Re: LOVERS BY Rengpuii Lushai (Completed)

[Ngaia]

Lovers

Chapter ~13

By~Rengpuii Lushai



Kan nunah hian kan beisei lâwk loh thil lo thleng tam tak a awm țhìn, kan beisei loh thil te'n kan tum lohna lamah min hruaiin min theh vir fo bawk. Chu chu ka nun hman dàn mêk chu a ni, ka suangtuahnate chu duhthusàm nakin lawka la ral vek tùr chauh a ni ta.





Kan khaw lama ka awmna pawh kâr hnih dâwn a lo ni dèr tawh, taksa damin țhat hmêl vur mah ila rilru a dam loh chuan mihring hi a lo nep theih khawp mai. Ka pa hrisêlna pawhin ziaawm lam a pan a, a hmêl hmuh pawh a nuam chho leh tawh khawp mai. Ka tum dàna awm lo ta chu tihian nitin in nghâkin hun ka hmang a, in chhûng sekrek khawih leh in leh a vêl tih fai chu ka hna a ni deuh ber e. Ka naute fel viau mah se ka nuin ka awm chu a hahdam zual phahzia a sawi a sawi ve mai, dawnsawn nuam lo tak ani lèm lo ve.





Mahni buai buaiin buai mah ila rilru kilkhatah hian theihnghilh theih loh keimah a bîk nihna neitu erawh a riak reng thung. Ka ngai a, ka ngai tak zet! 'Engtin nge hun a hman ang ?' tih ngaihtuah chungin suangtuahna a lûtin zân ka muthilh châng lah a tam. 'Min ngaihtuah ve țhìn ang em ?' tih zawhna lah ka inzâwt ngun, chhânna erawh ka nei ngai lo; A chhânna neitu hnên aţangin chhânna ka hmu ngai dâwn lo tih inhriatna chuan rilru natna bawk min thlen nawn leh fo țhìn.





Hun a liam a, krismas pawh kan hmang liam a, krismas ka hman tawhah chuan ka la hmang nuam lo ber hial awm e. Pâwn ka chhuak êm êm lo va, inkhâwm leh zâikhâwm tih loh chu ka tawm chawt a, Kuri nên kan inbe nasa hlê a, eng mah U Zomuana chungchâng a sawi ngai lèm lo, kei paw'n ka zâwt lêm lo bawk.





Chhûngkua kan dam tlàng a, kum thar lamah chuan ka naute pawh college kalin hmunpui lamah awm an ngai ve tawh dâwn a, Nu sawmteite inhawng viau mah se ka pa'n inbàwl hran ve a țhat zâwk thu a sawi a. Nusawmteite erawh an ngaih dàn a lo ni lo nasa; mahse, ka pa khaw khat pa pa rilru tumtlangin thil thleng thei leh a ngaih dàn țhenkhat an sawi tâkah chuan, Nu Sawmteite pawhin an rem ti ta nge nge kha a nia.





In luah tùr pawh min zawnpui leh ta lâwp lâwp a, Nu sawmteite vêng țhenawm lawkah an thawhpuite in hnuai ruak tùr a lo awm hlauh a, a luah mêk tute nupa rek hi in sa lai mêk an ni àwm e, april thla vêlah an in sak luah luh hman an inbeisei a, hmunpui in luah tùr vang nên an chhuah hun hun a invawm lût tùrin kan inbe fel ta kha a nia, kan hauh lâwk a ni ber e.





Kan la tlaichhe dâwn chuang lo bawk a, Zohera a zirnaah a tluan chuan a college țan hmâ deuhin kan insuan lût hman dâwn thova, hahdam deuhin kan awm a ni ber e.






Ka phone rawn nghawr dat dat chu ka bih nghâl vata inbual tumin ka bathrobe ka ha vek tawh, nu Paritei hming rawn lang va va ka hmuh chuan ka thaw halh a, ka en reng lai chuan a in-ring zo hman daih lehnghâl! Mahse, a rawn ti nawn lehnghâl zat tho, " Hello," ka ti deuh tawl a, " Lâte, i dam țha em, i ngaihawm vang vang hle mai, mas-te in hmang nuam bawk maw?" Tiin nu Partei chu a rawn țawng nghâl siam siam a, a awkâ dam tak pawh a la ngai reng mai, " kan dam tlàng e, nangni lam in țha tlâng em, hun pui lai vêl chu inbuai àwm mang e, " ka ti let ve nghâl mawlh mawlh bawk.




" Buai ve mup mup khawp mai, Kuri a dam țha lo a chawlh zeuh a lo ngai țhìn bawk nên mi pahnih kan lâk belh tawp mai, " a tih chuan ka hriat hnu tho mah ni se, ka inthiam lovin chawpchilh lutuk a ka bansan thut hrehawm ka tihna chu a rawn lang lehnghâl zat a, ka bansanna chhanin a rawn luah zui nghâl chu ngaihtuah zawm duh lovin, " Buai khawp a in inhralh țha chu a làwmawm lam a nih chu tiraw," ka ti zui nghâl sawk sawk a, kha thil kha ngaihtuah chhuah ka duh rih lo, a nu âw ka hriat lai phei hi chuan ka ngai zualin eng emaw boruak danglam bîk a keng tel tlat a ni.




"A ni khawp mai kan sumdawn chhan a ni bawk a, " a rawn ti ve leh thliam a.



" Lâte...Zomuana nên khân boruak eng emaw kha a awmin ka hria a, beiseina ka lo neihsan lutuk vâng ngê lo inrawlh chu ka duh viau lo nâin, i bàn chûk chûk chhan nên te khân a inzawm em?" Inthlahrung aw tih hriat ngawih ngawiha a rawn tih zawm leh chuan, chhàn mai dàn tùr min ti hre lo tak zet.




" Kei lah hi a, ka lo sawi thui leh chiam țhìn, theihnghilh daih rawh. Mampuia hi chu a buaithlâk a ni e, lo dam țha rawh aw, min rawn be ve zauh zauh țhìn la," ti zui sawk sawkin phone chu a ti tâwp zui daih a, ka hamhaih ang reng zâwk.




Inbual tùr chuan bathroom lam chu ka pan a, dârthlalang hmâah chuan dingin ka hmêl ngui zet chu ka thlîr vang vang bawk, ka bathrobe hâk chu ka darah hui liamin a vawi tam takna atân a sulhnu hnuhchhiah chu ka en leh vang vang bawk, a reh lam mah tawh niin a lang riak riak chauh tawh zawk. Ka thinlungah erawh a la chiang si kha zân engkim lanna leh tâwpna kha, maimitchhîngin ka thaw chhuak ham ham a..





Dâr 11 a hnaih thuak tawh avângin haw lam rilruin a âwn tawh a, U Zomuana chu a țhiante'n lo au-in min hruai tel ve a tum chuan, a țhiante nên hun thâwl hmang se ka duhpui a, bâkah lo hauh țung kha ka duh lèm loh avàngin Kuri bula ka lo awm zâwk duh thu ka sawi mai a, rilru nuam zàn lovin min ngaihtuah tih hriat takin min kalsan kha a nia.





Hun thâwl pêk ve kha ka duh bawk a, a hmêlhriat an tam tehlul nên min thlah thlam lovin ka bulah a awm reng a; mahse, tûnah tak chuan a lo lêt har ka tiin ka rilru chu a hmanhmawh ang reng tawh si a. Ka rilru chu a bet tawh hlawl lo a ni ber mai, Lalkuri lah hian zànin chu min ngaihsak țha duh dèr lo, min chhaih zuk zuk reng tih mai loh chu.





Thlîthlài tumin ka țhutna aţang chuan ka tho zui a hluai a, Kuri bulah erawh ka zun chhuak ka chhuanlam thung, " ka lo kalpui ang che," tih paha rawn thawh ve a tum chuan, 'a ngaih loh thu ka lo sawi vat' ner nâwngin a mitmu a chêt kualtîr ralh ralh a, zanin chu a rilru a kal dik lo laklawh a, sawi vak pawhin awmzia a awm lo tih ka hriat miau avângin nui pah hak hakin ka kal ta nghâl a.





Pâwn lama ka va chhuah chuan U Zomuana leh a țhiante ni àwm tak lo țhu chu ka va hmu nghâl mai bawk, hmeichhe pahnih leh Mipa pathum an ni. U Chhuantea erawh ka hmu ve lo, va pawh mai tùr nge niang ti a ka inngaihtuah lai chuan an zînga hmeichhe thu rawn sawi chuan min țhâwng kher mai, "Felicia lak ațang khân i move on theih kan ring lo asin; mahse, Atei hian in chungah tu emaw nên in inzui chho lai a hmu tlat che u nia aw," tiin a nui pah hak hak a, kei erawh ka vâwt chhuak vek ti ila a dik ber ang, ka thin phû a rang nghâl dawt dawt a, ka chhûngril chu a sa ham ham lawi si! Eng dang vâng a ni lo, Felicia hi U Mâ-i hming ni miau hek! A mak ka ti tak zet a, rilruah buai nuaihin thil hrang hrang a rawn inlar nghâl zut a, ka ngaihtuahna chuan kiltin dap nghâl ruaiin a ngaihtuah thlen leh phâk chin ngawt pawh chuan min ti chauin ka na nghâl vawng vawng ringawt mai ni. A belhchhah zual tùrin mipa pakhat lahin, "chûngte chu a tih loh dàn pawh a ni em ni, " tiin a lo tuihnih zat bawk! Ka chhûngril chu a khùr a, ngaihthlâk zawm zêl ka duh tawh lo chungin ka chawmawlhin ka ke chu ka chhep sawn thei dèr si lo!





Ât hmêl takin ka ding reng ringawta, a hmâ a hmeichhia bawk chuan, "Ricky-a khân tûn a mi hi Felicia nên an hmêl a inan thu a lo sawi bawrh bawrh a," tiin a sawi zawm leh zat a. Chêt ngaihna ka hre tawh lo tak zet, " hetah i lo la ding reng elo?" Kuri âwin a rawn tih làng láng tâkah chuan ka hma lama titi mawlh mawlhte pawh rawn hawichhuak hlawmin, amah ngei pawh chu hnuai lam bih ngur paha a kut suih zawma țhu kha a nia, a rawn hawi rang ngang mai, kan lâi kual vek a ni ber e.





Kuri chuan eng mah hre ve hek ta lo chuan, " in haw daih tawh ka lo ring a, hei ilo la hawpui lo va, a haw duh tawh a nia, i ngaihsak lo riau mai," ti zui lawng lawngin U zomuana chu a va melh a. Rawn tho vutin kan lam panin a lo pên nghâl vat a, min hmutu awm se mi pângngai pha zan lo hmuhin min hmu ang, tûn a ka lan dànah chuan an demawm lo khawp ang le, sawi mai tùr hre lovin ka ding tlâwn tawp a ni ber.






"Kan kal mai dâwn em ni?" Chîk zeta min melh chung chuan rawn ti chhuak supin ka kutah a rawn hûm nghâl a, ka lo bu nghat ringawt ka țawng châk lovin, awlsam thei ang bera awm chu ka duh a ni ber , " kan kal mai ang aw, " tiin Kuri melh zeuh chung chuan ka ti zàwi sap a, ka âw chu a chhuak chang chang a ni ber. Chutah zet chuan a ngaih a țha lo nghâl tih a hriat; mahse, ka hmêl a hmu chiang lo tlat, an light chhit hi a dìm lam a ni tlat a, ka tûn dinhmunah chuan malsâwmna a ni hialta ve ang, " Aaa...aw...aw le, " min ngaihtuah vânga buai deuh tih hriat takin bah naka min chhàn chuan ka nuih sak a. U Zomuana pawh chuan, " Kuri a nih aw, " ti a thlahin min kai zui a, a țhiante bulah kal paha thlahna sawiin kan pèl zui nghâl a. Ka va melh leh hrâm a an zînga pakhatin an che fuh lo a ni tih inhriaa, a țhian dangte melh kuala lei a chhuah pah zeuh chu ka va hmu leh hman hrâm bawk.







Motor chhûng kan luh thleng chuan kan țawng lo ve ve a, sawi tùr erawh ka ngah lutuk bul țan dàn ka hre lova ka ngaihtuahnate chu an inpawlh nuaih ni berin ka hria, a din tak dawtah chuan ka hawi kual thuak a, khaw chhûng kan la lût lo deuh niin ka hria.





" Tlàn tlang rawh ka hâw duh," amah pawh en lèm lo chuan ka ti chang fak a, hma lam ka melh ding ngar bawk, a hmêl ka hmu duh lova ka na lutuk lai hmêl a hmuh chian pawh ka duh hek lo.




" Min en teh," thâwk chhuah hawk paha a rawn tih chuan, en tumna pawh ka nei chuang lo a hmêl hi ka hmu duh lo a ni tawp mai, ka natna tùr ka hmu dâwn tlata inhriatna ka neih rualin, ka chak tawk lohna chu a hmu ang tih ka hlau bawk.




A che hrut a, dam zet hian ka bek tawn tawnah chelhin a lam hawi tùr chuan min kuai her a, " I ngaihtuah ang kha eng mah a ni lo, a lo thlenga a thleng a ni mai, " a rawn tih sup sup chuan, ka hrawk chu a tâwt vek tawh, " Engkim hre sain min hnaih, i nunhluiah i dam lo va, nangmah avàngin ka thisen zawmpuite an dam hek lo, chu lai kârah chuan kei hi mãwl takin ka then vêl mai mai tih ka hriat hian ka na, ka na lutuk, " chiang taka a mit a melh chungin ka ti khùr hlak hlak a, ka mittui chu a tling khat vek bawk, ka khap vaih chuan a tla dâwn tih ka hria, ka insehruhna lamah chuan ka hah zual sauh bawk.




" Zêpna chhan tùr ka nei lova, sawi ngawtna chhan tùr pawh a awm hek lo," ti nghutin min thlah vut a, thaw chhuak hawkin a seat nghènchhan chu a nghènga, a bân pahnih a tukkhum a suihzawmin a chhîng zui nghâl vung vung bawk.




Min hnaih tùrin ka duh lova, a inlâk hrana ka awm dàn tùr a dâwn zui miah lote chuan min ti na tho si! " Eng vângin nge u Mâ-i kha i phatsan?" A lam hawia inher rem meuhin ka ti chang fak, a bek ruh rawn pâwng țalh țalh khawpin a insehruh tih a lang kulh a, min la chhâng duh chuang eih lo.




Kei erawh a hmâ ang lo takin insûm tum buaina ka neita hauh lo, tûnah hian eng nge ka duh a ka tâna hmachhawn nge ka nih u Mâ-i tân tih pawh ka thliar hrang thiam lo, " In chungchâng ka hriat tawhte leh ka chhûngte he thil thlengin a nghawng dàn hre vek tu ka ni bawk, chuti chung chuan i thu sawi kha âwih theiin min ring a maw?" Ka ti leh hlawih hlawih a, ka âw pawh a vînin a zàwi tawh lo viau.




Muangchânga rawn meng chhuak ruai ruaiin hriat thiam har zet hian min rawn melh a, ka thinrim a ka nat êm êm laiin a ni erawh ka hriat thiam theih leh ka chhiar theihin a khawsa leh tawh tlat lo, " Ka nunhlui vâng a ka dam lo nia i hriat chuan, ka ring bîk chein i ring em?" Vawt ruihin a rawn ti chang rût a, ka lo nui hak, ka zakin ka na nget nget bawk.




"Min ring lo chungin engkim hre sa vek siin inzawmna min siampui tho a, eng vàng nge, i hnar theih loh tùr khawpa uchuak leh zahawm lovin ka nawr lo che tih i hria?" Ka ti țial ruai a, ka hrawk a min hnawhtu chu a nain a sak țalh tawh.





" Ka inrinna aiin hriat chian ka duhna che a nasa zâwk a ni mai, a bâk a awm lo," nèlawmna tel hauh lova a tih mar ut chuan, " Dâwt," ka lo ti leh fak.





" Tum nei sa ràna hnaih che a min ngaiin chu chu remchânga laiin min hnaih, i hria em.... hmeichhe tam tak infiam kual nâna i hmang ang chiah khân, i hun khawhralna pakhat ve mai ka ni, " Duhthawh zet chuan ka ti leh tawn tawna, dur khûia min melh rùnin a insehruh nghâl țawlh țawlh a, " Kei hian engkim hi min hnaih nan leh i unaunu phuba lâk i tumna vàngah ka ngai ve thei tih hi ring tawp rawh; mahse, nangniho ang lo takin chu ngaih dàn chu ka pai zui lèm lo," a rawn ti ve leh hmuk a.




" I tân chuan hmeichhiate hi i hun khawhralna, i infiamna chi khat ang chauh an ni, i nin hunah kalsanin beidawng tâwp khawkin i siamin i kalsan leh țhìn, i nunhlui vângin i nâ maw? Buma phatsan tâwk chu nang ni lovin u Mâ-i, nangmah avânga inâwk hlum kha!" Ka ti leh tawn tawn chuan, rawn che vutin ka darah chuan a rawn hmer ngut ngut a, ka lo inring lo nên a na lutuk chu ka țê chhuak țhat, " Ngawi rawh, ngawi hmak rawh," ka hmai zâwna rawn âu țhawtin a insehruh nghâl țawlh țawlh a, phâwk lutukin ka le melh lêt tawp, a rawn che rang lutuk leh ka dar a hmerna na ngut ngutte a âu ring bawk site chuan chêt ngaihna mai min ti hre lo, phâwk em emin ka en tlawk tlawk ringawt mai ni.




