LAVENDER BY Pysces Ferry Khawlhring (Completed)

[Ngaia]

Naupang chi a kalna àwm kawngah chuan zirtir ula, a upat hun pawhin a thlah lovang.


LAVENDER LAST CHAPTER

Thawm chu a reh vawng vawng a, ka office chhung boruak pawh rit tak ani. Tun maia ka rilru hahdamna leh ka thawvenna te kha khawiah nge an kal bo zawh hman pawh hriat lohin ka hmaa thu chu hrilh hai takin ka en tlawk tlawk ringawt.


Ka awmdan nghilh dup chuan tawngkam azawnga ngaihthlak ka duh loh ber a hria tih hriat takin min vaw chau nghulh theia, a thusawi kha pangai taka dawn sawn dan ka hre lova, ka thei bawk hek lo..


"heng in kher tawnna te hi kalsan ka duh tawh, kan awmdun chhung chu kan kalsan thei dawn lo Zodinpui, chu chu ka sawi ngai lovin nangpawh hian i hria, kan awmdun theilo "arawn ti zawi leh sapa, sawi nuam a ti biklo tih a àw ri ah pawh a hriat theih, ka rilru ah ka pu in then tura min tih na thla 1 hun min pek leh kar khat tha vel bak rilru siam fel nan ka nei tawh lo tih ka in hre thar a, mahse eng rilru mah ka la nei lo, then ka duh lova, tum chhin pawh ka duh lo.


Kan hma a inchhawp reng kan paltlang tur thil ani tih hre kur mahila athusawi chu ka hua in ka ngaihdan ani thei lo. Kei hian ka lo hmangaih reng tawh zawk tihna ani thei angem? "Ka sawi dik ani lawm ni, ka lakah hian feelings i nei lo tiraw? " Tiin thu delhkilh awm eih lo chuan arawn ti dam ruiha, mit khap lek lova min en karin ka chhanna anghak reng tih ka hria...


Mahse amah ngei pawh amitmeng chuan in thudang daih asawi tih min hrilhtu a awm tlat, kha zawhna kha keichauh ni lovin Zonunmawii tan pawh chhan huphurh awm tur tak ani tih hriatna ka nei tlat. Ka zam ang tho hian a zam ve hle tih pawh a mitmeng leh a hawi herah ka hmu thiam leh zel a,ngawi rengin kan in en reng ringawt mai ani.


Engtin nge ka chhan dawn ka hre lo, keimah ngei pawh hi ka buai nuai nuai tawh chu anihhi, ka hmangaih em tih ka in hre thiam lova, ka duh em tih nen lam, mahse a kianga awm leh ka ngaina takzet tih erawh ka thup sen a ni lo,a awm loh hlekah pawh ka khua ahar veng veng thin a, khawi hmunah pawh a awmve rinna neia ka zawn ruk tak fo thin hi engtin nge ka hrilhfiah ang.


Kan chendun rei tawh avanga a nghawng chauh chu ani thei tawh lo .. Amah ngei pawh hi zawt ila ka lakah hian eng ang feelings nge aneih tihhi a sawifiah thiam ka ring biklo,a hma ang chuan min haw lo tih leh a awmdan a tang hian alantir fo va,mahse khami avang ngawt khan min hmangaih ta tihna ani chuang silo ani.


"Nidangah kan sawi zawk dawn em ni? " Ka ti ta ringawta, ka ngaihtuahna achawmawlh hneh em a, tunah engmah ngaihtuah chiang hmasa lovin chhanna pe ringawt ila,nakinah ka kumkhaw inchhirna tur ala ni thei dawn tlat ani. Zonunmawii pawh thawk la halhin a nui sak a, amitmeng mawlh chuan min mawlh in, eng emaw tak zep anei tih ka ringhlel ru tlat nia maw le..


Tichuan ka office ah awm dun chawtin biak erawh kan in be fumfe meuh lo, kan rilru a kan ngaihtuah erawh a in an viau ka ring. Ka buaiin ka rilru ngaihtuahna a rit ut theia, thil thleng thei tur zawng zawng dàwn angai bawk si, then ta ringawt ila engkim hi kan ti tawp vek thei chuang in ka ring silo, lo then lo ta ila Zonunmawii nunna hi ka veng seng reng dawn lo, ngaihtuah ngaihna pawh ka hre tawh lo. Engkim chu a tawp vek mai hian ka hria.


