HMANGAIHNA MAK BY Lalnunngheti Tetei (Completed)

[Ngaia]

# ARRANGE MARRIAGE # IN PHIAR RUKNA # IN RINHLELHNA#
Ahnai lam saw ka paste sual palha in lo hrethiam dawn nia ka edit hman tawh lo

PROLOUGE:
" Ka mipa duh ber min neihsak chu i hlim viau tawh lo maw ? Mahse, heihi hria la ka duh, i hlim hun chhung hi a rei hauh lo ang i lak atang hian ka chhuhsak leh em em ang che, " ti tu leh ngeiawm taka nuisang ka hmaa ding ka unaunu ngei chu ka melh ngawt ngawt, a thusawi te chuan keimah ah nghawng a nei miah lo, chutih rualin ka duh reng vanga a mipa duh hi nei pawh ka ni bawk hek lo. " Nangpaw'n ka mipa hmangaih ber min chhuhsak ve tho a ni lawmni ? Kan danglamna chu nang chuan hre reng chungin min laksaka, kei chuan ka hre lawk lo thung " ti ve ngat in a mittah chuan ka melh ve ran.
" Nang ai thlawt chuan i Pasal hian min thlang zawk ang tih chu i hriat kha, ahma paw'n kanin karah eng thil chiah nge thleng i hre hleinem, " a thusawi chu ngaipawimawh lo zet in ka nui hak, " i phatsan tawh mipa hian a duh leh che ring suh, tuna i nau pai lai Pa chauh kha ngaihtuah rawh, " ti leh sak in a pum chu ka melha, " nang " ti paha a kut a phar chhuak chiah chu âw thum zet hian, " eng thil nge i tih " a rawn ti chang rut a, ka hawi phei chiah chu ka pasal nen kan mit a in tawng chat.
___________
" A phatsan che tih hre reng chung paw'n i hlat thei lo a chuti chung chuan nang hi ka ring ang che maw, "? Thinrim âw khur dar dar chuan ka ti a ka hmaa ding erawh kekawr ipte zen tat pahin a ding ngawi ngul thung. " Ka nunah in rawlh tum fo suh ka tih kha, ka sawi ang ang hian awm mai rawh, tu nge ka hnaih anga tu nge ka hnaih loh ang tih chu i sawi theih a ni lo, kanin neihchhan kha hre reng rawh, " ti nghutin a in her vut a, kanin neihchhan te chu kei ngei pawh hian ka theihnghilh bik lo, chhungte sawirem chawpa in nei mai mai kan ni a, englai mahin ka theihnghilh ngai bawk lo ang.
___________
" Lo let leh rawh i tel lo chuan ka awm thei lo, kan fapa hi nu leh pa kara seilian turin i duh lo em ni, "? Ngen ngawl zet a titu chu zak thei lo ka va han ti tak, " ka fapa hian ama puala pa a nei thei lo a nih chuan pa nei lo in awm reng mahse pawi tihna ka nei lo, midang nena pa anin tawm hi ka phal reng reng lo. Tin, i lerkawh san leh mai mai tura rawn let ka tum bawk hek lo, " ti hlak hlakin Bawihpuia chu ka pawm kanga ka kalsawnpui nghal nal nal.
*******
Unau ( cousin ) te pahnihin hmangaih anin tawm dan thawnthu, an hmangaih te ve ve chu anin laksak tawna, pakhat chuan duh reng vangin a unaunu bialpa chu a chhuhsaka, pakhat erawhin tum lawk pawh awm em em lo in a unaunu mipa duh em em thin chu a chhungte nawrluihna a vangin pasalah a neih a ngai thunga.


HMANGAIHNA MAK



CHAPTER-1




Room kawngkhar inhawngri thuai ri a vang chuan ka mutui lai chu ka harh chiang ngang mai, kawngkhar lam ka hawi phei chiah chu Lucy thinrim hmel ka hmu nghal chat. " Eng nge "? Ti bak deuh hlarin ka tho chhuaka hei hi chu tuktina kan awmdan than a ni, " eirawng ka bawl vek tawh vawk chaw tal chu pe ve rawh, " ti khar khar in rum fe hian min melh a ka lo ner deuh sak.



" Ka thawh hma tukah te chuan engkim ka ti vek ka phut kher bik lo che, " ti let ve hlakin puan chu ka tlawh hlima ka tho zui zat bawk, " lo chhuk la pe ang che " a ti leh hrama ka chhang peih tawh lo.




Room a tang a chhuah hnu chuan khum chu ka siam fel sawk sawka, ka zawh chuan hmai pawh phih hmasa tawh lem lo in inhnuaiah ka tlan thla hlawk hlawka, inhnuaia ka chhuk chuan ka pi leh pu te pawh an lo tho leh der tawh.




" Nula si hi thawh i hai ziah mai, " choka atanga lo chhuah pahin ka nu chuan a lo ti zui ve zat a, ngaipawimawh lo in pawnah ka chhuaka, vawkchaw chhumna bel a mi chu tin ah suak chhuakin kawmchhak lamah vawkchawk khai chung chuan ka chho a, mood fuh lo nen vawk nguk ri ringawt pawh chu ka haw hlur mai.





Kei hi Nora. Lalnunhluzuali ka ni a tunah hian Kum 24 na ka hmang ve mek, kan chhungkaw bik hi member pali kan ni, ka nu leh pa te nen kan cheng ho a, U mipa pakhat ka nei bawka a ni erawh hna thil avangin hmundangah a awm thung, ka pi leh pu ( ka pa nu leh pa ) te an chak vak tawh lo bawk nen kanin lamah kan awmpui bawk a, chuan ka pate-a fanu Lucy pawh kan awmpui tel bawk. Kan in a cheng chu tunah chuan mi paruk(6) kan ni tihna a nih chu.






Ka pa hian sawkhar ah hna chhe te a thawk ve a ka nu erawh inlamah a che thung, ka pate-a fanu Lucy nen hian chhang bung chiah kan ni a, a ni ai kum khat in ka upa zawk na chu rualpui kawm ang tak takin kanin kawm thin. In kawm thin tih lem ah kanin karah buaina a awm hma zawng kha chuan, tunah erawh ui leh kel thlun pawlh ang hlauh kan ni. Aizawl lamah College kalin kan awm char char thina tunah erawh chhungkaw harsatna avangin kan chawl tawh thung.




A nu leh pa te'n in kangah an boralsan tak avangin ka pa in kan inah a hruai luta, pianpui unau hi pahnih a nei a amah hi a naupang ber a ni nghe nghe.




An upa ber leh ka u hi anin ruala nupui neiin a ni pawh hmun dangah a awma, a U leh chiah pawh pasal neiin Zobawk lamah an awm bawk.





" Nunhluzual " fiak that a titu avang chuan ka phu deuh zuk, thlang lam chu ka hawi thla a ka nu in thinrim hmaisen hlarin min lo melh chho ve kar bawk. " Vawkchaw ka pe " pawr fe hian ka ti let ve a, hmeichhe lian lutuk ka ni lo na chu ka te chhe lutuk bik lo. Mizo hmeichhia ah chuan sang mawi tawk an tih ang chi kha ka ni.




Ka hmel hi chu a tha puak lo na in chhe lutuk pawh ka ni chuang lo, ka pumrua leh ka hmel chu vantlang pawl an tih ang chi a nih ber chu! Ka thin hi a chhe hle bawka ka pa phei chuan, ka nu te lam hi ka chhun minti mai thin.




" I Vawkchaw pe te hi i thang rei thei lutuk, pe vat vat la rawn chhuk thla nghal ang che " ti deuh hlak in inchhungah chuan a lut a, keipawh chuan vawk chaw chu ka pek chhunzawm lehnghal mawlh mawlh, a lo sawi a vang khan hmanhmawh tumna ka nei miah lo thung.




Minute 10 dawn ka awm leh hnu chuan ka chhuk thla ve ta nge nge a, vawk chaw chhumna ah tin te chu ka dah leh te te hnu in inchhungah ka lut a, ka pa chanchinbu chhiar paha thutthleng sei a a lo thu chu ka pan phei a, ka thu thla dawn chiah tih ah ka nu bawkin min lo ko leh tawh.




" Lo chhuk vat rawh ka tia ni lawmni eng em em nge i tih thin "? nem fahran lo hian a lo ti a ka chhang zui lem lo thung. " Lo phei teh hei hi lo siam rawh, " ka mawng ka hung fel hman awr tih ah a lo ti leha ka ter nghal at.




" Vawk chaw ka pek te chuan thildang te chu Lucy khan ti ve se a nimai lawm, a ni paw'n vawkchaw a pek te chuan khatiang te chu ka awl vek, " ti tan tan in choka lamah chuan ka phei a, dawhkan a chawhmeh siam tur chu banin ka pawt deuh sawk sawka ka nu chu a chek leh hlak hlak tawh.






" Nula i nih ve tawh hi i zia hi sim ve teh, a thuhrimin mi phut te hi pe na lutuk suh a tha lo, Lucy paw'n engkim a ti ve vek ," a tawnglai mawlh mawlh chuan Lucy chu a lo luta ka lo melh nghal khar khar.






" In hau reng rual pawh in ni lo inawm dan hi sim rawh u, unau in nih hi inngeih lo leh in phut reng renga awm reng mai, " ti lehin ka nu chu choka a tang a chhuaka, Lucy chuan min lo panhnai leh ruak tawh. " Min hek reng hi nuam iti mi, "? Ngeiawm fe a a lo tih chuan chhang let lo turin ka insum nasa viau. " I rilru naupangchhia lutuk vang a nih kha Jos paw'n akawp peih loh che, " a thusawi a vang chuan ka ding chhuak vut a amittah tak ka melh nghal ram ram.




" I tawngkha fimkhur rawh, " thinrim insehchilh zet hian ka ti a, kanin hnial apianga hetiang thu min hrilh reng hi ka tuar thei tawh bik lo.




" Fimkhur lo ta ila engtin nge mintih ang, " ngeiawm zeta nui pahin a ti leha ka insum nasa lutuk chu ka taksa a na deuh thum mai in ka hria. " I din hmun nena in mil tawk lek hian tawngkam nei thin suh, " ka tih ve takah chuan a hmel chu a rum ve nghal sawt.



" I nu leh pa hian nangai min ngaihsak zawk, chutiangin ka pi leh pu te paw'n " min tih thinrim belh tum tak hian a ti a ngaipawimawh lo angin ka awm hmak thung. " I fahrah zia an hria a chuvang mai mai in an ngaihsak che a nih hi, " ka tih rual chuan ka pa âw fiak zet in, " Nunhluzual " a rawn ti kha fak a ka phu deuh zuk.






Ka hawi phei chiah chu ka pa thinrim hmaisen tawn tawn ka hmachhawn nghal siah. Ka hmaa ding lah chuan hnehtu chan chang inti zet hian min nuihsang bawka.





" Khatiang tawngkam kha eng vanga hmang nge i nih "? Min melh khui khui paha a tih te chuan chhan pawh ka chhang thei lo, khati taka vin khan ka pa hian min be ngai lo miau a lo dawnsawn dan pawh ka thiam lo. " Pate " tap tiau in pakhat lah chuan a lo la ti zui, " Lucy i room ah va awm rawh " Ka pa bawk chuan Lucy melh pahin a ti dam thlup a, kei a fanu ngei min biak dan nen chuan dang tak a ni.




" Khatiang tawngkam kha eng tin nge i hman theih zawk, a hma a tang tawhin khatiang khan i lo ti fo thin zawk tihna em ni ? Lucy hi fahrah a ni reng reng lo a nia, a tan pawh kei leh i nu hi a nu leh pa ang tak tak kan ni, " a ti leh dap dap a hei vang tak hian alawm Lucy pawhin min hmuhsit ve leh chhawn em em na chhan chu.





