Thinlungmawlpa BY Cck Lalchhuanawmi (Completed)

[Ngaia]

Thinlungmawlpa
Chapter-7
Ziaktu: Cck Lalchhuanawmi


"Aw, niminah a lo kal. I hre lo em ni?".


Ka hawi kual vak nghal, hmanah pawh, a tukah a kal leh kha a ni a, niminah lo kal tawh mah se, vawiinah a lo kal leh mai thei asin.


"Ka pu, niminah a lo kal tak tak maw?",


"Tak tak e, eng nge in awmzia hi le?", zawhna tam tam puin min melh a.


Ice cream duh an awm avangin a pe leh rih. Ka pa aiin a naupang hlek ang tih tur a ni a, a lu a bukin, chapal a bun a, a ke a bal ang reng.


Ka puin 'min hrilh teh' ti awm taka min melh leh chuan, "Thingtlanga awm a nia, kei heta awm ka ni si a, duh duh hunah a inhmuh theih loh chu a nih hi", za lo têin ka nui a.


"Phone-in in inbe thei lo em ni? Tun ang laiah te chuan Thingtlang mi pawhin phone changkang tak tak an hum fur tawh alawm", Kross-an chutiang a hum pha lo.


A hming a hre chang anga, a kuta awm turin phone a suangtuah chhin pawhin ka ring lo.


Thingtlangah phone changkang tak tak hum fur hlawm mah se, Kross-a erawhin a hum pha lo. A hming a hre chang anga, chu zawng a ni mai.


Ka pu chu melhin, "Nia tiraw, mahse, phone hum pha lo pawh an awm fur ang chu", kei, khawpuia awm pawhin, hmanni lawkah alawm ka neih.


Phone leina tur dil chhuah a ngai a ni a. Kross-a hnenah dil ve rawh ti pawh ni ila, pitêi te khan pek chu sawi loh, an vaw nek duh ang.


"Ni ve tho mai", kan pahnihin inenin kan nui hmiah.


"Ka pu, khawngaihtakin a lo kal leh hunah ka ngai lutuk tih min lo hrilh sak rawh aw, ka lawm ngawt ang", zah theih loh chhuahin ka ngen a.


Ka pu pawhin, "Lutuk, ka lo hrilh ngei ngei ang", lawmthu ka hrilh nasa.


Rin ngam a ni ang em hre lo mah ila, Kross-a a lo inlan leh hunah a hrilh mial mahna tiin, Beiseinaa hrilh ka ni.


Min hrilh sak hrâm mawlh teh se.


Ka haw a, "In va bang har",

"In va bang hma", ti let vein, Jerome-an a dar chhin hakin, "A u, a nu a chhuak daih, a pa leh u Mambawihi an lo haw bawk si lo", a dul zût zût pahin a ti a.


Piai nawk nawkin, "Phakar thiam lutuk mai",


"Min thlah teh, ka ril a ṭam. Alu kan(kang) min pai tir ziah a, ka hne tawh", a ning ngawih ngawih a ni ang, a hmel a tichhe nasa em mai.


Dawhkanah bag dahin, "Chips leh drinks ka va lei ang, chaw chhumna tur Rice cooker lo on la", ka chhuak zui a.


Chawhmeh leina chang ka hre lo chu, âtthlak ngei mai.


Ka nu hi ina awm reng a ni a, a chhuaha a haw tlai dawn chuan pawna doormat hnuaiah chahbi a dah mai zel.


Dawr kawta Sangha, thlênga an dah chuan ka mit a la thlu ngang.


Ka hmu tawh, a hming pawh ka hria, Nghavawk. Ni tak, Zawhte a ni tak e. Kross-an Zawhte a tih tak kha maw.


"Pi, Sangha hi engzat man nge?",


"500 a nih kha",,


"A va to em em ve", a nui duai duai.


Pakua vel hi a ni a, an lian si lo. Tê tak tak te tih tur ni bawk si lo. Kross-a nen kan tui theh kangnaa mi aiin an tê vek.


Fridge-a chawhmeh awm ang ang siamin, hetia chokaa ka buai nak nak tawh hi chuan Kross-a angah ka inchan ṭhin.


Tunah te hian pawnah chawhmeh a siam ang a, ei hunah a thlêngah inthlahrung tâwkin chaw leh chawhmeh tlêm têin a dah anga, pawnah ṭhuin kham lo tâwkin a ei leh dawn chu a ni si a!


Kross-a, paih bo tur chein min ti mah la, ka thinglungah mai ni lo, ka thluakah leh mitthlaah leh mumang ram leh suangtuahna ram chenin, chutah chuan zung i kai nghet tawh lutuk.


Niminah i lo kal tih ka hre leh nghal.


Nangmah zawkin paih bo thei lo tur chein min siam zawk a nih hi maw.


Tukina a ṭhiante hmaa ka tihzah avang leh thu thinṭhawng ka sawi avangin, Mambawihi hmel a hlim hlawllo.v


A ṭhiante khan zawhna an zawt sup supin nia ka rin.


Ka nu pawhin min en dan a dang ṭan tih ka hria. An khuaa min kal tir kha pawi a ti tawh ngawt ang.


A hma aia tlawm leh zal turin min ngai ngei ang. Chutianga awm turin min tir a ni zawk a.


Mahse, min kal tir kha pawi a la ti dawn. Pawi a la ti chho zel mai ang.


Inrintawkna leh chhelna chhar chhuakin, Kross-a min hrilh ang takin inhnuaichhiah hrehawmzia ka chhar bawk.


Khang hun zawng khan mahni thiamna ngeiah pawh ka tan ka ding ngai lo a. Tunah erawh, a ni tawh dawn lo.


Lem chang thiam lutuk.


Jerome-a lehkha zir tura a pindana a luh rualin ka pindan ka pan ve daih.


Mambawihin ka luh hmain hnung lam aṭangin ka kut a lo man a, "Tukina i thusawi kha vawikhat mah sawi leh tawh suh ang che. A nih loh chuan-",


"A nih loh chuan eng nge? Mahni u te khatiangin an ti ngai em ni? Bakah, sawi dik loh ka neih ka hre lo, awmpui zawk chu nangmah i ni tlat si a", nuih sakin, ka kut thing thlain pindanah ka lut a.


Lehkhabu phawrhin ka hmaah ka inchhawp.


Sawi dik loh ka nei lo tak tak, awmpui dik tak chu amah leh a nu an ni tlat si a ni.


Ka sawi zel tho ang, sawi lo pawh ni ila thudik a thup reng theih loh. Ṭhiante zinga inlak eng emaw nana 'awmpui' tia min sawi reng reng.


Ṭhian kawm tur a vân loh ang chu a?


A vân lo ang, mawi takin ka thusawi kha a khuh leh tho ang.


Lehkha zirah ṭan lak ngai ka ni tak meuh meuh. Ka tan ai mahin Kross-a tana ṭan lak ngai ka ni.


Pawisa chhiar bak thiam a neih loh danah, School a kal dawn lo tihna a ni a.


Awi, a mak nia. Kei lah hi a!


School an kal tir dawn lo tih te chu a hriat reng reng. School kalte a châk hian nia ka rin.


A bulah awmin, a dawn ngai loh zawng zawng dawn tira, duat taka enkawl ka duhin ka va han duh tak em!


"Bawihi, College chu a nuam dawn awm em?",


"Nuam tehreng", ti varin, "A ṭhat chu, ṭha takin i zir dawn nia", ka pain a ti leh.


"Zir dawn chiang e, First-a pass tumin ka zir dawn alawm", ka ti ve bawk a.


Ka nuin, "Mambawihi chu Distinction a ni leh ang. Pawl sawmpahnih angin A Result a chhuak hmasa leh dawn a. Mambawih, Topper turin zir ang che, kan chhungkaw hmingchhiat leh ṭhat i kutah a awm tih hria la", a ti nghal.



Lam ṭang ka nei lo tih hriat takin, "Ni e, Distinction-ah mai ni lo, Topper ni turin zir la, i nu sawi angin i kutah kan chhungkua a innghat tak zet a nia", zaidam takin ka pain a ti a.


Thawh daih mai nia ka duh.


Chaw ei tui duh lo ngei. Intineitu tak leh hnehtu zawk ka ni ti ang hrimin Mambawihin min en kalh a.


Ka nuin ram hmek hmuka min melhna pawh ka mitsirin ka hmu ve ran.


Engah mah ngai duh loin nui varin chaw ka bar hmiah hmiah. An mi lo el rukna zawng zawng hre tawhin, enliam mai mai ka tum tawh si lo.


Kan inṭhen khum reng tawh dawn a nih hi.


"U, cheng sawm i nei em? Frooti leina tur", ka pe a.


Pindan aṭanga inkuah chhuakin, "Naktuk aṭangin chawhmeh tui tâwk tâwk i pai tawh dawn nia, vawiin chu Alu pai leh mai rawh aw",


"Hneawm tawh asin le", Jerome-an a ti niah niah.


A dara beng thak thakin, "Vawiin chu, lo ei leh phawt mai rawh aw, naktuk aṭangin Sa hlir i pai tawh ang",


"Naktuk thleng phawt rawh se", a han ti ngei a.


Nia mawle, naktuk han thleng phawt sela. Jerome-a hi chu ka haw phal lo. Ka thisen a kai ve a.


Tin, mipa a ni hi ka lawm. Hmeichhia ni sela chuan tun ang hian kan inner khum thei lo ang.


Ka haw(hua) phal loin, ka duat zawk em em si a.


College banah, ka hman phawt chuan bazarah ka kal ziah. A chang leh, College kal hmain ka kal bawk a.


Kross-a a lo kal leh kal loh ka hre duhin, ka nang fuh mial mahna tia kal ka ni ṭhin bawk.


Thla khat a chuang a, "A lo kal leh ta reng reng lo", min beidawnpui tak hian ice cream zuartupain min thlêk ve ngawih ngawih zel.


Classroom-ah ṭhuin, phone ka en mai mai a. Break lai hi chuan tih tur a vâng. Library-a kal turin ṭhutna aṭangin ka tho a.


Library kil khatah lehkhabu bihin ka ṭhu hle hle.


Thingtlang tih thumal an sawi rik hlekin ka thin phu a rang thei a nia aw...


Hla thu ril tih tak deuhin, 'Kross-a zungzamin min hual vel a. Ka ngaih luatah thisen luang te hi an chawmawlhin, thluak hnathawh lah muangin, ngaihtuahna te hi a tawi tûk a.


Hawina lam apiangah a hmel hmuh ka inring ṭhin.


Mipa sa ṭha tâwk tak hmuhin Kross-a emaw ka ti a. Hnathawh kawr ha, ngo veh vawh ni lo, hâng lam pawl ka hmuhin Kross-a emaw ka ti a.


Mithmul chhah ṭha tak ka hmuhin amah tho emaw ka ti. Mitmu dum khep khup hmuh lahin amah emaw ka ti tho.


Thaw a pikin a zîng muai muai!


Kross-a, nangmah vang hian ka va mualpho nasa tawh tak em'.



Ṭum khat pawh, lukhum hmathlawk var khum hi a hnung lam aṭangin ka hmu a. A taksa pianhmang leh a lu awm dan te Kross-a a an em avangin umzuiin ka en chiang tawh.


"Eng thil nge ni ta?",


"Ka tihpalh lutuk, ka hai che a nih hi", thupha ka chawi mawlh mawlh mai ni. Kross-a ni se ka ti lutuk.


A nih chuan mi tamna lai pawh nise ka kuah vawng vawng ang.


A tawpna thleng nghal turin bul ka ṭan pui lo. Mawl teh tuh lutuk mai.


"Bawihi, eng nga tan nge khati zozai i siam a?", zozai tih tur a ni lo. Aluchawp ka siam mai chauh a ni.


Chawl duh chuang loin, "Jerome-a pai tur a nih hi, ka pai tur nen. Alu kan(kang) a hne tawh a, chidangin ka siam a nih hi", ka hmaah chiah a ṭhu a.


A hma ang takin nel chu sawi loh, thinlung taka biak harsa ka ti tawh.


Mi melh kalh mai a, "College-ah canteen a awm lo em ni? Chutah inhnawhpuar ta mai che. Jerome-a pai tur chauhin siam rawh",


"Pawisa a hek, ka pa chauh hian a thawk chhuak a, kan hmansak huau huau chuan a ṭha lo zawk ang", ka ti ve ngat.


"College ka kalna man tal thawh chhuah tumin ka bei mek a. Project atana ka pa hnena pawisa dil ngai loin", ka ti leh ngat.


A nui tak naa, a rukin min melh ngawt ngawt. Inmelh natah thih theih sela, ka thihna a rei tawh ang.


Min chhân dan tur a hre tawh lo a ni ang, "I lo haw aṭang hian i mizia a dang tlat, thil thleng a awm em ni? Bawihi, sawi la, ka chhungte thiam lohnaah chuan ka hau hreh lo. Vuak pawh ka hreh lo", Kross-a a vuak nasat dan tur ka mitthlaah a lang zawk.


Chu chuan ka thin tisa phatin, "Vawikhat mah ka biak lohin vawitam inbia anga min sawitu hnenah sawi tur ka nei lo e", inher hmakin ka kut ka sil.


Kross-a a vuak nasat dan tur bak mitthlaah a lang lo.


Tihsual nei lo, an nghaisak nasat zia mit ngeiin ka hmu a. Chumi hnenah ka thinlung pe tawhin, annni ho vang mai mai hian ka kalsan lo ang.


Kei mah avanga a nunin awmzia nei ve taa ngai, Kross-a tan ka thinlung leh nun, hun zawng zawng ka pe tawh.


Chu chang a ni lo, ka pa hnena inbe reng reng anga min sawi kha, tuar dam mai mai a har.


Hniak phawi hauh loa dawt a sawi thei kha mak ka ti.


A hmaah ka ṭhu ve kur a, chuti chungin ka pain, "I nu nen in inbe ziah", min tiha a mitmeng danglam map lo te kha.



Rapthlak lutuk!


Jerome-a tiffin siamin ka insiam ve a. Canteen-a mi ei reng pawh, Jerome-a angin a hneawm.


Jerome-a pawn thleng thlahin, ka pa nen an kal rual a.


College kal tura insiam ve nghalin, dawhkana tiffin ka dah ka hmu ta reng reng lo.


Zawng kual nghalin, dawhkanah ka dah lo emaw tiin, pindanah lutin ka zawng. Awm bawk si lo.


Chokaah zawng leh ruaiin, Mambawihi lo kalin, "I la kal dawn lo em ni? Ngati nge i phi chung a?",


"Tiffin pai tur dawhkanah hian ka dah a, ka hmu zo lo", thaw hapin ka ti a.


Dawhkanah ka dah chiang lutuk.


Mambawihin, "Tiffin a? Dawhkana mi kha maw?", a ti chu, "I hmu em ni?",


"Hmu e, Jerome-an a theihnghilh emaw ka ti a. Ka nuin a pai reng thu a sawi takah, paihin ka silfaia ka dahṭha daih alawm", ka nu ruahmanna vek a ni chiang lutuk.


Ngeiawm zetin, "I pai tur tih ka hre lo a, ka tihpalh a ni e", a mitmengah min hmuhsitna a lang reng si a.


Ka ti let a nih chuan amah ang chauh ka ni dawn si a, hre loa tihpalh thu sawi a ni bawk nen, mahse, "Awmpuiin tihpalh in tih chuan a ṭha vek e", dar chhin hakin ka ti a.


Ka kalsawn chu hnung lam aṭangin ka chhip samah min kekin, "Min va han hmusit ve, awmpui te min tih", a kut manin ka tal chhuak a.


A ding lamah thlê sawn hmak khawpin ka bêng a nih kha, "Aia upa zahna i va nei lo ve. I u ka nih hi, u te an sual zawt zawt ngai lo", ka nu a lo kal.


Mambawihin, "A tiffin pai tur tih hre loin ka lo paih daih a,,ka tihpalh thu ka sawi pawhin mim bêng tho", hniak phawi hauh loa tiin, Savawm mittui a ti tla a.


"Mi tihpalh tih hnu pawha chutianga han tih. Mambawih, ṭap suh. Kan rethei nufa em a ni. I pa bula sawi pawh a ngai lo, keini min ṭan dawn chuang lo a, ṭan tlak pawh kan nih loh hi", ka nuin a kuah a.


An han insût feih feih vel a.


Uak tuarh tuarh ka nâp a, mittui lem an titla peih ngawt mai.


Ka bên avangin inthiam lohna ka nei tawp si lo. Kha aia nasaa bên leh a nia ka duh.


"Awmpui tia min ko hmasa tu zawk i ni a, awmpui dik tak i nih zawk thu ka hrilh mai chauh che a ni e. Natpui tham pawh a nih loh chu", min melh rum rual asin.


Kal ka tum leh chu ka nuin, "Min va han hmusit ve, i eng pawi nge kan sawi? I pa nen kan innei chu i lo helh viau a ni maw? Min duh lo tih hre rengin duat takin ka enkawl seilian che a. Hetiang hian maw min rulh dawn a",


"Nang hian, awmpui anga min en char char zawk avanga awmpui ti mai chauh che ka ni. Chu pawh, fiamthu leh nghalin, ka u i nih avangin ngamtlakah ti chein ka fiam ve che a. Mahse, nang chuan min lo hmusit ṭhin khawp mai. I ṭhiante bulah ka pa hi chhuhsak ang chein min lo sawi thul. Pa tel loa awm hrehawmzia i hre lo ang, pa ka nei thei hi ka lawm em em asin", ka beng a tikham.


A sawi kual nasa si, a mittui a titla thiam bawk si. Ka beng an tithlep.


Ka nu lahin, "Kan rethei em a, hmuhsit tlak kan nih hi", mittui hru fap fapin a ti a.v


Lem an chang peih mai mai e. "In ngaih ngaihin ngai teh u, lem in channa lamah in hah ve thei lo emawni?", min melh rum leh nasa lutuk.


Hui papa ka inher chu, ka pain min lo en reng!


"Pa, Office i kal a ni lo em ni?", ka lam panin a lo hnai a, min bêng ta chawrh.


"Pa?",


"Hetiang hi nimaw, ka awm loh hlana i nungchang chu, i va lo rapthlak em em ve. I zin bo hlana chhungkua kan hlim tehreng nen, i lo haw a i chawkbuai ta vek a nih hi. Nichin khan eng thu thu te nge i sawi kha? I zak chai lo em ni?", a ti ta khur khur.


Mambawihi te enin, "Nangni pawhin min hrilh tur alawm", min en leh a, "Ka fanu chu i ni ve si amaw? Tuna i nungchang kha sim hmak ang che".


Mambawihi te kai hrangin, keimah chauh chokaah min hnutchhiah.


Tiffin aṭanga an ruahmanna vek a ni. A ni chiang a ni.


Bazarah ka kawi a, College kal pawh ka phur lo.


Ka pain kut min thlak vawikhatna, chu pawh thudik hriat hmasak tum loa dawt hmanga an dawi ât avang chauhin.


Mahse, na ka ti!


A pawi chuang lo, an nihna dik tak ka hre chhawm zel alawm.


Khatiang ruahmanna an siam khan, fing sawtah min chhuah leh der. Finga inngaia ruahmanna dang dang an rawt apiangin ka fing chho zel ang.


