REAL LOVE BY Rebec Nunziri (Completed)
Posted: October 15th, 2023, 2:04 pm
Prologue:
"I nu enkawl nan pawisa I mamawh tih ka hria, ka ta ni la tichuan I nu ka enkawl sak ang che" titu chu huatna nen ka melh reng ringawt, pawisa chu ka mamawh tak meuh mai, mahse a ni ta nih ai chuan ka theih ang ang a pawisa thawh chhuah ka duh zawk.
"In ngaihtuah buai vak duh suh, I nu hian a rang lama enkawl a mamawh tih chu I hriat chian ka ring, i nu nunna nge I taksa kha I ngaih pawimawh zawk" a ti leh nghut a, rum deuh a melh pahin "I puihna ka mamawh lo" ka ti hlar a, a kiai deuh suk.
"I chiang maw, I nu enkawlna tur pawisa pawh I nei lova, chuan ba tamtak in nei bawk, ka ta I nih chuan in ba leh I nu enkawlna tur pawisa zawng zawng ka tum vek ang, chuvang chuan duhthlan tur I neilo, I tana tihtheih tha ber chu ka ta I nih hi ani" a ti leh a, a sawi dik kei hian engmah neih ka neilo, mahse ka la pawm thei chuang lo.
"I ta nih ai chuan thih pawh ka thlang zawk, min tibuai tawh suh, ka nunah hian inrawlh theihna dan engmah I neilo" tiin kawngkhar lam ka pan a, "Lo inngaihtuah ang che" a tih leh pawh chu hrelo derin pawnlam ah chuan ka chhuak nghal hmak a.
__________________________________________
"Kha mipa I hmuh duh vang khan maw min hmuh hmanloh thu I sawi" A tih hrawk chuan ka hlau lutuk chu ka kimki chawih a, ka hmaa mipa lian tak ding run mai thinrim mitmeng sen rum a min melh tu chu ka melh let ngam thlawt lo, engtinge kha hmunah khan a lo lan thut theih lah ka hre heklo.
"Lo ngaithla rawh, nanghi ka ta I hria em keima ta chauh I ni, kha mipa kha that turin min duh em, ani bulah khan let leh i tum amaw" A tawng tawp lam chu a vin thawt a, ka tawlh hnung deuh hrut hrut chu ngaitheilo tih hriat zetin rum hrawk chungin min pawt hnai dawrh a, "I ngaih ang kha engmah a awmlo, a ni nena kan inhmuh chhan chu i..ih ka purse min pek let a tum vang chauh a inhmu kan ni" ka hlauh lutuk vang chuan ka tawng bah deuh nawk nawk a.
"Bawihi insawifiahna hun ka pek lai che khan engmah I sawilo a dik em, tunah chuan I thusawi khan engmah awmzia a neilo, hremna hmu turin inpeih rawh" a ti chang bal a, a dar ah min put nawlh takah chuan ka tal nghal nawk nawk a, engah mah ngailo chuan room lamah min luhpui a.
__________________________________________
Zohlimpuii-Hmeltha leh huai tak, hmeichhe te ve tak feet 5'2 a sang, Anu nen chauha khawsa, lehkha a thiam em em a, mahse a nu enkawl a ngaih vangin college chawlhsanin a theih ang ang hna a thawk thin.
Alex Lalhriatpuia-Hmeltha leh chhelo tak, feet 6'3 laia sang, nunrawng tak, mi khawngaihna neilo, hmeichhe mi tak, hmeicvhia te chu nawmchen nan bak a tilo, misual rual hotu ber niin hnung zuitu pawh a nei tam hle, a hauhsak vang leh a nunrawn em vangin mite chuan an hlau thin hle.
