Thinlungmawlpa BY Cck Lalchhuanawmi (Completed)

[Ngaia]

Thinlungmawlpa
Chapter-16
Ziaktu: Cck Lalchhuanawmi

Mak tak maiin Mambawihi a inrawlh lo a, ka nu chauh a ni tawh.


Ka nuin Kros-a a huat tlat chhan hi ka hrethiam lo.


Mambawihi pawhin a pawm vek tho a, engmah sawi nawi a nei lo. Ka pa thinlung lah a nêm ṭan a. Ka nu hi ka hrethiam lo.



Inkhawm bân rual rualin nutêi te inah ka kal a. Dim thei ang berin ka lut.


Pindan kawngka ka hawng thut, a phu nasa lutuk chu khum aṭangin a let thla lo chauh.


Ka nuih rah rah a, "Kik ta che mawle aw", a âw a tisâng hlek a. A thinrim lo tih hre tho mah ila, tihtauh khum ka châk ve tlat.


Kawngka vawn chhan chelha la ding rengin, "Ṭha takin sawi ve mai la, khatia invin kher", ka tûm khum a.


Ani erawh, min thlêm tum angin a lang lo. A lehkhabu chhiar pawmin, khum kotlang nghengin a ṭhu âwn a. Ka bag-a va vawm ka duh a nia.


Lut tur pawhin min sâwm lo, "Vin a? Ka vin loh che kha, i hriatah ṭawngka vin ka hmang tawh em ni?", zaidam takin a ti a.


"Bawihi, i buaina a ho thei em mai", lehkhabu a bih zui daih.b


Kawngka khar ṭhuaiin ṭhutthlengah ka ṭhu tûm nghat. Min ngaihsak lohna chuan min tilunghnurin, ka thisen a tisâng.


Lan pawh a lo lang lo. Phone a ri a, "Bawihi, kan inah i awm tawh em?",


"Awm tawh e, eng nge ni ta?",


"Kan lêng dawn a, tlaiah chauh kan lo haw ang", Nutêin min lo ti a.


Nidang ang chu nise, ka lawm dawn lutuk. Tunah pawh ka lawm tho. Ka titau chu a ni ve si a, min thlêm a tum lo nge, a nachang a hre lo ve hrim hrim.


A hre lo pawh a ni ang. Kei lah hi, tihtauh kher.


Mahse, ka titau tih hria sela,,min thlêm reng reng chhin rawh se.


Tv ka on a, pindan kawngka a inhawng ta. Ka thin a inthum nawn rang mai mai asin.


"Bawihi", ka bulah a lo ṭhu thla a. Ka chhâng duh lo a, ka en duh ṭhak lo.


Ka kut lo vawn a tum chu ka la sawn a, "Bawihi", thaw chhuak hawkin a han ti a. Chutah, "Bawihi, i awmdan hi titau an tih ang chi a ni em? Thlêm lungawi ngai ang chi kha? Masangi nen min hmuh dun ṭuma i awmdan nen khan a inang".


Nuih ka duh si, ka nui duh bawk si lo.


A buaithlak thei e. "A ni em?", ka en a. A hmel zawng zawng nen a nuihzatthlak. A zawhna a ho ang bawkin, a mitmeng pawh a mawl.



Ka nêm mai mai lo ang mawle.


"Ka hre bik lo, i len tawh tawh nen, ngati nge i hriat loh? Nichin khan min vin vak a, ka fiam che a nih kha. Nge ni a, kei lo midang ngaihtuah i nei zawk? Lehkhabu chhiar ang deuhin i awm a, hmeichhe dang i ngaihtuah chiang a ni", ka ding hluai a, "I ngaihtuah chiang lutuk", ka ti hmiah.


A khabe dawmin, "Chuan, engtin zel?", ngai ho zetin a ti chhum hmuk. Ka va ngei mai mai tak.


"Lehkhabu i chhiar pawh a ni lo, hmeichhe âwm bawr nalh tak tak i ngaihtuah a ni", ka ti chu, "Hmeichhe âwm bawr nalh te chu ngaihtuah loh a har e", ṭhutthlenga lukham la lawkin ka vawm.


"Min iai ṭan tawh a nih chu, ka nalh ve si lo a. Ka tling lo a ni e", ka kut ka sik niap niap a.


Ka thinlung a nghing lawih. Hmeichhe âwm bawr nalh tak ni ve ila ṭha tur!


"I tling lo pawh ka tih loh kha, thil hi ngaikawi ziah suh. Lo ṭhu rawh, tv en ang", ṭhut ka tum lo nasa lutuk.


"Ngaihkawi theih turin sawi hek che, tv-ah khan en rawh. Hmeichhe âwm bawr nalh tak tak an tam mai", ka kalsawn a.


Nanaua pindana ka lut tur chu hnung lam aṭangin min lo pawm kâng nalh.


"Min chhuk tir teh", ṭhutthlengah min nghat chawrh.


Ka mal chungah a ke lo hlangin, a lamah min pawt hnai a, "Kar khatah tun ang hun chauh zel hi inhmuhna hun kan nei a, inlungawi lohsan atan a uiawm",


"Nichina i thusawiin zir tlat hek", a kiai sak a, "Bawihi, mahni inrintawkna nei rawh. Âwm bawr nalh chauh duh ila chu maw, nang aia nalh an tam lutuk, ka duh duh ka thing thei", ka âng phuau.



Ka thinrim lutuk, chutianga han tih kher. Inringtawk turin min ti ta lehnghal a.


Min inrintawk tir lo zo vek alawm.


Kei aia nalh an tam thu leh, a duh duh a neih theih thu a la sawi leh ta nghal.


"Aw, a tawk a nih chu. I duh duh i thing thei a nih chuan, kei aia nalh sing chuang pawh va nei rawh. Tunah kal nghal rawh", ka chum tai tai a.


Inlungawi lohsan atan hun a uiawm a ti a. Thu ṭha leh hlimawm sawi duh bawk si lo.


Ka thinrimna tur ngawt a sawi.


Ka mal chunga a ke hlan(hlang) dah thlain tho tum awm takin, a mawng a kan deuh a, "Chiah maw? Chutia i phal tho a nih chuan nalh ka tih ber ka va nei nghal a ni mai", a tho a.


Mak ti deuhin ka en. Kal a tum chu ka phal leh bawk si lo.


"Phalna min pe bawk a, ka va kal ang e", a sawi zawh rualin, min kal pel dawnah ding phatin a kut ka vuan.


"Kross-a, kal i tum tak tak em ni?",


"Tum e, kal rawh min tih kha", lawm hmel takin a la ti zui.


Ka thinrim chu sawi ber tur ka hre tawh lo, "Kal vang vang rawh". Pindanah ka lut daih.


Kawngka inhawng thawm ka hria a, a kal tak tak reuh mawni?


Hahthlak e, a tilui nge a ti tak tak zawk le?


Thin a va rim tak, ka va umzui dawn nge dawn lo?


Ka umzui a nih chuan min ngainepin, "Ka tel loin a awm thei lo a nih hi", ti rilru puin, min bum ang tih ka hlau.


Ka umzui lo a nih erawhin kan inkar a tawp ka hlau si.


Hahthlak!


Au vak vak ila ka zia deuh ang.



Tukverhah dak chhuakin ka hriat tawk lekin ka au a. A rei tual tuala ka nuih a za tawh.



Lawm lohin ka nui chiam chiam. Min nuih tir tu ber pawh ka hre chuang lo.


Ka chet dan ṭhing lutuj chuan ka nuih a tiza ni maiin ka hria.


"Ka tel loin i hlim hle mai", kawngka rinchhan chungin inkuangkuahin a lo ding kawisawi a.


"Huh, nang alawm hlim le. I duh ang zâwng i nei tawh a, i hlim tawh zawk ngawt ang", ka nuih a za tawh lo.


"Kan inkar tihtawp i duh tihna em ni?",


"Duh lo", ka ṭawng rang lutuk chu ka zak hnuhnawh.


Inkar tihtawp ka rilrem a ni lo. Chutiang ka duh lo, ka duh mawlh lo.


Kross-a lah, a thutak hmel sawt. A hma zawng aiin. Pawnah chhuakin a va hmu tak tak reuh mawni le?


Nge ni a, nutêin min ṭhen turin a hrilh leh anga, chu chu a bawhzui mai nge?



Kross-a lamah inherin, "Kross-a, nang hian i duh zawk tihna em ni?", ka taksa pumin ka khûr.


Ngaihawm tawk chauhin min melh a, min lo panin, "Kan inkar hi sawifel a hun, chumi hmain", a bag chhung a zen a.


Rawmawla tuam a lo la chhuak, "Bawihi, i kut min lo pe. Min hriat rengna tur ka pe dawn che",


"Kross-a, kan inkar tihtawp chu i duh tak tak em ni? Nutêi leh ka pa ten eng thu nge an hrilh che? Ka nu nen in inhmu em ni? Mambawihi ten eng nge an sawi?", ka kut pahnih hnung lamah ka dah tlat.


Ka kut manin hmalamah a dah a, "Bawihi, kei tehlul i thinlung min hlan phal hi ka lawm a ni. Harsatna ka thlen chein, kutthlak hial i tuar a, theih nise chu; i tana inchhuanna tham nih ka duh asin. Hna zahpuiawm loh tak thawkin", a kiai sak a.


Hlauhnain min man a, kan inkar tihtawp a duh tak tak a ni ang.


Thinrimna ka nei tawh lo reng reng, chu ai chuan kan inkar a tawp tak tak ang tih ka hlau lutuk.


Ka kut lain rawmawl chu a nghat a, eng tak chu awm maw?


"Bawihi", thaw dêpin dêpin ka en, "Hlawh ka la a", a ti mai chu, lukham la leh lawkin ka vaw vak vak.


A indang ve nasa lutuk, a tlanchhia a, mittui tla phungin ka um.


Min la nuih chiam chiam, nuihzatthlak a awm lo lutuk.


A hma zawng aiin ka thinrim.



"Bawihi, tawp tur chuan kan kal thui tawh lutuk ka tih kha",



"Khatianga sawi kual duah a ngai em ni?", lukhamin ka vawm.


"Duhtawk la, hlawh ka lak hmasak ber i kuta hlan ka duh alawm",


"Thu lawilo pui pui sawi hmasa loin sawi tlang tawp ta che", ka pheikhawkin ka vawm tawh.


Inlukhuh chungin min lo pan a, ka pheikhawk khing lehlamin ka tin ran. Ka heh hnuai ka pet tan tan a.


Khatiang sawi kual duah loin, ṭha takin sawi ve mai sela.



"I thinrim hmel", a tih chuan, "Rim, ka thinrim chatuan dawn".


Lungawi mai mai ka tum lo, khatiang thu zozai han sawi kher.


Hlawh an lak min hrilh duh a nih chuan, ṭha taka min hrilh awm. A ṭul lo lulai em mai, a thiltih ho kha.


"Bawihi, ka hlawh lak chu min pawm sak la", rawmawl bawk chu ka hmaah a lek kang a.


A suihna phelhin ka kutah ka dah a, "I thawkrim a, i phu lutuk",


"Ka lawm e",


"Pheikhawk min lei thei, ka vawmnaah che a chhe vek", ka ti chu, ka kuta a dah a hlawh lak chu rawmawl chawpa lain, "Teuh lo nasa mai, pheikhawk i ngah lutuk. Chapal tlawng bun i ngaih hunah zawk le".



Pindan aṭanga a chhuak chu ka um a, "Min lei rawh, a nih loh chuan thingpui ka lum lo ang", a nui hak.


"Lum tawp suh, a siam pawh i thiam lo. Nula pui ve si, tui taka thingpui siam pawh thiam lo mai", ka chalah min nam dak awrh.


Ngei zetin ka melh a, "I intithei rei miah lo ang aw. Nang aiin ka la thiam dawn", ka ti ve sak.


"Lo en ila",


"Naktuk aṭang chuan i lam nawn sek mai ang", ka ti hmiah a. "A lawmawm lutuk", min awihlo zetin a nui a.


Lo ngai reng rawh se, a aiin ka la thiam dawn khawp.


Pindanah lutin a hlawh lak chu felfai takin a bag-ah ka khung sak a. Lawm takin min hrilhin min dawntir thlap chu a ni si a!


In luah man pek a ngaih bakah, ṭhutthleng lei te kha a sawi a.


A indaih thei em em ang.



Pheikhawk min lei turin, vawikhat tal chu ka ti leh dawn.


Show post links
Top

[Ngaia]

Thinlungmawlpa
Chapter-17
Ziaktu: Cck Lalchhuanawmi


Pheikhawk min lei turin, vawikhat tal chu ka ti leh dawn.


Thawhṭanni aṭanga Zirtawpni chu College ka kal a, Inrinniah Panhnah silin ka nileng deuh thaw ṭhin bawk a.


Chutiang chiah chuan Kross-a pawhin hna a thawk a. Phone a neih loh avangin phone kaltlanga inbiak a theih loh.


Chawlhni apiangin nutêi te inah kan inhmu ta ṭhin a. English ka zirtir ṭhin.


A,B,C zirtir kha a ni mai a. Ziah leh chhiar nen. Keipawhin mak ka tih deuh chu, thil a man chakin, a thiam chak lutuk hi a ni!


Lehkhabu chhiar a ngaina bawk a, Mizo ṭawng a ziaha a chhiar thiam tawh avangin a chhiar nasa a.


English erawh, a awmzia hriat te a ngai a, English-a inziak a chhiar lo tluk a ni.


Kei aiin lehkhabu chhiar a ngaina a, ka lawm tawk em em.


Thil dang zawng aiin, 'Pathian Lehkhabu Thianghlim' a chhiar hun ka nghakhlel. Thar diaiin a thawmhnaw dahna mawng berah a la awm a. Dawhthei takin a lo nghak reng.


"Bawihi, Kross-a chungchangah hriat loh ka la nei em?", ka pa chu min hnungchhawn zawngin a ṭhu a.


A hnungah kut sik niap niapin ka ding. Hnunglam aṭang chauhin hmu mah ila,,a lungawilo tih a hriat.


Tv hmaa ṭhu ve dang, ka nu leh Jerome-a ten min lo en zuk zuk a.


Jerome-a phei chuan, "Lehkha ka'n zir tawh teh ang", tia a tho, min kalpel dawnin ka beng bulah, "A u, hrilh mai rawh", min ti nghe nghe.


Kross-a chungchanga ka la hrilh loh maw ni ang?


Ka nuin eng tak chu sawi leh ang maw aw?


Pangngai thei ang berin, "Pa, hrilh loh che engmah ka nei lo. Ka hrilh tawh ang che kha ni mai. Chhun lamah Hotel-ah thlêng silin a thawk a, zanah, ek paih motor zuiin a inhlawh leh ṭhin. Chu chu a ni mai", thaw hapin, a ṭhutna bul chiah ṭhutthlengah ka ṭhu a.


Boruak rit chu a awm reng reng, zanin erawh, a rit zual leh tlat.


A pindan aṭangin Mambawihi a lo chhuak a, "Pa, nu, ka ṭhiannu birthday lawmnaah ka kal dawn, ka lo haw har ang", kan thu ngaichang hman loin a chhuak daih.


Uchuak takin a inchei lo na chu, a infeng chhingin leather boots dum a bun a. Tawnzau var a hak chungah jeans jacket a ha a, a zip phui si lo.



A heh a senin, a mit a hnawih dum si. Ka nau a nihna angin ka ngaihtuah kher mai.



Sual ve viau mah se, ka unaunu a ni tlat a ni. A u ka nihna a bo lo a, ka nau a nihna a bo chuang lo.


Ka nu erawh chuan a enliam maiin ka hria.



Mambawihi chu ka ngaihtuah lutuk, thil ṭha lo a chungah thleng lo hrâm sela aw!


Ka pa chu ṭawng lehin, "Chutiang a hnathawh ni lo, a chhungte chanchin. A nu leh pa boral angin a sawi a. Chumi letling thawkin ka hre leh si a, ruihhlo a tih ṭhin leh, kutkem a neih ṭhin thu te ka hria a. Chu ka thu hriat chu a dik reng em?", min melh kalh mai.



Ka pa chu ka hlau, ka zep lo. Zep tur pawh a awm chuang lo.


Pate chu kan hlau ṭheuh ang. Tun dinhmunah leh ngat phei chuan.


Ka nu hi a nu unaunu tih hrilh loin, mi hrang ang hmakin Kross-a ka sawi tawh si a.


Hetia min zawh thut takah hian, hriat ruk a nei leh nge mawni?



Ka nu hian a hrilh anga, a ni em em ang. A hrilh chiang lutuk. A hma zawng aiin buaina a nasa chho leh dawn a nih hi.


"Pa, a chhungte chamchin chu a sawi ang kha a ni mai. Amah chauh a ni a, belh tur pawh a nei lo", ka pa chu a bu nghat ringawt a.


Dâwt ka sawi a, hrehawm ka ti ve tho.


Nimahsela, a ṭul tlat a ni. Chu lo rengah, ka nu te hian an fapa ang pawhin an ngaiin an enkawl chuang lo a.


Amah chauh a ni tlat si a, belh tur tumah reng a nei lo.


Ka pa chuan, "A hman hunah lo lêng turin hrilh rawh aw. Pawna in inhmuh fo ai chuan inah inhmuin inkawm ula ka duh. Pawnah chuan in awmdan kan hmu thei tawh si lo", ngainatawm takin a ti a.


"Lutuk, inhmuhna hun pawh kan nei thei meuh lo. Inhlawhin a buai nileng ṭhin a, kei College kalin ka buai nileng a ni deuh ber bawk a", nui sen senin ka tlak duah a.


"A ṭhat nasat hlei hlei chu", nui tat tatin ka pain a ti a.


Ka ngampa sawt. "Thingpui hang lum rawh le", ka pain a ti zat a. Tho phatin, "Hang tui tâwkin aw niang", ka ti var a.


Ka pa pawh bu nghatin a nui tat tat.


Kross-a ka hrilh châk tawh lutuk, zanin la laa hrilh ka duh tehreng nen, inbiak theih a ni si lo.


Nem tial tialin, lêng turin a sâwm hial a ni a. Ka pa hi a inthlak chiang a ni.


