Thinlungmawlpa BY Cck Lalchhuanawmi (Completed)

[Ngaia]

Thinlungmawlpa
Chapter-24
Ziaktu: Cck Lalchhuanawmi


Chantawka lungawi hi maw, a lo va har tak si em!


"A va nuam tak, i zarah chawhmeh tui tak tak kan ei reng dawn a nih hi. Ka va han puar tak em!",


"Ka awm tawh a, tui tak tak i ei zel dawn nia", thlêng sil.pahin ka ti a. Hmun phiat pahin Chhingpuii chu a nui har har.


Mi fel tak a ni, Kross-a tan pawhin a ṭha dawnin ka hria.


Thikna erawh ka nei a ni. A vannei chungchuang takzet.


Kohhran Ṭhalai hnatlan tur te an sawi a, a inkhawm tawh a ni ang. Lal Isua a pan tawh a ni hrim a, chumi vang pawhin ka lawm.


Hlim turin ka duh a, a hlimna ṭawmpui ka tihtur a ni.


Chhingpuii pawh mi fel tak a ni a, ka lawmpui hle tur a ni. Chhingpuii a chhuah lawk avangin Mambawihi nen kan inbia a.


"Ka thawhna tur School hi Kross-a ta a nia",


"Awiii!", a lo ti duah. "Bawihi, in inhmu tawh em? Engtin nge a awm? Nangpawh engtin nge a awm? Awi, ah, kum tam tak hnuah in inhmu chauh si a, in inngai dawn tih chiang sa, in inhmuh ve leh in inkuah em, film ang hian? Tunah khan in awm dun em? Maw, Bawihi han sawi vat teh", Mambawihin a ti sek sek.


Min dawp a ni hawt alawm.


Ka chhâng thiam lo, bul ṭan dan tur ka hre lo. "Englo", ka ti mawl tawp a.


Mambawihi lahin hriat a châk bawk si, "Ka bulah a awm", han tih ka duh a nia aw.


"I hriat hunah chawh min ti ngawt ang", ka thaw hap a, "Bialnu a nei tawh", ka ti chu, "I va han chawh tak, i chawh e. Nakinah chawhtawlh lianpui ka lo thawn ang che", a ti chiam a.


Min tinui nasa lutuk, min tithawl zawkin ka hria.


"Bawihi, a pawi lutuk", a lo ti chuai ruih, "Ni lo e, a ṭha lutuk alawm. An inhmeh lutuk asin, inkawp awm reng an ni. A hlim a, nuam a ti a. Chu tluka ṭha a awm lo".


Mambawihin, "Ka sawi kha, a nu a chhun a nih chu. Kan nu leh pa te hi kan chhun ṭhin a, an mize ṭha lo lai hi kan chhun tam zawk lehnghal", a lo ti a.


A sawi dikna chen pawh a awm ang, mahse, Kross-a chu ka ring phal lo. A chhe zawngin ka ring phal ngai lo.


Kei aia ṭha a hmu a, a ṭha, a ṭha lutuk.


"I thawk dawn nge, i lo haw dawn?",


"Ka hre lo le, naktukah ka ṭan nghal dawn a, ngaihchan phawt ka ti deuh",


"Lo haw la ka ti, nang mah i intihrehawm mai mai", min duhsak takin a lo ti a. Ka thleng chauh a ni a, haw leh nghal chu a ṭhat ka ring lo.


Bakah, Kross-an engtin nge a tih ang?


U Malawman duhsak takin min sawi sak a ni a. A zahawm.


Han ti beuh beuh ila, ka tuar thei dawn lo a nih leh, ka haw mai ang. Chutiang chuan Mambawihi ka hrilh a.


"Ni e, chak takin awm ang che, i dawih thei lutuk a. Ka hlauh ber zawk chu, Kross-a vangin i mualpho ang tih hi ni. Amah avangin hetah pawh lunglêng reng rengin i awm a",


"Mualpho lo ang, puitling ka ni tawh a, insumtheihna tlachham pawh ka ni lo a", inring tawk takin ka han ti a.


Amaherawhchu, ka thusawi mah nise ka chiang bik lo.


Ka ngaih em em ka hmaah a ding a, ka bulah a awm a. Khawih theih leh biak theihin a awm tawh a.


Insum thei loin mualpho mai pawh a awl dawn.


Second tina ka inven a ngai dawn a, dangtu an awm tlat si a. Rem lohna a awm tawh.


A chi tawh lo, kan inkarah nunhlui chawhthawh tir chi a ni tawh lo.


"Bawihi, i awm em?", pindan aṭangin ka chhuak a.


U Malawma ka hmu chu lawmthu ka hrilh leh mawlh mawlh.


"A ho lutuk, i duh ka ring a, ka lo be vat che a nih kha",


"Ka lawm takzet a ni, sawi ngaihna pawh ka hre lo. Eng mah tihsak theih che ka nei bawk si lo, ka inthlahrung zawk e a", ka ti sep sep a.


U Malawma a nui sâwng, "Inthlahrunna tur a awm lo, mahse, hrilh tur che ka neih kha i la hre reng em?",


"Hria e, mahse, ka hre tawh. Hemi hi tiraw? Zirtirtu hna hi?", a ni lo tih kei pawhin ka chiang mai sia.


Khami ṭuma min hrilh tur kha eng tak ni ang maw?


U Malawman, "Hre ṭhelh ve e, zaninah chuan ka sawi rih lo ang. I lo thleng chauh a, i thinrim hian naktukah min hawsan daih palh ang", a ti ta zêk a.


A nui hauh lo, a tak run mai a.


Ngaih a tiṭha lo zawk. "Zaninah sawi rawh, naktukah chuan ka ngaithla dawn lo che. Kan thawhna a inang dawn lo bawk a", ka ti leh sep sep a.


"Hnatlannaah i lo kal ve ang chu mawle. Ka lo sâwm ang che", a ding hluai a, "Chhingpuii chu mutsan daih rawh, lên a cheh lutuk. A bialpa hi amah zawkin a va rim ṭhin, a veng chawt a ni ber a, Kross-a ka khawngaih letling. A nih, muttui, naktukah ka lo sâwm ang che".


Pawn thleng ka thlah a.


Chhingpuii chu ka mutsan tak tak. Mahsela, ka mu meng kur tho. Chhingpuii tan chuan a nuam ngawt ang le.


Intithei viau pawh nise, a awm lutuk.


Veng chawt pawh nise, a tisual lo ang. Kross-a zûn ka chang tawh a, tuar thiam a har em asin!


Tunah ngat phei chuan Thingtlangah a awm a, a hausa pawl a ni dawn tih a chiang a. Khuaa nula zawng zawng mit a la dawn.


Ka ngaih thu hrilh chiam ka châk lutuk!


U Malawman School lama kal turin min sâwm a. Chhingpuii te nen kan kal ho.


Thingtlang ni mah se, tlem chuan a phuisui ve deuh. Concrete building pahnih pathum vel ka hmuh theih chu a ni a.


Primary leh Middle School chauh a awm a, Sawrkar a ni bawk.


Kan thawhna nen Primary School pahnih a awm a ni a. Private a ni a, belhchian a dawl ang chu maw?


A neitupa ka hre chiang a, sawiselbo chu a ni thei lo anga, fak tlak erawh a ni thung ang.


Ka hawi kual chhen a, Thingtlang khaw pakhat ang kha chu a ni lo nain, eng sulhnû emaw chu min fan tir a ni!


Kawng a khu a, metal lo chu heti tlat zel. Metal turin hma han la thuai thuai se.


Chhingpuii nena kan awmna in pawh Assam type a ni a. Thla khatah 1500 a ni a. A chanvea pek ve ve a ni mai.


Kalkawngah Chhingpuiin, "School dinna hi a la rei lutuk lo, kum hnih chauh a la ni. A tir chuan VC ho nena inṭawmin, hlawh pawh NREGS leh Monthly fee aṭangin kan dawng. Mahse, hmânni aṭang khan Official takin Kross-a kutah a awm tawh", nui ver verin a ti a.


"Insawithei ṭhin sia aw", u Malawman a ti a.


"Insawitheihna tur i neih ve loh vang", Chhingpuiin a ti zêk. U Malawma a nui hak ringawt.


School kan thleng a, ka thaw huai. "A nih u aw", u Malawma a kal hrang ta a.


"Middle School chu khaw pawn deuhah a awm a, a la hla tham lutuk. Chuan, Primary School pakhat chu kan lo kal pel tawh", ka bu zeuh.


Thawktu dangte nen inchibaiin inhmelhriattirna kan nei sap sap a.


Headmaster lo thlen ve leh a Room-ah kan inkawm.


"Sir, min lo hrethiam la, thil pakhat ka lo zawt che",


"Eng nge ni ta?", a thauin a dul a kiar a. A chum buang a, a duhawm her hawr lutuk.


"School neitu te nena inkawm a ngai ang em?", ka ti sep. Hei hi ka huphurh ber a ni.


Headmaster chuan, "VC ho nena ṭankawp lai chu nise a ngai ang. Mahse, a neitu hi pakhat chauh a ni tawh a, ka va biak khan a ngaih loh thu min hrilh a. Kei mah nena kan inkawmna hi a ring nghal a nih chu", a ti a.


Ka thaw huai huai.


A fala Kross-a han hmuh tur chu ka ngam thlawtlo.


Ka nihna phu lo leh inhmeh lo lutukin Math ka zirtir dawn! Ka nui tawp, "Chhingpui, inthleng ang", ka ti hial.


Chhingpuiin Mizo a zirtir a, Math hi chu...


Primary hi chu a la awl a, ka vannei zawk, "I tithei lutuk ang, i bulah ka awm tlat dawn alawm", Chhingpuiin a ti bawk si.


Hotu lam te ka hnial ngam lo, a hna duh zawk ka ni a. Duh duh thlang theiah ka la ding lo.


Ka tithei em em ang.


Tun hmaa naupang la kawi ngai lo ka nihna a lang chiang thei lutuk. Ni khatna chu ka tlingtla thei ṭawk a ni ber e.


Ka ṭang lutuk a, ka hah vek.


Zirtirtu ni tur chuan dawhthei leh mi zaidam tak nih a ngai tih, a ni khatna aṭangin ka chhar nghal.


Zirtirtute kha an lo va fakawm tak! An lo fel zawk e. Anmahni vanga tun thleng thei kan ni a.


Thu kan awih loa min hauh chang nei mah se, an lo zaidamin an lo dawhthei vek a ni. Hauh ngaiin kan awm ve zel bawk a. An thu kan awih kha chuan min duat theih em kha.


Zirtirtute pheikhawk ka han bun ve ta a, a chhung lum leh nuam deuh tur kha a lo ni hauh lo.


Bun tawk a har a, a kalna kawng a khirh si. Min hruaina kawng ata kalpen mai pawh a lo awl dawn a ni.


Inpumpekna a chawh tel tlat bawk.


"Chau em?",


"Tlemin, a hahthlak khawp mai", ka ti a. Chhingpuiin, "Ṭah hi a chhuak thei a nia aw, vuak tham an ni si lo. Thinrim taka ânkhum an ngamawm si loh, bei a dawng thei a nia aw", a to nuah nuah.


A thawk rei ve tawh a, a thusawi chu a dik ang.


Naupang 150 lai kan nei reuh si a, a harh pawl chin ṭhah an la ni zui. U Malawma a awhawm deuh reuh.


Anni chu lungfing chin ang an ni tawh a, a nuam phiang ang ti ila, a hahthlak ve tho ang.


"Bawihi, tlaiah Ball bênnaah kan kal dawn nia, chaw chhum vat vat ila", ka inthlak zung zung a.


Chhingpuiin hmun a lo phiat, chhuat nawhna ka chuh thuai a, "Ball bênnaah maw?",


"Kan bêng ziah, mipa ho an inkhel thung a. A nuam thei lutuk, i lo kal ve dawn nia, ṭhian tam tak i neih phah ngei ang", Chhingpuii chu a nui sen sen a.


Hnial loin phur takin ka chhâng a.


Chhuat nawh zawhah rei vak lo ṭhu chawl dunin, kan chhungkaw chanchin te inzawtin kan sawi a.


Nuhrawn ka hrawn tih ka sawi lo, "Unau pathum kan ni e, kei a upa ber, kan milai hmeichhia a ni a, a naupang ber mipa. A naupang ber a sâng ber a, a upa ber hi ka tawi", ti ringawtin ka sawi a.


Ka nu leh pa chanchin ka sawi vak lo.


Chhingpuii te pawh unau pathum an ni a, a naupang ber a ni bawk. Hmeichhia vek an ni thung a.


"In awm maw?", u Malawma a lo dak duk duk.


"Saum kan nei lo, lo lut mai mai teh", Chhingpuiin a ti khar khar a. U Malawman, "Saum ka duh lo, Chingal in nei zawk em?", a runluih nge mawni?


Chhingpuiin, "Soda kan nei", a ti vah a. Nui hakin a lo lut.


Dawhkan hnuaia chair pawt chhuakin, "Chawhmeh in nei em? Min lo suah teh u, mahni chauha awm chu, chawhmeh neih ṭhat a har", a ti chawhnu ruih a.


A intikhawngaihthlak kual kikawi nasa lutuk.


Chhingpuiin min lo en a, ka dar ka kân ak, "Zanin chu, chaw lo ei la, Bawihi hian chawhmeh siam a thiam lutuk. Ei ve turin ka duhsak che", Chhingpuiin a ti ta a.


U Malawma a khi vur vur, "Chuti na na na, ka lo ei dawn nia", a ti reuh a.


Chhingpuii nena an titi ka ngaithla zawm daih. An titi tui lutuk a, inrawlh a nuam lo letling.


U Malawman, "Inkhelh ka duh si a, ka va haw ang e", tih leh chhuah a rual a.


Kei ni pawh, Ball bêng turin kan chhuak ve mai bawk. Field zau tawk an lo nei reng niin.


A sirah Volley Ball bênna tur a awm a, a ṭhenin an lo bêng tawh.


"Kha, Chhingpui, khawi lama mi nge i lo hruai a?", an lo ti luai luai a.


Field kotlanga ṭhu, an inkhelhpui tur an ṭhiante nghaka ṭhu mipa ṭhenkhatin, "Chhingpui, ka hual tih lo hrilh teh", ti tawk an awm.


Lû an tihai dawn.


Hmeichhe pakhat hian, "En liam mai mai rawh aw, Thingtlang tlangval zia a nih saw", a lo ti a.


"Mercy ka nia", tiin min chibai vat bawk.


Chhingpuiin, "Kross-a farnu a nih hi, Mercy, i u School-a Zirtirtu thar a nih hi, Bawihi a nih hi", a ti chu, mak ka ti lutuk.


Kross-an farnu a nei lo reng reng.


"A nih chu, inchibai ṭha leh ang", Mercy nen kan inchibai ṭha leh. "Ka u dawn lo che, kei aiin i upa tih hre tho mah ila", Mercy chuan a ti leh a.


Kan nui dual dual.


Bên ka thiam loh avangin a en pawlah ka lo ṭang thung.


Ram lam aṭangin mipa ṭhenkhat an lo haw a. Mipa inkhel an ṭan nghal, a hnuah chuan chu chu kan en ṭhup. Zawn ruk ka nei, ka hmu mai lo.


"Kross-a hi khawiah nge?",


"A lo haw rih dawn lo", an ti a.


Pawi ti takin, "Aaa", an ti dual dual. "Kross-a a awm loh chuan ka en peih lo", ti tawk an awm.


U Malawman, "Kross-a a awm loh chuan min ngam lo", a han ti a. A pawlte nen an nui nghek nghek.


U Malawma te hian kawr an phelh a, Kross-a pawl niawm tak ten kawr an phelh lo.


Kawr ha leh ha loin an intum ṭhin niawm tak a ni.


"Ngam ele, ngam rapthlak", an ti hluk hluk a. U Malawma leh a pawl ten, "Ngam leh ngam, ṭan ila", an inhrosa thur thur.


"Ni e, Kross-a awm lo pawhin han ṭan tawh teh u", upa lamin an lo ti a.


Volley ball bênnah YMA ṭhutthleng eng emaw zahin dahin, naupang leh puiting thlengin an ṭhu khat a.


Field kotlangah lah kan ṭhu khat vek.


"Kross-a hmingin kan chak dawn", kawr ha hoin an ti a. Refree-in hamrik a ham, inkhel an ṭan a.


Kawr ha ho ka ṭan ru lutuk, Kross-a pawlte an ni tlat a.


Pi leh pute hlei hlei an ṭang.


Kross-a an lam tawp hleitheilo. Mercy pawhin, "Ka u chu awm se aw, an va chak dawn lo rua em?", a ti ve nasa mai.


Mercy leh Kross-a unau an nih chhan ka hrethiam mai.


Lawkin, Mercy hi a farnu a nih chuan, Mercy pa hi a pa a ni ve tihna a ni dawn a. Chumi awmzia chu, a pa dik tak nen intawngin, a pain a pawm tihna mawnile?


Mercy chu ka en ṭhin a, han zawh tlang tawp ka tum zet a, ka inthunun hram hram.


Kross-a leh a pa dik tak an intawng ta tihna a ni ang em?


Kawr ha lo, u Malawma leh a pawlte an chak a. Kawr ha ho pawl an ngui nghiai.


Mahsela, u Malawma leh a pawlte hoin a chak lo te tihlawm dan an thiam a. Inkuahin an nui dual dual.


"Kross-a awm lo chu aw", an ti an ti hlawm a.


He hmunah chuan, Kross-an ngaihpawimawh a hlawh ve ta!


Ka lo hlim veng veng. Kross-a tan a lungawithlakin a nuam dawn lutuk. He hmun ngei hi ni, a lo zawn ruk ṭhin.


"Pa nei lo",

"Hnam nei lo", tia chhaih nawmnah a hlawh dawn lo a. Hmuhsit tuar loin, chhungte kut aṭangin vuak a tuar tawh dawn hek lo.


Chutiang ai chuan, zah leh fak a hlawh a, ngaihpawimawh a ni bawk.


Kross-a tan chuan, Vanram tenau a ni ringawt. Ka lawmpuiin, ka va hlimpui tehreng em!


U Malawma chaw ei turin, a intihfai zawh rual rualin a lo thlawk lut a.


Chhingpuii nen kan chhaih kan chhaih.


"Mercy khan an ina kal turin min hrilh tak e, a puan zawrh en turin min ti tlat a. Pawisa neih loh nen", Chhingpuii chu a ner salh a.


U Malawman, "Mark tihṭhat a ngai bawk sia, pawisa nei lo mah la, i kal a ngai", nui sâwngin a ti a.


Thleng sil hmunah ka nui ka nui.


An pahnih hian an inngamin, an inṭawngkhum sawk sawk a, an haw(hua) lem lo chu a ni pakhat.


Chhingpuiin, "Bawihi, ka va kal lawk aw, ka rei lo ang", a ti sep a.