"Bawihi, hey, Bawihi, hmanhmawh rawh", ice cream zuartupa ka puin ralkhat aṭangin min lo ko vak vak a.


Hmanhmawh tâwkin ka tlan, "Hmanhmawh rawh, a kal chiah, sawti lamah",


"Tak tak em?",


"Tak tak, hmanhmawh rawh".


A kalna lam a sawiah ka tlan a, tlan chungin ka hawi kual.


Kross-a koh vak vak ka duh rum rum.


Amah ang deuh ka hmuh chuan, "Kross-a", ko chungin ka tlan a. Ka um a ni mah.


A kutah vuan chawtin, "Kross-a", a hmel ka hmu chu, "Tihpalh, ka hai che a".


Ice cream awmnaah lunghnur takin ka let.


"I nang lo em ni?", ka mittui a tla ringawt. Ka hru thuai.



Zinga ka pain min bênna ai pawhin Kross-a ka hmu hman lo chuan min tina tawh zawk.


Ka puin sarang khai chhuakin, "Hei hi pe tur chein min ti a".


Thingba a ni!


Panga lai, an lian si a, a tui leh dawn lutuk.


"Ka pu, ka thuchah che kha",



"Lungngai suh, ka hrilh alawm. A bu nghat ringawt a, mahse, a ngai ve takzet chein ka hria. A mitmeng aṭangin ka hre thei. A cher lutuk a, a ngaih luatah che chaw a ei thei lo a ni ang", min chhaih zui a.


Ka nui ve mai bawk.


Thingba chu pakhat ka pu pein lawmthu hrilhin College panin ka kal a.


Ka puin a cher lutuk a ti a. Min ngai ve ngeiin ka ring. Min ngai em em ang. Kei pawhin ka ngai a ni a.


Min ngaih avang erawha chaw ei thei loa cher a nih ka ring lo thung.


Aw, Kross-a, i va rethei tak!


Show post links
Top

[Ngaia]

Thinlungmawlpa
Chapter-8
Ziaktu: Cck Lalchhuanawmi


Aw, Kross-a, i va rethei tak!


Ka pa lo hawin en pawh min en lo, ka be lui tho, "Pa, Thingba hi ei ve teh mah, a tui reuh lutuk", zai phel sa ka pe a.


"Nakinah ka lo ei dawn nia", an pindanah a lut tlang a. Fridge-ah dahin, dawhkan ka tifel.


Mambawihi lah hi, lo haw tlai thei si. College banah an leng kual ṭhin tih hre mah se, ka pa hian a hau phal lo.


A hau ngam lo ka ti mai, kei erawh, min vaw(vua) duh ang. Haw tlai ka la nei lo.


Bazarah kual mah ila, ei rawngbawl hman turin in ka thleng ziah. Ka nu lahin min lo nghak emaw tih turin bawl a tum tawh lo.


A nihna dik tak hriat chhohin a awm zel dawn a nih hi.


Mambawihi te hriat leh hmuhah ka pa biak tum tawh loin, an hmuh lohin ka be ta ṭhin.


Ka pa ka biaka min chhân loh te hian an lawm tih ka hria. Chuvang chuan an hriat lohin ka be lui ngar ngar.


Ka pa nena kan inkar siam ṭhat ka tumnaah Kross-a ka hre chang lo lek lek.


Mahse, lehkha zir zawha mut meuh chuan a tharin ka thinlungah a inlar chuai chuai.


"Kross-a ai chuan ka la tuar nêp alawm", hei hi ka inhnemna a ni tawh.


Kross-a anga tuarchhel leh dawhthei ka hre ta hauh lo. Ka thinlung ka pe hi tisual inti loin, ka lawm zawk em em.


Ṭha takin min enkawl dawn tih ka hria.


Inchhung boruak eng ang pawhin ṭha lo mah se, lehkha zir ṭhulh thei ka ni lo. Kross-a tan, ka engkim hi Kross-a tan chauh!


"U, naktukah rice pai ka duh",


"Lehkha zir ṭha la",


"Zir ṭha dawn raps".


Ka pindang kawngka kharin, a pên pawk pawk. Class-8 zirlai ve chauh si hi, a pên ri aṭang te hi chuan patling pui emaw tih a awl ṭhin.


Kross-a mut dan tur ngaihtuahin, ṭhutthlengah a mu kawm leh ngêk anga, khum zau taka mut te a châk ve thei ngawt ang.


Zingah thoin rice ka siam a, sauce lei a ngai dawn a ni.


College kal tura insiamin pindan aṭangin ka chhuak a, dawhkana ka dah tiffin min suasam sak em tawh lo e.


Kha fek feka min ṭawngkhum la ching reng mah se, hmanni aṭang khan ka fimkhur ve tawh lutuk.


Min ṭawngkhum dan ang anga chhân let châng nei ve bawk mah ila, insual tur khawp khawpin ka ṭawng ngai lo thung.


Ka pa awm hnaih leh hnaih loh chian hnuah chauh, duh tâwkin Mambawihi nen kan inṭim ṭhin.


"I mak sawt khawp mai, i kawchhungah ramhuai a lut dawn a nih hi", ka nu nen min ti ṭhin.


A hma te kha chuan ngawi renga awmin, min zuam phah reng kha a ni a.


Tunah erawh, ngawih mai mai ka tum tawh si lo. Ka pa awm lai hi chuan ka insum ve tawh.


A awm loh lai pawhin fimkhur takin ka chhâng let. A rukin min lo ngaithla leh kur palh ang tih ka hlau.


Mahse, tlai khat ka haw chu ka pa Office kal haw lam nen kawngah intawkin min phur ve a.


Ka pa hian Maruti 800(Eight Hundred) a nei a. Hemi te hian Office a kal ve tlauh tlauh ṭhin.


Ka pa hnenah kan buaina bul zawng zawngte hrilh vekin, Mambawihin 'awmpui' tia a ṭhiante hnena min sawi dan te hrilh vekin.


Ka nu nena min tih dan zawng zawng te, "Pa, fahrah nun dik tak hriattira ka awm nan an khuaah pawh khan min kal tir asin. Ka nu a nih avang leh min duat ṭhin em avanga fahrah nun hre lo ka ni a, a thu hnial lo mai chauh ka ni. Mahse, Pa, fahrah nun hi a lo hrehawm takzet a ni".


Kross-a erawh ka sawi lo.


Hre lo zawk se ka duh.


Chubakah, Kross-a te chu mihrang angin an en bawk a.


Chuvang chuan an chhung angin ka sawi thei lo. An thisen kai, an fapa leh an tupa an nghaisak dan hre lo law law rawh se.


Sawi chhuah pawh a zahthlak, Kross-a an nghaisak dan em em hi chu, Ran leh Ramsa te takngial pawh hian Ngilneihna leh Lainatna an nei asin!


Mihringte zawk hi Ngilhneihna leh Lainatna, Ran leh Ramsa aṭang tea inzir kan mamawh takzet a nih hi.


Ka pa hnenah, "Pa, ka chungah eng ang pawhin thinrim mah la, ka nu leh Mambawihi te hi a hma angin ka en thei tawh lo. Min hmuhsitna leh diriamna te ka lo tuar dai nasa tawh lutuk a. Tunah chuan ka tlin tawh lo, ka chapona hian min phalsak tawh lo bawk. Nang leh Jerome-a te chauh he khawvela ka neih chhun te in ni tawh a, nangmahni avanga chauha la nung ve ṭawk ṭawk zawk ka ni".


Thinlungin, "Kross-a pawh", a lo ti a.


A rukin ka nui ver ver.


Kross-a, ka pa leh Jerome-a, nutêi te chhungkua. He khawvela ka neih chhun te.


Mahsela, Kross-an hmun a luah sâng deuh zawk.


"Bawihi, i nu kal hma lutuk hi chu, a pawi a ni tiraw?", ka kut lo vuanin a ti a.


Ka nu a ngai chiang a ni.


Vuan letin, "Ni e, a pawi a ni. Pa, ka ngai thei lutuk asin".


"Kei pawhin", mittui tling piauin ka nuih a. Ka pain ka nu a ngaih thu a sawi ka hriat vawikhatna.


Nu, ka pa nen kan ngai lutuk che!


Ka pa nun pawh hi, a nuam tehchiamin ka ring lo ta. A sawi ve mai mai lo tak naa, nuam lo a tiru ṭhinin, ka nu a lo ngai ve thei ṭhin ngawt ang.


Motor aṭanga chhuk hmain, "Bawihi, chhungkaw thar kan nei tawh a, inngeih dial diala awm i tum ang u aw", min ngen hi a ni mah zawk.


"Pa, ka tum nasa asin, ka tum a ni tih hi min hriatsak hram rawh aw".


Ka nu inah a awm a, ka pa hnungah ka zui lut.


"I lo haw hma chu ka va lawm tak, ka lo ngai hman tawh che alawm", ka pa nghawnga kuahin ka nuin a ti a.


Intitatu takin min lo melh.


Pindanah ka luh san daih. Intitatu takin awm mah se, ka pa thinlung erawh, tun thleng hian ka nuin hmun a la chang.


Tukverh hawnga hawi chhuakin, "Nu, ka pa thinlungah hmun i la chang reng asin. Kan pahnihin kan ngai lutuk che".


Ka pa nen kan inbe ṭha tawh a, Mambawihin ka pa nen kan inbiak ṭhat loh leh nan engtin tin emaw a awm kual.


Fimkhur tawk tak ka nih avang erawh chuan a tum a hlawhtling thei lo.


An nuihzatthlak zawk.


Thingba min lo ken aṭang khan thla khat a liam leh tawh a.


Thla hnih a liam leh dawn tawh zawk. College ban veleh Bazarah kalin, "Thingba aṭang khan a lo lang tawh lo reng reng, hriatthiam a har khawp mai", ice cream zuartupa ka pu pawhin min manganpui.


"Hmun dangah kal a ngai tawh a, a lo kal ve leh ka hrilh nghal ang che".


Ice cream bawm nawrin min kalsan a.


Kross-a chuan buaina tawk lo hram se aw. A tawk dawn tih hre tho mah ila, lo vaw(vua) tawh lo hram sela.


Lehkha zir chauh ka ngaihtuah avangin ṭhian kawm bik pawh ka nei lo.


Class-a mi te nen inbiak zeuh zeuh chang kan nei a. Mahnia tla fal mai ṭhinin, Library-ah hun tam hmangin ka awm ṭhin.


Phone lah hi, a ruak huai a. Ṭhian bulfuk nei lo leh ṭhian mumal nei lo chu, phone te hi a ruakin a ruak.


Chu zawng, pawi ka ti hauh lo.


Fb-ah account siam vein, Zirlai atana ṭangkai thei tur group chauh follow-in ka like a.


Phone en rei chuan mit a nat duh em avangin Lehkhabu ka bih ngun zawk a. Phone chu a zeuh zeuhin.


College-ah Advance Christmas hmangin, Refreshment pawla ka awm avangin Function kan ralkhat thlir tlawk tlawk.


An au dur durin kan phur hlut a, kan va tlan lut rawih ṭhin. A nuihzatthlak thei a nia.


"Bawihi, nuam i ti em?",


"Ti e a", a bak sawi belh tur ka hre lo. A tawp hmak.


Senior Malawma bawk chuan, "Kan College hi chu, Pawl sawmpahnih pass ṭha lo luh khawmna a nia, kan ât huai hlawm em hi", nui sak sakin a ti a.


Kan bula mite pawh an nui nasa mai.


"A nuam zawk daih, kan College hi a nuam ber", an ti bul bul hlawm.


Pawl sawmpahnih pass ṭha lo ho luh khawmna a ni tak takin ka hre ta. U Malawman sawi lo se, ka hre miah lo ang.


U Malawma te chuan an chhuahsan thuai dawn a, kei ang tan a huphurhawm.


Hmabak a ko lutuk a.


"U, a nuam em?", min hmuh rual rualin Jerome-an phone-a games khel chungin min zawt a.


A games ngawt a buaipui avangin en pawh min en lo, "Lehkha zir ta che",


"Naktuk tuk leh khi alawm exam", a ngaihsam mai sia.


A bula ṭhuin,,"Gift exchange in nei em? Ni tak, nei rual in ni tawh lo tak e", amah leh amah a inbia.


Games a khelh hi chuan biak ṭhat theih pawh a ni lo.


A mala ben thak pahin, "Khel rei suh aw, lehkha zir i ngaih kha".


Inthlakin chokaah ka bur a, "Jerome, Artui curry siam ila",


"Yes", phur lutuka a lo ti chu, "Artui va lei rawh",


"Aaaaa", phun nuah nuahin a kal ve mai bawk.


A lo haw hunah lehkha zir tura tih a ngai a ni. A vawh deuh avangin kawrlum ka ha a. Krismas kan hnaih tawh si.


Jerome-a lo haw chu, "Chaw ei hmain va zir thuak thuak la, zanah rei tak men ngai loin",


"Tui tâwkin siam rawh aw".


Pindanah a lut chiah tihin, an pindan aṭangin ka nu a lo chhuak a. Jerome-a pindan kawngka hawngin ka hriat ngei ngei turin, "Zanah i zir dawn nia, tun anga lehkha zir reng reng, tuin nge zir rawh ti che? Mawl lutuk, rilru tihthawl nan games khel mai mai rawh. Computer ṭha ber chi i neih kha, a man a tam si, hman ṭangkai tum rawh".


Awm hmunah ka lo ṭang ṭung. Min tizak.


Ka nu erawh, a zah ka ring lo. Mawl min ti a, lehkha zir ṭha se, sâng taka a pass ka duh vang a ni sia.


Ka nau a ni a, a ṭhatna tur ka duhpui.


Computer ṭha ber chi leh man tam a sawi chu min sawichhan, min intihtheihkhum.


Computer ka nei ve lo mai pawha. Pawi chai lo.


Jerome-an lehkha a zir ka ring lo hmiah bawk. Lehkhazir aiin games khelh a duh zawk tlat a.


Hetiang chuan a pass chhe dawn tlat, a ruka hrilh a ngai a ni.


Ka nu chu, choka a kal pelh dawnin min melh nasa mai. Ka mitsirin ka hmu ru reng.


Ngaia ka nei tial tial hi ka lawm.


Jerome-a chu a rukin ka hrilh tak tak. Thuawih takin, "Aw le", a ti zuah zuah a. A pindana ṭhutchilh a duh tawh si lo.


Lehkha a zir tak tak nge games a khel hriat theih tawh lo.


College kan chawl tawh si, Krismas Bazar vena tur tuak nan, Nu Dini hnenah Panhnah silin ka inhlawh a.


Pai khatah sawmnga zelin, an dawr hi a lian ve a, a lung reng mai ni. Kuhva pawh an hralh chak.


Anmahniin an zawrh bakah, dawr pahnihah an pe tel bawk a.


Nikhatah chawhrualin pai sawmpanga ka sil thei. Hlawh ṭha ve tak ka ni. Khawpuia awm hlawkna a ni pakhat.


Tluang takin Jerome-a te pawh exam zoin, result chhuakah pass vek mah se, Second Division-ah a pass a.


"Second Term-ah Second Division, ṭha hle mai", ka pain a ti chu, kan vai nuih.


Rin lawk ngeiin, "A u Mambawihi a chhun a, thiam thei lo pawh a ni lo, a ngaihtuah lo lutuk a. Ngaihtuah se chu, a u Mambawihi angin Distinction char char ang", ka nuin mi melh zeuh a.


Intivei takin Mambawihin min melh kalh bawk.


Hui, min el pawh ni lo, min er lutuk hi ka khawngaih tawh a ni. Ka thengthawngah an lut tlang thei tawh lo.


Eng nge an hlauha, titaka min er le?


Hriatthiam an har a ni e.


Mambawihi chu a ṭhiante nen Krismas Bazarin, zan rei tak takah a lo haw a.


Ka nuin a khuh mawi zel avangin ka pain hauh enah a tin lo, "Krismas bazar a la hun lo asin, i u pawhin bazarna tur min la dil lo", tukṭhuan ei laiin ka pain a ti a.


Mambawihi bakah ka nu te a rukin an ner nasa lutuk.


"Pa, kei chuan ka dil dawn lo che. Bazarna turin Panhnah silin ka intuak alawm. Nakumah pawh ka dil lo ang che", a rukin an ner nufa leh lutuk.


"I va intifel bik tak", ti ang ziazangin Mambawihin thip hlurin min melh.


An awmdan hi hrehawm an ti ve lo em ni le?


An peih phawt ahnu, awm zel mai teh se.


Ka pain, "U ber nih i tlin ṭhin mang e", zaidam tak leh nui sângin a ti a. A hmelah min chhuanna ka hmu thei.


Chu chu ka tan a tawk em em.


Ka nu leh Mambawihi te sawi nawinain min tihnual phah lo.


Bazar turin ka chhuak a, ka hlawh hnem hman a. Panhnah sila inhlawh a manhla zia ka chhar.


Kawn chei en kual mai maiin, kawngsirah zel kalin. A changin dawr kawtah dingin ice cream ka ei a.


A changin secondhand ka thing ang lawp lawp a. Tshirt pakhat chu ka lei ve.


Bag-ah a len mai avangin ka ak a.


Barbie leh T-set ang reng te, inkhualtelemna hrang hrang, Naupang lawm zawrhna dawr hian min hip zawk a. Chumi vangin chutiang dawrah ka lut tam zawk.


Barbie khalh rual ni tawh lo mah ila, nalh tak tak ka hmuh hi chuan ka ka duh tlat zel.


Kan tet lai aiin Barbie te pawh an nalhin an changkang chho zel tawh.


Kross-a nen kan inhmuhna ice cream awmna, ka puin min hmuh chuan, "Nang pawh chu, tunah chauh ka hmuh che a. Bazar kal i phur vak tawh lo a ni maw?",


"Ka Bazar chhan te chu ice cream a nia, min hmuh fo kha, min ning tawh a nimaw?", ka fiam let a.


Nui huah huahin, "Vawiin chu i lo kal fuh khawp mai, ice cream lian pui pek che ka duh a, Krismas thilpekah", a nui duh ṭhak lo.


Phur takin, "Ka lawm ngwt ang, ice cream lian pui ka la hmu miah lo a, a tui ang chu a?", nui varin ka ti a.


Ka pu chuan,,"Ice cream lian pui leh tui deuh, ka pek tur che chu i hnunga kha a awm", a fiamthu emaw tiin ka hawi.


Thinphu a rang lutuk, ka mumang chu a ni si lo amaw!


Ka pu en ṭha ngatin, "Ka mumang em ni?", ka ti hmiah.


A koki a sân ak ringawt.


"Bawihi?", min lo pan a. A pumraw khauh ṭhe ṭhawin Ni sa laka min hliah mai chu, "Kross-a", keimah ngei pawhin ka hre thei chang chang.


Zah pawh dâwn loin ka kuah, "Ka ngai lutuk che",


"Kei pawhin", beng bulah a sawi ve a.


"Inthlah ang, a zahthlak".


Zawhna ka ngah lutuk. Ka puin, "Krismas thilpek chu eng nge a an?",


"Ṭha ka ti lutuk ringawt, ka lawm e. Ka lawm lutuk, ka lawm tak tak", chibai pahin ka ti a.


Ka puin min nuih nasa lutuk.