"Pa, hei le", kan hmaah dawhkanah ka dah a. Ka ngampat tawh em avangin a bulah ka ṭhu nghe nghe.v


Ka nuin, "Naupangchhia pawh i nih tWh loh kha, mahni pa te bula ṭhut tlum hmuk te chu a", nui rah rahin a lo ti a.


Min ngai thei lo ve chu a ni.



Duhtawkin Mambawihi, ka pa bulah a ṭhu a, intinô lutukin a ṭawng zuah zuah a. "Naupangchhia", tiin a sawi ngai chuang lo.



Ka pa chu hnaih sawtin a bânah ka kuah a, "A ngaihawm em alawm, kan inhmu khât thei si", ka ti ve ngat.



A mitmeng aṭangin min ngai thei lo, ka pa bulah sawi a nei chiang a ni.


Ka pain Kross-a chungchang min zawh chhan tur a awm lo. Hmannia min bên te kha, khami ṭuma a thusawi kha, ka nuin a hrilh tih ka chiang lutuk.


Ka pa, nunnem leh zaidam tak thinlung pawh, a tihkhawloh sak vek dawn.


Engtikah tak, ka pa hi harh ang maw?


"Thingpui i in zo tawh bawk a, lehkha ka va zir tawh ange", thingpui no lain, ka silfai zawhah pindanah ka lut a.


Kross-a ngaihtuah leh hmasa phawtin, atan ṭha taka zira pass tur ka nihzia inhrilh nawn mawlh mawlhin, thaw hapin ka zir ṭan ta a.


Mambawihi ka ngaihtuah em avangin zir erawh harsa ka ti ṭalh.


Kross-a ngaihtuah chunga zir ka tum pawhin ka thei ṭhin lo. Zan danga lehkha zir ka peih loh emaw, zir emaw harsa ka tih chuan Kross-a ka ngaihtuah a, ṭha takin ka zir thei ṭhin a ni a.


Zanin erawh, a dang.


Kross-a ngaihtuah chung pawhin ka zir hleithei lo. Mambawihi inthuam dan khan min ṭhawng.


Zan ina a inthuam dan khan a inthuam ngai lo. Eng nge a hriat a, khati taka inthuama han chhuah?



A ṭhiannu birthday pawh chu an lawm tak takin ka ring ta lo.


Dar sawmpakhat a ri tawh a, Jerome-a lehkha zir a mu tawh a. Ka nu leh pa te lah an mu fel der tawh.


Khua a la vawt angreng bawk a, Mambawihi inthuam dan mawlh khan, ka ngaih a tiṭha thei lo.


Kawrlum hain pawnah ka chhuak a, kawtah inkuangkuah hlunin ka ding khawng at.


A vawh tual tual avang erawh chuan ka ṭhu tung ta daih.


"Bawihi?", ka hawi chhuak a, "Pawnah eng nge i tih?",


"Nang pawh, eng nge i lo tih?", Kross-a chu ka kuah a. Ka ngaih hman zia chu a.



Ka biang a kut vawt lutukin a tawk a, ka ṭek chhawk.


"I kut chu khawimaw?", ka kawrlum ipteah ka zen lut a. A kut la chhuah lehin kawrluma lukhum awm min khum ṭhat tir a. A kut a lo zen lut ve leh.


Kawrlum ha ve tho mah se, kei aiin vawt a tih hmel lutuk.


A hnuah chuan ka hnung aṭangin min kuah a, "Ka ngai lutuk che a, nang hmu thei dawn lo che mah ila, in in tak ka hmuh chuan ka hahdam ka ring a, ka lo kal tawp a nih hi", khûr der derin ka heh a pet zauh.


Tep chuap chuapin, "Bawihi, i va han tui, vawikhat dang leh".


A tawp hleithei lo, "Vawikhat dang leh", a ti mawlh mawlh.


"A tawk", ka thlê sawn a. "Vawikhat dang leh i ti sek a, vawiza chuang a ni tawh",


"Vawikhat chauh a nih kha", ti ṭalhin, ka heh a la pet lui hram.


Strawberry lipbalm ka inhnawih kha a ni a, a pet bo vek tawhin ka hria. A ei zo zawk mawni?


A tawpah zawng, step-ah ṭhuin a kapkarah min ṭhuttir a, a taksa ngheng chialin min pawm bet a. A lum nuam ham ham lutuk.


Pawna ka awm chhan min zawtin, "Mambawihi ka nghak, ka ngaihtuah em a ni. Nidanga a inthuam loh danin a chhuak a, ka ngaih a tiṭha thei lo",


"Engtin chiahin maw a inthuam?", Mambawihi inthuam dan te chu chiang takin ka hrilh a.


Kross-a pawhin, "A va zialo tak ve, engpawh nise, i ngaihtuah a ngai em ni? A sual sual nen", a ti chu, naupangchhia ka ti lutuk a. En chhoin ka nuih seih.


"Ni e, tiraw, a mak ngawt mai. A u ka nihna leh ka nau a nihna anga ngaihtuah chu ka tihtur a ni a. Sual ṭhin hle mah se, nau te ngaihsak chu ka tihtur a ni ve tlat lawi si a ni",


"Tluk lo rim i nam mang e", a biangin ka biang a lo nawk a. A hmuihmulin min vit.


"I inmet fai lo nimaw? I biang hmulin min vit", a rum nghut. "A vit lo che, ṭawng thar hi hmu chhuak ziah suh",


"Min vit", ka ti ṭalh. Khi sukin, "Chuti leh, a vit che ni rawh se. A ṭo tir a nia, ka la tifai peih lo a nih hi, Vai ho angin buk tawkin ka zuah dawn", a ti chu, ner nungin ka ṭhen khum sak sak.



"I duh nange?",


"A tenawm! Zanin la lain tifai nghal ang che", a bu nghat nghat.


A biang chu ka khawih a, rin ai takin khawih a nuam phian.


Min chhun sep sep a, ka kut a tiza lutuk.


"Duhtawk teh, i kut a vawt si",


"A nuam reuh lutuk. A, hei, a var pakhat ka hmu. E he! I putar tawh a nih hi", ka nuih tet tet a.


"I hlimna hi a ho mang e aw", ngaihno bei zeta min en chungin a ti a.


Min tizak chu ka sa pup pup.


Lehkhabu a chhiar nasa lutuk a, ṭawngkam a thiam sawt sawt.


"Bawihi, Mambawihi chu nghah chhuah i tum tihna em ni?",


"Ni mai ang chu, lehkha pawh ka zir ṭha thei lo. A chungah thil ṭha lo thleng lo hram se ka ti", min pawm bet sauh a.


Ka kokia a khabe nghatin, "Thil ṭha lo thlentir tur khawpa mahni inveng zo lo a ni tawh lo a. A tana ṭha leh ṭha lo thliar thiam rual a ni tawh. Ngaihngam takin awm rawh".


Lehkhabu a chhiar nasat zar a zo a, ṭawngkam a thiam sawt zia hi!


Ka biang nawk thuakin a chuk zauh a, "Hei hi chu a tui lo", tih leh ka khabe dawmin ka heh pet a rual a.


Min thlah chuan, "A tui tawh lo reng reng", a hahthlak mang e.


"Ei zo vek tawh hek che, tui tur a awm tawh hleinem",


"Van mak ve", ka seh hrep dawn mawni?


Strawberry lipbalm ka hnawih thu hrilhin, "Tunah inhnawih leh rawh", a la ti ta deuh deuh.


"Hnawih dawn lo",


"Dawn lo a?",


"Aw, dawn lo", ka kâwngah a kut pakhata nghet taka kuahin, a kut pakhatin ka biang a dawm a.



A biangin a han nawk tak tak mai a nih kha. Ka nui ring ngam si lo, nuihna lamah ka hah vek.


"Duhtawk tawh rawh, a na tawh", a duhtawk ve mai bawk a.


Ka biang a thip vawng vawng. A bân puama chum taiin, "A na lutuk", ka biang ka dawm a.


Za chuai chuai mah se, a rei deuh chuan a thip a, a na tawh.


"A pilh em? Haw hunah intifai ngei ngei ang che", thuawih takin a bu nghat.


A inthiamlo deuh nge ni, "Khawimaw ka lo en. Bawihi, ka tihpalh lutuk, haw hunah ka intifai ngei ngei ang", duat takin ka biang a chul a.


"Tlangval khabe hmul nei a mawi lo, tifai chiang bal rawh aw", thuawih takin a bu nghat nghat.


Ṭha takin min pawm a, vawt ka hre chang tawh lo.


A bulah hi chuan, ka ruak huai zel. Ipikna leh rilru tâwtna te a bo a, engthawl takin ka awm ṭhin.


Remchangah lain, ka pain lêng ve tura min hrilh te ka sawi a.


"Bawihi, kan hrilh mai dawn em ni?",


"Eng chu maw?",


"Kan-", a ti hman chauh, "In va han zahpuiawm dun tak!", Mambawihi leh patêa te.


Kross-a nen kan ding thuai a, ka rin ang chiah a ni.


Mambawihi thaw rim a dik lo. "Mambawih, kan lo nghak che a", patêa chu zawhna ngah deuhin ka melh.


Patêa chuan Mambawihi kiu chhakah a chelh a, Mambawihi chu din pawh a ding ngil thei lo.


"Min thlah rawh, in ninawm teivet, ka kham hluah hluah che u", patêa kut a thing thla sawk a.


Pai chharha lo kalin, "Awmpui leh chhiahhlawh inngaizawng, huh; in zahpuiawm dun em mai a!", in chhungah a lut daih.


Kross-an, "Bawihi, nangpawh va lut tawh rawh. Zan a rei tawh si", ka inher a.


"A thusawi kha ngaithla liam mai mai rawh aw", a kut ka vuan a. A thinrim ang tih ka hlau. Mambawihi khan, eng thu nge a sawi tih pawh a hre tawp nang mawle.


Kross-a chuan ngaihno bei zeta nuiin, "Um, Ngaihthlak liam mai mai tur a nih kha. A thuhrimah, ka hrawn rei ve a, a ṭawngkam kha chu ngaiah ka nei tawh".


Patêa a awm ve tih ka theihnghilh.


"Patê, engtin nge in lo haw dun theih? Khawiah nge i kal?",


"Vawiina ka file hawn kan puin a mamawh thut a, ka va pe, ka lo haw lamah Mambawihi leh mipa pakhat hi taxi chhunga an lo inhau ka hmu a.


Mipa chuan taxi aṭanga lo nam chhuakin chemtea tinin, "Min thlêm hmasa te tea, min mutpui duh leh si lo. Ṭang ṭang mah la, ka duh ka tipuitling tho ang. Min thlêm hmasatu i nih kha", a vo a.


Ka va chhan a, lo hruai haw ka tum chu, "Nangni ho hi, ka ningin ka kham hluah hluah che u. Ka awm awmin min awmtir rawh u", min au khum nghekin, mi kha hnek te min tum a.


Rui lo se chu, ka lo hruai haw thei kherin ka ring lo. In pahniha inngaizawng hian, tu te pawh min nghawng a nih hi. Bawihi, Kross-a leh Mambawihi te inlaichin dan sawi mai teh u.


Mambawihi buaina pawh a niin ka hria. Chubakah, dawta inngaihzawn chu a ṭha ngai lo. I pain thudik a hriat chuan, in tan kawng a awlsam mai thei asin".


Patêan min hawsan hnuah Kross-a nen kan ngaihtuah a.


"Bawihi, patêa khan a sawi dikin ka hria. Tun Chawlhni zanah ka lo lêng anga, tah chuan i hrilh teh ang aw. Ka nu leh Mambawihi te pawhin reilo tê chu an tuar a ngai mai thei a. Mahse,,nang hi",


"Kei chu min ngaihtuah suh. Mambawihi leh ka nu chuan tuar ve mai mai rawh se. Nangin i tuar nasa daih zawk. Hrilh chu i duh tak tak maw?",


"Duh tak tak e, kan inhmuh hmasak ber zanah pawh khan hrilh tlang ka duh. Ka ngaihtuah si che a, ka hrilh ta lo a nih kha".


Ka nu leh Mambawihi a ngaihtuah vang zawk a ni ang han ti ila, kha zan kha chu a laklawh em mai.


"Bawihi, han lut tawh rawh",


"Kein em ni i haw dawn?",


"Ni tawh mai, a hla chuang lo a, ka thleng hrim hrim", ka nghawngah min kuah bet a.


Chawlhni lo thleng tur ka nghahhlelh rualin ka huphurh ru kher mai.


Kham lo tak chungin kan inthlah a, a rualin haw ve daih thei ila!


Mambawihi pindanah ka lut kawi a, bawkkhup zawngin a lo mu bam.


Kross-a nen kan inkar a hriat aṭangin a buai ru ve khawp ang. Ka pain a hre lo a.


Mahse, hetia rui tur leh, mipa mutpui tura thlêm tur khawpin buaina a awm miah lo asin aw!



"A u, exam kan ṭan ṭep tawh a, Session thar aṭang chuan Hostel-ah ka awm dawn a nia. Apa min sawipui rawh aw", Chhangthawpa butter tat pahin a ti nuah nuah a.


A pass a nih chuan, a class a sang sawt dawn. HSLC a exam thei ṭep tawh.


Hun a kal chak mang e!


"Khawiah nge Mambawihi hi?", ka pain a ti chu, "A nuamsam lo deuh a, nakinah, a peih hunah ei mai rawh se", ka ti thuai a.


Ka nu pawh a ṭawng chuang lo. A hahdamthlak.


Jerome-a leh ka pa chhuak tur ka nuin a thlah chhungin Mambawihi ka thlithlai a. Zana a mut ngai ngaiin a lo la mu reng.


"Mambawih?", a kut ka tiche a, "College ka kal dawn lo", a rim tak lutuk chuan ka luak a pawt.


Ka pain a hre lo hlauh a, ka lawm.


"Chaw lo ei ta che, i pum a ruak dawn si a. I kulcho palh ang", hnar hup a theih ngawt si lo a.


Pindan inhawngah ka hawi chhuak a, "Eng rim nge a?", Mambawihi a bêng hlak hlak nghal.


"Nu, duhtawk rawh. A la harh ṭhat loh kha", ka nu chu ka dang a.


Ka kut a vai sawn fua, "Nangnu kir ker thil tih ṭul lo lutuk hi. Kross-a lo ngaihzawn tur i hmu lo em ni? Ka lo kal tir kher kher che chu ka inchhir mang e", Mambawihi a tho phat.


"In ninawm lutuk, Kross-a, Kross-a ti reng hlawm mai. He in hi ka ning tawh ngawt mai", pindan aṭangin a chhuak daih.



Kawngka na takin a khar ṭhuai.


Ka nuin, "Eng ang pawhin lo induh ula, in awm dun ka remti ngai dawn lo. I pain a biak ṭhat che avang khan i ngaih lo tiṭha ngawt suh ang che", ling hlara min enin a ti a.


Ani pawh a chhuak daih.


Ka pindanah ka kal a, lehkhabu ken tur bag-ah khung thuai thuaiin, in aṭangin ka chhuak a.


Ni laklawha Kross-a nen kan inhmu thei ṭhin lo hi chu, a pawi ngawt mai.



A inah va kal ngawt mah ila, amah a awm si lo a, awmzia a awm lo. Chawlhni thleng vat tawh sela ka ti em mai.


College banah bazarah kawi lehin, chawhmeh tlem azawng ka lei a.


Mambawihi ka hmu leh ta tlat. Amaherawhchu, patêa pawh a bulah a ding.


Mambawihi chu a thinrim hmel em em a, a kutzungchalin patêa a kâwk. Patêa erawh, a ding ngawi reng.


Eng nge an awmzia ni le?


"Bawihi, lo kal lawk teh, hmanhmawh takin", nutêin min lo call chu, Kross-a a kal a nih ringin, apron phelh theihnghilh ṭhakin ka tlan chhuak.


Thaw hlawp hlawpin ka lut a, "I va lo thleng hma em em", nutêin a ti chu, chhân pawh chhâng loin Kross-a ka zawng.


Mipa pakhat, sual hmel deuh bak a lo awm lo.

"Nutê, Kross-a a lo kal emaw ka ti a", ka phurna zawng zawng a bo vek.


"Bawihi ṭhin hi a", min bêng hlak a. "Hei hi phelh teh", apron min phelh sak a. Ka hre chang tawh lo alawm.


"Khawiah nge patêa leh Nanaua te hi?",


"Dawrah ka tir, lo kal teh", ṭhutnaah min kalpui a, "Alex, Bawihi a nih hi. Bawihi, Alex-a, i patêa u nupui vahpa a nia. A kual i ti em?", nutêi chu a nui hawr hawr.


Alex-a nen chuan kan inchibai a, "Alex-a hian nupui tur ṭha tâwk a duh a, ka hrechhuak chiang lutuk che a, ka ko che a nih hi. Alex, ka fanu chu eng nge an i tih?",


"Nutê",


"Sh, lo ngawi rawh", nutêi chu, Kross-a nen kan inngaizawng tih a hre ve vek sia.


Alex-a chuan, "Ṭha lutui, wife material type ka duh a", a ti dek dek a, "Wife material aia chungnung zawk mawle, ka fanu hi chu ka chhuang ve em asin", nutêin a ti nghal.


Alex-a chu a kiai sak a, ding hluaiin, "Ka haw ang e, a tlai tawh em mai. Duty a hun mai dawn si a", a sana bun a bih zauh a.


Kross-a aiin a pumrua a lian lo zawk a, kei aiin a sâng tampui lo.


Nutêi nen pawn thleng kan thlah a, "Alex", a lo hawi a.


"Kei chu, bialpa ka nei. I nupui duhzâwng hmu ngei turin ka duhsak che a nia", nutêin min pawt lut rang lutuk.


Min bêng chawrh chawrh, "Bialpa i nei tih sawi kher a ṭul em ni?",


"Nutê, Kross-a nen kan inngaizawng tih i hriat kha. Bialpa ka nei tihna a nia, dawt ka sawi pawh ni hlei lo",


"Kross-a nen inṭhen rawh u", Nutêi chu ka melh hrawk.


"Alex-a kha SI a nia, an chhungkua pawh hausa tak an ni asin. Alex-a pa phei chu, MLA te a ni tawh. I hmakhua ngaih thiam tum rawh. I nei thei a nih chuan i nuamsa dawn lutuk", âng phuain nutêi ka en.


