Tiam Tlat E BY Cck Lalchhuanawmi (Completed)

[Ngaia]

Tiam tlat e
Chapter-1
Ziaktu: Cck Lalchhuanawmi

"Mazai, Nunga saw, a khawngaihthlak i ti ve lo em ni, chhang ve tawh mai la?", ka nui sak ringawt. "Min fiam mai mai alawm, kei ve mai mai te chu, a duh chi ka ni lo", ka ti zawi sap a.

Ka thusawi chu a awihlo tih hriat takin a nui hak, "A duh chi i nih avang lawm, a duh thu a hrilh che, a sawi dan takah, kum khat chuang a thlithlai tawh che a nia, nupui neih pawh a hun tawh a, inngaihzawn kher pawh a ngai lo, innei nghal daih mai r'u", a ti dap dap a.

Ka nuih sen sen ringawt, "I tirapthlak em mai, inneih te chu ah, Nunga te hi i fuihpawrh a nih ka ring tawh", fiamthu titak deuh tak hian ka ti a.

Siamtei chu a nui zui uar uar, a lu a thing nawk a, "I hre lo zawk a nih kha, i chanchin min zawt reng zel, i number min dil a, tun thlengin ka la pe duh lo ngar ngar", nui ver ver chungin a ti a.

Thaw halhin, ka nuih ringawt, "Ei tur ka va lam tawh ang e, dar khat a ri dawn", tiin, ka tho zui a.

Ei tur nena ka let leh chu, Nunga nen an lo inbe siam siam a, kan dawr ka thlen hma tak takin Nunga chu a kal leh daih.

"Eng nge a lo tih a?",

"Tu, Nunga maw? Zanin a haw tlai a ngai sia, Committee naah min lo sawimawi sak rawh a lo ti a nih kha",

"Nih chu", ka lo ti sap a. "A rukin i ngaihven ve tho sia, Nunga ang hian tilang ve law law mai rawh", a phun sar sar a. Ka nuih liam ta mai mai.

Kan ei tur chu ngawi rengin kan ei ta a, thil ei laia ṭawng hi ka thiam lo a, min be ṭawng zo lo fo bawk. Mahse, he hmuna ka thawh aṭang hi chuan ka insiamrem ve zel a, thil ei lai pawhin min be ṭawng zo tawh.

Mahse, min be tu awm lo se tih erawh ka duhthusam a la ni fan. Ka vannei lehzel a, Siamtei pawh hian ei tur a hmuh tawh chuan ṭawng a ngaihsak tawh lo a, a ei buan buan zel.

"Keima'n ka lo tifel ve tawh ang e", Siamtei chuan kan eina vel a seng hawi nghal a. Dawrtu nei thut thei kan nih avangin, engtiklai pawha chet fel leh inring renga awm a ngai.

Ka hmui te hru faiin, ka ṭhutna aṭang ka tho chhuak a. Nautê kawr kan khai te chu enin ka siam rem a. Ka thawhna hi, MC anga mimal sumdawnna a ni a.

Mahse, MC ang lo takin dawr tin te hi, dawr ka ti tak naa, Department hrang hranga ṭhen a ni a. Ka thawhna pawh hi, nautê thawmhnaw zawrhna Department a ni a.

Nautê thawmhnaw zawrhna hi Department pathum lai a awm a, Department tinah thawktu pali emaw panga an awm ṭhin a.

Mahse, nautê thawmhnaw zawrhnaa Department tê ber a nih vang hian Siamtei nen chauh min dah a, ṭha ka ti zawk, Ground Floor-a awm a ni a, a kil em em bawk.

Hei vang te pawh hi niang, dawrtu kan ngah vak ṭhin lo. Mahse, nuam ka ti tho tho. Nautê thawmhnaw hlirin min hual a, ka thinlung hi a hlim ngawih ngawih.

"Heta mi hi en mai ang hmiang?", tih thawm ka hriat chuan, inher vatin ka va pan hnai a, "Lo lêng rawh u", tiin, nui sângin ka lo chhawn thuai a. Siamtei lo thleng pawh chuan a lo chhawn ve vat.

"A chung lama chhoh ai chuan a ṭha zawk ang", a ti leh a. Siamtei nen kan lo bu nghauh nghauh.

A pum chu a kawh ve lah a, ṭhutthlengah kan ṭhuttir a, a pasal .chuan kawr te chu khai chhuakin a nupui chu a hmuh tir zel a. A duhzawng a nih loh chuan a lu a thing ṭhin a, Siamtei nen paw'n kan lo khai chhuak ve a.

"Mipa nge hmeichhia a nih dawn kan hre si lo a, mipa leh hmeichhe thawmhnaw tur pathum ve vein lei mai ang", a pasalin a tih chuan, "Aw, pawi lo", a lo ti a.

An inlungrual hmel reuh sia, ka lo awt lutuk ringawt. Thawmhnaw bakah, pheikhawk leh lukhum te an lei pah bawk a, "Kan lawm lutuk e, lo kal ziah r'u aw", Siamtein a ti a.

Paper bag-ah khungin, nautê piang hlim thlalak hi bag pakhatah ka khung tel bawk. Nautê thlalak internet aṭanga ka download ho hi ka print tir a, tihian, pakhat hi an hriat lohin bag-ah ka lo dahsak ṭhin.

Thlalak hnungah thu ka ziak ṭhin bawk a, bag chu ka pe a, "A nu leh pa an hmelṭha em mai, a hmelṭha ngawt ang, mipa a nih chuan ka lo nghak dawn a nia", Siamtein a ti chu, kan lo nuih ver ver.

"Thla leh khi ka neih hun tur a nia", a tih chuan, "Hrisel deuhin lo piang rawh se", ka lo ti a. An kal chu ka hmuh theih chhung ka thlir.

Dar sarih leh a chanve a rik chuan kan insaseng fel ṭan hlawm a. Nakinah, hunpuiah chuan dar sawm thlengte hian kan la inhawng leh ang.

Nihliap leh bag ka la a, Siamtei nen kan dawr nghah chu kan chhuahsan a, "Kan puk aṭang kan chhuak sup sup ta e", Siamtein a tih chuan, ka lo nui sak.

Nunga chuan kawngkhar min lo hawn a, "Siamte, zanin chu aw",

"Lo lungngai suh, ka lo sawi dawn nia", Siamtei chuan a ti a. "Mangṭha ule", Nunga chuan ti lehin, min lo en zeuh a, ka lo nuih tawi tak.

"Pu ber leh Security hoin meeting an nei leh dawn a",

"Siamte, kan pu ber hi ka la hmu lo reng reng, a thlalak hmuh tur te hi a awm lo ka ti e",

"Keipawhin ka la hmu lo, a mak ngawt mai, ngati nge a inthup tlat le. I hre ve em, fapa a nei asin, a nupui chu Sap a nia, an fapa thla thum an ti nge mawni, US-ah a hawsan daih an tia, pathlawi a ni tihna nih chu", a ti siam siam a.

"A hmelṭha lutuk te an tia, a pa an ti bawk a, a palian te an tia,,hmuh ka chak ve ngawt mai, Nunga hnenah a ruka a thla la turin ka tia, meeting room-ah phone a kenluh tir ngai loh thu a sawi a, engtikah mah kan hmu ngai dawn lo a ang", Siamtei chuan a ti leh dap dap.

Chung zawng aia ka lo ngaihtuah zawk chu, a nupuiin a hawsan tih chu, nautê thla thum mi pawh a hawsan tel tihna a nia, engtin nge a theih zawk le?

Keiin, ka pasal te kan khum ngeia an chetla lai vawi tam ka hmuh hnu pawha, min ṭhen lo tura ṭhingṭhi chunga ka ngen lawm lawm pawhin, pawnah min theh chhuak a nia!

Hmeichhia pawh hi kan lo inang lo ngei mai, mahse, Sap a nia, inṭhen tih vel hi chu an nunphungah a bet tlat tawh a, engahmah a ngai chuang lo ang.

Sap ramah chuan, nuthlawi tih mai mai, an lawmpui zawk hial ṭhin a. Mizoramah erawh, chutiang a ni ve si lo a, nuthlawi an hmusit em mai.

"Bawihte, han puitling hrâm la chu aww, kum sawm lai i ni ve tawh dawn si a, school te i kal ang a, i pa nen paw'n kan inṭhen a ngai miah lo tur, nau pawh i nei tawh hial mai thei a ni", ka nui lui sak a.

A thlalak ka nei si lo a, internet-a nautê hmeichhia ka print tir ka thulkhung a, ka fanu ang chiah chiahin a hmelṭha a, a duhawm em em bawk.

Amah vang chauha innei thei pawh kan ni reng a, mahse, a lo pian aṭanga thla nganaah min boralsan a. Khata ṭang khan a pa nun a kalsual ṭan a.

A tir chuan min hnemtu ber zawk a ni, mahse, nau ka pai leh ka chhiat aṭang erawh kha chuan min lersan a, zan rei tak tak thleng a lêng a, a rui reng zel bawk.

A hnuah phei kha chuan, kan khumah ngei ka hmelhriat ṭha em em nen ka man a. Hmeichhe nêp tak ka nih vang pawh a ni mahna, ngaihdam min dil lo mah se, ka ngaidam a.

Ka lam a lo hawi theih nan, ka theihtawpin ka ṭang a, a chhan chu, ka hmangaih tlat a ni. Ani pawhin min hmangaih tih ka hria a, a lo kir theih nan khan ka tha tawpin ka ṭang.

Ka nu lah khan a mo atana min duh loh thu min hrilh chamchi reng a, "Bawihte, i lo pian kha chuan, i pi pawhin a hlim hmel min hmuh ve asin le", thlalak chu enin, ka ti zawi sap a.

Thlingtlanga awm tawh nak laiin, kan khuaa a pachhe ber kan la ni zui leh a. Nau ka pai avang chauha inneih phal pawh an ni a, mahse!!!

Bawihtei pian aṭang vawithum lai nau ka chhiat leh a, nau ka pai tih ka inhriat pawh khan ka rilru hi a chawl hahdam ngai lo.

Tumahin min ngaihsak ngai lo a, ka pasal leh a ngaihzawngte awmdan hrilhhriat ka ni reng zel bawk a. Ka nu leh pa te lahin, nau ka pai pawh khan inchhung chet min awl tir chuang lo.

Ka pasal farnu te awm ve reng mah se, mo ka nih ai mah chuan, an awmpui satliah ni ve mai khan ka inhre ṭhin.

Ka pasal te chet tlatna tih hre reng chunga, khuma han mut te kha, mittui tla zawih zawih chung khan ka mu ṭhin a, engtin tin emaw ka inṭap muhil ve zel mai bawk.

Ka pasal lahin, a thinrim hrikthlak nan min hmang awl lo, an chhungkaw anchhe zawng zawng ka chungah a tla a.

Ka haw a nih vaih chuan, ka dinhmun a chhiat tawh sa nak laiin, keimah bakah ka chhungte dinhmun a chhe dawn a, kei mai ni loin ka chhungte nen lam an mualpho dawn.

Fa nei thei lo tia tlangthang tawh ka ni a, nau ka pai lahin ka chhiat zel bawk si a. Ka tuar tlawk tlawk mai a ni, min hmangaih thu sawi ve ṭhin ka pasal lah chu, mihrang hlak a ni tawh bawk si.

"Khawngaihtakin, kumin chauh nghak leh ang, khawngaihtakin", a hmaah ka ṭhingṭhi a, ka kut ka suih a. Ka insut hlawp hlawp.


"Kumin pawh nghah a ngai tawh lo, tunah hian chhuak nghal rawh",

"Khawngaihtakin, min hmangaih ṭhin vang tal pawh khan, hetiang hian awm suh", a ke ka vuan a. Hmeichhia mai ni lo, mihring tungchho tlawm theih berin ka tlawm ngawih ngawih.

"Fa pawh min hrinsak thei hlei lo, hetiang hmeichhia eng atan mah ka ti lo che", a ke ka vawn a phih chawrh.

Chhuatah ka tlu a, pindan aṭang ka thawmhnaw lo pawm khawm ṭunin, "Tunah hian chhuak nghal rawh", ti fiak ṭhat pahin, min lo vawm a.

Min chhuahtir lo tur leh, kumin chauh la nghak leh turin ka la dil fan s, "Kumina nau ka pai leh chuan a puitling tawh ngei ngei ang", ka ti a.

Chutah, rum nghutin ka chhip samah kekin min hnuk a, pawnah min theh chhuak a, ka thawmhnawin min lo vawm leh.

Inchhunga a lut tur chu, "U Pui, u Pui, khawngaihtakin", ka umzui a, kawngka a khar hmak.

"U Pui, khawngaihtakin min lo hawn rawh, kumin chauh, khawngaihtakin kumin chauh nghak leh ang", ka au lawm lawm.

Kawngka a lo inhawng thut a, ka nu zawk a lo ni, "Ka nu, khawngaihtakin kumin chauh nghak ang u", ka ti a.

"Ka fapa thusawi kha i hre lo em ni? Kum kha leh chen tu hmel min hmuh tir hun tur kan nghak tawh che a ni lawm ni? VCP fapa neihchhunin fa pawh a nei thei lo an ti huai huai a.

Kan fapa bakah keini pawh hi kan zak asin, fa pawh hring thei lo hmeichhia hi eng atan mah kan ti lo che. Haw vang vang rawh, hei, zan khawthim hun lai a ni hlauh a, tumahin an hmu lo ang che, tu hmel min hmuh tir theihtu tur ka zawng a, ka fapa nen ka inneih tir dawn, i hmel hmuh kan duh tawh lo a nia", kawngkhar a khar ri chawrh.

Ka thawmhnaw pawm khawmin kan in lam ka pan a, zan khawthim lai ni mah se, zan reh hun a ni lo a, min lo hmu tawk an awm tho.

Khawvar rualin Aizawl ka lo pan daih a, kan khuaa awm ve reng kha ka zak ngawih ngawih. Ka chhungte tan pawh khan a mualphothlak.

Khata ṭang khan kan khuaah ka haw mang ta lo a, Aizawlah ka awm deuh chawt. Hnathawh tur ka hmu leh zel nen, Christmas leh Kum thar hmang turin ka haw ṭhin a, a ni mai.

Ka haw pawhin, ka chhuak ngai lo a, ramah kan kal te a nih ngawt loh chuan, Christmas leh Kum thar tukah leh, zan lam inkhawmah chauh ka chhuak ṭhin a, zan lamah pawh inkhawm loh chang ka ngah.

Aizawlah hian tumahin nuthlawi ka ni tih an hre lo a, an hriat huna min endan a dan dawn avangin ka sawi ngam lo. Hmeichhe nêp leh chak lo tak chu ka ni.

Chuvang chuan, Nunga pawh ka be ṭha vak duh lo a, ka hriat loh hian beiseina ka lo siamsak ang tih ka hlau.

Mipa rin ka harsat tawh a, awlsam takin ka ring thei tawh lo. Nunga pawh hi, Siamtei sawi dan angin fel mah se, ka chhungrila hlauhna intuh hian, min rintir thei lo.