"I hnatlang dawn lo em ni?", u Malawman a ti chu, "Ni tak, Bawihi, hnatlannaah ka tlang mai ang. Min lo mutsan mai rawh aw. Aw, ka va buai tak", Chhingpuii chu a phun bul bul.


A nuih a za a ni ang, a nui har har zui a.


"Bawihi, kei pawh ka kal. Kan bân hmat leh ka lo lêng", u Malawma pawhin a ti a.


An pahnihin an chhuak fel ta.


Kawngka ka khar ṭha a, tih tur ka nei tawh lo chu, Math Zirlaibu ka enlawk.


Han belchian tak tak chuan a awl miah lo!


Kawngka kik thawmah pindan aṭanga chhuakin ka hawng a, Kross-a lo ding reng chuan min tiphu chiang kher mai.


"Chhi, Chhingpuii a awm lo a", ka ti thla ngawt a. "A chhuahna a rei tawh em?", a tih chuan, "Rei ve deuh tawh, hnatlan tur kha", ka ti a.


Bu nghatin, "Ka lawm e", a ti thawp sat a. Ka hmaah a ding a, ka mualpho loh nan ka ṭang nasa kher asin.


Ka kut pahnih phar chhuaha a taksa ka pawm loh nan ka hnungah ka suih tlat.


Kross-a chuan, "Bawihi, nuam i ti em?", reilo tê tak tak chiah ka hawi chhuak. Pawnah a ding a, kei, in chhungah.


"Awm rei hunah a hriat mai ang", ka nui lui deuh a.


'Bawihi' tia min kohna te chu, ka beng aṭangin ka chhuahtir phal lo. Kum tam tak hnuah min kohna âw ka hria a ni si a.


Chutah, "Helaia i lo kal hi SI-an a phal em ni?", a ti ta.


Thâw dêp dêpin ka en. SI, Alex-a a sawina mawni dawn le?


"Alex-a maw?", a kiai sak a, "Chu chu a hming maw?", insehruh niawm takin a khabe ruh a che dat dat.


"Ih-",


"Ka kal ang e, mangṭha mai", tiin a kal ta daih.


Che chang loin a kal ka thlir a. Alex-a chu engtin nge a lo hriat theih zawk?


Min hmu a ni ngei ang, lêng tur khan lo sâwm lo ila ṭha tur. Min hmu pawh nise, SI a ni tih a hriat theih dan tur a awm lo.


SI a ni tih engtin nge a hriat?


Nutêi, e he! Nutêin a hrilh emawni dawn?


Kross-a hi a lo kal tawh anga, nutêin a lo hrilh nge ni dawn? Nutêi pawhin nuthlawi zu zuar a luhkhung tiin min hrilh a nih kha.


Phone ka ban thuai thuai.


Nutêi number ka hmet chhuak a.


Show post links
Top

[Ngaia]

cThinlungmawlpa
Chapter-25
Ziaktu: Cck Lalchhuanawmi


Nutêi number ka hmet chhuak a.


Min chhâng thei miah lo, vawithum a ri ral ṭhak. Inbia pawh ni ila, eng nge maw ka sawi chuan ang le?


Phone-in ka inchhû kar kar, "Arhh, buai lohna turah ka buai peih lutuk".


Mahni leh mahni ka inhau. A dik chiah, buai lohna turah ka buai mai mai a ni. Duh leh bialnu nei se, a duh phawt chuan sawm pawh nei rawh se.


Ka lo buai chiamna tur a awm lo.


A hlimna tur baka duh ka nei chuang lo, mahni ka inhrem mai zawk a ni. Chet chhiatna tur a awm lo a, mualphona tur lah a awm hek lo.


Kei mah zawk hi, inenfiah ka ngai a ni e.


Chhingpuii hnatlang bâng lo haw thlengin Math Zirlaibu ka inzir a. A intihfai zawh thlengin ka nghak.


U Malawman School kal turin min lo sawm a, Chhingpuii nen an titi char char.


A changin u Malawman a kuah thuak ṭhin a, Chhingpuii pawhin a bâna han kuah deuh ren rawn chang pawh a nei.


Kross-an a hmu ang tih ka hlau. Mahse,,a thikin ka ring lo, u Malawma nen an inkawmngeih hmel em mai.


School hi lei ringa sak niin, a chung rangva a ni a, a bang tile. Partition wall erawh plywood a ni a, awlsam taka tihchho theih turin an siam.


Naunawi tih takah, Nursery aṭanga Pawl khat chu dimdawi an ngaih bakah, kawmnel thiam an ngai a. Intlangneltir a awl ang bawkin, inhuattir pawh a awl.


Choka awmin, thingin chaw an chhum a. Tiffin pai a ngai lo.


Keini Zirtirtu te pawh hian tiffin pai loin chaw kan ei ve mai a. Ṭhenkhar erawhin, ina chawhmeh an pai deuh fur ṭhin bawk.


Kross-a ka hmuh zan aṭangin kar khat a liam a. Khami zan aṭang khan hmuh leh tik ka nei ta lo.


Chhingpuii hian a sawi ngai si lo, a bialpa a nih chuan a ngaih thu te sawi ve awm tak hi a nia.


U Malawma nen an inkawm char char zel. Zan rei tak tak thlenga inbiak an ching a, Chhingpuii a phun sep sep zel.


Tlaiah Ball bêng tur leh inkhel tur te leh inkhel en tur tea chhuah zauh ka ching ve a.


Kross-a ka zawn ka zawn pawhin ka hmu ngai lo. Mercy zawh ka châk thei a nia. Sumo te hi a khalh ve zawk dawn nimaw?


U Malawman chaw a lo ei leh a, "Zanin chu, Kross-a a lo haw tawh ang chu a? A ngaihawm tawh e", Chhingpuiin a ti ta a.


Min tilawm thei nia mawle!


A bialpa chungchang a sawi avangin ka lo lawm ve ringawt. Ka zak theilo tak tak a ni.


Chhingpuiin a ngaih ai daihin ka ngai zawk mai thei a ni.


U Malawman, "Ramah a thang rei si a, a lo tar haw bûaiin nia ka rin", a ti sup a.


"Ramah eng nge a tih ṭhin a?", ka zawt tawp, hriat ka châk em a ni.


U Malawma zawkin, "Lo zau tawk a nei a", a ti chauh a, Chhingpuiin, "Huan zawk alawm", a lo ti.


"A inang reng", u Malawman a ti hmiah a. Chhingpuii a ner nak.


"Huanah chuan hnathawh tur a ngah lutuk, a ei zawnna pakhat a nia lawm. A thawkrim tak tak a ni, ei zawnna pahnih lai a nei tho si a,,a duhâm reuh em mai", Chhingpuii tiel fahranin u Malawman a han ti a.


Chhingpuii ngaihdan a ni lo lutuk.


A chhâng lem lo naa, u Malawma a en nô lo lutuk.


Chaw ei khamah naupang chungchangte sawiin kan pathumin kan titi a.


Rei a ni lo, Chhingpuii phone a ri a, "Aw le", ti chauhin a chhâng a. A dah daih.


"Nang kha", u Malawma a en a, "Khawiah nge i phone i dah?", u Malawma a indap rak rak.


"E he! Lawkin, inah a awm. E he!", u Malawma chu Sava ang mai. A E he! Kiu vawng vawng.


Chhingpuii chuan, "Bawihin a bual â zo tawh che a nih kha", a han ti a. A âwah chuan thikna a tel tlata ka hriat pek chu!


"Awihawm loh", ka ti thuai a. "Tak tak alawm", Chhingpuii chu nui ar ar mah se, a hmel a dur khup thung a, thiknaa min melh chu, hmuh a nuam lo lutuk.


Kross-a nen an inngaizawng emaw tia, chutia u Malawma nen min thik ta chu, ka bo.


U Malawman, "I sawi dik chiah, Bawihi hian min bual â zo vek tawh a ni e", a ti leh hmiah.


Chhingpuii hmel hmuh a nuam lo lutuk, "Ṭha lawm", ti hmukin, Chhingpuii chu a tho ta daih.


"A mak thei em mai!", u Malawma lah a nui tawi tak. "Engah mah ngai suh, a tihdan a nih kha", a ti leh a.


Pindanah Chhingpuii a inkalh khum daih sia, ka thlêm ang em aw?


Mahse, min thik bawk si. Eng nge awmzia ni ngai?


Kawngka kik thawm ka hria chu ka lawm kher mai. "Lo lut rawh", u Malawman a ti a.


A lo lut chu, Kross-a a ni!


"Hlawl mai a! Ramah i inbengbel ta emaw kan lo ti ta mai asin", u Malawman a han ti a.


Kross-a chu khi sukin, "Nakinah chuan, inbengbel pawh a ngai ta ve ang", a ti thawp sat a.


Chhingpuiin a lo hria a ni ang, a lo chhuak vat, "I lo haw tawh maw?", Kross-a bulah ṭhu zatin a bânah a kuah a, naupang ṭawng fiah lo ti ila, fiah tho si, nu leh pa te hnenah intinautê taka thil kan dil ang mai hian, "Ka lo ngai tawh lutuk che a", Chhingpuii chuan a ti zui a.


Ngaih a ngam ta alawm.


Ka hawi chhuak zeuh a, Kross-an min en vung vung. Ka kun leh daih.


"Bawihi", ka hawi chhuak leh a, "Eng nge ni ta?", ka nui lui a.


"School chu ṭha i ti em?", nui seihin ka bu ringawt.


Mualpho lohna turin ka ṭang nasa lutuk. Chhingpuii chu ka thik a, Kross-a bula a ṭhu leh, a kuahte chu hmuh hrehawm tak a ni.


"Ka in khan min lo ngai tawh ang, naktukah kan inbe dawn nia", u Malawma a ding a.


Kross-a pawh ṭhu ngilin, "Kan haw rual ang chu, mut hma ka duh", a ti a. U Malawman, "I lo haw nghakhlel an awm kha, inkawm tlaivar rawh u", min lo en a, "Bawihi, a nih, muttui aw, Special takin", a ti a.



U Malawma haw ta chu, ka ngei ru lutuk.


"Kar khat em em lo haw loh chu, ngaih i tiṭha lo alawm le", Chhingpuiin a ti hnáp a.


Ka dinhmun a laklawh a nia aw.


"Phone kaltlangin chanchin kan inhrilh ṭhin tho kha", Kross-an a ti chu, a rukin ka phawk hra mai.


Phone a nei tawh maw?


A nei ang, nei lo se a mak tawh zawk ang chu le.


An inpawm lo chauh chu a ni si a, ka thikna mitmeng an hrethiam ang tih mawlh ka hlau.


Ka tho tharh a, "Khawiah nge i kal dawn?", Chhingpuiin min lo zawt vat.


Chhuanlam sawi tur ka hriat chhun, "Pencil lei lawk a ngai a", phone ban chungin ka ti a.


Pencil leina tur lain ka chhuak daih.


Dawrah kalin pencil ka lei a. An hlim dun ngawt ang chu.


In tin a la êng, mut hun a la ni lo bawk a. Naupang lehkha zir thawm hriat tur pawh a awm.


A ṭhen chu mipa leh hmeichhe nui dual dual thawm te a ni a. An inrim hlawm a ni ang chu.


Khawpuiah chuan an inrim pawhin ka hre lo.


Khawlaia Ui bauh nguah nguah te an awm a, ṭhenkhat in kawtah vawk chaw chhum te.


Tv en thawm te, motor tlan zeuh te pawh a awm. Thingtlang tak tak tia sawi tur ni lo mah se, Thingtlang khua a ni tih chu a la hriat tho.


Kan in thlen hma hian Street light a awm a, chumi hnuaiah ṭhutna an siam bawk. Tah chuan ka ṭhu a, Mambawihi nen kan inbia.


"Bawihi, modelling lamah kal loin, hnathawh tur ka zawng tawh dawn",


"Zawng lo ang, beidawn hma loh tur. Hlawhtlin hun a awm dawn alawm, nghah peih a ngai ve a", ka thiam angin ka fuih a.


Mambawihi tan chuan a tawk zo lo leh ang.


Kan inbiak zawhah nutêi ka be leh a, "Missed call ka hmu reng, ka hman lo thei lutuk a, i dam maw?", a lo ti a.


Kross-a chungchang zawh ka duh naa, ka ṭhulh leh ta zawk.


Zawtin min hrilh pawh nise, siam ṭhat theih a ni tawh chuang lo. Tihian, kan inkar a tawp fel ta der a. Inthlahna thu inhrilh tawn ngiai nguai aiin a ṭha mai.


Nutêi te nen kan inmangṭhaa, Nanaua a phur fal, "Muttui mangṭha ṭha ṭha ṭha ṭha", a lo ti duah a nih kha.


"A tawk, a tawk", nui hak hakin ka ti a. Kan inmangṭha fel thei lo ṭep a ni.


Kross-a a la awm ngei awm si a, heta ṭhut reng a chi chuang si lo. U Malawma inah kal dawn ila, a rem bawk si lo.


Mercy te inah kal ngawt ni ila, sawi tur ka hre dawn miah lo.


Tuilai rapin ka awm chiang lutuk.


"Thig ṭha chi a ni bawk a, a fiah ṭha ang chu a", pencil ka thlêk kual a. Pakhat chauh ka lei a, pathum lei ila ṭha tur.


Tlai khawhnuah hian ka hre chauh mai zel si a, huiham, ka tar tawh a nih dawn hi.


Ak ṭhain ka ke ka thên nghalh nghalh, "A va nuam awm ve", tihah ka tawp chawt a.


Muangchangin ka hawi chhuak a, ka ṭang ṭung mai.


"Ngati nge i lo chhuah a?", ka ti thei hrâm.


Min en vung vung mai si a, ka rilru puthmang a hriatthiam loh nan a mitah tak ka en duh lo.


Ka hawi kual a ni ringawt.


A ṭawng dawn lo emaw tih hnuah, "Bawihi, ka ngai thei lutuk che", ka inthlahdul rawih rawih.


Chiang takin ka en chho kalh a, chiang tak bawkin min en chhuk ve run.


Ka ngaih thu ka hrilh ve mai dawn mawnile?


Amah bawk chuan, "Bawihi, ka tlai ta si a. Pawi ka ti lutuk".


Kross-a kal hnu pawhin ka la ṭhu ta reng, tlaiah inngaiin pawi a ti a!


A tlai reng reng lo asin, kei mah zawk a nih kha, mipa dang pindanah ka lut a. Zu no ka la dawmpui zui.


"I tlai lo asin", tia auh lawm lawm ka nâp a.


Mut hmunah pawh, "Ka tlai ta si a, pawi ka ti lutuk", tih thu chuan min deng nawn awn awn.


A tlai lohzia hrilh turin han huaisen ila ṭha tur.


Hrilh pawh ni ila, a ngaihdamna dil ka hmabak a, min ngaidam duh dawn em ni?


Min ngaidamin kan inkar ṭha leh ta se, Chhingpuii hi! Engtin nge ni ta ang?


"Bawihi, i ṭap em ni?", chik zetin min en a. Kan thawhpui Êngi chu nuihin, "Ṭap lo e, nizanah ka nau nen kan inbiaa, min tilungchhe deuh alawm le", dâwt ka hrilh a.


Êngin, "I ṭah(ṭap) reng chu", amah pawh a nui.


"Tlaiah Volley ball bêng turin lo kal rawh aw, ka lo sawm ang che. Mercy-in a sawi ṭhin che a, i thiam hmel a ti thei lutuk. Vawikhat tal chu lo tel ve rawh",


"Kei aiin i thiam zawk ang, bakah, ka kal fo alawm. Ka hmu ngai miah lo che", ka ti sep a.


Office-ah hian ka bul chiahah a ṭhu a, kei ka vannei, tukverh bulah ka ṭhu.


Êngin, "I lo thlen hnu hian ka chhuak ngai lo zawk alawm. Mercy lel lawl saw lawm, ei rawngbawl a peih lo thei lutuk hi, a pit ru ṭhin pek mawle", a ti chu, ka indang hman lo, ka nui hak.


"Mercy saw i nau tihna em ni?", la nui reng chungin ka han zawt a, "Ni ve e, kan unau zinga naupang ber. Mercy u chiah ka nia, ka u teah hmeichhia pahnih an awm a, pasal an nei tawh thung. Chuan, kan unau zinga upa ber chu i hriat kha, u Kross-a hi a nia", Êngi chuan a ti sep sep a.


"In va rual reuh, unau in tam sia, a nuam viau lo maw?", chu ai thui ka zawt ngam lo.


An upa ber Kross-a chu, ka Kross-a a ni lo ti dawn mah ila, an Kross-a ngeiin, "Bawihi, ka ngai thei lutuk che", min ti mauh mai si.


Kross-an a pa dik tak hmuin, chhungkua a nei taah ka ngai.


A ruh lang rawta zawh a inthlahrunawmin, a nuam lo.


"Nuam lutuk, hmeichhe rual tih takah han inhnial laih laih chang awm mah se, i hriat kha, a nawmna a tam", Mambawihi ka ngaihtuah lo thei lo.


Tun hnuah kan inkar ṭha chauh mah se, ni e, unaunu neih chu a nuam a ni tawp mai.


Êngi chuan min lo sawm tak tak a, Chhingpuii te nen kan kal ho.


A entu pawlah bawk ka ṭang.


"Mercy inah a awm thung dawn nimaw?", an nui har har a. "A pit ru hman tlat lo", Êngin pawhin a ti ve mai.


Êngin min tel tir phet a tum a, ka hnial ṭang ṭang.


Mahse, Volley ball bênna bula ka ṭhu ṭha hle hle lai chu, Êngin min pawt tho zawt. "Ka thiam lo", ka tih pawhin, "Keini pawh kan thiam bik lo", Êngin a ti tawh mai si.


"Bawihi, kan pawlah lo kal daih rawh", Chhingpuiin a lo ti a. Êngin min hauh tlat.


Thiam lo tak chungin ka tel ta a,,ka bên ṭhelh nawk nawk. Min nuih nasa hlawm lutuk a, a zahthlak tihpiah lam a ni.


School kal lai khan Games-ah min tel tir ṭhin a, Point Box min ti ṭhin.


School Sport-ah, House aiawhin ka chhuak ngai lo bawk. A thiam lo tan chuan har ve deuh a nia aw!


Indem theih pawh a ni lo.


"Ka chhuak dawn", ka chhuak nap nal. "I khel ṭhang anga, i thiam chho zel mai ang. Khelh ngun a ngai ve a", an lo ti sep sep a.


Min tizak tual tual.


Chhingpuiin, "Mipa ho hi, an inkhel dawn lo emawni le?", a ti a. "Kross-a a hman lo", Êngin a ti a.


"Kross-a tel lo chuan, eng mah an ni lo", an ti sup sup.


Mipa ṭhenkhat an lo kal a, "Kan inkhel dawn si lo a, kan lo tel ve teh ang", an lo ti a.