"Insawn ka ngai tlat, in inhmuh lohna a rei tawh si, ka kalsan ang che u. Mahse, in inngai dawn tih a chiang saa, thil ṭha lo tih phah lo ula".


Ka pu innawr liam chu nui chungin kan thlir a.


Naupangchhia ni tawh hek lo, thil ṭha lo a tih chu hriat mai a harsa lo.


Ka ngai lutuk, ka hmu thei ta chu a kut ka thlah tawh reng reng lo. Mi zingah awm ni mah ila, zah ka hre duh tawh lo.


Kross-a pawhin min dang duh lo, ani pawhin min thlah bik lo. Kan kut chauh kan inchelh tawn a, mit tihkhamna tham a ni lo reng a ni.


Thingpui dawrah chawlhpuiin, kan kut inthlah mah ila, kan ke an chawl ta lo thung.


Zahthlak rualin nuihzatthlak, pheikhawk kan bun ve ve sia. Mahse, a nuam ve lutuk.


"Thingba kha tui ka ti lutuk, ngati nge min lo nghah loh? Ka puin i kal chiah a ti a, ka lo um nasa lutuk che. Nangmah ang deuh deuh ka hmu ṭhin leh nghal",


"Min ngaih vang a nih chiah chu", a sawi dik chiah.


Ka ngai lutuk a, mi zawng zawng amah turah ka ngai vek.


Ei tur chahin, "Bawihi", ka kut a rawn tawk zeuh. A kut a la let thuai.


Thingpui dawrah chuan duh angin a awm theih loh.


"Sawi la",


"Awmna tur min ngaihtuahsak a ngai, in inah erawh ka awm thei lo tih i hriat kha", ka zak duh lo.


A kut ka va vuan, "Ka nutêi te inah i awm dawn nia, ka hrilh anga an phal em em ang",


"Reilo tê chauh aw, in luah tur min zawnpui a ngai ang".


Ka thaw huai huai.


A tawpah zawng, hrehawm a tawrhna hmun aṭangin a tlan chhuak ta.


"Titawp hi ka nia, bungbel leh inchhung bungrua tur pawh ka nei lo",


"Ka kutah dah rawh, ka lawm lutuk. A tawpna thleng nghal turin bul ka ṭanpui lo che a. Engtikah mah ka thlah lo ang che".


Puar el awlin ka inhnawh puar pui.


Bazarah awm rei pui duh loin ka hawpui. Nutêi te inah kalin, an chhungin an lo chhuak dawn.


"In mikhual tur ka lo hawn", ti hmasa phawtin, patêa hnenah kan inkar thu te, a kip a kawiin ka hrilh vek.v


"Patê, a lo tlan chhuak tawp a ni a. Kan ina ka hawpui chuan buaina a tam dawn bakah, a duhdan a ni bawk si lo. In luah tur hmuh hma khawngaihtakin in inah awm tir hram rawh", ka kut pahnih suihin a khawngaihna ka dil lo chauh.


Patêan, "Chutiang a ngai lo. Kan bulah awm reng rawh se. Va lut rawh u, kan va Bazar ve lawk ang e. Haw hunah ṭha deuhin kan sawi ho zawk dawn nia", a ti chu, "Patê, ka lawm lutuk. Nutêi nen ka tana Vantirhkoh in ni", ka kuah a.


Patêa te Bazarah kalin, keini inah kan lut.


A pindan turah hruaiin, "Hei hi mikhual pindan tura an siam a nia. Hetah hian i duh chen chen i mu thei ang", min en vung vung.


Hetianga min en vung vung te hi ka lo thlakhlel hman zia ka hre chhuak.


Min lo hnaih a, "I lo hmelṭha zual sawt a nih hi", ka kâwngah min pawm a.


"Nang chu, ka hmuh hnuhnun ber ai chein i cher lutuk. Min hrilh ngei ka duh dawn nia aw, zep nei lovin min hrilh vek rawh aw",


"I ngaithla ngam dawn em ni?", mit chhing sawkin, ka heh hnuai a pet a.


Ka bek tawn tawna dawmin, "Bawihi, ka hawina apiangah i hlimthla ka hmu ṭhin a, thih hi ka tan a ṭha zawk tia ngaihtuah chang ka ngah ṭhin asin. Ka ngai lutuk che".


Uar leh chuhpuitu awm ni fahranin hmanhmawh zetin kan lei an inbuan let tawp tawp a.


Ka ngaih leh hmuh ka châk em em, ka hmaa awm ta hi, engtikah mah ka thlah lo ang.


Thlah ka phal lo, thlah mai mai turin ka thinlung ka pe si lo.


Show post links
Top

[Ngaia]

Thinlungmawlpa
Chapter-9
Ziaktu: Cck Lalchhuanawmi


Thlah ka phal lo, thlah mai mai turin ka thinlung ka pe si lo.


"Ka tawn hma che pawha ka khawhar ṭhin tawh tehreng nen, ka tawn chea i awm loh hnu aṭang phei chuan ka khua a harin, ka lung a lêng a.


A chang chuan ka thi dawn emaw ka ti hial.


Ramah kan inhruai nasa hman ve si a, khawiah pawh i sulhnu hmuh tur leh chhûi tur a awm zel nen.


Mut harsa ka tiin, zinga thawh harsa ka ti tho bawk. Chaw ei a tui si lo, ei rawngbawl pawhin chi aiah soda ka thlak ngheng a, a changin chini.


Ka buai zo vek a ni ber.


Chutianga ka awm avangin min man a, i awm loh hnu aṭanga mu leh mal pawh nei loa awm ka ni tih an hriatin, duhdah takin i hming an lam chho a, bawlhhlawh takin i mizia leh nungchang an sawi ṭhin bawk.


Ni eng emaw zah chhung chu ka pai dai thei mai.


Ka awmdanah min hria tih ka hriat avangin ka inthup nasa. Mahse, an hriat tawh tlat avangin awmzia a awm tawh lo.


A tir aṭangin lo inthup nasa ila ṭha tur a nia.


I nu pawh an lo hrilh, engtin nge a tih che ka hre lo. Chumi avangin paih bo che ka tum tak tak.


Mahse, ka thei thlawt lo. Bul ṭan puitu che leh thutawp siamtu ni mah ila,,ka thinlung aṭanga paih bo daih che chu, a sawitu kei hian ka thei thlawt lo.


Nang leh kei inkar i pain a hriat chhuah huna i tawrh nasat dan tur ka ngaihtuah nitin ṭhin. I nuin a hre tawh a, i pa a hrilh thuaiin ka ring bawk.


An hriat hunah chuan, tun ai hian i dinhmun a khirihin a chhe dawn.


Bawihi, min hriat kha", ka kut a vawn chu a tinghet zual a.


Boruak hip let kâwkin, a thaw chhuak ham ham a. Sawi tur ngah tak, sawi chhuah dan tur thiam leh tawh si lo, tui lai rapin a awm ka ti mai.


Ka kut hmer salhin, "Tlai khat, chaw ei ka siam laiin ka puin, "I tawmpui nu a awm tawh si lo a, i hawihilna a rei tawh dawn si, chah chho leh mai rawh", nui rah rah chungin a ti a.


Chhun lamah Bawng vengin ka chhuak a, chawhmeh ilo zawn nen, tlai ka haw hi chu ka chauh theih em kha.


Chauh nen, nang min fiam nan an hmang lehzel nen. Min fiam nan ṭawngkam tlahawlh tak tak an hmang leh ta nghal a.


Putêa ngawi hle hle thei lo lo ṭawng vein, "Chah chhoh pawh a ngai lo, khuaa a duh ber hnenah inhrithla sela, man bo daih sela a ṭha".


Dik taka sawiin Putêan a it che tih ka hria, a nupui pawhin a hai tawh lo.


Chutia putêa a ṭawng takah a nupui thin sa phatin, an inhnial chu a ni ta mai a. Ka pu nen lamin, an pathumin an inhnial hlawm a.


Tu ber nge thiam zawk tih pawh sawi theih lohin an ri phawng phawng a.


Kei erawh, chaw ei tur lain pawnah ka ṭhu daih. Thil dang ka ngaihtuah daih a. Ka ngaihtuah chu nang chauh i ni.


An inhnialnaa i hming an lam chhen chuan ka beng tikham tawhin, "A tawk rawh, Chaw ei tawh rawh u", ka va ti pek a.


An thinrim laklawh lai a ni bawk a, ka nu sualna zawng zawng te ka chungah tlak tirin, Anchhedawng ka nih thu leh, ka pian aṭanga chhungkuaa vanduaina thleng nasa te, leh an hausak theih loh chhanah mawh min phurhtir fai vekin.


Ka pian hlim aṭangin chhungkuaah hlimna thlen tawh ngai reng reng lo te. Aa, an sawi ṭeuh.


Kei min sawina chu eng pawh nise, min tinghing pha lo.


Mahse, i hming an lam chhen erawhin min tithinrim a. Bawlhhlawh thei ang bera an sawi phei che chuan ka kawchhung hi a alh hluah hluah.


A ngaitê bawkin ka ngawi leh reng, pawnah ka ṭhu a, chaw ka ei leh daih.


Mahse, chhung lamah an pathumin an ṭawng char char a. Inhnial ni loin, ka chungchang thu-ah chuan inthurual tak an ni.


Ka nu an huat aia nasain kei min huatna a nasa zawk a. Aa, Bawihi, sawi sen a ni lo.


Khami zan khera an thusawite, thih ka duh ṭum ber a ni ang.


Bawihi, a tawi zâwngin, ka alh chhuak a ni ber e. "I duh chuan chhuak rawh, khaw laiah va thi ang che", min ti bawk a.


Dan min tum hek lo, bag-ah hak thlak pahnih khat khungin in aṭangin ka chhuak a.


Ramah kal leh phawtin pawisa ka khawl lain helam ka lo pan ta a ni.


Khawpui pan tur motor a awm lo tih hre mah ila, kir leh ka tum tawh lo. Kein ka lo kal ngat ngat.


Êng ka nei lo a, zan thimah kawng hai chawpa kal ka ni a. Ka hlau eih lo.


Hlauh ai chuan lungchhiatnain min hneh zawk a, mittui leh hnap tui nen chu zan kawng chu zawhin, piang lo tur pianga inngaiin, kha leh chena ka lo tih ngai loh, Bawihi, pawi ka ti lutuk",


"Engvangin maw?",


"Ka mawhchhiat che a ni. Nang chauh ni lo, tu pawh. Ka nu, ka pu, ka pitêi leh putêa, ka nuliani. Mambawihi leh Duati te.


Mi zawng zawng, kha khuaa awm ho zawng zawng te kha.


A bikin ka pa!


Min hring chhuak tê têa, a hmel hmuh chu sawi loh, a hming takngial pawh hre loin, tu nge a nih lah hriat a ni lo.


Huatnain ka khat a, tu ber nge ka huat phei chu ka hre lo.


Ka thinlunga lo lang apiang kha ka haw(hua) fai vek. Nang tiamin. Ka thinlunga lian ber i ni a.


Ka huatna che a sâng bik.


Awm lo ta la chu, helhkam nei loin a dan ngaitêin ka awm anga. Bawng vengin nitin Ramah ka kal leh mai tur.


I lo lang a, ka bulah zel awmin, sulhnu tam tak khawiah pawh min hnutchhiahsak zelin, i hlimthla kalna hmun apiangah ka hmu a.


Man chhuaha awm loin zan thimah kein khawpui ka pan lo mai tur.


Pan tur leh belh tur ka nei lo a, ka chan chu rilṭam leh tui hâla, pitêi sawi anga khaw laia thih a ni tawh mai.


Chutia ka inngaihtuah lungpuam laiin, bawkkhup khawpin ka inchhuih a. Thawh pawh tho loin ka tluk ang anga awmin, "Thih ka duh", tiin ka rûm chhuak a.


Ka naupan laia ṭhian kawm tura chhuak ve ziah si, khawimaw kawm kar laia, "Pa nei lo, i nu a lerh si", tia min lo namsawn ṭhin avang te leh, lunga min vawm ṭhin avanga ka ṭah lai te.


Ṭap chungin an infiam thlirin, an nui thawm ka ngaithla ṭhin.


Mahni ina awm ve lêm sia chhiahhlawh ang maia min awmtir te, pâwn khawvawt hnuaia chaw ka ei bik ziah te.


Chu lo pawh, ka naupan laia an thu ka awih loh changa pawna min riah tir ṭhin te kha.


Khang hun te khan min ṭhingin, "Tu tana tuar nge i nih?", tih zawhna ka inzawt mawlh mawlh.



Tu tana tuar nge ka nih?


A fapa ngaihsak aia mipa dang dang ngaihsak thlang zawktu Chhûl aṭanga lo piang ve hi, tu nge ka nih?


Khang ka lo tuarna te kha, tu tana tuar ta nge ka nih ang le?


Mak tak maiin ka chungah êng bial, kuttum tiah lek tur hi lo thlawkin, ka mit zawnah tak a ding a.


Tho tura min ti tlata hriain, chu êng bial en reng chung chuan ka tho a.


Ka hmaah zel muangchangin a thlawk!


Mak ti hle mah ila ding khawng renga awm tawp thei ka ni lo. Ka zui ta zel.


Kawngthlanga a thlawh(thlawk) avangin ka chhuk a. Hnim hnah lak khawm hmanga bûk an siam chungah chu êng bial chu a ding leh ta chat.


Dumde ti dawn ila, Dumde a ni lo tih a pian hmang aṭang pawhin hriat sa a ni a. Dumde êng ni tur chuan, a ên dan a var pup lawi a.


Dumde a ni thei lo. Ṭaumeichher chhi lah a ni thei hek lo.


Chu êng chuan, "Lo kal la, chawl hahdam rawh", min ti!


Ka hrechiang lutuk, beng chhe ri a ni miah lo. Chawl hahdam turin min hrilh tak tak.


Êng bial chu a ni chungin, kuta mi kan hui ang hian min hui tlatin ka hmu tel bawk.


Mak ti tak leh zawhna tam tak nei chungin chu bûk chu ka pan a. A chhungah ṭhuin, chu êng pawh chu a thim chuang lo.


Bûk chungah dingin min veng hi a ni ber.


Mak ka tih leh em em chu, huatna nasa tak thinlunga khat ka nihna te bo duakin, chu êng chu ka thlamuanpui ta em em a.


Mihring ruangam ni maia hriain, chu bûk nen chawpin min kuangkuah ni mai hian ka hria.


A lum nuam em em a, famkim ta sawtin ka inhria. Thinlung a hlim em em a, thla a muang suai suai bawk.


Tui takin ka muhil a, zinga ka harh chuan rilṭam avangin pum a ri rawih rawih nghal.


Rama che ṭhang ka nih avangin ei tur apui ka hria. Chu bûk chhehvelah ram hnim ei tur a lo awm ṭeuh bawk nen.



Helai hnaiah tu mahin Lo emaw huan emaw pawh an nei lo a. Bûk awm ringawt chuan ngaihtuahna a tithui.


Ei tur nei mah ila, tui ka nei lo.


Êng a awm tawh lo a, amahin a bo. Thla a ni ti hnuhnawh dawn mah ila, Thla ên hun lai a ni lo.


Tin, khatianga hniamah Thla a awm thei lo. A thlawk thei lo bawk.


Chapal bun ka ni nen, ka inchhuihna ka kezungpui veilam chu, Tlangsam hmu remchangin a hnah nuai sawmin, thikhar phih thla lawkin ka bel a.


A thip na lutuk chu ṭhen sak sakin, ka rum chhuak ṭhelh a ni.


Chapal bun ṭha lehin hmatiam panin ka kal leh a. Chawlhni a nih avangin motor veivak a awm dawn lo.


Dang a ro hulh a, dang tihhnawnna turin chil takngial pawh ka nei tawh lo. Zun a chhuak sek a, zun chu a nia in mai te ka duh.


Heh a roin a khi tuarh bawk a, dang chang ni loin lei(tongue) thlengin a ro vek.


Ni a sâ ṭha em em mai bawk a, ka chau chu ka tlu leh ṭhuai. Inletin zangthalin ka mu a.


Ni sâ lutukin min ên mai chu(h), a rep rim ka nam vung vung. Alh thei mai turin ka awm.


"Ka, ka inpeih tawh e", ti supin mit ka chhing a.


Rethei reng renga hun hmangin, hmuhsit leh tihduhdah tuarin, rilṭam leh tui hâl, saruakin, ruang hlawmtu pawh nei loin ka thi dawn ta a nih hi!


Chutianga ka ngaihtuah laiin eng thawm emawni hi a lo ri a.


"He leian Saruak, rilṭama rumin awm mah ila, Lal Isua ka nei", ka ngaithla zel a.



"Rethei hnar ngai lo, hmangaiha pawmtu, chanhai rairah, a kiangah an lêng. Keipawh min hum ṭhin, ka kohna ri hriain, a ângchhungah vengin min muan fo".


Tu nge Lal Isua chu?


Saruak leh rilṭama rumte tan a awm ṭhin tihna em ni? Silhfen pein ei tur a pe ṭhin tihna em ni?


Lal Isua a neih avangin saruak leh rilṭama a rum lai pawhin a lawm zawk tihna maw?


Rethei te leh chanhai te leh rairah te paawh a kuangkuah ṭhin tihna a ni a. Kei ang hi min kuangkuah ve duh ang em?


Falak angte hi a kuangkuah ve duh ang em le?



Thinlungmawlpa
Chapter-10
Ziaktu: Cck Lalchhuanawmi


Falak angte hi a kuangkuah ve duh ang em le?


A kotu apiang chhângin a hum ṭhin tihna em ni?


Eng nge ni Hmangaihna chu?


Tu pawh hmangaihtakin a pawm duh tak tak em? Kei hi hmangaihtakin min pawm ve duh ang em?


Lal Isua neih ve ka duh, a bulah ka kal duh. Khawiah nge a awm?


Thei leh thei loa inbengkangin, ka tho chhuak a.


Chu ri lo chhuahna lam chu pai chharh chharhin ka pan a. Ka hmatiamah zel a ni.


Chiang lo ruaiin Car hi ka hmu a, a chhia a ni anga, an siam a nih ka ring. Chawlhni a ni a, khawiah kal tur nge an nih ang?


Car hma hi lo hawngin a lo siam mial mial, a kawr hak nghawng a var a.


"Ka pu", a hmaah ka ṭhingṭhi thla hnawk nghal. Ka khûp a nat leh nat loh lam ka hre tawh lo.


Lal Isua bula kal ka duh.


"Chhe hei! Vala, engtizia nge ni ta? Khawi aṭangin nge i lo kal? Min lo nghak lawk teh", kal sawn a tum chu a ke-ah vuanin, "Ka pu, min ṭanpui turin ka duh che",


"Vala, tui in tur ka lo lak ang che", a kal lui ta tho.


Ka ṭhingṭhit ngaiin ka la ṭhingṭhi reng, tui in tur min pe a. Tui ka in chiah chu ka harh kâwk.


Lui tui kang tawh hnua Tuihna thar insiam ang mai hian, chu tui chuan ka tui hâlna min tihreh sak chiang khawp mai.


"Vala, titeh, tho teh. Helamah hian i ṭhu phei teh ang", min kaihthawh a tum chu a kut ka vai sawn a.


