SWEET SORROW (M&B) (Completed)

[Ngaia]

SWEET SORROW 13
www.storyfb.com mizo story thar nitin dah ziah a ni e

Celia chu a ngawi reng a, Tim vek chuan, "I rilru i tihhah a tul lo ang! Chu i mi sawi pa chu a chanchin ka hre lo nain ka thik deuh rum rum mai, a dinhmuna ding ni ve na ila chuan ka nupui chu a tawlhthlukna turin bahla kawr a hmaah ka dah ang a, a ringruh sawhtliak vek mahse pawi ka ti awm lo e," a han tih chuan Celia chu a nui ta hawk a.

"I a thei thin em mai! Sawi awm loh ltk a nih chu," a han ti hlak a.

"Ka a thei thin reng a ni. Awle Celia, ka kalsan tawh ang che, inkawmna hun tha tak kan nei thei a, a lawmawm khawp mai, ka tih tur pawimawh tak neih pawh ka lo theihnghilh hmin der alawm le, Oddy-ah nula sambuang pakhatin min lo nghak reng tawh tak ang! I hriat angin sambuang hi ka atchilh tlat alawm, ka hriat chhuah phah ziah lehnghal che a," Tim chuan a ti ta a.

tim nen an inthen tak hnu chuan Jan thil tur chu a lei leh sawk sawka, Bayswater lam pan turin Bus ah a chuang ta a. Tunah cuan hna ka hmu dawn ta a, tia inngaihtuahin a hlim hle a, a hlawh lak hmasak berah chuan a thiannu jan chu eng emaw leisak ngei pawh a tum nghal a; Swan & Edgar's ami lukhum thar a leisak ngei turah a dah a, chu bakah mawza tlawn a leisak bawk ang a, Jan chu a hlim awm ang e.

Chutiang vel ngaithuah chuan Bayswater road ah chuan a chhuak zel a. An chenna Boarding house kawt a thlen chuan a hnunglama car thawm a hre ta a, a han lehkhawi chuan mimal car nalh zet mai chu a hmu ta a. Chu car chu muang chang hian a rawn tawlh phei zal zal a, a sirah chuan a rawn ding ta a. A khalhtu thutnaa thu hmel a han hmuh meuh chuan Celia chu a dang var nghal bawi mai! A thin chu a phu dawt dawt a, a bag kenlai leh thilfun kente chu a thlauh nghal tawl a, a kut chu humruhin, "guy.." a ti ta sap a.

Guy Denver ngei mai chu Car atang chuan a rawn chhuak a, a coat fual a ha a, a nghawngah chuan muffler a zem a, lukhum erawh chu a khum lo. Celia hmazawn takah chuan arawn ding siah a, "A tawp a tawpah chuan ka hmu leh ta nge nge che maw, Celia!" a ti thawp sat a.

Celia hmel chu tisenin a rawn thlak leh tial tial a, "guy, Engtinge... engtin nge ka awmna i rawn hmuhchhuah theih?" a ti khur hlak hlak a.

Guy chuan Celia kut pahnih chu a chelhsak a, "Car chhungah hian lut phawt mai teh ka duhtak, kan ti ti dun theihna tur khawilai hmunah emaw i kal phawt mai teh ang," a ti ta a.

Celia chu a'n chiai deuh a, mahse Guy a hmuh leh thei chu a hlim bawk si! Jan-in a hmu palh ang tih chu a hlau hle bawk a, car chhungah chuan alut ta nge nge a, a kianga Guy car khalh lai chu en nuam a ti hle a, "Hetiang hi ka lo beisei hauh lo a sin, Guy," a han ti ngawt a.

"Hmuh che ka duh tlat a ni, Celia."

"Engtinnge ka awmna i rawn hriat theih reng reng?"

"Miss Fuller-in min hrilh alawm."

"Sawi hauh lo tur khan a intiam si a?"

"Dem duh suh, Celia, a tir chuan ani pawhin min hrilh duh bik hleinem, mahse ka va leng a, ka nawr lui ve ta tlat a, tunhmaa a chunga ka thil lo tih tawh avangin zep theiah a inngai ta bik lo a ni. Chu bakah i tana thuchah engemaw i lehkha tur i hnenah a lo thleng si a, i awmna a hriat loh chuan a tan i hnena pek chhawn a theih dawn loh tih pawh ka hre ve reng a, chuvangin i awmna chu a hre ngei tih pawh ka hre bawk a ni"

"Ni e, a dik alawm, kan chhungkaw Ukil in lehkha min rawn thawn tak asin! Lhekha thenkhatah chuan hming ziah a ngai a, Miss Fuller hnenah khan ka address chu ka pe reng a ni, ka thilte chu ka hnen lama rawn thawn zel turin ka ti bawk a, mahse i hriat chu ka duh lo asin mawle!"

"Kei pawhin i awmna chu hriat loh ka duh zawk a, chu chu thil tha berah pawh ka ngai a, mahse chawlhkhar nga zet a han ral takah hi chuan ka tuar zo lo a ni."

"Oh, Guy, ka tuar nasatzia hi i hre lo anih hi."

"Ka hria a sin, i huaisen hle mai. Hmuh che ka duh nachhan pawh enganginge i awm zel ka hre duh a, hnate i hmuin i hlim hle tih hria ila chuan ka rilru pawh a nuam thei deuh ang, chuvangin ka kalsan leh hma che hian eng nge i dinhmuh tih ka hre duh a ni."

Celia chu a ngawi reng a, chuti taka Guy-an a ngaihsak mai chu mak pawh a ti a, "Khawiahnge kan kal dawn?" a ti ta ngawt a.

"Khawi hmunah pawh London hi i chhuahsan lawk teh ang, darkar reilote tal i kianga awm ka duh a ni. Ni lo, min lo hnial suh. A dik lo tih chu ka hria alawm, mahse ka hmangaihna che hian a dik leh dik lo pawh a thliar thei tawh lo a nih hi. Nang pawhin min hmangaih takzet tih chu ka hria asin, ka lak atanga i tlanbo avang hian hun reilote tal chu i han ti ti dun teh ang, a tawpna pawh a ni maithei a," Guy chuan a ti ta a.

"Jan-in mi lo ngaihtuah lutuk ang a sin, min ngaihtuah thei nasa mai si a."

"Phone mai rawh, phone la, thudik tak chu hrilh mai rawh, a hriat chu ka pawiti hauh hleinem."

"Anih leh i nupui."

"Frances maw? Pawisa khelhna hmunah ka rawn kalsan ta anih kha, kawiahnge ka kal tih pawh a ngaihsak hek lo. A chang phei chuan engvanga he thil hi tuar reng nge ka nih pawh ka inhrethiam lo, dan te zahawmnate leh hmingthatna te pawh a ni thei ang chu. Mahse inneihna nuihzatthlak hmuhsitawm ber chu a va ni em! Tunlai lek phei chuan ka chungah a sual lehzual a, a duh ang a min kaihhruai theih loh avangin thinurna a zwang reng mai a ni. Chuvangin a chang pehi hi chuan engvanga ka kianga la awm tir reng nge ka nih pahw hi ka hrethiam bik lo, Pathianin a hria ang chu! Hetia ka awmtir rengt3e hi thiltha ti ka ni em tihte hi ka ngaihtuah fo thin bawk a."

Celia rilru pawh a buai kher mai. Guy te inneihna chu a hlawhchham chiang alawm, mahse Danin a phuar tlat si a.

Guy chuan Celia chu a en reng a, "Engtinnge i lu chu a awm tak zel?" a han ti a.

"A dam vaih tawh, a ser ka hmuh changte hian ka hrechhuak ziak che a sin, hei hi keimaha i chhinchhiahna awm chu a nih hi," Celia chuan a ti a. Nui a han tum a, mahse a hlawhchham chiang kher mai, a mitah mittui a lo tlingta zawk tlat mai.

Guy chuan Celia malchungah a kuta nghat a, "Ka duh ang chu sawi mah ila i hnial leh dawn tho tih ka hriat avangin ka sawi nawn tawh lo mai zawk ang e, i bulhnaih pawh ka lo kal tawh lo ang tih ka tiam a che, Celia, i chanchin chu kimchang takin mi han hrilh phawt mai la, ngaihtuahawm i nih loh chuan ka kalsan tawh ang che," a ti a.

Celia chu a dak chhuak a, "Thu tam sawi tur pawh ka nei lo," ti chiahin a chhang sap ringawt a.

"Eng nge i tih ber thin?"

"Tun maiah khan ka thian hlui nen kan inhmu a, naktuk hian a hnuaiah hna ka thawk dawn ani," tiin Celia chuan Timothy nena an inhmuh dan chanchin chu a hrilh a.

"Tim Madden chu a va thikawm ve le! Keimah ni loin ama puiha i han awm tak chu le, hrep tak chuan."

"Ni lo, chutiang lamin ngai suh, rem ti ila chuan nang pawhin hnate chu min hmuhsak em em ang chu."

"Okay, lawmpui tur che ka ni tih ka inhria e, chutiang hna remchang tha takte i hmuh avangin," Guy chuan a ti ta a, "Chu tlangval chuan a ngaizawng hle che em ni?" a ti zui leh ngat a.

"chuti vaka lakrun tur chu a ni lo asin, Guy min hmuh remchan vang a ni ber mai. A reng rengah hmeichhe ngaihsak vak chi a ni lo."

"Nangte chu hmeichhe dang aiin i danglam tlat a lawm, i la runthlak viauin ka ring a ni."

"Duktak, chutianga i thik a tul lo ang, khawvelah hian nang lo chu mipa dang ka mamawh hleinem," Celia chuan a ti ta a.

"Chu tak chu hriat ka duh fo chu a ni," guy chuan a ti ve ta a.

"A dik a ni. Ka hmu tawh ngai dawn hauh lo chung che pawh hian kumkhuain ka hmangaih reng ang che."

Tunah chuan London khaw daifem lamlian zau takah an tlan zar zar tawh a. Guy chu a nui hak a, "Chhumzing kara tlan kan hrat hle mai," a han ti sap a.

"ka pawisa hleinem," Celia chuan a ti mai a.

"kei pawh, i kianga ka awm phawt chuan han kuah vawng vawng mai che pawh hi ka chak hle a ni."

Celia chu a nui sak a, "I rilru put ang chu ka pu ve tho alawm," a lo ti ve sap a.

Guy chuan car chu a ti ding a, a khawl a tithi nghal hmak a. Chutah Celia chu a lamah a pawthnai a, a kuah ta vawng vawng a.


Rei tawk a kuah nuah a thlah leh hram a, Guy hmel chu a ngui ruai mai a, "Vante hian min hriatpui ang chu keimi nun beidawngin hetianga hmangaihtu ka nei hi a mak a ni, mahse bawihte, kan innei thei dawn si lo, chuvangin min kalsan la, min hmangaih hi a sawtna reng reng a awm si lo," a ti chuai ta raih a.

"Chu chu i hnena ka sawi awm tak ve tho a ni, Guy. Engvanga min hmangaih ve ngawt nge maw i nih le?"

"A chhan chu sang tam tak a awm thei ang chu, Frances kalsan ai chuan nang hetianga khan kalsan ngawt che hi chu thil sual nasa tak ni zawkin ka ring a ni."

"Min kalsan chu ka duh hleinem, Guy. Mahse, Frances nen in inneih chhung si hi chuan inkawp thei kan ni si lo tih chu i hria alawm," Celia chuan a ti niah niah a.

guy chu hul hak hian a nui a,"Hetiang nupui hrep hi maw?" a han ti ngawt a.

Celia chuan,"Hlim takin awmdun thei ula ka duhsak che u a ni," a ti ve a.

