Tiam Tlat E BY Cck Lalchhuanawmi (Completed)

[Ngaia]

Tiam tlat e
Chapter-7
Ziaktu: Cck Lalchhuanawmi

"Bawihte, i nau hi lo veng rawh aw", ka ti zawi sap. Apaul-a chu ka kuah a, a mutui tawh lutuk ringawt.

Apaul-a harh hlau takin ka tho ṭhem ṭhem a, ka hmai te phih zoa pindan aṭanga ka chhuak chu Evelyn-i a lo che bawrh bawrh tawh.

Pu Brandon-a khawiah nge a mut tak ang aw,,Apaul-a bulah ka mu daih si a. Evelyn-i chu ka pui ve a, "Pu Roa chu zingah a chhuak a, ka tho kha a chhuak lai ka hmu hman, ka pi leh pu te erawh an la tho lo", a phun sar sar.

Keimah hian buaina ka thlen emawni te ka ti rum rum, ka inthiamlo hnuhnawh, mahse, naupang thusawi hi a tê ber aṭanga a lian ber thlengin, keini tana thu ho mai mai pawh nise, ngun taka ngaihthlaka bawhzui hi a finthlak ka ti ber.

Apaul-an min koh thawm ka hriat chuan pindanah ka tlan lut leh thuai. A hmai te phihin pindan aṭang kan inpawm chhuak leh a, kan pi leh pu te pawh an lo tho tawh.

"Ka tupa pawh a lo tho tawh e, khawmaw ka lo pawm teh ang che", nui varin ka puin a lo ti a.

Apaul-a pawhin a ban ve thuai a, ka puin a chhaih te chuan a nui uar uar, nimin ai chuan ka ṭha tawh thlawt. A nui ri te kan hre ta a, a nui ri nikhat lek hriat loh chuan a khawharthlak zawk alawm le.

"Khawiah nge Roa hi, ka va hmu lo ve?", ka piin a tih chuan, zinga a chhuah tawh thuin Evelyn-in a lo chhang thuai.

Huan tifaitu tur hi a lo kal a, huan bakah pangpar awmna bul te a tifai a, pa la valai tak hi a ni nghe nghe. Inchunga pangpar te pawh a tifai a, in chungah pangpar a awm tih pawh ka lo hre lo reng reng.

A tifai zawh hnu chuan, ka pu bulah a tihfaina man bakah a harsatna thu te thlenin, inthahrung tih hriat tak hian pawisa a dil belh a, ka pu lah chuan a dil ai zat tamin a lo pe.

A rukin ka lo thlithlai reng, mi hausa zingah thilphal tak tak an lo kat ve nuk tho a nih hi maw!

"Roa chu engtin nge aw,,ka phone a la thei si lo a, kan eisan mai dawn nge le, Bawihte, i rilṭam tawh em?", ka piin Apaul-a chu a zawt zui zat.

Apaul-a pawh chuan a rilṭam thuin a lo chhang ve mai bawk a, Pu Brandon-a chu chaw kan eisan leh.

"Pi, chaw ei kham aṭang hi chuan ka kal a ngai tawh dawn", Evelyn-in a tih chuan mak ti deuhin ka lo en. Ni dawn tak, hmun danga a awm a ngaih thu a sawi tak kha maw.

Ka pi leh pu te chu an inring hman lo ni ngei tur a ni, "Khai a, vawiin a lo ni reng tawh elaw?", ka pu zawk chuan a ti a.

Ka pi pawhin, "A va rang teh thut ve, kan ngai dawn hle mai che", a ti chuai raih. Keipawhin rang ka ti.

"Keimah ka awm dawn tho alawm, Evelyn-i in ngai hman dawn teuh lo", nui sun sunin ka ti a. Evelyn-i ka siai zauh, a lo nui ver ver.

"Mazai, i awm duh tak tak maw?", ka piin a lo tih chuan, "Zingah lo kalin zanah ka haw hun pangngaiah ka haw ang a, chhunah te chuan, Apaul-a nen exer lak pah ni fawmin in te kan tifel ang a", ka ti a.

Mahse, Apaul-a nen in tihfel ka sawi chu ka zak hnuhnawh, ka sawi zo tawh bawk si, ka sawi loh tawp tur ka sawi palh!

Ka pu chu a nui huah huah, "Sawipui che kan lo tum hrim hrim a, nangmah zawkin i lo sawi chhuak a, a lawmawm zawk alawm le", ka puin a tih chuan, ka nui sak.

"Mahse, lo awm nghal daih mai ta che, zinga lo kal a, zana lo kal leh te chu, a buaithlak mai mai lo ang maw?",

"Buaithlak dawn lo e, ngaiah ka nei tawh alawm", ka lo ti a. Ka pi pawh chuan, "Ni ve tho, mahse, lo awm zawk la chu a ṭha mawle", a ti a.

Chaw ei kham hnu rei vak loah Evelyn-i chu a mutbu te nen pindan aṭang lo inkhai chhuakin, pawn thleng kan thlah a, taxi hnungah a bungrua te chu ka han dah lut ve a.

Kan invai liam ta lauh lauh, inbe tam lutuk lo mah ila, a ngaihawm nghal vawng vawng, ka pi leh pu phei chuan an ngai dawn lutuk, an awmpuina a rei tawh si.

In chhungah kan lut leh dial a, Evelyn-i chu a ngaihawm nghal tak tak.

Apaul-a chu huanah wheelchair-in ka nawr a, ṭhu hniamin a khupah ka kut ka nghat, "Vawiin aṭang chuan nangmah nen chauh kan awm thei tawh dawn lo, ei rawngbawl te, thleng sil te, chhuat nawh te leh insuk te ka ti vek tawh dawn a.

Mahse, fel deuha i lo awm chuan ka tizo hma thei ang a, ka paw muhil thei ang che", ka ti a. A bu nghauh nghauh.

"Chuan maw, Mizo i nih kha aw, miin Mizo i ni lo an tih pawhin, ka pa Mizo i ti tlat dawn nia", ka ti leh a. Hrethiam tak chuan a lu a bu nghat.

In chhungah ka luhpui leh a, Pu Brandon-a pawh a lo haw ve chiah. Apaul-an a hmuh chuan, "Pa", tiin, a kut a phar chhuak a. Pu Brandon-a pawh chuan a lo pawm kâng thuai.

Wheelchair dah ṭhain, in tihfel hna thawh ṭan ka tum a, a lian ṭha ropui si ka huphurh ngei mai.

Mahse, ka piin, "Mazai, nakinah in tifai tur te an lo kal mai ang, nangmaha lo tih tum miah suh aw, an lo thlen hunah pawh i tih ve a ngai miah lo a nia",

"Ni lo e, ka pui ve ang a, kan zo hma dawn alawm",

"I sawi pawh chu a dik tho, mahse, unau an nia inhlawh nan an lo hmang ṭhin alawm", nui sângin ka pi chuan a ti a.

Mak ka ti deuh naa, ka fak leh ta zawk. Ka hrechiang tawlh tawlh a, an felzia leh ngilneihzia ka hre tual tualin ka hre mai.

Evelyn-i pawh khan insuk leh ei rawngbawl tih lo chu in tihfai a lo ti ngai bik lo, kha chen ka lo awm ve tawh a, chungte pawh chu ka lo hre lo reng reng.

Unau pathum hi an lo kal a, mipa pakhat leh hmeichhe pahnih, an la upa chhe lutuk lo, la naupang tak an niin ka hria.

Insuk tur awm ang ang khawmin bathroom-ah ka luhpui, ka piin khawla su turin min ti a. Khawl hman dan min zirtir, ka rin aiin a lo awl phian zui.

Apaul-a thawmhnaw bik ka thlang chhuak a, kutin ka su. Ama thawmhnaw bik hi chu kuta suk ngei ka duh tlat.

Ka zar chhuah hnua in chhunga ka luh leh chuan, Apaul-an min lo nuih ver ver. "Lehkha zir tawh ang", a tih chuan, "Aw le", ka lo ti thuai.

Ka insukna vel te tifel phawtin, chumi hnuah huanah kan kal leh a. Ka pi leh pu te pawh an lo phur tawh lutuk.

Ka kap karah ṭhuttirin Beramno thawnthu bu pakhat chu, sipel chawpin ka chhiarpui.

Chhiarpui loin amahin ka chhiartir a, a sipel chawp zel a, thiam tawh tak a ni. A chhiar pum hlum theih lohah erawh ka lo pui zel thung.

Thleng ka sil laiin, "Office-ah lo kal lawk rawh aw",

"Aw, aw le",,bah nawkin ka ti a. Ka bu zeuh. A kalsawn leh daih a, keipawhin thleng ka sil chhunzawm. Eng nge sawi tur a neih ang le?

A office kawngka chu kikin ka hawng a, "Sir", ṭi dak hian ka ti a. Dawhkana lo innemkhalhin min en ngur, kalsawn leh daih mai nia ka duh.

A kutin min lo hui a, a hmaa file awm chu a bih leh zui. Muangchangin a dawhkan awmna lam ka pan a, ka hawi kual a,,lehkhabu a tlim hmur bakah, sofa pahnih dawhkan tê hi tukverh bulah a lo inhung.n

A awmna bik lai te chu a êng uar a, a bak chu a êng thim khuih. "Ṭhu rawh", chair-ah ka ṭhu vat.

"Engvangin nge dawt i sawi?", ka hrethiam lo lutuk chu ka ngawi reng, eng dawt nge maw ka sawi le?

"Ka nu leh pa bulah engvanga dawt sawi nge i nih?",

"Eng, eng dawt?", thinphu dup dupin ka zawt let. Lungawilo tih hriat tak hian min lo en, "Mizo chungchang vel kha, ka nu leh pa bulah engvanga dawt sawi nge i nih?", sehchilh nawkin a ti a.

Ka hrethiam ta chiah e, ka pi leh pu bulah dawt sawt angah min ngai tihna ni maw?

"Ka fapa bulah eng thu nge i sawi? Nangmah zawk hian pawisa engzah nge i duh?", hlau duh hauh loin a mitah tak ka en ve kar.

"Veronica nen kan inbia a, Mizo tih thumal vawikhat mah a la chhak chhuak lo, engvanga dawt sawi nge i nih? Pawisa engzah chiah nge i duh, i hlawh pawh i kham khawp lo tihna em ni?", a mitmenga thinrimna chu ka hmuh hmaih hauh lo.

Ka mitmenga ka lungawi lohna pawh a hmuh hmaih bik hauh lo ang, min puh chhe lutuk chu ka nuih a za zawk.

Veronica chuan eng thu nge a lo hrilh zawk, engvanga dawt sawi nge a nih, dawt sawiah min la puh zui?

"Min chhang dawn lo em ni?", ka kun ngaih, "Ka sawi kha, ka hnuaia thawk ten ka thu an hnial hi ka duh lo a, dawt an sawi lek phei chuan, theh chhuah nghal an ni mai", dawhkan chum chawrh pahin a ti a.

Ka phu zawk, "Sawi rawh, i pawisa duh zat sawi la, he hmun aṭang hian i chhuak nghal dawn nia, ka sawi i hria em?", ka khabe a rawn hmer nghal vak chu ka phu uih.

Kan inen ta ran, ka hlau duh bik miah lo, a chhan chu dawtin min puh tlat a, "Pawisa ka duh lo", ka ti chhuak ṭawk.

Meng rum alin min en a,,ka khabe a hmer na bawk si, chutah, min thlah thut a, ka lu a hâi nghal muai muaiin ka hria.

Ka khabe chu ka dawm vawng vawng, a na lutuk. Ka pasalin kut min thlak lai ka mitthla thei. Ka lu ka thing nawk.

"Hmeichhia ho chuan pawisa bak in duh lo", a dawhkan pawhdawh hawngin pawisa chhah zeta inṭawn pahnih hi la chhuakin ka hmaah a lo theh thla.

"I la duh khawp lo a nih chuan ka pek belh ang che, dawt i sawi manah naktuk aṭang chuan lo kal tawh lo bawk ang che", a kutzungchala min kawk paha a ti chu, ka mittui a hnam sawk.

Min hmusit hle mai, min hmusit lutuk, ka ding a, ka kut ka sik niap niap, ka nunhlui bawkin min tibuai leh ta.

Ka pasal bakah, a chhungten hmusit leh diriam taka ṭawngkam chhe tak taka min ṭawngkhum te chu ka bengah an lo kiau vawng vawng.

Ka biang a lum thla pap pap a, ka meng kual rak rak, "Ka, ka sawi kha, pawisa ka duh lo, hausa ve lo mah ila dawt ka sawi ngai lo bawk. Ka lo kal tawh loh i duh chuan ka lo kal tawh lo ang. Pawisa erawh ka la dawn lo, pawisa ka duh avanga lo kal ka ni lo bawk", ka ti a.

Inherin muangchangin office aṭang chuan ka chhuak, ka mittui ka hru mawlh mawlh.

A nupui pawisa duh tak ang kha ka ni ve lo, pawisa avanga a fapa kalsantu nen min tehkhin vel a, pawisa duh lo ber pawl ka ni ang.

"Eng thu nge in va sawi a?", nui sun sunin ka piin a lo ti a. Ka nui sak, "Company lama hnathawh chungchang vel mawle, Apaul-a hi ka'n timuhil tawh ang e", ka ti a.

A lo duh lo nasa mai, "Ka haw a hun ṭep tawh a, chumi hmaa i muthilh a ngai alawm",

"Ka duh lo, ka bulah mu leh rawh", a lu a thing vak vak pah a, ka kut a vuan bawk. "Mom?", ka kut a tiche dat dat, "Lo kal teh", ka pawm a, a mawnga ben hlak pahin, "Misualpa, sual lutuk mai, thuawih lo lutuk", ka ti a. A nui uar uar.

Pindanah pawm lutin ka zuntir a, khumah ka nghat chawrh, "Dar kua rik hmain i muhil ngei ngei tur a ni i hria maw?", piai nawk nawkin ka ti a.

A bulah muthlain ka kuah a, a mit chhing tura ka hrilh chuan a chhing ve mai. A muthilh hnu chuan tho ṭhem ṭhemin pindan aṭang ka chhuak a, ka pi leh pu te mangṭhain in ka chhuahsan vang vang.

Ka rilru na lutuk chu ka ṭap phei char char, dawtin min puh a, thinrim miah lo tur ka ni, dawt a nih tlat avangin.

Mahse, ka rilru a na lutuk, engvanga na em em nge a nih pawh ka hre lo. Hmusit taka ṭawngkhum ka nih vang ni berin ka hria.

Ka hnung lam aṭanga min lo kuah a Ka kâng nghal lawp chu ka tal nghal laih laih, "Min thlah rawh", ka au a, "Shh, shh, bengchheng suh", ka hawi chho chu, "Min thlah rawh", ka melh rawm rawm.

Car chhunga min luhpui a tum chu ka tal leh vak vak, awmzia awm chuang lo, naupang hnehsawh taka kan pawm kâng ang hi a ni.

Car chhunga min ṭhut luhtir chuan kawngkhar pakhat hawna chhuah ka tum a, a vawnna ka ban chiah tihah a lamah min pawt leh dawrh.

A mal chungah nghet takin min pawm khawm chial, ka va han tê chem chem tak.

"David, Mall-ah aw", a tih chuan, "Ka duh lo, inah ka haw duh", ka lo ti vat. David-a chuan ka thu a awih dawn lo tih erawh ka hre ropui.

A âwmah min kuah bet a, a coat-in min la khuh hlun zui, chutia ka awm chu pangchan ka chak tlat pek, hahthlak hian.

"Ka haw duh", ka ti zawi sap a, a rum nghut. Ka tal leh laih a, min kuah bet leh sauh.

"Ka haw duh ka tih kha", ka vin hlur. "Ka hnuaia thawk te chuan ka thu an awih tur a ni",

"I hnuaia thawk ka ni tawh lo", ti hlakin ka tal leh vak, "A ṭha hlei hlei", a tih zawh rualin min fawp!

Ka meng bial kâwk kâwk, ka che chang tawh lo reng reng, ka taksa hi a khawng nghal vekin ka hria.

Tih ber tur pawh ka hre tawh lo, ngawi rengin ka awm mawl tawp. Ka hmui a leiin a nawr kau a, a lei a tiche kual hrut hrut.

Lei te an lo insualtir ṭhin tih ka hre lo reng reng, eng infawh dan nge ni ngai!

"Hey, i ṭha em, i la nung tiraw?", ka hmai beng hlak.hlak.chunga a ti chu, ka melh rawm rawm.

Min pawmna ata chu tal chhuakin ka bag-in ka vaw vak vak, "I hmuhsit turin eng nge tihsual ka neih, ngati nge min hmuhsit em em?