"Ka pu, Lal Isua hi i hria em? Tu nge a nih? A bula kal ka duh a ni. A awmna i hre mial lo maw? Min hrilh theih chuan ka lawm ngawt ang. Lal Isua bulah ka kal duh. Lal Isua bulah min hruai rawh.


Heng hi, ka pawisa neih zawng zawng a nih hi, hei hian a awmna min hruai thleng thei ang em? Min hruai thleng thei ang tiraw? Lal Isua bulah ka kal duh. Min kuangkuah ve turin ka duh a ni. Hmangaihna nena min pawm ve turin ka duh. Amah ka duh, Lal Isua ka duh".


A hmaah pawisa dahin, a awmna min hrilh turin ka ngen a.



Lal Isua bula kal ka duhna chuan ka thinlung tikeh sawmin, insum hman lêk loin ka rum ṭuah ṭuah a.


Ka dara min kuahin, "Tlangval, Lal Isua hi i hre miah lo maw?",


"Hre lo, ka pu, Lal Isua bula kal ka duh. A awmna i hria ang tiraw? Khawngaihtakin min hrilh rawh, ka ngen tak meuh meuh che a ni".


Ka chanchin eng kim hrilhin, ngun takin min ngaihthlak sak a.


"Hla a ni em? Chu hla chu panin ka lo thleng a nih hi. Lungngai taka awm ka duh tawh lo. Hmuhsit leh tihduhdah tuarin, rethei takin ka awm a.


Lal Isuan min kuangkuah turin ka duh ve a ni. A bula awm ka duh. Chu chauh chu a ni ka duh. Ka pu, Lal Isua chauh ka duh".



Thil dang eng mah ka sawi lo, "Lal Isua bulah ka kal duh", tih chauh, chu thu lo chu sawi tur ka nei lo. A bula kal baka duh ka nei lo.


Khawi hmunah pawh lo awm se, ka pan ang. Pawisain min daih loh leh, ka intuak zel ang.


"Tlangval, kum sawm chuang Pastor ka ni tawh. Lal Isua hre lo hi an awm lo asin. Nang chauh hi i ni, Lal Isua hre lo leh, a awmna hre lo awm chhun chu. Lal Isua bulah i kal duh takzet amaw?",


"Ka pu, duh tehreng mai. Khawi hmunah pawh lo awm se, ka pan mai ang. Hei hian a awmna hmun min thlen thei ang em?", ka pawisa neih chhun ka hmuh a.


Min kaithoin, "Car chhungah i lut teh ang. Lal Isua awmna dik tak ka hrilh ang che. I hriat hunah chuan mak i tiin, pawisa tel loa a awmna hmun a thlen theihzia i hriat phei chuan mak tih luatah i khawng ṭhelh ang".


Bag-ah pawisa min khung tir leh vekin, Car hnung lamah kan ṭhu lut tur chu, "Ngawi teh, Car ngheng hian i ṭhu zawk teh ang".


Car nghengin kan ṭhu a, inhmatawnin kan ṭhu.


A savun ipte aṭangin Lehkhabu pakhat hi a phawrh a, "Tlangval, he Lehkhabu hi i hmu tawh em?",


"Ka la hmu hauh lo",


"A hming pawh i la hre lo ngei ang. Hei hi, Pathian Lehkhabu Thianghlim a nih hi. Hetah hian, Lal Isua chanchin leh a awmna a inziak a ni. He Lehkhabua thu awmte hi a nung a, thiltithei tak a ni bawk.


Khandaih hriam tak ai pawha hriam zawk a ni a. Thlamuanna a pe che anga, i khawharna a thaibo bawk ang. Lal Isua chanchin ka han sawi ang e aw".



Lehkhabu chu a keu a, "Johana Bung thum, chang sawmparuk-Pathianin khawvel a hmangaih em em a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zawk nan".


"Pathian chu, he kan chênna khawvel siamtu hi a ni a. A chhunga awm zawng zawng te, khawvel piaha ami te pawh a siam vek a ni.


Hmangaihtakin khawvel hi a siam a, keini mihringte, a thilsiam zinga ropui leh chungnung ber, a anpuia min siamte hian phatsanin, a ângchhung aṭangin kan tlanbo a.


In aṭangin kan tlanbo tihna a nih chu.


Hmun hrang hrangah kan kal a, nimahsela; kan Pathian in aia nuam leh thlamuanna kan hmu si lo.


Chuti chung chuan mahni nuam tihna lam lamah kan kal a. A tawpah chuan, Pathianin misual chauh awmna tura a siam Meidila awm tur khawpin kan lo sual ta a ni.



Chu chu a hre reng a, lungngaiin kan tan a mittui a far a.


Keinin Meidil kawng kan pan zel si.


Vanramah intawh khawmna neiin, Pathian leh a ṭhian Vantirhkoh rual te nen, Meidil aia Pathian leh a ṭhian Vantirhkoh rualte awmna hmun Vanramah, kan Thlarau a kal theih nen, Pathianin min Chhandamtu tur a zawng a.


Tu mah he khawvela lo kal ngam leh, thisen chhuaka min Chhandam ngamtu tur an awm lo.


Chumi avangin amah ngei kan Pathian chu fapaa changin, Nula Thianghlim, pasal nei mai tawh tur. Taksa thianghlim leh Thinlung thianghlim pu mi Mari chhûl hawhin, he khawvelah dang ang thlapin a lo piang chhuak ta a ni.



Mari pasal hual chu Josefa niin, Thing Mistiri a ni a. Ani pawh Thlarau Thianghlimin Mari chu neih hlau lo tura a hriattir thlap avangin nupuiah Mari a nei ta a.


An inneih hnuah Mari pawh chuan nautê a hring. Chu nautê lo piang hming chu Isu-a a ni ta a ni!


Pathian tlanbosan tam tak zingah pawh, a lamṭang, Josefa leh Mari te ang an kat nuk ve tho.


Pathian tum ber chu, kan zavaia kan thih hnua kan Thlarau, Vanrama a kal a duh ber a ni. A bulah, Chatuana kan awm theih nan.


Kum za tam liam taa thleng kha a ni. Isua chu lo ṭhang lian zelin Baptisma a chang a. Chhandam kan nihna tur hril ṭanin, Johana bung sawmpali, chang ruk- Keimah hi kawng leh thutak leh nunna ka ni; keimaha kal lo chu tu mah Pa hnenah an thleng ngai lo ang.


Nimahsela, Isua chu Pathian fapa a ni tih leh, min Chhandam tura lo kal a ni tih ring duh loin, Pathian hming sawichhiaa puhin an man a.


Khang hun laia inhremna zahthlak leh hrehawm ber, Kross-ah an khengbet ta a ni.


Kross-ah chuan saruakin an khengbet a, an khup ruh vaw tliakin, Mupui ho an lu chung an vir vat vat ṭhin. Kross-a khenbeh te ho an thih veleha an taksa an ei theih nan.


Nimahsela, Lal Isua, Pathian fapa chu thisen chhuakin thi mah sela, ni thum ni-ah, Chhandamna famkim leh pumhlum kan chan theih nan, thlana an zalh tawh kha a lo tho leh ta a ni.


A kutphahah an khenbehna, perek an kilhna ser awmin, a ke an khenbehna, perek an kilhna ser a awm bawk. A nâk feia an chhuna ser pawh a awm.


Chutichuan, thia tho leh Lal Isua chuan Vanrama kan awm theihna turin min Chhandamna kawng chu a sial zo ta.


Amah, Lal Isua leh min Chhandamna thu ring apiang chu Chhandamin kan awm a. Kan thlarau Vanramah Isuan min hruai tawh dawn a ni.


Tunah hian Vanramah awm tawhin, min thlir reng a ni. Lal Isua chu Vanramah a awm. A Thlarau hmun tinah a awm a, tunah pawh hian, kan bulah a awm.


Lal Isua bula kan kal duh chuan min Chhandamna thu rin hi a ni. Pawisa a ngai lo. Eng lai pawhin i bulah a awm a, i be thei reng. I ko thei reng. A thlamuanna tawpin tai nei loin a kuangkuah reng ṭhin che", a ti chu, zanah min hruaitu êng bial hre chhuak zawkin, Pastor chu ka hrilh a.


"I bulah a awm reng a, nang erawh chuan i zawng a. Hmun hla takah a awm emaw tiin, zawn i tum a. I bulah awmin a hruai che a ni a.


Rom bung riat, chang sawmhnihpariat-Tin, Pathian hmangaihtu, ama ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria.


I chunga thil thlengte avangin Pathian i dem em? Demawm reng pawh a ni ang.


Amaherawhchu, heti hian ngaihtuah ang. Khang kha tawng ta lo la, tuar ta lo la, tunah hian eng dinhmun nge i thlen chin hi ni ta ang le?".


Ka thlen chin maw ni ang?


Ngawi rengin hnuai lam ka bih a. Khang kha tawngin tuar ta lo ila, tuna ka dinhmun tur hi maw?


Pastor enin, "Nu leh pa karah seilianin ṭhian pawh ka nei ang. Lungin min vawm lo anga, min vaw(vua) lo anga, chhiahhlawhin ka awm lo bawk ang. Tihian, in aṭanga tlanbo ka ngai lo mai tur", ka inhum ruh nghek.


Thinrim ka han tum a, ka inhumruh te pawh chu inthlahdulin, ka nuih a za ta tlat.


Nuihza takin, "Lal Isua chu tunah, ka bulah hian a awm em?", Pastor chuan, "Awm tehreng e, nizanah êng hmangin a hruai che kha. Bûkah a chawlh hahdam tir bawk che a", ka darah a bêng thak thak a.


Ka nuihza hmel a hmuh takah chuan, a hlauhthawnna a lang ṭan.


A tira ka awmdan leh tuna ka awmdan chu inthlau tawh tak a ni. Lal Isua chuan min hmuin, ka bulah a awm reng a nih ngai chuan, hei leh chen hrehawm taka ka awm a ṭulna eng nge ni ta?


"Ngawi teh, tlangval, i hmel a inthlak tlat. Lal Isua pan duhna i nei ta lo mai ka ti",


"Pan duhna ka nei tawh lo, ka nuih a za zawk e a. Mihring pawh ni hlei lo, engtin nge min lo kuangkuah ang", ka ti riap a.


Pastor chuan, "Ni love, chutiangin an ti ngai lo. Kha thu kha sawi mah la, i thinlunga khawharna leh Lal Isua pan i duhna a danglam chuang lo tih kan hriat dun hi", min hre chiang lutuk chu ka haw(hua) zawk.


A sawi dik chiah, Lal Isua pan ka duhna chuan min la hneh a. Mahsela, ka chapo nain min uai thlu hneh mah mah a ni.


Kross-a khenbeh a nih hnua a thi a, Thlan aṭanga a thawh leh thu te chu mak ka tiin, awih loh hial ka duh a.


Pastor meuh chuan dâwt min hrilh a rinawm si loh.


"Pastor ka ni i ti a, chu chu eng nge a awmzia?", a lawm zawk emaw tih turin a hmel hmuh a nuam a, a âw a dam thlup bawk.


"Pastor chu Pathian Rawngbawltu, Kohhran mipuite enkawltu tihna a ni", Kohhran nihphung leh, Kohhran awmzia leh din chhan te, a Lehkhabu dum tliang hmar keu pah zel leh chhiar chhuak chung zelin min hrilh a.


"Engvangin nge Pathian chuan Khawvel a siam reng reng? Mihring pawh chu atan siam a ṭulna a awm em ni? Kan phatsan a, min Chhandam tura a lo kal a ngai leh tho si a. Hlep a va awm awm lo ve. Lal Isua chu a mawl hle a nih dawn chu, Khawvel chauh siamin mihring te hi siam lo mai sela, keini pawh kan piang lo anga, atan leh kan tan a ṭha mai tur", Pastor chuan thinrim hmel min hmuh tawh ka ring a ni a.



Chutiang a ni awkawnglo, zaidam leh ngilnei tak hmel min hmuh a. Hrethiam takin min en a.


"Tlangval, tuna i thinlung put ang tho kha ka lo pu tawh ṭhin. Lal Isua hian dawhtheih chin a nei tih hi lo hre phawt teh.


Amah kan pan hi a duh ber a, chumi kawng atan khawdur mai bakah, ṭek leh kawlphe te hi a hmang hreh hauh lo.


Keipawhin ka tlanchhiat san char char a, min hmangaihna a thûk em avangin amah ka pan theih nan a hnuhin min hnuk asin. Chutiang chu a ni.


Lo ngaithla leh rawh aw, Isaia bung sawmngapathum, chang nga leh chang ruk- Nimahsela, ani chu kan bawhchhiatna te avangin hliamin a awm a, kan khawlohnate avangin vuak thitlinin a awm a; kan thlamuanna tura thununna chu a chungah a tla ta a, a vuakna vualtea tihdamin kan awm ta. Kan za hian berâm angin kan vâk bo va; mahni kawng kawngah kan pêng ṭheuh va; Lalpa chuan ani chungah chuan kan zaa khawlohna chu a nghat ta a.


Tlangval, Lal Isua hming leh chanchin hre loa seilian i ni a. Ka hriatthiampui lutuk che.


Kei, Lal Isua hming leh chanchin min hrilh chunga seilian pawh hian, "Pathian Engkim Titheia hian ka chungah thu a nei lo", tia inhrosaa, mahni duh dana lo tal hrep tawh ka ni.


Lal Isuan khawdur, OD hmanga min kohna chhâng duh loa rei tak ka awm hnuah, ka nu boralna hmangin min han hnuk mai a nih kha.


Ka nu boral ngai lo turin thuawih takin lo awm hle hle ila ṭha tur a ni a.


Chutiang chu a ni e, Tlangval. Hmuhsit leh vuak tuarah i inngai tiraw? A dik e, i tuar ngei alawm.


Mahse, Lal Isuan a lo tuar daih tawh. Hmuhsit leh vuak chu sawi loh, chil an chhak khum a. Mualpho leh zahthlak tawpthangin saruakin Kross-ah an khengbet a nih kha.


An khengbet dawn tih hre rengin Khawvelah a lo kal a. Nang ni ta la, i ngam ve ang em?


Tu mahin kan ngam lo. Kei ngei pawh hian.


Kan aiawhin vuak a tuar a, hmuhsit a tuar a. Chil an chhak khum a. Saruakin a awm a, mualphona a tuarin zak takin a awm bawk.


Chung chu keimahni vang vek a ni.


Pathian ve meuh si, Vanramah awm hle hle sela, atan pawhin a ṭha mai tur. Hlep a awm miah lo.


Nimahsela,,min hmangaihna hi a thûk em a ni e. Tuna kan tuar te hi chu, Lal Isua tuarna chanve chu sawi loh, a nê kan ek pha lo zawk.


Tunah chuan i hre ta. Lal Isua i hre tawh a, a awmna hmun nen lam. Pan turin pawisa a ngai lo.


I thinlung i hawn phawt chuan khawiah pawh awm la, i bulah a awm reng tih i hriat tawh kha.


Ṭawngṭaia Lal Isua hnenah intukluh a ni tawh mai. In in aṭangin chhuak lo la, nang leh kei hi kan inhmu kher dawn em ni?


Lal Isua chanchin i hre lo kumkhua dawn a ni a. Ama ruat anga a kohvate tan hian fel takin rem min ruatsakin min thawhsak a nih hi.


Kan hmaa khua saw ka Bial chhunga mi a ni a, tukinah thu ka sawi dawn nghe nghe. Thlen hmain ka motor a chhia a, a chhe lo ang tih ka hlau ta khawp mai.


Lawmthu sawina hun i hmang teh ang".


Mit chhing turin min ti a. Luhlul chhuahin ka chhing duh ṭhak lo.


Lawmthu a sawi tak taka!


Ka en ṭhin a, a thla a muang a, hlauhna a nei eih lo. A motor a chhiat avangin lawmthu a sawi a.


Chhe lo se, kan inhmu thei dawn lo a ni a. Kei pawh, ni sâ hnuaiah khan ka thi hlawm let reng tawh mai thei a ni.


Chu Pastor chu a êng chhuak vek, ṭhingṭhia ṭawngṭai a ni a. A hnunah, tu emaw, tu emaw tih tur a ni lo.


Mahse, a ruangam chu mihring a ni bawk si. Sava angin a hnungah thla a nei. Pahnih a la nei zui.


Pastor hnungah a ding a, a kut pahnih a phar chhuak a. Lungawi takin Pastor chu a melh a.


A lo hawi chhuak, min lo melh ve erawh chuan lungngai hmel hi a pu bik a. Pastor ṭawngṭai zo, "Amen", a sawi zawh rualin, nizana êng bial ka hmuh ang chiahah changin a ral ta daih!


Van lamah a thlawk chho zawk mawni?


Pastor chuan, "Tlangval, ka sawi angin khawi hmunah pawh, engtik hunah pawh Lal Isua i koin i be thei a, i pan thei reng bawk a nia aw".


Chhang min pek ka ei a, tui nen chauh pawhin ka puar pui.


Motor chhiatna chu a lo ho khawp mai, a ke hmalamah vawihnih ka chhir a, a nung daih! A chhia pawh a ang lo.


"A va mak ve", motor tinungin Pastor chu a chek hlak a.


"A va mak ve!", Pastor chuan a ti leh ṭhin.


Inkhawm dar a ri ṭan chiah tihin kan thleng a, "Lo inkhawm ve ta che",


"Ka lawm e", ti sakin, inkhawm ka tum lohzia a hria.


Intifaia mu hahdam turin in pakhatah min awm tir a.


Eng thu nge a va sawi dawn?




Thinlungmawlpa
Chapter-11
Ziaktu: Cck Lalchhuanawmi


Eng thu nge a va sawi dawn?


Pastor Quarter-ah min hruai a, Pathian thu phei chu min hrilhin min sawipui hauh lo.


Mak ka ti angreng lutuk a, mahse; min hrilh leh sawipui ka ngai lo.


Lal Isuan a chenchilh tih a chezia leh nungchangah khan a lang. A hmuh theih.


A ṭawng kam a damin, ngilnei leh zaidam takin tu te pawh a bia a. Rui thle mai mai ho pawhin an fiam bawh bawrh thei.


A nupui leh fate pawhin an zah a.


Kha Pastor-ah khan Lal Isua a hmuh theih!


Kar khat chuang ka awm pawhin a hranpa takin Lal Isua chanchin min hrilh leh tawh lo.


Ziak leh chhiar ka thiam lo tih an hriatin Pastor nupui leh a faten min zirtir a. Anni pawh, Lal Isua ang chiah.


An fate zawkin an thiam ang angin Lal Isua chanchin min hrilh zawk ṭhin.


Pastor leh a chhungkua ka en a. Lungchhiatnain ka khat. An chhungkaw awmdan chu ka duhthusam chiah a ni.


Min ngaihsakin min duat viau mah se, mahni insitin leh, an zinga tel tlak loah ka inngai a. Ka inkiltawih nasa hle bawk.


Thla khat chuang min chelh hnuah ka lo thleng ta a ni".


"Bawihi, Lal Isua hi sual ka ti khawp mai. Ka hua a ni. A bula kal ka duh lo. Tunah chuan khawiah pawh kalin awm mah ila, rualawt reng rengin ka awm tawh.


