Lunglawm Tikimtu BY Kimkimi Tlau (Completed)

[Ngaia]

Kanu te chu ka hrilh ta veka, Fela'n ka phatsan emaw a tih dante, an hriattur ang chu ka hrilh kim vek chuan ka hria, ka rai thu ka sawi lai erawh chuan ka sawi sak ṭalh a, kanu te hmel chu en ngamlo in ka mit ka chhing tlat

" Ka fanu neihchhun ka chhuan em em ini a, i nun uluk tur pawn ka hrilh fo che mahse, thil thleng tawh ani a, hauh che ka tumlo adik loh zia i hriaa chu chu atawk. Pathian zarah kan la dama fa pakhat chu i nu pawn ala enkawl pui thei em em ang che mahse, i tuang itih chhah viau chu angai ang, i chhel viau angai dawn ania " Kapa chuan ati a, a thinrim chiam ka ring ania dam dapa aṭawng chuan min ṭhawng zawkin ka hria, ka inthiamlo zual ngawih ngawih, min hau hrep se ka awm te pawh anuam zawk maithei ani

" Pasal neilo a fa i neih chhan tur a awmlo, Ruatfela pawh chu keiman ka hrilh mai ang, mawhphurhna chu ala ve tur ani " Kanu in ati ve khauh

" Nu, hrilhhriat ka duhlo, ngaihzawng anei leh tawh alawm, neilo selang chuan thudik hi ka hrilh vek ang " Ka ti a, ka duh loh zia chu kanu te hian hrethiamse ka duh

" Ngaihzawng anei leh tawh tih mai mai, nangin harsa deuhin fa i nei anga i enkawl in mualpho na zawng zawng i tuar bawk dawna, ani'n ngaihzawng dang neiin nun nuam tak ahmang bik ang maw ka fanu nun achhiat vek laiin pangai takin anun ala hman bik ka remti lo " A ti nghat nghat, kanu hmel chu a sen ṭalh ṭalh a athinrim viau aniang

" Nu, hriatthiam tum rawh keimah pawn ka enkawl ve thei em em ang " Kanu kut vuan chunga ka tih chuan ka mitah tak min en kalh a, kanu chuan min lainat tih ka hailo

" Tinge i rilru hi atluan em em le, engkimah tinge min chhun vek, mite hi keimahni ang turah i ngai vek ṭhin a, chu chuan i nun ati chhe zo vek anih hi. Ṭhian pawh kawm lutuk suh ka ti fo che " A tawp lam chu ari chang chang ani, a kun a aṭap nghal tlawk tlawk keipawh ka bang chuanglo


" Kan fanu pawh adik vek biklo a, an induhna avanga thil thleng ani, Fela pawh dem lutuk bik suh u, kan dam anga Bawihtei pawn Hlawh anei bawka Fa pakhat chu a harsatpui biklo ang " Kapa'n dam dap in alo ti leh, kanu chu ka kuaha kanu nen chuan kan ṭap dun. Kanu hlimna thlen hram duh ṭhin mahila atawpah chuan ka ṭah tir leh tho anih hi, harsa tak chunga min enkawlna leh asur asa pawh thlu lo a ka rual awh hlaua thawk hram hram ṭhinte ka rulhlet dan hi anunrawn thlak ani, ka dawntawi vang vek in heng thil hi athleng anih hi mahse, in chhir ka duhlo ka inchhir phallo bawk. Kan khua ah anla hre darh anga kei min rel mai duh tawklo in kan chhungkua an han sawi kai chho tur te ka ngaihtuaha, thu leng kual chu kanu te pawn hriat chin an nei leh dawn, an fanu hian zahna ka van thlen tam dawn tak em.


Kanu ten min hawnsan aṭang pawn ni tam aliam leh tawha, ka dul pawh a puar lang ve ṭan tawh Liani ang deuhin thawmhnaw lian pui pui ka ha nasa mahse, hnathawk tura chhuah chuan thawmhnaw lian deuh deuh hak amawi ṭhin silo a, ka thawhpuite leh company a thawk ve dangte pawn ka rai tih chu an hre fur tawh, min sawi sep sep tawk an awm a, ka thawhpuite erawh chuan engkimah min chhawmdawlin ka tana hriatnuamlo ṭawngkam an chhakchhuak ngailo. Kan khaw lamah pawh ka rai thu athang leh ta viaua ka awmna aṭangin hreawm kalo ti em em mai ani, Liani pawn min lo call a ' Engmah min hrilh ṭha duhlo ' alo ti a, min lo ṭahkhum lo chauh, Fela nen kan inkar thilthleng ahre ve veka, min khawngaih vanga lo ṭap ṭep ani mah zawk, zantin kapa ten min lo call ziaha an zahna thlentu hi minla ngaihsak em em a, nu leh pa hmangaihna hi chu ngaihtuah phak ai hian alo ril anih hi

" Eng nge inlo ken leh ṭeuh va " Ka ṭhiante lo leng tur chu anlo inkhai bawr lut leh khawp mai, anlo len apiangin eitur leh damdawi vitamin tih ang reng anlo keng ziaha, damdawi phei chu ka ei senglo room ah ka hung dul mai

" I tan anilo Naute tan " Anti zel a, ka hauh an hlauh vang mai mai ani

" Naute in ka en chaklo ati " Ka tih chuan

" I dawthei anih chu " Anti a, an thil lei ho chu ka ṭhutna bul chhuatah anlo dah

" Hetiang chu lo lei vak tawh suh u, ka ei senglo hmania in lo lei pawh kala nei " An thil lo lei enkual dan dan pah chuan kati, Apple te thei tharlam deuh deuh anlo lei ṭeuh zela, ka ei senglo hrim hrim Pawisa kalo ui pui ṭhin a, ka tana an ṭhatna leh min ngaihsakna ah hian ka lawm bawk. Keimah zawk hian engmah ka ei ṭha theilo a, eichak leh rilṭam tak tak pawh hi ka neilo, doctor pawh ka rawn ve a Vitamin leh damdawi dang pawh min chawh a ka sawtpui vaklo ṭhin mahse, kar liama aṭang khan ka chaw ei tak hi chu a pangai chho a avanneihthlak khawp mai mahse, ka khel leh ka kawngte ka taksa hi ana kham thei lutuk a, ahma in hetiang hi ka nei ngai bawk silo, kanu ka hrilh a ' Min chhun anih kha, nau ka paiin ka hrisello thei lutuk, chuvang alawm fa pawh ka neih tam ngam loh, railaia thil eitui an tihte hi ka nei ve ngailo, ka hrin dawn lahin ka har thei bawk si ' alo ti a, tlem chuan ka ngaih aṭha ve deuh naute hi ka chhiat mai ka hlau ani

" Thil te hi eilui ve ṭhin rawh " An thil lo lei ho chu Lalai'n adahṭha a, Thil ka ei tlem tih ahmuh rualin min hau leh hlak hlak, kil khatah Saipuia leh Seni'n naute hming phuah anlo inchuh ve reng bawk