Mipa leh hmeichhe inpawlhin Volley Ball an bêng a, Chhingpuii ka hawsan daih.


Towel-a ka lû ka hruk mial mial laiin kawngka an lo kik a. U Malawma a nih ka ring deuh.


Chaw ei tura lo kal a ching em mai.


"U Malawm, lo lut mai mai rawh. Chaw kan chhum kep che", ka nui sen sen a.


Ka nui rei lo, helhkam nei takin a lo pên lut a. A meng thip si, silai keng se, a pawi sawi palh ta ila, min kap thlu rang ngawt ang.


"Chhingpuii a awm lo a", a bu nghat a. Dawhkan hnuaia chair pawt chhuakin a ṭhu a, "Ka nghak mai ang", a ti ta a.


Pangngai takin ka la awm thei lo, ka hmui te a khûr.


"Chhingpuiin chawhmeh siam i thiam lutuk a ti a. Fiah a châkawm ngawt mai", ka nui sak.


A hmelah min tielna a lang, "Ṭhu ta che, i ding reng a, ka hlauhawm loh", a tih takah, a hmaah khûr der derin ka ṭhu a.


Mahse, chutia ka ṭhuta ka hmachhawn takah chuan ka khûr ta lo a, zângkhai vah hian ka awm tawh.


"Ka inzir nasa alawm",


"A ṭha lutuk", a nui ta chu, ka thaw huai. A mitmeng pawh a thip tawh lo.


Sawi tur a vâng ngei mai, "SI ngaihzawn chu a nuam ang tiraw? I duh duh a pe thei che anga", a ti chu, "Thingpui ka lo lum ang che aw, ka siam tui thiam tawh", ka tho nalh.


Gas ka on fuh hleithei lo, chutah, hnung lam aṭangin ka kâwngah min lo pawm thut!


Gas lighter ka thloh chiang lutuk.


"Kross-a, Chhingpuii a lo haw ṭep tawh", a kut phelh ka tum a. Min pawm nghet lutuk.


Ka kokiah a khabe a nghat a,,"Bawihi, SI i kalsan theih nan eng nge ka tih ang? Min han hrilh teh", a thusawi chu ka ngaihtuah bau lo.


A taksa si chetin ka awm a, ka kuah let ang tih mawlh ka hlau. Chu ai chuan, Chhingpuii a lo haw thut ang tih ka hlau.


"Kross-a, min thlah rawh. Chhingpuiin min hmuh chuan a ṭha lo ang",


"Mawh, min han hrilh teh, SI i kalsan theih nan eng nge ka tih ang? Pawisa engzah chiah nge ka neih a ngaih? Lirthei engzat nge ka neih a ngaih a, in engzah nge neih ngai?", ka nghawng a nawr chap chap a.


Ka kâwng a pawm nghet si, ka tal chhuak thei lo.


Chung a thusawi ho chu, eng rilru pua sawi nge a nih.


Chhingpuii a nei tawh reng alawm.


Min kuai her a, ka bek dawmin hlauthawng zet hian,,"Bawihi, min han hrilh teh, eng nge tih ngai? SI neih ang nei turin ka bei ang, ka thawk dawn lawm. Han sawi teh. Ralkhat aṭang ringawta thlir ṭhin che kha, ka thil huat ber a ni", a hma ang khan, ka nghawngah nghet takin min kuah a.


"Engtin nge SI chu i lo hriat?",


"Ka lo kal a, Bawihi, ka lo kal a. Mahse, SI nen in inngaihzawn thu min hrilh ta mai si. Rin loh duh mah ila, inhnaih taka in pahniha ṭhu dun min hmuh a. Chumi hnu aṭanga rei vak loah ka lo kal leh, chutah erawh, in pahnihin in lo chhuak dun a, in inphur chhuak ta a nih kha", ka kut ka phar a.


Tling lo tak chungin, Kross-a taksa chu ka pawm ta!


"Bawihi, min en teh", min kuai dak a, "Min han hrilh teh, eng nge ka tih ang? Ka ângchhungah i awm nameuh mai, tharum hmang pawhin ka bei thei che. Chu erawh zawng, hlauhna avanga ka bula i awm tur ka duh si lo. Sawi la, tuna ka neih hi a la tling tawk lo a nih chuan, vawikhat dang leh chu ka bei ang, i tan".


"Eng mah tih a ngai lo ka tih kha", a âwmah a bei hian ka bei.


A lung phu dup dup aṭangin hlauhthawnna nasa takin a hual vel a ni. A chhungrilah a khûr bawk.


Kei mah vang a ni leh ta!


Intipachangin ka en chho a, beisei mita min thlir rengtu hnenah chuan, "Alex-a nen khan kan inngaizawng lo. A lên ṭhin avangin kan inkawm mai chauh a ni. Kan inphur chhuak min hmuh kha chu, ih, pawi ka ti lutuk.


Min ngaidam turin ka duh che, i kal hnu khan rinawm taka nghak tur chein ka intiam a. Mahse, ka bawhchhe ta a ni", ka kun lap.a.


"Khami zan khan ka thaw a pikin, kei mah lamah buaina neuh neuh ka nei nen. Alex-a hnenah Zu in tur a neih leh neih loh ka zawt a",


"Bawihi, chutiang te-",


"Lo ngaithla phawt rawh. An inah min hruaiin a pindanah kan inzui lut a. Mahse, min ring rawh, Beer kha tlêm tê chauh ka tem. A dang ka tem miah lo. Chuan, a kut hmawr pawhin min khawih lo", ka nghawngah mim kuah a.


"Âw hi ka hria a, "Kross-an hmuin ta che sela, eng tin nge a tih?", chumi vang chuan ka haw daih. Min lo hmu tak tak reng si a".


Khami zan khan min lo hmu tak tak reng chu a ni si a.


"Ka hrethiam e, hrehawm takin i lo awm a, a bul chu kei ka ni",


"Ni lo e, pawi ka ti lutuk. Min ngaidam rawh. Mipa dang pindanah ka zui lut a, pawi ka ti lutuk. Mahse maw, a kut hmawr pawhin min khawih lo asin".


Ngaihdam chu ka dil ta. Min ngaidam duh ang em?


Ka heh khûr der der a pet zauh, nghet takin ka nghawngah a kuah a. Ka melh chho vah mai.


"Ngaihdam dil turin tihsual i nei lo, kei mah avanga hrehawm taka i awm avangin kei hi ngaihdam ngai zawk chu ka ni", Kross-a pawh chu a âw a khûr.


"Ngaihdam indil tawn sek lo khan inngaidam tawn mai rawh u, hun intiuiawm, a ninawm ṭan a nia", Chhingpuii a ni tih ka chiang lutuk.


Tal chhuah ka tum chu, Kross-an min thlah duh lo.


Kross-a zak hnuai aṭangin ka bih a, Chhingpuii a ni. U Malawma pawh a awm.


"Thawm nei ta che u", Kross-an a ti hmuk a. Chhingpuii ka lo hre tawh lo alawm.


U Malawman, "Kawngka kan hawn ṭhuai kha, in hre lo maw?", a ti ve hmuk a. Chhingpuii a nui ar ar.


"Insawifel vat teh u, inbual ka duh", Chhingpuiin a ti sep a.


Thil thleng chu ka hrethiam lo, Chhingpuii chu nasa taka thinrim tur a ni!


"Kalbo teh u, min ti laklawk", Kross-an a ti leh a. U Malawman, "Lo kal rawh, ka inah kal ang. An la inngaidam har dawn em mai. Hmannia i thawmhnaw pawh kha a la awm. Chhingpui, kalsan thuai thuai ang", a ti zung zung a.


Kawngka ṭha takin an khar.


Min thlah chu, "Chhingpuii kha-", ka ti hman, ka heh a pet a.


"Chhingpuii chu engtin maw ni a? Malawma nen an inngaizawng tih i hrethiam turah ka ngai a, i lo hrethiam miah nange?", sawi tur ka hre lo chu ka âng phuau.


Bah kikawi kual hian, "Nang, nangmah nen, u Malawma maw?",


"Ka thinlung kawltunu hi aw...", nuihza takin a ti a.


Chhingpuii leh u Malawma te maw?


A nih chuan, Chhingpui mitmenga min thikna te kha. A dik tihna. U Malawma nen an lo inngaihzawn lek vang a nih chiah chu.


Chuti, Kross-a pawhin bialnu a nei lo tihna!


Duh takin ka pawm vawng vawng, duat takin min chûl a. Thiltihin biahthu kan inhlan a ni hawt.


"Bawihi, min en teh, Tun aṭang chuan inthlah tawh lo ang aw", ka khabe a dawm kâng a.


Tun aṭanga inthlah tawh lo maw ni a, nichina ka inhlanna khan a tichiang viauin ka hria.


Ka bu nghauh nghauh.


A âwmah min bawh tir a, a hrawk bawk che ralh ralh enin, "Kross-a, Chhingpuii te lo kir hmain insaseng ila?", min leh thal vut a.


"Bawihi, inchhira inlamlet turin ka duh lo che a nia. Ngaihngam takin awm ang che. Lo ngai reng rawh, kei mah avanga hrehawm taka i lo awm ṭhinna te kha, hlimin i lampui tawh thung ang", duata min chulin a ti dam thlup a.


Lo kun hniamin, kan lei an insual a.


Inchhirin ka inlamlet hauh lo ang. Ka eng kim ka hlan ral vek tawh a, hlan leh tur chuan ka nei tawh lo.


"Kan inngaizawng ṭha leh tawh tiraw?", ka ti chu, a hmel dur khup nghalin, "Engtikin nge kan inṭhen?", a ti bung chhum hmawk.


Show post links
Top

[Ngaia]

cThinlungmawlpa
Chapter-26
Ziaktu: Cck Lalchhuanawmi

"Kan inngaizawng ṭha leh tawh tiraw?", ka ti chu, a hmel dur khup nghalin, "Engtikin nge kan inṭhen?", a ti bung chhum hmawk.


Kan insaseng fel, ṭhutthlengah ṭhuin ka mal chungah a mu a. "Zawh tur che ka ngah lutuk", ka ti hman chauhah, "Ka sawi vek dawn", Chhingpuiin pawn lamah thawm a lo nei a.


A thinrim takzet a ni.


Kross-a pawh tho vatin, "I nu ka hrilh vek dawn", Chhingpuiin kawngka a lo hawng ṭhuai.


"Fiamthu mai mai a nih kha", dam deuhin a hnungah u Malawman a ti ve bawk a.


Chhingpuii thinrim a sen ṭan ṭan, "Fiamthu a ni lo, mi pasal chhuhsak pawh tih tawh nak laia, mi bialpa lehzel chhuhsak a tum. Be tawh lo turin ka hrilh ngun tawh lutuk che, va luhkhung nghal la ti nia", u Malawman tihngaihna a hriat loh hmel lutuk.


Kross-a ka en a, a lo nui sun sun.

"Nui suh", a beng bulah ka phun sep a. A bu nghat tho naa, a nui sun sun tho.


Nuihna tur ka hre ve lo, Chhingpuii duh dan chu u Malawman zahsakin, be lo mai se.


Mi pasal a chhuhsak tawhin a sawi a, chutiang a lo nih tawh phei chuan. Chhingpuii lam ka ṭang zawk.


U Malawman, "Pui, ṭhu ila sawi ṭha ang. Thinrim tut tut zel suh", va tawk a tum chu, Chhingpuii a awm sawn.


En ringawt loin eng emaw tal kan sawi ve dawn lo em ni le?


Kross-a ka nghawk a, "Engtin nge ni dawn?", a heh tawkin, "Shhh", a ti ringawt.


"I nu ka hrilh vek dawn, hmeichhe dang i bia pawh thik tawh nak laiin, khatiang zak thei lo lutuk, pawmlai nei kher a ngaizawng duh lehnghal. A thuhrimah, thlêm i sâm ve hrim hrim, a kuah thuak che pawhin nuam i ti zawk emaw tih tur a ni, lungawi hmel hliah hliah lehnghal a",


"A va mak ṭhin tak. Khanu kha ka duh i ring reng reng emawni le? Kuah thuak i tihah te chuan, sawpa pawh saw", Kross-a a lo kawk a, Kross-a a tûm hmuk nghal.


U Malawma chuan,,"A bulah i tawlh hrut hrut a, nô tak takin i ṭawng a, i kuah chung chung zel tho kha. Ka thik lo bik i ring em ni? Hmuh lai ngeia bialnu ten mipa dang a kuah lai en mawl tawp an awm ngai lo ang. Ka sawiselin ka thinrimkhum ngai lo che, a chhan chu ka ring che a, min rinawmlohsan dawn lo tih ka hria. Ka rin che avangin ka ngawi mai mai a nih hi", a ti ta chiam a.



Chhingpuii a ngawi hle hle, u Malawma chu a thaw hawk a, a thinlunga hun rei tak a lo pai tawh a sawi chhuak a ni.


Hnara hlit phawi ang huai a ni ta chu, a lawmpuiawm zawk.


Chhingpuii chuan sawi tur a nei ta lo, "Kha kha chu, amah vang saw alawm", Chhingpuiin Kross-a a lo kâwk ve leh.


Kross-a chu khi suk hian ṭhutthleng hnung a ngheng a, min lo en a, "Eden zia, mawhpuh tur zawng ruai mai, mahni thiam lohna pawm duh lo", a ti chu, ka ngaihdan a ni bik ta lo.


Inhnial cho atin ka melh.


"A dik chiah", u Malawma lahin a lo ti.


Chhingpuiin, "Kross-an Bawihi a lo kal dawn a, a rilru puthmang hriat ka duh a tih vang chauh a nih kha", a ti ta.


Kross-an, "Khati khan mi melh suh, a thusawi khi i ring em ni?",


"Ring", nghet charhin ka ti a. Nuihza insum takin a lamah min pawt a, "Thudik a lo lang mai ang", a ti a.


A sawi zo chiah tihah u Malawman, "Kross-a te chuan, Bawihin bialpa ṭha deuh a nei tawh a, mikhual lawmin ka lo lawm a ngai ang, a ti a nih kha. Nang mah zawkin i pak huam a nih reuh kha", a ti ta a.


Chhingpuii chu a ngawi ta hle hle, u Malawma chu a tlawm zawkah ṭangin, "Pui, ka rilṭam tawh, thinrim tawh teh suh. Chaw ka ei duh tawh", thinrim ve thei lo ang maiin a ṭawng a.


U Malawma ka lainat ta tlat. Chhingpuii chu ka ngei ru zêk a. Eng chu ni bik lo mah ila, a tira Chhingpuii ka ṭan zawkna a bo vek.


"Bawihi, chaw ei siam ang hmiang", Kross-a chuan a ti a.


Kan pahnihin chaw ei kan siam, "Ka tihpalh", Chhingpuiin a ti ta a. Ka lo lawm lutuk.


A tirah khatianga tih tawh tur a nia.


Chaw ei naah hlim takin kan inkawm ta a, "SI nen in inngaizawng lo tak tak maw?", Chhingpuiin a ti sek.


U Malawman a ning ta deuh a ni ang, "Ngaizawng lo a tih chu, chaw kha ei vat vat rawh, thil ṭha deuh pek tur che ka nei", a ti charh a.


Nui sâwngin Chhingpuiin, "Hotupa thu angin le", a ti sep a.


U Malawman a phone enpuiin, "Woww", Chhingpuiin a ti leh ṭhin a. Nichinah an inhau tih a hriat tawh loh.


"Inah kan kal dawn nia", Kross-an a han ti a, hawi pawh an lo hawi lo, "Lo haw har s'u aw", an ti ringawt. Eng tak chu inhmuh ang maw?


Insi chial tê hian kan kal dun a, kan ke chheh a hmanhmawh dun lo khawp.


"Thil pakhat ka zawt ang che aw",


"Min han zawt la",


"Chhingpuii nen in ingaizawng lo a nih chuan, ngati nge khatia i bula a awm khan i hnar loh?", dik lo baksaka min chhân vaih chuan, ka nam thal tawp nghal ang.


A kiai sak a, "I thik a nimaw?",


"Thik lo chiang kuang eltiang", ka ti hmiah a. Nui hakin ka khabe hmerin min kuaidak bawk.


Chiang kel kawlhin ken inmelh siah siah, "Bawihi, i kâ aṭanga thu chhuak aiin i mit ka ring zawk", ka meng kual dû dû.


Ka mit aṭangin eng mah a hre lo ang e.


"Min en chungin i thik lo tih sawi rawh", a lehzel chuan a.


En pawh en loin, "Thik lo", ti mah ila, ka thik tih ka inhrechiang bawk si.


"Bawihi, ka mitah tak en chungin sawi rawh ka ti che alawm", a la ti tak deuh deuh a.


Tal laihin, "Haish, i hriat reng chuan, nge min zawh sek?", ka nghawngah min kuah a.


Hmanhmawh lo mangkhengin min kalpui, "Malawman min hrilh khan nang mah i nih ring deuh reuhin ka awm a. I display picture min hmuh takah chuan, nang mah ngei i ni tih ka chiang lehzual ta a ni.


Han hnial tum mah ila, Zirtirtu kan mamawh tawh si a, a rang thei ang bera thawk tur kan duh. Khawchhunga mi ka han melh kual ṭhin naa, a ngaihna a awm hlawllo.


Interview ngai lo turin kan ko thla ta che a nih hi. Malawman min hrilh phat aṭangin ka inbuatsaih tawh. SI nen in lo kal dawn nge dawn lo tih te", ka en chho a.


Sawi a châk zawk zawk lo a ni.


"I lakah ka mualpho mai ang tih kha ka hlauh ber a ni a. Ka insehruh nasa ṭhin teh asin. Zaninah, ka mualpho ta a nih kha",


"Mahse, mualpho lo ta la, tunah hian min kuah thei hauh lo ang", ka ti hmanhmawh.


Ka hnar a piai zauh a, "Dik lutuk, chuvang a nia ramah ka awm char char. Hmuh leh khawih phaka i awm reng chung pawhin phuar ka ni a, Hremhmun tenau ka tem a ni ringawt", lungawi lo zetin a ti charh.


Zawh tur ka va ngah tak, hunin min daih dawn lo.


"Bawihi", kan ding a, "Zanin kha, i inchhir em? Ka tih loh tawp tur ka ti tih ka hria",


"Inchhir lo e, mahse, Eden zia tih te i sawi a, min thlah duh mai lo ang maw?", zawh tur ka ngah lutuk a, hun chu sawi loh, kei ngei pawh hi ka indaih lo lam chu a ni.


"Thlah maw? Ka ta i ni tawh a, tlanbo han tum teh, ka ta i nihzia nasa takin ka hriattir ang che", min siai zeuh a, "Zan khuain",,a ti kher chu, "I zak thei lo", ka zak chu a âwmah ka hmai ka phum.


Zankhua han tih kher, sual thiam thei em mai.


Kross-an a nu leh pa min hmelhriattir a, a kip akawiin a sawi vek.


