All For Love BY Becca Lnz (Completed)

[Ngaia]

Prologue:-

"Ka pa, min fiam a ni tiraw?" ka pa thusawi chu ka hriat sual emaw ka ti zawk hial, "Bawihte, thudik ngei ka sawi a ni, Nicholas chu I neih ngei ngei a ngai a ni" a tih leh chuan ka tlu mai dawn in ka hria. Nilo kha mipa kha, ka hmuh apiangin a bialnu nen an awm dun ziah bawk, engtinge khatiang mipa kha ka neih theih ang, "Pa... chutiang a theih loh, in hriat pawh kan in hre ngai lova, engtinge kan in neih theih ang" ka ti a, "Hun a la tam alawm, naktuk ah an chhungkua in an lo kal dawn a, han in hmu phawt ula, in lo in rem phian maithei asin" a tih leh tak zelah chuan tah vak mai ka duh tawh, engtinge khatiang mipa leh lutuk kha ka pasal atan ka neih theih ang, ka chhungte hian a chanchin an sawi dan hi an hre ve miah lovem ni?... Mipa fel a nilo a, party naah hmuh tur a tam hle, mahse mi mai mai a nilo, company lian tak a nei a, Mizoram mai nilo hmun hrang hrang ah company a nei a, a lar hle.

A hmeltha a, a lian bawk nen hmeichhia ten an atchilh rawn a, a luck tih a in hre bawk a, hmeichhia ah chuan buai lo tak a ni, tun hnaite atang khan model lar tak Cindy nen an in zui nasa hle a, a hmeichhe kawp tawh te ah chuan a kawp rei ve ber a la ni hial ang, a chhelo em a tin ni. A chanchin ka hriat em em nachhan pawh social media ah hmuh tur a tam em vang a ni pakhat a, a ni erawh chuan min hre ve lem lovang, ka pa chu ka en a, "Pa... pasal neih ka la duh hleinem, ka hna tehi engtinge ni ang, pasal nei turin ka la in peih lo" ka tihchuan, "Bawihte, hriatthiam tum rawh, i pu duh dan a ni a, amah awm tawh lo mahse a thil duh chu nang a tunu hian i tih hlawhtlin sak dawn lovem ni?" a tih leh chuan chhan dan tur pawh ka hre tawh lo, ka tap mai dawn in ka hria.

"Ni e, Bawihte, i pa thusawi kha ngaihtuah chiang la, kan duh dan a ni bik chiah lo, mahse i pu leh Nicholas-a pu in thu an lo thlung a, i pu awm tawh lo mahse Nicholas pu a la awm a, a ni chuan in neih hun tur hi nghakhlel takin a thlir asin" ka nu pawh chuan dam diai hian a ti a, ka mittui chu hru zeuh in ka thut na atang chuan ka tho chhuak a, room lam ka pan nghal, ka luh veleh kawngka kalh sawk sawk in khumah ka bawk thlawp a, ka tap nghal a. Tunge hetiang thil hi ka chungah a thlen bik, ka pasal tura an tih lah chu ka mipa ngainat loh ber chi a ni bawk si, ka mittui chu a tla reng a, dan pawh ka tum buai peih lo, Nicholas-a pawh in he in neih na tur hi a duh bik in ka ring lo, amah nen in hmu phawt ila, sawi dun ila a tha in ka ring.

___________________________________________

Nicholas nen chuan in hma tawn in kan thu ran a, hnuai lam a bih ngur a, a lungawi loh hmel hle bawk, a awmdan chu ka hriatthiam pui, keipawh hi ka lungawi bik lo, kan chhungte chu an in be mawlh mawlh a, Nicholas-a pu erawh a taksa a chak tawk tawh loh avangin a rawn kal ve theilo thung. Kan chhungte chuan a fal a in biak na hun min siam sak a, kan in hnung pawn lamah chuan kan in zui chhuak a, ka zam lek lek, engmah sawi lovin ka hnungah chuan a rawn kal ve a, ka nu pangpar khawi ka thlir vang vang hnuah a lam chu ka va hawi a, thil ngaihtuah nei tih hriat takin hmalam chu a lo bih ngur ngur a, "In neih na hi.." ka tih lai mek chuan "Min neih chu i duh em ni?" a ti nghut a, "Chuchu a nia sawi ka tum, cancel dan i hre mai lovem ni?" ka ti ta tawp a.

"Engthil nge ti sep min tih?" a ti bul leh hmuk a, biak a har ropui si, ka ning lek lek, "Ka hrelo, mahse in neih na hi kan pahnih hian hnial ila, ka chhungte chuan in nei turin min ti lui maithei asin" ka ti a, in ring tawk tak pawn ka tawng ngam lo, "Chutiang thil a thleng theilo, kan pu te duh dan tih i hriat kha, engpawh nise kan in nei ang, amah erawh chu, ka nupui tak anga awm tum ngai suh ang che, ka nun ah in rawlh tum hauh lo bawk ang che, a hming maia nupa kan ni ang ka tihna a nihchu, midang hmuh ah erawh nupa in hmangaih takin kan awm thung ang" a ti dap dap a. A thusawi chhung zawng chuan ka thaw lo in ka hria, engtinge khatiang thil kha awlsam taka a sawi mai theih, amah chiah a in ngaihtuah, kei engtinge ka awm ang tih a ngaihtuah tel lo, ka rilru chu a na hle.

"Ka duhlo, pasal neih ka la duh lova, lemchan lah ka peih hek lo" ka ti fak a, a nui suk, "Ok.. ka nawr lui reng reng lo che, mahse heihi hria la, in neih na hi tih tawp tumna ka neilo a, i duh a nihchuan nangmah in tih tawp I tum dawn nia, kan lo in nei ta a nih pawhin pawi tihna ka neilo, ka nunah in rawlh lo la i nunah ka in rawlh bawk hek lovang" a ti nghet leh charh a, "Engtinge chutiang thil chu awlsam taka I sawi theih zawk, bialnu I nei a, engvanga kan in neih na tur chu dan tum lo nge i nih?" ka thinrim lutuk chu ka aw a khur dar dar a, "Lo lungngai suh, ka bialnu then tumna ka neilo, lo in nei ta pawh ni ila ka duh anih loh chuan kan in then ngai lovang, ka sawitur ka sawi zo tawh, lut ang hmiang, kan awm rei tawh mah mah" nung hmel zet chuan a ti leh nghut a, engtinge hetiang mihring hi an awm theih zawk?...

___________________________________________

"Ka kham tawh, ka dawh theih chin a pel tawh e, i hnen ah hian ka cheng peih tawh lo, i duh a nihchuan kha i bialnu kha hruai lut la, in pahnih in nuam chu tawl rawh u, ka tuar hnem ta mah mah e, ka chhuak dawn" tiin ka thawmhnaw bawm chu ka la chhuak a, thinrim zet a min en na pawh chu engah mah ka ngai duh lo, khum a ka thawmhnaw chu ka dah a, a dang lak leh ka tum lai chuan ka hnung atangin min rawn pawm kang deuh nawlh a, ka lo in ring bawk silo nen ka te that a, "Ramnunpui, min dah thla nghal rawh" ka ti tuar a, ka thusawi chu hrelo der hmak in khum lam chu min pan pui a, ka theh thla hnawk bawk, ka tawlh sawn tur chu min man in min rawn bawh nghal run a.

"Enge i hriat a, tho rawh" a awm ah chuan ka nam tang tang a, "Ka phal na tello in chhuah i tum amaw?" a ti hrawk a, "Tum e, i phal na la tur hian ka engmah I nilo e" ka ti hlar a, "I pasal ka nihhi, Lalnuntluang" a tih leh chuan ka lo nui hak a, "A hming maia ka pasal i nihkha, i hria em, kan in neih hmaa I thusawi te kha i hre tawh lo ami, a hming maia nupa kan nih tur thu sawi tu i nihkha, ka nunah in rawlh i tum loh thu nen lam a nihkha i sawi, ka nunah hian thu neih tu ni tur hian tunge I nih, ka pasal lem mai mai bak i nilo e" ka tihchuan a hmel chu a hma ai mahin a rum a, a rapawm lek lek, diktak chuan ka hlau, mahse ka hlau tih tih lan ka tum lo bur thung.

Engmah sawi lovin min melh chhuk ngur a, keipawh chuan ka melh let ve ran bawk, chutah a kut chu ti che thut in ka kawr chu a pawt ri thawt a nihchu, ka tal nghal vak a, ka kut chu man kawp in ka lu chungah a kut pakhat chuan a man kawp a, a tha a chak bawk nen ka tal chhuak theilo, ka kawr chu a pawt thler leh thawt a, ka bra a lang chiang tawh hle, "Engthil nge I tihhi, min kaltir rawh" ka au nghek a, "A teuhlo, nupa kan nih zia ka hriattir ang che" a tihchuan ka hlau tawh hle, "Tho vat rawh Ramnunpui" ka ti leh a, a kiai suk duh lek. Ka bra chu a nawr tawm a, ka hnute chu dimna tel hauh lo chuan a tham ta tawn tawn a, chutia dim lo lutuk a a chet vang chuan ka then lek sak zel a, mahse chuchu hria angin a awm lo, a rawn kun hniam a, ka hmuiah chuan na zetin a rawn fawp leh nawk nawk a, a hmuiah ka lo seh sak vat a, ka ka chhung a al pap bawk, a tawp duh chuang lo, ka hlauthawng tawh hle, ka tal na lamah ka chau tawh hle lehnghal, ka rilru in ka nu leh pate ka au mawlh mawlh a.

___________________________________________

Amelia Lalnuntluangi - Hmeichhe hmeltha leh in ring tawk tak, mizo hmeichhia ah chuan a sang pawl feet 5'8 lai a sang a ni a, chhungkaw khawsa thei tak atanga seilian, rilru tha em em mai, huaisen tak, a duh loh na chinah chuan tih luih harsa tak luhlul em em mai a ni.

Nicholas Ramnunpuia - Mipa hmeltha tak, hmeichhia te duh rawn, mahni thu duh tak a ni a, hausa tak, a pian leh a hmel a hauhsak na avang chuan hmeichhia te ah a tla na hle, feet 6'2 a sang, tawng tlem leh zah ngaihna tla chham tak a ni.

Mize in ang lo tak, an chhungte sawi rem chawp a in nei, harsat na tamtak an tawk a, an in ngeih loh hle bawk, engtinge an awm dun zel ang le...


Chapter-1



Amelia Lalnuntluangi POV




"Nu ka tlai dawn ka kal ania aw" ka ti lang lang a, "Awle, fimkhur la" kitchen lam atang chuan a rawn chhuak a, nidanga a tih thin dan ang bawkin kawngka thleng min thlah leh a, "Ka lo haw har maithei, tunlai chu dawr ah kan buai lai tak ania" ka tihchuan "Awle, I lo haw dawn ah min rawn hrilh hrim hrim la aw, riltam chunga hnathawh mai mai te kha tih tawh loh tur" ka nu hi chuan min ngaihtuah leh lutuk mah mah thin a ni. Garrage atang chuan ka car chu ka la chhuak a, dawr lam ka pan nghal vat, ka thleng chuan midang pawh an lo thleng nual tawh, min hmuh chuan min lo be nghal vat a, "Vawinah Pu Ruatpuia fanu Kimi kha a lo kal dawn a, a duhkhirh bawk si, nangman bia la a that ka ring" Arini chuan a ti a, "Awle, a lo thlen hunah ka room ah in lo kal tir dawn nia, tunlai chu kan buai lai tak a ni bawk sia, hahchawlh na hun pawh in neilo, kan buai hi han zo se in tih hlim na te kan nei dawn nia" ka ti a.




An phur ngang mai, ka room ah chuan ka lut a, chair ah chuan thu thla in table a lehkha awm ho chu ka en a, ka thaw hak, ka check nghal zung zung a, keihi designer ka ni a, keimah in dawr ka hawng bawk, a lun ve viau a, Mizoram ah na na na hi chuan keini aia lun hi an awm ka ring lo. Ka hming chu Amelia Lalnuntluangi a ni a, kum 23 a upa niin mizo hmeichhia ah chuan a sang pawl tak ka ni ve, ka naupan lai atang Delhi lamah lehkha zirin ka awm a, designer nih ka chak thin em em a, tunah chuan ka duhthusam ang ngei chu ka ni thei ta a ni, ka sang a ka pian a chhiat lem loh avang hian mi tamtak chuan model lam a kal turin thu min rawn fo a, mahse model lam kher hi chu ka tui na zawng a nilo a, ka ngaithla liam mai thin, ka nu hi nurse a ni thin a, ka pa nen an in neih khan a bang thung, ka pa hi Doctor a ni thung a, ka nu nen hian damdawiin atanga in tawng an ni nghe nghe.




Nau mipa pakhat ka nei a, kan unau hian ka in kawm ngeih hle a, kan pahnih a kan awm dun tawh hi chuan thian dang vak kan mamawh lo, kum 20 a pum ve tep tawh a, Delhi lamah lehkha a la zir thung, hotel pahnih kan nei bawk a, ka pa hian a enkawl a, ka nau hi han zir zo se a enkawl tawh ang. Khawsa thei ve pangai tak kan ni a, mi chapo tia sawi tur erawh kan ni in ka hrelo, ka nu hian kan naupan lai atang tawh in thu tha min hrilh nasa a, kan unau tan chuan a ni baka nu tha hi an awm leh theih pawh ka ring tawh lo, nikum khan ka dawr hi ka hawng ve a, hnathawk pawh 10 dawn lai ka nei ve tawh, an thiam hlawm em em a, an design ang ang te hi ka lo en dik leh thin, kan dawr atanga kan pho chhuah te hi chu ka design a ni tlangpui thung, lehkha ka en fel mawlh mawlh lai chuan kawngka an rawn kik a lutin ka lo ti nghal vat, ka lehkha en lai chu ka dah tha nghal bawk.




Kimi chu a rawn lut a, "I lo awm tawh maw, nimin ka lo kal khan i lo awm lova, ka haw leh ringawt alawm" thutna tur ka kawh hmuh ah chuan a thu thla nghal a, "Ka chhuah lawk hlan a nih dawn chu, chuan han sawi nghal mai la" ka ti a, "Aw.. ka kawr design a hmaa ka lo sawi tawh kha tlem in ka thlak duh a, a hma lamah khan lace ni thei se ka tia, a harsa angem?" a tihchuan "Harsa lo ve, kan peih har lovang, kan zawh hunah ka lo bia angche" lawmthu a sawi a, kawngka thleng ka thlah a, ka phone a ri a, ka thiannu duhtak Thakimi a lo ni, nui sak chungin ka la a, "I buai em?" a rawn ti nghal thawr a, "Buai lo ve, enge nita?" "Zaninah party a awm dawn a, kan kal ve loh in, a kim nang" a ti a, pawi ka ti hran lo, party naah hian kan kal ve nasa mahse hmeichhe awm herh lutuk tia sawi tur kan ni lo.




"Tehreng, kan kal dawn nia, khawi hmunah nge?" ka ti a, "Jd Picnic Spot ah a nia, kal hma lutuk pawh a ngailo ang, dar 8 vel ah kan kal dawn nia" a phur hmel ngang mai, "Awle, ka lo sawm dawn che nia" ka ti a, kan in biak na kan tih tawp hnuah hna ka thawk leh nghal mawlh mawlh a, mo kawr design tur ka neih avangin chawl lovin hna ka thawk mawlh mawlh a, kawngkhar an rawn kik takah chuan ka lo chhawn vat a, Arini a rawn lut a, a ni hi ka hnuai a hnathawk te a ka rin ber a ni a, a kawr design te pawh a nalh thei viau, "Chhun thil ei a hun tawh a, kan nghak che" sana ka en a, dar 1 a lo ri tawh, "Aw... chhuak ila" tiin ka bag ka la a, kan vai chuan thil kan ei na thin ah chuan kan kal a, a ngai te bawkin chow satui leih bawk ka ei a, a tui ngei mai.




Kan ei zawh chuan kan let lehnghal a, hna ka thawk leh mawlh mawlh a, Dar 6 a dik dawn hnaih chuan haw tumin ka in siam a, midang chu an haw vek tawh, light ka off a, dawr ka kalh fel hnuah ka haw a, ka haw hma in ka nu ka be tawh bawk. In ka thleng a, ka pa pawh a lo haw tawh, "Bawihi i va rawn haw tlai ve, in buai deuh em ni?" a ti a, "Aw... tunlai chu kan buai lai ania, ka han inthlak lawk ang aw, ka ril pawh a tam tawh" room lam pan chuan ka chho a, ka in tihfai hnuah ka chhuk leh a, kitchen lam ah ka pa nui thawm ka hria a, ka lut vat, ka nu chuan ka pa chu a lo melh ram ram a, ka pa chuan ka nu chu nuih in sum zetin a lo en ve thung, ka pa hian a chhaih thinrim leh a ni chiang lutuk, tihian nakin lawk ah a thlem leh mai ang, ka nu lungawi loh chuan ka pa hian a thlem ngei ngei.




"Nu chaw ei kan siam nghal mai dawn mi?" ka ti a, ka nu chuan min rawn en vat a, "Aw.. ei nghal mai ang u" tih pahin a che zawm mawlh mawlh a, ka pa chu en pawh a en duh tawh lo, ka pa chuan min rawn en a, a mitko a san euh bawk, nui ver ver chungin ka nu chu ka pui ve vat a, chaw kan ei lai pawh chuan ka nu chu a ngawi reng a, ka pa chuan en in "Bawihi nu I la thinrim ami?" a ti dut a, "Min be lovin i chaw kha ei ve mai mai rawh" a lo ti hmak thung, "Thinrim tawh lo la, I thinrim chuan ka thil ei a tui lo thin tih i hriat kha" a ti leh a, "I duh leh tuilo deuhin ei rawh, i ninawm min be reng suh" ka nu chuan a ti hlar a, "Ka tihpalh a nihkha, thinrim tawh suh, zanah ka duat viau angche" ka pa in a tih rual rual chuan, "Lalhmingmawi chutiang sawi suh, I fanu a awm ve reng kha, mawl thei lutuk mai" ti hlak hlak pahin ka nu chu a tho daih a, a lai a ni chiang lutuk, "I nu hi chu a titau peih lutuk a" tih pahin ka pa pawh chu a tho ve ta daih a.




Hmun vel ka tih fel hnuah sitting room a ka nu leh pate tv enna ah chuan ka va thu ve a, "Nu pa, Thakimi nen kan chhuak dawn aw" ka sawi zawh rual rual chuan ka nu chuan min rawn en a, "Khawiah maw?" a ti a, "Jd Picnic Spot ah" ka tihchuan "Rawn haw har lo la aw" a tih leh chuan ka lo aw vat a, insiam turin room lamah ka chho a, ka in siam zawh rual chuan Thakimi chu ka room ah a rawn lut a, "Eh.. ka lo sawm dawn che maw ka tia" ka ti he haw a, "Ka u a leng dawn a, in in lamah a lo kal dawn tho a tiin ka rawn in thlah tir nghal daih alawm" a ti sam et a, "A nihchu, ka hman tawh, kan kal nghal mai dawn mi?" khuma ka bag dah lak pah chuan ka ti a, "Awle, zanin chu a nuam ngawt a, mahse haw tlai lovang aw" pawn lamah chuan kan in zui chhuak a.




"Nu pa kan kal dawn nia aw" ka ti lang lang a, ka nu chuan kawngkhar thleng min thlah leh a, "Rawn haw tlai lo ula aw" a ti sep a, "Aw.. lo haw tlai lovang" tiin car lam pan chuan kan kal a, "Mi an tam dawn em?" ka tihchuan "Tam ang, college kan kal pui te pawh an awm nual ang ka ring, Chhana pawh a lo kal dawn" Thakimi chuan min en chungin a ti a, ka thin chu a phu nghal duh duh mai. "Tinge a hma khan I sawi loh, kal leh lo mai ang" ka ti chul a, "A ngailo, ka hrilh lawk duh loh nachhan che pawh kal I duh dawn silo a, a ho e, enge i duh ringawt a, hriat pawh a hre hleinem" a ti a, "Chupawh nise, kan in hmuh lohna a rei tawh sia, hrim hrim in engtinge a kal ve dawn tih i hriat a, Delhi ah a la awm char char turah ka lo ngai a" ka ti a.




"Rintei'n min hrilh, i duhna a rei ve tawh bawk sia, hrilh ve tawh mai la" a sawi zawh rual rual chuan "I mawl ami?" ka ti nghek a, ka au ring bawk a, a phu zawk lehnghal, min melh rum hle, "Ka beng a chhet loh hi, nge i au vak ka beng a na vek alawm" ti hlar in a beng chu a khawih a, "Engtinge ka hrilh ngam i rin, ka hmuh ringawt pawhin ka zam ania, ka duh thu hrilh phei ila chu ka hmu ngam tawh lovang" ka ti a, "A ho emai, puitling I ni tawh a, hrilh ngam loh tur thu a awmlo hrim hrim" a sawi awlsam dan ringawt hi a ni silo. A hmun kan thleng a, an lo tam hle, kan thiante pawh kan hmu a, an lam ah chuan kan kal vat, "Awii.. Amelia I va chhelo ve" college kan kal pui thin Puia chuan a lo ti a, "I chhelo daih zawk alawm, i bialnu kha I lo hruai ve lo a mi?" ka ti a, "Bialnu ka nei leh tawh lo" ngaihsam hmel fe chuan a lo ti a, a ni hi zawng a lerh lutuk a, bialnu a nei reng emaw kan tih te hian a lo nei leh tawh lo thin a, a chang leh hmeichhe dang nen kan hmu leh nawlh zel bawk, ngai ah kan nei vek tawh.




"Saw Chhana a lo kal ania" Sawmtei'n a tih takah chuan ka ding khawng awt a, ka zam chhe leh hle tawh, kum khat chuang chu ka hmu tawh lo, "Heyy, Chhana i dam maw, in hmuh lohna a rei tawh hle mai" Chhuana chuan a lo ti vat a, kei erawh ka awm ngai in ka la awm reng, ka hnung lawk ah chuan a ding tih ka hre thei bawk, "Dam e, in dam zawk maw, in ngaihawm thin khawp mai" a ti ve sup a, a aw ka hriat ringawt te chuan ka awm chhung hi a lum pup pup nimai hian ka hria. "Amelia, I ni tiraw?" a rawn tih leh chuan muangchangin ka in her riai riai a, Chhana nen chuan kan in melh siah, a hma aiin a lang upa tawh a, a hmeltha zual sawt emaw tih mai tur a ni, ngainat awm zetin min nuih a, ka nuih let ve ringawt.




"Lam ang u, hetia awm reng chu a nuamlo emai" Puia chuan a ti a, kan thian te chu lamtual lam panin an kal a, Chhana nen chiah kan awm a, "I dam maw?" a ti sup a, "Dam e, engtik in nge i lo haw a?" en pawh en ngam lo chuan hmun dang ka hawi daih a, "Ni thum liam ta khan mawle, ti rawh hetah hian thu ila" thutna lam chu min kawh hmuh a, kan thu dun a, kan in awm hnaih bawk nen ka thaw lak a buai lek lek hial, "Dawr i hawng tih ka hria a, ka lawmpui hle mai che, hmuh loh kar in I chhelo zual sauh bawk" a tih leh phei chuan lai tawh tak ka ni, ka hmai hi a sen tan tan tawh maithei a ni, a lam chu ka hawi zeuh a, min lo en reng tih ka hriat chuan ka hawisawn leh vat.




"I va ti lawmawm ve, helam ah i awm reng tawh dawn em?" ka tihchuan a ngawi vang vang a, "Aw.. ka tum dan chu a nia, ka pa hian kan dawr hi enkawl tawh turin min ti a" a tihchuan ka lo lawm ve ringawt, "Nia.. i nu leh pate an upa ve tawh sia, I chhawk ve a hun tawh alawm" ka tihchuan a nui suk a. College kan kal lai khan kan senior a ni a, mahse ka inkawm vek tho, ka hmuh hmasak ber atang ka duh nghal em em a, a ni erawh in thian ang bakin min en lo thung, Thakimi bulah chuan ka duh thu pawh ka hrilh a, kum 4 chuang chu ka lo duh ve tawh. Ka hmai zawn a kut hmet ri khep ri ka hriat takah chuan ka harh zawk a, "Enge i lo ngaihtuah veng veng a, ka biakna che pawh min chhang silo a?" mawi zetin min lo nuih a, ka melh haw ringawt.




"Thildang ka lo ngaihtuah daih alawm mawle, sawi nawn leh la" ka ti var a, "Eng sawi lo ve, I lo hmeltha sawt lutuk a" a tih leh phei chuan lai tawh tak ka ni, "I ti mai mai a nihchu, kei ai tha an tam emai" ka ti vat a, "Ka hmeichhe hmuh tawh ah chuan nang tluk tu che an la awm lo" en pawh ka en ngam tawh lo, "Ka ngaihtuah fo zel che asin" a tih lehchuan a hmel en turin ka hawi chho zawk a, min lo en ve run tih ka hriat rual chuan hnuailam ka en lehnghal daih, "I lai em ni?" nuih za in sum zet chuan a ti leh a, lu ka thing nak ringawt, "Ok... I no min pe la" a tih lehchuan "I nei emaw ka tia" ka lo ti vat a, "Ka phone ka ti chhia a, a bo daih" nuam tih hmel vak loh chuan a ti a, chuvang a nih chiah chu reh ka lo tih em em. Ka no te chu ka pe a, kan thiante an rawn let leh tawh bawk a, nuam kan ti hlawm viau.




