AIZIAL By CVL Awmpuii (Completed)

[Ngaia]

AIZIAL
By CVL Awmpuii



Chapter 31



Ka hamhaih êm avâng chuan ka ngawi vung vung a. Hetiang thuthlukna siam tur hian nawr tu ṭha tâwk tak a awm ngei ang.



"Rara, i chungah eng nge thleng?" ka ti ta rêng a. A lo thaw chhuak ham ham a. "Inneih ka duh" a rawn ti leh tawp a.



"Enga tinge?" ka ti sup a, ka thu tak viau bawk. "Au Hriatpui, min nei tawh mai rawh" tih ringawt a rawn sawi leh a. Kan in zawh chhuah hmel loh khawp mai.



"Nge...i rilru i thlak tawh em ni?" a rawn ti zawi leh sep a. "Chutiang lam a nilo" ka lo ti vat a. "Anih chuan i sawmna kha ka pawm tawh" a rawn ti mâwl leh tawp a.



"Ka nei ang che, mahse hetiang thuthlukna i siam thut hian chhan ṭha tâwk tak a nei dawn tih ka hria. I chhungte'n an hau che em ni? Eng harsatna nge i tawh?" ka ti zung zung a.




Ka ngaihtuah zia chu ka âw aṭang ringawt pawhin a hriatthiam ngei ang.



Rara-i chu a ngawi zui vang vang a, ka ring sual lo anih hmêl.



"Engkim tlang takin sawi rawh le" ka ti dam thlap a. A reh vang vang lai chuan ka lo ngaichâng reng a.



"Phone kaltlanga sawi chî anih loh chuan ka lo kal mai ang" zawldawh deuh hian ka ti leh a. "I hman chuan lo kal la pawi ka ti miah lo" a rawn tih tak sepah chuan hrilh nawn ka ngailo kher mai.



Ka kal vat tur thu sawiin kan inbiakna chu kan ti tâwp a. Inkhawm bâng chiah ka nih avangin ka inthlak nghal zung zung a.



A rang thei ang berin Rara-i te in lam pan chuan ka inkhalh chhuak nghal a.



Ka zuk thlen chuan an lo awm kim ṭhap a, min lo dawngsawng ṭha khawp mai. Rara-i pawh room aṭangin a rawn chhuak. Thlang lam Veranda kan inzui chhuak nghal a. Ka len apianga kan inkawm ve ṭhinna a ni a. A chhûngte pawh hian ngaiah an nei tawh.



"Enga tinge?" ka ti nghal thawr a, "Ka rin aiin i lo thleng hma a" a lo ti thung a.



Ṭhut hmun chu kan siam rem sauh sauh a, ka lo kuah nghal thuk a. Ani pawhin hahdam hmel zet hian min lo ngheng ve nghal a.



"Keichu dam pawh hi nuam ka ti tawh lo" beidawn hmel zet hian a rawn ti a. Ka lo rum nghal nghut mai.


"Rara" lungawi vak lova ka tih chuan "Dam chhan tur ka neih loh tluk zet hian thih chhan tur pawh ka nei chuang bawk silo" thil tam tak ngaihtuah hmêl pu hian a rawn ti leh a.



"Dam chhan tur ka awm hi" ka lo ti vat a, za vak lo hian a lo nui hak a. "Chuvang chu ania i hnena in tuk luha, inneih vat ka duh. Ka dam ve ṭawk ṭawk chhan chu nangmah chauh hi i ni tawhin ka hria" a ti sep a.



Inlahrang hlekin min rawn melh chho zeuh bawk a. "I chhungte'n an ṭawngkhum che em ni?" chiang zeta melh chung chuan ka ti a.


"Engkim min hrilh rawh" ka ti nghet leh charh bawk a. "Au Hriatpui, ka hah tawh, sum leh pai hi enga tinge an âtchilh em em. Ka theihtâwpin chhungkaw kehchhe tur ka vêng ve a. Ka phâk ang tâwk chuan ka chhungkua hi ka hum ve asin. Mahse tunah chuan ka hah zo tawh ani ber. Zaninah khan Ni Nêmi nen kan inbia a, ka pu ro chungchâng ngunthluk deuhin kan sawi dun a. Ka ni chuan heti hian a sawi a 'Kal thut thei dinhmunah i ding si a, a khâwm tu tur tifel vat la a ṭha ang. Dik tak chuan i nuhrawn tân chuan dah lo hul hual la ka duh, kha chen a lo ti hrehawm tawh che a. Tlang takin han sawi tawp mai ila, sum ka duh ngawr ngawr vângah min ngaih sak lo la. I in enkawlna senso hi a hautak ve ang reng a, kan sum leh pai kan khawhral nasa em em a. I pa Lura lakah pawh hian ka inthlahrung ve a. Ro kan duh vang ngawr ngawr pawh ni lovin tu hminga dah chhawn chi nge anih chu i hriatthiam ka ring' min ti a. Chutiang chu ka ni rilru anih chu! Ka inthlahrung tawh emai, i bulah min awm tir tawh mai rawh" a ti duah a.



Nu Nêmi rilru tuiêk zet chu ka man thiam ve nghal mai e. Sum duh lo inti chung siin sum duh vang chauha Rara-i hi buaipui ah ka ngai nghet hmiah tawh. A vahnu a nihna ang tal pawh hian hmangaihna a nei lo emaw ni !




Eng dang mah sawi lovin Rara-i bulah chuan "I rilru ti hah suh, kan innei dawn nia" ka ti nghal hmiah a. Nupuia neih chu ka duhthusam ania lawm. A inpeih hun ka nghâk a, ka nghah ber a inpeih tawh bawk a, kan innei thei tihna a nimai.



Chutah Rara-i chuan "Dik taka sawi chuan min buaipuitu te an ni miau a, min hmangaih lo mah se an tan tih theih ka nei anih phawt chuan eng thil mah ka ti hreh lo. Ka pu ro zawng zawng pawh hi khâwm se pawi tihna ka neilo. Mahse ka sawi tawh ang khan nakina harsatna lian tham thlentu tur ani tih ka hrechiang si a. Ka nu hian rosum vang in tih hreh a nei dawn lo. Chutiang bawkin ka nî dangte ho pawh hi an ni vek. Ni Nêmi te chungah hi chuan ka lawm ber tho, min ngaihtuah a, min enkawl miau a. Thil ṭha ber ber an phû. Mahse tunah chuan an sum hman sak ka duh tawhlo. Ka pu ro te pawhin tuman kan chang lovang" a ti leh duah a.




A rilru a buai hmêl takzet a ni. A dinhmun lai lutuk leh khirh khan ṭhin lutuk hi a lainatawm ngawt mai. Thil a lo ngaihtuah kim ve biai zel bawk si.




A samah chuan ka fâwp vang vang a, "Engtin nge i pu ro te chu tih i tum reng reng?" ka ti sup a. A chhûngte kuta dah a tum chuang bawk silo, ani'n neih a tum bawk silo. Eng nge a ngaihtuahna a awm ka hre ve phâk lo a ni.




Chutah Rara-i chu a lo nui sak a "Ka ngaihtuah fel vek tawh" a lo ti var a. Chal chuar tap a ka en chuan "Ka thurûk ani rih a, nakinah i la hre mai ang" a lo ti leh vat a. Ka zâwt lui duh ta bik lo.




An zavai tana ṭha ber turin a ngaihtuah fel vek dawn tih ka ring nghet tlat a ni.




Inneih chungchâng bawk chu kan sawi dun leh a. "Ka chhûngte ka lo râwn ang a, naktuk zanah palai ka lo tir ang" ka tih chuan a rilru a buai leh hmêl viau tawh.




"Ni dâwn tak e, engtin nge palai chu kan tih ang. Tunge lo dawngsawng ang?" a ti chuai raih a. Mal inti deuha awm tir chu duh lovin "I nî te hi kan be mai dawn alawm, a harsa lovang" ka lo ti sam thên a.




Nu Nêmi te chuan min lo hnial bikin ka ring lo. Rara-i a hautak zia a lo hriattir kher te chu ka run a. A enkawlna tur atan sum an ui a, beisei lêt nei ran a an lo buaipui ṭhin te chuan ka thin a khei a. Phurrit ang hrimin an lo ngai bawk a. Keiin ka enkawl zui mai ang.




Kan ngawi dun vang vang a, a bekah chuan ka fâwp leh tâwk ṭhin a. "Au Hriatpui" a tih chuan ka ngaithla tih lan tir nan a bekah ka fâwp leh zeuh a.



"Inneih chungchâng kha kan sawi ringawt a, ka hautak dawn asin. Engtin nge kan in enkawl zui ang. Dam lo reng ta ila engtin nge ni ang? Phai lam kal rengte ngai ta se. Chuloah Pa Sangzuala leh Nu Zualtei te chuan mo dam lo min nei ringawt dawn si a" a lo ti halh a.




A ngaihtuahna chu mi pangngai ngaihtuahna a ni. Mi harh vang tak, zak lo thei deuh ni mah se mi inthlahrung thei tak a nih zia hi ka hai lo. A ti lang chiam lo zawk a nimai.




"Engmah ngaihtuah hah suh, i in enkawlna tur chu ka thawk chhuak thei alawm" ka lo ti nghet charh a. Ka thusawiah chuan ka chiang viau bawk. A in enkawlna tur na na na hi chu ka thawk chhuak thei em em ang. Tuition ka pêk na piahlamah pawh a ṭul anih phawt chuan hna dang ka khawih tel mai ang. Tha sên ṭeuh ngaihna pawh nise a tan chuan ka tha leh zung zawng zawng ka sêng mai ang.




Inkhawm bana lêng ka nih avangin zan a tlai ve tawh ang reng a. Awm reina chî vak a ni tawh lova. Ka pa te ka râwn nghal ang a, a rang thei ang berin palai ka tirh tur thu te chu ka sawi leh zung zung a. A nî Nêmi ka biak tur thu ka sawi tel bawk a. A lo pawm ve thliam a.




A tukah chuan ka chhûngte chu ka râwn ta ngei a. Ka nu leh pa te chuan Rara-i an duh loh vang leh an huphurhna lam ni lovin an lo zuam lo rih khawp mai a.




Ka pa chuan "In theih chuan nghâk leh deuh lawk ula chu ka ti khawp mai. Dam lo chung chunga inneih chu Rara-i tan ber hian a ṭha lovang. A taksa in a zo lo mai ang tih a hlauhawm. Tunah pawh mi hrang ang kan ni chuang lova. Heti chung pawh hian phâk ang tâwkin kan ngaihtuah thei tho a" a ti duah a.




"Mahse in duh ngang chuan puitling in ni tawh a, in duh dan ka zah sak ang che u" a rawn ti leh a.




Ka chhûngte bulah chuan Nu Nêmi te rilru chu zêp si se ngaiah ka ruat ta lova. Rara-i rilru hahna te pawh chu ka hrilh ve ta vek a.



Chutia ka sawi tâkah chuan an lo hrethiam khawp mai. Ka nu phei chuan Nu Nêmi te rilru chu mak a ti hle mai a. A nuhrawn te leh a nî dangte nena an innghirngho na te pawh chu ka sawi tel ve luam avangin ngaihdan tâwk an nei thiam maiin ka ring.




Ka pa chuan "Anih chuan, Rara-i chu kan mawhphurhna anih chh! Palai turte kan bia ang a, kan lêng vat dawn nia" a lo ti hmiah mai a. Ka thaw huai mai.




Chutia inneih kan sawi tâkah chuan Vantei a lo phûr ngang mai a. Engmah sawi ve lo mah se a hmêl aṭang chuan ka hrethiam vek.




Nilai thawhṭan zana ka lên ṭum chuan Nu Nêmi leh Pa Lura te chu ka be hmasa ta a. Palai kal tir nghal ngawt ai chuan an lo inrin lawk nan hrilh lawk ka pawiti lo. Chu mai bakah palai lo dawngsawng tura ka biak an ngai hrim hrim a.




Mahse ka ngaih anv ngawt chuan thil a lo awlsam i khaw lo mai. Nu Nêmi chuan min lo hnial bur mai a. "Dam lo a ni a, pasal nei thei dinhmunah a ding lo" tih chu a thu tawp a ni.




"Nu Nêm, dam lo pawh nise ka iai hlei nem. Ka bula awm tir a, keimah ngeiin enkawl ka duh ani. Amah nen pawh kan sawi dûn tawh a. Kan pahnihah chuan harsatna a awm lo. A in enkawlna tur pawh ka buaipui vek ang. Khawngaihin remti rawh u" ngenngawl zet hian ka ti leh hram a.




Mahse Nu Nêmi chuan a thuthlukna sawh sawn mai mai a tum lo khawp mai. "Kum khat em pawh in la inzui hlei nem. Chuloah pasal nei tur chuan a la naupang lutuk" tiin chhuanlam eng eng emaw a siam ṭeuh a. Engvanga remti lo em em nge a nih pawh ka hre nek love.




Mahse ka duh dan sawh sawn ka tum bik lo a. Ka haw dawn chuan palai ka tirh tur thu ka sawi veleh hmiah a. Kan thu a in hmu lova, tur zetin min melh a. Ka ngai pawimawh duh bik lo.




Pa Lura erawh a ngawi reng a, mahse ka kal dawn tak takah chuan "Nangni berin in duh tlat si chuan palai lo dawnsawn te chu kan tih ve tur alawm" a lo ti ve thluam a. Tlêm chuan ka ngaih a ṭha ta deuh.




Nu Nêmi thu khawchang te chu hrilh lem lovin ka pa bulah chuan naktuka palai tirh ka duh tawh thu ka sawi hmiah a. I he lovin min lo pawmpui ve nghal mai a.



Rara-i pawh ka hrilh hre tawh a, a lo phûr ve khawp mai. Tunlai tak hi chu a dam ṭha rih viau mai a. Vellore an lo zuk kal ta kha a ṭhatpui rih ah ka ngai tawp.



Palai chu an zuk lêng ta ngei a, ka beisei sâng hran lo. Mahse Pa Lura kha ka ring hmiah a, an insawifel theih hram chu ka beisei tho.



Palai thu kan dawn leh hma in Nunmawiin min rawn call a, a pawimawh dawn tih ka hrethiam nghal.




Ka pick up rual chuan ka rin lawk ang ngeiin ka palai tirhte chungchang chu a rawn sawi a.



An haw chiah thu leh Nu Nêmi'n a lo hnial fithla ṭhak tih thu min rawn hrilh a. Ka lo rum chhuak hawk mai.



Nunmawii chuan "Hriatpui,tlang deuhin ka sawi ang a. I rin aiin thil hi a harsa dawn ania aw. I zuam ang ngawt kha a ni lovang. Ka nu hian Rara-i hi thlah zalen mai mai a rem ti dawn lo. A rilru puthmang zawng zawng hi hrethiam phei la chu a hlauhawm teh ania. Thluaka sum lût tawh laklawh mihring chu tih ngaihna an awm lo. Sum hian an nunah thil a ti thei lutuk. Duh aiin i ngaihtuah tawi deuh ani. Rara-i nen hian innei vaih ula chu ka pu ro zawng zawng in khawm dawn tihna ania. Tin, Rara-in inphenna tur a nei tawh dawn bawk che a. Chutiang thil te chu ka nu hian a ngaihtuah thleng vek a ni" a rawn ti duah a.




A pu ro an sawi ve sek hi eng tiang chiaha hlu nge maw anih le? A dam laia an chenna ṭhin bak kha ram a neih vak ka hre silo. Chu ringawt pawh chu sum duh tan chuan ît tham ni tho mah se a neih tum bur ang zawnga khawsak nan chuan a zialo lampang hretin ka hria.




"I pu rokhawm hi eng tiang chiah a hlu nge ni a?" ka ti ta hluk a. Ka duh aiin ka âw a bul mah mah. Ka ning ve tawh em bawk a ni. Hetiang sum chungchânga buai reng mai chu a hahthlâk.




Chutah Nunmawii chuan "Rara-in a sawi lo em ni? Ka pu te hi an thlahtu te aṭangin Aizawl mihlun an nia lawm. Ka pû pa khan ka pû hming hian ro sum engkim a dah a. Ngaih loh lamah ngai lo la Aizawl khawchhungah hian ram a ngah bakah thingtlang hmun hrang hrangah pawh a nei nual asin. Ka hriat ve chinah ringawt pawh a tam ania. Ka nû te, a chhui a chhui tan phei chuan an hre hnem dawn lutuk. Chung ram te chu hralh ta se hausak lawih na tham a ni ve asin. Chu chu lo ni lo ta teh reng pawh nise mi sum duh na ngiang tân chuan tlem lua a awm hlei nem. Kan chhûngkaw chungchang mah nise tlang takin engkim ka hrilh vek che anih chu" a rawn ti duah a.




Hmana ka pa thusawi ka hrechhuak zawk mai. Pa Sanghminga chungchang tho hi a ni, "In hmun lo ram an ngah bakah an khawsa thei ania. Chuti chung chuan engkim chân huamin Pathian rawngbawla a hnungzui a thlang a, a ngaihsanawm asin" a tih kha ka hrechhuak a.




Nunmawii chuan a rawn nem nghet ta chiah mai.



Phone aṭang chuan thil ri rawk thâwm ka hre zui a. Nu Nêmi âw ngei maiin "Rara, hetianga awm hi i inthlahrung zawk lo em ni?" a tih vin ṭhak ri chu ka hria. Ka kawchhûng a che nghal dawt mai.




Chutah Nunmawii chuan "Nakinah ka lo be leh ang che" tih leh phone dah chu ka rual nghal a. Ka ṭawng tum uaih tawh chu ka thaw chhuak zui hawk a.




Nu Nêmi'n Rara-i a vinna khan ka awm a ti nuam lo nghal vek thei. Mahse Nunmawii a awm a, thil pawi lian tham a thlen loh hram ka beisei.



Chutia ka inngaihtuah lai mek chuan kan palai tirh te lo lut thawm ka hre zui a. Room aṭang chuan ka va chhuak ve vat a.



Pa Manuna chuan an inbiak dante chu a sawi dap dap a. Nu Nêmi chuan a dam loh chhuanlamin a lo hnar a ni âwm a. Ka hriat lawk sa vek ania mak pawh ka ti hran lo.



An haw hnu chuan ka pa nen thu khawchang kan sawi dun leh a. Ka beidawn duh miau loh avangin kawng dang min dap pui a. Ka nu pawhin min khawngaih hmêl khawp mai.





"Keiman Nu Nêmi chu ka be ṭha leh mai ang" lungawi vak lo hian ka ti a. Mahse ka pa chuan min lo hnial vat thung a.



