AIZIAL By CVL Awmpuii (Completed)

[Ngaia]

AIZIAL
By CVL Awmpuii



Chapter 25



Ka phone ri ral ral avang chuan chiang lo ruai hian ka harh a. Meng mang hlei lovin lukham bula ka phone dah chu ka dap ruk ruk a.




Ka dap fuh ta maw tihah chuan ka hmai zawnah ka lek a. Phak chuap a mengin caller ID chu ka en a, hming lo lang avang chuan thawh phan pawh awm lovin ka nui suk mai.




"Aw... Hmelṭha" ka lak rual chuan ka ti nghal a, a lo chek hlak mai. "I la tho nange?" zâng vah hian a lo ti a.




Tunlai chu mut ka duh thar a, min kaihthawh loh chuan thawh ka hre mang lo. Mahse dem hleih theih pawh ka ni lo. Zan lamah kan inbe rei thei em a, ka zîng thawh hun a ti bahlah zo vek a ni.



Harh hlim hlawl aṭanga Rara-i âw hriat chu ngaiah ka nei tawh a. Ka nileng hun hman ti nuam tu ber a ni.



"Tho dawn chiah" ka tih rual chuan âwihlo zet hian a lo chek leh hlak a. "Dar 7 a ri tawh a, tun thlengin i la mu a. Kan mut hun a inang reng a, thawh tlai bik ziah kher. Sim vat rawh" a rawn ti nghal hlak hlak a.




Ka chhang chhang leh rual hian min vin a, min zilh ve hlak hlak zel mai tawh anih hi.



"Ka tho nghal dawn" ka lo ti vat a, ka sawi rual chuan ka tho nghal bawk a.



"Vawiin tlai kha theihnghilh suh aw" a rawn ti a. Engtin nge ka theihnghilh theih teh lul ang ni. A ni Nêmi te'n zanriah kilpuiah min sâwm a. Kan inkar thil an hre vek tawh a, kan inpawh leh zual nan leh Rara-i tana lo pawm ta kha ania.




"Theihnghilh phal chi a ni nang. Class in bân hunah min lo call la, ka lo hruai ang che. Tuition ka pek chhungin ka pu te inah min lo nghak ang a. Kan phei rual dawn nia" ka ti nghal zung zung a.



"A ngai lo, class ban veleh ka haw vat ang a, eirawng kan lo bâwl zawk dawn alawm" a lo ti ve thung a.




A ni teh tak e a, a eirawngbawl ka ei ang chu.



Kan inbiak zawh chuan ka inphih fai nghal sawk sawk a. Darthlalang a in en chung chuan thil ka ngaihtuah neuh neuh a.



Kar hnih vel liam ta a kan harsatna tawh te, kan tan kawng awmchhun ni a kan hriat inruk kan lo tum dan zawng zawng te kha ka ngaihtuah lêt a. Pathian ṭhatna bak sawi tur ka hre lo.



Tunah chuan Rara-i pawh a ni te inah a awm tawh a, kar hnih lai a liam ve ta. Nu Ramtei'n a hriat tirh chuan a thinrim khawp mai a. Kan inah zan khat a riak tih a lo hre ve tum hrang bawk nen chhe theihtâwpin kan pahnih chuan min puh a. Rara-i phei chu mi tenawm tâwp angin a chhuah hial a. Ka chhûngte chungah pawh a ṭuan nghe nghe. Ka pa in lo dawn sawn dân tawk a hre hlauh a. Min tibuai zui tak tak ngam lo zawk a.




Rara-i pawhin thlavang hauh tu ni a nei tawh a, Nu Nêmi chuan a thlavang a hauh tlat a. Nu Ramtei nen pawh an inhauh phah hrep nghe nghe a.



Nu Ramtei nu nasa ngang a lo ni bawk nen, a pasal farnu chu zah lo takin a ankhum phiarh phiarh a. "A hma leh zawng pawha ngaihsak silo, tun ataka ngaihsak âwm anga bera lo awm te kha zak rawh u. Ro sum in ît vang bak a ni lo. In rilru hi ka hai bik hlei nem. In vahnu hi kei tluka enkawl ṭha an awm lovang. Tih tak em ah chuan a pa zu rui thle mai mai nen ka châwm a, ka hrai a. Ka thawh chhuah sa an ring asin" a ti phiarh phiarh a.



A ṭawngka chhuak mak ka tih zia kha ! Nu nasa a ni tih chu ka hria a, mahse khati em em kha anih ka lo ring ngai lova. Ka rin phâk bakin mihring a tling lo ti tawp mai ang.




Mahse Nu Nêmi pawh a ngawi duh ta bik lova "Ka vahnu ka lo ngaihsak vat lo hi ka ti sual rêng anih hi. Kan ring ngam che a, i kutah kan dah a. An pafa kha i kutah kan lo dah ngam zawk a, hetianga insawi theih a, chapo puina atan i hmang leh dawn tih chu hria ila hman hman ah khan in chêng ho tawh lovang. Tih tak emah chuan ka nuṭa pa i neih chhan kha kan hai bik hlei nem. Ro sum ît vang veka nei i nih kha, rui thle mai mai mah se i khak eih ngai loh kha. A boral huna a ro i khawm theih nana i chêt lak dante pawh kan hre ve vek alawm. Mahse i rin loh lam daihin a kal ta si a, ka pa in Rara-i hming vekin engkim a lo dah si a. I duh i hmu thei lova, i theihtawp in Rara-i chungah i ṭuan anih hi. I vahpa pawh kha lo zilh ṭha ang che, FIR theh luh kan pawiti miah lo ania" a ti ve ta hmarh hmarh a.




An inhnial buai leh fe a, Nu Ramtei chuan Dawnga thlavang a hauh ṭung a. Ro sum ît vanga Rara-i awm pui duh angah an inpuh tawn a. Tlawm zawka ṭan an duh lo ve ve bawk nen tun thlengin an la inhmelma a.




Hengte hi va hmu ve kilh kelh lo mah ila Rara-in min hrilh leh vek zel a. A tuar ber tu chu amah bawk a ni leh tho. A nu leh a ni inhuatna chu a thiam lohah a ngai a. Mahse theihtâwpin ka hnêm a, rilru hrehawm lutuka awm chu a duh bîk lo.



A tan hian awmngaihna a vâng ve ṭhin ngawtin ka ring. Mahse a êng zawnga thil thlir ṭhin mi a nih bakah hmasawn tum lutuk mihring a ni a. Hei vangte hian a la hlim ve hram hram niin ka hre ṭhin.



Bathroom aṭanga ka chhuah rual chuan ka phone a lo ri veleh chiah a. Rara-i bawk emaw tiin ka la vat a. Mahse Arama zawk a lo nia.



"Hriatpui, Zirtawpni chu in lo kal ve hman ang tiraw. Tih tur dang i lo insiam ka hlau a, ka rawn remind mawlh mawlh che anih hi" a rawn ti zung zung a.



Tun Zirtawpni hi a piancham a ni a. Ṭhianho chaw ei khawmah min sâwm a, kawppui nei te chuan kan hruai thei bawk ang. Keimah tak phei chu Rara-i nen sawm tak têin min sawm a. Ka lo hnial lo nasa. Ka rilru buai em em zana min pui tu ber kha a ni a. Kan inbe zui nasa bawk a. Tunah chuan Dina ai mahin kan inpawhna a ṭha tawh zawk. Rara-i nen kan chungchang a hre vek a, a ngaihzawng nen an chungchang ka hre ve vek bawk a. A hma zawng aiin kan inpawh leh zual a tih theih ang.




Ka hriatchian tak em em chu mipa te pawh hi han inbe lum lam ve nasa ila, chanchin te inhrilh tawn ṭhîn ila. Kan inpawhna a zual ṭhin. In ṭhian ṭhatna te pawh a lo nghet nge nge alawm.




"Programme dang engmah ka nei lo, Pathian zara dam phawt chuan keini lam chu chiang sa" ka lo ti vat a. A lawm ve khawp mai.




Tukṭhuan ei laiin ka pa chuan thu ṭha min fah leh mawlh mawlh a. Tuk tin sawi tur hrang hrang, infuihna chi hrang hrang a thar sawi tur a hre zel thei a. Pathian pâwlna hi a dawng reng bik emaw tih mai tur ani.



Ka nu chuan Tuition pe tura ka kal hma in room tifai turin min hrilh a. Hriathlua naktukah chawlh hmangin a lo haw dawn a. Room kan in ṭawm leh mai a ngaih hmel a, hnawk lutuk lo mah se ka lo intihfai ve deuh chu a ngai ang. Ka pu te inah a riah leh daih chu ring tho mah ila a bungrua tlem azawng dahna tur hmun lo siam sak chu a ngai hrim hrim.




Tlaiah chuan dan ngai têin Tuition ka pe leh a. Naupang ka neih belh leh a. Tunah chuan zirlai 20 zet ka nei ve tawh. Ka hlawh pawh a pung ve sawt tihna anih chu.



Lawmawm leh zual em em chu an nu leh pa te hian lâwmthu min hrilh nasa thei em em a. Zirna kawngah hma an sawn phah nasa a. Ka tan chuan chu tluka hlawhtlinna chu a awm bik lo.



Ka pa sawi ang deuh khan ka phur ve telh telh a. A tira ka huphurh dan ngaihtuah chuan nuam ti tawh tak ka ni. Ka tui na zawng tak niin ka hre tawh.



Dar 5 velah chuan Nu Nêmi te inah ka awm der tawh a, Rara-i te in pawh a tih ve theih tawh ang chu. A remchan em avangin Lawmi pawh ka phur haw ve nghal a. Ani pawh hian a tuitor ang chauh ni lovin Rara-i nen kan inkawp tih a hriat ve kar tawh avang hian û angin min nêl ve em em a.




Rara-i hian ka chungchang an sawi dun nasat theih zia te min hrilh ṭhin a. A la naupang chhia bawk nen Lawmi nen chuan an inkawm tâwk khawp mai. Lawmi hian 'Sir chu' tiin min lo sawi ṭhin ni ngei tur ani. Sir Hriatpui ti a min koh uan te hi a chîng a. A ni fanu Lawmi a lo awm hlauh chu ka thla a muan phah a, room an lo in ṭawm leh zel bawk nen ngaih ṭha deuhin ka awm phah ṭhîn.




Ka chawei tur thu chu ka chhungte bulah ka hrilh sa thlap a. Zan lam pawh ka lêng tlang daih ang. Hmanhmawh a ngai hran lo.




Nu Nêmi nen chuan inpawh deuhin kan titi bawrh bawrh thei tawh a. A titi ka ngaithla a ni deuh ber zawk, zawhna min zawhin ka chhang a. Ka lo ṭawng ve zeuh zeuh a ni zawk mah. Mahse innel ve tawh tak chu kan ni.




Rara-i leh Nunmawii te'n eirawng an bawl a, an titi pah reng bawk a. Engti tiha anni pahnih hi inpawh ta em em nge an nih pawh ka hrethiam lo. Mahse an hmuhnawm takzet a ni. Nunmawii pawhin ka lakah rilru a pe tawh lovin ka hre bawk a. Pangngai takin kan inkawm ve thei tawh. Mi sual a lo ni bik miah lova, a khirh ve deuh tih mai loh chu.




Chutia kan lo awm khawm laih lai chuan Chawimawii a lo haw a. A ni hi Nunmawii û chiah, an unau zinga upa ber a ni a. Rara-i hian a chanchin vawikhat chu min hrilh tawh. Tin, ka len ve chhunah pawh a mizia tur awm ang chu ka hrethiam mai. Chapo ve ar, mi te chal delh deuh chî hi a ni. Rara-i pawh a ṭawngkhum fek fek ṭhin tih ka hria.




Mahse Rara-i chuan thlavang hauhtu a nî leh Nunmawii a nei tawh a. Tin, Nu Nêmi pasal Pa Lura hi pa dam thluam mai, Nu Nêmi thuawih em em mai hi ania. A fate zilh hreh chuang lo ang chi hi a ni ve a. Chuvangin Rara-i tan pawh tawrh hlelhawm lutuk ang khan a awm ngai lo.



Mahse ka huat em em chu Rara-i hi awmpui angin a chei bâwl deuh tlat a. A ṭawngkam hman dan a uluk lo ṭhin si a. Rara-i hian sawi zen zen lo mah se ka len ve a a biak dan vel aṭang hian ka hrethiam ve vek.




Zanriah chu zan dar 6 velah kan kil ho a. Inkhawm zan a nih loh vanga hmanhmawh vut vut lo kha kan nia. Rara-i leh Nunmawii te chawhmeh siam chu a tui hmel hlawm khawp mai.



Inthlahrung lovin keipawhin ka ei ve ṭeuh a. Rara-i chu ka nu in a lo hrilh ngei ni tur a ni "An tlak ka siam ania" tiin min bek bawr sar sar a. Midang chu awm lo sela ka nui huk ang.




Ka pa ka chhûn a, naupangtê ka nih lai aṭang tawhin antlak tui hi ka duh em em a. Zun pawh ka cheh rei reng a.



Ka ril a ṭam em em lo na in Rara-in min khawrh belh zel si a. A duhthawh thei mai sia, ka chawei a lo tui tho bawk nen ka ei ta ṭeuh kha ania.




Zanriah ei khamah chuan Nunmawii leh Rara-i te bawkin kan chawei na an seng fel a. Lawmi leh an unaua mipa awmchhun, an tlum ber ni bawk Tetea chu lehkha zir turin room ah an lut nghal a.




Chawimawii erawh a âwl hlauh thung a. Hnathawka chhuak ṭhin anih avang hian an zah na chen tam tak a awm ve a. Sum a thawk chhuak tawh tlat a, mak pawh ka ti hran lo.



Thingpui sen hâng te kan han in khawmuang leh a. Pa Lura nen pawh kan inbe luam a. Zan dar 10 velah chuan min mut san ta duak a. Len rei viau ka inthlahrung na in min chelh ve tlat hlawm kha ania. Kei lahin Rara-i ka lo thlahlel ve tho si a, ṭawngkam ṭha ka ûm ta kha ania.




Midangho mut hnuah chuan kan in ṭhut hnaih sauh a, a sam sei hnalh chu ka khalh sek a. A titi siam siam a, an internal test har zia te chu min hrilh malh malh a. Question set tu demin a han phun leh nang nang ṭhin bawk a. A duhawm ṭhin ania.




Chutia kan lo awm lai mek chuan inchung aṭangin Chawimawii chu Bottle nen a rawn chhuk thla hnalh hnalh a. Min rawn ngaihsak vak hmel lem loh.



Choka ah a lût a, tui a va thun niin ka hria. A rawn let leh lam chuan min rawn be ve teh mial a "Dina te nen in inkawm ṭhîn tiraw?" a tih chuan "Kawm ve ṭhin e" ka lo ti ṭha ve mai a. Awmze nei deuh hian a nui sak a.



"A hrilh fing zo lo che a nimaw" a ti kher a, Rara-i a lo îp nghal chawih mai. A sawi tum chu ka hrethiam nghal mai, Rara-i chungchâng bak va ni suh.



"In hrilh fin tur a awm em ni?" ka ti ve kher a, a lo ner deuh nawk a. "Inkawp tâwk lek te hi awm ve ania" a lo ti vei hmak a. Rara-i chuan nuam a tih vak tawh hmel loh.




"Chutiang pawh sawisel tawk te hi awm ve ania" ka lo ti ve salh a. Hmeichhe khin let urh urh chu ka duh viau lo na in a ṭawngkam a ngeiawm em a. Rara-i a hmer tel kher bawk nen ka ngawi thei lo ani.



Min chhan ngaihna vak a hre tawh lo aniang, Rara-i chungah a ṭuan ta daih a. "Naktuk zingah ka thawmhnaw bal room ami khi lo la la, suk tur a tam ania" a ti salh a. Rara-i chhanna pawh ngaihtuah zui lovin a chho leh nghal daih a. Ka lo insehruh ṭeuh mai.




"U Chawimawii hi chu a mak ve a, mahse hrawn hrehawm a ni chuang lo ania" Rara-i chuan a lo ti nghal zung zung a.



"Hrehawm i tih viau chuan awmna tur dang ka zawn sak ang che" ka lo ti nghal tawng a. A lu a lo thing vat thung a.



"Min hnuaichhiah tum eng ang mah se a duh duh dan chuan min ti thei bik hlei nem. Puitling ka ni tawh a, tih lêt dan tawk chu ka hre ve alawm. A vau pung nat ang ai hian tih lêt thiam chuan a ngawi daih zel ania" a lo ti nghal duah a.




Chal chuar tap hian ka lo ner nawk a "A thlavang i hauh tihna em ni?" ka tih chuan lu a lo thing mai a. "In inhau ṭhin em?" ka tih chuan nuihza insum hmel hi a rawn pu chawpchilh nghal a.




Nghal ru zet hian min lo melh a, eng emaw chu a ti ṭhin chiang alawm.



"Sawi rawh" melh run chung hian ka ti a. "Ka sual thiam ve lutuk, khati khan min tir kual ziah mah se tih tur tawk chin hi ka hria a. Inla viau thei ni lo mah ila hlutna ka nei ve tho alawm. Ani chuan a langin min hnuaichhiah a, kei chuan lang lo lam aṭangin a lêtin ka hnuaichhiah ṭhin" a lo ti sam thên a.




"Sawifiah la" dil chhut zet hian ka lo ti vat a. Engtin nge a tih ṭhin ka hre châk em a ni. "Inchhûng chêt leh ilo zawng zawngah hian midang a ring vek a. Thawmhnaw suk chungchang ah pawh a ni tho. Mahse a car tak hi chu tu khawih mah a phal lova, tifai tur pawhin tumah a ring zo lo..." a ti tê tê a, a nui zui kar kar phawt a.




Kei lah chuan a thusawi zel tur ka lo ngaichâng reng bawk a. "Kan ṭhenawm ah hian zawhte a awm a maw. Min ngaina tawp anih chu, zingkar ah hian zun ram thiar turin a chhuak ṭhin a. Chuan, a e ṭhin bawk a, tu emaw car chungah ka ek tîr ṭhin. Zing a lo thawh a, office a kal dawn meuh chuan college ka lo kal daih tawh zel sia. Min tih fai tir tum pawh nise a thei lo hrim hrim a. In aṭanga chhuak tlai ber a ni ziah bawk a. Amahin a tifai ṭhin, mahse tlaiah a phun phah ziah thung a. Nikhat danah zawhte chu car chungah a e ziah. A mak tawp, tu tih nge le " a ti duah a. A uang ve khawp mai.




A nui zui kar kar a, kei tak pawh chu ka nuih a za.




Ka lamah chuan ka pawt hnai zual sauh a "A ti tu chu a va nghal ve" ka tih chuan a lo nui rah rah a. "Sual chu thung rulh ve deuh hlek ṭhin tur" a lo ti vat a. A va han lâwmawm ṭhin tak.



A chêt dan chu naupangchhia in sual thiam thlak hle mah se ka hau duh bik lo. A rilru dam nan a theih ang tawkin a che ve ah ka ngaihsak hmiah.



Ka haw dawn chuan an inkawt thleng min thlah a, kan infâwp vang vang a. Hun kan neih ve chhunah hi chuan kan duhthawh thei ania.



Bike a ka chuang tur te chu ka chuang lawk thei lova. Vawi li vel ka va pan nawn leh a, ka fawp nawn sek a. A nuih a za ngang mai.



"Min âtchilh viau suh" a lo ti uang a, "Aizial i nih hi, min zial â tu. Keimaha hmangaihna awm zawng zawng phawrh chhuak tu" ka ti sup a. A biangah chuan ka khuap run bawk a.



Ka fawh hmasak ngai lovin ka hmuiah chuan min lo chuk zeuh a "Haw tawh rawh, Nu Zualtein a lo la nghak ang che" a lo ti sep a. A mitmengah chuan min la thlakhlelh ve zia ka hre tho mai.



"Ka ru haw leh mai dawn che emaw ni le" ka tih chuan a lo nui hak a. "Kan inru lo ta sa sa, ka graduate hma chu min nghak ang" a lo ti vat a.




Hei chu a hma pawhin kan sawi dun tawh. Dik tak chuan nupuia neih nghal mai kha ka hnial lova. A ni te in a a awm hnua palai tirh rum rum te kha ka duh a. Mahse ngaihtuahna fîm tak kan hmang dun a. Ani lah chuan Graduate law law a lo duh ve tawh bawk nen kan la pam ṭul zel phawt chu ania.




Keipawhin hmachhawp tam tak la neiin ka inhria a. Ka neihchhun ah hian lungawi tho mah ila hmasawnna tur tam tak ka la nei a. Hei aia mi hlawhtling zual nih hi ka duh. Hmalam hun êng tak beiseina nen hun kan la hmang dun ve zel chu ania.




Sawi lawk tawh ang ngeiin Hriathlua pawh a rawn haw ve ta a. A ni hi zawng a ka pa hnungzui a ni bawk a. A fel thluam mai a, û zawk ka nihna angin min zah thiam em em a. Vantei lah kei ai mah hian a duat thiam zawk emaw tih tur ani a. An inmil ṭhin khawp mai.




A zan hmasa ber chu unauvin sitting ah kan riak khawm a. Chu pawh Vantei thil rawt chhuah ania. Ka nu leh pa te lah chu an rawn inti phur chawp ve a. Kan inmangṭha fel vek tawh hnu ah lukham leh rizai nen an lo kal leh nawlh a.




Ka pa chuan "I nu in lo tel ve a châk tlat a, keimaha min muttir te a tum mai mai a. Kan lo tel ve mai dawn" a lo ti hlut a. Vantei a lo phur ngang mai, a nuih a za bawk si.




"Kan nuihzatthlâk e" a ti reng a, a nui hak hak a. Ka nu leh pa te mutna tur chu kan phah belh a. Sitting room a zau ṭha pangngai bawk a, kan mu chêp hran lo.




A sir berah ka pa a mu a, a dawt chiahah ka nu, Vantei a ni leh a, Hriatpuia leh kei kan ni leh bawk a. A hlimawm ang reng phian e.



Vantei leh ka nu te chu an titi malh malh a, ka pa in fiamthu a lo thawh ve reng bawk a. Hriathlua chuan biak ve deuh roh a nei nge phone bihin a nui suk suk a. A inhmeh lo lutuk chuan ka nuih a ti za ang reng.




Keipawh Rara-i nen kan in text a, chhûngkua a kan riah khawm thu ka sawi chuan thlalak min rawn dil a. Ka mutna aṭang chuan ka selfie a, midangho pawh rem leh rem lovin an lo in post vat mai.




Rara-i chu ka va thawn nghal a, "Ka dream family" a rawn tih chuan ka ngaihtuahna a ti kal thui leh tawh kher mai. Min thîk vang leh a rilru chhiat vang ni miah lovin tunah tak hian hrehawm ti rilru deuha a awm ka ring.




Ka va call nghal a, a lo pick up vat a "Lo video call rawh, ka hmu duh che u" a rawn ti zâng vah a. Phone chu a dah zui nghal az ka video call ve nghal mai bawk a.



Rei pawh phone chu ka keng hman lo, Vantei'n min rawn chhuh nghal a. Ka nu nen an be nghal char char a. An nui zui hawk hawk a.



Ka nu chuan "Hriatpuia nen in inneih hunah kan la riak khawm leh dawn nia" a lo ti hlut a. An insawi phur nasa mai. Hetia innel taka an inbe thei hi ka lawm takzet ani.




Phone ka dah hnu chuan Hriathlua nui vur vur ka hmu leh a. Rara-i nen kan inmangṭha a, zîngah lehkha zir a duh avangin mut hma a tum a. A bei ngawrh ve ṭhin khawp mai.




Hriathlua nui vur vur reng chu ka fiam zauh a "Biak i nei ve deuh reuh a nimaw?" ka ti a, zu han lai huih a mawle. Ka nuih a va han ti za tak. Puitling ve khup tawh mah se ka nau a ni miau a, ka la naupang chei bawl ve viau ṭhin.




"Tunge a?" ka tih chuan "Ka nei lo..." a lo ti a, mahse ka awih lo nasa. "A ruka ngaihzawng nei rual pawh i ni tawh lo" thu tak zet hian ka ti a. A zep duh ta bik lova.



Ka pu te vêng ami a lo nia, a sawi tak zelah chuan keipawhin ka lo hre ve nghe nghe a. Vantei te aiin a û hret a, ka hriat theih chinah chuan nula fel deuh ania. A pa pawh Kohhran upa a ni a, ka pi te nen pawh an inhre ṭha viau mai.



"Chuvang ani maw i lo haw chhunah pawh 'ka pu te' i tih reng " tiin ka lo fiam leh zauh a. A lo nui mai a, a pha duh tawh bik lo.



"Rara-i kha i thutak em?" a rawn ti ve hlawl a, a dilchhut hmel lutuk chuan ka nuih a tiza leh tlat pek a. Mahse pangngai tak chuan "Ka uang hlei nem" ka lo ti ṭha ve mai a.



"I û atan i duh em?" ka tih leh chuan a nuih a lo za ngang mai. "Naupang deuh mah se amahah khan eng emaw riau a awm. A hmelṭhat bakah a fel hmel. Ka nu te nen an lo innel sa bawk a. I tân chuan ka iai lo" a lo ti ve duah a.




Zanin chu kan titi ve duah mai. Chutia inhawng taka kan titi tak zelah chuan a hriat chak ang zawngte chu ka experience aṭangin ka hrilhfiah ve zel a. Ani pawhin thil min hrilh ve duah mai.




"Ka nupui lo chu fawh ka tum lo" a ti pek a. Mak pawh ka ti hran lo, he nau hi chu tlangvâl innocent ngang a ni a. A zei hawi lo viau ang. Mahse a nupui tur chu a vannei viau ang, a ngaih ṭhat thlak dawn emai.




