Thinlungmawlpa BY Cck Lalchhuanawmi (Completed)

[Ngaia]

Thinlungmawlpa
Chapter-31
Ziaktu: Cck Lalchhuanawmi


"Chuti, ka thu i awih dawn lo tihna maw?", ka thusawiah ka inâwk ta!


A sawi ang tak takin, Inrinni apiang leh
Sawrkar School chawlh apiangin Ramah min hruai ziah.


"Vawiin chu, ka peih lo", tia ka nuar pawhin, "Thingba kan cho dawn alawm", ka ngei thei a nia aw.


Rama kal pawh ka zei tawhin, Êm phurh phei chu, pian hlim aṭanga thiam tawh ang ka ni.


Kross-an min zirtir nasa em a ni.


Mahse, ka tan a lo ṭhain, Khawtlangah ka lang mawi thung.


Nula Êm phur thiam lo nih a lo zahthlak a, Rama ṭhiante nen kal chang pawha eng emaw hleka ṭe chul te a mawi loin, min ning hma ta zawk a.


Kross-a vang liau liauin, chung ang chu ka tawng lo vek.


Mercy leh Êngi te nena Chakawk zawn pawhin, "I mak reuh, khawpui mi ve si", min ti fo reng bawk.


Kross-an min hrilhin min zirtir nasa em a, ka mualpho lo mai chauh ṭhin a ni. Mualphona te hi a lo va ho ṭhin tak.


Nula nih hahthlakzia leh hautak zia hi aw!


"Bawihi, kan lo chhuak ṭan ta e. A hun takah kan lo thleng thei ang. Min lo ṭawngṭaipui zel dawn nia",


"Lutuk, tluang deuhin lo thleng rawh u aw".


Phone ka dah a, Kross-a pawhin a ngaithla ve reng.


Reilotê chhung chu, inṭhen a ngai dawn ta!


Man hlanna te tifel tura haw a ngai tawh dawn. Kross-a chuan ka kut a khal niap niap a.


Kan pahnih chauha awm ni mah ila, boruak a rit ru riau.


Tihzângkhai nan tiin, "Nakinah, Thingba hmun tawp siam ila?", ka ṭhen ṭha a. Min lo enin, "Chuan, nang mah hian i ei zo vek anga?",


"Ei zo vek dawn e", a nui hak. "Hlawk awm lo ve aw",


"A hlawk daih chu, Thingba chu, tu mahin min chuh thei lo", ka ti deuh hmuk a.


Ka thusawi kalh zawngin sawi a nei leh ngei dawn.


A lamah min pawt hnai a, "Chuti a nih ahnu, i tan, Thingba hmun zau tâwk tak kan siam dawn nia", duat takin min chul a.


Haw lam ka hnaih tawh avangin, School kan picnic ta a.


Lui kamah a ni a, naupang an tê nawi si, nuam taka ṭhut a theih loh. Ven reng an ngai. Harh rual chin ṭhah an ni hlawm bawk nen.


"Miss Bawihi aia Madam Bawihi i ni tawh dawn chu a ni si a", chutiang ringawtin min chhaih.


Ar kan keng mai a, Kross-a min ngaihtuah sak vek.


Naupang hoin nuam an ti a, kei pawhin muam ka ti. Ka Zirlaite kha an ni ve tlat a, an hlim chuan ka hlim a ni mai.


Lui kama che tla kan ni a, Chhingpuiin, "Awi", a tihnaah pawh, fel takin ka che thlap zel.


"Miss Bawihi chuan, Zirtirtu a nei leh chhawng a. Lui kama chet pawh a thiam em mai", min fiamna mah nise, nuam lo ka ti ṭhin.


Nuihpui har ka ti fo.


Êngi awm lo se chu, lunghnurin ka haw duh mai ang.


Chhingpuii lah hian, min hlat tawlh tawlh mai hian ka hria. Han zawh dawt ka hreh deuh reuh si, nuam lo ṭhin khawp mai.


Haw kawngah, Êngin, "Ṭhian atan i nau hman i tum em ni?",


"Aw, ka hmang dawn a. Ngati ta nge?", hnung lam leh hma lam a en a, kan hnungah tu mah an kal lo a, hmalamah an kal vek.


Beng bulah, "Chhingpuiin a inring a, a sawi nasa hman tawh lutuk, i nau i hman dawn takah chuan, saw, sawti ber bur a nih tak saw", ka hrethiam ta chiah e.


Mambawihi a thik tihna a ni maw?


Kan inkawmna a rei lo chu thuhran, Mambawihin phu ka ti a. Min dinpui chuan rilru engthawl takin ka awm thei dawn tih ka hria.


Êngi bulah, "Sawhsawn thei ka ni tawh lo",


"Ka hria alawm, i fimkhur a ngai dawn a ni", a ti ve sep a.


Chhingpuii awmdan mak thut chhan ka hre tawh a, ka thawl hawk zawkin ka hria.


Lo lunghnur mah se, sawhsawn ka tum tawh lo bur.


U Malawma leh Kross-a an lo lut rual a, Chhingpuiin u Malawma a chhuahpui daih dawn tih ka hria.


Chumi hmain ka chhuahpui ta zawk a.


A nuam ta phian, ke a kham deuh leh kan chawl a. Zan lam boruak a thiang zawk emaw tih tur a ni.


Kross-an, "Kan inah pawh khan kan kal thei reng a nia",


"Umm, tei kual rih ila, pawna awm hi nuam ka la ti".


Kan titi pah reng bawk a, miin min hmuh ka hlauh em avangin duh angin ka ṭawng ring ngam lo a, ka nui ri chhuak ngam hek lo.


Ka kalpuipa lah, zanin chu a nui duh reng reng lo.


Thlamuan nan, "Min nin rak thlengin ka tibuai dawn che, nang mah hlirin thingpui i siam ang", ka ti ṭhin a.


A hmel a êng deuh phât zel.


Saron kung pahnih hnuaiah kan kal a, tv en pahin kan ṭhu hle hle. Choka pawh a fel vek tawh.

Inah chuan ka nui ring ngam mai mai asin.


"Bawihi?",


"Eng nge ni ta?", hnung lamah âwnin a dar hlai hlap, khauh zet ka ngheng a. "I haw ngai tawh lo se", ka ner nak.

Ka en a, ka nuih a za leh lo. A titak nasa mai si a.


"Nakinah te hian, haw turin min la ti chhen ang e",


"Ti chhen mai thei a ni", ka thusawi min kalh leh ta. Ngaiah neih a la har mang e.


Min thlah haw leh ta a, Chhingpuii te an ri laih laih, "Lo lut la", hreh deuh takin a bu nghat.


Kawngka kik ka tum chiah tihah, "Bawihin a ṭhian atana a hmang lo tur che chu mak ka ti, mahni unaute an hman ngai ka hre lo e a", an ti ta a.


Chhingpuiin, "Hmang ngai e, sawi sawi a ngai lo, a ṭha vek", a lungawi chiah lo a ni.


"A thuhrimah, Kross-a peh thluk dan a thiam riau. A nachang kan hre ve tho, kan ti duh lo mai mai alawm. Lo peh thluk khalh daih ila ṭha tur", ka tlu thei mai dawnin ka hria.


Kross-an hnung lam aṭangin min kuah a, "Lut ang aw", ka lu ka thing nar nar.


An nui ri te chu, huatna,,thikna leh khâkna te a ni.


Ka ṭhiante emaw ka ti a, ṭhian atana Chhingpuii kan sawm lo pawh chu an enghelh viau chhan tur a awm emawnile aw?


Ṭha takin Mambawihi ka hrilh anga, Chhingpuii chu ka sawm mai dawn nge ni?


Pawnah kan awm rei lo, thaw hapin kawngkhar ka hawng ṭhuai. An phu nasa lutuk!


Nui lui sângin, "E he! In lo lêng elaw?", ka ti vah a.


Kross-an min zui lut miah lo. U Malawma a awm ve reng turah ka ngai a. An hawtir a ni ang.


Hawihhawm chhuah hlawmin ka kalna te min zawt a, "Nula nih chhung tawiteah, khua ka fang mawle", ka ti ngat.


An ṭawng ka hre thei vek si a, chu chu an hre lo pawh a ni thei.


An lungawi lohna a ho em mai.


"Tikhan lo lêng rawh u aw, kei chuan ka mutsan tawh mai ang cbe u".


Puan hnuaiah ka awm a, ***ka lo zui lut duh lo che a nih kha*** a vawikhatna, a hmasa ber atan Kross-an message min lo thawn!


Ka thawn let ve lo, a chhiar dawwn pawhin ka hre lo.


Message type a peih loh chuan, a chhiar pawh a peih lo tihna. Ka va call a, chau zet hian, "Aw, Bawihi?", ka call kher kher chu ka inthiamlo ru lutuk.


"Muttui ti turin ka lo call che a", chhuanlam ka siam a. "Ka lawm e, muttui aw", tui takin mu teh se.


School-ah chawlh dilna tifel vekin, hawna tur Kross-an min lo tihfelsak vek bawk a.


Ramah a kal tawh bik lo, chawlh hahdam a mamawhzia a inhria a, kei lahin kal tawh lo turin ka sawi ziah bawk nen.


Ka haw dawn tlaiah inkhel turin kan kal khawm leh a.


U Malawman, "Tun ṭum chu, kawr phelh ve tawh rawh u", a ti deuh tlat.


"I ho mai mai e a, khel ṭha hle hle ang u", Kross-an a tih pawhin, u Malawman a pawm duh tlat lo.


Ṭhuthmun aṭangin ka lo ngei ru lutuk a.


Kross-an min lo en zeuh ṭhin a, mi zawng zawng hmuha a taksa a pholan ka duh lo.


A hrechiang a, chuvanga hnial ṭang ṭang pawh a ni.


Mahse, u Malawman, "Thingtlang tlangval taksa chu a nalh an ti si a, chuti tehvaka nalh a ni lo tihna nimaw?", a han ti ta kher a.


A nui ta vak ang leh nghal a, ka thin a khei zak.


Kross-a a lo hawi leh a, ka bu ta nghat.


A kawr a hlip ta tual mai le. An khêk chel chul. U Malawma pawh a hawi lawl lawl.


A ngaih ang chu a ni bik miah lo. Thingtlang tlangval taksa pianhmang a nuihzat man a hmu chiang khawp.


"Kha kha a ni mai", Kross-a pawl te hoin an lo ti a.

Lo tlan pheiin, "Bawihi", a kawr min pein a lo kun hniam a, "Chak ngei theih nan", a biang a dawh ran.


"Vatin", min en ṭhup mai tawh sia. Ka zak lutuk chu ka so liam lo chauh. "Bawihi, min nghak reng a nia", thisen a va han lum ṭha duh tak.


Min hre vek tho alawm tiin, vawilehkhatah, a biang leh lam leh lamah ka chuk a.


Nui vur vurin Field chhungah a tlan lut leh ta a a, "Nuam awm bik mang e", Êngin min sik sawk sawk.


Chhingpuii leh a ṭhiante hoin ngeiawm zeta min lo melh ngar ngar chu ka hmu vuai.


Min tihrehawm pha lo thung. A duh apiangin min lo ngeiin min lo sawisel rawh se.


He hun thleng tur hian thil tam tak tuarin kan paltlang a. Kan dinhmunah khan ding hlawn ta se, an tlin kher lo ang.


A dik, tlin lo tur fe fe an awm dawn.


Keini chauhin kan hria, min lo ngei sawmsarih mah se, a ho em mai. Ṭhian atana ka sawm loh avanga maia lunghnur, Chhingpuii pawh a ti mah mah a ni.


Kross-an a pet goal a, Êngi nen dingin kan au thler ṭial rei ruai a, kan zuang tawr tawr bawk.


An chak ngei ngei tur a ni ringawt.


Êngin, "Han chak hlauh se aw", a ti sep a. "Chak dawn e a", a beng bulah ka au tuarh a.


"Beng a chhe dawn lawm", a thle sawn a.


Kan pahnihin kan nui dun kar kar. Chutah, "Kross-a", an au ṭhawt a.


An zi luai luai nghal.


Mangang takin ka tlanphei a, an inkarah kal mawp mawpin, lo let reng ka hmuh chuan ka pawm vat!


A hnar thi chu a kawr min ken tir khan ka hru a, ka mal chungah a lû nghatin, ka kuaidak deuh a. A hnar thi a reh mai lo atin ni.


Kross-a marphu an dek a, a thaw tih ka hria, "Nikhua a hre lo a nih hi", an ti ta a.


"Tui a awm em? Khawngaihin min lo pe teh u", min lo pe a.


A lû tihuhin, a taksa ka leih bawk. Khûr der derin a hmai ka chul a, "Hetia awmpui reng chu a ṭha lo, inah i zawn haw ang u".


Kross-a kut vuanin a bulah ka ṭhu reng, ka thawhsan phal thlawtlo.


A hnar thi reh tawh mah se, a la harh chhuak tlat lo. A khât tawkin a mar ka dek reng zel.


Hetianga awm tur hian a thawk nasa em bawk a ni.


"Ramah hnathawkin a awm reng a, a lo haw lahin a chawl mai mai bawk si lo, nikhaw hre lo te hian a awm khât zawk alawm", Mercy'n a ti ve seuh seuh a.


Naktukah ka haw dawn a, hetiang hi chuan ka hawsan thei dawn em ni?


Lo harh thuai thuai se ka ti mang e!


Chaw ei turin min lo ko a, zahawm ka tih em avangin ka hnial ngam lo. Tlêm tê tak tak chauh ka ei.


Ka hmuh loh kara engtin emaw taka a lo awm ka hlau.


Inlêng an lo pungkhawm ṭak ṭak, "A la harh lo, a mak khawp mai", chutianga sawi theih bak a ni lo reng a ni.


Damdawi inah te hruai ta zawk ila?


Êngi leh Mercy lo kal hnenah ka sawi a, "Ka pa ka va sawipui chhin ang e", Mercy a chhuak a.


Rei loah Êngi pawhin min chhuahsan.


Duat takin a biang ka chul a, a kut ka vuan tlat bawk.


Lo harh tawh tura ka duhzia ka sawithiam lo. Min kalsan turin ka duh lo a ni!


Kun hniamin a beng bulah, "Kross-a, hei chen kan thleng tawh, inphatsan awih loh!".


Nunna nei lo ang mai, thaw sât sât tho bawk si taksa ka kuah a, "Aw...ka kutah hian tihdam theihna han awm mai sela, rei a ni lo ang, "Bawihi", tiin min ko nghal ang mawle".


Dar kua chhoah pawh inleng an lo la kal tho, kei hi, pindanah ka awm char char a. Zak thei lo min ti em lo ang chu maw?


"Bawihi, thingpui i duh ve em?",


"Duh lo mai ang, ka lawm e".


Êngi chhuah hnuah a mar ka dek leh a, a pangngai thlap.


Ka phone lo ri chu chhangin, "Dar engzahah nge in lo chhuah ang?", Mambawihin a rawn ti a.


Tlai lama Kross-a awm dan leh, tun thleng pawha a la harh loh thu ka hrilh mial mial a.


Chutih lai takin Kross-a a rawn meng thut!


"Awi ka nu!", ka phu nasa lutuk chu phone ka thloh nghe nghe. Khum chungah a ni hlauh a,,a vanneihthlak.


"Kross-a, i rawn harh. I rawn harh tawh a nia", thei leh thei loin min rawn nuih a.


Pindan aṭanga chhuakin, "Kross-a a harh tawh", Êngi ka kuah hmiah. Harh tura duh hle si hian, a harh ta chêng a, awih har ka ti leh bawk si.


A nu leh pa bakah, u Malawma leh midang dang an lut a.


Êngi ka la kuah chawt.


"Bawihi, a lam che a, a bulah va awm rawh", a nuin ka hnung a lo chul a.

Min tilungchhe lehzual.


Kan pahnih chauhin kan awm ta a, ka hlauhthawnzia leh, a mar ka dek awl lo tih te ka sawi melh melh.


"Vawikhatmah khatiang khan awm tawh suh ang che", ka ti rawk a. A bu ve nghat tho.

**************

"Ni hnih hnuah chauh kan insawn dawn nia", a tih avangin, inah Pastor leh a lo kalpuite an awm a.


Kei leh ka chhungte chu, Chhingpuii nena kan in luahah.