Hetia, tlawng awl taka awm hi ka la duh zawk. Chu loah, nuthlawi ka ni tih a hriat hunah min iai lo ang tih tunge sawi thei?


Show post links
Top

[Ngaia]

Tiam tlat e
Chapter-2
Ziaktu: Cck Lalchhuanawmi

Hetia, tlawng awl taka awm hi ka la duh zawk. Chu loah, nuthlawi ka ni tih a hriat hunah min iai lo ang tih tunge sawi thei?

Fel taka in kalhin, ka thawhna lam panin ka kal a, taxi hmu hlauhin ka phar ding nghal.

Nilaini leh Zirtawpni apiang hian kamiz var ban tluan hain, Hmaram hi kan bih hnan ṭhin a, inches khat pheikhawk dum kan bun ṭhin bawk. Mipa ho erawh chuan Thangchhuah kawr an ha thung.

A bak ni-ah erawh, Smart pant dum hain, kamiz pawl ban tluan kan ha thung a, coat dum kan nei vek bawk, a thlawnin kan dawng a, kan uniform ve ang a ni a, school naupang ni mai te hian ka inhre ṭhin.

Mipa leh hmeichhe thawmhnaw hak a inang tlang a, kawng lehlam takah chuan a ṭha phian. Security ho erawh chu, form hran an nei thung a, Security form ang kha a ni mai.

"Mazai, en teh,, ka sam hi min lo bawk ṭhat lawk teh, tukin chu ka tifuh hleithei lo",

"I tho tlai leh ni maw, i la phelh phang mai",

"Niang chu mawle, nizan comittee kan rei em alawm, Nunga lo haw nen kan intawk",

"In va rel nasa awm em em", ka ti a. A sam chu ka bawk ṭha mial mial. "Kan rel ṭeuh, kan rel theih zawng zawng chu kan rel vek, Aizawl mipui chanve hi chu an hachhiau nasa ngawt ang", a ti hlak hlak a.

Kan nui dun ker ker, "Ka zo e", thaw hawk chungin ka ti a. A bag aṭang compact phawrhin a inhnawih leh sawk sawk.

"Muangchang khan inhnawih rawh, a la hma a, tumah an lo la kal dawn lo",

"Aw le, lipstick i lo keng tiraw?",

"Keng e, i duh em ni, inhnawih tak vak suh aw", tiin, ka bag aṭang phawrhin ka pe a. Make-up hman an phal a,,mahse, hmui hnawihsen hlarh erawh an phal lo thung.

"Siamte, Mazai, zanin chu nautê thawmhnaw department hoin meeting kan nei ve dawn aw", Rempuian a lo tih chuan, Siamtei nen,,"Ngati?", kan lo ti hâ.

Group-ah engmah an sawi si lo, "Keini department hi kan ṭan a ngai alawm, department zawng zawng zingah kan ṭha ber tih kan lantir tur a ni", Rempuian a ti leh chharh chharh.

"Keini te chu, ground floor-ah kan awm a, third floor-a awm ho kha ṭang hle rawh u", Siamtein a lo ti a. Rempuia chu a nui sak.

"Nangni pahnih ber hi asin kan lo nghahchhan che u, keini aiin in ṭha zawk tih kan hria alawm, Mazaii Thingtlang âwphawia ṭawng lung lung hi kan lo ngaina thei lutuk", Rempuian a tih leh chuan ka melh ralh ringawt.b

Thingtlang ho hian âwphawi kan neih pawh ka hre lo e ah, "Han chho tawh rawh, dar riat a pel tawh", ka lo ti vah a. "Aw le, ni hman nuam ule", a kut vai zauhin, Rempuia chu lift-in a chho ta a.

A hna a thawk.ṭha bawk a, Sales Manager-ah te hian a kaisân thuai ka ring. Thingtlang mi ka nihna hi ka chhuang a, ka zahpui ngai lo.

Khawpui boruak leh nun dan ai hian a thianghlimna chen a awm. Mahse, sawi leh sawi hnu, nuthlawi ka ni erawh, inchhuang tak hian ka la sawi ngam lo.

Ka inrintawkna a bo zo a, hlauh lah ka ngah em em bawk. Mipa zu rui ka hnuh te hian ka tha a khûr ringawt zel. Chubakah, ka kawng kal min lo chhaih tawk an awm te hian, ka hlau ngawih ngawih nghal zel.

Mahse, zawi zawiin hma ka sâwn ve zel a, nitinin mahni inrintawkna ka nei chho ve zel bawk. Inchhuang takin nuthlawi ka nihna hi ka la tlangaupui ang.

Nuthlawi te hi kan duhthu vang renga thlawi kan ni lo a, thlawi min nihtirtu chu mipa te bawk an ni.

"Mazai, mawza hi a tlem tawh ve, hmanniah kan dah tharin ka hre sia",

"A ni maw, kan inhralh theih tihna a nih chu, a va lawmawm tak", nui sângin ka ti a. "Ni dawn tak, a nuam e", kan kut inchelh tawnin kan zuang a.

"Cctv awm reng a, Operator hoin mak min ti ngawt ang", Siamtein a tih chuan kan zuang lai kan tawp chawt.

"Operator, kan Operator ho chuan engahmah an ngai awm lo em mai", ka ti a. A nui sak ringawt.

Basement-ah kan tlakchham lam turin ka kal a, Rempuian min kalpui. Kan department-a hotu ve ber a nia, ama tawkah a inthu thei ve em.

"Basement pawh hi tihfai a ngai leh tawh a nih hi",

"Nitin an tifai alawm",

"Ka hre tho a, tukin chu an tifai hman lo a nih dawn hi", Rempuian a ti chu, ka lo nuih hak.

Ka lu thing nar narin, "Tlai ban dawn hnaihah an tifai ṭhin, i hriatna a va ṭha lo tak", ka ti a. Ka kal nghal nal nal.

A hriat rengna aiin a hriat reng lohna a chak zawk tlat a, a hahthlak lam mah deuh a ni.

Siamtei nen kan rem fel a, dawrtu kan neih avangin kan kalsan leh rih. Engmah lei loin an chhuak leh daih a, hetiang ho hi ka ngei thei a nia aw.

Mahse, keipawh ka ni ve tho, ka duhzawng ka hmuh loh chuan ka chhuak leh mai ṭhin a, tumah indem tur kan lo awm lo ve.

"Zanin chu ka va peih lo tak, nizan men rei nen, haw thuai thuai a mut veng veng ka duh nen nen", Siamtein a ti nang nang.

Ṭhalaiah nihna te a nei ve a, dar riatah kan bang ṭhin bawk nen, a hah dawn tih ka hria. Mahse, dik tak chuan Siamtei nun hi ka awt ṭhin.

Nulat hriat tirh phat aṭangin pasal ka nei daih a, Kohhranah te inhmang hman loin, Ṭhalaiah te khan ka inhmang tam hman lo. 'Inchhir' tih ṭawngkam hi ka nun nen a inhmeh tawh ngawih ngawih!

Building ep chiaha restaurant-ah kan lut khawm a, Rempuia ṭawng hmasa berin, "Thil ṭha deuh a ruka hriat ka neih vang a nia hetia, inhmuhkhawm ka rawt chung chung", a ti a.

"Sawi vat rawh", kan lo ti luai luai. Eng thil ruk tak chu ni ang maw, "A ṭhat loh vaih chuan aw, kan ei tur man zawng zawng i chawi ang", Hmingan a lo ti ve bawk.

"Ka sawi dawn reng chu, nge maw ka sawi zawh hma hmaa in lo ṭawng", Rempuian a ti hlak a. "Sawi rawh", Siamtein a lo ti ve leh hlak, "Mut chhuah tawh nen, thin a chhe duh teh nia", Siamtein a ti leh.

"In va ṭawng peih hlawm tak, ka sawi lo tawp mai tur a nia",

"Lalrempui", kan lo ti nghal vat. "Aw, ka sawi dawn,,ka hriat ruk chu, kum tawpah Department thawk.ṭha ber te hlawh an double dawn bakah, Christmas thilpekah Department tina an duhzawng a thlawnin an thlang thei dawn", Rempuian muang cherh chawrha a ti chu, kan lo au chul.

"Bengchheng su", Daman a ti nghal vat. "Chuvang chuan a ruka kan thawh a ngai, tumah hrilh loh tur, kan department tana ṭha tur a nia, ka hmangaih zia che u hi maw, duh ila chuan midang ho ka hrilh thei, mahse, kan department ka ngaihtuah vangin ka hrilh lo, chuvang chuan kan thawk ṭha hle tur a ni", intithei fahranin Rempuian zawi tein a ti dap dap a.

Ka khi ṭhaw a, ka biang te a kham vek, a va nuam tak. Hlawh double mawlh chu ka lo ngaihtuah. Rangva ka lei ang a, kan khuaah phur hawin kan inchung ka siam ṭhat tir nghal ang.

"Awiii, a nuam dawn e, awi kei chu, heels duh ka ngah ropui, ka thlang ṭeuh ang", Humhimin a lo ti a. Midang ho pawhin an thlan tur an sawi nuah nuah, hlawh double tumahin an sawi lo reng reng.

Kei chuan, duh engmah ka nei lo a, thlan tur lah ka hre hek lo. Hlawh double mawlh mai chu ni, pawisa ka duh hmel bik tak tak.

Ka u ka phone a, "Department thawk ṭha ber te kum tawpah hlawh an thuahhnih dawn bakah, kan duhzawng a thlawnin kan la thei dawn bawk a",

"Company mi maw?",

"Aw ni e, department dang hoin an hre lo, kan ṭhian pakhatin a rukin a lo hria a, kan tha tawpin kan ṭang dawn, kum tawpah chuan rangva leh thawmhnaw hrang hrang nen ka lo haw ang. Kan inchung kan chih ṭha ang a, kan khuaah keimahni chhungkua kan nalh ber bawk ang", ka ti a.

"Inchung te chu kan chih ṭha daih tawh, kan la hrilh lo mai mai che alawm, Serthlum kan hralhna khan kan lei alawm",

"Aizawlah i lo chho maw?",

"Chho lo e, an lo zuar a, a remchang em mai tiin kan lei daih alawm", ka uin a lo ti a. Ka thaw huai maiin ka hria, mahse, "Pawisa kawl in nei tawh lo ang tiraw?", ka ti a.

Ka uin, "Sângkhat chu kan la nei, lungngaihpui tham a ni lo a nia, i rilru lo tihah suh", a lo ti thuai. "Aw le, pawisa ka lo thawn ang che u aw",

"A ngai lo, nangmah khan i bengah khan dah nghal hmiah hmiah zel rawh",

"Bank, beng a ni lo, bank alawm",

"Kei Thingtlangpa lamthiam dan ve lawm le", nui huah huah chungin ka uin a lo ti a. Keipawh chu ka nui sak.

Ka nu leh pa te inkhawm bang an lo haw ni ngei tur a ni, "Tu nge i lo biak, Mazaii em ni?", ka nu tih ri ka hria a. Ka lung a chhe dawnin ka hria.

Ka nu nen chuan kan inbe zawm a, ka pa pawh a kar lakah a lo inrawlh ve zel bawk. Kan department thuruk te chu ka hrilh ve a, tu hnenah mah sawi lo turin ka han ti ve ngei bawk ah.

Ka fanu thlalak ka en leh phawt te te a, Vanramah a nau te ho nen an awm tawh a. He lei hreawm deuha an awm ai chuan a ṭha tho tho, ka ngai thei lutuk tih mai loh chu.

Fa pali ka nei alawm le, an unau hoin ka tel loin Vanramah an awm a, Isua a awm tho a, a enkawl ṭha dawn tih hi ka hria, engtikah nge, ka fate bulah ka awm ve theih ang aw?

Name tag ka theihnghilh avangin inah ka let leh, ka thlan te chu hruin ka inhnawih ṭha leh te te. Ningani a nih tawh avangin Smart pant kan ha tawh thung.

Pawnfen chhing tak tak fen ai chuan a ṭha ka la ti zawk. A tir chuan, ka inthuam ngai loh dan a ni si a, ka zak a, ka che te chu a khawr deuh tlat ṭhin.

Tunah erawh, ngaiah ka nei tawh a, zângkhai takin ka chetpui thei tawh. Kan form-a ka duh leh em em chu Hmaram kan bih ṭhin hi ni. A chhing deuh na chu, a la ṭha tho.

"Morning",

"Morning", nui sâng chungin ka lo chhawn let a. Kawngkhar nam hawn ka tum chu Nunga zawkin min hawn a, "Ni hman nuam", a ti a.

"Nangpawh le", tiin, ka kalsawn nghal. A rukin boruak ka hip let kâwk kâwk. Beiseina mita min en hi ka duh lo, engtikah mah ka laka a rilru put hmang te hi ka pawmsak ngai dawn lo.

Inlaichinna tumah neihpui ka duh tawh lo a, nuthlawi ka nihna inpawm thiam tumin leh, nuthlawi ni chunga mahni inrintawkna neih tumin ka bei mek, pasal chu sawi loh,,ngaihzawng pawh neih ka duh tawh lo.

"Siamte, Serthlum min dawr leh dawn em?",

"Dawr dawn ele, a thlum tui si, ka chhungte pawhin an duh lutuk a lian ṭha thei bawk si",

"Kum tawpah ka uin a lo kalpui leh dawn alawm, ka hrilh lawk che nih chu",

"Yes, i va fel ṭhin tak em, ka duh duh ka thlang hmasa leh ber ang aw", nui varin Siamtein a ti lang lang a.

Nuih sen senin, "Chuvang alawm ka hrilh che, ka u lo thlen ve leh i lo kal leh nghal ang a", ka ti a. "Kum tawp ni tawh se ka va ti tak", min lo kuah chung chung.

Inlahrangin a thaw halh a, "Kan department chu thawk ṭha berah min thlang se aw", a ti vawng vawng.

Siamtei pawh hian duh a ngah tih ka hria, kan Hotu te lam khian kan duhzâwng zawng zawng min lak tir erawh ka ring lo.

Kan lak theih tur bithliah an siam ka ring, chuti lo chu, duh kan ngah si a, Company hian a tuar zawk palh ang.

Department thawk ṭha ber nih tumin kan ṭang tih a hriat ngawih ngawih. Group-ah an lo report liam liam zel. Siamtei nen erawh chusn report kan pe ve ngai lo a, kan nawi hrep zel.

Nu pakhat leh a fanu hi an lo lut a, "Ka nau fapa kum hnih mi lek hak tur ka lo zawng, vawiinah kan leng dawn a, ka lo inruahman lawk miah lo a, kan lo lut rawk rawk", nui uar uarin a ti a.

"Ee, a pawi lo, lo tlu lut mah la kan lo kaitho dawn che alawm", Siamtein a lo ti a. Kan nui ho dual dual.

A fanu ṭhutthlengah ka ṭhuttir a, a hmaah ṭhu hniamin a hming ka zawt a, "Tetei",

"I hming chu a va mawi em em, a nih, kum engzah nge i nih tawh?",

"Kum sawm",

"Nih chu, i va lian tawh ve, school te i kal em?", ka ti leh a, a kal thuin min chhang ve thuai.

