AIZIAL By CVL Awmpuii (Completed)

[Ngaia]

#Prologue
Rara-i te in zawn ka thlen rual chuan kawngsir remchang laiah bike chu ka tiding dat a. Ka inhun fel hnu chuan châbi chu la in ka ak tha zui nghal a. Ka ding rei dawn chuang lova midang lirthei khalhna kawng a dal loh hram ka beisei.
An kawngkapui chu a lo inkhar thiap a, mahse inchhung lama TV en thâwm ka hriat avang chuan mi tu emaw tal chu an awm ka ring ve ngawt a.
Kawngkhar bula door bell chu ka hmet a, inchhung lam atanga patling min lo chhâwn tu an awm rual chuan ka hawng zui nghal a.
Patling dul kiar ve lampang, lian zuar mai hi TV hmaah chuan a lo thu a. A thu chung pawhin a thu khat deuh hnuk a, a tê lo khawp mai. Rara-i pâ a nih ka lo ring ve ngawt a. A ni tak tak anih chuan a nu zawk a chhun anih ka ring hmiah. A pa chu a hmel a fel fai lo emai.
"Eng nge ni ta?" a lo ti dam thlup a. Rin ai takin a aw chu a pangngai a, a nghet deuh tlut bawk.
"Rara-i ka rawn lam dawn a" pehhel buai lovin ka ti tlang tawp a. Theih chu nise he inah hian ka kal teuhlo mai. Ka nau thiannu hi ka ngainat zawng a ni miau lova. A mize harh vang thit thet lutuk hi ka ngai thei vak lo a ni ber.
"A insiam in ka hria, a room ah han kal chhin teh" a lo ti awlsam then a. Ka beisei aiin a ngaih a sam ang reng. A fanu puitling ve uaih tawh room a mipa puitling luh tir chu a pawisak vak hmel loh.
Mahse keimah zawk chuan duh lovin "Hetah hian ka lo nghak mai ang" ka ti sup a. Thut thlak mai ka tum lai chuan "Han tur rawh, chutiang a nih loh chuan engtikah mah in chhuak lovang" a lo ti thuai a.
A ngaihna hrelo fe hian "A nimaw" ka lo ti ban chhalh a. "Aw, a room ah chuan han nghak rawh. A chhuak tur te hi a insiam rei thei leh lutuk a. Tur fe a ngai thin alawm, han chho rawh" a lo ti leh zung zung a.
Ka hmanhmawh bawk nen hnial zui chi ni tawh hek lo le. A inpeih vat theih nan chuan tiin Rara-i room ni a a sawi lamah chuan ka pen chho ta nge nge a.
Inchungah chuan room pakhat chauh a lo awm a, chumi chu a nih ka ring ve nghal ngawt a.
Kawngka chu vawi thum vel ka kik hnuah min rawn chhâwn ta hram a. A la bak hlar zui a "Rawn lut mai mai teh" a ti hlar a. A ngaihna ka hrelo lutuk chu ka hawi hil ang reng. Keimah ka ni tih a hrelo tawp aniang.
Kawngka chu zawi muangin ka hawng a, room chhunga ka thil hmuh avang chuan rang fahran hian ka hawi sawn nghal a. Ka sa chhuak pup maiin ka hria.
Hawisawn nghal vat mah ila a bra leh a kekawr bul pan tê nen chauha a lo awm teu kha ka hmu chiang hman lutuk.
Rara-i lah chuan engah mah ngai lo tih hriat lutuk hian "Ehe...nangmah elo? Zuia'n min lo hruai dawn emaw ka tia" a lo ti hliai a.
A tawng dan a pangngai em avang chuan a lam ka hawi vat a. A lo inkhuh tha sawk sawk tawh ang chu ka tih laiin a awmdan ngai rengin a lo la awm a. Darthlalang hmaah dingin a sam sei hniang chu a khuih dalh dalh a.
Saruak thaw thanga ka va hmu chu min pawisak loh hmel kher mai. A zak miah lo zawk emawni. Zak zum kimki chawih chawih chi a nilo tih chu hre tho mah ila hetiang em em ah hi chuan a zah ve ka ring ania.
"Kawr te ha ve ta che" ka ti ta hluk a. Min pawisa lo reuh lutuk chu hmeichhia a nihna angin ka ngaimawh tlat. Hetiang ah te chuan a zak lo anih pawhin zah der ve tal tur ania. Keimah zawk min ti zak lek lek mai.
"Ka la ha hman hlei nem, khumah hian lo thu rawh. Ka hmai ka chei zung zung ang a, kawr ka ha ang a. Ka hman a nimai" pangngai deuh hian a ti a. Engtin mah a awmdan a danglam eih lo.
"Pawn ah ka lo nghak zawk ang che" ka tih chuan mitmeng fiah zet hian min rawn melh kal a. Ka lo melh let ve run a. A hmel ah zahna emaw nuam lo tihna pawh ka la hmu chuang lo.
Kal chhuah mai ka tum lai chuan "Au Hriatpui..." a lo ti vat a. Ka lehhawi leh nghal vut.
Nuihza insum deuh hian min lo en a. A hmui hupin mitmeng tizim san hian min melh a, "Eng nge?" ka ti ta nghut. A awmdan engkim hi ka ngainat zawng a ni lo. Ka nau nen an mizia a inpersan si, an lo inkawm ve ngawt te hi a mak.
"I mitmeng kha" a rawn ti a, mitko a rawn san ak ak a. Eng chu a hria nimaw. "Eng nge ka mitmeng chu?" ka lo ti hluk. A awmdan hi ka nin zawng tak. A hma atang tawhin ka ning tawh. A rilru ka hre ve kar si a, ka chhungte vanga be chhe lo mai mai ka la ni.
"Min ît chiang lutuk" a rawn ti heu mai. Min va han tihrilhai tak e aw. Ka meng tal nghal tap a. Chutiang zawnga ka ngai lo lutuk chu min ti dang lel mai.
Intithei fahran hian min melh ralh ralh a, ka rap reuh mange. Hmeichhe zak thei lo tak han ti dawn ila a ni em bik silo. Min lo biak reng rengin chin tawk a hre ve fu si a.
"I kawr ha rawh" ka ti ta ngawt a, a la intihtheih hmel ta deuh deuh a. A mizia ang hi ka deal thiam loh zawng tak.
"Mipa hmaah saruak thawthanga awm tur a ni ngailo. Mipa sual chuan an sual hrep mai ang che. Khawi hmun pawh nise kawr pan lutuk leh bul lutuk hak loh tur. Tuna i awm dan ngat phei kha chu a zahthlak. Hetiangah hi chuan zah tur" ka ti ta duah a. Ka sawi tum ber pawh ka hre chuang lo. Ka sawi thiam hek lo.
Ka nau thiannu a nihna angin hei ai hian zak zum hret se ka duh. A awmdan a zahawm lo lek lek zel.
Rara-i chu a lo ner nawng a, mahse a nui ta sak a. A hmel hi chu a chhe miah lo mawle, a nui hmel phei chu a tha reuh. Mahse ka ngainat zawng a nilo.
"Nang chu mipa dik tak i nia. Pa Sangzuala en reng reng pawhin i sual dawn lo tih ka hria. Chuvangin saruak paw'n lo awm ila ka duhlo chung chu min khawih lui dawn lo tih ka hria alawm" sawi fuh inti fe hian a ti zat zat a.
Ka melh run run hnu ah "Duh pawh ni la ka khawih lovang che" ka lo ti hmiah. A room atang chuan ka chhuak zui nghal daih bawk.
____________*___________*__________
Heti hian duhthu ka lo sam ve thin a. Nupui te ka lo nei ve dawn anih ngai chuan ka nû anga hmeichhe nunnem leh zaidam, mite zah thiam, mi ti phawr phawr lo. Zahawm deuh leh Pathian tih mi hi ka la nei ve ang tiin. Mahse ani hi chu ka nu mize ep thawk a ni. Ka hmuh tirh phat atang khan a mizia hi ka ngainat zawng chî a nih loh bakah ka ngainat theih ngai loh tur niin ka hria.


AIZIAL
By CVL Awmpuii


Chapter 1


Ding zetin ka hma lama inchhawng sang pui pui ding ut te chu ka thlîr vung vung a. Motor tlan ri vut vut leh horn ri tuarh tuarh te chu ngaiah ka nei tawh.



Thawm bengchheng leh ri va a tam em em a, hahdam taka awm chu har ve tak ani. Chu chuan mahni ram ngeia haw mi ti châk zual a. Mahni ram leilung ngei rah a, thlamuang leh hahdam taka hun hman ka thlahlel ve tawh takzet.



Lunglênga han kur ngei nguai chu a mipa lo ka tih bakah ka duh ngai miah loh thil a ni. Mahse tukin zet chu ka lung a lêng ru ve veng veng mai. A ngaih that loh hial zawk.




Ka ban chu lek chhuak vutin ka sana bun lai chu ka bih zawk a, zing dar 8 a lo ri der tawh tih ka hmuh rual chuan hmanhmawh zetin ka room chhungah ka lut zui nghal a.




Ka ngaihtuahna ka lo kawm rei lutuk a, ka pâ thuchah pawimawh ber ka lo theihnghilh thelh a ni.



Khuma ka Bible dah chu la in Bible châng tawite ka chhiar a, khum bula ṭhingṭhiin ka ṭawngṭai zui ta nghal a.



"Khawi hmunah pawh awmin, thil engpawh ti la, chhung inkhawm hi bawh pelh ngai suh ang che. In lama zing dar 8 ah kan hmang thlap thlap ṭhin ang hian i awmna hmun apiangah lo hmang ve ṭhin la. Hmun khatah awm tlâng lo mah ila kan zingah i lo tel ve tluk a ni dawn a. Chuvangin zing dar 8 ah hi chuan hun in siam la, chhung inkhawm i lo hmang ve ṭhin dâwn nia" hei hi chhia leh ṭha ka hriat tirh aṭanga tun thlengin ka pa thu min chah a la ni reng.



Keipawhin ka pa ngaih pawimawh chu ka ngai pawimawh a, ka zah a, tih hlawhtlin ngei ngei ka tum ṭhin bawk.



Chhung inkhawm ka hman zawh chuan ka phone a rawn ri zui a. Ka en rual chuan ka nui nghal suk, tu dang ni lovin ka nû a ni.



"Aw nu" ka tih rual chuan "Mama, i dam tha em?" a rawn ti dam diai a. Ka nû âw chuan a hma ang bawkin hahdamna tam tak min pe leh tawh.



Khawvela ka hmeichhe ngaihsan ber min zawt ta se ngaihtuah buai ngai map lovin ka nu hming hi ka sawi nghal ang, "Hmangaihzuali" ka ti nghal vatin ka ring.




Ka nu nunah hian entawn tur tam tak ka hmu. Pathian a ṭih na leh ka pa a zah thiamna te, kan unau min enkawl dan te, chhungkua a a mawhphurhna a hriat lutuk avangte hian ka ngaisang a. Tha taka a tih tur leh mawhphurhna a hlen chhuak zel theite hi ka ngaisang ngawih ngawih.




Ka nu a nihna ngawr ngawr chu lo dah tha ta ila, mihring a nihna leh Pathianin min siam chhan a hlen chhuak bik lutuk hi ka ngaihsan bakah ka lo chhuang ngawih ngawih thin.



Chu thil chu ka pa pawh hian a lo hmu chiang hle a ni mahna nupuiah hial neiin tun dinhmun hi an thleng a. Keipawh ka lo pian ve phah ta a. An pahnih inkara ka lo piang kher kher hi Pathian hnenah lawmthu ka sawi bang lo a ni ber e.




"Mama ka ṭawng i hre thei em?" ka nu bawk chuan a rawn ti leh a, âtthlâk ti lutukin ka khi suk a. Hmeichhia ang maiin tunlai chu thil ka ngaihtuah zui vak vak zel mai anih hi.



"Aw, ka dam ṭha alawm. Nangni in ṭha zawk em?" ka lo ti ve ta vat a. "Vantei a ṭha em?" ka tih zawm leh zat a.



Vantei chu kan unau zinga naupang ber a ni a. Keini a unau dangte ang lo takin a hriselna hi a pan em em a. A pian hlim pawhin a thi ṭep nghe nghe. Pneumonia leh asthma in a tlak buak zui a, ICU ah pawh kar khat vel lai a awm hman. Mahse ka nu leh pa ṭawngṭaina leh kohhran mipuite min ṭawngṭai puina zarah a rawn tha chhuak leh a. Asthma erawh a nei zui ta reng a. Kum tin deuh thaw damdawiin ah kan lut a ni ber. Mahse Pathian zarah a dam veleh vat zel zawk. Dam hlen erawh a awm thei meuh lo chu a ni e.



Ka nu chuan "Tunlai tak chu a ziaawm ve khawp mai. College a zawm dawn khan kan huphurh pui ve lutuk a, mahse thian thar fel deuh mai a nei a. A dam that bakah a hlim ve lai tak a ni" a lo ti zung zung a.




"A tih zia nasat chu, pawnah chhuak hnem lutuk lo se aw. Tlang hri leng a kai hma si" ngaihtuah zet hian ka lo ti ve luam a.



Unau zinga naupang ber a nih avang hian ka nu leh pa, pi leh pu te bakah midang zawng zawng hian kan ngaihtuah rawn a. A unaute pawhin keh thei dawm tak meuh meuha kan dawm a ni ve a. Amah hrim hrim hi a zawi awi chi, ka nu ang chiaha nunnem leh dam diai hi a ni reuh a. Duat loh phal chi pawh a nilo, ka nau mah nise duat sual theih loh tur khawpa fel a ni ka ti ve tlat.




Ka nu nen kan inbiak zawh chuan chhuak turin ka insiam zui nghal a.




Ka hming chu Vanlalhriatpuia a ni a, Rev. Zosangzuala leh Hmangaihzuali te fa û ber niin tunah hian ka kum 28 na ka hmang mek a.



Kan unau hi pali kan ni a, ka nau chiah hi Vanlalhriathlua niin kum 25 a ni ve tawh. Tunah hian BD zirin Bengalore ah a awm a. Ka pa anga pastor ni turin a inzir chho mek tihna a nih chu.




Kan unau zinga a pathumna Vanlalhriatrengi hi a kum phu lovin a puitling reuh a, kumin kum tir lam khan kum 23 chauha upa niin pasal tha tak a nei der tawh. Pasal a nei hma hi tuman kan dem hran lo, kan lawmpuiin kan duhsak vek zawkin ka hria, pasal tha tak, innghahna tlak leh Pathian ṭih mi a nei miau a. Ngaihtuah awmah kan ngai lo tlang niin ka hria. A pasal Muanpuia hi Pro Pastor niin tunah hian thingtlang khaw pakhatah an awm mek a. Kristian chhungkaw tha tak an din ngei ka beisei.





Kan tê ber Vanlalhriatzuali chauh hi ka nu leh pa te bulah a awm rih a. Sawi tawh ang khan a hrisel loh em avang hian chhungte hlata awm chî ah kan ngai lo a ni.



Tunah hian Delhi ah Ph.D zirin ka awm mek a. Delhi ah vek hian college te kalin ka graduate thlengin ka awm a. Ph.D zir zawm leh ka duh avangin ka la awm tlang ta zel chu ania. Kumin hi ka kum 10 awmna tur a ni ve der tawh. Krismas leh kum thar hmang tur erawh chuan ka haw ziah thung.



Ph.D zir chhung hi a rei ve zek a, kum 3 atanga kum 5 inkar a ni tlangpui a, kumin hi ka kum 4 na a ni a.



Pathian zara dam chuan tun thla hian thesis proposal ka buaipui fel ang a, viva ka la hmabak dawn a, result tha tak nei turin ka bei mek a. Ka duh ang result ka hmu te anih chuan ka zir zo ve thei tawh dawn a. Thla leh lam atang chuan mahni ram ngeiah, ka chhungte bulah ka awm ve char char theih tawh ngei ka beisei.




Ka kal chhuah hma chuan Tlankimi ka text zuai a, a muhil ta anih ka ring a online lo. Nizan lamah mitthi lumenin a tlaivar ve a, a muthilh tur thu a sawi kha ania. Online lo mah se a thawh veleh a a hmuh turin message chu ka hnutchhiah ta tho a. Sikul kal a ngaih avangin a thawh har vak ka ring tawhlo.



Status a neih khat tehlul nen a lo nei ve teh mial a. Ka en rual chuan ka nui chhuak nghal hawk mai.





Nikum kum hlui thlah nî a kan thlalak pakhat, hnungzawnga kan lanna hi a lo hmang a. A darah kuahin ka kawngah min lo kuah ve bawk a, hnungzawnga kan lanna mah nise min hre sa ve ve tu tan chuan keimahni kan ni tih a hai theih loh. Caption ah chuan "Tu emaw lo haw hma hian pasal ka lo neih san daih teh ang" tih hi a lo hmang a.




Henu tak hi chu(h)! Nui vur vur chungin lu ka thing a. Nunnem leh zaidam deuh si hi a nghal ru ve zek a. Mahse hei tak hi ka duhna leh amah min vei zual tir tu a ni. Ka nu nen inanna tam tak an neiin ka hre ṭhin a. An inmil viau pawhin ka hria.




Kum 7 dawn kan lo inzui ve tawh a. Heng kum chhung zawng hian sawiselna tur ka hrelo. Inngaizawng ni ve ta fam chu intihthiam loh châng leh thu inhmuh fuh loh chang kan nei ve fo a. Mahse inthen hi kan la nei tak tak ngai lo. Kan inthlah thei tawh lo a ni ber mai.




Higher kan kal lai aṭanga inhre tawh kan ni a. Mahse chung hunlai chuan hmelhriat satliah angin kan inen a. Hmêlṭha erawh ka lo ti ru ve ṭhin viau. Tun hnu a kan sawi leh hian kan hlimpui thei phian a. A sawi kalhmangah a ni pawh hian khang hunlai khan min lo melh ru ve thin a ni awm e.




Kan inngaihzawn ṭan dan tak chu Delhi atang hian ania. College khatah kan lo kal dun leh nawlh a. Kan college ah chuan Mizo zirlai 10 pawh tling lo kan awm ve a. Kan tlêm avangin kan inhre bel zui viau a. Tlankimi nen tak hian kan subject lak a lo inang bawk nen assignment te ti dunin zirlai thil pawimawh ah kan inbe ta fo a. Innel chhovin a mipa zawk ka nihna angin tan ka la hmasa ta a. Min haw bik lo tih ka hriatchian em vang a ni. Tichuan tun dinhmun hi kan lo thleng ta a ni.




Kan graduate hnu khan a ni chu a haw a, hna a zawng zui a. Zirna kawngah a theu neu lo bawk a tunah chuan a nih châk ber Lecturer a ni der tawh. Kei erawh Ph.D zawh ka duh avangin hna nei lovin heti hian ka la inzir zawm zel ta chu ania.




Thianghlim takin kan inngaizawng a, chu chu ka duh dan leh ama duh dan pawh a ni. Mipa zawk na na na chu a hmunin a lo zir chuan ka insum thei lo lek lek thin a. Mahse hetiang hunah tak hian ka pa hmel ka mitthla ah a lo lang zel a. Pathian duh loh zawngin ka che chhuak ngam ngai lo.




Ka haw ṭum hi kan inhmuh theih hun a ni ve mai a. Râl aṭanga inngaizawng ngat ngat ni mah ila kan rinawm a, kan nghet dun ve viau chuan ka hria. A ngaihawm ve viau e tih mai loh chu harsatna ka nei em em lo.





Heti hian Ph.D ka zo ang a, hna ka hmuh veleh inneih puia sâwm ka tum a. Ka chhungte pawhin min pawm pui ngeiin ka ring. Amah paw'n min hnial ka ring lo, ka sawi thawi zuk zuk tawh a. A hmin ve viau chuan ka hria.




Zanah chuan kan in video call a, a nui hmel mawi zet hmuh hi chuan ka hahdam sawng sawng zel. Vawiin a hun hman dan te chu min hrilh siam siam a, a nui leh har har thin a. Ka ngai zual kher mai.



"Lehkha i zir duh tawh em?" a tih chuan ka lo nui suk a. Tlankimi ka duh zualna em em chu ka zai a ngai thiam em em a. Ka hmalam hun mjn ngaihtuah puiin ka zirna vanga a tan hun ka neih loh viau pawh hian a vui ngai lo. Dawhthei takin min nghak a, han tihtauh leh lungawi loh hi a nei lo tluk a ni.





Min fuih phur zawng hlirin a ṭawng a, ka hnual phah na tur leh ka tana awm nuam lo tur angin ka ṭawng ngai lo. Ka sawi thiam dan ber chuan a bula awm a hahdam thlak a, ngaihzawn a hahdam thlak ti tawp mai ang.




Hmeichhe thik thu chhe lutuk leh mi ti pung pung chî hi ka ngainat zawng an ni ngai lo. Min hrethiam tu, ka hun neih dan azira insiam rem ve thei zel hi ka duhthusam hmeichhia an ni. Chu chu Tlankimi nihna hi a ni.




"Zirlai naupang dik tak emaw hi min ti ṭhin a" ka tih chuan a lo nui hak a, "Zirlai naupang i la nih kha" a lo ti fiamthu a. Zan dang zawng aiin kan inbe rei a. A zirlai naupangte chungchang pawh min hrilh ve luam a. Uluk zetin ka lo ngaihthlâk sak ve bawk a. Ka zirlai chungchanga min hriatthiam ang chiah hian a hnathawhna kawngah ka hrethiam ve viau chuan ka hria.




Kan inbiakna kan tih tawp rual chuan ka phone a rawn rik zawm leh zat a, ka pa a lo ni. Sana ka en chuan dar 12 a lo ri ṭep tawh a. Tun ang zan rei tawha min lo bia anih chuan a pawimawh viau anih hmel.




Ka ngaihtuahnaah Vantei a rawn lut nghal a. A natna a rawn chhuak leh tawh pawh a ni mai thei.



Phone chu ka la nghal vat a, ka rin lawk ang ngeiin Vantei chanchin a lo ni tak tak a. Ka pa chuan "Tlai aṭang khan a awmdan a diklo tawh a. Mahse chuti lutuka ngaihtuah awm a ni hran lova. Ṭum dangah pawh awm nuam lo neuh neuh hi chu a neih fo kha, khami vâng khan ngaih ṭhat loh nachang em em kan lo hre lova. I nu nen chuan kan buaipui tho a, 'Ka awm nuam lo satliah leh mai mai bak a ni lovang, a reh veleh mai ang' a ti tlat a. Mahse dar 10 velah khan a thawhah a rawn chhuak a, inhaler a hip hnuah pawh a ziaawm hlei thei lova. Damdawiinah kan inphur phei a, Oxygen an lo pe nghal a. Tunah chuan ngaihtuah awm lutuk a ni tawh lova. Zanrei tawh lam mah nise chanchin ka rawn hrilh ve nghal hrim hrim che anih chu" a rawn ti duah a.




"Tunah cabin ah in awm tihna em ni?" ka lo ti vat a, "Aw, mi pahnihin kan riahpui thei dawn bawk a, i nu nen kan riahpui nghal mai ang" a rawn ti veleh vat a.




"Ngaihtuah awm a ni tawh lo tak tak maw?" ka ti leh hram a, ka nau hrisel lo lutuk hi chu ka khawngaih ṭhin ngawt mai. A nungchang zawiawi lutuk nen phei chuan a lainatawm leh zual.




Ka pa chuan "Aw...rawn ngaihtuah duh suh, ka rawn hrilh kher chhan che pawh i nu nen i lo lungawi loh leh kan hlau a" a rawn ti vat a.




Ṭum khat Vantei damdawiina a awm ṭum hian engmah min rawn hrilh lova, Tlankimi hnen aṭangin ka hria a. Ka nu leh pa bulah chinchang engmah min hrilh hriat loh avangin ka lungawi lo chiam tawh a. "Râl aṭanga i lo ngaihtuah vak kan hlau a" an ti chung pawh khan ka lungawi chuang lova. Khatianga ka awm leh kha an hlau ve tawh anih ka ring.




"Anih chu...a ṭha veleh vat turah ngai ang, keipawh ka rawn haw chho thei ṭep tawh alawm" ka lo ti ve hulh a.



Ka zirna chungchang min zawt zui a, ṭha takin ka chhang a. Ṭawngṭai tam tur leh Bible chhiar tam turin min chah leh lawm lawm bawk a. Ka nau tana ṭawngṭai nasa hle turin min chah leh bawk a. Pafa inbia sawi tur hrelo tawp ang kha chu kan ni bik em love. Zan a rei tawh avangin thu ṭha tinreng min fah leh zet hnuah kan inbiakna chu kan titawp a. Min fuih angin Bible châng tawite chhiar a, ka ṭawngṭai nghal a. Thla a muang leh nghal veng veng mai.



Mut hma in Tlankimi nen chuan WhatsApp ah kan inbe leh zuai a, ka nau chanchin te pawh ka hrilh ve luam a. A lo ngaihtuah ve lehpek khawp mai. Damdawiina a va kan ve tur thu te pawh a rawn sawi a, ka ngaihzawng chauh mah nise ka chhungte hi min ngaihven pui em em a. Uchuak ni si lo hian zahawm takin ka chhungte pawh a ngaihsak niin ka hre ṭhin.




Zingah chuan ṭum dang ang bawkin ka harh hma leh pek hle a, sana ka en a, dar 6 pawh a lo la ri lo. Zing mut rei ve deuh hi ka tum ngial pawhin ka ti hlei thei lova. Ka harh hun pangngai ah bawk ka harh leh nge nge ṭhin. Tûnlaiah nula tlangval tho har tak tak an awm laia hma taka harh reng bik mai chu ka pawiti em em hran lo. Mahse ka ṭhiante hian mak min ti do, Tlankimi pawhin "Tlangval tho hma ka hriat awmchhun i ni" min ti fo reng a ni.





Mut rei vak hi a Pathian thu lo ka ti a, ka pa pawhin a sawi fo. "Zing thawh hma lutuk kan theilo anih pawhin tlai taka thawh loh tur" a ti fo a, kan unau pawhin kan zawm ṭha viauin ka hria.




Ka nileng hun chu University ah bawk ka hmang leh a, kar leh maiah kan exam tawh dawn a. Tun ṭum hi kan kal tawpna tur a ni tawh a. A bak chu exam inbuatsaih nan hun kan hmang tawh ang.




Ka ṭhianpa, University a ka kawm ve ber Muhit-a nen chuan kan haw dun hnak hnak a, ka flat luah bul lawk hi an in a ni a. Chhungkaw khawsak pangngai tak leh fel deuh mai hi an nia. Hnam dang niin Kristian ni lo mah se Kristian nun dan tam tak an chhawm ka ti lo theilo.




An chhungkua an zau a, an inah pawh ka leng lut ve fo mai. Ka chungah an ṭha em em a, min duhsak bakah min lo be sawm peih em em a. Heta ka awm chhunga ka chhungkaw chhar thar te ah ka chhal deuh tawp mai.





Hnam dangte hi râl aṭanga kan hriat danin kan lo teh ngawt ṭhin a. Misual leh phakar deuh, rilru chhe deuh turah kan lo ngai ngawt zel a. Mahse belhchian an lo dâwl khawp mai.




Mizoram pâwn chhuahsan chiah hian Mizo chuan zia kan thlak zung zung zel, a zawng zawng chu kan ni chuang lo. Ram chhunga inngeih hmel deuh si hi ram pawn kan chhuak chiah a, thil a danglam nghal zar zel. Hnam dang karah chuan inngeih viau âwm tak kan nih laiin kan inkhei ru rân a, inla eng emaw ni pawl hi kan awm ve ziah. Inkawm hona ṭha leh inlungrualna ṭha hi a awm hlei theilo. Hnam dang bawk hi kawm an lo nuam a, an lo fel thei phian mai.





Chutihrual chuan mahni hnam pui te duhsak em em, kawm nuam leh inhawng em em an awm ve tho. Chungho chuan mi an ti thlamuang a, ram pawnah pawh Kan Mizo inunauna an chhawm nung a. Mizo nih tinuamtu leh min inchhuan tir tute an ni. Chutiang mi zawk chu keipawhin nih ka duh a, ka phak ang tawk chuan ka ni ve bawkin ka hria.




In ka thlen hnu chuan ka intifai nghal a, lehkha ka zir hmain ka nu ka call a. Vantei chanchin ka zawh chuan ngaihtuah awm a nih loh thu a sawi bakah damdawiin pawh an awm rei a ngai dawn lo anih hmel.