A la lunghnur reng a, Ṭhian Man ei tur pawhin a lo chho duh lo. Thlen thlak ve leh ka pe a, Mambawihi a inmiltir lo zui.


Mambawihin a lo ngai thutak si lo a, engtin mah chuan kan awm lo hlauh.


Hrehawm ka tih leh ka zah em em chu, Kross-a an pak hiam hiam hi a ni. Hmâna an lo hmuhsit leh an lo tihduhdahna zawng zawngte hre tawh lo lêkin, an fak a, an be ṭha a, nui hmel an hmuh.


Ka pu, pitêi leh putêa te lo kal lo mah se, pawi ka tih loh nen, an lo kal lui tlat a.


An ngaih ang aiin Kross-an dinhmun ṭha a chang tawh si. Ka bulah pawh, "I ti ṭha lutuk, ṭha takin awm ang che", tia min fuih ve te hian, a rukin ka lo ner nasa thei lutuk.


Kross-a lahin, a mawi tawk chauhin an biakin a chhâng mai a.


Chumi bak, a hranpa ngatin a biain a hmu ngai lo. Anmahni zawk an va kal hawr hawr a, hmâna an bula a awm laia a fel thu leh, duat loh theih loh a nihzia an va sawi nghek zel.


An zak thei lo nge, an zak duh lo pawh ka hre tawh lo.


Kross-a tan a zahthlak tur zia an m hrethiam pha lo. A nu leh pa te an fel em a, "A zahthlak thei khawp mai", chu ka bulah a ti ve ṭhin.


Inneih Hunserh tihah, Kutsuih Hunserh a ni zawk mah ang chu.


Biak In dar a ri ta bal bal, ka thaw hap a, Darthlalang hmaah dingin, Mambawihi nen kan inthlek kual.


Min kuah a, "I nalh lutuk, Kross-a a thidang lo turah ngai ang", a ṭhen zui sak a.


Jerome-a pawh, nalh lutuk tak maiin kan bulah a lo ding a, ka nau mah nise, hmeichhe tam tak thinlung a la tina dawn chiang alawm!


Biak In panin kan kal a, ke ngatin kan kal.


Sunday School Hall-ah, pawn lamah an lo ṭhu ṭhup a. Ka zâm lutuk chu, ka zun a chhuak et et.


Mambawihi bulah, "Zun a chhuak duh ngei mai", ti sepin, a nui rah rah a, "I zâm vang a nih chu, hahdam taka awm tum la, i zun chhuak a reh mai ang", Jerome-a pawhin a lo hria.


Hahdam taka awm turin min lo ti va a, ka bulah ding mah se, min tihahdam chuang lo.


Mo luh a hun ta a, Jerome-a nen muangchangin kan lut.


Jerome-a rinchhanin ka kal a ni ber.


Maicham hmaah, mipui hmuh theih tur leh an hmaah tak kan ṭhu dawn a. Kan siir tawn tawnah, mipui hmuh theih tur bawkin kan nu leh pa te ve ve an ṭhu bawk.


Kross-a leh u Malawma an lo ding tawh a.


Zâm luat avang hian a tluk theih tak tak dawn.


Kross-a kutah ka kut Jerome-an a nghat ta a, "Ka u Nunna leh chumi piah lam thlengin i hnenah ka hlan a, hmun nuam leh himah min hruaisak hram ang che", Jerome-an a inzir nasat thu a sawi bawk a.


Vawi tam tak lo ding tawh ang mai a ni.


Chu a thusawi chuan mittui a ko chhuak nghal der. Mitmeng ngaihṭhat thlak takin Jerome-a chu a melh a.

Kross-a nen mipui hmaah kan ṭhu ta a ni!


Sawi mai aiin a zahthlak a, zâm chhiat awl tak a ni. Biak In hawnga innei tur ni ila, mipui hmaa ṭhut pawh ka hnial hauh lo.

Mahse, Biak In a ni lo nachungin, ropui takin min buatsaihsak a, Pangpar an pho chhuah lah, a nalhin lung a kuai ngaih ngaih bawk si.

Ka va han lawm tak em!

Mambawihin rawmawl min lo pe zeuh a, kan inchei nalhna zawng zawng, mittuiin a luan ral hlauhawm khawpin ka insum ṭang ṭang.


Pastor-in Ṭawngṭaiin hun a hawng a, "Kum tam tak liam tawhah khan, Chawlhni tuk khat, ka Bial chhunga awm, khaw pakhatah Hun ka hmang dawn a. Chumi pana ka tlan laiin motor a chhe ta thut mai a.


Chutah chuan, Tlangval pakhat, rilṭam leh tuihal tak hi rawn lang hlawlin, "Ka pu, Lal Isua awmna i hria em? A bulah min hruai rawh", Pastor chu a hnuk ulhin a han ngawi deuh a.


A mi sawi tura chu, Kross-a a ni tih ka hria.

Pastor chuan sawi zawm lehin, "Lal Isua bula kal turin pawisa engzah nge ngai?", a ngawi leh deuh a, "Lal Isua chu tu nge a nih tih a hre lo ai mahin, tui leh ei tur min dil aia Lal Isua bula kal a duhna chuan min hneh zawk tlat a ni", mipui hmaah kan ṭhu si a.


Han ṭah hluam hluam a mawi si lo, ka kun deuh tlat a, hawi chhuah zahthlak tak a ni.

"Tichuan, ṭhutpuiin, Lal Isua chanchin kan inhrilh ta a. Rin loh deuhin, Lal Isua chanchin a hriat chuan a nuih a tiza ta tlat.
Hlawhchham ka inti a, amaherawhchu, Lal Isua pan duhna thinlung a put rengna erawh chuan lawmthu min sawitir ta zawk a.

Chumi rah chhuah chu, hmânniah min lo bia a, Lal Isua ke bulah a tluk tawh thu min lo hrilh a", Pastor chu a ngawi leh deuh.
Hetiangin mittui a tla hnem dawn tih hria ila, rawmawl ṭhahnem tak ka keng tur a nia.

Mit kan hnawih dum lo te chu, ka lawmna a zual.

"Lal Isua ke bulah a tluk luhna pawh, Bual inah a ni. Bual in chhunga Lal Isua pan hi ka hre ngai lo. Aw...ho ka ti lutuk a, mahse, a ni tlat bawk si a ni.
Khawi hmunah pawh Lal Isua a awmzia lantirtu a ni.

Chu ka sawi Tlangvala chu, tuna, kan hmaa ṭhu, 'Pa' tia la koh mai tur 'Krawsthumawia' hi a ni", mipui an phut mur murna karah, lungchhiat a reh thei chuang si lo.


"Thinlung zawng zawnga Lal Isua pan kan duh tawh chuan, Camping a ngai lo, Kohhran mi hnena kal a ngai lo, Upa leh Pastor hnena kal lam a ni lo. Bual inah pawh Lal Isua a pan tawp theih".

Ni e, ni e, Bual inah lo pawh, Vawk in aṭang pawhin a pan tawp theih.
Khawiah pawh a awm tlat atin ni.

"Sap ho chuan 'C-r-o-s-s' an ti a, keini thung chuan 'K-r-aw-s' kan ti a. A ril bik em em mai a ni", an nui deuh sun sun hlawm a.


"Chutiang bawkin, 'Krawsthumawia' a ni. Kraws chungchang sawi dawnin Lal Isua a inrawlh ngei ngei a. Lal Isua chanchin sawi dawnin, Kraws chungchang sawi ngei ngei a ngai bawk.

Chutiang chiahin, kan chanchin an sawiin Kraws leh Lal Isua hi sawi tel ṭhin rawh se", Pastor thusawi chuan min leh thal chiang lutuk.


Ka chanchin an sawiin, Kraws leh Lal Isua a ri ngai lo hrim hrim. Amaherawhchu, kan Pastor-a erawh, a chanchin sawiin Lal Isua leh Kraws lam loh theih loh a ni lo.

Pastor-in a lo hruai, Missionary-a an awmna khua, Thingtlang khua ve thoa mi, an nula tlangval ṭhenkhat a lo hruaiten thiam takin 'Shout to the Lord' tih hla an thlawh vawng vawng a.

Chumi hnuah, anmahni Hnam ṭawng, Cambodia ṭawngin an sa leh a.
Hla thu awmzia hre lo mah ila, an sa nung em a, mi a hneh lutuk ringawt.

Pastor-in a hla thu tlangpui a sawi ta a, "Lal Isuan Kraws lera a Thisen hlua min tlanna leh, Thawhlehna hmanga min Chhandamna avanga lawmthu hrilhna a ni", a ti ta a.

Inneihna pawh a ang lo, Inkhawm kan ang mah zawkin ka hria.

"Nupaa insiam hi a har lo a, a har ber laia chu, nupa ni tura insiam dawn lai vel, a dawn laia tak hi ni har chu.

Nupa inkarah thuruk a awm tur a ni lo a, pasalin 'kei ka ni' intiin, a nupui chungah rawng takin a che tur a ni lo. A nupuia thu a ngaichangin, thurawnte a la ve ṭhin tur a ni a. A nupui chu a zah thiamin, a duat bawk tur a ni.

Nupui pawhin a pasal chunga a lungawi lohna te midang bulah a sawi zuah zuah tur a ni lo a, a pasal bulah ṭha takin, chutiang khatianga i awmin ka duh lo, a hrehawm tiin, a pasal thin thawk thei lo tur ang berin sawi ṭhin tur a ni.


A laiah Lal Isua awmtir zel bawk ula, in kawng hruaitu atan lo thlang zel ang che u. Nupuite hi Missionary in ni tih hre reng ula, in kutah Chhungkaw hlimna leh Chhungkaw kehdarhna a innghat a ni.


Pasal pawh, Lal Isua hmaah bâng loin ṭhingṭhi zel rawh se. Nakinah, Chawlhni tukah kan sawi zau ang", an ṭhen ṭha hlawm mai.

Kraws-a nen kan Kut a suih ta a, Pastor-a ber pawhin a mit thlan a hru leh ṭhin a, chu chuan min tizualkai.

Hming ziah luhah, 'Krawsthumawia' tih ka hmu a. Pastor sawi ang takin a ril ngaih ngaih bik lutuk.

Pastor-in, "Eng inneihna mah hi, ropui leh ho bik a awm lo angin, Biak In hawng leh hawng loa inneihna hian, a inneia te Thinlung Thianghlimna leh Rinawmnain a tiropuiin, a tihlu ṭhin mai zawk a ni", a tih chuan, min tihlim a.

Biak In hawnga inneih erawh, duhthusam a la ni reng.


Chutih rual chuan, Biak In hawng loa mahni tlin lohna pawma inneihna chuan, tlin lo chunga Biak In hawnina min tihbuai hun tur a awm thei dawn lo thung.

Krawsa duh ang ngeiin a pa te inah ka lawi lut a, "Fapa neiin, kan in chhungah Mo a rawn lawi ang tih kan lo suangtuah ngam lohna chu, a takin kan tawng ta si a", hnuk ulh ṭeuhin a pain a sawi a.

Nu leh pa thar, unau thar leh in thar. Engkim mai chu a thar vek.

Khawtlang an chawl ṭhup a, hnianghnar taka chaw han ei ho chu, engtikah mah ka tawng leh tawh awm si lo.


An hna ṭhulhin min lo lawmpui a, School chawl hmakin, Naupang leh Zirtirtu zawng zawng te nen. A khaw nawta lawmpuina kan dawng leh, a khaw nawta innei ruai min kilsaktu te zara mawi ve thei chauh kan ni si a.


Mambawihin, "Photo Shoot kan nei dawn em?", phur tak hian a ti a.


"A ho mai mai", ka lo ti vat. "Ho lo, tunlaiah chuan an ti vek tawh alawm. Zan lamah Party te an nei a", a la ti ṭalh.

"Sap kan ni lo", Krawsan a lo ti hmak.

Mambawihin, "Tunlai mil zela in adapt ve ṭhin tur",

Krawsan, "Ramsa kan ni lo",

"In ho mai mai", an inkar thu ka pawtchat a. Mambawihin, "Bawihi vangin ka ngawi ang", a tho nalh a.

Mercy bulah a va ṭhu tau nghawng.

Thilpek kan en kual a, a la tlai chhe lutuk lo nain, ka puar lutuk a, mut a chhuak.

Pastor leh a chhungte hi ka fakin, ka zah a, zahawm ka ti. Krawsa an lawmpui em em a. Masangi la dam se, a lawm ber a nih hial ka ring.

Reilotê chhung min awmpui dawn a, Kohhran Hruaitute pawhin Thusawina hun te an pe a.

A sawi pui riap riap ngawt ang.

"Pastor leh a chhungte an awm chhung chu, engmah ka ti ngam lo", ka kâwngah pawmin a lamah min pawt hnai a.


Hrethiam lo anga lan duh viau mah ila, ka nuih a tiza em a ni.


Show post links
Top

[Ngaia]

Thinlungmawlpa
Chapter-32
Ziaktu: Cck Lalchhuanawmi


Hrethiam lo anga lan duh viau mah ila, ka nuih a tiza em a ni.


"Masangi nu awm lo se chu, tun hi ka thleng lo anga, ka fate vang chauha tun dinhmun thleng thei ka ni.

Chhungkuaah chuan Lal Isua a Lal ber a, Chhungkuaah chuan tute pawhin an thinlunga thu awm emaw, an ngaihdan emaw te an sawi thiang a.

Tu mahin, "Chutiang sawi turin thuneihna i nei lo", tih loh tur. Pa berin, nu berin, fa naupang ber thlengin an ngaihdan eng pawh an sawi chhuak tur a ni.

Chuta ṭangin, "Kan chhungkaw tan hian eng nge ṭha anga ṭha lo ang?", tia sawi ho leh tur a ni a. Chhungkaw tina tu emaw duh dan pawh zahsaka, an thu ngaihthlak ṭhin tur a ni. Kan nupui pasalte tan, kan fate tan bik Vanram kan tem lawk tir thei dawn a ni. Chhungkua hi Vanram kan tem lawkna a ni si a".


Kan Pastor-a chu Thlarau Thianghlimin a chenchilh bawk a, huat tur a awm loin, mahni inhmuhchhuahna tur hlir a ni.


A mi lo kalpuite lah, an zaithiam hlawm si.

An Hnam, Cambodian an nihna an zahpui loin, an Hnam thuamte a nihna ang angin, Modify loin an ha chhuak tawp a ni a.

Chubakah, an Faka an hrechiang bawk.

Hun remchang apiangah Pastor a nih loh pawhin Masangi nu nen kan inkawm ṭhin a.


Thil tam tak min hrilhin, keiin ka hriat lohte zawtin, min hrilh ve mai ṭhin.


Krawsa tan bâng loa an Ṭawngṭai reng thu te, khatia Krawsa kâ ngei aṭanga Lal Isua a pan thu an hriatin an lawm avangin an mittui a tlak hial thu te an sawi sep sep a.


"Eng pawh tawk ila, Lal Isua rin leh a kuta innghah hi kan tih tur a ni mai. Thil danga innghahna leh rin tur kan zawn hian ka hah thlawn mai mai", Pastor-in Krawsa bula a sawi lai ka hre fuh.


Pastor leh a chhungte leh an lo kalpuite chu kan vai liam ta a.


An haw ta chu, kan ngui nghiai hlawmin ka hre mai. Keini pawh, an haw aṭanga ni thumnaah kan insawn ta a.


Thaw a vengin, a hahdamthlak duh phian.


Mahse, a khawharthlak ta thung. Kan pahnih chauhin kan ni tawh a, sawi tur hre tak kan ni lo nen.


Tv kan ena Zeldin tura ka ṭawng hian a lo tuihnih zeuh a. Financial Department Room-ah Darkar khat emaw chu a inkhung ngei ngei.


Nuam lo ka tih em avangin a bulah ka sawi a, "Ka bulah ṭhuin, lehkhabu i chhiar dawn nia", a ti a.


Chuta ṭang chuan a bulah ṭhuin, lehkhabu ka chhiar a. A nih loh leh, a tuka Naupang ka zirtir tur ka inenlawk bawk a.


Krawsa finna leh thiamna ka hriat belh zel.


Math a thiam dan pawh turu tak a ni. Ka hriatthiam loh lai ka zawt ṭhin a, ka chal a khawng ri ṭawlh zel.