A tlai tawh em avang chuan haw kan rawt ta a, motor dah na lamah chuan kan kal a, "Engin nge i lo kal?" Chhana chuan ka bulah lo kalin a ti sup a, "Car ka keng a, Thakimi nen kan lo kal rual" ka ti a, "Awle, in ka thlen vel ah ka lo bia ang che" a tih leh chuan ka chhungril hi a nui ver ver mai, motor ka khalh lai te chuan ka nui leh vur vur thin a, Thakimi chuan min en duh khawp mai, "Nuam I va ti awm ve" a tihchuan bu nghat in "Party kha a nuam em alawm" awlsam zetin ka lo ti a, "Nuam tih chhan dang i nei tih ka hre ve reng a nia aw, a tir a Chhana i hmuh chak loh tehlul nen in hmu ta cheng a, nuam ti leh ber ber ah i tang a" min eiloh hmel zetin a ti a, "Aw.. ka hmuh lohna a rei ve tawh bawk nen a lo kal dawn tih i sawi khan min thawng deuh mai mai alawm, chutiang in hmuh ka chak loh thu ka sawi loh kha" ka ti ve a.




"Tak takin ni daih ula ka ti, in in hmeh e, Chhana lah mipa rintlak tak a ni tih a lang reng a, chuan maw zanina a en dan che kha a duh hmel tawp che, in thut dun lai kha ka lo en ru reng cheu alawm" Thakimi tak hi chu, "Beiseina min siam sak suh, min duh pawh ka ringlo, college kan kal lai pawh khan bialnu a neih kha, khanu nen pawh khan an lo la ni reng thei asin" ka ti a, "Buaithlak, a ni lah hi a in zep thei lutuk a, tumah hian a bialnu nen an in then leh then loh pawh kan hrelo, amah lah hian sawi a tum bawk silo, mahse maw a duh hmel che e" a la ti hram a nihchu, "Sawi tawh lovang, in in kan thleng tep a nia" a ngawi ve mai a, motor atang a chhuk a, "Naktuk ah kan in hmu leh dawn nia, i dawr ah ka lo kal ang" a tih hnuah inchhung lam ah a lut a, keipawh ka in khalh chhuak ve nghal.




In ka thlen chuan a lo reh thiap tawh, thawm dim zetin room lam ka pan a, dar 12 a la ri lo deuh, ka thawmhnaw hak te chu phelh in bathroom ah ka lut tlang nghal a, ka chhuah leh hnuah mut kawr ka ha sawk sawk a, ka sam chu ka chhem ro tir leh a, khumah ka in thawlh nghal than a, ka phone chu ka en a, message pakhat hi a lo awm vang a, "I thleng tawh em? Chhana" tih hi a lo ni a, ka nui hak, nuam ka ti lutuk chu khum ah ka leng vak a, min hmu tu chu awm se mi mawl emaw min ti hrim hrim ang, "Aw.. thleng tawh e, ka mu chiah zawk a" ka tih chuan a seen nghal, typing a in tia, ka lo nghak ran, "Naktuk ah kan in hmu dawn mi I hman chuan" a rawn ti leh a nihchu, awi ka thin a phu dup dup mai, "Hman loh thu pawh a awm hleinem, khawiah nge kan in hmuh ang" ka va ti a, "I dawr bula cafe a khan in hmu ila, dar 2 ah aw" a rawn tih leh a, khua hi var vat tawh se ka ti ngei mai.







Zing ka tho te chu kan phur mai mai khawp a, in hnuai lamah chhuk in ka nu nen eirawng kan bawl mawlh mawlh a, ka che zung zung a, chaw ei kan peih hnuah ka pa pawh kitchen lamah a rawn lut a, "A va rimtui ve, chaw kan ei nghal mai dawn ami, zai tur ka nei a, kal hma ka ngai tlat" a ti nghal zung zung a, "A pawi hleinem, ei nghal ang u, Bawitei pawh kal hma I ngai tiraw?" ka nu chuan thleng lak chhuak pahin a ti a, ka lo bu zeuh a, chaw te kan eikham hnuah ka nu nen eina kan seng fel a, ka pa erawh room ah insiam turin a lut a, thleng ka sil lai chuan ka pa chu a rawn lut a, "Bawihi nu min va thlah ta che" a ti sup a, ka nu nen chuan an in zui chhuak a. Ka nu hian hna kal tura kan chhuah dawn apiang hian min thlah thlap thin a, ka pa nen nuam kan ti thin hle, school kan kal lai pawh khan ka nau nen pawn thleng in min thlah thin.




In siam turin room ah ka chho a, nidang zawng aiin ka in siam rei, ka thawmhnaw hak te chu ka thlak kual sek a, kawrfual hak nuam zet, ka kup khuh, a pawl dal, ka kawng fel lang chiang thei zet tur chu ka ha a, sandal nen, darthlalangah chuan ka in en vang vang a, nalh ka in ti ve viau, inhnuai lamah ka chhuk a, ka nu in min hmuh chuan "Bawihte I va nalh ve" a ti a, ka nuih var var, "Mi hmuh tur ka nei a, chuvang mai mai mawle" tiin pawn lamah kan in zui chhuak a, "Fimkhur ang che aw, lo haw hma tum bawk la" motor ka luh hnuah chuan a ti a, "Awle, ka lo haw hma ang, ka kal ange, bye bye" ka in khalh chhuak nghal, dawr ka thleng a, an lo buai khawp mai, min hmuh rual chuan Terina tlem a nu ve deuh hi ka bulah hian a lo kal a, "Buaina a awm ania" a ti a, a hmel landan ah pawh chuan buaina naran a nilo tih ka hre nghal thei.




Room ah kan lut dun a, "Enge han sawi la?" chair ah thut thlak pah chuan ka ti a, "Hmani a kan thawmhnaw pho chhuah kha The Hanger ten kan design an ruk an tia, court ah min khin tur thu an sawi a" a ti a, "Engtin, nilo chutiang engtinge a nih theih, khathil kha harsa taka kan design a ni a, tu design mah kan ru hauh lo" ka thinrim hle a, "I be chhin mai dawn em ni, hetiang chuan kan mualpho lutuk palh ang" a ti leh a, "Awle, tunah kan kal ang, kan pahnih in" ka ti a, ka ding chhuak nghal bawk, Terina nen chuan kan kal a, an dawr kawt kan thlen chuan motor chu kan park tha a, dawr chhung ah chuan kan lut nghal, a neitunu Wendy hmuh kan duh thu kan sawi chuan a buai thu in min lo chhang a, "Kan rawn kal chhan hi thil pawimawh tak a ni, hmuh ngei ngei kan ngai" ka tih tak tlat ah chuan a room awm na lamah chuan min hruai a, room a kan luh chuan a buai tih min hrilh ve si kha, engmah a lo tilo, chair ah thu in phone a lo en vel mai mai.




"Miss hmu duh che an awm a?" min hruai tunu chuan a ti sep a, "Lo va chhuak rawh" Wendy chuan kei min melh ran chungin a ti a, a ni nen hian kan in el ka ti mai, ka el na em em phei chu ka hre hran lo, mahse amah hian min el em a, midang bulah te hian kan kawr design te hi a lo sawi chhe chiam thin a, min haw em em a, kan in hmuh fuh tawh chuan kan in be pangai khat viau, nu thau lam a ni a, kei ai kum 2, 3 vel bakin a upa lovang, a hma chuan Mizoram designer ah a ni aia lar hi an awm kher lovang, mahse dawr ka hawng a, rin aiin miten ka kawr design an duh a, chuta tang chuan min haw hle a, kan dawr hming chhiat na turin thil eng eng emaw a ti nual tawh, mahse a la hlawhtling ngai lo thung, a lam pan chuan ka kal a, a hma zawn thut na awm ah chuan ka thu nghal zat bawk.




"Chuan keini hian in design kan ru amaw?" a mit ah ka en kar a, "Aw.. ru lo ni ula kan design ang chiah chiah kha in rawn pho chhuak hauh lovang" kha fak chuan a ti a, ka nui hak, min melh rum hle, "Kan ru tih finfiah na i nei em, oh.. he thil hi" tiin table a lehkha awm chu ka la a, ka en nak chuan kan thawmhnaw design ang deuh chiah chiah hi a lo ni a, min bum theih a in ring a nihchuan a ti sual hle ang, "He design hi a nih ka ring, kan ruk i tihchu" tiin ka en nawn len a, ka kut atang chuan a rawn pawt thla a, "Ka phal na tello in ka kawr design i en ngam amaw?" ka ner nghal nang, "Wendy min bum theih chu ring duh suh, kha design hmang khan min bum I lo tum ange, in ang viau mahse en chian chuan kan kawr design nen in an na lai a nei tam lovang, chuan kha i thil design kha ni 10 April a i design a nihkha, chuan keini chuan ni 7 April khan kan kawr design kha kan pho chhuak tawh" ka ti a.




A mitmeng chu a danglam zawk a, "Hah.. chuvang mai chuan ka design in ru lo tihna a ni hauh lo a nia, a ni te hi chu ka ziak sual mai mai a nihhi" a ti a, ka awih lo nasa lutuk, "I tih tlat te chuan, i duh phawt chuan min khing dawn nia, hlauh na chhe te mah kan neilo, finfiah na tha tak kan nei a, tu zawk nge chan tha zawk chu kan hre mai ang, kan kawr design kha tun hnai maia kan design a ni tawh lova, thla thum liam ta daih a kan design kha a ni tawh, chumi fiahna pawh chu kan nei thlap" inring tawk tak chuan ka ti a, a meng dawi nghal du tawh, "Tun atang chuan kan thil design te lo ru tawh lo ula a nimai, tun chiah hi ka ngaidam ang che u, chhuak vat rawh u" a ti fiak that a, a aw a hlauhthawnna lang chhuak chu ka hriat hmaih lo nasa, "Ka sawi tur ni awm zawk tak a ni" ka ti ve fak a.




Kal mai mai ka tum reng reng lo, thil chi hrang hrang hmangin min tih hmingchhiat a tum thin a, ka kham tawk viau tawh bawk, "Vawikhat pawh hetiang thil tenawm hmang hian min puh tum tawh suh, tuin nge kan thil design ang ru thin zawk chu kan hre chiang ve ve, thla 5 liam ta a in kawr pho chhuah te kha kan design ang chiah chiah a ni, mahse engmah ka sawi lo, a chhan chu thil thleng vek tawh a nih vang a ni, ka room ah cctv a awm tih i hre lo pawh a ni maithei, cctv ah ka kawr design sa thla i lak lai kha a lang chiang viau, chuan a hnu lawk ah ka kawr design ang chiah chiah kha I rawn pho chhuak reng bawk a, i thil tih ang kha ti ve tur ah min ngai miah suh, hetiang zawnga min puh leh a nihchuan ka ngawi mai mai tawh hauh lovang" tiin ka ding chhuak a, tawng pawh tawng lovin hlauhthawn hmel zetin min en a.





Nui lui sak chungin ka chhuak nghal a, "A va han zaktheilo em em, an kawr pho chhuah kha i design ang chiah chiah a nih vang khan mak kan lo ti thin a, mahse nang lah in engmah I sawi bawk silo a, a lo in ang ve palh a nih kan ring kha a nia" Car a kan thut luh rual chuan Terina'n a ti a, "Aa.. sawi vak ngai ka tih loh vang a nihkha, hetiang zawng a a che leh a nihchuan ka ngawi mai mai tawh bik lovang" ka ti a, dawr kan thleng a, thil awmdan te chu Terina'n a sawi zung zung a, an lungawi lo lutuk chu an phun mawlh mawlh a. Ka phone a rawn rik chuan ka en a, Chhana a lo ni, vawinah in hmuh kan tum tih ka hre chhuak ve chiah, vawin a kan thil tawn te avangin ka lo theihnghilh daih chu niin, khatiang thil kha a thlen tawh loh hram ka beisei bawk.




Chhana chuan cafe ah min lo nghak ran tawh a, ka lut min hmuh chuan ding chungin a kut a rawn lek kang zeuh a, a nui sang bawk, a va han hmeltha chiang tak, a lam chu ka pan vat a, "Min nghah na a rei tawh em?" thut thlak pah chuan ka ti a, "Reilo ve, kan in biak khan ka thleng chiah, vawin lam te in buai em?" a ti a, "Buai lo e" ka ti sep a, in tur te chu kan chah a, "Enge min hmuh duh chhan?" sawi tur ka hre bawk silo chuan ka ti ta tawp a, nui hak chungin "Eng nilo ve, hmuh che ka duh mai mai mawle" coffe chu a in a, "Umm... mahse i bialnu in min hmu dun ang tih ka hlau alawm, taka in lo chho rual em?" ka ti ta daih a, engvanga a bialnu chungchang sawi lang ngawt nge maw ka nih le, ka saw zo vek tawh si a, chutah a ngawi vang vang a, a bialnu chungchang chu a sawi duh chiah lo a nih ka ring.




"Min chhang kher duh suh" ka ti a, "Nilo e, ka bialnu nen chuan kan in biak lohna a rei tawh alawm, tunah chuan pasal a nei daih tawh" a tihchuan mak ka ti hle, ka in hriat tirh atang khan an in ngaizawng tawh a, an in duh hle khan ka hre sia, bakah a bialnu phei kha chuan Chhana hi hmeichhe dang nen an awm dun pawh a phal ngailo kha a nia, a bula kan awm a hmuh te khan a thinrim thin a, chutia pasal a nei mai chu mak ka ti a ni. Ka ngaihtuah na chu a hria aniang, "Nau a pai a, a pa ka nilo, a chhan chu vawikhat mah Aremi nen khan kan la mu dun lova, naute pa nih theih na dan ka neilo" a ti leh a, "A nihchuan" tiin ka ngawi leh daih a, sawi nuam ka tih loh vang a ni, "I rindan chuan kha a ni, min kawp a, hun rei tawh tak atang khan" hul hak in a ti leh a, Chhana chu ka en vang vang a, Aremi kha a duh hle thin kha a nia, ka khawngaih takzet.




"Het.. khatiang khan min en suh, kum hial a vei ve tep tawh alawm" a nui hawk a, "A pawi ka tihpui tak tak che ania, mahse mipa i nia, ka ngaihtuah lutuk lo che" nui hak hak in ka ti ve a, "Ni e, tunah phei chuan ka thengthawng ah a thawk tawh lo" a ti leh a, thil dang dang kan sawi a, a bula awm hi chuan kan nui reng mai a nihhi. Dawr ah ka let leh hnu chuan hna ka thawk leh mawlh mawlh a, vawin chu haw hma ka duh deuh avangin dar 4 ah dawr atang ka haw a, in ka thlen chuan ka pa a lo la haw lo, ka pa hi pa upa tak a la nilo, tuna a thawh na hospital pawh hi kan ta tho a ni a, hotel kan nei ka tih tawh kha, a man a enkawl vek a, nakinah chuan ka nau enkawl tur a la ni, ka nau hian ka pa a chhun em em a, lehkha a thiam thei bawk nen a rual pui te aiin a pawl a sang a, tunah hian doctor nih tumin Delhi ah college a kal a, a zawh hunah sumdawn na lam zir leh a tum a ni, a thil zir engkim ah kan thlawp tlat zel bawk.




In ka thleng a, ka nu bulah chuan ka in thlak lawk tur thu ka sawi a, inchung lamah ka chho nghal, ka inthlak zawh ah in hnuai ah chhuk in ka nu chu ka chet pui leh mawlh mawlh a, ka pa a lo haw chuan chaw ei kan lo peih vek tawh, Dar 6 ah kan ei a, chaw ka ei lai chuan vawin thil thleng vel chu ka sawi a, "A ṭhalo hle mai, mahse chutianga I ti chu a tha a nihchu, engah mah a puh ngam tawh lovang che, tha takin hna thawk la, engkim a tha vek mai ang" ka pa chuan a ti sup sup a, ka nu pawh chuan a lo pawmpui khawp mai. Zanah chuan khumah mu chungin Chhana nen kan in be leh a, ka nui leh hak thin, fiamthu a rawn thawh leh zuk zuk thin a, a nuih loh theih thin lo, a tlai tawh deuh avang chuan kan in mangtha a, nui ver ver chungin ka mut dan chu ka siam rem a.




"Bawihte tho tawh la, hna kal I ngaih kha" ka nu chuan kawngka rawn kik pahin a ti a, ka meng chhuak riai riai a, ka muthilh a la chhuak hle, "Bawihte" ka nu chuan rawn ti nawn leh a, "Aw.. ka lo chhuk ang" phak chuap chuan ka ti a, ka ham bai bai bawk, zawi zetin ka tho a, khum ka siam nghal mawlh mawlh, sana ka en chuan dar 8 a lo ri va tawh, thawh ka hai chiang hle mai. Hmanhmawh zetin bathroom ah ka lut a, ka in bual zawh chuan in hnuai ah chhuk mai lovin ka in siam phawt a, ka bad chu ak in inhnuai lamah ka chhuk a, ka nu leh pate chuan chaw ei turin min lo nghak ran a, "Thawh ka hai chiang lutuk" chair a thut thlak pah chuan ka ti a, "A pawilo, tunlai chu i hah bawk sia, mu rei deuh mahla a pawi na a awm hleinem" ka pa chuan dam thluam in a lo ti a, chaw kan ei kham chuan ka pa nen hna kal turin kan chhuak a, ka nu in min thlah thlap bawk.



Cont...

In duhzawng a nihchuan comment lamah khan in lo sawi dawn nia aw..


Show post links
Top

[Ngaia]

Chapter-2



Amelia Lalnuntluangi POV




Kar khat lai a liam leh tawh, ka pu a dam tha lo a, ka nu leh pa te chu ka pu te khaw lamah an zin a, ka pa pa a ni a, a ni chiah hi pu kan nei tawh, ka nu pa leh nu, ka pa nu thlengin an boral vek tawh a, ka nu leh pate pawh an mangang tih a hriat hle, keimah chiah in inah ka awm bawk nen Thakimi chu kan in a riak turin ka sawm a, a lo hnial lo nasa, zanah chuan movie kan en a, ka nu hnenah chanchin ka zawh duh vangin ka call a, a la vat, "Nu ka pu chu enge a an?" ka ti sep a, "Bawihte, a tha vaklo, Aizawl lamah khan rawn kalpui mai chi niin kan hria a, mahse doctor in a rem ti chiah lova" a ti sep sep a, "A nihchu, a va zialo ve, ka lo kal ve daih mai dawn mi?" ka pu chu ka ngaihtuah hle, ka naupan lai atangin min duat em em a, keipawhin ka ngaina hle, rilru a nuam theilo.




"In kha lo nghak zawk rawh, keini kan awm tho alawm, a zual chuan kan lo hrilh leh zawk ang che" ka nu chuan a lo ti leh a, phone kan dah hnuah mu turin ka room lamah kan in zui lut a, "I pu chu enge a an?" Thakimi chuan khum a mut pahin a ti a, "A ṭhalo an tia, ka rilru a hah, ka pu hian min boral san mai ang tih ka hlau" ka ti a, "Lungngai reng reng suh, a tha leh vat mai ang" tiin min hnem ve a, ka phone a rawn ri a, Chhana a ni, "Hello" ka ti sep a, "Ka message i chhang thei silo a, I mu tawh ami?" a ti sup a, "La mu lo ve, thil dang ka lo ti a" Thakimi chuan min lo melh ran a, "Anihchu, i nu te an zin bawk sia, nangmah in ami I awm, i hlau em?" min ngaihtuah hmel hle, "Hlau lo ve, Thakimi riak turin ka sawm a, hei kan pahnih in kan awm dun" thawm a reh deuh vang vang a.




"Awle, a nihchuan ka dah ange, tui deuhin in mu dawn nia" tiin phone chu a dah a, chhan let na hman pawh a awm lo, "Enge a sawi a?" Hriat chak hmel zet chuan min rawn awm hnaih a, "Eng vak mah a sawi lo" ka ti ringawt, "Nangni pahnih hi in in be ve reng bawk sia, enge in awmzia?" min melh ran a, "Thian angin alawm kan in biak, hrim hrim in ni tur angah min ngai ngawt suh, a bialnu nen an in then a, an in then dan lah i hriat ve vek kha a la na ve ngawt ang, mipa a nia a ti lang lo mai mai a nihhi, nang lah hian min hmeh bel chhen I lo tum a" ka ti hlak a, "A rei tawh emai, bakah Chhana hian a duh tawh lovang, a en dan che leh a biak dan che hi a duh chiang che alawm, ni vat vat tawh ula, awii.. a nuam dawn e, I duhna a rei tawh bawk sia" a ti leh hluai a, chhan pawh ka chhang let peih tawh lo.




Ka pu chu a zual zel an rawn ti a, ka awm a nuam thei tawh meuh lo, midang pawhin hun a neih rei an ring tawh lova, kan chhung khat laina te pawh an kal khawm tan tawh a naktukah hian keipawh kal ka tum, ka nau vawin lamah a lo haw dawn a, ka lo nghak a ni, Lengpui ah chuan ka awm ran tawh a, ka nau hmel ka hmu chiah chu ka nui nghal var var, "U" tiin min kuah a, keipawh chuan ka lo kuah let ve vat, kei ai a lian daih tawh a, mahse ka lakah a la pangchang viau, "I va tlangval tawh ve" ka tihchuan a nui hawk a, "Loh theih nang, i nau hi e ka luck zia te hi i hria em, kan college ah hian hmeichhe chi hrang hrang in nitin min bem a, ka hne theih dan chu" a ti mawlh mawlh a, a bag chu khai sak ka tum a, mahse a lo phallo.




Car chuan kan haw a, "Ka pu chu a tha lo viau ami?" ka en nghal zawk a, hmalam chu a lo bih ngar a, "Aw.. ka nu in a sawi a, naktuk lamah kan kal ve nghal mai dawn nia, ticket pawh ka ti fel vek tawh a, han hahchawl deuh la" ka ti a, kan ngawi vang vang, ka pu kan ngaihtuah ve ve tih ka hria, "U... ka pu hi lo boral ta se, pi leh pu kan nei tawh dawn lo ania, ka pu phei hi chuan min duat bawk sia" a ti a, "Ni e, a tha leh vat mai ang, hlauthawng duh suh" ka ti a, mahse keipawh in a that chhuah chu ka ring tawh chiah lo, ka nu in nizan lamah ka pu awmdan te a sawi a, a hun tawp lam a hnaih tawh tih min hrilh tlang nghal bawk a nihkha, mahse ka nau bulah hian tlang takin ka sawi theilo a ni.




In kan thleng a, ka nau chu a room lamah a lut a, a la hma ang reng bawk a tiin eirawng pawh ka la bawl duhlo, Thakimi'n a thil chah a thleng tih min rawn hrilh a, kalpui turin min rawn sawm nghal, keipawhin ka hnial hran lo, ka nau bulah ka chhuah lawk tur thu ka hrilh hnuah ka in khalh chhuak nghal. Thakimi thil chah lah chu ka rin ai daih in a lian a, parcel in a in tuam tlat avangin enge a nih ka hrelo, "Ka nu in thil min chah a, lei leh lawk ang" a tih avangin motor park na remchang laiah kan park a, puan than a lo ni a, a lei zawh chuan motor lam kan pan a, hmeichhe pakhat in min rawn su dawt a, amah zawk a tlu a, kei erawh Thakimi'n min lo chelh hman thung. Rawn tho chhuak a, a hmel ka hmu chiah Cindy a lo ni, Mizoram model ah chuan a ni aia thawm nei lian hi an awm lo.




"I kalna kawng en ta che" a rawn ti chhuak nghek a, "Pawi ka ti lutuk" ka ti a, mahse ka thiamloh na awm in ka hrelo, amah zawkin min rawn su a, min la vin let zui, a ruk tak chuan ka ngei ru hle, kan bul hnaia awm te chuan min la en thup zui, "Fimkhur lo lutuk mai" a la ti hlak hlak a, "Enteh, thiannu i thiamloh zawk a nihkha, ka thiannu hi rawn su lo la chu i tlu hauh lovang, nangmah zawkin i rawn su a, i la thinrim ngam zawk ania" Thakimi chuan a lo ti a, ka lo nghawk zeuh, "Enga, nang khan engmaw i lo sawi ve a, tunge ka nihhi I hria em?" Cindy chu a thinrim ngang a niang, a hmai a sen tawn tawn a, "Hria e, tunge I nih ka hriat vang ngawt khan I dik loh na a la ngai reng tho" Thakimi chuan a lo ti then a. "Engthil nge thleng?" mipa aw ri kan hriat takah chuan Cindy tawng leh tur a a ka a ang zuai chu a chip leh hmak a.




