LOVING MR CAVALIER BY Bee Hlutei (Completed)

[Ngaia]

Liliana POV

Kan ṭum dawn hnaiah chiah Mr Cavalier chu ka hmu. Pilot in him takin kan thleng tih a sawi veleh ngawi rengin a rawn chhuak a, ka purse kengin ka lo ding reng a, Armagio pawh cockpit aṭang pindan lam chu a rawn pan a, chumi hnuah kawngka lam a pan leh a, a hawn fel hnu chuan Frantz a'n min chhuah tir hmasa a, ka hnungah min rawn zui a, driver pawh a lo ding vang mai

Car chhungah luh ka tum mek laiin ka phone a rawn ri a, ka han en chuan hriat loh number a ni tlat, khur beuh beuh in ka bengah phone chu ka dah a

"Hello?" Fimkhur tak leh dam takin ka chhang a

"Lili darling!" Carlos a lo ni a aw chu a nelawm loh khawp mai "Eng nge ni Carlos?" Ka ti a

Carlos a hming ka lam tih hria in Frantz chuan zaizir in speaker ah dah turin min hrilh a, a sawi angin ka ti vat "Hun a kal zel ania ka hmangaih" a rawn ti a

"Ka hria alawm ka rawn ṭum chiah, kan inbiak lai reng hian Luxury Hotel lam ka rawn pan mek e" ka ti a. Frantz chuan ngawi rengin a rawn zaizir a, Armagio leh Driver chu car chhungah an lut a, kan zui ve nghal

"I rang hle mai, i boss nangmah duh tu che kha a rawn tel ve a ni ang maw?" A ti a. Frantz chu ka va en a, sawi tur min hrilh ka beisei deuh a ni, mahse a ngawi reng a, keimah a ka chhan mai a ngaih hmel

"Tel se engtin?" Ka zawt let daih
"Engmah a danglam phah lovang. Ka duh chu ka nei tho ang, mahse lo thlir mai mai mahse pawi ka ti lo" a ti a, Frantz ka va en chuan a lo meng thip ram mai

"Ka nu ka be thei ang em?" Ka zawh pah chuan ka biangah mittui a rawn luang char char

"Awle" Carlos chuan a remti ve mai, Frantz chu ka va melh zuai a, ka hawisawn leh daih

"Lili?" Ka nu aw chu phone ah a khur der der, ka thaw chhuak sap

"Nu" ka inhnit hlawp hlawp, Frantz chu tukverh lam a hawi daih, second reilote ah min rawn en leh a

"Ka ṭha e bawihte, engkim a ṭha vek e" ka nu i'n a rawn tih chuan a aw chu a dik chiah lo tih ka hria

"Ka pa eng nge a an?" Ka ti leh a, ka nu insut faih ri ka hria "A la dam e, kan ṭha tak tak ania Lili" a ti dam dap a, ka lo bu nghauh, ka nui seih a "Ka hria e nu, ka hria e" ka ti a

"Psalms 23 kha i la hrereng em?" A ti a, ka nui ker ker, ka mittui ka hru leh zeuh a "Hria e" ka ti a

Frantz POV

Ka en reng a, ka thinlung a lo na ve ngawih ngawih. Ka ang chhungah pawm hle hle mai chu ka duh a, mahse Liliana a lawm vak lo maithei

Liliana POV

"A ṭha e, vawng nung tlat ang che" a ti a thil dang sawi ka tum lai takin Carlos aw ka hre leh tlat "In inbiakna chu a ngainatawm viau na in ka dawhtheihna hian a tlin tawh lo" a ti a

"Minute sawmpanga hnuah ka rawn thleng ang, khawngaihin lo tina suh" ka mittui a tling kuang mai, Frantz chu a inhumruh ṭeuh, Carlos a ka ngen ngawih ngawih chu hmuh nuam a ti vak lo aniang

"Ka tiam thei lo che" phone chu a dah daih a, hahdam tumin ka hmai ka khuh. Ka inhnit hlawp hlawp bawk, ka kutin ka mittui ka hru a, ka bang mai thei lo, Frantz chuan rawmawl a rawn phawrh a, min pek a tum a

"Ni love ka ṭha e" lo hnial ka tum a
"Rawmawl hi la mai mai rawh Liliana" hnial zawm theih loh in min hnawn hmak. Ka hamhaih zo vek, rawmawl chu ka la a "ka lawm e" tih pah in ka mittui ka hru a, ka hnar ka tifai bawk

Ka hahdam deuh hnuah Frantz chuan phone a phawrh a Deputy chu a bia a, thil awmzia a hrilh zung zung a, Deputy chuan kan hnaih bera awm Sheriff te chu a hriattir vat a, hotel tualah inhmuh kan remti a

Hotel tual kan thleng chiah ka phone a ri leh a

"Pawnah ka awm e" ka sawi tlang nghal vek
"A ṭha e, inchhawng li na, room 415 ah nangmah in rawn kal ang che. Police leh i bialpa tello in, innghahna pindan ah khan awmtir rawh. I bialpa kha pasalṭha taka chet a rawn tum chuan i chhungte hi ka that ang tih hre rawh" a ti hmuk a

"Ka hrethiam e" call chu ka dah a. Sheriff leh Frantz lam chu ka hawi a "Inchhawng li na ah keimah a kal turin min hrilh a" ka sawi pah in Frantz chu ka melh a, a lo meng rum ngang mai, Sheriff pawh a bang bik lo

"Nangmah te chuan i kal lul lovang" Frantz chuan a rawn sawi ṭan dawn a, ka lo titawp hmak "Keimah a ka kal loh chuan ka chhungte thah ah min vau alawm. Ka tih a ngai" chiang takin ka hrilh a

"A ṭha e, a pawi lo ania, officer te a kaw tawpah leh elevator ah an awm ve zel dawn ania, kan man ngei ang tih ka tiam a che" Sheriff chuan min ṭawng thlamuan a, lu bu nghauh in elevator lam ka pan a, Frantz awmna lam ka hawi tawh lo

Step tin mai chuan kan inkar a hla telh telh ni maiin ka hria, Mr Cavalier nen hian kan inhlat sawt ang mai a ni. Min hmangaih thu min hrilh se ka duh a, kan inhnial te kha a ṭha ka ti lo, ka lo hnial buai te kha a pawi ka ti. Ka lo hnar nasat em avangin ka hmangaih thu hi hrilh na hun pawh ka nei dawn lo anih hi. Ka hlauhna hi paih thla in ka ring mai ngam lo te hi ka inhua, a chhan chu a thusawi kha a ti tak tak niin ka hria

Elevator button ka hmeh lai chuan ka beiseina a bo zo vek, engkim hi a tawp vek aniang

Number kal thla zut zut chu ka en a, elevator chu a rawn hniam thla zel a, a rawn din fel chuan ka thin a phu dup dup. Second tin mai chu a pawimawh vek. Min uai tu hi a rit telh telh, ka thahrui te hi a zawi vek, ka kut a thlan hluam bawk

Elevator a rawn ri rak, ka chil ka lem khawlh, ka thin te hi a phu dup dup. Ka khur der der, kawngka chu a rawn inhawng a, ka lut tur chiah aw ka hria a, ka thin a phu leh dut

"Liliana!" Frantz a'n min rawn au a, ka lam panin a rawn tlan a, ka banah min chelh a, min kuai herin min fawp deuh chawt. Elevator ah chuan min nawr lut a "hold" button chu a hmet a, metal ball chu ka ngheng ran mai. A sam chu ka zut a, a kut vei lam in ka nghawng leh biang a vuan a, a kut ding lamin ka kawng a dawm ve thung

Ka hmuiah a fawp a, ka heh a pet zeuh bawk, thawk ka la halh a, ramhuai ka la hmachhawn tur ka theihnghilh hmin der. Boruak kan tlakchham thlengin kan in chuktuah a, kan in thlah hnu chuan ka chal ah a lu a rawn nghat riai riai

Ka thaw halh a, a awm zawnah ka kut ka nghat a, ka kut ding lam chu la in a thin zawnah a dah ve leh a

Ka mitah tak a en a "Hmeichhe dang chungah hetiang hian ka awm leh ang tih ka ring ngai lo, mahse heta hi ka awm e Liliana Chavez, i duh emaw duh lo emaw thuk takin ka hmangaih che. Hun pe tur che in min hrilh a, mahse eng chen nge a daih ang ka hre lo, ka thinlung chhunga awm hi hrilh ngei che ka duh" a ti a

Ka mit ka chhing vang vang, ka mittui dan ka tum nasa. Dawt sawi ka duh tawh lo, Carlos a'n eng nge a lo tih ang ka chiang tlat lo

"Frantz" ka thaw halh a, ka mittui a rawn tla ṭiam ṭiam, thu tiam thei ka ni lo tih ka hria, engmah sawi lovin ka han fawp leh ngawih ngawih. Frantz chuan a mit a chhing a, a mittui leh ka mittui chu a intawk chat, ka awm zawnah a far fup. Engmah ka sawi loh avang chuan a thinlung chu a na ve vawng vawng

Ka kalsawn a, a hmuiah ka fawp leh zeuh, thawk ka la halh a, aw khur deuh der der in "ka thei lo" ka ti a

"I thei lo tih ka hria, mahse ka lo nghak tho ang che" a rawn phun sup a, a mittui chu a hru a, button chu a hmet a, engmah sawi lovin inchhawng li na a hmet a, ngawi rengin a chhuak a, min rawn melh zeuh bawk

Elevator ah keimah a ka awm hnu in ka thaw halh a, ka insiam ṭha mawlh mawlh

Number chho zel chu ka en a, psalms 23 na ka sawi chho mawlh mawlh bawk. Ka hmui chu ka khawih leh veng veng, ka nui seih. Elevator chu a rawn ri rak, ka tum ram ka thleng tih ka hre mai. Room 415 na lam ka pan lai pawhin Bible thu chu ka chham mawlh mawlh

Room pawnah chuan ka ding a, thawk ka la halh. Kawngka hawng ta ila eng nge ka hmuh ang tih mawlh chuan ka rilru a kam, mahse ka chhungte chu him takin rawn chhuak se ka duh si a, chu chu a pawimawh ber

Ka hnar khu chhuah a, ka ban chu la kang in kawngka chu ka kik a, second reilote hnuah a rawn hawng a, Carlos chu silai vei lama keng chungin a lo nui ver ver, fimkhur takin ka en a, luh chu ka tum miah lo

"Lo lut rawh" Carlos chuan nelawm tak leh zaidam hmel tak hian min bia a, a mizia diktak hre lo ila chu a thutak emaw ka la ti ngei ang

Hotel room ah ka lut chiah, ka nu leh pa te chu ṭhithmun ah an lo ding reng. An awmna lam pan ka tum a, mahse Carlos a'n min lo hmer vak, min pawt let sawk "Ni love, ni love, anni tan i rawn kal hleinem, ka tan i lo kal zawk alawm. Pu leh Pi Chavez nupa te u, i fanu lo thlen theih nan in lo awm ve ṭang ṭang avangin ka lawm e, mahse pawi in tih loh chuan a fala biak ka duh tlat khawngaihin" a ti a

Ka nu chuan a melh hrawk a, ka mitah chuan rawn en leh in lungngai deuhin a bu nghat in ka pa kutah a kai a, kawngka lam an pan a, ka bul hnai an rawn thlenin ka nu chu a insum thei tawh lo. Ka lu ka thing a, ṭawng thlamuan in "A pawi lo, ka ṭha mai ang" ka ti a

Lu bu nghauh in min kal pel a, hall an thleng chiah tih in Carlos chuan kawngka a kalh a, min nam dawrh a, thinrim deuhin ka inher sawk, Carlos beih ka tum a, a silai chuan min tin ran mai

Frantz POV

Elevator chu a rawn ri rak a, nupa te hi an rawn chhuak a, Liliana nu leh pa an ni ngei ang, a chhan pawh hmeichhia zawk chu Liliana nen an inang lutuk

"Mrs Chavez, Mr Cavalier ka nia, phone ah kan inbiak tawh kha" ka in hmelhriattir zung zung a, Lili nu chuan min rawn chibai a, a pa pawh in min rawn chibai bawk

"Kha mi sual khan ka fanu a man" Sheriff a hmuh veleh Lili nu chuan a sawi zung zung

"Kan hrethiam alawm ka pi, mahse chiang taka kan sawi theih chu building hi a chhuahsan dawn lo tih hi a ni" Sheriff chu a rawn ṭawng a, a awm leh a belt chu a siam ṭha mawlh mawlh, thu a nei tih a hriat hle bawk

"Building chhuahsan pui a tum hleinem, pawngsual a, thah a tum alawm" Mrs Chavez i'n a rawn tih chuan ka sa nghal phat

"Ka pi, chu chu a thleng ngei ang tih kan hre hlawm hleinem" Sheriff chuan a hrilhfiah a

"Anih chuan silai puak ri nghah kher in tum tihna em ni?" Mrs Chavez chuan a ti leh a

"Dan ka zawm mai a ni, i fanu chu engtin mah a awm lovang tih ka tiam a che" Sheriff chuan a ti sam leh et a, officer te chu Liliana nu leh pa kalsawn tir turin a hrilh a, chutia an buai vel lai tak chuan Armagio chu ka zaizir a, silai chu pe ru zeuh in officer te hmuh loh ah inchhawng li na chu kan pan a

Liliana POV

Bedroom ah kal rawh" thu min pek pahin silai chuan min la tin reng

Metal chang tak maiin min tin run takah chuan bedroom lam chu ka pan a, ka lu ah ka kut ka la nghat reng. Hmanrua a awm em tih ngaihtuah ran chungin ka hawi kual zak zak. Vase chu table chungah a lo awm a, Carlos chuan ka ngaihtuahna hria ni awm tak hian min vau leh a "Ngaihtuah duh suh" a ti a

Min nam leh a, khumah chuan ka tlu a, ka tho chhuak leh nghal vat. Kawngka chu a khar a, a kalh sawk sawk. Min la tin reng. A ngaih a ṭha ta aniang, ka lamah a rawn kal a, ka khur nasa lutuk

Tihluihna a sex hman luihtir tura ka inngaihtuah hian ka ṭim uaih uaih mai. A hma khan ka lo ring ve em em a, mahse ka rinna a tichhe chiang hle a ni. Chhuahna tur dang ka hre mai tawh lo, ka ngen tawp a

"Carlos khawngaihin, ti lo hram rawh" ka inhnit hlawp hlawp, min beng chawrh a, ka biang pawh a thip vung vung