Computer a khawih thiam dan pawh, a tikal zet zet. Vawikhat mah School rap lo leh, Zirna lama eng Degree mah nei lo hi, kei, BA thlenga Degree nei hian ka tluk miah lo.


Tluk lo tak ka ni.


Computer pawh ka khawih thiam lo a ni a, ani erawh, Professional thlap thlap. Hacker a ang zawk.


"Zo ta e", ṭhutthleng hnung a ngheng a, beiseibo zetin ka en.


A hrethiam a ni chêk ang chu, "Khawilai nge?", ka ṭhen ṭha.


Min hrilhfiah zung zung, a sawi thiam si, Krawsa zarah, Math thiam ve tawh tak ka ni.


Primary School zirlai Mathamatics bik ka tihna a nia.

Middle leh High School Math ka thiam leh tawh miah lo ang, ka zir hnu vek mah nise.


Example te nen, ka ṭankawp nasat a ngai dawn.


Min pawm kâng a, "Hahchawlh a hun e", a tih chuan, "Tv la en ang, a la hma em mai", ka lo ti a.

A ngaihdan a ni lo lutuk.


"I mit ngaihtuah rawh",

"Naa, la en ang. Mawhh, pleasee", ka ke ka leng a. Min enpui erawh a tum lo nasa.


Kei aiin a tum a ruh tlat a ni.

Eng phei chu a sawi lo, ngawi ngalin min en vung vung a. Tv en chu hnai lo tak a ni ringawt.


Nawrh(nuar) pawhin awmzia a nei lo, thaw hapin, "A ṭha", ka ti hmuk a.

Min pawm kualin êng hmehkhep ka hmet a. Room khar ṭhain, Living room, tv enna leh choka thlengin ka hmet thim a.


Zinga ka harh chuan min lo thlir reng tawh, "I thawh rualin min kaitho ve ṭhin rawh ka tih kha",

"Min thawhkhalh tum zawk ta che",


"Zing thawh hma hi ka Kum Thar Thutiamah a tel lo", puanin ka inkhuh zui hmak.

Puan chhanah min kuah a, "Chhungkaw thar neih thuai thuai a châkawm", chhungrilah min fan rawih rawih.


A ni ngawt ang, chu lam ka lo ngaihtuah hauh lo.


Chhungkaw thar neih hunah, kan inkar pawh a ṭha zualin ka ring a. Kan in lah a phuisui zual ngawt ang.


"Bawihi, i muhil leh em ni?",

"Muhil lo, a tlai tawh em hi. Tho ang", ka thawhsan daih.


Min umzui vat a, "Bawihi, thil dik lo sawi ka nei em ni?", aw...kei lah hi.


"Nei lo, thawh a hun tawh hrim hrim alawm", ka ti nghat a.


Chutia âw ka chhuah ta mai chu, kei mah zawkin mak ka ti, "Ka tum a ni miah lo nia aw", ka ti sep a.


Krawsa hmela inthlahrunna a reh chuang lo, "Thil dik lo sawi i nei lo", ka ti ngial a, "A ṭha lawm, choka lamah ka lo va inphih fai ange", zawi hnuangin bual inah ka lut a.


Thinrimin ka inhre si lo, Krawsa thusawi kha a dik lohna a awm lo reng reng.

Engin nge min mawlh ta nimaw?


"Lo haw hma tum la aw, dar sawmpahnihah chiah chiah Chhun chaw ei ang che", a bu nghat nghat.


School lam panin ka liamsan a, kan inhmuh theih chhung chu min thlir char char.

Tukina ka awmdan kha chu, a tihchi lem lo khawp mai.


Pawl thum room aṭanga ka chhuak leh, pawl khat room aṭanga Êngi lo chhuak nen kan intawk a.

Office pan pahin kan titi, "Thlahnih chuang Period ka awl a, tukina ka han Period mai chu, ka lawm asin aw", a ti su su a.


Min tiharh zawk, kei pawh, Thla hnih lai mai Period ka awl tawh. Thla thumna turah pawh ka la Period lo.


Awi ka nu, kei pui reuh hi!


Thla hnih chuang Period awl chuan, a ngaihṭhatthlak miah lo tih ka hre ru ve kar.

Engthil emaw tak tih hnuah phei chuan!


Nilêngin ka awm a nuam ve ringawt. Haw hunah fiah ngei a ṭul a ni.

Naupang ho aiin School bân ka duh tawh. Bân ka duh tawh lutuk chuan banga Sana intar te a nia, lak thlak lawka bân dara her nia ka duh.


Ka nghak rei ngar ngar bawk a, bân dar an khawng ri ta bal bal.


Thlawk chhuak lo chauh an tih angin ka awm. Haw kawngah Sub-centre-ah kalin, nau ka pai leh pai loh min enpui turin ka ngen a.


Test kit chu dawhkan chungah dahin kan en ṭhup.

"Rin sen pahnih a awm chuan nau i pai tihna a ni a, rin sen pakhat chauh a awm erawh chuan nau i la pai lo tihna", min hrilhfiah a.

Ka vawikhat hriatna mawle!


Hetiang lam inhrilhhriatna te hi Zirlaibuah chuang se, a ṭha ang.

A rawn lang ṭan ta a, chiang kel kawlin pakhat a inrin ta ngei mai le!


Pakhat chauh a ngai ta.


Krawsa ka hrilh huna a lawm dan tur nen lam ka mitthla thei vek.


A va lawm dawn tak, patling pui ni mah se, fa a nei dawn tih a hriat meuh chuan sâng tak takin a zuang ngei ang.


Rin sen pakhat chauh a ngai tawh, pakhat chauh.


A lang har ta lutuk ka mangangin, "Rin sen pakhat chu a va lang har tawh em em ve", a nuam lo lutuk chu a nuam lo zawk.


Lu thing nar narin, "Nau i pai lo a nih hi", min ti ta a. Ka nui hak, a awihawmlo em a ni.


"Thla hnih ka awl tawh alawm, a thla thumnaah pawh ka la Period lo. Kan inneihna kum chanve dawn a ni tawh bawk a", ka inthiam lo chu, "Ka tihpalh", thupha ka chawi leh rih.


An fel hlauh a, "Kan hrethiam lutuk che, inneih hnuah pawh hian, awl a awm ve ṭhin tho. Han nghak leh rih phawt rawh".


Krawsa ka ngaihtuah ber, tukinah pawh a sawi si a.


Ṭhat loh rukna ka nei lo turah ngai ila, 'maherawhchu, Krawsa ka hrilh ngam lo. Thu lawmawm aia thu lawmawmloh sawi zawng, tu han duh rual a ni lo.


Nau ka pai lo tih tichiang turin a tukah ka Period pang nghal a, ṭah hluam hluam ka châk ber mai.


"Bawihi, dik lo a awm em ni?",


"Awm lo e, Period chu i hriat kha", ka ti satliah a.


Period laia ramhuai tê chi an tih anga ka awm loh hi a lawmawm. Chu ai chuan, ṭawng ka peih lo a, nui hmel ka pu ngai meuh lo thung. Ṭah a chhuak em em reng mai bawk a.


"Vawiin chu School lam ka lo en dawn a, kan kal rual dawn nia", tukverh a khar zung zung.


Sofa dup nuam zetah thatchhe lutuk tak maiin ka ṭhu a. Thawhsan ka hreh a nia aw.


Bag-ah test kit a awm reng a, hrilh mai ka duh. Kei mah chauha hriat reng chu hrehawm ka ti.


Ka bulah lo ṭhu thlain, "Bawihi, nachhawkna ei ta che",


"Nachhawkna ei a ṭha lo", ka lo ti a, "Tuilum ip ka lo lak ang che aw", a ti leh a, "A zuau thlak mai mai", ka ti bawk si.


Min kuah hle hle a, School thlen tlai ka hlau tho rualin, kal châkna ka nei thlawt lo bawk.


"Krawsa, min thlah suh aw", hrilh ta zawk ila, ka hahdam ka ring a ni.


Huaisenna ka nei ta lo emaw tih tur khawpin, ka kâ a inchip tlat. Hrilh ṭan dan tur lah ka thiam lo.


Nau ka pai loh thu sawi mawl tawp a ṭha dawn si lo a.


"Chawlh i duh chuan i chawl thei reng a nia",


"Nikhatna hi chu, a dan reng alawm a nih. Ka ṭha thuai mai ang, tirawh, kal tawh ang", a tho hmasa zawkah ka ṭang a.


Kea kal ka duh tlat avangin min kalpui a, kan inah kan pêng kawi lawk bawk a. Ka nuin chhuna an ei tur Suji a siam lawk min eitir leh rih.


School kan thleng a, classroom a en chhuah vek bakah, naupang a be diat diat hlawm bawk a.


Naupang ho pawhin an ngaina.


Zirtirtu leh Headmaster ho te nen kan inkawm leh a, Headmaster-an Report te a pe.


School hmasawnna tur leh, Zirtirtuten inzirna tur kan neih leh hmasawn ve tho tur kan nihzia te kan sawiho a.


Min ngaihtuah tih hriat tak hian min lo thlêk leh ṭhin a, ka lo nuih seih a, a hahdam thei ta chauh ṭhin.


A tuk zingah in kawtah motor kan sil a, a chhungah ka lo ṭhu a, tihphut nan motor ka tiri thut zel.


A phu nasa thei lutuk kat dawrh ṭhin chu ka lo nuih chiam zel.


Kawngkhar hawngin a tinung a, khar leh ṭhuaiin, a kiu nghatin, a kiu chungah a khabe a nghat a, "Ka pi, khawi Ram nge tlawh i duh ber le?",


"Ram maw? Switzerland ngat le", ti vahin, ka nui sen sen a.

He Ram hi chu aw....

Krawsan, "A nih, kalrualpui i duh ang em?", a tih chuan, "Kei mah ngata kal ka duh", fiamthu tih hre loin, min kalh zawngin a sawi leh ang.


Ner nakin min en vung vung a, chutah, "Nula i nih tawh loh hi hre reng rawh", rin ang vel a ni e.


"Nula chu ni tawh lo e, mahni chauha kal kha ka suangtuahna a nih ṭhin vang a nia", ka nui sen sen a.


Ani pawh a nui sun sun, ka bek a rawn dawm a, "Hetia i nuih hian, ei zawh vek che ka duh ṭhin", ka nui hak hak.


"Ei theih ka ni lo chu, a pawi mang e",


"Nia, a pawi tawp", Krawsa tak hi chu aw...mi pakhat a ni ve chiang a ni.


"Tifai vat vat ila, chaw ei ang, ril a ṭam tawh", kawngkhar hawn ka tum chu min dang a, "Sub-centre-a i kalna kha, engtikah nge min hrilh dawn?", ka ṭhu khawng at.


Ka thlawk chhuak dawn emaw tih tur khawpin ka khûr! "Krawsa, thinrim suh aw, ka hrilh ngam lo che a", thinrim suh se.


Thinrim turin ka duh lo.


"Bawihi, ka thinrim lo. Nu Papuiin min hrilh lo sela chu ka hre dawn hleinem. Ngati nge min hrilh loh? Min hrilh ngam lohna chhan chu eng nge ni?",


"Ka ngam lo ve tawp", ti sepin, "Zingah khan nautê i duh tawh thu i sawi a, thu lawmawm loh sawi kha ka ngam lo a ni", ka ti chhunzawm a.


Thinrim hmel a pu lo a, a hmel hmuh a nuamin a dam thlup a.


Ka thaw huai thei, "Chumi vangin i sawi ngam lo a?", ka bu zeuh, "Midang kâ aṭanga hriat aiin i kâ aṭang ngeia hriat ka duh zawk asin. Chuvang chuan, nangmahah bik lêk phei chuan, kei chauhin hriat ka duh, a ṭha em?", pawmpui loh theih loh a ni lo.


Tiang tur tih hriaa lo sawi daih awm.


Hriat hun hi, a tlai thei em mai, "Kum khat em pawh kan la paltlang hleinem, mangan loh tur aw".


Thaw a veng huai tawh e.

Ka dâwn a va tawi bik ṭhin tak em aw...


Nupui ṭha tak Krawsa hian a phu mawle. Ka chhah telh tulh em mai.


Krawsa chu ni lo se, "Nupui mawl tak i ni", min tihna a rei tawh ang.


Amah a nih avang taka thlang ka ni reng bawk a, ka tisual lo e.


Ngawi rengin ka thlir a, Khawpui tlangval hoin a tluk loh ngat a ni a. Khawpui nula zawng zawng zinga a chhah ber min han thlang chat chu a ni si.


Show post links
Top

[Ngaia]

Thinlungmawlpa
Chapter-33
Ziaktu: Cck Lalchhuanawmi


Ngawi rengin ka thlir a, Khawpui tlangval hoin an tluk loh ngat a ni a. Khawpui nula zawng zawng zinga a chhah ber min han thlang chat chu a ni si.


A ṭha ṭha inkawp te chu a!


A chhah ber hian min hruaitu turin a fing ber kan neih a ngai ve tlat atin ni.


Mambawihin min lo call a, Office aṭanga chhuakin, choka bula Lalkhuang bulah ka ding a.


Inneih Photo shoot bawk a rawn sawi, hei hi a sawi ziah. A lungawi lohna a la reh thei lo.


"Ka nu leh pa an dam ṭha maw?",


"Dam ṭha lutuk, Jerome-a awm tawh si lo, in chhung a reh lutuk a, ka lêng chhuak reng zel", a rawn tih takah, inah awm tam turin leh, a him zawk thu ka hrilh seuh seuh a.


Thuawih takin, "Nia mawle", a ti sep sep a.

A thuawih hun chhung a rei hauh lo ang. Mambawihi hi chu, hrechiang thawkhat ka inti ve.


Ka nau a nihna zawnah hian, thawkhat ni loin, ka hrechiang lutuk zawk.


"Bawihi, in inkar a ṭha zel maw?",

"Teh daih chuan, tu nen maw kan inkar ṭha zel tur chu?", Krawsa a sawina tih ka hria.


A hming sawi hrim hrim turin ka duh.


"I hre reng", a lo ti hmuk a, ka hriat loh thuin ka chhâng thung.


Krawsa hming a sawi duh lawk lo, keiin hre lo angin ka intiawm bawk si. A tawpah, "Krawsa", a rawn ti ta hlar.


Nui rah rahin, "E...a tirah sawi ta che", min rawn ânkhum nasa mai.


"Fimkhurna tur ka hrilh dawn che", thutak zawkin a rawn ti ta a. "Keimah maw?",


"Ka hrilh che a, nangmah i nih lohin?", ka tithinrim mawni?


Mambawihi chuan, "Ka pu te hoin Krawsa an rawn be sek tih i hre ve em?", a rawn ti chu, khuarkhurum aṭanga khai chhuah hlim ang mai niin ka hria.


Chutiang ka hre bau lo.


"I chiang maw?", Mambawihin, "A phone number min dil a, ka pe duh lo naa, ka nuin a lo pe a. Ka nuin engtin nge a neih ka hre bik lo. Kei pawhin ka nei lo a nia", a ti nuah nuah a.


Mambawihin Krawsa number min dil lo mah se, pek ka tum lo hrim hrim kha a nia.


Ka nu chuan khawi aṭangin nge a lo neih hman le?


Ni tak, putêa te khan an ngaihven em a, inneih hmang tura an lo kal khan, tu tute emaw hnen aṭangin an nei thei dawn.


"Fimkhurna tur chu?", ka hlauthawng ṭan.


Hlauhawm lam awm dawn lo mah se, ka hlau ve ringawt.


"Bawihi, engkimah lo fimkhur phawt ula a ni mai. Duh mah ila, chiang fek fawkin ka sawi thei bik lo. Kan chhungte aṭang hian lo fimkhur phawt mai teh u".


Mambawihi hnenah lawmthu sawiin, fimkhur taka kan awm tur ka hrilh a.


Ṭhut hmunah ngaihtuah neuh neuhin, chiang takin Mambawihin sawi thei se chu, a zia tur.


Ka pu te chuan, engvanga Krawsa lo bia nge an nih ang aw?


Krawsa hmelah danglamna a awm lo a, a awm lo mai pawh ni loin, a sawi si lo. Hre lo pawh ni ila, a awm lutuk.


Eng thu nge an rawn hrilh ṭhin ang?