"Bawih, he hmeichhia hian ka kal lai min rawn su tlu a" a ti no hnap a, nichin ah lem thinrim zetin a tawng a, tunah lah no thei ang berin a tawng leh a, "Dawt sawi lo mai teh, kal ang Amelia" tiin Thakimi chuan ka kutah a rawn kai a, min kalsawn pui nal nal, khapa kha ka hrechiang lutuk tlat, Mizoram ah na na na hi chuan a ni aia mipa lar kha an awm kher lovang, Cindy nen an lo in zui leh tawh tih chiang reng reng, ka hmu ve zeuh thin a, hmeichhe ngai reng a awmpui ngailo. Motor kan thleng a, "Cindy hi chu a in la no lutuk a ka ei thlawt lo, kha.. Nicholas nen an lo in zui leh hman tawh a nihkha" a ti hlak a, engah mah ka ngai lemlo, in thleng ka thlah hnuah ka haw a, dar 4 chiah a la ni, ka nau chu kitchen ah a lo awm a, "U... chaw hi ka chhum chiah a, chawhmeh chu nangman siam mai rawh aw, kei ai i siam thiam zawk" min hmuh rual rual chuan a lo ti zung zung a.




Chawhmeh te chu ka siam a, chaw kan ei zui nghal, kan ei kham chuan kan room ve ve ah lutin kan in siam a, ka in siam zawh chuan in hnuaiah chuk leh in kawngka te ka kalh tha a, Matthew erawh a muhil tawh a nih ka ring, room ah ka lut a, ka in tihfai hnuah ka mu ve nghal mai, ka phone chu ka khawih a, Chhana message a lo awm leh tawh, ka en nghal vat a, "Naktuk ah i zin tawh dawn sia, I cham hun tur I sawi thei bawk silo, ka ngai ngawt ang che" tih hi a lo ni a, ka nui hak, "Min ngai tak tak lovang" ka thawn rual rual chuan a lo seen nghal a, a message ka chhan let hun a lo nghak reng emaw tih mai tur a ni, "Ka ti tak tak alawm, i pu chu lo dam tha vat rawh se, I lo haw hunah thil hrilh tur che ka nei" a rawn tih leh chuan "Tunah min hrilh nghal mai la" hre chak zet chuan ka lo ti vat a, emoji nui lai hi rawn thawn a "I lo haw hunah le.... chumi chhung chuan ka lo in puahchah ang" a ti a.




Zingah chuan hma takah kan tho a, chaw kan ei kham hnuah taxi la in kan chhuak a, kan kal na tur sumo kan hmuh takah chuan kan bungraw ken ang ang te an hlang a, motor chhungah ka nau nen chuan kan lo thu a, kan chhuak har lo, ka pu te khua hi Aizawl atang chuan a hla ve a, darkar 8 lai tlan a ni, motor kan rui ngai lem lo a, mahse palh thil thu ah damdawi chu ka keng nual tho, kan khat vek lova, rin ai takin kan thawl, ka mut chhuak lutuk chu ka nau dar ngheng in ka muhil a, motor a ding tih ka hriat chuan ka meng chhuak riai riai a, chawlh an rawt chu niin, thingpui dawr ah kan lut a, kan in ei puar a, thei thur vel an zawrh naah chuan ka kal a, thei den te chu ka lei nual a, tun tum ka motor chuang chu ka rui deuh a, ka luak a chhuak hlui mai.




Kan chhuak leh a, khaw thim dawn ah chuan kan thleng ve ta hram a, ka pu te in an tlan pel dawn tho avangin kan la chuang a, driver hi hemi khua hi a lo ni a , ka pu pawh a lo hre hle a, a chanchin te chu kan sawi a, pawi a tih ve hmel khawp mai. Ka pu te in kawt ah chuan motor a ti ding a, kan chhungte chuan min lo hmuak a, min hmuh chuan min ngaih thu te an lo sawi a, kan cousin te nen kan han in hmu chu ka ti chel chul mai, inchhung ah kan lut a, Matthew nen chuan ka pu room ah kan lut a, ka pu chuan oxygen a lo hmang a, kan unau min hmuh chuan a hlim ve hmel hle, a bulah kal hnaiin a kut chu ka vuan a, kan kal hnuhnung ber kha chuan a la damtha vek a, tunah chuan a chak tawh loh hmel hle, "Pu dam leh vat rawh aw" ka ti sep a, muangchangin a mit a chhing a, a tawng that theih loh avangin min chhanna angah ka ngai.




Ka pu chu a muhil a, room atang chuan chhuak in kan chhungte lo awm na lamah chuan kan kal a, "Matthew-a chu I va lian tawh ve, lo kal teh, hmuh loh karin I lo tlangval ve uaih tawh a" patea chuan a ti a, nupui fel deuh a nei a, fa pawh pali an nei, "Nute, ka lo tihpui ang che" nutei'n thingpui a rawn chawi chhuak a, "A ngailo, in lo thleng chiah sia, i chau ang, lo thu mai mai rawh" a ti teh deuh tlat a. Thingpui te chu kan in ho a, ka pu chanchin ka patea'n a sawi chuan kan ngui bur hlawm mai, ka pa pawh a rilru a hah hmel hle, "Engpawh tawk thei turin kan rilru kan siam fel angai ani" a ti sup a, a dang engmah a sawilo, kan chhungkua hi kan hung ve a, kan in ngeih hlawm bawk nen a nuam takzet, ka pu hi awmlo ta se kan chhungkua hian kan tuar dawn lutuk, kan engkim a ni a, amah vang chauh a hetiang dinhmun thleng hi kan ni bawk.


..


Ni hnih lai kan awm ve tawh, ka pu chu zual lam a pan telh telh a, zanah phei chuan kan mu mang tawh lo, ka pa hian a awmpui deuh chawt a, ka pa te unau hi panga an ni a, ka pa hi a upa ber a ni a, ka pu hian a chhuang thin hle bawk, ka pu hi lo boral ta se ka pa hian a tuar ber ang. Zan tir ah chuan ka pu chu a thawk a rawn buai a, a enkawl tu turin nurse an ruai bawk a, a check nghal vat, a hnu deuh ah chuan a thawk a rawn pangai leh a, kan thaw deuh huai hlawm mai, han chim buai vak chi a nilo bawk nen room pawn lamah chuan kan lo nghak thap a, nurse leh ka pate unau bak room chhungah an awm lo, dar 1 a ri tawh a, naupang zual deuh chu an muhil tawh a, a puitling chin chu kan la meng vek, ka nu pawh chu a thu mai mai theilo, a vei tawn chhen a, nutei te hi pawh chuti tho, nurse a rawn chhuak a, a hmel chu a ngui ve lup mai, room chhung lam atang chuan mipa rum hawk ri pawh a hriat theih a.




Hlauthawng zet chuan nurse chu kan lo en a, "Ka pu chu tun mai khan a kal chiah e" a ti a nihchu, ka nu te hi chu an tap nghal hawm hawm a, room chhungah chuan an lut nghal, kei erawh ka awm ngaiin ka la awm reng, ka ngawng deuh chhulh nimai hian ka hria, "U.. lut ila" ka nau chuan a ti a, ka awmdan chu hrethiam takin min kaitho a, room lam pan chuan muangchang min kalpui a, ka pu khuma tui tih hmel taka mu chu ka thlir vawng vawng a, nunna a nei tawh lo tih a hriat loh, "Ka tunu duat lo zin leh vat rawh aw, I lo zin leh hunah tlang ah kan kal dawn nia" a tih lai te chu ka beng ah a rawn ri nawn tlut tlut a, ka mittui chu a luangthla pap, thenawm khawveng te an rawn pung khawm a, in vel an sing sak lai te chuan ka pu ngawt chu ka lo melh a, ka pa chu ka pi bulah a awm a, ka pu chu a melh ngawt ngawt a, a mittui tla lo mahse a na hle tih ka hriat sak thei. Ka pu kuanga an dah dawn lai te chuan hmeichhe ho chu an tap hawm hawm a.




Ka pu kuang bulah chuan ka thu thla a, YMA lam ho in sound vel an fit lai chuan ka pu hmai chu ka khawih a, "Pu.. tho tawh, hei ka lo zin hi, I lo zin leh hunah tlangah kan kal dawn nia i tihkha, tlangah pawh kan la kal hleinem, tho rawh" ka ti sep sep a, ka mittui chu a luang ngiai ngiai bawk, ka pu ka biak apianga min chhang thin tu kha a reh vang vang a, awmdan mai tur hriat a harsa takzet, thenawm khawveng te lo pung khawm chuan hla an sa dap dap a, ka nu te ho chu an la tap hawm hawm reng a, kei erawh tah vak pawh tum ila ka theilo, ka thin zawn hi a na vawng vawng a, ka pu min hmangaih em em tu a awm tawh lo tih ka hriat hian ka chhunglam hi na takin min siam a, khua a lo var anga ka pu chu lei hnuai thuk takah an zalh mai dawn tih ka ngaihtuah te hian ka thawk a chham mai dawn in ka hre hial.




Thlalak na te kan nei a, thlan ah chuan kan kal a, pastor in ka pu thlah nana a thusawi te chuan min va ti na em, "Pu min lo thlir ve reng thin rawh aw" ka rilru chuan ka ti vawng vawng a, tunah chuan ka pi nen an in hmu tawh ngei anga, hlim takin an awmdun tawh ngei ka ring, ka pu khan ka pi a ngai thei em em a, kan bulah pawh a sawi fo, ka pi nen an in hmu dawn tih ka ngaihtuah chuan tlem in ka zia deuh. Ka pu boral atang pawh karkhat lai a liam veleh tawh, naktukah Matthew-a Delhi lam ah chhuk leh tawh a ngaih vangin kan unau in Aizawl lamah kan haw dawn a, ka nu leh pa te erawh ka patea ten haw an la phal loh avangin an la cham rih deuh ang, kan haw hma chuan ka pu thlan ah kan unau in kan kal leh a, pangpar te kan dah hnuah reilote kan awm leh bawk.


...


Ka pu boral atang pawh thla thum lai a liam ve tawh, ka pu boral chu kan tuar hlawm hle, ka pa pawh kan khaw lamah a zin deuh reng a, ka nu in a tawiawm tha viau thin bawk. Chhana nen pawh a hma ai khan kan in pawh tawh a, dawr ah pawh a rawn kal ve ta fo mai, hnathawk dang te chuan ka bialpa emaw an ti fur tawh, a ni lah hian phat a tum ngai bawk silo, min chhaih te hian a lo nui leh vur vur thin a, kei lah ka lo zak ve thin bawk nen han chhan ngaihna ka hre ngai lo, Thakimi nen kan in bia a, bazar kal kan tum a, Chhana sawmk ve turin min ti a, an chhungkaw sumdawn na vel a enkawl tawh avangin a buai ka ring a, ka sawm duh ta lem lo, bazar chhung ah chuan kan lut a, mi an tam ngei mai, khua a la lum bawk nen haw mai chu ka duh rum rum, mahse Thakimi hian lei tur a la nei bawk si, haw chu ka la sawi ngam chiah lo.




Kan chhuak hma bawk a, kan haw dawn chuan a la tlai chhe lo, Chhana'n nizan kan in biak naah a thianpa in party a buatsaih dawn tih a sawi a, kalpui ah min sawm bawk, kei tak chuan tunge a thianpa chu ka hrelo, mahse ka thiante hian an lo hre khawp mai, an ni pawh kal an tum a, ka phur ve deuh. Kawrfual ka taksa phiar tang chu ka ha a, a ban a tluan bawk a tiin a chungah kawr ka ha tawh lem lo, ka nute pawh chhuah na tur an neih avangin inah an awm tawh lo, in atang ka chhuak a, Chhana chuan kawt ah min lo nghak a, nui var var chungin a lam chu ka pan a, "Tinge I lo luh mai loh a?" a hma a ding chung chuan ka ti a, "Ka lo thleng deuh chiah a, ka lo lut hman lo, I va chhelo ve" a ti ve ngei a, "Ka lawm e, nangpawh I chhelo alawm" ka tihchuan a nui suk mai.




Party na hmun tur kan thleng a, a nuam takzet, kan thiante kan thlen khalh a, wine no chu ka keng vang a, thut na awm ah chuan kan thu dun a, a then an lam a, a then chuan zu an in bawk, nuam an tih hmel hlawm viau, keipawh in party hi nuam ka ti, mahse zu tak hi ka in ngailo a, wine a ni deuh tawp mai. Kan thiante an lo thleng a, "Lalrina chu a va ti nuam ve" Puia'n a ti a, "Khawiah nge amah ber hi a awm a?" Thakimi thung a ni, "Ka hrelo a la buai deuh a niang, kan la hmu biklo" Chhana chuan a lo ti sup a, "Sawi lai mek mek in a lo kal alawm" Puia'n a tihchuan a hawi na lam ka en a, ka hmu ve ta chiah, ka hmuh hnu a ni tihchu ka hria, "Hey.. thiante u, in lo kal thei chu a va lawmawm ve, mamawh in neih chuan min hrilh ula aw" tiin keichu min rawn en a, "Amelia tiraw kha, keichuan ka hria che a, mahse min hriat ve hmel vak loh" a ti a.




"Aw.. ka hre chiah lo che" ka lo ti a, a nui sang a, "Lalrinawma ka nia, Chhana nen hian tet te atang school kan kal dun thin, college kha i rawn zawm tlai bawk si a, kei kan chhungkaw lam buaina vangin Mizoram ah ka haw leh ta sia, kan in hre hman chiah lo a nihkha" a ti leh zung zung a, college kan kal dawn khan ka dam loh avangin thlahnih laiin ka zawm tlai a, chuvanga in hre lo chu kan lo ni. Midangin an rawn biak buai avang chuan a kalsawn a, "Nuam I ti em?" Chhana chuan ka beng bulah a rawn ti sup a, "Ti lutuk, ka rin aiin an tam daih a" ka ti leh a, "Lalrina hian Mizoram pawn lamah sumdawn na a zauh a, party a siam na chhan pawh hi an partner te nen in rem na an neih dawn vang a ni, helai hmuna rawn kal tam zawk hi sumdawng lian tak tak vek an ni bawk" a ti leh a, chuvang a nih dawn chu an vai mai hian an zahawm em em hlawm ni.




Music chu an ti tawp a, stage ah chuan pa upa lam tawh leh Lalrina te chu an ding chhuak a, "Helai hmuna lo kal khawm zawng zawng te kan lo lawm vek a che u, zaninah hian Pu Vanlalmuana te company nen hian thawh ho na kan neih tur thuthlung kan siam min hriatpui tur a in lo kal khawm hi thinlung takin lawmthu ka sawi tak meuh meuh bawk e" Lalrina chuan tawngkam felfai takin a ti a, thil dang dang a sawi leh hnuah contract sign na te chu an nei a mipui lam chu kut kan lo beng dar dar hlawm a, a hnuah chuan music te rawn ri in lam tual lamah partner te te in an kal khawm a, Chhana chuan a kut chu ka hmaa a rawn dah a, ka lo melh haw, "Ka lam thiam vak lo asin" ka ti sep a, dawt ka sawi lo, lam kher kher hi chu ka tih mi a ni vak lo hrim hrim.




"Lungngai suh, ka zirtir ang che" tih leh ka kut rawn lak chu a rual a, kan thiante chuan kut an lo beng dar dar a, an va han over mai mai tak, kan han lam ve chiah chu a ke ah ka rah sak nghal a, "Awii.. a na viau em?" ka ti nghal a, "Na lo e, ka ke hi rawn rap rawh, chuan ka tih ang zel in I lo ti ve dawn nia" tlem chuan ka thiam ve ta deuh, hla chu a zo a, kan kalsawn tawh mai dawn emaw ka tih laiin Ed Sheeran hla Perfect chu an rawn play leh a, a hma a lam ve lo te pawh lam tual lam chu an rawn pan sap sap a, Puia leh Sawmtei, Chhuana leh Rintei chuan Thakimi leh Lalrina te pawh chu an lam a, a nuam takzet, he hla hi chu ka duh ve thlawt, ka ngaihthlak apiangin Chhana hi ka ngaihtuah na ah a awm ziah a, tunah ka ngaihtuah fo pa nen ngei chuan kan lam dun chu a nia, mumang a ang lek lek.




Kan lam zo a, hla dang an rawn play lehnghal, mahse ka ke a nat deuh tawh avangin lamtual atang chuan kan kalsawn a, pheikhawk sang ang reng tak ka bun bawk nen ka ke a nawt deuh a, ka pheikhawk bun chu ka phelh sawk sawk a, ka ke hnunglam chu a lo durh a, "Khawi ka lo en ang" tiin ka ke chu a rawn bih hnai a, "A ngailo, a kham deuh mai mai alawm" ka lo ti vat a, "A durh a nihhi" tiin min rawn en a, "A na vaklo tak tak a nia" min ngaihtuah hmel em avang chuan ka ti leh a, "I pheikhawk bun a sang bawk sia, bun tawh hrih suh, i ke a nat belh palh ang" a tih leh chuan ka lo nuih var var a, min ngaihtuah lutuk te chuan min ti lawm veng veng mai. "I ke a na elaw?" Thakimi rawn let chuan a ti a, "A nawt deuh a" ka lo ti mai a.




"Kan haw mai dawn em ni?" Chhana'n a tih takah chuan ka hnial lo khawp mai, pheikhawk bun leh mai ka tum chuan "Bun tawh suh" tih leh rawn laksawn a rual a, "Ka bun loh te chuan ka ke a bal vek dawn asin" ka sawi zawh chuan ka ke chu a en a, "Ka pawm mai ang che" a ti a nihchu, ka duh teuh lo, mi an tam si, "A ngailo, kalna tur a thui tawh chuanglo a, ka kal thei ang" ka lo ti ve tlat a. Pheikhawk ka bun hnuah ka ding chhuak a, kan thiante pawh haw ve nghal mai an tum bawk, pawn lam pan chuan kan in zui chhuak a, ka ke a nat deuh avangin a hnung ber ah Chhana nen kan kal a, kan chhuah hma chuan kan sir lam ka hawi a, mi pahnih hi an lo in fawp ngawng ngawng a nihchu, tunge an nih ka hrechiang lutuk ringawt, Nicholas leh hmani a ka sut nu model Cindy ngei kha, thiang hmun ual au lutuk ah te hetiang a an che ngam chu an huai hle mai, Nicholas chuan Cindy malpui lang lai chu a la chul zui.




En rei duh lovin ka hawisawn leh vat a, motor dah na lam kan thleng chuan kan thiante nen kan in mangtha hlawm a, motor kawngkhar chu min hawn sak a, ka thu lut vat. Kan in lam pan chuan a tlan a, a hlat ve deuh vangin darkar chanve vel lai la tlan a ngai, "Zanin chu nuam I ti maw?" hmalam en chunga a rawn tih sup chuan "Ti lutuk, tunlai chu chhuah thawven ka mamawh lai tak a ni bawk nen ka kal kha ka in chhir lo takzet, Lalrina kha a fel hmel ka ti" ka ti a, "Fel lutuk, college kan kal lai pawh khan a puitling thin a nia" a ti ve sup a, "I pate an tha zel maw?" a tih leh tak daih ah chuan "Tha lutuk e, ka pu boral kha kan tuar tlang a, ka pa phei chu kan khaw lamah a zin reng mai" ka lo ti ve luam a, "Amelia, i zin hmaa ka thusawi kha I la hria em?" a tihchuan a lam chu ka en a.




"Eng ber kha nge?" ka ti a, "Thil hrilh tur che ka nei ka tihkha" ka ngaihtuah vang vang a, "Aw.. la hria e, enge I la sawi ta miah lo a" ka ti vat a, "Thil thleng vel vang khan hrilh na hun che niin ka hrelo a, mahse tunah chuan ka thup thei tawh lo" a ngawi leh dat a, a thusawi tur chu ka lo ngaichang ran thung. A zam hmel em em lehnghal a, engtak sawi ang maw?... "Ka duh che, he thu hi hrilh che ka duh thin a, mahse ka ngam ngai thlawt lo a, tunah chuan ka zep thei tawh lo, kei hian ka duh che a ni, I bialpa a tan keihi min pawm duh angem?" a tihchuan sawi mai tur pawh ka hrelo, ka en reng a, "Lo in ngaihtuah la, tunah min chhang nghal kher a ngailo a nia" nui suk chungin a ti leh a, ka mumang emaw ka ti zawk hial. Kan in zawn ah chuan motor a ti ding a, "Mangtha le, tluang takin I haw dawn nia" ka ti a, "Nangpawh le, chuan ka thil sawi kha lo ngaihtuah la aw" a tih leh chuan ka bu zeuh a, kan in lam ka pan lai te chuan ka nui var var mai, ka mipa duh ruk em em in min lo duh ve reng chu a nia, engpawh nise ka thiante ka hrilh chak tawh takzet, min lawmpui ve viau in ka ring.




Inchhung ka luh chuan ka nute chu an lo la meng reng chu niin dar 11 lai a ri tawh sia, an mut tawh ka ring a nia, "Nu in la meng a nimaw?" ka ti a, "Aw... kan lo nghak che a, i pa hian sawi pui duh che a nei a, helam ah hian rawn thu ta che" a tih takah chuan sitting room ka chu ka pan a, "Pa enge i sawi duh chu?" thut thlak pah chuan ka ti a, "Bawihte ka thu hrilh tur che hian a thawng viau ang che tih ka hria" a ti hmasa te te a, a awmdan chuan min ti hlauthawng, "Pa... min ti hlauthawng a nia aw, sawi vat la" ka ti leh a, "Bawihte, i pu khan thian tha tak a nei a, i pu boral khan a lo kal ve theilo, a chak lutuk tawh bik lova, chuan i pu nen chuan thuthlun an lo nei a, chuchu chhungkhat a insiam a ni, an tu te ve ve in neih tir chu an duh dan a ni a, chuvang chuan nang hian i pu thiantha ber tupa chu pasal atan I neih a ngai a ni" ka pa thusawi chuan min thawng takzet.




"Ka pa, min fiam a ni tiraw?" ka pa thusawi chu ka hriat sual emaw ka ti zawk hial, "Bawihte, thudik ngei ka sawi a ni, Nicholas chu I neih ngei ngei a ngai a ni" a tih leh chuan ka tlu mai dawn in ka hria. Nilo kha mipa kha, ka hmuh apiangin a bialnu nen an awm dun ziah bawk, engtinge khatiang mipa kha ka neih theih ang, "Pa... chutiang a theih loh, in hriat pawh kan in hre ngai lova, engtinge kan in neih theih ang" ka ti a, "Hun a la tam alawm, naktuk ah an chhungkua in an lo kal dawn a, han in hmu phawt ula, in lo in rem phian maithei asin" a tih leh tak zelah chuan tah vak mai ka duh tawh, engtinge khatiang mipa leh lutuk kha ka pasal atan ka neih theih ang, ka chhungte hian a chanchin an sawi dan hi an hre ve miah lovem ni?... Mipa fel a nilo a, party naah hmuh tur a tam hle, mahse mi mai mai a nilo, company lian tak a nei a, Mizoram mai nilo hmun hrang hrang ah company a nei a, a lar hle.




A hmeltha a, a lian bawk nen hmeichhia ten an atchilh rawn a, a luck tih a in hre bawk a, hmeichhia ah chuan buai lo tak a ni, tun hnaite atang khan model lar tak Cindy nen an in zui nasa hle a, a hmeichhe kawp tawh te ah chuan a kawp rei ve ber a la ni hial ang, a chhelo em a tin ni. A chanchin ka hriat em em nachhan pawh social media ah hmuh tur a tam em vang a ni pakhat a, a ni erawh chuan min hre ve lem lovang, ka pa chu ka en a, "Pa... pasal neih ka la duh hleinem, ka hna te hi engtinge ni ang, pasal nei turin ka la in peih lo" ka tihchuan, "Bawihte, hriatthiam tum rawh, i pu duh dan a ni a, amah awm tawh lo mahse a thil duh chu nang a tunu hian i tih hlawhtlin sak dawn lovem ni?" a tih leh chuan chhan dan tur pawh ka hre tawh lo, ka tap mai dawn in ka hria.




"Ni e, Bawihte, i pa thusawi kha ngaihtuah chiang la, kan duh dan a ni bik chiah lo, mahse i pu leh Nicholas-a pu in thu an lo thlung a, i pu awm tawh lo mahse Nicholas pu a la awm a, a ni chuan in neih hun tur hi nghakhlel takin a thlir asin" ka nu pawh chuan dam diai hian a ti a, ka mittui chu hru zeuh in ka thut na atang chuan ka tho chhuak a, room lam ka pan nghal, ka luh veleh kawngka kalh sawk sawk in khumah ka bawk thlawp a, ka tap nghal a. Tinge hetiang thil hi ka chungah a thlen bik, ka pasal tura an tih lah chu ka mipa ngainat loh ber chi a ni bawk si, ka mittui chu a tla reng a, dan pawh ka tum buai peih lo, Nicholas-a pawh in he in neih na tur hi a duh bik in ka ring lo, amah nen in hmu phawt ila, sawi dun ila a tha in ka ring.