Duhthlan ngai si, thlan ngaihna hre bawk silo, rilru khingbai leh tawt up up in ka awm a, eng emaw kawng zawk zawk chu ka zawh angai tih ka in hria, chutiang lovin Zonunmawii hi lo tlan bo pui dawn ta ang ila ka pu hian min hmuh hma chu min zawn a thulh duh dawn der lo tih ka chianga, dam chhung hun tlan chhiat nana hman reng ani thei silo, ka nu leh pa leh ka unaute hi kut bengin a chhuahtir duh mai ka hlau ve bawk nen, rilru a buai nuai nuai mai.

............
Pu Hlira In lam pana kan tlan lai chuan Zonunmawii chuan "Ka pu ka hmu a, Siampuii chungchangah khan, " Tia rawn phun sapin ka melh vata, a chauh hmel ngawih ngawih. "khatiang khawpa ka pu thinrim kha ka la hmu ngailo, " Nui lui sakin arawn ti leh a, sawi hreawm a tihzia a hmelah ka hmu a, hriat belh chaka zawh chhunzawm ka tum hran lo, in sawi thawl a duh avanga chu thu pawh chu min hrilh mai anih ka ring.


Pu Hlira in kan thlen chuan eng ka hria nge maw ni boruak a ritin luh chakna pakhat mah ka neilo. Pangai takin min lo lawma, zanriah pawh kan kil ho thap bawk. Pu Hlira ber chu nidang anglo riau hian ka hre tlat peka, a tawng tlemin hmel hlim a pu meuh chu ani. Zonunmawii nen kan inkar avangin ka ngaihbel zo nge tih phei erawh ka hrelo.


"Adin, Nunu haw nghal mai lovin la awm khaw muang ve ru aw, in pu te ve ve anrawn kal dawna, thusawi ho tur kan nei, in pahnih chungchang ah hian, " Pu Hliran thaw hluai chunga rawn tiin, asawi dan hmangah leh ahmel landanah chuan sawi chakawm zawk zawk chu anilo tih ahriat mai. Eng lam hawi nge tih hrelo mah ila ka zam nghal em em ringawta, inthen tir min tum tak tak ang tih te ka hlau thar ngawih ngawih....


Darkar chanve vel zen zawn kan lo nghak thapa, atu amah reng reng tawng zai kan rel theilo. Midang chu ka hrelo mahse kei erawh ka lungphu a rangin ka thaw lak a sak talha, eng thil nge ni ang tih ngawt ngaihtuahin ka hah vek thei.

Kan mi nghah berte an rawn thlen rual chuan Pu Hlira chu tawngchhuak hmasa berah tangin, "Adin,Nunu heng thil thleng zawng zawng hi ka thiam loh vek ani, in pu te hi an inngeih deuh ka beisei avangin in inneihna kha ka ruat a, mahse a tawpah erawh inthen in duh thu in sawi leh si, eng buaina nge in neiha, in inngeih viau tawh emaw ka lo ti hman asin, " Tiin Pu Hlira chuan min en tawn zak zak hlawma, atu amah lah chuan chhan en ah pawh kan en hlawm lo.


"ava han hahthlak em aw, duhtawk em em rawh u Sangthang, heti fo ko hian unau thisen hmunkhat an in hal ngai em ni, in tu leh fate pawh in kawmngeih tir ahnekin hmelma ah in chana, in va han rapthlak unau tak em, zah pawh hi in zak lo vem ni? " Pu Hliran thinrim vin zeta arawn tih chuan Zonunmawii nen kan in melh tawn zak zak nghal, tuna kan thu hriat kha kan hresual lo ve ve tih pawh kan hmela mak tihna leh a awmzia hriatfiah chak mena kan men dun avang hian a hriat vek theih ngei ang.


"Ka u kha thil chungchang kha min zep pui i intiam kha, " Pu Sangthanga chuan rawn ti bul hmukin a landanah chuan alawm lo hle tih a hrethiam awm vek. "A teuh lo, in suah sual lutuk avanga in tu leh fate tawrhna hi ka hmu reng peih tawh lo, thisen hmun khat lehnghal ka sawi chhuak har lutuk zawka in huangtau anihhi. In nu leh pate thlarau pawh hi in zah em em lo vem ni?