An hmuhsit ṭhin avanga ngaihdam lo dil an nih ka ring lo. Kha chen ngaihdam dilna hun a awm.


Ngaihdam dil chu sawi loh, a leh a lingin duat taka enkawl anga insawiin, a ke an fawp lo chauh a nih kha!


Duh ngat se, Krawsan a ke a fawhtir thei ang chu mawle.


An khawsak dan leh cheziate khan a zir em a, Krawsan a ngaihsak lo chung pawhin, a hnungah an kal chhet chhet kha a ni a.


Ui aia an tihretheiha hnungah mei kawhin an um a ni a.


Krawsa rilru tur reng an dâwn pha tawh lo. Anmahni chauh an inngaihtuah. Rilru a va zing thei ṭhin tak em aw...


Haw pahin Krawsa ka bia a, "Lo haw hma tum ta che, thingpui tui tâwkin ka lo hmuak ang che", a lo nui tat tat.


"Lutuk, ka lo haw mek e".


Phone dahin chak takin ka kal a, inah kawiin, ka nu ina awm nen kan titi leh phawt.


Rei awm hman ni hek lo, haw leh thuaiin thingpui tur lumin, tukverh te ka hawng a.


Thingpui siam leh thuai thuaiin, flask-ah ka dah a. Lum nawn ngai lo turin.


Sofa dup nuam tâwkah ṭhu tlumin, motor ri ka ngaichang.


A tawpah zawng, motor ri ka hre ta. Ṭhutna aṭangin ka tho peih chuang lo. Ka ṭhu nuam lutuk a, thawhsan ka hreh.


Sofa dup nuam lutuk hian min pawm bet tlat.


"Bawihi?", pawn aṭangin a lo au a.


Peihlo tâwka thawh a ngai. Kawngka nghengin ka ding a, Di Pangpar min lo hawn hmuh rualin ka thlawk phei chiang lutuk.


Min kuah a tum chu thle sawnin, "Pangpar chauh ka duh", ner nakin, "Phakar reuh lutuk mai", a Pangpar kenin min khawng keuh a.


Computer hmaa ṭhut a ngaih loh avangin tv hmaah kan ṭhu dun a.


Rei a ni lo, kan ṭhu fel chiah tihah inlêng kan nei nghal. Krawsa ṭhiante ho an ni a, u Malawma pawh a tel.


Living room-ah an va inkawm a, tv ka lo en thung.


Ṭhut pawh ṭhu loin ka mu a, ka thatchhiat hmel mai mai a nia!


"Nuam i va ti ve", Chhingpuii ka hmu thut chu, ka phu chiang lutuk.


Tho nghal thuaiin, "Lo kal rawh, lo kal rawh", ka ti zung zung a. Ka ṭhutna bul chiah Sofa-ah a ṭhu ve.


U Malawma a awm tih a hria ang em aw?


Nge ni a, an pahniha lo lên an tum hrim hrim zawk?


Krawsa te chu, an inkhel lai vel sawiin an nui chiam a, "An va hlim dar dar ve maw", Chhingpuii chuan a ti a.


Nui varin, "Nia mawle, an lo lêng ziah ṭhin a, mahse, zanin hi, u Malawma a lo lang ve teh tlat", ka ti sep a.


Chhingpuiin, "A la hrilh lo che em ni?",


"Eng chu maw?", ti hê hâwin, "Kan inṭhen tawh alawm", hrui fei tâwk tâwk za chuang phiar khawma phuar ni mai hian ka awm.


Inṭhen tur chuan, chhan ṭha tak a awm ngei a ngai dawn.


Chhingpuii hnenah, "Fiamthu pawhin an sawi ngai lo", fiamthu a ni hauh si lo ale. Nuihza hmel a pu miah lo.


A lu thing nar narin, "Tak tak, fiamthu a ni lo, hmanniah kan inṭhen tawh, ni thum a ni tawh a nih chu", mak ṭhin mang e aw.


"Chhan a awm em?", a dar kân âkin, "Awm ṭeuh mai, sawi chhuah a rem lo mai pawh a", ka hrethiam chuang lo.


U Malawma a fel tehreng nen, a ṭhen phal zawk em mai a.


"Tihian, lo ṭhu rawh, thingpui ka han lumsak lawk ang e", chokaah ka kalsan a.


Krawsa te lah chu an hlim nasa ropui.


U Malawma lo lêng pawh chu, a ṭha phian. Intiharh turin a lo lêng a ni mahna.


A ṭhiante bulah awmin nui vak vak se, atan pawhin a ṭha zawk. A tuar viauin ka ngai ngawt a, Chhingpuii a duh bur khan ka hria, a ni lo mai thei bawk a.


Tray-a thingpui chawi pheiin ka pe diat diat a, "Krawsa insawithei lutuk pawh, a awm viau e. Pasalte ṭhian i ngaipawimawh tlat zel a, nangmah ang hi ka duh ve", u Malawman thingpui no ban pahin a ti a.


Midang pawhin, "Bawihi, unaunu te i nei lo maw?", an lo ti a. "A neih kha, ṭhian atana a hman kha", ti pawl an lo awm.


"Ni tak e, hmun ruak a la awm em ang chu a!", bei lo zetin an ti nuah nuah.


Krawsan a ṭhutna Sofa bân chungah min ṭhuttir a, tray chu center table-ah Krawsan a dah.


Ka kâwngah min kuah a, mi zawng zawng hian a nupui ka ni tih an hriat hi a duh berin ka hria.


Min ta neih bik hliah hliah zel.


A ta ka ni reng bawk a, "An lo hre lo palh ang e", ti niawm tak hian, a tilang fo.


Nuam ka ti, ka sawisel phal ṭhin lo a ni. Hei chen thleng turin kum tam kan inṭhen tlat si a.


Chhingpuii ka hre chhuak zawk, "Chhingpuii a lo lêng a, a bulah ka va awm ang e", kun hniamin ka ti sep a.


A lo phal ve mai.


Tray-ah no ruak an lo dah khawm leh anga, an in zawh hun awmah va lam a ni tawh mai.


"I lo ning hman em?",


"Ning lo e, tv ka en tui lutuk a".


Inbe lem hlei tawh loin tv kan en dun a, a changa kan tv en lai ka sawipui zeuh tih loh chu, amahin min biak a tum si lo, kan ngawi dun chet chet ringawt.


Thingpui an in zawh tawh ringin, Chhingpuii hrilh loin ka tho a.


An lo in zo ṭhap tawh.


Tray chawiin, tv hmaah ka ṭhu leh thuai. Chhingpuii chuan, "Haw tawh ila a ṭha ang, ka lêng rei dawn tlat", a ding hluai a.


"La hma em mai, i duh chen chen lêng rawh, a ho em mai", ka ding ve a.


Haw a tum ṭalh avangin Gate thleng ka thlah.


"Saron par mawizia hi aw...heti hian a kualin in la ti lehnghal, a mawi dangdai tawp", a thlir chho doh doh a.


A mawi a ni!


In chhunga ka luh pawhin, an la nui huah huah.


Min hmu thei chuang lo tiin, ka mu leh daih. Mambawihin fimkhur tura min hrilh te, putêa ten Krawsa an be sek te chuan, tv en laia min insawrbingtir thei thlawtlo.


Eng nge an duh a, an lo biak sek?


Kam fimkhurna tur chu eng nge ni ta ang?


Pawisa ṭhahnem tak an dil nge ni a, nge ni a, thildang zawk? Pawisa an dil ngei ang, pawisa bak duh an nei hleinem maw.


Chhungte laka fimkhur ngaih laiin, u Malawma leh Chhingpuii an lo inṭhen ve leh.


Anni erawh, ngaihtuah tihnat an ngai lo thung a.


Putêa te chu aw, eng nge an duh ang?


Krawsan an lo be ṭhin tih min hrilh ve tal se ṭha tur. Ni dawn tak e, Mambawihi hnenah putêa te number dil ila, kei mah hian ka bia ang.


Mambawihi message ka thawn a, a rang thei ang bera min thawn turin ka duh.


Phone ka en sek.


Ka va biak ve khan, ka tikhawbaw zo ang tih hlauhawm bawk si.


Min hrilh loh danah, Krawsan a tifel thei a ni anga, chumi vang a ni mai thei.


Ka hriat tur ang chu min hrilh ve ngei ang.


Mambawihin min lo thawn mah se, va be lo zawk ila, Krawsan min hrilh hun nghak zawk teh ang.


Period mumual lo deuh hian test ka nei ziah a, Krawsan min nuih tawp.


Tih vak ngaihna a hre bik lo, min en mawl tawp a ni ber. Inah test kan nei ṭhin a, amah hi test kit lei tura ka tirh ber a ni.


Kum thar kan chuangkai a, nau ka pai thei lo ber chuan min tibuai tawh.


"Bawihi, i hmanhmawh a nih kha, muangchang leh fimkhur tak zelin le", min ti ṭhin a.


Muangchang leh fimkhur te chu a!


Hmanni lawka innei te pawhin, nau an pai tawh nia.


Muangchan ka thei tawh lo hrim hrim.


"Hmanhmawh taka i awm khan, i rilru a hah a, naupai tur chuan taksa hahdamna bakah, rilru hahdamna hi a pawimawh. A hun a thleng ve mai ang. Chuvang chuan, hahdam takin awm la, hmanhmawh cheng chawng tawh suh", ka thin a tirim.


Chhungkaw thar neih thuai thuai a duh ve tho sia, hmanhmawhlo turin min ti bawk si.


Hrethiam mai mai bik lo e a.


"Dar sawm.a ri dawn, tv i en rei thei lutuk", min pawm kâng nawlh.


A hmuhnawm ṭan dawn chauh asin maw aw...


Hnial tuma, "A-", ka ti hman, "Taksa leh rilru a hahdam a ngai ka tih kha", ka hnial lui ṭalh dawn mawni?


Zingah ka harh hmasa ta thung, muthilh leh daih ka duh a nia aw...

A harh hmasak chuan min thlir veng veng zel a, ka thlir ve veng veng.


Harsatna tam tak a paltlang, thi leh thau pawha ṭangin tun hi a thleng ta a ni a. Thawk lo chunga nawmsak tum ten an be tlawn mek a ni a.


Chu khuarkhurumah chuan a tlak loh hram ka beisei.


A tla dawn lo, kei hian ka chelh dawn.


Show post links
Top

[Ngaia]

Thinlungmawlpa
Chapter-34
Ziaktu: Cck Lalchhuanawmi



A tla dawn lo, kei hian ka chelh dawn.


Pastor nen kan inbia a, "Kan chunga dan rual loh harsatna a thlen hian, mi puitling, Lal Isuaa innghatte nun a lang ṭhin. Chi-ai mai loin, âng buan buan lovin, thil then dan thlithlai zawk leh ngaichang reng zawkin an awm a. Chinfel dan tur leh, an thusawi tur phei chu ngun takin an ngaihtuah hmasa tê tê ṭhin. An fimkhur zual sawtin, an dam thlup a, harsatna thlen avanga buai leh inhneh tir an tum lo bur a ni".


Harsatna la tawk lo mah ila, zawm ngei turin ka ngaithla kar a.


Thinlung phekah a inziak nghal thlap.


Kan Pastor-a ang hi, an awm leh thei pawhin ka ring lo. Vannei ka ti dawn nge, nge ni a, Lal Isua a hmu chiang zawk em a ni.


Huan thlawhfai a ngaih pawhin amahin a ti tawh ngai lo a, hlawhfa a chhawr tawh zawk ṭhin.


Sumo lakna loan rulh a ngaih avangin ren thei ang bera a awm a ngai a. Chuvanga amaha thawk ngar ngar a nih.


Sumo lakna loan rul fel chiah lo mah ila, buaipui tham a ni tawh lo.


Chaw ringawt in aṭangin an keng a, Huanah chawhmeh an siam mai zel. Naktuk hi thlawh zawhna tur a ni tawh dawn a, ka tel ngei ngei a ngai.


School chawlh a ni hlauh bawk a, Exam chawlh a ni mah zawk. Result puan chauh kan hmabak tawh.


Exam lai te hian kei chauh lo, kei ai hian Krawsa a hah zawk.


Exam zawhna min buatsaihsak vek a, chhânna min enpui leh vek bawk. A phunnawi ngai lo a, kei aiin nuam a tiin ka hria.


Fiamthu deuhin, "Ka aiin va Zirtir la", ka ti ṭhin.


"Theih ila chu, Zirtirtu ni turin ka inzir puitling ngei ang", heti hian min chhâng ziah bawk.


A mitah tak ka en a, a theih phawt chuan Zirtirtu ni tura inzir puitlin chu a duh ngei a ni.


"Nausên nih lai aṭangin eng zirtirna mah dawng lo mah ila, Zirtirtu nih hi ka duh. Zirtirna ka nih ngai loh ho, zirtir ka duh ber a ni ṭhin", a mitah chang ni lo, a hmelah chang ni lo, a taksa zawng zawngin an lantir.


Huana kal turin kan insiam a, hna min thawhpuitu turte kan in kawtah an lo kal khawm a.


Krawsan, "A tawpna a ni tawh bawk a, Arsa kan hmeh dawn nia", a ti a. An lawm hlawm lutuk.


Sawmhnih dawn an ni a, Huan a zau ve em bawk a ni.


Pik-up hnungah kan lawn kai ta hlawm a, nu upa ve lam tawh tak hi a Seat-a ṭhu turin ka han thlêm deuh naa, a duh tlat lo.


"Nangmah ṭhu rawh", min ti teh tlat a.


An thawm a ṭha ngang mai. Hma lam aṭangin Krawsa nen kan nui ver ver.


"Pawl sawn tur an tam dawn awm em?", min zawt laih laih hlawm a, "An tam leh dawn lutuk a, an sawn theih loh dan tur, a bul aṭangin kan en ṭha ngat mawle", an nui tliar tliar a.


Ar pathum lai, lian nelh nawlh tak an lo keng lut chu, ka uak ta tuarh!


"Engtizia nge ni ta?", Krawsa pawh a lo tlan lut. "Ar rim kha ni berin ka hria, min ngei tlat", ka hnar leh kâ ka hup a.


Rimchhe lutuk tia sawi tur ni lo mah se, luak a pawt tlat. Ka ngaihah chuan rimchhe tawpkhawk a ni thung.


"Bawihi?", ka darah min kuah a, pawnah Ar a dahtir daih.


Ka en chho a, "Ka ṭha-", ka uak leh nghal. Vawiin ka awmdan teh thut chu, a zahthlak zawk alawm le aw.


"Ngawi teh, nangpui roh hi, nau i pai ni lo maw?", min rawn ti ta!


Krawsa nen kan inen hê hâw.


"Nau pai a?", min ṭhawng lutuk a, ngaihtuahna bingin a zui mai nen, "A ni thei dawn em ni?", ka ti hram.


"Test-na ka han lei ang aw", Krawsan a ti chu, "Ngai lo, a zahthlak", ka khap rang lutuk.


"Ka chiang lutuk, nau i pai a nih kha", min la ti zui a. "Tui tâwkin ka han siam ange, kan Ar chu", ti tâwk an awm bawk.


Krawsa chu an nghawng zai chu sawi loh, Ar ken ringawt pawh an phal lo. "Upain, nupuite nau pai laia pasalin thisen a chhuah hi thiang loah an ngai a, Ar chauh lo pawh, thisen chhuah theih reng rengah inhnamhnawih lo ang che", an hrilh thlap.a.


An zilh a ni mah zawk ang chu.


Krawsa chu inthlahrung duh bik loin, Ar chu a hmul pawh faiah takngial pawh a tel duh lo.


A mipa lamin hlo an thlo a, a hmeichhe lamin ei rawng kan bawl. Ar rimin min ngei tlat chu, hrehawm tak a ni.


A neitu ber engmah ti loa awm mai mai a mawi si lo. Han puibawm ka tum a, Ar rimin min hnawt thuai zel bawk si.


"Khawngaihtakin min lo hrethiam mai teh u, hrehawm ka ti em mai", min hrethiam takin, "Lo ṭhu mai mai rawh, nau pai lai chuan indim tur a nia", min ti a.


Pawna awm daih a chi si lo, an titi ngaithlain kil khatah ka lo ṭhu ngawi reng.


Ka vanneihzia thu ngawt an sawi laiin, nau an pai laia an vanduaizia an sawi bâng lo bawk.