Zirtawpni a lo thlen chuan kan tum lawk tawh ang ngeiin Arama piancham lawmna ah kan kal a. Kan kawppuite nen mi 15 vel kan nia, kawppui nei lo leh hruai tel ve lo pawh an awm tho. Dina chuan hmeichhe dang a lo hruai leh daih tawh a.



Hepa hi Mizoram-a ka awm tam loh avang khan ka lo hrechiang lo nge ni fel thluama ka ngaih kha ngaihzawng a thlak zing em em a. Kohhran leh khawtlang ah erawh chuan theihtâwp chhuahin kan in hmang tlang tho a. A sual chu ka ti lo na in ka beisei a pha lo sawt riau a. Kan inngainatna pawh a tla hniam nasa.




Hmeichhe hovin eirawng an bâwl a, Rara-i pawh a che ve zung zung a. Midang nena an inpawh viau nghal thei chu ka lâwm khawp mai. Arama bialnu pawh a fel em em a, anni hi chu an inkawp rei tawh a. Keini nen pawh kan inhmelhriat ṭha a. Kan ṭhianho ah chuan tih huk lam an hnaih ve ber tawh ang.




Kan inkawmho bawrh bawrh a, a ṭul ṭul tiin kan phe vat vat hlawm bawk a. Mahni tawkah ṭheuh nuam kan ti viau in ka hria. Dina nen pawh pangngai takin kan inbia a. Kan inkar hla deuh tawh mah se kan va inhaw ta tihna a ni lova. Ṭha tê tê chuan kan titi dun ve zel a.




Zan lama lên chhuah kan duh avangin zanriah chu tlai lutuk lovah kan ei a. Rara-i bai siam te chu an han fak ve luam hlawm a. Ka lo chhuang leh em em tawh.


Nuna chuan "Ṭhianpa nen in inneih hunah chaw ka lo ei ziah ang" a ti pek a. Kan nui ho dar dar mai.



Zanriah kan eikham chuan khua a thim thet thet tawh a. Kan intifel zung zung a. Tlangval tha za rual kan la ni bawk a World Bank Road lama ride turin thuthlukna kan siam fel a. Kan inphur chhuak ta sang sang hlawm a.




Kan ṭhianho a nawmna em em chu ruihhlo in min tibuai ve lova. Hlim tur hian ruihhlo a tel kher a ngai lo tih fiahna kan ni ka ti ve tlat. Khawvel a ṭhalai in hlimna an tawn buak theih ang zawng zawng hi chu kan tawng baw ve vek a. Pathian nen pawh hian nun hi a lo chên ve theih lutuk.




Kawngsir rem laiah chuan kan ding ta hlawm a, kham chhawr dawh laiah chuan thla la turin kan in rem ṭhap a. Dina'n Camera stand a lo pai thlap a, thla chu kan la nghal chuai chuai a. Rara-i nen pawh kan la dun zing ve malh malh khawp mai.




Chutia Rara-i nen inkuah riala kan lo din dun lai chuan Dina a lo kal a. "Rara...i dam ṭha maw?" a lo ti mial a. Rara-i pawh chuan ṭha takin a lo chhang ve mai bawk a. Midang chuan min rawn ngaihsak vak lo.



"Dawnga i hria em?" a tih chuan Rara-i nen kan lo hamhaih khawp mai a. A chhan hma hauhin "I hria em ni?" ka lo ti let a.



Chutah Dina chu awmze nei zet hian a nui suk a "Hre lutuk e, kan ṭhianpa alawm. I hriat loh pawh ka hre ṭeuh " a lo ti a.



Rara-i chu ngaihnêp hmel zet hian a melh a. Dawnga hming a rawn rik vang nge ka lo sa leh nghal phat tawh mai.




"Keipaw'n ka hrechiang khawp asin, Dawnga chu i lo hrilh dawn nia ka hmeichhia tibuai tawh lo turin" ka ti ve kher a. Dina awmdan chu ka kham ta khawp mai.



"Hmeichhe mitmei hi mipa in kan hai ngai hlei nem. Rara-i pawh mitmei i hmuh kher a, khawih che a tum ta chêng a. I duh lo kual leh vel a. Hmeichhe sih hnip hmel deuh hi chu kan hai lo. Ṭhianpa Hriatpuia pawh hian duh chu nise a khawih thei ang che" a rawn ti leh zet zawng ka inveng hman lo.




Ka kut a hit chhak a, Dina chu leiah a thal nghal tawp mai. Hmeichhe ho an ṭe nghal chûl a. Rara-i chu ka kut lehlamin nghet zetin ka kai nghal a.




Midangho chu an lo kal khâwm nghal laih a, Dina tho tur chu an lo pui vat a. Va ban leh mai ka tum chu Arama'n min lo kuah bet a "Eng nge thil awmiza?" Nuna'n a lo ti ve hluai bawk a.




Chutah Dina chuan ngaihnêp hmel zet hian min lo melh a, chutiang bawkin Rara-i pawh. "Ka thusawi i ngai kawi anih kha Hriatpui" a ti a. Ka khawih leh nghal mai loh nan ka insum hram hram ani.




"Thudik i hre lo anih chuan Rara-i chungchâng hi sawi ve tawh suh" ka ti nghek a. Za lo zet hian a lo nui hawk a "Hmeichhe pakhat vangin kut min thlak ania. I tana ṭha tur chu a tir aṭang khan ka hrilh vek tawh che" a lo ti ve nghut a. A thinrim hmel ve ta khawp mai.



"Ṭhian ṭha pawh i nih nek loh hi" ka tih chuan "I bialnu kha mi khawih hrep hnu pawh a lo ni thei asin" ngeiawm zet hian a rawn ti leh kher a. Min dang hman leh ta hlawm lo, ka hnek leh nghal chawrh a. A ni lahin a lo dawh tawh bik si lo, kan insual zui chu a ni ta der mai.




Tlangval tha chak rual ve ve, ruihhlo ti lo kan ni bawk a. Kan inhneh tawk kher mai. Ka hnek fuh nasat tluk zetin ani pawhin min hnek fuh nasa a. Hmeichhe ho lah chu an lo ṭe chul a. Ṭhiante'n theihtawp chhuaha min pawh hnu chuan kan inṭhen ta hlawk a.




Arama vawikhat hnek kan tuar ta ve ve a, "Eng nge in hriat a? Naupangchhia pawh in ni tawh lo. Hetia insual buai tur hian ruih in nei pawh ni hlei lo. Misual baw raw ang maia insual buai hi in zak lo'm ni? Hmeichhe ho awm lai lehnghal in" a ti hluk hluk a.



Dina chu a bialnu leh ṭhian dangte'n an buaipui a. Keipawh midangin min lo buaipui ve bawk a. Rara-i chu che châng lek lovin a lo ding mâwl tawp a. Hrehawm a tih hmel ngang mai.




Nuna chuan "Haw ang u, buaina a tam dawn tlat. Hriatpuia leh Dina te pawh inhaw zui lo ula. In buaina tak hre ve lo mah ila chingfel vat ang che u" a ti duah a.




Rara-i chu ka va pan hnai a, min lo melh kiau a. Ka kam sir thi chu ka tuai tâwk a. "I ṭha em?" ka tih chuan a lo bu nghat a.



A banah ka kai a, "Ka thlah ang che" ka tih chuan min zui mawl tawp a. Midangho tlân liam vek hnu ah kan tlan chhuak ve ta chauh a. Rara-i chuan nghet zetin min kuah a, ka hnungah chuan a bei hle hle a.




Dina ṭawngkam deng khawng zet zet te kha a hre ve vek âwm si a. Thudik ni lo mah se hrehawm chu a ti ve khawp ang. Kei lah chu ka la insual zui ania. Ṭhiante kut thlâk chu sawi loh ka mi huat te pawh kut thlâk duh ngai lo tu, sawi chhe ngai duh lo tu ka ni a. Mahni tâwkah ṭha ka inti ve em em thin. Mahse ka lo fel famkim tawk loh zia ka hrechhuak chiang kher mai.




Ka thinrim chuan ruihhlo rui buai insual ang chiah ka lo ni ve tho anih kha.




Mahse tunah chuan ka inthiamlo duh lo, Rara-i chungchâng ni lo takin a sawi a. A phû tawk a hmu ah ka ngai hmiah mai.




Ni Nêmi te inkawtah chuan ka ding dat a. Rara-i chhuk veleh Bike chu hûng ṭha in ka chhuk ve nghal a.




"Ka tihpalh" kan han ti rual a, za lo zet hian ka ṭhen suk a. "I thiam loh a awm lo, khatianga ka che lai kha i hmuh ka duh miah lo ania. Mahse ka insum zo lo anih kha" ka ti zui vat a.




"Keimah vangin in ṭhianho in buai phah a?" inthlahrun hmel zet hian a lo ti a. Ka lu ka lo thing vat a "Ṭhian ṭha ka hre tawh a, ka duh tâwk viau. Mipa kan nia, kan in haw rei lovang. Mahse kawm zui vak ka tum tawh lo" ka lo ti nghut nghut a.




"Min lo hruai ve ta kher kher ani" a lo ti leh hram a, ka lo rum nghut mai. "Ka hruai satliah lo che Arama'n a sâwm ve che alawm. Engmah ngaihtuah buai suh, ka chingfel vek mai ang. Inthiamlo hmel kha pu tawh suh" ka ti sup a.




"Dawnga te nen engtin nge an lo inhriat le?" a rawn ti leh a. Dawnga hming a rawn sawi rual chuan ka sa leh nghal huam mai. Hepa pawh hi hun remchângah ka la khawih khawp ang. Rara-i chunga a chêt dan te kha ka la theihnghilh reng reng lo. Zawma bulah erawh lawmthu ka sawi fel diam tawh thung a. Mi sual a ni lova, Rara-i nen kan inkar thu a hriat hnuah phei kha chuan a kut a sil ta kha ania.




"An lo inkawm tâwk vel lek aniang chu" ngainêp zet hian ka ti a.




In ka thlen chuan ka chhûngte an lo la meng kim ṭhap a. A mak hran lo, zan dar 8 vel chauh a la ni miau a.



Fate chîk reng renga khawsa ka nu chuan thup tum viau mah ila ka kamsir thi chu a rawn hmu hram a. Dina pawh kha a thi ve thluah tho mai.



"Arama te banga ka tauh a" ka ti ta ringawt a, dawt ka sawi thiam si lo a awih loh hmel ngang mai. Mahse vanneih thlak deuhin engmah min zawt zui ta lem lo hlauh a.




Ka intifai nghal thuak thuak a, ka harh sawng sawng mai. Arama hnenah thupha ka chawi nghal luam a. Min lo hrethiam khawp mai. Dina lah khan min lo sawi zui hrep a ni awm a. A hmeichhe rilru ka ti khawp mai.



Mahse Arama chuan "Rara-i hi ka hrechiang ve tâwk tawh alawm" a lo ti mai a, a ngaih ṭhat thlak khawp mai.



Kar a ral leh a, Hriathlua pawh a lêt leh a lo hun ta a. Ka chhûngte ho chuan Lengpui thleng an zuk thlah a. Kei erawh inrinni anih avangin naupangho Tuition ka pe nileng a. Karleh ah test an nei dâwn a ka buai nileng ve khawp mai.



Dina nen chuan kan la inbe leh ta miah lova, hrehawm tihna pawh ka nei hran chuang lo.



Tlaiah chuan Rara-i Class bang ka va hruai a, a sam boys cut min dîl leh heuh heuh a. A hma khan ka remtih loh thu ka sawi chiang viau tawh a. Mahse nimin piah aṭang khan dîl tak têin min dîl leh a. Tun thlengin ka la remti chuang lo.




A han titau vel ṭhin a, mahse ka phal ngang lo a ni ber. Hmeichhe sam boys cut chu engti kawng zawng pawhin ka ngaina lo bur.



An in thleng ka thlah a, "Sam sei hi i inhmeh ber ka tia, mahse i cut duh ngang anih chuan duh leh i dar chen lek pawhin cut rawh. Mahse boys cut chu ka remti lo bur" ka ti a.





Inchhûng a luh hma chuan "Ka boys cut âwm tho e" a lo ti ṭalh a. "I ngam chuan i cut dawn nia" tiin kan in vau titih a. A ngaih pawimawh hmel tawh lo kher mai. Mahse a cut ngam tak takin ka ring lo, ka thu a awih emai.



A tuka a college bang ka va hruai leh zet chu ka thin a va han ti rim tak. A sam chu a lo boys cut hram a. Ka thinrim nghal ṭeuh mai.




___________*__________*___________*_______


Show post links
Top

[Ngaia]

AIZIAL
By CVL Awmpuii



Chapter 26



Ka lam pana a rawn kal lah lah lai chuan mitmeng tur khuiin ka lo melh a. Min lo nuih var var lehnghâl a.



Ka bul a rawn thlen rual chuan ka mitmenga thinrimna hmu lo der hmiahin min rawn nuih sen sen a.



"Min lo nghak rei tawh em?" a lo ti var a, "I sam" ka lo ti bul hmuk thung a. "Ka sam thar chu ka inhmeh em?" a lo ti nghal zat a. A chhîp sam chu a tuai zauh bawk a.



"Min run luih a maw!" ka tih chuan a lo ner nang a, min nuih tlawn ti tih bawk a. "Ka boys cut châk tlat alawm. Ka inhmeh tho hi, Vantei pawhin inhmeh min ti alawm. Ka hmelṭhatna a bo chuang hlei nem" a lo ti zung zung a.



Ka lung a awi thei mawlh lo a ni.



"Ka thu i awih lo a" ka tih chuan "Au Hriatpui, thinrim suh... Rara-i tho kha ka la nia lawm. Ka inhmeh tho lo em ni?" a lo ti zat zat a. A sam bawk chu a han tuai leh vel a.




"I mawi thlawt lo" ka ti nghut a, a ngaih pawimawh hmel loh khawp mai.



"Thil dangah i thu ka awih char char a, tun ṭum chauh chu min hrethiam ve mai rawh. Sam tawi fel ât put hi ka châkna a rei tawh a. Ka ti ve chhin châk reng reng alawm" tiin a lo insawi thiam zat zat a.




"Ka phal lo chung i ti lui a" ka ti leh hram a. Min nuih tlawn reng a, min ti nui zo chuang lo. A nunah hian thuneih pum hlum ka tum reng reng lo. Mahse ka phal lo chung chunga a lo ti lui chu ka hua a ni. Min zah pah lo viau ah ka ngai nghal bawk a.



Eng khaw sawi set set lovin Bike ah chuan ka lawn leh nghal thurh a Hamhaih zet hian "Au Hriatpui..." a lo ti a. Mahse ka ngai pawimawh duh lo lui a.



Bike ka tih nun rual chuan ka dawk chhuak zui nghal a. A hrilhai ve khawp ang le. A sam boys cut vanga ṭhen mai mai chu ka tum lo. Mahse ka thu a awih loh vangin reilo te chhung hrem ve chu a phu in ka hria.




Tuition pe turin ka tlang zui nghal daih a. Naupang ṭhenkhat pawh an lo ṭhu far tawh mai. Lawmi pawh a lo awm tawh a, min lo nuih var var a.



Ka hna leh mimal nun hi inkungkaih tir ka duh lo viau na in ka mood a dik lo laklawh a. Naupang hovin an hriatthiam loh min zawh pawh chuan hau ni si lo hian ka chhang bung nghut nghut a.




"Sir, helai hi min hrilhfiah nawn leh lawk teh a" Lawmi'n a rawn tih chuan ka thin a thawk but a. "A hma paw'n ka sawifiah zing tawh. A hunlaiin ngaithla ta che u, in beng lehlama lut kha lehlamah chhuah tir nghal tawh suh u. A ngai in hrilhfiah reng hian hmasawn a har ania. Tlai tin in rawn kal a, heta kan thil zir hi in lamah lo bawhzui ve ṭhin ta che u. Heti reng hi chuan hmasawnna a awm lovang" ka ti hluk hluk a.




Naupangho chuan hamhaih deuh hian min lo melh ṭha hlawm a. Hetiang hian vawikhat mah ka la ti ngai silo. Ka sawifiah hnu a an la thiam loh cheu pawhin ka hrilhfiah nawn awn awn ṭhin kha ania. Chutiang ṭawngkam ka chhak chhuak thut chu an hamhaih ve viau a ni ngei ang.




Lawmi chuan nuam ti lo hmel hi a pu nghal a, a inthlahrun hmel ngang mai. Keipawh chu ka inhrechhuak chawpchilh nghal a. Rara-i chunga ka lungawi lohna kha anni hian an tawrh ngawt chhan tur a awm hlei nem. Ka inthiamlo ngang mai.




Za lo zet hian ka ṭhen suk a "Vawiin chu ka buai ve deuh a, min lo hrethiam hlawm dawn nia. Ka han ṭawngkhum hluai che u a, min hrethiam mai teh u" ka ti nghal zung zung a. A nuam lo duh ngang mai.




Lawmi ṭhutna lam chu hawiin "Lawmi eng ber maw i hriatthiam loh kha, lo sawi la. Kan sawi ṭha leh dawn nia" ka ti leh a. Theihtâwpa pangngai leh dam in ka ṭawng a. Tlêm chuan naupangho hmel pawh hmuh a nuam veleh ta deuh e.




Chutah Lawmi chuan a hriatthiam loh lai chu ban chalh hian a lo sawi nawn veleh mai bawk a. Nuam chu a tih vak tawh hmel loh khawp mai.



Tichuan, ka hrilhfiah nghal zung zung a. Kan bân hma chuan thupha ka chawi leh hram a. "Nichina thil thleng vang khan min hrethiam hlawm dawn nia. Vawiin ka ni hman a fuh vak lova, in chungah ka lo ṭuan palh a, ka thiam loh a ni. In hriatthiam loh te kha in lo sawi hreh phah ange. Sawi bawrh bawrh rawh u, khatiang kha chu a thleng nawn tawh lovang" ka ti luam a. Ngainat awm zet hian ka nui bawk a. An lo bu ve nghat nghat a.




Lawmi haw tur pawh chu a mimalin ngaihdam ka han dil leh hnuhnawh a. "Min hrethiam dawn nia aw, Lawmi. I ṭhiante bulah ka chhang bung vut che sia. A thleng nawn tawh lovang" ka ti sup a. A lo hrethiam ve khawp mai.




Ṭha tê tê chuan an haw veleh hlawm a.




In ka thlen rualin Rara-i phone call ka dawng nghal a. Ngai pawimawh lo luiin ka pick up duh lova. Ka thu a awih loh avang khan mangang ve teh se.



Zan a lo nih meuh chuan a missed call 5 lai a lo awm tawh a. WhatsApp ah min lo text duah bawk a. Mahse ka hanwg duh lo lui tlat a.



Notification a ka hmuh theih chinah chuan thupha a rawn chawi nasa mai. "Au Hriatpui, tun bak chu ka ti tawh lovang. Ka zuah sei char char tawh ang. Thinrim tawh lo la, a hrehawm ania" tih ang reng te a ni a.




Ka be châk lo chu a ni bîk lo, mahse hrem rih ka duh tlat. Kei ngei pawh ka inhrem pah a ni deuh ber mai.



Tukṭhuan ei laiin Vantei'n min lo khak ve ngei alawm le. Rara-i mangangin kan chanchin a lo hrilh ve ni ngei tur a ni.



Vantei chuan "Û, i naupangchhia lutuk. Tinge a sam boys cut vang mai maia i biak duh loh a. Hrehawm a ti teh mai nia, nizanah pawh ka bulah a rawn sawi a. I ngaihzawng pawh ni mah se i thuhnuai a awm tur a ni bik hlei nem. I thu a awih tehlul nen sam a boys cut châk a. A boys cut ve a nimai a. I sual emai" a ti hmarh hmarh a.



"Ka duh loh thu ka sawi mawlh mawlh alawm, a ti lui a, min run luih anih kha" ka lo ti nghut a.




Thil awmzia hre ve hek lo, ka nu leh pa te chuan Vantei nen min melh tawn zak zak a.




"Chu pawh nise thil a nih tur ang a ni vek tawh a, i tidanglam thei tawh chuang lo. Be ṭha mai mai dawh" Vantei chuan a lo ti ve hlar a.




Chutah ka pa chuan "Eng nge maw in sawi le?" a lo ti sup a. Ka ṭawng hma hauhin Vantei bawk chuan Rara-i nen kan chungchang chu a sawi nghal zat zat a.



Ka nu chuan lu a lo thing mat mat a, ka pa lah chu a lo nui huk huk a.



"In va naupangchhia e aw" tih bak a sawi lo.




Ka nu chuan Rara-i a lo khawngaih pek a "Hriatpui, chutiang mai maia thinrim te chu a mipa hna lo emai" a lo ti hlak a. "Mai mai a nilo" ka lo ti hluk thung a.




Ka pa chuan ka lam a lo ṭang hlauh thung a "Hmeichhe sam tawi mut chu a mawi lo alawm. Rara-i chu a hmelṭha a, a inhmeh dawn tho a. Mahse titau ve rih rawh" a ti a. A nui pah suk suk bawk a. Ka nu in a lo melh ram ram mai.




"A ṭha lo zawngin i fapa fuih suh" a lo ti hlak a. "An inṭhen dawn chuang hlei nem, a hrem ve hlek dawn a nimai lawm" ka pa lah chuan a lo ti sam thên a.



Rara-i nen kan chungchang vangin ka nu leh Vantei an titau a, an naupangchhia tak tak a ni. Kan tukṭhuan ei na pawh an ti fel duh lo. Ka pa in hmun a ti fel a, keiin thleng ka sil thung a. A hlimawm lamah ngai zel mai ang.




Ka pa chhuak tur pawh chu ka nu in a thlah duh lova. Ka pa lah chu a nuih a zat hmel mai sia. "Ka duat..." a ti dut dut a. Sitting room ah Vantei nen kan awm ve reng sia. Vantei thinrim pawh nuihza insum deuhin a inpet ruh a.



Ka pa lah chuan ka nu thlah a phût tlat a, a kal duh lawk si lova. A tâwp a tâwpah chuan kawtlai thleng an inthlah leh tak tho kha.




Nilengin inah ka awm a, a khât tawkin Rara-i text ka dawng leh zeuh zeuh ṭhin a. Ka la hawng duh chuang lova.




An class ban awm velah chuan an college bulah ka va châng ta tho a. Mahse min hmuh theih lohna turah ka bike dahin ka ding run a.



A ṭhiante nen an rawn chhuak tur chu a rukin ka lo en reng a. A sam sei hniang ṭhin a tan ta daih chu ka la ui ngawih ngawih. Sam boys cut chu a inhmeh lo pawh a ni hran lo. A hma ai mahin a hmel a lang felfai a, a mawipui zawk emaw tih mai tur a ni. A hmelṭhatna pawh a lang chiang zual a. Mahse ka pawm thei hlawl lo a ni ber. Ka mitah chuan sam sei hniang khan a mawi ber.




Vantei nen an kal liam tur chu ka thlir zui vung vung a. Ṭhian inkawp âwm tak an niin ka hria. Hmeichhia tih takah min rêl zui ve nasa ngawtin ka ring. Vantei hi awm lo se chu Rara-i hi ka tawng âwm der si lo.




Nidang ang kha chu nise kan in phur haw leh âwm si a. Mahse kar khat emaw vel tal hrem chu ka duh. Chumi chhung chuan a beidawn hman erawh ka hlau viau mai.




Keimah zawk hian kar khat chu ka tuar thei leh pek pawhin ka ring lo. Tunah pawh hian a message en loh chu har ka ti em em si a.




Tlaiah naupangho Tuition ka pe leh a, nimin lama ka mood chhe zet kha chuan min kian san tawh a. A hma ang tho a ṭha in ka zirtir a. Kan inpawh tlang khawp mai.



Dar 5 velah kan bâng a, ka hmanrua ho bag a ka khung mawlh mawlh lai chuan Lawmi a rawn kal a. Midangho chu an haw vek tawh.




A bag chu a hai zui rak rak a, chutia ka hma taka rawn ding chu ka lo bengkhawn vat a. Ka lo melh reng a.



Chutah a bag aṭang chuan envelope hi a rawn la chhuak a. "U Rara-in lo pe rawh min tia" ka hma zawna lek pah chuan a rawn ti a. Min nuih var var bawk a.




Ka lo la ve mai bawk a, Lawmi chuan min chhuahsan zui nghal a.



Envelope chu ka en a, a hawnna tur laiah chuan lipstick sen vat hi a lo val kalh a, hmui thla ni âwm tak a ni. Henu khawsa zia hi chu(h)!



Ka duh dan pawh ni miah lovin ka nui huk a. Min biakna tur kawng chu a dap nasa ve khawp mai.



Ka haw veleha chhiar ah ka ipteah chuan ka ak ṭha ta nghal a. Dik tak chuan ka thin pawh a rim tawh lo. A message ka dawn rengte leh tuna a chet dan velte hian min hneh leh em em tawh.




In ka thlen chuan ka nu in eirawng a lo bâwl mek a. Ka pa pawh a lo awm tawh. Ani pawh choka ah ka nu pot chei sa ho chu a lo tuai hnûm a. An thuvawn a lo ziak leh tawh a ni ngei ang.




Ka nu chuan min rawn melh zawk a, a hawisawn leh nghal daih a. Ṭum dangah chuan ka haw veleh min lo be nghal siam siam zel kha ania. Ka lakah a la lungawi lo anih ka ring.




Ka pa zawk chuan a enga mah hma in "Rara-i chu..." a lo ti nghal ngawt pek a. Mitko ka lo san uk a "Hrem leh lo mai rawh, inṭhen i ngam tak tak dawn chuang lova. Be ṭha vat ang che" a lo ti zung zung a. Ka nu chu a melh pah zeuh bawk a. An lo in hmin fel leh der tawh anih hmêl.



