AIZIAL By CVL Awmpuii (Completed)

[Ngaia]

AIZIAL
By CVL Awmpuii



Chapter 7



An in thlang lam veranda ah chuan ngawi rengin kan han ding dun ren rawn a. Tih vak ngaihna ka hre tawhlo.



Tlankimi hi ka duh tih ka chiang viau a, ka nupui tur atana ka lo suangtuah ṭhin pawh a ni. Mahse tunah chuan kan inkar hi a fel hlel tlat tawh. Chhe viau phei chu a ni lo, mahse a lan ang ai hian a serious tlat a ni.



"Engtin nge awm i duh?" ka ti ta tawp a. Min ṭhen theih nan kawng a dap ruai ni berin ka hre tawh.



"Kei chuan mipa innghahna tlak ka duh a" a ti halh a, a ngawi leh ren rawn a. Ka lo thaw chhuak hawk thung.




Mipa innghahna tlak a tih hi eng ang mipa nge ka hrethiam ve pha tawh lo. A teh fung ka hre miau si lova a duh dan anga awm chu har ve tak a ni.



"Chutiang mipa chu ka ni si lo a ni tiraw" ka ti zawi ruih a, hei bak baka tlawm intih hi ka la nei ngai lo.



"Ka kawng hawn sak che pawh i hnar zel a" a lo ti leh a. Heti hi chuan a ngai bawkah kan let leh dawnin ka hria. Tlang takin keimah hian thu ti tlu tawp ila ṭha berin ka hre tawh.



"Tlankim, mipa innghahna tlak i tehna hi ka hre lova, mahse chuti chung chung chuan i innghah theihna tur mipa nih ka tum ṭhin. Mahse chu chu i tan eng teh ual a lo ni lo anih hmel. Eng anga mipa ṭha, hna ṭha nei pawh ni ila i lungawi zovin ka ring chuang lo. I rilru mawlh tu dang an awm anih kha. Innghahna tlak mipa i duh anih si chuan i duh ang mipa chu ka nilo ania nge. I tana innghahna tlak tur mipa chu i lo zawng tawh mai dawn nia. Ka thlah zalen ang che. Heti hian kan inkar chu tâwp rawh se. Duhsakna ka hlan che" ka ti a.





Chu thil chu ka tan sawi chhuah a harsa takzet, mahse ti lo thei lovin min siam miau a. Ka hriatthiam dan ber chuan min ṭhen hmasak a hreh deuhin zalen a châk tawh bawk si a ni mai thei.




Kei aia mipa ṭha a lo tawng ta pawh ania nge. Kei chuan ka hahdamna tur hmeichhia ka duh ve a, rilru thlamuang taka ka awm theihna tur ka duh. Lungkham nei run chunga rilru hah reng renga ka hun ka hmanna tur hmeichhia ka duh tawhlo.




Ka melh chhuk run a, mahse ani chu a kun ngal a, engmah sawi tum ve pawh a ang tawhlo. Ka tana a harsat tluk zet hian a tan pawh a harsa ve viau in ka la ring fan a.





"Pathian ruat kan lo ni ta anih leh, bul kan ṭan ṭha leh mahna" tiin ka kalsan zui nghal a.




Pathian hian nupa tura ruat hi a nei vek a, chutiang chu kan lo nilo ania nge. Eng anga inzui rei tawh pawh ni ila Pathianin rem a tih loh chuan a rem lo ani mai. Chhan ṭha tawk tak a awm pawh a ngai kher lo. Khuanu ruat kan ni lo anih chuan a rem lo tawp mai ang.




Kan in pana ka inkhalh haw lai te chuan engtin emaw hian ka hnîm ve ruih mai. Indem theih pawh a nilo, kum 7 lai lo inzui tawh kha tunah kan tâwp ta thut ania.




Tlankimi thiam loh vek bik pawh a nilo, thiam lohna tam tak ka nei ve bawkin ka hria. Kan thu a in hmu miau si lova, tihngaihna a awm hlawl lo a ni ber e.



In ka thlen chuan ka nu min lo biakna pawh chu ka chhang ṭha hlei theilo. Room ah ka lut tlang nghal tawp a. Thawpik zet hian khumah ka ṭhu thla hnawk a. Ka tan chuan thuthlukna harsa tak a ni, mahse khatia tih mai loh chu kawng dang ka nei bawk silo.




Keimaha hahdamna a hmuh loh tluk zetin amahah hahdamna ka hmu tawh lova. Kan inkar hi siam ṭhat leh pawh tum ila a harsat tawh bakah puitling, kei ka ni inti ve ve kan ni bawk si a. A hma ang khan kan awm thei tawh chuang lovang.




Zanah chuan ka room ah ka pa nen kan inkawm a. Tlankimi nen kan inkar pawh tlang takin ka hrilh a. Min lo hrethiam khawp mai.



"Ani chuan hna pangngai tak a nei tawh a, nang chuan hmalam hun i la nei alawm. I thiltihah theihtawp i chhuah ang a, i chak zia i hmuh tir dawn nia" a ti a. Ka lo pawm khawp mai.




Dik tak chuan Tlankimi hi ka dem pum hlum thei bik lo. Tunlai hmeichhe ṭhenkhat rilru a pu ve a nimai. Hmeichhe fing, mahni lu zo veh vawh a ni a. Mipa ṭha leh ṭha lo thliar thiam tur tak pawh a ni. A innghahna tur mipa a duhna ah hian sawi theih pakhat mah ka neilo. Hmeichhe fing a nihna a lang a nimai. A phû tâwk mipa ṭha tak chu tawng mawlh teh se. A duh ang mipa inghahna tlak a tih ang chu nei se ka duhsak ber.




Kei chuan hma lam ka thlir ang a, Pathian ka rinna leh ka mize nghet tak hian eng emaw tal chu min la nih tir ve ngei dawn tih ka hria. Ka mangang lo.




Ka pa bawk chuan "A tirah chuan a harsa ve deuh mai thei a. Mahse hun a kal deuh ang a, i ziaawm chho ve mai ang. Kum 10 inngaizawng tawh, mi zawng zawng in innei tawh turah an rinte pawh hi an inṭhen veleh châwk tho alawm. Pathian remruat ni lo thilte hi a awm ve ania" a rawn ti leh a. Ka ngaihtuah dan chiahin a lo ngaihtuah ve tho anih hmel.




Ngaihzawng ṭhen vanga zan mut theih loh tih velte hi ka duh miah loh thil ania. Mahse ka mu thei rih bik der lo. Mahse ka rilruin ka infuih mawlh mawlh a.



"Hun a kal ang a, ka dik chho leh mai ang" tiin ka inhrilh mawlh mawlh a. Ani pawh ka awm ang chiah hian a awm ve thovin ka ring. Kan pahnih tan inṭhen thut chu awm thiam a la harsa rih ve ve ang. Mahse a tu zâwk mah inbiak hmasak kan tum leh tawh ka ring lo.




Tlankimi mizia ka hrechiang a, ka mizia a hrechiang bawk a. Ka thusawi kha kan tâwp hlenna tur niin ka hria.




Kar thar kan chuangkai a, ka pa sawi lawk ang ngeiin vawiinah Hriathlua a lo haw dawn a. Tukṭhuan eikham chuan ka nu leh pa te pawh hmuak turin Lengpui Airport lamah an liam thla a. Vantei nen kal ve chu duh viau mah ila Vantei ber hi a nuam sam meuh lova. In kan lo nghak ta zawk a.




Choka ah chawhmeh ka chhuan lum laiin Vantei chu a lo kal a. "Û, bazarah i kal lawk peih em?" a rawn ti a. A lam ka lo hawi vat a.



A phone hmet mawlh mawlh chung chuan min rawn melh zawk a. "Enga tinge?" ka lo ti vat a.




"Kan ṭhiannu û Millenium Centre-a dawr neiin thawmhnaw min chah sak a, chumi chu a lo thleng a, an rawn deliver hman loh avangin keimahni'n kan lam a ngai dawn a" a lo ti zung zung a.




"Kan kal dawn nia" ka lo ti ṭha ve mai a. Tih tur em em kan nei chuang lo bawk a, kan kal hman thovin ka ring.



Vantei chuan "Keimah hi motor chuan ka peih chiah lova, i kal hreh em?" a lo ti sep a.



A hmel ka en chuan zing lam ang tho khan a la chauh hmel a. Motor chuang tur chuan a ngaihtuah awm tak tak a.



"Hreh lo e, mahse engtin nge an dawr awmna tak ka hriat ang" ka tih chuan "Rara-i pawh kal ve a ngai tho a, an inah i lam thla pah ang a. Aman a hre sa a" a lo ti vat a.



Ka nau chu chiang zetin ka melh a, min lo melh ve chiah bawk a, Rara-i ka nel vak loh zia a hrechiang bawk a, a inthlahrung leh deuh aniang "Aaa...i duh chuan an dawr awmna tak ka hrilh che ang a, i lam thei tho bawk a. Rara-i chu sawm kher duh suh" a lo ti leh zung zung a.




Za lo zet hian ka lo kiai suk ringawt a. "An dawr awmna chu ka hrilh ang che" a tih leh chuan a bulah ka zuk ṭhu thla a. A phone-a dawr thlalak hmang chuan min hrilh zung zung a.




Chutia a sawi lai chuan eng ka hria nimaw "Rara-i chu ka lam thla mai ang" ka lo ti awlsam thên a. Min en hau mai, mak a ti pawh a nimai thei.



"Aa...u...i hreh viau chuan a ngai chuang lo ania" a lo ti nawi niai a, "Hreh chhan tur a awm hlei nem" ka lo ti ve mai a.



Tunah tak hi chuan kha nau titi zet zet kha ngaihthlâk a châkawm tlat. Chu mai bakah kan ina a lo chuan kai lohna pawh kar khat dâwn a ni tawh a. Ka hmu khât tawh reng reng. Ning viau mah ila a reh daih chuan a ngaihawm pha ve tlat.




Ka ngaihtuahna avang chuan ka lu ka thing vat a. Zantin a message pawh chhâng ṭha peih der silo, a ngaihawm te ka tia. Awm ang lo lutuk. Ka ngaihtuahna avang chuan ka nui ka nui mai.



Chawhmeh te ka chhuan lum hnu chuan ka insiam thuak thuak a, ka chhuak zui ta nghal a. Vantei chuan Rara-i a hrilh lawk tawh thu a sawi a. A lo inpeih at tawh a ni awm e.




Ka inkhalh chhuak dawn chiah tihah ka phone a rawn ri a, Rara-i chu ania "Au Hriatpui, kan in pengah khan ka lo nghak mai ang che" a rawn ti zang vah a. Aw ka lo pawh ve nghal mai bawk a.



Ka inkhalh chhuak zui nghal a, rei lovah an veng pawh chu kan thleng thla zui a.



Râl aṭang chuan an inpenga a lo ding va chu ka zuk hmu a. Ani pawhin min lo hmu ve nghal mai aniang, ban a rawn vai zauh a. A nui leh var var tawh.



A zâwna ka din rual chuan "I va rawn thleng hma ve" a lo ti var a. A inchei dan mawlh chu ka ngai mawh leh pek khawp mai.



Jeans dum, a khup ṭet hnuang hi a ha a, a kawr hak lah chu a taksa phuar thei ang ber hi a ha a, a awm a la zau em em zui. A dul a la lang tel kher bawk a. A inchei dan hian ka mit a tikham vek zel.



"Eng nge khatia min en vak a, chhelo min ti chiang mai" a lo ti ham ham a. Mitmeng lerh zet hian min lo melh bawk a. Ka lo rum nghut mai.



"Thawmhnaw pangngai deuh hi inbel ṭhin teh" ka ti ta hluk a. Sawi chhuah ka tum em em pawh a nilo, mahse ka kâ ka vêng hman lo a ni ber.



A rilru tihnat ka hlau leh deuh sia "Rara, i la naupang a, hmeichhia i ni bawk si. Mipa tâna zuamawm deuh thawmhnaw inbel tawh suh. Thawmhnaw hak aṭangin mi nun teh ngawt tur anih loh rual hian kan thawmhnaw hak hian min ti zahawmin min ti zahawm lo thei ania. Tun hnuah chuan i thawmhnaw hakah fimkhur tawh rawh" ka ti dam thlap a.




A tana pawm nahawm zawk turin ka thiam ang tawk chuan ka sawi ṭha leh a. Ka inthlahrung leh hnuhnawh viau mai.




Mahse ka beisei loh zet hian a rawn nui ta var var a "Lawk, Au Hriatpui, min lo nghak leh lawk aw...ka rei miah lovang" tiin an in lamah chuan a tlan let zui a.




A ngaihna hrelo zet hian hmanhmawh zeta a tlan chu ka lo thlir mawl tawp ringawt a. A awmdan chuan min tihrilhai kher mai.




Minute 5 vel a liam hnu chuan a rawn tlan phei hnak hnak chu ka hmu leh a. Smart pants var sar leh kamis dum hi a rawn ha a. A sam sei hniang chu a thlah deuh hnalh bawk a. A lang zahawm kher mai.




Râl aṭang chuan min rawn nuih var var a, a ngaihna hrelo lutukin ka lo en reng ringawt thung a.



Ka bul a rawn thlen rual chuan hah hmel deuh hian a thaw chhuak ham ham a. "Heti hian a ṭha tawh em?" tiin a inchei dan ka hmuh chian theih nan chuan a bân a phar hluai a.




Kei chuan a thawmhnaw ni lovin a hmel ringawt chu ka lo en thung a. A chêt dan chuan min barakhaih a ni tawp mai. Chet channa chang pawh min ti hrelo.



"Heti hian ka lang zahawm deuh tawh em?" nui var var chung hian a rawn ti leh a. "Inthlak turin i va let leh kher a" ka lo ti sup a. A lo nui liam mai a.



"Heti hian ka ṭha tawh em?" a rawn tih nawn leh takah chuan "A hma aiin i mawi zawk" ka lo ti ve ta vat a. Min nuih leh var var takah chuan ngainat awm zet hian ka lo nuih ve a.




Bike-a kan inphurh hnu chuan "I duh dan zela awm ka tum dawn. Theihtawp ka chhuah dawn" tiin ka bengbulah a lo phun sar sar a. A der ni miah lovin ka lo nui hawk a.




Rara-i, hmeichhe mak tak zawng a ni. Amahah hian hriat belh ka nei zel a, hei lo pawh hi mize dangdai tak tak a la ngahin ka ring. Hmeichhia ka hriat ṭhinte a ang lo, a danglam zar mai.



Millenium Centre-a kan kal hma chuan "Bawngkawnah thil min lampui hmasa lawk la" a ti a. A harsa lo bawk a tiin âw ka lo pawh veleh mai bawk a.




"Ke in kal ila, hun kan nei tho bawk a. A nuam zawk daih ang" a tih pawh chuan ka lo hnial lehpek lo.



Babu tlangah bike chu kan dah a, ke in kan inzui ve hnak hnak a. A inthuamna mawlh chu ka lo en leh ṭhin a, a hma ai khan a mawipui tak tak zawk daih.



Heti hi chuan hmeichhe pangngai takte pawh a ang ve ta alawm. A hma khan a pangngai lo e tihna lam ni lovin a inthuamna khan a ti lang zahawm lo emai a. Tuna a inthuamna hi inhmeh ka ti zawk daih.



Chhungril nun hi a pawimawh rualin landan hi a pawimawh lutuk tlat. Kan lan dan hian kan chhûngril nun tam tak a phawk chhuak miau si a.



Bawngkawn pana kan kal lai chuan kawngsira kutdawh pakhat lo ṭhu hi a hmu a, ka beisei loh zetin ₹50 hi a thlak a. Ka lo en reng a, min ngaihsak ang pawhin a awm lo.




Chutiang chuan kutdawh a hmuh apiangin a ding zel a, an bawm dawhah pawisa a thlak sak zel a. Mak ka lo ti khawp mai. Henu hi ka beisei ang a ni dawn hauh lovin ka hre ta.




Mi paruk vel bawma a thlak hnu chuan Bawngkawn thlen dawn hnaiha kutdawh pakhat lo awm chu a hmuh hmaih nge ka hrelo, kal pel mai a tum a. Kei lah chuan a thlak leh dawn emaw tiin ka lo ding chut a.




A rawn hawi let a, "Hei, i thlak leh dawn em?" ka lo ti vat a. A mitmeng a buai nak mai. A bag ah lai chu a hum ṭha sauh sauh a, a hmui a pet zeuh a. A awmdan chu a lai kual vel vek nimaiin ka hria.



Kei lah chuan a thlak hun ka lo nghak ran tawh mai sia. Kan ding ta reng a.



A bag chu a hai rak rak a, a hnuah chuan a ning ta deuh aniang "Au Hriatpui, ka peih tawhlo, ninawm e" a ti hluai a.




Mit kablo san deuh uk a "Tinge?" ka lo ti sup a. A lo thaw chhuak halh a "Aaa...ka ning e a" a ti leh tawp a, a hmel en reng reng pawh chuan a nin zia hai theih a nilo.



A sam chu a tuai vak a, a ṭham nawk a. "Pawisa ka nei tawh hlei nem, ka thil lamna man tur pawh ka thlak zo daih alawm" a lo ti nang nang a.



Ka lo nui chhuak hawk mai, lu ka thin khum nak nak a "Khawngaihna ngah lutuk chu a ṭha lo, a tâwk chiah a awm ve alawm" ka tih chuan "Aaa...chutiang pawh a nilo" a ti halh a. Ṭah chhuak ngawih ngawih hmêl hi a pu.




A awmdan chu ka lo en reng a, a che reng a, a ner nang bawk a. Thinrim ṭah chhuak deuh hi a ang ber. A awmdan chu ka sawifiah thiamlo.



Ṭawng tum a ka ân zuau lai chuan "Ka thin a rim eee" a rawn ti chiam a. "Aaa...ka ning a... mifel ang deuha awm ve ka duh a. Vantei'n hmeichhe khawngaihna ngah deuh i duh thû min hrilh a. I lakah mark score ka tum ve alawm. Mahse pawisa ka chân vek kher a. Kutdawh te pawisa ka pek chuan min hmu ṭha ve deuh thei ang a ka tia...a...ka ning, ka hne" a ti mawlh mawlh a.




A thiltih âtthlâk lutuk avang chuan ka lo nui chhuak leh hawk hawk a. A va han inhmeh tak tih bak sawi tur ka hrelo.



"Mak ka ti rêng che ani" ka lo ti hawk a. "Min nuih suh aw... khawngaihna ngah anga lan ka tumna lamah pawisa ka chân duai a. Ka ui lutuk, lak let leh chi a ni tawh bawk silo" a ti nghat nghat a.




A awmdan chuan ka nuih a va tiza tak e aw. Min duhna a lan chhuah tir tum dan te, ka laka lan ṭhat a tum ve na chu ka ngaihlu hle thung. Mipa mawl let tawp ka nilo a, a chetdan chu ka hrethiam ve vek.




Ka nuih a zat viau rualin engtin emaw riau hian ka lawm tlat thung a.



A thil lamna man pawh chu ka tum sak ta vek a "Lawmthu te min hrilh ve la" ka tih chuan "A ho emai a, nangmah vang vek ani tho " a lo ti awlsam then a. Ka nui leh hawk tawh.



Kan inphurh haw leh hnu thleng chuan ka chhaih ka chhaih a, a haw duh der si lo. "Ka duh nei turin hma ka la ve a nimai a" a ti ham ham a. Chhaih zâm chu har ve tak ani.



An inpengah bawk ka thlah leh a, mak deuh mai chu hetia ka thlah apiang hian ka hlauhthawn pui tlat tawh.



"I ṭha em?" chîk zeta melh hian ka ti a, ka zawhna chuan a ṭhawng deuh a nimai thei, min melh ralh a.



"Ka hmel hi chu a ṭha reng" a lo ti awlsam thên a, a nui zui awr awr a. A thawveng ṭhin ngawt mai.



"Rara" thutak zeta ka tih leh takah chuan chiang zet hian min rawn melh a. A mitmeng chhiar tum ni pah fawmin "Harsatna i nei anih phawt chuan min hrilh hreh suh aw, i û angin min en la. Engkim min hrilh dawn nia" ka ti a.



Ka chîk viau na in a mitmeng chu ka chhiar thiam chuang lo. Mitmeng dam raih hian min melh a, a lo khi sak a. "Û angin ka en hlei nem che" lo ti daih a.



Thaw chhuak hawkin "Chu chu ka sawi tum tak a nilo. Ka thusawi hmasa zâwk kha ngai pawimawh ang che aw" ka ti nghet charh a. A ha var rual ṭhat lang chuang a rawn nui a, a lo bu nghat a.



"Ka kal ange" ka tih rual chuan min rawn hnaihchilh nghal a, ka kawngah min rawn kuah zawk a "Ka lawm e" tih leh min thlah leh nghal a rual a. An in lam panin a tlan zui nghal hnak hnak a. A kal liam thleng chuan ka thlir a, a rawn hawi let ve tawhlo.




Min rawn kuah chhung kha reilotê tak tak ni mah se ka thinphu a rang ve dawt thei. Ka âwm ka dawm vang vang a, ka thinphu ran zia chu pui tak a ni.




Rara-i haw tur chu ka ngaihtuah zui leh a, in a thlen hunah harsatna tawk tawh lo hram se ka ti khawp mai.



In ka thlen ve meuh chuan ka nau in eirawng a lo bawl ṭan der tawh a. "I lo che peih elo?" ka tih chuan "Ka zia tawh lutuk, ka lu hai vel pawh a awm tawhlo" a lo ti var a.




Ka thil lam sak te chu ka pe zui nghal a, lawmthu min lo hrilh ve nghal zat bawk.




A eirawngbawl chu ka pui ve nghal a. Ka nu te'n min rawn call a, Airport aṭangin an lo chhuak chiah a ni awm e.




Chutiang anih chuan taffic jam nen darkar hnih thum velah an rawn thlen hman mai ka ring.




Tlai dar 5 velah an lo thleng a. Hriathlua chu a hmel hmuh a nuam khawp mai. Ka nau zawk mah nise a thil zirin a zir nge kei ai hian a lang patling a, kum3 chauhin kan lo inthlau bawk nen mi pawh hian ka û zawk emaw an ti fo.



A zualpui an indah fel hnu chuan chhung inkhawm te hmangin chaw kan ei zui nghal a. Chawei lai chuan a awmna chanchin te kan ngaithla a, ka pa in zawhna a zawt zeuh zeuh bawk a. Kan ri ve nak nak hlawm mai.



Kan quarter ah hian room pathum chauh a awm avangin room kan in ṭawm dawn a. Pawi kan ti lo ve ve chuan ka hria.




Mu tura kan intintuah lai chuan ka pa in "Khum hi siam belh a ngai ani, ṭum dangah in lo haw rual ngai em em si lova ka lo ngaihsak vak lova. Room chu inṭawm mah ula khum em inṭawm chu in tlangval ve uaih tawh si a. A awm ang lo emai" a ti hlut a.




Unaua mut hi pawi kan ti em em lova, engah mah kan lo ngai lem lova. Mahse chutia ka pa in a sawi takah chuan dik ka ti ve khawp mai.



Hriathlua chuan "Tun ṭum ka lo haw chu Mission Vengthlang ah, ka pi te bula hun hman tam ka tum deuh a. Room âwl a tam tho a, zanin chu hetah ka riak ang a. Naktuk aṭang chuan inpui lama chhuk thlak daihte ka lo rilruk a" a lo ti zung zung a.




"I rawn haw ve chhuna hmun danga awm daihte chu" ka nu'n a lo ti vat a. Sawi hmaih theih loh chu ka nu leh Hriathlua te hi an in nufa em em mai a. Kei ai mahin Hriathlua hian ka pa chhunna a ngah zawk a, hei vangte pawh hi a nimai thei.




Unauah chuan nu leh pa te hian hmangaih bik an nei miah lo na in mize milpui hi an awm ve a. Kei hi chu ka pa hian min khalh deuh bik a, a fa hmuh hmasak ber ka nih vang pawh a ni mai thei. Hriathlua hi ka nu in, Hriatrengi hi chu ka nî te lam an nia. Vantei hi ka pi leh pu te. Chutiang chuan kan unau hi min sem deuh ka ti mai. Mahse tumah kan inthik ngai lo, kan inthik na turin engmah an ti bik ngai lo bawk a.





Hriathlua chuan "Zan lam hun chiah ania ka sawi, lungngai suh Nu, chhunah chuan puih i ngaihna apiangah ka pui ang che" a lo ti vat a. An inbe rem lehnghal vek chu a nimai.



Zanah chuan Hriathlua nen kan mudun ta ngei a. Kan khum a zau thawkhat bawk a, kan indîp run chuang lo.




Ka result chungchang a hre ve vek a, ka unaupa neihchhun a ni ve bawk a. Ka hmalam hun tur sawiin kan titi a. Ka pa nen chuan sawi dun ve tho mah ila pa fa kan ni a, inhawng taka ka sawi rualin a rem ṭeuh lova. Mahse tunah chuan ka unaupa nen a ni tawh a. Kan titi pawh a ziaawm khawp mai .




Hriathlua chuan "Û, keichu teaching line i ti thei tho bawk a, helamah hian kal tlang daih la ka ti. A hranpa in tui zawng leh nuam tih zawng i nei chuang lo bawk a. I thawk ang a, i tui chho ve thei maiin ka ring" a ti luam a. Heihi ka lo ngaihtuah ruk ve rauh rauh ania. Mahse keimah hi thil thar hmachhawn turin ka inpeih tawh chiah em ka hre lo a ni.