Mahni ṭha intih tawk lohna leh induhkhawp lohnain ka khat a. Miin hmusit taka min kawh lai te, lunga min vawm lai te, min vuak lai te leh pawna chaw ka ei lai te pawhin ka bulah a lo awm reng ṭhin chu a nia.


Engtin nge a theih zawk?


Kross-a an khenbeha min Chhandam avangin a intithei lutuk. Ka hming pawh hi thlak ka duh.


Kross-a nih ka duh tawh lo. Krossthumawia nih ka duh tawh lo", naupang nuar ang maiin a insawh tau a.


A hming thlak a duh thu te a sawi a, Lal Isua sualte a ti. Naupang ang mai. Naupang thinlung ang mai a pu a ni.


Engtin nge, chung a thu min hrilh te chu ka rah hnum sak tak ang le?


Kei pawh, heti pui hi ka ni a.


Lal Isua leh a chanchin a lo hre ngai lo chuan min ṭhawngin, ngaihtuahna chang ka lo hre ngai lo te chu, â ka inti lutuk.


Bathlarah kan ṭhu a, ka kut a hmer leh salh ṭhin a. Ka en a, Kross-an min hipna a zual tual tual.


Ka mal chungah lo bawk thlain, "Bawihi, thinlung hi paih bo theih se", a chhangchhiat theih ngai e.


A naupang thinlung hi paih boin, puitling thinlung pu zawk sela mawle.


"I paih bo daih te chuan, khawiah nge ka awm ang?",


"A ni bawk si", chu a ti ang lawi a.


"Kross-a, pindanah lutin mu ta che",


"Kha hming kha ka hua, min ko tawh suh", ka nuih rah rah.


Runluih nan tiin, "Kross-ah Lal Isua khengbetin a thih phah a, kei pawh chutiang chiahin, Kross-a ah ka inkhengbet tawh a, ka la thih phah ngei ang", ka mal a piai vek.


"A na lutuk", ka nuih rah rah. A inlukhup a. A rum nghut.


"Bawihi, min hua em? Ṭanpui ngaiin ka awm a, mi chak lo tak ka ni. Ka zak khawp mai", a bân a uai thla hnuang a, a leh(let) thlak tawp loh nan ka pawm bet ṭang ṭang.


A rit tham si, ka mal chunga a bawk tlat bawk si nen, a lû te hi a rit lutuk mai.


"Kross-a, mut hahdam i mamawh. Tho la, mu turin pindanah ka hruai ang che",


"Tihian ka mu duh", thatchhe zet hian a ti a. Ka hre thei chang chang.


A hnungah ka kiu nghatin, ka bek ka dawm a, "Chuti chu, i peih chen chen mu rawh. Hritlang i kai ang tih ka hlau em a", min ngaithla pawhin a lang lo.


"Bawihi, ka inkhawngaih. Chuvang chuan min khawngaih suh aw. Nang chuan min khawngaih suh. Khawngaih thla la taka min en hian ka tuar zo lo", va han buaithlak ṭhin tak em!


"Bawihi, tinge min chhân loh?",


"Ka ngai che ti pawp mai la min ko reng loin", a rum leh nghut. A la na deuh a ni ang e.


A ngawih leh vang vang hnuah, "Bawihi, sual min ti em?",


"Sual ka tih chhan tur che han sawi la?",


"Zawhna min zawt let daih alawm", a titau mawni, a inlukhup leh daih.


A vawt si a, hritlang a kai ang tih hlauhawm. In chhung luma luh(lut) a tum lo hmel bawk sia.


"Kross-a, a vawt e. Lut ang",


"Bawihi, nuam ka ti lo. Ka dinhmun hi a laklawh", a darah vuanin ka kaitho. A ṭang lem lo a, ka kaitho thei mai.


A pang ka dek a, "Mu lum rawh, hritlangin a man tak tak hma chein", min hnial tawh lo.


Nutêi te an mu fel diam tawh. Zanin chu a pangchangin, a lungawi hmel lutuk a.


Duat ka châk tehreng nen, a rem teh ṭeuh si lo a. A awmdanin a zir bawk si, ka chum pawp pawp dawn mawni?


"Bawihi, ka bulah mu ve rawh", ka hnung aṭangin ka kâwngah min pawm a. Mut chu hnai lo teh e maw.


Inherin, "I kut vuanin ka mu ringawt ang, a nih loh leh, khumah mu la kei chhuatah", mi pawm bet nasa mai sia.


"Min ring lo em ni?", ta deuh deuh chuan.


"Kawr ha vekin ka mu dawn alawm", ka sik hlak.


Nutêi khan, "Chaw kan ei kha a hnuk a ulh deuhin ka hria. Pawnah chaw a ei ṭhin i ti tiraw kha? Chumi vang pawh a ni mai thei a ni. Naktukah chaw lo ei pui la tiraw?", a ti kha a ni a.


Ka pa hnenah nutêi te ina ka riah tur thu ka hrilh vek tawh.


"Bawihi, a nih loh chuan tharum ka hmang dawn nia", a ti chu ka melh Sakhi rap.


Mi han nuih khanglang zui a, "Ka hman duh i ring mawni le?",


"Chhuatah chuan i mu ngam chiah maw?", rang lutukin chhuatah a bawk a, "Ngam tehreng e, mahse,,a vawt", vawikhat na na na chhir zawt ka châk lutuk.


Mahse, ka chhir miah lo ang. Duat taka enkawl a phu.


"Lo mu rawh, i muthilh vat loh chuan ka tho daih ang", sawi nawn ngai loin khumah a per kai nalh.


Fel takin a inti mu reuh a, ka bêng châk lutuk.


Min kuah chunga thaw sât sâtin, a changin a phu leh zuk ṭhin.


Ka ngaihtuah a, ka nuih a za. Hah thikulin, rilṭam leh tui hâlin, Lal Isua beiseiin, Pastor pakhat nen an intawk hlauh.


A beisei ber Lal Isuan a nuih a tiza leh bawk si.


Eng Thlarauin nge luhchilh ang aw?


Kha leh chen hrehawm a lo tuar tawh a, a tawk tawh lutuk. Thlamuang takin awm tawh sela, zalên thei ang berin.


Mi zalên a ni tawh a, a duh ang takin a hun hmang tawh rawh se.


Sual tih nana a hmang dawn a nih erawh chuan, ka phuar hlawm ang, ka khai zai ang.


Duat takin ka chul a, Krossthumawia hian Kross chanchin a lo hre ngai lo hi ka dem lo.


Kross, thingkawkalh maiin mihring pakhat ve mai Kross-a nun hi a la thlak danglam sak ngei ang.


Tun apangin danglam chu a awm alawm. A la hrethiam chho mai ang, hrethiam chho zel tura pui turin ka awm dawn a. Ka thlah hauh lo ang.


He Kross hi ka vuan tlat zel ang!


Show post links
Top

[Ngaia]

Thinlungmawlpa
Chapter-12
Ziaktu: Cck Lalchhuanawmi


He Kross hi ka vuan tlat zel ang!


Ka patêa nen in luah tur kan zawng a, "Kan bulah awm reng se nimai alawm", a ti ṭhin a.


Kross-an a duh tlat loh avangin, "Ka nu bul hnaia awm a duh si lo alawm, a chunga a thil lo tih tawh vangte a ni fahmiang, kan hriatthiam mai a ngai a ni", tiin ka sawi hnum ṭhin a.


A nihna takah, Kross-a a inthlahrung thei lutuk a, chaw a ei ngam ṭawk zel a ni a.


Ka nu chu chhuanlam ve mai a ni. Ka nu bul hnaia awm a duh lo reng bawk a.


Kross-an in a chhuahsan tawh thu ka nuin a hre vat tawh ang. A awmna erawh an hriat ka ring lo thung.


Ka nuin Kross-a nen kan inkar, pitêi ten an hrilh thu Kross-an a sawi a. Ka nu hian engtin emaw takin min ti leh ngei ang.


"Bawihi, Krismas leh Kum Thar chu kan bulah awm se, Kum Thar zawhah a tharin kan zawng mai dawn alawm. Krismas thlen nan ni thum chauh a awm tawh a, a vâng em mai", patêa chu hnial ka hreh ngang mai.


"Patê, vawiin zawng ila, i thu angin Kum Thar zawhah kan zawng ṭha leh mai dawn nia", ka ti ta a.


Patêa nen kan zawng leh ngat ngat.


Bazar a tâwt ṭan tawh a, chutih laia in luah tur lo zawn. Kan hmuh ngei ngei theih nan rilru Ṭawngṭaina chhum lo chat lovin ka nei.


Patêa lakah inthlahrung viau mah ila, min ṭanpui tura ka ngen ngam awm chhun a ni rih si a.


Zawng ta na na na chuan, pakhat chu kan hmu ta hlauh. A hnuai ber niin, a tê angreng.


A neitupa sawi danin, "Nupa rek luah tura kan siam mai mai a nia. Siam phei chu a tumin kan tum tawh lo hrim hrim. Kan fapain siam ve reng reng ang u a tih takah, nupa rek chauh luah theih turin kan siam ta mai a nih hi", a ti zung zung a.


Keini nge a neitupa hi hmanhmawh pawh ka hre lo.


Patêa nen inenin kan nui dun ver ver a, Kross-a awmna tur kan hmu ta!


Tui leh êng a awm ṭha a, bual in hlei a ṭha.


Kan haw ta a, Nanaua leh Tetea ten Kross-a an zirlai an lo chhiarpui.


Kross-a pui reuh pawh a thutak mai sia, thiam tum tak takin a chhiarin ka hria. Pastor-te hnena a awmlaia thiam a nih tawh avangin hma a sawn zual.


Min hmuh ve leh min lo pan a tum, a mawng a kân deuh, patêa a hmuh leh tak si-ah a ṭhu ṭha a.


"In lo haw tawh maw?", kei mah zawk a bulah ṭhu thlain, a rukin ka kut a vuan vat .


Patêan, "Naktukah Bawihi nen va en ṭha rawh u aw, keini chuan ṭha kan ti mai a. I lungdum zân a nih ve leh ve loh Bawihi nen va en ṭha leh rawh u", a lo ti thuai a.


"Ka lawm e. Ka tibuai nasa hle mai che u", a kut a khûr nasa lutuk.


Lainatawm ṭhin hian!


Ka mitmengin hahdam turin ka hrilh a, a hmel landan pawh a ziaawm ta deuh.


"Bawihi, haw lo la",


"Zanah ka lo kal ang, ka lênpui ang che", ka lut laksawn ka tum a, a vuan tlat.


A lamah min pawt hnai a, ka kal a duh lohzia a mitmeng aṭangin ka hre thei. Theih nise, kal loh ania ka duh.


Chutiang ngawt a theih si lo.


"Naktuk aṭangin hmun dangah min awmsan tawh dawn si a, kan inhmu khât dawn mang e",


"Haw lo la", Nanaua thil ngen ang chiah a ni.



Rei fe inthlêm hnuah ka haw thei chauh.


Kawngkhar hawn hmain ka thaw hap a, ka nu hmachhawn hi ngaiah ka la nei thei lo.


Thlamuang leh him taka ka awmna ṭhin, ka in chhung ngei pawh, indona mualah a chang zo ta!


Lêng tura insiamin, "U, min lo hruai ve", Jerome-a chuan min melh nô nasa mai.


"Inah lo awm zawk rawh, kan veng kâwnchei mai mai hi nia ka en dawn. Hmun hla takah ka kal dawn lo", min ring lo tih hriat lutukin a ding kâwisawi.


"Nanauan, tu emaw tê tê...",


"Lal Jerome", va kuahin a kâ ka hup, "Nanaua thusawi mai mai awih tlak a ni lo", ka ti sep a.


Ka kut la thlain, "Naupangin dâwt an sawi ngai lo", a la ti tak deuh deuh.


"Nanauan a sawi ve mai mai a nih kha", ka la ti hrâm.


Ner sawkin, "A u, i nalh lutuk. Tlanbo tum lo ula aw", rang takin a chhuak zui a. Min tizak chu ka sa pup pup.


Nanauan a sawi ka ring lo, Jerome-a hi chu fing ve tak a ni a. Tunlai nutêi te inah ka kal nasa a, a chhan zawn chhuah a tum leh ngei dawn.


A chhan a zawng chhuak ta nge nge alawm.


Pawna min lo nghak ka hmuh chuan, "Ngati nge in chhungah i lo awm loh, a vawt si", a tlanin ka tlan.


A khi suk a, "A lum ka ti kei chu", ngeiawm mai mai reuh lutuk.


"Nutê, kan lo haw har lo ang",


"Lo haw ngei ngei rawh u aw", nutêin a tih vah a. A sawi awmzia kan hriat vek avangin nui lo abar kan awm lo.


Kross-a pawh a kiai sak sak.


"Nakumah chauh lo haw kan tum asin", Kross-an a ti chu Nutêin, "Chumi in tum dawn tih ka hriat avangin lawm ka sawi", a ti ve leh a.


Kross-an, "Kan fin khalh thei dawn lo chein a lang tlat", a ti vei sak a.


Nutêi chu a nui ring berah ṭangin, Kross-a thusawi chuan a tilawmin, "Bawihi, tlanbo ang a tih pawhin lo hawpui lui tho ang che", nutêin min ti a.


"Lutuk, a duh loh chuan phuar hlawm chungin ka lo hawpui ang", Kross-a ngaihdan ni lo chu, ka nuih sen sen.


Patêan, "Kross-a bân puam leh i taksa a inchawih tâwk chauh chu a ni si a. Engtin nge maw i phuar hlawm theih ang le?", a ti chu, Kross-a a nui chhuak hawk.


Ka ke per chhakin, "Patê, min ngai tê em mai. Ka len ve zia hi, Kross-a koki thleng ka ni aw", min nuih uar sawr.


"Bawihi te chu, a nulen em hi. Nge maw, chutia in tih", min ṭanin Nutêi a ṭawng ve a. Kross-a nui ru pawh ka melh nô lo lutuk.


Kross-a bân puam aiin ka taksa a lian daih. A koki ka chen bawk a. Fiamthu mah nise, patêa chu a tiawmanglo em mai.



"Va lêng tawh rawh u, lo haw ngei ngei ula aw", nui tet tet chungin nutêin min thlah a.


Kross-a bânah vuanin, "I ṭhenawm tur teah nula an awm ṭeuh a, ka vil hman dawn si lo che nen, inkharkhip tlat ang che", ka heh hnuai ka pet a.


Ka dara min kuahin a kâwngah ka pawm tawh a, "Nakumah chauh haw ang hmiang", ka bu nghauh nghauh.


"Hotupa berin i tih tlat chuan, kan haw anga a ni mai lawm", en chho vahin ka ti lang lang a.


Kalkawnga thu inziak hrang hrangte chu intithei takin a chhiar zel a. English erawh a la chhiar thiam lo.


Hei hi chu, keimahin ka zirtir ang.


Mizo ṭawng erawh a chhiar thiam tawh mah mah a ni. Intithei takin a chhiar nghauh nghauh zel a.


Ninawma lak ai chuan, ngaihnawm ka ti.


Kâwnchei chu a vawikhat hmuhna a nih thu leh, Krismas hun laia a bazar ngai loh thu a sawi a.


Ngun takin ka lo ngaithla.


Tunah tak hi chuan ngaithlatu a ni a mamawh.


"Duati a lo haw a, a awm loh laia min tihrehawm tawh tehlul nen, amah hlei hlei khan min tihreawm. A chang chuan ben fawk a nia ka duh ṭhin. Bawihi, mak ka ti, engmah ti loa ka awm thei ṭhin kha, tun hnu hian mak ka ti. Ramah ka kal daih zel a, ka thawpikna te kha an kiang duak zel", kal pahin min hrilh zel a.


"Mambawihi te kha, ramhuai tê chi ang mai. Bawihi, keimah hi ka dik lo tihna em ni?",


"Ni love, anmahni an dik lo zawk. Hreawm taka i awmna hmun aṭangin i lo chhuak tawh a, kha hunah khan kir tawh loin, hmatiam chauh thlir rawh", ka thiam dan zawng zawngin ka fuih.


Ka zeilo thei si, ṭawnghmang ka thiam lo hi chu, a buaithlak a ni.


"Ei tur te lei ila",


"Ka leisak ang che, leina tur ka nei", nui seihin ka bu zeuh.


Ar bawp hem hmin pahnih leiin, kâwncheia Vantirhkoh lem an siam, an tihên hnuaiah ṭhuin kan ei a.


"I pawisa khawl an lak sak tawh lo che em ni?",


"Hmun ṭha deuhah ka dah tawh a", a kiai sak a. "Khawiah maw?",


"Bawng ek hnuaiah ka dah a", ka sa ei ka hâk.


Ka hnung a chum dat dat a, "I ten em ni?",


"Ten lo e, ka rin loh lam daih i sawi a", ka khuh kharh kharh.


Kiai leh sakin, "A himna hmun ber a ni si a. Mahse maw, Bawihi, ka inhlawhna i hriat chuan min hau duh ngei ang", ngaihngam lo zeta min melhin, "Zu chhuannaah ka inhlawh ṭhin, inhlawhna tur ka hmuh chhun a ni si a", ka kut a rawn tawk a.


"Inhlawhna ka nei tih an hriatin chan nei map lovin min laksak zel nen. An hriat hauh loa ngaihngam taka ka inhlawh theihna a nih bakah", chawl datin a kun deuh a.


"Inhlawhna pangngai tak ka hmu thei lo", a thinlung hliam aṭangin min en tih hai theih a ni lo.


"Min hau dawn em?", ka lu ka thing a, "Zu chhuannaah i inhlawh tawh dawn lo tih ka hria a, a dik em?",


"Um, a dik. Sa kha i ei ten sawt em?", ka nui hak, "Zanin chu ka ei kâwt dawn khawp che",


"Kei chu min ei suh aw", min hlauh hmel takin a ṭhen sak a. A hnungah ka chum ri pawp nghal.


Khi suk suk chungin min kai tho a, hmatiamah inkai rialin kan kal zel.


A changin ei tur leiin kan ding a. A changin kâwnchei êng hnuaiah dingin kan hawi leh hû hû zel bawk.


"I duh duh sawi rawh, ka lo ngaithla zel ang",


"Bawihi, sawi sen pawh a ni lo. Ngawih bopui hi a ṭha mai zawk e. Ngaihthlak ngam loh tur khawpa sawi chhuah rem lo a tam lutuk", ka sam a hui ṭha a.


A kut la kânga ka heh nghat zauhin, "Ngaithla tur chein i bulah ka awm reng ang. Ka Kross vawn(vuan) hi thlah mai mai ka tum lo",


"Bawihi, i kuang lo i nawr palh ange aw", a lungnilo hmel chuan ka nuih a tiza lutuk.


Nuih ar arin a kâwngah ka pawm a, "Krossthumawia tih hi i hming a ni chiah maw? Lal Isua chuan engtiang chiahin nge i nuih a tihzat? Min han hrilh teh. Lal Isua thihna Kross nge, tuna ka pâwm mek Kross hi nghet zawk ang le?", chu ka thusawi chuan a run ngang mai.


"Bawihi, i mi han tih dan chu", engtin mah min ti ngam si lo. Ka lu chungah a kut a nghat a.


Kei lahin ka nuih ver ver mai si a, "Krismas pawh hi Lal Isua pian cham a ni asin", a hawisawn a.