" A harsa lutuk ka ei luih pawn ka luakchhuak zel " Ka ti nang nang, zingkar luakchhuak ka nei chho a hreawmna zawng zawng hian min bawm ani ber mai, kala hrisello em em zui lehnghal, ka rilru a no zuala lunglen ngawih ngawih chang ka nei ṭhin bawk, zanah te hian Lalruatfela ngaih vangin ka ṭap ziah ṭhin, a ngaihsakna dawn te ka chak leh a mahse, kan inbiak loh na pawh thla tam ani leh tawh

" A buaithlak e tinge i hrisel loh em em mai le " Lalai chuan ati a, tihtheih vak anei silo min ngaihtuah ṭhin si, amah hi a khawngaihthlak zawk

" Ka zia ve ṭep ang ka neih dawn hnai ah chuan ka hrisel ve mai ang " Ka ti ta ringawt amah pawn a awih lo anga keipawn ka thusawi hi ka awih lemlo

" Nangni pahnih kha in bengchheng lutuk in hneawm " Seni leh Saipuia chu ahau chhunzawm hlak hlak

" Min lo hau ziah suh, i ninawm zawk " Anlo ti let zek a Lalai pawh angawi ve leh ta mai, rei deuh min awmpui hnuah Seni leh Saipuia chu an hawnga Lalai chuan min riahpui dawn ka damdawi eitur min lo pe thlap a, kei ai mahin ka ei tur te hi ahre zawk

" Zingkar ka huphurh " Kan mut hnua ka tih chuan

" Tawrhchhawk ve hlek thei che ila " Lalai chuan ati a, hreawm hi ati thei asin

" A zia ve zel mai ang " Ka tih leh chuan kan ngawi dun vang vang

" Sangi " Kan ngawih dun vang vang hnuah alo ti leh thut a, min ti phu dawrh lo chauh alawm

" Min au vak khera " Ka tih chuan, a inthiamlo leh deuh nge ' Tihpalh ' ati leh rih

" Sawi la "

" Ka ngaihtuaha Fela laka naute chungchang kan zep hi adik theiin ka hrelo, engpawh nise hrilhhriat ve hrim hrim chu a phu ani " A thilsawi chu ka rin loh lam daih ani

" Keichuan angaiin ka hrelo, a duhdan in awm se atello in naute nen pawh hian kan tlei ve thei em em ang " Ka ti ve bur, hrilhhriat ka tumlo hrim hrim

" Alo hruai hawn kha abialnu ani tih i chiang chuang emni? " A tih leh chuan ka mu lai chu ka ṭhu chhuak hluai, Lalai pawh chu alo ṭhu chhuak ve nghala

" Lala, sawi ka duhlo ka natna thlen thei tur thil chu pehhel zel ka duh " Ka ti sep

" A zirlai a zo tawha tunah Aizawl ah a awm mek, Nangmah chauh in ngaihtuah lo in i puma i naute kha ngaihtuah vela, awlsam deuha thil chinfel theih hi keimahni hian aharsa zawngin kan kalpui tlat ṭhin, Fela hian a hmangaih che a thudik hria se ibulah a awm em em ang, rin thu mai mai thil kalpui hi aṭhalo " A tih leh chuan chhan pawh ka chhang tawhlo, chhan dan tur ka hrelo ani

" Ka mu dawn " Ka mu a Lalai awm lohna lamah ka saisir nghal daih, ka muhil thei chuanglo a Lalai thilsawi chu ka ngaihtuah zawm char char tho, ka thil tawn khan min ti dawih zuala nat leh ka hlau ani, nat leh ka hlau ka tih vang hian ka na te adam ta tihna anilo, tuna ka tawrh mek pawh hi ahreawm rih a adang hmachhawn leh tur chuan ka in huamlo ani. Fela hrilh ta ila afa anih ringlo se tunge na ang keimah bawk kana dawn, afa anih ringin ka kiangah awm theilo tase keimah tho ani tuar tur, chuvang chuan tuar belh ka peihlo a, engkim hi ka natna tur chi chu pehhel zel ka duh, ka dawihzep pawh inti maithei inti dik keichu ka dawihzep

A tukah chuan ka huphurh ang ngeiin ka harh phata ka kua alet leh but tawh, bathroom ah ka tlanlut chu Lalai'n min lo zui lut ve nghal, Amak e mite chu an raia an rai hlimah zingkar luakchhuak an nei ṭhin a, arei a thla4 thla5 tih chho ah te chuan an chaw ei te tuiin luakchuak pawh an nei tawh ngaiin ka hre silo a, kei ve thung chu ka tuar tulh tulh

" Fela chu thla6 session an nei emaw ka tia " Kan chaw ei lai chuan ka zawt a

" Thla5 in anti ta zawk anihkha " A tih chuan ka bu nghat, thla6 ai chuan atlem lo ang tih kha min hrilhdan kha ania, Lalruatfela hian min lo duh tak tak ngailo zawk nge ka ngaihtuahna ka kawm nasa lutuk hi ka rilru te hi a diklo zo vek tawh, Lalai'n min hawnsan hnuah Hna kal turin ka insiam a, Vawiin chu hna kan thawk rei dawnlo a Vari pawh ka hruai ve dawn


" Awi avan cute tak " Office ka lut nge lutlo Dari'n alo ban nghala, a hlimpui leh khawp ang

" Khawi teh kalo pawm ve chhin " Miriami'n atih pawh chuan aphallo a atlanchhiatpui, Miriami'n a um bawka an ri chel chul mai

" Fela alo hawng tih i hria em? " Ka room a ka luh chuan Tea'n min lo zui lut a

" I sawia ka hrechiah " Eng ah mah ngailo ang takin ka ti lar lar

" Ṭha deuh angin lan tum tlat ṭhin suh " A tih chuan ka mitmu ka chet kual ralh

" Ka ṭha alawm naute hian chakna min pe " Ram hmarhin kati

" I ṭhat chuan aṭha e, keipawn ka ṭhatna turin thil ka ti ve tawh ang " Tiin a chhuak nulh a, eng nge sawi atum ber pawh ka hrelo e, Ka khel na hian kal zung zung hi minti harsa tlat zel mahse, tuar hlelawm khawp chu anilo. Director in min lo call a chhunah thil eipui ah minlo sawm, director meuh sawmna chu hnar phal chi pawh anilo mahse, ka huphurh thil ka ei ṭha thei silo a

" Dari, Vari kha kalo hruai ang " Director nen thil ei turin chhuah kan tum a

" Kan lo awmpui mai ang " An ti a, anla phallo ngang mai

" Hawn tlang ka duh a, office ah kalo let tawh lo ang nangni pawh thil in ei zawh chuan in hawng dawn nia " ka ti a, chutia ka sawi takah chuan Vari chu min pe phal ve hram, ka duat bawka a chum ve si an lawm em em bawk hi a awm ve reng, ahmel te hi aṭha reuh sia

" Kan va chhangche dawn ve " Uite kai chunga ka chhuak chu Director chuan minlo fiam a

" Kalo hruai laklawh tawh sia, vawiin chu hna ban hmat ni ani tho a ka tia " Ka ti zung zung

" Ka fiam mai mai che anih kha, kan kal dawn mi " a tih chuan kabu nghat, Director hi hmeichhia ka tih tawh kha, amah hi inla puithu ṭhin viau mahse, ka lakah hi chuan afel lutuk keipawn ka ngaina