Min thlah thutin, " Chhuk rawh, " a ti chhum hmuk a, thâwk la hawkin stearing chu na êm êm hian a chum zui leh pawp bawk, a khawsazia chu enin ka lo phuin ka phâwk hrâ ringawt tawh, chhuk tùr a min tih chu ngaihtuah chhuak thutin ka seat belt chu ka hmet rak rak a; mahse, Motor chu start thutin kan dawk chhuak nghâl zawk a ni ber mai, maimitchhîngin ka tukkhumin seat nghènchhan ka nawr ngat ngat a, ka seat belt chu ka hmer nghet sauh bawk.



Gate zâwna a din chik tuar chuan ka hma lamah ka bu dawrh a, rum êm êm leh mittui tling khat vek a ka va melh chuan insehruh țawlh țawlhin hma lam a lo melh ding ngur a, a hmaia ham bawrh bawrh chu ka châkin ka taksa chu a sa chhuak vek thei nia!



Thimrim tha khùr ru hlak hlak chuan seat belt chu ka hmet phelh rak rak a, lock chu kuaiin kawngkhàr chu ka nam hawng rawp, " i unaunu duhthlannaah khân tel ve na ka nei lo," zâwi sehchilh naka a rawn tih leh chuan, lehhawiin ka melh ngat ngat ka țawng chhuak thei tawh lo, nunrâwng ka ti lutuk chu anchhia ka lawh loh nân ka insehruh nasa hlè. Kawngkhàr chu ka nam ri bura a thaw hawk rî leh stearing a chum pawp ri chu kan pahniha inkâra țawngkâ emaw chêtphung emawa a tâwp kan khar dàn a ni zui ta a nih kha. Min rawn be lova kei pawhin ka be zui hek lo, ka ngaia ka na êm êm bawk. Ka dar la duk raih chu ka en a, engkim chu ka ngaihtuahna ti buai tu leh ti na tu vek an ni tawh tih ngaihtuah zawm loh te hi a la harsa ka ti tak zet.






Kum a thar a, rilru thar nên tih rilru put a harsa tak zet a, chutih rual chuan kan chhûngkaw enin ka hma lam hun atân ti a rilru ka sèn a ngai tak zet a ni. DIET a training ve ka rilrûk kha a nia, zànriah kan kîl pahin ka thil tum dànte ka sawi luam a, ka thil sawi nên a inzawm lo zetin ka nu chuan a tih fô dànin nun uluk a pawimawhzia thû min hrilh leh vak a, hei hi chu a tih fô țhìn dàn kha a ni rêng a. Rini rai thû leh a mipa lam nên an inrem hleih theih loh thu Nu sawmtei'n a rawn hrilh ațang phei kha chuan, hetiang thû nun uluk tùra fuihna hi kan ngaithla awl lo a ni ber e.





Ka pa pawhin keimahah an innghah thûkzia a sawi ve bawk a. DIET a i training theih tâk loh leh computer class te kalin hnate i zawng pah ang a, i tân a țha ber hretu Pathian a awm a, han bel tlat phawt mai la a ti zui luam bawk.






Zànah chuan mut tawh hnuin Lalkuri nên kan inbe leh nghek a, kan inbiak tawh hi chuan kan tâwp mai thei țhìn tawh lo, vawiin pawh dàwrah a kal vângin chhûn lamah kan inbe lova zànin pawh a rawn khat liam leh khawp mai, kan inbiak rei theih nên kan sawi tùr ngah dàn a kiam thei chuang lo, " Nizàn chu a mak tawp u Zomuana'n min rawn phone a a rui ve deuhin ka hria, ' i țhiannu kha phone la i single lo ti rawh, ' tih ringawt zuk thupui a, ka kham zia chu e, hrilh ziah ang che min ti thul, min tih buai zia," a rawn ti nghâl hlak hlak a, ka nui a zat viau rualin zu a in chu mak ka ti lutuk tlat ; mahse, ka ngaihtuah chhuak leh hnuhnawh a, nu Partei'n kan pahnih chungchâng a sawi kan hriat zân paw'n min lo call in min muthilh san daih a nih kha, kha pawh khân a rui a ni mahna.




" Nu Partei lah hian sawi chhuah nawlh che hi a chîng a, ka sawi thuipui duh ngai lèm lo nâin ka khawngaih țhìn, sawi tùr a vang thei si a hrehawm. A thu hrimah i rawn chhuk hun chu thil thleng chipchiar tak ka hre duh a nia aw, ka nawr lui duh rih lo che a; mahse, hriat chu ka phu vein ka hria," Ka zai ngai taka a rawn tih chuan ka thaw chhuak ham ham a, u Mâ-i hming a rîk tel zêl a ngai tawh dâwn a hei ringawt pawh hi a hrehawmin an nunhlui avânga natna te nên engkim hi a hnawk nuaih vek si, chhûngkaw thil a nihna lai chen a lo awm ve leh zêl bawk nên kei mah avânga mi dang an nat thar theihna tam tak a awm bawk avàngin ngawihah ka tlâk tawp kha nia, anni erawh chuan u Zomuana vang ngawr ngawrah ngaiin hmeichhe pakhata lungawi lo hma lam pan tum lovah an ngai a ni ber.



Fuihna leh ka tih dik tawk loh min hrilh țhìn tute invaiin ka tân hian in hlu vek mai, ka lâwm e🥺


Show post links
Top

[Ngaia]

Lovers

Chapter ~14

By~ Rengpuii Lushai





Hun a liam ve zung zung a kum thar chuangkaiin, kan in luah tùr April thla atân inbiak fel ni mah se, a luah tute kha rin aia an in thar tùr an inpeih leh hma avàngin, kum thar vuak vêt zawh chuan insawn mai an tum hi a lo nia. Chutiang a nih tâk rau rauah chuan tiin naktûk lamah Aizâwl panin ka nu nên kan kal phei dâwn a ni àwm e.






In luah thar tùr tih takah ngaihtuah tùr a tam khawp ang, a zualpui tal ka nuin min ngaihtuah pui a duh avàngin kan phei dâwn a ni. Nu Sawmtei ka nuin a biak chuan a lo phûr thiam lehpek khawp mai, thlairêp eng ilo fahrante ka nuin kensak a tum thu a sawi phei chuan a phûl hlut a, loudspeaker-ah a dah avàngin kan hre tlâng vek a, kan lo nuihpui ve hak hak zêl. Nu sawmtei thil tih sak zawng a làwm thiam theiin keini tân pawh hian a hlimawm hliah hliah zêl.




Zànin zet chu ka helhhawlh nge pawh ka hre lo, ka mu thei lo chuan thil tam tak ka ngaihtuah a. Ni e, amah bawk kha ani! Khaw khatah kan awm leh dâwn chu a nia, kan inhmu fuh ang em? Eng tiangin nge kan inhmachhawn ang tih vêl ngaihtuahin ka inlet ka inlet mai, tui in mai ka tum chu ka bottle inchhawp a lo awm rêng rêng lo mai, Valmama'n a lo la leh daih nge mawni. Peih lo chungin ka va tho chhuak ta ngè ngé a, ka nute chu an la mu lo nge ni choka a lo la leng pup mai, mei lum an lo la ai dun ngei chu niin va pawh ka tum chu ka ding deuh chawt, an thu sawi chuan min pawt ding a ni mah zawk!




" In luah hran chu a țhat viau rualin kan chhûngkaw dinhmun ngaihtuah chuan kan tlin meuh ang em maw, " tiin ka pa bulah chuan a lo sawi mêk a, ka pa lah chuan, "Pathian zârah ka hrisel țha zêl ang a, kan tlin ve thei mai ang, a eng a mah hmain lungngai lutuk lo la, " tiin a lo hnèm ve bawk.





Thâwk la halhin ka nu chuan, "DIET training-te hi a hautak viau ang em, in thawhpuite ațang pawhin hriat dàn lo ngaihtuah la, a țûl leh U Sawmtei ka be mai ang a, " tia a sawizawm chuan, Ka pa erawhin Nu sawmtei biak buai țûl a tih loh thu a sawi ve nghut nghut bawk, ka tui hâl theihnghilh țhakin an titi chuan ka rilru ala pêng a, tui pawh in ta lo chuan ka room-ah chuan lêt lehin nichin mai a ka thil hriat ngaihtuah zuiin kei hi nu leh pa phur ti rit lo zâwnga ka khawsak a țûlzia ka hre thar bawk.






A tûkah chuan zîngah chhuakin tluang takin Aizâwl pawh kan thleng a, motor rui lo ve ve kan ni bawk a, kan chuang nuam khawp mai. In kan thlen chuan Rini leh Aruatite lo awmin Aruati chuan min lo be sawk sawk a, Rini erawh in chungah a awm a ni àwm e.





Bungrua kan inkeng lût fel a, kan țhu fel awrh tihah Rini pawh a rawn chhuk chhet chhet a, a chêrin a tla deuh dâk a, mutmu a tuah țha lo tih hriat zetin a mit hnuai pawh a val kalh mai, " In lo thlenna a rei tawh em, ka lo chhîngsek alàwm," a rawn tih chuan kan thlenna ala rei loh thû leh, kan țhut fel awrh thuin ka lo chhâng ve vat a. Ka nuin, " Rinte, eng nge i an?" tia ngaihtuah hmêl zeta lo zâwt vatin, khi sakin ' a that thu ' a sawi ve vat a ; mahse, a lan dàn leh a thil sawi chu an inphatsan tih a chiang hle thung, ka nu nên chuan an titi zui nghâl luam a.






Rei lo tê kan hahchawlh hnu chuan inbual faiin Aruati eirawng bàwl ka pui a, ka nu erawh ka pate biain an ri deuh làng lâng a, Rini erawh sitting room lamah țhuin eng nge a tih chiah ka va hmuhpui lèm lo, a dul chu a la lang lo nâin rai chu a haw ve hlè tih a hmèlah chuan a hriat hliah hliah thung.




Tlai lamah chuan hnathawk chhuak an lo thleng hlawm a, boruak a zângkhaiin kan hlim dar dar khawp mai. Chaw ei kan peih hnu chuan chhûng inkhâwmna hmangin zanriah kan kîl zui a, kan chaw ei lai chuan Nu Sawmtei'n 'engtia awm zêl nge ka tum' tih min zawh chuan, DIET training ka tum dànte hrilhin ka theih loh tâk leh thildang hmachhawp ka neih dànte ka sawi zui luam a.





Pa Rema rema chuan, " Lehkha i thiam thei a, i training thei mai ang," a lo ti ve var bawk. Ka rilru erawh chuan tum nghet tak a nei tawh thung.




Zânah Kuri nên rei lo tê inbiain naktûk tlai chaw ei leh riak nghâl tùrin mi a rawn sawm nasa khawp a, ka nu ka dîl chuan a lo rem ti ve mai bawk. Kan thlen tûk a ni chauh nâin Kuri'n a hma ațanga min sâwmna leh min hauh lâwk deuh bur avâng chuan, inthlahrung viau chungin nu Sawmteite chu ka nu a awm tho tiin Kuri chu ka ngaih pawimawh ve êm avângin, an in a zànriah ei a riak phei tùr chuan rilru ka siam zui nghâl bawk.




Chhûn lamah erawh in chhûng bungraw mamawh en tùra chhuah kan tum zet nâa Nu sawmte'in eng mah lei a ngaih loh thu leh an bungraw hman tawh loh khâwm tùr a tam thu a sawi a, țûl a lo awm tak leh amaho a office chawlh nî a kal a rawt a. A tih tawhna lamah hi chuan a ti tlut zêl bawk si, hnarin awmzia vak a nei țhìn lo. Chutia a tih tak tlat siah chuan kan in luah tùrte va en ve hrim hrim kan duh avàngin chawhma lamah va en zawk tùrin ruahmanna kan siamfel nghâl bawk.







A hmun kan va thlen chuan in neitute nula a lo awm a, Nu sawmtei'n a neitute hnênah kan en tùr thu a lo sawi lawk tawh avângin châbi te in pein min kawhhmuh zui bawk a, ka beisei aiin a nuam daih lehnghâl. Kan unaua luahah chuan a tâwk reuh dâwn khawp mai, a luah man tûnlai ngaihtuah chuan a to zawk zawk lèm lo bawk a, a in kan han hmu leh phei chu chhûngril a hlim veng veng mai. Ka nu pawhin a beisei ai daiha a nawm thu a sawi uar ve khawp mai.





A țûl leh tih fai nghâl tum rilru a kal kan nia; mahse, tih fai tùr eng mah a lo awm bawk si lo nên rei pawh rial lovin kan haw leh ta vat a, in kan thlen hnu chuan Kurite ina kal tùr chuan inti fai vatin, ka insiam zui a, ka nu erawh awm hle hle thei lo tih takah tualzâwl hnim tih fai êm êm pawh ngai lo a lo pawt leh neuh neuh tawh, a indaihzai thei bîk a nia!






Ka insiam zo Kuri ka call a, haw tùra a intintuah mêk thu sawiin min lo lam kawi nghâl thei dâwn a, 'nghah ngaiin awm suh ang che ka lo thleng a ni mai' nui hak haka rawn tiin kan inbiakna kan ti tawp a, kawtah chuan ka nu awmna bulah dingin ka lo nghak ràn a. Rei lo tê hnuah lo thlengin, ka'n inhmu chu sawi tùr a ngahin a titi nghâl barh barh reng bawk. A hmêl tla deuh kiam erawh ka khawngaih kher mai nula a pumpa hetia'ng êm êm a han hrisêl loh mai chu a hrehawm ve țhìn ngawtin ka ring a ni. ka nu chu a han be zui leh luam a, ani hi zawng țawngkam hi a haihchham lo ve țhìn a nia.. Ka nu nen an inbiak zawh chuan an inlam panin kan inphurchhuak zui ta vat a.





Kawngtluanin IGNOU a M.A zir zawm ve tùrin min thlem hi a ni hawt e! Chumi pahin inhlawh a'n sawimawi tak tak bawk a, hetiangah hian alàwm ka thiannu țawngkam thiamna hi ka awh êm êm țhìn ni.





An in ka thleng chu tum loh deuhin U Chhuantea pawh a lo la awm a, kum thar hmang a la chhuk thla lo a ni àwm e .





Kan chaw eina hmun vêl kan tih fai lai chuan an doorbell chu a rawn ri ral ral a, nu Zoremi'n a lo chhawn vata ngaihven zui lèm lo chuan thleng chu ka sil zawm mial mial a, kuri ka sîrah dingin a lo titi siam siam bawk a, " nangni pahnih êm êm hi, insawi zo thei thlâwt na nge, i pain thingpui hâng a lam a nia lo chhuansak la, i u Zomuana a lokal kep bawk la, " a tih zawm nghâl duah a, lokal pakhat hming a sawi chuan ka danglam lehnghâl vek tawh! Tih lan erawh ka hlau hlè.




Lalkuri'n min melh ralh pawh chu ka hmu reng, ka chêt ngaiin ka chêt zawm mawlh mawlh a, ani pawh chuan thingpui chu chhuangin ka tâna nuam lo thei ang zâwngin min fiam lèm lo.





Kan intih fel zawh a kan chhuah phei chuan inhmuh loh theih ni hek lo le, ka melh zawk chuan min lo melh ve rùn niin kan mit a intawn chuan ka ngaihzia ka hre thar awn awn mai; chu erawh ka thup hneh viau, rang taka ka mit la sawnin, " Ka lo han chho ang aw, ka nu biak lawk ka duh deuh," tiin Kuri chu ka melh zauh a, " Ka rei lovang lo han chho rawh, i duh leh lo inbual nawn leh la tiin a nui deuh a, bu nghatin ka chho zui ve mai bawk. Kuri'n " Lerh lutuk mai," a tih hlak rî chu ka hre hman hrâm, an ngaih dànah chuan kan tâwp chhan hi amah vâng ngawr ngawrah an ngai a nih hmèl.






Kan mut theih meuh chuan a hma lutuk tawh bîk lo, min ngaichâng tih ka hre reng a; mahse, bul han țan mai dàn ka hre bîk vak chuang lo, " Mak i ti dâwn tih ka hria, u Zomuana nunhlui i sawite nên khân kan lo inzawm nuaih mai, a bialnu boralta i sawi kha ka unaunu alàwm lo ni, " ka ti chhuak halh a, saisîr meuha ring kànin min rawn en háw a, ka dem lèm lo, " Nu Sawmteite fanu u Mâ-i, i tân chuan hriat ngaihna a awm lo, kei paw'n a hranpa taka hriat chianna leh inpawhna kan nei lèm lo, eng emaw chânga kan zina kan intawn fuh ang kha ni mai, kan la nau deuh bawk a," ka ti deuh luam a.



Kha mi zâna a țhiante thu sawi ka hriat dànte chu ka sawi mawlh mawlh a, a ngaithla ulukin mak a tihzia erawh a thup thei vak bîk lo a thaw chhuak leh hak hak zêl a, ka sawi zawh meuh chuan kei pawh ka thaw hawk hawk mai, ka thâwl huaiin ka ring kha a nia ka danglam phah êm êm paw'n ka hre chuang lo.