Engtik lai pawhin an tan a kanin hauh ni khua paw'n tu thiam loh nge tih an hre hmasa ngai lo, ka chungah an tuan hmasa ngei ngei.





" Tu thiam loh zawk nge tih pawh hre hmasa lo hian ti nge ka chungah in tuan ziah, ka nu pawhin thil thar lei se ' Lucy tan ' a ti zo vek a, a hma chuan eng ngah mah ka ngai ngai lo tunah erawh inti ve ta mah mah, " ka thinrim lutuk chu ka duhai ka âwki pawh a ring.






Ka pa pawh a hma zawng aiin a thinrim hmel leh zual, " hetiang ang em ema i awm hi chu ka ring lo " a ti leh nghuta ka nu pawh a lo lut ve chiah bawk.







" Nangni pa fa chu inva vin em em ve thenawm te pawhin an hre pha vek ang, eng thu ah nge in lo inhnial leh a, " a lo ti lut bawrh bawrha, ka pa chu a thaw ri deuh hrawk. " Tun hnuah vawikhat te mah Lucy hi fahrah ti leh tawh ngai suh, " ti lehin ka pa chu a chhuaka ka nu chuan phawk fe hian min lo en. " I pa thusawi kha eng nge a awm zia ? Lucy chu fahrah i ti em ni "? ka nu pawhin a ti ve leha.






" Aw ti " tih zawngin ka chhang let thung, choka a tang chuan chhuakin pawn lamah chuan ka kal a, pangpar bawr laih bulah chuan ka thu thla a hmalam chu ka en ngar ngar.





A chang chuan ka nu leh pa te hian min hmangaih ve miah lo ang te in ka hre thin, ahma zawng kha chuan engkim min tihsaka min duat em em thin, Lucy lo lan tak hnuah erawh eng kim a danglam vek.






A lo awm tirh kha chuan kanin ngeih in kanin ngaina em em thina, eng vanga ka chunga rilru chhia lo pu ta thut nge pawh ka hre thiam lo, hetiang teh nuai hi kan ni ta si. Ka mipa duh hmasa ber leh ka bialpa nilai min chhuhsaka, khatih hunlaia ka rilru natna te kha tun thleng hian ka la feel thei.






Lucy-i hi chu hmeichhe hmeltha tak a ni a, a pian pawh tunlai mipa ho duh chi hi a ni ka ti mai, college first year kumah pawh miss ah an thlanga, khami kum khan a ni ka bialpa ka lo duh ve em em paw'n kei aia a lo thlan tak zawk chu. Ka unaunu nen ngei mai chuan min lo kawpa, ka man chhuah tirh ah pawh tu emaw zawk zawk pawh khan inchhirna chhe te pawh an nei lo. Ngaihdam min dil ka lo beisei laiin deu sawhna tawngkam bak an pahnih hnen a tang ka dawng lo bawk.






Ka rilru nat ber laia awm thin ka bialpa leh ka unaunu ngei mai chuan min phatsana ka kehsawm vek nimai hian ka hria. Khatih hun laia tih theih ka nei lo lutuk te kha tun hnu a ka ngaihtuah let hian ka in haw hlur zel.





Khata tang khan keimah ah ka mize tha lai zawng zawng ka hloh zo a, a hrethiam lo tu ka nu leh pa te leh midang zawng chuan khawpuia ka awm tak vanga ka mize thlak ah min ngai hmiah thung. Eng ang pawhin min lo ngai mahse sawifiah tumna ka nei lem lo a, ka nunhluia thil duhawm loh ber ka tawn kha sawi chhuah ka peih bawk hek lo.




Inchhung lama ka luh leh pawh chuan tumah be lo in ka room lamah ka chho a, khumah chuan ka mu thla nghal hnawk, ka nun hahthlak lutuk hi ka ning. Rei fe ka mut hnu chuan ka ril atam tawh bawk nen inhnuai lamah ka chhuk thla a ka Pa chuan phone a lo hmang mek a, ka nu leh Lucy erawh choka lamah an awm thung.






Ka pi leh pu te chu pawnah nilum aiin an thu chhuaka, choka lama phei ka tum chu ka pa phone hmang zo in min lo koh tak avang chuan ding datin a lam chu ka hawia, " tlaiah i Pa Thana te'n chaw an lo ei dawna lo chhuak suh ang che thilpawimawh sawi ho tur kan nei, " a ti nghet charha chhang lem lo chuan choka lamah chuan ka lut a.





Lucy chuan ka nu chu alo be leh siam siam tawha a mizia hi chu a thup hneh ve thlawt, kei ngei pawhin a mize dik tak kha ka lo hmuh hmaih rei mah mah.





Tlai lamah chuan ka pa in ina awm tura mintih deuh tlat avangin lungthlu zan lo chuan ka awm ve hrama, pa Thana te chhungin chaw an lo ei dawn thu an sawia, tute nge pawh ka hre chuang lo, ka nu leh pa, ka pi leh pu te ti ti a tang chuan chhungkaw khawsa thei tak an nih hmel.






Dar 3 bawr velah kan mikhual turte chu an lo thlenga ka chhungte paw'n an lawm thiam ngang mai, kei erawh ka thut hmun a tang ka che sawn eih lo thung.





Pa Thana ni ngei tur chuan min lo chibaia a bula ding nupakhat pawh chuan min nuihsang bawk, " in fanu chu a lo lian tawh hle mai, " ti pahin pa Thana chu ka thutna bul chiah ah alo thu thla a han biak ve vak ngaihna pawh ka hre lo. Mipa pakhat taksa tha deuh fit 6 bawr vel tur hi a lo pen lut a a nuisang bawk, " khawiah nge i U chu "? Pa Thana nupui chuan chupa a hmuh rual chuan a ti a, an fapa a ni ngei ang.





A hmel lah chu a tha reuh phian lehnghal. " Pawnah " tih zawnga chhangin chupa pawh chu alo thu thla ve a, ka nu leh pa te an lo thut phei hnu chuan thingpui lum turin choka lamah ka phei ta daiha, Lucy zawkin engkim a lo tih fel leh diam tawh avangin ka in rawlh duh ta lem lo a, pawn lamah chuan ka thawm hnaw pho sengin ka chhuak ta daiha.







Pawna ka chhuah chiah chu Car dum fai zet atang hian mipa pakhat hi a lo chhuaka, nichina an zawn pa kha a nih ka ring, lo lut hmasa zawk ai kha chuan a hmel pawh a upat hmel daiha mahse a hmeltha zawk mahin ka hria.







Chutia ngawirenga ka melh lai chuan a lo hawi pheia kan mit chu a intawng nghal chat, hmeichhe zam chhe mai mai lo ka ni bawk nen hawisawn miah lo in a mittah tak chuan ka melh a, chutiang chiahin a ni paw'n min melh ve bawk.







Ka lampana a lo phei lai pawh chuan ka che sawn eih lo, ka bula a lo din takah chuan a pa lian tak zet, en thuak pawhin a len tawh tehreng nen in hnaih deuha kan awm phei chuan a lian leh zual tak zet. " Nora inchhungah Patea'n lo lut rawh a ti " ti paha Lucy lo chhuak chu hnunglam hawiin ka melha, ka bula mipa ding a hmu chiah chu thlahrang hmu ang mai a meng phawk nghal hra mai.










" Theo " zawi sepa a tih chuan mak ti zetin ka melh, ka bula dingpa pawh chu ka melh ve leh chiaha a ni pawh chuan Lucy chu mit tla lo lekin a melh ve reng bawk, an ni pahnih hi anin hria tihna em ni.?










( Chapter khat hi a sei dawn lo aw, hun ka neih loh chuan ka regu lo zuk zuk zel ang )COMMENT IN THAT CHUAN KEIPAWH KA REGU VE ANG


Show post links
Top

[Ngaia]

HMANGAIHNA MAK




( CHAPTER-2 )








Ngawirenga kan din thap lai chuan inchhung atang nichina mipa lo lut hmasa zawk kha a lo chhuaka kan pathum chuan kan la ngawi deuh thap. " U ka nu in lo lut turin a ti che a, " a lo ti thum dut a ka hmaa dingpa pawh chuan Lucy lak atang a mit chu la sawnin keimah bawk chu min melh leha, chumi hnuah inchhung lamah a lut zui nghal.







" Lucy nang maw "? Chupa in a luh dawn laia a tih leh lek phei chuan mak ka ti lutuk, " ah...aw i damtha maw "? Bah deuh niaia Lucy in a tih chuan chupa chuan a chhang zui tawh lo.







Ka thawmhnaw chu sengin inchhung lamah chuan ka lut a a Lucy pawh inchhung lamah a lut ve a, nichina a awm dan khan min thawng tak zet. Inchhung lama ka luh ve chuan inpui lamah an lo thu khawm thap a, ka pa in min hmuh rual chuan min ko leh tawh. Ka thawmhnaw seng chu bal bawmah dahin an lam chu ka pana min lo en deuh thap mai.








" I pa Thana hi i la hria em "? Ka nu in a tih chuan ka lu ka thing mat mat a, ka ngaihtuah ngial paw'n ka hriat ngai ka hre lo tlat a ni.






" I tet te atanga awm tu ber che an nih hi, kum 4 i nih thleng kha chuan veng khatah kan awm thina mahse hna tul a vangin hmun dangah an pem ta a " ka nu bawkin a ti zui leh siam siama, kum 4 mi ka nih lai daiha mi chu ka hriat a ring emaw ni.










" Hei i lo lian tawh lutuka ka hai dawn che lawm, " ti pahin Pa Thana chu a nui hawk hawka keipawh ka nui tawi ve tak ringawt, " nangni in la hria em ? In tet deuh lai te kha chuan inkawm nasat thin em kha maw, " an nu pawh chuan a fapa te melh pahin a ti a, a naupang zawk a nuihsang laiin a upa zawk chu a meng thip ul mai.










Lucy lo pen lut ve chu chik deuh hian ka lo melha Pa Thana fapa upa zawk nen chuan anin melh leh chat tawh, anin hre thin tih chu hai chi a ni lo, engtia inhria nge maw an nih dawn ni. " Hei hi i naupan laia i zui kual reng i U Theodore-a a nih hi " ka pa in a upa zawk melh pah chuan a ti a, ka naupan lai thil mah nise ka zui kual reng chu mak ka inti tak zet.








" Eng pawh nise hei in lo puitling ve ta a kan remruat ang a kal tlang mai pawh a tha tawhin ka hria " pa Thana'n a tih chuan a thusawi chu ka hrethiam hauh lo, eng chiah nge sawi a tum ? " Ni e, keipawh chu chu ka ngaihdan a ni, " ka pa pawhin a ti ve leha eng chung chang tak chu sawi ang maw.









" Keini lam chu kan in be fel diam tawha a rem lohna a awm lo, nangni lam inrem phawt chuan a hma lama tih pawh a tha ang " Pa Thana bawkin a ti leha ka pa pawh chu a bu deuh nghat, " zanin lamah ka lo sawipui anga kar leh lamah chuan thu thar ka lo hrilh ang che u, " ka pa in a tih tak ah chuan engmah an sawi chhunzawm tawh lo.








Chaweikham hnu pawh chuan pa Thana te chhung chu an la awm ve renga, Theodore-a an tih pa kha chu hmuh tur a awm lo thung. Pawn lamah chuan boruak thianghlim dawng turin ka chhuaka, ka pangpar huan lama ka phei lai chuan tawng thawm ka hria a ka ding deuh chat.