Nutêin min chelhna a kut dah sawnin, "Nutê, nawmsak hi ka thupui ber lo. Kross-a nen kan inṭhen dawn lo. Alex-a kha hmuh leh ka duh tawh lo. Zanin hi a thleng loah ka ngai bawk ang", nutêin min bêng hlak.


"Bawihi, i â em mai. Kross-a nen in inngaihzawnna a la rei lo a, in inkarah eng tham mah a la thleng lo. Ṭhen la, Alex-a nen inngaizawng zawk rawh u. Kross-a eng mah nei lo bula awm reng turin ka phal lo che",


"Nutê, ka lam ṭang turah ka ngai che a. Ka rilru i tina takzet a ni", nutêin hetiang teh thuta min ti hi hriatthiam a harin, min tina takzet a ni.


Ka lam ṭang turah ka lo ngai char char a, Kross-a ṭhen turin leh, midang nena inkawp turin min duh a ni a.


Eng mah nei lo, kei chauh min neitu Kross-a chungah a rilru put dik tak a rawn lang chhuak ve leh ta!


"I pa pawhin a duhpui chuang lo che. A tir chuan i hlimna a nih avangin ka duhpui che a. Tunah erawh, i damchhung hun hman dan tur ngaihtuah erawh chuan, Kross-a hi chu...",


"Nutê, tun Chawlhni lo thleng turah hian Kross-a kan inah a lo kal dawn a. Ka pa hnenah, ka nu te nena an inkungkaih dan kan sawi vek dawn.


Thudik tak kan hrilh anga, ka pain min pawm thei dawn lo kumkhua dawn pawh nise, Kross-a nen kan inṭhen lo ang, engtikah mah".


Rilru na zetin ka haw a.


Nutêi danglam ta chuan min tina, sawi mai aiin min tina ngawih ngawih.


Chawlhni chu lo thleng thuai teh se. A nih nih kan ni tawh ang. Kross-a nen min pawh ṭhen ṭalh an tum a nih chuan, mi tih dan lo pawh a ni hleinem.


Mi tih dan kan entawn ve tawh anga a ni mai.


Ka pa mai bakah, ka lungngaihna ka thlenna ber ka nutêi pawhin midang min zawnpui tawh a ni a.


Kross-an hre tase, ka hrilh lo mai ang. Hre ve suh se.


Ani lo chu, tu mah ka thlang dawn lo.


Nawmsakna ringawt hian hlimna min thlenin ka ring hauh lo.


Show post links
Top

[Ngaia]

Thinlungmawlpa
Chapter-18
Ziaktu: Cck Lalchhuanawmi


Nawmsakna ringawt hian hlimna min thlenin ka ring hauh lo.


Kross-a nena min pawmtu an awm tawh pawhin ka hre lo. Nutêin ṭhen turin min ti a, ka pa te chu sawi ngai loha hriat sa a ni a.


Nutêin ṭhen tur leh, midang vuan tura min tih bakah, min la inhmelhriattir thlap zui.


Khawvel tak hi chu aw...


"A u, Bazarnaah ka lo zui ve che",


"Han insiam rawh, kekawrbul nena kal ka phal lo".


Hmanhmawh takin a pindanah a lut a, minute khat pawh a awm tling lo. A lo chhuak rang lutuk.


Jerome-a nen Bazarah kan kal ta a, naktuk Chawlhni. Kross-a nen kan inhmu thei dawn!


Nghakhlel tawh tak ka ni.


Ice cream bawm bulah ka pu kha a lo ṭhu a, min hmuh chuan a khi ver ver.


"Ṭhian thar i nei nimaw? Khawnge a hlui kha?", min fiam tih hre tho mah ila, ka nui duh bau lo.


Melh kalhin, "Ka pu chu, min va ringchhe reuh tak aw...A hlui an awm lo, hmana mi kha a la ni reng aw", ka tûm deuh hmuk a.


Jerome-a pekin, "Mawi a! A thar ka nia, a hlui kha chuan nupui a neihsan tawh", thutak fe hian a ti reuh a.


Ka pu pawhin fiamthu tih a hre tho, mahse, a ṭhawng anga langin, "Chutia law! A va mak em! Kan tlangvala chu, ngati nge chutianga a lo awm. Khawpui nun a zo lo deuh a nih ngei dawn chu a", a ti ta chiam a.


Awm ngaihna min hriattir lo dawn.


Jerome-a lahin tifuh inti takin mi melh ralh a, "Ka lo hruai kher kher che a ni", ka kâwng ka dawm a.


A nui tat tat ringawt.


Ice cream min pe pahin ka pu chuan,,"Tak tak a, ka hmu ngai lo lutuk che u a, ka lo mangang deuh alawm le", a ti ta a.


"An ṭha lutuk, tihian, an nau hi hmanruaah min hmang a, a chhuah dawn apiangin min hruai ziah", Jerome-a chuan a ti reuh a.


Ka pu lahin, awih hmel takin a bu nghat nghat. Ka nuih ta mai mai.


Din rei a chi si lo, "A nih, ka pu, lo dam ṭha zel rawh aw", tiin, kan kalsan ta a. Amah, ka pu chauh khan Kross-a nena kan inkar sawi nawi lo awm chhun a ni ta.


Jerome-a nen!


Pindanah ka lut chiah tihin nutêin min lo call a, chhâng loin ka rik ral tir ṭhak.


Lêng tura min tiin, midang nen khan min inbiak tir leh anga. Kan pahnih chauha kan inbiak theih nan, chhuanlam siamin hmun dangah pawh a kal duh mai thei a ni.


Min koh zanah pawh, patêa te dawrah a kal tir daih.


Kross-a hi, zanah rawn kal leh se.


Nui sen senin puanin ka inkhuh a, ka zak lutuk.


A bek te kha tifai tak ang maw?


Ka biang a nawk vak vak kha chu, hrehawm ve tak chu a ni.


A tir aṭangin ka chhûi kir leh a, ka hmaa a kawr a hlip khan min la tiṭim uai uai thei nia!


Kha kher kha chu, theihnghilh phal loh zinga mi a ni.


A taksa inphiar fer nalh lutuk tak mai kha, kei lo midangin an hmuh ka phal dawn lo reng reng.


Ka hauh bur dawn, "Zah hre rawh aw", keimah leh keimah ka inbêng.


"A ho em mai, thil ṭha lo pawh a ni chuang lo", Kross-a ka hauh bur chu zahna tur a awm lo.


Tu nge, mahni bialpa te hauh bur awm lo bik ang?


Lehkha zir ṭhulh ṭhak khawpin mahni leh mahni ka inbia a. Kross-a nen kan awm dun theih hun chhung tlem ṭhin viau mah se, âm takin kan hmang ka ti ve tlat.


Lehkha inzirtir nan kan hmang a, chu bak baka hun hmang ṭha. Kan inpawh zual sawt a. A ṭha lutuk ringawt.


Tukverh hawngin ka dak chhuak a, hman zan ang khan lo kal leh se. Ṭul lo lutukin, Strawberry lipbalm ka inhnawih.


Ka kutah kai ka liak chhin a, a tui lo rapthlak lutuk. Ka ṭhen sak sak.


"Hetiang te, tinnge maw tui i tih theih zawk le?", ka phun sep.


Kross-an tui a ti ka awih thei lo. Dâwt a sawi pawh a ni thei. A tui lo em mai. Ni chiah, dâwt a sawi chiang lutuk.


"Ngaihtuah fim pu rawh", ka inkhawng kawrh. Aa, dâwt a sawi chiang lutuk, "Vawikhat dang leh", a ti zut a. A hriatthiam ta mai.


Ani pawhin tui a ti bik lo, tui a tih chhan a hriat ta.


Nui sen senin ka tuai fai a, lipbalm chu dressing table-ah ṭha takin ka dah. Tukverh kharin puanin ka inkhuh hlun.


Ka ngaih a ṭha lo chu, puan hlip thutin, Strawberry lipbalm ka la lawk a, ka inhnawih ṭha leh.


Vanlalkross-a vang vek. Ka thisen kal a tirang.


"Ngaihawmpa, lo kal leh teh", tukverhah ka dak chhuak leh. Hui, ka nun a tibuai. Nge ni a, ka intibuai mai mai zawk.


Ka awmdan hi a over lo ngei ka beisei. Ka ngai ve a ni mai a. Ka ngaih em avangin hmaichhana hmuh ka duh a, lo kal turin ka duh.


Nge ni a, kei mah hi ka va kal zawk dawn?


"Naktuk nghak rawh", ka inkhawng karh karh. Mahni leh mahni inbiak ka ching ṭan.


Huiham, naktuk nghak ang. Naktuk a thleng ṭep tawh ang. Naktuk nghak ang, ka nghak thei alawm. Nghah chu ka theih zawng tak. Ka chem kalna pakhat, Nghah hi ka koa tla mawhphurhna pakhat a ni!



Ham bai bai chungin pindan aṭangin ka chhuak a, "Bawihi", ka phu nasa lutuk chu bangah ka intauh dawt.


Zing kar kara Mambawihi âw vin chu, eng tak ni ang maw?


"Ṭha takin min ko rawh, min tihlau alawm",


"Ngaithla rawh, i patêa saw hrilh ang che. Ka nunah lo buai tawh suh se, ka kham lutuk", ti hmukin a pindanah a lut leh ta daih.


Patêa chuan engtin nge maw a lo tih ṭhin le?



Hman zana a hmuh danin a zir loh avanga la umzui reng a ni mai ang em le? Thu ṭha hrilh a tum ṭhing anga, Mambawihin a duh dawn si lo.


Patêa chu, zawh ngei a ṭha ka ti.


Nutêi te inah ka kal a,,Kross-a a lo la thleng lo.


"Nizanah ngati nge min chhân loh?", nutêin a ti ta chiah a, "Lehkha ka zir chuan silent-ah ka dah daih zel a, ka hmuh chuan zan a rei tawh si a, ka lo be ta lo che a nih kha. Tihpalh lutuk", ka ti duah a.


A lung a awi zân lo, "Kross-a lo kal dawn se chu, min chhân ran dawn dawn nen",


"Nutê, chutiang a ni lo. Tihpalh lutuk", ka kuah a. A lung a awi deuh. "Ka thu i awih duh si lo, Kross-a nen han kal dun ṭai ṭai mai teh u", a ti ta a.


Ka awm a nuam huai huai tawh mai. Nutêi a lo kir leh ta!


"Hmanhmawh ang u", Nanauan a ti chu, "Hmanhmawh ang u", Tetea pawhin a ti ve a.


Tetea hi a upa zawk a, kum sarih a ni ve tawh a, Nanaua hi kum nga. An duhawmin, patêa lamah an kal vek a, an pa chiah chiah an ni mai.


In aṭanga kan chhuak chiah tihah, "A, au Kaws-a", Nanauan a ti chu, ka hawi chhuak chiang lutuk.


Ka ṭap lo chauh a ni. Ka ngai lutuk!


"I va nalh ve", nutêin a ti a. Nanauan panin a inpawmtir.


Han inkuah chung chung a rem teh ṭeuh si lo. Kut invawn takngial pawh a ngamawm loh.


"Lo inkhawm ve ta che", patêan a han ti a. A hnial rang teh asin.


"Lo haw vat rawh aw",


"Zanah chauh ka lo haw dawn", ka ti chu, a run lutuk.


In chhungah a lut a, nuih rah rahin, kan tum ram panin kan kal a.


Kross-an min tihbuai em avangin, engmah ka ngaihtuah thei lo. Haw thuai thuai ka duh tawh.


Bân rual rualin ka phit chhuak.


Inbun sâng ve hle mah ila, puan sâwi chhingin ka tlan tak tak mai a nih kha.


Hnehsawh tak ka ni. Professional ang thlap ka ni!


Thaw hlawp hlawpin ka tlan lut a, nui varin pindan kawngka ka hawng. A ṭhutna aṭanga thoin min lo pan a, keiin tlanin ka pan bawk.


Inkuah chauh chu kan duhkhawp lo. Leiin a tuar leh ta!


Inthlah chu sawi loh, kan taksa nen lam kan inchar bet hi a ni ringawt. Mahse, a fair ve tlat. Ka taksa a khawih ngai lo a, hmana ka âwm khawih min dila, ka phal loh aṭangin min dil leh tawh lo.


"Bawihi, ka ngai thei lutuk che",


"Kei chuan ka ngai ve lo che", a khi sak a, "I kâ chu dâwt i sawitir mai thei, mahse, Bawihi, i mit erawh dâwt i sawi tir thei lo. I mitmengah hian, min ngaihzia leh min thlakhlelhzia a lang vek. I thinphu pawh hi ka hrethiam asin, a chhan chu maw; ka thinlung a ni tlat atin ni. A dik em?", lehkhabu a chhiar nasa lutuk hi, kan pahnihin kan ṭangkaipui ve ve a nih hi.


Ka bu nghauh nghauh a, "Dik lutuk, i thinlung kawltu hian ka lo hrethiam ṭhin lo a ni e. A nih, ka mitmeng aṭang chuan eng te nge hriat i la neih?", ka ti hâ a.


"Thil tam tak, nangpawhin i hriat loh; i mitmeng aṭangin ka hre thei. Ka tana inpumpekna, rinawmna leh duhsakna, lungngaihna leh thlaphanna te. Mit hian dâwt a sawi ngai lo! Bawihi, ka duh ber chu, i mit aṭanga min khawngaihna hmuh loh hi a ni", lungchim takin a thlawh vawng vawng a.


Nipui laia vur tuiral ang chiahin ka tuiral zawih zawih!


"Khawngaihnaa en tawh lo tur chein min siam tawh hi, a ni lo em ni?",


"Ni e, ka tilui lo che tih hi inpawmtir ka tum fo asin", a âwah chuan hlauhthawnna a tel.


Min tilui reng em tih ka hre bik lo. Tihluihna a tel lo.


"Ka duhthlanna ngei a ni. Inpuang hmasa zawkah ka ṭang a nih kha",


"Chuti maw ni a? Min en vung vung tawh suh i tih ṭhin i hrethiam taah ka ngai mai asin", ka han inngaihtuah ṭha kual.



Min en vung vung zel chu a nih kha. Kha kha, a inpuang tihna ang maw ni a?


"I hrethiam tawh em?", ka lei ka seh tut.


"Ngati nge ka hmaah tak kawr kha i phelh?", he chhânna hi chiang taka hriat ka duh.


A inphelh ngawt chhan tur a awm lo.


"Bawihi, mit dâwt Sawi thiam lohzia i la hre lo a ni ngei ang? Khami hnu aṭang khan ni lo em ni? Min ngaihven ṭan?", ka pha nasa lutuk.


Mahse, a dik bawk si.


"Dâwt i sawi, mit hian dâwt a sawi thei lo",


"I intihria a nih mai chu a", ka ti deuh hmuk. Ka heh pet zauhin, "Zanin atan inbuatsaih ang hmiang".


Zan hi thleng thei lo se ka va ti tak em!


Ka pa hnena sawi ṭan dan tur leh, a ṭul thut pawha tlan dun inring turin kan inbuatsaih.


Tlan dun hi chu, keimah chauh ka inbuatsaih a ni mah zawk. Kross-a hian a ngaihtuah lo hrim hrim.


A kalbuai a nih chuan, zui haw nghal turin a rukin ka inpuahchah. Zui haw a ṭha lo tih hre mah ila, ka pa tihhlauh nana hmanrua atan a ni deuh ber.


Ka pain a phal lo saa, zanin hian a phal lo zual dawn nge ni a, a phal tawh zawk dawn?



Lo lêng se, a ṭha ve tho alawm.


Rilru ṭawngṭaina ka nei nasa lutuk a, ka ni deuh hui mai.


Pawnah ka nghak a, ka pa te inkhawm pawh an lo thleng ṭep tawh ang. Inkhawm ṭan hma tein lo kal sela, kan inbe tam hman tur.


"Bawihi?", a tawpah, a lo thleng.


"Ngati nge pawnah i awm? In chhungah awm ta che", chhunah induat tawh mah ila, he taksa khauh ṭha takin min kuangkuah tawh hi chuan, eng mah ka hre chang tawh lo ṭhin.


Mambawihi leh Jerome-an an awm ve a,,"I patêa ka nin dan hi chu", min phun khum hrep.


Patêa chuan engtin nge a lo tih ṭhin le?


Jerome-a pawhin Mambawihi leh Kross-a te unau an ni tih a hria a. Kan boruak chu a ritin, ṭang at at tak a ni.


Ka nu leh pa an lo haw anga, huphurhawm ngei mai.


"Ninawm lutuk", Mambawihu tho tharhin a pindan kawngka a khar ṭhuai.b


"A u tak hi chu aw...", Jerome-an a ti hluk a. Ani pawh tho phatin, "Games ka khel dawn", a ti ve bawk.


Kan pahnih chauhin kan ni ta. Ka thaw huai thei nia mawle!


Jerome-a tal chuan hre lo se, nuam ka ti zawk ang.


"Thingpui i in duh em?",


"Thildang ka duh zawk",


"Sawi la", a nui tat tat a, min en vung vung.


"Khatin min en vung vung suh. I duh chu sawi rawh",


"A neituin a phal ang em tih a ni",


"Eng nge ni reng reng?", min rawn hnaih a, "Hrethiam har thei sia aw, hei hi", ka heh a tuai a.


"A neituin a phal ang em le? Hei hi ka duh", ka nui hak. Mahse, ka nuih a za miah lo.


Min pawm bet a, "A phal ang em?",


"Phal lo", ka ti hmuk. "Lehkhaah dilna ziah thlap a ngai", ka ti pek a. A lungni lo ngang mai.


Dilna ziah chu khawi lamah, min kuai her lawk a, min seh tak tak mai a nih kha! Ka hnar rei thei bik chuang lo.


Kawngka a rawn rik takah, rang takin kan inthlah a, "Ka la kham lo asin le", ka nuih rah rah.


Ani chang ni lo, kei pawhin ka kham lo.


"Pa, in lo haw tawh nimaw?", ṭhutna aṭangin ka tho a. Kross-a pawh a ding ve.


Kross-a an hmu chu an phu deuh zuk nghe nghe. Ka nu aiin ka pa a lungawilo hmel zawk.


Amah hian, leng tura sawm turin min hrilh zawk a ni si a.



