AIZIAL By CVL Awmpuii (Completed)

[Ngaia]

AIZIAL
By CVL Awmpuii



Chapter 19



Vantei nen kan inbiak zawh chuan in hum ruh ṭeuh chungin Rara-i number bawk chu ka dial leh a, a ring ral leh ṭhak tho.



Thinrim ru ṭunin ka awm a, ka insehruh ṭeuh bawk a. Ka sa pup pup maiin ka hria. Vanrawngbawli awm dan chu ka haw hlur mai.



Chutihrual chuan dem pum hlum vek thei ka nih bik loh zia ka inhrechiang a. Mahse ka lungawi lo viau tho bawk si a.


Vawi nga lai ka call hnu pawh chuan a la duh ṭhak lova. Zuia nen chuan eng hun hlimawm tak hmang dun ang maw.




Tuition pêk a hun mai tawh dawn a. In lama haw leh hmasak phawt ka duh avangin mitthi in aṭang chuan in lam panin ka inkhalh chhuak nghal a.



Tun dinhmunah chuan eng thil mah tih theih ka nei lo. Mahse engti kawng zawng pawhin ka sawi fel pui dawn a ni tawp mai ni.



In ka thlen chuan ka nu in min lo chhawn vat a, pangngai takin ka chhang a. Ka intifai thuak thuak a, Tuition pe turin ka pu te in lamah ka inkhalh chhuak leh nghal a.




Hn thil leh mimal thil inthlun zawm tir hi ka duh lo viau na in loh theih lohin Rara-i ka ngaihtuah zel a. A WhatsApp last seen ka check chuan zing lam daih tawh kha a ni. Ka morning wish pawh a lo la hmu lova. Min hai der thiam lutuk chu ka haw hlur mai.




Naupangho chu dawhthei takin ka zirtir a, ṭum dang anga pangngai taka awm chu harsa ka van ti tak. Dar 5 velah kan bâng ta hram a.




Ka mood fuhlo ti zual tur tingin Nunmawii a lo kal a, a nau tuition bang a rawn hruai a.




Nui sang chung hian min bia a, "Tunlai chu test velah pawh hma a sawn lutuk a, kan lawm tak tak ani" a tih chuan ka lo nui lui ve hram hram a. Nidang ang chu nise hei ai daih hian ka lawm ang. Mahse ka lo dawn sawn hun hi a fuhlo em ani.




"A lawmawm lutuk e" te chu ka han ti ve hram a. "Tuition fees vel chu kar leh lamah kan lo ken tîr dawn nia" a tih chuan ka lo bu nghut tawh. Inbiak lum lam ka peih thlawt lo a ni ber. Ani pawhin a hrethiam aniang, a nau chu hruaiin an inthiar fihlim vat a.




Zanriah ei laia ka chhungte titi pawh chu ka hre mumal lo. Ka chawei pawh a tui hrep lo e. Heti tak maia a ni khat reh hlekin min tibuai mai hi mak ka intih bakah ka inhaw hlur mai. Mipa pa ve tawk tak inti tan chuan a tha nat thlak riau bawk.




Zan dar 7 a rik chuan Rara-i te in kawtah ka ding vang tawh a. A vawi tam tak nan ka call leh a, chhanna ka dawng lo leh pek a.



Hetiang zawnga min nawr lui dawn anih chuan a ti sual hle ang.



WhatsApp ka luh chuan a lo online vâng a. "I rawn chhuak dawn nge ka rawn lut dawn?" tih hi ka va thawn a. Ka message chu hawng lo mah se a chhiar thei tho tih ka hria.




"Vanrawngbawl min hai der suh" tih ka va thawn leh a, ka bulah hian awm ngat sela chu ṭawngkam vîn ka hmang chiang viau ang.




An inchhunga va luh mai chu ka rilruk ta a, "Ka rawn lut ania" ka va ti leh hram a. Rei pawh nghah ngai lovin ka message chu a lo seen ta vat a. Typing a rawn inti nghal zat mai. Ka nui nghal suk a, nawr luih dan tawk chu ka hre ve alawm.




"Ka la haw lo" tih tê mai hi a rawn thawn a, ka sa chhuak pup maiin ka hria.



Tun thleng thlenga a la haw lo anih chuan Zuia bulah a la awm dawn tihna ania. Ka ngaihtuah zawng ringawt pawh hian ka thisen a lum huam thei. Mipa thîk thu chhe zet ka nih zia ka inhre thar awn awn mai.



Ka va call nghal a, vin hrep ka duh tehlul nen a pick up duh ṭhak lova. Tunah hi chuan dimna tel map lova thin hrep mai ka duh tawh.



Mihring luhlul leh mahni thu duh, tawn luih mai mai chi a nih loh zia ka hre chawpchilh nghal bawk a.



A lo haw hma nghak mai tur chuan rilru ka siam fel ta tawp a. Ka thiam loh a ni tih hre reng mah ila hetiang zawnga min nawr hi ka haw hlur mai.



Zan dar 9 a rik dawn thleng pawh chuan a lo la haw thei lova, va call leh mai ka tum ut ut a, mahse a la duh dawn lo tih ka hrechiang ngang bawk si.



Chutia ka inngaihtuah lai mek chuan a tawp tawpah râl aṭanga a lo kal hnak hnak chu ka va hmu ta a. Ka lawmna leh thin nawk ka châkna chu a inchen reng awm a.




An in sira thingbuk hnuai thim laia ka din avang chuan min rawn hmu mai lova. Hmalam thui tak en lovin a hmazawn chiah a en hrim hrim a, a rawn kal hnai hma loh chu min hmuh ngaihna a awm lo.



Pawnfen, a khup khuh hnâp arh deuh hlek hi a fêng a, kawr ban tlawn, a taksa fit tawk lek hi a ha bawk a. A converse bunte nen chuan a inhnerem thlap hlawm mai. Tin, messenger bag var a ak leh tawp bawk a. A landan chu a pangngai khawp mai.




Ka zawn a rawn thlen dawn hnaih chuan ka va pan nghal pawk pawk a. Min lo hmu chawpchilh ve nghal a, a lo ding nghal chawt rêng a.



"Nuam i va ti awm ve" ka kut phar hluai chung chuan ka ti a. Ka âw rik dan chu a ngeiawm ngawtin ka ring, ka nui lui hawk tel kher bawk a.



Min tham lo fe hian a lo nui sak a "Eng nge i lo tih dawn?" a aw rik dan ngeiawm lutuk chu ka haw let leh reuh sia.



"Vanrawngbawl" ka ti nghal hluk a, min melh dan ngeiawm lutuk leh a hmui pet sawi kual vel chu thin nawk nawk ka châk ber.



"Eng nge ni?" meng kalh ralh chung hian a lo ti a. Ka insum thei tawh lo, a dar tawn tawnah chuan hmerin ka thing nawk a. Ka thaw chhuak hrawk bawk a.



Engah mah a ngai chuang miah lo "Khatiang ti tur ngawr ngawr a lo kal i nih chu ka ring lova" chal chuar tap hian a lo ti a.



"Kut ka thlak duh mai ang che" seh chilh zeta ka tih rual chuan thîp ram hian min rawn melh ta a. A thinrim ve hle ni tur a ni, a insehruh nghal ṭeuh mai.



"I zak lo mange" a ti khur hlak a, a hmelah chuan hlauhthâwnna pakhat mah a lang lova. Mahse a thinrim zia chu hai theih a ni lo.



Ka vawnna aṭang chuan a tawlh hnung dat a, amah melh reng chung chuan ka lo thlah ve mai bawk a.



"Haw rawh" a ti fiah fak a, tur zetin min melh bawk a. A tih tak zia chu a mitmeng aṭangin ka hrethiam ve vek.



Ka thiam loh a nih zia ka hriatchian rualin a lakah ka lo lungawi tawh bik si lova. Chutia min pal zam mai mai a tum chu ka haw hlur a.




"College ṭhulh ṭhakin mipa i zui a" thil tenawm zet sawi ang mai hian ka ti a. Ka aw rik chhuah dan aṭang chuan ka ngaihnêp hmel viau in ka ring bawk.




"Mitthi lumen chhuanlama ngaihzawng hluite nen hun hman dun ai chuan ka la inchhuang zawk" a lo ti ve nghat a.




"Ka insawifiah thei" ka tih rual chuan a kut a lo vai fua a, "Insawifiah chawp ngai thil anih chuan sawifiah tur thil thleng a awm tihna a nimai. Keichu hetiang inthuar tham vel hi ka peih ve lo" a lo ti hmak a.




A thinrim hmel kha a bo ṭhak tawh a, thup tum eng ang viau mah se rilru na hmel a pu tawh zawkin ka hria. Chu chuan ka lo thinrim lêt ve na te kha a bengdai zo a, ka inthiam lohna a ti zual a, ka inhaw nghal hlur mai.




"Rara..." ti a va pan hnai mai ka tum rual chuan a lo tawlh hnung dat a.



"Tlankimi lakah rilru i la pe anih kha, chutiang hrethiam lo tur khawpa mâwl ka ni lo. Inbe rih lo ila, chu chu kan tan a ṭha ber" dam dap hian a lo ti a.




Kal mai a tum chu ka pawt ding nghal a, bul kan ṭan tirh khan heti em em hian ka veiin chân ka hlau ang tih ka ring pha ngailo.



"Rara" ngenngawl zet hian ka ti a, "Min ngaidam rawh" ka ti leh ta nge nge a. Tlawmah pawh ka la thei tawh lo. Amah chân ai chuan inphah hnuai mai chu ka pawiti tawh lo



A rawn hawi let a, a mitmeng chu ka chhiar thiam lo. "I tan midang bul ṭanpui nan chuan a la hma deuh a ni mai thei ani. Ngaihtuah chiang mang hlei lovin ka duhna ringawt che kha ka lo dah lian a. I la inpeih tak tak lo, i inpeih tak tak hunah kan la inngaihtuah ṭha leh zawk dawn nia" a ti dam dap a.




Kan inhmachhawn dan chu ka duh dan a ni ta hauh lo mai. Ka lo rin lawk dan chuan heti hian ka lo nghak ang a, thinrimin a titau ang a, ka thlêm takzet hnuah a lungawi veleh mai ka ring ania. Mahse tun ṭum chu a dan a dang takzet.




"Bul kan ṭan rual khan heti mai mai hian tawp pui che ka tum hlei nem" ka ti zawi ruih a. Ka thaw chhuak nghal ham ham bawk a.



Ngainat awm zet hian min lo nuih a "Kan tâwpna tur a ni ka ti reng reng lo, i rilru inpeih fel rawh se ka ti mai alawm. Nakinah tha tharin bul ṭan leh hun kan nei mahna" a tih chuan ka lo thaw chhuak nghal hrawk a.




Beidawn ai mah chuan rilru hrehawmna in min tuam nasa zawk.



"Chutiang ka duhlo" ka ti hmuk a, sawi belh tur erawh ka baih vai viau mai.




"Midang ngaihdan ngai pawimawh mî i nihna kha ka chungah lantir la, tunah chuan ka ngaihdan hi min zah sak rawh" a lo ti nghet charh a.



"Nunhlui vang mai maia inṭhen chu ka duhlo" ka ti leh hram a. "Nunhlui hian mihring nunah nghawng a nei nasa teh ania, khatiangin sawi ringawt suh. Nangman i hrechiang ber ang chu. I rilruah inthiam lohna tam tak a la awm anih chuan nangmahah awmzia a la awm tihna a nimai" a rawn ti duah a.




Chhan zui ngaihna ka hre tawh lo, a sawi dik miau si a ni. Tlankimi khan min la ti danglam tlat alawm.



Ka hmêl awmdân aṭang chuan ka ngaihtuahna a lo hrethiam nghal aniang min nuih deuh sak a.



"I inrintawk hun ka lo nghak ang" tiin min kalsan zui nghal a. Chelh din buai ka duh tawh lo. Ka thiam loh a ni a, ka tuar ngam tur a ni.



Chutihrual chuan Rara-i hi chân hlen ka tum hauh lo. Hetiang mai maia tâwp tur hian ke ka pen pui lo.



Khumah chuan mu thei lovin ka inlet tawn sek a.



WhatsApp ah chuan lutin Rara-i message ka hnutchhiah chu keimah leh keimahin ka chhiar nawn tlut tlut a.



"I duh dan chu ka zah sak ang che. Mahse ngawi rengin ka nghak dawn lo che tih hria la. Bul ṭan leh tûrin kan tâwp lailawk chauh ani tih hria ang che. Thâwm ka rawn nei reng ang a, ka hnar theih loh ang chiah che khan min hnar thei lovang" tih chu ka chhiar nawn leh ṭhin a.




A seen ringawt a, thâwm a rawn nei zui lo hrim hrim.



Rara-i nen pangngai taka kan inbiak loh aṭangin thla khat dawn a liam ta a. Kei chuan ka be âwl lova. Ka tih turte ka hrilh thlap thlap zel a. Chhanna erawh ka dawng ngailo. Mahse ka la beidawng duh lova. Beidawn chu ka tum lo bur hi a ni tawp mai ani.




Ka hmuh duh chhuanlamin Vantei chu college ah ka thlah fo a. Zuia nen an lo awm dun fuh thei em em mai lehnghâl a. A tirah chuan en liam harsa ka ti a. Mahse Vantei hian an inkar chiang takin a hria a, ṭhian bak an nih loh thu chiang takin min hrilh a. Thîk enah ka en tawh lo, chutihrual chuan an lo awmdun sek hian ka mit a tikham fo tho.




Ka chhungte pawhin kan inkar chungchang an hre leh vek tawh a. Ka pa min hnêm na chu a chau rau ang reng. "A la naupang a, Vantei sawi kalhmangah ngaihzawng a la nei ngai si lova. Naupangchhe star ang mai mai khan a star che aniang. Anni ang rual hi chu an la serious tak tak thei lova" a ti a.




Chutiang ringawt chu kan inkar a ni bik si lova. Inhnêm nana hman chu har ve tak ani. Min lak thutak pui vak lova. Vantei ṭhian anih avangin fanu a an lo ngaih sa vang pawh a nimai thei.




Tun hnai tê hian Tlankimi'n min rawn be leh zauh ṭhîn bawk a. Eng nge a rilruah hian awm ang aw ka ti rilru ve rauh rauh ṭhin.




Kan nunhlui rawn sawi dawt lo mah se thlalâk hlui min rawn thawn fo a. Delhi a kan inhmuhna hmasa ber te, Mizoram a let dawna kan chhuah dunna te, kan lenna thlalak te min rawn thawn leh ṭhin a.



Mahse kan pahnih chungchang sawi miah si lo hian "Hemi ṭum hian ka la chêr tawp" tih vel mai mai te a rawn sawi ṭhin a. Chhan loh tawp chang nei mah ila a rul tâwk tê tê a chhan chu ka nei ve fo a.




Rara-in a thîk zia ka hrechiang tawh a, mahse ka chhang veleh mai ṭhin chu mak ka inti ve tho.



Lehlam kawng zawng taka ngaihtuah chuan ka khawhar min hnemna lai chen a nei tlat a. Min rawn be lunglêng thar nimai hian ka hria.




Kan inbiak chuan a ngaihzawng chungchang kan sawi ngai lova, Rara-i nen kan chungchang kan sawi dun ngai lo bawk a. Mawl mang deuh deuhin kan inbia a. Eng emaw ti kawng zawng tak chuan ka hlimpui leh riau ṭhin a.



Chutia kan inbiak zeuh zeuh takah chuan zan tin kan inbe chho leh ta a. Rara-i text ka ṭhulh chuang lo bawk a, chhanna ka dawng ngai bawk si lo. A beidawn thlak ve lek lek tawh ṭhin.




A chang chuan ka pa thusawi kha a dik tak tak emaw ka ti hial ṭhin. Anni ang rual hi chuan mipa nin chin an nei tlat a. Khatiang khan min ngai emaw ka ti hial tawh.



December thla kan chuan kai meuh chuan Tlankimi nen pawh kan inbe nasa leh ta kher mai. Nunhlui sawia kan nuihpui hawk hawk chang lah a tam. Chutihrual chuan ka thinlung chhungril ber hian Rara-i a lam mawlh mawlh thung a.



Tun thlenga thâwm a rawn la nei miah lo hi mak ka ti a. Kan tawp tak tak dawn ta emaw tih hial châng lah ka ngah ta mai a. Kan inkar tawp hlen tura ka ngaihtuah châng ringawt pawh chuan ka thawk a pik vek thei.




Zan khat chu Tlankimi'n lêng turin min rawn sâwm ve teh mial a. Han in lên pawh leh êm tur chuan ka lo hnial vat a.



"I bialnu nen khan in inṭhen tawh tho a ni lawm ni?" a rawn tih chuan ka harh chhuak zawk maiin ka hria.



Hetianga a ngaih tur khawp hian a lakah zuamawmin ka lo awm hman tih ka hrechhuak chiah. Rara-in ka ngaihtuahna a rawn luah khat nghal a.



Ka nikhua loh zia ka inhrechhuak chawpchilh nghal bawk a.



Tlankimi message chu vawi 10 dawn ka chhiar hnu ah chhan let dan tur chu ka ngaihtuah chhuak ta a.



"Tlankim, i tân eng chiah nge ka nih chu ka hre tawh lova, mahse ka tan chuan nunhlui mai i ni. Tun hnai te ah ṭhian pangngai angin kan inbe leh a nimai a. Mahse hemi vang ringawt hian a hma ang kha kan ni leh ta tihna a ni lo ania. Chutihrual chuan, i tana ngaih kawih tur zawnga ṭawngkam ka lo chhak chhuak anih chuan ka thiam loh a ni. Min ngaidam dawn nia. Rara-i nen kan chungchang i sawi anih chuan tâwpna ka la siam pui reng reng lo, ka siam pui ngai lo bawk ang. Tin, ka nunhluiah let leh tumna pakhat mah ka nei lo bawk. Lêng tura min sâwm pawh hi a kawi zawnga min sâwm i ni lo mai thei, mahse ka hnar nawn leh ni rawh se. Tin, inbiak fo pawh hi ṭha ka ti tawh lo. Kan kawng ve ve kan zawh tawh a, ṭul tawp khawk a nih loh chuan inbe tawh lovang. Chumi hun pawh chu awm lo se ka duhthusam ani" tih hi ka va thawn duah a.




A lo ngaihdan tur pawh ka ngaihtuah hman tawh lo. Mahse ṭawngkam deng khawng leh na lutuk chuan ka ti lovin ka hria.



Ka têtte aṭangin midang chunga ṭhat chhuah tura zirtir ka ni a. Ka nu leh pa te hian midang biak chhiat ngawt an phal ngai lo. Mahse a châng hi chuan awm dan thiam a har ve ṭhin.




Ka pa rawngbawltu a lo nihna laiah hian mite chung en leh mi mit fukna ka ni tih ka hai lova. Ka pa fa a ka lo piang hi lawm viau mah ila ka tan phurrit a nih châng a tam khawp mai.




Ka naupan zual lai deuh phei chuan Thingtlang khua hmun hran hranah kan awm ṭhin si a. Mihring chêng kan lo ṭhahnem vak lo bawk nen thu a thang chak em em a. Naupangtê mah ni ila ka pa hmingchhiat hlauvin ka fimkhur ve em em ṭhin.




Sikul kalna ah lah ni se mipa nih chuan kan lo harh ve a, buaina neuh neuh kan lo nei ve ṭhîn a. Min insualpui châka min tibuai ṭhin tute, min cho em em tute pawh kha ka cho loh vang ni miah lovin ka pa hmingchhiat ka hlauh vang zawkin a tlâwm zawka ṭan châng ka ngah ṭhin.




Ka tan chuan mi tih buai a thian loh bakah min tibuai tute pawh ka tih lêt a rem ve ṭhin lo.




Ka ngaihtuah let apiang hian tha nat thlak ṭhin viau mah se tun dinhmun min hruai thlengtu, tuna ka nihna min nih tir tu mizia hi a ni a. Ka lâwm let ling zawk tawh.




Tlankimi ka va text dan chu ka chhiar nawn leh a, han huat tur leh nat viau na tur awmin ka hrelo. Mi rilru hliam hlau reng reng a khawsak reng mai chu mahni kan hah vek zel anih hi.




Ka thaw chhuak nghal hluai a, khumah ka phone chu theh thla in ka kawr ka hlip sawt sawt a. Towel ban leh bathroom pan ka rual a. Ka va inbual ta ringawt a, in tih harh ka mamawh tak zet a ni.



Room aṭanga ka chhuah rual chuan choka lamah ka nu leh pa te thâwm ka hria a. Ka va phei nghal vat a.




Ka nu in pot a lo chei leh tawh a, ka pa in a lo pui leh bawk a. An hnawk rem rum mai. Vantei chu room ah lehkha a zir mekin ka hria.




Ka nu in min hmuh rual chuan min lo tir nghal zat a.



"Hriatpui, ka laklawh lutuk a fridge a tui kha min lo lak nghal lawk mai" a ti a. A kutah chuan rawng a kai deuh niai a, a malchungah pot tê reuh tê pakhat a pawm bawk a.




Tui ka va pek rual chuan a ṭhutna bulah chuan ka ṭhu thla ve nghal zat a.




Ka pa in min lo fiam hmanhmawh a "Nula rîm tur nei ta lo chu i nu bulah i tap chawt mai dawn anih kha" a lo ti uang a, a nui huk huk bawk a. Ka lo nui ve hawk mai.




Ka nu chuan "A hmanhmawh thlak loh emai, i pa pawh a tlangvâl rei alawm. Tlangvâl rei ta chu hei, a ṭha ber min thing chhuak nawlh mai lawm" a lo ti zui ve zat a. Mawi zet hian a nui var var bawk a.




"Kan va intithei sâwt ve aw..." ka pa chuan a lo ti veleh hlut a, a âw kî a ka nu a duatna ri chhuak chu hai theih a ni lo. Ka nu a melh dan mawlh mai hi hmuhnawm ka lo ti ṭhin. Hmangaihna mitmeng a ni. Hmeichhe thusawi uar thiam deuh phei chu ni ila 'A luangliam ngawih ngawih' tih tur ang kha a ni.




Ka nu lah chuan "Ka khawngaih che a, tlangvâl zuarin pastor ah an nem nghet hman ang che tih ka hlauh pui si che a. Ka khawngaih neih ve mai mai che alawm" nghal zet hian a lo ti a. A nui zui kar kar bawk a.




A thusawi chu ngaihsak zui lo ang deuhin pot a chei zawm mawlh mawlh a. Ka pa chuan a melh run run tawh mai.




"Ka duat..." ka pa in a rawn ti chiah chu ka nu a rawn hawi chhuak vat a. Ka pa a melh zet hnuah min rawn melh ralh a, ka lo nui fun fun tawh mai sia. A lai ngang mai, mahse a inthunun nasa ve khawp mai.




Nghal zet hian ka pa chuan "Kan lai leh reuh sia" a lo ti leh kher a. A nui chhuak hawk hawk bawk a, ka lo nui ve huk mai.




Ka nu lai hmel lainat awm zia chu, hmuh a inthlahrun awm hial zawk.



"Chhuatah i mu mai ang" a han ti ringawt a, ka pa chu a melh deuh khai a. "I mu châk tawh em ni? Mut te i sawi a" ka pa in a lo tih veleh zet chuan keipawh ka lai lek lek tawh. Ka nu leh pa te mah nise an nupa kara lo awm ve reng chu ka hnawksak lek lekin ka hre tawh bawk.




"U Sangzual..." ka nu chu a sen ṭawn ṭawn tawh mai. A sa chhuak pup pup in ka ring. Keipawh ka awm dan a lai zo a, kalsawn ngawt dawn ila a laklawh zo vek tawh bawk si. Ka pa lah chuan nui suk suk chungin ka nu chu a lo melh reng tawh mai bawk si.




Ka âw ka thian khurh a, ka nuih a zat bakah ka awm dan lai lutuk chu boruak danga thlak danglam ka tum a ni ber.



Ka nu chuan "A mawi lo thei emai" a han ti hliai ringawt a. Min rawn melh zawk a, mahse a hawi sawn leh rang lutuk ringawt.




A awmdan lai zet chu ka pa in a lainat ta deuh aniang "Hriatpui, tunlai i hna lam eng nge chanchin?" tiin min be ta daih a. Min rawn melh a, ka nu chu en turin min rawn mitmei zauh bawk a. A nui pah suk suk bawk a.




Ka nu chuan a pot chei laklawh lai chu a tuai a tuai a, a kun deuh tlat bawk a. Pangngai taka awm tum, mahse a zahna in a hneh zawk tlat si hi a ang ber. Ka pa nen chuan kan in nuih vur vur mai.




Ka hna chungchang chu ka hrilh ve luam a. Tukinah tukṭhuan ei laiin ka sawi nual tawh a. Ka nu lai lutuk tur tih reh nana sawi nawn mai mai kan ni tih ka hrethiam ve tho.




Ka nu chu a tho ta tharh a "Thingpui ka'n lum ange" a ti a. Gas awmna lam a pan zui nghal zat a. Pangngai takin kan awm zui veleh hlawm mai bawk a.



Thingpui kan in zawh chuan ka pa in room lamah min luh san a. Tun Pathianni lo awm tur hi Pastor Bial fan programme a ni leh tawh a. Thusawi tur a inbuatsaih leh tawh dawn anih hmel.



An pot chei na hnuhma chu ka nu nen kan ti fel zung zung a. Ka nu chuan "Tunlai i awm dan hi ka chîk che a, i dik lo riau mai" a lo ti hliai a. Min melh lem lovin a pot chu a rem ṭha mawlh mawlh a.




"Ka ṭha alawm" ka lo ti liam puat a. Pot lian deuh hlek chawi a tum rual chuan ka lo ban khalh vat a. A dahna tur a sawiah chuan ka dah zui nghal zat a.