Ka pa hi patling ve tak ni mah se ka nu titau thlêm lungawi nan hi chuan eng pawh a ti mai ṭhin. Ka nu lah a lo pangchang ve bawk nen a châng chuan an nuihzatthlâk ṭhin khawp mai.




"Nu..." ka tih rual chuan a lo hawi vat a, ka nuih vur vur a. Min nuih let ve duh ṭhak lo. Rara-i hian ka chhûngte zawng zawng rilru a hneh tawh anih hi.




"Eng nge kan hmeh dawn a?" ka ti leh a, ka la nui tho. Ka pa pawh a nuih a za tih ka hre reng.



"Chawhmeh" ka nu chuan a lo ti hmak a, ka pa insum zo lo chu a lo nui ta huk a. Keipawh ka nui ve ta hawk hawk mai.




Ka nu lah chu a tum bar mai bawk sia. Chutah ka pa chuan thutak zet hian "Zuali, fate chungah an lungawi lo vak ngai lo. An ngaihzawngte nen an inkar a nia. Thinrim eng phiara inti thiam lo pawh an ni lova. Hriatpuia hi lungawi loh khum tawh suh, tlai a nih tawh hi" a lo ti vat a.




Ka pa hi chu a hun takah a ṭawng ṭhin a, uan hun leh thutak hun a hre ṭhîn. Ka pa mah ni se ka fak lo theilo. Mi pa chu ni phei sela lang deuhin ka ngaisang zual ang.




Ka nu pawh chuan "Anṭam, dal, alu, bawkbawn bai, parbawr kan, bâwl leh hmarcha" a lo ti ve ta duah a. "A dang hriat duh i la nei em?" a tih chuan lu ka lo thing vat a. A awmdan hian ka nuih a tiza tlat.




Zanriah ei lai chuan mipa pahnih kan titi a. Ka nu leh Vantei chu la lungawi famkim hek lo, an ṭawng duh ṭhak lova. Chawei na kan tifel leh tur erawh min chêt khalh ta thung a. Ka pa a nui vur vur reng mai.




Heti hian chhungkaw boruak hi danglam ve zeuh zeuh sela a hlimawm phian mai.




Room-a ka lut chu Vantei'n min rawn zui lut a. Ka lo melh he haw a, min han melh ram ram a. Ka khumah chuan a ṭhu tharh a.



"Rara-i hi a luck teh mai nia aw, duh chu nise nang aia mipa ṭha pawh hi a hmu ṭeuh a nia" a lo ti ram hmak a. Mipa dang a sawi kher chu ka lo rum nghut a.



Chutah Vantei chuan "Ka ti tak tak alawm, college ah phei chuan a lar teh mai nia. Amah hian a hnar thiam zawk hlauh zel a. Amah an duh vanga mipa min rawn bia, tihpui tura min rawn ngên pawh hi an awm nawk ania" a lo ti leh zung zung a.




Ka laka lungawi lo hmel pawh a pu tawh lo, thu tak deuh hian min melh a.



"Chuan..." ka lo ti duh lêk chauh a, min ngei hmêl ngang mai. A ṭhiannu thlavang a hauh lutuk lungawi lo hmuhnawm ka tih em avanga inla ngêng lui ka ni. Ka chhungril tak erawh chu a nui vur vur thung a.




"Aww...eng nge ni vak. In inṭhen ka hlau alawm, a fel sia, kan ina lawi tur chuan a ni baka ṭha an awm lo" a lo ti hluai a. Kan inṭhen tak tak a hlauh vang anih dawn hi a lo buai em em ni.




Chutia a hlauthâwng ta lutuk chu ka nuih pui suk suk a. "Lungngai suh Vante, kan inṭhen dawn hlei nem. Ka lungawi lo rih mai mai alawm" ka lo ti ve ta nge nge a.




Min melh vang vang hnu ah a tho tharh a "Be ṭha vat tawh rawh, hrehawm a ti ania" a ti ram hmarh a. Min chhuahsan zui nghal a.





Kan Rara-i zet hi chu a danglam a ni, ka nu leh ka nau lam ṭang ah siamin min tih tauh khum tir thei ania. Amahah hian mi hneh theihna riau a awm chiang a ni.



Ka hman hek hawk hnu chuan a lehkhathawn chu ka phawrh chhuak a. Ka hawn hma chuan ka han nuih leh tê tê a. A chetdan mak sak lutuk ṭhin hi chu a!




A letter chu ka han chhiar ta poh a. A bulṭanna chuan min nuih tir huk mai. "Thai kawi bawngte" a'n ti deuh hnâp a. Eng eng emaw chu a hre ve a ni.




Ka chhiar zawm ta nghal a, "Au Hriatpui, ka message i hawng duh bawk si lova heti hian lehkha ka lo thawn tawp che anih hi. A hmasa berah chuan i thu ka zawm loh avangin min ngaidam rawh. I thu awih lovin ka sam ka boys cut lui a, hrem hi ka phû tho a. Mahse hmangaih ka phu na a nasa zawk. Chuvang chuan titau tawh suh. Nizanah pawh ka ngai lutuk che a, ka mu thei lo a, zing thawh ka hai phah, college ka tlai phah ṭep zui a. Tukinah pawh chaw ka ei thei lova, chhunah ka ril a ṭam vak a. Nangmah vangin sum ka seng ṭeuh a, lunch ka ei ṭeuh phah a. Niminah lah khan min thlah haw duh ta si lova motor lak ka ngaih phah a, pawisa bawk a hek leh a. Vawiin tlaiah pawh a hek leh dawn anih hi. Zan khat leh ni khat lek min biak duh loh hian keimahah nghawng a nei nasa teh mai nia. Tuna ka letter ziah pawh hi chawpchilh tawka class a ka ziah ania. Lawmi School bang kan college kawta lo pêng turin ka chah a. Pek tir che ka duh sia. Keimah mai bakah Lawmi pawh a buai ve phah a ngai a. Ka sam boys cut hian heti em em in nghawng a neih thui ka ring lo alawm. Min ngaidam la, min be ṭha tawh rawh. Ka tel lova awm thei tawp si lo min tih tauh khum a. Ka thlêm rei peih dawn miah lo che ania. Mahse ka hmangaih êm che a, ka tuar hram hram anih hi. A tâwp ber na atan chuan min lo be tawh rawh. Chuti lo chu mipa dang ka biak san ang che. Mipa ṭha lo deuh tawng ta ila i inthiam thei dawn miah lo ania. Ka sam boys cut hnu pawh hian ka luck tho ania" tih hi a lo inziak tlar dul a.




A letter chuan min ti nui vur vur mai. A mu thei lo ve te lah chu thawh a hai a, a tukṭhuan ei theilo lah chhunah a ei ṭeuh tho a. Tuar a intih dan chu dangdai tak ani.



"Mahse ka hmangaih êm che a" a tih lai chuan ka thinlung a hneh a. A vawikhat sawi chhuahna a ni. A ka in sawi lo mah se ka bengah a ri ring tlat.




Ngaihdam min dîl mah se min khak let tel tho bawk sia. Ngaihdam dilna lehkha thawn chapo leh induh tawk ber a la ni hial awm e. Thai kawi bawngte nghal zet a ni.




A letter chu uluk zetin ka thlep ṭha leh a. Ka nui ka nui mai, min tihlim takzet a ni. Ka lungawi a, ka nêm nghal em em a. Mahse a chêt leh dan tur ka hre châk em a. Ka la be duh lo fan a. Naktukah letter dang dawn leh ka in beisei a ni ber.




A message pawh notification ah ka hmu reng a "Letter kha i chhiar tawh em? Chhiar tawh chuan min be ṭha tawh rawh " tih te ania. A message hawn loh pawh 100 chuang ka nei der tawh.




Ka ti lui châk ve hrim hrim a, status ka up zui nghal a. Hmeichhe sam chungchânga Pathian thu a ni a, 1 Korinth 11:15 "Hmeichhia erawh chuan sam sei a neih chuan a tân ropuina a ni zâwk; a sam chu a khuhna tûra pêk a ni si a" tih hi ka status a. Ka up rual rual chuan a lo view nghal a.




Nghal zeta a rawn reply ka rin tehlul nen a reh zui ta daih a. Ka hlauthâwng nghal ringawt pek a. Mahse zanin chu biak loh ka la tum fan tho.



Zingah chuan morning wish min lo thawn thlap a. Ka la hawng duh chuang lova. Ka rilru tê tê chuan zanin aṭangin ka be ṭha ang ka ti a. Reilotê chu la tuar ve det sela ka duh a ni. Chu mai bakah Letter hlimawm tak dawn leh ka in beisei tlat ani.



A college bâng pawh râl aṭangin ka châng leh a. Nidang zawng ai hian a nguaiin ka hria a. Ka inthiamlo lek lek tawh zawk. Vantei nen an haw dun leh hnak hnak a. Ngaih ṭha deuh chuan ka awm zui veleh mai bawk a.




Tlaiah chuan Lawmi chu ka ngaichâng deuh reng a. Tuition bân rual chuan haw nghal a tum a. "I u Rara-in sawi a nei em?" ka ti ngawt pek a. A lo bangbo khawp mai.



Ka nuih liam ta vel ringawt a, ka zak ve reng mai.



Zanah chuan beisei loh deuhin Nunmawii hnen aṭangin phone call ka dawng a. Ka lak rual chuan "Rara-i nen in chhuak em?" a rawn ti a. Ka va han bangbo tak.



"Aih, enga tinge?" ka ti nghal a, ka thin a phu rang nghal dawt dawt mai.


"Awi...i bula a awm si loh chuan khawnge a kal ang le aw? Zanriah eikham aṭang khan room ah a awm emaw kan ti kha a lo bo daih a" a rawn ti zung zung a.




"A awmna in hrelo a maw?" ka ti nghal a, ka aw a hlauhthâwnna chu a hrethiam ve vekin ka ring.




"Aw ...a bo daih mai, ka mangang ngei mai Hriatpui. Naktuk treatment a huphurh lutuk vang a mawnle " a rawn ti ṭiau a. Ka lo bangbo telh telh leh nghal a.




"Eng treatment?" ka lo ti khauh a, "Ekhai, engmah a lo la hrilh an che nge? A sawi vek tawh angin a insawi sia. Tinge dawt a sawi reng reng le. Kar hmasa khan Brain Tumor a nei tih kan hrechhuak a. A lo inthup char char a, treatment lak a lo ngai tawh lutuk a. A sam a boys cut tlai khan 'Au Hriatpuia chu ka hrilh ang' a ti thlap asin. Tinge engmah a lo la sawi loh a" a rawn ti ta zung zung mai. A ṭap nghal pur a.




Kei erawh chu ka lo khawng nghal awt mai. Sawi mai tur pawh hrelo in ka nghilh dup a. "Brain Tumor a!" ka ti chhuak thei hram a ni.




Chutah Nunmawii chuan duhthawh zet hian "Aw, a lo inthup char char alawm. Kar hmasa khan zanriah kan eikham kha a tlu sawp hnawk a. Damdawiin ah kan hruai nghal a, kan buai phili bawk nen engmah kan rawn hrilh hre hman lo che a. Doctor hnen atangin kan hre ve chauh alawm. A rawn harh rual khan hrilh hriat kan hreh ve tehlul kan sawi kha chuan amahah engmah danglam a awm lova. A lo hre sa vek a. A pa boral hma daih aṭang tawh khan ania. A lo zêp char char alawm. Kha a hmaa ka ngaih ṭhat loh laite pawh khan a lo na daih tawh tihna ania. I bula sawi rih lo turin min ngen bawk a. Amah ngeiin a inpeih huna a hrilh tur thu che a sawi a. Doctor khan admit zui a tum a. Mahse a duh rih tlat lova. A sam erawh kha chu thisen a heh si a, boys cut loh kha kawng dang a awm lova. A ui chung chungin kan tan tir alawm. Naktuk hi treatment a lak ṭan hun tur ania. A hma pawh khan la daih tawh tur ania, mahse kan hre miau lova. A lo peh hel char char tawh zawk a. Awi...a pawi emai, tunah lah chuan a bo daih bawk si. Min pui teh" a rawn ti duah a.




A ṭap zui hlawp hlawp mai. Nunmawii nen kan inbiak zawh chuan ka inthing harh a.



Rara-i hmel ka mitthla a, a sam chungchânga ka lungawi lohna te chu ka ngaihtuah lêt a. Insûm hman lovin bang chu ka hnek nghal chawrh a. Ka inthiam loh zia chu pui tak ani.




Ka chhûngte pawh chanchin ka hrilh mumal hman lo. "Rara-i te inah ka leng dawn" tiin ka chhuak zui nghal a. Kan inkar a ṭha leh tawh vang emaw ti a ka nu leh Vantei lo nui var var chu ka hmu hman hram a. Chem hriam taka vih ang sawk hi ka ni.




A kaln tur âwm ang chu ka chhui ka chhui a, rilru fîm put hram hram ka tum a ni. A tawpah chuan thlanmual bak ka ngaihtuahna ah a awm ta lova. Chu bak kal na hmun tur a nei lo.




Thlanmual lam chu ka pan ta nghal a, Nunmawii bulah khan lo mangang lo tur leh ka hruai haw ngei tur thu kha ka sawi a. Chu chu ka ti ngei bawk ang.



Rara-i khawsa zia leh awmdan zawng zawng te chu ka ngaihtuah lêt a. A hriselna chungchâng ah rinhlelh turin engtin mah a awm ngai lo. Mahse a natna hrelo khawpa ka lo chîk lo chu mawl ka inti a, mahni in demna in ka khat a ni ber mai.




Ka thu awih ziah ṭhinin a sam chungchânga ka thu a awih lo te kha chhan ṭha tak a awm ngei ang tih rin ngaihna ka hre tur ania sin mawle.




Ka ṭawngkhum dan leh nizan lama ka status te chu ka ngaihtuah lêt a. Mawl ka inti a, mahni inhuatna in ka khat a ni ber mai. A rilru ka lo hliam mawlh mawlh reng si a.




A sam boys cut a inhmeh loh thu ka sawi khum salh salh te kha nuih pui mah se a chhungril kha a lo na ngawt ang. Hrehawm ka tih luatah leh ka lainat luatah ka mittui a tling hial thei nia mawle.




A pu leh a pa an phûmna thlanmual chu ka thleng ta a. Zan dar 8 vel chauh a la ni a, thlanmual bula in awm pheuh pheuh te chu an la eng ve far hlawm mai.



Thlanmual tak erawh chu a reh ruih a. A pu an phûmna hi a zuk thlang deuh a, a pa pawh a bul lawkah an phûm nghe nghe.



Ka rin lawk ang ngeiin thlanmual bulah chuan a lo ṭhu ran a. Thawveng huai tur ka nih laiin ka ipik mup mai.



"Rara..." ka ti hulh a, a lo la phu chiam zui a. A rawn hawi rual chuan phâwk zet hian min lo melh a. Ka zuk lang thut chu a hamhaih viau a ni mai thei.



"Vanrawngbawl" ka ti leh nghut a, a ha var rual ṭhat langin min lo nuih var var a. Tun ṭum, a hmingpuma ka ko chu haw hmel pawh a pu lo.




"Eng nge Vanlalhriatpui?" ner nang hian a lo ti a. Ka zuk pan hnai vat a, "Heiham, ka zûn chuan ka hnên a rawn hruai thleng ta nge nge che alawm" a lo ti vei ham ham a.



A bulah chuan ka zuk ṭhu thla ve a, min lo kuah nghal sat sat a. Nghet zetin ka lo kuah lêt a, a samah chuan ka fawp vang vang a. Ka ngaih tawh zia hi !



"Engtin nge hetah ka awm tih i hriat a?" a lo ti sep a. A inlahrang a, chiang zet hian min lo melh bawk a.



"I sawi zawh chiah kha, i zûnin min rawn hruai thleng alawm" ka lo ti ril ruih a. Mitmeng thûk zet hian ka melh a, ka hmuiah min lo fâwp hmasa zeuh a.



"Ka tih tur min tih khalh ziah suh" ka tih chuan a lo nui ri hak a.




Ngawi rengin thlan lung pahnih bulah chuan kan ṭhu dûn ta reng a.



"Au Hriatpui" a rawn ti zawi sep a, a sama fawh zeuh pah chuan "Eng pawh sawi rawh?" ka lo ti sup a.



"Ka pu hi chu vanram a kai chiang sa dawn a...mahse ka pa hi..." a ti a, a ngawi zui dat a. Hrehawm tih hmel zet hian a lo thaw chhuak hak a.



"A kalna tur a chiang sia" a rawn ti zawi leh sep a. A hrawk a thian zui kharh bawk a, ṭah a insum leh pek tawh anih hmêl.



A pa thlarau kalna tur ah kher chuan hnem ngaihna ka hrelo. Mahni nunna la a ni miau si a, tihngaihna a awm hlawl lo a ni.



"Rara..." ka tih chuan lu a lo thing a, ka âwmah a hmai a rawn nawr vak a.



"Vanramah min lo hmuak ve dawn silo" a rawn ṭap chhuak nghal hak hi a ni ber mai. Rilru tâwt zet hian ka lo thaw chhuak ve nghal hawk a.



A hnungah chuan ka chul hauh hauh a, a sam ka hmuh chuan ka rilru a na thar a. Ka inthiamlo thar hle bawk a.




"I ngaihtuahna ti kal thui lutuk suh" ka ti sup a, chu bak sawi tur ka hre rih lo ani.



Rara-i chu a la inhnit faih faih a, a khur deuh dar dar bawk a.



"Chhûngkua kan kim dawn chuan si loh chuan vanram pawh khi a nawm ka ringlo" a rawn ti leh a.



Aw...a ngaihtuahna vak vel chuan kei ngei pawh min ti chau a. Ka ngaihtuahna a ti mang duk a. Hun kal tawh siam ṭhat theih a ni bawk si lo.




"Khatiang zawngin an ngaihtuah ngailo" ti mah ila kei ngei pawhin a ngaihtuahna chu ka ngaihtuah thleng pha tlat si a.



Chhungkaw kim a vanram thlen loh mawlh mai hi a hlauhawm a ni. Kan la dam lai hian siam ṭhat ngai te siam ṭhat hna thawk mawlh mawlh ila. Vanramah chuan in hre hrang tawh dawn lo mah ila a la dama te'n ngaih ṭha taka min kal tir theih nan dam lai nun uluk hi a pawimawh khawp mai.




Kan boral hunah hian kan chhungte'n 'A ni chu Pa angchhungah a châwl tawh alawm' tiin thlamuang taka min thlah theih loh mawlh a hlauhawm.



Chutiang ngaihtuahna chu Rara-i hian min neih tir ka ti lo theilo.



"Enga tinge mahni nunna a lak kher le?" a rawn ti ṭha leh a. A pa boralna vangin a na thar hle in ka hria.



"Hun kal tawh chu hun kal tawh a ni a, engmah a siam ṭhat theih tawh loh. Chuvang chuan a la dam a te hian thih hnu piahlam ram ngaihtuah chung zela nun uluk kan ngai" ka ti duah a. A rilru vak kual nasa lutuk chu lâk pen ka tum a.



Reilotê chu a la inhnit faih faih a, mahse ka hlawhtling anih hmel a ṭap bâng ta hram a.



"Enga tinge i lo kal ve reng reng a?" pangngai tak hian a lo ti ta a. A ṭahna avangin a mit a sen ram a, a hnar a sen tek bawk a. Hmuh hrehawm tak chu a ni hran lo.



"Enga tinge thil tam tak ka lakah i zep?" ka lo ti tawh thung a. Zaninah hian a natna chungchang sawi fel pui vek ka duh a ni.


__________*__________*_________*_________


Show post links
Top

[Ngaia]

AIZIAL
By CVL Awmpuii


(Hello, kar khat ṭha zen zawn ka châwl sia, in lo theihnghilh ṭhen tawh em. Heti hian tlemtê ka lo belh lawk a, ka zawmna lai ka chhinchhiah lo aw. Zan rei lamah chapter thar ka rawn dah leh dawn a. Tun kar chhungin complete ka tum a, ka rawn dah deuh ṭawk ṭawk dawn. Lo lungngai su aw. In mi hriatthiamna zawng zawng ah ka lawm ngei mai. 🥺)





Chapter 27



"Thil engkim min hrilh ṭhin rawh ka tih kha, enga tinge hetiang thu lian tham lutuk ka lakah i zêp a?" ka ti leh a.




Ka laka a natna a zêp chu lungawi loh pui viau mah ila tunah tak hi chuan amah ka lainatna a nasa zawk. A samah chuan fawpin ka thaw chhuak zui ham ham a.



Rara-i chu a lo nui ri hak a, "Ka hrilh hma che in i lo hre tawh a?" a rawn ti a, inlahrang hlekin a ner deuh nang a. A natna avanga hrehawm ti hmel min la hmuh lo cheu a. A hmel chu kei ai mahin hmuh a nuamin ka ring.



"Engtik aṭangin nge?" ka tih chuan ṭha takin min lo chhang ve mai a. "Ka pu boral hnu lawk khan ania. Kan inngaihzawn ṭan tirh lai vel khan a ni tawh. Ka lu hai ziah leh ka khua a rawn sik ringawt zel kha ka ngaih a ṭha lova. I bulah pawh ka sawi nghe nghe kha. In entir tura min tih hma khan ka in entir tawh alawm. Tichuan, Brain Tumor ka lo nei reng tih kha an hmu chhuak a. Mahse a nasa lutuk lova, Doctor te sawi dan kha chuan a tir lam chauh anih hmel. Treatment la turin min tia, mahse ka la inpeih lo êm a. A mak lutuk, a tirah chuan ka natna chungchang ah khan ka nghilh ve dup a. Mahse hun reilotê chhung chiah ania, ka beisei phâk bakin ka dawngsawng thiam a. Tumah hrilh lova ka natna hneh kha ka tum ta zawk a. Damdawi pawh ṭha takin ka ei a, check up a ngaih hun apiangin ka in check up a. Ka natna chuan ṭhat lam a pan lova, zual lam pawh a pan chuang lova. Ka ni te ina ka awm aṭang khan check up ka thlahdah deuh a, ziaawm lam ka pan vang pawh a ni pakhat a. Mahse hmanni tukthuan kan eikham kha ka lu hai ka tlu thut a. Damdawiin ah min tlân pui nghal a. Chutiang vel aṭang chuan an hre chhuak ta mawle. Doctor khan a serious tawh viau in a sawi a, naktûk aṭang hian treatment lak ka ngai dawn" a lo ti duah a.





Ka laka a zêp rei tehlul nen tunah lêm awlsam takin a sawi leh thei lawi a. Hrehawm ti hmêl a la pu chuang miah lo. Keimah zawk chu ka lo mangang a, kha leh chen kha amahin a lo tuar tlawk tlawk chu a ni sia.



"Ka sam pawh hi ka duh thû a boys cut ka ni lo ania, ka dam rei nan a ngai a. I thu zâwm lova ka kal a ngaih phah ta kha ania" a lo ti leh a. Ka inthiamlo nghal ngawih ngawih mai.



A kutah chuan ka hûm vang vang a, kan inhmatawn ran bawk a.



"Rara...ka thiam loh ani, min ngaidam rawh aw. Engmah hre lovin i chungah ka lo thinrim vak a" ka ti hulh a, ka rilru hrehawm zia chu pui tak a ni.



Chutah Rara-i chuan min lo nuih var var a, "Ka hrethiam alawm, i lungawi lohna kha chuan ka rilru a ti na pha miah lo ania. I laka ka zêp vang zawk ania, khami chungchang ah kha chuan ka dem lo che" a lo ti var a.



"Chuloah sam boys cut hi chu mawi pawh ka ti lo, ka hmelṭhat na a tibo vekin ka hria..." a tih lai mek chuan ka lo pawt chat a "A hma aiin i mawi zawk" ka lo ti vat a. Mahni insit zawnga a ṭawng chhuah chu ka phal lo bur.




Kei lah khan engmah hre lovin inhmeh lo ka lo ti bawl bawl a. Khang laia a rilru hrehawm dan tur te kha ka ngaihtuah lêt a, ka na ngawih ngawih mai.




Chutah Rara-i chu za lo zet hian a lo ṭhen sak a "Hmelchhia min tih em kha, sam sei kha chu a mawi asin le. I duhthusam ang hmeichhia pawh ka ni tawh lo" a rawn ti leh hram a. A ner deuh nang bawk a, a mitmenga natna a thup ruk char char chu ka hmu thiam ve ṭan e.




Ka lu ka lo thing vat a, "Nangmah tawp hi ka duh ber chu i nia. I lan dan hian i chhungril ka duhna tak kha a sawi danglam pha lo. A hmaa ka lo sawi tawhte kha chu ka thu i awih loh vanga ka lungawi lo phun mai mai anih kha. Heti hian i hmêl a ṭha chiang kuang zawk. I mawi ber" hnem tum tak hian ka ti a.




A awih loh hmel ngang mai, "Ehh...Au Hriatpuia chu ka rilru nat i hlauh vangin tikhan i sawi leh vel tih ka hrethiam vek ania" a ti a, a nui hak hak a.



Ka lo thaw chhuak nghal hawk a, a sam vanga ka lo lungawi lo viau kha a pawi ta ber mai.



A nui ri hak hak te chuan ka thinlung a ti na a. Ṭum dang ang chu nise ka hlimpui leh ngei ang. Mahse tun ṭum chu a nui ri hian min ti chau. Keimah zawkin ka lo tuar thiam lo ni ber hian ka hria.




"Engkim a ṭha leh vek dawn, engtin mah i awm ka phal dawn lo" ka lo ti sup a. Ka lamah hnûk hnaiin a chalah chuan ka fâwp vang vang a. Ka inlakhran rual chuan min lo nuih leh var var tawh.