Ka nu chu a chau ve viauin ka ring. In lam leh damdawiin kar tawn reng a ngai leh awm sia. Ka pa pastor a lo ni bawk nen, a khat tawkin mi hrang hrang inleng kan nei reng a, Vantei a lo hrisel lo bawk nen a ruk tak chuan hahthlâk a ti ve thei ngawt ang. A sawi lang ngai miah lo zawk a, ning hmel leh hah hmel hi a pu ngai lova, a nui sâng reng zawk a. Pastor nupui ni awm tak a ni an ti fo reng a ni.




"I chau em?" ka tih "Chau lo e, chauhna tur vak a awm hlei nem. A ṭhiannu Rara-in a rawn awmpui ve chawt a. A mawng a zang bawk si kan hahdam pui ve khawp mai" tiin a rawn nui hak hak a. Kan inbiak hmasak khan Vantei'n ṭhiannu thar fel deuh a neih thu a sawi tawh tak alawm.




Ka nu chuan "Exam chu karlehah maw in ṭan dawn?" a rawn tih zawm leh zat a. "Aw...Pathian zara dam chuan thla leh lamah ka lo haw ve thei tawh ang" ka lo ti ve vat a.



Vantei âw chiang lo ruai hian ka hre zui a "Nu...ka lo be ve" a ti niin ka hria. Chutah ka nu chuan "I nauin a be ve duh che anih chu" a rawn ti zui a. A ri deuh sat sat a, ka nau âw ka hriat zawm nghal zat a. Ka biak duh loh vangin a rawn vui ve nasa mai.




Tunlai ka buai em avangin ka nu leh pa tih loh chu ka chhungte ka be vak lova. Hun ka nei mang lo a tih theih ang. Chu mai bakah mipa nih chuan sawi tur a vâng riau ṭhin a, thil ṭul ah lo chuan mi biangbiak vak hi ka thiam lo hrim hrim.




Kan unauah pawh rual pawl tam lo ber hi ka ni hrim hrim a. Mizorama awm chawt ka lo ni lo bawk nen ṭhian pawh ka ngah vak lo. Râl aṭangin inbe tam em em lo mah ila kan unau inlaichinna hi chu a nghet reng a, kan inhmangaih bakah kan inngaina tlâng a. Kan awm kim ṭhep ṭhawp hi chuan kan ri ve laih laih zel tho.





Vantei nen kan inbiak lai chuan hmeichhe âw tliang ral, fiah zet mai hi ka hre leh zeuh ṭhin a. A thusawi tak erawh chu ka hre fuh theilo, "Nu Zual..." a ti leh hlut ṭhin chu ka hrechiang hle a nimai.




Vantei bulah chuan "Midang an awm ve em ni?" ka ti ta nge nge a. "Aw...ka ṭhiannu Rara-i a awm ve" a rawn ti thuai a. "A va bengchheng ve" ka tih chuan a lo nui hak hak a.



"Rara ka û in bengchheng a ti che" a tih ri chu ka hriat zawm zat a, ṭul lo ka ti khawp mai. Ka tum reng vanga sawi chhuak pawh ka ni lo, ka rilrua lo lang ka sawi chhuak pawp ni berin ka hria. Ka nu leh pa nui ri ka hre zui a, loud speaker ah an dah emawni.




"U Hriatpui, lo haw tawh rawh" âw tliang ral chuan a rawn ti a. Vantei ṭhiannu Rara-i a ni tih chu ka hai bik lo. "Râl aṭanga bengchheng lo intih ngawt" a rawn ti leh ham ham a. A landan aṭang chuan ka chhungte bulah a tlangnel tawh hle niin ka hria.




Sawi mai tur ka hriat tawh loh avangin "Vante, ka dah mai dawn asin, lehkha zir ṭan ka duh tawh a" ka ti ta ngawt a. A ṭhiannu nui ri ka hriat zawm zat a. Hmeichhe zawiawi deuh chu a nih hmel loh khawp mai.



Pathianin ka ṭawngṭaina te a chhang a, tluang takin exam pawh ka hmachhawn thei a. Vantei pawh damdawiin aṭangin a chhuak tawh a. A dam chhoh zel ka beisei.




Tluang takin thesis proposal pawh ka zo a, Pathian zarah result ṭha tak ka neih ngei ka beisei. Ka hriselna a ṭha pangngai bawk a, tun thla chu hun a kal duak maiin ka hria. Dam hi chuan hunte hi a lo kal chak khawp mai. Result chu Mizoram atangin ka nghak tawh dawn tihna a ni.






Ka chhungte nen nitin kan inbia a, ka haw hun pawh an lo nghakhlel ve tawh khawp mai.



Tukṭhuan eikham chuan bazar turin ka insiam a. Karleh lawkah ka haw tawh dawn a, ka chhungte hawn tur thil leia bazar ve ka rilruk a. Tlankimi pawh sawi hmaih chî a nilo. A ngainat zâwng ka hrechiang a, hawn tur chu ka haihchham bik lovang.



Bazar chhunga sneakers ka en buai lai takin ka phone a rawn ri a, dawr neitu pa nen kan inbiak lai tak a nih avangin ka la hman lo chiah chiah a.


Dawr aṭanga ka chhuah veleh call back tumin ka phone chu ka phawrh a. Mahse a rawn ri nawn leh nghal a. Vantei a lo nia.



Ka lak rual chuan "Û i buai em ni?" a rawn ti zâng vah a. "Tunah chuan buai tawh lo e, eng nge ni?" ka ti vat a. Ka thil lei ho khai ṭhat pah chuan kawngpui ka kân nghal a.



Vantei chuan "Eng vak mah, ka lo be mai mai che a, i rawn haw ṭep tawh sia" a rawn ti var a. Ka lo nui mai a.



"Eng nge i tih a?" ka tih chuan "Rara-i te inah ka leng a, chhun thil ei tur kan siam. Nang eng nge i tih zawk?" a rawn ti vat a. Rara-i hming pawh ka hre zing ta malh malh khawp mai. An inkawmngeih viau anih ka ring.



"Eng ti love, bazar ah ka chhuak lawk a. Ka haw ṭep tawh" ka lo ti ṭha ve mai a. A ṭhiannu ṭawng ri ka hriat zawm zat a "Thil chah ṭeuh rawh, khutah chuan engkim a tlawm zawk dawn a" a lo ti sar sar a. Loud speaker ah an dah anih ka ring. A ṭawng ring miah lova, mahse ka hre pha tlat.




"Eng nge min lo hawn dawn?" Vantei chuan a rawn ti leh a, "Eng nge i duh?" ka tih lai chuan a ṭhiannu ṭawng ka hre leh a "Ka thil tur chah ve rawh" a lo ti leh sar sar a. A nui zui har har a, zak zum cheih chawih chi a nih loh hmel khawp mai. Chu chu râl aṭanga ka hmuh dan a ni. Ka ring sual miah lo bawk ang.



Vantei chuan "Thil ṭha deuh a nimai, i buai awm sia, dah tawh rawh. Keini pawhin thil kan han ei ang e" a rawn ti zung zung a. Amah zawkin kan inbiakna chu a ti tawp a, a ṭhiannu nui har har ri ka hre leh hman hrâm bawk.




In ka thlen veleh ka thil lei ho chu ka dah fel zung zung a. Mipa nih chuan bazar thiam a har duh kher mai. Mahse ka chhungte thil hawn chu ka tih ṭhan a ni a, ka haw apiangin eng emaw tal ka hawn ve ṭhîn a, anni pawh an lawm thiam ve ṭhin viau.




Zan muthmunah chuan thil chi hrang hrang ka ngaihtuah kual a. Ka hmalam hun turah ka buai leh viau tawh. Heti hian ka theih chen chen a sâng ka zir a, ka zir zo ṭep tawh a. Eng ber nge ka tih zawm ang ka hre thei tlat lo.




Tunah hi chuan keimahin ka pocket money ka in tum ve tih loh chu chhûngte châwm hlawm tluk ka la ni. Ka ṭhianpa Muhit-a te nau, sikul kal lai hi hunawlah home tuition ka pe ve ṭhin a. Chuta ṭang chuan pocket money hi chu keimahin ka intum ve mai ṭhin a. A bâk, ka University kalna senso vel hi chu ka chhûngte vek an ni.




Keimahah beiseina sâng tak an nei a, min nawr tut tut lo mah se chu chu thil kalphung a ni. Zir zo ta pawh ni ila eng thil ber nge ka tih zawm ang ka chiang theilo. Ka rilru a hah leh viau tawh mai.



Tlankimi ka ngaihtuah tel lo thei lova, hna ṭha tak neiin tunah chuan hlawh a nei tawh a. A chhûngte a châwm tawh a, kei lah chu heti mai hi ka la ni bawk si. Rilruah inkiltawihna leh mahni insitna a awm lo thei lova. Kum 28 lai ni ve tawh tur si hi chhûngte rinchhanin kê ka la pên tlat a. Hma lam hun ngaihtuah vak hi chuan manganna leh hahna bak min pe lo.



A hnua ka inhnemna chu, ka chhungte ṭawngṭaina leh ka ṭawngṭaina hi a thlâwn lovang. He thû hian min hnêm nawn fo ṭhin. Ka rilru hah na zawng zawng kiang nghal lo mah se min chhâwk zangkhai ṭhin. Eng emaw tak chu ka la nih ve ngei ka beisei.




Ka haw dawn tûk chuan ka chhungte nen kan inbia a. Ka nu chuan theihnghilh ka nei palh ang tih hlauvin felfai taka in pack turin min chah lawm lawm a. Ka kal leh mai mai tawh âwm rih si lova, theihnghilh palh ka neih chuan a pawi viau ang.





Ka nu chuan "I sûlhnu kha ṭha takin rawn kalsan la aw, sûlhnu chhui vak ngai te khan i awm ange. Mi in luah i ni a, a luah leh turte tana tihfel vak ngai khan rawn chhuahsan suh. Fai deuhin i rawn kalsan dawn nia" a rawn ti lawm lawm a. Ka pâ nui ri ka hriat zawm zat a. Ka nui ve ta tawp.




Nû te hian thil an lo ngaihtuah kim ber mai. A bikin ka nu phei chu mi pawi sawi te hi a hlau a. "Mite tân malsâwmna kan ni thei lo anih pawhin harsatna thlentu nih loh tur" he thû hi min chah fo ṭhin. Kan unau pawhin theihtâwp in kan zawm vein ka hria.



Tlankimi nen pawh kan inbia a, sikul kal an ngaih avangin Airport ah min lo hmuak ve thei dawn lova. Ka hrethiam khawp mai. In hmuak a, han ti chiam rual kan ni tawh lo hrim hrim bawk a. Ka phût lui em em hran lo.




Dar 11 ka Flight hun a nih avangin dar 9:30 velah chuan Airport ah ka awm vâng tawh a, a hma thei ang berin checking paltlang a, Terminal-ah hahdam deuha lo awm mai kha a finthlak a. Chuvanga kal hma viau pawh ka ni.



Ka chhungte pawh dar 10 vel khan Lengpui an lo chhuk diam tawh a. Sawi hmaih theih loh chu Lengpui khua hi ka pa pastor-a a awmna hmasa ber a ni a. Ka chhang chiah Hriathlua nen hian kan awm ve hman a, kan têtlai hrechiang fe fe pawh an awm ve nual. A mi chêngte an fel bawk a, tun hnu thleng hian kan mikhual lo hle a tih theih ang.





Dar 2 velah daih kan ṭum thleng dawn na-in an lo kal hma viau mai a. Ka pa sawi kalhmangah Pastor quarter an tlawh duh a, chu mai bakah hmelhriat ṭha ho an lo tlawh kual hmasa dawn anih hmel.



Darkar thum dâwn kan thlawh hnu chuan him dam takin Lengpui Airport chu kan thleng ta hram a. Ka bungrua vel nghakin Airport chhungah chuan ka tawi khawmuang leh te te a. Ka chhungte nen pawh kan la inhmu lo. Lengpui Airport hi thuam ṭhat mek anih avangin zin turte leh thawktu te lo chu Airport chhungah luh an phal rih lova.




Ka pa ka call vat a, ka thlen tawh thu ka hrilh chuan pawna min lo nghah thu a lo sawi ve vat a. Ka nu leh Vantei pawh an tel ve dawn tih ka hria a, an lo phur ve tawh viau mai thei.



Ka bungrua te ka lak fel hnu chuan pawnah ka innawr chhuak nghal a. Ka hawi kual deuh a, ka chhûngte ka hmuh mai loh avang chuan call leh mai ka tum a. Mahse ral hla ve deuh hlek aṭanga hmeichhe pakhatin "Au Hriatpui" a rawn tih lauh takah chuan ka va hawi phei vat a.




A bulah chuan ka chhungte an lo awm ve a, an rawn hawi ve vat hlawm a. Ka pa chuan min rawn hui zauh a, ngainat awm zet hian min lo nuih hlawm a.



Min lo au lauh tu khan Vantei a hrilh ru nghal sar sar a, nuihza insum deuh hian an hmui an pet dun fan fan mai.



An awmna lama ka pan mek lai chuan an rawn phei ve vat hlawm a. Kan inhnaihchilh nghal ruak chu a nimai. Ka bungrua te chu motor ah ka pa nen kan hlang lut nghal a.



Ka nu chuan min lo nuih var var a "I chau em?" a tih chuan lu ka lo thing vat a. Ka naupan laia min tih ṭhin danin ka dar a hmer leh salh a, hetia min tih ziah chhan hi ka hre lo na in ka thlamuan pui viau zel. Mak ve tak chu a ni.



Vantei chuan ka hnungah min lo chum dat a, a lam ka hawi rual chuan a lo ner nang reuh a. Nui hawk chungin a sam sei hniang chu ka chûl thuak a, hahdam hmel zet hian min nuih ta var var a.



Kan indah fel hnu chuan nichina min lo au lauh tu nen khan min inhmelhriat tir ve a. Râl aṭanga an lo sawi fo ṭhin Vantei ṭhiannu Rara-i kha a lo nia.



Hmeichhe sam sei hniang mai, hmel sîn lampang, hmel fai veng mai hi a lo nia. Hmêlṭha vût ni si lovin a ṭha reuh zek tih tur ang chi kha a ni. Mahse a inthuam dân aṭang chuan teh dan tawk ka lo nei hmanhmawh a.



Tawnzau var thianghlim deuh, a taksa phuar at mai hi a ha a, a jeans hak lah chu a khûpah a la ṭet hnuang zui a. Sneakers lawk zet a bun bawk a. A inthuam duhdah ka ti dawn nge pawh ka hrethiam lo. A inthuam dân aṭang chuan ka lo îp chawih thei. Ka lo zak zawk a ni ber ang chu.




A sam sei hniangin a tawnzau hak bul zet chu a hliah hlauh zawk a. Chuti chu ni lo se a lang tam zual ngawt ang. Mipa ṭhenkhat chuan chhelo an ti ang a, an enzui vawng vawng tur chi a ni. Mahse kei chuan ka ti ve miah lo.




Ka chhungte a rawn zui ve ngawt chhan chu ka nau ṭhiannu anih vang a ni phawt ang a. Ka rilruah zawhna a rawn awm nghal pang a, eng tih tiha ka nau nen hian lo inkawm ve ngawt nge maw an nih le? An mizia a inpersan bakah an inthuam duh dan thleng hian lei leh vân ang an ni.





Kan vawikhat inhmuhna a kan inthuam dan leh che zia aṭang hian kan nun dan tur kan inteh fo a. Heihi a ṭha ber lo. Mahse hetiang aṭang hian kan nihna tak tak a lo hriat theih fo.




Bungrua kan dah fel tawh bawk a, tawi khawmuang tawh lovin in lam kan pan nghal a. Tunah hian ka pa hi ATC(Aizawl Theological College) , Durtlang ah Principal niin a awm mek a. A pension nan kum tam a ngai tawh lo a, ka lo rin lawk ruk dan mai mai chuan a pension thlengin kan awm tawh ka ring.



Ka nu in "Hmeichhe hlang a hnungah kan lo ṭhu ang" a tih tlat avangin ka pa bul, seat hma ah ka ṭhu a. Hnung lam thâwm a ṭha ham ham viau mai. Hmeichhe hlang ṭhu an ni bawk a, an ṭawng mawlh mawlh reng a.




An ṭawng mawlh mawlh tih lêmah Rara-i ber chu a titi zat zat a. A titi kalhmangah chuan hmeichhe tlang tak leh zep ṭit ṭet nei lo chî niin ka hria. Ka chhungte chuan an lo nuihpui leh ham ham ṭhin a. A ṭawng duh bawk a, zinkawng a ti tawi viau dawnin ka hria.




"Au Hriatpui..." a rawn tih hluai takah chuan darthlalang aṭangin ka va melh zawk a, min lo melh ve chiah bawk a. Ka ngaithla tih nan ka âw ka thian kharh a.



A lo ner nasa mai, "Mipa ho lah hi...khatia in tih khân pâ ta viau ah in inngai ṭhin emaw ni. Kan koh che u chuan 'Aw' te pawh ti ve ṭhin ula. Keichu ka ngei tlat" mi ti zek mai. A ngaihna ka hrelo zawk kher mai.




Ka chhungte lah chu za zet hian an lo nui hlawm a. Ka pa chuan "Kei ka ni ve em Rara?" a lo ti ve hlut a. Rara-i chuan a lu a lo thing nghal vat a. "Pa Sangzuala chu i cool dan hi a tawk chiah. Nelawm deuhin i zuamawm chuang si loh a. Nang chu mipa dik tak kan tih ang kha i nia" a ti nghal zat zat a.




Ka nu leh Vantei pawh an lo nui hak hak mai.



"I sawi duh chu sawi la" ka ti ve ta nge nge a. A hma aia nasa zawkin a rawn ner nawng a, min melh rum em em lehnghâl a.



"A mood ah pawh ka chêng tawh lo e a, nakinah ka phur thut leh ka sawi ang" a ti hmak mai.



Ka nu in thil dang a rawn sawi zui ta daih a. Rara-i chuan a lo zawm leh vat a. Hmeichhe mak sak zet ni turah ka ngai nghal ngawt mai.



Midang chîk mi leh lo teh zung zung mi hi ka ni a. Thil ṭha ber a ni em phei chu ka hrelo. Mahse ka mihring tawn thar te apiang hi ka lo teh zung zung zel a. Ka vawikhat hmuhna aṭang hian an mizia tur ka lo ngaihruat thiam nghal ṭhin a. Kan inhriat rei hnu hian ka tehna chu a lo dik nge nge zel.




Ka nau ṭhiannu Rara-i chu ka ngainat zawng a ni lo nghal pang mai.



__________*_________*_________*_______



(A va harsa ngat ngat ve. Thawnthu plot hran hlak kan buaipui leh dawn a. In fuihna ka mamawh leh nasa dawn nia aw. Thawnthu ṭha tak kan khawr pum leh theih nan ṭangrual leh dial dial teh ang u. Zirna lamah hun pek tel ka ngaih dawn avangin duh ang thâl in ka regular thei dawn lo mai thei a. Mahse ka reh vung vung kher lo turah ngai ang. Remchân chângin zantin kan dah ang a, a châng leh zan khat danah te, chutiang chuan dah kan tum dawn nia. Suangtuahna khawvel ah chêngho leh dial dial mai ang u aw)


Show post links
Top

[Ngaia]

AIZIAL
By CVL Awmpuii


Chapter - 2



Kawngtluanin hmeichhe ho chu an titi a, ka pa in a lo zawm ve zeuh zeuh a. Kei erawh chu ka ngawi ngul thung, phone ka en zeuh zeuh a, ka nui leh suk ṭhin. Eng dang vang a ni lo, Tlankimi nen kan inbe pawp reng a, kan thlen chin ka hrilh ve zel bawk.



Rara-in "Au Hriatpui" a rawn tih leh hluai takah chuan ka ngaithla tih lan tir nan chezia a lantir leh mai ka tum a. Mahse a huat zia kha ka hre chawpchilh lehnghâl hlauh a, "Sawi la" ka ti ta zawk a. A lam ka hawi zawk lai chuan min lo nuih sâwng a.



"Ph.D zir hi a hautak em?" a tih chuan ka âw ka thian leh tête a, "I inti patling thei e" a lo ti leh hmanhmawh a. Ka chhûngte'n min han nuih leh rih a. A mak zung zung ngawt mai.



Za zeta an nuih zawh hnu chuan "Sawi tawh rawh le" min ti leh kher a. Ka âw thian buai tawh lovin "Hautak ve e" ka lo ti tawi tap a. Zingkar aṭangin ka buai a, khua a lum bawk nen ka awmdan a dik hlei thei tawh tlat lo. Kawngtluanin a ṭawng char char bawk si, ka rui lek lek tawhin ka hria, chuvangin ka chhang thui hlei thei tlat lo.



"Sawi zau la, a hautak dan te pawh. Ka zir ve duh thut mai thei a. Dr. Rara-i te pawh ka ni ve duh thut thei a" a tih leh tak zel si ah chuan "A eng ber nge i hriat duh?" ka ti ṭha veleh mai a.



"Thâ leh zung sên a ngai hnem em? Sum leh pai lam te pawh, a zir hun chhung leh a kalphung hrim hrim kha ka hrechiang duh" a tih tak zelah chuan ning viau mah ila ṭha deuhin ka chhang ve mai a.



"Thil eng pawh ti dawn ila hlawhtlin kan duh anih chuan thâ leh zung hi chu sên hnem a ngai hrim hrim phawt mai a, hei hi chu eng kawngah pawh a ni. Pathian thuawih chu lo dah ṭha phawt ila, hlawhtlinna kawng hmasa ber chu taimak a ni. Ph.D zir hun chhung tak hi chu a rei berah kum 6 a nia, kan thesis proposal azirin a reiin a rei lo thei, a endiktute hmuh dan azir a ni deuh mai. Kum 3 chhunga zir zo te pawh an awm thei tho, an thesis a ṭhat viau chuan an hmu vat mai. Kan thesis topic turah khan resesrch kan bei a, kan inpeih fel hnu ah kan hnathawh kha kan submit a, chumi hnuah Viva in kan khâr tlangpui" ka ti ta duah a.




Darthlalang aṭanga ka va melh chuan a lo bu nghat nghat a, "Anih leh tihian i zo tawh tihna em ni?" a rawn ti leh a. "Ka course chu ka zo tawh a, result nghah a ni tawh rih mai" ka lo ti vat a.



"Result chhuah hunah chuan Dr.Vanlalhriatpuia i ni tawh dawn nimaw" tiin a nui zui har har a. Ka lo hnial nghal vat a "Chutiang ngawt chu ni bik lo e. Ka thesis kha an duhkhawp lo anih chuan degree ka hmu thei dawn chuang lo. Beih leh fan fan a ngai dawn tihna a nimai" ka lo ti vat a.




A lo chek tlak tlak a, "I lo tlin loh tak thut chuan zir buai duh tawh suh, kum hlohna mai mai" a ti hlak a, nuih tak takin ka nui ve hawk mai.




"I zir ve peih leh dawn si nange" ka tih chuan "I ti rapthlâk e a, Dr Rara-i ni lo pawh hian ka hlim ve tawk" a lo ti zek a. Kan nui leh ta vek mai. A ṭawngkam hman duh dan vel aṭang chuan a la naupang chhia ve hle dawn anih hi ka ti rilru rauh rauh mai.




"Au Hriatpui, thil pakhat ka zawt leh lawk ang che aw" a rawn ti leh hram a. "Min zawt la" ka lo ti vat a. A tira ka chhân ṭhat peih loh aiin a thil hriat loh hrilh hriat chu nuam ka ti ta zek a. A zawhna tur chu darthlalang aṭanga melh chungin ka lo ngaichâng rân a.




A sam sei hniang chu a hnunglamah a hui thla tê tê a, "Eng research nge i beih ber? Ka tih awmzia chu i thesis ziahah chuan eng topic nge i hman?" a rawn ti a.



"Science and Christianity" tiin ka thesis topic chu ka lo hrilh vat a. "Awi..." a rawn ti hluai a, "I tling lovang" a rawn ti teh bawl a. A ngaihna hrelo fê in hnunglam chu ka hawi zawk a, ka nu leh Vantei te'n an hmui an lo pet zeuh a, Rara-i chuan chiang zet hian min lo melh a. Thinrim hmel a pu lova, pawiti hmel pawh a pu chuang lo, mak min tih hmel berin ka hria.




"Tinge?" ka tih chuan "Aaa...ka hrelo, mahse in ṭawng pachhiat pawh a hlauhawm viau na in i tlin ka ringlo ve tawp. Science leh Christianity chungchangah chuan inhnialna a tam sa bawk si. A endiktute kha sakhaw dang kul muk deuhte lo ni ta se an thlâwp miah lovang che. Topic dang a tam âwm tehlul nen chutiang topic kher chu i hmang a. Sakhaw kaihhnawih thil hi chu khawi hmunah pawh a chêp. Science leh Kristianna inzawm angin i ziak ngei awm sia. An thlâwp miah lovang che" a rawn ti zung zung a.




Ph.D ka zir dawna ka rilru buaina tak kha min rawn thlîr pui thiam ve ni ngeiin ka hria. Ka lo nui tawi tap a. He thuthlukna hi ngunthluk fe a ka pa nen Pathian kan râwn hnua kan siamfel ania. Ka tui na ber a ni bawk a. Ph.D degree pawh lo hmu dawn ila he topic hmang ngeia hmuh hi ka duh tlat a ni.




Rara-i chuan pawi a lo tih hmel lutuk a, ka nuih a tiza ang reng khawp mai. "Chutiang ngawt a ni bik hlei nem, Ph.D lam pum hi Doctor of Philosophy ania lawm" ka ti ngawt pek a. A hriatthiam loh hmel lehpek kher mai.




Nui suk chung hian ka sawi zau leh a "Philosophy tih hi Greek ṭawng 'philosophia' tih aṭanga lak chhuah ania, 'Philos' awmzia chu 'hmangaihna' ania, 'sophia' awmzia chu 'finna' , chumi awmzia hrim hrim chu 'finna ngainatna' a ni ber. Philosophy chu ngaihdan ṭha ber, thlir dan ṭha ber ania. I duh duh i ring ngawt theilo, i rin chhan kha finfiahna a ngai. Chuvangin Science and Christianity tih hi topic ah lo hmang pawh ni ila, ka rinchhanah finfiahna ṭha tawk tak ka ziak anih chuan engmahin a dâl theilo. I hrethiam em?" tiin hnunglam chu ka hawi leh zawk a, a lo meng bial pap maiin ka hria.



"Awi, Pa Sangzual, Au Hriatpuia hian a lo chhûn che anih hi, a va'n fing tak" a'n ti hluai pek a. Ka chhûngte ho chu an nui leh dar dar mai. An lo ngainat chhan tur awm ang chu ka ring thiam ve ruak mai. A mizia ri phawng phawng hi an lawm viau niin ka hria. Mahse ka ngainat zawng a ni ve chuang hauh lo.




Ka pa chuan "I nu Zualtei a chhûn anih hi" a lo ti daih thung a. Rara-i lah chuan "A chhun kawp che u anih hi" a han ti veleh ngei a. Kan nui reng mai.



"I pî leh pû te pawhin an lo nghakhlel ve tawh viau ang che" ka pa in a rawn tih chuan "Kan inah an awm em ni?" ka lo ti vat a, "Aw, i lo haw dawn sia, nizanah pawh an rawn riak chho tawh alawm. An ngai ve viau mai che, i nî Mahlimi leh i nî Matei te pawh an awm ve tawh ang. Eirawng an lo bâwl vel mekin ka ring. An lo nghakhlel tawh viau ang che" a ti zung zung a.




Ka nu chuan a lo tuihnih ve vat a "I lo haw dawn sia kan tia, heta awm hnaivai hovin chawei khawm kan nei nghal mai ang chu kan lo tia. I pi leh pu, i nî Mahlimi te chhungkua leh i nî Matei te chhungkua . I pa Mafaka te erawh phût buai chi an ni lova" a lo ti var a.