Guy chuan, "Engkim mai hi kal dik tawh hek lo, ka hnathawh lai chauh hian rilru muangin ka awm thei a ni," tih pahin Celia chu a en a, "I makin i huaisen a, hetianga hna tha tak hmu theia i awm hi ka lawmpui che a, rilru dam takin ka kalsan thei tawh ang che," a han ti leh a.

"Ni e, ka ngaihtuahawm loh ang, Guy!"

"Ngaihtuah loh hram che chu katum ve ang, mahse i hnen atanga engmah hre lo a awm chu a hreawm dawn mang e."

"Ka thlarau talin a chenchilh ang che, Guy"

"Chu chu ka ngaihdan pawh a ni ve reng e, ka kianga awm rengah ka ngai thin che asin."

"chu thu chuan min thlamuanin chakna pawh min pe ngeiin ka ring."

"Aw, ka duhtak Celia" tia thawk halh pahin Guy chuan Celia chu a kuah leh vawng vawng a.

Celia chu a khur nasa hle a, "Hetah hian awm reng lo mai teh ang, Guy. I laka ka tumruhnate a chhe hlauh palh ang e," a ti ta sep a.

Chutia a han tih chuan Guy pawh chuan hrethiam takin,"Khawi lai hmunah emaw ei tur i lam ang hmiang, chumi hnuah chuan kan hruaihaw tawh dawn che nia," a ti ve ta a.

Tichuan kawngsira hotel pakhatah chuan chaw an ei dun a, Celia zawk chuan Guy chu tihhlim tumin fiamthute a thawh a, an nui dun hauh hauh a.

Chaw an eikham hnuah Guy chuan Celia chu Bayswater Boarding House lamah a hruai haw leh ta a. Boarding house kawtkaiah chuan a car chu a tiding a,?Guy chuan a kianga nula thu chu a han en leh vawng vawng a, "Kaltir che chu harsa ka va ti em, ka thei ngut pawhin ka inring lo," a ti chhuak ta phawt a.

Celia chuan," I thei ngei tur a ni, Guy. Helaiah hian i lo lang tawh tur a ni lo, chu chu i hrechian gang chu maw? Nangmah avang ni bik lo in keimah avang pawhin," Celia chuan harsa ti fe chung hian a han ti a.

Guy chu a rum deuh hak a,"Oh my god" a han ti hlawl a, chutah ahmel tihhar hmel tak pawh chu a lo nem ve leh ta deuh a, "Ka hre chiang e, Celia" a han ti leh a.

"Chuti chu... dam takin' in inti tawh zawk ang, ka damchhungin ka theihnghilh tawh lo ang che, Guy" tih pahin Celia chuan car kawngkhar chu a hawng a, a chhuak ta a. Hnunglam pawh hawilet leh tawh hauh loin kailawnah chuan a tlan chho a, a lut bo ta nghal a.

[Ngaia]

SWEET SORROW 14

Celia chu thla khat aia tam mah Rotherford ah chuan a thawk ve tawh a.

April thla a lo ni a, tuk khat chu Tim ta tur lehkha a chhutsak a, chumi tuk chuan hnathawh a rilruah a awm thlawt lo a ni ber e. A dik tak phei chuan dan ang chauhin Tim-an hnathawh tur a sawi chu a thawk ve a ni lek reng a, Technical lam phei chu a hre lo ve hle a, mahse Timothy chuan a fak em em reng tho a. Lehkha tam tak chhan ngai awmte chu Celia chuan a chhansakin meeting pawimawh a neih turte chu a hrilh hre nawn leh thin bawk a, a hna chu tlin hle ah a ngai.

Thlakhat lekah chuan a hlawh pawh a punsak a, Celia tan chuan lungngaihna em em tur a awm ta bik lko. Rotherford and Sons ah chuan a thlamuangin a him tawk tih a inhre ve a, a hnate lah chu a thiannu Jan thawh anga inchhung thim taka thil hralha hahna tur a awm bawk hek lo. Building changkang tak, tukverh tam tak nei, a chhuatahte lah chuan carpet chhahtak a inphah chhuak vekin chenna atan pawha itawm fahran mai hi a ni a.

Celia rilru buaina ber chu a boss chuan a la ngaihven hle tih a hre tlat a, chu chu pawi pawh a ti a, amah Tim tan aimahin ama tan pawh a ti a ni. Tim-an tha taka a enkawlnaah chuan a lawm hle nachungin ngaihzawng anga a enna erawh chu a duh lo a, an inkar boruak chhiat phah pawh a hlau a, Guy ta a ni tawh a, a rilru zawng zawng a lo pe tawh si a.

Chumi tuk pawh chuan Guy a ngaithuahna chuan a tibuaiin a hnathawh pawh a tifuh hleithei lo ani reng a, an inthen hnu atang khan chawlh kar nga dawn lai a liam leh tawh a. An inkara thuthlung an siam chu a tumah mah chuan an la bawhchhe lochu a ni a, mahse a ngaihtuahna chu guy hnenah a awm reng a.

Chumi tuka a rilru penna chhan ber pawh chanchinbua thu inziak a hmuh vang a ni a, Cockspur Street atanga hnaiteah damdawi in lian tak an hawn thar thu a ni a, chu damdawiin hmingah chuan St Gabriel hospital an vuah a, nimin maia an hawn kha a ni. A hawngtu pawh Duchess of Kent a ni a, Sir Mourice Whiteby House of Governor nupui a ni nghe nghe. Chu damdawiina a hotu lu ber chu Mr. Guy Denver a ni bawk.

Celia-in chu thu a chhiar lai chuan a kut a khur nasa hle a, chu chanchinbu chuan a kut a rawn kang ta emaw tih mai turin a khur a. Chutah chulai thu inziak chu a chepthla a, a bag-ah chuan a khung ta hmak a, Guy chu a lo va la hmangaih tak em! A thiltih leh a hnathawh han hriatte chu a tan chuan a va han hlu tehreng em!

Guy Denver a ngaihtuah rual rualin a rilruah Frances Denver pawh chu a lang tel lo thei si lo a, a hmeichhe hmuh tawh azawngah chuan a la hmeltha ber hial awm e. A rilruah chuan thikna a lo lut a, mahse a thik phah hauh loh a ni tih erawh chu a hre leh thuai a.

A rilru chu thildangah a pakai leh a. Tim chuan chenna boarding house chu tha a tihpui lo a, flat changkang deuha khawsa ve turin a tir chhen a, anih loh vek leh chealsea a thian pakhat, Army Officer te nupa hnena awm tur tein a ngen a, mahse Celia chuan Jan chhuahsan chu a duh der si lo. "Ka hreawm lai ber pawha min ngaihsaktu awmchhun a ni a, tuna ka dinhmuh a lo that deuh tak avangin maiin ka hlamchhiah thei lo ang," a ti ve tlat a.

Tim lah chuan a fuih ve sauh sauh thung a, chu chuan Celia thin chu a ti ur ve deuh tawh a, a mimal nunah a rawn inrawlh thuk lutuk deuhah a ngai a ni. Mahse Tim chu mi a a ni lo a, a lakah Celia chu a lawm lo nia a hriat avang chuan tihhlim dan a ngatihtuah leh thuai a, reiloteah a tinui leh ta mai reng a.

Jan phei chuan, "Hetia awm ringawt hi chu i tan a fel lo ang, Bawihi, i thluak hmang ve ta che, heti khawpa duhtu tlangval fel leh hausa bawk si i hmu anih chuan i vannei thlawt a ni, neih dante pawh ngaihtuah zawk ta che," tiin a lo fuih ve sauh sauh thin a.

Mahse, Celia rilru put dan chu eng thil mah hian a sawhsawn thei ngai lo ang, Jan emaw Tim hnenah emaw a rilru chu han hrilhfiah chiam dawn mahse an ngaihdan a ni ve dawn lo tih lah a hrereng si a.

Chhun chaw eihma chuan Tim-an a pindanah a ko lut a, Celia pawh chuan hanthawh inring takin Tim chu a zui lut ve a. Mahse, Ti8m chu hnathawh tum awm ang pawhin a lo awm lo a, a chair vir theiah chuan a lo inher kual vel mai mai a, a hmel pawh a hlim hle a. A pindan tukverhte chu a vaiin a inhawng vek a, April thla ni eng chuan a rawn chhun lut raih a. Tim vir miai miai chu tawpin Celia chu chik zetin a lo en vang vang a.

Tunah chuan Celia pawh a hmuh tirh ang kha chu a cher tawh lo a, a hmai pawh tisenin a luah a, a mitmeng dul raih thinte chu a eng ser tawh a, a hmai lah make up hman pawh ngai vak loin a mamin a nalh hle bawk si. A thawmhnaw inbelte chu a thar a ni ngei ang, tunhmain a la hmu tlat lo. Pawnfen sahlum la nem tak buang leh kawr var a ha a, kum 16 awm lek hmelpuin a lang bawk a.

Celia chuan, "MIn duhna i nei em ni, Mr Madden?" a han ti sap a.

"Aw.." Tim chuan a ti mai a. "Ka duhdan che chu pui tak mai mawle! a han ti zui leh zat a.

Celia chu a sen deuh ap ap a, "A viau teh suh," a han ti bak deuh hlak a.

Tim chu a tho hluai a, a coat ipte atang chuan a samkhuih a phawrh a, a sam dum chhah tha tak chu khuih ta mawlh mawlh a. "Thal boruak nuam tak mai kan thleng leh te chu a ni a, Celia nang lah chu thlasik lai ang hrimin i tawmna ngaiah i tawm reng mai si a," a ti charh charh a.

Celia chuan a ngaihna hre lo zetin a lo en ha a, a lu a thing a,"Eng nge sawi i tum chiah ?" a ti thung a.

"Hun reilote intihhlimna angte pawh."

"Tunah hian maw, Tim? Hei hi office a ni tih i hre..."

Celia sawi zawh hma hmain Tim chuan, "Ka hria lawm, i lakah hian i pu ka ni a, nang chu ka typist i ni a, hna tha takin i thawk a, mi tha tak Celia i ni tih chu ka hai lo. Mahse, hei ringawt hi tawk ka ti lo a ni, hna ringawt mai thawha intihhlimna chhete pawh nei ngai lo a nang ang thalai inkhung bo reng hi! April thla ni eng mawi takte hi i hmu chak lo em ni? Engtinge hlaphuah thiam pawhin a tih kha? Ka sawi chhuak thiam lo em mai pawh a, oh england pawh tunah chuan april thla a thleng ve tawh awm si a, a ti a ni lawm ni? England ram hawng churh mai a April thla lo thleng hlutzia hi i haider mai dawn em ni?" a han ti deuh duah a.

"A dik khawp mai, mahse chu chuan nang leh kei atan eng nge inzawmna a neih?" Celia chuan a lo ti a.

Tim chuan a rawn pan hnai a, amah a sang si a, Celia chu a chhuak en a. "Tlemte tal chuan min ngaina ve lo em ni?" a han ti a.

Celia chuan a heh a pet a, a mitmeng chu a buai nak a,"Ka ngaina che tih chu i hria alawm Tim, ka chunga i thiltihte hi ropui ka tiin, i chungah ka lawm em em a ni," tiin a chhang a.

"Mahse i mitah chuan mipa duhawm chu ka ni lo tiraw?"

"Chu em em phei chu ni lo e, mi duhtawk i ni alawm Tim, mahse..."

"Mahse... tih fo mai chu le"

Celia chu dawhkan tlangah chuan a thu a, Tim rilru chu a hrereng si a. Mahse a ngaihtuahna zawng zawng Guy hnena a chen si chuan engtinnge Tim chu a neih theih ang?

Tim chuan Celia kut lehlam chu a vuan a, "Celia, ka a lo a sin, ka hmangaih che avang hian thu atthlak pui pui hi ka sawi fo reng a; Loncoln chhuak ka ni a, chutiang rilru chu ka la pu reng a, i lakah ka tan hian beisei tur tlem tal a awm lo em ni?" a han ti a.