Kan intihfel zawh chuan mut mai ka tum a. Mahse ka nu chuan min lo ko let leh rih a. "Inbe lawk ang hmiang" a ti a, min melh deuh vang vang bawk a. A thutak khawp mai.



Veranda-a lamah chuan kan in zui chhuak a. Kan chair hunah chuan kan ṭhu ve ve a. A thusawi tur chu ka lo ngaichâng rân a.




"Hmeichhe chungchângah i rilru a buai a ni tiraw?" a tih chuan ka lo ṭhen suk a. A sawi ang khan ka nu hian min chîk em em a. Ka pa angin ṭawngkam ṭha in min zilh fo lo mah se nu a nihna ang hian keimahni a fel hlel a awm deuh chuan a lo hre pawh zung zung zel.




"A ho lutuk" ka tih chuan "Mipa ho tak hi chu" a lo ti hlak a, a ner deuh nang bawk a. Ka lo nui mai a.



"Hriatpui, Rara-i chungchângah hian i rilru a hah viau in ka lo hria asin. I nau hian min hrilh leh zeuh ṭhin a. I awmdan hi ka hai miah lo ania" a rawn tih takah chuan ka lo thaw chhuak hawk a.



"Rara-i chauh pawh a ni tawh lo" ka ti sup a, ngaih ṭhat loh hmel deuha min lo melh takah chuan ka ṭhen leh suk a.



"Tlankimi hi..." ka tih lai mek chuan "I la duh em ni?" a lo ti vat a. Lu ka thing rang kher mai.



"Thil a fel nghal duak dawn emaw ka tia, mahse rin ai daihin a nghawng a lo thui a" tiin Rara-i nen kan chungchang leh Tlankimi nena kan awm zui tak dan te chu ka hrilh ta tawp a. A zawng zawng chuan ka sawi êm bik lova. Mahse a hrethiam ruak thovin ka ring.




"Rara-i lungawi lohna chu a âwm lutuk, a kum zat leh a nungchang zawng zawng nen te phei chuan a inhne rem thlap alawm. Chutihrual chuan i thiam lohna em em a awm lo ania, inthiamlo lutuk duh suh. Mahse i thiam loh a nihna chen a awm ania" a lo ti nghat nghat a. Min hriatthiam hmel tho mai.



"Rara-i nen kan inbiak rih loh hnu chuan Tlankimi nen thu ho mai mai sawiin kan inbe chho leh a. Mahse ka duh tawh lo tih ka chian viau rual hian ka lo be ṭha duam bawk sia" rilru buai zet hian ka ti leh a.



Ka nu chuan "Pathianin mihring a siam khan mipa a siam hmasa a, hmeichhia a siam chhan chu mipa khawhar hnemtu turin a ni pakhat a. Tlankimi chu i ngaihzawng hlui a ni a, a rawn be lunglêng ve che anih chu. Kha kha mipa zia pakhat a ni ve a. Chutihrual chuan Rara-i duh chunga i lo be leh vak chu i thian miah lo" a lo ti zung zung a. Chu chu ka pawm khawp mai.




Ka duh tawh lo ti chung si a ka lo biak ṭhat lehna te kha a ṭul miah lo. Ka thiam loh vek a ni.




"Ka rilru tibuai tu ber pakhat chu Tlankimi laka ka awmdan hi ani bawk a. A bula ka awmin ka la danglam tlat, mahse ka sawi chhuak thiam chiah lo. Chu ringawt chuan Rara-i lakah inthiam lohna min neih tir a" ka ti fan leh ruih a. Ka nu chuan uluk deuhin ka thusawi chu a lo ngaithla a.




"Ka rilru hi a mumal chiah lo a mawnle te ka tia, ka rilru nghet lo nge pawh ka hrethiam tawh lo" ka tih zawm leh zat a. Ka inringtawk lo tak tak atin ani.




Chutah ka nu chuan "Tlankimi chu theihnghilh i tum lutuk a, i rilru a la luah hneh zawk mai mai anih kha. Theihnghilh tum ngut ngut duh suh, ngaihzawng hluite theihnghilh ṭhak a theih ngai loh. I pa pawh hian kan inneih hma in ngaihzawng hlui a lo nei ve tawh tho a, theihnghilh ngut ngut tum lovin a awm tawp a. Hei, a rilru luahtu tak chu min nei tho alawm. I thinlung duh zawng kha zâwm tawp rawh. Hetiang kawngah hian tawn hriat ngah lo mah ila thinlung duh zawng zawm pawimawh zia chu ka hrechiang ve ania" a lo ti duah a.





Ka ngaihtuah chiang a, a sawi dik viau in ka hria. Tlankimi hi theihnghilh ka tum em em a, mahse ka tan a hmasa ber a lo nih tawhna laiah a harsa a. Ka duh tawh lo tihah chuan ka chiang viau lawi bawk si.




"Tlankimi nge Rara-i i duh?" a rawn tih leh chuan "Ka la khaikhin ngailo" ka lo ti vat a. "Tlankimi chu ka duh tawh lo tih ka chiang viau a, Rara-i chu chân ka hlau" ka tih leh chuan ka nu chu a nui ta sak a.




"Kha tak kha alawm ka sawi chu, i thinlung duh zawng zâwm rawh ka tih kha ania. Kan duh zawng hi nghah rei peih a ngai, chutihrual chuan nei tura kan bei ve a ngai ania. Tunah chuan inrintawkna chauh i mamawh tawh" a lo ti nghet charh a.



Rara-i thusawi kha ka hrechhuak zawk mai, ani pawh khan inringtawk taka ka awm hun min nghak anih kha.




Zan muthmunah chuan ngun thluk zetin ka ngaihtuah leh a. Theihnghilh ka tumna chauh hi ani Tlankimi'n ka thinlunga hmun a chan tawh awm chhun chu ! Ka nunhlui a nih miau avangin theihnghilh chu thil theih loh tâwp a ni dawn a. Theihnghilh ka tum lutuk na lamah ka hre reng emaw ka lo inti zawk mai mai ani.




Rara-i chu chân ka phal lova, ka duh lutuk na lamah ka thinlung zawng zawng pêk ka duh a. Tlankimi ka hnaih ruala ka danglamna khan amahah inthiam lohna min neih tir nghal ringawt a. Ka lo duh hle vâng zawk a ni.



Tunah chuan hmachhawn leh turin ka inringtawk hle in ka hre ta. A huat zawng chu tih ka tum tawh lo. Mi pawi sawi leh mi rilru tih nat ka hlauh luatah ka duh ber pawi ka sawi a, a rilru ka tih nat sak bawk a. Ka siam ṭha vek tawh ang.




Zingah chuan hma deuhah ka tho a, rilru thar nen ka tho chhuak tawh bawk a. Ka zâng vah mai.




Ka ngaihtuah chhuah leh tak pakhat chu mipa te hian hmeichhia te ang bawkin insawi thâwl kan lo mamawh ve hle niin ka hria.




Thil sawi chhuah loh theih lutuk te hi pâ na emaw kan ti a, a nihna lai chen te pawh a awm ve ang chu. Mahse ka nu nena kan titi dun aṭang khan ka thâwl hawk tlat a ni.



Vantei class kal tur insiam lai chuan a room ah ka va lut a. An bân hun turte chu ka zawt luam a, pangngai takin min lo chhang ve mai bawk a.



"U, U Tlankimi nen khan in ni leh tak tak em ni?" a tih chuan ka lo phun hluk a. A inthlahrung leh deuh aniang "Ka zawt mai mai che" a lo ti leh vat a.



Ka inthiamlo veleh deuh a "Ni lo e, i ṭhiannu in i bulah eng nge a sawi?" ka tih chuan a lo meng ak ringawt a.



"Sawi chu a nei ngei ngei ang" ka ti leh a, chîk zetin Vantei chu ka melh bawk a. "Eng vak mah a sawi lo. 'I û kha ka ṭhen daih, ṭha mawla a nih kha. A mawl si, ka beisei a pha lo emai' tih chiah a rawn sawi" a lo ti hliai a.




"Tlankimi nen kan chungchang a sawi em?" ka ti leh a. "E aw, a sawi tel tak alawm. 'Tlankimi nen khan ni leh rawh se an in phû tawk chiah' a ti a. Lehlamah ka û i lo ni bawk sia, ka zawt chiang vak hreh a" a lo ti leh vat a.




Rara-i ngaihdan tur chu ka hrethiam ve ruak mai. A rik phawng phawng aiin ka nau bulah chuan sawi tur chin pawh a lo hre ve tal alawm. Â buang ang hian lang ṭhin mah se a fing veleh kar ṭhin lawi a.




Tlai dar 2 velah chuan Rara-i te college gate bulah ka awm vâng tawh mai. Zinga Vantei ka zawh khan dar 2 leh a chanve a an ban tur thu min hrilh a, an lo chhuak ṭep tawhin ka ring.




Reilote ka nghah hnu chuan an rawn chhuak ta hlawm a. Rara-i chu ka lo châng ve ran a. Tuna hmuh ngei ngei ka duh avangin zingkar aṭangin ka la be miah lova. Ti lang lo mah se min lo ngaih chân ruk ve tho chu ka ring.



Midangho an rawn chhuah vek tawh hnu âwm vêlah hian Vantei te nen an rawn inzui chhuak ve ta a. Va pawh mai ka tum a, mahse Zuia ka hmuh rual chuan ka ding leh chut a.




Rara-i chu a ṭawng zat zat a, midangho chuan an lo nuihpui dar dar bawk a.



Gate pâwn an rawn thlen rual chuan ka va pawh ta a. Min hmu thut chu mak an tih hmel vekin ka hria.



Rara-i pawh chuan min lo melh ralh a. Ka hmuh lohna a rei veleh deuh tawh bawk a, a hma aiin a lo thau hret a. Ka tel lova awm chu a lo ngeih viau pawh a ni mai thei a ni.



A hma zawnah chuan ka va ding a, "Inbe lawk ang" ka ti sup a, ka melh ngur bawk a. A ngawih vang vang hnu ah chuan "Sawi dun tur kan nei lo" a lo ti fiah fak a.



"Kal ang u" tiin Vantei leh Zuia te ban chu a chelh nghal a. Midangho chuan min lo melh tawn zak zak mai.



"Vanrawngbawl" ka ti hluk a, a kal zet chu a rawn inher leh a, mitmeng ling hlar hian min rawn melh a.



"Min ko ve tawh suh" sehchilh zet hian a ti a. A luhlul ve ngat ngat khawp mai.



Chutia a awm takah chuan ngaihtuahna thar ka nei nghal zawk a. Ngenngawl seta biak chi niin ka hre ta lo zawk a. A mizia en hian cho chhuah chî ni zawkin ka hria.



Chutia a ṭhiante a kal pui dawr dawr lai chuan "I va dawih ve" ka ti lauh a. A ding chawt a, a rawn leh hawi rang kher mai. Kei erawh ka lo nui suk tawh thung. A thawk ṭha viau dawnin a hriat e.



"Eng maw i sawi?" a rawn ti hlak a, ngaihnêp hmel zet hian ka melh a. A meng ling hlar tawh mai.



"Thudik pawh hre ngam lova pum pelh zel turah ka lo ngai lo che a. Mahse ka rin ai i dawih daih mai" ka ti leh a. A mitmeng aṭang chuan ka cho chhuak tih a hriat mai e.




"Nang ai chuan ka huai zawk, ṭha mawla i nih kha. I nêp si" min lo ti salh a. Nêp han intih chu tha nat thlak viau mah se haw thei dinhmunah ka ding der mai si lova.



"Min hmachhawn pawh i ngam loh kha. Mahse a pawi lo, khati khan min pum pelh zel rawh. Mi dawihzep deuh angin ka hre reng tawh ang che" ka ti duah a.


Engah mah ngai lo ang mai hian ka bike awmna lam chu ka pan zui nghal a, ka nui phei vur vur mai.



Bike-a ka chuan lai chuan min lo la melh reng a, Vantei leh Zuia te pawhin hrilhhai hmel deuh hian min lo en a.



"Rara-i mi dawihzep, ka kal phawt mai ang" tiin ka han ner vel nawk a. Ngeiawm zetin ka nuih suk bawk a.



Chutah Rara-i chuan "Lo va kal mai ru" tiin a ṭhiante pahnih chu a melh zawk a. Mahse Vantei leh Zuia te pawh chuan chêt sawn mai nachang an hre chuang lo.



Bike ka tih nun rual chuan "Vanlalhriatpui" a rawn ti lauh a, min rawn pan zui hlawk hlawk bawk a. Ka lo nui suk tawh thung a.




________*________*_______*________

(Heti zawng hi ni leh phawt teh se, zawmna a nih avangin a thui vak thei lo a. Pathian zara dam chuan nak zan aṭangin chapter pangngai angin kan ti leh thei tawh ang. In comments te chhiar a nuam liam liam ṭhin mange. Keichu ka lâwmna te hi ka ti lang thiam vak lova, han intih hluak ang te hi ka duh lova. Mahse ka lawm em em tih min lo hriat sak tawp mai dawn nia. In fel hlawm si, ka thla in timuang)


Show post links
Top

[Ngaia]

AIZIAL
By CVL Awmpuii


Chapter 20



Ka bul a rawn thlen rual chuan ka lo melh run a, chîk zet hian min lo melh let ve kal bawk a. Ka nuih chhuah mai loh nan ka insum hram hram a ni.



A ṭhiante lam bawk chu a hawi leh a, Vantei leh Zuia te chuan min lo la en ve reng a. "Min lo kalsan mai ru, ka'n chingfel lawk ange" a ti lauh a. A ṭawngkam deuh vel kher chu aw.



Vantei chuan min rawn melh ha a, ka lo bûk tak nghutah chuan a ngaih ṭhat hmel ta deuh e. Zuia chuan min lo la melh tawn zak zak a, kalsawn mai tum hmel pawh a pu lo.




Mahse Vantei'n a bana a chelh thak takah chuan an kal ta a. An kal liam hma chu kan thlir zui a, vawihnih thum vel chu an rawn hawi let hram a. An ṭhiannu chu an rawn ngaihtuah ve hle ni tur a ni.




Chutah Rara-i chu ka bike hmaah tak a rawn ding a, a kut a kuangkuah thân a. A sam chu a ṭawn sang vah a, a taksa phuar mawi tâwk kawr a hak bakah jeans thâwl deuh hlek a ha bawk a, sneakers lawk zet hi a bun bawk a. A kim ve biai bawk sia, a lan dan chu a duhawm takzet a ni.



"Eng nge?" a ti chang fak a, hmeichhe tawh khirh zet hmel hi a pu a. A kawlh hmel hle bawk.



"Thu pangngai sawi pui hleih theih loh khawpa dawihzep i lo nia" ngeiawm zet hian ka ti a. Ka cho tho leh dawn chiang lutuk a, chhungrilah erawh chuan ka nui vur vur thung a.




Thinrim hmel zet hian a lo rum nghat a, fing viau mah se tuna ka rilru hi chu a man pha dawn lo hrim hrim.




"Mipa nêp i nih kha, dawihzep mi ti ve khanglang suh" a lo ti ve nghat a, ngeiawm zet hian min nuih a, min nuih sawh a ni mah zawk. A thinrimna ka cho chhuak tawh anih chuan thu pangngai kan sawi vat thei ngei ang.



Ka lo nui ve suk a, tun atan chuan haw duh lo lawi tlat ila a thin a rim zual sauh ang a. Buaina kan chingfel hma a ni mai.




"I huai viau anih chuan rawn chuang rawh" ka ti a, ka bike hnung chu ka beng pah thuk bawk a.



"Tlankimi mawng hûn na hnuah khan ka ṭhut duh chu ring suh" a lo ti nghat a. A mimal takin Tlankimi hi a haw hlur tawh ni berin ka hria.



"Ok" ka ti sup a, ka rawmawl chu phawrh chhuakin seat hnung chu ka hru thuak a, a lungawina tur anih chuan engkim ka ti zel mai ang chu.



"Lo chuang tawh rawh le" ka ti dam thlup a, mitmeng tur khaia min melh leh zet hnu ah a rawn chuang kai ta tharh a, ka lo thaw huai tawh mai.



Ka pu te veng lama phurh phei chu ka rilruk a, ngawi rengin a chuang a. Loh theih lohin ka kawngah min chelh ṭai bawk a. Tun thleng hian Bike chuan a thiam lo lutuk hi mak ka la ti reng.




Aizawl lei kan thlen chuan a ngawi thei ta ngang lo aniang "Khawnge kan kal dawn?" a ti ta nge nge a. Ka fiam châk tlat pek a.




"Kan inru dawn" ka lo ti sam et a, ka kawng a rawn ṭham tawk a, a la na em em mai lehnghâl a.



"Hmela" a ti bak hlar a, "Ṭawngkam mawilo" ka lo ti sup a, a rum nghat mai. Hetiang ṭawngkam hmang tawh lo tur hian ka ti fo a, mahse kan inhauh buai apiang hian a la hmang ziah mai. Ka thusawi a zawm loh awm chhun a ni hial ang.



A hnu deuhah chuan kan kalna tur chu ka hrilh ṭha veleh mai bawk a, a rawn ṭawng chhuak ve tawh lem hlei lova.




Ka pu te in kan thlen chuan an kawtah Bike ka hung a. Inchhunga lût lem lo chuan inhnuai lam ka pan thla nghal a, Rara-i chuan ngawi rengin min lo zui ve mai bawk a.



Kawngkhâr chu hawngin ka lut zui nghal a, min rawn zui leh mai dawn emaw ka tih laiin kawngkhar bulah chuan a ding ta tlat a.




"Lo lût la" ka ti sup a, a hawi kual ralh ralh hnu ah a rawn lut zui veleh mai bawk a.



Naupangho ṭhutna ah chuan a ṭhu thla tharh a, a hmaah tak chuan ka ding nghal run a.



"Rara" ka tih chuan a lo hawi chhuak vat a, chiang zetin kan in melh a. He hmeichhe inthunun thei lutuk hi a mitmeng ka chhiar thiam leh pek tawh lo.



"I duh chu sawi rawh" a lo ti nghat a. Tuna a landanah hi chuan engpawh sawi ila engah mah min ngaih hmel loh khawp mai.



"A hmasain min ngaidam la" ka ti tê tê a, nin hmel zet hian a lo thaw chhuak halh a. Ṭawng tumin a kâ a rawn âng zuai hman a, mahse "Ka thusawi ngaithla phawt la" ka lo tih nghet churh takah chuan hnial zui chi ah min ngai lo aniang, a kâ a chîp leh hmak a.



"Khang thla khat chuang zet min biak duh loh lai khan Tlankimi nen kan inbe leh a..." ka ti chiah chu a rawn tho chhuak nghal vut a, "Ka rindan vel ani" a lo ti nghat a. Kal mai a tum lai chuan a dar tawn tawnah vuanin ka nem ṭhu leh a, a ri dawt mai, a na deuh mai thei a ni.



"Ka thusawi tur hi ngaithla zo phawt rawh" ka ti nghut a. A rawn hawi chho leh chiah chu rilru na hmel ka hmu ve ta e.



"Ka hliamah chî rawn phul suh" a ti chang rât a. "I hliam ka ti dam dawn anih hi" ka tih chuan ngeiawm zet hian a lo nui hak a. Ka thusawi chu awih loh hmel tak a ni.



"I duh duh sawi rawh, ka lo ngaithla liam puat ang" a ti a, a âw rik dan ngeiawm zia chu pui tak a ni. Mipa tâna tlawm thlak ngawih ngawih tur khawpa ṭawngkam ngeiawm niin ka hria. Mahse ka thiam loh a ni miau a, ka tel lova a awm theih zia leh a tel lova ka awm theih loh zawk zia ka hrechiang tawh a. Mahni hmasial taka chêt lak ka ngaih hun tak a ni.




"Ngaithla liam puat dawn mah la, engkim sawi ka duh. Chuti chuan ngaihdan i siam ang a, thutlukna i siam chauh dawn nia. Ka sawi zawh hnuah chuan engtin paw'n awm la, i duh dan ka zah sak ang che" ka ti nghet charh a.




Ka rilru chuan tâwp a thlang anih pawhin ka neih let leh theih nana beih a la tum fan tho!



"Sawi ta poh che" a tih rual chuan ka âw ka han thian tê tê a. Tlankimi nen mitthi ina kan kal fuh dan leh a bula ka awm a ka la danglamna te, chu chuan keimaha inthiam lohna nasa tak a siam thu te. Chuvanga insawifiah chiam ta ka nih thu te chu ka sawi ta vek a. A hnu lehzela kan inbiak chhoh dan te a bo a bâng awm lovin ka hrilh fai ta kelh a. A na hmel hmuh chu hrehawm ti hle mah ila sawi fai vek ka duh miau si a ni. Ka thusawi chu uluk zetin a lo ngaithla a. Nêp min tih hmel ngawih ngawih hian ka hria.




"Mipa hi chu in lo mak a nih hi, ka ṭhiante sawi ṭhin ang mipa tho kha i lo nih hi" a ti a, a nui lui sak bawk a.



"Sawi duh te i la nei em?" min tih chuan ka lo bu nghut a. A dar a lo kan ak a, a bag dawhkana a dah lai a ban tawh zet chu a dah thla leh a.



"Rara, chung zawng zawng chuan ka duh zia che leh chân ka phal loh zia che min hriat chhuah tir a. Nangmahah bet lo riau ni a ka inhriatna kha a ṭhiat a. Tlankimi nen kan inbe leh kha thil ṭha ber a nih loh zia hre mah ila nangmah nena kan inkar min hmuh fiah tir tu a nih bakah chan che ka phal loh zia min hriat tir tu a ni a. Tun aṭang chuan i tan kawppui ṭha ber nih ka tum ang a. I tan chauh ka bei tawh ang" ka ti leh duah a. Ka ngenngawl zia chu ka âw aṭang ringawt pawhin a hrethiam vek ang.




A hmaah chuan ka zuk ṭhu hniam a, a kut ka chelh sak tur chu a lo ṭang ṭung a, mahse ka chelh sak ta tho a.



"Ka inrintawk hun kha min nghak a, tunah chuan ka duh zia che ka hrechiang tawh a. Eng pawh thleng se i kal ka phal lo" ka ti sup a.




Ka ngen ngawih ngawih a ni ber. Heti tak hian hmeichhe hmaah ka tlawm ka inring ngai lo. Mahse hetianga ka ti lo anih chuan ka thil chân tur hi a hlu lutuk tlat a ni.




Rara-i chu a lo thaw chhuak halh a, a kut ka vawn lai mek chu a chêt a, ka lo thlah dul ve vat a.



"Ṭha mawla i nih hi" tiin ka biangah chuan na lo têin min rawn beng thak a. "Mawl lutuk mai" a ti leh a, ka biang lehlamah chuan a rawn beng leh thak a. Ka chhip sam buk lai chu a rawn ṭham leh salh a.



"Mahni thinlung duh zawng pawh zawm ngam lo, ṭha mawla" a lo ti leh nghat a. A thinrim tawh lo tih a hmêl aṭang chuan ka hre tawh a, ka lo nuih suk a.



A kutphah nem thep chu ka hûm leh nghal run a, lekkangin ka hmuiah chuan ka nawr ta vang vang a. A lo dawh mawl tawp a.



A hmel ka en chuan min lo melh ve kal a, "Thil ṭha zawng zawng i phû" ka tih chuan "Nang aia ṭha hi ka phû" a lo ti nghat a.



"A dik chiah, kei aia ṭha i phû. Mahse i tân chuan ka ṭha ber" ka lo ti churh a.



"Tikhan pal zam mai mai chi ka nih loh zia chu i hre tawh em? Theihtâwpin i tan insiamrem ka tum a, a loh thlawnin luan ral tir suh ang che" a tih chuan ka lo bu nghut a.




Pal zam chî ni miau hek lo le, a tel lova nun hman chu ka suangtuah ngam tawh rih lo. Hmalam hun hre lo mah ila hmalam hun ka hmanpui duh ber a ni tih ka hrechiang tawh.



"Min zial â vek tawh anih ber hi" ka tih chuan a lo intih theih hmel leh tawh viau e. Hetianga a awm tawh hi chuan a ngaih ṭhat thlak tawh tihna a nimai.



"Kan ṭha em?" ka ti leh sup a, chiang taka tih fel vek ka duh miau a ni.



Min melh vang vang phawt a, "Mawl viau mah la Tlankimi tan chuan i uiawm bawk sia, kan ṭha leh tawh nimai rawh se" a lo ti kher a. Ka haw ngam rih bawk silo, a sual ve kher kher ngawt mai.



"Engpawh chu nise khati kha chuan ka hahdam huai tawh e" ka ti a. A samah chuan ka chûl thuak a. "I ngaih ti ṭha viau duh suh, thîk tur pakhat pawh ka hmuh leh chuan ka ṭhen nal nal tawh ang che" a lo ti khar khar a. Za zetin ka nui chhuak ta hawk hawk a.



Tunah chuan Rara-i dik tak kha a lo let leh tawh a, ka ta a ni leh ta e.




Naupangho Tuition lo kal hun a hnaih tawh avangin rei kan awm ta lova. Ka thlah hma chuan fawh mai ka tum a, a lo remti tlat lo "Ka peih rih lo, ka hrem ve rih dawn che" a ti tlat pek a. Hnial bui ngamna chî pawh a ni lo.



Bike-a thlah leh mai ka tum chu min lo hnial vat a "Minute 5 chiah a awm tawh, naupangho an lo thleng ṭep tawh ang. Kawnah taxi ka la mai ang" a ti tlat a.



"Ka la thlah hman tho ang che" ka tih pawh chuan a duh tlat lova. "Anih chuan taxi fare tal ka lo pe ang che" ka ti a, ka wallet chu ka phawrh nghal a.