" Engkim hre sa vekin min hnaiha, ka duhnate leh kan intawn dàn rem thlupte hi ka ruahmanna leh ka tum luih rengah ngaiin min fiam kual ni tlatin ka hria a, kan tâwp kha a țha ber ka chhûngte natna ka siam thar leh mai mai a ni, bâkah u Mâ-i chunga a thil tih kha a râpthlâk êm mai, " tiin thil thlenga ka làwm lohna ber leh u Zomuana ka huatna lai tak chu ka hrilh kîlh kêlh a, " A tîrah pawh khân ka thlâwp vak lo che a, misual chu a ni lo mah se nunhlui nên a hma lam pan tum tlat kalsan tum lo nun hi chu beisei tùr hi a awm lo ve êm a ; mahse, i u chungchâng chu a mak e, phatsan ni se u Zomuana hian a tuar dâwn em ni? Bâkah, hmàn zâna ka nu leh nu Partei an inkawm zân khân an sawi leh nual alàwm inpahnih chungchâng a sawi zân khân, palai kal nawn lehna tùr dangtu pawh an mahni lam a nih kha, " a rawn tih ve chuan ka phâwk hlè, ka țhu deuh hluaia Kuri pawh chuan min lo melh ve hâ tho!





" U Zomuana khân a duh ve asin," a rawn tih nawn leh chuan ka mu thla dawt a, ka thu hriat chu ka remkhâwm thiam lovin rin ber tur pawh ka hre thiam tawh lo, a tawngtute erawh ka nuna mi pawimawh ve ve an ni si, chu chuan ka nun thlengin a nghawng avângin ngaihtuah loh a theih ngawt bawk si lo va, ka buai tak zet a ni. An fapa chu țanna chin an nei ve tùrah ka ngai hmiah bawk, " tuar tak tak ni se hmeichhe hrang hrang a kawp zul nâng," ka ti leh nghat a.



Thaw hakin, " kei chu mate sawi dûn thei u la ka ti, thil hi a lan dàn ringawt ni lo hi a awm ve a nia, u Zomuana hi ka hre chiang ve asin hetiang mi hi a ni ngai lo," duhthaw deuh chuan a ti leh a, " lo ni lo pawh ni se thil thleng hi a satliah lo êm mai, kan tâwp tawh a ti hian hma lam pan tum ila a țha ni mai, " ka tih chuan eng mah a sawi zawm tawh bîk lo.




Kawngkhàr an rawn kik kauh chuan Kuri chu ka nghawk zeuh a, a la muhîl bîk chiah lovin ka hria. A rawn rîk leh kauh kauh chuan phun hlakin a tho chhuak vat a, kawngkhàr a hawn chuan a u lo niin, " Lâtei kha a muhîl tawh em ni? " a tih chuan Kuri chuan min rawn melh zauh a, ka lo țhu chhuak ve vat bawk.




" Va be lawk rawh, ka u," Kuri'n ka bula rawn kal hnaih paha a tih chuan ka lo melh deuh háw a, ka mak ti hmêl chu hre thiam takin, " ka hre bîk lo, va kal rawh, " a ti leh ringawt a, " Lâte," u Chhuantea'n a rawn tih chuan ka tho chhuak ve ta nghâl sawk sawk a, kawngkaah lo dingin a phone a thai mual mual a, amah zui tùr a min signal -in a thle zui bak a, inkuah khawr țut chuan, " Eng nge, sawi mai la?" Nuam ti chiah lo chuan ka lo ti ban chalh a.




" Țhianpa nên inbe lawk r'u aw," a tih chuan ka beisei loh lam daih a nih vàngin ka melh deuh rèn ráwn a, " Sawi dûn tùr kan nei hleinem," inkuangkuah âtin ka lo ti khauh, kan nei lo miau a tinni, kha zànah khân sawi satliah pawh ni lovin a tu ve ve pawh, duhthaw takin kan ințawng khum tawh a nih kha.




" A rei dâwn lo, lokal lawk la sawi tùr a nei thung alàwm, nghaih thlâk ringawtte chu sawi tùr i neih loh phei chuan a awlsam hlei hlei," uang pah deuh titih chuan min thlêm a ni mah, min dinchilh rùn reng bawk si nên thaw halh chuan ka zui ve ta a, han țang țung țung kha thil mawi a ni lèm lo bawk a ni.


Room pakhat kawngkhàr chu hawngin a lût zui nghâl a, zui mai lova ka ding dat chu rawn lehhawi vutin, " A rei dâwn lo, inbe lawk r'u aw," a rawn tih leh chuan ka lo bu ve nghat a. Ka tîm deuh chu a hre thiam ngé ni nèlawm taka min rawn nuih sukin room chhûng lamah chuan thle leh zauh bawk, thaw hakin nuam ti zan lo chuan ka pan ve ta tho a, u Chhuantea chu ni lo se ka lût kherin ka ring lo.




Ka luh chuan u Zomuana chu single sofa lo awmah chuan a lo țhu khur a, a khupah a bân pahnih nghatin a suihzawma kun deuh khuna țhu a min lo melh rùn chuan ka melh lêt ve ràn a. A mitmeng chu a dulin a tak rân mai bawk nên ka hawisawn leh vat thung, a mitmeng nung lo lutuk chuan ngaihtuah loh tùr min ngaihtuahtîr ka hlauh vàng a ni zâwk mah; mahse, ka ngaihtuah dèr tawh zâwk si!




" Țha deuh khân in be rawh u aw Lâte, " u Chhuantea'n a rawn tih nawn leh chuan, rang zetin, " Kei chuan biakna chhàn tùr ka neih pawh ka hre lo, " ka tih chuan ka hma mi chu a lo khi suk ringawt.



U Chhuantea chuan ka darah rawn bêng thukin min chhuahsan zui mai a, a chhuah hnu chuan room chu a reh tlawk tlawk a ni ber, ka la ding reng bawk nen a ngawi leh rùn si chu dawhthei lo zet hian , " Sawi tur i neih chuan sawi la, " ka ti deuh khawl, " țhu phawt rawh," a lo ti dût thung a, " ti hian a țha, sawi vat zâwk teh, " ka ti ram leh deuh hmarh thung.




" Ti khân a țha maw, " tih paha nui sukin ka ke hmâwr ațangin a rawn melh chho kher a nih chu! Kekawr bul chhîng teng hâin ka mal chanve pawh a khuh pha țha țhum lo lehnghâl, kawr lah chu a bah mai ha ka ni tih rêng ka lo ngaihtuah thleng tawh lo, nuam ti tak a muangchâng a rawn melh chhoin ka mal a melh lai te chuan ka îp châwih tawh! Ka âwm bâwr a melh thlen rual chuan lo inhup vatin țhutna ka melh fuhna hmasa berah chuan ka țhu thla rawk rawk a ni ber, ngei lutuk chuan rum theih tâwpin ka melh ve ta nghek a, a nui suk duh chauh lehnghâl.




" Ka kal dâwn, sawi tùr i neih loh chuan, " tiin ka melh rân a, " Ka duh che, ka fiam kual lo che, " mitmeng tak rùn a min melh chung chuan a rawn ti nghut a, ka beisei loh tâwp khawk a nih vàng chuan âwih chu sawi loh âwih loh ngaihna pawh ka hre lo, ka melh mãwl tâwp a ni ber!





" In pawm tùr erawhin hun ka duh rei viau, " a rawn tih leh sup chuan ka lo thaw hak, engtia lo dawnsawn tùr nge ka hre lo va, hetiang hi a lak ațang ka beisei lo hul hual a amah nên pawh hian a inrem hlawl lo.




" Ka tân chuan rin hi i harsa lutuk, rinna chhàn tùr che lah ka nei hek lo, ka unaunu chunga i chêt dân ngaihtuah phei chuan haw hluah hluah tùr che ka ni, " ka ti lêt nghek a, ka ding zui zat bawk.



" A nih chuan nangmah kha bumtu chu i nih chu, kei chauh ni lovin nangmah pawh i lo inbum char char tihna a nih chu," a rawn tih khauh chuan, min ngaih dàn mak ka tih lutukna vâng zâwkin ka lo nui hak thung!



" I â tawh a nih kha, " ka tih chuan, " min duh emaw tiin i inbum char char tih ka sawi vàng chuan maw, " nui suk chung a tiin a mitmeng erawh a rum țha hle, " Thu dik hriat i tum miah lo bawk," țhen suka tih zawm lehin min melh rùn a, " Hriat tum vak a ngai lo a lang reng alàwm, nang hi i ni tih ka hriat hma daihin thu dik chu ka hre tawh," ka ti kha fak a, ka sa leh pup pup tawh. Huaisar taka min duh thu a sawi ngamte chu râpthlâk ka ti zâwk mah tawh!




Ding zui thutin, " I laka ka rilru puthmang kha i zah lo a nih paw'n, ka unaunu thlarau tal kha chu zah ve rawh," ti chungin melh pawh melh nawn tawh lo chuan ka kal pêl nghâl zat bawk, " Mahni inbum chîng, dang lamna in lo nei lo, amah ang chiaha dawihzep maw i lo nih," vâwt ruih a a rawn tih chuan ka ding chiang hlê, lehhawi riai riaiin ka melh ngawt ngawt a, a sualin nunrâwng ka ti lutuk!




In comment chhiar hi a va'n nuam țhìn tehlul êm, ka chakna inni, ka tih dik tawk loh leh fuih ka ngaihna lai in rawn sawite hi a hlu zual, engkimah ka lâwm vek mai


Show post links
Top

[Ngaia]

Lovers

Chapter ~15

By~ Rengpuii Lushai






Hun a liam ve zêl a, kha zân bâk kha U zomuana nên pawh kan inhmu leh tawh lo, kei pawh zîngah computer class kalin chhun lam chu eng êm êm mah ti lovin ka awm ve tawp rih a ni ber. Hna thawh mai tùr a vâng si, rilru buai map châng a tam hle, ka naute pawh exam hmachhawn mêkin an phâk ang tâwka an zir nasat ve thu ka nu kâ aţangin ka hria a, Aizâwl awm theih loh mawlh kha a nia an hlauh dâwn ni.





Nu Sawmtei min sihhmuh a țhiannu Dàwrte chu ka bel chiang a full time lutuk ang chi chu a rem chiah lo ka ti bawk si thu tlûkna siam harsa ka ti kher mai, ka thil zir tùr nên ka naute rawn chhuk theih hun zawng zawng hisap a ngai telte chuan ngaihtuahna a ti buai lo thei lo, ka thil zir tùr uluk taka ka ngaihtuah hnua ka thlan computer class kal ti buai lo tùr ka duh bawk si, ka nu leh pa ka sawipui hnuah an thu tlûkna angin nu Sawmtei țhiannu bulah chuan ka thawk dâwn lo ta phawt chu nia, ' hmanhmawh vut vut lo a ngaihtuah chî a nih chu i thil zir tùr nen i naute uap pah kha a tâwk viau a ni ' ka pain a ti mah se ka rilru chuan a dap kual nasa viau; chu chuan kawng tam takah u Zomuana nên a kan inkâr ka ngaihtuahna a la pêng a lehlam zâwng tak chuan ka lâwmin rilru la pêng tùr ka mamawh tak ka tâna țangkai bawk si a ni ber e.







" Nizâna a status te kha ka hmuh loh a hlauhzia kha hre rawh, inhmu lo ula khatiang khân a status lovang, i tel lo paw'n ka nung thei lutuk, i nu min sawi dàn zawng zawngte hi ka hre leh vek zêl a nia aw, ka ngawi mai mai bîk dâwn lo, nitei pawh a lawm lo lutuk, " Rini'n a beka phone chuktuah chunga a lo tih hlawih hlawih chuan ka thaw hak, tualzâwla țhutthlèngah chuan min hnungchhawn zâwnga țhuin kut zaizirte nên meuh a ni a țawng ni, a fa paina pa hi Rini aia naupang tê niin an thu a inbât reng mai ni, aia naupang tia thunun a tum luatah hian a chêt sual ka lo hlau țhìn; ka thu sawite chu a pawm ve àwm dèr si lo, țan viau han tum pawh hian amah hi a indah hniam leh vek țhìn, a mipa nu lahin a ît loh sa nâklaiin a ti hel tùr zâwng ringawt hmangin a chhâng lêt a, an inchhal khât tawk reng mai a ni.






Zànriah kan kîl lai chuan ka tum dàn tak chu ka sawi chhuak a, nu Sawmtei mitmeng phar deuh ãk chu ka hmu hman reng, " khawiah nge i thawh dâwn, a ngaiah khan thawh i tum leh chu a ni êm lo'ng chu maw, " a rawn ti chhuak nghâl chiah rêng a, min ngaihtuahin min hlauhthàwnpui na ka lo hre thiam lo țhìn kha atân hian a lo na țhìn ngawtin ka ring a ni, ka tum loh thu leh ka nu leh pate nên a kan inbiak dànte chu ka sawi luam a, " Chd-a be teh, kei paw'n ka lo sawi tho ang a, an la lian lo nâin an țhang chak khawp a nia, an chhawr ve leh chhâwng thei mai thei chein ka va ring e, " Pa Rema'n a rawn tih chuan ka lo ngaihtuah thleng lo chu mãwl ka inti lutuk, a hma daih paw'n a sawi tawh tih ka ngaihtuah zawm nghâl zat, ka phûr thar kher mai ka hmachhawp neihte ka ka naute uap chunga tih theih kha ka mamawh chu a ni ber, ka phûr lutuk chu ka chaw eite chu ka lèm duak duakin ka hre mai!






Ka phone ri ral ral chu ka en vat, Kuri lo niin a duh a rawn sawi lehnghâl bawrh bawrh tawh, a tih ve dàn rêng kha a nia, "eng mah i tih rih loh chuan dàwrah hian daily a inhlawh angte pawhin lo kal rih la, nu Partei bulah ka lo sawi dâwn em ni, ka sawi hma hmain Yesss a ni nghâl mai dâwn a nia, " rawn ti zui deuh luam a, min duhsakna chu ka hriat thiam rualin, thil țha ber a nih loh avângin lo hnial vatin ' Pa Rema'n u Chd-ate hnuaia thawh theih dàn thil la chiang vak lo min sawihmuh ang te chu sawi vein' a chiang ang maiin ka sawi a ni ber e. Chutiang a nih tâkah chuan a ni pawhin min ti lui zui lèm lo.






Ka phone rawn nghawr det det chu ka en vat a, " Patea'n min rawn zâwt luam a, nangmahte paw'n rawn sawi ve ta che," tih u Chd-a hnên aţanga ka dawn chu ka chhiar nui var var a, mi hi han pawh a han tih hluai ka thiam lo lutuk ber hi ka nu min zilh fo na, mi lakah pawh hian phût hi ka nei tam ngai lèm lo rêng bawk a ni.




" Rawn biak che ka tum mêk a, a țhat hlauh chu i lo hriat tawh chuan, a hma khân i sawi thuak tawh a ka besei deuh ngawt a nia aw, " tih chu ka thawn lêt ve nghâl zat bawk, naktûkah lo chhoh a tum thu leh a țhian dangte pawh lo rawn der ve a ngai dâwn a chutiang vêl sawi chuan kan inbe ta reng a, hna chungchâng min mawlh rengtu chu tlêm chuan a veng ta huai e.





Ka Room kawngkhàr a rawnin rîk kauh kauh chuan lo chhâwnin ka hawng zui vat a, " Lâte, ka laklawh nasa, " tiin Aruati'n Sanitary Pads a rawn zawng duk duk a, ka lo kawl mai bîk lo chu dàwr kal puiah min sâwm ta chuk chuk a, kan in hi fâl tak a ni lèm lo nâin țhenawmte nên kan inkârah hian kawngkawi kawr reh deuh lai hi a awma a nuam lo duh ve riau.






Kan in piah thim deuh laia Car lo ding reng ka hmuh chuan ka kal muang deuh hlek a, a mak ka tih vang a ni zâwk mah. Aruati'n zawhna a ngah zui hlau tak chuan pângngai takin ka kal zui ve leh mai a, kan kal pelh dâwnte chuan ka inthunun na lamah ka hah vek thei, eng vânga ding reng nge a nih, ka mitsîr tak ngial paw'n ka en duh lo nâin a chhûngah khân a awm loh rêng ka ring lo.





Aruati'n a duh ang a lei zawh chuan kan lêt lehnghâl mai a, " Amawitea ngaihawm tawh zia hi, ka lo ngai ber a nih hi zànin te hian han dîl ila a thinrim leh hmawn hmawn ang chu aw, " tih paihin a nui hak hak a, ka lo nui liam ve tawp ringawt! Kan kal pelh leh tùr chuan min rilru a kap lo thei si lo, ka rilru hre lo zet a a titi siam siamnate chu ka inphenna țha tak a ni zâwk hial awm asin!






Ka huphurh rûk ang ngei chuan a la ding vung a, hlauh rûk ang ngeiin, " Tu Motor nge le, tûn ang hunah helaiah an din ngai pawh ka hre lo," tih pahin Aruati chuan a melh deuh rân rân a, " kal chak ang ka lo ti vat thung, " min melh zauhin a kal chak zui ve mai a, kan pelh hma hret chuan khawngkhàr chu rawn hawng rakin, " Inbia ang," a rawn ti thûm deuh dût a, a reh si a aw thum zàwi leh fiah zette kan awmna êng lutuk lote chuan boruak chu a ti nèlawm lo zual vek thei.




