AIZIAL By CVL Awmpuii (Completed)

[Ngaia]

AIZIAL
By CVL Awmpuii

(Ka zawmna lai tak ka chhinchhiah lo aw)

Chapter 13



Damdawiin kawt ka thlen rual chuan ka pa ka call leh nghal a. Rei fe a ring hnuah a lo la ta chauh a.



An cabin awmna te ka zawt a, a lo sawi nghal zung zung a. Ka pa hi chu eng dinhmunah pawh pa inthunun thei ngang a ni a. A âw ah hlauhthâwnna leh chiai na engmah a lang lo.




Kan inbiak zawh chuan an cabin awmna a sawi lam chu ka pan ta nghal a.




Cabin chhung ka luh rual chuan ka chhûngte chu ka va hmu chawpchilh nghal a. Vantei chu Doctor leh nurse te'n an lo buaipui mek a. Ka nu leh pa te chu anmahni hlat deuhah hian an lo ding a.





"Eng nge a an hmel?" ka va ti nghal a. Ka nu hmel chu ka en a, a thlabar hmel ngang mai. A lainatawm zawk. Ka pa chuan a darah nghet zetin a lo chelh bawk a. A mittui a tling pam a, ṭah a insum nasa hle niin ka hria.




Ka pa chuan min lo chhâng vat a "A pulse a hniam bakah a BP a lo hniam lutuk a. Hei, an la buaipui mek a, chanchin chiang zawk pawh a la hriat theih loh" a lo ti zung zung a.




Vantei chu drip an khai sak bakah oxygen an vuah rup bawk a. Doctor chuan a mit leh mar velte a check zung zung a. Nurse te'n an lo pui bawk a. An sir hla deuhah chuan kan lo ngaichâng ve ran a. Ka nu hlauthâwng hmel mawlh mai chu hmuh hrehawm ka ti. Ka pa chuan thlamuan tum tak hian a hnungah a chûl leh hauh hauh ṭhin a. An bulah chuan ka lo ding ve reng a.





Check ngai ang zawng zawng an tihfel hnu chuan nurse te chu an chhuak nghal a. Doctor chuan chanchin chiang zawk min hrilh nghal zung zung a.




"Hlauhthâwn lutuk tur a awm lo ania , a BP hniam leh Pulse hniam lutuk ber kha ania. A pum pui a chak lo viau bawk a. A thawhah luhai bawk nen nikhaw hrelo in a awm phah anih hi. Ti sawn drip kan khai char char ang a. A ziaawm deuh hunah oxygen level kan hniam bawk ang a. A rawn harh vat mai ang" a ti a.




Kan thaw huai hlawm mai.




Doctor chhuah hnu chuan Vantei khum bulah kan phei nghal dial a. Ka nu chuan a kut chelh nghalin "Ka lainat reuh emai a" a ti halh a.



Ka nau hmêl dang bel chu ka en a, kei pawh hian ka khawngaih ṭhin. Mize zawi awi lutuk a nih bakah a la hrisel lo em em zui a. A nungchang nena ngaihtuah phei hi chuan a khawngaih thlak zual ngawih ngawih ṭhin.




Ka pa chuan "Pathian zarah eng êm kan ti lo a, a lâwmawm lamah ngai ang. Rin ai takin a lo khirh khan lo bawk a. Kan ṭha veleh vat mai ang" a lo ti dam thlup a.




Nurse pakhatin damdawi lei ngai ho min rawn pe a. Lei turin ka chhuak zui nghal a. Ka nu leh pa te chuan Vantei an lo awmpui thung ang.




Damdawi ka lei buai lai tak chuan Rara-i call ka dawng a. A haw hnu khan ka la be miah lo tih ka hrechhuak ve chiah. Ka buai zui êm a, ka demawm hran lo e.



Ka in lei fel law law a, call chu pick up ka tum veleh a tawp nghal daih lawi a. Ka call back nghal a, a lo la ve vat a.




"I buai em ni?" a rawn ti zâng vah a. Zêp buai lovin Vantei chanchin vel chu ka hrilh nghal zung zung a. A rawn ngaihtuah ve ngang mai.



"Zan a ni tawh mai dawn sia, ka lo kal tawhlo law law mai ang. Pathian zara dam chuan naktuk ah ka lo tlawh ve nghal dawn nia" a rawn ti zung zung a. Ka lo hrethiam khawp mai.




Ka la buai rih ve bawk nen rei pawh inbe lovin kan inbiakna chu kan titawp vat a.




Cabin ka chhoh leh hnu chuan Vantei chu a lo harh tawh a. Ka thawveng huai thei. Chutihrual chuan a la chauh hmel hle a. Ṭawng pawh a la ṭawng ṭha peihlo thung a.




Ka nu chuan a be malh malh reng a, "I Bp leh Pulse a lo hniam lutuk a, thil i ei ṭha tho bawk sia. I bawrhsawm lutuk hi chu aw..." a ti vang vang a.



Ka pa in nurse a va ko nghal a, rei lovah an rawn inzui lut a. Vantei chu an check nghal zung zung a. A thâwk a pangngai ta deuh aniang oxygen level chu an tihniam a.




Chutah nurse nutling zawk chuan "Tuna a dinhmun aṭang hi chuan Oxygen hi rei vuah a ngai tawh lovang, zan lamah chuan kan phelh thei tawh mai ang. Mahse drip hi chu khai belh zel a la ngaih hmel. A taksa a la chaklo emai" a ti zung zung a.




Ka damdawi lei leh thei ho chu khum bul drawer ah chuan ka dah ṭha nghal mawlh mawlh a.



Ka pa chuan "Hriatpui, in nghah lova dah reng chu a ṭha lo emai. Hei i nau pawh a rawn harh tawh tho bawk a. Zanin chu i nu nen kan lo riahpui ang a. Nang lo va haw mai ta che. Tlai lama ka lo call chuk chuk chhan che kha chu kan dinhmun a chiang lo ve emai a. Tunah chuan ngaihtuah awm a ni ta lo bawk a. Min lo va hawsan mai rawh" a ti a.




Ka lo pawm pui ve mai bawk a.



"Mamawh in neih chuan in lo sawi zel ang a, ka rawn pe zel mai dawn che u ania" ka ti a.



Ka haw hma chuan ka nuin eirawng inbawl chawp mai turin min chah a. Ka lo aw ve mai bawk a. "Chaw rawn pêk in ngai ang em?" ka tih chuan "Heta mi kan chah mai ang, in pêk chu a buaithlâk ang"ka pa chuan a lo ti vat a.




Damlo riahpui tur lo chu dar 6 thleng bak a awm theih loh a. Dar 6 rik hma hret chuan ka haw ta a.




In ka thlen veleh ka intihfai chhunga lo hmin hman turin chaw ka chhuang nghal a. Ka ngaihtuahna ah Vantei a awm ve rauh rauh reng a. Ngaihtuah awm loh angin lang mah se a dam hlen thei tak tak bawk si lova. Ngaihtuah loh chu har ve tak a ni.




Ka intihfai zawh chuan chaw pawh a lo hmin tawh a. Artui ka kang tawp a, chhunah thil ka ei mumal si lo. Ka lo rilṭam hle tawh aniang mahnia ei e ti lo chuan ka ei ṭeuh mai.




Thleng ka sil zawh chuan ka pa te chu chanchin ka zawt leh a. "A ṭawng peih tawh a, i haw hma ngawt ai kha chuan a hmel hmuh pawh a nuam ta deuh e" a rawn ti zâng vah a. A thawveng ve huaiin ka ring.




Dam lohna thil hi ngaia neih theih a ni lova. Vantei pawh hi dam lo zing viau mah se ngaiah kan nei theilo. Heti hian lo ṭha veleh mai zel bawk mah se a nat a chhuah tawh hi chuan kan hlauthâwng vek zel.




Thihna te pawh hi kan thi vek dawn tih hre reng chungin kan tuar thiam chuang lo anih hi.




Hun thawl ṭha hek hawk ka neih hnu chuan Rara-i nen kan inbe leh a. Vantei chu a rawn ngaihtuah zui khawp mai a. A chanchin min zawt seuh seuh reng a.



"A fel tehlul nen a dam lo reng mai a" a rawn ti ve vang vang mai. An ṭhiandûn hi chu fel an inti tawn em em mai ani.




"Pathian zarah a ṭha veleh vat turah ngai ang" ka tih chuan "Keichu khawvel hi mak ka ti ṭhîn. A fel fel te hi an thi hmasa a, a sual sual an dam kur a. A fair lo e. Fel leh hmêlṭha deuh deuhte an bawrhsawm a, misual ho lah hi an hrisel si" a rawn ti nghat nghat a.




A ngaihdan hi a hmaa ka lo ngaih ve dan ṭhin a ni. Mahse tun hnu a ka ngaihtuah hian mifelte hi Pathianin a duh a, misualte insiam ṭhat nan an nunna a zuah sak ṭhin niin ka hre tawh. Chu ngaihdan chu a hahdam thlak takzet bawk.




"Khawvel a ni miau a, misual deuh dam lo te pawh an awm ve tho a, mi fel deuh dam te pawh an awm ve tho alawm. Kan thlirna zawn zel hi ani mai" ka lo ti ve vat a.



Vanduai bik riau ni a kan inhriat lai hian vanneihna mual mual kan lo nei ve zel a. Chutiang chiah chuan mi vannei ni kan hriatte pawh hian vanduai intihna tam tak an lo nei ve tho bawk.




Rara-i vanneihna em em chu a vanduai hle chung pawh thil reng reng a eng zawnga a thlir thiam ṭhin hi a ni. Amah aia chan ṭha zawk chang vanduai inti em em hi an kat ve nuk tho ang.




"Nangmahin i riak awm sia, i khua a har em?" a rawn tih chuan ka lo fiam châk tlat pek a.



"Ka lo hruai che ang a, rawn riak ve mai la" thutak hmel zet hian ka ti a.




"I ti âwm ang lo e a" a lo ti vat a. "Ka ti tak tak Rara, rawn riak ve daih la, ka khawhar min hnem ang a" ka tih leh chuan "I tenawm leh ṭan dawn a nimaw, keichu hetiang vel hi ka peih miah lo ania" a rawn ti hlak a.



Nghal ka chhuah châk tlat pek a "Eng vel maw i peih loh?" ka lo ti kher a. A ni sawi hreh sit set nei ta lo chuan "Aww, hei, sex tih vel hi ka peihlo. In kiss, in kuah tih vel te pawh hi ka peihlo. A tenawm emai a" a lo ti nghat nghat a.




A ngaihdan âtthlâk lutuk avang chuan ka lo nui hawk a. A la naupang a, a thil ngaihdan te hi a mak thei ania. Chutihrual chuan a rilru thianghlim zia ka hriat belh telh telh bawk a, ka lawm viau mai.




"Lo innei duh ta ila, fa kan nei thei nang. Fa neih dawn chuan tih ngaite a awm ve sia" ka ti leh hram a. A rawn ṭeu nghal hlar mai.




"I ṭawp emai" a rawn ti hlar a, a thil ngaihdan ṭhenkhat hi chu sawh sawn sak ve hret hret a ngaiin ka hria.




"Tak taka Rara, chutiang ṭawp tihna a ni hlei nem. Mipat hmeichhiatna te hi nupa nih hma a hman chu sual ania. Mahse nupa nih hnuah chuan nupa inkar sawh nghettu pawimawh tak ania lawm. A pawnga taka huat a, ten ngawt chi a nilo" pangngai tak hian ka ti a. Ka thusawi chu hrethiam se ka ti khawp mai.




Chutiang anih loh chuan a ngaihdan nilo chinah hian a ṭang ve nasa ṭhin bawk si.




Chutah Rara-i chuan "Chu te chu ka hre ve tho alawm, mahse tunah chuan ka ten tlat. Ka luak a ti chhuak" a rawn ti leh hram a.




Hrilh fin chi ni pawhin ka hre tawh lo, heti hian a hriat chin hre phawt sela. A rawn indai kaw ve zel turah ngai mai ang.




Hetiang kawngah hian tawnhriat a la nei miah lo tih ka hriatchian phah ta bawk a. Ka rilru chu a hlim veng veng mai.




Mipa dang tana chhuah zalen chu ka tum lo nasa lutuk.




Tukṭhuan ka eikham chuan ka pa te thlak zawk turin damdawiin lam ka pan a. Rara-in "Min lo sâwm ve rawh" a tih avângin ka sawm ve nghal bawk a.




Damdawiin thlen hma chu a titi zat zat a, a hmaa ka nin ṭhin tehlul nen tunah chuan ka tan ngaihnawm vek a ni tawh. Reh ta tlawk tlawk se a reh ri a ring ṭha tawh viau ang.




Vantei cabin kan thlen chuan ka nu leh pa te a chhuahchhal zui nghal a.




"Pa Sangzuala leh Nu Zualtei te chu heti hian Vantei a awm a, engmah min hrilh pawh in tum lova. Ṭhian bengvar lo deuh ka nih phah ṭep asin. Au Hriatpuia'n min lo hrilh hlauh a, chuti chu ni lo se engmah ka hre dawn lo ania" a ti nghal hlak hlak a.





A ṭhiannu a ngaihtuah luat vang a ni tih kan hria a. Ka nu leh pa te pawh an lâwm hmel zawk daih.




Vantei lah chu a lo muhil chiah a ni awm a. Ka pa chuan "Nizan lamah a muhil thei lawk lova, a mu ve chiah bawk sia. Ti harh rih lo mai ang u aw" a lo ti zung zung a.




Rara-i chuan ka pa te chu a la chhuah chhal zat zat a. "Vantei chuan a damlo ka ngaihsak lo emaw min ti ngei ngei ang. Ka lo kan vat bawk si lova. Min lo hrilh lo khanglang a" a ti hmarh hmarh a.




Ka nu leh pa te'n amah hrilh lova ka lak aṭang chiaha a hria chu a lungawi chuang lo anih hmel.



An lo hrethiam khawp mai a. Ka nu chuan "Rara-i ber hrilh nachâng kan lo hrelo chu kan thiamlo hul hual anih chu. Mahse Rara, hei i hriat veleh i lo kal nghal a,kan lawm lutuk ania aw. Vantei pawhin a hrethiam lutuk ang" alo ti vat a.




Ka pa pawh chuan "Kan thiam loh vek anih chu, i lo kal vat loh vanga Vantei a tih tauh ai chuan min mawhpuh vek dawn nia" a lo ti ve hlut a.




Rara-i tih lungawi chu an tan thil harsa a ni lo. An ti thiam ka lo ti khawp mai a. A mize naupangchhia zet zet hi a lang chhuak lo thei lova. A rilru â deuh buangte pawh hi a chawr chhuahna vang niin ka hria.




Zirtirna mumal pe tu tur nu leh pa ṭha tak a nei tlat lova. A chhia leh ṭha hriatna te chu a thiam dan danin a hmang ve âwm si . Ngaihtuah chian poh leh a lainat awm zual ṭhin.



Vantei harh hun chu class kal ṭhulh ṭhakin a nghak ve ṭang ṭang a. Ka nu leh pa te nen chuan an titi mawlh mawlh a. A ri bawrh bawrh a, fiamthu a thawh leh hlut ṭhin a. Ka nu thawpik lutuk tur pawh a chhawk zangkhai sawtin ka hria.



An thâwm bengchheng deuh mah se Vantei chu a damdawiin a chiah hneh deuh nge a mu thei chiah chiah thei tho mai.




Dar 11 velah a rawn harh ta chauh a, ka pa sawi dan takah a hmel hmuh pawh a nuam tawh khawp mai.




Oxygen vuah tawh lovin drip erawh an la khai reng a. A taksa fit tawk ni a an hriat hunah an ti tawp chauh ang.




A ṭhiannu ber a awm ta bawk a, a nui var var reng a. Rara-i lah chuan beisei ai daihin a duat thiam a, a ti thiam zek mai a.



Vantei rawn harh hnu rei vak lovah ka pa te pawh intifai a inthlâk lawk turin an haw ta a. Kei erawh an ṭhiandûn inkawm bulah chuan phone hmet mawlh mawlh chungin ka lo ṭhu ve reng a. Ka pa chu rawngbâwlna lamah a buai zui dawn a, a lo let tawh rih lo ang a. Ka nu erawh chu a lo let vat thung ang.



Rara-i washroom a luh lawk chhungin Vantei chuan min rawn ko a, a lam ka hawi vat a. Mamawh a nei anih ringin ka va pan hnai nghal bawk a.




Mahse Vantei chuan "Û, Rara-i kha i bem tak tak em ni?" a lo ti teh daih a. Ka nau chu ka en a, thu tak fe hian min lo melh a. A ṭhiannu in engkim a hrilh hre vek tawh ang chu ka lo tih laiin ka bem leh bem lohah a lo la buai ve hle chu ania.




"Rara-in a sawi em ni?" ka lo ti khauh a, "Aaa...a sawi thawi fua fua a, a sawi fak duh ngailo. Ka zawh chian veleh hian a induh daih zel a" a fih chuan ka lo nui huk a.




Intithei deuhin thil a hrilh zuk zuk ang a, hrechiang châk deuhin a lo siam ṭhin anih hmel e.




"Nakinah amah i zawt leh dawn nia" ka tih chuan a lo ner nang a. Rara-i a rawn luh zui tak avangin kan sawi zui tawh lo.




Rara-i chuan a ṭhiannu sam te chu a phiar sak vel a. Venflon an vuahna thil an bel te chu a chei sak vel a. An hlim dun ve khawp mai.




Ka nu pawh a lo let leh vat a. Rara-i pawh chu haw turin a intintuah ve ta nghal a. Ka thlah veleh ngei ang chu.



Thlah tura motor kan chuan fel hnu chuan ka haw tir ui tlat pek a. "Inah min zui haw zuai la, tlai eirawng bawl hun awm velah ka thlah leh che ang a" ka tih chuan min han melh ren rawn a. Ka kawchhûng en tlang tum ni awm tak hian min melh a. Eng ngaihdan tak chu nei leh ang maw.




Mahse pangngai deuh chuan "Awle" a lo ti ve mai bawk a. Ka phur nghal surh mai.




In kan thlen chuan ka inthlak nghal sawk sawk a. Ṭum dang zawng aiin Rara-i chu a tim deuh dui hian ka hria a. Kan pahnih chauh kan ni a,boruak a dang ve deuh te pawh a nimai thei.



"Thingpui in ang aw" ka tih chuan a lo bu nghat a. Choka ah kan inzui phei a, dawhkan hnuaia chair chu pawt chhuakin a ṭhu zui nghal a. Kei chuan kan thingpui in tur ka lo chhuang thung a.




A bula ka va ṭhut thlak lai chuan a lai deuh huih mai hian ka hria a. A nui var var na in a mitmeng aṭang chuan a zâm deuh niin ka hria.




"I zak elo?" nuihza insum ṭeuh hian ka ti a "A teuhlo" a lo ti bak hlar a. Mahse ka awih lo nasa, a zak tak tak niin ka hria.




A kut ka chelh dawn chuan a lo ṭang ṭung a. Ka chelh lui ta tho a, nghet zetun a kut chu ka hmer a. Ka melh chhuk run bawk a, ani chuan hnuai lam a lo bih daih thung a.




"Hahdam deuhin awm rawh, engtin mah ka ti dawn lo che" ka ti thum dut a. Min hlauh hmel lek lek te'n ka hria a, a zialo tak tak a ni.




"Ka hah hlei nem" a lo ti vat a, a rawn hawi chhuak nghal bawk a. Min melh zawk a, mahse a hawi sawn lehnghâl daih a.




A kut chu lasawnin a tho chhuak vut a, "Thingpui chu ka lo vil ang" tih leh gas lam pan chu a rual a. A che zia lai lutuk avang chuan ka lo nui hawk mai. A awmdan vel chu a inhmeh hlawl lo.



Gas bulah chuan dingin thingpui so hun chu a nghak ta ngar ngar a. Ka lam a rawn hawi duh ṭhak lo zui a.



Kamisz dum leh smart pants a ha a, sneakers a bun leh tawp bawk a. A inchei dan chu a nalh tawk khawp mai.



Hnunglam aṭang chuan ka en reng a, a che ṭha ngam der lo niin ka hria.




"Rara" ka tih chuan a rawn hawi vat a, za lo tih hriat lutuk hian min rawn nuih sak bawk a.



"I lai anih kha" ka tih leh chuan a nui hmel bo ṭhak khawpa rumin min rawn melh nghal a. "Ka lai lo" ti bak hlar mah se a lai nasa lutuk.




Tho chhuakin ka va pan hnai vut a, a lo meng phawk nghal hra mai. A hma takah chuan dingin gas dahna ah chuan ka innem khalh nghal a. A sir tawn tawnah Rara-i chu ka khuap nghal a, kan in awmhnaih khawp mai. A zâm vanga a thaw ri ring ta viau pawh chu ka hrechiang kher mai.




A mitmeng fiah zet chuan min melh kiau a, a phawk deuh hra bawk sia. Tuna a hmel awmdan tak hi chu inhria se a in duh lo ngawt ang.



Ka zuk kun hniam rual chuan ka chalah min rawn toh ta pawp mai. Ka inlahrang nghal vat a, a lu chan zia chu pui tak a ni. Ka lu a hai ve chhak thei.



"Vanrawngbawl" ka ti hluk a, "I hur" min lo ti daih thung a. Rum zet hian ka melh a, a aia rum mah in min lo melh let ve a.



"I lu a va chang ve" ka tih chuan "Eng nge min rawn awm hnaih vak ni? Taksa insi chêt chêt a awm ka peih hlei nem" a lo ti hlak hlak a.




Thingpui a rawn so tak avâng chuan a off zui nghal a. "Engtin mah ka ti dawn hlei nem che, ka melh hnai ringawt che alawm" lungawi lo deuh hian ka ti a.



Thingpui thlit chhuah pah chuan min lo hnial zat zat a "Min fawh i tum, ka hre vek. Heihi alawm, bialpa ka neih tak tak peih lohna chu. Chance in neih hlekin mi tawm fal pui a, eng emaw tih in tum zel a. In mak emai, in rilru a hrisel lo lutuk" a ti hlak hlak a.





"Fawh che ka tum lo" ka lo ti bul hmuk a. Ka tum lo tak tak reng bawk a. A zâm lutuk leh lai lutuk kha belhchhah ka tum mai chauh ania. A lo ngaikawi daih a.




"I tum i tum, ka hrethiam ve vek. Heti hian ri chhuak phawng phawng in mawl hmel deuhin lang mah ila hetiang vel hi chu ka hrethiam ve lutuk" a lo ti nghat nghat a, a ṭang na mai bawk sia.





Lungawi lo deuh hian ka ṭhutna ngaiah chuan ka ṭhu thla leh a. Tleirawl tê, naute rual ngaihzawn chu a hahthlâk dawn hle niin a lang. Dawhtheihna ka mamawh belh ṭeuh bawkin ka hria.




Thingpui chu min rawn chhawp zui nghal a "Fridge-ah khan cake a awm" ka tih chuan Fridge lam chu a pan zui ve nghal mai bawk a.




A rawn let leh chuan ka bula a ṭhutna chair chu hnuk sawnin ka hlat deuh hlekah a ṭhu ta kher a, ka lo melh run run a.




"In ei puar vat ila, min thlah rawh" tih leh chhang ei chu a rual a. Ka lo melhna te chu a haider hmiah anih chu!




Ka ngaihdan a ni ta vak lova, ka thinrim pawh a ni hran lo. A awmdân hian min tilawm lo ve tawp a nimai.




"Eng nge khatia i awm tlat a?" ka tih chuan min rawn melh vat a, min chhang lem lo hian a thil ei lai chu a ei zawm mawlh mawlh a.



"Engtin emaw ka tih che i ring em ni?" ka ti leh hmuk a. Hetia min hlau ang hrim a a awm vel hi ka ngai theilo. Min hlau ka ti tak na in min hlau em em hmel chu a pu si lo. Min hlat ru tlat nimai hian ka hria.




Chutah Rara-i chuan "Nang chu i upa tawh a, tawn hriat pawh i ngah tawh ang a. Keichu ka la naupang a, thil ka hrethiam lo thei bawk si. Min thlem heuh heuh ang a, ka hnar thei lo che ang a. Eng eng emaw kan tih ka hlau alawm" a rawn ti ta zat zat a.





A thutak ve ang reng bawk sia. Kei erawh chuan a ngaihtuah thui peih ka lo ti khawp mai.




"Ka khawih lovang che" ka ti ringawt pek a, hetia a inveng reng hi ka ning. Awm nuam lovin min awm tir zawk.




"Min khawih dawn ka ti hlei nem" a lo ti ve zat a, ṭawng thlawn te hi a ba duh lo reng reng.



"Mipa, hmeichhe duh lo chung khawih lui turah min ngai emaw ni" ka ti nghut a. Min ngaihdan tur ang chu ka hrethiam ve vek a. Ka tan chuan a lâwmawm vak loh. Mahni lo mah a invawn thianglim ve nak laiin.




"Min va ngai khawlo ve a" ka ti leh hluk a. Ka melh run a, rum zet hian min lo melh ve bawk a.



"Ka ngaih khaw loh vang che pawh a ni lo" uar zet hian a ti a. "Anih chu" ngeiawm zet hian ka lo ti a.




Vawiin tlai zet chu kan fuh hlei thei thlawt lo a ni ber e. Kan inhauh buai dan lah chu a naupangchhia ang reng bawk sia. Ngaihtuah chian phei chuan a ho ang reng khawp mai. Mahse kan fuh hlei thei thlawt lo a ni.




Thingpui kan in zawh hma chu a tu mah mah kan ṭawng tawh lova. Rara-i chu a insawh tau nghawng nghawng reng a, mahse ka lo hrelo der hmiah thung. Eng pawh sawi ila min hnial kalhna tur a hre leh zel dawn a. Engmah sawi tawhlo a fuh berin ka hria.



Kan thingpui inna no sil a tum lai chuan "Dah rawh, ka sil mai ang, ka thlah tawh ang che" ka lo ti bul vut a.



Ka ṭhutna aṭang chuan ka tho chhuak a, ka bike châbi, choka luhna bula ka tar chu ka la nghal bawk a.




Rara-i chuan min rawn zui mai dawn emaw ka tih laiin a dinna ngaiah a lo la ding ngar a. Thlengsil na chu nghengin kut kuangkuah thân chung hian min lo en a.




A lungawi loh hmel em em mai lehnghâl a, "Kal ang" ka ti nghut a, a che châng duh der lo.



Ka nin chin a thleng leh tawh "Eng nge i hriat a?" sehchilh zet hian ka ti a. Thip zeta min melhin a rum zui nghat a.



"Ngaihzawn i har emai, i hahthlâk tlat. Thil i la kawi peih bawk si. Hetiang renga i awm chuan ka hne thuai ang" a lo ti nghat nghat a. Ka sawi tur ni zawk âwm tak a ni.




Ka chezia la kawi tu chu amah zawk hi a ni reng sia.




"Lungawi lohna tur zawng suh" ka tih chuan "Ka zawng lo, mahse ka hmu alawm" a lo ti vat a.