"Tunlaiah a hlawk tawh tho a, home tuitor te pawhin an hlawh hnen theih em hi. Chuloah zirtîrtu hna phei chu hna zahawm ania. I hlawkna tur ngawr ngawr chu thuhran ni se naupang hovin nang ang zirtirtu an neih chuan an hlawkpui dawn emai" ti lehin min sawi phur pui a. Ka ngaihtuah zui rauh rauh a. Ka tana Pathian ruatte pawh a ni mai thei ani.




Thil reng reng chu sual a nih loh chuan han ti ve chhin pawp mai ila, kan ṭhat pui leh kan tih zawm ang a, kan ṭhat loh pui tak leh kan bansan mai ang a ka ti rilru nauh nauh a.




Ngaihtuahna thar ka nei ta zawk mai. Tunlaiah tuition pek an uar em em a, mi nu leh pa te an buai tawh a. Fate lehkha zir tir nan hun an nei mang tawh lova. Ṭawng huat thu suhah class 12 chauh pass te pawhin Primary school kal chin pawh tuition an pe thei tawh ania. Chutiang anih chuan High School leh Higher level tuition hi hawng ve tawp mai ila a ṭha viau tak ang.




Tunlai zirlai naupangte harsatna ber chu Mathematics hi a ni chiah bawk a. Mathematics tuition tawp hi hawng ila tih ka rilrûk ta a.




Hriathlua chu ka hrilh ve nghal a, ṭha a lo ti khawp mai. "Ka pû te inhnuai an thawm ṭhat veleh ti nghal la a ṭha tak ang. Hmun hma pawh a rem nghal vek alawm. Pathian remruat aniang" a lo ti ve hlut a, ka phur thar kher mai.




A tuk zingah chuan kan tukṭhuan ei laiin ka sawi a. Ka chhungte chuan ka beisei ai daihin min lo phur pui ve a. Ka hlim ru kher mai.




Hriathlua'n min lo sawipui veleh bawk a, "Heti hian bulṭan phawt sela, a zirtîr te'n an ṭhat pui viau phei chuan sikula thawk turin an sawm luai luai mai ang" a lo ti veleh a.




Vantei pawh chuan "Tuna kan college physics professor pawh hi hetiang aṭanga bulṭan hi alawm anih. Tuition a hawng a, a zirlaite khan an hlawkpui thei lutuk a, result ṭha deuh deuh an nei ṭhin a. Kan college a thawk tur hian an sawm phah alawm. Tun thleng hian bawn an ti rapthlak " a lo ti ve hluai a.




Chutiang an sawi tak zelah phei chuan phur tawh tak ka ni. Mahse hmanhmawh vut vut na chi a nilo tih ka hria a. Pathian râwn a ngunthluk zeta ngaihtuah leh ka la duh.




Ka pa chuan "Thla leh lamah chuan i pû te inhnuai pawh kan peihfel tawh ang a. Mi luah tir an tum tawh rih chuang lova, tuition lakna atana rem law law in kan thawm ṭhat zui tir ang a. Ekhai, a ṭha dawn lutuk " a lo ti veleh hlut a.




Ka nu lah chuan "Keipaw'n zirtîr i ngah viau chuan ka pui ve thei ang che. Maths ah te chuan ka bawn alawm" a lo ti fiamthu ve a. Kan lo nui ham ham hlawm mai.




Ka pa lah chuan "I nu hi a bawn tak tak ania aw, zirtirtu ni ṭhin tho ania. A hnung i zui dawn pawh a ni mahna" a lo ti vat a.




Ka nu te khuaa kan zin apiang hian puitling ṭhenkhatin "Miss" an tih hi ka hrefuh leh zeuh ṭhin a. A zirlai hluite an nih thu ka pi khan min hrilh ṭhin.




Tlaiah chuan Rara-i a rawn lang teh nawlh a, bag a rawn ak ṭat a. "Nu Zualte, zanin chu ka lo riak dawn nia aw" a rawn ti ham ham a. Vantei nen an inkuah nghal chuk chuk a. An lo inhrilh lâwk sa diam tawh anih hmel.




Ka la leh Hriathlua te chu ka nî Matei te tlawh tûrin an inphur chhuak a, an lo haw ve ṭêp tawhin ka ring.



Sitting room a ka lo ṭhu min hmuh rual chuan "Au Hriatpui, i dam ṭha em?" a lo ti var a, "Dam alawm" ka lo ti ve mai bawk a.



"Khawnge Au Hriathlua chu? Amah ka hmuh duh vangin asin rawn riah ka tum" a ti zui zat a. Ka nu chuan a lo chhang vat a.




Ka nu te eirawngbawl chu a pui ve nghal mawlh mawlh a. A phun leh ser ser ṭhin a, a thusawi ka hre pha reng sia.



"Au Hriatpuia nge Au Hriathlua hmelṭha zawk? Tu zâwk nge lian?" tihte mai mai a zâwt a. A hahthlâk ṭhin ania. Eng atan nge maw a tih ni.




Ka pa te lêng pawh chu an rawn haw zui a. Hriathlua leh Rara-i te pawh an inhmelhriat nghal a. Rara-i chuan Hriathlua chu a be mawlh mawlh a, zawhna chi hrang hrang a zâwt bawk a. Mi zaidam ngang Hriathlua chuan ṭha tak takin a chhâng zel a. A ni hi chu a dawhthei khawp a, ning hmel pawh a pu ve lo.





Thlang lam veranda ah ka va ṭhu chhuak ta daih a. Tlai ni tla tur êng set phût chuan ka lung a rawn tilêng tlat pek a. Tlankimi zu han ngai tlat a mawle. Kar hnih lai kan inbe lo ve ta chu ania. A chanchin pawh ka ngaihven lo bawk a, ka hre zui lo khawp mai.




Ka hnunglama thâwm ri rak vang chuan ka hawilet vut a. Rara-i hi kuthnung zuihin a rawn kal dem dem a. Ka hmuh hnu pawh chuan a kal ngaiin a kal reng tho.




Ka bul a rawn thleng chawpchilh nghal a "Tlankimi nen in inṭhen tawh tih ka hria ania aw" sawi fuh inti zet hian a rawn ti a. "Û ve la, nang ai a upa daih ania" ka lo ti hluk, a ner nak a "A zah tlak loh emai a, in inṭhen chu in chawh dun ngawt mai" a ti hriam hrak a.




"I ṭawngkam fimkhur ve rawh" ka lo ti hluk, ṭawngkam hi a duh tui lo mah mah zel a. Hei tak hi tun thlenga ka la ngainat tak tak theih loh chhan niin ka hria.



A lo meng râng nasa mai.



"Nang au chuan Au Hriathlua saw a fel daih zawk" naupangchhia zet hian a rawn ti a. "Anih chuan ngaizawng daih zawk la" ka lo ti vat a, ka nuih suk bawk a. Min melh na teh asin.




"Keichu pastor te hi ka ngaisang lutuk. Pa Sangzuala te hi ka ngaisang tawp, chutiang bawkin Pastor nupui pawh. Au Hriathlua pawh hi ka ngaisang lawk" a ti zat zat a.



"Anih chuan Hriathlua chu i duh chî tak a ni dawn anih chu. Ka pa angin pastor a la ni dawn sia" ka lo ti veleh a.



"Pastor nupui nih ka peih teuh loh mai a, mawhphurhna a tam si. Nu Zualtei te hi ka fak teh mai nia. Pastor nupui nih a tlin si" a ti nghat nghat a. A thutak ve khawp mai.




"Au Hriatpui, i hmeichhe duh ang mizia in awm ta ila, min duh ve theih mai i ring em?" a rawn ti leh daih a. Kan thusawi inpersan lutuk avang chuan ka lo nui hawk a. Mahse thutak zet hian min lo en thung a.



"Min bem tihna em ni?" ka tih chuan "Mipa bem hmasak te chu ka duh bik teuhlo" a lo ti hlar a. Ka kiai suk ringawt a.



"Ka zawhna che kha min chhang la" a tih leh takah chuan ka lo thaw chhuak hulh a.




"Rara..." ka ti hluai a, a mitmeng fiah zet chuan min lo melh kal a. Ka sawi leh tur a lo ngaichâng rân mai.



"Tu emaw i duh avangin i mizia thlak tum duh suh, i nihna ang anga pawm tur che mipa zawng zawk rawh" tiin ka rilru dik tak ka hrilh a.




Mahse min lo chhanna chu ka beisei loh lam daih a ni.



"Ka nihna ang anga min pawmtu ai chuan ka dik lohna leh ṭhat lohna te min hrilh a. A ṭha zawnga hma ka sawnpui theih tur mipa ka duh zawk. Ka nihna ang anga min pawmtu mipa chu ka tawng hnem tawh. Mahse tunah chuan hei aia ṭha zawk Rara-i nihna min hmuhtir tu tur, hei aia ṭha zawk Rara-i min chher chhuak thei tu tur mipa ka duh. Chu chu nangmah ah hian ka hmu" a lo ti fiah fak a.




__________*________*________*_________


Show post links
Top

[Ngaia]

AIZIAL
By CVL Awmpuii



Chapter - 8



Rara-i chu ka melh chhuk run a, a thusawi chuan min ṭhawng a ni tawp mai. Hmeichhe mak danglam tak a ni tih bak sawi theih ka nei lo. Min ti bangbo hial zawk.



"Rara" ka ti hulh a, engtin nge ka laka beiseina nei lo tur hian ka hrilhfiah ang. Ka thusawi engkim hi huat lam ai chuan dawn sawn dan a thiam em em reng zel a. Ka thû a awih phian mai bawk si.



Kan pahniha bulṭan ve tura inngaihtuah ringawt pawh ka thiam lo. Ka nau ṭhiannu anih na angin kei chuan nau ang tak têin ka en a. Ka tân chuan naupang ang mai a ni. A nungchang leh awmdan zawng zawng nen phei hi chuan nula pangngai angin ka hmu theilo.




Ka rilru hi a tan ka hawn sak ve thei lo a ni ber.




"Kei chuan nau ang bakin ka en lo che, ka lakah beiseina nei suh" ka ti tlang ta tawp a. Lungngai hmel leh hrehawm ti hmel pawh a pu hran lo. Min nuih var var ringawt a. Ka tan hnawl a harsa zek mai.



"Ka bem dawn chuang hlei nem che, ka mizia te hi i rilrem zawngin ka siam rem zel ang a. I inkharkhip tlatna bang hi ka chhu chhe dawn. Tunah phei chuan tumah min dal tu an awm tawh lo bawk a, bem chuang si lo che in ka hma ka sial ṭan tawh dawn" confi zet hian a ti a.



Ka lo thaw chhuak hawk a, muk zeta ka melh lah chuan min lo nuih var var bawk si.



"Duh tawk la, a ṭha ber ang" ka ti leh ringawt a. A lo nui duh lek chauh.



Inchhunga min luhsan hnu chuan ngawi rengin ka inngaihtuah zui vang vang a. Ngaihzawng anga en tur chuan ka inngaihtuah thiam loh bâkah ka duh ang a ni lo.




Zanriah kan ei lai te chuan a titi leh zat zat tawh a. Ka rin ai daihin Hriathlua chuan a be thiam a. Kei tih loh ka chhungte zawng zawng chuan an be thiam em em a, an ngaina vekin ka hria.




Kei pawhin a hma ang em em kha chuan ka hmu tawh bik lova. Ka lakah hetiang rilru hi pu lo sela chuan pangngai takin ka be ve thei tawhin ka ring. A rilru hre reng chung si a beiseina siam sak ka duh lo.




Zan dar 7 velah chuan Hriathlua pawh ka pû te in lamah a chhuk thla a. Chhuahna tur ka nei lo bawk a ka bike ka hman tir tak kha.




Ka pa chu committee turin a chhuak tawh a. Ka nu hovin in kan lo nghak a, Rara-i chuan boruak a siam leh tawh khawp mai.



Sitting room lamah inkhel ka en mai mai a, anni ho chuan choka lamah ka nu pot chei an pui thung a.




Rara-in "Au Hriatpui, thingpui in ve rawh aw" a rawn tih chuan ka lo hnial lo khawp mai. Nui var var chungin min rawn pe a, "Kan mut hma chu la mu bik suh aw" tiin min kalsan zui leh nghal a.




Choka lam thâwm avang chuan ka inkhel en lai pawh ka ngaihtuah hlei thei lo. An titi ah îp chawih chawih chungin ka lo nui ve suk suk mai.



Rara-i chuan zahmawh ni chiah si lo hian awmze nei deuh deuhin thil a sawi a. A la naupan tehlul nen sawi tur lah chu a hre zek bawk sia.



"Keichu pasal nei lovin nula senior ka nia nga, mahse nula senior nghei miah lo ang kha ka ni dawn. Ka duhawm a, ka hmelṭha a, ka îtawm bawk a" a ti ham ham a.




Vantei chuan "Thil hi i sawi raw thei lutuk, a zahthlâk" a lo ti vat a. Rara-i lah chu a lo nui uarh uarh a "A ho emai a, ka fiamthu ve alawm. Pasal ka neih hunah chuan ka zei ngawt ang. Heti hian ka tia nga, heti te hian ka tia nga" a ti leh zat zat a.





An thâwm a rik hluai danah a tihdan tur chu a zir tih a chiang reng. Amah lah chu a nuihza za ah a la ṭang a. Thil raw zet zet a sawi zawm leh a.




Ka awm ve reng tih a hre âwm tho sia, min zah pah lo ve khawp mai. Vantei'n "I hrâm tla hawlh eee" za zeta nui chung hian a lo ti leh hluai ṭhin a.




Rara-i lah chu a la zak map lova "Tûnlaiah chuan mipa awm khawmin mi an rel a, hmeichhe awm khawmin zahmawh kan sawi nasa tawh zawk" a lo ti ham ham a.




A sawi dik thei fu bawk sia.




Ka nu in a khap takah chuan a sawi zawm tawh bik lo. A thusawi raw zet zette chu mipa tân pawh lo zah ve chem chem na tham a ni. Sawi tlang lovin pehhel deuh chung sia sawi a thiam fu lawi a. Mak ve reuh tak chu a ni.




Ka nu in a zilhna te chu ka hre pha ve reng a, a zilh tih lemah thil kalphung a hrilh a ni mah zawk.



Ka pa committee bâng pawh a rawn haw a, ka nu in a lo chhâwn vat a. Room lamah an inzui lut nghal a.



"Vante ...hei a hmaa ka hrilh nu che kha a live leh tawh" Rara-i chu a phul hlut a, a nui zui ar ar a. "Aw...aw...ehe...aw...a bawn chho dawn e" a ti nawk nawk a. Eng tak chu en ang maw.



Tui in turin choka ah chuan ka va phei a, Rara-in min hmuh rual chuan min lo ko vat a "Au Hriatpui, hei mipa lawm chi kan en, lo en ve chhin teh" a rawn ti a, a nui zui ham ham a. Vantei chuan inthlahrun hmel deuh mai hian min lo melh kar a. Ngawi rengin ka va pan ve mai bawk a.



Ka en pui ve nak chuan hmeichhe pakhat hi thawmhnaw thehlêp zet ha in IG ah a lo live a, a sawt auh auh mai.



"Eng atan nge hetiang te in en a?" tiin ka phun hluk a, ka kalsawn zui nghal daih a. Rara-i lah chuan "Eehhh...a'n en duhlo der vel ah kan college mipa ho pawhin an en ziah, a ruk tak chuan i en ve ṭhin tho kha" a lo ti zat zat a, min nuih zui vak vak a. Henu boruak han ngam pap pap dan hi chu!




"Kha aia en tur ṭha a tam emai, thil ṭangkai lo anih kha" ka lo ti nghut a. "Khawvel an ti famkim ve alawm" a lo ti ve zat a. Ka chhâng zui peih tawh lo.




An thil en lai pawh chu an dah zui ve mai bawk a. Kawr ṭhui dan style tih vel an sawi leh daih tawh.




Tunlaiah hmeichhe ṭhenkhat, an taksa uchuak tak taka pholang ṭhin an awm a. Zanrei lama Instagram-a live lah hi an intihhmuh emaw tih mai tur a ni. An video te lah hi khawi khawi emaw group ah an post kual a. En ve miah lo tan pawh a lo hriat ve zel theih.




Mihring hian thuamhnaw duh duh ha turin zalênna kan nei a. Chutihrual chuan keimahni min ti lang zahawm thei leh mi hmuha mawi tâwk hak hi pawimawh ka ti khawp mai.




Hetianga Instagram leh Facebook vela sexy tak taka in post ṭhin, thawmhnaw thehlêp zet zet ha te hi mi hur herh leh lerh an ni e chu ka ti kher lo. Mahse hmeichhe ṭha leh zahawm, mi te zah kai leh râwn kai ni lo tlângpui. Chhungpui nu atân an awhawm lem loh a, mipa pawh hian kan duh lem lo.





Ka pa inthlak zo pawh ka nu nen an rawn inzui chhuak leh a.



Hmeichhe ho chu choka lamah an la awm char char a. Ka pa nen erawh inkhel en pahin kan titi a.



Ka pu te inhnuai thawm ṭhat chungchang a rawn sawi chuan ka beng a lo verh khawp mai.




"Kar lehah an zo thei tawh dawn a. I pi leh pu te pawh ka be tawh a. An lo phur khawp mai. I duh chuan tun aṭangin zirlai zawng ṭan la a pawi miah lo" a ti a.



"Engtia han zawn kual chi nge ni ang aw?" ka tih chuan "I pu kha chuan vengchhungah pawh duh an awm nual a ring a. Nu leh pa ho a lo hrilh hriat tur thu a sawi a. Bulṭan tur chauh i la ni bawk a, zirlai tam tham nei nghal lo mah la nakinah chuan an rawn bawh ve mai ang. I zirtir thiam a, result ṭha te an nei anih chuan" a lo ti dam thlup a.



Ka mut hma in ka ṭhiante ho chu WhatsApp lamah ka be kual a, tuition ka hawn tur thu leh kal duh an awm anih chuan lo hriattir turin ka chah a. Min lo phur pui ve hlawm khawp mai.




Mu tura ka intintuah lai mek chuan ka beisei loh zetin Tlankimi message ka dawng nawlh mai a.




"Tuition i hawng dawn maw?" tih tê mai hi a ni a. Engtin nge maw a lo hriat hman ni? Ka ṭhiante tu emaw berin an lo va hrilh hman anih ka ring. Kan inzui rei bawk a, ka ṭhiante nen pawh hian an innel a, ṭhian ah an inchan hman vek a. An lo va hriattir ve anih hmel.




"Aw" ka ti tawp a, message chu a seen nghal a. A rawn type leh nghal mawlh mawlh a. Chumi chhung chuan Rara-i message ka dawng a "I bulah ka lo riak pawp mai tur ania" a rawn ti ham ham mai.



"Mu rawh" tih chauhin ka chhang. A thisen hi chu a sang ve ṭhin ani.



Tlankimi message chu ka chhiar leh a "A ṭhat nasat chu, duhsakna ka hlân che aw" a rawn ti a.



"Ka lawm e" ka tih chuan a seen lehnghâl a. A reh mai ka rin laiin a rawn type leh mawlh mawlh a, ka lo ngaichâng ve lo theilo.




Rara-i message zawk a rawn thleng leh a "Ka mu mek, Au Hriatpui muttui bawrh bawrh" a rawn tih chuan ka nui chhuak hawk hawk. Muttui bawrh bawrh han intih deuh tawp mai chu!



"Muttui le" ka lo ti ṭha ve mai a. "Ka mu thei dawn lo anih hi" a rawn ti leh ham ham a, ka chhang zui tawhlo.




Tlankimi chuan "Kan veng-ah pawh Mathematics tuition kal duh chu an awm nual a, ka lo hrilh hre ve hlawm dawn nia" a rawn ti a. Engtia chhan zui chi nge pawh ka hrethiam lo.





Kutzungpui ka va thawn ringawt a, a seen zui tawh lo.




Mutthilh tum mai tawh kha ka muhil thei ta reng reng lo mai a. Thil chi hrang hrang ka ngaihtuah a. Ka ngaihtuahna ah chuan Tlankimi a tel lo theilo. Ka tân chuan theihnghilh pum hlum hi a la harsa ve em ani.




Kha chen kan lo inzui ve tawh a, nupui tur atan hiala ka lo suangtuah thin a ni bawm a. Hetia han tawp thut mai chu awm thiam a har bakah khingbai deuh riau hian ka inhria a. Mahse ka tawrh theih phak bak erawh a ni hauh lo. Hrehawm mah se ka tuar chhuak ang.




Engtikah nge hmeichhe dang ka buaipui leh theih ang tih chu ka hre lo na in hun in a rawn tirh ve mai ka ring.



Tunah chuan ka hma lam hun innghahna tur chiah buaipui ila a fuh ber. Hmeichhia tih lam buaipui hman ka ni rih tlat lo.




Zingah chuan Rara-i ṭe chel chul ri in min ti harh zawk a. Sana ka en chuan dar 6 pawh a lo la ri lo.



Phak chuapin ka tho kâng a, tun ang zingkar hma lutuka han rik chel chul mai chu aw, a mi pangngai loh thlak mange.



Ka inphih fai tê tê a, room aṭanga ka va chhuah chuan Vantei nen kawtah ui buang lian zet an lo chhaih kual zak zak hi ka va hmu a.



Ka nu leh pa te chu choka lamah thingpui in in an lo ṭhu a. Ka phun zui hluk a "Tun ang zingkar karah rak chel chul mai" ka ti nghut a. An lo nui mai a.




Mihring famkim ka ni lova, zîng thawh hlim hian ka mood a fuh lo tlangpui a. Ka chhûngte pawh hian an hrethiam ṭhin khawp mai.





Ka nu chuan "Thingpui i duh chuan lo inthlit ve mai rawh aw" a lo ti vat a. Tui ka in tê tê a.




Thingpui keng chung chuan kawngka bulah ka va ding a. Kawtlaia ka nau leh Rara-i te ui chhaih chu ka en reng a.




Rara-i chuan uiin a ei phak loh tawk tur vel lekin biscuit hi a lekkang a. Ui chuan ei tumin a zuang auh auh a. Vawithum vel a zuan hnu chuan a barh nghal zel a. Chuti chuan biscuit dang la in a tih dan ngai chuan a ti zel a. A bulah Vantei chu biscuit bâwm kengin a lo ding ve reng bawk a. An hlim dun hmel kher mai. Kawngka bula ka lo ding reng pawh chu min rawn hmu lo.




"Zingkar karah tu ui nge?" ka va ti nghut a. An lo hawi vat a, Rara-i zawk chuan "Au Hriatpui, good morning " a lo ti zâng vah a. A nui leh var var tawh.




Vantei chuan "Kan inkawtah hian a lo bawk tawp a, kan lo chhaih harh mai mai anih hi" tiin ka zawhna a lo chhang vat a.



"I va bengchheng ve" Rara-i zawk melh run chung chuan ka ti a. "Ka reh thiam hlei nem" nghal zet hian a lo ti a. Ka tih loh zawk Vantei a lo inthlahrun hmel leh tawh.




"Ka mutui lai min ti harh ringawt a" ka tih chuan "Va mu leh rawh, ka bengchheng tawh lovang " a lo ti awlsam nghal ât a. Ṭawng hi chu a awlsam ve ngawt mai.




Inchhûngah chuan ka luhsan zui nghal daih a. Mut leh chu ka tum tawh lo nasa.



Tukṭhuan ei hma in Rara-i chu a haw a, ka chhungte'n thlah turin min ti leh a. Mahse amah zawkin a lo hnial ve teh khiah a. "Zing exer lak pah a nimai kê in ka haw dawn" a lo ti var a.




Ka thlah châk zawk zawk lo bawk nen ka lo hnial lo khawp mai.



Pathian zarah ka pu te inhnuai chu tluang takin kan thawm ṭha zo thei a. Ka chhûngte leh ṭhian ṭha te zarah zirlai pawh mi 11 lai ka nei nghal dawn a. Tlankimi pawhin mi 3 lai min hmuhsak a, a puihna ka dil miah lo na in lâwmthu chu ka hrilh ve kha. "Puih i ngaih chuan min lo pun hreh lo la" te chu a rawn ti ve a. Pun buai ka tum chuang lem lo.




Tuition pawh naktuk aṭangin kan ṭan nghal dawn a. Ka zirlaite hi pawl 10 vek an ni a, a hlawmin ka zirtir law law thei dawn a, a tihzia ang reng.



An tuition fee tur chungchangah chuan ka pa ka râwn a. Awmze nei map lova tih to chiam kha ṭha a ti lova, chu mai bakah bulṭan tur chauh ka la ni bawk a. Mite rate ang em em a pek kha ṭha kan ti ber lova. Keima tana hlawkna awm ve tho si, a zirlai te tana hlawk bawk si kan duhpui ve a. Thla khatah ₹1500 in bul ka ṭan ve dawn a ni.




Mi 11 lai ka nei nghal bawk a, thla khat chhungin chêng sing chuang chu ka la lut ve thei dawn a. Bulṭanna atan chuan ṭha ka ti ve khawp mai.



Tlaiah chuan tuition atana zirlai ho mamawh tur te leiin bazar ah ka chhuak a. Ṭhutthlêng leh dawhkan tih vel chu kan thiam ang tawkin kan pafa in kan buaipui ve a. Ka pu in min pui bawk a, nimin lamah khan kan tifel vek tawh a. Tunah chuan white board leh neuh neuh vel a ni tawh mai.




