Thinlungmawlpa BY Cck Lalchhuanawmi (Completed)

[Ngaia]

Thinlungmawlpa
Chapter-37 Last
Ziaktu: Cck Lalchhuanawmi


Thawnthu chu nise, "Tichuan, hlim kumkhuain an chêng ho ta a ni", ka ti ngei ang.


"Bawihi, Ditêi hmuamtelel awmna i hria em?",


"Nizanah Computer bulah in hnutchhiah", naupang exam paper ka en a. An thiam lo si, ka bei an tidawng.


An pafain ka bulah an lo ṭhu, "I awm aṭang hian exam paper keimaha en a ngai tawh", Krawsa ka tiparat pah, "Ka vaw(vua) dawn che mawni?", ka ti chu, "Eng maw i sawi a?", keimah zawk min vaw(vua) duh hial ang tih turin min melh nasa mai.


"Sawi ka nei lo", ka ti deuh hmak a.


An kalsawn daih. An che ngeiawm pafa thei lutuk mai.


Dar sawm pelhah pawh an pafain an inkhualtelem zak zak. Ditêin fiah lo taka a ṭawng ri nak nak chu, Krawsan fiah takin a chhâng zel a.


Inhrethiam tawn niawm takin, an nui rual thul.


An thawm ka ngaithla reng tho naa, ka ngaihsak duh lo. Chaw pangngai a ei tawh a, hnutê chu a zeuh zeuh a ni tawh.


Siam chawp in tir pawh a phal tawh a, hnutê thlahtir erawh a phal chuang lo.


Ka kuk fawk châk thei lutuk.


A fanu a ngaihsak luatah min hrechang tawh lo ṭhin a, ka tihtauh deuh hian kawngkhar ka khar ri bur zel.


Krawsan a tir chuan a hrethiam mai lo.


A hnuah erawh, sawi lo mah ila a hrethiam ta a, kawngkhat khar rik bur pawh a khât ṭan.


"Bawihi, naktukah huanah i kal ang u", Ditêi chuan nui sen senin a kut a lo bêng a, ka mal chung aṭanga a pa mal chunga kai a tum chu ka phal bau lo.


Phakar lutuk, nilengin School-ah ka awm a, ka ngai ve em em lutuk.


Nautê rim hian min tiâ lo chauh bawk, ka fanu rimtui lutuk tak mai hi, eng Pangpar mahin an tluk lo.


"Thosi a tam si, Ditêi a ngaihtuahawm", ti deuh hmakin, "Ka fanu nen hian kan inawm khât si, naktuk.chu nilengin kan lo inawm ve ang, lo haw hma tum mai rawh", nêm deuh zawkin ka ti a.


Thuawih takin a bu ve nghat tho.


Vanneithlak takin a pa a ngen lo a, min ngai ve a ni ang.


Krawsa pawh Computer hmaah a ṭhut a ngai lo a, kan pathumin tv hmaah kan ṭhu a, Nursery Rhymes kan en.


A pa hian duhtawkin a sakpui thei tawh.


Zaninah pawh, a lampui vel a, Ditêi a nui ar ar.


Thla ka laksak a, video-in ka record thul.


An pafa che vel ringawt pawh hi, man chawia en tham a ni.


Kawngka an lo kik a, Chhingpuii a lo ni. A rim ka hriat rual chuan Krawsa ka melh vat.


Danglam a awm chiah loh avangin ka luhtir a, "Lo inkawm rawh u", an pafain an kalsawn daih.


Computer hmaah an va ṭhu dawn a ni ang, an pafa inchhaih nui ri erawh a hriat theih tho.


"Nuam i ti ngawt ang, Krawsa a fel si. I awhawm alawm le", rim dang nam lo se chu, mak ka ti lo ang.


Rim dang a nam tlat a, mak ka ti.


A lo kal ngam pawh hi huai ka ti, chubakah, rilru hahna riau a nei emawni?


