Thinlungmawlpa BY Cck Lalchhuanawmi (Completed)

[Ngaia]

.

Thinlungmawlpa
Chapter-1
Ziaktu: Cck Lalchhuanawmi


"Bawihi, bazarah kal lawk mai teh, vawiin chu ka peih lo riau",


"A ṭha alawm".


Bazar tura insiamin, chawhmeh dahna tur bag kengin ka chhuak a.


Chawhmeh lei tur ho ka nuin ziakin min pe thlap bawk, pawisa nen. Vawksa leh Anṭam list-ah a tel tih, en lo pawhin ka hre thei.


Anṭam zawn leh hrep a ngai dawn a ni.


Khawpui tih takah, kan inpel suau suau mai. Krismas bazar aiin a la nuam. Krismas bazarah chuan, kal ngaihna a awm lo.


Kal pawh kan ni lo, a tleng hian kan tlengin ka hre mai.


Rul angin kan tleng, a nuihzatthlak zawk.


Anṭam zawn ngat ngat ka la hmabak, chhe deuh deuh ka duh bik si lo a. Hei avang tak hian ka hah phah hrep zel.


Tei tei na na nain, tel thum ka hmu a, ka lei hmak. Chhe lutuk a ni chuang lo. Haw vang vang ang.


A zuartunuin pawisa nawi min kir ve leh, "Ka lawm lutuk e", bu zeuhin, ka kal nul nul.


Chawhmeh lei zo tawhin, a la hma em avangin ice-cream-in mit a la vei nen, lei leh hmiah bawk a.


Ei chungin ka kal a, hriat loh laiin tu emawin min su a, inring hman hek lo, ice-cream ka thlauh.


Min sutupa lahin, leia tla ice-cream tla chharin min pek a tum ta mai.


"I hmu lo em ni? A balh vek tawh kha", a en vung vung. Hahthlak mang e aw...


Lukhum hmathlawk var a khum a, a sângin, a dar a khauh. Hmuihmul an ṭo siar siar a, a hnar ngul a sangin, a mithmul dum takin a chhah deuh bawk a.


A mitmu phei chu, dum ṭha tak a ni.


Ngo lam aiin, hang deuh lam a pawl a, hang pawh a ni chiah lo, ni sain a emna hnu a ang ber.


Ka chik nasa lutuk chu, ka inthingharh rang teh e.


Ice-cream a kenna kut chu, a thap hrup tih hai rual a ni lo. Kuthna a thawk nasa tih a hriat.


Thingtlang lam mi a nih ngei dawn hi.


Dam deuh zawkin, "Paih daih tur a nih hi, leiah a tla tawh si a, ei tlak a ni tawh lo", ka laksak a.


Bawlhhlawh bawm a awm remchang hlauha, ka paih nghal.


Ka chawhmeh min chuh thutin, a lû chu kal tur a tihnaah a thlê a, zui loh duh pawh ni ila, mi hre chang loin a kal nul nul a. Chawhmeh min khaisak daih bawk si.


Ice-cream zawrhnaah a ding a, a kawk, "Min leisak dawn em ni?", a bu nghat.


"Chutiang a ngai lo, a ho lutuk, tihpalh a nih kha, ni dangah, kalna tur en tawh la", dam thluama tiin, chawhmeh a khai laksak ka tum a.


Awm sawnin ice cream bawm a luin a kawk, a ṭawngthei lo nge mawni le?


Ka khawngaih em avangin a man tlawm ber chi pakhat ka la a, "I lung a awi tawh em?", vawihnih a bu nghat.


Chawhmeh khaina bag min pe a, ngaihdam min dil niawm takin ka hmaah, Korean ho angin a kun zeuh.


A chet dan chu ka rin loh deuh a nih avangin hrilhhhai ai mahin, ka khawngaih tlat.


Ṭawngtheilo bengchhet nge a ni ang?


Ka ṭawng a hre thei bawk si a, a beng a chhet lo tihna.


"Nih, ice cream min lei sak avangin ka lawm e, ka'n haw tawh ang e. A nih aw", bân ka vai a.


Min en vung vung, a hlauhawm dawn dawn alawm.


Thui pawh ka la kal hman lo, ka dar rawn khawihin hnung lamah min kuai a, chocolate ice cream, a bawm ang chi hi min pe!


Ka kutah a dah hmak a, "Lawkin, a to awm vei nen-",


"Lo ei zo vek ang che", mak ka ti lutuk chu, "Maw?", ka ti hû.


"I, i, i ṭawngthei elaw?", ka mit vun danglam danah, zau tâwkin ka meng tih ka hre thei.


A mak ve em bawk alawm, a ṭawngthei!


Lukhum hma chelha tihniam deuh hretin, a heh tichein a lo kalna tawhah a kir a.


Ice cream bawm ka ken chu a vawt mai bawk sia. Ka mi tawn tawhah, a la mak ber ang.


Min lo zui ni tehreng maw, zuitu nei angin ka inngai tlat. Tukkhum hi, a hit mum mum a. Chu chang ni lo, ka kal reng reng chu, chik taka min thlithlai rengtu awm ang mai a ni.



Ṭul lo deuha hnung lam hawi thut thut ka ching a, tu ber nge hmuh ka tum phei zawng ka hre miah lo thung.


Mak ṭhin a nia!


Pawl sawmpahnih result chhuakin, Third Division-ah ka pass a. First inbeisei ngam lo mah ila, Second tal ka inbeisei tehlul nen.


Ka nuin, "Nurse hi try ang hmiang, kan tling emaw tling lo emaw. College admission ti turin a la tlai chuang hleinem", min hnem pahna a ni tih hriat takin a ti dam dap a.



"Ni e, han try ve reng ang u, kan tling lo a nih leh, College i kal char char anga a ni mai", ka pain a lo ti ve a.


"In thu thu a ni mai", inthlahrung zet hian ka ti a.


Chumi belhchhah turin, "Nitin School i kal ve chu a ni sia, Kum thar aṭangin Hostel-ah i awm tawh bawk a, Distinction-ah a nih loh pawhin, First-ah te chuan i pass kan lo rin ve nen", Mambawihin a lo ti a.


A mitmenga min nuihzatna leh deusawhna en ngam loin, "Pawi ka ti tak tak a ni, min ngaidam rawh u", hnuai lam bih ngurin ka ti zawi sap a.


Ka nuin a hau ve ang tak naa, "Sawi dik loh a nei hleinem, Distinction-ah a pass a, a u lakah beiseina a nei sâng ve a nih kha", Mambawihi chhanin ka pa a lo ṭawng chhuak vat.


Mambawihi aiin kum khatin ka 'U' a, mahse, min u ngai lo, "Bawihi", tiin min ko ve mai.


Ka nuin min boralsan aṭanga kum khatnaah a lung kan phun a, lungphun aṭanga thla nganaah ka pain, ka nu leh Mambawihi te kan inah a hruai lut a.



Ka nu sulhnu hmuh theih ang ang chu, ka nu hian a thlak vek.



Kum sawmthum mi ni tawh mah ila, thu ka nei lo ropui si.


An inkarah Jerome-a a piang thuai bawk. Ka nu chu a insiam a nih ka ring a, fa an nei tawh miah lo.


Nuhrawn hrawn ni mah ila, ka nu hian min duat lutuk a, nuhrawn ka hrawn lo emaw ka ti leh ṭhin.


Mambawihi pawh fel tak a ni, tlawm zawka ka ṭan chhung chu.


Amah aia chungnung turin min duh ngai lo, "Upa ber i nih hi", min tithla zen ṭhin a. Upa ber nih hi a harsa takzet a ni.


Ṭawngkam mei nei tak hman a ching zauh a, chuti loah, fel tak a ni.


Upa ber ka nihna hi Mambawihi leh Jerome-a chungah ka lantir nasa. Ka nuin a ruk hian, kawr min leisak a, Thei ei tur te hi ka pindanah min lo dahsak ṭhinin, cupcake te hi, ṭha taka tuamin khum hnuaiah min lo dahsak ṭhin.


School aṭanga haw min tichâk ṭhintu a ni. Heta aṭang hian a chiang viauin ka hria.


Mambawihi leh Jerome-a te nena min en dan a dang lo. Nuhrawn hrawn zingah vannei ber ka ni ngei ang.


Nimahsela, famkim lo kan nihna hi a lang leh ṭhin.


Mei nei taka Mambawihin min ṭawngkhum hian min chhan ngai lo a,,hei vang tak hian, Mambawihi lahin min zuam.


"A u, i bulah ka lo mu", pindan kawngka ka hawng a, Jerome-a pawm lutin, "I muhil thei lo em ni?", min kuah a.


Khumah ka ṭhutpui, "Anuin i bulah mu turin min hrilh a, mahse", a kutin a heh a dek a, "Shhh, thuruk aw", a biangah ka chuk nasa mai.


"Thuruk", ka ti a. Lian ve uaih tawh si hi, nautê ang mai a la ni.


Thei leh thei loa la inpawm te a ngai, manganthlak zawk.


Ka bulah a mu chu, ka awm a nuam sawng sawng.


Nurse try turin ka inbuatsaih a, Arts aṭang chuan har ka ti ta lutuk. Written exam leh Interview a awm dawn a.


Third-ah ka pass si a, tling lo turah ka indah.


Form thehlut te kha, Third-a pass an awm miah loin ka hria. An awhawm lutuk!


Theih ang tâwkin ka inbuatsaih ve tho.


Tv ena kan ṭhut laiin, "Bawihi, tling lo ta la, kan College-ah em ni lo kal ve i tum?", PUC-ah a kal a.


Keini ang tan kan kal thei lo tih hrechiang bertu a ni.



Upa ber nih hi a hahthlak ṭhin ngawt asin.


Jerome-an, "A u, i zin dawn em ni?", a zawhna hi a dangdai thei em mai.


"Ka tlin loh leh, hna ka thawk tawh mai ang",


"A uiawm chutiang, i tling lo a nih chuan College i kal dawn nia", ka nuin a lo ti thuai a.


Mambawihin, "Third-a pass tan College a vâng, a awm lo tluk a ni. Hna chu thawk mai la, i tifuh zawk ang", a ti sak sak a.


Ipik ṭunin ka awm leh ta, "Nurse kan try ve kha maw", ka pain a tih pawhin, "A tlin leh tlin loh tur pawh kan chiang hleinem, College te chu, ani ang kal vena chi a ni lo. College-ah te chuan kan changkang hlawm lutuk, ani lah a ṭhing thei ropui si, kawr ṭhing deuh deuh hi a ha a, inchei lah thiam si lo, a ṭhing ngawih ngawih", Mambawihi tak hi chu aw...


Beidawnthlak tak a ni, "Mambawihi em em hi chu a, khatin u te an sawi ngai hleinem", zaidam takin ka pain a ti a.


Mambawihi erawh, a ngaihdan a ni lo lutuk, "A nihna a ni tlat si alawm, a ṭhing thei lutuk a, ṭhianten kan awmpuinu emaw an ti ziah", chu kher chuan ka thin a khei zak.


Ka pa chu a nui mai mai ang ta pek a, 'awmpuinu' tih ṭawngkamin min tihnatzia min hriatthiampui kher lo ang.


"A tlai tak tak hmain, lehkha ka zir teh ang, written exam a hnai tawh si a",


"Ṭha takin i zir dawn nia", ka nuin a ti a.


Lehkha pawh zir loin ka ṭhu mai mai. Pawl sawmpahnih ka pass ve tawh a, phone ka la nei ve miah lo.


Min leisak an tum lo tih a chiang, ka sawi ngam si lo. Mambawihi chu, laptop-te nen a inchhawp hnuk tawh.


Jerome-a pawhin Computer a pindanah a nei a, ka pindanah erawh, current hmehkhepna chiah a awm.


A nuihzatthlak zawk.


Form fill-up naah ka pa number ka ziak. A pawi lo, Nurse hi try phawt ila, ka tling lo a nih chuan, Vaimin pawh ka rawh luklak tawh mai ang.


Pawisa ka khawl ang a, ka duhzawng ngei phone ka lei ang!


Written exam hun a lo thlenin, thaw dêp dêpin ka kal a. Keimah chauhin ka kal. Ka nu lo kal a tum a, keimah chauha kal ka duh avangin ka hnar ta mai.


Exam chhung zawng pawhin thaw dêp dêpin ka chhâng. Education kan zir avangin tlem azawng ka chhâng thei mai a.


History leh Sociology a tel tawh si lo, ka bing muai muai mai.


Pawl sawm hma lama Science kan zir te leh, ka inbuatsaihna zozai te, khawiah nge an awm tak ka hre lo.


Chhâng ṭha tâwkah inngai loin lunghnur takin ka haw a. Interview pawh ka phur tawh lo. Ka tling dawn lo chiang sa.


Mambawihi thukhawchâng ngaithla leh phawt mai ang.


"Ka lo haw e", min lo en ṭhup a, Mambawihi hnenah, "Tu nge a?", an phun mur mur.


Mambawihin, "Kan awmpuinu a nih saw. I lo haw tawh a nimaw, ka ṭhiante an lo leng a",


"A nih chu, lo inkawm rawh u, dawrah theihnghilh ka nei a, ka va lam lawk ang e", ka chhuak leh a.


Ka thâwk a rang a, ka hnar chhung a sâ nghal up up a, ka mit pawh chutiangin.


'Awmpuinu' tih ṭawngkam hi, ngaiah ka la nei dawn lo a ni. Tun hnai aṭanga ka hriat a la ni zui.


Mambawihi sawi ang tak takin ka ṭhing viau emawni le?


A u, a unaunu hrawn ka nih thu tal pawh a thup a nia! Ka ṭhing awm ngawih ngawih hle mai.


Ka nutêi te inah lêngin, Nurse zir tura written exam ka neih thu te ka sawi a.


Har ka tihzia leh, tlin ka inrin loh thu te ka sawi nasa mai. Nutêin, "Mahni inrintawkna nei ta che, hawi sâng vah la, huai takin awm rawh. I tling dawn a ni tih inhrilh reng la, i tling a ni mai", a ti nasa mai a.


Lu thing nar narin ka nui nghek, "Interview hunah ka aiawhin min va kalsak",


"Kalsak dawn lutuk, pakhatna ka nihsak ang che", ka lo nuih tet tet. A lawmawm ṭhin a nia.


Dar thum a rikin ka haw a, "College-a ka ṭhiante kha chuan an hre lo che a nia aw", Mambawihi chu en pawh ka en lo.


"Aw le", ka pindan ka pansan daih.


Ka nu leh pain exam chungchang min zawhin, "Interview hunah a chiang thei chauh ang", ka ti hmiah.


Sawi kual duah ka peih tawh lo a ni e.


Interview kan zo a, result a han chhuak mai a nih kha. Khutah ka tla. Ka tla thum chiang ngei mai.


A har ve em bawk a ni!


Ka nu leh pa bulah, "Dawra thawhna tur te ka zawng tawh mai ang. Vaimim rawh tur zawng ila, a hlawk ka ring", ka ti nuah nuah.


Nurse nih ka tan a rem a lo a ni ang e.


"Bawihi, College kal zawk ta che, Mambawihi kalna kher loah pawh, College dang a tam e", ka nuin a ti a.


"Nu, hnathawh tur zawn ka duh zawk, lehkha zir hi, ka chem kalna a ni lo", pangchang takin ka han ti a.


Ka nuin, "A uiawm ka tih vang a nia, dawra thawh aiin lehkha zir a nuam zawk ang chu", a ti leh hrâm.


Lehkha zir ka peih tawh lo, "Nu, lehkha zir a hahthlak zawk", pangchang takin ka ti leh.


Mambawihi, a pindan aṭanga lo chhuakin, "Kan College Canteen-ah thawk tur an duh asin", a rawn ti a.


"Canteen maw? A ṭha tak ang a, Bawihi, College kal i duh lo a, hnathawh i duh ro ro, thawk mai la, i nau i vêng pah a ni mai dawn a", Mambawihi chhaih titihin ka pain a ti a.


Mambawihin, "Vên ka ngai lo ka tih ka tih kha, apa hi, i nghal tlat", ka pa bula ṭhuin a kuah a.


Duhtawka ka pa ka kuah theih lai ka ngai!


Jerome-an, "Mawi a! A u, kan School Canteen-ah lo thawk rawh, thawk duh tur an zawng reng reng alawm. Chuan, a thlawnin min eitir char char anga", min tlawn pahin a ti a.