"A la rem rih lo te pawh a ni ve thei tho bawk a, nghah lawk a ṭha in ka hria. Hetiang dinhmuna in din avang hian tih loh lohte in lo ti palh ang e. Hman ṭum ami kha tâwk ka ti viau ania. Pathian pawi sawi zawnga khawsak zui loh lo tum phawt mai teh " a ti a.




Kan inruk ve ngawt zan a sawina kha a ni tih ka hria a. Sawi zui tur vak pawh ka hrelo. Mahse ka rilru chu a hmanhmawh hlur tawh mai.




"Remti ta tlat lo se" lungawi vak lo hian ka ti leh a. Chutah ka pa chuan "Tih dan kan ngaihtuah dawn alawm" a lo ti dam thlup a.




Ka nu pawh Nu Nêmi te lakah chuan a lungawi vak ta bik lo aniang a vawikhat nan a rilru a sawi chhuak ve a. "An ni ang bula Rara-i awm tir reng chu ṭha ka ti hauh lo mai. A nuhrawn bula a awm lai ai khan buaina in ṭham ru a tam zawk a. Kut inthlak zawng leh ri hluai chî ni lo mah se an buaina a ril tlat" a lo ti ve duah a.




Ka pawm zâwng tak ani, Rara-i hi kut thlak kher lo mah se a ṭawngkam peh hel tak, mei nei si hmang hian a hliam em em ang. Zaninah lah khan eng nge thleng ka hriatpui ve tawh der mai si lo.



Room-a ka luh leh hnu chuan Rara-i ka call nghal a, vawi thum lai ka call hnuah pawh a la ring ral ṭhak ṭhak mai.




Ka ngaih a ṭha thei ngang lova an in a zuk kal mai chu ka tum a. Mahse chutih kai lai tak chuan min lo call back a.



"Aw Rara" ka ti nghal thawr a "Au Hriatpui, engtin nge kan tih ang?" a rawn ti ṭiau a. A ṭap tih ka hrethiam nghal mai.



"I ṭha em? An hau lo che tiraw? Engtin nge an tih che?" ka ti nghal zung zung a. A lo insut hraih a. Ka rilru hi a va'n tibuai hneh tak !




"Keichu hmun danga awm daih mai ka duh. Helai hi nuam ka ti tawh lo" insut reng chung chuan a rawn ti ṭiau a.



"Nî Nêmi chuan a rilru a thup sêng tawh lo, a der pawhin ka chungah ṭhatna a lan tir duh tawh lovang. Au Hriatpui engtin nge ka awm ang?" a rawn ti leh a. A ṭap chhuak nghal hawk mai.




Ka hmai chu ka tuai nghan puat a, ka thaw chhuak leh hawk bawk a. "Lo lungngai lo la, i chungah engmah ka thlen tir dawn lo. Min ring tawp rawh, kan innei ang" ka ti nghet charh a.



"Ka lo hruai mai dawn che em ni?" mumal lo zet hian ka ti leh a. Min lo hnial rang kher mai "Aih, tunah chuan a chî loh, ka nî lungawi lohna kan ti punlul mai mai ang. Kan inneih theih si loh chuan engtin nge ni ang?" a rawn ti ṭha leh a.



Belh tur dang a nei silo, a rilru buai dan tur chu ka hai lo. Keimahah nasa takin rinna a nghat a, ka tibeidawng hauh lovang.



"Ka awm chhung chuan i duh dan vekin thil a thleng ang. Ka nupui tur i ni a, i pasal ka ni dawn. Chu chu ka tiam che anih chu!" ka ti nghet charh a.



Zanina a nî khawsak khum dan vel chu amah zawh chi ah ka ngai lova. Mahse Nunmawii chu zawh ka tum tho. Thil engkim min rawn hrilh hre bawk a, a sawi hreh hauh lovang.




Rara-i nen kan inbiak zawh chuan Nunmawii chu ka be ta nghal a.



Engmah zep sit set nei lovin a rawn sawi fai ta kelh mai.



"Ka nu chuan a hau zek alawm. Hrehawm a ti viau ang, ka thiam ang tâwk chuan ka hnêm ve a, mahse awmzia a awm thui lo khawp ang. Aaa... Hriatpui, mak ka ti hial zawk, ka nu ṭawng duh dan kha. Rara-i chu phurrit ang maiin a sawi a. Pasal neih hautak zia leh nei thei dinhmuna a din loh zia te a hrilh duah a. Ṭha tê tê a sawi dun pui chu a awm lo ve khawp mai. Thil ṭha ber chu innei vat mai teh u. Kawng dang a awm lo, Rara-i hi chu i bulah awm sela, in chhûngkaw zingah awm se ka ngaih a ṭha ber" a rawn ti duah a.



Nu Nêmi ṭawng dan vel tur chu sawi nawn ngai lovin ka hrethiam mai e. Mihring mize chhungril tak tak hi thup hlen theih a ni miau lova, a rawn puak chhuak ta ngei e.



Nunmawii hnenah chuan thil engkim min hrilh hriat zel avangin lawmthu ka hrilh ve luam a. Ka lawm tak tak bawk a. Rara-i nen kan pahnih tana mi pawimawh tak a ni tawh a. Huat chu sawi loh kan tana mi hlu em em ah ka ngai tawh a ni.




Mahse a inthlak danglam tak em em chhan erawh hi chu ka hre chuang lo. A hma nen khan an inang tawh miau si lova.




Zawldawh chhuahin Nu Nêmi te chu ka pa nen kan zuk be leh a. An inah lên chilhin hmaichhanah kan bia a. Ka pa chuan puitling takin a titi pui a. Mahse eng thu mah kan sawi kaw lo.




Nu Nêmi chuan a rilru dik tak phuh chhuakin Rara-i rokhawm chungchang chu a sawi chhuak ta alawm le.



"A neih in duh vangte hi a ni lo maw, chhungkua kuaa in rawn hêl ni? A dam lo veleh zel bawk nen kal ta thut se a ro khâwm theih in in beisei em ni?" min lo ti salh mai chu ! Kei ai mahin ka pa ka ngaihtuah. Keimah vanga chutiang ṭawngkhumna a dawng chu ka inthiam lo hle bawk .




Mahse ka pa chuan "Pathian nei tu tân eng thil mah neih belh leh chuan a ngai tawh hlei nem. A ram leh a felna zawn hmasak phawt hi chuan engkim min pêk belh mai a ni. Rara-i hi ka fapa tân ka duh a, a bak a awm lo. Rara-i a nihna ang tawp hian kan duh ani" a ti dam thlup a.



A thusawi duh dan chu zahawm ka ti a, elhsen taka ṭawngkhum let miah lova a la zawldawh em em te chu ka ngaisang takzet bawk.




Nu Nêmi hmu tur hian keimah chauhvin kal ila chu min ṭawngkhum dan avang khan ṭawngkam na taka ka ṭawngkhum lêt ka ring a ni.




Mahse Nu Nêmi chu a lo la inti pauhkhauh lui ve tlat a. "Chutia amah chauh in duh chuan a neih ang ang hi kan kutah min pe sela in nei dawn ania. Rosum duh vang pawh ni chuang lovin amah chauh in duh ngei tih fiah nan" a ti hram a.




A ka hi chuan sum a duh lo, mahse a rilru zawng zawng luah khattu a ni lawi si a ni.


Chuti taka sum duh chu Rara-i ka titipui ang a, ka sawi fel pui mai ang tiin rilru ka siam fel ta a.



Rara-i pawh chu phone call hmangin ka titipui ta ngei mai a. Mahse a ni kuta a pu ro dah chu a lo duh ikhaw lo mai. Min hnial fithla ṭhak a. Kan thu a inhmu lo nghe nghe a.




Ka thinrim luatah ka duh loh dan puiin ka ṭawngkhum a "I Pu ro chu kei ai pawhin i lo duh zawk te hi a nilo maw" ka ti salh a. A ngawih zui tak daihah chuan ka ṭawng tam hret tih ka hre nghal a.



"Rara..." inthiamlo deuh hian ka ti zui a "A pawilo" a lo tih sep te chuan min inthiamlo tir zual.



"Ka tihpalh, ka thinrim vang anih kha. Khatiang rilru i put tak tak kha ka ring lo ania. Min hrethiam rawh aw" ka ti buai nuaih a. Ka ṭawng bah nuaih te chu ka va han inhmeh lo tak !



Chutah Rara-i chu a lo nui ri hak a. Min elhsen zawnga nui a nilo tih ka hria.




"Ka pu rokhawm hi ka duh ber a ni miah lo ania. Keichu ka dinna ngaiah ka la ding reng. Ka chhungkaw tana ka tih theih sang ber ka ti mek zel anih hi" a ti dam dap a.




Sawi zui tur pawh ka hre vak tawh lo.




"Kan innei tho ang" ka ti ta ngawt a. "Ka ring che alawm. Mihringte hmanhmawh viau mah ila Pathianin rem a la ti rih lo te pawh ania nge" a rawn ti a.



Ka rilru a hmanhmawh loh phah chuang si lo.



Kar khat a liam leh chuan buaina a pun lul leh ta sawt a. Hriat theih khawpin Nu Nêmi chu Rara-i chungah a ṭuan a. Chawimawii lah Mizoram a lo lêt tawh bawk nen an nufa chuan Rara-i chungah sual an chhuah a. Ṭha thluam anga lang tho siin awmpui cheibawl in Rara-i chu an cheibawl a. Ka hriat chhan pawh Nunmawii vek a ni. Amah Rara-i tak chuan engmah a sawi ngai lo.




A hriselna a pan sa tehlul nen an chhawr rim vak chuan a na zual ang tih ka hlau si a. Nu Nêmi te in aṭanga lak chhuah dan kawng ringawt chu ka dap ta a. Mahse belh tur fumfe a nei bawk si lova tih dan chu vâng tak a ni.




Kan chhûngte bula awm tir ngawt lah ni theiin ka hre bawk silo.



Ka chhûngte chuan thil engkim min hriatpui vek a. Kan pahnih inkar buaithlâk lutuk chu min mangan pui ve tih ka hria.




Vantei phei chuan a ṭhiannu a lainat lutuk leh kan pahnih inkar buai zel te chu min lainat avangin inru mai tur pawhin min ti hial a.




Chutiang thu Vantei meuhin min râwn chu mak ka ti. Mahse kan dinhmun hrechiang ve em em tu a ni a "Pathian pawhin a dem em em bik tawh lo ang che u. A duh dan thlapin hun in hmang ve tho alawm" a ti hial a.



Mahse Rara-i nen chuan mawlhtu kan nei tlat a, inruk chu kan tum buai tawh lo.



Zan khat chu number hlang aṭangin phone call ka dawng teh nawlh a. Thil pawimawh anih ringin ka pick ve mai bawk a.



"Hriatpui, nangmah tiraw?" a rawn ti a, a âw chu ka hriat tawh hnu a ang. Mahse ka hrechhuak mai theilo.



"Aw ni e" ka lo ti ve mai bawk a. Chutah lehlam ami chuan "Keimah Rara-i nû" a lo ti var a. Chutia min rawn be teh thut chu min ṭhawng ngang mai.



"Aw eng nge ni?" hamhaih deuh tak hian ka ti a. "Eng lo ania, Rara-i nen inneih in rêl deuh em ni?" a rawn tih chuan a hma zawng aiin ka hamhaih leh zual.




Engtin nge maw a lo hriat daih daih le?




Mahse zêp buai lovin thudik ka hrilh tlang tawk a "Inneih kan tum alawm" ka ti churh a.




Chutah Nu Ramtei chuan thil a rawn ruat fel ta zung zung mai. Nu Nêmi'n palai a lo hnar thu nen lam chuan a lo hre vek a. "Rara-i chu naktukah ka hruai haw ang a, ka hnênah palai in rawn tir dawn nia. Engmah harsatna a awm lo ang" a lo ti fel thliam mai a.




Min va han ṭhawng tak !




"Maw" ka ti hu a, ka hamhaih luatah sawi zui vak tur pawh ka hrelo. A thusawi lah kha hrelo ka ni lova, ka hriatchian lutuk vang zawk ani.




Nu Ramtei chuan "Khatin hamhaih deuhin awm teh suh, mihring ve tho ka nih hi. Ka zêp lo, Rara-i chungah hian ka ṭha ngai lo. Mahse inneih in duh chuan ka pui ang che u. Rara-i man chu ka dawng ang, ka hrin ni lo mah se ka enkawl seilen a ni a. Ka mawhphurhna alawm" a rawn ti leh duah a.




Engtia lo dawnsawn chî nge pawh ka hrethiam tawh lo. Lemchanna leh bawk pawh a lo ni thei tho a. An chhungkua teh nuaih hi, ka hrethiam hauh lo mai.




Rara-i ka biak leh chuan a nu nen an lo inbe fel diam tawh a, mak ka ti lehzual.



Rara-i lah chuan "Kan awmdun theihna tur anih chuan eng kawng pawh ka zawh mai ang. Pathian thu kalh zawng anih loh phawt chuan. Ka hma ka sial ve ran tawh dawn" a lo ti hmiah mai si.



Ka tan a inhuam thui ta em em chu ka lawm khawp mai.




Thil reng reng chu a thleng nghal zung zung a. Rara-in a ni te in a chhuahsan dawn ni chuan ṭawiawm tura kal ve ngei ka duh a. Mahse amah zawkin min lo hnial a.



A hnua Nunmawii hnen aṭanga ka hriat leh danin a nu chuan ṭawngkam hnehsawh zet zetin a ankhum a ni âwm e. Tin, nihnih thum vel liam ta aṭang khan an in atanga chhuak turin a lo nawr daih tawh hi a lo nia. Nunmawiin min hrilh chuan ka hre ve chiah. Tih theih a neih loh vanga hrehawm a tih thute pawh a rawn sawi ve mawlh mawlh a.




A hnen atangin chanchin ka hre ṭhin ringawtte kha ka lawm tâwk a tling tho.



Tichuan, rem lohna awm miah lovin palaite vawihnih lenna ah chuan kan inneih hun turte chu an sawifel ta vek a. Hnar a hlit phawi ang huai ka ni ta !




Rara-i lah chu insawiselna lian tham a nei tawh rih bawk si lova. Kan inneih hun tur chauh kan thlir tawh a. Kan inbuatsaih mawp mawp a ni ber.



Ka hmalam min hmuaktu hre lawk lo mah ila hlimna ka beisei a ni.



_____________*_________*___________


(Chapter hnih vel bak a awm tawhlo aw)


Show post links
Top

[Ngaia]

AIZIAL
By CVL Awmpuii

Eng tham mah ka lo ziah belh lo tih ka lo sawi lâwk tawp, a tâwp note khu chhiar ngei ngei tur aw. A tâwi bawk si min ngaidam lawk mai teh u. Ka zawmna lai ka chhinchhiah lo aw.

Chapter 32



Rara-i chu hun reilotê hnu ah ka ta a ni mai tawh dawn tih ka hriatna chuan hlimna tam tak min pe a. Ka nun in hlimna tâwp khawk a tawng haw chho mek zel a ni.




Ka nitin hun hman reng reng chu duhthusam ang vek hi a ni a. Harsatna leh buaina ka nei lova, lungngaihna tur reng ka hmu lo. Pathian hnenah pawh lâwmthu ka sawi fo a. Ka dilna te hlawhtling chho mek zel chuan Amaha rinna nghat zual thei turin min siam a.




Engkim ka thlen ṭhin a, ka mamawh ang leh ṭha tur zawk zelin ro min rel sak a. A rorêl dana vui leh chu ka tum tawh ngai lo.




Rara-i nen kan inkar a ṭha em em a, a ni têlin ka hmangaihna a zual a. A ni pawh a hlim tih ka hria.



Mahse Ani te nen an inkar a chhe sâwt hle thung a. Nu Nêmi hian a chezia engkimah sawisêl tur a zawng a. A nu bula a lêt leh daihte chu a haw em em a. 'Kha chen kan lo enkawl ve tawh na te kha a loh thlawnin a luang ral a, engmah a hre zui tawhlo, lawm nachâng hrelo mihring ' a ti hial a.




Beisei let nei a midangte puih chuan kan beisei anga thil a thlen lohin mahni bawk kan lungawi lova, keimahni bâk kan intihrehawm ṭhin lo. Chuvangin beisei lêt nei lo hian midangte pui ila, Pathian zawkin engkim a lo hria a. Kan mamawhna zâwnah chuan thil engkim kan dawng lêt mai ṭhin.




Mahse chutiang chu Nu Nêmi ah hian hmuh tur a awm ve lo. Beisei let nei ran chunga Rara-i a lo buaipui vang a ni mahna.





Lehlam kawng zawng takah chuan a chungah hian lâwmna tur ka hmu tho. A chhan chu Rara-i buaipui a ngaih zual laia lo buaipui char char tu kha a ni ve miau a. Beisei let nei ran chunga ti ni mah se Rara-i a enkawl danah chuan lâwmthu sawi mawlh mawlh tur kan ni.




Rara-i pawhin a haw lova, a inthiamlo em em zawk a. "Ka nu bula ka awm duh tawh loh vangin ka ni te ka bêl a. A hnuah ka duh ang neih theih nan ka nu bawk ka pan leh tho a. Ka ni lungawi lo lutuk pawh hi ka dem lo. Ka hma ka sial viau em le?" a ti fo ṭhin.





Chutiang ngaihtuahna a nei pawh chu mak ka ti hran lo, thil âwm ve reng a ni. A ngaihtuahna chu mi pangngai ngaihtuahna tur dik tak a ni.



Mahse chutiang chuan ka ngai ve hauh lo thung a. Amah pawh inngaihtuah mumal thei lovin kha leh chen a awm a. Tuna hmasial a intih na pawh hi hmasialna ka ti phal lova, a hlimna tur a ûm ve tawh tihna a nimai. Chutah chuan ka dem miah lo.




Chuloah, Nu Nêmi zawk hian beisei nei ranin an inah a hruai lût a. A bum thlu hman lo hlauh zawk angah ka ngai mai.



Thawhṭanni tûk a ni a, Rara-i nen bazar a chhuah dun kan tum a. Zîng hma takah thovin phur zet hian ka intifai surh surh a. Tunlai chu lungawi lohna tur pakhat mah ka hre lo. Thil engkim hian ka lung an ti awi vek mai ni.



Tukṭhuan ei lai te chuan ka khi reng a, ka chhungte'n min fiam min fiam mai. Ka nuih liam pui mai zel a.



Vantei'n "Vawiin chu ka lo zui ve dawn che u" a rawn ti chiah chu "A ngailo" ka lo ti bul hmuk a. Ka chhâng rang mah mah a ni. A hmêl ka en chuan a uang tih ka hrethiam chiah. An zavai chuan min nuih ta hawk hawk a. Ka zak ve reng mai.




