Khuanu ruat BY Vtei Zahau (Completed)

[Ngaia]

Bung 1na




Zikpuii's P.O.V




"Keichu ka kal ve dâwn lo" luhlul fe chuan lem lam ka hawi hmak a, kanu chuan, "Awle i duh chuan I rawn kal ve lo thei ang, mah se I thiante nen a picnic in neihna tûr ah pawh khan I kal chuang lovang" thu pe aw tak chuan a rawn ti ve a, "Duh thlan tur min pe hleinem" lungawi lo fe chuan ka ti ve leh a, "Duhthlan tur I nei a lawm, kan bula rawn kal nge in a kar hnih nangmah a awm" kanu bawk a ni, thinrim zet in ka pu dan lam pan chuan ka kal tau sawk sawk a, kanu lah chuan engah mah a la ngaih hmel loh lehnghal.






Ka ṭhiante bulah chuan picnic na a ka kal ve theih loh tur thu chu ka hrilh nghal a, keimah chuan ka mittui a tla a tla a, ka rilru chu a na a ni, ka chhungte'n min hrethiam lo lutuk hi ka thin a rim a ni.






Keihi Saizikpuii ka ni a kum 17 mi ka ni a exam chawlh ka hmang mek a ni, kan ṭhian ho a picnic kan lo rêl thlûk vek tawh laiin ka chhungten Kapu te khua ah kan kal tûr thu min hrilh leh thut a, tûnah duhthlan tur nei miah lo in min siam leh bawk a nih hi.






Ka phone rawn ri vang chuan ka mittui hru sawk sawk in ka phone chu ka picup a, ka ṭhiannu Zuali chuan "Mate, a pawi lo a nia, thei lo tur kan tam lutuk a, thla leh ah kan picnic mai dawn nia kan tih kha Group kha I en lovem ni" a rawn ti a, ka thaw huai mai, chutia kan zin tur leh picnic tur a in sut buai tak si loh ah chuan ka thawmhnaw te chu ka siam ve vat a, chawhnu lama ka chhuah mai tawh dawn vang chuan ka hmanhmawh ang reng hle a, ka in siam zawh chuan ka bag nen ka pindan ka chhuah san a, kau chuan "I rawn kal ve dâwn lo emaw ka ti a" a lo ti kher a, run viau mah ila ka chhang peih lem lo, a melh pawh melh loin sofa ah chuan ka ṭhu thla a, ka phone chu ka khawih san daih a.





Kapa car nen a rawn thlen chuan kan bag ṭheuh chu car ah chuan kan vawm lut sap sap hlawm a, kau chuan mei nei zet zet chuan min la fiam zui reng a, mah se ka khingsawng peih lo, car a kan ṭhut luh hnu phei chuan earphone vuah in hla ka ngaithla a ka mit ka chhin san ta daih.



Mit chhing reng ta na na na chu ka lo muthlu a, mumang ka lo la nei lehnghal a, ka mumangah chuan kawngpui zau thawkhat takah hian keimah chauh in ka lo ding a, ka bul velah chuan in hmuh tur pakhat mah a awm lo a, rannung hram ri chiah chiah tih loh chu hriat ka nei lo, chu kawngpui rapawm ru zet chu zawh in ka hma lam pan chuan ka kal a, kawngpui chu a lo thui hrep lehnghal, mah se rei fe ka kal hnu chuan kawngpui tawp chu ka va hmu phak ta a , chu kawngpui tawpah chuan thingkung sang tak lian ṭha tak hi a lo ding a, chu thingkung lian tak chu a nalh em em a, a rawng chu a sen deuh a, a hnah chu a khat tawk in a rawn tla deuh reng bawk chutia ngawi reng a chu thingkung ka lo thlir lai chuan chu thingkung chu eng sava nge tih pawh ka hriat loh pakhat hian a rawn thlawh kual a, a hnuah chu thingkung zar fal tak a awmah chuan ka lam hawi zawng a rawn fu in mak deuh hian a hram a, a hram ri chu ka beng ah a ring em em mai lehnghal a, chu sava chu chiang taka en tumin kan hnaih deuh a, chu velleh ka mitah tak a Mitmu dum vek a min rawn en in a hma ai a ring zawk leh rapawm zawk hian a rawn hram leh chiam a, ka harh nghal zawk.




Kapu te khaw dai maiah chuan kan lo awm tawh a, ka harh ka thaw kawk kawk chu Umama chuan mak min tih hmel deuh hian min lo melh reng a, mah se rei lo teah a hawi sawn ve leh mai bawk, keipawh chu in bengdai thuai in tuk verh pawn lam chu ka en a, kawng chu an lo reh ṭhuap a, khua a thim lek lek tawh bawk, ramhnuai te chu a thim khup ni mai hian a lang tawh a, rei lo tê ah khua chu kan thleng a, thingtlâng khaw tê tak tê a ni dawn emaw ka tih kha a lo ni hauh lo, a lo changkangin a lo thianghlim em em a, len erawh a lian lem lo tak tak, kawtthler vel chu a lo eng pup a, dawr ṭhenkhat lo la in hâwng tawk pawh a lo la awm ve bawk, mah se khaw tawp lam chu kan pan zêl a, kapu te in chu tlêm in a lo han fal deuh hi a lo ni a, mah se kapu te in ai a la fal pawh a la awm ve tho mai, kapu te chuan pâwnah min lo hmuak a, min hmu chu min lo lawm kher mai, kapi pawh chu a chak tawh lo tih hriat ve tak hian pawnah chuan a lo ṭhu ve a, puan a sin than bawk, midang ho ai chuan kapi chu ka pan hmasa ber a, kapi chu ka kuah nghal vat.




"Bawihte in rawn thleng thei maw, ka va han ngai tawh tak che u em" kapi chuan aw khur deuh bap bap chuan a lo ti a, engmah sawi lo in kapi chu ka kuah vang vang ringawt.




Min lo lawm zual pui a zawh chuan inchhungah kan lut a, an in chu a lo lian reuh kher mai, inchung lamah chuan kan thawmhnaw te dah tûrin kan chho nghal a, kau chuan, "Rem i awm dân a va dik lo ve" a rawn ti a, ka nui ringawt a, ka chhang lem lo, ka pindan turah chuan ka luh dan leh ta daih a, ka mumang khan ka awm a la ti nuam thei lo a ni deuh ber, a chhan erawh ka hre lo, khatiang thil hlauhawm êm êm pawh ni lo khan engvângin nge ka rilru a tih nawm loh ve ringawt.




Ka mumang chu ngaihtuah chhunzawm duh tawh lo in ka in tifai ta daih a, zanriah ei dâwnah min rawn ko a, ka chhuk ve leh ta chauh a ni, kapu chuan chaw kan ei hma in lawmthu sawi ṭawngṭaina a nei a, kei erawh ka thil ei chu a la tui tak tak thei lo, ka mumang vang bawk a ni.







Kapi bulah chuan ka awm deuh chawt a, a chauh deuh vangin dar 7 velah an pindanah ka chhoh pui a ka awmpui deuh reng, "Bawihte, i khua a har ang in hnuai lamah chhuk daih rawh" kapi chuan a rawn ti a, "Har love pi i bula awm hi a nuam ka ti a lawm" tiin kapi ke lamah chuan ka ṭhu a, a ke chu ka hmeh sak nghal a, ka ṭhutna aṭang chuan kapi te room a lemziak lianpui in tar chuan ka mit a la nghal hle a, "Pi khi khi engzatin nge in lei a" ka tinghal a, lemziah lamah hian ka tui hle a, hetiang thil danglam deuh hi chuan ka mit a la nghal chat reng a ni, "Kan lei a ni hleinem, keima ziah a nih khi" nui var var in kapi chuan min chhang a, "A ni maw, pi lemziah nuam i ti ve tho elo" tiin phur tak chuan kapi chu ka lo zawt nghal a, "Aaaa nuam ti ve tho ti ila, ka ziak ve vel mai mai a nih khi, ka mumang a mi a nia" tiin kapi chuan chu lemziak chu a en deuh vung vung a, kapi mittui chu a rawn luang ngiai ngiai bawk.







"Pi eng ang mumang nge a" kapi en kar chung chuan ka zawt a, "Aaaaaa mumang thui tak a ni, engkim kha a tak ang vek a ni bawk a" kapi chuan a mit aṭanga mittui rawn luang hruk pah chuan a ti a, ka hre chak zual sawt, "Pi chiang deuh in han sawi teh, tun thlenga I mittui la ko chhuak thei chu" ka ti a, kapi chu a rawn in beng kâng a, a ṭhut mut theih nân ka lo pui vat, "Tumah ka la hrilh miah lo a nia aw, bawihte nangmah chauh ka hrilh ang che" kapi chuan nui deuh var var chung hian a ti a, tleirawl te pawh a ang dawn dawn a lawm, a lawmawm takzet a ni.






"Engmah kha chu ka hre mumal tawh lova, mah se hmangaih tak mai ka lo nei a, mah se chhan eng emaw vang in kan awm dûn thei lo a ni, engmah kha ka hre mumal tawh lo, kha lai hmun a an mamawh tak hmeichhia kha ka nih loh vang te pawh a ni mah na" kapi chuan nui deuh sak sak chung chuan a sawi a, keipawh a thusawi mak zet vang chuan ka lo nui ve ringawt.






Ka ding chhuak deuh hluai a, kapi lemziak chu ka han en a, hmeichhe pakhat lem a ni a, hmeichhia chu a hmel lang chiang lo mah se a hlim lo a ni tih erawh chu chiang tak in ka hria a ni, tlang pakhat ah hian a ding a, chu tlang atang chuan a ral lam a khua ni awm tak chu a thlir a, chu nu chuan Kawrchei a ha nghe nghe bawk.







"Henu chanchin hi chiang deuh a hriat ka châk hle mai" kapi pan leh pah chuan ka ti a, kapi chuan nui var var chung hian, "Keipawh in maw leeee" a lo ti a, tih ngaihna ka hre lo lutuk chu ka nui ve tawp.