"I va han phakar reuh tak", a lû-ah ka kuk ṭawlh.


Ka nuin, "Lehkha va zir rawh, dar sarih a ri tawh", a lo ti khauh. Peihlo tâwkin a tho a, a rukin lei ka chhiah khum zauh.


"Bawihi, canteen chu", Mambawihin a lo ti a. Mambawihi bul hnaia awm ka duh miah lo.


"Jerome-a te school ka be phawt ang a, chuta a theih loh leh, ka lo kal mai ang", min hnial bik ta lo.


"Mambawihi te awmpui kha i ni lo em ni?", min ti tur ka ngaingam lo.


Jerome-a te school-a kal tura ka insiam laiin, ka nuin min ko a, ka chhuak chu, "Bawihi, Bawiha te school-ah kal lo mai ta che, lo ṭhu phawt teh", ka ṭhu a.


Ka nu chuan, "En teh, thingtlanga awm kan ni tih i hria tiraw? Ka pa bulah lo va awm ta che, i putêa te nupa an sual lutuk a, ka ngaihtuah em mai. Ka tilui dawn chuang lo che a nia", a ti a.


Kal tur erawhin min duh tih ka hria.


A phak ang tâwkin min duat a, Mambawihi leh Jerome-a te nen min en dan a dang lo ti mah ila, a thisena hrin ni lo tafam chu, kil khatah a lang leh ṭhin a ni hi.


Ka nu bulah, "A nih chuan, ka zu awm ang e. Ka pu hmuh lohna a rei bakah, ka la zin ve lo reng reng", ka ti a.


Ka nu lâwm lutuk chu min kuah chûng.


School-ah pawh kal loin bazarah ka kal a. Haw dawnah ice cream ka lei leh.


A zuartupain, "I bialpa nen khan in inṭhen em ni?", min la ti zui.


"Bialpa ka nei lo",


"Chuti maw, kha, hmana ice cream leitupa, lukhum hmathlawk var khumtupa kha", ka hre leh si.


"Ka pu, ka bialpa a ni lo", ice cream min leisak lah, Mambawihin a pumbilh hmak a ni a.


"A ni maw?",


"Ni e",


"Ka hresual a nih dawn chu, nangmah nen in nih hnu khan hetah a lo kal a, nghah nei niawm takin a tei kual a tei kual a, ice cream a lo lei apiangin thil min zawt dawn emaw tih turin a âng leh phuau ṭhin a. Mak ka ti tak tak a ni. In inṭhen emaw ka ti hman alawm", chupa pui roh chuan, min nghak emawni le?


Ice cream zuartupa bulah, "Ka pu, vawiinah a lo kal leh em?",


"A lo kal lohna a rei tawh lutuk, nangmah nen in nih hnu, a tuka a lo kal kha, khami tuk aṭangin a reh vang vang, ka hmu tawh ngai lo", a ti a.


Lunghnur tâwkin ka haw ringawt.


Thingtlanga awm a nih ka rinna chu a nghet tawlh tawlh. A pumrua a lian si, hmuh leh ka châk mang e.


Show post links
Top

[Ngaia]

Thinlungmawlpa
Chapter-2
Ziaktu: Cck Lalchhuanawmi

Thingtlanga awm a nih ka rinna chu a nghet tawlh tawlh. A pumrua a lian si, hmuh leh ka châk mang e.


Jerome-an, "Thingtlangah maw? I va peih tak, a nawm(nuam) loh hmel e", a ti bui bui a.


Ka nuin, "I la kal loh vang a nih kha, Thingtlangte chu Khawpui aiin a nuam daih zawk", a ti hmiah.


Dang duh lo Jerome-an, "Khawpuiah i awm tho sia", ka pa hoin kan nui a. Ka nu tih ngaihna hre bik loin, "Zir zer che hian a", a ti bawl a.


Jerome-a lah, "Thingtlang nawm loh thu ka sawi mai lawm", ka nuṭa neihchhun a ni ve sia maw.


Duh aiin a ṭawngthei mah mah dawn tlat, a lawmawmna a ni lawi bawk si.


Lehkha zir turin an ti leh a, phun hlukin a pindanah a lut a, kawngkhar a khar ṭhuai. Na miah miah ṭhin a nia.


"Bawihi chu, naktukah maw i kal dawn?",


"Aw, Pa, naktukah, englo, reilotê ka nutêi te inah ka kal lawk dawn. Ka va hrilh ve ang e".


Nutêi te inah ka lêng ta reng a, Nanaua leh Tetea te nen kan infiam a. Ka zin daih dawn sia, an ngaihawm dawn mang e.


Nutêin, "I duhthu renga kal tur i ni em?", Police hoin misual an dawp ang mai a ni.


"Ni e, Thingtlangah ka la zin ngai lo a, a boruak tem ve reng reng ka duh", nutêin min awihlo zetin min melh kal.


"An thu thua awm tur i ni hleinem, i in a nia, i pa hnenah sawi la, i chunga rorel theihna an nei lo hrim hrim. An duh duha an tirhkual tur che i ni lo. A thuhrimah, nang pawh, an thu thu hian awm ṭhin teh suh",


"Nutê, an thu thuin ka awm lo. Ka nu boral aṭanga tun thlengin ka rilru hi a ipik lutuk. Ka rilru hi chawlh pek ka duh a ni. Kan in leh ka chhungte hmuh phak lohah awma, rilru engthawl taka awm lawk ka duh vang mai a ni", nutêi chu a hmin deuh tain ka hria.


Nutêi tihlungawi nana sawi mai mai erawh ka ni lo thung.


Taksain chawlh a mamawh ang chiah hian, rilru pawh hian chawlh a mamawh. Taksa ai mahin rilru hian chawlh a mamawh.


Ka bula ṭhu a ni bawk a, nutêi kut vuanin, "Nutê, naupangtê nih laiin ka nuin min boralsan a. Puitlin chhoh zel takah chuan lung hi a lêng ngawih ngawih zel asin. Ka pain chhungkaw thar a din leh mai bawk nen.


Nu hmangaihna dawn theih tawh loh laiin, pa hmangaihna ka dawng ṭha fumfe lo zui a. Ngampa taka ka lo chuan luhna i ni a, ka tan i hlu lutuk.


Mahse, i hrethiam tho ang, hmun hla leh thengthaw nuam taka kala rilru tihthawven hi ka mamawh takzet zet a ni", ka ti niah niah a.


Nutêi pawhin min hrethiam tawh lutuk.


"Bawihi, ka hrethiam lutuk. Ngaihsakin duat duh viau ṭhin che mah ila, pasal leh fa ka nei ve a, a rem ṭhin lo a ni. Lo kal teh", min kuah a, "Ka nautê khawngaihthlak, mipa ṭha tâwk, i dawn ngai loh zawng zawng dawn tir theitu tur che han tawng hlauh la aw... Chumi turin i nun i uluk hle ang che aw",


"Lutuk, nutê feli thu kan awih lo ngam hleinem",


"Chimawm thei si, thingpui lum rawh", min ti nghal zat.


Thingpui ka lum a, tv hmaah ṭhuin, "Phone an leisak tawh che em?",


"Leisak lo, ka intuak anga ka duhzawng tak ka lei ang", nui varin ka ti a. Nutêi ngaihdan a ni ta lo.


Thingpui no dawhkanah a dah lawk a, "An va timak ve, Mambawihi chu pawl sawmah an leisak a ni lawm ni? Khatah pawh in pass rual a, an leisak duh tawh lo che a, tunah lah; Third-ah pass mah la, an leisak ve tawh tur che a ni. Pa nep tak hi chu, a pawi ngawt mai. Ngawi tak rawh, keiman ka leisak ang che. Naktukah kan bazar anga i duhzawng tak kan lei dawn nia. Ni lo, chaw ei khawm rawt ila a ṭha hial zawk ang", nutêi chu, a thinrim lutuk a, ka inthlahrung vek.


Nutêi kutah bawk vuanin, "Nutê, hahdam tum rawh, phone te chu a ho lutuk. Patêan a hriat chuan a hau zawk ang che. Lei lei a ngai lo, neih hun a la awm mai ang",


"I nu i chhun hi chu a pawi ngawt mai, i dawih leh lutuk a. I pa bulah sawi tawp ta che, nula i ni ve tawh a, tun ang laia phone la neih ve lo te chu a zahthlak alawm. Engtin nge bialpa te i nei ve anga?", min vaw(vua) dawn ta emaw ka ti hman.


Ka nutêi thinrim hi chu a sen vek zel, zah avanga kan sen ang hian.


"Nutê, phone nei lo mah ila kei ka zak hleinem. A ho em mai",


"Ho i tih vang hian lawm an zuam ṭhin che, i chhah mep mep thei lutuk. I zin pawh ka phal dawn lo, anni nufa thu thua i awm ka phal tawh dawn lo", a ti khur khur.


Beidawnthlak khawpin nutêi ka hrilhfiah.


A tawpah, kan inbengdai thei hram a. Inhrilhfiah kan tumna lamah kan inhrilh bo ṭep zawk a ni.


Haw dawnah, "Naktuka i kal hmain min lo hmu leh dawn nia. Phone leina tur ka lo tuak anga, i lo haw hunah chuan a daih hman ang", ka hnial duh ta lo.


Lawmthu hrilhin, kan inmangṭha ta a.


Thawmhnaw ken tam vak a ngai lo a, incheina tih ang ken ṭeuh tur lah ka nei lo.


Nutêi ka hmu leh lawk, "Tluang deuhin aw, helai aiin sawta miten an lo tihrehawm ang che tih ka hlau a ni", a hmelah a hlauthawng tih a lang bawk.


Ka nu thlanah ka nutêi nen kalin, "Nu, ka lo haw leh vat ang aw, min lo ngai lutuk lo la", ṭah nachang pawh ka hre lo.


Nutêi ka hnem leh rih a, kal a hun tawh si. Kan inthlah thei hram a ni.


Ka nu te khawlam panin kan liam ta a. Chutia kan liam ta chu, lungchhiat namenin min tuam ta.


Ka hawilet a, ka nu leh kan in te, ka pa leh ka nutêi te chu ka ngai thar vawng vawng.


Ka thlahlel thar em em bawk.


Hmu tawh lo tura kan inchan phei chuan, chhuk lawka tlan let vawn vawn chu ka nâp ta mai a.


A rukin ka inhru ka inhru mai.


Hnung berah ka ṭhu a, muhil vek an nih avangin a rehin a reh diak.


Zan rei lamah kan thleng a, rin aiin a hla zêk.


Counter hmaah ka ding reng, min hruaitu tur te lo kal peih loin an muhil tawh a ni ang.


Ka dinna aṭanga hla vak loah, mipa pakhat hi a ding ve a. Lukhum hmathlawk var a khum.


Ice cream min leisaktupa a nih ka ring ringawt a, a hmel ka hmu chiang thei si lo. A nih loh ka ring tho si.


Ani pawh chuan min lo en leh zauh zauh ṭhin, achangin mi en vung vung zel bawk. Min tihlau ṭan.


Midang chu an chhungten an lo hruai hlawm a, a ṭhenin an nghak ve mek bawk. A ṭhen chu mahnia hawte an ni hlawm bawk.


Hawna tur hre si lo, hruaitu nei bawk si lo chu, ngawi renga din a ni mai. Nghah tawp bak tihtheih awm lo.


Rei tawh ema ka hriat avangin mahnia zawn tawp ka rilruk ta a. Lukhum khumpa chu ka zawt duh miah lo.


Counter neitu ka zawt ta tawp a, ka nu pa hming ka sawi a, a lo hre ngang mai.


Nu la ṭhalai tak a ni a, a ngoin a thau bawk. A inhnawihsen ve hle bawk a ni.


Muangchang duh tawh loin lawmthu hrilhin ka kal thuai thuai. Engtiangin nge min lo lawm dawn ka hre mai lo.


Chhel tawh tak ka ni a, engtiang pawhin min lo lawm se, ka tuar thei tawh hi a ni hrim.


Zuitu nei tlata ka inhriat avangin ka hawi let a, lukhum khumpa tho kha a ni!


Chak leh zualin ka kal.


In pakhat kawngka inhawng hmuin, a êng bawk a, lutin ka pu te awmna ka zawt.


Min hrilh hnuah chak mangkhengin ka kal leh.


Ka thleng chu ka thaw huai. Hnung lam ka hawi a, lukhum khumpa chuan min lo hnaih tawh lutuk.


Kawngka ka kik a, "Hawng tawp rawh", lukhum khumpain min la ti zui.


Ka hawng tawp a, "Bawihi i ni em?", putêan a lo ti a. Ka nih thuin ka chhâng thuai.


Lukhum khumpain ka bag, leia ka nghah chu min khai luhsak a, putêa hnena lukhum khumpa hêk ka tum chu, "Kross-a nen in inhmu fuh thei maw? Lo lut rawh", putêa zawkin a ti a.


Lukhum khumpa chuan a lukhum phelhin, "Fuh thei a nih hi, ka lo hawpui em mai", ngeiawm rawngkaiin a han ti a.


A hmel ka hmu chiang thei ta, ice cream min leisaktupa kha a ni. Ṭawngthei lo emaw ka tih hial hmanpa kha.


Ṭhuthmun aṭangin mak ti deuhin ka en, "A ṭhat hlauh chu, Bawihi, saw lai saw bual in a nia, va intifai ta che. I ril te ṭam em?",


"Ṭam lo e, thil ka ei nasa lutuk a, ka puar lutuk", intifai turin ka tho a.


Putêan, "Kross-a, Bawihi tan mutna siamsak rawh aw", a tih chu ka hre hman.


Counter aṭangin min lo hre tawh tihna a nia, ngati nge min lo biak mai loh?


Hah tawkin kal phah hrep a, zawn chawp nen. Min tihah hman vek.


Ngeiawm lutuk, remchan hunah ka hau hrep dawn. Ka va ngei mai mai tak. Min umzui angah ngaiin ka lo hlau hman a. Remchan awm hunah ka hau khawp ang. Ngeiawm teh tuh lutuk mai.


Bual in aṭangin ka chhuak a, chhuatah mutna tur a lo inphah felsa diam tawh.


Ka mutna tur bul chiah ṭhutthlengah lukham leh puan a awm a. Ngeiawmpa mutna tur a nih ka ring.


Ha a nawt phuan bulh a, "Putêa a mu em ni?", min hnungchhawn zawnga ding a ni a, a bu nghat.


"Chhuatah em ni ka mut dawn?", a bu leh nghat. A tukkhum aṭanga hma lama bu dawrh tura nam ka châk ka lutuk.


Inhru hul vat vatin ka mu a, ka inkhuh bo pil hmak.


Ka lung a lêng nghal vawng vawng.


Ka nu kha ka lo hnial lo a ni tih te ka ngaihtuah.


Kross-a em ni kha le? Kross-an min han bum ngei a. Min tihlau lo khan ṭha deuha awm tur a nia.


A thawm ka ngaithla ru reng, current hmet ri leh, ṭhutthlenga mu thawmin a zui a.


Ka thaw huai, kan inhnaih bawk si a, ka chungah eng mah ti lo se.


Naktuk zan aṭangin ṭhutthlengah ka mu ve ang. Chhuata mut bik ka duh lo. Kross-a ka ring lo tihna ni loin.


Tunah rih chuan, ka ring chiah lo a ni. Ka ring lo mah zawk.


Bazara kan inhmuh pawh khan min hre tawh tihna mawnile?


Tlaivar ṭhakin ka inngaihtuah nia mawle!


Kross-a tho thawmah thawh ve mai ka tum a, ka mu leh ta zawk.


Tui herh haw ri hriain, current on riin a zui leh a. Chumi hnuah, bual in kawngka hawng leh khar ri ka hriat avangin puan ka hlip a.


Sana ka en chu dar li leh a chenve!


Ka inlukhuh leh daih. Dar li leh a chenveah tu mah an tho ngai lo ang.


A over ve hrim hrim nge, nge ni a, a chin ṭhan tawh zawk.


Tui herh haw ri leh gas on ri a inrual a, thawm ka ngaithla kar. A hnuah, no chawk ri ka hre zui a. Thingpui in a dawn.


Kawngkharpui hawng riin a zui leh. Chutah zet zawng, ka tho ta nge nge.


Mutna thlep felin Kross-a mutpuan thleh felsaah ka dah ve a. Bual inah lutin ka intifai sawk sawk.


Ka lu chu, bal tak a ni, bal tak.