Rara-i chu dar 10 velah ka zuk lam a, Bike aiah ka pa car ka keng a. Rara-i hian Bike chuan a la harsat reng a, a inhmeh lo ka ti fo ṭhîn. Ka phurh hmasak ber ṭum kha ka ngaihtuah chhuak ziah a. Khata ṭang khan ka rin loh dan deuh deuh mizia min hmuh fo ta anih kha !




An inchhunga ka luh rual chuan Nu Ramtei'n ṭha takin min lo chhâwn a. Lemchanna pawh lo ni se kan tan a pawimawh rih em a, ka be chhe ngai lo. Ṭhat a chhuah na te hi a tak tak ni ve tawh hram se ka ti khawp mai.



"A insiam mek a, lo nghâk lawk mai rawh" a lo ti nghal zung zung a. "Vawiin i office lo maw?" ka tih chuan "Sawrkar chawlh alawm" a lo ti mai a. Ka hrechhuak veleh chiah, sawrkar chawlh anih vanga lêng chhuak thei tur kan ni zawk a. Engtin nge maw ka theihnghilh theih zawk ni.




Rara-i pawh chu rei ka nghah hmain inchung aṭang chuan a rawn chhuk thla a. Tawnzau chhah ve pangngai a ha a, a chungah kamis dum pantê a ha a, smart pants dum nalh zet, a pian chawi em em hi a ha hawk a. Sneakers vâr nalh zet a bun bawk a. A inthuam dan chu a inhmeh takzet a ni. A sam a boys cut kha a lo ṭhang veleh deuh tawh a, a landan chuan min hîp a ni tawp mai.




Pâwn a kan inzui chhuah hnu chuan a bengbulah ka phun sup a, ner nang hian min lo nuih a.



"I mawi" ka tih nawn leh chuan "Ka sexy em?" a lo ti sa sa a. A hmelṭha teh vawt lehnghâl a.



"Sexy tih piah lam" ka tih chuan a lo nui var var a. Kamis dum hi inhmeh ka ti a, a lang sexy ka ti ṭhin. Chu thu chu ṭum khat ka hrilh tawh a, a hre ta reng a. A ha uar zui nghal em em bawk.



Bazar lam pan chuan kan tlân zui nghal a, Babu tlângah car chu ka park a. Bazar kan luh tak tak hma in Miniso ah chuan kal a rawt a. Helai hmun hi hmeichhe ho lawm zâwng a tam nge kal takah an nei fo mai a. Rara-i nen pawh hian ṭum thum vel chu kan kal dun tawh. Thil lei châng kan nei a, lei lova chhuah leh ringawt châng pawh kan nei tho. An thil zawrh en kual vel hi nuam a ti ve hrim hrimin ka hria.




Kan luh chuan nula leh tlangval ṭhenkhat inzui pawh an lo awm ve a. Hmeichhe ṭhianho kal te pawh an awm ve nawk a.



Rara-i chuan face mask lampang a en a, ka en pui ve zel a. Naute lem te chu a keng chhin vel a, a hmet kual neuh neuh a. Pakhat chu a la a, a dah a, a la leh ṭhin a. Ka hriat sual loh chuan a duh niin ka hria.




"Lei ila" ka tih chuan a dah leh vat a "Aih" rang zet hian a lo ti a. Keimah zawk chuan ka laksak a, a kutah ka hmehbel zui a "Ka lei ang che, i duh anih kha" ka ti sup a. "Au Hriatpui" inthlahrun hmêl deuha a tih chuan "Khatia awm kha i inhmeh lo, zak der vel suh" tiin ka lo zui suk a.




A lo ner nang danah a ngei tâwk a tling leh em em tawh tih ka hrethiam nghal. Mahse ka lo lâwm sauh thung. A chhan chu ihe lovin ka thil leisak tur hi a pawm nghal dawn tih ka hriat vang a ni.



"Aw, min lei sak mawlh rawh. I sum chên turin alawm kan bazar" a lo ti hlak a. Naute lem chu a pawm ṭha sauh sauh a. A mizia ka hrechiang tawh bawk a, ṭawngka a thunun dan hi chu ka thiam tawh lutuk ringawt. A hmuh loh lai chuan ka nui suk suk a.




Naute lem lo pawh thil kan lei nual a, mahse ka pawisa engmah a hmang duh leh chuang miah lo. Naute lem chauh kha ka thil leisak chu a nimai. A dangah chuan a pawisa a hmang vek.




Bazar pui ah chuan kan chhuk thla ta a, mipui an lo zi hut hut a. Chutiang karah chuan kan inzui ve hnak hnak a. A kuta chelh ka tum chuan a duh leh tlat tawhlo. Ngaihdan nghet deuh hi a nei ve a, heti hian chhuak dun ve fo tawh mah ila mipui zinga inkaia kal te hi a duh miah lo. 'Ka zak' a ti tlat zel a, a mizia nen hian inhmeh lo ka ti ṭhin khawp mai.




Mahse 'Kan inneih hunah kan inkai ṭhin dawn nia' a ti ziah thung a. Eng eng emaw dân hi a zam ve a, zawm sak loh chu ka duh bik ngai lo.




Thlasik kan hnaih tawh avangin coat fual ho chu a enkual dan dan a. A duh zawng a hmu hlawm lo aniang, rei deuh kan en te pawh chu kan kalsan leh nal nal zel.




Jacket ka en lai chuan ka bengbulah min rawn hrilh ru sa sa a "Ka ril a ṭam tawh" a rawn ti a. Ka jacket ken lai chu ka dah nghal a, thil ei turin kan inzui leh nghal a.



Thingpui dawr pangngai takah kan lût a, a tui tih ber chow satui leih a chah leh hmiah tawh. Hei pawh hi kan inngaihzawn tirh a kan bazar dun hmasak ber aṭanga ka hriat ania. Restaurant changkang pangngai ve taka kalpui ka tum a. A lo duhlo nasa mai a 'Chow satui leih ei theihna turah ka kal duh' a ti hmiah mai.



A kum tel dawn kan inhriat ve tawh hnu leh kan lo inzui ve tawh hnu pawh hian amahah thil thar ka la hmu zel a. Mi ṭha famkim ni bik lo mah se ka tan a ni tluk an awm loh zia ka hre thar leh ṭhin.




Thil kan ei zo a, bazar lamah bawk kan inzui thla leh a. Eng eng emaw chu kan lei ve nual a. Tun ṭum kan bazar chu inneih thil vela bazar kan ni lova, kan pahniha hun kan hman dun duh vang hrim hrim a bazar kan nia. A nuam dangdai ve hrim hrim.




Zanah pawh ka lêng leh nghal zat a. Nu Ramtei chu hna hmanhmawh thlakah an rawn ko leh a. A chhuak daih a, a sawi dana a awm te anih chuan zanlai velah bak a lo haw hman lovang. Hun kan ngah dûn hle tihna anih ber chu !



Chutia kan pahnih chauha awm ta chu kan insi chial reng a. A titi siam siam a, keiin ka lo ngaithla thung a. A thusawite chu ka beng lehlamah a lût a, lehlamah a chhuak leh nghal zel. Ka ngaihtuah hlei thei lo a ni ber.



Kan insi reng bawk si a, ka ngaihtuahna ah thil dang daih a awm a. Chutia a ṭawng siam siam lai chuan ka kuai her a, mit min lo san khum ak rual chuan ka nuih suk a.



A biangah ka khuap a, ka fawp zui nghal a. A tirah chuan dam deuhin ka fâwp a, ka duhthawh tial tial a. Ka kut pawh a hlei sâwt hle. A ni pawhin min lo dang bîk lova, duhthawh zet hian min lo fâwp let ve tan tan a.




Mahse awke a rawn hram thut a, a phu nasa lutuk chu a inlahrang nghal hlawk a. Kan thaw chhuak dun ham ham mai. Kan in en a, kan nui ta ringawt a.



Chu awke ka huat zia chu pui tak a ni. A mood a chên tir leh tumin fawh zui leh mai ka tum a. Mahse min lo dang vat a, "Midang an awm si lova,tih loh loh kan ti palh ang" a ti a. Ka ti lui ta bîk lo.




A hnu deuhah chuan a laptop a movie en a rawt a, a room lamah kan inzui chho a. Rilru thianghlim deuhin min hruai lut tih ka hria, mahse mipa lo ni ta fam chu ka rilru a Sodom leh Gomorra ruih mai a. Zanin ka rilru zet chu inhmeh lo ka inti a, mahse ka ngaihtuahna a luahkhat miau si a. Chance ṭha lutuk kan neih vang te pawh a nimai thei. Chutihrual chuan kan inneih hmaa khawih chhiat chu ka tum hauh lo thung.




A khumah chuan hahdam zet hian kan ṭhu dun a, Laptop chu a on a, a movie duh ber 'A walk to remember' chu min en pui a.



"He movie hi chu ka en ning theilo" a ti a. Movie hi ka en ngai vak lova, hun ka nei lo ve bawk em a. Ka en chhun ho chu insual buai buai te a ni tlangpui a. Mahse he movie hi chu min hrilh fo avangin ka hre ve zul tawh. En ve tawh ang chiah hi ka nimai.




Chutia tui taka a en lai chuan keiin amah ka lo thlîr char char thung a. Zanin zet chu a duhawm zual a, tenawm lam ni lo se ka ît ti tawp mai ang.



A inrin hma hauhin a Laptop chu ka khup sak thawk a, hamhaih zet hian min lo en a. Ka lo nui suk a hmuh rual chuan a ṭeu nghal hlar mai.



"Ka en tui asin" ṭawngkam nêm vak lo hian a ti a. "Tunah chuan ka duh zawng ti ve tawh ang" tih leh a Laptop dah sawn chu ka rual a. Khum bula dawhkan tê ah chuan ka dah nghal daih a.



Rum deuha min lo melh lai chuan a ke ah ka pawt thut a, a ṭe nghal ṭhat mai. Chutia ka pawt mu ta chu ka bawh zui nghal rûn a. Ka nui suk suk tawh mai sia.




A hlauthâwng ta deuh nge "Min sual i tum em ni a?" a ti hap a. A mitmeng lian kel kawl chuan min melh kiau bawk sia, ka nuih a va han ti za tak.



"Ni deuh mai e" ka lo ti sam thên a, "Khawi maw tho teh, i rit?" tiin min nem sawn a tum a, a hlawhchham chiang asin.



"Hey...kal teh, ninawm suh aw" a ti hmarh hmarh a. A kut chu a lu chungah ka nem bet nghal a, rum zet hian min melh ram ram a.



"Ka fâwp ringawt ang che" ka tih chuan "Ka chhang chuang lo ang che" a lo ti ve nghal zat a. A âw chu vin ṭha ve hlik hlek tak a ni.




Ka nui chhuak nghal hawk hawk a "Chiah maw? I insum thei meuh ang maw?" ka ti a. Ka thusawi chu a run hle ni tur a ni, a rum chhar chhar a.



A tal leh phat rual chuan ka fâwp nghal hmiah a. A khawng nghal awt a, min nam sawn pawh tum tawh chuang lo hian a lo dawh mâwl tawp a.



Rei ngial ka fawh hnu pawh chuan min chhâng let duh ṭhak lo anih chu! A va han luhlul ngit nget tak !




Ka inlahrang ta nge nge a "Vanrawngbawl, min chhanglet rawh" ka ti hluk a. Tham lo zet hian min lo ner khum a, ka va han haw tak !



Ka fâwp zui leh tawn tawn a, min la chhâng let duh ṭhak lo anih chu !



Ka inlahrang leh ta nge nge a "Ka sawi kha" ka ti leh hluk a, ka âw chu bul ṭha tawh tak a ni.



"Min turn on pha lo" a lo ti ham ham anih chu ! "Chiah maw..." ka tih chuan "Chiah e" ngaihsam zet hian a lo ti leh a.



Mipa tâna a run thlak zia chu ka mipatpui te bawkin an hrethiam ang.


Ka melh run run lai chuan a lo nui hak a "Min ngên rawh" cho zet hian a rawn ti a. "Min vîn hluk hluk lovin min ngen rawh" a lo ti leh salh a. Mitmeng lerh zet hian min melh bawk a. Ka thisen a lum pup pup mai.




A biangah chuan khuapin dim zet hian ka fâwp leh a. A hmui chu a rawn ti che ve duh eih chuanglo.



A hmui la si reng chung chuan ka phun sup a "Khawngaih takin Rara..." ka ti ta thlâwt a. Ka hmui ti che a ka fâwp leh chiah chu nui lum hak chung hian ka tukhum samah a rawn ṭham a. Min lo chhanglet ve nghal tan tan a. Engtik laiin a kut ka chelhbeh reng kha ka thlah hman pawh ka hrelo.




Duhthawh zet chuan kan infawp ta ngawng ngawng a. A lo thaw ri ve hiam hiam te chuan min ti zau thau a, duhthusam in ka thisen chu a lum ṭha takzet a ni.




A âwm bawr ka ṭham rual chuan a lo nui ri hak a. A kawr chhanah mai duhtâwk lovin ka zen lut a. A lo thaw ve hiam hiam te chuan ngaihtuahna mumal min neih tir thei lo.



A tâwp thlen mai duhna hi ka thinlung ah chuan a rawn awm a. Min dan hlau lutukin ka thiam ang tawkin a âwm bâwr chu ka khawih a. Thunun tum lutuk hian ka fâwp zui ngawng ngawng bawk a.



A kekawr kâwng ka khawih tur chiah chu ka kut a lo man ta chat a. Ka rilrua awm chu kaltlang pui ka la tum ta tho a. Mahse ka nawr luih theih loh khawpa nghetin ka kut chu a lo hmer ve tlat a.



"Tâwk rawh se" thaw chhuak hak chung hian a rawn ti a. "Thla khat vel chiah nghah kan ngai tawh" a rawb ti leh halh a. A âw chuan min thunun a ni ber mai. A âwmah chuan ka hmai ka nawr vak a, ka lu chu a lo tuai ve thuak thuak bawk a.




"Ka lâwm e" a lo ti sep a, ka lo nui nghawr dat a "A teuh tawh asin le" ka tih chuan min lo chum ṭaih a.



Ka thawk dan a pangngai hnu chuan a bulah let thla in ka âwmah ka kuah zui vawng vawng a. Ka tân a he hmeichhia hi a hlu a ni !




"Ngen chhuah kher i ngai a?" ka tih chuan a lo nui hak a. "Kan inneih hunah phei chuan thai bawih i ni ang a, ka thunun dawn che" a lo ti uang a.



"Kan inneih zanah chuan min ngên ang" ka lo ti hmiah thung a. Za zet hian a rawn nui a "Ka turn on pha lo che emaw i tia, i hre khawp ang" ka ti leh a.




Chutah Rara-i chuan thutak zet hian "Ka cho chhuak ve mai mai che anih kha. Min turn on lutuk mah mah, Pathian puihna vang chauh a la him ka nih hi" a lo ti vat a.




A rawn inbengkang a, ka hmuiah chuan rawn fâwp zeuhin "A hmeichhe hmangaih thianghlimna vawn him pui tu mipa hi ka ngaisang" a ti thuk raih a.



A thusawi chuan mahni inrintawkna tam tak min pe a. Mipa thianghlim ka ni hi ka zak lo, ka inchhuang em em zawk.




Inhnuaia kan inzui thlak leh hnu rei vak lovah Nu Ramtei pawh a lo haw a. Reilotê kan titi leh a, ka haw zui ve nghal a.




Rara-i nen kan inneih hun tur pawh a lo hnai ve tial tial a. Tunah hian October thla tâwp lam a ni tawh a. November ni 19 hi kan inneih hun tur chu a ni a.




Inneih thuam pawh kan enfel thuak tawh a, ṭul leh pawimawh ang pawh kan in lam khâwm ve nual tawh bawk a. Inneih chu cho tawh tak ka ni.




Rara-i ber hi a lainatawm a, Nu Nêmi'n a kut a sil hmak a. Mahse Nunmawii leh Lawmi te chuan theihtâwpin an ṭawiawm a. Pa Lura nen pawh kan inbe ṭha tho. Nu Nêmi ber hi a hahthlâk a ni.



A nî dangte pahnih chu inrawlh in buaipui ve vak lo mah se an lak atangin dona kan tâwk lem lova. Chu ringawt pawh chu a lâwmawm tawh hrim hrim.




Ka nu leh pa te lakah ka inthlahrung ve em em a. Rara-i chhûngte awm dan chu an tân a thanat thlak tur zia pawh ka hria. Mahse kan pahnih tana awm nawm lohna turin engmah an sawi ngai lova. Min phur pui em em zawk a. Ka lâwm takzet a ni.




Nu Ramtei chuan theihtâwpin Rara-i lan mawina tur a ngaihtuah ve a. Nufa innel leh inpawh tak ni lo mah se a ṭul ang angah chuan an inbuaipui ve a. A sum theh chhuah mai te chu a awlsam ang reng a. Rara-i a hrilhai ṭhin nghe nghe.




Arama'n min din pui dawn a, min phûr pui ve hle a. Ṭhian bengvar tak leh tlawmngai tak a ni a. Thil ṭul ah chuan kan inzui ve zak zak zel a. Dina erawh kha chu a hmaa kan buai tak aṭang khan kan inbe ṭha leh tawhlo hrim hrim. Biak lum lam vak ka tum tawh lova, ani pawh a reh zui vung vung mai.




Rara-i chuan Vantei dinpui a duh a, mahse ka farnu a ni miau si a. A rem ṭeuh lova, ṭhian dang a nei vak bawk silo. Kan rilru a buai hman hle a, mahse Nunmawii a lo awm hlauh a. An chhungkaw buaina chu dah ṭha in Nunmawii chu a lo inhuam ve em em mai a. A tirah khan heti tak hian Rara-i nen kan ṭangkai pui a, kan tana mi hlu a nih ka ring ngailo.





Kan inneih thla chu kan chuang kai chho a Rara-i a insawisel leh ṭan tlat mai a. Check up kan neih hnuhnun ber kha chuan a pangngai reng a. Hmasâwnna em em nei lo mah se ngaih ṭha lovin kan awm ngai lo.




Chutia a insawisel leh takah chuan check up neih leh hun a thlen hma in damdawiin ka kal pui vat a.



Doctor chuan Vellore pan leh turin min lo râwn a, rilru a buai leh ta map mai.



Motor ah chuan ngawi rengin kan chuang dûn a. Thil tam tak ngaihtuah tih hriat zet hian pâwn lam a thlîr vauh vauh a. Motor ka khalh avangin hmalam ka bih ngur thung a. Rara-i chu ka va melh leh zeuh zeuh ṭhin a. Kan ṭawng châk lo ve ve ni berin ka hria.




"Rara..." ka tih sup takah chuan a lo hawi vat a, a rawn nui lui sak bawk a. "I rilru ti hah suh aw" ka ti ringawt a. A lo nui ri hak ringawt a.