Ka pasalin a duhtawkin min sawisaa taksa leh thinlung nen lam, chu chu a la tawk lo em ni, ngati nge min hmuhsit em em?

Pawisa hmanga i thlêma duhtawka nawm i chenpui theih hmeichhia ang ka ni ve lo, pawisa vanga fate pawh kalsan hreh lo nu ang pawh ka ni hek lo",

"Ka hmusit lo che", tia ka kut a lo man chu, "I kutzungchala min kawh kha, pawisain min vawm bawk a, chubak baka inhmuhsitna dang a awm chuang em ni?", ka tha tawpin ka au khum.

Ka bag-in ka vaw bawk a, ka sam a uai thla hnuang a, ka mittuiin ka hmaiah te a char bet.

Car dingah chuan keipawh ka tawp a, kan in kawt a ni lo tih ka hriat chuan a hma zawng aiin ka thinrim ṭha leh.

"Ina min hruai turin ka tih che kha", David-a chu ka ânkhum, a buaithlak thei a nia.

David-a chu a chhuak daih a, "Tumahin David-a kha an la ânkhum ngai lo asin", inkuangkuah chunga min lo titu chu, ka melh rum al.

"Tumahin ka mitah tak min en ngai lo a,,thinrim mitmeng ngat chung phei chuan", a ti leh chu, "A ṭhat hlei hlei chu", ka lo ti vei hmak a, chhuah ka tum leh.

Ka kâwngah a kut lo vetin a mal chungah min pawm khawm leh chial. Min en chhuk run a, mittui kar sṭangin ka en chho ve piau.

Nautê chiah chiah hi ka ni mai, ka va han tê chem chem tak, ka sam hnawk nuaih hui ṭhain, "Tun hnuah chuan, thu tê ber aṭanga a lian ber thlengin ka bulah i sawi tawh tur a ni, ka nu leh pa bulah ni loin",

"Dawt ka sawi lo",

"Ka hria, ka nu leh pa bula i sawi chuan thil a buai mai mai, chuvang chuan ka hnen i lo thlen ṭhin tur a ni", dam diaii hian a ti a.

Muangchangin ka lu ka bu nghauh nghauh, a âwmah keimah zawk chu ka bei a, pangchanna tur nei tawhah inngaiin, ka thla a muang em em leh nghal.

A coat-in min khuh leh hlun a, ka lu a khuh bo daih. Car kawngkhar kikin, car kawngkhar inhawng ri leh khar riin a zui a, David-a chu a tlan chhuak leh ta.

Khawiah nge min hruai dawn ka hre miah lo, kan inah min hruai tawh dawn pawh a ni mahna.

Ka mit ka chhing a, thâwk ka la vang vang, ka awmdan siam ṭha sauh sauhin ka kuah. Huangtau min ti pawh a ni mahna, ka hun tawnin a zir em mai, remchang ka la ve a ni mai.


Show post links
Top

[Ngaia]

Tiam tlat e
Chapter-8
Ziaktu: Cck Lalchhuanawmi

Ka mit ka chhing a, thâwk ka la vang vang, ka awmdan siam ṭha sauh sauhin ka kuah. Huangtau min ti pawh a ni mahna, ka hun tawnin a zir em mai, remchang ka la ve a ni mai.

"Mom, Mom", ka meng a, Apaul-an min lo kuau, ka ṭhu chhuak chiang lutuk. Apaul-a mu reng chu, "Engtin nge hetah ka awm theih?", ngaihna hre lo zetin min en.

Nizanah khan ka muhil ang a, hetah min muttir ta mai mawni le?

"Nizana ka lo mut lai i hria em?", a bu zeuh. "Ka pain a pawm che", a hmui a hup nghal a, a nui kur kur.

"I mumang a nih chu", ka ti hlak. "I pi leh pu bulah sawi suh aw", ka ti a. A bu ve nghauh nghauh, "Sawi miah suh aw", ka ti leh.

Apaul-a pawmin pindan aṭang kan chhuak a, in chhung chu a lo reh ṭhiap, sofa chungah Apaul-a ṭhuttirin, tukverh leh kawngkapui te chu ka va hawng.

A lo inkalh tawh loh danah, tu emaw ber chu an lo chhuak tihna a ni phawt a,,Pu Brandon-a a nih ngei ka ring bawk.

Chokaah awmin ei rawng ka bawl ṭan, Apaul-an min lo koh chuan ka va phei a, "I bulah ka lo awm ve", a tih chuan, ka pawm phei ve leh.

Chair-a ka ṭhut fel chiah tihah, "E he, Mazai, i lo thleng der tawh elaw, lo kalna tur i hmu thei maw?", ka piin a lo ti a.

"Aw, ka lo thleng deuh chiah, khawiah nge in kal a?",

"In hnung lamah kan awm mawle, keini chu, zingah te hian kan mu rei thei tawh lo", ka pi bawkin a ti a. Kawngka hawngtu chu anmahni a ni tih ka hre ve chiah bawk.

"Kawngka a lo inhawng sa sia, mak ka ti deuh reng a ni", ka ti zawi sap. Zingkar kar aṭanga dawt han sawi nghal mai chuh.

Mahse, dawt var a ni tho, ka haw lai min hmu ve vek a, zanah ka riak tih an hre tur a ni lo reng reng, a zahthlak.lutuk.

"E, hei, pu bera pawh a lo tho ta e", ka piin a tih chuan, gas ka on tur chu gas lighter ka'n thlauh ringawt a.

Ka rilrua phun hlak chungin gas lighter ka chhar, ka on a, chawbel ka chhuang nghal zat.

Pu bera pawh chu hmuh tur a awm chuang lo. Apaul-a bulah ṭhuin bawkbawn a bialin ka chan a, artuia chiahin ka kang dawn.

"A tui i ti ngawt ang", nui varin ka ti a. Apaul-a pawh a khi ṭhaw.

Apaul-a bakah ka pi leh pu pawhin tui an tih thu an sawi an sawi mai, keini kha chu Zo Artui kha a ni ṭhin a, Zo Artui pawh ei a chakawm tawh.

Pu Brandon-a erawh chu ngawi rengin chaw a ei a, a tih fo ṭhin dan a nia, ngaiah ka nei tawh.

Nizanah engmah thleng loin a awm thei a, a hmelah leh cheziaah te pawh a lang lo reng reng. Keipawh chu, engmah thleng lo angin ka awm ve a, mahse, har ka ti ve det.

Ka hmuh chang hian min ṭhawng nasa thei lutuk a, ka thin a phu dup dup zel.

Min fawh aṭang kar khat a liam a, kan inbe ngai lo a, en pawh min en ngai hek lo. Ka haw dawna, "Mangṭha", ka tih bak hi chu, keipawhin ka en ngai lo.

A hmaa a lo awm ṭhin danin a awm a, kan pahnihin kan awm ka ti mai. Mahse, min fawh khan keimahah nghawng a nei nasa lutuk a, a chang chuan min en ve lawk se tih te hi ka lo beisei ṭhin.

A ruka beiseina ka neih tihbo tumin ka chal ka beng leh hlak hlak zel. A zahthlak lutuk, zahthlak tihpiah lam a ni.

Pu Brandon-an awmpui dang a la a, kan inrual chiah zui. Kei ka hna chu Apaul-a nena inawm leh chawt a ni mai.

Apaul-a mai ni lo, ka pi leh pu te awm tel bawk. Anni pahnih hi an hmuhnawm thei. Ka pi leh pu te nen kan awm ho hi chuan Apaul-a pawh a hlim sawt hian ka hre ṭhin.

"Mazai, a muhil tawh em ni?",

"Aw, muhil tawh",

"U Roa a lo haw har dawn sia, amah chauha a mu tur chu ka ngaihtuah deuh", a ti sap.

"A bulah ka pi a lo mu ṭhin a, ka pi pawh pindanah a lut chiah", nui var hian ka lo ti a. A bu ve nghat.

Rei awm duh loin ka kalsawn thuai, ka sual nge phei chu ka hre lo, ka ngainat zawng a ni lo tlat pek.

Pu Brandon-a a koh dan te hi ka lo ei lo nasa thei lutuk, "U Ro", a ti deuh kher zel a, a koh ka hriat tswh chuan a rukin ka lo ner nasa thei lutuk.

Gate vuanin ka lu ka thing nawk nawk, Pu Brandon-a hi ka rilru ngaihtuahna aṭanga ka paih chhuah a ngai.

Ka hma chu a lo êng phut, David-a chhuakin Pu Brandon-a kawngka a hawnsak a, rui chhe zet hian a lo chhuak!

David-an a kuah a, gate ka lo hawn sak, in chhungah an inkuah lut a, Temuanin, "U Ro, ngati nge a, i ṭha maw?", a tih ri ka hriat chuan, ka kut ka hum ruh nasa lutuk.

Thaw hawkin ka hmai ka beng hlak hlak a, ka lu ka thing nawk nawk. Ngaihtuahna ṭha lo tak ka pu a ni, a ṭha lo lutuk, a ṭha lo lutuk ringawt.

"Bawihte, i nu hi min lo ṭanpui rawh, in bula lo kal ve ka duh tawh, in bulah chuan hahdam deuhin ka awm thei ang a, kan nufa zain kan nui ho thei dawn a, ka ngai em mai che u, Bawihte, i nu hi min ṭanpui rawh aw", ka fanu thlalak enin ka phun sar sar.

Pu Brandon-a pawhin engah mah a ngai lo a, keipawhin engah mah ka ngai tur a ni lo, ka ngai thutak mah mah a ni.

Min bengdai tuma min fawp mai mai a nia, chuvang chuan ka ngaihtuah tawh tur a ni lo.

"Ka ngaihtuah tawh tur a ni lo", ti sapin, tui vawtin ka inleih! A vawt lutuk chu ka rak ṭhat. Ka nuih a za leh chu keimah chauh ni mah ila ka nui vak vak.

Ka inthlak chhung zawng pawhin ka khi vur vur reng mai. Ruah a hmi seng seng avangin nihliap kappharhin in ka chhuahsan a.

Ka vanneih asiami u Tea nen kan intawk hlauh, "Siamtei ṭhiannu kha i ni tiraw?", lo dak chhuakin a lo tih chuan, "Ni e, min thlah hman dawn em?", ka lo ti let.

Kan titi siam siam pah a, Siamtei nen kan inhriat dan te min zawh chuan, "Kan hnathawhna aṭanga inhria kan nia", tiin, ka lo chhang a.

A number ka dil ta tawp a, phal takin min lo pe ve mai bawk, "Zanah hian dar engzat thleng nge i service ṭhin?",

"A ṭul dan azir ni mai, dar kua hi chu ka thleng ve, inkhawm loh zanah hian", nui var chung hian a ti a. Ka nui sak.

Chuan man ka pek laiin David-a hi lo tlanin a lo chhuak a, Car hi hmun dangah an daih ṭhinin ka hria.

U Tea chu a tlan sawn thuai, David-a chuan min lo panin, "I lo thleng chiah em ni?", tiin, ka lo bia a. "Aw, thleng chiah, lut ila", a ti a.

Kan pahnih chuan kan lut dun, David-a zinga in chhunga a lo luh hi ka hre ngai lo, ka thlen hmain a lo kal ṭhin tawh pawh a ni mahna.

Pu Brandon-a ka hmuh chuan ka meng phawk hru, kekawr bul tihah, khup khuh chang chang a dum hain, tshirt var hi a ha a, a palian si inhmeh lo ka ti a nia aw, a nuihzatthlak zawk.

"Mazai, i lo thleng tawh maw, Huanah an lo nghak che", nui sângin Temuanin a lo ti a. Ka kal ve nghal turin ka chhang ve mai bawk.

Huanah ka kal a, chhiar an lo inzirtir ve nasa mai. "Hei le, Mom Mom a lo thleng ta e, ka hahdam thei ta", ka piin a lo ti.

Apaul-a chuan min lo ban thuai, ka ṭhu thla a, ka mal chungah ka la phei. "Mazaii lo thleng tawh bawk a, va kal tawh ang hmiang", ka puin a tih chuan, an kalna tur ka zawt vat.v

"MUP meeting an nei dawn a, ka tel lo pawha kal thei reng si hi", vui âw taka ka piin a ti chu, "I lo kal ve a ngai alawm", ka puin a lo ti.

Ka lo nuih dun sun sun a, an lawmawm em em mai a ni.

Apaul-a nen chuan kan inawm ta a, ka pi leh pu te awm lo chu, ruak huaiin ka inhre mai.

"I pi leh pu awm lo chu, khua a va har ve", ka ti a. "Ka ngai", a lo ti sup. A biang piai zauhin, "A nih, min lo ngai ve em?",

"Ka ngai ber che", a tih chuan, pawm kâng lawkin a biangah ka fawp zuk zuk. A biang puar lai ka seh ner ner a, a nui uar uar.

"Keimah ve", tiin, ka biang chu a seh ve ner ner a, a ti a za mawni min seh ta vak mai, "A naa, Zirsangzel", a la nui vak vak zui.

"Ka biang i seh chhe vek dawn alawm", a mawnga beng hlak hlak pahin ka ti a. Kan pahnih chuan kan nui uar uar.

Pu Brandon-a inah a awm a, Apaul-a chauh ka ngaihsak, kan bula lo kal zeuh a ching a, mahse, ka lo hmu lo der hmiah thung.

Apaul-a chu ziah ka zirtir ṭan, pencil hum tirin, a kut ka hum hman ve a, A AW B ka ziahpui.

A hnuah, entawna a ziah turin ka ziak chhuak leh a, la thiam lutuk lo mah se, tlem chuan hma kan sawn ve deuh,

A zan mu tur suak bak chu khum chungah ka ṭhutpui run. "Muhil rawh, zan a rei tawh",

"Ka la mu duh lo",

"I mut tawh reng kha, muhil rawh",

"Mom", ṭap pur chungin a ti a. Ka infiampui tawh dawn lo reng reng. Hetia a suak bak zel chuan ka haw hun a tlai dawn tlat.

"Ka pa pawh a lo la haw lo",

"A lo haw ṭep tawh, a lo haw hmaa i muthilh a ngai alawm",

"Mom, i sual e", a ti leh. A rukin ka nuih a, nawrh a thiam lutuk.chu a mawngah ka beng leh hlak, "Muhil rawh ka tih chu, Mom sual deuh ka nih hi", ka ti a.

A han ṭap uar sauh a, "Ṭap tawh suh, i ṭah chuan ka vua ang che", ka ti chu, a ngawi hmak.

A hmui a pawr tarh a, a mittui a parawl kuang bawk a, a duhawm hnup hnup lutuk chu pawm kângin a hnung ka beng thek thek.

"Dar kua a ri tawh dawn a, muthilh a hun tawh alawm, inah ka haw ve a ngai tawh a",

"Ka bulah mu leh rawh", a insut faih, ka nuih sak a, "I bulah i pa a mut ṭhin kha",

"Nangmah ka duh che lawm", a ti leh. Kan intimuhil thei lo ang tih a hlauhawm tawh.

A harh tawlh tawlh emaw tih tur a ni, ka thaw hawk a, "Aw le, zanin chu ka riak leh mai ang aw, mahse, i pa dil phawt a ngai dawn a, ka dil ngam miah lo, chuvang chuan kan pahniha muthilh a ngai ang, a ṭha em?", a ha lang ṭhawin a nui ver ver.

A muthilh hnu chuan tho ṭhem ṭhemin pindan aṭang ka chhuak a, Pu Brandon-a lo ding ka hmuh chuan ka ding chiang lutuk.

Bangah inkuangkuah hlun chungin a lo ding, ka chhuah hun tur min nghak tihna mawni le?

"Mangṭha", ti zawi sapin, ka kalsawn. Gate ka hawng a, David-a pawh chu car nghengin a lo ding.

Car kawngkhar hawngin, "Ka puin thlah tur chein min ti a",

"Aa, a ngai lo, keimah pawhin ka haw thei alawm",

"Ka thlah haw loh che chuan ka puin min bân mai ang", a ti chu, "Aw le", ka lo ti vat.

Min thlah haw dawn loh avanga a bân tur chu ka ngaingam bik lo. Kan pahnih chuan kan ngawi reng a, a hnungah ka ṭhu bawk nen, eng thu ber nge sawi tur lah ka hre mai lo.

In kan thleng ve mai bawk, chuan a nuam phian zui. "Ka lawm lutuk aw",

"Keipawh le", nui varin a lo ti a. A va han hmelṭha reuh tak. Nui sakin ka kalsawn. In chhunga ka luh rualin ka phone a lo ri a, bag aṭangin ka la chhuak thuai.