Cont...


Click leh comment a that chuan zawmna a aw leh vat ang aw, ka story hmasa ah khan click a tha lo hle a, chuvang chuan click a that vak loh chuan kan awl ve zak zak tawh ang...


Show post links
Top

[Ngaia]

Chapter-3


Nimin ka awl chhan chu kan picnic a, bakah chapter-2 tawp lama ka sawi ang khan comment leh click a that loh chuan ka dah lo ve zel tawh dawn ka tihkha, story hmasa lamah kha chuan ka awl ang ka tih pawn ka awl ngai manglo, mahse tun a story ah chuan kan awl ve zat zat tawh ang, ka story complete chiah ah khan a vaia belh khawm in 100 chiah click a awm, chuvang chuan buai chung chung a zantin rawn dah phet ka tum tawh lo aw...




Amelia Lalnuntluangi POV




Rei tawk fang ka tah hnu chuan Thakimi ka rilru ah a rawn lang a, ka ipik lutuk chu tih ngaihna hlawl ka hrelo, ka bag chu hai rawk rawk in ka phone ka la chhuak a, Thakimi chu ka call nghal, a la dawn lo emaw ka tih hnuah a la ta chiah a, "Hello" a aw atang chuan a muhil tawh tih ka hre nghal mai, "Thakim engtinge ka tih ang?" ka rilru hah lutuk chu ka thawk a chham lek lek, "Enge, thil ṭhalo a thleng a mi?" ka aw atang thil diklo a awm tih hriat takah chuan a rawn ti vat a, "Ka.. ka pa ten pasal nei turin min ti, engtinge ka tih ang, pasal neih ka la duh lo, nilo, ka mipa hriat chian loh phei chu neih ka duh lo lehzual" ka ti leh tiau a, "Enga, i chhungten pasal neih tir che an tum amaw?.. A va mak teh thut ve!" a rawn ti a, ka mittui chu ka biangah a luang leh ngiai ngiai a.




"Aw.. zanin ka haw khan min hrilh chiah, engtinge ka tih ang?" ka rilru chu a buai nuaih a, "Lawkin, Ngatinge chutiang thil chu an tih thut a, a va mak ve" kei ang bawkin a ni pawh chu a thawng a, "Ka pu khan thiantha tak a nei a, thuthlung an lo siam a, an tu te ve ve in neih tir turin" ka sawi zawng ringawt pawh chuan ka in hnip hlawp hlawp a, "Hahdam phawt rawh, tihdan tur kan ngaihtuah dawn nia, lungngai lo la" a thusawi chuan min hnem theilo, ka pa thusawi dan atang khan pasal ka nei ngei dawn tih ka chiang, eng ang pawn hnial mah ila awmzia a awm dawn lo. Engvanga hetiang thil thleng thut nge a nih, ka pasal tura an tih lah kha mipa lerh tak a ni a, engtinge nei turin min tih theih zawk?...




"Awmzia a awm lovang, ka pa in thu tawp a siam vek tawh, chu... chuan ka pasal tura an tih chu Nicholas Ramnunpui a ni" ka ti chhuak thei hram, "Enga?" a rawn au nghek a, "Thakim keichu tlan bo daih mai ka duh, khatiang mipa kha pasal ah ka nei duh lo" ka tawng chu a bah nawk nawk a, "Shh.. in bengdai rawh, a ni pawhin in neih chu a lo duh bik lo thei asin" a tih lai chuan ka rilru ah Chhana a rawn awm a, "Thakim, tlan bo daih mai ka duh" ka ti leh a, "Rilru ti hah suh ka tihkha, tihdan kan ngaihtuah dawn nia, Nicholas chu hmu ve hrim hrim la, a ni pawhin nupui neih chu a duh bik lo thei asin, chuvang chuan amah chu sawi pui la a tha berin ka ring" a ti ve sep sep a, "Nia.. a nih ka dah ange, thil thleng a awm chuan ka rawn hrilh leh ang che" ka ti a, Thakimi ka biak zawh chuan ka thawl deuh huai in ka hria.




Chhin khat te mah ka chhing lo, zingah hma takah ka tho a, ka nu pawh a la tho lo, eirawng ka bawl mawlh mawlh a, ka bawl zawh dawn chuan ka nu a rawn tho a, "Bawihte I va tho hma awm ve" a ti sup a, "Nia" tih ringawt in ka chhang a, ka awmdan chu hrethiam takin min biak chhunzawm tawh bik lo, room ah ka chho a, hna kal turin ka in siam nghal, ka chhuk leh chuan ka pa pawh sitting room ah chanchin bu a lo chhiar a, "Bawihte, Khawia kal nge I tum a?" min hmuh rual in a lo ti a, "Hnaah" ka ti a, "Vawin chu kal lo mai rawh, Nicholas leh a chhungte an lo kal dawn a, i lo awm ve a ngai" a tih leh pawh chuan ka chhang peih lo, "Ka sawi chu I hria maw, vawin chu hnaah I kal theilo" a ti leh churh a, eng ang pawn kal luih tum ila a phal dawn lo tih ka hriat avangin room ah in thlak turin ka chho leh a, ka lungawi hlawl lo a ni. Chaw pawh chu ka ei peih lo, room ah chuan ka tawm char char a, dar 11 a rik chuan in hnuai lamah thawm a awm a, an rawn thleng tawh a ni mahna.




Ka room kawngka an rawn kik a, ka nu aw ka hre zawm zat bawk, "Bawihte, ka lo lut aw" tih leh kawngka rawn hawn a rual a, khumah chuan ka thu a, "Nicholas leh a chhungte an lo thleng a, lo chhuk ve tawh la, engmah I ei bawk silo, thil te ei hrim hrim rawh" a ti mawlh mawlh a, "Nu.. pasal neih ka duhlo" ka ti a, "Bawihte hriatthiam tum rawh, i pu duhthusam ber a ni a, amah awm tawh lo mahse a thil duh chu kan tih hlawhtlin sak tur a ni dawn lawm ni, i hria em, i pu dam laia kan han zin khan kan bulah a lo sawi a, keini nupa pawhin mak kan ti a, mahse i pu khan Nicholas nen in nei ngei turin a duh bawk si che u a, chuvang chuan in in neih ngei tur thu ka tiam a ni, hriatthiam tum hram rawh" ka nu chu ka en tlawk tlawk ringawt.




"Mahse nu ka mipa hriat chian loh chu engtinge ka neih theih ang?" beidawng zet chuan ka ti zuai ruih a, "Han in hmu zing ula, in in hrechiang ve telh telh mai dawn alawm, tunah tut tut in nei turin kan tilo che u, in duh hunah in neih na chu kan ti chauh ang, chumi chhung chuan in in hrechiang anga, nupa hlim tak in nih ka beisei tlat a ni, Nicholas hi mipa rintlak tak a ni tih chu i hriat ka ring" a ti leh a, "Rawn chhuk rawh aw, nangmah hmu tur che in an lo kal a, an nghak reng che a nia" tih leh room atang chhuah a rual a, phur lo zetin khum atang chuan ka tho chhuak a, ka sam chu chul mam thuak thuak in room atang chuan ka chhuak a, inhnuai ka thlen thlak chuan nupa ni awm tak te ka hmu hmasa ber, min hnungchhawn zawngin mipa a thu bawk, tunge a nih ka chiang lutuk mah mah.




"Bawihte, lo kal hnai la, hei I pa Nunhlua te nupa hi rawn chibai ta che" Ka pa in a rawn tih takah chuan phur lo zetin an thut khawm na lam chu ka pan a, "Heihi maw in fanu chu, fanu in va nei hmeltha ve" hmeichhia zawk chuan a ti a, "Keihi Laltlansangi ka nia, Nu Tlante min ti mai dawn nia, chuan heihi ka pasal Lalnunhlua, heihi kan Fapa Nicholas Ramnunpuia a nihhi" a ti nghal zung zung a, Nicholas-a lam chu ka la en lo hrim hrim, Pa Nunhlua nen chuan kan in chibai a, "Fanu in nei hmeltha lutuk, a fel hmel si" a ti ve sup a, pa tawngtam lutuk a nih loh hmel, chuan Nicholas-a nen an in ang hle bawk. "Bawihte, hetah hian lo thu la, khatia ding reng ai chuan a nuam zawk ang" ka nu in a tihchuan an lo nui hak hak a, ka nu bulah chuan ka thu thla a, ka la tawng ve lo hrim hrim.




Nicholas nen chuan in hma tawn in kan thu ran a, hnuai lam a bih ngur a, a lungawi loh hmel hle bawk, a awmdan chu ka hriatthiam pui, keipawh hi ka lungawi bik lo, kan chhungte chu an in be mawlh mawlh a, Nicholas-a pu erawh a taksa a chak tawk tawh loh avangin a rawn kal ve theilo thung. Kan chhungte chuan a fal a in biak na hun min siam sak a, kan in hnung pawn lamah chuan kan in zui chhuak a, ka zam lek lek, engmah sawi lovin ka hnungah chuan a rawn kal ve a, ka nu pangpar khawi ka thlir vang vang hnuah a lam chu ka va hawi a, thil ngaihtuah nei tih hriat takin hmalam chu a lo bih ngur ngur a, "In neih na hi.." ka tih lai mek chuan "Min neih chu i duh em ni?" a ti nghut a, "Chuchu a nia sawi ka tum, cancel dan i hre mai lovem ni?" ka ti ta tawp a.




"Engthil nge ti se min tih?" a ti bul leh hmuk a, biak a har ropui si, ka ning lek lek, "Ka hrelo, mahse in neih na hi kan pahnih hian hnial ila, ka chhungte chuan in nei turin min ti lui maithei asin" ka ti a, in ring tawk tak pawn ka tawng ngam lo, "Chutiang thil a thleng theilo, kan pu te duh dan tih i hriat kha, engpawh nise kan in nei ang, amah erawh chu, ka nupui tak anga awm tum ngai suh ang che, ka nun ah in rawlh tum hauh lo bawk ang che, a hming maia nupa kan ni ang ka tihna a nihchu, midang hmuh ah erawh nupa in hmangaih takin kan awm thung ang" a ti dap dap a. A thusawi chhung zawng chuan ka thaw lo in ka hria, engtinge khatiang thil kha awlsam taka a sawi mai theih, amah chiah a in ngaihtuah, kei engtinge ka awm ang tih a ngaihtuah tel lo, ka rilru chu a na hle.




"Ka duhlo, pasal neih ka la duh lova, lemchan lah ka peih hek lo" ka ti fak a, a nui suk, "Ok.. ka nawr lui reng reng lo che, mahse heihi hria la, in neih na hi tih tawp tumna ka neilo a, i duh a nihchuan nangmah in tih tawp I tum dawn nia, kan lo in nei ta a nih pawhin pawi tihna ka neilo, ka nunah in rawlh lo la i nunah ka in rawlh bawk hek lovang" a ti nghet leh charh a, "Engtinge chutiang thil chu awlsam taka I sawi theih zawk, bialnu I nei a, engvanga kan in neih na tur chu dan tum lo nge i nih?" ka thinrim lutuk chu ka aw a khur dar dar a, "Lo lungngai suh, ka bialnu then tumna ka neilo, lo in nei ta pawh ni ila ka duh anih loh chuan kan in then ngai lovang, ka sawitur ka sawi zo tawh, lut ang hmiang, kan awm rei tawh mah mah" ning hmel zet chuan a ti leh nghut a, engtinge hetiang mihring hi an awm theih zawk?...




"Ka chhungte hnenah pasal ka neih duh loh thu ka sawi dawn, nang nen a in neih hi ka duh reng reng lo, hetiang in neih na hi ka duh lo a, nang nen a in khata awm ka duh lo bawk" ka ti leh a, "Ok.. i duh ang chuan han ti phawt la, ka dang hauh lo che, mahse keichuan sawi buai ka tum lo, ka chhungte hian tuna ka hmeichhe kawp hi an duh lova, chuvang chuan engmah sawi buai ka tumlo, chumi avang chuan ka hmeichhe kawp lai hi kalsan ka tum lo bawk" tiin in chhung lamah a lut nghal daih a nihchu, ka thinrim lutuk tihtheih nei bawk silo chu ka sam chu ka tham vak ringawt. A hnungah chuan lungawi lo zetin ka kal a, inchhung kan luh rual rual chuan kan chhungte chuan min lo melh thap a, "Ka pa kan kal tawh mai dawn em ni?" Nicholas chuan a ti sup a, "Awle, kan kal phawt ange, nidangah kan lo la kal leh dawn nia" Pa Nunhlua te nupa chu an tho zui a, pawn thleng in ka chhungte chuan an zui chhuak a.




"In neih ka duhlo" ka chhungte an rawn luh rual rual chuan ka lo ti nghal a, "Han thu phawt la" Ka pa in a ti dam dup a, "Han sawi chiang la, engvanga Nicholas-a chu neih duh lo viau nge maw I nih le?" a ti leh a, "Ka duhlo a ni tawp mai, pasal nei turin ka la in peih lo" ka ti leh a, "Chutiang chhuanlam a tling lo, an ni lamin harsat na an neih loh chuan inneih na chu a awm ngei ang, i pu duhthusam ber a ni tih i hriat kha" ka pa chuan a ti a, "Pa tinge hetiang hian in tih, Nicholas-a kha ka hriat ngai mi pawh a nilo a, engtinge nei turin min tih theih zawk?" ka mittui tla tur chu ka dang hram hram a, "Bawihte, kan sawi tawh kha, i pu duhthusam hnuhnung ber a ni a, chuvang chuan i neih ngei a ngai" ka nu zawkin a rawn ti a. Ka thut na atang chuan tho chhuak in ka room lamah chuan ka chho a.


...


Zanah chuan ka pa chu room ah a rawn lut a, "Tinge chaw ei turin I rawn chhuk loh va, zing lamah lah i ei tawh bawk silo, i nu in a ngaihtuah che ania" a ti a, chhan pawh ka chhang lo, ka hmalam ngawt chu ka melh char char a, "Nicholas-a pa in min rawn bia a, in neih chu Nicholas-a chuan a duh a nihchu, palai pawh an lo kal thuai ang" a tih leh chuan ka pa chu ka en vat a, "Pa.. pasal ka nei duh lo ka tihkha, khawngaihin pasal chu min neih tir lo hram rawh u" ngen tak te in ka ngen a, "Ka sawi tawh kha pasal chu I nei ang, min hnial tawh suh, eng ang pawn min hnial mahla awmzia a awm chuang lovang, chuvang chuan pasal I nei ang ka tihchuan I nei mai tur a ni" a ti hrawk a, ka pa chu ka en kawk a, hetiang taka thinrim hian vawikhat mah min la vin ngailo.




"Ka sawi tawh kha, Bawihte, i pu duhthusam hnuhnung ber a ni a, chuvang chuan Nicholas-a chu I neih ngei a ngai" dam deuh zawkin a ti leh a, engmah pawh ka sawi theilo, "Hahdam rawh, Nicholas-a hi i hrechiang anga, tunah duh lo viau mahla, han cheng dun ula, i la hmangaih vat mai ang" ka sam a chul zeuh pahin a ti a, a chhuak zui nghal. Ka phone a rawn ri a, min rawn call tu ka en chuan Chhana a lo ni, vawin nileng in kan la in be lo tih ka hrechhuak chiah, lak pawh tum lo chuan ka en reng ringawt a, "I mu rawh em ni?" Chhana hnen atang tho chuan message ka dawng leh a, chupawh chu ka chhang let chuang lo, ka beidawng ngawih ngawih, ngatinge hetiang hi ka chungah a thlen bik, ka mipa duh em em in min duh thu a sawi a, ka hlim em em laiin hetiang thu thin thawng lutuk hian min deng zui lehnghal chu a ni si a.




"Bawihte tho tawh la, a tlai tawh a nia" ka nu aw ri ka hriat avang chuan ka meng chhuak riai riai a, khaw var dawn ah ka muhil ve chiah a, nizan ka tap nasa bawk nen ka mit chu a bui deuh luk mai, "Aw.. ka lo tho dawn" ka ti a, ka nu chu a kalsawn ve nghal mai aniang, thawm a awm tawh lo. Ka hmai te ka phih fai hnuah in hnuai lamah ka chhuk a, choka ka luh chuan ka nu in min en chik kher mai, ka en let ve duh lo thung, "Chaw ei siam nghal mai ila" tih pahin thleng a la a, phur lo zetin chawhmeh te chu ka chhawp a, chaw kan ei lai pawh chuan ka tawng lo hrim hrim, ka chaw ei pawh ka tuilo, ka thai kual vel mai mai ringawt, "Vawin hnaah I kal dawn em?" ka pa in a ti a, ka bu zeuh a, "Awle.. naktuk ah Nicholas-a nen in chhuak dawn nia, in nei mai tur in ni a, in hriatchian nan hun in hman tam dun a tha" tiin chaw a bar zawm mawlh mawlh a.




Ka chair atang chuan tho chhuak in ka kut ka sil a, choka atang ka chhuak nghal, room ah ka lut a, hna kal turin ka in siam zawm mawlh mawlh a, ka zawh chuan Thakimi hnen ah in hmu turin ka sawm a, a lo pawm ve mai, inhnuai lamah ka chhuk leh a, ka pa pawh a lo in peih leh diam tawh, nidang ang bawkin ka nu in min thlah leh thlap a. Dawr ka thlen chuan an lo buai khawp mai, nimin ka kal bawk silo a, kawr order a lo tam leh tawh hle, thlaleh mai hi inkhawm pui a ni a, keini mai nilo dawr hrang hrang pawh an lun viau, ka room ah chuan awm in kawr te chu design kan tum a, ka rilru ah thil dang a awm tlat avangin engmah ka design thei lo, Thakimi a rawn lut chiah bawk a, ka thil khawih lai chu ka dah tha a, "Enge thleng han sawi teh" ka hma zawn a rawn thut thlak pahin a ti nghal thawr a.




"Engtia tihtur nge pawh ka hre tawh biklo, ka pa bulah pawh pasal ka neih duh loh thu ka sawi, mahse engmah awmzia a awmlo, pasal chu ka neih ngei ngei a ngaih thu a sawi a" ka ti a, ka aw te chu a hre thei angem pawh ka hre lo, ka hrawk a in hnawh tlat a, ka sawi ring theilo, "Nicholas-a nen chuan in in be hrim hrim em?" a ti leh a, ka bu zeuh a, nimin a kan in hmuh thu leh ka hnen a a thusawi zawng zawng te chu ka hrilh ve ta vek a, "Engtinge chutiang thil chu a sawi theih zawk a, a va mak ve" a ti a, a ni pawh chu a lungawi loh hmel hle. "Nizanah ka pa hnenah in neih an rem tih thu an lo sawi tawh bawk sia, tih ngaihna tak pawh ka hre tawh biklo, tlan bo daih mai a nia ka duh" ka ti leh a, ka beidawng ngawih ngawih a ni ber.




Nicholas Ramnunpuia POV




"Bawih" ka office ah chuan Cindy a rawn lut a, ka lo en reng a, "Vawi engzah nge ka phal na tello a lo lut tawh lo turin ka tih che" ka ti nghut a, "Tihpalh, ka lo theihnghilh leh thin, hrim hrim in keite chu i bialnu ka nia, engvangin nge kawngka chu ka kik kher a ngaih ang?" tiin ka dar chu a rawn hmet a, "Ka sawi tam tawh, hnathawh na leh mimal nun chu thliar hran tur" ka ti leh a, "Ok.. ka lo hre reng tawh dawn nia, ka lo kal chhan i hria em?" a tihchuan "Hrelo, engvanga lo kal nge i nih, engmah I sawi lawk lo bawk" ka ti a. Min en chungin a ner nang a, a hmui sen vam ham mai chu fawh a chakawm em em mai lehnghal, "Nizanah ka hrilh tawh che kha engtinge i theihnghilh theih zawk?" lungawi loh hmel zet chuan a ti a, ka hrechhuak leh ta chiah, nizan khan min bazar pui rawh a tih tak kha mawle.




"Ok.. ka hria e, kal ila" tiin ka coat chu ka ban vut a, kan in zui chhuak nghal, "Ka chhuak dawn a, thil pawimawh a awm a nihchuan min rawn hrilh dawn nia" ka secretary hnenah chuan ka ti a, kan kal zui lehnghal, "Enge bazar ah chuan tihtur i neih?" ka ti hmuk a, ka peih lem lo khawp mai, mahse ka bialnu a nih angin a duh ang chu tihpui ve ka duh miau si a, "Kawr thar nalh deuh mai hmani mai khan an design a, lei ka duh, panga chiah a awm a, tunah phei chuan pahnih bak a awm tawh lo an ti" a ti mawlh mawlh a, ho ka ti ang reng viau. Sawi buai lem lo chuan bazar lam chu ka pan ve zel a, building lian ang reng tak pakhat zawn ah chuan ka ding a, "Heihi a nia, kal ang, Mizoram ah chuan hemi dawr neitu aia designer lar hi a awm lo, a thiam viau a niang, nikum mai khan dawr a hawng chiah a, miin an pan nasa lutuk, tunge dawr neitu hi ka hre ve chiah lo" a ti a.




Dawr chhung ah chuan kan lut a, hnathawk ho chu an lo awm nual a, a dawr pawh a lian a, a zahpui awm loh viau bawk, "Lo leng rawh u" hmeichhe pakhat te ve tak chuan a ti a, "Hmani a kawr in pho chhuah kha a la awm em?" Cindy chuan a ti a, "Aw.. pakhat chu a la awm, helam ah min lo zui ula" a ti a, kan zui ve nghal, "Bawih, heihi nia ka tihchu, a nalh tiraw?" tiin kawr pakhat hi ka hmaah chuan a rawn khai a, "Nalh kha" ka ti liam puat ringawt, Cindy chu inthlak na lamah a kal a, dawr chu ka en kual a, a nalh hlawm hle, Cindy kawr thlang phei kha chu nalh ka ti ve takzet, a rawn chhuak a, a ma hak tura an design emaw tih mai tur a ni, a man te chu ka pek sak a, ka pek sak in ring sa in hetah hian a kal tih ka hria.




Dawr atang kan chhuah dawn chuan Amelia-i nen kan in tawk hlawl a, min hmu chu mak a tih hmel hle, "Nangmaw?" a ti haw a, "Nanghi ka hmu tawh che, oh.. hmani a min su tu kha i ni tiraw?" Cindy chuan a ti a, Amelia-i chu a ngawi hmak a, "Amelia I lo thleng maw, Pi Partei'n I room ah a nghak reng tawh che a nia" Nichin a mi nu khan a rawn ti a, "Aw.. ka lo kal nghal dawn e" a ti a, a la che sawn lo hrim hrim thung. "Hetah hian i thawk amaw?" Cindy zawh na chu tul ka tilo kher mai, "Aw.. a ni hi kan pi ber a nia, hemi dawr neitu hi, tuna i kawr lei pawh kha ama design hi a nia" hmeichhia khan a ti a, mak ka ti hle, designer a ni tih ka lo hre hauh lo. Hei vang chiah hi a niang, an ina ka kal pawh khan a thawmhnaw hakin ka mit a lam nghal zar ni, vawin pawh hian a nalh leh pek khawp mai, taksa lang tam thei thawmhnaw ha miah silo in mipa tam takin an thlir zui vawng vawng ngei ang.




"A nihchu mawle, keihi Cindy Lalrindiki ka nia, min hriat tho chu ka ring, chuan heihi ka bialpa Nicholas Ramnunpuia" Cindy chuan hawi vah chungin a ti a, Amelia-i chu ka en reng a, a ner ru sak chu ka hmuh hmaih lo, "A nihchu, mi hmuh tur ka nei bawk sia, ka kal ange, chuan kan dawr ami thawmhnaw te in lo lei avangin lawmthu ka sawi bawk e" tiin min kalpel a, dawr chhungah chuan a lut hmak a. Ka en zui reng, "Designer ve mai mai si a va in la reuh ve" Cindy chuan a ti hlak a, "Kal ang, hna pawimawh thawh tur ka la nei, inah ka thlah nghal dawn che nge, kal kawi na tur I la nei?" ka ti a, "Inah ka haw tlang nghal mai ang, chuan zanah lo kal rawh aw ka chhungte an awm lo, keimah chiah in ka awm" a thil sawi tum chu ka man nghal mai.




Cindy ka thlah zawh hnu chuan company lamah ka let lehnghal a, hna pawh thawk lo chuan Amelia-i ringawt chu ka ngaihtuah a, an ina kan kal lai te chu ka ngaihtuah a, min hmuh khan min hre sa tih ka hre nghal a, mak ti ang pawn a awm lo, a lawm loh hmel hle bawk a nihkha. Diktak chuan keipawh hian nupui neih ka duh lova, neih ka tum lo bawk, an ina ka kal chhan pawh inneih ka duh loh thu an zai vai hriat laia sawi ka tum vang a ni a, mahse Amelia-i hmel ka hmuh chiah khan engin nge min mawlh pawh ka hrelo, nupui a neih duh na rilru ka nei a, chuvanga khatiang thu sawi pawh kha ka ni reng bawk, amah erawh chu Cindy hi then tumna ka nei chuanglo, ni e, sawi rem chawp inneih na a ni a, chuvang chuan nupui ang tak tak a en tumna ka nei lem lo, a hmingin nupa kan ni anga chuchu a tawk ka ti viau, enge ka rilru pawh hi ka hrethiam chiah bik tawh lo.