Chapter-1
Zohlimpuii POV
Van lam chu ka thlir vang vang a, kum nopang tak ni chungin harsatna tamtak ka tawk tawh a, tunah ka nu khawvela ka chhungkaw neih ve chhun chu natna khumah thih sualin a awm mek si a, Pathian hi dem lek lek chang ka nei thin, mahse ka nu in thuṭha tamtak min hrilh ṭhin chu ka thinlungah a rawn ri nawn leh ṭhin a, 'Pathian hi dem thei kan nilo, min hruai tawh na zawng zawngah hian lawmthu sawisen loh kan ba zawk ani' a ti ṭhin a, chuthu chu ka la nunpui ve ṭawk ṭawk ani.
Ka hming chu Zohlimpuii a ni a, kum 22 ka ni ve tawh bawk, ka pa hian kum 7 mi chauh ka nih laiin nupui dang a nei a, vawikhat mah min rawn hmuh tumin a rawn kal ngailo, ka nu hi fahrah a ni a, ka pa thung kha chu chhungkaw hung tak ami ani, ka nu sawidan chuan ka pi leh pute khan ka nu hi an duh lo em em a, mahse ka pa khan a hmangaih tlat vangin a ru ta a, hun rei tak chu an pawmpui loh avangin an inbe lo nghe nghe.
Mahse kei ka lo pian takah kha chuan an hmin thei ta hram a, hlim taka kan awm ho laiin ka pa bianu hlui chu rawn inlar lehin ka pa chuan keini nufa ai chuan chu a ngaihzawng hlui zawk chu a thlang ta ani. Ka pa chhungte lam chuan ka nu leh pate an inthen atang khan min hnungchhawn ta hmak a, ka nu in harsa takin min chawm seilian ta ani.
Ka nu hi ka neihchhun tak meuh meuh ani tawh, min kalsan ta se engtinge ka awm ang tih pawh ka ngaihtuah ngam lo, lehkha thiam thei ve tak ka ni a, college ka zo ṭep tihin ka nu chuan insawiselna neuh neuh a nei ṭan a, hna a thawk mumal thei ta lova, ka zirna leh ka nu in enkawl nan pawisa tak tham tak kan puk a, rei kan daih lo ka nu chu hnathawk thei chu a ni a ka hriat tawh ngang loh avangin ka zirna chu kal chawlhsan chu ka ti tlu ta a, ka nu chuan a remti chiahlo, mahse ka tih luih tak tlat avang chuan min hnial ta biklo ani.
Chhun lamah thawmhnaw dawrah ka in thawk a, zanah restaurant ah ka thawk bawk a, hun awl ka nei tlem thin hle, vawin zana in ka thleng pawh a lo tlai ve deuh tawh bawk nen in chu a lo reh thiap tawh a, ka nu chu a muhil tawh a ngaiin bathroom lam ka pan nghal, ka chhuah leh hnu chuan ka nu na tuar rum ri ka hriat vangin room lam chu hmanhmawh takin ka pan a, k nu chu khumah a lo vial ngawt ngawt mai a, ka mangang lutuk a tihber tur ka hrelo, in thingharh vatin kan thenawm te inah lam chu ka tlanphei a, an kawngkhar ka beng dat dat bawk.
Reilote hnu chuan Pa Biaka chuan kawngka a rawn hawng a, ka hmel a hmuh chuan thil awmzia min zawt vat, kan inlamah chuan kan phei a, ka nu chuan nikhua a lo hre tawhlo, damdawiin lamah rang takin min kalpui nghal a, doctor chuan a check zung zung a, a check zawh chuan "Naktuk lamah test ngai te kan test anga, a natdan hi a hriat fiah theih chauh ang, a dinhmun han en mai hi chuan a tha lutuk lo a, mahse in rilru lo ti hah lo ula, kan theihtawp kan chhuah dawn ania" a ti a, a kalsawn hnuah tuna ka awm mek na laiah hian ka chho va, rilru fim put hram hram tuma chho ka ni tak na in ka thil ngaihtuah te chuan min delh rit zual.