"Mazai, i mu tawh em ni?",

"Mu lo e, eng nge ni ta?",

"Kan inbe khat em a ka ti", ka uin a lo ti chu, kan inbiak khat zia ka hre chhuak. "U, ka nu te an mu tawh em ni?",

"Mu tswh e, i mut ka ring ve tho na chu signal awm laiin ka lo bia che nih hi",

"Loah i riak ni maw?", ka lo ti vat.

"Chakai chhitin Sawma nen kan kal a, ruahin min dang sia, tunah hei, a bâng leh ta hlauh sia, ruah sur laiin Sawma a muhil a, hei, kan riak ta mai a ni ang chu", ka uin a lo tih chu, ka lo nuih hak hak.

Aiawt a chiaha mi Chakai tlem azawng leh vaimim leh theihai min lo thawn thu min hrilh duh hi a lo ni a,,sumo counter-a lam turin min lo ti.

Kan inbiak laklawh laiin a phone a ri vû vû, signal a bo tih a hriat. Zanina an chakai chhit ve tur chu, ruah tam laia han chhit reng reng.

"U Ro, vawiin ni hman nuam aw", nui sângin Temuani chusn a ti a. Pu Brandon-an min lo en chu hawisawnin, huanah Apaul-a ka kalpui daih.

Ka nuih a za tawh, ka tihtur awm chhun chu Apaul-a ṭha deuha enkawl a ni mai.

Apaul-a ka bual zo, thawmhnaw ka hak tir laiin ka pi a lo lut ve a, hlawh min lo pe, "Ka lawm lutuk e", tiin, ka lo dawng a.

Thla khat ka awm tling ta der chu nia, mahse, Apaul-a ah hian hmasâwnna hmuh tur a awm loin ka hria, ka inthiamlo ngei mai.

"I lo awm aṭang Zela pawhin hma a sâwn khawp mai, a hmel pawh hmuh a nuam tawh lutuk, ziak leh chhiar te a thiam a", nui sen senin ka pi chuan a ti a.

Apaul-a biang a piai hlak, "Nakumah chuan school kal ve tawh se kan ti a, a pa sawi tum kan tum a",

"A ṭhat chu, school kal se, hei ai hian hma pawh a sâwn chak ka ring, naupang ho bulah awm tam se, amah pawh inrintawkna te a neih phah ang a", tim dai hian ka lo ti a.

Ka thu lo nasa ropui si, chubakah, ka pi leh puin school kal tir duh mah se, Apaul-a pa ber hi ni, a tulum ropui si.

Ka pi awm lai tiin, Apaul-a hruai chhuah ka dil a, "Rorelliana hi", ṭhen saka a tih chuan, ka ṭhen ve sak.

"Chaw ei hmaa in lo haw hman dawn chuan a ni mai",

"Ka pi, kan ina chaw eipui ka duh a", tim daia tiin, Apaul-a ka en zauh.

"Khawiah?",

"Kan inah, keimah chauh ka ni tho a, ih, chhuah harh pah a ni mai", ka ti leh.

"A pa haw hun tur ka'n zawt lawk ang e aw", ka piin a tih chuan ka bu zeuh. Pindan aṭang a chhuak a, "Mom, khawiah nge kan kal dawn?",

"Keima inah, thil tui tawk kan ei dawn nia aw, mahse, sawi miah chi loh", ka ti zawi sap a. A kuta a hmui tawkin, "Shh", a ti ve ngei.

Apaul-a pawm chungin pindan aṭang kan chhuak a, ka piin, "Mazai, dar ruk hmain lo hawpui leh rawh aw, dar sarihah a lo haw hman dawn a nih chu",

"Aw le", nui vara tiin, Pindanah ka luhpui leh, a thawmhnaw thlaksakin pheikhawk ka bun tir a, lukhum ka khum tir bawk a, ka hnung puak bawk.

Ka pi leh pu chu kan bye bye a, "Mom, playground-ah kal ang",

"Ngawi rawh, a chi loh, i pa hriat lohin a nih hi kan chhuah, kan kal chuan min hau hrep mai ang", ka ti a. "Aw le", a ti ve mai bawk.

Taxi pharin, sumo counter lamah kan kal a, ka uin chakai vel min lo thawnna sumo a lo la thlen loh avangin kan nghak leh rih.

"I rilṭam em?", a hawi kual rak rak chu mi pawh en loin, "Ṭam lo", a lo ti. Ka nuih ver ver a, pawna chhuah chu nuam a ti tih a hriat.

Inah kan awmpui reng a, a ninawm ve duh dawn lutuk, naupang harh rual ta na na na chu.

"Mom, saw saw, saw saw ka duh",

"Eng maw?", a kawhna ka en a, Buzz Lightyear-a lem a lo ni. Khai leee!

"Bawihte, a to dawn e",

"Mom, ka duh, maw, please", ka hmalamah thlakin ka kuah bet a, ṭhutnaah ka ṭhutthlakpui, "Bawihte, nakinah kan lei dawn nia, tunah rih chuan a leina tur ka nei rih lo a, ka neih ve leh kan lei dawn nia aw", ka ti dap dap.

"Mom, ka duh", ṭap ṭeuh chungin a ti a. Kan bula awm te pawh chuan min en hrek hrek. "Nakinah ka tih kha", ka ti zawi sap.

"Mom", ṭap ṭeuh chungin a ti leh. A nuar nasa lutuk chu min timangang dawn dawn.

"I fapa chuan eng nge maw a ngen le, a va nuar nasa em em ve msw?", kan bula ṭhu ve ka pu chuan a ti a.

Buzz Lightyear lem a ngen thu ka lo hrilh, "Bawihte, nakinah ka tih kha", a mittui hruk sakin ka ti a. A lu a thing nawk nawk.

Han ṭah tir rawih rawih mai chu a tihchi bawk si lo, a tawpah, "A nih, ṭap tawh suh le, kan lei dawn nia,,i ṭah chuan kan lei miah lo ang", ka ti a.

Ka piin hlawh min pe hlauh chu ka vanneihpui ta a ni. "I hlim tawh em?",

"Aw", a ha lang ṭhawin a nui ver ver. A ṭahna te chu ka tuai fai.

Sumo counter-ah kal lehin, ka uin thil min lo thawnna pawh a lo thleng ve chiah.

Inah ka hawpui nghal, kan awmrei chuan thil man to tak tak a ngen leh palh ang, a pa ka la ṭhing dawn alawm.

Chhuatah bawkin Buzz Lightyear chu a khal a, a ṭawng tirna te chu hmetin, a nuihpui uar uar.

Chakai ka chhum nghal, a hmin chuan chaw Apaul-a nena kan ei khawp lek ka chhum leh.

Theihai pum hnih sil faiin, chemte leh bowl kengin Apaul-a bulah ka ṭhu thla. A hmin lam a ni tawh bawk a, Apaul-a ei theih tawk lek.a ni.

Ka mal chungah pawmin a ei tuam tuam mai, a kut pakhatin Buzz-a a keng tlat bawk, a thlah phal tawh lo reng reng.

Ka uin min lo thawn ho hi a tlem tham si a, ka pi leh pu te hriata sawi chi pawh a ni lo.

Theihai kan ei zawh hnu chuan vaimim chhum turin ka singsa leh. A nui ri ka hriat tawh loh avangin ka va en a, a lo muhil der.

Ṭha taka muttirin puan pan tê ka sin tir a, a Buzz-a chu laksak ka tum a, a chelh nghet sauh. Ka laksak duh ta lo.

Kawngka kalhin a muthilh lai tiin ka inbual a, hmanhmawh lutukin ka inbual, Apaul-a a harh ang tih ka hlau.

Ka inbual zawh chuan ka inthlak leh sawk sawk, a bulah ka ṭhu a, "Bawihte, naunaua a lo leng a nih hi, a hmelṭha i ti em?", a lu chul pahin, ka rilruin ka ti a.

Chutih laiin kawngkaw a lo inkik, ka va hawna ka hmaa ding ka hmu chu kawngka ka khar leh vat.

A lo inkik leh a, muangchangin ka hawng, engtin nge hetah kan tih a hriat?

Chair-ah a ṭhu a, Apaul-a bulah ka ṭhu thung, Apaul-a inphenna atan ka hmang.

"Hetah lo kal teh", ka lu ka thing nawk nawk, "Lo haw kan tum leh tho alawm", ka ti zawi sap a, ka kun ngaih.

"Lo kal teh ka ti chu", zawi tak si, chang fak hian a ti a. Hlau chung chungin ka va kal.

A hriat loha chhuak kan ni si a, engtin nge min tih dawn ka hre lo, a hmaah ka ding a, "Ih, kan khua aṭang ka uin chawhmeh min lo thawn a, chumi-", ka sawi zawh hmain a lamah min pawtin,,ka hnunah a kut pahnih a suih a, ka âwm hnuai chiahah a bei nghal!

Ka ding khawng leh ringawt tawh, ka hamhaih lutuk chu chetna chang pawh ka hre leh tawh lo.

"Innei ang",

"Eng maw?", ka tal chhuak chiang lutuk, "Thlawi ve ve chu innei ang, buaina a tam lo zawk",

"Eng maw?", phawk hruin ka ti kâ hô.


Show post links
Top

[Ngaia]

Tiam tlat e
Chapter-9
Ziaktu: Cck Lalchhuanawmi

"Eng maw?", ka tal chhuak chiang lutuk, "Thlawi ve ve chu innei ang, buaina a tam lo zawk",

"Eng maw?", phawk hruin ka ti kâ hô.

Apaul-a lo ngik chu ka pan thuai a, a lo meng kuau, a kut lo pharin ka pawm kâng a, "Mom,,ka rilṭam", tho phang lutuk hian a ti a.

A phelh phang mai bawk sia,,a nuihzatthlak zawk. "I hmai phih fai ila chaw kan ei dawn nia aw", ka tih chuan,,"Aw", a ti ve vat. A Buzz-a a zawng chu ka pe thuai.

Pu Brandon-an min lo en reng tih ka hria, haw tir dan ngaihtuah a ngai dawn a ni.

"Mom, ka pa a awm",

"Ka hria lawm", Pu Brandon-a en chungin Apaul-a beng bulah ka phun sap. Ka ding a, "Ih, i hnaah i buai lo em ni?",

"Buai lo a nih hi", a lo ti thum bal. "Pa, hei", nui varin Apaul-a chuan a Buzz-a chu lek kângin a pa a entir a. A pa pawhin, "Tuin nge leisak.che", a lo ti.

A ṭhutna aṭanga thoin kan lam a lo pan, ka hnungah ka tawlh hlek, "Engtin mah ka ti dawn lo che", Apaul-a ban chungin a lo ti a.

Apaul-a chu ka pe ve mai bawk. "Chaw i ei ve duh em, mahse, ka chhum kep miah lo che", nui tawi tak hian ka ti a, ka kalsawn nal nal.

An pafain an ri thum dut dut a, ka hre ṭha thei bawk si lo, eng thu tak chu sawi ve ang maw?

Chaw ei ka siam zawh chuan, "Chaw a ei theih", tiin, ka ko a. An lo inpawm phei, Pu Brandon-a pawhin a coat a phelh tawh a,,a kamiz bân a kiu thlengin a lo thlep chho leh dim diam.

"A hmai i phihsak tawh em?", ka ti a, Pu Brandon-a chuan a lu a thing nawk nawk.

"Khawi", Apaul-a chu pawmin, tuilumin ka phihsak a, ka hruk hul hnuin chaw eina lam tur kan va pan a, Apaul-a chu ka mal chungah ṭhuttirin, a dulah ka kuah.

Thleng hi pahnih ka kawl a,,ka u hian zawrh turin Serthlum a lo keng ṭhin a, chumi laia a awm chhunga a chaw eina tur tiin, min kawl tir.

Chakai chu pali lek a ni a, Aifiar pakhat a tel bawk, an thau ṭha em em leh nghal. "Chakai chiah mi kan hmeh dawn?",

"Ni lo e, hmarcha leh chi a awm a, anthur pawh a awm kha",

"Anthur chu chakai nen a inpawlh vek",

"Ei tawp suh", ka lo ti hlur. "Aw le", bu nghat chunga a lo ti chu, ka ngei lutuk. Chaw hlumin Buzz-a a ken lohna lamah ka ken tir a, a keih hmawk hmawk.

Ka lo nuih ver ver, Chakai bawppui lian ṭha deuh chu ka seh ri hmawk a, a ti la chhuakin ka ei tir a, duh kuang kuang lutuka a tep chuap chuap chu a hmuhnawm lutuk.

Chakai kawngkawraw thau ṭha zet pakhat lain a chhunga a ti Apaul-an a ei zawh hnuah chaw dahin thleng sirah ka dah a.

Kan naupan lai emaw, tun hnu thleng pawhin heti hian a kawngkawraw chhungah chaw kan dah a, chaw ei khamah kan ei leh ngei zel.

"Mom, ka duh leh", chaw hlumin ka ken tir leh a, a bawppui ti ka lak chhuahsak leh.

"Chaw ei rawh",

"Nangmah zawk khan ei rawh", ka lo ti vat a, "Ka thleng hi lo en teh", a tih chuan ka en a, a lo ei zo tawh reng chu niin, ka nuih tlawn ringawt.

Chaw khawrh pahin, "I ei zawh chuan la ve ta mai che", ka ti leh hrâm. Apaul-a ka buaipui pah nen, chaw ka bâr mang lo.

Pu Brandon-a pawh chuan chakai a duh kuang kuang lutuk. Ani chu a insiam thiam vek tawh a, buaipui a ngai lo.

Apaul-a ei atan a bawp lian ho kan thlengah a lo dah zel a, chakai ke te chu a hip hruih hruih, a thau avangin a ṭhen chu a hip chhuah theih loh a, Pu Brandon-a chu a phun leh hluk zel.

A chaw ei lai chu ka en leh zeuh ṭhin a, a fapa ang chiahin a chaw ei lai a hmuhnawm, mit leh lam chhing sawk chungin chakai bawp ho a han seh ngei a.

Apaul-a chu chakai tui te ka hawp tir a, a lo duh phian. Chakai tui chawmin thlenga chaw chu a bâr ve nasa lutuk. A kam sir vel a berh nuaih mai.

Ka lo suangtuah ṭhin kha a takah a thleng taah ka ngai, mahni fa ngei chaw hrai a, pawm chunga chaw ei te, chhungkuaa hlim taka chaw ei ho te kha, tunah, a thleng taah ka ngai.

Mahse, chhungkua tak tak kan ni bawk si lo!

Inngaihtuah lungpuam duh loin Apaul-a ei tur chakai kawngkawraw ka siam leh thuai.

An pafain chaw leh chakai an ei zo vek, ântui lah an hawp zo vek bawk. A lawmawm ni mai rawh se.

Kan chaw eina ka tihfel chhung zawngin ṭhutthlengah an lo inpawm a, an thaw dun huai huai, an hmel aṭang reng pawhin an puar tih a hriat.

Kei erawh vaimimin ka intipuar thung, chaw an ei ṭeuh avangin vaimim chu an ei thei chiah tawh lo a, Apaul-an pahnih a ei thei ṭawk a, Pu Brandon-an pakhat a ei zo hrâm bawk.

"Ka va'n puar em em",

"A lawmawm a nih chu", ka lo ti a, a nui suk. "Mom, keipawh ka puar lutuk", ti pahin, a pum a beng thek thek. Puar tur reng pawh an ni.

"Ka-", Pu Brandon-an a ti chiah tihah a phone a lo ri, "Lawk aw", tiin, pawnah a chhuak a, kawngka a khar avangin eng thu nge ka hre lo, chubakah, a mi biak ka hre lo bawk.

Apaul-a chu ka infiampui, puanin tumtelek ka siam a, chu chuan a Buzz-a nen kan indotir, nu tlingpui tawh pawh hi ka hlimna a ho sâwt tawh a nia aw.

Kawngka inhawng ri ka hriat chuan ka hawi phei,,kawngka bula dingin, "Hna hmanhmawhthlak a awm avangin ka kak a ngai a, ka zawh hunah ka lo hruai ang che u",

"Keimahniin kan lo haw thei alawm, va kal vat zawk rawh, i tlai palh ang",

"Ka lo hruai ang che u ka tih kha, lo kalbo lo ula ni mai", ti hlakin a chhuak zui. Thinrimna tur ka sawi awm ka hre si lo.

A coat a la theihnghilh zui, ka um a, an lo tlan liam hman chiah chiah.

Apaul-a bulah ṭhuin, "I pa chu kan nghak duh ang em?",

"Aih", a lu a thing nawk nawk, ka nuih sun sun. Kan nghak dawn nge dawn lo?

Dar nga leh a chanve thleng nghak ila, chuta a lo thlen loh chuan kan hawsan tawh mai ang.

Ka pi bulah dar ruk rik hmaa haw ka lo intiam tawh si a.