" I lo danglam ta hle mai " titu chu Lucy ngei a ni, tu tak chu bia ang maw. " Ani saw i nei thei lo ang " Lucy bawkin a tih leh chuan a thusawi ngaihthlak chian tumin ka kal hnai deuha, tu chanchin nge a sawi tih chu ka hre chak tlat. " Eng vangin nge ka theih loh ang " âw thum zetin a tih ve tak nghutah phei chuan tu nge a awmpui hriatchakna hlir in ka khat. " I theih loh chhan chu i hre chiang viau " Lucy pawh chu a nih na tak sawi chiang fak duh bawk si lo ka awm hmun a tang ka lo ngei leh em em tawh.










Mi thusawi lo ngaihthlak ruk tlat chu a dik lo tih hre tho mah ila ka in control thei ngang lo. An ngawih tak rengah chuan ka ning ta deuh chu kalsawn ka tuma, chutia ka inher chiah chu thawm ka siam palha ka khawng nghal awt mai.










Lucy chu a lo lang nghal hlawla mak tih hmel leh lungawi loh hmel tak hian min melh deuh rama, keipawh chu ding ngil ve nghalin a mitah chuan zam map lo hian ka melh let ve deuh ngat.









" Mi thusawi ngaihthlak ruk hi nuam iti viau mi "? minti a nih chu! Ka nui chhuak deuh hak, min man chiang viau mahse min tawngkhum dan a vang chuan ka ngawi mai mai thei bik lo, chhan tuma ka ang ziau tawh chu a hnunga mipa ding avang chuan ka tawp leh chat, eng tin ? Theodore-a ngei a ni, mak tih luatah tawng nachang ka hre tawh lo.









" Nakinah chuan engkim a hre ve vek dawn tho, " ti pahin min lo din hnaiha eng chu nge ka hriat ve vek tur chu, " Theo " no hnap hian Lucy chuan a lo ti leh reuha ka va ngei thin tak.








" Tui deuhin i mu dawn nia, kar leh lamah chuan i thuthlukna tha tak ka dawn ka lo inbeisei ang " ka mittah chiang kek kawka melh pahin a ti sup a nui pah bawk nen a hmel chu a tha lutuk. A tawngkam tha lutuk te chu a hmel nen in mil lo ka va'n ti reuh tak, chuan a thusawi " thuthlukna tha tak dawn ka lo inbeisei ang " a tih chu eng a sawitum na nge ni ta ang ?








" Ka kal ange muttui phawt, " ka bianga lo tawk zeuh paha a tih leh lek phei chuan ka tek deuh chhawk, min kal pelh tak hnu chuan ka biang chu ka dawma a sa deuh hat hat thei nia mawle.









Ka hawi chhuak chiah chu ka harh chhuak deuh zawk, Lucy chuan miteng ling hlarin min melh leh khur khur tawh.








Hmui ti pawrh tarih ka hawisang vaha, eng nge ka hriat pawh ka hre bik lo, Lucy awmdan chuan runluih minti chak tlat, zai rat rat in inchhungah ka lut a keimah zawk hi ka nuih a za tlat pek. Ka pa in an room lama lut tura mintih chuan ka zui luta, an khumah chuan ka thu thla nghal tharh.








" Bawihte tuna ka thusawi tur hi uluk takin lo ngaithla rawh aw " ka pa in a tih chuan mit ti zim sun hian ka melha, ' Bawihte ' ti a min koh tawh hi chuan ka lungawi lohna tur thil a sawi dawn tih ka hrethiam nghal thin, hostel-a min dah dawn pawhin ti chiah hian min thlema, nu leh pa te'n tawngkam tha taka mintih na na na chuan a tlawm zawk kan ni ziah.









" I pa Thana te nen pawh kan sawifel vek tawha, i ngaihdan kan hriat hnuah thil pawh a kal tir zung zung theih ang, " a han ti leh te te a ka lawmna tur thil a ni dawn lo tih chu hrilh nawn ka ngai lo la hrechiang lutuk.










" An fapa upa zawk Theodore-a nen khan innei turin kan duh che u " a sawi zawh rual chuan ka nui chhuak hak, a fiamthu emaw tiin ka pa chu ka melha a hmelah chuan a fiamthu hauh lo tih hria in ka nui tawp deuh riai riai, ni e khatiang thil kha fiamthu na chi a ni mawlh hek lo.








" Pa " chu thu chauh chu ka sawi thei, min fiam mai mai thu sawise ka va han ti tak, mahse chutiang reng reng a sawi lo









" Engtin nge chutiang thu thlukna lian tham min rawn miah lo a nangmahni duhthu a in kaltlang pui tawp theih " ka hmelah pawh ka lungawi loh zia chu a lang chiang viau ang, hetiang thilah hi chuan lungawina chi a ni lo reng a ni. " I pa Thana te hi mi khawsa thei tak an nia an fapa pawhin amahin sumdawnna liantham tak a enkawl bawk, nei la i inchhir hauh lo ang " a tih leh lek phei chuan thinrim tawh tak ka ni.







" In fanu hian sum leh pai ka duh viau emaw intia mi ? Tuna in thuthlukna hi ka damchhunga ka nun tidanglam thei tur a ni tih in hria em " ka pa melh ram pah chuan ka ti a, tun atan chuan ka thinrimna hi thunun har tak a ni.








" I tana tha tur chu engkim kan hria nangmah zawkin i ngai dik lo a nih kha," ti ve nghutin thawk a la hawka beidawng zet in ka melh ngawt ngawt.









" I nu nunna chhan tu an nih vangin he thu thlukna hi kan hnial thei lo a ni " room atang chhuah ka tum chiah chu a thusawi a vang chuan ka ding dat, " i pian hlim khan i nu kha a hrisel lo em em a doctor te'n zai a ngaih tur thu an sawia, keini lahin pawisa kan nei si lo, beidawng taka kan awm lai khan i pa Thana te hi kan tawng fuh hlauh a.






An ni chuan min tanpui anin tiama in nu zaina tur leh i bawnghnute hnek tur thleng khan min tum sak vek a, kan chunga an thatna kha i nu nen pawh rulh kan duh em ema, anni lah chuan a ngaih loh thu leh min mamawh hun chu a la awm ve mai tur thu an sawi a, tichuan nikum lam khan i Pa Thana nen hian kanin hmu fuh leh hlauha, kha ta tang kha chuan kan khuaah pawh a lo zin zeuh zeuha, college kal a in chhuah lai a ni bawk nen nangmah tak phei kha chu a hmu lo che a.





Vawikhat chu i chanchin te kan sawi langa chuta tang chuan a fapa nena in inneih dan tur a lo ngaihtuah tan daih tawha, ka hnial ve ngial na chu mi tha tawp khawk an ni a, kan tana an thil tih ngaihtuah phei chuan ka hnial reng thei ta bik lo a keipawn ka pawm ta a ni."







Sawi ve ber tur pawh hre lo in chhuat chu ka melh tlawk tlawka, tun hnu thlenga ka nu in min la dam pui chhan hi Pa Thana te zar a ni tih a sawia, an chungah chuan ka lawm tak zet, chutih rualin an thatna rulh let nana ka hmelhriat ngai pawh ni lo han neih tawp chu ka hre ruh tak zet.








Zan ka mutna ah pawh ka in let tawn sek a, ' nu ' ti a koh tur ka la neih chhan te ka ngaihtuaha Pa Thana chungah thinlung tak in ka lawm, mahse a fapa nei tur erawh chuan ka in peih tawk meuh lo a ni.








Ka phone ka en lai chuan number hlang a tang message ka dawnga, dp a lan miau loh a vangin ka reply lem lo thung. Dar kar chanve dawn a liam leh hnu chuan number ngai a tang bawk chuan message ka dawng nawn leh a, tu nge niang ti a ka in ngaihtuah lai takin call ka dawnga ka phu deuh zuk.








Number hlang tawp a tang bawk a ni leh a rilru nuam zan lo chuan call chu ka pick a, " i va in duh ve " âw thum deuh leh tham deuh raiha lo titu âw chu ka hriat hnu a ang lutuk, " tu nge i nih "? Nem vak lo a ka tih chuan leh lam a mi chu a lo nui deuh hawk, nuihna tur thil ka sawi awm ka hre lo.








" Thinchhe ve " a lo la tizui leh ta nghala, " in sawi duh loh chuan ka dah " ti paha off mai ka tum chu " Theodore-a " rang deuh hian a lo ti a ka thu chhuak nghal zawk.








" Tu Theodore-a "? Ka hriat Theodore-a hi chu a ning ka ring thei lo, min biak ngawtna chhan tur a awm lo reng a ni.










" I pasal tur " thum zet hian a rawn ti deuh nghuta ka ner deuh sak, mahse tunge a nih tih chu a chiang thawkhat viau thung, eng vanga min lo be ve ringawt nge a nih ang tih chu ka ngaihtuah nghal char char. " Tun ang hunah te tinge min lo call " ka ti leh hlaka zaidam deuha han biak vel kha a tulna ka hre tlat lo.









" Message i seen duh si lo a ka lo call mai loh che chuan " a ti leh reuh a message pawh kha ama lo thawn lek tihna a nimaw ? " Number ka hriat ngai loh atanga message ka dawn reng reng ka reply ngai lo " in la zet hian ka ti leh a, dik tak chuan nelawm loh takin awm ila min neih pawh a duh loh ve mai ka rin vanga tawngkam tha a be duh lo ka ni.









" ' I pasal tur ' ka intih khan min hre nghal mai sia engkim i hre tawh a nih hmel " a tih takah chuan ka thaw deuh hap, ' pasal ' tih thumal ringawt pawh hian min ti hah tak zet.











" Thu thlukna i siam fel tawh em "? A mah bawk chuan ka ngawih tak rengah chuan a lo ti leh a, inneih chu a hmanhmawh viau emaw tih tur alawm. " Siam fel lo, enteh dik tak chuan maw pasal nei tur hian ka la inpeih tawk lo hrim hrim, bakah ka la naupang bawksia, nang chu i hmel en reng reng paw'n kei ai kum 20 velin i upat hmel, "? Uar fe hian ka ti ta duaha, ka tawngtam lutuk chu mak minti viau ang tih ka ngaihtuah leh hnuhnawh.









" Tunah kum eng zat nge i nih hrim hrim "? a ngawih tak daih avang chuan ka ti leha, " 32 " bul zet hian a rawn ti a nichina ' kum 20 velin keiai i upat hmel ' ka tih kha a hua emaw ka ti deuh rum rum. " Ka rinai i naupang " ka sawi zawh chuan ka lei ka chhuah tet a nichina kum 20 dawna kanin thlauh hmel ka tih kha chu ka sawi uar ve mai mai a ni. A hmel en paw'n a upat hmel mawlh lo, kum 27 pawh inti se ka awi zawk hial ang tih tur a ni.









" Min neih i duh loh thu i chhungte hrilh ang che " thu pe aw zet a a lo tih chuan ka meng nur nang mai, a mizia hi ka hrethiam lo, " eng vang chuan maw "? Ti a ka zawh chuan a lo thaw deuh hawk mai.









" Min neih i duh lo a ni lawmni ? Keipawh hian nupui neih chu ka chak bik viau lo a nia, ka chhungte hi an thu ka sut tir thei lo a nang tal chuan i chhungte rilru i thlak tir thei ang, " a ti leh dap dap a, " i chhungte rilru i thlak tir theih loh avangin kei hi hmanrua ah min hmang dawn tihna em ni "? Lungawi zan lo hian ka ti hlak a ka ngei reuh tak tak.









" I ngaihdan danin ngai teh, a pawimawh ber chu kanin neih loh hi a ni. Nang leh kei hian inneih kan duh lo ve ve a chuvangin kan chhungte thu hi sut a ngai, kei chuan ka chhungte rilru ka thlak thei lo a nang erawh chuan i thei ang " a chhungte pawh a hmin theih loh laiin kei hi min hmin a tum chu a nia, ka chhungte rilru ka thlak danglam sak thei bik lo tih hi hriat ni ngat se zawng a beidawng viau ang.
