"Kan inneih veleh Vellore lamah chuan kan chhuk thla nghal ang a. I dam em em ang, engmah buaina tur a awm lo" ka ti leh zung zung a.



Doctor khan thla thar lama kalpui ṭha a tih thu a sawi a. Ni 19 kan inneih ni a ni a, a tlai viau lo turah ka ngai.




Rara-i chu a lo thaw chhuak hak a "I phur ti rit tu bak ka ni dawn lovin ka hria. A tirah kha chuan i bula ka awm na tur anih phawt chuan eng thil pawh hmachhawn ka inhuam a. Mahse tunah chuan i tel lova hmachhawn mai zawk te ka duh rum rum tawh. Inneihna hi kan ṭhulh mai dawn em ni?" a rawn tih rual chuan motor chu ka ti ding nghal chawt a. Ka lo rum chhuak hawk bawk a.



"Khatiang thu kha sawi suh" lungawi lo zet hian ka ti hluk a. A ngawi nghal dak mai, kawngsir rem laiah chuan tlanphei lehin motor chu ka tiding leh nghal a.



Rara-i chu ka melh nghal ngur a, hmalam enin a hmui a lo pet fan fan a.



"Rara" dam deuh zawk chuan ka ti a, a malchunga a kut dah chu ka zuk hum sak a. Min dang lova, min ngaihsak lo a ni ber.



"I dam dawn, khatiang zawng khan ṭawng tawh suh" ka ti hulh a. A kut chu ka fâwp zui vang vang bawk a.



"Au Hriatpui, ka awm awmin min awm tir la, min en liam tawp zawk mai rawh" beidawn hmel zet hian a lo ti zawi sep a. A thusawi duh dan chu ka duh zawng a ni hauh lo mai.




"Hetia awm hi i inhmeh lo, kan inneih ang a, ka enkawl dawn che. Chu chu thu tâwp a ni" ka ti nghet charh a.



Kan inmelh zui vang vang a, ngenngawl zet hian min melh a. Mahse a duh dana thlah liam chu ka tum hauh lo.



"Ka thusawi chu..." a tih lai mek chuan ka lo pawt chat a "Ka thusawi chu thu tâwp ani" ka ti hmiah mai. Min hnial zui vak ngaihna hrelo hian a thaw chhuak hak ringawt a.




An in thleng ka thlah a, Nu Ramtei a office daih avangin Rara-i chu ka zui lut ve nghal a. Kawngtluanin kan inbe zui ta lo kha ania. Kan awmdan muk zet chu hun reilotê la ni mah se hrehawm ka ti hman em em a, ka thawk a ipik takzet tawh ani.



Inchung lama a chho tur chu a hnunglam aṭangin ka kuah bet nghal thlawp a. Min dang lova, che lovin a lo awm mâwl tawp a.



"Rara...ka sawi fo kha, i tel lovin ka awm theilo" ka ti ṭuak a. A samah chuan ka fâwp zui vang vang a.



A dula ka kuahbetna kut chu a lo hmer ve salh a, ka lam hawia lo inher a tum chuan ka lo thlah dul ve hret a.



Kan inmelh vang vang a, ka hmêl khawngaih thla la lutuk chu lainat hmel zet hian min en a.



"Ka rilru hi a buai em asin" a lo ti halh a, a hmui a pet fan fan a.



Rara-i hi mi tlang tak, eng pawh sawi mai ṭhin ni mah se mihring pangngai ve tho a ni a. Ka laka a inthlahrung tlat hi duh lo viau mah ila thil âwm tak a ni. Chutihrual chuan keimah ngeiin enkawl ka la duh fan a. Ka nupui a nih hunah chuan inthlahrung hman lek lo turin ka duat ang a, hmangaih takin ka enkawl ang.



Mahse chutiang tur chuan engkim huam a min neih a ngai ve tlat a ni.




"Min nei turin thuthlukna i siam tawh a, chu chu eng thil mahin tidanglam suh se. I tân theihtawp chhuah ka inhuam em em a. Ka tan inhuam ve rawh. Hetia ka laka i inthlahrun a, inkiltawih hmel i put hian ka tan phurrit i ni zawk. Ka tana i tih theih sang ber chu ka nupui i nih hi a ni. Ka theihtâwpa ka enkawl che chuan ka rilru a dam ang a, ka hlim hle zawk dawn a ni" ka ti duah a.



Chhan let vak ngaihna min hre ta bik lo aniang, ngawi kar chung hian min melh deuh vang vang a.



Lo nuih sukin a hmuiah chuan ka fâwp zeuh a, a lo thaw ri hak te chuan engtin emaw tak hian min tidanglam a. Rara-i hi ka mamawh a, a tel lova hringnun hman chu ngaihtuah pawh ka duh lo.




Ṭha tê tê chuan ka hawsan veleh ta phawt chu ania. Ka chhungte bulah pawh engmah zêp lovin tlang takin ka sawi nghal vek a. Ka pa pawh a lo inhuam ve khawp mai.




Ro kan rel nghal zung zung a, inneihna pawh awlsam leh zahpuiawm lo tâwk vela tih ni mai se kan ti a. Rara-i hriselna dinhmun te ngaihtuah chuan ropui taka tih bung bung chu thil tih chî a ni tlat lo a ni.



"A innei turte in thianghlim a, Kohhran dan puitling ngeia inneihna kha a hlu tawh hrim hrim a. Ropui taka tih ngai lovin a ropui sa tawh" ka nu pawhin a lo ti ve a.




Kawng engkima ka duh dan min ngaih pawimawh sak ṭhin hi ka lawm ngawt mai. Anni ang nu leh pa ka nei hi vannei ka inti takzet.



Zanah chuan Rara-i nen phone call in reilote kan inbia a. Vawiin kan hun tawn ipik zet kha chu kan sawi zui tawh lo. Ngaih ṭhat lohna awm miah lovin kan inbiakna pawh kan titawp a.




Ka phone ri ral ral avang chuan chiang lo ruaiin ka harh a. Ka khum bula ka phone dah chu meng mang hlei lo hian ka dap ruk ruk a. Ka ban fuh rual chuan phak chuap hian ka meng a. Caller ID a Nu Ramtei hming ka hmuh rual chuan ngaih ṭhat lohna in ka khat nghal ringawt a.




Zanlai dar 1 vel a ni tawh a, tun ang hunah min rawn bia anih chuan chhan ṭha tawk tak a awm tihna a nimai.



Thin phu dup dupin phone call chu ka pick up "Aw Nu Ramte" ka tih rual chuan "Hriatpui, Rara-i hi a ṭha lo khawp mai. Zanin hna thila ka buai em avangin ka meng rei deuh a. Room-a file pawimawh ka check laiin choka lamah thil ri rawp thâwm ka hria a, ka va kal chuan Rara-i chu dawhkan bulah a lo let reng a. Damdawiin ah ka hruai nghal a, a dinhmun a ṭha lo khawp mai. Zîng khawvar hun a nghah theih tho na in kan chinchang tur a hriat si loh a. Kan inbuaipui fel zo chiah tihah ka lo hrilh nghal che anih hi" a rawn ti zung zung a.




Ka hamhaih viau rualin ka rilru erawh a fîm kar lawi a. Nu Ramtei chu an damdawiin awmna te ka zawt a, ka kal ve nghal tur thu ka sawi nghal zung zung bawk a.



Wardrobe a ka jacket khai lai chu la chhuakin Bike châbi ka ban nghal a. Ka nu leh pa te hrilh hriat ka tum zet a. Mahse keimaha lo va kal hmasak chu ka thlang ta zawk a.




Hmanhmawh zetin Rara-i damdawiin awmna lamah chuan ka inkhalh chhuak nghal a. Ka speed chu hniam lo tak a ni.



Ka va thlen chuan nurse lo duty te chu ka zâwt nghal a. Zanlaia mi luh tir an phal lo na in emergency thil a nih avangin min luh tir ta hram a.




Nu Ramtei nen kan inhmuh rual chuan "Khawnge?" ka ti nghal a. Chutah Nu Ramtei chuan "Emergency room ah an nawr lut a, an la endik mek. Ka la nghak anih hi" a lo ti vat a.




A hmêlah chuan nidanga ka hmuh ngai loh chiaina ka hmu a. Chutia Rara-i a awm thut chu a hamhaih ve viau a nimai thei.



Ka va thlen hnu chuan darkar chanve dawn kan nghak leh a. Doctor rawn chhuah rual chuan kan lo pan hnai vat a "Kan chhan hman ta lo ani" a rawn tih mawlh ka hlau !




Ka thin a phu dawt dawt a, ka hlauthâwng takzet a ni !



_____________*_________*________*________



(Zanin ah last chapter kan la dah theilo tlat mai. Heihi zanin atan chuan ka tlin tâwk a ni rih aw. Ka duhthu a la sam loh avangin chapter hnihin ka la pawt sei hlek dawn a. In lo ning viau ang tih chu ka hlau khawp mai)




_____________*____________*_____________


Show post links
Top

[Ngaia]

AIZIAL
By CVL Awmpuii



Chapter 33



Ka dang a ro hulh a, ṭawng chhuah mai ka tum a, mahse ka hrawkah hian min hnawh tlat a. Heti em em a zam hi ka la nei ngai lo.




Chutah Doctor chuan "In nau hi a dinhmun a ṭha lo khawp mai. A natna hian zung a kaih nghet zel a. Ziaawm lam aiin zual lam a pan nasa tlat a. Chuvangin ICU kan dah rih a ngai ang. In zai pui hmachhawn mai thei dinhmunah a ding bawk a. Heti hian kan ngaichâng rih ang a, a rawn ṭhat chhuah leh beisei phawt mai ila. Chumi hunah chuan zai nghal tur a ni ang" a ti a.




A thusawi chuan rilru ti hah viau mah se a nunna chhan hman a la ni hlauh a. Ka thaw veng huai tho mai.



Tichuan Rara-i chu ICU lamah an sawn nghal ta rêng a. Rilru hi a buai a, a zîng mup mai a. Hetiang huna ka buai chiam zel hi ka pa ka chhun lohna pakhat a ni.



Mipa mah ni ila ka mangang hma thei em em a. Rara-i chungchângah hrim hrim hi chuan ka nêm a, ka zuau zel a ni ber e.



ICU a kan in dah fel meuh chuan zing lam dar 3 a lo ri thuak tawh a. Lehkha pawimawh buaipui neuh neuh chhûng kha a rei emai a. Hun a lo kal ve duai tawh mai.




Ka chhungte call ka tum zet a, mahse ka ṭhulh leh ta zawk. Zing khawvar hunah law law ka be tawh mai ang.



Nu Ramtei nen rem kan ruat fel zung zung a. Emergency a damdawiin lut rum rum an nih avangin engmah an inkeng mumal lova.



Nu Ramtei chuan "Ka va haw lawk ang a, kan mamawh tur ho ka va lam khawm ang a, lo awm lawk mai ta che" min ti a. Aw ka lo pawh ve mai bawk a.



A va inla khawm rang viau aniang, darkar khat em pawh thang lovin a lo lêt leh nghal a. ICU - a damlo awmpui tute awmna hmunah chuan kan awm ve ran a. Rara-i dinhmun ngaichângin khawvar hun chu kan nghak a.



Nu Ramtei chuan a awmdan kim chang zawkte chu min hrilh mawlh mawlh a "Tun hnai tê hi a awmdan a dik lo zual a. Inchhûngah te hian han inpal tluk khut hi a chîng a, a khawhmuh a fiah tawh vak lo niin ka hria. Inneih inbuatsaihna lamah kan buai ve bawk nen a taksa a chau zual pawh a ni mai thei. Engmah hi a sawi ngai leh hlei lova, chêng dûn ni mah ila kan inbe khât riau a. Mahse a ṭha lo tih hi chu ka hre ru ve reng mai" a ti a.




A natna chungchâng te chu kan sawi dun a. Tunah hian ziaawm lam pan thei hlauh sela, Vellore lama kalpui leh chu kan rawt a. A ṭul dan ang anga buaipui pawh ka inhuam khawp mai.



Zing Ṭawngṭai inkhawm kal hun awm velah ka pa chu ka call ta a. A lo pick up har lem lo.



A ṭawng hma hawtin Rara-i chanchin leh zanlaia kan buai dan zawng zawng te chu ka hrilh nghal zung zung a.



Chutah ka pa chuan "A va zialo ve aw. I kal dawnin min hrilh hre hmasa lo anih chu mawle. Lo zui ve che ila ṭha tur ania" a ti a. "Ka chiai em a, engmah ka hrilh hman ta lo che u anih kha" tiin ka lo insawi thiam nghal vat a.




Ka pa chuan "Zing ṭawngṭai inkhawm hi kan han kal phawt ang a. Damdawiin lamah chuan a rang lamin i nu nen kan lo phei ve nghal dawn nia" a ti a. Ka lo hnial lo khawp mai.



Kan inbiakna kan tih tâwp hnu chuan Arama ka call veleh a. Ka ṭhian ṭha ber a ni a, chanchin engkim hriattir ve nghal chu ka tih turah ka ngai nghet hmiah.




Nu Ramtei pawhin phone call a hmang reng a, chhungkhat laina te a hrilh kual ve a nimai thei.



Nunmawii phone call pawh ka dawng a, Nu Ramtei'n chanchin a hrilh hre diam tawh tih ka hria a. Mak pawh ka ti hran lo.



Damdawiin a lo kal ve nghal tur thu a sawi a, Rara-i chu a rawn ngaihtuah ngang mai.



Tichuan, kan chhûngte ho chu an lo thleng khawm zung zung a. Ka nu leh pate an lo thleng a, Vantei pawh a lo tel ve nghe nghe. Nunmawii leh Arama te pawh an lo thleng ve nghal a.



Nu Ramtei chuan ka bula a sawi dan ang chiahin midang ho bulah chuan hetiang dinhmuna Rara-i a din tak thut dante chu a sawi zung zung a.



Ka pa chuan ṭawngṭaina a hmang nghe nghe a, Rara-i dam nan a dil bakah eng pawh lo thleng se pawm thiam dan kan thiam theih nan a dil tel a. Chu kher chu ṭul ka lo ti lo khawp mai.



Boral thut thei dinhmuna Rara-i a dah chu ka lawm lo ngang mai. Mahse engmah ka sawi zui chuang lem lo.



Ka chhûngte haw tur pawh chu ka zui haw ve ta lo law law a. Rei vak lovah Arama pawh a haw zui ve nghal a. Nu Ramtei leh Nunmawii te nen chuan kan la awm ran a. Hetia lo awm hian kawngro su vak lo mah se haw daih pawh ni ila ka rilru a kap run dawn tho a. Awm pui ve zel chu ka duh.




Tukṭhuan ei hun hma hretin Doctor chuan ward a fang kual a. ICU lama damlo awmpui tute awmna ah pawh a rawn kal ve a. Rara-i medical report te chu a check kual a, min hrilhfiah zung zung a.



Tunah chuan a dinhmun a la ngai reng a, biak pawh theih lohin a la awm reng tihna anih chu !



Chhunah chuan mi pakhat chauhin kan hmuh theih rih tur thu an rawn sawi a. Ka lo inrawlh nghal vat a. Nu Ramtei leh Nunmawii te pawhin min lo hrethiam khawp mai.



ICU chhûngah hi chuan thlalak an khap tlat a, inthuamna tur hran a awm thlap bawk a. Chumi chuan ka inthuam a. Ka lu tuamin glove min bun tir thlap bawk a. Ka luh hma in phone ka ken luh leh luh loh min check thlap bawk a. An strict khawp mai.




Rara-i awmna ICU chhunga ka lût chiah chu ka thaw chhuak nghal ham ham a. A hnarah chuan hrui sîn tê tê hi an lo zam a, drip an lo khai reng bawk a. A mutna bulah chuan khawl eng eng emaw a inhung thluah bawk a. Chutia natna khum a a mu bel hmuh chu thil hmuh nuam tak a va ni lo em !



Ka pan hnai zel a, ka hrawk chu hnawhtu awm ang mai hian a na ngut ngut a. A hmêl ka hmu chiang chiah chu ka â lo chauh.



Thisen nei lo ang mai hian a dâng bel a, a hmui sen chek ṭhin kha a duk deuh raih bawk a. A hmai chu pilh ang mai hian a duk deuh tlat bawk a. A landan chuan min tina ngawih ngawih mai.



A kut, drip an khai lohna lam chu dîm zet hian ka la kâng a "Hmelṭha Rara" ka ti ṭuak a. Ka thinlung chhungril ber hi a ti na a ni !



"Dam i tum kha aw, bei ṭang ṭang rawh aw" ka ti leh a. Mit a chhing tlat a, ṭum danga titi zat zat ṭhin khan min chhâwn thei rih tlat lova. A âw zâng deuh vah ṭhinte kha ka bengah a rawn ri nawn tlut tlut a. Ka thaw chhuak zui ham ham a.




Minute 15 chhung chauh damlo hmuh phal a nih avangin chu hun reilotê chhung chuan a hmêl chu ka thlîr ngawih ngawih a.



Zan hmasa lawkah pawh ṭha takin kan inbia a, pangngai takin kan inthlah kha a ni a. Tunah lêm heti hian a awm daih a.



Nimin tun ang hunah te kha chuan phone call a inbia in kan nui dun a. A titi zat zat a, keiin ka lo ngaithla char char kha a ni a. Min va han ti na tak.



Ka thinlung chu ka ti pau khauh lui a, a kuta chelh reng chung chuan Pathian ka auh sak a.



Thi turin ka dah phal miah lo, mahse ka beiseina neih hi a chau rau ngawih ngawih si.



"Lalpa...min tih dam sak rawh. A tello chuan ka thi thei mai ang" ka ti thlawt a. Chham tur dang hlawl ka hrelo.



Ka dem dawn lek lek a, mahse Pathian dem chu ka ngam chiah si lo.



Dinhmun harsa bera kan din laia Pathian kan dem tlat anih chuan beisei tur chuang kan nei dawn lova. Chuvangin kan beisei mei eng neihchhun chu Pathian chauh a ni a. Ka dem ngam lo, innghahna tur dang ka nei chuang si lo. A thiltihtheihna lan tir tura dil mai loh chu tih theih ka nei si lo a ni.



Rara-i a dam dawn, chutah chuan ka rinna ka nghat bur mai.



Ka chhuah hma in a hmai dâng bel chu ka chûl leh riak riak a. A kutah chuan ka fâwp vang vang bawk a.



Kalsan hreh em em chungin ka kalsan a, ṭap thei ni ila chu awrawl tawpin ka ṭap chhuak ngei ang.



Damdawiin ah chuan ni hnih ngawt kan awm ta a. Rara-i dinhmun chu a ngai reng a, hmu reng thei lo mah ila ka kalsan ngai lo tluk a ni.



