Tiam Tlat E BY Cck Lalchhuanawmi (Completed)

[Ngaia]

Tiam tlat e
Chapter-13
Ziaktu: Cck Lalchhuanawmi

Ni lo, ka hlau tur a ni lo, ka ngaihtuahna hi a ṭha lo, a ṭha lo takzet a ni.

Veronica chu a lungngaih hmel pawh a ni lo, lungngaihna vawrtawp a neiin ka hria.

Apaul-a chu Pu Brandon-an a la pawm reng a, Temuani nen chokaah kan lo awm. Ka pi leh pu te nen an inṭhut chilh a, Sap ṭawng an hman avangin an sawi awmzia ka man pha meuh lo.

Veronica chu Apaul-a pawh chuan a nel thuai, an inpawm thei tawh. A nu kha a ni ve tlat a, a nu nen inhmua an inpawm thei chu lawm tur ka nih laiin ka rilru a na tlat pek!

Pu Brandon-a chu hna kal turin a chhuak ta a, a ruk tak chuan a lawm vein ka ring, a nupui a nia, a la hmangaih dawn tih a chiang reng, a fapa nu a nih ang pawhin.

"U Roa nupui maw kha kha?", Temuanin a tih chuan ka bu nghat. "A hmelṭha reuh tawp", nui varin a ti leh a. A dik chiah, a hmelṭha lutuk ringawt, kei chuan a nê pawh ka ek pha lo.

"Mazai, lo kal lawk teh", ka piina min lo koh chuan ṭi dak hian ka va kal. Veronica nen min inhmelhriattir a, Mizo ṭawng a hrethiam a, ṭawng lam a lo harsat mai zawk hi a lo ni.

Ka pi chuan Apaul-a enkawltu ka nih leh, thil tam tak ka zirtir thu te chu a hrilh a. Veronica pawhin lawm tih hriat tak hian min en a, a nui sen sen, lawmthu te min hrilh.

Apaul-a pawhin a nu pawm chu nuam a ti ngang mai, ka lo thik lutuk chu keimah leh keimah ka inhau bawrh bawrh. An nufain an inpawm chawt tawh.

An inṭhen chhan thûk tak hre lo mah ila, inuiresan em an ni lo a, an inṭhen chhan pawh a la zia, an inrem leh thei tluka hlu a awm chuang lo. Apaul-a pawh a nu leh pa dik tak karah a seilian thei ang a, a ṭha lutuk ringawt.

Chaw ei thleng chuan ka awm ve reng a, eng em phei chu ka ti lo, Veronica chu Doctor min hrilh ho ka hrilh ve leh a, a thiam ang angin lawmthu min hrilh ve zel bawk.

Chaw ei kham aṭang rei pawh awm loin ka pi bulah ka haw mai tawh tur thu ka hrilh a, "Lo kal ziah tho rawh aw, lehkha zirpui a ngaih kha, huanah kan pitu hoin kan zir leh dawn nia", a ti a. Ka nui sak.

David-an min lo nghak leh reng tawh, in lam muangchangin ka hawi a, Pu Brandon-a pawhin a nupui leh fapa chauh a ngaihtuah tawh.

Ka ngaihtuahna chu âtthlak ti deuhin ka nui hak, David-a chu darthlalang tihniam leh turin ka hrilh a. Car kawngkharah ka lu nghatin pawn lam ka hawi a, ka mit ka chhing vang vang.

"Ka lawm e, fimkhur deuhin khalh rawh aw", tiin, David-a chu ka thlah a, a bu ve nghat.

Ni hnih lai ka haw tawh si lo a, in chhunga ka lut chu a ruak ngawih ngawih.

Kawngka nghengin ka ṭhu leh ren rawn, ka lunglen dan chu a turu lutuk ringawt. Ka ṭhutna aṭanga thoin khum lam ka pan a, ka mu nghal zat.

Ka fanu thlalak ka en a, "Bawihte, hlim tur ka nih laiin ngati nge ka hlim theih miah lo le?", ka ti zawi sap.

Kei chu Beisei leh chuan ka nei tawh si lo a, anmahni tal chu hlim reng sela, a dik chiah, hlimpui em em hi ka tihtur a ni.

Gate ka hawng a, Veronica-in Apaul-a pawma Pu Brandon-a hoa an nui ka hmuh chuan ka lo nui ve sen sen, an hmuhnawm lutuk.

Nui vara Pu Brandon-a a lo hawi chuan ka hawisawn vat. Ka hmalam panin ka kal a, Pu Brandon-a chuan, "I lo thleng tawh maw?", a sana bun bih zeuha tih chuan, "Thleng chiah", nui sângin ka lo ti a.

"A ṭhat chuh", tiin, a kalsawn a. Thlîr zui ka duh viau na chu in chhungah ka lut ta zawk. Apaul-an min lo ban chu, Veronica-in eng emawni sawiin a kalsawnpui daih a.

"Mom, Mom bulah ka kal duh", Apaul-a chuan min lo en ṭawk a, pindanah a luhpui ta tho. Pu Brandon-a chu nise ka va chhuh tawh ang.

Tih tur ka hre lo chu huanah ka va ṭhu ringawt, Veronica khan a hauh bur tawh a ni ngei ang. Apaul-an min lo ban pawh a kalsawnpui daih a nia.

Min hua a ni hrim hrim ang, "Mom", ka hnung lam ka hawi thuai, Apaul-a chu ka piin wheelchair-ah ṭhuttirin a lo nawr. Ka va pan thuai.

A kut a lo phar chu ka pawm kâng thuai bawk, ka ngai hman ngawih ngawih, "Ka lo ngai tawh lutuk che alawm", a beng bulah ti sapin, a chalah ka fawp vang vang.

Huanah kan ṭhu a, Ka pi pawh a ṭhu ve reng, a hnuah ka puin min lo zawm ve leh.

"Lehkha kan zir dawn lo em ni?", ka puin tih chuan ka nui ringawt, lehkha zir ka ngaihtuah tawh lo reng reng.

"In chhungah lut ila, kan zir dawn nia", ka ti a. Ka pi leh pu hoin kan inzui leh dial. Chhuatah zampher kan phah a, inkhuallemna leh lehkhabu nen kan hnawk leh nuaih.

Buzz Lightyear-a pawhin min la telpui tluang zel e, Veronica chu, "Lo tel ve rawh", tiin ka sâwm a. Min lo telpui ve mai bawk.

Apaul-a chu pawmin English ka zirtir a, ka âw ṭhing a tih avangin min nuih chiam zel. Thinrim theih pawh a ni lo, ka âw hi a ṭhin zia ka hre ve tawh.

English thumal lam nan phei chuan a nalh lo lutuk. Keipawh hian ka nuihpui leh nge nge zel.

"Keima'n ka lo ti ang", Veronica chuan lehkhabu chu a lo la a, Apaul-a a lo ban leh chu Apaul-an min kuah bet tlat.

"Ka lo pawm rih mai ang, tikhan lo sawi rawh", nui sângin ka ti a. Veronica pawh chu a nui ve mai, mahse, a lawm vak lo hmel erawh ka hmuh hmaih lo nasa lutuk.

Apaul-a chu thlahlel viau mah ila, "Bawihte, i nu bulah awm la, lehkhabua milem awm pawh i hmu thei dawn alawm", ka ti a. A lu a thing nasa lutuk.

Veronica pawhin nelawm zet hian, "Come on", tiin, a kut a lo phar a, Apaul-a erawh chuan a duh lo nasa lutuk.

Chutah ka piin, "La pawm mai mai rawh, a ngai ve che a nih kha", a lo ti a. Veronica hmai zah tho mah ila, ka piin chutia a lo ti chu ka lawm asin aw!

Ngaihngam takin Apaul-a chu ka pawm thei ta a, Veronica chu chhuanlam siamin a kalsawn ta daih.

Nuam lo ti tho mah ila, Apaul-a la pawm hi ka la thlahlel lutuk ringawt.

Nilengin kan inpawm ta a, a inbual hunah pawh keima'n ka bual a, chaw ei naah pawh ka bulah a ṭhu leh tawh. A chaw ei lai pawh ka buaipui leh thei ta a, hlim tak ka ni.

Tv hmaah kan ṭhu ṭhap a, Oggy leh chukcu ho inumkawi kan nuihpui leh dar dar.

Apaul-a chu ka pawm a, kan ep chiahah Veronica a ṭhu a, a mitmei duhawm lo tak tak ka dawng zeuh zeuh, nuam lo ti tho mah ila Apaul-a ka thlahlel ve tho si a, ka hre lo der ngat ngat.

"Mom, mu tawh ang", mut chhuak tih hriat taka Apaul-an a tih chuan Veronica-in a lo ban thuai a, keimah zawk chu Apaul-a chuan min kuah bet leh.

Veronica nui lai pawh a tawp riai riai, "Bawihte, Mom nen mu tawh r'u aw", ti paha, Veronica pawhin a lo ban ṭha leh a. Mahse, Apaul-a zawk chuan keimah min ti tlat thung.

"Mazai, nangmah khan timu leh mai rawh", ka piin a lo ti leh a. Ka pu pawhin a lo tuihnih ve leh.

Pindanah kan inpawm lut ta a, "Mom, min paw leh la", a tih chuan, kan inpuak khat zia ka hre chhuak. Nuih sakin, "Tehreng mai", ka ti a.

Puak puan ka la leh phawt, ka hnungah ka dah a, puak puan ka suih mek laiin, "Eng nge i tih?",

"Ih, ka pua a nih hi, a muhil thuai mai ang", nui sângin ka ti a. A lawm vak lo chu min nerkhum salh, a nuam lo duh ngei mai.

"Kan inâwimut dan ṭhin a nia, Mizo chuan kan fate hetiang hian kan âwi mu ziah zel", ka ti leh hrâm. A hua a nih leh haw(hua) tawh mai rawh se.

Pu Brandon-a a lo lut a, Veronica chu Sap ṭawngin a ṭawng nghal char char a, min lo en ṭhin a, min hêk a nih ka ring ta ber.

Veronica chu insut faihin Pu Brandon-a a kuah a, ka lo hawisawn daih. Apaul-a chu hmalamah ka dah a, a mit a lo chhing fel der.

Pu Brandon-a te chu an chhuak tih kawngkhar khar ri aṭang ka hre thei. Tukverh bulah dingin Apaul-a mawng ka beng thek thek.

"Engkim a ṭha vek e", thaw halhin ka ti a. Ka thaw chhuak hawk, engkim a ṭha vek e.

Apaul-a ka mut fel hnu chuan pindan aṭang ka chhuak a, ka pi leh pu te mu tur nen kan intawk. Kan inmangṭha zui mai bawk.

David-a a awm loh avangin muangchangin ka kal a, Veronica kha Apaul-a bulah a mu ngei dawn a, Pu Brandon-a pawh an bulah a mu ve ang em le tih ka ngaihtuah.

"Mu pawh nise a pawi vak em ni, a nupui leh fapa bulah a mu ve a ni mai a", keimah leh keimah chu ka inbe mawlh mawlh, âtthlak ṭhin ngei mai.

Ka hmaw mihring ruangam ding ka hmuh chuan ka ding chawt, a ruangam ringawt aṭang pawhin tu nge a nih ka hre thei nia!

Mahse, ka khûr tawh lo a, ka hlau tawh hek lo. Ṭha takin ka hmachhawn thei dawnin ka hria.

"Mazai, i va tlai ve", min be hmasatu zawkah a ṭang a, ka en mawl tawp ringawt.

"Tunlai i damṭha em?", a ti leh a, chhang loin ka en ringawt. Ka damṭhatzia hre chiang bertu a ni ang. Kut min thlak a tum te kha a hre tawh lo nge mawni?

Ani pawh chu a ngawi ve ta reng a, a ding ren rawn, a tawpah, "Engvanga ti nge i nih?",

"Eng chu maw?",

"Min hmangaih ve ngai miah lo tiraw?", ka ti a. A ngawi reng, ngawi reng tur pawh a ni. Engmah sawi tur a nei lo.

"Bawihtei boral kha keipawhin ka tuar lutuk asin, a hringtunu ka ni a, kei aia tuar an awm kher lo ang.

Zu leh hmeichhia min kawpsan a, chuti chung chuan ka la pawm hrâm hrâm che a, a chhan chu ka hmangaih vang chein.

Nang chuan min lo hmangaih ngai miah lo a nih kha, nau ka pai leh te khan ṭha takin awm la chu ka chhiat zel lo tur, nangmah vak vek a ni.

Bawihtei leh a naute ho an puitling thei lo kha ka ngaithiam lo ṭhin a, mahse, tunah chuan ka ngaithiam vek tawh, lo puitling vek tase, kan nufaza khan kan rethei dawn lutuk.

Kei chu engtin paw'n awm ila ka paldai zel thei ang, mahse, ka fate, naupang maiin an pa rui reng leh an nu ni lo a mutpui reng an hmuh ve reng zel erawh ka tuardam thei ngai lo ang.

Chuvang chuan, Pathianin an bula min hruaisak zel kha ka lawm tawh zawk. Tunah chuan, kawng hrang ve ve kan zawh tawh a, i kawngah lungawi takin kal tawh ang che, keipawh, ka kawng zawhah hian ka lungawi", ṭap ṭeuh chungin ka ti a.

Kan inṭhen hnua pangngai deuha kan inbiakna hmasa ber a niin ka hria, u Puia erawh a ngawi reng.

Ka thawl hawkin ka hria, ka thaw huai huai, "Mazai, kan la naupang em a ni", a ti chuai raih.

Naupang pawh ni ila, khatiang em em kha chu a lutuk em mai, "Ṭha deuh pawhin kan inṭhen thei asin, ṭha deuhin sawi la chu, kan inṭhen mai tur a nia, khatianga awm lo khan", ka ti chuai ve raih.

La naupang pawh ni ila, chhuanlam a tling lo em mai. Ka dara kut lo nghattu chu muangchangin ka en a, nelawm zeta min enin ka mittui luang a hru a, ka mittui lah chu a luang tawp thei lo.

Kan thusawi kha a lo hre ve hrim hrim ang, "Ka lo thlah ang che", dam diai hian a ti a. Ka kutah chelhin min kalpui nghal, ka hnial lo a, ka zui ve tawp.

Car kawngkhar hawngin min ṭhut luh tir a, u Puia chuan min thlîr reng tih ka hria, a dinna ngaiah ngawi rengin a la ding reng.

Kan tlanpel lai pawhin ka hawi let lo a, site glass pawh ka en duh lo. Thui fe kan tlan hnuah pawn lamah ka hawi chhuak a, a rukin ka thaw huai huai. Car chhung a thim vek a, ka awm dan min hmuh theih chiah ka ring lo.

Kan ding a, ka hmalam ka en ngur,,chhuk ka chak lo ngei mai. A hnuah, "Ka lawm e, fimkhur la aw", ka ti a. Chhuk ka tum chu ka kut a lo man.

Tun ṭum erawh ka ṭang tawh lo, a lamah muangchangin ka inher a, a ṭhut dan a siamrem ve sauh sauh.

"Ka bulah i lo kal dawn em?", a tih chuan,,ka lu ka thing nar nar. A nui suk a, ka kut a thlah. "Fimkhur la aw", tiin ka chhuk a.

In ka hawng rak rak,,kawngkhar nghengin ka âwm ka dawm vang vang a, ka ṭhu thla riai riai.

Ka duhthlanna siamah hian ka inchhir lo hrâm ka beisei. Vanduai tur renga duan ka nih ka ring, nunhlui ṭha lo tak ka neih avangin ka duhna lam pawh ka pan thei tawh lo a.

Ka chungah engpawh thleng se, lungawi leh lawm taka lo.pawm hi ka tihtur a ni tawh maiin ka hria.

Mahse, a pawi lo e, tuna ka awm ang hian awm zel dawn pawh ni ila a ṭha vek tho e. Ka chunga tla apiang chu lungawi tak leh lawm takin ka pawm zel tawh mai ang.

Veronica lo awm aṭang kar thum lai a liam leh tawh a, Temuani a kawmngeih a, ka pi leh pu a kawm thiam lutuk.

Apaul-a pawh hi ka pi leh pu vang chu ni lo se, kan inpawm thei miah lo ang. Veronica hian chiang takin min mil lo tih ka hre tawh.

A chhan chu, zantin Pu Brandon-a hian min thlah ṭhin a, ina ka kal ve reng pawh a duh lo tih ka hria.

Biak ve ka tum pawhin min hawisan hmak zel a, ka pi leh pu hmuh loh hlanin Apaul-a lah min chhuh hmak.zel bawk.

Ṭum khat erawh, Apaul-an min ngen nasa lutuk Veronica-in ka pawm a duh bawk si lo chu ka chuh tawh. Apaul-a pawmin huanah ka kalpui daih a, khata ṭang phei kha chuan min huatna a zualin ka hre mai.

Mahse, ka haider lui ngat ve zel thung. Apaul-a ṭha taka enkawl ka tihtur a ni a, kei aiin a nu hian awmpuina hun a ngah lutuk.

"Mom, ka bulah mu leh la",

"Bawihte, Mom tiin min ko tawh suh ka tih kha",

"Ka duh alawm", a ti a. "A nih, muhil tawh la, Mom tia min koh ka phalsak ang che",

"Puak ka duh leh", a tih chuan ka nuih sak. Ka pua a, ka sak sak ṭhin hla bawkin ka âwi leh.