Kapi pawh chu ka be zui reng ta lo a, a chau dawn tih ka hriat vang chuan ka phone ah hla ka play sak a, a ni pawh rei lo tê ah a mu zui ve mai bawk a, ka mumang pawh chu engmah ka ngaihsak leh tawh lo, kapi leh a lemziak ringawt chu ka lo ngaihtuah leh tawh a, mak deuh maiin ka rilru ah a awm tlat a, thil dang ka ngaihtuah thei lo.







~~~~~~~~~~~~~~~~~~~~~~~~~~~~~~





Kapi te khuaah pawh ni thum zet kan awm tawh a, kan chhûngte dang tlawh in chaw kan ei chhuak deuh reng a, zîng lam leh zân bak chu kapi te in ah pawh kan awm meuh lo.





"Nu khi lam ah khian engnge awm" tiin kan chhak lawk a tlang ka kal châk rûk em em na chu ka kawk a, "Ka hre bik lo, khi lam ah khian ka la kal bik miah lo, ipa zawt rawh" kanu chuan thlir chhoh ve vang vang pah chuan a ti a, ka lo bu nghat nghat ringawt, kapa pawh chu zawh zui ka tum lem lo.







Ka chhungte ho chu ti ti siam siam in hmalam an pan zêl a, kei erawh kan kal pelh tak kawng pêng pakhat, tlâng lam pawh tu ni awm tak chuan min hip ta tlat, a hlat hmel vak loh bawk a, chu lam chu ka chhungte pawh hrilh lem lo chuan ka pan nghal a, rei lo tê bak awm ka tum loh vang a ni.






Chu kawng pêng te tak tê chu ka zawh zêl a, tlang chhîp hnai te anga ka hmuh kha ka rin ai daihin a lo hla a, mah se ka kal ta ro ro a, lêt chu ka tum lo nasa, ka hma lam chu ka pan zêl a, kawng chu a lo chho telh telh a, ka hah tawh hle, mah se chu kawng chho lutuk a tawp chiah chuan tlang chhîp ni lo in metal road chhuk zet hi ka han pawh a, mak ka ti ang reng hle.







Chu kawng tawpah chuan thingkung lian zet a awm a, ka zu hmu phak nghe nghe, chu kawng chu kawng chu ka zawh thla leh ta zel a, Thingkung lian pui bulah chuan pitar pakhat zâng kul deuh khûn tawh chu a lo ding reng a, a tîr ah khan ka hmu hauh si lo a, ka hmu deuh thut chu ka phu zawk nghe nghe, kawrdum fual hlui zet mai hi a ha bawk a, a hmel erawh chu a pangngai viau thung, "Bawihi, lo kal teh ipi i ang hle mai" tiin chu pitar chuan min lo hui zauh a, ka che sawn lawk lo, ka hlauh deuh vang a ni, "Lo kal teh, i lian tawh hle mai" a tih leh takah chuan kapi ṭhiannu ni turah ka ngai a, ka pan ve vat, mah se ka rilru a awm reng chu kapi ṭhiannu ni ta se a upa ve tawh hle awm tho si a, kapi chu a bawksawp reng tawh a, a ni erawh a la ṭhat hmel hle si.







"Kapi helai ah engtinnge nangmah a i chhoh theih a" tiin a bulah chuan ka ding a, ka zawhna pawh min chhang lem lo chuan, "Ipi i ang hle mai, i la ang ber ang aaaa" a ti a, a nui deuh hak hak, a ngaihna hre lo deuh chuan ka lo nui ve ringawt a, "I duhthlanna hmang sual hauh suh ang che, kum tam tak mi dik tak ka lo nghak tawh a nia" a ti leh a, a thusawi awmzia chu ka la hre chuang lo, "Min lo zui rawh le" a tih leh chuan eng in emaw ka taksa chu a thunun ni mai hian ka hria, chu pitar chu ka zui vat a, chu thingkung lian zet mai chu min hel kual pui ta a, chet sawn ka tum pawn ka thei hauh lo, ti lang lo mah ila ka rilru erawh a mangang ru tawh takzet a ni.








"Bawihi, i thinlung kha ngaithla ang che" Pitar chuan a ti leh a, chu thingkung chu vawi thum min hel kual pui ta a, a vawithumnaah chuan thil eng emaw hi a rawn eng pup a, a en em avang chuan ka mit ka chhing nghal a, rei fe ka mit ka chhing hnu a kan men leh chuan ka hmaah kha pitar kha a lo awm tawh hauh lo, ka kut te chu ti kâng in ka han en a, ka duh dan ang takin ka ti che thei leh tawh rang takin khaw chhûnglam ka pan nghal a, mah se ka kal lam a ka zawh char char metal road kha hmuh tur a awm tawh hauh lo, a thim deuh vek tawh vang chuan ka hlau ru tawh hle a, engmah ngaihtuah lo in ka tlân mawp mawp ringawt a, khawchhûng ka lut tawh a ka in hriat pawh chuan light eng pakhat te mah ka hmu lo bawk.






Kapi te in zawn ka thlen chuan "Nu ngatinge light in off vek a" ka ti a, inchhunglam pan chuan ka au lang lang a, Bati an chhi a ni maithei in chhûng chu a lo eng pup a, mah se ka luh rual a ka thil hmuh erawh chuan min ti hamhaih hleee, nupakhat, pa pakhat, hmeichhe naupang pahnih leh tlangval pakhat hi inchhungah chuan an lo awm a, mak min tih hmel deuh hian min lo en ṭhap bawk.





Chu in aṭang chuan hmanhmawh lutuk in ka tlân chhuak lehnghal a, ka hawi kual ruai a, engkim chu a lo danglam vek tawh, in sak dan te chen chuan, thla eng hnuaiah chuan engkim chu ka han en chiang a, a danglam vek, ka kawr te pawh chu an lo danglam vek, hmanlai a an inchei dan chiah chiah chuan a ni ka lo inchei.







Engkim chu a mak vel vek a ni, ka mangang lutuk a ni maithei, thawk leh khatah ka lu chu a rawn rit bur a, ka tlu nghal tawp a, engmah ka hre chhunzawm tawh lo a ni.






Chhunzawm tur


Show post links
Top

[Ngaia]

Zikpuii's P.O.V






Engkim chu a mak vel vek a ni, ka mangang lutuk a ni maithei, thawk leh khatah ka lu chu a rawn rit bur a, ka tlu nghal tawp a, engmah ka hre chhunzawm tawh lo a ni.






Ka mit chu ka meng thei lawk lo, a thim vek a, ṭawng ri erawh ka hre thei ruai ruai thung "Zikpuii nu Zikpuii chu a la rawn tho harh lovem ni" tih chu chiang zetin ka hria a, ka meng nghal kawk a, ka hawi kual a, puan zâr hnungah khum ni awm tak ah chuan ka lo mu reng tawh a, ka awm na lai vêl chu a fai vuk a, bang pawh chu dâp leh mai tih ang reng vek a ni bawk a.






"Oo a la rawn harh lova, bawlpu kha chuan a rawn harh ve leh mai ang kha chu a ti a" nutlingin a ti ka hre leh a, ka hming chu lam lam mah se ka ṭawng chhuak duh lo, ka puan sin lai chhah zet chu ka hlim a, ka kawr hak chu kan en a, puan ka awm aṭangin ka lo bih reng a, a var lam a ni a, a thianghlim sar mai bawk, "Khawnge Zikpuii pa hi a lo kal leh hman dawn ni" nutling bawk chuan a ti leh a, puan zâr phên aṭang chuan ka chhuak phei a, ka awmna in chu a lo zau kher mai, amah erawh chu a ruak hle thung, "Awi ehe Chêmte i lo harh tawh a ni maw?" tiin nutling chuan min rawn pan vat a, ka lo hamhaih hle thung.






"Ooo a va lawmawm em, Zikpuii, min va ti hlauthâwng ve leee" putar lo awm ve pawh chuan a rawn ti ve a, ka chhang thei lo, sawi tur pawh ka hre hek lo, "Awi Chêmi pa lo haw thuai teh Chêmi a rawn harh a nia" tiin awmze nei lo in nutling chu a au leh chiam a, kan awmdan ka la hriat thiam loh em avang chuan ka la hamhaih hle, kawngka aṭang chuan hmanhmawh zet in patling hi a rawn tlân lut ve leh a, "Chêmi i rawn harh tak tak a ni maw" tiin min rawn pan ve a, a ni pawh chu a lawm hmel vur vur hle, kan thawmna a ni mah na pawn lamah chuan thawm a rawn awm ṭak ṭak a, putar lo awm ve pa chu a chhuak vat a, patling pawh khan a zui chhuak ve bawk, "Chêmte ka van lawm tak em, i rawn harh thei tawh dawn lo emaw ka ti a sin, eng emaw tal han sawi teh i ril te a ṭam em?" tiin nutling chuan min be leh a, "Kapi khawi lai nge kan awmna hi" ka lo ti daih thung, "Maw??" a mah zawk chu a hamhaih let ling tawh zawk niin a lang, "Khawi laiah nge ka awm" hawihhawm teh chiam lo chuan ka ti leh a, "Chêmte inah a lawm i awm" a mitah chuan hlauhthâwnna a lang tawh, "Chêmi pa lo lût vat teh" ka ṭawng chhuah ve leh hma chuan a ti leh a, nichina patling leh putar kha an rawn lut leh a, "Ngati chiam chiam nge" patling zâwk chuan min rawn en chung chuan a ti a.





"Bawlpu han ko vat teh u, Chêmi awmdan hi a dik miah lo, engmah a hre lo a nia" nu chuan a ti leh a, putar chu rang takin a chhuak nghal a, "Chêmi min hria em, ipa ka nih hi" a ti a, a hmel chu ka en a, ni lo kapa a ni lo, chhang lem lo mah ila ka hawi herah an mah ni ka hriat loh zia an hriat thiam ve vek chu ka ring.







"Chêmi" ka chhan loh vang chuan zaidam fee hian a rawn ti leh a, "Min hrethiam lo, ka hre lo che a ni" tiin a mit a ka en na mit chu la sawn in hmun dang ka melh ta daih, an mitmenga an mah ni ka hriat an beisei lutuk vang khan ka khawngaih a ni, an fanu chu ka hmêl ang tak a ni anga min hai a ni ngei ang.






Rei vak lo ah nichina putar leh putar dang pakhat hi an rawn lut leh a, rawn kal thar pa chu a hmanhmawh bawk a niang a rawn in chhuih lût khut khut lehnghal a, "Lalpa engtin maw a awm leh a" tiin pa chu a en a, min rawn en ve leh zawk hnuah, "Hei engtinmah a awm tawh loh hi, a ṭhat em hi, ka lo hmanhmawh ve em em si a" a ti nuah nuah a a lawm hmel loh ngang mai.







"A ṭha miah lo Putuak engmah a hre miah lo a nia, han enchiang vat teh Chêmi hi" nu chuan a lo ti thuai thuai a, Putuaka a tih pa pawh chuan mit ti zim deuh san chung chuan min rawn pan a, "A lu a sawh awm ka hre hauh si lo a" a ti leh a, min rawn hnaih viau thawh hnuah chuan ka mitah tak a en a, a mitah ka lo melh ve kar bawk, ka lu vel chu a rawn khawih a, "I lu ah hian na i nei em" ka lu dap thut thut chung chuan a ti a, "Chutiang na engmah ka nei lo" ka lo ti thung, "A mak hle mai, a hlauthâwng lutuk khan nghawng a nei te pawh a ni zawk maithei a ni" a ti leh a, ka lak atang chuan a kalsawn nghal a.






"Engmah a hriat si loh chuan a hlauhthawn lutuk vang kha a ni ang, ani ang hmeichhe awm nem in khatiang kha a tawng a, a awm lo hran lo, tlêm tlem in a hriatna a rawn kîr leh mai beisei teh ang" ti nuah nuah chung chuan a chhuak a, pa leh putar khan an zui chhuak bawk.






"Eng maw ka chungah chuan thleng" tiin nu chu ka zawt a, min rawn pan in ka sam chu a rawn zut thuak thuak a, "In thing phurhnaah sapuiin a bei che u a, i ṭhiannu nen, i ṭhiannu erawh a rawn tlanchhe hman a, nang chu in awm na a in hlat vangin a hmuh tawh loh thu che a sawi a, chuan tlangval ho kan rawn tîr a, an rawn thlen chuan nikhaw hre lo in i em bulah i lo tlu reng tawh a" tiin a sawi a, mak ka ti hle.







Hun a zin an tih ang hi ka ni thei mai angem, mah se mi taksa ka luah a nih hmel bawk si a, ka hriat hnu hnun ber kha chu tlangah khan kha pitar khan thingkung lian tak kha min hel kual pui a, chuan in lam ka pan a, lawk in ni tak kha thingkung kha.






Thingkung ka hriat chhuah zawk rual chuan in aṭang chuan ka tlân chhuak nghala kapi te khua kha a la ni tho a, a hmun awm dân pawh dang deuh mah se in an deuh deuh na lai chu an la nei tho a ni, tlang awmna lam ni a ka hriat chu ka pan nghal a, min lo hmu tu te apiang chuan mak mit tih hmel em em hian min en ha ha hlawm zel bawk, mah se chu chu engah mah ngai lovin ka tlân a, rei lo tê ah tlanglam panna kawng kha ka thleng a, ka tlân chho nghal mah se tlângchhîp ka thlen chuan a hma ang kha a ni tawh lo, tlângchhîp pangngai ve mai theng thaw nuam tak mai a ni, kawng chhûng deuh kha thingkung lian tak awmna pawh tu kawng pawh kha a awm lo, ka mittui chu a rawn hnai kuar a, haw ka duh a ni, helai hmunah hian ka awm thei lo.







"Zikpuii, i ṭha em" ka hnunglam aṭanga an rawn tih thut chuan ka phu nasa hle, tlangval 10 vel hian ka hnungah min lo ûmzui chu niin, "Tinge min rawn zui a" vin zet chuan ka lo ti a, an in melh hrak hrak hlawm, "Ihhh i tlân chiam si a, Lalnu mangang in min rawn ko a, kan rawn um che a nih hi" tlema tlangval upa ve lam tawh chuan min lo chhang a, keipawh chu ka in bengdai leh vat a, "A pawi ka ti lutuk" ka han ti ngawt a, "Haw ang u le, Lalnu leh Lalpa an mangang lutuk ang" chupa bawk chuan a ti leh a, beidawng ru zet leh thuawih tak si chuan ka zui ve hnak hnak a, "I rawn harh tawh a a lawmawm khawp mai" chupa chuan min be surh surh reng a, a rul tawk te tê bakin ka chhang lo.






"Chêmi min ti mangang a lawm" ka harh chhuahna in kan thlen leh chuan nu khan min rawn buaipui vat a, kawhmawh bâwl lovin thuawih tak chuan an sawi ang ang chuan ka awm tawp a, tih theih ka nei lo, "Kapi kapu tu te nge in hming?" chaw kan ei lai chuan ka ti a, nu zawk chuan rilru nat hmel zet in, "Chu pawh chu I hre chhuak zo lo a maw" a ti a, a in hrut nghal hraih, "Chêmi a mak thei emai, Bawlpu pawh in muangchangin a tih kha, Chêmi, keihi ipa Suakdenga Zawlnuam Lal kani a, chuan heihi inu Saichami a nih hi" Pa zawk khan a rawn ti ve leh a, ka lo bu deuh nghat nghat ringawt.






"Awi Lalṭhian, i rawn harh tawh lovang tih ka va han hlau tak em" chaw kan ei kham rual deuh thaw chuan hmeichhe pakhat hi a rawn tlân lut a, min rawn kuah vat, ka lo hamhaih leh hman vek tawh, "Lalṭhian min hre lo tiraw keimah i Ṭhuamṭhiani ka nih hi" a tih zawm leh a, ka chhang lo, "Chêmi kha Ṭhuampuii nên khân va in kawm tawh u, eng emaw tal hmasâwnna i neih phah maithei a sin" nu khan a rawn ti a, chu veleh Ṭhuampuii a tih chuan min hruai chhuak nghal a, "Ka kalsan daih che a pawi ka ti lutuk aw, ka chungah I thinrim viau ang tiraw, mah se kha sapui khan keimah kha min rawn pan si a, ka thlangah daih khan I awm a, tlan tur a ka hrilh hnuah che ka theih tawp in ka tlân a, rei deuh fe kha chu kha sapui khan min um a, mah se a hnu deuh ah chuan I awmna lamah khan a rawn lêt a, kei engmah ti thei lo ai chuan tlangval ho rawn koh kha ka thlang ta zawk a, ka kalsan tlang ta ringawt che a nih kha" a ti a, "Ka hrethiam che a lawm, i hlau nget ang nangmah zawk khan" ka lo ti ṭha ve mai a, a ni pawh chu a nui deuh var var tawh.






Nitina kan thil tih ṭhin te min hrilh a, a chang leh kan nui a, mah se a nu boral dan vel a sawi erawh chuan kan ṭap pur thung, apa hi kapa upa a ni awm e, a tir ah chuan a ṭul pui a, mah se a faten chhia leh ṭha an hriat hnuah nuthlawi fa pahnih nei tawh nen an in nei leh a, a nu a ṭha vak lo tih thleng chuan min hrilh nghal mawlh mawlh a, min ring tawk hle a nih loh chuan a thuruk zawng zawng tu te mai pawh hrilh nghal vek thei ang kha a nih ka ring.







"Khatia ka rawn tlân haw pawh kha kanu chuan min lo hau hrep a inu bula tlâktlum loh hi a hlau si a, kapa leh kau an awm loh lai a ni bawk nen tui thawl ten min vawm hial a lawm" a ti a, a sawi lai chuan a hmelah chuan nui hmel a lang a, a mit ah erawh hreawm tihna leh inthiam lohna a lang thung.







"A ho lutuk hei ka ṭhat tawh hi, hreawm tih suh o" ka lo ti ve bawk a, kan awm dûn rei telh telh a, a bula awm nuam ka ti telh telh, a rilru a zau hmel em em a, a nui reng bawk, fiamthu a duh em em bawk si.






"A nih chuan Ṭhuamṭhian kan chhungkaw chanchin hi min hrilh thei angem" ka ti leh a, bu nghat in, "Ipa hi kan khua Zawlnuam Lalpa Suakdenga a ni a, inu chu Saichami a ni thung, iu mipa Hrangruma hi Ipu Suakpui Lalpa Dengruma tlawh in a kal thung a" a tih chuan ka lo pawt chat vat, "U ka nei maw?" ka lo ti vat a, "Aw nei e, khaw mi te phei chuan an ngaina lutuk a lawm a in ngaitlawm in pachhia leh tlabal deuh te a tlawh awl lova, an mamawh ang ang te a pe in a tih sak thuai thuai ṭhin, hmeithai tan phei chuan hlu tak a ni, Pasalṭha a la ni zui lehnghal a" tiin a fak tel chiam a, kau nia a sawi pa chungchang a sawi laia a hmel awm dân vang chuan ka lo nui hak, ni e, mi aaa chauh lo chuan an hai hauh lovang kau a tih chu a duh chiang a ni.





He khawvel a ka awm na pawh ni hnih dawn a ni ta, thil danglam tak tak ka hre thar a, in lak eng emaw vang ni miah lovin têt te aṭanga khawpuia awm ṭhang ka ni a, helai khawvel a an tih ṭhin ang hi chu ka tan thil thar hlak ang an ni, engtirnan zînga hma taka thawh heihi chu khawvel changkanna in a ken tel ni maiin ka hria, chuan zîng tui chawi tih ang te, ka khawvel pangngai ah kha chuan kan têt lai deuh khan mamawh vang pawh ni lo in nuam tih vangin tui kha kan chawi ve zauh zauh ṭhin kha a nia, chuan lakaih tih vel pawh har ka ti ngang mai, a tah nen.






"Kanu Chêmi chu engtin maw a awm a?" ti a inchhunga rawn tlân lut chu ka hau in ka lo en a, "Aaaa hei a zia tawh lutuk" Nu khan a lo ti a, tlangval lo lût chuan min rawn hmuh rual rual in min rawn pan a, ka dar tawn tawn a rawn vuanin min en kual a, ka lo lai chhe kher mai, "Chêmi i u Hrangruma a nih kha" Nu bawk chuan min rawn en chungin a ti a, tlangvala chuan mak ti zet hian Nu nên chuan min en tawn deuh zak zak "Chêmi khan engmah a hrechhuak zo lo a lawm Taia" Nu chuan in hrut deuh hraih chung chuan a ti a, "Chêmi engtin chiah nge I awm a" tiin tlangvala chuan uluk zet chuan min en leh vung vung ṭhin a, a hmelṭha bawk nen ka lai lutuk chuan hnuailam ka bih tlat ringawt, Mizo tlangval ka hmuh tawh ah chuan a la hmelṭha ber maithei a ni.







"Kanu mangang teh suh chu Bawlpu ber pawh in muangchangin a ṭha chho ve leh mai ang a tih chu" Tlangvala chuan anu chu a va kuah a, au vak mai te chu ka duh engmah hriatchhuah tur ka nei lo, a chhan pawh ka hriat loh vanga helai hmuna awm hi ka ni a, an fanu emaw min la ti zui, an fanu chu rawn lêt leh ta se engtin tak min ti ang maw???







"Ṭhuamṭhiani te in ah ka kal lawk dawn" ka ti ta ngawt a, hemi te chhungkua hi koh dan tur ka la buai takzet a ni, "Ṭhuamṭhian Hrangruma a lo haw a sin lo leng rawh" ka ti ta ngawt a, "Oi ngatinge chung te min rawn hrilh ngawt" tiin Ṭhuamṭhiani chuan an in aṭang chuan min nam chhuak dawt dawt a, anu leh pa te chu a mitmei
pah reng bawk.






"A lo haw tak tak em ni?" an in kan hlat ta maw tih ah chuan a ti leh lawi a, "Kau a ni tak tak em? an fa lâk te ka ni lo maw, a hmelṭha bik bawk si" ka ti deuh mawlh mawlh a, mak min tih hmel zetin min chhan nachang pawh hre lo in Ṭhuamṭhiani chuan min lo melh haw ringawt.




"Aaaa ka sawi awmzia chu kan in ang lo bawk sia ka tihna a nih chu" ka ti leh ta ngawt a, Ṭhuamṭhiani pawh chu a nui ve ta ringawt.