Thinlungmawlpa
Chapter-19
Ziaktu: Cck Lalchhuanawmi


Amah hian, leng tura sawm turin min hrilh zawk a ni si a.


"Pa, nu, Kross-a a lo lêng a",


"In lo haw tawh maw?", Kross-a pawhin a ti ve a. Boruak kham loh avanga thih hi a harsa dawn lo tlat mai!


Kan ṭhu ho ta a, thingpui lumin chokaah ka kal a, "Tun lai eng nge i thawh ṭhin?", tih lam an inzawt a.


A pangngai dawna ka hriat avangin ka hlim ru kher mai.


Thingpui kengin, dawhkanah ka dah a. Kross-an ban mai a huphurh deuha ka hriat avangin, ka pa nen ka pe dun a.


Ka nu nen chuan kan in lo.


Thingpui kan ngaina tehchiam lo ve ve. Ka nu phei chuan siam pawh a siam ngai lo tluk a ni.


Ka pain, "Nangmah chauhin i awm si a, i khua a har ṭhin ang a?", tia a zawt chu, "Khawhar chang awm ve tho mai", kimki chawihin Kross-an a chhâng a.


Thingpui no a tuai a tuai danah leh, a ke a tiphu leh et et te chuan, haw thuai a duh tih a lantir a.


Ka pa nena an inkawm chu nuam lo a ti chiang lutuk. Ka pain a biak hian a hawi chhuak a, a bak chu a kun deuh tlat zel.


"Thudik tak ka hre duh, thil pakhat ka zawt ang che", ka thin a phu rang lutuk.


Ka pa chuan, "Bawihi hi, eng chen thleng nge kalpui i tum?",


"Pa, chutiang te an inzawt ngai em ni?", ka pain min melh hrawk.


Kross-a bula ṭhu ka ni bawk a, Kross-a thinphu ka hre thei. Chutiang zawhna chu a beisei lawk bik miah lo ang.


"Ka pu, i zawhna chu ka hre thiam mai lo", Kross-a chuan a ti zawi sup a. A hrethiam lutuk dawn tih ka hria.


School kala, inzir sâng ni lo mah se, lehkhabu a chhiar tam a. Chu chuan a ṭanpuiin a kaihruai tih ka hria.


Ka pain, "Nupuia neih i tum lo a nih chuan, engtikah nge in inṭhen dawn ka tihna a nih chu", a ti chu, "Pa", ka âw chu a khûr.


"Chutiang an inzawt ngai lo", ka ti sep a. Ka khûr chhuak titih.


Ka nuin, "Tun ang laiah te chuan hnathawh leh hlawh zat an inzawt ṭhin zawk asin", a lo ti hmanhmawh.


Thil ṭul lo lutuk lo sawi.


"Ka pu, chumi hmain, sawi duh ka nei", Kross-an a ti a. "Ka zawhna che min chhâng phawt rawh, nupuia neih chu i tum em?", ka pain a ti leh hrâm.


"Pa",


"Nang chu lo ngawi rawh".


Kross-a lam ka hawi a, nupuia min neih lam a lo ngaihtuah ngai miah lo tih hriat takin a ngawi kar a.


A inngaihtuah melh melh.


Ka pa pawh chu, chutiang inzawh. Hei hi nimaw a tum.


"Pa, chutiang an inzawt ngai lo. Hrilh tur che kan nei",


"Lo ngawi turin ka tih che kha", ka pa chu a meng rum a. Min bên mai duh khawpin a meng lian.


Kross-a lo ṭawng chhuak tain, "Ka pu, kha chen nun bulbal nei loin ka lo awm ṭhin a. Bawihi hian nun bul min ṭan ṭhattir lehin, tuihna thar min pe a. Lehkhathiamlo tih ka nih loh nan ziak leh chhiar min zirtirin, engtiklai pawhin ka tan a ding reng zel a. Chhungkua tih tur ka nei lo tih i hria, mahse, Bawihi hi ka chhungkaw neihchhun a ni tawh. Ka chhungkaw neihchhun hi thlah ka duh lo", ka nghing lawih lawih.



Ngaihthlak a harsa takzet.


"I thinlung i pe tak meuh maw?", ka pa chu a zawhna zawng zawngte nen ka haw fai vek.


Kross-an, "Ka pu, kei chuan thinlung ka neih lohna a rei tawh. Bawihi ka hmuh hmasak ber khan ani hian min ruksak daih tawh asin", a ti chu, ka nui chhuak lo chauh a ni.


A va mawl ṭhin tak em! Thinglung mawl a nei tlat atin ni.


"Ka pu, sawi duh ka nei. A tira ka sawi loh avangin min haw(hua) dawn tih ka hria. Mahse, tunah chuan hrilh che ka duh", Kross-an a ti a.


"Eng dang sawi a ṭul tawh lo", ka pa chu a ding a, keini pawh kan ding.


"Ni lo, ka pu, sawi ngei ka duh. Reilo tê a ni ang", Kross-an a ti chungin, ka pain a ngaihsak duh lo.


Chutah, Kross-a a en a, "I chanchin leh hnathawh te ka hria, pa chuan fa te a ngaihtuah ṭhin tih i hriat ngei ka beisei. Ngaihzawng atan mi ṭha tak nise ka ti a, pasal atan phei chuan lawi luhna tur chhungkua nei ni thei se ka duh", ka pa chu beiseina hian ka thlir doh doh mai a ni.


Kross-a ka mitsir a, a lo lêng duh hi a inchhir ta em aw ka ti hial.


Ka pa chuan, "Ka fanu hnenah i thinlung i pe a nih ngai chuan, ka hmaah hian ṭhingṭhi rawh", a ti ta mai.


"Pa, eng thu nge maw i sawi le?", kan vai chuan min ṭhawng. "Ṭhiana, ṭhingṭhit a? I ti tak tak lo tiraw?", ka nu pawhin a ti.


Ka nu mawhpuh ka tum a, mahse, ani pawh a ṭhawng ve tho chu a ni si.


"Ka hmaah ṭhingṭhi la, tichuan, ka fanu i thinlung i pe takzet tih ka hre thei anga. Lungdam takin ka thlah zalen ang che u, in inkarah sawi nawina a awm tawh lo ang", ka pa bawk chuan a ti leh.


Inṭhingṭhit tir maw ni a?


Mahni mihringpui te chunga nunrawnna dik tak a ni.


"Pa, i thusawi kha i ngaihtuah chiang em? Kross-a hi a ṭhingṭhit a ngai miah lo. En vang vang la, a thinlung min pe tih chu i hrethiam mai lo em ni?", Kross-a kut ka vuan a, "I ṭhingṭhit a ngai lo, tihsual i nei lo a, i dik tih fiah tura inphahhnuai kher a ngai lo", ka biang a lum thla pap pap.


Kross-a chuan min vuan let a, lo hawi chhuakin min nuih a, a ṭhingṭhi dawn!


Muangchangin ka pa hmaah chuan a ṭhingṭhi ta!


"Kross-a", rang lutuka ṭhingṭhi thla vein ka kuah a.


"Bawihi, tho rawh. I ke a na palh ang", a thinlung a rum tih hai rual a ni lo.


Ka pa chuan min phih tho a, "Hmeichhia zawk i khatih hawr hawr vang nimaw, a ngampat em em", tia ka pain bên min tum chu, "Ka pu, duhtawk rawh", Kross-an ka pa ke a vuan a.


"Ka pu, Nu chu ka nei ngei alawm. Pa pawh ka nei tih ka hria, pa tel loin he khawvel êng hi ka hmu thei lo. Khawiah emawni chuan a awm ngei ang.


Ka insiam ṭan tirh reng aṭangin duh loh ka ni a, vawi eng emaw zah tihboral min tum tawh. Chuti chung chuan ka lo piang chhuak a.


Pian hlim aṭang rengin, lawm loh leh thil ṭha dawng loin, mahni awm awmin ka lo ṭhang lian a.


Kei chu, thinrim hrikthlakna, an duh loh loh eia in ṭhinin, silhfen ṭha inbel tur nei loin, Bawng tana an dah puan ka silh mai ṭhin.


Mahni thiam channa ngeiah pawh vuak ka tuar a, mihring ni tura piang si hi, ui ang maia enkawl leh khawsa ka ni.


A chang chuan, Vawk mai mai te nun hi ka awt ṭhin asin!


Ka pu, Bawihi hi ka tan chuan nunna min petu a ni a, ka tuihna thar a ni. Ka thinlung ka pe tih tunah chuan i hre tawh a. Thil pahnih chauh ka dil ang che.


Khawngaihtakin, kut lo thlak suh. I fanu a ni a, atan thil ṭha engkim i duhsak tih pawh ka hria. Kei pawh hian a ṭha thei ber ber pek ka duh.


Chumi tur atan chuan ka la thawk nasa lo deuh a ni e. Min ngaidam hrâm rawh.


Mahse, ka intiam e. Bawihi tan hian tlin ngei ka tum ang. Ka bei anga, ka bei zel ang. Ka hlawhtling ngei bawk anga, chutih hunah, chutih hunah chuan ka lak aṭangin min laksak tawh suh aw".


Ka pain min thlah a, tha nei lo ang maiin zawi hnuangin ka ṭhu sawp a.


Ka hawi chhuak ngam lo, ka zak em a ni!


"Bawihi?", ka bek a rawn dawm a. Aw...ka va lainat.


Hrehawm leh tihduhdah a tuar zozai te kha, tunah, a chapona neih chhun pawh zah zo loin, ka tan mualpho takin ka pa hmaah a awm a ni a!


Lal Isua hmaa ṭhingṭhit pawh kan hnualsuat laiin, mahni mihringpui ngei hmaa ṭhingṭhit chu maw?


Tlawmah pawh a tlawmthlak ngawih ngawih lo em ni?


Mipa inti ve ngat ṭhin tana a zahthlaka a mualphothlak dan tur hi.


Ngaihtuah pawh ka duh lo. Ka pa chetdan chuan min ti zakin, a thinlung min petu pawh en ngam loin min siam ta a nih hi!


"Bawihi? Min en teh", phe ruaiin ka hawi chhuak a. A hmel ka hmu thei chang chang. Ka mit a thim hian a thim.



Ka zak lutuk chu ka sa chhuak vek a, ka nat em avangin ngaihdam dil tura ṭawng chhuak tur pawhin chakna ka nei lo.


Min en vung vungin, "Hetianga min en hian ka tuar zo lo tih i hriat kha", ka lu ka thing nar nar.


Ka khawngaih lutuk, kei hian buaina ka siamsak reng mai.


"I buaina ka nih hi", ka pian a hnu lama ka ṭah nasat ber a ni ang. "Ni lo e, ka buaina i ni lo. Tu buaina mah i ni lo bawk, ka sawi kha i la hria em? Puitling taka awmin, tu mah inhnuaichhiah tir lo la, tu mah hnuaichhiah hek suh.


Hrisel ṭha takin lo awm la, min ngai reng renga lo awm loin, âm takin i hun leh nî chhiarin lo hmang la, kei lo i thinlung lungdum i lo tawng ta a nih leh, Bawihi, lungchhe taka min thlah loin, nui chungin min lo thlah dawn nia. Mangṭha, ka thinlung kawltu".


A kal chu ka thlir ṭawk ṭawk!


Nu, ngati nge min kalsan? La awm ve ni la chuan, lungchhe taka ka ṭah a ngai lo tur. Ka thinlungin min kalsan lai ka thlir lo tur a ni a!


"Aw, ka pa, nang chu, hlimin zuang tawh rawh. I duhthusam a thleng tawh, i duhthusam i thlen dik tir ta e", kunin ka pa ke ka vuan a.


Mittuiin min bual a, ka taksa hmun tinah Kross-a tana luang mittuiin a luan a. Hul lai reng a awm lo.


"Hmeichhe thukhawchâng mai mai, i ṭhatna tur vek a nih hi. I pa aia i tana ṭha tur duh leh hria an awm lo. Tunah ṭap mah la, nakinah, tuna ka thiltih avang hian lawmthu min la hrilh zawk ang", ka pa chu a kalsawn a.


Ka ṭhutna ngaiah mittui nen ka la ṭhu. Tho turin chakna ka nei thlawt lo.


Ṭhutthleng ka ngheng a, biang a lum thla pap pap reng bawk. Ngaihtuahna bulfuk ka nei lo a, nichina thil thleng khan min la deng na em a ni!


Kha thil kha a thlen a ṭul lo, ka pa kaw chhungah eng thlarau nge lut ta?


Ama thua ti a ni chiah em? Nge ni a, tihtirtu ṭha tak a nei zawk?.


Tuna a thiltih avangin nakinah lawmthu ka la hrilh zawk ang maw? Ka tana ṭha tur a duh leh a hriat avangin Kross-a nen min pawt ṭhen maw?


Nu, ka nu duhtak, min la dampui ve reng ka va ti tak em?


Tichuan, tuna lungchhe vankaia ka ṭahna tur Kross-a ka tawng lo tur a nia le?


Nu, Vanramah i kal hma em a ni. Vanram i thlahlel leh lutuk a, min ngai ve ngai lo ang chiahin Vanramah i awm reng bawk si. Ka koh ka koh chung che pawhin, i hmel second khat tê pawh hmuh theih i ni tawh si lo!


I fanu hi min ngaihtuah ve lo em ni?


Lungchhe taka ka awm hi min kuangkuaha min thlamuan turin, khawngaihtakin Vanram aṭangin lo chhuk hrâm rawh.


"A u, pindanah kal ang aw",


"Kross-a kha, Duata". A bul aṭangin ka ṭap ṭha leh.


Ṭhingṭhit kher kha a ngai lo asin. Ṭhingṭhi lo mah se, a thinlung min pe takzet tih ka hria, ka hre lutuk.


Mawl lutuk, ṭhingṭhit kher a ngai lo.


"A u, pindanah kal ang", a darah min kuah tirin min thawhpui a. Ka nau chakzia ka hre thar.


Jerome-a rinchhan tak meuh meuhin ka ding. Mahse, ka tha a ṭhum zawh avangin ka tlu sawp leh niaih.


"Ka nu, inngaihzawntir mai mai tur chein ka sawi tam tawh lutuk. Kross-a chu eng ang pawhin lo haw(hua) mah la, Bawihi ngaihtuah turin ka hrilh che kha",


"A ṭhingṭhittir dawn tih ka hre bik hleinem",


"Duhtawk rawh u, au Bawihi hi pindanah min hruaipui rawh u. Inhnial reng ringawt mai. A u, intipachang la, pindanah kal ang".


Jerome-a chuan min dinpui leh a, Mambawihin min pui bawk.


Ka hma a thim khup, êng a awm lo reng reng. Ka pa hmaa Kross-a ṭhingṭhi lai chauh ka hmaah hmuh tur a awm.


Min khei ngawt ngawt.


A ṭhingṭhi lo pawh hetiang ka nih chuan, a ṭhingṭhitu phei chu. Engtin tak awm ang maw?


Kross-a, ka pa aiawhin ngaihdam ka dil a, min ngaidam mawlh mawlh rawh aw.


Nep min ti em? Tlaw min ti ngawt ang tiraw? Ka tan mualpho takin i awm a, ka ṭanpui thei si lo che a.


I tan hian ka tling lo zawk a ni e.


Ka kal thei tawh lo.chu ka tlu leh hnawk, "A u, intipachang hrâm teh",


"Duata, a na em a ni!", ka ti chhuak thei ṭawk. Ka kut pahnihin ka innemkhalh a, mittui chhuak tur nei loin ka ṭap khûr hlawk hlawk.


Kross-a chanah ka indah a, ka tih theih ngai loh tur a ni.

Ani erawh chuan a ti si!


Ngati nge a mawl em em? Ṭhingṭhi lo mah se, ka thlah ngai dawn si lo a.


"Mai mai chuan le, a va zahthlak em. Hmeichhia te te khatia i awm te chuan, tu mipa pawhin an zuam ang che. Zahawmna pakhat mah i nei nange? Tho vat rawh", ka pa chu ka en chho a.


A thinrim mitmeng ling hlar te chuan min tihlau loin, min tikhûr pha lo.


"Pa, ka zahawmna i kaltir ta si a, zahawmna chu ka nei lo tihna a ni mai lo em ni? Tlawm taka i siam ngeia hnenah ka thinlung a awm a, ka taksa hetah a awm thung. Thinlung leh taksa hmun khatah a awm loh chuan, ka pa, i fanu Bawihi i sûn mek a ni!".


Show post links
Top

[Ngaia]

Thinlungmawlpa
Chapter-20
Ziaktu: Cck Lalchhuanawmi


"Pa, ka zahawmna i kaltir ta si a, zahawmna chu ka nei lo tihna a ni mai lo em ni? Tlawm taka i siam ngeia hnenah ka thinlung a awm a, ka taksa hetah a awm thung. Thinlung leh taksa hmun khatah a awm loh chuan, ka pa, i fanu Bawihi i sûn mek a ni!".


Hmanhmawh takin step-ah ka tlan thla hlawk hlawk a, a inkalh!


A awm dawn tih ka rinnain min hneh em avanga zah dâwn loa kal ka ni a. Hmuh tur a awm si lo.


Khawiah nge a kal ang aw?


Phone ri chu chhângin, in neitu a lo ni a, "Chahbi min pein, be tur chein min ti a, bungrua ho la chhuak turin a ti che a ni", min lo ti a.


Hmanhmawh tak bawkin in neitute awmnaah ka tlan phei leh.


Anmahni awmna hi, luah tura an sak in aṭanga hla vak loah an awm a. Thlan tla phungin ka lut.


"Ka pu, a kalna awm tur te a sawi em?", âw khûr der derin ka han ti a.


Beiseina takmeuh meuhin ka ngaichang, a kalna awm tur tal hria ila, ka umzui hauh lo anga, ka lung erawh a dam thung dawn.


"Sawi tlat lo mai, bungrua chu in lak vat theih chuan a lawmawm ngawt ang, luah duh tur hian min lo be ve reng ṭhin si a", a han ti a.


Ka thin a rim hman dawn dawn, chutia tun tut tuta inlak chhuah pawh a chi dawn em ni le?


A ngaihah chuan a awm tho, awm tawh lo tur na na na chu, bungrua lak chhuah vat a ṭha zawk reng a ni.


Nutêi te bungrua an ni nawk hlawk bawk a, an inah kan dah leh vek. Ṭhutthleng ilo a lei hman lo te chu a lawmawm lehling.