Apaul-a inthiar chhuak chu, chair-ah ṭhuin commode ke rah chhan tawn tawnah ka ke dahin, ka keah ka ṭhuttir.

A inthiar zo kekawr te ka hak tir hnu chuan, "Mom, ka pum a tê vek", a ti chu, ka nuih hak hak.

Chaw a ei ṭeuh si a, a pum a thawl hawk ngei ngei ang, chumi a sawi tumna a ni ve ngei ang le.

Sana ka en zeuh zeuh a, Pu Brandon-a lah a lo thleng har si. Dar nga a ri tawh a, Apaul-a chu hawpui mai ka duh tawh.

Taxi chan kual chhung nen, dar ruk rik hma pawhin kan thleng hman lo ang tih tur vel a ni.

Apaul-a ham bai bai ka hmuh chuan, "Bawihte, i mut a chhuak tawh em ni?", ka ti a, a bu nghat nghat.

Rei kan inpuak hmain a muhil thuai, a puar takzet a nih dawn hi. Ka phone lo ri chu ka ban a, number hlang a nih avangin ka rik ral tir ṭhak.

A rawn ri nawn leh pawh chu ka la duh ṭhak lo, a vawithumna atana a lo ri leh chu ka pi ka ngaihtuahnaah a rawn lang zawk.

Haw har min ti tawh ang a, min lo phone te hi a ni reu reu palh ang. Ka chhang ta thuai, "Aw ka pi",

"Ngati nge i lak theih miah lo a, khawiah nge i awm?", a rawn ti vin ṭhawt. Ka beng aṭang phone ka dah sawn rang lutuk.

Speaker-ah dahin,,"Ka number hriat ngai loh ka chhang ngai hleinem", tim dai hian ka lo ti a, "Tun hnuah chuan chhang tawh ang che", a rawn ti ram hmak.

Ka rilruin, "I thu lo", ka lo ti tûm hmuk. Apaul-a chu hmalamah dahin ṭhutthlengah ka ṭhutpui a.

"Ka lo hruai dawn che u ka tih kha, ka nu ka hrilh vek tawh, lo awm hle hle ang che u, i hria maw?",

"Ka hria e", ka lo ti a. "Rorellian", tia, aukhum vak ka chak ngei mai. A thuhnuaia min kun tir a tum chiang a ni.

Inti luhlul ve tur ka ni asin mawle, ka intiluhlul ve chiang tawh ngawt ang, a hnuaia thawk ka ni tawh lo a, Apaul-a awm tur hian ka pi zawkin min ruai, a hnuaia thawk ka ni lo reng reng.

Apaul-a hnung beng thek thekin ka chul hliau hliau, nizanah muhil turin kan inthlêm a, tunah lêm, muhil tura inthlêm pawh a ngai lo.

Ka pi bulah engtin nge a sawi ang aw, a rukin kan chhuak ve em em a, min man leh sia. Engtin nge kan chhuak tih a hriat reng reng le, min en thla reng zawk hi mile?

Ka piin a hria nih chuan, Rorelliana chu lo nghak ila a ni tawh mai. A rei lo turah ngai ang. David-ah hnenah zawt ila min hrilh ṭhat duh ka ring zawk, David-a hi min lo enthlaktir reng te hi a ni zawk mai ang a, va buaithlak tak em!

Apaul-a lah chu a mutui em em, zan laiah a ṭhanharh loh hrâm ka beisei.

Ka u number hmet chhuakin ka phone a, a ri tawp ṭep tihah min lo chhang thei hrâm, mahse, ka nu zawk a lo ni.

"Nu, ka uin chakai vel min lo thawn ka hmu aw",

"A lawmawm lutuk e, zanin chu i u kan hau char char, a upat tawh nen nen a puitling thei thlawt lo",

"Ngati nge ni ta a?",

"Sawma nena an inkawm tawh hi chuan e, buaina a ni mai buaina. Tlaiah zu in turin Lalmalsawman a lo sawm a, ṭha te tein a lo haw dawn emaw tih laiin VCP inah min lo koh chu", ka nu chu thinrim tak hian a ṭawng bawrh bawrh.

VCP in(home) a tih chuan min deng dawt bawk, ka lo na veng veng nghal, "Nu, tu nen nge an insual a?",

"Lalnunpuia nen mawle", ka thinphu a rang nghal lutuk, "A lo va sawisak kha a ṭul lo reng reng, ka thin a rim a nia, cheng sânghnih chawi turin min la ti zui", ka nu chu ka lo thinrimpui.

"A zu in mahin rilru a tihhah tawh laiin, a rui zat apiang hian insualpui a nei ziah lehnghal", ka nuin a ti leh hlak hlak.

Chutih laiin, "Kha z*wngchhepa ṭan zawng khan engmah sawi suh u, a ring ruh ka titliak lo kha lawm hle rawh se",

"Vanhmingthang", ka nuin a ti nghal hrawk, ka mit chhing sawkin Apaul-a ka kuah nghet sauh sauh.

"Vuak i duh em ni, min tihhah zia hi i hria em? Zu i in duh a nih chuan in hle hle rawh, insualpui nei ziah mai, Lalnunpuia va tâwng va tâwng kha eng nge a ṭulna, keini min ngaihtuah lo a nih pawhin i farnu tal chu ngaihtuah ve ta che.

Ka hrilh zing tawh lutuk che, i pa hi VCP a nih ve loh hi, ani anga inluling thei i ni lo. Min hmuhsitna chu tuar ve mai mai rawh tih ka sawi ngun tawh bawk, thu reng reng awih thei lo.

An ina tlawm taka min kaltir aiin ngawi renga taima taka hnathawkin, i nu leh pa te hi inchhuang takin min kaltir ṭhin zawk ta che, nangpawh engtinmah an ti peih lo ang che.

Pawisa chawi tura min tih pawh nangma'n pe ang che, Mazaii hnenah pawisa dil hlek bawk suh ang che, i hria maw? Khaw'nge zanin chu ka'n vaw teh ang che, ka thin i tirim lutuk", phone chu off-in ka dah thla chawrh.

Apaul-a kuah betin a chal ka fawp vang vang, "Bawihte, ka bulah i awm a, ka nat ang tur pawhin ka na lo, ka va lawm tak em!", insut hlawp hlawpin ka mittui ka hru tawk tawk.

Sawi ber tur pawh ka hre lo, zu hi chuan min va tibuai ve chiang tak. Ka u pawh chu aw, sawisak kher a ngai emawni le?

En liam ve mai mai ṭhin sela ka va ti ṭhin tak em!

Ka phone ri chu ka en thuai, "Va mu nghal rawh, Mazai, i rilru lo tihah lo la aw",

"Ka u chu i vaw tak tak em ni?",

"A kal bai auh auh mai saw", ka nuin a tih chuan ka nui sak. "I uin pawisa a lo dil che a nih pawhin lo pe miah suh ang che, ama chawi tur a nia, ama'n pe rawh se",

"Aw le, khawiah nge ka pa?",

"A lo la haw lo, Vanhmingthanga min tihbuai dan hi e",

"Ka u chuan a sawisa na viau em?",

"Na lutuk a ni loin ka hria, a hmel erawh a duk churh a, a mit ko leh a kam sir a kak deuh bawk. I u nen an danglamna a awm chuang lo, Puia rui pawh hian i u hi a lo tâwng ve ṭhin a, i u rui ve bawk lahin a lo ngai thei tawh si lo, hahthlak lutuk", hreawm ka ti lutuk chu ka nu hnenah ngaihdam ka dil tawp.

"I thiam loh a ni reng reng lo, helam chu lo ngaihtuah buai duh miah suh, hahdam deuh khan lo awm ang che, nupuia nei duh tu che an lo awm a nih phei chuan luhkhung hmak chi", nui huah huah chung hian ka nu chuan a lo ti a.

Keipawh ka nui hak, ka nu nen ṭha deuha kan inbiakna kan tihtawp hnu chuan thâwk ka la vang vang.

Ka duhthlanna dik loh avangin tun thlengin ka chhungten an tuar phah ve a, a pawi lutuk, a pawi em mai!

Ka phone lo ri leh chu ka en a, ka chhang thuai, "Kan lo thleng ṭep, lo insiam rawh u aw", a lo ti a.

Engtin maha chhang loin phone ka dah daih, ka hmai phihin ka hru hul a. Insiamna tur pawh a awm lo.

Apaul-a chu pheikhawk ka bun tir leh a, a Buzz-a a ken reng chu ka lakthlak sak, ka zui tawh lo mai ang. Haw leh a ngai dawn tho.

Kawngka inhawng thawm ka hriat rualin ka hawi chhuak a, ka ding nghal thuai bawk. Car kawngkhar a hawn chuan, "Ih, ka lo kal tawh lo mai ang, Apaul-a hi la mai rawh, haw leh a ngai dawn tho a",

"Ka thlah leh ang che, lut mai rawh",

"Ka sawi chu",

"Keipawhin ka sawi chu, lut mai rawh", zawi tak siin a ti chang leh fak. Ka va han haw(hua) mai mai tak. Melh rum nghekin ka ṭhu lut.

Kan ngawi reng a, pawn lam ka hawi char char. Apaul-a lah a mutui nasa mai. Dim thei ang berin ka mut a, Buzz-a ka kentir leh.

"Mangṭha", ti sapin ka chhuahsan a. "Min lo thlah lo mai rawh, a bulah va mu zawk rawh, a ngai tawh ang che", ka ti a.

A âng zuau chu, "David-an min thlah thei reng, va mu rawh", ka kal nghal nal nal. Tulum lutuk mai.

David-a chu lawmthu hrilhin ka kal leh nal nal. In chhunga ka lut chu, a ruak huai mai. In chhung bakah, ka thinlung thleng hian a ruakin ka hria.

Apaul-a nui thawm hre turah ka han inngai leh tlat pek. Kawngkhar nghengin ka hawi kual a, khawharnain min tuam tup tup, ka mittui a luang ngiai ngiai a, an pahnihin ka ngai lutuk!

Veranda-a nghakhlel taka min lo thlirtu ka hmuh chuan, nui sen senin ka va pan, "Mom, Buzz-a nen kan ngai tawh lutuk che",

"A ni maw?",

"Aw, chakai ka ei leh duh", ka nuih sak. "Kan chah leh dawn nia aw",

"Tam tawwwk ni tawh se",

"Tehreng mai, tam taawwwwk kan chah dawn nia, in chhunga khat vek thei turin aw", a pum ka hmer salh salh pah a, a nui uar uar.

In chhungah ka pawm lut a, unau in tifai ṭhin te khan an lo tifai tlauh tlauh, a ṭhenin darthlalang te an nawt a, an hmela lungawina te chu hmuh a nuam lutuk ringawt.

Apaul-a muthilh hnu chuan, office-ah ka kal a, "Ih, Apaul-a hi Doctor entir ila ka ti a, i duh chuan i lo kal ve thei ang",

"Nangpawh inentir ve la",

"Kei chu ka ṭha",

"I ṭhat loh kha, vawiina i mizia leh nidanga i mizia a inang lo",

"Ka mizia te chu a ngai reng alawm", ka lo ti a. Chik zetin min en a, ka kun daih.

"Aw le, naktukah aw, zaninah ka lo tifel ang", a tih chuan, "Ka lawm e", nui varin ka ti a.

A Office kawngka ka hawng tur chu hawi let lehin, "Apaul-a a muhil tawh aw", ka ti a. A lo bu nghat.

U Tea ka phone a, a lo remchang hlauh. A lo thlen chuan ka ṭhu lut a, Nunga pawh a lo tel ve.

Kan inhmuh khat zia chu, khat rem rem tak a ni. "I lo dam em?", ka ti a. A dam thuin min lo chhang, form a la hak danah khawiah emaw a peng kawi a ni hrim hrim.

U Tea nen chuan School chungchang an sawi a, ka bengkhawn loh avangin an sawi dan ber ka hre lo.

"Hei le, kan thleng ta e",

"Ka lawm lutuk aw", u Tea chu chuan man te ka pe a. Ka chhuk thuai.

"Lawkin, Mazai",

"Aw", Nunga chuan min lo pan a, "Hrilh tur che a ni em tih chu ka hre hauh lo, hre lo la ka duh zawk a, mahse, i hriat ngei a ṭhain ka hre ta zawk a",

"Eng nge ni ta?",

"Hman kar khan mipa pakhatin a lo zawng che a, i pasal ni angin a insawi a", ka hnung lamah ka tawlh hret a, Nunga chu ka en ngawt ngawt.

"Chuan, engtin zel?", bah nawk hian ka ti a, "Lungngai suh, midangin an hre lo,,luhnaa duty ka nih avangin min zawt a, i thawh tawh loh thu ka lo hrilh, hahdam deuhin awm rawh", dam diai hian a ti a.

A inher chu, "Nunga", a lo inher leh thuai, "A hming a sawi em?", tim dai hian ka zawt.

"A hming maw, Lalnunpuia", ka mit ka chhing sawk, Aw Lalpa le! Thâwk ka la kâwk.

"Ka, ka pasal a nih chu, mahse, kan inṭhen tawh", nui lui sak hian ka ti a. A hriat thua min lo chhang chu, mittui kar aṭang mak ti deuhin ka en.

"Siamtei te ho nen kan thlah haw zan che kha i hria em? Khata ṭang khan ka hria, i thusawi kha, i sawi mai mai lo tih ka hria alawm",

"Nuthlawi ṭhian in lo nei reng a",

"Nia", nui hak hian a ti a. Keipawh ka nui sak, "Mahse, Mazai, nuthlawi pawh ni la kan ṭhian i la ni reng tho alawm, nuthlawi i nih avangin insit chuang suh.

I thlawi chhan kan hre lo a, lo sel tawk che an awm a nih pawhin engah mah ngai suh, en liam mai mai rawh. Phar charin tlai luat a nei lo an tih kha, muttui aw", nui varin a ti a.

An tlan liam thlengin ka thlir, ka insut ri hrawih. Nungan a hre tawh a, midang pawhin an hre har tawh miah lo ang.

"Iron leh Vitamin hi ka chawh phawt ang che u a, in lamah a theih ang angin exer in lo lakpui ṭhin bawk dawn nia", Doctor chuan a ti a.

Pu Brandon-an damdawi a lei chhungin car chhungah kan lo nghak. A buzz-a a lawm ter tur lutuk a, a lungawi a ni mah zawk, min hre chang tawh lo lek lek hian ka hre ṭhin.

"Restaurant-ah kan chawl dawn em ni?", lo ṭhu lut paha a ti chu, "Inah haw zawk ang u", ka lo ti a.

David-a in lam panin a tlan a, ka ngawi reng a, Apaul-an min lo biak hian ka chhang a, a ni mai.

Apaul-a chu huanah ka ṭhutpui a, a hnung ka beng thek thek. A muthilh lai pawhin a ṭhian Buzz-a chu a thlah phal lo.

"A va mutui ve", ka bula lo ṭhuthlak paha a ti chu, "A muthilh lai hi chuan a khawharthlak duh a nia aw", Apaul-a em chungin ka ti a, ka nuih sun sun.

"Ka sâwmna che kha, ka ti tak tak a nia",

"Ka duh lo ti ta ila", Apaul-a en reng chungin ka ti zawi sap.

"Ka pasal khan zu leh hmeichhia min chen san ṭhin a, chuti chung chuan a bulah ka la awm fan, ka ngaidam a, hmangaih takin ka lo kuangkuah ṭhin.

Kan fa hmasa berin kum khat pawh tling loin min boralsan a, chumi hnuah vawi thum lai nau ka chhiat leh.

A hnuah phei chuan Ka pasalin in aṭang min theh chhuak a, a chhan pawh fa ka hrinsak theih loh avangin.

Hlauhnain min man a, tumah inlaichinna neih pui leh ka duh tawh lo, zan tin ka fanu thlalak enin ka muhil ṭhin", insut ri hrawihin ka hawi chhuak a.

Pu Brandon-a kun ngaih chu enin, "Nangpawh, zu leh hmeichhia i kawp a, ka chakna hian a tlin tawh lo, min hrethiam rawh, hetia thlawi hi ka thlang zawk e.

Holam taka inlaichinna kan siam chuan, holam tak bawka kan tawp ka hlau, chuvang chuan, kei chu ka nihnaah hian ka lungawi e", ka ti a.

Ka mittui hru thuak thuakin, nui ver verin Apaul-a chu ka en. Hmanhmawh taka thutlukna siam ka duh tawh lo.

A tawpna tur ka hre si lo a, risk ka la ngam tawh lo bawk. Nuthlawi hi, lungleng taka awm pawh ka thlang zawk e.


Show post links
Top

[Ngaia]

Tiam tlat e
Chapter-10
Ziaktu: Cck Lalchhuanawmi

A tawpna tur ka hre si lo a, risk ka la ngam tawh lo bawk. Nuthlawi hi, lungleng taka awm pawh ka thlang zawk e.