~~~~~~~~~~~~~~~~~~~~~~~~~~~~~~




Ni hnih dang a liam leh ta, kau Tlangpela bula awm chu nuam ka la ti lem lo, a mah chuan min ngaihsak viau mah se, a biak pawh ka be hmasa ngam lo, chuan a nu leh pa te pawh khawr deuh in Nu Pa ka ti ve tawh a, kanu leh pa tak tak an ni lo bawk nen harsa ka ti takzet a ni.




"NuSai, khawnge Zikpuii hi, Thing phurh puia rawn sâwm ka tum a" ti a au lang lang in Lalinah chuan Ṭhuamṭhiani chu a rawn lut a, ka peih teh chiam loh vangin chhawn pawh ka lo chhawn lo, "Saw Saw ta saw a puan tah saw a la thiam hleithei lovaaaa" tiin kanu chuan ka ṭhutna lam chu a rawn kawh hmuh a, Ṭhuamṭhiani pawh chuan min rawn pan nghal.





"Lalṭhian khaw dai maiah sawn thing ro ṭha deuh tawh hual lâwk ka nei a, va phur ila" a rawn ti a, "Tehreng mai,kan kal dawn nia, tukṭhuan ei khamah em ni ang" ka lo ti ve mai bawk, "Aw ni e, Tukṭhuan eikhamah kan kal mai dawn nia, Urum thing chu min lo phurh pui ve laaaa, kan pahnih chauh chuan kei ka ngam tawh chiah lo" zak deuh chung chuan Ṭhuamṭhiani chuan kau Hrangruma chu a sawm a, Kau Hrangruma pawh chuan a ṭhiante nen an lo kal ve tur thu chu a sawi vat, kan pahnih chauh a chhuah vah rem a tih tawh loh thu thlengin a sawi bawk.






~~~~~~~~~~~~~~~~~~~~~~~~~~~~~~




He khawvela ka awm aṭang pawh in ni tam a liam ta, haw theih dan tur ka la ngaihtuah ru reng a, mah se hma ka sawn lem lo, chutih rual in heta kanu leh pa leh kau te nên pawh kan in pawh tlang tawh in kan hlim thei hle.




"Lalṭhian, Sangṭhiani sâwm ve ila vawiin chu naupang ho nen khaw dai lawk luite ah sangha zuk man ila" Ṭhuamṭhiani chuan a rawn ti a, kan tawh sual tawhna aṭangin hun a kal leh hret tawh bawk nen kan hlauhna pawh a reh tawh hlawm a ni, "Nia ooo a chaawm lutuk kan kal dawn nia" ka lo ti ve thuai thuai a, Ṭhuamṭhiani pawh chuan phûr zetin an in lam a pan a, Tukṭhuan ei khama kan thil tih tum te pawh chu ka chhungte ka hrilh ve leh a, tawh sual ka tawh palh leh hlau viau mah se ka ṭhiante nen a hun ka hman chu an duh ve tho vangin min phalsak a, keipawh chu ka phûr viau mai.




Tukṭhuan ei kham velleh ka ṭhiante leh naupang hi chu kan in ah an rawn lang nghal a, chuti chuan naupang ho nen chuan phur zetin kan inzui chhuak ta a.







Sangha kan manna tur lui pawh chu kan thleng har lo, he khawvel a ka awm aṭanga chhut in vawiin tluk a, thlamuan hi ka la nei ngai lo tih theih a ni, kan ṭhianho chuan tui te kan han dâi hmasa leh laklawh a, naupang ho ai si chuan nuam kan ti emaw tih tur hial a ni, naupang kan hruai zînga tlêm a chinchang hre tawh deuh chuan "UZikpuii khatia in lo dai vak vak te chuan engtinnge sangha kan man theih ang" tiin nur nang chuan min lo hau a, keini ṭhian ho pawh chu in thlahrung ru zetin tui aṭang chuan kan chhuak nghal sap sap a.







Chutia Sangha man a hlim taka kan awm lai chuan kan chhak lam aṭangin mipa pakhat hi a rawn chhuak hlawl a, ka lo en haw ringawt, a silai chuan keini ho chu min rawn tin in, "Che tawh hauh suh in, bengchheng siam hauh bawk suh ang che u" chang zet chuan an rawn ti a, tumah chu che ngam emaw thawm siam ngam kan awm lo.







Chhunzawm tur




In ngaihdan te comment lamah lo sawi leh liam liam ula aw🥰🥰 ka in siam ṭhat na lai tur te pawh in thlahrung miah lo innnn🥰🥰🥰 lo sawi ruuuu.


Show post links
Top

[Ngaia]

Zikpuii's P.O.V



"Che tawh hauh suh u, bengchheng siam hauh bawk suh ang che u" chang zet chuan a rawn ti a, tumah chu che ngam emaw thawm siam ngam kan awm lo.




Chutah kan thlang lam aṭang chuan mipa dang pahnih an rawn chhuak leh a, kan sir tawn tawn aṭangin pahnih ve ve an lo chhuak leh bawk a, "Engnge in hriat a, hetianga min rawn tih ringawt" ti a in ti huai in silai a min tin chûng a min rawn pan tu chu rum zeta melh lêt ve chung chuan ka bia a, "I hriat tur chin chu I hre mai ang, nang hi Lalfanu i ni em?" tiin min rawn hnaih a, ka khabe ah chuan dawm in ka hmai chu chik zetin a en a, a kut chu ka lo beng sâwn vat, "Min kian san nghal tûrin thu ka pe a che u" ka ti a, an in en kual a, an nui nghal hak hak, "Ipa tlangval te kan ni lo a nia, khatianga nangin a i duh duh a thu mi pêk tur kan ni lo ve, phuar vek ula rawn hruai ru" tiin silai keng pa khan in ti thu zet chuan tlangval ho chu thu a pe a, "In ngam chuan min rawn hnaih rawh u" tiin ka tawlh hnung hrat hrat a, chung tlangval ho chet la uk tawh te pawh chu an ding ve chat.






Chu chu an Pasalṭha berin a hmuh chuan, "Engtinmah a ti thei lo che u, engnge in hlauh, phuar rawh u ka tih chu maw le" tiin a nau te chu a vin khur khur a, a naute pawh chuan a mal mal chuan min rawn phuar a, naupang ho pawh chu an phuar ve bawk, "Naupang ho hi kal tir rawh u" ka'n ti leh a, "Chuan khuaah an lo han haw a nga, ipa tlangval te ho min rawn ûm turin an rawn tîr anga maw? a teuh lo" an Pasalṭha bawk chuan min lo chhang leh a, ka ṭawng ve leh hma chuan "Lalfanu kha a ka hnawh sak teh u, hetiang reng reng te chuan engtinnge kan awm a nga, ṭawnghnem leh lutuk" a ti hluk a, tlangval ho chuan rang zetin hnimhnah ṭha hnem zetin ka ka chu an rawn hnawh ta mai, a kha lutuk chu ka uak nghal ṭhawt ṭhawt thei.





"Kal ang u" an Pasalṭha chuan ka tal buai lai chu hmuhnawm min tih hmel zet chuan a nui a, ka haw takzet a ni.







"Leee midang zawng kha kha lam kawngah khan kal pui ula, khua aṭanga silai puak ri an hriat mai theih loh na tur hmunah in kap hlum vek dâwn nia" An Pasalṭha chuan a naute pathum chu ka ṭhiante kai hrang tur chuan a ti a, an thlavang hauh tûrin ka ṭawng chhuak thei tawh bawk si lo a, ka mangang ru takzet, an Pasalṭha leh tlangvâl pathum chuan min kal pui nghal nal nal a, mah se thui pawh kan kal hma in silai vawithum puak ri kan hria a, ka mittui chu a rawn luang nghal zawih zawih ka ding dat a, ka ṭhiante an liam puina lam chu ka en deuh reng a, an Pasalṭha chuan ka ka a an thil hnawh rawn phawrh mawlh mawlh chung chuan, "A aia hla an kal pui thei lo emaw ni, an silai an va hmet puak hma ve maw le" a ti a, min en in a nui leh suk, "Naupang leh hmeichhia mai mai pawh kut thlâk duh mihring tenawm lutuk, mihring ni ve tlak pawh in ni lo, tenawm ho" ka ti tawn tawn a, Pasalṭha chuan ka hmaiah chuan a rawn beng nghal sawk, "I ṭawng tam mah mah zêl, ngawi reng khan awm ang che" chang zet chuan a ti leh a, ka in rin hma chuan min rawn pu vâwk a, ka lo ṭe ṭhat, "Silai puak ri kha khaw chhûng aṭanga an lo hriat chuan kan tân a ṭha dawn lo, i kal vat teh ang u" tiin min tlân pui nghal ti tih a, a mah a pa lian si a, min zo ṭha hle, min tlân pui pur pur a, a nau te ka ṭhiante thattute pawh kha a ngaihsak chhunzawm tawh lo, Pasalṭha hma sial tak a ni ngei ang.







Min tlân chhiat pui dawr dawr a ni ber, an pali chuan keimah chu a in chhâwk in min pu a, tlailam dar 4 vel a ni tawh ang tihah chuan lui kawr te ah hian min chawlh pui a, min sawh nasa bawk nen ka chau takzet a ni, "Ke a kal lo ber chu I chauh hmel ber a nih kha" tiin Pasalṭha chuan nui sung chung chuan min rawn en a, rum zetin ka lo melh lêt ringawt.







"An ram chin kan pêl tawh bawk a, i chawl deuh vang vang teh ang u, thui tak nula-i hi la put a la ngai dawn si a, kan naute kha an hnai tawh nge tawh lo kan han bih zui lawk a nge, Buka nang in nula-i hi lo awmpui ang che" tiin Pasalṭha leh a naute pahnih chu kan kal tawhna lamah chuan a lêt vut a, "Enteh Buka" tiin Pasalṭha a liam velleh chuan ka bula tlangval chu ka be nghal a, min melh zawk ringawt, "Ka inthiar duh aaaa" tiin tlangval chu ka melh a, "Kan Pasalṭha thu lo chuan engmah ka ti dâwn lo" ngainatawm lo zet chuan a rawn ti hmuk a, "Ka in thiar chhuak hi in Pasalṭha thu a ni em ni, ka in sum thei lo teh a nia" ka ti vin leh ṭhat a, min melh vung vung hnuah kan awmna lui kawr chu a mawng lam min zawhpui a, tlema hnim bûk deuh kârah chuan min hruai in, "Tah khan ti mai rawh" tiin hnunglam chu a hawi nghal run a, "Ka kut hi" tiin ka kut an phuar chu a lamah ka va lek vah a, "A bak chu ka ti thei tawh lo a rawn ti leh, "A nih chuan engtinnge inthiar se min tih a" vin hlar chuan ka ti leh a, "I tih a va han tam veee" ti leh hluk in ka kut phuarna chu a rawn phelh a, keipawh chu in thiar tur awm ang tak chuan ka ṭhu hniam nghal a, "Hmanhmawh ang che" tiin hnunglam chu a hawi leh vat a, ka bul vel chu ka en kual a, thing tum lian zet mai chu ka hmu fuh a, chhar vatin thâwm dim thei ang berin tlangval chu ka pan a, a hnunglam aṭang chuan ka thing ken chuan ka vawta chawrh, mah se a la tlu nghal mai lo, a lu thing nawk chung chuan a rawn in her lek ta mai, a hma lam a rawn hawi leh chiah chuan ka lo vaw leh chawrh a, a tlu ve ta nge nge, ka thah palh ka hlauh vâng in ka vaw nawn duh ta lo a, lui kawr thlanglam pan chuan ka theihtawp a chakin ka tlân thla a, a chhak lam a ka kal leh chuan kha Pasalṭha nên khân kan in tawh leh palh ka hlauh vâng a ni, ka tlan thui ta deuh a ka hriat hnu chuan tui te chu in in ka chawl deuh vang vang a, mah se kal ka tum leh chiah tih a, lung mâm lai ah chuan ka tawlh a, ka ṭhut deuh nawk rual chuan ka au deuh ṭhat, chuveleh ka thlang lam aṭang chuan thawm ka hria a, ka hmui chu ka hip nghal chawt.







"Tunge?" vin deuh ṭhawt a ti ri ka hriat rual chuan ka che ngam tawh lo, mah se Kawrte mawng lam aṭang chuan min man tu te ni lo mipa pa 3 an rawn chho a, chiang zet chuan ka lo en a, an hmel chu an fai deuh var a, a rawn hmasa fal ber chu a hmel a ṭha takzet bawk, an silai chuan min tin kawh vah bawk a, "Hmeichhia maw?" pakhat chuan mak tih hmel zet hian a rawn ti a, ka chhang lo, "Lasi a ni thei mai angem?" chupa bawk in a ti leh su su chu ka hria a, ka nui ṭêp, "Ram palailengah hmeichhia lehnghal nangmah chauh in maw" a hmelṭha ber pa chuan vin ṭhat hian a rawn ti a, mah se chhan dân tûr ka hre lo, chutih lai tak chuan tuikhur hnar lam aṭangin thawm a rawn awm ve leh a, min man tu te ngei kha an rawn chhuak ta a.





Chung mipa te awm loh na lam ve ve ka Sir lama tlân ka tum lai tak chuan nichin a, hmelṭha deuh pa khan ka ban rek ah vuan in a hnungah min pawt phei dawrh a, "Tu te nge in nih" an Pasalṭha ber khan a rawn ti a, a naute pahnih nen khan Buka a tih kha chu an rawn tel ve lo, "Tu te nge in nih zawk, kan ram chhûng ah engnge in rawn tih" ka bâna la vuan ran chung chuan a chhang a, "Kan nula kha min pe lêt vat rawh" a zawhna chhang ta bik lo chuan min man tu Pasalṭha chuan a rawn ti ve leh a, "In nula ka ni awzâwng lo" ka lo ti ve hlar a, ka bâna vuan tu chuan min rawn belh zawk.







"Ka kuta awm tawh ka thlah ve mai mai ngai lo, i ngam chuan rawn hruai han tum chhin teh" ka ban rek a a vawnna chu a lek deuh vah vah a, tu zâwk nge misual pawh ka hrethiam tawh lo e a, min vuan tupa lah chu a mit meng, a hawi her leh a ṭawngkam hrim hrim ah mi fel a nih ka ring lo hul hual.








"Naupang tunge I hmachhawn hi I hre lo a ni ngei ang, Pasalṭha Thangluaia kawng dal hi thihna a ni a sin" Min man tu Pasalṭha bawk kha a ni, "Pasalṭha ram palailengah i hming kha chhâl dur dur duh suh, tumah hian kan hre chuang lo che" tiin ka ban a vuan tu chuan ka ban a vawnna chu a thlah a, a chem chu a phawrh nghal, "Naupang i in chhir khawp ang" ti ṭhawt in min man tu pa chuan ka bâna vuan tupa kha a rawn bei nghal a, ka bul a ding a ṭhiante pahnih pawh chuan kei min ngaihsak lovin min man tu pasalṭha naute chu an silai in an tin dun ran a, chu lai chu rem changah la in muangchangin an hnunglamah chuan ka kal hret hret a, an mah ni ka pêl chiah tih ah hnim pik kârah chuan ka tlân lut nghal a, ka thawm an hre lo a ni mah na min rawn ûm thawm emaw pawh ka hre hauh lo.