Min hnial ka hlauh teh lul nen "Chu chu alawm ka nghah, taxi fare tal min chawi sak ve a ngai alawm, min hruaitu i ni bawk a. Keichu châwm hlawm ka la nia, nang chu hlawh nei tawh i nih kha" a lo ti duah a. Ka nui chhuak hawk hawk mai.




Hmeichhe zaidam leh inthlahrung dêk chi hi chu a ni lo ve chiang alawm.




Cheng 500 chu ka pe a, "A bâng chu i pocket money atan a nimai" ka tih chuan "Tun aṭang chuan ka ei hek viau ang che" a lo ti ham ham a.



Kawn thleng chu ke in ka chhoh pui a, ka pu te in aṭangin a hla lo bawk a, kan thleng vat mai.




Taxi chu ka biak sak leh tê tê a, an tlan liam hnu ah ka let thla veleh ta chauh a. Naupangho pawh an rawn thleng chawpchilh ve nghal mai bawk a.




Ṭum dang zawng zawng aiin ka phei khai a zang a, naupangho pawhin an hrethiam ve vekin ka ring. Zep nak emaw tun thla khat chhung vel kha chu an tan hian ka nelawm loh viau in ka ring.



In ka haw a ka nu min lo biakna te pawh chu zangkhai vahin ka chhang a. Ka phur deuh surh lehnghâl a. Ka hlim ve em atin ani.



Zanriah ei lai chuan Vantei'n min fiam pek a "Rara-in min hrilh vek ania aw" a ti a, ka lo kiai suk ringawt a. Ka nu leh pa te chuan kan unau min melh tawn zak zak mai.



"Eng nge awmzia?" ka pa in a tih chuan ka chhan hma hauhin Vantei chuan "An renew" a lo ti vat a, a phur hmel kher mai.



Ka chhûngte chu an ngaih a ṭhat hmel tawh khawp mai.



Ka pa chuan "Nizanah khan i nu nen in inbe rei ka ti reng ani" a lo ti zauh a. Ka nu lah chuan "Ka zei alawm" a lo ti uang ve ngei a. Chawei laia ti lo chuan kan nui ho dar dar mai.




A hnu deuhah ka pa chuan thu ṭha tinrêng min fah leh mawlh mawlh a.




"Tunah hian in in duh rih viau a ni mai thei a, thil nihna tur pawh a ni a. Ngaihzawng neih hunlai hi chuan kan ngaihzawng te hi a ber emaw kan ti ṭhin a. 'Mi dang ka duh leh theih tawh pawh ka ring lo' te kan han ti a. Mahse nupui pasal tura Pathian ruat hi kan awm ve a nia. Chuvang chuan ka sawi fo angin fimkhur ula. I ngaihzawng mah ni se i farnu angin en ang che" a ti charh charh a.




A sawi dik ka ti khawp mai. Kan nupui pasal turte emaw kan tihte nen hian kan lo inṭhen theih zia chu Tlankimi aṭang khan ka hrechiang tawh. Mahse Rara-i hi chu a dan a dang, ka tan a danglam takzet a ni.



Message vela inbiak hi ka tih vak loh avangin zanah chuan ka va call leh tawp a. A lo pick up vat a "I ninawm leh dawn mange" a lo ti nghal zat a. Heti hian ti vel ṭhin mah se ka laka a rilru put hmang hi ka hrechiang ve tâwk a, ngaiah ka nei tawh.



"Anih chuan ka dah mai dawn asin" inthlahrung âw deuh hian ka ti sup a, min hmu thei lo tih ka hriatchian em avangin ka nui suk a.



"Hmela, i over" a rawn ti nghal hlar a. Ka lo rum nghal nghut mai "Ṭawngkam mawilo" ka ti nghut a "Hei chu sim a harsa emai" a lo ti nghal vat a. A rawn nui vel a, min nuih tlawn tih ka hre reng sia.



"Eng nge i tih?" ka ti ta daih a, "Ka inbual zo chiah a, tunah chuan lehkha ka zir ṭep tawh" a lo ti vat a.



"Khua a vawt tawh si i hritlang mai tur asin, i va inbual tlai ve" ka ti nghal hlut a. "Ka inbual tlai ṭhang alawm, a ho lutuk, ka hritlang ngai lo" a lo ti liam puat a.




Thu ho mai mai sawiin kan titi a. Kan nui dun leh hawk hawk ṭhin a. Tunah tak hi chuan ka hahdam tih piah lam a ni e.



Lehkha zir tur a la nih avangin rei ka be duh ta lova. "Lehkha zir zawhah ka lo bia ang che" a rawn ti ve thlap a. Ka hnar lo chiang asin.



A lehkha zir chhung chuan WhatsApp ah lutin message pawimawh ho chu ka chhiar a, ka reply nghal zung zung a.




Tlankimi chu nizana ka message a seen hnu khan a reh zui ta hmak a. Hmeichhe mawl a ni lo bawk a, tlawmah te pawh a la ve tawh ani mahna. Kei erawh chu hnar a hlit phawi ang huai ka ni tawh thung .




Mahse Nunmawii hi tih ngaihna ka hre tawh thlawt lo. Thu pawimawh hmel deuh deuh rawn sawi a chîng a. Han chhan loh ngawt dawn a chhan ngei ngei ngai si ang hian min rawn text ṭhin a. A nau chungchang a ni deuh ber ṭhin a. Information mumal taka ka pêk pawh hi min rawn zawt nawn kher zel a. Ka dawhtheihna in a tlin lo ṭep ṭep ṭhin. Ninawm lamah a kal tlat tawh ani.




Dik tak chuan a nau tuitor ang tak takin min en sela chu vawi tam pawh ka hrilh nawn hreh lo, mahse Dina hnen atangin engkim ka hre ve kur si a. Chu mai bakah Dina hian message nen lam ṭan a rawn lakpui ṭhin a. Ka ngaihzawng atan min duh pui thu hahipin a rawn sawi ṭhîn a. Ṭha deuha lo be turin min chah âwl lo bawk a. A mipa hna lo ka tih bakah a ṭhian ṭha hna lo ka ti ṭhin khawp mai. Ngaihzawng ka nei tih a hre ve tho si a.



Nunmawii pawh chutiang bawkin a nau nen kan inngaizawng tih a hre reng a. Ka bulah mei nei zet zetin a rawn rêl ngam a. Zuamawm a ka awm âwm ka hre bawk si lo, zahna a tlachham ve hle niin ka hre tawh.



Rara-in a hria ang tih mawlh ka hlau a, ka chet sual leh chuan a pawi thui tawh viau ang.



Nunmawii chuan "Naktuk Tuition an kal ang tiraw?" a rawn ti a. Ngaihsak loh ka tum viau na in rilru ka thlak ta zawk a. Chiang fek fawkin hrilh ila a ṭha berin ka hre ta zawk a.



"Information mumal takin kan in pe a, i nau phone number pawh ka nei reng a. Lo ngaihven viau duh tawh suh, eng emaw rokhawlhna a awm emaw thu hriattir ngai a awm anih chuan amah ka lo hrilh mai dawn nia. Puitling a ni tawh alawm, ngaihsak viau duh tawh suh. Keiman ka sawi anih lem loh chuan tha sênga min lo zawh a ngai tawh lo ania" ka ti ta duah a. Ka ṭawngkam a na deuh mai thei, mahse pawi pawh ka ti tawh lo.




Mi pangngai a nih chuan zah nachâng a hre ve ngeiin ka ring. Ka message chu a seen ngam tawhlo nge pawh ka hrelo. Zan danga ka reply chhun hmu zung zung si kha a hawng duh ta tlat lova. Pawi pawh ka tih hrep loh chu !




Rara-i nen chuan pangngai takin kan inkawp chho veleh ta a. Inti puitling deuh hian a naupangchhia leh tlat zel a. A titau der zing ṭhin khawp mai. Ka thlêm hian nuam a tih ve zia ka hrechiang tawh a. A tih tauh apiangin zawldawh deuhin ka thlêm ziah ṭhin a. A lungawi har ngai lo.




Tih tauh nuam a tih chhan te hi amah vêk hian a sawi nghal zung zung zel a "Ka titau vak vak ang a,min lo thlem zel dawn nia" a ti lawk ta ṭhin a. Ka hlimpui ṭhin khawp mai.



Pathian zarah kan dam a, Krismas pawh kar leh lawk a lo ni der tawh mai. Naupangho sikul an chawlh tawh avângin keipawh ka châwl ve tawh a. December thla chu Tuition kan kal rei lo bawk a, Tuition fee pawh Krismas present ni pah fawmin ka free hmiah mai a. An chhûngte pawh an lawm thiam ve khawp mai.




Chutia Tuition ka pek tak si lovah chuan ka hun tam zawk chu in lamah ka hmang deuh chawt a. Rara-i chu a zirlaiah a in duhthawh lai tak a ni a.



"Krismas nuam deuha ka hman theih nan December thla tir atang hi chuan lehkha ka zir vak vak zel a. Urlawk ni aṭangin ka châwl ve chauh thin" a ti pek a, a dangdai leh pek bik khawp mai.



December thla te chu mi zawng zawngin chawlh hahdam nana kan hman tawh laiin lehkha zir a lo duhthawh zual sauh zawk ania.



Chutihrual chuan ka tan hun a insiam reng zel a, kan inbe reng tho. A zirlaiah pawh theihtawp ka chhuahpui ve a, ka thiam ang tawkin ka fuih ve ṭhin. Ka thu a awih em em zel a, a ngaih ṭhat thlak ṭhin khawp mai.




An chhungkaw buaina chungchang kan sawi ngai mang tawh lova. A nu in sual a chhuah zui vak tawh lovah ka lo ngai mai a. Chutiang chu ni tak tak hram se ka ti bawk.



Kan inbiak apiangin "Harsatna i neih chuan min hrilh la" ka ti fo a. "Zep lovin ka hrilh vek zel ang che" a tih ṭhin avangin ka ring nghet hmiah.




Urlawk zan thlen hma Pathianni zan chuan chhungkua in kan inkhawm a. Kohhran kan hlim vanglai tak a ni a. Vantei'n taksa chetna a chang a. Inkhawm ban hnu pawh chuan la haw thei lovin Biakin chhûngah nutling ho te nen an la vir zak zak mai a. Lo haw san daih bik chu ṭha a ka hriat loh avangin k lo ngaichâng ve a.



Vantei hian a tleirawl chhuah hlim hlawt aṭangin taksa chêtna a chang ṭhin a. Ṭum khat pawh a dam lo chung inkhawm a duh tlat a, kan inkhawm pui a, a lâm dam ṭhak tawh.




Hetiang hi ka ring lo lam ni loin ka lo ngaihven lutuk ngai lova. Mahse khata ṭang khan Pathian faka lam ṭhat zia leh taksa chêtna te hi thlarau thianghlim hnathawh a nih zia ka hrechiang zual a.



Lamtuala lam chhuah te, tih deuh chiam fe hi a ṭha ber a ni chu ka ti hauh lo. Mahse Kohhran chakna hnar atan chuan a lo ṭangkai bakah Kohhran mipui châwm tu lian tak a ni ka ti lo theilo.




Kan chhungkua chuan kan nghak ṭhap a, taksa chêtna chang ve kher lo midangte pawh chu Biakin kawtah an la awm ve nuk a.



Upa pakhat chuan "Kan ṭawngṭai rual phawt mai dawn em ni?" tiin ka pa chu a râwn a. Ka pa chuan a lo hnial lo khawp mai.



Biakin bathlara la awm hote chu an ko lut zung zung a. Kan ṭawngṭai rual ta a.



Darkar chanve vel a liam leh chuan Vantei pawhin ngai a rawn awh leh ṭan a. Ka nu in a lo buaipui vat a. Tui a in tir a, "Pathian thlarau thianghlim in a khawih che a, i vannei lutuk, lawmthu i sawi mawlh mawlh dawn nia" ka nu chuan a lo ti sap sap a.



Kan inkhawm pawh dar 10 pelh hretah kan haw ve thei ta hram a.



Rilruin ngaihtuah a nei lo thei lova, inkhawm lai khan inah phone ka hnutchhiah a, ka charge daih a. Rara-i chu hrilh tho mah ila rei min ti tawh viau ang, inkhawm ban loh a hun tawh miau si lova. Tum loh deuhin ka awm ta sia a lo titau leh hman tawh mai thei a ni.





In kan thlen veleh room ah ka lut tlang nghal a. Inthlak pawh inthlak hmasa lovin ka phone charge chu ka phawi nghal a. Ka on rual chuan Rara-i missed call vawi nga zet a lo awm a.



WhatsApp ah pawh message min lo hnutchhiah a. "Inkhawm in ban veleh i lo kal lawk hman ang em?" tih tê mai hi a ni a. A rawn thawn chhuah hun chu dar 8 vel daih kha a ni tawh.



A missed call chu ka en leh a, dar 9 bawr vel vek a ni. A message ka seen theih loh avangin min lo call tih a chiang reng mai. A lo lungawi lo tawh viau ang ka ring.



Hmanhmawh zetin ka call back nghal a, a la har hrep lehnghâl a.



A titau laklawhin a la duh lo emaw ka tih lai mek chuan a rawn la ta hram a.



"Au Hriatpui" a rawn tih rual chuan "Vantei a ṭul a, inkhawm bang kan haw ve thei chiah a. I message leh missed call ka hmu ve chiah" ka ti nghal zung zung a.




"Aw, a nih chu mawle" pangngai takin a lo ti ve hliai a. A titau lo ni a ka hriat avang chuan ka lo thaw huai mai.



"Eng nge i tih a?" ka tih chuan "Tunah i hman tawh em?" a rawn ti daih a. A message kha ka hrechhuak chawpchilh lehnghâl a.



"Buaina i tawk em ni? I message kha" ka ti ta reng a. A lo thaw chhuak hak a.



"Tlai tawh viau mah se i lo la kal lawk hman ang em?" a rawn ti sep a, a thaw chhuak ham ham ri chu ka hre thei.



"I ṭha chiah em?" ngaihtuah zet hian ka ti a. An in a kal tur chuan rilru ka siam fel nghal a. Inthlak lem lovin ka bike châbi chu ka la nghal a.



"Ṭha tho a, mahse sawi dun tur kan nei" thutak zet hian a lo ti a. "Ka lo thleng nghal a nimai" tiin phone chu ka dah nghal a.



Room aṭanga ka chhuah rual chuan ka nu leh pa te ka hmu nghal zat a. Inthlak pawh la inthlak lova ka va chhuak chu min lo melh haw a "Pa, Rara-i te inah ka kal lawk dawn, a hmanhmawh thlak" ka ti bul vut a. Ka nu chu a lo hrilhhai hmel viau mai.




Ka pa chuan "Buaina a tawk em ni?" a lo ti vat a, "Ka hre lo, ka zuk kal phaw ange. In lo mu dawn nia" ka ti leh tawp a.



Ka pa min chhanna tur pawh ngaihtuah zui lo chuan ka chhuak zui nghal a. Bike chu tinungin ka dawk chhuak nghal zawt a. Ka speed chu a sang ṭha khawp mai.




Reilote ah an in chu ka thleng thuai a, ka phone nghal a. A lak rual chuan "Ka lo thleng tawh" ka ti mawl tawp a. "Ka lo chhuak nghal" a lo ti ve vat a.




An inkawtah chuan ka lo nghak a, an in chu a thim ṭhiap tawh a. A chhungte an mu tawh anih ka ring.



An kawngkhar a rik khep rual chuan ka lo ding ngil nghal vut a. Rara-i chu ka lam panin a lo kal hnak hnak a. Polar a sen no a sin thân a.



Ka bul a rawn thlen rual chuan chîk zet hian ka lo en a. Ka kuah nghal thlawp ringawt a, nghet zetin min lo kuah ve nghal a. A puansinin min dal deuh mah se a rim nu chêk chu ka hîp lut vang vang a.



A inlakhran rual chuan "Harsatna i tawk em ni?" ka ti nghal tawng a. A hawi kual hmasa zet a.



"Sawi tur a tam lutuk, ka pu thlanah kal phawt mai ang" a ti a. Hnial buai lovin Bike chu ka tinung nghal a. A pu thlan lam pan chuan kan kal nghal a.




Buaina a tawh hmasak pawh khan a pu thlana hruai turin min ngen anih kha. Khami ṭum kha chuan ṭap chungin min ngen kha ania, tun ṭum chu a ngaihtuahna a fîm hmel khawp mai.




A pu thlan bula thingbuk hnuaiah chuan kan ṭhu a, ka hmaah ṭhuttirin ka kap kalak a.


"Sawi tawh rawh le" tiin a bekah chuan ka fawp zeuh a. Min en thei turin a rawn insiamrem te te a.



"Au Hriatpui, ka pa hian thin cancer a lo vei a" mawl mang deuh hian a rawn ti a. A beidawng hmel ka vawikhat hmuhna ani. Sawi awlsam hle mah se a hmel aṭang chuan a rilru hah zia hai theih a ni lo.




"I pa in maw?" ka lo ti hulh a, a lo bu nghat a. "Rara..." ka ti hluai a, hnem dan kawng ka dap nghal ruai mai.



"Chuan..." a rawn ti leh a, chiang zetin kan in melh a. "Ka nu leh pa te hian pasal min neih tir an tum ania" a rawn ti leh zet zawng ka nghing lawih mai.




__________*_________*________*_______


Show post links
Top

[Ngaia]

AIZIAL
By CVL Awmpuii



Chapter 21



Ngawi rengin kan ṭhu dun tlawk tlawk a. Ka hamhaih luatah sawi tur ka haih chham a. A ni pawhin sawi zui tur a hre hlawl lo anih hmel.



Ka thin phu chu a châwl vek maiin ka hria, a thusawiin min ṭhawn dan leh min deh dan chu danglam tak a ni. Ka rin loh lampang thil daih a ni si a.



"Engtin nge ka tih ang?" a rawn ti zawi sep a, min hnungchhawn zawnga ṭhu anih vangin a hmel ka hmu thei lova. Mahse a nguai ve raihin ka hria.



"Eng nge i sawi awmzia kha?" ka ti chhuak thei hram a. Thil thlen dan chu a rang teh thut em a, ka lo inring hman lo a ni.



"Ka nu leh pa te'n pasal neih tir min tum. Chu pawh vawiin tlai khan ka hre ve chiah, ka hriat ve meuh chuan palai rawn tirh an tum fel der tawh. A hrilhai thlak duh asin aw" a ti a,za lo zet hian a rawn nui ri hak bawk a.



"Palai a?" ka lo ti vut a, ka lungphu châwl dup emaw ka tih chu a rawn in thum rawn nghal tlut tlut mai.



Ka lam hawi turin a rawn inher a, hnai zetah kan in melh tawn a.



Bu nghat chung chuan "Ka nû te thawhpui pa ania, a upat tawh hmel si. Ka duh lo, ka nei duh lo a ni tawp mai. Inneih chungchâng an sawi lai chuan ka hrilhai lutuk a hnial ngaihna pawh ka hrelo, ka nui tawp ringawt a. Ka pa nen chuan ro an rêl nghal zung zung a. Eng angah nge min ngaih pawh ka hre lo e a" a ti leh zung zung a.



Ka rilruah thil pakhat chiah a lo awm, Nu Ramtei ruahmanna a ni ngei ang a. A thawhpui pa a nih bawk chuan sum vangah ka puh lo thei lo.



"An duh dan ringawt chuan an awm tir bik lovang che. Sawi pui ṭha leh la, hnial rawh. An enkawl dan che avang ringawt pawh hian sawi theih pakhat mah an nei lo" sehchilh zet hian ka lo ti a.




Hetiang zawnga Rara-i fuih hi ka duh ngai lo. A nu leh pa a huatna leh demna tur ṭawngkam chhah chhuah ngat phei chu ka tih ngai loh thil leh ka tih duh ngai miah loh thil a ni. Mahse tun ṭum chu ka lungawi loh pui takzet. Chu mai bakah kan inkar nghawng thei thil a ni tlat a.




"Ka dinhmun hi a harsa lutuk, an sawi pa chu neih ka tum lo bur, ka duh lo bawk. Mahse ka hnial thlu thei ang em ka hrelo" a lo ti hap a. Amah nena inhmeh lo zet hian beidawng hmel a pu bawk a. A kun deuh lap mai.



A bekah chuan chelhin min en thei turin ka kuai dak a. Mitmeng ril raih, thûk zet hian min lo melh a. Chutiang chiah chu ka mitmengah pawh hian a hmuh ka ring.



"Midang ta turin ka phal ngai dawn lo che, i duh lo chung chu engmah a thleng lovang" ka ti nghet charh a. A lo thaw chhuak ham ham a.



"Engtin nge kan tih ang?" a rawn ti sap a, tunah tak chuan ngaihtuah zui dan vak ka hre bik lo. Mahse inneihna chu a thleng dawn lo a ni tawp mai. A thleng anih pawhin kan pahnih inneihna chauh a ni ang.



"I rinchhan theih turin ka awm ang a, i tan ka ding zel ang ka ti tawh kha. Lungngai reng reng suh, ka nupui lo chu i ni lovang" ka ti nghet charh a. Tun atan chuan min rinchhan rih tawp a ngai. A baih vai zia ka ngaihtuah chhuak lo thei lova, ka lainat thar leh ngang mai. Ka thinrim pui em em bawk a.




"Ka hnial thei ang em ka hrelo, neih chu ka duh lo bur a. Mahse ka nu hi a thu lutuk alawm. A thusawi apiang ka pa pawhin a zawm ṭhin bakah a hlau tlat a. Sum thawk chhuaktu ber a ni bawk sia..." a ti fan raih a. "Ka pa awm dan chu i hriat kha" a lo ti bul leh nghat bawk a.




Pa Marema nêp lutuk hi a ni ber, pa ber hian zir se heti em em hian Rara-i nun kawng hi a harsa lo tur asin mawle.



"A mipa chu tunge ni reng reng, i nu te thawhpui ti ringawt lovin?" ka ti a, ka sawi zawng chuan ka sa pup lehnghâl a. Ka thinrim nghal ṭun thei.



"A hming chu Zawma a nia, vawihnih thum vel chu ka hmu ve tawh. Hmel patling deuh, dul kiar ve deuh ania, a hmêlṭha lo si. A hmel aṭang chuan kum 40 bâwr vel a nih ka ring. Ka hmuh tawh chhan pawh ka nu hi a lo zui haw tawh a. Zanriah pawh a lo ei ve tawh nghe nghe. Kan intih thiam loh lai vel kha ania. Ka nu thawhpui ṭhenkhat te hian chaw an rawn ei veleh zeuh ṭhin avangin khatiang turah khan ka lo ngai ve mai a. A landan tawpah chuan mipa sual deuh chu a ang lo. Mahse ka duh lo a ni tawp mai" a lo ti duah a.




A thusawi ka ngaihthlâk chhung zawng chuan ka lo ṭang ṭeuh mai. A tâna a hrilhai thlak tur zia pawh chu ka ngaihtuah pui thiam ve ruak mai.




"I pa in engmah a sawi lo em ni?" ka tih chuan a lo ner nawk a. "Sawi ve bawk e, 'Engmah i ni chuang lo bawk a, hlawh nei tawh mi puitling neih mai chu a ṭha' min tia lawm. Ka sawi tawh kha, ka nu thusawi hi a pawm thluam zel. Ka thlavang pawh a hauh ngam hlei nem" a ti nghat a.




"A natna chungchang kha?" ka lo ti leh zauh a, nichin lawk khan a sawi tak alawm. Kan sawi zui ta miah lova.



Rara-i chu a rilru a hah hmel leh vek tawh.



"Aw chu pawh chu tukin zinga ka hriat ania. A lo inthup ve ngial a, mahse ka nu nen an inbiakna aṭangin ka hre chhuak a. Ka tan pa nih tlin lo viau mah se ka thisen zawm pui awmchhun ang a ni tawh a. Ka chân duh bik lo. Ka rilru hi a buai nuaih mai" a lo ti halh a.




A pa vanga a rilru a hah dawn tehlul nen a mimal nunah harsatna a lo tawk veleh zel bawk a. Theih chu ni ngat se a phurrit zawng zawng hi phurh sak ka hnial lo asin mawle.




"I rilru ti hah lutuk lo la, Pathian zarah kan chingfel thei mai ang" ka ti a. Tun atan chuan rilru fîm tak pu a ngunthluk zeta inngaihtuah ka mamawh ber. Chinfel dan kawng sawi pui turin ka inpeih rih tlat lo ani. Chutihrual chuan a chungah engmah ka thlen tir dawn lo a ni tawp mai.



"Ka rilru a buai nuaih mai" a lo ti halh a. A pa natna vangin a rilru a hah dawn a, pasal neih tir an tum chungchâng ah a haw dawn tho bawk si. A kum phu lova a thil dai buak bik zozai te hian min lo ti hah ve vek thei.




Ka hnêm thiam lo lutuk te chu ka in hua a. A rilru hahna tlem tal chhawk zangkhai ve thei ila ka ti ngawt mai.



Mahse Rara-i chuan "Ka in sawi thâwl tawh a, khati kha chuan tlêmin ka ziaawm tawh" a lo ti leh a. Chu zawng thil lawmawm tak a ni. Tlem tala a ziaawm thei pawh chu a ṭha tawh hrim hrim.



Zan a tlai tawh ang reng si a, rei tak thlânmual a awmpuina chî niin ka hre lova. Kan haw leh ta vat a.



An in thleng ka thlah leh a, "Thu thar a awm chuan lo sawi zel la. Zaninah tih dan tur ka lo ngaihtuah dawn nia. Pasal dang i nei dawn lo tih kha lo vawng tawp la a nimai" tiin ka thlah a. Hlauhthâwnna em em nei lovin ka haw ta phawt a.