"Pui, buaina i nei em ni? Hetianga awm lo hian chinfel dan a awm ang mawle. Thingpui ka lo siam ang che aw", a nui har har a.


Nui tawp thutin, "Buaina lian tak, chinfel dan pawh a awm. Mahse", a chek hlak a, "Theihnghilh rawh, thinlung a kehsawm tawh chuan pawisak neih loh a awl tawh", u Malawma nen an inkar siamṭhat a duh leh tihna mawnile?


Chhingpuii chuan, "I hria em, kan thinlung zawng zawng kan pekna ten min hnawla, midang nen hlim taka an awm lai thlir bak baka hrehawm a awm lo", a ti leh a.


U Malawman midang duh a nei reuh mawnile?


"Ani lo midang ṭha deuh i hmuhna tur a ni thei alawm, i beidawng hma a nih kha", u Malawman ngaihzawng a neih ka hre bawk si lo.


Chhingpuii hian a thinlung a pe takzet zet a nih dswn hi.


U Malawma nena kan inhriat dan te min zawt ta a. U Malawman ngaihzawng a nei chiang a ni. Chhingpuii hian a tuar thiam lo a ni ngei bawk ang.


Collge-a kan Senior a nih thu leh, he khuaa ka awm aṭang chauha inbe tlangnel chho kan nih dante ka sawi a.


Chhingpuii chuan, "College-ah eng nge i tih ṭhin? A harh pawl nge harh lo pawl? Kei chu, a harh pawl ka nia",,a ti leh a.


"Harh lo pawl, Library-ah hun tam zawk hmangin ka awm ṭhin. College-ah chuan Library ka ngaina ber",


"Malawman College-a an Junior, Library-a awm reng ṭhin, a ruka a ngaihzawn a sawi tak asin", ka rilru a kalsual ṭan ta tlat.


Chhingpuiin, "Pasal a neih hnu pawhin a la theihnghilh thei lo, a ngaihzawng atana sawm a tum tawh, a sawm ngam ṭhin loh avanga chânah a inngai a. A theihnghilh thei lo, pasal fanau a nei tawh tih a hre chung pawhin", a nui sak a.


"A hming i hre duh em?", hre duh lo mah ila, a sawi dawn tho.


Math ni lo mah se, rang takin ka hrethiam.


Chhingpuii chuan, "Bawihi a nia", a ti ta reng a. Nui har harin, "I hria em, Bawihi chuan ka thinlung luahtu min laksak daih bawk a", a ti leh ta.


Sawifiah leh chuan tur a awm ta lo.


Chhingpuii chuan kei ni loin Krawsa a lo duh zawk a, u Malawma lahin keimah.


A nih chuan, inngaizawnga an awm kha, an tider tihna em ni? An lo inngaizawng miah lo tihna maw?


Chhingpuii chu a ṭap a, "Bawihi, ka hua che, he hmuna lo kal lo tawp tur i ni. Ṭangkaina pakhat mah i nei lo", a kut zungchalin min kawk siah.


"Pui, eng thu nge maw i sawi le?", a tho tharh a, keipawh ka ding thuai.


"Khawvelah nang aia huat ka nei lo", min kawk leh siah siah.


Min kawhna a kut zungchal chu Krawsan lo man chatin, "Ka in aṭang hian chhuak rawh", thinrim takin a ti a. A âw erawh a sân lo.


Chhingpuii chuan, "U Mawi, kei hian nasa takin ka tilawm thei che ka tih tawh kha", ngaihnobei takin a ti a.


Pawi sa lo takin, "Khatiang hmachhuan i nih vanga hnar tluan che ka ni tih i la hrethiam lo em ni? Rui chungin ka in chhungah i lo lut a, zah lo takin ka nupui i ṭawng khum bawk a, zah ka ngai lai hian ngawi rengin chhuak rawh", Krawsa chuan ti hmiah hmiah a.


Chhingpuii chu a kal pai awn awn.


"Ditêi pang hi a lum deuh a, Bawnghnutê ka lo chhuansak lawk ang", Ditêi min pe a.