Mah se chutia chak tak a, hnunglam hawi zuk zuk chunga ka tlân lai chuan eng thil emaw hmul thup mai, chang zet ah hian ka in sawh chawrh a, ka thal nghal tawp.






Ka lu hai lutuk chu ka in thing nawk a, ka men chian leh chiah chuan Savawm lian zet hian ding ur ur chung hian min bawh tum in ṭan a lo la mek chu lo ni in ka rak nghal chiam a, min rawn bawh a tum chiah chuan ka sir lamah ka lum phei vat a, Savawm pawh chuan min bawh ṭhelh ta hlauh, mah se rak ruai ruai chungin min rawn pan leh a, ka mit chu ka lo chhing tawp tawh, mah se silai hi vawi thum lai a puak dur dur a, Savawm thawm pawh chu a reh hmak tawh, mah se ka la meng ngam chuang lo.







Ngursairuma's P.O.V





Ka beih pui pa ka dah ṭha zo chiah tih ah ka ṭhiante pahnih silai chu a puak rual ṭhawt a, ka beihpuipa naute silai hmeh puah lo tum chiah te chu an lêt nghal hlawl, "Khawnge kha nula kha" hnunglam ka hawi rual chuan ka ti nghal a, "Ehe" tiin kan sir a hnim pik pe deuh sûn lam chu an en nghal a, chu mi rual chiah chuan hmeichhe rak ṭhawt ri kan hre nghal a, chulam pan chuan ka tlânchhuak nghal zawk hlawm a, kha nula kha Savawm in a lo bei chu niin kan hmuh rual rual in silai chuan kan kap nghal a, chu Savawm pawh chuan ngenmu pathum zet chu a tuar zo bik lo a ni ngei ang, che zui tur a awm ta lo.






"Lawmpa, hei a va lian veee" tiin Raltawna chu Savawm chungah chuan a lawn a, kei erawh in nula a hlau tih hriat zet a Savawm bulah lola mu chu ka pan thung.





"A thi tawh tho rawh" ka ti a, a ni pawh muangchangin a rawn meng a.




Zikpuii's P.O.V




"A thi tawh tho rawh" bul hmuk a ti ri ka hriat rual chuan muangchangin ka meng a, engmah sawi lo chuan ka tho nghal sawk sawk, "Nula khawi khua nge I nih" pakhat chuan a rawn ti a, 'tu te nge an nih pawh ka hre lova, ka khaw hming ka hrilh ngawt thei lovang, misual ve tho, kan khaw beih tum tho an lo ni ve thei' ka thil ngaihtuah vang chuan chhan pawh ka tum lo, "I ṭawng thei lovem ni" a hmelṭha ber pa pawh khan bûl hmuk in a rawn ti leh a, min melh rum bawk nen ka chhang lo ngam tawh chiah lo, "Ka hre lo" tih ringawt in ka chhang a, ka mit a an mah ni ka rinhlehna chu a hmu a ni maithei, "Kawngah chhuah chhoh pui phawt ila, khawi kawng pawh a duhna lam lam zawh mai rawh se" a ti leh hmuk a, keipawh chuan engmah sawi lovin an kalna lam chu ka pan ve mai a, mah se kan chhuah chhohna lai chu nichin a kawr te kan pawhna lai kha a ni tawh hauh lo, kawng pêng lah chu pathum vel lai a la awm zui, "I duh ber kha zawh tawp rawh" a rawn ti leh a, rum zetin ka va melh a, a ni pawn min lo en ve reng tih ka hre nghal, "Thlah ka ngai lovang helam hi kan khaw kawng kha niin ka hria" tiin keimah chuan ka kal a, ka hnunglam a an ṭawng ri pawh chu ka hre reng.







Pakhat chuan "Eng ang nula nge maw a nih le, a nungchang a mak hle mai, kan pui a, a ṭawngkam ṭha pawh engmah kan dawng lo chu a ni si a" a ti a, pakhat leh chuan "A mah chauh a kal tir saw a fuh dâwn em ni" a ti ve leh a, a hmelṭha ber khan, "A mah berin a duh lo a lawm" bul hmuk bawk chuan a ti leh a, min rawn ûm thut ka hlauh vâng chuan kawng kawiah ka kual chiah tih in ka tlân nghal chiam a, thui fee ka tlân hnuah thaw hlawp hlawp chungin ka ding a, khua a thim dawn ruai tawh a, kan khawvel pangngai te kha chu ni se zan thim tih vel hi chu ka hlau hran lo, mah se he khawvel ah hi chuan sa hlauhawm tak tak mihring bei ṭhin te an la awm si a, nichin a Savawm ang reng te kha, khawi lai emaw pûk riahna tûr him deuh hlek ka zawn a ngai a ni, a thim tak tak hma hian.






Ka hawi kual deuh a, ka ṭhutna chhak deuh lawkah chuan pûk ang tak chu ka han hmu a, chu lam chu ka pan ta phawt, mah se chu puk ka pan na lamah chuan hnim pik kar aṭangin eng emaw hian ka ke ah a rawn seh niin ka hria, a na zâwk a, ṭe deuh ṭhat in ka ke chu ka khai nghal zawk a, mah se a thim deuh tawh vang in eng in nge min seh ka hre mai thei lo.





Pûk chu ka pan leh ta phawt a, pûk lian vak lo hi a lo ni a, miin riah nan an hmang fo a ni mai thei, mei talh leh thing ro fawm khawm sa a lo awm nual a, mei chhem tum chuan ka han bei a, mah se eng in emaw min sehna kha a rawn na leh zawk zawk ṭhin a, ka chet pawh a ti buai vek nghe nghe.







Mah se bei bei ve ta chu a tawp a tawp ah mei chu ka chhêm alh thei ta a, mei eng a ka ke ka han en chuan rannung sehna ni lo in rul chukna a lo ni a, a chukna hmuam hma vel chu a lo duk kual ruih bawk.





Chi ai hma chi ka nih lo vang hrim hrim in ka phawk lek tehchiam lo a, ka puan chu pawt thlêr deuh kawk kawk in ka chawn puar vel ah chuan ka ṭawn a, a bak a han tih dân vak ka hre lo, ram hnim damdawi vel pawh engmah ka hre lo a, ka hriat ve chhun Japan hlo lah ka hriat ve dan chuan indopui hun lai vêl a Japan sipai ho tana an rawn thlak ni khân ka hria a, tunah hi chuan indopui Mizoram in an la hmachhawn lo tih a chiang bawk si a, a awm ka ring lo hrim hrim.








Mah se rei vak lo ah, ka khua a rawn sik deuh ser ser a chu chuan ka mut a rawn ti chhuak nghal hle bawk, mei te chu ka tuah ṭha leh te tê a, mei bul mai ah chuan ka mu bawk a, ka muhil har lem lo.








Ngursairuma's P.O.V





"A mah a kal tir chu a him tak tak ang maw, khua a thim ṭêp tawh si a" Raltawna chuan a kal liamna lam bih vung vung chung in a ti a, "Kan khaw lam pan in a kal tho a lawm, kut ruak a haw ngawt aiah, Savawm kha zuk chan ila a hnungah kan kal ve nghal mai dawn nia" ka ti a, Savawm chu kan phurh zawh tawk tûr ang kan phawk thla hlawk hlawk a, kan nula chhan chhuah liamna lamah khan kan kal zui ve ta nghal a, khua a thim thet thet tawh tih hrechhuak a, a rawn lêt ve leh mai kha ka ring a nia, mah se ka rin a ang lo lutuk tlat, eng ang hmeichhia nge a nih chiah leeee.





Khua a thim fel ṭêp tih ah chuan kan hma lawkah hmeichhe ṭe deuh ṭhat thawm kan hria a, kan tlan phei vat, nichin a kan nula chhanchhuah kha a ni, kawng chhak lam a kan khaw mi te tu te pawh an laklawh changa an riah mai na ṭhin lam pan chuan bai saih saih chunga a chho lai kan hmu a, Raltawna leh Sângvunga chuan pan mai an tum a, ka lo dang vat, "Pûk pakhat zâwkah in nghat ve mai ang u, nula i sawn hliam a tuar niin ka hria" ka tih chuan Raltawna chuan "Chuvang tak chuan kan va pawh zâwk dâwn lovem ni" a rawn ti leh a, "A mizia a mak in min hlau deuh tih a mitmengah khan ka hmu thei chuvângin a mutthilh hunah kan va enfiah dâwn nia" ka tih chuan ka ṭhiante pahnih pawh an nui ve deuh hak a, pûk pakhat zawk lam chu kan pan nghal a.








Zan riah te kan ei kham fel hnu chuan kan han ṭhu chawl vang vang a, khaw chhûngah chuan awm ila lenglen ar a khuang al al tawh ang tih vel ah chuan keimah in nula awmna pûk lam chu meichher nen ka pan a, a thâwmah a harh tawh lo tih ka hre thei a, fîmkhur lo tak chuan ka pan chho a, a meichhem pawh a lo thi ṭhiap tawh, ka meichher a nulai ka han enchian chuan a khua a lo sik chu niin a thlan a lo tla nasa hle a, ka pan hnai vat, mah se ka hnaih tak tak hma a a chawnpuar zawn vel puan a a lo hreng ka hmuh leh chuan a ke chu ka han enkual leh a, rul chukna hnu ka hmuh rual chuan a mah chu ka lamah ka pawt hnai vat, a lo duk thluah tawh a, tur in a lo fan hman deuh a ni ngei ang, a duk nasa deuh hlek lai chu ka kawlhnam chuan ka han thai kak zauh a, thisen duk zet zet a rawn chhuak nghal ṭiam ṭiam a, a rawn thaw deuh kawk niin ka hria.








Chhunzawm tur.



In ngaihdan lo sawi ve leh ru ooo🥰🥰


Show post links
Top

[Ngaia]

Zikpuii's P.O.V







Ka ke na zawk vang chuan ka mit chu muangchangin ka meng a, ka bulah chuan meichher nen nichina min pui tu pasalṭha kha a lo awm a, ka ke chu a mal chungah a lo nghat a, ka hmêl pawh en lo in ka ke ngawt chu a lo en.






"I duh chuan I ṭap thei ang" min la en chuang hauh lo hian a rawn ti leh a, phu deuh zawk chungin ka ke chu laksawn ka han tum a, a lo vuan bet deuh tlat, "Lo che sek suh" bul hmuk chuan a la rawn ti zui a, ka hliam chu a buaipui ni a ka hriat vangin ka che sawn duh ta bik lo, mah se ka ṭhut chhuah theih thu a rawn sawi rual chuan ṭhut tum in ka in beng kâng nghal a, min lo pui ve mai bawk.






Mah se ka ṭhu chhuak chiah tih a ka mitah tak min lo en tu mipa vang chuan ka îp chawih thei, a mitmeng pa lutuk leh thûk ruih maiah chuan ka pil riai riai ni mai hian ka hria.






"A na em" tiin ka ke a tuam chu a hum lum deuh vang vang a, ka harh chhuah rual rual in ka ke chu ka dah sawn vat a, ka mit pawh chu ka la sawn rang hle, "Na tawh vak lo" tiin ka chhang a, a bu deuh nghut ringawt a, a chem vel a dah fel lai chuan, "Ka lawm e" ka ti leh a, a nui deuh suk ri ka hria a, ka hawi chhuak nghal, "In khaw hming min hrilh la, i ke a dam velleh kan thlah dawn che nia" dam dap in a ti ve ngei a, mak ti zet chuan ka en a, chutia ka en lai tak chuan min lo en ve leh a, "Zawlpui" a mit a la en ve kar chung chuan ka ti a, "Awle khaw ṭhenawm chiah a nih chu" a ti a, ka thaw deuh huai thei, "Naktukah kan kal nghal thei angem, ka chhungte'n min ngaihtuah tawh dawn em em si a" kan mit chu kan la la sawn hauh lo, "Awle, a ṭha a lawm" a ti ve leh mai a, ka lawm hle, mah se chutih lai chuan ka ril a ṭam tawh hle tih hriat theihna tûrin ka pum chu a rawn ri leh ruah ruah a, ka bula mipa chu a lo nui leh suk tawh, "Pûk pakhat zawkah kan in sawn dawn em niang, a lian zâwk a, eitur pawh a awm a" a tih chuan ka lo bu nghat nghat ringawt, a din tak hluai ah chuan ka ding ve vat a, mah se kal ka tum rual chuan ka ke chu a hma si mah khan a rawn na zawk a, ṭe deuh ṭhat chungin ka hma lawk a ding mipa chu ka bawh deuh rawk rawk, "Engtinnge ka ke hi I tih a?" tiin hlauthâwng zet chuan ka en a, "thisen chhia tlingkhawm kha ka paih maw le" tiin min din ṭhat tîr a, ka hmaah chuan a ṭhu thla nghal, "Ka lo paw mai ang che" zanin tlai a a mah kha a rawn lêt leh tawh a ni maithei, a ṭawng bul leh hmuk tawh, "Maw??" mak ti deuh chuan ka lo ti a, "Khua a thim tawh a, i kal muang dawn bawk si, kan kalna tur hi a bumboh bawk nen ka nghak reng peih dawn lo che a, ṭhat ka chhuah lai hian hmanhmawh mai rawh" a rawn ti leh hmuk, eng emaw sawi tum chuan ka ka ka ang zuau tawh a, mah se ka ngawi leh daih, keipawh in tlaiah khan bul deuh deuh in ka chhang ve tho a lawm, phun nawi thei ka ni bik lo, "Keimah in ka lo kal ve mai ang" ti a kal leh mai ka tum chuan ka ke chu a na leh si a, ka kal zawm thei ngang lo, "I chiang em?" min rawn melh leh reng tawh a, ka ke a na bawk si nen duhthlan tur dang nei ta lo chu a hnungah chuan ka lawn ta nge nge.






Min zo zet chuan min din pui deuh nawlh a, meichher la in kan awmna pûk piah lam chu min pan pui nghal a, kan va thleng a, a ṭhiante pahnih kha an lo awm a min lo nuih deuh var var, "A eitur kha lo buatsaih sak mai teh u" min nghah rual chuan a ti a, a ṭhiante pahnih pawh chu phur hmel zetin an che nghal a, a sawi ang tak tak in ka awmna pûk ai kha chuan zau zawk tak a ni, mi pali pawh chu riak dawn ila in si miah lo in kan mu vek thei ang tih tur vel a ni.






Chaw te chu ka han ei kham a, harh deuh sawng sawng ni hian ka in hria, "Nula tunge I hming ni a?" pakhat chuan min en deuh kar chung hian min zâwt a, "Saizikpuii" tiin ṭha takin ka lo chhang ve mai, "Keihi Raltawna ka ni a, heihi Sângvunga chuan kha kha Ngursairuma a ni" tiin ka hming min zâwt tu khan an ṭhian ho hming chu min hrilh a, ka bula ṭhu Ngursairuma chu ka en a, mei alh lai chauh chu a lo en tlawk tlawk ringawt.