"Rainô huat neih pawhin, haw(hua) lo ang chiaha chet bawrh bawrh a ngai tho a. Tu mahin min awl duh hek lo, pum puar ulh chung pawha chhuat nawh te a ngai ṭhin a nia, tunlai mi nau paite hi chu an vannei asin. Keini kan mo te leh fanu nau pai kan han duat theih dan hi aw", chu thu sawi chu an inchuh emaw tih tur a ni.


An chan chhiatzia te an insawisiak a ni ber.


Kil khatah ka ṭhu zum zût, Ar rimin min ngei avanga an ei rawngbawlnaa awm thei lo ka ni a, ka inthlahrung tawh khawp mai.


Ar rimin min ngei tlat chu ka thin a rim, duh leh haw hunah min ngei mai se.


Thin a rim hluah hluah mai ni. A sa ka ei nghek ang, Ar sual lutuk mai.


Mei ka lo vil a, hlo thlo turin min chhuahsan tawh. Bel chhunga Sa chu ka chawk baw(bua) lo chauh a ni.


A bel chawp chawpa thlawh bo tir vang vang a nia ka duh.


Krawsa lo kalin, "U Tûmsa i chhum em ni?", a nui hmel chuan thinrimna a han tizual ta mai a nih kha.


Be loin ka hawisawn hmak, ka dar a rawn tawk a, ṭek ang maia hlauhawmin ka melh.


Min rawn khawih chu ka duh ta tlat lo.


"Ar aiah Vawksa siam zawk tur ania", Indopui pathumna chawk chhuak thei dinhmunah ka ding mek.


Indopui pathumna chawk chhuaktu ni chu, pui ve thawkhat tur chu ka ni.


Chawk chhuak thei ang maw i!


Krawsan min en vung vung chuan, ka ṭah a tichhuak leh ta pek a nih kha.


Min en vung vung hi chuan, ka luangliam hneh ṭhin em a ni.


"Bawihi, ṭah i tum elaw?", a hrilhhai hmel chuan nuih a tiza leh pek. Haw thuai thuai ka duh tawh.


Thaw hapin, "Haw ka duh tawh", a hma zawngin a ngaihna a hre lo.


"Ka hruai haw ang che aw",


"Chuan, hetah i kal leh dawn tihna em ni?", a bu nghat a,,"Ka duh lo, keimah chauha ina awm ka duh lo", Krawsa ka hawisawnsan leh hmak.


Mei chhawm ṭha sauh sauhin, "Kan haw thei ṭep, min lo nghak lawk rawh aw",


"Ka bula awm i ning a nih kha", ka bul chêtah a rawn ṭhu thla thuai, "Bawihi, min lo en teh", en duh loin ka hawisawn ngar ngar.


"Bawihi, vatin, min lo en teh. A nih loh chuan tharum ka hmang palh ange aw", peih lo deuhin ka en a, ka heh a rawn tawk thut.


Eng ka hria nimaw, nghakhlel ber awm.ang.ziazângin ka dang lo reng reng.


Ka thinrimna leh ṭah duhna te kha an bo duak duak mai a, sawi fiah theih loh hlimnain min khuh hlup hlup a, Romeiah changin ka zâm chii chiaii!


"Kan haw thei ṭep ka tih kha aw", nui sen senin ka melh a.


Arsa rimin min ngei tih loh chu, thinrimna tih angreng ka nei tawh lo.


Nau chu ka pai tak tak roh em ni le?


Arsa rimin min ngei avangin ka uak a ni mai a, law chhuah phei chu ka nei lo.


Haw hunah fiah a ngai dawn a ni.


Tu emaw chu, test kit lei tura a kal a ngai dawn a ni. Phunnawi loin a kal ṭhin a ni a, mahsela; kal hah man a nei ngai lo thung.


Zanin erawh, kal hah man nei ngei tawh sela aw...


Chaw kan ei a, Arsa ei nghek tum khan ka ei thei ta ṭhak lo. A mi ngei na lutuk chu, zahpuiawm khawpin chaw ei khawmnaah ka ṭhu thei lo.


Bathlarah ṭhuin, an chaw ei lai ka thlir tawp.


Sa tel miah loin thleng hnih kengin Krawsa lo kalin min eipui a. Sa ei a duh dawn tehreng nen.


In chhungah ni loin leiah an ei a ni a, nuam an ti chu a ri hut reng a. An ngawi lo reng reng, an nui khêk tuar tuar.


Keini erawhin, bai chauh kan ei.


"Sa ei i duh chuan ei tho la",


"I ei loh chuan ka ei duh bik lo", ṭahkhum chiam ka duhzia chu a.


"Haw thuai thuaia, fiah a châkawm tawh ngei mai", a hlimna tilang ṭha duh chiah si lo, a nih loh palh hlauh takah tih thua tilang ṭha ngam lo.


Fiah chu a châkawm tawh lutuk.


A nghahhlelh ber kha a ni a, vannei chungchuang tak ka ni ngei dawn tih ka chiang ngam sak.


Rilru nuam lo takin min awmtir dawn lo a, min nuihtir reng dawn tih ka hre bawk.


A chhan chu, Krawsa a ni tlat a ni.


Test kit nen a lo haw a, zun a chhuak lo tlat mai a nih kha.


Tihngaihna a vâng lutuk a, inenin kan nui dun tawp. Tui min intir ta ṭeuh ringawt, keimah chauha in a ngaingam lo ni tur a ni, min intir aia tam daih a in.


Zun a chhuah tlat si loah chuan kan inbualfai a, ei rawngbawl a hun mai avangin chokaah kan bur chat.


"Bawihi", bai chawk lai chawlin min lo en a, Bean thian chungin ka lu ka thing.


Zun a la chhuak thei lo.


A tawpa tawpah, Tlumtea thlir taka kan thlir a lo thleng ta.


Dawhkan chungah rin sen pakhat lan hun inkuah chungin kan nghak. Rin sen pakhat a lang tawh a, pakhat chauh a ni, pakhat chauh kan nghak a, pakhat chauh kan duh.


Krawsa thinphu ri ka hre thei!


A rawn lang ṭan a, Krawsa phei chuan a en ngam tawh lo. A fiah tual tual a, rin sen pahnih a awm ta hmiah mai le!


"Krawsa, a bo daih", rang takin a lo hawi chhuak a, a em vung vung.


Khur der derin a la kang a, "A bo daih tak tak a nih hi", a ti hnual rawih mai chu, inring hman hek lo, ka nui ar ar a.


Chutah, lungchim taka min pawm bet thlawpin, "Bawihi, ba rulh tlak theih ngai loh tur ka insiam ta mawlh mawlh mai chu a nih hi", beng bulah sawi lo se chu, ka hre thei lo ang tih turin a sawi zawi.b


Thinlung erawh chuan a hrefiah hle thung.


Ba rulh tlak theih ngai loh tur ni loin, keimahni pualin Chhungkua kan din a, nu leh pa kar loa seilian kan nihna avanga tlakchhiat nana hmang loa tun thlengin, tuna kan Chhungkaw lo zawmtu tur hi chu, nu leh pa karah ngei kan seilen tir dawn thung a ni.


Eng ba mah rulh tur a awm lo.


"Ba i nei em ni? Ba chungchangte i sawi tak mai a?", ka bek a dawm a, "Hei bak baka ba a awm chuang em ni? Engtikah mah ka rul zo chein ka ring lo",


"Ka bulah i awm reng a ngai tihna a nih chu",


"Lutuk".


Ka chhungte ka va hrilh a, Mambawihi phei chuan, "A hming ka sa dawn", a rawn ti phur hlut nghe nghe.


Chhungten min lawmpui mah a lawmawm rualin, Krawsa lawmna hian min hneh zawk tlat.


"Ka nuhah", thaw hluam chunga a ti phei chu e, chhuata let tawp tawpna tham a ni.


Nuhah tak tak pawh a ni lo, a lehkhabu chhiarah, Nu naupai mek tana nasa taka nuih a ṭhatzia leh, hrisel taka nautê a pian chhuah theih nana hlim taka Nu a awm reng ṭhatzia a inziak tlat atin a ni.


Min nuihtir dan ngawt a zawng ṭhin a, tv-ah lah nise, nuihna tur hlir kan en a ni mai.


Chu chuan hna a thawk ṭha tho nachungin, rilru nô a chhuak lo thei lo ṭhin lo.


Chung hunah chuan min ṭhutchilh tawp zel. Thu nê nê ka neih chhun ka sawi zawh hun ngawi rengin a ngaithla a, ngainatawm takin min en vung vung zel.


Ka ṭah chhan te hi a ho thei si, "Lehkhabu i chhiar peih lutuk", tih mai mai hian bang kilah kher ṭhuin ka ṭap ta ṭhin.


Min en mawl tawpin, min ṭhutchilh tlat a, ka ṭah bân hun min nghak tawp zel.


Mahse, a rei a rei a, a reh tial tial.


Ka dul pawh hmuh theihin a lang ve ta deuh a, "Kil khata i ṭah lai kha a ngaihawm", min fiam nan tak a hmang ta ṭhin.


Ngei lutuk hian ka melh khâ khâ ṭhin a, kun hniamin, "Nautê ṭahbelh deuh ni turin lo chhuak suh aw", a ti kher ṭhin bawk.


Hetianga a tih hi chuan, ṭahkhum chiam ka duh ṭhin.


Counter lama a kal zeuh zeuh a ngai ṭhin a, Mercy hian min awmpui mai zel. Krawsa a awm loh chuan buai thei tak ka ni.


Mercy hi fel viau mah se, Krawsa a ang lo.


Ka ngaina lo tihna ni loin, ka ngampa lo mai zawk a ni. Chhingpuii a lo lêng zeuh ṭhin a.


Krawsa awm loh laiin a lo lêng duh lo a, a awm hunah chauh a lo lêng ṭhin.


Mercy hian, "U Chhingpuii hi a mak e", a tawpah a ti ve hial.


Hlauhthawn rukna nei ṭhin mah ila, Krawsa ka rin em avangin eng mah ka sawi duh lo mai a ni.


Chhingpuii a lo lên pawhin Krawsa nen an inhnaih thei chuang lo.


Zan khat a lo lêng chu, Krawsa hnaih theih dan tur ngawt a zawng. Ka hrethiam ta chiah bawk.


Awm lo ta ngat ila chu, ka awm lai pawhin heti a ni a, awm lo ngat phei ila chu, a nasa ngawt ang.


Krawsa bulah ka sawi ta nge nge, hriatchian ka duh takzet.


"Lo hlauthawng suh, Suar paltlanga ka neih che i ni a, Bawihi; ka thlah mai mai lo ang che", dâwt a sawi dawn lo tih ka hria a.


Ka ring a, a kutah ka innghat.


Chhingpuii a lo lan chang erawh chuan, suihlung mawl tak hi a phâng leh ṭhin a ni.


"Inah i awm tawh em?",


"Awm tawh e, ka thleng chiah", bag nghat thlain, tukverh ka hawng a.


Ka ṭhu âwn duai duai, "School chawl ta che, dul kawh luaha naupang hmaa din(ding) te chu a", a ni ve tho mai.


Ka dul ka khawih a, kawh lutuk a ni lo, len(lian) erawh a lian ṭan.


Naupang hmaa din zahthlakna tur a la ni lo.


"A lang ṭan chauh a ni a, kawh lutuk pawh a ni lo", nautê chungchang hlir kan sawi a.


Kei ai hian an phur vek maiin ka hria.


Thawmhnaw lei lawk angin an insawi hlawm a, an leilawk ka ring miah lo thung.


A hnuah, "Ka pu a dam lo a", a rawn ti ta a.


Mihring ka la nih tho avangin, mihring rilru a chhuak lo thei lo, a phutawkah ka ngai tlat.


Mambawihin, "A dam lohna a rei tawh lutuk, putêa ten min lo hrilh lawk lo a, tunah, boral thut thei dinhmunah a ding mek", teh thut chuan!


"Boral thut thei a?", chuti teh thut chu ka beisei lo. Ka beisei ngam lo a ni mah zawk.


Mambawihin, "Ka pain lo hrilh tur chein min ti a, lo kal turin a duh che u. Ka puin Krawsa a lam deuh reng bawk nen. Nang pawh, motor chuanpui thamin i dul a lian tawh a, ka pu dam lai ngeia Krawsa nen hmu turin a duh che u a ni", a ti pawh chuan, ka pu chu ka khawngaih thei tlat lo.


Krawsan a hmu duh dawn em ni?


Engvanga Krawsa hming lam reng nge a nih? A thil lo tih avanga ngaihdam dil duh a ni thei ang em?


Ka pu chu, a tupa ngaihdamna tel loa mualliam a duh lo a ni ngei ang.


Krawsa lo haw hunah hrilh a ngai dawn a ni. Putêa ten an hrilh tawh ka ring leh mah zawk, an be reng reng ṭhin kha a ni a.


Hemi chungchang hi Krawsan tun thlengin min la hrilh lo.


Lo haw phawt teh se.


Show post links
Top

[Ngaia]

Thinlungmawlpa
Chapter-35
Ziaktu: Cck Lalchhuanawmi


Hemi chungchang hi Krawsan tun thlengin min la hrilh lo.


Lo haw phawt teh se.


A hma zawnga nui hmela pua lo haw ṭhin kha, zanin erawh a nui hmel hmuh tur a awm tawh lo.


Zawh ngai loin rin dan a neih thiam theih, Mambawihin min lo hrilh tawh si a.


"Bawihi, hrilh tur che ka nei", a ṭawng chhuah hmasak ber.


"Tun hma lama lo hrilh tawh tur che ka ni a, pawi ka ti lutuk. Min ngaidam rawh aw", hui, min tihlau.


A hmel a rum si, a thinrim ni ber. Min tiṭap thei takngial dawn.


Ṭah ringawt rilruah a awm, huatthlalaawm lutuk mai.

*******

Krawsa chu ka en ṭhin a, khawilai hmun reh lutuk tak maiah amah chauhin han awm thut mai sela, hlauh ahnehin nuam a ti tawh zawk ngei ang.


A tir aṭang rengin kei hian buaina ka thlen zel chu a nih hi, kei zawk hian a chungah ba rulh tlak theih loh tur ka insiam ta a ni!


Ka dam chhung zawng pawh hian ka tlak dawn lo.


A pawi zo ta vek a ni, a pawi zo ta vek.


Ka nuin min boralsan lo se chu, tun hi kan thleng lo anga, keimah avangin thinlung rum ngawih ngawihin a awm lo tur.


Chutiang ni ta se, Lal Isua hre lo leh, hmuhsit leh tihduhdah a tuar zel dawn a ni bawk si.


Tuna a dinhmun hi a chang thei ngai lo anga, nuamsa takin a awm thei dawn si lo.


Eng hi nge ṭhaa ṭha lo pawh ka thliar thiam tawh lo.


Ka phone a lo ri a, "Bawihi, ka pu a thi!", khawngaiha lungchhiat aiin, ka lawm zawk tlat nia mawle!


"Bawihi, eng nge ni ta?", kawng sir remchang laiah ding tura hrilhin, Mambawihi thu min lo thlen chu ka hrilh.


Ngawi ngalin a kun tlat a, kha chen lo tiduhdah ṭhintu thihna chuan a ṭhawng ang nge, ṭhawng lo ang?


A thih hma lawkin thang hlauhawm tak, anmahni ngei pawh ina an inawh duh lohna tur kamnaah a la tel zui.


Ka pu hoin thang hlauhawm tak an kam a, ka pa pawh a bang bik lo.


Aw...pawisa avanga tar ahnu lam pawha han chawlh hahdam theih loh reng reng mai.


Steering-a a kut a nghah chu hmalama âwnin ka va vuan a. A khur ru dar dar!


Ka chhungte sualna zawng zawng kei hian phurin, a chhiahhlawh ni tura ka intukluh a ngai takmeuh meuh ta a ni!


Muangchangin seat hnungah a tukkhum nghatin, a maimitchhing a.


Ka rin dan chuan, a bul aṭangin a chhui kir ngei a ni. Thlamuanna thu sawi ka tum a, "A ṭha vek dawn alawm", tia hnem ka tum a.


Eng emawni hian min phuar bet a, ka kâ chu pawnchhiaa hnawh niin, ka lei(tongue) ṭawn beh(bet) a ni bawk.


