LOVING MR CAVALIER BY Bee Hlutei (Completed)

[Ngaia]

Frantz POV

Ka insumtheihna ka hloh ṭep avangin ka inzilh char char. Va let leh a, zawh fel law law chu ka chak rum rum. Ka mamawh ang chiah in ani pawhin min mamawh tih ka hria. Kan inngaihzawn tirh aṭang rengin a zahawmna vawnhim sak turin ka intiam tawh a, Liliana fiam hian awmzia a nei dawn lova, thlemna do zawh a har hle dawn a ni. Thil ho te a tih pawhin ka rilru a la peng zel, hriat loh karin ka lo en leh reng zel. A chin ṭhan pawh ka hre tawh lutuk, lehkhabu a chhiar apianga a nui ṭhin te leh a zam deuh apianga a hmui a seh niap niap ṭhin te hian a ti lang duhawm reuh lutuk

Thlawhna chhung ka luh tirh a, min hnung chhawna a din khan a hnung ah ka va kuah a, tawk deuha inchei a thiam te hi a ngaihsanawm. Ka nghah rei leh a tawpna chu a duhawm dawn tih ka hria. Ka lawm zawk viau mai. Puitling takin kan inngaizawng a, Liliana hi ka hmangaih dawn chuan a pian nalh vang ni lovin amah anih tawp vang zawkin a ni ang

Ka inzilh leh fe hnuah insum a ngai tih ka hria, chuti anih loh chuan duhna leh zauthauna in ka khat ngei ang. Rilru na taka siam ka duh tawh lo. Muangchanga kal bek bek a ngai

Liliana POV

Choka ah ka la awm reng. Frantz a insumtheih avangin chung lama Pathian hnenah lawmthu ka sawi mawlh mawlh. Chuti ni lo se chu keimah zawk hi insumthei lo zawk tur ka ni tlat. Frantz hian min ṭhawn ka ring ngai lo harsa ka ti ṭhin hle bawk. Ka chak ve tawk alawm. Nghet taka din a ngai. Ka duh loh chuan min nawr lui dawn lova, ka intiamna kha min theihnghilh tir lovang, chuvang pawh chuan ka lawm a ni

Ka in thing harh a, buaina dang awm lovin ka tihtur ka tifel a, ka hlauhthawn ang aiin kan thlawh chhung chuan a reh ang reng. Kan ṭum hnuah a ina leng turin min sawm lova, car ah pawh min chhaih lo, a reh vawng vawng a ni mai. Armagio a'n tuala car a tih din laiin min fawp zeuh a, an tlan liam daih

Ka ngaih chu a ṭha chiah lo. Min ning tawh anih te ka ring ve tawp. Inchhung ka luh chuan ka tawt up up. Min ṭhen a lo tum ru anih te ka ring rum rum

Ka chhungte ka be zuai a, chumi hnuah ka inbual a, Frantz a'n min rawn biak ka ring a, mahse a reh lutuk ringawt

A tlai tawh a, a chau anih te ka ring. Kan inngaihzawn tirh aṭang khan min rawn be zat zat a, zanah pawh a hmaih lo. Tlaia kan inhmuh pawhin ka haw veleh min rawn be tho ṭhin a, zing dar khat a ni tawh a, min la rawn be chuang lo. Eng nge a an? Tih hriat tumin ka be tawp mai

Vawi khat, vawi hnih, vawi thum, a ring a, min chhang lo

Ka thin a phu rang telh telh, na ka ti viau bawk. Ka lungphu a inthum rawn tluk tluk. Zam deuhin ka kuttin ka seh a, ka kutphah a thlan dup

A Vawi sarih naah min chhang a

"Hello?" A aw a ṭeng chhuai, ka hahdam huai

"Hey? I ṭha em?" Ka aw ah chuan ka ngaihtuah tih a hriat viau ang, lungngai deuhin ka ṭhu thla a

"Aw ka ṭha e" Frantz a'n a ti a, kan inkar chiang ta lo lutuk chuan ka ngaih a ti ṭha lo. A aw ki pawh a hma ang kha a ni lo tlat. Tun ṭum chu hla deuh taka awm ang mai a ni

"Min rawn be si lova ka ngaihtuah deuh che a" rilru nuam chiah lo in ka chhang a, a chhan ka sawi a ngai ta mai te chuan mi hran ah ka inchan hial. Ka kut te pawh a khur hlak hlak

"Ni love, ka ṭha e, ka chau lutuk a, ka inbual zawh khan ka muhil daih alawm. Ka tih hlauhthawn che vangin ka tihpalh" a ti a, chil ka lem khawlh. Ka bu leh nghat a "Awle hahdam rawh, tui deuhin i mu dawn nia" ka ti a

"Ka lawm e" a ti zawi sap
"Ka hmangaih che" ka ti thut, ka meng zau kawk, ka hmui ka hup a, ka sawi hman vek tawh bawk si

Phone chu a reh vang vang, ka thinlung a na thar thut. Second tin chuan a reh tlawk tlawk. Ngawi reng in min chhan hun ka nghak a, ka kut a khur char char bawk

"Ka dah phawt mai ang" zawi tein a ti a, ka mit ka chhing sawk. Ka thinlung hi a kerh darh vek ang mai a ni. Ka mittui a rawn luang ngiai ngiai a, phone a dah daih

Mi â tak ka nih hi, â lutuk mai, ka mawl hlawm tawp

Kha thu ka sawi lai khan eng nge ka ngaihtuah a? Ka hmangaih thu hrilh maw?

A chang leh ka in nuih sawh a, mi mawl tak ka ni chiang alawm. Ka mittui hi ka dang thei lo

Ti nge ka ṭah le? Keima thiam loh vek a ni sia, tinge Frantz kha ka hrilh le? Thil dik lo chu a awm ngei alawm. Keimah vang a ni maithei. Chuti ni lo se chu tiang hi a ni miah lovang. Zing aṭang khan a mizia a inthlak tawh

Ka lu ka thing a, ka lungawi lovin ka rilru a na hle, ka mittui rawn tla sek bawk nen keimah vangin kan inkar a chhiat phah anih hi

'Ka hrilh reng che kha' min lo ti tu hi an awm a, 'ngaihdan siam zung zung lo tura min hrilh tu an awm bawk'. Ka mawl em a ni tih loh chu sawi tur reng ka nei lo

Chau tak chungin khum ka pan a, ka intuam hlun. Ka mittui a rawn far keuh keuh a, ka lu te hi a na ut ut. Ka hnar phui lutuk chuan thawk a ti harsa. Ka inkhawngaih thar hle mai. Kan hun hman dun tawh te ka chhui let a

*Flashback*

A ina movie kan en hnu khan kan chhuak dun leh a, Beach bula restaurant ah kan chawl dun a, inkai rialin tui ah kan kal a, darkar khat kan inbia a, kan inum ziai ziai a, ni tla tur kan thlir a, kan nui dun char char

A tukah movie enin kan chhuak a, a tuk leh ah kan bazar a, Frantz a'n min han vah pui tak tak mai chu nuam tak a ni. Dawr ṭhenkhat ah erawh ka lut duh lo, kan chhuah dun apiangin min surprise ziah. Amah ah hian ka duh zawng zawng a kim vek. A hawihhawm a, mipa anih angin mamawh erawh a nei ve tho

A chang chuan nghak tura ka nawr avang hian nuam ka ti bik chiah lo, a rilru nat dan tur pawh ka hria, mahse ka din ngheh a ngai a ni. Zantin hian kan pahnih tan ka ṭawngṭai ṭhin. Min tilui ngai lova, infawh bak a pel duh lo, keiman ka tih hmasak chiah in a che ṭhin. Mahse a indang thei zel. A thutiam tih hlawhtlin a tum tih ka hmu a, dawhtheihna a neih lehzual theih nan ka dilsak hram

A kianga hun ka hman tam pauh leh ka duhna a zual ting mai a ni. Dunns te nupa ka zui zawh ah Airport ah min lo hmuak a, pangpar a lo keng bawk. Min fawp vawng vawng a, surprise chu ka ning em? Tih te min zawt a, ka nin loh thu ka hrilh hnuah, a inah min hruai a, eitur a lo siam peih diam. A eisiam ka tem laiin min rawn en a, ka nui ker ker. Eng nge ni? Tih ka zawhin zanriah ei kham a nghah thu min hrilh a

Pangngai deuhin kan titi a, chumi hnuah inkawm hona ah kan ṭhu a, min surprise tur nghakhlel ru takin ka awm, ka khup a sai dar dar. Ka heh ka pet a, min kalsawn san a, a rawn let leh hnuah album a keng a

Tumah a la hmuh tir loh thu a sawi a, "i nausen lai a mi?" Ka ti a, "Chutiang deuh chu, mahse chu chu a chhan a ni lo" tih pahin thlalak a mipa naupang pahnih thlalak min hmuh a

An hlim dun takzet. Lawng chhungah an nui ver ver a, an kiangah Mariella pawh a awm. An thlalak tawp ber a nih thu a sawi zawhin a mittui a rawn tla a, a khawsik a san thu leh damdawiina a boral thu a sawi tel bawk

A mittui ka hruk sak a "ka tihpalh lutuk" ka tih laiin a inhnit hlawp hlawp. Ka kut fawp in "Ka ṭha e" a ti a

A biangah ka fawp leh a, kan in hnaih khawp mai. Kan kut kan insuih dun rial a, a mit a chhing a, a mittui a rawn luang ngiai ngiai. Ka kalsawn deuh a, a mitah tak ka en a

"Eng nge a hming?" Ka ti a, khur deuh hlak hlak in a mit a khap fuk a, a mitmeng mawi tak mithmul sei tak chuan min rawn en a "Franco, a hming chu Franco a ni" a ti a, lu bu nghat in "A ṭha e" ka ti a, ka fawp vang vang

A mittui tla kar aṭanga min rawn en khan ka hmangaih a ni tih ka hre nghal

*End of Flashback*

Khata ṭang khan ka hmangaih thu sawina hun remchang ka zawng char char ka hmu thei si lo. Ka chan ka hlauh avangin tunah ka sawi ta a, ka thawven phah miah lo. Ka hlauhna a belhchhah daih zawk

Ka ti hlau a ni thei mai ang em? Ka va han â tak em. Bangah hian ka lu tauh chawr ila ka harh phah mai ang. Ka rilru hi na tak a ni. Ka awm a na nget nget, ka mittui a rawn dir zung zung

Frantz POV

Khumah ka mu meng kar. Ka rilru a insual nasa hle mai. Ka mit ka khap char char, eng thil mah ka ngaihtuah thei lo. Ka thin a phu dup dup. Liliana thusawi ka bengah a ri nawn tlut tlut

Liliana i'n min hmangaih thu a sawi ania. Min hringtu ka nu tih loh ah chuan min phatsantu nu kâ aṭang tih loh ka hriat lohna a rei ta hle mai

Vawi engzat nge he thu hi Christina khan a sawi, min phatsan tho anih kha

Ka fimkhur a ngai hle dawn a ni. Ka thuruk ka hrilh aṭang khan kan inzawmna pawhin hma lam a pan chho a, keimah in ka hmangaih thu ka hrilh hmasak ka ring a, mahse ka beisei loh dan daihin min rawn ṭhawng anih hi. Dawnsawn dan tur pawh ka hre mai lo

Ka harh chiang tawh bawk a, tih tur mai ka hre lo. Tshirt chu ka ha sawk sawk, ka chenna aṭang ka chhuak a, Armagio a la mut ring in ka tiharh duh lo. Garage ah kal in car pakhat ka hawl chhuak a, rilru fim ka put a ngai. Kal tumna pawh nei lem lovin ka chhuak tawp. Ka thinlung in min hruaina hmunah ka kal mai ang

Mariella POV

Kawngka ri rak ka hria a, ka bulah ka pasal a mu a, ka hlauthawng viau. Staff te mut a hun vek tawh. Tu nge ni ang tih ka ngaihtuah. Misual man chhuah ngei tumin ka tho ṭhem ṭhem. Ka hriatchhuah hma chu ka muhil lovang. Ka pasal chu tiharh lovin zawi muangin ka tho a, chapal bun in inhnuai lam ka pan a

Kawngka lam ka hawi a, a inkalh ṭha vek. Light pawh on lovin ka tlan thla a, ka thlen thlak chuan Corridor a lo thim vek. Choka chu a eng a, ka chapal khing khat ka phelh a, ka hum nghet sauh. Ka insiam ṭha sawk sawk. In tur thli ri ka hre leh a, a reh duak. Choka ah ka chapal chu vawm ngei ka tum hman ka fapa ka hmuh chuan ka tawp chawt

"Frantz eng nge i rawn tih?" Ka chapal ka bun ṭha leh a, ka thlamuang leh sawt, a rawn lan thut chhan ka ngaihtuah a

"Nu engtin nge ka thawm i hriat a? Thawm ka dim viau asin....ka tibuai che em?" A ti a, ka va pan hnai a

"Ka harhvang lutuk tih i theihnghilh a ni maw? Tinge i la men a? In rawn ṭumna a la rei si lova chawlh hahdam i mamawh asin" hmai chuar nung in a biang ka chul a, 'a ṭha em?' Tih hriat tumin a chal ka dek a

"Ṭha e, ka sawi awmzia chu min hmangaih thu a sawi a, nu" a thaw hulh a, ka tawlhsawn deuh bawk. Tu chungchang nge a sawi ka hre mai. Ka bu nghat a, ka fapa awmdan leh a mitmeng buai ru tak ka hmu a "Nang pawhin i hmangaih a, i sawi ngam lo tiro?" Ka ti a

Min chhang lo chuan in tur a thli leh a, a tlak pawp. In thlit leh a tum chu ka lo vuan a, ka tlak ve pawp. Ka fapa ka en a "Inbia ila" glass chu counter ah ka dah a, dawhkan bula ṭhutna chu ka kawhhmuh a, zan rei tak a ni ngei dawn e

****
Chhunzawm tur


Show post links
Top

[Ngaia]