A nui sen sen reuh sia, a fai ving veng bawk nen, a sam an ṭawn kak sak a, chalsam a nei vei reuh a, a hmelṭhain a duhawm lutuk ringawt.

A nu nen an kal dun hnak hnak chu ka thlir leh a. Ka fanu nen khan an inrual tihna. Ka fanu nen an inkawm tawk dawn chiah, ka nunhlui chhui hian ni pawh ka hmang liam thei lo a nih ber hi maw!

"Mazai, lo chhawk lawk teh a, i hman em?",

"Aw, hman e, eng nge ni ta?",

"Lo chho lawk mai teh", tiin, phone a dah daih.

"Tu nge a?",

"Rempuia, chho turin min lo ti a, nangmah han chho mai la",

"Ka peih lo, nangmah zawk han chho rawh, lift-in chho la, i thleng hma zawk ang", a ti a.

Lift lo chhuk thlak hun chiah a ni ve bawk nen, ka va tlan phei vat. Ka mi hmuh avang erawh chuan ka meng phawk hru.

Ka lut vat a, "Bawihte, i bo em ni?", ka ti a. Wheelchair-ah hian a lo ṭhu a, a sam a buang deuh a, Sap naupang a ang mah zawk.

Mizo ṭawng erawh a hre bawk sia, "I bo lo tak tak maw?", ka ti leh a. A bu nghauh nghauh. Lift chhungah amah chiah ka hmuh danah, tumah an lo chhuk lo tih chu a chiang phawt.

Inchung chhohna ka hmet a, a nu leh pa ten an kalsan tawp ka ring lo, a bulah ṭhu hniamin, "Bawihte, i nu leh pa te khawiah nge?", ka ti a.

"Play",

"Play, playground maw?", ka ti a. A bu leh nghauh nghauh. Min nuih sun sun a, a nui hmel a ṭha reuh lutuk, amah hrim hrim te hi a duhawm khat tlat.

"Tu nge i hming?",

"Paul", ti ringawtin min chhang. Mizo chu a ni lo phawt. Playground awm na, top floor ka hmet a, rei loah kan thleng thuai.

A wheelchair chuan ka nawr chhuak a, playground chhungah ka luhpui a. Naupang ho infiam chu ka thlirpui.

"Apaul, i infiam ve duh em?", a bula ṭhut thlak pahin ka ti a. Min lo nuih ver ver.

Ka pheikhawk phelhin, ka coat hak pawh ka phelh a, Apaul chu pawmin tawlhpanâlah ka ṭhuttir a, a hnuaiah ball te tak te te a awm tho a, intihnatna tur a awm chuang lo.

"I inring em?", ka ti a. A bu nghat. "Thlawk ang aw", ti pahin ka nam a. A tawlh thla vawn vawn a, a nui hak hak bawk.

Ka pawm kâng leh a, a ha lang ṭhuauin a nui. Mipa naupang duhawm tak a ni. Vawithum ngawt ka tawlhthlak tir a, nuam a ti chu a khek chul.

Ka pawm kâng leh a, "Sap i ang ka tia, i nu leh pa te Sap an nih ka ring bawk, mahse, Mizo ṭawng i hrethiam tlat bawk sia", ka ti a. Min nuih sun sun ringawt.

"Tawlh leh i duh em?",

"Aw", a lo ti var. Kan inher chiah tihah, "Miss, min lo hrethiam lawk",

"Aw, eng nge ni ta?",

"Naupang kha, kan pu ber fapa hi a nia,,a hnena hruai tawh turin min ti a", an tih chuan, "Kan pu ber fapa maw?", Apaul chu ka en a.

"Min bân lo ang tiraw, keima hruai a ni miah lo nia, lift-ah ka hmu a, playground-ah hian hruaiin ka infiampui a nih hi, min bân lo ang tiraw?", ka ti bah nawk.

Kan pu ber fapa a nih chuan, dinhmun derthawngah ka ding thei dawn tlat. "A bân lo ang che, lungngai suh, a hnenah hruai tawh turin min ti a, kan lo hruai tawh ang", dam dupa tiin, a kut a lo phar a.

Apaul chu hlan chhawn ka tum a, min kuah bet tlat, "Apaul, nakinah kan infiam leh dawn alawm, i pain a zawng nasa che sia, a lo hlauthawng tawh ngawt ang", a hnung beng thek thekin ka ti a.

Min betu chuan Apaul chu pawmin, pakhatin wheelchair chu a keng a. Engti tia naupang te, wheelchair-a ṭhut ngai nge le?

Ka lainat reuh em mai, kan pu ber chuan min bân em lo ang chu a, Apaul-a khan min sawifiahsak ngei ka beisei.

Siamtein Sap nupuiah a nei a tia,,kan pu ber fapa pawh chu Sap a ang alawm le, Mizo hming te hi a nei ang em le? Paul tih ringawt chu a ni bik lo ang.


Show post links
Top

[Ngaia]

Tiam tlat e
Chapter-3
Ziaktu: Cck Lalchhuanawmi

Siamtein Sap nupuiah a nei a tia,,kan pu ber fapa pawh chu Sap a ang alawm le, Mizo hming te hi a nei ang em le? Paul tih ringawt chu a ni bik lo ang.

Rempuia te awmnaah ka kal vat a, burger leh coffee min lo pe duh chu niin, "Kan lawm e", ti sapin, ka kalsawn nghal a. Lift chhuk thla tur ka hmuh chuan ka inrawlh lut ve vat.

"I va han rei em em", Siamtein a lo ti a. "Nia", ka ti ringawt. Ka thaw halh halh, "Rempuia chuan ngati nge a lo koh che?",

"Burger leh coffee min pek.duh vang hi mawle",

"A va ho tak e aw", ti pahin,,ka kuta mi chu a lo ban a. Siamtei chu kan pu ber fapa nena kan intawn dan ka hrilh a. "Siamte,,ka hruaibo anga a ngaih chuan min bân ang tih ka hlau e",

"Bân lo ang, a security hoin an hmuh reng che chu, chu loah, cctv a tam em mai, i hruaibo lo tih a chiang alawm", Siamtein a ti sap sap a.

Ṭawng rin ka phal lo, midangin an lo hria ang tih ka hlau. Ka hawi deuh reng mai a, kan pu ber te an lo kal lai awm reng reng ka hre si lo, a fapa ka hmu hlawl bawk si.

A fapa a awm a nih chuan an lo kal ngei tihna a nia, meeting tur chauhin a lo kal ṭhin a, chu pawh zanah, Security ho nen bak meeting an nei ngai bawk si lo.

"Siamte, ka mit vâi a ni zawk mawnile, kan pu ber lo kal lai i hria em?",

"Hre miah nang, kan awmna a kil em hi, i ngaihtuah nasa lutuk a nih kha, engtinmah an ti lo ang che", ka hnung beng hlak chungin Siamtei chuan a ti a.

Ka thaw hawk a, ka hmai ka beng hlak hlak. Siamtei sawi dan takah, engtinmah min ti lo ang. Ka ngaihtuah nasa lutuk a ni, kan pu ber pawhin min bân lo ang, tu nge ka nih tih pawh a hre dawn lo.

Heti zozai thawktu awmah hian, min lo hre chat thei dawn lo hrim hrim, cctv hmangin min hmu thei pawh nise, a fapa ka hruaibo chuang lo, ka infiampui zawk a, kan pu ber chu a lawm zawk ang.

"Mazai, lo kal vat teh, vat vatin", a bulah ka va ding thuai a. An inzui duah duah chu ka hmu, Apaul-a lu ka hmu vuai vuai, kan pu ber chu a lo kal chiang a nih saw.

Mahse, eng ang hmel pu tak nge a nih ka la hre thei chuang lo, a lu ka hmu chang chang chu a nia. Kan awmna hi a kil ve em bawk a ni.

In ka thleng a, ei rawng ka bawl thuai thuai. Buhfai hi ka uin min lo thawn ṭhin a, a changin chawhmeh min lo thawn ṭhin bawk.

Chaw, buh ni lo mai maia inhnawhpuar ka duh lo a, buh ngei hian min tipuar zawk bawk. Chaw ka duh tehreng nen, ka thau thei miah lo erawh, ka mangang ru deuh ṭhin.

Chaw ei kham hnuah damdawi ka ei a, Vitamin leh chhûl chakna damdawi Doctor-in min chawh a. Nau ka chhiatna hnuhma a fai ṭhat loh avangin hman kum lawkah kan tifai tawh bawk.

"Nau i pai thei tawh lo ang chu ka ti dawt ngam lo, naupai theih tawh lohna chance a sâng, i inenkawl ṭhat erawh a ngai", Doctor-in min ti a.

Naupai theih tawh lohna chance a sâng a nih chuan, nau ka pai thei tawh lo chu a ni mai a. Hmeichhe chapona ve ber naupai theihna, nau ka pai thei tawh lo a nih chuan, chapona tur ka nei dawn lo!

Ka ngaihtuahna chu duh loin, ka lu ka thing nawk nawk. Ka mittui luang ngiai ngiai chu ka hru a, ka hmai ka va phih.

Dar sawm a rik nghal mai avangin mu turin ka intintuah, mutna te siamin, ka siam zawh ve leh Bible bung khat emaw tal ka chhiar a.

Chumi zawhah, ka lehkhabu duh leh ngainat em em 'Nun Thlaler' Lalhlimpuia(Atea) ziah chu ka chhiar leh. He lehkhabu hi ka duh ngawih ngawih, ka hmangaih a ni mah zawk.

A chhunga thawnthu tawi bakah hian, fuihna thu inzep tel hian a tihlu ka ti. He lehkhabu hming leh ka nun hi a inan bawk avangin, ka duh zual bawk.

Dan pangngaiin hna kan thawk leh a, Apaul-a pawh chu ka hmu leh tawh chuang lo. Kan pu ber lo kal thawm erawh ka hre leh zeuh ṭhin.

Mahse, keini han hmuh phak a ni lo hrim hrim. Apaul-a kha, a ngaihawm ka ti tlat pek. Reilo te inhmu mah ila, a nui ri te khan min raih hian ka hria.

Siamtei nen kan inhnawhpuar a, chowmein kan ei, kan thil eina hi keimahni hian kan intum a. A chang chuan, restaurant hisn a thlawnin min eitir ṭhin bawk.

"Mazai, Nunga hian i chanchin min zawt tawh ngai lo a, ka hlauthawng",

"Hlauhthawnna tur a awm em ni?",

"Ka hlauthawng alawm, a bansan dawn che niang, in inhmeh ka lo ti asin le, ṭha deuhin insawirem teh u",

"A leh ringawt ṭhin hian, i tiawmanglo thei em mai", ka ti a. "Tak takin, i hre lo a nih kha, in inhmeh lutuk. Veng khata awm kan nih vang pawh ni loin, Nunga hi a fel teh mai nia aw, nang chuan zing leh tlaiah chauh i hmu a ni mai a, in inbe reng bawk si lo, i number ka pe dawn", Siamtein a ti siam siam a.

Ka lo nui sak ringawt, Nungan ka chanchin a zawt tawh ngai lo tih ka hria pawh chu, ka thaw huai huai.

Ka tlawngawlin ka zalen tak tak tawhah ka inngai. Tumahin min ngaihven lo se tih ka duh, ka natna te min hriatthiampuitu tumah an awmin ka ring lo.

Bân a huna kan chhuah pawhin Nunga chu zângkhai vahin ka bia a, ka laka a rilru put hmang hre reng chunga, hre lo ang hmaka awm kha chu a hahthlak ve deuh.

Ani pawhin, "Tluang deuhin, mangṭha le", min lo ti a. Ka lo nuih sen sen. Ka thaw huai huai a, a hma zawng aiin ka rilru a thawlin ka hria.

Keiin engtikahmah ka pawm thei ngai dawn si lo, hmalam pan se, kei nuthlawi mai mai hi chuan ka phu lo, miṭha tak tawngin nei rawh se.

"Mazai, chawhmeh te i la nei ṭha em?",

"Aw nei ṭha e, hetah pawh ka lei thei tho alawm, min lo thawn ṭeuh kha chuan a vuai chhe ṭhin a, fridge te ka nei ve si lo",

"Ni ve tho mai, ei chak te i neih chuan lo sawi zel la aw, in bâng har thei si a, mu tawh rawh",

"Aw le, nangpawh mu tawh rawh", ka ti a. Ka nu nen chuan kan inbiakna kan titawp a. Kumin aṭang chauh ka hlawh pawh hi ka khawl thei.

Kan in sak ṭhat nan kan hmang zel a, thingzai man te hi a to tawh si, Serthlum man ringawt aṭang chuan kan sa pumhlum thei lo deuh, kum tam fe a ngai dawn a.

Thingtlangnu, lehkha pawh zir sâng loin hna ṭha lutuk ka hmu ve te hi a lawmawm em asin. Pathian ka lamah a ṭang tih ka hriat hian, ka mittui a tla leh ṭhin.

Bible leh lehkhabu te chhiar zoin, ka fanu thlalak ka en leh phawt, "Aw Lalpa, keimah anga lu sûn reng leh, nunhluia kir reng hi an awm ve ang em le?

Nitin ka nunhluiin min tibuai a, engtikah tak he nunhlui aṭang hian chhuak ang maw?", ka rilruin ka ti mawlh mawlh.

Ka la chhuak em em ang, chumi tur chuan alawm ka beih ṭang ṭang. Puan sin ṭhain,ka mang lamah ka fate nen kan awm ho ngei theih nan, duhthusamna nen ka mit ka chhing a.

Vawiin chu nilengin ruah a sur a, bazar pawh an awm mang lo a nih ka ring, lo lut an tlem lutuk. A vawt deuh sûk bawk a, kan ngamtlak ve ber Rempuia hnenah AC tihhniam tir turin kan hrilh a.

Kan hrilh aṭanga rei vak loah AC chu an tihniam a, Siamtei nen inenin kan nui ver ver. "Rempuia hi kaisân tir se ka ti", ka ti zawi sap a.

Siamtei chu nui hakin,,"Kei chu, ka ngaizawng zawk dawn mawni ka lo ti a", a tih chuan,,ka nuih kur kur. "I rilruah hian ngaihzawng tih bak hi a awm lo nge mawni?", sehchilh nawkin ka ti a.

Min nerkhum sawk, "Chutiang ringawt a awm bik lo, school kal tinuamtu kan nei ṭhin ang khan, Rempuia pawh khi ka tan chuan hnathawh tinuamtu a nia",

"Aw haw le, kan inpuang ṭan e", ka lo ti sap a, min beng hlak. "Midang bulah te i sawi reu reu ang e aw, ka duh dawn miah lo nia, i sawi tih ka hriat chuan ka vua ang che", a ti a.

"Ka'n au chhuak teh ang", fiamthu titak zet hian ka ti.a. ka kâ a lo hup vat, "Mazai, midang bulah i sawi a nih chuan ka vua ang che ka tih kha aw", Siamtei chuan a ti hlak.