~~~~~~~~~~~~~~~~~~~~~~~~~~~~~~


Ka ke a nat zawk zawk vang chuan ka mit chu ka meng a, Ngursairuma chuan ka ke chu a mal chunga dah in eng hnimhnah emaw hi a lo bêl chu niin ka han meng chiang a, Uraltawna leh USângvunga chuan chaw an lo ei mek thung, "Ehe ka van mu rei awm ve min lo kaih thawh ve mai tur a lawm" tiin ka tho nghal hluai a, "I khua a sik a, i duh chuan I la mu rawh" Ngursairuma chuan a lo ti leh hmuk tawh, "Ka ṭha reng tawh a lawm, kan khaw lam chuuu" tiin ka en a, min lo en ve in a bu deuh nghut, "Tukṭhuan te hi rawn kil ve phawt ula chuan Zawlpui lam chu kan pan dawn nia" Uraltawna chuan a rawn ti a, ka tho tur chu Ngursairuma chuan a kut min rawn pe a, ka lo dawm ve mai, kan pahnih chuan tukṭhuan te chu kan ei ve leh phawt a tichuan hmanhmawh lem lo deuh in kan khaw lam chu kan pan a.






Uraltawna nen a hmaah kan kal a, a ti ti char char a, a thusawi lah chu a ngaihnawm phian lehnghal a, a thil sawi chu ka lo ngaithla char char ringawt, mah se darkar chanve vel kan kal ang tihah chuan Ngursairuma chuan "Shhhh, thawm a awm" ti a min rawn pan in ka hmaah chuan a rawn ding a, ka sir tawn tawnah chuan Uraltawna leh USângvunga an rawn ding ve lehnghal zât bawk a, kei erawh chu a ngaihna hre lo zetin ka lo hawi aaa hau thung.







"Eee kha in va hlauhawm khup khup ve"tiin Uraltawna chu a ṭawngchhuak a, kei erawh in an thil tih chu engmah a awmzia ka la hre lo thung, "Aaaa ni e hei chhan eng emaw vangin inkhuaah kan rawn lut rawih mai a nih hi, ral kan ni lo ve" ti tu aw ka hriat rual rual chuan Ngursairuma phên aṭang chuan ka dâk chhuak vat a, "Ka uuu" ti deuh lauh in ka ke na theihnghilh ṭhakin Ka Uruma chu ka pan nghal a, a lo hamhaih kher mai, "Chêmi" tih ringawt a lo sawi a, kei erawh in ka va kuah deuh chung chung thung.






"Zikpuii" Uraltawna aw ka hriat ve leh rual chuan ka harh chhuak nghal a, "Eee Utawn heihi kau Hrangruma a nih hi, chuan kau hei min man tu te lâk aṭanga min chhanchhuaktu Uraltawna, USângvunga leh Ngursairuma te an nih hi" tiin ka lo in hmelhriat tîr nghal zung zung, "Eee a lo ni maw, Pasalṭha te u, ka farnu in lo puih avâng hian ka lawm takzet a ni, kan khua pawh rawn thleng ve law law ula, kapa pawh in mimal taka lawmthu sawi a duh ve ngei ka ring a ni" tiin ka u chuan min kuah chunga nui sângin Ngursairuma te ṭhian ho chu a en a, "Eee Pasalṭha lawmthu sawi a ṭul reng reng lo, hei keini pawh mikhual mai kan ni a, nizân pawh kan riak bo ta ringawt si a, kan thlenin te hrilh kan ti hai lutuk ang, kan lêt phawt zawk mai a nge" tiin Uraltawna chuan a chhang a, Ngursairuma chu engmah sawi lo in a in her hmak a, Uraltawna te pawh chuan an zui ve leh bawk.






"Ka u Ṭhuamṭhiani te kha" tiin ka hriat chhuah rual rual chuan ka u kuah chung chuan ka ṭap ṭiau a, Chêmi lungngai mah ta che an ṭha a lawm" tiin ka u chuan ka lu a lo chûl hliau hliau a, "Engtinnge? silai puak ri te kha kan hre si a," tiin ka u chu dâk ha in ka en a, "Khang tlangval ho in an kut ohuar chunga an rawn hruai kha kan hmu a, kan ṭhian thum khan thil ṭha lo a thleng tih kan ring thiam nghal a, tichuan kan kap ta ngawt mai a ni, chuan Ṭhuampuii leh naupang ho khawchhunga kan thlah leh hnuah in hnu bih zui in kan rawn liam ve leh nghal a, mah se kawng thlang lamah mi pakhat lo let reng kan hmu a, a bula i dawhkilh tla ka hmu bawk nen ti harh in thil awmzia kan zawt a, mah se a hre thui lo a, thlanglam kan han zawhthlak leh khan ruang pathum kan hmu a, zan chu chulai bul velah chuan kan riak mai a, tichuan zinglamah hei in hnu kan rawn hmu a, kan rawn chhui ta ngar ngar mai a ni" a ti leh a, tichuan kan khawlam pan chuan kan in zui hnak hnak a, ka ke na pawh chu ka hre chang lo a ni deuh ber e.







Mah se ka rilru ti hlim kim tlat lo tu a awm a ni, ka muhil ka harh rual rual a Ngursairuma hmel hmuh kha a nuam ka ti thar takzet a, ka hmu tawh lo tur hian min ti hnual tak zet a ni.






"U khang min chhan chhuaktu Pasalṭha te kha I hria em?" ka tih chuan ka u chu a ngawi deuh vung vung phawt a, a hnu feee ah, "Ngursairuma ral aṭanga a hming ka lo hriat Pasalṭha Thangruma Chhim keite fapa Ngursairuma hi a ni a nih chuan Pasalṭha khauh tak a ni, a kum bih a la tlêm na chu Pasalṭha hming lian tak tak te pawh kum bih phu lo in a tudawl hnem tawh a ni.





Kau chuan a ti a, a tlangval rawn hruai te pawh chuan Ngursairuma chanchin an hriat ang ang chu an lo sawi ve nghal mam mam a, kei erawh in sawi zawm tur ka hre tawh lo, 'Kan in hmu leh angem? Engtinnge min ngaih ve ang?' tih ang reng chu ka thil ngaihtuah a ni, "Tuna kan awmna ram hi Apu Saitual Lal Rumliana ram chin a ni a" kau chuan a tih zawm leh a, an mah ni khua a ni lo a nih chu.