"A-u-t-u-m-n-Autumn", a tih chuan, "F-a-v-a-n-g-Favang", ka tih tir leh a. "I hria em, Favang hun kan thleng tawh a, thingkung hnah te pawh an sen eng tiar tuar tawh mai, kan khua chu a nalh leh tawh dawn lutuk", ka ti a.

Ka lung a leng thar hle bawk, Winter leh Thlasik ka chhiarpui leh. Ka thiam ang tawkin ka hrilhfiah ve zel bawk. A chang chuan Doctionary-te ka en ṭhin.

Lehkha zir sang ta lo chu English thumal hriat loh pawh ka ngah, a chhiar chu ka chhiar thiam mai zel a, a awmzia hriat ber hi ni ka buaina, thumal ho lam tak tak hi chu kan lo zir te a nih ve hlawm avangin ka hre ve mai.

"Mom, pawnah kal leh ang",

"Naktukah kan kal dawn nia aw, ka uin chakai min lo thawn leh dawn a, kan va la leh ang a, chuan kan ei leh ṭeuh dawn nia", ka ti a. A au nghal chûl.

Kan vanneih asiamin ruah tlak tawh lo hnuah pawh ka u aiawt chiah zinga pahnih vel a lo en manghilh tawhah an lo tla ṭeuh a, an thau vak ka ring lo.

Chu chu min lo thawn turin ka dil a, mautuai min lo thawn ṭeuh tswh bawk. Keima'n tlem azawng inlak vein ka inah ka dah ve ṭhin a.

A bak chu, Apaul-a pi leh pu te ei turin ka pe ṭhin. Pawisa min pek an tum ṭhin a,,mahse, hlawh ka nei tho tiin ka lo hnar ve zel bawk.

Phul sirah ṭhutthleng a awm tawh a, a awm har mah mah zawk a ni. "Mom, break ang", a tih chuan ka nuih sak, "Huii", thaw halh chungin a ti a. A chal a tuai puat.

Ka kap karah ṭhuttirin min lo ngheng a, ka hnung lama ka kut pahniha innemkhakhin ka hawi chho vang vang.

Phul nuam taka kan ṭhut theihna tur hlim nuam tak min petu thingkung pawh, a hnah a eng ṭan tawh a, mahse, an mawi em em tho si.

Thli a lo thaw heuh heuh bawk a, pangpar rimtui tak tak lêng chem chem te chu mit chhingin ka hip lut vang vang, a nuam lutuk ringawt.

Lehkha kan zirna te nen chuan in chhungah lut kan lut a, ka pi leh pu te lêng chhuak pawh an lo haw ve chiah.

Apaul-a chu bualin chhun thil te kan ei leh phawt, chhunah hian a mu tswh ngai lo a, zanah a mu hma tawh thung.

Chhunah pawh khan mu loin a lo awm thei reng a, mahse, keimah zawk khan ka lo paw muhil zawk ṭhin kha a ni a, chhunah lo muthilh tir ṭhin lo ila chu, zanah a mu hma ṭhin tur kha a nia.

A zakah dawmin, muangchangin ka kalpui chhet chhet, a hma ai chuan zia tawh tak a ni. A ke-ah tha a kal ṭan a, chhuatah a ke a nghahtir theih tawh bawk.

Damdawi bakah exer ṭha takin kan la a, naupangtê mah nise, a tum a ruh ka ti mai. Tlan a duh tlat a, "Ka tlan ve duh tawh", a ruk hian min hrilh deuh reng bawk.

Doctor kan hmu zeuh zeuh bawk a, nakumah chuan a kal thei tawh ang a, a kum lehah phei chuan a tlan thei tawh hrim hrim.

Pu Brandon-a Office-a a lut fel chiah tihah ka lut ve a, "Khawngaihtakin naktukah ka chhuahpui thei ang em, kan rei lo ang, sumo counter-a thil va lam lawk a ni mai",

"Aw le", mi pawh en loin a ti a. Lawmthu hrilhin ka chhuak vat. Thla chuang meuh a ni tawh, inneihpuia min sâwma ka lo hnar kha.

Khata ṭang min umzui ta lo a, ka duh dan pawh a ni. Rui chunga a lo haw ka hmu tawh lo bawk. A fapa vang tal pawhin rui thei a ni lo.

Apaul-a muhil chu a chalah ka fawp a, thawm dim thei ang berin pindan aṭang ka chhuak. Kawngka ka hawng tur chu, "U Ro, i mu tawh dawn em ni?", Temuanin a tih ri hriain,,ka chhuak vat.

Thâwk ka la vang vang, ka âwm ka dawm a, "Inthunun rawh, inthunun rawh", keimah leh keimah chu ka infuih.

Thui ka la kal lo tihah u Tea a lo lang, Nunga ka hmu chu ka lo nuih sak. Ka ṭhu lut a, u Tea pawh a tlan thuai.

Thil hmanhmawhthlak tih tur a nei em mawni, a tlan chak ka ti, "Nunga, engtikah nge in kal dawn?",

"Ka hre lo le, thla leh khi kan tum dan chu a nia, nakumah zawk pawh a ni mai thei", Nungan a tih chuan, "Khawiah nge in kal dawn?", tiin, ka lo zawt vat.

"Aa, Ṭhalai thu hla mawle, Missionary Field tlawh kan rel a, mahse, ka hna hi ka ngaihtuah ve sia, kei phei chu ka kal ka ring lo", Nunga chuan a ti dam thluam a.

Ka lo uipui, kal ngei ngei turin ka lo ti, chutianga kal te chu ka duh ber a nia, a nuam ngawt ang.

"Nia, ka rilru ka la siam fel thei chiah lo, Hotu kan nih vena anga kal chu a ngai ngei dawn a", Nunga chuan a ti leh a.

A rilru a buai ngawtin ka ring, lehlamah a hnathawh ngaihtuah a ngai a, lehlamah Ṭhalai lam.

A tlin zawk hi ka tia, "Hmanhmawh miah loin inngaihtuah rawh, ngun deuha inngaihtuah hnua thutlukna siam a ṭha ber", ka lo ti a.

Min lo enin a nui sak a, "Aw le", tiin, a bu nghat. Amah chiah hian nuthlawi ka ni tih a hria a, Siamtei takngial pawh a hrilh lo.

Phone-ah pawh kan inbe ṭan tawh a, chak taka awm turin min fuih ziah bawk, mahse, ka thlawi chhan te, a zawng zawng erawh chuan ka hrilh lo, nuthlawi ka ni tih a hre tawp a, a ni mai.

"Tluang deuhin in haw dawn nia", ka kut ka vai a, an tlan liam thlengin ka tlir leh. In chhungah lutin mu turin ka insiam nghak chu a ni mai.

"Bawihte, nang chu i nui reng bik a, a nuam awm bik, ka thik che", thlalak enin ka ti zawi sap. Mahni fanu ngei pawh hsn thik chu,,ka nui sak ringawt.

"Le, kal tawh ang aw, chakai tam tawwk va la ang le", ka ti a. Phur lutukin a nui ver ver a, "Kal vat vat ang", a ti hluai.

Ka pi leh pu pawh an phur nasa mai, chakai an lo duh kuang kuang hlawm lutuk a,,ka lo hre har mah mah a ni.

"Nakinah, in khuaah chuan min la zinpui rawh aw,,thlama chaw ei ka chak em mai", ka piin a ti a. Ka pu a lo nui huah huah.

"Ka lo thleng tawh e", Kawngka bula ding David-a chu ka en hô, "Hruai tur che uin ka lo kal", a ti leh a. Ka hrethiam ta chiah, Pu Brandon-an a lo tir nimaw.

Taxi hman man chawi a ngai dawn lo a, a ṭha ta phian. Buzz-a a nei tawh bawk a, inkhuallemna dang a hmuh pawhin a ngen tawh lo.

Ka uin chakai a lo thawnna sumo a lo thleng a, "A lo thleng tawh e", Apaul-a chu sumo ka kawhhmuh a, "A lo thleng, Mom, chakai a lo thleng", a au tawn tawn.

Kan bula awm ho pawh chu an nui tawp, "Zanin chu, chakai ei leh ṭeuh mai rawh aw",

"Aw le", a nui ver ver. Sumo chu ding ṭhain an lo chhuak sup sup a,,an bungrua te an la thla ṭan. Chutah, a hnuhnung bera lo chhuak ka hmu chu!

Ka mit ka la sawn vat, "Chakai lamtu tur a lo thleng tawh em?", tia an au chu, "Aw, heta hi", ka kut ka phar sâng vah a.

Mahse, David-a zawkin a lo la, "Kan kal thei tawh em?",

"Aw, aw, kan kal thei", keimah zawk chuan car awmna ka pan hmasa. Aizawlah eng nge a lo tih dawn le?

Puak puan phelhin Apaul-a chu ka pawm, thâwk ka la leh kâwk ṭhin. Ka hmuh apiangin keimahah nghawng a la nei ziah zui.

Ka lu thing nawkin, "Ngaihtuah tawh lo la, a fel a ni mai, mi pakhat ve mai a nih kha", keimah leh keimah chu ka inhrilh mawlh mawlh.

"I ṭha em?",

"Aw, ka ṭha",,nui lui sakin ka lo ti a, "Tak tak maw?", David-a chuan a lo la ti hrâm, "Tak tak, ka ṭha lutuk", ka lo ti a. Engmah min zawt leh ta lo.

In kan thleng a, David-an chakai te in chhunga a dah fel hnuah a chhuak leh nghal nal nal.

Ka pi leh pu chu naupang ang mai, chakai an lawm lutuk chu mak ka lo ti zawk. An tupa hoin an ri chel chûl, an hmuhnawm zawk alawm le.

"Chakai hi chu keima'n ka lo chhum ang aw", Temuani bulah ka ti a. A lo remti nasa mai.

Ei rawngbawl tea puih ka tum hian min lo hnar ṭhin a, vawiin erawh a lo remti hlauh.

Apaul-a chu pawmin chakai a ei tur ka siam sak leh mial mial. Pu Brandon-a pawhin a hip ri hruih hruih. Ka pi leh pu pawh, an chakai ei hi an hmuhnawm thei a nia.

Tv kan en a, Pu Brandon-a pawh a Office-ah a awm lo. Apaul-a nena kan ṭhutna ep chiahah ka pi leh pu te nen an ṭhu a, kan tv en pawh chu cartoon bak a ni lo.

OggY leh chukchu ho a ni a, Apaul-a vangin ka en ṭhang tawh a, hmuhnawm ka ti tawh lutuk. An nuihzatthlak bawk si, chukchu zingah Deedee-a a ṭha ber ka ti, a thau chum bat reuh a, a lawmawm reuh lutuk.

"E he, Zela chu a muthlu bawrh bawrh mai", ka piin a tih chuan ka en vat. A lo muhil tak tak.

"Ka va muttir tawh ang e", tiin, ka thawhpui a, pindanah ka luhpui. Ka mut tur chu a lo meng,,"Bawihte, i zun chhuak em ni?", ka ti sap a.

"Aw", a ti ṭuau. Zun tirin khumah ka mut a, a harh zui ta lo, ka lawm zia chu. Saisirin a mu a, a hnung ka chul hliau hliau.

"Va haw tawh rawh, ka lo buaipui tawh ang", pu Brandon-a chu en zeuhin, "Rei lo te ka'n ṭhu lawk ang e", ka lo ti a. Apaul-a hnung ka chul leh hliau hliau.

Ka haw ang a, ka khua a har leh dawn lutuk, ka inah hawpuiin ka bulah riak ve zel thei sela ka ti tawh.

Khum sir leh lamah lo ṭhu thlain, "Engtin nge pawm chunga chaw i ei theih zawk a?",

"Nu thiltihtheihna a nih kha", ka lo ti thuai a, a khi suk.

"Nuthlawi thiltihtheihna a ni zawk lo maw?", a tih chuan, ka melh ralh. Nuih insum tih hriat takin a hmui hnuai a pet tan tan.

A va chimawm reuh tak, "Pathlawi tih theih loh Nuthlawiin a tih theih avangin i thik tihna ni maw?", ka ti ve sak.

"A ni mai ang chu", nui sukin a ti a. A haw(hua) dawn emaw ka ti chu, hua ang pawhin a lang leh si lo a, ka inthiamlo hnuhnawh leh, hahthlak hian.

"Ka va haw tawh ang e, muttui ule", tiin, ka tho a, ka kut a lo man vat, "La ṭhu rih rWh, ka thlah dawn che nia", kun chung hian a ti a.

Hnial duh loin ka ṭhu thla leh, ka kut a man chu thlah loin a vuan zui a, Apaul-a chu a thlêk ngawih ngawih.

Ka kut lah chu a vuan nghet tawlh tawlh emaw tih tur a ni, a rilruah eng nge awm ang le?

Kan ngawih vang vang hnuah lo hawi chhuakin, "Tirawh, ka thlah tawh ang che",

"Ih, keimah pawhin ka haw thei alawm, mu hahdam rawh",

"Lo kal mai mai rawh", a ti a. A kal nal nal, ka bag lain ka zui a, Apaul-a ka ngaihtuah ngei mai.

David-a hnenah chuan, "Lo awm rawh", a ti a. David-an chahbi pein, "Lut rawh le", ka lut nghal vat.

A hmaah ka ṭhu a, khawhawi pawh a zia deuh. Car chhung chu a lum nuam em em a, darthlalang a tihhniam loh avangin a uap churh tawh maiin ka hria.

"Darthlalang hi tihniam deuh la,,a uap tawh e", ka ti a. "Aw le", thaw halhin a ti a. A tihniam ve mai bawk.

Kan ngawi dun leh tlawk tlawk, sawi tur ka hre lo reng reng.

Ka in luahna thlen hma deuh kawngsirah dingin, "Ka lawm lutuk aw", tia chhuk ka tum chu, ka kut a lo man leh.

"La chhuak suh", ka ṭhutdan ka siam ṭha leh. Eng nge sawi tur a neih ang aw.

"Eng nge ni?", ka ti.a. ka kut a thlah riai riai. A kut dinglama car steering chelhin, a kut veilamin ka kut a rawn vuan leh.

Laksawn ka tum chu, "Lo awm hle hle rawh",

"Ka kut chelh kher a ngai em ni?", ka lo ti thuai. "A ngai alawm", ti pahin, a hmer vawng vawng.

"Sawi vat rawh, ka mu duh tawh",

"A vawihnihna atan ka sâwm leh ang che", a ti chu, ka kut ka la sawn vat, ka thin a tirim tawh.

"Ngati nge kei kher, nuthlawi ka nih vang em ni?", ka ti hlak. Nuthlawi ka nih vang a ni ngei ang, "Nuthlawi ka nih vangin nêm duai turah min ngai suh, ka duh lo ka tih kha", ti leh hlakin chhuk ka tum leh a, ka kut a lo man leh.

"Min ngaithla ve phawt rawh",

"Ka ngaithla dawn lo.che, i duh dana min awm tir tum suh", ka kut laksawn tumin ka tal a, ka ban reka a hmer vak.chu ka âng phuau.

"Min ngaithla rawh ka tih che kha",

"Chuti sawi vat rawh",

"Kei chuan ka fapa chauh ka ngaihtuah a, nu a mamawh tih ka hria, chuvang chuan ka fapa bakah ka nu leh pa hmangaihtaka min enkawlsak theitu tur ka duh.

Chuan, nangpawhin fa i duh a chhungkua nen, kan duh kan inphuhruk tawnsak thei tihna a ni lo em ni?

I pasal hnen aṭang ngaihsakna i dawng lo a,,keipawhin nupui ngaihsakna ka dawng hek lo, kan pahnih pawhin kan duh leh mamawh te inpe tawn ila.

Ka sawi kha, nupui pasal dang nei tur chuan nunhlui kan nei tawh, hetia thlawi ve ve kan inneih chuan buaina a awm lo zawk bawk ang", ka mita en kar chungin a ti s.

"Min hmusit hle mai, min hmusit lutuk, ka chhanna chu ka hrilh vek tawh che, ngati nge min tihbuai reng?", ka aukhum nghek, hetia aukhum hi ka chakna a rei tawh lutuk.

"Ka hmusit lo che", a ti chu, "A nih chuan, engvsngin nge innei ang i tih chhen? Chiang deuhin ka chhanna ka hrilh tawh che", ka ti leh tawn tawn.

"Ka sawi kha, ka fapa chsuh ka ngaihtuah, a nu ni turin ka duh che, mahni fa hrin ang chiaha enkawl theitu ka mamawh, ka fapa tana nu i ni thei dawn a nih chuan, chumi piah lama i mamawh apiang ka pe ang che.