Chuta ṭang chuan a pa dik tak a la hre lo tih ka hre ta. Fapa an neih loh avang leh, Kross-an a belh ber an nih avang pawhin fa atan an la ta a.


Kross-a fa atan an lak avangin inchhirin an indawmkun ngai miah lo ang.


Êngi leh Mercy te nen kan lo inngainat thuak tawh avangin, an u Kross-a nen kan inngaizawng tih an hriat hnu phei chuan, kan inngaina zualin ka hria.


"Ka u", ti hlirin Mercy phei chuan min ko tawh. Mahsela, Kross-a nen kan inngaizawng tih hretu ten an sawi vak vak lo a.


Tin, Kross-a nen lah, khaw êngah kan inzuiin, mi hmuhah kan inpholang ngai si lo.


Khaw êng han ti ila, zanah pawh nise, kar khatah zan hnih emaw thum a lo lêng a, chutah pawh, Chhingpuii leh u Malawma an awm ve ṭhin avangin chokaah kan inkawm daih zel.


"Bawihi, Pa leh Hnam ka nei tawh asin, Falak tia sawi theih ka ni ta lo", hlim tak maia min hrilh zan kha theihnghilh har ka ti.


He khuaah hi chuan a hlim a, tu mahin Falak tia hmuhsit a lo tuarna an hre tawh lo.


A tel lo chuan inkhel an phur lo ang bawkin, khawtlang leh Kohhranah pawh a hming a ri fo.


"School hi chu loan rulh a ngai lo a, Sumo pali lai hi loan-a ka lak a nih avangin rulh a ngai a. Chuvang chuan a nia, Ramah ka kal nitin. Thlai thar reng ka ngai, hei hian min pui lutuk", phone chu ka bengah ka dah hnai sauh sauh.


"Zirtir hna in thawhna pawh hi, Thlai hralhna leh Sumo Service-na aṭang hian tlêm azawng pawh pen a ngai ṭhin", ka lainat zawk mang e.


Chhingpuii pawh a phun sep sep, u Malawma nen an inbe ve tho a, zaha lak ka duh bik lo.


"Chuan, naktukah i lo haw ang em?",


"A tuk lehah zawk aw, thil tui deuh ka lo hawn ang che", rilruin Thingba a tinzawn nghal.


Kan inmangṭhaa, Sihal leh Chinghnia laka veng turin Isua ka hrilh.


"Khatia in aṭanga ka chhuak kha kalna tur hre loin ka tei ka tei a. Hmuhsit ka lo tuar tawh zawng zawngah, i pa hmaa ṭhingṭhit khan min tizakin, min tithangtlawm ngawih ngawih.


Mahse, pawi tihna ka nei chuang lo. Tikha chuan, engtiang chiahin nge a fanu hnenah ka thinlung ka pek tih a hre dawn a.


Mahse, a har khawp mai. Har tak a ni. In neitu hnenah lo be tur chein ka hrilh a. Ka chhuahsan nghal ta a ni.


Kalna tur ka hre chuang lo, Motor chhe siamnaah thawh tur ka hmu hlauh a. Awmchilh nghalin, a chhe siam bakah, khalh dan te ka zir pah a.


Chumi hnuah Sumo khalh tur ka hmu leh ta hlauh. Driving license neih a ngai bawk si, Pa hming ziah a ngai a.


Bawihi, khatih laia zawhna ka dawn zin ber chu, "Tu nge i pa?", tih leh, "I nu leh pa hming han sawi teh. Khawi aṭanga lo kal nge i nih?", tih te kha a ni.


Chhân har ka tih luatah, "Hlate khuaa mi ka nia", ka tithlarawk zel. Khatiang zawhna kha dawng leh pawh ni ila, tunah chuan tim map loin ka sawi thei tawh.


Driving license nei turin Pa hming ziahte a ngai a, kan Pastor-a kha i la hria ang tiraw? A hming kha ka ziak tawp.


Sumo ka khalh theih takah chuan, Pastor-a Bialna khuaah ka kal a. Hmun danga an sawn thu min hrilhin, khaw hming nen lam min hrilh bawk.


Hun a rei tawh a, Masangi a boral tawh tih ka hria. An sawnna khua ka thlen chuan, Foreign ramah Missionary-in an lo kal chhungkua ta daih.


Hrilhhai takin ka lêt ta a. Bia ila chu, ka hahdam dawn tih ka hria.


Khawpui danga Sumo Service dang ka zawm hmaa lo hmuh che ka duh a. Zan rei pawh sawi loin kein ka lo kal ngat ngat.


Tukverha i lo hawi chhuak ka lawmzia kha, min hmu lo a ni mahna, kei chuan ka hmu chiang lutuk che. Lo lawn chhoha kuah chea, thlahna thu hrilh che ka duh tawh mai a.


Thlahna thu ka sawi kha ka duhtawk lo. Ṭhingṭhi chunga thlahna thu ngaihnobei tak sawi tur a ngaihtuah theih loh.


Khawpui dangah ka awm tawh a, tichuan; he khuaah hian awmin, tuna ka nu leh pa te bel chawtin, fapa min nei e, keiin nu leh pa bakah, unau ka neih phah ta a. Tun hi ka thleng ta a ni.


Bawihi, i thinlung lungdum dang i tawng a nih chuan, hlim takin min lo thlah ang che ti mah ila, hlauthawng reng rengin ka awm ṭhin.


Tlêma ka leikân deuhin ka lo kal a, chutah erawh, i hriat angin, SI kha.


Min theihnghilhin i lungdum i tawng taah ka ngai a. Hlim taka thlah che chu duh sateh mah ila, ka thei thlawtlo.


Ka lo kal leh a, in inzui lai ngei mitin ka hmu ta mai chu a ni si a. Thlah che a hun tih inhrilhin, harsa tak chungin ka kal kiang a.


Khami zan khan a ni, Lal Isua nen kan intawn leh tak!


Ṭhianten ruihna tur an hriatna hmuna an kal tur ka zui a. Tah khan, thil tam tak ka hre tharin ka hmu bawk.


Kha thil avang khan, kei hi siamin ka awm chu a ni si a!


Chhia leh ṭha hriatna bo map khawpa rui ṭhin zingah, min hringtu pawh a tel ve ṭhin tihna a ni a.


A nih, kei hi lo rui ta ila, min hringtu ang lek ka ni dawn a. Chuta karah, Pa nei lo tia hmuhsit ka tawh ang chiaha tawk ve tur fa hring ve leh ta ila!


Chung chu ngaihtuahna a lo lut zut zut a, ka mitthlaah i lang bawk.


Ruih theih lamah ka kal lo a, tun ataka kal ngawt chhan tur a awm lo tiin ka infuih a. Ka ṭhiante chawp chawp chuan ka chhuahsan ta a ni.


Ka inngaihtuah a, hei hi ka tawn tura ruat a ni ta ve ang. Hlimna lam aiin hlim lohna tur hlir mai ka tawng a.


Muhil hleithei loin ka inlet ka inlet a, hmâna Pastor sawi, "Khawi hmunah pawh Lal Isua hi a awm", a tih kha rilruah a lo thar thut a.


Ka ṭhu chhuak a, Masangi unaute ho pawhin Lal Isua chanchin min hrilhte, "Ka thi ṭep tawh a, mahse, ka lungngai miah lo. Isuan Vanramah min lo hmuak dawn tih ka hria a. Chu ai chuan, ka chhungte hi kalsan ka hreh, an bula awm hi ka la thlahlel", a tih te.


An chhungkaw bula ka awm laia an thu min hrilh leh, mizia te, khang khan nasa takin min inngaihtuahtir a.


Isua lam hawiin, nang hi min pe kir turin dil ta ila, min tihhlawhtlinsak duh ang em? Dilna tihlawhtlingtu an ti si a.


Bual inah ka lut a, chutah chuan ka ṭhingṭhi a, ka kut pahnih suihin, ka maimitchhing a, Lal Isua hnenah ka inhlan mawl ve tawp.


Khawi hmunah pawh a awm a nih chuan, Bual inah pawh a awm dawn tih chu rinna lian tak ka nei a ni.


Thu tam ka sawi chuang lo, tun hnu hian, engthu nge ka sawi pawh ka hre thei tawh lo. Mahse, khami hnu aṭang khan kei mahah, min tuamtu eng emaw tak hi a awm a.


Ka zâng vah a, thawpikna te an kiang duak mai bawk a. Bual in aṭangin ka chhuak a, hlimna tur awm si loah, hlimna namen loin min tuam lawi bawk si.


Thla khat inbual loa awma, fai taka inbual zo hlim ang mai ka ni.


Zan kan haw thim a, chutah chuan motor a êng thei ta lo. Tlan chu a tlan thei a, kawng êntu pawna mi êng a êng thei lo.


Kan endik nasa, a chhe awm lai kan hmuh chu sawi loh, Sumo lak thar a ni a, Dawrah enfiah vek hnua kan lak a ni a.


Nichin lawkah pawh kan kawng êntu a ni. Chutah chuan, Lal Isua hnenah min ṭanpui turin ka dil a.


Thla a rawn chhuak ta êng phût mai a, "Thlamang hun a ni lo em ni? A va mak ve", an ti luai luai.


Thla ên dan kha a mak zawk, bahlah miah loin khua kan thleng a, Van lam ka hawi a, Thla êng pawh a bo daih.


Pastor-a kha awm se, hrilh ka duh lutuk a, amahin min hrilhfiah ṭha ber dawn a, a bulah chuan ka sawi ngam bawk ang.


Masangi ka mumangah ka hmu ṭhin bawk a, an bula ka awm laia Isua chanchin min hrilh ṭhin lai kha a ni ṭhin a. An unau zinga min veitu ber a ni reng bawk a!


A vawikhatna atan, Pastor-a leh a chhungten min pek, 'Pathian Lehkhabu Thianghlim' chu keuin, ka chhiar ṭan ta a ni!


Ka chhiar apiangin Masangi têreuh khan min nuih ver ver hian ka hre ṭhin.


A mak ngawt mai.


Mahse, thil tam tak ka hre chho zel. Lal Isua ringtu inti ṭheuh ṭheuhah pawh a tak leh suak an awm ni maiin ka hria.


Lal Isua ring inti teah pawh Zu in zeuh ṭhin te, chubakah, Ṭhalai lamah pawh nise, mak tih tur khawpin Lal Isua ringtu an intihna a hmuh theih loh.


A tir chuan ka hrethiam lo a, ka pain, "Kohhran hi kan hmai kawrah hmangin, nihna chelh leh lânsar(langsar) kan duh luatah, Lal Isua ringtu kan nihna kan tidal leh ṭhin a nih hi", a ti a.


"Chumi a nih vang ringawtin Kohhran belh loh phah nana hman tur a ni lo a. Lal Isua avanga belh zawk tur a ni", ka pain a sawi ṭhin bawk.


Mahse, Ramah awm char char ṭhinin, kar tawpah chauh ka haw ṭhin a, ka inkhawm ve ṭhin chauh zawk.


Bawihi, Lal Isua kan tithinur ṭhin ngawtin ka ring. Ka sawi tawh ang khan, thi tur leh tho leh turin a lo kal a. Chuti chungin lemchannan kan changchawi a, kan nun dan a huatthlaawm si a.


Hlêp a awm lo, lo kal lo law law se, atan a ṭha zawk", Kross-a chu a ngawi ta a.


Ka puar lutuk a, a thusawi chuan min âwi a, mut te lam a chhuak. Chiang takin rilruah ka vawng thung.


Lal Isua a pan dan chu awlsam ka ti a, a ho ru viau lehnghal.


Harsa tak leh khirh thei ang berin Lal Isua pan kan tum ṭhin a. Chutiang a nih lohzia Kross-a aṭangin a hriat.


Bual inah ṭhingṭhiin a pan tawp a ni a. Khawi hmunah pawh a awm chiang alawm!


"Kan chawl rei tawh, thawk leh tawh ang", min kaitho a.


Exam kan zo tawh a, haw phei ka rilruk deuh a, hrilh ta ila a lungawi dawn nge dawn lo ka hre mai bik lo.


Saw lamah ka chhungten min lo beisei a. Helamah, Kross-a lahin, sawi lo mah se, min beisei tih a hai theih loh.


Thlai lak theih ang ang la ṭan lehin, Zirtiawpni a ni a, tlaiah khawpuiah a kalpui anga, zingkarah Chawhmeh zuar hoin an kharchhawng leh ṭhin a.


Chumi hnuah a lo haw leh ṭhin.


A thlai thar an ṭhain, an duah hluah zel a. Serthlum kung panga leh, Theihai kung pathum awmin, Lamkhuang kung pawh sawm lai a awm.


A thawkrim tih hi sawi sek a ngai lo, Ram aṭanga a lo haw hi chuan a tar bûai zel.


Pik-up hnungah felfai takin kan rem a, silpaulin-in kan khuh leh thlap.


Haw hmain intê kan kalh ṭha vek a. Thlâm tia sawi a duh lo. A ni lah taka, Thlâm tih tur a ni lo.


In pangngai a ni a, a tê fel at tih mai a ni. Tanky lian tak a awm bawk a, chu chu Zikhlum ho leh Thlai ho rin pui ber a ni.


Thinlungmawlpa
Chapter-27
Ziaktu: Cck Lalchhuanawmi


In pangngai a ni a, a tê fel at tih mai a ni. Tanky lian tak a awm bawk a, chu chu Zikhlum ho leh Thlai ho rin pui ber a ni.


Hla kan ngaithlaa, "Bawihi, he hla hi i hria em?", ka lu ka thing a.


"Ka pu te hnen aṭanga ka kalboa, Pastor nen kan intawnna Hla a nih hi. Rethei mah ila Lal Isua ka nei tih ka hriata, Lal Isua ka zawn ṭuma mi kha", a ti ta a.


Hming kal zet zet chu ka en a, 'Dintluanga Tochhawng-Ka chan tura ruatfel' tih hi a lo ni a.


Ka ngaihtuah zui a, Kross-a nun nen a inhmeh ta riauin ka hria.


"Engtin nge i hriat chhuah theih?",


"Pastor kha ka zawt alawm, Foreign-ah awm mah se, biak leh ka duh ngawt mai. Hrilh ila, min lawmpui vein ka ring. I ring ve em?", min lo en zeuh a.


Pastor mai ni lo, an chhungkua ina an lawmpui ka ring mah zawk a ni. Masangi chawp chawpin.


"An chhungkuain an lawmpui ang che", ka nuih sen sen a. Ani pawh a nui sun sun.


Kan in kawtah ka chhuk a, "I kal dawnah min lo be rawh aw", a bu nghat.


Chhingpuii chu haw turin a lo inbuatsaih fel diam tawh. Naktukah a haw tawh dawn a, thutlukna ka la siamfel thei lo.


U Malawma chaw ei turin a lo kal a, a hmaa heta a lo kal ṭhinte kha hrethiam har ka inti lutuk a.


A la haw thei chiah lo, an School an muang deuh bik a. A khua a har ngawt ang.


Chaw kan ei a, "Naktukah i haw tawh dawn sia, khawharthlak dawn e", ngui nghiaiin ka ti a.


U Malawman, "A haw dawn lo, kan haw rual dawn, nang zawk kha, haw i tum em?", min ti ta hmiah a.


Phawk hrain, "Pui, i haw dawn lo maw?", Chhingpuii chu thaw hawkin, "Nizan aṭangin haw lo turin min ti sek a, a ruala ka haw a ngai dawn a ni", u Malawma a nui rah rah.


Chhingpuii haw lo tur chu a lawm kher mai.


"Bawihi, haw i tum em?",


"Ka hre lo, Kross-a ka la sawipui lo a", an pahnihin, "Haw suh, a phal lo tih chiang sa", an ti a.


"A khawngaihthlak hnup hnup em mai, i awm aṭang hian a êng phet phet tawh, a hma chuan e, i awihlo zawk ang, chawhruala thinrim reng ang a ni", Chhingpuiin a ti charh charh.


Ka nui tet tet a, chutiang a ni lo ang.


Chhingpuiin a uar hret, chawhruala thinrim a ni bik lo ang.


U Malawman, "Thla khat chuangte hi Ramah a awm a, inkhel te hi ka ṭhulh zing a nia. A pawlte ho hian a tel lo chuan kei leh ka pawlte min ngam ṭhin lo a", a lo tuihnih ve zung zung bawk.


An pahnihin an in-set a, "Haw lo la, a ni mai", min ti leh.


Ka phone a lo ri a, "Bawihi, lo kal ve ta che. Mahni chauh chuan a khawharthlak thei em mai", a rawn ti chul ruih a.


"I hreh lo tiraw?",


"Min lo hruai peih chuan", ka ti a. Phone a off daih.


Chhingpuii leh u Malawma ka hrilh a, "Thil min lo hawn teh aw", Chhingpuiin a ti zat.


"Puan pahnih ka leisak tawh che kha", u Malawma lahin a lo ti. "Thil hawn tihah khan pui deuh a ni lo. Sweet emaw Lays tih angreng lawm ni ṭhin", Chhingpuiin a ti duah a.


Hrethiam ta niawm hrimin u Malawma a bu nghat nghat.


Pheikhawk ka bun fel chiah tihah, "Bawihi a hman tawh em?",


"Hey, Bawihi i lo hawpui leh lo a nih chuan, ka nasa ngawt ang", u Malawman a ti a.


Kross-an tham lo tih hriat takin, "Thahrui ka ngah zawk", a ti mauh a. Lukhum banin ka chhuak ta a.


"Inchei ve deuh la, khati teh tlawng chu", min hmuh rualin Chhingpuiin a lo ti var a. "Inchei chei a ngai lo", Kross-an a ti bung hmuk.


"Sawi ve mai mai nia", tawi taka nuiin Chhingpuiin a ti a.


Kross-a nen Khawpui kan pan dun ta a, nilengin hna a thawk a, zankhuain motor a khalh leh dawn chu a ni a.


A mut chhuak lutuk inveng zo lo hi, lo muthluin a tlukpui mai ang tihte a hlauhawm.


Ka kalpui chu ka lawm letling.


"Tihian, nangmah chauhin em ni i kal ṭhin?",


"Ni lo e, mi pakhat nen kan kal ṭhin", fiam zauh ka châk pek a, "Kei aiin a hmelṭhat ka ring e", ka tûm bur zui a.


A mak a nia aw, Kross-a hi chu, "Dik, nang aiin a hmelṭha, kawng tluanin a titi siam siam reng a, mut chhuah pawh ka nei lo", a fiamthu hmasa zawk ni mah ila, chutia a sawi takah chuan, ka thik ang lawi a.


Dâwt nge thutak hriat hma hauhin, ka tûm lian tual tual.


Phat ve awm tak a nia, "Chuti, i mut a chhuak ṭan tihna nimaw?", ka ti leh a, "Ṭan e, chauh tawh nak laia hetia zankhuaa motor khalh leh tur chu", a ner nak a.