"Inhnial ka peihlo, min hnial thla zen ṭhin suh. Naupangchhia angin awm suh" ning zet hian ka ti a.



A rawn che chhuak ta vat a. Chawei dawhkana a bag dah chu la in min rawn nek sawk a. A kal chhuak zui nghal nal nal anih chu!



Za lo zet hian ka nui chhuak hawk a, ngaihven zui loh pawh tum ila ka thei silo. Bike châbi hum reng chung chuan ka chhuak zui ve nghal a.



Ka chhuah rual chuan kan in kawng chhuka a kal thla hnak hnak chu ka hmu nghal a.




"Rara" ka au a, hrelo ang hmakin a kal tlang pawp pawp a. Ka auh nawn lehna pawh chu a lo haider hmiah mai.




Phun hluk chungin ka bike chu ka ti nung a. Ka umzui ve nghal a.



Ka zuk thleng thla chawpchilh a, a hnung chiahah chuan ka tlân a. "Rara" ka ti leh a, a rawn hawi duh chuang lo anih chu !




"Vanrawngbawl" ka ti vin hluk a, chutah rum zet hian min rawn melh ta a "Ka hmingpum in min ko tawh suh" a lo ti tuarh a. A thinrim ve hle ni tur a ni, a meng alh pap maiin ka hria.



"Rawn chuang rawh" ka theihtawpa damin ka ti a, "Vanlalhriatpui, haw rawh" min lo ti thung a. Min tham lo ve khawp mai.




Haw san ta ila ka ngaihtuah zui reng dawn tho a. Inti thiamlo mah ila vei zui tur chu keimah zawk tho ka ni a, a ni chu a inthunun leh thei dawn tho tih ka hria.




Chuvângin zawldawh zawka ṭan hun tak a ni. A upa zawk leh puitling zawk ka ni a, hrehawm deuha inthlah ai chuan tlâwm zawka ṭan chu ka pawiti ta lova.




"Ka thiam loh anih kha, rawn chuang rawh ka thlah ang che" ka ti dam ta thlup a. Ngeiawm zet hian a lo nui a "A chauh thuba rawh emai" a lo ti duh lêk chauh.




Min kalsan lehnghâl nal nal a, ka va han haw reuh tak e aw. Zui tawh loh ka tum zet a, mahse zan lam hun tur ka ngaihtuah a. Ka vei zui dawn tih ka hrechiang bawk si. Ka um zui leh ta nge nge a.




A bul ka thlen rual chuan bike chu ka ti ding a, ka chhuk thla a. Ka awm ve tih hrelo ang mai hian a kal ngai patin a kal a.




Ka pawt ding ta a, nin hmel zet hian ka kut chu vai thlak a lo tum a. Ka lo chelh nghet sauh thung a.




Kan intihbuai chhan a ho emai tiin kan buai na chu a zangkhai zawnga lak luih ka tum ta a.




"Hmêlṭha Rara" ka ti a, ka nuih vur vur bawk a. Ani chuan min lo melh rum ngang mai.



"Hmêlṭha Rara" tiin ka nuih tlawn leh a, "I hmelchhia" a lo ti hlak a. Nichina min tauh san hmak hmak ai kha chuan ka ngaih a ṭha leh daih tawh zawk.



"I hmêlṭha tho alawm" ka tih chuan a lo ner nang a, a lungawi viau leh tawh zawkin ka hria.



"Lo kal rawh le" ti a a kut ka chelh pawh chuan a ṭang ṭung tawh lova. Ka bike hunna bulah chuan ka dinpui tê tê a, "Tih tauh bur bur loh tur" ka tih chuan min lo chhiah khum vak a. A biangah chuan piai vakin ka nui zui hawk a. Ka hâ a ti ziau vek thei.




An in thleng chu lungawi deuhin kan inthlah veleh mai bawk a.



"Zanah ka lo bia ang che" ka tih chuan "Ka block leh mai thei che a ni" a lo ti nghal zat a. A uang ve tih ka hria a, huat enah pawh ka en duh lo.



Ka thlah hnu chuan damdawiin lamah ka kal leh zuai a. Zanin chu ka pa te riah chhawk ka tum ve thung a. Mahse ka nu chuan a lo duh der lo mai a.



"I pa nen in lo nghak zawk ula, hei ngaihtuah awm lutuk a ni tawh lo bawk a. Zanin chu keimahin ka lo riahpui ang" a ti ṭung a.




"Ka pa in a duhlo ang" ka lo ti nghal vat a. Ka nu leh pa te hi chu ka hrechiang ve a, ka pa hi rawngbâwlna thil a a zin bo te anih loh chuan riah hran hi an nei ngailo. Nupa inngai leh inthlahlel zet mai hi an nia. Mak deuh maiin ka pa hi hetiang kawngah hian a tuar theilo zawk a. Ka sawi thiam dan ber chuan ka nu hi a ngai ngawih ngawih a. A engkim a ni ve takzet in ka hria.




Ka ngaihtuah chian hian hetiang taka ka pa in a thlakhlelh chhana ka rin chu ka nu nungchang bawk hi a ni.



Hmeichhia te hian an zir anih phawt chuan mipa te hi kan lo tlu lut zung zung zel maiin ka hria.



Mipa ṭha awmna chhungkua hi chu han belchiang ila, a phenah hmeichhe ṭha tak an lo awm ngei ngei zel. A zawng zawng chuan ka ti lo, mahse a tam zawkah chuan a ni tlangpui.



Hmeichhia in mipa a dah chungnun thiam poh leh ama chungnunna a ni zel mai. Chuvangin hmeichhia te hi an lo pawimawh khawp mai.


Chu chu ka nu leh pa nun aṭanga ka zir chhuah pakhat a ni.




Ka sawi lawk ang tak takin ka pa chuan Vantei riahpui ve chu a tum ruh tlat a. An pahnihin an riahpui leh ta poh chu ania.




Keimah têin in ka nghak leh a, zanriah ka eikham hnu rei vak lovah room ah ka awm ta chawt a.




Rara-i nen kan inbia a, tlai lama kan mood chhe ve tak kha a reh ve ve tawh bawk a. Ṭha deuhin kan inbia a.



An chhungkaw chungchang a rawn sawi ve teh mial a. Hetiang hi a sawi zen zen loh avangin uluk deuhin ka lo ngaihthlâk sak a.



A pa leh a nuhrawn bula a la awm tlat chhante chu a rawn sawi ta mawlh mawlh a. A nî te chungchang nen lam min hrilh bawk a.



Rev Sanghminga tu leh fate meuh an ni ve si a, râl aṭanga ka lo ngaihsân ṭhin ang hu kha an lo ni hlawm miah lo.



Rara-i thu min hrilhte avang chuan amah chu ka hmusit a ni miah lo. Mahse an mak chhungkua ti ila a dik ber ang.



Lainatawm ta ber chu Rara-i bawk hi a ni.


___________*___________*_________*______


(Heti chin hi ni leh phawt sela, Chapter dawt leh aṭang chuan thui pangngai deuhin kan dah chho leh tawh dawn nia. Tun kar chho ka dah mumal loh bakah ka dah chhunah pawh a tawi thei viau tih ka hria a. Chuti chung chung chuan min lo hrethiam ṭhin a, ka lawm. Min hrethiam zel tur pawhin ka lo ngên nghal che u aw. Min lo nawr ṭhinte hi ngaihnawm in tih vang a ni tih ka hria a, a lawmawm lutuk. Chutihrual chuan innawr vak hian ka ziak phelh sawlh nuaih ṭhin a. Ka tlin chin chin hi min lo pawm sak hram dawn nia. Ka readers fel tak takte in chungah hian ka lawm ṭhin ngawt mai ! )


Show post links
Top

[Ngaia]

AIZIAL
By CVL Awmpuii



Chapter 14



Zan a rei tawh viau na in kan thusawi in a zir bawk a. Kan mut a la chhuak lo dun ve hle niin a lang.




Rara-i chuan an chhungkaw chanchin kim chang chu heti hian a sawi a "Au Hriatpui, kan chhungkua hi maw kan mak lutuk. Ka chhûngte hi an sual pawh a ni hran lo, mahse a hahthlâk ti ila a dik ber ang. Ka pu in min duat zia leh min duhsak ṭhin zia chu nang pawhin i hria ang a. Khati taka min duat chhan kha ka nu leh pa mumal loh vang pawh a nimai thei a ni. Ka cousin dangte chu chhungkaw pangngai tak tak an ni vek hlawm a. Mahse keimah hi ka hrang nalh bik a. Ka cousin te ho chu zêp loh chuan ka ngaina miah lo, an bula awm hi nuam ka tih loh bakah ka hahdam lo ti ila a dik ber ang. Chu chu keima thiam lohte pawh a niang, an sual hran chuang bawk silo a" tiin bul a han ṭan tê tê a.




"Nangmah zawkin pawh tum la, unaute chu inngeih deuha awm hi a ṭha alawm" ka lo ti hmanhmawh a. Min rawn chhang leh vat a.




"Ih maw, anmahni pawh a, an awmdan anga awm ve hi ka tum nasa ṭhin lutuk, mahse a harsa alawm. Anni chu an pangngai vek a, an khawsak a sân bakah an ṭhian kawm duhte hi ka ngainat zawng chî an ni lo. Chhungkaw thil tihkhawm nikhua te hian kan titi a, kan inkawm khawm ve ṭhin tho a. Mahse an titi hi ka pawh pha ve lo alawm. Kan mize inpersan hlawm lutuk hi ni berin ka hria. A châng chuan an zingah hian tê chem chem in ka inhre ṭhin" a rawn ti chuai raih a.




"Rara-i i nih kha, khatia mahni inring tawk lo deuha awm kha i inhmeh loh bakah mahni insit chu i inhmeh lo ania" ka lo ti vat a. Ka rilru tak tak sawi ka ni. Hmeichhe inringtawk ve tawk tak niin ka hria a, mahse mahni insitna a lo nei ve tho anih hmel.



"Chutiang ringawt a ni hlei nem. Tlang deuhin sawi ta ila, nang chu chhungkaw pangngai tak aṭanga seilian, nu leh pa kara seilian i ni a. Pa Sangzuala leh Nu Zualtei te phei chu pa ṭha satliah leh nu ṭha satliah an ni lo lehnghâl. Keichu heti mai hi ka nia, a châng chuan mahni inringtawk in lu zo veh vawh tak ni mah ila mahni insitna hi a awm lo theilo. Ka chawr chhuahna in a zir miau lova" a rawn ti duah a.




A sawi tum chu ka hrethiam ve ruak mai. Heihi ania nu leh pa kara sei len loh pawina em em chu! Eng ang pawhin an nihna thup tumin hlim angin awm mah se chhûngrilah mahni insitna leh ruak a awm lo theilo. Chu chu Rara-i nunah pawh hian ka hmu thiam ve ṭan mekin ka hria.





"Rara, kan sei lenna chhungkua ah hian duh kan thlang thei lova. Mahse keimahni zir zel hi a ni ve ania. Nang pawh mi hlim thei leh a êng zawnga thil thlir ṭhin i ni hlauh a. Chuvangin i insitna leh tê i intihna kha dah ṭhat tum hram hram rawh. I hma lam hun ngaihtuah la, i la naupang a, hmachhawp i la ngah ania" tiin ka hnêm ve duah a.




Mi hnem leh thlamuan hi ka thiam zawng a ni lova. Ṭawngkam lah ka thiam hek lo, mahse Rara-i ang hmeichhia chuan a hriatthiam ngei ka ring.



Chutah Rara-i chuan "Aaa... chutiangin ka hnual ta rawih tihna pawh a ni chuang lo ania. Kan sawi kal laklawh em a, ka lo sawi ve duah anih kha" a rawn ti zung zung a.




"Umm... ka hrethiam alawm, lo sawi zel rawh. Vanduai bik lutuk anga inngaih te hi a ṭha lo ania" ka tih chuan min lo pawt chat a "Vanduai bik chu ka inti chuanglo ania" a lo ti vat a.




"Vanduaina lai ka nei a, vanneihna lai ka nei bawk a. Mi tu pawh hian vanduaina lai kan nei vek alawm. Mahse keichu ka vanduaina indawm kûn nana ka hmang duh miahlo te hi ka vanneihna ania" a lo ti leh nghat nghat a.




Rara-i hian a sawi dik chiah ani. A thil tawn ang zawng zawng hi midang, ama rualpui vêk hian tawng ta se amah ang hian a la lâp thei kher lovang. Rara-i chu a êng zawnga thil thlir ṭhin a ni tlat a, hei hian tûn thlengin nun nuamin a la nun tir ve niin ka hria.




"I vanneihna i hmu thiam tlat ṭhinte hi i puitling lutuk" ka lo ti ve hlut a. A châng chuan hetia naupangchhia deuha biak a ngaih chang hi a awm ṭhin. Ka fuih phurna pakhat a ni ve bawk a.




"Naupangchhia ka ni tawh hlei nem, ka puitling tawh alawm. Ka pu pawh khan 'I kum phu lovin i puitling ' min ti ṭhîn alawm" a rawn ti ve zat zat a. A âw aṭang chuan a inchhuan zia a hriat theih. Lu thing chungin ka nui ka nui ta ringawt a. Tuna a awmdan te hi a naupanchhiat zia lanna a ni reng si a.




"Naktukah i lo kal leh ang em?" ka ti ta daih a. Kan sawi zel anih chuan a inchhuang vel dawn lutuk a, a naupanchhiat zia a lang zual ang a, ka nuih huk ka hlau a ni.




"Khawiah maw?" a lo tih chuan "Aww... damdawiin ah" ka lo ti vat a. "E aw...Pathian zara dam chuan ka lo kal leh ang. Vantei dam loh chhung chu college pawh ka kal bik lo mai ang" a lo ti zung zung a.




"I dam ṭhat em kha, i ṭhiannu dam loh vanga chawlh ve ngawt lo tumte chu" ka lo ti nghut a. Zirna kawnga a inthlahdah chu ka duh miah lo.



"Dam ṭha tho e, mahse naktûk chu ka chawl hrim hrim dawn. Tunlai class pawimawh lutuk ang kha kan la chuang hlei nem" a lo ti ṭung a. Kal turin ti eng ang mah ila min hnial dawn tho tih ka hrechiang a, ka hnial lui duh tawh lo.




Kan inbiak zawh meuh chuan a lo tlai ve duai tawh mai.



Zingah chuan ka thawh veleh chaw ka chhum nghal a. Ka nu leh pa te chaw pek an ngaih dawn avangin ka chhum kep thlap bawk a. Chawhmeh chu an chah chawp dawn a, chaw ken sak deuh tawp a nimai.



Rara-i nen pawh kan inbe leh tawh a, ka kal dawnah ka lam thla ve nghal ang.



Ka chaw chhuan laia ka pa nen kan inbiak chuan Vantei pawh a ziaawm sawt khawp mai tih thu min hrilh a. A zia chhoh zel tho chuan damdawiin aṭang pawhin an lo chhuak vatin ka ring. Zanin chu min hnial eng ang mah se keiman ka riahpui ve tawh ang.




Rara-i chu ka lam thla ta ngei a. Tunlai a inchei dan chu ka duh dan thlap vek a ni. A inthlak thleng thawk hi a ni ber. Taksa lang tam lutuk leh âwm bâwr pho lang lutuk kawr ang kha a ha tawh ngai lova. Kawrfual pangngai tak a hak loh leh smart pants emaw jeans pangngai tak a ha a, kamis emaw top pangngai tak a ha leh tawp ṭhin a. Heti hian ka mit a tlung fe zawk.




Bike bula ding reng chung chuan min lo pan lai chu ka lo thlir a. A rawn thlen rual chuan "Tunlai chu i mawi thei riau" ka lo ti hlut a, ka nui suk bawk a. A lo ner nasa ngang mai. "Sawi sual ka nei em ni?" ka tih leh chuan "Ka mawi lo ngai hlei nem" a lo ti hlauh thung a. Ṭha hi chu a inti ve chiang ania.




"Tun hnai tê i inchei dan hi ka duh zawng dik tak ani" ka ti a. A ha var rual ṭhat langin min lo nuih var var mai.




"I duh loha awm ka duh hlei nem" a lo ti khauh a. Heihi ania Rara-i ka duh zualna em em chu!




Ka duh dan a ngai pawimawh a, a insiamrem thei zel a. Chutihrual chuan a duh dan tê in a nung tho a. A nihna bo chuang si lova ka duh dana a awm thiam hi ka lawm ṭhîn.



Damdawiin lam pan chuan kan inphur thla ta a. Bike-a inphur kan ni a, titi nasa viau mah se a ṭawng ka hre ṭha hlei thei mang lo. Mahse hria ang vekin ka awm thung a. Thu pawimawh a sawi dawn lo tih ka hre tho a. A thinrimna tura a thusawi hrelo anga awm chu ka duh bik lo.




Vantei awmna cabin a kan inzui luh rual chuan an phul nghal hlut a. "Rara-i chu i lo kal leh hman a, i va fel ve" ka nu chuan a lo ti hluai a. Rara-i lah chu a lo inchhuan hmel em em tawh mai a. A duhawm ṭhin ania.




Ka nu leh pa te chu an chawhmeh tur lamin an chhuak zui nghal a.




Rara-i chu a ṭawng nghal zat zat a, Vantei pawh a be harh kawk kawk maiin ka hria. College chungchang velte chu a sawi mawlh mawlh bawk a.




Vantei'n "An lo zir hnem hman viau ang tih la hlau" a tih chuan "Lungngai suh, eng tham mah tûnlai chu kan zir lo" ngaihsam zet hian Rara-i chuan a lo ti a. An inhnêm thiam khawp ang chu.



An inkawm lai chuan ṭhutthlengah ka lo ṭhu a. Phone aṭang chuan tlaia naupangho tuition pek tur ka ennawn thuak thuak a.




Vantei te inkawm chu a hnu deuhah chuan an phum ta ser ser a. Ka hriat phak ni chiah si lo, mahse eng emaw chu an sawi ngei a ni tih ka hriat theih si hian an inbe sar sar a. An thusawi tak hre thei lo mah ila eng emaw chu an sawi chiang alawm. An nui dun leh hak ṭhin a. Ka awm ve chu min ngaihsak vak hmel loh.




"In va ṭawng zawi ta ve" ka tih chuan an lo hawi vat a, Vantei chuan a hmui a hup a. A mitmeng aṭang chuan a nui tih ka hria.




Rara-i chuan "Kan rêl che alawm" a lo ti sam thên a. Vantei'n a lo nghawk zauh a, mahse pakhat nu lah chuan a lo hrelo der hmiah thung a.



"Engtin nge min rêl a?" ka tih chuan "A ti mai mai nih kha" Vantei'n a lo ti vat a. Rara-i lah chu za em em hian a lo nui ar ar tawh thung a.




"Enge maw in hriat reuh le?" ka ti nghut a, an awmdan chu a ngaih ṭhat thlak tawh miah lo.




Chutah Rara-i chuan "Enteh, Au Hriatpui, Vantei hi kan pahnih chungchang ka hrilh a, a lo lai zawk daih a" a lo ti a. A nui zui leh ar ae a. Vantei chu a zah hmel lah tak bawk a.




A ṭhiannu lah hian zep sit set a nei ve tawh ṭhin bawk silo.




"Vante, kei aiin upa mah la ka nau tur i ni tihna anih chu. I û hian ka duat ngawt ang che" uang thuang zet hian a ti leh ham ham a.




Amah zawk hi zak tur awm tak a ni sia, Vantei a nuih let zawk daih thung a. Awm ngaihna pawh min ti hre ṭhin lo.




Rara-i hi chuan zah pah hi a nei vak lo, mahse ka duh tho bawk sia.




Ka nu leh pa te lo let hnu chuan Rara-in haw a duh tawh thu a sawi a. Ka chhûngte'n thlah tûra min tih hmain ka thlah tur thu ka sawi nghal a. A hma nen kha chuan inang tawh lo tak a ni.




Damdawiin aṭanga kan chhuak chiah chu Tlankimi kan hmu nawlh mai a. A ni a lo lut ve dawn chiah thung a. Rara-i hmela danglamna awm chu ka hmuh hmaih loh nasa. Mahse a ngaihtuah âwm ang ka hrethiam miah lo thung.




Tlankimi chuan min lo nuih sâng a "Hriatpuia teh nawlh chu, eng nge damdawiin ah te i tih a. I dam ṭha lo em ni?" a lo ti a.



Ṭha deuha min biak miau chuan han chhan loh ngawt thu a awm lova "Dam ṭha e, Vantei kan luhpui leh zawk a" ka lo ti ṭha ve mai a.



Chutah Tlankimi chuan "Aw haw, a va zialo ve. Vantei hrisel lo lutuk hi chu a lainat awm ngawt mai. A fel tehlul nen hian hrisel a phu asin mawle. Tunah eng nge a an tawh a?" a lo ti zung zung a.




A hmêl aṭang chuan pawi min tih pui ve takzet zet niin ka hria.




"Tunah chuan a ṭha tawh lutuk a,kan chhuak thei vatin ka ring. Eng nge i tih dawn zawk a?" ka han ti mawi hnai ve a. Rara-i a lo rum nghat mai.



Tlankimi chuan "Tunlai ka hrawk a thip lutuk a, ka in entir lawk dawn anih hi" a lo ti ṭha ve mai a.




"Anih kan kal phawt ang, kan hmanhmawh ang reng sia" ka tih lai mek chuan Rara-i chu a lo kal hmak tawh. Tlankimi chuan nui var var chungin min mangṭha a.




Dik tak chuan ka ngaihzawng hlui a ni a, pangngai taka biak chu ka tan thil nuam a la ni chiah lo. Mahse amah zawkin min be pangngai miau si a. Lo chhan chhiat ngawt thu a awm lova, chuvanga ṭha taka lo dawngsawng ve mai ka ni a. Chu chu mi pangngai nihna a ni bawkin ka hria.




Rara-i kal tau nghawng nghawng chu ka umzui vat a. A bul ka va thlen chuan rum deuh hian min lo melh a.



"Min be pangngai sia" tiin insawifiah ka tum nghal ngawt pek a. "I duh leh va be leh la" ngeiawm zet hian a lo ti thung a. A thik tih ka hrethiam ve tho a. Thinrim lamah a kal meuh lo.




"Ka be duh tawhlo e a" ka tih chuan rum zet hian min lo melh leh a. "Ehe Hriatpuia teh nawlh chu, damdawiin ah de de dei te a ti kual vel a. Ṭawng no fahran bawk si" tiin ngeiawm zet hian Tlankimi ṭawng dan vel chu a zir a.




Nui lo turin ka insum hram hram a ni. A la zir thiam hrep lehnghâl a. Ka hriatchhuah tak pakhat chu Tlankimi hi a lo ṭawng no tak tak anih hi.




"I titau nghawng nghawng em ni?" ka tih chuan ka ban puamah min chum ṭawlh a, a kutthlak lah chu a na zek a.




"Khatiangte chu thil pangngai ve mai anih kha. Kan tawp tawh a, bul kan ṭan ṭha leh dawn lo bawk a. Min be pangngai miau si a, pangngai takin ka chhang anih kha" ka ti ta duah a. Min la melh rum tho mai.




"Tlankimi khan min han hmu lo der vel a, a over si. Inti fel ropui si" a ti leh hlak a. Tlankimi hi a lo ngei takzet niin ka hria.




A darah chuan ka kuah thuak a "Engah mah ngai suh, a ho emai Tlankimi chu" ka lo ti awlsam thên a. La thutak lo se ka duh, khunkhan deuha sawipui chuan a thîk bakah buaina kan neih ka hlau a ni ber.




Chutah Rara-i chuan "Heihi ania, mi first love lo chu ka nih duh loh na chhan. Nunhlui hi nunhlui ni mah se tun hun ti khaihlak tu a ni ziah" a lo ti hmarh hmarh a.




A thusawi hmasa lam chu naupang chhia viau mah se a tâwp lam chuan ka ngaihtuahna a tithui viau mai.



Nunhlui hi nunhlui ni mah se kan tun hun ti khaihlak tu a nihna chen a tam khawp mai. Kan nuna kan mi tawnte ah hian fimkhur a ngai khawp mai. A hnu lehzela kan zahna tur leh hrehawm kan tihna tur hi chu tih loh ngam a ṭha. Kawppui chungchângah pawh a ni vek tho.




Chutihrual chuan Tlankimi kha ka va zah pui tihna lam a ni lova. Mahse ka ngaihzawng hlui a lo nih tawhna leh a ngaihzawng hlui ka lo nih tawhna kha a thlak danglam theih tawh loh.




Dik tak chuan mihring hi a tam berah tu emaw ngaihzawng hlui kan lo ni vek tawh a. Hmangaih hmasa berte nena innei hi chu awm ve bawk mah se an khât pharh thung.




Chuvangin ngaihzawng kan neih dan chungchangah pawh hian fimkhur a ngai khawp mai. Dik tak chuan Tlankimi nen khan sex lo hmang hman ta ila chu tun ai hian hrehawm ka ti ang. Mahse zahpuiawm zawngin kan inkawp ngai miau lova. Chu chuan inrintawkna tam tak min pe thung.




Rara-i bulah chuan "Mipa tan chuan a hmasa ber ai a hnuhnung ber hi in hlu ṭhin" ka ti sup a.



"A hnuhnung ber tur chu i duh leh va zawng rawh" a lo ti nghat a. A ngeiawm thiam ve ṭhin ania.




"Duat hlak i duh em?" nui suk chunga ka tih chuan "I hur" a lo ti hlak a. A bulah chuan a romantic ve theih loh reng reng.




A hnu deuhah chuan thutak zet hian "Rara, ka mi tawn tawhte chu ka thlak danglam theih an ni lova. Tlankimi pawh ka ngaihzawng hlui a ni a, heihi chu i pawm thiam ve a ngai. Tun hun hi a pawimawh ber. Tunah chuan ka bialnu i ni tawh a, Tlankimi nen chuan kan tâwp fel tawh. Thîkna hi a awm lo theilo tih ka hre ve tho a, thîk duh suh tih pawh ka tum lo. Mahse ka duh che tihah hian chiang hle rawh" ka ti ta duah a.



A hmêl ka en chuan a pangngai ve deuh tawhin ka hria.




An in thleng ka thlah leh a, kan inthlah dawn chuan kan ṭha leh viau tawh.




Naupangho tuition pe turin ka tlang nghal a. Ka va thlen chuan ṭhenkhat chu an lo ṭhu far tawh mai.




Zirtîrna ka ṭan tak tak hma in Rara-i lak aṭangin message ka dawng a.



"Au Hriatpui, sorry" tih tê mai hi ania. Vawiin tlaia a lungawi loh vel chunchangah khan ngaihdam min rawn dil tih ka hrethiam mai. Ṭul lo ti viau mah ila ka nui lo theilo. Rara-i hi hmeichhe danglam a ni.




Dik tak chuan ka thiam loh zawk ah te pawh a ngaih theih a. Chuti chung chuan tlawm zawkah a rawn ṭang lawi a.