"U ka hmu leh angem?" ka in rin hmanhma chuan ka ti deuh phut a, mah se vânneih thlâk takin kau chuan a lo hrechiang lo hlauh, "Eng maw chem in?" tiin min en ha a, "Kan khua a hnai tawh êm? ka ti deuh mai mai" ka lo ti leh daih thung.






~~~~~~~~~~~~~~~~~~~~~~~~~~~~~~




Buaina kan tawh aṭang pawh in hun a kal tam ve leh ta viau mai, eng mah harsatna kan tawk tawh êm êm lo a, mah se kha min rubo tu Pasalṭha kha a awmna khaw Pasalṭha in a rawn zawng a, thil awmzia ka chhungten an lo hrilh a, mah se lungawi hmel vak lo in a chhuak leh ta kha a nia, eng harsatna nge min rawn siam sak ang tih pawh hriatthiam har tak a ni, a mitmeng aṭang khan buaina chu a cho tih a hriat hle si a.






Kan khua pawh chapcharkut hmang tûrin kan in buatsaih mup mup tawh a, an nuam ka ti hleee, khua a har hman meuh lo, rilru hi hlim sarh reng ni mai in ka hria, he khawvel a awm hi nuam ka ti tawh takzet a ni.





Chhunzawm tur.



Zanin chu zan dang ai in a thui lo a, min hrethiam hram dawn nia, vawiin kan hnatlang nen ka buai ve reuh lutuk a, in mi hriatthiamna ka rawn ngen e🥰🥰 tui deuhin in lo chhiar dawn nia (Ka check leh chuan a rei dawn lutuk a, ka mut a chhuak tawh sia ka check vel lo mai)

IN NGAIHDAN LO SAWI VE LEH LIAM LIAM ULA OO🥰🥰


Show post links
Top

[Ngaia]

Zikpuii's P.O.V




Kan khua pawh chapcharkut hmang tûrin kan in buatsaih mup mup tawh a, an nuam ka ti hleee, khua a har hman meuh lo, rilru hi hlim sarh reng ni mai in ka hria, he khawvel a awm hi nuam ka ti tawh takzet a ni.





"Eeee nang ni in ni maw, kan rin ai daih in in rial rei ta si a, in hmel hmuh pawh kan lo in ring tawh meuh lo a sin" ka mutna hmun aṭang chuan kapa in mikhual a chhawn chu ka lo ngaithla ve kar a, ka mut chhuak tawh viau mah se engnge ka hriat pawh ka hrethiam lo, "Eeee hlawhchham kan tum hauh hleinem, Lalpa in thu leh rawn ngaichang tûrin hei kan rawn thawk chhuak leh a nih hi" mikhual aw ni ngei tur chuan a ti ve leh a, "Aw a nih tak chu kha han ṭhu ve phawt teh u khai, in chhawl te a hal em, tlângaupa hei Bualpui palai te hi ka zupui kha han chhawp rawh khai" kapa in a ti ka hriat leh rual chuan ka meng deuh kawk, palai aaa??? keima tana palai an nih thei mai angem??? tu palai nge ni ang?? eng ang mi nge a nih ang??? tih vel ngaihtuah chuan ka rilru a lo buai ve em em ringawt a, tunge pawh ka hriat ngai miah loh pasal a neih ka tum hek lo.







"Hei in zahawm viau nang in kan fanu in lo duh ve a, kan lawm viau na chu hei kan fanu hi a damsam thei meuh lo a, hman ni deuh khan vânduai thlâk takin ka hriatna a hloh tlat mai a, kan thuthlukna lo siam tawh sa pawh kha a mah kan han zawh leh zet loh chuan ka hrethiam tlat lo mai" kapa bawk chuan a han ti leh a, ka lawm hle, "Eee Lalpa a lo nih chu maw le, mah se kan Lalfapa pawh in tun ṭum chu kan hlawhtlin ngei tawh a beisei ve em em si a, Lalfanu pawh chuan rem a ti ve thei tawh mai lawm ni, a ni lah in kan rawn kal hmasakah pawh khan rem tih lohna kha a nei lo a ni a, tun ṭum phei chu man leh mual zawng zawng nen kan in sawi fel tawh ang chu kan lo ti a sin" mikhual pa bawk chuan a ti a.







"Ni eee, in zahawm viau mai, Chêmi pawh chu kan lo be ve leh dawn nia" kapa chuan a ti ta a, palai te pawh chu an chhuak ve ta mai a ni mah na, kei pawh chu mut chhuak in min rawn zem leh ṭan tawh in ka mit chu ka chhing nghal diar diar a.






~~~~~~~~~~~~Mumang~~~~~~~~~~~~




"I duhthlanna kha a pawimawh ka tih kha aw, thil kha chiang takin ngaihtuah ang che" he khawvel a min hruai tu pitar kha a ni, hnaih ka han tum ngial pawh in ka thei lo, "Eng kawngah maw, tun a keima tana palai rawn kal ah hian maw, a hmêl pawh ka la hmuh ngai miah loh chu pasal a nei turin min ti tihna em ni?" tiin ka hma a vei thauh thauh pitar chu ka vin deuh ṭhat, "I duhthlanna a lawmmm" tiin aw zâng khai vah chuan min chhang thung, "Engnge thlan tur ka hre thiam hleinem" ka lo ti ve leh a, "A hun a lo thlen hunah ngun takin en la, ngaihtuah la, nghak la, ngaithla ang che" chu pitar bawk chuan a ti leh a.






"A nih leh helai hmun aṭang hian haw ka duh ti ta ila" ka ti leh a, "A kawng ka hre hauh lo mai, nangmah khan i hre zawk ang chu " tiin min nuih var var a, "Min hruai tu I ni a, engtinnge I hriat loh theih, keiin engtinnge ka hriat daih theih ang" ka tih ve leh lai chuan a lo bo daih tawh, "Kapiiiii min chhang teh, Kapiiiii!!!!" ti a ka au leh vak vak lai chuan ka harh chhuak deuh zawk a.

~~~~~~~~~~~~~~~~~~~~~~~~~~~~~~





Khua chu a lo var ti tih tawh, thawm a la reh ṭhiap thung, ka mut a chhuah loh em vangin tui chawi tûrin tuikhur lam ka pan ta a, tumah ka la hmu lo.






"Chêmi i vân tho hma veeee, i muhil thei lovem ni" ka tui chawi in ka thlen rualin kanu in min lo be vat a, "Mu thei e , takin kanu, nizân khan in leng kan nei em ni?" tiin hre lo ang tak chuan ka'n zawt a, kanu lah chuan, "Aw nei e, Chêmi Bualpui palai te kha an rawn kal leh a lawm le" tiin kanu chuan eng emaw tal ka hriat beisei ni âwm tak hian min melh zui vang vang a, "Lo kal leh aa? kanu an rawn kal tawh em ni?" ka tih leh chuan kanu chuan "Aw kal tawh e, a hmasa ah chuan an Lalfapa te an rawn kal a, nangpawh in i mitmei i lo hmuh ve ni âwm a ni, an haw hnu rei lo tê ah palai hialin a rawn bawhzui ta a, an rawn kal hmasak kha chuan nang pawh in i hnar lovaaa?" kanu bawk chuan a ti leh a, "Kanu a pawi ka ti mah se lo hnial phawt teh u, a hmel em pawh ka hre tawh lo a ni a, engtinnge pasalah ka neih theih ang, a rilru a na in a mah pawh a mualpho ngei ang, mah se ka thei lo a ni" tiin eirawngbawl chu ka chhunzawm ta daih a.




~~~~~~~~~~~~~~~~~~~~~~~~~~~~~~




Ka chhungte pawn Bualpui lam palai te chu an hnawl ta phawt a, an in thiam lo hmel chu ka khawngaih ve tho mah se ka thei thlawt lo a ni, Chapcharkut pawh kan nei ṭan tawh a, zu leh sa nen nuam pawh ka ti hle, kan awmna hmun a zir in kan in siam rem ve mai tur a ni.






Kût hmang a kan lam a, kan rik luih luih lai chuan lalmual sir lamah chuan silai a rawn puak dawp a, kan reh nghal ṭhap, "Tumah kha che tawh hauh suh u" ti ṭhawt ri kan hria a, mipui ho chu chiai in an tlan darh nghal ta chiam a, silai pawh chu a puak zui nghal ṭhuai ṭhuai.







"Chêmi helam ah lo kal rawh" tiin Ka u Hrangruma chuan min kuai her deuh lawih a, zu ka vawi khat in na a ni a, ka k lo in ṭeuh bawk nen ka lu chu a hai deuh muai muai mai, ka u chuan kanu leh pa te nên Lalin hnung lama hnim pik kârah min tawm tir a, a ni erawh a hman rual la tûrin Lalin ah a lut leh thung, mah se ka u Lalin a a luh hnu rei vak lo ah tu emaw silai keng hi lalin ah chuan a tlân lut ve a, ka hlauthâwng chu kanu leh pa min dan hman loh in Lalinah chuan ka tlân lut ve ta ringawt, ka u leh a dawt chiah a lut kha an lo in chai mek a, ka u chu a chunglamah a awm a, chupa chu an hnek deuh chawr chawrh.





"Ka u" zawi te chuan ka han ko a, ka u pawh chu a rawn ding chhuak vat, "Ngatinge i lo kal" tih leh ka ban rek a vawn a rual a, min kal pui nghal dawr dawr, mah se Kanu leh pa te bul kan thlen hma chuan silai a rawn puak dawp a, ka u chu a ṭhingṭhi nghal rawh, "Uuu ka duh thei loo, ka u" tiin ka au chûl a, kanu leh pa pawh chu an rawn chhuak ve nghal a, chu tah kan chhûngkua chu mipa sâwm rual vel hian min rawn hual ta a, ka u hu a dar ding lama silai mu in a den vang in a ban a chet thei lo a, mah se chu ti chung chuan kan hmaah chuan dingin min hual tu mipate chu a hmachhawn a.







"Tu te nge in nih a? Engvângin nge min rawn beih ngawt?" tiin ka u chuan rum takin a en a, "I hriat a la ṭul lo ve" tiin pakhat chuan ka u chu a rawn tlawh chawrh a, ka u chu a rawn hnungtawlh deuh dawr, "U i ṭha em? Eng ang mipa nge maw in nih leee, hliam tuar che thei tawh lo a nih hi in hmu lo em ni? Chuti chung chuan kut in la thlak a maw?" tiin ka u kuah ran chung chuan rum takin ka melh a, "A sawhkhawk in tuar ngam dawn loh chuan min kalsan thuai rawh u" kapa pawh chuan sehchilh nak in a rawn ti ve leh, "Suakdeng, kha laiah khan a ni maw i lo bihruk a" tiin pakhat chu a rawn kal hnai hmawk hmawk a, kapa chu a rawn kek dâk awrh, ka u chu thawh san thuai in kapa kek tu chu ka va pan nghal a, "Rang takin kapa kha thlah nghal rawh" tiin a kut chu ka va man ve ngawt a, hlauhna pawh ka nei lo, ka ruih deuh vang te pawh a ni mah na.





"Lalfanu i lo in rawlhna tur a awm love tiin kapa a keh lohna lam kut chuan ka kut chu dahsawn mai a han tum a, ka lo vuan nghet ve tlat, "I kut kha dahsawn nghal tûrin thu ka pe a che" ka tih leh rual chuan kapa pawh in "Chêmi hmeichhe in rawlhna tur a ni lo a nia" a rawn ti ve leh, "I kut khan kapa sam zai khat pawh I pawt ṭil a nih chuan I thi chiang khawp ang" ka ti leh a, chupa pawh chu a nui hak hak a, mah se kapa sam chu a thlah ve tho.






"Min kalsan nghal rawh u, engvângin nge kan khua ah hian hetianga in rawn khawsak ngawt" tiin kapa hmaah chuan ka ding leh a, "I in rawlh tam ta mah mah eeee, Pasalṭha min lo dang hauh suh" tiin nichina ka thu zâwm tupa hnung aṭang khan mipa pakhat a rawn chhuak ve leh a, mah se ka thu zâwm tu pa khan a lo dang vat, "Engnge I hriat a, i va han dawihzep ve" tiin a mah lo dang tu chu rum zetin a melh a, "Engnge in hriat a mi in ring lo lai in rawn beih thut? mipa pawh in ni lo tuai vek in nih hi" ka ti tawn tawn a, mah se ka thusawi an hrethiam lo tih ka hriat rual rual in, "Haw ula in nu te pawnfên va feng vek rawh u" ka ti ṭha leh a, "I va han ṭawng hnem ta em êm ve" pakhat a bawk khân a ti leh a, ka thupek zawm tu pa khan, "A nih chuan in khaw tlangval pakhat emaw nen hian kan in mal beih a nga ka hneh a nih chuan min zui ang che, ka hneh lo a nih erawh chuan in khua hi ka chhuah san nghal ang" a tih chuan ka chil ka lem khawlh mipui te tuar tam lohna tur ni mah se ka u ber a tlu tawh si a, a mah han hneh thei tu tur ka hre lo a ni, kan Pasalṭha dang te lah ka ring zo bawk si lo.





Mah se ruahmanna ṭha tak ka ngaihtuah chhuak a, "Awle, mah se in in beih lai chuan phakhar i chhuah thei lovang nga i hote tumah kan khaw mi leh sa te hnaih ah an awm tûr a ni lovang a bik takin kei leh ka chhûngte hnaih ah, chuan in in beih laiin engpawh thleng se tuma'n kan khaw mi leh sa te kut an thlâk thei lovang" ka han ti a, a nui deuh vur vur, "Awle tehreng mai, i thusawi chu kan zawm ang, mah se a tawp ah nang hi ka nupui i ni tur a ni" a ti leh ka uak nghal deuh ṭhawt.







"Awle" ka la han ti ve leh a, ka ruahmanna chu ṭha ka tih em vang chuan ka nui deuh var var, "Pasalṭha he thil hi kan thil tum a nih loh kha" nichina min ngaithei lo zet tu khan a lo ti ve leh, "Lo ngawi rawh" chang fak chuan a lo ti thung, tichuan mual sir tinah chuan meichher an chhi kual ta diat diat a, a laiah tak kan khaw tlangval leh min neih tum tu Pasalṭha chu an ding ta ran a, in beih an ṭan rual rual chuan kanu chu ka hrilh ru nghal sar sar, "Ka u hi ṭha takin lo enkawl ang che u" ka ti a, ka ṭawng leh hma chuan "Chêmi i zui thei lovang" a rawn ti ve nghal a, kapa pawh chu ka chungah a lungawi lo niin ka hria, "Ka zui dawn looo, tûnah hian an in beih laklawh lai hian ka tlanchhe dâwn a ni, saw Pasalṭha saw thu ka tiam tir tawh a, a thutiam a bawhchhiat ka ring lo" ka ti thla rawk a, kapa chuan "Teuh lo mai, hmeichhia i ni a, zan a ni lehnghal ram palailengah nangmah in i kal thei lovang" kapa chuan a rawn ti ṭhat, kanu chuan thawm din tûrin a lo khap vat bawk, "Kapa saw mihring saw zui turin min duh zawk em ni? ka kal a ngai a ni, min pui thei tu tur ka hria a lawm" ka ti a, kapa erawh chu a ngaih a la ngam zan lo tih ka hria mah se chutia saw Pasalṭha sual zet ka zui ai chuan a ti a ni mah na, "Awle, mah se heihi la rawh, a hman dan I thiam ka ring a nia" tiin chemtê hriam hmel zet chei nalh zet hi a rawn phawrh a, mak ka ti lutuk chu ka en reng ringawt, "Kal vat rawh leee, dam taka hmuh leh che ka duh a nia ka fanu" kapa chuan a ti leh a, a ruk chuan lalin zaudawh aṭang chuan ka chhuk a, khaw pawn lam pan in ka kal nghal char char a, ka thawm an hriat theih tawh loh tur a ka ngaih velleh chuan ka tlân ta chiam a, thla a eng reuh bawk nen kawng kal pawh chu ka harsat lo viau.