"Oh Tim..." Celia chuan a ti sap a, a ngawi leh vang vang a.

"Min hnar lul suh Celia, nang ka neih loh dawn che chuan ka tlangval reng mai ang! Hun remchangte min pek a, min neih erawh chuan hlim takin ka siam ang che. Ka chapo vang ni loin tunlai hunah chuan mi vantlang tak chu ka ni ve a, i mamawh ang zawng zawng ka tihsak zel ang che."

"I nihna chu ka hria alawm Tim, i mi ngenna chu zahawm ka tiin ka phu loin mi chawimawi tih pawh ka hai lo, mahse ka nei thei lo che a ni. Tlangtakin sawi ila, ka hmangaih thei miau lo che a ni."

Tim chu a la beidawng duh chuang hauh lo, "Celia inhmangaih dan chu ka zirtir dawn che alawm," a ti leh zel a.

Celia chuan a kut lakthlak tumin pahin, "tim, midang pawh an awm tih i hrereng si a, " a ti ve sap a.

"Khapa kha i la vei reng amaw? I sawi angin pawmlai nei a ni si a, engtia tih nge i la tum cheu?"

Celia chu a chhing vang vang a, a rilru a na a ni. "Engtin mah tih ka tum lo," zawi sep hian a han ti a.

"Tunge maw anih le? A chanchin min han hrilh teh. A hmangaih ve che anih si chuan engvanginge a nupui chu a kalsan mai loh? Kei chu ni ila, nang nei tur chuan ka dinhmun chu eng ang pawh lo nise, zanin la la pawh hian ka kan in ka chhuahsan duh ngei ang," tim chuan a han ti a.

Celia chu a nui sak a, "I ti lawmawm thin e, Tim mi dik tak i ni tih pawh ka hria a sin, mahse hepa dinhmun hi chu a khirh tlat a ni, Doctor a ni miau a, a nupui chhuahsan mai thei a ni ve lo, a hmingmawina tichhetu nih chu ka duh lo kumkhua ang," a ti ta hmiah a.

Tim chuan Celia kut chu a thlah a, a sikret bawm a phawrh a, pakaht chu a tankai a, a dar chu a san ak a. "Chutiang vang chuan i damchhung hun chu midang pawh ngaihtuah chuang lo a khawrhar taka awm turin i lo hlan ta anih tak chu! In pahnih atan pawi ka ti ngawt mai, mahse a sawt lohzia chu i hai lo ang chu tiraw? Engvang midang ngaihven mai lo nge i nih?" a han ti leh a.

"Guy ka hmangaih em avangin ka thinlungah midang tan hmun a awm tahw lo a ni," Celia chuan a ti leh hmiah a.

"Anih tak chu, chupa hming pawh chu Guy a lo ni maw? ka thik hle mai."

"I thik a tul lo ang, keimah ang bawk hian ani pawh rilru hlim loa a awm ve tho ka ring."

Tim chuan a cigaratte pehkawh chu a pawhi a, Celia chu a en a, "Kei pawh ka hlim chuang hleinem Celia! Ka atchilh tlat tawh che anih ber hi! Chuvangin min hnar lo mai teh, i duh lo chung chu inhual emaw thu intiamtir emaw ka phut lui bik run bawk lo ang, mahse pawnlama lenchhuah dun tih angrengte chu i hnial bik lem dawn em ni? Engtikah emaw chuan i rilru pawh i la thlak danglam ve maithei a sin," a han ti hram a.

TCelia chuan chhan ngaihna tak pawh a hre tawh lo. Tim chuan a cigaratte chu a paih a, Celia chu a hnaih sauh a, Celia erawh chu lehlam a hawi thung a, "Mipa dang tumah a tan an awm thei ngai lo ang, th chu a rilru luah bertu a ni si a, "tim i rilru tichiai suh ang che, kan inthianna hi tihchhiat ka duh lo a, ka ngaina em em che alawm" a ti ta sap ringawt a.

Tim rilru pawh chu a hlim ve deuh huai a, Celia biangah chuan a fawp zauh a, "Rose par kuhmumte an rawn par parh a, an rawn vul chhuah hunah meuh chuan i hnen atangin chhanna lawmawm deuhte pawh ka la dawng mahna le! Awle, vawiin chu Berkeley buttery lamah kan kal dawn em ni ang?" a han ti a.

Celia erawh chuan Tim sawmna chu a lo hnial a, Lyons Corner House ah Jan nen inhmuh an lo tum tawh si a, a thiannu tihlunghnur chu a duh huah lo.

Tichuan Office chu a chhuahsan a, a thiannu Jan chhun chaw eipui turin April thla ni eng mawi tak hnuaiah chuan a kal chhuak ta a. Tim rilru a tihnatsak avangin pawi a ti hle a, Tim chuan a hmangaih hle tih pawh a hria a, chuvang chuan chulai office a thawh reng pawh chu thil buaithlak a la ni leh thei dawn tih pawh a hre ta a ni.

A rilruin Guy chu a ngaihtuah reng a, lamlian chu a kan mek a, a rilru chu hmun dangg daihah a awm avanign a hawi chhuak lo reng reng a. Bus lo tlan ri bengchhen tak mai elh a veilam a taxi tlan ri chuan a ngaihtuahna chu a rawn lapeng a; mahse a chiai zo vek a, a dinglamah a an insasengdawn na a, a tlai ta tlat mai le! Motor mudguard chuan a taksa khawilai emaw a rawn khawih hman avang chuan laiah a tlu ta thlawp a. Motor kei laia han inhrut ri chiau tawk leh mi au chel chul chu a hre riai ruai a, a khaw hmun chu a thim zo vek a, nikhaw hre loin a awm zui ta a ni.

Accident a tawh hnu chulai vel buaizia chu hriat pawh a hre tawh hek lo. Traffice a jam a, police an tam hle bawk a, rei vak lo ah ambulance motor a lo thleng a, Celia chu zawnin ambulance ah chuan an zawn lut ta a. Tunge anih hriat tumin a bag chu police pakhat chuan an en a, an note buah chuan an ziak lut nghal a.

Mi pakhat hian police hnenah chuan, "A va han khawngaihthlak reuh em, a thi em ni?" a rawn ti a.

"A inhliam na deuh a ni."

"Hmeichhe hmeltha tak chu a nih kha."

"Engemaw a hriat a, khatia lamlian kawngkanna laia a awm reng le aw?"

"Khawiah nge an rhuai dawn?"

"St. Gabriel hospital-ah"

Nimin lawka an hawn thar St Gabrial hospital ah chuan Celia chu an dah lut ta anih chu! Chu damdawiin hotupa ber leh a neitu ber chu Doctor Guy Denver a ni.

[Ngaia]

SWEET SORROW 15
http://www.storyfb.com mizo story thar nitin dah ziah a ni e


Guy Denven chu a nupui pindanah chuan a va lut a. Frances chu sofa ah thuin a mithmul a lo hnawih dum malh malh a, a hnunglama a pasal pen ri a hriat pawh chuan a tih ngai chu a ti reng tho a. Lehhawi chuan lo chuan,"Eng nge i duh, Guy?" a lo ti a.

"I thawmhnaw manah pound 2500 an rawn bill che a, pawisa chu ka rawn pe dawn che mawle, a rang thei ang berin pe nghal la ka duh bawk. Ka hnenah an lo kal a, an sawi an sawi mai a, ka kham hle a ni," Guy chuan a ti a.

Frances chu a nui sak a, "He pindana i lo luh hian thu lawmawm lam i sawi ngai lo teh e," a lo ti a.

Guy chuan hriam hrak hian,"I leiba rulh reng mai hi ka tan chuan ninawm tak a nia," a ti hmak a.

Frances chuan a dar a san ak a, "Ka leiba rulhte chu i mawhphurhna alawm," a lo ti awlsam then a.

"I dawng tam tawk tawh teh e, Frances i duh tinreng mai hi i nei thei alawm le," guy chuan a ti ve ngat a.

"Ka tan i sum dehral chu i ui hle a ni maw?"

Guy chuan a nupui chu a en a, hetiang hmeichhia a lo hmangaih thei chu mak a inti tawh zawk a. Paul de Poiret hnena kal a tumte khan a rilru a keh chhiat phah lo chauh kha a ni a, mahse tunah chuan a thinlung mit chu tihvarin a awm tawh si a. Frances thatna chu pawnlang maiah chauh a ni a, belhchian tlak a ni hlawl si lo.

"Ka duh tak, Frances, i laka sum dehral ui hle a min ngai chu i tisual hle ang, ka sum lakluh enin chintawk deuh nei turin ka duh che a ni zawk. Hetianga leiba nei teuha khawsak chhunzawm zel i tum anih chuan khawsak dan hranga kan khawsak pawh a la tul ang. Hei hi ka tum reng pawh a ni lo a, mahse ka ngaihdan i zawm theih si loh chuan a thleng lo ang tih ka sawi thei lo," guy chuan a ti a.

"Oh, nang leh i ngaihdan ve mai mai... ka kham hluah hluah mai," Frances chuana ti ta bawrh bawrh a, a hmelah chuan mawina reng a lang tawh lo. Hmeichhe rapthlak tak a nihna chuan a hmelthatna chu a hliah hneh hle a ni.

Guy chu a inher ngut a, pindan chu chhuahsan tumin kawngkhar lam chu a pan a, pindan chhungte lah chu pangpar rim a nam rum rum a. A nupui chuan tlangval hnen atangin pangpar bawr tha tak tak a dawng fo reng a, chung tlangvalte chu Frances ngaisangtute an ni! Amah Frances lah chuan French perfume rim a nam rum rum a, a rim a nain a chak a, pindan chhung chu a luahkhat zo vek a.

Frances chuan a pasal chu duh tawh lo hle mahse a sum chu la it bawk si a. A han ko let leh a, "Khawiahnge i kal dawn?" a han ti a.

"Damdawi inah, min chelh khawtlai lul teh suh, Frances, ka tlai tawh nak alaiin," Guy chuan a ti a.

"Kan hah dun teh e," Frances chuan a'n ti ve ngial a.

Guy chuan a mitko a san ak a, "Ina awm ai chuan damdawi ina awm hian rilru a zangkai zawk daih," a ti ve ngat a.

Frances chu a diau duh bik lo, "Kan hlim lo anih chuan nangma thiam loh zawk a ni," a la ti talh a.

"Chu chu i ring chiah maw?" Guy-an a tih chuan Frances chu a zam leh deuh nge ni, a turkish cigaratte chu a phawrh a, tlawn khat chu phawiin a tankaina tur mi lo hmantir teh a ti ta a.

Guy ngaihdan a ni lo kher mai. A nupui hian tih thinur tum ranin a chelh khawtlai tih lah a hrereng si a. A lighter chu a phawrh a, a han hmet alh a, Frances chuan cigaratte chu a tankai a, a fawp hlat hlat a. Chutah a rawn dak chhuak leh a, "Tuilen hnua i lo kir leh atang kha chuan ka lakah pasal tha tak angin i lang tawh lo reng reng a ni," a han ti leh hram a.

Guy chu che miah loin a ding a,"Chulam chu kan sawi dun tulin ka ring lo," a ti hmak a.

"kha hmeichhia kha i la hmangaih rengin ka ring tlat a ni," Frances chuan a ti leh ta zel a.

Guy chuan inthunun zawh loh a hlauh avangin pindan atang chuan a chhuak ta daih a. Amah lo nghak rengtu car chu a pan thla a, Chauffeur chuan car chu Harley street lamah chuan a khalh ta a, St. Gabriel hospital lam panin a tlan ta par par zel a.