'In inngeih deuh beiseiin Adina leh Nunu pawh ka inneih luih tir a, an hlimna tur pawh nangni unau avang hian ka tihchhiat angai hiala,mahse chuti chung chuan hmanrua ah hmangin in er in la bansan duh chuang lo chu anihhi, ka kham zo zai tawh lutuk, mi suaksual unau, ramhuai fapa ang chauh in nihhi "a ti bawrh bawrha, atar ve tawh nen atawng zawng te chuan a thaw kawk kawka, Pu Hlira rilru nà hmel ka vawikhat hmuhna ania,awm thiam ahar takzet.


Mahse chu zawng ai chuan chhungkua kan lo ni reng tih leh Zonunmawii hi ka cousin ka unaunu alo ni reng tih ka hriatchhuahna chuan zahna leh hreawm tihna min pe nghal àwn àwna,unau inkara thleng tura mawilo tawp khawk tur kan thlen tir a,ka zak thar ngawih ngawih hi ani tawp mai.


Zonunmawii rawn in sut zui hlapah chuan inthlahrunna nen ka melh tawk tawka,ahmelah chuan zahna leh hrehawm tihna bak hmuh tur a awm bik lo,thil thleng zawng zawngte kha achhui kir ve ngei dawna,mipa pawhin hrehawm ka tih chu hmeichhe tan phei chuan tawrh a hrehawm dawn hian ka hre lutuk. Ka in ten ti ila ka awmdan hi ka sawichhuak thiam berin ka ring.


"Adin khawngaihin min haw pui rawh, " Zonunmawiin mittui tla zawih zawih a min rawn biak chuan keipawh helai hmun a awm reng chakna nei miau hek lo, an buai buai a lo buai turin kan kalsan zui nghal a. Ka dam chhunga ka thu hriat tawh azawnga min la thawng ber tu ka tilo theilo, engtin nge khang thu te kha an lo thup reng theih zawk??


"I tha maw, " Thui fe kan tlan hnu ah tawng chhuak hmasa zawkah tangin Zonunmawii in sut ri leh hlap thin chu ka melh zeuhva, kan awmdan chu alaklawh dun viau hian ka hria. "Inthen ang, " Rawn ti lawi ratin pawnlam a thlir zui daiha, ka chhang tawh lem lo. Diktak chuan keipawh hian ti tawp hi thil tha ber ni ah ka ngai, mahse ka thinlung erawh chuan pawm harsa ati takzet.


Tu hriatpui silo in kawng dang awm se' tihna rilru a awm lo thei lo, mahse chu erawh vana rah ang ani thung si. Ka thinlung leh ka rilru a inkalha, mahse keimah chauh inngaihtuah thei ka ni bawk silo. Ka thinlung duhdan zuiin inthenna hi pawm duhlo ta ang ila, lang lo tura thuhruk engthil mah a awm lo ang hian, mualphona bak ka thlen dawn si lo ani.


Miten kan chhungkaw hnih inkara thudik an rawn hria anga, 'enteh u saw mi te nupa saw unau an nih saw, engtin nge an inneih ngam zawk le? Engtin nge an chhungte pawh hian an phalsak theih zawk? ' min la ti bawl bawl ngei ang, chu erawh ka hmachhawn ngam ngang lo. Kei chang nilovin Zonunmawii pawh hian a ngaihtuah thleng pha vek dawn tih ka hria.


Dan theih rual lohin kan pu te thuruk chu chhungkaw hnihte chuan kan hreta vek a, athen an tapa , a then an mangang bawka, athen lahin awilo luiin thudik nilo se an ti thul, boruak chi hrang hrang karah thaw ve tawk tawkin kan la dam sen ve reng chu anih ber hi. Pu Hlira erawhin a tu te kan nih angin inzawmna nghet zawk kan neih ala beisei fana, mahse a bul tan danin a zir tawh miau silo, engkim tha leh tur chuan kum kan hman ral ang zat tal kha angai let ve ngei ang.