Ka pa te hi unau pali an ni a, Pa Mafaka chu an unau zinga upa ber a ni a. Tunah hian bank manager niin Siaha lamah an chhungkua in an awm daih a. A fate pathum pawhin chhungkua an din veleh tawh a, ani pawh a pension ṭep tawh. A dawttu, ka nî Mahlimi te hi chu an chhûngkuain ka pa te vêng , kan vêng dik tak a ni ber ang chu, Mission Vengthlang ah a pasal fanaute nen an awm a. Anni pawh hi an fate pahnih chuan kawppui neiin fate pawh an nei veleh tawh a. A naupang ber ka nî Matei pawh a pasal fanaute nen tunah hian Zarkawtah an awm mek bawk. Anni chu tlemin an la chhangchhe ve deuh hlek.




Pathian malsâwmna chhungkua in kan danwg a, chhungkaw hung zet kan ni ve chuan ka hria.




Ka pa nû leh pa, ka pî leh pû te hian min la dampui ve ve a, inpui nghakin an nupa terekin an awm a. An kum a upa tawh si a, kan bula awm turin ka nu leh pa te hian an sawm fo a, mahse in leh lo kalsan an duh lova, kan inpui Mission Vengthlang ah an awm mek a ni.




Nî Mahlimi te nen an inhnaih tho bawk a, an buaipui tel thei a, a tihzia phian mai. A châng chângin Vantei a riak thla ve ṭhin bawk a. Hun remchângah ka nu leh pa te'n an tlawh fo bawk a, kan intlawh pawh tawn reng a, an khua chu a har lutuk bik lovang. Chu mai bakah an kum upat ngaihtuah in an la fit em em a, Pathian malsâwmna liau liau a ni.




Harsatna em em awm lovin kan in chu kan thleng a. Ka pa sawi ang tak takin in kawta motor kan ti ding chiah chu ka pi leh pu hmel ka hmu nghal a. Ka piin "Bawihpuia a lo thleng e" a lo ti lauh a. Ka hnunglamah nui ri hak thâwm ka hre nghal a, tu dang ni lovin Rara-i a ni "Bawihpuia" nuihza insum deuh hian a lo ti a. Ka pi min koh dan avang chuan a nuih a lo za viau anih hmel.





Ka têtte aṭangin ka chhungte hian Bawihpui min ti thîn a, ka puitlin hnu hi chuan Hriatpui min ti hlawm mai a. Mahse ka pi hian min la ko Bawihpuia tlat a. Pawi han tihna em em pawh ka nei hran chuang lo. Mahse Rara-i a lo nuih takah chuan ka zak ve deuhin ka hria. Tlangval ve uaih tawh Bawihpuia han nih deuh tawp chu a âwm lo ve deuh a ni.




Motor aṭanga ka chhuk rual rualin ka pi chuan min lo pan nghal ruak a. "I va lian tawh ve" min ti pek a. Ka hnunglam aṭangin nui ri hak thawm ka hre leh tawh. A zialo han tih ngawt chî lah a ni bawk si lo, ka lai deuh huih zu nia mawle.




Ka pu chuan "I chau viau lo maw Hriatpui?" a lo ti vat a. "Chau lo e" ka lo ti ve thuai a. Ka bungrua te chu inchhung lamah kan thiar lut zung zung a.



Min han hmu chiah chu ka nî te pahnih pawh an lo ri ve chûl a. Nî Mahlimi pasal, Pa Sanga chuan "A hma aiin i rawn thau haw ve deuhin ka hria. Mahse a mawi tawk chiah" a lo ti ve hluai a, nî Matei pasal, Pa Rina pawhin ngainatawm zet hian min lo nuih ve bawk a.




Intifai hmasa lovin ka thil hawn ang angte chu ka phawrh chhuak nghal zung zung a. Ka bakilh mawi leh sam ṭawn hawn te chu hmeichhe ho ka sem tawp a. Mawza chu mipaho ka sem leh tawp a. Ho lam tê mah nise an lawm thiam ve khawp mai. Ka tûte(ka cousin fate) chu nepnawi ka sem leh tawp bawk a. An ri ve chel chul mai.




Zin haw châng hian thil hawn thiam a harsat avangin lei awlsam sam a hlawmin ka lei tawp a, ka unaute leh ṭhian hnai vai deuhte ka sem tawp zel. Ka ṭhiante ah chuan min rawn tlawh hmasa sa, a rawn ngampa pa an vannei a ni deuh mai.





Ka pi leh pu te pawh shawl leh lukhum ka hawn ve a, an lawm thiam ngang mai. Kum upa chin tawh hi chu an lawmna a ho tawh em em a, tih lawm an harsa lo khawp mai.



Ka nu leh pa leh Vantei te thil tur chu ka dah ṭha rih a, nakinah ka pe tawh mai ang chu.



Ka pu in "Va intifai phawt la, chaw kan ei dawn nia. Eirawng pawh an bâwl peih tawhin ka hria" a lo tih takah chuan ka hnial lem lo khawp mai.




Bathroom aṭang chuan an ri laih laih thâwm chu ka hre pha vek a. An nui leh dar dar ṭhin a. Chhungkaw hlutna ka hre nawn awn awn mai. Horn ri tuarh tuarh leh mihring awmze nei lova rak nawk nawk thâwm hriat ai ngawt chuan ka chhungte nui hlim thâwm chuan hahdamna nasa tak min pe.





Ka inthlak lai chuan room kawngka an rawn kik a, ka lo chhâwn vat a. Ka nu hi nui var vae chungin a lo lut a. A mitmeng dam raih leh a hmêl hahdam lutuk hian min thlamuan ṭhîn.



"I inthlak laklawh viau em?" a tih chuan ka tshirt ken lai chu ka lo inthawlh thawk a. Boxer ka hak sa avangin ka inthlak zo chu a nimai.




"Ka zo chiah" ka tih chuan khumah a rawn ṭhu thla a, ka sam huh chu a hru thuak a. "Rara-i engmah i pe ve miah lo ania" a tih chuan ka meng tal tap mai. Nichin khan a awm ve reng si a, engmah ka pe ve lo tak alawm.



"Ka lo hre chang tawh miah lova" ka tih chuan ngainat awm zet hian min nuih leh a "I thil hawn khan a la daih thovin ka hria, nakinah pe ve rawh aw. Zaninah a lo riak dawn tho a, i duh leh midang haw hunah i pe ve mai dawn nia" a ti zung zung a.




"A rawn riak dawn maw?" ka tih chuan "Aw, i nau ṭhiannu ani bawk a, nau angin en ve nghal tawp mai rawh. Rara-i hi chu a fel reuh thar thar teh mai nia, i ngaina viau ang" a ti leh siam siam a.




Ka lo bu nghut ringawt, ka thengthawngah a thawk lem lo khawp mai. Mahse ka thil hawn chu pek ve ngei a ngai ang. A lo awm ve reng tawh bawk si.




Ka pa in ka pu chu chhung inkhawm hun hmang turin a ti zet na in ka pu chuan "Chhungkaw pa ber i nih kha" a ti ve tlat a. Ka pa in chhung inkhawm a hman zawh hnu ah zanriah chu kan ei nghal a.




Ka nau ṭhiannu Rara-i chu boruak vaw hit tu ber a ni ti ila ka sawi sual lo khawp ang. A ṭawng zat zat reng a, ka chhungte chuan an lawm em em a. A mawng a zângin a che nghal zung zung bawk si a. An han fak deuh lah chuan "Ka fel alawm keichu" a lo ti ve zat zel a. An fakna te chu phat buai a tum lo khawp mai.



Zan dar 10 velah chuan an haw rem ta duak a. Ka pi leh pu te chu riak turin kan han sawm leh ngial a. Mahse a zawna zan hnih êm mahni in riah chhuah san chu an hreh ngang si a. Kan tilui thei thlawt lo.




Kan sûlhnu kan tihfel hnuin ka thil hawn ṭhenkhat chu ka phawrh chhuak leh a. An pathum chuan Tshirt ka hawn ṭheuh a, an ha chhin vel a. An lo tawk chiah hlawm a. An lawm thiam ve khawp mai.




Ka nu in min rawn mitmei rual chuan bakilh mawi pasarih vel hi ka phawrh chhuak leh a, Rara-i hmaa lek pah chuan "I duh ber thlang rawh" ka va ti a. Chutah phur zet hian a enkual dan dan a, "Khawi hi nge mawi i tih ber?" a rawn ti let daih a.



"Ka hrelo" ka lo ti mawl tawp a, a hnu deuhah chuan ner nang chungin rawng thim lampang, tle var chu a la ta keuh a "Heihi nimai rawh se, chuan ka lawm e" a ti vat a. A nui deuh var var a, lawm ve tak tak ang maw. A ngai ho viau in ka ring.




Ka indahfel leh hnu chuan mu turin kan intintuah nghal a. Vantei te pawh nui har har chungin a room lam an pan a. Ka nu leh pa te erawh chuan min rawn zui lut thung a. An tih tur ka hriat chian em avangin pangngai takin ka lo awm a.




An pahnihin ka lu chungah kut an nghat a, ka pa zawk chuan min ṭawngṭai sak a. Heihi ka nu leh pa te tih ṭhan dan ania, kan awmbo dawn leh kan haw apiangin lu chunga kut nghatin min ṭawngṭai sak ṭhin.




Min ṭawngṭai sak hnu chuan an room lam an pan ve nghal a. Keipawh engmah ti buai tawh lovin ka mu ve nghal a. Reilotê Tlankimi nen kan inbe leh tê tê a, ka len nghal loh avangin thupha ka chawi nghal ngawt pek a. Min lo hrethiam nasa khawp mai. Ka chhungte ka ngaih pawimawh zia min hriatpui a, hei takte hi ka duhna tizual tu a ni.





Ka chauh ve deuh avangin ka muhil thuai a. Zingah chuan hmeichhe nui har har thâwm ka hria a, mit kham ṭhumin ka meng chhuak a, lukham bula ka phone chu melh mang hlei lo hian ka ban a, dar 7 a lo ri der tawh mai.




Ka mit a kham em avang chuan ka chhing leh ngial a. Hmeichhe nui thâwm bawk chu ka hre leh a, nimin kha amah ka hriat tak tak na hmasa ber mah nise tunge a nih ka hai lo nasa mai.




Thâwm a nei reng dawn tih ka hriat avangin ka tho chhuak ta nge nge a. Ka hmai te phihin choka lamah ka tlang nghal a. Ka nu hovin eirawng an lo bawl a. Ka pa chu zing devotion hmangin zirlaite bulah a awm leh daih tawhin ka ring.



Midangin min biak hma hawtin Rara-i chuan "Au Hriatpui, i mutui em?" min lo ti var a, "Aw..." ka ti ringawt. Ka la tho hlim bawk nen ka ṭawng tam peih fahran lo.



Vantei chuan "Û, vawiin chu college ah min thlah rawh aw. Ka pa a hman dawn lova , i awm tho bawk a Bus chân ai a nimai" a lo ti zung zung a. Ka bu nghut ringawt.




Ka pa lo haw veleh tukṭhuan kan ei nghal a. Rara-i chu a ṭawng leh zat zat tawh. Hmeichhe sawi tur hre lutuk hi hnê châng ka ngah. Ka sual vang nge phei chu ka hrelo. Chaw lah chu a ei thei zek lehnghâl a. A nihna ang angin a lang tawp maiin ka hria.




An insiam chhungin phone ka lo hmang a. Tlankimi nen kan inbia a "Sikul i la kal lo tiraw?" ka tih chuan "Naupang exam lai ania, dar 10 velah ka kal ang. Duty ka nei chuang lova ka hmêl va lan ve zuai kha a nimai. Nizanah pawh ka sawi tawh kha" a lo ti vat a.




"Ummm....a ṭhat hlauh chu ka rawn lam ang che" ka ti tlang tawp a. "Tunah maw" a lo ti vat a. "Ka nau te hi college a thlah ka ngai tho a, ka lo lam kawi ang che" tih pah chuan sana ka bih zeuh a. "Dar 8:30 vel chauh a la ni bawk a. I lo la insiam loh chuan lo insiam zung zung la. Ka nau te hman veleh kan lo chhuak ang" ka ti leh zung zung a. Min hnial lovin a lo pawm ve mai bawk a.




Room aṭanga Vantei te ṭhian dun an lo chhuah rual chuan phone ka dah zui nghal a. "In inpeih tawh em ?" ka lo ti sup a. Vantei chuan "Aw, kan kal thei" a lo ti var a.




Ka nu leh pa te chu Pa Nuna damlo chanchin ngaihvenin ṭhenawm ah an kal daih tawh a. Min rawn ngaihven tawh lem lo.




Kan chhuah hma chuan Vantei bulah Tlankimi ka thlah ve tur thu ka sawi nghal a. A lo hrethiam khawp mai, min chhaih ve ngei a, ka lo nui tawp ringawt.



Seat hmaah pawh chuan a rawn ṭhu duhlo ve ngei a. Rara-i zawk chuan "Vante, min ṭhut san rawh, a hnungah hian keimah pawhin ka ṭhu hreh lo ania" a lo ti ve ngei a. Mahse Vantei chuan "Tu emaw kan lam kawi dawn a" awmze nei zet hian a lo ti ve zat a. A nui kar kar a. Rara-i chu a hrilhhai hmel khawp mai. Mahse mak tak maiin engmah a sawi zui lo ve teh mial a.




Kan tlan chhuah dawn chuan Tlankimi ka call leh a, a lo inpeih diam tawh thu a sawi chuan phur zet hian ka inkhalh chhuak ta nghal a.




An in zâwn kan thlen chuan kawngsirah min lo nghak ran tawh a. Min lo nuih var var a, ka hmeichhe duh ang mizia zawng zawng neitu a ni bawk a. Hmuh ṭhat loh a har kher mai.



A zawna ka din rual chuan a lo lut ve nghal zat a. "Vante, i dam ṭha tawh maw?" a ti dam diai a, ngainat awm zet hian ka nau chu a nuih var var bawk a. "Aw, dam ṭha tawh lutuk, i dam zawk em? Tunlai chu i vâng lutuk a, ka nu paw'n a sawi reng mai che" Vantei chuan a lo ti ve vat a.




Chutah nui hak hak chung hian "Naupang exam lai ania, kan buai ve lutuk a. Nu Zualtei pawh a ngaihawm khawp mai" a lo ti let ve var a. Ka nau nen chuan innel deuhin an inbe nghal bawrh bawrh a.



Nui sâng chung hian min rawn melh veleh zeuh ṭhin a. Ka nau te thlah vat a, hun thawl neih ka châk tawh zia chu ka mitmeng aṭang hian a hmu thiam vekin ka ring.




"Rara, nang i dam ṭha em?" a ti leh zel a, ka nau ṭhiannu a lo hre ve chat chu mak ka ti ang reng. "Aw, dam ṭha alawm. U Tlankim, ka hmuh hnuhnun ber ṭum che ai khan i chhiat loh belh leh tawh" Rara-i chuan a lo ti ve hlut a. Henu hi chu a ri chhuak phawng tak tak zel anih dawn hi.






Tlankimi lah chuan nui hak hak chung hian "Nang deuh, i chhelo lutuk" a lo ti ve vat a. "Ka hria alawm" pakhat lah chuan a lo ti sam leh then a. Kan nuih a za tlâng leh tawh viau mai.




Ka nau te kan thlah zawh chuan dar 9:10 vel chauh a la ni a. Traffic a jam lo bawk nen kan tlan tluang ang reng a. A tihzia phian mai.




Ka nau te awm lo chiah chu kan zalen ta bawk a, motor khalh reng chung chuan Tlankimi chu ka melh zawk a, lai zet hian lei min lo chhuah khum ringawt pek a. Ka nui lum hawk mai.



"Ngaihawm nu" ka tih rual chuan a lo ner nang a, "Ka bialnu" ka tih leh chuan a lo nui hak hak a.



"Tun ṭum chu kan va inla zei thar ve aw..." hmui pet zauh chung hian a rawn ti a. "Ka zei sa alawm" ka tih rual chuan za zet hian a nui leh a. A nui ri chuan min tihlim khawp mai.




"Eng nge i thil zir chungchâng te?" a tih takah chuan thu pangngai sawiin kan titi chhunzawm nghal a. Bialnu fing deuh neih hi chu a manhla khawp mai. Thil chi hrang hrang, hriatna ti zau thei deuh deuhte kan sawi dun a, kan inpui tawn ṭhîn a. A tihzia tak tak a ni.




Râl aṭangin chanchin inhrilh fo mah ila hmaichhanah chuan thil a lo chiang nge nge a. A hna chungchang te pawh ka zawt ve luam bawk a. Kan inkawp fuh em em chhan pakhata ka hriat chu kan titi duh zawng a inan vang hi ni berin ka hria. Eng thu pawh sawi ila kan tui viau thei zel a. Tlankimi ngaihzawn hi chu a manhla bik ngawih ngawih ti tawp mai ang.




Reilotê chauh kan la tlân emaw tih laiin an sikul chu kan thleng chawpchilh nghal a. A chhuk hma chuan a banah ka chelh leh te te a, ka hawikual zawk a. Vei vak an awm lo tih ka hriat rual chuan a hmuiah ka va fawp zauh a. A hawikual nghal ruai mai.




"Tumah an awm lo" ka tih rual chuan a thaw huai maiin ka hria. "Khati khan min fawp thut tawh suh" tiin ka darah chuan min beng thak a. Ka lo nui mai a. Midang chu awm hnai se ka che chhuak bik teuhlo mai.




"Zanah ka rawn lêng ang, ṭha deuhin i duty dawn nia" ka tih chuan ṭha tê tê in kan inthlah veleh mai bawk a.



In ka thlen leh meuh chuan ka nu pawh a lo awm leh der tawh a. Ka pa chu office ah a kal tawh anih hmel.



A pangpar phun vel chinfel a duh thu a sawi chuan "Ka lo pui ang che" ka lo ti ve vat a. Tih tur ka nei chuang lo bawk a, a hah lutuk tur chhawk zangkhai nan lo tihpui chu a tihchî khawp ang.



"Lo awm hahdam zawk la" a tih chuan "Awm mai mai chu a hahthlâk zawk" ka lo ti vat a. "I pa ang mai" nui chung hian a rawn ti a. "Ania lawm, awm mai mai chu a hahthlâk zawk. Tih tur a awm hian dam chhan a awm bik alawm" ka lo ti veleh a. A nui tawp ringawt.




Building thlanga a pangpar phun velte chu chhak lamah kan sawn deuh nual a. A thi tawh ho chu kan paih fai vek bawk a. Phawi chhuah harsa deuh chu a zung nen ka lai chhuak tawp a. Thil harsa a ni hran lo. Chawhma chhungin kan tifel zo hman vek. Ka nu pawh a lawm ve khawp mai.




"I zarah ka nileng hnâ tur kha chawhma chhungin kan zo vek thei a, a tihzia hle mai" a ti hliai a. "Fapa fel neih man anih hi" ka lo ti uang a. Kan nui dun nasa mai.




Chhun thil atan tukina a pizza siam chu oven ah a ur lum a. Thingpui a lum nghal bawk a, ka pa pawh chhun chawlin a rawn haw a. Room a ka awm lai chuan an inchhaih nui ri ka hre fuh leh zeuh ṭhin a.



Ka pa hian tun thlengin ka nu hi a la chhaih lai hnehsawh khawp mai. Ka nu te khua ami, ka pi Rinkimi khan "I nu leh pa hi chu an inngaihzawn lai ang rengin an inneih rei hnuah pawh an inngaizawng reng ang. An inhiptawnna hi a chak emai. Pathian an dah hmasa ber zel bawk a, mihring tihchhiat mai mai theih an nilo" a ti ṭhin a. A dik zia chu kan unau hian kan hrechiang khawp mai. Tun thlengin an inhmangaihna thla zar hnuaia awm hi a la thlakhlelh awm reng.




Ka pa in "Hmangaihzual melṭhanu..." a tih ri te chu ka hre leh ṭhin a. A châng leh "Vei awm nu" a tih te chu ka hre leh ṭhin a. Ka nu in "I fapa room ah a awm ve reng ania, zak ve deuh teh" a tih ri te pawh ka hria. Awm hmunah ka lo nui ka lo nui mai.




An fapa mah ni ila an inchhaihna kara lo va awm veleh pawh chu ka inthlahrun bakah ka ui lek lek mai. Nu leh pa inhau thâwm ai chuan hetia an hlim nui ri hriat hi a hahdam fe zawk. Ka vanneih hle bawkin ka hria.




Ka nu in "Hriatpui, thil lo ei tawh rawh" a rawn tih tak lauhah chuan ka chhuak ve ta chiah a. Ka pa a lo nui suk suk a, ka nu chu a lai huih mai. An inchhaih thâwm chu ka hrelo der hmiah.




Ṭum khat ka tisual tawh a, ka pa hian "Ka duat" a tih kha ka lo hria a, "Ka pa duat" tiin ka nu hi ka'n chhaih mai chu! A lai nasa lutuk a, ka khawngaih hial zawk. Ka pa a chum ṭawk ringawt kha ania. Chuvangin hria angin ka awm duh tawhlo. Ka nu lai hmel chu a khawngaih thlak thei lutuk, a lainatawm hial zawk.





Tlaiah Vantei a rawn haw a, ka nu in "Rara-i a ṭha em?" a lo ti vat a. Vantei chu a lo thaw chhuak deuh hak a "A ṭha tho a, mahse lo riak leh daih mah se pawi ka ti lo zawk" a ti zawi raih a.




Chutah ka nu chuan "Awww...i lo hruai haw leh daih lo anih chu" pawi tih hmel deuh hian a lo ti a. "Aman a duh tawh rih lo alawm, hmachhawn a duh zawk a. Ka rawn thlah kawi a, hlim hmel pu sâng a min bye bye te khan ka ṭah a tichhuak " a ti ṭiau a, a mittui a parawl kuang mai.




"Rara-i te hi chu aw, a fel thet thet nen a lainatawm mange. Nakinah i pa bulah ka lo sawi ang a. A pu Sanghminga biak leh mai chî anih hi" ka nu chuan a lo ti zung zung a. An thusawi awmzia chu ka hre ve kher lo na-in Rara-i chungchang eng emaw tak a ni tih chu ka hrethiam ve ruak mai. Hmeichhe thu hlaah ka ngai a, ka lo zawt buai duh lem hlei lova.




Zanah chuan Tlankimi te inah ka leng ta ngei a. A chhungte nen kan inpawh tlang tawh bawk a. Min lo be sawm ve luam hlawm a. Ka zirna chungchang te pawh min lo zawt vat hlawm a. An zawhna ang angte chu ṭha takin ka chhâng zung zung a. Kan innel tawh bawk a, ka kimki chawih bik lo.




A chhungte an mut fel hnu chuan hun thawl kan ngah dun bawk a. Kan inhmuh lohna a lo rei ve tawh bawk nen kan âm dun ve ngat ngat hle a. Pathian pawi erawh kan khawih lo.




Ka ngai a, ka thlahlel em em bawk a. Ṭawngka a sawi lovin chetziain ka lantir mawlh mawlh a ni ber mai. Ani pawhin ṭha takin min lo dawngsawng bawk a.




Ka haw hma chuan inneih chungchâng ah bawk kan lut leh a. Phone ah pawh kan sawi dun zawk tawh a. Hmaichhana chiang zawka sawiah kan dah kha ania.




"Pathian zarah result ṭha tak ka nei turah beisei ila, hna ka zawng vat a. Kumin chhungin chinfel ka tum ang a. Nakkum velah chuan innei tawh mai ang aw. I inpeih tawh thovin ka hria" ka ti tlang tawp a. Min lo hnial bik lo khawp mai.




Ka haw hmain duhthawh zetin kan infawp leh a, ka Bike hunna thleng min thlah a "Fimkhur la aw" a tih chuan "Ka thlen hunah ka lo bia ang che" ka lo ti vat a. Ka inkhalh chhuak ta nghal a.



Ka graduate tirh khan ka pû in min lawmpui nan tuna ka Bike hi min lei ve rup mai a. Ph.D ka zawm leh avangin ka hmang tam hman lova. Mahse ka haw châng hi chuan a rim ve ngat ngat viau zel. Tlankimi lenchhuah pui nan tak ka hmang ve a. Mizorama ka awm chhung na na na hi chuan lekchhuah takah ka nei ve a. Ka chhungte pawhin fimkhur tura min chah chungin min dang ngailo.




In ka thlen chuan ka nu in Pot a lo la chei a, ka pa in a lo tih pui ve bawk a. "In lo Love Covers All leh tawh a nimaw" ka tih chuan "I nû hi zanin chu a duhthawh deuh a" ka pain a lo ti vat a.




Ka nu chuan "U Sangzual, hemi hi ziak fiah ṭha leh lawk mai teh. Heti hi chuan thawn chhuah hunah a reh hman palh ang" tiin ka pa hmaah chuan Pot pakhat hi a dah phei a.




"Hriatpui, thingpui i in duh em?" min lo ti zui zat a. "Aih, ka mu nghal mai ang. Tikhan lo Love Covers All rawh u" nui chung hian ka ti a. Ka room lam ka pan nghal a.



Ka pa in "Kan pahnih chauh kan ni leh ta, zanin romantic deuhin Pot chei chungin kan in date tihna a nimai" a tih fiamthu chu ka hre phak hram a. Ka nui chhuak lo chauh.




Tlankimi chu in ka thlen tawh thu hrilh ka text nghal a. Ka hmai te phih faiin Bible ka chhiar leh tê tê a, ka ṭawngṭai zawh hnuah ka mu thluang nghal duai a.





Tlankimi nen kan in text mawlh mawlh lai chuan number hlang aṭangin message ka dawng a. Hetiang hi ka tawk veleh zeuh ṭhin a, ka ngaihsak em em hlei lova. Mahse tun ṭum chu Tlankimi hming a rawn lang tel tlat a. Ka mit a la lo theilo.



Minute 5 vel a liam hnu ah ka hawng ta chauh a 'Au Hriatpui, U Tlankimi nen khan in ni chiang lutuk' tih hi a lo nia.



Min rawn text tu chu a Dp ka en nghal a, hnunglam hawiin a ding a, a sam sei hniang chu a thlah hnâp bawk a. Ka hmuh tawh hnu a ang ka ti bawk sia, ka hre mai thei bawk silo. Mahse a bio name ka en chuan ka hre ta chiah mai.



'Charm Rara' tih hi a lo hmang a, ka nau ṭhiannu Rara-i a ni tih ka hai lo nasa mai. A dp zawng zawng nen chuan ka hmehbel thiam nghal vek.




Tlankimi text ka dawn zui leh avangin Rara-i chu ka chhâng lem hlei lova. Ka nau ṭhiannu pawh lo ni se ka mgainat zawng a nih loh bakah min nel mah mah ang a, min zah pah lo lekin a huangtau ka hlau tlat pek anih chu!



__________*_________*_________*_______


Show post links
Top

[Ngaia]

AIZIAL
By CVL Awmpuii



Chapter - 3



Pathianni tûk a ni a, zing dar 8 velah chhung inkhawm kan hman zawh hnuin tukṭhuan kan ei a. Ka pa chuan Vantei nen min fuih mawlh mawlh a, ka nu pawhin a lo zawm ve zeuh zeuh bawk a.




Ngaihzawng neih chungchang pawh a sawi uar khawp mai. A ruh lang râwt râwt in a sawi a, chiang fek fawk tak a ni.




Ka pa chuan "Hriatpuia pawh zêp nak emaw ngaihzawng nghet nei i ni a. I lo haw remchân lai chuan in inzui ang a, in in rîm ang a, eng eng emaw te pawh in ti ve ang. Mahse Pathian pawi khawih zâwngin khawsa reng reng suh ang che u, fimkhur hle ang che. Tunlaiah mipat hmeichhiatna hi thil pangngai, inngaizawng te inkara thleng ngei ngei tura dahna chen kan nei a. Heihi thil nih dan tûr a ni lo. Pathianin nupa inkara hmang tura a tihna kha a la ngai reng. Khawvel inher danglam zel mah se a danglam ve dawn lo. Chuvang chuan fimkhur ang che. Thianghlim takin ngaihzawng nei la, thianghlim takin nupa a insiam tur" a ti mawlh mawlh a. Chawei lai mah nise a thutak zia hai theih a nilo.




"Vante nang pawh fimkhur ang che aw, hmeichhia phei chu vawikhat hmingchhiat hi a pawi ania" tiin Vantei chu a melh leh a.



Vantei pawh a lo bu nghat nghat mai.