A bal tih hriatna pawh, a khawngin a ro tih a hriat a, lu lei a thak em em mai ni.


Khua a êng uar a, Nî erawh a la chhuak lo. In chhung en kualin, lei rina sak a ni a. A tê fel at maiin ka hria.


In chanve phawk hi a inping a, pindan pahnih a nih ka ring hmiah.


Lehlamah ka putêa te, lehlamah ka pu. Kross-a chu ṭhutthlengah. Kei nen.


Ṭhutna hmun leh choka pawh a inhnaih angreng. A bang tile niin, a chung rangva a nih ka ring bawk. Ceiling a awm si a, rangva a ni ang.


Choka leh ṭhutna hmun inkarah kawngkharpui a awm a. Tê fel at at tak a ni.


Pawnah ka chhuak a, veilamah mei chhemna thuk a awm.


Kawt zau vak lo a awm a, ding lamah thingfak dahna awmin, a inchhek vûm thur.


"Hey, hey, hey", tih thawm chhuahnaah ka kal a. Bâwng an lo zi nuaih nuaih.


Zi nuaih nuaih tihah, sawm vel an ni. Bâwng an zi ngai tawp si lo. Mak thei a nia.


Kross-an min hmu chu mak ti deuhin min en hmasa tê têa, bâwng bawk a buaipui.


Hruiin an nghawngah a thlung a, hrui chu chelh vekin in hmalamah a kalpui, "La mu ta che", min kal pel chungin a ti a.


"Khua a var tawh hi", zuiin ka ti a. "Nia", a ti ringawt.


Nizana mi kha, ka la hau dawn chiang.


"Hrui hi lo chelh lawk teh, thlah suh ang che", ka kutah a hmehbel a. In chhungah a lut daih.


A lukhum var lo khum chhuakin iptê a ak a, hrui min lo chuhin, "Dar sarihah ka lo haw ang, tui ka on saw lo en la. Ka lo haw hma chu eng mah lo ti suh ang che", a ti a.


"Chaw chhum hi",


"Ka lo haw hma eng mah ti suh ka tih chu", a inher nghal hmak.


In chhungah lutin sana ka en a, dar nga a ri hnai. Thawm a reh diak sia, mahnia awm chu khawharthlak dawna ka hriat avangin Kross-a ka um.


Ka umpha thuai, "Kross-a", ka ko a. Mak ti deuhin min en.


"Ka lo kal ve, kei mah chauh chuan ka awm ngam lo", ka ti ngawt pek a. In lam a thlêk vung vung, hlauthawng zetin, "Current i off em?", a ti phawng.



"Off e, off chiang lutuk", a thaw huai.


Min thlêk a, "Shampoo i lo inken em?",


"Aw, ken, ti nge?",


"Hrukpuan nen va la rawh, ka lo nghak ang che", chhân tum loa ka phawk hru avangin, "Inbual i duh lo em ni? I lu kha hmuh a hrehawm. Inthlakna tur nen va lam rawh", a ti hmuk a.


Hmanhmawh tâwkin ka lam a, hmanhmawh tâwk bawkin ka kal leh.


"E he! Sahbawn, no pawh",


"A awm, hmanniah ka theihnghilh a, min lo zui rawh", a ti leh hmuk a.


Tho an la awm mang miah lo. Khawlai a faiin, Zun in leh bawlhhlawm bawm a felfai a.


Khawpui ai mahin a thianghlim emaw tih tur a ni.


Kross-a hnungah ka kal a, bâwng ho pawh ka nel thuai. Mi tina thei an ni tlat lo a ni.


Khawpawnah kan kal a, kan kalna tur ka zawt, "Kan thleng ṭep", ti ringawtin min chhâng.


Lui ka hmu chu, "E heee!", nui varin Kross-a lam hawiin, min lo en leh vung vung tawh chu a hawisawn hmak.


Lui kamah dingin, "Sawtah sawn balṭin a awm a, a chhungah bawlhlo a awm", a kawk a.


"Eng nge, balṭin leh bawlhlo chu?",


"I hre lo a maw?", mak ti zetin thlê bakin a ti a. Ka nui tawp.


Balṭin a tih, lei lai khuar aṭanga a khai chhuak chu, bucket lek lo niin. Balṭin han tih kher.


Bucket min hmuhin, "Hei hi balṭin, a chhunga khu bawlhlo", ka bih a, sahbawn leh no a awm.


Hawi chhuakin ka nui leh tawp, "Heheee, ka hre lo a",


"Hre tawh rawh", a ti hmuk. Bucket min pe a, "Tui ren ngai loin i inbual thei, bâwng ho hi ka va thlung lawk ang a, inbual zawh hman i tum dawn nia",


"Inthlakna tur hi",


"Tu mahin an hmu lo ang che".


Bâwng ho nen ral lehlamah an kal ta a. A reh tlawk tlawk ta si a, inbual tumin ka han insangmar dawn a, ka phu ta nghek nghek.


Bei lo zet zetin lui luang laiah ka ṭhu a, noin ka inleih thul. Ren a ngai lo khawp. A thûk lo lai a ni a, nawhlung tur tui chhunga mi ka zawng leh rih.


Reh tlawk tlawk a nih avangin ka phu nghek zel a, a ruka min enthlatu awm anga hriatna lah ka nei.


Thawm maksak tak tak ka hre thul, no theh phei lawkin ke lawngin Kross-a ka han um let ta a nih kha.


"Kross-a", ka ko pah zel a. Hlau tak ka ni hlau tak.


Bâwng bu ri ka hriatnaah ka tlan zel a, a tawpah ka tlan thleng.


Ka hlau lutuk, Kross-a lo hawi chu, "Ka hlau lutuk", ti pahin a nghawngah ka han kuah mai a nih kha!


Ka zak lutuk chu ka thlah leh vat vat.


"Min tihuh vek alawm", min la ti zui.


"Eng lo, ka hlau a, ka lo um tawp che, thinrim suh aw", min en a, "Khawiah nge i chapal",


"Ka lo tlansan", che ṭhing min ti ngawt ang.


Ho lutuk, nizanah a che ṭhing ve tawh tho.


Bawng ho a thlung ṭha mial mial a, hnim an pet mawlh mawlh. An e hmiah hmiah bawk a, bawng ek rim ka hriat vawikhatna.


Rapthlak zawk hian!


Bawng ek hmang hian gas a siam theih tih kha kan zir tawh tak.


Bawng ho chu ka chul a, pakhatah rannung mak deuh ka hmu ta.


A tê ti dawn ila, tê lutuk ni si lo. A lian ti dawn ila lian ni si lo. A puar pung ni mai hian ka hria.


"Kross-a",


"Awii",


"En teh, bawng hnungah rannung mak deuh ka hmu", ka ti chûl a.


Kross-a lahin, hnehsawh zetin, "Saphihrik a nih chu", a lo ti a. Ka vawikhat hriatna a ni leh ta.


"Saphihrik a?",


"Aw, i bengah te khan an lut ang nge, i beng a chhe mai ang, bawng ho kha hnaih vak suh", ka kut ka lasawn rang lutuk.


Amah bawkin, "Huh hnuangin i awm a, vangvatin an duh ngawt ang che", a ti chu, "Chu chu eng nge?", ka ti thuai.


"Saphihrik ang bawka thisen dawt ṭhin an nia, khawpui aṭanga lo kal i ni bawk a, tui an ti ngawt ang che", a inrin loh laiin lungin ka vawm dawn mawni.


A lo hawi a, "Bawihi, che suh",


"Maw?",


"Ngawi rawh, ṭawng suh", iptê aṭangin chem a phawrh a. Ka nghawngah eng thil emaw che hrut hrut ka hre ṭan ta pek.


Hlau hlawpin ka ding ngawi reng, mit ka khap eih lo reng reng.


Kross-an min lo veh ṭhem ṭhem, "Che suh aw", a ti a. Ka tlan thut dawn mawni?


Ka hlau lutuk chu zun ka cheh thei dawnin ka hria.


Kross-an min hnaih tial tial a, ka mit thip lutuk avangin ka hmu vâi ruai tawh.


Chutah, "Hnahthel a nih hi", a han ti mai chu!


"Vanlalkross", ti tuarhin ka chum pawp pawp. "Min tihlau alawm",


"Hetah rul a awm lo", a ti ta kher chu, "Rul a awm maw?", Kross-a ka hnaih sauh.


Ka keartui dinglam a thak em em zui, ka khawih a, eng emaw nâl puat hi a la ni zui.


Ka en a, a dum tliang hmar, a thak em em lehnghal a, ka khawih a, a nâl puat.


Kross-a ka entir a, "Vangvat a nih kha",


"Maw?",


"Tui a ti ngawt ang che", nuihza takin mi la ti zui. Ka ke dinglam chawi kangin a la a, thisen a chhuak.


"Thisen a chhuak, a thak lutuk",


"Khawpui mi awm ngawih ngawih tak i ni e", hlauh nak laiin chutiang han sawi.


Ka kuta dah a tum chu, "Ka duh lo, min râp, ka ten em mai", ka kut ka tikawm chial.


"Kal vat ang",


"Va kal rawh, Chakawk ka zawng lawk ang", ka hre lo leh ta.


"Chakawk pawh i hre nange?", ka nui leh ringawt. Takah, ka hre leh si, kan ei tawh.


"Ka hre reng, tohin ka ei tawh",


"A ṭhat chu, hlauh tur a awm lo, ka lo kir hmain va inbual thuai thuai rawh. Vangvat mai bakah, rul hmuh i duh loh chuan", mei kawhin lui lam panin ka tlan.


Show post links
Top

[Ngaia]

Thinlungmawlpa
Chapter-3
Ziaktu: Cck Lalchhuanawmi

"A ṭhat chu, hlauh tur a awm lo, ka lo kir hmain va inbual thuai thuai rawh. Vangvat mai bakah, rul hmuh i duh loh chuan", mei kawhin lui lam panin ka tlan.


Kan haw a, "An bula i awmin i sawi tur ngaihtuah chiang phawt ṭhin la, ṭawng chin tawk i hre dawn nia", Kross-an a ti chu, a awmzia ka man pha reng reng lo.


Chhâng lem loin ka bu ringawt, min hmu apiangin, "Kross-a, nupui i ru elaw?", an ti ziah bawk.


Kross-a lahin, chhâng loin a nui mai zel a, engah mah a ngai lo tih a hriat reng. A hnungah ka zui mawl ve tawp chu a ni.


Inbual fai chu, ka zâng hawk a, ka lu pawh a fai tawh avangin nuam tawh tak a ni.


Clip min pein, pawna tlangbanah ka thawmhnaw zarin, panties pho ka zak ta tlat. Bual ina khai ka zahna nen a inhen ang.


Kawr hnuaiah ka zar tawp a, a ro tho ang.


In chhungah lutin bucket leh no, sahbawn te ka dah fel a. Dar sarih a ri ṭep, Kross-an chawbel a chhuang a, Putêa leh pitêi te an la tho ve miah lo.


Pindanah Kross-a lutin, bucket hi a lo chawi chhuak a, a hing lutuk.


Hnar hup ka duh si lo, thaw loin ka han awm mai a. A tihchi vak loh, ka thaw dêp dêp ringawt.


Kross-a chu pindanah bawk lut lehin a ri bung bung a, bucket kha bual inah a dah maiin ka hria.


Ka pu a lo hruai chhuak ta a, "I lo tluang em?", kan inchibai a. Tluan thuin ka chhâng a. Kan mutna puan Kross-an ka pu pindanah dah lutin, choka lamah a pêng a.


"Motor-te i rui em?",


"Rui ve deuh, rui lutuk a ni chuang lo. Lû hi, a na deuh a, a ni mai", ka pu chu upa ve tawh tak a ni a.


A sam pawh a ṭuak vek tawh, sam tih tham pawh a nei mang tawh lo. A khabe hmul ṭo siar siarte pawh a var vek.


Ruhkawl hlang emaw tih turin a cher a, natna eng emaw tak veite pawh a ang zawk.


A bulah tiang a awm bawk, ka puin kan chhungkaw chanchin te min zawtin, ka nu leh Mambawihi chanchin a ṭha lam hlir sawi a ngai.


Ka nu chu ka sawi thei mai a, Mambawihi erawh tim dai hian ka sawi. Sual tak chu ni lo mah se, ṭawngkam mei nei taka ṭawng a ching kha a ni.


'Awmpuinu' tia a ṭhiante bula min sawi khan min la tilungawilo pakhat. Keiin ka zahpui loh tehreng nen, min zahpui bik a, ka la tuardam thei ngang lo a ni.


"Jerome-a chu lian uaih tawh si, nautê ang maiin a la awm. A ṭawngthei lutuk a, hnial ngaihna kan hre lo ṭhin. A ṭawngtheih tak hi a lawmawmna a ni lawi bawk si a", ka pu a nui tat tat.


Kross-a lam hawiin ama tawkah a buai ve reuh lutuk, "Kross-a, ka lo pui ang che aw", thawh ka tum chu, ka puin, "Ṭhu mai mai rawh, aman a ti vek mai ang", min dang a.


"Lo ṭhu mai mai rawh, i chau dawn nen", Kross-an a lo ti ve bawk. Nikhatna te a la ni rih si a, ka hnial duh ta lo.


Ka puin, "Nizan kha, i lo thleng tlai ta hrep si a, nghak zo ta loin ka lo mutsan ta daih che a, in lo tluang vak lo em ni?", a han ti a.


Putêa pawh pindan pakhat aṭangin mit nuai pahin a lo chhuak a.


Ka han hmu chiang ta chu, awi, ka sawi thiam lo. Ka ten ta lutuk!


Towel var vengin kawr a ha lo a, tawnzau takngial pawh a ha lo. A dul a kiar bawk si a, a lu a bukin, zakkha rim a la nam zui.


Awi, ka luak lo chauh a ni. Min la chibai ta ang lehnghal a, thil var hnang tlem ka la kai zui! Ka ten lutuk chu, uak tuarh tuarh tak hi ka nâp a.


Ka kekawrah ka tat nawk nawk, nutêin kal lo tura min tih lai ka ngai vawng vawng.


Pakhat leh mak takin, putêa mitmengah min îtna a lang tel tlat bawk. Ka pu bulah ṭhuin min en kual dû dû a, awm a nuam lo khawp mai.


Putêa heti a nih chuan, pitêi phei chu, thawh nachang a hre lo zui.


Chhuanlamah, tho tharhin, "Kross-a ka va pui ang e, kan zo hma zawk ang. Pu, thingpui te i in duh em?", ka han ti a.


Min chhân hma hmain chokaah ka kal daih, "A hangin aw", ka puin a lo ti a. Nui tawi takin, thingpui ka lum vat vat.


Ka kekawra ka kuta mi ka tah chu puanchhiain ka hru a. Thleng silnaa sahbawnin ka sil a. Sawi thiam a har, tenawm lutuk.


Awm rei a chi dawn miah lo.


Ka siam zo a, Kross-a ka pek tir, putêa bual inah a lut a, insum karna nei hlek loin a ri pawp pawp.


Aw, nutêin kal lo tura min tih lai ka ngai vawng vawng. Nutêi thu lo awih ila ṭha tur.


Ka puin min ko a, Kross-a chuan pawna mei chhemnaah chawhmeh a siam. Gas-ah erawh chawbel chauh a chhuang a, a hmin tawh avangin eng bel mah a inchhuang tawh lo.


Ka pu ep chiahah ka ṭhu leh a, pitêi hmuh hun tur ka huphurh lutuk. Ṭah chhuak tak ka ni.


"Tikhan ṭhu reng rawh, chawlh hmangah inngai la, awl deng deng mai rawh",


"Tehreng mai", ka han ti tak naa, haw daih a nia ka duh.


Phone nei ila chu, ka pa ka bia anga a ṭha tur. Pawisa neihchhun hian ka haw daih dawn mawni?


Ka puin, "Nizanah Kross-a nen in inhmu thei em? I nuin i thlalak min lo thawn kan entir a, zan thilah in inhmu chiang thei dawn si lo, unau hmelhai hun ni lo mah se, in inhai thei tlat a", nui tat tatin a ti a.


Fiamthuin a sawi emaw tiin, "Inhai chu sawi loh, keimahin ka lo haw alawm. Ka hnungah min zui a, misual emaw tiin ka hlauh dan chu a. Min zui reng a, a insawi duh ṭhak lo. In ka lo thlenah chauh ka hria", nui ver verin ka ti a.