Gas pawh nutêi te inah a awm.


Tukverh hawngin a biang nghengin, inkuangkuahin ka ding a. Nizana thil thleng vek kha a ni.


Ka muthilh miah loh avangin ka mit a thip deuh hlar a, ka mut erawh a chhuak chuang lo. A bûi deuh lûk a, ka lû lah a rit em em.


Ṭah chuan heti tlat hi a ni. Ka hriat theih ata ka ṭah nasat ṭum ber leh ka mittui tlak nasat ṭum ber a ni hial ang.


Chu pawh, mipa pakhat avangin!


Mipa avanga ka ṭah ka ring pha ngai lo a ni a, ka thinlung hneha kawltu tur phei chu ka rilru-ah ka la dah eih ngai lo.



Tunah, ka thinlung min hneha min kawlsaktu, mipa pakhat avangin ka ṭap a.
Mittuiin hul ni a nei ta lo. A kal aṭangin ni a liam a, kar a liam a, thla a liam zung zung bawk.
A ni telin ka ngai a, ka vei a, ka ṭahpui thul. Nui hmel put chu sawi loh, ka heh a chet hlek chuan khûr der derin ṭahin a zui nghal mai ṭhin.


Hetiang hi nimaw, thinlung kehsawm an lo tih ṭhin?


A ni em? Ka dik em? Hetiang hi a ni tiraw Thinlung kehsawm an lo tih ṭhin chu?


Ka dik lo a nih chuan, Thinlung kehsawm awmdan min lo hrilh rawh aw.


Ka awmdan hi sawia fiah mai chi a ni lo. Min tuarpuina thu lo sawi mah teh, ka lo hau zêk duh ang che.


A chhan chu a nat dan kei chauhin ka hria. Tawrh dan tur ka thiam lo mai chauh a ni.


"Kei pawhin ka lo tawng tawh alawm", tia min lo thlamuan tum mah la, nangmah zawk ka hua ang che.


I lo tuar ve tawh tih hriat ka duh lo, tawrh chhuah dan kawng lah hriat ka duh hek lo.


Ka hria, ka hre vek alawm. Mi zawng zawngin an tuar. A ṭhenin an tuar chhuak a, a ṭhen tuar chhuak zo loa nunna hial chhat mai pawh an awm.


Mahni nunna hial chhat ṭhinte kha ka lo nuih liam mai ṭhin a. Ka lo va â tak!


I thlamuan, i tuar a, i tuar chhuak tih i hrilh. "Nghak rawh", i ti a. A nghak, Beiseinain. Nitinin a nghak. I hrilh tlat avangin.


Mahse, a bulah awmin a kutah chelhin i dinpui em? Dinpui lo.


Kuangkuahin i thlamuan tak tak em? Thlamuan lo.


Thu chauh a ni, thu chauh. Thu chauhin a kutah i chelh a, thu chauhin i thlamuan.


Ka dik a ni. Thu chauhin kan ṭanpui a, thu chauhin kan thlamuan. Thu chauhin an kutah chelhin kan kalpui.


Chutiang a nih vangin mahni nunna chhat mai pawh a lo awl dawn mang e.


Nunna chhat loa mahnia tuar chhuak te, ka va awtin ka va han ngaisang tak che u em!


Ka bulah lo dingin lo awm la, ka kutah chelhin min dinpui la, min kuangkuahin min lo thlamuan zawk teh la aw.


Min ngaithla reng la, ngaihthlak, ngaithlatu a ni ka mamawh chu. Ka thinlung rum ri hre turin ka duh che a. Ka thiam ang anga ka thinlung natzia ka sawi min ngaihthlaksak turin ka duh che.


Ka ṭah chhan min hruaikirsak turin ka mamawh che.


Tichuan, mahni nunna chhat theihna hun pum pelhin, ka tuar chhuak ve mai tur!


Mahse, awm lo mah la ka tuar chhuak dawn.


I awih loh chuan min lo ngai reng rawh. Thutawp a siam lo. A siam tlat lo. Ngaichang reng turin min chah a nih kha.


Ka nêp ngawt mai tiraw?


Mi te chu, thutawp siamin, hliam reh thei lo tur hnutchhiahin an inkalsan a. Inphatsanna tenawm tak hmanga inṭhen te pawh an awm.


Chuti chunga tuar chhuak an awm a ni a.


Kei chu ka ni lo.


Min lo ngaichang rawh a ti.


Ka tihtur zawng chu, rinawm taka lo nghah a ni. A ni tiraw? Rinawm takin ka lo nghak ang.


A nemnghet tawh, kan chhungkaw hmaah a nemnghet tawh. Mualphona leh zah dâwn loin, ka tan, ka chhungte hmaah a intlakral ta a nih kha.


Khaw dang hawisan thei ka ni lo.


Mualpho taka siamtu te tan a Chhiahhlawh emaw, a Sal ni tur tal pawha atan ka lo rinawm ve a ngai a ni.


"Nui chungin min thlah ang che", a ti. Engvangin nge nui chungin ka thlah ang?


Ani lo, ka thinlung lungdum an awm leh tawh lo ang. Ka thinlung a kawl a, a kalpui daih alawm! A kalna pawh ka hriat loh hi.


Ka thinlung a kalbopui daih a, engtin nge lungdum ka tawn leh theih ang ni? Mawl reuh lutuk.


Intlakralna thama ṭha leh duhawm ka ni si lo. Chuti chungin a intlakral tho a.


Kross-a, khawvel êng hmu tura a insiam ṭan reng aṭangin paihbo tum a ni a. Harsatna tam tak paltlanga a lo pian chhuah hnu pawhin tihhrehawm a hlawh tho si.


Chuta karah, kei, fahrah ve mai tan mualpho leh zahthlak tawpthang, mi zawng zawng tih theih loh tur, a thinlung min pe tih lantir nan kan chhungkaw hmaah a ṭhingṭhi a ni a!


A va han na tak em!


Chung chu ka phu lo, phu lo pawh ni loin, ka dawn atana mawi lo a ni.


Mahse, ka tan Kross-a chuan a ti!


Khum bulah ṭhingṭhiin, "Isu, hmâna Kross-a i hruai angin hruai leh ang che. Pan duhna che thinlung i lo put tir tawh ang kha, put nawntir leh la. Khawngaihtakin, tun ṭumah chuan, i lam lo hawi tawh rawh se aw. Kross-a mualpho taka ka tan i intlakral anga, keimah avanga mualpho taka intlakraltu Kross-a, nang leh keia Kross-a kha, i hum tlat ang aw".


********


Jerome-a Hostel awm tum pawh ṭhulh a duh a, kan inhrilh nasa mai.


"Ka hmuh phak loah i awm dawn a, ngaihngam takin ka kal thei lo. Heti pui hi i ni roh si a, ṭahbelh si", games khel mual mual chungin a ti a.


Ṭahbelh min ti chu, ka la na deuh tlat zu nia!


Vui thei lah ka ni azeng pawh a ni lo, chu loah, ka ṭap lai min nang thei ve hrim hrim.


Jerome-a bawk chuan, "School kan kal ṭan leh tawh a, Hostel dorm a khat vek tawh, khum pakhat chu a awl reng tho nain ka duh ta lo a nih kha", a ti leh nuap nuap a.


Headphones vuahin computer-ah games a khel a, ML a ti emawni?


"Khum chu a la awl em?",


"Awl e, mahse, ka duh lo. Ka kalsan thei lo che", a hnunga inhung ṭhutthlengah ka ṭhu a. Chuti chungin a hmela lungngaihna lang ka hmu thei nia!


Khami zana thil thleng kha a hre vek atin ni. Amah hi nia, min ngaihtuahtu ber chu.


"Tunah te chuan, ka ṭhat tawh em hi. Khum a la awl a nih chuan va lut rawh. Chubakah, in ai chuan i rilru i sawrbing thei zawk dawn a, ka duhpui che", ka ti dek dek a, "I lo tlanbo ang tih ka hlau alawm", a ti chu, za vak loin ka nui.


Jerome-a lah chuan, "Nui suh, tak tak alawm. I lo tlanbo daih ang tihte nia ka hlauh. Hostel-a ka awm chuan min lo tlawh ziah turin ka duh dawn che a, chuti a nih loh chuan, min tlanbosan angah ka ngai dawn a. I awm loh chuan nuam ka ti lo", games khel chungin a ṭawng charh charh.


Games khel chunga ṭawng a thiam zawk a nia.


A zirlaiah awmin an zir pawh ni si lo, games khelh chunga han ṭawng zuah zuah.


Ngaihna awm hlawllo ni e.


Remchangah ka la hlauh thung, "Inah i awm chuan computer i chuh a, lehkha zir ngaihsak loin games i khel char char a. Exam naah pawh i tihchhiat em kha, i pass ṭawk a ni ber. Lehkha zira bur chat tura ka hrilh ve che pawhin, ka pa ten an lo ṭan zel che si a. Kan zavaia ṭang tlang chu ni ila, Hostel-a i awm.pawh ngai ka ti lo", ka ti duah a.


A inngaihtuah a ni ang chu, a games khel a muang deuh ruih.


Lehkha zir ṭha tura ka han hrilh deuh hian, ka nuin a lo sawi nawi ziah. Kan ṭang tlang lo a, Jerome-a tan pawh hian a hahthlak ang.


Hostel-ah awm loin, in aṭang ngeia School kalin, inah duhtawkin lehkha zir se tih ka duh.


Ka hmuh phak loa awm turin ka duh bik lo.


Chhungkua hian a zir lo em a, Hostel-a a awm ka duhsak zawk ta a ni.


A hnuah, "Ka lo inngaihtuah dawn nia, naktukah kan sawi ṭha leh dawn nia", a ti ta a.


Thoin a hnung aṭangin ka kuah a, "Duata, min ngaidam rawh aw. Ka tlaw em a ni. Ka nuṭa neihchhun leh innghahna tur i ni a, chumi hrethiam loa min bosan ka hlau a ni. Kan chhungkaw boruak lah, heti a ni zo ta si a. Mahse, i duh loh chung chu ka tir lui dawn lo che nia aw".


Jerome-a pindan aṭanga ka chhuah rualin, kawngka a lo ri a.


Lo kal tur ka hria, ka hrilh zin tawh nen, ka khamin ka hne hluah hluah.


Nutêi chenin an be ṭha a, ani lahin min chhâi thluk a tum ruh ngei bawk. Alex-a avangin kan chhungkua an inlungrual.


Dâwt a ni lo, nutêin ka pa a huat ṭhin tehreng nen, Alex-a avangin an inbe ṭha hawr hawr thei a nia.


An buaina thlentu chu kei bawk ka ni.


Min phih thlu thei ngai dawn si lo a, Kross-a tan ka ti tawh a. A tan ka ti fo ang.


Kawngka ka va hawnsak tho, "Mikhual kan thleng thei lo tlat", ka ti fiam a. Fiam pawh ka ni lo, ka hmu ning hluah hluah.



Ngampa takin a lo lut hmiah, "Thingpui no khat tal chu min intir phal ang chu tiraw?", a han ti a.


Ṭhutnaah a va ṭhu fel thân.


Alex-a thawm hi a ring a, pindan aṭangin nui sâng chungin ka nu leh pa an lo chhuak.


Saw tiang sawn Kross-a kha lo ti ve se, tun thlenga ka huat a ngai lo tur.


Ka tihdan ngai bawkin, "Zirlai ka la ni si a, lehkha ka han zir leh phawt ang e", nui lui sakin ka kalsan vang vang.


Tikhan, inkawm leh dial dial sela, min rel leh char char mai rawh se.


Nakin lawkah ka nuin kawngka kikin, "Inlêngte an bikbosan ngai lo, lo chhuak vat rawh", min lo ti anga.


Nutêin phone aṭangin, "Bawihi, Alex-a a lo lêng em? Ṭha takin lo be rawh aw, amah nei tuma zîm huai huaitu an kat nuk laiin, in inah a lo kal ziah a, lo be ṭha hle rawh", a lo ti anga.b


Chungte avangin ka nêm phah dawn si lo.


"Test tur kan nei", ti leh hmukin ka chhuak duh lo anga. Pindanah ka inkhung char char tho ang.


Hetianga ka awm reng chuan Alex-a pawh a tlawm mai ka ring a. Mahse, hei, kum khat chu a chuang der nia.


A tlawm hma chu, mar patin ka ṭang dawn.


Chhungte an inluangrual a, Alex-a lahin a tilawm thiam si. Ka vanneih asiamin Jerome-an a ngai thei lo hlauh.


"An hausakna leh a SI nihna a chhuang em mai", Jerome-an a ti bul hmuk zel.


Mambawihi erawh chu, Modelling lamah kal a tum a, a indiet nasain, exercise a la nasaa. Alex-a chu tu nge pawh a hre lo.


Ani pawh hian, "I patêa tei vet ninawm dan saw, Model chu an chuti khati ti reng mai. Ka ning lutuk", lungni lo takin a ti lung lung zel.


Patêa ka hau duh lem lo, a chantawk a ni mai.


"Kross-a, lo kir vat teh", ti neuh neuh chungin tukverhah ka dak chhuak a.


A lo kal turah ka ngai ziah, hetia tukverha ka dah chhuah hian lei aṭanga min lo thlir turah ka ngai ziah ṭhin bawk a.


Kross-a ang deuh hi ka hmu nawlh zel bawk, fiah lahin an lo ni ngai si lo.


Lung hi a zing muai muai zel.


Phone a lo rik rualin, "Bawihi?", ka nuin kawngka a lo kik.


Ka nin dan chu pui tak a ni. College Hostel a nih loh pawhin Private Hostel-ah te hian ka awm daih dawn mawni.


Nge ni a, Alex-a hi ka ngaizawng dawn?.


Ka kham hluah hluah, thlamuang takin min awmtir thei lo.


Show post links
Top

[Ngaia]

Thinlungmawlpa
Chapter-21
Ziaktu: Cck Lalchhuanawmi


Ka kham hluah hluah, thlamuang takin min awmtir thei lo.


"A u, Hostel-ah chuan ka awm dawn",


"Tak tak maw?", ringlo zetin ka han melh khâ khâ, "Tak tak e, khapa kha ka hne, ka luak a pawt", a ti ve hmiah hmiah.


A sawi awma mawi pawh ni lo a sawi hmiah hmiah tawh chu a nia.


Chhungkaw boruakin zir se chu, khatiang ṭawngkam a sawi chhuak miah lo ang mawle.


Chaw ei laiin ka pa bulah ka sawipui a, ka nuin a phal lo nasa lutuk. "Chutiang a ngai lo, Hostel-a awm turin Thingtlanga awm pawh kan ni lo. In aṭanga kal theih reng, a hla deuh a ni mai a, chutiang ka phal reng reng lo", ka nuin a duh loh thu a tlangaupui nasa lutuk.


Jerome-an, "Ka awm duh, inah ka awm peih lo-", a ti chu, a rukin ka mitmei vat a, "In aṭanga kalin pawisa a hek mai mai", a ti ta zawk a.


"Tuin nge maw, Hostel kawhhmuh che ni? A ṭul lo thei em mai", ka nuin min tihchhan kherin a ṭawng a.



Jerome-a ṭawng hmain, "Keimahin ka kawhhmuh a nih kha, inah chuan lehkha a zir ṭha thei lo. Pindanah phone leh computer a nei a, duhtawkin games a khel thei. A lehkha zir ngaipawimawh zawk tura ka hrilh ve ṭhin pawhin in lo ṭan zel a.


Pâwl pawh a sawn thei chang chang a nih hi. Inah chuan a zir ṭha thei lo. Hostel-ah awm se, a ṭha", ka nu en ranin ka ti vei hmiah a.


Ka nu ngaihdan a ni lo lutuk, "Mahse, Bawihi, i nu sawi pawh a dik tho, in aṭangin a zir thei alawm, in a nei reng a. Games khelhin a tihbuai chuan i pindanah kan sawn anga, phone pawh a khawih hun tur bi kan siamsak thei alawm", ka pa a lo inrawlh.


A duhnaah chuan a fing a nia aw.


"Hostel-ah a awm tho ang, remti lo mah ula, keimah hian ka dah dawn. Fee pawh ka chawi vek mai ang", ka tho nalh.


Jerome-an, "Hostel-a awm ka duh hrim hrim, a uin min kawhhmuh vang pawh ni lo. Keimah zawk hian Hostel-a awm ka duh", a ti sek sek.a.


Ka nu lungni lo chu, hmu kher lo mah ila, chiang takin ka mitthlaah a lang thei.


Alex-a awm lai chauhin min be ṭha, lemchan a thiam thei nia!


College kal tura ka inpeih fel hnua, Jerome-a pindan ka kal pelh dawnin,,"Bawihin Hostel-a awm turin a nawrlui che nge nawrlui lo che?", ka nu âwah chuan, min huatna nasa tak a lang.


Jerome-an, "Nu, engkimah a u puh ziah suh. Hostel-a awm ka duh chhan tak chu au Bawihi khawhar hmel hi hmuh hrehawm ka ti. U Kross-a chunga i thiltih reng reng te kha, ka chungah pawh i ti ve lo ang tih tu nge sawi thei?", awmhmunah ka lo insangmar.


Ka nuin a bêng ang tih ka hlau.


"I uin a dâwi â zo ta che nih hi, tuin nge mahni fapa te tiduhdah ngai? Thu in awih loh te chuan kan hau ang che u chu. In ṭhatna tur kan duh vangin, nu leh pa te chuan fa te kan hau ṭhin alawm", ka nu insawithiamna chuan ka nuih a tiza.


Jerome-a lahin, "U Kross-a kha, thuawih hmel thei tak a ni. Tihsual a neih ngaiin ka ring lo. Khami zanah ka awm ve reng kha. Hriat loh ka nei mang lo. Hostel-ah chuan ka awm duh a ni mai", a ti tawh mai sia.


Ka pindanah ka lêt ringawt.


Jerome-a rilru hruai suala a awm loh ka beisei. A la naupang si a, hetiang boruak tawng thut a ni bawk nen.


A chi-ai dawn tih chu hriat sa, chuvang chuan Hostel-a a awm ka duhpui ni.


Chuti ni loa ina a awm reng chuan, ka nu te nen kan inmil tawh loin, thuruk tam tak hailanin a awm tawh si a, lehkha a zir ṭha thei dawn lo a, games-ah a bur ngar ngar dawn tlat.