In ka thlen veleh ka text zui a, reilotê kan inbe leh a. Ka hnem zui leh mawlh mawlh a ni ber. Tawngkam ka thiam bawk si lo, mahse ka rilru a hrechiang dawn tih ka hria a. Ka hnemna te chu a thlamuan pui ve thovin ka ring.




Kan inmangṭha hnu chuan rei fe ka inngaihtuah leh a. Ka ngaihtuahna a buai ve nuaih tho mai. Nupui nei lo rual chu ka ni tawh lova, mahse ka la inpeih chiahin ka hre silo. Chu mai bakah ka rilru la tibuai tu pakhat chu Rara-i nen hian kan la inkawp rei lova. Amah ka rin tawk loh vang ni lovin a la naupang si a, nulat kham lo deuha neihte ka hlau a. Chutihrual chuan pasal dang neih tir an tum tho a. La inkawp rei lo mah ila neih mai chu ka pawiti ta lo. Pawimawh ta bera ka hriat chu kan inkar zawng zawng hi a nu leh pa te hriattir a ni.




Ka mut hma in ngunthluk zet chuan ka ṭawngṭai a. Ka pa thu min rawn fo angin Rara-i nen kan inkar chu Pathian hnenah ka thlen a. Ṭul a tih dan leh kan tana ṭha tur zêlin min rêl sak ngei ang tih hi ka ringhlel lo.




Tukṭhuan ei lai chuan ka chhungte hrilh hriat ve ka rilruk ut ut a. Mahse a ṭul rih lovin ka hre ta zawk a. Ka theih chin chinah Pathian puihna leh mahni remhriat danin hma la ve phawt ila. Tih ngaihna ka hriat tawh loh hunah ka pa thurâwn ka la ang a, a puihna ka dil chauh ang. Dik tak chuan ka nu leh pa te ah hian ka innghat ve emai a. Ka puitlin tur angin ka puitling pha lo ni te hian ka hre ṭhin.




Chhûngkuaa thu thlen vek zel hi a ṭha na meuh mai. Mahse mi puitling nih tawh chuan mimal thil lutuk hi chu kan theih chin chin a lo chinfel hi kan tih makmawh niin ka hria.



Room-a ka luh hnu chuan Rara-i ka call leh nghal a. A lo pick up rang khawp mai. Tichuan ka ruahmanna te chu ka hrilh nghal zung zung a. Kan inkar thu a nu leh pa te hriattir chu min lo pawm pui ve khawp mai. Mahse kawngro a sugt vak hmel loh a ti deuh tlat a.




A chhan ka zawh chuan a sawi duh lo tlat pek a. Ka dâwp luih ngial pawhin a sawi duh lo.



"Tukṭhuan ei laiin inneih bawk chu an sawi leh a" a rawn ti ta daih a. "I lo hnial tawh em?" ka tih chuan "Hnial dawn lo'm ni. Mahse an hai der hmiah. Ka nu chuan Krismas vuak veta sawi fel a, kum thar lama inneih mai a ṭhat thu te a sawi a. An duh duh dana min chin phar vel an tumin ka hria" a rawn ti a.




A lungawi lo ve takzet tih chu a âw aṭang ringawt pawhin a hai theih loh.




"Zânin inkhâwm bânah ka lo lêng phawt ang a, sawifel kan tum dawn nia" ka ti a. Vawiin hi urlawk ni a ni a, dik tak chuan zaninah hian kawn chei te fan pui a, len chhuahpui ka lo rilruk ve ania. Mahse a hmaa kan pahnih tana ruahmanna ka lo neih ve te chu kan ṭhulh a ngaih hmel.






Zaikhawmna tur Sunday School hall singsa turin Kohhran hnatlang an ko a. Chutah chuan nilengin ka tap ve chawt a. Nu hovin Krismas tuka thingpui hmeh tur an buaipui laih laih bawk a. Ka inngaihtuah muk lutuk tur a ti ziaawm hlauh zawk a. Chuti chu ni lo se inah ka awm tawp ang a, hmeichhia ang maiin ka inngaihtuah buai nasa viau ang.





Zan inkhawm banah chuan ka chhûngte zawng zawng chu an zaikhawm nghal vek a. Kei erawh chu Rara-i te in lam panin ka inkhalh chhuak nghal thung a. Ka chhungte pawhin zaikhawm tur chuan min phût lem lo, min hrethiam ve khawp mai.




An inkawt ka thlen rual chuan Rara-i chu call hmasak ka tum zet a. Mahse ka ṭhulh leh ta zawk a.



Pâ takin an door bell chu ka hmet nghal ṭhuai a. Inchhûng lam aṭanga Nu Ramtei'n min lo chhawn takah chuan ka lut zui ve mai bawk a.



Ka luh rual chuan "In awm maw?" ka ti a, ka hawikual nghal a. Ṭhutkhawmna lama mi pakhat lo ṭhu ve chu ka hmu chawpchilh nghal a. Rara-i sawi kalhmangah leh a landanah chuan Zawma a nih ka ring nghal hmiah.


Nu Ramtei leh Rara-i te chuan choka ah chhang a lo nuai mek a. Ṭhutkhawmnaah chuan Pa Marema leh Zawma te kha TV en pahin an lo titi a, heater an ai bawk a.




Min hmu thut chu an ham haih hmel vek maiin ka hria. Rara-i chu insiam ṭha hmasa berah a ṭang a "Min lo phone hmasa lova" a lo ti zawi sep a. Ka lo nui mai a.



Nu Ramtei chuan "Hriatpuia teh nawlh chu, kan lo beisei lawk lo che a" nui var var chung hian a lo ti a. A mizia chu hrechiang lo hle ila chuan fel ka ti viau ang.



"Rara-i ka hrilh lawk alawm" ka lo ti ve kher a. A enga mah hma in kan inkara thil awm chu ngaihbel tur siam sak nghal ringawt ka ngaihtuah a. Zawma a lo awm ve kher kher bawk nen kan intih neitu viau a ngaih tih ka hrethiam nghal vek.



"He lamah lo ṭhu phei ve rawh" Pa Marema chuan a lo ti ve ngei a, ka beisei loh lam a ni. Harh fim hmel a pu ve in ka hria a, a lawmawm lamah ngai phawt mai ang.




"Hetah i ṭhu duh zawk em?" Rara-i chuan a lo ti zawi sep a. Ṭhutkhawmna lam chu ka en a, Zawma chu a tlangnel hmel bawk a. An bula va ṭhut ve chu ka tih turah ka ngai ta zawk a. Rara-i pawh chhang lem lo chuan ka phei nghal vut a.




Zawma bulah tak chuan ka va ṭhu kher a, ka lehhawi zawk lai chuan Rara-in min lo en reng tih ka va hmu thei.




An titi suam suam a, lui lam chanchin leh ram kal te an sawi a. Ka hriat loh lam daih an sawi si a, lo zawm ve a har khawp mai. Tlangnel taka awm ve chu ka duh si a, an nuih chuan za lo deuh pawh nise ka lo nui ve thei mai zel a.




Rara-i sawi ang tak takin Zawma chu misual tak hmel a pu lova. A ṭawng kalhmangah pawh chuan mi pangngai tak niin ka hria. Mahse Nu Ramtei te'n inneih an sawi ngawt danah Rara-i lakah rilru a pe tih a chiang mai a. Ka ngainat tur chi chu a ni hauh lo.




"I pa te an dam em?" Pa Marema chuan a lo ti ve mial a "An dam ṭha lutuk e" ka lo ti ve vat a. "I pa te leh ka pa te kha rawngbâwlna thil ah an inhre ṭha ve viau mai a. An inngaina ve viau khan ka hria a, an inti chhungkhat khawp asin" a lo ti ve mial a.




Ṭawngkam mawi lo nilo se harhfim in hringnun a hmang lo tawp emaw tih laiin eng eng emaw chu a lo hre ve ngei anih dawn hi.




"Pu Sanghminga chu ka pa te aṭang ringawt pawhin kan hre ngun ve alawm" ka lo ti vat a. Pa Marema chu a nui huah huah a. A nuih chhan tur awm ang phei chu ka hre ve lo na in pa ho ve tak a ni tih a hriat nghal mai.




"Hriatpuia maw i nih?" Zawma chuan a lo ti a, "Aw nang?" te chu ka han ti mawi hnai ve a "U Zawm min ti mai rawh, keini ai chuan in la nau tlat" a ti a, a nui zui hawk hawk a.




Rara-i neih chu tum lo se mi pangngai tak angin ka hmu ngei ang a, inkawm ta ila ka ngainat viau pawh ka ring.




Kan titi zui leh nghal mawlh mawlh a. Zawma lah chuan mahni in chan chang deuh hian min tih tlangnel tum ni awm takin min be suam suam a. Pa Marema lah chu sawi pui tur a hre bawk si. Pa mawl tak chu a ni lo tih a hriat nghal mai e.



Nu Ramtei leh Rara-i te chuan chhang leh thingpui min rawn pe a. An thingpui in tur an rawn chawi phei ve nghal bawk a.



Rara-i chu ka bulah a rawn ṭhu nghal tharh a, a kimki chawih chawih lo chu ka lawm khawp mai.



Dik taka sawi chuan kan inkar sawi tura kal ka ni a. Mahse Zawma a lo awm ve miau si a, ṭawngka a sawi chî ni chiahin ka hre lova. Ka chezia in Rara-i chu ka ngaihsak zia ka ti lang a. A nu leh pa te mit tikham zawnga khawsak pui erawh ka duh hauh lo thung.



A ni pawh a lo mawl bik miah lo, an chhang chhawp te chu min lak sak a, min pe kher bawk a. Pa Marema leh Zawma te titi na kara Nu Ramtei mitmeng alh pap chu ka hmuh hmaih loh nasa. Ka haw hnuah Rara-in a tawrh chu hlau viau mah ila tun atan chuan hetia kan khawsak hi a fuh berin ka hria.




Zawma haw hma chu ka haw duh bik lova, ka ṭhu ve ta reng a. A ni lah chuan ka haw hma haw a tum bik lo emaw ni a ṭhu ve tlat bawk a. Dar 12 a ri ṭep tawh mai.




Nu Ramtei lah chuan "Hriatpui,i chhungte'n an ngaihtuah tawh ang che" a lo ti ve sek a. Min ngaihtuah hmel pu mah se a rilru ka hre ve kar a. "Tlangval ka nia lawm, ka kalna tur an hre vek a. Nge ka haw vat vat i duh tawh zawk em ni?" ka lo ti ve mai zel a. Uang âwm ang takin ka lang zui a, "Chutiang pawh a nilo" chu a ti mawi hnai ve zel mai bawk a.




Nu mawl a ni lova, inleng awm lai na na na chuan chêt mawi loh a hlau ve khawp mai.




Zawma lah chuan "Kan tlaivar mai dawn emaw ni" a lo ti hlut a. Titi vawrh tur a hre bawk a, Pa Marema'n a hlimpui thei khawp mai. Nu Ramtei chuan a zia tak tak ka lakah a chhuah ṭan a. Ngaih theih loh hmel zet hian min melh min melh tawh mai. Ka lo haider hmiah thung a.



Rara-i nen chuan ka phone ah eng eng emaw ni kan enkual daih a, kan nui dun leh hak zel a. Zawma chuan kan awmdan chu a hrethiam vak lo nge min hai der lui pawh ka hre tawh bik lo e a.




A tawp a tawpah chuan Zawma chu a ding ta hluai a "Hriatpui, ka haw san phawt mai ang che" a ti a. Nu Ramtei chuan ṭawngka in a lo chelh rang kher mai "Haw rual zawk ula" a ti ve ngial a. Mahse Zawma chuan "Zan a tlai tawh emai, val senior mut hun a ni tawh" a lo ti a.




A chhuak tur chu Nu Ramtei bawk chuan "Rara va thlah rawh" thupe âw zet hian a ti a. Rara-i chu a melh kâk bawk a.



Rara-i tan hnial zui ngamna chi ni hek lo le a tho nghal tharh a. Zawma chu kawngka bul thleng a va thlah a. Ka tan lo huat zui chi a ni lo.




Rara-i a rawn let leh chiah chu kan boruak a ipik nghal churh mai. Pa Marema pawh a kâ a chîp nghal hmuk a. TV a melh zui nghal ngur a.



Nu Ramtei erawh chuan Rara-i nen min melh tawn zak zak a.



"Kha kha eng nge a awmzia?" a tih chuan a sawi tum ka man nghal vek.



Thawk ka lo la hulh a, hetiang hmachhawn tur hian ka puitling tawk ve tawh viau alawm tiin ka inti paukhauh a.



"Rara-i hi pasal in neih tir ka rem ti lo. Zaninah hian chumi sawifel tura lo kal chu ka ni. In fanu hi pasal neih tir in duh anih pawhin keiman ka nei ang. Khapa kha ni lovin" ka lo ti nghet charh a. Ka rin ai takin ka aw a pangngai a. Ka aw a inrintawkna inphum ru lang chhuak chu ka lawm kher mai.




Nu Ramtei chu a meng thip nghal ram a, Pa Marema pawh ka thusawiin a zir viau nge ni min lo bengkhawn tawh khawp mai.




"In inngaizawng em ni?" a lo ti hû a, "Tun thla laihawl aṭang khan" ka lo ti vat a. Rara-i chu ka bulah a ṭhu a, a kun deuh ngal a. Midang ang lo takin a tan chuan a in hi hahdamna a ni ve lo. Hahna thlentu mai a ni.




Chutah Nu Ramtei chuan "Zawma nen an innei dawn alawm. In tâwp vat a ngai dawn anih chu. Sawi buai theih in nei lo" a lo ti nghat a. A ṭawngkam bul zet aṭang chuan a thinrim zia hai theih a nilo. A mize tak tak a rawn lang chhuak ṭan dawn anih hmel e.




"Ka sawi tawh ang khan in fanu hi ka duh a, pasal in neih tir dawn anih chuan keiman ka nei ang" ka lo ti leh churh a. Ka thusawi engkimah Rara-i ka vengthawng tel lo thei lova. Ṭawngkam ka chhep sual anih vaih chuan a tuar tur chu Rara-i bawk a ni.




Chutah Nu Ramtei chuan "I la puitling tawk lo, hna mumal pawh i nei hlei nem" elhsen zet hian min lo ti a. Min hmuhsitna ṭawngkam chu ka hai lo nasa lutuk. Mahse zawldawh zawka ka ṭan hram hram a ngai tih ka hrechiang a.




"Hna mumal nei lo mah ila ka châwm zo em em ang" ka lo ti vat a. "I tuiton pek na fee te kha chu eng tham mah a ni nang" a lo ti salh mai.



Rara-i chuan ka kut a rawn ban vat a, ka inhum ruh nghal ṭeuh mai. Rara-i hmel chu ka en a, a inthlahrun hmel bakah hrehawm a tih hmel takzet a ni. Keimah vanga hrehawm a tihna a ni tih ka hai lo.




Haw tawh mai rawh tih melh tak hian min lo melh a. Ka tan chuan a tlawm thlak takzet. Mahse duh tawk mai ka tum lo.



"Sum leh paiin hlimna a pek theih loh hlimna ka pe ang" ka ti leh hram a. Mahse Nu Ramtei chu a lo nui hak a "A hlimna hi kan ngaih pawimawh ber ring suh" a lo ti hmiah mai.




Chu tluka Rara-i tan tlawm thlak tur a awm lovang. Ka awm ve reng lai chu sawi loh amah a awm ve reng laiin Nu Ramtei chuan chutiang thil chu a sawi thei ania.



Chutia Rara-i ngaihtuah lek lova ṭawngkam chhak chhuak ta chu ka insum duh ta bik lo a. Keimah min hmuhsitna ngawr ngawr chu ka tuar dam thei, mahse Rara-i leh zel a tihdanah chuan ka lawm loh bakah ka thin a khei zak mai.




"Keiin a hlimna ka ngai pawimawh ber alawm. Heihi lo hre rawh u, kei lo chu pasal dang a nei lovang. In hlimna siam sak tur che u leh sum in hmuhna tur naute lem infiamna a ni lo ania. In tân hlu lo mah se ka tan a hlu a. A hlutna mualah hian hlimna ka siam sak mai ang" ka ti ve ta nge nge a.




Ka aw chu a sehchilh nawk a, ka thinrim luatah ka bek a pawng ṭawlh ṭawlh bawk.




Chutah Nu Ramtei chuan "Eng nge i tih theih kan en ang chu. Naupangtê anih aṭanga ka châwm seilen a nih hi. A lo puitling ta chêng a, ka duhdanin a awm tur a ni ringawt" a lo ti nghat a.



Pa Marema chu a rawn ṭawng ve ka rin tehlul nen a ngawi reng a. Nêp ka ti ngawih ngawih. Pa chu sawi loh mipa ni pawhin ka hre tawh lo.




Chuvang chuan cho chhuah ve ka châk tlat a "I fanu chungchângah hian ngaihdan siam ta che" ka ti deuh khawl a. Rara-i chu a lo îp chawih mai.



Chutah Pa Marema chuan a aw a thian khurh khurh a, an nu chu a melh tê tê a, hlau hmel a pu ti dawn ila a ni chiah bawk silo. A lan dan aṭang hian a rilru tur awm ang hriat a har khawp mai.



"A nu sawi ang khan a enkawlna kawngah hian ka inrawlh thui lova. A nu sum ringa hetianga khawsa ve thei hi ania. A nu duh dan zawm chu a tih tur alawm. In inngaihzawnna a la rei lo bawk a. In inthlah veleh thei mai ang" a lo ti sam thên a.




A sawi ve duah na in a thusawi chu kan tan a ṭangkai lo kher mai. Ṭawngkhum nghek mai chu ka duh a, mahse Rara-i pa a nihna angin zah ve deuh a phu ka ti bawk si a.



"In lo mak hi le, Rara-i hlimna hi ngaihtuah ve ta che" ka ti khawl a, ka thaw chhuak hrawk bawk a. "Zawma kha tlangval fel deuh mai ania, an chhungkaw khawsak pawh a pangngai a. Rara-i hi a duh viau bawk a, a tihlim dawn tih ka hria alawm" a lo ti leh khauh a.




Ṭawngkam mawilo ni lo se pa mawl ve tak a ni nge thil kalphung a hrethiam lo der tih pawh chu ka hrethiam nei love. Rara-i ang fanu neih hi a phu thlawt lo.



"In duh ang ngawt chuan thil a kal lovang" ka lo ti nghet charh a. Chutah Nu Ramtei chu a lo nui leh hak a "Kan la hria ang chu, in hun tawitê neih kha lo hmang ve phawt ula" tiin a tho tharh a, room lam min pansan nghal a.



"Rara, i ṭhianpa kha thlah la, i mu vat dawn nia" Pa Marema chuan a lo ti sam then a. A lut zui veleh nghal daih a. A zurui tih ngaihna a awm loh tehlul nen a harhfim phei chuan tih ngaihna a awm lo lehzual anih kha. A nêp tulh tulh maiin ka hria. A natna vanga lainat pawh ka thei tlat rih lo.




Rara-i chu a lo thaw chhuak ham ham a "Ka sawi reng kha" a ti sep a. "I tan min duh loh chhan chu sum vang tho maw?" ka ti nghut a. "A ni tho a, mahse thil dang pawh a la tam ang" a ti a.



Pawnah chuan ngawi rengin kan inzui chhuak a. Ka bike hunna bulah kan han ding dun leh ren rawn rih a.



"Dik tak chuan ka nuhrawn hian ka hlim a phal lo ni berin ka hria. A ṭang hma a hai char char ani ber. Zawma nen min inneih tir a tum chhana ka rin pawh sum chu lo dah ṭha ta ila, Zawma kha a thunun thei dawn tlat a. Sawi tawh ang khan misual a ni si lova, ka nu lemchanna hian a bum hneh dawn lutuk. Lo innei ta tehreng pawh ni ila ka nu thuhnuaiah kan awm tho ang. Chu chu ka nu thil tum a ni bawkin ka hria " a ri duah a. A lo ngaihtuah nasa ve hle anih dawn hi.




Tin, keipwhin ngaihdan pakhat ka la nei a. Rara-i hian pasal a nei anih chuan a pu rosum a hminga awm zawng zawng kha neih dan a dap nghal dawn tih ka hria a. Rara-i dah ṭhat hi a tan chuan a pawimawh rualin a hman ṭangkai theiha a awm hi a pawimawh leh zual dawn. Zawma hmanga hman tangkai a tum ni berin ka hria. Chungte chu ka sawi ve nghal zat a.




Rara-i pawh chuan a lo tin zawn thiam ve khawp mai. "A tana pawimawh ber chu sum hi niin ka hria. A ngah sa tehlul nen eng atan em em nge maw a tih le? A chang chuan a rilru a pangngai zan lo emaw ka ti ṭhîn. A khawsa zia a mak thei si" a lo ti ve mawlh mawlh a.



A sawi dikin ka hria, Nu Ramtei awmdan hi mihring pangngai awmdan ni pawhin ka hrelo. Sumin a mit a tidel tawh ni berin ka hria.



Chutia ka ngaihtuah mek lai chuan ka rilruah thil dang a lo lut zawk a. "I ni te i be chhin em?" ka ti vut a. A ni pawhin a hrechhuak ve thut aniang. "Ehe ka la be miah lo, min ngaihsak em em lo mah se ka nu in a duh duha min tih kual chu an remti bik lovang" a lo ti ve hlut a. A mitmeng ah chuan beiseina thar ka hmu a. Keipawh ka harh leh nghal kuar mai.




A ni te chu be ngei turin ka ti ta a, a ṭul anih phei chuan kal pui pawh ka hnial lo. A tan chuan beiseina awm chhun a ni rih tlat.



Beiseina sang tak neiin ka hawsan a. A ni te tal chuan a lam ṭang ve lawk sela, a tan pawh a zia deuh ang.




Krismas tukah chuan chhungkaw kim in kan inkhawm a. Ka pa chuan vanneih thlak takin ka ti dawn nge Krismas tuk hun a chang hlauh a. Thlan sa thupui hmangin thu a sawi a. Ka pa a nihna ang ni lovin Pathian thusawi a nihna angin a thusawi chu ka ngaithla a. Ka nuna seng luh tur tam tak ka chhar chhuak leh tawh.




Nilengin Biakin leh a chhevelah ka tap chawt a. Ṭhalai kan che suau suau a, ruai pawh kan ṭheh tlang nghal a. Phone hmanna hun mumal pawh ka la nei theilo.




Rara-i pawh keimah ang chiahin zingkar atangin Kohhran thilah a buai ve hle tih ka hria a. Inbiakna hun mumal pawh kan la nei thei lo.



Remchân veleh a ni te chu a biak tur thu a sawi âwl lova. Tukinah nizan thil thleng vel vang khan a nu in a lo khak a ni awm a. Ka zawt chik hle a, kut em chu an lo inthlak lova ka thaw huai mai.



A sawi dan kalhmangah Zawma chu neih tir an la tum urhsun hle a ni awm e.



Krismas te pawh tlaia lendun kan tum ve tehlul nen kan hun tawnin a zir lo em a. Kan buai dun em em mai si a, tum angin kan awm leh thei ta lova.



Zânah lah kan inkhawm leh a, zaikhawm zai hruaitu turte zing ami keyboard hmet tu tur chu dam sam lohna avangin a thei dawn lova. Chawpchilh deuhin KṬP Hruaitu te'n min han ruat leh hnuhnawh a. Ka tan phat ngaihna a awm silo. Tum loh deuhin ka zaikhawm ve a, keyboard chu ka hmet bawk a. Kohhran ho kan hlim lai a ni bawk si, kan la banh har em em mai lehnghâl a. Kan ban meuh chuan zanlai dar 12 a lo pel thuak tawh.




Zaikhawmna hall aṭanga ka chhuah rual chuan phone ka check nghal a. Rara-i missed call a lo awm vâng tawh mai. Dar 10 vela ka hman ka rin thu kha text in ka lo hrilh tawh a, mahse a missed call chu dar 11 vel a ni.




Ngaih ṭhat lohna em em nei lovin ka call back a. Mahse a lak rual rual chuan a rawn ṭap chhuak ta hlawp hlawp mai.


___________*__________*_________*_______


(A thawnthu a changtute zûnah hian uai tir vak che u ka tum lo. He thawnthu hian eng nge min zirtir a tum? Eng hlawkna nge kan chhar ang? tihah hian in ngaihtuahna sen tir che u ka tum zawk aw. A tâwp hunah chu chu kan hrethiam mai ang. Chutihrual chuan Au Hriatpuia leh Rara-i zûna uai loh erawh har kan ti sâwt khawp ang)


Show post links
Top

[Ngaia]

AIZIAL
By CVL Awmpuii



Chapter 22



"Rara..." ka ti nghal hluai a,chhuak zet hian a ṭap zui hlawp hlawp a. A hrilhai thlak duh kher mai.



"Au Hriatpui..." a ti a, sawi zawm thei lovin a ṭap zui leh nghal a.



"I ṭha em? Enga tinge? Harsatna i tawk em ni?" ka lo ti nghal chûk chûk a. Min chhang thei lawk bawk si lo, rilru a buai duh kher mai.



Min chhan let hun chu ka ngaichâng ta tawp a. Chutih lai mek chuan ka nu in min rawn au lauh a, ka lam panin a rawn kal zui nghal hlawk hlawk a. Phone ngaichâng reng chung chuan ka nu min lo pan mek tu chu ka lo melh ve reng bawk a.



"Hriatpui, Rara-i pa Marema a boral anih chu, nichin mai khan" a rawn ti ta mai. A mi den dan a dang duh kher mai.



