nghal mawp mawp a.

Tlai chaw ei a tum lo a niang, pawn thleng ka thlah a, a tlan liam hnuah kawngka kharin ka kalh nghal.

Thawm ri ka hriat hlekah, ka phu leh zuk zuk dawn a nih hi! "Venpui", kawngka ka hawng a, "Theihnghilh i nei em ni?", ka lo ti thuai.

"Lo kal teh", sofa-ah kan ṭhu a, "Hei i phone tur aw", a lek kâng a.

"I hming?",

"Lalvenpuii",

"Google email tur engtin nge ni dawn?", engtin nge nisng aw, a hma mi chu, theih tawh awm si lo a, "Venpuii ti mai rawh", ka ti ta ngawt.

"Password", ka ngawi deuh vang vang. Ka phone hmasaa password kha chu, tu emaw te te kha a nia!

"Venpui",

"Aw, kha kha ni leh mai, Venpuii, ni leh lo, Nghetpuii leh zawk si", ka ti a. "Tumtuleki kha em ni?", a ti zawi sup.

"Aw ni e", ka lo ti a. Nghetin hria se, engtin nge a tih ang aw? "A dang chu lo buaipui tawh mai rawh, jio sim a nia, a pawi em?",

"Pawi lo",

"I ṭhiannu number ka save tawh aw, lo fimkhur la", ti pahin, a ding hluai a. Keipawh ka ding, phone min pein a chuak zui lehnghal.

Rei vak loah number hlang aṭang message a lo thleng a, ka hawng vat. *ka number aw* a dp ka en a, Police Station a nih danah, u Ngaia a ni tih ka hre nghal mai.

Ngheti pawh ka hmu nghal, a number chiah a insave sa hrim hrim. Zanah ka bawl teh ang, keimah ka ni tih a hre dawn lo hrim hrim.

Rei lo te, quarter-a awm te nen pawnah kan inkawm a, Hindi zir pahna a ni nghal a, a ṭha phian. Station aṭang a hla ve hret a, Police nupui ho titi pawh, a bawn teh e.

*i van chhe lo*

*Lalvenpui, min bawl lo tum buai duh suh* ka âng phuau. *i mi sawi chu ka van hre ngai lo* ka va ti a.

*u Ngaian i number min pe aw* intithei fein a lo ti. Min lo call a, a âw ka hriat chuan, ka mittui a hnâm ṭiam ṭiam.

"I ṭap em ni?",

"Ṭap lo e", ka ti ṭuau a. Ka ṭap lo thei lo, "Ka ngai lutuk che", ka ti leh a. Min ngaih thu a lo sawi ve nasa lutuk.

"Nghet, ih, engloa kha-",

"Sawi pawh sawi suh, ka haw teh a nia, a bum mai mai che nih kha, a hmangaih tak tak lo che, an ṭhian hoa an infiamna mai mai i nih kha, ngaihtuah pawh ngaihtuah tawh suh",

"Eng, eng nge sawi i tum?",

"Ka sawi hmain, sex in hmang miah lo tiraw?", a rawn ti a. Ka bo tawlh tawlh.

"Ka sawi kha, kan hmang ngai lo",

"A ṭha e, an Kohhranin an phuar a, jail aṭanga a lo chhuahna pawh a la rei lo", a tih chuan, ka ṭim nghal uai uai.

Kohhranin an phuar chhan eng nge, "Ngati nge Kohhranin an phuar?", ka tih chuan, "Ka sawi ka sawi kha, ka ring hlawllo ka tih kha, sex bak a ngaihtuah lo, sâwn a thlak a, chumi bakah, veng chhungah buaina a siam a, an man alawm", ka thu hriat chu, ka awih lo zawk.

"I fiamthu lo tiraw? Inneihnaah a lo kal kha-",

"Chhahi, khami ṭum khan zui ta la e, tuna i chan tur hi ka ngaihtuah ngam lo",

"Nghetpui?",

"Mawia ngaihtuahin i hun hmang tawh suh, pasal ṭha deuh i nei tawh a, pasal nei reng chunga mipa dang ngaihtuah a ṭha ngai lo aw. I pasal chauh kha, ngaihtuah rawh", a ti dap dap a.

Mawia chanchin chu, hre lo law law zawk ila ka ti. Ka rilru nâ chuan, ka thinrimna pawh ka hre chang tawh lo.

Nghetin min bum mai mai thu a sawi te, midangin a fa tur an pai thu a sawi te chu, ka bengah a kiu vawng vawng.

Chutiang turin ka ring phal lo, min bum ka la ring thei chuang lo reng reng. Thla khat a ral hnuah chuan, ka haw ang a, keimah ngeiin ka chingfel ang.

Ka chhungte leh, Ngheti ṭangrualin min bum let zawk pawh a ni thei. Chutiang a nih ka ring ngam leh bawk si lo, ka rilru a mang vek!

"Nizan i mu thei em?",

"Thei lo",

"Ka ring reng a ni, lo call che ka tum a, mahse, inngaihtuah nan hun i duh zawk ka ring a",

"Nghet, ka chhungte nen ṭangrualin dawt min hrilh lo tiraw?", ka ti a. A thaw ri hrawih.

"Dawt ka sawi angah i ngai maw, nakinah Mawia nen kan inbiakna ka lo thawn ang che, a hming sawi ringawt pawhin ka luak a tichhuak", sawi leh tur pawh ka hre tawh lo, ka ngawi tawp ringawt.

"Venpui, i la awm em?",

"Awm e", ka ti a. "Thildang sawi ang, MA i zir dawn a tia, naktuk aṭang i ṭan dawn em ni?",

"Aw, ṭan dawn, an lo phal hlauh a, ka lawm zia chu",

"Police nupui nih chu, kha reng kha sin. Keipawh, IGNOU-ah admission ka ti ve a, dawr ka nghak pah a, a zia tawp", a ti lang lang a.

A thu leh hla ngaihthlak char char a ni leh dawn e. "Nitin class kal a ngai si lo a, MSR Market-ah khan maw, Beauty Salon-ah ka thawk a, dawrtu kan ngah thei lutuk, ka thiam an ti thei tawp a",

"I va han hausa dawn tak, min theihnghilh ang e aw",

"Lungngai reng reng suh, Lamborghini ka la leisak ang che", a tih chuan, ka nuih sun sun. Engtikah nge, min leisak theih ang aw?

"Ka hrilh che kha aw, Mawia chu theihnghilh hmak tawh rawh. U Ngaia chauh ngaihtuah rawh, i pasal a ni bawk a. Mipa dang i ngaihtuah ringawt pawh khan, i uire tihna nia aw",

"Lalnghetpui", ka ti tuarh, a sawi awm ang lo thei lutuk.

"Eng nge?",

"Eng ngaihtuahna nge maw i neih ṭhin le?", ka ti a. "Eng ngaihtuahna mah, pawmlai nei chunga, midang ngaihtuah kha, uirena chikhat tho a nih kha, Lalvenpui, i uire tawh tih i hria em?", ka chal ka beng dat.

Ṭawngkam lah hi, a duh tui lo thei si, a zahthlak thei lutuk. "I ṭawngkam hi, veng ve ṭhin teh, a mawi lo thei lutuk", ka ti nang nang.

A ner nasa leh ang chu, ṭawngkam a duh tui lo ṭhin lutuk hi ka buaina a ni fo. A zahthlak thei tak tak a ni, min chhuah chhe êm êm lehnghal.

Bedroom aṭang ka chhuak a, sofa chungah puan inthlep fel sa thlapin a lo awm leh tawh a, a zing tlan a lo haw ve leh chiah.

He hmuna kan thlen zan aṭang, sofa chungah a mu a, kei, bedroom-ah ka mu thung. Zing tin a tlan a, zana a lo haw tlai pawhin, a hun pangangaiah thoin, exer a la ziah tho.

A mut a chhuak ve ngai lo mile ka ti deuh. Ngawi rengin chaw kan ei a, tukina ka ei rawngbawl chu, a zia tawh tak takin ka hre deuh.

Mahse, u Ngaia chu, bâr thum hnuah a tho daih a, a bâr lian pawh a ni chuang lo. A tihdan ve ṭhin rengah ka ngaihsak tawh.

"Ban hunah i haw thei ang tiraw?",

"Aw, haw thei, ka lawm lutuk e", a lo chhuk ve a, Campus chhungah min luhpui.

"U Ngai, i lo kal ve kher a ngai lo nia", ka ti zawi sap a. Form ha lo mah se, min en hrek hrek hlawm a, nuam ka ti chiah lo.

A ṭhen chuan an hria ni maw, an Salute leh ṭhin a. Ani lah, hre lo angin a kal pawk pawk mai bawk si.

Subject Department awmna min zawn sak vek a, bathroom awmna, canteen awmna leh Office thlengin.

Class hmasa ber tur, Political Science room-ah mim hruai a, tlar hmasa berah min ṭhuttir. Tlar hma bera ṭhut ka hreh zia hria se chu aw, min ṭhuttir ka ring miah lo.

Dawhkanah innemkhalhin, "Buaina i tawk emaw, harsatna i nei a nih chuan, min lo hrilh vat dawn nia", hawi kual hru hru pahin a ti a, ka lo bu zeuh.

Khi sukin ka biang a tawk zeuh a, a chhuak zui nghal. A chhuah hnu chuan, ka zahna a zual, ka khûr titih vel!

"Lo lut thar maw?", hmeichhe pakhat hian a lo ti a. Ka lo chibai vat. Ka bulah a ṭhu a, information ka hriat tur ang ang min hrilh nghal zung zung.

A tawpah, "Lo hruaitupa che kha, i unaupa em ni?", zawi sap hian a ti a. Nui hakin, "Ni lo e, ka pasal zawk a nia", ka tih chuan, "Tak tak maw?", ka ṭawng an hre pha lo emaw ka tih hoin, an lo ti sup sup.

Min zim huai huai a, Punjabi hmeichhe hoah pawh, a lo tla nâ hle tih ka hriat chhuah phah.

"I van vannei bik, Nort East-ah chuan ka duh pawl tak, in State-ah a lar ngawtin ka ring",

"I vannei bik e", a ṭhenin min beng hlak hlak a. Rin ai takin, ka ni khatna ni mah se, a nuam phian.

Professor ho lah an fel, chu loah, BA kha, MBSE ni mah se, Distinction-ah ka pass ve miau a, Political-ah ka mark a filawr ve bawk ben.

"Ka pi, ka puin hruai tur chein min ti a",

"Aw le", ka ti var a. Police motor-ah ka ṭhu lut a, a zahthlak lam lek lek zawk. Min en duh hlawm lutuk a, Police nupui ka ni tih a hriat mah mah.

Station kan tlan pel a, Hindi ka thiam chhun ang angin, u Ngaian chhun thil a ei leh ei loh ka zawt a.

Ani lahin, English a thiam ang angin min lo chhang ve bawk, kan inpersan teh e. Ka nui tawp ringawt.

Quarter-a awm ve dang ho, an lo inumkawi zar zar a, kei tih loh chu, chhangchhe nu vek an ni.

In chhunga ka luh rual rualin Ngheti ka call a, min lo chhang thuai. Vawiina ka hun hman dan zawng zawng ka hrilh a.

"Punjabi nula hoah pawh, a lo tla nâ lutuk",

"Ni reng dawn sin, Mizo ho hian kan hre lo mai mai pawh a, hre ngat phei sela chu, i chang miah lo ang",

"Chu, nangpawhin i kherh ve dawn tihna ni maw?", ka ti chu, "Kherh dawn chiang e a, Shillong-a an awm daih vang nih kha, hre hmasa ngat ila chu aw, i chang miah lo ang", a lo ti nuah nuah.

Phone leh cosmetics min leisak thu te ka hrilh leh a, "Ka hria lawm, Lassi i fawp lai kha status-ah a hmang a, 'nupui i van nei chhia' ka va ti a, 'chhe reuh tak tak ni' a lo tia, ka nui vak vak", a ti leh a.

Ka ner sawk ringawt, chhia han intih tlawng mai chuh, "Venpui",

"Umm",

"Tupawh maiin i vanneihzia ngawt thu an hrilh che a, tun tut tutah Mawia i theihnghilh dawn lo tih pawh ka hria, mahse, pasal i nei tawh a, nupui ang taka awm i tum dawn nia",

"Aw le, aw le, tumtelek", ka ti a. "Khatiang khan min ko suh", a lo ti bak hlar nghal.