A kut a la thla a, lipstick ka inhnawih ve bawk a, a tichhe vek dawn alawm le. Kan ṭhu rih a, "Zai, i number chu Nunga ka pe a, a lo be tawh che em?",

"I pe tak tak elaw, i pek tak tak ka ring lo nia",

"Ka pe dawn ka tih kha, a duh thu a hrilh vang ngawt chein be chhe chuang lo la, ṭhian pawh a nih theih alawm", Siamtein a ti leh a. Ka lo nui sak ringawt.

Sawi tur emaw chhan dan tur ka hriat loh chuan ka nui sak ringawt a, ka ngawi daih zel. Ṭhian pawh a nih theih alawm, mahse, chuti chung pawh chuan mahnia awm ka la duh fan.

Eng nge ka rilruah awm chiah pawh hi ka hre lo, mahni hma ka sial emawni tih chang lah ka ngah. Ka inhrethiam tawh bik lo.

"Min lo hrethiam lawk", Siamtei nen kan hawi chhuak a, Apaul-a pawmtupa kha a ni.

"Eng nge ni ta?", hlauthawng ru tak hian ka ti a. "Kan pu ber nuin a hmu duh che a", a tih chuan, Siamtei ka en vat a, hlauhnain min man nghal.

"Tu, tunah maw?", ka ti a. "Ni lo e, Thawhṭanah khian aw", tiin, a kal nghal nal nal.

Siamtei ka en leh vat a, "Siamte, engtin nge ka tih dawn, ka hlau e",

"Hlau duh suh, a hlauhawm lo ang", a ti dam thluam a. A nu meuhin min hmu duh a, eng nge a chhan ni ang le? Tihsual ka neihawm pawh ka hre si lo.

Dar riat a rik hnaih chuan kan intifel ṭan hlawm a, kei erawh, ka rilru a nuam thei lo.

"Mazai, i ṭha maw?",

"Aw, aw, ka ṭha lutuk", nui varin ka ti a. Nunga chuan ngaihṭha lo tih hriat zet hian min lo en.

"A ṭha lutuk ngaihtuah duh suh, a nihliap a ken theihnghilh a", Siamtein a lo ti lang lang a, hahthlak ti tak hian ka lo melh thuai.

Nghet takin ka keng reng a, ka theihnghilh lo tih chu a chiang mah mah. "Nihliap kha khum ṭha ula, in hritlang palh ang e", Nunga chuan a ti a. Ka lo bu nghat nghat.

Siamtei nen chuan taxi kan chang a, keimah inthlah tir phawtin, Siamtei nen invai liamin, an veng an pan ve leh.

In chhung ka luh rualin nihliap chu bathroom-ah ka dah a, ka thawmhnaw hak phelhin, towel ban thuai bawkin ka inhru sawk sawk.

Vawtin min ṭham er er nghal, vawt vin tûk chu a ni lo. Fur hi chu, kan hnâwng chap reng mai a, a hreawmna chen a awm.

Ei rawngbawl pahin ka form ka su a, veranda ruahin a lo theh phak loah ka zar chhuak. Mut dawn hnaihah ka la lut a, bathroom-ah ka zar leh daih.

Chawlhni tuk a nih vangin ka mu âm ve hlek a, dar sarih leh a chanveah ka tho chauh. Ruah a sur cher cher a, ka form a ro hman lo ang tih ka hlau.

Inkhawm turin ka kal hnak hnak a, ruah a sur buan buan avangin kal chak erawh a har deuh. Zing lamah chuan a sur tam loh nen.

"Mazaii pawh a lo lang thei a, i va han fel ṭhin tak", kan Kohhran upa pakhat hian min lo chibai nghal a, ka zak chu ka sâ pup pup.

Ka fel vang chu a ni chiah lo deuh, "Ka pu chu, fel vang a ni hleinem, a ṭulnaina min ur vang mai mai alawm", tiin, ka lo hnial fiam a.

Senior 'A' ah ka awm ve hmiah a, inkhawm loh te ka chin zeuh avangin ṭhian tia han kawm tur ka nei lo a. Mahse, kan inbe vek thei tho.

Nungan nui sângin kawngkhar min hawnsak a, "Ka lawm e", ti varin, ka tlan leh nghal. Siamtei a lo la thlen chiah loh avsngin ka tei sek mai.

Siamtei lo thlen chuan ka thaw hawk, "I va ṭhat hmel loh ve",

"Vawiin kha, hmuh tur ka neih kha",

"Ni tak, engmah a ni lo ang, i ngaihtuah nasa lutuk a nih kha", a ti a. Ka dar ka chhin hak ringawt.

Ṭhutnaah kan ṭhu a, "Brandon Rorelliana",

"Eng maw?",

"Kan pu ber hming hi mawle, a mak reuh, a hming hi a pui ka ti", Siamtein ngaihtuah muk zet hian a ti a.

"A hming ang chiaha rorel lian a nih ka ring", a ti leh a. Ka nuih hak.

Kan sawi zo chiah tihah, "Lo kal rawh le", a lo ti thum bal a. Siamtei kut ka hmer ngawt ngawt. Engvanga hlauthawng em em nge ka nih pawh ka hre lo.

Kan inzui chhuak a, Nunga pawhin mak ti deuhin min lo en. Car dumah hian min ṭhut luh tir a, driver seat-ah ṭhuin a tlan chhuak nghal.

"Khawiah nge kan kal dawn?", tim dai hian ka zawt a, "Inah", ti ringawtin min lo chhang.

Ka ṭawng tawh lo a, pawn lam ka thlir vang vang. A tawpah, gate hawngin in lian zet chhungah kan lut a, inchung pan chhohna step aṭang hian, kamiz bân thlep chho chungin palian zet hi a lo chhuk thla a.

A ke pen te chu a thum dut dut ni mai hian ka hria, "Brandon Rorelliana, Brandon Rorelliana", ti hian, ka lûng te hi a phu dup dupin ka hre bawk!

Ka hmaah a ding a, a kekawr ipte tawn tawna a kut pahnih zen lutin a ding kak deuh a, a hmel tak ngul leh, a mitmeng thip zet, hlauhawm lutuk chuan min melh run, ka chil ka lem dâwk dâwk.


Show post links
Top

[Ngaia]

Tiam tlat e
Chapter-4
Ziaktu: Cck Lalchhuanawmi

Ka lu ka thing nawk nawk, ka thaw halh, chhungkaw tin hian harsatna inang lo vek kan nei a, chuvang chuan tumah insawi thei kan ni lo.

"Inbual hmain huanah kal ang aw", ka ti a. Phur zetin a bu nghat, nui hmel a pu reng thei a, ka va han chhuang tak.

Wheelchair-ah ṭhuttirin ka nawr a, phul awmna lai bikah dingin ka pawm thla a, ka nghat leh phawt. A kein engmah a hriat miau loh avangin a ṭhu nghet hleithei lo a, hmalamah kunin a kut pahnihin a innemkhalh ve ṭang ṭang.

Wheelchair dah sawnin, a zak tawn tawnah dawmin ka chawi tho a, a kephahin lei ka nghah tir phawt. Ka kut veilamin a zakah la dawm reng chungin ka kut dinglamin a kutah ka chelh a.

"Le, i ke kha tihchet tum rawh le", ka ti a. Ka thusawi âtthlak zia ka hre nghal, ngaihna hre lo zeta min en chu ka pawm nghal vawng vawng.

Kum ruk mi lek chungah hian tihtur ka bituk khirh mah mah a ni. "Phulah hian tei kual ang aw", ka ti a. Ka ke chungah a ke nghah tirin, a zakah ka dawm pah bawk.

Muangchangin ka kal a, a ke chu a tla leh ṭhin. Ka dawm ngheh em avangin ka siamrem leh thuai zel.

Nautê kal inzirtir hi kan ang ber, a hnuah phei chuan lei rah tirin ka kalpui a, kal chak chuan a ke a hnuk tawh ṭhin.

Phulah ṭhuin ka kap karah ka ṭhuttir a, ka hnung lamah âwnin ka kutin ka innemkhalh a, Apaul-an min lo ngheng ve ar ar bawk.

"I rilṭam tawh em?",

"Ṭam lo", a lo ti thuai. Ka ṭhutpui leh ren rawn, hmanhmawh deuha kal zirtir pawh a ṭha dawn loin ka hria. Kum ruk chauh a la ni a, kal tura ka tur ut ut chuan atan a ṭhat loh ka ring.

"Mom, zai la", a tih chuan ka nui hak, "Ka zai thiam lo",

"Please", min lo en chho ṭawk ṭawk. "Aw le", ka ti sap. Eng nge hla nge ka sak ang aw, nau awih hla chu sak a chi miah lo ang, Nursery Rhymes lah ka hre tlem si.

A tawpah, Twinkle Twinkle Little Star ka sa ta a, min nuih ker ker. Uang tak hian ka sa ve zel a, a nui uar sauh sauh.

"Lut tawh ang aw, inbual a hun dawn", ka ti a. Inchhungah ka pawm lut, kan pi leh pu te pawhin min lo nuih ver ver.

A pindanah kan lut a, khum chungah ka nghat leh phawt. Tuilum chawi lutin a inbualna tur ka siam a. Towel nen bathroom-ah ka pawm lut.

Ka bual apiang hian ka fanu thla nga mi lek, lapuaa ka tihfai ṭhin kha ka hre chhuak ziah bawk. Hnuk ulh ṭeuh chungin ka bual zo ve mai bawk.

A tin leh a beng te ka tifai leh a, kar loah a mut a chhuak leh mai dawn. Chhun thil ei turin kan inpawm chhuak a, kan ei zawh ve leh ka pua a, ka awi leh dur dur.

Ka hmalamah ka thlak a, a mawng ka beng thek thek, khum chungah ṭhuin ka insâwi dat dat a, a chalsam te chu ka tuai chho a, dim te tein ka chhem bawk.

A thlan tla te chu ka hru a, a biang chul heuh heuhin ka fawp a. Ka mittuiin a far khum te chu ka hru thuai zel bawk.

'Ka fanu' tih hi ka sawi reng mai dawn a nih hi. Ka fanu kha,,ka paw tak tak hman lo a, ka pawm hman ṭawk. Ka duh ang thal pawh khan ka pawm ṭhin lo.

Ka mut a, inchhung hna ka khawihsan leh daih zel. A lo muhil ve chiah chiah zel a, fanu fel tak a ni.

Apaul-a chu ka âwmah a kuah bet pah a, "Bawihte, i nau hian tlan a duh a, tlan dan tur lo zirtir rawh aw", ka rilruin ka ti a.

"Fanu fel tak i nih kha, i nau te pathum pawh i enkawl a, i nau ve tho Apaul-a pawh hi lo enkawl leh hrâm rawh aw", ka mit ka chhing a, ka rilruin ka ti mawlh mawlh, ka mittui a luang ngiai ngiai bawk.

Helen Zaithankungi sak-Ka Di Enchim loh chu tih, a thunawna 'Ka Di' tih lai chu 'Ka Hrai' tiin ka thlak a, "Ka hrai enchim loh, ka thinlai hnemtu, In tel lo chuan e hringnun hi, A ngui ruai asin Khawvel par zawng nen, In kianga awm reng ka nuam e", tiin, ka zai rat rat a.

Ka insâwi dat dat bawk, a châng te chu sain, ka hrai tiin ka thlak zeuh zeuh. Nula leh tlangval inkara inhmangaihna leh lunglenna ni mah se, ka fa te nena kan inkara inhmangaihna leh lunglenna a ni tel ve tlat.

"In tel lo chuan chhun ni zan khua, ka leng zo lo a rei ṭhin mang e, min dawn ve hian ka ring si lo", ni e, Vanramah hlim leh thlamuang deuhin an awm tawh a, kei chu min ngaihtuah ngai miah lo ang.

Apaul-a chal ka fawp vang vang a, ka fa te puaa fawp angah ka inngai ṭhin. Ka fa te tumah kha lungchim tak pawhin ka kuah hman lo a nia!

"Bawihte, in bula lo awm ve ka chak tawh, ka kuah vawng vawng duh tawh che u", Apaul-a en chungin ṭap ṭeuh chungin ka ti zawi sap a.

Ka fa te ngai hian nitin hun ka hmang a, second khat pawh hi ka theihnghilh ngai lo. Tunah chuan, an bula kal ve vat vat hi ka duhthusam ber a ni.

A tawp nan, "Ka hrai enchim loh, ka thinlai hnemtu, In tel lo chuan e hringnun hi, A ngui ruai asin khawvel par zawng nen, In kianga awm reng ka nuam e", tiin, ka zai leh a.

Puakpuan ka suihna hmawr chuan ka hmai hupin, ka ṭap tlawk tlawk. 'Nu' nih hi khawvela hmeichhia te thilpek ropui ber leh, hmeichhia te nihna tawh azawnga zahawm ber a nih ka ring.

Fa nei tura Doctor an pan sup sup te, damdawi hial an ei ṭhin te hi ka dem hauh lo. Kan hrin chhuah kan fa te chu eng ang mi pawh nise, kan hmangaih em em vek.

Apaul-a chu dimtein ka mut a, bathroom-ah puakpuan nen ka lut a, ka hmai phih sawk sawkin Apaul-a thawmhnaw leh puakpuan chu ka su a, ka zar leh phawt.

Insukna khawl hi ka hmang thiam lo a, chu loah, kut ngeia suk hi nuam ka ti. Ka sawi fo tawh angin, ka fa te thawmhnaw su angah ka inngai ṭhin.

Apaul-a ka enkawl thei hi ka lawm lutuk ringawt. Nu chanvo leh Nu dinhmun ka neilet a, he chanvo hi khawvela chanvo duhawm ber a ni hial ang.

"U, in damṭhat lai a ni maw?",

"Aw, Pathian zarah a ni e, i damṭha zawk maw?",

"Aw, ṭha lutuk, ka nu te an inkhawm em ni?",

"Khawm e", a lo tih chuan, "Inkhawm ve ta che", ka lo ti vat. "Chhunah ka thawk hah a, zanah te chuan ka chawl ve duh alawm", vui âw deuh tak hian a lo ti leh a.

Ka lo nui sak, Serthlum huan zau tawk a enkawl a, ka nu leh pa lo siam a enkawlpui leh bawk a, vawk chaw zawn leh chhum te a ti leh vek a, hah ve tur pawh a ni.

Ka u nen pawh chuan kan inbe rei lo, a hah thu a sawi si a, mu veng veng tura hrilhin phone ka dah a. Keipawh, mu turin ka intintuah ve leh nghal.

Taxi phar din(ding) tur a awm mai loh avangin kein ka kal bek bek a, tukin chu ka thleng tlai dawn tlat.

Ka thleng tlai dawn tih hrilhna turin, ka pi te phone number ka nei bawk si lo a, min hauh loh hrâm ka beisei.b

Ka phone ri chu bag aṭang ka la chhuak a, "Aw, Siamte?",

"Mazai, naktuk chu i lo kal hman ang tiraw?",

"Kal hman dawn e, mahse, min lo hruai a ngai ang, taxi chan tur a awm dawn si lo a", ks ti a. "Aw le, ka lo hruai ang che, kan inhmu lo rei tawh si a, naktuk chu lo hman ngei ngei rawh", a lo ti lang lang a.