Hre lo ang mai chuan kûn deuh ngal chuan ka kal lui zêl a, Aruati'n zawhna ngah hmêl taka min melh pawh chu ka hre lo der a tawp, " Hmangaihzual," a rawn tih fiah fuk chuan thaw halhin ka ding dat a, " I huaisen ve siah! " Awkî ngeiawm ang reng tak chuan ka ti ve nghat, ka ngaih dàn dik tak a ni miau a ni, " Nang i dawihzep thung a," a lo tih nghâl nghut chuan Aruati chu min lo va luhsan tùrin ka ti ta zâwk a, he pa hian a duh tawhna lamah leh duh loh chinah pawh inthunun a tum ngai miah lo tih ka hriat tawh vâng a ni ber.





" Hna dang zawng leh tho tùr chuan bân kher kha eng nge a țulna?" A rawn tih hmuk chuan ka phâwk ang reng hle, ka rin loh lam daih a sawi vàng chuan ka rilru chu ka zahpui lek lek zâwk a ni, chûng thleng thlenga a lo chhut ve vek erawh ka ngei zual sauh.





" A țul a ka bâng, ka mamawha ka zawng leh a ni mai, i lo buai vak kha a ngai lo, ka hua che a nia chu mi awmzia chu i hriat khawp kha," nin hmêl zet awkî chuan ka ti ve leh kher bawk, he pa hian eng vângin nge he tia min ûmzui tlat, kei hi ka zuamawm viau zâwk nge, hnâwl nih kha tlawmah a la zawk!




" Kha nu vàng ngawt khân min duhnate kha a bo nghâl vek maw?" Chek hluk chung chuan a rawn ti leh nghuta, ka insûm hman tawh lo kal hnaiin ka va chûm nghâl pawp pawp a, a lo dawh ve tawp bawk! Min dàn tumna a nei bîk lova ngawi ngul chuan ka duh angin min chêttîr tawp mai ni!




A tâwpah chuan ka bânrek ve veah rawn man chutin min rawn melh chhuk ràn a, a mitmeng dam raihte chuan ka țah an ti chhuak hluah hluah, a ngeiawmin a sual thiam lutuk leh min cho chhuah a tum dàn kî chu ka duh lo, huat reng ka duhna thinlung hi dah len ka duh ngawih ngawih!




Tha zawi zet chuan ka kun deuh chu ka ding ngîl luia, " Ka duhna che reh nghâl lo mah se i laka lantîr leh ai chuan ka thi mai ang," thinrim aw khùr hlak hlak chuan ka ti nawk nawk a, " chu thil chu a thleng ngai lovang, ka duhna che a tel tawh miau avângin awlsam takin i hmet mit thei dâwn lo, " a lo tih dam thlupte chuan țah khum nghek ka chak tak zet.




" Kal tawh rawh," tih sup pah chuan ka chalah a rawn fâwp zauh a, duh lo lutukin ka chal chu ka lo nuai nghal nawk nawk bawk, a kut pahnih a Jacket iptea zen lûtin, min melh rân chung chuan a nui suk suk a, kei erawh ka țah a chhuak hluah a thinrim awrawl tâwpa vîn tawn tawn chu ka châk ber, chu erawh nuam a ti zual sauh dâwn tih ka hriat avàngin ka insûmna lamah ka hah vek tawh hial zâwk! Rum êm êm a melh chung chuan inherin ka kal nghâl sawk sawk a ni ber, ka lehhawi tawh lo va min en zui leh zui loh pawh ka ngaihtuah hek lo, thinrim na hlîrin ka khat a ni ber mai.






In chhûng ka luh chuan Aruati'n min rawn pan vatin, " tu nge kha pa kha?" A rawn ti sar sar a, nui lui sângin, " ka țhianpa ve tawp a nih kha," ka ti ta ngawt pek a, âwih loh hmêl zet chuan a ner nâng a, ka nuih liam ta ringawt.




Ka room ka luh vêleh chuan Kuri call tumin ka phone chu ka thai kual nghâl a, " Ka hna zawn vêl kha u Zomuana i hrilh êm emaw nu Partei zâwk pawh," a lâk rual rual chuan ka ti nghâl tawl a, " Hrilh lo nasa, eng nge ka hrilh ngawt ang, eng nge a i thawk leh duh si em ni?" Min lo tih lêt hleuh chuan thaw hakin u Zomuana rawn chêt dàn vêl chu ka sawi thuak thuak a, nui kar kar chung chuan, " I sawi chu ni lo se ka âwih miah lovang," a lo tih chuan, chhâng lo chuan ka ner nâwng ringawt tawh, duhpui vak lo inti si kha a țan ru riau zêl tlat chu ka hre thiam lo lek lek mai.



Kuri sawi hmangin 'hna zawn vêl leh ka thil zir tùr vêl chu a thu phungin a chhungte a lo hrilh ve a ni àwm e, ka uin a hrilh a niang, an chhe dèt dût e an in la zei sia maw ka u lah hi a hriat ațang a lo phûr ve vak ringawt lehnghâl ' tih vêlin a rawn sawi duah a, han hauh chiam na tham ni si lo chu ka ngaithla liam vêl ta ngawt a.






Computer class kal tùrin zîng kara ațangin ka inbuatsaih a, U Chd-a pawhin a thawhpuite rawnin anni'n rem an lo ti hlauh nên an office-ah ka thawk ve thei dâwn a, ka lâwm tak zet.





An hna ber hi Marketing agency niin phai lam company hran hran nên indàwr tawnna an nei rengin, anni'n Mizoramah an bungrua supply na tùr an buaipui sak thung a, phai lama rei tak tak thang châng pawh an nei a, Mizorama an bungrua hralhna tùr buaipui sak chu an hna ber a ni bawk. Receptionist ang reng deuh a ni ber mai ka thawh tawk leh ka tih ve theih chu, an Agency hnuaiah hian company te nau an buaipui ve nasa tawh hle a, buaipui tham an lo nei ve nual tawh bawk, ka khawih hma chuan an zînga pakhatin a kawp mai țhìn a buaithlâk châng awm mah se an la lian lutuk bîk lo nên an ti ve naw naw thei tho nâin, ka mamawh êm avàngin kan inpui tawn a ni ber mai, hlawh erawh tam lua lo mah se a pângngaiin ka vannei tak zet ani.






Khawvêl hi chu a lo zìm tak zet a ni, ka computer class kalna a kan instructor chu U zomuana țhianpa, U Chhuantea Birthday day kan lawm zâna kan ruala kal Ricky-a kha lo ni rengin, kan inhmu thut chu kan mak tih dàn a inchen tih a hmêlah a lang reng mai! Inbiak vak theih ni hek lo min zirtîr mawp mawp a, a mâwiah tak tak ' Teh hlawl chuan, i țha maw inhmuh a khât hle mai ' te chu a rawn ti ve luam a ' ka țhat thuin ' ka lo chhâng ve mai bawk, a bâk han sawi zui tùr chiam erawh a awm lèm lo nâin rilruah erawh kha zân kha a ngai ngaiin a rawn lang leh lo thei lo, chu erawh ka ngaihtuah thui duh lo 'Amah' ngei pawh kha!





Zân tam mu thei lovin min siam a, huain thinrim mah ila ka huat theih tùr leh ka thinrimna ka hrîk thlâk theihna tùr talin rawn inlâr se tihte thlengin ngaihtuah châng ka nei a nih kha, u Mâ-i kher kha a nunhlui a mi lo ni lo se tihte hial ka suangtuah thlen châng lah a tam, thinlung tak ni lova eng emaw vâng chauh zâwk a invêng nia inhriat chângte, a sawi ang chiah a ' Dawihzep leh mahni inbum ' mai ni tlata inhriatnate chuan min luah khah vek châng lah a tam, chu chuan ka nun luah renga ka chhan tùr ni si, ka chhan theih si loh zawhna hlîrin ka khat a ni ber e!





Ka nau Zohera pawh a zirlai țha taka pass in hmunpui lam a rawn pan a, a result a țha ve bawk nên a college duhna berah a lût thei dâwn bawka a phûr khawp mai. Kan unauin kan awm ve ta rek rek a, nu Sawmteite'n min ngaihtuah êm êm reng a, hmun khatah awm lo mah ila thla an ti muang hliah hliah țhìn.





Ka hna pawh nitin kalin an fel hlawm bawk a, boruak a nuam țhìn tak zet, an office te chu a la têin an la chang tlung lo hle a, kal chhuak reng an nih avângin an la lian over lo bawk a tâwk erawh a tâwk ve viau mai.





Kan tlai bâng kan haw chu beisei loh zet ka hmu leh ta, u Chd-a nên haw rual tum kan ni nên a motor lam pan mai ka tum chu motor aţanga lo chhuakin, " inbe teh ang, " rawn tiin a hmêl en aiin a aw a pângngai daih, kha zân aţang khân kar khat dâwn liam leh tawhin, kha mi zîngah khân min rawn call thoin ' hun thâwl ka pe ang che ' tiin a reh zui ta vang vang kha nia, reh hlen erawh a tum loin a sawi ang chiahin a awm zui tih hriat takin a hmêlah pawh tumruhna a lang chiang hlê.





" Inbiakna chhan tùr kan nei lo, " tia kal mai ka tum chu, " Thu dik hi tlàn chhiatsan reng theih a ni lo a nia, thu dik tak i hriat duh chuan min rawn zui la, chuti chunga i rilru i la sawhsawn lo a nih chuan ka kalsan hlen tawh ang che, " A rawn ti deuh khawl khawl a, ' kalsan ' tih thu chuan min ti danglam lo ka tih chuan keimah chiah ka inbum a ni ang, kalsan hlen ni tùr angin ka lo la indah ngai miah lo tih ka hre chhuak zawk bawk! Chu thil chuan ka luhlulna ringawt a nih zia leh a laka huatna ka neih ve chu amah ni lo se ka tihna ringawt a nih zia a rawn nem ngheta, ka thinphu rang nghâl dawt dawt chuan chu thil chu a ti chiang viau bawk!




Ni e a lak ațanga ' thu dik ' tih thu chuan a laka ka rilru puthmang dik tak a rawn ti lang nghâl ngawt chu thup nghâl tumin inthunun tum viau mah ila ka rilrua beiseina lo awm nghâl mai chuan a thup hneh loh zia ka hre chiang viau bawk.




Kan hma a thlân lung uluk tak a enkawl hnum hlarh chu ka melh tlawk tlawk a, ka bula mi thâwk la hawk rî leh ka lungphu rang dawt dawtte avâng chuan ka zâm a, chu thlân chuan chiang takin min rawn en tlang ni mai te'n ka hria, ka chhûngril chu a vâwtin a khùr chhuak lo chauh a ni.




" Ka tih palh, " thâwk la hawk a rawn tih chuan, ka melh nghâl vat ; mahse, kei min be lovin thlân lung chu a bia tih ka hre thiam nghâl vat thung, lo thaw ve hakin ka kut chu ka hum ruh nghâl tlata, " ka hma ka sial ve tawh dâwn avângin min dem suh ang che, " tih chuan ka lo melh leh háw tawh! A hmêl thim khap leh a mitmeng dur khupte chuan ka thâwk a ti rangin ka lo hah ve êm êm ringawt mai ni!



"Ka nunah hian ka hun lo paltlang tawh engkim hre tùra ka duh hi ka tawn ka inring ngai lo, nangchu i danglam, a vawi khatna atân tak meuh engkim min hriatpui tùr a ka duh ka tawng che a," tiin a rawn nui hawk a, " ka thiam thu emaw ka thiam loh thu emaw chhahchhuah ka tum ngai lo, mite chuan rilruin țan lam neisain teh dàn dik lovin mi an teh fô țhìn. Insawifiah emaw ka tum ngai chuang lo, tûnah erawh engkim hrilh tùr che hian ka thinlung hian min nawr a ni," tiin harsa tih hmêl zet chuan a rawn ti thâm țuak a.






"Bum tâwktu kha bumtu zâwk angin khawvêl chuan min kâwk a," Seh chilh zet chuan a rawn ti chang hrâwk a, mak ti lutukin ka lo melh tlawk tlawk thung! Phuahchawp mai mai sawi a ni hauh lo tih chu a hmêl awm dàn, natna rawn lang zawk zawk ațang chuan a hriat hliah hliah, a tân sawichhuah a harsat tùzia chu a khât tâwka thâwk a lâk leh hawk dàn ațang chuan a hriat hluah hluah bawk, a bula awm thlengin chu ipikna chuan min man pha hialin ka hre mai!




" Mi zawng zawng hi bumtu a ngai lêtin ka hua, nang ngei pawh, " tiin mitmeng dul zet hian min rawn melh chhuk ràn a, a sawi leh tùr nghâkhlel leh huphurh êm êmin ka lo melh lêt ve kar bawk.




" Ani hian mipa dang a hmangaih thu leh a fa hial a pai thu min rawn hrilh a nih kha, " Sehchilh zeta a rawn tih chhuah leh chuan, amah chu enin ka hawi â hau a, thlân lung chu ka melh leh vat bawk awmze nei lo zet chuan ka melh tawn chhêna, ka thu hriat chuan min ti mang vek a sawi tùr reng reng ka hre lo, ka chil ka lem khalh ringawt a chu chuan eng mah a ti dang lam lo, ka thu hriat mak ka tih lutukna chiah bâk ngaihtuah thlen lah ka nei hek lo!



Ka kut hum ruh tlat chu a rawn hum a, a kut vawt thlur leh thlan deuh chualte chuan a thil sawiin a nun a nghawng tawh dàn min hrilh ve ni maiin ka hria!






Comment hlu tak tak min hnuchhiah sak tute chungah ka lawm e, heng te hian regu loh hlauhna te min pe a, ka tan in hlu, chhiar ve tho la comment ve lo te pawhin in hmuhdan tawite tal min hnuchhiah sak tur in ka sawm che u


Show post links
Top

[Ngaia]

Lovers

Chapter ~16

By~ Rengpuii Lushai





Boruak chu a reh tlawk tlawk a chhûngril erawh a let but but thung si, ka kut a hûmna chu a nghet țhain a na lek lek hial zâwk a ni, " Kei min phatsan tùra huaisenna a neih chanve tâl kha a chhûngte hmachhawn nân nei ni se, khatiang ang tâwpna kha a thleng miah lo tùr, " tiin thâwk a la hulh a, a mak ka ti tih bâk eng mah ka ngaihtuah thiam lo.




U Mâ-i'n chutiang thil ti duh tùr khawpin nungchang le lo a neih kan hre ngai hauh si lo, ngaihzâwng nghet neiin pângngai takin a khawsa tih chu kei ni a chhûngte chauh lo pawh vêng chhûng miin an hriat dàn a ni vek ang chu ; mahse, phone hlui tawh tih hriat tak rawn phawrh a u Zomuana laka a inpuanna zawng zawng, amah buma kal zêl tùra huaisenna a neih tawh loh thute, palai meuh an han kal tâkah phei chuan 'Dâwt hian min hnawh hlum mai dâwnin ka hria' ti hialin a nuna mi dang a bumna chuan a nghaisak thu thlengin a ziaka chûng zawng zawng chhiar chuan thil ni thei lo leh âwihawm lo kha thu dik a nihzia a pholang chiang êm êm bawk si.



Engkim mai chu a ziak chip chiar êm êm a, hnam dang mipa tlâng mi tho niin a thil zirpui ni àwm tak a ni, U Zomuana bulah pawh inpuana khâng thleng thleng kal a tum loh thute; mahse, a mipa chuan accident tâwka a boralsan tâk sî-ah chuan a lo rai hman bawk nên a nih nih ni tùrin u Zomuana nên an inkâr chu a kal tlangpui zêl a, mahse; lang chhuak maithei dâwt pai reng na nâ nâ nun nuam a hmang ngai lo tih hriat takin ' dâwt hian min hnawh hlum mai dâwnin ka hria' a ti hial rêng a nih kha, a inpuan zân vêk hian a chhûngte hnênah pawh thu dik a sawi nghâl tùr thu sawiin palai thu kal lai pawh a rawn ti tâwp a nih hmèl; mahse, a sawi ngam lova kawng awlsam zâwk nia a hriat a thlang ta zâwk nge, nu Sawmteite hian hre reng chung a zêpin an rilru nâ hian mawhpuh tùr zawngin u Zomuana hi an bûr bun zâwk, ka ngaihtuahna vak thui lutuk chu duh lovin ka lu chu ka thing zui nawk nawk a, ka thu hriat hi a lian tham mah mah a ni.





" Ka tih palh, ka hma ka sial ve a ngai tlat a ni, ani hi chân ka duh si lova," ti a phun supin thlan lunga hming inziahna lai chu a melh ràn a, min kai zuiin chu lai hmun aţang chuan min kalsawn pui nghâl bawk, eng mah ka sawi lova a tih ang ang chuan ngawi rengin ka awm tawp mai a ni, ka thu hriat zawng zawngte khân min hmet chau a, ka thâte chu a zaw vek maiin ka hre hial bawk.