" Motor in maw " Kan bulah car alo dinga bo deuhin ka ti hu, hnai teah kan ei mai dawn emaw ka tih vang ani

" Vawiin chu naute kha thil tui deuh kalo treat ang " ka dul thlek zeuh pahin ati a, zalo deuhin ka nuih ve tak kha, min hruaina hmun chu vawikhat mah kala kal ngailo

" Ka cousin te Restaurant anih hi, thla liamta khan an hawng thar ve a, an thilsiam atui em kan test dawn nia " Nui var var chungin ati a, a chhung kan luh chuan rin aiin mi anlo tam daih, Vari chu ka pawm kang daih a hetiang hmunah Uite hruai luh chu ka inthlahrung hnuhnawh khawp mai. Director chuan menu min pe a 'i duh duh chah rawh' ati bawk, kan chah hnu lawkah eitur anlo chhawp nghala, Vari chuan nuamlo ati nge a awm ṭha duhlo reng reng, min va tibuai ve tak

" Kalo pawm ang " Ti chunga Vari lo la tu chu Lalruatfela ani, Aizawl ah a awm leh tawh tih ka hriaa mak kati hranlo, Vari nen chuan engmah ka ei thei dawnin ka hrelo a, a pawm ta daih pawh chu ka hnial duh talo. Thil chu kan ei ṭana an siamtui ve khawp mai mahse, keimah hian ka ei chak vaklo hrim hrim

" I va eitlem ve, rai i ngeih vaklo ani maw " Director chuan ati a, ka ' aw ' Ve mai, bill pawh chu pek ka tum buai ve duh talo

" Kalna tur ka neia i rual chuan kalo let ve tawhlo mai ang" A car bulah kan ding a, Fela khan Vari kha khawiah nge akalpui ni

" I thawkrim tih ka hria i chanchin hriat anuam khawp mai, nau neih chawlh i la tur pawh hi ka ui viau che ania" Atih chuan chhanlet dan tur pawh ka hrelo, hmaichhana in fak hi chuan sawi tur hi avang ve ṭhin em ani

" Anih chuan ka kalsan ang che, i fimkhur dawn ania " Director kalliam hnu chuan ka hawikuala

" Heta hi kan awm " Tiri a awm chuan ka hawi let vut, ka dinna piah ah chuan Fela leh vari chu anlo awm, zawimuang chuan ka pan hnaia, Lalruatfela chuan ka pum ngawt chu a en leh nghal, Ka dul hi a lian vak chi ani dawnlo ani maithei ala puar lian vaklo a, vawiin phei chu thawmhanw lian lam ka ha a alang vaklo

" Ka lawm e " Ti a Vari lak mai ka tum chuan athlah duh miahlo

" Ka thlah ang che u " A ti sap a ka lu ka thing rang lutuk

" Vari chu in thleng ka thlah ang, i duh chuan ke in ilo kal dawn nia " Rum zetin ka melh a ka melhna chu eng ah mah angailo, Vari a pawm bet tlat bawk si hnial mahila awmzia anei dawnlo tih ka hrechiang

" I damṭha em? " A motor ah ka chuang veleh ta nge nge, min biak pawn ka chhang ṭha peihlo

" Damṭha lo ila chuan hetah min hmulo ang " Ka ti duah

" I danglam hle mai " A ti leh a, a danglam zia a inhrelo zawk ani teh chek ang chu

" Ka rai tih loh te chu danglamna ka nei hleinem " Ka ti leh hmak, sawi tur ahre tawhlo nge angawi ran a, keipawh ka ṭawng vak chak lemlo

" Leng turin min sawm dawnlo emni? " In kan thleng tawh a, min be ṭha thut pawh mak ka tih tawh nen len alo beisei te phei chuan mak min tihzual tir

" Min thlaha ka lawm e " Tiin ka kalsan daih, a awmdan kha ka hrethiamlo, min haw viau ṭhin kha ani si a. Ka phone ri ral ralin chuan min ti harh zawka, meng mang hleilo in ka mutna bul vel chu ka dap rak rak, Sofa ah phone khawih chunga ka mu mai mai kha kalo muhil tlang daih anih dawn hi

" Hello " Phak deuhin ka ti a, ka mit ka nuai pah chat chat, ka kawngka lah chu alo ri ve zat a, peihlo deuhin ka tho chhuak, minlo call tu chu ka en chianga Nitei ani leh nghal

" Sangi " Alo ti a, a aw lah chu adik lo riau in ka hria

" Eng nita Nite " Kawngka chu ka hawng pah rak, Pawna lo awm chu Lalruatfela ani a, phawk zeta ka en laiin Nitei chuan thu mak deuh alo sawi ve chiah bawk, Ka hriatsual anih ringin

" Engmaw i sawi " ka ti nawn leh

" I pa a awm tawhlo " Ṭah chhuak deuhin alo ti leh a

" Nite infiamna chi pawh anilo ania aw, iti anglo emai " Ka tih hlak hlak laiin Fela chuan ka phone chu min chhuh a

" Kanlo kal ang Nutei kha minlo hrilhsak dawn nia " A ti a, kei erawh ka a chhuih mai

" Eng nge i sawi ve ngawta, Nitei khan minlo fiam mai mai anihkha " Kala harhchiang lo a Nitei thusawi kha ka hriatsual ani maithei

" I rilru ti fim rawh che Princess " Titu Lalruatfela chu ka en tlawk tlawk

" Kapa athi maw " Rilru na zeta ka zawh chuan abu nghata, ka kaiza tha hi a zawi nghal vekin ka hria ka tlu tur chu Lalruatfela min lo dawm hmana, min pawm lawpin sofa ah min ṭhuttir

" Insiam la Inkhua ah kan kal nghal angai " A ti a mahse, ka chechang thei derlo

" Sangi i ṭha em? " Lalai te lo lut tlan lut chu ka mittui avangin ka hmu phe ruai, Lalai chuan min kuah a, ka ṭap chhuak hawk

" Seni, a thawmhnw kentur tam vaklo va siamsak rawh " Saipuia'n Seni atir rite chuan minti lungchhe zual vek, chau hnapin ka ṭap a mahse, ka mittui hi ahul thei chuanglo, tinge kapa chu aboral ringawt adamloh thu engmah ka hre bawk silo, ka phal thei thlawtlo ani

" Seni kava pui ang aw " Tiin Lalai chu room ah alut ve a, Fela chu ka hmaah lo ṭhu hniamin pheikhawk min buntir a, a chetdan chuan min ṭhawnga ka thiltawnin min ti a chhuih bawksi atih ang ang chuan ka awm ve tawp. Ṭhiante an phe sap sap hlawma, kei erawh ka ṭhutna ngaiah ṭhu in akhat tawkin ka ṭap leh ṭhin ka insum thei thlawtlo ani. U duhi te nupa pawh anlo chhuk ve a, ka biak tlak miau loh avangin Fela chuan alo chhawn, Ka ṭhiante chu ka mamawh tur buaipuiin anla buai vat vata, Nu tetei ka hmuh chuan mak kati deuh, ka bulah ṭhuin min hnem mawlh mawlh a, min hnem tam poh leh ka ṭah achhuak zual

" In in peih chuan kal teh ang u, Sangi i kal thei ang tiraw? inti pachang hram hram rawh aw " A ti a amah chu dingin min kaitho ve nghal