Ka mut fel hnua ka chhuak.chu Pu Brandon-an min lo pan chharh chharh, "Veronica-in a zungbun a tibo a, i la em?", a tih chuan, ka phawk hru.

Veronica chu a lo ṭawng lung lung nghal, eng nge a sawi ka hre ve si lo, "Pindanah ka dah a ti a", Pu Brandon-an a tih leh chuan ka lu ka thing nawk nawk.

"Eng zungbun mah ka la lo", en ran chungin ka ti a. "Brad, kan inneih zungbun kha a ni asin", Veronica chuan a lo ti a, an insut hlawp hlawp nghal.

Sap ṭawngin eng eng emawni a sawi leh, Pu Brandon-a chuan, "Room-a lut chhuak reng i ni a", a tih leh chuan, "Ka la lo, eng zungbun mah ka hmu lo", ka ti bah nawk.

Mittui parawl kuangin ka en a, min ring turin ka duh takzet, mahse, thinrim ṭawngkain min be lo a, a thinrim vak lo a nih ka ring, nge ni a, a thinrim lutuk hi a insum mai mai zawk.

"Mazai, i hmu miah lo maw?", ka piin a lo ti a. Ka hmuh loh thu leh ka lak loh thuin ka lo chhang vat.

Pu Brandon-a chu thaw ri hrawihin, "I hmu lo a nih chuan Veca, i dahna i hre lo zawk a ni lo maw?", Veronica lam hawiin a ti a. Ka hmaa a din avangin min hliahbo vek, a hnungah ka ding bawk si a.

Eng zungbun mah ka hmu lo a, lakbo tur zungbun a awm lo hrim hrim bawk. Inneih zungbun a ti a, an inneih zungbun a la bun reng tihna ni maw?

Pu Brandon-a kut ka en a, zungbun pakhatmah ka hmu lo chu ka thaw huai huai. Veronica chu a riat nawk nawk a, a insut ri leh hrawih zel.

Chutah, "U Ro, khawngaihtakin min ngaidam rawh, keima lak a nih kha, ih, pindan tifai tura ka luh khan ka hmu a, a lem emaw ka tih vangin ka la ringawt a, inneih zungbun a ni tih ka hre lo reng reng, khawngaihtakin min ngaidam rawh", Temuani chu ṭhingṭhi nghalin, zungbun chu a phawrh chhuak bawk.

Pu Brandon-a chuan a la a, "I zungbun bo chu i hmu ta e, i lawm tawh em?", Veronica kutah a va dah.

Temuani chu ka en a, ka khawngaih lutuk ringawt, ngati nge a lak le?

A kut a tuai nuah nuah a, a kun ngaih bawk a, a mittui chuan a kut a far leh ṭhin. Pu Brandon-a hian engtin nge a tih dawn, a bân a ang em le?

"A lawmawm e, kan hmu ta chu", ka pu chuan a ti a. Veronica chu phun hlukin pindanah a lut a, min kalpel lai khan min melh nô lo hle bawk.

"Temuan, i room-ah va lut rawh", ka puin a tih chuan, "Ka pu, tun hnuah chuan ka ti tawh miah lo ang, khawngaihtakin min ngaidam rawh u", Temuani chuan a ti a.

Ka puin, "Naktukah kan sawi ṭha dawn nia, i room-ah va lut rawh", a ti leh. Temuani pawh chu thoin a pindan-ah a lut nghal hmak.

Pu Brandon-a chuan min thlah leh a, engmah a sawi lo a, a ngawi reng, keipawh ka ngawi reng.

A hnuah, "Ka, ka la miah lo nia aw", a lam hawiin ka ti a. "Ka hria alawm", a lo ti dam thluam. Temuani a inpuang tlat a, nghah rei ngai loin ka dik a ni tih kan hre nghal a, Temuani ka khawngaih rualin ka lawm tho bawk si.

"Temuani kha, engtin nge i tih dawn?",

"Engtia tih nge i duh?",

"La awm tir zel rawh, a tihdik loh hriain a inpuang a, a ṭhat em kha", ka lo ti a. Kawng sir rem laiah car tidingin, "Ngati nge i ngawih reng a?",

"Ka ngawih reng loh hi",

"Inah khan, i dikna au chhuahpui ta che", a tih chuan, "Ka au chhuahpui reng kha, i bulah ka sawi kha", ka ti a.

"Ka bulah lo pawh khan, in chhunga awm zawng zawngin an hriat theih nan sawi ta che",

"Nangma'n i bulah chauh a tê ber aṭanga a lian ber thlenga sawi turin min tih kha", ka tih chuan, "A ṭha", ti supin, ka inring hman lo, min lo fawp nghal.

Ka lo ṭang lo a, ka awm hle hle, a kawr nghawngah ka ṭham a, ka biang tawn tawn dawmin dam zetin min fawp.

Engtin nge ka lo fawh let ve ang tih ka hriat mai loh avangin, min fawh ang angin ka awm tawp ringawt.

A kawr nghawng ka ṭhamna kut chu sawn chhoin, a nghawngah ka kut pahnih ka suih ve tawp.

Min fawh vang vang hnuah min thlah a, a chala ka chal sik tirin a thaw ham ham. Ka biang a la dawm reng, kei erawh chuan ka kut ka la thla tawh thung.

Awm hla deuhin min en a,,"Ka bulah i lo kal tawh dawn em?", muangchangin ka bu nghat nghat. Min fawp leh a, ka dawh mawl tawp ringawt, ka zei ve thlawt lo.

"Nuthlawi lungfing tawh tih takah, chhai thluk i har zek a", a tih chuan, ka nui hak. Ka chal a nawr vang vang, "Thlawi law law hi chhai ila, ka tihfuh ka rin vang a nia", ka tih chuan, min kuah a, a nui hak hak.


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

[Ngaia]

Tiam tlat e
Chapter-14
Ziaktu: Cck Lalchhuanawmi

"Nuthlawi lungfing tawh tih takah, chhai thluk i har zek a", a tih chuan, ka nui hak. Ka chal a nawr vang vang, "Thlawi law law hi chhai ila, ka tihfuh ka rin vang a nia", ka tih chuan, min kuah a, a nui hak hak.

In chhunga ka luh rualin khumah lawn kaiin puanin ka inkhuh nghal hlun, ka zak lutuk a, ka sa chhuak vek. Ka puak thei dawnin ka hria.

Ka zak hi a ni ringawt, nutling pui tawh ina ngaihzawng han neih ṭhat leh chu(h), a nawm(nuam) tho rualin a zahthlak, ka zak ngawih ngawih.

Zing ka tho te chu ka khawr ṭun mai, ka hriat loh te hian ka lo khi leh ṭhaw zel bawk a, ka biang a kham tawh ropui.

Hetiang hi chuan Pu Brandon-a ka hmu thei miah lo ang, pangngai thei ang bera ka awm a ngai dawn a ni!

David-a ka hmuh chuan chibai ka buk a, ka buk zawhin ka hmai ka bêng hlak hlak, ka biang tawn tawn dawmin, "Insum ve ṭhin teh", ka ti sap.

Khi ṭhaw reng thei ka ni lo, "I la lut dawn lo em ni, ka pu a lo kal mek a nia", David-an a tih chuan, "Tak tak maw?", tiin, bihrukna tur ka zawng ruai, a vâng ropui si.

Ṭhenawmte in kawt biru laiah ka va biru ringawt. Â inti lutukin ka chal ka bêng dat dat.

Pu Brandon-a te an tlan liam tih ka hriat chuan thaw huaiin ka chhuak a, in lam ka pan chharh chharh. Chet ṭhin(ṭhing) theih ngei mai.

Mahse, ka hmu ngam rih lo, ka ngam hlawl lo a ni e. Ka zak lutuk ringawt.

In chhungah ka lut a, ka hlimna te leh zahna te an bo duak mai, ka ṭi dâk mai ni. In chhung boruak chu ni dang ang kha a ni lo a, lungawi lohna boruak hian a tuam hlup hlup hian ka hria.

A hma kha chuan boruak a zâng a, hlimna boruak khan a tuam ka ti mai. Tukin erawh, boruak a rit ṭalh ṭalh khawp mai.

Veronica ka hmu hmasa ber a, min melh rum nasa lutuk, chutah, "Mazai, i lo thleng tawh maw, ka pi te chu Zela te nen an chhuak lawk a", Temuani chuan a lo ti a.

"Engtikah?", tiin, ka lo zawt let vat, "Zingah a nia, chaw ei hmain", Temuanin a lo ti leh.

Pu Brandon-a chuan a bântir ta lo nimaw, ka pi te an chhuah daih chuan tihtur ka nei ta lo tihna a nia, vawiin chu ka haw mai a ngai dawn a nih hmel.

Apaul-a ber a awm loh chuan, tihtur ka nei dawn lo, Pu Brandon-a lah a chhuak daih tawh bawk si a.

"An kalna i hria em?", Temuani ka zawt leh chu, Veronica chu a lo phun hluk nghal.

Ka runluih zawk dawn mawni, Apaul-a te awm lo mah se, ka awm ve reng zawk dawn mawni? An lo haw hun ka nghak a ni mai a.

"Aw le, an lo haw har lo turah ngai ila, ka lo nghak ang e", nui vara tiin, ṭhutna lam ka pan a. Ka ṭhu fel thân.

Veronica ep chiaha ṭhu ka ni bawk a, min hua tih hriat taka min lo en zeuh ṭhin te chu ka hai lo nasa lutuk.

A bawp khawkherhin, intivei taka inkuangkuahin a ṭhu a, engtin nge a lo lan(lang) ngam zawk le ka ti?

Inṭhen rawta ro chanve dawn lai a laksak a, tunah, thil tisual lo ang maiin a lo lang a. Engkima rorel a la tum zui.

Mahse, engkima roreltu chu a ni lo deuh ang, Pathian bakah, Rorelliana a awm alawm le. Keipawhin ka hlau bik tur a ni lo.

Sapnu lakah chuan Zonu te chu, Zopa mitah kan chungnung zawk daih. Amah angin ka changkangin, ka thuam inbelte pawh a ṭhing a ni mahna, duhtawkin Sap ṭawnga ṭawng thei loin, ka âw te hi English thumal lam nan a ṭhing pawh ni thei.

Zopa mit fukna ber ka ni tho tho, induh ve larh tur ka ni. Sapnu mai mai, ka dahnil ve chiang em mai.

Ni tak, zungbun kha, Veronica lam ka hawi a, leh lawkin, Pu Brandon-an engtin nge a koh kha le, Veca tiin a ko a, Veronica pawhin Brad tiin a ko.

Ka inher leh hmak, ka be chak zawk.zawk lo, zungbun chungchang pawh ka zawt lo mai ang.

Temuani nen an lo sawifel vek tawh tho ang. A thuhrimah, Temuani khan engvanga la nge a nih le?

Nilengin pindanah kan awm lo a, kan awm chhunah erawh kha chuan eng zungbun mah ka hmu bawk lo.

Veronica ka va en leh zeuh a, a kuta zungbun ka hmuh chuan, "A van bun ngam", ka rilruin ka ti hlak.

A va ṭullo ṭhin tak, nui sakin ka tho a, veranda-ah ka va ṭhu ta daih. Ka awm pawh a nuam ta deuh alawm.

Pawn lam boruak chu a zia ta deuh e. Apaul-a te chu lo haw har lo se aw.

Ka phone a lo ri chu bag aṭang ka la chhuak a, "Aw, u",

"Lalnunpuia khan a tibuai che em?", a lo ti nghal. Hahthlak hian, "Tibuai lo, kan inhmu lo hrim hrim", ka ti a. Dawt var ka sawi zeuh.

"A lo haw tawh a, eng buaina mah a thlen lo tak tak che maw?",

"Aww, eng buaina mah min thlen lo. Chubakah, Police an awm a, engmah hlauh a awm hleinem", ka ti a. A lung a dam ve ta chiah.

A haw tih pawh ka lo hre miah lo, a haw a nih chuan a ṭha tho e, ṭha takin va awm tawh teh se.

"Mazai", ka hawi chhuak a, Temuani ka bulah a lo ding, "Ih, Police i sawi sia, min mantir chu i tum lo ang tiraw?", hlauthawng tih hriat tak hian a ti a.

Ka nui hak, "Mantir dawn lo e, ka u nen kan inbia a,,ka sawi ve mai mai a nih kha", ka ti a.

Za vak lo hian a nui ve sen sen, ka bulah lo ṭhu thlain, zawi te hian, "U Roan min chhuahtir dawn lo a, ka lawm rualin i lakah ka inthlahrung, pawi ka ti lutuk a", a ti a.

"A ho lutuk, mahse, i inpuang vat a, kha kha a ṭha zawk daih a nia aw, mahse, ngati nge i lak reng reng a?",

"Aa, eng lo, nakinah kan sawi dawn nia, ka va insu phawt ang", ti sapin, a kalsawn zui.

Keipawh hi ah, a sawi hreh danah zawt nawn tawh lo ila a ṭha ber ang. A lem emaw a tih thu a sawi a, a chhuanlam pakhat a ni ngei ang.

Eng harsatna nge a tawh ka hriatpui lo a, Pu Brandon-a chinfel turah dah tawp tawh ang.

Chung zawng ai chuan, ka pi te an lo haw har tawh ber mai, ka ngai tawh lutuk ringawt.

Ka phone a lo ri leh a, Pu Brandon-a a ni tih ka hre nghal, number hlang tawp la ni mah se, amah a ni tih ka hre lutuk ringawt.

"Aw, i buai lo em ni?",

"Ka buai zo chiah e", a lo tih chuan, ka nui sak ringawt. "Ni dangah chuan tukin ang khan biru tawh miah suh ang che",

"Awihawm loh, ka biru lo reng reng, ka lo thlen chuan i lo kal daih tawh", ka ti bah nawk. David-an a hrilh a ni ngei ngei ang, ka la hau dawn.

"I lu ang deuh ka hmu a, ka hmusual a nih dawn chu, i hmel ka hmuh chak nen", ka mit ka chhing sawk. Ka zak lutuk, min hmu tihna nimaw, zialo ṭhin lutuk.

"I sawi ho e ah", ka ti ringawt a, a lo nui hak. "Ka pi te an lo la haw si lo a, veranda-ah ka ṭhu, an lo haw hun ka chang char char", ka ti nang nang.

An lo haw har ka ti tawh lutuk ringawt, "Ka ngai tawh", ka ti leh. Ka thaw halh a, "Keimah nge anni i ngaih?", a lo la ti zui. Rorelliana tak hi chu aww.

"Ka chhungte ka ngai", ka ti daih. A zak ang chu, zawhna har deuh a siam man.

"Aw le, a nih, Office-ah khan va awm daih rawh, pawna awm lo khan. U Mami te inah chaw ei turin an kal a, tlai lam nen ei nghal turin min ti a, Office-a awm lo pawhin lo haw daih mai rawh",

"I kal ve dawn maw, chaw ei khamah in lo haw nghal dawn em?",

"Kan lo haw nghal dawn nia", a ti a. Office-ah reilote ka awm tur thu leh, chumi hnua ka haw tur thu ka hrilh a, a lo phal nasa lutuk, "I haw dawnah min lo hrilh la David-a ka lo tir ang",

"Aw le", ka ti vah a. Phone dahin in chhungah ka lut leh. Veronica pawh ka hmu tawh lo. Pindanah a awm a nih ka ring, Temuani chu bathroom-ah a awm tih, khâwl ri aṭang ka hre thei.

Office hawngin ka lut ta a, kawngka ṭha takin ka khar leh. Ṭhutthlengah bag dahin lehkhabu chhiar tur ka zawng a.

A ṭhen chu, lehkhabu hlui an ni tih hriat ngawih ngawih, a kawm tla tawh te leh a rawng hrim hrim pawh dâ lûk te an ni hlawm.

Pu Brandon-a lehkhabu chu an ni thei lo ang a, ka pu lehkhabu an nih ka ring. Pakhat lain ṭhutthlengah ka ṭhu a.

Ṭhutthleng bân nghengin ka chhiar, a ngaihnawm phian bawk nen, mu chung tein ka chhiar tawh vel.

Ṭhutthleng bân lukhamin ka chhiar a,,ka mut a tichhuak chu ka meng vâi ruai a, lehkhabu lah ka thlauh dawn dawn ṭhin.

Phone-ah dar zat enin a la hma tho avangin muthilh tumin ka mit ka chhing a, ka pi te lo haw hma chuan ka harh hman hrim hrim ang.

Eng thawm emawin min tiharh hlawl a, ka thâwk a rang em em lehnghal. Ka hawi kual a, khua a la êng phut mai bawk.

Phone dapin dar zat ka en a, tlai lam dar hnih chauh a lo ni. Ka ring(nghawng) a kham em em lehnghal.

Ka dawm vawng vawng a, ka delh sual a ni hrim hrim. Ka bag lah chu chhuatah a lo awm daih. Ka ṭhu chhuak a, ka lu a hâi thut avangin ka mit ka chhing leh vang vang.

Ka chhun mut vang nge ni dawn, ka phelh phang ni mai tein ka hria. Chutah, "I ṭha em?", tih thawm ka hriat chuan min tiphu nasa lutuk a, ka meng vat.