A tirah kha chuan hetiang em em hi ngai ka ti miah lova. Mahse ka pu in "Tih dawn rau rau chuan ṭha thei ang bera tih tur. Engtia rei nge i thawh dawn a hriat loh a. Hna dang thawk lovin i tih âwm tak pawh a lo ni thei a. Chuvangin rei tawk hman theih law law, mi tam tham dâwl zo law law in, phuisui deuhin ti ang" a ti tlat a. A phur ber ber ah a ṭang a, a inhuam bawk si a. Ka lo pawm ve mai kha ania.




Bazar ah chuan Rara-i ka hmu nawlh mai a. A bula kalte chu a hmelhriat te an nih hmel loh, amah teh tlawng niin ka hria. Joger pants grey thawl hnelh hnawlh hi a ha a, chumi rawng ang chiah jumper chu a ha bawk a. Sneakers var sar a bunin thawven hmel zet hian a lo kal lah lah a. A bag lah chu ak ṭha mang hlei lo hian a thên lauh lauh a. Mi tamna lai chu nise a vai fuh thuak thuakin ka ring.




Lehkhabu dawr kawta ka ding min rawn hmuh rual chuan a rawn nui nghal var var a. Ka awmna lam panin a rawn tlan zui nghal bawk a. "Tuition chu Au Hriatpui" a rawn ti nghal tawng a.




Nizanah khan ka bula tuition kal a duh ve thu a rawn sawi pek a. Ani B.A kal lai hian ka hnenah Maths tuition rawn kal ve a duh chu a ni sia. A ngaihna hlawl a awm lo. Hahthlâk ve vet vet tak chu a ni.




"In in a hla sia, ka tân rawn len reng a buaithlâk a. Tuition ka lo kal ve chu phal mai rawh. I sum a hek dawn lova, a pun belh sawt zawk dawn ania" a ti zui zat a. A ngenngawl ve khawp mai.




"I ti awm ang lo thei emai" ka lo ti ringawt a. "Apu pawh ka dil vek tawh a, a phal alawm le. Inhmuhna chance a nimai a" tiin a mitko a san ak ak a.



"I naupangchhiat vang nge i thawveng ve hrim hrim pawh ka hrethiam tawh lo" ka lo ti leh ringawt a. Henu rilru sukthlek hi ka hrethiam pha lo. Vantei nen an inrual a, kum 20 lai chu a ni ve tawh. Puitling viau tur chu a la ni lo na in heti em em a awm tur hi chu a ni tawhlo.




"Ka duh vang che alawm" a lo ti awlsam leh thên a. "I hahthlâk ṭhin emai" ka tih chuan "Tlankimi nen in inṭhenna pawh thla khat dawn ani tawh, ninawm, min ngaihsak lo emai" a ti chiam a. A thinrim ve hmel khawp mai.




Min melh ram ram a, kei erawh thinrim ai mah chuan ka nuih a lo za leh pek tawh a. A thinrim hmel chu a hmelṭha reuh zek lehnghâl a, a lawmawm tak tak ani.




Tun hnai te hian a message te pawh ka chhang ve zel tawh a. Mahse tâwk chin hriat a ngai khawp mai. Eng emaw hlekah "Min bem tawh mai rawh" a ti zêl a. Beiseina siam sak ka hlau tho bawk si, a lakah ngaihzawng rilru ka pu si lo. A rilru nat tam mai mai ka hlauh avang hian ka in vêng ve nasa khawp mai.




"Khawnge i kal a?" ka lo ti daih a, "Heta hi ka rawn kal" nghal zet hian a lo ti a. Mahse "Tak taka kan ṭhiannu dam lo ka kan lawk a" a lo ti ṭha veleh nghal mai a.




"Chuan i haw tawh dawn a?" ka tih chuan "Aw, ka hmu remchang bawk che a min thlah rawh aw" a rawn ti zui zat a. "Lehkhabu ka lei fel ang a, kan haw dawn nia" ka lo ti ṭha ve mai bawk a.



Kan haw kawngtluan chuan a titi ka ngaithla leh a. Mak deuh mai chu, a hma ang khan ka ning tawh miah lo. A nungchang lang tlang zet hi ka ngaina ru riau tawh a. Induhna leh inngaihzawnna lam erawh a nilo tih ka hrechiang.




An inkawt thleng ka thlah a, a chhuk dawn chuan "Thingpui lo in la" a ti ve teh mial a. Vantei thusawi ka hrechhuak a, an in a lêng lut tur hian midang a sawm khat khawp mai a tih kha.




"Nidangah ni rawh se" ka ti mawi hnai ve a. Mahse eng a hria nimaw, tih tak têin min sawm ve ṭung a. Hnial zui chi ah ka ngai tawhlo. An inchhunga vawi khat na na na luh leh chu ka duh hrim hrim bawk a.




Inchhûnga kan inzui luh chuan a pa leh a nuhrawn an lo awm a. A nuhrawn chuan eirawng a lo bawl mawlh mawlh a. A pa pawh a harh ṭhat hmel khawp mai. Ka hmuh tum loh dan deuhin ka hmu a, ka hamhaih lek lek zawk.




Rara-i chuan min inhmelhriat tir zung zung a, a nu chu Nu Ramte ti mai turin min ti a, a pa chu Pa Marema a ni. Ka kal hmasak ber ang lo tak khan an lo nelawm dun nghal em em a. Awm nuam lovin ka awm lo hrim hrim.




Rara-i lah chu engtin mah a awm lova, a hmaa hlauthâwng hmel leh hrehawm ti hmel ang kha a pu tawh lo. Tuna ka hmuh dan tak hi chuan chhungkaw pangngai tak an ni.





Inthlak tura room a pan hnu pawh chuan a nu chuan ṭha tak takin min bia a. Ka nu leh pa chungchângte a lo hre teh khiah a. Mak ka ti viau dawn na in Rara-i leh Vantei hi inkawm chawt an ni ve a, a lo hria pawh chu a âwm ve tho mai.




"Eng hna nge i thawh?" a rawn tih chiah chuan chhan dan tur ka haihchham lek lek a. Mahse ka hmachhawp te chu ṭha takin ka hrilh ve mai bawk a. A lo bu nghat nghat mai.




Inchung aṭanga Rara-i leh Pu Sanghminga an rawn inzui thlak rual chuan thil awmzia ka hrethiam chiah.




Heng hi thil tak a nilo, lemchanna vek niin ka hria. Pu Sanghminga a lo awm ve avanga lemchanna.




"Sangzuala fapa chu, Rara-i te i rawn thlah a, i va fel ve" a rawn ti hluai a. Ka nu leh pa chanchin min zawt zui nghal zat a.



Sitting room lamah min ṭhut puiin a titi suam suam a. Rara-in thingpui min rawn pe a, a lai lehnghâl emaw ni, dehh vel chuan a! A awmdan chuan ka nuih a tiza ru leh viau tawh. Naupang lawm tak te hian ka lawm tawh ni berin ka hria.




Thingpui in zawh chuan rei ṭhu khawmuang tawh lovin haw ka rilruk ta a. A nu leh pa te chuan ṭawngkam ṭha in min thlah a.




Rara-i chuan ka Car hunna thleng min thlah a. Lei lam bihin a nui a nui a, "Eng nge i hriat a?" ka tih chuan "Ka nuih a za" tih chiahin min chhang.



A rawn hawi a, kan inmelh dun ren rawn a, nuihza insum deuh hian a hmui a hup a. "Ka nuih a za e" a ti leh a, a âw pawh chu nuihza insûm âw a ni. Kan han inmelh dun leh ren rawn a. Kan lai dun huih a. Kan nui chhuak ta hawk ringawt a. A insum thei tawh ngang bik lo aniang, a pum dawm meuhin a nui a.




La nui reng chung chuan "Tinge kan nuih le?" a rawn ti a. Kan ho dun ang reng khawp mai.



Car a ka luh hnu chuan "Makpa interview i paltlang ta" a rawn ti ham ham a. "I zam lo sia maw" nui chung hian ka lo ti a. "Ka bialpa nih bâwk kanin makpa interview i rawn nei ania, i thiam thei lutuk" a lo ti zat zat a. Ka lo nui tawp ringawt tawh.




A mize ri phawng phawng hi ka ngainat chhan ber ni ta in ka hria.



In lam pana ka inkhalh haw laite chuan a ṭawngkam mak sak takte leh a titi zat zat te kha ka ngaihtuah lêt a. Ka nui ka nui mai. Hmeichhe ngainat awm tak ni ta in ka hria.



Zanah chuan Tlankimi chanchin thar lâm ka hre teh mial a. Ka hriat dan pawh ṭhiante fiamthu aṭangin ania. Bialpa thar a nei a ni awm e. Chu pawh ka hmelhriat ve pangngai tak a ni. Kan college kalpui ṭhin ania. Inkawm em em lo mah ila kan inhre ve zul a. Tunah chuan college pakhatah asst professor a ni tawh.




Tlankimi chuan a duh ang tak, mipa innghahna tlâk a hmu ta niin ka hria a. An hmêl te ka han hmehbel dun a, an hnathawh zawng zawngte nen pawh an inphu tawn khawp mai. An inhmeh dawn hle in ka hria.




Kha chen ka lo kawp ve tawh hmeichhia anih avangin thinlungah eng emaw thawk dawt chu a awm ve lo theilo a.




Ka thîk chu ka ti miah lo na in lawmpui lutuk chu an har khawp mai. A nei leh hma ang reng bawk sia, mipa ka nihna ah tlawm thlâk chu ka ti ve det.




Ka gpay ah chuan ṭhiante hovin cheng khat te, cheng 5 tih ang rengte min rawn gpay hlawm a. "Ralna sum" an rawn ti kher bawk a. An rawn uang ve khawp mai. Ka lo nuih liam vel mai mai. Huat enah pawh ka en lo.





Pathian zarah tuition pawh kan ṭan ve thei ta a. Ni hmasa ber ah chuan zirlaite pawh an ngawng ve khawp mai. An thil hriatthiam lohte lah chu awl tê tê a ni hlawm a. An zawhna apiang chu zawldawh takin ka hrilhfiah hlawm a.





An thiam loh vanga lo kal an ni a, an hriatthiam lohte chu 'a ho' lo tih sak ka tum lo. Ka tâna awlsam deuh kha an tan chuan thil harsa, a suala an sual kha a ni ve tlat.



Kan in zirtir mawlh mawlh laiin Rara-i a rawn lang teh nawlh a. A bag nen rawn kalin ṭhutna hnuhnung berah chuan a rawn ṭhu ve ringawt. Ka lo melh reng a, min hmu lo der hmiah mai. Naupangho lah chuan an lo ngaihsak vak lem hlei lova. Keipawhin ngaihtuah buai duh lovin ka thil sawi lai ka sawi zawm mawlh mawlh a.




"Heihi nangmahniin chawk ve chhin ru aw" tiin question chu white board ah ka ziak a. Chair a ka ṭhut thlak rual chuan Rara-in min rawn ko pek a "Sir" a rawn ti lauh a. Midangho chuan an lo ngaihsak lo hlauh z a, a tihzia ti tawh mai ang.



Ri phawng phawng chi a nih avangin thil zahthlâk deuh a sawi ang tih ka hlau a. Ka va pan nghal vat a.



"Eng nge i rawn tih a?" sehchilh zeta ka tih chuan min lo nuih var var a "I lang ṭha tawp, i Tshirt var hi ha ziah rawh" min lo ti daih a. Ka kuk lawlh châk mange.



Naupang dangin min rawn auh zui takah chuan ka pan vat a. A hriatthiam loh lai ka hrilh nghal zung zung a.




Tlai dar 5 velah tuition chu kan zo a, Rara-i pawh a lo ṭhu tluan ve zak mai. Buaina a siam lo hlauh chu ka lawm tak tak ani.



Naupangho an haw hnu chuan ka hau ta a "Thil reng reng chu chin tâwk a awm a. Nangpawhin a chin tâwk hre tawh rawh Rara. Heta lo kal ve chî pawh i ni hlei nem, a hma pawhin chiang takin ka hrilh che kha. Min dîp zawngin awm suh, nau ang bakin ka en lo che. Tlang taka ka hrilh chung che pawhin i hrethiam lo nge, i hrethiam lo der zawk pawh ka hrelo. Tun aṭang chuan hetiang hi chîng tam tawh suh ang che. A âwm tawk hria la, hmeichhe awm dan tur dik takin awm rawh" ka ti a. Ka duh aiin ka ṭawngkam a nelawm loh.





Min melh vang vang a, a rilru a na ve ta deuh ani mai thei, a hmui a pet zauh a. Min chhang let thei lo.



Chu chu remchângah la in ka sawi zawm leh a "Thil reng reng chu kan ta tur leh kan ta tur ni lo hi a awm ve ania. I len miah lohna nuna tel phêt i tum chuan i na mai mai ang. Chuvangin hetia i chêt ṭhin hi bansan tawh rawh. Ka nau ṭhiannu angin awm tawp la, a tâwk " ka ti leh a.




Ngawi rengin min en a, "Kal tawh rawh" ka lo ti leh nghut. A awmdan hian ka thâwk a ti pik vek. Ka ngaina ve hman viau a, mahse a che uchuak leh hret ṭhin hian min ti hah, ka hne ṭhin.




"Chona ah ka lo ngai ange" tiin min kalsan a. A mitmeng kha ka chhiar thiam loh bakah a thusawi awmzia kha ka hrelo.



Zanah chuan a reh ta hmak a, tlai lama hau na viau si kha a status ka zawng a, a nei lo. A dp pawh a blank tawpin a dah a. A online leh online loh pawh ka hmu theilo. A ni tê reuh hi min block pawh a nimai thei ani. Engvangin nge chutianga ka chîk thar tak em em pawh chu ka hrelo.




Zingah pawh a reh zui vang vang a, tuition pe tura ka kalte chu a lo kal leh thut ka ring a. Kan inzirtir laite chuan kawngka lam ka lo melh leh vung vung ṭhin a. Mahse Rara-i chu a reh hmak mai.




Ka tawngkhum dan ka ngaihtuah let a, ṭum dangah pawh kha aia na khan ka hau ziah a. A haw ngai lem lova, tun ṭum chu a lo haw ve hle a nimai thei. Ka inthiamlo lek lek a. Engtin emaw tak hian min mawlh a. Nitin zantin min lo betu awm ta lo chu kimlo riau hian ka inhre pek a, a zialo tak tak ani.




Ka room kawngkhar in kik ri avâng chuan ka harh hlawl a, ka pa âw ka hre zui zat a. A la thim ruih bawk sia, ka phone chu ka en vat a, zing dar 2 a lo ri vel chiah. Tun ang hunah eng thil tak chu ni ang maw.



Kawngkhâr ka va hawn chuan thil awmzia a lo sawi vat a.



"Nichin lawk khan i Pu Sanghminga boral a, zuk tlan thla ve thuai teh ang u. I nu leh i nau pawh an insiam mek" a lo ti zung zung a. Ka ngaihtuahna ah Rara-i a lo awm hmasa ber.



"A va mak teh thut ve" ka lo ti ban chhalh a. "Ni e, a zialo khawp mai. Lungphu châwl an ti mai a, insiam vat la. Hmanhmawh in zuk kal teh ang u,Rara-i a ngaihtuah awm viau anih hmel" a ti leh zung zung a.



"Engtin nge a awm?" ka lo ti vat a, "Aaa...hetia sawifiah mai theih chi pawh a ni lo, a ṭhawng a ni tawp mai. Zuk ngaihven vat teh ang u" a lo ti sup a. Ka ngaihtuahna a tibuai kher mai.



Ka insiam nghal zung zung a, ka inpeih har lo. Minute 10 vel hnu ah chuan kan inkhalh chhuak ta nghal a.



Car chu keiman ka khalh a, ka speed a hniam lo khawp mai. Ka pa in khalh muang deuh turin min ti nghe nghe.



Ka nu leh Vantei te chu hmeichhia tih takah an mittui an hru an hru a. Kan hnîm ve ruih mai.



Vantei'n "Rara-i ka khawngaih e Nu" a ti ṭiau a. Ka nu pawh chuan "Ka lainat emai a" tih zawng a sawi.





_________*________*_______*______

(Zanin chu ka duhthu a sam lo lutuk. Chhiar mam dan lo thiam mai ru aw. Au Hriatpuia hi che buai ve rap rap tawh teh se.)

WhatsApp Group https://chat.whatsapp.com/FUhMq6EanQV2bgHX0kzKXE a duh apiang tan a join theih e.


Show post links
Top

[Ngaia]

AIZIAL
By CVL Awmpuii



Chapter 9



Pu Sanghminga te in kan zuk thlen chuan mi pawh an lo ṭhahnem tawh ngang mai. In leh a vêl sing sa in an lo che suau suau hlawm a. Inchhûng lamah chuan hmeichhe ṭap hawm hawm thâwm hriat tur a awm bawk a. Kan zuk lût ve ta vat a.




Ka mitin Rara-i a zawng nghal chat a, mahse hmuh tur a awm miah lo. Pu Sanghminga ruang chu an lo kil laih a, an ṭap hawm hawm hlawm a. A kal dan a rang teh phut lutuk a, a tu leh fate chu a ṭhawng ve hle in ka ring. Ka nu leh Vantei te pawh an insut ve faih faih mai.




Patling pakhat hian ṭhutna min lo kawhhmuh vat a. Ka pa te chu an ṭhu ve mai a. Keichu ka la hawi kual tê tê a, zawn ruk ka nei tlat a ni.



Rara-i chu ka la hmu chuang lo, Vantei chuan "Khawnge Rara-i hi le?" a rawn ti sep a, a lo zawng ve tho anih hmel. Ka nu chuan a lo chhâng vat a "An kalsawn pui rih aniang, a lo lang veleh vat mai ang" a ti a.




An bulah chuan ka ṭhu thla ve dawn zet a, mahse, "Pawn lam chêt ngaihna ah ka va che ve ange" tiin ka pa chu ka hrilh ta zawk a. Ka chhuak zui nghal a.



Tlangvâl ho thingpui lum na lamah chuan ka va phei ve a. Hmelhriat ṭhenkhat pawh an lo awm ve nuk a. An zingah chuan ka ṭhu ve ta reng a.




Ka hawi kual pah chhen a, Rara-i lah chu hmuh tur reng reng a awm lo. Thil ṭha lo deuh a ti ang tih ka hlau rilru khawp mai. Ka chhûngte khan an ngaihtuah ropui sia ka rilru a luah lo thei lo.





Darkar chanve vel ka ngaihchân rên râwn hnuah pawh chuan a hmel hmuh tur reng reng a la awm ta chuang lova. Ka awm hle hle thei tawh lo. Ka tho ta thurh a, "Ka'n tei hawi lawk ange" tiin ka ṭhut puite bulah chuan chhuanlam ka siam ta ngawt a.




In bul velah chuan ka tei ka tei a, an kawmthlangah te chuan ka chhuk thla a. Khawi emaw hmun kilkhawr deuhah rilru hrehawm deuhin a lo awm ang tih ka hlau ber. Mahse ka zawn ngial pawhin Rara-i chu hmuh tur a awm lo reng reng. Mitthi in lama awm te pawh an zai ṭan tawh a.




Kawmthlang lama thui fe ka kal hnu chuan beidawng zet hian ka lêt chho leh a. An in bul vel, mi inah emaw lo awm hlauh se ka ti khawp mai.




Thingpui lumna ah chuan ka ṭhu leh dawn zet a, mahse ka rilru a nuam thei ngang lova. Kawng chhak lamah chuan ka chho tlang leh ta zawk a. Rara-i chu ka phone a, Switch off a inti tlat bawk si.




Minute nga vel ka kal hman tawh tihah chuan râl aṭangin a lo kal thla chhet chhet hi ka han hmu ta a. Ka ding chut mai. Ka ngaihtuah viau laia him dama ka hmu hlauh chu ka lawm tak tak ani.




Inkuangkuah thân hian a rawn pên thla a, a kun deuh ngal bawk a. A rilru a hrehawm ve viau in ka ring.



"Rara" ka tih chuan a rawn hawi vat a, a lo ding ve chawt mai. Ka han tlan chho nghal a, a bul ka thlen chuan min lo melh kar a. A hmelah thil danglam hmuh tur engmah a awmlo.




"Ka zawng che a" ka ti thawr a, a awmdan aṭang chuan ṭawng mai a tum lo tih ka hria. "I ṭha em?" ka ti leh a, ka âw aṭang chuan ka ngaihtuah zia a hrethiam ve thovin ka ring. A lo bu nghat a.




"Khawnge i kal daih a?" ka tih leh chuan za lo zet hian min lo nuih a "I va fel ve" a lo ti daih thung a. A hmel chu chik fahran hian ka en leh a. A mitmeng ka chhiar thiam loh bakah a awmdan hi ka hrethiam lo. Ka tum angin ka hmu miah lo. A ṭha lam nge a chhe lam tih pawh ka hrethiam lo.




"Rara, i ṭha em?" amah ngaihtuahna a khat hian ka ti leh a, ka melh chhuk run bawk a. A lo thaw deuh halh a, sir lam melhin a hmui a pet zauh a. Ka zawhna chhang lo chuan "Kal ang" tih leh kal a rual nghal daih a. Ka lo zui ve nghal zat bawk.





Biak zui zel chi niin ka hre ta lova, a bulah chuan ngawi rengin ka kal ve zel a. A ṭawng lova, keipawh ka ṭawng bik lo.




A pu te inkawt kan thlen rual chuan a ding deuh chawt a, ka lo ding ve zel a. Kawngkhâr chu a melh vang vang a, inchhûng lam zai thâwm chu a ṭha khawp mai. Rara-i chu a rawn thaw chhuak deuh hak a.




"Va lût rawh, ka nu leh pa leh Vantei te pawh an awm kha. An lo nghak reng tawh ang che" ka ti sup a. Amah chu ka en reng a, ka thusawi chu hria âwm pawhin a awm lo.




Ka ṭawng leh dawn lai mek chuan inchhûng lam chu min pan san ta daih a. A awmdân teh thlawt chu amah a ang thlawt lo. Inchhûng a luh thleng chuan ka thlîr zui a. A pu thihna hian a thinlungah eng ang takin nge hna a thawh hriatthiam a har kher mai.



Keipawh chu thingpui lumnaa let tawh lem lo chuan inchhung lamah ka va lut veleh a. Rara-i chuan a pu ruang a lo kîl veleh thlap tawh a. An lo ṭah khum a, an lo kuah a. Mahse ani chu engtin mah a awm lo.




Vantei bula ṭhutna âwlah chuan ka va ṭhu ve a. Ka nu nen an lo inhnit veleh faih faih tawh. Rara-i chu an lainat viauin ka ring.




Zai thâwm a rin poh leh an ṭap thâwm chu a ring zual emaw tih mai tur a ni. Rara-i chu ka melh ṭhin a, ngawi rengin a ṭhu a, a pu ruang chu a melh ngar a. Ka hmuh tirh aṭang khan a mittui far khat pawh a la tla lo.




Zing dar 5 velah ka nu leh Vantei te ka han thlah a. Keichu ka let leh ang a, ka pa nen chuan ṭin hun an siam ah law law kan haw ang.




Ka nu te chuan Rara-i an lainat thu mawlh an sawi a. Vantei chuan "Khati khan ka la hmu ngai lo reng reng, a hrehawm e" a ti vang vang a. Ka nu chuan "Kan nat tawpkhawkah hi chuan ṭap tur kan awm thei tawh ngai lo. Thinlung lam hi a na vawng vawng a, lan chhuah tir ngaihna kan hre ṭhîn lova. Chutiang chu Rara-i awmdan kha niin ka hria" a lo ti a.





"A pu chu a neihchhun tak meuh meuh a ni ve asin le, ka khawngaih e" Vantei chuan a lo ti veleh a.



"A hriat tirh chuan a ṭhawng ve viau ang" ka lo ti ve sup a. Ka nu in a lo sawi zawm vat a "I pa an rawn phone lai kha chuan Rara-i chu a khawng vek an ti. Ṭap thei lovin a awm a, a pu ruang a hmuh khan a khawng vek a. Buaipui ngai khawpin a awm an tia. Mahse tikhan pangngai hmel takin a rawn lut veleh hlawl bawk sia. A ngaihtuah awm viau in ka hria" a ti duah a.





Ka nu te ka thlah zawh chuan ka inkhalh thla veleh nghal a. Ka zuk thlen thlak leh meuh chuan nu leh pa ṭhenkhat an lo awm belh ve nawk tawh. Ka pa bulah ka ṭhu veleh a. Rara-i awm dan mawlh chuan ngaih a ti ṭha lo theilo. Lo ṭap hawm hawm sela ka ngaih a ṭha viau zawkin ka ring.





A pu ruang bulah a ṭhu fel thân a, a zai loh bakah a mittui a tla eih bawk silo. A ngaihtuah awm zawk hle niin ka hria.



Ṭinna an siam hma hretin ka pa chuan thu tlemtê a sawi ve zawk a. A hnu lawkha ṭinna an siam zui a. Kan pafa chuan haw turin kan intintuah ve ta a.




Khawtlang hruaitu leh hmelhriat ṭhenkhat te'n ka pa chu an lo be veleh rih a. Chutih laite chuan Rara-i ringawt ka lo en reng a. A pu ruang a ṭhut chilh tirh ata tawh a la che sawn eih lo. Hnem duh viau mah ila a rem ṭeuh si lo, hun thawl a awm vat turah ngaiin ka kalsan ta a.




Kan chhungkua pawh mitthi in lamah nilengin hun kan hmang a. Hriathlua pawh ka pu te in lam aṭangin a lo kal ve bawk a.