"I vanneih lehzelna chu maw, hmeichhe ṭhian a nei lo a, a cousin hmeichhia ho pawhin an hlau", a tih chuan, ka nui var ringawt.

"Dawt ringawt sawi suh", ka ti a. Dawt a nih loh thu leh, a cousin ho te nena an inbiak ṭhin thu te a sawi dap dap.

A che rang ṭhin teh e, engtiklaiin nge maw, an lo inbiak hman ni?

"Tumtelek tih kha chu, u Ngaia min koh dan a nia, tuman min ko thiang lo", a ti a. Ka nuih vak vak. A hauh nâ leh ang chu aw.

"Ka sawi chu i hria maw?",

"Hria e, tlaia a lo haw hunah pawh, ṭha tawkin ka lo lawm ang", ka ti a. A lo au hluai. A rawl a ring si.

Tumteleki chiah chiah. Ka tho a, khum chungah ka ṭhu ran mai. Ka ngaihtuahnaah eng nge awm pawh ka hre lo, hmalam pana kal hi a lo harsa takzet a nih hi!


Show post links
Top

[Ngaia]

I Ninawm
Chapter-4
Ziaktu: Cck Lalchhuanawmi

Ṭhenawm nu ṭhenkhatte nena, kan inbe thei vak lo hi a buaithlak. An Punjabi ṭawng chu sawi loh, Hindi pawh ka thiam lo chu nia.

English hmang thei tlem an awm a, chu pawh, an chhangchhiat theih em avangin kan inkawm hman ṭhin lo. A tlawngawl ber ka ni.

"Vawiin chu, ka class neih hun a tlai deuh a, taxi-in ka kal mai ang", a bu nghat ringawt. Vawiin chu, form a ha a, a meng rumin, thinrim reng hmel a put avangin, a lang hlauhawm mah mah.

A puan sin leh a lukham case ka su a, sofa chunga mu reng ṭhin a ni a, a taksa a kham thei ngawtin ka ring, ka khawngaih reuh e ah.

"Hi, new comer", ka hmaah, thatchhe zetin a ṭhu thla nghal a, a lu a tuam ve miah lo, a lu chu, buk ṭha tak a ni. Leather jacket dum a ha a, a hnuaiah t-shirt plane var a ha a, chung zawng zawng chu ka lo en chhuak hman!

"I mitmu a va lian ve", ka hmaah a kut a tiri a, ka harh chhuak zawk. Thil ṭul lo lutuk ka ngaihtuah, tenawm lutuk!

"Ṭawngna chang i hre si lo a, keimah ka'n ṭawng char char zawk ang e aw", ka en mawl tawp ringawt.

"North East aṭang zirlai thar a awm an tih khan, ka ex ni turah ka ngai a, min lo umzui ta maw ka ti hman alawm", intithei fahran hian a ti lang lang a.

Punjabi tih takah, a palian si a, chubakah, a ṭawng dan leh min en dan te chuan, ka awm a ti nuam lo.

"Ka ni lo a nih chu, ka kal mai ang", tiin, ka tho a. Ka kalsawn nghal nul nul, min lo umzui ang tih mawlh ka hlau, kal pawh ka kal lo, ka kal tlan hi a ni ringawt.

Class ṭan hun a ni chiah chiah bawk a, tlar hnung lam ka chuh vat. Ka ṭhu chiah chu, ka thaw huai huai. Midang an lo lut sup sup a, a hnu rei vak loah, Professor a rawn lut ve nghal.

Ka thla a muang sawt sawt, Mizo pakhatmah awm lohna hmunah, ka la awm ngai si lo a, ka ṭah a chhuak ngawih ngawih, Ngheti tal awm se!

"Pi, puin hruai tur chein min ti leh", lehkha thema inziak a en a, English-a a sawi theih danah, u Ngaia nge, tu emaw talin an ziahsak a nih ka ring.

"E heu, heu, heu, wow", a ti hluai a. Ka bag hrui ka vuan nghet teh asin. "I hawna tur chu, a va protective em em ve", nui varin a ti a.

Ka chil ka lem dawk dawk, "Thlah haw che ka tum asin le, nidangah ni rawh se aw", ka lu rawn khawih a tum chu, ka hnung lamah ka tawlh nghal.

A nui hak hak a, min tirâp zawk. Bike tinung vut vutin a phit chhuak nghal, a accident hrim hrim ang, a tlan chak em mai.

"Pi",

"Aw, aw, kal ang", ka ti a. Fimkhur ka ngaihzia ka inhrilh mawlh mawlh, in thlen hma chu, rilru ṭawngṭaina ka nei char char.

"Pi, i hlau em?",

"Eng chu maw?",

"Nichin mi pa kha?", a tih chuan, ka nui sak. "Hlau lo e a, Police nupui ka nih hi", ka ti a. A hrethiam chiah lo a nih ka ring, zaizir meuhin ka sawi leh a, a hrethiam ta niang, a khi ṭhaw.

"I pu hrilh suh aw", ka ti a. A bu ve nghat. Hrilh lo hrâm sela. "In inbe thei meuh maw?", a nui sâng a. Ka bu nghauh nghauh.

"Hindi ka thiam lo hi chu, ka inchhir ngawt mai. Tun hnuah a ṭangkaina ka hre chauh a",

"Lungngai reng reng suh, i thiam chho zel mai ang, English pawh hi, pasal ka neih hnu chauha thiam alawm ka nih. A ṭulnain min ur tawhah chuan e, kan rin phak bakin kan thiam zet zet lutuk", a ti nuah nuah.

Kan nui uar uar a, a sawi chu a dikin ka hre ta phian. A fapa a ṭah avangin in chhungah min luh san a. Keipawh, kawngka te hawngin, ka lut ve nghal.

U Ngaia lo haw leh haw loh tur ka hre si lo a, chaw chhum dan tur ka bo kher mai. A lo haw ringin, ka chhum kep ringawt a, chhum kep tihah, no khat leh a chanve hi ka chhum dan a ni a.

A lo haw dawn lo a nih chuan, chaw ka chhum ka ngai lo. Noodles ka chhum a, chaw ṭhing nen ka ei hmiah zel.

Ei rawngbawl zawh veleh, ka inbual a. Kawngka ka inkalh hnan hmiah zel, quarter-ah awm mah ila, ka hlau tho tho.

Ka inthlak zo, bedroom aṭanga ka chhuak chiah tihah, kawngka a lo inkik karh karh. Kawngka ka va hawng a, step-ah a lo ṭhu.

Kawta naupang ho infiam a lo thlir a, an pa ten an pawm vel te chuan, an khêk chêl chûl. A bulah ka ṭhu thla ve a, a nui suk suk.

"Engtikah nge, nautê in neih ve dawn?", Anisha-in a lo tih chuan, chhan tuma ka âng zuau hman tihah, "Naktukah", u Ngaian a lo ti vat.

U Ngaia chu ka en vat a, a kiai deuh sak. "Khapa khan, nautê siam dan a hre lo", Anisha pasalin a lo ti. Ka nui kur kur, ka zak.

Anisha a nui uar uar a, quarter ṭhenawm ho pawh an nui tliar tliar. Hindi-in an ṭawng ta nek nek a, hrethiam ve ta lo chu, ka ṭhu ngawi reng ringawt.

An nui leh hak hak ṭhin a, an sawi awmzia hriat ve ka châk lutuk. A inbual chhungin chawhmeh ka lum ṭha leh a. Zanin erawh, bâr thum ai daih a bâr a, chaw a lam nawn!

Ka lawm lutuk chu, ka khi leh vur vur ṭhin a, ka inthup thei ngang lo. Engmah hre lo ang maiin, a ngawi kur a, lehlamah chuan a ṭha phian zawk.

Thleng ka sil laiin, sofa chungah ṭhuin laptop a khawih mial mial a, file panga lai vel chu a inchhawp bawk.

Bedroom-ah ka lut a, khuma a form leh a thawmhnaw dang lo awm chu, ka hmu nghal zat. Suk tura a tih emawni dawn?

Bedroom aṭang ka chhuak a, a buai lutuk a, va tihbuai ka inthlahrung. A thawmhnaw ka su ngai lo a, amah hlir hian a inbuaipui a.

Zanin aṭang erawh, suk sak zel ka duh ve tawh tlat. Ka lut leh a, room kawngka khar loin ka hawng huau, a thawm ka ngaichang ru reng.

Lehkhabu ka phawrh a, ka ṭan a ngai nasa lutuk, ka lut tlai bik chu thuhran, mark score-na ṭha deuh, Mizo subject a awm tawh si lo a. Thi leh thau pawlha ṭan ka ngai hi a ni tawp mai ni.

Chhuatah ṭhuin, khum ka bawh a, ka mawng a nâ vek thei. Room kawngka a lo inkik kar kar a, ka hawi phei a, "Ka lo lut thei em?", a tih chuan, ka lo bu zeuh.

Khuma a thawmhnaw dah chu a la a, a chhuak lehnghal. Keipawh ka tho thuai a, ka ke a la mu zui.

"U Ngai", dingin a lo inher a, "Kha kha, suk tur em ni?", ka ti a. A bu nghut. "Ih, keiman ka lo su ang, lo va ṭhu rawh", a thawmhnaw ken chu ka ban.

"Ka su thei lawm, lehkha va zir rawh",

"Khawi, ka lo su ang", ka chhuh a, bathroom-ah ka luhpui nghal. Engtin nge a awm zui tak zel ka hre lo. Hnathawh tur a nei ve tho a, a thawk zawm leh dawn pawh a ni mahna.

Machine kan neih loh avangin, kuta suk a ngai a. Police form bakah, mipaah chuan, ka pa leh ka u thawmhnaw bak ka su ngai lo a, mahse, tunah, engkim hi a dang zo vek tawh.

Fû tawka sawrin, ka zar pharh a, zingah istiri-in ka nawt leh ang a, a ha hman hrim hrim.

"Venpui, i zo tawh em?",

"Aw, zo chiah",

"Lo kal teh", ka va kal a. Ṭhu turin min ti a, ka ṭhu fel chiah tihah, laptop ka hmaah a lo dah a. Chiang kel kawlin Ngheti nen kan inmelh ran.

"I induh sia, ka be duh dawn che mile",

"I chhe reuh e ah", ka ti hlak a, a nui vak vak. "I ṭap ringawt ang e aw?", a tih chusn, "Ka ṭap peih teuh lo", ka ti a. A awih loh thu sawi nuah nuahin, a meng bial kâwk kâwk.

A hawi kual rak rak pah a, "In chhung i hmuh duh em ni?", ka ti a. U Ngaia a ṭhu ve kur tih ka hriat chuan, ka ṭhen sak. A laptop a nia, chawi kual a phal miah lo ang.

"Duh lo, a ṭhing awm em mai", a auin a au. Henu ṭhin hi chu aww. U Ngaia chu a tho daih a, ka en zui a, pawnah a chhuak daih.

"Hey, i hmaa hi ka awm",

"Ka hria", ka ti a. "Kan inah kal lawk teh a", ka ti leh a. A peih loh thuin min lo chhang. A hming pumin ka ko a, a teu hlar.

Phun bul bul chungin kan in a pan a, a kal muang bawk si, ka lo hah, ka hau a, engahmah a ngai lo ṭhak lehnghal.

"Ka thleng, nu, pa, Venpuiin a be duh che u nia", ka nu leh pa ka hmu chiah chu, ka mittui a hnâm ṭiam ṭiam.

Kan inhmuh hnuhnun ber kha chuan, ka thinrim êm avangin ṭha takin kan inthlah thei lo a, ka hmuh lohna a rei tawh vang nge ni, ka hmu cher êm êm mai.

"I thau sawtin ka hria", ka nuin a tih chuan, ka ṭah nui hak. "A nih hi, Venpui, i thau tak tak a nia", nui sângin ka pa pawhin a lo ti.

Ka thau pawh ka hre lo, ka ngai rengin ka inhre mai. "Khawiah nge ka u?", ka ti zawi sap a. A awmna tur hre tho mah ila, a duh angin pasal ka nei tawh si a, a ṭhat ve deuh ka ring.

