WILD TRUTH BY Un Sammy (Completed)

[Ngaia]

WILD TRUTH
by Sammy




<13>





"Zahna chang hre miah lo. Min zah loh dan kha i hmu em? A fapa nen khan theh chhuah a ni ka duh" ka nu chuan ka pa bulah chuan a ti zui hmarh hmarh a, a thinrim a ni tih chu sawi leh hrilh hranpa kan ngai lo. Kei erawh chu ka țhu ngawi ran a, țah pawh ka țap ring ngam lo. Ka mittui rawn luang chu ka nu hmuh hlau lutuk chuan ka hru leh zauh țhin.





"A duh dan ang khan a fate kha inneih rawh se, monu sual deuh nei rawh se. Kan fanu hi engah nge a ngaih ni ?" tiin min rawn en a, "Țap hlek suh" a rawn ti vin tuar.






"Insum rih teh. Msi tan pawhin a hrilhhaithlak dawn zia ngaihtuah la. Ngawi rih teh" ka pa chuan a lo khap a, haw kawng tluan chuan tumah kan ţawng leh ta lo.






In kan thlen chuan zinglam dar 2 a ri thuak tawh. Innghak Hmangaiha te engmah kan hrilh loh avangin an lo bangbo hle a, ka nu thinrim lah chu a hmelah a la lang nasa ropui si.





Tu amah chu engmah inzawt lo leh inbe lovin kan room lamah ţheuh kan lut nghal diak a, ka room kawngka ka khar rualin ka mittui chu a rawn tla leh ţan.





Remtluanga ka ngaihtuah a, a rilru a na dawn tih ka hria. Tuna ka rilru na leh ka zah ang ai nasa hian a awm dawn tih pawh ka hriat pui. Thil thleng duhawm lo ber a va ni chiang tak.





Chhin khat teh mah chu ka chhing ta miah lova, ka țap bawp si nen ka hmel chu hmuh tlak pawh awm lo. Mazami call in chhungkaw thil a ka haw thut thu ka sawi a, dawr chu a kutah ka dah rih tawp. Remtluanga pawhin vawi eng emaw zat chu min rawn call tawh mah se ka be ngam thlawt lo.






Zing ka thawh chhuah loh vang chuan ka pain min rawn ngaihven a, ka lo la mu bam si chu a thiam ang tawkin min rawn hnem a, ka nu chungah pawh thinrim lo turin leh min ngaihtuah lutuk zawk avang anih thu te a rawn sawi luam a. Tun thil thlengah hian tumah ka dem hauh si lo. Keimah chu a tir ațangin a thiam lo a ni tih ka inhria a, hei hi kan tawrh tur a ni tih hre sain ania hun kha ka hmang. Ka tawrh tur a ni a, ka rin ai hmain a rawn thleng thung anih hi.





Chhunah Ma-i a lo leng a, Remtluangate pawh an rawn haw tawh thu a sawi a. Tunah chuan thudik a hre vek tawh ngei anga, a thu hriat zawng zawng avang chuan hreawm a ti hle dawn bawk. Hnemtu nih ka chak a, mahse beiseina engmah insiam tawn tawh lovin, kan awmdun a rem lo a ni tih Remtluanga tan pawh pawm thiam na hun a ni anga, kawng hran ve ve zawh tur kan ni tih hi a hriatthiam phah ngei ang.





"Inthiamlo lutuk suh. Kan duhdan ang vek hian thil hi a thleng țhin lo ania" tiin min hnem mawlh mawlh a, mahse keimah ka inngaihtuah ai chuan Remtluanga ka ngaihtuahna chu a na zawk daih.






Ma-i a haw hnuah chuan intifaiin ka room ka chhuahsan ve a, ka nu leh ka pa an lo awm lo.






Ka vahte ho chuan kan thlen ațangin min la hmu hek lo, boruak kan tawn mek chu hrethiam pha lek loin min lo lawm chuk chuk a, ka room ațanga ka chhuak te chu mak an tih thu te an han sawi a, za lo deuh chuan ka nui lui ve zel mai.






Hmangaihan a fate chu a nu bulah a hnawk bo ta duak a, ka thaw hak. "Chaw te saw va ei rawh" Hmangaihan a tih chuan ka nu leh pa awmna ka zawt a, Patea te in lamah an kal thu a sawi.






Nuteiin Remtluangate inneih tir chu a la duh tho thu a sawi a. Nutei chuan hetiang boruak karah pawh a rilru chu a thlak lo ka ti dawn nge kei min huat lutuk vang zawk ka ti dawn ni. Ni e, tu nu pawh nise an lawmin ka ring lo.





"Inneih se la, engkim a fel vek a ni mai lawm" thawk chhuah hawk pah chuan ka ti a, "Remtluangan a duh lo a, inneih ngawt theih a ni hleinem..." tiin Hmangaiha chuan min en vang vang a, "Enge in ngaihtuah hi ka hre chak. A puitling zawk i ni a....." a tih chuan, "Engmah sawi suh" tiin ka tho a, ka room-ah bawk ka let leh. Thil ei tur pawh phurna chhete mah ka nei lo.






Ka phone ka en a, Remtluanga call leh message te chu a tam lutuk ringawt teh. Ka phone chu off ta tawpin ka thaw hak a. Ka mittui chu a rawn luang leh tawh.






Ka lo hmangaih viau hman a ni ang. Heti taka ka nat hi ka inring miah lo. Amah be ngam lo khawpin ka inthiamlo ania. Hlim turin ka duhpui a, a nu leh pa thu ang pawh chuan kei min ngaihsak lovin nupui te pawh chu nei se ka duh. Mahse..... chutiang ni thei tur chuan ka ngai ngam bik si lo. Ka ţap leh tawp a, thawk lak leh hawk chuan min hnem ber.





Ka nute rawn haw chuan ka nu chu a țawng leh lang lang tawh a. "Hre rawh u, saw in a mihring hnaisai lo a awm ve chhung saw chuan chhungkhat ang pawhin en tawh suh ang che u. A fapa sawn sualna a nei lo em ni? Engvangin nge ka fanu ringawt hi a dem a ?" tiin a ang tawn tawn a.






"A fa mo atan a iai khanglang anih chu! Nula lem lutuk raipuar lem chang nen khan a fapa chu innei se an inhmeh tawk chiah" a ti hmuar hmuar bawk a, midang țawng thawm chu hriat tur awm ve hauh lo.






"Kan fanu hi keh thei dawm a kan dawm ve tho a ni asin. Kan neihchhun ve tho. A duh duh a a țawngkam chhe tleuh nana a hman tur a ni hleinem" ka nu chuan dam deuh zawkin a rawn ti țuau a. "He ti khawpa a hmusit turin engmah tihsual a nei lova. A hringtunu rilru hi a na ve thei asin...." a ti a, a țap tih chu ka hai lo. Nutei chuan engtiang takin nge min sawi ang ka ngaihtuah thiam lova, mahse ka nu ang nu azawnga paukhauh ber mai a țah theih hial chuan a na thawkhat ang.






Ka nu tan chuan fanu neihchhun ka ni a, engtiang pawhin awm ila a rangkachak ang ka nih miau avangin tu emaw in a min sawichhe bawih bawih anih chuan ka nu rilru chu na tur a ni reng a ni.






Thla chanve dawn a liam tawh a, thil chu pangngai tak angin lang mah se engmah chu a pangngai mawlh lo. Tumah ka be ngai lova, ka phone phei chu hmang țangkai lo tak ka ni. Ka mu ngai meuh lo a, chaw lah nise a hming ang tak takin ka ei a, ka cher sawtin ka dang bawk a, hmuh ka nuam fahran tawh lo.






Remtluanga nitin a rawn lang a, ka nuin țawngkam na tak takin a hnar haw ziah țhin. Inneih chu an kaltlang pui dawn tih ka hria a, chu pawh karkhat vel bakin a dang tawh lo.





Țha takin inneih se, kei chu min theihngilh se la, a hun chu nuam leh hlim taka hmang reng turin ka duhpui a, kei nen chuan a rem dawn lo tih ka pawm thlap a, hunin min tih dam veleh beiseiin kei chu ka la thaw ve țawk țawk a ni ber.






Vawikhat chu choka a ka awm laiin Remtluanga chu a rawn kal a, ka nu nena an inhnial te chu ka en reng. A hmelțhat ngaiin a țha reng a, mahse a tla ve deuhin ka hria.






"Vawikhat chiah mun min hmuh tir rawh nupui" tiin Remtluanga chuan a dil a, ka nu lah chuan, "Engmah tih dun tur in nei lo" a ti hmak mai zel a. Ka en reng lai chuan Remtluanga chuan min rawn hmu a, "Ms... Ms..." min ko chul chungin rawn luh a tum a. A rawn pen lut hman tawh ka nu chuan a rawn pawt bet a, ka room lamah kei ka tlan lut nghal.





"A hmu duh lo che tih i chiang tawh em ?" ka nu chuan chhuak tur chuan a ti leh a. Remtluanga chu a kal mai duh der lo, "Ms ka beidawng dawn lo ania. I rilru kha heng mihring ho avang hian lo thlak hlek suh ang che...." a rawn uar tuar tuar.






"Haw vat rawh, i nu rapthlak lutuk khan min rawn ankhum hma in" tiin a nam chhuak niin ka hria, chiang mang lova Remtluangan, "Ms min hmangaih tih ka hria ania. Min nghak la, ka hmangaih che tih hi i hre reng dawn nia" a rawn ti chu ka hria a, ka âwm chu ka dawm chawt.