Mak ti deuhin ka en ringawt, min lo pan a, ka lo hawisawn leh daih. Engtikin nge a lo thlen hman ka hre lo, ka darah a kut a lo nghat chawrh, ka phu zawk lehnghal.

"Ka ṭha lawm, ka lu a hai deuh vang a nih kha", ka ti a. A nui hak. Ka bulah a lo ṭhu thla a, ka zâm chhe vel nia. Ka kun ngaih ringawt.

"Mumang ṭha deuh te i nei lo maw?", a tih chuan, "I lo thlenna a rei tawh em?", ka ti ringawt. Ka harha a lo awm danah a lo thlenna a rei tawh hmel.

"La rei lo, i harh tawh chuan ka va thlah ang che, i rilṭam em?", ka rilṭam tih ka hre chhuak chiah.

"Ṭam lo, a la hma em mai", ka ti a. Tlawmngaih ka chhuah ringawt. Min thlah a tum chuan inah awm daih ila a ṭha zawk ang.

"Ka haw duh tawh, min thlah tawh zawk rawh", ding hluai pahin ka ti a. Min pawt ṭhu rang lutuk, amah en thei turin min pawt hnai leh.

Kan ṭhut dun pawhin en chhoh tlawk tlawk a ngai. "Ngati nge i sân bik em em?", a khi suk. "Ka sâng duh a ni mai a, a nih, lo kal rawh le", ti pahin min thawhpui a.

David-a chu in lam panin a tlan a, Pu Brandon-a si chetin ka ṭhu, tukverh bulah ṭhu mah ila, ka boruak hip a rit ru riau.

In chhungah min lo zui lut ve a, ṭhutthlengah a ṭhu âwn duai nghal, a coat hak a phelh a, a necktie awrh a phelh thawl bawk.

Hetia ka ina a lo kal te hi a ṭha dawn miah loin ka hria, a mawi chiah lo bawk. "I inthlak dawn lo em ni?",

"Thlak lo mai ang, haw leh vat zawk la, David-an a nghak reng che sia",

"Aw le, mahse,,khatia ding reng lo khan ka bulah lo ṭhu phawt la", a tih chuan, ka lu ka thing nawk nawk.

Haw tawh zawk turin ka hrilh, khaw ên lai a ni a, mi hmai ka zah. Lo kal tum pawh nise, nidangah chuan lo kal tawh miah suh se.

Ding hluaiin min lo pan a, ka tawlh hnung ve hret, "Min hlau suh, engtinmah ka ti dawn lo.che",

"Ka, ka hlau lo che",

"A nih, tawlh hnung tawh suh", ka ding chawt. A palian si, dik tak chuan ka hlau ve deuh. Min lo pan chharh chharh mai bawk sia.

Min pawm kâng a, khum lam min panpui nghal chu ka tal vak vak, "Eng nge i tih dawn, min dahthla vat rawh", ka sawi zawh rualin khumah min nghat chawrh.

"I hre mai ang", a la ti zui. Ka ke tawmin ka ṭhu tlat a, a thaw ri hrawih. "Lo kal teh", ti pahin a lamah min pawt leh a, ṭha deuhin min muttir.

Min en chhuk run a, a la nui suk zui, min nem bet nghet si, "Engmah ti suh aw", ka ti ṭawk. "Thuawih deuha i awm chuan", ka bu nghat.

Thaw huaiin ka bulah a lo muthla a, min kuah bet nghal thlawp, "Ka mut a chhuak, nangpawh muhil leh rawh", a ti a. Ka meng kuau ringawt.

Ka muthilh hlanin eng thil emaw tih lo tum tase, a nih loh pawhin, ka in hi rawkin ka pawisa neihchhun leh ka bungraw hlu te min laksak tase.

Ka ngaihtuahna tak hi chu aww, a puitling thei hlawllo. Mahse, ka hlau ru ve reng.

Ngaihngam lo deuh chuan ka mit ka chhing a, Pu Brandon-a chu a thaw ri hruih hruih mai, a muhil tak tak nge mawni?

Min kuah bo vek, ka tê chem chem, tê tak ka ni, nautê ang chiah.

Ka harh leh chuan khua a lo thim fel hman der, Pu Brandon-a pawh a lo awm tawh lo. Ṭhu chhuakin kawngkhar lam ka en a, ka ruak huai zel hi a chhan ka hre tawh bik lo.

Ei rawngbawl pahin ka nu nen kan inbia a, "Serthlum ho pawh an sên ṭan tawh a, mawng vawm ba ang maiin a phi leh chûng tawh, a awm hle hle thei tawh lo", a ti a.

Kan pahnihin ka u sawisain kan nui dun hak hak, ka u chu a buai leh ngawt ang, a riahchilh leh ang a, huan chu a hung ṭha leh sek mai bawk ang.

Mahse, a thawkrim a, Pathianin mal min sawmsak bawk a, a rah duhin a rah lah a ṭha hlawm bawk si, a thlum tuiin a tui thei bawk si.

Chuti chunga zu a la in mai mai te hi aww, in tawh lo sela a ṭha ber. Ka haw hunah chuan u Sawma nen ka la hau leh ang.

Zinga ka harh ve leh inbualna tur tui ka lum a, ka lu a rit bur mai nen, ka muhil thei lo phone ka khawih char char a, zing lamah ka muhil thei chauh a, ka harh hma leh zel nen, ka lu a na vek.

Kawngka ṭha taka kalhin ngaihngam takin ka kalsan a, rukru pawh lo kal se, min khawngaih avangin thilpek min pe duh hial ang.

Chutiang khawp chuan ka dâ, mahse, ka neihchhunah ka lungawi a, tu thil mah ka awt mai mai bik lo.

Veranda-a Apaul-a ka hmuh chuan nuih ver verin ka pan a, a tlanin ka tlan. Ani pawh a lo nui ver ver.

Nikhat tawp kan inhmu lo a ni a, a ngaihawm hman lutuk ringawt. Vawiin nilengin inawm leh ila, lunglen pawh a zia mahna.

"Huanah kal ang",

"In chhungah lut ve phawt ila",

"Ka duh lo", a ti a. In chhungah luhpui loin huanah ka kalpui a. Min ngaih thu a sawi ve nasa.

Phulah ka din tir a, nghet tak chuan a ding ve thei tawh, mahse, ka la chelh reng tho. A ke tihchet dan a la thiam lutuk lo bawk, rei tak kal loa awm a ni tawh si a, a hriatthiamawm lutuk ringawt.

"Bawihte, i kal thei ṭep tawh a nia aw",

"Tak tak maw?", a tih chuan ka bu nghauh nghauh. "Sikul pawh maw?", a tih leh chuan ka bu nghat.

"Yesss", tiin a au hluai. A lawm tih hai rual a ni lo. "Mom",

"A ti leh ta, nutê tiin min ko rawh ka tih kha",

"Ka duh lo", a ti chuai raih. A rukin ka nuih a, a tûm bur mai.

"Nutê tiin min ko la, keipawhin Zela tiin ka ko ve tawh ang che",

"Ngati?",

"Inkoh dan tur dik tak alawm a nih,,i hming kha i hre tawh lo em ni, Zirsangzela a nih kha?", ka tih chuan, "Ka duh lo", a ti bul hmuk.

Ve deuh ngei chuan, ka dêk a, tawm chawih chawihin a nui vak vak. "Phakar lutuk mai, chimawm bawk si", ka ti a. A nui khêk duai duai.c

A nui ri te hi ka lo ngai hman lutuk alawm, ka pi a lo kal a, nimin lama an kalna te min lo hrilh. Ka hriat thu te sawiin, ka haw daih thu te ka sawi a.

Pu Brandon-a nena kan inkar hre tase, ka pi hian engtin nge min tih ang aw? Min duh lo ngawt ang.

Ka pi chu ka en a, ka khawngaih ta tlat. Thutlukna ka siam hma lutuk ang em le?

Ka pi bakah ka pu pawhin hre tase, an remti miah lo ang. Kei ve mai mai hi, ngaihzawng tur atan takngial pawhin min duh miah lo ang.

Chu loah, Pu Brandon-a pawh hian min duh tak tak ka ring ta lo, a hmaa a sawi pawh kha, a fapa tan nu a duh a, keiin fa ka duh tih a hria a, chumi chu chiang takin a hria a, chumi ṭanchhanin nupuiah min sâwm reng bawk a.

Kan kalthui hmaa kan inkar tihtawp hi a ṭha dawn tlatin ka hria.

"Mazai",

"Aw", phu zawkin ka ti a. Ka pi a nui huah huah, "Eng nge i ngaihtuah a?",

"Engmah mawle, thil ṭangkailo pui pui hi ka ngaihtuah a",

"Chuti ngaihtuah tawh suh, thil ṭangkai deuh ngaihtuah tawh rawh", nui varin a ti a. Ka nui sak ringawt.

In chhunga luh ka sawi chuan, ka piin lut rih lo turin min hrilh vat, "An pafa thumin an inbe lawk a nih kha", a tih chuan, Veronica, Pu Brandon-a leh ka pu te an ni tih ka hrethiam mai.

"Keimah ka va lut ang, tikhan lo awm rawh u", ti lehin a kalsawn a. Apaul-a chu ka en a, nu leh pa kara seilian lo atan chuan ka lainat.

Mahse, a nu leh pate ṭha taka an inrem leh tur chu ka ngaingam leh tawh bawk si lo, ka rilru a buai ve ṭan.

Apaul-a chu ka hmaah ka dintir leh a, "Bawihte, ni tak, Zela, Mom leh i pa te bula awm i duh em?", ka ti zawi sap.

A ruk tak chuan duh lo se ka ti lutuk ringawt, "Ngati nge?", bo deuh hian a ti a. Âtthlak ti deuhin ka nui hak. Naupang chunga ṭuan lo tur ka ni asin mawle.

"Ngati mah ni lo e, i pa leh Mom te an inrem tluka ṭha a awm hleinem tiraw?", ka ti a. A bu ve nghat.

"Ka mut a chhuak", a ti thâm ṭiak, ka pawm a, a hnungah ka chul hliau hliau. A muhil nghal maiin ka hria.

Ṭhutnaah ka ṭhut chhohpui a, "Bawihte, in rilru ang hi neih ka chak ngawt mai, tunah chuan rilru pawh a thianghlim thei tawh lo", ka rilruin ka ti a.

Pu Brandon-a te chuan eng nge an sawi ang aw, inrem lehna tur chu ni lo hrâm sela, ka lu ka thing nawk.

Rilru pawh a thianghlim tak tak thei tawh lo a nih hi!

Temuani lo kal chu ka nuih a, ka bulah lo ṭhu vein, "A va mutui em em",

"Nia, a mut a chhuak em a nih hi",

"Zungbun kha", a tih chuan, sawi tawh lo turin ka lo ti thuai. A khawngaihthlak hnep hnup em mai.

"U Roan tumah hrilh lo turin min ti a, mahse, hre ve turin ka duh che", a tih chuan, mak ti deuhin ka lo en.

"Veronica-in i bag-a a dah lai ka hmu a, u Roa lo haw ve leh hrilhin, amahin a la chhuak a, keimah zawk kha la anga insawi turin min ti a", ka chek hlak.

Pu Brandon-an a lo hre lawk sa maw, Veronica pawh chu, "Veronica kha mak ka ti tawp, kawm a nuam sia, a fel viau turah ka lo ngai a, mahse, khatia i bag-a a dah lai ka hmuh erawh kha chuan ka hmuh dan a dang vek.

Tun thlengin biak pawh min la be lo, ka ve hmasa duh si lo a, a mak e, Sap te chu kan ngaihsan tehreng nen", a ti a.

A thaw halh halh, "Sapah pawh a fel leh fello an awm ve ṭhin tho alawm", nui varin ka lo ti a.

Ka bag-a zungbun a dah chhan niawma lang chu, rukruah min ngaiin an inah kal tawh lo turin min ti sela, chusn amah thlamuang deuhin a awm thei ang a, chumi vang a ni ngei ang.

Buaina ka siam nge siam lo, Veronica pawi ka sawi pawh a ni si lo.

"U Roa nen an inrem leh theih nan a ṭang nasa bawk sia, ka pi leh pu te chenin ngaidam tawh mah se, u Roa hi chuan a neih duh leh ka ring tawh lo, a sual em mai", Temuani chuan a ti nang nang.

"Zela hi ngaihtuah la, nu leh pa kara seilian lo atan chuan a lainatawm em mai, tihsual te chu kan nei vek alawm", ka ti a.

Ka chhungril tak tak aṭanga sawi erawh ka ni lo thung, a hming amawia sawi ve mai chauh ka ni.

Inrem leha innei ṭha leh turin duh mah ila, inlaichinna ka lo neihpui leh tawh bawk nen, ka chhungril ber aṭang erawh chuan ka duhpui tawh miah lo.

Mahse, Zela hi, naupang mai a ni a, nu leh pa thlazar hnuaiah seilian ngei se tih ka duhpui tho bawk a.

Keiin a nu nih tumin Pu Brandon-a nei duh pawh ni ila, ka pi leh pute, min duh dawn lo tih a chiang sa.

"Ngati nge i ngawih reng a?",

"Ka ngawih reng ṭhin tho kha, a hma pawhin",

"A ṭha alawm", ka biang rawn tawk zeuhin a ti a. Zanin chu ama'n a khalh a, David-an min lo telpui tawh lo.

Kan thleng a, "Englo, kan inah lo kal tawh suh aw, ka tih awmzia chu, ṭhenawm khawvengte mitmei ven ve a ngai si a. Keimah bakah i tan paw'n a zahthlak, i sumdawnnain a tlakchhiah phah ang", min melh ralh.

A pawm zawng a ni lo tih a hriat ngawih ngawih, ka nuih tlawn tihtih tawp.

"Thu leh hla i ngah lutuk", a ti hmuk. "Ka ngah thlawt lo, ka duhdan ka hrilh vawikhatna che a ni ang, nang erawh chuan i duh dan dana min awmtir i tum", ka ti leh a. A chek tlawk tlawk.

"Aw le, i duh ang chuan ka lo kal tawh lo ang, mahse, ka thlah haw ziah tho ang che", a ti a.

"Good boy", ka ti a. Ka zak leh si chu ka lei ka seh tut, ka hawisawn daih bawk a. Ka chhuk rang lutuk.

Hawi let tawh loin ka kal nal nal, ngati nge mawni, ka chet ṭhin(ṭhing) theih em em mai le.

Nakinah, kan pahniha inkar hi chiang deuhin ka la sawipui ang.

A tuka ka kal leh chuan Veranda-ah Temuanin Apaul-a a lo ṭhutpui a, David-a pawh a la awm danah Pu Brandon-a a la chhuak lo tih a hriat bawk.

"Mom", Apaul-a, ni tak, Zelan a lo tih chuan, "Zirsangzela tak hi chu aw", ka ti hlak. "Sorry", a ti sup.

Wheelchair aṭang ka pawm kâng a, ka mal chungah ka ṭhuttir, "Nizanah Veronica leh u Roa an inhau a, Sap ṭawng a nih avangin an inhnial chhan ka hre thei lo. Veronica lah haw a tum tawh si lo a", Temuani chu ka beng bulah a lo phun sar sar.

"Tunah pawh an la buai deuh, haw daih se, a intimualpho mai mai a ni, a khawngaihthlak zawk e ah", a ti zawi leh sap.

Temuani pawh chu a ngawi ta ren rawn a, keipawh ka ngawi reng, sawi tur ka hre lo reng reng.

Kan boruak chu a ṭang lutuk ringawt, pawn lam boruak pawh tiang hi a nia, chhung lam boruak phei chu, a ṭang nasa dawn lutuk.

Ka ngaihtuah zawng ringawt pawh hian ka hah thei, Zela chuan a Buzz-a a chhaih mial mial a, ka nuihpui leh ṭhin.

Tunah tak hi chuan, naupang ni leh thut pawh ni ila, ka hnial lo hrim hrim.

David-a leh Temuani te hoin huanah kan kal a, min lo zui ka ti mai. Zela nen phulah ṭhuin, David-a thingkung bulah a ding a, Temuani pawh ṭhutnaah a ṭhu.

Kan vai mai chuan eng emaw tak chu kan ngaihtuah hlawm a ni, kan ngaihtuah a inang vek ang em le?

Ka phone ri chu Temuanin ka bag aṭanga la chhuakin min pe a, ka uin tun anga min lo phone chu mak ka ti deuh hlek.

"Aw, u, eng nge ni ta?",

"Lo haw ta che, ka nuin a liamsan hma che hian",

"Loah an riak dawn em ni, buh pawh in seng tawh sia, chubakah, loa riah hun pawh a nih tawh loh hi", ka ti a. Mahse, keimahah hlauhthawnna a lo inṭham nghal er er.

Ka uin liamsan a tih chuan ka thauah min nghal bawk a, "U, eng nge maw sawi i tum le?", ka ti leh.

Min chhang loin a ngawi reng a, signal a ṭha lo emaw tiin phone ka en a, a ṭha vek bawk si.

"Hello, u, min hre thei em, i la awm maw?", ka ti a. Ka u insut ri hrawih ka hriat chuan ka kut a sâi nghal hlawk hlawk.