( COMMENT KHA TANG VE DEUH ULA )


Show post links
Top

[Ngaia]

HMANGAIHNA MAK



CHAPTER-3







Ka mut hmunah chuan Theodore-a nena kanin biakna chu ngaihtuahin ka mu meng kar a, min neih chu a duh bik hauh lo tih a message a tang ka chianga, chutiangin keipaw'n ka duh lo bawk. Mahse engtin nge kanin neihna tur thu an thlun hi kan tih tawp tak ang, ka chhungte'n an rilru an thlak mai mai dawn bawk si lo, pasal nei tur anga ka in ngaihtuah ringawt paw'n ka huphurh ngawih ngawih.








Chutah ka hmel hriat ngai loh a la ni zui, Joshua tih loh kha chu tumah ngaihzawbg ka la nei lo a, mipa hrim hrim ka hnaih ngai lo a ni mah zawk.










Jos kha chu mipa thik thu chhe tak a ni a tu mipa mah ka hnaih a phal ngai lo, ka ngaihtuahna a vang chuan ka thaw deuh hak, tun ataka a ni ka ngaihtuah chu tul lo ka ti tak zet.









Zingah chuan ka tihdan ngaite in vawk chaw ka pe a, ka rilruah veilian tak ka neih vang nge ka awm te chu a nuam lo zo vek. Vawkchaw ka pe zo inchhunga ka lut chu ka nu leh pa, ka pi leh pu te chu an lo thu khawm thapa kal pelh mai ka tum chu ka pa in min ko a an bula thu tur chuan thu min pe nghal zat.










Hreh ru tak chung chuan an thut lohna pakhatah chuan ka thu thla a min en deuh thap mai, " i thu thlukna i siamfel tawh em "? Ka pa chu tawngchhuak hmasa berah a tanga a zawhna min zawh pawh chu ka lo rin lawksa mah nise lo dawnsawn dan ka thiam lo.










" A rang thei ang bera in thu thlukna chu siam fel la kan thih hma ngeia i pasal nei lai hmuh kan duh a nia, " ka pu pawhin a lo ti ve bawk.









Ka rilru chu ahma zawngai a buai zual, ka chhanna nghak in an ni ho lah chuan min en thap mai si a, thaw deuh halh in ka pa lam chu ka hawia beiseina a khat mitmengin min melh ralh mai, " pa a ni paw'n min nei duh kher dawn em ni ? Keipawhin hmelhriat ngai mang loh neih tawp chu ka hreh lutuk, chutiangin a ni paw'n a hreh ve tho ang. Nupa a insiam tur chuan in hriat chian ve te angaia, ni hnih khat lek atana in nei tur lah kan ni hek lo, " ka ti dap dapa an thu thlukna hi thlak se ka ti tak zet.









" Theodore-a chuan a pawm vek tawh ni in i pa Thana khan a sawi alawm, ni e i sawi pawh chu a dik khawp mai, in hrechiang tak in ni lo a hetia i hnial pawh hi a awm lo hran lo, mahse an ni chhungkua hi chu ka mi hriatchian an ni a an bulah chuan khawsa la i hlim khawp ang, " ka pa thusawi zet chuan minti beidawng tak zet.










Engpawh sawi ila min hnialna tur a hre zel dawn tih ka hriat chian avangin ka hnial peih tawh lo. An fanu tana tha ber ni a an hriat hi thil tha ber a ni kher angem.












Hun leh ni a liam ve zel a kanin neihni tur pawh an ruat fel diam tawh, chhungkuaa in hmuh khawm kan neih ni in Theodore-a pawh a lo kal ngeia a hmelah chuan kei ang tho in a hlim hmel teh chiam lo.












Mahni duhzawng tak neih a tum laia kei a mi hriatchian miah loh min neih a ngai chu a tuar thiam bik lo ang, kei ang tho in a chhungte nawrluihna avanga he inneihna hi pawm a ni ve tho awm si a.










Kanin neihni kan thlenga ka huphurh kher mai, ka mokawr var nalh zet chu ka kut thlan huh dap chuan ka tham leh tawk thina awmzia erawh a awm lo viau. Biakina ka luh lai te chuan nikhaw hre lo in ka tlu mai dawnin ka hria. Inneih thutiam kan chham lai te chuan lem hi ka ti ngawih ngawih, ' hreawmlai leh bawrhsawm lai pawhin ' tih kan sawilai te chuan ka nun hi lem ka ti zual tak zet.









Inneih hunserh luk lak kan hman zawh hnu chuan honeymoon hmang turin khawnuam ( phuah chawp ) lam kan pana, kan pahnih chiaha motor pakhata kan chuangte chu a hreawm zawk.








Hotel kan thlenga ka rinai a changkang, ka khaw hmuh hlat ber pawh Aizawl animaia a baka thui ka thlen hi ka awi thei lo. Hotel staff ho in kan room book-ah min hruaia a nuamin a zau tak zet, a bungrua engkim chu Mizoram chhuak a ni lo tih a hriat hle bawk.









Theodore-a phone hmanga bathlara a chhuah hlan chuan bathroom lamah ka lut a ka inbual nghal sawk sawk, zanin hi kanin neih zan a ni a ka awmdan hi ka sawithiam lo, ka ni huih mai in ka hria. Bathroom atang chuan bathdrope lian zet ha chungin ka chhuaka Theodore pawh khumah phone khawih mual mual pahin a lo thu vung mai.










Ka sam huh chu hru hul pahin dressingtable lam ka pana darthlalang hma a ka thut thlak rual chuan Theodore chu a tho vut a bathroom lam a pan zui nghal bawk. A hmel leh a awmdan hi chu nelawm lo tih piah lam a n.











Ka hmaiah cream vel ka hnawih zawh chuan ka inthlak sawk sawka a lo chhuah leh hma a in peih fel diama mutthilh hmak ka duh, a hmel nelawm lo lutuk kha ka hmachhawn peih lo.











Khuma ka lawnkai rual deuh thaw in bathroom a tang a lo chhuaka ka lo melh deuh kar, bathdrope pawl duk a ha a a sam chu towel in a hru hul nawk nawk bawk. A hmel hi chu zep miah lo chuan a tha ve chiang alawm, a taksa lah insawi zawi tha mi tih hriat takin a khoh fat mai bawk si. Inthlakna room lama a luh hnu chuan tho kangin room chhung chu ka melh kual dan dana, hetiang anga hmun changkangah hian ka awm ka inring ngai lo.











Theodore-a inthlakna room atanga a lo chhuak chu ka lo thlir renga, thsirt dum a ha a a chungah demin jacket a ha bawk, a kekawr hak tite tang chuan a chawn a ti lang lian zual, a converse bun lah chu a inhmeh phian, converse tih ah a man to chi tunlaia a chhuak thar ber ang kha a ni.












Khum bula a bag chu lo hai rawk rawkin perfume a in kap a a rimtui phian lehnghal, chutia mit tla lo leka ka thlir dauh dauh lai chuan vawikhat pawh min en lo in room atang chuan a chhuak nghal nul nul a nih chu! Min biak ve te ka ring a nia, mak ka ti lutuk chuan kawngkhar lam chu ka melh deuh ngawt ngawt.












Keimah chiahin khum lian zetah chuan ka mu a ka khua a har veng veng mai, ka nu leh pa, ka pi leh pu te ka ngai tak zet.










Zantira Theodore-a awmdan chu ngaihtuah letin ka tawt ut ut mai, duh reng vanga innei ni lo mah ila khatiang taka ka laka a nelawm loh chu ka ring miah lo. Ka inngaihtuah na lamah ka lo muhil a ni chek ang chu kawngkhar in khar ri bur ri a vang chuan ka harh chhuak zawka kawngkhar lam chu ka melh nghal bawk.









Theodore-a rui chunga a lo pen lut ka hmuh rual chuan ka thu chhuaka banga sana in tar ka melh chuan zing lam dar 3 a pel tawh, " khaw nge i kal a "? A be hmasa tu zawka ka tan a tula ka hriat a vang chuan ka ti a min chhang lo in min melh ngur mai.











Khumah chuan ngawirengin a lo mu a a kawr phelh tum chuan a che sat sat bawk. Puih ngaia ka hriat avang chuan ka lo buaipui vata a jacket hak chu ka hlih saka, a pheikhawk phelh tum chuan khum a tang ka tho chhuaka a mawza nen chuan ka phelh sak thlapa, khum lama ka insawn chhoh leh hnu chuan a muhil nge ni a mit a chhing deuh vang vang mai.








A kawnghren nena mut chu a hreawm ringin phelh sak ka tuma tlem chuan ka tim ve deuh, a kawngah chuan chelhin ka pawt thawl hreta chu vel leh a lo che deuh hruta ka kuttah chuan lo manin khumah chuan min keuh mu nghal thlawp bawk.











" Tho rawh " a awma nam pah chuan ka ti a mitmeng sen rama min melh chhuk ngurin a kiai deuh suk, a lo kun hniam tak zelah phei chuan hlauthawng tawh tak ka ni.











Ka hmui bul cheta a lo kun takah chuan ka tih ngaihna hre lo lutuk chu ka mit ka chhing deuh tawpa, chutah ka rin loh lutukin ka ngawngah chuan a hmui in a lo nawr deuh tawka ka ip nghal chawih mai. A chet tak miah loh ah chuan meng chhuakin ka melha, a muhil daih chu ni in, a thawk lak zawng chuan ka nghawng a lum ham ham zel a ka mur seng seng mai.










Ka tha tawp chuan ka nama ka sirah a let thla nghal thak, a bula mut chu ka thla a ngam chiah lo bawk nen lukham chu la in inthlakna room lamah ka pheia a remchang laiah chuan ka mu ve hmiah.











Kan awmdan te ngaihtuahin ka inthing leh nawk thina mintih danglam hneh zia kha a mak tak zet.







Thawm ri sat sat a awm takah chuan ka mengchhuaka inthlakna room-a mu tawp ka ni bawk nen ka taksa chu a kham thun mai, lukham chu la in ka chhuaka Theodore pawh a lo tho der tawh, a inbual zo deuh chiah a ni ngei ang a sam a la hnawm chhap mai. " Vawinah kan haw ang insiam ang che " thu pe âw zet hian a ti deuh hmuka chhang lo in khumah chuan ka mu thla hnawk, khum a mu thang tih takah chhuata ka mu thut chu ka taksa a na chhuak vek.









" Nizanah khawiah nge i mut "? A tih leh pawh chuan chhang lo in ka chhing deuh duam duam, " ka biak che chu " a ti leh chiah chu ka phu lutuk ringawt, tho kangin ka melh nghal rama nizana eng mah sawi lo a mahni chauha awm tura min chhuah san a vang khan ka la haw reng. " Ka duh duhna ah ka mu ang, nangman khuma mu ngam lo turin min siam miau alawm, khatiang anga ka chunga i che leh a nih ngat chuan pawngsual tum case in ka tan tir ang che " ti tan tanin puan chuan ka in lu khuha a reh zui vawng vawng.









" Ka ruih laia ka chetdan a vang chuan min ngaidam dawn nia, hnaih che hi ka chak hrep lo " a ti leh nghuta ka ngei lutuk ringawt.












Dar 11 bawr velah hotel atang kan chhuaka Aizawl lam panin kanin khalh chhuaka kawngtluanin kanin be lo. Dar 4 bawr velah in kan thlenga min lo hmuaktu pawh an awm ve nuk mai, an ni hi chu Aizawlah pawh mi hriat hlawh pawl tak an ni a, then leh rual tha pawh an ngah ngang bawk.