Phone chu ka chelh nghet zual sauh a, rilru a phili ruai tawh mai. "Rara..." ka ti leh a, Rara-i lah chu chhuak zet hian a rawn ṭap leh rawng rawng a. Ka nu chuan min lo melh ve reng bawk a.



Rara-i chu biak zui chi ah ka ngai rih ta lova, an in lama kal vat chî zawk niin ka hria.



"Rara, ka lo kal dawn. Engkim ka hre tawh e, mangang miah suh aw. Phone hi ka dah lawk dawn a, i kiangah ka lo kal vat ang" ka ti mawlh mawlh a. Ka rilru a hmanhmawh em avangin phone chu ka dah zui nghal a.




Ka nu chuan "Chanchin a rawn hrilh che em ni?" a lo ti vat a. "A ṭawng chhuak hlei thei lo, a ngaihtuah awm takzet" ka lo ti vat a.



Ka pa leh Vantei te pawh kan lo dinna laiah chuan an rawn phei ve nghal a. Chutah ka pa chuan "Chanchin in lo hre tawh ang chu maw?" a rawn ti a. "An sawi a, hei Hriatpuia ka lo hrilh mek a" ka nu chuan a lo ti vat a.




Ka pa chu a lo bu nghut nghut a, "Rara-i a ngaihtuah awm viau ang le. Boral dan pângngai in a boral lo lehnghâl a" a tih chuan ka beng a lo verh kher mai.



"Eng nge in sawi awmzia?" ka lo ti ang he haw a. Ka mitmeng aṭang chuan ka hriatthiam loh zia an chhiar thiam ve vek ang.



Chutah ka pa chuan "A inawkhlum alawm" a lo ti sup a. Min ṭhawng leh zual kher mai. A natna vanga boral thut turah ka lo dah hman a, mahse mahni nunna la maw a lo nih a ! Rara-i rilru chu a mang ve viau ang le.




Ka chhungte bulah chuan Rara-i min lo biak velte chu ka sawi thuak a. Ka nu chuan "Kal ve vat a va ṭha ve" a lo ti vat a. Ka pa pawhin a lo pawm pui khawp mai.



Tawi khawmuang thei ka nih loh zia ka inhrechiang a "Keichu ka kal nghal dawn a, nangni chu in thu thu a nimai" ka ti vut a. Kal mai ka tum lai chuan ka pa in "Tunah chuan inah ruang a la thleng rih lo ang aw Hriatpui. An sawi kalhmangah Damdawiin an thlen pui hman a, damdawiin a chatthla a ni a. Post mortem neuh neuh te an ti ang a. Ruang chu an la chauh ang" a lo ti zung zung a. Damdawiin hmingte chu a sawi nghal vek bawk a.




Ka rilru hmanhmawhin engmah ka lo ngaihtuah hman lo a ni.



Ka kal hmain Rara-i ka biak leh phawt a ngai tih ka hria. Mahse biak zui tlak vak a ni bawk si lova. Ka rilruah Nunmawii a rawn lang zawk a. Tun atan chuan ka biak ngei ngei a ngai. Thil dang ngaihtuahna hman pawh a awm lo.




Ka chhungte lak aṭanga ka kal hran hnu chuan Nunmawii number ka dial nghal a. Ka bike hunna bul ka thleng fel der tawh.




Ka call nghal a, rei fe a ring hnu ah a lo la ta chauh a. Aw ṭial reuh ruai hian min lo chhang a. An dinhmun ka hre bawk a, mak ka ti hran lo.



"Nunmawi, Rara-i a ṭha em?" ka ti nghal tawl a, ka aw aṭang chuan Rara-i ka ngaihtuah zia a hrethiam ve vekin ka ring.



"A hrilhai lutuk a, tawrh dân a thiam lo khawp mai" a rawn ti ṭiau a. "Damdawiin lamah in la awm vek nge?" ka tih chuan an awmdan chu a rawn sawi zung zung a.




"Aw...awm deuh vek chu a nimai. Ruang hi an post mortem mek a. Chu chu kan nghak a, an zawh fel hunah in lam kan pan theih chauh ka ring" a rawn ti zung zung a. A aw chu a pangngai ta deuh.



"Damdawiin lamah chuan ka lo kal ve dawn nia" ka ti a, phone chu ka dah zui nghal a.



Bike ka ti nung nghal a, ka tlân chhuah dawn lai tak chuan ka pa in min lo au ding leh a.



"Hriatpui, damdawiin lama kal ve zel ai chuan an in lamah sing sak ngai ang zawng zawng lo buaipui ve a ṭha zawk lo em ni aw? Ka ngaihtuah a, ruang chu in lamah lo nghak ve zawk la a fuh ka ring. Thil thleng a thlak danglam theih tawh chuang loh a, hmanhmawh vut vut pawh a ṭha ber lo ania. Rara-i te in lamah lo zuk kal la. I nu leh i nau te nen damdawiin lamah chuan kan lo kal zawk ang" a rawn ti a. Ro a rel nghal zung zung a. A ngaihtuah kim hmel khawp mai.




Mahse tun dinhmunah chuan Rara-i hmuh a, a kianga awm vat ka duh si a. Ka pa chu ka lo hnial vat a "Min mamawh hunlai tak alawm, a hrilhhai dawn si. A ngaihtuah awm lutuk" ka lo ti thlawt a.



Ka pa chuan dam thlup hian "Ka hria alawm, ka hrethiam lutuk ania. Mahse ka ngaihtuah thui vang zawk anih chu. Damdawiin lama i lan ve ai chuan an in lama buaipui ngai ang ang i lo buaipui a, ruang lo nghah ve kha i tan a ṭha zawk. Damdawiin i pan ve a nih chuan Rara-i rilru mang lai tak a ni dawn a, thil a hahthlâk zo ang. Keini kan lo va lang zawk ang" a ti tlat a.




Ka pa thusawi hnial ṭung chu thil tih chi ah ka ngai lova. Ani'n ṭha a a ngaih chu ṭha turah ka ngai hmiah mai.



Hreh deuh chungin Rara-i te in lam pan chuan ka inkhalh thla ta zawk a. Ka pa te pawh damdawiin lam panin an kal nghal dawn anih hmel.



An in ka zuk thlen chuan an lo che suau suau a, a ṭhen an lo ṭap bawk a. An chhungkhat laina te leh ṭhenawm khawvengte chu an pung chak ngang mai.




An in sing sak lai chu ka lo pui ve vat a. Khua a vawt tawh ang reng a, chêt a huphurh awm vak loh. Khawlum tuar tur a awm hran lo bawk a.



Rilru khingbai deuhin ka awm ve ta reng a. Ruango nghah deuh tlawk tlawk mai chu dawhtheihna neih a ngai khawp mai.



A ṭul ang ang kan sing sak fel hnu chuan ka pa ka call nghal a. Chanchin ka zawt nghal vat a, damdawiin an thlen tawh thu a rawn sawi chuan thawk khat chu a veng ta deuh e.



Zah pawh dawn lovin Rara-i chanchin ka zawt nghal a, "A tuar thiam thlawt lo a ni ber e" tih chu ka pa min chhanna a ni. Sawi thui lo mah se Rara-i na tuar rum ri chuan ka beng a rawn thleng pha hialin ka hria.



A niin a tawrh thiam thlawt loh chu a na a nimai. A pa hian ngaihsak lovin ruih san buk bûk ṭhin mah se a thisen zawmpui awmchhun a nih tawh bakah a pa a nihna a bo lova. Amah vanga a nuhrawn tihduhdahna pawh tuar ve hram hram kha a ni a. A tan chuan a pa tluk hi an awm bik dawn lo tih ka hria. Mahse tunah chuan a awm tawh silo. Ka thawk a lo ipik ṭeuh mai.





"An zo ṭep tawh ang em aw?" ka tih chuan "An zo thawkhat chu a nimai a, ruang rawn tlanpui chhung nen darkar khat vel chu a la ngaih ka ring" a lo ti vat a. Darkar khat chu a rei mah mah a ni.




"Pa ka lo kal ve mai dawn mawnle?" ka ti hulh a, kal ve mai chu ka duh tak tak a. Helai hmuna rilru nuam lo deuha lo awm reng chu a hrehawm duh emai.




Mahse ka pa chuan "Rilru phili deuhin awm suh, tikhan lo awm tawp mai rawh. I nu leh nau te an awm bawk a, an hnêm thei lutuk ang. Mipa i nih kha, a hun takah i la hnêm dawn nia. Tunah rih chuan hetiang hun thâwl hi a mamawh rih zawk" a lo ti dam thluam a.




Kan inbiak zawh chuan ka thaw chhuak hulh a. Khawtlang hruaitu te chuan "Silpaulin vel hi naktuka zar ngai lovin tunah kan zar law law mai dawn mawnle. Ruah te pawh sur thut thei ania, inhmakhua lawk ang u. Ruang a lo la thlen rih hmel si loh a" an ti a.




Silpaulin chu kan han zar leh hnuhnawh a. Ka hmelhriat ṭhenkhat te an awm ve nual a. Pawnah chuan ṭhu in an titi chu ka lo ngaithla ve ta reng a.




Pa Marema boral dan vel chu an sawi a, pakhat chuan "A rui buai deuh hlek aniang, chuti ni lo se hetiang thil a ti mai lovang" a lo ti a.



"Damdawiin an thlen pui hman tho tiraw?" pakhat chuan a lo ti veleh a. "Thlen pui hman e, mahse rei pawh a nih hma in a chat thla zui nghal mai a ni awm e" an ti a.




An chhungkaw chanchin te chu an sawi zui a. Mahse sawi zui chiam tur an hriat vak hmel loh khawp mai. An hriatchian em em chu Rev Sanghminga thlah te an ni tih a nimai a. A bak ah chuan hriat chiam na tur an vâng ve bawk a.




Zep nak emaw Pa Marema kohhran leh khawtlanga in hmang chiam chi a lo ni lova. Nu Ramtei lah nitin hnathawka chhuak a ni bawk a. Rara-i chu an hre bel hle a, a mawi tawka kohhran leh khawtlanga a lo in hman ve na te chu a ni deuh mai.




Lehlamah khawpuiah hi chuan vêng khat chu sawi loh ṭhenawm khawveng te pawh kan hre mumal tawh lova. Kohhran leh khawtlanga in hmang deuh an langsar leh a nimai. A bakah hi chuan mahni buai buaiin kan buai a, mi chhungkaw chanchin hriat pawh a har ve tawh em ani.




Lo awm tawp ringawt mai chu tiin ka inngaihtuah leh hluai ṭhin a. Ka pa chu ka call leh ta nge nge a. Hello pawh ti hmasa lovin chanchin a rawn sawi nghal a "Ruang an rawn tlan chhuahpui dawn chiah e" a rawn ti nghal a. Ka lo thaw huai mai. Mahse Rara-i hmachhawn ka huphurh dan leh ka lainat dan chu a intluk tawk viau ang.



Ka pa nen kan inbiak zawh chuan ruang an rawn chhuahpui chiah thu an lo sawi ve nghal a. Sana ka en chuan dar 2 a lo ri ṭep tawh mai.



Inchhûng lamah chuan ṭap ri a rawn awm leh hak a. Pu Sanghminga boral khan mi ṭhenkhat saw chu ka hmu nual tawh a, Rara-i nî te leh an fate an ni hlawm.



Ambulance ri kan hriat takah chuan kan tho suau a. Rara-i ka ngaihtuah takzet tawh a ni.


An inkawtah chuan an rawn ding ta a. An veng tlangval thenkhat te nen hma kan hruai a. Inchhûng lama ṭap ho pawh an rawn chhuak hlawm a.




Ambulance kan hawn rual chuan Nu Ramtei leh Rara-i te chu ka hmu chawpchilh nghal a. Ruang lak chhuah hma in an rawn chhuak a.




Nu Ramtei chu a rawn ṭap chhuak hawm hawm a. An lo kuah a, "Rara-i pa hian min ti hrilhai emai..." tiin a ṭap zui hawm hawm a.



Rara-i a rawn chhuah rual chuan ka kawchhûng a che rawih rawih mai. A hmel lainat awm lutuk leh baih vai lutuk chuan min lo ti chau vek thei.



Ka pan hnai nghal vut a, inzep leh zah ṭit ṭet na hun a ni lo tih ka hria.




Ani pawhin min rawn hmu chawpchilh nghal a, Ambulance aṭanga a rawn chhuah fel rual chuan a rawn ṭap chhuak hawm hawm a.



Ka lo ban nghal vat a, nghet zetin ka lo kuah nghal a. A nî te ho chuan a hnungah an lo chûl nghal bawk a. "Bawihte..." tiin an ṭap zui hawm hawm a. An lainat ve tak tak niin ka hria.



Ruang chu la chhuakin inchhungah zawn luh nghal a ni a. Rara-i chuan ka âwmah a rawn nawr vak a, a ṭap nasa lutuk chu a chau ngawtin ka ring.




Hetianga a awm lai hi ka vawihnih hmuhna chiah a ni. A vawikhatna chu a pu thlanah khan a ni a. Tunah hian khami ṭum ai mah khan a na in ka hria.



Inchhûngah chuan ka kuah lut a. Ka chhungte pawh râl aṭangin ka va hmu nghal a. Ka nu leh Vantei te pawh insum zo lovin an ṭap khur ve dar dar mai. Rara-i an lainat vang a ni tih ka hai lo.




Rara-i chu a pa ruang kilin a ṭhu ve nghal a, a bula awm reng chu duh mah ila ruang lo kil ve daih chu ni theiin ka hre lova. An hnung deuha ka chhûngte ṭhutna laiah chuan ka ṭhu ve nghal a.




A tu a te mai pawh chu an ṭap nasa, an ri chhuak chuah chuah hi a ni ber mai. Nu Ramtei chuan thu chi hrang hrang a chham a. Rara-i chungah eng ang pawhin sual ṭhin mah se a pasal thihna chu a tuar ve takzet niin ka hria.




Chhungkaw lam aṭangin ding chhuak thei mai an awm rih loh avangin an vêng Y.M.A President chu a ding nghal a.



Chhiat an tawh dan kim chang chu a sawi nghal a. "Hei zaninah Pu Marema chuan chatuan ram min pan san thut mai a. A boralna hian Chhungkhat laina leh khawtlang min barakhaih hlein a hriat a. Zep thu a chêng lova, hetiang teh thut hi chu kan beisei loh thil a ni vekin ka ring a. Keini'n a kan han hriat dan kan sawi hmasa ang a, nakinah chhungkaw lam aṭang pawhin an la ding turah ngai ila. Tunah chuan ka hriat ang ang ka lo sawi phawt dawn a ni. Hei, krismas zan te a ni a. Mihring kan sahawk lai leh kan buai vanglai tak a ni a. Zanin ti ila, nizan a ni tawh zawk mah ang chu. Nizan lamah khan Pi Ramtei te nufa hi an inkhawm a, Pu Marema hi chuan in a lo nghak a. Inkhawm bang kha Pi Ramtei hian a chhungte a tlawh kawi a. An fanu Rara-i hi chu a haw tlang nghal mai a. A nawm sam meuh loh avangin mut nghal mai a tum a. Mahse a muhil mai thei bik lo a. A rilṭam inhnuai lamah chhuk thla lehin ei tur a indap chawp a. A sawi danin zan dar 10 vel a ni awm e, a pa te room lamah thâwm ri rawk a hria a. A tirah chuan ngaih ṭhat lohna em em nei lovin a thil ei lai a ei zawm leh mai kha ania. Mahse a pa ber hetianga a awm ta chu a fanu rilruah mawlh tu a awm ania nge. Darkar chanve vel a liam hnu chuan a pa te room chu a va kik ta nge nge a. A pa in a lo chhâwn tak mai si lovah chuan a au ta lawm lawm a. Chuti chung chung pawha a chhan tak si lovah chuan a ngaih a ṭha ta lova. Tichuan, a nu a lo haw chawpchilh nghal bawk a. An nufain an han au lawm lawm a. Mahse pa ber chuan a lo chhawn ta si lova. An theih ang angin kawngkhar chu hawn an tum ta a. Hmeichhe tha chuan an ti mai thei si lo. Pi Ramtei'n ṭhenawm te pun mai a rawt a. Ṭhenawmte pun tura a kal chhungin an fanu Rara-i hian a lo nem hawng hlauh mai a. Tichuan, hei kan hre vek a. A pa ruang hmu hmasa bertu chu a ni ta mai a. A tan hian a hrilhai thlak zual dawn hle in ka hria a. Tikhan, ṭhenawm te'n an buaipui zui a. A mar an la hmuh avangin damdawiin lam pan pui nghal a ni a. Mahse minute tam pawh a liam hma in a chatthla zui nghal mai a ni awm e. Nakinah anmahni lam pawhin chipchiar zawkin an rawn sawi turah ngai ila. Tun atan chuan khati zawng kha ni rih mai rawh se" a ti dap dap a.




Ṭawngṭaina a hmang zui nghal a.




Kan chhûngkuain kan tlaivar pui ve ṭhak a. Rara-i chu a ṭap tlaivar zak a tih theih ang. Mahni pa te inkhai lai hmuh tlawng mai chu a ni ang hmeichhe âwm nêm, la naupang bawk si tan chuan a thla bar thlak viau in ka ring.




Midangho pawh an ṭap nasa khawp mai. A boral dan a hrilhai thlak bakah chhûngte tan chuan a rilru nat thlak dawn lutuk a. Chutia an ṭap rawng rawng pawh chu mak ka ti hran lo.




Rara-i mawlh mai chu a ni ka lainat ni !



Zingkarah chuan ṭin na te an han siam a. Midang haw rem deuh hlek hnuah Rara-i chu ka nu leh Vantei te'n an va ṭhut chilh nghal a. Ka pa chu pawn lamah a hmelhriat te hovin an lo be buai hneh leh viau tawh mai.




Tih theih em em nei si lovin Rara-i bulah chuan ka va kal hnai ve a.



Ka nu chuan a hnungah a chûl hauh hauh a, a bengbulah a phun sap sap bawk a. Rara-i chu ṭap khur dar dar chungin a lo bu nghat nghat a. An thusawi hre pha lo mah ila ka nu hian tlêm tal chuan a hnêm zo ve ngeiin ka ring.



Nu Ramtei leh Rara-i ni te ho pawh an pangngai ve ta deuh a. Nu Ramtei chuan "In fel hle mai, chhungkua kuain min rawn ngai pawimawh a" a lo ti ve luam a. A meng sen ram a, zan lamah a ṭap nasa bawk a. A chau ve viauin ka ring.




Nunmawii nû, Nu Mami pawhin min lo fak ve luam a. An fa tlum ber tuitor ka nih avângin min hre bel ve viau tawh a. Mahse Rara-i nen kan inkar hi chu an la hre miah lo turah ka ngai.



Zawma pawh a lo kal ve a, hmelhriat a ngah hmel khawp mai. Nizan aṭang khan midang nen an inbe deuh chhen a. Ka mit tikham zawngin a awm loh bakah chutiang lo ngaihtuahna hun a nilo tih ka hria a. Ka en liam ve tawp mai.




Kan haw tur chu Rara-in pawn thleng min thlah a. Ka nu leh Vantei te'n an be mawlh mawlh a, kei nen tak phei chuan kan la inbe mumal lo.



Ka pa in min rawn hmuh rual chuan Rara-i hnem tum takin a nui suk a "Rara-i chu a chhel alawm, thil engkim hi thil ṭha eng emaw lan chhuah tir na tura lo thleng vek a ni a. I tan kan awm reng dawn a, lungngai miah suh" a lo ti dam thluam a. A dawngsawng tu tan chuan a thlamuan thlak viau in ka ring.




Rara-i pawh chuan "In lo kal vek a, ka lawm e aw" a ti ṭiau a. Chutianga pangngai taka a ti thei chu ka chhuang khawp mai.



Chutah ka pa chuan "Ekhai, kan fanu alawm i nih, chutiang sawi a ngai reng reng lo" a lo ti vat a. Rara-i chu ṭah insum zetin a lo bu nghat nghat a.




"Zuali, Vante, lo va haw hmasa ila" a ti a. Ka nu te pawh chuan an zui ve nghal vat a. Rara-i bulah chuan "Tukṭhuan te kan ei ang a, kan lo lang leh vat ang" an ti lawm lawm a.



Ka pa te tlan liam hnu chuan Rara-i nen kan inhmachhawn ta a.



Ngawi rengin a kut chu ka chelh vang vang a. Zingkar mi mut reh lai tak a ni a, min rawn hmu fuh chat chu an awm kher lovang. Kan hnai vaia awm te lah inchhûng lamah an awm vek bawk a. Mi mitmei ven tur vak a awm lo.



"Tunah chuan ṭha rih lo mah la, hunin a la liampui em em ang" ka ti sup a. Mittui tling pam hian min lo melh a "Au Hriatpui, na ka ti emai" a rawn ti vawng vawng a. A mitmenga natna lang chhuak chu ka hmuh hmaih loh nasa lutuk. Ka lainat takzet a ni.




"Thil hrehawm tam tak i lo paltlang tawh kha, i chhel tawk tih inhria la. Ṭum dangah chuan nangmahin i paltlang ṭhin a, tunah chuan i hmaah ka ding ang a. Kan pahnihin eng thil pawh kan paltlang dun zel ang" ka lo ti nghet charh a.




Khur dar dar chungin a lo bu nghat nghat a. A samah chuan ka chûl zauh a. Hetiang ringawta haw san chu ka thei lovang. Rilru hrehawm deuhin ka awm ang. Amah ngaihtuah reng rêngin ka awm dawn tho tho.



"Ka haw lo mai ang" ka ti ta reng a. Mahse Rara-i chuan min lo hnial vat a "Haw vat zawk rih rawh. I inthuam dante pawh kha a ninawm tawh ang. Zaikhawm bang i lo tlang nghal a ni awm sia" a lo ti zung zung a.




A aw rik chhuah dan chu rin ai takin a pangngai a.



"Ka awm tlang ve law law zawk mai ang. Nangmah chauha kalsan che chu a tih chî loh emai" ka lo la ti ṭalh a. "Keimah chauh ka nih loh hi, min ngaihtuah lutuk suh. I lo kal leh vat dawn lawm" a lo ti vat a.




A mitmeng aṭang chuan ngaihtuah ngai a nih zia ka hai si lo. Mahse a ṭang ve tlat a. Ka bike dahna thleng min thlah a, ka inkhalh haw ta poh a. Ka kal leh nghal vat tur thu chu ka sawi mawlh mawlh kha!



Pa Marema chu chhun dar 12 ah kan vui liam ta a. Rara-i mittui chu a hul thei meuh lo a ni e. A pu thihna ai mah khan a tuar zawk emaw tih mai tur ani. A tuar na hle niin ka hria.




A sarhu lai a ni a, inhnem vakin awmzia a nei rih dawn lo tih ka hria a. Mahse an in lamah ka tap ve deuh chawt a. Nu Ramtei pawhin min lo be chhe hran lova. A nî te ho pawh ka lakah an fel khawp mai. Nunmawii pawhin awmdan tawk a thiam a. Ka beisei phak bakin an chhungkaw boruak a ziaawm ti tawp mai ang.




Zawma pawh ka hmu zing malh malh khawp mai. Nu Ramtei nen an inbe ṭha em em a, keimah ang thovin a nî te pawh chuan an be ṭha a. Inneihna chungchang erawh a ri leh tawh lo thung a.




Krismas vuak vet mah nise Rara-i chu Vantei pawhin kar khat ṭha zen zawn a riahpui a. A sawi kalhmangah a ziaawm ve hret hret anih hmel.



Kan inbe awl lova, ka fuih ve mawlh mawlh a. Mahse amah zawk hian ngaihtuah loh luih a tum ṭhin niin ka hria a. A pa chungchang chu kan sawi thui vak ngai lo.



Krismas leh kum thar vuak vet chu Rara-i te inah ka tap deuh chawt a. Inkhawm leh zaikhawm chu a mawi tawkin ka kal ve tho a. Ka ṭhulh chang chuan ka chhûngte pawhin min hrethiam khawp mai.




Rara-i te pawh chhungkua in an la riak khawm ve dal a. Tunah rih chuan ziaawm viau mah se nakin hun mawlh ka lo huphurh pui a. Nu Ramtei chêt leh duh dan tur kan hre bawk si lo.



Tichuan, hun a kal ta duak a. Naupangho in School an kal leh ṭan tawh a. A chawlh reng theih bik si loh a. Tuition pawh kan kal leh ṭan tawh a.




Rara-i pawhin pangngai takin college a zawm leh tawh a. A mize ngai, harh vang zeta let leh tur kha chuan hun a la duh ve deuh mai thei.



Mahse min ti lawm em em tu chu ka len apiangin hmuh hrehawm lutuk leh Khawngaih thla la lutukin min lo dawngsawng ngai lova. A hma anga harh vang zawk zawk kha ni tawh lo mah se a tana ka inpekna ah a lawm thiam em em ṭhin a. A pa boralna chuan kan pahnih inkar a sawh nghet zawk emaw tih tur a ni.



Tin, a ni te ho leh ṭhenawm khawvengte pawhin min hmehbel thiam ve ṭan tawh a. Rara-i hi chuan midang hriattir a la hreh viau mai a. Mahse Zawma a awm ve tlat tawh a, a pawiti lutuk tawh bik lo.




Zawma nen kan leng dun deuh zut a, a chhungte min biak dan chu a ngai reng a. Zawma hi mimawl a nih loh chuan Rara-i nen kan inkar a hrethiampui ka ve tawh ngeiin ka ring. Mi fing a nih phawt chuan inthiarfihlim nachang a hre ngei bawk ang.




February thla kan chuangkai chho a. Rara-i pawh a nu nen chauh an han khawsa veleh ta naw naw a. Pa ber awm ta lo chu a khawhar thlak ve viau in ka ring. Nu Ramtei chu lo fel vak lo pawh nise mihring ve tho a ni a. Khawharna in a chiah piah nasa ve viau in ka ring.