"U, ka nu chungah engmah a thleng lo tiraw?", âw khûr der der hian ka ti a. Ka mittui a luang nghal zung zung.

"Mazai", Temuanin ka dar a lo vuan a, "U, engmah a thleng lo tiraw?", ka ti leh.

"Mazai", ka pain a lo tih chuan, ka nu chungchang ka zawt thuai, "Tukin a vawk chaw pe a tlu sual palh a, lo hawna tur i nei thei ang tiraw? Mazai, i nu chuan Vanramah, i fate bulah min kalsan ta a nih hi",

"Ka, ka, ka nu leh, ka fate, Vanramah, an inhmu dawn", ka ti chhuak ṭawk. Ka taksa pumin ka khûr a, ka bengah phone ka la dah reng, "Chu, chu, chutiang a ni thei lo", thâm ṭiak hian ka ti a.

Ka nuin min kalsan thei lo ang!


Show post links
Top

[Ngaia]

Tiam tlat e
Chapter-15
Ziaktu: Cck Lalchhuanawmi

Ka nuin min kalsan thei lo ang!

Kan khua kawtchhuah kan thleng a, a ngui ruai mai hian ka hria, mawina reng a nei lo.

Kan in thlen hma deuhah kam ding a, chhuk thuaiin kan in panin ka tlan vawn vawn, ka rilruin ka nu ka au pah zel bawk.

Tlan pahin ka mittui te chu ka kawrin ka han hru leh ṭhin. Mi pungkhawm an tam tual tual a, kan in ka hnaih ve zel bawk.

Min hmu tu te chuan kawng min kian zel a, "Nu", tia in chhunga ka tlan luha khuma ka nu mu ka hmuh chuan ka bawh thla rawk!

Ka khâ a chih a, ka khûr hlawk hlawk a, han chham chhuah tur reng reng hi ka hre lo. Ka nu dara kuah liamin ka ṭah khum bawrh bawrh ringawt.

"Mazai, lo tho chhuak teh khai", ṭhutthlengah min ṭhuttir a, ka nu hmel nunna reng nei tawh lo enin puana ka kâ hupin ka ṭap hawm hawm.

A changin khum bulah ṭhingṭhiin ka nu biang vawt tak te chu ka chul kual a, eng thu mah chham tur ka hre lo pawh chu ka inhaw(inhua) ngawih ngawih.

"Ka nu", ka ti chhuak thei ṭawk. Nung damin kan inhmu leh dawn emaw tih laiin, ka awmbo rei lutuk mah mah em ni?

Ka nu ringawt enin ka ngaihtuah a, thildang engmah ka ngaihtuah thei lo. Ṭah pawh ka insum duh lo a, ka mittui luang ina ka hmai a tibal te pawh chu engah mah ka ngai thei tawh lo.

Ka mit thip hlur te chu thupui bera neih chi pawh a ni lo. Puanin ka hnar chin khuhin ka ṭap tlawk tlawk ringawt.

Mittui pawh an tlem tial tial, "Nu", tih chauh chu ka sawi chhuah theih a ni mai!

Kuang an rawn zawn luh ka hmuh chuan khumah ṭhuin ka nu chu kuah ṭawk ṭawk. A la hma lutuk, ka thlenna pawh a la rei lo.

"Mazai, ti teh, intipachang rawh le", ka hnung chul thuak thuakin an ti a. Ka nu biang ka fawp vang vang.

"Mazai, a tawk tawh e",

"Ka duh lo, ka phal lo, ka la kham lo, a hma em mai, hetiang hi chu a ni thei lo ang, a thleng tur a ni lo", ka nu nghawngah ka kuah tlat.

Min chelh bet a, kuang chhunga ka nu ruang, ka nu ruang!

Ka nu ruang dah tura an chawi chuan chhuatah ṭhingṭhi hnawkin puanin ka hmai ka khuh a, hawi chhuakin an chhin dawn chuan ka nu chu ka va kuah leh, "Nu, ka la kham lo che asin, heti ringawt hi chuan min kalsan thei lo ang, i muhil lo harh tawh rawh, loah te kal ila, ka u Serthluam huanah kalin a rah ṭha ṭha leh pum lian te lo leh ang.

Zuar turin khawpuiah kan kalpui leh ang a, ka pa hoin aiawt chiah te en turin kal leh ang u, lo tho tawh rawh, i muhil rei tawh lutuk", ka tha tawp hian ka ko a ni ber.

Min chhangtu tur a awm tawh si lo, kan inbiak hnuhnun ber pawh a la rei lo lutuk, hmaichhan ngeia kan inbiak hun ka nghahhlelh tehreng nen.

Tuna kan inbiak dan hi chu ka duh hlawllo, keimah char charin ka bia a, min chhang ve duh bawk si lo, lungawi a har em mai!

"Ka fate u, in pi kha lo duat rawh u aw, kei aiin in bulah a lo kal hmasa ta si a. Ka nu, ka fate bulah ka hmangaih thu min lo hrilhsak rawh aw", ka thinlungin ka au rawng rawng.

Ka nu awmna kuang chu an dah thla riai riai, thlan ko tlangah ṭhingṭhiin ka thlir zui vawng vawng, a va na tak em!

Kan inhmuh hnuhnun ber kha chuan a la damṭha lutuk asin le aw, nat lawkna pawh awm miah loin min kalsan a, Pathian rorel dan hi a fuh lo ṭep chu a ni.

Ka nu boral cham kar thumna a tlin chuan thlanmual panin zing karah ka kal a, kalkawnga Di par leh eng hnim hnim emaw par te chu ka lakhawm phei zel.

Kan in bula kan pangpar neih Arngeng par(Midum par kan tih ṭhin bawk kha) leh, Kungpuimuṭhi par te chu ka thliak bawk.

Ka nu thlan ka thlen chuan ka tifai hmasa leh phawt, pangpar ka ken chu ka dah a, ka ṭhu vang vang.

Ka fanu thlalak(A thlalak tak tak a nih loh kha aw) leh ka nu thlalak ka neih chhun te chu ka phawrh a, thlalaka an hlim ai hi chuan Vanramah an hlim dawn tih hi ka chiang.

Van aṭangin min lo thlir ve ang em le? Isua bulah an tlei dawn lutuk a, anmahni ngaia ka ṭah ka ṭah te hi an hre lo tawp ang, ka lung te a leng em tih lah hre turin Vanram aṭang chuan lei lam an lo bih duh miah lo ang.

Ka nui sak a, thlalakte chu ka chul ka chul, an hmelṭha dun lutuk a, thlir nin an har, "Ka va ngai tak che u em!", ka ti sap.

Thlalaka ka mittui farte chu ka hru a, ngaih bân ni reng ka nei dawn lo a nih hi. Vanrama kal ve ka chak tawh lutuk.

In ka thleng a, ka u vawk chaw pe zo nen pawnah kan intawk, kalkawng cement-in a zût chhuak vek, thinrim tak hian a zût ri rak rak mai ni.

Ka u pawh hi tun thlengin a la biak ṭawng theih mai mai loh, ka pa pawh a ngawi rei tawh lutuk.

Kei ai mah pawh hian an khawngaihthlak leh tawh zawk. Tap chhakah ṭhuin ka u ei rawngbawl chu ka chhunzawm a, chawhmeh ṭhing chhuan lum a ni mai.

Ka nu boral aṭang tumahin chaw kan lam nawn ngai lo reng reng, buhtlei chanve hi kan puar pui lutuk, buhtlei chanve pawh a tam mah mah zawk.

"Chaw ei ka siam, lo kal rawh u", ka u leh ka pa ka au a, muangchangin an lo kal chharh chharh.

Chhuatah kan pathum tein kan ṭhu a, inbe loin mahni thlenga mi kan ei mial mial. Kei chu, chaw ei laia ṭawng ka thiam loh bakah, ka nu ber a awm tawh si lo.

Chaw ei kham ve leh huanah ka u a kal a, "Chulah ka va kal mai mai ang e, inah awm reng zawng, a ninawm duh em mai", ka pa pawhin a ti a.

Chempui lain a iptepuiah a ak a, chul lam panin min liamsan ve leh. Kei erawh inah ka awm thung.

U Sawma a lo riak zantin ṭhin a, in riak awm tawh loh hnuah pawh a lo riak reng. Remchangah lain zu in tawh lo turin ka u nen ka hrilh ṭhin a.

Zantin rui lo mah se, ruih zeuh chang erawh an nei, vawk pawh ka uin a talh hmak. Thinrim tak a ni, vawk in panna kawng pawh cement-in a zût vek a, thinrim ṭeuh chungin vawk in pawh a ṭhiat.

A talh vawksa pawh pakhat mah kan ei lo, vawk tih pawh hi in chhungah kan lam ri ngai lo hrim hrim.

Pawi ka ti lo bawk, vawk vang vek, a sa a tui tehreng nen, sual lutuk mai.

Phone ka en a, Siamtein *Christmas hmang turin ka lo kal zawk dawn nia aw, min hrethiam rih rawh, ka inthiamlo ve lutuk a nia* a lo ti a.

*a pawi lo, a ho lutuk, i lo kal tawh tho kha, hahdam deuhin awm rawh* ka va ti a. Min lo chhang lo, an la chawl lo pawh a ni mahna.

Ka nu a boral tih an hriat rual rualin Nunga nen an lo kal a, kei chuan engmah ka hre tawh lo, engtin nge ka lo chhawn pawh ka hre tawh lo.

Phone dahin tukverhah ka hawi chhuak a, mahnia awm ngawt ngawt chuan ngaihtuahna a kal thui duh lutuk, lu sûn ngat phei chuan!

Chutah ka phone a lo ri a, Pu Brandon-a number pawh hi ṭha deuhin a hming ka la dah lo reng reng.

"Eng nge i an zel?",

"Ka ṭha tawh lutuk",

"I chiang maw, thlanah te kalin i ṭap leh chiam em?", a tih chuan ka ṭhen sak. A hriatna hi a ṭha thei si.

David-a nen khan min hruai a, kei berin ka ngaihsak thei si lo, a sawi danin car aṭang min lo thlir ngawt ngawt.

Zing khat, thlana ka kal ka ṭap chiam chu min awmpui tawh bawk. A sawi dan lehin tlang takin a lo inlan ngam bawk si lo a, min thlir turin a ruk thei ang berin a lo kal a, thlanah min lo hmu ta a ni.

Mahse, khami hnu aṭang kha chuan a lo kal leh tawh ngai lo, ka ngai ve reng mai.

"Zela a damṭha em?",

"Ṭha chiah lo",

"Ngati nge?", ka lo ti vat. Ka ngaihtuah lutuk ringawt, ama tawkah kha chuan a hrisel ṭha viau asin mawle.

Chutah, hlauhthawn ruk ve laiin, "A ngai lutuk che a, chuvang mawle", a tih chuan, ka ner sawk.

"I va sual tak, damloh thu hla te chu fiamthuna chi a ni lo nia, lo damṭha reng rawh se, duat ngawt ang che, a nih loh chuan ka khai zai dawn che a nia", ka ti lang lang.

A lo nui hak a, "Nui suh, duat ngawt ang che, a nih loh chuan ka sawi kha, ka khai zai duh tak tak ang che", ka ti hlak.

Dam zet hian, "Aw le, i thu vek alawm", a lo ti a. "Nangmah zawk kha inenkawl ṭha hle ang che, kan induat hman hmain i kalbo daih si a, mamawh i neih chuan min lo hrilh hreh hauh suh aw", a lo ti dap dap.

"Ka lawm e",

"Lawmthu sawi a ngai lo, helamah lo kal ve tawh la ka ti, a nih loh pawhin, ka nu leh pa te hrilh a lo hruai tawp mai che ka duh", a tih chuan, ka nui ver ver.

Khumah ka mu thla a, "I duh dawn lo tih pawh ka hria, mahse, keimah hian ka duh, tleirawl anga inchhai tak tak tur chuan kan lung a fing tawh.

Inchhai dan tur tactic leh lo hnar zel dan tur kan hre vek tawh a, chuvang chuan, tih huk hi kan pahnih tan a ṭha ber", Pu Brandon-a chuan a ti leh dap dap.

Nui ver verin ka lo ngaithla ringawt, a ngaihnawm zawk alawm le, "Min ngaithla em?", a lo tih chuan, ka ngaihthlak thuin ka lo chhang.

"I ngaihtuahna hi a mak reuh e", ka ti a. A rum nghut. "Vawiin chu ka ṭawng hnem ve hle mai", ka thaw halh.

Ṭawng hnem a inti ve chu ni si a, "A hma zawng pawhin i ṭawng hnem tho alawm le", ka ti leh a, "Nia", ti ringawtin min chhang.

Chutia ka sawi vang nge ni, a ngawi ta vang vang, phone chu ka en leh ṭhin a, phone a titawp bawk si lo.

A titau nge ni dawn, "Titau rual i nih tawh loh kha aw", ka va ti a, "Ka hria", a lo ti bul hmuk. Keimahtê chuan ka nui hak hak.

"Nangpawh, mi bâwl rual i ni tawh lo", a lo ti ve leh, ka nui hak hak a, "Ka hria", ka ti bul ve hmuk. Mahse, a nui nasa saah ka ṭang.

Titau rual leh mi bâwl rual chu kan ni tawh lo a ni, "Engtikah nge i nui hmel ka hmuh theih ang le?", a lo ti a. Ka nui lai ka tawp riai riai.

Min tilungchhe dawn lawm, "Min ngai ve em?", ka sawi zawh rualin ka mit ka chhing sawk. Ka zak lutuk ringawt. Kum tam tak hnua han intih nô kual leh vel.

"I va han fing tak", a lo ti chu, ka ke ka per vak. "I va sual tak", ka ti hlak. "Hre lo der ve mai ta che",

"Ka hre bawk sia", a lo ti chu, "I sual reuh e ah", ka ti leh hlak. "Inthlêm kual ka peih tawh lo nia aw", lungawi loh hmel zeta a lo ti chu, ka kâ hupin ka nui khûr char char.

"Thlawi ve ve inchhai chu kha kha a ni mai", a lo ti leh a. "A â zawkah ka lo ṭang mai ang e", ka ti a. A lo nui hak hak.

A lungfing ve ve tawh kan ni si a, a sawi dikna chen pawh a awm, tleirawl kan ni tawh lo a, nula tlangval pangngai lah kan ni hek lo.

Tleirawl emaw nula tlangval pangngai anga han inchhai tur chuan, pakhat zawk zawk kan ât thiam a ngai.

Ka nui sak, "Ka lawm lutuk aw, min lo tihlim ṭhin a, Thlasik a inṭan mai tawh nen, Christmas te hi a hnai telh telh a, lunglen a zual tawlh tawlh emaw tih tur a ni",

"A lungchhe zawngin ngaihtuah lo la, thil pakhat, i bialpa anga i sawi chu ka zawng chhuak a ka phum bo tawh aw",

"Eng maw?", ka ti hluai. Ka hmui hnuai ka seh niah niah, "I hriat ang kha a ni mai", a lo ti thum dut.

Min tihhlim a tumnaah ka ngaihsak hmiah, ka bialpa zawng chhuakin a phum bo a nih chu, a va han bawn mai mai tak.

"File pakhat chinfel lawk tur ka nei a, nakinah ka lo be leh ang che, inngaihtuah ngut ngut lo la aw",

"Aw le, i buai laia ka lo phone che ka hlau si a, min lo phone hun ka lo chang ṭhin dawn nia", ka ti a. Kan inbiakna kan titawp zui.

Ka mittui a luang nghal ngiai ngiai, ka bawk a, phone chu ka en kual vel mai mai.

Ka nu thlalak te chu ka en a, thla pawh lakpui thei loin kuang ka bawh tawp kha a ni a, ka ngaihtuah thui ngam ṭhin lo.

Pu Brandon-an Zela thlalak min lo thawn chu ka en leh a, a khi vur vur reuh a, a sam buang thek te nen a duhawm ngawih ngawih.

Veronica kha, engtin nge a awm zel tak ang le? Inah khan a la awm tluang zel nge? Pu Brandon-a ka zawt ngam bawk si lo, ani lahin min hrilh ve a tum bawk si lo.

Min hrilh hun chu a la awm vein ka ring, a nih loh pawhin keimah hian ka la zawt pawp mai ang.

Reilote ka muhil a, ka harh chuan tlai lam ei rawngbawl a hun chu a ni mai.

Mei chhemin tui ka lum leh phawt. Ka pa pawh a lo haw chawpchilh nghal. Tuilum ka chhuan chiah thu leh nghak lawk turin ka hrilh a.

Kawngka bulah ṭhuin pawn lam a thlir vung vung. "Mazai, i nu hi lo haw tur ang tein ka hre tlat ṭhin", ka pa chuan a ti zawi sup a.

Tui in tur pek pah chuan, "Min ngaihtuahna chang pawh hre loin a lêng reng a, a lo haw har ngawt ang", ka ti a.

Ka pa pawh chu a nui huah huah, a lukhumin a inzâp a, a thlan nasa lutuk ringawt. Chula thlamah a ṭap tih ka hre mai, a mit a dik lo.

Ka pa inbual zawh hnu chuan ka u pawh a lo thleng ve leh, "Zanin chu, huanah ka va riak tawh teh ang", a lo ti lut.