Ka pa chuan sawi zawm lehin "Hmeichhe thei hnem nih te hi inchhuan na chî a nilo, a zahthlâk zawk hle tih hriat reng tur. Mipa nih vangin nun uluk loh bîk tur tihna a nilo a, mipa nih chuan chhungkhat pa tur kan ni tih hriata nun uluk hle zawk tur a ni. Chhungkaw hlim tak tak in hriatte hi ngaihtuah chiang ula, pa ber leh nu ber te thianghlim taka innei an ni zel ania. Inneih hmaa lo chesual a, innei zui hlim ta viau pawh an ṭhahnem. Mahse duhthusam ah chuan thianghlim taka inneih tawn hi a ṭha. Nupa inkarah inrinhlelhna a awm lo nge nge. Ka sawi awmzia chu i hrethiam ang tiraw" tiin min rawn melh run a. Ka lo bu ve nghut thung.




Ṭawngka in chhang lo mah ila a thusawi ka ngaih pawimawh zia chu a hrethiam vekin ka ring.



Chaw eikham a hmunte kan tihfel zawh hnu chuan inkhawm turin kan insiam sap sap hlawm a.




Sawi tawh ang khan tunah hian ATC, Durtlangah kan awm a. Leitan Presbyterian Kohhran ah kan lawi a. Synod hmun pawimawh tak ATC awmna anih avâng hian Kohhranah pawh Pathian thu thiam, mi thiam tak tak an kat nuk mai a. Sunday School zirlai zir te hi a man hla bik riau ṭhîn. Kohhran mipuite'n hriatthiam loh kan nei anih pawhin kan thiam puipa te'n thiam takin, pawm nahawm takin an sawifiah thiam ṭhin a. Zirlai ngaithla ṭha peih tân chuan hlawkna hlir hi a nimai.




Helama ka awm tam loh ngaihtuahin ṭhian ka nei ve nuk hlawm a. A chhan ni bera ka hriat chu ka haw ve chhunah theihtawp chhuaha Kohhran a ka inhman vang hi ni berin ka hria.




Ka pa hian a sawi fo ṭhin "Kohhran leh khawtlang a inhman chu ṭhenrual ṭha ngahna a nimai. Chhiat ṭhat tawh nikhua hian a chiang leh zual. Mihring hi chuan engpawh tâwk thei kan ni a. Chuvangin mite hriatreng leh ngaihhlut nih duh chuan kan dam lai hian thil ṭha tih tum tlat tur. Chuta pawimawh em em chu Kohhran leh khawtlang a inhman hi ania. Mihring nun a bet tel tlat a ni a, kan phâk ang tâwkah theihtâwp chhuah ve tur. A sawisel ṭhin tute hi chu inhmang ve lo te bawk an ni ṭhin. Kohhran hi pâwn lam aṭanga teh ngawt chî a nilo, a kawr a hmang an tih ang hi awm bawk mah sela rilru leh tih takzeta Pathian bêl hi an awm tam zawk ania. A sawisêl ṭhinte bawk hian an han inhman ve tâk chinah chiah an hrechiang ṭhin."





Ka insiam zawh veleh room aṭangin ka chhuak a, Vantei ka ko zui bawk a. A ni pawh a lo inpeih diam tawh.




Ka nau hi chu a tê na vang vanga puanbih te hi a inhmeh at reuh a. "Nula tê chî" ka ti fo a, a haw ve thei hlar hlar khawp mai. "I len avangin min hmu tê mai mai anih kha, ft5 te chu ka pêl ve" a ti hlar zêl.




Ka nu leh pa te pawh room aṭangin an rawn chhuak zui ve nghal a. Ka nau aia puanbih inhmeh tih ka la nei, chu chu ka nû hi a ni. Ka nu aia hmeichhe puanbih inhmeh hi ka la hrelo, ka la hmu miah lo. Puan a bih tawh hi chuan puanbih nihna tur ang thlap hi a pho chhuak ka ti mai. A lang zahawm zual a, a dik deuh thlap bik ni hian ka hre ṭhin.



A la hma bawk a, ke in Biakin lam chu kan pan a. Vantei chu a puanbih a fu hlei thei meuh lova a phun leh nang nang ṭhin a. A bag min khai tirin a insiam ṭha leh ṭhin a. Ka nu in a lo pui vat zel bawk a.



"Ka pa chu...kan kal hma leh lutuk a, ka puanbih a fuh theilo aniang" a ti nang nang a. Ka pa chuan "Inkhawm tur kan nih a, kan hman hmâ tho anih chuan dar rik hmaa Biakin thlen a pawi reng reng lo. Ṭan dâwn ṭep a luh te hi a pawi na em em sawi tur awm lo mah se a fuh vak lo. Kan inkhawm dawn anih chuan zai ṭan tirh phat aṭang hian awm tur" a lo ti nghat nghat a.



Vantei chuan engmah a sawi zui tawh lo. "Zirlai thar in zir leh ta...in va nihlawh tak" ka nu zawk chuan nui hak hak chungin a lo ti a. Kan lungawi hmel hlawm khawp mai.




Ka pa hi chu pa ṭawng tam lo tak ni mah se a rawngbâwlna ah a chiang êm a. Eng dinhmunah pawh hian min fuihna tûr tâwk hi chu a hre reng zel.



Biakin gate kan luh rual chuan beisei loh zetin Rara-i ka va hmu nawlh a. Biakin bathlar ah kawrfual ha in a lo ding a, kan chhungkua min rawn hmuh rual chuan a phul hlut a.



"Vante..." a rawn ti lauh a, min rawn pan chawpchilh nghal a. Kan indinhnaih takah chuan Vantei'n "Chawhnu lamah chauh i lo inkhawm dawn emaw ka tia" a lo ti deuh ha a.



Vantei pawh chhang ta lem lo chuan "Nu Zualte, in va chhelo nupa ve" a ti hluai a, ka nu leh pate chuan ngainatawm zet hian an lo nuih a "I chhelo ber" ka nu in a lo ti vat a.



Rara-i lah chuan confi zet hian "Ka lawm e" a lo ti hmiah mai.



Biakin chhung aṭanga khuang a rawn rik takah chuan ka pa in "Tikhan lo lut ve mai r'u aw, keini chu kan lo va lût ange" a ti a, min kalsan zui nghal a.



Vantei chuan a puanbih siam ṭhat mawlh mawlh pahin "Chawhma pawh i lo inkhawm ve dawn maw?" a ti ṭha leh a. "Aw...ka pu nen kan lo kal nghal alawm" Rara-i chuan a lo ti vat a.




A vawikhat nân min rawn melh ve ta nge nge a. "Au Hriatpui, i va chhelo ve" nui var var chung hian a ti hluai a. Tawi têin ka lo nuih let ve ringawt a. A ner nghal nâng mai, engtin emaw tak min ṭawngkhum leh ka rin tehlul nen Vantei chu a biak zawm lehnghâl daih a.



An titi kalhmangah chuan vawiin chawhnu ah hian a pu in thu a rawn sawi dawn anih hmel. Kohhran Programme group-a an rawn post kha ka ngaihtuah let a. Thusawitu ah khan "Rev Sanghminga" tih a ni a, Synod Moderator hlui a ni.




Vawiin chawhnu ah hian thusawi turin an sawm a. Rara-i pû a lo ni reng tihna anih chu. Rev Sanghminga hi Moderator kal chhuak zingah chuan ka ngaihsan ber pâwl anih bakah ka pa te nen hian an inhmelhriat ṭha ve a. Hmaichhanah pawh pa kawm nuam leh dam dap mai hi ania. Chu chu Rara-i pu a lo ni teh daih a. Mak ka ti ang reng.




"Ka lo va lut ange" tiin ka kalsan ta daih a. An rawn kal ve nghal tih ka hnunglam aṭanga thawm a awm rual chuan ka hrethiam mai.



Inkhawm ban veleh ka haw tlang nghal a. Ka nu leh pa te chu Biakin bathlarah tu tute emaw nen an titi khawmuang leh ang a. Kal lam hi chu inthurual mah ila kan haw tlâng tawh ngai lem lo. Vantei pawh Rara-i a awm tho bawk a, ka ngaihtuah zui lo.




In ka thlen chuan ka beisei loh deuhin Vantei te chu an lo awm vâng tawh a. Choka lamah eitur an lo siam mek a.



"In va haw hma âwm ve" ka ti sup a, Vantei ka melh na in Rara-i zawk chuan min lo chhang a "I lo haw har mai mai nih kha" a lo ti nui sâwng a. Ka ner ru nawk mai. Ka la hre reilo viau na in a boruak hi ka zo lo nghal der mai.




Room lamah inthlak turin ka lut zui nghal a. Ka nu te rawn haw thâwm ka hria a. Rara-i chu an be zui mawlh mawlh a. "I pu thusawi i rawn ṭawiawm dawn a ni ang maw" ka pa in a tih chuan "Aw, chawhnu chauh lo inkhawm ka tum na in rawn len pah a nimai ka tia. Chawhma ah ka lo zui ve nghal daih anih hi. Inthlakna tur pawh ka rawn keng thlap a, zanriah ka lo ei mai thei ania aw" a ti nghal zar zar a. "Zanriah i rawn ei dawn chuan riak ve nghal law law la" ka nu zawk chuan a lo ti ve a.




Mahse Rara-i chuan "Aih, riah chhuah chu ka duh tawh rihlo " a lo ti nghal vat a. Ka chhungte laka a tla tlum em em leh inthlahrunna a nei miah lo hi mak ka ti. Zak thei lo ka va tihna lam ni lovin a mihring zia lo ka ti ve khawp mai. Inthlahrung se, tla tlum lo se ka ti tihna a ni lova, ka nau ṭhiannu a ni a, kan inah ngampa takin awm se chu ka duh lutuk. Mahse a zia ri thawt thawt hi ka ngai theilo a ni ber.





Ka pa in "Khawnge Hriatpuia?" a tih chuan "Room ah a inthlak" Rara-i bawkin a lo ti leh var a. Ngei neih hi mipa zia lo viau mah se Rara-i kher hi chu hmeichhe ṭawngkam takin ka ei hlawl lo a ni ber.




Midang an rawn haw tawh bawk a, room a tawm reng chu ka duh bik lova. Ka va ṭhu chhuak ve ta nge nge a. Rara-i chu a titi zat zat reng a. Sawi tur a hria ka lo ti khawp mai. College-a a ngei deuhte chu rêl ni chiah si lo hian fiamthu thawh nan tak a hmang a. An ṭawng dan leh tihdan velte chu a zir a, a nui ham ham reng a. Vantei pawhin lu thing mat mat chungin a lo nuih ve bawk a. An pahnih inkawm deuh chawt hi mak ka la ti reng.





Vantei hian a fel êm vangin hne chung chungin a kawm ve hram hram aniang tih ngaihdan te pawh ka nei hial. An mizia a inpersan emai. Ka nau mah nise Vantei hi chu a fel a, a fing bawk a. Ngei deuh pawh nise a tilang ve lovang. Hei vang takte hian ka fak ve ṭhin.




Momo an siam hi a lo nia, an tih hmin hnu chuan thingpuite nen dawhkan ah an chhawp dal a. "Û, a sat ṭhat lai hian lo ei rawh, a tui teh mai nia" Vantei'n a rawn tih takah chuan ka ril a lo ṭam ve tawh bawk nen ka tho nghal thurh a.




Rara-i chuan ka nu leh pa te pawh a au nghal lang lang a. Choka lam an rawn pan ve nghal mai bawk a.



An thilsiam chu ka han tem chhin a, a lo tui zek mai a. Vantei bulah chuan "Hetiang siamte khawi aṭanga i thiam nge a, a va tui ve" ka ti ve hlut a. "Rara-i siam vek anih kha" a lo ti vat a. A siam tunu chu a lo khuh kharh kharh a, inchhuang fe hian a kut kuangkuahin a meng kual vel a. Ka nu leh pa te pawhin an lo fak ve hlut a. "Nupui tlâk ka nia lawm" a ti ham ham a.





Eisiam a thiam chu inhmeh lo ka ti kher mai. Fanu duat sual, châwm hlawm, ṭawngthei deuh, inti eng emawni deuh, hman tlakna awm lo, chu chu amah ka hmuh dan ania. Mahse chutiang ngawt chh a lo ni bik lo anih hmel. A momo siam chu a tui ve tak tak mai.




Kan thil eizawh chuan chawhnu inkhawm a lo hun leh der tawh mai a. Ka pa chuan "I pû chu lêng lût tura ka sâwm ve nasat nen min chêt khalhtu an lo awm a. A rawn lut hman ta lova" pangngai tak hian a ti a.




"Ho lutuk, ka lênna ah awm ve turin ka duh lo hrim hrim. Haw veleh over min tih thu a sawi ve ziah a. Lênna ah fel deuha awm turin min ti ziah a, min ngainat nan ka ṭawng reng hian over min ti let daih zel a. Ka peihlo " a lo ti hlak hlak a. Ka nu leh pa te chu an lo nui hawk hawk a.



Ka nu in "I pu i ngai ber a, ani pawhin a ngai ber tho che alawm" a lo tih chuan a lo bu leh nghat nghat lawi a. "Ka pû awm ve lohna chu nuam ka ti chuang miah lo, ka ngai veng veng zel" a lo ti nghat nghat a.



An chhungkaw inlaichinna vel hi ka chhûngte'n an hrechiang viau anih hmel. A tirte aṭang khan ka hriatthiam ve loh thil an sawi nasa lutuk.



Chawhnu inkhawm chu kan bâng har zek a. Rev Sanghminga chuan sawi tur a ngah bawk aniang darkar khat vel zet thu a sawi a. Mahse ka hmuh theih chinah muthlu leh han ning hmel pu pawh tumah an awm lo. Sawi ṭha piap piap tak a ni. Politics nen lam a sawi lût a, tunlai rawngbâwltu tam takin an sawi ngam loh sawi ngai si hi a sawi ka ti mai. Ka hlawkpui takzet.




A sawi lawk ang ngeiin Rara-i chuan zanriah a lo ei ta ngei a. Vantei nen ka nu eirawngbawl an pui a. A chhûngte'n a ei siam tui an tih ṭhin zia te chu hahîpin a sawi a. A infak mawlh mawlh mai.



Zan inkhawm leh kan ngaih avângin zanriah chu hma deuhah kan ei a. A sawi ang tak takin Rara-i chuan chawhmeh siam pawh a lo thiam khawp mai. In fak hluak lo phei sela chu ka eitui zual ngawt ang.




Riak ve tura ka chhûngte'n an sawm luih ngial pawhin a hnial fithla ṭhak a. Ka pa in "Hriatpui, va thlah mai la" a tih chuan ka phur lo kher mai.



Mak deuh maiin Rara-i chuan a lo hnial hlauh a "Keimah pawhin ka haw thei alawm. Khua pawh a la thim em loh hi" a lo ti a. Mahse ka nu in "Pathianni ah chuan motor service a awm loh bakah a reh awm sia, i haw kawngah khua a thim hman ang. I û Hriatpuia a awm tho a, a thlah thei che alawm" a ti tlat a. Rara-i chuan min rawn melh vat a, ka lo melh let ve run a. A hmui a pet zeuh ringawt a.




Ka chhungte'n an ti miau si a, thlah tur chuan Bike châbi ka la ta poh a.



Kan inzui chhuah rual chuan ka chhûngte'n min rawn zui ve ngha a. Bike ka tinung a, a rawn lâwn hma-in ka chhungte chu a Bye bye tê tê a. A hriat phâk tur chauhin "Hmanhmawh rawh" ka ti nghut a. A lo rum nghat mai.



A rawn lawnkai chiah chu ka rin aiin a chuang zeilo daih mai. A khawr deuh ṭut a. Min hlat deuh takah hian a ṭhu a, "Min rawn ṭhut hnaih la, ka kawngah hian chelh rawh" ka ti nghut a. Ka âw chu a nelawm fahran lo khawp mai.



Kan tlân chhuah rual chuan a thaw chhuak hluai a. Harsatna a nei emaw tiin ka ding leh rih a. "Tinge?" ka tih chuan "Eng nge?" a lo ti vat a.



"I thaw hluai a" ka tih chuan "E aw...ka thaw mai mai... tlân rawh" a ti bah deuh niai a. Amah ang lo takin a âw chu inringtawk lo tak a ni.



Engmah sawi lovin ka tlân chhuak veleh nghal mai bawk a. Ka mi phurh tawh zawng zawngah phurh a la har ber âwm e. An in awmna ka hriat loh avangin ka zawt chawp a. Minute 15 vel kan tlân hnu chuan kan inthlah thleng ve ta hram a.




"Ka lawm e aw" nui var var chung hian a ti a. Ka lo bu nghut ringawt a, a lo ner leh nang tawh. "Awle" ning zet hian ka ti bul nghut a. A nui leh nghal var var mai.



Ka tlân chhuak tur chu "Au Hriatpui" a rawn ti hluai a, a lam ka han hawi leh rih, mitko ka san úk a.



"Ka message kha tinge i chhan duh loh" a tih chuan a ngaihna hrelo fe hian ka melh a. "WhatsApp ah khan ka rawn bia che a, min chhang duhlo" a ti ṭha leh a. Ka hrechhuak leh chiah, Tlankimi nen kan chungchang min rawn zawt tak alawm.




A zawhna pawh chhang lem lo chuan "Ka kal ange" ka ti ta ngawt a. Bike ka tinung leh nghal a. "Ka rawn biak leh hunah che min chhâng tawh rawh aw" a rawn ti leh hrâm a. Ngaihtuah zui lovin ka tlan chhuak nghal daih.




In ka thlen leh chuan inkhawm turin ka insiam nghal a. Rara-i ka hmuh dan chu hmeichhe thisen sâng tak nimai hian ka hria. Ka chhang lo anih chuan zak a, ngawih bopui zawk daih awm ania. Hmaichhanah min chhuahchhal bawl mai ania.




A lehlam kawng zawng taka ngaihtuah chuan ka be ṭha miah lo chung hian min û en ve em em a. Ka ngai theilo viau hi ka inhrethiam lo.



Zanah chuan min rawn be leh ta ngei a, a zawhna ngai bawk min rawn zâwt leh a. "U Tlankimi nen khan in inngaizawng tiraw" a rawn ti leh a. Han ngawihsan tawp chu ka ti mah mah in ka hre ve ta deuh a.



"Aw" tiin thudik takin ka chhang a. A seen a, engmah thâwm a rawn nei zui tawhlo. Ka lawm ang reng khawp mai.



Tlankimi nen kan inbia a, thu ho tete sawiin kan nui dûn reng a. Pathianni zanah hi chuan inkhawm nen lenna hun a awm tawhlo ṭhin a. Zaninah pawh leng lovin phone kaltlangin kan inbia a, kan lungawi dun viau mai.




"Naktukah min bazar pui la" a rawn tih chuan tih tur em em ka nei lo bawk a. Ka lo aw ve mai a. A phur sarh sarh khawp mai.



Tukṭhuan ei laiin ka thil tih turte chu ka chhungte bulah ka sawi luam a. An lo remti khawp mai.



Ka pa in "Vantei in check up ni ani bawk a, car hi keng la. In thlah kawi ang a a ṭha tak ang. Kei hi committee a chhuah ka ngai dawn a, i nu lah Pastor nupuite inhmuhkhawm na ah a kal a ngai bawk si. Keini'n Bike kan lo hmang thung mai ang" tiin rem a ruat zung zung a. Ka lo pawm khawp mai.



"Check up chu nangmahin i kal thei dawn em ni? I duh chuan Tlankimi nen pawh bazar hma in kan kalpui thei tho ang che" tiin Vantei lam chu ka melh a. Amaha in check up tur chuan ka lainat ve deuh. Mahse "Kal pui tur ka nei alawm" a lo ti sam thên a.




Ka pa chuan "Nula a ni tawh a, check up te mai mai chu a kal zing tawh emai. A hnehsawh lutuk, kan hman châng hi chuan i nu nen kan hruai mai a. Mahse ṭum thum ngawt amahin a kal tawh a. Nula puitling a ni tawh alawm" Vantei fuih pah deuh chuan a lo ti hlut a. Vantei lah chuan "Dik chiah mai" tiin a lo thlâwp vat a.




Unau zinga naupang ber tih takah naupan chhiatna lai deuh hi a la nei a. Fuih phur lah hi a nuam thei em em a. Ka nu leh pa te pawh hian chu thil chu an hmang ṭangkai fo mai. Chuti chu nilo se a pangchang thei ngawt ang.




Vantei insiam zawh hnu chuan kan inphur chhuak ta a. Tlankimi pawh kan kal dan tur vel ka hrilh tawh a, Vantei check up tura a kalpui chu a rawn sawi ve a. Mahse kalpui tur a neih thu ka sawi chuan a thaw huai mai.



"Tu in maw kalpui dawn che?" tiin ka nau lan chu ka hawi zawk a. "Rara-i" a lo ti vat. A hming ka hriat ringawt pawhin ka lo ner nawk mai. Kan lam kawi chu a ngai ve ngei awm sia. A ṭawng ka lo rui lâwk. Tlankimi a awm ve dâwn lehnghâl a, kan chungchang min lo zawt kher bawk nen ka peihlo takzet.




"I ning ṭhin em?" ka tih chuan Vantei chu a lo hawi deuh ha a. Ka thusawi awmzia a hrethiam lo tih ka hre mai.



"Rara-i hi i ning ṭhin em?" ka tih chuan a s ngaihna hrelo fê hian min rawn melh a. "Tinge?" a rawn ti let daih a.



Za lo zet hian ka lo nui suk a "Ka ti mai mai, a ṭawngthei si, in mizia a inpersan bawk si. In inkawm teh daih hi mak ka ti mai mai mawle. Ning chung chungte hian i fel vangin i lo kawm mai mai aniang te ka tia " tiin tlang deuhin ka nau chu ka hrilh a.




A lo nui hak a "Rara-i te chu a fel eee, ka kawm hi ka lawm zawk daih" uar zet hian a lo ti a. A nin thu a thup emaw ka la ti ṭalh tho a.



"I û ka nih hi i nin chuan tlang deuhin sawi tawp rawh. Ka dem miah lovang che. Misual nihna pawh a ni hlei nem, mi nin te chu" ka ti leh hrâm a. A lu a lo thing vat a.



"Tak takin Rara-i chu kawm a nuam alawm, a fel a, a ṭawng duh a, a ngainatawm bawk si. Amah ang nih ve hi ka châk zawk daih " thutak zet hian a lo ti a. A ṭhiannu nih a lo châk daih anih chu ! A ṭhiannu nun kha kan awh pui loh vei nen. A nunah eng tak lo hmu bik ang maw.




"A hneawm emai a" ngaihsam zet hian ka lo ti luam puat a. Min rawn melhin a nur nang a "I ngaih ang kha a nilo ang. Rara-i hi chu a chhelin belhchian a dâwl teh mai nia. Hrechiang la chuan i ngaisangin fel i ti ve ngawt ang" tiin a ṭhiannu chu a lo ṭan ve tlat a. Ka sawizui tawh lem lo.




Tlankimi kan lam hmasa a, seat hnungah Vantei a ṭhut deuh tlat avangin a hmaah chuan a ṭhu leh a. "Check up a kalpui chu i ngai lo maw?" ngaihtuah zet hian ka nau chu a zâwt nghal a.




Vantei chuan "Rara-in min kalpui dawn lawm" a lo ti vat a. Tlankimi chu a nui nghal hak a. "I ṭhiannu tê kha a ngainat awm, a hmelṭha si, fel ka ti ngawt mai" a ti deuh hliai a. An lo inhriat dan tak hi ka la hre chiah lova, nakinah ka la zâwt ang. A hmasa pawh khan inhre sa an ni tih an inbiak dan aṭangin ka hre tlat.




Rara-i chu kan lam kawi ve ta ngei a, a inchei dan mawlh mai hi ka ngaimawh phâk awm miah lo mah se ka lo ngaimawh ṭhin lutuk.



Torn jeans bawk a ha leh tawh a, kawr nghawng zau deuh, a âwm bâwr lang lek lek hi a ha bawk a, bân bul pangngai ve tak chu a ni. En reng rengin mipa ṭha lo tân chuan a zuamawm nghal a ni tawp mai. Hmuh hrehawm ka lo ti lehpek khawp mai.




A rawn ṭawng leh nghal zung zung a, vawikhat mah min be lo thung. Tlankimi leh Vantei chu a be mawlh mawlh reng a. Sawi tur a hre lehpek e.




Clinic kan thlen hnu chuan an chhuk ta a. Min rawn melh zawk a, a hawisawn lehnghâl daih a. Vantei bulah chuan "In hman hunah rawn sawi ula, kan haw tlâng dawn nia" ka ti a. Mahse min lo hnial rang khawp mai. "Bus in ka haw mai ang" a lo ti vat a. Mahse ka remti lo bur.




Tlai lamah a Doctor a ṭhu chauh dawn bawk a, an in entir chhungin kan bazar zo hman vek ang. Kan haw rual leh thei tihna a nimai.




A tawpah chuan min hnial seng ta bik lova. Hman hun inhrilh leh turin kan inthlah a.




Tlankimi nen chuan motor kan park hnuin bazar chhungah kan inzui lut a. Ka banpuamah a vuan ṭai a, a titi sep sep a. Pheikhawk dawrah kan lut hmasa ber a, a enkual diat diat a, a duh chin ho chu a man a tlawm zawk zawk lo khawp mai. Thil ṭha ber ber duh chî a ni a, aman hlawh a nei bawk a. Heihi chu ka sawi ve phâk pawh a nilo.



Pheikhawk chu pahnih a la a, pakhat man chu tum sak ve ka tum a. A lo duh ikhaw lo mai. A thinrim titih avang chuan ka pêk luih sak ta bik lo.



Dawr aṭanga kan chhuah hnu chuan a titau zui titih der mai a. Tih tauhna tur awmin ka hre miah lo a, mahse ka thlêm ta tho a. Ka thlêm fe hnu ah chuan a lungawi veleh ta hrâm a.




"Min bazar pui tura ka sawm chhan che chu keimaha bazar ka hreh vang ania. Thil dang a awm lo, thil man to inleisak hi ka duh zâwng a nilo. Piancham leh eng emaw huna thil in pêk hi chu ka pawm lutuk. Mahse hetianga thil uchuak inleisak hi ka duh lo. Bialpa te ti hek lutuk nih ka duh hlei nem. I hrethiam ang tiraw" a ti dam thlap a. Midang chu awm lo se ka fâwp chiang ngawt ang. A ngaihtuahna ang hi ka lo ngaihtuah pha miah lova.





A ngahdan avang chuan ka duhna a zual leh sawt mai. Ka bialnu a ni hi ka chhuang hliah hliah. Vannei ka inti hle bawk.



Smart pants kan enkual leh a, puanbih turte pawh kan en nual mai. Thil thar paruk vel zet a nei der mai. A bazar khât bawk a, âwm lo ka ti hran lo. Thil hi a duh tam lo na in a duh te vek vek chu a changkang a, a man pawh a sâng fal nalh zel.



Kan thil eina erawh keiman ka tum vek thung a, chu tak chu min lo hnial bik tawhlo.



Rinai takin kan bazar zo hmaa, ka nau te chu ka va call a. An lo inentir zo vel chiah ve tho a.



Motor la chhuakin clinic lamah kan inphur phei a. Tlankimi chuan rawtna thar a rawn nei a "A la hma tho sia, i nau te nen chuan folkland velah leng zuai ila i peih em? Ka chhuak vâk khât lutuk a ka châk deuh thut. Mahse i thu thu" a rawn ti zung zung a. Chutia a len châk te chuan hun a awm bawk a, pawi ka lo ti lo khawp mai.




Mahse ka nau te ka ngaihtuah tel ve lo thei lova "An peih chuan kan hruai ve ang a, an peih loh chuan thil dang an duhzawng ti turin kan tia nga, kan inghah tir mai dawn nia" ka ti a.




Tlankimi chuan "An peih loh chuan kan haw tlâng zawk dawn nia" a lo ti nghal var a.



Clinic kan thlen chuan kawtah min lo nghak vâng tawh a. Kan thil tumte ka sawi chuan vânneih thlak takin an lo phur phian mai a.



Folkland lamah chuan kan inkhalh phei ta a. Rara-i chuan a kal hnuhnûng ber ṭum a a chêtchhiatna te a sawi a, an nuihpui hawk hawk a. Keipawh a der ni miah lovin ka lo nui ve suk suk a. Eng emaw sawi tur hi a hre zel mai a, mak ka ti hial zawk.