"Ṭawng turin ka ti che em ni?" Min kal pel a, ka biang chu ka dawm vang vang

Carlos chu khumah a rawn ṭhu a, a ke kar suah in min rawn en a, ka biang sen tak leh ka mittui tla te chu min nuihsawh hmel takzet

Carlos chu a rawn nui a, thawk ka la phawt a, ka melh reng

A kekawr chu a zip thla a, min rawn ko in "Hmeichhe fel tak angin helaiah rawn kal mai ta che" a ti a

"Carlos" ka ti a

"Ni love, ni love, silai ka nei ania, ka hmang hreh miah lo ania, ka sawi nawn tawh dawn lo Liliana, lo kal vat rawh" Carlos chuan thupe deuhin min au a, a nui hmel pawh a bo vek

Frantz POV

Inchhawng li na kan thleng chiah, Room 415 na chu ka zawng nghal a, ka vanneih a siam in hnathawk ka hmu hlauh. Inbiakremna ka neih pui a, dollar za ka pe a, chabi ka nei thei hlauh. Kawngka chu ka hawng a, ngawi rengin ka lut zal zal. Liliana au ri ka hre chiah, bedroom lam ka pan nghal a, Carlos chuan Liliana silai in a lo tin run mai

"I lo lan hun tur hi ka lo chang reng asin. Liliana chetla lai hmuhtir che i duh em?" Carlos a ṭawng dan chu rei tak inkawm tawh ang maiin min bia a ni

"Duh lo" an pahnih chuan ka entawn zak zak a, Carlos a lu zawnah tak silai in ka tin ran mai

"A va pawi ve, hmuhnawm i ti dawn asin" Carlos chuan pangngai deuhin Liliana lam a hawi a, a nghawngah a liak hlup a, Liliana chuan a ten hmel ngei mai

Ka en reng a, ṭawng mood ah ka cheng hlawl lo

Liliana POV

"Liliana, ka rawn zaizir veleh che i lu vei lamah thle rawh aw?" Frantz a'n a rawn tih chuan ka bu rang lutuk, Carlos a hlatah hian a rang thei ang bera awm vat ka duh

Carlos chu a khi suk a, min rawn tin na lehzual "Pasalṭha nih tum lo mai teh, inremna siam ang hmiang. A pawnfen hnuaia a thuhruk ziah hi min tem tir la ka kaltir ang" a ti a

"Psalms 23" Frantz a'n a rawn tih chuan rang lutuk in Carlos chu ka seh a, min thlah dul veleh, ka biru a, chu veleh Mr Cavalier chuan Carlos a chal padar ah tak a kap siah a

Khumah chuan a taksa chu a tlu thlawp, Frantz chu ka va pawm nghal chawt, a awmah chuan ka ṭap zawih zawih. Min rawn kuah nghal a. Reilote ah Sheriff leh a team te chu an thleng ve nghal. Frantz chuan min la kuah reng a "Bedroom ah min va hmu mai ang" a ti a

"Mahse-" Sheriff chuan hnial a tum a "Hriat duh in neih chuan ka lawyer in be thei ang" tih pahin elevator min pan thlak pui a, ngawi rengin ka chhungte bul min hruai thleng a

Ka nu ka hmu chiah chu ka va tlan nghal a, kan inkuah deuh thlawp, ka pa pawhin min rawn kuah dun a, kan ṭap in kan nui bawk. Ka nu chuan ka sam a chul hliau hliau a, kan awmna aṭanga hla vak lo a Frantz ding chu a en reng a, a nui seih

Kan inkuah zawh hnu chuan ka nu chuan a mittui a hru a, keipawh ka nui leh thei tawh. Frantz a bulah a va kal a, a va kuah a

Frantz chuan lai deuhin a lo kuah let ve a, min rawn en chuan ka lo nui sen sen

"Ka lawm e" a ti a, ka pa pawhin "Ka lawm e" tih pahin a chibai a

Lu bu nghauh in Frantz chuan nui chungin a chibai let a

Lawmthu kan inhrilh a, kan inkuah hnu chuan ka nu chuan ngui takin min hmachhawn a "I let leh a ngai dawn si a" a ti a, ka lu ka lo thing vat "Ka let vat a ngai hleinem" ka ti a

"Ka hotel ah i duh chen chen i cham dawn nia" Frantz chuan a rawn ti vat, kan chhungkua chuan min ṭhawng vek hlawm

"A chi lovang" nui chungin ka lo hnial a
"Dik taka sawi chuan i pa nen hian zin chhuah kan tum a, a lawmawm ngawt ang chu" ka nu i'n a rawn ti zung zung a

"A lawmawm e" Frantz a'n a ti a, car chu min kawhhmuh a, Armagio chuan Frantz a hotel ah chuan min hruai dial a

Car a kan chuan chhung zawng, tu man engmah kan sawi lo, kan inmelh tawn zak zak chu ka nu i'n a lo hmuh hmaih lo nasa

Hotel kan thlen chuan Frantz a'n mikhual room ah min hruai a, hahdam taka awm tura min hrilh hnuah a room lam min pansan a tum a

Kawngka a thleng chiah tihin ka nu chuan a lo ko a "Tlaiah chaw min rawn kilpui ta che rem i tih chuan Italian ka lo order ang" a ti a. A thusawi avang chuan ka tui in lai ka hak lo chauh. Frantz chu a nui suk a "Ka lawm lutuk e" a ti a

****

Chhunzawm tur

Psalm 23
"Lalpa chu mi vêngtu a ni a;
Ka tlachham lovang
Ani chuan hlobet hring dup hmunahte mi bawhtîr ṭhîn a;
Chawlhna tui kamahte mi hruai ṭhîn
Ka nunna hi mi siam ṭhat ṭhîn a,
Ama hming avângin felna kawngah te mi hruai ṭhîn
A ni, thihna hlim kawr ruam zawh mah ila,
Thil ṭha lo rêng rêng ka hlau lo vang;
Nang ka hnenah i awm si a;
I talhtum leh i tiangin mi thlamuan ṭhîn a ni
Mi dotute mit hmuhah ka hmaah hian dawhkân i buatsaih ṭhîn a;
Ka lû hi hriak i thih tawh a;
Ka novah hian a liam reng a
Matheilovin ṭhatna leh ngilneihnain ka dam chhung zawng hian mi zui zêl ang a;
Tichuan, Lalpa inah kumkhuain ka awm reng ang

Chhiartu zawng zawng te He Bible thu hi ka rawn tel hram a, in lo hlawk pui ve ngei ka beisei
****


Show post links
Top

[Ngaia]

Liliana POV

Mr Cavalier a'n min chhuahsan hnu chuan ka nu lam ka hawi a "Tinge tlai chaw ei tura i sawm?" Ka ti phawng a, ka nu i'n a mitko a san ak ah chuan inthiamlo takin hnuai lam ka melh a "Tihtur dang pawimawh a nei mai thei a" ka insawi thiam leh hnuhnawh a

"Nei se chu, min hnial daih ang chu. Min puih avangin lawmthu sawi nan ka sawm anih kha, a bak a awm lo" ka nu i'n rinhlelh hmel deuh chuan min rawn en a "Tinge a bula awm hi i duh lo tlata ka hriat le? Min zawt leh a, nuam ka ti lo khawp mai

"Ni love....ka" ka ṭawng bah nuai

"I duh a, mahse i thinlung a nat a, i chak loh i hlau tiro?" Ka nu chuan min rawn ti tawp hmak, ka dar ka ti hniam a "Chutiang vel chu a ni" ka ti a

"I nawr sawn nasat pauh leh a zunah i uai ting a, a hlata i awm hian i duh loh phah chuang lo tihna a nih chu" ka nu i'n a tih leh hnu chuan ka ngawi daih. Eng nge sawi tur dang ka neih tawh? Ka nu hian a sawi dik chiah a ni. Ka nu chu a khi sak a, ka biang rawn dawm in "Va in tifai rawh, tlai ei tur ka lo chah ang e" a ti a

Ka nui ve mai a, bathroom hnai berah chuan ka lut a. Darthlalang a ka inen chiah chu ka hmai vei lam duk churh chu ka hmu a, zawi te in ka tifai a. Ka hmui ka khawih chuan ka lai lutuk chu ka nui ver ver. Thaw hak in ka mit ka chhing a, ka mittui a rawn tla sep

Mr Cavalier a'n min hmangaih a, ngaihtuah dan pawh ka thiam lo

Ka thu hriat vang chuan ka lawm viau a, mahse ka hlauhna ngai bawk kha a rawn chhuak leh ṭhin, engvanga hetia awm tlat nge ka nih le?

Ka lu ka thing a, ngaihtuah nasat vak loh ka tum. Ka mittui chu hru in ka kut ka sil fai a, tui vawt in ka hmai ka phih bawk. Ka in tihfel hnu chuan ka chhungte ṭhutna ah hlim taka an titi bawrh bawrh chu ka hmu a, ka nui ve ver ver, ka nu leh pate inhmangaihna ang hi tawn ve ka chak ṭhin khawp mai

Kawngki kik ri kan hriat chuan ka hawn tur thu ka hrilh a, ka va hawn chuan Hotel restaurant a Chef chu ei tur chi hrang hrang kengin a lo ding reng. Ka hawng zau leh deuh a, ei tur chu dawhkan a a dah hnu in "Ei tui u" tih leh chhuah a rual a

"Liliana, Mr Cavalier kha phone la kan inpeih tawh tih hrilh rawh" ka nu i'n a ti a, lo bu nghauh in phone hnai ber awmna ka va pan a, Desk lo nghak tu chu Mr Cavalier room a phone min pawh sak turin ka dil a. Phone a rawn lak hun ka nghah chhungin ka thin a phu dep dep, phengphehlep te hi an thlawk sup sup in ka hria, "Hello?" A rawn ti chiah phei chu ka ṭek chhuai mai

"Hi" ka ti mawl tawp, "Hello" dam deuhin a rawn ti leh a, a hmel awmdan ka mitthla ah a lo lang

"Ka nu i'n ei tur a peih tawh a, i nu ni lovin ka nu i'n.....i nu a ni lo tih chu a chiang a, nu chu i nei ve ngei ang a, i hmangaih hle bawk ang, ka nu chu ka nu ania tunah hian ka ṭawng bah nuai anih hi, mahse kan hman tawh tih ka hrilh duh che" ka ti chhuak thei hram

"Liliana" Frantz chuan min rawn au nawn leh a "Eng nge ni a?" Ka ti a, ka aw te chu ka bengah hian a hla telh telh

"Khawngaihin i nu hnenah khan minute reilote ah ka rawn thleng ang tih lo hrilh rawh" a ti a

"Awle" chil lem khawlh in phone chu ka dah a, ka chhip aṭanga ka ke ler thleng chuan phurna mak tak mai hian min rawn tuam hlup a, hriat loh chuan ka nui ver ver, Frantz kan rualin thil a ei ve dawn tih ka hriat chuan ka hlim veng veng

Mr Cavalier pawh a rawn thleng nghal chawpchilh. Tshirt var leh jeans dum lampang a ha a, a chhelo takzet. A inbual zo chiah tih hriat deuhin a sam a huh chiap a, a shampoo rim chu ka hman tawh ngei kha a ni, a perfume rim chuan ngaihtuahna ṭha lo deuh min neih tir, ka nu chuan hria se chu a lawm miah lovang

Frantz chuan wine bottle kengin ka nu a pe a, ka nu kut hnung lam a fawp zeuh a, a nui ker ker a, ka pa pawhin engah vak a ngai lo aniang, Frantz chu a chibai a

"Hello" min rawn ti ve sup a, "Tlai chibai le" ka ti let a

Ka nu chuan kan inbiak dan chu nuam a lo tih hmel lutuk ka meng kual rulh a, dawhkan chu kan kil ho ta a, kan in hmachhawn thei vek. Ka nu te chu an inhmatawn a, kei leh Mr Cavalier kan in hmachhawn ve thung. Kan inmelh fuh zeuh zeuh, ngaihtuahna ṭha lo ka nei leh dawn tlat. Biakin a kal ka mamawh anih hi

Tlai chaw pawh pangngai deuhin kan kil ho a, ka chhungte leh Frantz chu an titi tui khawp mai. A bula awm nuam an ti viau aniang. A hawihhawm in, a in hmuam up lo. Kan mit a intawn dawn pawhin a hawisawn zel, kaikuang kan leh garlic bread ka lo ei puk puk lai chuan a rawn hawi a, a nui suk zel. Ka lai lutuk ringawt. Ka thil ei lai hi a mawi vak lo alawm, chu vang aniang a rawn hawi zel ṭhin

Kan ei zawh hnu chuan Frantz chuan ka nu thleng a seng pui a, chumi hnuah ka pa nen inkhel an en dun leh a, an ṭan lam a inang lo a ni maithei a ni

Wine chu glass ah ka keng a, bathlar a kawtthler chu ka en reng a, zawi muangin wine chu ka in a, zan boruak chu a nuam khawp mai, Frantz a sam dum leh jeans chuan ka rilru a luah khat reng

Ka nu chu pawnah a rawn chhuak ve a, a tirah chuan engmah a sawi lo, mahse reilote ah min zilh dawn tih ka hre mai

"Mipa fel tak niin ka hria" a ti a, ka nui ve tawp. Ka nu hi chu a point takah a lut chat zel

"I hre hleinem nu" ka luhlul ka chhuah leh a, tihngaihna ka awm ngang lo anih hi

"I hria tihna maw?" Ka nu chuan min zawt let a, ka chhan leh hma in thawk ka la halh a

"Kan thawk dun a...." a rawn sawi zawm ringin ka tawp det a, a ngawih reng hnu chuan ka sawi chhunzawm leh a "Ka hmaah ngei mutpui min sawm a, kha mi hnu kha chuan a chetdan hi ka ringhlel zo vek tawh" ka ti chhuak vek a

Liliana nu POV

Ka ngawi reng a, Liliana thu min hrilh chu ka ngaihtuah neuh neuh a, Frantz a'n Carlos lak aṭanga a chhan khan a tihtak zia ka hmu thei, amah te in a va chhan ania, tu mipa mah in chutianga thui chuan an kal duh lovang. Kan hmuh theih aia nasa hi a awm ngei ang .Ka fanu hi ka hriatthiam tir ngei a ngai dawn a ni

Liliana POV

"Lili bawihte, kan vawikhat hmuhna a kan tawn te hi a rintlak vek kher lo ania" ka nu i'n min zilh ṭan a, ka lu thing in ka hawisawn a "Kan ṭan leh dawn ta e, kan inngaihzawn i duh a ni tiro?" Ka ti a