Kan ngawi dûn vang vang a, kan thinlung kan inhriat sak tawn viau in ka hria. Ka âwmah chuan nghet zetin ka kuah a, hahdam hmel zet hian a thaw chhuak siai siai a.




Rara-i hi ka chân duh lo, ka ngaihtuah zâwng ringawt pawhin ka â thei mai dawnin ka hria.




"Au Hriatpui, lo thi ta ila nupui i nei ang em?" a tih chuan ka lo rum nghut a. "Chutiang sawi suh" ka tih rual chuan "Mawhh...sawi teh" a lo ti ṭung a. Inlahrang in min melh leh kal tawh.



"Ka hre duh alawm, lo thi ta ila nupui i nei ang em?" a ti leh a. A hriat châk hmêl takzetin ka hria.


"Khatiang zawng khan thil ngaihtuah suh" ka lo ti chang bal a. A ner deuh nang a "Ka ngaihtuah pawh a ni lo, ka hre duh alawm" min ti let erh a.




Ka chhanna a ngaichâng ran bawk a "Nang lo chu nupuia neih ka tum lo" ka tih rual chuan lungawi hmel zet hian a nui var var a.




"Lo kalsan ta che ila, engtin nge i awm ang?" a ti leh hram a. A thusawi duh dan chu ka haw takzet a ni.



"Khatiang zawng khan eng thil mah ngaihtuah suh ka tih chu! Thi tur ang maiin ṭawng suh" ka lo ti tuarh a. Aw ka vin ka hman thut avang chuan a phu dawrh mai.




Rum zet hian min melh a, ka kuahna aṭang chuan tal pit in a tho tharh a. "Khatiangin min vîn vak zel suh" a lo ti bak hlar a. Ngei hmel zet hian min melh bawk a.




Ka lo thaw chhuak hawk a, a ha a seh ri bap bap mai. Ṭawngkam vîn ka hman khum avang chuan a lungawi lo takzet ni ngei tur a ni.



Thawpik zet hian ka hmai chu ka tuai pawk a. Chutia min lo melh ram ram lai chuan a banah chelhin ka hmaah chuan ka pawt ṭhu leh a. Min lo dang bik lo.




"Rara ...ka hmangaih che tih i hria tiraw?" ka ti leh thlawt a. A ngawi kar a, ṭawng chhuah tum ang pawhin a awm lo.




"Ka hmangaih che, min kalsan tur ang mai khan ṭawng tawh suh. Ka phal lo, khawiah mah i kal ka phal dawn lo" ka ti a, a samah chuan ka fawp zui vang vang a. Min ti â thei takngial dawn.



"Ka thusawi i la kawi zel anih kha" a lo ti khauh a. Ka kuahna kut chu a lo chelh ve vat a. "Au Hriatpui, kal san che ka tum reng reng lo. I tan dam ka tum dawn lawm. Ka natna hi inrahbeh tir ka tum hlei nem. Kha leh chen kha harsatna tam tak ka lo paltlang tawh a. Ka hlim ve dawn chauh a, awlsam taka thih chu ka tum hlei nem. He natna hi ka sual let ang a, ka hneh ngei dawn alawm" a lo ti dap dap a.




A thusawi chuan mipa zawk mah ni ila ka hnuk a ti ulh tlat pek a. Ka lo insehruh ṭeuh mai.



A rawn hawi lêt a, hahdam hmel zet hian min rawn melh a. A kut nem thep chuan ka hmai a rawn tawk da da a, min nuih sen sen bawk a.




"Min chân i hlau tiraw?" a rawn tih sep rual chuan ka lo thaw chhuak hrawih a. A kut te tak tê chu humin ka fawp zui tawk a. "Chân che ka duh lo" ka ti thlâwt a. Heti em em a chân ka hlauh hi ka ring ngai lo.




A lo nui sak a, "Chu ringawt pawh chu ka tân dam chhan tlak a ni" a lo ti nghet charh a.



Hnemtu tur zawk ka nih laiin hnem ngai zawkah ka ṭang a. A thim zawngin thlir lo se ka duh em em a, mahse keimah zawk chuan a chhe ber ka ngaihtuah thleng zel a. Ka hah a ni !




"Ka hriatchhuah tirh khan ka rilru a buai ve lutuk a, kan kal thui tak tak hmaa tâwp mai kha ka duh hman a..." a tih lai mek chuan "Chutiang sawi suh" ka lo ti hmanhmawh a. Engti kawng pawhin kalsan ka tum lo bur.



"Aw...ka sawi zo phawt dawn alawm, min lo pawt chat suh" a lo ti nang nang a. A thusawi tur chu ṭha deuhin ka lo ngaihthlâk sak veleh mai bawk a.



"Mahse ka ngaihtuah chiang a, ka thil tum kha a dawihzep thlak ka ti a. A Rara-i zia lo emai ka inti rilru a. Keichu ka huaisen a, ka hmaa buaina awmte pawh huaisen takin ka paltlang ṭhin a. Chuvang chuan ka hmasialin ka kawp zui ta tho che chu ania. Induh tawn tak leh inhmangaih tawn taka in kalsan ai chuan engkim hmachhawn dun ka thlang ta zawk a. Mahse hrilh tur che in ka inpeih lawk lova. Ka inpeih meuh chuan hei i lo hre hman tawh chu ania. Ṭha takin min enkawl rawh aw, ka pangchang viau dawn ania" a lo ti duah a. Min nuih sen sen bawk a.



A ngaihdan chuan min ti hahdam sawng sawng mai. "I nin khawpin ka duat che ang a, ka ngaihsak ang che" ka lo ti nghet charh a. Lungawi zet hian a nui ta hak hak a.



Dik tak chuan min kalsan tum sela chu kan in ti hrehawm tawn mai mai dawn a. Kalsan duh lo viau mah ila ngaihsak a duh miau loh chuan ka tan tih ngaihna a awm dawn lo. Mahse hetiang ngaihdan a nei thei hi huaisen ka ti a ,tluk lo ka inti a, ka chhuang hle bawk.




"I lungawina tur zanin min enkawl dawn nia, ka tibuai viau ang che" a rawn tih leh phei chuan hahdam tawh tak ka ni. He hmeichhia hi a danglam a ni. Nitin a danglamna ka hmu ziah chu anih hi !




A treatment lak hun tur te chu kan sawi dun leh a. Naktuk tlai lamah Radiation therapy a la dawn a. Ka kalpui ngei tur thu ka sawi nghal pang a. Min lo hnial bik lo.



Kan haw hma in Nunmawii chu ka call hmasa tê tê a. Rara-i ka hmuh tawh thu leh ka hruai haw tur thu ka hrilh a. A lo thaw ve huai mai.




An in thleng chu ka thlah a, Nu Nêmi chuan a ngaihtuah luatah a lo zilh nghal mawlh mawlh a.



"Naupangchhia pawh i ni tawh lova, i kal na tur te pawh sawi ve tur che alawm. Phone i keng bawk silo, min ti mangang asin. Kan zawng luai luai che a, rilru in thil chi hrang hrang a ngaihtuah hman a. Vawikhat mah chîng tawh suh ang che" a ti hmarh hmarh a.




A ngaihtuah luat vang a ni tih ka hria a, lo huat pui chu sawi loh ka lo lawm em em zawk. Rara-i pawhin a hrethiam viau in ka hria. A hmelah chuan nihlawh intihna leh hlim hmel a inchawhpawlh nawk zawk mai.




Mahse Chawimawii chu ṭul lo zetin a rawn ṭawng ve a. "Heti reng chuan min tibuai mai mai ang. Kan bulah i awm ve reng dawn anih chuan nun dan mawi leh ṭha zir belh hlak ang che. Zan zanah mi i ti mangang a, min tibuai hrep a. Inthlahrunna te hi nei ve rawh" a lo ti zek a. Rara-i hmêl chu a inthlak danglam nghal vek mai.




Mahse Chawimawii chu Nu Nêmi'n a lo khap nghal vat a "Keiin ka sawi tawh a, a tâwk. Ṭawng hnem a ngai lo" a lo ti nghat a. Chawimawii chu ṭawng la châk hmel viau mah se a ngawi zui ve ta hram a.



Henu hi ka hriat ve chinah pawh hmeichhe khawsak ṭha a ni hauh lo mai. Rara-i ka ngaihtuah zual phah a. Tunah phei chuan a dam lo nasa hle si a.



A hnu deuhah chuan nêm deuh zawk hian Nu Nêmi chuan lawmthu min hrilh luam a. Min tihbuai avangin thupha te a han chawi ve ngial bawk a.



"Ka mawhphurhna ani tel alawm" ka lo ti ve churh a. Thingpui in tura min tih tlat avangin ka hnial sêng ta bik lova. Thingpui in chuan ka han ṭhu khawmuang veleh a.



Naktûk Rara-i treatment lak turte chu kan sawi ho a. Ka beisei phâk bakin boruak a zangkhai a. Rara-i ber lah chu lungngai hmêl a pu miah lova. Dam khaw chhuah a tum bur niin ka hria.




Chu chuan min ti lawm em em a. Ka hriat tirh a ka rilru lo hrehawm lutuk pawh kha amah zawk chuan min ti hahdam sawng sawng mai.




Ka haw meuh chuan Dar 11 a lo ri thuak tawh a. Ka chhungte chu an lo la meng teh mial a. Vantei'n sitting room ah lehkha a lo zir a. Ka nu leh pa te'n pot an lo buaipui bawk a.




Ka nu chuan a tih dan ngai têin min lo chhawn nghal vat a. An bulah chuan ka va ṭhu ve nghal a. Rara-i chanchin engmah an la hre ve miah lovang. Hrilh hriat nghal mai chu ṭha in ka hria a. Engmah zep lovin ka sawi tlang nghal tawp a.



A ṭhawng ve hlawm khawp mai.




Ka nu chuan "A lo va tuar nasa âwm ve , a lo zêp ṭang ṭang si a" a ti vang vang a, a lainat hmel viau mai.




Vantei lah chuan "Chuvang anih chiah chu tun hnai deuh hian a chiang lo riau a. A mitmeng a buai leh zeuh ṭhin a. A lu hai pai deuh khat khat te hi a nei ṭhin a. Han zawh lahin a ṭhat thuin min chhang zel bawk sia. Ka van khawngaih tak" a lo ti zung zung a.




A ṭhiannu chu ngaihtuah ni âwm tak hian a ngawi deuh vang vang a.




Chutah ka pa chuan "Aman eng angin nge a ngaih?" a lo ti ve vat a. "A tuar thiam lutuk, ka bulah phei chuan hrehawm ti hmel pawh a pu lo. Mahse a sam chungchânga ka lo lungawi lo kher kha chu..." tiin ka thaw chhuak hawk a.




Kha thilah khan hrehawm ka tihna a la reh theilo.




Ka pa chu a lo bu nghut nghut a, "I pawimawh hle dawn anih chu. Rara-i hi chu a danglam ngawt mai. Hei vang hi aniang Pathian pawh khian a fiah reng mai ni. Kan dâwl zawh tur bak harsatna hi min pe lova. Rara-i chu a chhel em a, kawng tinrengin a fiah anih hi. Khawvel mite mithmuhah chuan lainatawm mah se nun hausa a nei tlat. Engkimah a lungawi thei zel a" a lo ti duah a.




Chu chu keipawhin ka ngaihdan a ni. A tawrh ang hi midang chuan tuar se Pathian lakah an vui ngei ang. Mahse a ni chu a ni ve lo reng reng. A vui teuh ṭum ber chu a pa boralna ah khan a ni mai a. Mahse kha pawh hun reilote tak tak chauh ani.




Mi ṭha famkim a ni bik lova, sualna leh ṭhat lohna tam tak pawh a nei ve a. Hmeichhia ni ta fam chu mi chanchin pawh a sawi ve nasa a. Mahse keimahah chuan a ṭhatna te hian a hliah khuh leh zel ṭhin. Zilh a sâwt em em a. A nihna ah lungawi mah se hmasawn a tum tlat ṭhin.




Ka mut hma chuan ka be leh a, ka pa sawi ang khan a hma zawng aia ngaihsak ka tum a. A phû hle bawkin ka hria.




Kan inbiak tâwp dawn lama a thusawi chuan min hneh kher mai. "Natna khirh deuh te tâwkin, harsatna tawp khawk, kan paltlang zawh loh tur hial khawpa kan ngaih pawh tawk mah ila. Beidawnna tâwp khawk tâwkin mihringin a chhe bera kan ngaih thihna hial pawh kan chungah lo thleng mah se Chatuan nunna kan neih tlat si chuan mi vannei, khawvêla nihlawh ber kan ni tho alawm" a rawn ti duah a.




A kal ka phal vang ni lovin kal ta pawh nise a ngaihtuah awm dawn loh tih ka hria a. Khawvêl thil taka thlamuanna ni lovin thlarau lam thlamuanna min pe tel tlat.




Chutihrual chuan ani ang hmeichhia hi khawvelin a la mamawh a. Pathian ropui zia lanna tur hmanrua lo ni se tih hi ka ṭawngṭaina leh ka duhthusam a ni.



Zîngah chuan hma deuhah ka tho a, Rara-i tân rilru leh tih takzetin ka ṭawngṭai a. Chhung inkhawm na ah pawh ka pa in a chham tel nghe nghe a.



Hun harsa kan hmachhawn laia Pathian auh tur kan nei reng hi Ringtute kan vanneihna a ni.



Dar 10 velah chuan an in lam panin ka inkhalh chhuak nghal a. Ka pa remtihna thlapin car ka keng a. Rara-i te pawhin ka va lam dawn tih an hre lâwk tho a, an lo inring vek tawh ang.



Ka va thlen chuan ka rin ang tak takin an lo inpeih fel diam a. Damdawiin luh hun tur kha dar 1 a ni a, tawi khawmuang tawh lovin kan inphur leh nghal a.



Nu Nêmi leh Nunmawii te an tel ve a, ka bulah amah a ṭhu a. A hnunglamah Nu Nêmi leh Nunmawii te chu an chuang ve bawk a.



Amah tak chu huphurh âwm pawhin a lang lova, a tih dân ngai têin a ṭawng siam siam reng a.



"I taksa in a tuar phah zawk a hlauhawm ngawt mai" Nu Nêmi chuan a lo ti halh a. A sawi tum chu kan hrethiam tlâng vekin ka ring.




Radiation Therapy lak hi ṭhat pui an awm rualin chhiat pui an awm ve fur a. Mahse chungho chu an hriselna a pan sa deuh vang a ni tlangpui a. Chuvangin taksa chak ṭha pangngai tân lo chuan therapy lak ngawt ngam chi pawh a ni lo. Mahse Rara-i chu kawng dang a awm chuang lova, a ṭhat chhuah leh ngei nan a lak ngei ngei a ngai thung a ni.




"Doctor thiam zâwk te'n ṭha tura an tih ania, a ṭhat pui turah ngai zawk ang" Nunmawii chuan a lo ti ve vat a.



Damdawiin chu rei vak lovah kan thleng a. Doctor pawh nghah buai ngai lovin kan hmu nghal zung zung a. A Doctor chu a felin a lo dam thlup mai a. Patling fai vung mai hi a ni a. Ka rin sual loh chuan ka pa te ai a naupanna a tam lovang. Rara-i natna chungchang te chu chipchiar takin a sawi leh dap dap a. Rara-in min hrilh ngawt ai chuan ka fiah kuar mai.




"Brain Tumor hi chu a dam thei tawh lo tluk a ni a. Mahse in enkawl uluk a, therapy te lâk zel theih chuan rei tak a dam theih ania. Rara-i hmalam hun pawh a sawi theih loh a. Treatment a lak vat loh avang khan a lo zual kai a. Tunah treatment te hi la phawt sela, zai hial pawh a ngai mai thei ani. A châng hian ṭha vur angin lang ṭhin mah se a na a chhuah tawh vek vek hi chuan natna tawrh hrehawm tak ania
Treatment chu la chhin phawt sela, enkawl zel dan tur pawh a fiah zui kuar mai ang" a ti dap dap a.




Nu Nêmi leh Nunmawii te chu an rilru a hah hmel kher mai. Keipawh tiamin ka rilru a buai a, beiseina nei tho mah ila thil chhe ber thleng thei ngaihtuah chuan thawpik thlak tak a ni.




Rara-i erawh hmel hmuh nuam zet hian a la awm a. "Ka dam dawn alawm, keichu ka chhel lutuk. Thih mai mai ka tum hlei nem" a lo ti var a. Doctor chuan a lawm hmel ngang mai. "Hetiang damlo enkawl hi kan tan pawh a nuam ania. Theihtawp kan chhuah tlâng ang" a lo ti ve hlut a.




Rara-i taksa chu a endik leh zung zung a. Mahsw buaina a awm ta tlat, a BP a lo normal chiah lova. A lo hniam deuh hlek hi a lo ania. Hlauhthâwn awm lutuk chu a ni lova, mahsw therapy lâk nân chuan a tih chî rih lo a ni.



Chutah Doctor chuan thutlukna a siam ta a "Zaninah i BP hi adjust kan tum ang a, a in up harin ka ring lo. Admit tur tho i ni bawk a, zanin chu dam varin lo mu mai la. Naktuk lamah i taksa in a tlin dawn chuan treatment kan ṭan dawn nia" a ti ta a. Tuman hnial enah pawh kan en lo.



Tlai lamah naupang tuition pêk leh ka ngai si a. Damdawiin ah chuan kan in admit fel zung zung a. A dam lo ber lah chu a hmêl hmuh a nuam em em mai a, ka kalsan dawn te chuan ka hreh tehlul nen lungawi deuhin min thlah a. Damdawiin pâwn thleng a lo chhuak ve nghe nghe a.




"Tuition pek zawh veleh ka lo let leh nghal ang" ka tih chuan a lo ner deuh nang a. "Min âtchilh ve sia maw..." a ti thlûk awn duai a, ka lo nui hawk ringawt a.




Mahse a hnu deuhah chuan "I ngaihṭhat na tur a nih phawt chuan i lo kal leh em em dawn nia" a ti a. Insum hman lovin a biangah chuan ka piai vak a, a lo ṭeu hlar mai. En tawp hi chuan dam lo hmel pawh a pu lo mawle.




Tuition pe tur chuan ka kasan ta nge nge a. Nu Nêmi pawh a haw zui ve nghal a, zanin chu Nunmawiin a awmpui rih thung dawn a ni.



Rara-i chu ka ngaihtuahna ah a awm reng a, vanduai viau mah se tunah chuan ngaihsaktu a nei tawh a. A vanduaina hi vanneihna ah a inlet chho ṭan mekin ka hria. Chutihrual chuan dam khawchhuak tura a la beih a ngai a. Kha chen thil hrehawm lo tuar chhuak tawh tu khan a tuar chhuak leh em em in ka ring.




Tuition chu tlai dar 5 ah kan bâng a, damdawiin lam ka pan leh hma in ka nu ka call hmasa zet a. Rara-i chanchin te chu ka hrilh ve luam a, ka kal leh dawn avangin zanriah min ei san mai turin ka ti nghal bawk a. A lo hrethiam khawp mai.




Damdawiin ka va thlen chuan ka beisei loh zetin Nu Ramtei a lo awm ve teh khiah a. Tlangvâl pakhat, ka rualpui tur awm vel hi a lo awm ve bawk a.




Nu Ramtei'n min rawn hmuh chuan a lo nui sâng a, lemchanna bawk a ni tih ka hai lo.



"Tuition in bâng tawh em ni?" a tih chuan ka lo aw ve mai a. Min biak ṭhat miau si chuan han biak chhiat ngawt thu a awm miau lo a ni.



Nunmawii nen pawh pangngai takin an inbia a. Kei chuan Rara-i khum bul ka va pan vat a, ngainat awm zet hian min lo nuih var var a. Drip an lo khai tawh a, a hmêl hmuh erawh a la nuam reng mai.




"Dawnga" Nu Ramtein a ti chiah chu ka hawi let nghal vut a. Tlangval lo awm ve hi Dawnga tihna maw !




Ka melh nghal run a, a ni chuan Nu Ramtei thusawi chu a lo ngaithla daih thung a. Ka inhum ruh nghal ṭeuh mai.




Nu Ramtei chuan "Motor lo zuk la chhuak la, kan haw dawn nia. In kan hun a tawp ṭep tawh sia, ka lo chhuk ve vat ang" a ti zung zung a.




Dawnga rawn hawi rual chuan kan mit a intawng nghal siah a. Tham loh hmel fe hian min melh a, keiin mitmeng tur khuiin ka lo melh a. Nu Ramtei leh Nunmawii te chu an lo inbe leh daih tawh thung.




Rara-in ka kutah a rawn chelh a, "Au Hriatpui" zawitê hian a ti a. Ka inseh ruh nghal ṭeuh mai. Va pan lawk a hnek nghal pawp lo tur chuan ka insum hram hram ani. Chawplehchilhin ka thinrim nghal em em mai ani.




A chhuah hma chuan "Rara, lo dam vat rawh aw" a ti hram a. A mitmeng mawlh mai chu ka hua a ni tawp mai. Rara-i a melh dan ringawt chuan ka pawi a sawi nasa takzet ani.




Cabin aṭang chuan a chhuak zui nghal a, chuti chu ni lo se ka khawih hman mai thei a ni.



Reilotê hnuah Nu Ramtei pawh haw turin a intintuah ve ta nghal a. "Pawisa chungchangah harsatna a awm chuan min lo hrilh dawn nia. Ka fanu ve tho ani a, a in enkawlna senso chu ka tum ve tur alawm. Ka bula a awm laiin a hrisel em em a, hetiang tur hian engtin nge maw an enkawl ni?" a ti a. A thusawi tir lam chu dawnsawn hrehawm tak ni lo mah se a tâwp lam chuan mi a khei fak mai.





Mahse Rara-i pawh chuan a chhang thiam ve reng reng a. "Taksa hrehawm mah se ka ni te bulah hian ka rilru a hahdam a. Taksa damna ai chuan rilru dam na a pawimawh zawk. Pawisa lamah chuan harsatna kan nei lovang, ka pu in min hnutchhiah hnem alawm" a lo ti ve salh a. A nui lui sak bawk a. A nu tan chuan a ngeiawm duh ve viau ang.




Nu Ramtei pawhin chhan zui vak ngaihna a hrelo aniang a melh nghek ringawt a. "Ngaihtuahna âw ka lah hi i hrethiam duh der silo" a ti leh ta tho. Tu ber nge dem tur pawh ka hre tawh lo. An ṭha hlei thei rih lo ni berin ka hria.




Nu Ramtei chu a chhuak zui nghal a, Nunmawii leh Rara-i te chuan thaw huai hmel an pu. Keima lamah chuan Rara-i ngaihsakna tak tak nei lo pawh ni se a lo kal ve hrim hrim kha lâwmawm lamah ka ngaih pui tawp.




In kan hun a zawh thleng ṭhakin ka awm ve ta reng a. Rara-i lah chu rin ai takin a ṭha phian mai a. Ngaih ṭha deuh chuan ka haw san a.




Ka haw hnu chuan ka nu in chawei min lo siam sak nghal zung zung a. Rara-i chanchin te chu min zawt a, ka hrilh ve mawlh mawlh hlawm a. An lainat hmêl kher mai.




Ka pa chuan "Pathian zara dam chuan naktuk lamah chhûngkua in kan va tlawh ve dawn nia. Eng em em ti thei lo mah ila kan va thlamuan ve thei mahna" a ti a. Kan lo pawm pui tlâng khawp mai.





Zanriah ka ei kham hnu rei vak lovah Nunmawii hnen aṭangin phone call ka dawng a. Rara-i chu ka haw dâwn a ṭha viau si kha a lo buai zui vak mai a. A lu a hai bakah a zanriah ei zawng zawng a lo luak chhuak vek hi a lo nia.



Nunmawii chuan "Tunah chuan drip pangngai an khai bakah khan taksa chakna an khai tel a, nachhawkna in an chiu bawk a. A muhil rih, a chau ang reng khawp mai" a rawn ti a.



Kan inbiak chhung zawng chuan khum aṭangin ka tho uaih a. Zan thil thu a ni a, va kal nghal rum rum chî a ni bawk si lo. Pathian hnênah ka ṭawngṭai a. Rilru thlamuang taka awm chu a har duh kher mai.




Zankhuain Rara-i nen chuan kan inbe thei lova, Nunmawii nen zawk chuan Rara-i chungchâng sawiin WhatsApp ah kan in text ta char char a.



"Chanchin lo sawi zel rawh aw" ti a ka va thawn chu a hmu zui tawh lo. Zanrei tak thleng ka meng a, Nunmawii chu ka ngaichâng reng a. Mahse ka message chu a ngai ngaiin a awm ta reng a. Ka ngaihtuahna a kal thui kher mai.



Zîng lamah chuan ka lo chhing sek a ni mai thei ka phone ri ral ral ah ka harh hlawl a. Caller ID ka en rual chuan thawh phan awm lek lovin ka harh nghal kawk mai.



"Rara, i ṭha em?" ka ti nghal hluai a, a lo nui hak hak a. "Ka ṭha tawh lutuk, ka tho nuam bawk sia. Nizan lamah min lo ngaihtuah lutuk tih U Nunmawiin min lo hrilh a, ka lo call nghal che anih hi" a rawn ti zung zung a. Ka lo thaw chhuak suai suai mai.




Pangngai takin kan inbe zui a. Vawiin lamah kan chhûngkuain kan tlawh tur thu te chu ka hrilh nghal luam a. A lo phur ngang mai.



Kan inbiak zawh chuan sana ka en a, dar 7 a lo ri ṭep tawh mai. Ka tho chhuak zui nghal a.



Tukṭhuan ei lai chuan nizan lama Rara-i awm dan te chu ka chhungte ka hrilh ve luam a. "Chuvang ani maw ka message pawh kha a hmuh theih loh" Vantei chuan a lo ti ve hliai a.