Pasal te lak aṭanga mamawh i neih pawhin ka tipuitling zel bawk ang", a ti chu, ka kut a chelh lohna lamin ka bêng chawrh.

Thinrim takin ka en a, "I ngaihtuahna chu a tenawm hle mai, fa ka duh tih ka hria chhungkua nen, chumi chu tawktarhah hman tum reng reng suh. Ka chhanna ka hrilh vek tawh che.

Ṭha deuhin awm la, Apaul-a tana ṭha tak tur nu i tawng mai ang. Kei chu ka ni lo, chu loah, Apaul-a hmanruaa hman tum bawk suh, naupang a nih saw, nu leh pa kara seilian a ni lo a, a bul hnaia awm ber a pa hi a mamawh zawk che, thil ho lam mai maiah i rilru dah suh", ka ti a.

Min ngaithla em pawh ka hre lo, "Ngati nge nangmah i nih theih loh?", a la ti hrâm.

"Eng nge hlauh i nei, i pasal hmasa anga ka awm maw? Chu chu em ni i hlauh, engtin nge min ngaih ve reng reng?", ka khabe dawm kangin, kan inen ran.

"Kan Hotu ber i nih kha", ka ti zawi sap. Min thlah a, steering a chum pawp. Ka lo tawm chawih, ka hlau bik tur a ni lo.

"Ka hnuaia thawk te chanchin hi ka hre vek asin, nitin in chetla ka thlithlai ziah bawk. My boy-an hmu lo che pawh ni sela, hruai che ka tum hrim hrim",

"A nih chu", ka ti chuai raih. Ka chanchin engkim a lo hre tawh a, min hruai bo a lo tum char char tawh bawk.

Misual tak a ni, misual tak, misual zawng zawng zingah pawh a sual ber a ni lawrlak ang.

"Min ngaithla em, min hriat hmain ka hre tawh che a, chuan, ka sâwmna i pawm hma chu ka tibuai char char ang che", nui suk hian a ti a.

"Bialpa ka nei, min ngaidam rawh, mahse, Apaul-a chu ṭha takin ka enkawl zui zel tho ang", ka ti chu, "Chupa chu tu nge?", ka darah vuanin min thing nawk nawk nghal.

"Kha maw, i thinrimna pawh i thunun thei lo a nih kha, ka hnar chhan che chu i hre tawh mai em?", nui lui sakin ka ti a.

Car aṭanga chhuah vat theih dan kawng ka dap ruai, min thlah a, "A ṭha lawm, challenge chu ka cho e, min hnar dan tur hre ṭhak lo khawpin ka siam dawn che",

"I â tawh a nih kha",

"Nuthlawi zûna ka uai vang hian maw?", nui haka a ti chu, "Eng maw?", ka lo ti hû. Nuthlawi zûna uai a sawi chiang a ni.

"I hriat ang kha a ni e",

"A ṭhat chuh", ti hmukin, car aṭang ka chhuak daih. In hawng rawk rawkin ka lut a, kawngkhar kalhin ka ngheng a, ka thaw huai huai.

A rui a ni hrim hrim ang, "Zaihlunchhung, ka sawi kha lo chhinchhiah reng ang che, min tlanbosan te kha tum reng reng suh ang che, i bialpa chu ka zawng chhuak ang a ka phum bo ang, i hria maw?", ka chal ka beng dat.

A â tawh tak tak a nih hi, tlanbosan chu a fuh ber tawh zawk ang.

Bialpa pawh ka nei tawp si lo, a pawi chai hleinem, awm lo chu han zawng kual teh se, hri hre mai ah.

Ka hming pumin min la ko leh ta nghal, ka bêng na tawk lo chu, ka inchhir hle mai.


Show post links
Top

[Ngaia]

Tiam tlat e
Chapter-11
Ziaktu: Cck Lalchhuanawmi

Ka hming pumin min la ko leh ta nghal, ka bêng na tawk lo chu, ka inchhir hle mai.

Ka inbual zo ka inthlak mek laiin ka phone a lo ri a, ka u a lo ni reng.

"Lalnunpuia Aizawl a lo kal tiraw?", thinrim tih hriat tak hian a lo ti nghal. "Kal e, chakai kan lam laiin ka hmu a",

"A hmu ve che em?",

"Hmu ang chu", ka ti a. A rum nghut, a buaithlak thei.

"U, engtin mah ka awm lo, i rilru lo tihah duh suh, amah pawhin engtin mah min tithei tawh bik hleinem, i hria maw? Buaina te kha i lo siam leh ang e?", ka ti a.

Buaina a siam dawn lo tih hre tho mah ila, han vo ve hrim hrim a ṭha. A ruih tawh chuan tu han zahpah vak a nei ṭhin tawh si lo. Ka haw hunah, u Sawma nen ka hau dawn alawm.

"A tibuai che a nih chuan min lo hrilh vat ang che, ka lo chho ve zawk dawn mawni?",

"A ngai lo, i lo chho tak tak reuh ang e aw, ka nu leh pa an hah theih em kha, inah ṭha tak khan awm mai mai rawh. Min tihbuaina chhan tur a awm lo, min tibuai pawh nise, Police ka man tir thei alawm",

"Aw le, mahse, fimkhur tho ang che i hria maw, a nupui a tlan a, chumi vang pawh a ni mai thei, Aizawl-a a lo kal ve rikngawt kha", ka uin a tih chuan, a nupui tlan chhan ka zawt vat.

"Tuin nge khatiang nêp lutuk kha awmpui reng peih ang, zan tin a rui a, a nupui pawh duh khawp loin a la lerh leh ta deuh deuh", ka uin a tih chuan khumah ka ṭhu thla riai riai.

Fa hial a nei tawh a, lerh a la sim chuang lo a ni maw, "A la lerh reng maw?", ka ti zawi sap.

"Lerh ang chu, Christmas-ah chiah i lo haw ṭhin a, i lo haw chhunah pawh nise i chhuak ngai lo a engmah i hre lo a nih kha, vawikhat na na na hi chu ka la khawih leh khawp ang", ka uin a ti nuah nuah.

A buaithlak ṭhin mang e, "U, khawih tawh reng reng suh, ngawi mai mai la ṭha deuhin awm rawh, ka nuin a vaw leh mai tur che asin", ka ti a. A lo nui hawk hawk.

"Ka ti tak tak a nia, awm tir mai mai rawh, i khawih loh pawh khan Pathianin hremna a pek nasat tawh em kha", ka ti a.

"Aw le, ka lo tum ang",

"Tum loin", ka lo ti thuai. Ka thusawi chu pawm tak ang maw? Pathianin hremna a pe tawh reng a, keinin kan lo tihbelhchhah a ṭulin ka hre lo.

Aizawl-ah a lo kal duh a ni ve mai a, a duh dan danin awm rawh se, ka buai tawh lo.

Mahse, Tei leh a fate chu aw, "Aw Lalpa, anni chu venghimin awmpui rawh aw", ka rilruin ka ti a. Fapa pawh a nei tawh a, ngati nge rui renga lerh kual a la sim thei lo cheu ni, mipa ho tak hi chu aww!

Pu Brandon-a chhuak tur nen kan intawk a, mi pawh en loin min kalpel nul nul, ka hawi let duh bik miah lo.

In chhungah ka lut a, Apaul-a chu ka pi leh puin an lo chelh a, ṭhutthlengah an lo dintir.

Ka pi leh pu pawh hian an tupa kal theih hun an nghakhlel tih ka hria, han inum kawi zawr zawr se nuam an ti dawn lutuk.

Apaul-a chu a ke exer kan lakpui hlawm a, a pi leh pu mita beiseina chu hmuh a nawm(nuam) rualin hmuh a hreawm bawk.

"Bawihte, nakumah school i kal dawn a",

"Tak tak maw?", phur lutuk hian a lo ti, ka bu nghauh nghauh, "Kal dawn e a, Pawl khata i ṭan nghal chuan i zo lo mai thei a, Kg-2-a i awm a ngaih ka ring. Nursery leh Kg-1 i bawhkan dawn a nih chu", nui ver verin ka ti.s.

Apaul-a pawh a nui sun sun, wheelchair pawh amahin a nawr thei lo a ni a,,school a kal tur phei chu ka ngaihtuah.

"Mahse maw, i pa ka la dil lo a, thuruk a nih chu aw, i pain a phal theih nan nasa tawkin ka lo dil dawn nia", ka ti a. A bu ve nghat nghat.

Ka pi leh pu te nen kan sawi ho a, Pu Brandon-a an lo la sawipui bik lo, kei ai chuan anmahni hian sawipui zawk ta se, a ṭhat zawk ka ring.

Kei chu, Apaul-a awmtu ve mai ka ni a, ka pawimawh lo lutuk.

Ka phone ri tleng tleng chu banin, Pu Brandon-a number kha a ni, ka chhang dawn lo reng reng.

"Tu nge a, ngati nge i chhan loh?",

"Company mawle, an ninawm thei a nia", ka lo ti a. Ka pi pawh a nui hak. A rawn ri nawn leh duh loin silent-ah ka dah daih.

Eng thu ṭha mah sawi tur a nei dawn lo, thu duk dak lo bak sawi tur a nei dawn chuang lo a, biak loh a him ber, kan thinrim lo zawk bawk ang.

Pu Brandon-a lo haw Apaul-a chuan a lo chhawn a, "Ka ngai tawh lutuk che", Apaul-an a tih chuan ka lo nui sak.

Pu Brandon-a pawhin pawm kângin a ngaih thu a sawi ve bawk a, kei erawh an bul hnaiah ka awm lo.

Chaw einaah ka pi chuan, "Zela hi nakumah chuan sikul kan kai tir ve tawh mai dawn em ni?", a ti a. Ka pu pawhin lo tuihnihin, "Nia, kai tir ve tawh tak ang u, amah pawhin nuam a ti ang a, ina inkhung reng zawng, a ninawm dawn em mai", a lo ti a.

Pu Brandon-a chhanna chauh kan nghak tawh, "A ṭul lo, inah awm rih rWh se", a ti hmuk chu, a rukin ka lo melh rum lutuk.

A va han thu lo ber tak e aw, tulum lutuk mai. Ina han awm tir reng mai chu, "Pa, school ka kal ve duh", Apaul-a pawh chuan a lo ti.

"A ngai lo ka ti, school kal thei i la ni lo", a ti ram hmak. Apaul-an ka kut a lo chelh vat a, ka lo kuah.

Eng nge maw a hriat le, "Naupang i tihlau alawm, ṭha takin sawi ta che", ka puin Pu Brandon-a chu a lo hau a, ka pi pawhin a hau, ka nuin ka u a vuak angin vaw hial se ka ti a nia.

Min lo phone ka chhan loh avang khan, ka chunga a thinrimna Apaul-a chungah a ṭuan ta a ni mai ang em? A nih vaih zawngin aw, a chak lo ngawt ang.

"Mom, ka pa kha a dam lo a niang?",

"A dam ṭha lutuk alawm, hlau duh miah suh aw",

"Ka hlau lo, Mom, a dam lo alawm, a damloh chuan a âng vak zel", Apaul-a chu mak ti deuhin ka en.

"Bawihte, i chiang maw, a damlohin a âng ṭhin maw?",

"Aw", a lo ti a. Ka awih dawn nge dawn lo ka hre mai lo, naupangin dawt an sawi mawh tih ka hre bawk si. Tun anga lo damloh pawh chu, a awm anglo em mai ah.

"Mom, ka pa bulah ka kal duh",

"Office-ah a awm si a",

"Damdawi va pe la", Apaul-an a tih chuan, "Aw le, i pi leh pu bulah lo awm rawh aw", ka ti a. Pindan aṭang chhuakin ka pi leh pu tv en bulah ka dah a.

Pindanah lut lehin damdawi bawm ka hai rak rak, nachhawkna mum khat kengin, Pu Brandon-a office kawngka chu ka kik dat dat.

"Lo lut rawh", a tih chuan ka lut a, "Ka pu, damdawi ka lo ken che a, lo ei rawh aw", tiin, a dawhkanah ka dah a, ka chhuak leh daih.

A damloh tak tak pawh ka ring lo, hna a la thawk thei em mai.

Apaul-a chu ka mutpui a, a meng kur, "Muhil tawh rawh",

"Zai leh rawh",

"Ka zai nasa tawh lutuk a, ka hrawk a na vek tawh", ka ti sap. A thaw halh a, a pa chu a ngaihtuah ve hle a ni maw?

Fapa duhawm lutuk a ni ve chiang alawm, "Ka haw a hun tawh dawn a, i muthilh hma chu ka hawsan thei bawk si lo che a",

"Ka pa bulah min hruai rawh", a ti a. Ka hnial duh ta lo, Pu Brandon-a office chu ka kik leh dat dat.

Kan lut a, Apaul-a a hmu chu a phu zeuh zuk, "Pa, damdawi i ei tawh em?", Apaul-a chuan a ti a, Pu Brandon-a a bu nghat.

Dawhkan ka en a, damdawi hmuh tur a awm miah lo. Pu Brandon-an Apaul-a a lo la chu, kan inhnaih tawh bawk a, a taksa lum ka hre thei, a damlo tak tak!

A mit pawh.a sen deuh a, coat a la phelh loh danah, vawt a ti ni ngei ang. Apaul-a chuan a pa a lo va hrechiang em em.

"Pa, mu tawh ang",

"Aw le, kan mu dawn nia aw", Pu Brandon-a chuan a ti.a. ka chhuahsan daih.

Pindanah lutin ka bag ka la a,,ka pi leh pu te chu ka mangṭhain ve leh. Apaul-a te pawh ka mangṭha tawh lo mai ang. An pafain inawimu rawh se.

Phone ka en a, kan department group-a an ri laih laih chu ka va zawm ve *thingtlang ho hi chuan min tichangel hmun* ka ner sawk.

*khawpui ho hian min tibekang hmun* tiin, Rempuia chu ka tilet, *Mazaii tih hming hi chu a thingtlang ngawih ngawih ni, ka rilru hi na* Rempuian a lo ti leh chu, kei chauh ni lo midang pawh an lo nui nasa mai.

Lalrempuia tak hi chu aw, *Mazai, thingtlang mi ni mah la, Zaihlunchhungi han nih kher, thingtlang hmingah pawh a thingtlang eee* Rempuian a ti leh chu, ka hui pap ringawt.

*i ṭawngthei, ngawi mai mai teh ah* Siamtein a lo ti a. Midang ho pawhin kan department chungchang te an sawi noh noh hlawm a, chu chu ka lo chhiar ta ringawt.

Thingtlang mi ka nihna ka zahpui lo a,,mahse, nuthlawi ka ni erawh tumahin hre lo se ka ti thung. A dik, ka zahpui!

Mahse, ka zahpui chhan tur a awm lo, nuthlawi ni lo tur khan ka bei nasa ve asin, nuthlawi ni turin ka inruat ngai lo bawk, nuthlawi erawh ka ni ta tho chu a nih hi.

Nuthlawi hi ka nihna a ni a, ka nihna ka zahpui reng chhan tur a awm lo, tupawhin an duh chu lo sawi rawh se, nuthlawi ka ni a, ka nihna a ni tawh.

Rempuian *thingtlangnu hi khawiah nge, a muhil ta em ni?* a ti chu remchangah lain *muhil lo e, thingtlangnu bakah nuthlawi hi ka la meng e* ka ti a.

An lo nui nasa mai *nuthlawi, i va uang tak*/Siamtein a lo ti a. Nuthlawi ka nih tak tak thu leh, an awih loh chuan Nunga zawt turin ka ti a. An reh duak nghal.

Keipawh chu phone ka off a, Nunga pgone a va ri ngun dawn tak em.

A hnu rei vak loah ka phone a lo ri, "Mazai, engtin nge a nih theih a, a va'n mak em em?",

"Hre lo la ka duh zawk, thlawi lo turin ka bei ve nasa asin, mahse, ka thlawi ta tho a nih hi", nui lui sakin ka ti a.

Ngaihtuah pawh ka ngaihtuah duh tawh lo, "I sawi duh lo a nih chuan a pawi lo, inkiltawih deuhin i lo awm ang e, group aṭang te khan i lo bo daih ang e aw", Siamtei chuan a lo ti lang lang.

Siamtei nen kan inbiakna kan titawp chiah tihah Nunga phone a lo kal, "Mazai, ngati nge i sawi a?",

"Ka thup reng thei tawh lo, an hriat hun a la awm dawn tho a, hetia keimah ngei ina ka sawi hi a ṭha zawkin ka hria",

"Aw le, a ṭha vek tho e, mut theih loh nan te i lo hmang ang e aw?", Nunga chuan a ti leh a. Ka nui hak, ka hman loh tur thuin ka hrilh a.