"Mut chhuah loh nan a nia, min kalpui tura ka sawm che", mi rawn nuih saih a. Ka meng lian kawl kawl khawp mai.


"Chutiang a nih chuan, kei aia hmelṭha chu tinge i sawm mai loh. A titi siam siam anga, i mut a chhuak lo mai tur", lehlam hawiin a nui sak.


Ka kut rawn vawn a tum ka lasawn a, "Bawihi, thik tur tu mah an awm lo. Isua nen alawm kan kal ṭhin",


"Dâwt", ka lo ti hmanhmawh. "A nih leh, kei mah chauhin ka kal ṭhin, lungawi tawh rawh le", ka inkuangkuah a, lukhum khumin, "Nang hian dâwt bak min hrilh ngai lo a nih hi", ka ṭhu tlum hmak a.


"Bawihi, zanah lukhum an khum ngai lo", ka inring hman lo, lukhum a la daih a.


Sam ka siam ṭha nghal zung zung, "Ka sam i tihnawk vek, khatia lo lak thut a ngai em ni?", ka âw vin chuan a tiphu ni tur a ni.


"Bawihi, lungawilohna hun pawh a nih loh hi, ka fiam mai che a nih kha", ka kut rawn vawn a tum a, ka tawm chawih chawih.


Lungawilohna hun a ni lo tih ka hria, ka fiam hmasaa, a thinrim hmasa zawk ka ni leh si.


Motor tiding chuang loin a kut a lo phar vak a, ka nghawngah min kuahin, ṭhut pangngaiin ka ṭhu tawh lo.


"Le, min han hrilh teh",


"Eng chu maw?", a nui hak a, "Engtik thleng nge min lungawi lohsan dawn?", nuihza takin a ti a.


Min thlêm pawhin a lang lo.


Kross-a chuan, "Bawihi, sawi vat teh", min thlaha, kil thei ang berin ka ṭhu.


Ka thiam loh liau liau a ni. Ka fiam hmasa tê têa, a lungawi lo zawkah ka ṭang daih.


Hmelṭha ka sawi khan, "Awihawm loh", te ti se, hetianga ka tûm bur bur ngai lo tur. Kan zeilo dun ve ngawt mai.


Min hmuh hlau takin ka nui ka nui a, eng tin maha min lo tih tawh loh avangin ka ṭhu ngawi ta ngawt ngawt a.


Min thlêm hma chu, lungawilo angin ka la awm lui tlat dawn.


Kan tlan thui ta a ni ang, mawng a khamin, ka ṭhut dan lah lungawilo ṭhu tûm ka ni nen, mawng bakah nghawng nen, ka taksa khawilai pawh a kham nasa tawh a ni.


Ka che sek a, ṭhut dan siam rem mai a har.


"Bawihi, seat hnuaiah puan a awm asin", a rawn tih pawhin, "Ngai lo", ti hmak tawh bawk si a.


Chawhtawlh lian chu ka mamawh ngei a ni.


A ruk tak erawh chuan puan ka duh khawp mai. Lungawilo laklawh ve tawh si, ka lungawi tawh tih lantir hreh si, huiham.


Mahse, motor tidingin seat hnuaia puan a dah chu la thoin, min pe a, "Lukham kan lo keng lo a ni tiraw?", nui sun sun pahin a ti a.


Puan chu min sintir a, "A lum", puan ka hnawl chu, "A tawk", min thing sawk a, inthiamlo tak hian a thaw leh hawk a, "Bawihi, khatiang khan min en suh, min hlau turin ka duh lo che", min kuah a.


Ka hlau tawp si lo.


"Tihpalh", ka ti sep a. Lungawi loh kual hian mahni ka inhrem mai a ni.


A thuhrimah, lungawi lohna a reh tawh, lungawi loh tak tak aiin a dera lungawi loh a hrehawm hlawm hlak.


"Tihpalhna tur a awm lo, puan hi sin la, seat a zau ṭha bawk a, i duh duhin awm rawh, a ṭha em?", puanin min tuam.


Puan nuam ang chi a ni a, darthlalang tihhniam aṭangin thlifim a lo lut reng a, a vawt ruih nen, a lum nuam tawh khawp.


Darthlalang a tisâng deuh a, ka en reng, "Le, a muthilh theih",


"Titipui tur i duh lo em ni?", duat takin ka lû a tuai a, "Thlamuang taka i muhil lai thlir ka duh zawk e", ngainatawm hliah hliah tak a ni.


Ka ke thluangin a mal chungah ka va nghat a, puanin ka inkhuh vek.


Darthlalang tichho vekin, kawngkhar ka nghenchhanah ka ring a, Kross-a erawhin a lama darthlalang a tichho lo thung.


"Kross-a, lukham kan lo keng lo a", pangchang takin ka ti a.


Pangchan ka duh ve reng reng, ani lo pangchanna tur ka nei chuang lo. "Ka lo ngaihtuah hauh lo a, a pawi tak tak a ni", a beng a pawt zauh.


"Pawi lo", ti tham salhin, ka ham zui a. Mut chhuakin min man, a turin min tur.


"Kross-a, hmeichhia i kalpui tak tak lo tiraw? Kei mah aia hmelṭha", meng thei tawh lo, mut chhuakin a man tawh, la meng duh tho si angin ka awm.


A nuih a za ngawt ang, "Lal Isua nen kan kal ṭhin ka tih kha",


"Naaa, chu lo", ka nuar vak ringawt. A ho thei e. "Bawihi, muhil rawh, i mut a chhuak tawh a nih kha", ka hre thei chang chang tawh a ni.


Dâwt a sawi dawn lo tih ka hria, kei mah zawkin a nih kha, mipa lênchhuahpui ni! Hmeichhe dang kalpui pawh nise, lungawilo vak thei ka ni lo.


Mahse, ka awmdan a mawi lo hle chungin, chutianga a awm tur ka ngaingam leh bawk si lo.


Haw leh haw loh tur pawh, sawipui ka la ngai tak.


Mumang ramah ka chêng thûk ta tial tial a ni ang chu, Kross-an min kaitho, "Bawihi, harh tawh rawh, kan thleng tawh a nia", phak chuap hian ka meng a.


"Ka va han mu tui", mi nuih sun sun. "Intiharh la, thingpui leh chhang ka lo va lam ang", a chhuak zui a.


Hmai phihna tur ka duh, ha nawhna tur nen.


Kross-a lo let hnenah, "Hmai leh ha phihna tur ka duh", ka ti mauh mai a, a nui chhuak hawk, "Ha i phih duh amaw?", nuihza takin a ti a.


"I hriatthiam reng kha a", thingpui ka in a. "Thingpui in zawhah aw ni ang", ka bu zeuh.


"Engtikah nge chawhmeh an lo lei ang?",


"An lo la kal hlawm lo a nih hi", ka bu leh zeuh.


Thingpui kan in zo a, "Kha hei, hei hian i hmai hru la, chuan, hei hi i ṭhial dawn nia", wipes leh centerfresh min pe chu ka phawk hra.


"Hmai phihna leh ha nawhna a nih hi", a tih chuan ka man thiam chiah.


A hmai hru tawh mah se, a hru leh tho. Centerfresh kan ṭhial chawm chawm dun a. A hlimawm.


Kross-an, "Nuih pawh a ngamawm ta alawm", a ti a. A sawi dik chiah.


Zunna tur min kawhhmuhah ka va zung a, khawpui dang chu ni lo se, kan inah ka thlenpui ang mawle.


Kross-an iptê min ah(ak) tirin, "Ka ta vek tur tiraw?", ka lei ka seh zauh.


Ngainatawm takin, "Ni chiang e, i ta vek tur alawm a nih", ka nghawngah min kuahin, duat takin ka biang a chul a.


Chawhmeh kharchhawng tur ho rawn kal ṭanin, Zikhlum leh bûk tur ang chi chu patla-ah bûk zelin, Kross-a a zei rapthlak over.


An kharchhawnna man lo dawngin, iptêah ka khung zel a.


"Hriat loh karin nupui te i lo nei a, chaw ei tur tala min sawm ve tur alawm", ka pi te hoin an ti luai luai a.


A changin, "Nupui thar neih manah, min tlawm a ngai", an ti pah bawk. An innel tawh tih a hriat ngawih ngawih.


Kan zo a, iptê a puar ṭha pap pap nia aw.


Intithei takin Kross-a hmaah ka ding a, "I duh zâwng apiang ka lei ang che", a nui saih.


"Tak tak lawm",


"Duh zâwng chu ka ngah, ka mamawh an ni vek kher lo a",


"A nih chuan maw, i mamawh chu sawi la, ka leisak dawn che alawm. Thlaphanna tur a awm lo", iptê ka bêng a, a nui tat tat.


Nuihzatthlak ka sawi tawp si lo.


Kross-a chuan, "Ka mamawh chu a man 420 a nia, a daihin min leisak duh meuh ang maw?", nuihza tak hian a ti reuh a.


Hrethiam lo zetin, "420 man maw? Chu chu eng nge? Thawmhnaw maw?", ka ngaihtuah zui neuh neuh.


"Aw, tikhan ngaihtuah rawh, 420 man chu lângsar deuh mai hi a nia, mi zawng zawngin an hria", ka hmaah inkuangkuah run chungin a ding a.


Ngainatawm takin min en vung vung.


420 man, mi zawng zawngin an hria. Thawmhnaw nge, eng nge ni ang aw?


A mamawh tak a ni bawk si.


Chutia ka ngaihtuah laiin, "Ṭhutthleng man 20 an pe kir leh ṭhin a ni ngai, chutiang a nih chuan hmeichhe man dik tak chu 400 tihna a nia, a tlawm e", kan dinna bula nu ho chawhmeh zuara ṭhu te an nui uar uar.


Thâwk min ti harsa.


Kross-an nupui neih a duh maw?


A mamawh chu, nupui maw ni a? "Kan man tlawm ang hu hian, pasalte lak aṭangin duat leh ngaihsak kan la hlawhlo zui, kan man hi tihsân a ngai", an nui uar uar a.


Kross-an, "I hrethiam ta alawm", ti niawmin min melh bawk a.


Ngawi rengin motor chhungah ka lut.


Kross-a pawh a lo lut thuai. Ngawi rengin ka awm a. Ka la inpeih chiah loin ka hria.


Chhungte hnenah kan inkar a ṭha leh hi ka la hrilh si lo. Mambawihi takngial pawhin a hre lo.


"Bawihi, sawi loh tur ka sawi em ni?", ka kut a rawn vuan a. "Khawngaihin pawm hrâm rawh se", a tihna tlukah ka ngai.


Hawi chhuakin, beiseinaa min en rengtu hnenah, "Ka sual si a, nupui atan min duh ang maw?", a nui saih.


"Hei chen ka nghah chu i nih si hi. School chawlh a ni tawh bawk a, i haw duh dawn a, chutah chuan Palai nen kan lo thlawk thleng ve nghal ang. A ṭha i ti em?", ka pawm a nih chuan, sihhnipah min ngai ang tih ka hlau bawk si.


Mahse, ka sihhnip der tawh chu a nih kha.


Ṭan derna nei eih loin a lakah ka inhlan hmak a. A nih tur ang a ni zo tawh.


"I rawn thlawh thlen nghal loh vaih", ti sakin, "Lungawilo hmel ka hmuh kumkhua ang che", a nui tat tat.


Ka biang a chuk zeuh, lei insual tir chu a rem lo.


Bazar turin motor aṭangin kan chhuk a. Pheikhawk hi phelh ka duh tawh bawk.


Ke a na, sawi mai aiin a na.


Ding chatin, chil ka lem khawlh, "Bawihi, eng nge ni ta?", ka pum ka khawih a. "I pum a na em ni?", ka lu ka thing.


Hnai set sawta dinchilhin, kun hniam turin ka hrilh a, a beng bulah, "Zingkara inthiar chi ka nia", zahthlak duh ngei mai.


Bazar hmunah inthiarna a awm tih chu ka hria, inthiar ka ngam bau lo.


"Bazarah hi chuan ka ngam lo nia aw", ti leh hmiah. Zahthlak tho mah se, inthiar a hun tawh tlat a ni.


Min kalpui a, thingpui dawr pakhat chungah min chhohpuiin, chutah chuan inthiarna hi a lo awm a.


A bul hnaia eng dawr mah awm loin, mihring pawh an awm lo.


Ka lut a, a rimtui lutuk. A fai ṭhain tui a hnianghnar bawk. Ngaihngam har ka tih em avangin hla ka play tawp.


Rei vak lohah ka chhuak a, chapal nen Kross-a a lo ding.


"Pheikhawk kha phelh la, hei i bun dawn nia", ka mamawh a va han hre tak.


Pheikhawk ka phelh chu, khawlum laia ice cream vawt tui tawk ei ang chiah chiah. A nuam lutuk.


Inthiarnaah lutin ke ka va sil a, mawzain ka hru thuak thuak. Pheikhawk chu chapal funna polythene-ah khungin ka khai daih.


"Ka ril a ṭam e", inthlahrung deuhin ka ti a. Chhang leh Coffee min leisak.


Uncle Chips lei ka dil a, a phal teh tlat lo, "Nakinah, chaw ei khamah", a ti tlat.


Naupang thil ngen, an leisak duh lo ang maiin ka tûm bur. A bânah ka vuan tlat a, bo ka hlau em em zui.


Kekawr secondhand awmna kan thleng a, en tura min tih chuan, "Uncle chips ka duh zawk", ka ti mauh a.


"Bên i duh em?", ti tak têin min en mai a nih kha. Ka hlau lo ropui.


Min kalsawnpui ta daih a, min leisak a tum ho hnial zelin, "Uncle chips ka duh", ka ti tlat zel a.


A fanu chu ni ila, Bazar e sawi loin, min vaw(vua) tawh ang.


Chaw ei turin dawrah min luhpui daih.


Ke thên nghalh nghalh chungin chaw ka ei a, "Bawihi, naupang i nih loh kha, i ke tiche loin ṭha takin ṭhu rawh", a thutawp tih ka hriat avangin ṭha takin ka ṭhu thuai thuai.


Inneih hunah, tun ang hian a khirh tho ang em le?


Va han huphurh lawk tak!


Show post links
Top

[Ngaia]

Thinlungmawlpa
Chapter-28
Ziaktu: Cck Lalchhuanawmi


Inneih hunah, tun ang hian a khirh tho ang em le?


Va han huphurh lawk tak!


Counter kan tlawh a, report an pe zung zung. Min en duh hlawm ngang mai.


A nupui emaw min ti hlawm tho a ni ang. Nuam phian. "U K, hei hi mi, kan Counter hming chawitu chu?", Kross-an min lo en a.


A nuih dan aṭangin ka hrethiam ta, 'Bawihi K'.


Bawihi leh Kross-a te tihna!


An ri chel chul a, anni aiin ka lawm zawk daih. Heh hnuai pet tan tanin ka en a, ka khawhmuh a phê ruai.


Sumo Service man hmuh ang ang te an inpe fel a. Chumi hnuah Bank-ah kalin a dah lut fel leh thlap.


Hawnaah ei tur kan lei a, chumi hnuah mahni in panin kan haw ta a.


Sawi mai tur ka hre lo, ka lawm bawk si, ka lungchhe tel bawk. Ka lawmna leh lungchhiatna a inpawlhsawp.


Ka hming chawia Sumo Service Counter hawn a ni a, ka hming chuannaah mi tam tak an chuang ṭhin a ni a!


A lawmawm dan sawithiam a har.


Ka lungchhiatna erawh, hetiang hian Kross-an a thinlungah hmun min chantirin, a thinlung min pe a ni a.


Kei hian ka thinlung leh ka taksa, leh engkim hlan mah ila, a tawk zo tlat si lo a ni.


A tawk zo hlawllo.


Hlan leh tur chuan ka nei ta lo, dam chhung hun a hnena hman turin inhlan mah ila, Kross-a tan hian tlingzo leh, ka tana a inpekna han tluk zo tur kei hian ka paw chhuak zo lo.


"Bawihi, i puar ta em ni? I ngawih reng a?", min lo ti a.


A ni lah taka, Counter aṭang khan ka ngawi ve em bawk a ni.


Hawi chhuakin,,"Kross-a, hlan leh tur chuan che ka nei tawh si lo, eng tin nge ni ta ang?", kawngsirah a ding a.


Lo hnai deuhin ka kut a lo vuan a, "Bawihi, i tan hian tih theih ka nei tlem em asin. Hetia ka bula i awm hian ka lung a awiin, ka thlahlel zawk a ni. Hrehawmna leh mualpho huamin ka lakah in inhlan tawh a, ka tan chubak a awm tawh lo ang",


"Ka lawm e", ngainatawm tak hian a nui a.


Mitmeng dê sawr sawrin min en a, hetiang hian hlim reng thei se, mahni hlimna aiin Kross-a hlimna a pawimawh zawk.


Horn ri tuarhah kan inthlah rang lutuk, lei insual tir chauh ni mah se, zah(zak) avangin a sat awp awp theih.


Kross-a pawh a khi leh suk ṭhin a, a awmdan aṭangin a zak ve tho tih a hriat.


A hnuah, "Chi loh ve maw!", a ti chhuak a. "Tu nge kan nih an hre chuang lo, an tlan liam leh vat tho", kei pawhin ka thusawi chu ka awih chiah bik lo.


Awih theih pawh a ni tho, hmalam aṭanga lo tlan an ni a, min hmu chiang thei dawn lo.


Horn an rawn pe reng reng kha, eng rilru tak pu ang maw?


A ṭha hrim hrim tho e.


Zankhuain motor a khalh tawh a, a chau dawn tih chiang sa, "Reilotê muthilhna turin chawl lawk ila", ka tih lahin, "A la hma em mai", a ti tlat zel si a.


Chuvang chuan ka be char char, ei tur ka barh zauh bawk a, tui ka intir awl lo bawk.


"Primary School aiin High School din a fuh zawk lo em ni ka ti mai mai. A chhan chu, Primary a awm tawh a, High School zir tura khua chhuahsan a ngai tawh ṭhin nen",


"School din hi ka duh reng vang a ni lo. VC ho khan Primary School din an ti teh tlat a, NREGS aṭangin hlawh sem ṭhen mah se, VC lam aṭanga ei duh an awm nen, an indaih ta lo a. Thawhpui tura an sâwm ten an duh loh zel azarah, lainatnain ka thawhpui a. Mahse, a ṭha ta phian, ka kutah a awm ta si a. Nakinah, nangin min la thawhpui duh zel leh, Middle leh High School pawh kan la din chho zel ang chu", mi rawn siai zauh pek a.


A mitmeng a dul tawhin, a mit vun a chuar ṭan.


Muthilh a mamawh tawh a ni.


"Kross-a, remchangah ding la, reilotê muhil ang",


"Mut a chhuak hleinem, thlen thuai thuaia ina hruai che ka duh",


"Aw...in inah te chuan ka lo kal thei alawm. Tunah rih chuan mut i mamawh", a intingeng khanglang a.