"Fimkhur rawh aw", ka heh hnuai a tuai a, "Hei hian a tuar mai ang", inlakhran ka tum a, ka nghawngah mi kuah bet tlat.


"Sawi leh la, sawi tur i ngahin ka hria", mi tiel zetin a ti a.


Ka heh a pet ngam dawn lo tih ka hria, heti zozai mipui awm khawm zingah, a ngam dawn lo nasa lutuk.


Nuih sêihin, "Lal Isua pian cham-", ka ti chiah chu, ka heh a pet!


A rei chuang lo nain min tibo, ka bo chiang lutuk.


Barakhaih hlim ang maiin, ni lo; min barakhaih chiang mah mah a ni.


Zau tâwk tâwkin ka meng.


"Sawi zawh i duh em?", mi la ti ang ta zui a.


Ka heh khawihin, "I, i, nang hi?",


"A tuar ang ka tih kha", ka nghawngah min kuahin min kalpui a. Ka kut chu a hnunglam aṭangin a kâwng min pawm tir.


A ngam ka rin loh nen, "Bawihi, i sen awp awp a nia", ka kun ngur.


"Khatianga chet kha a ngai em ni? Ka zak em mai",


"Ka insum zo lo a ni", min dinpuiin, amah hmuh theih turin ka khabe a dawm kâng a, "Ṭhuai hmiah hmiah mai che hi ni ka duh", ngawi rengin ka en a.


Chutah, min nuih ta nghek nghek. Ka nghawngah bawk min kuahin min kalpui leh.



Engtin nge ka awm dawn?


Ka hrethiam lo, ṭawngna hun ka nei lo reng reng nia.


"Ding teh, Kross-a, ding teh", a ding a.


"Min kalpui hmiah hmiah a, eng mah ka sawi hman lo", ka nghawngah bawk min kuah, "Engmah sawi loin ngawi rengin awm rawh, i duhawmzia hi i hria em?", min kuah nghet lutuk a, ka thaw ṭha thei lo lek lek.


A lawmna a ni tlat lawi a, ngawi reng chuan ka awm ta hle hle.


Naktuk aṭangin hmun dangah a awm tawh dawn a, "Kross-a, ur lawk zanah lo phei rawh aw", min en chhuk run a.


Ka mittui luang hruhulin, "Ka lo phei fo ang, i hlatah ka awm thei lo tih i hriat kha".


Sawmpahnih rik hmain in kan thleng a, nutêi te inah ka riak leh dawn a nih hmel.


Pindan ka chhuahsan hmain min kherh thluin, ka nghawngah min kuah a, min kuah lohna lama ka bek dawmin, kei pawhin a âwma ka kut nghatin, kan lei an inbuan.


Ka harh a, Kross-a pawh a harh. Kan inthlah hlei thei lo a ni ber.


Kham lo zetin kan inthlah a, "Bawihi", a kut ka bek aṭanga sawn thlaa ka âwm khawih a tum chu ka man.


"Bawihi, hlau suh, engtin mah ka ti lo ang che",


"Ka hria alawm. Mahse, kan inthlakhlelh lai taka kan tawp san hian a ṭhat ka ring. A nih loh chuan, nakina min iaina tur kan ti palh ang tih ka hlau zawk a ni. Keiin dang tur chein chakna ka nei dawn si lo", lungawi hmel tak hian min en a.


(Zin chauh chu, duh angin a chet theih loh, naktuk atangin kan zia tawh turah ngai ang)


Show post links
Top

[Ngaia]

Thinlungmawlpa
Chapter-13
Ziaktu: Cck Lalchhuanawmi


"Ka hria alawm. Mahse, kan inthlakhlelh lai taka kan tawp san hian a ṭhat ka ring. A nih loh chuan, nakina min iaina tur kan ti palh ang tih ka hlau zawk a ni. Keiin dang tur chein chakna ka nei dawn si lo", lungawi hmel tak hian min en a.


Hrethiam lo niawm takin, "Bawihi, nakina ka iaina tur che chu eng nge ni a?",


"Kal teh", ti pahin ka nam sawn. Ka tho a, a nui tat tat.


"Nanaua pindanah ka va kal tawh ang e, naktukah thawh kan hai palh ang", min pawt ṭhu a.


Ka hnung aṭanga ka kâwngah min pawmin ka beng bulah, "Bawihi, zawhna ka nei. Dik takin min chhâng rawh aw", a chawl dat a.


"Bawihi", ka kokiah a chal nghatin, "Ngai leh lo mai, va mu tawh rawh", min pawt tho thuaiin pindan aṭangin min chhuah tir a.


Ka duh zâwng sawina hun ka nei leh ta lo.


Pindan kawngka pawh ka kik duh ta lêm lo a. Nanaua pindanah lutin, intifai lem loin ka mu thla a.


A mi zawh duh chu eng tak ni ang maw?


Thil ni lo lo ngaihtuahin, mahni insit leh inhnuhniamin a awm anga, keiin engtiang chiahin nge ka ngaih tih hre duhin, chutiang zawhna mawlmang tak min zawt dawn a ni ngei ang.


Aw...mahni insit reng renga awm hi engtikah thlah ang maw?


Kross-a ei rawngbawl kan ei zawhah, a in luah turah kan pahnihin kan kal a. Uluk mangkhengin a en kual.


"Chuan...?",


"Lo kal teh", ka pan hnai a. Ka kâwngah min pawmin,,"Kan pahnihin kan leng tawk chiah", ka nui sen sen.


Ka sen awp awp, "Min fiam dan hi a mak thei em mai", tal chhuah ka tum a. Min pawm nghet sauh.


"Kum Thar law lawah insawn la ka ti",


"Tunah insawn ila a ṭha zawk alawm", a mita inthlahrunna lo lang chu en rei ngam loin ka mit ka la sawn a.


Dingdihlipa a nghawnga kuahin,,"Le, nizana i zawhna chhâng tur chein ka inpeih. Min zawt tawh rawh, dik takin ka chhâng ang che", kiai sakin ka sam a hui ṭha a.


Ka mitah chiang taka min en ren rawnin, "Ka chhânna hriat duh chu ka hre tawh e", hrethiam loin ka melh hâ.


Khi sukin,,"Bawihi, mipain a thinlung a pekna hmeichhia, iai chu sawi loh; a zah luatah inneih zan hmanpui takngial pawh a thawiin a suangtuah ngam ngai lo asin", nghet takin ka nghawngah min kuah leh a.


Tun ṭum erawh, kalbo tur ang maiin min kuah!


"Kross-a, khawiah mah kal suh aw. Ka bulah awm reng rawh",


"Bawihi, Bawihi, i thinlung kawltu hi ka tlawm em a ni. Min ngaidam rawh aw", a thusawi chuan min tihlauthawng.


Hawi chhuakin,,"Ngati nge chutiang i sawi tak? I tlawm reng reng lo. Ka thinlung kawltu i ni hi ka lawm a, i thinlung kawltu ka ni lehzel hi ka inchhuang takzet asin. Thu ho mai mai sawi tawh suh ang che, mahni insit taka i awm hi ṭha ka ti lo. Hnung lam hawi chhen loin, pum khat, thinlung pakhat inṭawm kan ni tawh a. Kan pahniha hmatiam chauh thlirin, chu lamah ke i pên zawk teh ang".


Ka tal chhuak a, in chhung tihfai dan tur leh, bungrua kan dan tur sawiin ka tei kual a.



Muangchang thei pawh kan ni lo.


Kan inpawm chilh reng zawngin, thu nawi bak kan sawi dawn lo.


Thaw hapin, Kross-a ding ngawi reng chu, "Le, bungrua chauh kan la thei ta, haw ang le", a bu nghat.


A thawmhnaw ka thleh fel laiin Lehkhabu pakhat hi bag mawngah ka hmu a 'Pathian Lehkhabu Thianghlim' tih chu!



Pastor ten an pe tih ka hrethiam mai.


A thar rim a nam chem chem danah leh, a phêk keu a sak deuh danah, Kross-a hian vawikhat mah a la keu lo.


A intuamna sarang erawh a awm tawh lo a. Kross-a hian a la keu eih lo.


Ka inhmu chhuak zawt zawt. Eng ka ni bik tawp si lo. Kross-a dem vak vak emaw, Lal Isua bula hruai tur phei chuan mi chak lo tak ka ni.


Amah ai mah pawhin ka ro zawk ang.


Kross-a Thlarau aiin ka Thlarau hi a ngaihtuahawm zawkin ka hre ta mai!



Kawngka kik thawmah hawi chhuakin, "I va rei ve", ka nuih seih a.


"Tihian, ka hman a ni mai",


"Chuti, lo chhuak tawh rawh".


Kross-a thawmhnaw tlêm tê leh Pathian Lehkhabu Thianghlim chu bag-ah khung sawk sawkin pindan aṭangin kan inzui chhuak a.


Patêan, "Lo mangang miah suh aw, Bawihi chu ka lo veng tlat ang", thutak meuh meuhin a han ti a.


Nutêi a nuih ar ar avang erawhin a thutak fumfe theih loh.


Nutêi te thlêng pakhat, fian pahnih leh bel pathum leh cooker tê pakhat te nen kan chhuak a. Gas erawh dawrah lam a ngai dawn thung.


"Tlai chaw ei khamah te kal law law la aw", patêan a ti vawng vawng a.


Nutêi pawhin, "Naktukah kal zawk mai rawh", a ti ve bawk. Nanaua leh Tetea te pawhin, ka rin aiin an ngainain a ui bet thiam riau.


Kross-a erawhin, "Kal tur tho tho ka ni a, tuna kal hi a ṭha mai e", a ti mai a.


Patêan, "Ni e, a dik. Lo kal ziah chhan tur i nei tho alawm", a ti chu, "Kan rin phak bakin a lo kal zing mai thei a ni", nutêin a ti ve leh.


Kross-a nen inenin kan nui tawp.


Nutêi te bula awm hi chu a thawventhlak mawle..


Kross-an ṭawngkam a thiam lo ve ropui si, "Ka lawm e", tih bak, han sawi duah dan tur a hre thlawt lo.



An puan leh pher pakhat nen, bungbel ṭhenkhat te nen kan liam ta a.


"An ṭhatna rul turin dam chhunga thawh a ngai dawn a nih hi", Kross-a pawhin a ti hial.


Kei lahin, "Awmpui che an duh reng a, i duh tlat lo a nih kha. Min ngaihtuah lo reng reng", lungni lo takin ka heh ka tisâwi a.


"Inah kan sawifel dawn nia", ti ringawtin min chhâng. Min thlêm ve tal tur a nia.


A pawi chuang lo, lungnih loh chhan tur a awm lo.


In min hawn tir a, a chhung bal te kan tihfai lawk avangin inrem fel zung zung a ni tawh mai.


Thawmhnaw leh bungbel te tihfel zawhah, "Chawhmeh lei tura bazar chauh a ngai ta", ka ti var a.


"Bazar thuai ang", mi rawn kai a.


Bazarah kan inhnuk kawi kan inhnuk kawi a. A tawpah, inkhai bawr luah chungin ice cream awmnaah kan tawp chat.



Min thlêk vang vang a, "Nangni pahnih hi", min kawk dun a. "In innei tihna em ni?", ka nui hak hak a.


Kross-a pawh a khi ve suk.


"Ka pu, hmanhmawh min ti em?", a nui chiam.


"Hmanhmawh em a? In awm tawk khawp alawm", a ti puat a.


Min ralkhat ngainat vein ka hria. Keipawh chutiang chiahin ka ralkhat ngainat.


A taka va pawh tur erawh chuan ka ngam chiah lo a ni.


Ice cream a thlawnin min pe a, "Kan kal tawh mai ang, lo inhralh-", ka ti hman chauh tihah, "E he!".


Vei lamah ka hawi phei a, Mambawihin min lo thlir reng chu niin.


Kei chu ngeiawm zeta min melhin, Kross-a erawh, hmusit takin a melh thung.


Hmusit taka a melhna mit chu vih sawk ka châk lutuk.


Ka nunrawn tak em em chhan te hi ka hre tawh bik lo.


Mambawihi chuan Kross-a nen kan invawnna en zeuhin, ner sawkin a kalsawn a.


Ka ṭang lutuk chu ka hah vek.


"Bawihi", nuih seihin, "Haw tawh ila, kan tlai palh ang", harsa ti zetin ka ti chhuak a.


Ka pu hnenah ice cream min pek avanga lawmthu hrilhin, kan haw a.


Kawng tluanin kan ngawi dun rauh rauh.


Mambawihin min hmu a, ka nu a hrilh dawn tih chu chiang sa. Haw ka huphurh lo ka tih chuan dâwt ka sawi tihna a ni a.


Ka haw hunah erawh, thudik hmangin ka hmachhawn leh mai ang.


In kan thleng a, "Bawl ṭan ang aw, zanin chu ka lo awl ang che".


Min hnial loin ka bulah a tei chhen tho.


Nichina thil thleng kha sawi a duh tih ka hria, sawi ṭul loah ka ruat tih ka chezia aṭangin a hrethiam a ni ang, a sawi chhuak chuang lo.


Mahsela, min en leh vung vung ṭhin a. Ka chet a tiṭhuanawp.


Harsa ti zetin ka ṭawng a, ngawi rengin min ngaithla. Ka nui luihna lamah lah, ka pum a na vek thei.



Chhuatah chaw kan ei a, "A tui leh tui loh sawi la", beisei takin ka en a.


"Bawihi, Mambawihi kha", a ti chu, "Chawhmeh tui leh tui loh sawi turin ka ti che, ei chhin la,,a tui loh chuan tui lo ti la, a tui erawh chuan a tui lutuk i ti dawn alawm. Chaw ei lai a ni a, chaw chungchang chauh sawi tur", ka thinrimna chuan ka thâwk a tirang.


Kross-an min en vung vung, "Min en vung vung zel tawh suh, i mawl hmel thei lutuk tih ka hrilh tawh che", a bânah ka chum tai tai a.


Mittui a luang ringawt, insût feihin, "Chaw kha ei rawh", ka inhru thuak thuak a.


Chaw ka bar a, ka hrawkah hnawhtu a awm tawh avangin lem chu sawi loh, a ṭhial pawh ka ṭhial thei lo.


Ka hmuam ṭun.


In ka thlen hunah, ka nu leh Mambawihi ten eng thu nge an sawi leh dawn?


Huai leh chak taka ka hmachhawn a ngai leh dawn a. Min chhantu tur an awm dawn lo.


"Bawihi", ka dar a rawn tawk chu vai sawnin, "Chaw ei turin ka tih che kha, ei ṭeuh ang che. Ka chawhmeh siam ho kha a tui emaw tui lo emaw i ei ṭeuh tur a ni".


Thuawih takin a ei buan buan a, keimah zawkin ka ei thei lo.


Ni dang ang chu nise, sawi tur ka ngah anga, hun hlimawm tak kan hmang bawk ang.



Mambawihin min tihchhiatsak vek.


"Hmun lo phiat la, thlêng ka lo sil ang", bu nghatin, hmun phiah a chuh nghal a.


Tlema kan boruak zia deuh chuan min tithawl tawh.



Pindanah lutin mutna tur ka siam sak a, bang nghenga ṭhuin ngawi rengin min en.


Ka melh leh zauh ṭhin a, a ngaihtuah tur awmang ka hriat vek avangin ka be duh lo.


Biak vaih chuan, lungchim tâwkin, "Bawihi", min ti leh anga. Min tiṭap palh ang.


Mambawihi khan a ngaihtuahna a la kal thui tir a ni mahna.


"Ka zo e", a kiai deuh sak a. Boruak erawh, a hma zawng aiin a rit.


Pawna kan chhuah hmain nghet takin ka nghawngah min kuah a, hetia min kuah tawh hi chuan hahdam aiin, hlauhthawnnain ka khat tawh ṭhin.


Hlauhthawn sa tawh nen, rin ang ngeiin,,"Bawihi", a tui hian ka tui ral leh nghal.


"Bawihi, keimah vangin i la tuar dawn chauh tih hre mah ila, ka thlah phal lo che. Thlah che hi ka ngam lo. Min ngaidam rawh aw", awmngaihna min hriattir lo ṭhin alawm.


Min thlah dul deuh avangin ka en chho a, min en chhuk ve run.


Ka beka dawmin, "Naktuk aṭang chuan a thar vekin aw. Zanin chu heti hian i liam tir phawt teh ang. Naktuk aṭang chuan nimin chhûi kir tawh loin, naktuk nghak tawh zawkin, kan tun hun chauh âm takin kan hmang tawh ang".


Hetiang tur hi a ni.


"Kross-a, min thlah suh", a heh a lakhran dawn chuan ka ti sep a.


A hmeichhia zawk hi ka zak lo tlat zel.


Kan heh insi reng siin, "Zanin hi ral tawh se, naktuk ka nghakhlel mang e", ka heh pet a rual a.


Zanin hi ral thuai se, naktuk thleng tawh se. Keipawhin ka nghakhlel.


Kan tan hian naktuk a pawimawh em asin. Lal Isua hian naktuk thlen tir hrâm se!


Taxi aṭanga chhukin, kan in kawngka bulah ka ding ren rawn. Zanin chauh chu, i tuar leh ang.


Zanin hi a ral ṭep tawh a, naktuk a thleng thuai dawn. Naktuk aṭang chuan a ṭha vek mai ang.


"Ka lo haw e", ka pain min hmu hmasa ber a, "Khawiah nge i kal? Chaw chhum nghal rawh, in lêng bo reng mai", ti vin ṭhat nghalin, na takin an pindan kawngkhar a khar zui.


Mambawihi a la haw lo tih ka hre thei a, ka nu hi khawiah nge a lên ve tak ang le?



Jerome-a lo chhuakin, "U, ka rilṭam tawh lutuk. Chaw chhum vat vat rawh", a pum dawm chungin a lo ti a.


Lainat taka kuahin, a biangah ka chuk zeuh a, "Chhang leh bawnghnute lo ei rih rawh aw. Ramhuai speed-in chaw ka lo chhum ang e".


Fridge aṭanga chhang la chhuakin dawhkanah ka dah a. Bawnghnute ka chhuanlum sak leh phawt.


Ka nu awmna ka zawt a, "Hre bik lo. A u, i awm loh chuan in hi nuam ka ti lo. Nakumah chuan Hostel-ah ka awm daih dawn. I phal ang tiraw?",


"Phal lutuk e a. I duh phawt chuan i awm dawn nia", a hnung aṭangin ka kuah a, "I tel lo chuan kei pawhin in hi nuam ka ti lo", ka ti ve a.


A lûin ka lû a tauh ri bawp, "I lû hi a va chang tak", a nui hak hak.


"U, pasal min um san suh aw", kun ngaihin a ti reuh a.


Fianpui nen a bulah ka ṭhu, "Duata, ngati nge chutiang i sawi? Pasal um tur pawh an awm loh hi", ka fiamthu pah deuh hlek a.


Min khawngaih tih hriat taka min enin, "Pasal i neih hunah chuan keiman Maicham hmaa hruai che ka duh. Chuvang chuan min um san suh aw".


Khawngaihna mita min entu chu en rei a har khawp mai.


Kross-a pawh khan a duh lo a nih kha maw. Ka hrethiam ve ta e. Kan khawngaihthlak bik hliah hliah.