Inah chuan intifai tur leh inthlak turin ka haw zawk zel chauh a. A bakah chuan damdawiin chu ka awm tamna ber a ni. Ka hna lam pawh ka buaipui lo tawp a. Naupangho chu thu leh awm hma châwl turin ka ti tawp a. An chhûngte pawhin min hrethiam tlâng khawp mai. Damdawiin ah nileng zankhuain ka awm ṭhin a.



Ka chhûngte pawhin min hrethiam em em a, midang mit pawh ka tih kham ka ring chuang lo. Ṭhenawm khawvengte'n innei mai thei dinhmunah kan ding tawh tih an hria a. Chutia ka ngaihtuah khu chûk pawh chu a mawi lo hran lo. Min lainat tu an tam a, ṭawngṭai puina kan dawng âwl lo bawk a. Chu chuan beiseina min pe ve hram hram a ni.



Nu Ramtei pawh office a kal rih lova, Nunmawii pawh a lo kal nitin a, a unaute pawh an lo kal ve tawh a. Pa Lura chenin an lo kal tawh. Tun hun thlenga Nu Nêmi hmêl ka la hmu ve miah lo hi ka hrethiam thei lo. Rara-i nî dangte chu an lo kal ve tawh a, chutiang bawkin a cousin hote pawh. Mahse Nu Nêmi ber chu mak ka ti a ni.




Rara-i tan mi ṭha a ni lo tih chu ka hria, mahse heti em em a rilru mak sak a put hi chu ka ring lo ania. Tunah phei chuan phût en ah pawh ka en tawh lo. Phût chu sawi loh mihring ang pawhin ka ngai thei tawh lo.



Rara-i bawk hi ka thanat pui ṭhin a, dinhmun hlauhthâwn awm taka a din lai paw'n thinlung leh tih takzeta ngaihtuah tu chhungkhat a nei miah lo hi ka na ka lo ti a ni.



Nunmawii hi ka rin ber awmchhun chu a ni mai. Nu Ramtei chu ṭha thluam tho mah se Rara-i chunga a lo chêt tawh dan te avang khan amahah rinna ka nghat ngam lo.



Chutiang karah chuan ka nu leh pa te ber hi ka fak thlawt a ni. An fapa hmangaih chu thinlung leh tih takzetin min hmangaih pui a. A tisa zawng mai pawh duhtâwk lovin thlarau lamah min lo ti chak a, min ṭanpui reng a.




Rara-i tan an ṭawngṭai âwl lova, an hmelhriat ṭha te zawng zawng pawh ṭawngṭai pui turin an sâwm fo a. Chu tluka hlu chu a awm bik lo.




Kar khat dawn damdawiin a kan awm hnu chuan thu lawmawm lam kan hre ta hlauh mai. Rara-i chuan ziaawm lam a pan ta ! Ka hlim zia chu pui tak a ni.




Pathian hnenah lawmthu ka sawi mawlh mawlh a. A hma zawng zawnga ka lungngaihna lêt sawm vel khan ka lawm a tih theih ang.



Kar khat kan awm tlinna ah chuan cabin pangngai ah kan insawn lût ta a. Rara-i pawh chiang lo ruaiin a rawn harh fo tawh a. Mahse biak pawh theih ang kha chu a la ni chuang lo.




Doctor chuan hlauhthâwn lutuk na tur a awm tawh rih loh thu a sawi a. Chu ringawt pawh chu thu lâwmawm tak a ni.



Cabin pangngai a kan insawn hnu ni thumna velah chuan a rawn harh pangngai ve ṭan ta a. Biak a hre tawh a, zai zir chuan min chhang ve thei tawh a. Ziaawm lam kan pan ve hret hret a ni.



Nu Ramtei'n damdawi a lei chhung chuan a kut chelhin ka lo awmpui reng a. Ka be mawlh mawlh bawk a. Sawi tur em em pawh ka hre chuang lo, ka hun hman dan te chu ka hrilh a. Kan pahnih tana hmalam hun ka lo suangtuah te chu ka sawi mawlh mawlh bawk a.




Mipa ṭawng tam leh ṭawng duh lutuk ka ni miah lo, mahse tunah chuan biak tam hi a mamawh ber niin ka hria a. Chuvanga be mawlh mawlh pawh chu ka ni.



"Kar leh mai hi kan inneih hun a ni tawh sia, i dam vat vat a ngai ania. Kan suangtuahna te puitlin turin kar khat vel chiah a ngai tawh. Chuvang chuan i dam vat vat a ngai. Ka hmangaih che tih hre reng la" ka ti mawlh mawlh a.



Chauh hmel zet hian min lo melh ve vang vang a, a khi ve sak sak bawk a.




"Fa paruk vel ka duh dawn a, inlak fit i ngai viau ang. Dam loh mai mai te hi kan inneih hunah chuan ka phal tawh dawn miah lo ania. I hrisêl ṭha hle tur a ni tawp mai. Kan inneih tirh chuan ka chhûngte nen kan awmho rih ang a. Mahse fa kan neih hunah kan in dang ang a. Ka chhûngte pawh ka dîl lawk vek tawh. An remtihna thlapin kan in dang ang a. I duh leh an bulah pawh kan awm zel thei tho bawk a. Hriathlua nupui neih hunah pawh kan in dang zawk thei tho bawk a. Chumi hunah chuan fa pathum vel lo neih hman kan tum ang a. Kei hnathawkin ka chhuak nitin ang a, nangin kan fate i lo awm ṭhîn ang a. Keichu chhangchhiat lai hi chuan chhangchhe viau mah ila ka pawiti lo. Pathianin rem a tih chuan kum khat dan zelah fa neih kan tum ang a. An puitlin hunah pawh hmuhnawm tham an ni dawn a. Kan fa û ber atan chuan hmeichhia ni se, inchhûng chêt ah a pui hma thei dawn che a. A dawttu atân mipa ni se, a û zah thiam em em turin kan enkawl ang a. Mipa pathum leh hmeichhe pathum hi ka duhthusam ania. Kan fanute chuan chhun em em che sela, khawvêl a hmeichhe hmelṭha ber an ni vek a nimai. Kan fapa te chuan kei min chhun em em bawk sela. Khawvêla hmeichhe hmelṭha ber an tawng ve mahna. Kristian Chhungkaw ṭha tak kan din ang a. Mite awh rawn chhungkua kan ni ngei ang" ka ti leh duah a.




Ka thusawi chu ka ngaihtuah zawng ringawt pawhin ka hlim em em thei anih chu ! Ka duhthusam te hi thleng dik mawlh teh se.



Rara-i mittui chu a rawn luang chhuak ngiai ngiai a. A kut ka hûm reng chu zawimuangin a rawn la hrang a. Ka kut chu a lo hûm let ve ta zawk a. A theihtawp a na in min hmer ve vang vang a.



A mit a chhing vang vang a, a mittui bawk chu rawn luang chhuak leh zung zung a. A rawn thaw chhuak hrak a.



A rawn phun chhuak sep a, a ṭawng ri ka hriat theih loh avang chuan ka zuk kûn hniam a. A hmui bula ka beng ka zuk dawh rual chuan "Ka thi dawn lo, i tan ka dam dawn" a lo ti thâm ṭiak a. A aw chu zawi hle mah se ka hrechiang lutuk tlat.




Ka khi suk a, "Kha kha ka hmeichhia awmdan tur chu a ni. Kha rilru kha Rara-i rilru dik tak a ni. Mi huaisen leh eng thil pawh paltlang thei kha!" ka lo ti nghet charh a. Chau tih hriat zet hian min nuih seih a.




A mittui luang ngiai ngiai te chu ka tuai hul sak a, inbengkangin a mitah chuan ka fâwp zui vang vang a. Aw chhuah thei chu nise tunah hian a nui ri leh hak tawh ngei ang.



"Ka hmangaih che, ka hmangaih che, ka hmangaih ber che" ka ti sup sup a. A mit, a biang, a chal , a hmuiah te chuan dîm zetin ka fâwp kual dun dun a. Mit a lo chhing vang vang thung a.




Nu Ramtei lo lêt leh hnu chuan pangngai takin kan lo awm tawh a. A damdawi rawn lei ho te chu a rem ṭha nghal mawlh mawlh a.



Rara-i biak theih loh chhung zawng khan kan pahnihin kan awmpui chawt bawk a. A hma ai mah chuan kan innel ve deuh tawh a. Thu hrang hrang kan sawi dun ṭhin a. A hna chungchang te pawh min hrilh ve luam ṭhin a.




Thil pakhat ka hriatchhuah tak a chu, mi zawng zawng hian ṭhat na lai leh ṭhat lohna lai kan lo nei ṭheuh tih hi a ni. Nu Ramtei pawh Rara-i chungah lo sual ṭhin hle mah se a hna ah chuan ani tluk an awm lo a tih theih ve tlat. A hna a thiamin a hnehsawh em em a. Chu chu tuman min hrilh hran lo, a hnathawk ka hmu pawh a ni hran lo. Mahse khang hun chhunga kan titi kalhmang aṭang khan ka hrethiam ve vek a. Mi a nileng nih loh chuan a man thiam vek theih miau a ni.




Chutihrual chuan Rara-i chungchângah hian ka la ring thei rih lova. Beisei nei a thil ti a nih chu ka la ring tho. Mahse reilote chhung ṭhat a chhuah ve pawh hi ka lawm hrim hrim.



Rara-i chu ka nupui ni mai tawh tur a ni tho bawk a. A ti hrehawm thei tawh dawn chuang lo miau a ni.




Inneih chungchâng ka ngaihtuah rual chuan ka hnual nghal rawih mai. Tunah hetiang dinhmun hi kan la ni rih si a, inneihna kaltlang puina chî a nih loh zia chu hriat sa a ni. Mahse kan ṭhulh rih a nih pawhin kan la innei dawn tho a, ka mangang duh lo.




Chutihrual chuan tum anga kan awm lo lutuk chu rilru hmanhmawh sa nen a inrem hlawl lo a ni.




Tlai lamah chuan Nu Ramtei chu hna hmanhmawh thlak ah an rawn call a. Rara-i muthilh lai a ni nghe nghe a.



"Office kal lawk ka ngai, file pawimawh khawih tur a awm thut a. Ka châwl rei tawh ang reng sia, min rawn dawr tute'n min ngaichâng reng tawh a. Nangmaha lo awmpui i hreh em?" a ti zung zung a.




A hmel a buai ve nak a, hna hmanhmawh thlak chu a ni khawp ang. A hmêl landanah a chiang vek a ni.



"Va kal rawh, ka lo awmpui thei alawm" ka lo ti dam thlup a. I he lovin ngaih ṭha deuh chuan min kalsan nghal a.



A kal hnu rei vak lovaj Doctor in cabin a rawn fang a. Rara-i chu a rawn check leh a "Beisei ai daihin a ṭha chak" a tih chuan ka va han lawm tak !



"A natna hi a dam thei ang tiraw?" beiseina sang tak nen ka lo ti vat a. Mahse a chhanna chuan min ti na zawk mai.



"Brain Tumor hi chu dam theilo tluk a ni" a ti tawi tuk a. Ka lo thaw chhuak hawk a. Mahse Doctor chuan "Chutihrual chuan a natna vei reng chung hian rei tak a dam ve theih tho ania. In enkawl ṭhat hi a pawimawh a, a nihna tur ang taka treatment lak chuan mi pangngai ang pawhin rei tak an awm ve thei tho" a ti leh luam a.




Rara-i dinhmun dik tak chu chîk zetin ka zâwt nghal a. "Tunah chuan sawi tawh ang khan beisei ai daihin a ṭha chak a. Mahse hetiang reng hi chu a ni thei dawn lo ania. Heti hian ziaawm lam pan zel phawt sela, zin pui ngam a nih hunah Vellore lam panpui leh nghal ula ka duh. In enkawlna a ṭhat zawk bakah an khâwl te pawh a changtlung zawk a. An Doctor te an thiam bawk a. A tluk an awm lo. In zaipui hmachhawn ngei ngei a ngai dawn a. Chutiang tur chuan ka refer ang che u. Keimah hian zai ka inhuam tho a, mahse Vellore lam pan in ngaih dawn tho avangin chutah chuan in buaipui tlang law law ula a ṭha ang. Keini aia mi thiam zawk an awm a, kan hrilhfiah theih loh tam tak pawh hi chiang zawkin an hrilhfiah thei ang che u. Hetah chuan hmanrua vel pawh a changtlung vak si lo " a ti duah a.





Chutia tlang taka a ngaihdan a sawi chu ka lawm khawp mai. Mizorama Doctor ṭhenkhat hi chu thiam an inti lutuk a. Inringtawk takin thil an sawi a, chu chu an hna, an tih tur mah nise mi famkim ni ta lo chu tih sual an nei ve fo a. Ka va dem pum hlum chuang lo. Mahse an thiamna in a tlin tawh loh hi chuan pawm ngam sela, hetiang hian huaisen takin sawi ṭhin se a ṭha ber.




Khua a thim tawh a, tun thlengin Nu Ramtei chu a lo la let lova. Dar 7 velah chuan min lo call a. Hna thil a a la buai thu leh zanin a a lo let hman a rin loh thu te chu a rawn sawi a. A inthlahrun hmêl khawp mai.




Kei lah ta pek chu ka duhthusam a thleng zawk emaw tih mai turin ka lawmah a lo tla a. Rara-i nen hun thâwl kan nei thei dawn tihna a nimai.



"Rawn ngaihtuah duh suh zanin chu, Keimahin ka lo riahpui mai ang" ka lo ti zâng vah a.



Rara-i a rawn harh zui tak avangin kan inbiakna chu kan ti tawp nghal a.



Rara-i chu ka pan hnai vat a, a kutah ka chelh nghal a "I ṭha em?" ka tih chuan a lo bu nghat a. A hmel hmuh a nuam telh telh mai.



"I nu hna thilah an lo phone a, a rawn let hman rih dawn lova. Zanin chu kan pahnih chauhin kan awm dawn anih hmêl " phûr zet hian ka lo ti a.



A lo nui nghawr dat a, ka hmêl nung sarh leh naupang ang maia ka phur chuan a nuih a tiza te pawh a ni mahna.



A ham zui bai bai a, "Min mutsan rei tehlul nen i mut a la chhuak em ni?" ka lo ti uang a, a lo nui leh mai a.



"Au Hriatpui " hmui phun a a rawn tih sep rual chuan ka awm hnaih sauh a. "Ka mu rei tawh sia, ka hnung a kham ṭhum mai" a ti zawi sep a.



Kar hnih ṭha chu khumbetin a awm tawh a, taksa kham ṭhum pawh chu thil âwm tak a ni.



"Engtin nge kan tih ang?" ka tih chuan "Min kaitho la, ka hnung min hmehsak teh" a ti a. Chutia inkaihthawh ringawt chu thil tih chî ah ka ngai lova. Mahse a hnung a kham tawh tlat bawk sia.




Cabin aṭang chuan ka chhuak a, nurse duty lo awm hote chu ka râwn a. A pawi loh thu an sawi rual chuan hmanhmawh zetin cabin lamah chuan ka lêt leh nghal a.



Rara-i chu dîm zet hian ka ṭhut tir a, drip an la khai reng avangin tih nat palh ka hlau hle a. A taksa te chu khawih nat ka hlau a, ka dim dawih ngang mai.



Khumah chuan lawnkai ve nghalin a hnungah ka ṭhu a. "Engmah ngheng lovin i ṭhu thei ang em?" ka tih chuan a lo bu nghat a. Tichuan a hnungzang chu na lo tê tê in ka hmehsak a.



Thaw chhhuak siai siaiin mit a lo chhing a, nuam a tih hmel ngang mai.



"A na em?" ka tih chuan nui chungin "A nuam" a lo ti mai zel a.



Darkar chanve dâwn ka hmeh hnu chuan a ziaawm ta deuh aniang a insiamrem sat sat a. A hnunga ka ṭhu chu min ngheng chialin a rawn ṭhu mu nghal zat a. Ka lo nui ri hawk mai.



Chutichuan ngawi rengin kan awm dun ta hle hle a. Hahdam hmêl zeta a thaw siai siai te chuan min ti hahdam zual takzet a ni.



A hnute hnuaiah chuan ka kuahbet a, a samah chuan ka fâwp leh vang vang zel bawk a.



"Au Hriatpui" a tih rual chuan ka ei lo phal lo "Eng nge ni Hmêlṭha Rara" ka ti sup a, a nui hak ri ka hre leh ta. Hei hian alawm min ti hahdam em em chu !




"Engtin nge ni ta ang, inneihna kha?" rilru hnual hmel zet hian a lo ti halh a. Ka kuahna chu ka tinghet salh a.



"Pathian zarah i ṭha chho zel ang a, i dam hun hunah kan innei nghal ang" ka lo ti nghet charh a.



"Ka mo kawr turte kha an ṭhui zo vek tawh awm sia, tunah hian ka ha tâwk tawh miah lovang" a ti leh ṭiak a. A kâ chu a hup vat a, a ṭap khur nghal ti tih a.



"Shhh...chutiang ngaihtuah duh reng reng suh, i la ha tâwk em em ang. A nih loh leh kan ṭhui tir leh mai dawn lawm" ka lo ti dam thlup a. A âwm ah chuan ka kut ka nghat vang vang a. A ṭap khur dar dar mai.




"Ṭap suh le, i ṭah chuan i taksa a chau lutuk palh ang a, i damlo zual palh ang" ka ti dam leh thlup a.



A inngaihtuah lung puam zual sauh tih hriat lutuk hian a hma aia nasa zawkin a rawn ṭap chhuak ta hak a.



Khumah chuan ka tluk zal pui nghal a. Ka âwmah chuan kuah bei nghalin ka inbengkang deuh a, a samah chuan ka fâwp zui vang vang a.




"Engmah ngaihtuah hah tur a awm lo, engtiang pawhin inthuam la, khawvêla mo hmêlṭha ber leh thianglim ber i ni dawn tho tho. Mo kawr te chu a ṭul anih chuan vawi sawm chuang pawh kan ṭhui tir mai ang" ka ti leh mawlh mawlh a.


A ṭah loh dan tur kawng ringawt chu ka dap a. Hetianga a ṭap reng anih chuan sawi tak ang khan a taksa in a zo lo mai ang. A la dam kawr bawk si.



Drawer chunga ka phone dah chu a rawn ri zui a. Rara-i ṭap chûl hauh hauh pah chuan ka kut lehlamin phone chu ka ban a. Ka rin ang ngeiin ka pa a lo ni.




Zan tin hetiang hunah hian Rara-i chanchin zawt turin min lo call ṭhin a. Ngaiah ka nei der tawh.