Frantz POV

"Min han hrilh la" Ka nu i'n zawi sapin min bia a, thaw la hawk in ka lu ka dawm vang vang a, ka sam ka vial tawp ringawt "Kan inngaihzawn tirh khan Liliana i'n inneih hma chu sex hman a duh lo tih min hrilh a, ka remti ve bawk. Min ring lo anih chuan ka entir theih thu ka hrilh bawk" ka ti leh a, ka nu chu a bu nghat a, a lo ngaithla chiang hle bawk "A fair viau alawm" a ti mai a

"Chu tak chu alawm buaina. A bula ka awm hi chuan in sum hi a har ka ti ṭhin. Ani pawh a lo zauthau ve hle ṭhin. Kan infiam ve fo a, mahse ka nawr nasa vak lo, phalna min pek hi chuan a chakna a chhuah vangah ka ngai mai. A tuk zingah a induh lo hle ṭhin. Pathian ṭih mi tak a ni a, amah a inhuat phah hial na tur erawh chuan ka tilui duh lo" ka lu ka thing a, ka thaw chhuak sap

"Awle ka ngaithla e" ka nu i'n min fuih leh sauh a, thawk la leh sup in ka biang a rawn sa hat. Ka nu nena hemi chungchang sawi hi nuam ka ti lo

"Engpawhnise, tukin zing ah khan hun kan nei dun leh a, a hlata awm tur pawhin beih fe a ngai. Ka insumthei lo ṭhin lutuk avang hian ka inhua. Kan thlawh chhung zawng ka inthiarfihlim a, haw veleh be lovin ka muhil daih a, min rawn bia a, ka awm hla der lui a ni. Min hmangaih thu a rawn sawi a, mahse ka hrilh ve lem lo" ka hrilh vek hnu chuan ka nu chuan a ngaihtuah zui aniang

Min rawn en a, a lu thing in hriat thiam loh hmel deuhin min zawt a "Anih chuan eng nge buaina chu? Ka sawi awmzia chu kha pa lak aṭanga i chhanchhuah lai khan elevator ah i hmangaih thu i hrilh a ni lawm ni?" A ti a

"Ka hmangaih thu chu ka hrilh ngei alawm mahse 'Ka hmangaih che' tih dawt hi chu dang tak a ni" ka tih leh hram a, ka dinna chu a nghet vak lo tih ka hria

"Anih chuan i hmangaih em?" Ka nu i'n zawi te in min en a, van lam chu hawiin ka mit chhing leh in ka thaw sup a, Liliana hi ka hmangaih chiang alawm

Ka mit sir aṭangin mittui a rawn luang a, ka nu lam hawiin "Aw ka hmangaih alawm" ka ti a

"Anih chuan hetah hian tinge i ṭhut reng? Kha hmeichhe khawngaihthlak tak kha rilru buai leh na takin a awm dawn asin. I hmangaih tak tak anih chuan a inah va kal nghal rawh" Ka nu i'n ka dar ah a vuan a, inhnit fuih in ka nui hawk a, chil lem khawlh in a kut ka vuan a

"Mamma?" A mitah tak ka en a "Si figlio mio?" Zawi te in min chhang a "Thuruk i zep thei ang em?" Ka tih chuan a nui seih a, a hmui a tih pawrh tarh hnuah a rawn nui a, a lu a bu nghat a

"Tehreng mai" a tih chuan ka nui sen sen a, ka thu sawi leh tur avang hian min chhuang dawn tih ka hria

"Zungbun ka lei tawh a" zawi te in ka hrilh a, ka kut thlah in a mak ti lutuk a ka hau, ka hmui a hup a

"Engtin?" A rawn ti zawi sap a, a mittui a tling kiau, a mit a khap sawk a. Ka ipte aṭang box chu ka phawrh a

A inhnit feih a, a han hawng a, diamond mit leh silver a inkual a ni. A nui hak a, min rawn kuah a, ka nui chhuak ve hawk a, ka mittui a rawn luang thla sawk. Kan inthlah hnuah a nui ker ker a "Engtik in nge i lei a?" A ti a

"Thla khat liam ta ah khan Lili kha zinna aṭang a rawn let a, thil ei puia ka sawm khan surprise tur ka nei tih ka hrilh a, ṭhi pek ka tum a, room a ka va kal laiin thlalak hlui ka hmu ta zawk a, ka hmuh ta zawk a ni. Franco chungchang ka hrilh a, ka mittui min hruk sak a, min fawp asin. Chumi zan chuan ka hruai haw a, Marco's ah kalin zungbun ka lei a, min hmangaih thu a sawi hun ka lo nghak a, zanin khan a sawi ta reng a ni" ka ti a

Ka nu chuan min chhuan hmel khawp mai. Min kuah vawng vawng a, ka ban ah a beng a "Zing kar a min ṭah tir vang anih kha. Hmangaihna lamah hi chuan ka zei vak lova, hmangaih i tawng ka hmuh hian ka duhthusam a kim vek. Engtik in nge inhual puiah i sawm dawn?" A ti a

"Ka hre bik mai lo, mahse zaninah chuan hrilh tur pakhat ka la nei" ka ti a, a lu bu nghat in min kaltir a, a biangah ka chuk zeuh a, lawmthu hrilhin "Grazie mamma, ti amo(Ka lawm e nu, ka hmangaih che)" ka ti a

"Ciao mio amore" a inhnit leh fuih a, nui chungin ka kalsan a

Liliana chenna lam panin ka inkhalh chhuak a

Liliana POV

Ka mutui thei thlawt lo, inchhung ah te ka tei kual a, fridge chu ka hawng a, Neapolitan ice cream bucket chu ka la chhuak a, silver spoon la chhuak in tv chu ka on a. Hun awl ka neih veleh Hell's kitchen chu ka en a, narrator in a sawi nawn leh laiin ice cream chu ka suak hlawih a, chocolate chu ka ei lo a, chhan pawh a nei chuang lo vanilla leh strawberry zawk chu ka ei a

Ka insut nasa lutuk a, ka hnar a phui vek. Ka thil ei a vawt bawk si. Gordon Ramsay a'n ei siamtu te a vin chuan min ti zia hawk. Ka thinlung na hi a dam deuh sawt

"Ka hmangaih che" tih ka sawi lai kha ka bengah a ri nawn tlut tlut, nuam lo ka ti hle a ni. Ka hnar a sa hut hut, ka mittui a rawn tla a, dik tak chuan ka hlau alawm. Khami vang khan Frantz hian min kalsan a ni thei mai ang em?

Ice cream pawh bucket ah a tui ṭan, ka rum nghat a, show chu ka ti ding a, choka lam ka pan san. Freezer ah container ka dah a, fridge hawng leh in mit khap lo in ka melh ngai ka melh reng

Ei tur ka hmuh mai loh avangin kawngka chu lungawi lo zetin ka khar a, ka room leh nghat. Walmart chocolate to hmel tak chu drawer ah ka thukru a, inchhungah ka kal kual leh a, box chhunga ei tur hrang hrang chu ka la a

Candy chu ka keih hmawk a, thaw chhuak halh in ka mit ka chhing a. Ka thil ei tui lutuk chuan vanram min tem tir. Mahse chini chhin chu a chhia a, ṭek leh khawpui a ri rum rum. Tukverh chu ruah in a rawn theh ṭhat ṭhat a

Ruah rawn tla chuan tuna ka rilru awmdan hi a pholang chiang hle. Zing dar thum a ni tawh a, ka mut a chhuak miah lo. Ṭhutthleng lam bawk ka pan a, movie chu ka en leh daih

A hnuah Gordon Ramsay a'n a tla tur a thlan lai tak ania, music rawn in ṭham chho nen thiam ka tih mi kha a tih tlak loh nan ka lo ṭawngṭai a, kawngki kik ri ka hre nghal. Ka phu zawk mai

Tukverh a ka hawi chhuah chuan thli a tleh vuk vuk a, tun ang hunah tunge rawn kal ang tih ka ngaihtuah. Tv chu ka ti ding a, ka hriatsual anih ka ring. Ngawi rengin ka beng ka tun hra a, kawngka an rawn kik leh

Chil lem khawlh in inchhungah chuan hmanrua ka zawng ruai. Ṭhutthleng hnuaiah tiang awm ka hrechhuak zawk. thir tiang sendang chu ka la chhuak a, kawngka lam panin ka kal ṭhem ṭhem, kawngka chu a rawn ri leh a

A tirah chuan 'tunge ni?' Tih ka tum a, mahse mi rukbo ching emaw suamhmang lo ni ta se chuan an rawn kik dawn lo tih ka hrechiang. Thawk ka la leh a, kawngka chu ka chelh vang vang a, muangchangin ka hawng a, tiang ka la kang a, vuak ka tum chiah Frantz chu a rawn lut a, a kawr leh sam chu a huh hnuang, ka biang ah rawn vuan in a theihna zawng zawng in min fawp a

Tiang chu ka thlauh chiang kher mai. A nghawng ah chelh in ka fawp let ve a. A ke in kawngka a tlawh a, kawngka chu a khar a, min nawr let a, bang ka deng dawt. Ka mawngtam ah a vuan a, a taksa in min rawn deh laiin ka alh chhuak lo chauh

Ka thawk a chham dawn aniang, a inthiarfihlim a, min rawn thawi fua. A thaw chhuak leh hawk a, min en char char, ka pum a nghawr dar dar. A sam hnawm deuh chap chu a nghawng ah rawn luang in a awm ah a rawn far thla a, a mit a khap sawk a, min rawn en lehin "Ka hmangaih che. Ka kawchhunga awm zawng zawng chen hian ka hmangaih che. He thu ka sawi chhan pawh tuna ka khawih vang che a ni lova, hmangaih theih ka ni tih leh hmangaih ka phu tih min hriattir vang a ni" ka ti a

A thusawi chuan ka mittui a rawn kai chhuak, ṭah hun chu ka nei hman lo, kan hmui kan in chuktuah leh a, a ṭangah ka bei hle hle. A kawngah ka ke ka nghat a, Frantz pawh a rum nghut. A hmui ka seh sak a. Ka mawng chu a piai leh a, ṭhutthleng lamah min hruai phei a. Min ṭhuttir hnuah kan inhnaih leh viau. Thaw halh in ka fawp a, kan in nawk nasa mai

Frantz POV

Kan boruak inthlak chak lutuk chu mak ka ti mahse ka insum vat a ngai. Liliana hi a thutiam ah ka hmangaih zia lan tir nan ka din ngheh tir a ngai

Ka duhna te dah ṭha in a khabe ka chelh a, fawp leh zeuh in ka kalsawn a

Liliana POV

Ka thaw chhuak sap, ka awm ah ka kut ka nghat a, mit chhing leh vang vang in rilru fim tak put ka tum a

"Nang hi..." a awm ah ka kut ka nghat a "Hmeichhe fiam dan i thiam hle mai" ka ti a, Frantz chu a khi suk a, a kut tin chuan min rawn kheuh zeuh a, ka ke tin ka ti kawm a, ka nam leh sawk a "Nang hi ka chak loh na i ni" ka tih leh chuan duh hmel takin min en ngawih ngawih

A chal ka si chat a, thutak deuhin ka hrilh a "I nghak thei lo tih ka hria alawm" ka ti dek dek a, ka khabe ah piai in min rawn ti tawp a, ka hmui a tuai leh zeuh a "I tan chuan kum sangkhat pawh ka nghak thei ang, a chhan chu ka nghah rei pauh leh i duhawm tur zia ka hria" a ti a, a mitah tak enin ka thaw sap a "Tu nge i nih?" Ka ti a

Frantz chu chimawm deuhin a rawn nui a "Kei hi maw nangmah neitu tur che, midang ta i nih ka phallo" a ti a

Nui leh ker ker in ka fawp a, a nghawngah ka lu ka phum a, a awm ah ka bei hle hle. A lungphu ri ka ngaithla a. Kan in a tifuh vek pawh chu pawi ka ti tawh lo. Zingah chhuat tihfai leh a ngaih pawhin pawi ka ti lo. A ṭanga bei hi nuam ka ti

Min kuah hle hle chungin a zai rat rat a, ka chalah fawp leh in ṭhutthleng chu a ngheng leh ar ar a, a muhil nghal daih. Ruah a la tla ser ser bawk si nen mut a tui duh ngei mai

A tuk zing ka harh chu Frantz a'n min lo la kuah reng. Engtin nge kan len theih pawh ka hre lo. A ang chhungah ngei ka harh thei hi a lawmawm ka ti. Frantz bula ka mut vawikhatna a ni a, zep lo ah chuan nuam ka ti hle mai

Kan inkuah dan ngai ngaiin ka insiamrem a, nui seih chungin ka mit ka chhing leh a, Frantz a lumna chu ka chhim a

A kawr a ro tawh a, a jeans chhan ah ka tal ka tal a, Frantz pawh a rawn meng phut

A phun sup a, a rawn zuang chhuak thut a
"Eng nge, eng nge, eng nge?" Hrethiam lo leh mak ti lutuk in ka meng zau kawk a. Frantz chuan rang lutuk in "Engmah a ni lo" tih leh bathroom a luh a rual a, hrethiam lo lutuk in ka khap sawk. A hnu chuan ka hrechhuak leh chiah. Ni lo

Ka chet dan ka ngaihtuah in ka biang a sa hut hut. A jeans emaw ka tih kha a ni miah lo

Awi thih daih mai ka duh

Chhuat hian a ka angin min rawn dawlh daih mai se ka ti hial, ka zak lutuk hi engmah in a sawifiah zo thei lovang

Frantz POV

Bathroom ah chuan harh chian zawk beiseiin ka in phih a, darthlalang ah ka inen chiah, hnuai lam ka bih leh a, marble counter chu ka chelh a, au tawp mai chu ka duh. Hetiang chuan ka tlin rei lovang. Ka insumtheih loh ka hlau hle mai