Haw tum a ka insiam lai chuan ka nu call ka dawng a, ka la nghal vat, "Bawiha I haw tawh dawn em?" a rawn ti a, "Aw.. hei ka chhuak dawn chiah" ka pa aw ka hre zawm nghal zat a, "Inpui ah rawn kal ang che" a tihchuan ka ner sawk a, phone ka dah nghal, keimah in ka cheng a, a tul tawp ah a nihloh chuan ka chhungte pawh ka tlawh khat viau. Motor ah chuan lut in inpui lam chu ka pan a, ka thlen chuan ka nu in min lo be nghal zung zung a, min hau hlak hlak bawk, "Hetah hian rawn thu la" ka pa in a ti a, a thut na lam chu ka pan vat a, "Naktuk ah enge I tih dawn?" a ti sup a, "Hnaah ka kal ang" ka lo ti ve mai, "Naktuk chu hnaah kallo mai rawh, Amelia-i nen in chhuak dun ang" ka pa chu ka en nghal vat.




"Ka hman lo, chhuak mai mai hman ka ni lo tihchu I hriat ka ring" ka ti hmuk a, "Ka sawi chu zawm mai rawh, ka fapa I ni a, I tan a tha tur bak engmah kan tilo, tunah lungawi lo viau mahla Amelia-i hi nula fel tak a ni tih kan hria, in in nei tep tawh bawk a, chuvang chuan hun in hman tam dun te pawh a tha" a ti leh dap dap a, "In duh ang ngei chuan nupui ah ka nei dawn a nilawm ni, thil dang ah min nawr luih tum tawh suh u" ka ti nghet ve charh a, "I pu duhthusam a ni tih i hriat kha, chuan i hmeichhe kawp lai kha thlah nghal ang che" a ti leh a, ka ding chhuak hluai a, "Ka pa, ka nun a ni a, ka duh dan in ka nung mai ang, puitling ka ni tawh, ka chungah hian thu neih tum tawh suh" ka ti a, ka pa chu lungawi loh hmel zetin a rawn tho chhuak ve nghal a, "I tan a tha lo, nupui nei mai tawh tur i ni a, hmeichhe dang nen a sawi zawm fo nih te hi a tha lo, i hmingchhiat na tur mai mai a ni" a ti a.




"Chutiang ah ka buai lo, chuan Cindy hi then ka tum lo tih ka hrilh tlang law law ang che u, Amelia-i nen hian in nei tur pawh lo ni ila, a pawina ka hrelo, in hmangaih vanga in nei tur pawh kan nilo a, a ni pawh in a duh te chuan bialpa a nei thei reng" ka tih leh chuan ka pa chu a thinrim hmel hle. "Ramnunpui i pa ka nih hi I hria em, engtinge khatiang khan min ṭawngkhum ngam zawk? Hre rawh, hetiang reng a i nung dawn a nihchuan ka en liam mai mai che ring suh, kha hmeichhia khan i sum vang chauh in a hnaih che tih ka hria, hetiang ang dinhmun sang takah hian ding lo nila chuan hnaih pawh a hnaih duh dawn lo che, chuchu engtinge i hriat loh theih zawk?" a ti hrawk a.




"Min hnaih chhan chu engpawh ni rawh se, ka then dawn chuanglo, chuan i sawi duh i sawi zo tawh a nihchuan ka kal ange" tiin kawngka lam chu ka pan a, ka nu chuan min au zui lawm lawm a, mahse ka kal ngai chuan ka kal reng tho, car ah chuan ka thu lut a, ka nu chu car kawngkhar vuan chuan a rawn ding a, "Engvangin nge khatiang khan i pa i chhan let, hre rawh, hetiang dinhmun i thlen theih na chhan hi i pa a nihhi, zah lo takin tawngkhum tawh ngai suh, i nu leh pa kan nih na angin I tan a tha leh tha lo chu kan hria, Cindy kha i tan a ṭhalo, Amelia-i erawh hmeichhe fel tak a ni a, a ni aia tha hi I tan an awm chuanglo, haw la, in ngaihtuah chiang ang che" a ti vin hlar a, a kal nghal daih bawk, ka nu hian ka pa zah lo taka kan chhan hi a ngaithei ngailo.




In ka thleng a, room ah ka lut nghal, zu chu la chhuak in ka in nghal a, ka rui thei der lo lehnghal, ka nu leh pa chungah ka lungawi lo hle bawk, ka hmeichhe hriatchian loh nupui a nei turin min ti a, chupawh ka pu duh dan a nih vangin, ni e, ka duh chuan ka hnial thei reng tih ka hria, mahse engvanga kha hmeichhia kha neih duh a rilru pu tlat nge ka nih pawh ka in hrethiam hrep lo. Ka pa in ka neih duh leh duh loh min zawh pawh khan neih ka hnial loh thu sawitu ngei kha ka ni, ka thinrim chhan ber ni a ka hriat chu ka pa in ka nun control a tum lutuk vang ni ta berin ka hria, mipa puitling ka ni tawh, nu leh pa thlazar hnuaia awm ka ni tawh lo, chuvang chuan ka nun hi ka duhdan a hman ka duh, ka nun ah hian tumah rawn in rawlh lo se ka duh ber.




Um khat ka in zawh chuan ka kai tawh hle, ka phone a rik vang chuan ka in dap kual a, Cindy a lo ni, an ina kal turin min tih tak kha mawle, "Bawih, ka nghak reng tawh che a nia" a ti sep a, "Zanin chu hnathawh tur ka nei ka lo kal hmanlo" ka ti a, "Mahse ka lo kal ang i tihkha, ka lo nghak char char tawh che asin" lungawi loh hmel zet chuan a ti a, "Cindy min hrethiam mai rawh, zanin chu ka hman lo" tih pahin ka dah a, a rawn call zui lehnghal a, ka la tawh lemlo. Ka phone a rik tak rengah chuan ning lutuk in ka silent hmak a. Eng ang pawn Cindy chu ka chungah lungawi lo mahse a lungawi lo rei ngam dawn chuanglo tih ka chiang mah mah, thla hnih lai kan in zui tawh a ka hmeichhe kawp tawh te a min la ti lawm ber tu a ni, a zei a, a engkim hian min hip a tih theih ang, a hmeltha em em bawk, Mizo hmeichhia ah chuan a ni aia hmeltha an awm kher lovang, nilo...




Amelia-i ni e, Cindy ai chuan Amelia-i a hmeltha daih zawk, a pian pawh a nalh zawk bawk, diktak chuan Cindy hian Amelia-i tluk na a neilo, mahse chumi avang ringawt chuan Amelia-i ka duh tihna a nilo, Cindy hian ka rilru ah hmun a luah nasa zawk, duhna rilru ka pu hauh lo, mahse ka tan engmah ui a neilo a, a mipa mutpui hmasa ber ka nilo tih ka hria, chuti chung chuan a lakah lungawi lohna ka nei chuanglo, keipawh eng ka ni bik lo, hmeichhe hrang hrang ka kawp kual thin, mipa kawp lawr tak tiin miin min sawi fo tih ka hria, thudik a ni reng bawk, hmeichhia te hi nawm na min siam sak tu ang bakin ka ngai lemlo, chutiang bawkin Cindy pawh, min hnaih chhan ka hria a, ka thil duh min pek chhung chu pawi tihna ka nei lem lo bawk.



Cont...


Comment leh click kha aw...


Show post links
Top

[Ngaia]

Chapter-4



Amelia Lalnuntluangi POV




Vawin ka dawr a Nicholas leh Cindy te ka hmuh khan mak ka ti hle, chutiang bawkin Nicholas-a pawh khan min hmu kha mak a ti tih ka hria, tunge a nih ka hrechiang viau a, mahse a ni erawh in ka chanchin tlem te pawh a hrelo thung, a bialnu nen in hmu reng chung khan kei hi nupui ah min neih a tum chu a nia, tenawm lutuk. Ka chhungte chungah pawh ka lungawi chuanglo, a chanchin miten an sawi dan hi an hriat loh bik ka ring lo, ka pu duhthusam chu tih hlawhtlin ka duh ve tho, mahse hetiang mipa lerh lutuk hi pasal ah neih ka duh bawk silo, ka rilru chu a buai tak zet, bialnu a nei reng tho a nih te chuan min neih rem tih loh mai tur a nia, a bialnu a chhungten an duh loh vang maiin keihi an inkar thup nan min hman a tum tih a tawngkam atang khan ka hre bawk.




Kan lo in nei ta a nih pawhin a duh ang chuan a awm mai mai bik lovang, tunge ka nih hi a hre lo a ni, hmeichhe no tak ka nilo, chutiang bawkin pasal ka nei a nih pawhin pasal in tawm theih neih ka duh reng reng lo. In neih na a awm ngei dawn tih ka hriatchian avangin hnial tum na ka nei tawh lo, amah erawh chu ka hlim hlawl lo a ni, tunge hlim bik ang, pasal lerh tak bialnu nei lai, inneih hnu ah pawh a bialnu thlah tum lo mipa hi tu hmeichhia mahin pasal atan an duh bik in ka ring lo. Ka nun hlim takin ka hmang dawn chauh a, mahse ka hlimna zawng zawng te chu thawk leh khat ah an bo ta vek hi ka tan hian hriatthiam a har takzet, ka mipa duh em em in min duh thu a sawi zanah ngei ka chhungten pasal ka neih tur thu min hrilh leh a, ka hun tawn te hi mangchhia mai nise ka va han ti tak em.




Chhana ka ngaihtuah chhuah phei chuan ka tah a chhuak takzet, ni hnih lai ka be tawh lo, vawi tam min biak tumin min rawn call tawh, mahse ka la ngailo, ka be ngam thlawt lo a ni, a zawhna min zawh ka chhan hun nghakhlel takin a lo chang reng a, mahse a beisei ang chhanna ka pe thei ngai dawn silo. Ka mipa duh em em nen nun bul kan tan dawn emaw ka ti a, mahse engkim chu ka suangtuah na mai mai a nih zia ka hrechiang tawh takzet, eng ang pawn Chhana hi duh mah ila ka ta a ni thei ngai dawn lo, a tan ka tling lo. Hmaichhan a ka hmuh hunah engtinge ka sawi ang, ka pehhel reng thei dawn lo tih ka chiang, ka hmuh hunah pasal ka nei dawn ka ti ang maw?.. Nilo, a bialnu in na takin a siam hnuah engtinge chutiang chuan ka chhan theih ang?..




Chutia ka lo in ngaihtuah lai chuan ka room kawngka an rawn kik a, ka nu a rawn lut nghal, ka khum sir ah chuan rawn thu in "Bawihte, naktuk ah Nicholas-a nen in chhuah dawn kha aw, hnaah kal lo mai rawh, in in nei tep tawh a, hun in hman tam dun pawh a tha, tunah hlim lo mahla, in han cheng dun anga I ngaina in i tan pasal tha tak a ni ngei ang tih ka hria" a ti sep sep a, 'Bialnu nei reng chungin engtinge ka tan pasal tha tak a nih theih tehlul ang?' tih nghek mai ka duh, "Mu hahdam rawh, hna I thawk nasa thin bawk si a, ka thusawi chu theihnghilh lo la aw" tiin room atang chuan a chhuak a. Ka mut pawh a chhuak lo, khumah chuan thu mu in ka hma hunah engthil nge ka tawn ang tih ringawt chu ka ngaihtuah a, ka ipik hluah hluah, Nicholas nen kan in neih hunah chuan harsatna tam tak ka tawk dawn tih ka hming ka hriatchian tluk zetin ka hrechiang.




Zing khaw var lam tawh ah chuan ka muhil ve ta chiah, ka phone a rik vang chuan ka harh hlawl a, en pawh en lo chuan ka la a, "I la tho lo em ni?" lehlam aw ka hre chiah chu ka harh kawk in ka hria, "Nia.. ih nizan ka mu tlai deuh a" pangai thei ang ber chuan ka chhang a, "I reh vang vang a, ka call leh message i chhang thei bawk silo, ka chungah lungawi lohna I nei em ni?" a rawn ti leh a, "Chutiang a nilo, tunlai chu ka buai deuh a, chuvang mai mai chu mawle, hun thawl ka neih hunah rawn biak che ka lo tum zawk a" ka ti a, dawt ka sawi ta ringawt, ka inthiam lo hle bawk. "Awle.. ka thil sawi avang khan i lungawi lo emaw ka tia, rilru nuamlo deuhin ka lo awm a, chutia lungawi lohna I nei lo tih ka hriat takah chuan ka thawl huai mai" a ti a, a nui ri suk pawh chu ka hre thei, kei erawh ka nui ve theilo.




Kan in biak zawh chuan khum atang tho chhuakin ka in tifai sawk sawk a, inhnuai lamah chuan ka chhuk nghal, choka a ka luh chuan ka nu a lo che leh malh malh tawh a, ka pui ve nghal vat, ka pa pawh chu choka ah a rawn lut a, thingpui ka lo pe nghal vat, "Bawihte, vawin kha aw" a rawn tihchuan ka bu zeuh a. Chaw pawh ka ei tui lo, bar hnih vel bak ka bar lo, ka kham nghal daih a, choka atang chhuak in pawn lamah ka chhuak a, thutna awm ah chuan ka thu thla a, vawin ni hi ral vat vat se tih bak duh ka neilo, hna ka kal lo ta tho a tiin in vel chu ka tifai a, chhuat ka nawh fai hnuah ka nu in insiam tura min tih avangin phur lo zetin room ah ka lut a, muangchangin ka inbual a, ka inbual zawh hnuah ka kawr bawm chu hawngin ka thawmhnaw hak tur te chu ka la chhuak a.




Insiam zo vekin room atang chuan ka chhuak a, sitting room ka thlen chuan Nicholas-a a lo awm reng tawh, ka rin ai daih in a rawn thleng hma, min rawn hmuh ve chuan min en char char a, "Bawihte, hei Nicholas-a hian a lo nghak reng tawh che a, kal nghal mai ta che u" ka pa in a ti a, pawn lamah chuan kan in zui chhuak a, hetiang em em hian ka chhuak tur ka phur loh hi ka la hrelo, a car ah chuan ka lut a, vawikhat mah ka la be lo hrim hrim. Khawiah nge kan kal dawn pawh ka hrelo, darkar chanve vel kan tlan hnuah in pakhat lian zet kawt ah motor chu a ti ding a, "Khawi hmun nge?" motor atang a chhuah dawn chuan ka ti a, rawn hawi zawkin "Ka in" a ti ringawt, muangchangin ka chhuk a, in lam pan chuan a kal a, muangchangin ka zui ve a.




Inchhung kan lut chiah chu ka hawi kual nasa ngei mai, a chhungte an awm ve ka ring a nia, mahse tumah hmuh tur an awm lo, "Khawiah nge i chhungte an awm?" ka ti leh a, "Inpui lamah hei chu keimah in bik a nihhi, hetah hian ka cheng" nin hmel zetin a ti leh a, a nihchuan lo innei ta ila hetah hian kan pahnih in kan cheng dun dawn tihna em ni, chutiang chu nilo hram teh se, a ni nen chauh a he in a cheng dun hi ka duh reng reng lo. "Enge i ngaihtuah?" a tih takah chuan ka harh chhuak zawk a, ka lu ka thing nawk bawk, "A nihchuan hetah hian kan in neih hunah kan cheng dawn tih na em ni?" ka ti leh a, a mit ko a ti che zauh a, "Tinge I chhungte bulah kan cheng dawn loh, ka duh bawk lo, nang nen chauh a in khata awm dun ka duh lo" ka ti hlar a, a nui suk a, "I duh te chuan ka chhungte bulah i cheng thei reng a lawm, pawi tihna ka nei lo" a ti sam et a.




In nei thar hlim hlawt a chutia han chen hran nghal ringawt chu thil tih chi pawh va ni suh, ka thinrim bawk si tih theih ka nei lo lutuk chu au nghek mai ka duh rum rum. Ngawi rengin in chung lamah a la chho daih zui, mawl lutuk, tihtur a awm bawk silo haw daih mai ka duh rum rum, a in awmna a fal bawk si, motor ka lo keng mai lo chu ka in chhir hle, minute 20 hnu vel ah chuan a rawn chhuk a, dar 1 a ri tawh, "Min thlah haw tawh mai rawh" ka ti ringawt a, "Ni mai love, hetah hian rawn thu rawh, thil sawi dun tur kan nei" a ti a, keipawh chu thutna tur min kawh hmuh ah chuan ka thu ve mai a, lehkha pakhat hi ka hma dawhkan ah a rawn dah a, "En rawh" a ti leh hmuk a, ka en nak chuan contract a lo ni, ka chhiar chhuah dap hnuah thinrim lutuk in a lam chu ka hawi a, min lo en ve reng a.




"Heihi enge awmzia?" ka ti fak a, "I chhiar zawh tak ang chiah kha a nimai" a tihchuan "Ka duhlo, I duhdan a I nun I hman theih laiin keiin ka thiltih engkim ka hriattir che a ngai ang maw, teuhlo" ka ti that a, enga mah hmaa a thu hnuai a min dah a tum chu ka duh dan a ni der lo, "I duh emaw duh lo pawh nila kan in nei dawn tho tho, I pasal ka nihna angin i thiltih engkim ka hre tur a ni bawk" a ti leh a, ka nuih a ti za zawk e. "I theihnghilh em ni, in hmangaih vang emaw in duh vanga in nei tur kan nilo, kan chhungte vang chauh a in nei tur kan nihhi, I sawi tawh kha, kan lo in nei ta a nih pawhin ka nunah I in rawlh loh tur thu I sawi chian tawh kha" ka ti leh fak fak a, "A tha alawm, I duhdan chuan I awm thei ang, kan in nei hlen dawn chuang lo a, chuvang chuan i duh ang ang chuan i nun I hmang thei alawm" a tih takah chuan tlem in ka thinrim na te chu a zia deuh.




"Ka thlah ang che" a tih leh chuan rang zetin ka tho chhuak a, pawn lam pan chuan ka chhuak nghal nal nal bawk, a motor chhungah chuan ngawi rengin ka thu a, a ni pawh a motor khalh chiah ngaihsak tih hriat takin hmalam a bih ngur a. Kan in lam pana a tlan lai chuan "Hetah hian ka lo chhuk ang" ka ti a, min rawn en vut, "Tihtur pawimawh ka nei" ka ti leh a, remchang laiah chuan a ding zui ve mai bawk a, motor atang chuan ka chhuak a, ka kalsawn nghal, a la hma tho bawk a tiin Chhana hmuh ka rilruk a, tuna ka sawi loh chuan sawi na hun tha a awm tak tak dawn in ka hrelo, ka call a, hun a neih lai a ni tho bawk nen ka awmna ka sawi a, min lo lam tur thu a sawi hnuah kan in biakna kan ti tawp a, a rawn thleng har lo.




"Helai hmun hi ka lo hre ngai miah lo a" ka rilru hah changa ka kal na thin ah chuan kan kal dun a, khaw thlir theih na nuam tak a ni a, mi hmuh tur an vang thei hle, "I hmel a va diklo ve, rilru hah na I nei a mi?" a ti leh a, a lam chu muangchangin ka hawi a, min ngaihtuah hmel zetin min lo en a, ka thusawi tur hi a hriat hunah engtinge a awm ang ka hrethiam lo, ka duhthu sawi ka duh mahse a rem silo, sawi tumin ka ka ka ang a, mahse ka thaw chhuak leh hawk a, hetiang reng reng a zam lai hi ka la neilo, min lo ngaichang ran a. Ka kut chu nghet takin ka hum a, "Chhan, ka thusawi tur hian a thawng viau ang che tih ka hria" ka ti hmasa te te a, "Enge ni han sawi la, rilru hah hmel i pu a nia, thil dik lo a awm em ni?" a ti leh a.




"Pasal ka nei dawn" ka sawi zo chiah chu boruak chu a reh dup maiin ka hria, Chhana chu ka en zawk a, min lo en ve reng, rei ka en ngam lo, hnuai lam chu ka bih leh daih a, rei tawk fang a ngawih hnuah chuan "Engmaw, pasal I nei dawn maw?" a aw chu ka hre chang chang a ni, "Aw.. a rang lamin pasal ka nei dawn" ka ti leh a, "Ka tlai deuh a nimaw?" a ti leh sup a, "Ka tihpalh a ni" ka ti leh a, "Pawi tihna tur a awm hleinem, pasal I nei dawn tih ka hriat hian min thawng deuh mai chauh a ni" tiin a nui a, mahse a nui lui tih chu ka hriat hmaih lo. Kan ngawi leh vang vang hnuah "Tunge I pasal tur chu?" a rawn ti leh a, "Nicholas Ramnunpuia" ka tihchuan mak tih hmel zetin min rawn en a, "Nicholas-a maw, a va mak teh daih ve, in in hria tih ka lo hre ngai miah lova" a ti ban charh a, "Nia.. kan in hriat na a la rei lo" ka nui tawi tak a.




Kan in neih chhan tur te chu sawi tlang vek pawh ni ila a pawi ka ring lo, "Kan chhungte vang a in nei tur kan ni, ka pu leh Nicholas-a pu hi thian tha tak an ni a, in tiam na nei dun in an tu te ve ve chu in nei turin thuthlung an lo siam a, ka duh dan a nilo, pasal neih hi ka la duh lo, mahse ka pu duhthusam chu ka ti hlawhchham theilo a ni" ka ti leh a, "A pawi ka tihpui hle mai che, thian kan la ni tho ang tiraw?" a ti a, a nui sang bawk, kei erawh ka tah chhuah mai loh nan ka in hum ruh ngawt ngawt a, "Aw.. ka thian i la nih duh phawt chuan" ka ti a, "Engpawh nise nupui tha tak I ni ngei ang tih ka hria, Nicholas-a chu a vannei hle mai" a tih leh chuan ka en vang vang a, a rilru that zia ka hriat belh zawm zat bawk.




"Ni e, in hmangaih vanga in nei tur nilo mah ila nupui tha tak nih ka duh, kan hma hunah enge thleng tur chu ka hrelo, mahse nupui ka nihna angin a tan rinawm tlat ka duh a, chuvang a nia i bulah pawh tlang taka ka sawi" ka ti a, "Ka hrethiam che alawm, chuan ka chhuang lutuk bawk che, engtik ah emaw min la in hmelhriat tir ve la a tha ang" engmah thleng lo ang mai chuan a ti zang vah a, mahse a mita natna chu ka hmuh hmaih hauh silo, kan let leh hnu chuan ngawi rengin ka thu a, kan in zawn ah a din takah chuan ka chhuak vat a, "Ka lawm lutuk aw" ka ti a, a bu zeuh a, "Lut rawh ka lo en liam ang che, chuan pasal i neih hma in kan thian ho in in tih hlimna kan la nei dawn nia, i nulat thlah na a ni pah mai" a ti leh a.




Inchhung ka lut chiah chu ka nu in chanchin te min lo zawt nghal mawlh mawlh a, room ka luh chuan chau lutuk in khumah ka thu hnawk a, ka awmdan hi ka hrethiam lo, mahse Chhana hnenah engkim ka sawi tawh avangin thawkhat chu a veng ta deuh. Zanah chuan ka nute nen tv kan en laiin door bell a rawn ri a, ka hawn chuan ka thiante an lo ni a, mipa te erawh an tello thung, an lo kal dawn tih an sawi lawk bawk silo a, mak ka ti hle, "Kan rawn leng dawn, khawi awm sawn ta che, luh i phallo a mi?" Sawmtei chuan a ti a, min nek sawn in an rawn lut zui nghal, kan nu ten ka thiante an hmuh takah chuan an be vat a, thingpui te ka in zawh hnuah ka room lamah kan lut ta dial a, Thakimi'n engkim a hrilh tawh a nih ka ring.




"Chuan engtik nge in neh chu in tih tak?" Rintei chuan a ti a, ka khum ah kan thu thap mai, "Ka hre biklo, engmah an sawi leh tawh hrih lova" ka ti a, ka phur loh zia chu ka hmelah an hriat theih ka ring, "A mek e, pasal I nei mai tur hi, chupawh Mizoram hmeichhia te duh rawn Nicholas Ramnunpuia lehnghal" Sawmtei chuan a ti deuh hluai a, "Chutiang sawi na hun pawh a nih loh hi" Thakimi chuan a lo ti hlak, "Ka tihpalh a ni, chuan Chhana hnenah I sawi tawh em?" pangai zawk chuan a ti leh a, "Aw.. vawinah kan in hmu a, ka sawi tawh, rin ai takin a lo dawng sawng thiam a, ka rilru pawh a thawl huai mai" ka ti a, "A that nasat chu" Thakimi chuan a ti a, sawi tur kan nre hlawm hlawl lo a ni ber.