Pu Sanghminga chuan ui tu leh ṭah tu a ngah khawp mai. Mipui pawh kan ṭhahnem narawh. Lehlamah Kohhran hruaitu leh Mizoram pumpui pawha Pastor mite hriat hlawh kha a ni ve a, puan leh pangpar pawh a dawng hnem khawp mai. Kan chhungkua pawhin puan leh pangpar in kan khuh ve a.




Rara-i ka ngaihtuah lo thei lova, vawikhat mah a mittui a tla lo a, an in lamah a ni emaw Biakin lamah pawh engtin mah a awm lo. Mahse a pu ruang an chhin dawn khan vawikhat chu a biangah a zuk tawk a, a phun sep a. Chu bak chu engmah a ti lo. Ruang bulah a ṭhu chawt a, chu zawng chu a ni deuh mai.




Chutihrual chuan Nu Ramtei chu a ṭap nasa em em a, thu tam tak a chham bawk a. Pa Marema pawh mipa mah ni se a pa a sûn a, a mittui a dang zo bik lo.





Synod hruaitu te leh mi chal lang tak tak pawh a vuina ah chuan an lo kal fur hlawm a. An lawina kohhran Biakinah Synod Moderator in a vui a. Thlanmualah Bialtu pastor in hun a hmang bawk a. Mitthi ro ro ah a thi ropui takzet a tih theih ang.





Kan haw hma-in Vantei chuan Rara-i biak ngei a duh si a, an in lamah kan va let leh a. Rara-i hmel reng reng hmuh tur a awm leh tawh lo.



Ka pa chuan "Vante, a pu a la sûn rih anih kha. A awm angin en liam tawp rih la, nakinah a sarhu loh laiin i hnem zawk dawn nia" a ti a. Vantei lungsi zan lo pawh chu kan haw pui ta tho a.




Hriathlua'n ka bike a lo keng a, a ni chu ka pa car ah zawk chuan tir in bike chu ka khalh haw ta zawk a.



Zanah chuan kan unauvin khawhar in lamah kan zuk leng thla veleh a. Vantei nen Bike ah kan inphur a. Hriathlua chu ka pu te in lamah a kal leh daih tawh.




Inrinna zan anih avangin ka nu leh pa te chu an inkhawm hmasa a. Inkhawm banah an lo kal veleh ang.




Kan zuk thlen chuan Rara-i pawh a chhûngte bulah a lo awm ve teh mial a. Vantei'n a hmuh rual chuan a va pan vat a. Zui ta mai lo chuan ka lo thlir reng a.




Vantei chuan a hnêm ve mawlh mawlh niin ka hria, Rara-i hmel pawh vawiin lam ai chuan hmuh a nuam ta deuh e.



Inlêng dang ho an lo kal khawm ta ṭak ṭak a, kan zai chho ṭan a. Kan zai tui khawp mai. Vantei leh Rara-i te pawh ka bulah an ṭhu ve ran a. Rara-i chu ka mitsir leh zeuh ṭhin a, zai lovin mit a chhing leh vang vang ṭhin a. A men lah chuan thil tam tak ngaihtuah hmel hi a pu a, hmuh a hrehawm lek lek mai.




Dar 8 velah khawhar in pawh chu kan bâng ta a. Vantei chuan Rara-i biak harh tum tih hriat zet hian college chungchang a sawi pui siam siam a. A hma zawnga ṭawng char char ṭhin zawk khan ngawi rengin a ngaithla ve ta thung a. Tuna Rara-i hi chu ka hriat ṭhin Rara-i kha a ni rih lo takzet a ni.





Ka nu leh pa te pawh reilotê hnu ah an lo thleng a. An lo chiau au vat hlawm a.




Ka nu chu kan awmna lamah a rawn kal nghal a. Rara-i sirah chuan a rawn ṭhu ve nghal a. An inhnem zui mawlh mawlh mai. Rara-i pawh a lo bu ve nghat nghat a. Eng ang takin nge a lo dawn sawn ang tih chu ka hrethiam lo.




Kan haw dawn chuan kawtlai thleng min thlah a "Pa Sangzual, in chungah hian ka lawm lutuk ania aw" a ti ve sep a. Ka pa chuan "Kan fanu i nia lawm, harsatna i neih chuan engmah rawn sawi hreh lo la. I tân kan awm awm reng ania" a lo ti dam thlup a.




Rara-i chu a bu nghat nghat a "Min ngaihtuah ṭhîn a, ka lawm, ka hre reng tawh ang. Tunah phei chuan..." tiin a hmui a pet fan fan a, a ngawi ta daih a. Ka nu chuan a hrethiam hle aniang, a lo kuah vat a. A hnungah a chûl hauh hauh a.




"Harsatna leh manganna te hi inhneh tir tum miah loh tur. Mi za chuangin min do mah se mi pakhat tal pawh kan lama an ṭan chhung chu hnual duh reng reng loh tur. I lam kan ṭang a, i tân kan awm reng ania" a ti mawlh mawlh a. Rara-i pawh chuan nghet zet hian a lo kuah let ve a. Ka lo en chîk ngang mai. A mittui tla thei miah lo hian min mawlh ru tlat anih chu !




Zanah chuan ka va text ta ngawt a, tihngaihna ka hre thlawt lo a ni. Hmaichhanah han be ve ngawt dawn ila a awmdan hrilhai thlâk lutuk avang khan sawi tur ka haihchham bawk si.




"Rara, Harsatna i neih chuan rawn sawi hreh suh aw" ka va ti teh ngawt a. Ka message chu pakhat chauh a in tick a. Data a on lo anih ka ring. Mahse a tuk zing thleng pawh chuan a ngai ngaiin a lo la awm a.



Khawhar in pawh a tâwp zan thleng ka leng ve bawk a. Rara-i hmel hmuh tur a awm tawh ngai lo. Ka pa lah Kohhran thilah a buai zui viau mai a, lênna hun a nei tawh lova. Ka nu lah a hritlang zui bawk si. Vantei'n a awmpui a ngai veleh zel a. Chutia midang kal thei ta lo chu keimahin ka zuk kal ta ṭhin a. Rara-i ka zawng ru reng zel a. Hmuh tur a awm ngailo.




Mahni hna ṭul ah ka buai chho leh nghal a, zirlai pahnih ka neib belh veleh a. Tunah chuan zirlai 13 lai ka nei veleh tawh. Hnathawh lai hi chuan ka ngaihtuahna ah hna bak a awm hran lova. Mahse zan hun awl ah hian Rara-i ka ngaihtuah ziah a.





Vantei chu zawh ka duh ṭhin a, mahse ka zawt hreh tlat pek a. Ka rilru pawh hi ka hrethiam teh nuaih tawhlo. Chawei lai hian a chanchin an sawi leh zeuh ṭhin a. Vantei chuan "Hun tlêm a mamawh thu a sawi a, ngai a rawn awh chho leh mai ang" a ti a. Ka pa pawhin a lo hrethiam khawp mai a "Ṭawngṭaina lamah kan hre reng ang a. A hunlai, a sarhu lai ania. Kar hnih thum te han ral se a zia chho mai ang" a ti a. Ngaih ṭha deuhin an awm zui chu ania.




Mahse keimah ber hi ka dik lo zo a, ka message lah kha a la in thawn chhuak reng reng lo mai a. Chutia ka ngaihtuah takah chuan ka harh chhuak zawk mai, a ni hi min block a ni thei mai ang em?




Zanah chuan ka va call a, rei fe a ring hnu ah a lo pick up ta hram a "Hello..." a rawn ti tham ṭiak a. A âw chu a dik miah lo, ṭap âw chu a ni chiah si lo, hritlang aw phui âw niin ka hria.




"Rara..." ka ti sup a, a reh zui vang vang a. "I dam ṭha em?" ka ti leh a. Chhânna pawh ka dawng chuang lo. A hnu ah phei chuan a dah ta daih a. Ka ngaih a van ti ṭha lo tak e aw.




Sana ka en chuan dar 8 pawh a lo la ri lova. Eng ka hria ni maw ka rilrua lang hmasa ber ang chuan ka che chhuak vut a. Bike châbi ka zawng a, Hriathlua'n a kawl tih ka hrechhuak lehnghal a. Chhuah ngei ka duh bawk si.




Ka pa chu car châbi ka va dil ta ngawt a, "Ka ṭhiante inah ka zuk kal lawk" tiin chhuanlam ka siam a. Engmah min zâwt buai lovin min pe ve mai bawk a. Rara-i te in lam pan chuan ka inkhalh zui nghal a.





An in ka thlen chuan ka rilru ka thlak leh palh hlauvin ka inngaihtuah buai duh lova. An door bell ka hmet nghal thawr a. An rawn hawn mai loh avang chuan ka hmet vak vak ringawt a. Ka awmdan phawr phawr hi ka inhrethiam tawh bik lo.




Chutia ka hmeh tak vak vakah chuan kawngkhar chu a rawn ri khap a, Rara-i ngei mai chuan min rawn hawn a. Kawrlum lian zet hain shawl hian a nghawng a lo tuam hlun a, a sam chu a bawk hnawk deuh niaih bawk a. Kekawr thawl ṭha hnelh hnawlh a ha bawk a. A lang duhawm tawp a tih theih ang.




Chutia min hmu thut chu a hamhaih viau lehnghâl a, a meng phawk hra a. Pawna la ding reng chung chuan inchhûng lam chu ka melh kual a, a nu leh pa te ka hmu miah lo.




"Khawnge i chhûngte?" ka tih chuan phâwk deuh hian min la melh reng a. Mahse a insiam ṭha ta vat a. "Nangmahin em ni i awm?" ka tih leh chuan a lo bu nghat a.



"Min block em ni?" ka ti leh thâwr a, awlsam zet hian a lu a lo bu leh nghauh a. Ka lo rum nghut mai "Min unblock nghal ang che" ka ti hluk a, a lu a lo thing vat a. Chutia ṭawng chhuak duh miah lova che zia a min chhang reng chu ka ti thei der lo.






"Ṭawng ta che" ka ti hluk a. Chu veleh rum zet hian min rawn melh a, ka ban puamah min chûm chawrh mai. A la thinrim hmel em em zui a!




"Eng nge i hriat a?" ka ti hluk a. A lo insehruh chiam a "Tikhan awm suh" sehchilh zet hian ka ti leh nghut a. A thinrim zual viau aniang, a biang chu alh tur ang mai hian a sen ṭun mai.




"I ṭawng thei lo em ni?" ka tih leh takah chuan uar zet hian a lo bu vat a. A phone a phawrh chhuak a, a hmet zui mawlh mawlh a. Ka kekawr ipte a ka ah lai ka phone chu a rawn ri kauh a. En turin min lo mitmei vat a, WhatsApp ah chuan lutin a message chu ka chhiar a "Nimin piah aṭang khan ka hritlang a, ka ṭawng zawngin ka hrawk a na zel a. Chu bakah ka ṭawng ṭha theilo. Ka âw a hnawk vek, a ri chhuak ṭha theilo" tih hi a lo thawn a. A thusawi tawp lamah chuan thinrim hmai sen ṭeuh lem hi a rawn dah a.



Ka nui ta suk a.




Inchhûng ah chuan pên luh mai ka tum a, min lo dang ṭung a. Thei leh thei lo hian "Haw rawh" a lo ti a, a âw chu a sawi ang tak takin a ri chhuak ṭha theilo. Ka nui huk a, min melh rum zia lah chu pui tak a ni.




"Reilote ka lo leng lawk dawn" ka ti ve tlat a, min dang seng ta bik lo. Sitting room lama ka ṭhut hnu chuan a chhungte awmna ka zâwt ṭha leh a. Rum zetin min rawn melh leh a, a ṭawng ṭha theilo tak e.




A phone a type tur chuan ka mitmei zeuh a, lungawi loh hmel deuh hian a type ve mai bawk a.



"Ka nu te in lamah an riak phei" a lo ti ṭha ve mai a, a type zawm leh a "Eng nge i rawn tih? Haw rawh" tih hi a rawn thawn leh a. A hmel ka va en a, min la melh rum khawp mai. Ngeiawm zet hian ka hmui ka lo pet duh lek chauh a.




"Tinge min block?" ka ti ṭha leh a, a nin hmel khawp mai. A phone ah thil a type leh mawlh mawlh a. Ka lo ngaichâng ve ran a "Min be reng suh, i ninawm haw rawh" tih hi a lo thawn leh a.




A ṭawng theih loh chu remchangah la in ka ṭawng ka ṭawng a "Tikhan ka haw hunah pawh min block tawh suh ang che. Ka biakna che min chhang ṭhîn la pangngai takin awm rawh. A hmaa ka ṭawngkhum vang che khan ka hua che tihna a ni lova, i tâna ṭha tur zawk sawi ka nih kha. Min huat phah nan hmang lo la, û angin min en la a tawk mai. Hetianga awm reng chu a ṭha ngai lo" inti puitling fe hian ka ti a.




Min tham loh hmel kher mai, a hmui chu ngeiawm zet hian a lo ti sawi a, tham loh hmel zet hian min melh bawk a. Ka tuk lawlh châk tak tak ani. Mahse chutia a lo awm vel chu ka lawm ru khawp mai. Han ṭawngthei ngat sela chu Rara-i tak tak kha a ni leh tawhin ka ring. A pu boral sarhu laia a hmelhmuh hrehawm zet kha ka hmu tawh lo.




A kutzungchalin kawngkhar lam chu a kawk va a, haw turin min mitmei a. Ka lo ṭhu ṭha sauh sauh a, min ngei hmel teh asin.



A ṭawng chhuak theilo chu hrehawm a ti ve ngawt ang. Hmeichhe ṭawng duh zet a ni bawk si.



A hnuah chuan a beidawng ve ta aniang a phone min ensan daih a. "Thingpui min lum la" ka tih pawh chu a hrelo der hmiah mai.




"I dam ṭha em?" ka ti leh a, min rawn melh zawk a, mahse chhanna ka dawng chuang lo. "Mahnia riah ai chuan kan in lamah i lo riak daih duh em?" ka ti leh a. Eng nge ka hriat pawh ka hre tawh lo e a. Mahni tê chauha awm tur chuan ka ngaihtuah reuh riau mai. Mahse ka biakna chu hrelo ang hmiahin a awm leh tawh. A duhna ah chuan hmeichhe luhlul tak a nih dawn hi!








Chutia awm ve lo ang maia min ngaih reng takah chuan tih vak ngaihna ka hre ta lova. Ka tho ta uaih a, a lo tho ve vat a. Kawngkhâr lam a pan vat a, ka haw hun a lo châng char char anih dawn hi.





"Haw tur chuan min va duh awm ve" ka ti hluk a, melh pawh min rawn melh aih lo. Kawngkhâr chu a hawng a, ka kalna turin min lo kian nghal a. A awmdan chu ka va han haw tak e aw. Tih theih ka nei si lo a le, ka haw san ta poh a.




Haw kawngah chuan engtin emaw tak hian ka hahdam vawng vawng mai. Min lo chhâwn ṭha lo mah se Rara-i nihna dik tak kha a lo let tawhin ka hria a, chu chuan hahdamna tam tak min pe. Ṭawng chhuak thei ngat sela chu ka hnial hneh awm der si lova. Ka ngaihtuahna avâng chuan keimahin ka nui ka nui mai.




Ka chhungte chu an lo la meng kim ṭhap a, inchhûng ka luh rual chuan Vantei'n lai zet hian min lo melh a, ka lo nuih liam mai a.





Mahse "I lenna ka hria ania aw" a rawn tih rual chuan ka melh leh vat a, lai zet hian min lo nuih a. Min ti lai dawn dawn mai, ka lu chu tuai thuakin ka nui ve ta ringawt a. Ka ât hmel ngawtin ka ring.




Ka nu leh pa te chuan an lo ngaihsak lo hlauh a, ka lawm zawk tak tak a ni.



Room-ah ka lut tlang nghal daih a, ka luh hnu lawkah kawngkhar an rawn kik. Ka lo chhawn rual chuan Vantei a rawn lut a, min rawn nuih leh var var a. Ka lo lai huih mai, a zialo tak tak ani.




"Eng nge ni Vante?" pangngai thei ang ber hian ka lo ti a. Ka khum chuar lo pui chu ka pawt mar pah bawk a.



Khumah chuan a rawn ṭhu a, darthlalang hmaa dingin ka sam chu ka tuai ka tuai a. Ka hair gel te chu ka han hnawih ngawt pek a.




"Û..." a rawn tih takah chuan a lam ka hawi vut a, "Lo ṭhu ve lawk la...thil tê tê ka hrilh ang che" a lo ti var a. Naute hmaa laih huih reng mai chu thil ni theiin ka hrelo a. Ka ṭhu thla ve ta nge nge a.





"Rara-i hian a hma deuh aṭang khan i hmeichhe duh zawng min zâwt vak vak a. A duh thu che tlang deuhin min hrilh a. Nang paw'n i hre tawh tih ka hria a. Chuan zâninah pawh khan i lêng tih ka hria ania aw" a lo ti zung zung a. Sawi tur a vâng duh kher mai.




"A lo hrilh hman che a nimaw" ka ti ringawt a, "Hrilh chiah lo, min lo text a 'I û hi haw turin rawn ti teh' a rawn ti a. Ka hrethiam vek" a lo ti vat a.




"Chutiang engmah a awm lo" ka lo ti ngawt pek a. "Ehhh....eng chutiang " a lo ti vat a. Min nuih rah rah bawk a. Ka awmdan lai huih chu a zialo khawp mai.




Mahse pangngai tak hian "Rara-i hi chu i ṭhiannu anih vângin nau ang takin ka en ve a. A pu boral laia a awmdan te kha ka ngaihtuah let a. Ka lainat reuh lutuk a, a chanchin ngaihven tumin ka zuk kal mawle. Mahse rin ai takin a lo pangngai a. A lawmawm khawp mai" ka ti ta daih a.





Vantei pawh chuan min chhaih zui bik tawh lovin "Rara-i te chu a chhel em alawm, tihian a tuar chhuak mai ang. Khawvelah hlim a phu ber" uar zet hian a lo ti a.




"A dik alawm" ka lo ti ve mai a, a chhuak mai dawn emaw tih laiin "Û, in pahnih hian ni daih ula" a rawn ti ngawt pek a. Ka lo nui huk mai.




"Nui ringawt suh, ka ti tak tak alawm. Ka duhsak tawp che u. Rara-i hi belchiang mah rawh, tu emaw ai chuan i duh daih zawk ang" a lo ti leh zung zung a. Tu emaw chu Tlankimi bak va ni suh. Ngaihzawng a nei leh tawh tih ka chhûngte pawhin an hre ve vek a. Khata ṭang khan Vantei hian a lo ngei ve deuh niin ka hria.




Ka mut dawn chuan Rara-i bawk chu ka va text leh a, min block leh nghal em tih ka hriat duh vang ani.



"Testing" ka va ti a, a tlang ve ta e. Ka lo thaw huai mai. A rawn seen vat reng bawk a.




Chutia ka message a seen takah chuan a rawn type veleh nghal a. A type rei zek lehnghâl a. Tih tur dang nei ta lo chu ka lo nghak ren rawn a.




"Au Hriatpui, Tlankimi nen in inṭhen tawh tih ka hria ania. I lunglen inhnemna tur atan min hman i tum anih chuan i tisual viau ang. Ka biak hmasak vang che khan hmeichhe nêp ka ni lo ania" tih a hi a rawn thawn phawt a, ka rilru lo pui a rawn sawi avang chuan chhan nghal mai ka tum a. Mahse a rawn type zawm leh takah chuan ka lo nghak leh rih a.




"Ka hlutna i hmuh thiam loh avang hian ka hlu ta lo tihna a ni lova. Ka ṭhatna i hmuh thiam loh avang hian ka ṭha lo tihna pawh a ni chuang lo. Min duh loh vang mai hian ka duhawmna a kiam phah eih chuang lo. Ka hlu reng a, ka ṭha reng a, ka duhawm reng. Chu chu min chîk peih apiangte'n an hmu thiam ṭhin. Min chîk la, min zir chiang ni la, min vei ang a, min âtchilh ang. Chutiang chuan i ti ta lo a, thil ṭha min chân anih hi" a rawn ti leh duah a.





A thusawi mal tin chuan chapo ni si lova mahni inrintawkna te, mahni inngaihhlutna te a keng tel in ka hria.




Chhan dan tur ka haihchham a, min ti zâm a. Ka phû miah loh mihring hnâwl angin min inngaih tir a. Ka zâm chhiava a ni ber e.




Ka inngaihtuah fe hnu ah chuan a message hmasa zawk chauh chu ka chhang ta ngawt a "Tlankimi nen kan inkar vel vanga rawn ngaihven che ka ni lo ania. Ka ngaihtuah vang che ania" ka ti ta tawp a. A thusawi dawt leh hi chu chhan ngaihna pawh ka hrelo.




Rara-i min duhna te hi ṭhiante bulah uan pui nan hmang dawn ta ila ka ngam hauh lovang. Chêt la chuang miah si lo hian min tur a. Zak theilo tih chiam dawnin chutiang khawpa uchuakin a khawsa ngai chuang bawk si lo. Ka zah ru ta khawp mai.




Ka message a hmuh rual chuan min rawn chhang veleh vat a "Ka ngaihtuah awm rêng asin. Kha kha a inṭanna a nih kha" a rawn ti a. Ka hrethiam leh pek tawhlo.



"Muttui, Harsatna i neih chuan rawn sawi hreh suh aw" ka ti ta ngawt pek a. A seen ringawt a, han in chhan leh a awm tawhlo reng reng.




Nitin ka hun hman dan chu a ngai deuh pat a, chhunah inah ka tap deuh chawt a. Tlai lamah tuition ka pe leh a. Mahni tawkah ka buai ve tawh khawp mai.



Hriathlua pawh a kal leh aṭangin kar khat dawn a liam leh tawh.




Rara-i chu a pu boral vuak vet aṭang khan ka la hmu leh ta miah lova. Kan inah a lo lêng lo pawh a nilo, ka awm laiin a lo leng ngailo zawk a tih theih ang.




Tlaia ka tuition pek hlanin a lo leng ziah a. A lo len tlai hi chuan zanriah ei laiin ka chhungte'n an sawi zui ṭhin a. Chuta ṭang chuan a lo lêng tih ka hre ve chauh zel. Ka hmuh lohna pawh thla khat dawn a ni ta mai.





Zantin kan inbe fo a, kan inbia tih lemah ka va bia a ni mah tawh zawk. A rul tawk tê tê in min chhang ziah a. Tuktin biak tawh loh ka tum fo a, mahse zan a lo nih hian biakna tur chhuanlam zawngin ka va be leh nge nge zel a. Kan inbe rei ngai lem hlei lova.




A chhan pawh biak zui chiam theih hian min chhang ngai tlat lova. 'Muttui, harsatna i neih chuan min hrilh hreh lo la' ti hian a tâwp ka khar leh nge nge zel a. A seen tawp a, chu zawng chu a ni mai.



A lo kal tlai hian "Vawiinah i lo kal a nimaw" tiin ka ṭan ngei ngei bawk a. "Umm" a ti ringawt zel sia. Sawi zui chiam chi pawh a ni ṭhin lo.




Tlai khat chu ka tuition pe zo, an ina kal ka rilru ah a lang tlat pek a. Va hrilh lawk ka tum zet na in kal thut ka rilruk ta zawk a.



An kawtah chuan Bike ka hung leh ren rawn a. Door bell ka hmet dawn chiah tihah chuan Rara-i ngei mai chu a rawn chhuak teh nawlh a. Inchhûng lamah chuan thil keh ri chhuai ka hriat zawm zat a.




Chutia min hmu thut chu a meng buai nak mai. A chal chu a dawm pah vang vang bawk a, a beka thisen luang chu ka hmuh hmaih loh kher mai.



Chîk zet hian ka lo en a, ṭap hmel a pu lo na in a mitmengah chuan natna tam tak ka hmu thei.



__________*__________*__________*_____



(Hmanhmawh lovin, muang chângin aw...)


Show post links
Top

[Ngaia]

AIZIAL
By CVL Awmpuii



Chapter - 10




Kan han indinchilh ren rawn a, chêt mai nachang kan hre lo.



"Vanrawngbawl, khatiang khan vawikhat mah min chhâng let tawh suh ang che, i hria em?" inchhûng lam aṭang chuan Nu Ramtei a rawn au zui tuarh a. Rara-i chu a phu chiam lehnghâl a. Tihngaihna hre lovin a hma zâwnah chuan ka lo ding ngawi ve reng a.



A rawn pên chhuak tur chiah chu Nu Ramtei bawk a rawn ṭawng leh a "I ngam chuan han chhuak teh, i rawn lut leh tawh lovang" a ti nghek a. Ka hma ami chuan mit a chhing deuh sawk a. Che châng lek lo hian ka lo melh reng thung a.





A dinna phên aṭang chuan inchhung lam chu ka va thlêk deuh a, nichin lawk khan Nu Ramtei chu rawn ṭawng reng mah se hmuh tur a awm chuang miah lo.



Rara-i chu ka han melh leh ren rawn a, a chal chu a la hup tlat a, hnuai lam a bih deuh tlat bawk a. "Rara..." ka ti sup a, min rawn melh zawk a. Chu veleh harh chhuak thut ni âwm tak hian a rawn che chhuak vut a.




A hmazawna ka din reng lai chuan min rawn nek sawnin min kal pel nghal fua a. A chal dawm reng chung chuan a kal zui hlawk hlawk a. Reilotê chhung chu ka nghilh deuh dup mai. Mahse harh chhuak nghalin ka ûm ta vat a.