"Serthlum an lian tawh hlawm si a, an bo a hlauhawm", chhuata ṭhu thla pahin a ti a. Zozial leh a meitalh phawrhin a pak khu nghal hluah hluah.

Buaithlak ṭhin, lian pawh nise an hmin tawh tih em pawh a ni si lo. Mahse, a riah duh chuan va riak rawh se, inkhap dai theih pawh a ni lo.

Hun thawl a mamawh ve tho, mahse, zu a in vak ang tih ka hlauhpui ber.v

"U, zu va in nghek suh aw", fiamthu titak deuh tak hian ka ti a, a lo ner sawk, a in dawn tih chu ka chiang lutuk.

Engtikah nge a bansan ve ang aw? Bansan hun chu a la nei ngei ngei ang, ka nuin a vuak ṭhin angin ka vaw(vua) ve ṭhin dawn nge mawni?

Chaw ei khamah u Sawma a lo kal a, ka u nen an mutbu an tel nghal sawk sawk. U Sawma rim a dang nghal pang a, huan an thlen thlak hunah ka u pawh, a rimtui sawt sawt mai ang.

"Va fimkhur ula, zu ringawt ngaihtuah lo ula aw", ka ti.a. u Sawma chu a bu nghauh nghauh. Hahthlak thei si.

Ka hmuh theih chin zawng chu ka thlir a, ka ngaihtuah dun em mai.

Ka pa inkhawm turin a liam a, kei erawh inah ka awm thung. Ka dinhmun lâi lutuk hi a ngaihna a awm lo.

Ka nu dam lai chuan a bulah ka ṭhu ṭhin a. Tun aṭang chuan, ka nu dam lai kan ti zel tawh dawn chu ni sia.

Pindanah tlan lutin khumah ka bawk thla a, "Nu, a dam lai chuan tih i ngai zel tawh dawn chu a ni si a, ka rilru hi a na lutuk", ka insut hlawp hlawp.

Ka nu chanchin sawi dawn pawhin, "A dam lai kha chuan", tih zel a ngai tawh dawn. Ka rilru a na em mai!

Ka phone a lo rik chuan ṭhu chhuakin ka chhang thuai, "I ṭap em ni?", a lo ti nghal.

"Umm, ka nu ka ngai lutuk a, ka nu chanchin sawi dawn pawhin a dam lai chuan tih zel a ngai tawh dawn a, ka rilru a na lutuk", ṭap ṭeuh chungin ka ti a.

Ka mittui te pawh chu hruk ka tum lo, "Kawngka min lo hawn la, pawnah ka ding",

"Tak tak maw?", ka sawi zawh rualin pindan aṭang ka tlan chhuak thuai. Kawngka ka hawng a, "U Ro", ti sapin, ka kuah thlawp.

Ka ṭahkhum nghal bawrh bawrh, in chhungah min luhpuiin kawngka a khar ṭha a, ka hnung a chul hliau hliau.

Ṭhutthlengah min ṭhutpui a, ka la kuah reng, ani pawhin min la kuah ve reng tho.

Ngawi rengin min ṭhutpui a, ka ṭap thawm bak hriat tur a awm lo.

"I duh chen chen ṭap rawh, ka kalbo miah lo ang", a ti dam dup a. Ka thla a muang hliah hliah.

Ka ṭahkhum ta nghek a, hreawm chu a tiru ve tho ang. Ka hmai ka phih zo, ka hruhul pindan aṭanga ka chhuah chuan a bula ṭhu turin min ti nghal vat.

Ka ṭhu ve mai bawk a, ka chhungte an la awm chuang lo. "Khawiah nge i chhungte?",

"Ka pa chu a inkhawm a, ka u erawh huanah a ṭhianpa nen an riak, Serthlum a ngaihtuah tawh lutuk a. Chhunah kan inbia emaw tia, zana i lo lan hlawl chu, David-a lo kal ve em, khawiah nge awm?", pawn lam ka thlêk nghal du du.

"Duhtawk ve teh, zawhna i ngah lutuk, keimahin ka lo kal, ka lo biak che pawh kha kawnga ka chawlh lai a nia", a tih chuan ka nuih saih.

"I va inpe zo tak em, ka phu lo tlat chein ka hria", ka ti chu, ka chal a pen tai tai. "Ka hmuh lai che hian han nui teh le", ka khi ṭhaw. A lungawi loh hmel lutuk.

Nautê ang maiin a mal chungah min pawm a, a âwmah ka bei leh ṭhin, a coat-in min khuhbo vek zel bawk.

"Ka pa a lo haw ṭep tawh ang, hrilh ila",

"Aw le, ka nu leh pate pawh hrilh thuai ila ka ti",

"I thu thu", ka lo ti a. Lawm tih hriat takin min en a, "Zanina ka kal leh nghal a ngai dawn, Zela ka awmbosan rei thei lo",

"Tehreng, eng lo, Veronica kha-",

"A haw tawh alawm", a tih chuan ka thaw huai maiin ka hria. Mahse, ka zawt zui zel ngam tawh lo. A haw tawh chuan a ṭhat hlauh chu, ka rilru a chhiat hmel tawp.

"I pa lo haw hma chu", ka hmui a khawih zeuh, "Midang lo kal thut ta se, a chi dawn loh lutuk", ka ti a.

Inngaihtuah niawm hrimin a ngawi vung vung, chutah, min chhuk tir a, kawngka a va kalh sawk sawk.

Kawng hnai ami tukverh te pawh a kalh vek. "Tikha chuan, tumahin min lo tibuai lo ang", lo phei pahin a ti a. Ka nuih ver ver.

Min pawm ṭha leh a, ka biang dawmin min fawp a, a nghawngah kuahin ka thiam angin ka fawp let ve mawlh mawlh.

Kan infawp rei tual tual chu, keimahah ka hriatṭhan tawh tih hriat tak hian eng eng emawni a lo lang zut zut a.

Chu chuan min pui tharin, min fawh dan ang zela fawh let thiamna leh ka kawr chhung zena ka taksa a chul kual te chu dawnsawn dan tur ka hriat theih phah.

Rei tawk fang kan infawh hnuah kan inthlah a, kan inen vang vang. Chutah, kham lo tih hriat tak leh, ṭamchhawl ta ang maiin kan infawp leh bawrh bawrh.

A mal chunga ṭhu ka ni bawk a, Pu Brandon-a thisen, u Roa thisen lum nasat zia ka hre thei.

Kan tawp lo a nih vaih chuan a tawp kan thleng thei takngial dawnin ka hria. Keimah zawk hi a titawptuah ka ṭang thei tih ka hria, mahse, min hneh lutuk a, tawp turin ka ti phal bawk si lo.

Ka biang tawn tawnah a dawm a, duhthawh zet hian kan infawp. Chuti chung pawhin min hneh lutuk.

Ka inla hrang deuh hlek chu, "Tawp ang aw, thil ṭha lo a thlen hmain", thaw hluamin a ti a.

Keipawh ka thaw halh halh, "Ka, ka tihpalh", ka ti a. Ka sam hnawk nuaih chu a hui ṭha mawlh mawlh.

Ka mit chhingin thâwk ka la vang vang. Ka chal a chalin a lo si a, kan thaw dun ham ham. A thisen lumna pawh chu a dai tual tual bawk.

"Khatiang kha a thlen ka ring miah lo",

"Thleng lo se chu a dik lo zawk alawm, kan hun tawnin a zir em mai", a tih chuan, ka nui hak. Ani pawh a nui ve hak hak.

Reilo te min fawp leh a, kan pamgngai leh ta thlapin ka hria.

Khatianga kan awm kha ka ring miah lo tak tak, mahse, kan hun hmasaah kan lo chhin fel vek tawh avangin khatiang thlenga awm kan nih ka ring.

Insumtheihna kan mamawh dawn ta ber a nih hi!

Ka pa pawh chu a lo haw har em avangin haw mai a tum a, pawn thleng ka thlah, "Nuthlawi rimna a hla veng veng hle mai", a tih chuan ka beng hlak.

"Va fimkhur la aw, i thlen ve leh min lo hrilh nghal dawn bawk nia", ka ti a. Min kuah leh tê tê.

"Engtikah nge i lo kal ang?",

"Serthlum a hmin hunah aw, Aizawlah zuar turin kan lo kalpui dawn nia",

"Aw le, chumi hma pawhin lo kal thei la ka ti em mai", ka biang dawmin, a kutzungpuiin a tuai heuh heuh.

"Muttui le", ti supin min fawp leh zuk. A tlan liam thlengin ka thlir a. A sawi dan takah, a lo lenna a hla veng veng em mai!

Ka ngai hlawm ve tawh tho si a, Serthlum hmin hma pawh hian ka va kal zawk dawn mawni?

Mahse, in lamah, ka u te hi, an pahnih chauh chuan ka ngaihtuah ve bawk si. Ngaihtuah ṭhat leh a ngai dawn a ni.

Ads click hi ti hram hram ang u aw, ads kan click atang hian writer ten hlawh an lo neih ve phah thin a, story min ziahsak man lawmthu sawinan ads kan click theuh dawn nia



Show post links
Top

[Ngaia]

Tiam tlat e
Chapter-16
Ziaktu: Cck Lalchhuanawmi

Mahse, in lamah, ka u te hi, an pahnih chauh chuan ka ngaihtuah ve bawk si. Ngaihtuah ṭhat leh a ngai dawn a ni.

Kan in bul hnim ka thlo fai a, kan pangpar neih chhun te pawh chu ka siksawi a, Derhken ho pawh an kuhmum ṭan der tawh.

Christmas te pawh a thleng ṭep tawh chu a ni.

Chawhma chhungin ka zo ta mai a, ka pa nen thingpui kan in zawhah Serthlum huan lamah ka liam thla a, ka pa erawh inah ka awm tir thung.

Thlâm ka thleng a, ka Em phurh nghatin ka u ka au a, vawihnih vel ka auh hnuah, huan mawng lam aṭang, "Eihh", a lo ti lung lung.

"Eng nge in tih?",

"Kan hung ṭha lawk", tiin, a lo au leh. Tumahin an ru awm si lo, a fimkhurin a veng uluk thei bawk si.

Tun ang hun aṭang hian a veng ṭan a, huan hi a zau tham tehreng nen a hung chhuak vek ṭhin.

Mahse, hung ṭhain veng uluk emaw inti viau ṭhin mah se, a hmin tak tak hunah chuan naupang hoin an lo leh ṭhin tho ang.

Naupang tih takah, engtin tin emawa huan chhunga luh dan te hi an thiam bawk si. Thinrim ṭeuh chungin a lo haw ang a, tûm burin a ṭhu leh luau mai dawn ni.

Engtikah tak nupui te hi nei ve ang maw? U Sawma chuan bialnu a nei tih ka hria, ka u erawh, nula pawh a rim mang ngai lo a nia, hetiang kumah pawh ka nuin a la vaw zak zak ṭhin kha nia!

Thlâm namthlakah ṭhuin, Van lamah ka mit ka lên vang vang, "In pitu hoin in hlim tawh awm bik sia, a nuam dawn mang e", ka rilruin ka ti mawlh mawlh.

Ka mittui luang chu ka hru a, ṭah belh ka inti duh miah lo,,ka ngai em a ni!

Ka u te chu an lo chho a, Serthlum pum li lek hi ka uin a kawrah a lo fun a, thlâm chhuatah a bun ruih. A tam hmel asin.

"A la hmin bawk si lo, ngati nge i lawh a?",

"A tla a nih kha", ti pahin a chempuiin a zai phel hmawk hmawk. A Cowboy lukhum a khum ngei bawk a.

Ka u chu a ni ve sia, "Ei rawh, pathum kha chu ka pa i hawn dawn nia", a ti a. Chi bur hawngin a chhinah ka bun a, Serthlum zai phel chu ka ei a.

A hmin lam chu a ni ve tawh a, a kawr a la eng lo mai pawh a, mahse, a la thur sek tho.

"U Sawm, ei ve la", a lu a lo thing nar nar. Sahdah a hmuam nghal zat. Ka uin Zozial a pak bawk a, an intodelh ve chu a ni.

"U, in lo haw dawn em?",

"Haw lo ang, huan mawnga lui kawr khu ka siam ṭha a, tui hman tur chu min phuhru ve lutuk",

"Thosilen saw a la ṭha em?", ka ti leh a. A bu nghat. U Sawma chuan a Phone phawrhin Pasalṭha thawnthu a ngaithla a, ka lo chek hlak.

A ninawm duh ṭhin em asin, Pasalṭha thawnthu ka ngaina ve bawk si lo. "Takah, Mazai, Dawngi nen Palai tirh kan titlu tawh asin", a mu inbengkang deuhin u Sawma chuan a ti a.

"A va lawmawm, zaninah em ni?",

"Ni lo, naktipah khian, mahse, nakum daihah kan inneih theih ka ring", a kut lukhamin u Sawma chuan a ti leh.

"I nghak fan fan ang a, a ni mai lawm, nuam i tiawm mang e, keini hi, engtikah tak Palai tirhna tur te hi nei ve thei ang maw?", ka u en zeuhin ka ti a.

Ka thusawi chu hria ang pawhin a inti awm duh lo, a phakar a nia.

U Sawma chu a nui huah huah a, "Ka fanu nghak mai rawh se", u Sawman a tih chuan, "Ngawi mai teh", ka uin a lo ti hlak.

Thlâm bula ka uin ka phurh haw tura thing ro a dah fel chu Emah thawnin, Serthlum pum thum nen ka haw ta a.

Ka pain tui a lo chhuang so vek a, inbual hmain ka thing keuh chu in hnuaiah ka dah ṭha leh rih.

"Pa, a la thlum chiah lo, chi nen a la tui tawk chiah", ka pa Serthlum ei lai chu chi kengin a bulah ka ṭhu a, pakhat ka ei ve leh hrâm.

Hah hi chuan thei thur lam châk hi a na tlat zel, chaw tui atan tuilum a ngaih tam loh avangin chawbel ka chhuang a, "Pa, ka inbual lawk dawn nia, chaw ka chhuan hi lo en mai rawh aw",

"Aw le", a lo ti a. Ka inbual thuai thuai. Ka inbual zawh chuan chawhmeh te ka siam leh sawk sawk a, ka pa nen chauh kan ni bawk a, chawhmeh siam tam chi pawh a ni lo.

Chaw pawh ka chhum tlem sawt a, chawhmeh ka siam zawh chuan chaw kan ei nghal chu a ni mai.

"Serthlum an lian hlawm tawh em?",

"Lian ve tawh lutuk, a ṭhen chu an eng ṭan tawh tein ka hria",

"Naktuk chu, kal ve tur a ni", ka pain a tih chuan, "Engmah tih tur a awm lo, hnim thlawh fai tur a awm lo a, ka uin a thlo fai hneh bawk a, thlâma awm char char a ni mai", ka lo ti a.

Ka pa chu a nui huah huah, "Khanghu kung thum lek phun turin ka ti a, a duh tlat lo alawm, Serthlum ringawt lo hi ching(emaw tuh) tel se a ṭhat dawn nen", ka pain a ti chharh chharh.

"Khawimi khanghu nge?",

"I putea te in bula mi saw mawle, a tam leh lutuk a, paih ṭhen a tum kha ka va sawi a, i uin a duh tlat lo pek a, kan in bula phun chi a ni bawk si lo",

"A paih ta nge", ka lo ti leh. "Paih lo e, an ṭhenawm te a pe a, i nî te pawh a pe, anni ho chu an huan te saw a zau a, keini a zau bawk si lo hi ni buaithlak.chu", ka pain a ti dap dap.

Chhuatah ṭhuin a zuk tur mei ka zial a, ka uin min chah lo a, a la mamawh lo a ni chek ang a.

"Khawi maw, pakhat chu", ka zial zawh(zo) chiah chu ka pe a, meitalh tiṭhekin a pak khu hluah hluah nghal.

Ka u nena meizial an fawh dan leh, an kuta an karcheh dan te, a khu an thawk.chhuah dan te hi a inang em em mai a ni.

An hnar aṭanga an han thawk chhuah phei hi chuan, nuam an ti ve em em mai ni.

"Pa, Vaihlo hi a zo hnai tawh sia, Pi Rumi hnen ami em ni ka va lak ang?",

"A ni leh mai, kan tleirawl chhuah aṭang Pi Rumi vaihlo char char kan la zu, a vaihlo hi a tui ber mai, i u pawhin hmun dang a kân thei bik lo. Chubakah, a eizawnna a ni ve a, kan ṭanpui ve theihna a ni mai", ka pain a ti a.

Ka lo bu nghat ringawt, zial lehkha erawh kan la ngah a, lei a la ngai dawn lo.

Kawngka a lo inkik kar kar, "Ka lo kal", tiin ka au a, ka ṭhutna aṭang ka tho zui zat.

"In awm maw?", kawngka an lo hawng a,,kan Ṭhalai hruaitute ka hmuh chuan, "Lo leng rawh u", ka lo ti vat a. Ka zak deuh chu ka tim dâi a, mei ka zialna khotê lain, "Lo ṭhu rawh u, thingpui ka va lum ang e", tiin tapchhak lam ka pansan daih.

Tun thleng hian biak chu sawi loh, kawnga tawh ringawt pawh ka duh lo, ka hel ngat ngat zel.