"Hlim turin ka duh che, ben fawk che a ngaih pawhin chhia leh ṭha hriatna i hmanna tur anih phawt chuan ka ti hreh miah lo. A tum chu ka hre lo a, mahse hla deuh aṭang pawhin mipa hmangaihna a luangliam a ni tih ka hmu thei. Frantz hi mi ṭha lutuk anih hi, sum lam zawngin ka ti lo ania. In inkar ah hian engemaw chu a awm chiang alawm. Ngaihtuah ang che. I duh loh chu ka nawr lui thei lo che, ka fanu i ni a, ka thurawn che hi i ngaih hlut hram ka beisei" a ti a

Ka hnual rawih, ka nu thurawn hi a pawimawh tih ka hria alawm. Ka chhungte thusawi hlut lo em em a puitling lo chu ka ni bik lo asin. Ka chhan leh hma chuan min kalsan daih a

Keimah te chuan ka lo in ngaihtuah leh a, ka nu i'n Frantz chu a thlah a, ka chhungte chu lawmthu a hrilh bawk a

Frantz POV

Ka room ka thlen chuan Liliana ka hlat aṭang khan ka rilru put dan diktak ka hrilh a, a hre tawh bawk a, a duhthlanna ah a innghat tawh ang. A hmuh ah ka inlan reng a ngaiin ka hre lo. Min duh chuan min hrilh ve mai ang chu. Zam tak chuan ka nghak dawn lo re re, a chhan chu ka rinna leh beiseina hi a lian ve tlat

Liliana hian thutak deuh ah min ngai lo ang tih ka hlau. Hmangaihtu dang te hi a zawng mai ang a, ka thinlung hi Christina i'n a hmaa a tihnat ang bawk khan a na ve leh ang tih chu ka hlau mahse Liliana hi chuan ka rilru a hneh ve a ni

Min thlang lo ta se eng nge ka tih tak ang? A hma ang khan lerh deuhin hmeichhia ka kawp leh dawn em ni? Nge hna lam ringawt ah ka rilru ka pe dawn? Anih loh pawh in mi pangngai takin hun ka hmang daih dawn em maw ni? Ka nghah leh phawt a ngai dawn anih hi

Liliana POV

Wine ka in zawh chuan in chhungah ka lut a, ka nu te'n min mutsan daih a. Tihtur hre mai lo chuan ka kal kual a, Frantz biak ka chak zek zek bawk. A hma lama a thu min hrilh kha ka va biak leh a ngaiin ka hria. Ka hlauhna hi ka hneh ngei a ngai bawk. Frantz bula ka awm dawn chuan sawi ngei ngei tur ka nei tlat. A pakhatna ah chuan inneih zungbun ka bun hma loh chuan ka mutpui lovang. Chu chu a hriat ve ngei a ngai. A dang chu kan inngaihzawn hunah a ni tawh mai. Ka rilru a insual char char hnu chuan inchhawng chung ber Mr Cavalier awmna lam chu ka pan chho a

Frantz chuan kawngka a rawn hawng a, jogger pant a ha a, a inhmeh khawp mai. Ka lo ding reng a hmuh chuan a phu zawk mai. Kawr a lo la ha si lova, a pian nalh tak mai chu ka en reng

Ka biang a sa nghal hut hut ka aw ka thian kharh a "Ka lo lut thei ang em?" Ka ti thei ta hram

"Tehreng mai" a tawlh sawn a, ka lut ve ta mai

Kawngka a rawn khar a, ka lam a rawn hawi a, ka kut ka lo khal niap niap, zam deuh takin ka thaw hak a, engvanga chutianga awm chu nge ka nih a hre lo nan zangkhai takin min lo dawngsawng a "Ṭhut i duh em?" A ti a

"Aih" ka lu ka thing a, ka thaw halh a, ka dar te pawh a hahdam leh deuh

Ka aw ka thian a, Frantz a mitah tak ka en, ka rilru a insual leh ta, tlanbo leh daih mai ka duh a, ka thinlung erawh in a neitu bula lungmuang taka awm chu a duh tawh. Zam deuh in ka ding reng

Frantz POV

Ka lo en reng a, a rilru a insual buai tih ka hre ve deuh. Inhneh tum te pawh a ang mah zawk, min hre chhuak thut ang mai hian a hawisawn a, a heh pet in a kut a khawih niap niap a, Min bia ang nge a awm ang tih ah a inhnial chiang. Ka harh ve thut, ka thusawi tawh ngei ka ṭhiah leh a ngai dawn anih hi. Liliana hian engmah tih a tum hmel si lova

Liliana POV

Hetianga engmah ti thei lova awm hi ka hua, ka thluak chuan kal bo turin min hrilh a, mahse ka thinlung in min hneh tlat, chance chu la in Frantz chu ka en leh a, ka lu thing in "Ngaihdan ṭha lo tak a ni, heta lo kal tur hi ka ni lo, ka tihpalh" chu thu ka sawi zawh chuan tlan chhuah leh ka tum a, mahse Frantz chuan min lo dang a, thinrim deuh hian min melh a "Eng nge i duh Liliana?" Ka ti a

Rilru buai deuh tak hian "Ka hre lo" ka ti a
"Ka awih lo che" a rawn ti ve zat. Ka ner sawk a "Eng nge? Ka rilru pawh i hre thei tawh em ni?" Ka kalsawn leh deuh a, ka kuangkuah a "Min kaltir rawh" ka ti a

"I duh min hrilh phawt loh chuan. Rome ang chiah khan chhan awm lo in i rawn kal leh ṭhin a, ka ning tawh. Engkim ti thei ang mai hian i awm a, ka dawhthei tawh bik lo ania Liliana" a ti a, ka hawi sawn leh daih

"I ti thei lovang" huaisen taka lan ka tum a

"Awle han tum chhin la, ka tih theih loh tur chu han sawi ta che, zankhuain hun a awm alawm" Frantz chuan a rawn ti leh hmak, a aw pawh a nghet ṭha in min cho zak mai.

Frantz POV

Infiam hi ka ning tawh. Engtin nge ka hmangaih tih hi ka lantir theih ang?

Rawva tak ang khan ka lang ṭhin a, dam deuh zawk in ka awm ta a, Liliana i zah theih turin fimkhur takin ka che a, mahse chu chu a duhdan a ni lo aniang a?

"Inbiakna kan nei lovang" a lu a thing a, ka harh chhuak zawt. Thawk ka la ham ham a, ka mit ka chhing daih ka men leh hnu chuan "Eng nge i duh Liliana?" Ka kut kuangkuah in ka melh reng a, a chil a lem khulh, a kut a thlan deuh bawk a "Kha thu kha min zawt tawh suh" a hmui a tipawrh a

Ka mitko ka san a "Eng nge i duh Liliana?" Ka ti leh a
"Engmah" a ti a
"ENG NGE I DUH?" chiang lehzual in ka zawt a, kan inhnaih tawh khawp mai. A rawn hawi chho a, a rilru ngheh loh zia a hmuh thei ruak mai

"Frantz" min ko leh a
"Ka lak aṭang hian eng nge i duh? Lili" ka nawr leh a, a ka aṭang ngei hian ka hriat a ngai tlat, ka tihluih ngai dawn mahse pawi ka ti lo. "I hnaih a ka awm i duh lova, chhuahpui min duh bawk si lo. Mahse i lo lang leh thut zel bawk si, i duh hi ka hre thei lo a ni e" ka ti a

Liliana POV

Ka mit ka chhing vang vang a, ka men fiah leh kawk hnu chuan "Eng nge ka duh maw? Mipa diktak angin awm la ka duh, sex vang chauh ni lo in, keimah ka nih vang tawp hian min hmangaih la ka duh. Min fawp la, khawvel thil dang hi min theihnghilh tir daih rawh mahse dan bawhchhe si lovin i thutiam ah ding rawh. Min hmangaih a nih chuan i fiah a ngai" ka ti a, a lu thing in a mit a khap fuk ringawt

Frantz POV

Chu zawng chu maw? Ka awih thei lo hial mai. A thusawi chu thang a ang zawk mah. Min fiah te pawh a ni maithei. Liliana hi tun ṭum chu ka chhuahtir miah lovang. Lehkhabu a tactic chi hrang hrang min ṭawng tir theih nan a hmang vel anih hi

Ka lu thing in ka hnar chu ka piai a, ceiling lam chu en in hah deuh takin ka kut ka nuai

"Ka tihpalh Lili, mahse hei hi chu a hma pawh khan min beidawn tir tawh. Thutak deuhin min la lo tih kha i lan chiantir tawh, inngaihzawn pawh i duh lo" chiang fek fawk in ka chhang a, ka thinrim pawh a ni lo.

Liliana POV

Ka lu ka thing a "En la, kha chiah kha alawm ka sawi chu. I insawi anga Boss i nih takzet chuan tunah pawh hian i hun ṭha neih hi i bawhpelh miah lovang. Kawngka aṭanga ka chhuak tur engtin nge min dan ang?" Ka cho let leh zak, a chhan chu Frantz hian engmah tih a tum lo ni a ka ngaih vang a ni

A la inthup deuh tih ka hre mai, engvang nge tih ka hre duh. Chuvanga nawr pawh ka ni reng a, Frantz a mizia zawng zawng hi hriat vek ka duh. Mahse chulai a thlen hma chuan a duhtawk zel anih hi

Frantz POV

Ka hmaa hmeichhe sam dum ding hi ka en reng a. Thla khat chhung nuam lo takin ka awm phah a nih kha, a chungah thunei taka awm ka duh loh vangin, hei tunah erawh amah zawkin min cho chhuak a. Nem tak leh derthawng taka ka ngaih vang a ni, Liliana erawh a letling chiah a lo nih hi

Ka hmui leh ka khabe chu ka tuai zeuh a, Liliana chu en lehin ka lu ka thing a "I duh hi i hre lo a ni Liliana" ka ti a. Liliana chu a thaw sap a, tho thurh in kawngka lam a pan a "Ka hria alawm, hun khawhral na mai a ni" a ti a

Liliana POV

Kawngka chu ka hawng chiah tih in Frantz a kut lian deuh chuan min lo dang a, kan taksa a indai chiah chuan ka ding khawng reng a, ka vun zawnah chuan a rawn thaw sek sek a, ka hmulthi a ding sung sung. A thin a phu rang ve hle in ka hria fimkhur takin a rawn ṭawng a "Min nawr reng a, i kalbo lehzel thei lovang" a ti a

Ka hming a lam dan chuan huaisen anga ka lanna hi ni in vur a chhun ang hian a ti tui vek. "Kawngka aṭang khan tawlh sawn la ṭhutthleng ah sawn va ṭhu ta che" thu pe deuhin min hrilh a, ka chhan dan tur a lo nghak reng

"Tihtur min hrilh thei ngawt lovang" ka khur beuh beuh a, a duh chu a hmu tho anih hmel

"Heta hi ka awm a, i thu ngeiin i ṭhu dawn nge ka ṭhuttir zawk dawn che. A hnuhnung zawk kha chu i duh ka ring lo" dam diai in min chhang a

Ngawi rengin ka hnar in ka thaw leh hak a, kalsawn leh ka tum thei alawm mahse ka ban a vawnna chuan min cho tlat. A thu chu ka zawm leh ta zawk a, kawngka aṭang chuan kal sawn in ṭhutna lamah thuawih takin ka ṭhu ta zawk a, Frantz chuan min en reng tih ka hria

Kawngka chu nghengin a kut a kuangkuah a, engmah a sawi lo, a mit chuan thu a sawi zawk a ni mai e

Kan ngawi rei dun lutuk chuan min ti chiai vek. Tinge min en reng le? Tinge engmah a sawi loh?

Ka dar ah hian sai a ṭhu ang mai a ni, ka rit deuh nulh. Chil lem leh khawlh in ka hawisawn a, a lam ka hawi apiangin pangngai takin a lo awm zel. Phengphehlep te hi an rawn thlawk leh nuai nuai tawh. Ka thin pawh a phu leh nasa viau mai

Kawngka aṭang chuan a rawn kal phei a, ka lo zuang tho zawt. A rawn hmu lo der a, ka hmaa a rawn ṭhu hmak. A kiu chu a khup ah a nghat a, min en chiang leh viau mai

Frantz POV

Nuam lo deuhin ka siam a, ka thinlung hi infiamnan ka hmantir tawh dawn lo hrim hrim

Phalna min pe bawk a, ka duh angin ka chet mai a ngai

Chiang lo deuha ka awmtir hnuah thawk ka la halh a, a rilru ka la chiang alawm. Engtiang chiah in nge ka hneh theih ka hriat a ngai

"I nu kha a ngainatawm khawp mai" ka tih chuan a hriatthiam loh hmel takzet. A khap fuk a, a lo ring lo lutuk aniang. Min chhan hreh hmel angreng, ka mitko ka san a, a lu a bu nghah "Ania lawm..." a ti a

Ka nui leh suk a, min chhan vangin ka bu nghauh bawk. Ka ṭhawng leh thut a "Ka fawp thei che ang em?" Ka ti a

Liliana POV

Ka nghilh nghal dup mai

"A...ka...ka hre lo" ka ṭawng bah nuai, Frantz chuan a rawn sawi chiang leh a "Aw leh Aih tih chhanna mai a ni. Ka kiss thei che ang em?" A ti a

"Aw....uh..." ka ti zuzi nuaih a, ka dang a ro zo vek. Dawhkan ah chuan a rawn ṭhu ṭha leh a, kan inhnaih khawp mai

Min rawn en a, a kut vei lam in ka ke a rawn zut a, ka sa nghal hut hut, ka mar nghal ṭun mai

A mit chuan a kut chu a zui zel a, ka khup leh chawn te chu dam diai in a khawih a, ka thaw dep dep. Kan kut chu suihzawm in a ke ah chuan ka nghat a

Kan kut kan insuihzawm chiah chu a nui nghal ver ver. Zawi muangin ka mit ka khap a, oxygen chu ka thaw chhuak hawk, ka kâ ka ang deuh bawk

A hmui hnuai lam chu a liak zeuh a, a rawn thaw ve ham ham a

"Lo kal teh" a ti a, a lam ka hnaih hma in chil ka lem leh khawlh. Frantz chuan a kut la sawn in ka dar leh ka nghawng chu a rawn chul leh a, a hnuah ka biang vung bur chu dim tein a chul leh a. Dawhkan hmawr ah chuan rawn tawlh leh in ka biangah chuan a chuk zeuh a, a chet dan chuan ka na zawng zawng hi a thawi dam vek maiin ka hria. Ka chhip aṭanga ka ke ler thleng chuan ka sa chhuak vek, ka hmeichhiatna hi a rawn let leh ni maiin ka hria