A hunah tak a indah sang thiam a, a ṭul phawt chuan a tlâwm hreh leh chuang lova. Lu thing nghut chungin ka nui ta ringawt a. He hmeichhia tak hi chu!



Naupang an lo thlen kim takah chuan an hriatthiam loh lai ka hrilhfiah zung zung a. Rara-i naupang rawn hruaite pawh kha zirtir an nawm bakah an man chak khawp mai.



Amah Rara-i lah chuan "Thla tâwpah ka naupang rawn hruaite fees kha a zatve in kan insem ang" a ti khauh mai a. A thutak nge a uang pawh hriat sen a ni tawh lo.



Tuition bân veleh damdawiin lamah ka tlang leh nghal a. Ka nu leh pa te bula Vantei riahpui ka tum ve tawh thu ka sawi chuan min hnial deuh a. Mahse amah Vantei berin "Min riahpui ve tawh rawh se, ka dam tawh alawm" a tih tak tlatah chuan min hnial zui bik lo.




In kan hun tâwp thleng ka nu leh pa te chu an awm ve a. A hnuah chuan an haw ta a. Naupangchhia kan ni tawh bik lova, ngaih ṭha deuh chuan min hawsan vein ka hria.



Mut hma in Vantei nen chuan kan titi a, a harh ṭhat bakah a dam deuh tawh bawk a. Kan titi tih lemah a titi ka ngaithla a ni zawk mah. A zirlai chungchang velte chu min hrilh siam siam a. A dam lohna avanga chawlh a nin zia te chu a sawi malh malh bawk a.




A hnu deuhah chuan Rara-i chungchâng ah bawk kan lut a.




"Û, in inngaizawng tak tak dawn mi?" a ti deuh ha a. Min zawt chiang bawk si, phat ka duh vang lam ni lovin chhan mai harsa ka ti ve tlat.




Ka nau a ni a, Rara-i ṭhiannu a ni bawk a. Nau te ṭhiannu han ngaihzawn tawp mai chu a âwm ang lo tihna lai chen ka nei ve tho a. Mahse ka rilru in a pawm tawh miau si a, tihngaihna dang a awm lo.




Ka lo buk tak nghutah chuan a lai ringawt a , ka nu bawk ka hrechhuak leh tawh!



"I lo lai daih a" ka tih chuan "A mak e" a lo ti hliai a.




"Min duh pui vak lo nge, i ṭhiannu tan min duh vak lo" ka lo ti fiamthu a. A lu a lo thing vat a.




"Chutiang vang lam pawh a nilo, ka duhpui tawn ve ve che u. Mahse a mak em alawm. In inhriat tirh khan i ngainat loh bakah i ngei hmel thei sia" a lo ti zung zung a.




A sawi dik khawp mai. Mahse ka hriat tirh ang reng kha a nihna a ni bik miau si lova. Ka ngainat loh chhan ber a nungchang khan min hip tlat tawh zawk a.




"Mipa leh hmeichhe inhip tawnna hi mak deuh mai ania" ka ti sup a. A lo bu nghat nghat mai.



"Ka nu leh pa te'n hria se mak an ti ve ngawt ang" a tih chuan "Nia" ka lo ti ringawt.



Hrilh hriat ve ngei chu ka duh a, mahse eng angin nge an ngaih ang tih ka hrethiam lova. Kan la inkawp rei chuang lo bawk a, ka la inpeih rih lo a ni ber.




"Mahse û, an duhpui che ka ring " Vantei chuan a lo ti leh khauh a. A phur hmel ngang mai.




Dik tak chuan Rara-i hi lainatin ngaina viau mah se ka kawppui tur atan em chuan mawi lo an ti ve deuh mai thei ani. Thil ni thei ngaihtuah ngai tam lutuk hi a hahthlâk ngawt mai.




Pathian zarah ni hnih a liam leh hnuin Vantei chu damdawiin aṭangin kan chhuahpui thei ta a. A hmelhmuh pawh a nuam tawh a, a pangngai leh tawh khawp mai. Mahse rilru erawh a nuam tak tak thei chuang lo, dam lo leh thut thei reng a ni bawk si. Doctor chuan thla tin check up nei turin min chah a. Hei chu kan ngai pawimawh khawp ang.




Naupangho term exam zawh ni a ni a, tuition pawh kan châwl a. Rara-i chu len chhuahpui ah ka sawm a, a lo phur vet vet khawp mai.



Buaina leh harsatna lian tham tawk em em lovin thla khat pum hlum kan inzui ve ta chu ania. Ka nu leh pa te'n an la hre lova, Vantei'n a hre leh tawp a nimai. Ka nu leh pa te chu ka inpeih thlap hunah ka la hrilh ve ang. Vantei pawh hria anga awm rih lo turin ka ti a. Min hrethiam khawp mai.




Kan inngaihzawn aṭang khan Rara-i chu kan inah a lo lang tam tawh lova. Vawihnih khat vel chiah a lo kal. Chu pawh thil pawimawh ah chauh.



Lo lêng turin ka sawm fo a, mahse amah tê reuh hian "A hma ang ngawr ngawrin kan awm thei tawhlo. Ka bialpa i ni tawh sia, ka lo kal reng kha a mawi hlei nem. Miin hre lo mah se an hriat hunah min sel peih dawn emai" a ti ve ṭung a. A ngaihtuahna te hi rin ai takin a puitling leh hlauh ṭhin a.




Chung a ngaihtuahna te chu ka ngaihtuah phak ve miah loh thil a nia. Naupangchhia ti viau mah ila a puitling ru leh tlat ṭhin.




Tlaiah chuan phur deuhin ka insiam a, ka chhuah lawk tur thu ka chhungte pawh ka hrilh tawh a. Anni chuan naupangho exam zo hahchhawl a, inti thawveng satliah turah min ngai.



Tlai dar 2 velah chuan Rara-i te inkawtah ka ding vang tawh a. Ka call chuan a lo chhuah thu a rawn sawi nghal a.



World Bank road lamah kan inphur thla vawk vawk a. Ka tlân chak chang chuan ka kawngah ṭhamin a ṭe leh chul ṭhin a. Kei erawh chuan ka lo nuihpui hawk hawk ṭhin thung a. A lungawi lo thei khawp mai.




A hmaa min zuina laiah khan ka kal pui leh a, ṭhutna awmah chuan kan ṭhu dun rial a. "Nuam i ti em?" ka tih chuan a lo nui tet tet a. A awmdan teh thlawt chu, a lai chu a ni chiah si lo ka hrethiam lo kher mai.




"Tinge a?" ka tih chuan "I inla romantic e" tiin a nui zui ham ham a. A ti ho leh zo ta vek a.




"Vanrawngbawl" ka ti hluk a, ka samah a rawn ṭham nghal chawt a "Vanlahriatpui, ka hmingpum hian min ko thla zen tawh suh" a lo ti hlak a.




"Hming mawi nu" ka tih chuan "Suala" a lo ti hlar a. Ka sam chu thlahin rum deuh hian min melh a, ka lo nui mai a.




"Tak takin Au Hriatpui, ka hmingpum hi mi hriat ka duh vak lo ania. A ṭhing ropui si" thutak zet hian a ti bai bai a. Ngaihtuah mang hlei lo hian "A mawi alawm" ka lo ti mai a.



Min melh thip lehpek khawp mai "A mawilo tihte chu ka hre ve reng aw. Ka pu ka huatna awmchhun chu ka hming hi ania. Heti em em a hming ṭhing hi min phuah a. A sawi dan chuan Pathian lak aṭanga a dawn ania, a dawng mak reng reng asin" a ti hlak hlak a.




A hmingpum chu a duh lo ve hle ni tur ani.




"A common loh bakah a sial alawm" ka lo ti vat a, hnem ka tum vang a ni pakhat bawk.




Rara-i chu a lo ner nang a "Common lo mah se miin 'A hmelṭhat tehreng nen a hming a ṭhing e' min ti mai tur asin" a lo ti nang nang a.




Thil ni thei tur âwm ang deuh deuh hi a sawi ṭhin a. A lungawi lo nasa ve bawk sia, a hming chungchang chu ka sawi zui pui duh tawhlo.




"I pa a ṭha em?" ka ti teh daih a, a lo hawi vat a. Ka zawhna chu mak a ti ve hle ni tur ani, a lo meng ralh mai.



An chhungkaw chungchang hi a sawi anih loh chuan ka zawt ngai hran lova. Mahse tunah hi chuan hriatchian a hun hle tawh niin ka hria. Amaha engkim tuar tur chuan ka phal tawhlo a ni ber.




Rara-i chu a lo bu nghat nghat a "A ṭha a nimai" a lo ti tawi tak a. Sawi zui a châk hmel loh kher mai. Mahse ka zawt lui ta tho a.




"I nu eng nge a an?" ka tih leh chuan min melh chiang tawh kher mai. "In chhungkaw boruak eng nge a an?" ka ti leh a. Ka duh ang thâl in ka la hrechiang lova, hriatchian a hun tawh takzet a ni.




"Aa...Au Hriatpui, thil dang sawi ang" a ti daih a. A hmela phurna bo ṭhak chu ka hmuh hmaih loh bakah hnual nghal rawih hmel hi a pu a. An chhungkaw boruak rit lutuk hi amahin a phur ve chu a ni si a.




"Rara, hriatchian che hi ka duh hle ania" ka lo ti thuk raih a. Chiang zetin kan inmelh a, a hnual hmêl nghal rawih chu hmuh hrehawm ka ti takzet a ni.



"Hriatchian tur pawh ka awm lo, min hmuh ang hi ka nimai" tiin za lo zet hian a lo nui a. "Pawn lama i landan aṭang hian i chhungril buaina ka hriat loh ring suh" ka lo ti khauh a.



Rilru hah hmel zet hian a lo thaw chhuak hak a.




"Ka pa leh ka nuhrawn takte hi chu tunlai tak hi an zia lai ber ania, mahse ka ni te hi" tiin a thaw chhuak halh a. Sawi harsa a tih hmel vang mai hian tih tawp ka tum tawhlo.




"I chungah an sual em ni?" ka tih chuan a lu a lo thing vat a "Chutiang lam pawh a nilo. Dik tak chuan ka pu ro thil min hnutchhiah hian ka phur a ti rit lutuk" a lo ti chuai raih a. Beisei phak bakin a buaina hi a lian tham dawn niin a lang.




"An chuhpui che em ni?" ka tih chuan a lo bu nghat a.



"Dik tak chuan ro thil tih vel hi engmah ka duhlo, mahse ka pu thil min hnutchhiah liau liau a ni a. Ka hnuchhawn ngam lo a ni ber. Mahse buaina lian zawk a thlen ai chuan engmah ka duhlo. Engmah nei lo a awm pawh ka pawiti lo. Mahse ka tel ve zel loh chuan thil hi a buai zual dawn a. Ka nuhrawn hian ka pu ro khawm a duh a, dik tak chuan ka pa hi ka pu fapa mal neihchhun a ni a. Ka nu chuan ka pain a khawm turah a ngai a. Mahse ka pu khan ka hmingin a lo dah vek si a. Ka ni te lah an ngaihdan a lo nilo nasa sia. Kei, naupang ve mai hminga ka pu ro zawng zawng awm tur kha an ngai ngam lova. Ka pu buaipui ber tute chu ka ni te pathum hi an nia, ka a hi a inrawlh ve eih ngai lo. Ṭawngkam mawi lo ni lo se hman tlak leh chhawr nahawmin a awm ngai miau lova. Dik tak chuan ka ni te ngaihdan chu âwm ka ti ve tho. Ka pu buaipuitu berte an ni miau a. Ka tan hian awmngaihna a vâng. Ka nu in min sawi khum reng a, ka ni te lah an bang lo. Sum hi kan buaina ber a lo nih hi " a ti nghat nghat a.




A ṭawngka chhuak aṭang reng chuan a rilru hah ve zia a hriat theih.




A ngaihtuahna buai nuaih chu âwm ka tih pui hliah hliah. Eng ang pawhin a pu ro chu ti ral dawn mah se a pa nge a ni te kutah a dah dawn tih a hrethiam silo. A pa kutah dah se a ni te'n neih dan kawng an dap dawn tho a. A ni te kutah dah se a nuhrawn rapthlak zia a hrechiang ve bawk si. A kutah awm lovin tu kutah pawh awm se buaina a chhuak dawn tho tho. A nun hi a hahthlâk ve hle dawn anih hi!




"Han sem ve ngawt dawn ila, pum bilh duh vek an ni bawk sia" a rawn ti leh halh a.




Mihring hi duhâmna te hian min lo tichhe thei khawp mai. Pathian mi tu leh fate pawh a lo zuah chuang lo anih hi.



"I pu inah chuan insawn daih la" ka tih chuan lu a lo thing vat a. "I tan a nuam zawk daih dawn asin" ka ti leh a.



"Aaa...Au Hriatpui, i hrethiam lo anih kha. Ka pa hi zu ruiin ka chungah ṭha viau lo mah se kalsan thei ka ni lo alawm. Ka nuhrawn nen chauha awm tur phei chuan ka kalsan phal lo. Sum an ngai pawimawh hlawm bawk a, engmah a nih loh zia hi ka fiah duh alawm" a lo ti teh tlat a.





A rilrua awm tûr âwm ang pawh ka hrethiam ve pha lo.



"Engtia fiah maw?" ka tih chuan "Ka tan chuan chhungkaw remna siam hi a harsa dawn tih ka hria a. Mahse siam ngei ka duh. Ka nun aṭanga fiah hi ka duh alawm" tum ruh hmel zet hian a lo ti a.




Engtin tak nge awm a tum hre lo mah ila kei chuan lo thlawp zel ka duh.



"Engkim, a bo a bang awm lovin min hrilh ṭhin la. Puih theihna che ka nei anih chuan ka pui zel ang che" ka lo ti nghet churh a. Phur zet hian a lo bu nghat nghat a, a samah chuan ka chûl thuak a. A hmui a lo ti pawrh tarh a.




Ka hawi kual a, tumah an awm lo tih ka hriat rual chuan zuk fawh mai ka tum a, a lo eu nghek a. A la hlauthâwn hmel em em zui a!



"Au Hriatpui..." a ti hliai a, a hmui ringawt ka lo melh tawh thung a. Ka fâwp chak ti tawp mai ang.



"Rara" ka tih chuan a hmui a lo chip hmak a, a la meng phawk em em zui a.




"Ka fâwp dawn che" ka ti teh ngawt a, a hma aia chip zawkin a hmui chu a ti chip leh a. Ṭawng chhuak si lo hian thâwm a rawn siam a.



"Awm ṭha la" ka tih chuan a lu a lo thing vat a. Ka vuan ṭung tawh bawk si, ani lah a lo eu vak tawh bawk sia. Miin kan awmdan chu ral aṭangin min rawn hmu sela mak min ti ngawt ang.




"Ka fâwp chhin ringawt ang che" ka tih leh ngawt a. Ka rilru a chawk buai vek tawh.




Min melh kiau chung chuan a hmui chu a rawn siam rem ve ta nge nge a. Ka kun hniam dawn lai chuan "A na dawn em?" a rawn ti pek a. Ka lo nui chhuak hawk mai.




Ka beisei phak bakin he nau hian tawnhriat a lo neilo anih hi!




"A na dawn lo" ka tih chuan pangngai deuh hian a lo indawh veleh mai a. Ka kun hniam leh lai mek chuan "A...Au Hriatpui" a ti leh hluai a. Ka han inla hrang leh rih a.



A chil a lo lem ri khawlh a, "Ka thawk a chham dawnin ka hria" tiin a meng kawk a. "Aw ti lo mai ang" ka ti ta tawp a. A hreh chung chung lo tih luih kha ka tan pawh a zahthlâk bakah a âwm ang lo emai.



Mahse Rara-i chuan "Aih, min fawp rawh" a lo ti veleh tlat thung a. Ka nghawngah a kut pahnihin min rawn chelh a, zam hmel zet hian a lo thaw chhuak a. A zah hmel ve deuh bawkin ka hria.




Ka lo hnial lo nasa asin aw, ka lamah pawt hnaiin a hmai bulah chuan ka phun sup a "Duhawm lutuk" ka ti sup a.




"Ka zam e, ka thin hi a phu chhuak dawnin ka hria. Engtin nge..." ti a a ṭawng lai mek chuan nui suk chungin a hmui chu ka hmuiin ka zuk khar chilh nghal hmiah a.




A ngaihtuahna a vah kual tir chhûng khan min hnial hman ka hlau em ani.




Ka fawhna chu a lo dawh mawl tawp a, mahse nuam ka ti lutuk tlat. A hmui chu pet kau in ril zet hian ka fawp a. Zei lo ti viau tur pawhin taksa che theilo fawp ang vel ka nia, a ngaihna a awm hlawl lo. Mahse nuam ka ti veng veng mai.




Ka inlahrang hlek a, min lo melh miau a, a bianga khuap run chung chuan "I hmui kha lo tiche ve rawh aw" ka ti sup a. Ka fawp zui lehnghal a. Reilote chhung chu a dawh mawl leh tawp phawt a. Mahse a rawn chêt ve deuh a, ka lo fawp uar sauh a.




Zei lo mah se a hmui a tih chêt rual chuan min ti phur kher mai.




Kan inthlah meuh chuan ka thaw chhuak ham ham a, ani pawh a lo thaw chhuak ve halh halh mai. A chil a lem ri khawlh a, ka lo nui suk a. Min melh kiau bawk sia, a duhawm tak tak ani.



"Ka thin a phu nasa mai" a lo ti halh a, ka lo nui mai a. "Nuam i ti em?" ka tih chuan a lo meng kalh ralh a.



"Tlankimi fawh hnu" a tih chuan ka lo rum nghut mai. "Thu dik chu a kha ṭhin" a lo ti leh khauh a. Dawt a sawi miau bawk silo, mahse sawi chhuah hun a ni ber lo.




"Ka zawhna kha chhâng ve mai la" ka tih chuan "In infâwp nasa tawh awm" a lo ti leh daih a. Thinrima sawi a nilo tih ka hria a, huatah pawh ka en duh bik lo.



"A aia nasa in ka la fawp ang che" ka tih chuan a lo nui hak a.



"I va zei reuh tak" min ti anih chu! Min melh chiang bawk sia. A ṭawngkam lang tlang lutuk avang chuan ka lai chiang ngang mai.



Ani lah chuan a lo hrethiam nasa mai sia "Au Hriatpui, Zeia" a rawn ti leh kher a. A va han nghal mai mai tak e aw.


"Khati kha chuan eng emaw pawh ka insum zo lo mai ang" a rawn ti leh ham ham zui a.




Vanrawngbawli zet hi chu, engmah sawi hreh a nei ngailo anih hi.



__________*__________*________*_________

(Ka regu lo viau chung pawha min lo hrethiam a, min lo nghak ṭhin tute ka tan in hlu)


Show post links
Top

[Ngaia]

AIZIAL
By CVL Awmpuii



Chapter 15



Râl lehlam ruama thing ding ruah te chu kan thlir dun a. Rara-i chu ka melh ṭhin a, a hmui a lo khawih leh neuh neuh zel a. Amahin a nui a nui a, eng nge maw a ngaihtuah leh pek tawh ni?



"Tinge khatia i awm reng a?" ka tih chuan a rawn hawi vat a, a hmui tawk zeuh chung chuan a nui sak a. "Ka nuih a za alawm" a lo ti mai a.




"Eng nge nuih zat tur awm a?" ka ti leh hram a, "Aww...a na dawn emaw ka tia, mahse a na tawp si lova" a ti a, za em em hian a nui ar ar bawk a.



Ka lo nui ve suk a "Na se tumah an infawp peih nang" ka lo ti nghut a, thinrim a sawi erawh ka ni lo.



"Fawh ka nuam ve tho em?" dilchhut zet hian a rawn ti a, a la thutak hmel em em mai lehnghâl a. A zawhna âtthlâk leh tlang lutuk avang chuan ka nui huk lo chauh. Min ti zak lek lek bawk.




Ka lo buk tak nghutah chuan a lungawi lehpek tawh lo. "Khatia tih khan pa ta viau ah i inngai ṭhin em ni?" tiin ka buk dan chu a zir kher a. A ner deuh nawng bawk a. Ṭawngka a chhan loh hi a haw ve hle anih hi.




"Ngaiah ka nei tawh alawm" ka lo ti pangngai ve mai a. Ner deuh nawk chung hian "Tun aṭang chuan sim tawh ang che. I duhdanin ka insiamrem zel a, ka duhdana insiam rem hi zir ve rawh" a ti hlak hlak a. A huat thu te hi a ho ve ania.




Mahse a sawi dik ve reng mai, a duhdana insiamrem ve pawh chu ka tih tur a ni.



"Yes boss" ka tih chuan a lo nui har har a. A huatthu a ho tluk zet hian a lawmna te hi a ho ania.




"Anih leh ka zawt leh ang che?" a tih chuan "Eng maw?" ka lo ti hu a.



"Fawh ka nuam ve tho em?" a rawn ti leh pek a. A dilchhut reuh tak tak a ni.



Chutia tlang taka min zawh takah chuan zep duh bik lovin "Nuam e" ka lo ti pangngai ve mai a. A lawm hmel em em mai lehnghâl a.



"I châkna ka ti chhuak chiang" a ti leh pek a, a mipa zawk ni siin ka lo ip ru ṭeuh mai.




"I mak thei phawng phawng" ka ti hluk a, chutah nui uar uar chung hian "Ka dawi dik chiang mai" a la ti ham ham zui a. Chhan zui chi ah pawh ka ngai tawh lo.




Mahse a hnuah chuan pangngai deuh hian "Ka rin loh vang che ni lovin keimah ka inrin zawh loh vang zawkin hmun falah awm fo lo ila ka duh. Hmeichhe sih hnip zetah min ngaih phah lo la. Keichu ka mawl lutuk a, hei vang hi ania bialpa pawh ka neih duh ngai loh. Min thlem heuh heuh la chu ka awn duai duai mai ang. Kum lamah kei ai i upa daih zawk a, kei aiin tawnhriat pawh i ngah tawh zawk dawn. Chuvang chuan upa zawk i nihna angin min dawm thiam la. Kei paw'n i thu ka awih viau ang" a lo ti duah a.





A thusawi chu mawl mang hle mah se ka lo hriatthiam pui khawp mai. Tlang deuh deuh a thu a sawi ṭhin hi ka duh chhan tak pakhat a ni bawk a.



"Thlêm ta heuh heuh che ila i duh ang maw?" ka lo ti fiamthu hmanhmawh a. Ka ban puamah min tawn chum pawp a "Mi thutak ve lai lai a" a lo ti bai bai mai.




Ka nui zui hawk hawk a, a ni pawh a nui veleh tho.




"Lungngai suh, ka bulah chuan i him ang" thu tak zet hian ka ti ta a. "Ka hria alawm" a lo ti vat a. A hmel pawh a nung sarh mai.




Ka thusawi chu ka sawi mai mai lo, tih tak zeta sawi ka ni. Tu pawh ngaizawng ila an zahawmna leh thianghlimna hi lak sak ka tum lo, ka duh lo bawk.




Mipa ṭhenkhat chuan dawihzepna leh mipa nih lohna angah ngai mah se kei chuan mipa ka nihna lai ka ti ve tlat a. Ka pa min fuihna ber pawh a ni bawk.




"Au Hriatpui" a lo ti leh hluai a, hetia min koh hian nuam ka ti viau tawh. Ngai a neih har ka ti a, hriat reng ka duh fo bawk.




"Ka tlin lohna leh fel lohna i hmuh chuan ngawi renga min kalsan lovin ṭha takin min hrilh la, insiamrem zel ka lo tum ang. Min hrilh chung pawha ka tling zo ngang lo anih chuan min kalsan mah la ka dem lovang che" thutak zet hian a lo ti a.




A thusawiah chuan mahni inrintawkna te, inngaitlâwm tak chung si a a indah sanna te ka hmu tlang thiam vek. Ka zah zual sawt a, ka duh zual sawt bawk.




A vawihnih nan ka fawp leh ta nge nge a, a lo ṭang ṭung tawh bik lova. A thiam ang tawkin min lo chhanglet ve a. A vawihnihna chauh a la ni bawk a, zir tur a la ngah khawp mai.




Kan inthlah hnu chuan mit chhing reng chungin a lo nui var var a, "Hmêlṭha lutuk" ka ti sup a. A rawn meng chhuak a, ka hnarah a rawn fawp zeuh anih chu !




"Kha kha eng nge?" ka tih chuan "Ka zûnin a phuar bet tlat dawn che" tiin a lo nui hak a. A zûn chuan min phuar bet der tawh chu anih hi!



"A zawng chhang tlak dawnin i hria em?" ka tih chuan hrethiam lo fe hian min lo melh a. A rik phawng phawng ang chiah hian rik ve phawng phawng loh chuan thu khuh hi a hrethiam ve lo.




"Infawh hi?" ka lo ti leh sup a, "Ka fawp hmasa ziah tawh ang che" zâm map lo hian a lo ti hmiah mai. Ka nui chhuak nghal hawk hawk tawh.



"Mipa chêt lakna hmasa tur alawm" ka ti a. A hmui a lo pet zeuh a "Ka duh hmasa tho che alawm" a lo ti khauh a. "Min bem hmasak duh chuan loh kha" ka tih chuan "Hei a hun takah i lo che tho alawm" a lo ti sam et a. Hnial ngaihna ka hre leh tawh lo.




Dar 4 velah kan haw ta chauh a, an inkawta ka thlah apiang hian ngaih ṭha zân lovin ka haw san fo mai. An chhungkaw buaina ka hre ve kur si a, harsatna lian tham a tawk mai ang tih ka hlau ṭhin.




Mahse in ka thlen hi chuan a ṭhat thu a rawn sawi vat zel a. Ka lo thaw huai tawh ṭhin.



Kar hnih vel tuition kan chawlh hnu chuan naupangho pawhin sikul an lut leh ṭan tawh a. Tuition pawh kan kal leh ṭan a. Result la chhuak lo mah se an sawi kalhmangah an ti ṭha ve pangngai turah ka ngai.



Zirtawpni zanah chuan Mission Vengthlang a kan inpui lamah chhûngkua in kan leng thla a. Ka pa âwl zan a nih vanga leng ta hlauh kan nia.



Ka ni Matei te chhungkua pawh an lo leng ve a, naupang nen kan nih nawk avangin kan ri ve laih laih mai.



Choka lamah ka ṭhu a, Vantei thingpui lum ka lo pui ve zeuh zeuh bawk a.



A hnu deuhah chuan ka pi a lo kal veleh a, ka bulah a rawn ṭhu thla a.



Ka dara rawn beng dat chung hian "I tuition pek ho chu eng nge an an dawn a?" a lo ti a. A kum a upa ve tawh bawk a, a ṭawng hi a fiah vak tawh lova, mahse a la fing viau thung.




"Pathian zarah an ti ṭha ve turah chuan ka ngai a" ka lo ti sup a.




Chutah thil dang a rawn sawi leh daih a. "Mi hmel kan hmu hnai ang chu tih lai mekin i lo tawp san daih a" a lo ti khauh a. Tlankimi nen kan chungchang a sawina a ni tih ka hria.