Thingpui ka lum a, an ṭawng ka hre pha vek tho, "Ka pu, khawiah nge Vanhminga hi?",

"Huanah mawle, Sawma nen an zu riak a nih kha", ka pain a ti a. "A thawkrim bawk si a, a rah chhuak pawh a ṭha ṭhin ngawt mai", an ti a. Ka pa pawh a nui ve tawp.

Tui a so chuan thingpui ka siam leh mial mial, "Ka pu, kan lo kal chhan chu, Vanhminga awm lo mah se, nangmah biak che kan duh hrim hrim a",

"Aw, eng nge ni ta, han sawi ula, kan tihtheih zawng a nih phawt chuan kan tihsak hreh reng reng lo che u",

"Kumin chu, in Serthlum hi Ṭhalai sum tuak nan kan lo zuar hlawh teh ang, inhlawh nan min thlawh fai tir tawh bawk a, in khawngaihna kan lo dil leh tawp a ni e", thingpui nô chu pahnih zela kengin ka pe hlawm a.

Lawmthu sawiin an la ve diat diat mai bawk, tapchhak lamah ka awm leh daih, ka pa chuan amah maia thutlukna siam a hreh thu leh, ka u nena an lo inbiak ve phawt tur thuin a chhang a.

"Tehreng mai, Vanhminga pawh hrilh kan tum tho a, mahse, nangmah kan lo be hmasa zawk che.a nih hi, Vanhming chu han riak bo lo hlauh se chu aww",

"Ni e, kan pafain kan lo inbe ve leh ang a, huan ringawt a buaipui a, inah pawh hian a awm hman lo", ka pain a ti a. An nui dar dar.

Mei zial pahin ka lo nui ve ver ver, thingpui nô ka va seng leh a, Serthlum ngawr ngawr bakah, ka nu boral thu hlaah te ka pa chu an han hnem ve liam liam.

Ka u Ṭhalaiah a la awm avangin Ṭhalai lam te pawh khan min lo ral tawh a, ka hre mumal leh thei ta tlat lo, ngati nge mawni?

"A nih,,kan han kal ang e, Mazai, thingpui avangin kan lawm lutuk a nia, a tui lutuk", an ti a.

"A lawmawm e, kei akara thingpui siam te a tui in ti a, keipawh ka lawm", tiin pawn thlengin ka zui ve a.

In chhungah lutin kawngka ka khar a, zan a la rei lo bawk nen ka la kalh rih lo. A hma ti ila, ka nu boral aṭanga kar hnih dawn kha chu inleng pawh kan ngah.

Mahse, tunah chuan an bo phiar, ka dem bik lo. Ram lama chhuak vek chi kan ni a, zan lo thleng hi kan tan chuan malsawmna a ni ringawt, chawlh hahdamna a ni tlat a ni.

"Mazai, kei chu ka mu tawh mai ang, ka mut a chhuak ṭan tlat",

"Aw le,,va mu rawh, hemi ka zawhah keipawh ka mu ve ang", ka ti a, mei ka zial leh mawp mawp.

Ka zawh chuan kawngka kalhin ka mu ve nghal. Phone ka en zawk a, department group pawh a lun ngang mai.

Kei erawh ka ṭawng ngai ta lo a, an titina vel erawh ka chhiar reng zel tho.

A tukah pawh chuan ka pa nen inah kan awm a, ka uin min lo phone a an lo haw dawn avangin tlai lam chu chaw chhum kep a ngai dawn.

Pi Rumi te inah vaihlo ka va lei zawk a, in ka thlen chuan thingpui ka lum thuai thuai.

Chaw ṭhing kan hmeh a, kan puar ve lutuk tho. Ṭhutthlengah ka pa ṭhuin, kei chhuatah ka ṭhu thung.

U Roa hrilh hmasa lo mah ila, kan pahnih inkar hrilh ka duh.

Ka âw thian hmasa phawtin, "Pa, ka thawhna te fapa ka enkawl ka tih kha i hria em, Zela kha?",

"Hria e, kal thei lo kha", a tih chuan ka bu nghat, "Eng nge ni ta, a damṭha lo em ni?",

"Damṭha lutuk, ih, englo, a nu chu Sap a nia, mahse, a pa nen an inṭhen a. Inṭhen pawh a ni chiah lo, an ramah a nu chuan a hawsan daih a",

"Ngati nge chu chu min hrilh",

"Ih, Pa, a pa nen chuan kan inngaizawng a, ih, ka nu boral hma lawk ni li vel niin ka hria", ka ti zawi sap. Ka ṭi dâk a, en pawh ka en ngam lo, ka kun ngaih.

Ka zak lutuk ringawt, min hauh hrep ka ring, zak thei lo min ti ngei ngei bawk ang.

"Ngati nge in inngaihzawn a?", ka pa chu ka en zeuh, "Ih, amah chuan a hnuaia thawk ka nih angin ka chanchin a hre vek a, ih, amah zawkin min duh hmasa a, chuan keipawhin ka duh ve tho sia, ka hnar reng thei bik lo a ni, pawi ka ti lutuk", ka pa chu a thaw ri hrawih.

Min vin phar dawr dawr ngei ang le, "Kan dinhmun a va inthlau ve mawle?", beidawn hmel zet hian a ti a.

Ka inthiamlo lutuk ringawt, ṭhen turin min ti tawh ngei ang le, "Pa, ka tihpalh lutuk, mahse, ṭhen tur chuan khawngaihtakin min ti suh aw, kan dinhmun chu a inthlau a, chumi vanga duh let ka ni miah lo a nia, amahah khan thlamuanna ka hmu a ni",

"Mahse, Mazai, keini han cho rual a ni lo, Puia te pawh kha ngaihtuah la, kan inthlau mah mah chu a ni. Fa a la nei zui", ka pa chuan a ti leh a.

A lungawilo ṭan tawhin ka hria, "U Puia ang a ni hleinem, kan inngaihzawn aṭang ni tam liam lo mah se, min hrethiamin min ngaihsak ṭha lutuk alawm", ka ti sap.

Ka ngawi ta daih a, engmah ka sawi chhunzawm leh tawh lo, ka pa pawh chu a ngawi a, sawi lo mah se, ṭhen turin min duh tih ka hre thei.

Kan pahnih chuan kan ngawi tlawk tlawk a, a hreawm lutuk ringawt, engtin nge ka tih ang aw?

"Patê, ka pain lo kal lawk teh a ti", Chhana chuan a lo ti a. A kal leh nghal daih. "Ka va kal lawk ang e", ti pahin ka pa chu a ding a. In aṭang a chhuak zui.

A lo haw hunah ṭha deuhin ka sawipui leh ang, ka hrilh dan kha a fuh chiah lo pawh a ni thei.

Pindanah lutin phone ka ban a, thâwk la vang vangin u Roa chu ka phone, a ri ral ral, a buai loh lai a nih hrâm ka beisei.

"Hello", a lo ti chuai raih, "I damṭha lo em ni?",

"Damṭha chiah lo", a tih chuan a chhan ka zawt thuai, a lo nui hak a, "Ka ti mai mai nih kha, ka ṭha lutuk",

"I ṭha lo, ka hre thei alawm, ka rilru a nuam thei dawn chuang lo, min hrilh rawh, chhawk zângkhai dan tur che pawh ka hre maithei asin", dam diai hian ka ti a.

A lo nui leh hak, nuihzatthlak ka sawi tawp si lo,,"Veca, Veronica kha", a tih chuan ka lo hlauthawng nghal ringawt.

"A haw tWh emaw ka tih kha,,Zela laklet tumin Court-ah min khing a", ka ṭhu ngil zawt mai, "Engtin nge chutiang a tih theih?", ka lo ti vat.

Mak ka ti lutuk, Zela laklet tumin court-ah an ko tihna ni maw, Aw Lalpa leh!

Ka pa ka biak thu ka hrilh ngam ta miah lo, "Lo kal tawh rWh",

"Aw le, mahse, min duat ngawt a ngai ang",,nui sakin ka ti a.

"Lo kal tal tak rwh aw, ka lo be ṭha lutuk thei chein ka ring lo",

"Ka lo kal ngei ngei ang, ka lo thlen hunah ka hrilh ang che", ka ti a. Kan inbiakna kan titawp a.

A rilru a buai dawn lutuk, ka va khawngaih tak.

Veronica pawh chu, ngati nge a kal thui em em mai le? Eng rilru nge a put bik aw.

U Roa bakah ka pi leh pute rilru pawh a hah ngawt hlawm ang, ka khawngaih hlawm em mai.

Zela pawh chu, ka hah. Veronica chu aww!


Show post links
Top

[Ngaia]

Tiam tlat e
Chapter-17
Ziaktu: Cck Lalchhuanawmi

Zela pawh chu, ka hah. Veronica chu aww!

Ka u te an lo haw a, u Sawma erawh an inah a tlang nghal daih.

Ka u inbual zawh hnu chuan chaw kan ei a, Aizawl lamah ringawt ka rilru a awm. Ka pa chuan ka u hnenah, Ṭhalai lamin Serthlum zawrh hlawh an duh thu an lo sawi te chu a hrilh a.

"Nangma thu thu alawm, Aizawl panpui kher a ngai dawn lo a, a zia phian zawk ang", ka uin a ti a.

Ka pain, "Chutia i remtih chuan keipawhin ka remti ve tho alawm,,nakin zanah an lo kal leh mai thei", a ti a.

Ka u nen an inrem ta phawt, Aizawla kalpui a ngai dawn lo a nih chuan a ṭha phian mai thei bawk.

Mahse, kan Ṭhalai lam te an hah thung dawn ni, Aizawl emaw an panpui tho ka ring mang e.

Chaw ei kham hnu rei vak loah u Sawma a lo lang a, "Mutbu in lo hawn si lo a", ka ti dek dek a, "Ka lo riak tawh lo ang, Ka peih tawh rih lo", a lo ti a.

Meizial a ṭan nghal zat, zial heh hlawm lutuk mai. Ka pa hoin nakuma lo neihna hmun tur te an sawi a, achangin an han nui leh huah huah ṭhin.

Ka pa mut rualin ka mutsan ve ta daih a, ka u leh u Sawma te chu an riat nawk nawk.

Phone ka en a, Siamtei nen message kan inthawn, u Roa, Pu Brandon-a pawh a ni tawh lo, ka nui sak.

U Roa chanchin ka zawt ngam lo tluk bawkin, min hrilh tur a nei dawn chuang lo a, a hnuah *department group-ah khan Rempuia va hnial mai mai ang* a lo ti a.

*va hnial rawh, kei chu ka lo mu mai ang aw* ka ti a. Phone ka dah ta daih.

A tuk nilengin Aizawl lam ringawt ka ngaihtuah a, ka pa bulah ka sawi ta tawp. Thlâmah kan pahnihin kan awm a, ka u erawh, huan mawnga luikawr kawng a siam ṭha thung.

"Ka ngaihtuah em a ni, a nu bulah awm tura an tih phei chuan an hmu thei tawh dawn si lo a, keipawh hian ka ngai tawh lutuk", ka ti a.

Hei bak chuan sawi leh dan tur ka hre thlawt lo, ka pa a ngawi ren rawn hnuah, "Eng chen nge in thlen tawh?",

"Eng chen mah, ka lo haw daih hi", lâi deuha ka ti chu, "Ni tak e", a ti a. A nui hak.

"Pa, reilo tê tal Aizawlah ka kal thei ang tiraw?",

"Thei tehreng e, va kal rawh, mahse, i hun lo tawn tawh aṭangin fimkhurna chang i hre dawn nia aw", ka pa chuan a ti a. Ka bu nghat nghat.

Thing phurh haw tur thlâm kawta mi ka ek phel a, a ro ṭha hlawm si a, eh a nawm bakah an keh duh a, hun pawh a duh rei lo.

A tuka kal mai ka tum avangin ka insiam lawk a, thawmhnaw ken tam ka tum lo bawk a, ka insiam zo thuai chu a ni mai.

Sumo ticket ka uin leng pahin min lo laksak a, ka u erawh chuan u Roa nena kan chungchang a hre ve lo.

Ka pa leh ka u ngaihtuah viau mah ila, reilo tê tal pawh va hmuh hrim hrim ka duh.

Zinga in aṭanga ka chhuah dawn chuan ka pain ṭawngṭaina a nei a, Sumo dinna thleng chuan min thlah tawh lo. Ka u nen kan kal dun hnak hnak a.

Kan chhuah dawn chuan, "I inluahna ṭhin lah kha, bungrua kan la vek tawh sia, engtin nge i va awm ang?",

"Sami te inah ka thleng thei alawm",

"A nih, va fimkhur hle la aw", ka uin a tih chuan ka bu zeuh a. Kan invai lawp lawp.

U Roa pawh engmah ka hrilh lo, zah theih loh chhuahin ka va ṭhawng thut dawn chu a nia!

Zan dar sarih bawr velah kan thleng a, u Roa te in ka pan ding nghal. Kawngka ka kik a, Temuanin a lo hawng.

Min hmu chu, "E he, Mazaii", a ti hluai a. "In lo dam em?", nui varin ka lo ti a. In chhungah ka lut a, a reh ṭhiap mai.

"An awm lo em ni?", ka ti a. A bu nghauh nghauh. Choka lamah kan inzui phei a, "Sawtah, u Mami te inah an va kal lawk a, an lo haw ṭep tawh ang, i awm lo a engmah i hre ve lo a nih kha, u Roa a khawngaihthlak asin aw, Zela a kalsan lo reng reng, a bulah a awm tir chawt, hnathawhnaah pawh a hruai ṭhin", a ti dap dap a.

Ka hmaah ṭhuin, "I haw hnu lawkah ṭha deuhin Veronica kha a haw ve mai emaw kan ti a, mahse, Lawyer nen an lo lang leh thut a, Zela awmpui a duh vang lek a lo nia.

Court lehkha ka pi leh puin an hmu chiah kha chu, nikhawhreloin an awm dawn ta emaw ka ti hman alawm.

U Roa thinrim lutukin Veronica kha ben a tum a, a kut pawh a phar chhuak vek tawh, mahse, ka puin a lo dang a, ka khawngaih tak tak a ni.

Court-ah kal tawh lo mah se, tunah hian Zela inchuhin an la buai reng tho",

"Tu zawk nge i ṭan?", tiin a thusawi kar lakah ka lo zawt a, "U Roa feee", a tih chuan ka thaw huai.

"Veronica chu a fel turah ka ngai a, kawm pawh a nuam, mahse, i bag-a zungbun a dah aṭang khan ka hmu dik thei tawh lo.

Chubakah, mahni fasên pawh pawisa vangin a kalsan thei a nia, mi mak ve tak a ni. Chuti chungin ṭha deuhin an lo mikhual leh duh a nia, a sual ve hrim hrim, u Roa hian nupui ṭha deuh neisan daih se ka ti nia.

A kalsantu zawk hi a huai pang pang tlat, Police man tir tawp se ka ti", Temuani chuan a ti hlak hlak. Ka lo nuih ver ver.

"Ka lo ṭang lutuk ringawt, Sap a nia, tihhreh a nei miah lo ang, Zela hi a awmpui daih thei a nih chuan aw, ka ngaihtuah ngam lo zawk, ka ṭang lutuk hi zan muttheih loh zeuh zeuh ka nei", a ti leh dap dap.

A hmel aṭang pawh chuan a ṭang tih a hriat, a muttheih loh ṭhin thu a sawi ka ngaihbel nge ni, a biang ti te chu a tla dâwkin ka hria.

Ka awm loh laia an lo awm dan te min hrilh dap dap a, ka pi leh pute, u Roa te ngaihtuah tho mah ila, ka ngaihtuah ber zawk erawh chu Zela a ni daih!

Ani naupang pawisawilo lutuk, thil hrethiam rual ni ve tawh tho mah se, hrethiam tak tak rual erawh a la ni si lo.

Vâi ruaiin a hre ve ngei dawn a, a ruk tak chuan a buai ru vein ka ring.

Motor thawm kan hria a, Temuani chu a tho vat, kawngka a hawng a,,a hnungah ka ding ve.

Ka pi leh pu an lo lang hmasa ber a, an hnungah u Roa leh Zela te, u Roa chuan a pawm a, Temuani sawi kha a dik tak takin ka hria.

"Mazaii ni rengin", min hmuh rualin nui varin ka pi chuan a ti a. Ka lo nui ve sun sun, "Mom", phur tih hriat tak hian Zelan min lo ko nghal chul bawk.

U Roa pawhin min hmu chu mak a ti ve ngang mai, a meng phawk hru reng. Zela chuan min lo ban uaih uaih a, u Roa kut aṭang ka va la.

U Roa pawhin min dang bik lo, kan ṭhu khawm a, u Roa erawh inthlak turin pindan lam a pan thung.

"I va ngaihawm tak em, kan lo ngai tawh lutuk che alawm, i lo thlenna a rei tawh em?",

"La rei lo e, ka lo thleng ve chauh, thlenna tur ka hre chiah lo a, ka lo kal tawp", ka ti a. Ka piin, "A ṭha lutuk, Aizawl i lo kal tih ka hriat chuan koh nghal che ka tum alawm", a lo ti vat.

Ka pu a nui huah huah a, "Zanin chu, ka Tuaipuia a mutui ngawt ang", ka piin, a biang piai hlak chungin a ti a.