Chokaah kalin a va ri rawk rawk.


Ditêi pang chu a lum deuh tak tak a, Bawnghnutê lum in tir hmain, nachhawkna tlêm ka tulh a.


Chumi hnuah Bawnghnutê kan intir chauh.


Bawnghnutê a in laiin a hnar a rawn thi a, a ṭap ta vak vak, keipawh ka chi-ai, "Krawsa, Ditêi, Ditêi hi", ka au chul a.


Bawnghnutê chhuanna bel a sil lai dahin a lo tlan, a pawm thuai a, Ditêi lû a kuai dak. A ṭap nasa mai sia.


A pang sa lah a reh thei lo.


Ditêi hnar thi chu a reh ta a, a la ṭap bâng thei meuh lo, "A zia chho mai ang", Krawsan ti mah se, ngaih ṭhat loh rukna lian tak ka nei tawh.


Nghet takin Ditêi muhil chu ka kuah a, a chher ber thlengin ka ngaihtuah hman vek.


A pang sa pawh a reh tawh a, muthilh erawh a harsa.


Chhingpuii chhuah hnu lawkah kan buai zui a ni mai a. Khang thu kha, engvanga rawn sawi ngawt nge a nih?


Krawsan mitmei a lo hmuh ve ṭhin a ni ngei ang. Chuti ni lo se, rui chunga lo kalin, thu awmze nei lo a lo sawi ngawt thei lo.


A chungah ka thinrim ta phat, ka tho lawk a, a muhil lai chu ka bêng chawrh, a ṭhu chhuak chiang lutuk.


Min en vung vung, ka thinrim lutuk a, ka ṭawng chhuak hleithei lo, ka khâ a inkhawng hlak hlak.


"Bawihi, i nuamsam lo em ni?", khap miah loin ka melh a, ka mit a thip vek.


Ka mit ka chhing vang vang a, meng chhuak hliaiin, "Ngati nge Chhingpuii hi a ngampat theih em em? Nangin engtin mah i ti ngai si lo? Awm lo ta ila,,amah nen in inngaizawng tawh ang tiraw? Nang pawhin i duh ve tho tiraw?", ka ti siah siah.


Hei hi ka ngaihtuahna a rei tawh.


Min hmu tura a lo kalin nutêin dâwt a lo hrilh a, tichuan, kei hi he hmunah kal lo ta bawk ila, Chhingpuii nen tunah pawh an innei hialin ka ring tawh.


"I tidik, kan inngaizawng ang", ka rin dan chiah, "Mahse", a ti chu, "Mahse tih a ngai lo, ka hrethiam ta vek e. Mi pahnih induh tawn takte inkarah tlazepin ka ṭhen hrang tihna a ni a. Ṭangkaina ka nei lo takzet a nih hi".


Rilru na deuhin bual inah ka lut a, awm zel dan tur ka hre tawh lo.


Pehhel taka sawi loa a sawi tlang tawp pawh chu a lawmawm.


Chhingpuii na takin a awm a, Krawsa hi engtin nge a awm ve? Ka awm hmain a lo duh ru ve tho tihna a ni phawt a.


A nih chuan, a la tlai chuang hleinem, ka inthiarfihlim mai dawn em ni?

Ditêi a awm leh tawh bawk si, nu leh pa kar lo aṭanga a seilian tur ka ngaingam lo, ka phal bawk si lo.


Inah hawin ka pa lo chhuah hun ka nghak mai dawn mawni?


Keimah chauh ka inngaihtuah thei tawh dawn lo, Ditêi ka hruai tel a ngai dawn a ni. Ka fanu a ni tlat a.


Chhuah tum ta ila, Krawsa hian min dang ang em le?


Dang em em ang, aw...Ngati nge mawl deuh deuha a awm ṭhin le?


Ka nuih a za leh hnuhnawh.


A chang chuan keimah zawk hi ka dik lo ṭhin a ni.