"A mu a, i u pawh a fel chho zel e. Mahse, a la inthunun thei tak tak lo", ka nuin a lo ti a. A fel chho zel tih ka hriat chuan, ka lawm angreng. Ka pain zu a in ngai lo a, ka uin a in tlat erawh, ka hrethiam lo lek lek ṭhin.

Ka nuin, "Venpui, Ngaia nu leh pa te va be ṭhin rawh aw", dam diaia a tih chuan, ka zah thuin ka lo chhang vat. Ka pa a nui hak hak a, Nghetin, "I va han laktlaklo tak", min lo ti.

Inneih ni aṭanga ni hnih hnuah, kan insawn nghal daih sia, khami hnu aṭang inbiak kan la nei leh lo tih, hrilh nawn ka ngai lo khawp.

"I dawih em mai, i dam rei lo ang", Ngheti bawkin a lo ti. Dawih vang pawh ni loin, ka zak!

In khata cheng ho chu ni ila, thuhran a nia. Phone aṭanga inbiak chu, ka zah zawng tak, chu pawh, va biak hmasak tur lehnghal chuan, ka huaisenna hian a tlin lo.

"Nakinah kan inbe leh dawn nia, u Ngaian hna a thawk a, laptop hi a hmang duh tawh ang",

"I inti pasal nei vel e ah",

"Lalnghetpui", ka ti nghal vat. Ka nu leh pa te nen inmangṭhain, kan inbiakna kan titawp a. Laptop chu, khawih chhunzawm dan tur ka hre ta hauh lo.

Centre table-ah dim thei ang berin ka dah a. Pawnah ka va chhuak ve, Police ho zawngin, meeting an nei ta emaw tih turin, zan lama Station-a awm lo ho zawng, an lo ṭhu bial laih a, eng tak chu sawi ang maw?

Bedroom-ah lutin, lehkhabu ka bih leh a. Mawng a nâ duh lutuk, lukham ka ṭhut hnan a, a zia ta deuh.

Kawngka a lo inkik leh a, "Mu har suh aw", a rawn ti sup a, rawn lutin puan leh lukham a la a, kawngka a khar zui nghal. Mu turin min duh tawh tihna niang, dar zat ka en a, dar sawmpakhat a ri dawn.

Insuk leh, ka chhungte nena kan inbiak khan, dar zat enna chang min hriattir lo a ni chêk ang chu.

Keipawh chu, lehkhabu dah felin ka mu a, hmai phih tura chhuah ka duh viau naa, ka inthlahrung deuh. Amahin kawngka a khar daih sia.

*ka nu leh pa min lo enkawl sak rawh aw*

*lo lungngai duh miah suh* ka nui sak. *ka u nen aw* ka tih leh chuan, *i u sual deuh tiam loin* a lo ti.

A hmel hmu thei lo mah ila, a ner nasa ngawt ang. Ka u hi chu, a ngai thei lo ve thlawt.

*zingkar aṭanga ka chhuah a ngai a, zanah chauh ka lo haw thei ang* dawhkana lehkha lo awm chu ka chhiar a. A hna hi, hahthlak a ti ṭhin ang em le?

Bawnghnute leh chhang ka ei ringawt, ei rawng ka bawl peih thlawt lo. Thawmhnaw ho ka pho a, form ha loin a kal tih, tumahin an hai thei lo ang.

U Ngaian min hruaitu tur a lo tir si lo a, taxi-in ka kal a. Min hruaitu tur a rawn tirh ṭhin avangin, ka beisei leh ringawt zel.

Chu loah, pawisa ka nei tlem tawh lutuk, ren deuha ka hman pawhin, ni thum bak min daih dawn lo. Hnathawh tur ka zawn a ngai dawn a nih hmel.

"North East girl", ka hnung a ri dawt nghal. "New comer chu kan lâm tir ṭhin a nia", ka hmaah dingin, a inkuangkuah than a. Min en chhuk run.

Library aṭanga lehkhabu ka hawh, ka âwmah ka pawm bet tlat. "I hming pawh ka la hre lo, tu nge a hming?", a ṭhiante chu a zawt a. "Lalvenpuii", dik bak sak loin an ti sup sup.

"Aw, aw, Manaf ka ni e", a kut a lo phar a, hlauhna nen ka fawmkem tawh avangin, ka kut phar chhuahna chang pawh ka hre lo, chibai ka duh lo hrim hrim.

"Manaf, i cho sual ang e aw, pasal nei tawh a nih kha", Jennifer chuan a lo ti a. Ka bulah dingin, min lo siai zeuh. A ngainatawm reuh tak tak a ni.

"Kha maw, ka sawi ṭhin kha, hmeichhia chuan lehkha a zir ve tur a ni lo. Pasal neia, ina awm tur an ni, hmeichhia chanvo chu, ina awma pasal leh chhungte rawngbawl a ni", a kut beng vak chungin a ti a.

Hmeichhia engahmah a ngai lo tih, a hmelah a lang ngawih ngawih. Ngeiawm zet hian min lo en a, ka hlau tawh lo, ka khawngaih tawh zawk.

Chuti taka hmeichhia huatna tur a awm lo, a rilru a piangsual chiang a ni e! "Manaf, keipawhin ka sawi tawh, i lo pian chhuahna hi, hmeichhia aṭang thoin a ni tih hi, ka hrilh nawn leh a che", Jennifer pawh chuan, a ti ve sak sak.

Lo inhre ṭha tawh an nih ka ring, an inngam sak sak em mai. "I lo inrawlh vena tur a awm lo, nangmah ni loin amah zawk hi biak ka duh", Manaf-an a tih chuan, "A ṭha lawm, ka dang hleinem che, mahse, SSP Lalzahngaia nupui a ni tih theihnghilh miah suh ang che", Jennifer chuan a ti hlak a.

Anmahni ṭawng, Punjabi-in eng emawni a sawi leh nuah nuah a. Manaf chu, inhrosa nghekin a kalsawn a. Jennifer chu a hnek pawp châk hmel lutuk.

"Jen, ka lawm lutuk aw",

"A ho lutuk, mahse, ani kha chu hnaih vak chi loh aw, mil lo tu che an awm ṭan a nia", Hallway kil lam a melh zeuh.

Ka hawi phei a, Punjabi nula hoin, thip deuhin min lo en kar hlawm. Ka hrethiam e, "Aw le, ka lo fimkhur ang", ka ti sap a. A nui sun sun.

He hmuna ka kal hmasak ber ṭuma min be hmasa bertu a ni a, inkawm lutuk lo mah ila, kan inbe zeuh zeuh. Jennifer bak hi chu, hriat pawh ka nei mumal lo.

"Jen, thil pakhat ka zawt ang che aw",

"Min zawt la",

"Ngati nge, English hming i put bik?", inthlahrung deuhin ka ti a. A nui hak hak. "Midang ho pawh hian min zawt nasa thei asin, Jennifer Winget-i hi i hria em?", a tih chuan, ka bu nghauh nghauh.

Bollywood Actress-a ka duh ber, Christian a nih vang tak hian ka duh zual. "Jennifer Winget zûnah ka papuia a uai tlat a, fanu a nei thei si lo. Ka lo pian khan, Jennifer tih hming min put tir tumin ṭan a khawh nasa alawm", nui sâng chungin a ti a.

Ka lo nuih var var, a nuam awm bik, "A nih, i lawm tho em?",

"Lawm e a, ka papuia hian, school ka kal theih aṭang, tun thlengin ka zirna senso zawng zawng a tum vek",

"A van fel em em?", ka ti a. A nui huah huah, "Fel lutuk, mahse, nikum khan min boralsan tawh a", a ti chuai raih.

"A van pawi, ka tihpalh lutuk", ka zawt ta kher kher pawh chu, ka inthiam lo.

"A pawi lo, Ka zirna pual hian pawisa a khawl a, chuvang alawm, vawiinah pawh min biak theih", a nui tawi tak a.

A papuia chungchang ka sawitir si a, a ngui deuh ruaiin ka hria. "Jen, ka tihpalh tak tak",

"A pawi lo ka tih kha, ka papuia chanchin sawi hi chu, nuam ka ti asin, Jennifer tih hming ka put chhan te hi, sawi nuam ka ti thei lutuk", a ti dap dap a.

A nui deuh sâng a, nuam a ti tih a hriat. "Ka hawsan phawt mai ang che, nangpawh, tluang deuhin i haw dawn nia", a ti a.

Ani hi chu, an driver-in a lo thlahin a lo hruai thlap thlap zel. Mahse, Manaf nen khan, an inkarah eng emaw tak chu a awm ka ring!

Taxi-in ka haw a, Station ka tlan pelh lai chuan, ka thlir zui vawng vawng. "Pui, i lo thleng tawh maw, in bungrua tur a lo thleng a, lo peng lawk teh", Anisha-te quarter-ah chuan ka kal a.

Study table leh chair ni awm tak hi min kawhhmuh, "Study table leh chair a nih kha, Constable hoin an lo dah a, pawna awm reng aiah tiin, ka lo la lut a nih kha", a ti a.

Anisha chu lawmthu hrilhin, min zawnluh pui turin ka sawm a, min pui ve mai bawk. Chahbi ka keng daih a, in chhungah an dah lut thei dawn lo hrim hrim.

Study table leh chair te chu, ngatan nge le aw? U Ngaia hian, ka tan a lei ni hrim hrim, chair-ah ka ṭhu a, ka pumrua nen a inmil tawk chiah chiah.

Anisha hnenah, min bazarpui turin ka sawm leh a, nau awmtu an nei tho a, chhangchhe deuhin kan kal lo.

Ani pawhin, an chawhmeh tur a lei ve a, Anisha tel lo chuan, bazar ka la zuam lo. Sangha ka fry a, Sangha-ah chuan, u Ngaia hian a mei lam hi tui a ti ber.

Chu pawh, Ngheti aṭanga ka hriat. Ngheti hi, ka la ṭangkaipui dawn chauh a nih hmel.

Thawmhnaw pho te sengin, a form ka nawt a, ka khai leh thlap. Ka pum a ri rawih rawih a, ka ṭamchhawl thei dawnin ka hria.

Chaw eisan ka duh bawk si lo a, lo haw har ka ti ve tawh reng. Zana a lo haw tur thu a sawi ka hre chhuak zawk a, ka lu ka thing nar nar, âtthlak thei lutuk.

Ka phone ri chu ka ban vat, "Venpui, chaw lo ei rawh aw, dar sawm daihah ka lo haw dawn", dam diai hian a ti a.

Ka hnual nghal rawih rawih, "Venpui, hello?",

"Aw, ka lo ei ang, fimkhur la aw",

"Aw le", tiin, kan inbiakna a titawp a. Ruak huaiin ka inhre tlat pek. Ka rilṭam tawh bawk nen, chaw ka ei thuai a.

Ka rilṭam ang huin, ka ei tam lo. Kawngka ka khar ṭha a, kalh êm chu ka ti deuh. Bedroom-ah zawk ka inkalh hnan a, in chhunga lo lut awm pawh nise, room-ah hi chuan a lo lut thei lo hrim hrim.

"Ka Duat, i buai em?",

"Lehkha ka lo zir a", ka ṭhutna ṭang thoin, khumah ka mu zangthal nghal.

"Ka hman lai ka chuh ve a, lehkha i lo zir bawk sia, ka va inthiam lo",

"A ho lutuk, ka mood off i on êng nghal pap pap", ka ti a. Sawi loh tur ka sawi tih ka hre chhuak, a tlai zo leh vek ta.

"Ngati nge, in inhau em ni?",

"Hau lo e, vawiin chu, kan la inhmu lo reng reng, zing ka thawh hmain hnathawkin a chhuak a, ka muthilh hnu daihah a lo haw dawn bawk", ka ti nang nang a.

Chutia ka vui ta hrep pawh chu, mak ka inti. "Ka van khawngaih che", a lo ti a. Ka teu hlur.

Min la nuihzat ve khanglang zui, "Chu zawng ai chuan, i zirna vel chu",

"Englo maw, buaina ka tawk deuh a, Manaf-an min tibuai deuh reng mai-",

"Manaf maw, lawkin, Choti Saardani serial mi kha maw, Meheri bialpa, a nuin a thah kha", ka chal ka beng dat.