Ka hrawkah lah Sangha ruh a tâng tlat bawk a, ṭawng chhuah chu sawi loh, boruak thâwk chhuah ringawt pawh a harsa a ni.


A kut vawn(vuan) bak tih theih dang ka nei si lo.


Car(SUV) kawngkhar hawng thutin a chhuak ta daih, ka chhuak ve thuai.


Kan dinna bul, hmun zâwlah kal pheiin, "Nang Putar kha, engvangin nge ka phalna la hmasa loa i thih ve rikngawt? Engtikah mah ka ngaidam ngai lo ang che!", a ṭhingṭhi thla hnawk nghal a.


A thinlung kan hliam reng a, a thinlung aṭangin kan rum chhuah tir reng mai zawng a nih hi.


Ngaidam lo pawh nise, dem theih a ni lo.


Ka dinna aṭanga pên ka tum a, lei(soil) leh ka pheikhawk hnuai chu an inchar leh tlat.


Krawsa chu thinlung na takin a rum ṭuah ṭuah a, aw...kei hian han tihdamsak thei hlauh teh ila aw...


Rulh zawh theih ngai loh tur ka va ba nasa tak em aw...


Thei leh thei loin ka pên a, pên khat zela pênin, a tawpah, ka tlan thei ta hial.


A hnungah ṭhingṭhi chung bawkin ka kuah a, a zak hnuai aṭanga ka kut pahnih rawlhin, a âwm hnuai chiahah ka suih a.


Ka kut an inhmu ṭha thei lo.


Min vuan vat a, "Bawihi, ngaihdam ka duh lo, insiamṭha tawh tur an ni asin!", an insiamṭhat theih nan hun a pe a, hun rei tak a pe a.


An insiamṭha duh chuang si lo.


Thang tenawm leh hlauhawm tak an kam ta zawk a. Mahse, awh(awk) an tum bera chu fihlim zawk hlauh dawnin, a kamtute zawk a awk dawn ta a ni!


Heti taka ka pasal thinlung hliamtu te hi, kei pawhin ka ngaidam thei lo a ni.


Khua kan pan ta zawk a, keini aiin an thleng hma zawk dawn tho. A thuhrimah, Damdawi in pan ding nghal pawh ni ila, an lo chhuak fel hman tawh dawn.


Sawi tur kan nei lo bawk a ni.


"Bawihi, kan ṭha em?", kawng sirah reilotê min chawlhpui ṭhin a.


Ei tur kan keng ṭeuh a, Mineral water case pahnih lai kan lei bawk. Nau pai mek ka ni a, motor-a chuan(chuang) loh dan tur ngaihtuahtu ber a ni a.


Zaninah erawh, "Thla li chu a ni tawh a, eng em kan ni lo turah ngai ang", ngaihṭha chiah lo hian a ti thâwp sup ṭhin bawk.


Ṭhut reng chuan mawng leh kâwng a kham a, car bul hnaia han tei kual châng lah a tam.


Lukham pathum leh puannuam pahnih kan keng a, nuam takin ka ṭhu tho.


Thlen rual ruala thil thleng tur hriat sa kur phei chuan, kir leh vang vang a châkawm ru ngei mai.


Kir leh theih erawh a ni tawh bau lo, tawp tir a ngai tawh.


Tawp tawh rawh se, thlamuang takin Krawsa hi awm ve tawh rawh se.


Chumi atan chuan kir theih a ni tawh lo.
*********


Mambawihi hnenah kan thlen thu ka hrilh a.


In aṭanga hla feah kan ding.


Chawhnu tlai lam ni mah se, pawnah an ngir khup a. An zai thawm pawh a ring.


"Bawihi, kal ang hmiang", a chhuk a.


Car hel kualin min lo hawnsak, muangchangin ka chhuk a, ka pum a rawn na zawkah ka kun deuh a.


"Bawihi, engtizia nge ni?", thaw hapin, "Ka ṭhut rei deuh vang a niang", zângkhai thei ang bera awm ka tum a.


Ka kâ aṭanga thuchhuak aia ka mit ring zawktuin a awih lo ang chiahin, kei pawhin ka awih lo.


He hmunah ngei a nih kha, paih an tumna ata lo piang chhuakin, hmuhsit leh tihduhdah tinreng a lo tuar.


Khawtlanga endawng leh nuihzat a ni a, lunga vawm a hlawh hial ṭhin a nih kha.


Saw in ngei aṭangin thinlung na takin a chhuak a, thinlung hlim leh lawma a luh leh a rinawm loh.


Min hmu apiangin min en hrek hrek a, an phun mur mur nghal zel bawk.


"Krawsa chu a ni em?", a ṭhenin an ti a, "Mi hausa fapa ang mai alawm a nih, saw lai motor changkang zet aṭang sawn an lo chhuak", a ṭhenin an ti bawk.


Ni e, ni e, hmâna an nuihsawh Krawsa kha chu a ni tawh lo a ni!


In chhungah kan lut a, Mambawihi leh Jerome-an min lo pan thuai a.


Ka pa te pawhin min lo hmu, Krawsan ka dar a kuah avangin a khûr tih ka hre thei. Keipawh ka khûr.


Mambawihin, ka pu an mutna khum ding lamah min ṭhuttir a. Pitêi ṭah hla chuan ka mittui ko haw thei miah lo amawle!


"Ka pa, i duat em em i tupa Krawsa pawh a lo thleng tawh e. Lo thoin han chibai ta che", Awle(Crocodile) lo kal se, "Kei aiin a ṭap thiam daih!", a ti hê hâw ngei ngei ang.


Awle(crocodile) ai pawhin a ṭap der thiam.


Mambawihi bula ṭhu, hmeichhe pakhat chu Duati tih a hriat theih mai bawk. A nu aiin a ṭap thiam emaw tih tur a ni.


Ka pu hmel chu, a hahdam thlawt lo.


Mitthi hmel a ang lo, helhkam ngah deuh hmel a pu. Ngaihdam dil a tum ngei a ni ang.


Krawsa ka en a, ka pu hmel vawikhat a en bak a en leh tawh lo. A kun deuh tlat thung.


Min nghak an ni bawk a, kan thlen hnu rei vak loah ka pu an phum nghal.


Thlanmual aṭanga kan haw hnuah Krawsa an hual tuau tuau ṭan a, "Khawiah nge i awm? I lo haw leh dawn em? Engtin nge car changkang deuhte i neih theih?",


Krawsa chhânna chu, "Lal Isua zawt mai rawh u", a va han Pa ṭheng ṭheng tak.


Ka bulah hlir a awm a, kan awm hlat deuh chuan a lo kal thuai zel.


Nautê nen min ngaihtuah em em a, chaw ka ei ṭhat loh mawlh a hlau a, min barh nghe nghe.


Khawhar lênkhawm a la tawp mai lo a, pindang bangte an ṭhiah vek avangin lo mut bik chu a rem lo.


Lângsar tak kan ni.


Kan pahnihin pawnah kan ṭhu a, hmâna amah chauha chaw a eina hmunah khan!


Ka rilru nâ lutuk ka insum thei tawh lo.


"Bawihi, ".


Amah chauhin chaw a ei ṭhin kha a ni a, chaw ei a tui chang pawhin a inkhawrh belh thei ngai lo.


Chawhmeh tui tak tak a ei phak ngai lo a, chuti chungin chawhmeh tui tak tak a siam loh chuan an vaw(vua) hrep zel kha a ni a.


Nasa taka hna a thawhnaah an lawm loin, amah avanga in leh lo nei ṭha an nihna leh, mi hmuha mawi thei chauh an nihna an ngaihtuah pha lo.


Chutiang ngaihtuah aiin an la hmusit zawk a ni a.


Lawmthu hrilh aiin, ṭawngkam tlahawlh pui pui an hrilh ṭhin a nih kha.


Insiamṭhat aiin an la zualkai ta deuh deuh chu a ni a. Hun ṭha an neih lai khan lo insiamṭha se ṭha tur!


A tlai zo vek tawh dawn.


"Bawihi, he hmunah hi chuan lungchhe takin i mittui titla teh suh khai. Hnehtu kan ni a, Hnehna Lallukhum khum chungin a nih hi he hmunah hian kan kal ni. Keini ni loin, ding chhuak tawh lo tura min namtlutu ten lungchhiatna leh inchhirna mittui titla zawk rawh se. Tlu hlen loa ding chhuak zawk kan nih hi, a dik em?", duat takin ka tukkhum a chul a.


Arpuiin a thlazara hnuaia a notê te a khuh bo ang mai hian, min kuah bo.


"Han en teh, kan bul ṭanna hi", ka hawi kual a, a la ngai reng.


Thil thar a awm lo, Krawsa a awm loh chuan heti hi a ni mai.


Krawsa khan a cheimawiin, a tiphuisui reng a ni. A awm lo tih a hriat em asin. Krawsa chunga ṭhat chhuaha, lawmthu hrilh mawlh mawlh tur an ni.v


"Tah hian a nih kha, ka hmaah tak i kawr i rawn phelh. Khatih laia ka zah dan kha i hre lo zawk ang", a kiai deuh sak a.


A ngaihtuah let ve niawm tak a ni, "Khami ṭuma i hmel awm dan kha theihnghilh har ka ti, duhawm tak i ni", ka duhawmna pawh ka hre lo.


"Khata ṭang khan a ni lo",


"Eng maw?", a ni lo reng a ni.


Khata ṭang khan a ni lo, haw tura min tih aṭang chauh khan a ni.


"Haw tura min tih aṭang chauhin alawm, i la hria em? Ka haw duh lo ka tih pawha min hawtir phêt i tum kha? Khami aṭang chauh khan alawm", min en vung vung a.


Dâwt a ni tlat lo a ni.


"Ka hrethiam e", ka biang rawn chuk zeuhin, ka beng bulah, "Nang ka tawn theih nan che a nih dawn phawt chuan, kha aia hrehawm pawh tuar ka inhuam",


"Ngati nge?",


"A chhan chu maw, min kai chhuak tura Lal Isua ruat i ni tlat a".


Lal Isua ruat maw ka nih a?


"Ka thinlung kawltu i ni hi ka lawm", a la ti ta deuh deuh.


Kei tak asin hi ni lawm chu.


Tawp chin nei lêk loa min kuangkuahtu leh min pawmtu, Lal Isua kan lama a ṭan chhung chu, min dotu te an tlu sawp zawk zel ang.


Ṭhutthleng pakhat ve vea mu ṭhin kha, inei zo lo chauhin kan mu ta a.


Kha zan ṭihbaiawm tak, putêan ka taksa a khawih zan, Krawsa ṭhut tlaivar zan ni bawk.


Lo haw har leh deuh se chu, ka chunga thleng tur ka ngaihtuah ngam lo.


"Ngaihtuah tawh suh", beng bulah a phun sup a.


Ka tum alawm, Krawsa ni lo se chu, tunah pawh ngaihngam takin ka mu thei lo ang.


Putêa a awm reng a, hmân ang kha a la ni. Ka la ten reng. Pitêi pawh a danglam chuang lo.


"Ngati nge i lo haw har em em? Ka lo nghak reng che asin? Khawiah nge i kal?", midang pawh an la phun mur mur tho.


"I mit aṭanga inthiarfihlim ka tum alawm. I mitah khan thil tam tak ka hmu a, thlamuanna leh hlimna ka hmu lo. Haw thuai thuai i duh tih ka hria", ka mit chu a lo va en chiang ṭhin awm em em.


"I mit ka en apiangin haw i duhzia ka hmu chiang tawlh tawlh ṭhin. Chuvang a nia, i mit aṭanga ka inthiarfihlim theih nana i hawna tur ngaihtuaha ka lo haw har tak".


Lo haw har mah se, min chhan hman a nih kha.


Kha zan ang kha, tawn nawn leh ka duh tawh lo.

*******


Khawhar inlênpui hun a tawp a, kan nihna dik tak a rawn lang ṭan hlawm ta.


"A u, College kal a ngai tawh sia, ka chhohsan mai ang che u", Jerome-a nen kan inkuah a.


Chho daih rawh se, heta a awm reng hian atan hlawkna a awm lo.


Ka dul a khawih a, "Nautê hi lo chhuak tawh se ka ti", nia mawle, chhuak tawh se.


Ka pa hnenah Jerome-an min chhohsan turin leh, a zirna hmuna kal nghal turin ka sawipui a.


"A ṭha tak ang a, in zir laklawh lai tak a ni si a", ka pain a phal chu, Jerome-a a thaw hawk.


Phaiah a awm daih dawn chu a nia, ka va ngai dawn tak em.


Ka insiampui a, thawmhnaw a keng tam lo bawk a, rei tak insiam ngai a ni lo. Krawsan min lo fin a, Jerome-a nen innel taka an inbe thei chu ka lawm ngei mai.


Chhun thingpui inna no silfai zo tih hriat takin Mambawihi pawh a lo kal a.


"Nakinah ka lo chhuk thlak dawn kha, fel deuhin awm ang che", Mambawihin a han ti a, "Phai Ram hmuh loh thlak em mai", a ti ve bawk.


Mambawihi chu a kal tak tak pawh ka ring lo, MA hetah a kal si a.


"Kal nghal i tum em ni?", Mambawihin a ti a, "Chawhnu kal tur an awm a, nutêi bulah in chahbi ka lo la dah dawn nia", nutêi sawi takah, kan va inbe khât ta lua em.


Patêan a khuahkhirh na viau tawhin ka ring a, chuti ni lo se, he thilah hian a inhnamhnawih vein ka ring a ni.


Krawsa, Mambawihi leh Jerome-a te nen kan ding rual ṭhup tihah, "Ka thu thu", ti vin ṭhawtin, thinrim meng pawng zawr zawrin Duati a lo lut a.


Krawsa a rawn tum chat, ka kut hum ruhin ka inring ran bawk.


"Nang, khaw lai fa mai maiin he in hi i chang thei lo", a rawn kawk ta siah sia. A kut zungchal ngatin.


Pitêin a tukkhuma lo ben ṭawlh pah hian, "Khati khan i u ti reng reng suh, i têt laia awmtu che a nih hi", Krawsa thlavang a hauh a.


Nimahsela, a tlai tawh lutuk a ni.


"Ka nu, khati khan min ti suh aw. Ka pu ro leh he in chen hian ka ta vek tur a nih hi", Duati chuan Krawsa a lo en leh a, "Nang, ui-", ka bêng hawi sawk.


Rum lutukin min melh a, "Eng thu nge sawi i tum kha? Mawh? Uicho tih i tum tiraw, a ni em? Tu nge uicho tia koh i tum? I u maw? Mahni u te koh dan tur a ni em ni?", a hmawr kan bawk tawh dawn e.


"Min bêng ngam elaw?", pitêi leh putêa a en a, "Ngati nge in ngawih reng, min bên kha? In fanu pawh min chhan ngam nange?", Duati chu a au tuar a.


Putêa te an ngawi diak mai si.


Krawsa kalh zawngin an ṭawng ngam lo bur.


Hmuhsit leh vuak maw? Ni lo e, a pawisa neih zat an hria a, an tlawn huam zawk alawm.


He in leh ro thil hrang hrang chu, Krawsa tlawn nan tiin, a hminga dah vek an tum.


Duatin a phal lo bur bawk. A phal ang tih kan hlau zawk.


"Ṭan ngamin awm phawt la, min ṭan rawh u tih ngai loin an ṭap dawn che alawm", ka ti hmiah a.


Ka chhaihkawlh ta mai a ni ang chu.


"Nau i pai mai avangin i duh duh sawi ve suh aw. Kutthlak che ka hreh hauh lo a nia",


"Eng maw i sawi kha?", Krawsa a lo inrawlh ta.


Pitêin Duati a pawt sawn thuai, Krawsa thinrim hi an tan a pawi dawn.


Duatin, "Min thlah teh", a nu kut aṭangin a tal chhuak a, Krawsa en karin, "Ka sawi i hria, ka ti duh tak tak mai ang. Min bên chhan tur a nei lo", min rawn melh nghek a.


"Nangni pawn lam mi, kan chhungkaw rorelnaa in inrawlh a ṭul lo", Krawsa leh keiin kan khap dai a ngai lo.


Pitêi leh putêan an khap vat vat.


Krawsa chuan, "Heng zawng zawng hi nei pawh ni ila, ka chunga in thiltih khan a hen zo lo", a ti hmak.