Ka hman chang changin ka leng thla ṭhin a. Pa Marema boral hlim chhawn vel laia min biak dan kha a bo ta tial tial a. A ze ngai a chhuah leh ṭan a tih theih ang.



Mahse thil danglam dang a awm tel tlat. Rara-i hi a hma ang khan a kimki chawih chawih tawh lova. A ni chu chhang let zawt zawt lo mah se a zah vak bik tawh lo tih an inchhung boruak aṭang chuan ka hre ve thei. Lawmna chî a nih leh nih loh phei chu ka hre lova.




Ṭum khat chu Rara-in a nu hna thila a zin tur thu a rawn sawi a. Ni li lai a zin bosan dawn a ni awm e. A rawn thawveng khawp mai a. Phone a inbia mah ni ila a hmel hmuh a nuam ngawtin ka ring.



Mahse kei chuan mahni chauha riak turin ka ngaihtuah tlat a. "I nu zin chhung chu lo riak mai la, Vantei nen pawh in mu thei a" ka lo ti nghal var a. Mahse min lo hnial vat thung a.




"A chi loh, a hma ang kha a nih tawh loh hi. Miin kan inkawp tih an hre ve fur si a. Lo riak ta ila chu Vantei nen kan inṭhian ṭhatna aiin kan pahnih inlaichinna an sawi vung zawk ang" a lo ti zung zung a.




A naupan ngaihtuah hian thil te hi a ngaihtuah kim biai zel a. A zilh tu zawk leh thu ṭha hrilh tu zawk hi ni mah ila ka tluk loh châng a tam mai.



"Anih chuan rei tawk ka lo leng ang" ka ti ta ngawt a. Chu erawh chu a lawm zawng tak a lo ni thung a.



Zanah chuan ka leng ta nghal a. Kan pahnih chauha awm kan ni bawk a. Kan inkarah eng emaw a lo awm ve bawk nen kan hun neih ang ang chu kan duhthawh dun ve hle a.



Kan insi chial a, kan infawp mawlh mawlh reng mai. Midang chu ngai lo ve tak kan ni. Ṭawngka aiin che zia in kan inkar chu kan tilang nasa zawk a. Tumah zah pah tur awm ta lo chu in duat hleuh hleuh tak kan ni.




Ka fawh mawlh mawlh lai chuan a inla hrang dat a "Ka ril a ṭam" a lo ti sep a. Kan thiltih lai leh a thusawi inpersan lutuk chu ka nui huk a.




"Tlaiah chaw ka ei hlei nem" a lo ti hlar a, ka lo rum nghut mai. Sawi sual inti lutuk hian lei a chhuah tet a "Vawi engzat nge ka sawi tawh?" ka tih rual chuan "Tunah ka ei dawn chiah" a lo ti ve zat a. Min nuin tlawn nghal bawk a.




A inla hrang a, a thawh rual chuan ka lo tho chhuak ve nghal vut a.



Chawhmeh ho chu a chhuang lum a, dawhkan hnuaia ṭhutthlêng chu pawt chhuakin ka ṭhu thla nghal a. Artui a kang sar sar a, a rimtui luatah ka ril a ti ṭam hrep mai.



"Ei veleh la" a tih chuan ka lo hnial lo kher mai. Chutah nui hak chung hian "Thlem sam pa" a lo ti hlak a.




Ka fiam châk tlat pek a, a artui kanna bul setah chuan ka va ding a "Thil dangah min lo thlem chhin" ka ti a, a rawn hawi rual chuan mitmeng de sawr sawrin ka lo melh a.



"I hur sia maw" tiin a lo ner nawk a, a inher leh nghal hmak mai. Hmeichhe dang chuan hetiangte hi awlsam deuha an sawi ngam ka ringlo. Mahse a ni chu Rara-i kha a ni miau a. Sawi ngam loh a neilo.



Ka nui ruh ruh a "Mawh...min lo thlem chhin" ka ti nawn leh hram a. A hnung lam aṭang chuan ka va kuah a, a bek chu ka nul thuak a. A lo ip nghal chawih tih ka hriat rual chuan ka nui suk a. Tih zâm ka chak tlat a ni.




A zah ka rin tehlul nen "Ka lo inla fit phawt ang" tiin min chhang khanglang anih chu! A nui zui har har a, min ti hrilhai letling zawk ania aw.




A rawn inher a, hmai pho lahin min lo melh chho a "Thlêm buai i ngai lo, min ît sa" tiin a nui sak a. A la intih theih hmel em em mai lehnghâl a.



A awm dan chuan ka ha a ti ziau tlat pek a "Ka seh sawk mai ang che" ka tih chuan a dawn che chhuak vut a. Ka hmuiah a rawn seh anih chu ! Engtin nge a tih theih pawh ka hrelo. Keia lo inring bawk si lo chu ka lo ding khawng luh a. Min la nuihzat em em zui a.




"Ka ril a ṭam, ei vat ang" tiin a kalsawn a. Chair pawt chhuaka a ṭhut dawn lai mek chuan ka harh chhuak thut a. A kawngah hmerin ka pawt let dawrh a. Taksa inthlawp zaiha kan awm rual chuan ka fawp nghal tawn tawn a.




Henu tê reuh hian zûn a ngah lutuk a, a zûn hian min phuar nghet tawlh tawlh mai.




Thawchham dawn khawpa kan infawh hnu chuan ka inlahrang ta hram a. A thaw chhuak nghal hlawi hlawi mai, keipawh ka lo thaw chhuak ve ham ham a.



"I mak thut thut thei lutuk" a ti hlak a, a inla hrang tur chu ka lo dang tawh bik lo.



Chaw chu kan ei dun ta poh a. Chawhmeh tam lo mah se chaw awm ang ang chu kan ei zo ṭhak mai. Zanriah kha ka ei hnem ve pangngai si a. Ka bula eiin a zir vang nge tum aia tam ka ei nawn leh ta ngawt chu a ni sia.




Dar 11 velah chuan haw turin ka intintuah ta a. Ka haw hma chuan zan tin ka tih ṭhin dan angin Rara-i chu ka fuih leh mawlh mawlh a.



Mahse zan dang angin ka fuihna te chu a ngaih pawimawh hmel tlat loh. A ngainep chu ka ti dawt lo na in a ngaih ho lam hmel khawp mai.



"I awmdan a dik miah lo" ka tih chuan za lo zet hian a lo ṭhen sak a.



"Pathian awm leh awm loh ka ringhlel mek asin" a lo ti zawi sap a. A ṭawng chu zawi hle mah se ka bengah chuan fiah ṭha tak ani.



___________*__________*__________*________*


Show post links
Top

[Ngaia]

AIZIAL
By CVL Awmpuii


Chapter 23


Ngawi rengin Rara-i chu ka melh tlawk tlawk a, mitmeng fiah zet hian min lo melh let ve kal bawk a.



A hmêlah chuan tum ruhna te, luhlulna te, mahni inrintawkna te ka hmu a. Chutihrual chuan a thinlung a rum takzet zet niin ka hria.



A ngaihdan chu sawh sawn tum eng ang mah ila tun dinhmunah chuan a harsa rih viau in ka ring. Eng kawngah mah a duh lohna ah chuan a tih luih theih ngai loh tlat a ni.




"Hetiang hian awm suh, i inhmeh miah lo" ka ti sup a. "A awm lo chu ka ti dawt ngam lo, mahse ka ringhlel ṭan mek a ni. Ka chunga thil thleng zawng zawng te hi pawm thiam tumin ka bei nasa lutuk. Ka pawm thiam viau ṭhin pawhin ka hria. Mahse tun dinhmunah hi chuan Pathian khi a reh tlat, awm lo ang mai a ni" a lo ti chang rât a.




Beidawnna âw ai mah chuan thinrimna leh lungawi lohna in a khat in ka hria.



A thil tawrh tawh zawng zawng te ka ngaihtuah lêt a. Demna tur ka hre bik lo. Chutihrual chuan Pathian a awm ngei a ni tih hi fiah sak ka tum nghal bur thung a.


Sawi zui pui vak chî ah ka ngai rih lova. "Engkim a ṭha leh vek mai ang" tih chu ka sawi theih tâwk a ni rih.




Ka muthmunah thleng chuan ka ngaihtuah lêt a. Rara-i nen chuan nichin lawk khan kan in mangṭha tawh a. Ani chu a mutui tawh viau mai thei a ni.




Kei erawh muhil thei lovin amah ngaihtuah chuan ka inlet tawn sek a. A nunah Pathianin thu a sawi ngei theih nana ṭan lak chu ka tih makmawh a ni.



Ka muthilh hma chuan Rara-i tân ka ṭawngṭai leh zet a. Zaninah ringawt pawh a hming lam hian Pathian ka va han au zing malh malh tak em ! A ṭul ngang a ni e.



A tukah chuan ka hun hman danah danglam vak a awm lo. Tlaiah naupangho Tuition ka pe leh a. Nunmawii a rawn lang veleh nawlh mai a. Pa Marema boral sarhu lai tih loh kha chu kan inhmu veleh ta miah lova. Tin, phone kaltlang pawhin min rawn be zui tawh lova. Chutia a lo lang teh thut chu ka hrilhai hman hle nghe nghe a.



Mahse a nau fee pe tura lo kal ve a nih thu te chu a sawi zung zung a. Fee chu min pe pah nghal bawk a. A kal leh mai dawn emaw ka tih lai chuan "Pâwnah inbiak lawk i hman em le?" a ti a. Min melh deuh vang vang bawk a.




Inbiak fal kan ngaihna ka hriat loh avangin "Heti hian sawi la" ka lo ti pangngai ve mai a. A lo thaw chhuak halh a. Naupangho chu a melh kual a, chutah min rawn melh leh in "Hetia sawi mai chî pawh a ni lo, Rara-i chungchâng ania" a ti zawi sep a. A thu tak viau bawk a.




Chutia Rara-i chungchâng a tih takah chuan ka ngai pawimawh nghal viau mai a. A hmel lan dan aṭang reng chuan thu ho mai mai a ni dawn lo tih a chiang reng a. Pâwnah chuan kan inzui chhuak ta nge nge a.




"Sawi la" ka ti sup a, a lo thaw chhuak halh a. Chîk zet hian min han melh leh tê tê a.



"Rara-i hi ngaihsak ṭha rawh aw. Tunlai a awm dan a dik miah lo ania. A hriselna hi a hma zawng aiin a tla hniamin ka hria. Ka lo chîk vak ngai lova. Mahse Pute Marema boral hnu hian ka chîk deuh a, a lan dan ang vur hi niin ka hrelo" a lo ti duah a.



A kâ aṭanga Rara-i ngaihtuahna ka vawikhat hriatna a ni a. Min ti hamhaih lek lek zawk. Eng vanga hetiang thu min hrilh thut hi nge a nih lah ka hrethiam hek lo.



"Eng nge i sawi awmzia?" ka lo ti sup a. Chutah Nunmawii chuan "A dam lovin ka hria, chiang deuh chuan ka sawi dawt thei lova. Mahse hmanni ah, a nu zin hma lawk khan ṭhiante ina ka kal kha an inah ka pêng kawi zuai a. Nu Ramtei chu a lo awm lo na-in Rara-i hi a lo awm a. Dawhkanah damdawi eng eng emaw a lo chhawp chhuak dul mai a. Ka va luh rual rual khan a khung ṭha sawk sawk a. A hnar a lo hup tlat bawk a, ka va ngaihven nghal a. A hnâr a lo thî a. Pangngai tak chuan min lo chhâwn tho a. A hriselna chungchang ka zawh kha chuan ṭha deuhin min chhang ve mai a. 'Tunlai ka dam sam lova, ka in entir a. Ka pum pui a lo chak lo viau mai a. Damdawi min chawh ṭeuh alawm' a ti a. A ṭang tlat si a, awihsak loh ngawt kha tih chî ah ka ngai lova. Ka zawt zui duh ta bik lova. Mahse pum pui chak loh vanga hnar thi ngawt a awm thei dawn a mawnle ka tia. Chu mai bakah a hmel a pha deuh dui bawk sia. A awmdan kha a inhmeh hlawl lo. Chu chu ngaihven zual teh, a dam lovin ka hria ka ti a nih chu " a ti ta duah a.



Rara-i ngaihtuah ve tak tak hmel hi a pu a. A thutak hle bawk.



"A hnar a thî a maw? A rei tawh viau em? A dam sam lohna hi a rei tawh a. In entir turin ka ti fo a, min hnial zel a. Chutiang engmah ka lo hre hlei nem" ka ti ve nghal zung zung a.




Rara-i hian ka lakah thup a nei ngeiin ka hre tawh. Ka la zawt chhuak ngei ang.




Chutah Nunmawii chuan "A hnâr thî kha chu thuhran, tunlai a hmel dang bel te hi a ngaih ṭhat thlak loh. Ngaihtuah hle dawh" a lo ti vat a.




Naupangho ka zirtir lai chuan Rara-i ringawt ka ngaihtuah a. Biak nghal a, zawh fiah nghal chûk chûk mai ka duh a. Mahse zaninah ka lêng dawn tho bawk a. Hmaichhana sawi dun ṭha zawkin ka hria. Kan pahnih hian ama chungchângah chinfel tur kan ngah khawp mai.




Zanriah ei laiin ka nu chuan Rara-i chungchâng chu a rawn sawi chhuak a. "A nu nen chuan an ṭha zel ang chu maw. Tunlai a lo lêng khat si a, hrehawm deuhte hian a lo awm ang tih a hlauhawm" a ti vang vang a.



"Awww, nu ka û a lên ziah tho hi" Vantei chuan a lo ti zauh a. Min chhaih ve deuh tih ka hre mai.



Chutah ka pa chuan "Hriatpui, pangngai taka chaw rawn ei turin la sawm ang che aw. A pa boral aṭangin a lo lêng pangngai miah lo mai a. Sawi tlang tawp mai ila, in lo inkawp ve tawh bawk nen i kawppui ang pawhin chaw rawn ei ve rawh se. Vantei ṭhiannu ang lo deuhte pawhin" a lo ti ve zung zung a.




Ka lo bu nghut nghut mai. Rara-i chungchâng hi sawi zing viau mah ila kan pahnih inkar hi ka sawi thui duh vak bik lova. Mipa puitling ka ni ve tawh a, a zawng zawnga pâ te râwn reng chu ka duh tawh bik loh bakah mahni a ka chinfel theih ang ang hi chu mahni a chinfel ve ka duh. Ka chhungte'n min ṭawiawm ṭha a, an ṭawngṭaipui na ka dawng reng tih ka hria a. Chutah chuan ka lâwm tawk rih riau.





Ka nu leh pa te hi chu tih ngaihna ka hriat tawh hlawl loh hunah ka pun leh chauh ang. Chutihrual chuan a âwm leh mawi tawk hi chu ka hrilh hre ve tho a. An lo hrethiam ṭhin khawp mai.




Zanah chuan ka lêng leh ta ngei a. An sitting room sofa sei berah chuan inngheng rialin kan ṭhu leh tawh a.




Rara-i chu a titi zat zat a, vawiina a hun hman dante chu a chipchiar thei ang berin min hrilh a.




Class-a a ei loh deuh deuhte chanchin pawh a sawi leh par par tawh. Nitin ngei tur hi a rawn nei haw ziah a. Ṭha ber lo mah se nuih hi a ti za ṭhin.



"Ei loh hmel deuhin min melh a" tih te mai maiah a thinrim a. Heihi chu hmeichhe dân ka ti mai, an inmelh dân aṭang ringawt pawh hian anmahni ei lo tu an hre vek thei. An bawn ṭhin ngawt mai.




A thusawi te chu a bo a bâng awm lovin uluk zet hian ka lo ngaih thlak sak a. An college a a ngei ber chanchin ka ngaithla mêk a.



Chunu star pa chuan a lo ngaizawng ni ngei tur a ni. Chumi vang chuan Rara-i chungah a lo ṭuan ṭhin a. Ṭawngkam mei nei deuh deuhin a lo ṭawngkhum ṭhin a ni âwm e. Ka bulah a vui vai ve mawlh mawlh a.




"Kar hmasa pawh khan Vantei nen canteen pan a kan kal laiin kalkawngah an ṭhian hovin an lo ding a. Kan va kal hnaih rual khan an phun ser ser a, min melh reng chungin an nui ho dar dar vel a. Ka pawi sawi dawt ngam si lo hian ka chhehvelah ngei awm deuh deuhin a awm a. Ka ning tlat alawm. Min rawn tibuai ngam tak tak chu nise ka insual pui hrep mai tur ania. Ngam tak tak si lovin ka huat tur tawk lekin a awm zel a. Han ṭawngkhum ngawt dawn ila ti hmasa tu zawk ka ang daih dawn si" a ti hlawih hlawih a.




A lungawi lutuk chu a thaw chhuak hraih hraih a. Hetiang hmeichhe buaina hi ka hrethiam ve vak lova. Mahse a sawi kalhmang aṭang chuan chunu awm dan vel tur chu ka hrethiam ve ruak mai. Rara-i te mizia ang tan phei chuan dawhtheih a har viau ang.




"I lo luck reng reng emai" tiin a thusawi chu a zangkhai zawnga lak sak ka tum a. Mahse a lo rum chhar chhar a "Chutiang lam pawh a ni lo, ka ngei tlat alawm. Ka pu leh ka pa chungchang thlengin an sawi a, min rêl sep sep zel a. Kan ṭhiannu pakhat aṭangin ka hre leh vek zel tho sia. Thudik in min sawi se chu thuhran, thu an belh tel zel hi ka hua alawm" a lo ti leh hlawih hlawih a.




"Engtin nge an lo sawi a?" ka tih chuan "A pu pastor ve si a pa chuan damdawi te a khawih a. A rui buai a inawkhlum a te min lo tia. Thû hi an belh hret zêl a, chumi lo pawh chu a tam mai" a lo ti nghat nghat a.




Awlsam zetin sawi mah se a tana dawnsawn a nawm loh tur zia chu ka hriatthiam pui ve ruakin ka hria.



"Eng tiang pawhin sawi mah se thudik lo chu a tluan tling ngai chuang lova, rilru nat nan hmang duh suh. Zilh hrep tlak an nih chu " ka lo ti ve hluai a.




Chutah Rara-i chuan "Rilru nat lam ai mah chuan ka thinrim alawm. A ngaihzawng pa vang maia hetia in sawisel kher. Min ngei chhan ah hian thiam lohna pakhat mah ka nei hlei nem" titau âw zet hian a lo ti leh a.




A samah chuan ka lo chûl thuak a, ani'n min lo ngheng ṭha ve salh salh bawk a.




"Nakinah i la hau dawn nia, a ngaihzawng pa pawh chu mitmei i lo hmuh ve aniang a" ka lo ti uang a, mahse ka nui duh miah lo thung a.





Rara-i chu a lo lungawi lo ngang mai "A teuhlo mai" uar zet hian a lo ti vat a. "A hmelchhiat chhiat nen" a lo ti leh hlak a. Ka lo nui chhuak nghal hawk hawk mai.




Chutah thutak deuh hian "Ka ti tak tak alawm, khatiang hmelchhe bawk si inla pa ve satliah kha eng atan mah ka ti lo. A Star tu nu nen khan an inhmeh tawk chiah" a ti bawih bawih a.




A ṭawngkam lawmawm zet zet avang chuan ka lo nui hawk hawk thung a. A bula awm hi chu eng pawh sawi ila a hlimawm ṭhin chiang a ni.




Mahse a tâwpah chuan zawldawh takin ka zilh let leh ta tho a.




"Mi chanchin te hi duhthawh lutuk a sawi bawih bawih loh tur ania. Kan huat zawng pawh ni se rêl ziah hi a fin thlak ber lo. Min haw tute pawh kan hmachhawn thei anih chuan hmachhawn pawp mai ila. Buaina chinfel nghal duak a awl zawk. Chunu pawh chu inhuat tawn aiin ṭha takin sawi pui la, kawngro a su zawk ang. A ngaihzawng i duh let ve loh zia te chu sawi la. Ṭha deuhin inbe rawh u. Chuti chung chung pawha i chungah a la sual anih chuan a sual ve hle tihna a nimai. Thiam lohna i nei lo, haider hmiah a nimai" ka lo ti duah a.




A lo lungawi famkim thei bik si lova "Chu pawh nise a ngeiawm ṭhin hrim hrim alawm. A ngaihzawng pa in min star vang maia ka chunga lo thinrim te chu" a la ti hram a. A ṭang na ve thei ṭung ṭung a. A thlavang hauh sak loh lah hian a titau bar bar zel a.




Ka thu awihin fel viau ṭhin mah se a tih mawh na laiah hi chuan tih mawh ve tak a ni.



Thu dang ka sawi pui ta daih a. Vawiina Nunmawii nen kan inbiakna kha ka hrechhuak zawk a. Tun hi zawh hun tak a ni.




"Rara..." tiin ka lam hawi tur chuan ka kuai her deuh a. Mitmeng bial kalhin min lo melh kiau a, a duhawm ṭhin ania.




"I dam ṭha em?" ka ti sup a, a mitmeng chhiar tum in chîk zetin ka melh a. A danglam zawk chu ka hmu hman, mahse a insiam ṭha leh vat a. A hmel danglam kha chu reilote tak tak a ni.




"Ka dam alawm" a lo ti var a, min nuih sen sen bawk a. Ka ngaih a ti ṭha lo zual sauh thung a.




"Dawt sawi suh" ka ti chang bal a. A hmelah eng thil mah danglam a awm tawh lo. Chutia a hriselna chungchang ka zawt thut chu mak a tih hmel tawh zawk .




"Eng nge chutiangte min zawh thut a" a ti ta rêng a. A hmel chu ka en chiang a, ka ngaihbel nge Nunmawii sawi dan takah a dang bel a. Kan inhmuh zin em avangin ka lo ngaihtuah thui lo mai mai zawkin ka hria.




"Zawhna min zawt let lovin ka zawhna che kha thudik takin min chhang rawh " thupe âw zet hian ka lo ti let thung a.



A lo ner nang a, a awmdan te chu lemchang a ang vek tawh maiin ka hria.



"Au Hriatpui..." tiin min nuih a, "Rara...thudik chiah ka duh" ka lo ti chang rât thung a. Tunah chuan a nui hmel hian min ti tlawm mai mai tur a nilo. Ka zâwt chhuak ngei ngei tur a ni.




"Aw ka dam lo ve alawm" a tih chuan ka lo thaw chhuak hulh a. Ka rin ai takin a sawi awlsam leh reuh bawk sia.




"I eng nge na?" ka tih chuan Nunmawii bula a sawi ang tho khan min chhang a. "Anih leh i hnar thî chhante kha?" ka lo ti khauh a.




Chutah inlahrang datin chiang fahran hian min rawn melh a "U Nunmawii nen in inbia a nimaw" a lo ti hlak a. A lungawi loh hmel nghal hle bawk a.




Ka lama pawh hnai leh ka tum rual chuan a inla hrang nghal dawrh a. A tho chhuak zui tharh bawk a.




"I duh leh Nunmawii be rawh" elh sen zet hian min lo ti a. A inkuangkuah thân a, min melh chhuk ran bawk a.



"Ka thusawi la kawi suh, ka zawhna chauh che kha min chhang rawh" ka lo ti dam thlap a. Tunah tak hi chuan Nunmawii a thîkna tur ka hrelo. Ama chungchang sawi dun kan ni a. A huat viau chhan tur a awm tlat lo a ni.



"Inṭhen ang, i duh leh Nunmawii nen chuan ni ru" a lo ti hlak a. "Vanrawngbawl " ka ti ṭhat a. Chutia ka thusawi a la kawi let daih chu ka ngaihdan a ni ta vak lo. Inṭhen a lo sawi khanglang bawk nen.




"Ka hming pumin min ko leh tawh" tiin a insehruh fan fan a. Kan inkawp rei ve tawh a, ka duatin ka lakah pawh a pangchang em em a. Ka hauh deuh châng hian min thinrim khum let ai mah chuan a rilru a no tlat tawh zel a. Kan inkawp tirhte kha chuan min chhang let zat zat ṭhin kha ania.




Mahse a pa boral hnu hian a danglam nasa zual a. A mizia hrim hrim hi chu a thlak nasa pawh a nilo. Keiman ka treat dan azir hian a inthlak nasa ṭhin.




"Rara..." inthiamlo deuh hian ka ti a, a lo insehruh fan fan a. A kut chu dah thla in a inhumruh vak bawk a.



Ding chhuak ve nghalin ban mai ka tum a, a lo tawlh sawn hmak mai.




"Ka tihpalh anih kha" ka ti leh ta nge nge a. A la lungawi hmel chuang loh.



"Inṭhen sawi tawh suh, vawikhat mah sawi tawh suh ang che. Intih thiam loh châng leh thu inhmuh loh châng chu kan nei ve fo ang. Mahse inṭhen chungchang chu sawi tawh suh. Engtikah mah ka ṭhen dawn lo che a, i kal ka phal ngai lo bawk ang. Inṭhen chungchang i sawi avang khan ka thin a rim thut a, ka inrin hma in ka vîn palh che anih kha" ka ti duah a.




Ka insawifiah leh nghal zung zung tawh mai. Henu lakah hi chuan ka tlawm reng mai anih hi!



Ka va pan hnai a, min hnar na hun pawh awm lovin ka âwmah ka kuah bei nghal a, a lo la ṭang ṭung tho mai. A samah chuan ka fâwp vang vang a, a chalah chuan ka fawp leh vang vang bawk a.



A lo inthlah dul ve tial tial a, "Kan ṭha em?" ka tih chuan min lo melh kiau a, "Sorry..." a hmai bul chêt ah chuan ka ti sup a.