Mahni inkhawngaihnain ka khat nasa thei lutuk a, chan chhia zawng zawng inbel chingin, ka indawmkun nasa thei mah mah.


Hun kal tawha kir ka ching lutuk a, hun kal tawh hnu intihnat ka ching hle bawk.


A ṭha miah lo, Krawsa hi a lo dawhthei zawk mang e.


Ka hmai ka tihuh a, ṭap anga lan ka tum. Ka ṭap tawp si lo. Thinrim tawh lo mah ila, thinrim anga lan tlat ka tum bawk.


Engtin chiah nge a awm ka hre duh.


Bual in aṭangin ka chhuak a, phili ruaia a lo awm ka rin tehreng nen, Ditêi kuahin a lo muhil tui lutuk.


Ka bêng harh leh chawrh dawn mawni?


A ṭha vek tho mai e. Hmai hruhulin ka mu thla ve nghal a.


Pafa tih takah, an inang em em zui.


A tuk zingah, "Mahse ka tih kha, sawi zawh hmain i kalsawn daih a, vawikhat mah khatiang kha ching tawh suh ang che", ka bu zeuh.


"Tihpalh", ka ti sep a.


Min hau a, ka lawm dan chu pui tak a ni.


Krawsa chuan, "Alex-a nen in inngaizawng emaw ka tih khan Chhingpuii ngaihzawn ve mai ka tum a. Mahse, ka thei lo. Engtik lai pawhin ka mitthlaah i châm a, ka thinlung na thawi dam tura midanga ṭuan kha ka duh lo. A hnua ka inchhirna tur a nih ka hlau a ni. A hun takah i lo lang bawk a", nizanah khan lo sawi zawh tir hle hle ila ṭha tur.


"Ditêi pawh a dam ṭha tawh a, huanah kal ang u", i hê loin, "Lutuk", Store room-ah ka kal nghal.


A thleng tur chu a thleng vek tawh, Chhingpuii pawh a ṭhat vat ka beisei!


Takzetin, a na dawn tih ka hria.


Kei aia hrechiang an awm bik lo ang. An inngaizawng emaw ka tih hun zawnga ka nat ṭhin dan kha.


Chumai a ni lo, kum tam tak a chanchin hre map loin ka awm bawk a.


A lungdumtu dik tak a la tawng ngei ang. Ka duhsak em em a ni.


Huanah kan kal a, "Ditêi pawh a huanah a kal thei ta e", Krawsan a ti a. A vawr nalh nalh a, dawng leh chat chat tho mah se, "A tla ang e", hlauthawng tak hian ka lo ti ṭhin.


Krawsan engah mah a ngai si lo, Ditêi lahin a pa a ringtawk tih hriat takin a nui ar ar.


Thei leh Thlai awm ang ang kan la a, Krawsan a fanu paw chungin a thawk a, kan sawt mawh reuh a nia.


Chawhmeh zuarin khawpuiah kan kal ngai tawh lo a.


Sumo counter check tur erawh chuan kan kal ṭhin.


Amahin a kal duh tawh lo. Ditêi chauh a hruai thei lo a, ka tel ngei ngei a ngai a ni tawp mai a ni.


A pi leh puin an paw thei tawh a, rei tak tak an pawm thei tawh bawk.


Mahse, a pa a awm loh lai chauhin a ni thung.


A pa âw emaw a pa thawm a hriat rual rualin a ṭe nghal vak zel. A ṭe ring thei si.


Krawsa tiparat nan hian, ka hau fiam ṭhin. Rum tawka min melhin a la thuai zel.


Thinrim theih pawh a ni lo, nuihza lamah a kal.


Krawsan School aṭanga Chhingpuii chhuah tir a tumin ka dang a, "A rilru nat luat tuar zo loin a inpuang a, a ṭha zawk. A thup reng chuan a puak keh anga, a ṭha lo zawk ang",


"I thu ang chuan le", lawm tih hriat takin min en vung vung a.