Folkland park ah chuan darkar chanve vel kan va awm ve a. Tûn hi ka vawi thum kalna vel chauh ania, nuam ka la ti reng. Mizoramah chuan lenna tur hmun nuam deuhte hi a vâng ve a, ka hawi zîm vang leh ka awm ngai vak loh vang phei chu ka hrelo. Han lenkualna tur hi ka hre mang lo. Folkland tih vel hi ka hre lar ve hlur a. A nuam ka ti ve khawp mai.




Dar 4:30 velah chuan haw turin kan intintuah ta a. Ka nau te pahnih chu motor dahna ah an lo va phei hmasa a. Tlankimi nen chuan kan in selfie ve ngei a, thla ka lak sak nual bawk a. Nuam kan ti ve khawp mai.



Kan motor dahna kan thleng ṭep tihah chuan ui bauh tuarh ri hi kan hria a. Engah teh vak ka lo ngai lova. Mahse Vantei leh Rara-i te lo inbuaipui ka va hmuh rual chuan hmanhmawh zetin ka va tlan phei vut a, Tlankimi pawh a rawn tlan ve nghal vat a.



"Tinge?" ka va thlen rual chuan ka ti nghal thawr a, Vantei chu Rara-in a lo kaitho hman tawh. A la thlabar hmel em em zui a.




Rara-i zawk chuan kan sir deuha ui bauh tuarh kha kawh pahin "Saw ui sawn a rawn bauh tuarh tuarh a, rawn seh a tum a" a lo ti vat a. "A seh hman lo tiraw?" ka tih chuan "Seh lo, lunglian a lo awm hlauh a, ka vawm tawp mai" Rara-i vek chuan a lo ti ban charh a.




Tlankimi chuan "Vante i ṭha em?" a lo ti vat a, ka nau chu a lo bu nghal nghat a. A thlabar hmêl chu a la reh chuanglo. A âwm ka tih pui hliah hliah, thingtlâng khaw pakhata kan awm lai khan a têtlai in uiin a um chiam tawh a. Khata ṭang khan a hlau tlat tawh. Tunah khatiang deuh kha a tawng leh a, a hlau zual viau ang.




Ui seh tumtu lam chu ka va hawi a, ka sawi thiam dan chuan a lo ṭhu sawp deuh niaih a. Ka enchian nak chuan a mit lehlam a lo thî hnuang mai. A kê lehlam pawh a thî in ka hria.




Rara-i chu ka melh zawk a "I va vawm na âwm ve" ka tih chuan "Kuttum tiat aia lian hretin vawi thum ka vawm" a lo ti hmiah mai.



Tlankimi chuan ui thi hnuang chu a lo hmu ve aniang, a va kal chilh nghal a. Ui duat leh ngaina tih takah a lainat hmel kher mai. "A zialo hle mai" a ti sap a. Rara-i chuan a hmui a lo pet a, a inthiamlo hmêl deuhin ka hria.



Vantei lam hawi chuan "I ṭha tak tak em?" ka ti leh hnuhnawh a, a lo bu nghat a, Tlankimi'n ui a chûl vêl chu kan en ṭhap a. Nichina kawlh hmel deuh si khan Tlankimi chûl na vel chu a dawh hauh hauh a.




Ka va pan hnai a, "Kal tawh ila" tiin a darah chuan ka va chelh a. A rawn hawi rual chuan a mittui a lo tla reng mai. Khawngaihna ngah tih takah a khawngaih leh viau tawh anih hmel.



A mittui luang chu a hrufai thuak thuak a, "Ka khawngaih emai a" a ti ṭiau a. Tih theih vak a awm chuang bawk silo. A hreh chung chung chu kan motor dahna lamah ka kai phei a. Ka nau te pahnih chuan min lo en chîk ngang mai.




Haw kawngtluanin tumah mah kan ṭawng lova, Rara-i takngial pawhin sawi tur a hrelo anih hmel. Tlankimi kan thlah fel rual chuan Rara-i chu a lo phun hlak a, ṭawng zawi viau mah se a sawi chu ka hre hman "Over lutuk" a ti hlak a. Darthlalang aṭangin ka va melh nghal vut a. Ka nau in mitmeiin a lo khap chiah a, engmah a sawi zui tawh lem lo.




Zanah chuan Rara-in min rawn text leh a, "I bialnu Tlankimi kha ka rin aiin a over" a rawn ti zek a. "U Tlankimi" pawh a ti tawhlo, a ngei viau anih ka ring. Ka chhang lem hlei lova. Over a tihna kî tak chu khatia ui vanga a ṭah vel vang kha ni berin ka hria.



A rawn la type zawm mawlh mawlh a, "Vantei chhantu nih pawh kha a inthlahrun awm zawk alawm le. Ui kha khawngaih lo bik pawh ka ni lova, kawng awmchhun ni a ka hriat vângin tikhan ka che ve a nimai a. WhatsApp ah min rawn la bawhzui lehnghal a. Chhelo ka tihna a reh vek. I nau kha seh se a duh zawk emaw ni" a rawn ti duah a. Ṭawngkam chu a duh tui lo ve khawp mai.




"WhatsApp ah min rawn la bawhzui lehnghal a" a rawn tih tak chuan ka mit a la fuh ngang mai. Tlankimi'n a lo va bia tihna chu a ni phawt ang a.




Ka chhan loh avang chuan message dang a rawn thawn leh a. "A tirah kha chuan inhmeh ka tih êm vâng che u in engmah ka sawi duh lova. Mahse a ho emai a, ka duh ve tho che" a rawn ti teh daih a. Ka hawi hil ang reng khawp mai.




__________*____________*________*_______


(Hei ai hian type na hun ngah thei ila, rawn dah nghek te hi ka châk ṭhin, thinlungah a khat liam mai sia. Mahse hun ka nei lo ve ropui si. Zantin awm chângte a awm ang a, awm loh châng te pawh a awm ang aw)


Show post links
Top

[Ngaia]

AIZIAL
By CVL Awmpuii


Chapter 4



Tlankimi nen zan rei tâwk tak thleng kan inbia a, vawiin thil thleng chungchang kha chu kan sawi zawm tawhlo. Naktuk sikul kal a ngaih tawh avangin min mangṭha hmasa ta zâwk a.



Ka mut dawn chuan Rara-i message chu ka chhiar nawn leh kher a. "Ka duh ve tho che" a rawn tih chu eng teh ualah ka ngai lem lo. Mahse ka ngaihtuahna tibuaitu tak zawk erawh chu Tlankimi chungchang a rawn sawi dan chu a ni.




Rara-i hi thil zêp sit set lo, ri chhuak phawng phawng chi a ni a. Hetia a sawi anih chuan a lo va be ngei chu a ni ang a. Engtin tak lo inkhak ang maw. Va zawh zui chiam chu ṭha berin ka hre bawk silo. Phone chu dahin ka mu ṭha ta ngawt a.




Tukṭhuan ei laiin Vantei chuan a piancham lawm chungchang vel a sawi a. Karleh mai hi a ni tawh a, a kum 20 tlinna tur a ni a. Lawm ve a duh hle hi a lo nia. Ka nu leh pa te a râwn a. Mak ve deuh chu, a piancham apiang hian a dam lo ziah a. Vawikhat mah a la lawm ve thei lova. Kumin chu a dam ṭhat lai tak a ni bawk a. Chuvanga lawm ve dil pawh a ni.




Ka nu leh pa te pawhin an lo remtihpui khawp mai a. Ka pa chu a phur ber berah a ṭang zui nghal a "I nu nen lo ngaihtuah chhuak hmasa zawk tur kan ni hlei hlei asin mawle. Kumin chu i dam ṭhat kum tak a ni bawk a, lawm ngei ngei chî anih chu" a ti hluai a. Ka nu pawhin a lo pawmpui khawp mai.




Vantei chuan "Chutia pui deuha lawm huk pawh ka duh chuang lo. Chhungkhat laina leh ṭhian hnai vaite nen a hminga lawm ve kha ka duh dan a nimai. Zanah eitur siamin cake te cut ve mai mai ila ka tia. Pâwn lama lawm huk huk ang kha chu ka peih chuanglo" tiin a duhdan te chu a sawi zung zung a.




Ka pa chuan "Umm...nuam i tih dan ber kha a ṭha a nimai. Inkhawm zan a ni dawn lo bawk a, a hmingin zanriah te kan buatsaih ve hrim hrim ang a, a ṭha viau mai" a lo ti leh a.



"Aaa...a hautak âwm emai, chutiang bung bung a ngailo" Vantei chuan a lo ti vat a. Mahse ka pa chuan a sawi phur laklawh tawh a. Ka pî (ka nu nû ) te ho chah chhoh nen lam a sawi a. Nu Rinkimi te thleng thlengin a sawi kai zel a. A phur hmel viau mai.




Vantei pawh chuan "Api te an lo kal dâwn chuan ka duh leh si" phur zet hian a lo ti var a. Ka nu nû hi a upa ve tawh tho a, a hriselna a pan ve tawh bawk nen Aizawl an lo chuangkai khât a. Kan zin châng hian kan inhmu ve a, a bak hi chu phone kaltlangin a ni leh tawp mai. Chuvangin Vantei hian a ngai reuh a, kan zin châng te hian a bulah a tap chawt ṭhin. Inhmu khât mah ila inlaichinna ṭha tak kan nei a ni.




Ka pa chuan "Khati mai tur kha ani, i nu tân a ni tel bawk a" a lo ti zauh a, "Nizanah pawh..." a tih leh lai chuan "U Sangzual..." ka nu in a lo ti nghal kha kha a. A melh na ngang mai.



Ka pa chuan nui vur vur chung hian "Vante, pasal i neih ve hunah nû te ngaih vângin i ṭap ve hlap hlap ang em?" a rawn ti a. A thusawi dan vel aṭang chuan thil awmzia ka lo man thiam nghal vek a, ka nuih a za viau mai.




Vantei lah chuan hrethiam lo zet hian "Ka hrelo, ka ṭah chuan ka pasal a khawngaih thlâk dawn emai, ka ṭah a chhuah viau paw'n ṭah loh ka tum hram hram ang" a lo ti vat a.





"Tu emaw ai chuan i puitling dawn anih hmel" ka pa chuan a lo ti leh hram a. A nuih a zat hmel viau mai. Ka nu chuan a melh rum tawh lutuk tlat. Hrethiam zetin ka lo nui ve vur vur bawk a.




Tukṭhuan eikham chuan kan pafa in inkawtah nilum aiin kan ṭhu a. "Nizanah ka nu a ṭap a nimaw..." tiin ka pa chu ka zawt a, a lo nui suk mai.



"I nu leh i pi inzawmna hi chu a thûk bik alawm. Heti chen kan lo innei ve tawh a, ka bula a hrehawm vang ni miah si lo hian i pi a ngaih vangin ṭah châng a la nei fo ania" a ti sup a.




"I chhaih kher a, a haw ngawt ang" nui hawk chung hian ka lo ti veleh a. Chhungkua kan inpawh tlâng a, ka pa nen phei hi chuan mipa ve ve ni mah ila kan pahnih chauha kan awm chuan sawi turte hi kan hre em em a. Kan tlak ve duah zel.




Ka pa chuan "I nû huat nihte chu a hlauhawm loh emai a" tiin a nui hawk hawk a. Kan hriat laia ka nu chhaih buai vel hi nuam tih tlat châng a nei a. A nghal ru ve zek chuan ka hria. Mi chuan a âwm ang lo tihna lai chen an lo nei mai thei. Mahse keichuan hetia ka nu leh pa te an awm hian nuam ka ti a. Chhungkaw nih phung tur tak niin ka hre bawk. Thu tak rengte hi ninawm châng a awm ve a. Han infiam zeuh zeuh ila kan inpawh nge nge.




A tâwpah chuan thutak bawkah min luhpui leh a. Ka nu nun aṭangin entawn tur bung thar min hrilh leh a.



"I nû tluka nû te hmangaih leh dawm thiam hi an awm kher lova. Tun hma thil zawng zawng in hre ve kilh kelh lo zawk a. Hria ni phei ula chu i nû hi in ngaisang zual ngawt ang. Nû leh pa te hi ngaih tur, mipa nih vanga intihpâ a, chhungte lak aṭanga inlakhran tlat te hi a pâ lo, a ṭhing ru tlat. Chhungkua ngaih pawimawh a, chhungkuaa tal tam te hi a pâ daih zawk tih hriat tur. Ram dangah in awm a, duh angin kan awm khawm hnem theilo zawk a. Eng anga zir sang leh thiam pawh ni ila khawvêlah chhungkua bawk hi kan tâwpna tur ania. Chuvangin dah pawimawh em em tur" a ti leh ta duah a. A vawi tam tak nan ka bengah thu ṭha a lut leh ta.




Ka pa sawi lawk ang ngeiin ka pi te chu an lo zin a. Nu Rinkimi chuan a tunu, Nu Sawmtluangi fanu hi a rawn hruai a, a hming chu Angaihi ania. Kan zin ṭumin kan lo inhmu ve zeuh zeuh tawh a. Vantei nen hian an mizia a inang em em a, an inrual tawk viau bawk. Kum 2 velin Vantei hi a upa in ka hria.




Midangho chu harsatna neuh neuh avangin an lo kal ve thei lova. An pathum chu an ni deuh tawp mai.




Nu Sawmtluangi hian pasal a neih âwm ka hre si lova. Heti hian fanu a nei ringawt a, heng vel hi ka hrethiam ve chiah lo. Angaihi hi sâwn a nih âwm ka hre bawk silo. Ka nu leh pa te hian hemi chungchang tak hi chu thu chiang engmah min hrilh ngai lova. Kan zawt buai lo bawk.




Kan zin nikhua hian Vantei nen an inkawm deuh chawt a nimai. Mahse ka lo chîk ve ṭhin a. Angaihi hi a inthlahrung riauin ka hre ṭhin. A mizia hrim hrim pawh a lo ni thei a, ka hre tawh bik lo le.





Nu Rinkimi chu a ri nghal phawr phawr a, "Zosangzual, a va lunglên thlak ve" a'n ti hluai pek a. Ka pa chu a lo nui hawk hawk mai. Nu Rinkimi tluka ka nu leh pa te hnehsawh hi ka la hrelo. An in ngam thawkhat viau ṭhin.




Ka pi nen chuan kan in chibai a "Hriatpuia pawh hmuh loh karin i lo puitlin hmel ta khup alawm le, i pa i chhun tulh tulh lehnghâl a" a ti a, a nui var var a. "I dam ṭha em pi?" ka tih chuan a dam ṭhat thu in min lo chhang vat a.




Zanriah eikham chuan mu nghal mai lovin kan titi hlawm a. Ka pa te inngaihzawn lai vel sawiin Nu Rinkimi chu a titi tui nasa mai a. Kan hriat ngai vek a sawi a, mahse kan nuih a la za tho. Nu titi thiam tih takah a thusawi reng reng hi a ṭhing ve thei lo reng reng.




"Hriatpui bialnu i nei em?" a rawn ti teh daih a, ka lo nuih suk danah a hrethiam aniang. "A va pawi tak" a ti ham ham a, a nui hawk hawk bawk a.




Ka nu in "Chutiangte i la zawt chauh a, mo kan nei hnai ṭep tawh ang chu kan lo ti zawk a" a lo ti fiamthu a. Chutah Nu Rinkimi chuan "Bialnu nei lo la chu ṭha deuh ka lo haul sak che asin le" a ti hlut a. Fiamthu mah se a thu tak hmel tho mai.




Ka pa chuan "Sawi hrim hrim la, kan lo duhpui zawk mai thei asin" a lo ti uang a. Nu Rinkimi lah chuan "Ele Angaihi hi" a lo ti hem mai. Angaihi nen chuan kan mit a intawng nghal zawk a. A zah hmel ngang mai. Ka nau nen mize inanna tam tak an nei ka tih tawh kha.




Ka lo nui mai a, ka pi zawk chuan "Unau alawm an nih" a lo ti vat a. Titi dang an vawrh zui ta daih a. Kei tak chuan eng teh ualah ka ngai hran lo, mahse Angaihi zak hmel chu a khawngaih thlak zawk.




Zan dar 9 velah chuan mu turin kan intintuah ta a. Ka khumah ka pi leh Nu Rinkimi te an mu ang a, Angaihi chuan Vantei khum a ṭawm thung ang.



Mutna phah chawp tih vel aiin ṭhuthlenga mut mai chu awlsam ka ti zawk a. Ka nu te'n chhuata mutna min phah sak an tum pawh chu ka hnial a. Ka pi chuan "I lo haw ve chhunah i room kan lo luahlan sak ringawt che a, a va zialo tak" a ti vang vang a.





Chhan ka tum lai takin Nu Rinkimi zawk chuan "I tupa anih kha Ṭhapui, inthlahrung lutuk ṭhin suh. A tân pawh a nuamlo zawk ang" tiin a lo khap vat a. Ka pawm zâwng tak a ni.




"Va mu tawh ru, in chau ang" ka lo ti ve vat a. Room ah an lut bo zui ta diak a.




Ka mut fel hnu chuan Tlankimi nen phone call in kan inbe nghal a. Ka Ph.D result chhuah hun tur min rawn zawh chuan karleh vel anih ka rin thuin ka lo chhang vat a.




"Tling lo ta la, eng nge tih zawm i tum?" a rawn ti thut a, chhan mai dan tur ka hrelo kher mai. "Ka hrelo le" ka lo ti ban chhalh a.



"I zir ṭha leh dawn em?" a tih chuan "Zir ṭha leh mai thei ani" ka lo ti a. Zir ṭhat leh tak tak ngai ta se ka kum a kal duai dawn a. A peihawm tawh kherlo mai thei a ni.




Chutah Tlankimi chuan "Kan upa duh awm" tiin za lo zet hian a nui hul hak a. Chhan mai dan tur ka hrelo. Nui mah se eng emaw ngaihtuah hi a ang ka ti. Kan lo inzui rei ve thawkhat tawh bawk a. A mizia hi chu ka hrechiang viauin ka hria.




"Anih loh pawhin kan innei daih ang a" ka lo ti fiamthu ta daih a. Tunah tak hi chuan a hnual zawnga inngaihtuah ka duh rih lo. Hmachhawp ka nei lo lutuk te hi inhmeh lo ka inti a, nep ka inti tlat.



"Innghahna tlak pasal neih lohte chu a" a rawn ti nghat a, a thutak hmel viau bawk. Fiamthu maia sawi ka ni a, ani chu a lo thu tak viau anih hmel.




Min hmuhsitna ṭawngkam ni chiah lo mah se ka awm a ti nuam lo pha tlat a. Keimah leh keimah insitna a rawn piang chhuak hialin ka hria. Mipa, mahni inringtawk ve tak hi min rawn ti derthawng pha tlat. Ka ngaihtuahna a tibuai viau bawk.




"I pî te chu an rawn thleng tluang em?" a rawn ti leh daih a. Ka lo thaw huai maiin ka hria. Zan danga kan inbiak ṭhin dan ang bawkin kan inbe leh a. Mahse a hmasa lama kan thusawiin a zir loh vang nge zan dang angin nuam ka ti ta hauh lo mai. Keimah zawk chuan ka mut a chhuah tawh thu sawiin kan inbiakna chu ka ti tâwp ta tawp a.




Ka mutna bula phone ka dah hnu chuan ka inngaihtuah vang vang a. Hmalam hun ngaihtuahna bawkin ka rilru a tibuai leh a. Tui zawng leh tih châk zawng ka neih leh neih lohte ka ngaihtuah a. Rilru mumal, rilru nghet ka pu thei tlat lo. Mipa nêp tak ang mai hian ka inhria.




Ka pa min zirtir ṭhinna nen inhmeh lo ka ti a. Zirtirna ṭha tak ka dawng a, ṭawngṭaina nen min enkawl seilian a. Mahse keimahah hian eng emaw dik lo riau hi a awm. Chu chu ka hrechhuak thei lo a ni.




Ka inngaihtuah zel chuan ka hah vek dawna ka hriat avangin ka phone bawk chu ka ban leh a. Kan Rara-i paw'n message min lo thawn leh duah tawh.



Min duh thu a sawi atang khan hmaichhanah kan la inhmu leh miah lova. Mahse phone lamah chêt a rawn la char char thung a. A chângin a message chu ka seen a, a châng leh ka dah khâwl a. Chutiang vel mai mai chuan ka awm tir.



Tih tur em em ka hriat loh avangin Rara-i message ho chu ka chhiar thla diat diat a.



"Au Hriatpui, hmeichhe khawngaihna ngah deuh hi i duh chî em ni?"
"Au Hriatpui, vawiinah nangmah ang deuh ka hmu"
"Au Hriatpui, eng rawng nge i duh ber?"
"Eng nge i chawhmeh ngainat zawng?"
"Ka duh ringawt che"
"Ka bem lo che ania aw"



A message chu a tlar thla dul mai, thu thar lam em em a awm hran lo. A ngai te bawkin ka seen leh tawp a. A beidawng ve ṭêp tawhin ka ring. Tleirawl hawk lak nih lai chuan mi te hi kan duh vul chuk a, reilo ah a reh veleh mai zel a. Kan lo paltlang hnu vek ania, a awmdan hi chu ka hrethiam ve lutuk.




A mizia angah ngat phei hi chuan a thawveng bawk a, duh leh vei te hi chu a nei dulin ka ring.



A message ka seen tih chu a hria aniang, a rawn type zawm leh mawlh mawlh a.



"Kan inhmuh lohna a rei tawh sia, Vantei Birthday ah chuan ka rawn vul chuk chuk viau ang" a rawn ti ham ham a. Hmui lian tawk sticker che zawk zawk hi a rawn dah a. Ka rap lek lek mai.



Zingah chuan Tlankimi'n morning wish min rawn thawn hmasa a. A tana tling lo ta riau ang hian ka inhria. Engtin emaw hian ka awm a tinuam lo, ka hahdam lo a ni ber. Mahse pangngai tak chuan kan inbe zui leh ta tho a.




Zana ka len tur thu ka sawi chuan a lo phur khawp mai. Tlêm chuan ka awm pawh a nuam leh ta deuh. Ni hnih ngawt hmaichhanah kan inhmu leh tawh lova. Hmun danga ka awm lai kha chuan a ngaihna ngang a awm lova kan inhmu lo a nimai a. Mahse tunah chuan inhmu phakin kan awm reng a. Hetia ka awm chhan pawh hi kan inhmuh khât leh tawh vangah ka puh ta tawp. Hmungdanga awm law law ni ila chu thuhran ania.




Zanah chuan ka lêng ta ngei a, a chhûngte pawhin min lo be leh luam a. An mu tur pawh pangngai takin kan inmangṭha a. Kan pahnih chauha kan awm hnu chuan kan inchhaih nui leh kar kar a.




Kan hlim dun ve tehlul nen ka haw dawn hnaih chuan zirna chungchang bawk kan sawi lehpek a. Ka hnual lehnghal rawih mai.



Min fuih mawlh mawlh a, ṭawngka in min thlamuan ve bawk a. "Hetiang lam hi sawi zeuh zeuh kan ngai, chuti lo chu hma kan sawn lovang. Keichu hna ka nei tawh a, nang pawh i thawh âwm tawk hna chu a awm em em ang" a ti mawlh mawlh a.




Ka awm a nawm phah der lo mai, ka tlawm vawng vawng nimai hian ka inhria. Rilru kawi pu a sawi anih loh zia ka hrechiang a, chuti chung chuan keimahah hian diklo a awm leh tlat tawh.



Bike a ka chuan hnu chuan Vantei piancham lawm chungchang kan sawi leh ta daih a. Naktuk mai hi anih tawh avângin ka hrilh nawn a ni zawk mah. Vantei pawhin phone kaltlangin a lo hrilh ve thlap tawh anih hmel.




A tukah chuan chhungkhat laina ho chu kan inah an lo chuangkai ṭak ṭak a. An che nghal suau suau a. Mihrang awm lo mah se chhungkua kan hung bawk a, kan ṭhahnem ve khawp mai.




Tlankimi chu sikul a kal leh tawh avângin an bân veleha lam turin kan inbe fel a.



Ka nau ṭhiante ho an fel bawk a, an che suau suau a. Ka lo pui ve bawk a, kan hlim tlâng dar dar viau mai.



Sa sat ho bula ka lo awm lai tak chuan Vantei'n min rawn ko a. Min rawn pan nghal zat bawk a.



Ka bul a rawn thlen rual chuan "Û, Rara-i zuk lam lawk mai teh a" a rawn ti nghal a. A rawn sawi takah chuan a lo la kal ve lo tih ka hre chiah.



Ka chhan mai loh avang chuan "Kan ṭhianpa Zuia rawn lam turin kan inbe fel a. Mahse Zuia kha a pa a dam loh deuh thut avangin a rawn kal remchang dawn lova. Midang tirh tur mai ka hrelo, an buai em em vek hlawm bawk sia. Rara-i te in an hre âwm hlawm silo. Nangman zuk lam mai teh" a ti leh zung zung a.




"Amahin a rawn kal theilo em ni?" ka lo ti thung a. A boruak ka zo ṭhin silo, bike a inphurh leh vel chu ka hreh tlat pek a.




"Theih chu thei dawn e. Mahse Zuian a lam dawn emaw tiin a inring lawk vek tawh awm sia. A rawn kal hun tura a sawi kha a ni tawh bawk si. Amaha rawn kal tura tih leh kha ka inthlahrung alawm. Chuloah i tan hruai a harsa dawn chuang hlei nem" a ti zung zung a.



"Ka buai ve tho asin mawle Vante" tiin pumpelh dan kawng chu ka dap leh hram a. "Ka tirh ngam awmchhun i ni rih alawm" a ti ve ṭung bawk si. Ka inkhalh chhuak ta nge nge a.




Rara-i te in zawn ka thlen rual chuan kawngsir remchang laiah bike chu ka tiding dat a. Ka inhun fel hnu chuan châbi chu la in ka ak tha zui nghal a. Ka ding rei dawn chuang lova midang lirthei khalhna kawng a dal loh hram ka beisei.



An kawngkapui chu a lo inkhar thiap a, mahse inchhung lama TV en thâwm ka hriat avang chuan mi tu emaw tal chu an awm ka ring ve ngawt a.




Kawngkhar bula door bell chu ka hmet a, inchhung lam atanga patling min lo chhâwn tu an awm rual chuan ka hawng zui nghal a.




Patling dul kiar ve lampang, lian zuar mai hi TV hmaah chuan a lo thu a. A thu chung pawhin a thu khat deuh hnuk a, a tê lo khawp mai. Rara-i pâ a nih ka lo ring ve ngawt a. A ni tak tak anih chuan a nu zawk a chhun anih ka ring hmiah. A pa chu a hmel a fel fai lo emai.




"Eng nge ni ta?" a lo ti dam thlup a. Rin ai takin a aw chu a pangngai a, a nghet deuh tlut bawk.



"Rara-i ka rawn lam dawn a" pehhel buai lovin ka ti tlang tawp a. Theih chu nise he inah hian ka kal teuhlo mai. Ka nau thiannu hi ka ngainat zawng a ni miau lova. A mize harh vang thit thet lutuk hi ka ngai thei vak lo a ni ber.



"A insiam in ka hria, a room ah han kal chhin teh" a lo ti awlsam then a. Ka beisei aiin a ngaih a sam ang reng. A fanu puitling ve uaih tawh room a mipa puitling luh tir chu a pawisak vak hmel loh.



Mahse keimah zawk chuan duh lovin "Hetah hian ka lo nghak mai ang" ka ti sup a. Thut thlak mai ka tum lai chuan "Han tur rawh, chutiang a nih loh chuan engtikah mah in chhuak lovang" a lo ti thuai a.




A ngaihna hrelo fe hian "A nimaw" ka lo ti ban chhalh a. "Aw, a room ah chuan han nghak rawh. A chhuak tur te hi a insiam rei thei leh lutuk a. Tur fe a ngai thin alawm, han chho rawh" a lo ti leh zung zung a.



Ka hmanhmawh bawk nen hnial zui chi ni tawh hek lo le. A inpeih vat theih nan chuan tiin Rara-i room ni a a sawi lamah chuan ka pen chho ta nge nge a.




Inchungah chuan room pakhat chauh a lo awm a, chumi chu a nih ka ring ve nghal ngawt a.