Ka hman ngei ngei turin ka lo chhang ve lung lung. Phone ka dah hnu rei vak loah, vanneih asiamin taxi ruakin, "I lo kal duh em?", min lo ti hlauh.

"Duh", ti thuaiin, ka ṭhu lut nghal zat. Chuan man te pea lawmthu hrilhin, gate ka pawt hawng a, in veranda-ah ka pi leh pu te an lo ṭhu, ka inthlahrung ngei mai.

"E kha, Mazai, i lo thleng ta maw?", nui varin ka piin a lo ti a. Inthlahrung tak ka ni, "Ih, taxi a vang lutuk a, ka lo tlai a, ka inthiamlo hle mai", ka ti bah nawk a.

Ka zam lutuk te hian ka ṭawng bah nawk zel, "A pawi lo, kan bulah hian lo ṭhu ve rih rawh, a pa nen an la inawm a, lo ṭhu rawh", ka piin a ti a.

A pa nen an inawm tih ka hriat chuan ka lo hlim ru ve veng veng. Ka pi leh pu bulah chuan ka ṭhu a. Ka pi leh pu ka ti tak naa, ka nu leh pa aiin an upatna a tam chuangin ka ring lo.

Mahse, ka pu phei chu a lu te a ṭuak var vo tawh a, ka pi pawh nu valai ang tak tak chu a ni tawh chuang lo. Ka nu leh pa aiin an upa lawr lak chu a ni chiang.

Ka pu Vanglaini Chanchinphek chhiar chu, a ngaihdan te a sawi ṭhin a. Ka piin a lo sawipui ve thei mai zel.

An nui dun leh ker ker ṭhin a, an inchhaih pah zauh bawk a, hmuhnawm ti tak hian ka lo thlir doh doh, ka awt ru lutuk.

Pasal ṭhena, nuthlawi nih bawk chuan ka pi leh pu te chu thik ngawih ngawih tham an ni. Engtin nge tun thlenga an la inneih zawk le?

Thuruk ṭha deuh an hriat ka ring tlat, ngam ngat ila chuan, zawh ka chak lutuk ringawt.

"Takah, Mazai, va lut tawh rawh, Zela pawhin a lo nghakhlel tawh ang che", ka piin a tih chuan, "Aww, ṭhut tir ve rih rawh, tihtur kan neih chuan loh hi", ka puin a lo ti a.

Ka piin a beng hlak a, ka pu chu a nui huah huah, "Ka va lut tawh ang e", nui vara tiin, ka ṭhutna aṭang ka tho a. Ka lehhawi leh ngat, an inchhaih zui nghal.

Apaul-a pindan kawngka chu dim tein ka hawng a, kan pu berin a lo pawm a, min lo en kuau, "Mom", Apaul-an min hmuh chuan a lo ti nghal thuai.

"Ka tihpalh lutuk", ṭhen sak chungin ka ti a. Kawngka kharin ka kal nal nal. A awm ka ring chiah tawh lo a nia.

In hnung lam huanah ka kal a, phulah ka ṭhu hle hle. An pafain an inawm a, a ṭha alawm. Mahse, kei ka khua a har ve leh thung.

An pafaa inawm an tum chuan, tihtur ka nei dawn lo tihna a nia, ka haw mai a ngai dawn a nih hmel, engpawh chu nise, a ṭha vek tho e.

Apaul-a pawhin, a pa ngaihsakna a mamawh ve tho alawm. Ka hnung lamah âwnin ka kutin ka innemkhalh a, thli lo thaw heuh heuh chuan min chhem dai sawng sawng.

Ka mit ka chhing a, pangpar rimtui tak tak ka hre tel bawk nen, thli lahin min chhem dai sawng sawng bawk a, ka nui ver ver.

Ka mittui a luang ngiai ngiai, muangchangin ka meng a, ka hma zawn Van chu a dum khuih, ruah a sur dawn chiang.

Min en an awm tlata ka hriat avangin ka sir lam ka hawi a, ka phu zawk! Ka ṭhut dan siam rem thuaiin, lehlam hawiin ka mittui luang ka hru a. An pafain min lo en reng tihna chu a nia, engtin nge ka hriat loh theih zawk le?

Apaul-an min nuih kur kur, "Mom, ka lo ṭhu ve", a kut a lo phar chhuak. Ka ding thuai a, kan pu ber, Pu Brandon-a kut aṭangin Apaul-a chu ka la a.

Apaul-an ka nghawngah min kuah vat, phulah ka ṭhutthlak pui vat a, kan pu ber hmaah chuan fanghmir chiah chiah hi kan ni mai.

A kalsawn dawn emaw ka tih laiin, kan hnungah a ding ve ran, ka thin a phu dup dup a, a rukin ka khûr der der. Ka hlauh vanga khûr ka nih ka ring.

Ni lah a lang ta reng reng lo a, chhum dum a invial tup tup, ka hnung lamah lah thingkung ṭawi luah a ding bawk a, a mi uap a na bawk a, ka thaw a chham dawnin ka hria.

Ka thaw ṭha ngam lo, Apaul-a ka duh angin ka chhaih ngam lo, ka va han dawih tak.

A tawpah, a kalsawn ta hrâm a, inchhunga a luh thlengin ka en zui. Ka thaw huai huai.

Apaul-a chu ka hmaah ka din tir a, a zakah ka dawm. "A AW B leh A B C kan zir kha han sawi teh", ka ti a. Bahlah miah loin a sawi zet zet.v

"A nih, zanah mut dawna ṭawngṭai dan tur kha", ka ti leh a. Bahlah miah loin a sawi leh zet zet. "Scientist i nih duh hmel", ka ti ta ngawt.

"Chu chu eng nge?",

"Mifing tihna", ka ti a. A nui sun sun, a va lawmawm reuh tak, pawmin a biang ka piai vak vak a, fawpin a biang chu ka seh hlak thul.

"Engtinnge naupang duhawm lutuka i pian theih le?", ka rilruin ka ti a. A nu ka hriain ka la hmu lo bawk a, mahse, a hmelchhiat ka ring miah lo. Fapa a nei hmelṭha em mai.

Ruahin min rawn far khum chuan Van lam ka hawi chho vat, ka chalah tak a lo far leh, "Bawihte, lut ang, ruah a sur dawn", ka ti a.

Dinpui thuaia ka tlanpui tur chu ka i chhuih a, Apaul-a chu hmai tauh zawngin ka thlauh ta!

Bawkvak chungin ka pan thuai, pawm kâng vatin a hmai chu ka tuai a, a ṭap miah lo a ka lawm zia chu.

"Bawihte, a na em, ṭap miah suh aw, tlangvalna a nih kha", ka ti mawlh mawlh. A chal veilam a duk deuh a, a pawng deuh nghe nghe.

Ka hlauthawng nasa lutuk, "Apaul, ka tihpalh lutuk min ngaidam rawh aw, ka thiam loh vek a ni", ti pahin, ka fawp zuk zuk.

Inthiamlo tak ka ni, thlauh miah lo tur ka ni asin mawle. "Bawihte, ṭap suh aw", ka ti a. Keimah zawk chu ka ṭap thei takngial dawn.

Ka thlauh lai kha min lo hmu ta se, a nih loh pawhin inchhungah kan lut dawn a, Apaul-a hmai chu an hmu ngei ngei dawn.

A pain engtin tak min ti ang maw, min bân ngei ngei ang le. Imchhungah ka luhpui vat a, a pindanah ka luhpui nghal.v

"Bawihte, ka tihpalh lutuk aw", ka ti a. "A na lo", a lo ti ve thâm chhalh. A ruk tak chuan na a ti ve dawn lutuk.

Ruah pawh a sur buan buan, Apaul-a chu ka pua a, ka hmalamah ka dah. Tukverh bulah dingin ruah sur kan enpui a, kuah pahin a mawngah ka beng thek thek.

Ka insâwi leh dat dat a, "Thinlai hnemtu ka hrai duhlai te u, tlang hrang kan chuan ṭuan ṭul vangin maw. Tawn leh ni tur ka va'n nghakhlel em.

Ka hrai enchim loh, ka thinlai hnemtu, In tel lo chuan e hringnun hi, A ngui ruai asin Khawvel par zawng nen, In kianga awm reng ka nuam e.

In tel lo chuan chhun ni zan khua, ka leng zo lo a rei ṭhin mang e, min dawn ve hian ka ring si lo", khaw awm danin a zir bawk a, Apaul-a pawh chu a muhil thuai.

Sofa chungah ṭhutpuiin, sofa tlangah ka lu ka nghat a, ka mit ka chhing vang vang. Apaul-a chu ka âwmah ka pawm bet a, a mawngah ka dawm pah bawk.

Apaul-a awi mut nana ka hla sak chu ka rilruin ka sa rat rat a, ka mittui pawh a tla ta zen lo, mahse, ka hnuk erawh a ulh ṭun, ka fa te bawk chu ni!

Eng emaw thil dum lian deuh ka hmaa awm ang maia ngaihna chuan min tihlau a, ka meng chhuak kâwk.

Ka âng zuau zuau nghal, "Ka, ka tihpalh lutuk, ka tum a ni miah lo", Apaul-a harh hlau takin ka ti bah nawk.

Min ngaithla lo tih hriat tak hian Apaul-a chal duk chu damdawi var hi a hnawih sak a, a thinrim deuh chuan ka hria.

Apaul-a ka âwma bet a nih avsngin kan pu ber nen chuan kan inhnaih mah mah. Ka thaw ṭha ngam leh ta lo, ka thin lah a phu dup dup.

Ka bulah ṭhua lo kun hniam a ni bawk a, a beng bulah hian ka thaw kâwk kâwk. Inchung ka melh ta daih a, ka sir lam te chu ka melh tawn chhen.

Zo vat vat se ka ti lutuk, a hnuah awmsawn hrâmin min melh kar a, ka kun ngaih ringawt. Kalsawn a la tum mai lo, ka thaw a chham thei dawnin ka hre mai!

"Kha hla kha engvanga sa ṭhin nge i nih a?", a ti thum bal a, hawi chhuakin ka en, "Eng hla maw?",

"Nichin lawk pawha i sak kha",

"Ih, ih", ka ti ringawt. Sawi ṭan dan tur ka hre lo, a lo hre ve tihna mawni. "I ṭap ziah leh nghal", a ti thum leh bal a.

Kamiz var hi a ha a, a bân a kiu thlengin a thlep chho a, a kamiz kawrkilh hmasa pahnih a kilh lo lehnghal, a kekawr hak lah a dum bawk.

Thip deuhin meng tawh lo mah se,,ka mit ka la sawn rang lutuk, kan pu ber a ni a, a mit taka en tur pawh ka ni lo.

"Ih, ka fa te ka ngai ṭhin a", ka ti zawi sap. Khawpui a ri dur dur nghal, "Khawiah nge an awm?", ka ngawi vang vang a, ṭek a tla ri chuaih chuaih mai bawk.

"Vanramah", ka ti leh a, ka mit ka chhing sawk, ka thinlung hi chhun ang mai a ni. Khawpui a ri leh nghal dur dur.

Ani pawh a ngawi leh ta vang vang a, a hnuah thoin, a lo let leh chuan puan pan tê, mahse lum nuam tho si a lo keng a.

Chu chu min sin tir a, pindan aṭang a chhuak zui leh nghal. Ka thlîr vang vang ringawt.


Show post links
Top

[Ngaia]

Tiam tlat e
Chapte-5
Ziaktu: Cck Lalchhuanawmi

Chu chu min sin tir a, pindan aṭang a chhuak zui leh nghal. Ka thlîr vang vang ringawt.

Ka pi leh pu bulah pawh ṭha deuhin ka sawi a, min hrethiam ve lutuk. Apaul-a ṭap miah lo kha ka lawm asin aww.

Apaul-a muthilh hnu chuan pindan aṭang ka chhuak a, puak kher lo pawhin a muhil thei a, mahse, puak hi a ngen deuh tlat zel, atirah kei lahin ka paw muhil ve ziah bawk nen. Pangchang thiam ve tawh tak a ni.

Inkhawm kan bang fel in lam ka pan nghal a, kan in ka thlen hmain ka phone a lo ri, "Kan lo thleng aw", Siamtein a tih zawh rualin ka hnung lam ka hawi a, taxi aṭang a rawn chhuak ve chiah.

"Mazai, lo kal nghal daih rawh",

"Lawkin, ka inthlak ve phawt ang",

"A ho lutuk, lo kal mai mai teh", min pawtin Taxi-ah min ṭhutluhpui nghal. "U Tea hian min tlawmngaihsak thei hlauh a, tlaiah pawh kan thlah leh thlap ang che", Siamtei chuan a ti zung zung.

Siamtei te in kan thleng a, naupang ho an lo tam ngang mai, a chhungte ka la hmuh loh avangin kan hming te kan inhrilh a, piancham neitu ber pawh chu ka la hmu thei lo.

An tlan kawi zar zar a, an inum kawi zak zak mai bawk. Balloon ham puar sa lah a tam em em mai bawk.

Siamtei nen a pindanah kan awm a, a inthlak mek.chu, "Min inthlak tir ve phawt tur a nia", vui âw deuh hian ka ti a. A tihpalh thu sawi thuaiin a kawr min hak tir tur thu a sawi a.

"Ka duh lo", ka lo ti hmak a, a rukin ka nui sen sen. "Kha hei aw", kekawr leh kawr ka hmaah a lo dah a. Kekawr aiah pawnfen ka duh zawk thu hrilhin, khup khuh chang chang tur hi min lo pe a, "Ka neihchhun a nih kha", nui varin a lo ti.

"Pawnfen tam deuh neih tur che alawm",

"Ka ngaina lo alawm, kekawr hak hi a remchang ber a", khumah mu tlawn zuarh nghalin a phone a bih a.

Keipawh inthlak sawk sawkin a bulah ka mu thla ve, Rempuia nen an inbiakna min hmuh a, an lo inbe ṭha kual vel chuan ka nuih a tiza reuh lutuk.

Siamtei pawh a nui hak hak,,"Hnathawh tinuamtu i nei ṭha dswn hle mai",

"Chutiang a ni lo, min lo fiam ve mai mai a nih hi",

"Ka awih chuang lo", ka lo tihsak. "Tirawh, chhuak ang, pindana awm reng a mawilo em mai", tiin, ka kaitho a.

Naupang ho chu an tam tual tual emaw tih tur a ni. Piancham neitu berin cake a zai hmain piancham hla kan lo sa dual dual a, naupang awmkhawm tih takah, uang pah tein an sa.

Cake a zai zawh ve leh Siamtei nen zai ṭha lehin dispo plate-ah kan lo dah den den a, dispo no var chi-ah theitui kan lo thli chhuak bawk a.

Dawhkanah tlar dulin naupang ho chu kan intlar tir a, pakhat te tein cake leh thei tui chu kan lo pe. "Ka lawm e", nui ver verin an ti hlawm a.