Frantz chuan ka hmui leh nghawng a thawi fua a, ka thaw chhuak hawk. Ka nghawng te chu a nghawr dar dar in ka hria, a lungawi hmel viau mai. Ka dar leh beng inkarah chuan a zut phei a rawn phun sup in "Ka fawp tawh dawn che ania" a ti a, ka lo bu leh nghauh a "Awle" ka ti sap a

Ka hmui a rawn chuktuah a, kan hnar khu chhuah hak, min rawn en leh a, a hmui liak leh zeuh in a aia nasa chuan min rawn fawp leh a, a kut zungpui in ka hmui leh khabe a khawih a, ka thaw chhuak leh hak

Ka hmui chu a rawn pet leh zeuh a, a hawi sawn leh deuh a, min hip chiang alawm. Ka biang chu a dawm a, ka thu ngawt chuan ka fawp ve thei tlat lo

Frantz POV

A rilru ka nei chiang tawh tih ka hriat chuan ka chian lehzual a ngai tlat

"Control che ka tum lo ania Liliana. Inzawmna min neihpui ngam lo khawpa puitling lo i intih chuan kan hun ve ve hi i khawhral tih i hre dawn nia" ka ti a

Liliana POV

Chu thu a sawi zawh chuan a kalsawn leh daih a, min ti hrilhhai in, ka sa pup pup, ka rilru la buai deuh mahse ka duh chu ka hrechiang viau tawh

****

Chhunzawm tur


Show post links
Top

[Ngaia]

Liliana POV

A ti leh ta

He mihring fapa hian a ti leh ta

Mi mawl ang maiin min chei a, ka phal sak bawk anih hi

Ka mit ka khap fuk a, ka dang a ro vek, Frantz hian ka nunah nghawng a la nei nasa hle anih hi. Puitling lo te kha min ti a, ka ngeng a chhun sak mai. Ka hmui ti pawrh in ka lu ka thing a

Puitling lo chu ka ni bik lo asin ka rilru ka siam thei lo mai chauh ania, ka puitling lutuk ringawt

Ka lan chhuah tir ngei a ngai anih hi

Ka ding hluai a, ka va umzui a "I thei lovang" ka ti a

"Eng chu?" A rawn hawi zeuh a, room lam a pan a, min hmuh chuan a khi suk

"Khatia min fiam hnu a engmah thleng lo ang maia awm leh daih ang kha" ka ti chhuak a, umphak ngei tumin ka kal chak lehzual sauh

Frantz POV

Room ka thlen hma lo chuan chhan ka tum lem lo. Kawngka biangah chuan ka ding a, ka kiang a rawn thlen dawn chuan Liliana chu a hah hmel tawh hle, ka lo en reng a, a beng bulah zuk kun hniam in "Ka ti chiah" ka ti a

Chimawm deuhin ka nui a, ka siai zeuh bawk. Khum awmna ka pan a, ka kut khamin ka tlu zal a, Liliana chu a ding reng a, a hrilhhai hmel takzet

A hmel landan ka hmuh chuan ka khi leh suk, ngaihna hre lo deuha awmtir hi a nuam ve alawm, a meng zau kawk kawk zel te hi a lawmawm tawp, a khap leh fuk fuk a

Liliana POV

A perfume rim chu ka hnar ah a la cham reng. Eng nge ngaihtuah tur ber pawh ka hre tawh lo. Kan inkara thil thleng chu ka ngaihtuah neuh neuh

Ka harhchhuak leh thut, min fiam leh ngei anih hi. Ka kut ka kuangkuah a, inhnial kan ṭan leh dawn ta "Khatiang khan i ti tur a ni lo, enghelh nei lo in min kalsan thei lovang" kawngka biang ah chuan ka ding a, ka ning tawh viau a ni

"Tunah chuan ka rilru awmang tur i hrethiam tawh ang chu" a ti a, ka hmel a nur nghal khup "Min rulh let i tum tihna em ni?" Ka ti a

"Ni love, infiamna duhtawk turin leh i rilru i siam peih theih nan zawk a ni. Mipa ka ni a, thinlung pawh ka nei. Min nawr sawn a, min pawt let leh ṭhin hi ka chau tawh, nghet taka awm i duh te anih loh chuan ka tlin rei lovang" a ti a, ka rilru a dek zar mai

"Chuan hei hi min vauna tawp ber a ni em?" Ka hnual rawih, jail tang ang mai ka ni. Kumkhuaa min kalsan tur anga ka ngaihtuah hian pawm harsa ka ti hle mai

"Ni love" a tih chuan ka thla a muang deuh sawt mahse a lo la sawi zo lo "Invauna hlauhawm vak lo ah i ngai thei ang" a ti a, ka lungphu hi a chawl mai dawnin ka hria

A sawi zawh chuan a ham bui bui a, inzi mar leh ṭiam ṭiam in khumah chuan a insiam ṭha sauh sauh a, rawn ṭawng leh in "Eng dang mah a awm lo" a ti a

Tui vawt takin min rawn leih ang mai hian ka harh chhuak zawt. Ka meng zau kawk a, ka mit a sen rum bawk. Ka biang a rawn sa hut hut, ka thin a phu nasa hle bawk. Frantz a min vau khan awmzia a nei ang em? Tiin ka ngaihtuah neuh neuh

Frantz POV

Liliana hmel landan inthlak thut chu ka hmu reng, mahse ngaihdam ka dil dawn lo. Ka puakkeh mai ang, ka dawhtheihna in a tlin lo ka tih kha thudik tak a ni. Infiam nana min hman leh hi ka phal tawh lo. Ka hmangaih a, mipa dang nena ka hmuh hian ka thinlung a tina. Venhim hi ka tihtur ve reng ah ka ngai. Tunah chuan a zalen tawh a, chet ka lak leh ngei a ngai dawn a ni. Zawi muangin hneh ka tum ang mahse a thinlung chu ka neih a ngai. Ka bulah awm se ka duh

Kan ngawi rei ta deuh a ka hriat chuan ka fiam leh zeuh a. Ka ham leh phawt a, chimawm deuh a nuiin ka thle phei ha a "Zankhua in khatah khan i ding dawn nge ka bulah i rawn mu ve dawn?" Ka ti a, Liliana chu a meng zau kawk mai

Liliana POV

Hetiang tih hi a ching riau mai. Ka hmai a sa leh hut hut, hnuai lam ka melh daih. Frantz a bulah ka mu thei ringawt hleinem. A dik lo hrim hrim. Dik lo lutuk, ka intiam tawh a, thlemna ah ka lut thei lo

Ka lu ka thing a, hnial ka tum ruh viau mai "Frantz...." ka ti raih a, a hming ka lam zawh chuan kawr ha lo a a awm chu ka thlek leh a, a jogger dum hak leh.....

Ceiling lam chu ka hawi a, ka lu thing in rilru in ka in zilh a. Kawng dik lo ka zawh dawn tlat. Ka lu thing in ngaihtuahna dik lo chuan min rawn tuam hlup hlup

"Chuan?" Frantz a'n min rawn zawt a, ka lu thing in ka hmui ka pet a, lai deuhin ka nui chhuak a, ka in control leh theih hnu chuan "Ka ring chiah lo" ka ti a

"Eng nge? Ka khuma i mut vawi khatna a ni hleinem" Frantz a'n a tih zawm leh a, chu thu a sawi zawh chuan ka za nghal chuai chuai, ka lu thingin ka hawisawn a, hmui ti pawrh leh in zawi sup in "A inang hleinem" ka ti a

"Eng nge a danglamna?" Hriat chak hmel deuhin a rawn ṭhu chhuak a

"A hmasa berah chuan khumah i awm a...kawr i ha lo bawk, chu lo ah kan inngaizawng lo a....." ka zuih ral lek lek, sawi tur pawh ka hre tawh lo. Frantz chu a lo bu nghauh a, engmah ka sawi chhunzawm lo tih a hriat chuan min zawt leh a "Anih chuan engtin nge ka inngaihzawn ang? I chhungte ka hmu tawh a, kan in fawp a, lai lo chuan min en thei miah lova, ka hmangaih thu che ka hrilh bawk a....eng nge ka la hmaih?" A ti a

"I bialnu ni turin min la sawm chiah lo a ni maithei asin" ka ti a, a thu hriat chu a phu ve zawk mai. A lu thing in a ngaihtuah aniang, rawn nui hak in a lu chu a hiat a

Engmah sawi lovin room ah chuan a kal kual a, ka bul a rawn thleng, a hnu ah thawmhnaw dahna room lam a pan leh a, tshirt var a rawn ha a, ka piah deuh lawkah a rawn ding a inringtawk takin a rawn nui suk a "Ka bialnu i ni duh ang em?" A ti a

Mak ti lutuk in ka khap leh sawk. Frantz a ka aṭang hian a chhuak ang tih ka lo beisei lo em a ni. A thusawi chuan boruak te hi a ti zangkhai sawt, phengphehlep pawh an thlawk leh sup sup tawh.

Frantz POV

Ngawi rengin min chhan hun tur ka nghak a, pawn lamah chuan dam takin ka lang a, chhungril lamah chuan buai tak ka ni. Aih lo ti ta se ka thinlung hi a na nawn leh dawn asin. Mahse tun ṭum chu ka inpeih tawh, aih a lo tih pawhin ka chhuah tir dawn lo hrim hrim

Liliana POV

Frantz a chu ka en leh a, ka kâ ân ka tum leh chiah, ka hriatna lehlam zawk hian Aih tih sawi turin min lo vau bawk a

Mak ve tak chu a ni, mahse Frantz hi ka tibuai hnem tawk tawh, a dawhtheihna pawh in a tlin tawh lovang tih ka hria, chuvang chuan hun ṭha ka pek ve a ngai

Hun khawhral duh tawh lovin thawk ka la hawk a "Aw, Mr Cavalier, i bialnu ka ni duh e" ka ti a

Frantz chu a phu ve zawk, a rawn nui a, min rawn pawm a, ka nghawng a fawp a, ka nui ker ker, ka sa pup pup mai

Kan inkuah zawh hnu chuan min rawn fawp leh zeuh a "Zanin chu rawn mu ve la" a ti leh a

Ka thaw leh hak a, inchhuang takin "Aih" ka ti leh a, Frantz chuan a hrethiam aniang a lu a thing a "Tehreng mai, ka thlah ang che" a ti a

Ka nui sap a, Kawngka thleng min thlah a, min rawn kuai her leh a kan infawp leh ta, kan in thlah hnu chuan kawngka a hawng a

Pawn ka chhuah chuan Frantz chuan aw ki nalh deuh hian "Muttui Ms Chavez" a ti a, nui leh ker ker in "Muttui le Mr Cavalier" ka ti a

Frantz POV

Liliana elevator a a chhuk thlak hnu chuan kawngka ka khar a, boruak ah chuan chakna sign ka lantir a, ka hlim veng veng. Khumah ka ṭhu a, ka nu chu ka be nghal

"Ciao" ka nu i'n rawn chhang a
"Ciao mamma" ka aw pawh a zangkhai tawh khawp mai. Ka nu pawh in a hrethiam aniang "Engkim a ṭha vek a ni maw?" A ti a

"Aw, Liliana leh a chhungte chu an him tawh e chuan...." ka zuzi ral vel mai mai

"Chuan?" Ka nu i'n min nawr a

"Liliana chu ka bialnu a ni tawh" ka nui ver ver

"Oh Hallelujah, tunah chuan hlim lo deuhin inah i rawn lut tawh lovang" ka nu i'n a tih chuan ka lo meng kual ruih "Chu chu maw i lo hlim chhan?" Ka ti a

"Ni e, i pa pawh a rawn haw ṭep tawh a, ka nghakhlel tawh alawm mahse hlim taka ka lo hmuak bik tur kha i hmuh duh ka ring vak lova" a ti a, ka rum nghut, ka hmai ka khuh a "Nu" ka ti a

"Eng nge? Ka sawi dik lo hleinem" pawisawi loh hmel deuhin a ti a, ka lu ka thing tawp "Ka dah tawh dawn ania" ka ti a

"Tehreng mai, bialnu i nei tawh a, min dawhthei tawh lo a ni maw" ka nu chuan uar fahran in a lo phunnawi ve a, "Ka biak rei deuh che i duh em ni nu?" Ka ti a

"Ni love, min ngaihtuah suh, khumah keimah te in ngawi rengin ka bu dawn...biak tur pawh ka nei lo" a ti a. Ka nu hi chuan min hrechiang ve a ni ka nui huk a "Eng nge i an nu?" Ka ti a

Liliana POV

Room chhung ka lut chiah ka nu i'n choka ah min lo nghak reng

Tleirawl in aṭanga chhuak ru luh ruk tum an man chhuah ang mai ka ni. Ka thaw a sa phat, zam deuhin kawngka chu ka khar a. Ka nu ka hmachhawn a, rilru ṭawngṭaina ka nei leh mek "Hey nu" ka ti a

"Tun thleng thleng in khawnge i chhuah nula?" Tlang takin min lo zawt a, ka chil ka lem dawk. A changa ka nu hlauhawmzia ka lo theihnghilh daih a ni

"I thurawn kha la in Frantz ka va bia a" min hau ang em tih ngaihtuah reng chungin ka chhang a

"Ani maw? Eng tin nge in inbiak?" A rilru a dek zar aniang

"Kan boss hi ka bialpa a ni nghet ta tiin kan sawi thei tawh ang" ka tih chuan a rawn nui a "Ka fanu diktak i ni e, ka lawmpui hle mai che bawihte" a ti a

"Ka lawm e Nu" ka nui a, ka nu tan pawh chanchin ṭha tak a ni ngei ang. Kan in mangṭha hnuah khum lam ka pan a

Ka phur lutuk vang nge ka muhil thei mai lo, ka inbual leh phawt a, ka zawh chuan ka inthlak a, ka mut fel hnuah ka insin hlun a, mutthilh erawh har tak a ni

Frantz a pian te chu ka mitthla a lang leh zut zut, ka lai chhe leh der tawh. Ka lu thing in ka ding lamah ka inlet a, ka mit ka chhing vang vang. Frantz nena kan infawp lai bawk ka mitthla ah a rawn lang leh. Vei lam, ding lam, ka in let tawn sek. Ka muhil thei dawn lo tlat mai

Hmuh ka chak leh tawh, mahse a tlai tawh bawk sia, a muhil daih tawh ang. Tun ang huna han lan leh pawh a dik chiah lo. Ka chhungte hauh bur ka ni mai dawn asin hetiang chuan ka dik dawn lo tlat

Ka lu chu ka hiat leh a, lu thing leh in awm mai mai chu a har tlat. Tinge Frantz a bula awm ka chak em em le? Ka infuih sauh sauh a, ka heh ka peh apiangin hnuai lam hi a nghawr leh dat ṭhin. Kan infawh ringawt pawhin tiang hian ka awm anih hi

Ka harh chiang leh tawh sia, ka phone chu la i'n Frantz biak ka tum a, tun thleng hian a number ka nei lo tih ka hrechhuak leh chiah

Beidawng deuhin ka rum nghut a, mut a ngai tawh ah ka ngai ta mai

Ka phone chu ka charge leh a, mutthilh leh ka tum a, ṭawngṭai leh phawt a, ka hahdam leh ta. Ka mutthilh leh hnu chuan mumang ngai bawk ka mang leh ta. Danglamna chhe te a awm bawk. Ka ṭap lo a, lungngaihna leh hlauhna ni lo thil dang a tel tlat, chu chu zauthauna a ni.