Chutia kawngpuia a kal hlawk hlawk chu ka au zui a, ka âw a hriat veleh a kal chak zual sauh emaw tih mai tur ani. A hnu deuhah phei chuan a tlan zui a.




Mi zanriah ei hunlai âwm vel a ni a. Vei vak an awm lo hlauh a, a tihzia khawp mai.




Reilotê ah ka ûm pha nghal a, chelh din ka tum zet a. Mahse a hnungah chuan ka zui zel ta zawk a. Ani pawhin a hre ve aniang, a rawn leh hawi zawk a. Mahse min ngaihsak lem lovin hmalam chu a pan leh hlawk hlawk tho a. A kal chak apiangin ka kal chak ve zel a.




A ning ta deuh aniang "Haw rawh" a rawn ti bung nghat a, a rawn hawilet lem hlei lova. A thusawi chu ngai pawimawh duh lovin ka zui lui zel a.




Reilotê ah a pu an phûmna thlanmual kawng ni ngeia ka hriat lam chu a pan a. A pu thlân a tlawh duh anih ka ring thiam ve nghal mai bawk.




Ka zui leh zel tak si ah chuan a dawhtheihnain a tlin tawh ngang lo aniang a ding dat a. A rawn inher a, chiang zeta min melhin a chal chu a la dawm reng a. Thisen luang kha a lo la awm reng a. Ka ngaih a ṭha ta vak lo.




"Rara..." ka tih rual chuan "Ka mamawh lo che haw rawh" min lo ti chiam a. A thusawi ngai pawimawh lo zet chuan ka va pan hnai a, a chal khawih ka tum rual chuan a lo tawlh hnung dat thung a.



"Thisen chhuak kha tih tâwp a hun tawh viau ania" ka ti hluk a, mitmeng hriatthiam har zet hian min lo melh reng a. Chu chu remchângah la in ka va hnaih chilh leh nghal a. A kut laksawn sak ka tum chuan a lo la ṭang ṭung tho mai.




Ka buaipui hma chuan ka hawikual deuh a. Tlai reh lai a ni hlauh a, thlânmual kawng a lo ni bawk nen tuman min rawn hmu mai lovang .



Ka kekawr iptea ka rawmawl ah lai chu ka phawrh chhuak a, a beka thisen luang chu hruk fai sak mai ka tum a, mahse a fai ṭha duh der lo. A lo khang hman chu niin.



A chal aṭanga thisen lo chhuak leh zel tur chu dîm têin ka hrufai ta zawk a. Min hnial lovin a lo dawh ve hle hle tawh.



Ka dehna rawmawl chu lasawn hlekin "A na em?" ka ti sup a. "Na lo" a lo ti bul hmak mai. Ka hruk sak leh dawn lai mek chuan "Keimahin ka ti thei" a lo ti nghat a, ka rawmawl ken lai chu min chhuhsak zui a. Ama ngam tâwkin a chal chu a hru nghal mawlh mawlh a.



A chezia chu ka lo en reng a, na ti hmel pawh a pu lo. "Engtia i tih nat nge a?" ka tih chuan min rawn melh zawk a, mahse ka zawhna ngai pawimawh lo zet hian a chal bawk chu a buaipui zawm leh mial mial a. A beka thisen luang khang deuh tawh pawh chu a hru deuh tawk tawk a, a reh thuak chu a nimai.




"Rara...engtia i tih nat nge?" ka tih leh chuan nin hmel zet hian ka rawmawl chu min rawn hmehbel a "Haw tawh rawh" a lo ti ram hmak mai. A hmelah chuan min ngaih theih loh zia pawh chu thup a tum lem lo.




Ka melh ngur na chu ngai pawimawh lo zet hian min leh hawisan hmak a. Hmalam a pan zui lehnghâl zat a. A hma ang em em a chak kha chuan a kal tawh lo.




Amah chauha awm tir chi niin ka hre lova, ka zui lui zel tho a. Min ngai theilo viau mah se ngaih ṭha lo deuha haw san ai chuan hetia zui zel pawh hi ka pawiti lo.



A kal laklawh lai chuan a rawn hawi leh zawk ṭhin a, rum eltiang hian min rawn melh ta ṭhin a. Lo nuih sukin bân ka lo vai zauh zel a, thinrim hmel deuh hian a lehhawi leh hmak zel mai bawk a.




A pu thlân hmaah chuan a ding ngar a, ngawi rengin a hnunga thingbuk hnuaiah chuan ka lo ding ve bawk a. Ka lo ngaichâng reng a.



Darkar chanve dâwn kan din hnu pawh chuan a din ngaiin ala ding khawng lah a, che châng thei der lo.



Khua a thim ṭep tawh a, a hma zawk zawk tawh lo bawk nen chutia thlanmuala awm reng chu ṭha in ka hrelo a. Ka va pan hnai a, a pu thlana kraws intar mawlh mai chu a lo melh ngawt ngawt a. A mittui a tla lova, mahse a mitmenga natna rawn langchhuak chu ka hmuh hmaih lo.




"Rara...a tlai tawh viau ania" ka ti sup a, a lo thaw chhuak deuh hak a.




"Vawiin chu a vawikhatna atân mi vanduai ber ni hian ka inhre ve a..." a rawn ti ro halh a. Ka melh chhuk run a, ani chuan a pu thlan a kraws chauh chu a la melh thung.




"Ka chau ve ṭhîn lutuk..." a ti chuai leh raih a, a mit a chhing deuh vang vang a. Za lo tih hriat zet hian a rawn nui chhuak hak a.




"Ka va inhmeh lo tak" tiin a ner deuh nang a. Han hnem vak ngaihna ka hriat loh bakah a awmdân hi ka hrethiam chiah lova. Hetia awm lo hian ṭap hlawp hlawp se ka hnêm thiam zawkin ka ring.




"I duh chuan ṭap la" amah ngaihtuah zet hian ka ti sup a, chu chu thil ṭha ber ni a ka hriat vang a ni.



Min rawn melh zawk a "Ringawt a che" a lo ti hlak a. Min chhan let dan chuan min ti hawihai kher mai. Chal chuar tapin ka lo nui tawp ringawt a, ka nuih chu a za chuang miah lo.




Han hnêm ve ngial ka tum ania, henu hi chu tihngaihna a awm thlawt lo anih ber hi.



"I chal kha a na em?" zah zelah ka ti leh ringawt a, a chal chu ka kawk pah zeuh bawk a. A lo khawih ve vat a "Na e" a lo ti bul hmak a.



A chetsawn rual chuan ka lo che sawn ve hrut a, min melh rum ngang mai.




"Haw teh, i ninawm, min dîp" a ti hlar a. He nau hian awmdan tur ber pawh min ti hrelo.




"Kan pahnihin haw ang" ka lo ti ve tawp a. Min ngaih pawimawh hmel vak lo, ka thusawi chu a hai der hmiah mai.



"I chal te kha pem thar damdawi hnawih vat loh chuan a pûn mai ang. Tlai deuha thlanmual awm reng chu a ṭha lo. Tunah chuan haw phawt ila , nakinah ka kalpui leh ang che" pangngai deuh zawk hian ka ti ta duah a.




"I duh leh nangmahin haw mai rawh" a lo ti duh lek chauh.



A pu thlân bula thlan lung pakhatah chuan a ṭhu rem sauh sauh a. A chezia chu ngawi rengin ka lo en mawl tawp a. A luhlul reuh bawk si, tih vak ngaihna ka hrelo.




Ka phone a rawn rik zui takah chuan ka chhâng nghal vat a. "I lo la haw dawn lo em ni?" ka nu chuan a rawn ti nghal var a. "Aw...ka la hman lo deuh a" ka lo ti ṭha ve mai a. Rara-i chu ka va melh zawk a, min ngaihsak lem lo hian a ṭhutna bula hnim ṭo chu a pawt a pawt a.




"Zanriah chu min lo ei san mai ru" ka nu bulah chuan ka ti zui leh vat a. "Aw kan inkhawm zân te a ni sia, kan lo eisan mai ang che aw" a rawn ti veleh a.




Kan inbiakna kan tihtawp hnu chuan Rara-i ṭhutna lamah chuan ka va phei ve vut a.




Min lo melh kar a, a bulah chuan ka va ṭhu rem ve saih sauh a. "Au Hriatpui, min hawsan mai rawh" a lo ti vat a. A âw chhuak chu amah ang lo takin a dam ve khawp mai.




"I awm chhung chu ka awm ve ang" ka lo ti nghet churh a. Min melh vang vang hnu ah a pu thlan bawk chu a melh leh a. Tih ngaihna vak min hre bik lo aniang, min hnial zui tawh bik lo.




Rei fe chu kan ngawi dun rauh rauh a. "Rara..." ka tih takah chuan a rawn hawi vat a, "I ṭha chiah em?" ka ti dam dap a, ngunthlûk zet hian ka melh bawk a.




He zawhna hi vawi engzat nge ka zawh tawh pawh ka hrelo. Mahse ka hre duh tlat si a ni. A mitmengah hian natna tam tak ka hmu ṭhin a, mahse chu chu lan chhuah tirin a awm ngai lo.




"Ka hmelṭha reng ka tih ṭhin kha" nui hak chung hian a lo ti a. "Fiamthu tawh lo la" ka lo ti vat a. A rilru hriat tum ni âwm tak hian chiang takin ka melh bawk a.




Ka hmêl aṭang chuan ka fiamthu loh zia a hrethiam ve aniang, za lo zet hian min lo nuih a.



A pu thlân lam chu hawi lehin zawi te hian a phun sep a "Ṭha lo leh chuang tawh pawh ka awm tawh lo" a lo ti zawi sep a. A thusawi chu zawi viau mah se ka hrechiang lutuk tlat.




A chhanna chu ka beisei ang chhanna ni mah se ka lo nat pui a. Hrehawm ka lo tihpui ve ngawih ngawih mai. An chhungkaw boruak ka lo hre ve zul si a, ani ang kum naupang tê tawrh atân chuan a mah mahin ka lo hre ve ṭhin.




"Lemchan hi duh tawk la, a tak ramah chêng tawh rawh. I nat chuan inpawm la, na rawh. I ṭah a chhuah pawhin ṭap chhuak bawrh bawrh rawh, ṭah hi chak loh lantirna a ni ngai lo ania. Mihring hi chu chak lo thei, na thei, ṭap thei kan ni a. Chutihrual chuan nat hlen leh ṭah hlen tum miah loh tur. I natna hi lanchhuah tir ngam la, i thâwl hawk mai ang" ka ti ve duah a.




Rara-i mi harh vang leh hlim thei kha a nihna tak tak niin ka hrelo. A natna leh hrehawmna te mawi taka thup ṭhin tu, miin a tawrhna an hre palh ang tih hlau a hlim lui hram hram, chu chu Rara-i nihna dik tak niin ka hria.




"Ka vui ve duh ṭhin, mahse vuina tur ka neilo" thawk ipik hmel zet hian a lo ti halh a, "Eng nge maw ka sawi le?" tiin za lo zet hian a nui leh hak a.




"Mi hlim thei nih hi a ṭha, mahse natna hliah khuh nana hlim luih vak hi ṭhat lohna tam tak a awm ania. Kan natna te hi lan chhuah tir a ngaih châng a awm ve ṭhîn ania" ka lo ti vat a.




Rei tâwk fang chu kan han ngawi dûn leh vang vang a.



"Khuarêlah hian ka lungawi vek bik lo, mahse Siamtu dem tur hian dikna ka nei si lo. Chuvangin ka dinhmunte hi pawm thiam ka zir mêk zel anih hi. Pathian chu dem lo mah ila vawi tam hetiang dinhmuna ka din bik chhan hi ka zâwt fo ṭhin" mit a chhing deuh vang vang a.





A thusawi chuan ka thin hnûn a khawih che dawt mai hian ka hria. Sawi leh chuan tur ka hre lova, lo dawnsawn dan lah ka thiam hek lo. Ka hriatchian tak em em erawh chu kum naupangtê in rilru puitling zet a lo pu tih hi a ni.




Chu chuan a hma a amah ka lo ngaih ṭhin dan zawng zawng kha a ṭhiat a. Tuna ka hmuh dân tak hi chu Rara-i mi chhel, a dinhmuna lungawi ṭhin. Engtikah mah ka tluk ngai loh tur mihring niin ka hria. A lakah chuan tê ta riau ang hian ka inhria a, ka zah thar ngang mai.




Chutia ka lo ngaihtuah lai mek chuan a rawn tho ta tharh a. "Ka haw hma chu haw i tum bawk silo, haw tawh mai ang" a lo ti zâng vah a. A âw kî pawh a pangngai leh tawh khawp mai.




Kei erawh chêt chân mai nachang hre lovin ka la ṭhu reng a. A thil tawnte hian min lo hmet chau ve vek nimai hian ka hria. A ngaihdan te hlei hlei chuan min hmet chau zual a. Nâ ka tihpui a, harsa ka lo tihpui hliah hliah mai.




"Au Hriatpui" pangngai taka a rawn tih leh takah chuan ka tho chhuak ve ta nge nge a.



"I duh chen i awm tawh em ni?" ka lo ti lawi rût a, ka âw ka chhuakah chuan mahni inrintawkna a awm thei tawh meuh lo. A hmaa ka lo hmuh ṭhin dân avang khan ka zak thar tlat pek a.




A lo buk tak nghatah chuan kan inzui haw ta a. Kawng tluanin a tu amah kan ṭawng lova. Mahni rilru kan kawm haw dun mawlh mawlh maiin ka hria.




Kei chuan amah hlir ka ngaihtuah a, a ngaihtuah tur âwm ang chu ka hre ve hauh lo. Mahse ngaihtuahna muk zet a hmang ve chuan ka hria.



An inkawt kan thlen leh meuh chuan khua a thim vek tawh a. Ka bike hunna bulah chuan kan ding dun ren rawn a. "Au Hriatpui, ka lâwm e aw" a ti sep a, min nuih var var bawk a.



"Harsatna i neih chuan sawi hreh lo la, puih theihna che ka neih phawt chuan ka pui zel ang che" ka lo ti nghet charh thung a.



Inchhûng a lut tur chu ka ngaihtuah kher mai. A nu ṭawngkam te kha ka hre ve reng si a. An kawngka bulah chuan a ding ren rawn a, ka bike hunna bul aṭang chuan ka lo thlir ve reng bawk a.




A rawn leh hawi rual chuan ka va pan leh ta nge nge a "Rara, haw tawh lo mai rawh" ka ti teh ngawt a. A kutah chuan ka chelh ngawt pek bawk a.



A ngaihna a hriat loh hmel kher mai. "I haw leh chuan i nu kha..." ka thaw deuh hawk a. Hetianga a haw leh anih chuan eng tiang takin nge Nu Ramtei'n a lo khawsak khum leh ang?




"Ka ngaihtuah awm hlei nem" a lo ti dam dap a, min nuih var var reuh bawk si. "Zanin chu pu te in lamah riak mai la" ka ti ta thlawt a. Hetia thlah chu ka ngaih a ngam thlawt lo a ni.




"Ka hmachhawn a ngai dawn tho tho alawm" a lo ti pangngai mai a. Mahse ka ngaih a la ṭha thei chuang lo "Kan inah lo riak mai rawh" ka ti leh ringawt a. Amah ngaihtuahna in ka khat a ni ber.




Rara-i chu a lo nui ri hak hak a "Awi...Au Hriatpui, i naupangchhia lutuk" a ti hluai a. Min nuih ri kar kar a. Ka awmdan hi ka hrethiam tawh bik lo.




"Min thlah la, ka'n lut tawh ang e. Nang pawh haw tawh rawh" pangngai taka a lo tih leh takah chuan ngaih ṭha zan lovin ka thlah ta hram a.



"Ka rawn be hmasa dawn miah lo che ania" tiin inchhungah chuan min luhsan zui nghal a. A nu in a lo hau palh ang tih hlauthâwng reng rengin pawnah chuan an thâwm ka lo ngaichang ren rawn a.



Minute nga vel hnuah pawh thawm danglam engmah a awm tak loh ah chuan thlamuang deuhin ka haw ve ta hram a.




In ka thlen chuan Vantei chauh a lo awm a, chawei min siam a tum zet na in "Keimahin ka lo insiam mai ang" ka lo ti vat a. Sitting room lamah chuan Tv en in a ṭhu ṭha veleh mai bawk a.




Ka nu leh pa te awmna chu a lo sawi zung zung a. Kohhran hmeichhe inkhawm zan anih avangin ka nu chu a inkhawm a. Ka pa chu committee pawimawh ah a chhuak a ni awm e.




Ka mut hma in Rara-i chu ka va be leh ta nge nge a. A reh vung vung si a ,ka ngaih a ṭha thei thlawt lo a ni.




"I ṭhat leh ṭhat loh tal chu lo sawi ve ta che" ka va ti a. Reilotê ah min rawn chhang vat a "Ka lo be hmasa dawn miah lo che ania ka tih mawlh mawlh kha" tiin emoji thatchhe deuha lei chhuah khum lem hi min rawn thawn tel a. Ka lo nui chhuak hawk mai.




Inchhûng a luh dawn khan a sawi tak kha mawle.




"I induh ve deuh tihna em ni?" ka tih leh chuan "Min duh ṭan mek anih kha" confi zet hian a rawn ti a. Chhan ngaihna ka hre lehpek tawh lo.



"I mu tawh dawn em?" ka ti ta daih a, "Ka muhil tawh dawn" a rawn tih tak si ah chuan biak buai chî ah ka ngai ta lova. Zan dangah ka lo tih ṭhin dân ang bawkin "Muttui, harsatna i neih chuan rawn sawi hreh lo la" ka ti leh a. Ani pawhin a seen leh tawp a, a reh zui vang vang mai.





Ka phone chu dahin khumah chuan hahdam zet hian ka mu a. Vawiina ka hun hman dante ka ngaihtuah lêt a. Mak tak maiin Rara-i nena kan awmdun lai hlir kha ka mitthla a. Keimah ngei pawh hi ka inhrethiam tawh bik lo.




Zingah chuan ṭum dang ang lo takin morning wish ka va thawn ringawt pek a. A lo like ringawt a, beidawn thlak duh tak a ni.




Vawiin chu ṭhiante hovin chhun lama inhmuhkhawm an rawt a. Heta ka kawm ve ber ṭhin Dina te inah ania. Chhun thil te eiin eng eng emaw kan ti khawm ve ang chu.



Keipawh chuta kal tur chuan tukṭhuan eikham veleh ka insiam zui mawlh mawlh a. Ka chhungte ka hrilh tawh bawk a, an lo phal khawp mai.




Ka ṭhiante hi hna nei tawh, mahni in châwm zo leh chhûngkua pawh châwm zo vek tawh an ni a. Ka tâna awm nuam lo turin ṭawng ngai lo mah se nuam lo chu ka ti ve deuh ṭhîn. Mahni insitna hi thil ṭha lo tak ni mah se mihring nunah hian a bet vek miau si a. Chutihrual chuan in rah beh tir duh miah lo ila, hma kan sâwn a nimai.





Lehlamah keipawh hna nei lo, awm tawp ka ni tawh bik lova. Sum ka thawk chhuak ve bawk alawm tiin ka inhnem ru ve mawlh mawlh a. Hmasâwn zel thei ka la ni bawk a, hniam lutukah chuan ka indah duh bik lo.





Dina te in ka zuk thlen chuan an lo awm kim ṭhap tawh a. Mipa hlang awmkhawm mah ni ila kan ri ve luih luih a. Mahni mimal thil ṭheuh ah kan buai ṭhin bawk a. Vawiin na na na chu kan chên ve ang chu.




Pawisa thawhkhawmin arsa pum khat leh chips eng eng emaw kan lei a, drinks kan lei nual bawk a. Chhun thil atan chuan kan puar pui ve khawp ang.




Kan vaiin mi sawm vel kan nia, kan innel tlâng a. Ka ṭhiante chu Kohhran leh khawtlangah pawh theihtawp chhuaha inhmang ve ṭhin an ni bawk a. Zu leh a kaihhnawih ang kha kan khawih lova,mahse mahni tawkah kan hlim ve viau tho.




Ngaihzawng nei leh tawh turin min fiam zuk zuk hlawm a. "A hmanhmawh thlak tawh hlei nem" ka lo ti ṭha ve mai a.




Mahse an sawi zui duh ngang mai a. Arama chuan Tlankimi a rawn sawi chhuak nawlh mai a "In nu hlui chu a thei pap pap khawp mai" a rawn ti zauh a. Nuna chuan a lo tuihnih ve vat bawk a "Keichu in inṭhen kha ṭha zawk tihna chen ka nei tho asin. Tlankimi chu a fel lutuk a, innei thei pawh ni ula duhthusam. Mahse ...mahse...hi a awm tlat. A mizia hi ka sawi thiam lo, a fel mah mah ka ti mai. Hetiang mi hi an ṭha ber lo" a lo ti ve duah a.




Ka ṭhiante ho chuan an sawi zui zel a, Arama bawk chuan "Nuna sawi tum chu ka hrethiam mai. Hmeichhe independent lutuk ang hi chu maw, nupui atân an ṭha lo. Dik an in tia, an inringtawk bawk si. Pasalte thuhnuaia awm an hreh a, an duh duh dana pasalte tih kawi an tum ṭhin a. Han thinrim khum dawn a thinrimna tur tak awm em em si lo, lungawi thlak chuang si loh hian mi hi an siam thiam a maw. Tun ang laiah hetiang hmeichhia hi an tam ania. Chu chu Tlankimi ka hmuhdan pawh hi ania" a lo ti leh duah a.





Dina chuan "Tuna a bialpa nen pawh hian in inṭhen hma khan an lo inbe daih tawh" a lo ti hluk a. Chu zawng mak pawh ka ti hran lo. Thla khat em pawh a ral hmaa ngaihzawng a neih leh nghal theih danah an lo inbe lawk sa deuh tih chu ka hrethiam ve nghal vek.




Nuna lah chuan a lo hrechiang ngang mai a "A bialpa kha ka ṭhiannu cousin alawm, tlangval fel pangngai deuh mai hi ania. Hetia ngaihtuah tawp chuan an inphu tawk a, an inhmeh viau mai a. Mahse zêp miah loh chuan Tlankimi hian a phû reng reng hlei nem. A mipa hian a duh huam huam mai pawh a" a lo ti ve hlut a.




Tichuan, ka ṭhiante chuan Tlankimi chu an sawi zui ve chiam hlawm a. A chungchânga ka hriat ngai miah lohte an lo hria a. An inchhûng lamah chuan a lo khirh zek a ni awm e. Misual tak phei chu a nilo. Mahse an sawi kalhmangah a hahthlâk ve hle chu anih hmel. An sawi chhan ber lah chuan ngawi rengin ka lo ngaithla a ni hawt mai.





"Sawi tawh lovang u, a mipa thu hla lo emai" Dina'n a tih tak hluaiah chuan an thusawi chu ho an ti leh hnuhnawh hlawm khawp mai. An nui hawk hawk hlawm a.





Dina bawk chuan "Hriatpui, hmeichhe dang ngaihtuah ve tawh la, duh deuhtu che pawh ka hre kar ania aw" a rawn ti leh a, a nui zui suk suk a.




"Ka hmanhmawh tawh rihlo" ka lo ti ṭha veleh mai a. "Ex te vanga kur nguai reng mai chu a ṭha lo ania aw" Arama chuan a lo ti fiamthu a.



"Chutiang lam pawh a nilo" ka tih pawh chuan an awih vak hmel loh. Ka ṭhiante hian Tlankimi la duh tlat tur angah min ngaihna chen an la nei ve a. An ngaihdan pawh chu a âwm lo hran lo. Kha leh chen kan lo inzui ve tawh a, ka thinlungah a tla na ve hle turah an ngai ni hmiang ka ti mai.




Kan thil siamte chu tui ti zetin kan ei fai kelh a, ka puar ve awk mai.



Tlai lamah naupang tuition pek leh ka ngai dawn si a, dar 2 velah chuan haw turin ka intintuah ta a. Midangho chu an la awm dawn anih hmel.




Dina chuan an kawngka bul thleng min thlah a, nichin lawka a thil sawi bawk kha thutak fahran hian min sawi pui leh a.




"Duh deuhtu che ka hria ka tih kha ka ti tak tak ania aw Hriatpui. Kan vêng nula fel leh chhuanvawr ania, a hmel pawh a ṭha teh mai nia. Tlankimi te chu nêp te" uar zet hian a ti hlut a.




Ka lo nuih liam san mai a, a ngaihdan a lo ni der lo. "Nui ringawt lo khan a number ka rawn pe ang che aw" thutak deuh hian a rawn ti leh a.




"Aaa...ngawi teh, a rem teh ṭeuh lo emai" tiin ka lo hnial vat a. Dina chuan chîk zet hian min melh run a "Nang hi, i nei veleh tawh zawk a nilo maw?" a lo ti sup a.




Mak tak maiin ka ngaihtuahna ah chuan Rara-i a rawn awm ngawt pek a. Ka lu thing nghutin "Chutiang lam pawh a nilo..." ka ti ta ngawt a. Ka in hrethiam tawh bik lo.




In ka thlen chuan Vantei ṭhiante an lo awm nuk mai a. Chart paper leh water colour an lo inchhawp hnawk dul mai a. Ka nu in an ei tur a lo siam sak bawk a.



Rara-i ka zawng nghal ngawt pek a. Mahse ani chu hmuh tur a awm ve lo.