A chalah thlanfim a rawn bawl chhuak tiam tiam a, hetiang hrepa damchhung hun hmanral dawn tak chu a huphurh hle mai. Celia hnenah va kal ngawt mahse a rilru a la thlak bikin a ring si lo. A chal chu a dawm a, a rilruin Celia he lungngaihna chhummpui zing hian kian huna nei ve dawn nge kumkhuain a zing pik reng mai dawn? tiin a ngaihtuah a, a indawm kun ngaih reng a.

A hnaah lah chuan a buai thei em em a, chumi ni pawh chuan rilphir zai tur mi 2 an awm a, zai tur tenau dang pawh an awm nual bawk.

Damdawiin corridor var tak mai leh zau pui maiah chuan sister pakhat nen inzaina pindan lam chu an pan phei a; theatre kawngka bulah Guy chu a ding dat a, a kawrfual var chu a kilh tha mawlh mawlh a.

Theatre kawngkhar chu zimte hian a hawng a, a chhung chu a mahin a duh ang thlapa a cheibawl a ni a, tukverh a tamin a eng nuam iar iar kher mai.

Corridor ah chuan Wheel stretcher in damlo zai tur an rawn nawr a, chu damlo chu rikrum thila hmanhmawh taka zai ngai a ni a, a chunga mu chu kawmawlin an khuh a, a sirah nurse a kal avangin a kut chauh a lang thei a, Guy chuan,"Hei hi eng nge a awmzia?" a han ti a.

"A kiu zai a ngai a ni," sister chuan a ti vat a.


Stretcher chuan a awmna zawn a pelh chiah chuan a chunga mu chu Guy chuan a hmel a hmu ta a, Guy thin chu a thawng ta kher mai le~ chu hmel putu chu a hrechiang lutuk tlat~ A sam nalh tak darh niaihte chu duat taka a lo chulsak heuh heuh tawh kha a ni lo em ni? Celia ngei a ni. A han hmuh tirh phat atangin nikhua a hre hauh lo tih chu a hre nghal a, tuilen dawna car accident atanga a chhanchhuah lai ang chiah hmel kha a pu a, kha zan raphtlak tak kha a la theihnghilh thei ngai lo, "Celia' tiin a phun sap a.

Guy tan chuan chu Theatre chhung boruak chu a lum lampang hrat a ni ta.. Boruak lum reng vang chu a ni hauh lo, a thin a thawngin chu sergeon mi nunna tam tak lo chhan chhuak tawh thin pawh chu a zam tlat a ni.

Sister pawh chuan a rawn zui lut a. Zaina khuma nula mu chu a hmai adang lap a, Guy lah chuan a en ngawih ngawih mai a; a thinlung luahtu a hmeichhe hmangaih em em chu a kutah a awm ta si a. He thil hi engvanga thleng nge? A accident tawh dan chanchin chu kimchang taka hriat a duh a, a kiu chu eng ang chiaha hliam na nge a nih. Sister sawidanin enkawl that hle a nih loh chuan a ban chu a hmang leh thei tawh lo maithei a ni.

Dawhkan lam chu a pan phei a, Nurse in thelret kutkawr a pek chua bun a, mi a zai dawna a inthuamna famkim chu inbelin a hna chu a thawk tan ta a.

Chu inzaina tuartu tak zawk chu Guy a ni, doctor hna a thawh hnua thlaphanna a neihna hmasa ber pawh a la ni. Celia chu theatre atangin an lachhuak a, doctor dangte leh nurse te pawh chuan Guy awmdan chu mak an ti ve deuh rilru hle nain a thawh hah lutuk vangah an ngai ta ber hlawm a. Chumi nia midang zai tur la awmte pawh chu doctor dang kutah Guy chuan a dah a, chhunzawm leh thei chi a ni tawh lo.

Matron awmna pindanah Guy chu a thu chawl vang vang a, brandy tlem a in hlek a, amah ngei pawhin a awmdan chu pawi a ti a, a inzahpui hle bawk. Matron lah chu a lo felin amah ngaisangtu tak mai a lo ni a, "Sister phei chuan a fak teh che asin, vawiina i mi zai i ngunthluk leh i fimkhur thu hi ha hipin a sawi a, thiam pawh a ti hle che a ni," a han ti serh serh a.

Guy chuan chhang lem lo. A mi zai chanchn chu zawt ta daih a, Matron pawh chuan a hrilh theih chin chin chu a hrilh a. A mi zai hming chu Hammond a ni awm e, Bayswatera cheng a ni a, Cookspur street ah office pakhatah hna a thawk a, a ruaitupa Mr Madden pawh an phone tawh a, Mr Madden pawhin miss hammmond chu private room a lo dah tur leh a senso zawng zawng a rawn tum dawn thu a rawn sawi a.

Guy chu a tho hluai a, a thin chu a phut dawt dawt a, chupa chu lincoln a Celia thian hlui chu a ni ngei ang. Guy rilruah chuan thikna a lo lut a, Madden chun Celia enkawlna zawng zawng a tumsak dawn anih chuan Celia nena an inhmuh loh chhung mai khan an inkarah engemaw a lo awm hman a ni ngei ang.

Matron chuan,"La tho mai teh suh, Mr Denver" a han ti hram na a, Guy chuaan,"Ka tha deuh tawh e, ka chau deuh thut mai a nia," a ti a.

Matron chu a nui hak a, "I rilru tihah duh suh, theatre boruak hi midangte pawhin zawh loh chang an nei fo a nia," a lo ti dam thluam a.

"Khawi pindah nge ka damlo chu in dah?"

"Private room 14 ah."

"ka va kal ang e, sister hnenah khan naktuk lama tihdan turte ka va hrilh teh ang; he case hi ka ngaihven riau," Guy chuan a ti a.

Minute reilote hnuah private word no 14 ah chuan a awm a, Celia khum bulah chuan a ding a.

An pahnih chauh chuan an awmdun a ni a, damdawiin khum thir chhah tak mai nghet churh mai chunga nula mu chu a thlir vawng vawng a; chu nula chuan kawmawl a sin a, a hmai chu a dang bem a.

Chutah nula chu a rawn rum tiah tiah a, a ban veilam lah chu an tuam khawng bur mai si a. Guy chu a zuk kun hniam a, nula kut dinglam chu a la a, "Celia ka hmangaih ber," a ti thawp sat a. Chu nula a hmangaihna chu eng thil mah hian a dang zo tawh lo.

Celia chu a rawn meng diar diar a, a bul maia lo kun mek hmel a han hmuh chuan a mak a tihzia chu a hmelah a lang nghal a, "Oh... oh.. Guy!" a ti sap sap a.

Guy thin chu a phu rang hle a, Celia in a rawn hre thei nghal ringawt pawh chu a lawm a ni. A tawng ri erawh chu a hriat loh reng reng a, a hmui phun atang erawh chuan ama hming a rawn lam a ni. "I kianga hi ka awm reng e, ka bawihte," Guy chuan a lo ti vat a.

Celia chu a rawn harh ve tial tial a, a tir chuan a na chu a rawn hre hmasa ber a, chutah a kianga awm chu tunge tih a hre leh a, accident a tawh dan thleng chuan a rilruin a han chhui let a, nikhaw hre lo a a awm hnu khan damdawi inah an dah chu a ni phawt mai a, mahse guy chu engvanga helaia lo awm ve nge a nih le? a lo awm ve chhan chu hre lo mahse a hmel a han hmuh ringawtpawh chu a lawm tawk a tling a ni, "Guy" a han ti leh sap a.

"I vanduai mang e aw, i lainatawm reuh kher mai" Guychuan a lo ti vat a.

Celia rilru chu a harhfim tial tial a, "Pawi ka ti lo, ka tha leh mai ang. Mahse helaia i lo awm vena chhan hi ka hre lo a ni, engtin nge hriat pawh i hriat ve?" a ti a.

"duh tak, hei hi ka damdawiin alawm, keimah ngeiin ka zai bawk che a sin," Guy chuan a ti vat a.

Celia chuan angaihna hriat loh hmel zetin a en reng a, chutah, "nangmah.." a han ti sap ringawt a, chutah, "Nangmah..." a han ti sap ringawt a.

"Aw... mak takin ka hnenah a rawn hruai thleng che a ni, pathian hnenah lawmthu awm rawh se, i kiupawh a thain ka ring, i hmang leh thei thuai ang," Guy chuan a ti leh a.

"Chuti chu.. tum hnih lai min zai ta anih chu le... tunah chuan nangmah hriatrengna turin ser dang ka nei leh dawn ta anih chu.. Guy!" Celia chuan a ti ta hau a.

"Ni e, ser dang pakhat!" guy chuan a ti ve mai a.

Celia mittui chu a rawn luang ngiai ngiai a, a na tawrh aimahin a rilru a na a ni. Guy pawh chuan en hreawm a ti a, a rawmawl chu a phawrh a, Celia mittui chu a hruksak heuh heuh a. "I tha leh mai ang, na i ti viau em?" a ti a.

"Na lutuk lo e."

"nurse kan ko ang e, a jection dawn che nia, i na tawrh pawh a ziaawm huai mai ang."

Celia chuan nuih hram an tum ve na a, mahse a hlawhchham tlat mai. Guy vek chuan, "Ka enkawl dawn che alawm Celia, i tana ka tih theih sang ber chu ka ti zel ang, ka hnena an rawn thlen che hi Pathian khawngaihna vang chauh zawk ani," a han ti a.

"Oh, Guy, chu chu ka duhdan chiah bawk a ni alawm, min la hmangaih ve reng em ni?"

"Khawvel thildang zawng ai pawhin ka hmangaih che."

"Chuvang tak chuan kei pawhin ka hmangaih che, Guy!"

"Hetiang ka han hmu ta mai che hi mak ka tiin ka thin pawh a thawng hle a sin."

"I fimkhur hle tur a ni ang Guy, i nihna hi hrereng ang che."

"Min la ngaihtuah reng mai a ni maw?"

"Midang tumah ka ngaihtuah thei hleinem."

"I va duhawm thin em, Celia! Tuna ka pek theih hauh loh hlimna sang ber pek che hi ka va duh tak em, Celia."

Celia chu a khur der der a, "Hlimna chu pek ka ni tawh reng alawm, natna te accident te hi rapthlak hle mahse ka tan chuan a hlu a ni, nang ka hmuh theina che a ni si a," tham deuh chel chuan a han ti a.

Guy chuan han pawm vawng vawng mai hi a duh a, chutihlai tak chuan pen ri a hre ta a. Celia sawi chu a dik a ni, a fimkhur tur a ni ang. A tih tur reng anih bakah a nunkhua tihminghliautu a ni thei a, chutah Frances a la awm bawk a, heng thil pathumte hi Celia nena an inkarah a inzep tlat reng si a.

Nurse chu pindanah chuan a lo lut zan zan a, doctor denver a hmun velah a ding chat a, "oh, Mr Denver, i lo awm ve reng a ni maw? MIss Hammond hmu duhtu tlangval pakhat a awm a," a rawn ti a.

"Tim a nih chu, "Celia chuan a ti sap a, "Ka la hmu duh rih lo, ka la chau em mai," a han ti zui sap a.

Guy chuan nurse lam chu a hawi a, "Chu thu chu va hrilh chhawng ta rih che," a li ti ve nghal zat a.

Nurse chuan Guy chu a en a, a mitmeng chu a buai deuh riau a. "Thu kam hnih khat lek ka hrilh thei ang che ngem ka pu?" a han ti a.

[Ngaia]

SWEET SORROW 16
www.storyfb.com mizo story thar nitin dah ziah a ni e


"Teh reng mai," guy chuan a ti a, hun reilote chu nurse nen chuan an han ding fal hlek a, chutah Guy chuan Celia chu a en leh a, aw pangngai taka biak tumin, "Naktuk lamah ka rawn hmu leh ang che MIss Hammond, Nurse a lo kal ang a, i muthilh theih nan a rawn jection dawn che nia," a ti a.