Group-ah chuan Rempuian *kan nuthlawi neih chhun hi i lo lawm ang u, humhalh tlat bawk tur tih kha theihnghilh lo ula* a ti a. Ka nui ver ver ringawt.

*thurawn in mamawh te a nih chuan ka awm reng e* ka ti a. An lo ri hluai hlawm mai.

Nuthlawi ka ni tih an hre ta a, keipawh chu ka thawl hawkin ka hria. Nuthlawi ka nih avanga min fiam zui te chu nuam ka ti ta zawk phian.

A tir aṭang nuthlawi ka ni tih lo sawi law law ila, nuthlawi ka ni tih an hriat chhuah hlau taka hreawm taka ka lo awm te kha a ngai miah lo tur.

A ṭha vek tho e, nuthlawi ka ni tih an hre tawh a, ka rilru pawh a zângkhai tawh lutuk ringawt.

Taxi ka hmuh chuan ka phar thuai a, u Tea a lo hre zui, "Taxi driver ho hi chu kan inhre vek alawm", a ti a. Ka nui ve sun sun.

Pu Brandon-a chu a lo chhuak daih tawh a, Apaul-a chu a pa chungchang ka zawt, "Chaw ei dawnah chauh a lo tho", a tih chuan, ka nui sak.

A damlo ngei a nimaw, engtin nge a damlo tih a hriat zawk le? Apaul-a biang ka piai vak vak, fing reuh lutuk.

(Zanin chu a ho deuh tlat a tawi bawk a, min hrethiam r'u aw, min lo nghak rei ang tih ka hlau em mai)


Show post links
Top

[Ngaia]

Tiam tlat e
Chapter-12
Ziaktu: Cck Lalchhuanawmi

A damlo ngei a nimaw, engtin nge a damlo tih a hriat zawk le? Apaul-a biang ka piai vak vak, fing reuh lutuk.

"Aw le, a rukin lo inbuatsaih ṭan mup mup ang aw, school i kal huna i buai lutuk loh nan, chhiar i thiam tawh a, ziah chauh zir kan ngai tawh e", ka ti a.

Tumruh lutukin a bu nghat, ziaklobu leh pencil ka lei belh leh a, Kg-2 zirlaibu ka hmuh fuh fuh ka lei bawk.

Ka thiam ang tawkin ka han zirtir a, English kan zir phei chuan min nuih nasa lutuk. "Mom, i inhmeh lo e", a ti a. A nui vak vak.

"Eng nge ka inhmeh lohna?", bo hûin ka ti a, "I âw nen a inhmeh lo eee", ti lehin, a pum dawm meuhin a nui. Ka ngei ṭep a ni.

Rempuian, "Thingtlang âwphawi", a tih ka hre chhuak rum rum. Ka âw chu a ṭhingin, English thumal lam nan a inhmeh lo viau mile.

"Ka âw a ṭhing i tihna nimaw?", melh ralh paha ka tih chuan, "Sorry", inthiamlo zet hian a lo ti. Ka ner nûng ringawt. Kei aiin English thumal a lam nalh zawk a, Sap chiah chiah a ni mai.

A mawhawm chuang loh, a khing lehlam Sap a ni tlat a, "Nui tawh lo la aw", ka ti a. Nuih insum tak hian a bu nghat.

English thumal ho chu ka chhiar leh a, lehkhabu kar aṭang ka en zeuh zeuh bawk a, a kâ hupin a nui kur kur. Ka âw chu a ṭhing viau mawnile?

"Nui tawh suh ka tih kha", ka ti hlak a, a nui lai tawp chatin, min lo en nghal kar, a lu a thing nawk nawk.

"Ziah kan zir thei tawh", ka ti a. A bu leh nghat, English thumal ka vawntir ho ka ziah tir a, a ṭhen chu a la thiam lo a, a thiam loh hi a tlem zawk a ni ang.

School a kal huna a buai loh nan, a theih ang anga in lama lo zirtir hi a ṭha ber ang.

Ka phone ri chu banin,,"Office-ah lut la, file kawm hring min lo pe rawh", tiin, a dah leh nghal hmak.

Engmah ka sawi ve hman lo,,"Tu nge a?", ka piin a tih chuan, "Pu Brandon-a nia, file kawm hring pe turin min lo hrilh",

"A nih chuan, va pe lawk mai rawh, David-a lo tirh tur alawm le", ka pi pawhin a ti a.

Office-ah lutin file kawm hring chu ka zawng ta a, a hring reng reng a awm lo, file kawm sen chauh hmuh tur a awm. Lehkhabu ṭhahnem tak karah te chuan ka zawng zel.

Lehkhabu kar ka en laiin ka lehkhabu ngainat em em 'Nun Thlaler' tih, a lo awm ve reng chu niin.

La chhuakin ka keu a, a hma phek hmasa berah 'Brandon Rorellianan a chhiar tawh zat' tih a lo inziak a, chhiar ni nen a lo awm thlap.

A chhiar hnuhnun ber chu hman zan kha a ni, keimah ang thoin zan tin deuhthaw a lo chhiar ve reng a, kei aiin a lo chhiar tam tawh zawk lehnghal.

Inanna mual mual chu kan nei ve a nih hi, eng rilru pua chhiar ve nge maw a nih ang aw?

File kawm hring ka hmuh loh avangin ka phone a, David-an min lo chhang, "A buai lawk a",

"David, file kawm hring ka hmu miah lo tih lo hrilh lawk teh",

"File kawm hring ah, hetah a awm reng alawm", David-an a tih chuan, ka rilruin, "Rorellian", ka au nghek. Ka va vaw chak tak.

"A lawmawm chuh", ti hmukin phone ka dah a, Office aṭang ka chhuak nal nal, kawngkhar ka khar ri chawrh bawk. Hah takin kan zawng ve em em a, a bulah a awm reng tawh zawk a, a va han sual tak.

Apaul-a bulah ka ṭhu tûm hmuk a,,ka phone a lo ri leh, ka kalsawn a, "I lo kal mek em, ka mamawh tawh a nia",

"I bulah a awm reng tawh kha, engvangin nge dawt i sawi?", ka ti hlak. "Eng dawt mah ka sawi lo, min lo pe lawk rawh, a hmanhmawhthlak a nia",

"File hring pe tur chein min ti a, file sen bak a awm lo, a hring te chu i bulah a awm reng, min lo tibuai suh", tia, dah ka tum chu, "Eng maw, a hring ah? A hring ka ti lo, a sen ka tih kha, a hring te chu hetah a awm reng alawm, a sen chu lawm ka mamawh, min lo pe rawh",

"David-a lo tir mai rawh",

"Hmun dangah ka tir daih tawh, lo hmanhmawh la a ni mai",

"I duh leh nangmah kha lo kal mai rawh", ka ti leh hlak a, ka thinrim khum chiam tak chhan pawh hi ka hre lo, nuam ka ti ru phian lehnghal. File hring a ti chisng lutuk.

"Aw le, Temuani ka hrilh mai ang", tia, a phone a dah chu ka thin a ter at. Temuani hming a lam ri kher chuan min khei chiang lutuk.

Ka phone let thuai a, "Ka lo kal dawn", ka ti hmuk. Office-ah lut lehin file sen chu ka la a, Apaul-a, ka pi leh pu bulah file ka pek lawk tur thu sawiin ka kal nghal nal nal.

Taxi chhunga ka ṭhut luh rualin thâwk ka la vang vang, ka inngaihtuah a, mawilo taka awm angah ka inngai. Ka che mawilo viau ang em le?

Pu Brandon-a ṭha taka be tur ka nih laiin thinrim khumin ka ânkhum a, a dik miah lo. Ka pi leh pu hmuhah pawh a mawi lo lutuk, hre ngat phei se chu aw.

An la hre lo zawk a, Temuani lah ka thik ringawt. Aaa, ka â zo tawh a nih hi. Ka hmai ka beng vak vak.

Pu Brandon-a min fiamna mai mai a ni, min tihbuai char char tur thu a sawi tak kha, a kawng nâl siamah ka tlu tur a ni lo reng reng, fimkhur deuha ka awm a ngai dawn a ni.

"E he, Mazai, eng nge i lo tih dawn?",

"Hei hi ka lo pe lawk dawn a",

"A nih, han chho vat rawh", Nunga chuan a ti a. Ka chhuk hunah Siamtei pawh chu ka hmu tawh mai ang. Lift-ah ka chho a, a inhawn chuan David-a ka hmu hlawl.

David-a pek pahin, "Lo pe mai rawh aw, ka hmanhmawh tlat", tih leh kal ka rual a, thui ka kal hmain ka phone a lo ri.

Pu Brandon-a number a nih avangin ka chhang lo, vawihnih a rik ral hnuah min phone zui ta lo bawk. Lift aṭang chhuakin Siamtei bulah ka va kal a, kan inkuah chûng chûng.

"Awiii, kan inhmuh lohna rei tawh dan hi",

"Ka ngai tawh lutuk che", ka lo ti a. Min ngaih thu a sawi ve nasa. Mi pakhat an lo dah a, thawk thar a nih hmel. Siamtei chuan min hmelhriat tir a, Siamtei ang chiaha ṭawng duh ve tak a lo ni.

Ka phone bawk a lo ri leh, Pu Brandon-a a nih vangin ka rik ral tir leh ṭhak, "I chhang dawn lo em ni?", Siamtein a tih chuan, "Company mawle, phone hian chaw a mamawh leh tawh a, an hna hi an tlin thei a nia", nui sâwng chungin ka ti a. An nui ve hak hak.

Phone chu chawl lovin a ri ta char char, duh ang pawhin a titi theih loh, ka ning lutuk tawhin, "Eng nge?", ka vin nghal hrawk.

"Khawiah nge i awm?",

"Inah",

"I chiang maw?", a rawn tih chuan, cctv kaltlangin min hmu thei vek tih ka hre chhuak, hahthlak hian.

"Ka'n let tawh ang e", phone dahin, Siamtei te hnenah chuan ka ti a. Kan inbye bye nasa mai.

"Ka awm rei hman si lo a, ka kal leh tawh mai ang",

"Aw le, tluang deuhin aw", nui sângin Nunga chuan a ti a. Ka lo nuih sen sen. Muangchangin ka kal a, taxi ka melh ru pah reng tho.

Min zuitu an awm tlata hriatna ka nei leh nghal, ka phone a rawn ri leh, ka ning tawh lutuk, "Eng nge?", ka ti leh hlak.

"Building kha chhuahsan tawh rawh",

"Ka chhuahsan daih tawh", phone ka dah hmak. Ninawm lutuk ah. Min tihbuai char char a tum tak tak rsuh mawnile, ka ning lutuk ah.

Ka phone bawk a lo ri leh, silent-ah ka dah ta daih. Vawiin atan chuan a tawk mah mah, a ni em em tawh lo.

"Mu tawh rawh",

"Ka mut a la chhuak lo",

"Khawngaihtakin mu tawh rawh", beidawng zet hian ka ti a. A la harh tual tual mai bawk sia aw. Khumah pawh a awm duh lo, ṭhutthlengah a bawk tlat.

Pawm kân(kâng) ka tum pawhin a ṭang ve tlat, "Ka haw a hun tawh dawn a nia", ka ti leh a, a beidawnthlak ngawih ngawih.

A bulah inkuangkuahin ka ṭhu ve ta ran, a riat nawk nawk a, ka be lumlam duh ṭhak lo. A pi leh pu pawh an mu tawh a, a pa lah hi a lo kal har si.

Chhunah phone hmangin min tibuai hrep a, ka hah tawh lutuk, mut veng veng ka duh ve tawh.

"Mom, engtikah nge school ka kal dawn?", a bawk a, ka kut a lo tiche dat dat, ka en lo a, ka chhang lo bawk. Ka ngawi reng.

"Mom, Mom, ngati nge i ngawih reng a?", ka kut a sâwi nawk nawk a, ka la en duh ṭhak lo.

Ka mal chungah lo lawn kai a tum a, a ke a hmang ṭha thei si lo. "Mom", ṭah âw ṭuau hian a ti a. Ka inthiamlo ve reng, mahse, ka la ngawi ngat ngat thung.

"Mom", a ngik faih faih a, ka mal chunga lo lawn kai tumin a ṭang ve ṭang ṭang. A ke záwi lo se chu, a lo lawn kai daih tawh ang mawle.

"Mom", ka mal vuanin a tawlh chho hrut hrut, a rukin ka en ta reng a, a tawlh chho a lo tawlh chho zel a, a tawpah pei chuan ka mal chungah a khamphei zawngin a bawk ta tual mai le!

Min lo en chho, a mittui a parawl kuang a, a hmui tipawrin a hmui hnuai a seh niah niah. "Vanlalchimawmtê", ti pahin, a mawngah ka beng hlak.

Ka âwmah ka kuah bet a, a biangah ka fawp zuk zuk, a hmelṭha bawk si, duhawm bawk si, phakarin chimawm thiam bawk si, si hlir singsângsawmsarih a ni mai.

"I mu tawh ang tiraw?", ka ti a, "Aw", ṭah âw ṭuau chungin a ti leh. Ka nuih sun sun a, a mittui hruksakin khumah ka pawm phei. Khuma ka nghah fel hnuah a zun chhuah thu a sawi leh.

Kan zung leh tê tê, hahthlak viau ṭhin mah se, ka sawisel phal ṭhin lo. A nuam em em zawk si a, nu tan chuan fate tluka hlu leh buaipui nuam hi a awmin ka ring lo.

"I muhil thei na'nge?",

"Mom, ka pa bulah min hruai rawh", a tih chuan thaw halhin, "Aw le", ka ti a. Khum aṭang kan inpawm kâng leh a, "I pa bulah ka dah che ang a, ka haw tawh mai ang", ka ti zawi sap.

Ka bag lain pindan aṭang kan inpawm chhuak a, Pu Brandon-a pawh rawn luh a tum chiah. Min hmuh chuan, "Khawiah nge in kal dawn?", mak ti deuh hian a ti sup.

Apaul-a chuan, "Pa", tiin, a ban a. Pu Brandon-a pawhin ka kut aṭang a lo la thuai. A pa hi a ngai ve a ni hrim hrim, nilêngin a chhuahsan a, zanah lah mut hunah chauh an inpawm leh thei a, ngai tur tak pawh a ni.

"Ka va haw tawh mai ang, muttui ule", ti sapin, ka kalsawn a. Gate pawnah David-a a lo ding vang. Pu Brandon-a tirh a ni tih ka hrethiam mai.

Seat nghengin pawn lam ka hawi a, thli a lo thaw lut heuh heuh bawk a, Favang a ni tawh nen, boruak pawh a vawt nuam ruih tawh mai.

Favang hun hi a nuam ka ti ber, Thingkung hrang hrang an mawi hun lai a ni a, Pangpar pawh an par mawi zual lai ni berin ka hria. Favang hun duhawm tak mai hi, Nipui, Fur leh Thlasik awm lo hian Favang ni reng thei se ka ti!

David-a nen inmangṭhain inchhungah ka lut a, ka ruak leh huai tawh mai!

Ka fanu thlalak enin, "Bawihte, i nu hi lo ṭanpui rawh aw", ka ti zawi sap. Ka mittui luang ngiai ngiai chu hruk pawh ka tum lo.

Ka thaw halh, ka hna bak ka ngaihtuah tur a ni lo, Pu Brandon-a nena inneih phei chuh, inngaihzawn pawh, a awmang lo lutuk.

Keia neih phak pawh a ni lo, min fiam mai mai pawh a ni thei. Chuvang chuan, ka hnaah chauh ka rilru ka pe tur a ni a, tumah ka thik tur a ni lo bawk, Pu Brandon-an a duh duh a be thei alawm.

Ka biang tawn tawn dawm vung vung chungin ka kun ngaih a, heti hian taxi ka chang chu a ni ve si a, ka hmu har awm mang e.

"I hnaah chauh i rilru pe ang che", ka rilruin ka ti chuai raih. Ngati nge mawni, nizanah ka infuih nasat ve nen, tukin ka tho chu ka hnual ruih mai!

"Mazai", ka meng phar kâwk, "Khawiah nge i kal dawn?", muangchangin ka hawi chhuak a, ka ding lam ka en.

Nui sâng hian min lo en a, a hmel chu a zaidam em em lehnghal. "Ngati nge mak i va ti ve, min hre tawh lo em ni?", a khi suk zui a. Ka lo en reng ringawt.

Ka kut la thlain ka bag hrui ka vuan a, hnung lamah ka tawlh hnung det, "Min hlau suh, engtin mah ka ti dawn lo.che", hmalamah a lo pên hnai ve hlek bawk.

Pangngai thei ang bera awm tumin thâwk ka la halh, "U, u Pui, eng nge i lo tih dawn a?", nui sak chungin ka ti a. Ka khûrin ka hria.