Eng huaisenna zozai nge a neih ka hre bik lo, amah ka hmuh vang ringawt khan ka thin a phu nasa a. Engtin nge huai takin ka nu hmaah khan min hmangaih thu a sawi theih zawk ni? Nupui nei mai tawh tur a ni a. Aarhh..... ka mittui rawn parawl chu duh lo zetin ka khap per sak sak.

.
.
.
.

Kar pawh a liam leh hmain Remtluanga te inneih ni chu a ni der. Ka chhungte dang chu inneihna lama kal turin an inbuatsaih vek. Ka kal dawn leh dawn lohah ka rilru a insual buai nasa lutuk. A ni pawimawh berah chuan tel ve ka duh a, mahse ka hmu thei angem? Ka intimualpho mai lo ang maw tih chu ka ngaihtuah ber a ni.






Ka phone ka on tak loh vang vang chu ka on a, a rawn en hma hmain hriat hreawm zawk khawpin message tawn chu a rawn ri dawt zut. Ka thaw hak a, kan tawp hlen dawn tih a chian takah chuan a message en ve hrim hrim te chu ka phu alawm!





Ka han nghak deuh a, Remtluanga message chu 200+ in a lo awm vang mai.





Ka chhiar thla dan dan a, thil thlen thut dan mak a tih thu te, a rilru a nat thu leh min ngaihtuah thu te a rawn sawi nawk a. A changin a rawn beidawng a, a changin min hmangaih thu leh min ngaih thu a rawn sawi bawk a. A thlalak te min rawn thawnin a hun hman dan zawng zawng chu he phone hmai tereuhte kaltlang hian min rawn hriattir a tum viau țhin.






Chutia ka en mek lai chuan a rawn online a, a message a rawn lut a. Mahse chuti chung pawh chuan ka lo la en duh lo lui a. Ka out nghal hmak. Tunge bum ka tum a, chutiang taka Remtluangan ka la ngaihven a ni tih a hriat ka duh loh chhan pawh chu ka hre lo.





Nakin deuhah chuan ka en leh a, a online tawh lo. A message chu ka en a, "Ms min dem lutuk suh aw. Min hmangaihna kha ka ringhlel ngai lova, mahse ka hmangaihna che ang hian a nasa ve lo a ni ang. Huaisenna pek belh thei lo khawp che kei min hmangaihna kha chu lo theihngilh daih rawh. Mahse ka lawm e" tih hi a lo ni a. Ka phone chu ka dah a, ka mittui rawn luang tur chu ka dang hram hram nain a rawn luang tho.





Ka va nep tak! Tun ka dinhmun aia chhia hian ka thleng leh thei tawh lo ang! Ni e, amah angin ka huaisen ve tawk lo a, mahse ka hmangaih asin. A dik leh dik lo pawh thliar thiam lo khawpin ka lo hlimpui ve viau țhin kha a ni a. Kan inkarah chuan inhmangaih tawn ringawt kha a lo tawk lo ania nge.





"Tinge i lo țah leh tak !?" Ma-in a rawn ti lut a, ka bula rawn țhuin ka darah a rawn kuah a.





"Bang rawh bang rawh, vawiin ang hlimniah" tiin a thiam dan dan chuan min han hnem a. Inneihnaa ka kal ngei ngei angaih thu a sawi deuh deuh.






"I kal ngei ngei angai Ms. Helai room tereuhte a i awm chhung chuan engtikahmah hma i sawn dawn lo" tiin ka thawmhnaw hak tur te chu a en sawk sawk a, engmah tih chu ka tum chuang lo. Inneihna lama va lan kher chu a țulna ka hre lo a, nuteiin țawngkam na tak tak a min țawngkhum ka hre duh lo.






"Va kal ila, buaina thlen ta si ila" Ma-in min chei mawlh mawlh laia ka tih chuan, "Buaina thlentu i ni hleinem. A hmun kan thlen phawt angai" a ti zui leh hmak.






Ka mit khur duk kual raih chu makeup hmang pawh chuan a lang mawi zo meuh lo. Ka kal țawk țawk a, thatho lo zetin kan chhungte chuan min chhuah pui ve ta tho.






Biakin a an inneih theih loh avangin hall pangngai a hmang kha a ni a, kan thlen chuan mi an tam tawh ngang mai a, kei chu ka chhungte min kaih kual ang ang chuan ka awm mawp mawp. Mi min biakna te chu ka chhang mumal lova, ka nu chuan engkimah min veng a ni tawp.





A chhung kan luh ve hnu rei loah țan a ni a, Remtluanga pawh ka hmu ta hram. A suit hak chu a inhmeh hle a, inngaihtuah muk hmel zetin a ding a, min rawn hmu ve lem lo thung.






Tluang takin a kal a, ka hlim nge ka rilru a na pawh ka hre lo. Remtluanga leh Alice-i chu ka en ngawt ngawt.





Pastor in, "A rem lohna hria kan awm em ?" a tih chuan a reh țhiap a, din chhuah mai chu ka chak zek zek. Mahse..... buaina thlentu nih ka duh lo. Remtluanga pawhin a duh taka a neih a ni a, hlim takin awm mawlh rawh se.






Tumah an rawn țawng chhuah lo vang chuan Pastor chuan nupa an nih thu chu a puang dawn ta. Thawk ka lo la hawk a, mahse Patea chu a rawn ding chhuak ta nawlh mai.






Kan en țhap a, patea chuan Remtluanga en kal chungin, "He inneihna hi a rem lo" a rawn ti nghet churh.







☆Mimal hasatna vangin ka rawn chawl vang vang a, harsatna pawh rawn sawi thei lo in ka awm lehzel a, in hriatthiamna sang berin min lo hrethiam mawlh mawlh ru aw


Show post links
Top

[Ngaia]

WILD TRUTH
by Sammy





<14>







A reh duk a, hall chhung a awm zawng zawng chu an hrilhhai tlang hle tih an in en kual hlawm avang chuan a hriat hle bawk.




Nutei chuan patea chu pawh țhut a tum ngar ngar a, mahse patea chuan nutei kut chu phih thla hmawkin a sawi zawm a, "He inneihna hi a tir ațangin ka pawm ngai lo hrim hrim a, ka nupui leh hmeichhe lam te, min rawn ve eih lovin in duhdanin in kal mawp mawp a, tunah chuan ka duhdanin kan kal ve tawh ang" a ti a, a thusawi chu a nghet churh a, nek luih chi a ni lo tih a chiang bawk.





"Ka fapa hi a hmangaih miah lo nen inkhata cheng dun turin ka nawr liam dawn hlek lo a. Nangni pawhin in fanu hi ka duh loh zia leh kan fapa pawhin a tir ațangin a duh lo zia in hria a, in fanu amah hmangaih miah lotu hnena tirh liam in tum tlat hi ka hrethiam thei lo" Alice-i chhungte lam hawi chuan a ti leh fak fak a, Alice-i chu ni ila ka va han zak dawn tak.






Patea chu la țawng zelin, "Inneih lawmpuia min rawn telpui zawng zawngte inchungah ngaihdam ka dil a, mahse vawiinah hian he inneihna hi a thleng lo anga. Engtikahmah a thleng lo ang" a ti a, amah chu a chhuak zui daih bawk.






A ri nghal mer mer a, tupawh chuan chutiang a thil a thlen chu kan beisei lo tlang hle a, kei tak phei chu ka hawihai ang rang hle.





Thil chu a țha lo zel zawk dawn tih ka hrethiam nghal vek. Țha takin inneih se a fel vek nimai tur ania. Chhungkua thlengin kan buai leh anga, kan thil tih hian pawi tawp a nei dawn lo zawk em ni?





Remtluanga min rawn en ngurna ka hmuh chuan ka țhuthmun ațang chuan ka tho chhuak a, ka pa bulah chuan haw ka duh tawh thu sawiin ka chhuak zui ve zat. A mitmeng khan thil țha lo a ti leh duh mai dawn tih min hrilh chiang lutuk a, inthiarfihlim vat chu ka tan a țha ber.





Mi zawng zawng zik huai huai na karah chuan ka nu leh pa leh Ma-i te nen kan haw ta daih a. Ka nu leh Ma-i chuan an ngaihdan chu an sawi dun vel a, ka nu chuan Remtluanga rawn pian dan vel chu a sawi chhuak. Kei erawh thlamuang pawhin ka țhu thei lo, kan hnungah hian Remtluanga a rawn tlan ve char char tih ka hmu miau a, kan in thleng pawhin ni ila ani hi chuan tumah rawn zah leh ih vak kha a nei dawn der si lo.





In kan thlen chuan hmanhmawh lutukin car ațangin ka chhuak a, inchhungah chuan a tlanin ka tlan lut a ni ber. Mahse room ka luh hma hma in Remtluangan min rawn man hman tho a, ka nuin Remtluanga pawh chu a rawn au zui țhat țhat a. Min tibuai lo tur a hrilhin haw nghal tur chuan a han vin chiam tak na a, ka nu thusawi ngai pawimawh lo zet chuan ka room lamah min nawr nawk nawk a, a kalh nghal hmak bawk.






"An pahnih khan awm rih rawh se...." ka chuan a ti a, ka nu chu rum nghut chu ka hre thei.






Remtluanga lah chuan min en kar a, min ti zam chhe lutuk chu a ngeiawm zawk. .






"Enge i duh ?" ka tih chuan min chhang lovin min la en run a, "Remtluang thil a pawi leh tak tak hmain haw rawh" ka ti a, a rawn nui.






"Eng pawi nge thleng leh tur awm tawh chuang a ?" a rawn ti let sak mai.