Choka lama lo che mek ka nu bulah chuan "Eng nge an rawn tih a?" ka ti sup a. "An zirtirtute'n group hrang hrangah an ṭhen a, assignment an pe a. I naute group in kan inah an rawn ti ho anih hi" a lo ti zung zung a.




Rara-i chu ka zawng leh hram pek a, an group a ni ve lo aniang hmuh tur a awm ṭhak lo.




Room-ah chuan lutin ka intifai thuak thuak a. Ka nu Thingpui min lo lum sak chu ka in nghal zung zung a. Tuition pe turin ka pu te vêng lamah ka inkhalh thla ta nghal a.




Thla khat dawn kan kalna a ni ve ta bawk a, naupangho pawhin hma an sawn ve zel a. Zirtirtu tak tak ang hian ka lawm a, ka phur zual khawp mai.




Zanah chuan Rara-i chu be lo turin ka insum ve ṭang ṭang a. Mahse a status ka hmu zet chu, ka insûm theihna zawng zawng a ṭhiat nghal vek.



A status ah chuan mipa hmel pangngai ve tak nen an kut an phar chhuak lai thlalak hi a rawn hmang a. Bracelet inang an bun chu a langsar kher mai. A mipa bun laiah chuan R tih alphabet hi chiang fahranin a lo inziak a. Rara-i pawhin Z tih inziak hi a bun ve bawk a. Ka lo en chîk ngang mai.




WhatsApp a text ta mai lo chuan ka va call ta a, a vawikhatna ah chuan a la ring ral ṭhak zui a. Ka che buai vek nimai hian ka hria.



Ka vawihnih call na ah chuan a lo pick up ta vat a "I status kha eng nge?" a rawn ṭawng hma hauh chuan ka ti nghal tawng pek a.




"Eng nge?" hriatthiam loh hmel fe hian a lo ti he haw a. "Vanrawngbawl" ka ti nghek a, Nu Ramtei'n a hmingpuma a koh lai kha ka la hre ve alawm.



"Hmela, ka hmingpum in min ko suh" a rawn ti ve hlar a. Ka thaw zui hrawk a, "Eng nge i status kha?" thinrim insum tak hian ka ti leh a. Ka sa pup pup maiin ka hria.




"Aww...eng nge ni vak a, Zuia nen kan thlalak kha em ni i tih?" nin hmel zet hian a rawn ti a.



"Tunge Zuia chu?" ka lo ti leh hmanhmawh a, ka âw chu bul ṭha vet vet tak ani.



"Awww...ka ṭhianpa" nin hmel zet hian a lo ti ṭha veleh mai bawk a. Ka lo lungawi thei der lo.



"Tu i ṭhianpa?" ka lo ti leh hlur a, a reh deuh vang vang hnu chuan a rawn nui chhuak ta ham ham a.



"Awi...Au Hriatpui, ka hrethiam mai, i thîk chiang. A nuam e...i thîk anih kha. Rara-i zûn phurh chu na deuh mai asin" a rawn ti zui ham ham a.




Ka harh chhuak zawk nimai hian ka hria. Enga tinge a status pakhat vanga hetia ka awm chiam mai le. Ka kâ chu ka chip nghal hmuk a. Vanrawngbawli hian min ti â vek dawnin ka hria.



"Zuia kha maw...ka bialpa hual anih kha" a rawn ti leh ham ham a, a nui zuk har har bawk a. "Min duh loh vang khân midangin min duh lo ve ngawt turah ngai suh" a rawn ti leh salh a. Min cho chhuak et et khawp mai.




Phone chu dah nghal hmakin Bike châbi ka ban vut a, zan dar 9 a ri tawh a. Ṭhalai tan chuan a la hma lutuk.



Ka chhungte Tv en pawh chu ngaihsak lem lovin ka inkhalh chhuak zui nghal a. Minute tam pawh a liam hma in Rara-i te inkawtah ka ding vang tawh mai.



Ka phone chu hmet mual mualin Rara-i bawk chu ka call leh a. A ti lui nge pawh ka hrelo, vawikhat chu a ring ral tîr ṭhak a. A vawihnihna ah bawk a lo pick up leh a. Ka tawt ṭun tawh mai.



"Rawn chhuak rawh" ka ti nghut a, "I va thû ve" ngeiawm zet hian a rawn ti a. Min chhaih thinrim a tum nimai hian ka hria.




"Rawn chhuak lawk teh" ka ti ṭha leh a, "Min ngên phawt la" a la ti ham ham zui a. Ka dawhtheihnain a lo tlin tawh silo, "Vanrawngbawl" ka ti nghek a. "Ka hmingpumin min ko suh" a lo ti leh hlar a.




Ka lo thaw chhuak hawk a, "Ka dah dawn nia" chimawm zet hian a rawn ti leh a. Ka va han haw mai mai tak e aw.




"Rawn chhuak mai teh" ka ti leh hluk a, "Enga tinge sawi phawt la?" a rawn la ti hram a. A hmel chu hmu thei ila a nui vur vurin ka ring, a âw aṭangin ka hre thei vek.




"Min la duh em?" ka ti teh ngawt a, ka zawhna chu a âtthlâk viau mai. Mahse ka hre duh tlat si a ni.


A hma chuan min duhna te kha ka tân a pawimawh miah lo, mahse tunah chuan a pawimawh tawh takzet a ni.




Ka zawhna chhang ta mai lo chuan "Min bem dawn mi?" a rawn ti leh hram pek a. A va han hahthlâk tak e aw.



Ka thaw chhuak hluai a "Rara, rawn chhuak phawt mai teh" ka ti leh tawp a. Hetiang chuan kan sawifel zo thei lovang.



"Ka rawn chhuak ang a, min bem leh loh si vaih" a rawn ti leh hram pek a. Ka thin pawh a rim tawh lo, a ṭawngkam naupangchhia zet zet avang chuan ka nuih a za tawh zawk.




"Umm..." ka nui ri suk a, a hrethiam ve tawh maiin ka ring.



"Min bem tak tak ang maw?" a rawn ti leh hram a, ka lo nui chhuak hawk tawh mai.



"I â thei phawng phawng lutuk" ka tih chuan a che deuh sat sat ri hi ka hre ta a. Ka lo thaw huai mai.




"Ka lo chhuak, mahse beisei sang miah suh ang che. Ka easy lo teh mai nia" a rawn ti leh hram pek a. Phone chu a hmet tawp zui nghal a.




Ka nui chhuak hawk hawk mai, ka thin phu lah chu a rang em em mai lehnghâl a.



Ka âwm dawmin ka thinlung thusawi chu ka ngaithla vang vang a.



Tuna ka mamawh ber ni a ka hriat taka chu mahni leh mahni inpawm hi a ni. Ka thinlung duh zawng chu ka zui hmiah ang a. Hlimna in min lo hmuak mawlh teh se.




Hmeichhe harh vang thit thet leh hlim thei zet nen a bulṭan ṭhat chu a hlimawm viau ang le.




____________*__________*__________*_____


Show post links
Top

[Ngaia]

AIZIAL
By CVL Awmpuii



Chapter 11




Ka bike bula ding reng chung chuan Rara-i chu ka lo nghak a. A lo chhuak mai dawn emaw ka tih laiin a rei hrep lehnghâl a. Ka dawhtheihna a pan leh viau tawh.




Ka hmazawna lungte chu ka chhir ka chhir a, sana ka bih leh vut a, dar 10 a lo ri ṭep tawh. Ka phone chu phawrhin call leh mai ka tum a. Mahse min rawn auh tak lauhah chuan ka va hawi vat a. An kawngkhar bulah a lo ding fel ât mai.




Chutia ka lo melh reng lai chuan a rawn kal phei hnak hnak a, hlim hmel zet hian min rawn nuih var var bawk a. Polar kekawr tlawn senno leh tshirt ban tlawn var sar hi a lo ha a. Zan zanah hnawihsen a la inhnawih zui a. Mahse a hmel a tilang mawi zual kher mai.




"Le...sawi tawh rawh le" min rawn din chilh rual chuan a ti a, a mitmeng fiah zet chuan min melh kalh bawk a. A inkuangkuah thân a, a confi ṭha mai bawk sia. Ka zâm lek lek mai.





Ka lo thaw chhuak huk a, "Min la duh em?" ka ti hmasa tê tê a. A awmdan aṭang hian ka lak aṭangin a rilru a la pelhe miah lo tih chu ka hrethiam ve a. Mahse ama kâ ngei aṭangin, chiang taka hriat hmasak ka duh phawt a ni. Chêt lak sual laklawh ka hlau ve tho si a.





"Min bem dawn maw tia" a lo ti hlak a, a ner deuh nang bawk a. "Min la duh em sawi phawt la" ka lo ti ve tlat thung a. A ngawih ren rawn hnu ah chuan "Min bem phawt la i hre mai ang" a lo ti khauh a.





Hmeichhe ri phawng phawng, a nihna ang anga lang chhuak ṭhin hmeichhia mah nise a awmdan hi hriatthiam loh châng ka ngah khawp mai. Tunah pawh hian min tihrilhai leh lek lek tawh.




Chutia kan indinchilh ren rawn lai chuan a phone a rawn ri a. A kuta a hum reng lai chuan ka zuk bih ve a, Zuia bawk kha a ni.



Min rawn melh ralh a, lungawi vak lo hian ka lo melh ve run a. "Amah bawk chuh" sehchilh zet hian ka lo ti hluk a.



Min ngai pawimawh lo zet hian phone call chu a la a "Aw Zuia..." a tih rual chuan min rawn melh kher a. Min tham loh hmel khawp mai.



"Aw...lawk aw, zanrei lamah ka lo bia ang che. Tunah chuan ka la buai deih hlek a, nakinah kan sawi dun dawn nia" a ti leh zung zung a. Thinrim insûm zet hian ka lo melh thung a.




"Khapa kha tu chiah nge a nih?" phone a dah rual chuan ka lo ti hmuk a. A kutkuangkuah thânin min rawn melh leh tê tê a.



Chutah nin hmel zet hian "Au Hriatpui, i ninawm ania. Eng ti tur chiahin nge min rawn koh chhuah a" a ti ta nghat a.



Ka zawhna a chhân mai loh avang chuan ka lo dawhthei leh tawh bawk silo.




"Vanrawngbawl" ka lo ti hluai a, "Ka hmingpumin min ko tawh suh" a lo ti bak ve nghal hlar a.



Hetiang hi chuan eng thil mah kan sawi kaw zo lovang. Thu ngaiah kan tâng reng dawnin ka hria a. Ka sawi duh tak chu ka sawi ta tawp a.



"Min la duh chuan inngaizawng ang" ka ti bul vut a, ka sawi zawh rual chuan ka lum chhuak pup maiin ka hria.



Rara-i chuan min lo nuih var var a, mahse a hnu lawkah a tûm zui nghal bûr a. A ngaihna ka hrelo leh pek khawp mai.




"Enga ti hmuk hmuk nge?" ka tih chuan rum zet hian min rawn melh a. "Lo duh tawh lo ta che ila, min duh leh dawn lo tihna em ni?" a lo ti khauh a. A ṭawng bul ve khawp mai.




"Ka duh che a, min la duh chuan kan inngaizawng thei" pangngai tak hian ka ti leh a. Han sawi kur chiam dan ka thiam lo. Amah ka duh tihah ka chiang a, min duh ve bawkin ka hria a, ka inpawm tawh bawk a. Chu chu tâwk viau in ka hria.




Rara-i chu a lo thaw chhuak hluai a, a insehruh nasa khawp mai. A duh loh zawng sawi ka lo nei leh tawh pawh a ni mai thei. A kut chu a phar hluai a.



"Aaa...ka ning" thinrim ṭah chhuah hmel zet hian a rawn ti a. A hmel pawh a pe chhe ve khawp mai.



Kawng dawm meuh hian min han melh ren rawn a, a lungawi loh hmel khawp mai. Ka tan chuan awmdan thiam har tak ani.




"Awi...Au Hriatpui, ka beisei i pha thlawt lo" beidawn hmel zet hian a rawn ti a, nuar vak tur hmel te pawh a pu in ka hria.




"Pangngai deuhin min bem dawn emaw ka tia, khatia han intih ringawt te chu. I inti thu emai" a ti leh hliai a. Kha bak baka bulṭan dan ṭha kha ka hre bik lo asin mawle.




"Anih chuan engtin nge ka bem vak ang che. Min duh a, ka lo duh let ve che a, kan inngaizawng thei tihna a nimai lawm ni?" chal chuar tap hian ka lo ti ve a.




A ngaihdan a lo ni lo kher mai "Enteh, ka duh che tih chu ka pha lo, mahse vawikhat pawh ka bem lo che ania aw. Tunah tak hi chuan keimah zawkin ka bem che a, min chhanglet a ang. Keichu hetia inngaihzawn hi ka peihlo. Pangngai deuh te'n min bem ve la, ka lo duhlo phawt che ang a. Kar khat hnu velah ka chhang chauh dawn che alawm" a ti hlak hlak a.




Kei erawh a ngaihdan naupangchhia zet avang chuan ka lo nui chhuak hawk a. Henu zet hi chu, a lâwmawm thlawt a ni.




"Tichuan, romantic deuha bem maw i lo duh a?" ka tih chuan ka lo bu nghat nghat a. "Bialnu nei tawh i nih kha, hetiang in bem dan hrelo tur khawpa tawnhriat neilo i ni lova. I zei ka rin tehlul nen ka beisei i pha lo emai" a lo ti leh nghat nghat a. A ṭawngkam chu ka lo lawm takzet tawh.





"Anih chuan engtin nge ka bem ang che aw..." nuihza insum zet hian ka lo ti a. "Huiham, kha chu ka ngaihtuah pui thei tawh lo che. I zei viau loh chuan ka duh leh lo daih ng che" a lo ti vat a.




A kawngah chuan chelhin ka hnuk hnai dawrh a, a lo meng phawk kher mai. Ka lo nuih suk thung a.




A bengbulah chuan zuk kun hniamin ka phun sup a "Ka duh che" ka ti zawi sup a. Ka din dan ngai chuan ka ding leh nghal vat a, hnai zetah ka melh a. A hamhaih hmel pawh a ṭha viau mai.




"Tikhan i chhanna ka nghak" ka ti leh sup a, a hmui chu a liak hnawm zeuh a. A hamhaih hmel mawlh mai chu hmuhnawm tak a ni.




A kawnga ka chelhna ka thlah rual chuan harh chhuak thut ni awm tak hian a inlahrang vat a. A meng buai vek maiin ka hria.




"Chhanna ka duh ania" tiin ka lo nuih leh suk a. Tuna a hmel landan hi a inhmeh hlawl lo, zâm hmel a pu ve tlat a. Amah hlei hlei hian a in duh lo viau in ka ring.




A ṭawng chhuah hun tur chu ka lo ngaichâng ve reng a. A sam chu a tuai ṭha te te a, chiang fahran hian min rawn melh a.




Eng tak rawn sawi ang maw ka lo tih lai chuan "I tenawm emai a" a lo ti teh daih a. Min va ti hamhaih tak e aw.




"Ka zei viau lawm ni?" ka tih chuan a lo ner nawng a. "Keichu khatiang kha ka ten zâwng tak. Pangngai deuh te'n min bem ve la, romantic deuh, tenawm si lovin min bem ta che" a lo ti hlak hlak a. Tihngaihna tak pawh ka hre tawh lo.




"Aww...kha bak bak a awm em ni? Ṭawngkam han thluai thlum vak ka thiam ve hlei nem. Lungawi tawh mai rawh" ka lo ti nghut a. "Ṭawngkam thluai thlum ngai pawh ka ti lo...mahse...Aaa...i hrethiam lo emai. Nakinah kan sawi ṭha leh mai dawn nia" a ti bah nuaih a.




Lungawi loh hmel zet hian min han melh leh ren rawn a. "Lo in zir ṭha leh phawt teh" tiin min kalsan mai a tum a.



Ka lo che ve nghal vut a, a banah chuan ka va chelh a "Rara" ka tih rual chuan nin hmel zet hian a rawn hawi leh a. Eng rilru nge a put ber pawh ka hrethiam tawh lo.




"Min chhâng dawn lo em ni?" ka ti zawi sup a, henu hian ka rilru a tibuai tak zet tawh a ni. "Aw...chhang rih dawn lo, ka easy lo ka tih mawlh mawlh kha. Awlsam deuha kan neih theih thil chu nikhua a lo rei a, kan hlut lo telh telh zel a. Harsa deuha kan neih thil chu kan hlut telh telh thung. Chuvang chuan tikhan tuilairapin lo awm ve phawt rawh" a ti ta mawlh mawlh a. Ka va lungawi lo tak, mahse tih theih dang ka nei chuang bawk silo.




"Ka beidawng hman ange aw" tiin ka sawi ṭhaih a. Mahse a lo duai duh der lo. "I duh leh tunah pawh khan beidawng la, min duh leh lo la a nimai lawm. Ka duh chuan ka inthunun ve thei lutuk. Ṭha ka tih dan zelin ka nung dawn" a lo ti leh hmak a.




Han tih zui vak ngaihna ka hre tawh lo. "Min thlah la" a tih chuan ka lo la vuan reng tih ka hrechhuak chiah a. Muangchangin ka thlah ve mai bawk a. Rawn hawi let tawh miah lovin inchhungah chuan a lut zui nghal a.




Rei tâwk fang chu an inkawtah chuan ka ding leh ren rawn a. Ka rilru a ti buai ve map mai. Amah ka duhna lah chu ka kawchhûngah hian meialh ang maiin alh hluah hluah mai sia.



Ka haw hnu pawh chuan ka inngaihtuah buai nasa khawp mai. A ṭawngkam nuihzatthlâk tak takte kha ka ngaihtuah let a, keimahin ka nui leh ṭhin. Ka duh chhan tur âwm ang ka ngaihtuah a, mahse a chhan ṭha tak sawi tur a lawi ka hre lo. Ka duh a ni tawp mai.




A mizia harh vâng tak leh ri phawng phawng, a hmaa ka lo huat ṭhin te kha tunah chuan ka lawm tawh zawk a. Amah ka duhna tizualtu an ni zo vek tawh.




Khum bula ka phone chu banin ka va text hram a, "I mu tawh em?" ka va ti a. A lo online va a, mahse ka message chu a seen har khawp mai.



"Mu tawh" tih tê mai hian min rawn chhang a. Engtia hmalak chi nge ka hrethiam lo. Min la duh ngei chuan ka hria a, mahse a khirh reuh zek bawk si. Min tibuai takzet a ni.




"Zanina ka sawi ho kha...dawt ka sawi lo ania aw" ka va ti leh a. Reife ka nghah hnu ah min rawn chhang veleh chauh a.



"Ka hria alawm, ka duhawm alawm" a rawn ti awlsam thên a. Ka nui chhuak nghal huk mai.



"A dik, i duhawm, bem rei ngai suh aw" ka va ti leh a. Engtin tak min rawn chhang leh ang maw. Amah ang hian tlang deuhin, ka rilru ang takin ri chhuak ve phawng phawng tawh ila ṭha berin ka hria.





Rei vak lovah voice message hi a rawn thawn a "I hmanhmawh anih khaaa..." a rawn ti thluk awn duai a. A ṭawng zawnga a hmel awm dan tur ka lo mitthla hmanhmawh a. A nui pah deuh ang a, a hmel a siam chhe kual leh bawk ang a. Ka ngaihtuah zawng ringawt pawhin ka nuih a tiza khawp mai.




"A hmanhmawh thlak alawm, min chhan vat loh chuan ka ban leh mai ang che" ka va ti a. Chhaih thinrim kual vek ka châk ve hrim hrim a ni.




Voice message bawkin min rawn chhang leh a "I tei rei peih loh chuan min chân ropui a nimai " a lo ti hluai a. Ka nui nasa hle tawh. Engtin emaw riau hian hlimna tam tak min thlen chu anih ber hi.





Thu ho tê tê sawiin kan titi zui a, a ṭawngkam lang tlang lutuk leh naupangchhia zet zette chuan min nuih tir reng mai. Mahse ka duh hle tawh tih a hriat vang nimaw a induh tawk thiam ve khawp mai.





Tukṭhuan ei laiin Vantei chuan Rara-i nen chhuah dun an tum thu a sawi a. Class kal zawha bazar kawi lawk an duh thu te chu a sawi siam siam a. Ka lo bengkhawn khawp mai.




Ka pa chuan "Engtin nge Rara-i hi a awm zel dawn le aw? A pu lah a awm tawh bawk si lova, beihvai deuhte hian a lo awm ang tih a hlauhawm. Mal leh khawhar riau te'n a lo inhria ange. Vante, a hma zawng aiin i ṭhiannu hi ngaihsak rawh aw" a ti dap dap a.




Vantei chu a lo bu nghat nghat a, "An inpui saw Pu Sanghminga khan Rara-i hming vek hian a lo dah a. Rara-i rochun vek tur tihna anih chu! Kei chuan tunah hian insawn daih se ka lo tia. Mahse amah hian a duh rih tlat lova" a ti zung zung a.




Ka nu a lo ṭawng ve vat a "Nu leh pa kara seilen tluk hi chu a awm lova. Chutihrual chuan Rara-i hi chu a thil tawrh zawng zawngte, a nuhrawnin a khawsak khum dante kan hai bik lova. Chuvangin hetiang reng ringawta awm ai chuan inpui lamah chuan insawn daih sela a ṭha zawk daih ang. Mahse mahnia awm tur em chuan a la ngaihtuah awm ve tho bawk sia" a lo ti ve malh malh a.





"Lehlamah a nî te pawh an la awm a..." ka pa in a tih lai mek chuan Vantei'n a lo pawt chat vat a "A nî te hian an ngaihsak vak hlei nem. A nu leh pa in an zir si lova, Pu Sanghminga lah khan a duatin a ngaihsak bawk sia. An thîk ka ti dawn nge, an ngei tlatin ka hre ṭhin. A lakah phei chuan an sual hran lo, mahse engtin emaw riau hian an ṭawngkhum leh fek ṭhin a" a lo ti hmarh hmarh a. A ṭhiannu chu a lungawi loh pui ve hle niin ka hria.




"Naupangtê si hian thil rapthlak tak tak a paltlang hnem lutuk a, a lainat awm tak tak a ni. Keini hian lo buaipui ve chiam dawn ila a hmingin chhungkhat laina a la nei ve bawk si a. An mit kan lo ti kham ve thei a" ka nu chuan rilru buai hmel zet hian a lo ti veleh a.




An titi chu ngawi rengin ka lo ngaithla ve a, ka chhûngte hian Rara-i chanchin chu an hrechiang thawkhat ve viau tawh niin ka hria. An lainat thu mawlh an sawi a, an thusawi mal tin chuan min lo ti chau ve nghulh thei. Ka lainat zual hle bawk.




"Rara-i hi chu mi tlang tak leh ṭawng phawng phawng ṭhin ni mah se a tawrhna te hi a thup tlat a, a sawi chhuak zen zen ngai lo. Hetia ngaihtuah tawp hi chuan mi ri phawr phawr, rilru hahna pawh nei ve lo hi a ang a. Mahse chhungrilah a na veng veng ṭhinin ka ring. Naupangchhia deuha a lan ai hian a pachang ka ti ṭhin asin aw" Vantei bawk chuan a lo ti leh malh malh a.




Hetia lo khawngaih hle mai loh chu tih theih dang vak ka nei rih si lo. Ka ta anih hunah chuan a hmaah ka ding a, ka venghim ang a. A tan hlimna thlentu ka ni ngei ang. Chutiang tur chuan rilru ka siam sauh sauh a. A duhthlanna ngeia ka kawppui anih hunah chuan ka chhawk zangkhai ngei ang.




A chanchin chu ka hre hnem telh telh a, ka rilru a hneh telh telh mai. Ka hriat tirha ka hmuh dan leh tuna ka hmuh dan chu inang tawhlo tak a ni. A nungchang a thlak hauh lo, mahse a nihna dik tak ka hre telh telh tawh zawkin ka hria.




Tlaiah chuan a ngai têin naupangho tuition ka pe leh a. Ka zirtir rei telh telh a, ka tui ve tawh takzet. Mahni ka inzir pah ve zel bawk a, ka hlawkpui ve ṭhin takzet bawk.





Naupangho zirtir pah chuan ka phone rik hun ka lo ngaichâng ru pah reng bawk a. A chhan pawh Vantei te bazar ka hruai haw dawn vang a ni. Aman min sawm pawh a ni hran lo, ka insawi lut pek a. Vantei min chhaih na pawh ka hai der lui hmiah mai. Anmahni hruai haw inpeih sa thlapin car ka keng bawk a.




Chutia ka lo ngaihtuah lai mek chuan ka phone chu a rawn ri ta ngei a. Vantei a lo la ni zui a, rang zet hian ka pick up a. "Û, kan inpeih tawh a. Mahse in tuition bân a la hun bawk si lova, kan lo va haw hmasa mai ang" a rawn ti zung zung a. Tuition hi a tlângpuiin dar 5 ah te kan bâng a. Tunah chuan dar 4 a la ri ek ek chauh a ni bawk si a. Ka ngaihtuahna a buai hman zet a. Mahse naupangho bân hma tir mai chu ka thlang ta zawk a.




"Lo awm ru, ka rawn lam ang che u. Vawiin chu bân hma nî a nimai" ka lo ti vat a, a rawn nui hak hak mai. Min chhaih na a ni tih chu ka hai lo nasa.