Ditêi kum khat tlinna chu ropui thei ang bera lawm a tum a, chumi atan a inbuatsaih nasa tawh lutuk.


A pianchama a hak tur kawr pawh a ṭhuifeltir vek tawh a, lo thleng thut pawh nise, bahlah miah loin kan lawm thei nghal ang tih tur a ni.


Mahse, buaina kan tawk chho mawp mawp thung.


Ditêi pang a dam thei reng reng lo mai a, a tlei loin a ṭap reng a. Chaw a ei thei si lo.


Bawnghnutê lah a in duh lo.


A pa ṭângah a bei chawt a, chuti chung pawhin a tlei thei chuang lo.


Inentir turin kan kal tawp, Mambawihin ka pindan a lo tifel a, "Ditêi chum ṭhin tehreng nen, ka lainat mang e aw", Mambawihi pawhin a ti ve ngawih ngawih.


Ditêi chu a pa ṭângah a bei hle hle a, a pa mangang hmel chu hai rual a ni lo.


Keimah ang hian a manganna thute a sawi chhuak chiam lo nachungin, a hmelah erawh nasa takin a tilang thung.


Mangan tak tak tawh chuan sawi sawi hian kawng ro a lo su tehchiam lo. Ngawih reng a chawh tawh tlat ṭhin a ni.


Test neuh neuh min neitir a, Krawsa zawk hian hriau a hlau pawh a ni lo, Ditêi tuaran a ngaingam thlawt lo a, amah zawk bengdai ngaiin a awm leh ṭhin.


Result kan han hre meuh chu, ka khûp tha hi a sâi hlawk hlawk mai a ni.


Ditêi chuan Thisen Cancer a lo vei reng!


"Nautê mai a ni a, hetiang natna a vei thei lo hrim hrim, in tisual a ni ang. Test ṭha leh rawh", Krawsa insum zo lo chuan Doctor a hmuh hmasak ber kawr nghawngah a ṭham sawk sawk.


Vawithum lai test neih hnuah pawh, Result a dang thei lo.


Ka mangang lutukin, "Khawngaihtakin min lo Ṭawngṭaipui rawh u aw", tiin kan Pastor, Foreign-a awmte ka zu ngen tawp.


Doctor bulah, "A hnar hi a thi zeuh zel a, chumi bak nat em em a nei si lo", beidawng tak hian ka ti a.


Doctor te zawk an khawngaihthlak.


"Cancer hi an thihpui vak ngai tawh lo asin, a inenkawl dam theih tawh. A veia te azir a ni tawh mai",


"Nautê mai hian a natna bei dan tur a thiam dawn em ni?", Doctor pawh chu a kun ngaih.


School ka chawl hmak a, Ditêi ka pawm hle hle.


Krawsa pawh eng a thawk thei bik lo.


Ka nu te inah kan awm tam zawk bawk. A nih loh leh, ka pa nen kan inah min lo awmpui a.


Krawsa nen pawhin kan inbe khât tawh lutuk, a fanu nat aṭangin a nui hmel hmuh tur a awm tawh lo!


Ditêi hian a hlimna zawng zawng a kawl tak meuh meuh a ni.


A beiseina leh nunna thlengin.


Ditêi ai pawhin a taksa a chhe chak. Chaw a ei thei si lo, Thingfanghma leh bawnghnutê hi a ni deuh tawp mai a ei ṭhin ni.


Krawsan Ditêi chu a paw tlaivar zak zak a, chhun lamah nise, a âwmah a beitir hle hle zel bawk.


Remchang hmasa berah Jail-ah ka pa kan va kanpui a, "A misual zawk hian lo vei ila ṭha tur a nia, ka va lainat tak em aw...Ditê, i pu hian lo tuar zawk ila ṭha tur, a va han pawi tak em aw...", Ditêi pawmin a ṭap zawih zawih a.


A natna do let dan tur a thiam dawn si lo, "Helai hi a na", tih pawh a sawi thei lo chu a ni a.