Motor chhûng kan luh dâwn thleng paw'n kawngkhàr min hawnsakin engkim min buaipui vek a, ka ngawi renga ani paw'n eng mah a sawi bîk lo, kan rilru kawm chu kan duh zâwk ve ve a nih hmèl lungawi lohna lam pawh a lang zui lèm lo, țawngchhuah hi hetiang êm êm hian a lo châkawm loh thei tih ka hriat phah hial mai, țawng chhuah châkna rêng rêng ka nei lova ka awm mãwl tawp a ni ber.




Kan inkawt thleng min thlah a, ka chhuk dâwn a, " I thu tlûkna eng pawh ka zahsak ang che , " tiin min thlah a, chhâng lèm lova ka melh zawk ringawt vâng nge thâwk a la hawk a, ngaihven zui tawh lèm lo chuan kan inpanna step-ah chuan zawi zetin ka chhuk thla hnak hnak a, kawngka inkalh tawh loh dànah Zohera leh Kimkimite pawh an lo haw tawh a nih hmèl, a tlai tawhin haw loh a hun tawh lo rêng bawk a, ka boruak tawnin thil dang min ngaihtuah chhuahtîr miah loh avàng chuan ka inthiam lo ru ang reng phian zâwk a ni.





Ei rawng an lo bàwl peih vek tawh a, ei mai theih a nih tawh tho vang chuan ka intleuh hmasa zuai a, chu chu ka mamawh rih ber a hriat vang a ni pakhat bawk. Zànriah kan kîl lai chuan Kimkimi chu a titi barh barh reng a, ka nu hi a chhunin a nêma a țawng duhin kan chhûngkaw boruak siamtu ber a ni țhìn rêng a, ka pa hian a ngaiin an inpafa zual bîk hian ka hre țhìn.




U Zomuana chuan min rawn be buai tawh lèm lova, thu dik ka hre tawh a ka thu tlûkna eng pawh min zahsak tùr thu a sawi a nih kha, ngaihtuahna erawh a mangin a vai riai reng a. Nu Sawmtei'n thu dik a hriat loh phei chuan ka hmachhawn tùr thil tam tak awm theite pawh ka ngaihtuah thleng pha vek ; mahse, chûng thil avâng ngawt chuan mahni duh dàn leh duhthlanna pawh pawm ngam lo nih erawh ka duh miah lo, an fate nunhlui liam tawh vàng leh an mahni vènthàwn vàng ngawt a ka nun tih chêp emaw ka duhna thup bo a hrehawm taka nun hman ka hlau zâwk, a chhan chu ka theihnghilh mai mai dâwn lo tih ka chian êm vâng pawh a ni mahna!




Computer class ka kal zawhin kan office chu ka pan tlang nghâl a, chaw ei a haw leh a buaithlâk ka tih vâng hian ka inhnawh puar mai țhìn a, buai lutuk ang kha kan nei lèm lo bawk a khawharthlâk lek lek zâwk hial țhìn.





Vawiin pawh U Chd-a a zin dâwn avângin Rinawma leh U Hlutea nên kan ni leh deuh tawp mai a, office Assistant ang ve deuh an nih ber chu. A rem remah ka pui ve lawp lawp a, vawiin lam pawh buaina chhetê kan nei a, Lunglei lama kan bungraw supply pakhat a lo fuh chiah loh avângin complain a rawn lût a, en fiah tùrin u Rda-a a kal bawk a ni. A theih ang angin kan thil supply nate nên an harsatna chinfel leh bungraw neitu lamte nên inbiak rempui a ngaih nawn châng a tam a, buai viau nite awl nite awmin kan ni hman dàn chu a in ang lo nuaih zêl.





" Vawiin chu tlai lam a thlahtu nei țha bîk kan awm leh dâwn em?" U Hlutea'n a rawn tih chuan ka melh nghâl vat, a lo nuih tâk vur vurah chuan nimin lam u Zomuana nên kan inphur kha an hmu hman tih ka hre thiam mai, " Ngawi rengin a lo to viau elo?" Rinawma chuan a lo ti ve zauh bawk a, " in ninawm, chhûnah eng nge kan ei dâwn, naktûk aţang chuan tiffin pai tawh ila a țha ang," tiin thil danga pakaipui tum chuan kan thu sawi ka thlâk vat a, nui vur vur chunga Rinawma min melhna chu ka nuih lêt ve tawp.






Tlaiah Kuri'n 'chaw ka rawn ei phei dâwn min lo nghâk rawh' a tih vângin hmanhmawh lèm lo tak chuan ka insiam a, " Ngah kher ngai lo awm sa kan awm ve reng a," Ka nghah hre tawp și lova U Hlutea chhuak tùrin a rawn tih leh kher chuan ka nui chhuak ve hak hak, mi fiam vêl hi nuam a ti ve thei a nia.





Ka phone rawn ri ral ral chu la vatin ka chhâng nghal thuai a. Kuri lo niin, a nuin Bazâr a tlang lawk tùra a tih vângin lo va hawsan leh mai tùr chuan min rawn ti leh sia, Rinawma nên chuan kan inphur ta ngawt a, kan vêng a inang lo bawk si nên ka inthlahrung viau; mahse, mipa zahawm awm dàn mawi hre tak tih takah ka hnial hneh lo nasa, ka inthlahtîr ta poh chu a nia.





Kan inthleng min thlah thlapin, " Zànah pawh la rawn len ziah tùr a nih hi," a tih chuan lo lêng tùr a tiin kan inthlah liam zui nghâl a, a kal fel awrh tihin chak tâwkin car pakhatin min rawn tlàn pel ve nghâl zat bawk a, lo hawi deuh háwin a hnung lam chu ka en vat a, ner nâwngin ka chek zui tlak tlak ringawt, Zomuankima ni miau hek!





Lalkuri'n vawksa rêp a rawn lei chu chhûm leh hnuhnawhin zànriah pawh kan ei hmâ lo viau mai, Kimkimi nên chuan titi barh barhin Zohera nên chuan kan ngaithla a ni zâwk mah, " U Kur kâr laklawhah chaw lo ei ziah la," Kimkimi'n a tih chuan Lalkuri nên kan nui chhuak hak a, Zohera erawhin a nau chu a melh rum nasa viau, kan inren mai bâkah kan invawm luhna a la rei lova a rem dàn dànin kan la khawsa ve naw naw rih kha a ni mai sia, a ni la nau ve deuh tân chuan nunphung thlâk thut chu a har ve deuh maithei a ni.





" Nu Partei'n a sawi leh zeuh zeuh țhìn che a, sawi tùr hi ka hre lo thei sia, a nuam lo duh zâwk tak tak a ni," a haw tùr ka thlah step kan pan chhoh lai chuan a ti siam siam a, " tûnlai phei chu ka hne tawp u Thari pasal cousin kha a rawn lawr peih lutuk a, dàwr an nei ve tho sia, an inhralh thei awm lo hi ka tia, " tih pahin ngeiawm deuh chuan a nui zui haka. A titi rawn vawrh chhuah dàn kî chuan thiam takin min dek ka ti mai, ka tân ngaihven hurh anga lan hrehawm mah se ka ngaihthlâk nuam tih êm êm a ni tho si !




U Thari pasala cousin a sawi chuan ka beng a verh êm êm a, " Tu nge chu chu," satliah ang reng taka ka tih liam puat chuan ka nuih erawh a za viau, kan inveh nasa dun lutuk chu kan hre ve vein ka ring, " Aw, u Zomuana kawp țhìn, Sports items vêl zawrhna dàwr lian deuh an nei alàwm, lokal sek lo hian an dàwr vil zawk se a hlâwk zâwk ang maw le," a ti deuh tan tan a, a tâwp lam chu a țang tawh hlê, an dàwr hmingte a sawi chuan hriat chhuah ka nei nghâl a, ka rin pawh chu a dik ngei ka ring bawk.





Kan inthlah fel hnu chuan kei pawh chu ka lût zui ve nghâl mai a, ka naute pahnih lehkha zir menpui pah chuan naktûk lama chawhmeh tùr siam lâwk chi dal vêl chu ka siam lâwk vek a, hetia ka tih hian chaw chhum chiah ngai a ni tawh maia, an tân a awlsamin tlai lam erawh chaw an lo chhuanga ka hawin chawhmeh rin nawn chi bâkah siam awlsam ang ang ka siam tawp zêl a, kan khawsak dàn pawh kan insiam rem chho ve hret hret zêl a, kan thiam ve fu tawh mai.






Ka tih tùr ka tih zawha ka inbual zo ka inthlâk lai chuan Room Kawngkhàr chu kik pahin, " u inlêng i nei," Zohera'n a rawn tih dût chuan kawngkhàr lam ka melh nasa mai, ka thin phu rawnin thum rawn nghâl dat dat chu ka duh lo viau. Hmanhmawh tak chuan ka inthlâk sawk sawk a, ka sam la huh chuap chu mawi lo ti viau mah ila tuam lûk chung chuan ka chhuahpui ta thova.





Kan Room hi Kimkimi nên kan ințawm a, tlêma a pûk namthlak deuh hlek a nih vâng hian an lo lût thâwm ka hre lo a ni maithei a ni, bâkah lo țhute ka hmuh phei chuan thâwm han nei hlut chi kha an lo ni lêm lo êm a ni, " Zânah lehzêl inhmuh a ngai a nih hi," nuih vur vur pahin Ricky-a chuan a lo ti hlut a, ka nuih lêt ve var vara ka beisei loh lutuk zia erawh ka ti lang lèm lo, a bula țhu chuan min lo en chîk nasa mai si inbual dai chauh e ti lo chuan ka sa pap mai!





" Thingpui kan lum ang aw," sawi tùr ka hriat loh êm avàng chuan ka ti ta ngawt a, " Min hawtîr hma i va'n tum ve," Ricky-a chuan a lo ti nghâl zat a, nèl taka min be nghâl thei chu làwm viau mah ila nuam tih vak lohna riau hi ka nei laklawh tawh tlat amah ka hmuh hi chuan ; mahse, pângngai tak chuan, " Chutiang thu a hman lai êm mai," fiamthu deuh chuan ka ti ve nghâl zat a, u Zomuana lo nui suk suk pawh chu ka melh pah zauh bawk.






An lêng rei lèm lo, Ricky-a titi chu kan ngaithla a ni ta ber, innêl sa kan ni lo bawk nên kawm dàn ka thiam lo kher mai, a sawi ang ang chu a mawi tâwka lo zawm bâk sawi tùr hlawl ka hre lo chu ka inkhawngaih zâwk, pakhat lah chu a biak chin tê bâk a țawng meuh lo a ni ber e.





An haw tùr ka thlah chuan Ricky-a chu phone a mi be lung lung chung chuan kan hmâah a pên thauh thauh a, a hnungah chuan kan inzui chho dûn ve bawk a. A din thut chuan ka melh chho vat a, " naktûk zîngah i call ka lo châng ang," a tih sup chuan ka meng buai deuh nak a, sawi zau pawh tum lêm lova min melh ràn reng avâng chuan ka hre chhuak ve leh mai bawk a. Ka beng lo sa nghâl hat hat keimah chauhin ka hre thei chu ka lâwm viau, ka lâi thar deuh țût lehnghâl ka mit chu ka la sawn vat a, min chhiar hnehsawh si ka sawi kher ngai lovin ka chhûngril hi a hre lutuk tih ka hre bawk.




" Eng nge zîngah kher?" Ka tiin ka zâwt leh hnuhnawh a, " Hmeichhiate chu zànah in inngaihtuah vak vak zêl a ni lo'm ni?" Nui suk chunga a tih chuan, " I hre khawp ang chu ," ka lo ti chang deuh fawl thung, ka awkî ka hriat thiam chuan ka îp zui nghâl châwih bawk, ka hlauh ang ngeiin a nui nghâl hawk bawk.





Ka mut tawh hnu pawh chuan a thim zâwng ringawt a thlîr ka hlauh êm avâng chuan ngaihtuahna fîm pawh ka hmang duh lo, ngaihtuahna fîm pawh hmang eng ang mahila kan rinnain a zui loh chuan awmzia a nei chuang lo bawk a. Kuri biain kan awm dànte chu hrilhin ka sawipui ta zâwk a, ' I chhûngril kha ngaithla la chu chu thu tlûkna siam nan hmang rawh, eng thu mah pawlh daltîr suh ' a rawn ti ve thliam bawk a, ka duhthlannaah chiang viau tawh mah ila ka țhiannu awkâ hriat chuan inrintâwkna min pe lehzuala. Nu Sawmtei hre chhuak nghâl zâwkin inthiam lohna erawh ka nei lian lèm lo, ka duhthlanna avànga ka ti sual a nih pawhin a tuar tu tùr chu anni ni lovin kei ka ni, a tawrhna mahni hmasial taka a lo la vung a nih pawhin thu dik hi engtikah mah a up hlen theih chuang loh, chutih hunah chuan a hre thiam thei mahna. Tumah en lova ka chhûngril chauh ngaithla tùr chuan thu tlûkna ka siam ngei ang!






Ka phone nghawr det det chu ka en vata, min ti nui sak ' Ka nghâk che ' a rawn tih sup chuan, ka kal nghâl tùr thu sawiin ka inkhung sawk sawk a, " U Hlute, ka kal aw ka rawn lêt har lovang, " ka tih chuan phone a hmang laklawh bawka nui chunga bân min lo vai khum zeuhin a bu liam ve mai a. Rinawma chuan min lo en chîk nasa lutuk chu lâi zetin ka nui ta ngawt a, " Rawn lêt tùr i awm tawh lo ang e aw, zànahte rawn lên ka la tum ve kha aw, rawn bo nghâl suh ang che, " thu tak zeta a tih chuan, ka nui chhuak hak hak a.






Motor chhûnga ka țhut luh hnu chuan min lo melh vung vungtu chu ka nuih saka, nui ve sukin, " ka tlànbopui dâwn che ," a lo tih dût chuan ka nui hak hak a, " i over thei sia, tûkin te khân khati taka hmâa min rawn call thawh kha a țûl ber lo chiang e," tiin ka melh deuh khai khaia.



"Zîng kârah hian thluak a fîm duh alàwm, bâkah thil dang zawng zawng i ngaihtuah hmàin a hmasa ber nih ka duh bawk," mitmeng tak ngula min melh chunga a tih chuan ka ner nâwng tho, engkimah hian a châng chuan a ti lutuk deuh tih châng ka nei țhìn; mahse, zia tê tê hi tu paw'n kan nei țheuh alàwm hei hi amah ti Zomuankima tu tak tiin ka ngaihtuah liam ve mai bawk a.





Kan chawlhna hmun chu a nuamin a dai raih mai, Dawhkàn a lo book lâwk sa thlap avângin chu lam pan chuan a thawktu fel tak chuan min hruai nghâl a. A chhûng an chei dàn felfai takte chuan a ti lang thianghlim zualin a hahdamthlâk ngawih ngawih bawk, kan order buaipui tùr lokalin kan duh zâwng chu kan lo chah nghâl mawlh mawlh a, a chah tam lutuk chu mak ka lo ti ru hlè, zîng chaw a ei lo lo niin ka hau deuh hlak hlak nghe nghe bawk, " Ka tho hma lutuk a ka muhîl leh a ka thawh tlai phah vek a, " a tih chuan over ti lutukin ka lo melh râwm râwm a, dâr khatah min rawn call tho a nia a tih tawh lam leh tih loh chinah chuan mi bâk hian a khawsa țhìn hi a danglamna a ni ve bawk sia, chhiatpui châng leh țhatpui châng pawh a ngah ve ngawtin ka ring țhìn, a nunhluiin a vuak lêt dànah pawh a lang reng mai.





" Nimin a mi kha inthlahtîr tawh suh aw," a rawn tih hmuk chuan ka thil ei lai chu lem khalhin ka en deuh rèn ráwn a, Rinawma a sawina a nih hmèl, " I sual a nih chu a, min thlah peih phawt a hnu," ka lo ti lêt ve hmak, tissue paper chuan a hmui chu hru tâwkin a thaw hawk a, " keima'n ka thlah thei che, kan haw rual thei reng alàwm, " dam deuh zâwka a rawn tih leh chuan ka lo thaw hak, ka hnial zui duh tawh lèm lo a thîkthu chhe hmêl thîp khui chuan boruak a thlâk danglam zui ka duh lèm lo bawk, bul kan țan chauha he a mizia hi chu a thil lo tawn tawh nên hriat thiamna thui tak ka neih a ngai dâwn tih ka pawm a ngai a ni mai.




Kan chhuah hnu chuan min thlahin a lêt lehnghâl vat a, kan hma zawk zawk tawh lo ve bawk a ni, tlaiah min rawn lam kawi tùr thu sawiin min chah uluk hle bawk. Min hrilh uluk lutuk chu ka lo nui a hmuh chuan a meng dur nasa viau, " Ka rawn tlai hlek maithei a, min lo nghâk tlat ang che, " a ti leh hrâmte chu amah nên chuan a inhmeh lo viau nâin, kan inkâra a thu neihna china a inti thupetu vêl lutuk chu dawnsawn hrehawm tak a ni lèm lo tih erawh ka chiang viau.