"Mom, ka bulah mu rawh aw", Zela pawhin a ti ve zat, ka âwmah a bei nghal a, a hnung ka beng thek thek.

U Roa pawh a lo chhuak a, ka piin, "Kalna tur a nei si lo a, a cham chhung chu Zela nen inawm rawh se, hmun dangah min kalsan dawn nge dawn lo tih pawh a hriat si loh a", ka piin a ti sap a.

Ka puin, "Mami nu ṭhin hi chu aww", a lo ti vat bawk. Ka pi chu a ngui bam a, a khawngaihthlak zawk.

Pindanah kan pawm lut a, u Roa chu ngawi reng mah se, sawi tur a ngah dawn lutuk tih ka hria.

"Mom, ka ngai tawh lutuk che", a ti zawi sup, ka beks indawmkângin ka en a, min en ve ngawih ngawih.

"Keipawhin ka ngai lutuk che, i lo muṭha ṭhin em?",

"Ṭha lutuk", ka nuih saih a. "Muhil leh rawh aw, ka lo veng ang che", ka ti a. A mit a chhing vang vang.


Show post links
Top

[Ngaia]

(A bik taka lawmthu sawina: Keia kara Thawnthu ziah ve mai mai te duhsak taka min chhiarsak ṭhin avangin ka lawm a, in hriatthiamna dil reng rengin ka khawsaa, zawldawh taka min chhâwn ṭhin avangin ka lawm em em bawk. Thawnthu ka ziah ṭan tirh phei chuan Mizo cover-a ka hman ṭhin vang nge ni dawn, comment te hi ka nei khat a, beidawng tak chung pawhin zantin kha chapter thar ka dah ve hrâm hrâm ṭhin. Mahse, tunah chuan, sêlna thu tal pawh min comment sak loh chuan ka phurnain a tlin ṭhin lo a, ka chawlhsan leh daih zel. Chuvang chuan, sêlna thu ringawt pawha min comment sak ṭhin te hi ka tan chuan a hlu bik ngawih ngawih. Duhsak taka min chhiarsak a, comment min pek sak hrâm hrâm tute chungah ka thinlung zawng zawngin lawmthu ka sawi a, ka lawm tak tak a ni. 'Nuthlawi lungleng' ziaktu, Mam Suzzane Sainghinglovi Sailo chungah ka lawm em em bawk, a tha leh zung tam tak a senna Lehkhabu, phal takin a thlawn liau liauin min pe a, a chungah ka thinglung zawng zawngin lawmthu ka sawi bawk e. In zavaia chungah a tharin lawmthu ka sawi e🥰)

Tiam tlat e
Chapter-17 zawmna Last
Ziaktu: Cck Lalchhuanawmi

(Chhunzawmna)

A âwmah ka kut nghatin ka beng thek thek a, ka zai pah rat rat bawk. Ka muhil lawk thei lo, a muhil siai siai chu ka thlir vung vung.

Ka lamah pawt hnaiin keipawh chu muthilh tumin ka mit ka chhing a, a lum nuam em em mai bawk si, a nuam lutuk ringawt.

Zingah pindan aṭang kan inpawm chhuak a, ka mutui lutuk a, thawh ka hai ṭep a ni.

"Temuan, kan lo pui ang che aw",

"A ngai lo, keimahin ka ti thei alawm, lo awm mai mai rawh u", a ti a. Ka hnial duh ta lem lo.

Huan lam ka en a, ka pi leh pute an lo ṭhu kun ngaih mai. U Roa pawh in chhungah nen ka zawng ru deuh a, mahse, ka hmu mai lo.

A la tho lo a nih chuan, in aṭang a chhuak tawh pawh a ni mai thei a ni.

"Temuan, huanah kan va kal ve ang e aw",

"Tehreng, va kal rawh u, chaw ei theih hunah ka lo ko dawn che u a nia", a ti a. "I fel bik e", nui varin ka ti a. A ner sawk.

Fel ka ti lutuk ringawt, atira ka ei loh chhan kha chu u Roa a koh dan kha nia, keiin Pu Brandon tia ka koh bik laiin, mahse, ka hriatthiam phak bak bakin a fel.

Zela nen phulah kan ṭhu a, a pi leh puin an lo chhaih pah reng bawk. Mahse, an hmel erawh a ngui bam thung, han nui ve bawk mah se, an chhungril erawh a rum tih a hriat.

"Mazai, hetah i awm reng dawn em?", ka piin a tih chuan, "Awm reng lo ang, ka lo kal zawk, pawisa khawlsa la chhuak turin ka lo kal a, ka haw leh vat a ngai dawn", ka ti a.

Ka kal chhan dik tak ni lo mah se, a ni ve deuh tho. "Mom, ka bulah awm leh rawh", min lo en chho ha chungin Zelan a ti a. A biang piai zauhin, "I bulah ka awm reng hi", nui varin a ti a.

A ṭhen sak, ka hawi chhuak a, ka piin nui sen senin min lo en reng chu niin, min tilâi lutuk ringawt.

"Pi, pu, chaw a ei theih reng tawh", Temuani a lo au a. Kan pali chuan kan inzui lut hnak hnak.

U Roa pawh ṭhutthlengah a lo ṭhu vang tawh mai. Zela chuan min kuah chawt a, u Roa lahin a lo la chuang lo.

Chaw kan ei a, kan ngawi ṭhiap, Zela nen kan inbe leh zeuh tih loh leh, Temuanin chaw kan duh leh duh loh min zawhin kan ṭawng a, a ni mai.

U Roa pawh kun ngurin chaw a ei a, ani phei chu a buai ngawtin ka ring.

Temuani kan chaw eina sengfelpui duh viau mah ila, Zela nena inpawm chawt kan ni si a, Temuani lahin puih a ngaih loh thu a sawi bawk nen, a mikhual zawk hi ka tlawngawl leh ber.

Veranda-ah Zela nen kan ṭhu a, "Mom, khawiah nge i awm daih a?",

"Kan khuaah ka awm a",

"I awm leh dawn em?", a tih chuan, "Naktukah ka haw leh ang, vawiinah bazarah ka kal dawn a. Tumah hrilh lo la aw, nangmah hmu tur chein ka lo kal vang vang a nih hi, ka ngai tawh lutuk che a", ka kuah bet a, a biangah ka fawp zeuh.

"Mom, i bulah min hruai ve la", a ti chuai raih, "Bawihte, nakinah ka lo kal leh dawn alawm",

"Engtikah?",

"Ihhhh, a rei lo ang, Serthlum pe tur chein ka lo kal leh ang", ka ti sap a. "Ka duh lo", a lu a thing nawk nawk.

A Buzz-a chungchang ka sawipui daih, thil ni lo lo te kan sawikai palh ang, ka rualin ka hawpui duh mai ang, nautê duhawm lutuk hi ah!

Khuh ri kan hriat chuan kan bula ngawi renga ding chu, Zela nen kan en a, ka nerkhum salh. A khi suk a, lo ṭhu hniamin, "Vawiin chu ka hruai ve lo mai ang che aw", Zela kut pahnih vuan chungin a ti a.

Zela pawh chu a bu nghat nghat, min lo en a, "Nangpawh ka hruai ve lo mai ang che", a ti chu, "Ka lawm e", ka lo ti hlak. U Roa chu a nui suk a, Zela lahin ka tihdan a la a, "Pa, keipawh ka lawm e", a ti ve hlak.

U Roa chu a nui hak hak a, Zela biangah fawp zeuhin, "A nih,,ka'n kal tawh ang e, fel deuhin lo awm la aw", a ti a.

Kan bye bye nasa mai, in chhunga lut loin kan la ṭhu ren rawn a, kawta Pangpar te chu an hming ka hrilh dap dap.

In chhungah lutin ka pi leh pu bulah ka chhuah lawk tur thu ka hrilh a, "Bank-a kal ka duh a, chubakah, naktuka hawna tur ticket lak te ka duh a",

"Naktukah i haw dawn maw?", ka puin a lo ti vat. Ka pi pawhin, "I va awm rei dawn lo ve, tun thla tal chu i awm dawn emaw kan tia", lungawi loh hmel tak hian a ti a.

Ka inthiamlo zawk alawm le aww, "In ka ngaihtuah ve bawk si a, ka pa leh ka u ringawt chu",

"A ni ve tho mai", ka piin a ti chuai raih. Hawsan hreh viau mah ila, ka awm reng a mawi si lo a.

U Roa nena kan inkar an hriat ngat phei chuan aw, tuna min uider ang hian an awm miah lo ang, haw vat tura min duh zawk ka ring.

Zela nen kan inpaw(inpua) chhuak leh ta a, ka hnungah ka dah a, a nui ver ver. A Buzz-a a keng lang vâ vâ bawk a, "Mom, engtikah nge kan thlen dawn?", tiin, min zawt deuh reng bawk.

"Kan thleng ṭep", tiin ka chhang ve zel mai bawk a. Taxi ruak kan hmu ta hlauh. Kan ṭhu lut vat a, kan kal duhna ka hrilh nghal zung zung.

"Mom, ka tui a hal", bag aṭang bottle la chhuakin ka intir a. Ka pawm ṭha leh sauh sauh, tukverhah a dâk du du a, hmuhnawm thlir tak têin a thlir.

Bank kan thleng a, an lo awm ve deuh ṭhup avangin kan nghak leh rih. Bengchheng lo turin ka hrilh a, thu a awih ve lutuk.

"Mom, a vawt", a tih chuan, puakpuan nen kan tuam a, ka âwmah a bei hle hle, ka kuah bet tlat bawk.

Bank chhung hi chu a vawt ve deuh ṭhin a, puitling tan paw'n a vawt a, naupang tan phei chuan vawt tur tak pawh a ni.

Kan hun a thlen chuan ka pua a, kan zawh ve leh kan chhuahsan nal nal. "Mom, ka rilṭam",

"Aw le, dawrah kan chawl dawn nia aw", ka ti a. Ka hnungah a hmai a phum a, a kut te pawh a dah lut vek. A rilṭam ni loin, a mutchhuak te pawh a ang zawk.

Dawr ka hmuh hmasak berah kan lut a, dawhkan âwl awmah kan ṭhu a, a ei duh zawtin kan lam a, Lassi vawt tui tawk kan lam bawk.

Ka mal chungah a ṭhu a, a dulah ka kuah phei. A hmaa eitur awm chu a ei buan buan a, a helh ang tih ka hlauh avangin a khat tawkin Lassi ka fawh tir ṭhin.

"Mom, ka puar lutuk", a pum a beng hlak hlak. Ka nui ver ver a. Kan ei man te pein kan inpawm chhuak a.

La puak em chu ka duh lo, a puar bawk si, a pum a na palh ang. Thui kan kal hmain, "Mom, ka mut a chhuak", mutchhuak tih hriat tak hian a rawn ti chhuak ta.

Ka pua a, ka hnungah a bei nghal thlawp. Hmun reh lai deuh ṭhutna an siamah ka ṭhutpui a, tlemin mi veivak hmuh tur a vang a, motori erawh a ring ṭha ve duh khawp.

Ka phone ri bag aṭang ka la chhuak a, "Khawiah nge in awm?", a lo tih chuan kan awmna ka hrilh, "Ka lo kal ang, lo kalbo s'u aw", ka nui hak.

Phone ka dah a, u Roa chu kan nghak tawp. A mutui ngang mai, a phu zuk tih loh chu! A Buzz-a lak ka tum a, muhil e ti lo chuan a chelh nghet em em lawi si.

Rei loah u Roa a lo thleng a, Zela tihharh hlau deuhin ka ṭhu lut a, u Roa lain dim baksak loin car kawngkhar a khar chawrh mai a nih kha!

Ka ngei lutuk, Zela harh uaih uaih chu ka sâwi a, a hnung bek thek thekin a rem dan ang angin ka âwi.

"A harh em ni?", zawi supa a lo ti chu, ka melh ralh. Ṭul tawh lo lutuk.

In thlen thlengin kan inbe lo a,,kan ngawi reng, min lo ṭhut hnaih a, chu zawng chu a ni mai.

"Mazai, naktukah i haw ang maw?",

"Aw, naktukah",

"Tun thla tal chu min han awmpui rih la aw", ka piin a tih leh chuan, "Ka pi chu, min ngaihtuah duh a nih kha, tluang deuhin kan haw dawn alawm", ka ti ringawt.

A dera min la thlahlel ve pawh chu a lawmawm mah zawk. Zela nen kan mu a, amah hlei hlei hi ka ngai dawn lutuk.

Ka biang za mer merah ka harh a, "Keimah", ka beng bulah a lo phun sup nghal. A muhil ve lo mawni?

Ka khap fap fap a, ka meng ṭha hleithei mai lo, "Ka meng thei lo", ka ti zawi sap. Ka kâ te chu a dâ luk maiin ka hria.

Chawhnu lama chhuak ticket ka la hlauh a,,zing thawh hma a ngai dawn lo a ka lawm ngei mai.

"A pawi lo, muhil leh rawh", a phun leh sup a. Min kuah ṭha a, tlem chuan ka zak deuh, ka zak lutuk ringawt. Naktukah ka zawt ang.

U Roa a lo mut tel avangin pathum kan ni ta a, ka chungah engmah phei chu a ti lo. Mahse, a zahthlak tihpiah lam daih a ni. Pathlawi zak thei lo lutuk mai!

Zela chu ka bual fai thlap a, a pi leh pu bulah ngaihngam deuhin ka kalsan thei ta.

David-an min thlah a, a kal leh nghal daih. "Reilo tê la nghak leh lawk ang aw, kan driver awm a nuam chiah lo a, i mut tir lawk ang", an lo ti a.

Kan ṭhu ṭhap, a ṭhen chu an kalsawn a, mi kawngkal ka chhiar mai mai ringawt.

"Mazai, lo kal leh lawk mai teh", ka piin min lo phone. Ka va kal leh vat a, Zela ṭap an lo buaipui nasa mai.

Min hmu chu min lo ban nghal uaih uaih a, "A ngen nasa lutuk che a, thlêm ngaihna kan hre tawh lo", ka piin a ti a.

Hruai ve mai turin min ti, "Mom, ka bulah awm rawh", ṭap rawih rawihin Zela lahin a lo ti ve bawk.

Haw lo tawp chu a ni theiin ka hre si lo, ka piin hruai ve mai turin min ti a, u Roa a awm si lo. Ani thu hmu loa han hruai tawp pawh chu.

"Ka pi, haw lo tawp chu a ni theiin ka hre si lo a, hawpui ve ringawt dawn pawh ni ila a pa hi",

"Kan lo hrilh mai dawn nia, a ṭahna lamah a hrawk te a thler ang tih a hlauhawm zawk", ka piin a ti sap.

Kalkawngah u Roa chu ka hrilh ta a, "Ka lo kal ve dawn nia", tiin kan inthlah.

Kan khua kan thleng a, ka pa bulah ṭha deuhin ka sawi a, min hrethiam lutuk ringawt. Ka u hnenah pawh a sawi loh theih loh tawh loh.

Zela awm achin chu kei ai mahin ka pa leh ka uin an hlimpui emaw tih tur a ni. "Chakai hehpa", ka pain a ti ṭhin a. Aiawt chiah leh a duh thu te a sawi a sawi ṭhin.

Ka u pawhin a pawm ṭhin a, khawlaia a chhuahpui hian an lo en duh thei lutuk. "Sap naupang a nih hi", ka uin a tithla zen mai bawk.

Ka uin kan ṭhenawmte hman tawh loh walker a dil a, phal takin min lo pe ve mai bawk.

Walker-ah kan ṭhuttir ṭhin a, amah te chuan a lir a lir ve ṭhin a. A ke te chu a per chhak thei ṭan.

"Tihian awm ṭhin sela, a ke pawh a hmang thei vat mai ang", ka uin a ti a. Naupang infiam ho te chu kan kawta infiam ṭhin turin ka pa lahin a lo hrilh hlawm.

Mahse, Zela tan ṭha tur vek a lo ni, kar khat kan awmpui tlin chuan chelh loin, amahin pên sawm a pên thei tawh!

"Bawihte, han kal leh teh", ka kut ka phar chhuak a, ka pa bul aṭang ka lamah a lo kal a, a nui uar uar pah.

Ka lo pawm chat a, a biangah ka fawp zeuh, "I tlangval tawh lutuk ringawt", ka ti a. Ka pa leh ka uin kut an lo beng dar dar, chu chu a lawmah a tla a, a kal nawn chhen.

Pên sawm aṭang pên pakhatin a belh leh hlek a, kan lo lawm lutuk ringawt.

Tapchhak bulah ṭhuin puakzo ka kang a, a puak apiang ka eitir zel. Kawta motor ding thawm ka hriat chuan u Roa a ni tih ka hre thei.

Ka pa leh ka u bakah, ka pi leh pu te thlengin an hre vek tawh. A lo kal hmasak ṭuma ka pa bula kan chungchang a sawi lai kha ka la hre reng.

A khawngaihthlak zawk, sawi tur a hre lo lutuk kha, a rukin ka lo nuih kur kur. Vanneihthlak takin ka pa leh ka uin an ngaina der a, ka u phei chuan huanah te a riahpui.

Mahse, ka uin zu intir a tum ṭhin a, a lo hnar ve ngat ngat zel. Chumi vangte pawh a ni ang e, ka u hian a chhe zawnga a sawi duh miah loh.