Liliana POV

Kut khur dar dar in bathroom ka pan a, ka thaw chhuak sap

Ka thin a phu dut dut, basketball tih rik ang mai a ni

Kawngka ka ngheng a, thaw chhhuak sap in ka bia a "Frantz? I ṭha em? Ka tihpalh aw, ka lo hre lova" insawifiah ka tum a, min chhan mai loh avangin ka zawt nawn leh a "I ṭha em?" Ka ti leh a

Frantz POV

A ṭawng ri ringawt pawhin min ti â mai dawn. Ka hnar chu ka chelh a "Inbual ka ngai" ka ti a
"Awle" a ti mai a, bathroom aṭang a kalsawn a

A kal hnu chuan ka rum chhuak nghut a, inphelh sawk sawk in tui vawt lutuk chuan ka inleih a

Nuam vak lem lo tak a ni, mahse hna a thawk ṭha tho. Second khat chhungin vawt ka ti nghal, ka phurna pawh a bo chawpchilh duak. Shower chuan ka inbual zui a, tui chu a rawn luang ngiai ngiai. Sahbawn rim chu Liliana hman tawh hnu anih vangin rimtui ka ti thar riau. Shampoo pawh ka hmang thlap

Ka inbual zawh ah parda chu ka pawt chho a, thawmhnaw lo awm pawh ka hmu a, Liliana lo luh lai ka hre miah lo. Nui suk chungin ka lu ka thing a, Hoodie leh sweatpant rawng inang thlap a lo ni. Thawmhnawh piah ah toothbrush la intuam thlap ka hmu a, ha ka nawt leh thei chu ka lawm. In ha sawk sawk in inkawm khawmna lam ka pan a

Liliana chu Choka ah eitur siam in a lo buai mawp mawp, min en ngam lo tih chu ka hre ve tlat

Nuam lo a tih ngei ring in boruak tih zangkhai ka tum a

Choka ah va kal ve in pancake batter a tah laiin coffee ka lo siam a

Stove a tih alh laiin ka en leh a, coffee siamna ka tih ṭhat hnuah a rawn ri rum rum. Inher in Liliana chu ka en a, ka sam chu hui thla pap in ka nui suk a "Hoodie leh sweatpants i neih dan hi ngaihṭhat lohna tur a ni em?" Ka ti a

Liliana hian sam et in "I hmuh loh laiin ka hawh lawk pawh a ni thei a" a ti a

"Imm" ti ringawt in counter aṭang ka chhuk a, Liliana chu ka va pan a, a kawngah vuan in a dar ah ka lu ka nghat a. Ka ke lam chu ama hlat ah ka dah ve tawh. Chutiang chuan reilote kan awm a, a tu ve ve mah chuan engmah kan sawi lo. Kan ding dun hle hle

Tukṭhuan kan peih chuan dawhkan ka lo siam a, Liliana i'n plate ah ei tur a lo dah a, kan ei laiin min la en ngam lo reng mahse ka duhdan a ni chiah lo

Coffee chu dah thla in a kutah ka vuan a, a biang a sen vek hnuai lam a melh a

"Hey, duhtawk rawh" zawi sap in ka ti a, mit khap sawk in min en a "Ka hrem che ni berin ka hria" a ti a

"Mahse min hrep hleinem" ka ti sam et a, ka insum thei tih ka hria

"Aw mahse" a ti leh a
"Mahse ti suh, inneih hun thleng nghah i duh tih ka hriat hian ka lawm zawk asin" ka ti a, a kut chu ka tuai sak neuh neuh a

"Tak tak maw?" A ti a, lu ka bu nghut a "A chhan chu hmangaih dan min zirtir a, i insumthei lo lutuk leh sweet i ngaina em em te hi, i muthilh apianga i hnar sek sek ṭhin te leh i nui hmel te hi thil dang te nen" ka ti a, a nui ker ker, a hawisawn a "Ka hnar ngai lo" a ti a

"I ti chiang alawm" ka tih chuan meng kual ralh in a nui chhuak a

"Thil dang hrilh tur che ka la nei ania" ka ti a, beisei nei deuhin min en a "Zaninah ball ah kan kal ang" Ka ti a

"Eng a?" A meng phawk hra a "Tunah min hrilh chauh maw? Thawmhnaw pawh ka nei hleinem" rilru buai deuhin a rum nghat a

"Ka tifel vek tawh. In surprise na tho ah ngai mai rawh. Chei tu tur che pawh ka tifel vek tawh" ka ti sam et a, a hnual rawih in ka hria "Frantz kan sawi dun tawh kha. Inseng nasa lutuk suh" a ti a

"Ni e, i sawi buai hian min tawp tir dawn chuang lo ania" nui chungin ka ding hluai a, fawp leh zeuhin kan thleng leh no chu choka lamah ka seng a

"Anih leh Ball chu khawiah nge nghah a nih dawn?" A ti a

Liliana POV

"New York ah. Darkar khat hnu ah kan thleng thei ang. Insiam rawh le duat" a tih chuan awih harsa ti deuhin ka lu ka thing a

Mr Cavalier hi chu ka hmangaih chiang alawm

****

Chhunzawm tur


Show post links
Top

[Ngaia]

Liliana POV

Ṭukṭhuan kan ei aṭanga dar kar thum a liam leh meuh chuan Frantz a thlawhna aṭangin New York leilung chu kan rap leh der. Ni a lang ṭha in ball neihna atana hun nuam tak a ni. Thlawhna chhungah khan ka chawlh ni anih vangin hostess a ṭan a ngai lova, lehkhabu chu ka chhiar a, min rawn en leh zeuh zeuh ṭhin tih ka hre mai

Nizana ina a rawn lan thut leh a thusawi avang khan ka thawk dan a la dik thei lo re re. Min rawn en reng maiin ka hria, ṭawngṭai tam ka ngai hle mai. Hetiang em em hian a har ang tih ka ring ngai lo. Ka intiamna ka theihnghilh apiangin ka in hau nasa thei hle

Ngaihzawng nghet ka la nei ngai lova, thil te tam deuh ah pawh fimkhur a ngai hle mai. Zing kar aṭang khatiang thil kha tih ka tum lo, high school zirlai tih awm a ni, hria ila chu ka indang mai tur ania

Ka pawm alawm nuam ka ti chiah lo Frantz ka ngaihtuah hle bawk

Min hmangaih thu min hrilh khan ka lawm lutuk a, min nghah theih loh ka hlau bawk si. Ka heh ka pet ringawt. Mipa zei tak a ni ngei ang, hmeichhia hlimna pek pawh a thiam viau ang. Keimah vangin a insum ṭang ṭang a, hma ka sial viau a ni thei ang em?

Ka ngaihtuah thui hma in ka lu ka thing in ka indang a. Hma ka sial hleinem. Ka duhthlanna alawm. Ka taksa leh thinlung hi a kaw tawp ah a awm a, ka venhim a ngai alawm

Frantz a'n min tihnat ka hlauh vang ni lovin vawi tam tak min ngaihtuah tih a lantir tawh a, a unaupa chungchang a sawi pawh khan a sawi chhuak zen zen dawn lo tih ka hre mai. Christina a hrilh ve ang em? Tih ka ngaihtuah chuan ka inhua/haw thar riau mai. A hming ka rilru a a lo lan avang chuan nuam ka ti chiah lo. Kha nu kha hriatchhuah ka duh tawh lo

Thawk ka lak leh hnuah Frantz a laptop a thil lo type mek chu ka va melh a, a thil ziah hmui phun in a chhiar zui melh melh, a mitko a tichuar tap a, a kiu nghat in a kut zungte chuan a hmui a khawih a

"I duhzawng i hmu em ni Ms Cbavez?" Screen en reng chungin min rawn bia a, ka zak leh hnuhnawh viau mai "Hmu chiah lo" ka ti a

"Min va tina deuh ve" a ti leh a
"A nih dan tur reng alawm, ring chhin duh tawh suh Mr Cavalier" ka belh leh hram a

"Tu in nge ka ring chhin ti a?" A nui mai a, ka dar ka san zeuh a, ka hawisawn daih, ka nui hmel chu ka dang thei thlawt lo

"I nuih lai kha chuan hawisawn lo teh, ka hmu chak che ania" a ti a, ka nui ker ker. Ka hmel ka thup thei ngang lo. Min rawn nuih a, ka lu ka thing ringawt. Engtin nge hepa zunah hian ka uai viau theih le? Ka hre bik lo. Mahse thil pakhat ka hriat awm chhun chu ka thinlung zawng zawng in ka hmangaih tih hi

Kan ṭum fel hnuah Frantz a'n Armagio hnenah hotel thleng min thlah turin a hrilh a, chaw chhun kan ei leh zuai a, thawmhnaw dawr ah kan lut leh a, ka meng phar dawrh

Thawmhnaw chu en kher ngai lo in a to dawn tih ka hre nghal mai

Rawng chi hrang hrang a tam ngei mai. Ka hawi kual ruai a, Frantz lam hawi leh in chil ka lem khawlh a "A to lutuk Frantz, Burlington aṭang khan thawmhnaw to ka inbel ṭan a, mahse hei chu a nasa mah mah" ka ti a

"Lili duat, tinge sum ka hman nasat i duh lo em em? Hlim takin awm la ka duh" zawi supin a rawn ti a

"A chhan chu pawisa hian hlimna min pe hleinem. Nangmah zawkin a ni. Ngaiah ka nei thei lo, vawikhat mah ka hak leh loh turah chuan inseng vak tawh lo la" ka ti a

"Awle a ṭha e, inremsiamna nei ang hmiang. Thawmhnaw pakhat kan lei ang a, nidangah chuan i dawr kalna hmunah ngei kan lei tawh dawn nia" a ti a, a mitah tak ka en a, a ti leh tak tak dawn lo tih ka hriatin "Awle" ka ti ve mai a

Frantz POV

Ka chim buai lutuk hlau deuh tho siin inremna ka siam pui a, lottery dawng ang mai ka ni ka nui suk. A biangah ka chuk char char, kan bazar zawh ah Liliana chuan rose gold sequin fual a ke lang thei a thlang a

Pedicure leh manicure turin ka hruai a, lili chuan engmah a sawi lem lo. A ke leh a kut an chei hnuah Pizza kan ei dun leh a

Liliana POV

Ka makeup leh sam an siam lai a, eyeliner min hnawih lai phei chuan car ah ka tlan let leh lo chauh

Engkim an zawh fel hnu chuan ka mut chhuak lutuk chu ka lo bu leh zeuh ṭhin. Mahse muthilh na hun a awm mai lo

Hotel kan let leh hnu chuan kan insiam ṭan mawlh mawlh. Kei ai a lo insiam peih hmasa a, mikhual room aṭanga ka chhuak min hmu chiah a meng zau kawk

Ka sam sei rawng uk chu a sirah kan tawm bawk a, natural deuhin min chei bawk si nen hmuh ka nuam ve viau maithei

"Wow" Frantz chuan ka beng bulah a rawn ti sup a, ka lo nui ker ker hnuai lam melh in "Eng nge ka an?" Ka ti a

"I mawi lutuk ringawt" kut kan insuih rial a, ka lawm khawp mai. Hotel aṭang chuan kan chhuak a

Car chhung a kan awm laiin ka kut ka khal niap niap, ka zam tih a hria aniang

"Lungngai suh, a hma ang bawk kha a ni mai" min rawn ṭawng thlamuan a, ka thaw chhuak halh a, Frantz chu en leh in "Tun ṭum chu i fel tawh dawn em?" Ka ti a

"Eng nge i sawi awmzia?" A ngaihna hriat loh hmel zetin min en a

"Contract hmuh tum a zaidam deuha be tu che" ka ti a. Frantz chu a rum nghut "Engvangin nge fel ka chhuah kher ang? Remchanna lei tu te mai alawm an nih" a ti a

"Wow, ṭhian kawm pawh i thiam chho dawn hle mai" ka meng kual ralh a, ka nui leh hak, Frantz chuan tukverh lam a melh daih

"En teh, contract i pek kher a ngai lo, mahse zaidam taka i biak tho an ngai alawm. Zaninah ṭha deuha mi i biak chuan ka fawp zel ang che" ka ti a, Frantz a'n buai hmel deuhin min rawn en a "Awle" a ti a

Ka nui ver ver mahse paparazzi ten red carpet ah min han bawr leh tak tak mai chu ka nui hmel a bo chawpchilh duak

Nuam ka ti lo tih a hria aniang, min rawn vuan nghet a "A hma ang chiah khan ka bul hnaiah awm rawh" a ti a, zam deuh takin ka bu nghat a, kan kut kan insuih rial, Armagio pawh a rawn thleng nghal chawpchilh. Kawngka hawn hma aṭang thla an la nasa, mipui chu an sahawk a ni ber mai

A eng lutuk chuan ka mit an ti vai vek, Frantz a nghawngah ka lu ka phum a, ka kawngah vuan in min venghim ṭha khawp mai

"Mr Cavalier helamah!"
"Mr Cavalier helam rawn hawi rawh!"
"Mr Cavalier!"
"Mr Cavalier!"