Thawk ka la deuh ham ham a 'Lalpa khawngaihin ka nu hi venghim hram angche' ti sepin inhnuai lamah chuan ka chhukthla ta a. Ka nu awmna lam chu ka pan a, khumah chuan tui tih hmel takin a lo mu a, ka thlir vang vang, a bulah chuan kal hnaiin a kut chu ka vawnsak vang vang a, ka lo muhil a ni mahna ka lu a min chul tu an awm vang chuan ka harh a, ka meng chhuak siar siar a ka nu lo nui sang mai ka hmuh takah chuan ka thawveng huai huai thei.
"Nu.. I zia deuh tawh em? Na I nei em?" Ka ti nghal zung zung a, "Ka tha vek tawh e, engmah na ka neilo" a ti a, ka hahdam huai mai, doctor in ward a rawn fang a, ka nu chu a be vat a, vawin lamah test ngai neuh neuh a la awm vangin kan la chhuak thei hrih dawnlo tih a sawi a, ka lo pawm thlap, doctor kal hnu chuan ka nu in "Mamte.. haw la, va hahdam rawh, ka tha tawh lutuk a nia, hna I thawk chau awm sia, min awmpui reng ka ngai chuanglo ang" a ti a, ka hnial tlat.
Test tur te chu an test zung zung a, a ranglama result pawh a chhuah theih an ring bawk. Ka nu pawh nizan lam ai chuan tlemin a hmel hmuh a nuam ta deuh zawk a, doctor in chhuah a la phal loh vangin engvhen nge kan awm dawn tih ka ngaihtuah thiamlo.
"Hahchawl turin va haw rawh, zan lamah I lo kal leh dawn nia" A ti a, in lama haw turin ka insiam nghal. Taxi fare ka ui vangin kein ka kal a, in ka thlen meuh chuan hun akal ve duai tawh, inbual sawk sawkin eirawng ka bawl nghal vat vat a, in lama ei lovin chaw chu ka fun a ka nu nen a kan eitur ka fun zawh chuan ka thleng tih balh ho chu ka tifai leh zung zung a.
In ka chhuahsan meuh chuan a tlai tawh mah mah ani, pawisa neilo viau mah ila taxi ka lak mai a ngaih hmel, kan in awmna hi a tlang reuh avang hian bus hmuh tur a awm ngailo, taxi lo tlan hmasa ber chu ka phar ding a, damdawiin lam pan turin ka hrilh nghal zat bawk, damdawiin kan thleng a, fare pein ka chhuk a, ka nu awmna lam ka pan vat, a lo muhil a, ti harh duh lovin a bulah chuan ṭhuin ka phone ka khawih a, ka nu chu a rawn harh thuai a, chaw chu kan lam ei nghal mawlh mawlh bawk.
Ka nu chu a chau deuh thu sawiin a mu leh nghal a, kei chu ṭhutthlengah chuan ṭhu in WhatsApp lamah ka ṭhiannu nen kan inbe mawlh mawlh a, ka nu chanchin ka hrilh chuan min rawn hnem ve luam a, thla a ti muang ṭhin ngawih ngawih, ṭhian hi ka kawm tam lemlo a, Arintei anga kawm ngeih ka neilo bawk.
Zirna avangin Mumbai lamah a awm a, an chhungkua an rethei zawk zawk lo bawk a, college tha takah a zir thei a, ka lawmpui rual rual in ka awt ṭhin hle, keini pawh kha ka tetlai kha chuan kan reithei biklo, ka pa kha contractor a ni a, kan khawsak kha a nuam ve hle ṭhin.
A rawn haw vat tur thu a sawi chuan ka phur khawp mai, kan inhmuh lohna a rei tawh bawk nen rawn haw vat vat se ka ti takzet, a bula ka awmchuan ka hahdam huai zel tlat ani. Kan inbiakna ka tih tawp chuan dar 11 a ri hnai tawh a, ka mutna turah mu vatin muthilh tum chuan ka maimitchhing nghal a, naktuk lamah hna kal ngei ngei tawh ka ngai a, tho tlai thei ka nilo.