"Nangmah hmu tur chein ka lo kal a",

"Ngati?",

"Ka fiam che nih kha, ka lo intiharh ve mai mai", a nui hak zui. Keipawh chu ka lo nui tawi tak ringawt.

"A nih, ka kal tawh mai ang, a nih aw", tiin, ka inher a,,ka hmalamah ka kal nul nul. Ka hnungah min lo zui ve zelin ka hria.

Taxi ka melh ru reng a, a tawpah ka hmu ta hrâm. Taxi chhunga ka luh rualin, "Ka lo kal ve, ka la leng ang chu maw?", u Puia chuan nelawm zet hian a ti a.

Driver pawh chuan a lo phal ve mai, kawngkhar bul retah ka ṭhu a, kawngkhar hi inhawng thut sela ka tla thei ang tih turin ka hnaih.

A hnungah u Puia nen chauh kan ṭhu a, Driver nen an titi siam siam, chutah ka lam hnaiha lo tawlh hretin Driver bulah chuan, "Ṭhianpa, nupuite tlan koh dan ṭha deuh i hre mial lo maw, an lo haw ngei ngeina tur", fiamthu thutak deuh tak hian a ti a.

Ka lo ip chawih, pawn lam ka hawi a, min sawichhan tih ka hrethiam mai pawh chu ka inhua.

Ka nunhlui an lo lang zut zut, tun thlenga â ka intihna leh min tina rengtu la ni chu, kan nupa khuma ka hmelhriat ṭha em em nena an chetla lai ka hmuh hnu pawha ka lo ngaidama, ka lo la chênpui te kha, ka la mutpui duh te kha!

Ka ngaihtuah zawng ringawt pawh hian ka tiril hi a khûr thei. A na tih ṭawngkam hian a sawifiah zo lo, vawikhat mai a ni nêm, vawitam an chetla lai ka la hmu zui.

Min theh chhuah hun nghak lo te khan lo chhuak daih tawh ila, natna tur tam tak ka nei lo mai tur, ka lo va â tak.

A insiamṭhat hun leh ka lama a lo hawi hun ka nghak ngat ngat mai kha a ni a, mahse, natna bak a ni si lo.

"Hetah ka lo chhuk ang aw, engzah nge ni ang?", ka chhuk a, chuan man pein ka hmalam panin ka pên pawk pawk.

Ka mittui ka dang zo tawh lo, nupui tlan koh chungchang te a sawi a, engtin nge let leh duh se min tih reng reng le?

Tun hma ang khan ka natna tur panin ka tuar tlawk tlawk tawh lo.ang. ka mittui luang te chu ka hru thuak thuak. Amah vangin ka mittui pawh a tla tawh tur a ni lo.

"Mazai", tia, min kuai her lawp tu chu mittui tling piauin ka melh rawm rawm, ka awm hrang thuai, "Ka tlai dawn, a nih phawt", hmalamah ka inher leh thuai.

"Mazai", ka hmaah tak lo dingin, "Mazai, min ngaidam rawh", a ti a. A mitmengah erawhṭ ngaihdam min dil tak tak lo tih ka hre thei. Dawt sawi hmang!

"Ka tlai dawn a nia", ti lehin kalsawn ka tum a,,ka kutah a man chat. Ka thing nghal vak a, a chelh nghet lutuk ringawt.

"Min thlah rawh", ka kut ka thing vak vak a, "Awm ṭha rawh", min chelh lohna lam a kut min bên tumin a phar chhuak a, a vin tuar bawk.

Ka phu zuk a, ka mit ka chhing tawp, kut min thlak lai ka hmu leh zui zat a, ka ṭhu thla hnawk, "Mazai, i ṭha em?",

"Kalbo rawh, kalbo rawh", ka kuta inlukhuhin ka au vak vak. "Mazai",

"Lalnunpui, kalbo rawh", nam thlu sawkin ka tlan vawn vawn. David-a ka hmuh chuan in ka thleng tawh tih ka hria, ding chawtin ka thaw halh halh.

"I ṭha em?", David-an min lo panin a ti a. Ka bu nghauh nghauh, ka lûngphu a la pangngai thei lo, a inthumrawn tlut tlut mai.

Ka hmai hupin leiah ka ṭhu tung a, David-a pawh hi ka thlamuanpui, min lo hnaih thei tawh dawn lo tih ka hria a.

Ka taksa pum hian ka khûr ni mai hian ka hria, ka sâi hlawk hlawk. Min vin ngam tur kha a ni lo asin, lo vin let hrep zawk tur ka nia.

Kut min thlak a la tum ta deuh a, zak lo lutuk mai. Ngati nge maw, ka dawih em em mai le, nêp lutuk mai.

Ka mittui hru thuak thuakin, "Apaul-a a awm em?", ka hmaa dinga mak ti deuha min en reng tu David-a chu en chhoin ka zawt a, "A nu nen an inbia a, huanah lo va awm rih mai rawh", dam dup hian a ti a.

Sâi hlawk hlawk chungin huanah ka kal, in chhunga luh kher ngai loin a kal theih a, ka thlen chuan ka ṭhu thla hnawk nghal a, thâwk ka la vang vang.

Aizawlah a lo kal tih hre mah ila, khati teh thuta kan inhmuh ka ring lo em a ni, pangngai taka inbiak chu sawi loh,,kut min thlak a tum zui a, ka lu ka thing nawk nawk.

Ka hmai te chu ka hru fai, ka lûngphu pawh a pangngai ṭan tawh. Dingin ka inbeng fai a, ṭhutthlengah ka ṭhu ta daih.

Ka chhungte chu hrilh chi an ni dawn lo, abikin ka u phei chu, a sawi ang tak takin a lo chho duh tak tak mai ang.

"Mom", nui varin ka hnung lam ka hawi a, Pu Brandon-an a lo pawm a, Apaul-a chuan a kut a lo phar.

Ka pawm a, Pu Brandon-a chu thu kamkhat mah sawi loin a kalsawn leh daih.

"Nizanah tui tawkin i mu em?",

"Aw, nang zawk?",

"Keipawh, ka mutui lutuk e", ti sapin, ka kuah bet a. A lu-ah ka khabe ka nghat. "Bawihte, reilo te ka kuah lawk ang che aw", ka ti a. Ngawi rengin a awm ve hle hle.

A hnuah, "Mom, Mom nen kan inbia a",

"Mom pahnih i nei a ni maw?", nui sakin ka ti a. "Chu chu eng nge?", hrethiam lo zet hian a ti a.

"Mom chu English ṭawng a nia, Mizo ṭawng chuan Nu tihna, Mom tiin min ko a, i nu tak tak kha Mom tiin, i ko leh a, a dik thei dawnin ka hre lo. Tun aṭang chian nutê tiin min ko tawh la a ṭhat ka ring",

"Ngati nge?",

"I nu kha Mom tia i koh a ṭha zawk alawm, atirah khan lo sawi ila a ṭha tur a nia", chek hlakin ka ti a. Apaul-a chu a bo tawlh tawlh emaw tih tur a ni.

Keima thiam lo a ni ta tlat, Mom tia min koh khan lo hrilhfiah nghal ila ṭha tur hi nia, a beidawnthlak ṭhin mang e.

"Tun aṭang chuan nutê ti hlirin min ko tawh dawn a nih chu aw, i hrethiam tiraw?",

"Ka duh lo, ka Mom i nih kha",

"I Mom ka ni lo, i Mom nen chusn in inbiak zawh chiah kha", dam diai hian ka ti a. A lu ka tuai heuh heuh.

Kan inhrilhfiah har ngawt ang le, "Kei chu, i Mom ka ni lo alawm, i Mom ai ka naupan ka ring a, chuvang chuan Mizo inkoh danin Nutê tiin min ko thei", nui varin ka ti a.

Lungawilo tih hriat hian min en kar, "Nutê han ti chhin teh",

"Ka duh lo", a ti chuai raih. "A pawi lo e, mahse, nutê ti hlirin min ko thei tawh aw, vawiin chu ka ngaidam ang che", ka ti leh.

Ka kuah hlun a, nichina ka hlauhna leh thlabarna te kha ka hre chang tawh lo reng reng. Ka thaw huai huai, ka dam leh tawh lutuk ringawt.

"Ka thlamuanna i nih hi", ka ti zawi sap, "Eng maw?", Apaul-an a lo ti chu, "I bula ka awm hi chuan ka thla a muang a, hlauh ka nei tawh ngai lo",

"I hlau maw?", a tih chuan ka bu nghat, "Eng nge i hlauh?", a ti leh. "Hlauh bik deuh ka nei alawm, mahse, i la tê lutuk a, hrilh che pawh ni ila i la hrethiam dawn lo a",

"Ka hre duh, Mom, sawi teh",

"Sawi chi loh",

"Mom, maw, sawi teh, ka hre duh, please", ka nui hak. "Ka hlauh chu maw", zawi sap hian ka ti a. A beng a chhi ve ran mai.

"Pangang ka hlau a", ka ti sap. "Caterpillar maw?", a tih chuan ka bu nghat a, a nui ta chiam.

"Caterpillar i hlau,,Mom, i funny e", a ti a. Min nuih leh chiam. A nui hmel ringawt pawh chuan min tihlim, ka nui ve ver ver.

"Kei chuan ka hlau lo", a ti a. A nui leh ta chiam. A nui lai chu ka en tawp ringawt. Ka thlamuan dan chu pui tak a ni.

Nilengin kan inawm a, a bulah ka awm lo ang tih hi ka hlau ngawih ngawih. Ka pi leh puin an hlimpuia an tleipui ang chiah hian, kei pawhin Apaul-a hi ka hlimpuiin ka tleipui ber mai.

Han kal thei sela aw, han tlan thei phei sela chu, kan inumkawi nasa ngawt ang.

Naktuk.hi Doctor hmuh hun kha a ni leh tawhin ka hria, "Mom, nutê tiin ka ko duh lo che",

"Bawihte, ka sawi kha, nutê tia min koh a ngai alawm",

"Mahse", a ti chuai leh raih. "Muhil rawh le, naktukah Doctor kan hmuh a ngai a nia", ka ti a. Doctor a hmuh duh loh thu a sawi leh, hahthlak, inthlêm leh a ngai dawn e.

Pindan aṭang ka chhuak a, Pu Brandon-a nen kan intawk, "Zanin chu haw loin riak rawh, room pakhatah ka mu dawn", a ti a. A kal leh nghal daih.

Hnialna hun a awm lo reng reng, pindanah ka lut leh a, Apaul-a bulah ka mu leh. Zanin chu ka hnial lo phawt mai ang, tu emawin min lo chang ang tih te ka hlau.

Damdawi ina kal turin kan insiam a, Pu Brandon-an ka thawmhnaw inbel tur paper bag-a dahin pindanah a lo dah a, ka hnial nasa viau naa, paper bag-a min vawm loh chauh avangin ka la ta hrâm.

Pu Brandon-a a lo tel theih dawn loh avangin David-an min thlah a, inentir ka duh ve avangin hmeichhe inentirna lamah ka hming ka va ziak ve leh.

Apaul-a hun a thlen chuan kan lut a, "A ṭha tawh lutuk, damdawi a ei lai kha zo sela, damdawi dang ei pawh a ngai tawh lo ang, nautê kal zir tir ang tak tak a ni tawh dawn, exer in lakpui ngun a, kal tura in zirtir peih athu a ni tawh mai", a ti dap dap a.

Ka lawm lutuk chu ka khi vur vur, Doctor hnenah lawmthu sawiin kam chhuak a, Apaul-a chu a kal thei ṭep twh a nih chu.

"Aw Lalpa, ka va lawm tak, ka lawm lutuk ringawt", ka rilruin ka ti mawlh mawlh.

Ka hun a thlen ve hun nghakin kan ṭhu ve ta ren rawn leh a, ka hming an lam chuan pindan têah kan lut ve leh, "Doctor, nau vawithum ka chhiat a, ka chhul hi a la ṭha em, naupai thei turin a la chak ṭha ang em, nau ka la pai thei ang em?",

"Tuna i fapa hnuah khan em ni i chhiat?", Apaul-a ka en a, "Aw", tiin, ka chhang ta ringawt.

"I chhulah natna eng emaw tak te a awm loh chuan i la pai thei lutuk, mahse, vawithum lai i chhiat a nih chuan i chhul a chak ṭhat vak ka ring lo, damdawi ka chawh che ang a, ṭha deuhin i lo ei dawn nia, i period a pangngai ang tiraw?",

"Aw, pangngai lutuk, thla hnih awl chang ka nei leh zeuh ṭhin a, mahse, pangngai tak chuan a hunah ka period ve mai ṭhin", ka ti a.

Doctor-in min chawh damdawi leia Damdawi in kan chhuahsan chuan David-an min lo nghak leh ran.

"Inah ka tlang nghal dawn em ni?", David-an a tih chuan ka lo bu zeuh.

Nau ka pai theih leh theih loh tura ka inentir chhan ngawt pawh chu ka hrethiam mai lo, mahse,,hriat ve hrim hrimah pawh a ṭha alawm.

In kan thleng a, Apaul-a chu kawng lakah a muhil daih, David-an kawngka min lo hawn, Car aṭang ka chhuak a, "Ka pi", tia, David-an min koh chuan mak ti deuhin ka en.

"Ka pu hi ruih chu a rui ṭhin a, mahse, hmeichhia hi a kut hmawr pawhin a khawih ngai lo a nia, a ruih laia a bula hmeichhia i hmuh kha chu ka ṭhiannu a nih kha",

"Ngati nge chu chu min hrilh a?",

"I hriat ve a ṭhain ka hria a, amah chuan a sawi dwn miah lo a, keimah zawkin ka sawi a nih chu, ka va kal tawh ang e", David-a.chu car chhungah lut nghalin, a tlan nghal thuai.

Mak ti deuhin ka en reng ringawt, eng nge maw awmzia le? Engvanga David-an min hrilh ve ngawt nge maw a nih le?

Pu Brandon-a chuan hmeichhia a khawih ngai lo maw? Ka ring chiah lo, an ruih tawh chuan hmeichhia an kawp ngei ngei.

David-a kha dawt sawi turin ka ring chiah bawk si lo, ka rilru a tibuai vek dawn alawm le.

Tlaia Pu Brandon-a lo haw chu a rukin ka lo en a, ka ngaihtuahnaa thil lo awm chu duh loin ka lu ka thing nawk.

Ka lâi thar ta tlat, chaw ei lai pawh chuan Pu Brandon-an min en reng turah te ka ngai a, chaw ei ka tim dûk lehnghal. Ka awmdan chu ka duh lo lutuk.

Ka pi leh pu te chu Doctor min hrilh te ka hrilh ve a, Pu Brandon-a pawhin a lo ngaithla ve kar.

"U Ro, chaw aw?", Temuanin a tih chuan, ka lo sa nghal pup mawle! Ka awmdan hi a dik lo reng reng.

Bathroom-ah lutin ka hmai ka bêng hlak hlak, ka hmai ka phih ringawt bawk.

"Zanin pawh la haw suh", Apaul-a muhil chu a chala fawp zeuhin a ti a. Min lo en a, nidang zawng aiin, awi!

Ka hawisawn daih, "Aw le", ka ti ringawt. Pu Brandon-a chu a chhuak a, ka âwm ka dawm vang vang.

Ka bag aṭang ka fanu thlalak.la chhuakin, "Bawihte, i nu hi i ṭanpui a ngai a nia, i naute nen khan min lo pui teh u", ka phun sar sar.

Apaul-a chu ka kuah leh vak zel, ka rilru puthmang te chu ka duh lo lutuk, ṭhu chhuak phutin, "Ka duh tur a ni lo", ka ti zawi sap.

Apaul-a nen pindan aṭang kan chhuak a, Pu Brandon-a pawh a lo chhuak ve chiah. A rukin thâwk ka la halh.

Pangngai taka ka lan theih nan ka insehruh nasa mai.

Pu Brandon-a hna kal tur chu, Apaul-an a lo ban a, an han inpawm leh rih. Chutah, hmeichhe sam buang, suitcase nena lo lut hi ka hmu a.

A lungngaih hmel em em leh nghal, kei chauh ni lo pawh chuan an hmu ta vek, "Veronica", Ka pi chuan a ti a.

Ka bula ding Pu Brandon-a ka en zeuh, mak ti hmel a pu miah lo, a hre sa a ni maw.

"Mom", Apaul-a pawh chuan a ti a. Hlauhnain min tuam leh nghal hlup hlup, Apaul-a leh Pu Brandon-a ka chân msi ang tih hlauhna chuan min tuam.

Ni lo, ka hlau tur a ni lo, ka ngaihtuahna hi a ṭha lo, a ṭha lo takzet a ni.


Show post links
Top