Kan ding leh vei ah min au chuah chuah a,
Inchhung kan lut chiah ka thawveng deuh huai mai

Frantz POV

Nuam lo ka ti ṭan riau, CEO dang te ṭha taka biak a ngai ta mai hi hrehawm ka ti. Mahse Liliana hlimna tur anih chuan ka ti mai ang. Min fawh dawn phei chuan pawi ka ti lo nasa lehzual

Ballroom kan luh chuan host te'n min lo lawm a, lawmthu min hrilh luam bawk

Ṭha deuhin ka be hlawm a, Liliana ngaizawng anga an awm apiangin ka bul hnaiah ka pawt a, a biangah ka fawp zeuh zel

Liliana POV

A tih ang angin ka awm ve mai. Kan ṭhut fel hnu chuan tlai hun nuam tak hmang turin ka inring tawh, ka nui seih a

Christina ka hmuh hma loh kha chu

A rawn lut chiah ka ṭhu ngil zawt, mahse ka beisei loh lutuk in Frantz chuan engah mah ngai lo ang maiin keimah chauh chu min en a

Ngaihven loh ka tum pawhin Christina hming an lam apiangin ka ṭhu ngil awt zel. Champagne te kan in a, thusawi kan ngaithla a, kan lam bawk. Kan nui nasa hle

Tlai lamah a nu i'n a rawn call avangin pawnah min chhuahsan a

Ka hawi kual pahin in tur chu ka lem leh a, ngaia neih a har dawn hle mai. An mawi hlawm siau siau si, an inel hle ang tih a hriat mai. Ka lo ngaihtuah neuh neuh laiin Christina chu ka piah lawk chair ah a rawn ṭhu a

Christina POV (ka duh lo viau nan tih ve a ngai tlat sia)

Hla deuh aṭang ka lo thlir reng a, Frantz a'n Liliana a bawihsawm dan ka hmuh chuan ka dam thei thlawt lo. Min theihnghilh hi ring ngai lo mahse he hmeichhia hian min laksak anih hi

Ka ngaihdan a pel tlat. Frantz a biak ka tum lem lo ania mahse Liliana hi ka sawiṭhaih ngei chu a ngai. Frantz hi a kalsan mai ang

Ngaihtuahna thar nen Liliana chu ka va pan a, Frantz a'n phone a la hmang tho bawk a

Liliana piah chair ah chuan ka ṭhu a, ma nuih seih a "Hahdam teh, zam lutuk duh suh. Ka seh lovang che. Mahse tu in nge seh ang che i hre duh em?" Rei tak inkawm tawh ang maiin ka be bawrh bawrh a

Liliana POV

Ka lu ka thing mawl tawp, Christina chuan min rawn hrilh ru a "Frantz a'n mawle" a tih chuan ka meng zau kawk, a tawlhsawn deuh a nui har har in "I duh phawt chuan a seh ngei ngei ang che" a ti a

Min sawiṭhaih tih hre mah ila ka ngawi reng. Engemaw sawi ai chuan ngawih reng hi a ṭha zawkin ka hria. A ṭawngkam ngei awm tak te hi ka chhang peih lo hrim hrim

"Ngawi teh in la mu dun lo em ni?" Ngeiawm deuhin min rawn hrilh ru a, ka hawisawn tawp, ka thaw kawk a, Christina chuan chimawm deuhin a hmui a hup a, a lu thing in a nui deuh hlek a "Lili bawihte, hetiang chuan a ni lo. Inhual tura min sawm tur hian eng nge ka tih i hria em? Damchhunga a chen tur thil ṭha ka hmuh mawle" thurawn ṭangkai vak lem lo min pe a, ka mamawh em em pawh ka hre lo

Engmah sawi lovin ka ngawi reng a, Christina bawk chu a rawn ṭawng chhuak leh "Eng mah i tih loh chuan a kalsan daih mai ang che" a ti a, ngaihthlak loh ka tum pawhin ka hlauhna a rawn chawk tho leh

Mit ka khap sawk a, thawk ka la kawk a hmuh chuan a sawi zawm leh a "I chelh reng theih nan engemaw i tih a ngai ania, midang a zawn san daih mai ang che" Christina i'n a tih leh lai chuan ka beng ka tun hra, ka thin a phu nasa hle bawk

"Ka hrilh che chu bawihi, i thil neih hlu tak kha pe mai rawh, mipa mamawh nei a ni miau a" a ti leh a. Second tin mai chuan thawk harsa ka ti "Nghah tir reng kha dik in i hria em ni?" Min han dem leh te te a, ka mit ka khap rang lutuk. Ka tawt up up a "Hmun dangah nawmna zawng turin i nawr tih i hria em?" Pawisawi loh hmel zetin min han dek leh a, ka thinlung hi na tak a ni

"Nghah rei tir lutuk suh" a rawn ti leh ṭan chiah ka ding hluai a "Min lo hrethiam phawt mai teh" ka kalsawn daih a

Ballroom chhuahsan ka tum chiah Frantz nen chuan kan in tawk a, a awm ah ka bei hle hle. Ka tluk loh nan ka kawngah a vuan a

"Hey, i ṭha em?" Ka thaw kawk kawk a hmuh chuan min zawt a, ka mit a sen rum a, ṭah loh ka tum nasa viau

"Kal ka duh TUNAH" ka ti a. "Awle" tih pahin min hruai chhuak nghal

Hotel kan pan lai pawhin engmah ka sawi lo. Tukverh lam chu ka melh tlat a, ka mittui far tih loh hram ka tum. Ka awm a tawt hle harsa ka ti takzet

Frantz POV

Engvanga lungawi lo em em nge anih ka hrethiam lo. A chhan ka hre chak viau na in hahdam phawt se ka ti. Liliana hi chu a thinrim hian a hlauhawm thei sia Chihuahua nen hian ka tehkhin ber. Car hi ding vat vat se biak ka chak a ni

Hotel kan thlen chuan ka room kawngka ka hawn laiin Lili chuan engmah sawi lovin min kal pel a, a room chu na lutuk in a khar hmawk a

Liliana POV

Au chhuah chu ka chak rim rum, ka thinrim lutuk hi tauh chawrh tur awm se ka ti hle mai. Ka ding reng. Ka lu chu ka kut in ka hliah a, zawi muangin ka thaw chhuak sap

Ka mittui a rawn luang ngiai ngiai. Ka pum ka dawm a, ka inhnit feih feih. Ka lu hi a na hle bawk. Lungawi lo takin ka lu ka thing a

Hei hi ka hlauh ber kha a ni. Frantz hian sex a lo duh reng ka ring. Ka duh vang reng pawh ni lovin Christina thusawi kha thudik anih ka ring tlat. Ka in ngei hle nan Frantz hi a duh ka pek ngei a ngaiin ka hria

Kawngka a rawn kik chuan ka harh zawk "Hey duat, ka mu tawh dawn a, i thinrim niin ka hria a, mahse hun thawl ka pe ang che. Min biak i duh chuan min hmuhna tur i hriat kha. Insiam sa la aw, naktuk zing hma tawkah kan let dawn nia" a sawi zawh chuan a ngawi let det a, a kalsawn ta a

Ka chhang ta mai lo, a room ah a lut ta aniang

Frantz hi chu mipa hawihhawm tak a ni a, ṭha taka dawnsawn a ngai ni lawm ni? Hetiang thil hi ka tih ka ring ngai lo, mahse a dawhtheihna leh hmangaihna vang pawhin ka tihtur chu a chiang ta. Ka mittui hru in ka inthlak mawlh mawlh

Pajamas ha in ka hmai ka phih a, infuih thar leh mawlh mawlh in room chu ka chhuahsan a, Frantz a room ah lutin kawngka pawh ka kik lo. A thawmhnaw a lo phelh ve mek

Ka va pan hnai a "Hey, engkim a ṭha vek maw? Mmh" ka fawh zui mawlh mawlh avangin a tawp lam pawh a sawi fiah hleithei lo

Frantz POV

Chhan let ka tum leh laiin kan infawh na chu tihluihna a ang mah zawkin ka hre tlat

Lawm lo takin ka che sawn a "Hey, i ṭha em?" Ka ti a

Mahse min chhang lo. Khumah chuan min nam tlu a, ka chungah ṭhu in min fawp leh a, a mittui a rawn luang leh ngiai ngiai bawk

"Ngawi teh Lili" ṭawng chhuah ka tum a, mahse Liliana chuan hun min pe lo, min fawp pah in khur chungin a kawr kilh a phelh a, a mittui a rawn tla nasa. Ka dar a hluh hlup laiin ka kalsawn thei ta Liliana chuan a kawr a phelh a, a bra nen chauh a lo ding

"Woah, woah, Lili duat, duhtawk teh" ka kutah ka vuan a, Liliana chuan in hnit faih faih in "Hei hi i duh a ni lo em ni? Ka chelh reng theih nan che?" A rawn ti a, ka lu thing in ka mit ka khap sawk "Ni lo ve, ti nge chutiang chuan i ngaihtuah?" Ka ti a, min chhang lo. Ringhlel mitmeng a min rawn en chu ngaihtuah tih hriat deuhin ka lo melh let a

Liliana POV

Ka thil tih atthlak zia ka hrechhuak chiah, ka ṭap chhuak hawm hawm, ka hmai ka hup a, zawi te in ka rum hak. Ka thawmhnaw chu min rawn pe a, ka kawr a kilh ṭha a, min rawn kuah hle hle

Zak deuhin hnuai lam ka melh a, Frantz chuan min la chelh reng. Ka khabe chawiin a mitah tak min en tir a "I inpeih loh tur thil ah ka nawr lui thei lo che Liliana. Khawiah mah kal ka tum lo ania" ka mittui a rawn hru a. Ka hmui ka tipawrh tarh, engvanga Christina thusawi kha zawm nge ka nih ka hrethiam lo. Ka chak tawk ve viau emaw ka tia sin

Duat takin min en a, ka biang ah chul leh in ka hnar ah a fawp a, ka biang ah fawp leh in "Ka hmangaih che, sex vang ni lovin i taksa vang pawh a ni lo, hemi vang zawkin" ka awm chung zawnah a kut a rawn nghat a "Hetah pawh" ka lu zawnah rawn kawk leh in "A bak zawng nen" a sawi zawh chuan min fawp a

Tisa chakna vang ni lovin duhna vanh pawh ni lovin min fawp. A thusawi chu nemngheh a duh zia ka hria. A tih tak zia ka hre tawh

Ka tan a tih khan a ti tak tak ani tih ka hmu thei. Dim taka min fawh lai chuan ka mittui a rawn tla leh a, min hmangaih tak tak a ni tih ka hrechiang ta

Ka zak lutuk chu hnuai lam ka melh tlat. Ka mittui a rawn luang thla leh ngiai ngiai. Ka thil tih tum atthlak zia ka hrechhuak leh thut

Frantz chuan ka ṭap tih a hria aniang zawi supin "Lo kal teh" a ti a, min pawm hle hle a, a nghawng ah ka hmai ka phum a, min kuah nghet sauh. Ka ngheng char char, min rawn beng thek thek a, ka zia deuh hawk

Kan lo muhil dun aniang, hei aia khuma mut dan nuam zawk a awm lo hial ang

*****

Chhunzawm tur


Show post links
Top

[Ngaia]

Frantz POV

A tuk zingah Liliana chu ka lo la pawm reng. A hmai chu ka nghawng ah a phum a, zing tin theih se chu hetiang hian tho reng ṭhin ila pawi ka ti lo. Ka nui seih, a lu ah ka fawp a, a rawn tawlh hnai leh sawt, zawi te in a rawn hnar leh sek sek. Ka nuih a za viau nan ka tih harh ka hlau bawk si. Ka harh ṭha tawh si a, ka kiu a kham tawh lutuk, Liliana tih harh hlau viau mah ila ka chet tho a ngai dawn tlat

Minute rei lo te ka nghah leh hnuah ka ban chu a mu chuah chuah. Muangchangin ka kut chu ka la sawn a, a phun sap a, a inher vut. Nimin lama kan tawn ang kha tih nawn leh ka duh loh vangin ka tho vut, bathroom ka pan a, ka ha nawt in ka hmai ka phih a, room ah bawk ka lut leh

Liliana chu a la mutui si a, ka tiharh duh lo law law, inhnuai lamah tukṭhuan eitur ka chah a. Hun thawl ka neih hnu chuan Liliana phone aṭanga number ka lak ruk chu ka hmet chhuak a, phone a rik a, an rawn lak chuan zam lo ang taka lan ka tum a, ka inrintawkna te hi tukverh ah an thlawk chhuak nghal vekin ka hria

Ka thinphu a rang ngei mai, ka kut a thlan hluam bawk ka aw thian in ka ṭawng hmasa a

"Zing Chibai Ms Chavez, eng nge in an?" Ka nui seih a, ka lungphu ri hi a inthum rawn tluk tluk

"Frantz engkim a ṭha vek em?" A aw ki ah chuan ngaihtuahna a lang thei. A hmanhmawh hmel hle bawk

Ka chhang rang khawp mai "Tehreng mai, ka tih hlauh che chuan ka tihpalh" inben tawp mai hi ka duh
"Awle a ṭha e, eng nge i an?" A rawn ti a

"Ka ṭha alawm, ka lawm e ka rawn biak chhan che chu rawn tlawh che u ka tum a, Lili nen New York ah kan awm mek a, ka thlah fel veleh ka rawn kal ang. Thil pawimawh deuh sawipui che u ka duh a" Counter chu ka khawng kerh kerh a, ka kutzungte in ka hmui ka lo khawih leh tawh

"Tehreng mai" Ms Chavez chu a aw a zangkhai khawp mai. Ka thawveng deuh huai, ka zang hawkin ka hria

"Anih chuan nakinah kan inhmu dawn nia" ka mangṭha phawt a, chumi hnuah phone chu ka dah fel a

Kawngka an rawn kik a, eisiamtu a lo ni reng. Choka lamah ka hruai phei a, dawhkan ka lo siam mawlh mawlh. Ei siamtu in a peih fel vek hnuah pawisa ka pe a, a liam fel hnuah Liliana chu a rawn chhuk thla a, a thawmhnaw hak kha chu a lo thlak fel diam. Ka kawr lian deuh leh sweatpant a ha a, a inhmeh ka ti viau mai

"Zing Chibai" a ti zawi sap a, a biang a tai tek reuh a, ka kawr hmawr chu a khawih niap niap

"Min chhuhsak leh ta" a bul hnaiah kalin ka fiam a, a hawisawn daih "Rei tak ka hawh ah ngai mai rawh" a ti a

"Awle tehreng mai" faifuk rat rat in ka lamah ka pawt hnai a, ka fawp vawng vawng

Min rawn chhang let a, thil engemaw a thlen hlau takin ka tawlhsawn a, chimawm deuhin min rawn nuih a, min chhaih tih ka hre mai. Thil ṭha bera ka ngaih ka ti a, ka pawm bei thlawp

Ka awm nghengin kan insi chat mai. Ka awm ah a kut a nghat a, a meng zau kawk a, beisei nei deuhin min en a, kan mit a intawng chat. Ka kut ding lamin a biangah ka chul a, a hmui chu ka zut a