"Nupui i neih loh avang hian kan inkar hi a danglam phah dawn hlek lo. Unau kan ni a...." ka tih lai chuan, "Kan ni lo" vin fahranin a rawn ti a, vawikhatmah min la vin ngai lova, min han vin hrawk chu kimki chawihin ka mit ka khap fak fak mai.






"Kei chuan unau ang lo chuan ka hre reng tawh lo che. Nangpawhin chutiang chu tum ve rawh" ka tih chuan, "Ka tum ve alawm. Mahse ka hmangaih che ka tih khan ka sawi mai mai si lova, a theih loh anih hi. Unau kan ni lo tih ka hriat ațang ngat phei kha chuan bansan che hi ka tum ikhaw lo" a ti nghet churh a, min va han ti beidawng tak.





"Remtluang eng pawh sawi la kan inkar hi chu a danglam dawn lo. Ka hmangaih tawh lo che, kan kal hran hi kan pahnih tana ţha ber tur a ni" a mit taka en chung chuan ka ti a, mahse kan mihring luhlul lutuk hian maw, "I thusawi engmah hi ka ngaihthla dawn tawh lo. Ka duhdanin ka kal anga, a țul leh ka ru bo mai ang che. Ka sawi tawh kha, kei lo chuan an nei dawn lo che" a ti leh hmak.






"Remtluang..." ka han ti leh ngawt a, sawi mai tur pawh ka hre tawh lo. Ka thaw hak a, "Haw phawt teh" tia nawr chhuah ka tum chu min rawn kuah bet a, "Ka ngaih zia che hi i hria em ?" tiin ka biangah te chuan a fawp mawlh mawlh a, a tih ngaihna pawh ka hre lo.






"Min lo nghak tawp la, min ring rawh aw" tiin ka darah a vuan a, țawng tuma ka ang zuau chu min rawn țawng khalhin, "Ka hria min hmangaih" ring fahranin a ti a, ka nuin a hriat ka hlau lutuk chu țawng ring lo tur chuan ka ti vat. Chutia ka tih veleh lah chuan, "Ms ka hmangaih lutuk che ania. Ka neih che an phal dawn lo anih chuan ka ru bo dawn che" a ti lang lang a, sitting room lam ațangin ka nuin, "Lalremtluang!" a rawn ti țhat reng bawk.






Min han kuah leh vang vang a, " Boruak hi zia deuh se kan inneih dawn nia" a rawn ti leh mauh a, "I ngaihsam dan ang ngawtin thil hi a kal țhin lo ania" ka ti a.
"Ka hria alawm. Mahse kan beisei tlat chuan kan beisei angin a thleng ve ţhin bawk" a rawn ti leh. Chhan dan tur pawh ka hre tawh lo.
.
.
.
.

Thil chu a nihdan tur angin a rawn ni zung zung ka ti mai. Remtluangan min veh reng nen ka awmdan hi a lai hu a, ka nu hmaizah a na țhin khawp mai. Remtluanga lahin zah vak a nei si lova, achang chuan hreawm ka ti țhin. Ka nu leh nutei vang hrim hrim pawhin ahma anga awm leh kha ka tum tawh lo a, Aizawl lamah pawh in luah tur ka zawng ru leh deuh a, ka nu erawh chuan awm hran rem a ti tawh lo khawp lehnghal a.





Dawr tur pawh min hmuh sak tawh thu leh dawr pawh siam tawh lo law law a pasal neih lam awn turin min ti a, kan boruak tawn zawh chiah nen, Remtluangan min bansan a tum si lova, kei aiin ka chhungte an beidawng tawh zawk. Mahse, ka nuin Dinfela nei mai tura min ti erawh ka duh lo hul hual. Amah Dinfela lah chu a duty loh zana rawn len zeuh zeuh a rawn ching tawh lehnghal a, amah vang hrim hrim pawh hian Aizawl lama awm leh daih chu ka duh.






Ka taksain ngai a la awh thei meuh lova, chaw lah ni se ka la ei thei lo tluang zel a, zan lah ka mu thei lo zel bawk. Chhunah ka muhil thei mang bawk si lova, zan mut theih loh chu chaw ei theih loh ai pawhin a hreawm zawk.





Ka hun hman dan pawh a ho țhin viau a, ka vahte nena infiam zeuh zeuh chu a ni ber. Ka nu hian ka thil ei thei lo leh ka zan mu thei lo hi min han hau ringawt zel a, inhauh a zan mut theih phah dawn chu ila ka mutui ve khawp ang ka ring.






Zan dang ang bawkin Dinfela a rawn leng hma leh viau a, mahse țhian a rawn nei tel tlat.





Dinfela chu a rul tawk te tein ka chhang a, mahse a țhian rawn hruai nen kan inhmu chiang chu kan phu zawk ve ve niin ka hria.






"Hetah enge i tih ?" min han ti he hu daih a, "Kan in alawm" ka lo ti ve vat. "Hei hi in in maw ?" tiin at hmel lutukin a hawi kual a, "In inhria em ni ?" Dinfelan a tih chuan, "Hei hi mi i sawi ţhin hmeichhia kha ?" Isaac-a chuan a zawt leh ta hleuh a, ka lo ner sak. Ka chungchang midang bulah lo sawi vel țhin nih chu!





"Aw ni e" Dinfelan a tih chuan, "A va mak ve! Khawvel hi a lo zim anih hi tiraw Ms ?" tiin a nui keh hui. A chanchin te ka zawt a, ka haw ațang khan kan la inbe leh miah lo anih kha. Dinfela nu hi a ni anih thu leh Christmas leh kumthar hmang tura a rawn zin thu a sawi a, ka lo lawm phian.






Isaac-a leh Dinfela chu cousin an lo ni a, Isaac-a nen chuan inkawm sa kan ni bawk nen kan inbiak loh chhung a a awm dan leh Christmas hman a tum dan te a sawi vel luam a, ka nuih pui leh hak hak țhin. Isaac-a nen kan han inkawm leh meuh chuan thil zawng zawng ka theihngilh duak duak mai ni.






An haw hnu rei loah ka nu te thingpui lum sak lehin ka room-ah ka lut ta daih a, ka phone room a ka dah daih chu ka en a, Remtluanga message a lo awm vang a, a call pawh. Mahse a message ho ai chuan Isaac-a message lo awm chu ka en a, "Ms naktukah ka rawn leng ang, thil hmuh tir tur che ka nei" a rawn ti.






"Aw lee" tiin ka reply a, ka send chiah tiin Remtluanga message a rawn lut a, "Ka message pawh seen hmasa lovin tunge i biak a ?" a rawn ti a, a țawngka ang zawng chuan sawi dawn se a rum leh viau ngei ang.






"Ka duh duh be turin zalenna ka nei" tiin ka reply ve ngat a, ka kham lutuk. Heti reng chuan nuteiin a thinrim hritthlak nan min hmang lo ang tih pawh sawi theih loh.






"Ka nula i ni tih chu i inhre chiang viau ang chu" Remtluangan a rawn tih chuan min ti thinrim lutuk. Reply pawh reply lovin ka out ta daih a, a message a rawn thleng zawm leh nghal zat a. WhatsApp-ah chuan lutin Remtluanga chu ka block ta daih. Khatia min ti kher kha ka haw lutuk ringawt.





Reiloah chuan a rawn call ta vat reng a, mahse ka la lo chiang khawp mai. Ka la lo chung pawha a rawn call nawn sek avang chuan ka phone chu ka off ta hmak.






Muthilh tum lutuk a ka mit ka chhin laiin Hmangaihan min rawn ko a, ka room kawngkaah chuan a rawn dak.





"Rawn be lawk teh" tiin a phone a rawn lek lang, Remtluanga a ni tih ka hre nghal a. "Ka be peih lo" tiin ka inlet thak.






Hmangaiha chu a kal mai a, mahse leh ahnu rei loah ka pa a rawn kal veleh. Remtluanga em em hian chintawk a hre thlawt lo.





Ka call let mai tur thu sawiin ka pa chu mu turin ka ti a, ka pa ka thlah thlap hnuah Remtluanga chu ka call.






"I rawn chhuah loh chuan ahma pawhin i hriat kha" a rawn ti leh nghal tawng. Ka thaw hak a, "Zan a rei tawh ka chhuak thei lo" ka tih chuan, "Anih chuan ka rawn lut thung anga nimai" a ti hniam sut. A sawi angin a rawn awm leh ngei dawn tih ka hriat chian em avang chuan inthuam lum belh sawt sawtin ka chhuak ta nge nge.


Show post links
Top

[Ngaia]

WILD TRUTH
by Sammy




<15>






A bike nghengin a lo ding vang a, uluk deuhin min lo thlek. A vawh tehreng nen ani chu sweater long neck leh leather jacket chauh a ha a, vawt a tih hmel chuang miah lo.





A bul ka va thlen rual rual deuhthawin min lo kuah nghal chawt a, "Vawt i ti em ?" awiawmloh zawk khawpa dam dap chuan a ti a, ka melh raw raw.






"Ngaihawm deuhin i awm a, i induh thiam leh reuh bawk si" tiin a hnar chuan ka hnar a rawn nul a, duh lo zetin ka lo awm san.





"Sawi tur i neih chuan sawi vat vat rawh, ka mu duh tawh ania" ka ti a, hetianga min thlahlel leh min duh tak a a awm vel leh a ngaihzawng anga min treat luih tlat avang hian han khauh țung pawh hi a ti har țhin.






"Zanin chu ka rawn riak ve mai dawn em ni ka ti a" thawk deuh ham ham pah chuan a ti a, a hmanhmawh lo hmel mai bawk sia maw.