Sawi leh sawi hnu ka chhûngte zawng zawng hian Tlankimi kha an hmelhriat hman vek a, an innel tlang a. Ka zir zawh huna innei tur angah min ngai vek bawk kha ania.




Mahse kan thu loh zia chu hei, kan tâwp fel der a. Midang kan tawng leh ve ve tawh chu a ni sia.




"Pathian remruat loh hi a awm ve alawm" ka lo ti mai a. Ka nunhlui ami a ni tawh a, ka sawi zui vak peihlo.




Chuan mak tak maiin bum ni hian ka inhre tlat ṭhin a. Kan inṭhen aṭanga thla pawh a ral chian em hmain ngaihzawng dang a nei leh thei ania. Ka la duh tihna lam ni lovin mipa ka nihna ang hian tlawm thlak ka ti.




Ka pi chu a lo bu nghat nghat a "Ni e, Pathian remruat loh hi an awm ve alawm. I la upa lutuk chuang lova, heti hian la awm ve rih rawh" a lo ti ṭha veleh mai a.




Thil dang a sawi zui lo chu ka lawm khawp mai.



Ngaihtuahna dang daih ka lo nei a. Ka chhungte ho hian Rara-i nen kan chungchang hre ta se eng ang takin nge an ngaih ang aw ka ti. An ngaina a, fel an ti em em a, mahse ka kawppui ang ni lovin ka nau ṭhiannu a nihna angin ania. Ka kawppui anga an hriat hunah chuan a ṭhawng ve hlawm viau ang.




Min pawm pui ang nge amah an duh loh vang lam ni lovin awm ang lo an tih vang zawkin min pawh ṭhen an tum zawk ang tih ka hrethiam lo.




Mahse ka nu leh pa te hi chuan ka duh dan min zah sak ngeiin ka ring. Fate duh leh duh loh ngai pawimawh ṭhin an ni tlat a.



Kan lêng chu dar 11 dawnah kan haw a, kan leng thla khat ve bawk a. Chuvanga leng rei ta viau pawh chu kan nia.



Ka mut rual chuan phone ka check zung zung a, Rara-i chuan ka message pawh a la hmu lo. Dar 10 vel daih kha a last seen a ni tawh a. Zan tir lamah khan a mut a chhuah thu a sawi daih tawh a. A lo muhil daih pawh a nimai thei ani.




Ka ṭhianpa Dina message a lo awm ve teh khiah a "Hmeichhe ṭha deuh hmelhriat tir tur che ka nei ania" a lo ti a.



"I bialnu thar maw?" ka lo ti vat a. Ani pawh hi thla hmasa lawk khan a bialnu nen an inṭhen a. Keini ang takin inkawp rei ve lo mah se kum khat ṭha zen zawn chu an inkawp ve hman a. An inṭhen chhan a ṭhiante tumah hian kan hrelo. Amah hian a sawi ṭha duh miau lova, zawh zui chi ah kan ngailo. Chhan ṭha tawk tak chu a awm a ni phawt ang.




"Ni lo ni lo" a rawn ti a, hmaichhana inbia chu ni ila a phun leh bul bul tawh ang.



"Sawi la" ka lo ti ringawt a, ka message lah chu a seen zung zung zel a.




"Kha, a hmaa ṭhianho inhmuh khawm ṭum a ka hrilh tawh che kha ania. Tun thlengin a la vei che ania aw. Tlankimi nen in inṭhen thu a hriat te khan âwm leh mawi pawh thlu lovin i number min dil tawp a. Mahse nangmah râwn phawt che ka duh avangin ka lo pe mai lova. I uksak ta vak si lova, amah phei chu ka hrilh leh tawh lem hlei lova. Mahse zanin khan i number min rawn dil leh a, ka lo pe ta mai ania " a rawn ti duah a.




A sawi chhuah takah chuan ka hrechhuak veleh chiah. Ṭhianho kan awmkhawm lai khan chu hmeichhe chanchin chu min hrilh tak alawm. Ka ngaihtuahna a Rara-i awm tirh lai vel kha ania, ka lo uk sak lem hlei lo kha ania. Tunah pawh eng teh ualah ka lo ngai chuang lova.




Ka chhan mai loh avang chuan a rawn type zawm leh nghal a. Ka lo ngaichâng ve reng a.



"A hming chu Nunmawii ania, a lo biak hlauh che chuan lo be chhe suh aw. I tân ka hual ania, in inhmeh dawn lutuk. Tlankimi te chuan a tluk teuhlo" a rawn ti leh a.




Tlankimi lakah ka rilru ka la pe reng emaw a ti niin ka hria. Ka ngaihzawng neih leh tawh thû hi ka ṭhiante tumahin an la hre lova. A âwm lo hran lo. Hun kan nei lo tlâng em a, kan buai tlâng bawk si a. Hmeichhia angin kan inbe reng ve hlawm bawk si lo, sawina hun a la awm lo ani.




Tun hun hi hrilh hun tak niin ka hria a, tlang deuhin ka sawi ta a.




"Ṭhianpa, midang ka nei tawh" ka va ti ringawt a, a hrethiam vek dawn tih ka hria.




A reh vung vung hnu chuan a rawn call ta a. A call ka lak rual rual chuan "Eng nge i sawi awmzia?" a rawn ti hluai a, a phur hmel ngang mai.



"Midang ka nei tawh" ka lo ti leh sup a, Dina hi chu ka ṭhiante ah pawh ka hnaih zual bik a ni a. Lo hre lawk mah se ka pawiti vak lo.




"I va sawi lo ve, i va inthup thei ve a" a rawn ti a, a âw ah chuan lungawi lohna lam ai mahin nuihzat na a ri telin ka hria. Min lawmpui vang zawk pawh a ni mai thei.




"Sawi na hun a la awm lo em alawm" ka tih chuan "Tunge?" a rawn ti vat a. Sawi viau pawh ni ila a hriat ka ring chiah lova. "Nakinah ka la inhmelhriat tir ang che u" ka ti ta zawk a. A lo phur khawp mai.




"Nunmawii chu a va khawngaih thlak dawn ve mawle, a duh ve viau che asin. A lo biak che chuan lo be chhe chuang suh aw" a rawn ti leh hram a.




"Beiseina lo siam sak te chu a..." ka tih lai mek chuan min lo pawt chat a. "Beiseina i siam sak dawn tihna a ni hlei nem. Lo be chhe suh ka ti mai alawm. Ka lo sawi phur pui nasa tawh sia, ka tan tak pawh a inthlahrun awm alawm. Lo be chhe lo la a nimai" a rawn ti leh zung zung a. Ka lo umm e liam mai mai ta ringawt a.




A ṭhiannu lo biak ṭhat pawh chu ka tum lem hlei lova.




Midang hian eng ang takin nge an ngaih chu ka hrelo na in ngaihzawng neih reng laiin midang biak kual hi ka tih zâwng a ni ve vak lo. Min lo beisei tute beiseina thlawn siam sak phei chu ka duh lo lehzual.




Mahse thil reng reng hi a âwm tawk leh mawi hnai tawk a awm ve a. Zahawm taka min lo bia anih chuan pangngai taka lo chhan hi ka pawiti lo. Mi puitling zia ni zawk bawkin ka hria.




Chu chu Rara-i min rawn biak tirh aṭanga ka zir chhuah a ni bawk. Beiseina siam sak lova an rilru damna tura a beidawn thlak zia hriat tir hi ka pawiti lo.



Rara-i hi chu a danglam a, a danglamna ka hmu thiam hma hlauh hi ka vanneihna a ni bawk.




Zingkar hma deuhah Rara-i chuan min rawn call a, ka rin ang chiahin nizanah khan a lo mu hma daih hi a lo nia. Ham bai bai chungin a rawn sawi a.



"I thawh veleh min lo bia em ni?" ka tih chuan "Aw ka hrechhuak hmasa ber che a" pangngai tak hian a rawn ti a. Ka lawm tawk a van tling tak.



A thawh hlim a a hriatchhuah hmasa ber ka ni chu ka lawm a ni. Zingkar aṭanga chutiang thu dawn chu a lâwmawm viau bawk.



"College ka van kal peihlo tak" a rawn tih chuan "Kal ngei chu a ngai ang" ka lo ti vat a. "Ka peihlo ka ti mai mai alawm, ka kal dawn reng" a lo ti vat a.



College kal peih loh thu hi tuk tin a rawn sawi a, a kal ngei ngei tho zel. Zirna kawngah hian thatchhe deuh angin lang mah se Vantei sawi dan chuan a tichhe pawl a ni ngai miah lo. A ti ṭha viau ngailo bawk a, mahse a vantlâng pawl chu a ni awm e.




"Vawiin tlai chu tuition ka lo kal ve" pangchang zet hian a rawn ti a. "Maths i zir ve loh kha" nui hawk chung hian ka lo ti a.




"Min hmu châk lo em ni?" a lo ti bai bai a,a inti pangchang ve viau chuan ka hria. Chu chu ka pawi tih loh zawng tak ani.




"Tuition pek hma in i college bang ka lo hruai ang che" ka tih chuan min lo hnial vat a. Tuition pekna a lo kal a duh zawk thu a sawi leh a, min dil tak ṭung si ah ka hnial fithla ṭhak thei ta bik lova. "I lo kal dawn nia" ka tih takah chuan a lawm kher mai.




Tukṭhuan ei laiin ka pa chuan "Hriatpui, hmeichhe dang an awm tawh em?" a lo ti khauh a. Min melh lem hlei lo hian chaw chu a bar zawm mawlh mawlh a.



Vantei nen kan lo in melh chiang ngang mai. Hetiang lampang hi ka sawi anih loh chuan min zawt ngai lem lova. Chutia min zawt thut pawh chu mak ka ti khawp mai.



Ka chhang mai dawn a, mahse ka chip leh rih a. Sawi hun a ni chiah ang em ka hrethiam lo a ni.




Ka âng zawk a, mahse ka pa bawk chu a lo ṭawng leh a. "Ka zawt mai mai che anih kha. Chutia hmanhmawh tura tur rum rum che ka duhlo. Nupui pasal neih hi a hmanhmawh thlak miah lo ania. Tunlaiah senior deuha an hriat chu 'Nei ve tawh rawh' an han inti ngawt zel a. Hei vangte hian hmanhmawh duh loh tur. Rilru fîm taka ngaihtuah fel a, neih chauh tur. Inkawp rei leh rei lohte hi nupa nun nghehna a ni chuang lo. I nu nen pawh kum khat tling lo hret kan inzui a, kan inneihna chu a hlawhtlin em em tho hi. Pathian remruat hi chu a dik thlup zel" a lo ti duah a.





Ka nu chuan min lo fiam zauh a "Tu emaw chu an awmin ka hria" a lo ti khauh a, awmze nei zet hian min nuih bawk a. Vantei meng tal tap chu ka hmu zui nghal a. Eng emaw tak ka nu bulah a lo sawi tih ka hrethiam nghal mai.




Ka pa chuan "Hriat ve loh ka lo nei zawk em ni?" a lo ti hu a. "I fapa hian a inpeih hunah a la hrilh mai ang che" ka nu chuan a lo ti vat a. Kan boruak chu engtin emaw riau hian a zangkhai a.




Ka nu hmel ka en chuan min pawm pui dawnin ka hria. Vantei inthiamlo hmel chuan ka nuih a tiza zawk. Min zep pui rih turin ka ti kha ania. Ka nu lakah chuan a lo zep thei bik lo ania nge. Ka dem hran lo, ka nu nen an inzawmna hi a ṭha em a, tum loh deuhin an lo sawi chhuak pawh a nimai thei.




Tlaiah chuan tuition ka pe leh a, sawi lawk ang ngeiin Rara-i pawh a lo kal ve a. Dawhthei deuhin naupangho hnungah chuan a lo ṭhu ve ran a. Min tibuai lo ve khawp mai.




Tuition kal lai ni ve ang mai hian lehkhabu leh pen a inchhawp ve a, ka sawifiah lai chuan uluk deuhin min lo en ve ṭhin a. A lehkhabu ah chuan engmah a ziak zui lem hlei lova.




Naupangho haw hnu chuan ka va pan vat a, "I lo ning hman em?" ka tih chuan lu a lo thing vat a. A bianga ka piai zeuh chu a lo ṭeu hlar mai.




"Biang a chât duh ania" a lo ti hlar a, ka lo nui mai a.




"Ka thlah hma che in lengkual ila" ka tih chuan lu a lo thing vat a "Min thlah nghal zawk rawh" a lo ti a.




"Min lo nghah man a va awm dawn lo ve" chal chuat tap hian ka ti a. "Awm e, hei kan inhmuh theih phah alawm" uar zet hian a lo ti a.



"Naktûkah lo kal leh la" ka tih chuan "Ka peih tawh lo e a" a lo ti vat a. "I hnê nghal der elo?" nui hawk chung hian ka ti a.




Lu thing mat mat chung hian "Hnê lo nasa, naupangho mithmuha lo awm ve sek chu a mawi lo emai" a ti ve ngei a. Naupangho a tih chuan ka nuih a tiza tlat pek a.



"In inrual khat reng ang a" ka tih chuan a lo duhlo ve nasa lutuk. "Ka chhang chhang leh te vel an nih kha" a lo ti hmarh hmarh a. Kan inti upa leh tawh viau e.




Kan haw hma in ka pi te inah ka pên pui zuai a, ṭum danga pangngai taka awm ṭhin kha a lai thar tlat pek a.



Ka pi chuan "Engtin nge in rawn inzui luh teh nawlh a?" a lo ti hliai a. Rara-i chuan chhan mai a tum loh avangin ka uang châk tlat pek a "Tuition a lo kal ve alawm" ka ti a. Fridge chhunga tui chu lachhuak in ka inzui khawlh khawlh a. Rara-i ka va melh chuan a lo meng tur nasa mai.




Ka pi lah chuan hrethiam lo fe hian "Vantei te nen college in kal ho tho sia" a lo ti he haw a. Rara-i chuan a nuih tlawn ringawt tawh. A ngawi kar rengte chu a va inhmeh lo tak e aw.



Ka pu chuan "Rara-i chu i lo la nau deuh a nimaw. Vantei te nen in inrual khat turah ka lo ngai a" a lo ti ve chuar chuar a.



Ka ṭawng duh tawh si lova, Rara-i insawifiahna tur chu nui vur vur chungin ka lo ngaichâng ve ren rawn a.



Rum zeta min rawn melh hnu ah ka pi te chu a chhang ta a.



"Au Hriatpuia hi ka lo pui lawk a, naupangho enkawl hi a la thiam vak lova, zirtir a ngai ṭhin a. Kan vêng naupang pathum an lo kal ve bawk a. Chûngho thlah pah chuan ka rawn pui mawle " a lo ti ham ham a. Dawt sawi hmel pawh a pu lo, a sawi tlang par par mai.




Ka pi leh pu te pawh chu an nui ta hawk hawk a. A insawifiah hnehsawh lutuk chu mak ka lo ti zawk.




Bike-a kan inphurh haw hnu chuan a phun hlak hlak a, ka nuih liam pui mai mai takah chuan a lungawilo rei bik lo.




Zanah chuan number hlang tawp aṭangin message ka dawng a. "Hriatpuia a ni tiraw?" tih tê mai hi ania.




Thu pawimawh a nih takin tih thil thu ah "Aw ni e" ka lo ti ṭha ve mai a. "Dina ṭhiannu ka nia, ka lo be ve tawp che" a rawn tih chuan Nunmawii a ni tih ka hre chawpchilh nghal a. A bio ka check chuan Nunmawii a lo inti rêng bawk a.




Ka seen ringawt a, chhan zui loh a fuh berin ka hria. Chhânna tur chhan ka nei lo bawk a.




Sawi hmaih theih loh chu Rara-i hi ka rin aiin a thikthu a chhe zek a. Tlankimi nen min hmuh dun aṭang khan ka hrechiang tawh. A thik tur thil reng reng chu tih ka tum lo.




Chhan zui loh ka duh teh lul nen message dang min rawn thawn leh nghal a. "Naupang tuition i pe ṭhîn tiraw?" a rawn ti leh a. Pangngai takin min rawn be miau a, seen ringawt thu a awm lo a.




"Aw" ka ti ringawt a, a seen a, a reh zui ve mai bawk a. Rara-i nen zan rei tawk tak thleng kan inbia a. Thu ho tê tê kan sawi a, a ṭawngkam mak sak zet zet chuan min ti nui nasa leh pek tawh kher mai.




Ka Tuition pe zo tlaia ka haw chu kan inah a lo awm ve teh mial a. Vantei nen an college bang an rawn inzui haw anih ka ring. Kan inngaihzawn aṭang hian a lo lêng vak tawh ngai lova. Sawi tawh ang khan a mawi a ti ve tlat a. A lo lên luh hi chu chhiar tham chauh a ni. Inbe reng mah ila a lo kal dawn hian a sawi lawk ngai lova. Tun ṭum pawh a sawi lawk lehpek tawh lo.




Ka chhûngte pawh an lo awm kim ṭhap a. An titi kalhmangah Rara-i chu Vantei'n zanriah ei turin a sawm a, a lo ei dawn anih hmel.




Ka inbual zawh hnu chuan ka va ṭhu chhuak veleh a. Eirawng an bawl chhungin ka pa nen chuan sitting room lamah kan lo inkawm a. Ka pa thusawi ka ngaithla a ni zawk mah. Ka pi (ka nu nu) dam ṭhat loh thu vel a lo sawi a, choka lam aṭangin ka nu in a lo zawm zeuh zeuh bawk a.




Rara-i pek chuan "Au Hriatpui, i va inla cool ve" a lo ti pek a. "Cool em ni?" ka lo ti ṭha ve mai a. Engtia awm tur ber nge pawh ka hrethiam lo, awmdan min ti thiam lo a ni ber. A ni chu a ngai reng a, keimah zawk hi ka ni deuh huih mai.





"I titau em ni?" a lo ti khauh a, a thusawi awmzia ka hriatthiam loh avang chuan chal chuar tap hian ka lo melh a. Choka ah a la awm reng a, sitting room leh choka hi daidanna a awm lem loh avangin kan inhmu tlang thei vek a.




"Eng maw?" ka lo ti fan ruih a, "Theihnghilh rawh" tiin ka nu chu a biak zawm daih a. Ka phone hmet mual mual chung chuan an titi ah beng ka lo chhi ve reng a.




An mipa duh zawng te sawiin an titi a, ka nu chuan a lo nuih pui hak hak reng a. Ka pa chuan ka ep chiahah ṭhu in ngun thluk zet hian lehkhabu a chhiar bawk a.




Vantei chuan "Mipa hi chu a tâwk chiaha zei ni se, tenawm kher lo se" a ti a. Ka nu in a lo nuihpui nasa mai.



Rara-i chuan "Pa Sangzuala ang hi ka duh" a lo ti ve hlut a. Ka pa pawh a lo nui ve suk mai "I Nu Zualtei hi chu vannei deuh mai asin" a lo ti uang a. Ka nu lah chu a lo duai duh bik der lo "I pa Sangzuala hian ka duh lo chung min ngaizawng a. Ka hlauh vang mai maiin ka ngaizawng ve mai mai alawm" a ti a. An nuih a za ngang mai.




Ka pa pawh a lo nui ve hawk hawk a, chhungkua chu heti tur hi a ni.




Vantei chuan "Keichu pasal nei dawn pawh ni ila ka pa ang ka duh, ka nu ang hmeichhia nih ka tum bawk ang a" thutak zet hian a lo ti a. Ka nu leh pa te lawm tawk a tling leh em em dawn tih ka hria.




"Keichu Au Hriatpuia hi a ni deuh tawp mai" Rara-i chuan a lo ti pek a. An nuih hawk hawk lai chuan Vantei'n "Ka û chu a chut emai" a lo ti nghat a.




Rara-i ngaihdan a lo ni lo ngang mai "A zei rapthlak aw" uar zet hian a lo ti e. A lam ka hawi nghal vat a, ka chhûngte pawh an meng tal tap mai.




Amah lah chuan sawi hreh sit set a nei tawh si lo "Min fawp a, ka thiamlo a, min zirtir thlap" a lo ti leh zat zat a. A nui zui har har a.




Ka chhûngte chu meng phawk tawh tak an ni, "Rara..." sehchilh zet hian ka ti a. Duh tawk tura ka mitmei na chu a hrethiam lo nge "Eehh, a zak vel" a la ti ta deuh deuh a.




Ka chhûngte chu an nui tawp tawh, ka lo zak chem chem thung a. A ṭawng phawng phawng ṭhin hi lawmin nui nasa ṭhin mah ila tun ṭum chu a za thlawt lo.




"Ih maw...Au Hriatpuia chuan infawh a thiam lutuk. Keimah zawk khan..." a tih lai mek chuan ka tho vut a. Ka duhtawk tir lo anih chuan a sawi vek ang a. Kan mualpho viau ang. Chhûngte bul mah nise kan inngaizawng tih pawh an la hre lova, a nihin a nilo reng reng.




A hmui ka va hup chuan za zet hian a nui har har a. Vantei chuan zah hmel deuh hian min lo en a, ka nu leh pa te chu an inmelh tawn zak zak a. Nuihza insum hmel hi an pu bawk a.




Tun bak baka zah hi ka la nei ngailo.




"Sawi âwm leh âwm lo hi hre rawh" ka ti hluk a, a nuih a za laklawh tawh bawk si. Ka thusawi ngai pawimawh lo zet chuan uar zet hian a nui a. Hmeichhia zawk a ni a, zak viau tur a ni zawk asin mawle.




A hmui ka la hup reng a, ka chhungte nuihza hmel chuan min ti zak zual kher mai.




Chutah Rara-i chuan "Min thlah teh, ka sawi tawhlo" thei leh thei lo hian a rawn ti a.




Ka pa in "A thawk a chham ang" a rawn tih takah chuan ka thlah ve ta hram a. Ka thlah rual chuan mitko san auh auhin min rawn nuih a, min cho hmel em em mai lehnghâl a. Ka haw reuh tak tak ani.




Ngawi rengin, zak ru ṭeuh chungin ka ṭhutna ngaiah chuan ka va let leh a. Ka pa chuan min hrethiam aniang min ngaihsak lo ang deuh hian lehkhabu chu a chhiar leh a.




Chutah ka nu chuan dilchhut fe hian "Au Hriatpuia chu a lo zei viau a maw" fiamthu deuh reuh hian a lo ti leh hram pek a. Ka nu nghal zia ka hre ve chiah.




Rara-in a kâ a ân leh lai mek chuan "Vanrawngbawl" ka lo ti hluk a. A lei min lo chhuah khum vak ringawt a. Ka la hau khawp ang.




Kan zanriah ei boruak te chu ka zo lo vek tawh a ni ber. Ka lai huih a, Rara-i lah chu a ṭawng zat zat reng a. A sawi chhuak leh ang tih mawlh ka lo hlau. Bet lo zet hian chaw chu ka ei a, ka puar pawhin ka hrelo. Midangho chu pangngai takin an awm leh vek tawh a, an haider ni berin ka hria.




Rara-in haw a duh tawh thu a sawi chuan ka pa in min lo fiam zauh a "I thlah dawn nge ka thlah dawn?" a tih chuan lai anga lan ka duh si lo. Ka lai ru tho bawk si, a hrehawm tak tak a ni.




"Ke in haw rawh se" ka lo ti hmuk a. Amah lah chu ngeiawm zet hian a lo nui har har a. Ke a a haw ka phal dawn lo tih hrechiang ber tu a ni miau a ni.



Ka nu chuan "A tlai zel dawn a, zuk thlah vat rawh Hriatpui" pangngai tak hian a lo ti a. Ka tho chhuak zui ve mai bawk a.




Motor khalh paha hauh ka duh avangin car ka keng a. Ka hau zui mawlh mawlh ta rêng a.



"Thlasik mau puah phawng phawng tawh suh, khatiang kha chhungte bula sawi chi pawh a nilo. Ka tan a zahthlâk bakah i tan pawh a mawi lo ania. Ka chhungte hmaizah a na lutuk ringawt. Ṭha lo deuha inkawp emaw te min lo ti ang a, kan hmalam hun a thim vek mai ang" ka ti hluk hluk a.




Ka thutak tehlul nen thawveng zet hian "A ho emai a" a lo ti a. Duhdah zet hian a ṭhu a, a insiam chhe reng bawk a.




Ka lo rum nghut a, "A ho lo, thil kalphung ka sawi anih chu. Chhûngte bula sawi âwm leh âwm lo hi a awm ve ania. Khatiang kha chu a zahthlâk lutuk ringawt" dam deuh zawk hian ka ti leh a.




Ka va melh chuan ngeiawm zetin ka ṭawng dan zir chuan a lo insiam chhe kual vel a. A hahthlâk lampang hret chu a ni.



"Vanrawngbawl " ka ti nghut a, "Vanrawngbawl " ka sawi ang ki chiah chuan a rawn ti veleh a. Henu hi chu tihngaihna hlawl a awm lo.




"Min ngai pawimawh rawh" ka ti nghut a, a ngawi kar tawh a. Keipaw'n engmah ka sawi zui tawhlo.




An inkawt kan thlen chuan chhuk mai lovin "Au Hriatpui " a lo ti leh hluai a, a lam ka hawi chuan ngainat awm zet hian min lo nuih a.




"I duh loh zawng ka lo sawi palh anih chuan tihpalh aw. Ka ti tawh miah lovang" a lo ti sep a. A hmel landan ka en chuan ka inthiamlo leh hnuhnawh zawk.




A samah chuan ka va chul zeuh a, "Duh loh zawng sawi love. Ka sawi awmzia tak chu i hriatthiam ka ring. Tun aṭang chuan sawi âwm leh âwm lo hre tawh la" ka ti a, naupang thuawih deuh ang mai hian a lo bu nghat nghat a.




Kan boruak tih zangkhai tum tak chuan "I sawi chhuah zel chuan ka romantic tawh lovang" ka ti fiamthu a. A lo nui ve hak hak mai.




Ka lamah a rawn tawlh hnai a, ka hmuiah a rawn fawp zeuh a "Ka fawp ziah ang che" a ti khanglang a. Ka lo nui lum hawk mai.



"Mipa emaw hi i inti ṭhin a" ka tih chuan a lo ner nang a. "Nuam ka ti dawn riau mai" a lo ti teh daih a. "Eng maw?" ka tih chuan "Ele infawh hi" a lo ti sam thên a.




Kan inthlah fel meuh chuan kan dik leh thlup tawh.




Ka haw veleh ka pa in min titi pui nghal a. Ka nu leh Vantei te chu an mu tawh anih ka ring, an reh emai.




"Rara-i nen chuan in ti ve deuh tak tak em ni?" a tih chuan zep buai lovin ka aw hmiah a. A bu deuh nghut a, a nuih a za deuh bawkin ka hria.





"I nu nen kan lo hre thawi tawh a, nau angin i en tho emaw kan lo tia. Kan lo uksak vak lova" a ti sup a.



A ngaihdan chu âwm ka ti hliah hliah. A laka hetiang rilru ka pu ta mai hi keipawhin mak ka inti.