An ri laih laih reng bawk a, intiṭap tawk lah an awm. Mahse, naupang tih takah, rilru leh thinlung thianghlim ta na na na chu an nui ho leh dual dual zel tho.

Siamtei nen chuan cake leh theitui inna vel kan tifel a. Naupang ho pawh chu chawhnu inkhawmnaa kal turin an chhuak sup sup a.

A khawharthlak nghal ruihin ka hria, Siamtei nen dawrah kalin Spicy noodles chhum tur leiin kan chhum a. Siamtei specialist-na a ni bawk a, a tui ngang mai.

An ina ka kal vawikhatna ni mah se, an fel em em vek mai a, a inthlahrunawm zawk. Siamtei nuin tlaia chaw ei turin min ti tlat bawk a.

Ka han hnial ve deuh a, "I ei ngei ngei tur a ni, engtikah nge i lo kal leh dawn a hriat si loh", Siamtei nuin a ti a. Ka 'aw' ta tawp.

Kan eina kan tihfel zawh hnuin chokaah kan la awm a, Siamtei phone-ah ludo kan khel char char.

"Mazaii lo kal chu ka awl phah hlauh a, ka lawm tak tak a ni",,Siamtei u nupuiin a tih chuan, "A ho em mai, engmah a nih loh kha, kei aiin Siamtei a hah zawk tih ka hria alawm", ka lo ti var.

"Siamtei te chu, a mu mai mai zel, a hahdam ber a ni ang",

"I chhe reuh e ah, kal mai teh", Siamtein a ti hlak a. Ka lo ip chawih, nuam lo ka ti lutuk. Siamtei u nupui pawh chuan, "Ka kal, ka kal, mi hi huphurh thei bawk si", ti nang nang chungin a kalsawn a.

Siamtei chu ka beng hlak, "Eng nge?",

"Khatiangin mo te an ti ngai em ni, i u nupui a nia, zah ve ta che",

"A va buaithlak, i ngaihtuah nasa duh a nih kha, kan mo mah nise, ka ṭhiannu a nih saw, kei aiin kum hnihin upa mah se, kan inkawm nasa thei lutuk", a ti dap dap a.

Lu thing nar narin min nuih ver ver, "A tirah sawi ta che", ka ti ringawt, ka inthiamlo leh hnuhnawh.

"Ka uin a ngaihzawn chhan leh nupuia a neih chhan i hre duh em?",

"Han sawi teh",

"Keimah vang", Siamtein ka beng bula a ti zawi sap chu ka kâ ho, "Ngati nge?",

"A sawi dan chuan kan unau zingah keimah hian ka ngaihtuah ber a, ka ṭhiannu pawh sawn keimah ang bawka a ngaihtuah a ring ve a, chubakah kan unau dang te chuan nupui pasal an neiin an indang vek tawh si a, keimah nen lo inpawh tlangnel kan ni tawh bawk nen, farnu leh mo te inkara inhmuhthiam lohna awm thei lak ata invenna ni pah fawmin a ti a", Siamtein a tih chuan, ka nui sak.

A u chuan a va han ngaihtuah chikim em em, "I u chu a va fing ve", ka ti sap a, a dar a chhin hak, "A finna ka hre lo e ah, mahse, ka ṭhiannu a chhai thlu thei erawh a fing ka ti ve, engtin nge a chhai thluk theih ka hre lo", nui sâwng hian a ti leh a.

Siamtei nen kan phun sar sar sia, min lo hmu tu te chuan eng kan sawi an hre dawn si lo, mak min ti ngawt ang, kan nui kur kur pah nen.

Ka ngaihtuah ta ber chu, farnu leh mo te inkara inhmuhthiam loh a awm lohna turin Siamtei u chuan, a farnu ṭhiannu a nei hmak a nia!

A mak ve ngawt mai, a rukin ka thaw halh halh. Ka nunhlui bawk ka chhui kir leh, ka phak ang tawkin ka pasal farnu te pawh kha ka tiṭha a, mahse, keimahah an duhkhawp erawh an hmu thei chuang lo.

Ka pasal nu leh pa te pawh, an mo atana min duh loh thu min hrilh chamchi pawhin nui sângin ka be siam siam ṭhin a, min chhan duh loh pawhin ka be lui ngat ngat zel tho.

Nupui leh pasal inkara inhriatthiamna awm a ngaih tluk bawkin, pasal nu leh pa leh farnu te inkarah pawh inhriatthiamna a awm ve tho a ngai tih ka hre ta.

Mahse, chung chu moin a tih vek tur a ni chuang lo, mo chauhin hriatthiamna a neih bik a ṭha chuang lo. Kan pasal chhungte pawhin hriatthiamna nei ve sela.

Chubakah, lungawina neih te hi a lo ṭha ta ber, thleng tur chu a thleng vek tawh a, lungawina kha lo thupui ber ta hlawm ila, tun hi kan thleng lo tur!

"Mazaii ei rawngbawl te kan ei a, a tui hle mai", Siamtei pahin a tih chuan lawmthu ka lo hrilh a. "Engtikah nge Serthlum a awm leh theih ang?", Siamtei u nupuiin a tih chuan, "Kum tawpah hian a ni ang, par pawh an la par ṭan lo", ka lo ti a.

Chaw ei paha ṭawng hi ka harsatna a la ni reng a nih hi, ka ṭawng chhung zawngin chaw ka ei ngai lo a, ka sawi tur ka sawi zawh hnuah chauh chaw pawh ka bar ṭhin. La inzir fe chu ka ngai a ni.

Mahse, puar tak chuan ka ei ve tho mai bawk, "Mazaii leh Siamtei te an awm bawk sia, ka'n lo ṭhu mai mai ang e",

"I chhe em mai ah, kal rawh", Siamtein a ti leh hlak. Kan lo nui dar dar a, an inhaw tawn lo tih a hriat ngawih ngawih, a nuam ngawt ang.

Siamtei leh kei tih loh inkhawm turin an kal hlawm a, a pindanah kan mu veng veng.

"Kal ila, u Tean a hman thu min lo hrilh",

"I sawi har ka ti reng a", ka lo ti. Inkhawm ban a hun der tawh mai sia, "A inkhawm ve a, tunlai chu inkhawm a taima thei lutuk", Siamtein a ti lang lang.

Ka inthlak leh a, tihian inkhawm bang ka ni ve mai. Siamtei u te chhungkua lo haw nen kan intawk a, kan inthlah liam liam.

"An inah va kal ang aw", Siamtein a tih chuan ka bu nghat. Nunga nen kan la intawk zui, ipte chei hi a ak ngei a, Pastor a ang reuh lutuk.

Min hmu chu a phu deuh zawk, "Kan va inhmu khat thei ve", a ti ta ngawt a, "Nia", tiin, ka lo chhang ve mai bawk.

"Thlah haw a ngai a, u Tea i hmu em?",

"An in a thleng tawh ang", Nunga chuan a ti a. "Lo kal rawh, Mazaii hi min lo thlahpui ve rawh", Siamtei chuan a ti a.

Nunga chuan a lo hnial a, mahse, Siamtein a tilui tlat. Nunga kut chu a chelh a, a kalpui dawr dawr, an hnungah ka kal ve hnak hnak.

Nunga leh Siamtei bakah, driver chuan a ṭhianpa hi a hmalamah a phur ve a, min thlah zawh ve leh a thlah ve leh dawn.

An titi siam siam a, ka lo ngaithla ringawt, Nunga nen kan inkarah Siamtei a ṭhu a, kan hmalama ṭhu te titi chu a va zawm ve pah zauh zauh ṭhin bawk.

Kan ṭhutna lam hi a thim a, hmalam erawh a êng thung, êng lutuk a ni chuang lo. Siamtei hmalama a ṭhut chhuah deuh avangin Nunga nen kan inhmu thei a.

Ka inngaihbel nge phei chu ka hre lo, Nungan min en rengin ka hria, hmalam ka en ngar chu, pawn lam ka hawi ta daih. Ka ngaihbel pawh a ni mai thei a ni.

Min duh thu min hrilh a, ka lo hnar kha a ni a, ka inthiamlo ve reng. Ka duhthlanna a ni a, ka lo hnar zel mai ang. Min duh thu min hrilha ka lo hnar aṭang engmah a sawi leh tawh lo, min tilui lo te hi ka lawm.

Kei nuthlawi ve mai mai ai chuan, Siamtei pawh atan a ṭha zawk. Siamtei te nen kan kum a inrual a, Nunga erawh kum khatin a upa thung.

"Mazai, han sawi ve teh, eng nge i ngaihdan ni ve?", Siamtein a tih chuan, "In sawi chu a dik vek alawm, mahse, hmeichhia an uire thei a, mipa erawh an uire ve thei lo thung. Hmeichhe uire chu nasa taka diriam an ni a.

Mipa uire ve erawh, 'mipa a nia' tiin, an khuhmawi a, mipa chu uire ve thei loah an ngai tawh. Chubakah, mipa aiin hmeichhia hian hmangaihna kan ngah zawk", ka nui deuh sak a.

Driver ṭhianpa chuan, "Uire chungchang i sawi chu a dik tho naa, mahse, mipa pawh hian hmangaihna kan ngah ve tho asin",

"Mipa chuan a nupui vawikhat uire pawh a ngaidam thei lo a, mahse, hmeichhia chuan a pasal vawitam uire pawh ngaidamin lungawi takin an la mutpui thei ṭhin asin, a chhan chu a hmangaih tlat avangin", ka sawi zawh rualin pawn lam ka hawi nghal.

Ka mittui luang ngiai ngiai chu hruk ka tum lo, ka kut ka lek chhuak a nih chuan ka ṭap tih an hre palh ang.

Ka thinlung chhungril bera natna thûk tak, puak chhuak tura inmunga invial tup tup chu a puak chhuak ta!

Ka pasalin vawi tam min uiresan chung pawha lungawi taka ka mutpui ṭhin thu ka vawikhat sawi chhuahna. Ṭap chhuak lo turin ka inpet ruh fan fan, a va han hreawm tak.

Uire chungchang Bible-a inziak te an sawi a, Isuan a ngaihdam thu te sawiin, hmeichhia ang thoa mipa pawhin hmangaihna an ngah ve tho thu te an sawi a.

Mahse, kei chuan hmeichhiain hmangaihna kan ngah zawk tih hi ka pawm dan a la ni fan.

Mipaah pawh hmangaihna ngah an lo awm ve pawh a ni mahna. Mahse, kei chu ka hun tawnin a zir lo bawk a, nge ni a, a zir em avangin ka ti dawn, ka thlîrna tlâng aṭang hi chuan hmeichhia hi ka la ṭan fan.

Chubakah, sawi leh sawi hnu, pasal kan nei a, kan pasal te chauh hmangaiha rawngbawlsak a ni tawh lo, kan pasal te bakah hmangaih tur leh rawngbawlsak tur an tam tawh.

Chung zawng zawng chu mipain an ti miah lo, hmeichhia vek thoin ni ti.

"A tawp khar nan, mipa leh hmaichhiaah pawh a ṭha leh ṭha lo kan awm a, a ṭha lo te avangin tupawh inmawhchhiat ngawt tur kan awm lo, kan inbuktawk i ti mai teh ang", driver ṭhianpa bawk chuan a ti a. A nui zui huah huah.

Kan in chu kan thleng chawpchilh ve mai bawk a, ka chhuah chuan ka mittui ka hru nghal thuai thuai.

Ka lehhawi a, "Mazai, kan lo lut tawh lo mai ang aw",

"Aw, aw, a pawi lo", ka lo ti a. Siamtein, "Nidangah kan lo leng ve thung dawn nia aw", a ti leh a. Driver pawh chuan, "Ka taxi number leh ka hmel hi chhinchhiah kar la, khawimawa kan inhmuh nikhuaah pawh min lo be nghal vat dawn nia", a ti a.

"Aw le", ka lo ti var. Driver ṭhianpa ho chuan kan invai lâwp lâwp a, Nunga pawh chuan, "Mazai, mangṭha", nui sâng chungin a lo ti a.

In chhunga ka luh rualin ka mu nghal, ka fanu thlalak phawrhin ka âwmah ka pawm bet a, a bul aṭangin ka ṭap ṭha leh hi a ni ringawt.

"Aw Lalpa, nitin mai hian ka ṭap ziah a, nitin ka nunhluiin min tibuai a, engtikah nge thlamuang tak hian ka awm ve ang?", ka rilruin ka ti a. Ka mit ka chhing vang vang.

Naktuk aṭang chuan,,ka nunhlui hre chhuaka min tibuai a nih pawhin ka ṭap tawh lo ang. Nghet takin ka ding ang a, chhel takin ka tuar tawh bawk ang a, ka mittui ka titla tawh lo ang.

Muangchangin ka kal bek bek a, taxi ka melh pah reng bawk. Naupang school kal tur te ka tawk a, thil pakhat hriat chhuak zawk ka nei.

Lehkhabu dawrah lutin, naupang lehkhabu bik an dahnaah ka kal a, lemziah sa chei tur leh thawnthu Beramno bu thum lai lain, rawng leh pencil, nawhreh leh pencil zumna te leh ziaklo bu ka lei bawk.

Polythene-ah dahin min pe a, dawr ka chhuahsan dawna ka lehkhabu hmuh chuan ka mit a la zar. Ding chawtin ka thlek a 'Nuthlawi lungleng-Suzanne Sainghinglovi Sailo' tih chu, ka melh ngawt ngawt.

Ka lawm lutuk chu ka khi vur vur, hetiang lehkhabu te a lo awm ka ring ngai miah lo. Ban tuma ka kut tihkân ka tum chu, nu pakhat hian min lo lak khalh ta, ka va han ui tak!

Bu dang ka zawng a, ka hmu tawh lo, "Tunah rih chuan stock sa a awm tawh lo a", min la ti zui.

Bei lo zetin dawr aṭang chuan ka chhuak a, ka ui lutuk chu a rukin ka insawh tau nghawng nghawng. Melh ngawt ngawt lo khan lo lak pawp tur hi a nia.

Pawi ṭhin em asin, nakinah a awm leh hun awm velah ka kal leh ang a, a lo awm leh tak tak a nih chuan ka la pawp tawh ang.

'Nuthlawi lungleng' tih takah, ka chhiar tur chi tak a ni.

Veranda-ah an pathumin an lo ṭhu a, "Mom", Apaul-an min hmuh chuan a lo ti thuai. Ka pi leh pu chu an lo nui sun sun a, a nuam lo duh ngei mai.

An bulah chuan ka han ṭhu thla ve a, Apaul-a tana ka thil lei te chu phawrhin ka sawifiah pah zel bawk.

"In duh chuan pindanah pawh va inawm ula", ka piin a tih chuan, "Ni lo e, vawiin aṭang chuan kan pali hian inkawm ho tawh ang u", Apaul-a biang piai zeuh chungin ka ti a.

Apaul-an min lo nuih ver ver, a duhawm chiang alawm. A sam buang thek te hi a inhmeh bik ngawih ngawih, a dum thei lo em mawni le?