" Nu, kalo hruai ang " Fela'n atih chuan Nu tetei'n min chelhna athlaha Fela chuan ka kawngah nghet deuh in alo chelh nghal, Fela car in kan kala Ahnungah Lalai nen kan ṭhu a, ahma ah Nu tetei ṭhu in Fela'n motor akhalh, Lalai chuan zawi tete in min hnem ve renga

" Bathroom ah alut kha alu hai thutin atlu a, a tlukna lamah alu asawh ani awm e, damdawiin pawh an kalpui hmanlo" Nu tetei'n kapa boral dan asawi chuan ka rilru hi ana ngawih ngawih, atan damdawi pakhat pawh ka leisak hmain min boralsan mai hi ana ka ti zual em em ani. Kan khua kan thlenga kan in aṭanga zairi lo chhuakte chuan ka ṭah ati chuak zual a, motor aṭang a an chhuk vek hnuah pawh kala chhuak ve theilo

" Princess, lokal rawh le " Fela'n kawngka alo hawnga, Dam dapin min bia, ka kutah chelhin motor aṭang chuan min hruai chhuak a, Kan in pana min kalpui laite chu ka ke pen hi asak ṭalh mai. Inchhung kan lut a Nu leh tlangval tlaivar turte anlo ṭhu ṭhap a, ṭap ri hawm hawm ka hriatte chuan min i tawt ngawih ngawih, Fela tha ring chuan ka kal ve mai mai ani

" Bawihte " Kanu'n min hmuh rualin min ko a, min lo pan hnaiin min lo ṭahkhum tlawk tlawk, kan tan hian tuar thiam ahar ve em ani, min kalsan dan teh tawp hian rilru hi ati na veng veng, Fela awmlo selang chuan kanu'n min lo bawh rual khan ka tlu daih ang, Ka nau in kanu chu alo kaisawna, keipawh Ruang bulah chuan ka ṭhu thla ka bulah Lalai leh Fela te anlo ṭhu ve a, kapa kut chu ka chelha mahse, nidang angin lumna anei tawhlo

" Pa " Ka ko a min chhang thei tawhlo, Ahma chuan ka koh in min chhang ngei ngei zel asin

" Sangi, insum reng reng suh, ṭap bawrh bawrh rawh " Tia Nitei'n atih takah chuan ka ṭap chhuak hawka, zah lam alang thei tawhlo kapa ruang chu bawhin ka ṭap tlawk tlawk, ka dul chuan duh angin min chettir theilo a, Ka intihpah hlauin Lalai leh Fela'n min veng pah reng

" Bawihte i chau lutuk ang, mu hahdam ta che " Nitei'n atih chuan lu ka thing a, kapa hi ka kalsan dawnlo hrim hrim, ka thlir ṭhin ka mitah chuan tudang mah hian an tluk biklo asin. Kapa chu kan thlahliama ka van hrilhhai tak em! Kapa nen he khawvelah inhmu in kan inbe thei tawh dawnlo, a hmuh chak ve em em ka naute pawh ahmu hman dawnlo a, ka naute hian hmangaihtu pu anei ve dawnlo, zahna ka thlen zawng zawngte hrelo dera chak taka awm tura min chaha min fuih ṭhintu kha a awm talo, a anka damdiai te min hmangaihtu aw ri te kha hriat kala khamlo asin, ka kulhpui min humhim ṭhintu kapa, inkalsan tur chuan thu kanla tiamlo asin

" I kua aruak lutuk ang " Lalai'n thingpui leh a hmeh min chhawp a, ka bulah ka ṭhiante an awm ṭhap ka tawrhna min tawrhpuiin ka tan an awm a, anni hi awmlo se ka mualpho chiang viau ang

" Inti chak hram hram rawh, i nu hnem turin nang bak i awmlo ania aw, i nu in amamawh dawn che a nang chu chhel taka i awm angai " Lalai'n ati sep sep Liani pawh ka bulah alo ṭhu a, a dul chu alian tawh khawp mai

" Inti chak hram hram rawh aw " A ti a, ani pawh amit abui ve lak mai

" Princess, i rilṭam em? " Lalruatfela ka bulah alo ṭhu a, hepa awmphung hian minla tibuai reng, kan inkar ṭha vek ang maiin a awm a, engkimah min ngaihsakin ka kiangah a awm reng bawk

" Lalai'n eitur min pe " Tiin thingpui chu ka lem khalh a, ṭhiante lah chuan hun thawl min pe ang hrimin an kalsawm diak leh nghal, ka bulah alo ṭhu a thingpui ka in leh mek lai chuan ka dul alo khawih thuta, ka thingpui in ka phuh chhuak teuh lutuk

" Eng nge itih " Phawk zetin ka en a pawisawilo zetin min lo melh let

" I pum ka khawih " ati a akut chu ala sawn duh miahlo, dahsawn sak ka tum chuan arum nghuta

" Awm ṭha mai mai teh " Ala ti hmuk zui, midang an awm ve neuh neuh avangin ka ṭanglui lo mai mai ani, eng nge ahriata a ngampat em em


Kapa thih aṭanga karkhat aliam veleh tawha, kapa tello chuan kan run hi aruak ngawih ngawih, Khawtlang nu leh pa ṭhenkhatin kan khawhar hnemin zantin minla lenpui a mahse, intih pachan hi ahar kala ti em em tho, Lalai te ho chuan karkhatna min awmpuiin nimin lam khan Aizawlah min letsan a, Lalruatfela leh Nu tetei'n minla champui thung. U duhi te nupa pawh kapa ral turin anlo kal ve vang vang a, An fate pahnih a pi te bulah dahin Pekpeki erawh anlo hruai ve, an inhnuai luah ve mai chuti taka min ngaipawimawh chu ka phulo ka ti hle. Rin ai tak chuan kanu leh ka nau chuan an tuarthiam a, keimah ber hian tuarthiam har kala ti


" Nangni pahnih hi engtin nge in awm dawn, Sangi lah a dul apuar lian tawh a, kan dinhmunah sawi hun chu la ni chiahlo mahse, laklawh deuha awm reng zawng a fuhlo " Nu tetei chu ka en vat, zanin chu inleng kanla neilo a kanu leh mampuia te nupa bakah Nu tetei leh Fela te nen kan awm a, Nu tetei thusawi chuan min ṭhawng viau

" Sawi hunlo a awm hleinem, Sangi pa nen pawh khan kan sawidun ṭhin a " Kanu'n a chhanga mahse, ahnuk a ulh deuh aniang asawi zui theilo

" Hriatsual innei in ka hria, kei leh Fela inkar ah engmah a awm tawhlo, kan chanchin sawi intum anih chuan kan inkar kan titawp fel tawh " Kanu ṭawng chhunzawm leh hma chuan kalo tih khalh, tumah an ṭawng leh hma chuan ka nau fanu aṭap a, Lucy chuan thawhpuiin room ah aluhpui nghal daih. Mampuia te hian fa an nei tawh tih ka sawi theihnghilh Mampuia te fa chu kapa khan ahmu hman a, a duatin kan inbiak tawh chuan a tunu chanchin alo sawitel ziah ṭhin