Ka haw(hua) reuh lutuk.


Mut a mamawh, an inah te chuan ka kal reng reng thei a.


Tuna taka ngaihpawimawh chiam tur pawh a ni lo asin mawle. A thuhrimah, zanah kan thleng dawn a, mut hun a nih dawn avangin, a rem tehchiam tawh lo.


"Ni lo e, kan thlen hunah i hre mai ang, choka lam ka la peihfel chiah loh avanga hruai lo mai che ka ni alawm",


"In i sa tihna maw?", ka ti he hâw a.


Kross-an, "Sakna rei tawh, sum lam indaih loh ṭhin avangin zawh(zo) thuai theih a ni si lo a", ka thaw hap.


Hnial loin pawmpui ta mai zawk ila, a ṭha ang.


Kross-a chu kei mah zawkin ka va kuah a, a biang leh ka biang sik tirin, a nghawngah ka kut ka vet kual a.


Thaw hapin, "Saw tah sawn ding la, muthilh i ngai",


"Eng maw? Thingpui thlum tui tâwk min pe dawn maw ti a", kan pahnihin kan nui chiam.


A ding ta a, a hnar a rawn thi ta zawih zawih!


Ka kuai dak rang kher asin. "Tihian awm la, a reh mai ang. Maimitchhing bawk la, ka thu i awih lo lutuk a, mu tura ka tih lai che khan mu la chu, i hnar a thi miah lo ang", ka hnungah a kut a lo nghat a.


"Ka, lû a na lutuk", damdawi kan nei bawk si lo.


Mangang tawh tak ka ni, a hnar thi a reh thei lo. A vanvadak chung pawhin a lo luang thla.


Kross-a chuan na a ti ngang a niang, a hnar hmet pingin tui bottle a ban a. Leiah a chhuk ta daih.


Kei pawh, ka chhuk thuai.


Motor nghenga ṭhuin a lûah tui a leih a, a hnar thi a reh thei si lo. A reh leh tawh si.


"Kross-a", a kamsira thi kaite chu ka hru a. Mu turin ka ti mawlh mawlh a, a duh lo vel a.


"I hnar a thi tawh loin ka hria", a inleih huna ka hru leh mawlh mawlh.


Damdawi ei tur awm si lo, a meng lo a, thi tur ang mai hian a thaw hrawk hrawk tawh mai si.


A dara thingin ka ko ṭhin a, a rum nghut ringawt zel.

A rum ri hriat tur a awm erawh, a lawmawm rualin, a manganthlak.


Kawngpui a ni a, motor tlan a la awm mang lo zui. Chawlh lai a ni zawk mawni?


A thâwk a pangngai deuh hnuin a lû kuaikunin ka darah ka nghat a.


"Bawihi, Bawihi", min kuah a, ka âwmah a hmai a phum a, "Bawihi, min thlah suh aw", a thaw leh hrawk.


Kuah nghet zualin, "Thlah dawn lo e, engtikah mah".


Chutia ka ṭhutpui hnu rei vak loah kan pahniha hming 'Bawihi K' tih chuanna Sumo a lo tlan ta a.


An puihnain motor chhungah an kuah lutin, fel takin an ṭhuttir thlap a. Driver seat loah ṭhuttir turin ka ti a.


Nachhawkna keng awm hlauhin, lawm takin ka dawng a.


Kaihthawh theih loh khawpa a muthilh avang erawhin ka la eitir thei mai lo.


"Isu, khawngaihtakin tidam rawh aw", duh takin ka kuah a.


Chauh tawngkhawng chiah chiah a ni.


A hnar thi chhan pawh, chhan eng mah a awm thei lo. Ni sa sen hnuaiah hna a thawkin, a zan la la, zankhuain motor a khalh a.


Zingah chhin khat eih pawh chhing loin motor a khalh leh a.


A lo harh hnuah pawh, ka la chawlhpui.


Thil ka eipui leh phawt, a inphih harh a. Kum nga laiin inthlau mah ila, hna a thawk nasa lutuk a, kum sawm duaia inthlau ang kan ni tawh.


Chawlh a mamawh takzet zet.


Khua kan thlen chuan thim chiang viai viai tawh tak a ni. A reh ṭhuap tawh bawk.


Kawnga buaina kan tawh dan te leh, ṭanpui kan nih dante ka hrilh a. "Ka lawm e", a chau tawngkhawng ta a ni.


Inah chuan min hawpui ta a, a fal deuh hlek bawk.


Pal a inhung a, luhna tur, a sir tawn tawnah Saron Kung pahnih awmin, chu chu tikualin an hmawr ve veah a phuar ta a.


Ka hmuh theih chhan pawh, Saron kung bulah Tual ên pha vek thei tur Êng a inkhai vang a ni.


In a hawng a, hmehkhep hmetin a tiêng nghal thuai thuai.


Mumang emaw tih mai a awl. Fel takin a inṭhen a, phuisui tak hi a ni ringawt. LED TV a inhung a, Sofa te nen, fel khep khep tak a ni.


Hnung lam aṭangin min lo kuah a, "A nuam dawn awm em?", ka darah a khabe a nghat a.


"Nuam dawn lutuk, Mumang emaw kan ti dawn alawm",


"Mumang chu ni dawn lo e", a ti chuai ruih a. Mut hahdam hmak a ngai.


Pindan pawh a nuamin a phuisui. Computer a inhung vâng a, a hnathawhna a ni ngei ang.


Kil khatah Chhuar awmin, lehkhabu a intiang er ur bawk. Khum ka hmuh loh takah, "Kross-a, khum a awm lo", nuihza takin min en a.


"Bawihi, heti lamah zawk hian", ka sa awp awp.v


Zahthlak thei e.


Bual in a awm nghal avangin kan intifai zung zung a.


Lukham deh rual rualin ka chatthla nghal maiin ka hria.


Ka harh chuan Niin tukverh a lo chhun tawh. Parda erawh an la uai thla sung.


Kross-a a tho tawh tih hriat takin a awm tawh lo a. Bual inah lutin, ha nawhna thar hmangin ka intifai a.


Mutna siam felin ka chhuak vat.


Chokaah a lo bur ngar ngar. Zo fel lo angin a insawi kha a ni a. A fel thlap tawh chu a ni si.


"I lo tho tawh maw?",


"Min kaitho lo a", a lo inher a, "I chau tih ka hria alawm, ka kaitho duh lo che a nih kha", fel thei nia aw.


Inkhawm loin nilengin kan inkawm a.


"Biak In hawngA Inneih kan tlin dawn si lo, Bawihi, pawi ka ti lutuk. A mipa zawkin insumtheihna ka tlachham atin ni",


"I thiam lo a nih bik loh kha, kan dinhmun khan a zir em alawm", ka kun daih.


A zir tak tak em alawm.


Kan inpuang a, khata kan pahnih inkar ṭha leh ta leh, inngai reng renga lo awm kan ni bawk a.


Insum har ve tak a ni.


Mahse, khatih lai tak khan lo insum deuh ila chu, Biak In hawnga inneih kan tlin awn si a.


Kross-an,,"Lal Isua hian min hrem lo ang chu maw?", a ri roh a. Min tihlau ta!


A mak ṭhin a nia aw.


Hlauthawng tak hian, "Hrem lo ang",


"Ngaihdam kan dil si lo", Kross-an a ti chu, rilruin ngaihdam ka dil nghal char char.v


Kross-a pawh a rilruin ngaihdam a dil a ni ang. Hnuai lam enin a ngawi kar.


A hnu deuhah, "Vawikhat bak a ni lo a", ka ti chhuak phawng a, "Dik chiah", a lo ti ve thuai.


"Khami hnu aṭang chuan rilruah a awm tawh lo", Kross-an a ti leh a.


Kan nui ta ngawt.


Biak In hawnga inneih tlin ta lo mah ila, a pawi lo. Kross-a a nih chhung chu, eng hawng pawhin kan innei a ni ang chu.


Chhingpuii leh u Malawma te nen kan haw ta a.


Kan pathumin a thlawnin kan haw, Kross-an min haw tir a ni a.


Hmân ang khan, "Ka rualin lo kal mai rawh", ka ti leh a.


Tun ṭum erawh, "Bawihi, kei mah chauhin ka lo kal tawh lo ang. I hnungah kan lo kal ang", a ti ta a.


"I thinlung aṭangin min paihbo ang che", tih ai fein ngaihthlak a nuam tawhin, a thlamuanthlak tawh zawk.


Ka nu leh pain engtin nge min lo dawnsawn ang?


Kross-a leh Palai te, engtiangin nge an lo dawnsawn ang le?


Chubakah, Biak In hawng kan tlin tawh lo tih hrilh ngei an ngai dawn a. Ka pa ka zahin, a hmel hmuh ka va huphurh tak em!

(Naktukah chuan, innei ruai kan theh tawh mai thei a ni)


Show post links
Top

[Ngaia]

Thinlungmawlpa
Chapter-29
Ziaktu: Cck Lalchhuanawmi


Chubakah, Biak In hawng kan tlin tawh lo tih hrilh ngei an ngai dawn a. Ka pa ka zahin, a hmel hmuh ka va huphurh tak em!


Ka thlen rual rualin Mambawihin min dawp a, kan pahnih chauha awm kan ni bawk a, hrilh loh theih a ni lo.


Hrilh vek ila, hre vek zawk se, kan pahniha tan pawh hian a ṭha ang.


Ka nu leh pa hrilh ka la ngai a, Mambawihi hnena ka sawi angin kan inngaihzawn thu chauh ka sawi mai ang.


Palai an lo kal hunah, a bak chu ni tawh rawh se.


Insumtheih lohna rah seng a ni mai dawn a, inpawm hmak hian hahdam taka awm a ṭha zawk reng a ni.


"Mambawih, nang chuan min pawmpui turin ka duh che, hun kal tawh chu eng pawh ni sela, a tisualtu a ni lo a, nangin i tuar tluk zekin a tuar ve. Keini ai daihin a tuar nasa zawk tih kan hriat kha. Nu leh pa dik tak kar lo aṭang veka seilian kan ni a, inhrethiam tlang taka kan awm a ngai a ni".


Hrethiam tura ka duhzia ka mitmeng aṭangin a hre ngei ang.


Dam takin a meng sar sar a, sawi chhuak kher lo mah se, ka kut a rawn hmer salh salh te chu, a awmzia hrilh kher ka ngai lo.


Ka kuah hnâp a, min kuah let ve hnâp.


Nu leh pa dik tak kar aṭanga seilian kan nih loh chhan hi, hei vang hi a nih hi.


Khang hrehawmna tam tak te kha, kan paltlang tura Lal Isua duan a ni a. Vui chang nei chunga kal bek beknain tun hun hi min thlen a ni ta si a.


"Ka nu hi, a tlawm duh maiin ka ring lo. Ka pa hmin dan a thiam tih i hriat tawh kha",


"A fala ka biak ngei a ngai dawn a nih chu", huphurhawm tak a ni.


Tukṭhuan ei laiin ka sawi ta a, "School a ni? Sumo Service maw?", ka nu mak ti chu, a ṭhutna aṭanga a per nalh duh hmel lutuk.


"Kross-a a ni takmeuh maw?", min ringlo takin ka pain min en a.


Mambawihi pawhin, "In inngaizawng ṭha leh tihna maw?", a lo ti a. Ngei tak hian ka melh hrawk.


Chimawm lutuk mai.


"Inngaizawng ṭha turin kan inṭhen hleinem", ti lui ngatin, intithei takin ka dak vah a.


Mambawihin min nuih nasa kher mai. Ani hi chuan, engkim a hre vek tawh.


"Palai rawn tirh a tum bawk asin, ṭha taka min lo dawnsawnsak ngei ka phut tlat a ni", an pathum chuan min en ṭhap.


Bah nawk chung hian, "Palai a? Inneih in tum tihna em ni?", an pathum zingah tu in nge sawi ber ka hre mai lo.


An âw a inang lo tih mai a ni. An thusawi lah a inang. Engtin nge an sawi rual theih zawk ni?


Mak ṭhin em mai.


"Aw, tum. Tun ṭum chu, harsatna awm tawh lo se ka ti ngawt mai", ka thawhsan hlawm a.


Ka chhungte pawh an tho sang sang, "Kan fanu ve lem an duh che chuan lo kal mawlh rawh se", ka pain a ti dam dup a.


Thlêng silna aṭanga lehhawiin, "Ka lawm e", ka va ti a.


Ka nu erawh, Mambawihi sawi angin a la tlawm dawn lo chiang khawp. A unaunu tihsual zawng zawng, pawisawilo chungah tlak tira, hrehawm taka awmtir a duh a.


Chutiang ngawtin a tipuitling thei lo.


A tipuitling thei ngai lo ang.


Lal Isua neitu a ni tawh a, vwnghimtu a nei ṭha tawh em asin!


Khang kum tam tak liam ta te khan theihnghilh chu sawi loh, dawhtheihna leh rinawmna min zir chhuah tir zawk a.


Hmun hrangah awm ve ve mah ila, thinlung hmun khat a nih tawh avangin, tu mah biak ṭhat a thiang lo a.


Tih theih tâwk, nghak kha a ni mai!


Khang kum liam ta kha a tawk tawh a ni. A tawk tawh.


A rei mah mah a ni.


Inneih an phal loh leh, ka zui haw mai ag. Ka hreh reng reng lo, phal takin ka Thianghlimna ka hlan tawh a, dam chhung hun zawng pawh ka hlan fel tawh.


Ka mualpho fel der tawh a, zui haw avanga mualphona tur hriat loh hmak a thlannahawm zawk a ni.


Chumi avangin ka chhungte an mualpho tel ve dawn tlat.


Nimahsela, pawi ka ti tawh lo. Ka chhungte tan hian ṭangkaina ka ngei lo a.


Min ngaihsaktu leh min thlahleltu tluk a awm chuang lo.


Ka nu nen a falin inah kan awm ta a, "Nu, i lungawilo tih chu ka hria, mahse, Kross-an thiam lohna pakhatmah a nei lo tih chu i hriat ve tho kha. Kan inneihna turah khawngaihtakin engmah min sawi nawisak suh aw".


Ngen takmeuh meuh ka ni.

Tlawm ka inti a, ka nu tan chuan ka la tlawm tawk lo a ni mai thei.


Mahse, kei chuan tlawm ka inti.


Eng mah a sawi lo, min hawisawnsan hmak a. Thiam ang tawkin ka ngen nasa. Sawi nawi lo turin ka duh, ka duh takzet.


Kross-a nen kan inbiaa, "Zanin chu, lo inring rawh aw",


"I tel ve dawn em?", zawhna awmanglo lutuk ka zawt tih sawi chhuah kher a ngai lo.


Kross-a pawhin, "Bawihi, a âtthlak em mai. Ka rawn tel duh tak tak mai ang", a nuihza hle a.


A nui ri chuan min tilungchhe zawk e a.


Zanah chuan Palai leh a pa an lo kal ta a. A pain, "Pawnah a awm", min hrilh ru keuh.


SUV chhungah lum nuam takin a awm dawn a, ka ngaihtuah lutuk lo. Hmuh erawh ka châk, inhmuh lohna a rei tawh em mai.


Pindanah ka awm daih a, a hnu lawkah Mambawihin min lo fin, "Nangnu hi", a lo ti lut chu, "Thil ṭha lo thleng a awm em ni?", hlauthawng tak ka ni.


"Thleng e, chhia leh ṭha hriatna hloh ang maiin ngati nge i awm theih? Mi puitling tak emaw ka ti che a", a ti ta siah siah.


Ka rei! An hre ta vek e.


Zah(zak) avangin ka khûr, ṭhutna aṭangin ka ding chhuak thei lo.


Ka hnung a chum taih a, "A tilui che em n?", Police nise, mi dawp a thiam em mai.


Modelling-a kal a tum hi, a tifuh chiah lo a ni.


Ka nau mah nise, a mitah tak en har ka ti. U ber nihna anga entawntlaka awm tur ka ni si a.


Lumnain min tuam a, khawlum vang ni hauh loin, ka zah(zak) em vang a ni.


"Tilui lo, duhthlanna ngei a ni", heh hnuai petin ka en a, a nui sâwng. "Kum tam hnua khatia in inhmuh leh takah chuan, a hriatthiam theih mai alawm", a ti ta zêk a.


Min nuihzatna hmel chu khuh a tum lo.


Pawi lo, nui rawh se. Ka nu leh pain engtin tak min ti ang maw?


"Bawihi, i pain a hmu duh che", ka nuin kawngka kikin a lo ti a. Mambawihi hnenah min chhuahpui turin ka ti.


Nui rah rah chungin ka hnungah a kal a.


Palai ho chu, hlawhtling tak ang maw?


Ka pa hmaah ka ṭhu kêk a, a hmel a dur nasa mai. Chutah, hlauhawm lutuk maiin a lo hawi chhuak a, "Biak In hawnga inneih chu in tlin lo maw?", thukam khat avanga tluk tawp theih chu nise, ka tlu mai pawh ni loin, ka lungphu a chawlh theih ka ring!


"Aw, pa, pawi ka ti lutuk", ka âw khûr leh taksa khûr chu, thup theih a ni ta lo.


Ka khûr nasat em avangin ṭhut pawh harsa. "Chumi avanga neih duh i ni nge ni lo?", vin lo mah se, a chang fak mai a.


Zawhna tawp ber tur a ni bawk,,"Pa, chumi vang ni lo pawhin neih ka duh", a tho ta phat reng a.


"Naktukah kan sawi fel ang", ka ding a. Ka ṭhu thla leh chiang lutuk.


Ka pa kalsawn fel hnuah, zawi zetin ka mu âwn nghal.


Tuipui fawn ang mai niin ka hria, ka khûrna avang hian ka rui ṭep tawh. "Ka pain a phal i ring em?", Mambawihi pawhin min hlauhthawnpui.


Palai ho chuan tinge maw an sawi thawt thawt le aw?


A fel hunah sawi chauh se, a ṭha zawk dawn daih si a. Palai dan an thiam lo em mai.


A tukah chuan, chhungkua inhmuhkhawmna neiin, nutêi pawh ka pain a ko phei a.


Ka nu lam aṭangin ni mah se, a awm a ngai ve tlat a ni. Patêa nen an lo kal a. Mambawihin Patêa a hmu chu, ngei zet hian a melh kha kha.


Patêan engtin emaw takin a kamkhat leh a ni ang.


"A awmthei pawl ni mah se, Bawihi, Thingtlanga a awm daih tur chu aw", tun hma zawnga an ngaihsakna dawng ngai lo khan, tun atakah min ngaihsak hlawm em em vek mai a.


"Ngaihtuahawm a nih dawn lo chu, hlo thlawh a ngai dawn lo a, a ṭha", an ti luai luai bawk a.


Ka pa tih lo chu, an hmin vekin ka hre mai.