"Ruah a sur lo bawk a, in hnung lama phulah khan va awm ang u", phur zetin ka pu chuan a ti a. A tho nghal vat a, inchhungah a lut a, "Puan phah tur ka lo la ang", ka pu chu a lo au rawng rawng.

Apaul-a ka nawr a,,ka piin lehkhabu ka leisak ho chu a keng bawk. Ka pu chu lo chhuakin puan pawh ni loin Alphabet zampher hi a lo keng chhuak.

Ka pi leh puin an phah a, an nui dun ver ver a, an hmuhnawm dun lutuk. Keipawh chu ka hlim, ahma daih tawha hetia kan palia lo awm ho tawh tur hi a nia.

Ziaklo bu-ah Apaul-a hmingpum 'Paul Zirsangzela' tih chu ka ziak a, "I hmingpum a nih hi, i hming chhiar dan zir ang aw", ka ti a. A bu ve nghat nghat.

Sipel nen ka zirtir a, sipel lo pawhin a chhiar thiam thuai. "Kum ruk i nih tak tak pawh hi ka ring lo", dêk zeuh pahin a ti a. A lo nui khêk chul.

"Sipel leh chhiar i thiam tawh sia, ziah zir chauh kan hmabak ta, chumi hmain thawnthu chhiar phawt ang aw", ka ti a. Beramno thawnthu bu pakhat lain ka chhiar a.

Chei tur awm chu ka chei tir leh phawt a, rawng hming te chu ka hrilh thlap thlap. Thaizawm tur te, milem pahniha a inan lohna zawn tur te chu ka zawnpui.

Beramno thawnthu bu hi thawnthu bu tawh zawng zawngah chuan ṭha ka ti ber, thawnthu ngawr ngawr chhiar tur awm loa, hetia rilru sawrbingna tur infiamna ang chi an telh hi a ṭha ka ti.

"Mom, zai leh la",

"Zaina hun pawh a nih loh hi", ka lo ti thuai. "Mom, please", a ti leh a, ka lu ka thing nawk nawk. Ka zai duh teuh lo mai, a rauah lah ka chêng lo.

Ka pi leh pu pawh chuan, ka lehkhabu lei chu an tupa ai mahin an lo hlimpui. Ka nuih ver ver, "Khami rawng khan chei rawh",

"Ka chei dawn reng alawm", an invin ve hlak hlak. "Mom, please, zai leh rawh", min ngheng ar ar chungin a ti leh a. Twinkle Twinkle Little Star ka sa leh ta tawp.

A hnuah Venthiam Huaisena tih ka sa a, a kut chelhin 'Bauh bauh bauh' tih laiah chuan a pumah a kut ka chelh chuan ka tiza a. Ama kut ngeia a pum a tiza chu a nui vak vak e, a khêk chul mai bawk.

Ruah a rawn hnaih avangin inchhungah kan lut a, "Ṭhutthleng siam a ngai dawn a nih kha", ka puin a tih chuan, "Rorelliana kan hrilh dawn nia", ka piin a lo ti a.

A rukin ka lo nui, an fapa chu an ko duat ve lo tawp, Rorelliana han tih tawp chu, athuhrimah, a hming an phuah upa e, a chal ka ti, Rorelliana han tih tawp mai chu(h).

Chaw ei a hun a, "Zela pa chinchang hi eng nge, Mami nu?",

"Ka hre nang, ka'n phone ang e", ka piin a ti a. A phone banin a tarmit a vuah ṭha leh te te. "E, aw le, aw le", tiin, a phone chu a dah a.

Ka piin ka pu chu enin, "A lo haw har dawn a nih chu, kan eisan thei", a ti a. Ka puin chaw ei a rawt nghal.

Ka bulah Apaul-a a ṭhu a, chaw ka ei muang hi a ni tawp mai. Ka pi leh puin chaw ei laia min biak te hi an ching a, Apaul-a chaw ei ka vil pah nen.

Alu kan(kang) a ei zawh chuan ka pe leh a, chaw a ei zawh pawhin khawrh sakin dal te ka chawm sak leh a, ka chaw ei a muang lutuk ringawt, inzir ka ngai nasa lutuk ringawt.

Chaw ei kham hnu rei vak loah, "Nu, pa, chaw in ei tawh em?", nu pakhat hi naupang pathum nen an lo lut a, an hnungah, a pasal ni ngei turin a lo zui bawk.

"Kan ei kham chiah", ka piin a ti a. Choka lamah ka la buai bawk nen, ka uksak ta lo. An ṭawng erawh ka hre pha thung.

"Ka vahpa duatpuia chu a lo damṭha maw?", a ti lang lang a. Apaul-a ni a nih chu, "Ngawi teh, i thau sawta ka hriat chu le", a ti leh a.

Ka piin, "Enkawltu a nei ṭha tawh em alawm, A AW B pawh a thiam tawh lutuk, a hming pawh a chhiar thiam tawh", a tih chuan, a rukin ka lo nui sen sen. A nuam ve reuh lutuk.

"A va lawmawm ve, lo thau sawt sawt rawh aw", Apaul-a ni chuan a ti leh a. "Aw le, ni", Apaul-a pawhin a lo ti ve.

Ka puin an kalna tur a zawt a, "Brandon-a Mall-ah bazar turin kan kal dawn, an la inkhar chuang lo a, khaw'nge amah hi a lo la haw lo em ni?",

"La haw lo, a lo haw har dawn a, chaw pawh kan eisan", ka piin a lo ti a.

Apaul-a ni chuan, "Nau ten Mall lian zet an nei a, a thlawna va bazar char char a ni mai", nui hak hakin a ti a. An awm rei lo, an chhuak leh thuai.

Apaul-a chu pindanah ka hruai lut a, ha te kan nawh fel hnuah khumah ka nghat a, puak a ngen leh tlat.

"Bawihte, puak loh pawhin i muthilh theih kha",

"Min lo pua", a ti a. A tûm hmuk nghal, "Naktuk zanah ka paw mai ang che",

"Ka duh lo", tiin, a han ṭap pur nghal a, "Ka paw dawn chuang lo che, muhil hmak rawh", ti pahin, ka mutthlak tir.

"Mom, please", a insut faih, ka nuih hak a, "Mizo i nih kha, please ti tawh suh", ka ti a.

"Khawngaihtakin", a lo ti. "Awi, awi, awi, nangte hi", tiin, ka dêk leh a, mittui tla purin a nui uar uar.

A tawpah zawng kan inpaw muhil ta tho, ka muttir fel hnuin pindan aṭang ka chhuak a, "A pa a lo haw har dawn si a, ka lo mutpui lawk ang e", ka pi chuan a ti a.

Gate khar ṭhain, kan veng panin ka kal a, taxi tlan reng mah se, an khat vek zel a, mi pakhat chauh lenna tur pawhin hmun awl a awm lo.

U Tea chu a ngaihawm vawng vawng, Siamtei phone-a inhruai tir mai ka duh rum rum.

"E hem", tih thawm ka hriat chuan ka bag hrui ka hmer ngawt ngawt a, kun ngaih chungin ka kal. An zawn ka thlen chuan zu rim a nam huam mai bawk.

Khûr der der chungin ka kalpel thei ta hrâm a, ka thaw huai huai, zu pawh hi ka hua, ka haw(hua) lutuk ringawt.

"Min lo nghak ve la, kan lo thlah ang che", an lo tih chuan, min umzui tih ka hre chiah.

Motor vei vak awm mah se, mihring hmuh tur erawh a awm mang lo thung. Zan dangah pawh ka hmu ngai si lo, khûr ru der der chung hian ka kal leh a.

"Min lo nghak rawh", tia min lo auh pawh chu hre lo ang hmakin ka awm. "Nangmah chauha kal chu a ṭha lo a nia", an lo ti leh a, an nui hawk hawk.

Ka kallui ngar ngar, ring tawka au chhuah ka duh tawh mai, min tihlau ngawih ngawih.

Chutah, ka sirah car lo dingin, "I haw dawn em ni?", tih ka hriat chuan, ka hawi chhuak vat.

Kan pu Brandon-a ka hmuh chuan ka thaw huai huai, ka chil ka lem khawlh a, "I him tawh", tih, ka inhrilh mawlh mawlh. Ka thla a muan dan chu pui tak a ni.

Car aṭang a lo chhuak a, ka hmaah a ding, ka tet zia ka inhre leh ṭhin.

Hmel tak ngul hian min en chhuk run, coat a ha a, a kilh bawk si lo, a coat sir ve ve chu a kuta delhin a kekawr ipteah a kut a zen lut a, a ding kâk deuh kher bawk.

Hlauthawng em em hian ka en chho ve ran bawk, ka awmdan chu a hrethiam ni maw, a mit la sawnin ka hnung lam a hawi a.

Chutah, "David", tiin, a lu a thle zeuh. Ka hnung lam ka hawi ve a, David-a a tih chu, Apaul-a pawmtupa leh an ina min hruaitupa kha a ni.

Ani pawh chuan a coat phelhin a kut veilamah a bâng liam a, a kut dinglam kamiz bân chu a thlep chho mawlh mawlh.

Min umzuitu te hnen a thlen chuan, card phawrhin an hmaah a lek a, "Hei hi, ka Karate Zirtirna hmun a nia, in duh chuan nangni pawh in lo zir ve dawn nia", a ti a.

A chhaih kawlh dawn mawni, "A nih chu mawle", tia, mi pakhatin hnek tuma a kut a lek.chu a lo man chawt a, leiah a bin thla chawrh.b

Ka au tuar a, kan pu ber chu a nui hak, "Ka card hi in la dawn nge dawn lo?", David-a chuan a ti leh a, an la rang khawp mai.

David-a chu a coat ha ṭha mawlh mawlh pahin a lo kal a, car bulah a va ding leh daih, ka en reng ringawt.

"David", a lo bu nghat. David-a chu car-ah lutin a tinung a, a tlan ta mai. "E he!", ka ti a. "A lo let leh dawn alawm", ka hnunga ding pu Brandon-a chuan a lo ti thum bal.v

David-a chu kan hmaah a lo ding, a va in turn lawk chu niin. "Lut rawh le, kan lo thlah ang che",

"Ah, a ngai lo, keimah pawhin ka haw thei", ka kut phar chhuak meuhin ka ti.

Pu Brandon-a chuan, a banreka kamiz var bân hmawr chu khawih pahin, "Ka hnuaia thawk ten ka thu an hnial hi ka ti thei ṭhak lo", khi suk paha tiin, rum em em hian min lo en a.

Car kawngkhar hawng rawk rawkin ka ṭhu lut nghal vat. Tukverh lamah ka ṭhu kawm kêk a, Pu Brandon-a pawh chu q lo lut ve nghal.

Car chhung pawh chu a khat nghal mai hian ka hria. "Khawiah nge i chên?", a tih chuan, rang lutukin ka chenna ka hrilh.

David-a chu kan veng panin a tlan ta a,, darthlalang hi tihhniama thlifim hip veng veng ka chak lutuk.

"David, darthlalang ho hi tihniam ta che", dam dupa Pu Brandon-an a tih chuan darthlalang chu an hniam nghal sang sang.

David-an a thunun vek tihna ni maw, ni lo, kan Pu Rorelliana hian a thunun vek zawk, Rorelliana, a hming a pu zo kher mai.


Show post links
Top

[Ngaia]

Tiam tlat e
Chapter-6
Ziaktu: Cck Lalchhuanawmi

David-an a thunun vek tihna ni maw, ni lo, kan Pu Rorelliana hian a thunun vek zawk, Rorelliana, a hming a pu zo kher mai.

"Tah hian aw", David-a chu ka va hrilh a, a din rual rualin, "Ka lawm lutuk e", tiin, ka chhuk thuai a, hawi let miah loin ka kal nal nal.

In chhunga ka luh rual rualin kawngka ka kalh hmak, min lo umzui ka ring chu âtthlak tih vangin ka nui hak.

Chaw ka ei tawh avangin ka insil a, mu turin ka inpeih fel der.

Mu pahin kan department group-ah ka lut a, message lo tlim hmur chu ka chhiar ringawt.

Siamtei message hmuh tur a awm loh danah, Kohhran lamah a buai deuh a nih ka ring, Committeee peng hrang hrangah te khan a awm ve si a.

Phone pawh chu ka en rei lo, zan tin ka tih dana tiin, muhil turin ka mit ka chhing zui a.

"Mom", veranda-ah a lo awm a, wheelchair-a ṭhu reng chung pawhin a nui ver ver thei a, naupang mah nise ka tluk lo ngei mai.

"Ngati nge pawnah i lo awm, in chhungah lo awm tur alawm?", ka ti a. Ka ṭhu hniam chu ka nghawngah min lo kuah, "Ka ngai tawh che", a ti a.

"Keipawhin ka ngai tawh lutuk che",,ti pahin, ka kuah bet sauh sauh.

"Inchhungah lut tawh ang aw",

"Ka duh lo",

"Ngati maw?", ka inla hrang a, a mittui luang ka hmuh chuan ka kuah leh vat. In hnung lam huanah ka hruai ta zawk a,,phulah ṭhuin ka mal chungah ka ṭhuttir.

"Ngati nge i ṭah a?", ka hmaah ka dintir leh a, "Mom, Mizo ka ni lo mi?", a ti chuai raih. Ka âwmah ka kuah bei hle hle.

Mizo a nih thu ka hrilh chiang viau tawhin ka hre ve asin le, ngati nge hetiang zawhna hi a neih aw?

Tu emaw berin ṭawngkam an nei tihna a ni mai, "Bawihte, ka sawi kha i la hria em, i pa Mizo a nia, chuvang chuan nangpawh Mizo i ni tihna a nih chu, miin Mizo i ni lo an tih pawhin, "Ka pa Mizo a nia, chuvang chuan keipawh Mizo ka ni", i ti tlat dawn nia aw", ka ti a.

A bu nghat nghat, kum ruk mi lek beng hriata sawi atan chuan a ṭha miah lo. Tuin nge lo sawi ṭhin ang aw?

"Lo kal rawh, lut ang aw, i pi leh pu pawhin min lo zawng palh ang", ka ti a. Wheelchair-a ṭhuttir ka tum chu ka nghawngah min kuah bet tlat.

"Min pawm rawh", a ti a. Ka hnial duh ta lo. Tv hmaah ka ṭhutpui a, a ngui ruai mai hian ka hria.

"Apaul, eng nge i ei chak, i ei chak sawi la kan siam dawn nia", ka ti a. A lu a thing nar nar. Tukina a awmdan chu ka hrethiam miah lo.

Ka pi leh pu te chu bazarah an lo kal daih a, Pu Brandon-a lah a hnaah a kal daih bawk, an awmpui nen chauh an lo awm a, an awmpui chuan a lo hrilh mawni ka ti hman.

"Bawihte,,tah hian lo ṭhu lawk rawh aw", tiin, ka tho a. An awmpui insu mek bulah ka va kal a, min lo hmuh chuan a lo nui sen sen.