An inkohnate pawh tihdanglam a ngai ve tlat, "Ka lawm e, doctor, dam takin le" Celia chuan a ti a. Guy chhuak tur chu a thlir zui reng a.

Corridor ah nurse chuan doctor denver chu a bia a, miss hammond rawn kan tum tlangval chu hnar haw a huphurh zia leh miss hammond chu hmuh a tum luih tlat thute a hrilh ta a, chuvangin Mrs Denver chu he case buaipuitu anihna anga amah ngeiin hrilh mai turin a ngen a. Guy pawh chuan, "A dik alawm, waiting roomah chuan ka zuk kal ang e, Mr Madden chu keiman ngeiin ka zuk hrilh ang e," a ti ve ta a.

Waiting room a guy Denver a zuk luh chuan Timothy Madden chu rilrua vei nei tih hriat zet hian a lo vei sek mai a, a awm hle hle thei lo tih pawh a chetdan hmangah chuan alang reng a. Guy lo lut a hmuh chuan a ding chawt a, hlim hmel pu takin, "Miss Hammond enkawltu doctor i ni tiraw, ka pu?" a lo ti nghat vat a.

"Aw ni e, darkar tlemte kaltaah khan ka zai alawm," guy chuan a ti thuai a.

"A tha maw? Na a ti viau em?"

"Tunah chuan nachhawknain an jection mek ang, chu chuan a na tuar pawh a tiziaawm ngei ang."

Timothy Madden hmel chu hlim ta sawtin a lang a, "Pathian hi chu a tha a ni, ka va lawm em! Tunah chuan thawk pangngaiin ka thaw ve thei tawh ang. Ka hming chu Tim Madden' a nia, Miss Hammond nen hian inthian tha tak kan ni a, ka office ah thawk nghe nghe a," a ti zung zung a.

Guy pawh chuan, "Guy Denver ka ni e" a han ti ve a

"Ka sawi duh chu.." tim chuan a han ti a, a tawp leh chawt a, doctor chu a en a,"Guy..!" a ti leh sap a.

"Chu chu ka hming a ni," Guy chuan a ti leh sap a.

"I ni thei lo ang.. nang hi doctor... a awmpui.." Tim chuan a ti bah ta nuaih a.

"Doctor a awmpui a?"

"Tuilen laia Celia-in in pakhata a awm pui doctor kha!" mak ti hmel zetin Tim chuan a ti ta hau mai a.

"Aw, khapa kha ka ni e," Guy chuan a ti ve hmiah a.

"Oh..!"

An han ngawi dun vang vang, Guy chuan a rilruin mipa sual tak chu anih dawn loh hi, a thusawi duhdan pawh a tlang hrak mai.. Celia hi zawng a duh ve hle anih dawn hi, tiin a ngaihtuah a.

Tim pawh chuan a ngaihtuahna chu a lo kawm ve mek bawk a, hepa hi Celia mipa hmangaih chu a lo nih dawn hi! MIpa.. Celia nena kan inkara ding tlat chu.. A fin hmelin a hmel lah chu a tha si a, hrep tak chuan! Celia hmangaihna chelhbet tur hian eng nge dikna a neih? tiin a lo ngaihtuah ve mek bawk a.

Guy chu a rawn tawng chhuak hmasa a, "Miss Hammond chuan i hnenah ka chanchin a sawi chhuak a ni maw?" tin a zawt ta phawng a.

"Aw.." Tim chuan muang raih hian a ti a.

Guy rilru chu a buai deuh nak mai, he tlangval hnenah hian Celia chuan eng nge a lo hrilh chiah a hre si lo. He tlangval duhawm tak hian Celia chu nupui atan a sawm ngei awm si a, nitin an inhmuin, zanteh pawh an leng chhuak dun thei awm si a, engtikniah emaw chuan Celia hian a la nei ngei ang le! Guy rilru chu a na hle a, a hmeichhe hmangaih ber tel lo chuan a nun chu hlawhtlingin chanvo sang tak pawh nei mahse hlimna reng a awm thei dawn lo a ni tih pawh a hre chiang tial tial mai chu a ni si a.

Tim chu a en a, "Ka buai em a, min lo hrethiam hram la; Mr Madden, i hriat atana ka duh chu miss Hammond chu dinhmun hlauhawmah a awm tawh lo a, rilru hahna tur a awm tawh lo tih hi," a han ti a.

Tim pawhin chu doctor chu thil tam tak sawipui duh rilru hle mahse chelh chu a tum ta bik lo a, "Engtikah nge Miss Hammond chu ka hmuh theih ang?" a ti ta zawk a.

"Naktukah, zanin lamah chuan tumah hmu rih lo se thain ka ring," Guy chuan a ti ve mai a.

Tim chuan a lukhum leh nihlip chu a la a,"A dik alawm, miss hammond hnenah chuan naktukah ka rawn hmu ang tih min lo hrilhsak dawn nia, Nurse hnenah a pangpar tur pawh ka dah kha, vawiin tlaiah theirahte ka rawn thawn ang e," a ti ve ta a.

"A tan chuan a lawmawm ngawt ang chu," guy chuan a han ti ve sap a.

"Anih leh ka kal tawh mai ang e, i chungah ka lawm takzet a ni, Mr Denver," tih pahin hmanhmawh takin Tim chu a chhuak ta nghal a.

Guy chu a dinna ngaiah a la ding reng a, a ngui rawih mai a, engvanga kha tlangval dinhmun anga ding thei lo kha nge ka nih? Oh, Celia ka duhtak Celia ka ta i ni ve thei ngai dawn lo anih awm hi tiin a inngaihtuah ta hial a.

PIndan a chhuhsan hma chuan hmeichhe pakhat hi thaw hiam hiam chung hian a lo lut a, coat nalh lo tak leh pawnfen pawh nalh lo tak hian a rawn inthuam a; felt hat lukhum a khum a, a coat nghawng chu sahmul nem chi, man tlawm tak si hi a ni a, "Doctor te zinga pakhat i ni tiraw? MIss Hammond i hria em? A tha em? A chanchin min rawn hrilh a chinah awmngaihna pawh ka hre tawh lo!" a rawn ti hlawp hlawp a.

A thusawi tawpah chuan a rawmawlin a hmui a hru a, a mit lah chu tap hrep tih hriat fe hian a sen urh bawk a, a mittui avangin a hmai pawh a val riak a, a hnarte chu a tle hliau mai a.

Celia lainat hmel tak a put atangin Guy chuan tunge a nih chu a hre nghal a, Celia best friend, Jan. A hmuh tirh atangin a ngaina ve nghal mai reng a, zaidam tak chuan a han bia a, "Miss Leigt i ni tiraw?" a ti ve nghal hlawl mai a.

Jan chuan mak ti hmel tak hian, "Engtin nge i hriat?" a lo ti let ve thung a.

"I chanchin hi ka hre tam viau tawh a sin"

"tunge i nih a, ka pu?"

"Helaia sergeon pakhat hi ka ni a, darkar tlemte kaltaah khan miss hammond ban ka zai a ni."

Jan chuan a hming pawh zawh leh zui nachang pawh a hre tawh lo. Guy banah chuan a vuan chawt a, "Oh my god!" a ti ta hluai ringawt a.

"a ban pawh a hmang leh thei thuai ang," tiin Guy chuan a hrilh a.

"A ban ni lo pem dang hliamte a nei em?

"Khawilai laiah emaw a duk deuh tih mai loh chu hliam dang a nei lo."

"A lu a khawih tel lo maw?"

"Khawih tel lo e, a hmai vel pawh vanneihthlak takin a him pial a ni. Kha taxi khan a ban chauh a khawih a ni."

Jan chu a insut hlap a, "Rethei reuh tak chuan le! Doctor, he nau khawngaihthlak duhawmzia hi i hre lo anih kha!" a han ti leh chiam ringawt a.

"Ka hria sin," Guyh chuan a ti mai a. A hrechiang lutuk tlat zawk a ni.

"Ka hnenah a cheng ve a," tih pahin Jan chuan a hnar chu a han tuai pah zauh a.

Guy chuan, "Va hmu ta che, kal rawh, a pindanah ka va hruai ang che," a ti ta a.

"Public ward ah em ni a awm?"

"A tirah chuan ni e, mahse zai zawh hnuah chuan Mr Madden rawn ngenna angin Private ward ah dah ani."

"E, kha tlangval duhawm tak kha anih dawn chu," Jan chuan a ti leh hluai a. A aw phawi chu lancanshire awphawi chiah ani. "Celia thiantha neih ve chhun a ni tlat si a," a han ti zui leh a.

Guy thinglungah chuan thikna a lo lut zawk a, mahse a insum thei hram a,"A thian tha tak anih ngei chu ka ring," a han ti a, Room no 14 an thlen chuan Guy chu a ding a, "Va lut rawh le, mahse awm rei lo la, a chauh phah ang e," a ti a.

"Va hmuh zawk ka duh mai a nia, ka biak hma loh chuan zaninah pawh ka muhil theiin ka ring lo," Jan chuan a ti niah niah a.

"I rilru timangang duh suh, Miss Leigt, va lut la, nangmah ngeiin i va hmu dawn alawm," guy chuan a ti a.

Jan chuan tim deuh takin kawngkhar herhhawnna chu a vuan a, Guy lam chu a rawn leh rih a, "Ka chungah i ngilnei tak zet a ni, tunge i hming?" a ti ta bauh a.

"Guy denver," tiin a hming chu a hrilh ta a, Jan-in a biak leh hma chuan a kal ta daih a.

Jan chu a ka ta hau mai a, Guy kal ta chu a en zui vawng vawng, "Guy Denver," a ti sap a.

Guy Denver maw lo ni le! Kha doctor, Celia-in a hmangaih em em kha! Amah avang hian Vincent Street pawh an chhuahsan kha a ni si a, tunah lah an tlansan tak enkawlna hnuaiah a awm leh lawi si! Denver-a hospital ah ngei Celia chu an dah lo ni rengin, Denver ngeiin a lo enkawl anih chu, Jan chuan thil awmdan chu a duh lo tih hriat zetin a lu a thingta nar nar a.

Chutah dingdihlipin Celia pindanah chuan a lut ta a, zinga hnathawk tura an inthen hma kha chuan an hlim dun hle kha a ni a, tunah lah Celia chu damdawiin khumah puanvar thianghlim tak phah chungah a mu bem a, damdawi chuan hna a rawn thawk tan tawh in, a na pawh ziaawm huaiin a hre tawh a, a khum sira pen ri niawm taka'n hriat chuan a lo meng a, "Guy" a han ti thla ngawt a.

Jan chuan nuam lo a ti in a hrilhhai ngei mai, chu hming mawlh chu! Celia lahin a han lam ri leh ta bawk si, "Jan ka nia, ka beramnote," a ti ta vat a.

"Hello, Jan, Karei!"

"I tha maw, ka varaknote?"

"Aw, ka tha e."

"Engvang hetiang thil hi tuar teh hrep nge i nih le?"

"Ka at vang ani ber mai"

"Ka rawn be ta che a, ka rilru pawh a nuam ta huai mai, zanin chu ka khua a har dawn mang e, ni engemawzat lai chu i awm awm si a."

"Doctor chuan kar khat emaw kar hnih emaw ka awm a ring a."

"Hmm, doctor kha maw, eh hetianga i awm hi a buai phah ve fu lo maw?" Jan chuan a han ti a.

"OH, Jan i hria a ni maw?" Celia chuan a ti ta a.

"Hetah a awm ve a ni lawm ni? Tak taka, ka rawn hmu alawm," tiin Jan chuan a hrilh ta a.