Fawh beisei deuhin a ka a ang a, ka kun hniam a, a hmui zawnah ka phun sup a, thu ka tiam a "Vawi khat emaw chu min fiam thei lovin ka la siam ang che" a ti a, a kalsawn a, dawhkan lam ka pan a, ka ti hrilhhai leh dawn tih ka hria a, ka nuih a za ngang mai

Liliana POV

A ti leh ta

Min tibuai leh nak mai

Engtin nge hetiang hian min tih reng theih pawh ka hre lo. Chhaih reng hi ṭha ka ti bik lo, mahse a nuam thei ve em a ni. Min chhaih let ve pawh hi ngaiah ka nei tawh

Tukṭhuan peih vek tawh lamah chuan ka zui a, a rawn nui a "Kan thlawh chhuah leh hma eitur ka lo chah a, state pawnah tihtur hmanhmawh thlak tak ka neih avangin ka thlah vat ang che" a tih pahin ka ṭhutna tur chair a pawt chhuak a, ka ṭhut fel hnuah ka zawt a

"Eng ang thil hmanhmawh thlak nge?" Hrechak deuhin ka lo zawt leh hman, ka chin ṭhan a ni ber tawh, ka ring thei ang tih ka hria

"I hria ang a, company chungchang vel mawle, ka hrilh che chuan i ning zawk viau ang" a ti sam et a, ka nui seih a "Ning lovang, italian ṭawngin i sawi angah kan ngai mai dawn alawm" ka ti a, dawt a ni lo reng a, Italian ṭawng a hman hian inhmeh ka ti thei, ngaihthlak a nuam a, a sexy bawk

"Imm Italian ṭawng ka hman hian ngaihthlak nuam i ti tiro?" Ṭhu pahin min zawt a, plate ah chuan pancake, bacon, croissant leh artui kan a awm hnur a

"I zawhna chu ka chhang lo mai ang che" nuih insum takin ka ti a, ka thuruk hi puan chhuah vek a ngaiin ka hre lo

"Engvangin?" A mitko san in min en a
"A chhan chu...." ka ti zuih raih a, a mitko san nawn leh in "Tehreng mai" a ti a

Ka nui chhuak hak a, tukṭhuan kan ei ṭan a, kan in melh zeuh zeuh bawk. Kan mit a intawn fuh apiangin ka hmangaihzia ka hrechhuak telh telh. Nizana kan awmdan aṭang khan min hmangaih zia a tilang chiang. Ka chak lohna kha a hmang ṭangkai thei reng, mahse min hliahkhuh zawk anih kha. Ka nuna a rawn lan aṭang hian min chhanchhuak tu a ni ber in ka hria

Kan inhmuh tirh kha chuan hetiang hian ka hmangaih dawn tih min hrilh se chuan ka nuih sawh hrim hrim ang, min hrilh tu chu thlawhna aṭang ka paihchhuak duh hial ang mawle. Tunah hi chuan ka hmangaih zia ka hrechiang tawlh tawlh

Tawrh hlelhawm leh sual tak ni turin ka lo ring ṭhin a, a landan ah chuan a nat nawn leh hlau in a lo inveng reng zawk a lo nia. Ka zaidam viau lo ani maithei, mahse kan buai ve nasa hman alawm

"Pancake i hmu ang maiin min en ania" a ti a, ka lu thing in ka nui hak a "Ka tui hmel viau em ni?" A tih pahin a hmui a ti pawrh tur a, ka insum thei thlawt lo

Ka insum leh theih hnuah ka sawifiah a "Ni e, i tui hmel thei ka ti lutuk a, red velvet cake nen ka tehkhin ber che" ka ti a, thaw huk in a meng kual ralh a "Imm, pawi ka ti miah lo" a ti a, ka lu ka thing ve a, ka meng kual leh ralh a, ka nui nasa hle bawk

"Ka hmangaih che tih i hria tiro?" Kan insum theih hnuah a rawn ti a, ka thin a phu deuh zawk "Keipawhin ka hmangaih che" ka ti a

Tukṭhuan kan ei zawh ah airport lam kan pan a, lehkhabu ka chhiar leh a, anin laptop ah hna a thawk leh mawlh mawlh, kan inchhaih pah zeuh zeuh a, kan ṭum fel hnuah min thlah leh thlap a, mahse a rawn lut lo

Ka zawhna pehhel in min fawp a, hna chungchang ka sawi chhuak leh hma in a kal vat a, ngaihtuah loh ka tum nasa. Inchhungah lutin hun awl hnawh khah nan ka tifai a

Frantz POV

Hmanhmawh deuhin Airport ka pan a, Georgia a kal turin ka insiam leh a, state ka thlen chuan hotel ah ka lut a, Liliana chhungte in ka thlen chuan min lo lawm thiam hle

"Mr Chavez, Ms Chavez, kan inhmu thei chu a lawmawm hle mai" zam chhe viau mah ila chibai ka la buk thei tho. Coat suit dum ka ha chu a ṭha hle mai, ka thlan tla an hmu thei dawn lova

Chibai tumin ka kut ka phar chhuak a, mahse Ms Chavez in min lo kuah daih, a zaidam lutuk avangin ka nui ringawt. Thil ei turin kan ṭhu a

Titi pangngai kan sawi a, sawi tur pawh ka hre ve phian mai. Second grade kan nih laia Ms Perrybowl - i class a science presentation ka pek laia ka zam em em lai ang chiah kha a ni leh tawh. Ka rin aiin hun te hi a kal liam chak, ka zamna a la reh tak tak chuang lo. Ka lungphu rang lutuk leh ka kut thlan dup te hian min pui lo khawp mai. Ka khup a sai dar dar bawk

"Anih chuan Frantz, min sawipui tur pawimawh deuh i nei tiro?" Mr Chavez chuan min zawt a, ka aw thian kharh in ka chhang a "Aw ni e" ka bu nghat a, chil lem khawlh in ka ipte ka zen a, zungbun bawm chu ka phawrh a

Ms Chavez chuan a hmui a hup a, a mittui a tling kuang. Bawm chu ka hawng a, an hmaah ka nghat a, zam deuhin ka thaw kawk a, ka aw thian leh kharh in "In fanu hi ka nupui atan ka neih theih nan in phalna ka rawn dil a ni" ka ti a

"Awi leh..." Ms Chavez chu a ṭawng zawi sap a, a pasal a en laiin a mittui a rawn far thla a. Mr Chavez pawhin a nupui chu a melh ve reng, ka lam a rawn hawi leh a, a biang chu a sen ve deuhin ka hria

"Kan fanu hi neih i duh maw?" Awih loh hmel deuhin min zawt a
"Ni e, in fanu hi ka hmangaih a ni. Ka thinlung zawng zawng in hun hi ka khawhral ka duh tawh lo, ka nupui ni sela chhungkua dinpui ka duh" inringtawk takin ka chhang a, ka zam lutuk pawh a zia deuh hawk

Mr Chavez chuan a nupui a en leh a ṭah nuih chungin min lo vuan a, a pasal en ve in a bu nghat a, Mr Chavez chuan min melh ve leh a, nui suk in min rawn chibai a "Tehreng mai bawiha, kan malsawmna zawng zawng dawng vek rawh" a ti a, kan inthlah hnu chuan ka hlim veng veng. Ka kalsan daih

"Engtikah nge chu chu i tih dawn?" Thlawhna chhunga ka ṭhut fel hnuah ka nu i'n min rawn bia a

"Rome ah ka hruai ang. Ball kan kal vawikhatna a ni bawk a, tun kar tawp ah hian a ni ang. A chhungte leh Chamille pawh ka hruai vek ang. Nangni pawhin min rawn zawm ula ka duh, engmah a la hre lo" ka sawifiah lai chuan Liliana inneih puia ka sawm dan tur ringawt ka mitthla ah a lang

"Ball a? A pui mah mah lawng maw?" Ka nu i'n a ti a, min hrechiang em a, chuvanga sawi a ni.

"Ka hria alawm mamma Liliana hi ka zahpui lo tih khawvel hi hriattir ka duh alawm, ka nupui atan ka thlang tih hi hmu rawh se" ka tih lai chuan ka nui ver ver

"I pa nen kan chhuang khawp mai che ka fapa. I rawn thlen hunah min rawn hrilh rawh aw?" A tih chuan ka remti ve mai bawk. Kan inbiakna kan titawp a, chair nghengin ka thaw huk ka nui seih bawk. Tun aṭanga rei vak lo ah Liliana chu ka nupui hual a ni ve mai ang

Kar tawp chu kar lo ah a rawn thleng thuai, Lili nen Rome kan pan a, hostess thuam famkim a inbel a, a chhelo khawp mai

"Mr Cavalier" Liliana chuan min ko a, zei deuha nuih in ka han melh a "Eng nge ni Ms Chavez?" Ka ti a

"Kan sawi dun tawh kha" lai deuhin hnuai lam a melh a

"Eng maw kan sawi?" A chhip aṭanga a ke ler thlengin ka lo melh chhuak dap

"Khatianga min en ṭhin kha mawle" a ti a
"Immm" ka ti mai a, ka mit chu ka la sawn thei thlawt lo

"Infawh ka duh" ka ti thut a, a meng zau kawk, lai deuh in min chhang a "Hna ka thawh hi" a ti a

"Ka hria alawm, mahse vawi khat chiah a ni mai" ka ngen ngawng ngawng a, Liliana chu a thaw halh "I sawi ve ziah a, mahse i duh belh zia" a ti nuah nuah a, meng kual ralh in a nui a "Ka nun hi i siam hahthlak lutuk" a ti a

"Awihawm loh" ka lo hnial a, min rawn en leh a "Awle a ṭha e, vawi khat chiah aw" a ti a, christmas tuk ang chiah in ka nui ver ver

Min rawn pan hnai a, mahse a thil tih leh tur hi ka beisei loh lam daih a ni. Ka piah ah a rawn ding a, rawn kun hniamin ka dar ah a kut a nghat a, ka nghawng ah min rawn kuah a, ka awm a zut thla leh a. A kawr hak tlem rawn lang ah chil ka lem khawlh. Ka belt chu a khawih a, ka kekawr hi a awm hle hle thei lo. Ka mal ah a kut a nghat leh vang vang a

Ka beng leh nghawng inkarah a rawn thaw sap a, ka perfume rim a hnim vang vang a, ka biangah a rawn chuk a, ka hmui sir ah a rawn fawp zeuh bawk. A kut veilam in ka mal a ṭham a, a dinglam in ka necktie a chelh a, min pawt hnai a, kan hmui a insi ṭep "Hna ka thawh tawh loh hunah ka fawp ang che" a ti a, a kalsawn daih. A ngaihna hre lo takin ka hawi reng ringawt

A kal zawnga a mawng insawi te chu ka lo melh leh reng, zui mai chu ka nap

A thiltih hrechiang zetin chimawm deuhin min rawn melh a, ka ṭhutna ah chuan ka ṭhu ngawi reng mai

Kan thlen fel hnuah Lili chuan engmah a sawi lo, intithei deuhin a nui ver ver, min bum ni maiin ka hria. Ka tih ṭhin dan chiah in min chhaih let ve anih hi. Hetiang hi ka duh lo, Liliana rilru tur ka hrethiam chiah. Car kan luh hma chuan ka ngawi reng. Ka tih let ve loh chuan nuam ka ti dawn lo

Liliana chu tukverh ah a dak veuh veuh a, Rome khawpui hi mawi a ti ve in ka hria, keipawhin amah hi ka thlir ning thei lo

Ka chet dan a fair lo tih ka hria, mahse ka chhaih leh deuh hlek a ngai dawn a ni. Ka ṭhu ṭha a, Liliana chuan min rawn en a, ka nui miah lo, mit ka khap bawk lo. A ngaihna hriat loh hmel deuhin min rawn en a, ka kut zungte in a ke ka zut a

"I hria em?" Ka ti ṭan dek dek a ding nghal awt mai "I chin ṭhan a niin ka hria" a khup leh mal chu ka zut tawn sek, Lili chu a thawk a buai vekin ka hria "Min chhaih hi" a pawnfen chhan ah ka zut leh zeuh "Let leh tur i awm tawh lo ṭep" ka nuih var var a

Liliana chu pawisawi loh hmel deuhin a meng zau kawk a, a lu a thing deuh sawk a, chil a lem leh khawlh a, ka la fiam ṭang ṭang mahse chin tawk chu ka hre tho

"Nilo maw?" Ka ti a, a lu a thing leh tawh, ka hriatchhuahtir ani mahna
"Imm" ka faifuk rat a, ka kut chu ka la sawn a "Ka hriat sual aniang" ka nui leh suk a, car nghengin ka hawisawn a

Ka rilru in panga, pali, pathum, pahnih, pakhat ka ti mawlh mawlh

"Nang mihring fapa!" Min ankhum a
"Eng nge ni ka hmangaih?" Ka hre lo der hmak
"Nang, Nang ugh!" Sawi zawm ngaihna hre lo in a rum nghat a

"Min fiam vangin ka chhaih let che anih kha" ka ti a, a ṭhu tum bur mai, a kuangkuah a "I ngam chuan rawn ti leh la" a ti a

"Ka ti daih tawh, i darah khan, hmun dangah i duh leh em?" Ka ti a, ka chhang let zel dawn a ni tawp mai

"A fair lo em mai" tih pahin a rawn kun hniam a "Ni e nang pawh i fair bik hleinem" ka nawr let a. Kan inhmachhawn der, kan thaw chhuak leh vak a

"Infawh kha i la duh reng em?" Ka mit leh hmui a melh tawn zak zak
"Duh chiang e a" a tukhum vuan in ka fawp a. Ka jacket chu chelh nghet sauh in min nam sawn leh dawrh a, kan infawh chian tak tak hma in Armagio chuan hotel a thleng der

Thaw chham lek lek in kan inthlah a, ka melh chian lutuk vangin hnuai lam a melh tlat