Jerome-a leh ka pa an kal fel nia ka hriatah ka chhuak chauh.


Ka nuin Jerome-a a hnial phal dawn lo tih ka hre bawk. Ka pa bulah pawh a sawi anga, Hostel-ah a awm em em ang.


"Bawihi, i zir nasa tawh em?",


"Mahni tawkah zir nasa ve khawp mai", ka ti liam puat a. U Malawma a kiai sak.


"Dhoi ei ang, ka treat ang che",


"Leina tur ka nei ve tho, a zahthlak", ka ti ṭalh a. Chuti chungin min leisak tho.


Kross-an ice cream min leisak lai ka hre chhuak. Kha hun kha koh kir leh theih ka va duh tak.


"Eng nge i ngaihtuah vung vung a?",


"Thil ho mai mai", ngaihsam zetin ka ti a. "Ho mai mai hi in ti a, in han sawi lah hian a lo ho tawp nasa thei si", nin hmel zet hian a ti ne ne a.


"Kei chu chutiang ka ni lo, ho ka tih chuan a ho a ni mai", a awih lo nasa lutuk.


U Malawman, "Kan inhmu remchang chu a zia e, hrilh tur che ka neih avanga in bân hun lo châng ka nia", a han ti a.


"Thingpui dawrah lut ila", a ti nghal zat. Thingpui dawr kan hmaah tak a awm bawk a.


"A tlai tawh e, tihian sawi ta mai che", ka tur te pawh a ang zawk.


U Malawman, "Mak thei em mai, khawlaia sawi chi a ni lo. I hmanhmawh hmel si, zanah ka lo bia ang che. Saw, taxi", a kut a phar a.


Kan hmaah taxi a ding.


"Zanah ka lo be dawn che a nia, lehkha zir hmain", a ti leh.


A Graduate tawh a, a nuam awm bik hi ka ti alawm. Thingtlanga Zirtirtu hna a hmu an ti tlatin ka hria.


Mi ai kal tur an ti zawk mawni?


Zirtirtu ni tur chuam Training leh exam ilo te kha a ngai vein ka hria.


Min lo be tak tak, lehkha zir hma tak takin, Alex-a hnen aṭangin ka kalsawn theih phah bawk. Ka lawm asin.


Tukverhah ka ṭhu a, "Bawihi, lehkha i la zir lo tiraw?",


"Zir ṭep, min lo be dawn tih i sawi a, ka nghak che", a nui tat tat. Nuihzatthlak ka sawi tawp si lo.


Thu ho mai mai kan sawi fe hnuah, "Min hrilh tur chu sawi tawh rawh, lehkha zir a hun mai dawn", ka han ti a.


Âw thian kharhin, "Thingtlangah Zirtirtu pakhat ai ka kal dawn a, hlawh insem turin. Middle School a ni a, SS Zirtirtuin ka va awm ve dawn a nih chu", a han ti a.


"Chu chu maw min hrilh tur, a va ho tak. Tlaia kan inhmuh khan a sawi theih reng si a",


"Nia, aaa, ka hmuh tawh che hi chuan sawi tur ka haihchham tlat zel a", huiha, awihawmlo thei lutuk.


"Engtikah nge i kal dawn?",


"Naktukah, chuvang nia tlaiah pawh ka lo hmuh hram hram che",


"Ka va lawm tak, Senior aṭangin ngaihpawimawh ka ni ve a", ka ti thlarawk a.


Min ngaipawimawha chutia min hmu tura a lo kal chu a lawmawm khat tlat.


U Malawma chuan, "Ni mai rawh se, lehkha zir tawh rawh", a ti ta a. Tluang taka a kal theih nan duhsakna ka hlan mawlh mawlh.


A tukah, ka nu leh pa te nen School-ah kalin, Jerome-a tan Hostel-ah hmun ruak kan dilsak a.


Ka nu phei chu a la lungawi lo, "A u hian ka tum vek ang a ti tlat si a", a ti nghe nghe.v


Hmun ruak min siamsak a, ka nu sawi ang takin fee chawi tur zawng zawng ka chawi vek.


Panhnah sil aṭangin ka hlawh hnemin ka khawl tam hman tlat a ni.


Jerome-a ka bszarpui a, "A u, a nuin a ṭawngkhum che pawhin i diknaah chuan ngawi tawh suh, i thiamthu sawi pawp pawp rawh", min ti roh a.


Ka ngaih naupan aiin a puitling daih.


A dara kuah pahin, "Duata, ka thiamthu pawh ka sawi zuah zuah chian a hma zawng aiin inchhung boruak a chhia a ni mai. Ngawi zawka ka ṭan hian a fel ber mai", ka ti sep sep a.


"Lehkha zir chauh ngaihtuah la, in lam chu chhete pawhin lo ngai suh. Ngaihtlak tu mah kan awm loh hi", ka fuih sauh sauh.


Ka fuih dan zozai hi a dik ber em ka hre lo.


A chunga ka innghah nasatzia ka hrilh chamchi a, hei hian amahah nghawng ṭha lo tak a nei lo amg chu a?


Zanah, a thawmhnaw tihfelpui pahin, "Duata, ka innghahna i ni ka tih avang kham chu ngawt ngaihsak lo la. I tuina lam lamah kal la, chumi tur erawh chuan lehkha zir hi a ṭangkai a nia aw", ka ṭawngkam thiamnain min daih lo.


A hriatthiam thu min hrilh ve nasa mai.


Kan chhungin Hostel-ah kan thlah a, ka thaw a veng sawt.


Tikha chuan, inah eng boruak pawh awm se, Jerome-a a awm tawh lo a, duh dan danin ka hip ral thei tawh ang.


Kei pawh, lehkha zirah ka bur a. Graduate hnua thawh nghal mai theih tur ka melh ru reng bawk.


Panhnah silin ka inhlawh reng bawk a, kuhva kan lo duh hlawm dan hi aw!


Mambawihi pawh, a kal tumna, Modelling a la tifuh hleithei lo.


Engtin tin emaw chuan dawr fakna turah an lo sawm ve ṭhin a. Chu chuan eng teh ual a thlen bawk si lo.


Runway Fashion Show pangngaiah a tel pha ṭhin lo a, an College tihpui nia a inlan hi a ni deuh ber mai.


Chuti chungin a tum a tiruh tlat a, a indiet nasain, Gym-ah a kal ziah.


Kei mah hi ka lo hah ṭhin.


Nutêin an inah min ko a, "Bawihi, kum hnih lai a liam tawh hi. Lo inlan tur chu nise a lo lang daih tawh ang. Alex-a hi khawngaih ve tawh em em la", a ti leh heuh heuh a.


Ngawi rengin tv ka en, a beidawng duh chuang lo, a ai nasain Alex-a a fak a. Patêa leh Nanaua te lo haw thuai thuai se ka duh.


Nutêi bawk chuan, "Kross-a chu theihnghilh tawh rawh. En teh, thil pakhat hrilh tur che ka nei, finfiahna pawh ka nei thlap", a phone a phawrh a.


Eng tak min hmuh ang maw tih nak laiin, rang lutukin nutêi phone chu ka chuh.


A ni thei lo ang, Kross-a a ni thei lo.


"I hmu em? Nuthlawi zu zuar a luhkhung a, chhum lo chat loa a ruih mai mai tak kha. A thinlung a pe hlawllo che a ni. I chiang tawh em?", nutêi thusawi chu awih tur nge awih loh tur?


"Kross-a a ni lo", ka ti sep.


Min tina lutuk. Chatthla mai mai tur atan ka ringlo. Ka phal lo bawk. Amah a ni thei lo.


Ka bula tawlh hrut hrutin, "Alex-a pawhin a lam i hawi hun a nghak ngat ngat che a, i nghah ber hetia a awm takah, nun thar hmang turin inpuahchah ve tawh rawh.


Thlalak ka zoom kual a, Kross-a a nih loh dan tur ka zawng ngat ngat.


Kross-a hetiangin a awm thei lo.


A taksaah a inchulh mai chauh zawk ṭhin a nih kha. Chu pawh, a inhlawhna aṭanga a thawh chhuah tlem azawng a chan theih nan.


Zu mana a hmanral an rina, a dahṭhat zel ang khan.


Chutiang chu a ni a, chatthlain a awm mai mai hauh lo ang. Nuthlawi zu zuar luhkhung maw?


A teuhin a hnai lo. A luhkhung tawp lo ang.


Ngun taka thlalak ka en kual hrep hnu pawhin, Kross-a ngei chu a ni si amaw!


Ka biang a lum thla pap pap. Amah ngei chu a ni!


A hmaifang te, a hnar ngul leh heh awm dan te, a khabe ruh kual dan leh, a lû um zawng zawng.


Kross-a ngei chu a ni!


"Bawihi, i tana ṭha tur duh tu mah an awm lo. Keini i chhungte hi kan ni. Alex-a hian a duh em em che a, nupuia neih hial che pawh a hnial lo. Han nei ngat la maw, hnathawh i ngai lo ang. Inah i awm anga, inchhungkhur chet pawh i tih a ngai dawn lo.


Awmpui an nei thlap, fiamthu angin i tihtur awm chhun chu pawisa chhiar a ni tawh mai. Thawmhnaw class tak tak i inbel anga. SI aṭanga Alex-a a kaisan hunah phei chuan, Police hoin an veng dawn che a ni a. Bawihi, i nawm dan tur chu e, i hma hun ngaithiam rawh", nutêi chu ṭawng tam ka ti mai mai khawp a.


Ṭim hrep ka duh.


Kross-a thlalak te hi engtin nge a neih theih?


"Phone chu khawi maw? A luhkhungnu hi Police-in an man a, chuta ṭanga nei thei ka nih hi. Alex-a pawhin tu nge a nih a hre tawh",


"Khawiah nge a awm?", nutêi a phu zuk. Ka âw a chang em a ni.


Thâw dêp dêpin, "A awmna min hrilh rawh", ka âw a nem tawh.


Nutêin, "Ka hre mai bik lo, Station-a ka chhar a nih ni. Hria pawh ni ila ka sawi lo ang. Bawihi, harh chhuak tawh rawh", min hau zêk.


Tho tharhin ka chhuak nal nal, "Bawihi?", nutêin min kohna chhâng loin ka hawi duh lo bawk.


Khatiang thlalak te chu, a siam chawp theih. Thiamna a sang tawh.


Zu rui chatthla lû-ah Kross-a an vuah anga, chu pawh a ni thei.


Chutiang turin Kross-a thlalak tu mahin kan neih awm ka hre si lo.


Thlalakah khan engmah hre lo tih hriat takin a mit a chhing a. A muhil lai kei chauhin ka la hmu.


Nge ni a, an ina a awm laiin Nutêin a rukin a muthilh lai thla a laksak dawn nimaw?


Chutiang a tih duh ka ring si lo.


"Kross-a, i ni lo tiraw?", kawngsirah ka ṭhu tawp.


A tem pawh tem chhin loin, nuthlawi zu zuar a luhkhung lo tawp ang. Thlalak erawh, amah ngei chu a ni si!


"Au Bawih, pa, au Bawihi", ka hawi chhuak a. Phe ruaiin Nanauan min lo pan lai ka hmu.


A tlanin a lo tlan a, Lays sawmhnih man chi a zakzeh ngei.


Min kuah chawt a, "Nangmah i ni tak tak", a nui sun sun a. Tetea pawhin min kuah.


Jerome-a awm lo pawh nise, ka nuṭa pahnih te hian min la thlamuan e.


Patêan, "I nutêin eng thu nge a lo hrilh leh tak che a?",


"Kross-a thlalak min hmuh a?",


"I ring em?", patêa pawhin a ring chiah lo. Ka rin loh thu ka sawi a, "I nutêi hi a mak sawt khawp mai, i hre lo anga, inhauh zeuh zeuh kan ching chho. Alex-a a sawi chamchi a, phone-ah lah an inbe reng zel bawk.


Ka hrethiam tawh lo, Alex-a lah, ka nau a nih amgin ka hrilh ṭhin a, "Bawihi min tihpui alawm", a ti tlat bawk si. I nutêi nen an inbe reng hi ka duh lo khawp mai", patêa mangang âw a hriat theih.


Patêa bawkin, "Chhuanlamah an hmang tawh che ni berin ka hre tawh. Ka u nupui pawh ka sawipui tawh, an inṭan ṭham hlawm lehnghal a. A buaithlak khawp mai", lungawilo takin a ti tawi hmuk hmuk a.


"Patê, pawi ka ti khawp mai. Kei mah thiam loh vek a ni",


"I thiam lohna a awm lo, i nutêi harh chhuah theih nan eng emaw ka tih a ngai a ni mai. I chungchang rel tura inhmu tura an la chhuak lo hi a lawmawm. Ka ringhlel ngam lo nain, mahse, Bawihi, i nutêi leh ka nau hian chhuanlamah an hmang che ni berin ka hria".


Patêa leh Nanaua te ka thlir liam a.


Nutêi leh patêa hian kum sawmthumpanga an la pel lo ve ve. Kum sawmthum bawr awr chauh an la niin ka hria.


Ka hresual mai thei bawk.


Nutêi leh patêa te hi, an unau zinga naupang ber ve ve an ni a. Ka nu pawhin nutêi a duat thei lutuk.


An pahnihin intuaihnum peih ve ve an ni bawk a, kum sawmthum hmel pu lo an ang mah a ni.


Patêan Alex-a leh Nutêi ten chhuanlama min hmanga an inbiak ṭhin a sawi chuan, min inthlahrun tir a.


Kross-a mah, buaina ka siam tawh nen, patêa lehzel tan buaina ka thlensak leh a ni hawt alawm.


Tu te tan pawh hian buaina thlentu ka ni bik ziah. Ka nun hi ka ning!


Zan khaw rei sawi loin panhnah ka sil a. Kross-a thlalak ka hmuh khan min tibuai. A ni lo tia ṭan a theih ngawt loh.


A pumrua leh hmel awmdan te chu ka hrechiang ve tawk.


Siam chawp a ni lo, amah ngei a ni. Khawi hmunah tak hian nge a awm ang?


Chatthla mai mai atan chuan ka phal lo asin le!


Ruin a thla lo laksak reng reng. Nutêi leh Alex-a te ṭang dunin a duh loh chung an laksak te hi a ni ang a?


Chutiang chu ni hlauh se, "Nu, nutêi hi lo hrilh ve teh, a sual tawh lutuk".


"Zan a rei tawh hi, dah tawh rawh. A pawisa duh thlak em mai",


"Lo va mu rawh",


"Khatiang mi laktlak lo ngaihtuah kha duhtawk rawh. I tel loa a awm thei lo a nih chuan a lo hruai tawh ang che. A nu aṭangin a hriat, nawmchen bak an thupui lo", Mambawihi chu ka melh chho a.


Melh hriam tak ka ni.


A ṭawng dan lah hi, "A nu angin a awm dawn hleinem",


"Nu leh pa te chu kan chhun vek alawm, an mizia ṭha lo kan la vek. Ani pawh, a nu a tenawm a, a nu mize ṭha lo a kai dawn tih chiang sa. Natna ṭha lo veiin a lo pan ngei ngei ang che", Mambawihi chu fridge hawngin tui a la chhuak a.


"Ngawi hmak rawh", a sam pawh kawlh ka châk lutuk.


Tui a in a, "Amah avangin i la ṭap leh ta nghal, zahpuiawm lutuk. A hur kual mai mai zawhah a lo pan che anga,,nangin thianghlima ngaiin i lo pawm leh anga. I nu mizia a hriat, i dawihin i chak lo a, midang rinchhan reng renga nung chatuan tur i ni", ka tho lawk a.


A samah ka kek, "I thusawi kha i hre chiang maw? Tu maw dawiha chak lo chu? ",


"Min thlah rawh", ka sam keh tumin a inphar kual a.


Min kek thei chuang lo, thlah mai ka tum lo bawk. Ka nu, mi chak lo tiin a sawi. Ani pawh hi eng a ni bik lo.


A nu hi eng nge a nih bik?


"Min thlah rawh",


"Ka thlah lo ang che. Mi chak lo tiin ka nu i sawi a. I tidik, ka nu mizia ka pu. I nu mize ṭha lo i put aiin, mi chak lo tia i sawi ka nu mizia ka pu hi a ṭha zawk", a alh hian ka alh.


Mi Dawihzep ka ni lo a, mi chak lo lah ka ni hek lo.


Ka ngawih mai mai avanga zuam chi ka ni hek lo. Hei leh chen ka lo ngawih tawh ṭhin avanga tun thlenga la cheng ho thei kan ni.


"Bawihi, engtizia nge? Thlah rawh", ka pain min pawt leng lawp.


Mambawihi lû a thur bum mai. Arbawm ang chiah chiah.


Ka pain, "Eng nge thil awmzia? Unau in nih hi, unau an insual ngai lo, an ṭang tlang ngai", ti mah se, unau angin min en ngai hleinem.


Ka nuin min ṭawngkhum a duh zia chu, ka pa a awm avangin a insum mai mai a ni.


Hau na tawk lo min ti nge, a tuk chaw ei naah, ka pain min zilh hrep. Zanah ka nuin a hmin fel der tih chu, kan ina Fanghmir lo kal te pawhin an man thiam ang.


Ngawih reng ka thei ta lo, "Pa, Kross-a kha ka nu nau fapa tih i hria. Khami zan khan hrilh che a tum a, mahse, nangin sawi thei loah i siam a nih kha",


"Bawihi, chaw ei laiin an sawi ngai lo. Chaw ei fel phawta sawi chi", ka nuin a ti vat.b


Ka beng ka chhû ngawng lui, "Pa, khatianga inṭhingṭhit tir kher kha a ṭul lo. Inṭhen tura min duh a nih chuanin, "Cousin in ni a", ti ang zawng pawhin a sawi theih. Kross-a khan Mambawihi te nen chhungkua an nihzia i hnena sawi a hreh em em asin", tu mah chaw ei kan awm lo.


Kan chaw thlêng kan vuan ṭai ṭai.


"Mahse, nang chuan i lo hre tawh a. Thinrim awm taka ngaihah i thinrim loa, thinrim lohna turah a thinrim lawi si.