Ka harh hnu reilo teah damdaiin chu ka chhuahsan a hmanhmawh takin inlam panin ka kal nghal hlawk hlawk bawk, nimin lam hna ka chawl tawh bawk sia, tlai ka duh lo, in ka thleng a insiam zung zungin ka hman veleh kan dawr lam panin ke bawkin ka kal leh a, ke in ka kal ngun bawk a, nuam ka ti hle, ka hnathawh na hmun ka thleng a, U Siamtei chu a lo awm tawh a, min hmuh chuan chanchin min zawt nghal zung zung a, a tlangpui ka sawi hnuah hahdam taka awm turin min ti a, ka hnathawhna neitunu hi a ni a, a felin biak a nuam em em bawk.
Chhunah chuan eitur order turin ka kal a, ka let leh lam chuan kawng ka lo en bawk silo nen mi pakhat hi ka su dawt a, keimah zawh chu chhuatah mawng sawh dawmin ka ṭhuthla hnawk a, ka mawng chu a hit mum mum thei hial mai.
Thawh ka tum a ka la thei lawklo zui a, harsa takin ka tho thei hram ka mi sutpa kha ka en a, min lo en let ve ngur bawk, awi a va nelawm loh hmel veleh, chuan a len dan em em chu feet 6 chu a pel val val ang, "Ka tihpalh lutuk" ka ti sep a, min enchiang bawk si nen ka zak ru chem chem mai, kal mai ka tum a, ka kalna lai turah tak a ding tlat bawk si, "Ih.. ka lo kal lawk mai" ka ti a, min en reng chungin a che hrut a, rang takin ka kalpel nghal.
Ka thin phut nasat dan chu a, khatiang taka mipa lian kha ka hmuh awm pawh ka la hrelo, mipa sang tak tak chu ka hmu ngun ve tawh, mahse ani kha chu alian in a sang em em a, a inthuam dan atang khan mi mai mai a nilo tih chiang takin a hriat theih bawk.
Dawr ah ka lut a U Siamtei chuan min lo en reng "Tinge hlauh nei I ang lutuk" a ti a, "Mi pakhat.ka rawn su a, a len dan chu keima sut zawk nu chung khan keimah zawk chhuatah ka thu thla hnawk mai mawle" ka ti a, a nui uar uar a, keipawh ka nui ve ta ringawt a, "Chu I hlau a I lo tlanchhiat san a nimaw?" La nui reng chung chuan a ti a, "Teuhlo, ka hlau lo, mahse a nelawm loh hmel lutuk kha rang tawkin ka rawn kal" ka ti leh a, a nui char char ringawt.
Eitur a lo thleng a, kan rilṭam tawh bawk aniang inbe lovin kan ei zui mawlh mawlh a, thil te kan ei zo a, customer an awm ve reng a, titi na hun tur pawh awmlovin customer te chu kan buaipui nghal zung zung a, dawr khar a hun dawn hnaih chuan customer pawh an awm tawhlo, dawr chu kan khal fel a, in mangtha in restaurant lam chu ka pan lehnghal a.
Ka thlen veleh inthlak in hna ka thawk leh nghal mawlh mawlh a, ka vanneih na chu ka hnathawhna te hi an fel a, mi an hrethiam em em thin hi ani. Kei tak phei hi chu hna kalloh zeuh zeuh hi ka nei zing a, ka nu nen chauh kan nih vang hian min hrethiam a, min hauh emaw pawh an tum ngailo.
"Puipui, sawlai a thu te saw order lo va laksak lawk mai rawh aw" ka thawhpuinu Hruaii chuan a rawn ti a, bu nghauh in an lam chu ka pan a, "Order ka lo la dawn a" ka ti sep a, lawkin vawina ka mi sutpa kha a ni chiang lutuk, min en chiang em em mai lehnghal a.