Nutêin a pawmna chhan pawh, "Chan tur i ngah dawn lutuk, Alex-a aiin a ṭha daih. In hrang in chang dawn bawk a. A ṭha, Alex-a ve, laktlaklo lutuk. Biak In hawng tlin lo pawh ni ula, a pawi reng reng lo. Biak In hawnga innei tam tak, inṭhen an tam em mai", a ti sû sû a.


Ka nu pawhin eng mah a sawi nawi lo.


A chhan pawh, Biak In hawnga innei thei lo tura, thil eng emaw kan lo tih tawh vang a ni.


Chu chuan a tihlim a, mahse, pawi ka tih ber erawh, Kross-a a hmuhsitna a zualkai vang a ni!


Jerome-a ka bia a, Phaia College kal a duh tlat si a. Nuam a ti ngawt ang.


Bike an leisak bawk a, "Lo haw la",


"Tunah maw? College-ah ka awm",


"Chuti, pasal ka neihsan daih dawn che", ka ti hmak a. "U", a lo ti tuarh.


A hlauthawng lutuk, "Lo haw la a ni mai",


"Min neihsan tak tak reuh ange aw", a lo ti chuai raih a.v


Thu tam sawi hman a ni lo, a ṭhianten an lo ko ta si a, "Duata, pasal ka nei dawn, Palai an rawn kal tawh",


"A u, dâwt sawi suh. Alex-a kha neih luihtir an tum lo che tiraw? Aw, nakinah ka lo kal ang", a au zui lang lang a.


A ṭhiante an kalbo ta a ni ang, "U, dâwt sawi loin, Alex-a a ni em, neihtir che an tum?", ka thaw ham ham.


"Ni lo e, Duata, Kross-a nen kan innei dawn",


"Maw? Engtin? Engtin nge?", a lo ti chul.

A bul aṭang bawkin ka hrilh ve leh ta a.


Dam zet hian, "Ka lawmpui lutuk che u. Ka lo haw ngei ngei ang", a ti ta a.


Thawveng tawh tak ka ni.


Ka pa nen kan inkawm a,,ani pawh, a bul aṭang bawkin ka hrilh.


"Pa, min en la, tu kuta ka awmin nge ka him a, thlamuanna ka neih ṭhin? Inneihna hi tih mai mai a ni lo tih nangpawhin i hriat kha",


"Ka hria alawm", a mitmeng dê sawr sawr aṭang chuan min pawmpui ve ta tih a hriat theih.


"Kross-an a duh chu a nei ngei tur a ni. A phu e, nangpawhin i phu", zak deuh takin, nui sen senin ka en a.


"Biak In kan hawn theih dawn loh avangin pawi ka ti lutuk",


"Ka thiam loh vek a ni, khatiang lam hrilhhre tur che ka ni a. A nih tur ang a ni zo vek tawh", ngaihngam takin ka awm thei ta.


A nih tur ang a ni zo tawh.


Hrilhhriat chu kan ni lo ngei mai, mahse, a hun leh hmun khan a zir em atin ni!


Palai lo kal lehin, kan chhung dangte pawh an ṭhu ta a. A chhan chu, inneih hun tur lam kha sawi a ngai tlat tawh a ni.


Mambawihin min lo call a,,an thusawi ka lo ngaithla.


Kan Pastor-an min inneihtir dawn!


Foreign aṭangin a lo kal vang vang dawn maw ni a?


Kross-a ka bia a, "Eng nge awmzia?",


"Bawihi, ka lo manghilh daih alawm mawle aw...Pastor nen kan inbe thei hlauh a, amah ka duh em avangin biak theih dan tur ka zawng a ni. Ani pawhin lawm takin a lo pawm a. Hrilh nghal tur che ka nih vei nen, Bawihi, pawi ka ti lutuk",


"Min rawn ve tur alawm",


"Bawihi, pawi ka ti lutuk. Ka thu kaltlangpui i pawm loh leh, kan siamṭha thei alawm", a lo ti a.


Dik tak chuan, keipawhin ṭha ka ti.


"Siamṭhat a ngai lo, Pastor chu keipawhin ka duh e".


Foreign aṭanga lo kal vang vang tur chu, keini tehlul min ngaipawimawh chuan min tilawm takzet a ni.


Kan Pastor-a kha chu, mi bik a ni tlat a!


Lal Isua neitu a nihna a hrilh laia, kan Pastor-a awm dan ka hre chak.


Kei mah ang thoin, a lawm dawn tih ka hria. Ka chiang mah zawk a ni.


"Bawihi, in awmna tur In chu a phuisui em? Dâp inah in awm ang tih ka hlau", nutêi chu a nui har har a.


Alex-a nei tura min tur nasat ṭhin nen, Kross-a nei lo hlauin a phi leh chung.


Amah zawk hian, Kross-a chu nei tur zawk a ang. Kei aiin a phur.

Patêa ngaihdan a ni lo leh ta, "A hmain hetiang a ni ngai si lo, engtik aṭangin sum bâwihah a lo tân(tâng) tak ni", kei pawhin mak ka ti.


Alex-a aṭang khan a suakbakin ka hria.


Chumi hma pawhin a ni mai thei. Kan lo hre lo mai mai zawk pawh a ni ang.


Kross-a hmuh an duh hlawm em avangin chaw ei tura ka sawmna hnial loin a lo kal a.


Nutêi awmdan chuan min tizak ngawih ngawih.


Kross-a hmai ka zah ṭum ber a ni ang. Nutlingpui, keiin ka khak chiam a mawi si lo.


Patêan hawpui a tum pawhin a duh tlat lo. A thinrim chu, Nanaua leh Tetea te kaiin an haw daih nghe nghe.


Kei atak pawh ka inchhir. Nutêi awmdan a makin, min tizak em mai.


Hnaih hrut hrutin a kuah thuak thuak a, a thil hriat duh pawh, engdang a ni lo, "Thlakhatah engzah nge i lakluh?", tih mai mai.


Chumi tizualkai turin ka nu a lo inrawlh ve sek bawk a.


An pahnih chuan zaka, Kross-a be ngam tur pawh an ni lo. Keimah ka lo zak zawk chu a ni si a.


Mambawihin, "Hawtir tawh mai teh", a thaw halh a. "Ka zak lutuk hi, ka puak lo chauh tawh, ka va ṭim nghek ang tih ka hlau", a ti sar sar.


"Nutê, Kross-a kha haw tawh rawh se, a chau ang, a thlenna te pawhin haw har an ti tawh ang", ka va ti a.v


"A ngai lo, haw lo ang. Kan inah lo riak rawh. Takah, i hria em? I tan hian, SI lakah Bawihi ka lo hum char char asin",


"A ni maw?", Kross-an min lo melh zawk.


Min nawrtu ber chuan min puh ta hmak. Patêan hau ngei ngei teh se.


"SI aiin i hausa zawkin ka hria. Bawihi", nutêi chuan min lo en vah a, "Inhlan mai pawh kha a ṭha reng a ni", nutêi chuan mun thik tlata ka hriat pek chu!


A awmdan aṭang chuan, inhlan ve mai pawh a pawiti hauh lo ang le.


Nui har harin, "Bawihi aiin lo inhmu hmasa ila aw", Kross-a thlêk vang vangin nutêi a thaw ham ham a.


Kross-a taksaah a lawnkai lo chauh a ni.


Kross-a chuan nutêi namsawnin, "Bawihi aiin kan inhmuh hmasak kha, i hre tawh lo em ni?", a ti ta charh.


Nutêi a nui tawi tâk.


A awmdan chu ka hrethiam lo. Ka pa inthiar a lo kal ta a, nutêi chuan a awmdan a siam ṭha rang ngei mai.


Zanin hian, a nihna dik tak hriattirin ka awm leh ta.


Ngati nge, nihna dang an lo neih zel hlawm le?


Ka pa nen puitling takin an inkawm thei ta a, sum lam leh ei zawnna an sawi ve lo.


Ka tet lai chanchin te Kross-a chu a hrilh mai mai.


Nutêi thusawi ai thlawt chuan Kross-a pawhin ngaihthlak nuam a ni.


Kan hnungah nutêi a ṭhu a, a lawm vak lo, "Bawihi, a hmaah khan ṭhut ve ka châk", hmusit zetin min ti a.


"A seat a nia, tu mahin an luahlan thei lo", Kross-an a ti hmak mai si a.


"Chuan(chuang) a nuam hle mai,.SUV an ti mi kha? La lei ve a ngai a ni", patêa chauhin hlawh a nei a.


Huiham, nutêi mizia hi a mak tawlh tawlh.


Ka zak lutuk chu, nutêi kan thlah fel hnuah ngaihdam ka han dil tak tak mai a nih kha.


Nutêi kawchhungah eng nge lut ni?

Khati teh vaka a awm. A mak a ni. Tun hmain khatiang khan a awm ngai si lo.


"SI lakah ka tan a lo hum char char che a ni maw?",


"A sawi ang kha ni mai", Kross-a pawhin a ring lo.


Nutêi khan min hum lohzia, a chetzia aṭang khan tilang nghal vek hek.


"School kal tura i lo kal hunah kan inhmu dawn nia aw",


"Tihian, i haw nghal dawn em?",


"Nghal lo ang, Counter ka ngaihven leh phawt ang".


Ni e, hetah pawh a nei tak alawm.


Ka bek a rawn dawm a!


"I nutêi khan ruih a nei em ni?",


"Ka hre duh lo, min tizak lutuk", ka ti hmar hmar a.


Patêa hrilh ka duh, ka hrilh ngei bawk ang.


A tukah Kross-an min lo bia a, "Bawihi, lêng ang, ka lo lam ang che".b


Kan lêng a, ice cream bulah kan kal.


Ka puin min hmu chu, "Nangni pahnih hi in mak e", a ti nuah nuah.


Inneih kan tum thu leh, chuta lo kal ve turin Kross-an a sawm a.


Ka puin a han hnial deuh naa,,Kross-an a ngen em avangin a hnial rei thei ta bik lo.


Thingpui dawrah te chawlin, handbag min leisak, hnial theih pawh a ni lo, "Nakinah, kha aia tam kan la lei dawn nia", a ti sup a.


Counter-ah kal leh phawtin, chumi hnuah min thlah ta a.


Thingpui in tura ka sawm takngial pawhin a duh lo.


Ka chhuah hmain ka kut a rawn vuan, "Inneih nan thla tam a la awm a, Bawihi, duh lo viau mah ila, kan nghak chhuak zo lo ang tih hi ka hlau a ni",


"Ngati nge i hlauh? I hre tawh lo em ni? Biak In hawng thei lo tura i laka ka inhlanna kha? Nang i nih loh chuan tu mah an ni ngai lo ang", a hlauhna a la kiam chuang lo.


Nutêin nge, ka nuin nge, tu berin eng thu emaw tak hrilh an awm a ni chêk ang a. A ni lo mai thei bawk.


Hun nghahhlelh tak kan neih hian, Sana chek ri a ringin, a kal muang em em mai si a!


Kross-a sawi angin, inneih nan thla tam a la awm a.v


School ṭan a hun mai avangin, kan in aṭanga ka kal chhuah a ngai leh ta.


Pastor-te pawhin lo kal turin an inbuatsaih mek bawk a. Amah biak theihna tur ka nei tawh a.


Masangi boral ka tuarpui thu sawiin, kei ve mai hian thlamuanna thu te ka sawi a.


Ani tan chuan, keia thu chu eng mah tham a nih loh tehlul nen, "Ka va han lawm em! Ka thawveng huai mai", ka lawm a tling ve em em mai a ni.


Kross-an min lo hmuak a, hnathawh kawr nen ngat.


Chhingpuii leh u Malawma te pawh an lo thleng chawpchilh nghal.


"Biak In hawng loin maw?", Chhingpuii chu a meng bial kawk kawk. U Malawma pawh, chelh bettu awm ang mai, a ṭhu khawng at.


Chhingpuii chuan, "Mak ve!", a ti hluai a.


"Mahse, a ṭha tho e. Sawi loin Biak In hawngin i innei thei tho si a. Chutiang chu an awm nawk tho asin. Mahse", Kross-a nen min en dun vang vang a.


U Malawma lo inrawlh vein, "Mahse, mi mit hmuha lanmawi aiin, Van lama mi mit hmuhah lanmawi a ṭha zawk si a", a lo ti a.


Chhingpuiin, "Nia, tluang takin innei mawlh teh u", a ti ve sep.


An pahnih bakah, min lawmpuitu kan tawng nual.


Kan pahniha chanchin an hre deuh vek tawh a, chuti chunga, "Hausa loin, rethei se chu inneih an phal teuh lo ang", ti tawk an awm tho.b


Huatna tur a awm lo a, an sawi dik, ka chhungten an pawm chhan pawh a ni a.


Mahse, kei min hnuk lut erawh, haw(hua) lo chu ka ni lo, pawm dan ka thiam mai zawk a ni.


Chung sawitu te hnial chiamin a sawt dawn lo a.


Kum tam hnuah thu kan thlung thei dawn a ni a, chung ngaihtuah chuan eng tham mah a ni lo.


A zawng zawng an hre tawh si lo a, kan hriat loh lai taka hi, Zeldin kan hrat leh, nuam kan tihna a ni bawk si.


Show post links
Top

[Ngaia]

Thinlungmawlpa
Chapter-30
Ziaktu: Cck Lalchhuanawmi

A zawng zawng an hre tawh si lo a, kan hriat loh lai taka hi, Zeldin kan hrat leh, nuam kan tihna a ni bawk si.


Math ni lo, Subject dang lak duh ve tawh tak ka ni.


Kross-a phei chuan, "Headmaster ni thei turin inzir zel la ka ti", a ti mauh a. Min tihrilhhai.


Lehkha zir ki ka tan chuan, beih tham a ni. BA pawh, Second-ah ka pass hram a ni a.


"Second-ah ka pass a, ka zir zel thei lo ang", ka tih laia, a nuihza insum kha a mittui a tling pam a. Nui turin bual inah a lut ngat.


Pawn aṭangin a nui ri ka hre thei vek sia, phakar thiam reuh lutuk.


"Miss, lehkha zir ka peih tawh lo", a rawn ding chhuak hlawl. Pawl li room-ah ka awm a.


Pawl hniam lama kan zir tawh, number tam Sem kan ennawn mai mai a. Hlimpuia a ni nghe nghe.


A hming ang tak hian, eng pawh a hlimpui thiam a. Math-ah hian a chak lo em a ni.


Subject dang chu hnehsawh tak a ni. Math-ah hian a hnufual bik ziah. In lamah nen hian kan inzirtir ngun bik thei lutuk.


Hlimpuia zarah, "Kei pawh", an ti sup sup.


"A chhan han sawi la, a ṭhat viau chuan i chawl daih dawn nia", ka han ti a. Phur lutuk tak maiin, "Rama hnathawh ka duh zawk", a ti bawl.


A ṭhiante hoin nui chungin a hnungah an bêng vak vak a. Nui uar fal deuhin dawhkan an bêng bawk.


"Ram lam hna i thawh lohna turin alawm, School i kal a, lehkha i zir", ka han ti tak naa, "Pu Kross-a pawh nitin Ramah a kal ziah a, in ṭha deuh a sak saw", chu chuan min hnial dang chiang lutuk.


Thlai leh Thei a hralhnain in a sa a, chu loah, kan hlawh zahve dawn hi Rama nitin a kalna aṭangain a ni bawk.


Hlimpuia sawi leh azarah, "Nia, Miss, a dik chiah. Keini pawh, Lo neih aṭangin in kan sa asin. Ni tak, motor pawh kan nei", Sawmpuian a lo ti ve bawk.


"Sawrkar hna thawh tur a awm lo an ti a, lehkha zir a ṭul lem lo e", an sawiho ta diat diat.


Pawl li zirlai ṭhah si-ah chuan, an ngaihtuahna chu a mak a ni!


Kâ hôa en an ngai, "Lehkha zir vak vakin, Sawrkar hna hmu lo ta ila, Ramah hnathawh ngai leh si tho se", chung chu an pawm dan ber a ni.


Muanawmin, "Miss, kei pawh, Chawhmeh zawrh(zuar) hi a hlawk ka ti. Chawhmeh zuartu ka ni duh. School kal hi ka ning", a rawn ti chhuak phawng a.


An sawi zui leh diat diat.


Min timangang zawk alawm.


"Le, le, min lo ngaithla lawk rawh u", fel taka ṭhuin min en ṭhup a. Zâm chhiat a awl duh lutuk.


Naupangtê mah nise, chik taka min en tawh hi chuan, ka sãi hlawk hlawk thei.


"Lehkha zir chu in peih lo viau em ni?",


"Aw", an ti rual dual. Engtin nge ka han hrilhfiah ve tak ang aw?


Zawhna dang siam lehin, "In nu leh paten lehkha zir turin nge an hrilh ṭhin che u a, Rama kal turin?",


"Lehkha zir turin", an ti leh dual.


"Kan nu leh paten lehkha zir turin min ti a, Rama kal turin min ti ngai lo. A dik em?",


"Aw, mahse", Hlimpuian a lo ti leh hram. "Ka sawi phawt dawn alawm", nui saihin ka ti a. A bu nghauh nghauh.


"Kan nu leh pate hian Sawrkar hna kan thawh theih nan chauha School min kaltir an ni lo a. Lehkha min zirtir an ni hek lo.


A nih, tunah hian, tê tak tê kan nih lai aṭangin Ramah min hruai char char ta se, School kal miah lo ila, Pakhat hmun khat kan hria ang em?", an lu an thing nawk nawk a.


"Pakhat leh pakhat belh kan thiam ang em?", an lu an thing leh nawk nawk.


"Miss?", Hlimpuia bawkin a kut a lo.phar a, "Miss, ka hming ziah dan pawh ka thiam miah lo ang",


"A dik chiah", an ti rual leh sup sup.


Kan inhrilhfing thei em ang chu a.


"Hlimpuia sawi kha a dik chiah, kan hming kan ziak thiam ringawt te hi a hlu asin, in ti ve em?", a hma aiin kan hmin deuh chuan ka hre tawh.


Ka tei kual a, "Lehkha kan zir chho zel ang a, chutah chuan, Rama hnathawh dan te leh, Sawrkar hna kher lo pawh, hnathawh tur ṭha tak tak a awm ṭeuh tih kan zir dawn a ni.


Chuan, pawimawh deuh pakhat chu, Pawl sawm pass ngei ngei tur. Pawl sawm pass tawh te kan hria em?",


"Aw, a u", a ṭhenin an ti a. A ṭhenin an u te chiah lo te pawh an sawi nak nak.


"A bikin, hmeichhe tan chuan Pawl sawm pass ngei ngei tur",


"Miss, ngati nge?", ka thusawi a puitling deuh em aw ka ti ta.b


Ka han ngaihtuah ṭha a, "A chhan chu, hmeichhia chu pasal nei tur kan ni a, pasalte inah awm a ngai ṭhin a",


"Miss, a nutêi pawhin pasal a nei a, an inah a awm tawh miah lo", Mimtêin a lo ti a.