Ka pu chu, ṭhu ngil zawtin, "Chupa mai mai chu, laktlaklo ṭhin lutuk mai. Ruih a nei leh ta nimaw? Chutianga misual ang maia i hlauh tura a han awm vei", ti khur khurin, thinrimin a han meng pawr zawr zawr ta mai.


Putêa lah bual in aṭangin a lo chhuak, "Eng nge ni ta?", tiin, "Kross-an Bawihi hi inhmelhriattir duh loin amahin a lo haw tir a, a hnuah Bawihi hlauh theih turin a zui duh chauh lek a ni awm e", ka puin a ti ta mai.


"Ni lo, chutiang a ni lo, fiamthu mai mai a nih kha. Counter aṭangin ṭha takin kan pahnihin in kan lo thleng alawm", nui chungin ka ti tak naa, awmzia awm lo, putêa lah a thinrim tawh.


Kross-an inngaihtuah hmasaa ṭawng tura min tih ka hre chhuak zawk. Min hrilh chhan ka hre chiah. A tlai zo ta si!


Pawn aṭangin Kross-an a hre pha dawn, Putêan, "Kross-a, lo lut vat teh", chang fek fawkin a ko a.v


"Putê, ka fiamthu mai mai a nih kha",


"Kross-a mizia hi a ṭha lo hrim hrim, a naupan lai aṭangin a ni tawh. A nu chhunin hurherh zawngin a awm tlat a", ka puin a ti ta mai.


Ka bo map!


Kross-a a lo lut a, a bek veilamah putêan a bêng ta sawk sawk, vawinga a bêng hman tihah, ding chhuakin, "Putê, duhtawk rawh, fiamthu ka tih kha",


"Nizana a ṭawng duh dan reng aṭangin a dik tawh lo, fuh thei a nih hi ka lo hawpui em mai te a ti a. Kan khaw tleirawl ho pawhin an hlauhrawn a nih hi", putêa ṭawng duh dan zawkin ka thin a khei.


Kross-a chu a ngawi reng a, ding kâk deuhin a hnungah a kut pahnih a suih a, a kun tlat bawk. Putêan a bên pawhin a che eih lo.


Ka puin, "Lo kal hnai teh", Kross-a a kal hnai a, a tiangin a mal veilamah a han vaw leh pawp pawp.


"Nizanah hlau hlawpin Bawihi i siam a, vawikhat mah ching tawh suh ang che", a ti fak a. Kross-a a bu nghat.


Ka khawngaih lutuk a, en pawh ka en ṭha ngam lo.


A na ngawt ang, "Kalbo rawh", chang fek fawkin ka puin a ti a. Pawnah a chhuak leh.


Muangchangin ka ṭhu thla a, hetiang a ni dawn tih hriain, Kross-an ṭawng fimkhur turin min hrilh kha a lo ni a.


Ka lo hrethiam lo a, a pawi lutuk!


Putêan, "Bawihi, i ṭha maw?", min ngaihtuah hmel taka a ti te chuan, luak a pawt.


"Aw, ṭha, fiamthu ka tih mawlh mawlh kha", ka ti ve ngat.


Kross-a ka khawngaih lutuk, pawna chhuaha va ngaihsak ka nâp a.


Kan thawmah phak chep chawpin, "In va bengchheng tak, tui tak hian a muthilh theih reng reng loh", pindan aṭangin a lo ti chhuak.


Kawrfual uk lam hain, a lu chu Sava bu emaw tih turin a hnawkin a pawr chhip chhep a. A dul a kiar ve tho. Kawrhnuai a ha lo tih hriat takin a hnute a uai pur a.


Putêa nen innei awm tak an ni.


Kan bengchhen chhan putêan a sawi a, "Fiamthuin ka sawi a, thutak pawh a ni lo. Kross-an counter-ah min lo nghak ngat ngat alawm. Kan rei si a, ka inthlahrun mah nak laiin", Kross-a chhanin ka ṭawng chhuak vat.


Pitêin Kross-a a hauh vak ka hlau. Putêa leh ka pu ten an vaw nasa si.


Pitêi chuan, ner nawkin, "A nu hurherh a chhawm a, a mak vak lo e. Tisawn, awm mai mai rawh se", a ti bawl a.


Kross-a ka lainatna a zual ting.


Tukṭhuan kan han ei a, chaw châkna a bo vek.


Kan bulah Kross-an chaw a ei ve lo tlat atin ni!


Thlengah chaw leh chawhmeh dahin pawnah, mei chhemnaah a ei a. Hetiang anga inthliarhranna hi ka hriain ka la hmu ngai lo.


Kross-a chu, hmanlai huna an chhiahhlawhte ang maiin an cheibawl hi ni ber.


Pitêin, "Engtikah nge i haw dawn?", i he lovin, "Kar lehah", ka ti.


Kar lehah haw ngei ngei ka duh, ka nu kha chuan kumin awm turin min ti a, mahse, kar lehah haw ka duh.


Pitêin, "A nih chu a, awm reng turin kan duh che asin le", intinelawm tih hriat takin a han ti a.


Nui lui chungin, "Min ning thuai mai ang", ka ti a. Vawiinah hian a nia haw nghal ka duh ni.


"Ti daih ila, kum engzat nge i nih?",


"Kum 19",


"Duati aiin i nau deuh hlek a ni maw? Ka fanu a nia, Shillong-ah lehkha zirin a awm. College a kal a, pawl engzah i zir ve tawh?", Pitêin min hmusit tih hriat taka min han en te chu, tuar thiam a har ngei mai.


"Hmannia pawl sawmpahnih result chhuakah ka pass ve a",


"Mambawihin College a kalsan che law?", a tunu chhuan hmel takin putêan a ti ve bawk.


"Nia mawle, lehkha zir hi chem kalna a nih loh chuan, nau te pawhin min kalsan mai", ka ti a. Ka nui lui bawk.


Pawl kuaah dam ṭhat loh avanga fail-in, min umpha a. Pawl sawmpakhatah fail lehin, sawmpahnihah min kaisan ta a ni.


Pawl sawmpakhat ka fail lui tih tu mahin an hre lo ang!


Ka puin, "Tihian, kan bulah awm ve reng la a ni mai, kan putuin kan inawm ṭhin ang a", a tih te chu, a ni lo zawngin ka la tawh.


"Nia", ti satliah tawp. Pawna chaw ei mawlhin min helh.


Thleng seng fel ka tum a, pitêi bawkin, "Ṭhu mai mai rawh, Kross-an a ti vek mai ang. Kross-a, kan ei kham", tham lo takin a ko zui a.


"Mipain chaw eina seng fel chu a, a ṭhiante bulah nuam lo a ti palh ang", ka seng lui tho.


Pitêi chu a nui nghek a, a ha kher pahin, "Kross-a te chu, mihring pawh a ni ve hleinem, mipa te i han tih", putêa ho hoin an nui.


Beng bulah, "Va ṭhu rawh, nang mah vanga min vuak leh hmain", min tiphu nasa asin.


Luhlul chhuah tlat thoin, "Hmun ka lo tifel ang", ṭhut mai mai ka tum hauh lo.


Gas te tifaiin, hmun ka phiat a. Kross-an thleng a sil. A ṭhiante bulah insawitheihna a nei miah lo ang le.


Pitêin, "Ka nu te inah ka lêng dawn a, i pu nen lo awm rawh u aw", pindanah lutin, kawr dang nen a lo chhuak a.


Intichhe lo ve tak a ni. Chhia erawh ka ti tho.


Putêa pawh a chhuak a, khawiah nge a kal ve dawn ka hre lo. Chaw ei kham aṭangin an chhuak nghal a nia.


Kross-an hmun phiah a tum chu, "Ka phiah tawh kha",


"Ṭhu hle hle rawh", nuihza hmel takin a ti a. Tukina mi avangin ka khawngaihin ka inthiam thei lo.


Pindan aṭangin ka pu a lo chhuak a, "Bawihi, inah lo awm la, ka han chhuak lawk ang e", a ti ve leh.


Kross-a nen chauh kan awm. Pindan pahnih a tifai a. A nawt fai leh thlap.


Inpui nawh a tum chu ka chuh, "Ṭhu mai mai rawh", a ti tlat a. Keiin ka chuh tlat bawk.


Chhuat nawhna kan inchuh, a tawpah ṭap chungin, "Ka lo nawt ang ka tih chu", ka ti tawh.


Kross-an min en vung vung, mittui kar aṭangin, "Tukin avangin ka tihpalh", putêan a bên lai leh, ka puin a vuak lai kha chiang takin mitthlaah an lo lang.


"Fai takin nawt ang che", chhuat nawhna min pe a.


Ṭhu chunga nawh ngai a ni a, ke a kham duh lutuk.


Kross-a insiam mawlh mawlh koin, "Khawiah nge i kal ve dawn?", ka han ti a. "Ramah, bâwng ho ven a ngai alawm. Chawhmeh ei châk i nei em?",


"Chawhmeh maw? Ramah a awm dawn em ni?",


"Tukina i ei chakawk te kha Van aṭanga lo tla turah i ngai em ni?", a ti ta mai. Ka nui leh ringawt.


"Hnahbial a awm ang em?",


"Ka lo hawn dawn nia. Ka pu kha a lo haw har lo ang, inah lo awm tlat ang che", Sipai pheikhawk bun pahin a ti a.


A bun zo, ding hluaiin, "Pindanah lo lut hlek suh ang che", a ti hmuk a. Chu erawh, ka zawm tur dik tak a ni.


Kawngka thleng thlahin haw har lo turin ka hrilh luam.


In chhunga ka lut chiah tihah, "Bawihi?",


"Aw", lehhawi thuaiin, "I theih chuan a rang lama haw i tum dawn nia", min ti a. A tum ram panin a kal ta nal nal.


Chu thu chuan min deng harh chiang lutuk.


Min ngaihtuah ve tho tih ka hriat phah a, tukin ang kha, putêa te ho chet duh dan a nih chuan keipawh, min zuah lo hun an nei ngei ang.


Hemi hre sain ka nuin kal turin min ti tih a chiang ta bawk.


Lo hnial ila ṭha tur hi a nia.


Eng ka hria nimaw, ka pu pindanah lutin, ka pawisa neihchhun la chhuakin, Kross-a thawmhnaw dah ril berah ka dah!


"Kross-a ka hrilh mai ang", ka phun sap a. Kross-a lo haw ve leh ka hrilh nghal ang.


Tlaiah, putar pakhat hi lo lêngin, "Kross-an nupui a ru an ti a, ka lo chhin a nih hi", a ti a.


Min hmuh chuan, "Nangmah hi em ni?", a ti a. "Ni lo e", nui lui chunga ka ti chu, "Kross-an a va thlang thiam ve", a ti leh ṭalh.


Kross-a pawh a lo haw tawh, pawnah chawhmeh a siam a. Va chhuah ve daih a nia ka duh.


Ka puin, "Ani hi chu, Kross-a angtein an nei pha lo nasa, khawpui nula a nih hi", khi vur vur chungin a ti a.


Pitêi pawhin, min hmusit tak kha paihboin, a derin nelawm taka min enin ka nu leh ka pa inneih dan te a sawi a.


Putêa pawhin min fakna thu a chhak chhuak nasa.


Tukina min en dan te leh an ṭawngkam te chu inpersan tawh tak a ni.


"Khawpui nula chu, kan khuain kan ṭangkaipui dawn hle mai che a. Kan khaw tlangval hoin an hriat hunah che chuan, rimtu i ngah dawn mang e", nui tat tat chungin, kan inlêng ka puin a han ti a.


Pitêi leh putêan min fakna thu sawi pahin min chhuan hmel takin min han en a, namen loin min fak bawk.


Ka pu pawhin, "A pa kâmding a nia, inlêng naran mai mai nei thei kan ni lo", a ti bawk.


Kan inlêng ka pu ngaihdan a nih hmel lo lutuk. Kei pawh ka lo zak.


Haw theihna tur remchang melh ru rengin ka awm ve ta reng a, karlehah haw tura ka inruat kha, ka haw thei ta mai lo.


Kar khat chuang ka awm hnu chuan, thil eng kim ka hre thiam ta.


Kan inlêng ka pu nen inkawmna hun ṭha deuh kan nei a, chutah chuan ka zawt a, ṭha deuhin min hrilh ve mai bawk.


"Falak a nia",


"Chu chu eng nge?",


"Falak chu, a hringtunu ngei pawhin tu nge a pa tih a hriat loh hi a ni. Kross-a nu, khawpuia a awm kha a tal khawlo lutuk a.


Kross-a pai puar ula lo hawin, "Ka rui lutuk a, tu nge pawh ka hre lo", a ti ta vel mai mai a. A thup ti dawn ila, ani pawhin a ngaihtuah nasa tho si.


Falakin Kross-a a lo piang ta a, a nu lahin a lerh kual san leh ta mai mai. Ngaihsak ṭhatu pawh nei loin, a awm awma awmin, thing delh loh lung delh loin tun a lo thleng ta a ni.


A mak khawp mai", a ti siam siam a.


Kross-a nu awmna ka zawh chuan, "A hurhlum mawle", a ti tlawng. Zawh nawn ngai loin a hriatthiam theih.


Chuvang a ni ngei ang, Kross-a chu chhiahhlawh ang chiah chiahin an chei a. Pawnah chaw a ei bik ziah ni.


Ui ang lekah an ngai tihna!


Ka nu unaunu a ni tihna a ni a, a va rapthlak em! Ka nuin a sawi ngai miah lo. Sawi ngai lo pawh nise, ka dem hran lo.


Ngilneihna lantir loin, an thinrim hrikthlak nana an hman ber a ni tih ka hre chho ta zel a.


An mood fuh loh chang leh, lungawi lohna an neihin Kross-a chungah ṭuanin, a chang chuan kut an thlak ṭhin.


Tih theih nei si lo, khawngaih takin Kross-a chu ka en ṭhin!


Mittui hi amah avangin a tla fo.


A tuar ṭhan tih chiang reng reng, a dawh tawp zel. Ṭan hi a na thei asin.


Mambawihin a putêa a chhun chiang a ni. Kei aiin Kross-a a khawngaihthlak.


Kei chu fahrah ka ni a, Kross-a erawh, fahrah ni pha ve loin, 'falak' a ni thung.


Hmuhsit leh diriam a tawh nasat bik zia hi aw!


"Tlaiah eng nge ka lo hawn ang?",


"Saisu aw, tui tâwkin i bai leh anga", a bu nghat.


Kawngka thleng thlahin, ka kut vai lauh lauhin, "Tluang deuhin aw", ka ti a. A bu nghat nghat.


"I peih mai mai e a, a awm awmin awm rawh se", ka puin a lo ti a.


Chhâng loin ka nui mai mai. Pitêi te pindanah vawikhat mah ka lut lo.


Kross-an rama a kal dawnah ka pu pindan nen a tifai ṭhin a, keiin inpui lam.


Chawhmeh tui tak tak kan hmeh ṭhin te hi, Kross-an ka tana a siam tih ka hria.


A rukin, "Chuhhelh ve ṭhin rawh", min ti ṭhin a. Min ngaihtuah tak taktu, nuṭa thar neiah ka inngai.


Tuk khat pitêi lo tho chu, "Kross-a, Kross-a", a ko vak vak a.


Thinrim eng phiar phiarin Kross-a lo lut chu, "Nang, rukrupa, hurhherhnu fapa, khawiah nge ka pawisa i dah? Mihrang ka pindana lut nang mah chauh i ni. Khawiah nge i dah, sawi rawh? Tunah min pe nghal rawh", a ti tawn tawn a.


Kross-a a ngawi reng, "Pitê, eng nge awmzia?",


"Ka pawisa a bo, hepa bak hian a la lo ang. Kutkem ka nei ngam e ti i ti vel a. I hrawkhrui chawmtu che hi min rawk ngam elaw?", a bêng a. A chum thul.


Ngawi rengin a dawh tawp si a, an inkarah ka tla zep, "Pitê, Kross-an a la lo ang, zawng ṭha leh la, i dahna i hre lo zawk a ni ang", Kross-a hmaah ka ding a.


Kross-a a khawih loh nan ka kut pahnih ka phar chhuak, pitêi ka tithinrim mai mai chauh a lo ni.


"Ṭan reng reng suh, i hria em? Pa sawrkar hnathawk i neih avangin ka in chhungah inluling ngawi thei i ni lo", min ti ta.