A hahthlak ṭhin mang e, "Meheri bialpa, a nuin a thah ni lo, Manaf-a", ka ti a. "A hmelṭha em?", a lo ti vat.

"Hmelṭha e, mahse maw, tu emaw min hriat chhuah tir",

"Ka hre mai, i hlat a ṭha a nih chu",

"Ka hria lawm, pasal chhe lo tawk ka nei tawh a", ka ti a. Ka thusawi mah nise, ka zak, ka sa pup pup. "Eeeee", Nghetin a lo ti a, Min tizak lehzual.

"Venpui, dik takin sawi rawh aw, u Ngaia chungah, rilru dang i pu deuh tawh em?", han chhan dan tur mai ka hre lo, ka tin ka seh niah niah.

"Venpui",

"Nghetpui, ih, lerh min ti em?", zak chung chungin ka ti sap a, ka sawi zawh rualin ka mit ka chhing sawk.

"Ka ring reng a ni", a lo la ti zui. "I bikbo rei ka ring lo reng a ni, Lalvenpui, ka lawm lutuk, ka ṭap a nia", a insut ri hlawih hlawih nghal.

A va han over thei tak aww, "I over thei em mai aw",

"Nge, ka lawm alawm le. I uin, i tana thil ṭha a tih ṭhat awm chhun a ni hial ang",

"Ka tan, thil ṭha tam tak a ti fo alawm",

"Nih chu ah", a lo ti hlak. Ka uin kut min thlakna laka min chhan ṭhintu a ni a, ka u ṭan zawnga ka ṭawng hlek chuan, min hau hrep zel.

"I u chu duhtawk ang, ih maw, u Ngaia pawh khan inneih a duh miah lo, a pa nen paw'n an inhauh phah nasa lutuk. Mahse maw, i thlalak an hmuh tir khan, a rilru a thlak nghal vel",

"A cousin-ten an hrilh che mi?",

"Hrilh e a, a cousin hmeichhia ten an hlau ka tih kha i hria em, anni ho chuan, u Ngaia kha, nelawm deuh leh, smiling face pu ve deuh reng tur tea siam tur chein an duh che nia", a ti a.

Ka nui var ringawt, chutianga keia siam theih pawh a ni dawn mawni?

Puan leh lukham dah chhuakin, kawngka ka inkalh hnan leh a, dar sawm a ri tawh naa, a lo la haw lo.

Mu chungin zungbun chu ka tuai ka tuai a, zungbun mahina pumkhata min siam theih chuan, thinlung thung chuan, pumkhatah min va siam leh zual leh dawn êm!

"Nizan i lo haw lai ka hre miah lo",

"I mutui lutuk a", a ti sup a. Ka nuih saih. Ka lawmna em em chu, chaw a bâr tam ve tial tial hi a ni.

Ka chawhmeh siam te, tui a tih tawh ngei ka beisei tlat, nakinah, ka la zawt ang.

A hnung lamah ka ṭhu a, front glass aṭang min lo en leh zeuh ṭhin a, ka hre lo lui ngat. Nghetin, ka thlalak a hmuh ruala inneih a sawinawi tawh loh thu a sawi, ka bengah a kiu vawng vawng.

"A nih aw",

"Nangpawh le", ti sapin, ka ban ka vai a. Min han nuih ve saih se, a nuam leh zual ngawt ang.

Manaf-a hmuh tur a awm lo a, ka lawm zia mai chuh. Bad boy tih angreng intihbuai tir ka duh tawh lo reng reng.

Jennifer nen kan ṭhu dun a, thau lam deuh a ni naa, inzo veh vawh tak a ni thung. Actress, Jennifer Winget nen chuan, inthlau ve tak an ni.

A hmelchhia chu a ni hauh lo, a thau ve deuh tih mai chauh, mahse, zûn ngah tak, phurh zawh loh tur ang chi kha.

"Eng nge ni ta?",

"Nghet, khawngaihtakin pawisa min lo puk, ka ṭhiannu number ka pe che ang a, min lo gpay",

"In pa dil ta che, a hausak em kha", ka ngam loh thu ka hrilh vat. Jennifer number ka pe a, sângkhat lek ka dil laiin, sângnga lai min lo pe!

Ka call leh vat, "In pain min lo thawn a, ka lo thawn ve leh che nih kha, min puk lo tihna nih kha", a ti vah a. Phone a dah daih.

Ka thinrim dawn nge dawn lo pawh ka hre lo, a lo va hrilh leh thawt thawt chiang lutuk. Engtin nge maw, ka hmuh ngam ang le, ka va zak tak.

"Venpui, engtin nge ni dawn? I duh chuan, cash-in ka kawl tho a nia",

"Ni maw, i neih chuan min pe nghal mai la pawi miah lo ang", inthlahrung deuhin ka ti a. Basketball court-ah min hruai.

Manaf leh a pawl te ho, an lo inkhel luih luih a. Jennifer-in Manaf a koh vak chuan, thinrim deuhin a lo hawi vat.

Kan lam a lo pan chharh chharh a, "Eng nge i duh?", a ti bak hlar. "Sângnga ka mamawh, tunah",

"Ka nei lo", ti hmuka, kal a tum chu, "Sângnga ka mamawh ka tih chu", Jennifer-in a ti vin ṭhawt.

An pahniha an inbiak dan chuan, ka ngaih a tiṭha lo lam zawk. Thle bakin, Manaf chuan a bag a va hai rak rak a, Jennifer kutah, pawisa a dah chawrh.

Ka meng bial kâwk ringawt, Punjabi ṭawngin an inbe leh ta daih a, Jennifer a nui sak a, lawmthu an inhrilh loh hmel khawp.

Basketball court kan chhuahsan chuan, pawisa chu min pe a, a thianghlim loh ka hlau.

Ka ngaihtuahna a hria ni maw, "Hlauthawng duh suh, pawisa thianghlim a nih hi", nui sângin a ti a.

Ka mamawh em avangin ka la ta vat, chubakah, u Ngaia pawisa a ni hrim hrim a. Jennifer chu, Manaf nena an chungchang zawh ka duhna, a zual ngei mai.

Ka inbual a, ka dai sawng sawng. Pawnfen dum, Daisy pâr te tak te tea ṭial, ngal thlenga fual fengin, t-shirt var plane, a top ang chi ka ha a.

Apron ka awrh tho a, ka thawmhnaw hak a bal lo. Kawta motor ding ri ka hriat chuan, ka thauah min man.

Pawisa vangin, u Ngaia ka hmu ngam lo. A lo lut a, ṭi dek chungin ka lo chhawn. A bu nghat a, room-ah a lut zui.

A inbual fai sawr sawr a, ani pawh, kerkawr khup khuh chang chang, vut rawng plane a ha a, tshirt dum plane tho a ha.

Chaw ei chhung zawng pawhin a ngawi reng a, pawisa chungchang a sawi miah lo chuan, ka awm a tinuam lo zawk.

Sawi hmasak ka hreh ve tho bawk si a, a buaithlak vel vek.

Thleng sil zawh chuan, kâwl pawh a sên phut tawh. Naupang an ri chel chul a, fa neih min tichâk ve vek.

Pawnah ka va chhuak ve a, step-ah bawk a ṭhu leh. "Ngai", Apple an lo vawm a, a lo man chat.

A chapal pakhat chauh pawh ni loin, pahniha phelhin a ṭhutna bul chiahah a dah a. Ṭhu turin min ti a niang, en pawh min en lo a, ka thawm aṭangin a hre vek thei niang.

Amah si chetin ka ṭhu a, a keṭhiah chu, Zopa keṭhiah chiah chiah. A rukin ka nui kur kur a, Zonu tan chuan, Zopa aia duhthusam a lo awm chuang lo e.

"U Ngai",

"Um",

"SSP chu eng nge?",

"Senior SP", a tih chuan, ka kâ ho. "Senior i ni tawh maw?", ka ti hû a, a bu nghut.

"Ka u nen in inrual ang tiraw?", ka ti leh a, a bu leh nghut. Apple keihin, a ei tuam tuam a, Apple chu ka hmaah a lo lek.

Ka lo keih ve a, ka keihna hnuah a keih ve kher chuan, min ti ṭim uai uai thei. Ka lawm zawk tihna nih chu.

Senior-a a awm chu, mak ka ti, engtin nge Senior daihah a awm theih tawh zawk le?

Ka sam ka ṭawn loh avangin, ka bengah ka zep ṭha mawlh mawlh mai. U Ngaia chuan, Apple pet kawh vûin, a kekawr ipte aṭang rawmawl sen a phawrh a, ka sam min ṭawn sak.

A ṭawn zawh chuan, a dâr a beng thek thek a, bei turin min duh tih ka hrethiam mai. Ka kut veilam a vuan a, a kut veilama Apple kengin a keih leh hmawk ṭhin a, min keih tir a ṭhulh chuang lo, kei lahin ka lo keih ve zel bawk a.

"Pui, kum engzah nge in inngaihzawn han sawi teh. Ngaia hian, love marriage a ni lo a ti tlat a, ka awih thei lo. In inpawh lutuk, love marriage ni lo atan chuan, a awihawm lo zawk", Anisha chuan, a ti dap dap a.

U Ngaia ka en a, lehlam a hawi hmak. "Kum nga", ka ti a. Anisha-in, "Ka ring reng a ni, love marriage a ni tiraw?", a tih leh chuan, nui varin ka bu zeuh.

"Ngaia dawt sawi peih dan hi chu aw, love marriage a nih ka ring reng a", Anisha-in a ti nuah nuah.

Mipa tleirawl rual, pali panga vel lu buk deuhin an lo kal a, kan lo thlir ṭhup. An titi tui phian lehnghal.

Anisha pasal chuan a ko a, a zilh a nih ngei ka ring. "Eng nge a sawi a?",

"An lu met turin a hrilh a nih saw, zirlai an nia",

"I lu buk lai i ngai em, i lu a kawlh reng a ngai tawh sia",

"Lukawkh hi a ṭha", a ti bul hmuk a. Ka nui hak hak. "U Ngai",

"Um",

"Nichin kha, tihpalh aw, dawt a ka sawi ringawt a",

"Chuan?", a lo ti a. Pawisa vel kha a nih ka ring hmiah, "Pawisa pawh kha", kun ngaih chungin ka ti a.

A dârah ka lu a bei tir leh, ka kut a vawnna chu a tuai heuh heuh a, a ṭhat vek thu a sawinaah ka ngai.

Apple ei tur a awm tawh loh chuan, intithei fahranin bawlhhlawh bawmah a vawm lut.

A kut veilam chu lain, ka sam ṭawnna rawmawl chu ka phelh a, ka hruksak. A zungbun leh ka zungbun chu ka thlek pah sek bawk a, lâi chem chem tak ka ni.

"Taka, in ineih aṭang thla khat leh a chanve lai a liam tawhin ka hria, in lo awm tirh aṭang ka lo chhinchhiah a", Anisha chuan a ti a.

Chu chuan, ka ngaihtuahna a kaiharh zawk. Thla khat leh a chanve a liam tawh, thla khat hnua haw ka tum kha nia!

"Mangṭha u", ti liam liamin, an lut sang sang a, kan pahnih chauhin kan awm tawh, khua pawh thim fel tawh tak a ni, street light a êng vâ vâ tawh.

Ka khabe rawn dawmin, kan inmelh ran mai. Min fawp dawna hriatna ka nei tlat zui.

Ka hre sual lo hle bawk, muangchangin, min tihnât hlau awm takin, min fawp a. Chutih laiin, inchhung lamah phone a lo ri.

"Apple ei angah ka la inngai", a ti sup a, ka nui hak. Inchhungah a lut a, keipawhin ka zui lut ve nghal.

A bengah phone a dah ren rawn a, rei vak loah, bedroom-ah a tlan lut nghal. Ka zui ve thuai a, Police Uniform a lo inbel mawp mawp.

"Emergency a awm thut a, ka kal a ngai tlat", a pistol te chu a pai ṭha mawlh mawlh.

Ka dâr tawn tawnah vuanin, "Tukverh leh kawngka lo kalh ṭha vek la, i mut dawn hunah pindan kawngka pawh i lo kalh dawn nia, hlauhawm a hnai nia i hriat chuan min lo call la, a nih loh pawhin, 100 i lo call dawn nia. Mahse, hlauh tur a awm lo, lo chi-ai vak lo la, naktukah daih ka lo haw tawh ang", a ti a.