An zinga pakhat la nopan hmel ve tak chuan order chu min hrilh a, rang taka ziakin ka kalsawn vat a, khapa ka hmuh khan ka awmdan hi engtin emaw a danglam tlat a, a palen lutuk vang leh a mitmeng nelawm lo zet vang kha a nih ka ring, a hmel erawh a tha em em thung a, Mizo mipa ka hmuh tawh ah chuan a la chhelo ber hial ang, aa.. enge maw ka ngaihtuah le..
Order ka va pe a, paliana chuan min en reng tih ka hmai za mer mer atang chuan ka hre thei, a lam chu hawi loh hram hram ka tum a, nichina order min hrilh tu lam chu nuisanga hawiin "Tui deuhin in ei dawn nia" ka ti a, ka kalsawn lehnghal a.
An ni lam chu ngaihven zui tawh lovin hna ka thawk zawm ta mawlh mawlh a, customer an awm tawh loh meuh chuan zan a tlai viau tawh a, inthlak zung zungin damdawiin lam ka pan a, ka nu chu a lo muhil tawh a, bathroom ah lutin ka inphih fai a, thawm dim zeta ka mutna tur lam ka pan lai chuan ka nu a lo harh a "Bawihte I lo thlenna a rei tawh em?" Thophang aw deuh hian a rawn ti a, ka phu zawk nghe nghe.
"Rei vaklo, ka ti harh che animaw?" Inthiamlo ru deuh chuan ka ti a, "Nilove, ka zun a chhuak a, chuvang zawk chuan ka harh" a ti a, bathroom lam a pan a, a lo chhuah leh chuan ka lo mu fel than tawh, khumah a mut hnu chuan a muhil lehnghal mai a, keipawh chu ka chau deuh bawk nen ka muhil chhunzawm ve nghal.
Zing ka harh chuan ka nu chu tui tih hmel takin a lo la muhil a, hnaa kal ka ngaih avangin ti harh duh lovin inlam ka pan a, in ka thlen chuan inbual fai sawk sawkin ka insiam chhunzawm nghal a, in ka chhuah meuh chuan a hma leh tawh lo khawp mai.
Dawr ka thlen chuan U Siamtei a lo thleng tawh a, min hmuh chuan min lo nuih nghal sen sen, "Taka vawin lamah kan pa nen kan lengchhuak dawn a, chawhnu lam chu nangmaha dawr I lo nghah mai a ngaih hmel" a ti a, ka lo fiam nghal a, amah zawk zawk chu nuihzaah a la ṭang zui.
Usiamtei hi nula senior tih em tur chu a la nilova mahse a nopang chhe zawk zawk tawhlo, a bialpa hi police officer ani a, U Ramte tiin ka lo mai ṭhin a, a fel bawk a, kan innel ve tawh viau, fiamthu a duh bawk nen dawr a lo kal tawh chuan kan nui reng zel, chhunthil kan ei zawh chuan U Ramtea pawh a lo thleng a, fiamthu a thawh nghal char char, kan nui leh hak hak zel, rei lutuk awm lovin an inzui chhuak nghal a, customer an awm reng a, keima tawkah ka buai ve viau.
Zanlam hna ka thawk zo a, damdawiin ka thleng leh der tawh, doctor haw tur nen kan intawk a, naktuk lamah ka nu test result a chhuah dawn thu leh min biak a duhthu a sawi a, ṭha taka chhangin kan in mangṭha zui a, Arintei nen muthmunah kan in bia a, karleh lama a lo haw tur thu a sawi chuan ka lo phul hlut, lo haw vat vat teh se, a awm chuan ka thla a muang em em a, ka ngai tawh takzet bawk.