"Um san lo e a. Nang mah ngeiin Maicham hmaah min hruai dawn alawm. Chuvsng chuan hrisel ṭha takin awm la, meizial te i zu ve ang e",


"Zu lo rapthlak", ka nuih sen sen a.


Ka nau Jerome-a hian he in chhung hi a tihlimawm. A awm loh chuan a nuam lo.


Nuṭa neihchhun a nihnaah, a farnu chak lo tak hian a ṭawiawmna ka la mamawh chho zel dawn.


Hostel-a awm te a sawi a, a duh chuan awm mah se, pawi tihna ka nei lo.


He in chhung hi indona mual a chang zo ta si a!



Thinlungmawlpa
Chapter-14
Ziaktu: Cck Lalchhuanawmi


He in chhung hi indona mual a chang zo ta si a!


Mambawihi lo haw chu a hawi vah a, min chaldelhna tur hre tawh niawm taka inngaiin elsen takin min melh a.


A tum ang chu a ni hauh dawn si lo.


Ka nu a la hrilh lo a ni ang chu, hrilh nise an nufain an hawi sâng ngawt ang.


Chaw ei naah, "Pa, vawiin kan ṭhian hoa kan titi naah, kan pasal duh zâwng sawi ang u an ti a. An sawi tliar tliar a, mahse maw, kei chuan, ka pa ang chiah ka nei dawn ka ti a. I pa chu a va fel awm em em min ti hlawm a. A nuam tawp a ni mai", Mambawihi chuan a ti bawrh bawrh a.


Ka nu pawh a nui har har.


"A va lawmawm ṭhin tak, fel ka inti lo asin le", inngaitlawm takin ka pain a ti let a.


Mambawihi erawhin,,"Pa zawng zawng zingah i fel ber", naupangchhia takin a ti a. A ṭawng a tinô thul.


Ka nuin Mambawihi fak zawngin a ṭawng ve bawk a. Jerome-a nen chuan ngawi renga chaw ei a ni mai.


Mambawihin, "Pa, kei chuan tu nge a pa tih pawh hriat loh, a nu pawhin a kalsan, mi ina awma harsatna thlentu leh, chhiahhlawha awm leh kutdawh mai mai ka ngaizawng ve dawn lo. Pa, nangmah ang ka hmuh loh chuan, ka lengtar mai ang", thianghlim ber ziazangin a ti siam siam a.


Ka melh hriam hraih. Intithei takin min en a. Ka mit ka lasawn thuai.


A sawi tum ka hriatthiam luatna chuan ka thinlung a sâwi nghing!


"I pa ang hi chu an vâng a nia, i lengtar dawn a ang hle mai", ka nuin a ti a. An nui hawr hawr.


Jerome-an, "I tum loh deuhin kutdawh i ngaizawng ang e, ṭawngte hi insum tur. Hmalam hun a hriat loh, rethei deuhin i awm mai tur asin", a ti chu, Mambawihin kei min lo melh rum daih.


Ka fuihpawrah a ngai hrim hrim.


Jerome-a thusawi chuan min tilawm riau. Ka va nuih sak.


"Ngawi mai mai rawh, eng mah i hre lo", ka nuin a vin hrawk.


Ka pain, "Duata sawi chu a dik chiah alawm. Mambawihin inzir nan hmang rawh se", nui tat tain a ti a.


"I lo hmu maw, i thisen kai i fapa kam chhuak kha. A puitlin hunah engtak ni ang maw?", ka nuin nui sângin a ti a.


Ka pa tihlawm dan hi chu a hriain a thiam mawle.


Ka pa chu a khi vur vur.


Chaw eina tihfel puitu nei loin keimah chauhin ka tifel a.


Ka pa hoin tv an enin an ṭhu chawl vek.


Jerome-a chungah ka vui phal lo. Ani hi chu ka duat.


Nichina a thusawi khan min tihlim em asin. "Bawihi, Grapes ka lei kha sil fai la lo keng teh aw", sak ṭalhin ka nu a lo au a.



Chhâng loin ka tihtur ka ti mial mial.


Grapes chu kengin dawhkan têah ka dah a. Ṭhu turin min duh lo tih hre tho mah ila, ka ṭhu lui ngat a. Grapes chu ka ban hmasa ber.


Ka nuin, "Thil man a to chho zel a, Grapes te hi a to tawh a nia aw. Mi nazawng ei theih a ni tawh lo", min sawi chhan tih ka pa chauhin a hrethiam lo.


Jerome-a erawh hi chuanin a hrethiam tawh tih ka hria. Tlaia a thu min hrilh te leh, chaw ei laia a thusawi te kha, ka thlavang a hauhna ni ber.


"Kan la ei theih danah, mi naran kan ni lo tihna a nih hi", ti ngatin, Grapes chu ka ei ṭeuh.


Nui chhuak hawkin Jerome-an, "A u hi, a sawi dik thei e", mi ti a. "Ka hria lawm", ka siai zeuh.


Tukverh hawngin a bulah ka ṭhu a, Kross-a awmdan tur ka ngaihtuah.


Nutêi te inah ka kal a, Kross-a ka zawng ringawt. Hmuh tur a awm tawh bawk si lo.


A mutna ṭhinah ka mu a, ka chul ka chul.


Ka hleiluak bik em aw tih te ka ngaihtuah.


Khawhar taka awm turah ka ruat a, min ngai ngawih ngawih turin ka ruat.


A nihna takah chuan, kei mah zawk hi khawhar leh ngai ngawih ngawih zawk chu ka ni.


Mipa ka ngaihsak hmasak ber leh, ka thinlung ka pekna hmasa ber a ni a.


Ka tan a hmasa ber a nih angin, atan pawhin a hmasa ber ka ni a. Hlu vet vet tak a ni.


"Bawihi, mipain a thinlung a pekna hmeichhia, iai chu sawi loh; a zah luatah inneih zan hmanpui takngial pawh a thawiin a suangtuah ngam ngai lo asin", a tih chu ngaihtuah letin.


Ka zah tharin, ka inhmu chhuak chiang takzet bawk.


A mipa mah zawkin chutianga a ngaihtuaha, a thinlung a thianghlim tehreng nen.


Hmeichhia tê tê hi ka zak thei lo bik lutuk.



Ka haw peih tawh lo chu ka riak ta daih.


Kross-a ngaihtuahin ka tlaivar ti ila a sual lo ang.


Tun thlenga kan awmdan ka chhûi kir a, khang hunah khan kir thei tawh lo mah ila, nu leh pa thuawih chu a ṭhatna mual a awm a ni.



Ka nu thu hnialin kal duh ta lo ila, Kross-a ka tawng awm si lo.


Ni tak e, khami hmain ka tawng tawh. Min sut avangin ice cream ka thlauh a, a dang min leisakin, a bawm chi min la leisak belh leh zui.



Ramah kan inhruaiin, min veng him a. Keimah vangin diriam leh vuak a la hlawh zui.


Tlawm takin a awm a, a hming hi a pu zo em asin.


Mihring tlawmna hmun leh harh tharna hmun chu Kross a ni a.


Ka tlawmna hmun leh ka harh tharna pawh Kross tho a ni!


A mak ngawt mai.


Kross-a hian min kaihruaiin, ka nun min hruai nasa hle mai.


Khum bulah ṭhingṭhiin, "Isu, Kross-a nen i kutah kan lo tlu e. Zan thima a kawng i tihêna i hruai ang khan, kan kawng hi tiêngin min hruai ang che. Amen".


Pindan aṭangin ka chhuak a, "Nutê, chaw ka ei dawn lo aw",


"Aw le, zaninah a lo kal dawn em?",


"Kal dawn chiangkuang rapthlak eltiang", nutêi a nui chiam.


Kawngka pawh an kalh lo, Mambawihi a riak chhuak a ni chek ang. Ka nuin a sawi mam leh dawn a, ka pain hauh(hau) chu sawi loh, a hre lo leh tawp ang.


Urlawk zan kan thleng a, nutêi te inah Arsa kan kang a.


Tlem viau mah ila, nuam kan ti ve lutuk.


Jerome-an min lo fin bawk a, rin ai takin Kross-a nen sawi tur apui an ngah zek.


An titi malh malh a, ka bulah a ṭhu tawh lo. Jerome-a chu ka thik. Ka ngaih tehreng nen.


"Hey, nui rawh, i tûm nasa em mai", nutêin min nghawk zeuh.


"Ka nui alawm", ti pahin ka nui lui a. Nutêin min hrethiam tho.


Lu thing nar narin, "I nau a nih saw, thik tham pawh a ni lo", nutêin a ti a. Ka nuih a za tawh.


Mahni nau han thik mai pawh chu. Mahse, ka ngai ve em a ni.


A tawpah, kan pahnih chauha inah min dahin, pawnah an chhuak vek.


Arsa kan kang dun a, sawi tur ka hre lo lutuk chu ka kuah leh ringawt zel.


Kross-a pawh chuti tho, sawi tur a hre bik lo. Ka heh a rawn pet leh zauh ṭhin a. A nuihzatthlak zawk.


Thupui thawh tur kan hre thlawt lo.


Âw thian kharhin, "Kross-a, zawh duh che ka nei",


"Min zawt la",


"Ngati nge ka hmaah kher i kawr i phelh? Thing i eh(ek) lai kha i la hria em? Khatah khan, ka hmaah tak dingin i kawr i phelh a, ngati nge?", min en vung vung.


Min chhân tum pawhin a lang lo, "Kross-a, thil ka zawh che chu?", a hmaah ka kut ka vai a.


A bek dawmin min en vung vung, "Min en vung vung zel tawh suh", a hawisawn duh chuang lo.


"Kross-a, i sual em mai aw. Min en tawh suh", ka hawisawn a.


Arsa kan kang zo tWh nen, Sikri ka ai san daih.



Min lo zui dawn emaw ka ti chu Arsa kanna bulah a ding reng a. Kan kanna hnuhma a tifel.


A tihfel zawhah lo ṭhu vein, "Khami ṭuma i mitmeng dé sawr sawr hmuhnawm zia kha", nuihza insum taka a ti chu, ka nek chawrh.


"I sen awp awp a, chilthli i thlauh lo chauh a nih kha min thlirna lamah", a ti mai chu, ka zak thar lutuk a, ka hmai ka hup.


Chiang takin ka la hmu zui.


"I sual lutuk, mi hmaah tak an inphelh ngai em ni?", ka kut a lasawn a. Ka mit ka chhing tho.


Mahse, ka meng chhuak rang chiang lutuk.


Hlauhthawnnain min man a, ka thâwk a tirang. Eng thil emaw thleng tlat turah ka ngai a.


Thil ṭha lo tak, thil ṭha lo tawpkhawk a ni tawp.


"Bawihi, dik lo a awm em ni?",


"Min thlah suh aw", min kuahna kut ka hmer a. Ngaihna hre lo zetin, "Ka thlah dawn lo che. Engtizia nge ni ta?",


"Ka hre bik lo, ka hlau",


"Hlauh tur a awm lo. Kan pahnih chauhin kan awm hi", min hnem mah se, ka awm a nuam thei tlat lo.


Hlauhthawn sa tawh nen, kawngka an lo la kik zui, min tiphu nasa lutuk.


Kross-an, "Ka va hawn ang", tia a tho chu a hnungah ka zui tho.


Kawngka kan hawng chu, ka nu leh leh pa an lo ding!


Ka pa chuan min melh tawn zak zak a, ka nu mak ti leh hrilhhai, ka pain Kross-a chu a unaunu fapa a ni ang tih hriat a hlau tih lah Kross-a, huatnaa khata a en dan aṭangin a hriat bawk.


"Pa, eng nge in rawn tih dawn?", Kross-a hmaah ka ding thuai a.


"I nutêi te kâwnah ka hmu a, lo hruai haw che ka tum a", ka pa chu a lungni lo tih a âw aṭangin a hriat.


"Nakinah ka lo haw ang, Arsa kan kang a. Ei zawhah ka lo haw ang", ka pa mit erawh ka hnungah a awm.


Kross-a nen chauh kan awm atin ni.


Ka pa chuan, "In pahnih chauhin em ni in awm?", a ti ta chiah reng a. In chhungah a lo lut nghal bawk.



Ṭhutthlengah kan ṭhu a, Kross-a bulah ṭhu ngatin, thup reng theih a ni tawh chuang lo.


Thup ka tum lo hrim hrim bawk a, chutih laiin, "In lo kang zo tawh em?", Nutêi te an lo lut.


"Ka pa te chu", Jerome-an a ti a. "Duata, i u nen va haw rawh u. Lênna hun pawh a ni tawh lo. Zan a rei tawh", Kross-a ngawt melh ngurin ka pain a ti a.


"Pa, nakinah ka lo haw ang ka tih kha. Chuan, hmelhriattir tur che ka nei", Kross-a kut chelhin, "Pa, Kross-a nen hian kan inngaizawng a. Hrilh che ka tum reng, mahse, i buai thei lutuk a", ka pa ka lainat lutuk.


Chutih laiin ka nu mitmeng buai leh, thinrim sosang leh huatnaa khata Kross-a melh hrawktu chuan ka induhtawkna a chawk tho ve bawk.


Ka pa chu insum tih hriat takin a han thaw deuh hawk.


"Tu nge i nu leh pa te?", ka pa zawhna chuan Kross-a a khûr tir. A kut ka la chelh tlat a ni.


Kross-a tana zawhna har ber, tu hnen maha chhânna a pek theih ngai loh tur a ni.


Show post links
Top

[Ngaia]

Thinlungmawlpa
Chapter-15
Ziaktu: Cck Lalchhuanawmi


Kross-a tana zawhna har ber, tu hnen maha chhânna a pek theih ngai loh tur a ni.


Kross-a chuan a chhâng lawk lo a, kan boruak rit lutuk chu, ka zo lo dawn dawn.


"Merry Christmas!", tia au thawm leh halpuah a ri chuah chuah a. Keini boruak tihmun pawh a puak darh ṭep tawh a ni.


Ka pa lahin Kross-a chhânna a nghak reng, "Ka pu, an boral tawh", a tawpah Kross-a chuan a ti ta a.


Ka nu chu a thaw huaiin ka hria.


A khûr nasa lutuk chu nghet takin ka chelh a. Ka pa te pawh, nutêi te ina kal ngai lo an ni a.


Zanin ber khera an lo kal hi hriatthiam a har. A ṭha nge ṭha lo ka hre mai bik lo.


"Chhungte i nei em?", ka pain a ti leh a. Nutêin ngawi reng tura min mitmei bakah, Kross-a pawhin ka kut a hmer salh ṭhin a.


Ṭawng ka châk a nia aw.


Kross-an, "Ka pu, keimah chauh ka ni e", thinlung na takin a ti chhuak a. A âw khûr lah ngaihthlak liam mai chi a ni lo.


Ka pa chu ka en a, min duhpui lo tih hriat tak a ni.


A tho nalh reng a, "Jerome, i u nen lo haw nghal rawh u", a kal nghal nul nul a. Ka nuin a um phar dawr dawr.


Kross-a thu ngaichang niawm takin a lamah kan fu ṭhup a.


Ani erawh, a ṭhu ngawi reng. A khûr tawh lo a, muk takin a inngaihtuah. Eng tak min hrilh ang maw?


Min ṭhawng thut pawh a ṭha reng reng e. Kross-a nen kan inngaizawng tih ka pa pawhin a hre ta a.


A thawventhlak zawk.


"Bawihi?", mi han nuih saih a, "Va haw tawh rawh u", Jerome-a a en a.


"Ka duh lo", min kaitho a. Ka nghawngah bawk min kuah.


"Naupangchhia anga awm lo turin ka hrilh tawh che kha. Ka thlah ang che".


Khuaa kan awm laia min haw tir a tum a, keiin ka duh loha min kuah chunga min kalpui ang bawk a ni.


"Arsa kan kan(kang) kan la ei si lo",


"Ka lo ei kep ang che".


Mi ṭhenkhat chu, hlim taka inkuah chungin halmawi an en a. Inkai chunga nui dun hak hak te pawh kan tawk.


Keini ve, hlimna hun leh hmunah lungngaia indawnkunin kan ṭap a ni a!


Mahse, a pawi lo.


Tunah ṭap mah ila, heng kan mi tawh te aia nasaa hlima nuih hun kan la nei ngei ngei ang.


Chumi hun thleng tur erawh chuan dawhthei taka nghah fan fan a ngai dawn a, tuarchhelna nen.


Thinlung pakhat inṭawmin, kan thisen zungzam pawh taksa pakhatah luang tawhin, ngaihtuahna hmun khat, suangtuahna thuhmun pu kan ni tawh.


Thlah mai mai turin he Kross hi chelh ka ni si lo a!


Kan in kawtah kan ding a, "Keimah vangin i mittui a tla reng dawn chu a nih hi", ti pahin ka mittui a hruhul a.


Hrukhul sen pawh a ni lo, a tla zel tho.


"Va lut tawh rawh, tui taka muthilh i tum dawn nia. Min lo ngaihtuah miah suh ang che".


A tuk zana inhmu leh turin kan inthlah a. Jerome-a a awm ve avangin lei insualtir a rem chiah lo.


Jerome-a lahin, "Ka mit ka lo chhing ang", a ti pek a. Ka melh rum ṭha mai mai asin.


"Ka lo en ang che u",


"Umm, nutêi phone aṭangin kan inbe dawn nia aw".


Kan lut fel chiah tihah, "In pindanah lut nghal rawh u. Mambawihi pawh ko haw nghal rawh u", ka pa chu ṭhutthlengah inkuangkuahin a ṭhu thân a.


"I thiam loh vek", ti niawm takin ka nuin min melh. Mambawihi a be zui a.


Pindanah ka lut daih.


Tukverh aṭanga zuan thlak tawp a nia ka duh. Kross-a chu engtin tak awm ang maw?


Phone phawrhin nutêi ka be nghal a, "Lo ngaihtuah suh, pindanah a awm a. Naktukah ṭha takin in inbe dawn nia".


Ka muthilh loh avangin pindan pawna thawm ri nak nak ka hre reng. Ka tho peih thlawtlo.


Mambawihi haw hun ka pain a nghak niawm tak a ni.



Thawm a reh deuh hnuin dim thei ang berin ka chhuak a.


"Bawihi leh Kross-a te an lo inngaizawng reng a, i putêa sawi kha a dik a nih hi. I pain Kross-a nena kan inkungkaih dan a hre tur a ni lo. Kross-a erawhin a nu leh pa te an boral tawh thu leh, amah chauh a nih thu a sawi a", ka nu a phun sû sû a.


Mambawihin, "A ṭha reng alawm. Duh leh inngaizawng se, a pawina awm lo em mai. Kross-an a chhungte angin min sawi chuang lo a, Bawihi lahin ka pa a hrilh loh chuan, keini pawhin sawi lo ila, a ṭha ni mai", a ti chu, ka nuin, "Chuti maw? Fing thei reng reng lo mai", a ti zêk.


"Ka fin daih zawk chu, awmpui leh chhiahhlawh inngaizawng te chu inngaizawng mai mai ang hmiang. Min koh haw chhan hi a ho fe zawk. A nuam ṭan dawn chauh a", titauin Mambawihi chu a kalsawn ta daih.