"A pawimawh loh chuan ka lut dawn ania" ka ti leh a, a thle bak. "Min koh chhuah fo hi sim ang che, tleirawl ngaihzawng nei thar ang maia hetia ko chhuah ko chhuah rual pawh ka ni tawh lo" ka ti leh nghat a, "Hmm...nula a bialpain a rim ang hian rawn len i phal tihna mi ?" ka sawi dan ni lo zawng chuan a la daih a, ka melh rawm rawm.






"Khatiang zawngin ka sawi lo tih i hre chiang lutuk. Ngaihzawng dangte nei la, țha deuhin i hun hmang rawh. Nakin lawka vahte awm a pitar nimai tur hi min hel min hel suh" ka ti ta tawl tawl mai. Hnawl dan tur hi ka hre tawh thlawt lo alawm. A luhlul si a, ka thusawi ve te phei hi chu thosi seh ai pawn a ngai ho zawk tih a hmelah a hriat reng.






"Helai pitar hian khaw vawt a ngaina vak si lova...." tiin ka kawr hnung a rawn zen a, a kut vawt rapthlak lutuk a ka nak nem a rawn deh chho chuan ka ip chawih a, "Dah chhuak vat teh, a vawt lutuk" tia dah chhuah sak ka tum lah chu min lo kuah ngheh nan remchangah a la hmak.







"Remtluang...." ti vakin a vawt lutuk chu ka mur vek thei.






Ka inrin hmain ka hmuiah a rawn fawp leh a, "I bengcheng lutuk" a inlakhran rualin min ti zawk daih lehnghal.





"Remtluang... a hreawm ania...." ka ti leh a, ka thusawi lah chu a ngai pawimawh lo si, "I ke a kham em ni ?" tiin ka kawngah a chelh a, mit khap kar lekin a bike ah min hlang fel der. Amah chu ding rem sawt sawtin ka bawp pahnih chu a kawngah min kherh tir a, ka kut lain a nghawngah min kuah tir leh thlap.






"Helaia awm mai mai hi a ho lutuk. Nangpawh haw la mu lum zawk rawh" tiin ka kut a vawn chu ka la sawn a, min en leh run tawh.






"Dinfela a rawn len tam avang hian ka lakah danglam tum hauh suh aw. Tun ai hian ka luhlulin ka sual thei ania" a ti khur khur.






"Lalremtluang!" ka ti vak a, "Ka bansan dawn loh thu che ka sawi tawh kha. Sawtiang vairam return avang mai mai chuan i rilru hi thlak tum hlek suh. Nge ni a i rilru i lo pe tawh zawk ?" mit ti zim san a min en chuan ka haw lutuk, "Nang ang ka ni lo aw" tiin ka nam sawn a, a bike ațanga chhuk ka tum a phal si lo nen chuan kan ti inchai buai ti tih.





"Awm țha rawh!" a ti vin hrawk a, "Min vin suh Hmela!" thinrim lutuka tiin a hmaiah chuan ka beng. A duh duh dana min ti kual a tum țhin hi ka hne.




A rawn nui a, "Helai pitar hian vin pawh a ngaina lo anih hi a" tiin a awmah chuan min kuah bei lui a, "Che che suh, bike kha a tluk chuan i na dawn ania" a rawn tih nghut taka chuan ka awm ve ta hle hle a, ka țawng erawhin bike a ti che tam lo bawk a, inchhung ka luh duh thu ka sawi leh zat zat. "Min ngai ve deuh teh Ms !" lawm lo zet chuan a ti hluk.





Kan thawm chu a ring deuh nge kan kawngkhar chu a rawn inhawng a, ka pa chu a rawn ding luau. Mahse kan awmna a thim deuh bakah a hlat avangin min rawn hmu thei lo niin ka hria.






Ka pa a luh leh rual chuan ka tal hrang thei ta hram a, "Nangmah vanga ka lut thei lo anih chuan....." ti kha kharin ka kalsan.





Kawngkharah ka beng zawhin inchhung lam thawm chu ka ngaithla a, a reh țhap. Kawngkhar chu ka han hawng dawn a, a inkalh miah lo. Ka lut a, kalh țhain ka room-ah ka lut tlang vat. Dar zat ka en a, dar 11 a ri țep tawh. Inphel thawlin khumah chuan ka lawn kai sawt sawt a, ka delh lum lai zawng zawng a lo vawt zo vek tawh a, a vawt țha var var khawp mai.






Zan dang ang lo takin ka mutui ve phian a, zingah pawh ka tho har khawp mai. Remtluanga chhunah a rawn kal a, a zin tur thu rawn sawi.





"I duh duh naah kal la min rawn hrilh kher ka ngai lo" ka lo tih san hmak hmak a, "Ms ka rawn haw leh hunah chuan țha deuhin awm tawh ang aw" a ti leh lah chuan, "Kan awm lo ami" ka lo ti mai si. A thaw hawk a, "Imm nia, ka sawi tawh kha. Vairam return-a lakah khan lo nem lo la" tiin ka biangah a rawn fawp a, "Ka zin rei vak lo ang. Thil țha deuh ka rawn hawn dawn che nia" țha taka min thlahin a chhuak zui.






A chhuak chu ka thlir zui a, heti khawp hian a beidawn theih nan ka ngaihsak lo chung pawhin a luhlul a chhuah lui ve tlat ania. Hahthlak zawk hian.





Isaac-a chu a rawn leng ta ngei a, fb group pakhatah Remtluanga nena kan thlalak a hmuh thu a sawi a, a screenshot sa chu min hmuh.





Thlalakah chuan Remtluanga nen kan lang ngei a, mahse ka khum ngei a kan muhil lai a ni. A thalak ațang chuan room kawngka zawn vel ațanga lak tih a chiang a, ka khum chu a pumin a lang a kan hmel chu a chiang ngang bawk.





Hetiang hian vawikhatmah thla kan la lo a, tiang thlalak hi kan nei a ni tih pawh ka hre ngai lo. Thlalak post tu chu mipa a ni a, a caption-ah, "Khawvel chhiat tawh zia hi, unau pawhin unau ka ni an ti tawh lo ania" tiin luak lem emoji a dah tel bawk a, ka sa phat phat mai.






Isaac-a chu ka en a, "Tiang hian thla kan la lo" tiin ka insawifiah nghal" tunah hian Remtluanga nena kan chanchin hre tu tak tak awm lovin sawi zui nawk an awm dawn tih ka chiang. Tunlai social media chak tawh lutukah hian thu dik hre ber nih tumin min hre ngai miah lotu leh kan hriat ngai miah loin a phone hnai kutphah tiat kaltlangin țawngkam tinreng hmangin min chhilh dawn tih ka hria.






Milar tam tak an chanchin chhe lai an sawi luai luai a, hmeichhe aiin mipa ten mi sawisel nuam an ti zawk a! Chutiang mipa ho titi ti tam turin engtin nge hetiang thlalak hi a awm theih? Keimahni kan ni tih lah chu hairual a ni bawk si lo. Aizawl kan awm lai khan khum khatah chuan kan mu dun țhin ngei a, mahse...... Amak a ni! Tui taka kan mu lai chu tu lak nge ni ang?






Isaac-a chu ka en a, ka van zak tak! Ka mualpho hle tih ka inhria. Ka zah thar ru deuh riau nghal. Kan ni lo pawh ka ti ngam lo, "Hetiangin thla kan la lo" tih bak sawi ngam ka nei lo.





Ka zak ngawih ngawih. Ka thin a rim tel bawl si, a ti tu hi ka hre chak zek zek mai. Ahma khan ka zakin mualpho tawk kha ka inti a ni a. Kha chu nep te hi a lo ni. Ka chhungten hre ve ta se engtin nge an ngaih ang? Awm ve loh vang vang chu ka va chak tak em.






Isaac-a chuan min hrethiam tak leh min hnem pah deuhin, "Hreawm ti duh suh. Tunlaiah chuan mi chanchin sawi hi eizawn nan an hmang emaw tih turin mi chhiatna lai hlir alawm an lawr țhin ni. A mipa pa hi țawngthei an ni lehnghal a" a ti ve bawk a, mahse ka zah lo phah chuang lo.






"A post tu hi ka'n en ange...." tiin a phone a sik nghal melh melh a, kei chu ka sa tut tut. Zahna leh thinrimna nen, ka chhungte hriat hlauhna leh, Remtluangan a hriat hunah engtin nge a awm ang tih ngaihtuahna nen ka buai vek.





"A post tu tak tak chu hmeichhia anih hi..." tiin reiloah a phone chu min rawn en tir leh a, hmeichhe pakhat profile a lo awm sa vung.






A thlalak ho chu ka en a, ka hmuh tawh hnu ang ka ti lutuk. Mahse ka ngaihtuah ngial pawn ka hrehhuak zo lo.






"I hre ngai em ?" Isaac-an a tih chuan, "Ka hriat hnu chu a ang" ka lo ti a, mahse a thlalak ka en zel a, Remtluanga nena an thalak ka zuk hmuh fuh takah chuan ka hrechhuak ta uar uar mai.


Show post links
Top

[Ngaia]

WILD TRUTH
by Sammy




<16>







Ahma chuan Remtluanga hian tleirawl ngaihzawn hi a nei ve ţhin a, amah aia upa daih mahse kei aia nau deuh si a ni. Aizawl a rawn awm tirh khan a ngaizawng nasa thei hle a, kumkhat vel kha chu a vei bur a ni tawp. A ngaihzawn nu erawh chuan nau en bakin a en lem lova, chutia duh let lo na na na chu a rei telh telh a, Remtluanga chuan a theihngilh zawm ve mai a ni ang. Hriat pawh ka lo hrechhuak tawh ngai lo zawk a, tunah engvangin nge hetiangah a rawn chet thut? Mi mualphona thlen zawng lehnghalin!