Tukṭhuan ei kham chuan tih tur pawimawh a neih avangin ka pa chu a chhuak zui nghal a, a tih tur ang ang te a ti hmasa tê tê ang a. Chumi zawh lamah chuan chhûngkuain damdawiin lamah kan kal ang.




Vantei te chu vawiin an châwl a, ka nu plants tifai a pui a. Keiin tlai lama naupang zirtir tur ka lo en lawk bawk a. Rara-i nen pawh kan in text reng a "Ka mut a chhuak, ka muhil lawk dawn" a ti a. A reh zui daih a, a muhil nghal mai anih ka ring.




Ka pa chu chawhma chhûng vekin a lo haw leh hman hlauh a. Damdawiin pan turin kan insiam zui nghal a. Chhun thil chu pawn lamah kan ei chhuak law law dawn anih hmêl.




Dar 1 rik hma hret chuan in kan chhuahsan a. Tuition pek tlang nghal ka duh dawn avangin car a chuang ve lovin ka bike ka keng a. Keiin hma ka hruai a, ka chhungte chuan car in min lo zui bawk a.




Damdawiin bula restaurant ah chuan kan inhnawh puar hmasa tê tê a. Ka nu chuan a thei tui siam bakah thei chi hrang hrang a lei a, Rara-i tan a ken sak a. Vantei'n pangpar a keng bawk a "Rara-i pangpar ngainat ber ania" tiin nihawi pâr tak ngei mai a lei sak kha ania. Ka tih tur ni zawk awm tak a ni.




Anni chu kan inhriat hmaa lo inhre tawh an ni a, an thil ngainat zawngte pawh an inhriat sak hnem viau in ka ring. Ka lo hre lo chu zialo ka ti ve reng. A dawt lehah chuan keimah ngeiin ken sak ve ka tum bur tawh.




Damdawiin kan han thlen chuan Nu Nemtein a lo awmpui a, Nunmawii chu ka hmu mai lo. A haw ve lawk anih ka ring.




Rara-i pawhin hmelhmuh nuam deuh maiin min lo chhâwn a. Kan thil ken sak ang ang te chu ka nu in a pe a. Nu Nemtei nen chuan an rem fel zung zung a.



"In lo keng tam lutuk anih hi a" Nu Nemtei chuan a ti hliai reng a. Ka nu lah chu a lo nui mai a.




Vantei'n pangpar a pek rual chuan Rara-i chu a lo phûl deuh hlut hi a ni ber mai. "Awii...a nuam e, min ti hahdam" a lo ti hluai a. Vantei nen chuan an inkuah vang vang a.



A pangpar dawn chu a mutna bulah a dah nghal a. A khi var var reng mai.



"Eng nge i an tawh a Rara?" ka pa chuan a lo ti dam thlup a. "Damlo ang pawhin ka inngai lo, ka dam lutuk a "Rara-i chuan a lo ti var a. A chhanna avâng chuan kan nui ham ham hlawm mai.



Nu Nemtei chu chanchin chiang zawk ka zawt a, "Tukinah khan Doctor a rawn kal a, a sawi kalhmangah a BP pawh a normal chho tawh a. Zaninah treatment a lak theih hmel. Nizan lama a luhai leh luak kha chu hlauhthâwn awm lutuk anih loh thu a sawi a. Pathian zarah tluang deuhin hun kan hmang thei turah ngai ang" a lo ti zung zung a.




Vantei leh Rara-i te chu an inkawm nghal char char a. Puitling deuh hovin Rara-i natna chungchang chu kan sawi thung a. An ṭhian dun chuan kan titi chu min rawn ngaihsak vak hmel loh.




Ka pa chuan "Kan ṭawngṭai pui âwl lova, treatment te han la se Pathian zarah a ṭha chho ve zel mai ang" a ti a.



Darkar khat vel hnuah ka chhûngte chu haw turin an intintuah ta a. Rara-i chuan lawmthu a sawi mawlh mawlh a. Ka nu chuan "Damdawiin aṭanga i chhuah veleh chaw i lo ei dawn nia" a ti a. Rara-i pawh a lo bu nghauh nghauh mai.



Tuition ka pek hma thleng awm ka tum avangin ka chhûngte chu motor dahna thleng ka thlah a. Beisei ai taka Rara-i a lo ṭhat avang chuan an lawm ve khawp mai. Kei tak pawh chu ka lawm, beiseina tam tak ka neih belh bawk.



_______*______*______*______


Show post links
Top

[Ngaia]

AIZIAL
By CVL Awmpuii



Chapter 28




Ka chhungte ka thlah liam hnu chuan Damdawiin lamah ka lêt leh a. Rara-i cabin a ka luh rual chuan Nu Nêmi'n min lo be nghal zung zung a.




"Hriatpui, i la awm hman tho chuan damdawi leh mamawh ilo vel lei turin dawrah ka zuk chhuk lawk dawn a mawnle ka tia. Chumi chhûng chu Rara-i hi lo awmpui lawk mai ta che" a lo ti zung zung a.



I he lovin ka lo aw ve mai bawk a. Chutah Nu Nêmi chu a chhuak zui nghal a. Rara-i nen kan pahnih chauha hun thâwl kan nei tur chu ka lawm ang reng hle a.




A mutna bula ka va kal lai chuan ner nang hian min lo melh a. Thil tih sual nei te pawh ka ang alawm le.



"Tinge?" nui vur vur chung chuan ka ti a "I zei lo ve eee" uar zet hian a lo ti a. Ka hnar tuai zeuh chung chuan ka mit ka kan uk a. A sawi awmzia ka hrethiam tlat lo a ni.



Chutah Rara-i chuan a chal dawm vang vang chungin a lu a thing deuh mat mat a. "I zeilo emai a" a lo ti leh a.




A thusawi awmzia ka la hrethiam chuang lo, "Sawi chiang la" ka tih chuan a chet hlak a.



A awmdan chuan min tih hrilhai viau rualin ka nuih a ti za reuh khawp mai.



"K-Drama velah te chuan an bialnu te dam lo an kanin pangpar te an inpe ṭhin a, nang chuan engmah pawh min lo ken lova" a ti a, a tum zui bar a.



Ka lo nui nghal huk a, a la lungawi loh hmel em em mai lehnghâl a.



"I va ho e aw" ka tih chuan a lo ṭeu nghal hlar a "A lo nih tak chu" a ti hmak mai. A mu tau nghal sawk a, drip an la khai a, a duh ang takin a la insawh tau thei lo zawk mai mai a ni.



Nui hawk hawk chungin ka awm hnaih zual sauh a "Hmêlṭha Rara" ka ti dut dut a, lehlam min hau tauh san hmak mai.



A dara chelh pah chuan "Vantei'n i pangpar duh deuh a lo ken tho che hi" ka tih chuan a rawn hawi nghal a. Rum zet hian min melh a "Vantei chu ka bialpa ania mi? Ka ṭhiannu alawm, ani mahin min lo ken sak nachang a hriat te chuan nachang hre ve tur i nia. A lei dawn te khan 'Keiman ka lo lei ang, ka pe ang' te ti ve ta che. I zei lo emai" a ti tan tan a.




A awmdan chuan ka nuih a ti za telh telh mai. Ka laka a titau vel chu ka lâwm phian lawi a. Ka nui vur vur reng a,ani lah a thinrim bawk si.



Drip an khai lohna lam a kut chu ka chelh a, lak sawn a tum a. Ka lo chelh nghet tlat thung a.



"Ka lo kal leh hunah chuan ka lo ken ziah tawh ang che" ka ti dam thluam a, a lung a la awi hmel chuang lo.



"Ka sawi hnuah chiah tih i tum a, engmah a ngai lo. Ka lâwm tawh chuang lovang" a ti hrâm a. A lungawi hle ni ngei tur a ni.




Kan ngawi ta reng a, a lu chu leh lam hawiin a la thle tlat a. Drip chu khai lo sela chuan a taksa pumin min hnungchhawn duh ang ka ring. Drip an khai avangin a duh ang takin a inla hrang theilo zawk a.




A kut chu nghet zetin ka chelh a, ka fawp zui vang vang bawk a.



"Min tauh san bur bur tawh lo la, i ni pawh a lo let leh ṭep tawh ang. Hun thâwl kan nei khat bawk si, tun hun reilotê pawh hi a uiawm ania. Tuition ka pek a hun leh ṭep tawh a, i tih tauh laia kal ka duh lo. Lungawi tawh rawh, i hmelṭhat em kha. Hmêlṭha deuh ti tau peih deuh nih i duh em ni?" ka ti duah a.




Naupanchhiatna lai deuh a la neih avang hian amah cho chhuak zawng a ṭawng te, bâwl deuh titih a chhawn chhaih te a la ngai ṭhin a. Ka hlim pui letling phian ṭhin.




"I zeilo emai a" a la ti bai bai a, ka lo nui nghawr dat a. "Ka zei tawh dawn alawm" nuihza insum deuh hian ka ti a.



"Le...lo hawi tawh rawh le" ka tih chuan zawi muangin a lo hawi ve ta nge nge a. Chiang zetin kan inmelh a. A hmel chu ka ngaihbel nge pawh ka hrelo. A tla ve duak maiin ka hria.




A hmaiah chuan dimte in ka chûl hauh hauh a, "Hmelṭha lutuk nu" ka tih chuan lei a lo chhuah zeuh a, ka nui leh hawk tawh.



"I zâm em?" thutak zeta ka tih leh takah chuan a lo thaw chhuak halh a. Mahse nui var var chung hian a lu a lo thing a. "Engmah ka hlau lo" a lo ti nghet charh a.



A treatment lak hun a thleng ṭep tawh a, zâm hmel pawh a la pu lo tak tak. A inthup nge pawh ka hrethiam tawh lo. Mahse hmeichhe huaisen tak a ni a, a hmachhawn ngam khawp ang.



"Engmah ngaihtuah hah lo la, kan ṭawngṭai pui vek che a. Thil tam tak i lo paltlang tawh a, tun ami pawh hi i paltlang leh em em ang. I dam ṭhat veleh kan innei nghal hmak dawn nia" ka ti dap dap a.




Ka rilru tak tak sawi ka ni, a hma kha chuan ka hmanhmawh em em lova. Mahse tunah chuan inneih vat ka duh tawh.




Rara-i chu a lo nui var var a, ka kut chu a biangin a lo nawr let ve vang vang a "I tân ka dam khawchhuak ang" a lo ti ve sap a. A hmela tum ruhna te chu ka hmuh hmaih lo kher mai.



Nu Nêmi lo let leh hnu rei vak lovah Tuition pe tur chuan ka kalsan ve ta nghal a. Ka haw hmaa ka tlawh kawi leh tur thu ka sawi nghal bawk a. Min hnial lem lo.



Tuition ka pek lai te chuan sana ka bih sek a. Doctor sawi anga kan awm thei te anih chuan tlai lamah hian Radiation Therapy an ṭan tawh dawn a. Ka nan hman loh mawlh ka hlau a ni.




Dan ngai têin Tuition chu dar 5 velah kan bâng ta a. Hmanhmawh zetin damdawiin lamah ka vung nghal a. Mahse ka han thlen chuan Rara-i chu an lo nawr lut hman tawh a.



Nu Nêmi leh Nunmawii te'n min lo chhâwn a "Tinge min lo call loh?" ka tih chuan "I laklawh lai anih kan ring a. Chuloah Rara-i khan a phal tlat lova" an lo ti ve mai a.



"An luhna a rei tawh em?" ka tih chuan "Nichin lawk khan, chhete in i lo nang hman lo" Nu Nêmi zawk chuan a lo ti a.




Pâwnah chuan rilru ṭawngṭaina nen kan lo nghak ta reng a, minute 15 hnuah chuan an rawn nawr chhuak ta a. Kan lo inbuaipui vat a. Cabin lamah an nawr lut leh nghal a, Rara-i chu a chauh hmel khawp mai.




In kan hun a zo nghal mai si a, hreh deuh chungin ka haw a. Nunmawii bawkin a riahpui leh dawn a, "Chanchin min lo hrilh reng la aw" ka ti lawm lawm a. Min hrethiam khawp mai.




Ka haw veleh ka chhungte bulah chuan ka sawi ve nghal zung zung a. Chhûng inkhawmah ka pa in Rara-i tan a ṭawngṭai sak leh bawk a. Thawk khat chu a veng leh huai mai.




Ni nga chhûng tal tawp chu Damdawiin leh kan in ka kar tawn ve zak zak a. Rara-i pawhin a treatment lâk thawh khatna chu a paltlang tawh a. Khang ni nga chhung zawng khan mumal pawhin ka awm lo. Ka ngaihtuah em em reng a. Therapy an lak zan apiangin a lu a hai a, a chau nghulh reng a. Mahse Doctor te chuan thil nih dan tur an ti a, ngaih ṭha deuha awm turin min ti a. Mahse Rara-i na hmel hmuh chu hrehawm tak a ni.



A duhdan ang takin pangpar ka ken sak ta ziah a, a hnuah phei chuan amah zawkin min khap leh lawi a.




Kar thar kan chuangkai a, in lama in enkawl zawm turin an haw ta a. Damdawiin aṭanga a chhuah dawn ni chuan chhungkaw lam harsatna chhuanlamin naupangho pawh tuition ka chawlh pui tawp a. Rara-i damdawiin awm chhung khan buai chung chungin bet lo deuh khan tuition ka kalpui mawp mawp tho a. Ka inthiamlo duh bik lo.




Nu Nêmi te chuan ka beisei phak bakin an ngaihtuah a. Pa Lura pawhin fa ang takin a en ve in ka hria. Chawimawii erawh vawikhat pawh damdawiin lamah a lo lang ve lova. Mak ka ti hman viau a, mahse Nunmawii sawi kalhmangah hna thila ram dang a zin lai a ni âwm e. Pawi pawh ka ti em em hran lo. A awm lo chu Rara-i tan takte hian a hahdam thlak zawkin ka ring tlat.




Nu Ramtei chu vawikhat pawh a lo lang leh tawh lova. Rara-i pawh hian a phût buai lovin ka hria.




Tluang takin damdawiin aṭang chuan kan inla chhuak a. Rara-i chu dam ṭha taka a awm tâk phei chu ka hrelo. Zep loh chuan a therapy la hi a chauh pui ngawih ngawih zawkin ka hre tlat pek a. Zan lamah luhai leh luak chhuak a nei fo a. A khua a sik reng bawk a. A ngaih ṭhat thlak loh duh kher mai.




Mahse keini aia mi thiam Doctor te berin ngaih ṭhat lohna tur a awm lo an ti miau si a, tih ngaihna tak pawh ka hrelo.




Zantin ka lêng thla a, damdawiin aṭanga a chhuah zan phei chuan kan chhûngkua in kan lêng a. Ka pa in ṭawngṭaina a hmanpui thlap a. An thlamuanpui ve viau chuan ka hria.



Tunah chuan damdawiin aṭanga a chhuah aṭangin kar khat lai a liam veleh ta reng mai. A tira lu hai leh luak chhuak a neih ṭhin kha a reh ve tial tial a. Tunah chuan hmasâwnna kan hmu tam tawh zawk a, ka ngaih pawh a ṭha ve ta khawp mai.




College pawh pangngai takin a zawm veleh tawh a. Damdawi ei ṭha turin kan inchah mawlh mawlh reng a. Dam chhuah a tum bawk a, a zâwm ṭha ve khawp mai.



A natna hi natna enliam mai mai chi a ni lova, a ṭha reng emaw tih laiin a lo na leh a, a dam leh vat zel lawi a. Chutiang reng reng chuan hun a hmang chho ve a.



A in check up ni apiangin ka kalpui a, ka remchan loh chângin Nunmawii emaw Nu Nêmi'n an kal pui ṭhin a. Mahse vawi hnih thum bak a la ni lo.



Thla thum a liam leh chuan Rara-i pawh a pangngai chho ta viau a. Chutihrual chuan a natna in a la kian san lova. Ka ngaihtuah em em reng a, ka ṭawngṭai pui âwl lo bawk a. Dam ṭha vur ni lo mah se harsatna lian tham a nei tawh lova. Chu ringawt pawh chu thil lâwmawm tak a ni.



Zan khat chu an in, a pa te nena an awmna ṭhin a kalpuiah sâwm tak têin min sâwm a. "Ka nu va tlawh ang" a ti tlat pek a.



"I ni te hrilh hmasa ila" ka tih chuan lu a lo thing vat a. "Ka hruai chhuak lawk dawn ti la, chhuanlam min siam sak mai rawh. Kan in hlui tlawh an remti lova" a ti zawi sap a.



Chuti taka an in hluia a kal châk mai chu ka ngaih a ṭha lo hle mai a. Mahse a duh miau a, Nu Nêmi te hnenah chuan chhuanlam ka siam sak ta nge nge a. An in lam pan chuan kan inkhalh chhuak nghal a.



Kan va thlen chuan Nu Ramtei chu a lo awm ngei a, chokaah file pawimawh hmel tak tak khawihin a lo inchhawp hnawk rem rum a.



Kan va lang thut chu a lo hrilhai ve viau aniang a lo ka hau mai a. "Eng nge in lo tih dawn?" tiin Rara-i chu chiang zet hian a melh a. Rara-i lah chu a nui lui deuh sak a. "I dam ṭha em?" pangngai tak hian a ti a.




Nu Ramtei mak ti hmel chu hai theih pawh a nilo. Kei tak pawh chu Rara-i chezia chuan min tihrilhai a ni.



"Dam ṭha e" a lo ti ve mai a. Rara-i chu a ṭhu ta deuh deuh a, "Ka lo tlawh khât che sia ka lo kal mai mai" a ti a. Nu Ramtei hmel pawh a pangngai ta deuh e.


"I dam tawh em ni?" a ti veleh a, Rara-i chu a lo bu nghauh nghauh a. "Ka dam lo tak tak ngai hlei nem, ka dam lutuk" a lo ti var a.



Nu Ramtei chuan min rawn melh zawk a "Lo ṭhu ru, thingpui ka'n lum ange" a ti mawihnai ve a. A tho zui nghal a, Rara-i bulah chuan ka ṭhu thla ve a. Eng emaw ngaihtuah hmel hi a pu a, a mitmeng chu a thûk raih mai. Ka hrethiam pha hauh lo.




Nu Ramtei'n thingpui a chhuan dawn lai chuan "Nu" a ti hluai a. Nu Ramtei chu a lo hawi rang kher mai. "Thingpui chu lum duh suh, kan haw leh nghal zawk ang. Kan lo tlawh mai mai che, i ṭha tih kan hria a. A ṭha mai" a lo ti leh zung zung a.




A awmdân chuan ka ngaih a ti ṭha lo telh telh mai.



A rawn tho chhuak zui nghal a. "Thingpui tal chu in ula" Nu Ramtei chuan a lo ti hliai a. Mahse Rara-i chuan a lo hnial leh vat a "I buai hmel bawk si, i thil tih lai kha lo tih zawm leh tawh zawk rawh. Kan kal phawt mai ang" a ti a.



"Au Hriatpui " a rawn ti a, ka tho zui ve nghal a. Ṭha deuhin kan inmangṭha a. Bike bula kan din hnu chuan chîk zetin Rara-i chu ka melh a, ngaih ṭha hliah hliah hmêl hi a pu.




"I awmdan hi ka ngaih i ti ṭha lo" ka tih chuan a lo nui mai a. "Rara" ka tih leh takah chuan "Ka tlawh châk thut vang mai mai, chhan dang a awm lo. Ka chunga a lo chêt tawh dan chu engpawh nise min enkawl seilian tu a nihna a bo lova. Ka ngaihtuah ve lo thei lo alawm" a lo ti malh malh a. Ka nui ta suk a.




Henu mizia hi ka hrethiam thei ngai dawn lo chu anih hi!



Bike-a kan inphurh hnu chu a tu amah kan ṭawng tawh lova. Ngawi rengin ka kâwngah min kuah a, ka hnungah a bei chial a. Muangchangin ka tlan pui a. A awmdan chu a hahdam hmel viau mai.



Nu Nêmi te in ah chuan ka thlah leh a. Keipawh reilotê ka ṭhut khawmuan hnuah ka haw zui nghal a. Phone kaltlangin kan inbiak zawm leh zat a. Tunah chuan kan ṭha rih viau mai.



Zân lamah hian luhai thut châng a nei a, a khua a sik veleh zeuh ṭhin bawk a. Mahse Nu Nêmi leh Nunmawii te an rin tlak emai a, ngaih ṭha lo deuh chuan ka awm tawh lo.



Zirtawpni tlaiah chuan kan ina zanriah ei turin ka hruai haw a. Damdawiin aṭanga a chhuah tirh khan ka chhungte'n an sâwm daih tawh a. Mahse hun remchang a awm thei mai lova. Thla li dawn hnuah a rawn ei ve thei dawn chauh a. A ṭha vek mai a.



Ka nu leh Vantei te eirawngbawl chu a pui ve a. Ka chhungte chuan an dim dawih em em mai a. Mahse amah ber hi a ngaih a sam a, a che zung zung a. An dang seng lo a ni ber. A ṭawng pah mawlh mawlh bawk a, kan chhungkua hi chu min tihlim chiang a ni.




Zanriah chu tlai lutuk lovah kan ei a, ka ei hnem khawp mai. Rara-i pawhin a ei ve ṭeuh a, ka lawm ru veng veng mai.



Dar 7 velah chuan haw a duh tawh thû a sawi a. "A la hma" ka tih chuan "Hma mah se ka lo leng rei tawh emai" a ti tlat a.



Ka nu chuan a lo hrethiam khawp mai. "Nia, haw tawh pawh a pawilo, i chhungte pawhin an ngaihtuah tawh ang che. In enkawl ṭha la aw, i rawn leng ziah dawn nia" a lo ti zung zung a.




Vantei nen chuan zirlai chungchang an sawi leh zet a. Dar 7 leh a chanve velah kan inphur chhuak leh ta a.



An inkawt kan thlen rual chuan "I lo lêng dawn em?" a ti a, "Lo len i phal em?" ka tih chuan a lo ner nawng a. Nui hawk chungin a hnarah chuan ka piai nghal vak a, a lo ṭeu hlar mai.



"Min tiduhdah ṭhin viau suh" a lo ti hlar a, "Hmelṭha Rara..." nui suk suk chunga ka tih chuan rum zet hian min melh a. Thei leh thei lovin ka chhip sam buk laiah chuan a rawn ṭham a. "I naupangchhia thei lutuk" min han ti ve ngei a. Ka nuih a va han ti za tak.




"Sorry..." nâ tih hmêl deuh hian ka ti a, ka nui zui hawk hawk a. Ani pawh a nui veleh tho.



Min thlah hnu chuan a kawngah chelhin ka lamah ka hnuk hnai a, nui var var chungin min lo melh a.



Kan awmna lai hi a thim mai bakah vei vak an awm vak lova. Tu mitmei mah ven a ngai hran lo.



"Min fawp dawn em?" ka tih chuan a hmui a lo pet zeuh a. "Mawh...min fâwp dawn em?" ka tih leh chuan a lo nui hak hak a.




Chiang zetin hnai fahranah kan inmelh a. A sam tawi mat te chu a mawipui hliah hliah a, a hmelṭha zet chu a tilang fiah zual kher mai. Hetiang tak hian amahah ka luangliam ang tih rin ngaihna ka hrelo.





Ka hmuiah chuan dingdihlip ak akin a rawn chuk zeuh a, a rawn nui lum hak bawk a. Ka lo hip lut chiang kher mai.



"Min thlah tawh rawh le" a tih chuan ka lo ner nawk a "In chuk ringawt te chu a!" ka ti a. Ka titau âw chu a hai lo khawp ang. Ka lakah a pangchang em a, heti hian ka awm lui veleh zeuh ṭhin a. Nuam a ti ve reng tih ka hre tawh a, pawi ka ti hran lo.




"Kha bak bak" a tih rual chuan "A ho" ka lo ti hluk a, a nui hak a. Chutah a hmui chu a rawn dawh rem ta sat sat a. Ka hmui zawnah chuan a rawn ti pawrh tarh a, a va han lâwmawm mai mai tak.




Fâwp ta mai lo chuan ka kut lehlamin ka tuai zeuh a, a landan duhawm lutuk chuan ka ti ril a ṭham za chuai thei nia mawle !



A kawnga ka chelh leh rual chuan ka fâwp zui nghal a, min lo chhanglet ve vat a. Kan duhthawh dun kher mai. Kan inthlah meuh chuan kan thaw chhuak dun ham ham mai.




Kan chal chu a la insi reng a, ṭawng chhuah tuma a ang ziau tawh chu a biang tawn tawna chelhin ka fâwp zui leh tawn tawn a. Ka duhthawh lutuk a, min chhan ngaihna pawh a hrelo hialin ka hria.




Ka inlakhran rual chuan "Ka hmangaih che" ka ti sup a. A chalah chuan ka fâwp zui leh vang vang a. "Keipawn ka hmangaih che" a lo ti ve sep a.



"Ka nupui ni tawh mai la" ka tih chuan a lo nui leh tawp a. Tunlai chu inneih puiah ka sawm zan tin mai.



"Hei aia ka dam leh zual hunah" a ti mai zel a, tunah pawh chutiang tho chuan min chhâng leh a.




Châwl hahdam zawk se ka duh avangin ka lêng lut ta lo law law a. Ka haw veleh nghal a, phone kaltlangin kan inbe zui a. Dar 9 velah chuan mu turin kan inmangṭha ta a.




A ni chu a mu zui nghal mai a, kei erawh Laptop phawhin a natna chungchang bawk chu ka en kual leh a.




Brain Tumor hi kan hriatthiam theih dan tur chuan thluak cancer a ni deuh ber a. Natna dam thei tawh lo anga ngaih a ni a. A natna hi a ran bakah thihpui tawp tham a ni a. Mahse hriatchhuah hma a, in enkawl hma chuan damna chance a awm tih a ni a.