"Nicholas-a hi Mizoram mai nilo India ramah a lar hle a in in nei dawn tih an hriat hunah chuan mi tamtak in mak an ti hle ngei ang" Sawmtei a ni, sawi tur ber pawh ka hrelo, "A pawi e, Chhana nen in inkar in that lam a pan dawn chauh a hetiang thil hi a thleng leh bawk si" Rintei pawh chuan a ti vawng vawng a. Ni e, a pawi a ni, ka mipa duh em em mai ka nei ve thei ngai lo tur hi ka tan tak pawh hian hriatthiam a har a, hreawm ka ti ngawih ngawih, pasal ka nei tur hian hlimna pakhat mah min thlen lo, theih ni se pasal neih lova ka chhungte bula awm reng hi ka la duh, ka pasal tura an tih lah hian hmeichhe dang a la hmu reng a ni si a, kan hma hun chu a eng lo khawp mai, ka thiante an haw hnuah mu turin ka in siam a.




Zing ka harh rual chuan hna kal turin ka in siam nghal a, ka in peih hnuah room atang ka chhuak chiah, chaw te kan ei fel hnuah in atang ka chhuak a, dawr ka thlen rual chuan hnathawk te ho chu ka lam panin an rawn kal a, an hmel ah diklo a awm tih ka hre nghal mai bawk, "Enge thleng a?" ka sawi zo hman tawk tih ah Cindy chu a rawn lang hlawl a, a thinrim hmel em em lehnghal, min rawn pan a, ka hmaa a din rual chuan "Zaktheilo nu, nanghian ka bialpa hi pasal ah neih I lo tum amaw, I va han zaktheilo ve" a ti ta tuar tuar mai, "Ka dawr ah hian buaina siam ka duh lo, min lo va chhuahsan ta che" ka ti a, "Ka chhuak hauh lovang, i hnathawk te pawh hian an pi hi engtiang chiah a tenawm nge a nih hre ve rawh se" a au ring bawk si, midangte chuan min en thup a, ka zak lutuk chu sawi mai tur pawh ka hre tawh lo.




"Engvanga ka bialpa kher hi pasal a neih tum nge I nih? tenawm lutuk, mipa dang i hmu zo lo em ni? hre rawh, in in nei ngai lovang, Nicholas hi ka ta chiah a ni" tiin min nam deuh dawrh a, ka kat deuh nawk mai, tu emaw ka la su chawrh zui, en pawh en lem lovin "Ka tihpalh lutuk" ka ti a, ka kawngah a rawn man takah chuan ka hawi chhuak chiah, Nicholas-a chuan min lo en chhuk ran a, "Cindy hetah kal lo tur in ka ti che a nilawm ni?" a aw chu a chang tha fek fawk viau, "Kha hmeichhe tenawm zet kha a nihna ka hriattir mai a ni, ka bialpa i ni a, engtinge khanu khan pasal ah neih che a tum ngam zawk, tunge a nih a a in hriat" a tih leh pawh chuan ka la chhang lo, "Buaina I siam tam hma hian chhuak rang rawh" Nicholas-a vek chuan a ti leh a.




"A teuhlo mai, ka chhuak lovang" Cindy chuan a ti leh that a, "Ka dawr ah buaina I rawn siam avang hian ka lawm lo hle mai, dawr neitu ka nih na angin helai hmun atang a i chhuah nghal loh chuan police ka ko ang, chutianga ka tih i duh lo a nihchuan tunah hian chhuak nghal rawh, chuan vawikhat mah ka dawr ah hian rawn kal leh tawh ngai suh ang che, thil pakhat leh chu thil i hriat chuan hmasak loh chuan khatiang khan vawikhat mah che tawh suh, milar i ni tih i hriat kha, a hming chhe zawk tur chu nangmah chiah kha I ni" ka ti fak a, a thinrim hmel hle, "Tunah chhuak rawh" Nicholas-a pawh chuan a ti a, thinrim zetin a chhuak tau nghawng nghawng a, hnathawk dang te chuan min lo en thap a, ka zak takzet.




"Nangpawh chhuak rawh" ring hauh silo in ka ti a, a rum nghut, "Khawiah nge i room a awm?" a ti hmuk a, ka hrilh na chhan tur ka hrelo e, "Chhuak vat mai rawh, nang nen a in biak hi ka phur fahran lo a nia, hnathawh tur ka nei" ka ti a, ka kalsawn nghal, ka room a ka luh rual chuan a rawn lut ve a, min zui tih reng reng ka lo hrelo, "Ka phal na tello in engvangin nge ka room ah i rawn luh?" ka thinrim sa bawk nen ka vin nghek a, a ner sawk, "Bengcheng siam suh, chuti lo chu i nau te sawn mak an ti lutuk ang che" a ti a, "Chhuak mai teh, i hmel hi ka hmu peih lo" ka ti leh hmak a, ka thusawi chu ngai pawimawh lo zetin a rawn kal hnai a, chair ah chuan a thu thla zui hmiah bawk, a chet dan chu ka lo en ran a, zak lo hi ka ti ngawih ngawih.




A bialnu in zak taka min siam hnuah a ni erawh chu zahna nei map lovin ka hnathawh naah a duh dan dan in a rawn la awm ngam a, eng ang mihring nge a nih pawh hi ka hre hrep lo ve, "Naktuk ah kan in neih tur thu kan puang ang, lo in buatsaih ang che" a ti a, "I duh chuan puang la, ka buaina tur a awmlo" ka ti hmak a, a thaw chhuak hawk, "In nei tur chu kan pahnih hian kan ni tih i hriat kha, keimah chiah in repoter te hmaah ka in lan thei lo, I tel ve ngei a ngai, chuan ka sawi tawh kha, kan chhungte sawi rem chawp a in nei tur ni mahila midang hmaah chuan in hmangaih tak angin kan lang tur a ni, ka hmingchhiat theih na turin che hlek suh ang che" a va han zaktheilo tak.




"Ka thusawi chu theihnghilh suh ang che" tiin room atang chuan a chhuak a, ka dawhkan a paper awm ho chuan a kal liam na lam chu ka vawm a, ka thinrim bawk si, a samah ka lo kek nawk nawk lo kha ka in chhir hle, room ah chuan ka awm ta char char a, chhuah pawh ka chhuak peih lo. Ka room kawngka an rawn kik chuan lut turin ka ti vat a, Terina a lo ni, "Amelia, Pu Nicholas-a nen khan in in nei dawn tak tak em ni?" a rawn ti a, "In hriat ang kha a nimai" tih chiah in ka chhang, mak a tih hmel hle, "A van mak em em, in in ngaizawng tih reng reng kan lo hrelo a, Cindy nen khan an in zui nasa bawk sia" a ti a, "Terin nakinah kan sawi zawk dawn ami, tunah chuan khatiang sawi na mood ah pawh ka cheng lo" ka ti a, room atang a chhuah hnuah ka rilru chu sawr bing tumin hna chu ka khawih mawlh mawlh a.




In ka thleng a, ka pa in zanin lama palai an lo kal tur thu a sawi chuan min ti chau leh zual, room ah chuan chaw ei hma zawng ka tawm char char a, chaw eikham hnuah pawh room ah chuan ka chho lehnghal, palai te chu an rawn kal ngei a, ka nu in min koh avangin room atang chuan ka chhuak a, thingpui te ka sem hnuah an bulah chuan ka thu ve ta reng a, ka hmelthat thu te chu min hrilh ve luam a, za lo zetin ka lo nui ve ringawt, buaina em em a awm loh avangin in neih ni pawh chu an tifel nghal a, thlaleh ni 26 ah pasal ka nei dawn a nihchu, tunah thla tawp lam kan hnaih tawh a, ka duh ai chuan in neih ni chu an ti hma, mahse engmah ka sawi lemlo, sawi pawh ni ila awmzia a awm dawn lo tih ka hria.




A tuk lamah chuan reporter te hnenah kan in neih tur thu chu kan sawi ta ngei ang, mak an ti hlawm hle, Nicholas-a mi hriat lar a lo ni bawk nen kan inneih tur thu chu mite sawi duh ber a ni, hmeichhe thenkhat chuan min ngei hmel takin min melh thin bawk. Mi thenkhat erawh in ka venneih zia leh keimah ang nih an chak ve thu an sawi bawk a, keimah ber hian ka vanneih na ka hrelo, kan in neih chhan leh nupa tak tak kan nih dawn loh zia ka hriat vang te pawh a ni mahna, kan in neih chhan hrelo a in hmangaih vanga innei tur angah mi chuan min ngai vek, mahse an mi ngaih ang chu a ni dawn silo, Nicholas-a pawh Cindy nen an la in zui reng a, hmingchhiat hlau hle si kha a hmeichhe kawp nen lang sar takin an la in zui ania, tenawm hian a.




In neih ni a hnai ve zel a, ka chhungte pawh an in buatsaih nasa tawh hle, kei erawh ka phur lo telh telh a, hun hi ka duh aiin a kal chak a ni. Kan inneih na tur in karkhat chiah in a dang tawh, kan chhungte khaw dang ami pawh an rawn thleng khawm tawh a, an hlim hmel hlawm viau, mo kawr en turin ka thian hmeichhia te nen kan chhuak a, mo kawr chu ka ha nual tawh, mahse ka duh ang a awm lo, kan beidawng chuan naktuk lama en turin kan haw ta ringawt a. Zanah chuan Terina'n min rawn bia a, ka tan mo kawr an lo thui chu niin min surprise an duh vangin an lo sawi lo a, ka lawm takzet, naktuk lama ha chhin turin kan in bia a, a tuk lamah chuan ka thiante an rawn thleng a, Terina ten ka tan mo kawr an lo thui thu ka sawi chuan phur zetin dawr lam pan chuan kan kal a.




Mo kawr ka hmuh chuan a nalh takzet, kan hak chhin vel pawh chuan ka lo tawk chiah a, ka lawm takzet, a simple em em a, ka duhdan chiah pawh a ni, in kan haw hnuah ka chhungte bulah ka sawi a, an ni pawh an lo lawm khawp mai, in neih ni a hnai tawh em avangin ka thiante nen in tih hlim nan tiin party ta nau kan nei a, mipa lam pawh an rawn kim viau. Chhana pawh in min phur pui em em a, ka mamawh ang tur chu min ngaihtuah pui vek a, ka thiante bulah hun ka hman chuan ka thawl deuh huai. Inneih ni a hnai zel a, naktuk mai hi a ni tawh, zanah pawh chuan ka muhil theilo, pasal ka nei mai dawn chu a ni sia, ka duhthusam ang a inneih na a ni dawn lo chuan min ti hnual takzet.


...


Biakin chhungah chuan ka pa in min kai lut a, kan inneih na min lawmpui tura rawn kal pawh an tha hnem hle, ka zam takzet, ka pasal nimai tur hnen kan thlen takah chuan ka pa in Nicholas-a kut a chuan min hlan ta a, thutiam kan chham lai te chuan ka thinlung takin ka chham, Biakin kan thlen hma deuh a ka nu thusawi chu ka bengah a ri nawn tlut tlut a, "Bawihte, in hmangaih vanga in nei tur in nilo tih ka hria, mahse Nicholas-a tan hian nupui tha tak nih i tum dawn nia, hun te han kal deuh se, nupa hlim tak in ni ngei ang tih ka ring tlat a ni" a ti a nihkha, nupa kan ni ta ro ro engvangin nge ka tum chhin loh ang, mi tamtak pawh sawi rem chawp a in nei, in hmangaih ta te pawh an awm a, ka bei tauh tauh chuan nupa hlim tak kan nih theih ngei ka beisei a ni.




Hun serh a zawh hnuah chuan pawn lamah kan chhuak a, mipui lo kal khawm te chuan min chibai sap sap a, ka thiante pawh chuan min rawn chibai a, Chhana pawh in duhsak na min hlan ve, Cindy a rawn lang ve hlawl a, min chibai pahin a rawn awm hnai a, ka beng bulah chuan "In neih na lem lem mai a ni tih ka hria, Nicholas-a nen hian kan inkar a tawp chuanglo tih i hriat ngei ka beisei, engpawh nise ka lawmpui a che" a ti sep a, a thusawi chu keimah chiah in ka hria, a kalsawn hnu chuan thlalak na te kan nei a, ka chau tawh takzet. Cindy hmel hmuh tur a awm tawh lo erawh in min ti thawveng huai a, a thusawi te khan min thawng lem lo, a chhan chu Nicholas-an engkim min hrilh lawk vek tawh, hetiang chung hian a tan nupui tha tak nih ka la tum fan a, ka hlawhtling angem tih erawh ka sawi theilo thung.



Cont..



Comment leh click kha aw...


Show post links
Top

[Ngaia]

Chapter-5



Amelia Lalnuntluangi POV




Nicholas-a nen chiah kan awm takah chuan a reh ruih mai, dar 12 a ri tep a, a inah kan awm a, tunah chuan he in hi ka in a ni ve tawh, Nicholas-a chu pawn lamah a awm a, a rawn luh hma chuan tihtur hrelo in sitting room ah a lo luh hun tur ka lo ngaichang a, a rawn luh vel ah ka tho chhuak vat, "Inchung a room ruak ah khian i awm dawn nia" ti nghut in min kal pel a, inchung lam pan chuan a chho nghal nal nal. Ka en reng a, hetiang hian pasal ka nei ve chu a nisia, engmah sawi zui lem lovin ka room tur ah chuan ka lut ve a, a lian em em a, tumah an awm ngailo tih hriat takin a fel fai thlup mai, Nicholas-an a lo tihfai tir a ni ngei ang, ka thawmhnaw te chu a ngai ngai in a lo awm a, engtik laiin nge a lo dah tir lah ka hre der lo.




Vawin lam inneih na boruak te nen ka chau bawk a, ka inbual zawh hnuah ka mu nghal, rin ai takin ka muhil tui a, zing ah chuan ka harh hma hle a, ka in tihfai hnuah inhnuai lamah ka chhuk a, a lo reh thap mai, Nicholas-a a la tho lo a ni ngei ang, choka lamah chuan thawm ka hriat avangin ka lut a, hmeichhe pakhat hi a lo che mawlh mawlh a, min hmu chuan a la phu deuh zawk zui, "Ka tihpalh ka lo hmu lo che a" a ti a, "A ho lutuk" tiin choka ah chuan ka lut a, "Thingpui i in duh em?" a tih leh chuan ka in duh loh thu in ka lo chhang a, "Tunge i hming?" han biak mawl tawp chu thil mawi pawh a nilo, "Tluangi ka nia" a ti a, a che leh mawlh mawlh a, "Khawi ka lo tihpui ang che" tiin a thil chan lai chu ka chanpui a, heta a thawh na a rei tawh tih a tawng dan atang chuan ka hre mai, lang in a kal a, chahbi a kawl vangin buai na a awm em em lo, kei aiin kum 5 laiin a upa a, chuvang chuan U Tluang tiin ka ko a.




Nicholas-a pawh chu a rawn tho chhuak a, "Morning" ti sup in ka biang ah a rawn fawp zeuh a, ka lo meng phawk vak, ka in siamtha leh vat thung a, U Tluangi a awm vanga khatianga rawn che kha a ni tih ka hre nghal mai, "Morning" amah pawh en lo chuan ka ti liam satliah a, "U Nicholas-a chu nidang aiin I tho tlai daih mai, nizan lam i meng rei a nimaw?" U Tluangi chuan a lo chhaih a, tullo pui in ka lo lai ringawt lehnghal. Nicholas-a pawh chu a nui suk a, fridge a mi tui vawt chu la chhuak in a in nghal khawlh khawlh a, ka ngaihsak zui lem lo, a chhuah hnuah "A mak e" U Tluangi chuan a ti deuh hluai a, ka en vat, "Enge mak?" ka lo ti haw a, "U Nicholas-an nupui a nei mai hi mawle, nupui a neih ka ring ngailo ania, a bulah hian kum 2 chuang ka thawk tawh, hmeichhe hrang hrang a kawp tih pawh ka hria a, mahse tumah ala thutak ngailo, a chhungte an lo kal pawn nupui nei turin an nawr fo a, mahse engah a ngai lo, nang a tawng che a, engkim a danglam nghal vek a nihhi" a ti a.




Kan inneih chhan engmah a hrelo tih ka hrethiam nghal mai, kan inneih chhan hi kan chhungkaw hnih leh kan thian hnai te bakin an hriat ka ringlo, in hmangaih vanga innei angin tu mai pawh hian min ngai vek. Chaw ei kan peih hnuah chaw kan ei a, eina vel kan tihfel lai chuan Nicholas-a hmuh tur a awm leh tawh lo, sitting room ah U Tluangi nen kan thut dun lai chuan inchung lam atangin coat suit nen a rawn chhuk a, "Hnaah buaina a awm deuh a, ka kal angai, ka lo haw vat ang" tiin a chhuak nghal a, tawng na hun pawh a awm lo, ka en liam ringawt, "U Nicholas-a hi chu a buai thei bawk si, a chau thei ngawt ang" U Tluangi chuan a ti niah niah a, tihtur a awm bawk silo, ina awm reng chu ka ning lek lek, mahse U Tluangi a fel hlauh a, in leh a vel te chu min fanpui a, in hnung lamah chuan hmun zawl nuam deuh mai hi a lo awm a, huan te ah siam ila a tih chi phian ang.




Zan dar 7 a rik dawn pawh chuan Nicholas-a a la rawn haw lo, U Tluangi a haw daih tawh bawk si, in chu a reh ruih a, ka hlau lek lek, kan in bul velah in hmuh tur a vang bawk si, hetiang hmun fal lutuk a a cheng duh te hi mak ka ti zawk. Ka riltam tawh lutuk chu ka pum a thip vawng vawng thei, chaw ei ah ka lo nghak laklawh tawh bawk si, ka nghak ting tang tawh a chaw han ei san ringawt chu thil tih chi pawh a nilo, tv chu ka en a, ka phone ka en leh thin, a rawn haw tlai dawn te chuan min rawn hrilh ve tal awm a nia, vanneih tlak deuhin ka flim en duh em em mai a lo chhuak a, ka en tui ngang mai, a zawh hnuah pawh Nicholas-a chu a la rawn haw chuanglo, sana ka en a, dar 10 a ri thuak tawh, a ni em em tawh lo tiin ka phone ta tawp a, a la thei lo zui.




Ka call nawn leh takah chuan a la ta hram e, mahse phone la tu chu amah a nilo, Cindy ngei a ni, "Khawiah nge Nicholas-a?" ka ti a, "A inbual, sawi duh i neih chuan ka bulah sawi mai rawh" a ti a, a aw a min hmuhsit na chu ka hriat hmaih lo nasa, "A rawn haw tep tawh em tih zawh ka duh mai mai mawle" engah ngailo ang chuan ka ti a, "Zanin chu a rawn haw thei dawnlo, ka bulah a riak dawn, lo nghak duh suh" tiin call a cut nghal daih. Hetah keiin riltam em em in a lo haw hun ka nghak ania, hna a thawk emaw ka tih laiin nuam a lo tawl amaw, tenawm hian, thinrim zetin choka lamah chuan ka lut a, chaw te chu ei sawk sawk in ka ei kham veleh ka eina vel ka silfai leh a, kawngka chu kalh tha in room lamah ka lut nghal hmak.




Ka thinrim lutuk chu mut pawh ka muhil theilo, ka phone chu ka en a, Thakimi message a lo awm vang mai, ka hawng vat a, 'I tha em?' tih te hi a lo ni a, kan in neih chhan a hre vek a, min ngaihtuah hle tih pawh ka hria, ka call a, a la vat, "Chanchin engmah I lo sawi bawk silo a ka ngaihtuah che lawm" a rawn ti nghal zung zung a, "Nia.. vawin chu ka buai deuh mawle" ka ti sep a, "A nihchu, chuan enge I an, I tha maw?" a tih leh chuan "Tha a nimai" ka ti zuai raih a, "Thil thleng a awm em ni?, Khawiah nge in pa a awm hrim hrim a?" engtia chhan tur nge pawh ka hrelo, "Hnaah a buai a" ka ti ta ngawt a. Rei fe kan in biak hnuah kan dah ve thei hram, ka thinrim mai bakah he in lian lutuk ah hian keimah chiah in ka awm bawk nen ka muhil thei thlawt lo, Nicholas-a ka haw hlur bawk.




Zinglam khawrvar dawn ah chuan ka muhil a, ka room pawn lamah thawm a awm vang chuan peih lo zetin ka meng chhuak a, ka mit chu a na deuh thum bawk. Zawi zetin khum atang tho chhuak in kawngka ka va hawng dek dek a, Nicholas-a a room a a lut tur chiah chu ka hmu hman, ner sawk in kawngka chu ka khar leh hmak a, khum chu siam fel in bathroom ah ka lut a, ka inbual fai hnuah inhnuai lamah ka chhuk ve chiah, U Tluangi chu ka chet pui a, a tawng duh bawk nen ka nui leh hak zel, chaw ei kan peih hnuah Nicholas-a pawh chu chauh hmel zetin choka ah a rawn lut a, melh pawh ka melh peih lo, chaw kan ei lai pawh chuan ngawi rengin ka ei a, Nicholas-an min en leh zeuh thin chu ka hmu ru reng, engah mah ngai lovin ka ei mawp mawp a, ka kham hnuah ka thleng chu sil turin ka dah a, choka atang chuan ka chhuak nghal.




Pawn ah chuan ka ding vang vang a, khua a thiang bawk nen a nuam takzet, ka bulah chuan ding an awm tih ka hria, tunge a nih ka hriatchian em avang chuan en pawh ka en peih lo, "Vawin hna I kal dawn em?" a ti sup a, "Umm" tih ringawt in ka lo chhang thung, inchhung a luh ka tum chuan ka banah a rawn man a, ka en ve ta chiah, "Ka rual in I kal dawn nia" ka ner ru nang mai, ka kal loh tur zia hi sawi pawh ka sawi peih lo zawk. "A ngailo, keimah in ka kal thei mai ang" a rum nghut a, "I car an rawn la dah lova, helai ah chuan taxi hman tur a awm lo, chuvang chuan ka rual in kal la a fin thlak zawk ang" a ti leh sup a, ka car rawn la dah lo mahse kal na turah ka buai lo, a rual a kal lo pawh hian ka dawr chu ka thleng thei lutuk, "A ngailo ka tihchu" ti hmakin ka kut chu ka thing a, a thlah ve mai.




Choka ka luh chuan U Tluangi thleng a lo sil mawlh mawlh a, ka pui lo chu ka inthiam lo hle, "Min lo koh mai tur che ania" ka ti sep a, "A ngai hleinem thil harsa pawh a nilo a, hetiang te chu keimah pawn ka ti thei lutuk alawm" a ti mai a, "Hna kal turin ka insiam dawn aw" tiin room ah chuan ka chho a, ka insiam zawh chuan chhuak in Nicholas-a room ka kal pel tur chiah chu a room atang a rawn chhuak ve chiah a, ka ding deuh dat, "I hman ami?" a ti a, "Aw.. i rual in ka kal dawn lo ania" tiin step ah chuan ka chhuk a, ka hnungah chuan a rawn kal ve zel, pawn kan chhuah rual chuan ka thiannu gate bula lo ding chu ka hmu a, ka pan vat, "I lo thlen tawh te chuan rawn lut ve mai ta che" ka ti a, scooty a nei tho tiin a hna kal pahin min lo lam turin ka ti a, "In pa a nelawm loh ber bur sia, ka lo lut duh lo a nihkha, bakah ka lo thlenna a la reilo" a hnungah chuan ka thu kai a, a tlan chhuah dawn chuan kan in lamah chuan ka hawilet leh hram a, Nicholas-a chuan min lo en reng.




Dawr zawnah chuan a ding a, ka chhuk nghal, "Ka kal nghal mai ang, ka tlai tawh" a ti a, ka hnial lem lo, zirtirtu a ni a, tunlai phei chu internal test an neih lai a ni bawk nen a buai ve viau. Dawr ka lut chiah chu hnathawk ten min bawr nghal thuau a, "A nuam em, a duat che em?" tih vel chu min zawt a, chhan pawh chhang lem lo chuan ka nui ringawt. Ka room a ka luh hnuah thilfel ngai ang te ka ti fel a, kan customer te atanga min biak tum an lo awm nual bawk nen vawin chu ka buai hle dawn a nihhi, mizo model lar tak Amami chuan interview naa a kawr har tur a rawn order a, kan vip a ni bawk a, keimah ngeiin design sak ka duh, chhunah a rawn leng a, a ni pawh pasal hual a nei a, a hlim hle, keimah nen ka in tehkhin a kan in ang lo hle mai, a ni chu hlim takin a pasal neih hun tur a nghak a, keive ka duh ai hma in pasal ka nei thung a.