Ka lo bu nghauh nghauh. A lukhum khumin a chhuak a, thui a kal hmain lo let lehin, min fawp a.

"Muttui le", a nui suk a. Motor tinungin, Anisha pasal hoin an tlan chhuak a. Border te, Shershaah te, tum lo deuhin ka rilruah an lo lang.

Ani chu, dam takin a lo kir dawn alawm!


Show post links
Top

[Ngaia]

I Ninawm
Chapter-5
Ziaktu: Cck Lalchhuanawmi

Ham bai bai chungin bathroom-ah ka lut a, ka lu a rit êm êm lehnghal. Ka muthilh theih mai loh avangin lehkhabu ka bih a, zing lam dar li-ah ka mut a chhuak ve hrâm a, ka muhil leh hnuhnawh.

Call leh message ka dawng miah lo a, 'Emergency' a tih avangin, ka lo hlauthawng ve lutuk ringawt.

Anisha chahbi ka kawl tir a, an chhuak ngai chuang lo a, u Ngaia haw hunah a lo pe ang a, keiin ka ken daih chuan, a ṭha lo zawk ang.

"Ngaiah i la nei vat mai ang, hlauhthawn vak loh tur aw",

"Aw le", Anisha leh a fate nen, kan invai lâwp lâwp a.

Vawiin chu, Jennifer hmel ka hmuh loh avangin, tlemin ka khawhar a zual deuh. Midang ho nen, kan inbe ṭha lutuk thei lo. Manaf pawh, hmuh tur a awm lo.

Anni pahnih inkarah hian, eng emaw tak a awm ka ring nghet tawlh tawlh.

"Kan lo ṭhu ve", ka lo bu nghat. An pahnih chuan an titi siam siam a, ka hrethiam bawk si lo, va zawm tum ve pawh ni ila, ṭawng kan inman miau loh chuan, tihngaihna a awm chuang lo.

A tawpah, "Min lo hrethiam ula, zawh tur che u ka nei a?", tim dai hian ka ti a. "Aw, min zawt la", an lo ti dam thluam a, ka thaw huai.

Jennifer leh Manaf inkar ka zawt a, "An pahnihin an inngaizawng ṭhin lawm", an ti a. Ka rin dan vel a ni.

"Mahse, an inhuat hmel bawk sia", ka ti leh a, "Keini paw'n, hei tak chu a chhan kan hre bik lo. Inneih an tum a, mahse, an ṭhulh leh daih a, khata ṭang khan, an inhmu Sakhi ṭan", an ti sap sap a.

Hriat thûk zel ka chak tawlh tawlh, "Ngati nge, inneih chu an ṭhulh daih?",

"Chu chu maw, ka khawngaih dun ngawt asin, an inhmangaih bawk sia. An ṭhulh chhan kha, Manaf-a pa vang a nia. A pain inneih a phal loh chhan chu, Jen leh Manaf-te hian an hrechiang ber ang", an ti a.

An inngam sak sak danah khan, an inkarah eng emaw tak a awm ka ring reng a ni. Jennifer-in pawisa a dil khan, Manaf-a khan a pe ve mai bawk a.

Mahse, Hmangaihna vanduai maw ni a, an chan chu! Ka va lainat dun tak, eng harsatna tak chuan tibuai ang maw?

"Ṭhiannu, ih maw, Manaf-a te ang chu, hnaih miah lo la i tan a ṭha zawk ang. Angela-in a hauh nâ teh nia aw",

"Angela chu, Miss India-ah participate a tum ve ngei ni lawm ni?",

"Awi, lo tum kual mai mai teh se, a personality a ṭha si lo a, a thlen sân theih ka ring lo", an pahnihin an inbe mawlh mawlh a, ka lo ngaithla mawl tawp.

College leh University pawh hi, a lo dang tehchiam lo a nih dawn hi. "Taka, SSP Zahngaia an tih, nupui maw i nih?", pakhat zawk chusn a rawn ti hlawl.

Ka bu nghauh nghauh a, "A nuam awm bik, North East lam hi in ṭha thei ka ti, pasal atan North East mi ka duh ve", a ti nang nsng a.

Ka nuih sak ringawt. A ṭhenin, North East lam chu, Chinese min ti a, min hmusit êm êm a, Japan emaw Philippines emaw min ti tawk lah an bo lo.

Campus pawna inkuangkuaha Police Motor nghenga lo ding ka hmuh chuan, ka meng bial kâwk. Ka mumang emaw ka ti hman dawn alawm.

A chal veilam a inbel a, a intipalhna a ni ngei ang. Form a ha bawk si a, a lang zahawm ka ti dawn nge, a lang hlauhawm ka ti zawk dawn pawh ka hre lo.

Ka va pan hnai a, min hmuh chuan a kut a lo vai zeuh. "I chal kha", ka kâwk zeuh. "Ka tlu a", a ti ringawt.

Kawngka min hawn sakin ka ṭhu lut a, a hma lamah a ṭhu leh dawn maw ka ti chu, ka bulah a lo ṭhu ve.

A dâr a beng leh thek thek a, ka lu ka nghat vat. A sana bun chu, a darthlalang a khi râng nuaih, "Ngati nge, i sana hi?",

"Ka tlukna", a ti sam leh et. Number pawh a hmuh theih hleinem. Eng Emergency nge an buaipui ang aw?

Zawt pawh ni ila, min hrilh duh ka ring miah lo. Mutchhuakin min zêm chiai chiai a, ka mit ka chhing a nih vaih chuan, ka chatthla nghal a ni mai.

"Venpui",

"Aw", ka ṭhu ngil zawt nghal. "Kan thleng", nuih insum zet hian a ti a. Ka lo muhil hman nge mawni?

Anisha hnenah chahbi lamin, in chhungah kan lut a, rice cooker-ah tui dah khatin, ka on vat. Tuilumin a inbual duh ngei ngei ang.

Ka inthlak zawh veleh, inthlak turin a lut ve a, a lo chhuak har phian zui. Ka va bih a, khumah a lo bawk hle hle. Dim tea lutin, ka en a, a lo muhil.

A chau hle a niang, tiharh duh loin ka chhuahsan a. Hna hahthlak tak a thawk a, chawlh a mamawh nasa dawn lutuk.

In kawtah ṭhuin, mi kawng kal te chu ka thlir a, an zi nuaih nuaih. Mizoram lo ralmuan zia leh, a thlamuanthlakzia ka hre chhuak uar uar.

Mi rama awm takah chuan, han ti ve ngial ila, Zorock-an, Zoram ngaih hla a thlawh vawng vawng te kha, a lo ril raih raih mang e!

"Venpui",

"Eh, i lo harh tawh maw?",

"Chaw i ei tawh em?",

"La ei lo, ka nghak che", ka tih chuan, a chek hlak. "Lo ei tur che lawm, min nghak duh a nih kha, ei nghal ang", a ti a.

A thawh hlim a nih vang pawh a ni mahna, chaw a ei thei vak lo. A inbual hmasa lo a ni.

"U Ngai, tuilum a awm asin",

"Ngai lo mai, ka lawm e", bathroom-ah a lut nghal a. Tui ka lo lum ve vek tawh nia, a pawi chuang lo e, tuivawtin inbual rawh se.

Ka thinrim tihna mawni le, ka thinrim chiang a ni, hahthlak ṭhin mang e. Tuilum a hman duh loh vang maia, lo thinrim kual, a ṭul lo lutuk ah.

Sofa-ah ṭhuin phone ka khawih a, Ngheti bulah, u Ngaia nu emaw a pa emaw number min hriatsak turin ka ti a.

*lawk aw* tiin, a out a. A hnu rei vak loah, a nu leh pa number ve ve min lo pe!A che rang ṭhin teh e.

*ka lawm e*

*ka tih ve tur lawm, be ngei ngei ang che* a lo ti a. Thu ṭha tak tak min hrilh nghal mawlh mawlh.

*i zo tawh em?*

*eng chu?*

*councelling class a zo tawh em ka ti*

*zo tawh mai rawh se* a lo ti a. Ka nuih sak, a la kham dawn lo nasa lutuk. A hnathawh te kan sawi a, training a neih thu leh, amah aia thiam chak an awm loh thute, a sawi uar nasa mai.

A type laklawh laiin *ka ngai lutuk che* ka va ti. Sawi loh ka tum zet naa, ka insum thei ngang lo.

Pasal ka neih nî-a, a ruka a ṭah nasat zia kha ka la hre reng. Ṭap lo angin a awm mai mai tak naa, pasal ka nei te kha, a hlim berah inti ṭang mah se, kan awm hrang tawh tur hi, a ui ve tho tih ka hria.

*hmelchhenu, nangmah vangin ka ṭap*

*i ṭahbelh e ah* ka va ti a. Keipawh, ka mittui a tla zawih zawih, ka hru tawk tawk a.

*i âw hriat ka châk naa ka lo call dawn lo che* a lo tih chuan, ka ṭah nui hak. A âw ka hria a nih vaih chuan, ka haw nghal duh mai ang.

Lehkha zir chhuanlamin kan inbiakna ka titawp ringawt a, a tawp lo a nih chuan, ka haw duh tak tak mai ang.

Tv ka en a, u Ngaia thawm ka hre bawk si lo, a la inbual angah ka ngai ringawt. LPS emaw Zonet emaw a awm ve si lo a, Mizo ṭawng hriat tur a awm lo ringawt pawh chu, a khawharthlak ngawih ngawih.

Phone bawk ka en a, youtube-ah Khiangawia ka en ta daih. Ngheti awm se chu aw, nui vak vak pahin min beng leh hlak hlak tawh ang chu!

Chutih laiin, in chhung chu a lo thim ta pup. Ka phone flashlight ka on nghal a, u Ngaia ka ko vat.

"I awmnaah lo awm rawh, inverter ka lo on ang", a ti a. A sawi zo chiah tihah, in chhung a êng nghal pup. Ka ṭhutnaa ṭhut thlak leh ka tum chu, tu emawin min rawn man chat!

"Che suh", a ti zawi sup a. Ka kut pahnih hnung lamah a khirh bet a, a kut pakhatin ka nghawng si chetin chemte a keng a.

Ka che hlek a nih chuan, amahin min zai pawh ni loin, keimah leh keimah ka inzai thei dawn. Ka chil pawh ka lem ngang lo.

Ka hlau lutuk chu, ka lûng a phu dup dup a, ka thlan a tla nasa bawk, ka chhungrilah ka khûr hlawk hlawk a, ka mittui a hnâm ṭiam ṭiam, hlau tak ka ni.

"Venpui, i-", min hmu chu, a thlê bak. "Venpui, hlau suh aw", a ti dam thluam a. Ka hlau tho tho.

An pahnih chuan a inbia a, u Ngaian a duh ang chhanna a pe lo deuh ṭhin nge mawni, ka nghawng chu, chemtein a ngawk leh sawk sawk ṭhin.

Ka mit ka chhing sawk sawk a, u Ngaia lah, a hmel a hahdam em em zui. Ka haw lek lek zawk.

U Ngaia chu, eng eng emawni sawi pahin a lo pen hnai zel a. Misualpa lahin, hnung lamah min tawlhpui ve zel bawk.

Ka thih zan tur te pawh a ni tawh ang, u Ngaia hmel a hahdam em mai, hlauthawng hmel emaw, chi-ai hmel emaw pawh a pu ve lo reng reng.

U Ngaia nen chuan, feet thum chauhin kan inhlat tawh. Misualpa nen an inbe char char a, an ṭawng ka hrethiam ve bawk si lo.

Ka hlauh bakah, ka thinrim hlur tawh, ṭawng ve mai ka duh rum rum. Chutah, misualpa kut lo man thutin, keipawh chu min pawt chhuak zawk.

Chhuatah ka tlu bawk a, ka hawi chhuah chuan, u Ngaian bangah nawr betin, a nghawngah a rek a, zawh nei niawm takin, u Ngaia chu a phun bul bul a, misualpa lah, ṭhen sak sak chungin a ṭawng ve zuah zuah bawk.

Tihtur ber pawh ka hre lo, ka bing muai muai. Ni tak e, Police quarter-ah lawm kan awm. Ko khawm ila a ṭhat ka ring.