Phone ka dah hnu chuan ka inngaihtuah chiang a, ka thiltih âtthlâk zia ka hriat zawm zat a. Ka in nuihzat ru khawp mai. Ka awmdan hi tleirawl hawk lak ang mai ka ni. Ka helhhawlh chu a nih tak ber hi a.





Naupangho chu ka bân hma tir ta ngei a, an phur khawp mai. An lâwmna ka siam sak ve angah ka ngai hmiah a, a pawi viau lo turah ngai ang.




Bazar lama ka inkhalh phei lai chuan Vantei nen kan inbe leh a. MC kawtah min lo nghâk rân tawh.



Traffic jam ah ka tâng rei lo hlauh a, ka va thleng chawpchilh nghal mai a. Rara-i chuan kawrfual pangngai tak hi a ha a, sandals a bun leh tawp a, paper bag pahnih hi a khai bawk a. Tuna a inchei dân hi chu amah a ang thlawt lo, mahse a inhmeh viau lawi a. Hmuh a nuam takzet a ni.




Motor an rawn luh rual chuan an ri nghal bawrh bawrh a. "Au Hriatpuia chu min hmuh châk vângin Vantei i lo tlawn vel a nimaw" a rawn ti ham ham a. Ka nau a awm ve reng si a, min ti zak zawk lek lek mai. Mahse zak lo âwm ang takin ka lo nui liam mai a. Vantei zawk chu a lo lai hle in ka hria.




"In duh ang in lei thei maw?" ka lo ti ve sup a, "Thil man a to hlawm lutuk a, eng vak mah pawh kan lei lo. Kan mamawh tak tak loh chu" Vantei zawk chuan a lo ti vat a.




Motor hmaa darthlalang aṭang chuan ka va melh zawk a, Rara-i pawh chuan min lo melh ve chiah bawk a. Mit min lo siai khanglang anih chu! Ka nui chhuak hawk lo chauh a ni.




"Vante" a ti hluai a, "Au Hriatpuia hian min bem vel ania aw" a rawn ti ta hem mai. "Vanrawngbawl" ka lo ti nghal hluk a. A nui zui uar uar a. Darthlalang aṭanga ka va melh chuan a ke te chu a leng velin ka hria. Rum zetin ka va melh a, Vantei nen chuan an lo nui dun nasa mai.




"Vante, i û hi ka rin ai daihin a zeilo" a la ti ham ham zui a. Ka va han haw mai mai tak e aw. Ka zak ve tho bawk si. Ani lah chuan sawi hreh sit set a nei tawh bawk silo.




"Ih maw" a tih leh lai mek chuan "Vanrawngbawl" ka lo ti leh hluk a, a nuih lah chu a la za em em mai lehnghâl a. "I duhna ah chuan i zah theih loh em kha a" min lo ti hlak a. Sawi tur alawi pawh ka hre tawh lo. Vantei lah chu a lo nui tet tet tawh mai sia. Zahthlâk ve duh tak ani.




An in pêng kan thlen chuan chhuk mak turin a lo inring tawh a. Mahse eng emaw tal ti lo chuan chhuk tir mai mai ka tum lo. Nghal ka chhuah pek a, ka tlan tlang hmak a. A ṭe ring ngang mai "Ding rawh...kan in kan tlanpel daih ania" a ti chul a. Ka lo nui suk duh lek chauh.




Vantei pawh chuan "Û, Rara-i..." a lo ti ve vat a "Ka thlah phawt ang che" ka lo ti duh lek chauh. Rara-i ngaihdan a lo ni lo ngang mai a "Tinge i tlân tlang daih a, din a har viau em ni? Kan in awmna hrelo pawh i nilo a" a ti hlak hlak a. Ka chhâng zui duhlo, ka inla ngêng lui ve tlat a. A huat tawk a tling leh em em mai ani.





Darthlalang aṭang chuan ka va melh leh zeuh ṭhin a, a insawh tau sawk sawk a, a tum zui bar mai. Vantei lah chu a lo lai leh ringawt pek a. Ka nu nen an in anna a lang leh tawh ka ti mai. TV ah hian mipa leh hmeichhia, romantic deuh hleka an awm te hian an lo lai dun nasa thei lutuk.





Reilotê hnuah kan in chu kan thleng vat a, Vantei chu a chhuk zui tharh a. "Rara, anih leh ka hawsan mai che aw" pangngai tak hian a ti a. Rara-i chuan a chhang zui duh tawh ṭhak lo. A kut a kuangkuah hmak a, Vantei chhuk lohna lam chu a hawi daih bawk a. Ka nuih a tiza ru viau mai, a lungawi lo ve hle ni tur a ni.




Vantei chuan chal ti chuar tap hian min rawn melh a ,a ṭhiannu titau chu tih vak ngaihna a hre bik lo aniang. Ka lo buk tak nghutah chuan a ngaih pawh a ṭhat hmel ta deuh e. Nui var var chungin Rara-i ka thlah tur chu min vai liam a. Pakhatnu lah chuan a ngaihsak zui duh tawh der lo.




"Rara..." ka tih chuan a lo hrelo der hmiah a, ka koh nawn leh pawh chuan min bengkhawn duh der lo. A awmdan chu engtin emaw zawng tak hian ka lâwm a, a duhawm thlawt a ni.




"Hmelṭha Rara" ka tih chuan "I tenawm" a lo ti hlak a, a ten chhe thei ania.




"Titau kan awm em aw" nui suk chung hian ka ti leh a, "I ninawm" min lo ti leh vak tawh.



"Vanrawngbawl..." ka ti hluai a, "Ka hmingpum khan min ko ziah suh" a lo ti bak leh hlar tawh. Ka lo nui hawk hawk tawh thung a. A ngawih reng ai chuan a thinrim hian a ngaih ṭhat thlak tawh zawkin ka hria.




An in zâwn kan thlen rual chuan ka ding dat a, a chhuk mai dawn emaw ka tih laiin a ṭhu lui ngar a. "Rara..." ka tih chuan a lo hrelo der leh hmak tawh. Ka insiam rem a, hnunglam chu ka va hawi a "Ka pawm chhuah i phût em ni?" nuihza insum zet hian ka ti leh a. Hawi pawh a rawn hawi duh ṭhak lo anih chu! Ka nui ka nui mai.





"Hmêlṭha Rara" ka tih chuan rum zet hian min rawn melh a, a rawn hawi duh tawh tal a, a ngaih ṭhat thlak leh zawk daih tawh.




"Hmêlṭha Rara" nui suk chung hian ka ti leh a, a meng ling teh e. "I hmelchhe mai nih chu" a lo ti hmak a. Ka nui chhuak hawk hawk mai. Min ngei hmel ang reng bawk sia.




"Inngaizawng tawh mai ang" ka ti leh lek phei chu thinrim hmel tawh tak a ni. "Ka hnê ṭep che" a tih chuan ka lo rum nghut a. Ka melh nghal run a, min tham loh hmel ngang mai.




Motor aṭanga a chhuk tur chu ka lo dang leh rih a. Nin hmel zet hian "Eng nge?" a lo ti bak hlar a. "Engtin nge ka bem ang che?" ka ti leh tawp tawh. Ka beidawng chu ka ti chiah lo na in a awmdan hi hriatthiam a har telh telh a. Amah ka duhna lah a pung tual tual mai bawk si. Engmah ni lova tâwp ka hlau hlur tawh.




"Au Hriatpui..." a lo ti hap a, a rilru a buai ve hmel ta khawp mai. A ṭawng chhuak mai dawn a,mahse mawlh tu nei ang mai hian a ngawi leh daih a. "Sawi la" ka lo ti sup a. Kan hmel chu a thutak dun ve ngang mai.




A thaw leh hliai a, a ṭawng chhuah hun chu ka lo ngaichâng ran a. "Keichu heti teh tawp hi ka nimai a. I laka ka rilru puthmang hi tâwk ka ti viau mai. Ka duh che a, hetah hian tawp sela ka duh" thutak zet hian a rawn ti ta a.




A thusawiin ka kawchhung a deh dan chu dang tak a ni. "Ka lakah beiseina i nei lo em ni?" ka lo ti hulh a, a lo bu nghat nghat a. "Ka sawi chu, ka duhna che ah hian tâwp rawh se. Tunah pawh hian duh ai kan thleng thui tawh ka ti. Min hrethiam pha kher lovang" a lo ti charh charh a.




Rara-i chuan hrilhhai zetin min siam ka ti lo theilo. "Min duh a,ka duh che a, kan induhtawn a. Bul kan ṭan dun thei reng alawm" ka lo ti vat a. Ka sawi awmzia chu hrethiam se ka ti khawp mai.




Za lo tih hriat zet hian a lo ṭhen sak a. "I ngaih ang ngawta awlsam kha nise ka ti, mahse i rin phak bakin buaina ka ngah ang. Ka chanchin hi hriat loh tam tak i la nei ania. Mal tlat nun hi ka thlang zawk" thil tam tak ngaihtuah ang mai hian a rawn ti a.





Motor aṭang chuan a chhuak zui nghal a, inchhung a luh thleng chuan ka thlir zui a. Ka tha tho na zawng zawng te chu a kal bopui vek nimai hian ka hria. Min ti chau a, bulṭan theilo tur anga ka inngaihtuah ringawt pawh chuan thawpikna tam tak min pe.





Zanah chuan ka inngaihtuah zui rauh rauh a, va biak zui chî a ni ang em ka hrethiam lo. Hei aia ka duhna hi a zual hma in bansan ta zawk ila tihte ka ngaihtuah a. Lehlamah ka nau ṭhiannu a ni a, nau angin en tlang ta zawk ila tihte thlengin ka ngaihtuah a. Mahse ka beisei phak bâkin Rara-i hi ka lo duh tawh ani.




A zûnin min phuar a, min zial a, mi â ang mai hian ka awm ni berin ka hria.




Zan dar 11 a ri tawh a, ka harh tulh tulh a. Ka insum thei ta ngang lova, ka va text leh ta tawp a.




"Rara... bulṭan dun ang" ngenngawl zet hian ka va ti a, ka duhna chuan inphah hniam lo thei lovin min siam a ni.




Ka message a seen rual chuan a phone call ka dawng zui a. Ka thinphu chu a rang ngang mai.




Ka âw ka thian tê tê a, ka pick up ta vat a. "Hello" ka tih rual rual chuan a ṭap hlawp hlawp ri ka hre zui ta mai. Min va ti hamhaih tak e aw.




"Rara..." amah ngaihtuahna a khat chuan ka ti chhuak nghal hulh a, ka inperh tho nghal zawt hi a nimai.



"Enga tinge? I ṭha em?" ka ti leh zung zung a. A hma aia uar zawk mah hian a rawn ṭap zui leh a. Ka ngaihtuahna a tibuai takzet ani.




Khum aṭang chuan ka tho chhuak nghal a, "Au Hriatpui..." la ṭap hlawp hlawp chung chuan a rawn ti a. "Aw...ka ngaithla, inbengdai la, sawi rawh le, an hau che em ni?" ngaihtuah zet hian ka ti leh zung zung a. Ka kawchhûng a so bulh bulh maiin ka hria.





"Min lo hruai mai teh" la ṭap reng chung chuan a rawn ti ṭial ruai a. Engmah ka ngaihtuah zui thei tawh lo. Ka chapal chu bunin room aṭang chuan ka tlan chhuak nghal a. Bike châbi ka la zui a, ka chhungte chu an mu vek tawh a. Hrilh enah pawh ka en tawhlo.




Pâwn ka thlen rual chuan "Lo mangang suh aw, ka rawn kal ania. Hlauthâwng reng reng suh" ka ti zui mawlh mawlh a. A ṭap hlawp hlawp reng chuan ka ngaih a ti ṭha lo ngang mai.




Bike khalh ka ngai bawk si a, phone ka dah anih chuan engtin emaw a lo awm hman ang tih ka hlau bawk si. Ka ngaihtuahna a buai nuaih mai.




"Rara, ka lo kal dawn a, bike khalh ka ngai a. Phone hi ka dah phawt ang a, ka lo thlen rualin ka lo be leh nghal ang che. Lo hlauthâwng miah suh aw, ka rei lovang" amah thlamuan tum tak chuan ka ti leh mawlh mawlh a.




"Umm...rei suh aw..." a rawn ti leh ṭiau a, a ṭap zui leh hlawp hlawp a. A ngaih ṭhat thlak duh lo kher mai.




"Rei dawn lo, ka lo thleng vat dawn" ka lo ti nghet charh a, phone chu ka dah zui nghal a.




Hmanhmawh zet hian Rara-i te in lam chu ka pan nghal a. Zanrei tawhah vung zetin ka inkhalh chhuak a. Vei vak an awm tawhlo hlauh a, a tihzia tak tak a ni.




Ka speed a sâng bawk a, rei vak lovah Rara-i te in chu ka thleng a. Ka phone phawrhin ka call zui nghal a.




A pick up rual chuan "Lo kal rawh le, ka lo thleng tawh ania" ka ti dam dap a, a insut ri hraih a, a lo la ṭap char char anih hmel.




"Lo chhuak rawh le" tiin phone chu ka dah zui nghal a. A lo chhuah hun chu ka lo ngaichâng rân a.




Rei vak lovah an kawngkhar chu a rawn ri ta khap a. Rara-i hmel ka hmu zui nghal a.




Ka va pan hnai dawn zet a, mahse amah zawk chu a rawn tlan phei a. Ṭap hlawp hlawp chung chuan ka kawngah min rawn kuah nghal a. Nghet zetin ka lo kuah let a. Ka âwm ah a hmai a rawn nawr vak mai. A khur zui ta ngat ngat mai. A awmdan avang chuan ka kawchhûng a lo tawt ve ṭun thei.




______________*___________*___________


(Duh angin kan kal chak thei ngang lo. Class kan ṭan tak tak tawh dawn a, dah loh zeuh zeuh zan kan nei mai thei aw. Chutiang hunah chuan min lo hrethiam hram hram ṭhin dawn nia. A hma angin ka regu tawh lo in lo ti mak thei a , a hma ang khan hun ka nei tawh tlat lo ani. Chutihrual chuan awm khât lutuk ang kha a ni dawn miah lo ania. A laklawhah chuan ka bansan hauh lovang.)

Chuan, thil pakhat leh, innawr vak hian ka che buai a, ka hmanhmawh luatah ka type pelh sawlh nuaih thin a. Chuvangin in nawr tut tut lovang u aw, chuti lo chu ka duh ang thalin ka ziak chhuak theilo ang tih ka hlau thin. Pressure a sân poh leh a ngaihnawm lo telh telh mai ang. Calm deuhin, zawi muangin kan tih bek bek a ngai tihna anih ber chu.


Show post links
Top

[Ngaia]

AIZIAL
By CVL Awmpuii


(Ka zawmna lai ka chhinchhiah lo aw, zanlaiah chapter 13 ka rawn dah leh ang)

Chapter 12



Rara-i awmdan chuan ka ngaihtuahna a ti kal thui kher mai. Hmeichhe harh vâng leh inthunun thei tak a ni a. A rilru a huaisen a, a chhel hle bawk anih kha. Hetiang taka a ṭah hian chhan ṭha tawk tak a nei ngei ang. A pû ruang chungah meuh pawh ṭap lovin a awm tluan thei ania. Ani meuh heti taka a ṭap chhuak anih chuan a rilru a ipik ve hle tawh anih ka ring.




Nghet zetin ka lo kuah a, a hnungzangah chuan hnem tum tak hian ka chûl hauh hauh bawk a. A na ngang ania nge, a ṭap bâng hlei thei meuh lo. Rilru na, kawchhûng aṭanga puak chhuak tih hriat zet hian run zetin a ṭap a. A ṭah chhan tak hre rih lo mah ila ka lo nat pui ve vawng vawng thei hial a ni.




A ṭap hnang dawn ngiala ka hriat avang chuan "Rara" ka ti sup a, amah en thei tur chuan inlakhran ka tum bawk a. Mahse min lo la kuahbet ṭung a.




"A tawk e, a tawk e. Ka lo kal tawh hi, mangang miah suh. Inbengdai la, hahdam takin awm tum rawh" ka ti zui mawlh mawlh a. A hma aia run mah hian a rawn ṭap chhuak leh rawng rawng a. A na thlawt niin ka hria.




Rei tâwk fang a ṭah hnu chuan a tha a rawn zawi tial tial a, a rawn insut ta feih feih a. Inlakhran ka tum pawh chuan min pawt ṭung tawh bik lo.




A hmel ka en chiah chu ka lainat zual kher mai. Ṭap nasa tih hriat zet hian a mit a bui lâk a, a hmai a sen vek bawk a. A ṭah a la chhuak reng tih hriat lutuk hian a insehruh fan fan a. A taksa erawh a zawi ngiai tawh mai. A ṭap nasa bawk a, a chau vek anih ka ring.




A bianga khuap run chung chuan chiang zet hian ka melh a, mittui la tling pamin min lo melh ve bawk a.




"I chungah hian eng chiah nge maw thleng le" ka ti chhuak hulh a, a hmel landan lainatawm lutuk leh khawgaih thla la lutuk chuan ka tha a ti na ngang mai.




Ka âwm ah chuan ka kuah bei leh tê tê a, nghet zetin min lo kuah let veleh bawk a. A ṭap khur zui leh dar dar mai. Eng emaw tak chu a tâwk ni ngeiin ka hre tawh. Chuti chu ni lo se heti em em hian a awm lovang.




"Au Hriatpui..." a rawn ti chhuak ṭial ruai a, a samah chuan ka lo fâwp nghal tawk a. A thil sawi tum tak pawh sawi hlei thei lo hian a inhnit zui leh hlap hlap a.




Hetia a awm chhan tak hi ka hre bawk si lo, rilru a hah ṭun tawh mai. Mahse hei erawh chiang takin ka hria, Rara-i hi a na, a kehchhe mek niin ka hria. Ka tih tur chu a rilru natna te hriat sak a, tuam dam sak a ni.




A sam chu ka chûl hauh hauh a. "Engkim a ṭha leh vek dawn, ka awm tawh hi hahdam la" zaidam zet hian ka ti a. Tun atân chuan min thlamuan pui hle se ka duh ber.



Tlêma a pangngai deuh hnu chuan thil awmzia ka zawt ta a. Min chhâng thei mai lo, mahse a mitmenga natna tam tak inphûm ru chu ka hmuh hmaih loh nasa lutuk.




"Apu thlânah min hruai lawk mai teh" hrehawm tih hmel lutuk hian a rawn ti ṭiau a. Zawhna zawh zui vak chî niin ka hre ta lova.




A duh ang chuan a pu thlân lama hruai phawt chu thil ṭha ber niin ka hria.




Zan khaw teirek pawh sawi thei lovin a pu thlan lamah chuan kan in phur phei ta a. Ka kawngah chuan nghet zeta min kuahin ka hnungah a bei chial a. Zawimuangin ka tlân pui a. Tlêm talin hahdamna hmu se ka ti khawp mai.




A pu thlan kan thlen rual chuan a ṭap baw leh nghal hawk a. A ruang awm lai khan ṭap thei miah lovin a awm a, tunah hian a sûn thar leh ni berin ka hria. A rilru tur chu hrethiamin ka lo dang duh lova. Mahse a bulah chuan ka ding tlat a, nghet zetin a darah ka lo kuah thung a. A rilru hrehawmna te chu tlêm te tal pawhin chhawk zangkhai thei ila ka ti takzet a ni.





Ṭap nasa hle mah se tun ṭum chu a hma zawng ai khan a ṭap bang hma a. A zia ve deuh hawk tawhin ka ring.




A pu thlân bula thlân lung lian zetah chuan kan ṭhu dun ta rial a. A darah ka kuah a, ani'n hahdam hmel zetin min lo ngheng bawk a. Ka lo thâwl ve huai mai hian ka hria.





A awmdan a pangngai ta bawk a, khatiang vaka a awm chhan kha ka zâwt ta a. "I chungah eng thil chiah nge thleng le?" ka ti dam thlup a. Ka âw aṭang chuan a tân ka inhawn zia pawh a hrethiam in ka ring.




A ngawi deuh vang vang a, ka zuk melh chuan rilru nat hmel zet hian hmalam a lo bih ngar a.



"Au Hriatpui..." a lo ti zawi sep a, a hmui a pet deuh fan fan a. Ka awmdan chu siam remin a samah chuan ka zuk fâwp zeuh a "Engkim min hrilh rawh" ka lo ti nghet charh a. A hlimna tur anih chuan a tan engpawh ka ti mai ang.




Chutah ṭawng chhuah harsa tih hmel zet hian "Dawnga'n min khawih a tum" a rawn ti zawi ta sep a, a âw chu zawi hle mah se ka hrechiang ngang mai.



Ka kawchhûng a che nghal dawt a,ka tho chhuak nghal hluai a. Ani pawh a lo ṭhu ngil vat a. A mittui luang chu a lo hru hul nghal tâwk a.




Ka melh chhuk nghal run a, ka inhum ruh ngang mai. Ani chuan ngaihtuahna mumal pawh put hmel loh zet hian hmalam a melh ngar a, a hmui a pet fan fan bawk.




"Tunge Dawnga chu?" ka ti bul vut a, inthunun tumin ka insehruh ṭeuh mai. Rara-i ka khawngaihna leh ka thinrimna avang chuan ka kawchhûng hi a so nghal bulh bulh mai.




"Ka nu û fapa" a lo ti halh a, a rilru a nat hmel ngang mai.



Ka lainat bawk si, ka thinrim bawk si, ka thawk a lo ipik vek thei hialin ka hria.




"Ka nû unaupa fapa ania, ka lo phone hma lawk che khan ka room ah a lo lut a..." a tih leh lai mek chuan ka zuk kuah nghal a. A rilru natna tizual turin eng thu mah sawi zui ka phal tawh lo. A ṭap khûr lehnghâl dar dar a.




A natna ah chuan ka lo na ve ngawih ngawih. Dawnga khawih châkna in ka thisen a so bulh bulh bawk a. A vanduai bik lutuk hian min hmet chau a, min lo tina ve ngawih ngawih mai.




A rilru mumal deuh hlek hunah thil thlen dan kimchang chu min hrilh chauh sela ka duh. Tunah hian hre châk viau mah ila a la thlabar emai a, chumi tizual tur tinga thil zawh chîk viau chu ka duh rih lo a ni.




Chutia ka lo kuah reng lai chuan inlahrang hmasa zawkah a ṭang a. A hmel chu hmuh a hrehawm kher mai. A mit bui lutuk ber chuan ngaih a ti ṭha lo. Zanin zet zawng a mittui a hul thei mawlh lo a ni e.




Ngawi rengin thlan lungah chuan kan han ṭhu leh ren rawn a. Thil tam tak ngaihtuah hmel hi a pu a, hah hmel zet hian a rawn thaw chhuak leh halh ṭhin bawk a. Zanin chu a nun chau rau lutuk hian min hmet chau ve vek mai.




Pangngai taka thawk a lak hnu chuan thil thlen dan kim chang chu min hrilh ta malh malh a. "Ṭum dangah pawh Dawnga chu a lo lêng lût fo a. Ka nu hi a be thiam riau a, an titi duh zawngte a inan bakah ka nu hi thil ho te te leisakin a tilawm thiam a. Hei vang hi aniang ka nu hian a vahte ah pawh a duat bik a. Kan inah pawh a lo chuang kai zing. Kan inbe em em lo na in lo lêng zing na na na chu inbiak zeuh kan nei ve ṭhîn a. Pangngai taka min biak ṭhin avangin mifel pangngai ve deuh turah ka lo ngai a. Mahse vawiin ah khan zanriah a lo ei a, ka nu in riak nghal turin a sawm a. A lo remti ve mai bawk a. Kei chuan ka lo bengkhawn em em hran lova. Ka room bul lawkah hian mikhual room a awm a, chutah chuan ka nu in riak turin a tia. Zan tirah Assignment ka tih avangin tlai deuhah ka inbual a, ka inbual zawh khan dar 10:30 vel niin ka hria. Mahni chauha room-a awm ta chu towel chauh vengin bathroom aṭang chuan ka chhuak a. Ka khuma ṭhu chung chuan ka inthlak a, Bra leh panty ka ha hman ṭawk tihah ka room kawngkhar a rawn hawng teh thut a. Ka room kawngkhar kalhna hi a chhiatna a rei tawh a. A hma-in nang pawh i lo luh tawh kha. Keichu ka ngaih a sam sia, khatia ruak thaw thanga ka lo awm kha zah enah pawh ka lo en vak lova. Lo inhup vat nachang pawh ka lo hre lo. Chuloah ka nu vahpa anih avangin ka lo mihran en ngai lo hrim hrim a. Innel viau lo mah ila khatiang rilru chhia pu turah ka lo dah ngailo hrim hrim a. Kawngkhâr a rawn hawn pawh chuan tho chhuak lem lovin ka lo chhâwn vat a. Eng emaw mamawh a nei ang a, a lo kal aniang te ka tia. Ka inthlak zui mawlh mawlh tho a. Mahse ka kekawr ka inthawlh laia a mitmeng ka va hmuh chuan ka hlauthâwng nghal vek thei. Ka ṭawng chhuah leh hma hauhin min rawn pan a, min rawn bawhbet ta mai a. Ka au dawn a, mahse ka kâ a hup tlat bawk sia. Kan inchai zui nghal a. Ka tal nasat em avangin a duh ang chuan min khawih thei bik lo. Mahse ṭawngkam tenawm zet zet hi a chhak chhuak a 'Ka îtna che a rei tawh, hei vang hi alawm zaninah pawh ka nî sâwmna ka hnial duh loh' te min ti a. Mipa thâ chu ka lo hneh bik silo, chhe vek turah ka inngai hman tawh a. Mahse vanneih thlak lutukin inhnuai lam aṭanga ka nu in a rawn ko ri kan hre ta hlauh a. A inlahrang nghal vut a, midang hnena sawi lo turin min vau zui nghal a. A chhuah hnu pawh khan rilru pangngai pu hlek thei lovin ka awm a. Ka pu phone mai ka tum a, phone ka ban hman tawh, mahse a awm tawhlo tih ka hrechhuak nghal a. Chutih lai mek chuan i message kha a rawn thleng chawpchilh nghal a. Ka rawn phone ta tawp che anih kha" a ti a.