Frantz chu a nui a, "Ka hlatah awm i tum em ni?" A lo ti a, ka thin a phu leh zawk mai. Ka ke pawh a lo nghawr leh dawt dawt. Ka ke ka lo chip a, pangngai deuhin ka mal ah a kut a lo nghat a

Ka lo zuang tho zawt a "shh, hahdam rawh" a lo ti a, rawn zut leh in ka thaw hak, nuam ka ti veng veng

"Hahdam rawh Lili" tih pahin min lo en a, thawk ka lo la hawk, hnuai lam a melh leh a

"Ka ta i ni ta" a lo nui suk a, a thaw chhuak ham ham. Ka harh leh chuan ka lo thlan hluam

Ka mumang chu duh aiin a tak alawm le. Ka lu ka thing a, khumah chuan ka la mu reng, dam taka awm ka tum a. Ka mit ka chhing a, ka mumang chu ka ngaihtuah zawm melh melh, zahna in min rawn khuh a, awmzia a nei tih ka hria. Hmuh lawkna pawh a ni maithei zawk. Frantz hian min hip tih chu a chiang alawm. Ka duh telh telh anih hi

Rilru hahna dang ka la nei tlat. Ka mumang hi Frantz ka hriattir dawn lo hrim hrim. Ka châkna thuruk hi ka zep tlat dawn

*****

Chhunzawm tur


Show post links
Top

[Ngaia]

Liliana POV

A tuk zing chu rilru laklawh deuhin ka awm. Ka chhungte'n min hawsan tawh dawn a, Kei pawh Florida ah ka let a, HR a ka banna thehluh kha sut tir dan hram awm se ka ti hle mai. Ka hnathawh hi nuam ka ti a, kan client te pawh ngaiah ka nei tawh. Company danga bul han ṭan leh chu ka peih tawh chiah lo. Frantz hi ka la titi pui ngei chu a ngai ang. Tunah rih chuan ka tum ber chu mittui tih tlak loh hram a ni

Frantz chu tukṭhuan ei turin ka chhungte'n an sawm avangin a rawn chhuk thla a, kan inhmu chiah chu hawihhawm takin "Zing Chibai"a rawn ti sap a, ka biangah a rawn chuk zeuh bawk. Ka sa leh hut hut. Nizan khan mutthilh leh ngial kha ka tum ania, ka mitthla a ka mumang a rawn lan zel avangin ka harh tulh tulh. Ka mu mang lo a tih theih ang

Tukṭhuan kan ei lai chuan Frantz chu ka chhungte nen an inbe siam siam a, min rawn melh fuh apiangin ka hawisawn zel. Kan mit a intawn fuh pawhin rang lutuk in hmun dang ka melh nghal zel. Kan in hmu fuh mang lo a ni e

A hmui phun te chu chik takin ka lo en leh ṭhin. Kan hmui han inchuktuah ila tih te ka lo ngaihtuah. Ka ngaihtuahna hria ni mai awm hian a hmui a rawn liak zeuh a, ka ṭhutna hmunah ka tal ka tal mai

Frantz POV

Liliana i'n min pehhel deuh tlat a ka hriat chuan ka ngaih a ṭha lo khawp mai. Inngaihzawn a duh leh lo em ni? te ka hial mai. Rilru dang a lo pu te anih chuan min hrilh vat mai se ka duh. Kan pahnih chauha kan awm hunah ka la zawt ang

Tukṭhuan eikham ah Lili chhungte chu an chenna thleng kan thlah a, chumi hnuah Airport kan pan ang

A chhungte nen an inkuah a, zawi te in an ṭawng bawk. Car chhung aṭang ka lo en reng a, a nui hmel leh a nu leh pa a biak dan ka hmuh chuan second tin maiin a zunah ka uai telh telh in ka hria. Liliana hian rilru dang a lo put phei chuan a atthlak dawn hle a ni.

Engpawhnise a chhungte hmangaih tak leh zah taka a enkawl ka hmuh hian inanna riau kan nei dawnin ka hria. Ka chhungte pawh a zah thiam ngawt ang

Liliana POV

Frantz a'n min lo en reng tih pawh ka hre lo. Ka nu i'n ka biang a piai a "Ni khat ah vawi khat tal min rawn bia ang che" a ti a, a thusawi hrethiam takin ka bu nghat

"Ka hria alawm nu" nui ker ker in ka insut feih feih. Ka biang rawn chuk in ka beng bulah a rawn phun sup a "Saw laia mipa hmelṭha deuh nen tû min pek vat ka beisei dawn ania" a ti a

"NU" ka au vak, kan ṭawng ri hria in Mr Cavalier chu a rawn hawi phei a, ka sa deuh pup pup. Ka nu chu tihsual nei lo ang mai hian a nui kiah kiah a, Ka pa in rawn khap in "Awm tir mai mai teh Nû i, inenkawl ṭha la aw bawihi" tih pahin min rawn kuah a

Ka hmangaih thu ka hrilh ve ve hnu in ka mangṭha a, car chhunga min lo nghak reng tu Frantz a awmna lam ka pan a

Kan tlan chhuak leh chiah ka hmai ka hup a, ka mittui a rawn dir zung zung. Ka chhungte hlata awm hi harsa ka ti ṭhin. A chhan pawh min uap hneh in min fuih nasa a, hun thawl pawh min pe fo bawk. Kan inbe ngun a, ka tlawh vak ngai lo. Ka insut leh feih feih

Frantz chuan min lo hmu reng aniang, rawmawl a rawn phawrh a, ka mal ah a rawn dah. Ka mittui hru pah in ka nui hak a

"Ka lawm e" tihtak zetin ka hrilh a. Frantz chu ngawi rengin a bu nghut, a kiai suk bawk a. Rawmawl min pek hmasak kha chuan kan inkar a la fel chiah lo. Darkar sawmhnih pali hnuah erawh ka bialpa a ni fel der

Ngawi renga kan ṭhut hnu chuan ka lam a rawn hawi zeuh zeuh in ka hria, ka awm a nuam chiah lo

"Eng nge?" Lungawi lo deuhin ka zawt a, ka lam a rawn hawi a, lu thing in "Engmah a ni lo, i chhungte i hmangaih hle a ni tih ka hre mai" a chin ṭhan danin a khabe a dawm a, a kut zungte in a hmui a dek

"Ka hmangaih alawm" lu bu nghat in ka nui seih a. Frantz chuan hriat chak hmel deuhin "Anih chuan tinge an hlatah i awm? In in pawh hmel si a, in mangṭha a har thei ngawt ang" a ti a

A sawi tum hrethiam in ka chhang a "Kan khuaah hian Air hostess hna a awm tam vak lova chu lo ah ka chhungte bula ka awm reng chuan chhungkua ka din thei lovang tih ka nu i'n a hlau a, tû hmuh a chak tawh mai si a" nui hak hak chungin ka lu ka thing a

"Naupang i ngaina em?" Frantz chuan min rawn zawt thut. Ka thin a phu nghal dup. "Diktak chuan ngaina e, mahse ka pasal tur nen hun kan hman fe hnuah chauh fa chu neih ka duh ang" ka ti a

Frantz chuan a lu a bu leh nghut. Engmah chu a sawi lem lo. Thawk ka la halh a ka zawt let ve hmak "Nangin i ngaina em?" Ka ti a

"Keimah maw? Ngaina e, chuti lo chu ka nu i'n min sawp hrep mai ang" a nui chhuak hawk a, keipawh ka khi ver ver. Frantz pawh hian a chhungte a zah thiam hle anih dawn hi

Ngawi rengin nuam ti deuhin kan ṭhu a. Tukverh chu nghengin ka ngaihtuahna a vak nasa. Ka mumang ka hrechhuak leh thut. Ni in min rawn kah ang mai hian ka sa leh pup pup. Ka ṭhu ṭha sauh sauh. Ka bawp khawkherh in ka aw ka thian a, ka nghawng leh hmai hi a sa vek

Frantz POV

A hmel landan inthlak thut chu ka hmuh hmaih lo nasa. Tukverh ah a dak chhuak a, nuam a ti chiah lo em maw ni? Ka ti deuh

"I ṭha em?" Ka ti chiah, rang lutuk in a lu a bu nghat a "imm ka ṭha e" a ti a, awih chu a har ve deuh

"A lum i ti em? I thlan a tla ania" a hmai sen lutuk chu mitko san meuhin ka zawt a

Liliana POV

"Ti love ka ṭha e" ka chil ka lem khawlh a, ka dang a ro vek, ka thinphu pawh a rang teh e. Airport kan thlen vat theih nan rilru ṭawngṭaina ka nei bawk. Ka dam chhuah zawh loh te ka ring rum rum, AC on pawhin a lum lutuk ringawt

Frantz chuan min zawh thui vak loh avangin ka lawm angreng. Ka aw thian in ka mit ka chhing vang vang a, ka nghawng ah thlan a rawn luang ngiai ngiai. Ka meng leh chiah tukverh lam ka hawi a, he car chhung ngeia min fawh lai ka ngaihtuah let leh a, ka zauthau leh sawt. Meng kual ralh in ka in zilh char char

Frantz POV

Liliana chetdan chu mak ka ti telh telh. A rei pauh leh a awmdan hi hriatthiam a har. Rilru dang a pu em tih ka hriat vat a ngai. Thil dang in ka rilru a luah thei lo "Anih chuan thudik min han hrilh teh, eng thil nge thleng?" Khauh deuh takin ka zawt a, a zam hmel takzet

Min en lovin a aw a thian a "Engmah a ni lo...." a ti zuai raih

"Eng thil emaw chu a ni chiang" ka nawr leh a, a lu thing in "Ka hrilh thei lo che" a ti a

"Tinge min hrilh theih loh?" Fimkhur deuhin ka zawt leh a, hriat ka tum ruh hle a ni. Thil awmdan ka rem khawm neuh neuh, a biang sen sauh leh a ṭhut dan te hian thil pakhat chiah a kawk

Liliana POV

"A chhan chu a mak dawn em a" lai deuhin ka chhang a, ka jeans a ka kut ka hruk laiin nawmna in min rawn tuam leh chuai. Ka mumang hre chhuak leh in ka ṭek sawk. Ka thaw leh halh

Armagio chuan motor a ti ding chat. Airport kan lo thleng der mai. Private jet pawh a awm reng tawh

Kawngka an rawn hawng chiah, ka zuang chhuak nghal. Frantz pawh ka nghak hman tawh lo. Reilote pawh ṭhu thei ka ni lo, ka thluak hian min bum a ni. Min man chhuah ka hlau tlat. Rilru fim tak ka put a ngai

Frantz POV

Thlawhna chhunga ka luh ve meuh chuan Liliana chu a lo ṭhu fel der tawh. A inhreng nghet hmel hle bawk

Ka jacket chu phelh in a epah chiah ka ṭhu a, chik zetin ka melh leh a, a hma ang bawkin Armagio chuan kawngka a khar a, kan ṭhufel a hmuh chuan cockpit ah Pilot bul a pan a. Kan pahnih chauh in kan awm leh ta

Thlawhna a thlawh chhuah fel hnuah Liliana chu ka bia a "Min hrilh dawn nge ka ṭawng tir zawk dawn che?" Ka ti a, a khur der der, tih hlauh hi ka tum lo asin le

Liliana POV

Ka lungphu te hi a chawl dukin ka hria, ka khap leh sawk a "Engmah a ni lo tak tak...." ka ṭawng bah nuai, ka heh pet in sawi tur mai pawh ka hre lo

"Eng chu?" A ti leh a, min zawh chhuah a tum nghet hmel hle mai.