Ṭah bakin a sawi thiam si lo, keini lahin kan hrethiam tawh si lo.


Ka pu, ice cream-a kan kan a, ani pawhin min tawrhpui takzet!


Duat taka pawmin, "Ditê, vawikhat chauh hnutê hi hne leh rawh, vawikhat chauh ni lo, vawitam tak hne rawh", hnêk tir ka tum a.


Duh loin a hnar char char, a hnuah erawh reilotê a hnê a. A phawi leh vat tho.


Mahse, ka lawm a ni.


Mitmeng fiah kêk kâwkin min en chho doh doh va, a nui sen sen, "Ka fanu hmelṭha, duhawm, tuar fan fan rawh aw. I pa nui hmel min hmuhtir leh rawh. I pa nunna kawltu i nih hi aw, hnehtu i nih a ngai. Ditê, i pa tan bei rawh aw", ka ti seuh seuh a.


Zan khat ka ṭhangharh chu, an pafain an lo mu tawh lo.


Ka hawi kual a, Krawsan Ditêi zak zehin tukverhah a lo zung.


"Mak ṭhin e", ka tihah Krawsa a la phu zuk leh nghal. Pên khat lekah bual in a awm reng a, tukverha han zun tlat.v


"A chhuak tawh lutuk a", a la ti zui.


"Chil chhak phak lekah nih hi bual in a awm",


"Ditêin vawt a ti dawn asin", chhân khan lah hre thei lutuk mai.


Tukverh a khar ṭha lo chu ka va khar ṭha. A patling hna lo thei em mai.


Ditêi kuta venflon invuahna chu duat taka chul heuh heuhin, a chhêm hliau hliau a.


Thilmak thlengin, Ditêi hi han dam var mai sela aw...


December thla kan chuangkai a, inah kan awmpui thei tawh lo.


Room hranah, darthlalang bawm chhungah an khung a, hrui an zam kual ngei nguai mai bawk.


Daidanna bang chu chhut chhiata, darthlalang bawm aṭanga Ditêi lak chhuaha tlanbopui vang vang ka duh tawh mai.


"Ditê, khawngaihtakin i pa tan tal tuar chhuak hram rawh aw", Krawsa pawh, drip khai hial a ngai.


An pafain min kalsan mai ang tih ka hlau lutuk.


Kan pahnihin pawn aṭangin kan thlir a, "Naktuk mai khi a piancham a ni tawh asin", Krawsa chuan chau zetin a ti chhuak a.


A fanuin a nunna a kawl tak tak a ni.


Pawnah insi rialin kan ṭhu a, Mambawihin min awmpui reng bawk.


Jerome-a pawh a lo thleng chho tawh, "Vawikhat pawh ka tunu chu ka la pawm lo asin mawle", a ti chu, insum zo loin ka ṭahkhum chiam.


A tuar ai tuar thei ila, tuar ka inhuam reng.


Nautê mai tuar atan chuan a lutuk deuh a ni. A natna do let dan tur a hre dawn lo, a hre dawn lo em asin.


"Bawihi, a ṭha leh vek mai ang", Krawsan min lo kuah a. A ṭha vek dawn lo tih hrechiang bertu a ni ang.


Ditêi chuan a natna do let dan tur hre thlawtlo le, a piancham, kum khat a tlinna chamah chiah chiah, December ni sawmpanga, zan dar ruk leh a chanveah, "Mangṭha", tih pawh sawi loin min kalsan!


Hrui chi hrang hrang an veh kual phawiin, Darthlalang bawm aṭangin an la chhuak a.


"Ânu, âpa", tia min koh hun tur kan nghahhlelh tehreng nen.


Zawi hnuangin ka kutah a awm ta si!


A pain a pianchama a hak tur kawr a ṭhuitir kan hak tir a, pheikhawk bun tirin, Bakilh nalh deuh kan kilh tir bawk.


A thawmhnaw leh pheikhawk leh bakilh te a sen vek a ni a, a hming 'Dingdi Vanlalpangpari' tih zawng zawng nen an inchawih tawk em em mai a ni.