A natna lanchhuah dan tlangpui chu lu hai reng, khawsik leh luak chhuak. Khawhmuh fiah lo, taksa chau, sam tla reng te a ni tlangpui a.




A natna veitu kha a taksa a chak ṭhat deuh chuan Radiation therapy lak hi treatment ṭha tak a ni a. Chu chuan a natna a taksa pêng danga kai darh tur kha a veng a. Tin, a natna neih sa pawh kha a that ve thei a ni.




Mahse Radiation Therapy lak hi a risky ve ang reng a, chhiat pui tlat te pawh an awm ve bawk.



First treatment chu ni nga chhung an la tlangpui a. Radiation Therapy pawh hian nghawng a nei veleh zel a. Brain Tumor lan chhuah dan ang tho kha a ni deuh mai.




Rara-i natna avang hian chutiangte chu ka en kual nasa a. A enkawl dan te pawh ka en nasa a. Ka theihtâwp in ka hrilh hria a, ka buaipui theihna apiangah ka buaipui bawk. Dam khaw chhuah tir chu ka tum bur a ni.




Zan khat chu Nunmawii hnen atangin message ka dawng teh nawlh a. "Hriatpui, tunlai kan chhungkaw boruak hi Rara-i tan a ṭha miah lo ania" a rawn ti teh tawp a. Ka bangbo hle nghe nghe.



"Eng nge i sawi awmzia?" ka tih chuan "I buai em? Ka lo call mai dawn?" a rawn ti nghal a. Rara-i chungchâng anih avangin ka lo aw ve mai bawk a.




Tichuan a thu rawn sawi awmzia chu a sawi ta alawm. Eng dang ni lovin sum leh pai, in leh lo chungchang bawk a ni.



Nunmawii chuan heti hian min hrilh a "Ka nu leh Pi Ramtei hi ka pu rokhawm chungchangah tun hnai tê hian an inbak kaih nasa khawp mai. Ka tan tak pawh hian sawi nuam a ni lova, tun hmaa Rara-i laka ka lo awmdan ṭhin kha chu engpawh nise tunah hian ka ngaihtuah ve takzet a ni tih min hriat sak la ka duh. Chuvanga kan chhungkaw buaina pawh lo hrilh che ka ni. Ka nu hian Rara-i hi sum vang chauha ngaihsak a ni chu ka ti duh bik lova, mahse sum hi a bul pakhat chu a ni tlat a ni. Nu Ramtei bula Rara-i a awm reng chuan ka pu rosum kha a chên sak a hlau a, a phal lova. Chuvanga Rara-i pawh hi ngaihsak khu chûk ta niin ka hria. Pi Ramtei lah a lo â bik si lova. Sum duh in tiin an inhau reng a, mahse tlang taka sawi chuan an khawsak dan hi sum vang a ni ve ve. Chutah chuan Rara-i inrawlh ve lo mah se ka pu khan rokhawm vek tura a tih kha a ni miau a. A tuar ber tur chu amah tho hi a ni" a rawn ti duah a.




A thusawi chuan min ti harh kawk kawk mai. "I nu chu Rara-i chungah a ṭha tawh viau in ka hria asin" ka ti hram a. Mahse Nunmawii chuan "Ka nu mah nise tlang takin ka sawi ang, beisei a nei tlat alawm. Rara-i hi a mâwl bik lova, ka nu in ka pu sum chungchang a sawi pui reng danah te hian a man thiam ve vek tawh ang. A hrelo der zawk mai maiin ka hria. Dik tak chuan Rara-i hian ka pu rokhawm hi a duh ber a ni bik lo tih ka hria. Mahse a buaina tak tur chu tu kutah pawh dah se buaina a chhuak dawn tho tho a ni" a rawn ti leh duah a.




Thil nih dan leh a rin dan te chu a rawn sawi zung zung a. Chutiang min hrilh teh thutte chu mak ka ti a. Ka ngaihtuah chian chuan thil ni thei deuh tur a ni.



Kan inbiakna ka tih tâwp hma chuan a nu te unau chanchin a rawn sawi leh hram a. "Nutei te pahnih pawh hian ka pu ro an chuh ve tho nia mawle. Mahse anni hi chu mifing kher khiap an ni a. Ka nu leh Pi Ramtei te hi a langin an inchinfel tir ang a. Tu emaw zawk zawkin chang ta se an rawn lang ve chiah ang. Ka rawn hrilh chhan che pawh hi ka zêp theih tawh loh bakah thil pawi lian tham a thlen hman ka hlau si a. Rara-i tan hian kawng dap sak rawh" a rawn ti leh a. A ngaihtuah thui ka lo ti khawp mai.




Kan inbiak zawh chuan ka thaw chhuak zui ham ham a. Rara-i humhim theih dan tur leh rilru thlamuang taka a awm theih dan tur ringawt ka ngaihtuah a.



Ka ngaihtuahna ah lah chuan kawng pakhat chiah a la awm zui a. Chu chu nupuia neih mai a ni.



Ka kum zat ka ngaihtuah a, kum 30 ka kai ve ṭêp tawh a. Nupui neih hun chu a ni ve reng tawh tho a. Mahse Rara-i ber hi a inpeih ang em tih a pawimawh ta a ni.



Eng pawh nise inneih chungchâng chu khunkhan taka titipui ka tum ta a. Min la hnar pawh ni se ka nawr ve deuh hlek tawh mai ang.



Lehkha zir a chhuanlam anih pawhin a duh chen chen kan inneih hnu ah a zir mai ang a. Tuition naupang an pun belh ve zel bawk a. Thla khatah sing chuang fe ka la lut ve tawh tho bawk a. Zahpuiawm khawpa hlawh chhia ka ni tawh bik lova. Ka châwm zo em em ang.




A tuk zanah chuan ka zuk lêng ta nghal a. An ina sawi pui chi niin ka hrelo a "Khawiah emaw kal lawk ang aw" ka tih chuan a lo aw ve mai a. Nu Nêmi leh Pa Lura te chu ka dil thlap a. An lo phal khawp mai.



A vawikhat nan Rara-i chu kan Biakinah ka hruai a. A hrilhai lutuk tih a hmelah chuan a chiang reng mai.



"Eng nge kan tih dawn?" a tih chuan "Ṭawngṭai lawk ang" ka lo ti ṭha ve mai a. A ngaih a ṭhat hmel ta khawp mai.



Biakin chhûngah chuan kan inzui lût ta a. Keyboard hnungah ṭhuin a kut chu nghet zetin ka hûm sak a.



Ṭawngṭai pui ngei ka duh si a, mahse ka zâm ru tlat a. Ka awmdan a dik thei meuh lo. Mahse Pathian rinchhana hruai lut ve rawih ka ni a. Ka pa thu min rawn fo a ni bawk a. Ka intipaukhauh lui a.




"Ṭawngṭai ang aw" ka ti leh sup a, mit a lo chhing ve vat a. Kan pahnih chauh hriat tham lek hian ka ṭawngṭai zui nghal a.



"Lalpa, natna khirh tak kan tâwk a, i hming avângin pawm thiam dan kan zir zel a. Harsatna kan chungah a lo thleng ṭhin a. Min chin fel sak zel dawn tih ring chungin i lakah kan vui duh lova. Hlimna kan chungah a lo thleng a, i malsawmna a ni tih kan hai lo. Kawng engkimah nangmah hre reng chunga ke pen dan min zirtir avangin lawmthu kan hrilh che a. I awm ngei a ni tih kan hriat hian kan thla a muang em em a" tiin ka ṭawngṭai hmasa a.




Rara-i lo insut feih ri ka hriat zawm zat a. Ka thinlung a khawih a, chunglam beng a thleng nghalin ka ring bawk.



Rara-i natna chungchang te chu Pathian hnenah ka thlen zui a. Damna ka dil sak a, a chungah engpawh lo thleng se pawm thiam dan kan thiam theih nan ka dil a. Chutihrual chuan a dam khawchhuah ngei theih nan ka la dil fan a.



Kan pahnih inkar chungchang te chu Pathian hnenah ka thlen bawk a. Thianghlim taka kan inkawp zel theih nan leh kan inneih ngei theih nan ka dil bawk a. Ka ṭawngṭai tâwp lamah phei chuan Rara-i chu a lo ṭap khur dar dar tawh mai.




Biakin pawnah chuan ngawi rengin kan ṭhu dun a. Ka âwm ah ka kuah bet a, a la insut feih feih a.



A hnungah chuan chulin a samah ka fawp zeuh zeuh bawk a. A lungchhe ve hle ni tur a ni.



"Au Hriatpui..." a rawn ti a, ṭap aw ni tawh lo mah se a ṭah a la chhuah hmel tho mai.



"I pâ ber" a rawn ti hlawl a, kan awmdan leh a thusawi inpersan lutuk avang chuan ka lo nui hawk a. A ni pawh a ṭah nuih hak a.



"Mipa i nih hi" a ti leh a, nghet zetin min kuah a, "Ka va pa awm ve aw" ka lo ti uang a.



A ṭawngkam mawlmang zet chuan ka nuih a va han ti za tak.



"Aaa...zanin tluka ka luanliam hi ka la hrelo, ka duh emai che" a rawn ti leh hlawl a. Ka lo nui hawk hawk a.



"Engvang ber chuan maw?" ka tih chuan "A hmeichhe hmangaih Biakin a hruai a, ṭawngṭai pui thei mipa hi pâ ka ti a, ka ngaisang " uar zet hian a lo ti a.



Tunah chuan ka hrethiam ta chiah a, Biakina ka hruai leh ka ṭawngṭai pui chuan a thinlungah hna a lo thawk ngang anih hmêl.




Tlêma kan awmdan a pangngai deuh hnu chuan inneih chungchâng chu ka sawipui ta a. A chhanna ka ngaichâng nghal ran a. A zam awm ve duh khawp mai.



__________*__________*__________*_________


Show post links
Top

[Ngaia]

AIZIAL
By CVL Awmpuii



Chapter 29



"Rara, nawr luih che hi ka duh ngai miah lova. Mahse hetianga ka tih mai loh chuan i rilru i siam fel theih loh ka hlau a ni. Ka rilru a hmanhmawh tawh a. I hriselna chungchâng chu chhuanlam hauh lo la ka duh bawk. Engkim sawi lo mah la ka hre vek a, ka ngaihtuah che a, vênhim che ka duh. Chutiang tur chuan ka bulah i awm char char a ngai a ni" ka ti dam thlap a.




Ka thusawi chu hrethiam se, ka rawtna chu pawm mai se ka ti khawp mai. A ngawi deuh vang vang a, min melh kiau bawk a. A ngaihtuah tur awm ang chu ka hrethiam lo.




"Min chhâng la" ka tih leh takah chuan a âw a rawn thian kharh kharh a. "I duh dan chu ka hrethiam lutuk a. Mahse Au Hriatpui..." a ti a, a châwl deuh dat a. Min hnial dawn tih ka hriat rual chuan ka hnual nghal rawih mai.




"Ka la inpeih lo, chuloah a la hma ka ti" a rawn ti ta nge nge a. Ka lo thaw chhuak hulh a.




"A hun tawh zawk viau in ka hria asin. In in aṭanga ka rawn hruai chhuah zan che aṭang tawh khan nupuia neih che ka duh bur tawh. Ka ngaichâng che a, i dinhmun te ka ngaihtuah in tur vak chi ah ka ngai lo che a. Chuvanga la sawi ṭhat pui lo mai chauh che chu ka nia. Mahse tunah chuan ka hmanhmawh tawh" ka lo ti duah a.




Sawi tur mai hre lo tih hriat zet hian a thaw chhuak halh a, a ṭawng dawn a, a ngawi leh daih lawi a.




"Min ring la, pumkhat ni ila, ka rualin ke pen tawh rawh" ka lo ti leh churh a. Ka nupui ni tur chuan a ngenin ka ngên a ni ber mai.



"Au Hriatpui, min hrethiam lo anih kha. I sawi ang ngawta awlsam a nilo. Ka tan hian a khirh khân lutuk asin" a lo ti chuai raih a.




A kutah chuan ka lo chelh vat a "Engmah ngaihtuah hah lovin min rinchhan tawp la, min nei rawh " tiin a kutah chuan ka fâwp vang vang a.




"Kan chhungkaw buaina hi a thûk lutuk asin" harsa tih hmel zet hian a rawn ṭawng chhuak a. Chiang zetin kan in melh a, a rilru na hmêl chu thup buai a tum tawh bîk lo niin a lang.




Ka âwmah chuan ka kuah nghal vang vang a. "Nunmawii hnen aṭangin engkim ka hre vek tawh. Chuvanga hmanhmawh zual em em chu ka nia lawm. Min nei la, chinfel dan kan ngaihtuah dawn nia" ka lo ti vat a.




Chutah Rara-i chu lo inlahrang nghalin mak tih hmel zet hian min rawn melh a, a ka hau mai.



"U Nunmawii maw!" a tih chuan ka lo bu nghut a, "Nizanah engkim min hrilh vek tawh. I pu ro i khawm vanga harsatna i tawh te pawh ka hre vek tawh. Tichuan, ka lakah i zêp bawk a" ka ti a. A lo thaw chhuak ham ham a.



"Ka zêp em em pawh a ni hran lo, thil sawi ṭul a ka ngaih loh vang zawk ania. Mahse tunah chuan a harsa telh telh mai. Phûl hluai ni si lova kan harsatna hi a inṭham ru tlat a. Awm ngaihna hlawl ka hrelo. Dik taka sawi chuan ka pu ro zawng zawng hi khâwm duhna thinlung ka pu lova. Ka pu min duhsakna leh hmangaihna erawh ka theihnghilh ngai lo, ka hre reng thung. Mahse he a ro sum in leh lo min hnutchhiah te hi ka tan chuan phurrit a ni. Eng tiang pawhin ti ila buaina a chhuak dawn tho tho a. Tu kutah pawh awm se ka pawiti lo. A châng chuan ka nî hminga dah vek a zalen hi ka duh ve ṭhin. Mahse ka ngaihtuah a, ka nu emaw ka nî te tu emaw ber hming pawh hian dah chhâwng ila hei aia buaina lian tham zawk hi a chhuak dawn. Tunah chuan a lang a pauvin tumah an ṭawng chhuak lo zawk a. Mahse nakinah chuan an la buai nuaih dawn. Entir nan zan khat mit chhin lo tawk ta thut ila, ro chungchânga an innghirngho na hian zual lam a pan dawn tih ka hria. Tuna ka inthiarfihlim loh chhan hi chhan ṭha tâwk tak a ni. Buaina lian tham zawk thleng thei pum pelh nan ka pu ro te hi ka hminga a awm reng a ngai tih ka hrechiang asin. Chuti lo chu kei zalên mah ila an buai telh telh dawn" a ti ta duah a.




Rilru buai hmêl zet hian a thaw chhuak zui ham ham a. An chhungkaw buaina pun lul tur bengdaih nan a theih ang tawkin a lo ṭang ve chu a ni a aw. Tunah chuan a rilru pawh ka hrethiam ta e.




Rara-i hian sawi dik loh pakhat mah a nei lo, a pu sum hi a duh bik lo tih ka hrechiang a. A chhûngte innghirngho na tur dan nan a la hum ve ṭang ṭang tih ka hrethiam tawh.




Duh chu nise a pu thil hnutchhiah zawng zawng hi tu emaw ber hnena hlan chhawngin a in ti zalên thei a. Hahdam takin a awm thei. Mahse an chhungkaw phurrit lutuk tur chu a lo phur lawk a ni.




A ngaihdan chu puitling ka ti em em a, a huaisen thlak ka ti hle bawk a ni.




"Min nei la, i chhûngte rilru hneh turin kan pahnihin kan bei dawn alawm. I harsatna te hi hrethiam lo ka ni lo a, ka hrethiam lutuk zawk ania. I pu rosum chungchang pawh tih dan kan ngaihtuah ang a. In chhûngkaw tana ṭha ber tur chu Pathianin min hriattir em em ang. Pumkhat ni ila khawvel hmachhawn dûn ang" ka ti leh hram a.




Za lo tih hriat zet hian a lo ṭhen sak a, "Au Hriatpui, reilotê tal min la nghak thei hram lo em ni? Ka hriselna chungchang chhuanlam lo turin min ti sa teh mah la ka chhuanlam lo thei lo. Bawrhsawm deuha pasal neih ngawt ka duh hlei nem. I tân ka dam dawn ka tih fo kha. Ka dam var hunah kan innei dawn nia. Chumi hma chu min lo nghak leh lawk thei anv em?" tiin ngen tak tê hian min ngên a.




A la inpeih lo chung nawr luih vak chu ka hreh leh ta zawk a. "Ka nghak ang che, mahse reilotê tak tak ni tawh rawh se" ka ti ve ta nge nge a.




Chutah hlim zet hian min lo kuah thak a, nghet deuhin ka lo kuah let ve nghal bawk a. A sam rimtui zetah chuan ka fâwp zui vang vang bawk a.



Nupuia neih chu duh tawh viau mah ila a remtihna te a ngai ve si a. A inpeih diam hun ka nghak leh phawt mai ang chu!



Kan haw leh meuh chuan dar 10 a lo ri ṭep tawh a. A nî te remtihna thlap a hruai chhuak ka ni bawk a. Ka hlauthâwng hran lo.



Ka mut hma chuan rilru tih tak zetin Rara-i tan ka ṭawngṭai leh a. Taksa damna bakah tawrhchhelna te ka dil sak a. A vanduaina te hi indawm kûn nan hmang duh sela dam khawchhuak tur a awm tawh pawhin ka ring lo. Mahse thil reng reng hi a eng zawngin a thlir thiam em em zel a. Ka tân tak pawh a hahdam thlak ve ṭhin.




Tlai khat chu Tlankimi message ka dawng nawlh mai a. Ka en nak chuan inneih sawmna hi a lo nia. Mak tak maiin ka thawveng huai anih chu.



Mahse a pasal tur chu ka hriat ngai a ni miah lova. Kan inṭhen hnu a a ngaihzawn zui tak kha a ni miah lo. Mak ka tih rualin ka lawmpui ti tawp tawh mai ang.




"Ka lawmpui che, lo kal ngei ka tum dawn nia" te chu ka va ti mawi hnai ve a. Ka ṭhiante hnen aṭangin message ka dawng indawt nghal zut a. Min rawn fiam hlut hlawm hi a ni ber mai.





An message te chu ka chhiar zung zung a, "I na ve det tho em?", "Ka tawrhpui lutuk che, stay strong", "Ṭha lêng dang tan a vul dawn ta", tih te a ni nuk hlawm a.




Video lungkuai deuh deuh te min rawn thawn tawk an awm bawk a. Ka gpay ah te chuan chêng khat te min rawn thun sak a "Râlna aw" te an rawn ti a. An va han nghal hlawm mai mai tak.




Ka engah mah a thawk pha der si lo. Min rawn fiam a, an rawn uang ah ka ngai ve mai a. Mahse a zahthlâk ve duh reng tho mai.




Kha chen kan lo inzui ve tawh a, mi te hmehbel rawn kha kan ni ve ṭhin a. Chutia pasal nei hmasa zawk tura a ṭang chu a tha nat thlak ve tho mai.



Mahse ka tan chuan Rara-i a awm a, Tlankimi te chu ka nunhlui a ni tawh a. Ka hmalam hunah engmah tih tur a neih tawh loh bakah ka tun hun hman hi a tibuai pha tawh lo.




Rara-i hnen aṭang pawhin message ka dawng a, Tlankimi te inneih sawmna card chu a rawn thawn a "I lo ṭap kerh kerh ange aw" a rawn ti a, mittui tling emoji a dah bakah lei chhuah vak emoji a rawn dah tel bawk a. A va han nghal mai mai tak.




"Nghal viau suh" ka tih chuan nui per chuaih emoji tam deuh hi a rawn thawn nghal a. Rei rial lovin ka call zui nghal a, a lo pick up rang kher mai.



"A dai hlen ta emaw ka lo ti hmana ka hmangaihna che" tih hla chu a rawn sa zui nghal zat a. "Nghal viau suh aw" ka tih hluk rual chuan a lo nui awr awr a.




"I na ve det em?" a rawn ti a, "I ho" ka tih rual chuan "Tak takin ka thinrim miah lovang, thudik takin min lo chhang" a rawn la ti deuh deuh a.



"Eng vangin nge ka nat ngawt ang a?" lungawi lo zet chuan ka lo ti bul hmuk a. A nuih lah chu a'n zat hmel mai mai khawp a.



"Awww, in lo in zui rei ve tawh sia, khiang a awi san dawn ta si che a. Tlemtê chuan i nat ve tho ka ring, kawchhûng che dawt chu a awm ve ang. Zêp duh suh, i la na anih kha" a rawn ti zung zung a.




"Engtin mah ka awm lo" ka lo ti awlsam thên a, rilru na ve ringawt tur anga min ngai chu ka duh lo ngang mai.



"Tlâwm ah i la laklawh mai mai anih kha, mipa ni mah la na ve thei alawm i nih. I rilru a nat chuan rawn sawi ve bawrh bawrh rawh. Zanin chu ka lo hnêm ang che" a rawn ti fel leh thên a.



"Ka rilru ang lo pui pui min puttîr tum ṭalh lo teh" ka lo ti hluk a. Chutah thutak zet hian "Au Hriatpui, zêp duh suh, a na ve thawkhat ang. Hmangaih tawh lo mah la hmangaih hmasa ber te hi chu theihnghilh an har an tih ṭhin hi ka hre ve alawm ka hrethiam lutuk che ania" a rawn ti leh zung zung a.




"Eng nge i tih a?" ka lo ti daih thung a. Ka sawi zui pui peih tawh lo. Kan sawi zawm zel anih chuan ka rilru ang lo pui min puttîr in a zeldin thu hmangin a titau leh ringawt dawn tih ka hrechiang em a ni. Heti hian sawi chhuak hmasa tu zawkah a ṭang a, a insawi thinrim leh ziah tlat a ni.




"Ka mu mai mai, ka be pah bawk che a" a rawn ti a. "Zanin lam i ṭha em?" ngaihtuah zeta ka tih leh chuan "Ka ṭha lutuk, ka hmêl pawh a ṭha" a lo ti leh vat a. A uang ve ṭhin ngawt mai.




Reife kan inbiak hnu chuan Tlankimi pasal neih tur chungchângah bawk min luh pui leh hram a.



"Hei vang hi ani chiang mai inneih puiah te khan min sâwm?" a rawn ti nang nang a. "A teuhlo mai" ka lo ti nghut a.



"Tlankimi pasal nei tur chu tlâwm thlak i tia, chêt hmasak i duh vang anih kha. I rilru a la luah ve deuh anih hmêl" a rawn ti leh a.




Ka ngaihtuah lâwk ang chiah khan thil a thleng leh ṭan tawh e. A aw aṭang chuan a lawm vak tawh lo tih lah a chiang reng mai si a.



"Kha, i rawn sawi hmasa a, min lungawi loh khum leh ringawt a" ka ti ta rêng a. "Min puh daih suh" a lo ti hlar a. A hahthlâk leh ṭan dawn e.



"Min puh daih zawk chu anih ber hi" ka tih chuan "Min hnial zel suh" a lo ti bak hlar a. Hmeichhe zaidam leh nunnem hi chu a va han ni lo ve chiang tak !




"Ka dah dawn ania, i in ang thinrim zual mai mai dawnin ka hria" ning zet hian ka ti a. "Dah suh, dah hlek suh" a lo ti leh lawi bawk si. Dawhtheih hi a van ngai ṭhin tak. Hmangaih hle lo ila chu kan inṭhen zing ve viau ang. Mahse a zûnin min phuar a, min zial â miau tawh a. A tel lova awm theilo chu keimah bawk hi ka ni.




"Rara" ka tih chuan a lo ngawi kar a, "Hmelṭha Rara..." nui suk chung chuan ka ti leh a. A lungawi loh lah hi a pe na ve thei bawk si a. Ka thlem zing malh malh ṭhin khawp mai.



"Vanrawngbawl ka hmangaih che, ka hmangaih ber che" ka tih leh rual chuan "Ka hmingpum a min ko kher lo khan min hmangaih thei" a lo ti vei hmak a. Ka lo nui nghawr dat tawh thung a.




"Hmelṭha Rara, ka hmangaih ber che" ka ti leh a, a lungawi leh vek tawh dawn tih ka hre nghal mai.



"Naktûkah Vantei ka lo haw rualpui ang a, cheng 7 in ka rawn râl ang che. Muttui " tih leh phone dah chu a rual a. A nui ri hak chu ka hre hman tho, a ngaih ṭhat thlak leh ta huai e.




A sawi ang tak takin a tûk tlaiah chuan an college bâng Vantei chu a rawn zui haw a. "Min lo hruai suh, Vantei nen kan lo haw ang" a tih vanga hruai lo ta kha ka nia.




Envelope hi a rawn thing ri tleng tleng a, a chhungah chuan eng nge awm hrilh kher ka ngai lo. Ka hrechiang lutuk tlat.




Ka nu eirawngbawlna bula ṭhut pah chuan ka lo melh run a, mitmeng chimawm zet hian min melh a.




Ka hmazawnah chuan en envelope chu a rawn dah a "I feel so sorry for you" tiin a ner zeuh a. Ka nu leh Vantei nuihza insum hmel te chuan min ti thinur hlur mai.



"Rara" ka ti hluk a, min la nuih sâwng zui a. A che zia nghal lutuk chu tuai vir pawp mai ka châk a ni.



Ka melh run run a, envelope chu min mitmei zeuhin "La rawh, ralna sum an hnar ngai lo" pawi sawi loh hmêl zet hian a lo ti a. Envelope chu tum bur chungin ka la a, ka hawn nak chuan cheng 2 thir pathum leh chêng 1 thir pakhat a lo awm a. A sawi lawk ang ngeiin a vai chuan chêng 7 a ni.