"Mimal thil ania" ka ti leh a, min zawt thui vak lo se ka ti asin le. A bu nghut a "A tirah a mak a, a hnuah mimal thil a ni leh daih a ni maw?" A lu a thing a "I inchhir leh anih chuan min hrilh vat zawk rawh" a ti a

Ka hnual rawih, ka chhang vat "Teuh lo mai, hriatthiam ka har tih chu ka hria alawm mahse ka thutiam ah khan ka la ding ania" ka ti a, a bu leh nghut, min zawt nawn leh a "Anih chuan eng nge ni?" A ti leh a

Ka mit chhing in ka thaw halh. Frantz chuan hriat a duh a, chhanna ka pe mai thei lo a ni. Ka rilru a ka ngaihtuah zawng zawng hi hre vek se chu duh aiin kan inhnimhnai ang tih ka hlau

"Nidangah ka la hrilh ang che, tunah chuan ni love ka tiam a che" ka ti a. Engemaw ngaihtuah chhuah nei tih hriat deuhin chimawm deuhin a nui a "Awle nidangah ka la zawt ang che, i intiam tawh ang khan min hrilh ngei ang che" a ti a

"Tehreng mai" ka lu bu nghat in ka hawisawn a, ani pawh a ṭhu ṭha ve mai. Lehkhabu chu keu in ka chhiar a, ani pawh Laptop ah hna a thawk ve mai a

Boruak pawh a zangkhai leh viau tawh. Ngawi reng chuan kan ṭhu dun a

A hnu deuh lawk ah Frantz chu a ding hluai a "In tur i duh ang em?" A ti a, ka phu deuh zawk. Frantz a in tur kha ka thli ṭhin kha a ni si a, ngaia neih a va har ve. Kan inngaihzawn vang hian a danglam ang tih ka lo ngaihtuah ngai lo re re

"Ka ti thei alawm" ka ding ve thut a, Frantz chu rawn hawiin min rawn ti ding a "I duhzawng min hrilh mai rawh" a ti a, mak ti deuhin ka khap leh sawk "Khawngaihin serthlum tui ka lo duh ang" ka ti a

"Ka rawn lak dawn che nia" lu bu nghauh in choka lam a pan a, Scotch chu glass ah a thli a, ka in tur thli lehin min rawn pe a, rawn ṭhu ve leh in ngawi rengin kan in a

Tui ti deuha ka in hnu ah ka aw ka thian kharh a "Ni reilote kal ta ah khan banna ka thehlut a" ka ti dek dek a

"Jenna in min hrilh hlim khan ka hnawl nghal" a ti leh a, a chhan ka hre chak viau mai "Tinge chutia i tih?" Ka ti a

"Kan inmil thei lo pawh a ni maithei a, chumi vang ringawt a ka hnuaia hnathawk ṭha ber chan ka duh lo. Client te pawhin i ṭhat zia thu an sawi" a tih leh chuan ka hna thawh ṭhat zia ka hriat in ka inchhuang ve hle mai. Ka hna vanga chauha min chelh a ni ang em tih ka ngaihtuah neuh neuh

"Chuvang chauha min chelh chu i ni mial lo maw?" A rilru dek ru takin ka zawt a, a bu nghut "Aw...chu leh thil dang vangin" a ti a

"Thil dang chu eng nge tih ka hre thei ang em?" Ka ti a, a khi deuh suk "I awmdan a zir a ni mai" a ti a

Hemi thu hi chu sawi ka duh chiah lo asin. Frantz a mitmeng chimawm lutuk hian ka hriat chakna a tireh zo vek. Serthlum tui chu ka dawt leh khawlh a. Frantz chuan "Ka nu hmuh tir che ka duh a" a ti a

Min ṭhawng lutuk, ka thil in lai chu a dik lo ah a lut nge ka hak nghal bawrh bawrh, ka khuh chiam a. Ka bulah rawn kal in ka hnung a chul a

Frantz POV

Ka sawi chhuah hun hi a fuh vak lo tih ka pawm thlap. Lili nen kan inngaizawng tih ka hrilh khan ka nu i'n a hmuh duh thu kha a sawi a. Tukṭhuan ei tura ka chhuk hma khan an inhmuh theih nan ruahmanna ka siam zung zung. Ka tifuh lo em maw ni? Te ka ti hial mai. Tu in nge min dem thei ang? Hrilh ka tum lai khan a ṭap char char bawk si a, sawina hun ka nei thlawt lo

Ka in zawh chuan ka lu thing in 'ka ṭha' tih zaizir in ka lantir a. "Ka nu i hmu chak tawh lutuk tih hria ila chu ka inhmuhtir vat ang che u" ka fiamthu a, boruak rit hi a zan phah lo

A nui lo a, lungngai hmel pawh a pu lo, a awmdan chuan min ṭhawng hle zawk mai

Liliana POV

A nu hmu tura ka inngaih chuan ka rilru hahna a zual ting, ka aw ka thian kharh a "Engtikah?" Ka ti a, inthiamlo hmel deuhin a nui a "Chhun chaw ei turin kan rawn kal ang tiin ka hrilh" a ti a, ka nghilh nghal dup. Ka hmel landan a lo hmuh hmaih lo fimkhur deuhin min zawt a "A hma mah mah em?" A ti a

Chhan dan tur mai pawh ka hre lo. A hma mah mah ang em? Kan inkar hi a vawrh chho dawrh mai ang em?

A nu chu hlauhawm tak te lo ni ta se, hausa tak leh kherkhiap tak a nih a, a fapa tan min duh loh phei chuan ka zak ngawt ang

Ka bulah rawn ṭhu in "Eng nge ni?" A ti a, ka lu ka thing leh tawp. Frantz chuan min lo dang a "Khatiang khan ti suh. Thudik min han hrilh teh, hahdam phawt la" a tih chuan ka thaw sap a "ka hre lo le, i nu i'n min lo ngaina lo ta se" ka ti a, a lu a thing deuh tawp "I rilru ti hah duh suh, a ngaina dawn lutuk che, kan tlawh thei tawh ang em?" A ti leh a, chhuanlam tur ka la zawng char char

"Heti ringawt chuan ka tlawh thei lovang. Ka inthuamna hi en la, vawikhat hmuhna tur atan chuan ka nalh lo deuh a ni" ka ti a

"Dawr ah thawmhnaw kan en kual dawn nia, khati pawh khan i inhmeh lutuk" a ti a, ka kekawr hak leh kawr ban tlawn chu ka en a "Tak tak in hetiang chuan i nu ka hmu thei lovang, ka sam pawh hi a hnawk teh mai ania" ka ti a

"Liliana duat, hahdam teh. Inthlak i duh chuan thawmhnaw ka lei mai ang che. Ka nu hi i ngaih ang khan a hlauhawm miah lo ania" ka ban a rawn vuan a, ka biang a chul leh bawk. Duat tia min ko chuan min ti hlim hle bawk

"Sawi mai te chuan a awl alawm, ka chhungte i hmuh pawhin i nalh em kha" ka ti bui bui a

"Nang pawh i mawi lutuk" a rawn ti a, ka meng kual ralh "Kan thusawi lai thlak i tum anih kha. Nidangah kan tlawh mai thei lovem ni? Rilru tak leh mawi taka ka lan hunah kal zawk ila" ka ti leh hram a nu hmuh hi ka la ngam chiah lo deuh a ni. A tan pawn a fair lo ang tih ka ring

"Thawmhnaw te chu ka lei mai dawn che alawm" min rawn en a, ka heh petin ka hawisawn daih. "Min leisak ka ngai hleinem. Inah hak turte chu ka nei reng a, min hruai haw pawi i tih loh chuan ka inpeih thei mai ang..." ka ti a

Frantz chuan min en reng a, ka pehhel char char, thil hrechhuak zawk ang mai hian "Pawisa ka hman i duh lo a ni maw?" A ti a, ka chhang lem lo, a hre tawh tho alawm

Min pawt hnai a, en loh theih a ni lo. A mitah tak chuan ka en a, kan thusawi lai ni lo thil dang ka ngaihtuah mai dawn alawm le

"Ngaithla teh, kan inngaihzawnna ah hian ka rilru ka pe hle tih i hria tiro, thilpek ka pe che anih pawhin a tur ve reng ah ngai tawp mai rawh. Ka nu nen inhmuh tir vat che u ka lo tum hma lutuk pawh a ni maithei. I la inpeih ngang loh chuan ka hruai haw mai ang che" a ti a

A thusawi avangin a mitah tak ka en leh a, ka remtih loh chuan misual tak ka ni mai dawnin ka hria "Awle kan tlawh dawn nia mahse duhdan ka nei dollar sawmnga aia to chu ni lo se" ka ti a, ka hnar ah a rawn piai a "Tehreng mai" a ti a

A kut chu ka paih a, nui hawk in min kuah a, ka biangah a chuk zeuh bawk

A chesawn a thil hrechhuak leh zawk ang maiin "Tukin zing khan min fawp ve lo re re, khawiah nge a awm tak?" A ti a

Lai angreng takin ka hawisawn a "Ka hre lo le" ka ti a

"Tunah ka dawng thei ang em?" A ti a, ka thin a phu dup dup ka fiam leh a "Ka ring chiah lo, a tlai tawh viau lo maw?" Ka ti a. Frantz chu a nui mai "In fawh nan tlai a awm hleinem" tih leh ka biang dawm a rual a, zawi muangin min rawn fawp a, ka hlim leh sawt

Kan inthlah leh hnu chuan min fawp leh zeuh a. Pilot pawhin kan ṭum ṭep tawh thu a rawn sawi a, chu thu a sawi zawh veleh ka nghilh nghal dup. Tun aṭanga darkar khat velah hian Mr Cavalier a nu kan hmu dawn chu a ni si a, a nu in min ngainat ngei theih nan rilru ṭawngṭaina ka hmang char char

****

Chhunzawm tur


Show post links
Top

[Ngaia]

Liliana POV

Kan ṭum fel dawn ah ngaihtuahna fim tak ka la pu thei chu a lawmawm ka ti. Frantz a nu hmuh ka remtih aṭang khan boruak ka tlachham dawn hial in ka hria. Ka zam lutuk. Ka kut a thlan char char. Ka pum hi a inlet but but, thlawhna a kan chuan vang pawh a ni chuang lo. Ka thin a phu ring telh telh. Ka thawk a mumal lo, jail tang ang mai ka ni. Frantz a'n min ngaihtuah loh nan Lehkhabu te ka chhiar a, ka keu mawl ve tawp, a thu inziak te pawh ka hmu chiang thei lo

Frantz chu mipa diktak a ni. Thlawhna aṭanga min hruai chhuak a, car chhung kan luh fel thlengin ka hnungah min zui zel. Kan tlan chhuak chiah, khawpui kan hnaih zel a, ka zam telh telh. Hna min thawh san leh a, ka kut zungṭang ka khawih niap niap, buai hmel deuhin tukverh lam ka thlir a, ka dang a ro a, tui erawh ka in duh lo. A nu kan hmuh hunah ka zun chhuah ka hlauh vang a ni. Ka chhungte chu nakinah ka la be mai ang

Rei tawk kan ngawih dun vang vang hnuah ka nuam ti lo chuan thawk ka la sap a "Restaurant ah em ni chhun chaw kan ei dawn?" Ka ti a, thawveng taka awm ka mamawh

"Ka nu in eisiam a tum hmasa zet a, i ei duhzawng a hriat mai loh avangin Restaurant ah kan ei mai dawn anih chu, pawi i ti lovang tiro?" Fimkhur deuhin min zawt leh a

Ka lo bu nghat "Imm" ka hawisawn a, Frantz chu a nui ringawt "Ka hrilh che kha, i rilru ti hah lutuk duh suh. Ka nu i'n a ngaina dawn che tih ka hre mai" a ti a, ka ṭhen sak, ka la zam reng tho

Restaurant kan thleng dawn. A hming ka han hmuh chuan ka phu zawk Angel's Palate a lo ni. Mak ka ti ngei mai

Nuih tur nge ṭah tur pawh ka hrethiam lo. Carlos a'n min hruaina hmun ngei kha a ni. Deja vu ang mai a ni, ka tihrawl te hi an dik thei lo. Car chu a ding chat a, kawngka an rawn hawng bawk a

Ka thil tawn zawng zawng te kha a nasa em a ni. Ka mumang ah Frantz ka lo hmuh avanga ka rilru hahna chu a nu kan tlawh tur zam bawk nen, Misualpa in min hruaina hmunah ngei khan a ni a, belhchhah tu ka ngah lutuk a, ka lu te hi a hai muai muai in ka hria

Chil ka lem khawlh

Frantz chu car aṭang chhuak in ka kiangah a rawn ding a, ka lai lutuk ka biang a sa hut hut. Ka chhip aṭanga ka ke ler thlengin ka ṭek chhuai, ka hriatrengna ṭha lo neih te pawh a bo chawpchilh duak

Buaina ka tawng leh ngei ang

Frantz chuan ka bek ah zawimuangin a rawn fawp a "I inpeih em?" A tih chuan ka bu nghat a "Ka inpeih e" a mitah tak pawh ka en lo, a kut lum tak hian ka rilru a la peng zawk tlat. Kawngka lam pana a kal lai chu "Ngawi lawk" ka ti a

Rawn hawi letin zawhna nei tih hriat deuhin min melh a, ka thaw hak. Tunah tak hian kan boss nena inngaihzawn aia risky zawk thil ka tih a ngai. Ka lamah ka pawt hnai a, dingdihlip in a beng phulah ka phun sap a "Ka chet maksak chhan kha chu nizan ka mumang ah ka hmu che a" ka tih rual chuan ka zang hawk

Nuam ti lo deuhin ka siam maithei, mahse ka zia phah sawt. Sual hmel hle mah ila pawi ka ti lo. A mit khap sawk in "Eng ang mumang nge?" A ti a, ka chhang tawh lo, ka nui seih a, inchhungah ka lut a, min rawn zui ve mai

Maitre D chuan Frantz chu a lo lawm a "Mr Cavalier, helamah min rawn zui rawh u khawngaihin" a ti a

Kan hmaah chuan invawngfel tih hriat takin a kal a, zanriah eina tur lamah min hruai a, room nuam tak a ni, mi pawh an tam vak lo

Kan luh chiah chuan a nu kan hmu a, an inan zia chu hai theih rual a ni lo

Hmelṭha tak a ni, a sam chu a dar chen vel niin rawng uk dum inpawlh a ni, mit dum, hnar ngil tak nei a ni. Kawr par fual a ha a, pheikhawk sang var a bun a, a mawi ka ti lutuk chu inchei lo hle in ka in hre thar thut

Ka va pawh mai ngam lo Frantz chuan min vuan nghet sauh a, min fuih nawn leh in nui chungin min nawr a. Luhlul chhuah a tlan daih chu ka duh rum rum kan lam hawiin a rawn nui sen sen bawk si a, hma lam pan mai loh chu tih theih ka nei lo

Dawhkan kan va thleng chiah, a nu chuan ding meuhin min lo lawm a, a ban phar chhuak in "Bawihi" tih pahin min kuah a, a perfume rim chu ka hnarah a cham reng. Lai deuhin ka nui a, a hnungzawng ka beng thek thek. Ka kut thlan ka hru zeuh bawk

Kan inthlah hnu pawhin a la nui sen sen "Chiang deuhin kan en leh teh ang che" tih pahin ka khabe chu a dawm a, ka nui ringawt

"Awi le, Engtin nge Frantz hian nang anga hmelṭha hi a hmuh theih zawk le?" Ka mitah tak a en a

"Nu, a tawk tawh, ka bialnu kha tiduhdah suh" Frantz chu a rum nghut a, a nu chuan pawm lo deuhin a zilh a "Zawhna har tak pawh anih loh hi, pasal ah a neih duh che pawh ka ring lo" a ti a

Ka nui chhuak hawk, ka zia tawh hle a ni. Ka lam a rawn hawi a "Min hneh theih nan hlawh a pe che a ni em lo maw?" A ti leh a, Frantz chu a meng kual rulh

"Ni love ka pi" nui ker ker in ka lu ka thing a, ani pawh a rawn nui seih "Bawihi, ka pi min ti suh, Mariella tiin min ko rawh" a ti a