" Luhlul chhuah lo teh Ka u, sawifel theih anih chuan sawifel aṭha " Mampuia'n alo tih ve chuan ka tho hluaia, room ah ka lut nghal daih, ka hreawm em em lai khan ngaihsak pawh minlo ngaihsaklo, tunah lem min rawn hmasa miahlo in an duhdan an sawi leh nghal pawpa min thamlo mah mah ani

" Inbe teh ang " Lalruatfela'n min lo zui lut a, rum zeta melh ram ram in

" Chhuak zawk rawh " Ti hmakin lehlam ka hawisan

" Ka ringlo che a ka hria ka thiamloh ani, khatih lai khan ka rilru ana a engmah kha ka ngaihtuah chiang hmanlo " A tih chuan ka inhum ruh ngar ngar

" Tea'n thudik ahrilh vang chauh chea kan inkar siamṭhat duh ini tiraw? Chutiang anih chuan kan inkar hi siamṭhat tum suh " Ka ti ram ve hmarh

" Thudik hi midang min hrilh ka ngai hleinem, ngawi renga ka tawrh mai mai iring emni, Kan inkar siamṭhat ka duha mahse, kan session kanla zo miau silo, chuvang chuan nang leh naute hmuchak viau che u mahila hna zawhfel tur kala nei bawk si a, ka reh reita deuh ani " Engtin nge thudik ahriat tihte chu zawt chak viau mahila ka ṭawngchhuak theilo, ngawi renga amah hnungchhawn zawnga ka din lai chuan, ka hnunglam aṭang chuan min lo kuah a ka ṭang deuh ṭung mai

" I msg khan minti na asin, ka hmuh veleh khan lo hmuh nghal che ka duha, buaina tenau ka tawk leh bawk si, hlim turin min chaha itello khan ka hlim viauah i ngai bawk mahse, hei hi i hre tello ani, ka lunglawm tikimtu tello in engtin nge ka hlimin ka lawm theih ang " Rilruih in ati

" Zuali kha " Hrechhuak thutin ka tal nghal phata mahse, min kuah nghet sauh

" Ka nau anih kha itello in hmalam ka pan theilo tih hrechiang em em la ani mai " Ati nghut, chutia a insawifiah takah chuan ka hahdam huai thei mawle

" I ṭhiante'n an fiam che pawn insawifiah itum miahlo " Ka ti leh hrama

" I lak kawih ka rin loh vang ani " A ti a, alam hawi turin min kuai her, thil hi ala ngai awlsam reng anih hi

" Kan ṭha tawh tiraw? Inti na tawn tawhlo ang " Chiang deuhin kan in melha, a mitmeng ah chuan min duh ngawih ngawihna te min hmangaihna te kha alang chhuak leh zut zut tawh, ka ta liau liau ni thei tawhlo a ka ngaih zan tam ka ṭahpui fo kha tunah ka hmaah ading mek chu ani si a, mumang a ang ruai mai kan inkar ṭha leh se tiin suangtuah fo ṭhin mahila ataka athlen meuh chuan ka ring ngam leh silo

" Khanu kha i bialnu emaw ka ti a, chuvang alawm engmah ka sawi duh tawh loh " Ka tih chuan anui chhuak hawk a, rum deuhin ka melh nghal ram ram

" Engmah min zawt hleinem "

" Min huat em kha " Ka tih chuan ka hmui alo tawk zeuha

" Atir kha chuan ka thinrim alawm mahse, ka rilru afim hnuah ngun deuhin ka ngaihtuaha, thudik pawh ka hriatphah " Ati leh sap, a landan anga thil ka teh ngawt ṭhin hi chu sim vang vang chi ani, Lalai pawn a bialnu anilo maithei asin ati a mahse, ka nat leh hlau in ka ngaihven ṭha duh tawhlo anihkha. Room aṭanga kan chhuah leh chuan inleng tam vaklo anlo awm tawha, Lucy in indaihlo deuha thingpui alo buaipui chu ka hmu a Fela pawh ngaihven talo chuan choka ah ka tlanlut, ka kal hmanhmawh deuh hian ka khel hi ana zawk zela ka tlu hnawk ang tih te pawh a hlauhawm

" Lucy kalo siam ang " Ka ti a, nau a paw pah bawk si room ah kan tawm rei deuh ani

" Naute hi lo la zawk rawh " A tih tlat avang chuan naute chu ka pawm ta zawka Lalruatfela pawh ka bulah alo ding leh run tawh

" A cute tiraw? " ka vahnu chu ameng ve kiau a, thla2 chiah ala ni chungin a inla nikhaw hre ve lutuk

" A hmel chu a patling hle mai " Hnai deuha lo bih pah chuan Fela'n ati peka ka nghawk nghal sawk, Lucy a awm ve reng bawksi

" Anih a cute " A ti leh hram bawka, amah ngai hian zanah ka ṭap ṭhin chu ani sia ka nuih aza reuh e a

Fela nen kan inkar kan sawifel ta a min delh rit em em ṭhin kha abo duak mai, kapa chu ngaiin la thlahlel viau mahila tuar dan ka thiam ve ta a, vanduaina in kan chungah thla ahan zar ve meuh chuan lainata min ngaihsaktu rin phak bakin kan ngah a, ahma a min sawi sep sep ṭhinte pawn min tuarpui a, Pathian hi aṭha tih loh theih anilo kan chunga thil thleng hi hriatthiam har mahse, a remruat dal rual anilo a engkim kan tana ṭha turin ro min relsak ṭhin tih hi harsa mahse, kan pawm thiam angai ṭhin. thihna meuh hi chu ana a tuarṭhan awmlo ani bawk hei vang hi aniang kan hmelhriat loh chungah vanduaina thleng mahse, kan tuarpui ve ṭhin em em tho, kan mi huat zawng tak te kan pawisawi reng ṭhin te pawh anni ang, thih leh dam kara an awm chuan kan haw reng thei ngailo

" Khawiah nge inkal a " Kapu tein a kan luh rualin Nitei'n min lo zawt a

" Thlanah kan kal a, aremchan laiin kanlo leng lut anih hi " Fela nen thlan kan tlawh a, Aizawl lamah let kan tum hnaia, tun bak chu kapa thlan pawh kan tlawh thei tawh rihlo ang

" Aizawl ah let intum hnai deuh ami? " Atih chuan

" Aw, rei deuh hna ka chawl thei silo a " Kati a kapu in minlo biak ve takah chuan kapu chu ka ngaihven san a

" Pu engtin maw itih " A bulah ka ṭhu thla a, Fela pawh kan piahah alo ṭhu

" I ni hian asawi zuaia inneih lam insawi ri deuh ami? " Kapu in atih chuan Fela chu ka en a alo la nui vur vur zui

" Aw mahse, nakum angai tawh ang kapa hetiang hi ani sia " Ka tih chuan kapu chu abu nghat nghat

" Chhungkaw pangai taka seilian naupang te pawh enkawl thiam an hara, nu leh pa te anti beidawng fo ṭhin, nu leh pa kara seilian naupang pawh chutiang annih chuan nu chauhin a enkawl naupang Pa chauhin a enkawl naupang hi aṭha lutuk theilo tih hria ula, nangni chuan in fate ṭha taka enkawlin engkimah in ṭangdun tlat dawn nia, fa hial innei dun dawn tawha inhauh leh thil ho mai maia tihtauh te kha achi tawhlo, Tuaii i hria tiraw? Puitling taka i awm angai a, Fela pawh i chhungkua thlima i lenchhua fo arem dawn tawhlo, ka sawi chu inhrethiam em? " Kapu'n ati chuar chuar a, a sawi zawh ah Fela nen chuan ' Hrethiam e' kanla ti rual chiah lehnghal.