A hnungah ding mah ila, a sawi mai mai lo tih a hriat theih.


"Lo sawibuai tawh suh ang che", ti hmukin, min lo kuah a.


Duatin, "Sumdawnna pahnih i nei a, i ti lutuk lo maw?", a nui hak. "Ti lutuk lo e, ka chunga in thil lo tih tawh ngaihtuah mai rawh", Krawsa thinrimna alh chhuak lo tura inup chuan min kangkai a, ka sa awp awp.


A ṭawng zel a nih chuan, tharum hman a pawiti dawn miah lo.

*********
Jerome-a kan thlah a, "Helam chu lo ngaihven reng reng suh ang che, chuan, i thlen rual rualin min lo bia ang che", a bu nghauh nghauh.


A kal phawt loh chuan chet ngam a ni lo.


Hmu lo turin ka duh. Mit ngeia a hmuh aiin phone kaltlanga a hriat ka duh zawk a ni.


Kan hmanhmawh lo dun khawp, hmânah khan, helai kawngah haw turin kan innawr a ni a.


Hmânah khan a ni zo vek tawhin, a hlimawm tawh zawk.


"A nuihzatthlak e", Krawsa pawh a kiai sak sak. "A hunlai khan hrehawmin lungchhiatthlak viau mah se, paltlang tawh hnuah erawh a lo chuti tehual tawh si lo, i sawi angin a hlimawm tawh zawk", a ni reng asin.


A hun laia kan ṭahpui pawh, tun hnu hian min tihlimtu mai a ni.


Pawn aṭangin an thawm a hriat, Mambawihi erawh pawnah a lo ṭhu thung.


Hla taka Police Motor ri lo hnai tual tualin, kan in kawtah tak an lo ding ta!


Ka inbuatsaih nasa bawk a, min ṭhawng em em lo.


"Kan rei deuh a, in mi hriatthiamna kan ngen e", Inspector-a chuan a ti a. Inspector hmeichhia pakhat leh, Constable hmeichhe pahnih leh Constable mipa pahnih an lo hruai tel bawk.


Chumi bakah, an mi man mi pahnih an tel bawk.


Kan chhungte an lo chhuak a, Police an hmu chu an meng phar awk awk. Duati hlau lutuk phei chu pitêi hnungah a biru.


"Ngati nge Police?", ka pa hian a ât man a tel dawn ta a ni hi.


Kan lut a, phone ka dah thuhrukna aṭanga la chhuakin, in chhunga awm zawng zawngte hriat theih turin volume full papin ka dah a.


"Krawsan a pa a sawi theih nan tihthinrim tur ka tih kha?", ka nu a ni.


Duatin, "Ka tum reng kha, i hmu lo em ni? Ka bulah i awm reng a, min ṭanpui zawk ta che. Tihthinrim dan tur ka hre lo, a nupui zawk kha ni kha ka sawisak châk. A nau pai chhiat rawk theih tura sawisak ka châk mah nak laia", Krawsa thinrim che hrut chu ka kuah thuai.


"Ka sawi zing tawh lutuk, a nupui char char kha tum tur. Ani chu eng ang pawhin sawi mah la, a thinrim dawn lo. Tihthinrim dan ṭha ber chu, a nupui bitum a ni mai", ka nu bawk a ni.


Ka pa ka en a, min en ngam lo.


Hetih lai hian an bulah a awm ve reng a, a fanu thlavang hauh chu sawi loh, a fanu ka nihna a lantir lo hrim hrim.


Rilru na takin ka en ngawih ngawih.


"Doctor-i khan pawisa tam tak a duh sia, engtin nge ni dawn?", pitêi leh putêan an ti a.


Ka nuin, "A rukin a bag-ah ruihhlo kan dah anga, a ruk bawkin Police hnenah kan report anga, an man mai dawn alawm", a tih zawh rualin, "Cheih, cheih, cheih! In va han rapthlak em em ve", Doctor-i a rawn ṭawng chhuak a.


Ka phone ka off rih, "Test result lem ka siamsak avang che u a min rulhna tur chu", a ti hlak a.


"In chhuak mai mai bik dawn lo", a ti leh hlak.


Doctor-i thinrim chu ka nuin engah mah a ngai lo. Police ho leh finfiahna te pawh chuan an tihlau lo.


Midang erawh, ka pa chenin Police chu an hlau.


Phone on lehin, "A pa hnenah chuan a pawisa chenve a pek tak tak in ring em?", putêa a ni.


Ka nu chuan, "DNA Test Result khan a tichiang viau. Bawihi nena inṭhen tira Duatin Krawsa zar buaiin, a pain lo tibuai bawk sela, a chanve mai ni lo, a vaiin kan nei the ang", ka thuhriat chu, hre lo zawk ila, ka hlim zawk ang.


Duatin Krawsa thinrim zawnga ṭawngkhumin, Krawsa thinrim ve leh a pa an lo sawi zauh dawn a.


Pa a nei tih ka hre dawn si lo, ka titau kual vel, kan inhauh lai chuhin, thiam taka Duatin Krawsa chhaih a tum dawn a.


An ruahmanna erawh, a tlawlh chiang khawp mai.


Krawsa chu ka nu hmaah a ding a, "Ka nu tihsual min phurhtir phêt tumin kawng i zawng a, ngati nge? Ka nu ka ni lo", a ngawi dat a.


"Nang pawh i thiam lo, i pasal kha a thawkchhuaktu zawk ni mah sela, i hnuaichhiah ran a, a hlawh beitham tak sawisel reng rengin, pawisa ringawt i ngaihtuah a nih kha", thudik inphum a awm leh ta nimaw.


Krawsa sawi hi ka ring zawk e.

"Engtikah mah i thiltum tenawm tak hi i hlen chhuak ngai lo ang. Bawihi nen min inṭhen tir thei lo, engtikah mah i thei ngai lo ang", a ti charh a.


Ka pa bik chuan min va han tina tak em?


Aw...engah nge maw, a lo tel ve reng reng ni.


"Bawihi?", ka kâwngah min kuah a, harsa ti zet hian, "Bawihi, i ngaidam a nih chuan keipawhin ka ngaidam ang. Mahse, a lehpek a awm tawh tur a ni lo ang", Doctor leh Krawsa pa dik tak anga an sawi leh, ka phone-a an ṭawng record nen, tualthah anga Case sâng tak ni lo mah se, hun rei tak Jail-ah an awm thei.


Ka pa a tel ve a, chumi avang ngawtin ka ngaidam mai bik thei lo.


"Bawihi, min ngaidam rawh, min ngaidam rawh. I duh duh i nei thei ang. He in leh pawisa, eng pawh", pitêin a lo ti zung zung.


Putêa pawhin, "Bawihi, min khawngaih la min ngaidam hrâm rawh. I pu thihna pawh a la rei si lo, Bawihi", a kut pahnih a suih.


Ka pa chu a hawi chhuak lo reng reng, eng emaw tal sawi ve se, a ngawi reng a. Ngawi reng turin ka duh lo.

"Pa, sawi tur i nei em?", a che eih lo.

Ka nu zawkin, "I chapo hle mai maw? I hmaa ṭhingṭhia ngaihdam dil tur chein min duh elaw?", a lo ti.


Zir zer tak hian, Jail-a khung theitu leh khung theilotu ka ni.


"Mi mawlnu, ngaihdam dil ve ta che", pitêin Duati a bêng chawrh.


Duatin, "Min ngaidam rawh", ṭap pur chungin a ti ve bawk.


Ngaidam ta ila, an sim chuan loh chuan sawtna a awm dawn lo. Kei chang min tina lo, ka pasal an tina a ni. Ka pasal thinlung chu ka thinlung a ni a.


Ka pasalin a ngaihdam theih loh chu, keipawhin ka ngaidam thei bik lo.


Min hringtu ngei pawh nise.


"Inspector, khawngaihin hruai rawh u".


Duati tlanchhiat tum chu an chhip samah Constable hmeichhe pakhatin a ṭham nghek.


"Bawihi, khawngaihtakin min ngaidam rawh", pitêi leh putêan an ti awl lo a.


"Khalai nu remruat vek a nih hi, a pa dik tak angin insawi la, pawisa ka pe ṭeuh ang che min tih avanga insawi mai chauh ka ni", a lo ti ve khar khar bawk.


Doctor-i pawhin ṭah âw takmeuh meuhin, "DNA Test Result-ah an pahniha inmil tir turin min ti a, pafa dik tak pawh an ni lo. Thiam lohna ka nei lo, keite chu, ruihhlo avanga min man tir an tum.kha, mim bum let an tum kha", a ti rawng rawng bawk.


Police hoin ka pa an kalpui tluka en harsa a awm lo.


Mambawihi chu Duatin inhnamhnawihin a sawi chamchi a, "Ka nau hian inhnamhnawihna a nei lo", Krawsan a tih hmakah, Duati a ngawi chiang lutuk.


Police Motor tlan liam rual rualin chau lutukin ka ṭhu thla hnawk.


"Bawihi, pawi ka ti lutuk".


Pawisa avangin an inlungrual a, an thawk hoin, thil tenawm tak an ti a.


An thawh chhan ber pawisa chuan a ṭhen hrang ta zawk a, naia khat pawh an hmu si lo.


Ka pa kha, Sawrkar Office-a thawk a ni a. Pawisa a mamawh tawh lo asin.


"A tawp tawh em?",


"Aw, Bawihi, a tawp tawh. A thleng tawh lo ang", hriat a va han nuam em.


Ka lawm a ni. A tawp tawh a. Tawp tawh rawh se. A rei lutuk a, ka chau chhe hman mai dawn alawm.


Tawp tawh rawh se, a tawk tawh.


Show post links
Top

[Ngaia]

Thinlungmawlpa
Chapter-36
Ziaktu: Cck Lalchhuanawmi


Ka lawm a ni. A tawp tawh a. Tawp tawh rawh se. A rei lutuk a, ka chau chhe hman mai dawn alawm.


Tawp tawh rawh se, a tawk tawh.


"Bawihi, hei, bun rawh le", ṭhu hniamin pheikhawk min bun tir a.


Ka kâwngah min kuahin muangchangin min dinpui a, tlai lam walh kan nei dawn.


Dul a lian tawh a, ka zah avangin School pawh ka chawl. In leh a kawtkaiah hian ka tap chawt a ni mai.


Miin min hmuh ka duh lo, zak tak ka ni.


"Zahna tur a awm lo, Mal sawmna a ni ngai e", Krawsa pawhin min ti hial.


Mahse, pawna chhuah ka duh chuang lo. Engtin nge, nau an pai lai te hian thlalak an ngam zawk le te ka ti mai mai a.


Krawsa nuih a za thei a nia aw.


Kan inkawtah muangchangin kan kal kual a, a changin kan ding leh vang vang ṭhin.


Mercy-in chaw ei turin min lo ko ta a, "Khaw thimah kan lo kal ang, Ninja angin", heti hian a ti ziah.


Ka melh hre hraw a, hre lo ang hmakin a awm.


Mercy chuan nui ar arin, "Car sawn kal ang u, ka chuang khât tawh. Kea kal kal a ṭha tawh lo", a ti kharh kharh a.


Krawsan, "Lirthei hrim hrimah chuan(chuang) loh tur", a ti leh ṭalh.


"Kal ang, khaw thim hnuah te chuan rilṭam a pel tawh dawn asin", Krawsa pawh chuan min hnial duh ta lêm lo.


In kan thleng a, minute khat ṭhu chawlin chaw kan ei.


Kei chauhin chaw ka ei tawh si lo, keimaha nunna pakhat ei kep zel a ngai a. Chawhmeh ṭhat leh chhiat a sawi theih loh, "Chaw", ka ti zat zat zel.


"Drip khai ngai lo tea i awm ringawt pawh hi a lawmawm", ka nu leh pa pawhin an ti ṭhin.


A lawmawm tak tak a ni. Hriselna a ṭha a, chaw ei a tui a, ngaihsaktu leh duattu kan nei a, ka lawmin ka vannei takzet a ni.


Mambawihin *ka pa a dam ṭha lutuk, ngaihngam takin lo awm rawh aw* message min lo thawn chu ka chhiar nawn ka chhiar nawn.


A hnathawhnaa a lo eiruk ṭhin avangin hremna thuah hnih a tuar a.


Chubakah, Police-in an hruai aṭangin a la ṭawng leh miah lo. Ngawi rengin a awm a.


Vawikhat chu Krawsa hian min kanpui.


Mittui tla zawih zawhin min kuah a, thu kam khat tê mah a sawi chuang lo. Mahsela, pawi a ti takzet a ni.


Ka nu pawh kan hmu, ani erawh, a ze ngai a chhuah, a paih thei tawh pawhin ka ring lo.


Duati pawh, a in luahna neitu te pawisa leh tlereuh a ru ṭeuh mai a, Shillong-ah FIR an lo thehlut si a, hremna thuah hnih aia tam a tuar.


Pitêi leh putêa te erawh kan hmu ta lo.


Hmu pawh ni ila, ngaihdam min dil nasa dawn tih a hriat.


Mambawihi chu, amah chauhin inah a awm a, a khua a har thu min hrilh seuh seuh ṭhin.


Nutêi pawh, patêan a zilh zalh tawh a, a mize ngainatawm tak kha a pu leh tawh.

Patêan, "Mambawihi saw, zan rei tak taka lo haw a ching leh zeuh zeuh a, hriatthiam tum nasa hle mah ila, zilh loh chuan ka enliam thei ṭhin lo a ni", Mambawihi a zilh ṭhin thu min hrilh a.


Zilh tawh lo tur leh, a chhiatna tur khawpa a awm loh tur thu inringtawk takin ka hrilh thung.


Mambawihi chu a fing a, a chhiat rawkna turin eng mah a ti dawn lo.


Kan pa'n a eiru a, kan nu lah, sawi chhuah a ngamawm lo zawk. Ngaizawngtu pawh a hmu thei tawh dawn em ni?


An ngaihzawn huai huai kha a ni ve a, College-ah te pawh a lâr pawlah a ṭang ṭhin a. Chung chu a chang pha tawh lo tih ka hria.


A ṭhian ṭhenkhatte lahin an kawm duh tawh hek lo.


Chutiang karah a awm a ni a, inah amah chauhin a awm lehnghal. Ka lainat em asin.


Hmabak êng tak nei a ni a, amaherawhchu, zan rei tak takah haw pawh nise, tun kan dinhmun aṭang hian a fimkhur dawn tih ka hria.


Mahni inveng thiam tak a ni.


Jerome-an, "Nu leh pa te chuan fate sualna leh mualphona an phur ngai a ni a, kei erawh, nu leh pa sualna leh mualphona ka phur ta zawk a nih hi", a tih chu, hriat reng loh tum pawh ni ila, nitin hian a thar ṭhin.


"Chak taka i awma, puitling taka i awmna tur kawng a nih hi. I u Krawsa pawh hi en la, tlukchhiat nan ni loin, hlawhtlin nan a hman zawk hi. Nang chuan tihsual i nei lo a, chuvang chuan rilru zâlen takin awm rawh", ka ṭawngkam thiamna hian a daih ṭhin lo a ni.


December thla tira piang tur a ni a, ka nuin lukhum, kutkawr leh mawza tur a phiar a. Kawrlum tur pawh a phiar dawn.


Nautê tan vek a ni.


A lo pian chhuah hunah chuan an va han duat dawn tak em aw!


Min theihnghilh theih hial ka ring.


Krawsa pawhin min theihnghilh ka ring tlat, nautê ringawt a ngaihsak anga, kil khat aṭanga ka lo thlir tlawk tlawk duh hmel lutuk.


Heti ang chhungkaw fel leh ṭha Krawsan a nei thei hi ka lawm.


Krawsa tan chang ni lo, ka tan pawh hian nu leh pa tak tak an ni. Chêngho lo mah ila, ka pa nen min ngaihven turin an lo kal ziah.


Ka nu kha boral loin, ka pa nen nau ka pai laite hian min ngaihsakin min ngaihven ve reng ta se.


Pasal ka neihnaah pawh, an pahnih ngeiin min telpui se, aw...duhthu ka va sam nasa ṭhin tak!


Krawsa tiharh lo turin mittui tla zawih zawihin ka tho ṭhem ṭhem.