"Eng nge i ngaihdan?" ka ti tawl a, a âw a lo thian khurh a.




"I ngaihdan dan a nimai. Mipa puitling i ni tawh a, ngaihdan hran nei rual i ni tawh bawk a. I nu nen hian fate nuna inrawlh thuk vak hi kan tum lem lo. Pathian hriatna kawnga kaihhruai che u hi kan tih makmawh a nimai a. Kan thutiam pawh a ni a, chu thil chu theihtâwp in kan hlen ve bawkin ka hria a. Chuvang chuan in kawppui thlan kawngah hi chuan rawn inrawlh kan tum lo. In kawppui turte an ni a. Mahse duhzawng hi chu kan lo nei ve tho a. Rara-i hi chu kan beisei loh lam daih ania, a la nau ve bawk si a. Mahse le, induhna te hian engmah a thliar si lova. Âwm leh mawi takin inkawp ula, Pathian dan zam bawhchhe lo ula. Bawhchhe turin kawng inhawn lo bawk ula a nimai" a ti ta duah a.





A thusawi chuan min thlamuan khawp mai. Min pawmpui thu sawi dawt lo mah se min hnial chuang lova. Heti hi chuan rilru dam deuhin ka awm thei tawh ang.



Zanah chuan Nunmawii bawk khan min rawn be leh a, "Kan tlum ber hi tuition chu lo kal tir ve kan rilruk deuh a. A thiam thei vak lova. A rem chuan a lo kal tir ve theih ang em le?" a rawn ti a.



"In duh phawt chuan rem lutuk e" tiin ka Tuition pek ṭhin na te chu pangngai takin ka hrilh ve mai a.



"A lâwmawm nasat chu, karleh aṭangin lo zawm tur kan tum dawn nia. Ka lawm lutuk e aw" a rawn ti a. Ka lo like ringawt tawh. Hna thil a ni miau a, pangngai takin zawhna min rawn zawt a, ka lo chhang satliah veah ka ngai a. Dina rawn sawi ang ho kha chu ka lo haider hmiah.




Hun remchang hmasa berah Rara-i chu Dina te inah ka len pui a, ka inhmelhriat tir a. Mak tak maiin an lo inhre sa reng a. Mahse inhre ṭha lutuk chu an nih hmel loh. Inhmelhriat satliah ang kha an lo ni reng a ni âwm e.




Duna chuan thingpui min lum sak te a tum zet a, mahse Rara-i chu a hmanhmawh em a. Kan in ta lem lova. Inhmelhriat tir lawk tura hruai hrim hrim kha ka ni a. An lo inhre sa tho bawk a, kan haw leh ta vat zawk a.




Eng vang nge maw ni Rara-i chu a nguai ta riau hian ka hria a. A chhan ka zawh lah chuan "Ka awm a nuamlo" a ti ringawt a. Ka ngaih a ṭhat phah der lo.



"Engtin nge Dina te nen khan in lo inhriat daih daih a?" ka tih chuan "Aizawl khaw chhunga awm ṭheuh ṭheuh, hmelhriat ka ngah alawm" a lo ti mai a. A nui lui sak bawk a. Mahse eng emaw tak chu a hmelah a inphûm ru chiang ani.




___________*___________*__________*_______


Show post links
Top

[Ngaia]

AIZIAL
By CVL Awmpuii



Chapter 16



Ka motor khalh laite chuan a hmêl chu ka en leh ṭhîn a, a dik mawlh lo a ni. Thla hnih lai kan lo inzui ve ta bawk a, a hmel danglam chu ka hriat hmaih loh nasa lutuk.




Mahse amah berin engmah a sawi duh tak si lovah chuan zawh zui zel chi ah ka ngai ta lova. Dina hnen aṭang chuan eng emaw tak chu hriat ka tum tho.


An in thleng ka thlah a, ṭha tak chuan kan inthlah veleh tho a. Mahse ka ngaih a ṭha zan chuang lo.



Zana kan inbiak pawhin pangngai takin kan inbia a, vawiin tlaia thil thleng vel chu kan sawi zui tawh lo.




Dina zawh ka tum lai mek chuan amah zawkin min rawn text a.



"I bialnu chu" tih tê mai hi a rawn thawn a, emoji nui per lem hi a rawn dah tawp a. Min tih elna ni tlat hian ka hre nghal pek a. Mahse pangngai takin "Eng nge?" ka lo ti ringawt a.



"Ka lo hre lutuk alawm, naupang ngaizawng turah chuan ka ngai lo che a" a rawn ti a. Sawi ho ka ti ang reng khawp mai. Mahse a rilru hriat nan hrim hrim "I hmin vak nange?" ka va ti veleh a.




Rei fe min chhan loh hnu ah "Ka nuih a za" tih te mai hi a rawn thawn a. Ka ngaih a ṭha lo kher mai.



"Eng nge?" ka ti leh a, a sawi duh tak chu sawi tlang mai sela ka duh. Hetia intih kual vel hi ka peih zawng a ni ve lo.


"Hetia sawi mai chi pawh a nilo, hun remchângah hmaichhanah ka la hrilh dawn che ania" a rawn ti a. Hre châk zawk zawk anga lan chu ka duh lova. Zawh luih zel chi ah ka ngai tawh bik lo.




Rara-i chu ka va call ta daih a, a lo pick up nghal vat a.



"I mut a chhuak tawh em?" tiin ka bana sana chu ka bih zeuh a, dar 11 a lo ri ṭep tawh.



"Chhuak lo e" ti chung siin a lo ham bai bai a, "I thusawi leh i awmdan a inpersan tlat" tiin ka nui suk a. A lo nui ve hak mai.



"Ka mut a la chhuak lo, ka ham mai mai anih kha" a lo ti zâng vah a.



"Eng nge i tih a?" ka tih chuan "Thawnthu ka lo chhiar a, a changtupa a thi daih a. Ka ṭap nasa lutuk, ka mit te hi a bui vek. Changtunu ka khawngaih lutuk a" a rawn ti duah a.




Tunlai hian thawnthu chhiar a chîng thar a, a âtchilh em em mai lehnghâl a. A changtupa te a duh ṭhin zia thu a sawi fo bawk. A thu chhiar ah a luangliam hneh ve ṭhin khawp mai.




"Thawnthu vanga lo ṭah te chu, a tak pawh ni hlei lo. A ho ang reng e" ka lo ti mai a. A lo rum nghat mai. A ṭang leh nasa dawn lutuk tih ka hriatthiam avang chuan ka nui suk a.



"Keichu suangtuahna rama chên mai mai hi nuam ka ti" a rawn ti a.



"Tak rama chêng kan ni tho sia lawm" ka lo ti vat a.



"Tak ram chang lo tur suangtuahna hian tak ram hlimna tam tak min thlen fo a. Tak rama ka dai buak theih loh tur thil tam tak min dai buak tir fo a. A châng leh min ti hlim a, a châng leh min ti ṭap. Ka suangtuahna hi a châng chuan ka thîk hial ṭhin" a rawn tih chuan engtin emaw tak hian ka chhungril a khawih che a.




Khawvela hlimna tur hmu miah lo tam tak hian suangtuahna ramah hlimna an insiamchawp ve fo in ka ring.




"I suangtuahna te chu min hrilh la, ka tih theih a awm phawt chuan ka tih hlawhtlin sak ang che" ka ti nghet charh a. A lo nui hak hak ringawt a.



"Sawi la" ka tih leh chuan "Thil theih loh tur ka suangtuah alawm" a lo ti mai a.



Ka hre châk zual sauh mai. A tân chuan thil theih loh ni a ngaih pawh tih ka tum zel tho ang.



"Eng nge sawi la?" ka tih leh tlat takah chuan a lo sawi ta a.




"Kan chawr chhuahna chhungkua turah hian duh thlang thei ila, pian nawn leh ka duh" a rawn ti khauh mai a.




Sawi tum tam tak a neiin ka hria. Chu chu thil theih ngai loh tur a ni tlat.




"Kha ka sawi kha, thil theih loh tur alawm ka suangtuah " a rawn ti leh a, za lo tih hriat zet hian a nui ri hak bawk a.



"I chawr chhuahna chhungkua ah duh thlang thei lo mah la. I la din ve tur chhungkuaah chuan i duhthlanna a pawimawh ber dawn tho alawm" hnem tum tak hian ka lo ti ve a. A hriatthiam ngei ka beisei.




Pâwn lamah hlim tak anga langin, ri huau huau ṭhin mah se a chhûngril ruak hi ka bulah chuan a lang chhuak leh fo ṭhîn. Mahse pawi ka ti lo, chu chuan a tana mi eng emaw ni tak angah min inngaih tir a. Kan inkar sawh nghettu a ni bawk.




"Au Hriatpui " a rawn tih leh takah chuan kan thusawi lai a rawn thlak dawn tih ka hrethiam nghal mai a.




"U Dina khan eng nge a sawi?" a rawn ti teh daih a. Ka ngaihtuah tawh loh lai tak a ni. Chutia a rawn sawi chhuah takah chuan eng emaw tak a awm anih ka rin ruk kha ka ring nghet hmiah tawh.




"Engmah a rawn sawi lo. Mahse nangmah hian min hrilh rawh" ka lo ti churh a. A reh deuh vang vang a. A inngaihtuah ve anih ka ring.



"A rawn sawi loh chuan sawi lo law law zawk mai ang" a lo ti daih a. Ka ngaihdan a ni lo kher mai. Eng emaw tak chu an thup dun chiang ani.




"Rara" ka ti fiah fak a, ka âw aṭang chuan sawi tura ka duh zia a hrethiam ve in ka ring.



"Sawi tur a neih loh chuan ka nei bik lo alawm. Min lo sawi lova, a ṭhat chu" a rawn ti leh mai a. Ka lo duhkhawp der lo. Ka ngaih a ti ṭha lo tulh tulh tawh.




"In inngaizawng ṭhin em ni?" ring vak chuang lo hian ka ti a. Mahse chu bak tin zawn thiam ka neilo a ni.



"A teuhlo mai" a lo ti vat lawi a.


Dina sawi ang chiah khan "Nakinah hun remchângah ka hrilh ang che" a lo ti veleh a.




Lungawi vak lo mah ila hmaichhana sawidun chu ṭha zawkin ka hria a. Thu dang sawiin inrem deuh chuan kan inmangṭha zui ve mai bawk a.




Zingah chuan Nunmawii message ka hmu a, tution chungchang bawk min rawn zawt a. Ken ngai leh mamawh te min lo zawt a. Hei chu a hriat sa tho ka ring, a zah zelah min rawn be tih chu mipa ka nihna angin ka hrethiam ve lutuk tlat.




Mahse ṭha tak chuan ka hrilh ve mai bawk a, min zawh chin chiah chiah ka chhang a. A reh zui veleh mai bawk a.



Mahse tukṭhuan eikham ah min rawn text leh a "Naktipah ka nau chu lo zawm tir ila a laklawh viau ang em?" a rawn ti a. Thla tir kan chuangkai chauh bawk a, fees pawh a full law law in a la kal tir theih tho bawk a. Chuvangin ka lo pawm ve mai a.



Uchuak takin min rawn be hran lova, lo huat chhan ngawt tur lah ka nei hek lo bawk a. Kan pangngai viau chuan ka hria.




Zanah chuan Rara-i te ina len ka tum nghet bur a. Kan inngaihzawn hnu hian ka la leng lo hrim hrim a. A chhûngte nihn dik tak belhchian nan pawh ṭha dawnin ka hria a. A bula ka sawi chuan "Nuam i ti lovang" a lo ti ṭung a. Leng lo tura min duh zia pawh a tilang nasa. Mahse ka tih tak tlat si ah chuan min hnial zui ta bik lova.




Dar 8 rik hma hretin in aṭang chuan ka chhuak a. Naupangchhia ni tawh lo mah ila ka tih ṭhan danin ka chhungte chu ka kal na tur ka hrilh thlap a. Hetia kalna tur sawi hian an ngaih a lo ṭha ve a. Eng emaw rik rum thil tawk thut thei kan ni a, hetia chin châng sawi zel pawh hi a ṭha hrim hrim.




Rara-i te in ka zuk thlen chuan amah ngeiin kawngka min lo hawn sak a. Min lo nuih var var a, "Lo lut la" pangngai tak hian a ti a. Nula rim tur thar tir ang mai hian ka zam hnuhnawh viau mai a, a zialo tak tak ani.




Ka zui lut ve nghal mai bawk a. A nu leh pa te pawh an lo awm a. Pa Marema chuan sitting room ab ṭhu in ring zet hian TV a lo en a, Nu Ramtei pawh a ep chiahah ṭhu in file eng eng emaw hi a lo phawrh darh nuaih a.




Rara-i nen chuan choka lamah kan inzui lut nghal a. Nu Ramtei chuan min hmuh veleh min lo nuih var var a. Nu inchengvawng leh hmêlṭha tak a nih chu thuhran, amah hi en hrim hrim hian nu zahawm hmel deuh hi a pu a. Rara-i chunga a khawsak dante hi hre lawk lo ila chu ka fak viau ang.




"Hriatpuia chu i lo leng a,i va fel ve" tiin min rawn nuih var var a. Pa Marema chuan min rawn ngaihsak ve vak hmel loh.



"Eng nge i tih a?" te chu ka'n ti mawi hnai ve a. "Office a ka file en zawh hman tak loh ho ka lo en fel e ka tia" a lo ti ṭha ve mai a. Pangngai taka kan inbe thei chu ka lawm.




Chutihrual chuan Rara-i chu a kimki hle a, a nuam hlawl lo emaw tih mai tur a ni.



Choka ṭhutthlêngah chuan ka ṭhu a, ka bula ding chungin "Thingpui lum ang aw" a lo ti var a. A hmela inthlahrunna chu thup a tum hram hram niin ka hria. A lan dan aṭang ringawt hi chuan a dawihzep hmel ngawih ngawih. Hlauh nei a, inveng reng hi a ang.




Thingpui a lum lai te chuan ka lo en leh vung vung ṭhin a. An inchhûng khur buaina inphum ru nuaih hi ka hriatthiam phak bak a ni. A hahthlâk ru em em a, boruak chu a uap churh maiin ka hria.



Nu Ramtei chu kan bulah a rawn ṭhu phei ve a. A titi nghal zat zat a. A hnathawh hahthlâk zia te sawiin min be siam siam a. Ka chhungte chanchin lah chu min zawt chîk em em mai lehnghâl a. K hnathawh te thlengin min zawt a. Ṭha takin ka lo chhang ve zel mai bawk a. Pa Marema chu ka va melh ṭhin a, min rawn ngaihsak hlawl lo. A TV en lai chauh chu a ngaihtuah ni maiin ka hria.




"In chhungkua in Rara-i hi in lo ngaihtuah ṭhîn a, kan lawm tak tak ani" a tih chuan ka lo meng tal tap a.



Rara-i chuan thingpui min lo pe ve chiah bawk a.




"Engmah kan ti hlei nem" ro zet hian ka lo ti a. Ngainat awm zeta min nuih chung hian "Keichu thinrim insum zawh loh chang hi ka ngah ṭhin a. Ka duh ai hian ka lo vîn leh ṭhin a. Mahse a hnuah ka inchhir ziah" a lo ti zung zung a.




Rara-i chu a che sek a, thingpui min rawn pêk zawh khan a rawn ṭhu ve mai dawn emaw ka ti a. Mahse sitting room hmun te chu a va phiat leh rih a.




Nu Ramtei sawi tum tak chu ka hrethiam lo, a insawi khalh zung zung nimaiin ka hria.



"Rara-i hian in bulah min lo sawi ṭhin em?" a rawn ti zawi sap a, ka lu ka lo thing vat a.



Mahse za lo tih hriat zet hian a lo nui ro halh a. "Ka hre vek alawm Hriatpui, nu ṭha tak ka ni hlei nem. Sawi a mual mual te chu a nei ve ang. Lehlamah ka fa hrin a lo ni bawk si lova. Ka hau ṭha ngam ngai lo, a pu in a duat zia chu i hrethiam ang a. A dam lai pawh khan ka hau ṭha ngam ngai hlei nem. Engtin emaw han hau ve hlek ila a thlavang a hauh ṭung zel a. Ka nun kha a hrehawm ṭhin asin aw. Amah hian min pawh lo lutuk a, ka tan pawh tih vak ngaihna a vâng" a lo ti duah a.




A thusawi chu awih tur a nih leh nih loh pawh ka hrethiam lo. Ngaihdan ka siam thiam lo a ni ber.




"Rara-in engmah a sawi ngai lo" tih chiahin ka lo chhang a. A lo nui mai a.



Rara-i hmun phiat zo rawn phei chu ka lo melh reng a. Kan lam a rawn hawi loh chu sawi loh min ngaihsak âwm pawhin a awm lo.




"Rara" ka tih chuan a lo phu zawk zui a, hlauh nei anga a awm reng hi hrehawm ka lo ti. A hahdam lo a ni ber.




A rawn hawi vat a "Lo ṭhu ve la" ka tih chuan a hmun phiahna te chu dah felin ka bulah a rawn ṭhu ve mai bawk a.




Nu Ramtei chu a kal mai dawn emaw ka tih laiin kan bulah chuan a la ṭhu ve reng a. A titi siam siam a, Rara-i chu a bet hlawl lo tih ka hrechiang bawk si.




"Rara-i nungchang hi chu ri phawr phawr chi a ni sia,keipawhin ka zilh nasa a. Mahse a sim hlei theilo anih hi" Nu Ramtei chuan a lo ti a, a ngeiawm zawnga sawi a ang bawk si lo. Mahse a dawngsawngtu tana dawn sawn nuam ni bawk silo hian a sawi a.




Rara-i chu ka melh a, a pa TV enna lam chu a lo melh daih a. A nu thusawi chu a hre ve thovin ka ring, a hrelo der zawk niin ka hria.




"A fel lutuk alawm" ka tih chuan awih loh hmel zet hian a lo nui a.




"Lehlamah a pa a laktlak loh ve bawk sia, a nu lahin duh lovin a kalsan a. Zilh tu mumal hi a nei lo ve a, kei lah hian zilh vak dawn ila sawi leh sawi hnu ka fa hrin dik tak a lo ni bawk si lova. Zilh loh fa tih takah mi ngei pawh a hlawh nasa. Mahse theihtâwpa amah thuam mawi hi ka tih ve tur a ni tih ka hrechiang. Nu angin min en lo mah se fa ang takin ka en ve a, a ni lo fanu ka nei chuang lova. Ka la ti ve hram hram chu anih hi" a lo ti leh duah a.




A thusawi duh dan chu mak ka ti kher mai. Ka sawi thiam dan ber chuan Rara-i chu a hmuhsit hle bakah hmusit a, en hniam ve turin min duh ni mai hian ka hria.



A ṭawngkam chu huat a, han tih let viau dawnin ngeiawm zawnga sawi lo ang takin a awm lawi bawk si a.



Rara-i nuam lo ti hmel ka hmu nghal a, kei tak pawhin nuam ka ti miah lo.




Ka lên a lo phal loh chhan te kha ka hrethiam ve ruak tawh mai. Hetiang hian a nu a awm dawn tih a hmu tlang vek anih hmel. Amah chu hrechiang lo hle ila ka hmuhsitna ram ram turin a nu chuan a sawi thawkhat viau a ni.




Rara-i ber tan chuan a hrehawm dawn hian ka hria a, ka leng rei duh ta lova. A nu lah chu inthiar fihlîm a tum bawk silo, ka len chhûng chu a ṭhu ve reng dawnin ka hria a. Min vêng ran nimai hian ka hria.




Darkar khat êm pawh ka len hmain haw ka duh thu ka sawi ta tawp a. Nu Ramtei chuan "La leng ve la" te chu a han ti mawihnai ve a. Mahse ka mut chhuah thu in chhuanlam ka siam ta daih a.




Rara-i chuan ka bike bul thleng min zui chhuak ve a. Nu Ramtei pawhin min zui chhuak lo chauh a ni. Kawngka bul thleng min thlah ve a. Inchhunga a lut leh chiah chu ka lo thaw huai mai.




Rara-i chu a ngawi reng a, a kun deuh lap bawk a, a ngui nghal ngiai mai. A nu ṭawngkam te kha a hre ve vek awm si a. Amahah inkiltawihna nasa tak a awm leh tawh ngei ang.




Kan boruak tih zangkhai tum tak hian "Hmêlṭha Rara" ka ti sup a, min lo melh chho vat a, a lo ṭhen sak a. Mahse a nuih a za hlawl lo tih ka hria. Hetia awm tir reng chu ka duh lo. Kan boruak uap churh te kha thlak danglam vat a ngai ani.



"Goodnight kiss te chu ka hlawh dawn lo'm ni?" nui suk chung hian ka ti a. Mitmeng thûk zetin min lo melh daih thung a.



"Au Hriatpui, lem chang suh" a lo ti fiah fak a, ka nui hmel chu a tawp riai riai a. Engmah sawi lovin kan in melh ta reng a.



"Kha vang khan ania lo leng duh suh ka tih" a lo ti halh a. A hmel landan ka hmuh chuan ka lo lêng lui ta kher kher kha ka inchhir rum rum mai.



"Engmah ka bulah hrehawm tihna tur a awm lo ania. Ka ring che, i nu thusawite avang khan engmah a danglam dawn lo. I inrintawkna kha hloh suh" ka lo ti nghet charh a.




Ka lamah chuan pawt hnaiin ka kuah zui vawng vawng a, a rim nu chek chu ka hîp lut vang vang a. A lo thaw chhuak ve ham ham mai.




"Khatiang vang te khan ania kan ina i lo lan ka duh loh" a lo ti leh khauh a. Ka inlahrang hlek a, a hmel ka en chuan a hmui a lo pet zeuh a.




"Eng nge sawi i tum?" ka tih chuan "Ka nu thusawi avang khan min naihdan a danglam dawn lo tih ka hria. Mahse hrehawm ka tih ber chu ka hrehawm ti hmel vanga i hmel awmdan kha ania. Hrehawm i lo ti veleh chhawng zel kha nuam ka ti lo. Ka duhlo bawk. Ka nu thusawite avang khan min hmuhsit phah dawn lo tih ka hrechiang lutuk. Mahse nuam lo ka tih i hlauh luatah i ṭang nasa lutuk a. Kha kha ania ka sawi chu" a lo ti duah a.




A ngaihdan teh daih chu ka rin loh lam tak a ni. Ngaihtuah ngai zawka a awm lai pawhin min lo ngaihtuah leh chhawng a. Kan inveng thawng tawn lutuk te chuan kan in duhna ngheh zia min hriat nawn tir awn awn mai.




Haw mai tum chuan Bike ah ka chuang fel diam tawh a, mahse thil a hrechhuak leh zawk a. Ka chhuk leh tê tê a, a ngaihna hrelo fe hian Rara-i chuan min lo melh a.




Kan boruak tawnin a zir lo emai a, ka hmuh duh chhan ber ka lo theihnghilh daih alawm mawle.



A bulah chuan ka ding chawpchilh leh nghal a "Rara, Dina chungchang kha" ka ti nghal tawl a. A lo meng deuh awk mai.



"Hemi sawi tur ber hian ania ka lo kal" ka ti leh a, "Engmah a sawi lo em ni?" a lo ti let a. "I hnen aṭanga hriat ka duh zawk" ka tih chuan a lo thaw chhuak halh a.



"I ṭhianpa khan min hrechiang viau ang, ka nihna bak bak pawhin min hria ang" a lo ti fan raih a.




Dina khan a hriatchian thu min hrilh tak alawm, mahse engti zawngin nge a sawi hman lo mai pawh a.




"Engkim min hrilh rawh" ka tih chuan "Insawi khalh ka ang awm emai" a lo ti nghat a. A ner deuh nawk bawk a. Dina nen chuan a ṭha zawnga inhria an nih ka ringlo ve tawp. An intham loh dun hmel emai. Ka inhmelhriat tir lai kha chuan an pangngai dun mai pawh a.




"I kâ aṭangin ka hre vek duh alawm" ka lo ti leh fuk a. A lo thaw chhuak hak a.



"Chutia han sawi hluai tur phei chu a awm lo. Mahse amah kha ka chhungkhat laina te nen hian an inpawh lutuk. Ka cousin te nen an inkawm ṭhin bakah Dawnga nen khan an inkawm ve ṭhin a. Ka chanchin a hre bel ngawt ang. Kei chu mi rin chhiat ngawtte hi ka duh lo viau na in ka cousin te nen an inkawm ṭhîn miau a. Mi ṭha tak ang chuan min hrelo tawp ang. Kan inhriat ṭan tirh dan pawh, ka cousin pakhat piancham aṭangin ania. Thil kan tih khawm hian a lo kal ve zeuh zeuh ṭhin a. Kei ai mah pawhin a tel hnem ka ring. Kan inbe ve zeuh ṭhin a. Inhrechiang lem lo mah ila ngaihdan tawk min nei ang" a lo ti ta duah a.




Dina kan hmuh ruala a hmel inthlak danglam te, Dina'n hrechiang deuh anga a lo insawi te chu ka hrethiam ve ta ruak mai.




Tin, ka hriatchhuah leh tak pakhat chu Rara-i hi kawng engkimah a lo inkiltawih a, mahni inrintawkna a lo tlachham hle niin ka hria. Chu thil chu a pawn lam landan hian a hliah khuh mai mai zawk a ni.




Midangin an ngaihdan tura buai ve ngai miah lo tura ka ngaihna te kha ngaihdan dik lo tak a ni. A ngaihtuahna a lo luah hneh ve hle in ka hre zawk tawh. Hetiang anih chuan mahni a hrehawm tih châng a ngah viau in ka ring.




"Midang ngaihdan tur ngaihtuah vak vak lo la, i nihna i hriatchian em kha. Rara-i mahni inringtawk leh lu zo veh vawh kha ni reng la ka duh. Midang chuan eng ang pawhin sawi che mah se ka hrechiang che a. Chutah chuan lungawi la, hlauthâwng suh" ka ti ve luam a.




Dina ngaihdan tur pawh chu ka la thlak sak ang. Rara-i hian belhchian a dawl hle a ni tih hi hre ve hlawm teh se.



"Nang chuan min ring tlat dawn tih ka hria alawm, mahse chu chu ka duh tâwk lo" a lo ti teh tlat a. A hmui a pet zeuh bawk a.




"Ka ring che a, a tawk viau lo'm ni?" ka tih chuan lu a lo thing vut a.




"Au Hriatpui, i mit tlung chauh nih ka duh lo. I chhevel ami te zawng zawng mit tlung nih ka duh. Hriatpuia hi a phû lo an tih ka duhlo. Nangmah phû tawk turin ka bei ang a. I chhungte leh ṭhiante mit tlung nih ka tum tlat dawn" a lo ti nghet charh a.




Ka ngaihtuah loh dan daihin thil a lo ngaihtuah leh tawh. A nuna hmasawn a tum lutuk hi ka chhuang ngawt mai.