Ka pu in naupangte kan nih lai atanga min zirtirna te kha a tha lo chu ka ti pum hlum lo, mahse a diklo ani, kawngdik leh tha chu min zirtir ngei alawm mahse min zirtir famkim silo midangte laka indah chungnun dan te, tlawm zawka tan duh lohna thinlung te, a tha ber ni tura pawisak neih loh dan te, mi el lova er dan zawk min zirtir daihna te kha naupang rilru chuan thli fim thiam tawh hek lo.


Kan lo than len puia, bakah kan kianga khawsa te mizia kha kan zir ber leh kan en ber anih avangin ka pu zia leh hawiher te, atawngkam chheh duh dan te kha kan hriat loh laiin kan lo nei fel daih tawh a, tunah puitling niin hun tam tak kan hman liam tawh hnu hian, mi rilru kan lo hliam nasa in mi huat kan lo hlawh nasa dawn hian ka hre thar a, chuvang chuan ka pu min enkawl dan kha adiklo ka ti ngam tawh.

. ______ .
"Eng vanga inthen duh nge in niha? " Tia lawyer in min en kur chuan Nunu i chu ka melh zeuhva, a zam hle tih ka hria akut a keuh neuh neuh chu vawn sakin, "ka pu kha chu mimal thil ania, khawngaihin lehkha chu kan sign nghal thei angem? "Tiin tha takin ka ngen a, chupa pawh chuan tih ngaihna ahre vak bik lo ani ang, inthenna lehkha chu min sign tirin Zonunmawii nen chuan kan chhuak zui nghal.


Kan chhungkaw chanchin kan hriatni atang khan in khatah pawh awm dun tawh lovin, ka appartment ah kei ka in sawn lut a, Zonunmawii erawh kan nupa in ah khan ala awm thung..


" Kha heng ho hi Pu Hlira hnen atanga ka ro neihna lehkha ho an nia, ka mamawh tawh lo, tunah chuan ka unaute pawh mahnia ding chhuak turin an kawng theuh an zawh ngam tawh a, chuan in hotel leh kan hotel inkarah pawh buaina i tawk tawh lovang, engkim hi kalsana thawveng taka awm ka duh tawh, Chuan min hriat thiam avangin ka lawm e, anih phawt" Tiin a kal sawn zui daih a, dang turin huaisenna ka nei tawh lo, ngawi rengin cara a tlan chhuah thleng chuan ka thlir reng a, ka ruak nghal vekin ka hria.


Ka appartment lam pana ka tlan lai chuan Jeremya hnen atanga call dawngin ani pawh Aizawl lama ahaw dawn thu phur takin arawn sawi a, ka pu hmuh a duh hrih loh vang tih erawh ka hre mai. Chutiang bawkin Tluangpuii leh midang ho pawh mahnia appartment luah hrang vekin an khawsa zui deuh veka, hetianga chhungkua kan kehdarh hi ka pu ka dem lo theilo.


Min enkawl danin zir nise , hetiang hian kan awm khumin kan palzam ngam lo anga, zah aphu tluk zetin kan zah viau ka ring bawk. Ka appartment ka thleng atanga minute 5 velah Ahmangaihi a rawn lang hlawla, anaute nen an ni nghe nghe, ruak ngawih ngawih leh mal ta em em a ka inhriat avang chuan engmah sawi lovin ka kuah thlawpa, mahse ka kim phah chuang reng reng lo.


"I tha maw Adin..i phone a ri ania, " Ahmangaihin arawn tih chuan in la hrang nghalin Zonunmawii call ani tih ka hmuh rual rual chuan phur zetin ka pickup nghala, ka phur surhna te chu achhan pawh ka hre lo. Ka thinlungin alo ngaichang reng tih erawh ka phat theih rual anilo.

Diktak chuan ka thinlung hian 'Zodinpui inneihna kha tih tawp ka duhlo,' tih emaw, eng emaw tawngkam min ti hlim a,min ti hahdam veng veng thei tur min hrilh se tih chu ka beisei ber ani.


"Adin, engkim avang khan ka lawm e aw, " Rawn ti sapin a reh zui vang vanga, keipawhin ngawi rengin ka ngaichang zui kar bawk. "Hmelma angin bul ka tanpui che a, mahse a tawp dan erawh ka thinlung ka veng seng ngang lo, min hrethiam rawh. Ka sawi chhuak lo anih chuan awm ngaihna ka hrelo ani.. Ka unaupa ilo ni reng tih hi hrechhuak lo ila ka ti lutuk asin, mahse Pathian remruat zawk ani ngei ang thui kan kal hma in ti hian thudik min hriatchuah tir a, "tiin a in sut zui hlap a.