"I rilru na te chu lo dam vang vang rawh se" a rawn ti leh kher a. "Ka thing nek mai ang che" ka tih nghut rual chuan za zet hian a nui ta awr awr a. Ka nu leh Vantei te pawh ka ṭawngkam avâng chuan an nuih a za ngang mai. Keipawh ka nui veleh tho a.




"Nghal viau tawh suh" tiin a cheng thir min pek te chu envelope ah chuan ka khung leh a. "An inneih ni te chu kal ve i tum em?" ngaihsam hmel zet hian a lo ti a. Ka hmazawna chair chu la chhuakin a rawn ṭhu zui tharh bawk a.




"Min sâwm miau a, ka hman chuan ka kal ang a. Kan pahnihin kan kal ang" ka lo ti hmiah a. Nuihzatthlâk thil ka sawi pawh ka hre si lova za zet hian a nui dir leh tlak tlak a.




"Eng nge?" lungawi vak lova ka tih chuan "A bulah chuan intih theih nan min hman i la tum tho tihna em ni?" a lo ti khanglang a.



Ka huat tâwk tura sawi tum a ni tih ka hrechiang em a, hnial buai duh lovin "Tum e, a aia ṭha ka nei ve tho tawh tih hi hria se a ṭha ang" ka lo ti hmiah a. Min ner khum nang nang ringawt a.




A thusawi ka haw duh lo chu tih vak ngaihna a hre tawh bik lo aniang.




Ka nu chuan zanriah ei ve nghal turin a sâwm a. Mahse a lo hnial vat a "Min zuk thlah teh" a ti ta zawk a. I he lovin ka bike châbi ka la nghal a. Kan inphur thla veleh dat dat a.



Tlankimi chuan a pasal neih hma zanah min rawn text leh a. An inneihna a kal ngei tur chuan urhsun zetin min rawn sâwm a. Mahni chauh inngaihtuah thei ka nih loh avangin Rara-i chu ka be râwn ve a. A lungawi chiah loh ka rin tehlul nen phur zet hian kal dun a duh thu a rawn sawi ve a.




"Rara-i nen kan lo kal ang" tiin Tlankimi chu ka va hrilh ve ta nge nge a. A lo lâwm thiam khawp lehnghâl a.



Tichuan, an inneih ni chuan Rara-i nen pawh kan kal ve ta ngei a. Biakin hawngin an innei a. An sawi kalhmangah a pasal chu sawkar hnathawk, officer lian zet hi a lo ni a. Mak pawh ka ti hran lo, Tlankimi'n a neih nghal chat danah a innghahna tlak dawn tih ka hre nghal mai a. A pasal tur meuh a a thlan chu a hniam thei lo hrim hrim. Kan inṭhen chhan pawh kha hna thil vang a ni pakhat miau a.




Ka dem dawn viau na in ka hrethiam hle ta zawk a. Hmeichhe fing a nihna ah pasal innghahna tlâk a thlang chatah ka ngai hmiah mai. Inhmeh pawh an inhmeh hliah hliah a. An hausa chhungkua dun bawk a, an inneihna engkim chu a ropui vel vek a nimai. Chutihrual chuan a pawimawh ber Kristian Chhungkaw ṭha tak an din lovang tih chu ka hlau khawp mai.



Rara-i chu a nui sâng reng a. Tlankimi te inneihna ai mah chuan a phaw vuak vel chu nuam a ti ni berin ka hria. Zaithiam an sawm nual bakah host in a zei bawk a. Mipui lam nuih dar dar na tur thu min fah leh zeuh ṭhin a. Kei tak pawh chuan nuam ka ti. Mahse ka ṭhian ṭhenkhat te chuan min fiam leh zuk zuk ṭhin a. Ka lungawi chiah lo.




Dik taka sawi chuan ka kal ve duh chiah loh chhan pawh kha ania. Mahse mo berin sâwm tak têin min sawm miau a, kal lohna chî ah ka ngai lo a ni. A thu hrimah ka engah mah a thawk tawh lo tih nemngheh nan pawh kal pawiti lo kha ka nia.




Ruaiṭheh zawhah Rara-i nen chuan kan inphur haw veleh ta a. Bike keng lovin ka pa car ka keng a, a hahdam thlak phian mai.



Rara-i chu thil eng emaw ngaihtuah hmel pu hian a nui rah rah reng a. Min rawn melh zawk a, a nui leh ṭhin a. Ka mitsirin ka hmu thei vek si a.



"Eng nge?" ka tih takah chuan zep buai miah lo hian "Tlankimi pasal kha a hmelchhe eee" uar zet hian a lo ti a. A thusawi lang tlang lutuk avang chuan ka lo nui chhuak hawk a.




A sawi dik reng, zêp nak emaw Tlankimi pasal kha chu eng ang pawhin hausa mah se a hmelah chuan chhuan tur a nei lo ve khawp mai.



Pa tê ve lampang, dul kiar ve deuh, vun ngo lutuk lo. Sek khal ve ṭulh mai hi a ni a. Ka sawi thiam dan ber chuan ball a ang.



Rara-i nen chuan kan ngaihtuah a inang aniang, kan in melh zawk a. In hrethiam tawn deuh hian kan nui ta hawk hawk a.



"A hâng bawk sia, hâng ngaihno bei a ni leh bawk si lova. Thlalak aiin a la chhe lehchhâwng ania. Pathianin min lo ngaidam se a hmelchhe eee" a rawn ti leh a. Hmelchhia a ti ngang a nih hmel e.



"Hmêlṭha i tih viau ka lo ring ania" ka ti uang a, ka fiamthu chu amah zawk zawk chuan a lâwm a. A nui awr awr a "A hmelṭhat dan kha a na e. Khati khan nang aia a thlan zawk chu a ni ve mai si a. An thîk awm loh ve e, karah hmelma an hrang lovang" nui reng chung hian a lo ti leh a.



Chutia Tlankimi pasal hmelchhiat thu a sawi reng chu zialo la ti ta deuh hlek a. "Hmelah bát awm lo an tih ṭhin kha, hmelchhe mah se a hausa tal a. Mipa tam tak aiin a innghahna tlâk ang chu. A fel ve hmel khawp kha" ka ti luam a.




Chutah Rara-i chuan "Keichu hmêl ka ngai pawimawh tho tho, chuti chu ni lo se kan inngaihzawn hmaa min bem tute ho pawh kha ka nihpui vek ang. Sum ringawt a teh dawn chuan an hausa hlawm emai" a lo ti ve nghat a.



"Bem tu che an hmelchhe thei a nimaw" nui hawk hawk chunga ka tih chuan a lo la na ngang mai.



"Hmelchhia i intia mi?" min ti let zek a, ka insawi tel ve tih reng reng ka lo ngaihtuah hman tawh lo.



"Ka bem hlawhtling tal che alawm" nui suk chung chuan ka ti a. "I hmelchhe lo ve em alawm. Keichu hmêlṭha, hausa, innghahna tlâk, fel deuh Pathian ṭih mi, min hmangaih ngawih ngawih thei tur ka duh a. Chutiang chu i nihna ania" thutak zet hian a lo ti ve malh malh a.




A thusawi chuan ka lâwm a va ti kim si tak em aw.




Thla thar kan chuangkai a, Rara-i nen kan inzui na pawh kum chanve lai chu a ni ve ta reng mai. La rei lo viau mah se kan inpawhna chu a thûk tawh em em a. Kan inhriatna tak pawh a la rei lo kha a ni a. Mahse chutiang ngaihtuah chuan tuna ka awmdan hi chu kum tam tak inhre tawh ang mai kan ni.





Ka pa leh a pu te an lo inhriat ṭhat em vang pawh a ni mai thei a ni.



Tun hnai tê hi insawisel a chîng thar leh riau a. A natna ka hriatpui vek tawh avang hian ka lakah engmah a zêp tawh ngai lova. A na anih chuan tlang takin min hrilh mai ṭhîn a. Damdawiin ah pawh check up turin kan kal zing malh malh khawp mai.




A doctor chuan a dinhmun chu hriatthiam har a ti ve khawp mai a. Zirtawpni tlaia kan in entir ṭum phei chuan phai lama kal pui mai turin min ti hial a. Velore lamah in enkawlna ṭha zawk dawng turin a duh a.




Mizoram ah chuan duh angin kan khawlte a ṭha tawk lova. Kan mi thiamte pawh thiam ve lutuk tawh mah se phai lama in entir tluk chu a awm lo niin a sawi a. Ka lo pawmpui khawp mai.




Mahse Rara-i ber hian phai kal buai ngai lova a ṭhat chhuah veleh mai a ring a. A châng hi chuan a dam var a, a châng lah hian a chau leh ngawih ngawih zel a. A hriselna chu a nghet ṭha tawk lo a ni ber mai.



Nu Nêmi te nen pawh kan sawi ho a, Velore lam pan mai chu kan remti tlang ta a. Tunah chuan Rara-i hmin chiah chu kan hmabak a ni tawh mai.



Kan in check up zana ka va len chuan a lo chau hle mai a. A luhai chu a lo luak nasa hle hi a lo nia. Kan inbuaipui vat a.



A chauh tak zet si ah chuan ka ngaih a ṭha ta ngang lova. Ka biakna te pawh chu min chhang ṭha peih mang tawh tlat lova.



Damdawiin kal nghal ka rawt ta ngawt a. Pa Lura leh Nu Nêmi te pawhin min lo thlâwp khawp mai.



Vanneih thlak takin ka pa car ka ken chhuah zan a lo ni hlauh a. Car chhungah chuan ka pawm lût nghal a. A chau lutuk leh luhai bawk si chu men pawh a meng ṭha peih tawh lova.



Nu Nêmi leh Pa Lura te'n min zui a, midang zawng chuan in an lo nghâk dawn a ni.



Damdawiin kan thlen rual chuan thawktute'n min lo buaipui nghal zung zung a. Check ngai ang zawng zawng chu an check nghal zung zung a. A bp a hniam bakah a taksa a chaklo hle hi a lo nia. Tin, a pang a lum reng bawk a.




Drip an khai nghal a, nachhawkna in an chiu nghal bawk a. Doctor in check ngai zawng zawng leh tih fel ngai zawng zawng a tih hnu chuan duhthlang tur pawhin min ti tawh lo. Phai lamah min refer nghal hmiah a.



Doctor chuan "A natna hi a serious tawh takzet ania. Helamah chuan duh angin in enkawlna a ṭha tawk lova. Dam ṭha angin lang leh ṭhin mah se a natna a dam hlen lo anih chuan rawn lanchhuah hun a nei leh ngei ngei zel dawn. Tlang takin sawi ila, Brain Tumor natna hi chu dam khaw chhuah pui zawh loh natna a ni ve pakhat a. Theihtawp chhuah a, Pathian rinchhan chuan an nunna te pawh pawseiin a awm ve mahna. Tunah chuan heti hian kan enkawl rih phawt ang a. A ziaawm deuh hnu ah Vellore lam pan turin inpuahchah nghal a fuh ber ang. A rang thei ang bera zuk in enkawl a ṭha. Radiation Therapy pawh hi a risky tawh lutuk a, tunah chuan kan pe ngam tawh rih lo. Operation hial pawh a hmachhawn a ngai tawh zawk mai thei. A tir aṭanga enkawl vat a ni lo kha a pawi ber mai" a ti duah a.




Doctor berin chutiang a sawi chu ka hnual rawih a, beisei a va han bo ngawih ngawih tak !



Rara-i natna khuma mu bam chu ka thlir vawng vawng a, a hmêl chu dang bel mah se a la hmêlṭha reng a. Ka hmangaihna te chu a kiam phah eih lo bawk.




Nu Nêmi chuan phone hmangin chanchin te chu in lam a hrilh ve zung zung a. Ka chhungte ka la hrilh ve miah lo tih ka hrechhuak zawk mai.




Pawnah chuan phone hmang turin ka chhuak nghal a. Ka nu zawk biak ka tum zet a, mahse a hlauhthâwn ka hlauh avangin ka pa ka call ta zawk a.



Rara-i chanchinte chu a tawi thei ang berin chipchiar tak siin ka hrilh a. In lama an lo ṭawngṭai pui tur thu a rawn sawi chuan ka thla a muang suai suai mai.



"Engtikah nge i lo haw ang?" a tih chuan "Ka hrelo " ka ti tawp a. Ka hre lo tak tak miau a ni.



Chutah ka pa chuan "Hriatpui, lo awm ve reng khan kawngro a sut loh bakah zan a rei ve tawh ang reng si a. Mi min ngaihdan a buai vak hi a ṭul ber lo na in mi mitmei ven ve te pawh hi a ṭha ngai a. Chuvangin lo haw har vak lo la ka duh. In inngaizawng a, in inhmangaih tih ka hria. Mahse âwm leh mawi te hi zawn ve hram hram tur a ni. Lo haw vat la chanchin kan ngaichâng reng tho ang a. Pathian zara dam chuan naktuk lamah kan kal leh dawn nia. Sawi duah hun ni lo mah se ka rawn sawi duah anih chu" a lo ti dap dap a.




Pa te nge nge chu an lo ngaihtuah kim a. Ka dai pelh tur leh ka dai sual tur min vên pui tu pâ ka nei hi ka lawm takzet a ni.



A thusawi chu zawmin rei vak lovah ka haw zui ta nghal a. Pa Lura te pawhin min lo hrethiam khawp mai.



A tukah chuan kan chhûngkua in kan va kal ta ngei a. Rara-i pawh a lo harh ve tawh a, mahse a la chauh hmel khawp mai. Chuti chung chung chuan hlim hmel min lo hmuh hram hram a.



A taksa natna te chu kei hian ka hmuh hmaih loh nasa a ni.



Ni a ral a, kar a ral leh a. Rara-i chu damdawiin ah a la awm reng a. Mahse kan luh tirh ngawt ai kha chuan ziaawm tawh tak a ni.



Damdawiin aṭanga a chhuah dawn ni chuan Vellore lama in check up turin ka hmin thei ta hrâm a. Ka lawm tih piah lam a ni e.



"I tân ka dam ngei ngei dawn alawm" a ti fo a, thih hi a tum reng reng lo. Min kalsan thei a ni lo hrim hrim bawk a.




____________*____________*_____________


Show post links
Top

[Ngaia]

AIZIAL
By CVL Awmpuii



Chapter 30



Tukṭhuan kan ei laiin Rara-i chungchâng chu ka chhûngte ka hrilh ve ta a.


Ka pa chuan Velore lamah hmelhriat a lo nei hlauh a. Rawngbâwltu chhungkua tho an ni a. A biak vat tur thu te sawiin an theih ang tâwk a Rara-i lo buaipui ve turin a chah tur thû te a sawi a. A thlamuan thlak huai mai.



Velore an kal dâwn zan chuan kan chhûngkuain kan zuk lêng thla a. Rara-i hmêl pawh hmuh a nuam rih khawp mai.



Ka pa chuan tukṭhuan kan ei tûk a a sawi tawh ang khan Vellore lama a hmelhriat te a biak sak thu chu a sawi a. An lo lawm ngang mai.



Nu Nêmi pawhin "A thlamuan thlak sawt mai, in hmelhriat te chu kan hmelhriat te an ni ve nghal mai dawn a" a ti chhen a. A lawm ve tak tak niin ka hria.



Chu mai bakah ka pa chuan chêng singkhat lai a dam lo in enkawlna lo phuhru turin a pai tel bawk a. An in enkawlna senso hautak zia ngaihtuah chuan eng tham mah a ni lovang. Mahse an lo lawm thiam ngang mai.

Rara-i phei chu a inthlahrung hle tih a mitmeng aṭangin ka chhiar thiam vek.


Ka pa te haw hnu chuan thlang lam veranda-a ah inngheng rialin kan ṭhu dun a. A chhungte pawhin min hrethiam hle aniang, hun thâwl ṭha tawk tak min pe a.



"I huphurh em?" ka tih chuan "Tlemtê in" a lo ti sep, a nui seih bawk a. A chhîp ah chuan ka fâwp nghal vang vang a, a dar chu ka tuai pah hauh hauh bawk a.



"In enkawlna ṭha zawk i zuk dawng ang a, dam deuhin i lo haw mai ang. Engmah hlauh tur a awm lo ania. In lamah kan lo ṭawngṭai pui reng dawn che alawm" ka ti a. Nghet zetin min lo kuah ve ṭawk ṭawk a.



"I lo lerh vaih chuan bialpa dang ka nei nghal a nimai" tiin min vau zui a. Ka lo nuih huk lai chuan a thutak hmel em em mai a.



"I lo zuk lerh zawk ange, hnam dang mipa te kha lo melh lo la, in melh tir lo bawk la. Fel deuhin zuk awm la, damlo lerg deuh zuk ni miah suh ang che" ka ti let ve churh a. A nuih za za ah a ṭang leh lawi a.



An awm chen tur kan hriat loh avângin kan hun tâwp zan ang a ni ve tawh a. Ka fâwp leh vawng vawng ṭhin a. A thiam ang tawkin min lo chhang let ve zel bawk a. Kan inthlah zan na na na chu hun kan hmang âm dun ve kher mai.



Chutia inngheng rial a kan ṭhut lai chuan ka wallet phawrhin cheng sang nga chu ka hnawn a "Au Hriatpui" lungawi loh hmel zet hian a ti a.



"La rawh, i ta tura ka khawl anih hi" ka tih chuan a lawm lo ngang mai. Ka pa khan pe tawh tho mah se hei chu a pual liau liau, a duh duh dana a hman atâna ka dah ṭhat sak a ni a. Pêk ka tum bur a ni.



"Pa Sangzuala pawhin min pêk ṭeuh tawh kha, ka duhlo" a lo ti hmak a. A inlahrang nghal daih bawk a.



Mahse ka hnûk hnai leh nghal a, a lo ṭang ṭung bik chuang lo.



"I tana ka khawl ka tih chu, rilru nuam deuha i hman tura ka khawl sak che anih hi" ka ti dam thluam a.



"Chu pawh nise ka duh lo" a ti tawi tak a. "Rara" ka tih rual chuan "Ka duhlo" a lo ti veleh chiah a. Kan han inmelh ren rawn a, a lungawi loh zia chu a mitmeng aṭang pawhin ka hai lo.



"I lâk loh chuan ka lawm lo viau ang, ka bialnu tana ka khawl a ni a. Nang lo dawngtu tur an awm lo" ka ti sup a. "I nupui êm ka ni hlei nem, i châwm tur ka nih loh bakah hetianga pawisa in pêk vel hi ka duh lo. Thil in lei sak hi chu ka hrethiam, ka hrethiam lutuk. Ka lawm bawk. Mahse sum faia in pêk ang hi chu ka duh lo. Sum che lek vak hi a ṭha miah lo ania. Ka damlo in enkawlna tur tâwk hi chu kan nei ve alawm. Min ngaihsakna leh min hmangaihna che zia a i lan tir hian ka duhtâwk viau. Sum chuan hmun chang suh se" a lo ti duah a. A thu tak ngang mai.




Duh lo viau mah se keiin pêk luih ka tum bur si a. "I dam lo in enkawlna tur atan ka ti lo, i duh duh leina tur atana ka tih anih hi. Ka rilru nawm nan tal pawh la rawh. Sum che lek lamah min ngaihsak suh. Tuition naupang pahnih lai min hmuh sak aiah khan ngai la. La hmak rawh, i hlawh ve anih hi " ka ti ve charh charh a.




Ka thusawi tâwp lam chu fiamthu ti tak deuh hian ka sawi a. Ka pawisa pêk a lak duh nana sawi ka ni pakhat. Chu mai bakah amah hi cho chhuah ngai chî hmeichhia ani kha. Khawngaih thla pa zawnga ka ṭawng chuan a la duh dawn lo tih ka hrechiang em a ni.




"Chu pawh nise" a la ti hram a. Ka lama hnuh hnau salh pah chuan ka nuih lui a "Bialpa hausa deuh i nei alawm, sang nga te mai mai chu i nikhat hman tur" ka ti uang vel a. A lo ner nasa mai.



Ka pawisa pêk pawh chu a la ve ta nge nge a, "Ka zawngchhang khawp ang, thla tin ka dîl ang che. Kawr thar ka nei reng dawn tihna a nimai" a ti hmarh hmarh a. A landan lawmawm lutuk avang chuan ka piai vak a, a lo ṭeu hlar thung a.




A tâwpah chuan kan nui dun nasa leh viau tawh.




Ka lên rei lutuk chuan a meng ve reng dawn si a. Kham lo viau mah ila dar 11 rik hma hret chuan ka haw ta a. An kawtlai thleng min thlah a. Kan infawh leh vang vang hnu ah ka haw ta chauh a.




A tukah chuan Vantei nen kan zuk thlah ve a. Airport thleng zui ka duh viau na in Rara-i ber chuan a remti tlat lova.



"I lo kal ve zel chuan ka kal theilo palh ang" fiamthu ti tak deuh hian a ti a. Keipawhin ka hnial zui ta lo.



Guwahati ah zan khat an riak phawt ang a, chuta ṭang chuan Vellore lam panin an thlawk chhuak leh dawn ani.



Dik taka sawi chuan kalpui ve ka duh hle a, ka inhuam em em bawk. Mahse thil mawi leh dik a ni chiah si lova, chuvanga kalpui lo mai chauh chu ka ni.



Nu Nêmi leh Nunmawiin an kalpui a, mi hawi zau pangngai tak an ni ve ve bawk a. An zuk inbuaipui fel thei maiin ka ring. Tin, sawi fo tawh ang khan ka pa hmelhriat te an awm bawk a. An zuk intifel thei mai ang.



Tluang takin tlai lamah chuan Guwahati an thleng a. Zanah pawh rei tâwk tak kan inbia a. A hriselna in a tuar phah ka hlauh avangin rei tak inbiak hi ka duh ngai lova. Mahse chumi zan chuan phone ka dah a phal tlat lova. A dam rih tho bawk a, ka lo ngai ve bawk nen kan inbe ta reng kha ania.



Tluang takin Vellore pawh an thleng thla ta a. Ka pa hmelhriat chu Pa Ropuia a ni a, Pastor ve tho a ni a. Rawngbawltu niin Vellore ah a nupui fanaute nen an awm a. Rara-i te chu an lo hmuak a, Nu Nêmi'n ka pa a rawn be nghal a. Pa Ropuia te chhungkua chu a rawn fak ngang mai.



Ka pa chuan "Harsatna in neih chuan pun hreh reng reng suh u, inthlahrunna tur a awm lo ania" a lo ti ve luam a. Nu Nêmi chuan lawmthu a sawi chhen mai.




Rara-i chu Doctor te'n an check nghal zung zung a. A natna chu a lo serious hle mai a. Doctor chuan "In va lo kalpui har ve" a ti nghe nghe a. Mizoram lama an in enkawlna lehkhate chu an hmuh bakah chipchiar takin an sawi a.



Doctor chuan a taksa pum en chhuah leh a, test neih ṭhat leh vek a duh thu a sawi rup mai. Rara-i chu a kiangah ka awm thei si lova, a hlauhthâwn a, a zâm ka hlau em em mai a. Phone kaltlanga kan inbiak chuan pangngai takin min chhâwn thei zel a. "Ka hlau lo" ti mah se a ruk tak chuan a hlauhthâwn ve tho ka ring a ni.




Thil chu a nih tur ang a ni deuh zung zung mai a. Ni hnih chhungin test ngai zawng zawng chu an test fel ta a. Result pawh a chhuak harin a rinawm loh.



Pa Ropuia te chhungkua khan an ngaihak zui ve reng a. Ka pa te nen pawh an inbe âwl lova. An chungah lâwmthu sawi sen loh kan ba a ni.



Zan khat chu Rara-i ni lovin Nu Nêmi zawkin min rawn call a. A rawn hlauthâwng ngang mai. "Vawiinah a luak nasa lutuk a, a muhil a rawn harh khan a hriatna a hloh nge ka hrelo. Nunmawii nen min hrelo hrim hrim. A meng â vek mai a, tuna a awm dan hi a ṭha miah lo, Hriatpui. A manganthlâk khawp mai. A taksa ah hian hrui eng eng emaw an zam nuai a. Doctor khan a dinhmun a ṭhat loh thu a sawi a" a rawn ti zung zung a.




A âw aṭang ringawt pawh chuan a mangan zia hai theih a ni lo. Nizan lamah te kha chuan pangngai takin kan la inbia a. A chau tih chu ka hria, mahse ka zawhna te ṭha tak takin min chhang zel kha ania.




Chutia Nu Nêmi'n a chanchin a rawn sawi leh takah chuan hlauhthâwnna in ka khat nghal vek mai. Kan inbiak zawh chuan ka chhungte ka hrilh hre ve nghal a. Chhung inkhawm kan hmang nghal rum rum a. Ṭawngṭai rualna te neiin Rara-i tan kan ṭawngṭai a. Ka nu leh Vantei te phei chu an mittui a tla nghe nghe. Mangang viau mah ila ka mittui erawh tlâk tir ka tum lo.



Pathianah beiseina ka nei tlat a, Rara-i hian thih a tum lo, a thi mai mai lovang.



Zan ka mut dawn te chuan ka ngaih a ṭha thei ngang lova. Bike châbi la chhuak in Biakinah ṭawngṭai turin ka va kal tawp a.



Beidawng duh si lo, beiseina chau rau deuh si, thil ṭha zawk thleng tur duh siin Pathian ka au a. Rara-i tan chuan ka ṭawngṭai mawlh mawlh a.



Chham ngaihna pawh ka hre chuang lo, "Dam tir rawh" ka ti teh tawp a. Chutiang ringawt chham chuan darkar khat vel zet Biakin chhungah ka va ṭhu a.