"A fel i ring ang chu tiraw?"

"A fel viauin ka ring, mahse chu chuan engmah a thlen lo ang che."

"Tun ang hunahte chuan min zilh vak teh suh, Jan.. hmuh zin ka tum lo, ka hlim theihna hi min duhpui phawt mai teh phawt."

"Ka theih ang a ranga rawn lakchhuah che ka tum ang."

"A tha alawm."

"Ekhai!, hei khawilam pangpar nge, tu rawn thawn che nge?" tih pahin Jan chuan carnatim par sendang tawnkhawm chu a han kawk a.

"Tim-an min rawn thawh a ni," Celia chuan a ti a.

"Ka ring reng a, ngaihtuahna thluak hmang thiam tak a ni ve reng a ni, "Jan chuan a han ti ve zaih a.

Celia chuan a chhang duh lem lo a, tim ngaihtuah chu a duh lo. Minute tam pawh la liam loa a bula Guy chu a mitthlain a la hmu reng a, chu ngei chu mumang lamah pawh hmuh a duh ber chu a ni. A maimitchhing a, mutchhuakin a rawn zem ta chiai chiai a.

Jan chu a ding a, Celia chu a en vang vang a, a hmaite chu a dang lep a, "Ka beramnote khawngaihthlak," a han ti sap a. A zuk kun hniam a, "Mangtha rih phawt aw, naktukah ka lo kal leh ang e, lo intiharh tum thuai thuai la, chu chu a tha hmasa phawt ang; i tel lo chuan ka khua a har teh mai a nia," a han ti leh diam diam a.

Tichuan pidan chu a chhuahsan ta a, corridor thui tak chu a zawh chhuak a, kawtthlerah chuan a chuang chhuak ta a.

[Ngaia]

SWEET SORROW 17

Private ward 14 a nula damlo awm leh doctor Denver te pahnih january thlaa tuilian avanga intea an awm chungchang hrechhuaktu hmasa ber chu zan duty nurse pakhat a ni a.

Chu nurse chu a hriatrengna a thain mi tam zawk chuan tuilen hun lai bawr vela chanchinbua Mr Denver awmpui hmeichhia kha Celia Hammond hi a ni tih pawh an lo hre tawh mang lo a. Mahse chu nurse hriatna nei tha tak chuan al o la hrerengin a lei chu veng zo ta hek lo, St Gabriel hospital ah chuan chu chuanchin chu a khat ta thuai mai reng a! Mi sawi nuam tih zawng tak mai a lo ni ve nen, chutah Celia hammond chu damdawi ina Mr Denver enkawlna hnuaiah a han awm ta leh zel si chuan ti ti a titam kher mai.

Chutiang mi sawisepnain Celia beng a thlen hma chuan Celia chu St Gabriel Hospital ah chuan ni 10 zet a awm hman tawh a. Guy chuan nitin zantin a rawn tlawh ziah a, a ban chu dressing pawh angai hran lo, chawlhkar 6 zet tuam khawng tlat tur a ni mai a. a chang chuan Guy chu Nurse awm laite pawhin a lo lut a, a changin sister nen an lo kal dun a, mahse amah maia a lo kal chu tam zawk a ni. Celia kiangah chuan thuin a la hmangiahziate pawh a hrilh thin a ni.

Hmangaih tih tawngkam chu Celia chuan Tim hnen atang pawhin a dawng reng tho mai, mahse, a ngaihdan leh a lo dawnsawn dan erawh chu a dang daih thung. Tim pawh chuan nitin a rawn kanin, Guy tih ve ngam miah loh chu CElia tan chuan a rawn tihsak thin a, mahse Guy chuan a hmangaih tawk loh vang a ni lo tih a hrechiang a, a hmagnaihna chu Guy thinlungah a inphum reng tho. Celia pindante chu Tim chuan pangparin a vultir chuk a, ei tur tuihnai tinreng leh chanchinbu chhiar turte a rawn kensak reng bawk a, Celia tan chuan sum pawh a khawhral hnem hle tawh a ni.

Celia chu chuti tak a rawn ngaihsaktu tim chu a khawngaih rilru ve thin hle a, mahse a thinlung luah rengtu Guy chu a awm tawh miau si. Chu damdawiina a awm chhung chuan Guy hmel a hmuh fo theih avangin a hlim hle a ni.

(clickve tho ula aw, tawi viau mahse hihihi)

Mahsela, a hlimna chuan a daih rei ta lo em mai pawh a, nitina a mutna khum rawn siam ziahtu Nurse training lai lo kal thin chuan lungngaihna a rawn thlen ta a ni. Chu nurse chuan, "I chanchin hi ka lo phurpui hle asin, Miss Hammond," a rawn ti chhuak ta hlawl mai a.

Celia chu a nui mai a, chu nula thusawi awmzia chu a man pha lo reng reng, "Engvang chuan maw?" a lo ti hau a.

"Tuilen chhunga Mr Denver nena in awmdan kha mawle," chu nulain a han tih takah meuh chuan Celia nui hmel chu a tawp chawtin a thin chu a phu rang ta hle a, a biangte chu a sa hat hat a. Chu nula lah chuan a sawi zawm barh barh zel mai si a, "Kan vai hian Mr Denver hi kan ngaina a, kan zah em em vek a, a hmel lah hi a tha nasa mai si a. Hollywood-a Mr Lesley Howard-a nen pawh an inang hlein ka hria a sin! nang, tha i tih zawng ve em? Ani nen chauha mi rauhsan inah han awmdun chu a nuam awm mang e, a damdawiin ngeia hetia dah i han ni leh hi i hlimin i phur viau lo maw?" a ti ta zel mai a.

Celia chu a ngawi ran ringawt a, chhan ngaihna pawh a hre lo. He damdawi inah hian chu thu chu a khat a ni awm si a le! Mitinin an sawi sep sep ang a, chanchinbu lah khan khati khawp khan a nun a tikhawlo tawh a, tuna hetianga hmingchhiatna a han tawng leh hi a tan pawh tuar zawh rual a ni tawh lo ang, Guy nupui beng pawh a thleng leh tawh hial pek ang chu! Chuvangin St Gabriel Hospital hi a chhuahsan hma poh leh a tha a ni mai.

Chumi ni chuan Celia chu a hlim thei mawlh lo a, a ban chu a dam hle tawh a, hnathawk tur erawh chuan a la inzuam hauh lo. Mahse, boarding house ah a chawl hahdam rih mai tur alawm. Tim phei chuan chawlh hmanga tuipui kam lama zin chhuak turin a ngen a, a senso chu a tumsak hreh loh thu thlengin a hrilh a, Celia erawh chuan a tum lem chuang lo. A dam chian var hma chu damdawiina awm chu a duhdan a ni a, Guy a hmuh theihna anih avanign, chu Nurse-in chutiang thu a han sawi takah chuan a rilru a buai ta hle a, zanin ngeiah Guy chu hrilh phawt mai a duh ta a.

Chumi zan chuan a dan pangngaiin Guy chuan damlo chu a rawn tlawh kual a, Celia pindan chu luh hnuhnun berah a neih thin a, Celia hmel ngui tak mai a han hmuh chuan a ngaih a tha lo hle a, khum bulah chuan dingin Celia kut chu lak pahin, "Engtizia nge ni ta, Celia? eng thil nge i ngaihtuah le?" a ti ta phawng mai a.

Celia chu a dak chhuak a, a hmel chu a ngui riai a, "He hmun hi ka chhuahsan phawt a ngai ta a ni, Guy," a ti sap a.

"Engvangin maw, duhtak? Nuam i ti lo em ni? nge thil fel lo a awm em ni zawk?"

"Mite min sawidan hi i hre lo a ni, Guy"

Guy chuan Celia kut a chelh lai chu a thlah a, a hriat chu a lo hre ve namueh mai, mahse nurse hote atanga a hriat ni loin a nupui hnen atangin a ni tlat. Tukkin zinga a hnathawk tur chhuah hmain Frances nen an intawng fe a ni. Frances chuan, "Tuilen chhunga i hmeichhe hlut em em mai lah chu St Gabriel hospital ah a lo awm ve reng niin! I hnathawk tur hetia taka i phur pawh hi thilmak a lo ni hran lo e," a tih khum salh salh a.

Guy chuan chu thu chu khawilam atanga a hriat nge tih a zawt lui ve ngat a, Frances lah chuan doctor dangte ka atanga a hriat thuin a chhang ve mai a. Chutiang vel ngaihtuah chuan a han ngawi deuh a, chutah Celia chu a en a, "Oh, God... heng mi tenawmho hian min ngaihthah thei hlawl lo em ni?" a han ti thawp sat a.

Celia chu a thaw halh a, "An thei ngai lo ang, kan hming hi a khat reng mai dawn anih hi," beidawng hmel fe hian a han ti a. Chutah mangang hmel takin, "Engtinge ka ka tih tak ang, Guy? dinhmun rapthlak takah kan ding ta a ni," a han ti leh a, a aw ah chuan a beidawn hmel ngawih ngawih a.

Guy chu chhuatlaiah chuan a ipte zen chungin a vei a vei a, a ni pawh a hlim bik lo. A dinhmun chu a han ngaihtuah thin a, chu nula chu a hnena hruaibo daih mai a duh a, mahse Celia chuan a duh hauh dawn lo tih lah a hresa reng a. Frances chungah a tih tur ang chu ti tawh mahse a beidawng a ni. Engpawhnise, chu nula hmingchhiatna tur chu a duh bik hauh lo, kawng engemaw a dap a ngai a ni.

Celia chuan, "A chang hi chuan ka tuar zo dawnin ka inhre thin lo hial a ni, "a han ti a, a chhing diar diar a.

Guy chuan,"Chutiang lam chu sawi teh suh Celia, chakna ka neih ve theih nan min puih a tul ani. Mihring ve mai ka nih hi duhtak, khawngaihin min tanpui zawk ang che. Keimah ang bawka i chak loh ve hlauh chuan an tih ang angin kan awm mai ang. MIpa tan chuan a tuar theih viau zel a sin, mahse, i hlim lo hmel hmuh hi ka thil hreh ber a ni," a han ti a.

Celia rilru pawh a insual ve nasa kher mai a, Guy chu a hmangaih alawm. Mahse, a hnar a tul tlat si, a huaisenna chu a han sawm khawm a, a han meng a, "a tha leh vek mai ang, min ngaihtuah reng reng suh Guy" a han ti sap a.

Guy chuan Celia kut chu a vuan leh a, "Hmeichhia zawng zawng zingah hian nang aia thlan ka nei hauh lo, ka damchhung hian ka rilruah i thi tawh ngai lo vang! chu chu hrereng ang che," a han ti a.

"Kei pawhin ka damchhungin ka hmangaih reng ang che, Guy" celia chuan a ti ve sap.

"Ni lo, duhtak i tan a tha lo takzet a ni."

"Nang ka neih theih dawn loh che chuan pasal ka nei lo hlen mai ang."

"chu chu ka duhzawng a ni lo,Celia. Tlangval fel tak Madden pawh a awm kha... kha tlangval khan neih che a duh em em alawm. Ka enkawl zel ang che, Pathian hming ka ngen a che, a tan hun remchang i siam sak tur a ni."

Celia chu a thaw halh a, "Chu thil chu ti turin min duh ania maw, Guy?" a ti ta a.

"Chu phei chu min zawt duh lem suh, " guy chuan a ti a, a rilru natzia chu a hmelah pawh a lang reng a. "I tana tha tur nia ka rin avangin ka han sawi ve mai a ni e, Celia, i la nuapang si a, pasal nei lo ringawta i awm chu tha ka ti lo. I hma hun tha tam tak a la awm a, nangmah duh em em tu Madden te ang an lo awm bawk si a, oh, hrep taka" Guy chuan a ti chuai raih a. Celia kut chu a thlah a, a rawmawl aphawrh a, a chal hnawng chap chu a hru phawk phawk a.