"Pitê, ka inluling a ni lo. Ngaihtuah chiang la, dahna hriat loh pawh a awm theih alawm. Kross-an a la lo ang, rukruk hmang a ni lo", ka ti ve tlat.


Putêa lo ṭawng chhuak tain, "A thawmhnaw bawm hai ila a ni mai alawm", a rawn ti ta.


Chu zawng, Kross-a tan manganna ka chawkchhuak leh dawn tihna a ni.


Kross-an, "Hai a ngai lo, ruk ka ru ngai lo", ka lawmzia chu e.


Ṭawng chhuah daih tawh tur hi a nia.


Awmzia erawh a awm lo thung, "A ngai lo i tih danah, hai a ngai zawk a nih chu", putêa ka melh rum nghek.


Pitêi a melh avangin min hmu lo mai chauh pawh a. Pitêin hai turin a ti a.


"A ngai lo ka tih kha", Kross-an a umzui.


Putêan lo nam chhuakin, "Awm hle hle rawh", a kutzungchal a hmuh a.


Kross-a thawmhnaw dahnaah ka pawisa ka dah a, amah Kross-a ka la hrilh si lo. Ka thlarau a chhuak dawn emaw ka ti tawh.


Putêa lo chhuakin, ka pawisa neihchhun ngawih ngawih kengin, "En teh hei, ka thil hmuh hi", pitêi thin sa phatin, hmunphiah a chuh lawk a, Kross-a vaw ta vak vak.


"Pitê, duhtawk rawh, duhtawk rawh", ka dang ve tak naa, awmzia awm lo.


Kross-an a ru lo reng reng, ka pawisa neihchhun ngawih ngawih zawk a ni.


"Pitê, duhtawk tawh rawh. Kross-an a ru lo", min nêk chawrh a, "I pa hausakna i chapopui vei a ni maw? Mi rethei kan ni a, kan tan pawisa a hlu bik asin. Sawrkar zêm zen kan nih ve loh hi", a kutzungchal min hmuh chungin a ti phiar phiar.


Ka pawisa a nih zawk thu sawi ka tum chu, Kross-an mitmei min lo hmuh vat. Sawi lo turin min ti tih ka hriat avangin ka ṭap ringawt.


Ka sawi a nih chuan, Kross-an a tuar belhchhah dawn bakah, kei thleng thlengin ka tuar dawn.


Pitêin vuak a tum leh chu, "Pitê, duhtawk rawh", Kross-a kuahin, a aiah ka indawh.


"Ni e, duhtawk tawh rawh", ka pu a lo ṭawng ve chauh.


Putêa pawhin, "Pawisa kan hmu let tawh a, insum rawh khai", a ti ve bawk.


"Nangni fahrah hian min tibuai hle mai, ṭangkaina nei lo lutuk", pitêin fahrah ka nihzia min hriatthar tir ngawih ngawih.


Fahrah ka nih avangin heng ang hi ka phu lo asin.


Ka chunga a thlenna bik tur a awm lo.


Fahrah nun min temtir turin helai hmunah hian ka nuin min tir a ni maw?


A hrehawm lutuk, a va han hrehawm tak. Hetiang hi ni maw, fahrah nun diktak chu!


Nu, ka va han rethei tak em. Fahrah nih hi ka phu em ni?


Show post links
Top

[Ngaia]

Thinlungmawlpa
Chapter-4
Ziaktu: Cck Lalchhuanawmi

Nu, ka va han rethei tak em. Fahrah nih hi ka phu em ni?


Kross-a chu a umin ka um. Ka zui tih hre reng mah se, vawikhat mah a lo hawilet lo.


A tan buaina thlentu ka ni hawt alawm.


Bâwng ho awmna kan pawh har tawh si, bâwng ho awmna lamah kan kal dawn lo a ni mahna.


Tukinah, pitêin min hau a. Puar taka chaw ei ngam ni hek lo, chaw ka ei lo tluk a ni.


Pum lah a ri ruih ruih, kan kal thui tawh si a, ka rilṭam lutuk chu ka tha a khûr der der ṭan tawh.


Ka kal ṭhat theih tawh loh avangin ka ding a, ka thinzawn a thîp nghal vawng vawng.


"Bawihi", min pua a, "Kan thleng ṭep".


Min ngaihsak lo emaw tia.


Chil rial ṭanin, khaw hmuh a vâi ruai. Ṭamchhawlin ka thi dawn a ni ang. Ṭamchhawla han awm tak mai pawh chu!


A retheih thlak em mai.


Lui dang thlengin min nghatin, ka lu a tihuh a. "Bawihi, i hmai phih rawh, i harh mai ang", a ti chu, in ka tum ta mai.


Ka kut man vatin, "Tui tlem ka in chuan ka ṭha mai ang",


"Ṭhat phah dawn la chu ka in tir tawh ang che", thei leh thei loin ka en.


"Kan thleng ṭep tawh", amahin ka hmai phihin ka lu a tihuh leh a. Tuia ṭhu sawp ka ni bawk a, ka harh deuh chuan ka hria.


Min kaithoin, ka dara min kuahin min kalpui leh a.


Tui in in ila chu, hei aiin ka harh phah ang mawle?


"Tah hian lo ṭhu rawh", hnah a phah a. Min ṭhuttir. Thlang lamah a liam a, a hnu rei vak loah eng bâl emaw var panga vel lo khai chhoin, lei a kai nuaih bawk a.


A kawr hîk vat vatin min ei tir, a hâng tuiin, tui a pai reuh a. Chawl map loin ka ei. A dihin ka dit a ni mah.


Kross-a chu mittui tling pamin ka en chho, ka thil ei lai ka ei mawlh mawlh tho.


Kâ phawi miah loa pathum ka ei hnu chuan ka harh tawh lutuk. "Kal leh tawh ang", a kut pharin ka ban a.


Min kalpuina lam tur hre lo mah ila, ka ring tawk. Amah lo rin tur dang lah ka nei hek lo.


Bâwng bu ri ka hre leh ta, kan tum ram kan thleng ṭep.


Ka thil ei lai ka zawt a, "Thingba a nih kha",


"A tui reuh e", a bu nghat. Bâwng bu ri aṭangin kan hnaih tih a hriat.


Bâwng hmu ṭan thuaiin, in tê tak tê, thlam zawk, thlam zawk. Thlam a lang a, Anthur kung a tam em em a.


Thlam bulah Pangpar mak danglam deuh a awm bawk.


"Tuin nge kawngkhar hawng?", Kross-a chu tlan a rual.


Ka um ve thuai a, thlam chhunga kan lut chu, Kross-a tiatpui lawih, chal tak tak mipa pathum hian thlam chhung an lo chinglet.


Chumai ni lo, an kutah pawisa ṭhahnem lutuk an keng bawk. An khi vur vur a, Kross-a inhumruh nasa lutuk hmuh hmaih theih a ni lo.


"Pawisa kha, in lakna hmunah dah let rawh u", thah vek duh hmel a pu!


Chumi te lah chuan, hmusit zetin, "Pa nei lo tê tê si, chutianga mi tih. Hnam hming pawh nei lo, fahrah mai mai", pakhatin a ti a.


Pakhatin, "Tu nge a pa kan hriat loh hi?", a ti ve a. An kutzungchala kawkin, "Falak, falak, falak Kross-a", an inset kual a.


Vawilehkhatah Kross-an a bawh thut a, an insual chu a ni ta!


Ka dinnaah ngawi rengin ka awm a, biang a lum thla pap pap. Mi pathumin Kross-a an sawisa rawn chu ka en mawl tawp!


Tih ber tur ka hre lo, ka hmaah an insual bung bung a, Kross-a chhan tur ka nih laiin. Pitêi lakah chuan ka chhan ngam a.


Hemi te lakah ka chhan ngam lo thung. Kross-a hnek pawh an tuar nasa.


Hlau takin, thaw dêp dêpin ka lo en. Khâ a chhihin a khawng tlat bawk a. Tawp tura ngen ka duh. Ka thei bawk si lo.


Kross-a chu a kawr âwma ṭhamin, "Ka pa hi YMA President tih pawh i hria, khua aṭangin ka hnawh chhuahtir thei che asin. Pa pawh hriat loh, Hnam hming pawh nei lo, hming bulfuk lah nei hlek lo in, vawikhat mah thu min pe tawh suh ang che", Kross-a chu a khi sak.


A ṭhamtupa mit taka enin, "Ka pawisa i ruk kha min pe rawh", sehchilh takin a ti fak a.


Thinrimin chhuatah a keuh chawrh, Kross-a tho phatin a hnek leh buan buan, min hmu chu a tawp chat.


Chu chu remchangah lain pahnihin an man bet a, pakhatin a hnek hrep hrep.


Kross-a hnektupain min lo en a, "Hmeichhe lakah i mualpho hle mai a, eng nge sawi tur i neih?",


Hnar aṭanga thi chhuak, mitko dinglam kak aṭanga thisen luang chungin Kross-an min lo melh a, a hmaa ding en lehin, "Pawisa i ruk min pek let duhna thinlung engtikah nge i put dawn?".


A kawr âwmah ṭham tawn tawnin, "I ruk khawm a ni tho a, a pawina a awm lo. Kal ang u", an thlah a.


Kross-a chu ding âwnin, "Zan khata in nu ten min pek zat in hre duh lo em ni?", chu chuan an pathuma thin tisa phatin Kross-a an bei leh chiam.


Pawnah an hnuk chhuak a, leia bâwng ek awmah a hmai chanve nawrin, a hnungah a kut an hnungkhirh a, misual ang maiin.


Eng nge an sawi ka hre thei tawh lo. Khaw hmuh a fiah loin, beng a ngawng. Ka â chhûi!


Phe ruaiin ka lam pana tu emaw lo kal ka hmu a, che thei hek lo. Ka ding tawp.


"Bawihi, an kal tawh", ka inthlahdul thei ta!


Chau hnek hnawkin ka ṭhu thla a, ka khaw hmuh a la vâi tho.


Kross-an min kuah a, "Inah ka haw duh",


"Ka hria e".


Bâwng ho nen kan haw a, luiah chawlin, Kross-a a inchiah pil vang vang.


Lui kamah ṭhuin ka lo nghak.


A hnuah lo chhuakin, "Min chhan turin lo ding tawh suh ang che", thutawp a ni tih ka hriat avangin thuawih takin ka bu nghauh nghauh.



A hmai hliam khawih sak ka tum a, a thlê sawn, "Chaw ei tuina a nih hi", a ti duh chauh.


Pawnah, Kross-a chawhmeh siamna bulah ka ṭhu ngawi kar. Chengkawl hi ka ang lutuk.


Mei alh enin, thil ni lo lo ka ngaihtuah nasa mai.


Fahrah nun dik tak ka tem mek chu a ni si a, hetiang tur si, ka nu khan engvanga min duat em em nge a nih ang?


Helai hmunah min tir a, nuam takin an nun an hmang mek dawn chu a ni si.


Ngati nge ka ât em em mai le?


Ka nu khan, a tir aṭang rengin fahrah nun min tem tir tawh chu nise, tun ang em em hian ka zuau lo tur.


A ṭha alawm, haw hun ka la nei dawn. An duh duha an tirh kuala, ṭawngkam na tak taka an ṭawngkhum theih ang ka ni tawh dawn lo.


Ka haw hunah, nuamsa takin an awm bik tawp lo ang.


Zingah, Kross-a rualin ka chhuak a, lui kam hmun ṭha lai min zawnpuiin, "Ka pawisa khawl min laksak daih si a, i hawna tur tuak nan Anṭam leh Zikhlum hmun kam siam dawn nia. Inhlawhna tur ka hmu thei mai si lo", ka khawngaih lutuk chu, ka bu nghat ringawt.


Kei mah avangin a tuar ziah a, buaina thlentu dik tak ka ni.


Zikhlum chi tuhna tur lai khuar zelin, keiin ka thlak zel a,,thlak zawhah lui ami tui chawiin ka pe leh den den.


Anṭam chi thehna tur lai phutin, kan pahnihin kan theh a, chumi hnuah, Center fresh dahna bawm chhin vit pawp pawp thluah thluahin, chumi hmangin Anṭam chi tui a pe a.


Kross-a nen chutiang chuan kan thawk a.


Hrehawm ka tih ber mai chu, Putêa ten an mood fuh loh changa Kross-a chunga an ṭuan ṭhin chu a ni.


Chhan a duh tawh si lo, ka chhan khan a tuar nasa zawk tlat a.


An hauh tawh chuan pawnah ka awm daih zel.


Zan khat chu pitêi hnenah, ka huaisenna zawng zawng sawm khawmin a phone hman ka dil a.


Phal mah se, a bulah min ṭhuttirin loud speaker-ah a dah.


Duh angin a inbiak theih loh, ka nuin, "A lung i tilêng mai mai", a lo tih sek avangin, minute khat tling loah phone a off daih.


Putêan, "Pa te ngai rual pawh i nih tawh loh kha, pathlawi fa pai rual tawhin lunglên avangin an ṭap ngai lo", a dûl kiar luah zût chungin a ti a.


An ṭawngkam hman duh dan te hi a mak thei a nia.


Ngawih reng a ṭha zawk tih hre lo ila chu, ka chhâng tawh hrim hrim. Mambawihi pawh chhâng loa ka ngawih mai mai avangin min zuam a.


An inang vek a nih hi.


Pawnah chhuakin Thuk bulah ka ṭhu a, min hmu thei lo bawk a tiin, ka mittui luang ka hru duh lo.


Kross-a a lêng daih a, khawharthlak zual ngawih ngawih.


Chhung lama an ṭawng hre pha vekin, an rilru leh an ṭawngka chhuak tin chu pawisa hlir a ni mai.


Putêan, "Kross-a hian inhlawhna tur te hi a hmu tawh lo nge ni?", a ti tlawng a. Pitêin, "Tu mahin mi thatchhia an chhawr duh lo, a zawmthaw si, in chhungah lah chet tum loin a ṭhu reng a. Bâwng a vêng hi a duhtawk em em ringawt", a ti bawl bawl.


Kross-a thawh chhuah sa ringin an nung a, Kross-a hnawmhnawk tihfaiah chêngin, Kross-a suk fai thawmhnaw an inbel a. Kross-a ei rawngbawl an ei a, a duhtui tuiah an la ṭang zui.


Zak map loin an sawiselin an tiduhdah ṭhin a nia!


An lakah chuan zahna pawh hi hawi chhuak ngam loin a biru ta ve ang.


Kross-a lo haw thlengin ka ṭhu ta reng a, bal paw thial thualin a lo haw, "Cement kan thiar a, sawi suh ang che", kan lut a.


Kawngka kalh felin ka mutsan ta daih.


Thlamuang taka zan ka mut theih chhan te hi Kross-a vang a ni.


Min vêng tih hriain, tui takin ka muhil chiah chiah.


A tuka Anṭam leh Zikhlum huan kan siamnaa kan kal chu, mihringin an suasam tih hriat lutuk mai hian, a lo darh vek.


Kross-a thinrim lutuk chu, lei a chhuih khu luih a, "Hrep tak a!", ti chhuak fak fakin a insehruh ṭeuh.


Haw tura min duh lo tu an awm chiang a ni.


Thawmhnaw suk tur kan ken avangin Kross-an a su a. Min suktir phal lo.


Putêa leh pitêi te underpant rimchhe tak tak te, ka pu thawmhnaw hing leh bal, a changa ek them tel ṭhinte chu a su ta ṭhin a ni a!


Kross-a tan hian hmabak a thim ngawih ngawih.


"Pawisa chhiar ka thiam", a tih angin, pawisa chhiar bak thiam a nei lo. School kal tir ngai hek lo.


Khua zawng zawng ina an hmuhsit rawn a ni a. Sawi ngai lo mah se, nung dama awm reng a ning ber a ni ngei ang.


A tan dam chhan tur a awm hlawl lo. Awm lo tak a ni.


Ka chhûtpui hian, lo piang lo ta se, a tan a ṭha zawk. Piang lo tur piang mai a ni. An puhchhiatna zozai te leh an vuakna a dawh tawp zel a.


Bei let loin a dawh tawp zel a, khawngaih taka thlîr vawng vawng tih theih ka nei ngai bawk si lo.


Kei aia a dinhmun khirh lutuk hian min timangan lehchhawng.


Thing kawkalh pahnih siamin, mau pum a kham phei a, chutah chuan thawmhnaw suk phoin, ram lamah kan kalsan a.


Kan pahnih chauhin kan inzui ṭhin.