Kawngka chu vawi thum vel ka kik hnuah min rawn chhâwn ta hram a. A la bak hlar zui a "Rawn lut mai mai teh" a ti hlar a. A ngaihna ka hrelo lutuk chu ka hawi hil ang reng. Keimah ka ni tih a hrelo tawp aniang.



Kawngka chu zawi muangin ka hawng a, room chhunga ka thil hmuh avang chuan rang fahran hian ka hawi sawn nghal a. Ka sa chhuak pup maiin ka hria.



Hawisawn nghal vat mah ila a bra leh a kekawr bul pan tê nen chauha a lo awm teu kha ka hmu chiang hman lutuk.



Rara-i lah chuan engah mah ngai lo tih hriat lutuk hian "Ehe...nangmah elo? Zuia'n min lo hruai dawn emaw ka tia" a lo ti hliai a.




A tawng dan a pangngai em avang chuan a lam ka hawi vat a. A lo inkhuh tha sawk sawk tawh ang chu ka tih laiin a awmdan ngai rengin a lo la awm a. Darthlalang hmaah dingin a sam sei hniang chu a khuih dalh dalh a.




Saruak thaw thanga ka va hmu chu min pawisak loh hmel kher mai. A zak miah lo zawk emawni. Zak zum kimki chawih chawih chi a nilo tih chu hre tho mah ila hetiang em em ah hi chuan a zah ve ka ring ania.



"Kawr te ha ve ta che" ka ti ta hluk a. Min pawisa lo reuh lutuk chu hmeichhia a nihna angin ka ngaimawh tlat. Hetiang ah te chuan a zak lo anih pawhin zah der ve tal tur ania. Keimah zawk min ti zak lek lek mai.



"Ka la ha hman hlei nem, khumah hian lo thu rawh. Ka hmai ka chei zung zung ang a, kawr ka ha ang a. Ka hman a nimai" pangngai deuh hian a ti a. Engtin mah a awmdan a danglam eih lo.



"Pawn ah ka lo nghak zawk ang che" ka tih chuan mitmeng fiah zet hian min rawn melh kal a. Ka lo melh let ve run a. A hmel ah zahna emaw nuam lo tihna pawh ka la hmu chuang lo.




Kal chhuah mai ka tum lai chuan "Au Hriatpui..." a lo ti vat a. Ka lehhawi leh nghal vut.



Nuihza insum deuh hian min lo en a. A hmui hupin mitmeng tizim san hian min melh a, "Eng nge?" ka ti ta nghut. A awmdan engkim hi ka ngainat zawng a ni lo. Ka nau nen an mizia a inpersan si, an lo inkawm ve ngawt te hi a mak.




"I mitmeng kha" a rawn ti a, mitko a rawn san ak ak a. Eng chu a hria nimaw. "Eng nge ka mitmeng chu?" ka lo ti hluk. A awmdan hi ka nin zawng tak. A hma atang tawhin ka ning tawh. A rilru ka hre ve kar si a, ka chhungte vanga be chhe lo mai mai ka la ni.




"Min ît chiang lutuk" a rawn ti heu mai. Min va han tihrilhai tak e aw. Ka meng tal nghal tap a. Chutiang zawnga ka ngai lo lutuk chu min ti dang lel mai.



Intithei fahran hian min melh ralh ralh a, ka rap reuh mange. Hmeichhe zak thei lo tak han ti dawn ila a ni em bik silo. Min lo biak reng rengin chin tawk a hre ve fu si a.




"I kawr ha rawh" ka ti ta ngawt a, a la intihtheih hmel ta deuh deuh a. A mizia ang hi ka deal thiam loh zawng tak.



"Mipa hmaah saruak thawthanga awm tur a ni ngailo. Mipa sual chuan an sual hrep mai ang che. Khawi hmun pawh nise kawr pan lutuk leh bul lutuk hak loh tur. Tuna i awm dan ngat phei kha chu a zahthlak. Hetiangah hi chuan zah tur" ka ti ta duah a. Ka sawi tum ber pawh ka hre chuang lo. Ka sawi thiam hek lo.




Ka nau thiannu a nihna angin hei ai hian zak zum hret se ka duh. A awmdan a zahawm lo lek lek zel.



Rara-i chu a lo ner nawng a, mahse a nui ta sak a. A hmel hi chu a chhe miah lo mawle, a nui hmel phei chu a tha reuh. Mahse ka ngainat zawng a nilo.



"Nang chu mipa dik tak i nia. Pa Sangzuala en reng reng pawhin i sual dawn lo tih ka hria. Chuvangin saruak paw'n lo awm ila ka duhlo chung chu min khawih lui dawn lo tih ka hria alawm" sawi fuh inti fe hian a ti zat zat a.




Ka melh run run hnu ah "Duh pawh ni la ka khawih lovang che" ka lo ti hmiah. A room atang chuan ka chhuak zui nghal daih bawk.



Inhnuaiah chuan ka lo nghak ta zawk a. A pa chuan "A la inpeih nange" a lo ti vat a. "Inpeih ṭep" ka lo ti ṭha ve mai a.



"A bialpa em ni i nih?" a rawn tih chuan ka lo ṭhu ngil deuh zawk mai. A pa chuan min melh run a, a mitmeng a sen râm a, tunah khan ka hmu ve chiah.



"Aih ni lo e, a ṭhiannu û" ka lo ti vat a. A nui nghal huah huah a, zu rim a rawn nam huam mai. Nichina kan inbiak lai khan kan inhnaih vak lova, ka lo hrelo pawh a nimai thei.




"Kan fanu te tuin nge maw duh ve ang le, âtthlâk lutuk" a ti zui hluk hluk a. A phun nuah nuah a, eng nge a sawi ber pawh ka hre tawhlo. Nichin khan a pangngai hmel viau si a, tunah chuan zurui â bual hi a ang ber.




Rara-i a rawn chhuk thlak zui takah chuan ka tho nghal vut a. A inthuamna chu ka ngaimawh lehpek khawp mai.



Pawnfen, a khup khuh lo tâwk vel hi a ha a, a kawr hak pawh a mar ṭha leh pang pang viau mai. Leather jacket dum a ha hak hnan a. Boot sei vak lo hi a bun bawk a. Ka ngainat zawng a ni leh pek lo. Uchuak tak angin lang lo mah se hmuh mawh a awl riau.



Kan chhuah dawn chuan "Pa kan kal aw" a ti sep a. A pa chuan min ngaihsak zui lem hlei lova.




Bike ka tih nun lai chuan car pakhat hi kan zâwnah a rawn ding a. Kan lo melh vat a, Rara-i ka va melh chuan hlauthâwng hmel hi a pu tlatin ka hria.



Nu pakhat hleitling zet mai hi a rawn chhuak a, a inthuam dan chu a zahawm khep mai.



Chiang kek kawkin Rara-i chu a melh a, "Rawn haw har suh ang che" a ti kha fak a. Rara-i chu a lo bu nghat mai. Amah ang lo takin a kun ngal a, hnual rawih hmel hi a pu ni berin ka hria.



Nu pakhat chuan Rara-i te in lam kha a pan zui a, a lut zui nghal a. Rara-i chu ka melh leh a, a âwm dawmin a lo chhing vang vang mai.



"Rara..." ka tih chuan a phu awk a, a rawn meng chhuak ta chiah a. Ka hmel a hmuh rual chuan nichina a hnual hmel leh hlau hmel kha a bo nghal vek a. Amah tak tak ang khan a rawn nui var var a.



Engtin nge tun second reilotê chhung khan a insiam danglam hman ka hrelo.




"Khanu kha tunge?" ka ti teh tawp a, "Ka nu" a lo ti ṭha ve mai a. Ka lo meng tal tap mai. "I nu maw?" ka ti leh ngat a, ka âw ah chuan mak tihna a ri chhuak ngei ang.



Chutah phur zet hian "Aw, a hmelṭha tiraw. Ka tluk lo asin" a ti hluai a. Chîk zeta ka en ngial pawhin thup nei hmel a pu bawk silo, ka hrethiam teh nuaih lo khawp mai.



Bike-a a rawn chuan rual chuan "Harsatna i nei em ni?" ka ti teh ngawt a. Nichina a hlauthâwng hmel khan ka ngaih a ti ṭha thlawt lo a ni ber.



"Ka duh che hi a nimai" a lo ti ham ham a. "Uang lovin" ka tih chuan za lo te hian a nui hak a. "Kan inngaihzawn hunah ka hrilh ang che" confi zet hian a rawn ti a. Ka zawt zui tawh lo chiang asin.




A ṭawng leh nghal zat zat a, sawi tur hi a hre em em bik ṭhin ngawt mai. Ngainat tum lui ve ngial dawn pawh ni ila ka thei ṭhin lo. Hmeichhe ṭawng tam leh ti zawk zawk chi hi ka ngainat zawng an ni miau lova.




Tlaiah Tlankimi ka va lam leh a, Vantei piancham lawmna zanriah chu tui ti takin kan ei tlâng a. Rara-i chuan Tlankimi nena kan awmdun chu min rawn melh leh nghek ṭhin a. Engah mah ka ngai lem hlei lova.




Tlankimi chuan "Rara-i hi a fel viau dawn emaw ka tia, ka ngainat zawng a ni miah lo" tiin ka bengbulah a rawn phun sar sar a.



"Folkland kan kal ṭum khan zanah i lo va bia em ni?" ka lo ti daih thung a. Zep buai lovin a lo bu nghat a.



"Rante chu hmangaih tur ania, tihnat miah loh tur. I pawi an khawih dawn anih pawhin tihnat loh dan kawng dap hram hram tur. Nakinah chuan hre tawh rawh aw Rara' ka va tia. A lo haw ngang mai a, min lo haw let daih a. A zialo tak tak ani" a ti a, Rara-i che vel chu a en pah reng bawk a.




"Engtin nge a lo chhan che?" ka tih chuan "Sawi chhawn pawh a zahthlak zawk. Aia upa min zah miah lo kha mak ka ti, 'I over anih chu a' min rawn ti let erh a. Ka ngaihdan a ni vak lova, a aia na deuh zawkin ka khak a. Kan zialo chho deuh chu a nimai" a lo ti vat a.



Eng ka hria nimaw ka nuih a za tlat pek a. Tlankimi te ang mi ti dem dem chi pawh a lo chhang zek thei ania. Rara-i hian mize danglam tak a nei ve ngei chuan ka hria. Tumah a zah pah vak lo anih ber hi.




Nuihza viau mah ila ka insum hram hram a. Tu zawk mah thiam chan tir tur ka hre hran lo. Hmeichhe thu hlaah ka ngai mai.



Zanah birthday cake te kan zai hnu chuan an haw ta sap sap hlawm a. Rara-i erawh a la awm ve reng a. Tlankimi'n Vantei thil a pek lai pawh chuan Vantei bulah a lo awm ve a.




Tlankimi chuan present bawm te ṭha nil nel deuh mai hi a pe a. Vantei pawh a lo lawm thiam ngang mai. Rara-i chuan Tlankimi chu a lo ner khum nawk a. Ṭhut hmunah ka lo nui tawp ringawt.



Tlankimi ka thlah hnu chuan Rara-i chu a lo la awm cheu a. Ka ngaihven lem hlei lova. Mahse ka pa in thlah tura min tih chuan ka hreh lehpek khawp mai. Ka ngaina thei miah lo mai hi ka inthiamlo hial zawk.



Tih theih dang ka neih miau loh avangin ka thlah leh ta poh a. An inkawt kan thlen hma kawng pengah chuan min din tir daih a. Ka haw leh hma dawn tihna a nimai tiin ka ding ve mai bawk a.




"Nakinah ka lo bia ang che" a ti ham ham a, min kalsan zui nghal a. Ka inkhalh let leh hnu, kawng chanve vel ka thleng tawh tihah chuan bike hmaa kan khai, a cake hawn tur polythene a kan pack chu a theihnghilh tih ka hrechhuak a. Inpek leh mai a buaithlâk ka hlauh avangin a harsa lo bawk tiin an in lam panin ka tlan let zui lehnghâl a.




Reilotê hnuah an in pawh chu ka thleng veleh mai bawk a. Bike aṭanga ka chhuk, an inkawt ka thleng chiah chu inchhûng lam aṭangin thil keh ri bur ka hria a. Ka ding nghal chawt mai.



"Nu..." Rara-i thlabar âw ngei mai chu ka hre zui zat a. "In pafa hian ka châwm hlawm in nih hi in hria em?" nu pakhat hian a ti leh ṭhawt a. A ri zui lehnghal bur a. A ngaih ṭhat thlak duh lo kher mai.




_________*_________*__________*______

(Chapter dawt leh aṭang chuan Rara-i tak tak kan hre chho tawh ang. Comments hmuh theih loh hian a awm zêl mai a, manganthlâk duh khawp mai. Khatianga a lo awm leh anih pawhin pawi ti lutuk duh su aw, ka tan a hlu tawk lutuk ania)


Show post links
Top

[Ngaia]

AIZIAL
By CVL Awmpuii



Chapter 5


Pâwn lam aṭang chuan an thâwm chu ka ngaithla reng a. "Min tilungawi zawng hian khawsa ve rawh" ti ṭhawt ri ka hre leh a. A âw aṭang chuan a thinrim zia hai theih a nilo. Rara-i âw chu a nilo, a nu âw kha niin ka hria.



Va pawh mai tur nge hetia kalsan tawp tur tih pawh ka hrethiam lo. Ka ding ta reng a, an awm zêl dan tur ka lo ngaichâng a ni ber.



Glass tla keh tuarh ri ka hriat leh rual chuan ka che vut hi a ni ber. Ka ngaih a ṭha thei tawh ngang lo a ni.



Kawngkhâr chu hawn mai ka tum a, a lo inkalh tlat a. Ka chûm ri nghal bur bur a, inchhûng lam thâwm chu a hma ang lo takin a reh nghal ṭhiap mai.



"Rara..." ring zet hian ka ti a, "Rara..." ka ti leh a, kawngkhar chu ka chûm ri zui lehnghâl bur a. A rawn ri ta khep a.



Mahse Rara-i ni lovin a nû zawk chu ka hmu a. Kut hma suihin a ding khawng lah a, thîp zet hian min melh bawk a. A phên aṭang chuan inchhung chu ka thlek a



Rara-i pa chuan sitting room ah zû a lo thli ri karh karh a. An chhuatah chuan zu ûm ni awm tak lo tla keh darh nuaih hi a awm nual bawk. An ṭhutthlêng te pawh a sawi bawih hlawm mai.




"Khawnge Rara-i?" ka hmaa nutling hawi sâng vah a ding chu chiang zet hian ka melh a. Ka zawhna ngai pawimawh lo zet hian "Eng nge i duh?" a lo ti kha fak a.



"Khawnge Rara-i?" ka ti leh a, min melh fe hnuah chuan "A room ah a awm, a chhuak tawh dawn lo" a lo ti hmak a. Ka lo thaw chhuak deuh hawk mai.




"Eng nge i duh?" ti lehin ka thil khai lai chu a rawn melh a. A âw bul zet aṭang chuan min ngaih theih loh zia ka hai bik lo.



Ka thil khai lai hi dah tawp a kalsan leh mai chî nge thil awmzia zawh fiah chi zawk tih pawh ka hrethiam teh nuai lo.



"Tunge a?" rui aw pawr chhur hian Rara-i pa chuan a lo ti a. A rawn hawi ṭawk ṭawk a, a mitmeng aṭang ringawt pawhin a harhfim lo tih a hriat ngawih ngawih.



"Helai hmunah hian tih tur i neih âwm ka hre lova, chuvangin min kalsan mai ta che" seh chilh zet hian Rara-i nu chuan a lo ti veleh a.



An chhungkaw buaina vel ni ah ka ngai ta tawp a. Ngaih ṭha zan lo chuan ka cake khai lai chu ka lek chhuak a "Rara-i khan a hawn theihnghilh a, ka lo dah anih hi" ka ti sup a. Ngawi rengin a lo ban ve mai bawk a. Hnawksak min tih hmel ang reng si a, lo awm ve reng chi a ni bawk silo. Inchung chhohna kailawn chu melh leh zeuhin ka kalsan ta tawp a. Kawngkhar chu a kalh ri leh nghal khep mai.




Thâwm a awm leh ringin minute 15 vel chu ka ngaichâng ren rawn a. Mahse eng thawm mah ka hriat tak lovah chuan rilru nuam zân lovin ka kalsan ta a.



In ka thlen chuan ka chhungte an lo meng kim ṭhap a. Kan chêtvelna te tifelin an lo che suau suau a. Ka pi leh Nu Rinkimi te erawh an lo ṭhu hahdam thung a.



Vantei chuan hmun a lo phiat mek a, ka rilruah a ṭhiannu bawk a rawn awm leh nghal a. A hmaa ka nu nen an titi kalhmangah khan Rara-i te chanchin hi an hriatchian viau hmel tlat a ni. Nakinah a falin zawh chian ngei ka rilruk ta a. Loh theih lohin Rara-i chu ka ngaihtuah reng a. Ka pi te min lo biakna pawh chu a rûl tawk bakin ka chhang lo.




Room ah ka lut a, ka inbual laite chuan Rara-i hlir ka ngaihtuah a. Eng ang mi tak nge a nih hriat duhna in ka khat ani ber. A lakah eng rilru emaw ka va pu ta tihna lam ni lovin nichin maia ka thil hriatte kha ngaih ṭhat lohna tham a tling tlat a ni.




Zanah chuan zan dang ang lo takin min lo biak hun ka ngaichâng ren rawn a. Dar 12 a rik dawn pawh chuan a reh vang vang a. WhatsApp ah a last seen ka en a, tlai lam daih tawh kha a ni.




Tlankimi nen kan inbe ve bawk a, rilru kap tu ka nei miau a, ka tui rih lo tlat. Rara-i hlir ka ngaihtuahna ah a awm reng mai.




A reh tak tlawk tlawkah chuan ka va call ta tawp a, mahse switch off a inti tlat. Ka ngaih a ṭha thei ngang lova Vantei biak tawp mai chu ka tum ta a. A room-a ka va kal hma in WhatsApp ah ka va text te te a. A la men leh men loh ka zawh chuan min rawn chhang vat a.




"Room ah ka lo lut lawk dawn nia aw, Angaihi a mu tawh em?" ka ti leh tê tê a. A mut tawh thu a sawi rual chuan a room lam ka pan nghal a. Ka va thlen rual chuan kawngkhar min lo hawnsak nghal a.




Zanrei tawh lama ka chutia ka awm teh thut chu mak a ti viau aniang. Min lo melh kiau a, "A va pawimawh hmel ve" zawitê hian a rawn ti a.




Khum a Angaihi muhil chu ka thlek zawk a, heta sawi chu ka ngaih a ṭha lo leh deuh bawk si "Sitting room lamah lo phei lawk zawk mai teh" ka ti ta tawp a. Chîk zet hian min melh a, mahse engmah min zâwt buai lovin a lo kal ve mai bawk a.




Ka mutna ṭhutthlêng ah chuan ka ṭhut tir tê tê a. "I ṭhiannu nen zaninah in inbe tawh em?" ka ti nghal tawp a. A rin loh lam daih ka zâwt a ni mai thei, a meng deuh awk a.




"Rara-i maw" a tih chuan ka lo bu nghut a. "Aw" a lo ti tawi tap a. Chîk zet hian ka melh a, "Engtikin?" ka tih chuan "Kan mut hma lawk khan" a lo ti ṭha veleh mai a.




"Harsatna a tâwk em?" ka ti leh hram pek a, ka hmuh tâwp dan kha a ngaih ṭhat thlak thlawt loh alawm.



Vantei chu a meng buai deuh nak a, eng emawni tak chu a thleng tih ka hrethiam nghal mai e.



"Enga tinge chutiang min zawh?" a lo ti let daih a. "Vante, Rara-i hi ka hrechiang duh, an chhungkaw chanchin te, thil dang tam tak pawh..." tiin ka thil hriatte chu a tawi zawngin ka sawi zung zung a. Uluk deuhin a lo ngaithla a. Ka sawi zawh rual chuan a lo thaw chhuak ham ham mai.




"Ka hrilh che ang a, mahse hria angin awm miah suh aw û..." a ti ta hap a. Ka lo buk nghut rual chuan a ṭhiannu lakah a inthlahrung leh deuh aniang "Mahse sawi miah lo turin min ti bawk sia..." a ti fan leh raih a, hrehawm a tih hmel khawp mai.




"Ka sawi chhuak dawn chuang hlei nem, min hrilh tlang tawp rawh. Puih theihna kan nei anih phei chuan kan pui dawn nia" tiin ka thlem titih a. "Pui tak tak ang aw..." a rawn ti vat a, ka lo buk nghut takah chuan a ṭhiannu chanchin a hriat ang zawng zawng te chu min hrilh ta a.



"Rara-i hi ka hriatna a la rei bîk vak lova, college aṭanga inhre ve chauh kan nia. Kan inhriat ṭan tirh dan pawh a fel vang vek hi ania. Kan college ah khan senior sual ve deuh deuhte an awm a, kan semester ah hian duh deuh mai an nei a. Mahse chupa chuan min lo be reng zel a. Khami an hriat khan min lo ngei nge pawh ka hrelo, an huat zawng ka ni ve hrim hrim pawh a ni mai thei, zunin velah te min tibuai ta ṭhin a. A châng leh ka zun lai te'n min lo kalh khum a. Canteen ah lah thil ka ei laiin ka bulah an rawn ṭhu a, ka tana thu hriat nuam lo deuh deuhte an sawi thîn a. Ṭum khat chu ka college bâng ka haw tur kha min dang a, room pakhatah min hruai a, ka zui lo ngam bawk si lova. Ka zui ta a, reilotê ka bulah an awm a. Chumi hnu chuan min kalh khum an tum ta mai a. Chutah chuan Rara-i hian min rawn chhan alawm. Khami te kha a hauh hrep bakah zirtirtute bula sawiah a vau a. Rin ai daihin an lo dawih a, khata ṭang khan min tibuai ngam tawh lova. Rara-i nen chuan kan inkawm chho ta a. A mizia hi ka hriat tirh aṭanga tûn thlengin a la ngai reng, a inthlak danglam velo reng reng" a ti a, hun kawl tawh ngaihtuah ang deuh hian a nui sak a.




"A chhûngte chu?" ka lo ti hmanhmawh a. Ka hriat duh tak ka la hrelo atin ani.




"Aw ka sawi dawn alawm" a lo ti vat a, a sawi zawm lehnghâl a. "Khatia ṭhian kawm ngailo ve ve kan han inkawm chhoh takah kha chuan thuruk tam tak kan i inhrilh a, chhungkaw chanchin te kan in share dun a. Ka pa in Pu Sanghminga chaweia a sâwm ṭum in a lo kal ve nawlh a. Khatia ka pa te leh a pu te an lo inkawm ṭhin tih kan hriat takah phei kha chuan kan inti unau zual a. Ka nu leh pate pawhin an duat ve em hi. Kan inah a lo lêng ziah a, mahse vawikhat mah an inah min hruai ve duh ngai lova. A chhungte ka hmuh châk thu ka lo sawi ve hrim a, a nui liam mai zel a. Ṭum khat chu an inah min hruai ve ta poh a. Mahse chumi ṭum chuan tumah an lo awm lova. Tun hnua ka ngaihtuah let hian tumah an awm loh vang khan min hruai zawk ni berin ka hria" a tih lai mek chuan ka phone a rawn ri pek a. Rara-in min rawn call back anih ringin hmanhmawh zetin ka en a. Mahse Tlankimi a lo ni daih a, tunah chuan hun ka nei rih lo tlat. Ka silent zui a, Vantei chu sawi zawm turin ka mitmei a.




"Khami nî a ka lêng ka haw tur kha a pa zurui ṭawng deuhin a rawn haw a. A nu a rawn âng lut bawrh bawrh bawk a. A nu ṭawngkam chu a chhe lutuk sawi chhawn chi pawh a nilo. Rara-i ka en khan pawitih hmel lutuk hian a lo awm a, a hmela ka la hmuh ngai reng reng loh hrehawmna leh zahna a vawikhat nan a mitmengah khan ka hmu. A nû chuan Rara-i chu a vîn zui nghal a, keimah te kha min melh nghek a. An ina ka lo lêng ta kher kher kha pawi ka tih zia chu! Rara-i vang nilo in a nu vang zawk chuan ania ka tih. Ka lên vang khan Rara-i a hauh phah hrep a. Rara-i mizia ka ngaihtuah a, a chhan let hrep ka rin lai khan a kun ngal a, a vawikhat nan a thlabar hmel ka hmu a, a tha a khur zui chu a nimai. Kei lah hlauthâwng hma chî ka lo ni bawk nen awm reng kha ṭha in ka hrelo a. Rara-i chuan pawitih hmel tawk hian min melh a, a hmelah chuan a thlabar na te chu thup a tum nasa lutuk, ka khawngaih zawk ania aw. A tawi zanwgin sawi ta mai ila khata ṭang khan zep buai lovin an chhungkaw chanchin chu tlang deuhin min hrilh ta a. A nu kha a nuhrawn a lo nia, a têtte aṭanga enkawl seilian tu a lo nia" a rawn ti chu mak ka ti miah lo. A nu dik tak a nih kha ka lo ring lo ve tawp. Ka hriat ve chhunah pawh a biak dan khan a zirlo emai.






Vantei thusawi chu ka ngaihthlâ zawm leh a "A nu dik tak leh a pa hi chu an innei ve ngei a. Mahse a pa hi pa lak tlak vak loh chi a ni ve a. Rara-i hi kum khat pawh a tlin hma-in an inṭhen a, a nu chuan a hruai tel lova. A pu, Pu Sanghminga te hian an enkawl zui a, a pa erawh kha chuan amaha parawl a thlang a, zalen deuha zû a tlan theih nan aniang chu. A nu dik tak chuan pasal dang a nei leh a, Rara-i pawh hi a ngaihsak zui hran lo. Tunah phei chuan Rara-i hian a boral tawh a ti nghe nghe. Rara-i kum 4 anih hian a pa pawhin nupui dang a nei veleh a. Tuna a nupui hi ania a neih tak chu. An innei kha a hria apiangte mak tih a tling, a chhan pawh Rara-i pa hi a laktlak loh ve sia, a nuhrawn lah kha nu inchengvawng deuh, sawrkar zem zen pha chin, thlahte aṭanga hausa, chutiang aṭanga chawr chhuak chu ania. Rara-i pi, Pu Sanghminga nupui hi a nuhrawn leh a pa te inneih kum vek chuan nat lawk em em pawh awm lovin a boral zui ta sia. A pâ nau, pasal nei lo hi a la awm ve tho na in college kal lai chauh a la ni bawk sia, an enkawl zui a rem ṭeuh tawh bawk silo. A pa khan inti patling deuhin 'Ka fanu ania ka enkawl ang' a ti a, a hruai haw leh ta a. Pu Sanghminga pawh khan chutia a pa in mawhphurhna a la duh anih chuan tiin a lo hnial bîk lova. A nuhrawn kha a lungawi lo ta em em a, Rara-i ah hian a ṭuan ta ṭhin a, a pa lah a lo lak tlak bawk si lo. A nu kha an ei bel ber a nimai a. Pu Sanghminga te pawh engmah sawi thei dinhmunah an ding lova. Chutihrual chuan Rara-i hrehawm hi a hlau ber a, tunah pawh an bula awm mai turin a sawm fo a. Mahse Rara-i hian a duh tlat lova. Keipawhin awm mak turin ka ti fo, mahse a duh loh chhan min hrilh hnu chuan huaisen ka ti a, ka ngaisang lutuk. A sawi dan chuan "Ka nuhrawnin ka pa a neih chhan hi chu in leh lo a ît vang hi ania. Ka pu te bula ka awm daih anih chuan kan in leh lo hi a pumbilh vek dawn sia, a sual bawk si, ka phal teuhlo. Heti hian ka tuar chhuak ang a, keiman ka nei vek ang. In leh lo hi ka va duh ngawr ngawr vâng lam pawh ni lovin a duh hiam hiam em a, ka pa Hmangaihna kha hmachhuanin a neih phah bawk a, hetia a rilru tibuai tura awm hi ka tih theih tawk a ni" a ti ve tlat a. A tum ka hriatpui ve bawk a, a pu te bula awm tur pawh chuan ka tur duh tawh lo. Mahse buaithlâk deuh chu a nu hi a hlau lutuk a, a rapthlak sia, kutthlak a hreh bawk silo. A la tuar ve ṭek ṭek chu ania" a ti vang vang a. A sawi hnem bawk a a thaw chhuak ham ham mai.