Pa Thana hi Aizawl college nikum maia ding tharah a thawka, a nupui nu Mawitei erawhin Electronic bungraw zawrhna dawr a nei thung. An fapa naupang zawk Israel-a hi infiam mi ni in mizoram tan pawh vawitam tak football khel in a chhuak ve thin. Chuan ka pasal Theodore. Lalruatsanga hi businessman a ni bawk.











An chungte ho chuan min lo lawm thiam bawka keipawh ka inthlahrung lo sawt, kanin leng te reng reng chu an hmel en reng reng paw'n min khawsa thei tak an ni tih a hriata, a then phei chu milar tak tak an ni bawk.










Room lamah bungraw remin ka nu nen kanin zui chho a min be siam siam reng bawk nen a felin ka nel nghal tak zet. Theodore-a thiante pawh an lo kal ve nual avangin anin kawm khawm hlawma kei chu min ngaihsak teh chiam lo.








Thawmhnaw vel kan tihfel hnu chuan inhnuaiah kanin zui thla a Theodore-a te thian ho pawh an lo la awm thap, choka lamah chuan lutin tih tur a awm leh awm loh ka zawta, engmah tih tur a awm loh thu an sawi a vang chuan ka chhuak leha Theodore-a lo lut tur nen kanin su lo chauh.









" Fimkhur ta che " ti hluk in min kal pel a ka ner deuh sak, " i thin hi a chhe lutuk, mi awmlai in i nupui hi vin ngai suh ang che " ka nu in a ti sar sar ri chu ka la hre pha a kan misuala chuan a zawm duh hian ka ring lo.










Chaweikham lamah chuan eina vel te ka seng fela awmpui chu nei tho mahse a zawng zawnga rin chu ka duh bik lo, mo ka nia ka tih ve tur rengah ka ngai.











Ka huphurh ber zan hun chu kan thleng leh ta ngeia room khatah kan awmdun tur ringawt pawh chu ka huphurh.










Room lamah chuan tim dai hian ka chho a kanin hmachhawn a ngai ziah tur hi ka ning, room chhunga ka luh chuan vanneih thlak takin a lo awm lo, ka thaw deuh huai mai. Khum lam pana ka kal lai takin dawhkan tê a phone chu a lo ri ral rala Theodore-a phone a nih a vang chuan ka ngaihsak duh lem lo, a tawp hnu pawha an lo call tak sek ah chuan ning zet hian khum a tang ka chhuk thla a phone chu ka ban nghal zat.










Mahse a lo call tu hming ka hmuh chuan ka tawp chat, Lucy tih hi chiang em em in a inziaka, ka ngaihtuahna ah Theodore-a te kanina an lo kal hmasak ber ni a Lucy nen anin hmuh tum kha a lo lang nghal, an ni hi an lo in hre tak tak tihna em ni ? Rilru buai deuha phone ka melh ngawt ngawt lai chuan tu emaw hian ka phone ken chu a lo phih thla sawka ka hawilet chu Theodore-a nen kanin hmachhawn chat.









A phone chu a bih nghal ngura keiin mit tla lo lekin a che zia chu ka lo thlir reng thung, Lucy tih midang tam tak an awm thei tih ka hre tho na chu ka mi hriat ka unaunu Lucy ngei a nih ka ring tlat, lo ni tak tak ta se anin karah hian eng chiah nge awm ?











( PHURNA MIN PE TU BER CHU IN COMMENT HI A NI VE A, ZANTIN DAH IN DUH CHUAN COMMENT TAL HI CHU TANG VE ULA)


Show post links
Top

[Ngaia]

HMANGAIHNA MAK




CHAPTER,-4




" Eng nge i hriata, " lungawi hmel loh fe hian a ti chhuak hmuka, a phone ka lo en ringawt chu a thinrimpui viau a nih hmel. " Eng vanga ka phone khawih nge i nih, " a ti nawn leh nghuta, ka insum thei tawh bik lo chuan, " ka khawih duh vang renga khawih ka ni bik hleinem, a ri renga ka ning lutukin lak ka tum mai a nih kha, " ka ti let ve hmiah, a hmel lah chu a rum zual sawt emaw tih tur a ni.




" Vawikhat pawh lo khawih tawh suh, " ti leh hramin room atang chuan a kal chhuak a, a ngaihna hre lo zetin ka meng nur nang mai, a phone ka lo en vang maia khati taka han thinrim, a rilru a te ka ti tak zet.



A mize ngai hi a pu reng a nih chuan engtikah mah kan in mil thei lo ang, a hmelthat ang hian han fel se chu a tha nimai tur.



Khumah chuan keimahin ka mu meng kura, zanlai dar 12 a pel thuak tawh. Theodore erawh a chhuak kha a lo la let leh miah lo thung, mutthilh tumin ka in let tawn seka, ka harh tulh tulh zawk emaw tih tur a nia. Ka awmdan vel chu ka ngaihtuaha mahni in khawngaihna hlirin ka khat, hetiang tur mai maia pasal ka nei hi ka tah te a chhuak zawk hial mai.



Chutia ka in ngaihtuahna lamah chuan ka mut pawh zawi zawiin a lo chhuak ve tan a, ka mit ka chhing deuh diar diar tawh tih ah room kawngkhar chu dim lo bak sakin an lo hawngri thuaia, harhchiang nghal tak ka ni.




A ngaite bawkin Theodore-a chu rui chungin a lo haw leh tawh, hetiang reng a nih dawn chuan ka dawh seng bik lo ang.Mit meng thip lutuk hian min melh ngura, keipawh ka zam duh bik lo, amah ai maha rum in ka melh let ve kar.




" Tho rawh, " a au hian a au a ka phu nasa lutuk ringawt, ka melh rum tha viau thung, a thusawi erawh zawm ka tum bik lo.




" Ka sawi chu i hre na nge, tho vat rawh, " ti leh hmukin a lo pen hnaia, a che rang lutuk chu ka awi lo hial mai, ka mawng sawh dawp khawpa khum atanga min pawh thlak chuan ka na ti lutuk chu ka ner sak mai. " I taksa tenawm khan ka khum hi dai tawh hlek suh, " ti leh hlukin bathroom a pana, ka thinchhiatna chu a kai tho chiang ngei mai.




" Nanga khumah hian ka mu peih bik hrep lo, lalkhum pawh ni hlei lo eng nge ka mut pawh chu i huat viau. Chuan ka taksa hi a tenawmna pakhat pawh sawi tur i hria em ni, "? Amah ang chiahin ka tawng zawi vak bik lo.




Bathroom-a lut ta mai lo chuan a ding ngura, kawngkhar vawnna chu a hmerna hle tih ka hmu thei, chu chuan a thinrim a in sum nasat zia min hriattira hlauh erawh ka hlau bik hauh lo thung.




" Kanin neih chhan te chu chiang takin nangpaw'n i hria, duhthlang thei ni ila o bula awm hi ka thlang kum khua lo bawk ang, amaherawhchu vanduaithlak takin duh ka thlang thei lo, nangmah ang chiahin. " Ti leh in room atang chuan ka pen chhuaka, a tihdan ang chiahin kawngka chu ka khar ri ve bur bawk.




Inchung berah chuan chho in van lam chu ka thlir vang vanga, thli in min lo chhem takah chuan tlemin ka thinrimna te pawh a zia ve ta deuh. Ka hma in lang eng pe tuar ho chu ka thlira ka lung chu a leng ve tak zet.




Ka nu leh pa te thil tih hi ka hrethiam thei lo, min hmangaih ve lo nimai te hian ka hria. Anni chuan hlim viau turah min ngai anga, an ngaihdan leh ka awmdan erawh in perhsan tak a ni si.




Pipu anga an siam thutna ah chuan thu in ka hmalam chu ka melh ngawt ngawt a, ka zawi tial tial nimai hian ka hria. Kut lum veng vengin ka biang a lo tawh chuan ka harh deuh riai riaia, mahse ka meng thei mai lo thung.




Ka taksa a kan nawlh rual chuan ka harhchhuak kawka, min pawm kangtu taksa lum zet chu ka hre chiang ngang mai. Min pawmtu hmel ka hmu chiah erawh tek hmuam ang hlauh ka ni lehnghal.





" Min dahthla nghal rawh, i kut tenawm hian min khawih suh, " ke leng vak vak pah chuan ka ti tuara, a ni erawhin ka kâ a rawn hup hmiah thung, a va han zak thei lo mai mai tak. " Mi dang muhil lai kaih thawh kher i duh loh chuan ngawirengin awm rawh, " ti hmukin a pen sawn nghal pawk pawka, ka la tal fat fat thung.



A room chhungah chuan min pawm lutin, ka mut a duh lohna a khum ngeiah chuan min nghat thla a, a awmsawn rualin rang zetin ka tho kang ve nghal.





" Ka taksa tenawm hian he i khum hi avdeh i phal em ni, " ngeiawm zet hian ka ti a, a ni erawh a nui deuh hawk.




" Kan pahnih inkarah chuan eng pawh lo thleng mahse kan chhungte hian an hriat ve kher ka duh lo, room khatah nupa kan mu lo a nih chuan an ngaih a tha hauh lo ang, chu vangin ngawirengin mu mai rawh, " a ti nghuta, a ngaihdan tur chu ka hrethiam ve nghal mai bawk.




Mahse a ngaihdan tur ka hrethiam tih chu hriat tir kher ka tum bik lo, " room khatah kan riak lo tih hria se eng nge ni vak, " ka ti ve leh ngat a, " a chhan chu fa kan neih vat a ngai, nang leh kei hian fa kan neih hma loh chu kan muhrang thiang lo, " a thusawi avang chuan ka meng deuh kawk.




" Nang...nang leh kei hian fa kan nei ang maw, "? mak tih na avangin ka tawng te chu a bah deuh niai mai, ka hmaa ding pa erawh a lo kiai deuh suk duh lek.






" Chu chu kan nu leh pa te inremsiamna pakhat a nih chu! Kan fa in kum 5 a tlin hunah kanin then ang, " a sawi zawh rual chuan ka nu leh pa te dem na hlirin ka khat nawn leh a ni ber, thuthlukna liantham lutuk dang leh chu ka hriat lohin an lo siam leh a nia..




" Nang nen hian engtik ah mah fa kan nei lo ang, ka dam chhung hian a thleng dawn lo. " Uar fe a ka tih chuan a lo ner deuh sak, " ka duh bik viau turah ngai suh, he inneihna lem lutuk atanga kan zalen theihna kawng awmchhun a ni miaua. Zalen vat i duh chuan ka sawi chu pawm mai rawh, kan neih hma pauh leh kan zalen hma dawn tihna, " awlsam fe hian a ti leha, a sam buk laiah sawn keh nawk nawk mai ka chak.




" In lak inno vel kha a tul lo, ka chak bik vak lo a nia, " ngeiawm zet hian a ti nawn leha, melh rum vak bak tih theih ka nei lo chu ka thinrim hlur mai. A lak atanga ka zalen theihna kawng awmchhun ber kher hi a va han khirh tak em.




" Zanin chu i rilru siamfel nan hmang rawh,he inneihna hi i ning tak tak a nih chuan thuthlukna tha tak i siam ngei ka ring, " ti keh in khum lam chu a pana ka melh reng ringawt, khuma a lawn kai rual chuan a bul chu a beng thek theka min mitmei ralh bawk.





Zawmna






Luhlul chhuahin couch awmna lam chu ka pan pheia ka mu thla nghal zat, min ngaihsak zawm tawh lo a chutiangin keipaw'n, ka chau deuh a ni ngei ang rei lo ah mutchhuakin min lo zem chiai chiaia ka muhil nghal chu a nimai.