"Hrilh tur che ka nei a" thawk la hawk pahin ka ti a
"Eng nge ni?" A ti a
"Naktuk tlai ah Ball ah kan kal dawn nia" ka ti a
A lu a thing a "Edna leh Jay an ka thawmhnaw an buaipui leh dawn em?" A ti a

"Tute maw?" Ka mitko san in ka zawt a
"Ball kan kal hmasak a, min cheitute kha mawle" a ti a
Awih harsa ti lutuk in ka zawt let a "Sandra leh Marco i tihna a ni maw?" A ti a

Hriatthiam loh hmel deuhin min rawn en a, a mit a khap sawk "Ni e..." a ti a
Ka nui hawk hawk, lu ka bu nghut a "Ni e, an rawn pui ang che" ka ti a

"Awle" min nuih leh seih a, Armagio chuan kawngka a hawnsak a. Car a chhuahsan dawn laiin ka lo nuih let a. Ka jacket ipte ah velvet bawm ka dah reng. Tun aṭanga reilote ah Liliana chu ka nupui hual a ni tawh mai dawn sia. Malsawmna ka dawng nasa hle mai

****

Chhunzawm tur


Show post links
Top

[Ngaia]

Liliana POV

A tuk zing ka tho chu ka zam in ka phur deuh viau bawk si, hotel kan thlen in ka chhungte ka va bia a, mahse min chhang lo. Zing kar hma taka ka biak lah in min call mai bawk si lo. Chamille i pawh ka call a, ka chhungte ang bawkin min chhang miah lo

Tukṭhuan kan ei laiin Frantz chu ka hrilh a, sam et hian "An muhil ani maithei a, an buai pawh ani thei ngaihtuah lutuk suh, i be thei vat mai ang" a ti a, ka rilru chu a nuam thei chuang lo. Nilengin ball huna ṭha taka ka awm dan tur ka ngaihtuah a, Christina a rawn lang ang em tih te chuan ka rilru a luah

Ṭhutkhawmna pindan ah Chamomile thingpui ka in a, Christina ka hmuh leh hun chuan ka be tawh ngei ang tiin ka infuih mawlh mawlh. A thusawi avangin Frantz hmaah ka intheh dere lo chauh anih kha. Puitling taka ka hmachhawn a ngai a ni. Christina hi rul anga verther anih hi. Ka bialpa hi a hnaih mah mah a ni

Christina vanga ka rilru hah piah lam ah ka chhungte ka be thei lo chuan ka rilru a tibuai. Thil engemaw ropui deuh thleng tur ang tlat hian ka hria, enge a nih chu ka hre mai lo. Frantz nen ball a kan kal vawi thumna tur ania, a bialnu ka nih anga ka kalna tur vawi hnihna chiah a ni bawk. A khawvel a ka tel ve dawn hi chuan ka zam thei lutuk. Ka zam chhan hi eng pawh nise a ṭha lam anih hram ka beisei

Kawngka an rawn kik a, ka va hawn chuan "Darling!" Sandra a lo ni, Edna tih a inhmeh ka ti zawk tho. Marco pawhin a rawn zui ve bawk

Tun ṭum Sandra lo lut chuan thawmhnaw a rawn keng a, Marco ve thung in make up bawm a rawn keng thung. Nui sen sen in ka lo lawm a, an inbuatsaih lai chuan ka lo inbual sawk sawk. Chumi hnuah phone a rawn ri a, ka chhungte an nih ka ring lutuk mahse an ni lo tih ka hrechhuak

Lungawi lo insum deuhin phone chu ka la a, zawi sapin "hello?" Ka ti a
"Hey duat, i ṭha em?" A aw ah chuan zamna a hriat theihin ka hria

"Aw ka ṭha e. Ka chhungte ka be thei lo tih kha i hria tiro? Ka rilru an ti buai deuh a, an chinchang ka hre lo fo anih chuan naktukah ka thlawh let leh a ngai maithei" khumah chuan ṭhu in lotion ka hnawih a

"An ṭhat ka ring. Marco leh Sandra an rawn thleng tawh ang tiro?" A ti a
"Aw, pencil a ka mit an hawlh loh hram ka beisei" ka ti a
"Ka hmangaih i buaina chu ka hriatthiampui lo che, i ṭha mai ang" a ti a, ka lo nui sak "I phur hmel hle mai, ka hriat tur thil a awm em?" Ka zawh lai chuan hnuai lam hi a nghawr dar dar

"I bula hun hman hi nuam ka ti" phone chhan ah chuan a rawn ti a, nui chungin ka lo chhang a "mmm awle" ka ti a

"Min ring lo a ni maw?" Fimkhur deuhin min rawn zawt a, ka chhang a "Ka ring lo che a ni lo, ka hre chak lutuk a, ka phur phah alawm enge maw tih i tum tlat in ka hria" ka ti a, Frantz pawh a rawn nui chhuak hawk "Ka tih lungnih loh che chuan tihpalh ka hmangaih, zanin chuan in surprise na tur a awm lo, i biangah ka fawp char char ang che, i nin loh hram ka beisei" a ti a

"Awle i zeilo viau tih ka hria, Sandra in min rawn au tlat in ka hria. Ka dah phawt ang e, ka hmangaih che" ka ti a
Frantz pawhin min rawn chhang a "Ka hmangaih che" a ti a

Phone ka dah hnu chuan school naupang ni ṭha leh ta maiin ka in hria, ka nui ker ker a, Sandra leh Marco awmna bula ka chhuk dawn ah ka inha sawk sawk a

Ka thlen thlak chuan Marco a'n min lo hui vat, ka sam an thlah a, ka rum nghat. Ka lu vun te hi a na, ka mittui a rawn tlak hnuah ka hnar a ping vek. Marco chuan ka sam a khawih zo ta. Ṭahna tur dang ka la nei, ka mit line a la ngai

Sponges leh powder makeup chi tinreng a awm tih pawh ka hriat ngai loh te chu min han bel a, Sandra chuan min pawt hnai a, ka sam pawh an bei nalh khawp mai. Mascara leh lipstick nen ka mawi ve ngawt ang

"Darling, ei tur tui deuh ang mai i ni. Frantz a i chawk buai hneh dawn hle mai" Sandra chuan mawi a ti ve ngang ania, bag chu a rawn hawng a. Thawmhnaw chu ka la hmu lo reng a, zipper a han hawn chuan kawrfual pawl a puan ṭha chi ngat a ni. Ka phur leh tawh hle

Thawmhnaw chu ka hmuh theih ah a khai a, ka hmui chu ka hup a, mawi ka ti lutuk ringawt

"I hmai kha khawih suh!" Mario a'n min rawn au a, hmanhmawh lutuk in ka kut ka dah thla nghal

Sandra chuan chhuat chen vela fual a hnunga laced a chei, nem thap mai chu a rawn keng leh a, a mawi lutuk hi sawi ngaihna pawh ka hre lo

"Ding reng lo khan rawn ha ta che" Sandra chuan min tur ut ut, an puihna zarah thawmhnaw chu ka ha fel der. Darthlalang ah ka inen an la phal rih lo a, ka kawr mil turin pheikhawk pawl ka bun a

Perfume min rawn kap leh a, ka lam rawn hawiin a thaw hak a "I inpeih em?" Sandra chuan min zawt a

"Inpeih e" lu ka bu nghat, min her kual a "Awle tunah chuan i inen thei tawh ang" a ti a, zam deuh si chuan darthlalang ah ka in en a

"Wow" ka ti zawi sap, make up pawh a nasa lutuk lo, ka mithmul pawh a fai in cut thlap a ni. Eyeshadow pawl min hnawih a, ka hmui chu a sen hlar. Ka mit ka khap sawk, ka mittui a rawn tla a. Marco chu a rawn in rawlh vat "I mawi lutuk alawm Darling, ṭap suh Prince Charming a rawn thleng ṭep ania" a ti a

Ka mittui ka hru hul chiah kawngka an rawn kik a, ka thin a phu nghal dup dup. Thawk ka la leh hawk. Sandra chuan kawngka a va hawng a, Frantz chu kawngka bulah a lo ding reng. A chhelo takzet, ka hmangaih lehzual sawt. Coat suit dum a ha a, bowtie pawl awrh in rawmawl ipte ah a inzep ṭat

"I chhelo lutuk ringawt" a ti a, ka lai nghal tawp
"Ka lawm e" ka ti zawi sap. Ka lamah a rawn kal a, ka biang ah a fawp a, Marco min hauh ka hlau ngang mai

"Marco, Sandra, ka lawm e" ka ti a, Frantz chuan an awm tih a hre ve chiah aniang, a bia a chumi hnuah hotel innghahna pindan kan pan a, Frantz chuan hawihawm deuhin min hruai a, ka mit sirin Delia ka hmu a, a inrintawk loh hmel khawp mai. Frantz a kut chu ka la vuan reng. Mikhual ho chuan min en reng tih ka hria, ka inchhuih ka hlau zek zek

"I mawi lutuk a, an en lo thei lo che anih hi" Frantz a'n min fak a, ka lu thing in ka nui ker ker. Ka chhang lem lo

Limo chhungah chuan Frantz chu a zam hmel takzet. A khup a khawng/khawn loh leh a hmui chu a khawng a, a ipte a zen thul

"I ṭha em?" Ka ti a, ka zawh mai loh chuan min ti zam ve vek mai dawn
"Aw leh Aih, ka bula i awm vangin ka ṭha a, mahse vawiinah thu ka sawi dawn a, ka la inpeih lo, ka ziak sa lo" a ti a, mak ka ti viau "Engtin nge sawi chhuah i tum?" Ka ti a

"Ka sawi tawp mai ang chu ka ti" a ti a, ka lu ka thing a, a ngaihsam lutuk hi mak ka ti "Sawi tawp maw? Inrintawkna i nei a, i ti ṭha lutuk ang" ka lo fuih ve nasa mai

"I ring tak tak em?" A ti a, nui chungin ka bu nghat, a thawveng huai aniang, a thaw hawk a "Kan hre mai dawn alawm tiro? Kan thleng ta" a ti a. Armagio chuan red carpet thleng min zui a, paparazzi an tam vak lo. Frantz nen buaina awm lovin kan lut thei mai, a lawmawm ka ti hle bawk. Ballroom lam panin kan phei a, ka phur ve hle mai, ka thin a phu leh dup dup. Ka chhungte ka ngaihtuah chhuak leh thut, ka phurna a reh leh duak. Chanchinṭha leh ṭha lo lam ka hrethiam hauh lo

Frantz chuan min rawn nghawk zeuh a "Kal ila" a tih zawh in hall ah kan lut a

Frantz POV

Liliana chu ka hruai laiin ka awm hi a inthum rawn tlut tlut, a lo hria ang tih ka hlau viau. Zing kar aṭang ka zam lutuk tawh, a rawn hre ta reng a ni. Ka beng ah hian kan pen ri chu a ring telh telh. Ballroom ah min nei turin ka sawm dawn si a

Tun hi mi ka vawihnih sawmna a ni dawn a, a inang lo hle. Christina ka sawm kha chuan ka hmangaih tih kha ka inhrilh nawn char char a, engkim kha nawr tut tut ang mai a ni. Midang nen ka hmuh dun aṭang khan ka hrechhuak a, ka lo hmanhmawh lutuk a lo ni. Christina lah khan lar kha a lo chak hle si a

Liliana nen chuan engmah tih luihna a awm lo. Kan kut kan invuan te pawh hi a pangngai vek. Ka hmangaih a, anin min hmangaih bawk. Chu chu ka inrintawkna nei let turin a tawk hle a ni

Ballroom ah chuan host te'n min lo lawm a, kan ṭhutna tur min kawhhmuh bawk. Party ropui tak a ni a, mikhual an tam vak lo a, a tawk chiah zawk. Ka nu khan mipui tam deuh an awm chuan min ngaihtuah riau a, Lili i'n nuam a tih loh a hlau tel bawk. Sawm loh mikhual chu an rawn tel lem lo a, tumah in min tibuai lovang

A ngai te bawkin mikhual ho karah an inrawlh a, champagne te kan in bawk. Lili chu a nui seih a, a biangah ka fawp zeuh. Mi chi hrang hrang kan biak hnuah ka mi sawm te ka hmu ta. Chamille chu dawhkan kilah a lo ṭhu a, midang in an hliah vangin hmuh a harsa deuh. Lili chhungte pawh an awm hla lo, a hmuh theih loh nan ka hliah a, ka chhungte pawh lili chhungte nen dawhkan an kil ho. Ka nu i'n min rawn en a, ka lo nuih let sak, inrintawkna min pek avangin ka lawm hle

Tlai aṭang a Liliana rilru chu ka la peng char char, a pheikhawk a tawt thu min hrilh a, kan hmelhriat te a hmuh theih lohna tur dawhkan ah ka hruai a, musician ka rawih te pawhin ballad hla an tum a, zan a rawn inher ṭan kan titi tui khawp mai

A zangkhai hle in ka hria, nuam a tih hmel hle bawk

A chang chuan ka lo thlir leh vdng veng zel, atthlak ka ti hle bawk

"Eng nge ni?" Lai deuhin a tum deuh bur a
"Engmah ni lo, tuna kan nun hi i inhmeh hle in ka hria, mi biangbiak i thiam a, ka hlauhawm loh hmel sawt alawm" ka ti a, hnuai lam melh in a nui ker ker a "Tu emaw in an fiam dawn che anih chuan keimah a ni ang" a ti a

"Tu pawh an ni thei mai lo em ni?" Mak ti deuhin ka zawt a, a rawn nui ver ver "A chhan chu ka bialpa i ni tlat" a ti a, ka hlim lutuk ringawt

"I inti neitu hle a ni maw?" Ka ti a, sam et hian min chhang a "Eng ang pawhin sawi rawh thudik a ni tlat" a ti a

"I vuah dan chu ka duh zawng tak a ni" tih pahin a biangah ka fawp leh zeuh

Sana chu ka bih a, heta kan kal chhan hi tih a ṭul tih ka hrechhuak. Ka inrin hma chuan ka ipte a bawm chu ka khawih neuh neuh. Zam deuhin ka thaw leh hak a, ka aw thian in Liliana lamah ka va awn a "Ngaithla teh, ka thusawi tur ka hrechhuak tawh" ka ti a