Celia mangang lutuk chuan, "Guy kalbo mai teh.. min rawn hmu tawh lo mai zawk la a tha ang," a ti ta ngawt a.

"Kal bo tura min ngen chuan ka kalbo mai a ni ang chu"

"A tul tih chu i hriat ve tho kha, Guy"

"Ni e, ka hria alawm."

"Kei pawhin he hmun hi ka chhuahsan phawt a tul a ni."

"I la tha chiang si lo a."

"nursing home lamah ka insawn mai ang, Tim-an min tanpui duhin ka ring. Hmingchhiatna thleng lo a thil eng emaw ka tih chu a tul miau si a ni."

Guy chuan a chhang hauh lo a, bengngawng ang maiin a din ngai chuan a ding reng a. Celia thusawi chu hreawm pawhin a lang lo. A tawpah chuan, "A tha e, i kal chu a tha zawk tak ang," a ti ve ta a.

Chutihlai tak chuan kawngkhar chu an rawn kik ta a. Celia chuan a chakna sawmkhawmin pangngai taka lan tum hian, "Lo lut rawh, " a han ti a.

Nurse pakhat chu a rawn dak a, "Inleng i nei dawn a nia, Miss Hammond," tiin ar awn hrilh a.

Chutah pindan chhungah chuan Timothy Madden chu a rawn lut ta a, pangpar bawr leh chocolate a rawn pawm am a. Tim leh Guy chu an han in en vang vang a. Guy chuan, "Awle, ka chhuahsan tawh mai ang che, Miss Hammond, i that deuh tawh avangin ka lawm ngawt mai ka rawn hmuh leh che pawh tulin ka ring tawh lo, tin, i ban kha chu thla khat dang them la dawh rih a that ka ring bawk. Ka kalbovin ka ring deuh a, chuvangin nangmah lo enkawltu turin doctor dang ka kan hrilh ang e, a tuamnate kha phelh a ngaih dawn avangin," a ti ta a.

"Awle, ka lawm khawp mai," Celia pawh chuan ahan ti ve sap a, a dangte chu ro hulh hian a hre ta mai a.

Guy chuan khuma nula mu bam chu en pawh a en nawn leh ngam tawh lo, a taksa leh rilru a thunun theih lai chu chuhin a chhuak ta vat a. A chhuah pah chuan kawngka chu a khar zui hmak a.

Tim chuan Celia khum bul chu a rawn hnaih ve thung a, "Kan nau damlo chuan chocolate te a ei duh ang emaw chu?" tiin a fiam hmasa a.

Celia chuan a chhang thei ta mai tlat lo, a chhing sar sar a, a inpetruh fat bawk a. Tim chuan lungnilo zetin Celia chu a en a, chu nula laka thinur phei zawng a ni hauh lo. Chu nula rilru tihreawmtu sergeon pa kha a hua a ni. Hrep tak chuan pangpar bawr leh chocolate bawm chu khumah chuan a dah a, "Lo ngaithla teh Celia, he hmun hi i chhuahsan a hun tawh a ni; eng ang pawhin hnial mahla, ka pawisa tawh lo, brighton-ah emaw, eastbourn ah emaw ka kaltir reng reng ang che. Ka car i hmang mai ang a, chawlhkar engemawti chhung tal chawlh hmang ang che, nangmah enkawl turin Jan pawh ka ngen ang a, a hruai mai ang che," a ti ta a.

Celia chuan a la chhang thei chuang lo; Guy chauh lo chu ngaithuahpawh a nei thei lo. Tunah lah a kalbosan dawn ta lehnghal a, inthlahna thu pawh sawi lo leh vawikhat te pawh fawp loin a kalbo ta si a! Tah hawm hawm mai hi a duh tawh a, mahse mittui tla tur pawh a nei lo , mittui tlakna piah, thinlung na lutuk lamah a cheng zawk ani. Chutah a rawn meng a, a mitmenga tuarna lo lang chuan Tim rilru chu a khawih hle a, "celia, hetianga awm tur a ni lo, eng nge a sawtna awm? KHa doctor kha i hmangaih tih chu ka hria, mahse i nun tikhawlotu mai chauh a ni, chuvangin helai hmun hi chhuahsan phawt turin ka duh che a ni e, ka thusawi chu ring mai teh, i kal chhuah hi i tan leh a tan a tha zawk lo em ni?" a ti ta charh charh a.

Celia pawh chuan, "A tha zawk tih chu ka hria alawm. Tim, ama hmingmawina humhim zel nan pawh chu chu a tha a ni. Tunah phei chuan he hmunah hian kan chungchangah sawi sep sep a awm tawh bawk si a, a nupuiin a hre ve tawh lehgnhal," a han ti ve niah niah a.

"chuti anih chuan naktukah ka rawn hruai ang che," Tim chuan a ti a.

"keimah avanga i sum tam tak i sen ral ve zel hi ka duh l oani, Tim."

Tim chuan fiamthu deuh hian, "Sum lampang i sawi rik leh chuan i khum atang hian ka hnuk thla che ang a tukverhah ka theh chhuak daih ang che," a han ti a.

Celia chu a nui ve sak na a, tahin a rawn zui a, "Chutiang chuan ti la chuan ka duhdan chiah a ni asin... ka tan damin awmzia a nei lo, Tim! Aw, Taxi khan min lo chilhlum law law zawk se.. ni lo Tim, thu tha lo deuh ka sawi a ni.... mahs he thil hi ka tuarthei ngang lo ani," a han ti a, a mittui chu a far zawih zaiwh a.

Tim erawh chuan thlem pawh a tum chuang lo, a duhtawkin tap sela a ziaawm zawkin ka ring a ni.

Chutah Celia rilru sosang tak pawh chu a daih leh ta deuh a. Tim lam chu a hawi a, "Pawi ka ti ngawt mai tim, ka chungah i that tehlul nen keima dinhmun chauh ka ngaihtuah vang a ni," inthiam lo hmel tak chuan a rawn ti leh a.

"min nei mai la thain ka ring a ni, Celia chu chuan he i tuarna hi a chhawk thei mai ang che," Tim chuan a ti a.

Celia rilru chu a insual buai a ni ber ta mai, Tim neih chu a tha maithei e, Guy pawhin a sawi kha maw!

A ngawih rei em avanign Tim vek chuan, "Ka nawr lutuk che pawh a ni maithei e, mahse hepa nen hian mi sawi sep in kai si a, nang nen kan inhual tih miin an hriat chuan Mr Denver tan pawh a him thlak hle dawn asin, a hmingchhiat i hlau hle si a," thiam tak chuan a ti leh dap dap a.

Tim chu a fing kher mai, a sawi chu dik pawh a dik ngei ang le, miin Tim nen an inhual tih an hriat chuan an sawi an sawi hauh lo a. Frances lahin a pasal chu chungchang thuah a dem chhuah fo tawh bik lo bawk ang.

"A tha e, min nei duh i nih chuan ka nei ang che. Mahse, i a a ni ngei ang, mipa dang ka hmangaih tih i hre si a, chuti chunga min nei duh tho i nih erawh chuan i mi sawmna chu ka pawm ang e," a ti ve ta a.

Tim hmel chu a sen deuh tan a, a rilru chu a nuam chiah bik chuang lo. Mahse, chu nula chu a lo hmangaih ve si a, dinhmun chhiat lai denchhen ang hrima remchang lo zawn ve chhen chu a inthiam chiah bik lo. Chutiang ti turin mi rilru sual tak pawh a ni bawk lo. celia kut chu a la a, "Duhtak, i tan ninawmin ka awm lo ang, i rilrua min duh tak takna i neih hma loh chuan pawnlang taka fawh tih loh phei chu, ka fawp runthlak hauh lo ang che, inhual rih phawt ila a tha tawk viau alawm," a ti dam duam a.

Celia chu a thaw ta huai a, "Ni e, chu chu ka duhdan tak ani, a ti a, Tim pawh chuan a chhuahsan ta rih a.

[Ngaia]

SWEET SORROW 18

Celia leh Tim chu an vannei nge an vanduai zawk? An tum angin St Gabriel hospital chu an chhuahsan thei ta mai bik hauh lo a.

Celia ban chu a na leh ta deuh tlat mai a, a khuate a sik a, zana amah rawn kantu Sergeon chuan a ban tuamna chhunglamah chuan thil fel lo deuh a awm niin a ngai a. "Engpawhnise, naktukah Mr. Denver-an en sela a tha ang," a ti ve leh ta tlat mai.

Celia erawh chuan engmah a sawi ve lo. Tim chuan a hawsanna pawh a rei tawh a, tunah chuan Tim nupui hual a lo ni ta mai si a. A ban han na leh kher kher chu pawi a tiin guy hmuh leh chu a huphurh tawh hle a, sergeon hnenah pawh chuan, "ani kher a ngai lem em ni? Nang pawhin i ti ve thei mai lo em ni?" a han ti a.

Dr. Turnera chu a'n nui sak a,"Ka ti theiin ka ring chiah lo, dik takin Mr Denver hi a thiam bik a, chu bakah ama lo enkawl tawh hi chu midang kutah a hlan ngai lo teh asin," a ti mai si a.

Celia khum bula nurse lo ding ve chuan, "Mr Denver chu midanglam tak ania sin," a lo ti bawk a.

Celia chu a miamitchhing a, a rilruin 'oh kalbo teh u, chu hming chu ka hriat turin sawi tawh lo hram teh u, tiin a lo ngaihtuah a.

Dr Turner chuan nachhawkna damdawi a pe a, "I rilru tihah reng reng suh, hetiang hi chu a awm thin chawk a nia... Mr Denver-an a han en leh ang a, a fel vek mai ang," tiin a thlamuan zui a.

"Mr Denver... Mr Denver' tih tak fo reng mai chu! Celia chuan a mit hliahin a kut chu a dah a, a ban nat bakah a rilru a na em em si a. Tah chhuah hawm hawm tak a nap a, mahse a inthunun hram a. Dr. Turner leh Nurse-in a chhuahsan hnu chuan a thawpikna pawh a veng deuh hawkin a hria a, dar engzatnge maw i ni tawh dawn le? guy-an a chhuahsanna lah a rei tawh si a, kum tak ral ta ang vawng vawng niin a hria a.

A han maimitchhing a, a rilru chuan Guy chu a lam reng a. Aw, Guy kumkhua atan chuan min kalsan teh suh... Aw, tuiliante khan kan pahnihin min lo chimpil dun zawk se, hetiang beidawnnate hi kan tawk lo tur! Ni lo, chutiang rilru chu ka pu tur a ni lo, nang zawng hna ropui tak thawktu i ni a, mi tam takin i thaimnate an mamawh si, keimah avanga chung mi mangangte chu i kalsan a thiang lo.. huaisen takin awm zel ang che aw Guy tiin a ngaihtuah a, a damdawi ei chuan a thawk tan a, a muhil ta sek sek a.

Hma takah a harh leh a, nurse pakhatin thingpui a rawn pe a. A banna chuan a tibuai leh deuh ta riau a, chu nurse la naupang vek tak lah chuan Celia rilru chu hre phak hek lo, a rilru tina zawng takin thu a han sawi lehnghal a, "mr Denver nena in awmdan hi a romantic riau alawm mawle Miss Hammond, tuilian danbeha in awm hnuin i ban a zai leh a, a enkawlna hnuaiah i han tlu lut leh si a, i tan chuan a phurawm ang reng phian ang chu," a han ti mai pek a.