Hnaa ka lêt leh hnu chuan ka khua a har nghâl veng veng mai, hnathawh leh chu châkawm lo duh tawh tak a ni, Rinawma leh U Hlutea pawh an lo buai lèm lo tih hriat takin an lo țhu duh dah hlè a, min lo fiam zui hlutin kan han nuiho leh rih a hmeichhe dang awm lèm lo mah se hrehawm ka tih phah lèm lova a nuam zawkin ka hre hial mai.




Tlaiah chuan min lo lam kawi leh ngei a, a insawi lâwk ang chuan nghah erawh a ngai lèm lo thung, ka thawhpuite pahnihin min fiam zuk zuk renga, " Zànin chu aw," Rinawma'n a tlàn chhuah hmaa a rawn tih zauh chuan nui hak hakin ka lo bu ve nghat a, min fiam mai mai a nih ka ring , a lo lèn tak tak pawh ka ring lèm lo.




" Kha pa sawi awmzia kha eng nge?" Motor chhûnga ka țhut luh rual chuan a lo ti hluk a, ka melh deuh haw a ani erawh chuan hma lam a lo melh ding ngar thung.





" Zànah ka lo lêng ang a ti, " pângngai tak chuan ka lo ti lêt ve mai bawk a.



" I naute Lehkha zir an nia inlêng lo neih dur durte kha a țûl lèm lo khawp ang," tih hmuk paha a tlàn chhuah chuan, ka nuih a za tlat pek a. Ka nuih chhuah hak hak pawh chuan min melh duh eih lo, ding takin hma lam a melh ràn a, " i thil sawi chhuah leh i rilru kha chu a inpersan daih ti raw, " nuih za aw țial rian a ka tih chuan, " Lo lêng tùr dik ka lèn chuan a tawk viau, " min en duh miah lo chuan a ti leh thâwr a, a thu vek emaw a ti tlat hi alàwm ka nuih ti za tlat țhìn tu chu, a thîkthu pêk chhiat dàn hi dawnsawn harsa khawp a ni lêm lo bawk ka la nuih liampuiin ka la hlimpui viau rih chu a nia, a lakah eng mah ni lo ila min inti neitu dâwn si lova.




Kan inkawta Car lo ding chiah leh a chhûng ațanga lo chhuak mêkte ka hmuh chuan ka taksa chu a țangin ka thaw a sa nghâl phat phat bawk. Anni pawh chuan min rawn hmu ve nghâl tih hriat takin chîk tak chuan min lo en ve ràn bawk. Ka thin rawn phu nghâl dat dat chu thunun tum chuan thâwk ka la hak a, ka bula mi chu lo hawi zawkin a ding zui ve nghâl mai bawk.




Hriat thiam har zet chuan min rawn melh vang vang a, chhûngril phu dut dut chuan ka lo nui lui sâng a, a lem ngawtin ka ring a ni, " Hlauhna chhan tùr i nei lo a nia, " dam thlupa a rawn tih chuan, ka lo bu nghat, " kal rawh ka lo en ang che, " a tih leh chuan, a ngaih loh thu leh kal nghâl tùra ka duh zâwk thuin ka lo chhâng lêt vat a, mitko ti hniam khuia min melh chuan, inthunun tum tak chuan ka nuih lêt var var a, nui suk chung chuan zâna a lo lèn tùr thu sawiin a tlàn liam ve nghâl mai a, ka thaw huai zawk min kalsan vat se mahnia hmachhawn ka duh ber zâwk a ni.





" In office bâng in lo kawi tihna em ni Pa Rem, " inthunun tak chung chuan ka ti nghâl thuai a, " Kha pa nên khân eng inlaichinna nge in neih," Pa Rema nên kan inbiak mêkna hre lo ang hmak chuan, nu Sawmtei chuan a rawn ti chang nghâl fak a, ka rin dàn tâwk ni mah se a aw chhuak kha lutuk leh a mitmeng min huat hmèl lutuk chuan ka awm a ti nuam lo zual sauh bawk .




A țawngka chhuak chuan min ringhlel a min zâwt chauh a ni nâin, a mitmeng erawhin a zawhna min zawh chu a chhânna pawh nei sa ang vekin a ni min melh, huatna a khat mitmeng kha zetin!



Sunday zân kan awl ang a, Thawhțan zânah kan Lovers ho leh dial dial dâwn nia. In comment hlu takte hi min nawr kaltu a ni tih kha hre reng ula, inchhiar zawhah a hmunah inhmu leh vek ang u aw


Show post links
Top

[Ngaia]

Lovers

Chapter ~17

By~ Rengpuii Lushai






Hlimna avânga kan nuih rual hian kan kiang lawkah hian thinrimna leh huatna hi hnai têah a awm tel ve reng țhìn tih hi theihnghilh mai a awl țhìn mang e!




" Kha pa kha tu nge a nih i hria em?" Ka chhânna pawh nghâk zo lo chuan thinrim aw khùr hlak hlakin a rawn ti leh nghâl zat bawk, " In chhûngah lût phawt teh ang u," Pa Rema'n a tih chuan ka lo thaw huai mai, in chungah hian a neitute an awm vea khawlaia hmuhnawm siam chu ka duh lo tak zet, a țhiante an la ni zui!





" Ka thu sawite kha pawm àwm deuha awmin min lo bum char char a ni maw, in pahnih khân mi thu hmun in nih kha, nang pawh amah ang chiah i u buma phiarrutu, i danglam chuang lo," duhthaw êm êmin a ti khùr leh hlawk hlawk a, a hmui sai dar darte chuan a chhûngril thlenga a nat zia leh huatna a pai rei tawh zia an ti lang tel hialin ka hria.





"Nu pui..." Ka kohna chu sawi loh eng mahin a thinrimna leh a natna chu a ngaihventîr tawh lo, chu chiah chuan a ni amah chu thunun tawh. Car Kawngka a khàr rîk țhuai chuan ka chhûngrilah ka lo phu zâwk a, pa Rema'n, " Insûm ve deuh țhìn teh, " a lo ti ve tak nâin ngîl auh a țhuin hma lam a melh ngar a, a hmèl lan dàn chuan min ti tâwt hluah hluah engtikah mah pângngai taka kan sawi dûn theih ka ring ngam lo tûna a lan ațang hi chuan, " Lâte, kan phei phawt ang nge aw," pa Rema'n a tih chuan melh zawkin ka bu zui nghat a, ani erawh a inthunun tih hriat takin eng mah thleng lo ang maiin a dam thlup reng a, a tuar lo bîk a ni àwm dèr si lo. Ding khawng lahin ka bag hrui chu ka hmer nghet êm êm ringawt mai ni, nizàn lawkah ka suangtuah a, nî êm pawh a la ral hman lo asin, kan intawn hnua ka nun a thil thleng engkim inlet kual but but maite hi a rang lutuk vek a ni.




Thu dik lo hmangin huatnate'n amahah hmun an chang thûk tawhin, chu chuan amah vaw chhiain a bula mite thlengin a ti na hial thei maithei a ni, nu Sawmtei vàng leh amah hlauhna vâng ngawt chuan tâwpsan ka tum dèr si lo. Thu dik a hriat erawh a ngai tih ka hria, a pawm emaw pawm lo emaw hrilh ngei chu ka tum a, huatna pai reng tùr chuan a nun hrehawm dâwn em mai, a lo dawnsawn dàn chu eng pawh ni se, hrilh ngei tum chuan ka rilru ka siam sauh sauh bawk.




U Zomuana tân tak pawh hei hi ka tih ngei a ngai tih ka hria, phatsan zâwk a ni chunga bumtu ang maia kawh rawn a nihna hian a hliam a ti na zualin huatna leh mi dang rin lohna a tuh lian zêl a, huatna nen phatsantu anga kawh rawn reng a ni a, engtin nge hmangaihtu hmêl hmu lo ta na nâ nâ chuan mi dang rinna a neih theih tehlul ang, ka ngaihtuah thui telh telh a, u Zomuana rilru kal sual dàn thleng thlenga ka ngaihtuah thlen phei chuan ka hah êm êm ringawt mai ni.




" Eng nge i din reng le?!" Zohera'n a rawn tih hû chuan, inthing harhin ka nuih ta ngawt a! "Auh mawlh mawlh che paw'n i hre thei lo," a ti leh bui bui a, ka inthiam lo ang reng viau.' Nu Sawmtei'n an rawn pên kawi tùr thu hrilh a an rawn phone thu leh an țhulh leh nge' tih vêl a rawn ngaihven a nih hmèl, ' Thil hmanhmawhthlâk a awm a, an kal lehnghâl ' tih vêlin ka lo chhâng liam ta ngawt bawk a.





" I nu puii thu rawn sawi hi eng nge a awmzia?" Zànriah kan kîl lai mêk niin, ka phone rî ka chhàn rual rual chuan ka nuin a rawn ti nghâl tâwng a, nu Sawmtei'n a hrilh tih ka hre thiam nghâl mai, eng mah pawh ka thu sawi ngaithla lovin a ngaih dánin a zêldin chho kual ang a, chûng zawng zawng chu ka nu hnênah a thlen tel vek ang tih pawh ka chiang nghâl viau, a àn hla zawng zawng nêna lo dawngtu tân chuan rîk ve nghâl hluai na chî ni miau hek.





" Chaw kan ei laklawh nakinah kan in be dâwn nia, " ka tih chuan, " I nu pui'n thinrim engphiarin i awm dàn a rawn sawi a, a duhtâwkin a âng a eng mah sawi ve hman hmàin a dah leh a, phone lêt lahin a la leh duh chuang si lo, nang pawh a sawi kha thu dik nge eng nge a awmzia ni rêng rêng a," a rawn ti kawlkalh nuaih a, ka naute pahnih chuan min lo melh ve kâr bawk nên, chaw eikhama ka phone tùr thu sawiin min chhânna pawh nghâk lo chuan ka dah zui vat a, buaina ka hmachhawn țan chu a ni dèr mai.






Ka nu chu phone zui nghâl tùr nge pawh hre thiam lo chuan ka inngaihtuah buai zawm nasa hlè, ka chawhmeh siam laiah pawh chuan ka rilru ka pe thei meuh lo, Kimkimi'n a thiam loh min lo zâwt buai ve reng bawk nên thâwk chu a ipikin hah a dam hlawl lo. Zohera zâwt tùra ka tih lahin ' A thinchhe si ka zâwt peih lo ' a ti deuh hlar bawk a, hun thawl hek hawka biakah ka ti ta tawp ringawt a.




Kawngka kik chu lo chhâwn vatin, ka beisei loh deuhin Rinawma leh tlangvâl pakhat an rawn lût hlawl a, " Kan lo lêng dâwn ka tih kha aw," nui vur vur chung chuan a rawn ti lût nghâl a, " chaw in la ei na nge?" Choka lam melh pah chuan a tih zawm nghâl zat bawk, kan ei tawh thu leh chaw eikham vêleh eirawng bàwl nghâl ka ngaih leh țhìn thu sawiin ka nui hak hak a, min hre thiam tak chuan a lo bu ve nghut nghut bawk.




Ka thil tih lai ka tih fel zung zung hnu chuan țhu phei ve nghâlin ka la inbual hman lo erawh ka inthlahrungin ka awm pawh a nuam thei meuh lo, an titi chu lo nuihpui ve hak hakin ka lo zâwm ve zauh zauh bawk a. A țhian rawn hruai Nunsanga a tih pawh chu a fel hmêl viau mai, an tlàngnêl ve dàn leh an ngam nghâl sarh dànah rawn lêng lam satliah an ang ber, Rinawma nên phei chuan innêl sa tawh kan ni bawk a, a hahdamthlâk viau.






An țhian dûn han insawisa fiamte chu Kimkimi lehkhazir zo lo chhuak chuan a hlimpui êm êm a, Zohera nên pawh an innêl ve mai a, ani râwlthar chhuak inti pà rual han biak dàn vêl pawh an thiam khawp mai, mi puitling an ni bawk a mi dangte inngainattîr dàn pawh an thiam khawp mai.





Thingpuite an inzawh hnu rei vak lovah chuan haw lam an intintuah a, Kimkimi lah pek chuan in lo lèn leh hunah chuan card lo keng u la, games kan khêl dâwn nia alo ti khauh a, card khelh vêl an thiamzia leh Magic show pawh an thiam thu kha uang zetin an sawi vâng a ni ngei ang.






Kawt thleng thlahin kan invai liam hma deuh chuan motor light rawn êng deuh pap chuan kan awmna lai rawn chhun êngin kan hawi deuh țhap a. Kan piah a rem laiah chuan motor ti dingin a awm zêl dàn kan ngaichâng deuh țhap a ni ber, Rinawma lah chuan, "zânah lehzêl pawh vengtu i nei ani maw?" tiin nui chungin a rawn phun sup a, " A rawn thlen phei hmain tlanchhia ang, " tia nui vur vur chungin an Bike-ah chuan lâwnin min vai thuakin an tlàn liam zui nghâl a.






U Zomuana chu Motor ațanga lo chhuakin ka lam panin a rawn phei a, ka lo ding mãwl tawp a ni ber, " Kha vàng khân a ni maw ka call pawh i chhân theih loh," ti deuh hmukin a lawm loh hmêl ngang mai, tlaia ka nu nên kan inbiak dàn vêl avàngin phone ka silent zui ta daih kha a nia, " I lo call lai ka hre miah lo, " inthiam chiah lo chuan ka ti ban chalh a, " hre lo tawp ang, inbual pawh la inbual hman lo khawpa buaipui thil dang i lo nei a, eng emaw i tawk palh ang tih hlauin rawn ngaihven tùr chein ka rawn kal a, ngaihven i lo ngaih loh tawp hi, " ti nghutin, a lungawi loh hmêl tak zet. Inhera kal mai a tum chu a hnungah ka lo kuah vat, a dulah chuan ka kut ka suih zawm vat a, tuma'n min hmuh ka ring lèm lo bawk a ka tîm duh vak lo.






Ka sawi tùr hre lo tih ngaihna hre si lo chuan, " ka tih palh, inlêng hnar a mawi lo tih i hriat kha; mahse, tu nên pawh awm ila ka thinlung zawng zawng neitu chu nangmah chauh i ni, " tiin ka thiam ang tawk chuan kan sawi ve ngial a, ka thu sawi chu âwih se ka ti tak zet bawk.



A thâwk chhuah hawk rual chuan rawn inherin min melh deuh rèn ráwn a, nui sukin ka chalah chuan a chalin a rawn tauh dat bawk, "Zomuankima nun chawk buaitu i nih hi, a indai danna bangte vaw țhiat vektu, ka nun a ka zawm tùr dàn ka zam vete min bawh chhiattîrtu, " ti pahin a nui nghawr zui dat a, a dawngsawngtu tân chuan thil hrehawm a ni mawlh lo, kan hma lam hunah eng nge kan tawh dâwn chu ka hre lo; mahse, eng dinhmunah pawh ding i la, he mipa hi vawn tlat ka duh tih erawh ka chiang a ni.





A hmâ tawh vak lo nâin kan inzui thla leh ta tho va, " i inbual chhûng ka lo vêng ang che," a tih chuan a bana uai deuh ti tih chuan ka nui thla hak hak a, amah pawh chu a nui ve suk suk tho.





Ka nuate chu an la muhîl chiah lo nâin an lo mu fel tawh a, kan țhutkhâwmna zau lèm lo takah țhu thla nghâlin kei pawh chu inbual tùr chuan room lam ka pan zui nghâl vat a, " I lu su suh," a lo ti ve sek reng bawk a, suk ka tum loh nên a lo sawi ve reng erawh pawm nuam ka ti viau, rei inbual lovin ka chhuak phei leh thuaia, " I phone kha a ri sek a nia, " a lo tih chuan pan hnaiin ka en vat a, ka nu tih ka hriat rual chuan ka awm a nuam lo nghâl vek thei, ka dah hnu chuan a bulah ka țhu thla ve nghâl zat a. Ka sam ka bâwk tawm vek avângin ka nghâwng vêl chu a langsarin ka ni deuh vawk hian ka hre mai! Pakhat pa pawh chuan a lo hmuh hmaih lo nasa, ka țhut fel rual rual chuan, a hmuiin a rawn nawr chak chak a. Nùl kual dun dunin a fawp zui tâwk bawk, nui chung chuan ka lo ip deuh cheih cheih a, ka darah rawn kuah khâwmin min man nghet nasa mai, a fawh leh deuh vang vang hnu chuan, " I rim dik tak i nam leh tawh, " tih sup pahin ka bengah chuan a rawn seh zauh a, a nâkah ka lo pia hlak thung.





Rei lêng tawh lovin kan țhut dun hnu rei vak lovah chuan kan inthlah chho ta nghâl a, thâwm chhuah hlau taka țawng lova kan kut a han insual leh bat bat țhìnte chu a hahthlâk ang reng viau nâin, a tâwpah erawh duhthaw tak leh ril ruiha min fawh chuan thlahlel takin ka lo chhâng lêt ve ngàng ngáng a, a âwm hlai țha zet leh lum vung vunga min thlâkhlelh hmêl taka min pawm beh deuh vung vungte chuan thla a muanga hah a dam hliah hliah.