"Ka hria" ka han ti tawng a, "Tunge ?" Isaac-a chuan a lo ti vat. "Remtluangan a tlangval tak tak hmaa a ngaihzawn țhin anih hi" ka ti a, thlalak chu ka melh vang vang. Remtluanga chu a lai deuh nu hian a hriat a, a sam, a thawmhnaw hak leh a hmel awmdan zawng zawng, a picture quality ațang pawh chuan a rei ve tawh a ni tih chu a hriat lutuk.





"Engtin nge i awm ?" Isaac-an a tih chuan, "Maw?" ti hlawlin amah chu ka en ha a, "Aa... hei hetiang hian thil hi a kal nuai sia. Ka lo rin ruk dan kha chuan a ruktein in pahniha inneihna in kalpuiah ka lo ngai a" a ti reuh a, ka nui hak.




"Chutiang a lo ngaihtuah ngawt a! Chulam ai chuan tinge hetiang hian a post le...?" ti vawng vawngin thlalak chu ka en leh a, "Kan delete tir dawn em ni ?" Isaac-an a tih chuan, "Amah hian delete pawh nise hmu an tam bakah post chhawng leh an tam tawh ang" ka ti zuai raih a, bei hi a va han dawng tak.




"A ni ve tho. Mahse engmah sawi lo la, an sawi rei peih lo ang. Lo hnial kalhtu an awm chiah hian thil hi a pun lun zel a" a ti ve bawk a, ka thaw hak mai.





Ka chhungte hian he thil hi hre lo hulhual se ka duh, an zah dan tur hi ka ngaihtuah ngam lo. Chutakarah an zahna thlentu kei ka ni bawk ania. Ka nu leh pa tan hian ka va han chhuanawm loh tak!





Kar a liam a, beisei ang chuan engmah a thleng lo zel. Kan chungchang chu a darh zel a, Remtluanga nen kan thlalak chu pakhat mai ni lo, sawm chuang a darh tawh. Khawi ațanga an neih zozai nge ka hre lova, a țhen phei chu rilru dang kan put hma ka hna kal tur min thlah lai vel te a ni. Chutiangah chuan ka chhungte pawhin an hre lo thei ta lo. Mahse min hau lova, țawngkam khat pawh hi ka tana ngaihthlak hreawm tur leh ka awm nawm loh phahna tur khawpa sawi an nei lo. Chuti a hnekin min ngaihtuah em em a, engmah thleng lo ang hmakin an awm zawk a, chu tak chuan hreawm min tih zual tirin ka inthiamlo ngawih ngawih.





Remtluanga rawn haw lah chuan ka pa hnenah inneih a dil leh ngawt a, thawk avan ipik țhin tak!





Chhungkuain kan han țhu khawm a, puitling ho chuan Remtluanga nen chuan min hau mawlh mawlh a, hawi pawh ka hawi chhuak ngam lo.





"Hei aia pawi zawk a thlen hmain Ms-i zawk hian pasal nei mai rawh se. Dinfelan palai rawn tirh pawh a pawi ti lova, hetiang dinhmunah chuan pasal nei la a țha ber ang" ka pa chuan a rawn ti a, sawi tur pawh ka hre lo. Ka pa chu ka en a, pasal neih kher chu ka duh lo sin.




"Enge hei aia chhe zawk chu? A chhe ber kan thleng tawh anih hi. Pakhat zawk zawk kan thih hi in duh kher tihna em ni ?" Remtluangan a tih chuan Patean a lo khap vat.





"Ka pa... ni lo, in vai hian heti khawp hian kan buai a, kan mualpho tawh bawk a, min inneih tir hi enge sual ni a in hriat tlat? Nangmahni avangin Ms-i hi ama rilru dik tak pawh pho lang ngam lo leh pawm ngam lo awmin a awm tih te hi in hria em? Hetianga min nawr reng dawn anih chuan...." tiin a ngawi zui a. Patea chuan, "Remtluang min vau khanglang suh aw" a rawn ti zawm nghal khur khur.





Remtluanga chu a tho thut a, "In duhdanin kal ula, keipawh ka duhdanin ka kal ang" a ti chang bawl a, a chhuak zui nghal.





Kan reh țhap hlawm a, nutei leh ka nu phei chuan engmah an la sawi ve lo hrim hrim zawk.




"An la naupang si a, a buaithlak anih hi" ka pu ber chuan a rawn ti ve bap a, ka pain thawk hak paha, "Ms nangpawh lo inngaihtuah la" a tih chuan ka lu ka bu nghat a, engmah dang sawi tawh lovin ka room-ah ka lut nghal daih.





Ka khumah chuan ka țhu thla hnawk a, pasal neih lam ka rilruah a awm ngai lo hrim hrim a, tun kan buaina pawh hi engtin tin emaw a kan nghah daih theih mai ka ring kha ania. Mahse ka pa te rilru erawh a lo dang hlak bawk si.




Ka tih ngaihna hre lo lutuk chuan Ma-i ka call tawp a, chanchin chu ka hrilh ve ta vek.





"Ms kawng dang a awm tawh ngang lo tlanbo mai rawh u" Ma-i takngial pawh chuan a rawn ti ve thlawt. Eng harsatna pawh tawk ila, a eng zawnga thlir tlat ţhin kha ania, ani lehzelin tlanbo mai tur a thurawn min pe chuan kan tlanbo lo anih chuan pasal ka neih ngei ngei dawn zia min hriatchian zual tir viau mai.




Call chu ka dah a, Remtluanga chu ka call ta nghal. A vawikhatnaah chuan a la lova, a vawihnihnaah pawh. Vawi nga zet ka call hnuah hmeichhiain a rawn la ta a, 'tunge' ni ang tih chu ka ngaihtuah nghal rauh rauh.





"Heihi Remtluanga phone a ni em ?" ka tih chuan, "Aw ni e" a rawn ti fel thlap a, "Anih chuan amah chu ka lo bia" nem lo tak chuan ka ti a, ka call lo chhangtu anih vang nge biak țhat chu har ka ti riau.





"Bathroom-ah a lut lawk a, lo nghal lawk rawh aw" a tih chuan ka dah hmak. Helai ațang khan thinrim lutuk in a chhuak kha ania, hmeichhe dang bulah a lo va awm kual leh mai mai tho a, ani takngial pawh hetiang zawnga a awm dawn chuan rin tur ka va nei lo tak.





Ka ngaihtuah a, pasal nei duh lo a kalbo tum chu keimah ka ni a, Remtluanga tel kher lo pawhin ka duh naah chuan ka thleng ve thei em em ang.





Ka thawmhnaw chu bag lian vak loah ka siam mawlh mawlh a, khawiah nge ka kal tih ka ngaihtuah pah rauh rauh bawk. Aizawl a awm ngawt lah kha ka chhungten min rawn hmu rang mai dawn si a, min zawn hmuh theih miah lohna hmun tur ka duh.





Ma-in a rawn call leh a, "Ms Mamit lama nutei te ka bia a, i duh chuan tah chuan in kal thei aw...." tiin thil kimchang deuhin min hrilh a, ka thaw a veng ta sawt.






Ka room aţang chuan ka chhuak leh phawt a, pasal neih loh chu ka sawi phawt anga, an rem ti lo anih chuan zanin la laah ka chhuak nghal ang.





Ka pa bul chetah chuan va țhuin ka pa chu ka va tlawn titih deuh va, ka pa chuan min lo kuah.





"Pa pasal neih loh dan kawng chu a awm lo em ni ?" ka ti a, ka pa chu a ngawi vang vang. "Pasal hi nei lovin kan bulah hian awm reng thei la chu kan duhdan alawm. Mahse hmeichhia i ni a, i neih tho tho angaih dawn avangin a tlai chhiat hmaa neih chu a țha zawk daih alawm" ka lungawihloh hlau niawm tak a nuisang a a tih chuan za lo takin ka nui ve seih a, "Nia, a dik alawm" ka ti ringawt. Pasal chu min neih tir ngei dawn tih a chiang a, zanin la la ah ka chhuak ngei ang.




Zanriah ei tur pawhin ka room ațangin ka chhuak duh lova, ka nuin ka room kawngkhar pawn lam ațanga, "Titau rual pawh i ni tawh lo. Chaw hi rawn ei mai mai rawh" a tih pawhin ka chhuak duh lo.





Ma-i nen kan inbe reng a, ka lehkha pawimawh te keng tel vek tur a min tih avangin ka inkhung fel vek.




Ka chhungte mut hunah ka chhuak anga, Ma-i te inah zan chu awm leh phawtin zing karah Ma-i leh an pain min thlah dawn a ni.





Zan dang ang lo takin dar 10 a rik pawh chuan ka chhungte chu an la meng kim țhap a, an lo hre lawk ve nge ni chet lak a theih mai loh.





Keimah zawk chu ka lo muhil sek a, dar 2 velah chuan ka harh hlawl. Ka phone ka en a, Ma-i call a lo tam ngang. Call let duh rih lovin ka room ațang chuan ka chhuak a, an mu vek tawh tih ka chian hnu chuan ka bag pack chu lain thawm dim thei ang berin ka chhuak ta.





Pawn ka chhuah chuan ka thaw deuh huai a, kan in ka kal hlat hnuin Ma-i chu ka call let ta chauh.