Zingah ka harh chuan ka taksa ana thuma ka mutna a chep lutuk vang a ni ngei ang, khuma mu lah chu a la hnar ri kuk kuk lehnghala, hetiang ang pasal laktlak loh lutuk hi ka nei bik hi ka vanduai tak zet.









Nizan lama a thusawi kha ngaihtuah chhuakin Theodore-a muhil chu ka thlir leha, " nang leh kei hian fa kan nei ang maw ? A thleng ngai lo ang " tiin ka tho chhuaka.










Bathroom lamah chuan lutin ka intifai zung zunga, inhnuaia ka chhuk thlak meuh chuan dar 7 a ri dawn tep tawh, mothar tuka thawh hai ka ni nghal der.









Hmanhmawh takin step-ah chuan ka tlan thla a, choka lam atanga thingpui lo chawichhuak mek nu pakhat nen chuan kanin tawk hlawl, " thawh nuam le, thingpui i in duh ve nghal em "? Polite zet hian a lo ti a, a hmelah chuan ka nu te rual vel awm a ni.






" Kei chu thingpui ka ngaina lem lo a, thingpui hi tu nge i pek dawn "? Ti let ve in a tray ken chu ka melha, ka nu( Theodore-a nu leh pa hi ka nu, ka pa tih hlirin ka koh tir tawh ang ) te a pek tur thu asawi chuan keimah zawkin ' ka lo pe ang ' ka ti a min hnial bik lo.










Tho tlai lo ila chuan keimah ngeiin ka lumsak tur a nia, Theodore.Lalruatsanga vang vek.









Sitting room lamah chuan tray nen kain chawi pheia, ka pa chuan chanchinbu a lo chhiara ka nu in tv a lo en thung. " Nu, pa hei in thingpui tur aw " tipahin dawhkanah chuan thingpui no chu ka dah a.










" Ehe! Thingpui te min lo lum elaw "? Ka nu in a tih chuan ka zak chem chem mai, " ni lo e, an siamsa ka lo chawiphei " inthlahrung zet hian ka ti a, ka pa chu a lo nui deuh hawk.








" Mothar tukah te chuan thawh an hai chawk alawm zak duh reng reng suh, i nu pawh hi a ni ve tho a nia " ti lehin dawhkana thingpui ka dah chu abana, tlem chuan ka zah pawh a zia ve deuh.









" Ni e, ipa sawikha a dik a nia kei phei chu chawei an siam peih hnu vekah alawm ka va thawh chu le " ka nu pawh chuan a ti ve leha, keipawh chu ka nui ve ta ringawt.










" Lehkha zirzawm leh te hi i rilru em "? Ka pa in no ruak dawhkana dahthla paha a tih chuan ka melh zawka, " zirzawm leh pawh ka tum chiah lo " pangngai tak chuan ka ti ve a, " ka zawh chhan zawk tak che chu zirzawm leh i tum paw'n keimahni lamah chuan harsatna a awm lo tih ka hrilh duh vang che a nia, mahse chutianga zirzawm i tum ta lo ro ro chu i nu dawrah hian i thawk ve duh mai angem ? Ina awm tawp ai chuan itan pawh a nawm zawk ka ring, " a ti leh dap dapa, a tawngkamah hian pa zahawm tak a ni tih a hriat hluah hluah.







" Kan dawrah i thawk ve duh te a nih chuan a lawmawm ngawt ang, chutih rualin nangmahin i zuam chiah lo a nih paw'n kan tilui lo che a nia, kha chu i thu thu a ni, " ka nu pawhin a ti ve a.








" In a awm tawp ai te chuan keipawhin pawi ka ti hran lo, mahse ka thawh theih chi a ni dawn emaw ni le " ti in ka rilru dik tak chu ka sawia.











" Customer lo chiau au vel kha animaia thil harsa chu a awm hran lo, i thawh duh dawn phei chuan counter-a thu ah ka duh zawk mah lehnghal che a, " ka nu chuan a ti dam thluama, " chutiang a nih te chuan keipaw'n thawh chu ka hreh bik hran lo " atawpah chuan ka ti ta nge nge a, ka rilru dik tak ka sawi bawk, ina awm tawp ai chuan hnathawka chhuah ve daih kha ka tan pawh atha zawk..






" I thawk duh chu alawmawm khawp mai, chuti ni lo se midang zawn buai a ngai dawn hrim hrim lehnghala " ka nui chuan nui sen sen pahin a ti leh vara, chutia hna chung chang vel kan sawi ho lai chuan Ruatsanga lel lul pawh phak deuhin a lo phei ve chhup chhup mai.








Ka pa in ka nu dawra thawh ka tum ve thu te chu a lo hrilh nghal zung zunga, Theodore-a chu a lo ner deuh sak, a ngeiawm thiam thei a nia.









Chaweikham lamah ka nu nen an dawr lam pan turin taxi in kan kala, hausa viau mahse lirthei erawh pathum chiah an nei thung, car pakhat chu Theodorea'n office kal nan ahmanga a dang leh chu ka pa leh Lawmsanga ( Theodore-a nau ) te'n an hmang thung, ka nu sawidanah chuan a ni chu taxi in a kal mai thina, a chang leh a hman hmanin an thlah thin thung.










Taxi a din takah chuan fair te pe felin ka nu nen chuan kanin zui chhuaka, kawngchhak lamah chuan min phei pui a, SAILO ELECTRONIC STORE tih lian zeta in tarna kawtah chuan min din puia ka ka hau mai.










Hetiang em ema dawr changkang leh lian hi a nih ka ring pha lo, inchhung lamah chuan min hruai luta an hnathawk te chu an hriat hran theih nghal khawp mai, kawr in ang an ha thapa hmuh an nuam tak zet.










Customer buaipui lo then khat chuan ka nu chu an lo wish sap sapa, ka nu chuan min in hmelhriat tir bawk. Customer an chhuah then tak vek hnu chuan an zavaia bulah min inhmelhriat tirna a nei leha, hnathawk ho pawh chuan min lo chibai sap sapa an fel khawp mai.







( HETI HI NI TEH SE )


Show post links
Top

[Ngaia]

HMANGAIHNA MAK




CHAPTER-5






Nilengin dawrah chuan ka awma, dawr luj tak a ni bawk nen customer pawh an lut chhuak ngun malh malh hle, keipawh counter lamah thuin customer te thil lei vel chu aman zat te ka lo chhut saka, rinai tak chuan a nuam ka ti phian bawk.







Dar 5 bawr velah ka nu chuan haw hmasa tura mintih tlat avangin taxi changin inlam pan chuan ka haw a. In ka thleng chu ka pa te pawh an lo awm vang tawh, vawin lama ka hnathawh chung chang vel min zawt luama keipawh chuan phur zetin ka hun hman dan te chu ka sawia, ka pa pawh a nui kur kur mai.







Inchung lamah intifai tura ka chhoh chuan Theodore-a pawh a lo awm vang tawh, be lem lo chuan ka bag vel chu ka dahtha a ka thawmhnaw hak tur phawrh pah te chuan ka zai rat rata, chhuak daih se ka ti.








In be lo in awm mah ila a bul hnaia awm hrim hrim hi ka duh lo, a hmel nelawm loh lutuk te hi ka hmu peih lo. Bathroom-ah chuan lutin shower chu ka inphuh tira ka dai seng seng mai.








Bathroom atang ka chhuah leh chuan vanneih thlak takin a lo awm tawh lo. Intifel zung zungin inhnuai lamah chawei turin ka chhuk thla a ka nu erawh a lo la haw lo.









" I nu chu lo haw tawh tur a nia, zan lamah hian dar 10 thleng kanin hawng tlangpuia hna thawk tu erawh zan lam atan a hran kan chhawr leh thung, hna thawkte hi a ring tawk lo thin lutuka " ka pa in chaw kan ei lai chuan a ti mawlh mawlha, chhun lam leh zan lam hnathawk a hrana an chhawr kawp thei hi amak lem lo, an dinhmun in a zir miau a.








Dawr atanga sum an lak luh ringawt paw'n hnathawk ho hlawh te chu a daih lutuk mah mah ang, nikhat ka thawhna a tang an hlawk zia ka hre miau a.









Chaweikham lamah thingpui in in sitting room-ah kanin kawm khawma, ka nu pawh a lo thleng ve chiah, " hnathawk hran chhawr man hi a awm lo thin lutuk, i hrisel loh tehreng nen zan lam hi chu thawk tawh suh " ka pa chuan a ti charh charha ka nu chuan a hnial lem lo.









Dar 10 bawr velah mu turin kan room lamah kan chho a, room chhung kan luh chuan kanin melh deuh chat. Kei chuan nizan lawka a thusawi kha a ni ka ngaihtuah chu.









Ka rilrua thil awm chu duh lo zetin ka lu ka thinga ka hawi chhuak chiah chu mit tla lo lek a Theodorea'n min lo melh kur ka hmuh chuan chil ka lem khawlh.










" Engtin nge ni dawn "? A lo la ti zui a nih chu! Ka va han ngei tak em, a sawi chhuah miah loh paw'n pawi ka ti lo a sin.









" Nang nena mutdun tumna ka nei lo hrim hrim " ka ti thla ve rawka a nui chhuak hawk mai, a nuih aza tak tak a ang viau bawk, " chutiang te chu i lo ngaihtuah a nimaw ? ka sawitum zawk chu khumah nge sofa-ah sawn i mut dawn "? Mit ti zim sun hian a ti a, a hmelah chuan a nuih ala za deuh tih a hriat.









Kan ngaihtuahna in ang lo lutuk a vang chuan ka zak hle a, keimah leh keimah ka in timualpho let der bawk.








" I khum a nia nangmah i mu tur alawm, kei te chu khawiah pawh mu ila sawi theih ka nei hleinem " ka ti deuh ngat a, min hnial ka rin teh reng nen, " i ti dik " a ti daih a ka melh nghal dawr, tlawm ngaihna ava han nei lo tak, ' hmeichhia zawk inia khumah sawn mu rawh ' a tih te ka ring ve a nia.









Thinrim zetin sofa awmna lamah chuan ka pheia ka thu thla nghal thak, a ni pawh chuan khum lam chu a pan pheia a mu thla ve nghal zat.









Ka mut hnu chuan khuma tui tih hmel taka muhil thaw sek sek chu ka thlir leh zeuh thina mahni hmasial tak a ni. Ka phone ka en chuan Lucy message a lo awma ce teh mial chuan, phone-a kanin biak lohna rei zia ka hre chhuak thut.









A message chu ka en a, " naktukah kan lo zin dawn " tih te mai hi a ni, ka nu in tlai lam khan min hrilh tawha ka lo mang nghilh palh, reply chuang lo chuan ka out san leh daiha, ngainat tum ngial mah ila ka thei tawh ngang lo.










A tukah chuan ka pa te an lo zin dawn avangin ka pa in ka nu pawh dawra kal lo mai turin a chaha, chutiangin keipawh. Hnial lem lo chuan inah kan awm tawpa Theodore-a te unau erawh an chhhuak thung, ka pa in haw hma tur in a chah ngun malh malh viau thung.









Dar 2 bawr velah ka nu leh pa leh Lucy te chu an lo thlenga ka pa te nupa chuan an lo lawm thiam ngang mai. Sitting room lamah chuan kanin kawm khawma Lucy chuan min melh leh ralh ralh thin.








" Ka nu leh pa te chu Rinchhungi te nupa in maw lo awmpui dawna "? pa Thana chuan a ti a, ka nu leh pa a tih hi ka pi leh pu a sawina a nia a awm pui tu tur nupa te hi ka pa farnu te nupa an ni, farnu tih ah cousin zawk.