"Ditê, min kalsan lo turin ka hrilh che kha. Mahse, a na em a ni tiraw? Tunah chuan i dam tawh, eng natna mahin a tibuai thei tawh lo che. Hlim takin awm tawh rawh aw".


Fanu hmelṭha tak leh duhawm tak ka nei a, min itsiktu an awm ta em ni le?


Nautê takngial itsiktu chu tu tak ni ang maw? Min tibuai ṭhin hle mah se, kan vaw(vua) phal lo.


Vuak chu sawi loh, a ṭah hlek tawh chuan kan chi-ai zo vek ṭhin kha a ni a.


Khang zawng zawng kha mit khap kar lekin an kiam zo ta si!


Krawsan Kuangah pawh dah duh loin, Thlan thleng a pawm.


" Dingdi Vanlalpangpari,
Hringnun ṭahna hrualhrui ata
Hringnun hlimna hrualhruia lo
thlaktu, ka fanu Ditê, i pâr vûlna hmunah
chuan lâwm takin ka thlah leh che a;
mawi takin pâr vûl zual zel ang che.
Ka lungdumtu leh enchimloh,
Ditê, tui takin muhil siai siai tawh rawh le!".


Harsa ti tak chungin Kuang chhungah chuan a zalh ta a.


An kilh hnan hnu pawhin reife ka la kuah, "Bawihi, a dam tawh, a dam tawh. Lâwm takin thlah zawk ang", ka la thlah thei lo a ni.


Thla kaw(kua) chhung paiin, kum tam tak a daih dawn emaw tiin, kum khat awrh chauh a daih chu a ni si!


Lung a awi thei hlawllo.


A chang chuan, "Ditê", ti te hian ka lo au chhuak leh ṭhin.


Krawsan min tiharh thuai zel.


In mai bakah, khawvel hi a ruak ngawih ngawih.


Min tihlimtu berin min kalsan tawh a, nui ri hriattur lah a awm ta mang lo.


Zanrehah hian a mutna ka dap kual leh vak ṭhin, kan bulah a la mu ṭhin turah ka ngai a.


Thisen chhuak hiala hrin chhuah, mahni fanu te meuh han chân mai chu!

"Kum tam kan awm hran ai khan tuar thiam har ka tiin, na ka ti", Krawsa tihngaihna hre loin, duat takin min kuah tawp zel.


A chang chuan Ditêi zui nghal mai ka duh rum rum ṭhin.


Ka pasal ka thlir erawh chuan, zui thei ka ni lo tih ka inhre leh bawk.ṭhin.


A fanuin a kalsan a, a nupuiin ka kalsan leh zel chuan, drip khai chu sawi loh, thisen pek hial a ngai ang.


"Bawihi, Ditêi chu a dam tawh a, keini pawh intidam ang", pawm thiam mai a ngai a ni.


Ditêi thlan aṭangin kan haw a, in kawtah u Malawma leh Chhingpuii ten min lo nghak.


Chhingpuiin hman zana a awmdan avangin ngaihdam min dil a.


U Malawma erawh chuan eng a sawi lo.


Min tuarpui takzet thu a sawi a, chu zawng chu a ni mai.


Chhingpuii ka haw(hua) hran lo a, huat chhan tur a awm hek lo. U Malawma erawh, a rilru puthmang thlak tawh se ka ti.


Chumi avangin ka haw(hua) ringawt thei lo bawk.


An pahnih chuan ngaihngam taka awm turin ka chah a. A tukah min hawsan ta mai!


Krismas a hnai a, kan khuaa Pitar leh Putar awm zawng zawng hnenah Krismas Putar Lukhum kan sem a.


Chhungkaw harsa zual nia kan hriatteah Krismas Bazarna tur kan sem leh vek bawk.


Kan in kawngka lu chungah 'Ditêi Rûn' tih Krawsan a tar a.