Ka lak rual chuan "Eng nge in an zanin lamte?" a rawn ti ta reng a. Phone ka hmang tih Rara-in a hriat rual chuan a ṭap bang nghal a, mahse a la insut faih faih tho. A insum ve hle ni tur a ni.




"Kan zia khawp mai zanin chu..." tiin keimah chauha ka riah pui thu te chu ka sawi nghal luam a.



Ka pa chuan "Aww, chutiang tih lo hriat a Vantei lo tirh ve tur ania" a lo ti vat a.



Rara-i chuan ka âwm zâwn aṭangin min lo melh chho kiau a, hmui phunin 'Ka pa' ka ti sup a. Ngawi rengin ka âwmah chuan a bei leh hle hle a. Nichina ṭap hliam hliam ang kha chu a ni leh tawh lo khawp mai.



"I buai em?" ka pa bawk chuan a rawn ti leh a. Ka âwm a bawk mêk Rara-i chu ka fiam châk tlat pek a.



Chutah ka pa bulah chuan "Buai em em lo e, naupang ṭap thlêm a ngai leh zauh ṭhin tih loh chu" ka ti a.



Rara-i chu a rawn hawi leh nghal vat a. Ka pa chuan a lo man lo nasa mai "Engtin maw i tih?" a lo ti he haw a.



Kei lah chuan chiang zeta min lo melh kiau tu chu fiam zui ka châk zual sauh a.



"I monu hual hi a ṭah belh lutuk a, min ti mangang mawle " tiin ka nui zui hawk a. Chu velah Rara-i chuan min melh nghal ram ram a. A dam lo mitmeng chau bo ṭhak khawpin min melh rum a.




Ka pa lah chu a nuih a lo za em em mai a. Ka thusawi a hrethiam ta tihna a ni. "In ṭha tawh viau a nimaw" a lo ti sup a.



Rara-i chuan ka phone ken lai chu min rawn chhuh sak nghal a.



"Pa Sangzual, Au Hriatpuia lo sawi kha dawt vek aw" a theihtawpa ring hian a ti a. A duh ang takin a la ṭawng ring thei lova, a ṭawng muang hle bawk.




Ka pa nen chuan reife an inbe zui ta reng a. Loud speaker a dah tura ka tih lah chuan a lo duh ṭhak lova. Eng tak chu sawi dun ang maw?




Rara-i lah chu a ṭawng tlem zawkah a ṭang a, a nui leh hak ṭhin a. An thusawi hre ve lo ta chu ka bangbo khawp mai.



An inbiak zawh rual chuan phone chu min pe nghal a.




"Eng nge in sawi a?" ka tih chuan "Kan rêl che" a lo ti hmak a. A sawi ṭha duh der lo.



Mahse a hnu ah chuan ka nu leh Vantei te nen pawh an inbia tih min hrilh a. La chauh hmêl hle mah se a hmêl a nung deuh sarh tawh.




Kan awmdan ipik lutuk tih zângkhai tuma ka lo fiam zauh khan kawngro a su khawp mai.



Zankhuain harsatna em em tâwk lovin kan awm a.



Rara-i harh ṭhat pangngai hnu ni hnihna ah chuan Vellore lam chhuk turin kan inruahman ta a. Ṭha viau a sawi tur ni lo mah se ziaawm lam kan pan tawh hrim hrim te chu thu lâwmawm tak a ni.



Kan inneih ni chu ni li chiahin a dang tawh a. A rilru hah ka hlauh avangin leh hrehawm a tih ka hlauh avangin chutiang lam chu ka sawipui duh tawh lo hrim hrim.




Tun ṭum chu keimah ngeiin ka kalpui tawh dawn a. Nu Ramtei chu lo kal ve thei dinhmunah a ding tawh rih lova. Hna thilah an ko reng tawh si a hriatthiam na a awm thei tawh tih lo ani. Chuvângin a ṭul ṭul a min pui turin Nunmawiin min zui thla ve dawn a. Chin châng hria a lo zuk kalpui tawh an ni bawk a. A tihzia phian mai.




Ka pa chuan min fuih âwl lova, "Beidawng lo la, mahse beiseina sâng tak nei kher suh ang che. I beisei anga thil a thlen loh chuan i na dawn lutuk. Chuvangin engpawh tawh huamin awm la ka duh. Chân kan inhuamna zâwnah hian engkim pekin kan awm fo ania. A damna tur ngawr ngawr khan dil lo la, A remruat pawm zel thei turin dil zawk rawh" a ti ṭhin a.




Chu chuan ka nunah thu tam tak a sawi a. Pathian Thu a kaihhruai tlat ka nih avang hian kawng engkimah ka chak thar leh ṭhin.





Kan kal dawn ni chuan ka pa in ṭawngṭai na in min thlah thlap a. A tirah khan ka kalpui ve an remti lovang tih mawlh kha ka hlau a. Mahse beisei phak bakin an lo remti ta zawk kha ania.




Ka ṭhianpa Arama pawhin theihtâwpin min fuih a, damdawiin a kan awm lai pawh khan a ṭul ṭul ah ka pun buai ṭhin a. I he lovin min pui zel a. Ka ṭhianpa mah nise lawmthu ka sawi mawlh mawlh reng mai.




Rara-i nî te ho pawhin min thlah liam ve thlap hlawm a. Nu Nêmi pawh ka hmu ve ta nge nge a, mahse a ṭawng lo tluk a ni, ngawi rengin min thlah liam ve hi a ni tawp mai. Rara-i nî dangte ho chuan min be mawlh mawlh hlawm a. An makpa ang takin min cheibawl nghal a. Chu chu ka pawi tih loh zawng tak a ni.




Tichuan, Vellore lam pan chuan kan liam thla ta vung vung a. Rara-i pawh a chau lutuk bik lova. Kan thlen thlak ni chuan Mizoram aṭanga medical record kan ken thlak zawng zawng te chu kan pe nghal vek a. An endik nghal zung zung a.




Mizoram lam aṭanga kan Doctor in a sawi lawk ang ngeiin Rara-i chu zai turin thu an ti tlu ta a.



Kan inneih nî tak chu an zai hun tura an ruat chu a la ni zui a !




"I zâm em?" ka tih chuan "Ka dam dâwn" tih zawngin min chhâng ṭhin. Amahah beiseina a awm tlat avang chuan beiseina sâng tak ka nei ve a. Beiseina pe zawk tur ka nih laiin amah zawk hian beiseina min pe fo a.




Dam a tum lutuk hian damna famkim a la pe ngei ang tih hi ka rindan a ni.


______________*__________*____________


(Chapter dawt lehah chuan a hmawr kan bâwk tawh ang aw)


Show post links
Top

[Ngaia]

AIZIAL
By CVL Awmpuii


Last Chapter



Rara-i chu rin ai takin a zia phian mai a. Naktip maiah hian an zai tawh dawn a. Amah tak phei chuan a huphurh vak lem lo, keimah zâwk hian ka huphurh ru ṭun a. Mahse ka tilang duh ngai lo thung.




Zanah nurse duty pahnih an lo kal a, an drip khai te chu rawn check in Rara-i BP leh Pulse te chu an check zung zung a. A ṭhat vek thu an sawi a. Harsatna kan nei anih chuan ko vat tura min chah hnuah an chhuak zui nghal a.




Chu veleh Rara-i chu ka pan hnai vat a, a lo nui hak mai. A hmêl hmuh hrehawm lutuk kha a bo ve tial tial a. Mahse dam lo ngawih ngawih hmêl hi a la pu tho a. Chu chuan a la ṭhat tawk loh zia a lan tir chiang khawp mai.




A kutah chuan ka hûm nghal chawt a, chauh hmel zet hian min lo nuih var var a. Vawiin lamah test neuh neuh kan nei nasa a, chhunah a khua a sik leh bawk nen a chau ve viauin ka ring.



"Ka bulah lo mu ve rawh" a tih sep rual chuan i he lovin ka lawn kai ve nghal a. Tih nat hlau zetin dim zet hian ka taksa bet thlawp in ka kuah a. A lo thaw chhuak siai siai mai.




Damlo hi mi pakhat chiahin riahpui an phal avangin Nunmawii chu a hmaa ka lo sawi tawh, ka pa hmelhriat Pa Ropuia te inah khan a riak mai zel a. Min riah chhawk a tum ṭhin viau na in ka remti ngai lova. Min ti lui thei dawn lo tih a hria aniang, engmah a sawi buai ngai lo.





Ka sawi hmaih loh tur chu Pa Ropuia te chhungkua hi kan tan an ṭangkai takzet a ni. Damdawiin ah mi pakhat chiah riahpui a theih avâng khan Hotel book mai kan rilruk a. Mahse annin an lo remti i khaw lo mai a. "Keini kan awm reng laia man chawia hmun danga awm kha a ṭul na a awm miah lo" a ti khauh fur a. Ka pa pawhin lungdam deuha awm turin min ti a. Kan hnial ta lo kha ania.





Awmna hmun tur min lo pek chu thuhran ni se Rara-i hi an lo ngaihven ve em em a. Chanchin ngaihvenin Nunmawii an lo zui ve reng bawk a. Ka tan chuan mi hlu, ka theihnghilh theih tawh loh turte an ni.




"A hrehawm em?" ka tih chuan lu a lo thing vat a. "Min dim dawih lutuk anih kha, engmah na ka nei lo" a lo ti sep a. Ka âwm nghêng chuan a mu hle hle a.




"Naktuk tuk kan inneih ni a ni tawh a, kei lah chu heti hian ka la awm a" tiin za lo zet hian a nui ri hak a. Innei thei dinhmunah kan la ding lo tih chu kan hrethiam ve ve tlat a ni.



"I dam ṭhat veleh kan innei nghal dawn alawm" ka lo ti nghet charh a.



Kan ngawih rauh rauh lai chuan "Eng hla nge mawi i tih ber?" a rawn ti leh daih a. A zawhna teh thut chuan min ti hamhaih deuh a. Chhan mai dan tur ka hre lawk lo nghe nghe.




"A eng berah?" ka tih chuan "Hla hrim hrim ah hian, Sap hla a ni emaw Mizo hla pawh ni se. Eng hla nge mawi i tih ber?" a lo ti vat a.



"Keichu hman lai hla hi mawi ka ti, ngaihthlâk nuam ka ti ber bawk...chuloah" ka tih lai mek chuan min lo pawt chat a. "Aih, chutiang ni lovin eng hla nge i duh ber, i duh zawng ni lovin i hla duh ber" a lo ti vat a.




Thei leh thei lo hian min lo melh chho kiau bawk a. A zawhna chu ka ngaihtuah rauh rauh a. Hla duh ber ka neih âwm ka hre miah lo. Ka ngaihtuah loh lam pang daih a ni.



"Hla duh ber pawh ka nei hran lo" ka ti sup a, "Nang eng hla nge i duh ber?" ka tih leh chuan phûr zet hian "Ka hla ngaih thlâk zin ber a nimai. Han ring chhin teh" a lo ti var a.



Ka ngaihtuah vang vang a, a hla ngaihthlâk duh zâwng te, motor kan chuan dun apianga a hla play ngei ngei ṭhin te chu ka ngaihtuah a. Mahse han rin mai tur ka hrelo.




"Pathian hla ah maw?" ka ti leh tê tê a. Chutah lungawi vak lo hian "Min chîk ngai miah lo em ni? I ring fuh nghal thei turah ka lo ngai a" a ti nang nang a. A tum vei hmak bawk a. A awmdân lâwmawm lutuk chuan ka nuih a va han ti za tak ! Mahse nuih chhuah chî a ni lo, a lungawi lo leh dawn lutuk.




"Sawi la" dam zet hian ka ti a, a ngawi hmak a. Mahse ka ngaichâng lui ve tlat a, a rawn sawi ta nge nge a.



"Kristian Hla Bu number 532 na" a rawn tih takah chuan ka hre nghal mai. 'Khawvel sum tinreng leh lunghlu' tih hla hi a play zing tak alawm. A status zing viau bawk.




Mahse ka lo ngaihtuah zui vak ngai lova, min zawh kher danah a khat liam ve ngang aniang.



"Ka hria e, duh chhan te i nei em?" ka lo ti hluai a. Hetia biak lum lam vel hi nuam a ti tih ka hria a. Thu ho mai mai sawi hian kan hlim dun fo rêng a ni.




Chutah Rara-i chuan "Khawvêl ah hian ropuina te, hausakna te, nawmsakna te hi kan mamawh vak lo. Chung chuan vanram min thlen dawn lova. Lawm zel nun kan neih a, rilru thianghlim kan put phawt chuan sumin a lei theih loh rohlu kan nei nghal a. Chu chu vanram min thlentu tur a ni bawk a. Sumin a lei theih loh chatuan nunna neih hi a hlu ber" a lo ti duah a.




A thusawi puitling lutuk leh thu tak lutuk chuan ka ngaihtuahna a ti thui khawp mai. He hla hi ka lo sa liam mai zel a, ka bula a awm a a play ṭhin lai pawh khan ka lo ngaithla liam mai zel a. Ka lo chîk ngai lo, chutianga a sawi takah chuan hla ropui leh nung a nih zia ka hre thar a. Hmasâwnna bawk ka hmu leh ta .





Chuloah, ama nun nen chuan a inrem em a, keimahah pawh a thawk na khawp mai.




"Hla chu play ang aw" ka tih chuan a lo bu nghat a. 'Khawvel sum tinrêng leh lunghlu ' tih hla chu ka phone ah ka play sak ta a. Ngawi rengin kan ngaithla dun rauh rauh a.




Tunah chuan ka thinlung a a thawh dan pawh a danh ta zar mai. Naupang hla satliahah angah ka lo ngai ṭhin a. Mahse a lo ni lo miah lo, puitlin lam kan panna kawnga min kaihruaitu atan chu tluka hla ṭha leh thlarau nun chawmtu tur chu a awm bik lo.




Rara-i chuan a châng hnihna chu zawitê hian a sak pui rat rat a.



"Khawvel ropuina ka dil chuan,
Sirva ang a thlawk bo thin;
Rilru tha, thianghlim hlu tak chuan,
Kumtluang chenin min hnem thei"



A hla thu chu ka ngaihtuah chian poh leh hlu ka ti a. Ropui ka ti a ni.


Rara-i nun nen chuan ka tehkhin a, sumin a lei theih loh rilru thianghlim neitu a ni a. Chu chuan hringnun khawvel piah lam thlengin a daih dawn a. A tân chuan vanram châbi a ni dawn a ni.



Kan hla play a tâwp rual chuan "Au Hriatpui" a rawn ti hluai a. Ka ngaithla tih lan tir nan a samah chuan ka fâwp zauh a.



"He hla hi lusûnna hla atan a inrem lo viau em?" a rawn ti teh daih a. Zanin a zawhna reng reng chuan min ti bangbo thei khawp mai.




"Enga ti maw?" ka lo ti hu a. A ngawi leh daih lawi a. "Enga tinge?" ka ti leh kher a.



Chutah Rara-i chuan "Ngaih loh lamah ngai lo la, lo thi ta thut ila hemi hla hi min sûnna hla atan ka duh" a lo ti zawi sep a.




A âw chu zawi hle mah se hrechiang tak ka ni. Ka thisen a lum nghal pup a.



"Khatiang lam sawi tawh suh ka tih kha" lungawi vak lo hian ka ti nghut a. A lo tal aih a, chutah inlahrang hlekin min rawn melh kiau a.




"Aih, ka thi dawn ka ti kher hlei nem. Lo thi thut ta ila, inrin lâwk nan ka hla duh ka sawi anih chu" a lo ti var a. A nui nghal sen sen bawk a.




"Kan sak dawn loh tawp chu, a chhan chu i thih ka phal lo" tiin ka âwmah chuan ka kuah bei nghal hle hle a.




"A inrem lo viau ang em?" a rawn ti leh hram a. "Sawi tawh suh" ka tih hriam hrak takah chuan a ngawi zui dak mai.




Engtik ni ah emaw chuan mihringte hi kan la thi vek dawn a. A lungrun zawnga ngaihtuah phei chuan mihringte hi thi tura piang kan ni a. Vul tura duan, chuai tura vul mai kan nih chu !




Mahse tun hunah hian kan la tiam lo, min kalsan thei a la ni lo. Hmalam hun êng tak kan nei, chu bak chu ka thlir duh lo a ni.



"Au Hriatpui, ka thusawi hi la kawi zel lo la, khun khan deuhin titi lawk ang" inthlahrun hmel zet hian a rawn ti leh a.



"Thih chungchang chu sawi ka duh tawhlo, a dang chu ka phal vek" ka lo ti hmuk a. A lo thaw chhuak hak a.



"Chu tak chu ka sawi duh alawm, la kawi lo hram la. Tun chiah ka sawi min phal sak rawh" a la rawn ti hram a. Ngen tak tê hian min ngên a.




Lungawi vak lo chung chuan ka remti ta nge nge a.




A lo phur sauh emaw tih mai tur ania. Ka va han haw tak.



"Engtik ni ah emaw chuan ka la thi dawn tho tho a. Chuvangin heihi ka sawi lawk duh. Ka lo thi ta anih pawhin lo tuar na lutuk lo la. Pathian dem miah suh, chakna hmuh nan lo hmang zawk ang che. Ka sawi tawh ang khan ka lo boral thut chuan ka hla duh ber hian min thlah liam dawn nia. Pathianin hna a thawk ngei ang. Min ngaiin lo indawm kun ngawih ngawih lo la, chhel deuhin i lo awm dawn nia" a ti duah a.




A duh sawi zo tawh ang hrim hian lungawi zetin ka âwmah a bei hle hle a.



"Engtikah mah min kalsan ka phal dawn lo, chu chu a ni tawp mai" ka ti nghet charh a. Min chhang zui tawh lem hlei lova.



Mahse a hnu deuhah chuan "Thawnthu min hrilh la" a rawn ti leh daih a, ka lo nui hawk mai. Ka thawnthu phuahchawp awihawm loh zette hi ngaihnawm a ti tlat zel a. Damdawiin ah kan in awm chilh hneh bawk a, tih ṭhan ah kan nei tlat tawh.




Tichuan, ka thawnthu phuahchawp vel mai mai chu ka hrilh a, ṭawngkam thiam leh titi thiam ka ni hran lo. Mahse ngaihnawm ti deuh hian a ngaithla ve mai zel.




A muhil ta maw tihah chuan ka inlahrang a, a hmel dang bel chu ka thlir vawng vawng a.



A tisa nung sarh ṭhin te kha a dang vek tawh a. A vun sen chek ṭhin te kha a duk lek lek tawh a. Mahse ka mitah chuan a ni tluk an awm chuang lo. Ka tan chuan hmelṭha Rara-i kha a ni tlat a ni.



Zîngah chuan rin ai takin a lo harh har zek a. A muhil hmêl chu ka thlîr ning thei thlawt lo a ni.