" In room te kha i nau kha va hmuh ve la " ka nu in a tih chuan tul lo ka va'n ti tak, midang pawhin an lo thlawp miau avangin peih lo zetin room lamah chuan ka chhoh puia.








" In hlim em "? Room chhunga kan luh rual chuan a ti sep a a hawi kual ruai bawk, " hlim lutuk " a zawhna awm zia pawh hre chiang ngawt lo chuan ka ti let ve a a nui hak mai, ka thusawiah khan nuihzat tur a awm ka hre lo e a.







" Theo duh zawng chu ala ngai reng a nih hi, rawngthim lam ala hmang tam khawp mai " a tih chuan mak ti zetin ka melha, hemi te pahnih inkar ah hian eng chiah nge awm ?








" Oh! Mak i tih hmel hle mai " nui har hara a tih te chuan mak tihna a khat mit mengin ka la melh reng tho, " Theodore-a nen hian inhria em ni "? A tawpah chuan ka ti chhuak phawnga, thu zep tit tet hi ka thei ve tlat lo, ka hriat duh chu ka zawt mai thin.








" In hre satliah nimai lo in kanin ngaizawng thin, in ina ka lo awm hma deuh khan a nia kan in kawp lai kha chuan kan la naupang dun khawp mai, zirna avanga ramdanga a awm tak hnu khan kanin be zui tawh lo a, i hriatthiam dan turin inthenna mu mal pawh kan nei lo " a ti zung zunga, zawh ngai miah lo a engkim kimchang taka a sawi chhuak vek chu inthiam lohna nei hmel pawh a pu lo.









" Mahni nang te chuan Jos-a i duh a ni lawmni " ka tih chuan a nui haka hrethiam lo fe hian ka melh deuh tawp, " Joshua te chu nangmah tihnatna hmamrua mai alawm, i lak atanga i mipa duh ber ka laksak ang chiah che kha i pasal pawh hi ka laksak ang che " mit meng hlauhawm zeta min melh pah hian a ti a, eng vanga nunrawng em em nge maw a nih le.









" Jos-a ka laka a tanga i lak bo ang ngawt kha chuan ka pasal hi chu ka lak bo tir lo ang che, " ka ti thla ve rawka kei ngei paw'n ka thusawi chu ka pawm lo.










" I lo en dawn nia, i pasal hian min duh thin lutuk tih theihnghilh lo bawk la " ti pahin Theodore-a khumah chuan a thu thla a che zia chu ngawi ngulin ka melh tawp.










" I en zawh hunah i lo chhuk dawn nia " tih leh inher ka ruala, a bula ka awm reng chuan ka inthunun theih loh mai ka hlau.








Room kawngkhar ka khar zo ka hawichhuak chiah chu ka phu lutuk ringawt, Theodore-a a lo ding run chu ni in, min melh deuh ngura kan thusawi kha a lo hre vek tihna em ni ?







" Ahh...ih Lucy kan room hi ka en tira "zah zelah ka ti ta ringawta, min ngaihpawimawh sak pawh ka ring leh em em chuang lo.






" Theo " ka hnunglam atangin Lucy pawh chuan a lo ti no diaia kan boruak chu atang ru tak zet, " in nu hian in pindan hi min lo en puia, i duh zawng ala ngai reng a nih hi " a âw ah chuan in tihtheihna âw ka ka hre tel.






" Kan nupa room-ah hi chuan midang hi lut tam lutuk lo mahse a pawi lo a nia " Theodorea'n a tih chuan ka melh chho dawra ngainat awm zet hian min la nuihsang zui, a awmdan teh thut hian minti ham haih.









" Ka chau deuha min lo inthlak pui teh " pangchang zeta a tih te chuan chetna chang pawh ka hre lo, " in hnuai lamah min lo nghak maita che " Lucy melh pah chuan a ti dam leh thlupa Lucy hmel hmu thei lo mah ila a mak ti hmel tur chu ka suangtuah thiam.









" Theo " Lucy chuan a ti zuai ruiha Theodore erawhin a ngaihsak zui lem lo, " ti rawh lut ang " ti leh sup in ka kutah min kaia room chhunga kan lut tur chu mit meng ling hlar hian Lucy chuan min melh khur khur mai.








Room chhunga kan luh hnu rei lo ah chuan ka kut a kaihna chu a thlaha, a chetdan avang khan sawitur ber pawh ka hre lo.










" In thlak la ka lo va chhuk hmasa ang " kan ngawih dun reng takah chuan ka ti sep a, nichina a thusawi a vang khan ka dik lo zo vekin ka hria, " ka sawi kha i hre lo mi "? a tih chuan ka melh haw a mit ka khap deuh fak fak, " min in thlak pui turin ka hrilh che kha, " a tih chuan ka nersak.









" Kha te chu...." " ka ti tak zet a nia, i pasal ka nih hi chute chu itih ve tur reng alawm " min tawng khalh in a ti leha, a mize danglam chak lutuk hi eng nge maw a chhan ni dawn ni.








" I thawmhnaw em thlakpui tur che chuan kanin hnaih tawkin ka hre lo " ka ti deuh hlaka a ni erawh a kiai suk thung, " ti hian kanin hnaih tawh em "? Hnai set sawta lo kun hniam pah hian a ti thum bul a thawk a sak talh mai.









" Awmsawn mai mai teh " tipahin a awmah chuan ka nama ka kut chu a lo hum hnan nghal hmiah thung, " i pasal hi midangin an chhuhsak loh nan che min duat deuh rawh " a tih chuan meng phawk tawh tak ka ni, Lucy bula ka thusawi kha a ni hian a hrechiang lutuk tlat, chuan a ni lo zawngin min ngai bawka.








" I zakthei lo a nih chu "! Ti lehin ka namvaka a awmsawn ve hram, hmeichhe zam chhe mai mai ngai lo ka ni ve a sin, hepa hmaah erawh zahpui awm khawpin ka zam chhia a nih si hi.








A in her vut rualin rang zetin room atang chuan ka tlan chhuaka ka awm chu ka dawm deuh vang vang, ka awmdan chu duh lo tak ka ni.








In hnuaia ka chhuk leh chuan midang ho chu an lo ti ti laih laiha keipawh chu an bulah ka thu thla ve a, ka nu leh pa te chuan Theodore-a awmna min zawt nghal chat. " A inthlaka a lo chhuk tep ang " ti pahin Lucy chu ka melh zawka a lo la meng thip ngang mai.









Rei lo ah Theodore pawh a lo chhuk thla ve a, a che zia mak sak lutuk chu a la bansan lo cheu, ka bul chetah chuan a lo thu a ka taksa chu a nek deuh talh talh bawk, eng vanga Lucy bula khatiang thu sawi kher kher kha nge maw ka nih le, min runluih nan a hman phah lehnghal a.










" Naute te hi in pai dawn hnai em "? nui uar uar paha ka nu in a tih chuan ka ip chawih mai, chutiangte inzawh ngai amaw ni, midang ho pawh chu an nui bawk bawka kei erawh ka nuih a za hauh lo, naute an sawichhuah takah phei chuan anin remsiamna kha ka hrechhuaka ka nu leh pa ka zawt chiang ngei ang, a lo ni tak tak a nih phei chuan an chungah ka lawm lo viau ang.








" Chanchin lawmawm kan hre vat turah ngai ang " ka pa Thana pawh chuan a ti ve leha keipawh chu ka nui tawi tak ringawt, Theodore-a ka melh zeuh chuan min lo nuihsuka ka hawisawn rang lutuk ringawt.









Ka nu te chu a tuk maia haw tur an ni bawk nen zanriah eikham lamah pa Thana te nupa in an lenchhuah puia, cham rih tur paw'n an sawm nasa viau, ka pi leh pu te ngaihtuah ngai lo se chu cham mai pawh an ni paw'n pawi an ti hran bik lo ang.









An len chhuah vek hnu chuan kan room lamah ka chho a, lehkhabu chhiar tur chu la in dawhkan hmaah chuan ka thu a, tih tur ka neih loh chuan lehkhabu hi ka chhiar mai thin.






Lehkhabu ka chhiar zo ka hawichhuak chiah chu ka rak deuh that, engtik laiin nge a lo luh reng reng ni, a khumah chuan bawkin biang dawm meuh hian min lo en a, ka rak that chu min la nuih huk zui.








" I mawl em ni "? Ti hlakin ka awm chu ka dawma ka lung chu a phu nasa kher lehnghal. " Tlaia kan chhungte thusawi kha i hria tiraw " a tih chuan chhang lo in lehkhabu chu a dahna turah ka va dah a, " keipaw'n fa neih vat chu ka duh " a tih chuan a lam chu hawiin ka melh kar a, " kanin then vat theih nan maw " ka tih chuan a ngawi chiang kher mai.

















( COMMENT HI CHU KA SAWI ZING TAWH, IN THU NI TEH SE )


Show post links
Top

[Ngaia]

HMANGAIHNA MAK






CHAPTER-6






Ngawirenga dinga min melh deuh ngur tu chu mitmeng elhsen zet hian ka melh let ve kar a, ka thusawi chu sawifuh ka inti viau. " Ni e, a dik alawm kanin then vat theih nan chu chu a ngai tlat sia " a tawpah chuan a lo ti ta ngeia, a ni hi then duh hle mah ila a fa pai chu ka tum lo bur.







" A pawi khawp mai i dilna chu tih hlawhtlin tumna ka nei lo, " ka ti leha a ni pawh a tawngchhunzawm tawh bik lo. Inhnuaia ka chhuk chuan an lengchhuak pawh an lo haw tawha, ka nu leh pa te chu an room lamah ka zui phei ve nghal zat.










" Theodore-a nen hian fa kan neih hma loh kanin then theih loh tur thu thuthlun in lo siam em ni "? Ka ti lut phawnga ka nu leh pa te chuan mak mintih hmel khawp mai.








" Chutiang kan hre hauh lo, inthen intum em ni "? Ka nu zawk chuan a lo ti a, ka thaw deuh halh. " In chiang chiah maw ? Nangni paw'n induh vang renga innei kan ni lo tih inhrechianga fa kan neih kher chu phut suh ang che u, kan lo inthen ta a nih paw'n kanin rem theih ngang loh vang tih min lo hriatsak dawn nia " ka ti leh siam siama, an ni pawh hian kanin neihchhan chiang takin an hria a kanin then a nih paw'n sawisel theih an nei lo ang.









" Eng vanga inthen thu sawi ta nge maw inih le ? I pa Thana te nupa lahin an duat em em che a, " ka pa chuan a lo ti deuh hmuka, " a chhan chu kanin hmangaih miau hek lo, ka tana a hreawm tur zia hi in hrethiam phal lo ang " ka âwki pawh a zawi hran lo, in thunun chu tum viau mah ila ka thinrimna in min hneh laklawh tlat.








" Eng pawh ni se fa te innei anga inhmangaih chho ve mai ang " ka pa in a tih chuan ka beidawng tak zet, " ka hmangaih loh mipa nen hian fa ka nei lul lo ang " ti hlakin ka pa chu ka melha, a ni pawh chu a lungawi hmel viau lo khawp mai.






Room atang ka chhuah hnu chuan inchung lamah ka chho a, room chhungah pawh lut duh lo in balcony lamah ka chhuaka, room khata awma a hmel hmuh ka peih lo.









Arsi eng phe tuar te chu enin ka thaw leh hak thin, ahma te kha chuan ka mipa hmangaih tak neiin chhungkaw hlim tak ka din ang te kha ka ti ve thina, tunah erawh duhthusam te chu an thamral zo ta si.









Chhum rei lo te lo langa ral leh mai thin ang hian, ka hlimni te pawh a ral zo ta si. Hetiang tur reng renga pian ve ngawt hi ka tan ava sawt lo si em.