Aizawlah Fela leh Nu tetei te nen kan let leh a, inrem vek tawh mahila inneih erawh kum thar lam kan nghah angai dawn ani, kan kalsan tur chu kanu ka ngaihtuah khawp a, ka nau hnenah pawh ngaihsak turin ka chah ngun khawp mai. Mampuia ten fa annei hman chu alawmawm kati bawk, kanu'n arilru a kawm ngawt ngawt theilo anga a tunu in a rilru ala peng ve thei dawn, Aizawl kan thlen zanah Lalai te anlo lenga, Samuela leh Lalawm an tel ve bawk nen anlo ri lut chel chul mai

" Rin aiin ala puar lian lo hle mai " Samuela'n ati a ka dul chu a en chik ngang mai

" Ka nei ve dawn hnai tawh apuar lian vak dawnlo aniang" Tiin ṭha deuhin ka hrilh ve mai, in hau hrep ṭhin mahila lo la biak chhiat reng thu awmlo

" Lawmi chanchin kha i hre ve tawh em? " An ti leh a engmah ka hriat loh thu ka sawi chuan

" Hrilhna hun ala awmlo em a engmah kanla hrilh velo " Lalai'n alo ti zung zung

" Sawi ula " Sofa ah ke thluang duaia ṭhu in ka mal vel chu ka chum a, akham thei lutuk hi a hreawm

" Khawlaiah nikhaw hrelo in atlu a Damdawiin ah an kalpuia, a thluakah bawk a awm a zaiin awmzia anei tawhlo anti a, a hriatna pawh a khawih pawi maithei achhungte chuan phaiah kalpui chu an tum lui tho a " Samua thusawi chuan min ṭhawng khawp mai, ka rilru a lo lang hmasa ber erawh ' Phuba reng reng keima lak tur ' Lalpa'n ati a, keiin phuba lo la mahila phuba la ṭhin kan Pathian hian ka tlawm luih tlatnaah hian phuba min laksak ngei ka ring tlat a, Lawmi chan chu a chawh ka tiin a phu ka ti pawh anilo mahse, Pathian phuba hi chu mihring tan tuar hlelawm tak ani tih erawh achiang


" A van zialo ve, hmu turin inkal ve tawh em? " Ka tih chuan

" Nimin khan kanva kal alawm, hmuh loh karin a cher chhe hman lutuk, amah pawh a ang tawhlo min hmu nge hmulo minlo ṭahkhuma, i laka a inthiam loh zia leh hreawm atihzia te asawi luam mai, mihring lamah chuan damna chance neilo tluk ani a, nangpawn vawikhat tal chu arilru nawm nan hmu ve hrim hrim la aṭha ang " Lalai'n ati sep sep, ka thiltawn te khan ka rilru anti chhe zo nge ka rilru a chhe ve tawh hrim hrim pawh ka hrethiamlo

" Khawngaih duh viau mahila Lawmi ka ngaihtuah rual rualin min tihdante ka ngaihtuah chhuak leh a, ka chungah rilru chhe tak pu in engkim ama ruahmanna vek ani, Fela nen kan inkar ti chhia in nun hreawm tak min hman tira, khatiang zawng zawng ka ngaihtuah let chuan ka khawngaih theilo, ka rilru te hi a chhia in a khawlo zo vel tawh " Ipik zetin ka ti a

" Kan hrethiam che hmu ngei ngei rawh kan ti hleinem, hun aliam anga i huatna pawh hun in ala ti dal mahna " Lalai'n atih leh mek laiin Lalruatfela alo lut ve chiah, Lalai chuan alo be thuaia ṭha deuha chhangin ka bulah alo ṭhu leh thurh, ka ke ka thluan duai chu la kangin a hmet nuap nuap a ava han nuam tak, ka ke kham lutuk pawh azia huai huai alawm

" Tea a accident a, i hre tawh em? " A tih chuan Fela chu ka melh haw, a thusawi chu tuman an hre velo ang, ka hriat tham leka ringin a sawia

" Hre nang engtikah " Lawmi chanchin ṭhalo lam ka hre zo chauha tunah Tea ani leh bawk

" A accident na arei tawh, tunah chuan adam tur athak huai huai tawh ang " a ti leh thena asawi awlsam mai sia

" Engtin nge a awm reng reng " Dilchhut deuha ka zawh leh chuan

" A rei tawha adam ṭep tawh ka tihna, kan kut kan tih nat pawn adam dawnin athak huai huai zel " A ti leha za deuhin ka nuih kar kar

" A ṭhat chu Lawmi chanchin kan hrezo chiaha Tea chu ana leh viau emaw kati hman alawm " ka awm dawmin ka ti a naute ka pai aṭangin ka dawihzual bawk

" A tir chuan ana mahse, a vannei khawp mai Doctor pawn alo damchhuak leh hi amak anti " Ani leh nilo angin asawi ve niap niap sia asawi zawh rualin ka bu nghat nghat, mihring beidawn tawhna ah pawh hian Pathian erawh chuan tihtheih loh aneih loh zia alantir leh ṭhin, he thu ah hian kan in nghah ngam angai khawp mai

" Aṭhat chu nakinah kanla kan ve hrim hrim dawn nia " Ka tih chuan min en ngur ngur a, eng chu hre leh ta ni maw

" Eng nge " min en ngur ngur bawksi, hrethiamlo deuha ka zawh chuan

" Ka tello chuan tumah i hmu thei tawhlo ang, i fimkhurlo thei si " A ti bur a hnialin awmzia anei leh lo khawp ang. A tukah chuan Fela nen Tea chu Damdawiin ah kan va tlawh a, a awmpuitu anu chuan min hmuh rualin min lo be siam siam

" Kan khaw lama kan awm avangin kalo hre velo a, azialo hle mai " Ka ti khawmawia Fela'n ṭhutna tur min lo kawhhmuh ve sek

" Inthiamlo duh suh, ka fimkhur loh vang anih hi " A ti a kan awm avang nge anu chu a chhuak daih, a ngaih aṭha rih pawh ani maithei, Fela chu ka bulah aṭhu ngawi kura ati nuamlo ṭhin tak tak ani

" Engtikah nge inneih intum " Nui ṭha chunga atih leh chuan

" Nakum angai tawh ang " Ka ti vata Tea chu a chek tlak tlak

" Fela'n anghak thei meuh ang che maw " Atih chuan Fela a phun hluk a

" Ngawi ve mai mai ṭhin rawh, ka hnek chak teh mai che ania " A ti deuh hmuk ati zialo ṭhin asin, Tea nu lo let thleng kan awm a alo let hnuah keini pawh kan ṭin veta, pawnah chuan Lalai te nen kan inhmu nawlha

" Lawmi kan tlawh leh lawk dawna, reilote chu lo hmu ve zawk la " An ti a, ka rilru a insualbuai nasa Fela chuan ka kut alo vuan a