Hmana kan inlêng ka pu, Kross-a chanchin ka zawhna, ka pu pawh khan, Kross-a mihring angin a en chuang lo.


Mi zawng zawngin hmusit takin an diriam a, bâwng vêng ṭhin a nih avangin, "Bâwngpu", an tih loh leh, "Ongbak".


"Hnam hming neilo", an tih loh leh, "Pa nei lo", naupang thlengin an chhaih nawmnah.


A ngawi mai zel a, a nuih liam zel.


Chhungrila a ṭap nasa tih ka hria, taksaa hliam aiin thinlung hliam tuar dam a har zawk ngei ang.


A duhthu renga mite hmuhsit tura piang a ni si lo.


Duh sela, pian loh a duh awm zawk si a.


"Mei lo chhem la, Pangbal ka zu cho ang",


"Aw le".


Mei chhemin, belah tui ka chhuang a. Ram lama chet pawh ka hnehsawh tawh lutuk.


Hun remchang melh ru rengin, pitêi phone lak ruk ka tum a.


Vawikhat dang ka pa biak leh ka duh. Nutêi phone number vawng ila chu, inah ka awm tawh ang.


Pangbal nen Kross-a lo lutin, silfai sawk sawkin belah a thlak a. Mei a chhawm ṭha mawlh mawlh.


Chhum chhungin Chakawk leh Hnahbial la turin a chhuak leh a.


A hmin leh hmin loh en nan ka hawlh chhen. Chini leh chi, hmarcha hring nen ka inchhawp tawh.


Inah puar takin chaw ka ei ngai lo a, tihian, ramah Kross-an ei tur min siam ziah.


Pangbal a nih loh leh, luia sangha min mansakin a chhum a. A changin Saisu a bai a. In aṭanga kan ken chaw nen kan ei dun ṭhin.


Unau rethei tak kan ni!


Kross-a nui varin ka en a, min lo en vung vung leh tawh niin, a hawisawn rang lutuk.


Tianga min en vung vung hi a sim thei lo. A chang chuan, min tihlau dawn dawn ṭhin.


"Kross-a?", a lo hawi a, "Min en vung vung zel tawh suh, i mawl hmel thei lutuk",


"I mawl fe zawk", mi ti ta chiam.


"Kei aiin i mawl", ka ti let a, "Ka lawm e", a ti chu, "Thinlungmawlpa", ka ti phawng a.


Chu thu chu eng vanga sawi nge ka hre mai lo, ka rilrua awm ka sawi chhuak hmiah.


"Ei mai mai rawh", ka nuih a. A nui duh ṭhak lo.



Zanah a dan pangngaiin inhlawhna zawngin a chhuak a, ka tibuai mah mah a ni.


Thlama a dah pawisa, an laksak tak pawh kha, a inhlawhna aṭanga tlem a lak pên zel niin, a bak, a tam zawk Pitêi te a pe ṭhin a.


"Zu rim ka innamtir ṭhin a, zu manah ka hmang emaw an ti zel", Kross-an a ti mai a.


"Khawimi zu nge?",


"An inna ṭhinah kalin, an in bânin ka inchulh", a ti hmiah. A fing ka ti dawn nge, a mawl ka ti dawn pawh ka hre lo.


Chumi zan ka mu chu, ka inluhkhuh a, mahse, min daptu awm ang tlatin ka inhre ta.


Kross-a a lo haw lo tih ka chiang.


Haw pawh nise, min dap dawn lo tih ka hre si. Mumang a ni lo tih lah ka chiang.


Puan chhanah ka ke hmawr aṭangin mi rawn dap chho zel a, ka meng phar kâwk.


Putêa a ni chiang lutuk!


Thin a phu rang nghal dup dup a, thlanin min bual huh dup nghal.


Kross-a ka au mawlh mawlh.


Chet phut ka tum chu, thil rit lutukin min delh bet ang maiin ka che thei ta reng reng lo.


Ka mut ngai ngaiin ka mu reng a, chet ka tum poh leh min delhna a rit a, chhia leh ṭha hre vekin ka meng kur bawk si.


Chet nasat tum poh leh, taksa a incharbetin a nghet.


Ka khel bawr a zût thleng tawh, mittui a chhuak a, "Kross-a, min ṭanpui rawh", thinlung a rûm tlawk tlawk.


Show post links
Top

[Ngaia]

Thinlungmawlpa
Chapter-5
Ziaktu: Cck Lalchhuanawmi

Ka khel bawr a zût thleng tawh, mittui a chhuak a, "Kross-a, min ṭanpui rawh", thinlung a rûm tlawk tlawk.


Chhia leh ṭha hre vek siin ka che thei thlawt si lo. Thâwk a rang tawh lutuk.


Vawilehkhatah kawngkhar inhawng ri hriain, ka taksa zûta awm pawh a tawp nghal!


Pindan kawngkhar ri ang deuh ka hre zui a, putêa ngei a ni. Ît hmel taka min en ṭhintu a ni a. Amah bak bak an awm thei lo.


Ka inkhuhna puan inhlipin, ka kâng awk a, thaw hluam hluamin mittui kar aṭangin Kross-a ka en!


Lainat tak hian min thlêk ngawih ngawih.


Ka taksa a hmet nawk nawk a, inthlahdul tawh tak ka ni. Rilru a fim chho zel a, haw ka duhna a zual tual tual.


A mutnaah pawh mu loin, ka mutna ṭhutthleng nghengin a ṭhu a.


Mu turin duh viau mah ila, khâ a chih tlat avangin eng thu mah a sawi chhuah theih loh.


Zankhuain a ṭhu a,,puan min sin ṭhattirin pang a dek zauh reng bawk. Khawsikin min ṭham a hlau deuh a ni ang.


Putêa chu, nizana a thiltih avanga zahna nei map loin a hawi sâng vah a, "I lêng a nih pawhin tlai tak takah lo haw tawh suh, inah tih tur a tam tehreng nen, bibo daih zel mai, phakar lutuk mai", Kross-a hauin a vin khur khur a.


"I zawmthawt luatah inhlawhna tur i hmu thei lo, taimak chhuah turin vawi engzah nge ka hrilh dawn che. Duati pawisa thawn a hun ṭep tawh, inhlawhna tur zawng ṭan ang che", pitêi a lo ṭawng ve leh.


Hahthlak tawpkhawk hi a ni mai.


Kross-a avang chauha nung dama la awm an ni a, duat hle tur an nih vei nen, chhiahhlawh chei tak têin an chei a ni a.


Engtikah harh chhuak ang maw?


Inlêng an nei ngai lo te hi a awm hliah hliah, lo lêng an awm chhunah an ṭawng chaltlaiin an indah chungnung larh a.


Midang chu hniam takin an dah ṭhin.


Chu chuan an hriat hauh loin, hniam taka an dahte aiin an hniam zawk tih a lantir. Kross-a ai pawhin an hniam.


Kross-a awm lo se chu, an hmuhsit dinhmun hniam taka awm tur an ni.


An fanu Duati an fak chamchiin, mi zawng zawng aia fel leh ṭhaah an ruat a. A hmelṭhat thu an sawi chamchi zel bawk.


A hmelṭhain a fel ka ring lo ve hmiah, Mambawihi nen angkhat an nih ka ring. Putêa te hian an zir em mai.


Mahse, Mambawihi te ai pawhin a lo fel thut thei a, ka chiang bik lo.


Ka puin, "Inah awm mai mai rawh, ramah kal kal ve suh, i bo ang", nui hawk hawkin a ti a.


Putêa inrawlh leh vatin, "Kross-a i zui i zui sia, i puar pawp ang e", a va han tenawm tak!


Kei ai mahin Kross-a a thinrim, a inhum ruh ṭeuh hmuh hmaih theih a ni lo.


"Inah lo awm rawh", min ti ta reng bawk a. Zui duh mah ila, inah ka awm.


Vawiin chu zui lo ve phawt mai ang.


Pawnah ka ṭhu char char, in chhungah ka lut duh lo reng reng.


An mizia leh awmdan leh ṭawng duh dante ka hre vek tawh a. Kalsan ka duh tawh lutuk.


Lemchanah hetiang hi chu awm thei chauha ka hriat ṭhin a ni a. Lemchanah ni loin, a tak ngei chu a ni si!


Pawna awm reng aiah tiin, "Pu, thingpui te i in duh em?", a ep chiah ṭhutthlengah ka ṭhu a.


"Lo in ila, tui tâwkin siam rawh aw", nui vur vurin a ti a. Kei pawh nui sânga ka awm avangin putêa lawmah a tla.


Chu chu hriain, ngaihno bei takin ka melh a, "Putê, nang i duh dawn em?", a kuhva eina ha sen ṭhawta khi vur vurin, "Nula thingpui siam te chu in ila", a ṭhu ṭha sek sek.


Thawh paha kawk zeuhin, "Special tâwkin aw", ka ti a lawm lutuk chu, hawlhtu awm ang maiin a che sek.


A khi vur vur bawk a, luak a pawt a nia.


Pitêi a lo haw a, "Pitê, thingpui in rawh aw", ani pawhin, "Aw", a ti ve mai.


A ṭhut thlak rualin, "Hlimawmi leh Maruata te inngaihzawn thu kha i hre tawh em? Maruata te ang rethei lutuk, Hlimawmin engtin nge a neih duh zawk ni? VC fanu meuh ina bawng chaw phur mai mai a nei tur chu, a chhungte pawhin an phal zawk em mai.


Duati erawh chu, College ṭha takin kal zo se, Sawrkar hna ṭha tak thawk rawh se. Bawng chaw phur mai maiin an neih phak loh turin a awm ang a, lo lên an tum pawhin ka lo hnar haw zel ang", a ti barh barh.


Awm hmunah ka lo zak chem chem.


"A hmel a ṭha si, a felin a nungchang a mawi a, Officer lian tak takin an duh dawn lutuk. Officer ho teah pawh, a hausa fal nalh pasalah a nei dawn. Nuamsa taka awm a ni tawh mai", pitêi chu chawl map loin a ṭawng barh barh.


Shillong-ah a awm daih a, a nundan an hre kil kel tawh si lo.


Duati chu eng tin chiah a awm ṭhin ang?


An fak nasa thei bawk a, a tak ngeia hmachhawn ka duh ve khawp mai. College a zir zawha a awm zel dan tur ka hre châk.


Pitêi sawi ang takin a awm thei dawn em?


Thingpui pekin ka nui sêih a, putêa lawmah a tla thlu ngang mai.


Min ît tih hriat takin min melh chho a, pitêin a lo man a ni ang chu, "Rodinglian?", a chapalin putêa a lo vawm.


"I va han ṭhing tak e", putêan thingpui a tibaw deuh hlek a. "Thingpui a buak hi, khatia min vawm turin tihsual ka nei lo".


Pitêi a tho phat, "I nei, i nei, i nei chiang khawp mai", ti khar kharin a chhuak ta daih.


"Pitê, thingpui hi", ka au ngat a. "Huangtau hlawm lutuk", a ti bul hmuk.


Ka puin, "Henu mai mai tak ṭhin hi chu!", lungawilo fahranin a ti a. Putêa a inrawlh leh vat, "Bawihi, lo ṭhu rawh, a lo haw leh tho ang", thingpui a in a, "Special ngei mai", min siai zeuh.


Chhuanlam siama bual ina lutin ka uak ṭhawt!


Ka thiltih kha a ṭha lo takzet a ni. Nuam ka ti miah lo. Hrehawm ka inthlen mai mai zawk a ni.


"I va lo haw hma ve", ka chhuak thuai a, Kross-a ka hmu chu ka thaw huai huai. Ka ngai hman alawm le?


"Thingpui ka lo siam ang che aw, Vanram Thingpui ang turin", min awih lo nge ni, a kiai sak.


Bu nghatin, "Han siam la", ka nuih sêih.


Putêan, "A ngai lo, Bawihi, siam duh suh, bawnghnute pawh a awm tawh loh kha, ramah kal rawh se. Haw nan a la hma lutuk, thatchhe lutuk, bawng pakhat i lo haw pui ang ta lang a. Khawiah nge a dang?", ding chungin a vin khur khur a.


"Ka siam dawn tho", ti rilru chungin gas on-in ketli ka chhuang.


A thu lo em mai, Vanram Thingpui ang turin ka siam dawn tho tho. Bawnghnute pawh kan ngah lutuk.


Kross-an, "A rai a, ka lo hawpui a nih hi, inah awm rawh se. Lui kân kân a chi tawh si lo a", zaidam takin a ti luam a.


Vawikhat na na na hi chu, âwki han sân ve se ka ti.


A sân a nih erawh zawngin, a chan tur a hriat lawk sa.


Putêa ṭawng chhuak leh chuan ka thin khei zakin chhân tumin ka âng hman tawh, Kross-an mitmei min hmuh lo se chu, kan inhnial buai ang.


"Nangpui reuh hian i lo rai a ni lo maw?", patling ṭhan kin tawh ṭawngkamah chuan a huatawmin a tenawm ngawih ngawih.


Kross-a hi a tupa a ni a, a laka a chetdan leh ṭawngkam te hi a niin a ni lo reng reng.


Midang thingpui ka siam aia special takin ka siam a, bawng a thlung zo pawna a ṭhu chu ka pe.


"Vanram Thingpui a nih kha", nui varin ka ti a.


"A tui ngawt ang".


A bulah ka ṭhu ta reng, Kross-a tih loh midang ho chu ngaihtuah tlak pawh an ni lo.


Nichina putêan Kross-a a ṭawngkhum dan khan min la khei!


Pitêi chu a lo haw ta, noodled man to chi a lo hawpui. Min eitir phal dawn lo chiang sa. Ka beisei ngam lo hrim hrim bawk.



Kawngka a khar zui hmak a, "Mi pamham ei tura hawn pawh ka ni lo", a ti deuh kher.


Pawnah Kross-a nen kan ṭhu reng a, a rimin min fan raih raih.


Aw, inah kha chuan ka ei pha ve asin mawle?


"Min lo zui rawh",


"Khawiah?",


"I hriat kha".


A kut min pe chu ka ban thuai.


Luiah kalin tui kan theh kang.


Ninhlei chhuahin tui luang danchahna tura lei kan belnain ka vawm a, "Awm ṭha rawh".


Engah mah ngai duh loin ka vawm lui leh ngat, "I ei ve duh a nih chuan ninhlei suh", ka ninhlei ta lo.


Min ei tir lo tak tak palh ang.


Lui luang lian chu danchah theih a ni lo a, lui kuang têah pawh, a tê lehchhawng, Sangha awmna si kan dangchat.


Dangchat fithla kan ni chuang lo, a sir lamah, Sangha hoin chhuahna tih an hriat lohna tur, tui a luan kang theih nan kan ti âwng.


Sangha tam tâwk lo awm ṭeuh se.

Tui kang nghah chhungin Rairuang min kêk pui a, ka kêk thiam loh chu thuhran, a rai leh rai lo ka hre hrang thiam thlawt lo.


Min hrilh duh der lo bawk.


A keh sa lungawi takin ka hmawm mawlh mawlh.


Tui kan theh kangnaah kal lehin, Sangha chhar tur an awm ṭan tawh. Sangha vân lai ni mah se, an tam ve tawp.


Kan lak zawhah lungthu siamin, mei a chhem a, mau suih têin Sangha lian lian a rawh.


A rawh hmin apiang ka lo ei zel, "Ei ve la",


"Ka puar e".


Eng mah ei lo chu, a puar lo tih ka hre ru reng.


Pakhat ka ei luih tir thei hrâm, chu pawh a kâah ka hnawh.


"Kross-a, Thingba kha ei leh ka châk, a la awm ang em?",


"Awm tawh lo ang, a vâng tawh em mai. Mi chul hlui mi a nia, chul hluia zawn hrep a ngai tawh".


Zawnpuiah ka sâwm dawn mawni le?


Ei leh ka châk, rilṭam laia ei tur tak a nih kha. A thlum loin a al lo a, a hâng lutuk pawh ni lo. A hâng tui a, puar theih tak a ni.


"Tlaia hawn tur kan nei lo palh ang",


"Kan haw dawn nge?",


"Bal ling lawk ang".


Lungthu a siam chu tidarhin, nawalh bawm a thlauh zui. Chharin ka pe a.


Tui danchah phet turin kan kal leh lawk, chutah, Sangha liam fahran hi a lo awm.