Chhan let tumin ka àng hman zuai tihah lehlam thawm atanga mipui tawngri nawk nawk kar atang chuan " Hman hmawh rawh u,kan thlawk chhuak dawn ania" Tia Hindi a au lawng lawng rí chu ka hria a, engmah sawi hman a awm lo ka tlan chhuak nghala, henu hian ka hriat lova min kal bo san atum tih ka hrethiam nghal.


"Khawiah nge i awm, Hetiang hi chuan ti suh Zonunmawi" Tiin stepah chuan ka tlan thla hlawk hlawka, ka thinrim leh ka hrilhhai lutuk chu engtianga chakin nge stepah chuan ka tlan thlak pawh ka hre lo. "Zodinpui, duhtawk rawh, ka kal angai, in hmu thei lova kan awm hi a tha zawk.. Lo kal duh suh i rawn thleng hman dawn lo, " Arawn ti leh chuan ka ding chawta, ka thinrim nge ka rilru nà pawh ka hrethiam tawh lo, bang char chu hnek deuh chawrh chawrin ka au nghek ringawt.


"Khawngaihin Zonunmawi, min kalsan suh, " Ka ti ta thlawta, ka mittui arawn hnam tiam tiam nghal, hmeichhia avang hian ka tah ka in ring ngailo asin. Mahse tunah erawh avawikhat nan ka mittui ka dang zo tawh lo, inthenna lehkha ka sign mah harsa ka tih tawh nak alaia, pumpelh theih nise kumkhua atan pumpelh ka duh hial asin,chulai kara min kal bo san a tum thut chu ka hrethiam theilo.


Ka thin tawt up up chu dawmin ka thaw lak asak talha, avawi khat nan bawk thinlung nà leh rúm an lo tih ngei chu ka hre ve ta, kan pi leh puten Nupa tangthen chu dar lehlam sahthlak ang ani an lo ti thina.. Tuna ka thinlung natna erawh hi chu tehkhin thu engmahin a sawifiah zo kher lovang. Enga tinge Pathian pawh khian hetianga rum vawng vawng tura min lo duan kher...


"Ka tihpalh Zodinpui, ka thei lo ka ngainatna che hi a pun lun zel loh nan ka kal bo pui angai alawm.. Lo in enkawl tha la, kum khat hnu ah ka lo let leh anga, hnate pawh kan thawk dun leh dawn nia, intih thawven nan mai alawm ka zin chhuah dawn, " Arawn ti zang vaha, mittui kar atangin ka nui chhuak hawk nghal.


Kumkhua atan min kalbo san dawn emaw ka lo ti hmana, mahse chutiang alo nisi lo, ka hahdam nghal sawng sawng mai. Mittui nep thaw chhuak kawkin stepah chuan ka thu thla hnawka, ni e a tu ve ve pawn hun kan mamawh tih ka hria, mahse chuti chung chuan thinlung chhungril atang erawh kallo tura ngen turin min tur ut ut tu a awma, ngaihtuahna mak pui pui alo lut zut zut reng bawk.


Hetiang ang thinlung khawharna,mal ngawih ngawiha in hriatna leh hnawl nia in hriatna khawi lehkhabu ah mah hrilhfiahna tur awm lo tawrh hi ka duh tawh lo, a chhan ber puh tur awm si lovin thinlung a rúm a, hrilhhaina bak chan tur ka nei lo.. Lawmkim lo tak chungin tluang taka a kal theih nan duhsakna sang ber hlan chungin ka thlah liama, phone atang mai mah nise ka ruak leh zualin ka in hria.


Tihtur leh awmdan tur hre lovin ka thu tlawk tlawka, ka chanah ka lung a awilo nge, Zonunmawiin min kalsan vang zawk ka nà ngawih ngawiha, tha hrui chakna reng ka neilo. Heihi hmangaihna anih siloh chuan khawvelah hian hmangaihna a awm lovang ka ti ngam.. Ka mittui luang thla nguai nguai chu hru zung zungin mipa pawh mipa ka ni zo tawh lo, thinlungin nà a hriat tawh chinah chuan...