A kum leh Ditêi piancham, December ni sawmpangaa, kan Sumo 'Bawihi K' tia zin chhuak tur zawng zawngte kan free vek bawk.

Ditêi pian cham zarah a thlawnin an tum ram an thleng thei dawn.


Krismar Putar lukhum bakah mawza lum chi kan khuaa Pitar leh Putar kan semin, chhungkaw harsa zual hnenah bazarna tur kan sem leh.


A zawngchhang thlak reuh lutuk a, kan tih zel kan ring.

Chu chang a ni lo, kumin Ditêi pianchamah chuan Nau Hnuchham In zawng zawngah Piancham Thilpek kan pe vek bawk.


Chung zawng zawng chu Ditêi hmingin vekin a ni.


An hlim hmel kan hmuhin, "Ditêi chuan hna ropui tak a thawk a ni", Krawsan a ti chhuak hial.


Ditêi lawm dan tur hi ka sawi thiam lo.


A tel loin kum khat dang kan hmang a ni a, nghilh ni reng kan nei lo.

Mumang ni mai te hian ka hre ṭhin.


A thleng rang lutuk a, mangchhia aṭanga harh chhuaha, engkim pangngai leh tura ngaih awl thei tak a ni.


Mangchhia aṭanga harh chhuah a awm thei bawk si lo.


Krawsa hian Ditêi a ngai bik, inpawm reng an ni a, "Ka ngai", ti kher lo mah se, muthilh ṭhat theih loh chang a neih te, leh Ditêi thlalak en vung vunga, a mit a nuai leh ṭhinte hian an tarlang.


Zan khat chu, meizial zuin pawnah a tei a tei.


A ṭhut thlak hnuin ka va pan a, a kapkarah ṭhuin, a âwmah ka bei a.


A meizial zuk a tithi tawh.


Meizial zuk a ching zauh zauh ta mai a, inthiamlo tak hian, "Tun chauh hi", a ti ṭhin a.


Tunah pawh, "Tun chauh", a ti leh.


"Tun chauh tak tak", ka ti a. A bu nghat nghat.


"Bawihi, lut ang, a vawt em mai",


"Zawh duh che ka nei", ṭhuthmun a tirem leh té tê.


Hei hi nia zawh ka duh em em chu, "Lal Isua i rinna a sáwi nghing em?", min en vung vung a.


"Bawihi, chutiang an inzawt ngai em ni?",


"Ka hre duh a ni, mi tam tak chu a sâwi nghing fo asin. Nang pawh hian, meizial i zu ngai lo a, han in en la, tun chauh i tihna hi a rei tawh i ti lo maw?", a nuih a za deuh.


Ka bek a dawm a, "Chuti a nih chuan, tun chauh ka ti leh tawh lo ang, zanin aṭangin", ka nuih sen sen a.


Ring phawt mai teh ang.


Ka en chho a, "Lal Isua i rinna chu?", ka ti leh hram.


"Eng nge ka sawi ang, hei hi ka chan tura a ruatfel chu a ni a. Lal Isua ka rinna a nghet zawk a ni. A kianga ka chawlh hun tur nghakhlel takin ka thlir a, ka nghak fan fan zawk a ni".


A hmelah chuan a ti mai mai lo tih a hriat theih a.


Min tihlim takzet a ni.


Entawn tur ka bulah a awm reng a, kei hi ka hahthlak ber.


A fanu thinlung ang maiin a thinlung a thianghlim a, engemaw chang chuan a mawl riau ṭhin bawk.


Ditêi nen khawiah emaw, eng hunah emawni chuan hlim takin an awm dun ngei ngei ang.


Thawnthu Buah han chuangin, Lasi Lalnu hnenah ṭanpuina dilin, engkim mai hi a ṭha vek tur.


"Lut ang, a vawt", ka duh tlat lo dawn mawni.


Ka nghawnga min kuahin, min en vung vung a, "Ditêi khan min lo chhûn zawk daih a nih hi", a nui sun sun a.


****A TAWP TA****


Show post links
Top