"Chung zawng zawng chu ka nu te hian an hre ve em?" ka tih chuan a lu a lo thing vat a. "Tuna a nu hi a nuhrawn a ni tih an hria a, a tihrehawm ṭhin hle tih an hre bawk a. Mahse an hriat chin hi chu Rara-i tawrhna te nena tehkhin chi pawh a la nilo, an hre tlem lutuk" a lo ti vat a.



"Umm...nichina in inbiak chuan a ṭha em?" ka ti leh hram a, a hmui a lo pet zeuh a "Amah hi chuan ṭha a inti reng zel a, mahse a ṭha hlawl lo. Mi hlim thei chi hi a ni hrim hrim a. Naktuk class a rawn kal theih loh tur thu a sawi bakah a biak tlang rih theih loh tur thu a sawi a. Chu zawng chu a nimai. Ka zawt thui ṭha duhlo, a rilru a nat zual mai mai ka hlau a. A nu in engtin emaw a ti leh tawh tih ka hrethiam nghal vek. A châng chuan kar khat chhung a phone te hi a kawl sak ṭhin " a lo ti pang pang a. A ṭhiannu chu a thinrim pui hmel kher mai.




Zan a rei tawh bawk nen thil tam tak hriat duh la nei mah ila ka nau chu ka muttir ta nge nge a.



Ka kut lukhamin mit ka chhing vang vang a. Rara-i chuan ka ngaihtuahna a luahkhat a ni ber e. A pawn lam landan leh an inchhungkhur inan loh ziate chu ka ngaihtuah a. A hma ang ngawt kha chuan ka ngai thei tawhlo. Ka thinlung chhungril ber hian ka lainat tlat pek anih chu !




A nuhrawn chu duhâm ka ti khawp mai. Hna ṭha tak a nei a, sum te chu a thawk chhuak reng âwm si a. Mi in leh lo han ît ṭalh mai chu duhâm thlak ka ti a, ka dem viau mai.





He khawvel hi chu nei lo te te'n neih an châkna khawvel, nei te pawhin neih belh zel an châkna khawvel. Duhâmnaa khat a nih ber hi!




A chhe ber thlengin ka ngaihtuah a. Kan chhungkua leh an chhûngkua chu ka tehkhin lo thei lova, inpersan tak kan ni.




A pawimawh ta bera ka hriat chu PA hi an ni, chhungkaw pa hi an lo pawimawh ber mai. Hmeichhe lu chu mipa, mipa lu chu Krista tih vawn nunna chhûngkua apiang chu chhungkaw awhawm leh chhungkaw hlim an ni berin ka hria.




Rara-i pa hian a mawhphurhna a hlenchhuak zo lova, nu leh pa dik tak kar lovah a lo sei len a ngaih phah a. Chu mai bakah tihduhna tam tak a tawrh a ngaih phah bawk a. Heti hian ka ngaihtuah leh zel a, Rara-i nu dik tak kha hei ai hian chhelin a pasal kha a lû ah dah se, heti em ema dinhmun chhia hi chu an fanu in a chan ka ring bik lo.




Thil thlak danglam theih tawh miah loh tur Rara-i tan chuan ka zeldin a. Ka lo hmuh dan ṭhin te kha a nihna tak tak hian a hliahkhuh vek mai in ka hria. Nau ang takin ka lainat bawkin ka hria.




Rara-i pu, Pu Sanghminga chu ka dem dawn dawn ta mai a. Rawngbâwltu a ni a, pulpit tlângah Pathian thu te sawiin, chhungkaw inrelbawl dan tur te, ram inrel bawl dan turte a tlangau pui a. Amah berin chhungkua a rem fel bawk silo. Ka ngaihsanna te chu a tlahniam dawrh maiin ka hria.




Ka phone chu ka ban a, biak tlang theih a ni rih dawn lo tih hre reng chungin Rara-i chu ka call ta tho a, switch off a la inti tho. Âtthlâk ti lutuk hian ka thaw chhuak hawk a. Zanin zet chu Tlankimi lam rêng a lang lo. A aia min delh rittu an awm tlat a ni. Mahse a kawi zawng leh inngaihzawnna thil lam pawh a ni hran lo. Ka hun tawnin a zir miau a ni.




Zingah chuan Tlankimi bulah thupha ka chawi a, min lo hrethiam leh pek khawp mai. Ṭha tê tê chuan kan inbe leh ta chu ania.



Tlaiah email ka dawng a, kan result chhuah hun tur kimchang an rawn dah hi a lo nia. Naktuk lawkah a chhuak chawpchilh dawn a ni awm e. Ka chhungte pawh ka hrilh a, Tlankimi ka hrilh bawk a. An nghakhlel tlang ve khawp mai.




Ka pi te an la châm ve reng bawk a, an awm remchân laia ka result a chhuak tur chu ka lawm rualin ka huphurh ru zek mai.



Veranda-a ka ṭhut laiin Nu Rinkimi a rawn kal a, ka bialnu chungchângah min rawn fiam phawng phawng a. "Angaihi chu a hmelṭha zawk mawle" a ti leh hram pek a, "Ani chu ka nau alawm" ka lo ti mai a. "A ni teh tak e a" tiin amah zawk chu a nui ang hawk hawk a. Ka nu leh pa te vânglai hun min hrilh leh mawlh mawlh a, kan nui kan nui mai.




Zanah chuan Tlankimi nen kan inbiak leh bakah Rara-i chu ka ngaihven ru reng a. A last seen chu nimin tlai tho kha a la ni. Thu thar a hriat takin tih thil thu ah Vantei chu zawh leh mai ka rilruk a. Hmaichhana sawi tawh em lovin phone aṭang chuan ka zawt a.




"A pa phone aṭangin min lo bia a, a ṭha aw. Naktûkah a phone a dawng let leh ang" a lo tih chuan ka thaw ve huai mai.




Naupangchhia a ni tawh lova, phone êm han inkawl sak chu a ti mah mah ka ti khawp mai. A nuhrawn mizia hi ka hriatthiam phak bak a nih ka ring.



Ka muthilh dawna ka ṭawngṭaina ah chuan Rara-i tan ka dil ve thlap a. Ka result chhuah tur chungchang pawh ka thlen a. Ph.D chu hmu lo tur riaua inngaihna hi ka nei tlat a, ka thesis submit tirh lai leh viva ka hmachhawn tirh lai vela ka confi tehlul nen khan ka confi ta hauh lo. Eng emaw thleng rup dawna hriatna ka nei tlat pek anih chu!



Ka muhil theilo chu ka inlet tawn sek a, sana ka en a, dar 1 a lo ri ṭep tawh. Ka rilru a nuam thei ngang lova, ka ṭhu chhuak leh hlawl ṭhin a. Min mawlh tu lian tak hi a awm ka ti mai. A hrehawm duh tak tak a ni.




Ṭhutthlêng seia ka lo ṭhut run lai chuan ka pa te room kawngka a rawn inhawng ri khep a. Ka pa ngei mai chu a rawn pen chhuak a, chutia ka lo ṭhu run min hmuh chuan mak ti hmel pawh a pu hran lo.



"Mutthilh a har hle mai tiraw Hriatpui" a rawn ti sup a, za lo zet hian a kiai suk a. Ka bulah chuan a rawn ṭhu thla a, "Zanin chu min mawlhtu lian deuh ka nei tlat a, ka muhil theilo" ka lo ti tawl a.



Mitmeng dam ruih hian min en a, mipa ka nih rual hian fapa ka ni a. Ka pa in hetia min en tawh hi chuan ka thlamuang sawt zel.



"In result chhuak tur chu in mawlh tîr lutuk duh suh" a lo ti sup a. Min mawlh tu tak a lo hre chat anih hmel.



"Pa... tling lo ta ila engtin nge ni ang?" rilru hah zet hian ka ti a. Tun hi ka piantirh ata ka hriat theih chinah ka la hlauhthâwn ber ṭum a ni hial ang.



Ka pa chuan "I tling lo tihna a nimai" a lo ti sam mai a. Ka lo duhkhawp lo kher mai, ka haw lek lek bawk. Mahse a rawn sawi zawm leh a "I tlin loh chuan Pathian remruata ngaiha inpawm thiam a nimai. Thil hi ngaihtuah hah lutuk tur a ni ngai lo, dam chhûng tawi tê hi thil chi hrang hrang tih nan a sei tâwk ania" a ti dam thluam a.




Naupangchhia zet hian "A zahthlâk dawn emai" ka ti sup a, ka pa chu a lo nui hawk a "Zahna te chu a reilo emai, thil dangah hmasawn zawnga i ṭhan te chuan tuma'n an hre rei lovang" a lo ti vat a.




"Tinge i rawn thawh chhuah a?" ka lo ti teh daih a, min lo nuih suk a "Hetia i rilru a lo buai viau vangte pawh hi a ni mahna ka muhil thei lo ka rawn tho chhuak mai mai a" a lo ti mai a. "Pa leh fa inzawmna aniang" ti lehin a nui suk a.



"Ka ṭawngṭai sak che ang a, muthilh i tum dawn nia?" a ti leh sup a, ka lo bu ve mai a. Ka lu chunga kut nghat chuan min ṭawngṭai sak ta a. Pathian thlamuanna leh hahdamna min dil sak a. Min mutsan hnu chuan ka hahna te chu a reh nghal mai chuang lo na in tui deuhin ka muhil zui a. Zingah pawh ka tho nuam kher mai.



Ka phone ka check a, Tlankimi morning wish aia ka mit latu thil a awm tlat. Chu chu Rara-i message ani.



"Ka reh ri a ring viau ani maw, missed calm vawi thum" a rawn ti a, nui per chuai emoji hi a rawn dah tel bawk a. Ka lo nui hawk mai.



"I ṭha em?" ka va ti let ve vat a, a hnuah Tlankimi message chu ka chhang zui a. Rara-i chu ka ngaichâng leh deuh na in a reh zui leh daih a.




Tlankimi chuan min rawn call a, ka pick ul rual chuan aw zâng vah hian ka result a nghahhleh tawh thû a rawn sawi a, ka zâm leh der tawh mai. Rei pawh inbe lovin ka buai ka chhuanlam a, kan inbiakna chu kan titawp ta a. Result chhuah ruala hrilh vat turin min rawn chah tel bawk a.




Tlaiah chuan kan result chu a chhuak ta alawm le. Chhûngkua in kan châng ṭhap a. Ka hming a lang ve ta lo. Ka hnual nghal rawih mai a. Ka pi te min hnemna leh ka nu leh pa te min hnemna chuan ka thinlung chhungril a thleng pha hlawl lo a ni ber. Ka tlin leh loh kha ring mah ila keimahah beiseina a lo awm ve laklawh tawh si a. Beidawng deuhin ka awm leh ta sia, hnual tak ka ni.



Tlankimi phone call pawh la peih lovin ka awm a, ka awmdan chu ka inhaw takzet. A puitlin loh thlak ka ti a, a Pathian thu lo viauin ka hre bawk.



Room ah ka lut ta daih a, ka chhungte pawhin min hrethiam ve khawp mai. Pawm thiam ang deuhin ka awm a, mahse a rûk takin ka na. Pathian lakah ka vui ṭep lehnghal a. Mahse vui pui na tur êm chuan ho lam ka ti bawk si.




Ka pa chuan thu pakhat chiah a sawi "Kha chen zirna kawngah i hlawhtling tawh a. Vawikhat hlawhtlin loh hian a hen zo reng renglo" a ti a. Midangin min hnemna zawng zawng aiin chu thu chuan min hnêm ber.



Tlankimi'n a rawn call leh takah chuan lak loh chi niin ka hre ta lova. Ka pick up ta ngei a, call ka pick up theih loh avang khan ka chhungte nen an lo inbe tawh anih hmel. Min rawn hnem mawlh mawlh a. Ka inthlahrung hial zawk. Rei pawh be duh lovin ka dah ta ngawt a.




Rara-i phone call ka dawng a, ka biak châk hlawl loh avangin pick up pawh ka pick up lo. Min rawn hnem a tum ve velte kha aniang a, ka peihlo. Mahse a rawn call tlut tlut a. Vawi ruk a rawn call naah chuan ka la ta poh a. Ka nin em avanga la ka ni zawk mah. Ka mood leh amah biak chu a inrem hlawl lo a ni ber.





Ka bengbula phone ka dah rual chuan a rawn ṭawng nghal lang lang a "Pasal Doctor kher ka duhlo, ho lutuk" a rawn ti nghal ham ham a. A teh ngawt chuan a.




"Phone te lak duh loh vel kha a ngai lo. I zir ṭha lova, nang aia zir ṭha leh thiam. Nang aia thesis ziak ṭha, research bei ngawrh zawkte an tling a nimai. Mahni tuh rah i seng a, rilru i tina vel em ni? Hetiang hi ka huat zawng tak" a rawn ti zui leh bawrh bawrh a.



Min rawn hnem tum tute zingah chuan a tel ve lo chiang khawp mai.




"Tinge min rawn call?" ka tih chuan "Ka hau dawn che" a lo ti vat a. A ngaihna hrelo lutukin ka phone chu ka melh nghek a. Ka beng zawna ka dah leh hma hma chuan "Pa Sangzuala leh Nu Zualtei te'n i lakah beiseina sâng tawk neiin phai ramah te an dah ve che a. I rulh let dan hi ka lawm lo khawp mai" a rawn ti leh lawng lawng a.




Eng eng emaw sawi tum chu a nei ve anih dawn hi. Rilru nguai leh hah deuha awm laia a rawn ṭawng zawt zawt chu ka tei thei ta vak lova "Eng nge i hriat a?" ka lo ti hluk a.




"Ka duh che tih ka hria " thawveng zet hian a rawn ti a, a nui zui har har a. Phone chu ka hmet tawp nghal hmak. A boruak tawn leh ka boruak tawn hi a inpersan lutuk tlat.



Ka rilrua lang hmasa ber angin ka che chhuak a, ka Bike châbi chu ka la in ka chhungte lo ṭhutna lam chu ka va pan a. Min ngaihtuah em em vek tih ka hriat avangin ngawi renga chhuah chu ṭha ka ti lova.




"Kan chhuak harh lawk ange" tiin ka pa chu ka melh zawk a. Mitmeng dam thlup a min en chung hian a lo bu nghut a. Ka nu in min lo biak a tum pawh chu mitmeiin a khap zui a. Ka kal chhuak nghal a.




Kan vêng pêng ka thlen rual chuan râl aṭangin Rara-i hmanhmawh zeta a lo kal hi ka hmu a. Ani pawhin min rawn hmu ve chiah mai. Ka lo hmu lo der nghal hmiah thung a. Ka tlanpel mai tur chu ring fahran hian "Au Hriatpui" a lo ti lauh a, ka speed a sâng hran lo bawk a, side glass aṭang chuan ka melh zawk a. Min lo nuih var var mai.




Hmanhmawh zet hian min rawn pan zui bawk si a, din loh chî pawh a nilo. Ka bula a rawn din rual chuan ka thil hriatte kha ka ngaihtuah let nghal zawk a. En tawp hi chuan Vantei thusawi te kha thil awihawm loh tak a ni.




"Khawnge kal i tum? Rawn len ka tum asin" hah hmel zet hian a ti a. A thaw ham ham reng a. "Han lêng rawh" ka lo ti ṭha ve mai a. Mahse a lo ner vak a "Ka rawn len chhan ber tur i lo chhuah daihte chuan awmzia a awm nang, i kalna turah min hruai ve zawk mai rawh" a lo ti sam then a. Ka melh reng ringawt. A thluakah hian eng ngaihtuahna nge awm ve ang aw ka ti ṭhin.




"Awm leh mawi hi hre ve teh" ka ti hluk a, ka ṭawngkam a na mah mah tih ka hria, ka inchhir zui nghal rêng bawk a. A rilru a na viau a ka rin laiin min melh thîp nghal râm a. Rilru natna ai mah chuan thinrim te pawh a ang zawk.




"I kalna tura min hruai ve pawh chu eng nge a mawi lohna, i sual emai" min ti chiam a. A thinrim hmel khawp mai. Mak tak maiin a thinrim hmel chu ka hmu ṭha zek lehnghâl a. Mipa chuan hmelṭha kan hre hrim hrim. Kan va ngaihzâwnna lam ni lovin.





"Ka hmanhmawh" tia inkhalh chhuah leh mai ka tum lai chuan rang fahran hian a rawn lâwn ve hmak a. Ka lo phun nghal hluk a, "Rara" ka ti chang rut a.




Ka kawnga min kuahin "Tlan rawh le, i rilru na hian mahni intihhlum i tumte pawh ka hlau ve alawm. I duhna ah chuan kal tawp la, ka lo kal ve i phal chuan ka tibuai miah l lo vang che. Ka ṭawng miah lovang" a ti ṭung a.




A hma aia âw chang zawk chuan "Chhuk rawh" ka ti rum rût a. A hmingpum chu hria ila tûnah hian ka ko ngei ang.



"Ka chhuk dawn si lova maw, tlan hle hle rawh, tih theih i neilo" a lo ti sam thên a. Ka kawngah chuan min kuah nghet mai bawk sia. Min tham loh zia chu a âw rik dan ngeiawm zet aṭang chuan ka hre thei.





Chuti na na na chu tiin kan vung pui chiam mai alawm le, ṭe chhuak lo mah se ka kawng a chelhna chu nghet tak a ni. Eng ka hria nimaw ka nuih a za tlat pek a, ka hnunga a lu a rawn nawr rual chuan ka nui hawk hawk tawh mai.




Bazar chhungah chuan ka tlân muang ta deuh a "I sual bawk a, ka thu ka sût leh e. I kalna ah chuan ka ṭawng char char ang a ka tibuai ang che" a lo ti nghat nghat a, a rum chhar chhar a. A der ni miah lovin ka lo nui mai a.




World Bank road lamah ka tlan pui leh chiah mai chu a ṭe chûl tawh mai. A ṭap lo chauha ka hriat avang chuan tlêmin ka speed ka tihniam deuh a. Mahse amah zawk chuan "I duh leh khalh chak leh rawh, ka hlau bak sak lo" a lo ti hmiah mai. A hlauh zia ka hriatchian tehreng nen aw.




"Ka beng i ti ngawng ṭep alawm, tlan chak leh chuan a ngawng palh ang" ngeiawm zet hian ka lo ti a. Ka ṭawng a hriat theih loh ka hlauh avangin ka ṭawng ring ve hle bawk.




Kawngsira waiting shed an siamah chuan kan awmdun ta rân mai a. Ral lam hla tak chu thlirin thil ka ngaihtuah vung vung a. Mak tak maiin kan Rara-i pawh a lo ngawi ve kar mai.




Chutia minute sawm vel kan awm hnu chuan a tuar thei ta ngang lo aniang "A ninawm e, intih lungngaih a, tuar vak i tum kher a. Ka ning tawh" a rawn ti chhuak phawng a. A ṭawngkam tlang lutuk avang chuan ka lo nui hawk mai.




"Min tihbuai loh tur thu i sawi kha" ka tih chuan "I phal lo chung chung zui lui che ka nia. I phal chuan ka tibuai miah lovang che ka tia lawm. I phal lo a ka tibuai dawn che" a lo ti nghat a.



"Min lo zui reng hi" ka tih chuan "I thu ni lovin ka thu in alawm ka lo zui che" a lo ti hmak a. "I va ṭawngthei tak" ka ti hluk a. A lo nui mai a.




"Min han hnêm ve reng reng teh" ka ti hluai a. A lakah eng teh ual ka beisei hran lo. Mahse engtin nge min han hnem ang tih ka hre ve chak reng reng ani.




Amah lah chuan "A ho emai ka tih tawh kha. Doctor nupui nih ka peih kher lo, eng ang mi pawh ni la Vanlalhriatpuia i ni dawn tho a, chu chu ka duhtâwk mai. Han inhnêm vel vak hi a ho emai a, engmah kawngro a su lo. An hnem luai luai che a, i hahdam phah chuan loh kha" a lo ti zung zung a.




A thusawi chu dik a mual mual a awm ve alawm. Min hnem luai luai khan ka hahdam phah chuang miah lo.



"Thil hi a eng zawngin thlir thiam zel mai ila, a ṭha a nimai. Hnemtu te hi mamawh vak duh loh tur, chakna pawh an nilo. Kan no zual a, chak lohna mai mai alawm. Kei chuan i chak loh ka duh lova,ka hau sawk sawk dawn che" a ti leh duah a.



A ṭawng duh dan vel chu ka lawm tlat pek a, amah en reng chung chuan ka nui ka nui ta ringawt a. Mak tak maiin ka hahdam sawng sawng in ka hria.



_______*______*_______*________


Show post links
Top

[Ngaia]

AIZIAL
By CVL Awmpuii


Chapter 6



Minute 5 vel ngawi renga kan ṭhut leh hnu chuan a nin chin a thleng leh tawh a nimai thei, a rawn thaw chhuak hak a.



"Ka ning tawh, Au Hriatpui haw ang" tiin a ding hluai a. "I duh leh haw la" ka tih chuan rum zet hian min melh a, ka lo nui suk thung a. Chhaih kawlh a nuam dawn riauin ka hria.



"Keimahin ka haw thei hlei nem, hetia awm reng hian engmah a tihdanglam phah lo. I pa te paw'n an ngaihtuah lutuk ang che" inti puitling fe hian a lo ti hlak hlak a.



"Ka awm chin awm peihlo tur si tinge min zui ve ringawt" ka lo ti awlsam leh thên a. A lungawi loh hmel tawh khawp mai.




Haw a tih tak tlatah chuan ka ding ve ta hluai a, "I thu i duh reuh sia maw" ka tih chuan "Ka thu ka duh lohin mi thu ami ka duh dawn. A ho emai a, mahni thu duh hi a ṭha ber. Mi thu awih dem duam te hi a ṭha lo" a ti hlak hlak a. Ka ṭawng leh a nih chuan min hnial na tur a hre leh zel dawn a, ka ṭawng buai duh ta lo.




Bike chuan kan inphur haw leh ta a, kal lam ang kha chuan ka tlan chakpui duh tawhlo. A hlau tih ka hria a, ka va ngaihsakna lam ai mah chuan ka kawng a hmer vak khan a na duh emai. Ka tuar nawn peih tawhlo.



Mak tak maiin Rara-i chuan min hnem lo mah se ka hahdam sawng sawng ni ber hian ka hria. Ka rilru pawh a nung deuh sarh mai.




"Kan inah min thlah tlang mai teh aw" khawchhung kan luh rual chuan a ti a. "I lo lêng dawn emaw tia" ka tih chuan "Lo lên ka tum chhan ber ka hmu tawh che a, ka duh tawk" a lo ti mai a.



Khua a thim ṭep tawh a, an in thleng lovin hman zana ka thlahna ah bawk khan min din tir leh a.



A chhuk hnu chuan min kalsan mai lovin a ṭawng leh zat zat phawt a. "Au Hriatpui, hnual phah duh reng reng suh aw. Keimah ang hian thawveng deuhin awm tum rawh, a êng zawngin thil thlir tlat la. I tling lova, nang aia ṭha zawk an tling a nimai. Nangmah chiah tling lo i ni lo tih kha inhre reng la. Thil ṭha zawk kan hmuh theih nan kan thil duhna takah hian hnawl nih kan ngaih châng a awm fo ania" a ti a. A thu tak vei phian reuh a.




Kei erawh chuan ka lo melh run a, a thusawi chu ka hre vek a. Mahse thil dang daih ka lo ngaihtuah. Vantei nen kan sawidun dan zawng zawng te kha ka ngaihtuah let a. Zaninah hian vawiina a chhuah avangin a nuhrawn khan a lo hau leh mai ang tih ka hlau. Hmeichhe âwm nêm, la naupangtê a ni a. A thil tawrh te hi a tan chuan a mah mah lutuk tlat a ni.




A la ṭawng reng lai chuan "I ṭha em?" ka lo ti daih a, chîk zet hian ka en a. Ani pawhin min lo melh ve kal mai. A mitmeng chu chhiar ka tum a, mahse tawrhna emaw, hrehawm tihna engmah ka hmu lo. Hmeichhe inthunun thei tak chu a ni phawt mai.




"Eng nge ka ṭhat loh ang" a lo ti zâng vah a. "Hmêlṭha deuh mai hi ka nia, tupawn hmelṭha min ti" a lo tih zawm leh zat a. Ka lo rum nghut mai "Khati zawngin ka sawi lo. Hman zana ka thlah che khan biak zawm theih lohin i awm nghal daih a. Eng vang nge?" ka ti nghut a. Ka nau hnen aṭangin hre tho mah ila zawh ngei ka duh si a ni.




"Awww...biak theih lohin i awm reng a, min chhâng duh ngai bawk silo. In duh hun stage ang kha ka thleng ve tawh alawm" a lo ti ham ham a. Fiamthu hmel a pu bawk si lo, heti zawnga a thawveng harh reng mai chu ka thin a tirim lek lek.




"Eng nge i hmingpum?" ka ti teh daih a, kan thusawi nen a inpersan a ti deuh aniang, a lo meng deuh ralh a.




Ka hriat duh chhan pawh heti zawnga a ṭawng châng hian a hmingpuma koh ka duh dawn tlat a tin ani.



"Kan inngaihzawn hunah ka hrilh ang che" a lo ti leh tawh. Ka nin chin a thleng leh der tawh chu a nimai.



Rum zet hian ka melh a, min lo nuih var var lehnghâl a. Ka khawngaihna zawng zawng hi chu thuhran nise, hmeichhe zak theilo tak hi chu ni ve in ka hria.



"Kal tawh rawh" ka tih tak nghutah chuan "Kal hmasa rawh, ka lo en liam ang che" a lo ti vat a. Inhnial buai leh ka peih tawh loh avangin Bike chu ka tinung a, ka in turn ta a.





Ka tlan chhuah hma chuan "Ka induh ve deuh hlek tawh dawn ania aw, min lo be hmasa dawn nia" a ti zui leh ham ham a. Ka ngaihsak zui tawhlo.




Puih duhin lainat viau mah ila a mizia hian a zir miau si lova tihngaihna hlawl a awm lo a ni ber e.



In ka thlen chuan ka nu in min lo be vat a "Tlankimi a rawn kal a, i awm si lova" a lo ti hap a. "A haw na a rei tawh em?" ka tih chuan "Nichin lawk khan a haw , a nghak deuh ren rawn che a. Rin ai takin i rawn let leh har ang reng sia" a lo ti ṭha ve mai a.



Ka rilru awmdan chauh ka lo ngaihtuahna lamah midang hre chang lo lekin ka lo awm a. Ka inthiamlo khawp mai.



"A rawn phone che a, i la thei lova" ka nu bawk chuan a rawn ti leh a. Room ah ka phone ka kalsan daih tih ka hre chawpchilh nghal a.




"Phone ka keng lova" ka lo ti ṭha ve mai a. Eirawng an lo bawl peih diam tawh avangin ka intihfai zawh veleh chaw kan ei zui nghal a.




Ka chhûngte chuan ka result chungchang engmah an sawi lova. Ka thawven huai tak pawh ka hre chuang lo. Min kap run ve tho si a.




Ka tlin loh vang ngawr ngawr a rilru hah a, rilru na pawh ka ni tawhlo. Tunah tak hi chuan tih tur ber ka hriat loh avanga rilru hah ka ni zawk mah.



Room ah ka lut a, khuma ka phone lo let ngat chu ka ban a. Tlankimi missed call vawi li hi a lo awm a. Ka inthiamlo tak tak a ni. Min ngaihtuah ve awm hle si a.



Ka call back chuan a lo la rang khawp mai. "Ka ngaihtuah lutuk che" a rawn ti nghal rêng a. Za lo zet hian ka lo nui a.



"Ka chhuak lawk a, phone ka lo kalsan daih alawm. I lo kal tih ka nun a sawi a, ka lo chhuah lai tak a ni sia, a zialo hle mai" ka ti zung zung a. Ka insawifiah a ni deuh ber.




"Umm...hrehawm ti lutukin i lo awm ang tih ka hlau a. Hnual phah reng reng suh aw, Pathian hian kan ṭhatna tur vekin engkim a ruat ṭhin ania. Hnem dân che ka thiam bawk si lova aw..." tiin a thaw chhuak ham ham a.




Min hnem chu a tum ve hle in ka hria, "A pawilo, min ngaihtuahna kha a tâwk" ka tih chuan "Lo leng la, thil sawi dun ang" a rawn ti a. Zanin chu chhuah ka peih chiah lo asin mawle.