"I pasal neih naah khan lo kal ve ka duh nen ka hman ta silo a, a pawi hle mai" a ti a, "Pawi love, I buai zia ka hria alawm" a inthlahrun hmel lutuk chu nuam ka tilo letling zawk. A rawn kal zing bawk a, kan in kawm ngeih ve viau, "Nicholas-a nen in in nei mai tur kha mak ka lo ti deuh a, Cindy nen an in zui nasa bawk sia" a ti leh a, chhan mai dan tur pawh ka hrelo, "Engpawh nise nupa hlim tak in nih ngei ka beisei, chuan thla thar ni 2 a nihkha aw, ka pasal neih hun tur, in nupa in in lo kal ngei ka beisei dawn ania" a tihchuan kan kal ngei tur thu ka sawi ve tawp a, Nicholas-a chu a hman pawh ka ring chuang lo, keimah in kal ka tum a, ka sawi lang lo mai zawk a ni.




Kawr te chu ka design a, ka duh ang taka a la chhuah theih loh avang chuan ka ti tha zing malh malh hle, Terina chu ka room ah a rawn lut a, eitur a rawn keng lut bawk, "I thawk nasa lutuk, chawl ve tawh la, chhun ah engmah i ei bawk silo, heihi ei rawh" tih pahin a eitur rawn ken luh chu ka hmaah a rawn dah a. Nui sak chungin ka ei a, ka ei zawh chuan Terina nen kan titi a, hnathawk te an haw vek hnuah pawh chuan ka la haw ve hman lo, kawr chu ka la design mawlh mawlh a, a tawp ah ka en chuan a nalh hle, khua a thim vek tawh a, sana ka en chuan dar 6 a lo pel daih tawh chu niin hetiang em em a tlai a nih ka ring lo asin mawle, pawn lamah chuan ka chhuak a, taxi ruak ka hmuh veleh phar dingin ka lut nghal a, kan in zawn ka thlen chuan fare te pe in ka chhuak nghal.




Kawt ah chuan ka car ka hmu a, an lo dah tawh a ni ngei ang, Nicholas-a erawh a haw tawh em tih ka hrelo, motor a nei tam bawk si a, in kawt ah hian garrage ang deuh hi a awm a, mahse bang vel a awm lo, chung chu anei tho a, compound a zau bawk nen car ringawt pawh 10 dawn chuang chu a park theih ang. Inchhung ka kut chiah chu sitting room lama Nicholas-a lo thu ka hmu a, ka thawm a hriat takah chuan ka lam chu a rawn hawi a, mit ti zim sun hian min en a, "I va rawn haw tlai ve" a ti sup, "Nia.. kan buai deuh a" tiin inchung lamah ka chho nghal, ka inthlak zawh ah room atang chuan ka chhuak lehnghal a, Nicholas-a chu a thut na ngaiah chuan a lo la thu reng, a in ei puar tawh ka rin avang chuan ngaihsak zui lovin choka lamah ka lut a, ka chaw eitur ka siam mawlh mawlh, "Min siam kep ve nghal rawh, engmah ka la ei biklo" hnunglam atang a rawn tih chuan ka phu deuh zawk a.




Engmah zawt buai lem lovin ka siam ve mai a, in be lovin chaw chu kan ei mawlh mawlh, chaw eikham chuan a room lamah a lut lehnghal daih. Tihtur a awm bawk silo, in lah hi a lian bawk si, a reh em em lehnghal, nuam pawh ka tilo, ka chhungte ka ngai takzet, pasal nei lovin ka chhungte nen la cheng ho chu ni ila tunah te hian hlim takin kan nui ho leh dar dar tawh ngei ang, room ah chuan mu turin ka chho a, a la tlai loh avang chuan ka nu chu ka call a, a la vat, "Bawihte, I tha maw?" ka nu aw ka hre chiah chu ka lunglen na a zual a, ka tap thei mai dawn in ka hria, "Tha e, enge in tih, in mu tawh em?" ka sawi zawh rual chuan ka pa aw ka hre zawm zat a, loudspeaker a dah turin a tia, a ri deuh rawk rawk a, "Bawihte, hreawm tihna te I nei em?" ka pa chuan a ti dam dap a, "Neilo e, a nuam lutuk, tinge min rawn biak pawh in tum miah loh a?" lungawi lo zet chuan ka ti a.




Ka pa chu a nui hawk hawk a, "Min lo biak hun kan lo nghak reng zawk mawle, I buai kan ring a, kan lo be duh lo che a nihkha" a ti a, ka la tum nasa hle thung, "Khawiah nge i pasal a awm a?" a tih leh chuan "Hna a thawk a" ka ti a, biak a duh thu a sawi ang tihchu ka hlau rilru viau, "Anihchu, in in neih na a la reilo bawk nen hnathawh a ngai bawk si duat hle la aw" 'duat tu tur a nei reng' ka rilru chuan ka lo ti hmanhmawh a, ka chhungte nen kan in biak zawh chuan ka room veranda ah chuan ka chhuak a, thilfim chuan min rawn chhem a, ka harh kawk in ka hria, tihian pasal ka nei chu a ni ta der si a, mak ka ti a, a lem riau in ka hre bawk, oh.. nupa lem mai chuah alawm kan nih, hetiang in neih na hi ka tawng ang tih rin ngaihna ka nei ngailo.




Room lehlam bathar ah chuan mipa tawng ri ka hriat a, Nicholas-a ngei a ni, phone a hmang niin ka hria, keipawh chu enge ka hriat ni a tawng chu ka hre chak tlat a nihchu, thawm neih miah lovin ka ding reng a, "Ka sawi ngun tawh kha, ka chhungte vang chauh a nei ka ni" a lungawi loh hmel hle, tunge a biak chu hrelo mahila ka chungchang an sawi ngei chuan ka hre bawk. "A tawp na ni rawh se, hei bak ka sawi tawh lovang, a hma pawhin ka sawi tawh kha, a ni chu a hming mai a ka nupui a ni a, then che ka tumlo ka tihkha, chuan ka inah rawn kal tum suh, nupui nei thar hlim ka ni a, a mawilo, a hun ka tih ah chauh i rawn kal ang" thupe aw zet chuan a ti a, Cindy nen an in bia tih hrilh chawp ka ngailo, ngaithla reng duh tawh lovin room chhungah chuan ka lut ta daih a.




A tuk lamah chuan ka car in dawr lam ka pan a, ka thlen hnuah kan design sa te en fel na ka nei a, thla thum hnuah hian fashion show buaitsaih kan tum a, a hma zawng aiin kan buai dawn a, hnathawk pawh lak thar a ngai ang. Terina bulah hnathawk thar tur lo interview turin ka hrilh a, tunlai ah chuan mihring kan tam tawh khawp a, hnathawh tur hian min daih tawh lo zawk. Model tur te chu kan en fel a, Mizoram a model kan neih that ber pawl te an tel a, kan vawikhat fashion show neih ve na tur a ni bawk nen ka zam rilru viau, in lamah ka haw a, Nicholas-a chu hmuh tur a awm lo, ka ngaihsak em em lo bawk nen hnathawh tur ka hawn nual a, chaw te eiin ka room lamah hnathawk turin ka lut nghal a.




Pawn lama thawm ti deuh rak rak ka hriat chuan Nicholas-a a rawn haw tawh a nih ringin room a tang chuan ka chhuak a, mahse ka thil hmuh avang chuan ka room kawngkhar bulah ngawi rengin ka ding a, an ni chuan min la hmu ve lo, Nicholas-a leh Cindy chu an lo in fawp ngawng ngawng a, chet sawn nachang pawh hrelo in ka en reng ringawt. Cindy mal lang chin chu Nicholas-a chuan a zut kual dan dan bawk a, min hnungchhawn zawngin a ding a, Cindy chu bangah nam bet in a tukhum a a tham sak a, Cindy rawn meng chuan min hmu chiang ngang mai, chutah min nuih sakin Nicholas-a sam ah thamin a fawp zui ngawng ngawng a, ka luak a chhuak vek thei, tenawm hian, en reng pawh peih lovin room ah chuan ka lut leh ta daih a, ka thil hmuh chuan min thawng em a hnathawh nachang pawh ka hre tawh lo.




Karkhat em pawh kan in neih atang a la liam lova mahse hetiang hian ngampa takin an che ngam a nia, ka rin ai daih in zah an hrelo. Ngaihtuah tawh loh ka tum pawn ka mitthla ah a lang zel mai bawk si, min zahna nei lek lova an che ngam chuan min ti thinrim, Nicholas-a chungah pawh ka lawm lo takzet, hnathawh pawh rilru ah a lang thei tawh meuh lo, khumah chuan ka mu a, engtinge an awm zel ang tih ka ngaihtuah chuan ka ner sawk, ngaihtuah lo zawk teh ang, an duh ang ang chuan awm ang hmiang, ka buaina tur a nilo e, hetiang chung hian nupui tha tak nih a kan inkar siam that ka tum chu ania, ka beidawng nghal der mai, engpawh thleng rawh se, a duh dan dan chuan han che phawt se hnial tumna ka neilo.




Zingah chuan hma takah tho in Nicholas-a ka hmuh peih loh vang chuan a rawn thawh chhuah hma in hna kal turin ka chhuak a,, chaw pawh ka ei hman lo, dawr ka thleng chu tihtur a lo tam leh ngang mai, fashion show kan neih na turah in buatsaih a ngai a, kawr order a lo awm nuam bawk nen chawl lovin hna ka thawk leh char char a, dar 1 a rik chuan thil ei turin ka chhuak ve ta chiah a, ka pum a thip vawng vawng mai, vawin nilengin engmah ka la ei lo bawk nen restaurant lamah chuan ka kal a, Terina te erawh chuan an ei vek tawh, order ka siam zawh hnu lawk ah Nicholas-a a rawn lut ve hlawl a nihchu, min hmuh chuan mak ti hmel pawh a pu lo, min rawn pan in ka bulah chuan a rawn thu thla a, ka lo en reng ringawt, restaurant chhung a chawl te lah chuan keini pahnih chu min en duh hlawm bawk si, nuam ka tilo ru hle.




"Enge i rawn tih dawn?" zawi te chuan ka ti a, min rawn en in, "Zingah ka thawh hma in hna I kal daih tawh bawk sia, rawn hmu tur che in ka lo kal, I naute'n heta I kal thu min hrilh a" a ti a, ka chhang tawh lem lo, eitur te chu a chah ve a, an rawn dah chuan ngawi rengin ka ei mawp mawp a, "Muangchangin ei rawh, tuman an ei khalh lovang che" nui suk chungin a ti a, tui chu thli chhuak in ka hma zawnah chuan ka rawn dah nghal bawk, midang awm ve vang maia min ngaihsak awm ang taka a lang chu ka haw hlur a, engmah ka sawi buai lem lo. A tui rawn chhawp pawh chu in lovin ka ei leh mawlh mawlh a, ka ei zawh rual chuan din nghal mai ka tum chu ka kut ah a man vangin ka che lai ka tawp chawt, "Min lo nghak rawh, kan chhuak rual dawn ania" a tih takah chuan ka hnial lem lo.




A ei zawh veleh kan chhuak a, a hma zawnah chuan ka ding nghal a, "Enge rawn tih I tum?" ka ti leh hmak a, thaw hawk chungin "Ka sawi tawh kha" a ti bul ve hmuk, "Min hmu tura i lo kal a ngailo, I buai hmel si, let leh tawh rawh" khawlai a nih vang chuan tha deuh chuan ka be ve mai a, "Nimai love, ka lo kal ta ro ro bawk a, i dawrah reilote chu ka chawl hman alawm" a tih leh zel chuan ka melh rum tawh hle, engvanga hetianga rawn awm nge maw a nih le. Dawr chhung kan lut chiah chu hnathawk hovin min lo en thap a, ka hnungah palian pui lo kal vang hi a ni tih ka hria, ngawi rengin room lamah chuan kan lut a, ka chair ah thu in laptop chu ka on a, kan kawr design sa ho chu ka en kual mawlh mawlh a, Nicholas-a chu ngaihsak pawh ka ngaihsak lo, a duhthu a lo kal a nia, a duh duh dan in awm mai mai teh se.




Ka kawngka an rawn kik chuan lut turin ka ti vat a, Terina a rawn lut a, min hmu duhtu an awm tih a rawn sawi a, rawn luh tir tura ka tih hnuah a chhuak lehnghal, pakhat pa lah chu ngawi rengin a thu a, ka room chhung chu bel chiang ni awm fahran in a en kual dun dun bawk. Rin loh deuh in Chhana a lo lut a, ka thut na atangin ka ding hluai a, pasal ka neih hnu atang khan kan la in be leh miah lo, "Nangmaw?" tih hluai in ka nuih nghal ver ver a, "Aw..i reh riau a, ka lo kal a nihhi" Nicholas-a lo thu run a hmuh takah chuan a ngawi nghal hmak a, "Lo thu rawh" tih pahin thut na chu ka kawh hmuh a, "Pu Nicholas-a chu kan in hmu a ka lawm hle mai" tih pahin Chhana chuan chibai tumin a kut chu a phar chhuak a, Nicholas-a chuan a en run run hnuah a chibai ve ta chiah, a ka lah chu a chip hmuk zui.




Chhana nen chuan kan titi a, sawi tur a hre bawk nen a nuam viau, Nicholas-a chu eng a hria nimaw kan bulah chuan ngawi rengin a thu ve ta reng a, hna lamah a buai lo emaw ni, mahse han biak vel vak ka tumlo, nizan a awm dan vang khan ka lungawi lo a, han ngaihsak chiam tumna lah ka neilo, a duhthu a lo kal ania, a duh duh danin awm teh se. Chhana haw hnuah pawh chuan a la thu ngawi run a, "I let tawh dawn lo ami?" ka tih takah chuan min rawn en vut a, a lungawi loh hmel em em lehnghal, "Ka lo awm ve chu hnawk min va ti awm ve" a ti bul hmuk a, "I ngaihdan dan" tiin hna ka thawk leh mawlh mawlh a, chutah ding chhuak vut in room atang chuan a chhuak nal nal a, a chet dan maksak zet avang chuan ngawi rengin a kal liam na lam chu ka en vang vang ringawt.




In ka thlen chuan a lo reh deuh thuap a, inchung lamah chho in ka room ka lut tur chiah chu ban tha chak zet hian min phih deuh dawrh a, ka phu nasa lutuk chu ka te that, ka hriat leh hmasa ber chu ka room ah min nawr lutin kawngkhar ah chuan min nam bet tih zawng a ni. Min bih chhuk ngur a, min vawn na chu a nghet mah mah bawk, a hmel lah chu a chang deuh rut lehnghal, a thinrim tih a hai theih loh, "Dawr a rawn kal kha tunge?" a ti chhum hmuk a, "Ka thianpa" ka chhanna avang chuan a ner deuh sawk a, "Min bum tum hlek suh" a tih leh chuan ka thinrim ve ta deuh a, "Ka bum hauh lo che, ka thianpa a nihkha, chuan min thlah rawh" tiin ka tal a, mahse min vuan nghet telh telh zui, "Lalnuntluang ka nupui I ni tih hre reng rawh tu mipa mah i hnaih tur a nilo" a ti leh hrawk a, thinrim lutuk a en in "Ka duh duh mipa ka hnaih thei, lo in rawlh lo mai teh" ka ti hlar a.




Zaktheilo lutuk, a bialnu nen an in zui reng chungin ka thianpa ka hmu chu enge a lo thinrim ve chiam ni, thinrim ngam tur ni ah a in ngai em ni?... "Ka nupui I ni a, mipa dang i hmu reng tih hi midangin hria se ka hmingchhe dawn, chuvang chuan ka thusawi chu zawm mai rawh, tu mipa mah hnaih lo la, chuchu a tha ber" a ti leh nghut nghut a, "Chutiang ah ka buai lo, nangmah zawk kha in en fiah rawh, i bialnu nen in in zui reng a, midang hmuh dan tur che ngaihtuah zawk ta che, Chhana kha ka thian tha tak a ni a, ka hmuh tawh lohna chhan tur ka hrelo, chuan ka nunah i in rawlh loh tur thu I sawi kha, chuvang chuan ka nunah hian rawn in rawlh tum buai duh suh" thinrim zet chuan ka en ran a.




"I nunah hian in rawlh ka duh reng reng lo, ka hmingchhiat na turin engmah tilo la a nimai" a tih leh chuan ka nuih a za zawk, "Chuthil chu min hrilh ka ngailo, i bialnu nen khan fimkhur zawk ula a nimai, nizana in awm dan te kha, midang hmuh ah khatiang khan awm tawh suh ang che u, chuan a hming maia nupa ni mahila i bialnu he inchhung a i rawn hruai luh reng hi ka duh lo, chuvang chuan in in hmu duh a nih pawhin hetah lo hmun dangah in hmu tawh ang che u, engpawh ti ula ka buailo, mahse fimkhur lo taka in che zel a nihchuan i hmingchhe vat dawn, ka hrilh ve mai mai che a nihchu" ka ti fak a. Sawi tur a hre rawh lo nge a ngawi reng a, min vawn na chu thing thla hnawk in ka awm sawn nghal a, "Chhuak tawh rawh, ka chau, chawlh hahdam ka duh a nia" ka ti leh a, min en run run hnuah ngawi rengin a chhuak a, thawk ka la nghal hawk hawk a.




Nizana an awmdan kha ka hrelo emaw a ti a ni ngei ang, tenawm lutuk, chaw pawh ei peih lovin room ah chuan ka tawm char char a. Zanlai ah ka harh hlawl a, ka riltam lutuk chu ka hre hmasa ber, tho them them in room atang chuan ka chhuak a, inhnuai ah chhuk in choka ah ka lut a, chhuar chu ka hawng dan dan a, noodles ka hmuh takah chuan phur zetin ka la a, ka chhum nghal, a la hming chiang bawk silo, ka riltam tawh bawk nen chuan a rim te chu ka hnim ka hnim a, ka pum lah chu a ri rawk rawk tawh bawk si. A hmin veleh ka ei nghal a, ka ei zo rang khawp mai, ka thil chhum na te chu silfai leh vekin a awm na ngaiah chuan ka dah a, current off in inchung lamah ka chho nghal, ka room a ka lut tur chiah chu inhnuai lamah thawm a awm vangin ka hawi thla vat a, dim light a in on avangin Nicholas-a kawngka atanga a rawn lut lai chu ka hmu a, tun ang zan rei tawh ah enge maw a tih le?.. Oh, a bialnu nen an in hmu bak va ni suh, hetah lo hruai tawh lo tura ka tih vangin pawn lamah an in hmu bak a nilo ange.


Cont....


Comment leh click kha aw....


Show post links
Top

[Ngaia]

Chapter-6



Amelia Lalnuntluangi POV




Nicholas-a nen chuan kan in hmu khat khawp mai, in khat ah cheng mah ila kan in hmu ngailo tluk a ni, inah rawn haw loh a ching a, hnaah a buai viau a nih loh pawn a bialnu nen hun an hmang dun ah ka ngai hmiah, a awmdan hi lungawi lo viau mah ila engmah ka sawi buai lem lo. A tir atangin kan in neih chhan ah kan chiang ve ve a, kan nun dan ah tu mah mah kan in rawlh lo ang kan ti sa kha a nia, hetiang reng a nihchuan rei kan in nei in ka ringlo. Chuchu ka duhdan chiah pawh a ni, kan pu te duhdan ngei in kan in nei tawh a, mahse kan in nei hlen kher lovang, hna banah chuan in a haw tlang lovin ka hmun ngainat em em ah ka kal a, ka thawl huai mai, ina haw ka peih thlawt lo a ni, khaw thim hnuah pawh chuan ka la awm char char a, theih nise helai hmuna awm char char hi ka duh.




Dar 8 a rik hnai avang chuan in lam panin ka haw a, Nicholas-a a haw tawh in ka ring, inchhung ka lut chiah chu Nicholas ka hmu nghal zat, min lo en ran a, ngaihsak em em lovin choka ah ka lut a, ka hnungah pen thawm a awm vang chuan min rawn zui tih ka hria. Tui vawt chu ka in a, ka in her chiah chu Nicholas-a nen kan in hma tawn ran mai, enge maw a hriat ni ngawi rengin min en ngar ngar ringawt lehnghal, kalsawn ka tum chu ka banah a rawn man a, min phih let sawk a, "Enge maw I hriat le?" ka ti that a, "Engvanga rawn haw tlai nge i nih?" a ti hmuk a, "Hnaah ka buai" ka ti a, a awih loh hmel hle, "Lalnuntluang dawt min hrilh tum suh, i dawr ah ka rawn kal a, I haw tawh, khawiah nge i kal kawi hrep?" a ti leh thawt a, hetiang em em a a thinrim lai hi ka la hmu ngailo, a ruk chuan ka hlau deuh, mahse a langah erawh hlau lo angin ka awm thung a.




"I hriat a ngailo" tiin ka kut a vawn beh chu thin thlak ka tum a, mahse ka theilo, "Min thlah teh, ka chau a nia, nang nen a in hnial tur hian chakna ka nei lo" ka ti leh sep a, "Vawikhat mah hetiang hian rawn haw tlai tawh suh ang che" thinrim zetin ka en a, "Ka rawn haw tlai leh tlai lovah lo buai lo mai teh, i duh hun hun ah i riak chhuak a, engmah ka sawi buai ngailo, chuvang chuan ka duh duh danin ka awm ang" ka ti let hlar a. Karkhat ah vawi hnih vel bak a lo haw ngailo, he inah hian ka awmna a la reilo, thlakhat chiah ka la awm chungin keimah chiah in ka awm thin a, a fal bawk si hmeichhia mahni chauh a awmna atan chuan a hlauhawm tih pawh a ni hian a hria ang, chuti chung chuan min ngaihsak miah lovin a bialnu nen nuam an tawl reng a, ka nunah thu neih a tum reng tho bawk si te hi ka ngaithei lo.




"Ka sawi chu zawm mai rawh" a ti nghet leh charh a, min thlah nghal bawk, "I thu ka zawm na tur ka hre lo ve" ka kut chu ka nuai a, a vuan nghet bawk a, a thlah rual khan a hit chum chum thei hial. "Ka nupui I nih hi theihnghilh suh ang che" ka kalsawn tur chu ka ding leh chawt , a va han zaktheilo tak, "Ka pasal I ni tih hi theihnghilh bik suh, i nupui ka nihna hi sawi lang reng bawk suh, i nupui ka nih na angin min ngaihsak ve tawh em, teuhlo, he in lian tak ah hian mahni chiah a awm in engtinge ka awm tih ngaihtuah lek lovin i bialnu nen nuam in tawl thin a nilawm ni, chuti chung chuan i nupui ka nihna hi sawi lang reng ngam tur niin i in hria em?" ka ti leh fak a, a ngawi reng, ka thusawi a dik lutuk vang zawk pawh a ni maithei, en pawh en rei peih lovin inchung lamah ka chho nghal nal nal, a hmel ka hmuh peih tawh loh avangin chaw pawh ei lovin room ah chuan ka tawm char char a.




Zing khua a lo var a, room atang ka chhuah chuan Nicholas-a chu hmuh tur a awm leh tawh lo, thil te ei puar in ka chhuak ve nghal a, vawin chu ka nu te in lamah leng ka duh, pasal ka neih atang khan vawikhat chiah ka la kal a, ka ngai tawh takzet. Hna atang chuan ka haw hma a, ka nu te in ka thlen chuan door bell ka hmet a, ka nu in kawngka a rawn hawn a min hmuh chuan a phul deuh hlut a, "I lo kal dawn tih i sawi lawk bawk silo a, enge i lo tih ve teh mial a, in pa a lo kal velo a mi?" a ti nghal zung zung a, thutthleng a thut thlak pah chuan "Hnaah a buai a, a lo kal ve hman lo" ka ti sep a, dawt ka sawi chu nuam lo ka ti veng veng. Ka pa pawh hna atang a rawn haw a, min hmuh chuan a hlim hmel hle, ka haw dawn chuan Nicholas-a nen chaw ei ah min sawm thu a bulah sawi turin min chah a, sawi pawh ni ila engah mah a ngaih ka ring chuanglo.




In ka thleng a, Nicholas-a a haw tawh, in be lem lovin chaw te chu kan ei dun ve ngei kha, fashion show a mi tur in model kan ruai tur te profile en fel ka ngai a, naktuk lamah kan in hmu khawm dawn bawk. Dawr ka thlen rual in Terina nen model ho lo kal chu kan buaipui a, kan buai mup mup viau mai, thlahnih chiah a awm tawh avangin kan chet hmanhmawh a ngai tawh a, a dawn hnaihah buai deuh chung chung kha ka peih lo, fel fai takin engkim ti nghal vek ila ka duh a ni. Model te nen chuan kan thu khawm a, "Nangpawh tel ve la, i pian a nalh a, I kawr design ngei i hak chuan a hit viau ang" model zing a mi Hriati chuan a rawn ti a, ka lo nui hak, "A tih chi nang, nangni angin ka zei ve hleinem" ka ti a, midang ho pawh chuan an lo ti ve sap sap hlawm a, Terina thleng chuan, ka hnial fe hnuah pawh tel turin min la tilui nasa hlawm mai.