Thlanglam varanda zìm têah chuan bang nghèngin ka țhu tung at a, ka nu chu a la mut loh ring chuan ka phone nghâl bawk, " Nu, nu Puii chuan engtin nge a rawn sawi a," ka nuin min lo chhâwn rual rual chuan, tîm ru deuh tak chuan ka ti nghâl tawp a, rawn thaw halhin, " A thu sawi i zâwm lova, kei thleng pawhin min huat phah khawp ang, ' ka thawhna dàwr neitu fapa' i tih kha i u Mâ-i phatsana bumtu kha a ni maw, in lo inkawp ni àwm te'n a sawi lehnghâl a, a râpthlâk êm mai in lo inkawp a nih vaih chuan thlah nghâl ang che, a chungchâng engkim i hre vek, hre lo ni ka la hre thiam deuh," a rawn ti nghâl mawllh mawlh a, " Nu, kan hriat ang kha a lan dàn a ni miah lo asin, " ka lo ti ve vat a, chek tlak tlakin, " Chu chu tu sawi nge, amah maw....a bum lêt tawp che a nih chu, in kal thui hmàin ti tâwp ang che, i u thlaraute kha zah ve rawh, ka beisei loh dàn deuhin i awm mai, a tih nat ve hma chein thlah vang vang ang che, " min ngaihthlâk ve tum miah lo chuan a rawn ti lehnghâl hmawk hmawk a, nu Sawmtei'n a lo han àn khum dànte nên lam a sawi zawm nghâl mawlh mawlh a ' Kan thu sawi zawm àwm deuha awmin min lo bum char char a, kha pain kan chunga a thil tih hre vek chungin min pal lui a, mahni thisen zawmpuite natna tawrh pawh a hmuh kàn thei a nia, kha mihring khân min hmuhsit lêt ngawt ang' tih vêl a ni, a sawi tam takte chu ngaihthlâk hrehawm khawpin a țawngkam a nâin, ka nuin a sawi lan loh leh sawi tel duh loh pawh tam tak a awm ka ring bawk.




Ka nu ka biaknain awmzia a nei lo lutuk chuan min ti pik zualin ka țahte hial a chhuak ut ut tawh, thu dik an hriat ve lohna chuan min ti hah hluah hluah a, an rilruah u Zomuana huatna ka thlen zual telh telh tihte chu hmuh theihin a lang zui nghâl mawllh mawlh bawk si nên, tih zawm tùr ber pawh hre lo chuan ka țhut ngai chuan ka țhu ta tlawk tlawk a.





Ka zing tho chu ka mit a thîp urh mai! Ka muhîl lo chiang lutuk chu ka lu thleng chuan a nuam lovin a na deuh fek a, phûr lo zet chuan ka che zui hnelh hnelha class kal ka ngai tho bawk si, ka insiam peih hnu chuan ka chhuak zui nghâl a, tûk dang angin ka hma tawh lo nên taxi hman mai chu ka tum a, țum dangah chuan ke a kalin ka insawizawi a ni mai ka ti mai zêl a, tûkin chu a ngaihna a awm ngang lo a ni e.




Class-ah pawh chuan rilru ka pe thei meuh lo, Sir Ricky-a'n min melh leh rulh rulh țhìn tih pawh ka hre reng nâin ngaihtuahnaah ka lo pêng leh țhìn, engtin chuan min ti lèm lo nâin a nuam duh lo kher mai. Kan class kal țanna a la rei lo bawk nên typing ngawr ngawr min la khawihpui a, minutes sâwm chhûnga type zawh hman tùra min pek pawh type sual nuaih chungin ka tlingtla hrâm a ni e.






Kan class la zo pâwn kan chhuah chuan ka beisei loh deuhin u Zomuana'n min lo nghâk ràn mai, a bula ka thlen phei chuan, " Engati nge?" Ka ti deuh hâ a, " Ricky-a hmuh lawk ka ngaia a rem êm a, ka lo nghâk pah che a nih hi," tiin a Bike a chuang tùr chuan min mit mei nghâl zauh bawk. Kan tlan chhuah hnu chuan, a office dâwn êm tih vêlte chu ka zâwt làng láng a, Bike a lo keng chu a ziain trafic jam-ah hun kan hmang rei loh phah deuh, kan office kawt thleng min thlahin tlaiah min rawn lam leh a tum thu a sawi chuan, ka hnial lèm lo a duh chuan a ti lui leh țalh dâwn tho tih ka hre miau a.





Chhun chawlh a hun chuan tuma'n chhuah kan châk lèm loh avàngin ei tùr kan chah hlawm a, Amawitea nên inbe pahin Rinite an inrûk thu a rawn sawi chuan mak ka lo ti hlè. Nu Sawmtei bawk rilruah lo lang nghâl zawkin an in chhûng boruak hrehawm tùrzia ka ngaihtuah thleng nghâl vek bawk, " Nizân i inlêng chuan a hmin zo meuhna che nge, chhûn awlah pawh phone i bihsan ngar ngar a nia," nui țhu chunga U Hlutea'n a rawn tih chuan rang lutukin ka phone chu ka la thla nghâl zat, an pahnih chuan nui vur vur chungin min lo melh a ka lo nui zui ve hak hak a, " i hriat hlauin kan inbe nghâl char char pawh a ni maithei asin," Rinawma'n a lo tih ve phei chuan âwih loh hmêl tak chung siin fiamthu chuan kan inkâp zawm a, ngaihtuah dang neih zauh chu ka hahdampui viau bawk.





U Rd-a Lunglei lama bungraw complain vêl en fiah tùra kal pawh vawiinah a rawn thleng phei thei dâwn a nih hmèl, Office lamah a rawn kawi dâwn lo bawk a kan bâng har lutukin ka ring lo ve ngawt a, u Zomuana zâwk chu nghah a ngai rei ang tih ka hlau hle. Haw hma a hun thâwl neiha ka nu biak nawn leh chu ka duh tlat a ni. Nu Sawmtei ngawr ngawr chuan min luah lutuk lèm lo, ka chhûngte ber zawkin a ni min kap tu zâwk chu ni.





Kan bang hma ang reng sia lo nghah chî a ni em tih ka va zâwt ta nge nge a, an la haw mai theih loh thu rawn sawiin lova kalsan mai tùr chuan min rawn ti ta hlauh a, Bus stand lam pan chuan ka kal zui ve nghâl sawk sawk bawk, haw vata ka nu biak leh bâk chuan min luah hlei thei lo a ni ber mai.





In ka thlen chuan ka naute pawh an la rawn haw lo ; mahse, chu chu ka duh dàn tak pawh a nih zâwk rêng a, ka thu hriat leh thil nihna dik tak sawi chhuah ngei ka duh lutukna lamah chuan ka vei et et a ni ber e, kan inkawp tih an hriat ruala u Zomuana an huatna zual sauhte chu ka duh lovin tih theih neih ka châk tak zet, u Zomuana tân hian a tuartu ni chunga dem leh huatna mitmeng nêna an thlîrte, amah a nih tawha ngaih dàn tawk nei chunga a chungchâng sawi zui a ni țhìnte hi, atân chuan runluih châkna hlîrin a khah ve hial ka ring țhìn a ni, a lan dàn phêna a nihna tak hi hai hawn theih ka châk zual sauh bawk, dawhtheih a ngaih tùrzia pawh ka ngaihtuah thlen tel rualin, chu ringawt chu a tawk em tih erawh ka chiang hauh lo!





" Aw, eng nge?" Ka nu chuan a rawn ti nghâl tawl a, ka infuih ru nghâl mawlh mawlh, " Nu pui'n a rawn phone leh tawh che em?" Ka ti ve thuaia, be leh lo se khati'n ka nu a awm hmuk hmuk ngai lo tih ka hre chiang ve êm a, thin rim viau mah se rei a daih ngai lo, a theihnghilh tihna ni lovin eng mah hi a pai reiin a up bet ngai reng lèm lo.





" Phone e maw le, kha lamah hruai chho ula, Kimkimi Hostel-ah dah lût ila Zohera rawn phei thung se a tia, a buaithlâk êm mai, i pa pawh a làwm lo viau tawh a nia, engtin chiah nge maw i khawsak rêng rêng le, " a rawn tih chuan ka lo thaw hak, chûng thleng thleng a lo rêl leh keimah eng mah min zâwt duh si lova thil a lo ti kual vêl chu ka beisei loh dàn deuh niin ka ngei ngêi mai, naupang ang maia ka awm dàn tùr a lo rêl kualte chu ka ngaithei dèr lo.





" Eng nge chûng thleng thleng a lo rêl a țûlna, a fanu kha nih kha bumtu chu, u Mâ-i kha a rai, chu pawh u Zomuana kawp reng chungin a hnam dang mipa kawp lakah lehnghâl, " ka ti ve nghâl tawn tawn a, phone a vîn êm êm a ' Lalhmangaihzual ' tih rî leh ka hnung maia tih rî chu a inrual hle, ka lehhawi nghâl zawk a, ka biang a rawn thîp nghâl hlar rual chuan, ka thle deuh sawk bawk!


He thawnthu in ngaih dànte kha comment lamah lo thai lang ve leh țheuh r'u aw, fakselna engkim a leng vek


Show post links
Top

[Ngaia]

Lovers

Chapter ~18

By~ Rengpuii Lushai






" Ka fanu dâwt hmanga diriam kual vêl lo khân i tlangvâl pa chu kawp mai ta che, sawifiah ngai nun a nei nasa lutuka mi dang tawrhna hmangin thup bosak i lo tum vêl a maw, i u chunga a tih ang chiah kha i chunga a thlen ve huna i awm dàn tùr ka hmu châk khawp mai, " hmui sai dar darin a rawn ti sehchilh nghâl nak a, a mitmeng sen ram kâra mittui tling pamte huatna nasa tak lo lang chhuakte chuan min ti zâmin ka chhûngril chu a khùr nghâl dawt dawt bawk, ka biang chu dawmin ka melh ve ràn nâin chhàn zui mai dàn tùr erawh ka haihchham chiang hle.






" Eng nge pêk loh leh tihsak loh che kan neih, hetianga min ti lêt tùr hian, hmanni lawka i hriat chu pawh i unaunu ngei phatsana a thihna vànga mawhphurtu leh nghâl kha i thisen zawmpuite aiin i ring zâwk a maw, zahawmna nei lo mihring i lo nih hi, " Duhthaw taka min tih zawm leh bawih bawih chuan ka kut chu ka hûm ruhin ka mittui rawn luang thla papin, ka biang a luan thîp sek chuan ka heh chu ka pet nghâl fan fan bawk.






Ka phone hûm mêk chu a rawn nghawr dar dar a, phe ruaia ka melh chuan ka nu lo niin, kan inbiak laklawh lai kha a ni bawk a, a ngaih a țha lo viauin ka ring bawk, chhâng lo chuan ka hmet tawp a ka thaw chhuak zui ham ham bawk, " Ka fanu kha kei a nu tluka hre chiang an awm lo, nangni pahnih inkâr kan pawm loh inhlauh avânga dâwt hmanga mi dang laka insawi mawi tum kher suh u, ka fanuin khatiang thil tenawm kha a ti lul lovang, " a ti leh nghat nghat a, hre chiang a inti lutuk leh a duh dàn leh țha a tih dàn a mi dangte nuntîr leh thunun thei veka a inngai chuan, ka insûm tumna chu a ti bo vek ni maiin ka hria.





" Nu pui, u Mâ-i khân a mamawh lutuk che asin, i zahawmna tihchhiat a hlauh luatah, i ngaih hlut zahawmna vâng zâwkin asin a nunna kha a lak, a hriat chian ang che khân hre chiang ve la, u Mâ-i nun chhûngril puitu mamawh ngawih ngawiha talbuai kha i hmuh thiam ka ring, " thâm țiak chuan ti lêt ve bawk a, a mitmeng alh nghâl phat leh a insehruh tlat dànah ka thu sawiin âwih leh pawm a hlawh loh zia chu a sawi chhuah ngai lovin a ti lang chiang nghâl hlè bawk.





" Nang hian eng mah hriat i nei lo, a bum kual vêl mai mai che tih hria la a duh a hmuh hunah chuan tûn ang hian i la huaisen a nge maw chu, " a tih leh chuan ka insûm nasa lutuk chu ka khùr chhuak hialin ka hre tawh, " U Mâ-i khân engkim chiang takin a hrilh vek asin an biakna nen zawng zawng ka mit ngeiin ka hmu bawk, u Zomuana nên hian inkawp lo mahila ka ring zâwk thovang, " țawngsual hlau tak chuan ka ti ve khalh khalh a.





Min ben leh tuma a kut a lek uaih tawh chu ' û ' tih rî avâng chuan a la lêt riai riai a, Zohera chu ka bulah a rawn ding zui nghâl bawk nên. A kut chu hûm ruhin min melh thîp hle, a insûm hmèl chu a sen awp awp bawk nên thu dang sawi nawn chîah pawh ka ngai tawh lo. U Zomuana ka rinna a nasa telh telh a, pawisak a neih loh dànah hian u Mâ-i tân englai mahin khatiang thu lian tham kha a chhûngte hrilh a ngam awm loh tùr zia ka hriat belh bawk.





" I u tenawmzia hi i hria em, Kimkimi Hostel-ah awm se, nang kan bulah rawn phei la Hmangaihzuali hi chho rawh se a min tih mualpho tam hmàin, chhûngte thlavàng hauh nachâng pawh hre lo, mahni hmasial lutuk mai, " tih leh hlawih hlawih pah chuan inherin a chhuak zui nghâl hlawk hlawk a, boruak chu a reh nghâl duk mai!





Țhuthlèng hniam lo awmah chuan ka țhu thla hnawk a, ka khûr ru der der leh ka lungphu inthum rawn dawt dawtte chu an la reh mai thei lo, khûr ru dar e ti lo chuan ka sa phat phat bawk, ka mittui lo luangthla chu duh lo zetin ka hru tawk a, thâwk ka la zui ham ham bawk.





" Eng nge a sawi kha a awmzia?" Zohera chuan a rawn ti nghal chat bawk, " i nau a la rawn thleng ve lo em ni?" Tiin ka lo zâwt lêt daih thung, chhàn mai dàn tùr ka hre lo ve êm a ni.





" Eng mah a ni lo, tui lum lo chhuang rawh a bâk chu ka rawn chhunzawm ang, " kun deuh chung chuan ka ti leh tawp a, ngawi renga a kalsawn ve mai chu ka thaw huai thei, ngaihtuah ber tùr ka hre lova ka nu leh pate ka ngaihtuah thlenga min ngaih dàn leh an dawnsawn dàn ka hre tawh a; mahse, thu dik tluangtling an hre si lo leh chu chuan thui tak a hruai thei tih ka hriatnate u Zomuana nên kan inkâr thlengin eng nge a nghawng dâwn tihte ka ngaihtuah thlenga ka ipik zualin ka hah hluah hluah a ni ber mai.





Eirawng ka bàwl lai chuan ka nuin min lo call leh a lâk châkna ka nei lo lutuk chu ka chhâng ta lo rêng a, Zohera a lo phone zui lehnghâl ta tho a. Kan inbiakna kan tih tâwp hma khân nu Sawmtei khân min rawn nangching kha nia, a hriat hman chuan a rilru chu buai ve tho ang tih chu ka ring nâin ka be châk lo tak zet.





" I phone i chhâng lova, min ti mangang dâwn alàwm, i nu puii a lokal ti raw?" Ka beisei loh dàn deuha dam chuan a lo ti fan raih a, ka hnuk a ulh nghâl țûn thei ka nu chu inhawng deuhin awm se, ka dik emaw dik lo emaw ka thu sawi min ngaihthlâksak ve se ka tihna chuan inbun thâwl ka mamawhzia min hriattîr a. A dik a dawk thlu lova awn lam nei sa ràn a, min zilh leh nawr lo hian min ngaithla tùrin ka duh tak zet a ni, chu bâka mamawh chu tûnah tak hian ka nei lo tih ka chiang a ni.






Ka dinhmun ațang chuan u Mâ-i dinhmun ka thlîr a, an duh dàna nawra zilha pawt kaltu ni lo, kan tih sual pawha kan bula dinga kawng dik min kawhhmuha huaisenna nên a ' engkim a țha leh vek mai ang ' ti a min fuiha kan hmaa huaisen taka min dinpuitu tùr kan mamawhzia ka hriat tharna chuan Chhûngkua leh nu leh pa hlutzia ka hre thara anni'n min thlâwp lohin tu in nge min thlâwp ang a, khawvêl hi min hmachhawn pui ang, chûng thleng thleng ka ngaihtuah avàng chuan ka khawngaih thar ngawih ngawih bawk.






" Hmangaihzual.... Zoher...an va'n hahthlâk tak, " a rawn tih hlak hlak chuan, " Aw ka hria, ka laklawh alàwm eirawng ka bàwl a," ka ti dul raih a, ka biak thâ a tho hlawl lo. Ka nun ni lova mi dang nun a thlîr lutuk te, ka natna ni lova mi dang nat a hlau lutukte chuan min ti hnual ngawih ngawih a, ka pa tal sawipui ka châk a ka ngam tawh dèr si lo, nu Sawmtei'n ka nu a hrilh a ani'n ka pa a hrilh leh chhâwng ang a, an ngaih dàn tùr àwm chu ka hre sa vek bawk.