Tûnah hian kan khaw piah chiah Ngursairuma pu te khaw lam pan tum a tlân chiam ka ni, khapa zui kha ka duh hauh lo, tih dan tur dang ka hriat loh vang a hetianga che ta mai ka ni, thui feee ka tlan hnu pawh in eng thawm mah ka la hre lova ka tlân deuh char char a, mah se ka rin aiin a lo hnai hauh lo, min rûk chhuah lai kha chuan khang mipa ho khan min pu in min tlân pui a, hnai te emaw ka tih kha chutiang in a lo hnai lo, ka kal hla ve tawh hnuah chuan ka hah ta hle hlauhna in min rawn man lehnghal he khawvel ah hi chuan huai tih ang reng an la awm dâwn tih ka hrechhuak leh hnu hnawh a, ka hnunglamah te chuan min zui tu an awm tlat a hriatna ka nei ṭan lehnghal, pen ri ni awm tak tak te ka hria a, chauh pawh sawi lo in chak zet chuan ka kal leh a, mah se ka hnung a pen ri ka hriat chu ka kal châk poh leh a kal châk ni mai in ka hria ka ṭap ṭiau tawh.






Hmanhmawh tak chuan ka kal zêl a zan chu an ni rei tawh ka ti hleeeee, mah se chutianga Hun rei tak ka hman hnu chuan khawfîng chu an rawn chat ve ta hram a, khua a rawn êng ṭan tih ah chuan a hmaa min man tu ten min chawlh pui na kawr te kha ka thleng ve ta hram, beisei nei zet chuan ka han hawi kual a, mah se tumah ka hmu lo, "Ngursairuma" tiin ka han au ngawt a, keimah ber ber chuan awmzia a awm lo tih ka hrechiang hle thung, chuta ṭang chuan ka kal leh ngat ngat a, mah se ka hnunglamah chuan mihring thawm ngei ka hre taaa, mah se an thawm an dim hle tih pawh chu ka hria, chu tah ka tha neih zawng zawng sâwm khawm in ka tlân chiam a, a hmaa kan riahna pûk pawh kha ka thleng ve leh a, pûk ah chuan awm an awm tih ka han hre ta bawk, rang takin ka tlân chho nghal a, mah se ka hmuh tum loh tak tlangval pa rûk ka han hmu a, chhuah tum in an lo in siam mek a lo ni, "Khawngaih takin min pui rawh u" thaw hlawp hlawp chung leh ṭap ṭiau chuan ka han ti a, "Nula engnge a awm zia, han hahdan phawt teh" tiin phawk hra in min en hlawm a, "Miin min rawn ûm mek a ni, khawngaihin min thukru rawh u, an tam teh a nia" ka han ti leh a, ka harh chiang telh telh a ka hlauh a zual telh telh.







"Bûk chhûngah hian lo awm tlat ang che nula" tiin pakhat chuan min awmpui a, a bak zawng chu an chhuak ta nghal a, "In khuaah in Laltupa Ngursairuma te kha an la awm em?" ka han ti a, chu pa chu a hawi phawk kher mai, "Aaaaa nithum vel ram vak in kan chhuak tawh a, a haw tawh leh haw loh ka van hre lo em" a tih zawh rual chuan ṭawng lo turin min khap vat, "Nula pakhat helam pana rawn tlan phei hi in lo hmu mial em?" ti a au deuh lang lang kan hria a, "Eeeee ka va hre lo emmm, hei kan tho ve chiah a" tiin pûk bula awm te chuan an lo chhang a, ka thaw deuh huai huai, min ngaithei lo zet tupa aw khan "In hre lo tak tak maw?" a ti bul hmuk a, "Aw kan hre miah lo" an lo ti ve leh a, in la pa kual vel lo a chutianga an lo chhan vang chuan ka lawm hle a ni, rei feee thawm a reh vang vang a, "Thawma, nula hi sawng mi te kal lohna lam aṭangin kan khuaah i leh luh pui mai ang u, i hmanhmawh teh ang u," tiin tlangval te chuan an bungrua an khung fel mawlh mawlh a, puk chu kan hel a chu lam aṭang chuan Saitual khaw lam chu kan pan a, ka ke chu a na tawh tak zet a ni, mah se ka sawi hreh em vangin in pet ruh fan fan chung in ka kal ve zel a, rei vak lo ah kulh lo ding deuh khup hi kan hmu ta a, ral veng an lo awm bawk.






"Rema keimah ni kan ni e" tiin Thawma kha a au deuh lang lang a, kawngka pawh chu a rawn in hawng ruai ruai a, kan lut nghal, Lalin chu min pan pui nghal a, kan luh dawn chuan ka zâm chhe leh hnuhnawh Ngursairuma te ṭhian ho kha an lo awm angem? Hmu ta ila engnge ka sawi ang? Ka rilru chu a in sual buai nasa hle mah se lût lo thei ka ni si lo a.






"Lalpa I khaw tlangval te kan ni e kan rawn lut thei angem?" tiin luh chu an han dil hmasa te te a, luh theih thu an rawn sawi takah chuan tlangval pahnih leh keimah chu kan in zui lût ta nghal a, mah se a chhunga kan mi hmuh te vang chuan kan meng phawk hle, kan khua rawn luhchilhtute leh min ûmtu te ni bawk ngei chu an lo ṭhu kur a, min neih tum tu pa phei kha chu a lo nui ṭhaw lehnghal.






Mah se keichu harh chhuak thut in Lalin aṭang chuan ka tlânchhuak lehnghal a, mah se Lalin zaudawh aṭang ka zuan thlak chiah chuan tu emaw hi ka su deuh nawk a, tlân tlang mai ka tum lai chuan, "Lalfanu thu I tiam tawh a ni lâwm ni kei chuan ka thu tiam ka hlen tawh a, i thu tiam i hlen ve dâwn lovem ni?" tiin Lalin zaudawh aṭang chuan a rawn au a, "Nang ang pasal a ka neih duh tak tak che i ring em maw ni" ti deuh sa sa in tlân leh mai chu ka tum a, mah se ka tlangval sut pa khan, "Buaina hian a um zui zêl che nge nangmah hian I cho chhuak ṭhin" a rawn ti hluk a, a aw ka hriat rual rual chuan lawm zetin a hmel chu ka en a, awww a mah a ni, Ngursairuma ngei a ni.







Chhunzawm tur.




🥰🥰in ngaihdan lo sawi ve leh ula oooo🥰🥰🥰


Show post links
Top

[Ngaia]

Zikpuii's P.O.V



"Buaina hian a um zui zêl che nge nangmah hian I cho chhuak ṭhin" a rawn ti hluk a, a aw ka hriat rual rual chuan lawm zetin a hmel chu ka en a, awww a mah a ni, Ngursairuma ngei a ni.





A hmel ka hmu thut ka hlim lutuk chuan ka kuah nghal vat a, a ni pawh a hamhaih a ni mahna che lo in a ding khawng ve reng ringawt, "Nang pa kha, tuna i hmeichhe kuah lai kha ka nupui tur a ni tih i hria em?" vin zet a kan hnunglama au ri kan hriat rual chuan Ngursairuma chu ka thlah nghal a, a hnungah chuan ka biru vat, "A kuah tu zawk ka ni in i hria em maw ni?" Ngursairuma chuan a ti hluk a, a hnung aṭang chuan min kai chhuak in, "Engvângin nge saw pa saw i hlauh?" tiin ka mitah tak chuan a en a, "Ihh ihh" ka tih deuh nuaih vang in dawh thei lo zet hian, "Ihh ihh ti lo khan hlau lovin sawi rawh, i bulah ka awm hi" tiin ka kut chu a hmer nghet sawt a, thawk te ka'n lâk deuh vang vang hnuah, "Chapcharkut kan hman lai a ni a, kan in rin loh laiin nizân khan min rawn bei thut a, ka u pawh an hliam nghe nghe, ka u te thlavang ka lo hauh kha hepa hian 'in tlangval te nen kan in bei anga min hneh chuan kan kalsan ang che u, min hnên loh erawh chuan ka nupui i nih a ngai thung ang' a ti a, ka mite himna a nih ring in ruahmanna nei sa ran in a rawtna chu ka pawm a, an in beih laklawh laiin in khaw lam pan hian zan zan ah ka rawn tlân ta a ni" a mit a la melh ve kar chung chuan ka ti a, "Nangmah in maw i rawn tlân chhiat" a hmel chu a rum tawh hle a, a mit mengah chuan engmah chhiar theih ka nei lo, "Awww" ti chauh a ka chhan hnuah a hnungah chuan min din tîr leh a, "Hmeichhe awm nem hlau hlawp a siam in in rawn ûm a, Pasalṭha ka ni e chu I la ti ve ngam a maw?" a aw ringawt ah pawh chuan a thinrim zia a hriat theih.






"Naupang a thu sawi kha I hre vek lovem ni, ka rawtna siam kha a pawm a, ka thutiam an khaw mi leh sa tumah ka ti na lovang ka tih kha ka hlen a, a ni pawn min neih a tiam a, a ti hlawhtling ngei tûr a ni" a tih lai chuan Ngursairuma chuan, "Duhthlan tur dang pe ni la nang neih ai chuan an khaw tlangaupa neih pawh a thlang ngei ang chu, duhthlan tur dang siam sak hek lo che, a nei duh lo che a a lo tlân chhia a ni mai, ka hnên a rawn thleng tawh a, i theih phawt chuan I hruai dawn nia, han tum chhin ta che" tiin a a kawlhnam chu a phawrh zal zal a, a vilik deuh valh valh, "Taia kha engnge thil awmzia?" Lalin aṭanga rawn chhuak Lalpa chu a rawn au ṭhat a, "Kapu he mihring mipa hming tichhe tu hi kan dah ṭha phawt a nga engmah chu kan la sawi ṭha dawn nia" tiin a pan phei ta a, "Naupang i buai loh na tura I buai avangin vawiin hian I thi dâwn khawp" min man tupa khan a ti a, Ngursairuma chu a ṭawng zawih em avangin a chhanna ka hre pha ve tawh lo.








Ngursairuma's P.O.V






"Naupang i buai loh na tura I buai avangin vawiin hian I thi dâwn khawp" ka hmaa Pasalṭha chuan meng rum ul chungin min rawn pan a, "He nula zanlai a hlauhlawp a an khua aṭanga in rawn ûm chhuah man hi chu in hmu dâwn khawp, ka that vek dâwn che u" tiin ka pan hnai ve a, Zanlai a hlau mangang chung a kan khaw lam pana a rawn tlân tur ka ngaihtuah ringawt pawn ka thinrim lutuk chu ka in hum ruh ngar ngar thei, a chhan ka hre hauh lo thung.






In beihna chu a rawn ṭan ta, a, min rawn beihna chu ka lo dang zât zat ringawt rih phawt, ka thin a la rim em avang chuan chet ka la thawh ve duh lo a ni, kapa in 'Kan thinrim lai ber hi fimkhur a ngaih lai ber' a tih ṭhin khaaaa.







Rei fe min rawn beihna ka lo dan hnu chuan tlemin ka in beng dai ta deuh a, ka khawih lêt ve ṭan ta a.






Saizikpuii's P.O.V






Hetiang ringawt te chuan engtinnge a hneh theih ang, a hnungtawlh awrh awrh teh bawk si, chutiang a ka ngaihtuahna ka lo kawm lai tak chuan Ngursairuma chuan a bei lêt ve ṭan ta a, min um tu pa kha a lo chau deuh ta bawk nen Ngursairuma'n an vai ve tak tak ta chu a tawlh lêt ve ta hâwn hâwn mai, chu tah Ngursairuma chuan a chem chuan a rawn chhuk sah pawp a, chu lai tak lo in dang a a in siam rem hman loh lai tak chuan a pum ah a tlawh leh chawrh a, a lêt nghal tawp, "Mi inring lo lai ka bei ngai love" tiin Ngursairuma chuan an beihpuipa lo thawh leh hun chu a nghak ta ngat, a tlawm la lutuk chu a rawn tlân leh puat a, mah se Ngursairuma chuan a chem lo vai chhuah lo lo bum zauh in a chem chu a sat chhuak zui ve nghal a, a beihpuipa lu chu a tla hrang ta hlawl mai, ka rin loh lutuk thil ka hmuh vang chuan in ring hman lo in ka pum a rawn let vut bawk nen ka uak nghal ṭhat.






"I ṭha em?" tiin Ngursairuma chuan min rawn pan vat a, "Taia Lalin chhûng lamah I ti ti ho lawk teh ang u, nula kha rawn hruai la" tiin Lalputar chuan lawm hmel loh takin Ngursairuma chu a melh zawk a, a lut zui ta daih.






"Tlangval te u, he Pasalṭha nei te kha phuar ula rip ah lo khung vek ang che u" Valupa chuan an han ti a, kan pathum chuan Lalinah kan in zui lut ve leh nghal a, "Engnge thil awmzia" Lalpa chuan a lo ti tu deuh hmuk, "Aaa kapu hei Sikpuii hian a hrilh kim thei zawk ang che" tiin min rawn melh ta daih, in hnialna hun awm hek lo, kei pawh chuan zam zetin Lalputar mengrum deuh ul bulah chuan kan thil tawn te chu ka sawi fai ta vek a, a tawp tlip nan, "Lalpa hei I tupa Ngursairuma te ṭhian ho hian a hma pawh khan min lo pui tawh a, kha kha hre reng In a zan a zan in in khaw lam pan in min lo puih thei mial beisei in ka rawn kal tawp mai a ni e" ka han ti a.