Khûr hlawk hlawk chungin ka tho chhuak a, ka kaihza tha khûr chuan min tikal ṭha thei lo. Ka ṭhu leh hnawk, sofa hnungah ka ka awm a. Au ka tum a, ka thei der lo.

Misualpa zawk chuan u Ngaia chu, a bin let tawp. U Ngaia tho tur chu, a hnek thlu leh chawrh a. Ka beng hupin, ka au tuarh, awm ngaihna ka hre tawh lo.

Misualpa chuan, a kawr nghawngah ṭhamin, bangah a nawr bet a, u Ngaia kam sir aṭang thisen a hnâm ṭiam ṭiam.

Ka rilru tipaukhauhin, misualpain min hmuh loh nan, kun chungin kawngkhar lam pan ka tum a. Chutih laiin, chhuatah u Ngaia chu a paih leh chawrh.

Eng nga tinge maw, a insawisak tir mai mai ni? "U Ngai", tia, ka ding chhusk chu, misualpain silai a phawrh.

Mahse, u Ngaian a bawh thlu vat. "Venpui, tlan chhuak rawh", a lo tih chuan, bu nghatin tlan ka tum a.

Ka hnung lama ka tawlh det chu, misualpain silai chuh lehin ka malpuiah min rawn kap!

"Venpui", ka thlarau a chhuak ta emaw ka ti hman. U Ngaia chuan, bawh betin a hnek chawrh chawrh a, a hnuah a lu-ah silaiin a chhu a, misualpa chu a zal der.

"Silai ri- e he!", midang an lo lut sup sup a. U Ngaian min lo pan vat a, ka malpui dinglam niin, pawnfen ka fen avsngin, ka malpui dinglam chauh a tichho a.

Min kahna lai chu a chiang teh e, thisen ka hmuh chuan, min râp lutuk. Mitthi tlukah ka inngai!

"Pui, i ṭha em?", Anisha-in ka hnung a chul hliau hliau. Anisha pasal leh midang ho chuan, misualpa chu an buaipui a.

U Ngaia hoin, ka ṭawng hriatthiam lohin an inbe mawlh mawlh, thil pawimawh tawpkhawk a ni ngei ang le.

"Khatiang khan ṭawng tawh suh, khawvel dang daiha awm angah ka inngai, nuam ka ti lo", a ban vuan chungin, ṭap chungin ka ti a.

A tihpalh thu sawiin, a âwmah min kuah bet. "Silai mu a lut thuk lo a, damdawi in kal kher ngai loin a lakchhuah theih ang",

"Damdawi inah kalpui zawk ang u", Anisha-in a lo ti. Anisha ka thlawp chiang lutuk.

"Surgeon Ngaia a awm kha, hlauhthawn tur a awm lo", Anisha pasalin a lo tih chusn, Anisha-in a lo khak vat.

Misualpa chu chawiin, pawnah an chhuah pui a. Engvanga, lo kal ringawt nge a nih a, eng buaina nge awm le?

"Damdawi in kal a ngai lo", ti supin a tho a. First aid-kit bawm nen a lo let leh. Anisha pawh tiamin, a chhuah tir vek a, kan pahnih chauhin kan awm.

A tshirt phelhin ka kâ a hnawh a, "A rei lo ang aw", mittui tling piauin ka en. "Ka chal hi i lo en char char dawn nia", a ti a.

A thusawi ka zawm lo nasa, Antibiotics-in a hmuamhma a tifai phawt a, chumi hnuah, chemte a lek chhuak!

"Lo en lo la aw", a tih zawh rualin, ka mit chhingin ka ṭap hawm hawm. Ka meng ngam tawh lo.

Inzai palh hlek pawh, a nât mah nak laiin, inzaipui, Major Operation ka hmachhawn hi a ni ringawt.

"Kan zo e", ka meng a, a kutphahah thisen kai nuaihin, silai mu a lo awm. Min râp lutuk ringawt. Ka kâ hnawhna, a tshirt lain a ha leh.

"Ṭhui a ngai lo a, tihian, a dam leh thuai mai ang", tuam pahin a ti a. Senior SP kha a ni tawh tlat a, a che reng reng chu a, a mâm zaih mai.

"U Ngai",

"Aw",

"Ih, khawngaihtakin min lo kuah", ka ti a. A âwmah min kuah bet nghal thuai, ka hahdam pawhin ka hre lo, ka hlau zual tawlh tawlhin ka hre mai!

Min pawmin, khumah min nghat a, "Station lamah kan va inbuaipui lawk ang, Anisha-in a lo awmpui dawn che nia, hlau tawh lo la aw", ka biang dawm vang vang chungin a ti a.

Chelh duh viau mah ila, amah zawk.chelh hlei theih loin a awm miau si a, ka la pangngai thei lo reng reng.

SSP Ngaia pov...
"Eng nge i rawn tih dawn?",

"I lo hre tawh em, mi tu emaw ka in chhungah lo lutin, ka nupui a kap hliam a?",

"Oops, a va ṭha lo ve, i that nghal em?",

"Pawisawi lo ka that ngai lo", ka tih chuan, a nui khâwk rum rum. A hmaah ka ding ngawi reng a, a rui tawh mah mah a ni.

"I nupui kha, a va han sexy tak, darkar khat, ni lo, zan khat lek kawl atan, engzah nge i chhiar ang?", ka kut ka hum ruh sauh a, harhfim se chu, ka khawih tawh ngei ngei ang.

"Hman zanah, ka pa sumdawnna i chinglet tih ka lo hria a, mahse, News-ah ka lo hmu miah lo",

"Evidence an lo thukru hman a", ka ti a. A nui khâwk leh rum rum. A hmai tuai puatin, a thaw halh halh a.

Light lo êng pup chu, Jennifer a lo thleng tih ka hre nghal mai. "Manaf",

"He nu hian, eng nge a rawn tih ve?", rum zeta min en chungin a ti a. "Zu in tawh lo turin ka hrilh che kha",

"Hmeichhia, lo inrawlh ve suh",

"Ka sawi zing tawh, Manaf, ṭha taka awm tum ve teh",

"Ka awm, ṭha takin ka awm, hei bak baka ṭha taka awm dan a awm lo", Manaf tlu ṭep chu ka va kuah a.

"SP, i nupui kha a sexy e, zan khat lek chu min lo kawl tir",

"Jen-i i nei reng lawm, duhtawk ve em em rawh", ka ti a. A nui hak hak.

Jennifer car chhungah ka dah lut a, a chatthla nghal chu a ni mai.

"Eng evidence mah in hmu lo tih ka lo hria a",

"I hriat kha, Police zingah Spy a nei a",

"Man vat vat rawh, Manaf nun hi a chhe zo takngial dawn. Engtiklai pawhin puih che ka inhuam reng a nia. Chuan, Venpuii chungchang a sawi dan kha, a aiawhin ngaihdam ka dil e",

"A ho lutuk, a ruih vang mai mai nih kha", a bu nghat a. Kan ngawi dun vang vang.

"Kal tawh rawh u",

"Aw le, Venpuii ka lo venhim sak ang che",

"Ka lawm e", nui hakin ka ti a.

"A fapa hian, a pa thiltih hi hailang mai sela",

"Pa leh fapa inzawmna hi, rin ai daihin a thûk a nia, a pa sumdawnna ril ber a hriat hnua, a fapa nun saw han thlir mah teh", Jennifer-te tlanna kawng chu, kan tlir dun vang vang.

"Anisha-i ka bia a, Venpuii a muhil chiah a nih chu. Misual pawh chu, engtin nge kan tih ang?",

"Heroin kawl kan la nei em? Khami hmang khan, thubuai siam sakin lo khung mai ta che",

"Aw le", Station panin kan tlan a. He hmun hi, Venpuii tan a hlauhawm ṭan dawn tlat, a haw mai a ngai dawn a ni.


Show post links
Top

[Ngaia]

I Ninawm
Chapter-6
Ziaktu: Cck Lalchhuanawmi

Venpuii pov...
Ka malpui hliam chuan, ka khua a tisik a, chu loah, ka hlauhnain min la hneh lutuk a, ka la pangngai thei lo.

Hlauhnain min ṭham er er a, ka taksa te hi a chak lo sawtin ka hria. Ka rilru a dawih lehzual a, ni hnih lai liam leh tawh mah se, la pangngai lo tak ka ni.

"Venpui, eng nge i an?",

"Ka ṭha tawh lutuk",

"Damdawi ei leh ta che", ka chal a lo dek a, ka lu ka thing nar nar. "Ei tur ka lo hawn che a, i tho chhuak peih ang em?",

"Peih ang", muangchangin ka tho a, u Ngaian min lo pui bawk. U Ngaia rinchhanin ka kal bai auh auh a, u Ngaian a thûk lo ti mah se, a thûk ka ring tlat, ka tha a fuh a nih ka ring, a nâ em mai.

KFC leh cold drinks dawhkana ka hmuh chuan, ka nui sak. "I duh ka ring a", a ti sup a. Lawmthu ka hrilh thuai.

Ka hmaah ṭhuin, phone a khawih a, a changin mi a bia a, ka hrethiam ve ṭhin bawk si lo. A meng rum al bawk sia, thu hlimawm lam a nih ka ring miah lo.

Misualpa chungchang min la hrilh miah lo a, engtin nge a awm zui tak zel, a thi em le? U Ngaia ka zawt ngam bawk si lo, Anisha-in, engmah zawh loa, en liam tawp a ṭhat thu a sawi mai a.

Mahse, kei chuan, min hrilh ve vek se ka ti. Police ho thuruk tawpkhawk min hrilh thei lo a nih pawhin, a nî hman dan tal te chu min hrilh ve liam liam se tih ka duh ber.

"Venpui", ka en a, phone a êng leh chuai. Arsa ka seh lai tak a la ni zui. "Status-ah i hmang leh dawn em ni?", ka ti a.

Phawk hruin min en, "Nghetin min fiam leh ang a, ka duh miah lo nia, ka inring bawk si lo, ka lang chhe leh dawn lutuk", ka ti nang nang a. Ngaihna hre lo zetin min en vawng vawng.

A hnuah, a bu nghat a, phone a hmet leh niap niap. Arsa lah chu, pakhat pawh ka la ei zo lo. Ka kâ a chawmawlh a, eng tuina mah ka pawh lo ni ber, cold drinks lah, in châkna ka nei hlawl lo.

U Ngaia chuan bur khat lo banin, a hawng a, ka hmaah a lo nawr phei. Phone bawk a khawih leh a, tun ṭum erawh, a thinrim hmel lutuk.

Thoin hmun dangah a kal a, eng eng emawni a sawi hlak hlak. A thinrim takzet zet a ni.

"Station-ah ka kal leh vat a ngai a", sehchilh nawkin a ti a. Thinrim lo anga lan a tum hrâm hrâm.

"Lawk aw", dawhkanah innemkhalhin ka ding a, "Lo kal lawk teh", ka ti ta ngawt. Ngaihna hriat loh hmel takin, min lo pan a.

"Lo hnai leh deuh teh", min rawn hnaih leh a, "Lo kun deuh hlek", a lo kun chuan, a biang tawn tawnah ka dawm a, a hmuiah ka fawp zeuh.

Ka nui var a, ka zak ve tho, mahse, zak lo angin ka lang lui ve ngat. "Eng nge i an, i thinrimna a kiang sawt lo maw?", ka ti a.

"Ka thinrim lo", zângkhai vahin a ti a. Dawt sawi mah se, a thinrimna a kiang deuh tih a hriat.

Ka kuah a, "Ka thinrim emaw, ka lungngaih emaw ka ṭah te hian, Nghetin min kuah ṭhin a, ka ipikna te a kiam duak zel", ka ti a.

A hnuah, min rawn kuah let ve. Thinrim ṭeuh chunga a kal chhuak a nih chuan, thil ṭha lo a thlen ka hlau. Kan thinrim laia kan thiltih te ai baka, inchhirna lungchhiatthlak a awm lo.

"Va kal tawh rawh, fimkhur la aw", ka ti sap a. Bu nghatin, a lukhum a khum a, "Lo ei zo vek ang che", dawhkana mi chu a kawk zeuh.

U Ngaia sawi vang pawh ni loin, ka ei lui hrâm hrâm. Ama tawkah, a buai lutuk. Chak taka awma, a bula ding tlat turin chakna ka mamawh.