Kross-a khan a sawi ang takin a tuar nasa asin. A chungchang mawilo taka in sawi leh chuan, ka mize in hriat ngai loh in hre chho zut mai ang", thlêng chawiin ka tho hmak.


Chaw eina tihfel ka tum lo.


Insiam zung zungin ka chhuak daih. Chaw eina seng fel ka tum lo.


Show post links
Top

[Ngaia]

Thinlungmawlpa
Chapter-22
Ziaktu: Cck Lalchhuanawmi


Insiam zung zungin ka chhuak daih. Chaw eina seng fel ka tum lo.


Min rel nasa ngawt ang.


Library-ah ka tawm a, ka tawmna hmun a ni tawh. Bengchhen phal a ni lo a, ka tan hian a ṭha takzet.


Ka thinrimna a la dai thei lo. Ngaihtuah chian poh leh ka alh zual ting hi a ni ringawt.


Nutêi te, tu te pawh, lam ṭang reng nei loa ka inngaihna a lian tawlh tawlh a. Khawvel aṭang hian ka bo ni maiin ka hre tawh.


Ka awmdan sawithiam har ka ti a, ka bing muai muai.


Nunphung hloh ka inti duh si lo, hloh angin ka awm chu a ni mai si. Thluak hnathawh chawlh tum ngawt theih ni si lo, chawlh tir tum poh leh, hna a thawk nasa ting mai zel si.


Mihring nih hrim hrim pawh hi a huatthlalain, a khamawm.


"A u, i va han cher em em. Chaw i ei ngai lo em ni?",


"Ei ngai e, i ei ṭha zawk em?", chau zet hian ka han ti a. Men pawh ka meng peih chang chang a ni a. Ṭawng phei chu, a châkin ka châk lo.


Jerome-an min en vung vung a, min en vung vung ṭhintu kha min ti ngaiin, min tilungchhe dawn dawn.


Amah vêk chuan, "Chaw ei ṭha la, mut ṭhat tum bawk rawh", tiin, min fuih nasa mai a.


Hostel-a a awm hi lawmna a zual tual tual. Inah awm se chu, games bakah, keiniin lehkha zira a rilru a sawrbing theih lohna turin bengchheng kan siam ṭhin nen.


"Harsatna i neih chuan min lo be ṭhin la aw. Lehkha zir chauh ngaihsak la, Board exam in hmachhawn tawh mai dawn si a", ka ti luam a.b


Thuawih takin a bu nghat nghat.


Hostel aṭanga ka chhuah hnuin, bazarah ka kawi a.

Ice cream ka kal pel hleithei ṭhin lo. Ka pu lahin, "In vâng dun e, Taivang ang mai", a ti ṭhin a.


Chhân ngaihna ka hre lo hi, ka nui tawp zel.


Mang niaih nuaihin tukverh bulah ka ṭhu a, thi daih ila nun a nuam zawk mai thei a ni!


Mambawihi laka ka inthiam lohnain min hneh em em bawk a, nutêi thu min hrilh tawh akara khatianga a ṭawng khan min tialh phut a, ka insûm hman lo a ni.


Tu te mai tan pawha buaina ka ni fai vek a nih hi!


"Bawihi, Alex-a a lo lêng", ka nuin kawngka a lo kik a.


Phone a lo rik loh danah, patêan nutêi a hau deuh tawh a ni ang. Phone pawh keng chhuak loin ka chhuak a.


Ka pain, "Lo inkawm rawh u, hna en fel tur ka nei lawk a", ka nu nen an kalbo a.


Zanin chu, ina awm ka peih tlat lo.


Ngei hle mah ila, Alex-a hnenah lêng chhuak turin ka sâwm a. Mi pawh hnial loin kan inphur chhuak.


A hna thawh chungchangte, hahthlak a tih ve ṭhinzia te leh, ina a haw changa lo hmuaktu tur nupui a duh ṭhinzia te a sawi dur dur a.


Bengkhawn lem hlei loin darthlalang tihniamin pawn lam bengchheng ka ngaihsak daih.


"In tur leina tur i hria em?", ka ti mauh mai pek a. A ding chawt a, hmalamah ka intauh ṭhelh.


"Kan inah ka kawl reng alawm", lawm hmel tak hian a ti mai a. "Kal ila", phur sur surin a tlan leh thuai.


An in kawtah a ding a, kan in aiin a lian. A chhungte tu mah an awm lo a, tleirawl pakhat hian Thingba kawr a lo vel mial mial ka hmu chu, min tikhûr!


Alex-an, "Mawipui, a va tui leh dawn ve, khawmaw, pathum min lo pe teh", khi ṭhaw chungin a ti a.


Mawipuii pawhin a pe ve mai.


"Bawihi, lo kal rawh", Thingba kawr vel sa pathum nen in chungah kan chho a. Ram dang in ang mai a ni.


Nutêi sawi kha, Alex-a nupui nih chu, nawmna hlir a nih ngei dawn hi!


A pindan pawh a zau ṭha ngiang, a jacket hak phelhin a khainaah a khai thlap.


Ka hawi kual a, bungraw changkang tak tak vek a ni.


"Bawihi, lo kal la", ka va kal a. Mini cooler hawngin, Beer chi hrang hrang leh, in tur apui a tam nangiang mai.


"Eng ber hi nge i duh? Wine, Juice, Local, Rum, i duh duh thlang rawh", a ṭhuhniam chu kiai sakin min lo en chho a.


Thlan ber tur ka hre lo.b


"Beer kha nise, e, lawkin, wine zawk kha", ka ti tak naa, in tur tak tak erawh chuan ka ngam leh lo.


Hetiang chi reng reng ka la tem si lo.


Wine leh Beer a la chhuak a. Beer hawngin, "Kha hei, balcony-ah sawn min lo nghak rawh", ka ban a.


Balcony-ah ka lo nghak, ka ṭhu ngawi reng a, ka thil ken chu tlêm tê tak tak chauh ka tem.


Tui ti taka in ka thei lo, ka ṭhen sak sak. Fridge-a awm tih takah, a vawt tui phian lawi a, min tiharh.


"Eng nge an i tih?", wine thlitna glass-ah a chanve lawihin pahnih a lo keng a, pakhat min pein, a ken chu a han lem khawlh a.


A lo chin ṭhan tih hriat reng mai, kei erawh, Beer pawh ka ti thei lo a ni a. Wine phei chu, a hnai lo nasa.


Khawthlir a nuam zêk a, thli la thaw zui. Nuam hle mah se, nuam lo tih rukna pawh a awm tho.


Alex-an, "Thingba te kha ei rawh, Chips ka va lam leh lawk ang", ti lehin, wine no dahin a tho phat a.


Thingba bana ei ka tum chu, ka hrawkah min hnawhtu a awm ta tlat.


Beer ka tem tawh a, la tem leh tur Wine ka chawi vû bawk. Thingba chuan sulhnu min chhûitir nasa lutuk. Mitthlaah chiang lutukin an lang zut zut bawk.


Chutah, ka bengah hian, "Kross-an hriain lo hmu ta che sela, engtin nge a tih ang?", duhsakna âwka a ni!


Tu emaw, an beng bula kan hrilh ang chiah a ni. A chiang lutuk. Ka no ken ka thloh lo chauh.


Ka hawi kual a, tu mah an awm lo. Balcony hi a sâng angreng a, lei aṭanga lawn chhohna tur eng mah a awm lo bawk.


A chiang em em mai bawk si a, "Min lo nghak rei em?", ka phu zuk.


"Min lo ngai hman a ni maw?", a la ti zui.


"A rei chu i rei", awihlo zetin a ner nak. "In la, i duh kha", thlit khah(khat) a tum chu no ka lasawn.


Nichina ka benga thu lut khan min runin, "Kross-an engtin nge a tih ang?", tih mawlhin min tina lutuk!


Kross-an engtin nge a tih ang?


Mipa dang nen, a pindan Balcony-ah, ka zak e a. Misual tak ka ni, thinlung chhe tak pu ka nih hi.


Mambawihi ai pawhin ka sualin, ka thinlung pawh a lo sual a nih tak hi.


"Ka haw phawt mai ang, a nih le", tho thuaiin, pindan aṭangin ka chhuak a. Eng rilru pua helai hmuna kal reng reng nge maw ka nih le?


Beer te chu ka la tem ang leh ta nghal a. Wine pawh ka tem hman ṭep a nih kha.


"Bawihi", min pawt ding a, "Ka thlah ang che", ka hnial duh lo.


Haw kawngah kan inbe lo a, Alex-a pawh a ngawi reng.


Mambawihi hnenah ngaihdam ka dil ngei tur a ni.


Kan in kawta a din ruala chhuk ka tum chu, "Lawkin", ka ṭhu ṭha leh a.


"Zanin bak hi chu ka lo kal tawh lo ang, hmin i har em mai. Ka beidawng tawh e", chu thu pawh chuan min tihlawm aiin, ka sualna min hmuhtirtu mai a ni.


Alex-a ka thlir liam a, mi sual tak ka ni tih bak sawi tur ka nei lo.


Mi sual, thinlung chhe tak pu mi, engmah ni si loa mahni tawka chapo ve ringawt.


Hmâna ka nihnaah khan kir leh ka duh!


Mambawihi pindan ka kik a, "Mambawih", ka ko a. Min chhâng si lo. A pindan a la êng a, a la mu lo tih a chiang.


Inah a awm ngei khan ka hre bawk si.


Vawithum ka koh pawha min chhân duh loh avangin, "Mambawih, min ngaidam rawh".


Tukverh hawngin a biang nghengin ka ding a, "Nu, mi sual tak ka nih hi. Kross-an ka phatsan tih hre ta se, buaina bul zawng zawng chu kei ngei hi ka lo ni e".


Hmâna kei mah, miin engtiang pawhin min lo ti se, ngawi mai mai, thinrimna pawh pai dai mai mai.


Mahni tawka hlim thei em em, hlimna lah ho tê tê. Chantawka lungawi, tu dang, eng dang ngai loa engthawl taka nui sen sen ṭhin.


Hmâna kei mahah khan kir leh ka duh a ni!


Mambawihi hnenah ngaihdam ka dil tawh a, min ngaidam lo pawh nise, vui thei ka ni lo.


Ka nu leh pa hnenah ngaihdam ka dil leh anga, mahse; min ngaihdam duh ka ring lo. Min ngaidam a nih leh, ka vannei a ni tawh mai.


"Kross-a, nang pawhin min ngaidam duh ang em?". A lakah, demawmin ka awm tawh si a.


Rinawmna tlachham mi tak ka lo ni reng chuan min tihnualin, mahni ka inhaw(inhua) hle bawk.


Kross-a min ngaidam duh bik lo ang.


Tu mahin min ngaidam duh lo ang. Tu mahin, mi sual tak ka ni. Thinlung bawlhhlawh pu tluk lek ka ni.


Ka pu tawh zawk chu a ni.


Chutiang turin ka inphal bawk si lo. Hmâna kei mah kha, kha kei mahah khan kir leh theih dan tur awm se ka va ti em!


Kir leh theihna tur a awm ngai a nih chuan, kir leh daih ka duh.


A nih loh pawhin, kha hmun leh hun, Kross-a leh keiin hmuhsit kan nihna hmun ngei maiah khan.


"Nangni fahrah unau", min tihna hmun leh hunah ngei mai khan, hrehawm hle mah se, ka bulah Kross-a a awm tal a.


"I kir leh duh em?", tih zawhna ka dawng a nih phawt chuan, "Kir duh e", tiin ka chhâng vat ang.


Hmuhsit tawk mah ila, Kross-a a awm tlat. Kross-a nen kha chuan, eng pawh a nuam.


A ngaihsakna ka dawng a, a nui hmel ka thlir a, tu tan pawha innghahna a tlinzia ka hre bawk.


Amahah khan ka intulut a, ka ke chheh pawh a bulah chuan a dik. Ka lungphu leh thisen luang zawngte khan Kross-a an ngaichang a ni ber.


A lan lohna hmun chu, a chûl rawih rawih a, Khawibu rauhsan ang lekin a rawp a. Luah tlak lohin a ram zo ta!


Chaw ei turin kan ṭhu khawm a, "Alex-a nuin an ina lêng turin min sâwm a, vawiin chu ka va lêng teh ang. An chhungkaw driver min lo hruai tir a tum naa, ka pha ta mai", ka nuin a ti siam siam a.


Ka ngawi reng.


"Bawihi, nizanah khan khawiah nge in kal?", dam dupin ka pain min zawt a.


Aw, a âw dam dupte hi asin, ngaihthlak leh ka duh ni. Hetiang hian min be reng turin ka duh.


Mahse, a theih leh dawn loh.


"Min ngaidam rawh u, Alex-a nen kan inkarah eng mah a awm lo. Ṭawngkam mawi lo tak tak ka lo chhak chhuah te kha ka inchhir a, pawi ka ti lutuk. In theih chuan min ngaidam dawn u nia", ka khap sak sak.


Ka mittui a tla ang tih ka hlau.


Nimahsela, chu bak ka sawi lo.


Ka thawh hmain, "Khawngaihtakin min ngaidam rawh u", ka ti leh a. Thleng silnaah thleng dahin, "College kal hma ka ngai a, min hrethiam dawn nia".


Muangchangin ka insiam a, Library-a dah tur lehkhabu khawmin, ka inhnawih paw ve deuh hlek.


Nilêngin Library-ah ka tawm.


Lehkhabu ka chhiar lo a, a mawiin ka bih ve mai chauh a ni.


*Kross-a, Mangṭha chu ka ti lo. Rinawm taka awm ka lo intiam a, ka bawhchhe ta si. I thinlung kawl tlak loah ka insiam tawh a, i ngaihdamna chang phak lo mah ila, min ngaidam hrâm rawh aw. Hlim takin awm reng ang che*



Thinlungmawlpa
Chapter-23
Ziaktu: Cck Lalchhuanawmi


Hostel-a awmte kan hun a ni bawk a, Mambawihi nen Jerome-a kan kan.


Min hmuh ve leh min kuah a, "Chaw ei ṭha turin ka hrilh che kha", a ti reng bawk a.


Nui lui seihin, "Ka ei ṭha lutuk alawm, nang zawk, i ei ṭha em? Hriselna lam te a ṭha maw?", chauh âw ka thup hrâm hrâm.


"Ṭha lutuk, kei chu ka ṭha vek. Inenkawl ṭha rawh", Jerome-a hmelah hlauhthawnna a lang.


Chu chu duh loin, "Lehkha ka zir nasa alawm, Mambawihi aia pass ṭhat ka duh a", ka ti a.


Mambawihin, "Pass awm lo, Third-ah i pass leh tho ang", a lo ti hmuk a. Kan unau thumin kan nui nghek.


Jerome-a chu, a naupang ber e ti loin, a u te pahnih aiin a sâng a. Kei aiin Mambawihi a sâng bawk. Kan unau zingah ka tawi ber.


Unau nihphung ve reng chu a ni si a.


Mambawihi hnenah haw hmasa tur leh, bazara ka kal lawk tur thu ka sawi a, "A hma em mai, ka haw peih bik lo. Bazarah chuan ka lo zui ang che", a kal nul nul nghal.


A uma ka um a ngai, a indiet leh, exercise a lak ṭhat em avangin, a hma zawng aiin a pian a nalh.


A duhthusam ram thleng thei se ka ti ngawt mai.


"Ka pu, ice cream kan lo duh ang e", min hmuh hi chuan a khi vur vur zel. Ngatnat a phu hliah hliah.


Ice cream min pek pahin, "I ṭhianpa hi, hmuh tur a va vâng tawh ve. Thingtlangah a kir leh tawh em ni?", min zawhna chu chhân thiam a har ṭalh.


Mambawihin, "Thingtlang tlangval ngaihzawn ka peih loh chhan chu hei vang hi nia", mi melh deuh kalh hian a ti reuh a.


"A dik chiah", ka pu pawhin tiin, an pahnihin an nui dun ker ker.


Haw lamah min zawt ta nge nge a, Kross-a nen kan intawn hmasak ber dan te ka hrilh a. Ka pu ngainatawm dan te ka hrilh vek.


Min ngaidam a nih ka ring, a bulah ka inpuang em mai.


"Bawihi, Bawihi?",


"Chokaah ka awm", chawbel chhuang pahin ka ti a.


Sangha kan ro tur ka buatsaih leh ṭan, "Lo hawi lawk teh", hnung lamah ka inher a.


"Khawi zawk hi nge nalh i tih?", kawr pahnih, a kut lehlam lehlamah a lo khai a.


"Vei lama mi kha",


"I ti ve tho maw? Pink hi a design pawh a nalh zawk daih tiraw?", hlim zet hian a ti a.


A duhzawng ka duhpui avangin a ha var ṭha ṭheh ṭhawh lang rual vek khawpin a nui sen sen.


Ha ṭo thuah inhmeh ber a ni hial ang.


"Pink hi chu mi ngoin an inhmeh, nangpawh i ngo a, pink i inhmeh ber", ka rilru tak tak ka sawi.


A ngoin a hleitling bawk a, ka nau a ni thei hi ka inchhuang.


"Hihi", ti sepin a kal kiang a. A va ha chhin vel dawn a ni ang.



Zing leh tlaiah Salad siam ngei ngei a ngai a, Fridge-ah englai pawhin Salad siam sa a awm a ngai bawk.


Mahni nau te chuan hah ka inti phal lo.


College ka kalnaah pawh nise, Modelling lamah a kal theihna tur ka melh ru ve reng ṭhin bawk.


Alex-a a lo lang tawh lo a, nutêi pawhin a sawi tawh lo.


Ka nu leh pa pawhin eng an sawi bik chuang lo ti ila, ka nu hian Alex-a sawi zeuh a ching a. Alex-a nu nen inkawm a ṭhulh lo bawk.


A pawng atakin min hrilh lem lo naa, a chezia chik tan chuan a hriat theih tho.


Ka hlauthawng tawh lo, Alex-a pawh a beidawng tawh a. Ka nu pawh hi a la beidawng em em ang.


Mambawihi nen a hma zawng aiin kan inkar a ṭha a, unau dik tak hi kan ni ringawt.


Inkuah thuak thuak te hi kan ching a, lehkha zirnaah pawh inpuih tawn chang kan ngah.


Modelling a buaipui lutukna lamah zilh chang ka ngah a, "A kam tam thlak mai mai", min tithla zen zel.