Min nghah reng thu a sawi a, an in ka thlen ruala chhuak mai thei turin a lo inring thlap tawh.





An in ka va thleng phei chuan an nupain min lo nghak ran tawh a, a nuam lo ang reng.





Car ah chuan lutin kan tlan chhuak zui chu a ni mai a, ka thaw deuh hawk. Ka nu leh pa bulah chuan engtikah nge la let leh ang, aaaa... ka let tawh lo thei bawk. A lo hreawm deuh anih pawhin ka tuar anga, ka tuar chhuak ve thei em em ang.





"Ms Remtluanga chu kan hrilh lo ang maw ?" Ma-in a tih chuan hrilh angaih loh thu ka sawi a, ani va tihbuai vel chu ka duh lo.





Chhun dar 11 velah tluang takin Mamit chu kan thleng a, kan thlenna hmun chu a rem vel viau mai.




Car ațang chuan chhukin ka han zimar kual a, tunah chuan a tharin ka nung tawh anga, tuma min hriat lohna hmunah mithar hlak angin ka awm tawh ang.






REMTLUANGA POV.






Ms-in ka call a chhang duh lova, hetiang boruakah pawh min hlat a la tum tho ania. A awmdan hi achang chuan nuih a ri za zawk țhin.





Papuia bula neih ka dil khan an rem tih ve tawh ka ring kha ania, mahse ka ring sual der. Hnung lam ațangin min bei ka ti dawn nge Ms-i pasal neihn tur lam an lo buaipui daih a, kei nen min inneih tir chu an duh lo tlang tih a chiang bawk.




Ka pa fa tak tak ka ni lo tih ka hriat khan ka rilru a nain ka zak a, ka pa chu ka zah thar viau bawk. Mahse..... Ms-i nen unau kan nih loh zia fiahtu anih si avang khan lawmna ka nei tel lo thei lova, ka hlim em em chuang lo a, mahse Ms-i nen kan awmdun thei dawna ka ngaih avang khan hlim lo ka ni chuang lo.





Mahse engmahah hian kan lo thu ve lo em a, tun thlengin Ms-i nen chuan kan la awmdun thei lo. Min hnar a, min duh lo vang ni lovin a chhungte vang a ni tih ka hrethiam vek. Kan dinhmun a harsat pauh leh bansan tum a hnehin ka duh zual a, ri buan buan mai lo tur hian ka insum nasa țhin.





Tunah pawh ka be tlang thei lo a ni a, ka dawhtheihna hian a tlin lo lek lek țhin.





Hmangaiha chu ka call ta tawp a, tunah la la hian insawifel a, tlanbopui vang vang chu la tum dan a ni.




"Room-ah a awm a, nizan ațangin a rawn chhuak duh tawh lo" Hmangaihan a tih chuan ka thaw hawk, a buaithlak țhin maw.





"Engtin nge awm in tum a ?" Hmangaihan min zawh chuan, "I u kha ka ru dawn" ka ti hmiah. Vawi engzat nge nupui a ka dil ka hre seng tawh lo. An duhdanin an kal hlawm ta sa sa a, mahni duhdan chuan kan kal mawp mawp zel mai ang chu.




Ka thawmhnaw tlem ang a zawng ka inpack a, Ms-i hruai chhuah luih a ngaih takin tiin ka t-shirt Ms-i hak ve theih deuh tur zel chu ka khung hlawm a, boxer pawh a hak ve theih tur zelin ka khung.





Zanriah ei khamin ka call leh a, a la la chuang lo. An in lam pan chuan ka inkhalh chhuak ta tho a, duh lo eng ang mah se ka hruai dawn hi a ni tawp.




Mahse an in ka thlen phei chuan ka beisei loh takin Papuia chuan thinrim lutukin Ms-i awmna min zawt ta hlauh. A ngaihna hre lo zetin Hmangaiha chu ka en a, Ms-i a awm loh thu leh ngaihtuah lo tur leh zawng lo turin lehkha a ziah thu a sawi a, ngawi reng chuan ka ding ngawt ngawt.





"Khawnge a awm ?" Papuian min zawh chuan, "Ka hre lo" tih ngawtin ka chhang a, "Pasal a neih duh lo vanga tlan ania, a neih duh loh chhan pawh nangmah i ni. A kalna chin chu i hre em em ang" a tih leh chuan, "Hei hi in cho chhuahah ngai rawh u" ti hmakin ka chhuak zui ta hmak a, in lam panin ka inkhalh let.





Ms-i chuan engmah min hrilh lovin khawi lam nge a pan ang, amah a hetiang ti turin a huaisen tawk lo. Min ring ve deuh ni se, engkim min rawn hrilh ve nise chuan a fel vek nimai tur.





In ka thlen chuan Ms-i kalna tur awm ang a ka ring zawng zawng chu ka be kual a, mahse khawiah mah a kal lo. Khawiah nge a kal ang rin dan ka nei thiam lova, ka hlauh ber chu khawi khawi emaw ah tawhsual a lo tawk anga, mi kut te tuarin a lo awm mai ang tih ka hlau takzet.





Ka inkhalh chhuak leh a, khawpui kawtthler kual zawng zawng chu ka hrut chhuak vek a Ms-i pian hmang ang takngial pawh hmuh tur a awm lo.





Beidawng lutukin ka let a, ka thin a rim ta kher mai. Papuia te chhung chu an rawn phei a, an ni ka hmuh ngat phei chuan ka thinrim a zual a, tharum thawh lo turin ka insum nasa ngang mai.





An ngawi țhap hlawm a, tu emaw ber hi chuan Ms-i awmna chin hi chu an hria ang maw le.





"A țhiante pawhin Ms-i awmna chu an hre lo amaw" ka pu chuan a rawn ti muang ban chap a, "Tumahin a kalna tir awm kan hre lo" Papuia chuan a lo ti.




"A tir ațangin min rawn der eih lovin in thu angin in kal zar zar a, hei hi anih hi a rah chhuah chu" ka pu bawk chuan a ti a, midang chu kan ngawi țhap hlawm.





"Ka fate hi vawi engzat nge in sual a, vawi engzat nge ka ngaihdam cheu ka hre seng lo. In fate hi ti sual ve thei vek an ni a, tinge nu leh pa in nih anga ngaidam a, hlim taka awm tlan theihna ngaihtuah lova in hming mawina tur ringawt in zawn ni ?" ka pu bawk chuan a ti leh a, ka en kual dan dan a, sawi tur hria tumah reng a awm lo.





Ka bike chahbi chu lain Ma-i te in lam panin ka inkhalh chhuak a, ti khan an inhmuhchhuah thlengin ka pu khan lo zilh nek rawh se.


Show post links
Top

[Ngaia]

WILD TRUTH
by Sammy





<17>






Ka beisei ber hnen ațang pawhin Ms-i chungchang engmah ka hriat belh lo. Ka beidawng rilru hle a, amah a biak tlang theih si loh. A la dam a ni tih tal min rawn hriattir se ka ngaih hi a țhain ka thla a muang deuh tur.



Christmas chu Ms-i telloin ka hmang ta a, engkim mai chu a ho vek. Ka tum loh dan deuha ruih ka ching a, min chhang chuang lo mah se Ms-i text leh call chu ka sim phah lo.





Heti taka a reh thei mai hi min ngaihtuahna pakhatmah a nei lo chu ania nga, kei helaiah amah ngaihtuah em em in, zan pawh mu hlei thei lovin ka awm tih min rawn hriatpui hlek lo tih a chiang bawk.



Kum thar lam phei chu Aizawl lama let a mahni a awm daih mai ka duh a, ţhian kawm emaw a huhova awm hi nuam ka ti ngai lo a, tun dinhmunah tak phei hi chuan nuam ka ti lo lehzual.




Beidawng rilru sa zetin Ma-i te in lam pan chuan ka inkhalh chhuak leh ta phawt a, tun țum a Ms-i awmna a sawi loh chuan a hre lo tak takah ka ngai anga. Ms-i hian kan hlat a awm a duh ni a ngaiin bansan ka tum tawh ang.



Ma-in min hmuh rual rual chuan, "Ka hre lo...." a ti nghal a, ka nui tawi tak.





"Nia ka ring sa lawm" tiin a rawngbawlna bulah chuan ka țhu ve reng.





"Tih theih hi a tlem si a tiraw. A rawn be miah lo che maw ?" a tih chuan ka lu ka thing ringawt a, diktak chuan ka rilru a na ve a ni. Ka mualpho pui ngam leh chhungte zah lo khawpa ka duh kha ania, heti tawpa awm chu mipa taka thlirna lam ațang chuan a tlawm mah mah a ni.





"Ms-i hi chu a buaithlak anih hi. Heti taka han reh mai ni? In inhau hrim hrim em ni ?" a tih leh chuan ka lu ka thing leh ringawt.





"Theihngilh tum la, i la naupang bawk a, i luck bawk a, Ms-i ai țha ang tam lutuk" zangkhai deuh a a tih leh chuan ka khi sak a, "A pawi anih hi! A pawi tih loh chu sawi tur ka hre lo" ka ti chhuak tawl.





Ka kal chhan berin awmzia a neih tak loah chuan ka chhuak leh ta vut a, ka inkhalh chhuak mai tur chu Ma-i chuan min lo au ding leh rih.





Lehkha them hi min pe a, "I haw hunah i chhiar dawn nia" a tih chuan țawngkaa chhang lovin ka lu ka buk khum nghut a, ka inkhalh chhuak nghal.




In ka thlen veleh chuan ka room ah ka lut tlang a, Papuia te nupa an rawn leng leh a, puitling ho chu ka pu hoin an lo țhu khawm țhap mai.