A thil neih tawkah lungawi a thiam rual hian hmasawn turin a bei tlat a. Naupangtê a nun sual a ngai lutuk bikte hi khawngaih viau mah ila ka tluk loh mihring niin ka hria.




"Rara" ka ti ringawt a, sawi ber tur pawh ka hre tawh lo. Min lo nuih var var thung a.



"Chan tâwka mi lungawi thiam te hi mi vannei an nia, thlen chin aṭanga hmasawn zel tum te hi mi vannei lehzual an nia. Chu chu ka nihna" mahni inringtawk zet hian a lo ti a.



Ka tana insiamrem zel a tumte hi hlut loh phal chi a nilo. Heti renga a awm dawn anih chuan ka phu lo hle zawkin ka hre tawh.



Mut hmunah chuan thil chi hrang hrang ka ngaihtuah kual a. Nu Ramtei kha nu hriatthiam har tak a ni ve chuan ka hria. A thusawiah te khan thil âwm tak tak a awm a, chutihrual chuan Rara-i chunga a khawsak ṭhin dante ka ngaihtuah let a. Tu ber nge dem tur pawh ka hre tawh lo.



A awm ve avanga Rara-i tîm tlatte khan hauh naran chauh chuan a hau ngailo tih tu tan pawh a hai theih lovang. Keimah ngei pawhin ka lo hre fuh ve tawh anih kha.




Pa Marema lah kha aw, chhungkaw pa ber a nihna angin a tih tur a ti lova. Chumi rah chu Rara-i hian a lo seng ta ni berin ka hria.



Numawii lo sawi lawk tawh ang ngeiin a nau chuan Tuition a lo kal ve ta ngei a. Amah ngeiin a rawn thlah a. A taka ka vawikhat hmuhna a ni a. Hmeichhe cher sâng lam pang, hmelṭha pangngai tak a ni chuan ka hria.



Kan han in chibai ve lawp lawp a, "Ka hmuh hnuhnun ber che ai kha chuan i lo thau ve deuh tawh anih hi" a ti a. Chal chuar tap hian ka lo melh a. Ka la hmuh ve âwm ka hre bawk silo.



"Chutia mi" te chu ka'n ti ve a, a lo bu nghat a "Dina û fapa Birthday kha chuan tun ai hian i la chêr" a lo ti veleh vat a.



Dina û fapa piancham kan lawm kha chu nikum daih tawh ani. Chung hunlai chuan min lo hre daih tawh anih hmel.



"A lâwmawm lamah ngai mai ang" tiin ka nui suk a. A lo nui ve hak hak a.




A nau thiam loh dan velte chu min hrilh luam a, a ngawng ve hmel khawp mai. Mahse chumi vanga lo kal tir tur an ni tih k hrechiang a, theihtawp lo chhuahpui kha ka tih tur a ni mai.




Nunmawii pawh chu rei awm lovin a haw veleh vat a. Tuition chu ka pe zui nghal mawlh mawlh a. Naupangho pawh chuan kan kal tirh ngawt ai chuan an lo man chak tawh a. Sawi hmaih theih loh chu 1st term result chhuakah Mathematics a hmasawnna tam tak kan hmu a. An chhungte pawhin lawmthu min hrilh ve sap sap hlawm a. Chu tluka thu lawmawm chu ka tan a awm chuang lo.



Ṭum khat chu Arama'n ṭhian hova an dîl kal a rawn rawt a. Tunlai inkawm khawm hun kan neih loh bakah hna thilah kan buai ve hlawm em em a. Inhmuhkhawmna leh intihhlimna hun ṭha tak niin kan hria a.



Arama chuan "Kan sangha te pawh a man theih dawn a. Lên kan deng a, awmni khamin hun hmang ila. Duh leh in ṭhiante pawh sawm ve ula, zanriah kan ei nghal daih ang a" a ti a. Kan lo pawm tlang khawp mai.




Zirtawpni ah chuan kan kal ta a, kar tawp a nih tho avângin naupangho tuition pawh ka ṭhulh pui a. Lirthei nei ṭheuh kan ni bawk a, kan keng vek hlawm a. Ṭhian te'n midang an sâwm belh te anih loh chuan mi panga kan ni dawn a. Nuam ti tham chu kan awm ve hrim hrim in ka hria.



Dina te inah kan inhmukhawm a, beisei loh zet hian Nunmawii a lo tel ve dawn a. Min hmuh rual chuan min lo nuih var var a. Ka hriat thar leh tak chu Nunmawii hi Dina bialnu thar Amami ṭhiannu a lo nia. Amami pawh a lo kal ve dawn a. Ka ṭhiante chuan kawppui an hruai vek dawn a. Keimah chauhin ka hruai dawn lo anih hmel.





Rara-i sawm nachang ka lo hre ve lo chu pawi ka ti tak tak ani. Ṭhianho mipa hlang kan ni dawn emaw ka lo tia. Mahse kawppui hruai vek an lo tum chu ania. Rara-i chu lui kan kal tur thu ka hrilh tho a. Ani chu a awm a nawm loh vangin class a ṭhulh thung dawn. Sawm pawh ni ila a lo kal peih ka ring chuang lo.



Tunlai insawisel a ching a, a lu nat thu a sawi reng a. Kar khat dawn chu a ni tawh. In entir tura hruai ka tum lahin a ṭang ṭung a. Khawsik hluah ni si lo hian awm nuam lo tawk vel lekin a awm ṭhin ani awm e. Hetiang renga a awm dawn anih chuan in entir turin ka la hruai tho ang.




Lên te kan peih fel hnu chuan chhuah nghal mai kan tum a. Nunmawii chuan motor chuanna tur a lo neilo pek a. Dina chuan phur mai turin min ti a.




Hre lawk sa vek a ti a ang ka ti lo thei lo. Ka lungawi lo ru khawp mai. Dina chu ka melh run a, a lo hai der hmiah thung a.



"Motor i keng lo em ni?" Numawii lam hawi chuan lungawi vak lo hian ka ti a. "Aw...ka scooty a hman theih loh a" inthlahrun hmel zet hian a lo ti a.




Phurh loh han tum ngawt dawn ila thil ni theiin ka hre bawk silo. Dina chu ka melh leh ren rawn a "Phurh tur i nei chuang hlei nem" a lo ti mai a.



Nunmawii chuan min lo melh tawn zak zak a "Aaa...ka lo kal ve lo law law mai ang. Ka peih vak chuang lova, Amami min sawm luih vang chauha lo zui ve ka nia. Lirthei a awm nghal dawn emaw ka lo ti mai a" inthlahrun hmel zet hian a lo ti duah a.



Amami chuan "I lo kal loh te'n, ka kal peih bik hlei nem" a lo ti vat a. Duhthlan tur a vâng kher mai.



Ka ti mah mah deuhin ka hre ta a, ka phurh avang khan thil sual ka ti ta tihna pawh a nilo a tiin ka inhnem ru mawlh mawlh a.




"Ka phur ang che" ka ti ve ta nge nge a. Kan inphur ve ta poh a. Arama te lui chu darkar 1 dawn tlan hi a lo nia. Nunmawii nen chuan ngawi rengin kan inphur a. Ka kawngah min chelh a, ka tlân chak deuh apiangin hlauh hmel deuh hian a lo awm ṭhin a. Tlan chak ngam chi pawh a ni lo.




Lui chhak deuhah motor chu kan dah hlawm a, an ram chu tlema zu luh thlak deuh a lo la ngai a. Ke in kan kal a.



An kawppui hruaite ṭheuh chu an ngaihven em em a, kal harsa deuh laiah chuan an chelh zel a. Nunmawii chu ka kutah an dah deuh tawp ni mai hian ka hria. Phur lo deuh chuan ka pui ve zel mai bawk a. A inthlahrung hmel chuan mahni inthiam lohna min neih tir lek lek zel.




Mahse ṭha taka lo buaipui chu har ve tak a ni. Ngaihzawng nei ka nih chu sawi loh a rilru ka hre ve kur si a. Ho tê ah beiseina siam sak ka hlau. Mahse Dina nen an inhre ṭha bawk a, beisei tur ka awm loh zia chu a hre tawh ngeiin ka ring.



Thlâm kan thlen hnu chuan reilote kan ṭhu hahchawl a. A thlang lawkah dîl chu a awm a. Kan lên kente phawrhin lên dêng tur chuan kan intintuah ta a. Hmeichhe ho chuan thlam sir a thlai ho an lo la khawm ang a, eirawng an lo bawl thung ang.




Kan lên den lai chuan awmze nei deuh deuh hian Dina chuan min fiam zuk zuk a. A khamawm duh ngei mai. Nunmawii nen chuan min hmehbel a tum tlat a, midangho pawh chuan inhmeh min tih thu an lo sawi ve sap sap hlawm a.



Dik tak chuan Rara-i chungchâng hi an bulah ka sawi tam lova. Dina kha chu ṭûlna avangin ka hrilh kha a nimai a. Mahse midangho hi chuan an hre fuh chiah kher lovang. Mahse nei angin ka awm tih chu an hrethiam ve tawh tho ang.




Rara-i hian duh dan a nei ve thlip thlep a, kan inkawp tih hi mi hriat vak a duh loh bakah âwm leh mawi te hi a zawng ve a. Mi hriat a zak tlat a, keichuan naupangchhia ka ti. Mahse a duhdan zah sak ve ka duh bawk si a. Ka tan a insiamrem zel a, a tan insiamrem ve zel chu ka duh dan a ni.



Chutihrual chuan kan inkar hi kan thup vak chuang lova. A hunah chuan kan tilang ve tho. Mahse ka ṭhiante tak hi a la hmelhriat mumal lova. Inhmelhriat tir vat chu ṭha in ka hria.



Sanghâ chu kan eikhawp tê chauh kan man a. Hun a duh reilo khawp mai.



Thlâm a kan chhoh leh hnu chuan phone ka ban nghal vat a. Rara-i nen zinga kan inbiak bak kha kan inbe leh ta lova.



Dîl lam pana kan chhuak tur kha chu WhatsApp text in ka va hrilh zuai a. Min lo chhang tawh ngeiin ka ring.




Ka beisei ang ngeiin a message chu a lo awm va a, mahse ka rin loh lam daih a rawn sawi.



"Bike a i phurh kha ka cousin" tih tê mai hi ania. A thusawi mak ka tih chu thuhran kan inphur lai kha min lo hmu reng nge pawh ka hrethiam tawh lo.




__________*__________*_________*______


Show post links
Top

[Ngaia]

AIZIAL
By CVL Awmpuii



Chapter 17



Rara-i message chu ka chhiar a, ka chhiar nawn leh ṭhin a. Han chhan let mai dan tur ka hriat loh bakah thil sual ti ang mai hian ka inthiam lo nghal ringawt a.




A lo thinrim viau ang nge, eng angin nge a ngaih ang ka hrethiam chiah bawk silo. A ngaihdan turah ka buai nghal ringawt a.



A message tur chu ka type a, ka delete leh a, ka type ṭha leh a. Chutianga vawi li vel ka tih hnu chuan tawitê in ka chhang let a. Ka inngaihtuah buai ve nasat teh lul nen "Dina te lui kan kal tur kha a lo kal ve a" ka va ti ringawt a. Ka message chu reilote hnuah a seen a, a reh zui vang vang mai.




Sâwm nachang ka lo hre ve lo chu ka inchhir hnuhnawh viau mai a. Lo kal ve sela chu Nunmawii hi ka phurh a ngai lo ni mai tur ania. Mahse midang dem thei pawh ka ni lo. Ka phur miau si a.




A reh zui tak vang vangah chuan ka ngaih a ṭha lo nghal a. A thîk bikin ka ring chiah bawk si lo, thîk tur pawhin ka phur satliah ve mai a ni a, kan inkârah engmah a awm chuang lova.




Va insawifiah ka tum nghal ngawt pek a, mahse Nuna'n min rawn koh takah chuan phone chu ka dah leh rih a. An ṭhutna bulah ka va phei ve nghal a.



Rilru bet zân lovin an titi na ah chuan ka awm ve ta reng a. Hmeichhe ho chu an fiam an fiam a, an inchhaih nui ar ar reng hlawm a.




Dina bawk chu a phawk berah a ṭang leh a. Nunmawii nen min hmehbel sek lehnghâl a, ka dawhtheihna a pan hle tawh. Nunmawii lah chu an ngaihbel tur tingin a lo lai ve tum hrang zel bawk si. Kei erawh chu nuih pawh ka nui thei tawhlo, ka rum ul in ka ring.




Kan ṭhianho hi sawm rual vel zet kan ni a. Mahse hetah pawh hian inkawm fal deuh bik kan awm veleh a. Kei, Dina , Arama, Nuna leh Siama te hi kan nia. Tun ṭum ah pawh hian kan panga bawkin kan ni leh a, an kawppuite ṭheuh an hruai avang leh Nunmawii a lo tel ve avangin mi 10 kan ni tihna anih chu. Nuam ti tham chu kan awm ve.




Ka kawm ve ber Dina'n min chhaih reng takah chuan midangho pawh chuan min hmehbel ṭhup a. Han hnial hluai dawnin a tih chî chiahin ka hre bawk silo. An lâwm tlang tawh mai si a.




Arama'n "Bialnu i nei reng emaw tia"? a rawn tih takah chuan ka ngawi duh ta bik lova. Sawi chhuahna hun ṭha tak niin ka hria a. A zawhna avng chuan ka lawm zawk tak tak ani.



"Nei reng e. Dina phûr lutukin min hmehbel mai mai alawm tiraw Nunmawi" tiin Nunmawii chu ka melh a, ka nuih deuh suk bawk a. A pha duh lo em a ,heti hian pha fel ve sela min hmehbel rei peihin ka ringlo.



"Dina hi chu a uang thei lutuk a" a lo ti ve sep a. Nui mah se a chhungril takin a nui lo tih ka hrethiam ve vek. A tan chuan a zah thlak ve dawn tih pawh ka hria. Mahse phat buai a tum miah lo kha ka ti lui ve hrim hrim ani. Mipa tan han phat duah kha a nuam lo zawk a.




Kan haw hma chuan Rara-i bawk chu ka text leh a, a lo titau nasa viau ang tih ka hlau a ni.



"Ka thiante'n phur turin min tia, phur tur dang an awm si lova. Ka phur ve ta ringawt alawm. Engmah a awm lo ania" ka ti a. Ka insawifiah tih chu phat rual a ni lo. Tih vak ngaihna ka hrelo a ni. Ngawi rengin a lo thinrim ang a, kan inkar ah thil pawi zawk a thlen ka hlau.




Thîk ngawt na tur a awm phei chu ka ti lo a, mahse a thlirna tlang aṭang chuan a lungawi thlak loh ve mai thei. Insawifiah ba tlata ka inhriat vanga insawifiah pawh ka ni pakhat a.




Ka message chu pakhat chauh a in tick a, data a lo off tawh anih ka ring. Ngaih ṭha chiah lovin ṭhiante zingah chuan ka awm ve ta reng a. Nunmawii nen min hmehbel tawh lo chu ka thaw huai mai.




Mahse Dina bialnu Amami chuan min fiam leh ṭhin a. "In inhmeh tehreng nen bialnu i lo nei a" te min ti a. Nuih liam pui a la harsa tho mai. Nunmawii erawh chuan nuam lo a tih hmel takzet tawh.




Zanriah te kan ei kham hnu chuan haw lam kan tin tuah ta a. Ka phone chu ka check leh zawk a, ka message pawh a ngai ngaiin a lo la awm a. Ka va thawn aṭang khan hun a liam leh fe tawh a, a ngaih ṭhat thlak tawh miah lo.




Tih theih dang awm ta lo chu Nunmawii nen bawk kan inphur haw leh a. Kawng tluanin kan inbe lo.



Dina te inah kan peng kawi leh phawt a, kan sangha man ṭhenkhat te chu chhungkaw ei khawpin kan insem ve diat diat a. A hlawk thlak ve duh khawp mai.



Dina chuan "Hriat, Nunmawii hi thlah haw leh law law mai la. A tan haw a buaithlâk ang" pangngai tak hian a ti a. Tun ṭum chu min hmehbel zawngin a sawi lo tih ka hrethiam a. A hma ngawt ai chuan a inthlahrun ve hmel deuhin ka hria.




"Aih, ngai lo, ka nau ka in hruai tir tawh mai ang" Nunmawii chuan a lo ti vat a. Ka lo thaw huai mai. Han thlah kawi leh vel kha ka phur fahran tawh lo.




Mahse Arama chuan "A harsa hlei nem, i inthlahrung anih kha. Hriatpuia'n a thlah tlang thei tho che alawm" a lo ti khauh a. "Nia, chuloah i nau te chu a la haw lovang" lo ti tu chu Amami ani.




"Aaa, ke paw'n ka haw thei tho alawm" Nunmawii chuan a lo ti ve niah niah a. Keiin engah mah ka ngai lova, chutia inthlahrung lutuka siam chu nuam lo ka ti hnuhnawh viau mai a. "Ka thlah ang che" ka ti veleh ta tawp a.




Kan inkarah engmah a awm chuang lo bawk a tiin ka infuih ru mawlh mawlh a. Kawng lehlama ngaihtuah chuan Rara-i rilru tur ka dâwn tel zel a. Ka tim viau mai. Mahse thil hi a lutuk a awm ve a, hetia Nunmawii ka lo ngaimawh viau leh a tana awm nuam lo tur khawpa awm hi ṭha pawh ka ti chuang lo.




An in thleng chu ka thlah leh ta poh a. An inkawta kan din rual chuan a chhuk tharh a. Lâwmthu min hrilh ve luam a. Chutihlai mek chuan an kawngkhar chu a rawn ri khep a, kan hawi rual nghal vat a.




Ka beisei loh zetin Rara-i a rawn chhuak nalh mai. A ni pawhin min beisei bik lo tih hriat zet hian a ding ve chat a. Min melh tawn deuh zak zak a.




Nunmawii chu ṭawng chhuak hmasa berah ṭangin nui sang chung hian "Rara, i lo lêng elo?" a lo ti var a. Rara-i pawh a lo nui ve nghal sak a "Lêng chiah lo, thil ka lo dah lawk a" a lo ti ve mai a.





"Khawnge in kal a?" ti zawm zatin min rawn melh ralh a. Nunmawii bawk chu a melh leh nghal bawk a.




"Kan ṭhianpa te dilah kan kal lawk a" a lo ti ve mai a. Lo ngawih reng bik chu ni theiin ka hrelo a. Ka message lah kha a la hmu bawk si lova, min ngaih kawih vek ka hlau nghal ringawt a.




"Eng nge i tih a?" ti supin ka melh run a, a rawn hawi ve nghal vat a. Nunmawii mak ti hmel chu ka mitsir in ka hmu reng.




Chutah Rara-i chuan pangngai tak hian "Ka sawi tawh kha, thil ka lam lawk alawm" a lo ti ve mai a.



"I haw tawh dawn em ni?" ka tih leh chuan a lo bu nghat. Ka rin ai daihin min be pangngai a. "Ka thlah ang che" ka lo ti vat a.




Nunmawii chuan min melh tawn zak zak tawh. "In inhria em ni?" bangbo zet hian a lo ti a. Rara-i chu a lo nui nghal sak a, a lai ve deuh reuh te'n ka hria.



"Ka bialnu nen cousin in lo ni reng a" nui suk chung hian ka ti a. A lo meng tal tap mai. Mahse a insiam ṭha leh nghal vat a.




"A va mak ve...ka tih awmzia chu..." a ti bah nuaih a, a nui lui sak bawk a. "In inhmeh" a ti leh halh a. Rara-i chuan "I status kha ka lo hmu reng alawm" tiin a nuih sak a. Nunmawii hmel buai deuh nak chu ka hmuh hmaih lo.




"Au Hriatpuia bike khalha chuan chu a nuam teh mai nia" naupang chhia zet hian a tih zawm leh zat a. Ka hrethiam ta chiah e, Nunmawii hian Bike a ka phurh lai vel kha thla a lo la a, a status anih hmel. Chu chu Rara-in a lo hmu a, a hre ta tihna a nimai.




Nunmawii chuan nuam a ti ta chiah lo aniang "Ka luhsan ang che" tiin an in lam chu a pan ta daih a. A luh hnu chuan Rara-i chuan min lo pan vat a.



"In va haw tlai" a lo ti zâng vah a. A awmdan hi ka lo ngaihtuah ve dan nen khan a inpersan ta lutuk a, ka lawm viau rualin ka hamhaih lek lek mai.



"Zanriah kan ei nghal a" ka lo ti sup a. Chiang zetin ka melh a, ka duh vang ni miah lovin a hmelah chuan lungawi lo hmel ka zawng a. Mahse chutiang hmuh tur a awm lo hrim hrim.




"Ka message min chhang lova, a dang pawh i hmu zui lova" ka ti sup a. Hriatthiam loh hmel zet hian chal a lo ti chuar tap mai.



"Chhuna kan inbiak bak kha phone ka la khawih leh lova" a lo ti hap a. "Aw, chutah chuan ka message i seen ringawt alawm, min chhang lo. A hnu lehzel phei chu hmuh pawh i hmu lo" ka lo ti churh a.




"A va mak awm ve, ka rawn chhang lo che a maw" a ti he haw a. Ka phone chu phawrh chhuakin kan inbiakna chu ka hmuh tir zui nghal zat a. A lo chek hlak mai.




"Ka chhang che emaw ka tih kha ka lo chhang lo che anih hi. A dangho kha chu sawi tawh ang khan phone ka khawih leh hman tawh lo hrim hrim a" a lo ti zung zung a. Pawi tih hmel deuh hian a chek hlak hlak a.



"Ok, a ṭhat hlauh chu, i lungawi lo emaw ka tia" ka ti sup a. Bangbo zet hian min lo melh vat a. "Lungawi lohna tur a awm em ni?" a lo khauh a. Ka chîk ngial pawhin a hmelah danglam engmah a awm loh takah chuan ngaih ngam deuhin ka awm ve thei chiah.




"Nunmawii nen kan in phur vel kha mawle, englo...i lo ngaih dik loh ka hlau a" ka ti tlang tawp a. Min han melh ren rawn a, a mitmeng a fiah ṭhin kak kak bawk nen hetia min melh hi chuan mipa zawk mah ni ila a zamawm ve lek lek zel.



A ngawih reng takah chuan "Ka ṭhianpa bialnu in a lo hruai ve a. Midangho khan kawppui an hruai ṭheuh si a. A hruai lo awm chhun ka nih takah chuan thiante'n phur mai turin min tia. Ka phur ta ringawt anih kha" ka ti leh zung zung a. A lo thaw chhuak hak a.




"I insawifiah nasa hle mai" a lo ti daih a. Min melh kiau bawk sia, eng ang takin nge min ngaih ka hrethiam tawh der lo.




"Insawifiah ba in ka inhria alawm" ka lo ti hulh a. "Eng emaw ti dun te pawh in ang alawm" a lo ti nghat a. Ka ti lungawi lo chawp zo vek zawkin ka hria.




"Ka thlah ang che" ka ti ta daih a, min han melh ren rawn a. "Lo kal rawh" ka tih leh chuan a rawn chuang ve mai bawk a.




An in a thlah ta mai lo chuan ka tlan tlang pui ta daih a. "Khawnge kan kal dawn?" a lo ti vat a. "Nghak lawk la" ka tih chuan a lo rum nghat a.




"I inti thu sia" a lo ti hlak a, ka lo nui suk tawh thung a.



Nunmawii ka thlah avang khan ka thil hawn turte kha Dina te inah ka la hnutchhiah rih a. Chumi chu lam pui hmasak zet a, thlah haw leh mai tum ka ni.




Dina te in zawna ka din rual chuan "Eng nge kan tih dawn?" a lo ti ha a. "Ka thil hawn tur vel ka la lawk ang a, ka thlah nghal ang che" ka ti vat a.




"I lo lut ve duh em?" ka tih chuan lu a lo thing vat a. "Pawnah hian ka lo nghak zawk mai ang che" a tih chuan ka bu nghut a. Inchhûng lam chu ka pan zui nghal a.




Ṭhian dangte pawh an lo haw vek tawh a. Ka thil hawn turte chu ka khung fel zung zung a. Dina pa chuan "Hun thâwl in neih leh hunah chhûngkua in kan la kal leh dawn nia aw Hriatpui. I pa te pawh lo sâwm la, a nuam viau ang" a lo ti hlut a. "Nia, kan la ti leh dawn nia" ka lo ti ve vat a.




Pâwn lamah nghaktu ka neih avangin tawi khawmuang tawh lovin ka chhuak zui nghal a. Ka bag chu ka ak ṭha nghal bawk a.



Rara-i ka va en chuan bike bulah phone a lo hmang mek a. Ka va pan hnai a, a phone chu a dah zui nghal a.




"Tunge i lo biak a?" ka tih chuan "Ka nu mawle" a lo ti pangngai ve mai a. Ka dilchhut tlat pek a, "Eng nge a rawn sawi a?" ka ti leh zel a.




"Zanin chu hna thil vangin a rawn haw thei dawn lova" a lo ti ṭha ve mai a. "I pa nen chauh in awm dawn tihna a nimaw?" ka tih chuan "A nih hmel " a lo ti tawi tak a.




Dik taka sawi chuan a nu awm lo tur chu ka lo lawm zawk. Amah pawh hi a thlamuang zawkin ka ring.



An in thleng ka thlah leh a, "Zanin chu ka lo lêng ang aw" ka ti a. A ngawi deuh vang vang a. "Ka pa nen chauh kan awm dawn a..." a lo ti fan raih a, eng emaw ngaihtuah hmel hi a pu.




"Nia ka hria alawm, chuan ka lo leng dawn" ka ti leh a. "I thu thu a nimai, mahse nuam lo i ti ange" a lo ti nawi niai a.



A samah chuan tuai zeuhin "I awmna apiang chu a nuam vek" ka ti sup a. Ka thutak tehlul nen a lo chek hlak a. "Ṭawng chhawrthlapui suh" a tih chuan ka lo rum nghut a.




"Ka romantic ve anih kha" lungawi lo deuh hian ka ti a, ka melh deuh run bawk a.



A ha var lang ṭhatin min lo nuih a, "I lo lên chuan ka duat ang che" a ti khanglang a. Mit min la siai sak zui a. Henu tak hi chu! Ka nui leh ta nge nge a.



In ka thlen meuh chuan khua a thim lek lek tawh. Ka nu leh Vantei te an lo awm a. Ka pa chu rawngbâwlna lamah a la ṭul rih a ni awm e. Mahse a lo haw vat in ka ring.




Ka sangha hawn te chu ka nu in a phawrh chhuak nghal a. Lian vak lo mah se pathum lai mai min hawn tir a. Kan tan chuan a ṭhahnem lutuk tlat.




"I lo va hawn hnem ve" ka nu chuan a ti ta reng a. "Nia, kan man hnem ve ang reng a" ka lo ti ṭha ve mai a.




"I ṭhiante'n an chang ve em?" a tih chuan "A inzat ṭheuhin kan insem" ka lo ti vat a. Ka pa pawh a rawn haw zui a. Kan dîl kalna chungchâng te chu min zawt ve luam a.