" Harsa mahse, nakinah inchhirna tur insiam loh hi aṭha " Ati a, Lawmi hmu tur chuan kan kal veleh ta, mihring lam taka ngaihtuah let chuan aharsa ve, keiin ka duhsak a aṭha ber ka ngaihtuah laiin min rulhlet dan kha anasa em a mahse, ka rilru natna hre reng ila thi leh dam kara awm tawh hi hmu duhlo ta ila ka rilru anuam dawn chuanglo amah ang chiaha sual kani ve dawn, chu chu ka duhlo a chuvang chuan ka natna te hi dahṭha a vawikhat tal chu ka hmuh ve angai ani

" Duati, i ṭhiante anlo kal ania " Lawmi awmna cabin kan luh rualin anu chuan Lawmi chu abia a, ani erawh amuhil ani maithei khumah mu in a mit achhing chial

" Kaitho duh suh Nute, kanlo kal remchang em a kanlo lut zuai anih hi " Ka tih chuan Lawmi chu alo meng siar siar a, amitmeng chu aharh vaklo

" Sangi " Min hmuh chian rualin aṭhu chhuak hluaia, min nuih nghal var var

" Na i nei em? " Ṭha deuh chuan kati a

" Neilo e, minlo va tlawh har ve, Lalai te anlo kala i tel ve ngai silo " Ati nang nang a, a mitmeng chu afimlo ruaiin ka hria, thil thleng engmah ahre tawhlo tih hrilh ngailo in ka hrethiam maia, aṭhen laiah chuan avannei khawp mai.

" A natna hi a chak lutuk a, a hriatna pawh a khawih tawh, amu vang vanga alo harh chang hian min hriat loh chang anei ṭhin a mahse, ahnuah min hre leh ṭhin " Hnuk ulh ṭeuhin Lawmi nu chuan min hrilh a, vanduaina atawh meuh chuan rei tak ka ṭhian alo nih tawh avangin rilru ati hreawm pha leh tho, Lawmi chanchin sawi takah chuan Bawihtei pawh company aṭangin abang a, engtin nge a awm chhunzawm ka hrelo mahse, Dari sawi danin mi dawrah a inhlawh ani awm e, Company aṭanga aban chhan hi ka chianglo a, Ama thulunga bang erawh anilo tih chu ka hria, Smart leh chhelo tak ni chungin nun smart lo tak ahmang chu ani ta mai sia. Kan nun hi uluk angai khawp mai, kan thil tihsual te midang rilru kan tihnat te hian min la vaw let leh ṭhin tih hriat hi aṭha.

Pathian zarah hrisello tak chungin naute pawh ka pai chho ve zela, ka neih ahnai tulh tulha ka infit lo tulh tulh, zingah tho in exer te pawh la ve mahila awmzia vak a awm chuanglo, ka rai lian lutuk pawh ni silo in ka ke hian min zolo ni berin ka hria, Pathianin min awmpui tlat lo selang chuan ka naute hi ka chhiat daih tawh ka ring. Kal laklawh laia tluk thutte ka ching a, heivang hian Fela'n min awmchilh deuh tawp, Kanu chuan Mampuia te buaipui angaih avangin min awmpui theilo a chah pawh ka chah ngamlo, Nu tetei erawh in min awmpuia naute ka neih hunah chuan Pa thana pawh alo chho ve dawn ani awm e

Nau neih hnaih tawh lamah chuan kan zan mute hi kan zun achhuak sek a, zung tamlo mahila bathroom ah kal reng angai tho, Nu tetei'n diaper hreng maila atih lahin ka duh bawk silo, ka zun zin deuh chang phei chuan Lalruatfela ka melhrum vak zel

" Zun chhawk thei che ila " A tih lek phei chuan ka kek nawk nawk lo chauh ani, min khawngaih tih chu ka hriaa mahse, aṭawngkam hian thin hi ati thawk tlat zel. Zanin ka mu pawh ka zunchhuah vangin ka harh leh seka, room pakhatah Nu tetei mu in ka room chhuatah Fela amu ve bawk, vawi5 dawn ka zun hnua ka let leh lam chu ka tai ana riai riai a ka pum pawh ana ṭalh ṭalh, ka nau neih thla ani tawh bawk si hlauthawng ang reng deuh chuan Chhuata Fela mu chu ka ke in ka tlawh a

" Na i nei ami? " Thawh phan pawh awmlo in alo ti nghal, a harhvang mai mai asin

" Nau ka nei dawn hnai aniang ka pum ana " Ka tih chuan ameng kawk

" Sang rawh le " Ka kutah vuanin ati peka, a nakah ka nghawk sak sawk

" Nau i chhar thiam ami? Kanu va ko rawh damdawiin ah kal ang u " Ka tih hlak hlak chuan rang deuhin achhuak nghala, na neih nen a kaw lo lutuk hi chu vin loh theih pawh anilo, eng amah hmaa sang rawh han intih nghal ngawt, thin atirim si nuih atiza tho bawk si, kanu nen anlo let leh rual chuan inrin lawkna awm miahlo in zun ka cheh

" Nu zun ka cheh " Ka tih chuan

" I tuibawm a keh zawk aniang, Bawiha Sangi hi pawmchhuak rawh " Nu tetei chuan ati a, Fela chuan min pawm in pawnah min chhuahpui nghal, ka neih hun ahnaih tawh avangin damdawiin kan luh thut pawha ken nghal theih turin puante leh naute mamawh chu bag ah kan dah fel thlap tawha, chumi keng chung chuan Nu tetei'n kan hnungah min lo zui ve hmawk hmawk. Damdawiin kan thlenga atira Fela chiai ber kha tunah chuan apangai leh thlap tawha, engkim aman abuaipui fel vek cabin a book nghal bawka, doctorin min en chuan ' I neih hun ala hla ' ati a min chhuahsan leh nghal daih, nurse in ka bp te alo check a, ka pum lah ana em em tawh bawk si mut pangai pawh ka mu theilo, ka letkual seka achangin ka bungbu vu zel bawk Ka thlan tuiin min bual huh vek tawha, Nu tetei'n kanu te chanchin ahrilh kual zung zung

" Tinge doctor pawh chu an reh vang vang a " Fela aphun hluk hluk tawh Ka na tuar chu hmuh hreawm min ti bawk si, ka neih hun ala hla antih avangin doctor ten min ngaihsak vaklo lehnghal, ahnuah phei chuan insum theilo in a chhuak vuta Doctor leh nurse te nen anlo in zui lut leh

" Inpa chu a den tawp " Nurse pakhat lo lut chuan ati sar sar a, Fela hian ava hrawk leh pawh ani maithei, reife hnuah nau neihna ward ah min nawrlut a, anat dan chu ka taksa hi a in phel darh vek mai dawnin ka hria

" San ala pek loh che chuan sang lui duh suh, san apek hunah che i chau hman lutuk ang " Nurse in atih chuan ka thaw kawk a, ka rilru in ka ṭawngṭai mawlh mawlh

" Iti ṭha hle mai, Fanu duhawm lutuk i nei e " Naute ṭap ngak ngak ri ka hria a, nurse in min lo hmuh tir zuai, ka fanu hmel chuan ka na te chu min chhawk huai huai