Vawin haw hma ka ngaih thu U Siamtei bulah ka sawi a, min lo hrethiam khawp mai, kan buai lutuk lo bawk nen chhun thil ei hmain haw tur chuan min ti a, ka hniallo, damdawiin lam ka pan nghal a, ka nu chu hmu hmasa phawtin kan titi dun a, doctor a rawn luh chuan ka nu a lo muhil fel vel chiah a, "Ka cabin lamah kan inbe lawk mai dawn em ni?" Ka nu muhil en pah chuan a ti a, "Awle" ka tih hnuah kan in zui chhuak ta a.
A cabin chhunga kan luh hnu chuan a ṭhut naah a ṭhu a, ṭhu tura min tih chuan a hma zawn ah ka ṭhu thla ve nghal a, file a en a, chutah a thaw chhuak hawk a, a awmdan atang chuan ka ngaih a ṭha thei lo, file chu ka lamah ka en theih turin a rawn dah a, ka en a, mahse a awmzia a hriat mai loh avang chuan doctor chu ka en leh a.
"Khakha I nu test result a ni a, I nu hi thisen cancer ani" a rawn tih chuan ka mang vek nimai hian ka hria, a tawng ka hresual emaw ka ti hial zawk "Doctor I ti tak tak lo tiraw?.. Nilo nang hian min fiam mai mai ani" ka ti bah deuh nawk nawk a, a hmel ka en chuan a ti mai mai lo tih chiang takin ka hre si.
"Puipui a pawi ka tihpui khawp mai che" a ti leh sup a, ka rilru a buai deuh nuaih a, engmah fim takin ka ngaihtuah theilo, khawvela ka neihchhun tak meuh meuh ka nu hi ka chan mai ang tih hlauhna in ka khat a, a tello a nun dan ka thiamloh mai bakah a tello awm turin ka la inngaihtuah chin ngailo.
"Dam theihn chance a la nei em?" Ka ti sep a, thaw hawk chungin "A ranglama kan in enkawl vat chuan beisei na tlem chu a la awm a, mahse chumi tur chuan pawisa a ngai tam thung ang, damdawi man ringawt ah pawh insen teuh a ngai dawn a" a ti dap dap a, tunah hian pawisa kawllai cheng 500 bak ka neilo, engtinge pawisa chu ka thawh chhuah tak ang.
Ka pa te lam va pawh buai chi niin ka hre silo, an puihna va dil pawh ni ila min puih duh ka ring lo, ka beidawng takzet, ka nu hi ka chan theilo, a tan chuan engpawh ka ti mai ang. Doctor chu ka en a, min lainat hmel takin min en a "Pawisa chu ka lo ngaihtuah dawn nia, khawngaihin ka nu hi min enkawl dam sak hram rawh" tiin ka ngen a.
"Awle, ka theihtawp ka chhuah ang tih ka tiam ache" a ti a, cabin atang chhuakin ka nu awmna lam pan chuan ka kal chhet chhet a, hrilh chi a niin ka hrelo, kan dinhmunin a zirloh em vangin in enkawl zui a duh dawn tih kei aia hrechiang tu an awm lo, chuvang chuan doctor hnenah pawh hrilh lo turin ka ngen ta tawp kha ania.
Ka nu room ah chuan ka lut a, a lo muhil a, ti harh duh lovin a bula ṭhutthleng ah chuan ka ṭhu a, engtinge pawisa chu ka neih theih ang tih ka ngaihtuah a, ka rilru hah lutuk chu ka thaw chhuak leh hawk zel a, awmzia a awmlo.
Ka nu hmel chu ka thlir vang vang a, a kum phu lohin a la upa a, hna a thawk nasa in kan lo harsa tel kher bawk nen hah pawh sawi lovin hna a thawk char char a, nuamsa ve deuha kan awm lai kha chuan nu invawngfai leh hmelṭha tak ani, ka pa khan nupui dang neilo se chuan tun dinhmun hi a thlen ka ring lo, ka pa ka huatna leh ka dem na chu nasa tak ani.