A fapa lo ṭhu reng tawh lam a hawi leh a "I bialnu i rawn hruai vang maiin chibai min buk pawh i tum tawh lo a ni maw?" Lungawi lo leh rilru nat hmel deuhin a han ti ṭha leh a. Frantz chu rum nghut in a tho a, a nu kuah in "Ciao Mamma" a ti a, a biangah a fawp zeuh a, a lai hmel chuan ka nuih a tiza ngang mai

A nu chu a nui a "A ṭha e, a ṭha e, a tawk tawh. Nangmah vanga lo kal ka ni lova, Liliana vang zawkin a ni" a ti a. Frantz chuan a ṭhutna tur Chair a pawh chhuahsak a, chumi hnuah ka chair a rawn siam ve leh a "Ka lawm e" ka ti zawi sap a, ka lam hawi a a nuih chuan ka ṭek leh sawk. Lai lutuk in ka hawi sawn a, Mariella chuan a lo hmu chiang viau aniang. Min lo melh tawn zak zak tih ka mit sir in ka hmu

Frantz chuan a nu a awm ve tih hrechhuak leh chiah ang maiin a aw a thian kharh a

"Chuan Liliana engkim min han hrilh teh, kum engzat nge i nih? Khawi aṭanga lo kal nge i nih? Engtia rei nge i thawh tawh?" Hriatchak hmel zetin Mariella chuan min zawt a

"Nu khawngaihin" Frantz chuan lo khak a tum a, a fapa lam chu hawiin "Eng nge? Liliana hian pawi a ti lo tiro bawihi?" A ti a

"Pawi ti lo ve, a ṭha e" Frantz lam chu hawiin ka bu nghat a "Kum sawmhnih pali ka ni a, Georgia ah piangin ka seilian ka thawhna a la rei vak lo" ka ti a

"A sual em?" Mariella chuan a fapa chu na zet hian a melh run a, ani lah chuan nui chungin a lu a thing a "A chang chauh in" ka ti a, a lu bu nghat in "A ṭha e" a ti a

Mariella chuan engemaw sawi a tum leh chiah tih in a phone a ri a, a han en a "Aw i pa anih hi" tih pahin ka lam a rawn hawi a "Ka tihpalh bawihi, hei hi ka lak ngei a ngai tlat, ka rawn let leh vat ang" a ti a, ka lo buk zeuh hnuah a chhuak a

A liam fel hnu chuan Frantz chu rum nghut in ka lam a rawn hawi a, ka lo nui ker ker "I nu chu a ngainat awm hle mai. Tinge min hrilh vat loh?" Ka ti a

"Ka hrilh reng che alawm. Mahse i hlauthawng lutuk a, min ngaithla lo anih kha" tih pahin tui chu a in a

"Tehreng mai. Min puh mawlh mawlh mai rawh" meng kual ralh in ka nui a. Tui ka in ve hnu chuan Waiter a rawn thleng a, kan ei duh kan thlang fel a. Frantz pawhin a nu a chah kep a. Heta eitur an siam hi a tui hlawm bawk a, ka ei chak tawh lutuk

Waiter a let hnuah restaurant chhung chu ka en kual a, Frantz a'n min lo en reng tih ka hmuh chuan "Eng nge?" Ka ti a, ka lamah rawn inher in "Eng nge i mumang ah chuan i hmuh?" A ti a. Chil lem khawlh pahin thawk ka la a "Tun hi sawi hun a ni chiah pawhin ka hre lo" ka ti a

"I ti dik e" tih pahin a lu a bu nghauh a "Mahse nang pawhin ka inrin hma in min rawn ṭhawng a, i sawi ngam tawh ah ka lo ngai mai asin" sam et hian min chhang a. "Ni love, ka zam lutuk kha ka zangkhai phah ringin i lo ngaihtuah zawm ah ka hrilh tawp mai che anih kha" ka ti a

"I zangkhai phah theih nan rilru nuam lo takin min siam tihna a ni maw?" A tih chuan ka nui hawk hawk. "Khati zawnga i ngaih duh pawhin a theih tho..." insum harsa ti takin ka nui a. Frantz chuan ka mit leh hmui a entawn zak zak

"Imm" Frantz chu a bu leh nghut a, ka beng bulah rawn phun sup in "Rilru nuam lo taka min awmtir i tum a ni maw?" A ti a, ka in rintawkna te hi a kiam duak duak, min sawiṭhaih tak tak hma in Mariella chu a rawn let a "Ka rei in ti em? Eng nge kan sawi lai kha?" Tih pahin dawhkan ah a kut a nghat a

Mariella ho chuan kan titi melh melh a, ka nu nen inanna riau an neiin ka hria. An ngaih a samin an bula awm a nuam a, rilru nuam takin ka awm theih phah. Frantz nen an inbe lai ka hmuh hian an inkar hi a chhiat ka lo hlau ve tawp

Mariella chuan Frantz a naupan lai atthlak taka a chet lai vel min hrilh a, ngawi turin a ti ngun ngang mai. A hrelo der hmak, ka lo ngaithla tui ve hle a ni. Frantz a ka lam a rawn hawi pawh ka lo hmu lo

Restaurant ah darkar khat kan awm pawh chu a rei lo viau mai, hun hi a kal chak ka ti hle mai. Kan thil ei tur pawh a tui hlawm in thil chi hrang hrang kan sawi ho a, haw a hun der mai. Frantz chuan Mariella nen Restaurant aṭang min hruai chhuak a, kan biangah fawp in a nu chuan a pa rawn haw hunah Zanriah ei turin min sawm a, ka lo remti vat. Ka chhungte a la sawm tur thu a sawi phei chuan ka lawm hle a ni

Min kalsan hnu chuan Armagio pawh car aṭang a rawn chhuak a, Frantz nen chuan nuam ti deuhin kan ṭhu lut a "Penthouse lam kan pan ang" a ti a

Meng phawk hraw in a lam ka hawi a "Ngawi teh, inah haw ka ngai" ka ti a
"I haw dawn reng alawm, i mumang min hrilh zawh ah" a ti leh a

"In lama pana kan tlan pahin hriat i duh lo em ni?" Ka ti a
"A chhan chu i bulah rei deuh zawk awm ka duh" a ti a, ka hlim veng veng, thup theih lohin ka hmelah a lo lang chhuak

Ka aw ka thian leh a, ka biang a sa leh hlup, ka nuih nasat viau avangin ka biang ki a na vek, hawi sawn lehin zawhna ka zawt a "Hnathawh tur i neiin ka hre sia" ka ti a

"A hmanhmawh thlak hleinem" a tih chuan ka bu nghat. Sawi tur mai pawh ka hre lo. Frantz chu a ngawi leh reng a, a hnuah min en leh a "A ngaina hle mai che" a ti a, ka nui hak a, thawveng deuh zawkin ka bu nghat "Ka ngaina ve tho mai. A hmangaih hle che tih ka hmu thei mai. Fa mal i ni em?" Ka ti a

"Aw, chhang ka nei a, kum hnih in kan inthlau. Kum thum a nihin min boralsan a" a tih chuan "Ka tihpalh lutuk ka..." ka sawizawm mai thei lo

"A pawi lo, a rei tawh alawm. Ka nu hian min ngaihtuah phah alawm mahse ka sawi tawh ang khan a rei tawh lutuk" a ti a, ka bu leh nghat "I pa chanchin min hrilh ve thung la" ka ti a

"A ngawichawi lutuk mahse thil chik mi tak a ni. A ngaina dawn che tih ka hre mai. A thutak hmel viau na a Mr Chavez nen soccer chungchang sawi dun se chu a mizia a dang vek mai ang" a tih chuan ka nui hak "Soccer chungchang ah chhun tur i nei ṭha hle mai" ka ti a

Ka sawi zo chiah Armagio chu Mr Cavalier a chenna building kawtah a ding a, hnathawk te chuan kawngka an rawn hawng a, ka chhuak hmasa a, Mr Cavalier a'n min rawn zui

Penthouse ah min hruai a, kawngka a rawn khar hnu chuan kan pahnih chauh in kan awm tih ka hrechhuak leh thut

Ka chil ka lem khawlh a, ka hawi kual nasa, a jacket a phelh a, a kawrkilh chung ber a phelh bawk a, a kawr ban tawm lehin choka lam a pan a "In tur i duh ang em?" A ti a

"Duh lo e, ka lawm e" nui chungin ka lo hnial a, Darthlalang bang lam ka pan a, khawpui chu ka en thla a, car in tlan pel zut zut leh mihring in sulpel ka hmuh chuan ka nui ver ver. Frantz chu ka bul hnaiah a rawn kal a, a lam hawiin ka zawt a "Tinge hmun sang deuha chen hi nuam i tih em em?" Ka ti a

"Tuna i nuih chhan ang bawk kha, bathlar aṭanga hnuai lama mi che vel hmuh hi muanawm ka ti. Zana kawtthler a eng an chhit te hi a mawi lutuk. Nilenga buai taka hun hman hnu a haw na atan duhthusam a ni" a ti a

"Anih leh Rome ah khan?" Ka ti a, a nui hmel leh a ha var tak mai te hi hmuh a nuam ka ti.
"Ka nu vanga ngaina ka ni. Ka naupan laiin min zinpui reng ṭhin. Ka seilen hnu thlengin an nunphung leh chetdan hian ka thinlung a hneh" a ti a

Hrethiam deuhin ka bu nghat. Khawpui bawk chu ka en leh a, ka harh sawng sawng in ka hria

"He laia ka hruai chhan che hi ka la hre chuang lo ania" thlamuang taka ka awm lai chu min rawn ti harh leh a "Eng nge i mumang chu?" A ti leh a

Thaw halh in ka mit ka chhing a, ṭhutna lamah let leh in ka kiangah ṭhutna hmun tur ka zuah sak a "Tisa takin inzawmna kan lo nei a" pehhel deuhin ka hrilh a

"*** i tihna a ni maw?" Frank deuhin min zawt a, chil ka lem dawk "Ni e, tikhan sawi ringawt lo la" ka ti a

"Eng chu? *** chu maw?" A tih leh chuan ka ṭim uaih uaih, ka zak nghal chem chem

"Ka lam dan chu i duh lo a ni maw?" A rawn ti a, chhang ta mai lo chuan ka kut ka khawih niap niap. A thil in chu a tlak pawp a, ka hma ah a ṭhu a "Eng tak chu maw i mumang ah kan lo tih?" A tih leh chuan ka hit chum chum. Ceiling ka en chho a, ka lu thing in thawk harsa ka ti hle

Hemi thu sawi hi a hma mah mah ang em aw?

"Ti teh, ka seh lo ang che" a ti a, ka thaw leh hak "Uh....Khumah ka lo mu a.....uh.....ruakin i lo awm a...." ka ti zuzi raih a, ka biang a sa hut hut. Ka lungphu a rang a, ka chuap hian boruak a tlachham hial. Ka hmui ka liak zeuh a, Frantz chuan dawhthei takin min lo nghak reng

"Ka ke min kar tir a....uh....chuan Awi lalpa leh..." ka zuzi kual leh a, ka hmai ka hup a, ka nui hul hak. Chhuat hian a ka angin min rawn dawlh daih se ka ti hle mai

Kan duh deuh te bula inpuan dan dangdai ber a nih dawn hi, tuar har ka ti hle mai

Frantz chuan ka dar ah min vuan in ka hmai inkhuh chu a hawng a, ka mitah tak rawn en lehin ka biang vei lam a chul heuh heuh a, ka hmui a rawn khawih zeuh bawk

Ka mit khap fuk a hmuh chuan a nui a, ka nghawng leh dar a zut thla a, chumi hnuah kan kut a suih dun leh rial a "Chuan engtin zel?" A ti a

*****

Chhunzawm tur


Show post links
Top

[Ngaia]

Liliana POV

"Chuan engtin?" Ka chhan mai loh avangin ka beng bulah a rawn phun sup a, a kut zungpui a min rawn deh chuan ka lai nasa lehzual. Ka thin a phu dut dut, ka biang pawh thla bial sen phut ang mai a ni

"Ka mal i rawn piai leh a chuan....ka hrilh thei tawh lovang che ka tihpalh" ka sawi bah nuai. Thawk te hi a harsa, ka chuap pawh a chawl dup maiin ka hria. Bati ral riai riai ang maiin ka zawp ral vek maiin ka hria

"Awle" a bu nghut a, ka biangah rawn fawp zeuhin "I inpeih hun hunah i mumang chu a takah kan la chantir dawn nia" a ti a, ka meng zau nghal kawk, velvet cake hmu ang mai ka ni. Ka chhip aṭanga ka ke ler thlengin ka mur chhuak vek. Ka ṭhu chip chat a, ka hnuai lam a nghawr dar dar

"Bathroom kal ka ngai" ka ti chhuak thut. Kan boruak ka ti chhia tih pawh ka hria. A rawn nui chhuak hawk a tawlhsawn leh in "Hall ah khan kal la, i vei lamah i peng dawn nia" a ti a

A sawi zawh rual rual in ka ding hluai, ka tlan chiam. Bathroom darthlalang ah ka in en chiah chu ka biang a tai tek, boruak nuam viau mahse ka thlan a chhuak nasa mai. Ṭawngkam ṭha lo chhak chhuah ka duh rum rum. Frantz erawh pangngai deuhin a awm a, a hahdam hmel in a chhelo takzet. Hmuh tlak pawh ka ni lo, a che mawi thei si a, insum ka tum pauh leh harsa ka ti hle ṭhin

Ka hmeichhiatna hian che rum rum turin min nawr mahse a ep chiah ah thung intiamna ka lo nei tawh a, inneihni ah bak lo chuan tumah ka mutpui lovang ka ti tawh

Ka thaw chhuak leh hawk, tui vawt takin ka hmai ka phih a, ka phu deuh zawk. Ka zia deuh sawt. Ngaihtuahna fim ka pu leh thei ta, inneih thlenga min nghak thei anih chuan ka lawm em em ang

Frantz a bul ka va thleng chu hahdam deuhin a lo ṭhu a, min hmu chiah chu a ding a "I ṭha em?" A ti a

"Ṭha e, ka lawm e" ka nui seih a, ka kut suih in a mitah tak ka en a "Frantz thudik ka hrilh che a ngai, inneih hma loh chuan tih ka duh lo" ka ti a

"Ka hria alawm" a ti a

"Inneih hun thleng i nghak thei ang maw?" Ka ti leh a

"Thei e a" a ti a, ka la sawi zo lo tlat "Khawngaihin khirh takah min ngai lo la, ka lo intiam tawh a ni a, min zahsak theih chuan ka lawm ngawt ang" ka ti a

"Ka hria e" a tih leh pawh chuan ka la chhunzawm ta hram "ka chian leh hram duh a...." ka zuzi leh ta. Frantz chu a nuih a zat hmel hle mai "I remti vek maw?" Ka ti leh a

A ipte zenin a bu nghut "Min pek tur lam ni lovin ka duh che, nghah i duh chuan kan nghak thei alawm. Ka thei dawn lo anga i ngaih chuan ka rin sual tir thei che" min rawn cho sak a, ka mitko ka san a
"Tunah chuan i haw hma ngeiin movie en ang aw" a ti a, ka khi ver ver

Ka melh leh ralh a "A ṭha e, mahse kan en tur chu keimah in ka thlang ang. Popcorn, ice cream leh gummy bear leh..."