Mahni duh dan ang paw'n ka nung thei lo chu a nia. College ka kal tirh lai vel te ngaihtuah letin ka rilru chu ka kawm melh melha.








Khatih hunlai te kha chuan ka hlim ve thin a sin, ka mipa duh em em Jos ka bulah a awma, tudang mah ka mamawh ngai lo.










Hmeichhe thian ka kawm tam lo viau bawka, ka kawm ber leh ka thiantha ber anga ka ngaih pawh Lucy a nimai, a ni lah chuan min bumin ka mipa duh ber min chhuhsaka, khata tang phei kha chuan ka mal zual ngawih ngawih.









Tunah tak hi chuan, ' ka ta' han tih ve tur pakhatmah ka nei lo, ka duhthlanna thlengin min thunun sak vek a, nun hluta awmzia pawh ka pawh pha tawh lo ni berin ka in hria.









Darkar khat dawn ka din hnu chuab hreh ru tak chungin kan room lam chu ka pana, room chhung ka luh chuan pakhat pa chu a lo mutui nasa mai, a la hnar thlawrh thlawrh zui leh ta nghala, kei rilru hah tawka ka awmlaia a lo hahdam bik chu ka haw hlur mai.








Sofa ah chuan ka mu a, mutthilh mai erawh a harsa khawp mai. Rilru ah thil tam tak a awma eng ber nge zawma zawm loh tur ka hrethiam lo.










Theodore-a nen hian fa lo nei ta ila kum 5 hnuah kanin then thei ngei anga, mahse ka fa chu nu leh pa karah a thanglian thei dawn si lo, keiin chhuahpui ringawt dawn ila mahni pawh in enkawl thei ka nih loh laia naute enkawl tel phei chu ka tlin dawn lo sa.









Theodore-a kuta ka fa daha kalsan ringawt zawng a nunrawngthlak ka ti bawksi, kan neih hma hauh paw'n rilru a buaia han nei tak tak phei ila engtin tak awm ang maw.









Thawm ri sat sat a awm vangin ka mengchhuak siar siara, banga sana intar ka en chuan a la hma viau bawksi.








Khum lam ka hawiphei chuan Theodore chu a lo tho reng tawh mai, ka thu chhuak hlawla chutih rualin bathroom lama shower hmang thawm ka hre zawm zat.











Ka puan te chu thlep felin wordrobe-ah ka dah lut leh thlapa, inti fai hmasa lo a chhuk ka duh bik loh avangin Theodore-a bathroom hmang chu ka nghaka, a lo chhuah rual chuan min melh ding nghal chat, a sam huh hlap chu a far fep fepa a mitmeng pa hrak chuan min melh deuh ngawt ngawt.








In thing harhin bathroom lamah chuan ka lut ve nghala, mipa in min melh in khatiang tak khan ka zam ngai lo, zam ve thei miah lo anga ka inngaihna te kha chawp leh chilhin a bo nghal duak nimai hian ka hria.










Ka intihfai zawh hnua ka chhuah leh chuan a lo awm tawh lo, inhnuai lamah chhuk thla in ka hawi kual ruaia hmuh tur a awm miah lo lehnghal, eng vanga zawng nge maw ka nih dawn ni.







Mawl in ti zetin choka lamah chuan ka lut pheia ka nu ( ka pasal nu ) pawh a lo tho leh der tawh, min hmuh rual chuan min nuih ver verin " Iva tho hma ve " a lo ti zang vaha, keipawh chu ka nui ve deuh seih.









" In pa chu a cham rei dawn sia i lung a leng hman mai anga " chair pawt chhuaka ka thu chiah chu a lo ti a, ka bang bo viau.









" A hna hi a tul thei lutuka, in inneih hma pawh khan kum khat tawp te, a chang leh thla hnih thum te chamin a zin chhuak deuh reng zel, nangpawhin i dawhthiam viau a ngaia, mahni hna a in pumpek chi a ni bawk nen, " a tih zawm leh siam siama, a awmzia chu Theodore-a chu a zinchhuak tihna.







Engtin nge engmah min hrilh loh theih, in mil lo viau mah ila a hming chuan nupa kan ni ve a chutiangte chu min hrilh ve awm, ka nu bulah hre lo anga awm chu a zahthlak ve bawk nen engkim hresa ang zia zang chuan ka ti ti pui ta ringawta.







Midang ho pawh chu an lo tho ve hlawma Theodore-a awmna chu min lo zawt nghal luam bawk, ka nu leh pa te pawn lama anin zui chhuah chuan keipawhin ka zui ve vat, " engtik nge haw in tum deuh "? Nizan lama kan buaina te kha chu tun atan chuan a reh leh tawh.








" Vawin tlaiah kan chhuak ang, " ka nu zawk chuan a lo ti a ka thaw deuh huai mai, Lucy awm lo tur zawk chuan a ni min ti hahdam, eng vanga Theodore-a nen inzawmna an lo neih tawh thin avanga haw em em nge maw ka nih dawn ni, ka duh vang chu a ni hauh lo ang.








" Lucy hi a insiam tihna em ni "? ka ti leha, dil chhut chu ka inti ve tho, " tukin zingah a chhuak tawh alawm, a thian pakhatin hnathawh tur a kawh hmuha chumi chu belchiang turin Us lamah a phei a nih kha, pawisa lah chu khawi a mi nge maw a neih dawn ni, " ka nu bawk chuan a ti leha.









" USA ah maw ?" Ka ti nghal hu thung, USA lam daih daih a pan chu mak ka ti viau, khawia pawisa nge maw a neih dawn ni.








" Um, karleh velah a lo haw ang, hna a hmu hlauh a nih chuan thla thar atang a awm anga, a vanduai palh ta a nih chuan Aizawl lamah hian hnathawh tur a zawng leh ang " a tih leh chuan USA lamah chuan hna hmu hloh se ka ti tak zet, eng vanga ka rilru put hi dik lo ta viau nge ka nih dawn ni ?








Inchhung lama ka luh chuan pa Thana te nupa lo ti ti na lam chu ka va pawha, an bul ka thlen hma deuh chiahin ka nu chuan, " Bawiha chu USA lamah a nilawmni a kal kha, a zin kual nasa lutuk tawha ka hriat pawlh nuai mai " a lo ti siam siama ka ding deuh chawt.







" A nih kha, karleh velah chauh a lo haw theih tur thu a sawi lehnghala, tun tum phei chu eng sumdawnna nge an neih dawn tih pawh a sawi lo, tum dangah te chuan a sawi ziah sia, " ka pa Thana chuan a ti ve leha ka mit deuh sulh.









A ni hi Lucy nen anin kawp leh tawh anga hetah chuan kan awm veksia an duh angin an awm thei dawn lo bawk nen chuvanga a ruala zin chhuak anni mai angem ? Ka rilrua zawhna lo lang avang chuan ka thin a thip deuh zawk, bum nawn leh ang maiin ka na.








ZAWMNA





Theodore-a a zin chhuah atang karhnihna a ni tawha, ka nu sawidanin tlai lamah a lo haw dawn a ni awm e. Min lo be ngai lo a kei lahin ka be bawk hek lo.







Ka nu leh pa te pawhin an haw hnu pawhin chanchin te min lo zawt ve renga, ninawm khawpin Lucy chanchin min hrilh ziah bawk, ka pasal leh ka unaunu ngeiin min bum ni a ka hriatna hi dik lo se ka ti tak zet, Theodore-a hi hmangaih lo mah ila a hminga ka pasal a nih ve miau avangin min rinawm lohsan mai chu ka ngaithiam thei bik lo ang.









Midangin hre pheise a hmingchhe zawkah ka tang lo ang tih tunge hria, kan thulak duhdan lah a mak thei si, ngaihtuah zawng ringawt paw'n ka tim suk thei.







Vawin chu saturday a nibawk nen ka nu in dawr lamah kal lo mai turin min chaha, tih tur dang a awm lo bawk nen Kan room ka tihfaia, thawmhnaw suk tur ka khawm lai takin phone call ka dawnga, ka en chuan ka rin loh lutukin Theodore-a a lo ni, eng vanga min lo call ve nge maw a nih dawn ni. " Hello " zangkhai deuha ka tih chuan a reh zui vang vang mai.






" He..." Ka tih leh lai mekin Lucy âw ngei chuan, " ka lo haw chiaha zanriah chu khatah khan ka ei ve nghal ang, ka phone a chhe sia in pa phone ka lo hmang mai " a lo ti duaha ka inhum ruh vak.









Mintih hreawm a duh vang hrim hrim a nih ka rin vangin pangngai tak anga lan chu ka tuma, " ava tihzia ve, zanriah atan i chawhmeh duh ber ka lo siamtir ang " ka ti deuh khera, mak tiin a meng buai leh nasa tawh ang.








" Engtia rei nge khatianga i awm theih kan hria ang chu " ti hmakin call chu a off-a ka nui hak thung.








Engtia rei nge ka pasal nen hian min buma anin kawp theih tih ka en zawk ang, a lakah engmah ka tisual lo chung paw'n heti khawp hian min hua a, tunah chuan min chhuhsak a tum a duh em em ka pasal hi a lak atang ka dah hla ve ang, kan duh tak te'n min phatsan hian engtia chiahin nge kan nat thin tih hi ka hriat tir ve khawp ang.








Tlai lam dar 5 bawr velah Theodore-a leh Lucy chu an lo inzui luta, Airport lama in hmu fuh palh angin anin sawia, ka ei lo ngei mai.










" I chau awmsia inbualna tur tui ka lo lumsak che a, tunah inbual duh nghal em ? Nge ni a chaw i ei hmasa phawt duh "? a bag khai lai lalsak paha ka tih chuan mak a tih hmel viau, kei erawh ngainat awm thei ang berin ka nuisang thung. " Chaweikhamah zawk le " a tih tak dutah chuan ka bu nghat.







" Lucy i ril atam tawh em "? Lucy melh pah chuan ka ti leha, a ni paw'n mak mintih hmel viau, " tam lo e haw kawngah Theo nen thil kan lo eiduna "awmze nei zet hian a ti a, midangtan erawh rinhlelh ngaihna a awm lo thung, Theodore-a ka melh chuan mitmeng zim sun hian min melha, ka nuih leh sak.





" A nih chuan va intifai chhungla, chawei chu ka lo siam tho ang, chawei lo tawpa awm te chu a tha lo ang " ti lehin choka lamah ka pheia, chawei chu ka siam nghal zung zung. Ka siam zawh hnu chuan midang ho chu ka ko a Theodore-a a lo lang hmasa ber.









" Thu la ei mai rawh, " ti lehin a thlengah chuan chawhmeh vel chu ka suah saka, ka nu leh pa te pawh an lo lut ve chiah bawk.







" Mambawiha ( israel-a Theodore-a nau kha ) hi a lengchhuak em ni "? Ka pa in chaira thut thlak pah chuan a ti sup a, " a thiante nen thil pawimawhah anin hmu khawm dawn a nih kha " ka nu chuan a lo ti ve vat thung, chaweikham lamah chuan eina vel te ka ti fel leha, vawin chu awmpui ho in chawlh an lak a vangin eirawng pawh keimahin ka bawl veka, mo tak tak te pawh ka ang ve deuh tawh.







" Chho la inbualna tui tur ka lo siam ang che " Thleng ka sil zo chu Theodore-a bulah dingin ka ti sep a min melh chho leh vut tawh, " ni e va inbual rawh i chau ang, duh leh i mu nghal mai dawn nia " ka pa pawh chuan a lo ti ve a, Theodore-a pawh chu a tho ve tuah tuaha, a hmela mak tihna la chambang chu ka hmuh hmaih thei lo.









( COMMENT IN THAT CHUAN KA REGU VE ANG )


Show post links
Top