A buaina lo tihbelhchhah lehzel ka duh lo. Kungfu te hi zir ila, a ṭhat ka ring. Misualin min lambun leh hunah pawh, ka bin let tawp tawp theih nan.

Khum chungah ṭhuin, ka malpui hliam chu ka thlêk a, a hil chho ve zel. Aloe Vera ka hnawih ṭhin a, mahse, u Ngaian a ser lohna tur a tih aṭang erawh, ka hnawih tawh ngai lo.

Ser se ka duh, ka lawm zawk, ka thinrim miah lo. Ka tan chuan, a hlu lutuk ringawt. U Ngaian, ka taksa a khawih hmasak berna a nih vangin, a hlu ngawih ngawih!

Ka tlun leh mai ka hlauh avangin, damdawi ka ei a. Chhun lam hi chu tihdan dan a la awm a, zan lam erawh, khua a thim dek dek tawh chuan, hlauhnain min man ṭan tawh ṭhin.

Ka zuau nge pawh ka hre tawh lo, ka intipachang ve viau chuan ka inhria. Mipa ni loin, hmeichhia ka nihna a lang leh ṭhin ka ti lo thei lo.

Bai auh auh chungin, chokaah ka tei kual a, chaw bel ka chhuan zawh veleh, chair pawt chhuakin ka ṭhu nghal. Silai muin, ka tha a fuh chiang alawm!

"Ka lo haw e",

"Eh, i va lo haw hma ve", mak ti deuhin ka en a, a nui suk ringawt. "Keima'n ei rawng chu ka lo bawl ang, lo va mu hahdam rawh", a ti a.

Ka duh loh thuin ka lo chhang thuai, mahse, a ei rawng bawl ka ei châk. Kei ai pawhin a thiam.

Inthlak turin room-ah a lut a, bathroom-ah a va insil fai leh phawt. Chaw pawh a hmin ta der.

"Ka lo suan ang", a lo ti a. Ka hnial duh ta lem lo. Fridge aṭang, parbawr, tomato leh bean a la chhuak a. Sil faiin a chan leh vek a, hnehsawh lutukin thirbelah tel a leih.

Purun sen te chanin, tel pawh a lo hmui a, a bulah dingin ka en kar. Mipa ei rawngbawl thiam hi chu, an ngaihsanawm ka ti ngawih ngawih.

"A tui lo em ni?",

"Ka kâ a la tui chiah lo zawk", ka ti a. A bu nghat. Kan ngawi dun leh ta reng a, ei ṭeuh ka tum nen, ka ei thei thlawt lo.

Hmun ka phiat a, ani'n thleng a sil thung. Ka nât hlim chhawn phei kha chuan, amah char char a che a, a hna nen, buai thei tak a ni.

"Aloe Vera dang ka lo hawn a", ka bulah a lo ṭhu thla a, ka ke chawi kangin a mal chungah a nghat.

Min pawt hnai a, ka pawnfen hlim chhoin, "A hil chak hle mai a", a ti a. Min lo en chuan, ka lo nuih saih.

Aloe Vera hnawih a tum chuan ka lo dang vat. "A ser dawn asin",

"A pawi lo, ser mai mai rawh se", tim dai hian ka ti a. Min en ren rawn, thuruk sawi chhuak tura indawpna ang mai a ni.

"Min tihlau a nia", ti sapin ka kun a. Misual ang maiah ka inngai. Ka pawnfen a siam ṭha a, dim deuhin ka ke a hlang thla leh.

Thoin, Aloe Vera a va dah ṭha a. Rei vak loah lo letin ka ṭhutna bul chiah sofa-ah a ṭhu a. Ka bula ṭhu tura ka duh tehreng nen.

A laptop a khawih a, file nen a entawn leh chhen. Police ho hi, hetiang hian an lo buai thei tak tak nge mawni?

Star Movies-ah Titanic an pe hlauh a, channel dangah ka kal tawh lo reng reng. Mahse, car chhunga an awm lai vel a thlen chuan ka hmet sawn chiang lutuk.

"Venpui", ka inkhuh ve em em a, min la hmu tho. Hna a thawk char char emaw tia. Ka bulah ṭhuin min kuah a, tissue a mal chungah dahin, ka inhnit hruih hruih.

Violin tum hoin, an himna tur ngaihtuah lo a, 'I lamah min hip rawh Lalpa' tih an play chu, ka rilruin ka sakpui mawlh mawlh.

He lai scene hi, ka mittui tlak tamna ber a ni ziah. Mahse, ka awmna hmun a dang tawh bawk a, ka rilru no chhuakin, ka ṭahpui ta char char.

A tawp chiah chu, u Ngaia a thaw hrawk. Min ning tawh ngawt ang, ṭahbelh min ti dawn lutuk.

"Ka ṭap zo ṭep", ka ti ṭuau a. Movie Tawp tawh mah se, ka rilru no erawh, a la tawp hleithei lo.

U Ngaia chuan, ka dâr a beng thek thek. Bathroom lam min panpui a, ka hmai te ka phih a. Ka chhuah chuan, kawngka te a lo kalh fel vek tawh, light a lo off ṭhen bawk.

A puan leh lukham a la a, "Mamawh i neih chuan, min lo ko dawn nia aw", a ti a. Misualpa lo luh aṭang khan, room kawngka kan khar ngai tawh lo a, u Ngaian khar ngai a ti lo nge ni, ka hnial lo hrim hrim bawk.

Keimah chauhin khum zau deuhah ka mu a, pasal ka neih hma pawhin, keimah chauhin ka mu ṭhin naa, pasal neih hnuah erawh, ka sawi thiam bik lo, mahnia chauha mut chu, a khawharthlak.

"Venpui",

"Aw",

"I haw a ngai", ka chaw ṭhial lai ka tawp chawt.

"Vawiin chawhnu Ticket ka la fel vek tawh a, heta ṭangin Delhi-ah i thlawk thla ang a, Delhi aṭang Aizawl i direct lehnghal ang", kan inah ka haw dawn maw?

"Ngati nge?", ka ti chuai raih.

"Tuna kan case buaipui hi, a hlauhawm lutuk a, a chhuitu ka nihna angin keimah chauh min bei dawn lo a. Hman zan ang khan, i chungah thil ṭha lo tak a thleng reng thei", a ti a.

Ka hnial dawn nge dawn lo, ka rilru a buai. Min sawiṭhaih pah deuhin ka hria. "Ka ngaihsak ṭha hman tawh dawn lo che a, mahni chauha lo awm reng tur atan chusn, ka ngaihtuah che, zan lam i la hlau deuh nen", a ti dap dap a.

A sawi kar laka lo inrawlh a chi miah loh, a thinrim zawk ang tih hlauhawm khawpin, a thutak.

Haw tura min duh chhan ka hrethiam thei lo, chu pawh, Aizawlah lehnghal. Keimahni inah, inṭhen a duh tihna zawk mawni le? Haw tura min duh chuan, kan inah ni lo, an inah zawk niawm tak a ni.

Mahse, ka haw miah lo ang, ka haw duh lo reng reng. Station-a a kal lawk tur thu sawiin, a chhuak zui a.

Insiam turin min ti mah se, khum chungah ka ṭhu ngawi reng.

Motor ri ka hriat chuan, ka insangmar nasa mai. A hmeichhia zawk, dawl angin ka tlawm zawr leh hnâp dawn nih hi!

"Kal ang le",

"Ih", ka kut ka sik niap niap a, sawi ṭan dan tur ber pawh ka hre lo. "Ih, ih, kan", aww, sawi tur ka inruahmanna zawng zawng a bo vek.

Ka bulah lo ṭhu thlain, a ngawi ngal a, keipawh ka ngawi tawp tawh. Ka ṭawng a nih leh vaih zawngin, ka ṭap thei hial ang.

"I haw hreh viau em ni?", a tawpah amah zawkin a ti a. Ka bu nghauh nghauh. Haw ka hreh lam a ni lo a, haw ka duh lo zawk. Ka haw a nih chuan, kan inṭhen tlukah ka ngai thei hial ang.

"Hrehawm i ti lo ang maw?", a ti leh a, ka bu nghat. "I hlau tawh lo chiah ang maw?", a ti leh a, ka bu ve leh nghat nghat.

"A ṭha e", a ti bul hmuk a, thoin room aṭang a chhuak ta daih. A thinrim nge rim lo pawh ka hre lo, mahse, tlem chuan a rim ngei ngei ang a, thuawih lo min ti ngei ngei bawk ang.

A ṭawng ri ka hre thei a, ticket a cancel. Ka inthiam lo lutuk ringawt, thlawhna ṭicket chu a to thei ropui si, mahse, refund a theih tho a, a zia hlauh.

A lo lut leh tawh miah lo a, a thawm ka hre tawh bawk si lo, ka ngaih a ti ṭha lo zawk.

Room aṭang ka chhuak a, sofa-ah ṭhuin, a lo inkuangkuah thân a, a inngaihtuah ni ngei tur a ni. A bul hnaiah pawh ka kal ngam lo, room-ah ka let leh a, kawngka biangah dingin, ka thlir ringawt.

Thinrima tho vutin, min hau chiam mai ang tih ka hlau. Chutiang chuan, ti lo hrâm se.

Muangchangin a tho a, intifel tawkin khumah ka ṭhu leh vat. "Venpui", kawngka a kik pah a, khum aṭang ka tho a, ṭi dakin ka en.

"Zaninah leng ila, i duh em?", a tih chuan, ka hamhaih em avangin, chhan nachang pawh ka hre lo. A nui suk a, "I duh lo em ni?", a ti leh a.

"Aw, a, ka duh", ka ti bah bawk a. Nui sukin, "Ka'n inthlak lawk ang e", a ti a. Room aṭang ka chhuak dawn nge dawn lo pawh, ka hrethiam tawh lo.

A inthlak lai ka en zeuh zeuh a, ngo vur a ni lo a, exer lak a peih bawk a, a taksa pawh inchawih nalh tak a ni. Ka sawi thiam dan berah, Mizopa dik tak!

"Station-ah ka'n kal leh lawk ang e, ei rawng bawl a ngai lo ang aw", ka lo bu nghat.

"Takah, hei hi min lo suk sak rawh aw, khawngaihin", ka hmaah a uniform a lo lek kang a, nui varin ka lo ban vat.

A uniform ka suk zawh ve leh, in ka tifel a, ka zawh ve leh, fai tawkin ka inbual. Rimtui chem chem tawh tak ka ni, ka fai sar tawh bawk.

Leng chhuak tur erawh chuan, ka la insiam chiah lo. Ei rawngbawl a ngai lo a tih danah, Hotel nge, Restaurant-ah nge kan ei dawn a ni hrim hrim.

Dar li leh a chanve a rik chuan, u Ngaian min lo call a, insiam ṭan turin min lo hrilh. Cotton jeans dum hain, sneaker var ka bun a.

Kamiz, a var leh sen ṭial ka ha a, a hmawr ve ve ka dul zawnah ka suih. Ka sam thlahin ka herh kawi a, ka bek.chung hlek ve vea sam tlem phiarin, ka tukkhumah bakilh tein ka kilh a.

Ka hmai pawh, simple deuhin ka chei. Darthlalang hmaah ka inthlêk vang vang a, keia lungawina ai chuan, u Ngaian a lungawipui ang em tih mawlh ka ngaihtuah.

Motor ri ka hriat rual rualin, room aṭang ka chhuak a. Kawngka a lo inkik kar kar, ka hawng vat a, a chek hlak.

"Venpuii a awm em?", inthlahrun hmel deuhin a ti a. "Phungpuinuin a dawlh daih alawm", ka ti a. A nui chhuak hawk. A nui ve ngei!

A inbual chhung leh a insiam ve chhungin, thawmhnaw pho ka seng a. Nawt marin, ka khai leh thlap. A insiam zo chu, kei ai pawhin a nalh.

"Khawi mi car nge a?",

"Ka hawh", car kawngka min hawn sakin ka ṭhu lut a. Car hmalam kal hualin, a lo ṭhu lut ve thuai.

Khua a la êng deuh bawk nen, Park pakhatah kan kal a, a nuam hi a ni ringawt. Kan inkai rial a, inngaizawngte pawh kan ang zawk.