Ka nu erawhin Mambawihi a pawt ding a, "Kross-a awmna hriatchhuah tum rawh. Bawihi hi chuan a thlah dawn lo a, Kross-a hnenah kalbo turin hrilh ila, a ṭha vek a ni mai", ka dinna aṭanga pên chhuaha ânkhum hrep ka châk lutuk.



Mambawihin, "A mak e, duh leh inngaizawng mai mai rawh se. An innei dawn ti pawh ni hleilo. Ka pa hian a remti dawn chuang lo, kan lo buai chiam hian kan hah mai mai. Ka pa hmin ṭha hle la ni mai. Kross-a biak ka peih lo. Hmuh pawh ka hmu peih lo", a ti sak a.


Tukverh bulah ṭhuin ka dâk chhuak a, Nu tel lo hringnun hahthlak zia leh ralmuan lohzia hre chho zelin. Ka bula dingtu tur leh, ka thinlung chhungril min ngaihsakpuitu tur ka nei lo.


A hrehawmin a va khawharthlak tak em!


Tunah tak hian ka nu mal chunga muta, Kross-a nen kan inkar hrilhin, min fuih pah leh thurawn min pe pahin ka lu min chulsak heuh heuh sela, a nuamin a thlamuanthlak dawn mang e.


"Mahse maw, Nu, min boralsan lo ta la, Kross-a hi ka tawng awm si lo a. Nang chu vawn(vuan) theih loin i liam tawh si a, tuna ka vawn mek hi nghet takin aw...Ka thlah miah lo ang".


Nutêi te inah a awm tih ka hriat avangin thlamuanna chin ka nei.


Krismas inkhawm te a nih dawn avangin ka pain eng thu mah a nei lo nachungin, hmel hlim erawh min hmuh meuh lo.


A hmel ka hmu lo tluk a ni.



Inkhawm bân ve leh thingpui leh zochhang an sem pawh la loin nutêi te inah ka kal thuai a.


Amah chauhin a lo awm.


"Hi hi hi, Krismas chibai le", nui varin ka bân ka phar a.


Lo vuan vatin, "I nalh lutuk", nelawm zetin min nuih a. Nizan thil thleng nen, ka ngai ngawih ngawih.


"Nizan kha, min haw(hua) ngawt lo maw?",


"Huat chhan tur che ka nei hleinem", zaidam takin a ti a.


A kapkarah min ṭhuttirin, ka kokiah a khabe a nghat a. Ka kâwngah nghet takin min pawm a.


A changin kan biang ve ve an innawk.


"Ih, ka pa chungah khan lungni lo hram rawh aw. A aiawhin ngaihdam ka dil e. I ngaidam tiraw?",


"Bawihi, ngaihdam dilna tur a awm loh kha. Pain a fanu chunga a tih tur tak a ti a ni kha", sawi satliah mai lo se aw.


"A der mah nise, ka lawm lutuk", a nui hak a, "A der a ni hleinem. Bawihi, sawi tawh lo ang. I pa mittlung tur erawh chuan ka thawh nasa deuh a ngai tihna a ni mai", a thusawi chuan min ṭhawng.



"Kei aiin i puitling daih mai", ka ti chu, "Thlasik kan hmang liam tam tawh alawm", ka biang a piai zeuh.


Inherin, "Ka lawm lutuk. Ka pa hi a sual miah lo a nia, nizana min hmuh dan kha a ṭha lo ti ila, kan pahnih chauh khan kan awm si a. Nakinah, min hrethiamin min la pawm em em ang. Dawhthei takin nghak ang aw", ka ti sep sep a.


Ka khabe hmerin, "I duhawm ang aiin i fing ru tlat. I pa thlavang hauhin, i sawichhe phal lo a. Hei vang tak hian tun kan dinhmun hi paltlangpui che ka duh. I pa mittlung ngei tumin ṭan ka khawh bawk anga, ka bulah i ding reng dawn a ni. A dik em?",


"Dik lutuk, i bulah ka ding reng ang".


Nutêi te an lo haw mai avangin kan inthlah thuai a. Min hmu hman lo chiah chiah.


Krismas ruaiṭheh te pawh rilru thawveng takin ka ṭheh a. Nutêi te inah Kross-a a awm reng bawk.


Chaw leh Sa dawhin ka hawnsak a, "Lal Isua piancham lawmnan chaw kan ei a nih hi", ka ti a.


A lungni lo kan inthlêm hrep.


Tunah heti la ni mah se, a tira Lal Isua a duhna khan a hneh leh tlatin ka ring a ni!


Ka pain Kross-a nen kan inkar a thawi pawhin a sawi lo a. Kha zan aṭangin pangngai takin kan inbe leh tawh lo.


Ka nuin a hmin hneh der tawh a ni mahna.


"Kross-a a lo lêng a, lo lêng ve ta che", nutêin min lo bia a. Phone off leh kawrlum hak rualin, pindan aṭangin ka chhuak a.



Tv hmaah ka pa leh ka nu an lo ṭhu, "Pa, nu, nutêi te inah ka lêng dawn a nia, ka rei lo ang. Panhnah sil tur ka nei a, ka rei lo ang", chhuah mai ka tum chu, ka pain min ko.


"Khawiah mah chhuah a ṭul lo",


"Pa, nutêi te inah alawm, ka rei dawn lo",


"A ṭul lo ka tih chu, i chhuak lui a nih chuan a pawi khawp ang", ka pa chuan min bêng dawn ta emaw ka ti hman.


"Pa, ka rei-",


"I pindanah lut rawh", ka pindan a kawk a. Kross-a a awm tih a hria mawnile?



A hre hrim hrim.


Thinrim takin, "Ka sawi i hria em?", a ti hrawk a.


"A nu leh pa pawhin an buaipui ngai khawpa ruihhlo ngawlvei a nih bakah, kutkem nei a la ni zui. Hepatitis a vei lo ang tih pawh a sawi theih loh. Hmuh pawh hmu tawh suh, a hlauh pawh i hlau lo em ni?", ka pain a ti leh.


Chutiang chuan ka nuin a hrilh ka ring hmiah.


A ni reng bawk ang, a hmel landan a hlim em mai.


"Min chhang rawh, zanin aṭangin i hmu tWh tur a ni lo. I hria maw?", ka pa thinrim tawng sân lai ber ka tawng mek a ni.


"Pa, ka thei lo ang", ka sawi zo chiah, ka phone a ri a. Nutêi a ni.


Ka pain min lo pan a, ka phone kan inchuh, "Pa, khawngaihtakin thlah rWh",



"Min sual ngam vei nimaw?", tih leh bên min rual a. Chhuatah ka tlu chiang lutuk.


Ka pain min bêng leh tawh! Min benna dawm chungin phe ruaiin ka pa ka en.


Phone a chhâng a, nutêin, "Bawihi, naktukah hnathawh tur a nei a, a haw ta mai. Tui deuhin lo mu sela, zanah chuan panhnah sil suh se a ti che nia".


Ka pa thinrim sen ram chu a dâng tial tial.


Ka kutah phone theh thlain, "Lo haw har suh ang che", a ti ta a. An pindanah a lut daih.


Engkhaw sawi set set loin ka tho thuai a. Nutêi te in panin ka tlan vawn vawn.


"Nutê", ka ti lut a. Kross-a a awm tawh lo.


"Bawihi, eng nge thleng a?", ka nutêi ka kuah nghal a.


"A haw tawh em ni?",


"Haw tawh, i pain a bêng che em ni?",


"Mahse, a na lo", ka nui deuh sak a. Nutêin mawl tih hmel takin min en vang vang.


Ṭhutthlengah ṭhuin, "Bawihi, Kross-a nen ṭha taka sawiin inṭhen mai teh u. Nakinah chuan i pa hian a la vua ang che tih ka hlau a ni", nutêi chu ka haw dawn dawn a.


Ka ṭhatna tur a ngaihtuah avanga sawi chauh a ni mai si.


"Nutê, inṭhen mai mai turin kan invuan lo asin. Tawrhchhuah hun kan la nei mai ang",


"Aw...Bawihte, i patêa nen chusn kan va inanglo tak. Keini chu kan chhungte ve vein min duh a, midangin min tibuai zawk a nia", patêa va melh zauhin, "Lasi chi hrang hrang khan min tibuai kha a ni a", nutêin a ti a.


Patêan, "Khuavang chi hrang hrang an tam ve tho kha a", a lo ti ve bawk.


An pahniha zarah ka nui nghek.


"Nutê, haw leh vat zawk ila a ṭhat ka ring",


"Um, va haw rawh. Bawihi, Kross-a pawh ka sawipui a, sawi ṭha teh u. A tuartu ber i ni si a, i lainatawm em mai".



Pindanah tlang loin panhnah ka sil a, Kum Thar hmain ni tam a tla a, ka thawk chhuak hnem leh dawn a ni.



Kross-a pawhin inhlawhna tur a hmu a, "Bawihi, inhlawhna tur ka hmu, Hotel-ah thleng silin a nia", khi vur vurin min hrilh.


Inhlawhna tur hmu hlimpui ber a ni ang, "Inhlawhna tak tak ka hmu mawle", kan inhmuh tawh chuan a ti ngei ngei bawk.


Lawmpui loh chi a ni lo!


A haw hmain ka thleng hman si lo, a thinrim lo ang chu a.



Zaninah tam deuh silin, naktuka sil ngai lo tur leh, Kross-a hnathawka a chhuah hmaa hmu hman tura ka chhuah theih nan.


Ka inrin loh laiin ka nuin panhnah ka silna chawhtawlh rawn pet thalin, "I pa sawi angin hmu tawh suh ang che. A nih loh chuan ka mize dik tak i hmu palh hlauh ang", ka ding a.


"Mipa i duh viau a nih te chuan, ani lo an tam lutuk. I duh chuan ka zawnpui ang che. Kan chhungkaw min timualpho tu nena in inkawp ka remti ngai dawn lo a, ka in chhunga a lo luh lah ka phal hek lo. I hria maw?", a ti zung zung a.



A hmanhmawh bawk si, ka pa hriat hlau takin a sawi chu a ni ve si a.


"Nu, tu nge in chhungkaw timualpho tu ka hre lo. Chupa nen chuan kan inkawp lo bawk. Tuna ka bialpa hi chu, rethei leh hrehawmna tinreng tuara lo seilian a ni asin.


A pa hmel hmuh chu sawi loh, a pa takngial pawh a hre lo a ni a. A nuin lerhsanin a boralsan zui.


A chhungten an thinrim hrikthlak nana hmangin an vaw(vua) ziah ṭhin. Chuti chungin puitling takin a awm a. Ho takin a nun a hmang lo. Mipa duh viau ila chu maw, Kross-a ka tawn hmain mipa tam takin min be ṭha ve reng tih i hre dawn nia.


Thil pakhat, Kross-a hi i fapa tih ka pa ka hrilh i duh loh chuan min thlawp ṭha hle la a ni mai. Ka pain a hriat chuan, i unaunu awmkhaw loh avanga Kross-a lo piang a ni tih a hriatin a lainat zawkin, nang hi, a laka i zep avang zawkin a chhilh nghek duh mai thei che asin.


Chuvang chuan, Nu, Kross-a nen min inṭhentir tum loin, ka pain min pawm theih nan min ṭanpui zawk rawh. Tichuan, mi zawng zawng kan hlim thei dawn a, a fel vek a ni mai".



Ka sawi zo chu, boruak ka hip lut ṭeuh ṭeuh.



Khatiang em em khan ka ṭawng theiin, sawi tur ka ngah ang tih ka hre lo. Khawimi zozai nge sawi tur ka hriat?



Lungni lo tak si, min hnial dan tur hre si loin ka nu chu a kalsawn a.


Tha khûr der derin Panhnah ka sil.


"Naktuk, khawngaihin lo thlêng tawh hram teh".


Jerome-an min lo hre vek, "U, u Kross-a kha, anu unaunu fapa maw ni a?",


"Shh, lo kal teh", ka bulah ka pawt ṭhu a, "Ngati nge a nuin a sawi duh lo a?", ka nu a dem thu a sawi niah niah.


A bul aṭangin, Kross-a chanchin ka hrilh vek a.


"Chu pawh nise, hre lo anga a awm a ngai em ni? U Mambawihi pawhin a hria tiraw?",


"Ka pa tih chauh lo chuan kan hre vek ta a nih hi",



"Nutêi te pawhin an hria nimaw? U Kross-a chu ka va khawngaih tak em? A u, kalsan miah suh aw, a khua a har thei ngawt ang", Jerome-an a ti chu, "Lutuk, nangpawh, i puitling tawh a nih hi", ka kut vawtin a biang ka tawk a.



A tlanchhe rang lutuk.


Mambawihi lo haw lai thleng pawhin ka la sil a, kawrlum pahnih ka hak thuah tawh.


Kross-a chu, hre rengtu ten hre lo hmak se, pawi tihna ka nei lo.


Keiin ka hria a, a tawk.


Hre tu tam lo se, a ṭha. Ka ngaihtuahna vang chuan ka nui ka nui a.



Amah hretu an tam khan kan buai mai mai. An inluahna lah, in chung lamah nula an tam si.


Kawngka te a kalh thlap loh vaih chuan aw. A lêng chhuak te a nih vaih, ka phuar hlawm tak tak ang.


Ei rawngbawl sawk sawkin, panhnah silfai sa nen ka chhuak a. Ka pa hnenah thudik takin ka kalna tur ka hrilh thlap tho.


Nizan kha a inthiam lo ve deuh a ni ang, sawi nawi loin, "Lo haw har lo la", a ti a.



Dawrah panhnah dahin, hlawh min pe a. Lawmthu sawiin ka kal vang vang.


Taxi aṭanga chhuk thuaiin, step-ah ka tlan thlaa, ka mi hmuh te avanga ding chatin ka tûm hmuk.


Kross-an min hmu a, "Bawihi, eng nge i lo tih dawn?", ta deuh chuan a.


"Eng ti dawn lo e, in boruak ṭha deuh ka tichhia nih hmel a, ka kal leh ang e", nui sakin ka ti a.


A hmeichhiain, "Nih leh aw", min la ti lenghal.



Ka inher hmak, thui ka kal hmain Kross-an min pawt let a, "Min thlah rawh, ka haw dawn",


"Haw lo ang", ka nghawngah min kuah bet. Hetiang hian min ti ziah. Ka ning tawh lutuk.


Min kalpui hlawk hlawk a, hmeichhia hnenah, "Amah hi nia ka sawi, a luhlul a nia aw, a ni em?",


"Ni lo", ka ti hlak.


Hmeichhia chu a nui sen sen a, thik tur tak ka thik a ni!


"Bawihi, Pastor ka sawi kha i la hria em? A fanu a nih hi", Kross-a chu ngei zetin ka melh.


Pastor fate a tih khan naupang tê tê turah ka lo ngai a, fanu nula a lo nei reng chu niin.


"Masangi ka nia, kan inhmu leh dawn nia. Ka haw tawh ang e. Lo inthlêm lungawi phawt rawh u".


In chhungah min kuah lut a, tal chhuah ka tum nasa poh leh min kuah nghet.


"Bawihi, ṭha takin awm teh",


"Ka awm, Pastor chuan fanu a nei chhe lo ngawt mai", a nui chhuak hawk.


"Bawihi, kha nula, a thihna tur thla thum chauhin a nghahnu kha chu thik lul suh. I lainat zawk teh ang",


"Eng nge awmzia?", rang lutukin ka em chho.


"I hmu ve lo em ni? A sam lem vuah te, a taksa chhe tawh tak khuh nana thawmhnaw lian a inbel te kha. Bawihi, kum sawmparuk chauh a nih kha, Pastor-a fate zinga upa ber a ni a, nau pathum a nei, an kum tur zat chhût tawh mai rWh".


Thikna leh lungawi lohnain min man rang lutuk a, chutiangin ka lo chik reng reng lo.


"Dawt i sawi",


"Ṭalh ṭhin hian, Bawihi, a nih leh; a âwm bawr kawh ṭha lah hrawm nawk nawk-", a ti chu, ka sik hlawk hlawk.


Chutianga a ti chu ka thinrim ṭha leh, amah vangin ka pain min bên phah a ni a.



Hmeichhe dang chutianga a sawi chuan min tialh hluah hluah.


"Bawihi, a tawk, fiamthu a nih kha", ka kut a man a.


Rum lutukin ka melh chho vah, "Engtin nge i awmna a hriat theih?",


"Ka hre lo, Masangi sawi dan khan Pastor-a a ṭawngṭai a, ka awmnaah hian an lo kal tawp. Pastor-a leh Masangi an lo kal a, tukinah Masangu khan min lo kan leh a nih kha",


"Lal Isua a va han ring em em",


"Nia tiraw, i lungawi tawh em?", ka nam dawrh.


Min kuah bet leh tho, "Hmeichhe âwm bawr kawh ṭha lah i hmuh apiang i zui zel dawn tihna em ni? Chutiang ka ni ve si lo a?",


"Bawihi le!", ka heh a pet zauh a.


"Keimah vanga kutthlak tuartu hi, engtin nge ka phatsan theih ang che?",


"Ka nutêin min hrilh a",


"Zankhuain ka inngaihtuah a, tawpsan tur chuan kan kal thui tawh lutuk. He dinhmun paltlang thei turin inthlah loin invuan tlat zel zawk teh ang".


Thu kan thlung thar a ni ringawt.


Inah chuan boruak eng pawh tawng ila, Kross-a bula ka awmin ka hre tawh ṭhin lo.


A bulah chuan ka hahdam a, ka thawl huai zel.


Masangi chu min tlawhpui a, ka hmuh hmasak berin ka lo chik lo tak tak a ni.



Lainatawm reuh lutuk!


"Ka pa, min ṭawngṭai rawh", kan awm laiin vawihnih a sawi hman.


A pa, Pastor pawhin a ṭawngṭaisak zel.


Cabin-ah an awm a. Pastor-an Kross-a nen an inhmuh dan te leh, an ina a hruai haw te a sawi a.


Masangi nat dan te, thla thum chauh dam tawh tur a nih te, Pa a nihna angin lungngai takin min hrilh ve.


Nimahsela, Lal Isua neitu leh, Lal Isua chhinchhiah a nihna vang erawhin, pawm dan a thiam a.


A chhungte thlamuana lawmthu sawina ṭawngṭai nei ṭhintu a ni.


Ka lo suangtuah ṭhin, Pastor nun dan tur dik pu chhuaktu a ni. Ka pu Pastor Lalruatdika Pautu hi!


Kum a Thar a, Hotel-a a thawh bakah, zanah hian Ek paih motor zuiin Kross-a chu a inhlawh leh ṭhin.


A inhlawhna hmuh hi a zahpui ngai lo a, lawm tak leh taima takin a thawk ṭhin.


Keipawhin zahpui ahnekin ka chhuang a, ka tawng lo ang tih ka hlau.


Amah aṭang hian thil tam tak ka zir a ni.


Ka pa hnenah Kross-a inhlawhna te, kan pahnih inkar dik tak zelin ka thlen ṭhin a.


Nitin a nêm tual tualin ka hre mai. Sawi chhuak lo mah se, Kross-a chanchin a hriat dan kha a awih bik lo.


Ka nuin chhe thei tawpin Kross-a a chhuah a, a dik lohzia amah Kross-a ngeiin a nemnghet zel chu a ni.


Mak tak maiin Mambawihi a inrawlh lo a, ka nu chauh a ni tawh.


Show post links
Top