"Tak tak maw? A ṭha lutuk alawm" min rawn fuih leh sauh a, min au phur tu ṭha tak a ni. Ka thil tih tum hre miah lo a min fuih hi a lawmawm ka ti

"Ni e, mahse min kalpui ka ngai ang" ka ti chiah a hmel a dang nghal vek
"Kei maw?" A inkawk a, chimawm deuhin ka lo nui suk
"Eng nge ka lo tih ve ang a?" Zam deuhin a hawikual a

"Engmah ni love, ka rawn signal hunah che Aw tih i sawi ang a chu zawng a ni mai" ka ti a

"Awle" a ti ve mai a, a huaisen vak lo tih ka hre mai
"Host in min ko ṭep tawh ang" lu bu nghut in ka nui a, kan zo ṭep tawh e

Thudik a lang ṭep tawh e

Host chuan music a tawp tir a, mipui lawmthu a hrilh leh a, kan tam vak lo a, mahse min hriatpuitu an awm ve tho. Mic a thusawi turin min ko chho a, ka thin hi a phu leh dup dup, Liliana chuan ka kut a chelh a, kut an lo beng hluah hluah

Liliana nen ballroom kan paltlang lai te chuan ka bulah a kal ve zel, a mawi takzet. Tumah in a pheikhawk bun a tawt tih an hre lovang. He hmeichhia in min hmangaih hi vannei ka inti takzet. Room lai kan thlen chuan Psalm 23 kha ka rilru in ka sawi char char. Ka thla a muan phah viau mai. Lili nena min suihzawm tu a ni a, ka zam lutuk pawh a reh huai huai

Mi hmaah chuan kan ding a, kut beng a tawp hnu chuan Lili kut chu thlah in ka aw ka thian a "Heta lo kal mi duhawm tak tak te u, Sky High Incorporate leh Fundraiser te aiawh in ka lo lawm vek a che u, in thilpalna avangin ka lawm lutuk e" ka ti a, Liliana pawh nui chungin kut a beng hluah hluah

"Ka pu in Company a din tirh khan khawtlang tan thil ṭha tih a tiam a, ka pa in chhunzawm in a thutiam chu kan tihlawhtling ta zel a ni. In mihring puite ṭanpui na ah min telpui avangin ka lawm lutuk e" ka ti leh a, kut an beng leh nasa, Liliana pawh ka piah lawkah a nui tawp thei lo, min chhuan hmel hle in ka hria, ka zamna zawng zawng a bo vek

Tunah ngei pawh hian miin an en ṭhup tih pawh ngaihtuah miah lovin min en char char. Ka hriattir a ngai tawh a ni

"Thil kan pek hian kan chik lo maithei, midang kan hmangaih a kan ngaihtuah tih kan lantirna a ni, mi hmangaih lamah chuan hriat ka nei e" ka ti a, room a awm zawng zawng chu an nui a "Mi hmangaih chu kan nei vek alawm, kan chhungte an nih loh pawh in kan ngaihzawng te pawh a ni thei, ani loh pawhin eitur kan thuhruk te pawh a ni ve thei tho" ka ti leh a, an nui chhuak leh hak "Hmangaihna chu kan hre vek a, ṭhiante u" ka thaw hulh a, kan chhungte an rawn kal hnai a, Chamille i'n a rawn zui bawk. Liliana chuan a hmu chiah tih ka hre mai, hriat chak hmel deuhin a ner sung a "He room ah hian ka hmangaih tak a awm" ka ipte zenin bawm chu ka la chhuak a, Liliana chuan a lo hmu mai lo "Chu chu helaia nula hmelṭha tak hi a ni" ka khup pakhat chuan ka ṭhingṭhi a, Liliana chu a meng zau kawk, chil a lem dawk

Ka insiam ṭha leh te te a, a hmui a hup tawp, room a mipui zawng zawng pawh kan ṭhawng vek. A inhnit feih feih a, keipawh ka ṭap ve ṭep. Bawm chu ka hawng a, lunghlu zungbun a ni

"Liliana ka hmuh tirh aṭang che khan thil engkim hi ka ta a ni vek lo tih min hriattir a, beih nasat a ngaih zia min hmuh tir bawk. I hmangaihna dawng thei tura min siam avangin ka lawm e. Tunah hian ka nupui ni turin ka sawm che a ni. Liliana Chavez, min nei duh ang em?" Tawi fel takin ka sawi a, inneih thutiam sawi hun atan ka khek a ni mah zawk. A ṭah nuih a, a hun chiah tih ka hrilh ṭep mahse rang takin a bu nghat a "Duh e, duh e!" Rawn fun hniam in min fawp a, zungbjn ka la keng reng

Kan in fawh zawh chuan ka insiam rem a, mikhual te chuan min lawmpui nasa mai. Kan chhungte pawhin min rawn pan a, Lili chu zungbun ka bun tir a, kan infawp leh chu min rawn ṭhen hrang a

A nu leh pa te chu ṭah nuih chungin a kuah a "Ka ngaihtuah lutuk che u asin, min chhang bawk si lo" a ti a

"Kan lo awm sa reng alawm bawihte, ka lawmpui lutuk che, ka chhuang lutuk che ania" a nu chu a ṭap a, a pa pawhin a lu ah a fawp a, kuah pahin "Kan fanu hi a puitling ve tak tak ta" a ti a

An inkuah hnu ah Chamille chuan lawmpuina a hlan ve leh a, a nui tawp thei lo. Kan chhungte kan inthleng a, Lili nu leh pa chuan an chhungkua ah min lawm lut a. Ka nu leh pa in Liliana chu an pawm fel ve thlap bawk

Liliana chu ka kiangah a rawn kal a, kan infawp leh vang vang, ka thinlung ah hian a cham reng tawh ang. Vawiin aṭang Liliana Chavez hi ka nupui hual diktak a ni ta

****

Chhunzawm tur


Show post links
Top

[Ngaia]

Frantz POV

A lehpek thla ruk chhung chu kan nun a inthlak nasa. Kan inhual zan khan Madrid Spain aṭanga lo kal sumdawnna ṭan tu mipui zingah a lo tel ve a, lawmpuina min hlan sap sap laiin min rawn pan a, a hming chu Mr Cardenas niin hotel thar Spain a din turin contract min pek a tum a

A sawi zawh chuan ka ngawi vang vang a, Madrid a Hotel neih hi ka suangtuah fo ṭhin mahse ka la ti chiah ngai lo. Kan company ah sum an thawh hi chuan hamṭhatna a awm phah ṭhin, mahni a bul va ṭan tawp ai chuan a ṭha zawk tho mai. Ka pa chu ka ko phei a, kan pathum chuan contract chungchang kan sawi a

Sumdawnna chungchang kan sawi laiin ka nu leh Mrs Chavez chuan engmah ngaihtuah buai lo turin min hrilh a. Chuta ṭang chuan Spain ah ka thlawk ta fo mai. Liliana nen pawh hun kan nei dun khat pharh mai, kan inkar hla ta lutuk chu a buaithlak zo vek

Liliana POV

"Engtia rei nge i cham dawn?" Phone chu ka hmui zawnah ka dah a, ka ṭawng zawi sup, ka thlenna hotel room ah ngei chuan ka tlu zal a, hotel thar a buaipui mek laiin client ngai te ka zui leh a, tunah pawh New York ah zan hun ka hmang mek. Dunns nupa zing ah ka zui a, naktukah Florida ah kan let ang

A rawn thaw hak a, a chau anih ka ring ve mai "Kar leh chhung chu ka la cham ang Sawrkar in kan contract kha an pawm ve chiah a, engineer thiam ber ber leh kut themthiam ṭha ber ber te kan rawih a ngai dawn bawk a" A rawn ham bui bui bawk

Lu ka bu nghat a, ka khap rang hle bawk, kar thum chhung ka hmu tawh lo. Kan inhual aṭang thla khat a liam leh tawh. Ka zungbun chu ka en vang vang, ka mittui a rawn tling kuang, ka lu ka thing a, ka mit ka chhing a, ka biangah mittui a rawn luang ngiai ngiai. Police lak aṭanga misual tlanchhiat tum ah ka inchan ber

Frantz POV

Liliana chu a ngawi rei riau in ka hria. Ka chal chu ka khawih vang vang a, ka mit chhing in chil ka lem khawlh a, ka ngai ve hle a ni. Ani pawh a ngawih reng danah hian kan inkar inhlat hi hrehawm a ti ve anih ka ring. Ka fawh tawp ber ṭum pawh ka hre tawh lo, kuah hle hle ka chak hle a ni. Ka kianga awm tir reng mai ka duh

Liliana POV

"Lili duat, i ṭha em?" Frantz chuan zawi sapin min zawt a, ka mit ka khap a, ka mittui a rawn luang a, ka inhnit feih feih ka bu leh nghat a "Ka ṭha e, ka chau mai chauh ania chuan ka ngai che" ka ti a. Thudik ka hrilh thei tawh tih ka hria, kan inhual tawh a, inneih chiah kan hmabak. Zah ṭet ṭet a hun tawh lo

"Ka ngai daih zawk che" a ti a, ka lo nui sak "Ni love, ka ngai lutuk zawk che" ka ti a
"Inel i duh deuh tihna a ni maw?" Frantz chuan min rawn cho a, ka lo nui leh ker ker "Rawn ṭan ta che Bawiha" ka ti a

"Ka ngai lutuk che hi maw kan inbiak lai reng pawh hian ka thin hi a phu dup dup" Frantz a'n a rawn ti a, ka hlim viau mai. Ka nawr let ve leh a "Ka ngai lutuk che hi maw ka hmaa i din loh chuan mit khap nachang pawh ka hre tawh lo" ka ti a

"Ka ngai lutuk che hi maw i vun nem thap ka mitthla ah ka hmuh pawh hian ka kut zungṭang te hi an mur seng seng" a faifuk hlet hlet

Ka biang sa lutuk chu ka han zap a, ka nui tawp hleithei lo, mahse Frantz chu ka chak tir dawn lo re re "Ka ngai lutuk che hi maw tunah pawh hian min rawn kuah than in ka hria" ka ti a

Frantz a thaw ham ham ri ka hria, a ha chang ṭhial lai ka mitthla in ka hmu hial mai. A chin ṭhan a ni tawh a, hetianga a tih chang hian hmuhnawm ka ti hle ṭhin

"I beidawng tawh em?" Ka ti leh sak a, ka aw ka ti hniam hle bawk. Kan in ngaihzawn chhunga ka thiam thar a ni. Frantz ka chhaih hian a buai vek ṭhin. A sam kawlh vek duh hial khawp hian ka chhaih ṭhin.

Frantz chu a rawn thaw leh sup a "Khati zawng khan maw kan tih dawn?" A ti a
"Dawih aw em ni ka hriat?" Ka lo ti leh a, Frantz chu a rawn nui hul hak, ka mur leh seng seng. Ka ke ka khawkherh a, a nuam deuh sawt

Ka hmui ka liak zeuh a, chil ka lem leh dawk, Frantz a min chhan dan tur ka lo nghak tawp

"Ka hlaj hleinem ka hmangaih. Nuam deuh khan lo awm suh. Ka ngai lutuk che hi maw tunah ngei mai pawh hian bangah nam bet che ila, i zawi hnak thlenga fawh che ka chak ania, tawp turin min ngen sek mai ang" A European aw phawi ngei mai chuan min chhang a, chhun ai pawh hian a fiah zawkin ka hria. Frantz hi a zauthau tak tak aniang, ka mit ka khap a, chil ka lem leh dawk. Ka thaw chhuak leh hawk a, ka huaisenna ka sawmkhawm leh a

He infiamna khelh hi chu a hlauhawm alawm, a intiamna ngaihtuah phei chuan nasa tak a ni. Phone aṭang pawhin kan inkar a engemaw awm hi a hriat theih. Ka kut pawh a thlan hluam mai

"Ka ngai lutuk che hi maw i kut tin khan na lutuk in min han piai la, a thla lang kulh ka hmuh apiangin hriatchhuah che ka duh" ka han ti let leh a

Frantz POV

Ka kekawr chu a tight khawp mai, plastic chu ka hnek keh mai dawnin ka hria. Ka phur ṭan riau mai. Liliana hian min tih let dan a hre hle mai a

"Khatianga inkhelh kha i duhzawng a ni maw? Ka hrethiam e Ms Chavez" ka ti a, ka hmui hnuai chu ka pet a, Liliana angin ka mitthla a

"Tihluih ka nih chiahin mawle Mr Cavalier" Liliana chuan tlawm mai a tum loh hmel khawp mai. Ka chak zawk ziah a, mahse tun ṭum chu chak zawk nih a chuh ve tlat

Liliana POV

"A sawi chuan i chak alawm, mahse a takah eng nge i an ang?" A ti a, ka mit ka chhing vang vang, a rawn ti tak tak mawle

Ka mit ka khap a, ka tum deuh bur. A chak leh ta. Phone ah chuan sakeibaknei ang maiin ka huai alawm mahse Frantz nena kan inhmachhawn hi chuan ka khup leh zul zul ṭhin. A lumna in min han uap a, a rim ka hnim vang vang hian chaichim ang mai ka ni leh ṭhin. Frantz a'n thuneihna zawng zawng a chang leh ṭhin

"I fair lo em mai" ka ti a
"Tunge hnehtu zawk ka hriatchhuahtir che a ngai alawm" a rawn nui hak a, thaw chhuak hlaeih in ka mit ka chhing a, ka mut a rawn chhuak chawpchilh a, ka hmangaih ka be chung hian ka chau viau tho mai. Ka mur chuai chuai bawk nen ka mut a chhuak hle tawh a ni