Ma-i lehkha min pek chu ka en a, phone number leh a neitu hming niawm tak a ni a, "Mamit" tih a inziak bawk.




Ms-i awmna anih chu ka ring nghal a, ka chhunglam ațang hian eng emaw ni riau hi a rawn chhuak a, Ms-i awmna anih rin na nen rin chiah si lohna nen ka inpawlh nawk.




Phone number chu dail in ka call nghal a, vawi thum vel a ring hnuin Ms-i ngeiin "Hello" a rawn ti zang vah.





Biak zawm mai chu ka tum a, mahse a awmna ka hria tih a hriat chuan a lo kal bo leh daih ka hlauh si avangin ka âw chu ka ti danglam deuh a, lehkha a inziak hming chuan, "Manui a awm em ?" ka ti țhuai.





"Awm rih lo a, enge ni ta ?" a rawn ti lehzel. Ka hmai chu ka tuai puak a, pangngai taka biak chu ka va chak tak. A âw ka hriat hian min hmuh chak tir zual a, kuah vawng vawng chu ka thil chak ber a ni.





"E aw anih chu. Ka rawn call nawn leh mai dawn nia" ka ti a, keimah zawkin ka dah ta rih.





Ka inngaihtuah vang vang a, midang chu ka hrilh ang nge ka hrilh ve lo ang? Hrilh ta ila Ms-i hruai haw an tum awm si a, engkim a buai leh vek ang. Keimah zawk hi ngawi rengin Ms-i awmna lam chu pan ila thil a fel a ni mai.





Inthuam țhain ka thawmhnaw pack sa chu ka ak a, ka room ațanga ka chhuah chuan min lo en țhup.




"Khawnge i kal dawn ?" ka pa chuan a lo ti vat a, kei chuan ka pu ka melh daih thung.





Ka pu hi kawng engkimah ka nu leh pa ai hian min hrethiam zawk a, tun țumah pawh hian ani tal hi chu thudik hrilh ka duh.




"Pu i room-ah inbe lawk ang hmiang" ka tih chuan zawi muangin a rawn ding a, midang chuan min lo en reng hlawm.





Ka pu chu kaiin a room kan luh chuan a ding a, "Kal i tum tiraw ?" a ti nghal, ka en a, "Ka hria alawm. Ms-i khan a kalna tur min hrilh a, i han thleng anih pawhin buaina siam lo la. Țha takin in han awm dawn ania" engmah ka sawi hma chuan a ti dap dap a, ka pu kan lama a țan avang chuan ka lawm a, mahse Ms-i awmna hre reng a a zep chu ka haw lek lek.




"Ka lawm e pu" ka ti ve sap a, "Kal thuai thuai rawh, helam chu ka lo chingfel ang" nui deuh chung a a tih chuan ka chhuak zui a, midang chu ve lovin in chu ka chhuahsan ta vang vang.





Ni tlak dawn hnaih chuan ni tla tur lungleng thlak zet avang chuan kawngsirah ka ding a, ka bike chu nghengin ni tla tur lam chu ka thlir.



Ms-i ka mitthlaah rawn lang a, a nui hmel ka mitthla a, kan hun hman dun ka ngaihtuah let chuan ka khi leh sak sak a. Hetiang teh hnuai kan nih hma kha chuan kan hlim ve țhin maw le, ka indem ve lek lek țhin a. Mahse mipa taka ka duhna ka lantir kha demawm niin ka inhre thei lo. Kan kawng dal zawng hian awm sek lo hlawm se kan hrang lo anga, kan hlim dun nimai tur.





Inthing harhin ka zi mar a, tunah bul ţan leh turin ka pan a ni a, ahma ang khan kan hlim leh em em ang.



Ka phone chu phawrhin ni tla tur chu ka click zuai a. Rilru a, 'Min lo nghak rawh aw, kan awmdun thei țep e' ti rauh rauhin ka inkhalh chhuak leh ta a.






MS-I POV.






"Ms vawiin tlai chu chaw eiah min sawm la, in hmeh tui dawn sia" kan țhenawm hnaih ber rawn leng haw leh tur chuan nui țha chung hian a ti a, "Ni tak a, haw lovin rawn ei ve nghal tak la" ka ti a, "Aw tunah tut tut lo. Ni dangah ni leh zawk si rawh se" amah chuan a thusawi chu a hlimpui a ni chek ang chu a nui vur vur a, a kal zui mai.





Kei chu pawn lamah zanriah ei khawm lama ei nghal theih turin mei chhem ka tum mek a, boruak a vawt var mai a, inchhungah sikri leh pawn lamah mei kan chhep alh hluah țhin.



Ka tih țhan a ni lo bawk a, ka leh ke paw chhuk chuan ka chhem alh thei hram. Pa Chhuana vawk chaw pe rawn haw chuan, "Vawiin tlai ni tla tur chu a mawi khawp mai a" a rawn ti a, en lem loin, "Ni e" ka lo ti satliah.





Ka han sawi chhuak a, ni tla tur chu a lo mawi kher lah tak a. A bul vela chhum chu a chhun sen phût a, thlasik boruak a ni nen zan thim tur chuan țiau chhum a rawn keng tel a, hla tham deuh a, thingkung awmkhawm buk deuh te chu a paw chuk a, lungleng mi tan chuan hreawm ti khawpa lunglenna tham a ni.



Kei mi a zawnga lunglenna nei ngai lo ber pawh chu ni tla tur chuan zûn a nei a ni chek ang chu khaw dang hawi hlei thei lo khawpin ka mit a la a, ka theihngilh ngai loh ni mah se amah chu ka mitthlaah a rawn lang nawn sek a, a nui hmel ngawt ka mitthla avang chuan ka nui ve seih seih mai.




Chutia ka awm chu keimah leh keimah chu â inti zetin ka nui a, ka lu ka thing mat mat. Tunah te hi chuan hun nuam takin a hmang anga, min hre reng tawh tawp lo ang. Chu chu ka duhdan zawk pawh kha a ni a, ka tello a a hlim kha ka duh pui.





"Ms lo lut a, chaw hi i ei teh ang u" UManuin a rawn tih chuan ka lut a, chaw ei te chu ka siam pui nghal zung zung.





Ka thlen tirh khan a hreawm ka ring ringawt a, mahse ka duh ai aiin nuam ka ti tawh. Ma-i nutei ni mah se kei aia a upatna a tlem avangin ka 'u' a, an pa Pa Chhuan erawh chu ka pa rual anih miau avangin ka 'pa' thung. Fa pakhat chauh an nei a, chu pawh kum 12 bawr vel chauh a la ni.





An fel bawk a, hreawm ti em em lo leh lunglen hre lo khawpin ka awm a, mahse zanin zet zawng ni tla tur khan min la fan ania nge ngaihtuah loh tur pui pui ka ngaihtuah a, ka țah te lam lam a chhuak hial mai.




Pawn a ka mei lum chhem aia ka țhu deuh chiah tihin kan inkawtah chuan bike a rawn tlan a, a headlight chuan min chhun chiang ngang mai.




Ka bul maiah chuan a rawn ding dat a, ka han hmu chiang chu ka meng zau ta kawk kawk mai. Engtin nge helai hmun hi a rawn thlen theih? Ani pawhin ka awmna a hria nih chuan midang pawhin an hre tawh ngei ang.




A bike ațang chuan rawn chhukin a helmet a phelh a, min melh chhuk ta ran mai. Min hua nge a hmel awmdan chu hriatthiam har ka ti a, ka lo awmdan chu ka lai hu mai.



"Hetah enge i rawn tih ?" ka ti a, beisei loh lutuk a hmu hlawl ka ni a, abak sawi tur ka hre lo.




A dar chhin ak khawpin a han thaw hrawih a, ka banah chuan rawn manin min pawt ding pawp a, nghet lutukin min kuah zui.




"Kal bo lam i ngaihtuah leh anih chuan kan inthihchilh tawh ang" ka beng bulah chuan a ti sup. He mihring hi kan inhmuh leh hmasak berah pawh tiang thu hi min hrilh thei a nia.




"Ka ngai lutuk che" hniam ruih han a ti a, a thusawi chu a mitmeng chuan a ti chiang viau bawk.




"Ka ngai lutuk che Ms" a ti leh chuan ka lo thaw hak a, "Keipawhin" ka ti chhuak ve ta.



Ka ngai ve alawm, theihngilh tum viau mah ila ka thei bik lo. Mi min hmuh phak lohna hmunah hi chuan zalen taka ka ngaih ve zia te, ka theihngilh ngai miah lo thu te hrilh ve ka duh ni.




Inthlahlel tak chuan kan inkuah ta ngawih ngawih a, hetih lai tak hian khawvel rawn tawp thut pawh ni se ka vui hauh lo ang le.


Show post links
Top

[Ngaia]

WILD TRUTH
by Sammy



Ch >< 18








Ka awmna a hriat dan ka zawh chuan ka rin dan chiahin Ma-in a hrilh a lo ni a, Ma-i bawk chuan UManui te hnenah chuan Remtluanga an mikhual dawn thu a lo sawi fel leh diam tawh a, țhianțha lutuk ka nei hi ka va vannei tak.



A ril țam rih lo avang chuan a intihfai na tur tui lum pawn mei lumah chuan kan chhuang a, innghet chât chuan kan țhu a, ka kut chu a khal neuh neuh.





"Ka pa te i hrilh em ?" ka tih chuan a lu a thing mat mat a, "Ka kalna tur awm pawh an ring thiam lo ang" a ti a, midang chu ka awmna a hrilh bik lo anih hmel.