Tukṭhuan ei a hun chuan ui chung chungin ka kaitho a, phak chuap hian a rawn harh a. A hâm zui bai bai bawk a "Ka dam loh hnu a ka muttui ber ṭum a ni" a tih chuan ka lawm khawp mai.




Tukṭhuan chu tûk dang zawng aiin a ei hnem bawk a. Naktuk maia zai tâwk tur a nih tawh avangin tlai lam aṭang chuan thil ei an phal tawh dawn si lova. Tun a chaw a ei ṭeuh pawh chu ka lawm viau mai.


Nunmawii leh Pa Ropuia nupui, Nu Mary te pawh an lo thleng chawpchilh ve nghal mai a. Rara-i chuan phur zet hian chaw a ei hnem thu te chu a lo hrilh siam siam a. A tho nuam viau anih hmel.




Nu Mary chu awm rei hman anih loh avângin a kal leh vat a. Nunmawii awm chhûng chuan ka chhûngte nen kan inbia a. Chanchin kan inhrilh a ni deuh ber mai.




Rara-i pawh an be ve nghe nghe a, duh angin ṭawng ring thei lo mah se nuam a ti ve hle tih a hmel nung sarh ah chuan hai theih a nilo.



Chhûnah chuan tui zet hian a muhil leh a. A natna chhuak lova hahdam taka a mu thei chu ka lawm thlawt a ni.



Tlai dar 2 velah chuan a rawn harh ta chauh a, mahse ka beisei loh zetin a rawn meng vai lek lek a.



Ka lo buaipui vat a, ka kut ka va dah hnaih rual chuan a lo ban nghal a. "Au Hriatpui..." a ti sep a, a mit chu a chhing leh nghal vang vang a. Ka kut chu a theihtawpa nghetin a hmer a.




"I ṭha em? Na i nei em ni? Rara ..." hlauthâwng zet hian ka ti nghal mawlh mawlh a. A mit chu a chhing vang vang a, "Ka lû...ka lû hi a hai lutuk" a rawn ti ṭiak a. Thawk a la zui nghal kawk kawk bawk a.




Ka va han mangang tak ! Nunmawii dawr kal lai tak a ni a. Doctor koh mai ka tum a, mahse ka kut chu a lo hmer tlat bawk si.



"Rara... Doctor ka va ko dawn, ka lo let leh vat ang" ka ti a. A rawn meng chhuak ṭawk ṭawk a. Heti em em a a na tuar hmel hi ka la hmu ngai lo. A meng vai ruai karah chuan thei leh thei lo hian min lo melh ṭawk ṭawk a.




"Rara... hlauthâwng suh" tiin hnem tum tak chuan ka ti dam thlup a. Ka rilru a phili a, ka mangang hle bawk. Mahse tun hunah hian rilru fîm ka put a ngai tih ka hria.




Ka kut chu a hmer tlat avang chuan tih theih dang awm tawh hek lo le. Theihtâwpa ringin Doctor te chu ka au a, rei vak lovah nurse pathum an rawn inzui lut nghal a. Rara-i chu a ṭha lo tawh takzet a ni. Ka kut a chelh na chu a thlah dul telh telh a.




"Rara...ka awm reng dawn, mangang suh aw...i dam dawn" ka ti mawlh mawlh a.




Chutia a kut a zawi tak hnak ah chuan nurse te chuan min lo nem kiang deuh a. An check nghal zung zung a. A hnu rei vak lovah Doctor a rawn lût zui a.




Pâwn lama chhuak nghal turin min ti a, ka che hlei thei der lo. Ka ngawng chhû a, ka harhfim lo a ni ber.



"Sir, please" khauh zeta nurse pakhatin a rawn tih fiah tak fakah chuan Rara-i cabin chu zawimuangin ka chhuahsan zui nghal a. Kawngkhâr an khar thleng chuan ka thlir zui vawng vawng a.




Engmah ka ngaihtuah thei lo.




Nunmawii pawh a rawn thleng chawpchilh nghal a. Chutia ka lo ding khawng reng chu min rawn khawih a, ka hmel landan aṭangin a hrethiam nghal mai aniang.




"Tinge Rara-i?" hlauthâwng zet hian a ti a. "A nâ..." tih bak ka kâ aṭangin a chhuak theilo.



Chutah Nunmawii chuan "Eng nge i sawi awmzia Hriatpui? Enga tinge? Zingah chuan a la ṭhat vek kha. Nichin lawkah pawh tui deuhin a mutthilh kha, eng nge thil awmzia?" a ti nghal mawlh mawlh a.




Chhânna mumal pawh ka pe theilo.




"Hriatpui!" a tih vîn tuarh takah chuan ka harh chhuak zawk a. Chiang zetin min lo melh a, a hrilhai ve hle ni tur a ni.



"A rawn harh a, a lu hai thu a sawi a, nikhaw hre lovin a awm zui nghal chu a nimai" ka ti a. Ka thaw chhuak zui hulh a.



Nunmawii chu a mangan hmêl khawp mai.



Ka pa Phone call ka dawng zui a, ka kut te chu a khûr vek. Heti em em a zâm hi ka la nei ngai lo.



Intih pachan a ngai tih ka hria a, puitling taka awm a, phili buai lo turin ka inthunun hram hram a. Mahse ka thinphu chu thlawk chhuak tur ang maiin a phu rang a.




Ka pa Phone call ka lak rual chuan "Hriatpui, eng nge vawiin lam chanchin te?" a rawn ti zâng vah a. "Pa, ṭawngṭai pui kan ngai" ka ti tawp a. Ka rilru a sawi tur lo lang hmasa ber a ni miau ani.



"In ṭha vak lo em ni?" a rawn ti ta reng a. Chuti chuan inti pauhkhauh in thil thlen dan kimchang chu ka hrilh nghal zung zung a. Felfai taka ka sawi thei hlauh chu ka lawm a ni.




Chutah ka pa chuan "Kan lo ṭawngṭai pui ang che u. Eng pawh thleng se Pathian in a rêl fel em em ang. I rilru siam fel la, inti huai ang che" a rawn ti nghet charh a.




Ka pa nen kan inbiak zawh chuan bang ngheng in ngawi rengin ka ding hle hle a. Ka mit ka chhing vang vang a, a va han na ngawih ngawih tak.



Nunmawii chuan ṭap pur chungin phone a hmang a. An chhûngte chanchin a hrilh kual anih hmel.



Rara-i tân ka rilruin ka ṭawngṭai mawlh mawlh a, mahse rilru fîm ka pu thei thlawt lo.



Rei vak lovah Doctor te chu an rawn chhuak a. ICU - a Rara-i sawn chu an ti thlu ta a. An rawn nawr chhuah lai chuan ka va pan hnai a. Min lo dang vat thut a. A hmêl dang bel leh a hnar a an thil vuah ṭup te chu a inhmeh lo ngawih ngawih.



"Reilotê, reilotê chiah in dah luh hma in ka hnaih phal rawh u" nurse te bulah chuan ka ti thlawt a. Min khawngaih ve a ni mahna, min dang lui bik lo.



A hmel chu ka tawk zeuh a, "Hmelṭha Rara...i dam dawn, kha chen hnehna i chang tawh a. Tun hunah hian i hneh leh tur a ni" ka ti ṭuak a.




Nurse pakhat chuan hmanhmawh a ngaih thu a rawn sawi a. An nawr liam lai chu ngawi rengin ka thlir vawng vawng a. Nunmawii pawh kan sirah a lo ṭap khur dar dar mai.



Rara-i cabin chhunga kan inzui luh rual chuan a reh tlawk tlawk a. A tu amah kan ṭawng theilo a ni ber.



Nu Ramtei phone call ka dawng leh a, lâk ka huphurh kher mai. Mahse Nunmawiin chanchin a lo hrilh tawh anih hmêl. "ICU ah chuan an dah fel tawh em ni?" a rawn ti a.




"Aw, an dah lut chiah" tha tho lo zet hian ka ti a. Rei pawh kan inbe lo, sawi tur hlawl kan hrelo dun ve ve anih hmêl.




Zan a lo thleng a, Nunmawii nen chuan tih tur kan vân dûn kher mai. Cabin ah kan awm dun deuh tlawk tlawk a. Doctor te'n kan pahniha awm an remti hlauh a.




ICU kawtah chuan a khât tawkin ka va ding leh ṭhin a. A chhunga awm ve a, a bula awm tlat tluka duh chu ka nei lo.



Pa Ropuia hnên aṭangin phone call ka dawng leh a. Ka pa in chanchin a lo hrilh ve nghal tih chu a ṭawng dan aṭangin ka hrethiam nghal mai a.



"Naktuk lamah i Nu Mary nen kan lo kal ve dawn nia" a rawn ti dam thluam a. Engtin emaw tak chuan min thlamuan ve deuh e.



Zan dar 10 velah Doctor in min rawn ko a. Thinphu dup dup chungin ka va hmu a. Nunmawii erawh cabin lamah a lo la awm thung a.



Doctor chuan "In chhûngte in hrilh hre tawh em?" a ti a, ka lo bu nghut a. Kan Doctor hi hnam dang daih mah nise a felin biak a nuam em em a. Thil nihna tak min hrilh ṭhin bawk a. Kan tan chuan Doctor ṭha leh fel tak a ni.




Chutah Doctor chuan "Tlang deuhin ka sawi ang a. Tun dinhmunah hi chuan beisei a bo tawh khawp mai. A chhe ber tâwk tura in inbuatsaih a ṭha ang. Kan theihtawp kan chhuah a, kan chhuah zel bawk ang. Mahse zanin hi a tlin kher ang em kan hrelo ani" a ti dam thluam a.




Ka nghing nghal lawih mai, ka ngaihtuahna a mang vek a. A thusawi chu hriatthiam harsa ka ti a, ka ring phal lo a ni ber.



"Min chhan sak rawh" ka ti tawp a, a hmêl landan aṭang chuan min lainat ve zia ka hmu thei. "Ka tih theih piahlam a ni tawh a ni" a ti a.


"Doctor, beiseina sâng tak neiin helai hmun hi kan lo pan asin. Rara-i hian thih a tum hlei nem, dam tumin alawm helai hmun hi kan lo pan. Nangni berin beiseina min pêk loh chuan engtin nge ni ang? Pangngai takin kan lo kal a, mihring chang lovin kan haw ang maw" hrethiam lo zet hian ka la ti fan a.




Beiseina min pe sela, 'Hlauhthawn tur a awm lo e' min ti sela ka duh ani.




Doctor chu a ngawi reng a, "Min chhan sak rawh" ka ti leh tawp a. "Ṭhianpa, kan tih theih piah lam ani" tih zawng a sawi.




Beidawng zet hian cabin lamah chuan ka lêt leh a. Nunmawiin chanchin min lo zawh pawh chuan ka chhâng ṭha hlei theilo.



Phone a hmang leh a, Pa Ropuia te a lo call anih hmêl. Zan zanah an rawn kal a, duty ho pawhin an lo luh tir ve mai anih hmel.



Pa Ropuia chuan khun khan deuhin min zawt a, thil awmzia chu ka theih ang tâwka felfai in ka sawi a. Ṭawngṭai a rawt a, kan han Ṭawngṭai rual leh rih a.




Kei chuan engmah ka ngaihtuah thei tawh lo.



Darkar khat vel a liam leh a, Rara-i chu cabin ah an rawn sawn leh a. An rawn sawn leh chhan chu eng dang vang a ni lo.


A ṭhat leh deuh tak vang pawh a ni lo, beisei an nei tawh lova. ICU a tuma dawm hlum loha boral tir ai chuan kan bula thlamuang taka hahdam tîr an duh vang a ni!



Chu chuan min ti na a, ngaihtuahna mumal pawh ka pu theilo.




Midangho chuan hun thâwl min pe a. Nunmawii leh Nu Mary te phei chuan mittui tla zawih zawih chungin min thlir reng tawh.




Pa Ropuia'n in lama kan chhûngte chu lo insingsa fel mai turin a phone tawh a.


A na asin, ka hmangaih kal liam tur chu ka nghak deuh tawp mai ani.



Dar 12 rik nan minute sawm thum chiah a awm tawh a. November ni 19 a ni ṭep tawh, bul kan ṭan ni tur atâna pumkhat kan nih hun tur kha a thleng ṭep tawh asin.



Rara-i chu ka thlir ngawih ngawih a, a mit chu a rawn che leh ralh ṭhin a. Mahse chu thil chu beisei neih na tham a ni tlat lo. Doctor min hrilh dan a ni.



A kut a rawn che hret a, "Rara..." ka lo ti nghal a, "I hre thei em?" ka tih chuan a rawn meng da va riai a. Hlim zet hian "Rara..." ka ti hluai a. Ka lungphu chu rang tak a ni.




A hmui a chêt rual chuan a bengbulah ka zuk kun hniam a.



"Min kal tir tawh mai rawh" fiah lo ruai hian a rawn ti a. A rawn ṭawng chhuak chu lawm viau mah ila a thusawi mawlh mai chuan min ti na a ni !




"Aih, khawiah mah i kal ka phal lo, ka dam dawn i tih fo kha. I tello in ka awm theilo. Ka phal lo" ka ti mawlh mawlh a. Ka âw a mumal lova, ka â ruai maiin ka hria.



"Rara..." ka ti leh a, a mittui chu a rawn luang thla ngiai ngiai a. A rawn phun leh rual chuan ka zuk kun hniam leh a.




"A na...min hahdam tir tawh mai rawh" thei leh thei lo hian a rawn ti leh a. Theih nise a tawrh ai zawng zawng tawrh hi ka huam asin mawle.



Kaltir ka phal lova, mahse ka rilru lehlam chuan a natna tuar reng ai chuan kal mai se tihna chen ka nei bawk a. Duhthlan tur ka va han hrelo tak !




Mit ka chhin vang vang hnu chuan rilru ka siam fel ta a. Ka thutlukna siam tawh zawng zawnga pawm harsa ber a la ni hial ang !



A biangah chuan ka zuk khawih a "Umm...kal rawh... châwl vang vang tawh rawh. Vanramah chuan min lo nghak rawh aw...van angel zîngah chuan a hmêlṭha ber i ni ang a. Min lo thlir ṭhin rawh aw" ka ti ta a.




Ka âw a ṭial ruai a, ka mittui a luang thla nghal pap bawk a. Ka insum zo thlawt lo a ni. Insum pawh ka tum lo. Ka hmangaih hian ṭah a phû a ni.




Rara-i chu a reh zui ta vang vang a, a mit che leh ralh ṭhin pawh kha a bo tawh a. Monitor ah chuan nunna nei a la nih zia chu a lang tak na in nunna nei hmêl pawh a pu tawh lo.




A kutah chuan ka hûm vawng vawng a, ka ṭap khur ngat ngat a. Harsa ka va han ti tak.




A tân chuan khawvel hi a hrehawm emai a, hahdam tawh mai rawh se. Mahse ka la thlahlel em em a, dam khawchhuak thei se chu ka la duh fan a ni. Chu erawh ka beisei ngam tawh lo.



November ni 19 zing dar 3 velah chuan ka hmangaih chuan min liam san ta !




Doctor leh nurse te'n an rawn bawihsawm nghal zung zung a. Nunmawii chu a ṭap nghal rawng rawng a, Nu Mary pawh a insum zo bik lo. Keiin Rara-i engmah hre tawhlo taksa chu ka pawm bet tlat a. Ka mittui a hul tawh a, mahse ka kawchhûng erawh ka sawifiah thiam phâk bakin a na a ni !




Harhfim ka ngai tih ka hria a. Nurse te'n a ruang tuam an tum lai pawh chuan ngawi rengin ka thlah a, ka va han lainat tak.




Ka chhûngte ka phone kual a, Nunmawii chu a pangngai tawh hlawl lova. Rara-i ruang chungah chuan a ṭap rawng rawng a.




Ka pa ka biak lai chuan ka hnuk a ulh ve ṭeuh mai "Pa...a kal tawh aw, a dam tawh" ka ti thâm ṭuak a. Mahni pa te bulah chuan tlangvâl uaih tawh mah ila rilru no na lai ka lo la nei tlat a ni.



Chutah ka pa chuan ka têtlai a min koh ṭhin dan ang ngeiin min rawn ko "Bawihpui..." a ti dam thluam a. Ka ṭap chhuak lo chauh a ni. Pa te bulah chuan ka pâ zo lo lek lek a ni. Mahse ka ṭap chhuak ta em lova.



"Patling takin awm tum la, chhel takin aw. A fanu chu Pathianin a lo lâwm lut ngei ang" a rawn ti dam thluam a.




Ka pa ṭawngkam chuan engtin emaw tak hian min thlamuan a. Tichuan kan ṭhian ṭha te ho pawh ka phone kual zung zung a. Rara-i chhûngte pawh ka hrilh kual a. Nu Ramtei chu a hnuk a ulh ve ṭeuh in ka hria.



Pa Ropuia chuan kawng engkimah min buaipui a. Vellore-a Mizo awm hote pawhin theihtâwp min chhuah pui a. Hmelhriat miah loh aṭang tein ngaihsakna kan dawng a.



A boral tûk ah chuan Mizoram lamah a ruang chu kan haw pui ve thei ta hram a.



Zanah an in kan thleng a, a nî te ho chu an lo ṭap rawih rawih a. Nu Nêmi pawh a sirah dingin a lo inhru fap fap a. Nu Ramtei chuan hrehawm a tih hmel khawp mai.




Ka chhûng te pawh an lo kim biai tawh a. Hriathlua leh Hriatzuali te chhungkua pawh an lo awm ve nghe nghe. Ka pa in a chah haw hlawm a ni mahna.




Ka nu leh Vantei pawh an ṭap rawng rawng a. An tuar thiam lo ve hle in ka ring.



Ka pa chuan min lo kuah thuk a, "Chhel takin aw" a ti a. Ka hnungah chuan a beng dat a. Ka thaw chhuak ham ham mai.



Zaninah hian kan lumen leh ang a, naktuk chhun dar 12 ah kan vui liam dawn a ni.



Khawtlang hruaitu te chu an lo ding vat a. Chhiat tawh chungchângah eng emaw neuh neuhte an sawi a.



Rara-i ruang kil chuan ka ṭhu ve reng a. Ka mittui chu a tla leh tawhlo hrim hrim. Mak tak maiin ka hahdam huai a. Ka sûn lo a nilo, mahse Pathianah hahdamna ka hmu tlat a ni.



Zing khua a lo var a, mite zai thâwm chu ka bengah a luh pawh ka hrelo. Rara-i hmel ringawt chu ka thlir a. A hmui dang lep ṭhin kha an hnawih sen a, a hmai pawh a vâr vek tawh mai.