"Ka hming pumin min ko tawh suh" titau âw zet hian a lo ti ve ta nge nge a. Titau âw la ni mah se a lungawi tawh tih ka hre ve nghal mai.



"Ka ko tawh lovang che" thuawih zet hian ka lo ti nghet charh a. A hmel hmuh pawh a nuam ta deuh alawm.




"Zûn ngahnu, min zial â vek dawn" ka ti leh sup a, a hmuiah chuan ka zuk fawp zeuh a. Ka inlahrang leh nghal vut a. Min lo nuih leh var var tawh.




Heti hian kan han intithiam lo hluai a, kan ṭha zui veleh mai zel bawk a. Mahse dawhtheih a ngai ṭhin khawp mai. Thiam thu sawi ve zut zut ṭhin ila chu kan inṭhenna a rei tawh a. Amah hian tlâwm lo thei lovin min siam leh ṭhin.




A hriselna chungchang chu ka zawt nawn leh ta tho a. Nunmawii chungchang pawh a hriatthiam theih dan tur ang berin ka hrilh a.



"U Nunmawii chuan min ngaihtuah maw?" a lo ti ha a, awih loh hmel zet hian min en bawk a.



"A ngaihtuah vang che in i chungchang sawi turin a nau tution a lo zui vang vang alawm. Chu bakah ngaihven viau tur chein min ti bawk a. I chhungte tan hian i hlu ania" ka lo ti luam a.




A chhûngte tana hlu angah inngai se ka duh a. Chu chuan a rinna kawngah chakna thar a pe mahna.



A mak ti hmel leh awih lo hmel chu nuihza hmelin a rawn thlak ta daih a.



"Lemchan an thiam hlawm alawm" a lo ti daih a. Za lo zet hian a nui zui bawk a. Ri phawng phawng ṭhin mah se a mizia hi a vawt ru raih a.



A chhungte laka ngaihsakna a dawng lo rei lutuk hian amahah thil engkim rinhlelhna a siam vek tawhin ka hria.




"Rara, chutiang ngawt a nilo. Mi hi ngaih chhiat viau loh tur. Tun hma nun chu lo dah ṭha ta ila tun atan chuan i chhûngte hian an ngaihsak che. Chu chu pawm thiam rawh" ka lo ti nghet charh a.



A la awih hmel vak chuang loh. A ngaihdan hi awlsam taka thlak theih a ni dawn lova. Chuvângin ka sawi zui pui duh ta rih lova.




"Chuan, i dam lohna chu?" ka ti leh hram a. Chutah chuan pangngai tak hian min lo chhang ve tawh a.




"Kar hmasa khan Doctor ka râwn a, ka pum pui a ṭhat loh bakah ka BP a lo hniam a. Thil serious lutuk a ni hran lo. Mahse ka in entir vat loh avang khan a lo nasa deuh tawh a. Pumpui Ulcer ka lo nei ṭep a. Chawei ṭha tura min chah bakah damdawi min chawh ṭeuh bawk a. Chutiang vel chu, ka hnar thî chhan kha chu a ho lutuk. A hma paw'n a thî zeuh zeuh ṭhin alawm. Ni sa ka do nasat lutuk hian a thî ṭhin a. Ngaih ṭhat lohna tur a awm lo" a lo ti duah a.




A thusawi lai chuan chîk zetin ka lo en a, dawt sawi hmel a put lo a. Ka rin ai taka a serious loh avang chuan ka lo thaw huai mai.




"Anih chuan Nunmawii lo kal lai khan damdawi i dah ṭha kher a?" dilchhut zet hian ka lo la ti hram a. A lo chek hlak a.



A kawng ka chelhna aṭang chuan inlahrang in choka lam chu a pan a. An chhuar a sarang inkhai chu a rawn la thla a. Ka lam panin a rawn kal leh nghal vat a.



Ka hmazawna sarang rawn lek pah chuan "Kha, damdawi hi en rawh. Pum pui damdawi leh vitamin vel anih hi. Engmah natna lian tham damdawi a awm lo. U Nunmawii lo luh laia ka lo dah ṭhat chhan kha chu chaklo tak anga min ngaih ka duh lo" a lo ti hmarh hmarh a.




Damdawi chu ka en kual diat diat a, chi 6 vel zet hi ania. A sawi ang tak takin Pum pui damdawi leh Vitamin hlir a ni. Chutia fiahna ka hmuh tak si ah ka thawveng huai mai.




"Lo thuhrûk kher, a va ho ve mawle" ka ti sup a, a damdawi ho chu ka khung ṭha leh nghal bawk a.



Ka pek rual chuan a lo ban vat a, a awmna ngaiah a va dah leh nghal a.



"Ka sawi tawh kha, ka chhungte hian mi chak lo anga min ngaih ka duhlo" tum ruh zet hian a lo ti a. Ka bul a rawn thlen rual chuan ka pawt hnai a. Sofa ah chuan inngheng rialin kan ṭhu leh nghal a.



"Dam loh hi chak lohna a ni kher hlei nem. Rilru tih pau khauh lutuk te hi a ṭha ngai lo. A châng chuan kan chak lohna te hi midang hriat tir ve a ṭha ania. Kan phurrit a zâng ve hawk ṭhin alawm" ka lo ti sup sup a.




Thu dang a rawn sawi leh tak daihah chuan kan sawi zui tawh bik lo.




Ka haw hma chuan duhthawh zetin ka fâwp leh a. Bul kan ṭan dan ngaihtuah chuan hmasawn tawh tak a ni.




Duhthawh zet hian min lo chhang lêt ve tan tan a. A âwm bawr ka khawih rual chuan a lo ṭeu nghal hlar a. Ka kut chu a man nghal chat a. A inlahrang nghal bawk a.



"Kan insum thei lo palh ang" a ti sep a, ka hmai bulah a rawn thaw lum hak bawk a. Min va han ti zau thau tak !




"Min ringlo em ni?" ka ti khur hluk a, "Ka inring lo zawk" nui hak chung hian a lo ti a. Kan taksa thunun tum chuan kan thaw chhuak dun ham ham a. Zanin tluka harsa tih hi ka la nei ngai lo.




"Kan ropui ngawt mai" ka ti chhuak hawk a, a ngaihna hrelo fe hian min lo melh a. "Kan insum thei a" ka lo ti awlsam thên a.




Ka ngaihdan dik tak sawi ka ni. Mipat hmeichhiatna kawnga insawi thei deuh nih theih ai chuan insum thei deuh nih theih hi a duhawm zawk. Chu chu Pathian mithmuhah pawh a ropui zawk a. Kan inkar sawh nghehna pawh a ni zawk.




Chutah Rara-i chuan "I insum theilo ṭep, keimah zawkin ka dang che" a lo ti var a. Intithei hmêl hi a pu a, a mak thei nghauh nghauh ania.




"Insûm theilo ta tlat ila" ka tih chuan a lo ner zeuh a. Eng emaw ngaihtuah hmel hi a pu a. A hnu rei vak lovah chuan "Ka inpek theih mai ka ring. I lo zei ve hurh hurh sia" a ti pek a.




A rilru thianghlim lutuk hi khawih chhiat phal chi pawh va ni suh.




Ka haw hma a tâwp nan kan infawp leh vawng vawng a. Ka haw ta nge nge a.



Kawngkhâr kalh ṭha turin ka chah mawlh mawlh bawk a. Nizanah pawh harsatna awm lovin amahin a riak thei a. Zanin pawh a tlingtla veleh thei mai turah ka ngai.




A chhung dangte bula riak tura ka tih lahin min hnial tlat bawk si. Ngaih ṭha zan lo chuan ka hawsan leh ta nge nge a.




A nu zinbo chhung chuan zan lamah kan in awm deuh chawt hi a nimai a. A nu awm loh kan hlêp ṭeuh ti ila a dik ber ang. Kan awmdun tam bawk a, kan inpawh zual sauh a.




Ka vei zual tulh tulh a tih theih ang.




Tukṭhuan ei laiin ka pa chuan Rara-i chaweia sawm turin min chah nawn leh a. A hma khan ka lo mang nghilh daih a, ka hrechhuak leh chiah.




Tunah chuan a nu a lo haw tawh a, an inah chuan ka leng veleh zeuh ṭhin a. Mahse a nu in min be tawh ngai lova. Engah mah ka ngai duhlo lui ve tlat thung a.




Rara-i nen kan inkar erawh a ṭha reng a, a nu mitmei veng renga a awm tawh lo te chu ka lawm zawk.




Zawma chu a reh hmak a, inneih chungchâng a ri leh tawh lo. Rara-i ka zawh pawhin engmah an sawi tawh ngai loh thu a sawi a. A nu hian a ti lui thei vak tawh lo a nih hmel.



Zan khat chu Rara-i hnen aṭangin phone call ka dawng leh a. A ṭap leh hlawp hlawp tawh mai. Hetiang a thlen hi chuan a mangang leh tawh hle tihna a nimai.



An in chu muangchang lovin ka pan nghal vat a. Zan dar 10 a ri ṭep tawh a, motor tlan an la awm ve zut a. Kawtthler chu a la reh lutuk lo.




An inkawt ka thlen rual chuan koh chhuah chawp ngai lovin an kawtah chuan a lo awm lawk teh mial a.



Mahse amah chauh ni lovin luggage nen a lo ding a. A lo awmdan chuan min ti hamhaih lek lek mai.




Bike aṭanga ka chhuk rual chuan min lo pan vat a, ka lo kuah nghal chawt a.



Kan inbiak lai ang khan a ṭap hlawp hlawp tawh lova, mahse a awmdan hi a ṭha miah chuang lo.




Ka inlahrang hlek a, mitmeng thûk zet hian min lo melh ve kal a.



"Hetah hian ka awm duh tawhlo" a ti zawi sep a. A mittui a rawn luang thla leh ngiai ngiai a. A zawi hmel ngawih ngawih a, a chungah hian thil ṭha lo tak a thleng chiang a ni.




"He inah hian ka awm duh tawhlo..." a ti leh a. A rilru na hmêl chu thup buai a tum lova. Ṭap chhuak hlawp hlawp ni si lo hian a mittui a luang zawih zawih mai.




"Eng nge i chungah thleng?" ka lo ti churh a, a sam hnawk niai chu ka chûl thuak bawk a. A biang ka khuap nghal run a.




"Ka â thei mai ang, ka kehchhe vek dawnin ka hria" a ti hak a. A mitmeng aṭang chuan awmngaihna a hre hlawl lo ni berin ka hria.




Harhfim hmêl a pu pawhin ka hrelo, rilru buai nuaih hi a ang ber mai.




_________*________*_________*________


Show post links
Top

[Ngaia]

AIZIAL
By CVL Awmpuii


Chapter 24



A biang tawn tawnah chuan chelhin ka melh chhuk run a.



"I chungah hian eng chiah nge maw thleng le?" ka ti sup a. Ka ban chu a lo chelh ve nghal a, a mittui a dir zawih zawih mai.



"He ina chên leh ai chuan thih pawh ka duh zawk" a rawn ti ṭiau a. Ka âwmah chuan ka kuah bei leh nghal hle hle a.



Chutia rei tawk fang ka kuah hnu chuan a inla hrang dat a. "Dawnga kha a lo kal leh a..." a tih rual chuan ka sa nghal phat mai. Ka ngaihtuahna ah thil tam tak a rawn inlar nghal zut zut a. Thinrimna in ka khat nghal vek a tih theih ang.



Rara-i chuan ṭap zawih zawih chungin min lo melh a. "A khawih che em ni?" ka ti chang nghal fal a. Ṭap chhuak hawk chung hian a lu a lo bu nghat a. Ka nghing lawih mai, ka puak keh lo chauh a ni.



"A khawih che a maw?" ka ti fiak leh ṭhat a. Rara-i chu a rawn ṭap chhuak nghal rawng rawng a. Ka thisen a so bulh bulh a, thinrimna vangin ka puakkeh mai dawnin ka hria.



Rara-i chu ka kuah bet leh nghal chawt a, chhuak zet hian a ṭap hlawp hlawp a. Ka nghilh deuh dup mai.



"Min khawih a...mahse ..." a ti a, ka âwm a rawn nawr vak a. Ka inhumruh nghal ṭeuh mai.



"Eng thil pawi nge a khawih chu ka hriattir khawp ang" ka ti chang fal a. Tunah tak hi chuan Rara-i hnem ai mahin Dawnga ka khawih châkna chu a nasa zawk a. Ka kawchhûng hi a so bulh bulh maiin ka hria.




"Min khawih a, mahse a puitlin hman lo..." ka âwm a hmai phum reng chung chuan a rawn ti ṭawk ṭawk a.



A khawih a, a puitlin hman lo anih chu ! Lawm tur nge pawh ka hrethiam tawh lo. Mahse chutia thil pawi a ti hman lo hlauh chu thawk khat a veng huai mai. Chutihrual chuan kha mihring pa kha ka chhuah hauh lovang. Pawi lian tham thleng hman lo mah se ka hmeichhia a lo khawih hman tlat a ni.



Tlema a pangngai deuh hnu chuan thil awmzia chiang zawkin min hrilh ta a.



"Ka nu chhuah hnu lawkin kawngka an rawn kik a. Ka va hawn chuan Dawnga kha a lo ding a. A hmaa thil thleng tawhte avang khan a luh ka remti lo nghal a. Chuloah a mitmeng aṭang khan a harhfim lo tih ka hrechiang ngang si a. Tum nei sa rana lo kal a ang hi ka ti ber. Kawngka khâr leh nghal mai ka tum kha min lo dang hman a, a rawn lut nghal bawk a. Sitting room ah min nawr pheiin kan in chai buai ta nghal a. Rui mah se rui chhe lutuk ang kha a ni lova. A thâ a zawi phah lo reng reng. Theihtawp chhuahin bei mah ila mipa thâ chu ka lo hneh bik si lova. Ka kawr a pawt thler a, ka kekawr pawh min pawh thlak sak vek a. Theihtâwpin ka ṭang ve, mahse ka hneh ngang lova. Ka thawmhnaw inbel zawng zawng min hlih sak a. Saruak ngal ngata ka awm hnu kha chuan a hlawhtlin loh kha ka ring lo reng reng. A inphelh ve ṭan a, ka la ṭang ve char char. Mahse a taksa a len bakah a chak ṭha ropui si a. Ka hneh mai thei bawk silo. Chutihlai tak chuan vanneih thlak lutukin kawngka a rawn in hawng a. Zawma a lo lang hlawl a. Min rawn chhan ti ila a dik ber ang. Dawnga kha a phih hrep a, a sawisa zui hrep bawk a. Mahse a tâl chhuak hram a, a thawmhnaw lakhawmin a tlan chhuak zui a. Ka thâ a zawi tawh bawk nen chêt ngaihna reng reng hre lovin ka lo awm mâwl tawp a. Saruak in ka awm tih hre mah ila ka che thei silo. Tichuan Zawma chuan min thing harh a, sofa khuhna in min khuh in ka hria. Ka hrechiang tawh bik lo. Phone a hmang zui a, ka hriat sual loh chuan ka nu nen an inbia in ka hria. Ka chungchang ah an inhau hrep nghe nghe. Chumi chhung chuan ka lo harhfim ve tial tial a. An inbiak zawh meuh chuan ka ngaihtuahna a lo fim hman vek tawh a. Zawma chuan min ngaihtuah ve zia a mitmeng aṭangin ka hria. Lawmthu ka hrilh a, min ngaihtuah chung chungin ka haw luih tir a. Chuan, ka lo call nghal che anih kha. Hetah hian ka awm duh tawhlo. Ka him loh bakah nuam ka ti lo" a ti duah a.




A rilru a chiai thar leh bawk nen a sawi bah deuh niaih a. Thil pawi thui zawk a thleng lo chu lawm tak ka ni. Chutihrual chuan Dawnga chu ka chinfel turah ka dah nghal hmiah thung a. A vawikhatna pawh a ni tawh lo leh nghal a. A châk lo khawp ang.




"A pawi ka ti lutuk" ka ti sup a, mahse Rara-i chuan a lu a lo thing vat a. "I thiam loh a awm hlei nem, tunah chuan ka bulah i awm tawh a. Ka him tawh dawn tih ka hria alawm" a lo ti vat a.



A vawi tam tak chuan ka kuah leh ta thlawp a. A samah chuan ka fâwp vang vang a. Ka bulah hian thlamuanna leh himna hmu se ka ti ṭhin a. Chutiang a lo hmu thiam chu ka lawm a ni.




A luggage thlek zauh pah chuan "I bungrua mamawh tur ang i la kim em?" ka ti sup a, a lo bu nghat a. Ka rilru chu a buai ve nuaih mai. Engtia han tih chî nge ka hrethiam mai lo tlat a ni. Han inru ngawt dawn ila ni theiin ka hre bawk silo.




A luggage chu ka khai nawlh a, ka kut lehlamin a banah ka chelh bawk a. Ka bike bulah chuan kan va phei ren rawn a. Ka ngaihtuahna a buai takzet a ni.




"Engtia awm nge i duh ber?" ka ti ta ringawt a. An inah a awm duh tawh lova, hmun dangah han dah ngawt dâwn ila a baih vai ve ang reng bawk si. Ka zawhna chu zawhna âwm lo tak pawh a ni. Mahse a rilru in eng chen nge a huam hriat hrim hrim phawt ka ngai a ni.




"Ka hrelo, i thu thu a nimai" a lo ti tawp a, a kun deuh ngal a. Ka lainat thar ngang mai. Naupangtê ni si a nun sual chhuah a ngai bik lutuk hi ka khawngaih a ni.




A luggage nen chuan Bike ah kan in phur thei dawn lo hrim hrim a. Ka phone ka phawrh chhuak tê tê a, ka rilrua lo lang hmasa ber Arama chu ka call ta ngawt a.




A hma ang kha chu ni se Dina ka call hmasa ngei ang. Mahse tunah chuan ka ring zo tawh lo. Rara-i a mil lo sa em em a, Rara-i pawhin a ngaina hek lo.




Phone a lo lak rual chuan Rara-i chu hmui phunin ka bia a "Ka'n be lawk ange, tikhan lo awm lawk rawh" ka ti sup a. A lo bûk nghat rual chuan kan dinna piah deuh, thingbuk hnuaiah chuan ka va kal a. Kan ṭawng a hre lo turah ka ngai.



"Aram, i puihna ka mamawh" ka ti nghal tawl a. A ham haih ve viau in ka ring.




"Eng nge ni?" a lo ti hluai a. Ka ṭhianpa a ni a, Dina tih loha ka rin ber a ni bawk a. Tunah chuan Dina ai pawhin ka ring mah tawh zawk.




Ka buaina te chu tawi fel takin, a hriatthiam theih dan turin ka hrilh nghal zung zung a. Rara-i harsatna tak erawh ka sawi thui duh chuang lo. An hmuhsit ka hlau a, ka vêng thâwng a ni ber. Mahse chutiang mi chu Arama hi a ni lova. A zawng zawng in ka hrilh lo mah ila ka hrilh thui khawp mai.




Car nen a lo chhuak mai turin ka ngen a, Rara-i te in awmna chu ka hrilh nghal bawk a. Ani'n a lo hre sa hlauh a, a tihzia phian mai.




Ka beisei ang chiahin Arama chuan a lo hrethiam khawp mai a. Chanchin ka hrilh hriat loh lutuk ṭhin avangin min rawn hau nghal nghe nghe a.




"Zawh loh che hi chuan engmah i sawi ṭha duh ngai lova. Hetiangte hi in hrilh hriat tawn vek a ṭha a. Mipa nih vanga thil sawi ho loh lutuk te hi a ṭha ngailo. Ṭhian nihin awmzia a nei nang. Tlang deuhin lo sawi ziah tawh rawh. Harsatna ah phei chuan in pui tawn zel tur kan nia lawm" a rawn ti duah a.




Vui vai tur pawh a ni ve bawk em a ni. A chhan chu ka ngaihzawng chungchang ka hrilh hre em em ngai lova. Ka bula thil an sawi ang hu hian ka sawi ve ngai lo tlat a tin ani. Chutia a rawn sawi takah chuan ka inhmuchhuak ve uarh uarh mai.




A car nena a lo kal nghal tur thu sawiin kan inbiakna chu kan ti tâwp a. Ka thaw nghal huai mai.



Rara-i chu ka pan leh nghal vat a. "Ka ṭhianpa car nen a lo kal dawn a, nghak lawk ang aw" ka ti a. Min han melh deuh vang vang a, mahse engmah sawi buai lovin a lo bu nghat a.




Reilotê ah Arama chu a rawn thleng a. A falin kan han inbe leh rih a.



"Engtin nge in awm dawn?" a ti sup a, a meng buai ve nawk mai. "Ka hrelo, engtia tih chi nge ni ang le?" ka ti hulh a.




Chutah Arama chuan "In inru dawn tihna em ni?" a lo ti hluai a. A hmêl aṭang chuan chutiang ti duh tur angin min ngai lo tih lah a chiang reng mai si.



Chhan dan tur hre lovin ka ngawi reng a. Dik tak chuan tun hunah hian in ruk mai lo chu kawng dang kan nei lovin ka hria a. Mahse chutiang thlen tir em tur chuan mipa mah ni ila ka thisenin a zuam lo a ni ber.




Arama bawk chu ṭawng chhuak hmasa ah a rawn ṭang leh a. "In rûk hi ka thlâwp zawng a ni viau lo na in in dinhmun a khirh khan ve bawk si a. Inru pawh ni ula ka dem lovang che u, ru tawp mai rawh" a lo ti churh a.



Kan han in melh ren rawn a, hriatthiamna a khat mitmeng hian min lo melh a. Ka rilru a mang duk mai.



Rara-i chu ka va melh ṭhin a, ka bike hunna bulah chuan kun ngal chung hian a lo ding a. Ka lainat bawk si, awm ngaihna ka hrelo a ni ber e.




Inngaihtuah rei na hun a awm si lo, ka rilru a awm ang a chêt leh tawp loh chu tih theih a awm rih lo.



Chutihrual chuan ka rilruin thil tam tak a chhui kual a. Ka ngaihtuahna a vâk vel a. Lo inru ta ila engtin nge miin min sawi ang. A hmasa berah chuan 'Pastor fapa ve si' tih a ni nghal dawn a. Ka nu leh pa te hming ka ti chhe nghal pang tihna a ni dawn a. Keimah leh keimah pawh ka in dem nghal dawn a ni.




Ka ngaihtuahna lehlam chuan mahni leh mahni ka in thiam chawp a. Midang tih loh dan pawh a ni hlei nem tiin ka inhnêm chawp a. Keini aia dinhmun khirh khan lo zawkte pawh an lo inru fo tawh a. Keini phei chu a khirh khan si a, min dem lovang ti têin ka inhnêm a.




Rara-i hmel ka en chuan ka lainat a, humhim ka duh a, dinhmun derthawng a dah ka phal tawh bawk si lo.




A tâwpah chuan thuthlukna ka siam ta tawp a. Mahni in thiam chawp chungin ka ta ni tura kan inchhung rah pui chu ka thlang ta zawk a.



Keimaha inthiam lohna rilru a rawn awm dawn apiang chuan ngaihtuah zui duh lovin Rara-i ka duhna chauh chu ka dah lal a. Ka hriatchian tak em em a chu Rara-i hi ka hmangaih a ni! Ka hmangaih vangin ti ve tura ka inngaih ngai loh thil ka ti dawn a. Ka hmangaih luat vangin engkim huamin ka chetpui dawn a ni.




Rei fe Arama nen kan ngawih dun ren rawn hnu chuan "Ka ru mai ang" ka ti ta tawp a. Awih loh hmel zet hian min lo melh a. Mahse a insiam ṭha leh nghal vat a.



Bu nghut chung hian "I duh dan a nih chuan a ṭha vek mai e. Kei chuan ka dem lo che ania" a ti a. A car châbi chu min pe nghal a. Keiin ka bike châbi ka pe thung a. Zanin chu motor kan inkawl thleng rih dawn tihna a nimai.




Rara-i awmna lamah chuan kan va in zui phei ta a. Arama nen chuan an han in chibai leh hnuhnawh a.



"Engmah hlauhthâwn na tur a awm lo ania aw Rara. Hriatpuia hi a rin tlak a, ring tawp mai rawh" nelawm zet hian a ti a, ngainat awm zet hian a nuih suk bawk a. Rara-i pawh chuan a lo nuih ve seih a.




"Ka tibuai hle mai che u" a ti hap a, mahse Arama chuan "Buai lah lo e, ka tih ve theih tawk alawm" a lo ti vat a.



Kan inthlah liam hma chuan ka darah a lo beng thuk a "Tluang deuhin aw" a ti churh a. "Ka lawm tak tak ania" ka lo ti ve vat a. Ka rilru zawng zawng in ka lawm miau a ni.




Ṭhian hlutna min hriat thar tir a. Midang mamawh ve ka nih zia min hriat nawn tir bawk a. Arama bulah hian lawmthu sawi mawlh mawlh ka ba ani.



"Lawmthu in hrilh a ngai lo, man tak khan che tawp mai rawh" a ti zâng vuh a. Min nuih vur vur bawk a.




Tlan liam hmasa zawkah a ṭang a, ka bike chu a ngaihtuah awm dawn loh tih ka hria. Naktuk emaw velah kan in thleng leh mai turah ka ngai.




Rara-i kut chu ka chelh a, motor ah chuan ka ṭhut luh tir nghal a. A bungrua pawh seat hnungah kan dah tawp a. Luggage pakhat leh air bag pakhat chauh a ni a. A rit tham vak lo.




Ngawi rengin ka che zia chu min lo en mawl tawp a. A nguai vek maiin ka hria. A nun hahthlâk lutuk chauh pui pawh chu a âwm ve reng a ni. A chhel tawh zawk ngawt asin.