A thusawi tir lam chu pangngai viau mah se a thusawi tâwp lamah chuan a ṭah a chhuah hmel leh hle tawh.




Harsat mangan a tawh laia a hriatchhuah hmasak ber ṭhin a pu chu auh tumin hma a la ve a, a boral tawh tih theihnghilh khawp hialin a lo mangang chu a ni awm si a. A beiseina neihchhun pawh tunah chuan a awm tawh silo, ka lainat zual kher mai.




A hmaah chuan dingin ka kuah leh ringawt a. Han hnem vak ngaihna ka hrelo, mahse innghahna tlâk, beisei tur a nei leh tawh tih hi hria sela ka duh ber. Ṭawngka a inhnem chiam ai chuan che zia hian inhnêm ila thil ṭha ber niin ka hria.




Dawnga chunga ka thinrimna chu pui tak a ni. Rara-i hi chu a in sawi ang tak tak khan ngaihsam chî a ni a. A room-a ka luh ṭum pawh khan ruak thawthangin a lo awm a, zah nachâng a hre lem lo kha ania.




Engpawh chu nise, eng ang pawhin awm rawh se, Dawnga khan khawih ngawt theihna dân a nei lo hrim hrim.




Tu hmeichhia pawh hi eng ang pawhin inthuam se, eng anga sexy, saruak pawh ni rawh se. Tumah hian pawngsual an phû bik lo. 'A thawmhnaw hakin a zir lo alawm' tiin a tuartu dem ngawt chî a ni lo. Pawi khawihtu thlavang hi hauh ngawt chî a ni lo. Eng ang thuamhnaw pawh hmeichhia hian inbel sela, mipa rilru chhia leh sual an tawn chuan tawhsual an tawk tho tho. Mipa ṭha, mipa dik tak erawh chuan hmeichhe saruaka awm chu ît hle mah se a duh lo chung a khawih lui chuang lovang.





Chuvângin Rara-i pawh hi dem ngawt theih a nilo, a rilru a thianghlim vang hian midang zawng zawng hi rilru thianghlim vek turah a ngai a. Thawmhnaw famkim pawh inbel se Dawnga khan khawih a tum tho ang. A ṭawngkam aṭang khan a tum lawk sa a ni tih a hriat vek. Chutihrual chuan Rara-i pawh zilhna tur tam tak a awm bawkin ka hria.




"Tunah chuan hahdam deuhin awm tawh rawh, i chungah engmah a thleng dawn lo. A thlen ka phal ngai lo bawk ang" ka ti charh charh a. A hahdam hmel viau tawhin ka hria.




A inlahrang dat a "A zialo hle mai, zanlai laiah ka tibuai chiam che a" inthlahrun hmel zet hian a lo ti halh a, za lo tih hriat zet hian a ṭhen sak bawk a.





Kei erawh ka lo rum nghut thung a "Inthlahrung hmel kha pu ve suh, i inhmeh miah lo ania. Rara-i ang tak khan awm rawh" ka lo ti churh a. A lo nui mai a.





"I message kha hmu miah lo ila chu tunah te hian rilru ipik deuhin room ah ka awm âwm si a" a tih chuan ka lo pawtchat vat a "Pathian remruat anih kha, zaninah hian rawn biak che ka tum reng reng lo. Ka insum ve ṭang ṭang a, mahse ka insum thei ta ngang lova. Ka lo be tawp che anih kha" tiin ka lo ṭhen suk a. Ka thu tak hle thung a.





Ka lo va bia kha Pathian remruat tak tak niin ka hria. Chuti chu ni lo se a sawi ang tak tak khan tunah hian hrehawm ti lutukin a awm âwm si a. Ka lo va be hlauh kha ka lawm thar ngang mai.




"Nikhua ka hriat tirh ata ka la ṭah nasat ber ṭum niin ka hria. Ka ṭap khât viau ania, mahse zanin chu a chhuak ngang aniang, ka ṭap vak mai ania. Chupawh i bulah lehnghâl, zahthlâk viau mah se ka thawl hawk mai" a lo ti leh malh malh a.




Tunah chuan a âw pawh a pangngai tawh a, a hmel hmuh pawh a nuam tawh khawp mai. Chutihrual chuan a mit a bui chur a, men a harsa ngawtin ka ring.




"Kha, i ṭap hmelchhe vek alawm " ka lo ti fiamthu a, "Ka hmelṭha reng aw, min duh em kha" a lo ti hlak a, ka lo nui hawk hawk tawh. Kan boruak chu a zangkhai sawt khawp mai.




Kan haw hma chuan Dawnga chungchang chu kan sawi dun leh a "Tun aṭang chuan hlat ang che, a hmel ka hmu anih chuan a châk lovang. A hma zawng aiin fimkhur la, i sahimna tur ngaihtuah ve char char ang che. I thawmhnaw inbel chungchângah pawh ngaihsam lutuk tawh lo la. Mipa hi chu kan rilru a chhe teh mai nia. Kawr âwm zau deuh hak te, kawr chhing lutuk, dul lang huang huang hak te kha sim la. Kekawr ṭet sa phei chu ha tawh miah suh ang che. Kan landan tam tak hian mite hmuhah min ti lang zahawmin min tilang zahawm lo thei ania. Hetia ka sawi avang hian i chunga Dawnga chêt dan kha a âwm ve reng ka tihna a ni lova. A ni chu engti kawng pawhin a thiam lo hul hual. Chutihrual chuan i thawmhnaw inbel dan chungchangah fimkhur tawh la" ka ti ta duah a. Naupang thuawih deuh ang hian a lo bu nghat nghat mai.





"Ka fimkhur tawh viau ang, Dawnga pawh a awm lai chuan inah ka awm tawh lovang" a lo ti ve vat a. A sam hnawk deuh niaih chu a bengah zepin ka chûl mam sak thuak thuak a.




"I pu awm tawh lo mah se keimah ka awm tawh a, i pu ai ka awh zel ang" ka ti nghet leh charh a. A lo bu leh nghat nghat a "Apu chu ngai viau mah ila hmun nuam deuhah a awm tawh tih ka hria a. Leia a awm lai kha chuan buaina hlir ka thlen a, a hahdam ve tawh tihna a nimai. Tunah chuan ka tibuai char char tawh ang che" a lo ti veleh a.




"Umm...ka bulah chuan ṭap hreh lo la, mahse ṭah belh lutuk loh tur. Nula i nih tawh hi" ka ti leh a, ka nuih suk bawk a. Inti fel zet hian a lo bu leh nghauh nghauh a. A va han lawmawm mai mai tak e aw. He nau hian rin ai takin thu a awih dawn zekin ka hria.




An ina ka thlah leh dawn chuan ka hlauhthâwn pui ngang mai a. "I lo riak mai dawn mi?" ka tih chuan min lo hnial ve ṭung a.



"A hunlai khan ka thlabar lutuk a, mahse tunah chuan ani pawh a mu daih tawh ang. Ka chhûngte pawh an mu vek tawh dawn a. Ka hlauthâwng tawh lo. Chuloah min khawih ngam mai ka ring tawh lo. Ka fimkhur tlat tawh dawn alawm. Chemtê ka inchhawp mai ang" a lo ti hriam hrak a.




Ka ngaihtuah loh phah der silo. An inkawt kan thlen chuan ka ngaihtuahna a buai nuaih mai.




Ani lah chu a pangngai tawh khawp mai a, Rara-i tak tak ang khan a awm leh der tawh.





"Rara, lo riak mai teh " ka ti leh thlâwt a, ka hlauhthâwn pui êm a ni. A lu a lo thing vat a, thil hrechhuak thut ni awm tak hian a rawn phul hluai a "Ni dawn tak e, ka pa te room bul, inhnuaiah room ruak a awm alawm. A tê nanga zanin chu ka riak mai ang. Awi... engtin nge ka hriat vat loh theih zawk le" a ti hluai a.




Chutia room danga a riah theih dawn chuan ka ngaih pawh a ṭha ta deuh e. Mahse duhthusam ah chuan hruai haw ila, zanin chu rawn riak daih mah se ka pawiti lo. Vantei nen an mudun leh thei dawn tho a.




"I lo riak lo tak tak ang maw..." ka ti fan leh ruih a, a lu a lo bu nghat a. "Ka ngaihtuah awm loh ang" a lo ti var a. Ka ngaihtuah loh phah chuang bawk silo, a mangan thlak duh tak tak ani.




Lungsi zan lo chuan Bike ah ka lawn leh a. "Au Hriatpui" a rawn tih leh hluai rual chuan a lam ka hawi vat a.



A ngawi leh daih lawi a, mit tizim sun hian ka melh a. A zam hmel hle in ka hria.



"Ih...ih...englo...heti hian eng nge...ka tih awmzia chu...hei eng ang nge kan nih?" a rawn ti bah niai a, a hmel buai zet leh a ṭawng bah nuaih aṭang chuan a sawi tum ka man mai e.




Ka lo nuih suk a, a hmui a lo liak zeuh thung a. "Ka bialnu i ni tawh a,i bialpa ka ni tawh" ka lo ti nghet charh a. Min rawn melh ralh mai. Ngainat awm zet hian ka lo nuih ve thung a.




A lo buk tak nghat nghatah chuan a pawm ve ta niin ka hria.




In ka thlen veleh ka call nghal a, a ring ral ṭhak mai. Hlauthâwng zetin ka call nawn leh a. A lo pick up ta hlauh a. Ka thaw nghal huai mai, ka hlauhthâwn hman zia chu pui tak a ni.




"I ṭha em?" ka ti nghal tawng a, "Aw, inhnuaiah chuan ka riak daih a. I lo call lai kha inchunga ka chhoh lawk hlan ania" a rawn ti nghal zung zung a.



"Chuan i mu fel tawh em ni?" ka ti leh a, "Aw...mu fel tawh chu a nimai" a lo ti ve vat a.




Thu ho mai mai sawiin kan titi zui a, Dawnga chungchang kan sawi leh lai chuan ka lo insehruh nghal ṭeuh mai.




"In ka thlen chuan hmuh tur a awm tawh lo, naktukah pawh a haw hma chu ka chhuak lovang. Anih loh paw'n a thawh hma in ka chhuak daih ang" a rawn ti zung zung a.




"Ka sawi tawh ang khan fimkhur la, hnaih tawh suh ang che. I incheina chungchângah pawh fimkhur la aw. Hun remchâng i siam sak hlauh ang e" ka ti ve luam a.




Thu ṭha hrilh leh fuih hi ka tih ve theih tâwk chu a ni rih mai a. Ka vênghim zo lovang tih erawh ka hlau takzet ani. Chutihrual chuan mahni sahimna hrelo tur khawpa mâwl a ni lova, Dawnga zia dik tak a hre tawh bawk a. A fimkhur thiam ve tawh ngeiin ka ring.





Chutia kan inbiak lai reng chuan "Au Hriatpui" a rawn ti hluai a. Kan thusawi nena inpersan deuh a rawn sawi leh mai ang.




"Sawi la" ka lo ti vat a, "Heti hian kan inngaizawng tak tak maw?" a rawn ti hliai a. Ka sawi rêng kha maw, thu dang daih a rawn sawi leh tak tak tawh.



A zawhna âtthlâk zet avang chuan ka lo nui hawk a. Ka sawi chiang viau khan ka hria asin mawle. Mahse a rilru tur chu ka hrethiam ve khawp mai. Anni ang rual hi chuan thu tih chian kilh kelh hi an phût ṭhin tlat a ni.




"Rara..." ka ti zawi ruih a, ka hmui petin ka nui suk a. "Ka bialnu i ni tawh a, i bialpa ka ni tawh. Chumi awmzia chu kan inngaizawng tawh tihna" thutak zet hian ka ti ta a.




A reh vang vang a, a inngaihtuah buai leh tawh viau anih ka ring.




"Tlankimi theihnghilh nan leh tih elna atân min hman i tum anih chuan ka duh miah lo ania" a rawn ti fiah fak a. A thil ngaihdan âtthlâk lutuk avang chuan ka lo phun hluk mai.



"Khatianga buai mai mai rual ka ni tawh lo" ka lo ti bul hmuk a. A reh leh vang vang a. Ka ṭawngkam bul zet avang chuan a lungawi vak lo emaw ka ti hman a.




Ṭawng leh ka tum lai mek chuan "Anih leh..." a rawn ti zawi sep a, a ngawih leh daih avang chuan "Sawi la" ka lo ti zawi ruih a.




Khumah chuan ka lawnkai nghal bawk a. A thusawi leh tur chu ka lo ngaichâng a.




"Min khawngaih vanga hetia min ngaihsak hi i ni em?" a rawn ti leh khauh a. He nau hian thil tam tak a ngaihtuah ve niin ka hria.




A ngaihdan âtthlâk zet zet avang chuan ka lungawi lo viau dawn a, mahse a dinhmun te ka ngaihtuah a. Hmeichhia hi chuan thil zeldin vak vak hi an peih a, an hlauthâwng hma em em bawk a. Chutiang dinhmunah chuan Rara-i hi a ding niin ka hria. A ngaihtuahna buai ve dan tur chu ka hriatthiam pui khawp mai.





"Rara, ka thusawi tur hi uluk deuhin lo ngaithla rawh. In duhna te, in lainatna te, in khawngaihna te hi thil hran hlak, mahse inkawp rem em em tho si an ni a. In duhna ah chuan lainatna leh khawngaihna te pawh a tel vek a. Chutihrual chuan lainatna leh khawngaihna ah hian in duhna a tel vek thei lo. I hriatthiam dan tur chuan ka duh che a, a bak chu ka duhna che in a keng tel vek thung. A bulpui ber chu nang ka duhna che hi a nimai. I ngaihtuahna kha vah kual tir vak vak suh" ka ti ta duah a.




Ka thusawi chu a hriatthiam ngei ka ring.





Chutah naupangchhia zet hian "Anih leh ka eng ber hi nge min duh chhan?" a rawn ti a. He zawhna hi hmeichhe tam tak zawhna ni ṭhin, mipa in kan chhan mumal theih si loh niin ka hria.





Chutiang chiah chuan Rara-i pawh hi ka duh chhan ber sawi tur ka hrelo. Ka duh hle tih hi chiang takin ka hria a nimai.




Ṭawngkam thiam ta lo chu "Ka hre tawh bik lo le" ka ti ta ngawt a. A lo chek hlak mai. A lungawi lo leh tawh anih ka ring.




"Duh chhan tur ka tam em hi, pakhat tal te chu sawi ve la" a rawn ti nghat a. A ṭawngkam naupangchhia zet zet leh lang tlang lutuk te hian min ti nui reng mai anih hi.




"Aw, anih leh ka'n sawi ang e. I fel a, thil thup ṭit ṭet nei lovin tlang deuhin i ngaihdan i sawi ṭhin a. I nihna ang tawpin i lang ṭhin a. Hei vang hian ka duh che" ka ti duah a. A lungawi zo ange maw.




Ka thusawi chu nui chunga sawi ni mah ila ka rilru tak tak sawi ka ni. Ka ngaihtuah chian hian ka duh chhan tak sawi thei lo mah ila a mizia hi ni ta berin ka hria.





A lungawi zo lehpek lo nge ni, a lo rum chhar chhar a. "Ka hmêl te a ṭha a, ka piante pawh a nalh a, ka ngo a, thau si lovin a tâwk chiahin ka khal bawk a, mipa duh zawng tak ka nia lawm. Chungte chu rawn sawi tel ta che. Ka beisei loh deuh i rawn sawi daih a" a rawn ti hlak hlak a.





A âw aṭang chuan a thutak ve hmel bawk si, kei lah ka nuih a lo za tawh mai sia. He nau hi chu a confi ve thlawt a ni.




"Aw...chung zawng zawng vangte pawh chuan ka duh che " ka han ti leh hnuhnawh a. A lungawi nan chuan ka lo pawm zel mai aniang chu. A thusawi zawng zawng kha dawt ni hek lo le.




"Ka duh chhan che min zawt a, nangmah leh nangmah i in chhang leh daih a" nuihza insum zet hian ka ti leh a.




A ri deuh sat sat a, a mu ṭha vel anih ka ring.



"Aw i sawi kim lo em anih kha. Kha lo pawh kha sawi tur ka la hre ṭeuh. Ka hnute a tâwk chauhin a lian bawk a, ka mawngbawr te pawh mipa duh chî. Keimah hrim hrim hi..." a tih lai mek chuan ka lo pawt chat a "Aw, mipa duh chî tak i nia lawm" ka ti ta tawp a.





Ka pawt chat vat lo anih chuan sawi hreh sit set a nei dawn si lova. Ka tum loh pui pui ka hre ṭeuh ang tih ka hlau. Keimah zawk ka zak leh emaw te kha ania nga. Kan Rara-i zet hi zawng, a danglam a ni.




"Au Hriatpui" a rawn ti leh hluai a, hetia min koh hian nuam ka ti ru riau tawh. Ka eih lo phal tawh mang lo.




A titi zui siam siam a, a hma lawkah hmeichhe rilru na zet, ṭap rawng rawng kha chu a ang leh tawh lo kher mai.




Heihi ania Rara-i ka duh zualna em em chu, a rilru natna te hi inrah beh tir a tum ngai lo. Naupangtê ni mah se a chhel ru tlat a ni.




Ka men rei em avangin zing thawh ka hai pek a. Chawei dawnah Vantei'n min rawn kai tho a. Inthlahrun awm duh ngat ngat tak a ni.



Ka nu phei chuan ka damlo emaw a ti hial a. A ngaihdan chu a âwm lo hran lo, ka dam ṭha anih phawt chuan ka mu rei ngai miau lova.




Tukṭhuan ei lai chuan Vantei'n min nuih tet tet reng a. A ṭhiannu kâ aṭangin thil eng emaw tak a hre leh tawh ani tih a hriat reng mai. Tihngaihna vak awm hek lo le, ka hrelo der ta tawp a.




Nau te ṭhian han ngaihzawn tawp mai chu thil tih chî a ni viau ang em ka hrelo, mahse ka duh miau si a. Keimahni ber thianghlim taka kan inkawp phawt chuan mi mit kan tikham lo turah ka ngai ve tawp mai.





Tlaiah chuan a ngai têin naupangho tuition ka pe leh a. Rara-i chu zingah khan ka be tawh a, Dawnga haw hnu ah college kal turin a chhuak ve chiah a ni awm e. Anmahni in ngeiah pawh zalên takin a awm thei lo ania, a lainatawm ngawt mai.





Engtik ni ah emaw chuan Dawnga hi hmuh ve ngei ka la duh ang. Rara-i hi a mal lo ani tih hria se ka duh.




White board hmanga naupangho ka zirtir mawlh mawlh lai chuan ka beisei loh zet hian Rara-i a rawn lang teh nawlh a. Amah chiahin a la ni lo zui a.





School uniform ha hmeichhe pathum hi a rawn hruai tel a. Ka lo bangbo ngang mai.




Kawngka bula an din reng lai chuan ka va pan vat a, "Eng nge i rawn tih dawn?" ka ti zawi sup a. Naupang uniform ha ho pawh chu ka melh bawk a, an lo nui ringawt a.




Rara-i lah chuan min nuih var var bawk a "I duh leh ka pu te inah min lo nghak la, kan zo ṭep" ka ti leh sup a.



Hna thil leh ngaihzawng hi chu thliar hran thiam hram hram ka duh. Naupangho mit tikham zawnga awm phei chu ka duhlo nasa.




Chutah Rara-i chuan "Hei, ka naute an nia, kan veng mi vek. I bulah Maths tuition an lo kal ve duh a. Ka rawn surprise che anih hi" a lo ti hem mai. Ti ṭha intih hmel zet hian a hawi lah a, a nui var var bawk a.




Naupangho chu ka en leh a, Rara-i hnunga ding reng chung chuan lai zet hian min lo nuih a. "Eng nge i sawi awmzia Rara?" ka ti sup a, a thusawi chu hrelo pawh ka ni lo. Mahse heti teh tawpa naupangho rawn hruai chu min ti bangbo em a ni.




Chutah Rara-i chuan "Ka sawi chu, i bulah tuition an lo kal ve duh a. Ka lo hruai anih hi, ka hrilh lawk duhlo che anih kha. Ka rawn kal i phal loh ka hlau sia" a lo ti leh zung zung a.





Naupangho chu ka han en leh ren rawn a, an zah hmel hlawm bawk sia. Han indan ngawt thu awm hek lo le, ka luhtir ve ta tawp a.




Rara-i bulah chuan "Tikhan lo awm lawk rawh" tiin naupangho bulah chuan ka va kal nghal a.





"Tuna white board a ka chawh sa ho hi lo chawk zo ula, ka nau saw ka va be lawk ange" ka ti zung zung a. Rara-i chu kawngka bulah a lo la ding reng a.




Ka va pan zui nghal a, nichina a nui hmel bo ṭhak khan min lo melh a. Tih sual ka nei ta emaw tih tur khawpa thipin min lo melh a.





"Lo kal rawh" ka ti sup a, a che châng duh der lo. Kei erawh pawnah ka lo chhuak fel der tawh a. Naupangho min hmuh theih lohna lai turah chuan ka ding zui nghal a.




"Rara" ka tih leh takah chuan a rawn kal ve nghal a. "Naupangho saw an lo kal ve duh tak tak nge, i lo kal duh vanga i chhuanlam zawk?" pangngai tak hian ka ti a.




"I nau maw ka lo nih a?" a lo ti nghat thung a. Ka ṭawngkam hman ka ngaihtuah lêt a, naupangho bula ka nau ka lo ti kha a la na viau anih hmel. Rum zet hian ka lo melh a. Ka ṭawng sual tih inhre chiang lutukin chal ka lo ti chuar tap thung a.




"Ka u" a lo ti nghat a, a biang a sen tek a, a thinrim insehruh hmel te chu lawmawm ka ti tlat pek a. Mahse ka tan nuihna chî a ni bawk silo.




"Aaa...an ngaih kawih loh nan ka ti tawp anih kha" ka ti ta ringawt a. A lo lungawi thei chuang der lo.




"Ka ṭhiannu te pawh min ti mai la" a lo ti hlak a, ka lu tuai thuakin ka lo nuih tlawn ta ringawt a. A la mengrum ngang mai.




"Ka ti tawh lovang" ka tih chuan a lo meng kual ralh a. "Ka haw dawn, tikhan tuition chu pêk zawm rawh" pangngai tak hian a ti ta a.




"Min lo nghak la" ka tih chuan "Ka hmanhmawh tawh" a lo ti vat a.





Naupangho a lo hruai chhan chu ka zawt leh hnuhnawh a. "Ka hmuh châk vang chea rawn hruai tur khawpa naupangchhia ka nilo. I sum ka rawn tipung alawm. An chhungte'n tuition kal tirna tur ṭha deuh an duh a. Chu chu ka lo hria a, an bulah ka sawi che a. Ka rawn hruai anih hi" a ti zung zung a.





Inti puitling deuh hian a ding al a, a chezia engkim hi lawmawm lamah a kal vek tawh.




"I fel lutuk e" ka tih chuan a lo ner nang a. Ka lo nui huk thung a.




"Mi pathum an nia, i hlawh cheng sang thum chuangin a pung dawn tihna ania. Thil ṭha deuh min lei thei tihna" a lo ti ham ham a.




"Dawn chiang" ka lo ti vat a, "Bialpa hausa loading" uang thuanh zet hian a lo ti a.




"Min lo nghak rawh, kan haw rual dawn nia. Kan rei tawh lovang" ka tih chuan min lo hnial leh vat a. An chhungkaw boruak ka hria a, ka chelh lui duh ta bik lo.




Rara-i haw hnu lawk chuan naupangho chu ka zirtir zui leh mawlh mawlh a.




Kan bâng ṭep tawh tihah hian ka phone a rawn ri a, ka pa a lo nia. Tuition ka pek hunlai a ni tih a hre dawn a. Tun ang huna min lo call anih chuan thil pawimawh a awm anih ka ring a.




Ka pick up nghal vat a "Hriatpui, in laklawh viau em?" a tih chuan "Aih, eng nge ni?" ka lo ti vat a.




"Vawiin tlai Vantei rawn haw hi a inbual zo kha a thawk a rawn buai a. Nikhaw hrelo in a awm zui nghal a. Damdawiin lam kan pan mek aw. In laklawh viau loh chuan i rawn phei ve nghal mai dawn em ni. I nu nen kan awm tho na in i nu hi tun ṭum chu a phili tlat a. Buaipui deuh a ngai tel bawk sia" a rawn ti zung zung a. An damdawiin kalna te chh a rawn sawi nghal bawk a.



Inngaihtuah buai hun a nilo tih ka hria a. Ka pa nen kan inbiak zawh chuan naupangho chu ka bân tir ta nghal a.




Vantei an hruaina damdawiin lam chu ka pan ve ta nghal a.






__________*___________*____________


(A nawi tlat, zanrei lama mi tur chu a pangngai tawh turah ngai ang)


Show post links
Top