"Ooo a lo nih teh nuai chu a, tûnah ipa Suakdenga chu engnge a an a" Lalputar chuan zaidam zet hian a rawn ti ta a, "Ka hre bik chiah lo Lalpa, ka rawn tlânsan dawn kha chuan an ṭha viau a, mah se an chin engmah" tiin ka ngawi zui ta daih a, "Oooo a ni tak e, Chêmi han in tifai in han chawl hahdam la, chaw te kha han bar ve phawt la, muang mar in i hahdam hunah I chin tur kan la sawi ho leh dawn nia
" Lalpa bawk chuan an ti leh a, chu veleh Lalnu leh Lalfanu te ni awm tak chuan min rawn buaipui nghal zung zung a, an fel hleee, Lalfanu upa ber phei chuan min be siam siam reng a, chu lai hmuna ka awm pawh chu a ti nuam hle, ka in tih fai hnuah eitur te min siam sak leh a, ka ril a ṭam tawh bawk nen hmeichhe ei a mawi lo khawp ka ei maithei a ni.





~~~~~~~~~~~~~~~~~~~~~~~~~~~~~~





"Lalpa heta han cham pawh a chakawm viau a, mah se ka chhûngte chin engmah ka hre si lo a, ka rilru a nuam thei lo a ni" tiin Lalpa hmaah chuan ka ṭhu a, ka sirah Ngursairuma, Uraltawna leh USângvunga an lo ding ve ran bawk a, upa ho nen.







"Kapu Zikpuii chu kan ṭhianho hian kan va thlah mai dâwn em ni ang?" Ngursairuma chuan a rawn ti a, lawm zetin a mah chu ka va en a, "Mah se an khuaah chuan ral te pawh eng zât nge la awm tuma'n kan hre lo a, vânduai zawk ah in ṭan ve thei tlat a ni, nangmah ni ho chauh chu kal lo ve" Lalpa chuan a ti ve leh a, a ruahmanna siam dân tûr chu ngai changin kan ngawi deuh ran hlawm a, "Ka khawtual tlangval sawmnga vel kha Valupa Buaia khan thlang chhuak sela in hnung zui ve rawh se" upa ho nen an in rawn khawm nak nak hnu chuan a han ti a, kan khawlam min pan pui nghal dawn vang chuan ka lawm hle.





"Ziki vawi hnih chauh kan la in hmu a, buaina i la tawk ve ve bawk a" Kawtchhuah kan pêl deuh awrh tihah chuan Uraltawna'n min fiam nghal a, ka duh lo ve hle, ka duh vang reng a buaina tawk reng ka ni bik lo aaa, "Ka duh vang a ni bik lo aaaa, kha'ng ho kha a lawm" tum bur chuan ka lo ti ve a, "A nih leh engtinnge I chhan lêt ngam reng reng aaaa, takin ramhnuaia nangmah man tu che pawh khan a thih hma khân 'Kha Lalfanu ang em em a ṭawngthei kha ka la hre lo' a ti a nia" a rawn tih leh phei chuan ka va han thinrim tak.







"A vân zakthei lo, ka ṭawngthei kher lo e a, 'ka ṭhiante chhuah rawh u' tih vel bak ka sawi lo, chupa chu ka hmuh leh hunah a chak lovang" kan ti ngawt a, a thi tawh tih ka hrechhuak leh si a, ramhnuaiah chuan ka hawi kual deuh nghal ruai ruai, Kanu leh kapa ten min sawi ṭhaih ṭhin na kha ka hre chhuak zawk zawk mai, 'Mithi tawh chanchin sawi chuan kan bulah an rawn awm nghal ṭhin' an tih kha.







Ka hawikual deuh ruai ruai lai chuan ka hnunga kal Ngursairuma chuan min rawn su deuh nawk a, ka tlu tur chu min vuan bet vat bawk, "Chhun a nih hi hlauh tur engmah a awm lo" dam dap chuan a rawn ti a, Uraltawna chuan min lo pawt sâwn vat, "Ngura nen hian in in hnaih sawt tlat" tiin Ngursairuma nen kan in kârah chuan a rawn ding a, "Awiawm loh lutuk, kan in hnaih kher love a" ka tih laiin Uraltawna chuan "A nih leh kan khua I rawn pan dawn khan tunge I rilruah awm hmasa ber" a tih rual in rang zet in "Ngursairuma" ka ti a, a nuih deuh hak takah chuan "Te nangmah te, USângvunga te" bah nawk nawk chuan ka ti leh a, chulai tak chuan Ngursairuma a rawn in rawlh ve leh.








"Midang zawng zawng chu I u vek a, keichu Ngursairuma min ti a" hma lam en deuh run chung chuan a ti a, "Aaaaa i ho lutuk, ka ko tawh laklawh che u" ka ti tlat a, Ngursairuma chuan engtin mah min chhang zui tawh lo.






~~~~~~~~~~~~~~~~~~~~~~~~~~~~~~






"Khaw chhûngah kan pathum hian kan han lût a nge, Zikpuii kha lo awmpui ula" Valupa a awm lova, pasal ṭha dang an awm lo bawk nen, Ngursairuma chuan ro a rel deuh zung zung a, an ṭhian thum chuan khuaah an han lût a, keini ho chuan kawt chhuahah chuan kan lo nghak deuh far hlawm a, "Ziki, kan in hnaih teh lul nen in khua hi ka la rawn kai hauh lo a, hei khawchhûng luh hma aṭang reng in in khua hi a nuam dawn tih a hriat reng mai a hei" tiin tlangval pakhat chuan min rawn bia a, "Nia hei a nuam ve reuh khawp a sin, in rawn chuang kai fo tawh dawn nia" ka lo ti ve bawk a.







Mah se chutia kan ti ti lai chuan khawchhûnglam aṭangin silai puak deuh dur kan hria a, kan ngawi nghal ṭhap, "Khua hi eng ang a zau nge a nih Ziki helai aṭang hian kawt chhuah a la hla em? khua hi I tuam teh ang u" nichin a min be tu tlangval bawk kha a ni, "Aaaa chutiang in a hla vak tawh lo" ti chauh in ka chhang thei khawchhûng lam chuan ka rilru a la pêng em a tin ni, "Pathum khan Zikpuii hi lo awmpui ula keini ho in khua hi kan han tuam dawn a nge" a ti leh a, "Hetah ka lo awm duh bik teuh lo" ka lo ti ve tlat, "Hmeichhe rawn kal ve na chi a ni hleinem, hetah lo awm zawk rawh, a nih loh chuan Laltupa kan chungah a lawm hauh lo ang" a ti leh a, "Awle a nih chuan ka lo awm ang" lungawi lo zet chuan ka ti ta nge nge a, tlangvâl pathum chuan min awmpui-in a bak zawng chu khaw tuam tûrin an in sem darh ta a.








"Enteh u an rei tawh in ti ve em?" an kal hnu rei lo tê ah chuan ka ti deuh sek a, tlangval ho lah chuan an la rei loh thu in min lo chhang ve mai zel bawk a, khawchhunga thil thleng engmah ka hriat loh vang chuan ka awm hle hle thei tawh lo, "Enteh u, khawchhûng panna hmun biru deuh ka hria a sin, chu ta ṭang chuan kal ila khawchhunga thil thleng te in hre ve chak lovem ni?" tiin ka bula tlangval la naupan hmel tak tak te chu ka thlem ṭan ta a, an hmelah chuan heta awm reng an ning ve tho tih ka hrethei, min chhang chuang lo na chu.






"Enteh u, keichu heihi ka khua a ni a, a chhungah buaina a thleng a ni a helaiah ka awm mai mai thei lo a ni, bakah in tlangval te ho leh in Laltupa te pawh keimah vanga helai hmun a lo kal in ni a, keimah vanga hliam in tawrh chuan engmah ka ti bawk si loh chuan ka in thiam thei lo vang" ka ti leh duah a, "Mah se Utlana'n a phal si lo a" an tih takah chuan, "A hau lovang che u lungngai suh u, keima'n ka hrilh mai ang, min lo zui rawh u" ka ti a khawchhûnglam pan chuan ka kal nghal a, kawng pangngai ah hlir chuan ka kal pui a, khawi lai mah a kawng rûk ka hre lo a ni, Lalmual kan thlen dawn chuan thawm kan hria a, kan ding nghal ṭhap, "In Pasalṭha chu ka kut zalah ngei a tlu tawh a, in lam lêt na hun ka pe ang che u, a nih loh chuan kan that vek ang che u, hual beh vek in ni tawh a nia" mipui kârah chuan Ngursairuma aw kan hria a, hmuh erawh engmah kan hmu pha lo.







"Hei ai hian hnaih leh deuh ang u" tiin ka kal hnai leh a, an ni pawh chuan min zui ve zel mai, mipui kârah chuan kan in hnawh deuh talh talh a, Lalmualah chuan Ngursairuma chu a banpuam thi deuh phang in mipa pakhat nen an in veh deuh dan dan a, "Kan Pasalṭha kha nang ang naupang mai mai lakah a tluk ring turin min ti a maw? Eng emaw thil dik lo chu an awm ngei ang" tiin an hmaa mi chuan a hnaih thut a, an in bei chu a ni nghal der, Ngursairuma chu a ban dinglam ban a nat vang a nih ka ring a veilam hmang chuan chupa chu a bei a, mah se a ding lam a hman thiam ang tluk zetin a vei lam pawh chu a hmang thiam tho lo niin, chu pa chuan a khan lo takzet a ni.







Ngursairuma te an in bei lai mi zawng zawng in an thlir ṭhup lai chuan kan khaw luhchilh tu te c
zîng a mi pakhat chuan a silai a lek kâng de de lai ka va hmu a, Ngursairuma lam pan chuan ka tlan phei vat, Ngursairuma'n a beihpuipa lu a a sat chhum chiah tih ah chuan silai vawi hnih a rawn puak ṭhuai ṭhuai a, Ngursairuma chu ka nam sawn dawr a, mah se eng emaw hian min rawn deng in ka leng deuh lawp niin ka hria, "Chêmi" ti a kanu au lawm lawm chu ka hre zui a, mah se ka meng lui thei ta thlawt lo.






Ngursairuma's P.O.V







Silai a min tin tu chu ka mit zirin ka hmu a, Raltawna'n a hmu ve tih ka hriat bawk vangin ka ngaihven lo, ka beihpui pa lu ka chat chiah tih in silai vawi hnih rawn puak ṭhuai ṭhuai a, mah se tu emaw hian min rawn nam sawn dawr a, mah se a tha a ṭhat vak loh vangin ka kar deuh nawk nawk ringawt, mah se ka bul a tlu reng ka hmuh rual chuan ka pan hnai vat a, a ka aṭangin thisen a rawn chhuak a, a harh hauh lo bawk.







"Chêmi" tiin Lalpa leh Lalnu chuan an rawn pan nghal a, ka mal chunga mu Zikpuii chu a kut a vuanin an ko lawm lawm a, kei erawh in ka lo en tawp ringawt.






"Kalsawn teh u lo hnaih tuau tuau suh u, hliam tuar hian thawk lâk a mamawh dawn a nia" ti a au lauh lauh chu bawlpu a nih ngei ka ring, "Pasalṭha, inchhung lamah in pawm lût dâwn em ni ang, ka lo en a nge" tiin bawlpu chuan min rawn hnaih ve leh a, keipawh chuan engmah sawi lo in Zikpuii chu Lalin ah chuan ka pawm lût a.







Zikpuii chu Lalin ah chuan ka mut tîr a, keichu ka chhuak zui lehnghal, ka kut leh a taksa vela a thisen kai chuan min ti sa pup pup thei hial in ka hria, Lalmualah chuan kapu tlangval te leh ka ṭhiante chuan khaw luhchilh tu te mi sâwmhnih vel zet chu hnung khirh in an lo ṭhingṭhit tîr fâr tawh hi a lo ni a, chu lai chuan tlangval pathum hian min rawn a, "Laltupa a pawi kan ti lutuk, mah se khawchhunga thil thleng hre lo in ka awm thei lo a ti tlat si a" an rawn tih lai chuan chhan pawh chhang lovin an hnungkhrih te lam chu ka pan a.







"Tu ber hian nge silai hmet puak kha?" ka ṭawng ring hran lo mah se ka thinrim lutuk tuk ka kut ka hum khur ngat ngat tawh, "Tu ber hi nge?" tiin Raltawna chu ka en leh a, a bul chiah a hnuailam melh run a lo ṭhingṭhi chu a melh a, "Awle" ti deuh nghut in chupa chu ka ṭham tho nawk a, "Nichina i hliam tak nula kha a rawn harh chhuak leh lo a nih vaih chuan nang hi ka hlep ral vek ang che, nuam sa tak chuan I thi hauh lo ang" tiin ka thlah leh hnawk a, Lalin lam bawk chu ka pan leh.







"A rawn harh ve leh mai ang, a pawi lai ah ngenmu hian a fuh lo a, a hlauhthawn lutuk vangin a thidang rih chauh a nih hi, ngenmu hi a tlang hlauh bawk nen thisen a chhuak tam hnam lo bawk a, hlauhthawn tur a awm love" bawlpu in a ti chu ka hre hman a, lut in Zikpuii hmel en chuan ka ding deuh ran a.








"Pasalṭha, engtia helai hmunah kafanu hruaia rawn lang hlawl hi nge I nih aa?" tiin Lalpa chuan min lo zawt vat a.






Zikpuii's P.O.V







Hmun thim vek ah bawk ka harh chhuak a, ka bulah helai hmun a min hruai tu pitar kha nui var var in a lo ṭhu bâwk, "Midang chuan khatiang khan an ti ve hauh lo a sin" tiin ka sam chu a lo zut hliau hliau, a hmel leh a inchei dan chu a danglam vek tawh, nutling hmelṭha leh zahawm tak ang in a lang tawh a, a hlim hmel sar tawh bawk.







" 'Midang chuan' aaa kapi engnge I sawi awmzia?" tiin ka ṭhu chhuak a, "Nakinah nangma'n i hre chho ve zel mai ang, hethil hi ânchhia an ti ṭhin a, mah se ânchhia ni lo in 'khuanu ruat' a ni" a ti leh a, a ral leh riai riai a, keipawh chu ka meng deuh kawk a, ka bulah chuan ka chhûngte leh Ngursairuma an lo ding deuh ṭhap a, Ngursairuma chuan ka mitah tak a lo en kar a, keipawh in ka melh lêt ve reng bawk.






Chhunzawm tur.


Ngaihdan te sawi ve leh ṭheuh ang u ooo🥰🥰🥰


Show post links
Top