"Lili duat, movie chu lo thlang la, ei tur chu ka rawn la ang" eitur ka lo suangtuah lai mekin min rawn ti ding a, min kal pel a, ṭhutna ah chuan hahdam zetin ka ṭhu thluang a

A bialnu ka ni a, ka chin ṭhan hi ngaiah a neih ve a ngai ang

Frantz POV

Bathroom a a kal laiin bang ah ka lu ka tauh lo chauh. A mumang min hrilh kha ka mitthla ah ka hmu a, bawiha hi a lo che ve vat. Ka mal chu ka hmer ngat ngat. Chip chat in ka ṭhu a, hahdam ka mamawh a ni. Thlan fim a rawn chhuak a, zep miah lovin min hrilh bawk si a, ka hrilh hai lek lek

Min ti â thei mai dawnin ka hria, a laih apianga a heh a pet ṭhin te hian a mizia danglam bik zia a lantir. A nui hmel te hian mi a aikaih tlat...A hmui pawh hi nilengin ka fawp reng peih ang. A lungphu ri pawh theih se chu ka hre reng duh ang. Mi hlauhawm tak ka ang viau maithei mahse insum a harsa ve em a ni

Liliana chungah ka rilru ka pek apiangin a fimkhur em em zel, a rilru la peng tu a neih hi chuan lehkhabu te a chhiar daih zel. A lang tlang lutuk hi ka duh zual sauh ṭhin

Hmanhmawh takin ka nawr thei lo, a zahawmna hi a tan a hlut zia ka hria. Inhnaih taka kan awm chuan min pehhel zel, ka hrethiam hle bawk. Dawhthei turin min siam a, ka tan hun a la inhawng ve em em ang. A tan mi bik nih ka duh

Special na deuh te hi a nei a, mipa dang lakah ka chan anih chuan ka â hle ang. Kha mi rawva pa lakah khan ka chan ṭep a, ka hmuh phak loh ah ka awm tir tawh lo ang

Kan inngaihzawnna in a ken tel bawk chu hahdam taka awmtir a ni. Mahse chu chu chona lian tak a ni. Inhnaih taka kan awm in ngaihtuahna dik lo ka pu zel dawn. Insumtheihna ka la nei a, tui vawt taka inbual ka ngai fo dawn niin a lang

A vun nem thap ah han fawp ila tia ka ngaihtuah ringawt pawhin ka hmui a fawn hlek hlek. Thil ṭha hi chu a nghak chhuak peih te tan a hlu ṭhin. Nghah rei chu a la ngai dawn hle mai

Bathroom ah a awm rei tawh riau in ka hria, ka tih hlauh loh hram ka beisei

A rawn let hnu chuan sawi tur a nei tih ka hre mai

Sawi tur a neih hi chuan a hnungzang a ngil at zel, a kut zungṭang erawh a che nasa thei hle

A sawi tur awm ang ka hre mai. Liliana anga hmelṭha kum 24 mi tan a thianghlimna a ven ṭang ṭang chhan tur chu inneih hun atan a khek tih ka hre mai

A sawi ṭan a, a ṭawng bah nuai bawk, ka duh telh telh. A thusawi zawng zawng ka pawm vek tih a hriat laia a hmel landan kha pui tak a ni. Ka nghak thei tih ka sawi laia a hmel te kha hmuhnawm tak a ni

Choka ah eitur ka la a, ṭhutna lam ka pan leh hnuah Tv a lo en tui lutuk aniang, min hmu awm pawhin a lang lo. A biang a ti puar pap a, duhawm reuh tak a ni. Tui vawt a inleih ka ngai ngun dawn hle mai. Heng zawng zawng hian chhan an la nei vek ang

Popcorn leh gummy bear bowl a ka dah a hmuh chuan nui seih chungin a ban a, ka mitmei pawh a veng lem lo. A thil ei lai pawh chu ka thik dawn hial mai. A nuihzatthlak zawk alawm le

'The Mummy' a thlang a, Brandon Frasier a tlangval lai a star anih ka ring ve tawp. Movie a chhuah hnu lawkah a tawp chawt a

Zawhna nei tih hriat deuha ka lo melh hnuah ka lam a rawn hawi a "Hriat chhuah thut ka nei, hna kan la thawk dun dawn tiro?" A ti a

"Ni e..." ka tih chuan a sawi chhunzawm leh a "Profe deuha kan awm a ngai dawn ania aw? Ka rilru la peng turin awm lo la" a ti a

"Keimah maw? Chutiang thil tih ka tum lo re re" pawisawi loh hmel deuhin ka inkawk a

"I ti ṭhin chiang alawm. Min rawn melh zeuh zeuh ang te kha" a ti a
"Eng nge dik lohna a awm em ni?" Ka hmai ka tichuar nung a. A kut a la sawn a "En la hetiang hian..." ka mit zawnah a rawn insiamrem a, ka men ṭhin dan a zir a, a van chhelo reuh tak

A ti nawn leh a, a hmui a pet leh zeuh a, ka inrin hma in a khabe ka chelh a, fawp turin ka pawt hnai a, zing kar aṭanga ka chak tawh a ni. Ka awm ah a kut a nghat a, a khabe ka la vuan reng. A nghawng ah ka chelh leh a, kan in thawk khum ham ham. Ka kawr chu a chelh nghet sauh. Ka kalsawn a, a thaw chhuak hak. Ka lam a rawn hawi hra a, ka lo khi suk "Hnathawhna ah chuan fel taka awm ka tum dawn nia" ka ti a, min chhang lo in lai deuhin a hawisawn a, movie a en daih

Liliana POV

'The Mummy' kan en lai chuan min kuah hlun a, bowl lian tak chu a keng bawk. Popcorn leh gummy bear chu ka ei mawlh mawlh. Kan in date hmasak berna a ni mai ang chu

Reilote chhung chu min ṭhawng deuh zawk. Hnathawh naah fel takin a awm theih ka ring lo. Thaw leh hak in tv chu ka melh char char

Movie a tawp dawn lamah chuan khua a thim ṭan tawh, a lungphu ngaithla reng chungin zawi muangin ka mit ka khap a, a perfume rim chu hip leh vang vangin ka lo muhil daih

A tuk zingah Frantz a khumah ka harh hlawl. Keimah chauhin ka lo mu a, nizana ka kawr hak lai pawh ka la ha thlap. Frantz chu ka hmu lo, bacon leh pancake tharlam deuh rim chu ka hnar ah a cham

Khum aṭang chuan tho in bathroom lam ka pan a, toothbrush la hman loh ka hmu a, toothpaste pawh a awm bawk, a la intuam vek. Ka nui seih a, ka nawt mawlh mawlh. Ka hmai ka phih zawh ah choka lam ka pan a

Frantz chuan Tshirt var leh jogger dum a ha a, ka en reng tih pawh hre miah lovin a che char char. Tih phut zawk dan tur ka ngaihtuah laiin, ṭhutthleng seia lukham awm ka hmu a, nizana a mutna a ni ngei ang

Ka inrintawkna a lo let leh tawh nen nuam tak a ni. A kiangah kal in a kawngah ka kuah a, a hnungzang ah ka bei hle hle

A rawn khi suk a "Zing Chibai, i mutui em?" A ti a
"Imm" ka mit ka chhing a, ei tur rim chuan min fan raih, ka pum a ri ruih ruih

"Nizanah ṭhutthleng seiah i mu em ni?" A chiang sa viau nan ka zawt leh kher
"Ni e, i hnar sek sek kha i hria em?" A ti a, ka pha nasa "Awihawm loh lutuk" ka ti a

"I hnar chiang alawm" a lu a bu nghut a, koala ang maiin ka la kuah reng

"Chuvang a mi i mutna i sawn?" A chhanna ka hre tho a, ka fiam chak hrim hrim

"Imm" a ti mai a, engmah a sawi lo

Frantz POV

Liliana hian min fiam hi nuam a ti hle mai. Ngaihtuahna mak deuh deuh a nei chiang mai. Ka hriat theih chhan pawh umzui kha nuam a ti tlat a, nizana ka tihdan a zir pawh khan a sexy lutuk. Chona nasa tak a ni, inneih hma chu a duh ah a chiang tlat

Ka lu ka thing a, a kut chu la thla in ka inher a, kan in hmachhawn chiah, hun bawhpelh lovin ka fawp a, min rawn chhang let ve a, ka che sawn zeuh "Zing Chibai" ka ti nawn leh a, a nui ker ker "Zing Chibai le" a ti let a

"Tukṭhuan min eipui ta che" ka ti a, nui seih in a bu nghat. Dawhkan a lo peih fel a, pancake leh bacon chu plate ah ka dah a "Armagio a'n a hruai haw dawn che nia, ka lawyer hmuh a ngai a, zanriah ei turin ka rawn hruai leh ang che" ka ti a

"Frantz keimah vangin i intibuai lovang tih kan sawi dun tawh kha" a ti a, a lam ka hawi a "Chutiang kan sawi lai ka hre lo, zanriah mai mai alawm. Ka bialnu i nia ka ngaihtuah che i ngai alawm" ka ti a

Liliana POV

A thusawi avang chuan ka insum thei lo, ka nui chhuak hak a. Frantz hi chu mi pakhat a ni ve chiang. A ei siam ka tem chiah chu pasal tur chi a ni tih ka hre mai

Chuta ṭang chuan ka hmangaih zual telh telh maiin ka hria. Thla khat a liam leh tawh, hna kan thawk dun in kan inngaizawng reng bawk. Mipa dang in min rawn nel lutuk te hian a thik ṭhin. A tirah chuan Profe deuhin a awm ve a, a duhzawng te ka zawt bawk. Hna a thawh nasat avangin a rilru chhawk zangkhai tumin a kiangah ka ṭhu ṭhin. Kar tawp ah Rome ah kan kal a, ka mal ah a lu a nghat a, ka massage sak a, min fiam khat hle bawk

Kan chhungte ve ve pawh an inpawh nghal thuai. Frantz a pa kan hmuh hmasak ber chuan an inang ka ti lutuk. European aw phawi chhah tak a nei a, a sam bu a ṭha hle. A ngainatawm in soccer fans diktak a ni. Ka pa nen an duhzawng a inan hmel hle mai. Mariella i'n barbecue party a siam a, ka nu nen an titi bawrh bawrh

Thla ruk a liam leh hnuah pawh kan inzawmna a la ṭha hle mai. Frantz chuan thilpek min pe fo a, ka duh lo viau na in tih theih ka nei lo. Hna lamah erawh thawk ṭha tak ka ni. Ka client ka bialpa ni bawk hian min fiam zeuh a, lai deuhin duhtawk turin ka ti a, ka fawh chauh in a duhtawk tur thu a sawi a, a ti leh tak tak ngai lo

A rilru hahna a reh hi chuan ṭha takin a thawk leh mai zel. Chamille pawh hna a rawn thawk leh tawh a, a changin Mr Cavalier chu a zui a, a chang leh keiin. Ka zui loh chuan ka aw tal hriat tumin min rawn be ṭhin a, a hlimawm thei lutuk

Chamille i'n kan inngaizawng tih a hriat chuan ka rin loh dan daihin a dawngsawng "A hun tawh reng alawm" a ti a, nui chungin a hawisawn daih

Kan thawh dun pawhin engvak mah a thleng lo, kan in melh tawn zak zak leh car a kan infawh zeuh tih loh chu. Ka hrilh hnu aṭang engmah tih a tum tawh lem lo, a chang chuan ka ngai deuh tho. Frantz nena engkim tih dun ka chak ṭhin. Profe deuha awm duh tu zawk ka nih avangin a ṭha zawkah ngai phawt mai ang

Thawhṭan tuk chu thlawhna chhungah engkim ka lo en fel a, Choka tui dehna ah glass ka hru fai a, a rawn luh lai pawh ka hre lo. Counter ah chuan min rawn kuah a, ka nui seih. A rawn kun hniam a, ka nghawng ah a fawp a, ka nui her her. Ka kawng ah a rawn vuan leh a, kan insi chat

"Zing Chibai Mr Cavalier" ka aw ki a dik chiah lo

A rawn thaw ham ham a, ka hnuai lam a nghawr det det. Chil ka lem khawlh, lum ka ti sawt riau. Ka kut thlan hlup chu tisa chakna in min rawn tuam hlup

"Uh....tun ṭum atan hostess ka ni dawn" ka ṭawng sak hle, ka mit ka khap sawk "Imm" a ti mai a

Ka mawngtam zawnah a kut a nghat a, a darah ka bei hle hle. Ka khup a zawi vek. Ka zauthau hle bawk, ka kut ding lamin a kut ka chelh a, ka pawnfen chungah ka nghat a. A kut veilam chu ka hnute zawnah ka dah a, a ṭham chuan nuam ti lutuk in ka ṭe ṭhawt. Ka heh ka pet vang vang

A rawn nui chhuak hawk a, min nawr deuh hlek in zawi sup hian a rawn ṭawng a "Zing kar aṭang i duh a ni maw?" Ka mal chu a piai leh a, ka pawnfen chhan ah a kutin a rawn kawk zeuh a, ka rum nghat. A kekawr chhan ah ka nawk zeuh a

Counter ah min hlang a, a vei lamin ka mawngtam a vuan a, a ding lamin ka pawnfen hnuaia mal a zut a, a lum nuam ham ham lutuk. Ka ke inkar a hnaih chho telh telh

Ka ke chip ka tum a, mahse Frantz chuan ka dar ah a chelh a, ka rum leh nghat. Ka ke pawh a hahdam leh tawh. Frantz chuan a tih zawm leh a, second tin chuan thawk harsa ka ti. A kut chuan min rawn dai thuak. Ka bengah a rawn phun sup "Zing Chibai Ms Chavez, vawiin chu a nuam dawn hle mai" a kalsawn daih a, ka hrilhhai zo vek

****

Chhunzawm tur


Show post links
Top