Ka nu hnenah chuan a natna chu ka zep tlat a, damdawiin a chhuah theih tawh dawn leh dawn loh doctor a zawt fo ṭhin, chhuah chu sawi loh a awm hun tur chhin pawh kan hre silo, tuna ka hna thawh mek hian ka nu enkawlna tur a daih dawn lo tih ka hrechiang a, hna dang ka zawng mek bawk a, bar ah chuan zanlaia hnathawk tu tur duh chu an awm a, ka rilru ka la siam fel lo thung.
Doctor nen kan inbiak leh chuan an enkawl tan dawn thu leh pawisa ngai zat awm ang tur chu min hrilh a, tunah chutiang zat pawisa ka nei silo, duhthlang thei nia ka inhriat loh vang chuan bar a hnathawh chu ka rem ti ta a, zanin aṭang ka ṭan dawn a, ka kal mek bawk.
Bar ka thlen chuan music ring zet ka hre hmasa ber a, hnathawk that tur ka ni tih ka hrilh chuan maneger in min lo buaipui vat a, thawmhnaw ha tura min tih ka hak fel hnu chuan inthlak room aṭang ka chhuak a "Muantea ka nia nang tunge I hming?" Manager chuan a ti a, "Zohlimpuii, Puipui tiin min ko dawn nia" ka ti sep.
"Awle Puipui tihfel ngai ang ang hi lo ti fel la, hriatthiam loh I neih chuan min zawt zel mai dawn nia, chuan sawlai a ṭhu te saw kan VIP te an nia, lo ngaihsak zual bik la aw" tih pahin a kil sir lama mipa pali panga ve ṭhu lam chu a kawk a, an awmna a thim deuh bawk nen an hmel ka hmu theilo.
"Awle" ka tih hnuah a awmna ngaiah chuan a awm a, an zu Inna no ruak te chu ka dahfel zung zung a, Muantea min hrilh VIP ṭhutna lam a tanga min rawn koh chuan ka kal vat a, "Nanghi restaurant ami kha I ni em?" Pakhat chuan a ti a, a hmel ka hmu thei lo an awmna a thin em bawk ani.
"I ni chiang mai" a ti leh a, ka chhang chuanglo ka thawhna restaurant ah khan a lo chawl ve tawh te pawh a niange, a kil a thim leh zual thute chu ka melh zawk a, mipa leh hmeichhia an thu a, a hmeichhia zawk chuan a zut vel dan dan a, hetiang lam hi ka hmuh ngai chakloh vangin nuam ka ti chiah lo, ka kalsawn a, engmah tihtur a awm hrilh loh vangin Muantea bulah chuan ka awm a.
VIP te thutna lam atanga zu an rawn lam chuan pe turin ka kal vat, hmeicvhia chuan lo lak a tum a, mahse a la chiah tihin a kawrah a baw ta vek a, a te that bawk, "Fimkhur ta che" a ti hlar a, ka thiamloh nilovin a ma thiamloh a ni reng sia.
"Thing lutuk mai, kalla a dang min va lak leh nghal rawh" a ti tan tan a, chhan let chak viau mh ila ka insum hram hram ta zawk a, no dang chu ka laksak leh a, min melh rawm rawm a, engah mah ka ngai der silo.
"Babe" tih pahin a bula thupa chu a pe a, a lam ka hawi chuan ka thlawk chhuak lo chauh paliana bawk kha ani, engvanga inhmu fuh thei em em nge maw kan nih le?... Min en chik leh hle tawh a, min entlang vek a tum nimai hian ka hria, ka en reng lai chuan a nui suk a, nui mahse a mitmeng khan thil dang daih a ngaihtuah tih ka hria a reng duh lovin ka kalsawn ta vat zawk a.
Cont.
Hei aw... A ngaihnawm hmel in ti em, comment leh click kha han pe sap sap ila aw...
Show post links
Top