"Nghavawk a nih hi a, a va mak ve!",


"Nghavawk maw?", a bu nghat. Ka khawih a, a nâl puat. A mak reuh e.


La chhuak loin ka ṭhutchilh a. Kross erawh a khupah innemkhalhin min en vung vung.


Ngaiah ka nei tawh, mi a en vung vung hian nuam ka ti tawh zawk tlat!


"E he! Kross-a, ki a nei", a nuihza ngang mai.


"A hmul a nih kha",


"Dawt sawi kher a ngai em ni?", a kiai sak. "Zawhte angin hmul a nei a nih kha, kha i hmuh reng kha, ki a ni lo", a ti ta deuh deuh.


"Ka awih chuang lo".


"La vat la, âwtah khan dah rawh le".


Ka kut hnihin ka man bet a, a che laih laih a, a nâl nen, âwta ka khung tur chu a che laih ka inring hman tawh lo, ka thlah ta daih!


Kross-an lei a lo phet vek tawh si nen, lui luangah a hleuh thla zar zar.


"Awi, ka ui lutuk, ka ui lutuk. Nang Nghavawk, lo let leh rawh, kan ei dawn lo che. Nghavawk hmelṭha, lo let leh hrâm rawh, ka ngai lutuk che", ka au thla lauh lauh.


A thûk lai ka thlen tawh avangin ka ding a, ka per chhak chhak.


"Ka ui e", tau nghawngin Kross-a ka melh ralh.


Nghavawk sa ei a châkawm tehlul nen.


Min hui a, tau bur burin ka chho. Tuiah ka per chhak chhak.


"Ka ui e, Nghavawk ka la ei ngai lo asin. Ka ui e, tui i chêng thiam tho a, zu liluhin zu man rawh", ka ti bawl.


Ka tukkhuma min namin, "Kal mai mai teh, bal ling ila kan haw ang. Nidangah, Nghakuai kan chiah dawn nia",


"Nghakuai a?", ka ding dat.


"I hre lo hrim hrim nge, i hre lo der?",


"Hria e, kan zir alawm. Mahse, a takin Nghakuai chiah lai ka hmu lo a", ka ti chu, a lung a dam ta.


Bal lingna tur kan thleng a, "Ka Ba hmun a nih hi", intithei fe hian a han ti a.


Ka awihsak lutuk ringawt, awihlo chi a ni lo. Ka mi hriat tawha taima ber a ni.


Kan ling ṭan a, a ling sa ka lo khawm, "Cho a nih zawk hi, a bulah i cho a, Bal i la chhuak leh a. Eng tin nge ling a nih theih, cho emaw Thur emaw a ni thei lo em ni? A chi tuh dawn hi ling an ti emaw ka ti a?",


"Khawpui mi awm tak i nih hi!", a ti tawp.


Mawl hmel ka inti ta lutuk a.


Eng mah ka zawt tawh lo. Pawl sawmpahnih pass chu ka ni ve si ale. A zahthlak zawk e.


Thlamah lutin Paikawngah a khung a. Em pawh ka vawikhat phurhna tur!


Thlam pawh hi, Kross-a tan chuan in pakhat a ni. "Ka tawm hulna a nih hi", a ti mai a.


A pian chhuah aṭanga tun a hun lo hman thlen dan hi ka hre châk. A tuar nasain, a ṭap ru fo ngei ang.


"Kun tlat suh, dak deuh rawh, ding ngil la", ngil tâwka dingin ka dak vah a. Chu chuan Em phurh a tibuai.


"Iptepui hi ak la, keiin ka lo phur mai ang",


"Ka phal lo, ka phur duh",



"I thiam loh loh nen", a hmelah min nuihzatna a lang. Indeusawhna ang zawng ni loin, ka thiam loh em avang zawkin.


"Vawikhatnaah ka thiam nghal thei hleinem", ka ti lui tlat.


Hnung lam aṭangin min dawl, a changin Em mawng a sâwi a, a changin ka tlukpui.


A changin kun lutukin ka kal a, a changin dak vah, ngil et awtin ka kal a.


Hnung lamah Kross-a a hah thei lutuk.


In erawh, ka thlenpui ve tho.


Pitêi ṭawngkam mawilo kan dawng nghal char char, a zahthlak zawk.



"Va inbual rawh", Kross-a âw dam zet erawhin pitêi ṭawngkam tladah min tihrechang lo.


Bual in aṭang pawhin, "Chawhmeh bei tham rawn hawn ziah mai", tih ka hre pha.


Sangha a ei thei dawn a, lawm zawk awm hi a nia.


"Rimtui tawh ve", putêan min siai leh zeuh chu, "Nia", lei ka chhiah khum zeuh. Tenawm thei em mai!



Bual inah thawmhnaw ka keng lut vek zel a, inthlak fel thlapin ka chhuak ṭhin.


Ka kawrhnuai te hi ka zar uluk, putêa hi ka ring hlawllo.


Lu tuam chungin pawna mei chhemnaah ka ṭhu a. Bal bai ka vil a, kawtah Kross-an thing a ek.


Thing a tum lianin a keh mawh si, a harsain a lo hah tawh a, a thlan dup.


Ṭhen saka min lo enin, "I fai maw?",


"Fai lo", a kiai sak.


Thing tum chhana hrei dahin a lo phei a, ka hmaah tak a kawr ban tluan hak a hlip mai a nih kha!


A taksa thlan dupin a dul thuar fit ṭha lutuk pho lang chiang hlein, a âwm khauh tak chu Lungphur avangin a bawl ṭuk ṭuk a.


A mawina a hliah zo chuang lo.


A dar pharh ṭha tak vaw thuak thuakin, a beka thlan fim luanga, a khabe aṭanga far thla te chu man chawia en a phu hliah hliah.


A hnuah, a kawr chu a kâwngah hrengin thing a va ek leh.


Ka mit ka la sawn thei lo, a ban puam ṭha leh sek ṭalh te chuan min hipin, tha chak lutuka thing a ek phel ta phawk phawk te chu.


Awi! Awi! Awi!


"Maktaduai sawm min pe la, i damchhungin i thlir dawn nia", min ti se, i he lovin ka pe nghal ang.


Thing keh ṭha duh loa ka ngaihte chu, an phel ta phawk phawk mai.


Mumang ramah nge ka awm a, a tak ramah zawk tih pawh ka hre tawh lo.


"Bawihi", thing therin min lo vawm a, "Chawhmeh kha en rawh", a lo ti chu rang lutukin ka mit ka la sawn.


Ka la mitsir ṭalh!


Sangha chu duh angin ka chang ta reng reng lo. Luiah a rawh ka ei ṭeuh tawh tho a, ka vui chuang lo.


Pawna chaw eipain min chiah hneh tawh lutuk, tlaia a thing ek aṭang phei kha chuan.


A kawr hlip lai ka chhûi kir hian ka mur sung sung thei!


Pawn thleng ka thlah a, min din hnaih chu ka zâwi vek. Ka ding thei chang chang.



Kun hniamin beng bulah, "A rukin lo insiam rawh, dar sawmah khua aṭanga khawpui kal tur an awm a, chutah chuan i kal ang".


Hnungtawlh dawrhin Kross-a ka en a, a bu nghat.


Ngati nge mawni, thinlung a na vawng vawng! Haw ka duh tehlul nen, Kross-an i haw dawn a tih chuan haw châkna zawng zawng an thlawk bo vek nia.


Show post links
Top

[Ngaia]

Thinlungmawlpa
Chapter-6
Ziaktu: Cck Lalchhuanawmi

Ngati nge mawni, thinlung a na vawng vawng! Haw ka duh tehlul nen, Kross-an i haw dawn a tih chuan haw châkna zawng zawng an thlawk bo vek nia.


Kross-a hlat tura ka inruat chuan, ka thei ta tlat lo!


Pawnah ka ṭhu reng, in chhunga awm pawh ka peih lo.


Ka la hriat ngai reng reng lo, khawharna leh tu emaw thlakhlelhnain ka khat a. Amah ngaihtuaha khawharna leh thlakhlelhna bo chu khawi lamah.


A zual ting emaw a ni!


Kalsan hun a thlen meuh chuan, khang hun kan lo hman dun tawhnaa, Nuṭa ang maia ka lo ngaihna, min ngaihsak em avanga Nuṭa anga ka lo enna zawng zawngte khan awmzia a nei ta lo.


Thinlungah a khat liam tawh lutukin a lakah ka intulut hneh tawh lutuk.


A chungchang ṭha lo taka an sawia ka lo natpui te khan, thûk takah engtin emaw takin zung a kai nghet tawh a.


Ka awm laia hetiang a nih chuan, ka awm loh hnuah pawh, engtin nge a awm ang?


A rukin min kaltir dawn a ni a, zing an thawh hunah Kross-a chungah rapthlak takin an che ngei ang.


Chutiang hre vek sain engtin nge ka kalsan theih ang?


Keimah chauha ka kal chuan rapthlak takin an che dawn a, ka rualin lo kal ta se!


Min zui turin ti ta ila?


Helai hmun ai chuan nuamsa takin, kutthlak leh thinlung hliamna tura ṭawngkam chhe tak tak dawn tur nei loin a awm thei dawn a.


A thlakhlelhawm!


Kawngka hawn ka tum chu, "Khawiah nge kan fahrah unaute hi an awm a, zan thim hlim aṭangin an chhuak ziah mai. Zan hi an lawm mah mah", pitêi ṭawng hlawk lutuk chuan min ṭhawng tawh lo.


Putêan, "Vak vak mai rawh se, an tih theih alawm", a ti liam puat a. Pitêin, "Chuti maw, thingpui inpek paha inmelh nô kha chu a nuam viau ang", pitêin a man thiam chiang alawm.


"Mai mai a, tu te nge inmelh nô chu? I mang rama mi hi sawi ziah suh",


"Huh, a ni maw? Mang ram maw ni a? Naupang tê siin zahna chang hre lo lutuk. Kir ker mai a, mipa râwp lutuk, naktuk aṭangin pawnah chaw a ei ve tawh ang, a hre chhawm zel mai ang. Mi pasal chuhpui a tum vei maw", pitêin kei min sawina a ni tih ka hria.


A pasal zawkin hmeichhia a râwp hiam hiam zawk a nia. A pasalin a zir em a nih kha.


Min puh thlu fai vek chu ni si. An nupa inkar chawhbuaia, pawhṭhen pawh a awl dawn hle mai.


Luhlul chhuahin Kross-a hnial ila, an nupa inkar ka chawkbuai dawn mawni le?


Pindan kawngkhar inkhar burah ka phu uih, an inhau zuiin ka hria, hriat ṭhat theih lohin a thum bul bul.


Kross-a a lo ding ngawi reng tawh, "I dinna a rei tawh em?",


"Eng thil nge i tih a?", pitêi te sawi a hre hman chiang a ni.


Zep buai duh loin ka hrilh fai vek.


In chhungah a lut lawk a, ka thawmhnaw nen lo chhuakin ka ban reka min chelh leh min kalpui a rual.


Ka hmuh hmasak bera a khum lukhum var bak hi a dang a nei lo a ni ang. Hei ringawt a khum.


Mittui parawl kuangin a tukkhum ringawt ka en, nuihzatthlak zawk.


Ka kal a nih chuan helai hmuna kir leh ka duh tawh dawn si lo. A nih chuan, Kross-a ka hmu thei tawh dawn lo chu a nia.


Ngaihtuah zâwngin ka na veng veng. Min hawtir a tum ruh em em mai sia.


Hmuh leh hun a inher loh phei chuan!


Hei hi kan inhmuh hnuhnun berna tur ni ta se. Amah vang chauh pawhin putêa te ṭawngkam tlahawlh tak tak hriat reng pawh pawi ka ti lo.


Kut min thlak dawn pawh nise, lawm takin ka dawh tawp ang. Kross-a ka hmuh reng theiha, a bula ka awm reng theihna tur a nih dawn chuan.


Zawhna mawlmang tak tak zawt ngai loin, min buaipui reng loh nan Em phur lah ka zei tawh ngawt ang.


"Kross-a",


"Hmanhmawh ang".


Ka kal lai tawpin min chelhna ka kut ka pawt let a.


"Hmanhmawh a ngai, dar sawm a ri ṭep tawh",


"Ka haw duh lo", huaisenna zawng zawngin ka phun chhuak thei ṭawk.


Min en vung vung a, chutah, thinrim lutuka sehchilh zâwi chiang fek fawkin, "Ka bêng dawn che mawni le?", ka inlukhuh.


Ka dâra vuana min thing sawkin, "Zaninah i haw tur a ni. Thingpui inpek paha inmelh nô maw? Naupang chhe rilru pu hlek suh", min thing leh sawk.


Min en vung vung, "Ka runluih ve a nih kha, i chunga an awmdan a ṭha bik lo",


"Min chhan lo turin ka hrilh tawh che kha, luhlul chhuah lo la, kal vat zawk ang",


"Ka duh lo", ka kut ka la sawn.


"Luhlul chhuah hun a ni lo", ka kut ka âwma tawm tlatin, ka nghawngah min kuahin min kalpui tho.


Ka tal chhuak zo tawh lo, "Kross-a, ding lawk teh, hrilh tur che ka nei", min ngaithla tawh pawhin a lang lo.


"Kross-a, ding lawk teh, ka tlu dawn", a kâwngah ka pawm. Ka kut pahnih an inhmu thei lo.


Ngati nge pum raw(rua) lian deuh a neih?


"Kross-a, ka haw ang. Mahse, min thlah phawt rawh, ka tlu thei takngial dawn".


Min thlah rual rualin min pawm a, ka heh hnuai a pet zawm mawp mawp. Dimna tel map loa pet a nih avangin a na lutuk.


Min seh zawk emawni?


Leiah min nghat thlain ka bek tawn tawna dawmin ka en chho vah.


Chiang takin a mit hmu thei lo mah ila, danglam a awm a ni!


Ka heh pet lehin, "Bawihi, bawihi, i haw dawn maw?", a âw a khûr deuh titih.


"Haw turin min duh kha-", ka heh a pet leh hmak.


Min en vung vungin, Kross-a chuan, "Bawihi, ka tan Thlêmtu ni lul suh. Ice cream vangin ka hria che a, zan min mut ṭhattir theilo tu leh, ka nunin awmzia nei ve taa min ngaihtirtu i ni.


Hmuh leh che ka duh em avangin a tukah, kan inhmuhnaah ka lo kal a. I lo lang thei bawk si lo. Haw a ngai tawh si.


Nang hruai tur chea min tiha mak ka tihzia i hrethiam pha lo ang. Vawikhat chauh hmu che mah ila, kha zan thim takah pawh khan ka hre nghal chat che.


Hriatchhuah loh lai che ka nei ngai lo. I lo thlen zana thawn let leh che ka duhzia kha i hrethiam pha lo ang.


Kei chu engtin pawhin min tiin awm mah ila pawi ka ti lo, ka tuar thei vek. Ka tawrh ngai lo pawh a ni lo a.


Min vuaka min hauh ten min tina pha tawh lo.


Mahse, Bawihi, i hria em?


Hrehawm ka tih ber chu, nangin i tuar ve zel hi a ni (keimah avang zawkin a tuar zel si a, a mawl reuh e).


Min hmuhsitna i hmaa chiang taka langa i hre zel hi, tlawm thlak ka ti a. Ka hnaih ngam ngai loh chhan che a ni.


A bikin, tuna min en ang hian, khawngaih hmel taka min en hian min tina bik. Hei hi ka tuar thei lo. Hrehawm ka ti ber.


Bawihi, ka khawngaihthlak viau em ni?".


A tir chuan ka khawngaih, tun thleng pawh hian. Khawngaihthlak tak a ni, ka inkhawngaihna aia nasain ka khawngaih!


"Bawihi, hetiang hian engtik thleng nge min en dawn?", âw khûr titihin a ti leh a.


A kâwngah pawmin, "I duh ang taka en tur chein min siam ta che".


Kan lei pahnih chu an inbuan let tawp tawp.


A thinlung phawrh chhuaka min hlanna chu lawm taka pawmin, ka thinlung pawh lawm takin a dawng a.


Hlimna leh lunngaihna inhruipawh tawnnaah a lai takah Beiseina a ding a.


Beiseina chu hlimnain a chakpui dawn nge lungngaihnain a chakpui dawn?


Muangchangin kan inthlah a, thlahlel takin ka thlîr chho vawng vawng, "Ka lawm e", lungawi takin a ti sup a.