" Ka sawi kha hre reng la aw, i nu Puii mit ti kham zâwngin awm zui tawh suh, kha pa hming an lam rual khân an nâ a, nang lehzêl chuan kha kha belhchhah tawh suh, bâkah a zahthlâk reng reng mi ngaih dàn tùrah pawh, " a rawn tih leh chuan ka chhâng tawh lo, min zilh mawlh mawlh reng a, ka bengah a lût a a chhuak lehnghâl vek, chu zawng chu, a chhan chu amah paw'n min ngaithla lo miau a tinni!





Zànriah kan eikham chuan inti fai thuak thuakin mu tùr chuan ka intintuah nghâl daih a, kan chaw ei lai paw'n ka naute'n min leh zeuh zeuh țhìn tih ka hre renga eng mah thleng lo ang maia rîk bawrh bawrh ka harsat êm a mu daih ila mi dang tân pawh rilru a buai lo zawk ang.





Ka phone rawn nghawr dat dat ka en chuan 'Nu Partei ' hming a lang kalh a, min rawn be ve leh nawlh zel a, Pa Biaka check up a phaia an kal dâwn pawhin min rawn hrilh ve thlap a U Zomuana nên kan inkâr vàng ni lovin min ngaina tih ka hria a, inkawp lo phei ila chuan tûn ai hian kan inpawh zualin ka ring zâwk, mi pângngai an ni a thil rêng rêngah a tawk a hre thiam țhìn tlat a ni.











" Lâte, i pa Biaka in-check up a kan kal kha, result țha tak neiin kan rawn haw a, naktuk chu chaw rawn ei phei ve ta che. Țhian țha leh chhûng lehkhat ko khâwm ila kan ti deuh a," a rawn ti nghâl barh barh a, ka beisei loh lam daih a rawn sawi avâng chuan, " A va'n làwmawm tak; mahse, chaw ei kher chu ka va'n chiang lo tak," ka ti ban chalh a, ka aw nghâl ngawt thei lo a ni; ka naute an awm a, ka hna nên ka la ni cheu, " in zànriah ei hun pângngai kha ni mai, a har lo lutuk, min hnial țung zêl lo teh, Mampuia'n a rawn lam dâwn che nia, " a tih leh chuan hnial zui tawh lèm lo chuan huphur ru viau mah ila, ka lo insiamrem tùr thû a chhângin kan inbiakna chu kan ti tâwp zui nghâl mai bawk a.





'Kuri an hrilh ve ang em?' tih chu ka ngaihtuah leh hnuhnawha han inzawh chi lah niin ka hre chiah bawk si lo kal ve se ka ti ngei mai, ka huphurhin ka hreh ru ang reng bawk nên bâkah ka boruak tawn vêl pawh sawi chhuah ka châk reng; mahse, ka ngaihtuah chian chuan hmaichhana sawi țha zawk a ka hriat avàng chuan muthilh tum chuan ka chhîng zui nghâl vang vang a.






Ka zîng tho chu ka boruak tawn ngaihtuahin ka tho nuam lutuk chu ka veng hawkin ka hre mai, tawngkhawng thil hi mihringah hian a lo awm thei tih ka hre thiam nghâl uar uar bawk, ka phone ka bih chuan U Zomuana hnên aţangin Misscall a lo awm va a, zân dâr 11 leh tih vêl a mi a ni, ka call back ta tho a, " Morning," thaw hulh hulh chunga a rawn tih chuan a tih tùr àwm ang chu hre thiam nghâlin ka inhria, " nizàn ka muhîl hmâ lutuk a, eng nge nita," ka tih zawm nghâl zat a, " Ka nuin a rawn hrilh che em?" A tih chuan ka hre thiam nghâl mai min lo call chhan tùr chu, " Aw; mahse, hnâah te pawh ka kal ve phawt ang a, a rem dâwn leh dâwn loh pawh ka la sawi fak thei lo, ka naute pawh ka la hrilh lo, " ka ti duah a, a thâwk la ham ham rî chu ngaihthlâk nuam ka lo ti hlè.





" Rem rawh se, i hna pawh bàn hun pângngai kha a ni mai a, i naute pawh lokal vek ula, eirawng bàwl a ngai lo ni mai alàwm, " awlsam deuh chuan a rawn ti liam puat, ngaihsam ti lutuk chuan ka ner nâwng a, mipaho tak hi chu ka ti chhuak sap a, a nuih huk chuan ka nui zui ve hak tho.





Ka naute bulah chuan sawi thuakin zànriah eikham vêleh ka haw nghâl tùr thû ka sawi a, kal chhuahsan loh hrâm ka duh țhìn nên nu Partei a zahawm ka ti riau bawk si inthiam chiah lo chuan ka inthiam chawp lui kual ta vel a ni ber e.






U Zomuanate ina chaw ei tùr chuan huphurh ru takin ka rilru ka siam fel a, haw tawh kher lova tlang nghâl mai ka tum tho avâng chuan ka boss-teho pawh chu ka dîl buai duh ta lo law law a. Kan bâng tlai over ngai chuang lo bawk a, nu Partei-te paw'n ka hun hman țhìn dàn an hria a, min beisei dàn tawk an thiam ka ring mai bawk.







Ka kal loh hlau takin chhûnahte chuan min rawn phone nawn leh hial a, kan tân kal loh chu inthlahrunawm tak a ni hial tawh zâwk a ni. Min lo sawm ngawrh bâkah thil làwmawm satliah lo tak a lo ni ve leh zêl bawk nên, ' Zomuana pa dam țha thei lo kha cancer a nih ringin phaiah kan kal kha a nia; mahse, result duhawm lo eng mah nei lovin hlim takin kan rawn haw a, Pathian hnêna lâwmthu sawi pahin chawhlui kilho chhûngkua leh țhiante tân buatsaih an nih ' thûte chu a rawn sawifiah nawn leh mawlh a.







Hna atanga haw hma dîl pawh chu a lo ngai lèm lo a, kan buai loh avângin haw hun pângngaiah kan haw thei a. Kan intih felfai hnû chuan nghah ka nei tih ka sawi a, min fiam zui nghâl luama ' Mipain kan hual țhup nitin che a, lamtu i nei thlap daih zêl țan lâk a ngai a ni' tiin an in kap kuala ka'n nuiho leh dar dar bawk a, kan inpawhna a țha a, engkimah nuam ka ti telh telh rêng a ni.







Min kalsan tâk hnû chuan U Zomuana lo nghâkin ani pawh rei lo tê hnuah lo thlengin an in lam panin kan inphur a, ka chêtphungah ka hahdam lohzia leh ka huphurh rûkzia a hria em mawni, 'eng mah zahna tùr a awm loh thu leh ka bulah a awm tlat tùr thu chu a sawi leh zauh țhìn bawk a' hahdam huai phah lo mah ila eng emaw chenah ka awm erawh a ti nuam huai huai tho.








An in kan thlen chuan an lo awm nual tawh a, ka rin aiin mi an tam hmêl, a țhen kawtah lo awmin a zìm ang reng bawk nên naupang infiam thawm nên, thawm a țha laih laih khawp mai. Garage sîrah chuan inzui chhoin Varanda nuam takah pawh chuan puitling leh naupang nên a lo awm leh thliah a, in chhûng kan luh rual chuan Nu Partei'n min lo hmuin min rawn ngaihven vat a, mi dang a hranpa taka min han ngaihven an awm lem lo, mahni buai buaiin an buai hlawm a, nuam ka ti mah zawk.





Nu Partei bulah chuan ka thlen har avâng leh rawng bàwlpui hman lova ka awm avàng chuan thuphâte ka chawi luam a; mahse, ti tùr an tam thuin min lo chhâng var a, rilru a nuam deuh. U Zomuana chu a pate'n rawn ko-in kei erawh Nu Partei zuiin choka lamah ka kal zui ve mai bawk a, Sangsangi pawh lo awmin min lo be ve nghâl bawrh bawrh a tlêmin hah a dama ka huphurh ang êm êm a ni lo chu ka lâwm hlè.







A hnu rei vak lovah U Zomuana chu rawn kalin inthlâk lawk a duh thu a rawn sawi chuan, " Choka lamah hian ka lo awm ve rih ang, " ka lo ti vat a, ani pawh chuan ' A rei dâwn loh thu sawiin ' min melh deuh vung vung hnu chuan, "Hrehawm i ti em," a rawn ti leh lawi a! Min ngaihtuah ru phian chu ka inthlahrung zawk lek lek a ni, lu thing nakin, " Hrehawm loh han inthlâk vat zâwk la," nui sângin ka ti lêt vata, chutia awkî zângkhai taka ka chhàn tâkah chuan, hahdam huai hmêl a pu chawpchilh ve nghâl mai bawk a, nui sukin, " Ka rei chuan min rawn ko la, ka châk viau a nia, " ka beng bula a rawn tih sup chuan ka phâwk nasa, ka îp zawk thei hial a ni, amah lah chu nui ruh ruh chuan step-ah chuan a pên chho thauh thauh a, ka inngaihtuah harh chuan ka nuih a za hlè a nuih ruh ruh dànah khân a tum a fuh chat tih hriat reng reng!







Mi che vêl chu ngaihtuah lèm lo chuan ka lo en liam ta vêl mai mai a, Nu Partei hmêl hlim sarh chunga kal kuala mi a be siam siamte chu ka lo en leh veng veng zêl. Nu Sawmteite nên kan inkungkaih dàn a hre ve ang em tih ka ngaihtuah chhuah thut tâkah chuan, ka awm chu a nuam chiah lo kher mai , a hriat loh ka rinna aiin a hriat ka rinna a lian zawka mi dang nun a inrawlh ngàwng ngáwng chi a ni lèm lova, a fapa nên kan inkâr pawh min iai lo tih ka hriat hnu pawhin a zahawmna bo țhak khawpin kan nunah a inrawlh lèm lo, " Lâte, Pangpâr i ngaina em? In chhûng vêla khawi tùr enkawl hranpa êm êm ngai lo chî ka nei nual a, i duh thlang ve ta che, mi dang pawhin an thlang nasa a nia aw, lo kal rawh va en ang, " amah ka ngaihtuah lai mêk chuan a rawn tih làng láng pahin min rawn hui a, nui chungin ngawi reng chuan in chung lam pana a kal chu ka zui ve mai bawk a.







Nu Partei'n titi siam siam paha Pangpârte duat hmèl taka a en kual vêl chu a hmuhnawm tak zet a ni. A Pangpâr min pêk tùrte kan enkual dan dan lai chuan, railling hrula kal ve zêl chungin kawngpui chu ka bih chhuka gate chhûng lama scooty hûng țha mêk chuan ka mit a la kher mai. Hlauhthàwnna eng emaw takin mi a țhâm zui er er bawk.






Kan thil enah chuan ka rilru pawh ka pe thei tawh meuh lo, Lalkuri'n dàwra a rawn kal ngun thû a sawite chu ka ngaihtuah chhuak a, ka rilru chu a dik lo vêl vek mai, kan chhûngkaw boruak te nên ngaihtuah loh loh tùr ka ngaihtuah thlen tâkah phei chuan țul lo ti zetin ka lu ka thing zui nak a ; mahse, step rawn zawh chhuak chho țêp ka hmuh chuan ka ngaihtuahna thunun ka lo tum ve țang țangna chuan awmzia a nei lo tak zet.






Nu Partei'n ka hminga min rawn auh lauh tâkah chuan harh zawkin a lam ka hawi vat, ka enna lam chu va hawi phei vein a mi hmuh avâng chuan min vêngthãwng tih hriat zetin an in chhun dànte mi a hrilh nghâl thuai thuai a. Chûngte hlei hlei chuan ka awm ati nuam lo, ani pawh chu rawn kal pheiin min rawn pawh nghâl thuaia, min melh thuak a, a hawi herah chuan engah mah min ngai lohzia tihlan a duh nimaiin ka hria, an dàwra a nui sâng hmêl kha ka mitthlaah rawn langin ' A sumdawnna atân chauh a niang ' ka ti ru neuh neuh a.





Min melh ralh chungin min kal pela Nu Partei bulah chuan, " Nu, i dam em, kan va'n inhmu khât êm êm, " a ti nghâl deuh barh barh a, an inpawhzia min hmuhtîr a duh ni berin ka hria, ka ngaihbel nge ka rilru kal dik loh vang pawh ka hre thiam lo, ka boruak tawn mêkte nên ka hmehbel leh țhìn a, kei hi ka dik lo zâwk pawh a ni mahna!







Nu Partei chuan, " Ti r'u, i chhuk ang u Lâte, " tiin min rawn nuih sâng a, ka lo hahdam ru veng veng mai, chhuk tum chuan kan intintuah zui nghâl a. An hnungah zuiin ka kal ve zêl a, kan chhuk mêk chu U Zomuana lo chhoh tum mêk nên intâwkin, " ka rawn zawng che u alàwm, " tiin min rawn melh chat a. Pakhatnu chuan, " Bawiha, i va haw hma awm ve, " zângkhai zetin a lo ti nghâl var a, " Hma vak nâng, i va fel ve kha, " tih pahin a nuih suk a, ka duh lo dàn deuhin ka lo îp châwih mai!





' Bawiha ' tih țawngkam chu ka ten nghâl ngawih ngawih bawk a nih chu! Awmze nei miah lo chuan U Zomuana ka'n melh rum nghek ringawta, hre thiam lo tih hriat fê hian a dar a lo sân uk thung. Step tâwpah chuan min lo nghâkin a lo ding ràn a, a kekawr ipte-ah a kut pahnih chu a zen lût hlùn bawk nên ' Bawiha ' tih ngawt chu ka bengah ri nawnin a lo din dànte a lan dàn fai sarte nên chuan ka ngei êm êm ringawt mai ni!




" I bân hma chuan min lo lam kawi rawh ka ti ve mawlh mawlh che a, " vui aw zeta chu nuin a rawn tih leh phei chuan ka kut chu ka hûm ruhin ka taksate chu an țang țung tawh, u Zomuana chuan a melh deuh haw a chutah, nui sukin, " Special deuh taka sâwm ngai ka nei a," tih paha min rawn en chhoh ran chuan ka taksa țang lutuk chu ka thlah dul nghâl riai riai a, chu nuin ner saka min melh chunga a nui hmêl erawhin min țhâm leh er er tho! U Zomuana tân, a eng pawh lo ni ila a buai loh hmèl hliah hliah tih a lang ni berin ka hria.




A bul ka thlen thlâk chuan kal pelh vang vang chu ka châk ber, nu Partei lah kha nu inthiarfihlîm pui khân a kalsawn daih tawh si. Amah lo belhbul tùr ka nei dèr si lo, a thiam loh ni êm êm si lovah chuan ka ngeiin ka thin a ti rim a ni ber mai, " I nuam vak lo em ni?" A rawn tih dût dût chuan, " Nuam e Bawiha," nui sâng chunga ka lo tih chuan, min melh run runin a heh chu a peta a la nui ruh ruh zui, nuam a tih hmêl tak zet! A theih tâwpin min ngaihsaka țul lovah ka inti hah mai mai ni te'n ka hre leh hnuhnawh a, pângngai taka lan tum chuan ka infuih ru mawlh mawlh zui bawk.




Choka lamah chuan min kai pheiin Fridge chu hawngin theitui a la chhuak a, a che vêl chu ka lo en reng ringawt no-ah thliin min rawn pe nghâl zat a, ngawi rengin ka lo ban ve mai bawk, dawhkàn kîl a kan țhut hnu chuan, " I zia deuh em?" Chîk deuha min melh rùn chunga a tih sup chuan, nuih lêt var varin, " min ti dai sawng sawng mai, " ka lo ti ve vat a, " 'Bawiha' tih khân a lo ti alh lo chauh che a ni maw, " nui ruh ruh chunga a tih leh chuan dawhkàna a kut dah chu ka sik hlakin ka nui ve ta tho, " A tih theih a tê e, " țhen suka a rawn tih leh chuan ka chhâng tawh lèm lo, ka ngaihtuah chian hian a dik ka ti êm a ni. Ani ni lovin keimah alàwm a bîk taka min sâwm leh lam kawi kha!





Kan kal khâwm chhan ber Pathian hnêna lâwmthu sawina hun hmangin Pa Biaka'n hun a hmanga, Bible châng chhiarin țawngțaina hun a hmang bawk, a natna leh an inenkawl chhoh dànte sawi leh thuak thuakin, a tâwp khàr nâna a thu sawi ' Kan beisei loh dàna kan nun a inher châng a awm lo thei lova mihring kan nih miau avângin, tlûk chângte pawh kan nei ang kan harsatna tawh leh kan tih sual tawh te'n zirtîrna kan nunah min thlen lo a nih chuan chu thil chuan min hnêh tihna a ni ang, mahni inhneh hi thil harsa tak ni mah se mahni kan inrina kan inhneh phawt hi a ngai a ni. Damnate piantharnate hi, crusade-ah emaw tu emaw vàngte a awm a ni lova, Pathian fapa Isua'n min chhandamna hi ring tlat ila chutah chuan tisa leh thlarau damna famkim a awm a ni ' tih thu a sawi lai chuan a fapa chu a melh tlata, a chhûnga awm zawng zawng tân sawi ni mah se a fapa tân a thu sawi chu fiah bîk se a tih hmêl lutuk chuan ka chhûngril a fan a, a rilruin a țawngtai zui mawlh mawlh hial ka ring a ni.


Show post links
Top