Bual inah lutin, tui ka herh hâw a, ka ṭap ngam ta deuh.


Mahni inkhawngaihnain min tuam a, rethei leh vanduai ka inti ngawih ngawih. Hetiang ngaihtuah lo tur hian ka inhrilh fo.


Eng emaw chang hian a lo awm leh ṭhin.


Thlir kir hian, retheihna leh vanduaina bak chan ka nei lo.


Min ngaihsak rengtu pasal ṭha tak ka nei chung pawh hian kim lo hi a awm tlat alawm.


Pasal nei tawh pawh ni ila, nu leh pa hnen aṭangin an ngaihsakna dawn ka la mamawh ve reng tho si a.


Nau pai lai ngat phei hi chuan, an bula awm ka châk.


A bik takin ka nu bula âwm ka châk a ni!


Ka bulah awmin, min pai laia a awm dan te sawi sela, ka pa nena an intawn dan leh inneih dan te.


Nausên mai ka nih aṭanga tun hun thlenga min enkawl dan te leh, thu ka awih loh ṭhin em avanga min vuak hial ṭhin thu te sawi seuh seuh sela.


Hlim takin kan nuihpui tawh dawn si!


"Nu, min kalsan hma em mai", bual in bang nghengin, ka pum rawn na zawk chu ka dawm a.


Nautê a piang ṭep tawh a, a pu chanchin te pawh ka hrilh ve duh dawn a.


Engtin nge ka hrilh tak ang?


"I pa an phiarruk avangin an man", chutiang chuan ka hrilh thei lo ang.


Jail-ah hruaiin, "Hei hi, i pu a nih hi", ka ti thei chuang lo ang. Thil nihphung a ni lo reng reng.


Pa ber a ni a, a nupui thu thua awm loin, a nupui zawk chu, a thu thua awm tur a ni.


Kei min ngaihtuah lo a nih pawhin a fapa, Jerome-a tal ngaihtuah tur a ni asin.


"Bawihi, kawngka hi lo hawng rawh", tui ka herh hâw a liam pur pur. Ka titawp a, ka ṭap tih thup ka tum lo.


Min hrechiang a, dâwt sawi a theih loh tluk a ni.


Bual in kawngka ka hawng a, amahin min pawt chhuak. Min kuah bei hle hle a, "I awm rei lutuk a, i vawt vek alawm", puanin min khuh hlun a.


Wipes lain ka ṭahna hnuhma min hrukhulsak.


"Pawi ka ti lutuk, ka nu ka ngai thut a", min hrethiam takin a bu nghat a.


"Tun hnuah chuan, zan rehah bual inah awm tawh suh aw. I duhtawkin ka bulah i ṭap thei ang",


"Ka pa ngaidam hram rawh aw, a aiawhin ngaihdam ka dilsak e. Thlêmna a tawh a do zo ngang lo a ni, ngaidam hram rawh aw", ngaihdam ka dilsak ngai lo.


Zanin erawh, a hun tawh tlat.


A ngaidam thei lo a nih pawhin, ka vui chuang lo ang. Ngaidam sela, hei ai hian ka ngampa lehzual tur.


"Thu ho pui pui hi sawi ziah mai", ka dul chungah a kut nghatin, "Ka ngaidam vek, ngaihdam loh ka nei lo. An tihsual rah erawh an seng tur a ni", ka thaw hap.


Thlamuang takin ka awm thei ta!


"Ka lawm e, ka lawm lutuk", ka ti sep a. "Ṭap tawh suh ang che, ka fanu hi ṭahbelh tak ni turin ka duh lo a nia", a ti deuh hmuk chu ka lei ka seh tut.


Min tizak thei lutuk mai.


"Fapa sual tak aiin fanu ṭahbelh a ṭha zawk lo em ni?", ka ti fiam a.


Fanu nge fapa a nih dawn ka hre tawp si lo. Fanu nge fapa a duh zawk ang. A sawi hmangah, fanu ni turin a duh zawk tihna chu a ni a.


"Fanu ṭahbelh ka duh zawk",


"Zanlaiah ṭap se, i tho peih dawn em ni?", ka ti leh a, "Kei lo tho tur dang an awm chuang em ni?", min dang chiang khawp mai.


Ka kuah ta ringawt, ani lo tho tur dang an awm chuang lo.


Amah char char a tho anga, tui takin kei erawh ka mu thung ang. A buai deuh pawhin ka tho duh miah lo ang.


Ka va han sual thiam dawn tak.


"Fapa aiin fanu ka duh zawk, fanu tam tak. Ka fapa ten an thinlung mualpho taka mi hmaa an ṭhingṭhitpui ve loh nan, leh ka fanute pawhin an kawl, mi thinlung mualpho taka ka siamsak loh nan", a sawi chhung zawngin a rukin ka ip chawih chawih.


Duh ngat sela chu, ka pa chunga phuba lak nan kut min thlakin, ka pa laka a thinrimna te ka chungah a hrithla thei chiang alawm.


Chutianga ti loin, min ngaihsakin min duat em em zawk si a.


Ka pa chunga phuba lak lah a ṭul hek lo, a hun takah chuan a tuar mai alawm.


Thinlung dik tak hnenah ka intulut a, lawmna hi teh thei niin, a tehna Tehfung awm sela, ka lawmna teh dawn ila, Tehfung a puak darh thei hial ang.

*********

"A biang a tai têk mai", a nui sun sun a.


A duh ang ngeia Fanu chu neiin, lungchim taka pawmin a thlêk vawng vawng a.


Ka awm ve tih pawh a hre chang lo dawn dawn.

Ka nu leh pain, "A hming tur eng nge ni ang?", an ti a. Mambawihin ka en a, a lu a lo thing nasa lutuk.


A ṭi dâk mai a, ko lui ṭalh lo.ila chu, a thuin a lo kal ngam lo ang.


Jerome-a pawh lo chhoh a duh viau naa, Krawsa hmuh a hreh em avanga chhuanlam siam char char a ni.


Min lo en a, "Ka pa, nangin a hming tur sa rawh", a ti ta a.


Ka pa chu a hmelah hlimna a lo lang chhuak nghal, "In duhzâwng a ni ang em aw? Kei chu, Van lam khi ka ngaizâwng tlat mai a", nui tat tatin a ti a.


"Pu a nei ṭha tihna a ni mai alawm", ka lo ti sep a. Mercy-in, "Ka sawi tum chiah", a lo ti ve bawk.


Mambawihi koin ka bulah ka ṭhuttir a. Krawsan nautê chu ka pa kutah a hlan a.


Ka pa chuan, "Hringnun hi a ngai rengin a kal lo a, kan bul ṭan dan chu a harsain khirh hle mah se, kan tan Van Pangpar khi a bungbu leh ṭhin. Ka fapa fanu hming tur chu 'Dingdi Vanlalpangpari' a ni e".


Kan ngawi ṭhiap, kan lung a si zân lo deuh mawni.


A tunu thlêk ngawih ngawih ka pa chu kan en ṭhup. Kei chuan mawi ka ti a, a hming a sak dan pawh chu ril ka ti.


Hun rei tak aṭanga a lo inpuahchahna a sawi chhuak ta te pawh a ang alawm.


Krawsa ka sik zeuh a, a kiai sak.


"Dingdi Vanlalpangpari chu ka lo pawm ve tawh dawn em ni ang?", ka nuin a han ti a.


"In ngaihdan te pawh sawi ula, in duhzâwng a nih loh chuan kan thlak dawn nia", ka pa chu a inthlahrung hnuhhnawh.


Ka pa chuan, "Van lam rim nam hi ka duh ṭhin a", a ti leh.


"A ṭha lutuk, Van lam rim nam a ṭha ber", Krawsan a ti a. Ka pa pawh a ngaihngam ta.


Krawsa kutah nautê chu a awm leh ta a, "Ka fanu Ditê, zanreha ṭah ching hauh suh ang che", kan nui hak hak a.


"A nî-in a la pawm ve lo", Mambawihi lam a hawi a, "Lo la rawh le", Mambawihi chuan a pawm ta a.


"Min chhûn dawn a nih hi", harsa ti takin a han nui a. Krawsan, "A nî angin a la hmelṭha dawn alawm", a lo ti a.


A chil a lem khawlh, Mambawihi chuan min hlan thuai a, "Ka han zung lawk ange", theihnghilh nei ang maiin a chhuak a.


Va ṭap vak lo se aw...

Krawsa ṭhatnain a hneh a, hei aia hnehna ropui a awm chuang lo.


Tharum hmanga hnehna ai thlawt chuan, ṭhatna hmanga hnehna chan hi a chhuanawm reng a ni.


Ka nu leh pa leh Mercy-te pawhin min chhuahsan a, kan chhungkua thumtê chauhin ka awm.


Ka bulah lo ṭhuin min kuah a, a biang tai têk piai zauhin, "Chhungkaw thar kan nei ta, Ditê, Vanah mawi takin i par tawh a, he leiah pawh hian mawi takin par ang che aw", Beiseina sâng tak a nei a.


A fanu hian a tihnual dawn lo.


"Ditê, i pa nunna kawltu i ni a, a hlimna leh lungngaihna kengtu i ni tih hriain; chak taka awmin, eng harsatna mah inhnehtir lo la, tuar fan fan zel ang che. I pa nui hmel kan hmuh reng theih nan, i pa Beiseina i ni tih vawng reng ang che", ka rilruin ka ti sep sep a.

********

Ditêi chu kan duatin, tute mai pawhin min duatpui a, kan phu loin Zo Artui kan ngah phah.


Nautê en nan tiin min lo kensak zel a, Fridge a khat ṭep tawh a ni.


Krawsa chuan a fanu chu a duh khawp a, keia tih zawng chu hnutê pek chauh.


Puak theih hma zawng a pawm nileng ṭhak a, a fanu pawhin a Pa pangti a hre hneh lutuk tawh a, a Pa pangti ngheng lo chuan a muhil thei tawh lo.


A pi leh pu pawm aiin a Pa pawm a duh zawk bawk a, a pi leh puin an tawh hlek pawhin a ṭe vak zel.


Kei, a nu takngial pawh hian a rilṭam loh lai chuan ka pawm thei lo.


A lehlam takah a ṭhatna a awm, School ka kal theih phah a. Hnutê siam chawp in tir a duh loh avangin, School-ah a fanu a lo kalpui ngat ngat ṭhin.


Nikhatah vawi sawm ai tam a lo kal ṭhin ang, nitin a lo kal a ni a. Chawh rual chuan, chutiang zat a lo kal hman.


Ka chhût buai peih lo.


Ramah a kal tawh lo tluk a ni a, Inrinniah chauh a kal ta ṭhin.


Krawsa chuan a fanu chu a ngaihsak ṭha viau bawk. A muthilh hma chu a menpui a, a muthilh hnuah a âwma pawm betin lehkhabu a chhiar ṭhin.


Puak theih a nih chinah, paw chungin Computer hmaah a ṭhutpui a, "Ditê, a zo ṭep", a fanu ṭe chu a thlêm ṭhin a.


An pafa nunah hian ka lang tawh thlawt lo.


Kil khat aṭangin ka lo thlir ṭhin.


An hmuhnawm a, thlir manhla tak an ni. Big screen aṭanga en an phu.


"Bawihi, harh teh", ner nakin, "Lo hnaih tir rawh", ka ti a. Ditêi rilṭam chu ka hrai leh rih.


A muhil har thei si, a pa awm lo se chu buai tak tur ka ni.


Thla ruk a tlinin ka pa kan va kan a, "Pa, a hming chu Dingdi Vanlalpangpari a nia, Ditê tiin kan ko. I tunu a nih hi, duhawm i ti ve em?", Ditêi kut leh ka pa kut ka tawhtir a.


Ditêi pawh chuan a pu chu a nui sen sen a, "Chibai", ti niawm takin a riat nawk nawk.


Ṭawng hi a ching a, fiah taka thu lam erawh a nei lo thung.


Ka pa chu a khûr dar dar a, "Bawihi", dawhkan bawhin a ṭap chhuak ta a.


Ditêi pawmin Krawsa chu a tho a.


Ka pa kut vuanin, nasa takin min hmer a, "Min ngaidam rawh", lawm tur a ni em ka hre lo.


"Kan ngaidam vek che alawm, ngaihdam dil a ngai lo. Krawsa pawhin a ngaidam vek tawh che, i chhuak vat dawn alawm. I chhuah hunah chuan, Ditêi te nen kan lêng ho anga, a puin kawr pakhat tal chu a leisak ve ang", a bu nghat nghat a.


Nuih luih tluka har a lo awm lo.


Amaherawhchu, ka hlim a ni.


"Bawihi, i nu ka va ngai tak. Min kalsan hma em a ni",


"Ni e, min kalsan hma em a ni. Keipawh hian ka ngai ṭhin lutuk. Ditêi ka pai lai ngat phei chuan, ka bulah awm se ka ti ṭhin asin", sawi lo tur ka ni.


Mahse, ka luangliam ve em a ni.


"Krawsa ni lo se chu, ka khawhar dan tur chu. Min ngaihsakin min duat a, ka tan nu leh pa chan a chang takmeuh meuh asin",


"Phuba lak nan hrehawm taka a awm tir che ka hlau a ni",


"Ni lo e, phuba lak a ngaihtuah lo. Nuamsa takin min awmtir a, min duat sual ṭep tawh", ka pa chu a nui deuh a.


Ka nu a ngaih ṭhin dan mawlh min hrilh.


A thusawi kar lakah ka nu a lam leh ṭhin, "I nuin min boralsan khan na ka ti a, hriatthiam har ka ti a ni. Zu ka in chuan i tan a hrehawm ka hlau si, ka rilru natna min chhawktu tur dang awmin ka hre si lo. Mambawihi te hmelhriat ṭanin ka lo hruai lut ta mai a ni. Hruai luh kha ka duh hauh lo, i nu khan ka thinlung zawng zawng a nei a, tu mahin ka thinlung an nei leh thei tawh lo ang tih tur a ni", ka rilrua awm daih chu, eng nga ti nge rilru na thawi dam nana Zu kan in ṭhin tih hi?


Ka pa chuan, "Hruai lut lo ila chuan, tun hi kan thleng lo tur. Ka rilru na te kha Mambawihi nu chungah ka hrithla a. Zu in ai chuan a ṭhat zawk hi tiin ka inhnem chawp nitin ṭhin. Mahse, min hrechiang ta lutuk a, ka cheng a man fuh em a ni. Hruai lut lo ila chuan, tun hi kan thleng lo tur. Bawihi, i nuin min kalsan hma em a ni, ka va ngai ṭhin tak", a ti mawlh mawlh a.


"A thleng tur chu a thleng tawh a ni, a tawpna a ni lo a, bul kan ṭan dawn chauh. Chhel takin lo tuar la, chhungkuain kan la awm ho leh dawn alawm",


"Duata kha?",


"Lehkha ṭha takin a zir a, ngaihtuahawm a ni lo. Mambawihi pawhin ṭha takin in a nghak. Ṭhian kawm tur mumal pawh nei loin inah a inkhung deuh chawt a", ka pa chu pawi tih hmel takin a ṭhen sak a.


"Ka fate hmakhua ka tichhe vek ta a nih hi",


"Tichhe lo e a, hmalam pan nan kan hmang zawk asin. Thiam lohna i nei lo, Zirlai ṭha tak min sial sak zawk a ni".


"Hun a tawp", Krawsa a lo ṭhu thla a, "Pa,,kan kal tawh mai ang, remchang hmasa berah kan lo kal leh dawn nia aw", kan ding chu, Krawsa ke vuanin ka pa chu a ṭhingṭhi ta mai.


Min ṭhawng lutuk chu ka ding khawng reng ringawt.


Ka pa chuan, "I chunga ka lo tihsual tawhnaah khawngaihtakin min ngaidam la, ka fanu chungah tlak tir lo hram ang che. Ṭha takin min enkawlsak la, a thiam lohna kawng hrang hrangah pawh zawldawh taka ngaidam ṭhin turin ka ngen che a ni", Krawsa chuan ka pa a kaitho a.


A ngaihdam vek thu leh, thlah loa min vawn tlat tur thu a hrilh a. A kuah nghe nghe.


Thawnthu chu nise, "Tichuan, hlim takin kumkhuain an chêng ho ta a ni", ka ti ngei ang.


Show post links
Top