Vanvadakin ka mittui chu ka khap per leh saka, tumah hmaizah ka nei zo tawh lo, 'Lalpa a lo let hunah chuan ka ta ni turin min ruat sak hram rawh aw, 'ka ti chhuak ta thlawt a, ni e, ka nghak dawn ani. Kum 1 chauh chu harsa dawn hle mahse ka nghak chhuak thei em em ang. Kum 1 hnu ah akut ka vuan leh thei anih ngai chuan ka lak atangin a kalbo ka remti tawh ngai lovang....


Min dem lul suh u, ka hmangaihna hian tu pawi mah a sawi lova sin, ahmangaih a neih chu ve chu a thiang ani lawm ni.... 'Zonunmawi ka lo nghak reng dawn che ania aw... 'Tiin ka phun chhuak sapa.


Kum 6 hnuah chuan

"Bro,naktuk chu aw ,i rawn tlai vaih chuan " Tia Jeremyan phur fahrana arawn tih rual chuan ka hnar ka tum zui hmak thung, ani nupui nei tur hi mawng hawlh ang mai in a khawsa a, min ti chung chung reng bawk nen aninawm mah mah. "I ninawm sek vawiin ringawtah pawh vawi 4 i sawina ani tawh, " Ka lo ti deuh hrepa, a sawi ngun lutuk a, ka hne hlui tawh.


"I mak nangin nupui i nei tawha, ka neive dawna min phur pui tur zawk inih kha, ti daih ila in nu chu eng nge a an, a tha meuh maw? " Arawn ti zawm a, dawhkan ti felfai mek tu ka nupui Mamuantei chu melhin a dam that thu in ka chhang let vata, achanchin kan sawi tih hrethiam in min rawn nuih let ver ver nghal.


"A that chu,hahdamna hun pawh in nei dawn silo,in rawn chho tlai lutuka, karkhat la awm velah tal lo chhauh tur cheu ania, e lawk lo vuan lawk, hrilh tur che a awm," Rawn ti sur surin a bula thawm chu akalsan zui tih a reh duk danah ka hrethiam nghal.


"Bro, Nunu i a rawn let asin ,mahse hmu lo la ka duhpui zawk che " Arawn ti chiah chu ka phone ka thlauh lek lek tep ani. Ka chil ka lem khawlh a, engmah sawi zui lovin call ka off nghal.


Hmanhmawh takin room lamah chuan tlan luh ka ruala, ka lehkhabu dahkhawmna atang chuan ka diary kara Zonunmawii ka hriat chhuah fo na kan inneih zungbun chu la chhuak zui rawk rawkin, kum tamtak en pawh ka en duh tawh loh a thu tiama adinloh avanga ka huat zui tak em em Zonunmawii nen kan inneih zungbun lo let bal chu ka thlir zui vawng vawng a,kum tamtak ral tawh mahse a mawi ngaiin ala mawi renga, ahlutna abo phah chhuang der lo.


Kum 1 chauh ti tu khan kum 6 min awmbo san tawha, a kalbo atanga khang kum chhung ka nghah chhuah dan hun hreawm leh mangchhia ang maia ka hman ral takte kha ngaihtuah chhuah fo ka duh tawh lo asin, mahse henu hi zawng engtik lai mahin ka thinlungah hian a thi thei tawh tak tak ngai lo tih erawh ka mangphan fo avangin ka pha theilo.


Mamuantei nen hian nikum khan innei in chhungkaw ni turin tunah hian kan fa pakhatna tur apai mek a. Mahse chuti chung chuan kilkhatah erawh Zonunmawii ala awm fan tho. A thu tiama adin loh chhan te, a chhungte leh athiante tak ngial pawh rawn be pawp lo leh a reh zui hmak chhan te,thu tamtak zawh tur ka nei a, mahse kum tamtak hnuah pawh a thawm ri va hriat tur awm zui lovin a reh zui hmak si, khatih laia ka thinlung natdan kha sawifiah ngaihna a awm tawh lovang.