Ka hlim bawk a, a rukin ka nui ka nui mai. "I ke a kham tawh em?",

"Kham lo e, i ke a kham tawh zawk em ni?",

"Kham ve tawh reng", a tih chuan, ṭhutna lam ka panpui a. Kan ṭhu chiah chu, a ke a thluang a, a ṭhen sak sak.

"A va'n kham tawh awm em em", nui varin ka ti a. "Kham ve tawh reng mai", a ti sup. Ipte chei, a bial chi ka ak a. Rawmawl la chhuakin a thlan ka hruksak.

A thaw halh halh a, ka nuih sak ringawt. "I lu a buk ṭan, meh kawlh leh a ngai dawn nih hi", a sam ka tuai heuh heuh.

"A ṭha lawm", a ti bul hmuk. A banah kuahin, a dârah ka lu ka nghat a. Hetiang ang hian, ka thla a la muang ngai lo reng reng, ka him hliah hliah.

Thla min lak sak a, a phone-a a lak avangin, a la nalh nge nalh lo ka hre thei lo. Min hmuh tura ka tih lahin, a lu a thing hmak.

Ka phone-in ka lak sak ve a, nui tura inhrilh te a ngai. A inrin loh laiin ka laksak a, a lang nalh zawk daih lenghal. Ka entir duh ve ṭhak lo.

Mall-ah kan kal a, scarf leiin, ka kâwngah a suih. "I kawr hak a chhing lutuk", a ti a. A lungawi vak lo deuhin ka hria. "Ka tihpalh", ka ti sap a. Min enin, a bu nghut.

"I rilṭam tawh em?",

"Ṭam lo, tlan kual zawk ila",

"Aw le", ka kutah chelhin, Mall aṭang min chhuah pui a. Ei tur leh in tur leiin, kan tlan kual a. Hla kan ngaithla pah bawk.

Bzi Tochhawng-Leng dun zel ila tih chuan, min deng dawt dawt. Inhre ṭha leh, inhmangaiha innei kan ni lo a. Mahse, a luangliam hmasa zawkah ka ṭang tih, hai rual a ni lo thung.

Hetiang zel a nih chuan, ka la hmangaih thei ngei ngei ang. Ka pasal a ni a, nitin inhmu leh, in khata cheng dun kan ni si a, ka la hmangaih thei ngei ngei ang. Chutiang a thlen hunah, engtin tak, min ngai ang maw?

"Aw",

"I ṭha em?", ka lo bu zeuh. "Park-a kal leh i duh em?", a tih chuan, "Zan lama inhawng a awm em ni?", ka lo ti thuai.

"Awm",

"A nih, kal leh ang", nui varin ka lo ti a. Park awmna lam ni ngei turah, steering a her kawi zawk zawk.

"Puak i duh em?", ka melh ralh, awihawm lo thei lutuk.

"I la bai deuh sui sui sia", min ngaihtuah zet hian a ti a. "Chuti, min lo pua", ka ti a. Min paw ve mai bawk.

Ngawi rengin, muangchangin min kalpui a. Kan pahnihin ngawi dun reng mah ila, kan chhungrilah erawh, kan sawi nasa ngawtin ka ring.

"U Ngai",

"Ka ril a ṭam",

"Ka pu Sai sawm kap ti phawt rawh", a tih chuan, ka nui hak. A fiamthu ve ngei a. "Ka pu Sai sawm kap", ka ti a.

"Ka pu Sai sawmhnih kap ti leh rawh",

"Ka pu Sai sawmhnih kap", a sawmngana thleng min sawi tir a, a sawmrukna tur min sawi tir leh a tum chuan, "Ka peih tawh lo", ka ti hlak.

"I thin a va chhe reuh", a tih chuan, "A chhe ve duh tho lawm", ka ti leh hrâm.

Hotel-ah chaw kan ei a, chaw ei pawh ka inti duh lo. Buh a tel lo a, Maian bai te nia ka ei châk tawh.

"Min en hrek hrek hlawm nia",

"A ho lutuk", a ti sam et zui. Ka hmui a hru a, ka va han ei berh awm ka ti, a zahthlak zawk.

Ei ṭeuh tum mah ila, Mizo chaw a nih loh vang tak pawh hian, ka ei ṭeuh thei lo. In kan thleng a, ka thaw huai.

Sofa-ah ka ṭhu thluang zuarh, "Inthlak la, i mu dawn nia, i chau a nih kha",

"Yes Boss", ka ti vah a. Peih lo tawkin ka tho a, inthlakin bathroom-ah ka lut a. Ka hmai te phihin, ha te ka nawt.

Ka ni hman a fuh vang nge ni, ka khi ṭhaw reng mai. Bathroom aṭanga ka chhuah chuan, a mutna a lo siam malh malh.

"U Ngai",

"Um", a lo hawi a, "I mu nghal dawn em ni?", ka ti zawi sap a, a bu zeuh. Sofa-a a mut ka rin tawh lo nen.

"Aw le, a nih, muttui aw",

"Muttui le", a tih chuan, ka nuih saih. Khum kotlang nghengin ka ṭhu a, ka zungbun ka tuai ka tuai.

U Ngaia pawhin a bun ve tho a, mahse, ka ngaihhlut ang hian a ngaihlu ve ang em le? Tun thlengin, room khata mut chu sawi loh, room pawnah a la mu char char chu nia!

Nupa kan nihna anga, kan inhnaih lai ber nia ka hriat chu, reilo te min fawh zawk kha. Vawihnih chauh kan la infawp a. Ka taksa a khawih awm chhun pawh, silaimu a lak chhuah lai chauh.

Kei hi, eng nge maw ka hriat tak le? Ka beisei sang lutuk nge, ka â pawh ka hre lo. Hetiang, beisei tur ka ni lo reng reng. Beiseina ka neih dan hi, a dik miah lo.

"Vawiin aṭang class ka kal ṭan dawn a, mahse, taxi-in ka kal leh mai ang, class ṭan hun a tlai deuh a", ka ti lang lang a.

Bu nghatin, a chhuak a. An lan theih chhung chu, ka thlir zui vawng vawng. "A ṭha vek tho e", boruak ka hip let kâwk.

Boruak hi, a lo ṭangkai takzet a nih hi. Engtiklai pawhin, a pawimawhin a lo ṭangkai takzet a ni.

Jennifer leh Manaf-te pawh, ka hmu ṭan tawh a. Angela leh Manaf-te inphur kawi leh, inchhaih kual vel ka hmuh hi chuan, Jennifer-i ka khawngaih tlat zel.

Manaf pawh hian a la ngaihven reng tih ka hre thei, Jennifer-i pawhin, a la ngaihtuah lutuk. An pahnih hian, inhaw deuhin lang dun mah se, an inngaihsakin, an inngaihtuah dun em em tho si a, ka lainat ru mang e!

Keini pahnih pawh, tluang tak chuan kan la awm ve zel. Tukver awmna tawh phawtah, bar a vuah tir vek a.

Zan lama a lo haw thei dawn lo chuan, Police pahnih, pawnah a duty tir ngei ngei bawk.

Chiang deuha a hmel ka hmuh lohna pawh a rei ta. A lo haw chhunah lah, mawngvawm ba ang maiin, hna a thawk char char a.

Ni khat tal tawp te, lo haw loh chang lah a ngah. Kar a liam zel a, kan inneihna aṭang thla thum hmel kan hmu ta reng mai!

Zanin tal chu, lo haw ve hrâm tawh se. Chaw ka chhum kep tho a, sangha ka kang leh. A kan ro hi a tui tihdan ber a ni a, a duh dan ang thlapa kan(kang) pawh, ka thiam tawh lutuk.

U Ngaia hnen aṭang, eng thu mah ka dawng lo a, chaw ka ei san leh tawp. Va biak hmasak ka hreh tlat zel.

Lehkha zir hma tv ka en a, motor ri ka hriat chuan, kawngka lam ka hawi vat. Kawngka a lo inkik rual rualin ka tlan phei.

Nui varin ka hawng a, ka kuah nghal thlawp. "Ka bal lutuk a nia", a tih pawh chuan, Ka kuah lui ngat ngat tho.

"Venpui",

"Ka ngai che lawm",

"Mahse, in chhungah min luhtir ve phawt la",

"Awh, tihpalh lutuk", in chhungah ka kai lut a. A rilṭam leh ṭam loh ka zawt thuai. A inbual chhungin chawhmeh ka lum ṭha leh a. A ei leh ṭeuh mai.

Amah si cheta ṭhuin, a dârah ka lu ka nghat a, movie kan en dun leh. Hnathawh tur a rawn hawn lo a, ka lawmzia chuh, lehkha zir ka ṭhulh phah ve daih.

"I mut a chhuak tawh em?", ka lu ka thing nawk nawk. Dar sawm a rik chuan, mu turin min ti a. Tv off-in, room-ah min pawm phei nghal daih.

Khumah min nghat a, "Zanah i mengrei thei lutuk, mu tawh rawh", a sawi zawh rualin, ka biangah a fawp zeuh a. A kal tur chu a kut ka man.

"Khawiah nge i kal dawn?",

"Hnathawh tur tlem ka nei a",

"Hetah, thawk mai la, ka tibuai miah lo ang che, ka bengchheng miah lo bawk ang", ngen ngawl zet hian ka ti a.

Laptop leh file a entawn leh chhen a, eng hna nge a thawh bik ni? Film-a Police hoin, u Ngaia anga an thawh ngai pawh ka hre lo.

"I la muhil nange?", mak ti zet hian a ti a. Ka lo bu zeuh. A hmuhnawm lutuk a, ka muthilhsan phal teuh lo mai.

A laptop leh file ho a dahṭha a, a kawr hak phelhin, ka bulah a lo inthawlh lut ve. Ka lâi nghal ringawt!

"I sen vit vet a nia", a ti thum bal a. En pawh ka en ngam lo. A taksa lum lah chuan, min ur ham ham mai bawk sia.

"Venpui", amah en thei turin min siam a, "Ka fawp dawn che nia", ka chhanna pawh a nghak hman lo.

Ngaihzawng nei ngai lo a nihna a hriat ngawih ngawih zel, mahse, chuti chung chusn ka sawisel phal teuh lo, a theitawp a chhuah tih ka hria.

Ka hnute inkara khuavang awm chu, a thlêk vang vang a, "A dangdai, a nalh lutuk ringawt", min lo en chho a, ka lo nuih saih.

Muangchangin ka underwear hak a phelh a, ka zak duh bik lo, ka pasal hmaah lawm ruakin ka awm dawn!

Ka malpui dinglam chawikang deuhin, a hmuiin a nûl thla zel a, silai kahna hnuhma chu, dim zeta fawpin, a hnê dawk dawk.

Ka thlarau a chhuak dawn ni mai hian ka hria. Silai kahna hnuhma aṭang a insawn thla zel a, ka awm hle hle thei tawh lo.

Ka ngaihtuahna a tinû hneh lutuk ringawt. Ka tisâa a nêm laiah bur chat tawhin, ka rin loh lutuka a lei a chettir chuan, rak ṭhatin a samah ka ṭham tawk.

"Venpui",

"U Ngai", a nui suk a. Min ko nawn leh a, keipawhin ka koh nawn leh.

"A pawi lo nia", ti supin, a duh ang zânin a lei leh a hmui a chet chhunzawm a. Khum bengin, thei leh thei loin bedsheet ka ṭham tawk tawk.

"Zanin chu, insum phawt ila, a tak ram thleng lo mai ang. I chau dawn lutuk tlat",

"Umm, insil tur pawhin ka tho peih lo", chhing duar duarin ka ti a. A nui zui hak.

"Tissue a awm reng alawm, no worry", ti supin, a tho a. Tissue nen rawn letin min hru a, bawlhhlawm bawmah a paih leh thlap.

Ka hmui tawk zeuhin, "Muttui le", a ti a. A ban min kham tirin, ka hnung a chul hliau hliau a, a âwmah ka hmai phumin, ka muhil siai siai.

Mahse, ka ngaihtuah a, a taksaah khan danglamna pakhat mah a awm ve lo reng reng. A taksa chu thuhran, a thâwk te kha, a pangngai thlap!

(He story hi, based a nih avangin, a khuh thei ang berin ka ziak e, kan duh chuan, kan lo google thei bawk a nia)


Show post links
Top