Ka tuar lo ka tih chuan dawt ka sawi chiang hle ang. Mahse a la harhfim laia a thu min chah te kha ka ngaihtuah let a.




A thih tur thu hre lawk ang hrim khan a ṭawng fo mai a. 'Ka dam dawn' a ti alawm, tunah chuan a dam tawh. Natna awm tawh lohna ah a châwl a ni.




Tukṭhuan ei tura midang an thawh sup sup lai pawh chuan ka thawh san phal lova. A ruang bulah chuan zankhuaa ka ṭhut dan ngai ngaiin ka ṭhu reng a.




Innei mai tawh tur dinhmuna ding kha kan ni a. Midang pawhin min hrethiam hle in ka hria.



Mi rêm deuh lai chuan a biang vawt thler chu ka tawk da da a. Vellore-a kan inbuaipui chhûng nen zan hnih tlaivar pui ang kan ni tawh a. Damdawiin an chiu reng a, rimchhia engmah a awm lova, a hmêl te chu a ṭhat ngaiin a la ṭha reng zawk a ni.




"Hmêlṭha Rara..." ka ti sup a, min chhâng tawh lova. A reh tlawk tlawk a, ka rilru chu a insual bulh bulh mai.




Pathian dem ka duh lova, mahse zawhna chhan sen loh ka thinlungah a awm a. A vul lai tawi lutuk te chu na ka tih pui a. A hahdamna hian natna tam tak min pe si a ni.




A ruang chungah chuan ka pa pawhin thu a sawi ve a.



"Vanrawngbawli hi ka fanu ang chiah a ni a. In hre ṭheuh ang a, Rev Sanghminga fam ta tunu kha a ni a. A pu te nen kan inlaichinna hi a ṭha viau mai a. Chu mai piahlamah kan fa tlum ber nen hian inkawm ṭhin a, kan inah pawh a lo chuang lut ve fo mai. Hriatpuia nen pawh hian chuta ṭanga inhria chu an ni nghe nghe. Lo inhmangaih chhovin inneih hialte an lo duh ta a. Mahse hei, Pathian rorêlna chu kan dal zawh rual loh a ni ta a. An inneih ni tur tak maiah chatuan ram min pan ta si a. Kan fate hi ka lainat em em a, chutihrual chuan vawiin ni ah hian a indawm kun zawnga thusawi ka tum lova. Ka sawi duh tak chu heihi ani. Rara-i nunah hian zir tur kan ngah khawp mai. A dinhmun kan hria a, engah mah hian Pathian lakah a vui ngai lo. A eng zawnga thil thlir duh tlat mi, mi hlim thei tak mai a ni. A tawrhna aia a malsâwmna dawn te chhiar tlat ṭhin mi a ni. Chu chu helai hmuna lo kalte hian entawn ila ka duh" tiin a sawi a. A sawi zel a.




A thusawi tâwpna chuan min khawih khawp mai.



"Rara-i chuan harsatna engkim a hneh zel ṭhin a. Engmah a indal tir ve ngai lo. Tichuan vawiin ni ah hian a natna hnehin damna famkim a chang a ni. Vawiin ni a a hnehna hi hnehna ropui ber ani. Pa ângchhunga a chawlhna hi"




Ni e, ka pa sawi hi a dik chiah a ni. Pa ângchhunga a chawlhna hi a hnehna ropui ber a ni. Thihna te'n an ngam lova, a taksa chu boral tawh mah se thlarau damna a chang tlat a ni.




Ka pa chuan min cho chhuak a, Rara-i ruang chungah chuan khur ru ṭeuh chungin ka ding zawm ve zat a.



Mipui mit chu keimahah a fu ṭhup a. Kei chuan ka hmangaih ruang dai chu ka thlir vawng vawng thung a.



"Vawiinah hian min tihrilhai lutuk a" ka ti tê tê a. "Theih chu nise nung damin la awm se, ka kiangah awm se ka duh a. Mahse Pathian remruat chu mihringte dâl rual a ni si lova, pawm thiam kan zir mai aniang chu" ka ti a.




Ka ngawi leh vang vang a. Tichuan, Rara-i nat dan kimchang te leh a boral zui tak dan te chu ka sawi a. Ka rin ai takin ka sawi pangngai thei a, ka lawm khawp mai.



Bialtu Pastor chuan fuihna thuchah tlêm a sawi a. Chumi hnu ah amah thlah nan a hla duh ber mai chu kan sa ta alawm. Ka thusawiah khan mipuite'n mak an tih lutuk loh nan ka sawi lawk diam tawh a. Khawhar hla ni hran lo mah se kan sak chhan chu an hrethiam ve vek ang.




"Khawvêl sum tinrêng leh lunghlu" chu kan sa rual a. A thunawn kan sa chiah tihah chuan Nu Nêmi a rawn ṭap chhuak ta chiah mai le !




A hma zawng khan a inhru fap fap ringawt a. A puakkeh ta ngang aniang, Rara-i ruang chu thei leh thei lo hian a bawh a. A biang a chûl a, a ṭap hawm hawm a.




A thinlung leh tih takzetin a ṭap tih ka thinglung hian a hre thei tlat.



Chutiang chiah chuan Nu Ramtei te, a nî dangte ho pawh chu an rawn ṭap chhuak ta chuah chuah a.



"Bawihte..." tih bak chu an sawi thei lo, an ṭap rawng rawng a. Ka thinlung alo lawm tlat pek a.




Rara-in "Pathianin hna a thawk dawn" a lo tih lawk kha a thleng dik mekin ka hria.



Kan zai zawh thleng pawh chuan an mittui a hul thei lova. Ruang hnaih vaih deuha ṭhu te ho pawh chu an inhru fap fap hlawm mai.



Lal ṭawngṭaina kan sawi rual a. Kuang an chhin dawn tak takah chuan Rara-i ruang enchiang tur chuan ka zuk kun hniam a.




A biang vawt thlerah chuan ka chûl a "Hmelṭha Rara, min tina asin, mahse i dam ta" ka ti tham ṭuak a. Ka mittui hul mah se ka kawchhûng hi a ṭap rawng rawng maiin ka hria.



A chalah chuan ka fâwp vawng vawng a. Heihi a hmel ka hmuh tâwpna tur chu a ni tawh mai si a aw. Ka tliak hnawp maiin ka hria.




A biang chu ka chûl leh hauh hauh a, ui zetin ka thlah ta a. Kuang an chhin lai chu ka hmu ngam thlawt lova. Ka hawisawn tawp, ka kaltir phal lo mai ang.



Thlalâk na hunte kan hman zawh chuan thlanmual lamah vuina hun kan hmang leh a.



Ka rose ken lai chu ka thlâk thla a, a kal ka phal lo. Mahse kaltir turin min ngen tlat kha ania. A dam tawh tih chuan ka inhnêm ru mawlh mawlh a.



Nu Ramtei leh a ni te ho chu an la ṭap rawng rawng a. A cousin te ho pawh an bâng chuang lo. Vantei leh ka nu te pawh ka pa chuan an dara kuahin a hnêm mawlh mawlh a.




Ṭap rawh se, an theihtawp a ringin ṭap rawh se. Ka hmangaih hian mittui tam tak a phû a ni !



Tichuan, vawikhat mah inhmu leh tawh ngai lo turin min kalsan ta a.



Tlai lamah chuan Nu Ramtei te'n zanriah ei ve nghal turin min ti a, kan hnial viau na in haw an remti tlat lova. Kan chhungkua chuan kan awm ve ta reng a.



Ka ṭhiante nen pawh pangngai takin kan inbia a. Nu ho chuan puitling min tiin min fak luam hlawm a. Keipawhin rin ai taka ka pawm thiam chu mak ka inti.




Mahse zân a lo ni a, khawharna in min rawn luhchilh ta tak tak alawm le.




Ka khumah chuan ngawi rengin ka ṭhu a. Mit ka chhin leh ka mitthla ah Rara-i hlir a lo lang a. Ka men leh ka thawk a pik tlat bawk si.




Hriatpuia leh Hriatzuali te chhungkua chu ka pu te in lamah an riak thla daih a. Ka nu leh pa te'n min riahpui an tum zet a. Tlangval a pumpa thil ni thei niin ka hrelo a. Ka hnial ta kha ania.




Ka lung a lêng em em mai a. A boral hma lawk pawh khan kan la inbia kha ania. Ka ngaihtuah chiang telh telh a. Nâ ka ti telh telh mai.



Ka riru ipik lutuk chu ka pa te room ka va kik tawp a. An lo mu thei bik lo aniang ka nu chuan a lo hawng vat a. Dawhkanah Bible leh notebook an lo la inchhawp nuai mai.




Ka nu chuan "Lo kal rawh Hriatpui" a lo ti dam thlap a. Ka pa pawh a lo tho vat a.



Eng dang mah sawi lovin "Min ṭawngṭai sak teh u" ka ti tawp a. Awmdan tur ka hre hlawl lo a ni.



Chutah ka pa chuan ihe lovin ka lu chunga kut nghat chungin min ṭawngṭai sak a.



Pathian hnenah thlamuanna min dil sak a, a ṭawngṭai zawh hnu chuan min fuih mawlg mawlh bawk a. Kawngro a su mawh rih khawp mai.




Mahse ka room a ka let leh chiah chu engtin emaw tak hian ka thawl huai a. Ka ṭawngṭai ve nghal bawk a.



"Lalpa, ani chu min lak sak ta si a, min awmpui ve thung rawh aw..." tiin ngenngawl zet hian Pathian ka au a. Mak tak maiin tui tak hian ka muhil zui veleh mai a.




Kar khat chhung chu engmah ti lovin ka awm a. Mahse Pathian zarah hrehawm lutuk ang khan ka awm lova. A tihzia khawp mai. Ka chhûngte mai bakah mi hrang hrang hnen atangin ṭawngṭai puina ka dawng mawlh mawlh a. Chumi vang chu a ni ka ti lo thei lo.




Mahse kar hnih a liam leh chuan ka lunglêng ta telh telh mai a. Ka ṭawngṭai thei mang tlat tawh lo. Hna pawh ka la zawm chuang lova inchhungah chuan ka awm mâwl tawp a. Ka chhûngte pawhin min hrethiam a, min en liam rih a ni ber.




Rara-i boral thla khatna kan thleng a, zanah chuan sualin min bei nge ka hrethiam lo. Pathian demna in ka khat a. Ka inngaihtuah lung puam a.




Rara-i chu ka ngai em em a, a âw zâng vaha min kohna te kha ka bengah a rawn ri nawn tlut tlut a.


Mumal lo zet hian ka phone chu ka ban a, a number chu hmet chhuakin call ka tum a. Mahse chhanna ka hmu lo, phone tlang pawh ka phone tlang thei lova.




Ka â vek maiin ka hria. Vawi sawm lai ka call hnuah pawh chuan min chhang thei si lova. Ka phone chu ka vawm pawp a, "Enga tinge?" ka ti tuarh a. Ka mittui a rawn tla nghal bawk a.




"Enga tinge min chhan loh i âw ka hre duh" ka ti leh tuarh a. Ka thâwmah chuan ka chhûngte an lo kal nghal a. Ka pa chuan min rawn hnaihchilh nghal ruak a.




Ka nu leh Vantei te erawh kawngka bulah an lo ding reng a.



Ka pa in "Hriatpui" a tih sup rual chuan awrawl chhuah meuh hian ka ṭap chhuak nghal a.



"Pa... Rara-in min chhang duh lo" naupangchhia ang mai hian ka ti a. Ka pa chuan min kuah nghal vat a.




Ka nu leh Vantei chu hmui hup chungin kawngka bulah an lo ding reng a. An mittui a luang nghal zawih zawih mai.




"Nu, Rara-in min chhang duh lo" ka nu va melh chung chuan ka ti leh a. Ka nu chu a ṭap khur nghal dar dar a.



Vantei chu melh lehin "I ṭhiannu kha phone la turin hrilh rawh" ka ti mawl leh tawp a. Vantei chuan lehlam a hawi nghal daih a, a khur zui ngat ngat mai.




Chutah ka pa chuan "Bawiha, harhfim taka awm tum hram hram rawh" a ti a. Min kuah reng chung chuan ka hnungzang chu a beng dat dat a.




Awrawl chhuah meuh hian ka ṭap chhuak a. "Pathian hnenah min dil sak rawh, ka hnenah lo awm leh mai rawh se. A tello chuan ka thi thei mai ang" ka ti thlawt a.




Ka pa chuan engmah sawi tawh lovin ka pangngai hma chu ka hnungah a chûl ringawt a. Ka nu leh Vantei te chu an lo ṭap chhuak hlawp hlawp tawh mai.




Ka rilru a fim tial tial a, mahse chu chuan natna min pe hnem tial tial thung a. Rara-i khawvelah a awm ve tawhlo tih ka hriatna chu a rawn chiang telh telh a. Ka na a ni !




Ka nu a lo phei ve nghal vat a, ka pa chu inlahrang in ka nu zawk chuan min lo chelh a.



"Hriatpui..." tiin min kuah bet a, a ṭap khur nghal dar dar a. Ka samah chuan a fawp zui vang vang bawk a.



Ka pa chuan "Ṭawngṭaina kan hmang ange" a ti a. Ka lu chunga kut nghatin min ṭawngṭai sak a.




"Lalpa, he khawvel hi chu kan khualzinna ram a ni a. I kianga haw leh vek tur kan ni. I hnena lo kal hmasa te chu mi nihlawh an ni a. Chutihrual chuan Lalpa, awm lo ngaia rûm te hi a na a, a hrehawm em em a. Anni hlim tawh mah se an kalsan takte hi kan hrehawm ṭhin a. Khawngaih takin Lalpa lungngai te thlamuan ṭhin tu chuan min thlamuan la. He thihna ah hian i tel ve a ni tih min hriat nawn tir fo la. Lunglênna te lo awm ṭhin mah se nangin min hnêm la. Kan fapa khawharna te hi hnêm ang che aw" tiin Pathian min auh sak a .




Chumi zan chuan zankhua in ka mu lo a tih theih ang. Ka mu leh pa te'n min ṭhut chilh tlaivar ve ṭhak a.



Pathian ka demna thu te chu ka chhak chhuak a. Mahse min ngaithla liam tawp a ni ber.



A tirah chuan ka tuar thiam em em kha a ni a. Tunah chuan ka tawrh zawh tawl aliam natna niin ka hre tawh.




Zingah chuan chhûng inkhawmna ah ka pa in thu tlemtê a sawi a.



A thusawi chuan mim vaw harh chiang teh e !




"Vanrawngbawli chuan vanah rawng a bâwl tawh a. Hriatpuia hian a ta emaw a lo ti char char a. Mahse ani chu Pathian ta a lo ni reng si a. Pathian chuan a ta a la mai a ni" a ti nghet charh a. Chu chuan min tidam sawng sawng maiin ka hria.




Chuta ṭang chuan Bible chhiar leh ṭawngṭai chu ka phak ang tawkin ka ti leh ṭan a. Ka nu leh pa te'n min fuih âwl lova. Ṭawngṭai puina ka dawng âwl lo bawk a. Ka lawm a ni.




Rara-i chhûngte pawh ka tlawh ve reng a. Rara-i thihna chuan malsâwmna tam tak a lo thlen reng a. Chhungkaw keh chhe mai tur kha inrem takin an awm tawh a.



Lawmna a khat rilru thianghlim khan Nu Nêmi te thinlungah hna a thawk a. Inngaidam tawnin chhungkaw ṭha tak an ni chho zel a.




Rara-i chuan a pu ro a khawm zawng zawng kha hnuchham in hrang hrang tan a lo dah vek hi a lo ania. A dam lai khan ro a lo rel fel lawk diam a.



Chu thil chu tuman an sawi buai tawh lo. Rosum inchuhna a awm tawh lova, an chhungkua chu an inpawh tlang em em tawh a.



Mahse Rara-i dam laia an ngaihsak ṭha tawk lo erawh kha chu hrehawm an ti a. A dam laia a chunga an lo ṭha lo lutuk khan tun hnuah a vaw let fo mai.




Ka bulah hian an sawi fo a, an inbunruahna pakhat ka ni deuh ber mai. Mahse inlungrual taka an awm hi Rara-i duhthusam ani tih ka hria a. Inthiamlo deuha an awm pawhin hnem lettu zawk ka ni ṭhin.



Khawvel sum tinrêng leh lunghlu dil ngai lo tu khan a dil ṭhin rilru thianghlim chu pekin a awm a. Chu chuan an chhungkua a kai harh a. Chatuan nunna a pek phah ta a ni.




Engkim kan ta tih hian a lo huam thui khawp mai. Hlimna leh lâwmna te hi chu kan ta anihin dawnsawn a lo nuam viau mai a. Mahse lungngaihna leh ṭahna te a lo thlen hian kan ta a pawm thiam a har fo ṭhin. Mihring tana pawm thiam har ber chu thihna hi a ni awm e. Mahse hei pawh hi kan ta a ni a. Chutihrual chuan thihna avanga malsâwmna lo awm tur pawh chu kan ta tur tho ani.




Chutiang chiah chuan Rara-i thihna vanga malsâwmna lo thleng pawh hi kan ta a ni a. Malsâwmna lo thleng leh zel tur pawh chu kan ta tur tho a ni.




Rara-i thlan bulah chuan ngawi rengin ka ding hle hle a. Ka thlir vawng vawng a.




"Ka hmangaih che hmelṭha Rara" ka ti sup a. Pangpar mawi zet chu ka dah zui nghal a.



Lei ram ka thlakhlelh loh nan he lei ram hi a chhuahsan a. Van ram ngaih ti zual turin vankhawpui ah min lawi san a. A damna chuan ṭahna min thlen a.



Mahse heihi ka hria ani, Pa ângchhungah chuan thlamuang takin a châwl ani tih hi !




A TÂWP TA !



____________*___________*______________



KA THAWNTHU PALI NA CHU KAN LO ZO VELEH TA RENG MAI. A TÎR AṬANGA A TÂWP THLENGA MIN LO CHHIAR SAK TUTE KA TAN IN HLU. CHUMI PIAHLAMA COMMENTS ṬHA TAK TAK MIN HNUTCHHIAH TUTE KHA IN HLU ZUAL. KA REGU LO HLE A, KA THAWNTHU DANG PAWH A PHÂK LO HLE TIH KA HRIA. CHUNG ZAWNG ZAWNGAH CHUAN NGAIHDAM KA DIL CHE U.



THAWNTHU KAN NEIH LEH HUN TUR HI KA SAWI LÂWK THEI LOVA. MAHSE KA RAWN ṬHAWNG THUT ANG CHE U

(Zanin chu ka type laite hian ka ṭap vel, in lainat anv chiah khan ka lainat aw. Season 2 a awm thut mai thei ania. Mahse kuminah lo...hihi...)


Show post links
Top