Mite chu an ṭawngṭai zawhin an thawl hawk ṭhin te a ni ngai a. Kei erawh min delh tu rit tak awm ang mai hian ka thawk a pik zual em em a. Ka rilru a hah ngawih ngawih a ni ber. Ngaih ṭha taka awm ka tum ngial pawhin ka thei ngang lo.




Khumah chuan muhil thei si lovin ka inlet tawn sek a. Ka phone chu a rawn ri ang a, thu ṭha lo tak ka dawngsawng ang tih ka hlau ru ngawih ngawih a. Heti taka rilru hrehawma ka awm pawh hi ka la hre ngai lo.



Zankhuain ka muhil lova, khua a rawn vâr a. Zing ṭawngṭai inkhawm dar hmasa a rîk rual chuan choka lama ka nu leh pa te inbe thâwm ka hria a. Biakin lamah an kal dawn tih hrilh chawp ka ngai lo.




An dam ṭha anih phawt chuan zing ṭawngṭai inkhawm hi an ṭhulh ngai lo. Ka kawchhûngah tur tu a awm tlat avangin ka tho chhuak ve nghal hluai a.



Ka pa te chuan min kalsan hman ang tih hlau zetin ka va chhuak a. Chuti taka hmaa ka va tho chhuak ve chu min lo melh hu a. Ka pa chuan "I va tho hma ve" a lo ti mai a. Mahse ka nu chuan chîk zetin min lo en thung a "I mu miah nange Hriatpui" a lo ti halh a. Nu te na na na chuan min lo chîk a, thil te hi an lo hre thei ania nge.




"Ka lo kal ve dawn" ka ti tawp a, ka sawi tum an hrethiam nghal mai anih hmel. Ka pa chuan "Va inthuam lum deuh rawh, zing lam boruak chu a vawt si" a lo ti vat a.



Room ah chuan lutin ka inphih fai nghal a, ka kawrlum pan deuh chu lachhuakin ka ha nghal sawk sawk a. Ka va chhuah leh rual chuan Biakin lam panin kan chhuak zui nghal a.



Kan chhûngkuain kan ṭhu ho a. Ṭawngṭai thupui thawh na hun an hawn lai chuan ka din buai ve ngai lovin ka pa chu a ding chhuak nghal a.



Rara-i tana ṭawngṭai turin Kohhran mipuite chu a sâwm a. An hriat theih dan turin Rev Sanghminga tunu a nih thu te pawh a sawi tel a. A thupui thawh dân aṭang chuan vawikhat mai pawh ni lovin Rara-i chu a lo thawh fo tawh a nih hmel. Kan ṭawngṭai zui nghal a.





Bân veleh keichu ka haw tlang nghal a. Ka nu leh pa te chu Chowkidar te inah an lut kawi a, thingpui in kawi tura an sâwm vang ania. Min sâwm tel ve tho na in haw ka duh zawk.




Khumah chuan ka bawk leh ren rawn a, a la hma ang reng bawk si. Tih tur a vâng duh kher mai.



Rara-i chuan ka ngaihtuahna zawng zawng a luahkhat a. Ka duhthusam ang hian thil thleng nghal duak duak se ka ti kher mai.



Ka lo chhing ve sek a ni mai thei Vantei'n min rawn kai tho a. "Chaw kan ei dawn" a rawn ti a. Sana ka en vat a, dar 9 a lo ri ṭep tawh. Ka lu lah chu a na bur a, zan ka mut loh vang a ni tih ka hai lo.



Tukṭhuan pawh ka ei tui nek lo e. Rara-i chuan kan ngaihtuahna a luah hlawm ngang aniang. Kan sawi chhen a. Ka pa chuan min hnêm mawlh mawlh a "Thil hi a eng zawnga thlir tum hram hram tur. Chuti lo chu mahni leh mahni kan inti hah mai mai. Chutihrual chuan thil thleng thei zawng zawng ngaihtuah a, rilru lo buatsaih lawk hi a ṭha ania" a ti dap dap a.




A sawi tum chu ka hai lo nasa. Rara-i chungah chuan thihna hial pawh lo thleng dawngsawng thiam thei tura inpuahchah lawk turin min ti tih ka hrechiang ngang mai.




Mahse chutiang thil chu ka duh lo. Thi tur angin ka ngaihtuah thleng lo a ni bik lo, mahse ka phal lo, ka phal ngai lo bawk ang. Kan la tiam lo tlat a ni.



Ni thum a ral leh a, Rara-i dinhmun chu a ngai reng a. Rilru hah leh nat ai mah chuan ka thin a rim hial tawh zawk a. Vellore an lo zuk kal kher kher kha a nat zualpui ah ka puh hmiah mai. A natna kan hriatchhuah ve hma pawhin a ṭha vur tho si a. Kan hrechhuak a, treatment te a la a, dam pui tura kan ngaih kha a nat zual pui daih a. Doctor te ka dem lek lek a, mahse kei aia thil hre zau zawk leh mi thiam zawk an ni ṭhiau bawk si. Ka dem lo thei chuang bawk silo.




Tlai khat phei chu zanriah kan ei laiin ka âng nghe nghe a. Ka pa thusawi pakhatin min khei zak vang a ni ber "Pathianin mi thiamte a hmang ang a, a dam leh mai ang" a ti a. Kei Doctor lo dem laklawh ta chuan ka chhang let lo thei lova.



"Mi thiamte kan tih ve hi a, engmah an ni lo. A natna kan hriatchhuah hma leh treatment a lak hma te kha chuan a dam lutuk, natna nei hmel pawh a pu lo. Kan hrechhuak a, treatment te a la a, a natna a zual daih hi. Ka thu chu nise a awm ngai khan a awm char char ang. Doctor ka pan pui lo tawp ang. Vellore pan tura ka lo thlêm te kha ka inchhir ania. Ṭha taka kan awmdun khan a dam zawk. Eng treatment mah la lo leh Doctor lak tlak loh zet zette tel lo khan a ṭha zawk" ka ti hluk hluk a.




Ka lungawi loh zia chu an hai bik lovang. Ka in âng thinrim zual leh nghal a, ka insehruh ṭeuh mai.



"Hriatpui, khati zawngin thu an la kawi ngailo" ka nu chuan a lo ti dam diai a. "Thu lâk kawih lam pawh a nilo, thil nihna anih chu" ka lo ti hluk a.



Hetiang hian ka nu leh pa te ka la chhâng let ngai lo. Mahse tun ṭum chu thil engkim hian min ti thinrim. Rara-i dinhmun ngai rengte chuan natna min siam bakah puh mawh tur ka zawng kual a. Ka hah ngawih ngawih zel.




"I rilru a buai anih kha Hriatpui, hetiang hun takte hi ringtu nun nghehna lanchhuah hun tur a nia. Rilru tih hel tlat te hi a ṭha ngai lo. Rara-i chu a natna hriatchhuah hma a ni emaw a ni lo emaw. Treatment lak leh lak loh pawh nise tuna a awmdan hi Pathian remruat a ni. I duh dan ang khan hun hi her let thei pawh ni la Pathian remruat a nih miau si chuan tun hun hi kan thleng tho tho ang. I pawm thiam hma leh i hahdam a ni mai. Engpawh nise ṭawngṭai thlah thlam lo ila. Pathian chuan ṭha a tih angin ro a rel zel mai ang" ka pa in a rawn tih leh dap dap takah chuan ka ngawi hmak a.




Tumah kan ṭawng zui tawh lo. Mahse ka rilru tê tê chuan a thusawi chu awlsam tak ni mah se pawm thiam har ka la ti tho.



Zanah chuan Nunmawiin min rawn call a, biak ka lo tum lai tak a ni nghe nghe a. Ka pick up thuai a, "Rara-in hma a sâwn e" zâng vah a a rawn tih rual chuan ka harh kawk maiin ka hria.




"A biak theih tawh tihna em ni?" ka ti nghal thawr a, ka rilru a phili nghal vek thei. Chutah Nunmawii chuan "La biak pangngai theih rih lo e, mahse tlai lam aṭang khan a rawn harh chiang deuh a. A mitmeng buai tlat te pawh kha a reh tawh a. Kan biakna pawh mitmeiin min chhang thei tawh a. Min hrechhuak leh tawh bawk a. A lâwmawm khawp mai" a rawn ti chûl a.



Ka hahdam nghal sawng sawng mai. "Doctor in engtin nge a tih?" ka tih chuan "Aw, chu hma a sâwn thu min hrilh bakah naktuk lamah chuan eng emaw thut a thleng te anih loh chuan a biak pangngai theih tawh mai a rin thu a sawi a. Mahse chutiang anih chuan Radiation Therapy khai leh an duh dawn a" a rawn ti leh zung zung a.



Radiation Therapy a rawn sawi rual chuan ka lo phal tawhlo nghal ringawt a.



"Kha khan a ti chau zual zawk mai maiin ka hria" ka ti a, han hnial bur chu mawiin ka hre bik chiah lo ani. A bialpa mai ka ni a, anni chu enkawl tak taka enkawltu, mawhphurtu an ni si a. Thu nei lutuk anga awm chu ka duh lo.




Mahse ka ngaihdan chu Nunmawii ngaihdan a lo ni ve chiah a "Keipawh ka lo tia, a ti chau zual zawk mai maiin ka hria. Therapy chu la lo mah se ka pawiti miah lo. Chutihrual chuan enkawl dan tur dang vak hi a vâng ve em a. Damdawi leh khâwl thil a ni leh tawp mai a. Doctor chu ka be ṭha leh hrim hrim ang. A theih hram chuan Radiation therapy kha chu pumpelh sela ka duh" a rawn ti ve duah a.




Chumi thu ah kher kher chuan kan rilru a inhmu ngang mai. Ka chhûngte pawh chanchin ka hrilh ve nghal a.



Ka pa chuan "Pathian hnena lawmthu sawi kan ba anih chu" a lo ti mai a. Heihi ania ka pa ka ngaihsan zual na em em chu kawng engkimah Pathian hming a lam vek a.



Kan dîl a, pêk kan ni anih chuan kan dîlna hnena lâwmthu sawi chu kan bat a ni a. Kan tih ngei ngei tur thil a ni.




Zan mut hmunah te chuan zanriah ei laia ka nu leh pa ka chhan dan te leh Doctor te ka sawi dan chu ka ngaihtuah let a. A zialo ka ti hmuhnawh hle mai a. Ka ṭawngkam bung nghut leh mawi lo lutuk te kha ka inchhir ru ngawt mai. Ka rilru a ti nuam lo vek thei. Mahse ka ngaihdanah erawh kha chuan ka la ding nghet reng thung. Radiation Therapy chu a theih hram chuan pumpelh sela ka duh.




Zingah chuan ka pa te zing ṭawngṭai inkhawm tur ka zui leh a. Ṭawngṭai thupuiah pawh a thawh leh a. Rara-i hmasâwnna avanga Pathian hnena lâwmthu min sawipui turin Kohhran mipuite chu a sâwm a. Tin, a ṭhat chhoh zel theih nana dîl leh turin a ngên bawk a.




Zîng ṭawngṭai inkhawm bang ka haw chu ka pheikhai a zâng ve ta vah mai. Chhunah chuan Nu Nêmi nen kan inbia a, Rara-i pawh hma a sâwn ve zel anih hmêl. A âw hre châk in be châk tawh viau mah ila a la chau hle dawn tih ka hria a. Biak ka tum buai rih lo.




Mahse zanah chuan amah zawkin min lo bia a, "Hmelṭha Rara..." ka ti hniam ruih a. Min lo be hmasa tak na in a ṭawng ri ka la hre ve miah lo.



"Vanlahriatpui..." a rawn tih rual chuan ka nui chhuak hawk hawk a. Chutia a âw ka hre leh ta chu engtin nge khang ni nga chhung khan a âw hrelo a ka lo awm theih tih ka ngaihtuah hial mai. Beisei phak bakin ka ngaih zia ka hrechhuak nawn awn awn bawk a.



"Hmelṭha Rara..." ka ti leh a, "Vanlahriatpui..." a rawn ti veleh a. A âw chu a ring hran lo. Mahse ka bengah chuan chu tluka ri ring chu a awm lo. Ka thluak leh bengdar a luah khat nghal vek.




"Min ti mangang alawm" ka ti hulh a, ka hahdam sawng sawng tawh thung a. Chutah Rara-i chu a lo nui ri hak a.



"Vanram fang ve zuai alawm..." duhdah deuh hian a rawn ti a. Ka lo nui huk mai. A dam kawr chu a rawn fiamthu nghal zat a. He nu tak hi chuh!


Ka bulah chuan awm se ka piai hrep ang.



"Hremhmun i fang zawk lo maw!" ka tih chuan lungawi lo zet hian a lo rum nghat a.



"Vântirhkoh in hremhmun ka fan chhan tur ka hrelo" min tham lo zet hian a rawn ti a. Rara-i tak tak kha a ni ngei e.



Ka nui chhuak leh hawk hawk a.



"I ṭha tawh em?" thu tak zeta ka tih leh takah chuan "Ka hmêl hi chu a ṭha reng a, mahse ka taksa hi a la chau deuh a" a rawn ti ve mai a. A hmelṭha tih hi chu a hai mawlh lo a ni.



"Zanriah te i ei thei em?" ka tih chuan "Tlemtê ka ei a, ka luak chhuak leh daih a. Mahse ka ril pawh a ṭam chuang lo, drip kan khai char char a, ka puar vek" a rawn ti duah a.




Sawi awlsam viau mah se a thil ei a luah chhuah leh vek thu chuan min ngaihtuah tir lo thei lo.



"I khua a sik em?" ka tih chuan "Nachhawkna in min chhâwk rih a" a lo ti ve mai a.



A hriselna chungchâng ah chuan zawhna tam tak ka zâwt a. A hnuah phei chuan a ning ta deuh nge min chhang bul hmak hmak a.




A insum thei ta ngang lo aniang "Ka ning, zawhna min zawt tawh lo teh. Inngaizawng te inbiak danin inbe tawh ang" a rawn ti hluai a. Ka va han nui nasa tak.



"Anih leh..." ka ti a, sawi tur ngaihtuah in ka ngawi leh vang vang a. Ṭawng tum lo zet hian min lo ngaichâng ve ran a.



"Eng nge i tih mek a? Ka bialnu" ka tih chuan "A dik chho dawn ṭan e. Tunah chuan ka mu mek. Eng nge i tih zawk?" a lo ti vat a. A ṭawngkam ho tê tê avang hian ka nui reng mai.




Rei tak biak chi ah ka ngai lova, a ṭawng nasat chuan a chauh leh ka hlau si a. Kan inbiakna chu tih tâwp ka rawt hmasa ta a. Min lo hnial bik lo.




Ni hnih a liam leh a, a taksa a chak ṭha deuh tawh aniang Radiation Therapy chungchang bawk chu Nunmawii nen kan sawi leh a.



Doctor a râwn thu leh tih ngei ngei a ngaih thu a rawn sawi a. "A chau leh viau ange?" ka lo ti hulh a. Tunah chuan hlauhthâwnna hlirin ka khat rih a ni ber.



Mahse Nunmawii chuan "Doctor kha chiang takin ka zâwt alawm. Radiation Therapy hi a tirah chauh pui mah se a natna darh tur a vêng dawn a. Tin, a natna awm sa pawh kha a that ve thei bawk a. A hmaa Radiation Therapy a lak a a awmdan te pawh ka sawi vek a. Mahse Doctor chuan 'A hma in treatment lo la lo ula chu tun ai hian a dinhmun a chhia ang' a ti daih mai a. Ngaihtuah chian chuan sawi dik ka ti ve tho. A nunna chelhtu pawh a lo ni ve daih thei a" a rawn ti duah a.




Radiation Therapy hi pawng hlauh tur a nilo tih chu ka hre ve tho a. Brain Tumor chungchang hi Rara-i vangin ka en nasa bawk a. A ṭhatna pawh tam tak ka hria, chutihrual chuan chhiatpui theih anih avangin a chhiatpui tu zinga a tel ve ka hlau a ni ber.




Mahse tih theih dang awm hek lo le, Therapy lak leh phawt mai loh chu kawng dang a awm miau lova. Ka thutlûkna siam tur a ni bawk silo. Pathian rinchhanin a damna tura pawm thiam ka zir ve mai a ngai ang.




Tichuan Radiation Therapy chu ni nga chhung a la leh ta ngei a. A hma ang bawk khan a taksa a chau leh a, a luhai vângin a luak fo bawk a. Kar khat chhung tal tawp chu kan inbe lo leh ta pang a. Mahse Nu Nêmi leh Nunmawii te kaltlangin chanchin ka hre ve zel a.




A taksa a tawrh hun chhung chu a hma ami ai khan a reilo zâwk a. Ni thum chhung vel chu a chau zual a, mahse a hnu ah chuan a rawn harh pangngai veleh ta deuh a. Kan inbe ve leh thei ta hram bawk a. Thawk khat chu a veng leh ta hawk a.




Vellore ah thla khat chhung vel zet an zuk in enkawl hnu chuan an rawn haw ta a. A natna hi dam ngawt thei a ni bik si lova. A ziaawm rih avanga rawn haw mai an ni a. Thla leh ah check up nei tura an kal leh a ngai dawn a. Therapy lak leh te pawh a ngai mai thei.




An lo haw ni chuan Lengpui Airport ah ka zuk hmuak ve thlap a. Naupangho Tuition pawh ka chawlh pui hmiah a, an thiam ve tawh tho ti tawp mai ang.




Rara-i cuuan min beisei lawk lo hle aniang min hmu thut chu a phâwk hle a. Ka dem hran lo, ka lo hmuah tur thu hi Nu Nêmi te nufa chauhin an hre miau a ni.



Ka pa car ka keng a, chu chuan kan inphur haw ta a. In dim a la ngai hle a, a la chak ṭha tawk lo bawk a. Motor pawh ka khalh chak lo hle a. A theih ang tawkin a ṭawng siam siam reng a.




Tunah tak hi chuan midang awm ve lo se, theihtawpa duat ka châk takzet a ni. Hun thâwl kan nei veleh vat turah ngai ang.



An in kan thleng a, a nî te pahnih pawh an lo awm ve mial a. Tin, Nu Ramtei pawh ka hmu ve nawlh mai. Dawnga lo awm ve kher chuan a engamah hma in ka mit a ti kham nghal hle bawk a.



Mahse rei an awm lo hlauh a, Rara-i chungchâng te chu Nu Nêmi'n a sawi zung zung a. An hriatchian hnu chuan Nu Ramtei nen an inzui chhuak leh nghal chu a ni deuh mai.




Rara-i chu a nî te pathum chuan an ngaihsak em em a. An be chhen a, na a neih leh neih lohte chu an zâwt reng bawk a.



Rara-i pawhin chutia an ngaihtuah hluak chu mak a ti deuh aniang, hmui pet zeuhin hrilhai hmel deuh hian min lo en leh ṭhîn a.




Kei lah chuan ka lo lainat hmanhmawh a ! Ngaihsak tu nei ngailo lutukin chutia ngaihsaktu a nei thut chu mak a ti tawp mai ania. A âwm lo hran lo.




Tuna an ngaisak na te hi eng vang pawh nise a ṭha lamah ka ngai lui hmiah rih mai. A chhan chu tunah hian keima lak aṭang mai bakah a chhûngte ngaihsakna tak tak hi a mamawh takzet a ni.





Pa Lura chuan zanriah ei ve turin min ti na in ka lo hnial vat thung a. Zan lama ka len leh tur thu sawiin ka haw zui ta nghal a.



Midang awm ve reng laia lo ngaihsak hluak kha a mawilo deuhin ka hria a. Zan lamah chuan hun thâwl te pawh kan nei ve thei tawh zawk ang chu! Thla khat chhung teh meuh taksa insi lo leh inbe mumal thei lovin kan awm a. Ka ngaih tawh zia leh duat ka chak tawh zia chu pui tak a ni.




Zanah chuan kan chhûngkuain kan zuk lêng thla a. Puitling ho chu sitting room lamah an titi a. Vantei nen chuan Rara-i room ah kan awm thung a.




Vantei hi hmeichhe ṭawng tam tak a ni hran lova, mahse Rara-i nen an awmdun hi chuan sawi tur a hre ve zek zel a. An titi mawlh mawlh a. College chungchang velte chu an sawi a.




"In lo zir hnem awm si, internal test a hnai tawh bawk sia. Test loh ka duh bawk silo, min pui rawh aw. Ka rilru a hah teh mai nia" Rara-i chuan a lo ti hliai a. A rilru chu a hah hmel tak tak a.



Chutah Vantei chuan "Lungngai suh, i dam ṭhat phawt chuan kan zir dun zel dawn nia" a lo ti var a.




Nunmawiin thingpui leh a hmeh a rawn chawi lût a, kan bulah chuan a awm ve ta reng a. Hmeichhe pathum titi na bulah ka lo ṭhu mawi ve hi a ni hawt mai. Sawi tur an hre em em a. Ṭum dang ang lo takin Rara-i ber chu a ṭawng tam lova. Hahdam deuh hian an thusawi a lo ngaithla ve a ni ber.




Ka chhungte haw hnu chuan ka thaw huai mai. Rara-i nen chauh a room ah kan awm tawh a. Nunmawii khan a chhuah dawnin min la fiam zeuh lehnghâl a "Lo induat rawh u, in inngai tawh âwm si" a ti vel ngei a.




Kan inhriat ṭan tirha kan inbiak dan leh tuna kan awmdan hi chu inpersan tak a ni. Tin a lo sual lutuk bik lo tih ka hre ta bawk a, ka thawveng huai mai. Nge ni a, a insiamṭha zawk pawh ka hrethiam lo. A enga pawh chu nise a ṭha hrim hrim e.




Rara-i chu ka ṭhut hnaih nghal ruak a, "I mut a chhuak tawh em?" ka tih chuan ham bai bai chung hian "Zînga ka mut hnem bakah in lo kal hma lawk khan ka muhil a, ka la harh ṭha lutuk" a lo ti thuai a.




"I hâm bai bai sia" ka tih chuan a lo nui nghawr dat a. "Hâm satliah anih kha" a lo ti mai a.



A khumah chuan ka lawnkai ve nghal a, a bul chêt a ṭhu chung chuan "Min lo ngheng rawh" ka ti sup a. I he lovin min lo ngheng ve nghal mai bawk a.




"Min lo ngai em?" nui ri hak chunga a tih chuan "Ka thi hman ṭep" ka lo ti uang a. A nuih a za ngang mai.



"I pawisa min pêk kha khawhralna tur ka hre hlawl lova, ka laminate ang a, ka dah ṭha mai ang chu ka lo tia" a tih chuan ka nui huk a.




"Thil i hre mak sak thei si" ka ti sup a, a samah chuan ka fâwp vang vang a.



Min rawn melh chho kiau a, "Zêp miah lohin ka rawn haw hmelchhia i ti em?" a rawn ti teh daih a.



"A teuhlo lutuk" ka lo ti vat a, ka chhang rang lutuk tlat.



"Ka awihlo" a ti nghat a. A hmêl chu ka enchiang a, a hmai a duk deuh hlek a, a hma aiin a rawn cher haw zual bawk a. Mahse ka mitah chuan a ni tluka hmelṭha an awm chuang lo.



"I hmêlṭha ber" tiin a biangah chuan ka fâwp zeuh a.



Awih loh hmel zet hian a lo ner nang a "Ka rawn hmelchhe haw tih chu ka hre ve tho alawm. Ka sam lah hi a tawi ve tawh sa nen a tla nasa lutuk a. Pitar ka ang" lungawi lo zet hian a lo ti bai bai a.




"Ka mitah chuan i hmêlṭha ber tho, tuman an tluk lo che" thu tak zet hian ka lo ti a. Mahni insit leh hrehawm ti deuha a awm chu ka duh lo bur.



"Vellore chu a nuam em?" ka ti leh daih a. A landanin a ngaihtuahna a ti kal thui lutuk tur chu ka vêng pah nghal a.



Ka zawhna chu a chhan châk zawng tak a lo nia nge a theih ang tawk leh a hriat ang chin chin te sawiin Vellore chanchin chu min hrilh a.



An lo haw ve chauh si a, a chau ve viau in ka ring. Tin, Nu Nemi leh Nunmawii te pawh ngaihtuah tel ve an ngai a. Rei vak lovah ka haw ta a.



Rara-i chuan hma a sâwn ve bek bek a, kar thar kan chuan kai meuh chuan college pawh a zawm veleh tawh a. Mahse tu mai pawh chuan kan vêng thâwng a, harsatna a tawh thut te ka hlau a.




Vantei pawh ngaihsak turin ka chah nasa thei hle a. Tun thlengin harsatna lian tham a tâwk leh ta lo chu ania.



KṬP inkhawm bâng in ka haw chu Rara-i phone call ka dawng zui nghal a. Inkhawm zan anih vanga leng thla ta lo kha ania.



Ka lak rual chuan "Min lo ngai hman em ni?" ka ti uang a. A nui nghawr dat ri chu ka hria.



Mahse min chhang ta mai lo chuan "Au Hriatpui" a rawn ti halh a. A âw aṭang chuan a thutak hmel viau bawk.



"Sawi rawh le" ka lo ti dam dap a.




"Min neih i la duh reng em?" a tih chuan ka bangbo khawp mai. Ka rin loh lampang daih a rawn sawi miau a ni.




A zawhna chu chhan buai ngai ah pawh ka ruat lo "I hriat kha" ka lo ti churh a.



A lo thaw chhuak ham ham a. "Innei tawh mai ang" a rawn ti zawi sep a. A ṭawng chu zawi hle mah se ka hrechiang lutuk tlat.



Mahse chutiang teh thut a inneih chungchâng a rawn sawi chuan min ti hamhaih khawp mai. Neih ka duh loh vang lam a ni lova. Kha leh chen min hnial tu khan phone kaltlangin inneih a duh thû a rawn sawi ania !



Chhan ṭha tâwk tak a awm tihna a nimai.



_________*_________*__________*_______


Show post links
Top