U Roa hian hnar ṭhin lo se chu, ka uin ṭhenna thu sawi turin min ti ngei ngei ang.

Huanah kan kal a, Emah Zela ka phur a hei chu kan tihdan fo a ni. Nuam a ti tawh lutuk.

Thlâm kan thlen chuan u Roan a chawi thla a, thlâm namthlakah kan pahnihin kan ṭhu.

U Roa erawh ka u pui turin a kal a, keini erawh kan hahchawl lawk ang. Serthlum ṭhenkhat an hmin ṭan a, "Mom, ei tawh ang",

"Nakinah aw, la ṭhu phawt ang", ka ti a. A bu ve nghat. Thlâm aṭang a pa a au a, a changin ka u a au bawk. "Pa", a tih loh leh, "Pute", a ti ṭhin a.

A nui ver ver reng thei a, ka awt ṭhin ngawt mai.

"Serthlum hmin zawng ang aw",

"Yesss", phur lutukin a ti a. Thlâm aṭang kan inpawm chhuak leh. Hmun zawl tak a ni lo a, a âwih ve deuh. Lum pawh a âwl lutuk.

Ṭha deuhin ka uin kawng a siam a, kalna lai bik tur te cement-in a zût a, ka nu boral aṭang a fimkhur tawh lutuk ringawt.

Ka nu boral hma chuan cement pawhin a zût lo. Tunah chuan, fimkhur tawh tak a ni.

U Roan min hmuh chuan Zela a lo ban thuai a, ka chuh buai duh lo. A pa nen an inpawm a, Serthlum hmin ka hmuh apiang chu ka lo zel a, pathum pali vel bak hmin a la awm lo.

Thlâmah lut dialin thingpui ka lum a, kan huan sira ka uin Pangbal a laih chu chhumin kan ei a, a puar theih ve lutuk.

Reilotê awm lehin Zela nen kan haw daih, in lamah ka pa chauh a awm si a.

In kan thleng a, ka pain a lo chhawnchhaih vat. Kan inbual fai a, ka pain a lenchhuah pui leh.

Chutiang chuan thla chuang fe kan awm a, u Roa a lo kal zeuh zeuh a. Ka pi leh pute nen paw'n kan inbe reng ṭhin bawk.

Serthlum lawh(lo) a hun a, kan Kohhran Ṭhalai ho hnatlang turin an lo chhuak khawm tup tup.

A hmunah chuan duhtawka ei tur a awm dawn a, chumi ni pah fawma kal pawh an tam ka ring.

Zela nen paw'n kan kal ve a, Thlâmah an thingpui in tur kan lo lum a, a changin Zela chu an lo chhaih pah reng bawk.

Amah pawhin a ṭhu nghet thei tawh a, kal pawh kal thei tawh tak a ni. Mahseṭ thui tak erawh kal thei a la ni lo, a ṭhu leh hnawk zel.

"President te inah kan phur khawm vek ang a, naktukah Aizawl kan panpui nghal bawk ang, zaninah khuaah hian a theih ang angin kan zuar bawk ang a",

"Naktuka kalpui chu a chi dawn em ni, zanin leh naktuk hi kan khua leh khaw ṭhenawmah zuar phawt ila, chuta a ṭul dan azirin Aizawl kan panpui zawk dawn nia",

"Nia, Aizawlah Ṭhalai zawng zawng kan kal thei dawn si lo a, chutiang chuan ti phawt ang u, a hu hoa zawrh kha a ṭha ve alawm", an ti a.

An nui dar dar a, an ri chel chul bawk.

"Naktukah chuan in lo kal dawn em?",

"Aw kal ang",

"David-a ka lo tir ang aw", a lo tih chuan, "Sumo-in kan lo kal ang, chawhnuah aw", ka ti a. Min pawmpui ve mai.

Meizial ka zial a, ka awm loh chhunga an lo zuk tur. An heh bawk si. Ka pa leh Zela chu an inchhaih nui uar uar a, ka ṭhut hmunah ka lo nui ve ver ver zel.

Ṭhenawm lamah, " Serthlum min leisak ve rawh u", tih a ri lung lung. A va nuam dawn tak.

Kan in erawh an kal pel a, a neitu te kan ni ve tlat atin ni. "Mazai, Serthlum ken tur in tifel tawh maw?",

"Aw, fel tawh", Siamtei leh Nunga te Serthlum ka hawnsak ang a. Ka pi leh pute pawhin min lo chah ve mawlh mawlh bawk, hawn loh phal loh chi an ni lo reng reng.

Ka u a lo haw a, Zela a chhaih nui nghal. Keimah ai mah hian an hlimpui zawk. Naktukah a haw tawh dawn si a, an khua a har ve ngawt ang le.

"Kan va ngai dawn tak che em, lo zin leh thuai rawh aw", ka pain a ti a. "Aw le", tiin a bu ve nghat nghat. Kan in bye bye lawp lawp tawh mai.

Ka pawm a, tukverh bula ṭhu kan ni bawk nen, pawn lam ringawt a thlir. "Mom, en teh saw?", a thil hmuha mak a tih chu min kawhhmuh ṭhin a, ding meuha en theih ni hek lo, ka hawi chhuah ve meuh chuan kan lo tlanpel tawh ṭhin.

U Roa leh David-an min lo hmuak a, Zela chu a muhil bawrh bawrh tawh, a mut a hun tawh tlat a ni.

Khumah nghatin ka intleuh thuak thuak a muttui nan. Ka chau ve deuh a ni ang e, lukham ka deh rualin ka muhil zui ni maiin ka hria.

"Kum thar thleng chiah khi kan bulah a awm dawn", ka piin a tih chuan a chhan ka zawt thuai.

"Veronica-in court lehkha a lakkir dawn chuan kum thum tal a bula awmtir turin min ti a. Kan ngaihtuah a, court-ah inkhing ta chiam ila, Zela tan a hrehawm dawn bakah a zahthlak dawn lutuk.

Zela bulah a nu bulah nge a pa bulah zawk a awm duh tih an zawt ang a, ani naupang mai tan chuan hriatthiam harsa tak tur a ni.

Roa chuan a phal lo a, court-a tihfel a duh zawk nachungin a pa thu a hnial hneh ta bik lo a ni.

A tet lai aṭang tun thlengin kan enkawl a, a nu thiltih ngaidamin kan biak tir ṭhin a. Mamawh a neih apiang a lo sawiin, "Zela nu alawm a nih", tiin kan tihsak zel a.

Mahse, tunah erawh, kan rilru a tina nawn leh ta a nih hi. Kum thar aṭang chuan Sap ramah min awmsan daih dawn si a, ka ngai dawn em mai, kan tupa hian min theihnghilh mai te ka hlau rum rum mai, a nu hian a la hrang hmak ang tih hi ka hlau ngawih ngawih", ka piin, rilru na tih hriat ngawih ngawih hian a ti dap dap a.

Han hnem dan tur vak ka hre lo, a kut ka vuan a, ngawi rengin ka ṭhutpui reng ringawt.

Zelan min zui duh viau mah se, a pi leh pu bula awm turin ka ti a, thuawih takin a awm ve mai. Engmah a hre ve si lo, "I pi leh pu hi lo tinui vak vak rawh aw", ka hrilh ru a, a bu nghat.

Nunga chu Serthlum ka pe a, "I uin a lo kalpui dawn emaw ka ti a?",

"Kan Kohhran Ṭhalaiin inhlawh nan an hmang a, Aizawl an lo panpui ve thuai ka ring",

"A nih chu, in va fel tak, in tiṭha lutuk", Nunga chuan a ti a. Ka nui ver ver, a ṭawngkam dam zet te hi a ngaihawm alawm le.

Siamtei bulah ka kal leh a, Serthlum ka hawnsak chu ka pe leh. Kan Kohhran Ṭhalai lamin inhlawh nana an hman thu te ka hrilh a.

"Min lo hawnsak hrim hrim a ka lawm lutuk, vawiin chu ka thawhpuinu a lo kal thei lo a, ka khua har tawp", a ti nang nang.

Reilotê kan inkawm a, a kar lakah min ngaih thu a zep tel zeuh zel bawk. Rei awm loin ka kal leh thuai.

Kan inhmuh tawpna tur a nih avangin kan inkuah vawng vawng. Kum tam kan lo thawh hona leh ka ṭhian ṭha tak a nihnaah ka lawm a, ka ngai dawn lutuk.

"Naktukah i haw leh nghal dawn maw?", ka puin a ti a. Ka bu zeuh, awm rei chi a ni lo hrim hrim. Chubakah, ka zak.

A tawp nan kan inpua a, kan inâwi dur dur, a muthilh chuan ka hma lamah thlakin, ṭhutthlengah ka ṭhutpui rih a. A mutui nasa mai si a, "Mom, pipi leh pupu te an nui nasa lutuk", intithei deuhin min hrilh ve a.

A duhawm lutuk ringawt, a pi leh pu te tleina ber a ni a, an ngai dawn tihpiah lam a ni.

Kawngka inhawng thawm ka hriat chuan ka en a, necktie phelh mial mial chungin min lo pan.

Ka bulah a lo ṭhu thla a, Zela muhil chu a thlir zui vawng vawng. Engmah a sawi ve si lo a, a tawt up upin ka ring.

"Mu tawh rawh u, naktuk chhuah i ngaih kha", mi pawh en loin a ti sup a. Zela chu a en ngawih ngawih.

"U Ro, min lo en teh", ka ti sap a. Muangchangin min lo en, a mit a sen vek. A biang dawmin, "Ka lo ngaithla ang che", ka ti a.

A nui sak a, engmah sawi loin min lo fawp ringawt, muangchangin dam zet hian min fawp a. Zela a harh ang tih ka hlau lutuk ringawt.

Mahse, keimahah a hma zawng aiin awmze thuk tak a neiin ka hria.

Hnathawk ve tura form ka thehluh ni te, uniform la chhuak a, nitin ka kal ve hnsk hnak te. Dawr chhunga ka chetla zawng zawng te kha, min lo hmu vek ṭhin a.

Zela nen kan inhmuh hmasak ber ni te, kan Hotupa a ni chungin a ruangam chauh ka hmu ṭhin a. A hmel awmdan phei chu ka hre lo.

Ka hmuh hmasak ber aṭanga tun thlengin ka chhui rauh rauh. A hlimawm lam la tawng lo mah ila, ni lo, nitin mai kha a hlimawm em em vek.

Ka chunga lungngaihna thleng te ka inhneh tir tlat a, ka chhehvela mite engtiangin nge a nghawng ka hre miah lo.

Vanduai bikah inngaiin ka lu sûn te ka hre reng a, kei lo midang pawhin lu an sûn ve vek tho a, mahse, tuar thei lo bikah ka inngai a.

Chuti chung chuan tun thlengin ka la dam ve ṭawk ṭawk, indawmkun reng chung pawhin tun hun ka thleng a, ka hnungchhawn ta te kohtir theih a ni tawh lo.

Koh kir lah ka duh hek lo, a nih chuan, ka hmaa awmte hi ka thlir tlat a ngai dawn a ni. Ka thinlungah mi thar pahnih ka la lut a, ṭha taka ka enkawl an ngai tawh.

Ka kutah an innghat a, ka theitawp chhuahin ka enkawl ang.

"Mom, min ngaih avangin lo ṭap miah suh aw", a tih chuan, ka ṭah nuih hak. Ṭhutthlengah ṭhuttirin, a hmaah ka ṭhingṭhi a, a kut pahnih chelhin a tawp nan ka fawp vawng vawng.

"Keimahni min tihnuiha, kan hlimna i nih ang chiah hian i Mom pawh tinui reng la, a hlimna ber ni reng ang che aw",

"Aw le, ka Nu i ni thei ang em?", ka nui sak. "Engtiklai pawhin i Nu ka ni reng ang",

"I fapa ka ni ve tho tiraw?",

"Umm", ka bu nghauh nghauh, "I Nu ka ni a, ka fapa i ni reng bawk ang",

"A nih, ka Nu", a tih chuan ka kuah a, a biangah ka fawp zeuh. "Fel deuhin awm la, ka fapa tan hian ka lo Ṭawngṭai ziah ang", ka ti a. A bu ve nghat.

Ka bag aṭang ka fanu thlalak ka phawrh a, a kutah hmehbelin, "He thlalak i en apiang hian min lo hre chhuak ṭhin dawn nia aw, chuan, thil pakhat, i pi leh pu leh i pa te hi lo be ziah ang che, an ngai em em dawn che tih hria la",

"Aw le, ka lo haw hunah kan bulah awm reng tawh rawh aw, ka pa leh keima bulah",

"Tehreng mai",

"I tiam em?",

"Ka Tiam Tlat E", a tawp nan kan inkuah vawng vawng. A mittui tla chu ka hruksak a. "Buzz Lightyear-a i nih kha, chak deuhin awm ang che", ka ti zawi sap.

Huan aṭang in chhungah inpawm lutin, a pi leh puin an pawm a, thlahna thu te an hrilh nasa. Ka pi phei chu a ṭap nasa lutuk, "Pi, ṭap suh, ka lo haw leh dawn alawm", Zelan a ti a. A pi mittui tla te chu a hruksak.

"Aww, ka tuaipui", ka piin a ti vawng vawng.

U Roan a pawm a, ngawi reng mah se, a chhungrilah erawh thu tam tak a sawi tih ka hria. Ka pi leh pu erawh inah an lo awm a, ka piin, "Ka thlah thei thlawt lo", a tih avangin ka pu nen inah an awm.

Keini erawh, Airport panin kan chhuak. Zela chu a Buzz-a nen infiamin a nui leh ṭhin a. A nui ri chu bur chhunga khung mai ka duh.

Airport kan thleng a, Veronica pawh chu a hlim chuang lo tih ka hria. A hmelah inthiam lohna ka hmu thei.

U Roa chu bathroom-ah a kal a, Zela nen kan inpawm chawt, "Ka inthiamlo ve lutuk tho a nia aw, natna khirh tak tuar lo ila chuan, hetia tih hi ka duh bik miah lo.

An rilru ka tihnat man ka tuar ni mai hian ka hria.

Brad-an tun thlengin nupui a la nei lo tih ka hriat khan, ka natna tawrh mek hmanga hneh theih ka inring a, mahse, min pawm theih tawh loh thu min hrilh ta si a.

Ka hun tawp lamah tal chuan ka fapa hian min awmpui se tih ka duh vang a ni. Nangpawhin min hrethiam rawh aw", a ti dap dap a.

A mittui a hru leh ṭhin, "Ka hrethiam lutuk che, mahse, a pi leh pu leh a pa hi chu lo biak tir ṭhin rawh aw", ka ti a. A bu zeuh.

An kal a hun chuan, u Roan a pawm sawn lawk a, a fapa beng bulah a phun sup sup. A har dawn tih ka hria.

"Ka pa, ka Hero i ni", Zela chu a lo au lauh lauh.

Thlawhna chhunga an luh thleng leh, an thlawh liam thlengin kan awm a, an thlawk sâng tual tual a, an tê tial tial, "I ngaihawm nghal alawm le", ka rilruin ka ti mawlh mawlh.

David-a pawh chu a ngui ruaiin ka hria, "Hei i ta tur aw",

"Eng nge a?",

"Hawng la", a tih chuan, tuamna kawr nalh zet chu ka hlip a, ka hmu chiah chu, "Khawi aṭangin nge i neih a?", ka ti hluai.

"I duh ka ring a",

"Ka duh lutuk, nu pakhatin min lakkhalh daih a", lehkhabu chu ka thlêk kual a, ka duh tak ka hmu a, ka thaw huai.

"Thlawi law law chhai hi a fair zawk a ni", tia zawi supa a zai chu ka melh ralh. David-a pawh a nui chhuak hawk.

"I hla sak kha a awmzia pawh i hria em ni?",

"Ka hriat avang alawm ka sak",

"Hnial khan i hre si", ka ti hlak ringawt. Ka lehkhabu dawn 'Nuthlawi Lungleng' tih chu ka keu vel a, Poetry awm ṭeuh chu ka lawm ngei mai!

"Pathlawi Lungleng tih bu te hi awm ve se",

"A awm hunah ka leisak ve ang che", nui varin ka ti a. A khi suk.

"Keima'n ka ziak dawn",

"Pathlawi Lungleng-Brandon Rorelliana, a ṭha dawn lutuk", ka ti a. Nui sukin, "Thlawi tirtu-Zaihlunchhungi", a tih chuan, ka beng hlak.

Ka nui kur kur a, chimawm thiam lutuk.

Airport kawng hi a hla deuh hret chu a ni e, David-an dam zetin a khalh a, chuti ni lo se, khâma tlak hlauin ka invuan nasa ngawt ang.

Zela te chu an tum ram tluang takin thleng mawlh teh se!

"Thlawi law law chhai hi a fair zawk a ni", David-a chu mak ti deuhin ka en, "Sorry", David-a chuan a lo ti sup.

U Roa a nui chhuak hawk hawk a, kei erawh, ka nui ve duh miah lo.

Zinkawng bul kan ṭan a, a tawp thleng tawh tura kan inngaih tawh hnuah pawh, a bul aṭang bawkin Zinkawng kan lo zawh leh a nih hi a!

***A Tawp Ta***


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/