Mipa lam an nui rah rah, "Nui suh u", ka han ti a. A kâ hupin an la nui tho. Nuihzatthlak an hre thei lutuk mai.


"A chhan chu maw, a pasal inah a awm ang a, chuan, mi zawng zawng Nutêi a lo ni dawn alawm,", Mimtêin a hrethiam ang chu maw?


Ka hah, sawi tur ka inzir lawk lo a. A thleng thut bawk nen. Ka ṭang si a, an hrethiam tawh lo ang tih ka hlau.


"Miss, sawi leh tawh la",


"Aw le, mipa tan leh hmeichhe tan pawhin pawl sawm pass ngei ngei tur aw. Chuan, harsatna avanga chumi thleng thei lo kan awm palh a nih pawhin lungngai loh tur", ka thaw ham ham a.


Eng thu nge ka sawi leh tak ang?


"Yesss", an ti dual a, "Pawl sawm kan pass thei lo a nih pawhin, nasa tâwka lehkhabu chhiar ṭeuh tur. Tam tâwk, khawvela lehkhabu zawng zawng chhiar chhuah tum vek tur", ka ṭang lutuk a.


Nuih a za tawh zawk.


"Thuruk ka hrilh dawn che u, in sawi chhuak tur a ni lo a nia aw", ka heh ka tawk a, "Shh", ka han ti a.b


An heh tawk ṭheuhin, "Shhh", an lo ti ve bawk.


Hlimpuia chauhin, "Shh, Zip", a ti deuh kher. School kal tinuamtu pakhat a ni ve a. A hlimawm hrim hrim.


"Pu Kross-a hlawhtlin chhan ka sawi dawn, in hre châk em?",

"Miss, sawi vat vat rawh", min tur ta sek.


Ka sawi ta a, ngun deuhin an ngaithla. Belh leh paih zirtir erawh chuan an ṭawng peih hle a ni si a.


"Pu Kross-a pawh School a kal miah lo, pawl sawm pawh a pass miah lo. Mahse, a hming ziah dan a thiam a, a chhiar thiam bawk a. Chuan, belh leh paihte, sem leh puntir te a thiam a.


Chumi a thiam zual zel nan, School kal loin Pawl sawm pass lo mah se, lehkhabu tam tâwk tâwk a chhiar ṭeuh a. Lehkhabu a hmuh theih ang zawng zawng, a ngaihnawm emaw ngaihnawmlo emaw a chhiar vek zel",


"A peih e", an lo ti chu, ka nui hak.


Kei pawhin peih ka ti. Mahni Zirlaibu takngial pawh chhiar peih lo laiin, hei hian a thawkrim tih a tilang chiang hle thung.


"Lehkhabu a chhiarah chuan Rama hnathawh dan te, Anṭam chin(ching) dan tur te, Vawk vulh dan tur te, chuan, motor tlantir dan te zawng zawng a inziak a ni.


A lehkhabu chhiar avangin, "Ti chhin ang", a ti a. Tichuan, tunah chuan, Motor a nei a, in a sa a. School a nei bawk. Chung a tih theih chhan chu, lehkhabu a chhiar vang vek a ni.


Keini pawh, kan nu leh paten School kal tura min tih chhung chu kal zel ila, Sawrkar hna aia hna ṭha tak tak thawh tur a tam ka tih tawh kha", Pawl li zirlai ho aiin, Middle School emaw High School-ah sawi ila, a ṭha zawk phian ang.


"Peih lo tâwk pawhin School lo kal ula, in thiam loh lai min zawt zel anga, a ṭul chuan, picnic chung tein kan inzirtir dawn alawm", an lawm lutuk chu an au dur dur.


"Miss, tak tak aw", an ti hlut a.


Sawi sual lo turah ka inngai. La picnic ho pui reng reng ila, an zirlaiah pawh phurna thar a siam mai thei a ni.


Chhingpuii leh Êngi te, mi dang dang ka sawipui a. Anni pawhin ṭha an ti.v


"Tun kar Inrinni hian ti nghal ang u", Headmaster-in a rawn ti thut chu, kan ṭhutna aṭangin kan thlawk chhuak nghal vek!


A nui huah huah a, "In va han phu nasa tak em aw!", ṭhutna tur chair kan pe a.


Naupang tihphur nana picnic kan lo sawi ho thu te kan sawi ṭha leh a. Headmaster ber ber chu a phur berah a ṭang.


"Bawihi, ka lo va kal hmasa ang aw", Chhingpuii a chhuak a.


Volley Ball pawh, bên ka thiam ve tawh lutuk. Tihfuh loh zeuh chang ka nei ṭhin tih loh chu.


Khel tur an lo kal tam hma hian ka khel ṭhin a, an tam ṭan ta maw tihah, ka chhuak daih zel.


Chubakah, tlai tin Kross-a a lo haw tawh a, inkhel en turin Field kan hual ṭhup zel.


Tlai tin erawh an inkhel chuang lo, chawlh an mamawh atin a ni.


An inkhelah pawh, Kross-a a tel ziah lo a. A tel chhunah an chak ziah. A telpui loh pawhin a pawl te chuan chak châng an nei ve tho.


Choka lam ka tihfel zawhah pheikhawk bunin, jumper ka ha a, leggings ka hak avangin kekawrbul ka ha bawk.


Inkhel thiam tak te hi ka ang ṭhin a nia.


Ka thlenin an lo la tam vak lo bawk a, Êngi leh Mercy an lo tel thei tlat. Fiam nan tak an hmang a.


Anni lahin insawisain, kan nui har har hlawm a.


An tam deuh hnuin ka chhuak leh ta daih, Mercy tui ken ka in a. Thlan a chhuak hman a, hei tak hi ka duh.


School-ah kan awm nileng a, thlan chhuahna tur ka nei lo.


Ram aṭanga kan ṭhian lo haw te lah, an Êm nghat sawk sawkin Court chhungah an lut rawk a, an hlap per pawp pawp.


An zuang sâng thei si, ka awt ve thei lutuk.


Mipa lam pawh an lo haw ṭan a, "Ball in kawl em?", an lo ti a.


Mercy'n, "Awi, ka theihnghilh daih", a lo ti vah a. A nui sen sen. "I va nikhua lo ṭhin tak", chupa chuan a ti hmuk a.


"Ka theihnghilh a ni mai alawm", Mercy lahin a ti bak hlar.


U Malawma a lo thleng a, "Ka lo keng", kan thaw huau vekin ka hria.


Kross-a pawh a lo thleng a, ka ṭhutna hnungah a ding a, ka jumper lukhum min khumtir phet a tum a, ka duh si lo.


A tawpah phei chuan, a ke ka rah sak vak.


Nui tat tatin a lo kun hniam a, "Naktuk School chawlh a nia, Nghakuai chiah ila", Ram rim a la nam.


Phur tak hian, "Chiah maw?", a bu nghat.


Lei seh tutin ka nui a, "Lei min chhuahkhum chuan ka hruai lo ang che", ka kâ ka chip hmak.


"Kross-a, lo kal rawh", an lo ko chu, "Ka lo en zawk ang che u, ka chau deuh tlat", a ti a.


"Lo kal mai mai teh, inawm tleina hun in la nei dawn chauh", an nui zui hawk hawk a.


U Malawma hlei hlei a nui nasa. Ka la hau dawn, chaw ka chhum kep tawh lo ang.


An sawm hlawhtlin tak lohah, ka bulah a ṭhu a.


A sawi ang takin a chau a ni ang, a ṭhu hle hle. Hawin intifai zawk ta se, a harh kâwkin ka ring.


"Bawihi, i la en duh em?",


"Haw i duh em ni?", a bu nghat.


Ka hawpui ta a. Kalkawngah a iptepui aṭangin Chengkek a lo phawrh a. Khawimi nge tia ka zawh chuan, "Huanah a awm reng kha, i hmu lo em ni?",


"Hmu nang, a kung a lian nge a tê?", a thur chu, ka ha a ṭim sawk a, ka maimitchhing diar diar.


"A thûr viau em ni? Khawimaw?", mu khat a ei a. Kei ai aiin thûr a ti a, a meng tawh lo reng reng.


A kuta chelha kalpui a ngai.


"Chi a ngai nih hi", a ti sup a. "Ka chil a rial", a ti chu, "Chil rialna tham a ni lo, chil rial te chu rilṭam laiin alawm a awm ṭhin", ka ti mauh a.


A rawn meng thei ta, "Ni mai rawh se", a ti sup a.


In kan thlen nghal mai avangin, "Zanah ka lo lêng dawn nia", bu zeuhin, "Ngei ngei aw", bân ka vai a.


Chhingpuii lo haw chuan, "Bawihi, i ṭhian atan tu nge ni dawn?", a ti sar sar a. A phur em em leh nghal.


Min tiphu zawk!


Ngaihtuah loh lam tak a ni.


"Ka van hre mai bik lo em, mahse, ka nau hman ka tum deuh. Unau pawh a theih tho a, ka unaunu neihchhun a ni tlat si a. Ka ṭhian atan ka hmang ang", Mambawihi mitthlaah a lang a.


Ṭhian atana ṭha tur ber a ni.


Chhingpuii hmel chu a dâng nghal sawp sawpin ka hria. Engti zia nge ni?


A hlim loh hmel ta riau pek a, "Ka man i ei ngei ngei a ngai", ka ti siah a. Nui chungin a bu ve zauh.


"Zanin chu, Malawma ka va rim zawk teh ang",


"Chaw ei turin a lo kal si lo a, ko ta mai zawk ila", Chhingpuii hmel dur khup chu hriatthiam a har.


A lo hawa a hmel nen a inang tawh lo.


Thlêng chawiin a tho ta daih a, "Ka va lêng ve hrim hrim ange, zanin chu a buai deuh dawn niin a sawi a, ka va pui pah a ni mai", kei pawh ka tho a.


Thlêng a sil chhungin hmun ka lo phiat a. A zawh ve leh a insiam zung zung.


"Kross-a a lo lên pawhin, engthil mah ti s'u aw", ngeiawm lek lek hian a ti a. A ngeiawm mah zawk a ni.


Ṭha takin ka chhâng ve mai bawk a.


A kal hnuin Mambawihi nena inbiain, "Ka ṭhian atan ka hual che, i hnar thei lo ang. Thupek a nia aw",


"Hnar lo ele...Nang aiin ka nalh dawn", ka ner nak.


"Mo kawr hak i tum ve ringawt ang e aw", a lo nui ar ar. "Awi, ah, i thu lo em mai. Mo kawr dum ka ha dawn", a nui ar ar a.


A ha dawn lo tih kan pahnihin kan chiang lutuk tlat.


Kei aiin nalh pawh nise, ka pasal turin a mitsir duh dawn chuang lo a. A pawi teih teih lo em mai.


Mambawihi nena kan inbiak zawhah Jerome-a nen kan inbe leh, "A u, Tuxedo ka ṭhuitir a. Naktukah Smart Shoe lei turin ka bazar ang", ka naute pahnih chu, kei ai mahin an phur zawk emaw tih tur a ni.


Ka lawm an va tifamkim kher si em!


"Biak Inah ni lo mah se, Maichamah, kei chauhin ka hruai dawn che. Ramah emaw, Tuifinriat chungah emaw a mawngah emaw pawh innei dawn mah ula", ka nui har har a.


Jerome-a tumruhna chuan mi a tihlimin, a nuihzatthlak bawk si.


"Chuan, i u Kross-a nen kan inhauh hunah i bulah ka lo kal daih ang",


"Tak tak aw", kan unauin kan nui dun kar kar a.


Kawngka inhawngah ka hawi phei a, "Duata, nakinah kan inbe leh dawn nia aw, lehkha ṭha tâwkin zir ang che".


Chau zetin ka mal chungah a mu thla nghal a, inneih hma hmain a tar zo mai dawn.


"Chawl ve ṭhin la ka ti, nitin lo deuhin, ni hnih danah emaw te kal ṭhin la",


"Nia", a mit a chhing a. "Mut a chhuak ngei mai", a biang khuar duak chu duat takin ka chul a.


Eng mah ka sawipui lo, a muhil a ni ngei ang, a thaw sât sât a.


Chu tluka duh ka nei chuang lo.


A kekawr ipte aṭanga phone lo lawr chu ka ban a.


On ka tum zet naa, ka ṭhulh leh ta zawk. Fel takin a kekawr ipteah ka dah leh a.


A chhungah eng nge awm ka hre lo, hriat chu ka duh. Mahse, ka hriat loh tura a duhte a awm mai thei a.


A thu hmu loa ka khawih tih a hriat chuan min hau zawk ang tih ka hlau bawk si.


Thla tlêm tê chauh a ni tawh a, chuta kara lo intihthinrim ka duh lo a ni.


Mahse, Ka thlêk ṭhin a, a chhungah eng nge awm tih ka hre duh tlat bawk si. Kross-a thu hmu loa khawih ka duh bawk si lo.


Rilrua boxing an khelh mek laiin, "Password chu 'Bawihi' tih aw", ka phu nasa lutuk chu, ṭhutthleng hnungah ka intauh dat.


"Bawihi, i ṭha maw?", a tho thuai a.


Bu nghauh nghauhin, "I muhil emaw ka ti a",


"Muhil ila chu, i buai der dawn asin", phawk hrua melhin, "Chu chu 'nge awmzia?",


"Riah i phal dawn lo a, min paw(pua) haw thei dawn hleinem", nuihza takin min en a.


Ka nuihzatthlak thei viau em mawnile?


A phone chu min enpui ta a, sir zawnga ṭhuin ka ke a mal chungah ka nghat ta thung a. Ka nghawngah nghet takin min kuah.


Phone ka hmuh tawh zawng zawngah a ruak ber ang!


"Biak tur ka hre lo, khang ho kha ka hnathawhpui te an ni a. Chu loah, message type vak vak ka peih lo. Mamawhna leh thil hmanhmawhthlak a awm hian ka va bia a, a ni mai",


"Inbiak ai chuan Message-a inbiak hian a ṭha zawk alawm. Zanlai angag te hian, phun mur mur ngai loin", ka fiam zauh a.


Ni lo pui puia min chhân leh loh hram ka beisei.


"Message type ka peih lo, chutia ṭha i tih leh, ka lo be tawh lo ang che", ka tih reng kha.


Kross-a hi chu aw....


"Chutiang ka tih loh kha, a ni lo zawng ngawtin sawi ṭhin suh", a kut a lasawn a, "Message-a inbiak a ṭhat thu i sawi a, keiin ka peih si lo a. Message-a inbiak hi chu a ho em a ni", ka ke ka hlang thla a.


Phone vang vek.


"A ṭhat thu ka sawi a ni mai a, inbiak loh tur ka tihna a ni chuang hleinem", a tukkhum a dawm a.


"Zan reiah pawh nise, i âw hriat ka duh ṭhin avanga lo bia che ka nia. Peih ila chu, ka lo call ngai lo ang che", min tibeidawng.


Tho phatin, "Nang chu i mak thei em mai. Ka thusawi apiang a ni lo zawng ngawtin i sawi a. Tihtauh leh thinrim pawh a theih ve loh, nang mah zawk i titauin i thinrim lêt hmak zel a", ngawi rengin a kun tlat.


"Chhingpuii chu, u Malawman a thlêm hliau hliau zel a, kan pahnihah chuan kei mah hian ka thlêm ziah che", a lo hawi chhuak a.


"Sawi zel rawh", a ti duh chauh lek.


"I sual thei em mai!", ka ti hlur a. Min tiṭap thei takngial dawn. "Bawihi, min hresual a ni ang, kei chu Malawma ka ni lo",


"Engtik laiin nge Malawma i ni ka tih? Chhingpuii tihtauh leh thinrim a thlêm thu ka sawi mai alawm. Chhingpuiin u Malawma a thlêm ngai lo",



"Engtin zel?", ka thinrim chu ka insâwi nghawng. "Ka sawi ang kha a ni mai, a tlawm zawk leh nêm hmasa zawkah ka ṭang ziah a, tihlungawi i ngai ziah",


"Chuan...", a hrethiam lo lutuk chu chhuatah ka ṭhu thla a, "Chhingpuii nen in inngaizawng a nih loh chuan, ngati nge, hmânah khan 'u Mawi' tia a koh chea, a kuah vel che? I bânah te a kuah a, i mal chungah a ṭhu lo chauh a nih kha. U Malawma nen an inngaizawng tih hre rengin i hnar duh lo a, u Malawma rilru tur pawh i dâwn lo em ni?", ka ti sep sep a.


Thikna leh rilru natnain min tuam thar leh a, chhuatah mittui a far kauh kauh!


"Lo kal teh", ka hmaah ṭhuin min kuah a, "A laka i fimkhurna tur tak a nih kha. Malawma hian a la hmu thiam lo mai chauh a ni", a thu min hrilh chu, ka man thiam deuhin ka hria.


Khatih lai khan, u Malawma rilru a lo va hrehawm dawn tak em!


"Bawihi, min lo en teh",


"Aih, ka duh lo", min pawm khawm hmak a. Ka thaw ṭha thei lo dawn dawn.


Nautê kan pawm ang chiahin min pawm. Chhuatah min la ṭhutpui a, "Thingtlang tlangval leh Khawpui Nula kan nih hun chhung a rei tawh si lo, hun tlêm tê chhung hian, Ramah ka hruai char char dawn che, hmân ang khan", phê ruaiin ka nuih sen sen a.


Ramah kan inzui nasa hle ṭhin a nih kha, "Êm phurh i thiam tawh em?", a ti chu, "Sual suh aw", bên ka tum chu ka kut a man a.


A bek min dawmtirin, "Kross Putara ka la ni em bik lo a nia aw", ka nuih ar ar a.


Kross-a pawh a nui sun sun, "I inhmeh reuh em mai, Kross Putara",


"Bawihi, tun bak kha chu, hriat nawn ka duh lo a nia aw", ka lu ka thing hmak thung.


A inhmeh em a ni.


"Takzetin, tun bak kha hriat ka duh tawh lo", a kapkarah ṭhingṭhiin a nghawngah ka kuah a, "Lutuk, tun bak kha chu i hre nawn tawh lo ang. Nang chu, ka Kross-", ka ti chauh, "Bawihi", ka nui tet tet.


"Bawihi, a tihchi viau lo ang aw", a intihlauhawm kual vel.


Ka hlau tawp si lo.


A mitah tak enin, "A sawi hmasatu zawk i nih kha", ka kâwngah pawmin, "Chuti, han sawi leh teh", a heh a liak huh hlap a.


Min titim, sawi a chi miah lo, "Sawi i phal loh kha", ti sepin, "Thuawih theih tak ka nia",


"Chuti, ka thu i awih dawn lo tihna maw?", ka thusawiah ka inâwk ta!


Show post links
Top