Patêa lah a ngawi tawh a ni ang, "I patêa saw", pawh a ti tawh ngai lo.


Jerome-a lah, zirnaah hma a sawn a. Ina hruai haw leh daih mai ka duh. Kan in chhung boruak a thiang nuam tawh em mai.


Kan ti nek nek a, harsa tak chung pawhin kan kal bek bek a.


Mambawihi College Graduation kan lawm der! Distinction-ah bawk a pass. Modelling a buaipui nasat nen, Distinction-a a pass hi ka awih lo lam mah a ni.


Graduation Day an hmannaah kan chhungin kan kal a. An College chu pui tak a ni. Kan rama College ṭha ber a ni tlat atin ni.


Chutiang aṭanga Distinction-a han pass, ka nau a nih hi!


Kan chhunga thla kan lak zawhin, "Bawihi, ka ṭhiante ho chaw eiah ka sawm a, Jenny, Lti, Sanga, Hruaii, mi sawm an ni dawn a. Keini chhung nen chuannnn, kan tam dawn. Ei rawng min bawl sak la, i thiam em kha, Catering ngai loin", ka dara min kuahin min nuih tlawn a.


A lukhum te min khum tir thul, phakar thiam reuh a nia.


"Zaninah maw?",


"Ni lo e, naktukah zawk",


"Inah pawh i sawi thei reng sia", a ha var lang ṭheh ṭhawhin a nui sen sen.


Mambawihi chu kan hawsan a, a ṭhiante nen an ri laih laih duh dawn a, nghah dawn chuan a rei mai mai.


Jerome-a chu a pindanah a ri ṭhuai ṭhuai nghal.


Games khelh a nghakhlel bawk a. Chaw ei tura koh ngai hial khawpin a pindanah a awm.


A khelh tlaivar ṭhak ka hlauh avangin, "Duata, dar sawm hnu lamah chuan off tawh rawh aw", min ngaithla pawhin a lang lo.b


Ka chhuahsan dawnah, "Aw le", a lo ti a.


A off leh off loh fiah turin dar sawmah en a ngai dawn a ni.


Lehkha ka zir a, Third-a pass thei ka ni lo. Distinction chu ka pha lo sa a. Second a nih loh pawhin First ka tum dawn.


Chumi tur erawh chuan thi leh thau pawlha ka ṭan a ngai dawn bik.


Tukṭhuan ei kham ve leh bazarah kalin, chawhmeh ka lei a. In thlen rual rualin ka che nghal vat vat.


Inrinni a ni bawk a, a fuh lutuk tlat. College chawlh ka ngai dawn lo a.


"Bawihi, min lo en teh, ka inchei viau em?", ka han thlêk kual vel.


A vir kual chhin a, a in pose thul. Khup thlenga fual niin, a rawng chu a sen a ni a. Ka sawi thiam lo, a inhmeh tawp a ni mai.


"A nalh i ti em? Ka inchei viau lo tiraw?",


"Eng lo, ṭhiante nena chaw ei khawm tur a ni si a, casual-in awm ta mai la, a pawi dawn mawnile? Nakinah, chhungkuain lawm kan tum tho a, chutah chuan i ha zawk a nga", ka ti ta a.


Mambawihi pawh chu a bu nghauh nghauh, "Ni dawn tak e, ka phur mah mah a ni. Ka va inthlak daih a nge, miin min hmuh chuan a chi dawn loh lutuk", sen ṭan ṭan chungin a kal chhet chhet a.


Chhungkua ina kan lawm hunah, duh leh Gown pawh ha se, a pawi lo.


Tun erawh, a ṭhiante chaw eiah a sawm a ni a. Khatiang chu a la tihchi viau lo.


Sawmpahnih aṭangin an lo thleng ṭan a, cake an lo kensak.


"Duata, lo chhuak ve la", ka va dak zeuh a, "Peih lo", ti chauhin min chhâng. A peih hunah lo chhuak mai rawh se.


Hmâna a ṭhiante, awmpui anga min sawina te pawh an tel a, khangte kha fiamthuin kan nuihpui mai mai.


Huatah ka la tawh lo, "Ka nau hi chu a mawl lutuk a, Lal fanu emaw a inti tlat zel a", nui sângin ka ti a.


"I hre lo a nih kha, College-ah phei chuan Junior ho chibai a inbuk tir lo chauh zel", an ti ve mai bawk a.


Dawhkanah chaw leh chawhmeh dah sa thlapin ka chhawp a. Kan thlêng mawi tak tak dah ṭhat te an lawm hian ka ring.


Ṭawng thei ngat hlawm se chu, "Hman kan ni ve ta", tia an au chhuah duh hial ka ring.


"Au Bawihi chu, ei rawngbawl i va han thiam", min fak liam liam a.


A tak tak nge phei chu ka hre lo, mahse, min tihlim lutuk.


"Wife material, ka duhzawng tak", mipa ho lahin an lo ti.


Mambawihin, "No Vacancy", a ti lo ti a. Pawi tih hmel takin an chal an dawm a, "Aiii, a tlai zo ta", a ṭhenin an ti a.


A ṭhenin, "Pawi lutuk", an ṭhen sak sak.


Chaw eina min seng hawipui an tum chu hnarin, inkawm hlim turin ka ti a. Ka ṭan tlat avangin an ṭang zo bik lo.


Inkawm hlim thupui an ni hlawm bawk a.


Jerome-a peih lo chung ka inpui tir. Amah nen chuan kan zo thuai mai bawk.


"I puar em?",


"Puar lutuk, khatiangin ei rawng bawl i thiam ang tih rin ngaihna ka hre lo. A u, Catering ti ve ila, nang chu i thiam si, kan hlawk ngawt ang", suangtuah zui niawm takin a nui ver ver a.


"Kei mah ni loin nang mah i hlawk duh hmel zawk", ka ti chu, a la na lutuk.


"Alu leh Dal i lo tlanchhiatsan chhung hi chu, chawhmeh tui tawk tawkin ka han siam ange", a phurthak nasa mai.


Kan tihfel zawhah games khel turin min awmbosan daih.


Mambawihi te thawm chu mahniin ka lo nuihpui ve sen sen. Zanin chu kan tlaiin kan hlim a ni e.


A lawmawm lutuk.


Chhung leh khat, laina zawng zawngte nen Mambawihi pass chu kan lawm a. Nalh lutuk tak maiin a inchei.


Patêan, "Modelling luhchilh a tum si a, tu mahin an hmelhriat lo hi a mak. College-a Miss Contest-ah lah tel duh si lo, College Miss aṭangte hian kawng a awm ve a", ka bulah a phun sup sup a.


"Dawr faknaah an hmang ve ṭhin tho alawm", Mambawihi ṭan zawngin ka ṭawng a.


Patêa chu a nuih ringawt.


Resort kan book a ni a, kan chhungkua pawh ṭhahnem tak kan ni.


Mut hmain tukverh bulah ka ṭhu leh ren rawn a, ka hawi chhuak chu Kross-a ang deuh ka hmu leh.


Finfiah turin ka chhuak thuai a, beidawnna bak a ni leh chuang lo.


Step-ah ka ṭhu a, "Phatsantu hian ka beisei leh chu a ni a", ka indawmkun a.


Ralkhat aṭang ringawt pawha hmuh ka va châk tak!


Kum tam liam tawh mah se, ka la beisei reng chu a ni si a.


"Kross-a bawk em ni i ngaihtuah? Pawnah ni loin in chhungah ngaihtuah zawk ta che", ka bulah a ṭhu ve a.


Mambawihi chu enin, "A tlai tawh nen, i la muhil nange",


"I thawm a ring em alawm, ka muhil tawh ka harh phah",


"Tihpalh lutuk", ka beng ka pawt zauh a. Min bêng hlak. Vawiina nuam a tih thu te sawiin, a lawmzia te a sawi a.


"Vawiin ang kha ka tawn ka ring ngai lo. Nuam ka ti lutuk. A mak ka ti bawk. An tu leh fa tak tak, an thisenpui angah min ngaiin, tu mahin min en hrang lo a, nuam ka ti lutuk", Mambawihi chu a khuh deuh kharh a.


Sawi zawm lehin, "Kross-a kha 'ka u' ti hlirin ka ko ṭhin. Min duat thei lutuk, min awm tleitu ber a ni ṭhin. Keipawhin ka ngaina, a tihsual ni miah loa an vuak te khan ka khawngaih thei lutuk a.


Mahse, a nu leh ka pa an inngaizawng daih a. Ka nu leh pa an inṭhen a, "A pasal pawh venghim zo lo, a nauin a chhuhsak", tiin ka nu an sawi ṭhin a", Mambawihi chu a rilru a na takzet a ni.v


"Keipawhin ka hua, a nu thiam loh a ni tih hre tho mah ila, Kross-a chawp chawpin ka hua. Kei pawh hian ka nu ang chiahin chhaih nawmnah ka tawk ve tho. Chuvang a nia", a thaw halh a.


"I hrethiam pha lo ang, chutiang chhungkua aṭanga seilena, vawiin ang hun boruak tawn chu, piancham ai pawhin ka ngaihlu a, nuam pawh ka ti", a nui leh sen sen a.


Mi tin hian thawnthu lungchhiatthlak kan lo nei vek a nih hi.


"Kross-an a hria em? A nu leh i pa inngaihzawn vel chu?",


"Hria e, a nuin a pa a hre si lo. Ka nu a thinrim lutuk, Kross-a lah a lo piang chhuak nawlh bawk si. Chuta karah ka pa nen, beidawnthlak tak a n. Chuvang a nia, a nu a chhun ka tih", a ti ve nuah nuah.


Chutiang chu a lo ni vel vek a nimaw? Zawh thui zel duh loin in chhungah ka luhpui ta daih.


Mambawihin thil nih dan min hrilh mah se, pawisawilo Kross-an a tuar nasat dan bak hriat ka nei chuang lo.


Mambawihi chu MA a zir zawm a, Modelling lamah a beidawng ve deuh.


Ka bulah a sawi ve sep sep zel a, beidawng lo turin ka fuih nasa thei lutuk. "Mi fuih dan i thiam lo em mai", min ti ṭhin.


Theihtawp chhuahin ka fuih ve a ni a, a tawk zo lo. Nuihzatthlak.


Exam tura inbuatsaih chauh ka hmabak tawh avangin, thildangah peng loin lehkhabu ka bih ngut ngut.


Panhnah sil pawh ka bansan.


Ka intuak ṭeuh hman a, a tihzia tho tho. Engti ti emawin tluang takin exam ka bei zel ka bei zel a.


A tawpah phei chuan, exam zawh ni kan thleng tawh.


Exam kan zo chu ka thawl hawk. Khawlum laia tui vawt in ang a ni!


U Malawma nen zanah kan inbia a, "Pass thei dawnin i inring em?",


"Ring e, pass turin alawm ka zir", a lo nui tat tat a.


U Malawma chuan, "Chanchin thar ka nei a, mahse, i duh dawn nge dawn lo ka hre lo", a ti chu sawi turin ka ti thuai.


"Private School-ah Zirtirtu pakhat an mamawh a, rokhawlhna avanga a bansan a ngai thut a. Headmaster hnenah ka sawi che", a ti chu ka au chhuak chiang lutuk.


"Dâwt i sawi lo tiraw?", ka ti chul.


U Malawman, "Sawi lo e, Primary a nia, enkawl an har deuh ang. Naupang tênawi an ni hlawm a. Middle School chu kan indaih mah mah. Private a nih avangin hlawh erawh a tlem dawn, keini angin Sawrkar School a ni si lo a", a lo ti nasa mai a.


Ka lawm lutuk awmngaihna hre lo chu, ka tei kual sek.


"U Malawm, dâwt i sawi lo tiraw? A nih, engtin nge ni dawn?",


"Interview nei tura i lo kal a ngai, naktukah a neitupa ka lo hrilh anga, kan ṭhianpa tho a nia. Naktukah lo kal nghal mai rawh, exam in zo tawh tho a", au nghek ka duh tawh mai.


Pindan aṭanga chhuak vatin ka chhungte ka hrilh a, ṭha an lo ti lutuk.


Nutêi te inah kalin ka hrilh leh vek.


A zan la lain ka insiam a, interview chauh a la nih dawn avangin thawmhnaw ken tam a ngai lo ang.


Thlenna tur ka nei dawn ta lo. U Malawma chu mipa a ni si a. Engtin nge ni ta ang aw?


Ka inngaihtuah rauh rauh laiin u Malawman min lo be leh, "Bawihi, Headmaster-an thawk nghal turin lo kal mai rawh se a ti che a nih chu. School neitupa, ka ṭhiana pawh ka be nghal a, a lo remti e",


"U Malawm, ka lawm lutuk, lawmthu ka ba nasa hle mai che",


"Ho lutuk, naktukah chuan tluang takin lo kal phawt mai teh. I thawhna tura thawk ve tho Chhingpuii pawh ka bia a, in luahpui tur a duh reng, amah nen in luah dun dawn nia. Chhingpuii nen kan lo hmuak ang che", u Malawma chuan a ti siam siam a.


Ka hmanhmawh a ni ang, u Malawma thusawi pawh muang raihin ka hria.


Engkim tihfel meuh chuan ni khat liam hnuah ka kal thei chauh bawk.


"Cham hlen tum suh aw", Jerome-an a ti a. "Ka cham hlen dawn", ka ti pek. Min hnek lo chauh a ni.


Kross-a lukhum kha khumin, ka bengah earphones ka hnawh a.


Zingkara chhuak kan ni a, Driver lah hian a khalh châk. Kan thleng hma dawn thung a, ka lawm viau tho.


U Malawma nen thlen chin kan inhrilh zel bawk. Kan chuanna Sumo chu 'Bawihi K' tih a ni a.


An fanu hming a nih ka ring ringawt.


Him leh dam takin, tluang takin ka thleng a. A thim chhe lutuk lo. Ni a tla dawn chauh a ni.


Counter bulah u Malawma chu a awm ngei a. A bula ding hmeichhia chu Chhingpuii a nih ka ring.


"Hlawl mai a! Inhmuh loh karin a lo va lian tawh tak", u Malawma chu ka melh kalh a. Chhingpuii a nui har har.


Nuih a duh reuh phian ang.


U Malawman min inhmelhriattir a, "Khawpui aṭangin ve tho ka nia, mahnia awm ka ni bawk si, ka khua a har thei luruk. I lo thleng a, ka khawharna a bo vek", Chhingpuii chu a nui sen sen a.


Khawpui nula tih a hriat bik. Kei ve hi, huiham, khawpui mi ṭheuh ṭheuh pawh, a inan loh theih ngei mai.


"SUV ngatin ka haw dawn, lo nghak phawt ang aw, Counter aṭangin a lo chhuak ṭep", Chhingpuiin a ti a.


U Malawman, "A intithei leh ṭan dawn e", a lo ti a.


"Eng nge? Intihtheihna tur dang ka nei chuang hleinem", Chhingpuiin min lo en a, "I lo kalna 'Bawihi K Counter' neitupa hi ka bialpa a nia", a lei a seh zauh a, "Chuan, kan thawhna School pawh hi ama din a ni bawk", a bialpa chhuan hmel takin a ti siam siam a.


Chhingpuii tan pawh chuan intihtheihna a tling a nih chu.


A nuam ngawt ang.


"E saw, a lo kal ta e", Chhingpuii chu a nui var a.


"Min lo nghak rei em?", ka hnungah a awm. Amah ngei a ni. A ni chiang lutuk.


"Kei chuan rei ka ti lo, rei ti pawl an awm leh tho ang", u Malawman a ti chu, "Hepa hi chu aw...", nui har harin Chhingpuiin a ti a.


Hnung lam ka hawi ngam lo, hmu kher lo mah ila, a âw aṭangin tu nge a nih ka hre thei atin ni!


Amah zawk chu ka hmaah, Chhingpuii bulah a ding a, Chhingpuiin a bânah a kuah.


"Lukhum te chu la thla ve tawh la", u Malawman ka lukhum a la thla. A phih na lutuk a, ka dak awrh.


Mahse, ka hawisawn thuai.


Ka kutah lukhum a dah a, ka bula dingin, "Kross-a, amah hi nia ka sawi chu. Bawihi a nih hi, a Bio-data ka hrilh tawh che kha", u Malawman a ti a.


"Bawihi, inchibai ve reng reng teh u, Krossthumawia a nih hi. Thingtlanga Private School din thei ngat a nia, a bawn asin", u Malawman a ti chu, ka nui mai a.


Kross-a chuan a kut lo pharin, "Nia mawle, inchibai ila", khûr der derin ka kut ka phar a.


A tawkin ka tawk a ni hawt, ka vuan lo. Ka tawk zeuh ringawt.


"Kal ang u, Bawihi hi a chau dawn. Chawlh hahdam a mamawh", Chhingpuiin a ti a.


Chhingpuii hnungah ka ṭhu a, mitsir theih tawk chauhin ka ṭhu tlat si a. Kross-a lak aṭangin ka mit ka lasawn hleithei ṭhin lo.


Ka mitsir leh ṭhin!


Smart tak a ni, smart tak. A hma aiin a puitling lehzual emaw tih tur a ni.


School a nei a, Sumo Counter a nei bawk a. Bialnu pawh a lo nei!


Mahse, Counter hming 'Bawihi K' tih chu, a neitute fanu hmingah ka ngai kha a ni a. Innei si loin fanu an nei tihna mawnile?


Ni lo, ni lo, thinrim thei ka ni lo.


Ka thinrim tur a ni lo. Ka chantawk a ni e. Ka chantawk chiah.


"Takah, Kross-a, Kohhran Ṭhalai hnatlan tur kha, naktuk zan kha a ni a, i hman dawn em?", u.Malawman a han ti a.


"Hman lo ang", Kross-an a ti thuai a. U Malawman, "Chhingpui, i chet a hun e", a ti a.


Chutah, ngaihnobei zetin, "U Mawi, naktuk zana Kohhran Ṭhalai hnatlannaah lo kal ve ta che", Chhingpuiin a han ti a.


Mipa tana hnar theih loh, tuar thiam har tak a ni.


Kross-an, "Tehreng mai", a ti ta a. Chhingpuiin a kuah thuak.


"In hnungah ṭhu kan awm hi", u Malawman a ti a.


Chantawka lungawi hi maw, a lo va har tak si em!


Show post links
Top