"Ka lo ngaihtuah dawn nia" ka tih takah chuan an phur hlawm ngang mai, an kawr hak tur ang te chu kan sawi ho leh a, an lungawi tlang viau hlawm, in hmuhkhawm na te kan neih zawh hnuah Terina nen kan chhuak a, puanthan en kan tum mai piah lamah kawr cheina tur lei nual kan ngai tawh a, hun kan nei thin lo bawk nen vawin chu han lei nghek ila nimai. Puanthan dawr a chuan kan lut a, kan en dan dan, pakhat nalh tih zet mai ka nei a, kan en chiang vel pawh chuan a puan a tha a, ka duhzawng tak a ni, a neitu nen kan in hre tha tawh bawk a, a dawr a lian in a changtlung bawk nen kan duh zawng ang chu kan hmu kim deuh vek, min pe tlawm a, dawr atang chuan lungawi takin kan chhuak a.




Dawr dang dang ah te chuan kan lut kawi a, kan lei hnem bawk nen kan bawr viau mai, car a kan thil lei kan dah luh lai chuan ka hming a min ko tu an awm avangin ka hnunglam chu ka hawi vat, chutah ka mi beisei lo zet ka hmu a, Nicholas-a leh Cindy te an ni, Cindy chuan ka hmuh loh hlau ni awm fahran hian Nicholas-a ban a vawn na chu a ti langsar sauh a, engah mah ka ngailo tih hi hria se chuan hetiang hian a ti awm tawp silo, a chet dan chuan ka nuih a ti za deuh tlat pek a. "Helai hmunah te kan hmuh che kan in ring miah lova" Cindy chuan a ti a, "Nia.. dawr thil kan lei a nihhi" Terina lo ding ngawi reng chu ka melh zeuh a, Nicholas-a ka en chuan min lo en ve reng, ka nuih lui sak bawk, hetia langsar taka an in zui reng lai hian mipa dang hnaih lo turin min ti a nia, hah...




"Fashion show I buatsaih dawn tih ka lo hria a" Cindy vek a ni, engtinge a lo hriat hman ni, kan la puangzar miah lo a nia, Nicholas-a chuan min rawn en vut a, en let velo mah ila chutiang thil a bula ka sawi lo chu a lungawi hmel teh chiam loh, "I lo kal ve ngei ka beisei" nui chungin ka ti a, "Nicholas-a nen kan lo kal ang" mei nei deuh hian a ti leh a. Ka phone a rik vang chuan Cindy pawh chhang lo chuan ka phone chu la chhuak in ka chhang ta daih a, Thakimi a lo ni, "Vawin tlai kha aw" ka tawng hma hma chuan a rawn ti a, enge vawin tlaiah awm dawn ka hre hauh lo, "Enge tihtur a awm ami?" ka ti hu a, a rawn chek tlak tlak a, "Group te kha en ve ta che, thian hovin dine out kan nei dawn, i rawn kal ve ngei ngei a ngai" a ti leh a, ka phur hle, ka thiante nen kan in hmuh khawm lohna pawh a rei tawh.




"Awle, ka lo kal dawn nia, ka buai deuh a, ka dah ange" tiin phone chu ka dah a, Cindy te lah chu an lo la ding ve reng zui, "Zaninah ka rawn haw tlai ang, kan thian hovin chaw kan ei chhuak dawn a" Nicholas-a en pah chuan ka ti a, a meng dur khup mai, min chhang pawh tum lovin a ka a chip hmuk a, an ni nen a in biak reng ka nin vang chuan "Terin kal ila, hnathawh tur kan la nei tam si" ka mitmei nghal zeuh a, car ah chuan a lut nghal, "A nih kan kal ange, nuam deuhin hun in hmang dawn nia" tiin car ah chuan ka thu lut ve nghal. Kan dawr lam pan a car ka khalh lai chuan Terina'n sawi duh nei hmel pu hian ka lam a rawn hawi leh zawk thin a, "I sawi duh chu sawi la" hmalam en chung chuan ka ti a, "Zawh chi che a ni em chu ka hrelo a, mahse i pasal leh Cindy kha an la in hmu thin bawk sia, enge awmzia?" a ti a.




"I hmuh ang kha a nimai" ka ti mai a, "Amelia kan in hriat na a rei ve thawkhat tawh a, thudik tak min hrilh rawh, a ni nen hian nupa hlim tak in nilo tiraw?" a ti leh a, ni e, Terina hian kan in neih chhan a hre biklo, in hmangaih vanga in nei angah min ngai ve tho, nitin ka in hmu a, min hrechiang mah mah bawk. Chutah ka thaw chhuak hak a, thudik sawi pawh ni ila a chhuak in ka ringlo, "Um... diktak chuan kan chhungte vanga in nei mai kan ni" ka tihchuan mak a tih hmel hle, "Enga, a va mak ve" a ti hluai a, "Ni e, kan pahnih in karah hian hmangaih na a awmlo, a hming maia nupa kan ni e, chuan Terin tuma bulah sawi suh, midang chuan nupa hlim tak angah min ngai tih i hriat kha" ka ti leh nghal zat a.




Sawi chhunzawm ka duh tawh lo tih hria in engmah min zawt tawh lo, dawr kan thleng a, hnathawh ngai ang ang te chu ka thawk leh mawlh mawlh, nidang aiin dawr atang ka chhuak hma, kan thian hova kan in hmuhkhawm na tur hmun ka thleng chuan an lo awm vek tawh, min hmuh takah chuan an thawm a ring khawp mai, thil ei hmasa ta lo chuan kan titi hlawm a, ka thiante bula hun ka hmang chiah chu ka thawl hawk in ka hria. Tumah in ka pasal chungchang min zawt lo, thil te kan ei a, restaurant atang kan chhuah hnuah thian hovin in tih hlimna neih an rawt a, ka hnial lemlo, karaoke ah kan kal a, an zai nasa hlawm hle, Puia ber chu a phawk a chhuak a, a lam nasa na ngang mai, kan nui bawk bawk a, an chau deuh tawh aniang, ka bulah chuan an rawn thu thla hlawm a.




Zanin chu nuam ka ti ve takzet, ka thiante ah tumah nupui pasal nei an la awm lova, an mahni ang hi nih ka chak, pasal ka neih tawh miau avangin ka nulat laia ka thiltih thin tamtak kha ka ti thei tawh lo, haw kan rawt a, kan thiante an tlan liam hnuah Chhana nen chuan kan la awm a, "I hlim loh hmel lutuk a" a ti sup a, "Ka hlim alawm" nui lui sak chungin ka ti a, ka thusawi chu a awih lo tih ka hria, "I pasal nen in in kar a tha maw?" a tih leh chuan "Tha a nimai" ka ti a, "Fashion show kan neih hun chu aw lo kal ve ngei ngei ang che" ka ti a, "Tehreng, ka awm chuan ka lo kal dawn chiang sia" a lam chu ka en vat a, "Hmundangah I awm dawn ami?" ka ti nghal vat, "Awm dawn han tih ah, sumdawnna vangin Delhi lama thla hnih khat vel awm ka ngai maithei a" a ti sup a.




"A nihchu, mahse rawn kal chu tum la aw" ka ti leh hram, a tlai deuh tawh avangin kan in be rei lem lo, in ka thleng a, ka motor te park tha in inchhungah ka lut nghal, sitting room ah Nicholas-a a lo thu run mai, light a ti thim tawh a, dim light bak a in on tawh lo, enge maw thim tham ah sawtianga a lo thut ni, min tih hlauh hman zia chu ka thin a phu dup dup a, misual emaw tiin ka au chhuak thelh lehnghal. "I va rawn haw tlai ve" a aw chang deuh fak ah chuan a lungawi lo leh tawh tih ka hrethiam nghal mai, wine ka lo in ve bawk nen a ni nen a inhnial hi ka peih viau lo asin mawle, "Nia, kan thian hovin kan in hmu khawm dawn ka tihkha, kan titi tui ta phian hlawm sia, chuvang a ni" ka ti tha ve mai a, inchung lamah chuan ka chho nghal, ka room ah ka lut chiah chu a rawn lut tlang ve nghal thawr a.




Ka melh haw, "I awmdan hi ka duh hauh lo a nia" a ti hmuk a, ning zetin ka thaw chhuak halh, "Enteh, in hnial mood ah ka awm lo ania, ka room atang hian chhuak rawh" ka ti a, ka aw pawh a ring hran lo, "I awmdan hi thlak ang che, ka nupui I ni a, hetianga zan tlai tak tak a i rawn haw te hi ka duh hauh lo tih hria ang che" a ti leh hram a, "Ka awmdan ah hian lo buai suh, nangpawh i duh duh danin i awm tho a, engmah ka sawi buai loh hi, min en liam ve mai mai rawh" ka ti a, "Ka nupui i ni a, hetia i khawsa hi ka en liam mai mai ang che maw, teuh lo lutuk, hre rawh, ka hmingchhiat na turin Engthil mah I tih ka phal dawn reng reng lo" a ti nghet churh a, hetia thu a sawi hi ka haw takzet thin.




"Engtin vak nge ka khawsak, hetianga min ṭawngkhum fo ni, i khawsak dan hi en let zawk ta che, i bialnu nen langsar takin in khawsa a chuti chung chuan ka khawsak danah hian rawn buai lo mai teh, hmingchhiat i hlau viau a nihchuan vawin a I bialnu nen mi hmuh a in in lan ang khan in lan tawh suh u, tuman ka khawsak dan an rawn ngaihven lo, mahse nangni erawh mi te hriat lar in ni a, in khawsak dan ho te te pawh mi te mit fuk na ber a ni tih i hriat ve tho ka ring, chuvang chuan kei min zilh lo hian i bialnu nen khan fimkhur ula i hmingchhe lo a nimai" ka thinrim lutuk chu ka aw a khur vek thei. Vawin ah pawh a bialnu nen in si rial in mi hmuh ah an in lan a, chuti chung chuan ka khawsak danah a lo buai lutuk hi ka hne ngawih ngawih, kan in neih hma in kan nun danah buai lo turin amah zawk in a sawi a, tunah lem ka thiltih engkim a sawisel reng a, ka nun hman nawm loh sa nen ka ning.




"Tupawh ka chhuah pui ang, lo buai duh suh, fimkhur la a tawk" a tih leh chuan ka nui chhuak hak, "Tupawh chhuah pui la pawi ka tilo a, ka buai lo bawk, i hmingchhiat na turin engmah tih ka neilo tih hria la, I lo hmingchhe ta a nih pawhin keimah vang nilo in nangmah vang a ni tih hre bawk ang che, ka nun a nia, nupa kan nih vang ngawt hian i thu hnuai a min dah tum reng reng suh, a hming maia nupa kan nih hi, i hria em, reilote chauh kan la in nei chung hian hreawm tamtak ka tuar tawh, ka hne, i bialnu in hmusit tak tak in min tawngkhum reng zel bawk nen ka hne, hetiang in neih na hahthlak zet a tan reng ai chuan kan chhungte bulah sawi ila in then zawk ang, chuchu kan tan a tha tur zawk a ni, nang nen hi chuan awmdun tur kan nilo, bialnu I nei a, a ni nen chuan hlim takin awm dun zawk rawh u, keichu ka rawn in rawlh lovang" ka ti hmak a.




Engtik laiin nge ka dar ah a rawn man hman ka hrelo, min sawi deuh nawk a, "Thlakhat chiah kan la in nei a, chuan in then I sawi amaw, kha I bialpa vang kha em ni?" thinrim seh chilh nawk nawk chuan a ti a, amah zawk hian bialnu a nei a, chuti chung chuan keihi bialpa nei angah min la puh zui amaw, zaktheilo lutuk, "I va zaktheilo ve, nang ang ka nilo tih hria ang che" ka ti that a, a ner sawk, "Hre rawh, kei hian kan in then ang ka ti a nih loh chuan kan in then ngai lovang, chuan heihi hre bawk ang che, tun atang chuan i duh duh danin i nun I hmang tawh tawp lovang, kha I mipa duh em em mai kha hmu tawh suh ang che" a ti leh hrawk a, "Min thlah rawh, ka nun dan emaw ka mi hmuh tur ah leh zel chuan rawn in rawlh thui duh lo mai teh, ka tan engmah I nilo, i thu hnuai a kun tur lah ka ni hek lo" ka ti a.




"Kan hria ang chu" tiin min thlah a, room atang chuan a chhuak nghal, zaklo lutuk a duh ang chuan ka nung tawp lovang, a bialnu nen an in hmuh theih reng laiin ka thiante ka hmu theilo bik ang maw?.. A thu hnuai a kun tur ka nih loh zia hi hre rawh se, a ngaih ang mai mai hmeichhia ka nilo. Zantin a bialnu in phone atangin min rawn ankhum a, a hriat pui ve vek in ka ring bawk, engah mah ngai duh lovin ka en liam mai mai a, tu hnenah mah ka la sawi chhuak lo bawk. Mut pawh ka mu meuh lo, zing ah pawh chuan ka tho tlai hle, hmanhmawh zetin ka in siam a, hna kal tura ka chhuah chuan dar 11, a ri tep, dawr ka thleng a, mi hmuh tur ka neih avangin ka chhuak lehnghal, restaurant ah ka lo nghak reng a, fashion show kan neih na tur hmun neitu U Hmingtea a ni a, thil ngai ang te chu min zawt a, thurawn min pe bawk, a fel bawk a, midang aiin min hman tlawm tir dawn a, ka lawm hle.




Kan in biak zawh chuan thil te kan ei a, kan chhuah dawn lamah Cindy leh Nicholas-a nen bawk kan in tawk leh, Cindy hmel a in tihtheih na chu ka hmuh hmaih lo, "Pu Nicholas-a chu enge i tih ve dawn teh mial a?" U Hmingtea chuan a ti a, "Hna lam thil mawle" Nicholas-a pawh chuan tha takin a lo chhang ve mai a, "I nupui hetah a awm tih hria in I lo kal emaw ka lo ti zawk a" nui hawk hawk chungin U Hmingtea chuan a ti leh a, za lo deuhin ka lo nui ve ringawt. "Kan kal dawn mi, min nghak reng tawh ang" Cindy chuan a rawn ti no deuh hluak a, ka luak a ti chhuak zawk, "Keini pawh kal ila" U Hmingtea en chung chuan ka ti ve nghal zat a, kan kalsawn dawn chuan Nicholas-a ka en leh hram, a ni pawh chuan min lo en ve ran a, a hmel te hi ka haw hluah hluah a ni ber.




Chau zetin ka haw a, sitting room a ka mi hmuh te avang chuan ka chauh a zual, engvanga hetah rawn hruai nge a nih, min rawn hmuh chuan Cindy chu a nui deuh suk a, "Nicholas-a hian rawn leng rawh min ti a, ka rawn kal chu pawi I ti em lovang chu maw?" nui sawng chungin a ti a, ka chhang buai peih lo, ngawi rengin choka ah ka lut a, U Tluangi a lo la haw lo chu niin, tun ang ah te chuan a haw daih tawh thin sia, "Tinge I la haw loh a?" ka ti nghal a, "Cindy sawn ka riltam a tia, hei a ei tur hi ka siam zo anga ka haw ang" a ti mai a. "I thiltih lai kha dah la haw daih rawh, a tlai tawh si" ka ti a, "A ho lutuk, kan ti zo law law ang" Nicholas-a a hlauh vang tih ka hria, a tih zawh chuan sitting room lamah a va chawi phei a, Cindy au that ri ka hriat takah chuan hmanhmawh zetin choka atang chuan ka chhuak a.




"I mawl em ni, Engvangin nge min rawn tih buak?" U Tluangi chu a vin hrep a, "Ka tihpalh, min lo su a" U Tluangi chuan inthiam lo zet chuan a ti a, "Dawt sawi lo mai teh, I ti lui a nihkha, nge ni a khatianga ti tur che khan an ti zawk che?" ka thinrim ve nghal phat, an lam pan chuan ka kal hnai a, "Khatiang khan U Tluangi hi vin hlek suh, nangmah vangin a haw tlai phah a, i riltam a nihchuan nangmah in in siam ta che, khatianga vin tur khan tu ah nge i in ngaih?" ka ti ve fak a, "A tilui a nihkha, nang hian i tihtir tiraw?" A va han zaklo tak, "Khatiang ti duh tur ah khan min ngai suh, nang ang ka nilo, enge thleng hmu ve kher lo mah ila, nangmah vanga hetiang thil hi thleng a ni tih ka hria, chuan he in hi ka inchhung a nihhi, khatiang khan tumah vin tawh suh ang che" tiin U Tluangi chu ka buaipui nghal a, a kawr hma lam chu a huh dup a.




Nicholas-a erawh a la ngawi reng thung, U Tluangi chu choka lamah ka hruai a, hreawm a tih hmel hle, "Ka va tifai lawk a nge" puan chhia lak pah chuan a ti leh a, "A ngailo, a duh leh amah khan lo tifai rawh se, lo kal rawh, ka thlah ang che" ka ti a, "A ngailo, I chau awm si, keimah in ka haw mai ang" a inthlahrun hmel lutuk chu ka khawngaih zawk. "Chau lo ve, taxi hman mai tur pawh a awm tawh lovang, lo kal rawh" ka tih luih tak tlat ah chuan min hnial ta lo va, a bag chu la in choka atang chuan kan chhuak a, kan in zui chhuak chu Cindy chuan rum zetin min melh a, "Khatia haw tum lo khan i thil tih balh hi rawn tifai hmasa ta che" zahna nei map lovin a rawn la ti hram a, "I thil eitur a buaipui a, a tawk viau, nangmah tih balh a nia, nangman lo tifai rawh" pawn lamah chuan kan chhuak nghal daih a.




"Engvanga lo ngawi reng nge i nih?" Cindy in lungawi lo zet a a ti ri chu ka hre hman a, mahse va in rawlh leh ka peih tawh loh avangin ngawi rengin kan chhuak a, U Tluangi te in lama kan tlan lai chuan U Tluangi chu a ngawi reng a, hreawm a tih hmel hle bawk, "U Tluang, in in awmna lai tak ka hrelo a, min hrilh pah mai rawh aw" ka ti a, a bu zeuh ringawt. "A hreawm e" a rawn ti deuh hluai a, ka nui lui sak, "Engah mah ngai duh suh, I thiamloh a nilo tih ka hria alawm" ka tihchuan "A buaithlak thin a sin aw, U Nicholas-a nen in in neih hma hian a rawn kal ve fo tawh a, min hmusit thin bawk si" a ti a, "Tun atang chuan ti let ve zel tawh rawh, mikhual mai a ni a, a hmusit tur che a nilo hrim hrim" ka ti sep sep a.




An in ka thleng a, "Lo leng lut la" a ti a, ka hnial deuh na in min sawm luih tak tlat ah chuan an inah chuan ka leng a, a nu leh pa te bulah min in hmelhriat tir a, an fel hle, "Chaw ei ve nghal daih la" a tih erawh in ka lo hnial vat, a chhungte pawhin ei ve turin min ti nasa viau a, mahse ka vawikhat leng luh na chiah a ni bawk nen chutia chaw han ei nghal ngawt chu ka duh loh vangin ka hnial a. In ka thleng a inchhung ka luh chuan Cindy pawh a lo la awm reng, "I lo let tawh bawk a, chaw ei nghal mai ang u" Nicholas-a chuan engmah thleng lo ang mai chuan a ti a, "Ei rawh u" ti hmak in inchung lamah ka chho a, ka room ka lut tur chiah chu ka hnung atangin "Kan rual in chaw rawn ei rawh" A rawn ti leh a, engtinge an rual a chaw ei turin min tih ngam zawk ni?...




"Ei rawh u ka tihkha, ka ei peih lo, ka riltam hunah ka ei ve mai ang" tiin room ah chuan ka lut hmak a, ka thawmhnaw te chu thinrim zetin ka phelh a, ka dang a ro deuh avangin ka khum bul a tui ka chhawp chu in ka tum a, a lo ruak vek, room atang ka chhuak a, choka ah tui vawt la turin ka kal a, Nicholas-a leh Cindy te chuan chaw an lo ei a, melh pawh ka melh peih lo. Tui kan lak hnuah kal leh nghal mai ka tum chu "Mikhual chaw ei tur in neih chuan a rual a chaw ei hi a mawi a sin" Cindy chuan a ti a, "Ka mikhual I ni lo a, chuvang chuan I rual a chaw ei kher hi ka thiltih tur a nilo, kha a sawm tu che nen in ei kha" ngeiawm zetin ka ti a, Nicholas-a chuan min rawn en a, ka lo nuih sak.




A tuk lamah chuan hna kal hma ka duh vangin ka insiam hmaa ka zawh chuan inhnuai lamah ka chhuk a, chaw ei sawk sawk in hna kal turin ka chhuak nghal. Hna ka thawh mawlh mawlh lai chuan ka phone a rawn ri a, ka nu a lo ni, "Bawihte, tlaiah chaw ei turin rawn kal rawh u aw, I pasal nen" a ti a, "Keichu ka hman anga mahse Nicholas-a chu a hman ka ring lo" ka ti a, "Ka hrilh tawh alawm, a hman tur thu a sawi a, in rawn kal rual mai dawn nia" a ti leh zung zung a. Ka nu te inah chaw kan ei dawn avangin dawr atang ka chhuak hma a, Nicholas-a chu a motor ngheng in a lo ding ran chu niin, "I hman tawh chuan kan kal tawh mai dawn mi?" a ti a, ka lo melh haw, min rawn hruai turin a rawn kal amaw "Enge hetah i rawn tih?" ka ti a, "Ka pi in a rawn biak tawh che ka ring, i chhungte inah chaw kan ei dawn kha, kan kal rual ang chu" a ti leh a.




"A ngailo, ka car ka keng" ka ti hmak a, a thaw hawlh a, "I chhungte hmuh ah kan kal rual loh chuan a mawi lo, chuvang chuan hetah i car hnutchhiah la, ka rual in rawn kal rawh" a ti leh hmuk a, "A ngailo ka tihchu, bakah mawi leh mawi lo tih lam kha chu sawi ve chiam lo mai teh, i bialnu kan inchhung ah ngei I rawn hruai luh pawh kha thil mawi a ni bik em ni?" ka ti hmak a, ka car lam pan chuan ka kal nghal. Ka hnungah chuan Nicholas-a chuan min rawn zui ve zel tih ka hmu thei, kan in kawt ah motor ka ti ding a, motor atang ka chhuah rual in Nicholas-a pawh a rawn chhuak ve nghal, door bell ka hmet ri a, kawngka an rawn hawn chuan kan lut zui nghal, ka nu leh pate chuan min lo lawm thiam khawp mai, ka pa chu chaw kan ei dawn vangin a hna atang a rawn haw hma hi a lo nia, ka chhungten kan nupa a min hmuh chuan an hlim hle tih an hmel ah a lang thei.




Ka pa leh Nicholas-a te chuan hna chungchang te an sawi a, ka nu nen choka lamah kan in zui lut a, chaw kan ei tur chu a lo in buatsaih nasa hle, chaw ei nan a la hma bawk nen sitting room ah chuan kan in kawm khawm a, Nicholas-a bulah thu in ka pa nen an thusawi chu kavlo ngaithla ve reng, tha tak tak in a chhang a, makpa tha ber awm ang in a awm a, lemchan thiam ka ti rilru viau bawk. Chaw te kan ei a, Nicholas-a chuan ka thleng ah chawhmeh te min rawn suah a, tullo ka ti viau, mahse ka chhungte an awm ve vangin engmah ka sawi lang lem lo thung, chaw kan eikham chuan ei na vel ka nu nen kan ti fel zung zung a, thingpui hang te ka in ho leh a, "Bawihpuia pawh thlaleh lamah a rawn haw dawn kha" ka pa in a tihchuan "A nimaw, engmah min hrilh ve miah lo" ka ti a, a rawn haw dawn tih a sawi lo chu ka lungawi lo viau bawk.




"A buai deuh a, chuvang a niang, a hman hunah rawn hrilh che a tum thu a sawi tak kha" ka nu pawh chuan a rawn ti ve a, "A nihchu" ka ti deuh hmak a, mahse ka nau rawn haw tur chu ka lawm viau thung, chutia ka thut tum viau lai chuan Nicholas-a lam ka va en a, hmanhmawh tih hmel zet hian min lo en a nihchu, ka hawi sawn leh vat. Kan haw dawn chuan kawt thlengin min thlah a, motor hran ve ve a kal kan nih vangin a hrang in kan haw a, ka hnungah a tlan zel, in ka thleng a, Nicholas-a nghak lem lo chuan inchhung lamah ka lut a, tui vawt la hmasa te te in inchung ah ka chho nghal, room a ka luh hnuah ka inthlak a, tunlai hna lamah kan buai a, ka chau bawk nen ka mu nghal a, ka phone ka en zawk hnuah ka muhil nghal. Ka hmai za mer mer chu ka mang hriat deuh ruai a, ning lutuk in ka in let thawk a, mipa nui ri suk ka hria, mahse ka meng theilo, thawm a awm leh tak lovah chuan engmah hre zawm lovin ka muhil lehnghal.


Cont.....


Comment leh click kha aw...


Show post links
Top