"Zanin chu in lama awm mai mai ka lo tum a" inthlahrung zet hian ka ti a. Min lo hrethiam nghal khawp mai.




"Aw...a pawilo, naktuk zanah a nimai, hrehawm ti lutuk lo la aw" a rawn ti leh vat a. Heihi ania Tlankimi ka duhna em em chu kawng engkimah min hrethiam ṭhin a. Min tur ve tut tut ngai lova, ho tê tê a a thinrim ve ngai lote hi ka lawm. Amaha hahdamna ka hmuh ṭhin chhan pawh niin ka hria.




Kan inbiak zawh chuan sitting room lamah ka va chhuak ve a. Ka pi te chuan TV - ah kuthnathawk pual an lo en a, an thil en chu Pi Rinkimi nen an sawidun zel bawk a. Ka pa chuan choka ah Bible a lo chhiar a. Ka nuin thingpui a lo lum bawk a. Ka naute pahnih chu room lamah an awm anih ka ring.




An bula awm nuam lo deuha ṭhut ai chuan tiin veranda lamah ka va kal chhuak ta daih a. Van lam hawiin thil chi hrang hrang ka ngaihtuah a. A hma ang em em chuan ka thawk ipik tawhlo mah se hahdamna ka duh ang tak hi ka la hmu lo ani.




Ka pa âw thian ri ka hriat takah chuan kawngkhar lam ka hawi vat a. Min rawn panin ka dinna bulah chuan a rawn ding ve a.



"I nu in a ngaihtuah lutuk che a" a ti sup a, za lo zet hian ka lo nui mai a.




"In result chhuah hma khan kan in thlamuan lawk nasa lutuk a, duh ang result kan hmuh loh phah emaw ni aw ka ti hial a" fiamthu ti tak deuh hian a ti a. Ka lo nui ve hawk mai.




A sawi dik chiah, nizan lamah khan tling lo turin ka indah nghal tawp a. Ka rilru hah min ṭawngṭai sak tawp kha ania.




"Engtin nge ka awm zel ang le Pa?" beidawng zet hian ka ti a. Ka beidawng ve takzet niin ka hria.



"Ka hma lam hun tur ka ngaihtuah a, engmah ka hmu thiam lo. Ka nih châk pawh ka hrelo, tui zâwng leh tih châk zawng ka nei bawk silo. Vision mumal tak ka nei lo a ni. Thil chi hrang hrang ka ngaihtuah kual a. Mahse eng hna mah hi ka thawh chak pawh ka hrelo" ka ti leh zung zung a. Ka rilru tak tak ka phawrh chhuak ve ta nge nge a.




Ka pa chuan uluk zet hian min lo en a, "Ph.D kha lo tling ta pawh ni ila tih zawm tur ka hre chuang lovang. Tunah ka beidawnna tizual tur tingin ka la tling lo zui ania" ka ti hul hawk a.




Kan ngawih dun rauh rauh hnuah ka pa chuan "Hma lam hun ngaihtuahna hian min tibuai duh khawp asin. Ka lo paltlang hnu, ka rilru a lo hah ve tawh ṭhin na kha ania. Ka hrethiam lutuk che ania ka fapa. Mahse ka hnung i rawn zui anih phawt chuan a hnung ka zui ṭhin Pathian hian a thlah thlam tawp lovang che" a ti nghet charh a.




"Ka lo piangthar tâwk lo emaw nile aw ka ti" zawi tê hian ka ti leh a. Ka rilru tak tak ani. Piangthar ka inti a, Pathian hi ka ring tawk viauin ka hre bawk. Mahse tuna ka awmdan tak hi chu piangthar awm dan tur niin ka hre hlawl lo a ni. Mi piangthar ṭha, ringtu ṭha te chu chânna ruamah pawh an lawm a, lo lungawina an hmu ṭhin ania. Mahse keichu ka ni silo. Ka rinna ah hian ka chiang lo emaw ka ti hial mai.




Ka pa chuan ka hnungah a rawn beng dat a "Khatiang sawi reng reng suh. Lungngaihna te, rilru hahna te, hma lam hun ngaihtuahna te hi chu mihring nun a bet tel tlat alawm. Depression leh anxiety nei te hi piangthar lo hmuhin kan hmu leh ngawt zel a. Piangthar tâwk lovah kan ngai ngawt zel a. Hengte hi a dik miah lo ania. Kan chênna hi khawvel a ni miau a, engpawh tâwk thei, rilru na thei, hah thei kan ni. Pathian lakah a lawm reng theih loh. Chutihrual chuan kan piangthar lo tihna a ni lo. Kan chak lo ang a, kan hlawhchham anga , rilru a hah ang a, kan thlamuang lo ve riau ṭhîn ang. Mahse chung thilte chu Pathian hmingin a hneh theih tih hriat vek tur. Depression leh anxiety te pawh kan nei ve ang, kan thiam loh a nilo. Mahse chung chu kan in delh beh tir lovang a, Pathian hmingin kan hneh zel tur zawk a ni" a ti leh dap dap a.




A thlir dan zawng hian ka lo la thlir ngai miah lova, ngaihtuahna thar min neih tir nghal a. "PA..." ka tih chuan a lo nui suk a, "Piangthar lo anga inngaih tir tlat che kha Setana thil tum anih kha, in hneh tir miah suh" a lo ti vut a. Ka lo bu nghat mai.




Inchhung lam aṭanga ka nû in a rawn koh takah chuan a nui suk a "I nu in 'U Sangzual' min tih hian ka thin a la phu rang nasa ṭhin " a ti zui hlut a, uang angin lang mah se a thu tak ru viau tho.




"U Sangzual" ka nu in a rawn tih leh tak lauhah chuan "Ka va lût ange, lo lut vat la aw. Pawn boruak chu a vawt si" a ti a, min luhsan zui nghal a.



Ka âwm ka dawm deuh vang vang a, keimah leh keimah chu inhnem ka tum a ni ber. Ka mit ka chhing vang vang a, ka rilruin ka ṭawngṭai zui a.




Kan tawrh phal tu hian kan tawrh reng a phal lova. Kan nat phal tu hian kan nat reng a phal lova. Kan ṭah phal tu hian kan ṭah reng a phal hek lo. Tawrhna ah chuan tawrhchhelna a awm a, natna ah chuan damna a awm a, ṭahna ah pawh nuihna a awm a. Chung lam a rawn chêt hunah chuan kan tuar chhuak ang a, kan dam leh ang a, kan nui leh ang. Chu chu kan beisei ang a, kan beisei thlawn lovang.



Ka âwm zâwn chu ka dawm leh vang vang ṭhin a, ka hahdam sawng sawng maiin ka hria.



Inchhûnga ka luh leh chuan ka nu in "Thingpui ?" a lo ti vat a, ma buk nghut takah chuan min rawn pe nghal a. Chîk zet hian min en a, min ngaihtuahna mitmeng a ni, ka buk leh tak nghatah chuan a ngaih a ṭhat hmel sawtin ka hria.



Ka pi te titi chu ka ngaithla ve ta reng a. Hmanlai chanchin te sawiin an titi mawlh mawlh a. Ka pa bawk hian a lo be thiam leh pek a. A sawi pui ve thei zel a, an hlim dûn khawp mai. Vantei leh Angaihi te pawh choka lamah an awm a, phone ah thil endunin an nui leh hak zel a. Ka nu chuan a pot chei sa ho a remfel thung a. Mahni tawkah an hlim tlang viau chuan ka hria.




Ka vanneih zia ka hrechhuak thar a. Nu leh pa thlazar na hnuaiah, chhungte ngaihsak rawn niin ka seilian a. Nu leh pa satliah ni lo, nu leh pa ṭha tak, Pathian ṭih mi te kara seilian ka ni a. Chhungkaw ṭha tak ka nei a, ka vanneih zia ka ngaihtuah zui rauh rauh mai.




Kan lo sawi lâwk tawh angin Zirtawpni zanah chuan Tlankimi te inah ka leng ta ngei a. A chhungte'n ka zirlai chungchang vel min lo zâwt lo chu ka lawm khawp mai.




Ka kal dawn khan ka huphurh tehlul nen tuman min lo zawt miah lova, Tlankimi'n a lo sawi lawk pawh a nimai thei ani. Ka awm nawm lohna turin tumah an ṭawng lo.




A chhûngte mut hnu chuan lêng tura min sâwm chhan ti mai ila, thu pawimawh a tih chu a sawi ta a.



Ka zirlaiah a lût tê tê phawt a "Dik tak chuan i tlin loh kha ka ring miah lova, mahse ka rin loh lam daih result i nei ta sia. Hnual phah nan hmang chuang lo la, mahni in pawm thiam mai hi a ṭha ania. Kan kum a naupang chhe zawk zawk tawh lova, hei leh chen kan lo inzui ve tawh bawk a. Hma lam hun sawi dun te pawh a ṭha ka tia" a ti a. Min rawn ngheng ṭha salh salh a.



Ka hnute hnuaiah ka lo kuah nghet ve sauh bawk a.



"Engtia awm zel nge i tum hrim hrim?" tiin ka lam chu a rawn hawi zawk a, a hmuiah ka lo fawp zauh a. "Ka la inngaihtuah buai rih khawp mai. Ka pa ka la sawipui ang ka tia" ka ti sup a.




""Lêng tura ka sâwm chhan tak che chu hna thil ah ania. I hna tur ka hmuh sak thei mai thei che ani" phur zet hian a ti a. A ngaihna ka lo hrelo kher mai.



"Vawiinah kan Principal ka bia a, nizanah khan râwn hmasak che ka duh viau na in i lo kal hman ta si lova. Midang an lak hman ka hlau bawk sia. Ka thu in ka lo kal tlang ta tawp a" a tih chuan a sawi awmzia ka hrelo kher mai.



Amah bawk chuan a rawn sawi chiang leh a "Kar hmasa aṭang khan kan sikulah hian Mathematics teacher post a ruak a, hnathawk tur kan lo zawn lai mek ania. Application form pawh lakchhuah theih a ni tawh a. Ka hriat theih chinah mi 100 vel chuan an la chhuak tawh a. I result ka hriat rual khan ka rilruah a lo awm nghal a, Pathian remruat te pawh a nimai thei ani. Tichuan, vawiinah Principal ka lo bia a, i duh anih phawt chuan i rawn thawk ve thei maiin ka ring. I result te ka hrilh a, ṭha a lo ti khawp mai a. Ph.D zir leh emaw thil dang tih ai chuan a ṭha mai ka lo tia. Mahse i thawh dawn chuan a hminga application form i lak ve phawt a ngai dawn a, i tih tur chu form lak chhuah chiah a nimai. Interview pawh a awm tho s, form la dangho kha an interview ang a, mahse nang chu interview pawh ngai lovin an la nghal thei che. Principal khan ka sawi anih vang leh i result ṭha a tih avang khan a duh hrim hrim che a" a ti duah a.





A sawi zo chiah chu ka kawchhûng hi a let but maiin ka hria. Ka thinrim bakah tlawm thlak ka ti a. Min râwn hmasa miah lova chutiang a lo ti chu ka lungawi lo ṭeuh mai.



"Tinge min râwn hmasa miah lova chutiang te i lo tih a?" ka ti bul nghut a. Ka thinrimna chu thunun ka tum hram hram a ni.



Tlankimi chuan "Aww...ka sawi chu râwn na hun che ka neilo alawm. Delhi i awm lai pawh khan in ṭhenawm te nau Home tuition i pe tho a ka tia, i duh mai ka ring alawm" ka âw kî ang chiah chuan a lo ti ve nghat a.




"Ka duhlo, in Principal bulah chuan lo sawi ṭha leh ang che" âw ka dam thei ang ber hian ka ti a. Ka inlahrang zui nghal a, ka din hluai takah chuan min lo melh haw mai.



"I thawk hreh viau em ni? Zirtirna lamah i tui tho a ka tia. I tana ṭha tur ka ngaihtuah ve anih chu" a lo ti hlak a. A lungawi hmel bik vak tawh lo khawp mai.




"Mipa rilru tur i hrethiam lo anih kha" ka ti mawl tawp a, ka awm rei anih chuan kan inhnial thinrim zel ka hlau a. Ka insiam ṭha mawlh mawlh chu mitmeng thîp zet hian min lo melh a.



"Ka va haw phawt ange" ka ti hawk a, ka chhuak tur chu a rawn ṭawng chhuak leh rih a. Ka kal mai thei bîk lo.



"Hriatpui, keichu i lungawi loh ngawt chhan hi ka hrethiam lo. I tan vek anih hi ka tih, Principal hmuh kha ka duh dan a ni bik reng reng hlei nem. Mahse kawng ka hawnsak che anih hi. Mipa ka ni tih vanga bialnu te duhsakna pawh hrethiam lo. A hahthlâk emai" a ti bak hlak a.




"I sawi ang ringawt kha a ni hlei nem, ka rilru tur i hrethiam lo anih kha. Chu lo pawh chu a la awm, khatianga insawipui vanga hna hmuh kha ka duhdan a ni ve lo" ka ti dam dap a. Ka thinrim aia ka âw ka dam chu ka lawm khawp mai.




"Khatiangte chu insawi pui pawh a ni hlei nem. Sawrkar sikul pawh a ni lova, private ah te chuan an duh duh an la thiang alawm. Principal thu thu a nimai lawm, dan kalh a nihna pakhat mah a awm lo" a lo ti leh a.




"Engpawh chu nise in Principal bulah chuan sawi ṭha leh ang che" ka ti mawl tawp a. A ngaihtuah tawi lutuk chu mak ka ti hial zawk. Private School pawh ni eng ang rawh se. Mi hrang hrangin an hmuh ringin dilna lehkha an thehlut ve a, chuta kara interview pawh hmachhawn lova lak nih chu ka duh teuhlo. A hranpa in dilna form te awm lovin, min sâwm tlang tawp se chu ka hrethiam a. Chutiang ni lova lak nih tawp chu ka thisenin a ngam lo hrim hrim. Sawrkar ah chauh hian eirukna a awm lo, hetiang tê tê pawh hi a ni vek.




Tlankimi chu a phun zui hlak hlak a "Ka tân sawi leh pawh a nuam tawh hlei nem. Min lo duhsak ve laklawh tawh a..." a tih leh lai mek chuan "I lo sawi thawt thawt anih chu" ka lo ti hmiah.




A lungawi lo hle ni tur ani mitmeng thîp zet hian min melh a "I hrethiam lo emai a, mahni a inhai kaw thei si lo. I chapo ve em em a, kawng ka hawn sak che a. Engmah i hrethiam lo" a rawn ti salh mai le.




Ka kawchhûng a che dawt a, thinrim ai mah chuan tlawm intihna keimahah a lang lian a. Tlankimi pawh chuan a sawi thui tih a inhria aniang, a meng buai nghal nak a.




Chhâng let thei dinhmunah ka ding tawh pawhin ka hrelo, ka tlawm a ni e.



"Ka haw phawt ange" ka ti thei hram a, min rawn auh letna pawh chu ka ngaihsak zui tawh lo.



Ka tum loh deuhin vung zetin bike chu ka khalh a, chesual pawh ni ila a âwm hliah hliah ang. Engmah ka pawisa lo a ni ber.




World Bank road lamah ka inkhalh thla a, nimin tlai lama Rara-i nen kan ṭhutna ah khan ngawi rengin ka ṭhu a.



Ka rilru a let leh but a, ka ding hluai a, ka thawk ipik lutuk tih reh tum chuan ka'n au chiam mai anih kha. Ka âw a thang khawk rum rum mai.




Zan dar 11 vel a ri tawh a, ṭhalai tan chuan a la tlai lutuk lo. Vawi nga vel ring zeta ka au nghek hnu chuan ka ṭhu thla hnawk a. Tlemtê chuan ka zia ve deuhin ka hria. Mahse ka la thâwl hawk chuang lo.




Chutia ka ṭhut reng lai chuan Bike pathum hi an rawn tlan a. Ka bike hunna bulah chuan an rawn inhung ve a.



Thawm an rawn nei huk mai, ka ṭhutna piahah chuan an rawn ṭhu a. Thla a ên em avângin an che vek chu ka hmu thei vek a. An mahni pawh chuan min rawn hmu ve ngeiin ka ring.



"Ṭhianpa, kawl lai i nei ve em?" an rawn ti teh ngawt a. Engmah ti ve ngai lo mah ila an thusawi awmzia chu ka hrethiam ve lutuk. Tun ang hunah chuan helai hmun hi heng mite ho awmkhawmna hmun a ni tlat.




Ka lu ka lo thing ṭha ve mai a, pakhat zawk chuan min hriatthiam hmel zet hian "Pawilo pawilo,hei kan nei alawm. Min rawn join ve la, nakinah kan neih loh hunah kan pun ve thung che ang a. Inṭhian ṭhatna zel" a lo ti zung zung a.




An bag aṭangin a sen chi bur hnih hi an rawn phawrh chhuak a. Pakhat pa chuan a hawng a, dispo ah a thli chhuak a. No li an thli chhuak a. Min thlit kep ve tih hriat reng reng.




"Lo kal rawh" min tih rual chuan eng ka hria nimaw ka va pan hnai vut a. Tunah tak hi chuan engmah hrelo a awm ka châk ber. Mipa tana tawrh hrehawm ber chu mahni leh mahni tlâwm intihna hi anih ka ring. Chu chu ka tuar mek a ni.




An in zui khawlh khawlh a, ka lo en reng ringawt a. "In vat rawh, kan ṭhiante pahnih hi an dose a sang ania. I chang hnem hman lovang" a tira min lo be hmasa bertu khan a lo ti a. A ṭhiante pahnih chu an lo nui huk a.





An inthlit leh a, an tlak leh nghal pap a. Ka hmaa dispo chu ka en a, hetiang tih duhna rilru hi ka pu ve ang tih pawh ka inring ngai lo. Mahse tunah tak hi chuan ka hmaa thil awm chu ka ît ngawih ngawih a ni ber. Ka la kang a, ka melh leh ren rawn a.




In ka tum zet a, ka hmui zawnah ka dah lek lek tawh. Mahse ka ngam ta ngang lova, ka dah thla leh ta zawk a. Ka bula awmte chuan min lo en reng hi a lo nia. A ngaihna an hriat loh hmel kher mai, za lo zet hian ka lo nuih a.




"Ngawi teh u, ka inpui lo mai ang che u" tiin ka tho thurh a. "Inthlahrung duh suh, ti ve bawrh bawrh rawh" min la be ve miah lo tu khan a lo ti a. Ka lo nuih liam mai a.




Hetiang ti ṭhinte pawh hi anmahni tawkah an lo induhsak tawn ve hle ni tur ani.



"In rulh leh vel ka sawi avang khan i in duh lo em ni? Inthlahrung suh, in rulh leh vel a ngai lo ania. A free vekin in rawh" pakhat pa chuan a lo ti leh a.




"Pathian hmingin ka ti lo mai ange" ka lo ti dam thlap a. Min melh haw hlawm mai.



Awm ve reng chu ṭha in ka hrelo a, "Ka'n haw phawt ange, ka chhungte'n min lo ngaihtuah lutuk ang " tiin ka kalsan zui a.




Ka tlân chhuah hnu chuan ka kut lehlamin ka âwm chu ka dawm a, engtin emaw tak hian ka hlim veng veng mai. Pathian thlarau in min chên chilh ni ber hian ka hria.



In ka thlen chuan ka nu leh pa te an lo la meng a. Choka dawhkan bulah an lo ṭhu a, pot an chei ti dawn ila engmah an lo inchhawp hnawk bawk silo.




Min rawn hmuh rual chuan ka nu in "Kan lo nghak che a" a lo ti var a. Ngainat awm zet hian min lo nuih a.




"In mut a chhuak tawh âwm" ka ti hul hawk a, a lo nui mai a. Ka pa erawh chuan chîk zetin min lo melh thung a.



Ka nu chuan ka mutna tur min siam sak zung zung a. Ṭhutthlêng a ka mut avang hian a hrehawm hlauvin bedsheet lum min phah tel sak ṭhin a. Ka hmai ka lo phih fai thung a.




Kan intihfel zawh chuan ka nu chu room lamah a lut nghal mai a, ka pa a sâwm tak na in ka pa chuan "Hriatpuia hi ka'n be lawk ang" a ti a.




Room-a ka nu a luh hnu chuan "Eng lam nge?" tiin ka pa chu ka melh vat a. "Ka ṭawngṭai ang che" a lo ti ringawt a. Min rawn pan hnai nghal a. Ka mutna tur ṭhutthlengah chuan ka ṭhu a, ka luchunga kut nghata min ṭawngṭai sak zet hnuah an room lamah a lut ve mai bawk a.




Ka inngaihtuah let a, zu kha in in lo rui haw ta ila chu ka nu leh pa min lo nghak reng tute khan an hria ang a. An rilru a na viau ang. Ka lo hnar ngam kha ka hlim veng veng mai.



Zankhuain Tlankimi a reh a, va biak châkna pakhat mah ka nei bik lo.




Rara-i message pawh ka en a, ka chhang leh pek lo. A lo online va a, a number erawh chu ka save ve ta hram a. Ka dp a hmuh rual chuan a hrethiam ve nghal mai aniang.




"I thinlungah khan min la save tel dawn sia" a rawn ti a. A zak veleh deuh aniang "Ka tenawm e" a rawn ti leh a, emoji nui per chuai chuai lak a rawn dah tel a. Ka lo nui ve suk mai.




Zing ka thawh chuan ka phone ka check nghal a, loh theih lohin Tlankimi message ka beisei tlat pek a. Mahse eng thil mah a awm lo. Kha leh chen chhum lo chat lovin kan lo inbe ve tawh a, ka be châk ve reng mai. Mahse a thiltih kha ṭul lo ka tih bakah a ṭawng duh dan kha mak ka ti em a. Ka tlawm zui duh bik lo.





Tukṭhuan ei laiin ka pa chuan "Hriathlua pawh karleh lamah chawlh hmangin a rawn haw thei dawn a ni awm e. Chhûngkua kan awm kim ve theih hunlai a ni dawn a, a lâwmawm khawp mai" a ti a.




Vantei a lo phur khawp mai, Angaihi bulah chuan Hriathlua chanchin a sawi zui mawlh mawlh a. Hriathlua leh Angaihi tak hi chu an la inhmu fuh chiah lovin ka hria. Ka nu te khuaa kan zin lai hian a lo haw ve thei ngai lova. Kan naupanlai kha a zin ve tâwp ber chu a nimai. Chutihrual chuan a lo haw châng hian ka pi zawk hi a lo zin chho ṭhin a. Kum khatah vawikhat tal chu an inhmu ve ṭhin.




Ka nu chuan "Ka nu te chu awm ve hman thei ula ṭha tur ania" a lo ti hlut a. "Karleh thlengte chu châm leh ula" ka lo ti ve vat a. Mahse ka pi chuan "Dawr kan kalsan rei tawh emai. Hriathlua chu hmu ve châk viau mah ila haw kan lo tum laklawh tawh si a, in lam ngaihtuah a na tawh emai" a lo ti vat a.




Vawiin tlai Sumo chhuaka haw tawh tur an nia, thawmhnaw vel pawh an pack fel vek tawh. Ka pa in thlah a duh viau na in a lo hla tham ve si a, chu mai bakah Kohhran thila a buai lai tak a lo ni bawk si a. A thlah hman dawn ta lo ani.




Pi Rinkimi chuan "Han hre hma deuh ila chu tih tihdan a la awm tur ania, a chawpchilh em alawm" a lo ti ve bawk a.





Tlaiah chuan an haw ta ngei a. Vantei leh Angaihi te mawlh mai hi an inngai dawn. An in awm chilh ve chawt si a, ka nau chu a lungleng ve khawp ang le. Mahse Rara-i a awm a, a ziaawm chho vat turah ngai ang.




Zânah chuan Tlankimi'n min rawn be ta nge nge a "Principal chu ka be tawh a, a ui viau na in i duh miau si lova ka hrilhfiah thei hlauh ani" a rawn ti a.



"A ṭhat chu" tih zawngin ka chhang. Kan inbiak loh chhung reilotê kha hrehawm ti ve viau mah ila a thusawi mal tinte kha ka hre reng a. Tunah tak hi chuan hetia awm tawp rih hi ka duh.




"Hriatpui, naktukah inbe teh ang" a rawn ti leh a. Kan awmdan chu thil ṭha ber niin ka hre lova, naupangchhia kan ni tawhlo bawk a tiin sawifel chu ka duh tho mai.




"Ok" tih zawngin ka chhang leh a, a rawn type zui leh a. "Sikul ka kal dawn chuang lova, inah midang an awm dawn lo bawk a. Kan inah i rawn kal mai dawn nia" a rawn ti leh zung zung a.




"A ṭha alawm" ka ti ve ta nge nge a. Rara-i message ka hmu reng a, seen lem lovin ka phone chu ka dah a. Ka ṭawngṭai a, ka mu zui nghal daih.




Chhunah chuan Tlankimi te inah ka va kal leh ta ngei a. Kan buaina kan chinfel theih ka rin laiin a punlul lehzual sauh mai.



Ka chungchâng ah bawk kan lût leh a, hna nei turin min nawr ngat ngat ni ber hian ka hria. "I awmdan tur chiang tawh la ka ti, heti ringawta awm chu ṭha ka ti lo" a ti a. Min ngaihtuahna nge pawh ka hrethiam tawhlo.




"Ka rilru ka la siam fel thei lo anih hi" ka tih chuan a lo thaw chhuak hak a. "Result chhuah huna inneih te kha kan sawi ve nasa si a. Tunah in result chu a chhuak tawh a, khatiang lam kha kan hawi thei bawk silo" tlang takin a ti a.




Hei chu a sawi dik thlap mai. "Kha lam chu tuna min neih i hnial loha thu a nimai" ka lo ti hmiah. Kan sawi lawk tawh a, la inpeih chiah lo mah ila a duh anih phawt chuan neih pawh ka hnial hran lo.




Tunah hna nei rih lo mah ila ka nupui fanaute châwmna tur chu ka thawk chhuak thei dawn lutuk tih ka hria.



Tlankimi chuan "Engtin nge min châwm ang a? Pasal innghahna tlak neih lohte chu a" a lo ti hlak a. A duh ber pawh ka hrethiam tawhlo. Sum ti dawn ila a duh anga tam a nei thovin ka hre bawk si.



A ṭawngkam chuan min vit leh ngut ngut tawh.



"Anih chuan hun tlemtê min pe ve la, min nawr tut tut a, ka rilru i tibuai zo alawm" ka ti nghut a. A lo thaw chhuak hak a.



"A hahthlâk emai, i sawi ang hian i awm theilo anih hi" min ti salh a. Eng ber hi nge a buaina pawh ka hre tawhlo. Keimah hrim hrim hi min hne tawh emaw nile ka ti hial zawk. Hetiang teh tawp ka lo nih takah chuan min iai ta te pawh ani ve ang.



"Eng chiah hi nge i duh?" ka ti ta tawp a, a meng buai nak a. "Ka hna kawhhmuh che kha duh la a ṭha nimai tur ania. I duhlo ve khanglang bawk si. Tikhan kum 4 chhung ka lo nghak ve che a, engah mah i chhuak chuang bawk silo. I chapo ve tlat bawk si. A hahthlâk emai" a ti hlak hlak a.



Chiang zet hian ka en a, hman zana a inchhîr hmel ang pawh kha ka hmu tawhlo.



"Anih chuan eng thil chiah nge i duh?" ka ti leh salh a. Ka lungawi vak tawhlo. "Mipa innghahna tlak ka duh a, chutiang chuan ka ngai ṭhin che. Mahse ka lo ring sual deuh che ani mai thei. A...ka hrethiam teh nuaih lo" a ti khur hlak a.




Ka lo hrechiang tawk lo nge a lo inthlak nasa tawh viau pawh ka hrelo. Tlankimi ka duh dan kha a ni tawhlo.



Keipawhin thiam lohna tam tak ka nei ang tih ka hria, mahse tunah rih chuan eng pawh thleng ila ka pawiti tawh biklo.



________*________*________*_________



(Hmanhmawh lovin, muang chângin kal bek bek ang u aw. Zanin chu Rara-i a leng hnem vak lo. Buaina te hi chinfel ni phawt sela chapter dawt leh aṭang chuan kan ti deuh Rara tawh ang.)


Show post links
Top