Dina pa thusawite kha ka hrilh a, a lo phur ve khawp mai. "Hun remchângah la kal ho ve tur anih chu" a ti ve hlut a.




Ka nu chuan "I pa a lo haw ta bawk a, va intifai la, chaw kan ei vat dawn nia" a lo ti zung zung a. Room ah ka lut zui ve nghal mai bawk a.




Rara-i chu ka text hmasa hram a, in ka thlen tawh thu ka hrilh zuai a.




Zanriah ei kham hnu rei vak lovah leng tur chuan ka chhuak ta a. Ka chhungte'n ka kalna tur an hre thlap a. Rilru nuam deuhin ka chhuak a.




Vantei chuan nghal chhuahin min fiam zuk zuk leh nghal a. Thil hrehawm tak ni lo mah se ka lai ve huih mai.



Ka inkhalh chhuah hma in Rara-i chu ka call a, a lak rual chuan "Ka lo kal dawn chiah aw" ka ti sup a, "Ka pa a awm dawn lo ania" a rawn ti hap a. Chu thu chu eng vanga rawn sawi nge anih ka hrelo.




"Chuan..." ka ti sup a, "Kan pahnih chiahin kan awm dawn tihna" a lo ti hap a. A ngaihtuahna a vak thui leh viau tawh anih hmel. A rilru tur ka hrethiam leh nghal ruak tawh. Hmun fala min ṭih deuh tlat ṭhin hi tih reh sak ka duh ngawt mai.



"Aw, ka lo chhuak dawn chiah" a thu sawi hai der chuan ka ti leh a. Phone chu ka dah zui nghal daih bawk a.




An in lam pan a ka inkhalh thlak lai te chuan ka phur hurh a. Zêp nak emaw hun thawl kan nei khat a, ka duh ang takin ka ngaihsak hman ngai lova. Inngaizawng te tih ang zawng zawng hi chu tih pui ve vek ka duh. Chutihrual chuan chin tawk ka hriat hle a ngai tih chu ka infuihna a ni.




An door bell vawi thum vel ka hmehna ah chuan a rawn hawng ta chauh a. "I va rei ve" ka tih chuan "Inchunga ka awm lai ania, i va rawn thleng hma ve" pangngai tak hian a lo ti a. "Ka hmanhmawh alawm" ka lo ti mai a.




Sitting room ah chuan kan in zui phei a, ka bulah a lo ṭhu mai dawn emaw ka tih laiin ka ep chiahah a ṭhu daih a. Jogger pants thawl ṭha hnekhnawk leh Tshirt lian zet a ha a, a lang duhawm tawp hi a nimai.



"Nangmah chauhin maw i awm a?" ka tih chuan "Aw, sawi tawh ang khan ka nu chu an office ah a riak dawn a. Ka pa chu zan tir lam khan a chhuak daih tawh. A lo haw dawn loh thu a sawi bawk a" a rawn ti zung zung a.




Sawi liam puat mah se ka ngaihtuah na a lo kal thui leh hmanhmawh a. An fanu heti hian amaha awm turin an kalsan tawp ania. Chu pawh zana amaha riak tur lehnghâl in. Khawchhung a ni a, a hlauhawm miah lo ang pawhin a ngaih theih tho a. Chutihrual chuan Rara-i an ngaihsak lo zia a lang chiang ka ti lo theilo.




Ka nu leh pa te hian Vantei amah chauha ina riak turin an kalsan duh teuhlo. Ka khaihkhin lo thei lova. Mahse an chhungkaw chanchin hre tân chuan hetia amah chauha awm tura an kalsan pawh hi mak ka ti chuang lo.




"Thingpui in ang aw" tiin a tho tharh a, choka lam chu a pan zui nghal a. Kei chuan ka phone ka lo phawrh thung a.



Nunmawii message a lo awm vâng a "Ka nau daih daih maw" tih tê mai hi a nia, nui lem a dah tel bawk a. A message chu ka seen ringawt a, mahse chumi rual chuan a rawn type zawm leh a.




"I ril a ṭam em?" ti a Rara-in min rawn biak takah chuan phone chu ka dah zui daih a. Choka ah chuan ka va phei ve a.



"Chaw ka ei kham chiah alawm" ka lo ti vat a. "Chhang hmeh tel ang ka ti dawn a, keichu a ṭam a" a lo ti ve mai a.




"I chawei na a la rei âwm loh loh nen" ka tih chuan "Chaw ka ei hlei nem" awlsam zet hian a lo ti mai a. Ka lo phun nghal hluk a.




"Chawei loh mai mai a ṭha lo ka tih fo kha" ka tih chuan min nuih tlawn ta tawp a. Tun hnai te hian chaw a nghei fo a, a chhan ka zawh lah hian chaw châkna a neih loh thu in min lo chhang awlsam thên zel a. A hauh pawh ka hau zing khawp mai.





Thingpui min rawn pek pah chuan "Chhang chu i duh ve tho em?" a ti leh a, lu ka lo thing vat a.



Ka bula a rawn ṭhut thlak rual chuan "Naktukah in entir turin ka hruai dawn che" ka lo ti churh a. A ngaihna hrelo fe hian min melh a.



"Tunlai i dawl dang si, i thil ei a tui loh bakah a hma aiin i chêr tlat. I hrisel loh hmel. Lu nat mai mai te i chîng si a. In check up ṭha ka ti" ka lo ti zung zung a.




Hei pawh hi ka sawi zing tawh khawp mai. In entir turin ka ti fo a. Mahse a thu chuan a in entir mai maiin ka ringlo. Tih luih deuh a ngai tawhin ka hria.




Mahse Rara-i chuan "Engtin mah ka awm lo, nawm sam loh chângte chu tu pawhin kan nei alawm. Hetiang ho lam deuha in entir hi ka peih lo e a. Hun han kal deuh sela ka zia veleh mai ang" a lo ti zung zung a.




"Thusawi lah hi i awih lo thei khawp mai. Nat tak tak hmaa in entir hi a ṭha, min hnial suh" ka ti nghut a, thinrima sawi erawh ka ni lo.




"Vawiina in hun hmante chu a nuam em?" a lo ti daih a. Ngaihbel tura sawi ni lo mah se Nunmawii ka hrechhuak lo thei lova. Ka inthiamlo hnuhnawh leh ringawt tawh. Min lo la text khanglang zui bawk si. Chu achhapah unau an lo la ni lehzel a.




"Naktukah chaw lo ei la, ka sangha man kan hmeh dawn nia" ka lo ti thuai a. A lo ner deuh nang a "I intithei vel e, i man ve thiam pawh ka ring lo e a" a lo ti nang nang a.




Vawiin kan hun hman dante chu ka hrilh zui chiam a, ka sangha man chungchang te chu ka sawi zui a, insawi theite pawh ka ang zawk mah. A lo nui har har reng a. Ka tan chuan thil hriat hrehawm tak a ni hran lo.




Thingpui kan inzawh hnu chuan sitting room ah kan phei leh a. Hmun danga ṭhu tawh lovin ka bulah a ṭhu a. Sofa ban bulah chuan lukham dahin ka ngheng a, min ngheng thei turin ka pawt hnai ve nghal zat a.




Phone a khawih mawlh mawlh a, keiin a sam ka lo chûl ka lo chûl thung a. A hnu deuhah chuan "Khawi maw i phone?" tiin a kut a rawn dawh a.




"Ka net pack a zo tawh a, reels ka lo en teh ang" a tih leh chuan phone pawh chu ka phawrh zui ve mai bawk a.



A kuta ka pêk rual chuan a hmet eng nghal a, ka hmai zawnah a rawn lek leh a "Hawng la" a tih chuan ka password chu ka lo sawi ta zawk a.




Ka sawi zawh rual chuan hmai zang thal haw hian a rawn leh hawi a. "Eng nge a awm zia, ka hming i hman chu thuhran ni se eng nge Aizial kha eng tihna nge?" a lo ti ha a.



Chhang ta mai lo chuan ka lo nuih suk a. Kan inngaihzawn zan aṭang khan ka password ka thlak nghal daih a. Thil ho lam deuh angin lang mah se ka ngaihhlut zia ka tarlan ve theihna niin ka hre tlat a.



"Mawh, AizialRara chu eng tihna nge?" dilchhut zet hian a lo ti leh a. A bekah chuan ka fawp zeuh a "I zûnin min zial" ka tih chuan a la hriatthiam hmel chuang loh.



"Eng ṭawng nge?" a la ti deuh deuh a, "Ele Mizo ṭawng" ka tih chuan a lo meng awk a. A hma aiin mak a tih hmel zawk.



"Chutiang Mizo ṭawngah a awm maw?" a ti leh he haw a. A hrilhai leh mak ti hmel chu hmuhnawm tak a ni. Ka lo buk nghut takah chuan a taksa pum ka lama rawn hawi tirin "Sawifiah vat teh" a lo ti leh a. A hrechiang châk hmel chuan min ti hlim khawp mai.




A sam chu a bengah ka zep ṭha tê tê a, ka thusawi tur nghakhlel zet hian min lo melh kiau a.




"Min rawn biak hmasak ber zan khan i WhatsApp Bio hi ka check a, tuna i bio name kha min han hrilhfiah phawt teh" ka lo ti sup a.




A lo meng ralh a "Charm_rara tih kha maw?" a tih chuan ka lo bu nghut a. "Aww, i hrethiam ve mai lo em ni. Charm chu sap ṭawng ania, Mizo ṭawng chuan zûn ngah, zûn nei, eng emaw zûn nei riau tihna a nimai lawm" a ti a.




Sawi zawm leh mai a tum chu zah hmel zet hian a nui rah rah a, "Charm Rara chu Rara-i zûn ngah tihna" a ti leh a. A nuihza insum hmel lawmawm zia chu pui tak a ni.




A biangah chuan ka piai zeuh a, keipawh ka nuih a za ve tho. Ka hriatthiam loh vanga zawt ka ni lova, amah ngeiin sawi se ka tih vang a ni.




"Zûn ngah i lo va inti âwm ve" tiin ka fiam zui a, a nui kar kar a. "Sawi tawh rawh le, i password awmzia chu" a lo ti ve vat a. Dilchhut zetin min melh leh kiau tawh.




"I bio name ang chiah kha a nimai. Aizial chu Mizo ṭawng tho ania. I bio name a charm tih awmzia tak kha a ni bawk. Aizial, aikaih ti te pawhin a sawi theih. Ka sawi thiam dan ber chuan i zûn hian ka tum ni miah lohin min aikaih a, min zial anih tawh ber hi. Nangmahah hian mi hîp riau tu zûn a awm a, chu chu ka hmu fuh a. Ze duhawm deuh i nei a, min zial â tawh chu a nih ber hi" ka lo ti duah a.




Ka thusawi chu uluk zetin a lo ngaithla a, ka sawi zawh rual chuan a nui ta var var a.




"Min hmuh tirh kha chuan min ngai thei vak lo anih kha tiraw" tiin a lo nui hak hak a. Kan inhriat tirha ka awmdan vel kha a hrethiam lo emaw ka lo ti char char ṭhin a. Tunah hian a lo hriatthiam ve zia ka hre chiah. Hrethiam lo derin min lo pal ve mai mai ṭhin anih hmel.




"Mahse i che zia engkim kha mak ka ti fo ṭhîn, a ṭha lam emaw a chhe lam pawh" ka tih chuan min lo melh leh vat a.



Chutah naupangchhia zet hian "Engtin nge min duh theih mai le?" a ti hap a. Ka nui chhuak hawk hawk mai. A ni pawh a rawn nui veleh tho a.



"I message ka dawn apiang leh i chezia danglam tak tak ka ngaihtuah chhuah apiang hian ka rilruah thil pakhat chiah a awm ṭhin" ka ti leh sup a.




"Eng maw?" hriat chak hmel zet hian a lo ti vat a. "What a charming girl?" ka tih sup rual chuan a ha var rual zet lang ṭhatin a lo nui a. A lungawi hmel hliah hliah.




"Zûn ka ngah tak tak ani" fiamthu ti tak deuha a tih chuan kan nui dun hawk hawk a.




A ṭhut dan chu siam remin min rawn ngheng ṭha sauh sauh a. Ka phone pawh chu a hmet eng zui nghal a.



Instagram ah lutin reels chu a en mawlh mawlh a. A titi zat zat reng bawk a. A thil en apiang chu a sawi zui thei zel a. Uluk deuhin ka lo ngaihthlâk sak a, a lungawi tawk ve em em mai ni.




Mahse notification ah Nunmawii message a rawn lang chiah chu a titi lai a tâwp nghal chat a. Pawi ti lutuk hian ka lo ṭhen sawk a.




A thîk turin engmah ti lo mah ila Nunmawii rilru ka hriat kur avâng hian nuam ka ti lo vek zel.



"Rara..." ka ti sup a, phone chu a hmet thim zui nghal daih a. Ka hmai zawnah a rawn lek va a "Hmang tawh rawh" a ti sep a. Tih vak ngaihna a hre bik lo anih hmel.




Nunmawii message lo thleng ber kher lah kha a hmu chiang dawn ropui si "Naupang i ngaihzawn ka ring lova" tih a ni a. Keipaw'n ka hmuh hman chuan ani ka phone kengtu phei chuan a hmu chiang dawn lutuk.




"I duh leh en rawh" ka ti tawp a, tih vak ngaihna ka hre miau lo ani. A rilru tur awm ang ka hre bawk si lo. Mahse a lungawi dawn lo tih chu ka hrethiam ve nghal ruak mai.



"In lo inbe ṭhin a nimaw. Vawiin tlai khan rawn inphur haw satliahah ka lo ngai che u asin" a lo ti fan raih a. Za lo tih hriat zet hian a nui hak bawk a.



"Khatiangin ngaihdan siam ringawt suh, i duh leh en rawh" ka ti sup a. Ka phone chu ka âwmah a rawn theh thla a, inlakhran a tum rual chuan ka lo chelh bet vat a.




"Hetia awm hi i inhmeh lo ania" ka tih chuan ngeiawm zet hian a lo nui hak a. Dem thei pawh ka ni lo, ka thiam lo miau a ni.




Ka phone chu ka kut lehlamin ka la a, ka hawng zui nghal a. Rara-i chu ka kut lehlamin ka la chelh reng bawk a.




WhatsApp ah chuan lutin Nunmawii nen kan inbiakna chu ka hmet chhuak nghal a. A hmai zawnah chuan lekin "Chhiar rawh, ngaih kawih tur engmah a awm lo" ka ti dam thlup a.



Thîp zet hian min lo melh a "Phone in check sak tih vel hi ka peih ve lo" a lo ti hmak a. "Inrinhlelh ai chuan a ṭha zawk" ka lo ti ve nghut a.



Min han melh leh zet a, "En rawh" tiin phone chu ka pe a. A rawn thaw chhuak hak a, ka tih tak tlat si ah chuan ngawi rengin a la ta nge nge a.




Nunmawii nen kan inbiakna chu a scroll thla zel a. Ngaih kawih turin kan inbe lo bawk a, ka inringtawk ve khawp mai. Tin, vawikhat mah ka be hmasa lo bawk a. Chhan loh theih lohah ka chhang a, chhan ngai em em a nih loh chuan ka chhang ngai lo bawk a. Rilru hrehawm deuha in awm tir ai chuan heti hian chhiar vek se, hre vek sela ka pawiti lo.




Mahse Nunmawii message tâwp ber chu ṭul lo ka ti khawp mai.



"Ka nau i lo ngaizawng reng a" a rawn tih hnu khan "An chhungkaw chanchin i hrechiang em? Ka nau mah nise tlang taka sawi chuan zilh loh a nihna hi a lang ve ṭhin a" tih a rawn thawn tel a.




Nichin lawka notification rawn thlengah lah khan naupang a ti tawh bawk a. Rara-i tan chuan pawm dam a harsa ve viau in ka ring.




A chhiar zawh rual chuan ngawi rengin phone chu min pe a. Rinhlelh tur a hmu hauh lovang tih ka hria, mahse a unaunu ngeiin a chungchang a sawi duh dan kha a hre vek tawh si a. Hrehawm ka lo ti ru ṭeuh mai.




"Ka tihpalh" a ti zawi sep a, "Engvangin?" tiin ka lo phun hluk a. "Ka ringhlel che a...chuan..." a ti a, a ngawi leh daih a.




"Nunmawii thusawi hi ka awih ring reng reng suh" ka lo ti vat a. A sawi zui duh loh chu ka hrethiam ve tho. Mahse Rara-i hi mahni inphah hniam chî leh mi laka tlawm mai mai chî a ni lo tih ka hrechiang ve tawk.





"Hetiang vangte hian ania ka ngainat theih miah loh" a lo ti nghat a, za lo têin min nuih seih bawk a.



"Dina nen ka inhmelhriat tir lai che u a i danglam chhan pawh kha a ni tiraw?" ka tih chuan "Hei chu a la ho lutuk, U Nunmawii û zawk hi ania U Dina te nena inkawm ṭhîn ka tih tak kha chu. U Nunmawii hi chu a zia ber emaw ka lo ti zawk a. Mahse a" tiin a thaw chhuak hak a, a nui zui hak bawk a. A nuih a zat loh zia chu ka hrechiang lutuk tlat.




"Nunmawii nen kan inbiak dan chu i chhiar ang kha a ni mai. Min ring rawh tih rengte hi ka duh ve lova, ka peihlo bawk a. Mahse chutiang sawi ngai lova awm chu ka tum ang" ka lo ti sup a.




"Keichu hmelṭha in fel viau mah ila ka thîk thu a chhe teh mai nia. In ven uluk i ngai zual viau ang" thutak zet hian a lo ti a.




A hmelṭhat zia hi chu a hrechiang ve thlawt alawm. Ka nuih chu za viau mah se a thutak em a, ka nuih ngam lo.




"Nang pawh mipa dang i hnaih anih vaih chuan ka hlap hrep ang che" ka ri fiamthu a, a lo nui hak hak mai.




Zanin chu kan boruak a inthlak kual zut reng a. Inrem takin kan awm veleh mai zel bawk a. Hun thawl neih tam pawh hian inhauhna chance a ti sang viau in ka hria. Mahse kan thu a inhmu leh vat zel a.




A titi siam siam lai chuan zuk fawh mai ka tum a. A kutin min lo dang vat a "Midang an awm si lo" a lo ti sep a. Mitmeng de sawr sawr hian min melh bawk a.




"Engtin mah ka ti lovang che?" ka ti zawi ruih a, a lu a lo thing vat a. "Eng eng emaw kan ti palh ang" a tih chuan ka lo nui huk a.




"Ka insum thei alawm" ka ti leh hram a, ka thlêm titih a ni ber mai. Hetiang hun thawl hi kan nei khât a. Mipa tan chuan bawh pelh uiawm tak a ni.




"Mipa hian hnute lian in lâwm tiraw?" a lo ti daih a. A âwm bawr chu ka melh nghal lo theilo. "I chhuang ve sia" ka tih chuan a lo nui har har a.



"Tlankimi ai chuan ka îtawm zawk" a lo ti khanglang a. Tlankimi nen kan inlaichinna a hrechiang ve hman si a, inkhaikhin hi a sim hlei theilo.




"Tlankimi hnute i hmu tawh em?" a rawn ti leh a, a va hahthlâk tak. A zawhna mawlmang lutuk, zahthlâk bawk si avang chuan ka dang der mai.




"Mawhhh" a ti leh a, hre châk tak tak hmel hi a pu a. "A va buaithlâk" ka ti ringawt a. Min ti zak dawn lek lek zel.



Ngaihzawng hluite nena kan khawsak dan sawi zui hi ka duh loh bakah mipa dik tak tih tur niin ka hrelo a. Tuna a zawhna hi chu Tlankimi nen kan inkar thil a ni a, chhan ka duh bik lo.



Ka ngawih tak rengah chuan "I hmu tawh chiang mai" nghal zet hian a lo ti a. A naupangchhia lutuk leh zep a neilo lutuk hi a châng chuan hahthlâk tih chang ka nei ve ṭhîn.




"Kei aiin a lian ang em aw" a la ti ta deuh deuh a. Ka lo nui hawk hawk mai.




A lo hawi lai tak chuan ka zuk fawp zui hmiah a. Nichina min khap tum hrang ve si khan min lo chhang let ve thuai a.



Hei baka thui chu kal pui ka duh lo. A theihtâwpin a inveng ve a, a indaidanna ṭhiah chu tih thiang lovah ka ngai.




Ka inlakhran rual chuan a âwm bawr chu ka ṭham zui salh a, a lo rak ṭhat mai.



"A lian tak anih kha" ka tih chuan a zak leh reuh sia. Ṭawng phawng phawng ṭhin mah se hmeichhe pawi sawi lo leh tawn hriat nei lo zet a nihna hi a lo lang leh ṭhin.




Pathian zarah kan dam a, hun pawh a kal ve zel a. October thla kan chuangkai chho a. Kan vêng chu a vawt vur tawh mai a. Durtlang hi chu Mizoram hmun dang ang lo takin boruak hi a vawt deuh surh reng a. Ruah a sur chang phei hi chuan chhum a zing nghal chûk zel a. Boruak a thlak danglam hneh thin khawp mai.




Rara-i nen pawh kan la tluang zel a. Nunmawii chuan min rawn text leh zeuh ṭhin a. A nau lah hi chhuanlamah a rawn hmang sek tih ka hrethiam ve tawh a. A ṭul tawpah lo chuan ka chhang ngailo.




Mak tak maiin Dina hi ka pawh hlei thei tawh tlat lova. Inhmuh apiangin Nunmawii min sawi pui zel a tum a. Ka hne ve takzet bawk si. Kan inbe ṭha hlei thei ṭhin lo. Chutihrual chuan ka ṭhian a nihna anga biak chhiat tawp chu ka duh bik lo.





Ṭum khat chu ka beisei loh deuhin Tlankimi message ka dawng teh khiah a.



"I dam maw?" tih tê mai hi ania. Ka danglam lo ka tih chuan dawt chiang tak ka sawi a ni ang. Mahse amah ka va duh leh ta tihna erawh a ni hauh lo.




___________*__________*_________*_______



(Ka dam sam loh avangin kan châwl rei sia, in lo theihnghilh hman tawh em. Min hrethiam ṭhin tute ka tân in hlu ngawt mai♡. A kal ngaiin a kal pat pat rei tawh bawk a. Tun aṭang chuan kan in ṭhawng deuh mawlh mawlh tawh ang aw. Theihtawp ka chhuah ang a, regu chhoh leh viau kan tum tawh dawn nia. In fuihna ka mamawh hunlai tak ani)


Show post links
Top

[Ngaia]

AIZIAL
By CVL Awmpuii


Chapter 18



A message chu la hawng lo mah ila ka hmu nghal vek thei a. Rara-i message a rawn thleng zui ve nghal zat bawk a.



"Zanin chu ka mu hma mai dawn asin" a rawn ti a. A la dam sam meuh lova. In entir tura ka tih lah hian a duhlo tlat bawk si. Ka mangan pui viau tawh.



Chutihrual chuan dam lo hluai han tih tur kha a ni lova. A lu nat thu leh a chauh thu a sawi fo a. Nachhawkna a ei a, a reh veleh mai zel a. Mahse a dam tak tak thei bawk silo.



Ka hna ṭul zualpui ka zawh hunah in entir pui chu ka tum ruh bur tawh. Min hnial leh pawh ni sela ka hruai dawn a ni tawp mai.



"Awle, ka lo khawhar deuh dawn tihna a nimai. Muttui le" ka va ti a. "Muttui" a rawn ti let ve vat a. A reh zui nghal bawk a.




Tlankimi message chu chhan chi a ni ang em ka hre chiah lo. Mahse han be chhe ngawt dawn ila a fuh berin ka hre bawk silo.



Ka engmah a ni tawh chuang lova, zawhna min zawh miau avang chuan "Dam e" tiin ka chhang ve mai bawk a. A lo seen rang kher mai.



"Ngaih loh lamah ngai lo la, tunlai chu ka lung a leng thar tawp. Ka ngaih che phei chu ka hrelo a" a rawn ti a. Nui lem a rawn dah tel bawk a.



"Haha" tih ringawtin ka chhang a. A reh zui mai dawn emaw ka tih laiin thil dang min rawn sawi pui leh a.



"Tunlai i hnaah i tluang em?" a rawn tih chuan "Aw" tih ringawtin ka va chhang a. Dik tak chuan ka ngaihzawng hlui a ni a, thil ṭul lova inbiak zen zen hi ka duh tawh loh bakah kawppui dang a nei tawh a. Chutiang chiah chuan keipawhin.




Ka beisei loh zet hian a rawn call a, reife ka inngaihtuah hnuah ka la ta chauh a.



"Eng nge ni teh tlat a?" ka ti nghal tawng a. Ka ṭawngkam hman chuan kan inhlat tawh zia hriat nawn tir se ka ti khawp mai.



"Saia chanchin kha i hria em?" a rawn tih chuan "Tu Saia maw?" ka lo ti he haw a. A lo chek hlak a. Ka duh vang ni miah lovin a hmel awmdan tur ka lo ngaihtuah hmanhmawh a. Ka lu ka thing rang kher mai.




"Aww...Delhi a kan college kalpui ṭhin kha" a rawn ti hluai a. Ka hrechhuak chawpchilh ve mai bawk a.



Saia te nen chuan B.A kan kal ho a, department hran mah ni se Mizo kan tam loh avangin kan in hre kim ve biai a. Inhre lutuk ni lo mah ila kan inhmelhriat vek hlawm a. Chutia a rawn sawi chhuah takah chuan ka tan hriat harsa a ni lo.




"Chuan..." ka lo ti sup a, "Tunah hian Durtlang ICU ah a awm asin" a rawn ti hliai a. A thusawi chuan min ṭhawng khawp mai. Ka hriat theih chinah tlangval taksa pumrua lian tak, hrisel ṭhat hmel deuh hi a ni si a.




Mahse engvanga Tlankimi chuan min rawn hrilh nge a nih ka hre lo.



"A va mak ve" ka lo ti hulh a. "Nia, zu a lo in nasa ve a, a thin a ṭhat loh bakah a mît a lo liam a. Natna neuh neuh dang pawh a ngah mai an ti. Niminah khan ICU ah an dah lut a. A dinhmun a ṭha lo viau a ni awm e" a rawn ti leh zung zung a.




Han sawi zui pui vak ngaihna ka hrelo a. "A va zialo ve" ka lo ti ringawt a. Dik tak chuan kan inkarah engmah awm tawhlo mah se hetia pangngai taka titi pui hi ka la thiam lova. Ka duh vak lo bawk.




"Zanin pawh a daih lo mai thei an tia, kal ve chu a ṭha khawp mai. Durtlangah in awm tho bawk a, ka rawn hrilh ve luam che anih chu" a rawn ti leh a.




Kal turin min phût nge pawh ka hrethiam tawh lo. Ka kal hreh vang ngawr ngawr ni lovin kei min rawn hriattir kher chu mak ka ti deuh a. Ṭhian dangte'n min rawn hrilh se chu thuhran ania.




Ka lo bengvar lo bik lutuk erawh chu pawi ka ti khawp mai.