"Min theihngilh daihin nuam taka hun i hman ka ring a" ka tih chuan lawm lo tih hriat zetin min en a, "Nang ang ka ni lo" a ti nghut.





"Kei chuan ka ngai ţhin che a" amah pawh en lem lo chuan ka ti sep a, awih loh hmel tawk hian a phun hluk a, "Biak tlang theih hlek lova awm chung khan min ngai amaw ?" a ti deuh hmak mai.




"Imm" ti a uar zeta ka lu ka buk chuan a hmui hnuai chu a ti pawrh terh a, "Ka awih khawp mai" hawisan daih pah chuan a ti ngei a, a ti tau ve deuh niin ka hria.




"Anih tlanbo leh ta ila...." ka ti chiah chu rum lutukin min rawn melh a, "Khatiang thu kha i kâ ațang khan chhuak tawh suh se" a ti hrawk a, ka hmui chu naupang fel deuh ang maiin ka chip hmak a, amah chu ka en kar.




"I tlanbo leh dawn ai chuan thah che pawh ka pawi ti lo hial zawk. Chuvang chuan ngaihtuah pawh ngaihtuah chhin duh suh" tiin ka biang chu a rawn dawm a, a chul deuh hauh hauh.




"Kan chhungte hmuh phak lohah kan awm tawh hi" tiin a khi deuh sak.





"Hmangaih em em che lo ila tun ang thleng thleng hi ka kalpui lo ang che. Nang lo hian hlimna tak tak min pe lo tih hi ka chiang a, chuvanga min hnar reng lai pawha vuan țang țang che ka nih hi" a ti a, a mitmeng chu min hmangaihna te, min thlakhlelhna hlirin a khat nimai hian ka hria.




"I hria tiraw ka sawi chu" tiin ka nghawngah chuan na lo te hian a rek a, ka khabe hmer chhoin amah chu ka en dak vah.




"I hria em ?" a tih nawn leh chuan ka lu ka bu nghak a, nui suk suk pah chuan,,"Naupang fel lutuk!" min ti khanglang.



Min koh dana lawm lo zet chuan hawi sawn hmak ka'n tum a, mahse a kut pakhat a ka biang rawn dawn belhin ka hmuiah a rawn fawp.




A inlahrang leh vut a, a tep chap chap. Chal ti chuar nanga ka lo en chu min nuihin min rawn fawp leh a, mahse kan hnunglam ațanga hrawk thian kharh kharh thawm avang chuan kan hrang dawrh.




"Kha tuilum kha a so anih kha" tiin pa Chhuana chu a rawn țhu ve a, "Lo țhu la ka'n siam ange aw" tia ka ding chu min pawt țhu a, "I chawi zo lo ang" tiin amah chuan zei lo zetin tuilum bel chu a suan thla a, inchhung lama a luh pui chu ka zui lut vat.





"I hak tur te va la chhuak lawk la, tui lum hi ka lo siam dawn nia" ka tih chuan a kal ve mai a, a inbualna tur chu ka siam sawk sawk.




A inbual zawh chuan ka inthlakpui leh thlap a, thawmhnaw lum a rawn keng mang lo zui.





"Ms kan mut san ang cheu aw. Mutna tur lam kha chu lo inbuaipui mai teh u" UManui chuan tiin an nupa room lamah min luh san a, "Vawt i ti em? Mei lum saw kan ai leh lawk dawn em ni ?" ka tih chuan min kuah deuh hlan a, "I bulah ka mu duh ania" a ti zat.





"Chutiang a theih ngawt loh" tia nawr sawn ka tum chu naupangchhia lutuk a insawh nghawng nghawng pah chuan, "Ka mu duhhhh" a han ti deuh vak a, a hnungah chuan ka beng ri awk.




"Bengchheng suh an mut luh chiah kha" ka ti a, inla hrangin hmel hlimlo deuh chuan min en a, "I bulah ka mu duh" a ti leh.





"Mi pakhat lenna bak a ni lo...." ka tih k sawi zawh hma hma chuan, "Pakhat chu kan nih tawh ber hi" a rawn ti leh a, ka nui ta tawp.



"Aw i mu dawn nia" ka tih chuan a nui a, "Tak tak...?" awihlo deuh a a tih chuan, "Imm.... keipawn ka ngai ve tho che a" tiin a nghawngah chuan ka kut pahnih chu ka han suih a, ka kawngah a rawn dawm ve zat bawk.





"Vawikhat chiah ka lo fawp leh che" thutak deuh chuan min dil ve mauh mai, ka nui a za angreng hle a, ka fiam chak tlat.




"Tu tu emaw i fawhna te ania nga..." ka tih chuan, "Nangmah lo tumah ka fawp lo" tiin a hmui hnuai a ti pawrh terh a, nui chungin keimah zawk chuan ka han fawp.





"Hmelțhanu" a ban khama ka mu chu hnai set sawta min enin a ti a, min ti lai deuh tlat.




"I ho lutuk a!" ka ti deuh hluk a, min rawn fawp zeuhin, "Papuia hian a lo siam thian khawp mai che" a ti leh.




Ka chhan ngaihna hre lo lutuk chu min nuih a, "A vawt si lo tawlh hnai rawh" tiin min pawt hnai sauh sauh a, puan kan sin lum țha nen a lum nuam khawp mai.




"Hetah in luah tur te zawng ila awm hlen daih i duh em ?" a tih chuan, "Chutiang i awm ngawt thei lo" ka lo ti vat a.



"Anih chuan Aizawl lama awm leh daih mi i duh? Ms kan chhungte lam chu ngaihtuah vak suh. Puitling kan nih tawh hi, kei chuan ka hmuh leh ațang che khan kan hma hun bak ngaihtuah ka nei thei tawh lo" a ti a, "Hreawmin ka awm tir lo ang che, kan dam anga, ka thawh theih chhung chu i duh duh ei a in turin ka siam em em ang che. Inneih ang aw" amah vek chuan tiin min rawn en kar a.




"Mawhh inneih ang" ka hawisawn hlau niawm tak chuan amah en tlat tur chuan min kuai a, insawmna ai chuan inngenna a ni zawk tawh mah.


A tho a, a bag chu va hawng rawk rawkin a rawn let leh. Khum bulah chuan a țhingțhi a, zungbun a rawn lek lang va.




"Ms ințhen leh tawh miah lo turin, kumkhuaa kan awmdun a, ka hmangaihna che hi nitin a hmuh tir che a, ka hmangaih zual zel theih nan che min nei rawh" a ti ta.




Ka țhu chhuak a, "Remtluang" ka hamhaih lutuk chuan ka ti mawl tawp.



"Imm, kan damchhung a ka hming chauh i lam a, ka ta chauh ni turin" a ti leh a, hetiang em em hianin min hmangaih a ni tih lo hria ila chuan hmanah khan ka tlanbopui tawh tur hi ania.





"Mi â lutuk pa" ka tih chuan min en reng a, "Ka nghak ania" tiin ka kut chu ka phar chhuak a, rawn nui chhuak hawkin ka kut chu a la a, zungbun chu min bun tir.



Hlim lutukin min rawn bawhthlu titih a, nghet zeta min kuahin a nui a, a țah nui ti tih.




"Ka fawp dawn che nia" a sawi zawh rualin min rawn fawp a, ka lo chhanglet ve nghal.




Zungbun min bun tirna lam chu lain a fawp a, bek a thisenzam pawng țawlh țawlh hian min rawn en a, a mitmeng te chu a de sawr sawr thei hialin ka hria.



Keimah zawk chuan a nghawnga lo kuaiin ka fawp a, min dim leh duhthawh ru deuh si chuan a che zawm ta mawlh mawlh.
.
.
.
.

Kumthar nuam leh dam takin kan hmang zo a, rilru a buai țan ta khawp mai. Kan chhungte hriat lohah awm bo tawp chu thil țha ber pawh a ni lo a, mahse an hria anih chuan thil thleng thei chu kan hrechiang dun si.



A tawpah chuan Aizawl lama awm leh rih phawt chu kan ti tlu ta a, kan hna ngai ve ve kan zawm rih anga, abak kan awmdan tur chu hunin a hril ang chu.




Aizawl lama kan inluah țhinah Ma-i te nupain min lo hmuak a, thil chu a kal fel thlip thlep rih khawp mai.




"In zahpuiawm hawr hawr eeeee!" Remtluanga nena kan hlim dun lutuk Ma-in a hmuh chuan a ti leh ţhin a, keini pahnih lah chuan nuih tawp loh chu tihtheih kan nei der si lo.




Remtluanga duhdan angin court a inneih chu kan ti mai a, hriatpuituah Mazami leh kan inluah neitute chhungkaw pa ber kan chung a engtiklai pawha țha em em reng chu kan hmang a, helaia kan hnaih tak awm chhun an ni a, an ni chuanin midang angin min hmu dik lo ve kher lova, kan dinhmun chu min hriatthiam pui zawk em em tlat.




Remtluangan a hna a zawm a, keiin ka awm loh chhunga fel taka an lo enkawl ka dawr chu ka buaipui leh țan bawk a, mahse pawn ka la chhuah duh rih vak loh avangin karkhatah vawithum vel bak ka kal ngai lo.




Kan nun chu a tluang chhoh purh a, a nuam a, a hlimawm a, heihi mite duhthusam țhin nun nen khan a danglam hauh lo ang.




Remtluanga chuan min duat thiam a, ka beisei lo deuh deuhin a che fo va, mipate pawh hi an dinhmun a zir leh a rilru mil hian a awm ve mai zel tih min hriat tir a ni.


Show post links
Top