Ka ngaih em avang leh a àw hriat ka chak thin em avangte khan Pathian lakah pawh ka in thlahrung seng lo mang ramah tal min hmuh tir turin ka ngen thin anih kha.
Ka khawsak dan mumal lo zet avang te khan mi pangai pha tawh lo hiala min ngai tawk lah an awm nuk hmana, tumah ka dem lo, thinlung kehsawm khan awm ngaihna a hre hlawl lo atin ni.


Beiseina in siam sak luiin a phone number , a chhungte leh athiante tak ngial pawhin biak tina antin tawh loh te kha ka call nitin thin a, engtin emaw line kal fuhin alo pickup palh hlauh ka ring lui thin. Mahse min chhang let tu erawh number hi a thi tawh tih chauh ani thung si.

Awm ngaihna ka hre lova, keimah leh keimah ka in hlauh vek bawk. Mi à ang maiin ka awma, alo haw tep tawh ang' tiin mahni leh mahni dawt derin ka infuih phur chawpa, Jeremyan, 'duh tawk tawh em em rawh, hma lam pan tum la, hetianga i awm reng chuan i thi mai ang... Zonunmawii chauh hmeichhia an awm hleinem, bakah ani chu kan unaunu, kan farnu ania.. Lo let mahse in awmdun thei dawn chuang lo, theihnghilh tum rawh' tia min zilh fo te khan vawi eng zat nge Jeremya khan ka kut thlawn a tawrh pawh ka hre zo zai lo.


Khati chung khan ka beng chhu ngawng luiin, 'alo haw tep tawh ang, eng emaw vangin ala tangkhang hrih mai mai ani ang, 'tiin kei ngei pawhin rin harsa ka tih thu hmang te khan ka chhang let thin anih kha... Khang hun zawng zawng te kha ka tan chuan mangchhia ang mai ani a, mahse mangchhia chu reilo ah kan theihnghilh thina, kha ka nuna mangchhia rawn thleng erawh ka kumkhaw nunpui tur an lo chang zo tawh si anihhi.

______
Jeremya nupui neihni a rawn in herchhuah meuh chuan keini pawh kan nupa in Mamuantei damsam lo chung hruai chuan kan kal ve a. Mamuantei dul alen ve tawh avangin chet zung zung aharsat tawha, ka thiam leh theih ang tawka ngaih sakin a kiangah ka awm deuh chawt hi ani mai.

Chhungkaw thlalak te neiin ka pu pawh wheelchair nen arawn tel ve theia, damsam lo chungin a tu te inneihna rawn hman ve ngei a duh bawk nen damdawiin atangin arawn kal vang vang ani. Boruak a zangin kan hlim tlang a, Jeremya leh anupui Sangtei pawh hmuh an nuamin nupa in hmeh tak zawng an ni ve chiang alawm.


Khawvel in lum let dan hi keia hriatthiam chi ani lo na chu amak ka tiin ka phuloh malsawmna ka dawn nasat zia ka nupui atang pawh hian ka hria a, ka tlai hma a Lal Isua ka lo thlang kha ka nuna risk ka lak fuh ber ani ta anih hi .


"Hei bro, lo kal teh, kha hei hi Nunu i phone no anihhi, neih ahar teh ania, ka pe lovang che ka tia mahse ka pek ngei che hi angai anihhi, in in hmu tawh em? " Tia Jeremyan min rawn hrilh ruk sur sur phah chuan ka kutah lehkha them hi arawn hnawh tat tat a, chhan mai ngaihna ka hrelo. Hetah a awm ve phei chu ka ring chhin eihlo zawk.


"Ka kal angai, hun tha anihhi, be rawh inneihna ah pawh hian arawn kal ve zan zan kha, i rilru ah a awm tih ka hria, mihring chu zankhat thil thu a liam vek thei kan nih hi bro, nangpawh i rilru ti khauh lui lovin Nunu i thil tih hi hriatthiam tum zawk rawh, a tan pawh hian aharsa dawn lutuk ania.. Anih aw nakin ah kan in hmu dawn nia, chanchin ka zawt leh dawn che, be rawh a nih phawt " Ti zui lawng lawngin biakin kawt lamah chuan atlan let a, ka rilru in sual nasa lutuk chu awm ngaihna ka hrelo.