" Piansualna anei em? " Zawi sep a ka tih chuan

" Ṭhat lohna aneilo e " Tiin Nurse in min chhanga hahdam huaiin ka inthladul, reilo te up turin naute chu an hruaichhuak a

" Princess " Nau neihna ward aṭanga min nawr chhuah rualin Fela'n min lo hnaih ruak a, a mit asen ram mai

" I fanu chuan i lung adum em? " Ka nui a mahse, min hliamna na zawk vang chuan ka ṭhen nghal sak

" Ka hmangaih lutuk, in nufa in ka hmangaih lutuk che u " Ti ṭuakin ka chalah a fawp vang vang

" Lalruatfel nun over pa " A hnung aṭangin Seni'n alo ti hlak hlak a, Lalai leh kan ṭhian dangte pawh anlo awm kim khawp mai

" Kan naute chu ahmelṭha lutuk " Lalai'n ati sep a, a mittui a hru pah bawk

" Nangmah a chhun che a " Ka tih chuan aṭah nuih hawka, Cabin a ka awm hnuah Naute chu ka bulah anlo mut a, hnute tui kala neilo lehnghal, Nestogen an hnek tira ka fanu pianghlim pawh keima hnute tui ka hnek tir theilo chu ka rilru ana tlat ka khawngaih bawk si

" I rilru ti nuamlo suh, naktukah chuan i nei ve mai ang " Min ṭhutchilhin Fela'n ati a, Nu tetei'n naute chu abuaipui vek, naktuk lama lokal leh turin Lalai te pawh an hawng ve rih

" Zanah naute ṭap se i awi thiam dawn mi? i nu i hawn tir daih bawk si " Ka tih chuan a fanu mulai athlirna aṭanga hawisawn ve hramin min lo en, a fanu a kalsan duh miau silo a, nu tetei zawk ahawnga kei lah ka che ṭha thei bawk silo. Nu tetei khan 'hnute tui awmlo mahse, i fawh tir dawn nia aw, fawh chhuah chin an nei ve ṭhin ania ' atih avangin naute alo harh chang chuan ka fawh tir ṭhin a tlem tlem chu a fawp chhuak ve

" Ka inzir nasa lutuk " Ati then lehnghal, Zan arei tulh tulh a naute pawh asual tulh tulh ka hnute tui lah ala tlem mai sia, an pafa in zeilo deuhin an in awi surh surh mai, kei erawh ka chau nge ka meng lui thei nganglo intih harh tumin phone te ka khawiha ṭhiante sts ah chuan kan fanu deuh hlir alang, intih harh tum teh mahila ka harh thei chuanglo ka mutthluk san leh tho. A tukah chuan Nu tetei alo kal a, kanu te nen pawh kan in vcall

" Bakhate hian hnute tui asiam chak " ati a Bakhate chhum tui chu inturin no ah min thlitsak, hnute tui ka neih nan chuan tiin tlak pawp tumin ka in a mahse, a kha lutuk ka luak lo chauh

" A kha lutuk " In zo duhlo in ka hung a, Lalruatfela'n min en ngur ngur

" In rawh " A ti hluk

" A kha asin ka in peih tawhlo " Tum barin ka ti a

" Naute akhawngaih thlak alawm, vawikhat bak in angailo ang " Ati a hreawm ti deuhin ka in zawh tak vek kha, a kha lutuka ka lu ahai nghal muai muaiin ka hria. Hnute tui siamna ti a Doctorin aphut siam chawp tur min chawh pawh chu Fela'n min siamsak a bakhate lak chuan tui tak ani, hnute tui siam thei ṭheuh ṭheuh a in anglo thei khawp mai. Ka thil ei chu aṭha ve tak tak pawh ani maithei chhunah chuan hnute tui pawh ahma ai chuan atam ta deuh, kan naute pawn akham khawp hnap a hne veta bawka tui zetin a mu deuh reng tawh. Lalai te lo kal leh chuan naute thawmhnaw leh thildang anlo kensak nuala amuhil lai tih harh phet an tum lehnghal Fela'n aphal silo Seni'n ' I inti neitu sia ' A ti hlaka Fela lah chuan ' Ka siam ania, i siam ani ve hleinem ' Ati hmak leh nghal, midang zawngin an nuih hak hak. Kan naute hming atan Nu tetei'n 'Vanneihpuii' tih a sa/phuah a, Ṭhianten Sap hming telh an tum chuan Fela'n a phallo thung. Ka hlimlai ber hian kapa ka ngai veng veng, kan zingah a awm ve tawhlo mahse, Lawmna leh lungngaihna te ka tawn changin hriatchhuah ani ziah dawn anih hi, ' Pa, i tunu hi ilo hmu em? la dam vela chuan i hlimpui dawn tehlul nen tiraw ' Tiin kapa rauthla chu ka be mawlh mawlh

" Princess, kan fanu hmelṭhat zia hi " Kan fanu muhil lai chu a thlir dauh dauh, awmze neilo zeta Bawihtei'n thawm alo chhuah ve te chu a hlimpuia anuih pui hawk hawk thei mawle

" Min ngaihsak vaklo in ka hria " Ka tih chuan min en vuta

" I thik ami? " Nuihza insum zetin ati sup, chutia atih takah chuan

" Thiklo e " Ka ti a Bawihtei mut lohna lamah lo kal kualin min kuah vang vang

" Engtik lai pawn nang chu ka ngaihsak reng ṭhin che alawm" atih chuan ner nangin

" Kan inṭhen lai pawh khan maw, ka awihlo e " Ka ti nang nang

" Lalruatfela leh Lalthansangi chu innei tura khuanu malsawm alawm kan nih " A tih chuan ka nui a ani pawh anui ve tho, Bawihtei lo tal ṭiah ṭiah chu kan thlir duna aharh mai ka rin laiin tui zetin a mut zawm leh nghal

" Ka Duatnu mut hlan in ka duat ve ang che" Fela chuan ati a, min kuai dakin lungchim zetin min fawp vang vang

" Kanla innei lo ania " Ti a kalo dan chuan

" Ka fawp ringawt dawn che, uikawm viau suh " ati hluka min fawp leh nghal zat, min fawh kar lakah ' ka hmangaih che ' Hriatnuam zeta atih tel chang chuan Lalruatfela zunah hian ka luangliam nawn leh ṭhin

Thawnthu ti hlu tu leh ti ngaihnawm tu chu harsatna leh manganna anih ang chiahin kan inkar ti nghet tu pawh kan buaina tawh kha ani, hlimna in a pawlh mek kan hun tawn hi anuam alungawi thlak takzet. Harsatna manganna kan tawhte hian min ti hlumlo anih chuan min ti hamsawn ṭhin an tih ang khan ka harsatna tawhte khan hmasawnna tam tak min pe ani, ka fanu leh ka pasal la ni mai turte hian ka thinlung hi an luah hneh em em a, ka lunglawm antikim in ka hmangaihna zawng zawng neitu te anni.



A tawp ta..

Ka thawnthu ziah famkimlo tak min lo ngaihthlak/chhiarsak leh avangin thinlung takin lawmthu ka sawi e. Christmas leh kumthar hlim leh nuam taka hmang turin duhsakna sang ber ka hlan che u


Show post links
Top