Frantz POV

Ka la phur nasa mai "Duat?" Ka ko a, Liliana chuan "imm" a ti zawi sap a
"Ka tan malsawmna i ni tih i hria em?" Ka ti a, Liliana chu a rawn nui sep a
"Nitin Pathian hnenah lawmthu ka sawi ṭhin. Ka hmangaih lutuk che. Contract thar lo awm nen thil hi a buaithlak tih ka hria. Ka ngai lutuk che. Ka nupui ni tawh la ka ti asin. Khawiah pawh ka kalna apiangah hruai che ka duh. I hlata awm hi har ka ti. Kan hma hun atan ti ka ni asin, kan fate tur tan pawh a ni tho. Tunah chuan mu tawh rawh ka hmangaih, kan inhmu vat dawn nia" ka ti a

Liliana chu a muhil a ni ngei ang, phone ah chuan a rawn hnar sek sek a, chau lutuk in ka nui suk a, phone chu ka fawp zeuh a, ka dah ve ta

Liliana POV

Kan inbiak hnu chuan darkar tlemte chauh inbiakna hun kan nei ṭhin. Kan inhlat avangin chauh mai chu ka tum bik lo, inneih hun turah ka rilru ka pe zawk a, engkim hi a rih lutuk chuan ka rilru tih zangkhai tumin Gospel hla ka ngaithla a, Frantz a tan ka ṭawngṭai hnem phah khawp mai. Harsatna a tawh ka hlau em a ni. Him takin a thleng tih ka hriat hma hi chuan ka rilru a nuam thei ṭhin lo

Thla te chu an ral chak leh khawp mai. Inneihni pawh a hnai leh kuar mai

"Lili, i ṭha em ka hmangaih?" Ka nu in ngaihtuah nei lem lova ka ṭhu reng chu min rawn zawt a, inneihni a hnai a, ka zam telh telh mai. A rawn lang chhuak ṭan in ka hria

"Inneih hma rilru hah a nih kha" Mariella chuan a rawn ti ve khauh, ka han nui lui leh sek a, inneihni thawmhnaw en turin dawr ah kan lut a, kar hmasa khan ka thlang fel tawh a, mahse ka tawk turin ka fit tir leh a, vawiin hi hak chhin ni a ni. Frantz a suit leh kan pa te ve ve ta tur pawh an peih vek. Chamille chu ka ṭhian ah a ṭang dawn a, ani pawh a inpeih tawh. Frantz nen khan inneihna lian vak lo siam kan rawt a, kan client te leh thawktu ṭhenkhat chauh an awm ang

Frantz chuan duh pakhat a nei a, chu chu Puithiam John a malsawmna neih a ni. He Puithiam bawk hi a ni, Carlos a'n min khawih a tum hnua kan va biak kha. Frantz khan Puithiam thurawn a lak khan dawhtheihna te a neih phah a, kan inkar pawh a ngheh phah sawt. Chuvang chuan a lawm lutuk a, Puithiam John a malsawmna a duh phah a ni

Mariella leh ka nu chu an inkawmngeih in an lungrual dun khawp mai. Biakin an lo hauh a, inneihna a engkim mai an lo peih fel vek. Frantz nena kan tihtur ber chu dawr a kal a, eitur te tem chhin chauh a ni mai. Kan nu te hian engkim an peih fel vek, a lawmawm khawp mai

Inneih a hnai a, ka zam telh telh, ka mang vekin ka hria, ka thin a phu dep dep. Ka chuap pawh hian hna a thawk ṭha mawlh lo. Ka thlir ngai ka lo thlir leh reng zel. Chaw tak tak pawh ka ei thei lo, Pizza tih loh chu

"Lalpa leh, ramhuai ang maiin a dang vek ania, i pa nen kan inneih dawna ka awm dan ai pawhin i nasa zawk" ka nu i'n a ti a, ka lu thing in ka nu hnenah ka ṭhat thu ka hrilh a "Nu, ka ṭha ania, thla ruk kalta kha chuan an hlat hmel em em a, tunah lem ni thum chiah in min dang tawh a, ka la inpeih lo, ka sawi tur pawh ka la thiam lo, ka thawmhnaw te kha ka tawk ang em? Pizza ka ei nasa si a chuan" ka ṭawng bah nuai a

"Liliana" ka nu i'n min rawn ti tawp a "Engkim a ṭha vek ania" min rawn en leh a, a thaw ham ham

"Ka hlau ania nu, nupui nih dan pawh ka thiam hleinem. Eng nge ka tih ang? Engtin nge a bulah ka chen ang? Ka-" ka thaw a chham lo chauh. Inpeih nan hun ka la mamawh. Thla ruk chhung kha a reilo hle in ka hria

Ka nu chuan a lu a thing a, ṭawng a tum chiah Mariella chuan a lo sawi khalh a

"Frantz a pa hi kum sawmpasarih ka nih in ka nei, khami ṭum kha chuan ka hre chang chang chauh a ni. Ka la hmangaih lo bawk. Ka chhungte hi lo neia eizawng an ni a, a chhungte hi kan khaw hotu ber an ni. Kan in hmuh tirh khan a nupui ah min duh nghal a, mi sual chu a ni lo, kut pawh min thlak ngai lo, mahse a chapo in a induh tawk ve a, a thusawi tawh chu a ti ngei ngei ṭhin. Ka insiamrem a ngaih phah ṭhin. Hun ka pek hnuah kan inhmangaih ta a ni. Ka sawi duh chu maw Liliana, nupui ṭha hi an awm bik lo. Theihna i nei a, pasal nei tur pawhin i puitling tawh. I rilru pawh a nghet a, Frantz pawh i hrechiang sa a, i hmangaih bawk. A harsa ang tih ka hria alawm. Hlim ni leh lungngaih ni te pawh a lo la thleng ang, mahse in inhmangaihna chuan a hneh tir zel ang che. Chutiang tur chu alawm" min fuih zawh chuan ka thaw leh hak a, ka lu ka thing a, ka mittui ka khap per sawk, ka thawk a pangngai leh tawh

"Nangmah ah hian ka duh deuh i hria em? Liliana" a ti a, ka lu thing in "Hre miah lo" ka ti a

"I thiltih engkim ah hian Pathian i dah hmasa ber ṭhin hi a ni. Franco in min boral san khan, kan chhungkua in kan dinhmun a chhe viau mai, inṭhenna lehkha te kan phawrh a, Frantz a enkawl dan tur kan sawi a, a tukah paper kan sign zawh in khuaah ka haw a, Biakin ka pan nghal a, Frantz pawh ka kiangah a awm. Ka ṭawngṭai a, ka mittui a rawn tla nasa bawk. Ka mipa hmangaih in ka mittui hru in ka khabe a chawi kang a, chuta a thusawi chu i hre duh em? Mittui tling kuang chungin he thu hi a sawi a 'Helai hmunah hian ka rawn hmuh che ka ring reng a, ka hmuh hmasak berna hmun che pawh a ni a, khami ni khan ka nupui atan ka duh nghal che a ni. Kan inneih thutiam kha ka hrechhuak a' a ti a hemi ka hrilh chhan che chu Lili, I rinna hian a tichak ang che, thil dang chu i tawn zel thei mai ang" ka kut a vuan a

Inhnit feih feih in ka nui ker ker a, hnuai lam ka melh a, ka nu chuan ka hnung a rawn zut a

"Ka hrereng ang" ka bu nghat a, Mariella chu a nui seih a "Tunah chuan cake leh pizza inan lohna kan tem chhin dawn em ni?" A ti a

Kan nui chhuak leh hak, car aṭang chhuak in dawrah kan lut a

Ka thawmhnaw thlan chu A line, dar a lang thei, nghawng a nei a, off white puan rawng niin lace a invuah a, veil lukhum a nei bawk. Ka pheikhawk hi saingho rawng niin lace a tel leh bawk, a sang lutuk lo bawk a, a tawk chiah, chet sual palh a hlauhawm em mai

Fitting room ah ka lut a, staff pakhat in min lo pui a, ka thaw thei lo ṭep. Zipper an zip thla a, tawk loh ka hlau viau a ni. Kawngka rawn inhawng pawh ka lo hre lo lek lek, ka nu te ka hmuh a ngai sia, ka va chhuak chu an lo ṭap a

"Awi leh" Mariella chuan a rawn ti sup a, a hmui a hup tawp, ka nu chu a mittui a lo tling kuang mai

"Nu?" Zam deuhin ka ko a, chil ka lem leh dawk, a remtihna ka nghak mek
"I mawi lutuk ringawt, mikhual ho pawh i tibuai dawn hle mai Bawihte" a rawn ti a, ka thawveng huai. Cake leh pizza ka lo ei kha ka lawm tak tak a ni

Mittui nena dawr kan chhuahsan hnu in ka nu te chuan min kalsan a, Chamille nen Mall ah kan inhmu a, kan kal chhan tur a sawi miah lo. Kan inkuah vang vang a, chumi hnu chuan a thaw halh a "Kal ang le" min kai dawr dawr a, Mall chhungah kan kal kual a

"Eng nge kan tih dawn?" Ka nui ver ver a, Chamille chuan sam et hian min chhang a "I ṭhian ka nih angin i nu in hna min tuk a, in inkar siamṭhat nan a ṭha hle dawn a ni. Underpants kan thlang dawn mawle Frantz tibuai vek thei tur" a tih chuan ka dang a ro nghal vek, mit ka khap sawk

Inneih chungchang ringawt ah ka lo buai a, a hnu lam ka lo ngaihtuah tel miah lo. Honeymoon kha

"Aih aih aih" Chamille chuan ka hmel inthlak danglam a hmuh chuan a lu a thing a "Thil thleng thei lo tur ang khan ngai re re suh. Kan lut ang a, kan thlang dawn tho tho" a ti a

"Mahse, mahse" ka lo ti a
"Mahse ti suh" Victoria Secret dawr ah min luhpui a, ka kal ngai lohna tak a ni "Helai hmunah hian eng nge an lei ṭhin i hria em?" Room chu a eng vak lo, bra leh panty a lo tam mai. Perfume leh incheina chi hrang hrang a awm bawk

"Mipa kekawr bul leh T shirt bra" inchhuang takin ka ti a, dawr nghaktu lipstick sen hnawih hian nui chungin min rawn pan a

"Hello, Victoria Secret ah kan lo lawm a che u, Sasha ka nia, in duhzawng a awm ang em?" Kan ṭawng ve hma chuan a rawn ti zung zung a, Chamille chuan a chhang a "Ka ṭhiannu hian pasal a nei ṭep tawh a, panty a mamawh khawp mai" a ti a

Ka ang huau

Sasha chu engtin mah a awm lo, a rawn nui a "Ka hrethiam e, in mamawh tur chu ka hre mai ang" a ti a

"Panty kher a nih a ngai lo ania, mipa kekawr bul pawh ka ha thei tho" ka lo ti thuai a, Chamille chuan a rawn belh leh a "Chimawm deuh kha nise a tawk mai" a ti a, ka lu ka thing ringawt. Chamille hi chu huat a har a ni

"He lamah min lo zui rawh u" kan hmaah chuan a kal zel a, underwear tam deuh awmna lamah min hruai a

"Hdng style hi kan nei a" milem dum leh sen lace awm hi a kawk a, lai pawh a hmu theih tho. Ka en reng laiin Frantz a'n min thlir vauh vauh tur ka mitthla in ka hmu a, a mawi ve tho mai

"I duhzawng a ni em?" Chamille i'n min zawt a, ka ṭawng thei tawh lo, a langtlang vak lo a, ka duhzawng tak a ni. Ka biang a sa hut hut
"Kan lo la ang" ka chhan mai loh avangin Chamille chuan Sasha a chhang a

Dawr ah chuan a kal kual a, Perfume leh Lotion chu min lei sak a, panty chu ha ngei turin thu min rawn a, ka zawm mawl tawp. Frantz nen thu kan tiam ṭep tawh ania

Kan in lei fel hnuah Chamille chuan min buaipui vek tur thu a sawi leh a, kan haw hma in thil kan ei leh zuai a

Restaurant chhung chu a lum nuam khawp mai. Zawhna ka rilru ah a lo lang reng ka inrin hma chuan ka sawi chhuak thut a "Eng ang nge a nih?" Ka ti a, ka biang a sa vek

"Eng chu?" Chamille i'n min zawt a, a in tur chu a tep zeuh a, ka hawisawn daih, ka kut chu ka khawih leh niap niap a, ka zam ve khawp mai.

"I hria em?.....Zan khat na hi mawle" ka ti zawi sap a, ka sawi zawh rual chuan ka zak lutuk hi inhnim phum vang vang ka duh hial mai. Ka zawh loh tawp tur a ni

"Ooh" Chamille chuan ka thusawi hrethiam in a meng zau kawk a, ka zawhna chuan tibuai lo ang maiin a nui a, min rawn chhang nghal

"A tirah chuan a nuam chiah lo alawm. A na riai riai a, kei phei chu a zia lo tawp. A hming chu Dallas a ni a, ka bialpa hmasa ber a ni. High school ah senior kan nih aṭanga College junior thleng kan chhuak dun a, ka ṭhian ṭha ber a ni a, ka ringtawk hle bawk. A zei vak bik lova, kan infawp a, a mood a chen tumin kan infiam a, chumi hnuah kan ti ta alawm. Chutiang vel chu a ni e" Chamille chuan zep awm lovin a sawi vek a, ka bo telh telh. Mahse min hrilh duh avangin ka lawm hle mai

Chamille chuan ka ngawi reng chu a hrethiam aniang nui chungin min thlamuan a "Zam kha thil awl tak alawm, keipawh pasal ka neih dawn khan ka zam ve lutuk. Mahse i hmangaih tak nangmah ngaihtuah em em tu che i tawng ania, Frantz a'n a melh dan aṭang che hian ka hria alawm. Ṭha takin a enkawl thei ang che. Hahdam tak khan awm la, engkim a ṭha vek mai ang" dawhkan ah ka kut a rawn vuan a, a thlamuan thlak takzet, ka thaw halh a, ka nui leh sek

Frantz nen kan inneihna tur ni chauh in a dang tawh a, engkim a kal tluan vek ka beisei

*****

Chhunzawm tur


Show post links
Top