Celia pawh a inthunun zo ta ngang lo, a rilru nat bakah a ban chu a na tel nen, a rawn tawng chhuak pawh chu a bak ve hlak tawh a, "A romantic awzawng lo e, thil awm palh ve hrim hrim a ni. Thudang alai chuan ka ban hi an phelh hunah chuan khawngaihin ka pasal hual min va phone sak ang che," a ti ve ta ngat a.

"ka pasal hual' tih tawngkam han hman chu a hreh hle nain, kawngro su thei tur tih a hriat avang erawh chuan a rawn hmang ve ngat a. Nurse hmel chu a sen ap ap a, makti hmel zet hian "Pasal hual a, Miss Hamoond? Pasal hual i nei tih reng ka lo hre lo a ni," inthiam lo hmel tak chuan a ti ve ta ngei reng a.

"Anih tak chu.. Mr Madden nen kan inhual alawm," Celia chuan a ti e leh mai a.

Nurse chuan a chhuahsan ta a, Celia chuan a thingpui in pah chuan a rilru te te in tunah chuan damdawiin pumpui amite hian an hre thuai tawh dawn anih hi! guy tan chuan a nuam ve huai tawh ang, tiin a ngaihtuah a.

Tim erawh chu, chutianga a tih avang chuan a lawm chiah lo mai thei a, mahse a thiam loh alawm, a rilru hrereng chunga nawr lui a ni ve miau a.

Celia tan chuan hun a rei duh hle mai, Guy lo lan hma chuan a pindan khawngkharah Nurse engemawzat hi an lo dak sek a, pasal hual a neih chungchangah lawmpuina an rawn hlan hlawm a.

"A va phurawm ve le, Miss Hammond."

"Hmeichhe vannei tak ni ni."

"Mr Madden kha a hmeltha reng a ni."

"Mipa sang lam deuh i ngaina reng em ni?"

"Mr Denver-an i ban tuamna a phelh hunah chuan Mr Madden nen an inbia ang a, a fel vek mai ang."

Chutiang thu chu Celia hnenah rawn sawiin an nui zui hawk hawk hlawm a. Celia chuan a rilru te tein nui rawh u, in vaiin nui zel phawt teh u. Tunge min ngaihsak tak tak awm chuang, ka rilru natna hi tunge min hriatthiampui ni? tiin a ngaihtuah a.

Jan chuan a han lama a kal hmain a rawn tlawh zawk a, Tim nen an inhual thu Celia'n a han hrilh chuan hlim hle hian a hriat a, amaherawhchu, a ban na a hmuh chuan tilunghnur leh hle thung a, "Englekhawle, Mr Madden-a nen in inhual si chuan helai hmuna i awm reng hi dikin ka hre tawh lo," a ti ve ta a.

"a pawina vak a awm hleinem, Jan" Celia chuan a lo tihsan mai a.

"Anih leh engtia han tih nge i tum dawn, ka beramnote?" Jan chuan ti leh a.

"tunah chuan mi zawt teh suh Jan, chutiang lama ti ti turin ka la chak tawk lo tlat a ni."

Jan pawh chuan ngaihtha zan lo chung chuan a chhuahsan ve ta rih a. A chhuah hma chuan, "Mr Madden chu mink coat nalh deuh tak leisak tur chein ka la hrilh ang a, ka lo hlep ve zeih dawn ani," a han ti a, nui har har chung chuan a chhuak ta a.

Dr Tunner chu a lo lut a,"Eng nge i an zel?" a rawn ti luam a.

"A tha vak lo," Celia chuan a lo ti ve mai a.

Dr. Turner chuan, "A dinhmun chiah chu kan la hre thuai mai ang, nichin lawk khan Mr Denver pawh phone in ka va bia a, a lungni lo viau asin, a chhan pawh i ban han vung leh kha a ni ber a, mahse hetiang hi chu a thleng ve chawk thin reng ania," a han ti a.

Celia chuan Dr Turner thusawi chu a ngaihsak lem lo, chu ai chuan Guy rilru put dan tur awm ang chu a lo dawn sak zawk a ni. Amah hmu tura rawn kal leh chu hreawm a ti ve viau pawhin a ring bawk a.

Darkar chanve zet a ral hnuah Guy a pindana a rawn luh a, a hliam chu amahin khawih a tum tawh lo thu a rawn sawi pawh chu mak a ti hran lo. "Nikhaw hre lo a he damdawi ina lakluh i nih khan keimah ngeiin ka khawih che a, a tumhnihna zawng ka ti thei tawh lo ang Celia. Chuvangin he hna hi Miles Goring kutah ka hlan a, helaia thawk ve hi a niin Sergeon tha tak ani. Tin, a khawih tur pawh chhete mai chauh a ni a, a chhung han en leh a, hemro deuh chauh an i. Ni reiloteah i tha leh mai ang, mahse kei erawh chuan ka thei tahw lo a ni," a han ti a.

"Ka hrethiam alawm," Celia chuan a lo ti ve sap a.

Guy chuan a ipte zenna a kut dinglam chu a rawn dah chhuak a, Celia chuan a tuam a ni tih a lo hmu vat a, "Oh i kut chu engtizia nge?" a ti vat a.

Guy chu a then sak a, "Dawt chhete sawi ka duh vang mawle, he hna hi ka thawh loh theih nan te tham deuh sawi a tul talt a, ka kut ka zai palh tiin ka hrilh hlawm a, ni engemawti chhung chu operation lam reng reng ka khawih a thiang dawn lo ani," a ti ta a.

"Keimah vanga i hnathawh kaltluang tha lai bahlah phah angai dawn ta chu pawi ka ti hle mai, Guy."

"Chulam chu lungkham duh suh, nihnih nithum vel chawlh ka la ve a ni mai a, chumi chhung mai chuan ka hna lam in a tuar phah em lo ang chu," Guy chuan a ti leh mai a.

"Kal bo i tum em ni?"

"Ka kalbo a tha zawkin ka hria, Celia mahse keimah chauh a ni ang."

"Oh Guy"

"Na i ti viau em ni, duhtak?"

"na em em lem lo e."

"Dar sawm leh a chanve ah an khawih che ka ring a, rei nghah a ngai tawh lo e, Miles Goring kutah innghat ngam la, mi tha tak a ni a, ka damlo enkawl bik i ni tih pawh a hnenah ka hrilh tawh kha."

"ka ni amaw?"

"Oh, Celia, min thlem teh suh, ka ta ni thei la chuan ka kalbosan che pawh hi a tul hauh lo, keimah ngeiin ka zai nawn leh mai tur che pawh a ni."

Celia rilruah chuan Tim a lo lang a, an inhual tak thu pawh Guy hnena hrilh ve ngei thain a hria a, mahse sawi harsa chu a va ti si em! A awm a'n thian kak a, a tirilah chuan akhur deuh dar dar a.

"khawi hmunah pawh kal la, i kal hmaa i hriat ka duh chu.. Tim kha neih ka tum ta a ni," a ti ta phawng mnai a.

Guy hmai chu a rawn sen nghal awp awp a, chutah a rawn dang leh lawp a, thlarau hmu niawm tak ani. Chu chu a hmuhin Celia chuan mangang takin "guy ka ti ta mai a ni! Nizan khan min sawm a, min nawr reng bawk si a, chu bakah he hmuna sawi sep hi a bo nan ka ti a, i tan tha bera ka ngaih avangin ka remti ta ngawt mai an i, " a ti ta sawk sawk a.

Guy hmel chu a rumin, a tihhar hmel hle a, a thu hriat chuan a tithinur hle tih pawh a lang a, "Keimah avanga hepa hnena i inpumpek ta mai chu ka remti thei hlawl lo.. i hria em? Hepa hi i hmangaih reng reng lo...!" a ti ta nawk nawk a.

Celia chuan, "Chu phei chu ka hria alawm, Guy nangmah chauh hi ka hmangaih che a, mahse neih chu thil tha ber niin ka ring si a ni, " a han ti leh niah niah a.

"Mipa dang i nei anga maw?" Guy chuan a ti hluai a.

Celia mittui chu a tling kiau tawh a, a biangah chuan a luang thla ta ngiah ngiah a, "Chutilam chuan i ngaihtuah ka duh lo... inthen kha kan remti dun tawh si a, ka tan harsatna min siamsak leh si chuan ka thi thei hial ang, Guy!" a ti tiau ta mai a.

Chu tawngkam chuan Guy rilru han let but chu a tifim leh tial tial a, chu nula, amah avanga mipa dang laka inhlan mek chu a tihreawm tur a ni lo tak asin. Ani chuan nupui a nei a, Frances a neih chhung chuan chu nula chu a ta a ni thei dawn hauh si lo. "A dik e, ka bawihte, min ngaidam teh, tap tawh suh, i tap lai hmel hmuh chu ka duh huah lo a nia," a ti ta a.

Celia pawh chuan a mittui a hru hul a, hlim hmel pua lan a tum hram hram a. Guy vek chuan, "Mr Madden hnenah chuan ka duhsakna leh lawmpuina mi lo hlansak dawn nia... nang nen hian vannei taka awm turin ka duhsak che u a ni tih chu Pathian pawhin min hriatpui a ni. Hlim takin i awm zel tih ka hriat phei chuan kei pawh ka hlim ve ngei ang," a ti ve ta thliam thliam a.

"Hlimna thu lam chu kan sawidun a tul lo ang Guy!"

"Nun bul tan leh nan thil eng emaw kan tih chu a tul si a, tunah erawh chuan kalbo ka tum a, nithum aia rei pawh a ni mai thei. London hi chhuahsan phawt mai ka tum a, rawn hmuh leh che pawh ka tum tawh lo ang," guy chuan a ti ta a.

Guy ke pen ri chu corridor ah chuan a ri phei khauh khuah a, Celia chuan a ngaihthla kiau reng a. Guy chuan a kalbosan dawn ta! Hun rei lote atan a ni ta mai lo, kumkhua atan a nun ata a inthiarfihlim ta a ni. Celia chuan a hmai a hup a, a tap ta zawih zaiwh mai a.

a hnu reiloteah chuan a pindnah nurse te, doctor te an lo lut a, nawrlirhah an muttir a, theatre lamah an hruai ta a. Special Nurse chuan Celia thlamuan nan, "mister Denver-an a kut a zai palh hlauh si a, a zialo ngawt mai. Mahse Mr Miles Goring pawh hi tha tak a nia, Mr Denver tan chuan a hreawm duh ngawtin ka ring, a bul tantu ni si, a thawk tlauntling thei ta si lo," a han ti a.

Celia erawh chuan engtinmah a chhang thei tawh lo, a mittui chu a tla reng a, Nurse lahin a khawsik vang emaw a ban nat vang emaw a ti mai a, a mittuite chu a hruksak a, "Hreawm ti mah ta che, dam takin he hmun hi i chhuahsan dawn alawm, i chhuah hunah lah i pasal hualin a lo nghak reng dawn bawk si che a," tiin a han hnem ve ngial a.

Celia chuan a chhang tawh lo. Rei vak loah Dr Miles Goring chu a lo lut ve ta bawk a, Celia ban tuamnate chu a han phelh e, "I tha leh mai ang, i hlau em ni?" a han ti luam a.

"hlau lo e," ti chahin a chhang a.

Miles Goring chuan, "Chhete khawih leh ngai chauh a ni a, hlauh tur engmah a awm lo," a han ti nawn leh a.

Celia chuan chiau mutna an pek dawn laite chuan harh chhuak leh maih tawh lo a awm hlente a duh rum rum a, mahse chutiang suangtuhana tha lo tak chu put loh hram hram a tum lui tlat thung. A tan chuan damchhan tur a la awm alawm, nurse ho sawidan takah Tim te ang pasal a han nmu chu a vannei thlawt ani, OH God.. he thil hi tuar tlang hram hram thei turin chakna min pe rawh, tiin a rilruin a tawngtai ta zawk a.