Call ta ila eng nge ka sawi ang, engtin nge ka biak tan ang tih ringawt ngaihtuahin ka tawi kual ka tawi kual hi ani tawp mai. Keiin nupui neiin chhungkua ka din tep tawha, keimah ang hian pasal fanau alo neive reng tawh zawk angem tih te mai mai chu ka ngaihtuah rauh rauhva, call mai pawh chu ka ngam der lo.


Ka tawi khaw muang lui zela, ka zam em em na chhan pawh chu ka hre bawk silo, a tawp atawpah thawk la halhin engmah chán leh tur chuang ka nei tawh lo ti chungin ka call a, biakin tual leh ka sir lam chu ka hawi kual zui nghal thuak thuaka, mahse Zonunmawii hmel awm ang tak ngial pawh hmuh tur a awm lo.

A pickup dawn lo emaw tih hnu ah rawn pickup in biakin sir kawngkhar atanga arawn chhuak zan zan chu hmana ka hriat Zonunmawii ngei kha ala ni danglamna a awm lo reng reng.


A hmel atha a, a tawk lekin a taksa pawh a khal at reuh a, asam sei lutuk lo chu thlah mawl ve leh tawp mahse a inhmeh em em tho si. Chu zawng ai chuan a aw rí mawlh mai chu ani, kum 6 chhung vawi 1 tal hriat ka chak thin kha ania, tunah ka hma ah a tawng lai ngei hmu in ka hria a, ka thaw halh halh ringawt ,"Hello, tunge aw" Ti lang langin min hnungchhawn deuh hian ading a, kanin hlat lutuk lo na chu ka pan mai ngam tlat lo.


Ka ngawih tak reng vang nge call chu off in chumi rual chiah chuan nichina arawn chhuahna kawngkhar atang chuan mipa naupang felfai tawh tak hian "anu anu," Tiin arawn pan a, afapa ani tih hai rual ani lo , mahse chuzawng ai maha min thawng tu zawk chu a fapa dinhmun zawk chuan ani, a ke lamin harsatna a tawk tih rinhlelh rual lovin a ke veilam chu thlirin an cher saka, tiang a nei bawk.


En mai chuan kum 5 bawr vel ni mai tur ani, a natna vang nge ka hrelo a taksa chu a lian lem lova, tarmit a vuah vei lap bawk. A hmel chu ka hmehbel nge, ni turin ka duh vang zawk, in ang ka in ti tlat pek a, a khabe kual hnuai deuhva khuangvang chhinchhiah a neih te chu ka neihna nen ala in ang thlap bawk nen che chang lovin ka thlir reng mai ani.


Chutah anumber ah chuan call lehin ani pawh chuan apickup ve leh maia, mi an vei leh zeuh zeuh thin nen min rawn la hmu lo pawh chu a àwm ve tho. Theih tawpa in sangmarin ka pan hnaia, a fapa chu akuta khaihsakin a biakna chu a chhang let leh thin. Pen nga vel leka ka in hlat chuan thawk la halhin "Lo hawi rawh, Zonunmawi " Ka ti ta ringawta, ka thinphu in sep ri dup dup sa chu Zonunmawii rawn hawi let nen a su ring zualin ka hria.


Anih pawhin ka hmel ahmu thut chu a tawp chawta, "Zodinpui" Ti lawi ratin a hamhaih in mak a ti tih ka hailo, mahse in siam tha vatin min nuih ta ver ver a, chutah nichin zawng zawnga ka lo hmuh hauh lo a dul puar deuh ak leh a kut tanga kawplai neite chhinchiahna zungbun tle ser ser chu chiang em em in ka hmu a,sawifiah thiam siloh hian min khawih dawt ka ti mai.


Ania sin kei ngei pawh nupui neiin ka nupuiin kan fa lo piangtur apai mek tih hre reng chung si hian Zonunmawii ka hmuh leh dan chuan min ti nà thar takzet a, ka zahpuiawm viauin ka hria.


Sawi leh tur a awm tawh lo,in hmelhriat tharna atana kan bul tan that nan nge, a tawp kan khar nan zawk kan in nuih tawn ta ringawt mai ani.


A tawp ta.
Mi zawng zawng thawnthu hi a hrangin hlimna in a tawp vek kher lo. ☺/i]


Show post links
Top