"Ka lo pui ang che aw",

"A ngai lo, ka ti thei alawm, current a awm lo a chuvang mai mai lawm kuta ka suk, current a awm hi chuan khawlin a suk mai thei a", a lo ti a.

"A ho em mai, ka lo pui zawk ang che", tia ka ṭhu tur chu ka kut lo manin, "A ngai lo ka tih kha, nakinah i la buai zawk mai thei a nia aw",

"Eng nge awmzia?",

"A hmasaa ka thawhna chhungkua ten nautê an nei a, an buai lutuk kha min lo bia a, ka kal a ngaih dawn avangin nangmah hi awmtir che an tum a, Zela buaipuitu i ni bawk nen", a ti dap dap a.

Mak ti deuhin ka en, "I ti tak tak em?",

"Tak tak e, ka pi leh pu te sawi ka hria a, mahse, Pu Roa kha chuan a remti chiah loin ka hria", a ti leh a. Ka nui sak.

"Zela bulah va awm rawh, ka khawngaih reuh a nia", a ti zawi sap a. Eng emaw hriat duh ka neih avangin ka la kal mai lo.

"Heta i awmna hi a rei tawh em?",

"Rei ve tawh reng, Pu Roa te inneih hmain ka awm tawh", tiin, min lo melh ralh, "Eng nge i hriat duh a?", a tih chuan ka nui hak.

"Chutiang engmah a awm lo",

"Min zawt rawh, i hriat duh apiamg chu ka hrilh thei ang che", a ti a. A rukin ka thaw huai, ka kâ ka âng zuau hman, "Mom", Apaul-an min lo ko, "Va kal rawh, a bulah va awm char char rawh", min lo ti a.

Apaul-a bulah ka va kal thuai, "I rei lutuk", min lo ti a. Ka khawngaih reuh lutuk. Ka mal chungah pawmin, sofa hnung ka ngheng a, Apaul-a pawh chuan min lo ngheng ve ar ar.

Kan pi leh pu te pawh chu an lo thleng a, an lo inkhai bawr nasa mai. An thil lei ka hmuh chuan ka nui ver ver.

Rawng chi hrang hrang, pencil, nawhreh leh pencil zumna a bawm bawmin an lo lei a. Thawnthu bu lah, Beramno chauh lo pawh an hmuh tawh phawt an lo lei emaw tih tur a ni.

Ka pi leh pu te lah chu an nui dun ker ker leh nghal, an tupa ai pawhin nuam an ti zawk dawnin a lang.

Tv hmaah hian Alphabet zampher phahin, inkhualtelemna hrang hrang leh lehkhabu nen kan awmkhawm tup. A chhangchhiatthlak lam mah zawk.

Ka pi leh pu te an phur tehreng nen, Apaul-a erawh a nguai tlat, a nui hmel hmuh tur a awm mang lo. Min kuah chawt reng a, ka âwmah hian a bei tlat.

Ka ngaih ṭha lo chu a pang ka dek leh ngawt zel a, mahse, khawsik a awm bawk si lo.

"Zeltea chu ngati nge a, lo kal rawh le, i pu nen milem chei ang u", ka piin lo ban a tum chu a lu a thing nawk nawk.

A awmdan hi ka hrethiam tawh bik lo, "A mut a chhuak a niang, ka'n paw mai ang e", ka ti a. Ka pi pawh chuan, "A ni mai thei a ni, paw loin khumah muttir zawk la, a bulah i mu ang a i hahdam deuh zawk ang", a ti a.

Bu nghatin pindan ka luhpui a, khumah chuan ka mut, a bulah muin a âwm beng thek thekin hla ka sak sak a, "Khami lo",

"Eng maw, Twinkle Twinkle hi lawm ka sak ṭhin",

"Ni lo, kha, ruah sur laia i sak ṭhin kha", a ti leh a. Ka hrechhuak.chiah. "Aw le, i mit chhing la aw", ka ti a. A mit a chhing ve mai bawk.

A muthlilh hnu chuan tho ṭhem ṭhemin pindan aṭang ka chhuak a, ka pi leh pu te an lo la tui nasa khawp mai.

An bulah ka ṭhu thla a, ka chil ka lem khawlh, "Ka pi, ka pu nen thil eng emaw hrilh tur che u ka nei a", tim dai hian ka ti a.

Dam dupin sawi turin min lo ti, min hauh lo hrâm ka beisei, thawk la leh phawtin, "Ih, Apaul-a hian Mizo a nih leh nih loh hi min zawt a, ahmain min zawt tawh a, tukinah a ṭum hnihna atan min zawt leh", ka kut ka sik niap niap.

Min hau let hrep zawk ang tih ka hlau, ka pi leh pu an ngawi ren rawn a, an ngaihtuah muk hmel lutuk ringawt.

A tawpah, ka pi chuan thinrim tih hriat tak hian, "Veronica mai mai chuh", sehchilh tak hian a ti chang fak a, a thinrim tih a hriat ngawih ngawih.

"Pawisa a mamawh leh ta a nimaw, tun ṭum erawh engzah mah kan pe tawh lo ang, Zela nu a nih avangin kan lainat a, inṭhen manah pawh a la ṭeuh tawh, a fapa hi hmanruaah lo hmang miah suh se, vawikhatmah a fapa nen paw'n inbe tawh suh se, vawi engzah nge kan koh haw, a lo haw duh lo a",

"Mami nu, a tawk, Roa kan hrilh ang a, ama'n chingfel rawh se",

"Hrilh hrilh a ngai lo, Mami'n hau teh se, Mazai, Roa hrilh miah suh aw, a kal thui mah mah tawh a ni", ka piin a ti kharh kharh.n

Ka puin a lo bengdai ve bawk, "Ka lung hi a dam thei lo, amah avangin kut bengin kan awm lo chauh a, tunah, a fapa hmanruaah hman a lo tum leh a nia, Sap fing phakar tak a ni, hmangaihna pawh nei lo",

"Mami nu, a tawk ka tih kha", ka puin a lo ti vat. Nuam lo ka tih em avangin ka kalsawn a, pindanah ka lut leh daih. A nu nen an inbiak apiangin Mizo a nih loh thu a lo hrilh ṭhin a ni ngei ang, Apual-an a pa emaw, a pi leh pute emaw a hrilh ṭhin a ring bawk ang a.

Apaul-a biang ka chul heuh heuh, hetiang naupang duhawm lutuk pawisawi lo hi, hmanruaa hman an lo tum maw, chu pawh amah hringtunu ngeiin!

Hmeichhia te pawh hi kan lo va inang lo tak, nu ṭheuh ṭheuh pawh hi a lo inan loh theih ngei mai.

Zanriah kan ei a, Apaul-a chuan chaw a ei tlem ngei mai. Vawiin nilengin kan inpawm bet tlat.v

"Ka Tuaite, chaw kha ei ṭeuh ṭeuh rawh, i niin lo ei ṭeuh ṭeuh rawh a tih che kha", ka piin nui varin a lo ti a. Apaul-a chu a bu ve nghat. Mahse, a ei tam chuang lo.

Ka pi leh pu te an chhuak a, ka piin Mami a tih bulah an kal dawn a ni mai thei. Pu Brandon-a erawh a Office-ah a awm a, a buai ngawt ang, file a lo hawn nasa em mai.

Apaul-chu hma thlakin, Evelyn-i nen chokaah kan awm a, "A phakar ka ring sa hrim hrim, a mitmeng te reng reng kha ka ei lo nasa mai, hrawn a hreawm si, Sap nundan anga nun a tum a, vawikhat chu Zela a pai lai hian zu a lo in a, Pu Roa thinrim lutukin a ben phah alawm, Zela kal theih loh chhan pawh hi a zu in vang kha a nih ka ring", Evelyn-i thusawi chuan min vit ngawt ngawt.

Evelyn-i nen kan titi chhung zawngin Apaul-a beng pahnih ka hup a, muhil tawh mah se, a lo hre ru kiau ang tih ka hlau.

"Zela pian hnuah inṭhen a rawt a, ka pu te ro chanve dawn lai chu a chang ang, chumi hnu pawh chuan chhuanlam eng eng emaw siamin pawisa a lo dil ṭhin. Ka pu te hi an fel ka ti em asin, kei chu ni ila ka pek loh tur zia chuh.

Ka pu te hian an inṭhen hnuah pawh an ko ve ṭhin a, mahse, a lo haw duh chuang lo, tunah pawisa a mamawh ang a, Zela hmang hian lo dil a tum a niang, a nu a nih vang hian an inbiak tir zeuh zeuh ṭhin a, hei lawm hnam pui ngei neih loh chu, buaina a tam dan hi", Evelyn-i chu a phun sar sar.

Pu Brandon-a hriat hlau takin min hrilh ve siam siam. Pu Brandon-an Sap nupuia a neih daih chhan zawh ka tum ut ut a, mahse, ka ngawi leh ta thung.

Ka hriat duh chin chu ka hre tain ka hria, Apaul-a lu ka fawp zeuh. A nuin hmanruaah chuan lo hmang lul suh se.

A nu nen an inbiakin eng thu nge a lo hrilh ṭhin ka hre miah lo, thu ṭha lo tak erawh a nih ka ring.

Evelyn-i thildang ka sawipui ta daih a, Apaul-a beng pawh ka hup tawh lo. Apaul-a harh hlau tak siin kan nui dun leh hak hak ṭhin.

"Ka pi te chu aw, ka mut a chhuak tawh asin le, an lo haw har tawh e",

"Va mu rawh, keima'n ka lo nghak ang",

"Ah, an lo haw ṭep tawh ang", a lo ti a. "A nih, tv en ang lo kal rawh", ka ti a. Tv kan en dun ta daih.

Ka pi te pawh chu an lo haw har zek, an lo va inhauh buai loh hrâm ka beisei.

"Evelyn, ka nu te hi khaw'nge?", ti thum bal chuan min tiphu nasa lutuk.

"U Mami te ina an kal kha an lo la haw lo", Evelyn-in a lo chhang thuai. "Va mu tawh rawh, keima'n ka lo nghak ang",

"Aw le, muttui le", Evelyn-i chuan a ti a. Mut a duh tawh bawk a, a lawm ngawt ang. Chubakah, Pu Brandon-a thu chu hnial chi loh, awih ngei ngei a ngai.

"Nangpawh haw tawh rawh, khawi Paul-a kha", ka hmaah a lo ṭhu hniam a, kan inchen chiah chiahin ka hria.

Puakpuan ka phelh a, zawi muangin Apaul-a chu Pu Brandon-a kutah ka nghat a, puakpuan nen a lo pawm nghal thuai bawk.

Ka ruak huai mai bawk, pindan lam a panpui a, a hnungah ka zui. Pindanah ka bag a awm avangin lak a ngai dawn.

Lo lehhawiin, "Haw rawh ka tih kha", a ti zawi sup. "Ih, ka bag", ti sapin, ka kun ngaih.

Pindanah ka zui lut a, dim te hian khumah a nghat, ka lo en reng. An hmuhnawm reuh lutuk.

Lu thing nawkin ka bag ka la a, pindan kawngka ka khar dawn chiah tihah, "Mom", Apaul-a chu a ṭap nghal râwi râwi.

Ka lut vat a, Pu Brandon-an a lo kuah bet tlat, min hmuh chuan chhuak turin a mitmeiin min lo ti. A thu awih a ngai tlat si a, Apaul-a ṭap vak vak leh, "Mom", tia a au chu, in ka chhuahsan thleng pawhin ka hre thei.

Ka mittui luang ringawt chu ka hru mawlh mawlh, Pu Brandon-a thla ka hau bawrh bawrh mai bawk.

Nizana min chhaihtu te dinna zawn ka thleng a, zanin chu hmuh tur an awm lo. Chutah, "U Mazai, Mazai", ka hnung lam ka hawi vat.

Evelyn-i chu a lo tlan phar dawr dawr, ka bul a lo thlen chuan, "Zela a ṭap nasa lutuk, lo kal vat rawh",

"Pu Brandon-an haw turin min ti alawm",

"Lo kal mai rawh, Zela a khawngaihthlak, Pu Roa chuan kan pahnihin min hau mai rawh se, kal vat ang", thaw halh halh chungin a ti a.

Evelyn-i nen chuan in lam kan pan chharh chharh, a hmanhmawh berah ka ṭang. In chhunga kan luh chuan, "Mom", tia, ṭap khêk chul ka hriat chuan ka mittui ka dang zo lo.

Pindanah ka tlan lut thuai, Pu Brandon-a ngaichang tawh loin, thlêm tuma a pawm beh mek a fapa chu ka laksak.

Ka âwmah ka pawm bet a, ka sâwi dat dat, "Ṭap tawh suh, bâng tawh rawh le, i bulah ka awm hi", ka ti zawi sap sap.b

Ka nghawngah min kuah bet tlat a, a ṭap pawh a bâng tial tial. Mittui parawl kuangin Pu Brandon-a chu ka en a, khum chungah ṭhuin min lo en ngawt ngawt.

Mak min ti ngawt ang, a nih loh pawhin zak thei lo min ti ngawt ang le.

A hmai tuai puatin a chhuak ta daih, "Mom",

"Eih a, ṭap tawh suh le, ka pua ang che aw",

"Umm", ṭap ṭeuh chung hian a ti a. A zun chhuah thu a sawi chuan ka zun tir a, ka paw leh.

Ka hmalamah dahin, "Ka hrai enchim loh, ka thinlai hnemtu, I tel lo chuan e hringnun hi, A ngui ruai asin Khawvel par zawng nen, I kianga awm reng ka nuam e", tiin, ka sa ta zawk a.

Apaul-a muhil chu enin ka fawp leh zeuh ṭhin, a nu chuan eng thu nge a lo sawi ang aw. A nu nen an inbiak laiin ka pi ten awmpui tur an ni asin mawle.

Naupang duhawm rilru thianghlim tina tur khawpa thu chu, ka hre ve chak ngawt mai.

"Mazai, ka inthlahrung viau na chu, zanin chu lo riahpui mai la", ka piin a lo tih chuan, "Lutuk", tiin, ka lo chhang a.

"I ṭap em ni, Roan a hau che em ni?",

"Hau lo e, a ṭap kan inthlêm bâng thei lawk lo a", ka lo ti a. "Buaina kan tawk leh dawn niin alang, Roa te nen inbiak a ngai a, Mazai, kan chhungkaw chanchin hi min sawi chhuahsak lo ang tiraw?", ka kut vuanin ka piin a lo ti a.

"Ka pi, ka sawi chhuak lo ang, sawi chhuahna chhan tur ka nei hleinem", Apaul-a en zeuh chungin ka ti a.

Ka pi pawh chu a thaw huaiin ka hria, min chhuahsan ta a. Apaul-a nen chuan khumah kan mu.

Naktuk zingah chuan engkim a ṭhat tawh ka beisei, Apaul-a naupang mai hian a taksaah hliam a nei a, a rilru erawh tihhliam belh a ṭulna awmin ka hre lo.

"Bawihte, i nau hi lo veng rawh aw", ka ti zawi sap. Apaul-a chu ka kuah a, a mutui tawh lutuk ringawt.


Show post links
Top