A tira inkalpui dawr dawr ngai kha, inngai taka inkuah tawn chungin kan kal tawh.


"In lo thleng tawh maw? In pahnihin em ni?",


"Ni lo e, amah chauh hi", chupa chuan mak ti deuhin, "Ti ta nge?", a ti hluai.


Kross-an, "Buaina a awm lo ang", ti mah se, keiin buaina a awm dawn tih ka hre ropui.


"A hnunga i chuan a ngai dawn, damlo phur tur an ni si a, ṭhutna tur ṭha deuhin ka siam tawh a, nuam takin i thleng thei ang".


Pick-up hnunga ṭhutna a lo siam fel diam min hmuh a, hlan chho min tum chu, "Min lo zui rawh, kan pahnihin kal ang",


"Ka thei lo",


"Engvangin? I tel loin eng mah an ni lo, chu chu hre loin an nawm an mâkin an awmtir che a. Ui ai pawhin an hmusit che. Kross-a, min lo zui rawh, helai aiin i nuam zawk ang".


Min ngaithla pawhin a lang lo, "Kross-a, maw? Khawngaihin?".


Ka kut pahnih hmer khawmin, "Bawihi, hei hi kan bul ṭanna leh kan tawpna tur a ni",


"A ni lo, chutiang a ni thei lo. Ka kal a nih pawhin kan inhmu leh ang tiraw? Kan thinglung hi khawhar takin kan awm rei tir lo ang tiraw?", a lu a thing nar nar.


Ka mittui luang hru hul thuak thuakin, "Bawihi, Naupang chhe rilru pu tawh loin puitling takin awm rawh. Tu mah inhnuaichhiah tir loin tu mah hnuaichhiah hek suh.


Inhnuaichhiah hrehawmzia i hriat tawh hi.


Khawpui i thlen rual rualin kei leh, hrehawm taka i awmna hmun hi i thinlung aṭangin paih bo hmak ang che",


"I thinlung aṭangin min paih bo dawn tihna em ni?",


"Ni lo e, ka thinlung aṭangin ka paih bo ngai lo ang che. Eng tikah mah, ka thinlungah nang tih lo tu mah an awm tawh lo ang",


"Chuti si, ka thinlung aṭanga paih bo tur chea min tih bik? Hei hi, kan tawpna ni lul suh se, min tiam rawh", a mit ka enin ka beidawng.


Kan lei inbuan lehin, min thlah chuan, "Min thlah suh, khawngaihin", min pawm bet sauh.


Min thlah leh chuan, "Min thlah suh, Kross-a, khawngaihin",


"Kal a hun", pawisa min pe a.


"A tawpna a ni dawn lo tiraw? Kross-a".


Min dawm chho a, a kut ka vuan tlat, "Kross-a, min lo zui rawh. Kan pahnihin kal ang, khawngaihtakin", ka âwmah a kut chu ka pawm bet tlat a.


Motor a nung vut vut tawh, "Bawihi", a lukhum phelhin min khumtir a, "I hriatna leh i thinlung aṭangin he hmun leh kei hi min paih bo hmak ang che, hemi nen hian", lo lawn chhoin ka heh a pet a.


"Kross-a, khawngaihtakin min lo zui rawh",


"Bawihi, i mittui tla hi ka tan a ni tiraw?", uar fein ka bu nghauh nghauh.


"Ka piang ve a ni tih min hriattir mai piahah, ka tan i mittui a tla a. Phu lo ka intiin, ka lawm lutuk. I thinlung min hlan phal avangin ka lawm bawk, ka lo vawng reng ang", motor sir a bêng vak vak a.


"Kross-a, min lo zui rawh, khawngaihtakin",


"Bawihi, mangṭha. Nuam takin hun hmang la, ka tan i mittui lo titla tawh suh aw".


A kut ka vuan thei tawh lo.


Lungngaihnain Beiseina a chak pui ta!


Bul kan ṭan chauha a tawpna pawh a ni maw? Nakin zela hlim taka awm nan Beiseinain kan kal chho dawn emaw ti a!


Inthlahlel tak chunga inṭhen a ngai leh si. Awm dun leh hun tur hriat theih bawk si loh, lungngai tak chunga mahni chauha hmalam pêna Beiseinain intawn leh hun tur nghah a ni tawh mai.


Beiseinain nghak pawh ni ila, kei lo a thinlung luahtu tur lo tawng ta sela, intawn ni awm thei dawn si lo, a thinlung aṭanga min paih boin lo luah tir ta se.



Lungngaihnain Beiseinain a chak pui. A chak pui thei lo, a chak pui dawn reng reng lo.


Min lo zui mai sela a har loh tehlul nen.


Nuam taka hun hmang turin min ti a, engtin nge maw hmang thei tura min ngaih reng reng le?


A bul ṭanna leh a tawpna zan khatah maw? Chutiang a ni thei lo.


A hnungah kei mah chauhin ka ṭhu a, ṭha ka ti zawk. Hnung lam ka hawi deuh reng mai.


Kross-an min lo umzui turah ka ngai tlat pek. Min lo umzui tak tak se nia ka duh.


Ka ruak huai a, ka tha a tho loin ka chau ngawih ngawih. Ka ngai a, kuah leh vawng vawng kha ka châk.


A thinlung aṭangin min paih bo ang em?


Ka thinlung aṭanga paih bo hmak turin min ti a, chuti chungin sulhnu min hnutchhiat nasa si.


A lukhum min khum tir te, min kuah leh ka heh a pet te, ka hawna tura pawisa min thawhchhuahsak te.


Bal ling, tui theh kang, Sangha rawh min ei tir te. Rama kan inzui nitin te.


Khang zawng zawng kha engtin nge paih bo tura min tih theih. Bul min ṭanpuiin thutawp a siam leh nghal a.


Engtin nge a theih zawk?


Kross-a, min paih bo thei a ni mahna, kei chuan ka paih bo thei lo ang che. Ka thinlungah ka vawng reng ang che.



Nutêi bulah kal hmasa phawtin, min hmu chu, "Awi ka nu! Bawihi", min kuah chung chung a.


"I va han cher em em. I thu si, ngawi teh, i thu pawh ni lo, a dumin i dum. Lo kal teh", min kuah leh a, "Chaw ei tur kan nei, Arsa kan(kang) a awm. I rilṭam chuan ei rawh aw. Bawihi, i lo haw chu ka va han lawm tak, biak theihna tur che ka nei si lo, ka mang a ang ṭhin teh asin".


Nutêi a ṭawng zung zung a, a khât tawkin min kuah chhen.


"Bawihi, nuam takin i awm lo tih ka hria a nia. Min han hrilh vek teh",


"Nutê, eng tin mah min ti lo. Kei aia tuar zeltu a awm a. Kei ai pawhin a khawngaihthlak. A ei rawngbawl sa ei tuam tuam siin pawnah chaw an ei tir ṭhin. Ui ai pawhin a ngainep, hna an thawh tir ṭeuh a, duat takin an enkawl bawk si lo. An mood fuh loh ṭumin a chungah ṭuanin an hau hrep a, kut hial an thlak ṭhin",


"Chu chu tu nge ni? Chutianga an tih, an va han rapthlak ve. Mihring an ni ve lo em ni?".


Mitthlaah Kross-a chunga an khawsak dan a lang malh malh.


"An tupa, an thisen kai ngei mawle", nutêi a kâ ho.


A vei thuak thuak a, "Tupa dik tak maw?", ka bu zeuh.


"An va han rapthlak ngai ve le. Thlarau nei lo ang maia chutianga an awm vei. An tupa chu ka va khawngaih em. Kum engzah nge a nih?",


"Kei aiin a upa, a kum zat ka zawt lo a", ka ti chu, "Chu leh nghal, ngati nge a tlanbo daih loh. Hrehawm a va ti dawn tak. Ka khawngaih mang e. Lo hruai ve tur che alawm", min hau titih.


Nuih sakin, "Nutê, College ka kal dawn. Phone pawh ka pa ka lei tir ang. Khawiah mah ka kal tawh dawn lo", ka bulah lo ṭhu thlain, "A ṭha lutuk. Dik tak chuan, Bawihi, in in saw chu lo dah ṭha ta ila, i nau leh pa te i kutah an awm. Mambawihi leh a nu sawn ṭha taka an enkawl ka ring bo lo. Chak leh huai takin awm rawh, a neitu takin awm rawh".


Kross-a pawhin chutiang chiah chuan min hrilh alawm. Min hrilh ang ngeiin ka awm bawk ang.


A dawh zawkah ṭang reng mah se, keiin phuba ka laksak thei.


Ka nuin Kross-a a hria, ani pawhin Kross-a, nuamsa takin a awm tirin ka ring hauh lo.


Putêa aṭang rengin, a nasa ber a ni hial ang.


Kross-a nuamsa taka awm tir lo tu apiang chu, kei pawhin nuamsa takin ka awmtir bik lo ang.


Jerome-a chauhin phur takin min hmuak.


Ka pain, "I putêa te pawisa i ru a, chuta karah ngaihdam pawh dil loin i lo haw ru zui. I zak lo em ni?", ka ngawi reng.


An thu lo sawi kual dan chuan ka nuih a tiza mang e. Ka pawisa zawk an ru a nih kha maw.


Kross-a, min lo zui mai la a ṭha tur. Ka nutêi bulah i awm thei reng asin le.


Khawngaihin eng tin mah lo awm suh aw.


"Min chhâng rawh, pawisa ru turin ka enkawl che em ni?",


"Pa, hawna tur ka nei hleinem. Lo biak che ka tum apiangin biak hleih theih lohin i awm a. I fanu hmun dangah ka awm a, ka dam leh dam loh te min zawt turin vawikhat tê mah min lo call lo",


"Dawt dawt sawi suh, i nu nen in inbe ziah. I nu nen in inbiak chuan keiin ka lo biak che nen a inang reng", a nih vel chu a.


Ka nu nen kan inbe ziah maw, a va han nuihzatthlak lo tak.


Ka pa chu tim eih loa enin, "Pa, fahrah nun dik tak ka zirin ka tawng asin. Mahse, i hria em, mi tuar chhelah min siamin, chak leh huai taka awm turin min siam zawk a ni", ka ding a.


"Pa, College kal ka duh. Naktukah admission lakna tur zawngin ka chhuak dawn", ka nu hmela hlauhthawnna ka hmu zuai.


Pawisa an lo duh vek a nih hi, min duatna leh ngaihsak ṭhinna te kha a der mai a ni.


A va han lo peih mai mai tak.


Pindanah ka inkalh khum a, chau lutukin ka mu pharh duai.


Kross-a an hauh dan tur leh, kut an thlak dan tur te ka ngaihruat thiam vek. An pawisa rua haw angah min sawi a.


A ruka Kross-a a inhlawhna aṭanga haw ka ni reng si a. Ka pawisa rutu zawkin an pawisa ru anga min sawi vel chu.


Zahna hi khawiah nge a awm tak ni?


"Kross-a, lo tuar fan fan rawh aw. Keiman ka lo hruai ang che. Min lo nghak rawh, rim takin ka thawk anga, ka lo hruai ang che".



Nutêin an inah min koin ka va kal a, "Bawihi, ka phone hi hmang rawh, Sim i lei dawn nia. I patêa phone ka hman ṭawm thei tho a, harsa lo ila chuan i patêa nen phone leisak che kan duh tehlul nen. Ka Sim phawiin i patêa phone-ah kan dah a",


"Nutê, a ngai lo. Ka pain min leisak dawn alawm",


"I chiang maw?", ka chian thuin ka chhâng thuai.v


A pindanah min hruaiin, "Hei hi inhnawih ṭhin ang che".


Facewash leh compact tih te, Sunblock tih ang reng te, a thar vek ni zui.


"Nutê, a tam em em e. A thar vek ni zui",


"A ho lutuk, phone man aiin a tlawm zawk a", hui papin a nui sêih a.


Lawmthu hrilhin ka kuang chung chung.


"Thil pakhat", almirah chhung aṭangin bag a rawn phawrh, "Hei hi chu ka leina a rei tawh lutuk. I zin dawn avangin ka pe lo che a nih kha, College i kalna tur atana i patêa nena kan lei a nih hi", a ti siam siam a.


Lawmthu ka hrilh mawlh mawlh.


Ka pain phone leina tur leh Admission fee tur min pe a.


"Mambawihi pawhin Project ami tur pawisa a mamawh thu min hrilh tak asin", ka nuin a lo ti vat.


Ka pain pawisa min pek a hmu thei thlawt lo.


"Mambawihi chuan dil ve mai rawh se. Ka lawm e,,Pa, chhuak turin ka han insiam ang e", ka pa ka kuah a.


Tun hma zawnga ka hmuh ngai loh, ka nu mitmengah min huatna nasa tak ka hmu ta!


Tun hma zawng khan lem a lo chang kual mai mai a ni.


Dar sawm a rik hnaih tawh avangin insiam zung zungin, ka nutêi min leisak bag chhungah pawisa khungin Pindan aṭangin ka chhuak a.


Phone leh Sim thar te leiin, College-ah kal kualin, a tawpah, Admission lakna tur ka hmu hlauh.


Form la chhuakin, thil ṭul ang te hre loa chhuak ka ni si a. A tuka thehlut turin ka chhuak leh a.


College nuam tak a ni ngei ang.


Pawl sawmpahnih kha ka pass chhe lutuk a, College tal hi chu ṭha tâwka pass ka tum dawn.


Inah haw leh phawtin photocopy ngai tur zawng zawng nen ka chhuak leh. Passport pawh siam tir a ngai.


Buai hle mah ila, Kross-a theihnghilh theih a ni lo.


A nitin hun hman dan ka hre kur si a, ngaihngam taka awm ka thei tawh lo. Ka awm loh hnu aṭangin an suakbak dawn tih lah hai theih a ni lo.


Kross-a, mikhual ni turin in khuaah ka lo kal a. Mikhual ka nihna hmunah ka thinlung ka hlan fel der che chu a ni si a.


Ka thinlung kha lo enkawl ṭha rawh, kei chuan i thinlung hi duat takin ka enkawl ṭhin aw.


A nat ka phal lo.


Intawn hun a awm dawn tih ka hria, bul kan ṭan chauha a tawpna kan la hnaih lo.


A tawpna kan la hnaih lo, engtikah mah a tawpna kan hnaih ngai lo ang. Nitin bul kan ṭan zel ang.


Kross-a lukhum lain pindan aṭangin ka chhuak a, Mambawihi leh a ṭhiante an lo ri luih luih.


Pakhatin min lo hmuh chuan, "Khawiah nge i kal dawn?", min lo ti a. Ka kalna tur ka sawi chuan pakhatin, "Awmpuiin College an kal ngai em ni? Mambawih, in va han fel em em", mi elsen takin a ti kher a.


Ngawih mai mai ka tum tawh lo, nui ver verin, "Mambawihi nen hi chuan inngam tlakah kan infiam dan te hi a bawn thei lutuk. Dik takin, Mambawihi hi awmpui dik tak zawk a ni. Ka pain a nu hi nei lo se chu, kan awmpui a ni miah lo ang. Hun hman nuam ule".


Mambawihin zawhna a dawng tam dawn lutuk.


A zak khawp ang le.


Admission tifelin, kar khat chuang lai College-ah ka ṭhu ve ta ziah a. Rin ai takin hahthlak ka ti.


Fashion pho chhuahna hmun a ni hawt alawm. Nitin thawmhnaw thar hlir, Korean top tih ang reng te.


Mahsela, ka thawmhnaw neihchhun hi ka zahpui lo.


College ka kal chhan chu Zirna vang a ni a, B.A passna lehkha ka duh ber a ni. Fashion pho chhuak tura kal ka ni lo tlat.


Kross-a lukhum khum chungin College banah bazarah ka kawi a.


Kan inhmuh hmasak berna leh, ice cream min leisaknaah pahnih ka lei.


A zuartupain min la hria, "Hmana mi kha i ni tiraw?",


"Ni e",


"I bialpa a ni lo tak tak maw?", min ti leh. Tun ṭum erawh, "Ni tak tak e, ka fiam che a nih kha", ka ti a.


Khi ṭhawin, "Ka ring reng a ni", ka nui sak.


"A nih, in inhau nimaw? Niminah a lo kal a, vawiinah nang", ka nui lai ka tawp chawt.


"Ka pu, eng maw i sawi? Niminah a lo kal i ti em ni?",


"Aw, niminah a lo kal. I hre lo em ni?".


Show post links
Top