"Chanchin engmah ka lo hre ve lova" ka han ti ve ngial a. "Aw, keipaw'n vawiin tlaiah khan ka hre ve chiah alawm. Chanchin han inhrilh na turin WhatsApp Group vel kan lo nei bawk si lova. Saia ṭhiannu te nen veng khat kan nia. Chuta ṭang chuan keipaw'n ka hre ve chiah alawm. Chanchin ka zawh chian kha chuan kan batch mate te chuan an lo hre vek tawh a ni awm e" a rawn ti leh zung zung a.




A hre tlai bera ṭan chu a nuam lo duh khawp mai. Ṭhiante chuan min lo beisei ru ve ngei âwm sia tiin ka ngaihtuah a. A inthlahrunawm duh takzet.




"Midangho pawh chuan min hrilh nachang an hrelo anih chu mawle" ka ti veleh a. A chauh thu barawh erawh ka ti viau mai.




"I hre sa angah an ngai pawh a ni mai thei. Keipaw'n hre tawh turah ka lo ngai zawk che a. Mahse hei i lo la hre miah lova" a lo ti veleh ngial a.




"Kal ve chu a ṭhat dawn chu" ka tih chuan min lo pawm pui khawp mai.



"Nia, chhiat ṭhat tawk thei vek kan nia. Kan theih chen chena in ṭawiawm ve hi a ṭha ania. Durtlanga awm sa i ni bawk sia, ṭhian dangte paw'n an phût ve deuh che in ka ring a. Ka lo hrilh hre tawp che anih hi " a rawn ti leh zung zung a.




A ṭawngkam a felfai leh thlap tawh. Kha chen kan lo inkawp ve tawh a, mi rilru chhe lutuk a ni bik lo tih ka hrechiang a. Mi vengthawng takin min rawn hrilh ve niin ka hria.



"Min lo hrilh hria a, a lâwmawm lutuk e" ka ti veleh vat a. "I ṭawngkam chu kan va inhlat hmel ta ve" a rawn ti khauh a. Chhan dan tur ka baih vai der mai.




"Pangngai takin kan awm leh thei alawm" a rawn ti leh a, a nui ri hak hak bawk a. Kan inkar chungchang emaw kan nunhlui sawi zui chu ka duh tawh loh bakah thil ṭul ber niin ka hrelo. Tun dinhmunah ngat phei hi chuan.




"Damdawiin kal tur chuan ka'n insiam ve ange, anih phawt" tiin min chhan zui lehna tur pawh nghak lo chuan ka dah zui nghal daih a. A ṭul chin sawi hi ka duh tawk viau a ni.




Sana chu ka en zawk a, dar 9 leh a chanve chiah a lo la ni. WhatsApp ah chuan lutin Rara-i nen kan inbiakna te chu ka en let a. Min mut san hma mah mah ani, a khawhar thlak dawn tlat.



Damdawiin kal tur chuan ka insiam zui nghal a. Durtlang hi chu Ber thla kan chuan kai tawh chuan zan lam boruak hi a dai diai tawh ṭhin a. Tlemin ka inthuam lum ve deuh a.




Thutkhawmnaa ka va chhuah chuan ka chhungte pawh an lo la awm kim ṭhap mai. Dar 10 vel hi kan mut hun a ni tlângpui a. TV ah en tur hmuhnawm leh ka pa bengverh zawng a chhuah erawh hi chuan ka nu nen hian an mengrei ve thei ṭhin khawp mai.




Kan ṭhianpa chanchin chu ka va sawi zung zung a. Damdawiin kal ve ka tum thu ka sawi chuan min lo pawm pui khawp mai.



Ka pa phei chuan "Chutia hnuk chat mai thei dinhmuna a din chuan tlaivar pui an ngaih pawhin i tlaivar ve nghal daih dawn nia. A chhungte tan pawh a thlamuan thlak ve ang a. Chanchin min lo hrilh ve zel dawn nia" a lo ti a.




Ka nu pawhin "Ṭawngṭaina lamah kan lo hre ve reng dawn nia" a lo ti ve vat bawk a.




Damdawiin lam pan chuan ka inkhalh chhuak zui nghal a. Ka kal hma khan Rara-i chu a mu tawh tih hre tho mah ila chanchin hrilhin ka text tho a. Zing a harh veleh a hmu ve tawh mai aniang chu.




Damdawiin ka thlen chuan ṭhian ṭhenkhat te pawh an lo awm ve nuk a. Khawtlang hruaitu te leh mi tlâwmngai ṭhenkhat an lo awm bawk a.



Delhi a kan batch mate te pawh sâwm vel zet an lo awm ve a. Kan han inhmu chu chhiatna lam mah nise kan ri ve hluai a. Inhmuh lohna a rei ve tawh bawk a, kan hmel pawh a danglam fur tawh mai.



A enga mah hma in thupha ka chawi nghal ngawt a. "Chanchin ka lo hre ve miah lova, ka hriat meuh chuan hei boral mai thei dinhmunah a lo ding der tawh a. A zia lo tak tak a ni. Ka lo bengvar lo lutuk a" ka ti ve luam a. An lo hrethiam khawp mai.




"A natna a la rei vak lova, zep thu ah a chêng lova. Zu a in ve nasa a maw, tun hnai tê khan a insawisel a. Heti rum rum hi an ni nghal mai a ni awm e, Saia pa sawi kalhmangah" an lo tih takah chuan ka thaw ve huai mai. Ka inthlahrung lutuk pawh a zia deuh e.




Damdawiin chhunga luh huk a chî loh avangin pawnah kan nghak hlawm a. Y.M.A ṭhutthlêng tlem azawng an lo la a, ka ṭhiante ṭhutna bulah chuan ka ṭhu thla ve nghal a.



Mizo te kan vanneihna em em chu chhiat tawh nikhua hian kan inpui bawm tawn nasa a. Tuna kan hun tawn angte hi ram danga an tih ve ngai miah loh thil a ni.



Dam lo in menpui te hi thil pangngai ah kan ngai a, mahse ram dang leh hnam dangin an tih ve ngai miah loh thil a ni. Chhungkhat laina chu sawi loh ṭhenawm khawveng leh hmelhriat lohte thleng pawhin tlâwmngaih chhuahin kan inpui tawn ṭhîn kan Mizo na tinuam tu a ni.




An bulah chuan ka awm ve ta reng a. A ṭhenin phone an khawih a, a ṭhenin meizial an pak khu hlat hlat bawk a. A ṭhen an titi suam suam bawk a.



Ka phone chu ka phawrh zui ve nghal a. Tlankimi message bawk a lo awm a "I kal ta em?" tih tê mai hi ania. Ka kal tur thu ka hrilh chiang viau khan ka hre sia.




"Aw" ka ti tawp a, zanin chu eng a hria nimaw min lo be thut pawh mak ka tih tawh nen ka message chu a seen nghal zung zung zel a.



"A ṭhat nasat chu, midang an awm nual em?" a rawn ti leh a. "Awm ve nual mai" ka tih chuan a hmuh rualin a rawn type leh nghal char char a.



"Chanchin min rawn hrilh ve zel la aw, rawn kal ve chu ka duh viau na in naupang test paper check tur ka ngah lutuk a" a rawn ti leh zel a. A message chu ka like ringawt tawh. A reh zui ve mai bawk a.




Tichuan, ṭhiante bulah chuan ka ṭhu ve ta reng a. Ka phone chu ka tuai let sek a, Rara-i ber a mu tawh bawk si. Tih tur a vâng duh tak tak ani. Meizial han zu ve ngawt dawn ila ka zu ngai bawk silo. Patling titi na kara lo va ṭawng ve chu ka thiam bawk silo.




Gallery ah lutin Rara-i nena kan thlalak te chu ka en kual ta vel mai mai a. Hmeichhia tih takah thlalak a peih em em a, thlalak dun pawh ngah tak kan ni. Kan inhmuh hlekin ka phone min phawrh tir a, min selfie pui vak vak zel a.




Pangngai taka kan lak dunna te, ka biang a fawhna te, a bianga ka fawhna te, a insiam chhiat vak vak na te, a hmui a tih pawrh chiam na te, a tam mai. Thlalak hrang hrang kan nei dul mai.




Chung ho chu keimah têin ka en a, ka nui leh vur vur zel a. A thlalak ringawt pawh hian min tihlim viau a ni.



Mipa nih chuan thlalak rengte hi nin chang ka nei a. A intih thuna lai tak a lo ni ve ṭhin bawk si a. Ka ning chung chung min lakpui hi a tam mai. Mahse a hnuah keimah ber ber hian ka hlut ṭhin.



"Kan la zing emai" tih lah hian "Hetiang hian kan la la hlei nem" tiin style hrang hrangin min in pose pui ṭhin a.




A ṭul na hre vak lo mah ila ka tih pui leh nge nge zel a. "Thih hunah a la hlu dawn chauh" tih te hi a chîng a. Khak viau ṭhin mah ila a ṭawng liam satliah hi chu pawm thiam dan ka zir ve ṭhin.




Kan rin lawk ang ngeiin ka ti dawn nge, Saia chu zanlai dar 12 rik hma hretin a chat thla ta a. Kan che nghal suau a, a ṭhenin phone an hmang a. A ṭhenin ruang lo chhuak tur chu an lo va ngaihven bawk a.




Keipawhin ka phone chu phawrhin ka pa ka call nghal a. An lo mu tawh anih ka ring rei fe a ring hnuah a la ta chauh a.



"Aw Hriatpui" a rawn ti vat a, chanchin chu ka hrilh ve nghal zung zung a. Ruang chu an vêng thleng zui thlak a, lumen ve ka tum thute pawh ka hrilh nghal a. Min lo pawm pui khawp mai.




Kan inmangṭha hnu chuan Tlankimi ka va text ve nghal a. "Saia chu tunah khan a boral chiah aw" ka va ti a. A lo mut daih tawh ka rin tehlul nen ka message chu a seen nghal vat a. Chumi rual deuh thaw chuan min rawn call nghal a.




Ka lo pick up ve mai bawk a "A va zialo ve" a rawn ti hap a. "Nia, a ruang an rawn la chhuak ṭep" ka lo ti ve vat a.



"Zui ve i tum em? Ka tih awmzia chu an vêng thleng zui a, tlaivar i tum em?" a rawn ti leh zung zung a.



"Aw, tlaivar pui ve law law loh chuan" ka lo ti pangngai ve mai a.




Chutah Tlankimi chuan "Anih chuan Hriatpui, lo kal ve ka duh sia, min rawn lam kawi thei mai ang em le. Zan a rei tawh sia midang tihbuai ai chuan" a rawn ti a.



A sawi awlsam ang aiin ka lo dawngsawng sak ṭalh mai. Kal ve lo mai rawh in tih ngawt na chî a ni bawk silo. Mahse a duh dan anga awm mai mai chu ka tum lo.




"I scooty " ka ti khauh a, "Vawiinah ka ti nung thei lova, workshop ah ka dah daih alawm" a lo ti vat a. A sawi awlsam ang reng ṭhin bawk si.




"Ka lo insiam lâwk ang a, min lo lam kawi mai rawh. Kal ve loh chu ni theiin ka hre bawk si lova. Saia te in chu ka hre tho a, kan veng in rawn tlanpel dawn tho bawk a, kal dun kha a awlsam mai. Engmah ngaih kawih tur a awm lo, rilru kawi pû in ka rawn phût lo che ania" a rawn ti leh zel a.




Mipa rilru tê leh kher mei lutuk anga lan chu thil mawi niin ka hre ta bik lova. Engahah mah min ngai lo ang maiin a awm tho a, ka ngaihtuah zui vak bik chhan tur ka hrelo. A pawimawh ber chu kan inkarah engmah a awm tawh lova, ka tan nunhlui a ni tawh a. Ka inpal hnawk leh dawn tihna a ni hek lo. Chuvang chuan lo hnial ṭung chi ah pawh ka ngai ta lova. Âw ka pawh ve ta nge nge a.




Kan inbiak zawh chuan Rara-i chu WhatsApp ah ka va hrilh veleh a. Ka thiltih hi hriat kilh kelh a duh ve ṭhin a. Ka thu a awih ṭhin bawk a, a duh dan chu theihtâwpin ka zah sak ve in ka hria.





Reilote kan nghah leh hnuah ruang chu an rawn la chhuak thei ta a. A chhungte chu an ṭap chuah chuah hlawm a. An lainatawm duh kher mai. Ambulance ah an dah lut nghal a, a nu leh a ṭhiannu pawh an chuang zui ve nghal a.




Ambulance a tlan chhuah hnu chuan keini ho pawh chuan kan zui ve nghal a. Tlankimi lam kawi ka ngaih avangin a hnuhnung berah ka tlan a. Ani nena hun rei tak hnua inphurh leh chu k huphurh tho mai.




An in kawt ka thlen chuan ka call a, ka call chu pick up mai lovin a rawn chhuak nghal a. Kan inhmuh lohna pawh thla khat dawn a ni ve tawh a. Mahse a hmel ah danglam engmah a awm lo.




"Kan kal nghal thei a nimai" a rawn ti a, ka hnungah chuan a rawn lâwn zui nghal a. Min tawh rual chuan ka duh loh lutukin ka danglam zawk a. Hrehawm ka ti kher mai.




Hmana ka kawchhûnga chê dawt awm ṭhin kha a rawn awm leh a. A hma ang em em kha chu ni tawh lo mah se ka hai der theilo.




Ka va duh leh ta tihna a nilo tih chu ka hrechiang hle a. Chutihrual chuan hetia ka la danglam tlat hi ka duh lo kher mai. Mahni inthiam lohna ka neih phah ziah a, chu thil chu tawrh hrehawm tak ani.



Kawng tluanin Saia te in awmna lam min hrilh bak chu kan inbe lova. Vanneih thlak lutukin ka ti dawn nge a lo hla lo hlauh a.




Bike aṭanga a chhuk chiah chu ka thaw huai maiin ka hria. A kal mai dawn emaw ka tih laiin ka bike hung ṭha lai chu min lo nghak leh zel a.




Ngaihsak loh luih tumin ka kalpel a, min lo zui nghal vat a. "Ka rin ai daihin mi an ṭhahnem" a ti hliai a, ka chhâng lem hlei lova.




An in chu an lo sing sa fel vek tawh a, an lo zai pui ṭan dawn vel mek hi a lo nia.




Tlankimi chu peh hel tumin ka lut lawk duh lova, mahse a lo ding ve zel bawk si a.



"Lo va lut rawh" ka tih chuan "Lut rual ang" a lo ti teh tlat a. Ngainat awm zet hian min nuih bawk a. Keimaha danglamna la awm tlat hi ka duhlo. Amah ka huatna aiin ka inhuatna hi a nasa zawk daih.




Inchhungah chuan kan inzui lut ta poh a. Tlar hnung ber chu a lo la âwl a, kan va ṭhu dun ve rial a. Kan zai lai chuan theihtawp in a zai ve a. Ruang kil ho an ṭah rawng rawng chang chuan a lo inhru ve leh fap fap ṭhin a. Mi khawngaihna ngah tak a nihna kha ka la theihnghilh bik lova, a ṭap ve pawh chu mak ka ti hran lo.




Ka bula ṭhu chu ngaihtuah loh hram hram ka tum a, harsa ka van ti tak. Ka awmdan chu ka in haw hlur mai.



Darkar khat dawn kan ṭhut dun hnu chuan ka dawhtheihna in a tlin ta ngang lova. Ka che hluai a, "Khawnge i kal dawn?" a lo ti vat a.




"Pawnah ka va chhuak lawk ange" ka tih chuan a bag chu a ak vat a " Ka lo zui ve ang che, keipawh zun te ka duh" a lo ti veleh zel a.




Ning zet hian ka thaw hluai a, midang chu an zai tui bawk a, min rawn ngaihsak lem lovin ka hria.




Mitmeng pawi sawi lo zet hian min lo melh kiau a "Hriatpui..." a hmaa min koh ṭhin dan ang chiah khan min ko a. Ka awmdan hi ka duhlo hul hual.



"I duh leh ka chhuah hnu ah i rawn chhuak dawn ania" ka ti chang rât a. Ngaihsak zui lovin ka tho a, ka chhuak zui nghal a.




Pawn ka thlen veleh chuan ka thaw chhuak hawk a, ka thawk a chham lo chauh ani. Min la ti danglam hneh tlat kha ka hua. Ka duh tawhlo tih chu ka hrechiang tho bawk si.




Tlangval ṭhenkhat, thingpui lum ho bulah chuan ka va ṭhu ve ta daih a. Tlankimi pawh chu a rawn chhuak ve zui lem lovin ka hria.




Ka phone chu phawrhin WhatsApp ah ka lut a, Rara-i message a lo awm vâng mai. Phûr zet hian ka hawng a, ka rilru la pêng tu tur ka mamawh lai tak ani.




Ka ngaihtuahna chu duh lo zetin lu ka thing a. Rara-i hi ka rilru la pêng tu tur atana ka ngaizawng a ni lo.




A message chu ka en a, "Ka harh hlawl a, in ṭhianpa chu a zialo hle mai" tih hi a lo nia. Nichin lawka a lo thawn a ni a, a la men ka ring a. Ka phur nghal surh mai.



Mi awm vak lohna ah chuan ka kal hrang nghal a.




Insum buai duh lovin ka va call nghal a, a lo pick up vat a. A rawn ham nghal bai bai mai.




"I lo muhil leh hman elo?" ka tih chuan "Aih, ka harh tulh tulh mai" a lo ti vat a. Tunah hian zing dar 2 a ri ṭep tawh a. A harh lâi ka ti khawp mai.




"I tho hma hle mai" ka ti fiamthu a, a lo nui hak hak mai.




"Heti hian khawvar dawnah ka mut a chhuak leh awm sia. Ka harh lâi lutuk a a" a lo ti bai bai a. A harh hlim pawr fap hmel tur ka ngaihtuah a, a duhawm ngawtin ka ring.




"Enteh Au Hriatpui" a rawn ti leh hluai a, a mak teh hluai ṭhin ania. Kan inbiak reng lai pawh hian min ko leh hluai ṭhin a. Mahse hei hi nuam ka ti.




"Aw hmelṭha Rara " ka tih ve hluai takah chuan min nuihzat kher mai. Za zetin a han nui leh tê tê a.




"Hmeichhe sam sei nge sam tawi i duh?" a rawn ti teh daih a. Kei lah chuan awlsam zet hian "Ele sam sei" ka lo ti vat a.



Chu veleh a reh deuh vang vang a, "WhatsApp ah khan thil ka lo thawn che, en lawk teh" a rawn ti a. Kan la inbiak lai reng chuan WhatsApp ah chuan ka lut a.




Hmeichhe sam boys cut style hran hran chi nga vel hi min rawn thawn a. "I en em?" a rawn tih leh rual chuan "Aw en e, eng nge a awmzia?" ka lo ti vat a.




"Khatah khan eng nge mawi i tih ber?" a rawn ti a. A thlalak min rawn thawn ho chu uluk zetin ka lo en kual a. Duhthlan tur ka hre map lo, mawi tih lah ka nei hek lo.




"Ka hrelo e a" ka ti ringawt a, "Aih i duh ber thlang rawh" a rawn ti ṭung a. "Hmeichhe sam tawi satliah hi chu thuhran nise boys cut hi ka ngaina lo" ka lo ti nghut a. Thinrima sawi erawh ka nilo.




"Khawi emaw style ber khan ka sam ka ti duh a" a rawn tih rual chuan "A ṭul lo" ka lo ti bul vut a. A lo phun hlak mai.



"Ka sam hi duh aiin a sei tawh alawm. Ka têtte aṭangin sam ngai char char ka pu a, ka ning tawh alawm. Sam danglam ka pu ve duh tawh" a rawn ti nghat nghat a.




"Ka duhthusam ah chuan khati khan a mawi ber, sei deuh hniang khan . Mahs ei duh ṭalh anih chuan i zakhnuai chen velin tan rawh, boys cut chu ka ngaina lo" ka lo ti vat a.




Ka rilru tak tak sawi ka ni bawk. Hmeichhia hi chu an sam hi sei deuh hniang se mawi ka ti ber. Ka mipatpui dang rilru phei chu ka hrelo a.




"I haw har dawn viau em?" a rawn ti leh daih a. "Dar 5 velah chuan ka haw mai ka ring " ka lo ti ṭha ve mai a.



"Ṭhian kawm turte i nei em?" a rawn ti leh a, a zawhna naupangchhia zet avang chuan ka lo nui huk a.



"Mal deuhte khan i lo awm ange" a rawn ti leh deuh deuh a. Ka inring hman lo "Tlankimi nen kan kal alawm" ka lo ti hmanhmawh a. Sawi sual inti lutuk hian ka ṭhen nghal sawk a.




Rara-i chu a reh zui vang vang mai.




"Rara" inthlahrung duk hian ka ti a. "Eng nge?" pawr zet hian a rawn ti a. A aw chu pawr ṭha tak a ni ringawt. Mahse a ngawih reng ai chuan ka ngaih a ṭha zawk.




"Kan kal rual ringawt a, kan awmdun chuang lo ania. Tuna mitthi hi Delhi a kan zir pui ṭhin ania. Chuvang chuan kan kal rual fuh mai mai. Engmah ngaih kawih tur a awm lo" ka ti zung zung a.




Insawifiah ngaia ka awm chu ka inhaw hlur mai.




"A lo nih vel tak chu" ngeiawm zet hian a rawn ti a.




"Thîk duh suh, kal rual mah ila ka rilruah i awm char char tho" tiin ka thlem titih a. A la naupan vang hian thlem dan tawk pawh thiam a ngai khawp mai.



"Chu in va kal rual nasa âwm ve" a rawn ti leh zel a. "Rara..." ka ti hulh a. Ngeiawm zet hian a hming ka lam dan chiah chuan a rawn lam ve a.




"Ngai kawi lo la, ka tan a nuam lo ania" ka ti zawi ruih a. "A nuam reng nang, nuam i tawl nasa tawh em alawm" a rawn ti nghat a.



Tunah tak hi chuan thil eng pawh sawi ila a ngai kawi zel dawnin ka hria a.



"Zingah ka haw hma in ka rawn peng kawi ang" ka ti ta ngawt a. "Ka lo mu ang" a rawn ti salh a. "Lo tho hma la, kan inbe dawn nia" ka tih chuan ngeiawm zet hian a lo nui a.




Kan thu a inhmu hlei thei dawn lova ka hriat avang chuan phone chu ka dah ta tawp a. Tih lungawi dan tur ringawt ngaihtuahin ka buai leh chûk tawh. Ka inthiam lohna lah chu a pung tual tual mai sia.




Darkar khat dawn pâwna ka awm hnu chuan ka va lut veleh a. Tlankimi bula ṭhu tawh lovin a ep thawkah ka va ṭhu a. Min lo melh ralh chu ka hmu lo der hmiah. Ka mizia a hrechiang bawk a, tawn luih chi ah min ngai tawh bikin ka ringlo.





Ka rin lawk ang ngeiin kan ṭin darh dawn thleng pawh chuan kan inbe tawh lova. Ka bike ka tih nun rual chuan Rara-i te in lam panin ka inkhalh chhuak zui nghal a. Tlankimi chuan a hawna tur chu lo inngaihtuah ve tawh mai rawh se.



Rara-i te inkawt ka thlen veleh ka call nghal a, a ring ral ṭhak mai. Vawi thum lai ka call hnu pawh chuan a la ring ral ṭhak a. A la muhil anih ka ring.




Sana ka en chuan dar 6 a lo ri thuak tawh a. Zan lam ka lo tlaivar chau ve bawk nen nghah zui zel chi ah ka ngai ta lova. Mahse kan sawi fel tho tho ang.




In ka thlen chuan ka nu a lo tho leh der tawh a. "I chau awm si, intifai la, muhil nghal daih rawh" a lo ti zung zung a. Hah deuh chang leh chauh deuh chang hi chuan ka nu aw dam zet hian min ti hahdam sawng sawng zel.




Ka inbual lai chuan ka pa a lo tho chhuak ve nghal aniang. An thawm chu ka ngaithla kar a. Zingkar aṭanga an inchhaih kual vel hriat hi nuam ka ti. Heti hian kan hre lo emaw an ti ve âwm si a, ka hre vek zel sia. Vantei pawh hian a hriat ve ṭhin tho ka ring.




Ka pa in "Ka duat" tia a ko uang vel leh ka nu in "I ninawm, i fate'n an hria ange" lai aw deuha a tih te chu ka hre reng a. An zahpui awm ka ti phal lo, nupa awhawm tak an niin ka hre ṭhîn. Ka nu leh pa an ni hi ka lawm hle bawk.




Ka inbual zawh veleh WhatsApp ah lutin Rara-i chu ka text hram a. A la thinrim em avangin min chhan duh pawh ka ring lo.




Ka lo chau ve deuh bawk nen ka muhil zui ta daih a. Ka harh leh meuh chuan dar 10 a lo ri ṭep tawh.




Ka phone chu ka check nghal a, ka rin lawk ang chiahin Rara-i chuan ka message chu a seen duh ṭhak lo.




Ka va tho chhuak a, ka nu chuan pickle a lo siam vel mek a. Ka pa leh Vantei te chu an chhuak tawh anih ka ring.



Ka nu chuan min lo be nghal siam siam a, chaw ei nghal turin min ti bawk a. Ka ril a lo ṭam ve tawh bawk nen ka hnial lo kher mai.



Mitthi ina kal leh ka ngaih avangin ka che zung zung a. Vuina hun tal ka zuk tel veleh loh chuan a dik lovang.



Dar 11 velah mitthi in chu ka zuk thleng thla veleh a. Tlankimi pawh a lo awm leh vâng tawh. Vawikhat kan in melh zawk tih loh chu kan inkarah eng thil mah a thleng lo.




Dar 1 velah kan in vui liam ta a. Thlalak naah pawh ka tel ve a.



Tlaiah naupangho Tuition pek leh ka ngai dawn a. Rara-i tana hun insiam ka duh si a. An college bang lam tur chuan rilru ka siam fel a.



A lak duh ring vak lovin ka call leh hram a, ka rin lawk ang chiahin a lo la duh ṭhak lova.




Ka duh loh dan deuha ka chêt a ngaih hmel. Vantei chu ka call ta tawp a. Rara-i nen an awmdun leh awm dun loh ka zawt nghal a. Mahni naute bula ngaihzawngte chanchin zawh chu thil nuam tak a ni lem lo.




Chutah Vantei chuan "Vawiin a lo kal hlei nem, a hrilh turah che ka ngai a. Zuia khan a nu piancham lawmna a kal ve turin a sawm a. A kal ve daih alawm" a rawn ti zung zung a.




Zuia tih hming chu ka hriat hnu a ni. Ka insehruh nghal ṭeuh a. Heti zawnga intihtauh san hi ka duh dan a ni miah lo.




_______*________*________*________

(Heti zawng hi ni leh phawt teh se, duh angin a thawnthu hi ka kal chak tir thei lova. Chapter tlemtê tura ka duan mah ni se a thui deuh hlek dawn ta anih hmel...hihi)


Show post links
Top