Kan in lam panin motor chu ka khalh mawp mawp a. Ka ngaihtuahna a vak kual leh ruai tawh a. Tum loh deuhin Pathian duh loh zawng ka ti dawn chu a ni si a. Inthiam lo viau mah ila kawng dang a awm tlat si lo a ni.




Rara-i nen chuan kan inbe lova, ka va melh apiangin pawn lam a lo thlir vauh vauh zel a. A ngaihtuahna a vak kual nasa ve viau anih hmel. Tunah chuan be lum lam turin chakn ka nei thlawt lo a ni.




Kan vêng penga ka tlan luh dawn lai chuan "Au Hriatpui" a rawn ti sep a. Ka va melh zawk a, a awm nawm theih dan tur ang berin ka nuih suk a.




"Engtin nge kan awm dawn?" a rawn ti sap a. Inthlahrung dek aw hian min zawt ka ti mai.



Ka lo thaw chhuak huk a, ka chhanna chu min han ngaichâng ren rawn a.



"Kan inru dawn" ka lo ti tawp a, ka va melh zawk a. A lo meng buai nak mai. Mahse a insiam ṭha vat a.



"Ka...kan inru dawn maw..." a lo ti bah niai a, a hamhaih ve hle anih hmel.




"I duh lo em ni?" ka tih chuan a ngawi nghal dak a. Kei hian ka nawr deuh em ni aw ka ti hman a. Mahse "Nangin ṭha i tih chuan ka pawm vek" a lo ti ta sep a. Ka lo thaw huai mai.




In rûk chu duh lovin inthiamlo hle mah ila min lo hnial mawlh ka hlau tawh.



Kan in chu kan thleng ta a. Dar 12 a rik thuak tawh avângin ka chhungte chu an mu vek tawhin ka ring. A nih loh pawhin ka nu in an room ah meng chungin min lo la nghak mai thei.



Zan ka len rei deuh pawh hian ka haw hma chu mu lovin min lo nghak thlap zel a. Ka pa nena min lo nghah châng pawh a tam mai. Chumi vang chuan chêp ta viau ah ka inngai ngai lova, hetiang taka min ngaihtuah tu nu leh ka nei hi vanneih ka inti a, ka lawm em em ṭhîn zawk a ni.



Mahse zaninah chuan an rilru ka hliam dawn si a. Ka inthiam lohna leh hrehawm ka tih na chuan ka ti ril a ṭham a. Ka hlauthâwng ve takzet ani.




Rara-i hi ngaina in lainat viau mah se hetianga kan awm hi an duh dan a nih dawn loh bakah an rilru a na dawn lutuk. An lo thinrim viau mai thei bawk a ni.



Rara-i chu ka kai nghal a, ka kut lehlamin a luggage ka keng a, ani'n a kut leh lamin a air bag tê fel at chu a khai ve bawk a. A kut a khur ve dar dar mai, a zam ve hle a ni mahna.



"Min ring em?" tiin chiang zetin ka melh a, min lo melh let ve kar bawk a.




"Ka ring che" a lo ti nghet ve charh a. Chu chuan inrintawkna tam tak min pe a ni.



Kan in hi light kan off thim vek ngai lova. Zan lai ṭhan harh eng emaw a chêt a harsat lutuk loh nan choka light hi chu kan on tlaivar zak zel.



Zan dang ang bawkin choka light pawh chu a la êng a. Pawn lam aṭangin a lang chiang ngang mai.



Kawngkhâr chu dîm thei ang berin ka hawng a. Rara-i chu ka chelh nghet sauh bawk a. Vanneih thlak lutukin ka ti dawn nge tumah an lo meng tawh lo hlauh a.



Mahse tih tur ka nei tho, ka nu leh pa te kaihthawh a, thil awmzia ka hrilh hmasak ngei ngei a ngai.



Choka ah chuan Rara-i bungrua chu ka nghat a.



"Lo awm lawk rawh" tiin ka nu leh pa te room lam chu ka pan san a. Kawngkhâr chu ka kik karh karh a. Rei pawh rial lovin an rawn hawng khep a.



Ka nu nen kan inhmachhawn ta rân mai, mitmeng dam dap hian min lo melh a.



"I lo haw chiah em ni?" a lo ti var a. A landan aṭang chuan a lo la muhil miah lo anih hmel.



"Eng nge ni ta Hriatpui?" ka pa âw ka hriat zawm ve nghal a. An lo la meng ve ve chu niin.



Kawngkhâr phên aṭang chuan ka pa chu ka va melh a, dawhkanah Bible leh notebook a lo in chhawp a. A ṭhutna bulah chuan chair ruak a lo awm bawk a. Ka nu nen Bible an lo zir chiang leh tawh tih a chiang reng mai. Chu chuan ka inthiam lohna a ti zual sawt a. An rilru ka ti na dawn si a.




"In lo chhuak lawk hman em?" ka ti sup a, ka hmel thutak lutuk chuan ka nu a ti ham haih deuh a. Mahse engmah min zâwt buai lovin "U Sangzual" a ti a. Ka pa chu a lo hawi vat a.




"Hriatpuia hian sawi duh a nei anih hmel" a ti dam diai a. Min lo dawngsawng ṭha mai bawk si a. Ka kawchhûng hi a khur ru ngat ngat mai.



Choka ah chuan kan inzui phei a. Rara-i an hmu thut chu an hamhaih ve ngang mai. A bungrua an hmu tel leh zel si a.



Rara-i lah chu a lo kun ngal a, ṭum danga hmel hmuh nuam em em ṭhin, ka nu leh pa te bulah phei chuan hlim hmel pu reng ṭhîn kha a zâm a. A kun ngal mai a.




A kutah chuan ka va chelh nghal a. Ka huaisenna zawng zawng sâwm khawmin ka Nu leh Pa te chu ka melh tawn zak sak a. "Nu, pa, Rara-i nen hian kan inru" ka ti mâwl tawp a. Ka zawi zawh rual chuan ka sa chhuak vek thei nia mawle.




Rara-i lo îp chawih pawh chu ka hre reng, mahse sawi tlang nghal tawp hi thil ṭha ber a ni tlat si a ni.




Inchhûng chu a reh ṭhuap a, ka nu chu a hamhaih hmel ngang mai. Ka pa erawh chuan min melh ngur a. Thinrim hmel leh lungawi lo hmel pawh a pu lo. Hamhaih hmel lah a pu hek lo. A mitmeng chu ka chhiar thiam lo.



"Hriatpui..." ka nu zawk chu a rawn ṭawng chhuak hmasa a. Sawi zui tur a hre hlawl lo aniang a kut a phar chhuak hluai a, a dah thla leh a.



"Eng nge i sawi awmzia?" a ti leh hap a. Ka nu hamhaih lutuk chu ka hrethiam, mahse ka pa awmdan chuan ka ngaih a ti ṭha lo takzet a ni.



"Kan inru" ka ti leh tawp a, ka paltlang tur ang ang chu patlang pawp pawp mai ka duh.




Ka nu chuan "U Sangzual..." a ti hluai a, ka pa chu a melh a, thinrim ai mah chuan ṭah chhuak ṭeuh hmel a pu.




Ka pa chuan ngawi rengin min la melh tawn zak zak a.




Kan ngaichâng ṭhup a ni ber.



A hnu deuhah chuan "I ṭhu phawt teh ang u" a ti dam thluam a. Ka beisei ai daihin a ṭawngka chhuak a dam a. Ka lo thaw huai mai. Mahse ka ngaih a ṭha ta nghal vek tihna erawh a ni hauh lo.




Sitting room ah chuan kan ṭhu khawm ta rân mai a. Vantei pawh an kai tho ve nghal a, kan lo awmdan aṭang chuan thil a hrethiam ve nghal mai a. Ka nu ang chiahin a hamhaih hmel ve khawp mai. Engvanga tel tir ve kher nge an nih pawh ka hrelo.




Ka pa in "Hriatpui" a tih chuan ka en nghal vat a. Mitmeng tak run hian min lo melh a, "Ka beisei lo asin" a lo ti khauh a. A aw a nghet churh a. Rilru na emaw thinrim hmel pu lo mah se hrehawm ka ti em em tho si.



"Pa, kawng dang kan nei lo alawm" ngenngawl zet hian ka ti a. "A ṭha lo asin Hriatpui " ka nu chuan a lo ti vang vang a. A rilru a nat hmel ta khawp mai. Mahse Rara-i ka Hmangaihna ka la dah lal fan a. Hnungtawlh san thei ka ni tawh lo.



Chutah ka pa chuan "Chhia leh ṭha hre rual i ni tawh a. I naupan têt aṭangin Pathian hriatna nen kan enkawl ṭhin che a. Ka thin tih rim chu sawi loh i awmdan apiang khan ka lung i ti awi em em zel a. Ka chhuang ru veng veng ṭhin che. Tuna i thuthlukna ah hian i chiang viau turah ka ngai a. Tu pawi nge i khawih i hrechiang a. I nu leh pa te rilru hi i hliam satliah lo. Pathian rilru i hliam a ni. Mahse engah mah nawr luih che ka tum lo. Dan zawhkim i nih rual khan i chunga kan mawhphurhna chu i nu nen hian kan hlen tawh. Tunah chuan mahni kawng i thlan ve a hun tawh a. Tuna i thil tih hian min ti thinrim lova, Rara-i chungah pawh thinrimna ka nei lo. Mahse Pathian Thu vangin min hliam tih hria ang che u. Chutihrual chuan in chunga sual hi ka tum lova, khirh lutuk pawh ka tum hran lo. Puitling in duh in thlang tawh a, sawi zui vak ka tum lo. In pa ka nihna ang chuan ka dem che u, mahse mawhphurhna ka hlen ang" a ti duah a.




A thusawi mal tin chuan awmngaihna min ti hre lova. Ka rilru natna tur leh hrehawm ka tih ngawih ngawih na turin ṭawngkam chhak chhuak lo mah se min dem ruala min pawm thiam lutuk chuan min vit sawk sawk a ni ber.




Ka lawm a, hrehawm ka ti a, ka in thiam loh em em a. Ka pa thu chu puitling ka ti a, rilru a ti buai map tho si.




Mahse duhthlanna ka siam tawh a, tawpsan laklawk chu ka duh tawh bik lo.



Kan pa a nihna anga mawhphurhna hlen a tum tlat erawh chuan min ti thlamuang takzet a. Chu chuan ka inhnêm tawp mai ani.



Ka nu erawh chuan rilru nat hmel lutuk hian min melh ngawih ngawih a. Rara-i a lainat ve tho si a, min dem pum hlum duh ta bik lovah ka ngai tawp mai.




Ka pa bawk chuan "Va indah lut rawh u, Vante, nangpawh mu leh tawh rawh, i û te chanchin hre nghal tura ka duh che avângin kan kai tho che anih kha. Zuali, keini pawh mu ang" a ti leh zung zung a.




A ṭawngkam dam thlup te chuan keimahah inthiam lohna nasa tak a thlen zual a. Ka thuthlukna sawh sawn erawh ka tum hauh silo.




Vantei chuan min han melh tawn zak zak a, ngawi rengin room lam a pan ta hram a. Ka nu la ṭhu reng chu ka pa in a hnungah a beng dat a "Hawh le, Duati" a ti sup a, a kai tho nghal bawk a.



"Harsatna in neih chuan in sawi dawn nia, muttui u" ka pa bawk chuan a rawn ti leh a. Ka hamhaih lek lek zawk a ni.



Kan chhûngte ho chu room ah an lut bo ta diak a. Rara-i nen chauh kan awm leh ta.




A pangngai hlawl si lova, a inthlahrun hmelin hrehawm a tih hmel si a kei talin pangngai taka ka chhawn a ngai tih ka hria a.



"Lo kal rawh le" ka ti sup a, ka nuih lui suk bawk a. Ka room-ah chuan kan han indah lut ve ta poh a.



Khumah chuan a ṭhu zum zât a, "Lo mu la, hmai ka phih zawhah ka lo mu ve ang" ka ti a. A lo bu nghat a.




Hmai phih tur chuan bathroom lam ka pan nghal a. Tun atan chuan eng thil mah ka ngaihtuah thui duhlo. Rara-i nen kan inkar chiah ka ngaihtuah duh.



Hmai ka phih zawh a ka va chhuah leh chuan lukham nghengin a lo ṭhu mu deuh a. Min hmuh rual chuan a lo meng buai nak a. Ka nuih suk a, lai zet hian a lo nui ve ta mai bawk a.



Ngawi rengin ka hmai chu a ka hru hul zung zung a. Ka tshirt hak lai chu hlipin drawer ah ka bâng a. Khumah chuan ka va inthawlh ve ta a.



Kan pahnih chiah kan ni ta bawk si a, inru kan ni bawk a. Ka lai ve huih mai.



Ka va inthawlh rual chuan a lo mu ṭha ve vat a, mahse sir deuhah chuan a lo tawlh nghal hrat hrat a. Ka nuih a tiza zawk mange. A lai ve tho tih lah ka chiang ngang mai si a.



Tichuan khum sir tawn tawnah chuan mu in kan inhawi tawn a, kan inmelh ta ran mai.



"Au Hriatpui, ka tih palh aw" a lo ti sep a, "Eng vang ngawt chuan maw?" ka lo ti nghut a. Tun atan chuan inthlahrung hmel hi pu tawh lo sela ka duh.



"Buaina ka thlen reng zel che a, tunah pawh i duh loh dan deuhin i awm a ngaih phah a" a lo ti halh a. Ka awmdanah khan inruk ka hreh zia a lo hrethiam ve vek anih hmel.



"Ka hmangaihna che hi a pawimawh ber" ka lo ti churh a, mitmeng buai nakin min lo melh nghal a. Awih lo hmel a pu bawk. Ka vawikhat sawi na a ni miau a ni.



"Ka hmangaih che" ka ti leh sup a, a mittui a parawl nghal kuang mai. Rang zetin ka va tawlh hnai nghal ruak a.



Ka kuah rual chuan a lo ṭap khur ngat ngat a, "Ka lawm e aw" a rawn ti ṭiau a. Ka lo nui huk a.



"Inneih zanah i ṭap nghal pang mai a, in thlêm zin kan va ngai awm ve" ka lo ti fiamthu a. A rawn ṭah nui ve hak mai.



A inlahrang dat a, kan mit leh mit a intawng ta siah mai. "Kan inneih tawh tihna maw?" a lo ti ha a. A ṭahna avangin a mit chu a de sawr sawr a, hnar sen tek te chuan a ti lang ṭha zual ngawih ngawih.



Chutah nui suk chung chuan "Ka nupui i ni tawh a, i pasal ka ni tawh bawk" ka lo ti nghet charh a. A rawn nui ta var var a.



Ka fawh hmasak ngai lovin ka hmuiah chuan a rawn fawp zeuh a, a inlahrang leh nghal vat a.



Ka âwm zâwn aṭang chuan min lo melh chho kiau a, a hnara ka zuk seh zauh rual chuan a lo nui hak a.



Ka hrawk bawk chu a rawn khawih kual riak riak a. Rilru kawi pu a khawih a nih loh zia hrechiang mah ila keimah zawk min tidanglam ta tlat a.


Zanin hi kan inneih zan ang a ni a, ka ruk tawh ber chuan insum a ngaihna ka hrelo a. A kut lah chu a hlei zek bawk si a, ka lo kuah hnai nghal sauh a.



Ka taksa danglam ta chu a hrethiam ve aniang a chil a lo lem ri khalh a. Zam hmel zet hian min melh kiau a "Kan ti dawn mi?" a lo ti heu mai. Ka lo nui chhuak hawk a, min ti zau thau vek thei.



"I duh em?" ka ti sup a, a lo meng buai nak a. Min hnar ka hlauh zia mai chu ! Ka taksa a danglam nasa tawh mai si a.




Mahse "I thu thu" a lo ti ta a. Hrilh nawn ka ngailo chiang kher asin. Ka thu ngeiin ka fâwp nghal siah a. Chhanna pawh ka dawng ṭha ngang mai.



Ka room chhung chu kan pahnih thaw halh halh riin a luah khat nghal a. A mitmeng phelh phang te, a thaw ri ve ham ham te chuan mipa ka nih zia min hriat nawn tir a. Tawp chin nei lek lo khawpa khawsak pui hrep min ti châk ber mai.



Kan thuamhnaw te chu hnawk tiin kan phelh darh nghal nuaih a. Ka taksa a lo chûl kual ve na te chuan min ti zau thau zual kher mai.



Saruak ngal ngata Rara-i han hmuh meuh chuan rapthlak khawpin ka thisen a ti lum. Zah hmel deuh hian a lo sen ṭan ṭan a, ka zuk fawp leh nghal a. Rang zetin min lo chhang let a.



A tâwp ka thlen pui tur chu eng in nge min mawlh ka hrelo, ka tawp thut a. Rara-i pawh keimah ang thovin a lo meng buai nak a.



Chiang zetin kan inmelh a, ka kawchhûng a che dawt dawt mai. Mawlh tu ka hriat si loh hian a tâwp thleng theilo turin min siam ti ila ka sawi sual lovang.



Rara-i chuan harh chhuak thut ni awm tak hian min nam dat a. A bulah chuan ka let thla nghal tawp a.



Rang zetin kan puansin theh hlim tawh sa chu a ban khawm a, a inkhuh ṭha nghal sawk sawk a.



"Au Hriatpui...ka ngam lo, ka thei lo, kan ti thei lo, a dik lo" a ti nghal nawk nawk a. A chiai hmel ngang mai.



A awmdan chiah hian ka awm ve a ni. Pathian pawi lian tak khawih tur angah ka inngai a. Ka tisa châkna te'n min kian san nghal duak a. Engtin nge a tâwp thleng ṭep tawh chunga ka tâwp san theih kha ka hrethiam lo. Ka thisen lum vanglai tak a la ni zui a. Hmeichhe îtawm tak a ni tho bawk si.




A bul ber chu Pathian a ni, Rara-i nen chuan kan inmelh vung vung a. Engmah sawi lovin reife kan inmelh a. Kan thinlung a inhmutawn viau in ka hria.



A tawpah chuan a rawn ṭap chhuak ta hak a, "Pathian a awm" a rawn ti chhuak hak a. "Kan tih theih loh chhan kha Amah" a lo ti leh a. Lawm em em hmel hian min melh a, ka kawchhûnga hmangaihna awm zawng zawng hi a phawrh chhuak vek maiin ka hria.




"Ka rilru ang hi i pu ve tho tiraw?" ka tih chuan lawm hmel zet hian a lo bu nghat nghat a. A ṭap zawih zawih bawk a. Zanin a mittui tlak hnem tawh zia hi ! Mahse chhan hrang hrang vang ani.



Tuna a mittui tla hi chu a thuk bik ngawih ngawih a, thinlung a fan zual raih mai.




Inru tura inhruai haw si kha ka room chhungah ṭhingṭhi in kut inchelh rialin kan ṭawngṭai dun a. Pathian hnênah lawmthu kan sawi a.




Rara-i ṭawngṭaina min hneh em em tu chu "Min rêl fel sak dawn, engti kawng zawng pawhin min rêl fel sak dawn. Ka ring tak tak tawh ang che. Ka mihring chhelna ah innghat tawh lovin, ka tawrh theih na ah innghat tawh lovin nangmahah ka innghat tawh ang. Ka phur rit mah se min phurh zui zel dawn tih ka hria. Ka tawrh reng i phal dawn lo" tiin Pathian hmaah a ṭap zawih zawih a. Min hneh asin aw.




Kan ṭawngṭai zo chu kan thawl huai ve ve in a hriat a. Mahse eng eng emaw kan lo ti ve hman nual si a, a lai tlat pek a. Keipawh ka ni ve tho. Mahse mipa zawk na na na chu ka inthunun thei khawp mai.




"Hnute nalh nu" ka tih chuan min lo chûm ṭalh a, a lai ngang mai. A va han inhmeh lo tak. Kan nui dun ta hawk hawk a.



Tlai khaw hnuah kan chhungte kan tibuai leh chûk chûk a. Ka pa chu a lungawi hmel ta ngang mai. Ka nu lah bang lo, hlim zet hian min nuih dun var var a.




Ka pa chuan "Ka rindan vel ania" a lo ti sam then a. A ngaihna hrelo fe a ka lo melh lai chuan "I inhriat chian aia nasa in i pa hian ka hrechiang che. Chu aia nasa chuan Chunglam, Pathian khian a hrechiang che" a lo ti nghet charh a. Ka harh ta kuar mai le.




Kha leh chen Pathian tana ka lo inserh ve tawh na te, a tana ka thil lo tih tawhte avang khan Pathianin a hun takah min hriat zia a rawn lan tir a ni. Lalpa mi hriat nih tluka thil hlu hi a awm reng reng lo.



Inru ve si kha Rara-i ber chu Vantei room ah a mu ta daih a. Inthlahrung dâk tawh bik lovin a hmel a zâng vah tawh a.




Ka nu chuan "Rara, i mu thei ang tiraw?" a lo ti fiamthu a. A laih ve ka rin tehlul nen "Au Hriatpuia bula riah chhin hrim hrim chu ka châk a, mahse a tih chî bawk si loh a. Ka mu thei mai ang" a lo ti duah a. Ka chhungte nuih a ti za ngang mai.




Zanlai laiah kan chhungkua in kan nui dar dar a. Dar 2 a ri thuak tawh si a, thawh kan hai hlawm ang tih chu a hlauhawm khawp mai.



Ka pa chuan "Mu phawt ila zing lamah Rara-i awm zel dan tur pawh kan ngaihtuah dawn nia" a ti a. Kan lo pawm tlang khawp mai.



Ka nu leh pa te chu room-ah an inzui lut nghal a. Vantei lah chuan min lo fiam ve ngei a "Ka lo va mu ang, tikhan lo inthlah ru" tiin a nui kar kar a. Room-ah a lut zui nghal a.



Chu velah Rara-i chalah chuan ka fâwp nghal vang vang a "Biakin hawngin kan innei dawn nia, Kohhran dan thianghlimin " ka ti nghet churh a. Lungawi hmel zet hian a lo bu nghat a.



Kan duhna te kha ti puitling in lo inru ta ila chu kan hlim tho ang a, mahse dam chhung hriat reng tawh tur Pathian pawi sawi kan nihna chuan kan nun a tibuai ve tho in ka ring.




Heti hian Pathian duh dan zawm mah ila harsatna chu kan la tâwk tho ang, mahse Pathian vangin kan hneh zelin ka ring.



Tukṭhuan ei laiin ka pa chuan ro a rêl zung zung a. Rara-i harsatna tawhte pawh a bo a bang awm lovin an hrethiam ve vek tawh a. An ina let tir leh chu an phal tawh bik lo.




Kawng khat chiah a awm a, chu chu a nî te tu emaw ber ina awm rih a ni.



Nunmawii ka ngaihtuah chhuak lo thei lova. A chhûngte zingah Nunmawii te lo chu hriat tlangnel sa ka nei lova.




A huat hlau deuhin ka sawi a, mahse rin ai takin a lo hrethiam khawp mai.



"Ani Nêmi te in chu a fuh berin ka ring" a lo ti ve thlap a. Chutia a duh ve tak berah chuan a nî te zînga ziaawm ber ni hmiang ka lo ti mai.



An phone number te chu ka pa nen an inpe a. Ka pa chuan a buaipui sak vek a. A ni Nêmi te pawhin an lo hrethiam ngang mai. Chuti lutuka sual chu an ni bîk lo aniang.




Rara-i chu an rawn hruai nghal chûk chûk a. Nunmawii pawh a lo tel ve nghe nghe. An fanu Lawmi tuitor ka nih avangin Pi Nêmi te nen pawh kan inhre ṭha sa a. Tun atan chuan ngaih a ṭha rih khawp mai.




Pi Nêmi chu nêlawm deuh hian a rawn ṭawng nghal bawrh bawrh a "Ramtei awm dan hi chu kan en liam tawp tawh alawm. Marema dam lai pawh khan sawi buai en ah kan en tawb lova. A vahpa Dawnga pawh chu a ṭul dan ang zelin a chungah action kan la ang. Rara-i hi ngaihtuah chûk chûk ngai lo mah ila ka vahnu a nihna a bo lova, ka hmangaih asin. Ramtei'n chhûngkua min chin let dan em em hi chu a la hre khawp ang" a ti hmarh hmarh a.




Rara-i thlavang a hauh ve zia leh a thinrim zia chu hai theih a nilo.



Chutah ka pa chuan "Thil awmzia engkim in hre bawk a, Rara-i pawh kan fanu ang tho a ni a. Kan sawi a mawi ni lo mah se in kutah a him dam turah kan ngai a, nang ni lo han bêl bul tur vak a nei si lova. Kan han sawi khawm nak nak khan 'Ani Nêmi ' a lo ti ve vat a. A beisei awm chhun in ni tih in hrethiam ang chu maw" a ti chuar chuar a. Ṭawng sual hlau deuh hian a ṭawng a.




Pi Nêmi chuan a lo pawm thiam khawp mai "Ngaihsak ngawih ngawih tur kan nih laiin kan lo ngaihsak tawk lo zawk a. Nangni in lo awm hlauh a, theihtawp chhuahin in lo buaipui ṭhin a. Kan tluk lo ngawt mai che u. Ka pa vângin chhungkhat ang tho kan ni a, kan in hrethiam tawn aniang chu" a lo ti ve thliam a. Kan boruak chu a ṭha khawp mai.




Rara-i pawhin nui hmel tak tak a pu veleh thei ta a. A lawmawm takzet a ni.




Heti hian Ani te a ngaihdan pawh inthlak ve hret hret sela, in hrethiam tawn takin inhmangaih tawn sela tih chu ka duhthusam a ni.

___________*____________*____________*_____


Show post links
Top