GOD GAVE ME YOU BY Mami Dekhenez Chawngthu

[Ngaia]

GOD GAVE ME YOU
.
Ka office bang chu ka dan pangngaiin inkhel turin field lam ka pan a, tlai tin rokhawlhna ka nei anih loh chuan ka inkhel ngei ngei thin. Field kotlangah chuan hmeichhe pakhat hi bawrchhawr deuh tak hian lo thu sawp nuaih a, henu hi ka vawikhat hmuhna chu ani lo. Kumkhat kalta atang khan he hmunah hian hnathawkin ka awm a, mahni veng ang maiin ka tlangnel tawh a, helai hmuna hmeichhia pawh hi veng tawntirh a awm an ni tih ka hria. A hming erawh ka lo ngaihven ngai lem loh vangin ka hre lem lova, mahse hemi tlaia ka hmu chu mak tak maiin hriatchian chakna chu ka nei ta tlat a. Ka haw hnu thleng chuan ka rilru ah a awm reng a, a hmel enin hmeltha ve thawkhat tak ani tih ka hria, chhan awm lovin khatiang khan a awm lovang tih ka ring tlat a. Ka thian kawm ve ber Mama chu la zawhchian tum ru tak chungin bathroom lamah inbual turin ka lut ta a.
.
Zan dang ang bawkin Mama chu a rawn leng lut a, ka khumah a mu a, movie ka neih thar ho chu a copy mawlh mawlh a, “Mam.. kan veng nula rui thei deuh hi tunge a hming?”chu aia mawihnai a bul tan chu ka duh viau na a han tih dan tur ka hre mai lo ani. Min rawn chhoh en ha a, “Tu chu maw?” a chal chu a han ti nuar nang a, “Estheri maw?”amah vek chuan ahan ti leh a. A hming hriat loh vanga zawt ka ni reng sia, ka then sak a, “Hria ila ka zawt dawn che em ni?”ka ti a, a nui ve at var var a, “Field bula lo awm ve thin kha”ka han ti leh chuan, “Estheri anih chu, a khawngaihthlak reuh asin, kan veng nula fel leh hmeltha, kan chhuanvawr ani thin a. Hetiang taka a nun a hloh ta hi chu a bul ber chu a nu vang ani.”a ti dap dap a, ka room tukverh chu ka han hawng zau deuh a, “A nu vang maw? Ava han mak awm ve aw.. A nu chu nuhrawn em ni?”ka han ti leh a, alu chu a thing a, a rawn tho chhuak a, khum tlang ngheng chuan a han thu a, “Sawi dawn chuan sawi tur a tam mai. I hriat chak viau chuan ka han sawi ange”a ti a.
“Kan vengah hi chuan tute pawh hi kan in ngam em em vek a, kan fiamthu pawh a sang ve thin hle. Nula leh tlangval te pawh in ngam tak hian an infiam bawrh bawrh thin a, kohhrana inhmang tlang ho phei chu tute nge inngaizawng tih pawh hriat har khawp hian an inkawm thei vek a ni. Estheri pawh hi kan veng nula ah chuan lehkha thiam leh hmeltha, fel bawk si ani a. Mi tupawh a be thiam a, pitar putar thleng hian an ngaina thin. Ka u Andy te nen hian an inkawm nasa bawk a, ka hrechiang ve thawkhat viau in ka in hre bawk. A nu leh a pa hi kohhran bel lutuk an nilo a, mahse an unau erawh kohhran a inhmang vek an ni thung. A pa hi mi zaidam lutuk, tu pawi mah sawi ngai lo ani a, a nu erawh tlema hlauhawm ang chi hi ania, a tlawn zawngah chuan tha leh fel ta, a ngei nih hlauhawm deuh mai hi a ni a. Ka u te ngei pawh hian pawh ngam loh chin hi an nei thin, Esi hian a khuh mawi em a, an mawina ber a ni. Nula fel leh hmeltha chuan ngaizawngtu pawh an ngah a, officer lian tak tak te pawhin an rim ve thin, mahse ngaihzawng a nei nghet a, midang tan beiseiawm in a awm ngai lo. Chu a ngaihzawng pa chu tuna kan KTP Leader U Muantea hi ani. Tlangval fel tak ani a, I hmuh angina amah a lian in a zahawma, an han inzui chu thlir zui loh hi har tak an ni. Khatih lai khan hna ala nei bik lova, tunah erawh hna zahawm tak a thawk tawh. Esi nu hian a iai thin khawp mai a, u Andy hian a sawi thin a, officer lo chu neih tir a tum loh thu alo sawi thin ani awm e. Mahse Esi hian a hmangaih ve em em a, thlah chu a tum lo. Inhmangaih a in zui ta reng chu inneih an tum ve ta nge nge a, a tirah chuan Esi nu hian a remti loa, palai te chu beidawngin an lo haw tir ani. Mahse Esi pa hi pa tha tak mai ani ka tih tawh kha, palai te chu an kal nawn leh a, ama thu in rem alo tihpui a, inneih ni pawh an ruat nghal ta vek a. Chutiang thlenga an kal tawh avang chuan Esi nu pawh lungawi o hle mahse an pa thu chu hnial fithlak a ngam ta bik lo ani. Thu chu a kal zel a, mite hriat loha inbuatsaihna chu a ruk thei ang bera kal pui chu an duh a, mipa lam leh hmeichhe lam duh dan pawh ani. Ka u te thianho pawh hian kan inchhungah takngial pawh an sawi tha duh lova, a hmingin kan hre thawi ve tih chauh a ni. Chutiang vel lai kar chuan inneih chu an thulh leh ta thut mai a, kan veng chhungah kar lovah a darh nghal vek bawk. Engmah hi zep theih hi a awm tak tak lova, tuman sawi lang lem lo ma hila palai te nena an inrem dan chu kan hre thum hlawm tho. Lehkha tar anih hma zan chiah ah inneih an thulh thu chu kan hria a, a ngaihna kan hre lo tlang viau hlawm a, ka u te thian ho chu Esi te inah an kal vat a. Tute pawh chuan thu chiang kan hre chak vek a ni.”khum bula bottle a tui chu a han inkhalh khalh a, a han sawi chhunzawm leh a,
.
“U Muantea te lam inbuatsaihna kal velah an in chu rawng an hnawih thar a, kan veng nu pakhat hi a lo va leng lut a ni awm e, a thuphungin thil tih ruk tum in nei em ni tih velin alo fiam ve satliah a, U Muantea nu pawh chuan fiamthu in alo chhang ve bawrh bawrh a, chu nu haw hnu lawkah chhungkaw pahnih te chu an inhmu thiam lo ta mai ni awm tak ani. Esi nu in U Muantea nu chu tawng thei leh midang ngaichang lo a tawng zung zungah a puh a, an fanu chu neih loh an hlauh lutuk vang ni te in a sawi bawk a, chhungkaw pahnih inremna nei tawh te chu hoteah an in hmu chhe ta vek mai ani. Chiang tak leh thuk zawk chu ka hre ve lo a, mahse ka hriat chu inneihna lehkha tar mai tawh tur pawh chu Esi nu in a sut leh tih hi ani. Mipa lam pawh an reh ta hmak a, kohhran tana tangkai em em pahnih chu engtinge an awm zel ang tih ka thlir thup ani ber. Inhmangaih leh in duh ngawih ngawih, inneih hial tum tawh te chu thawklehkhat ah an inhmangaihna thawnthu chu a thamral dawn a ni. Chumi hnu chuan Esi hian kohhran a a nihna a pha vek a, biakin kawng a zawh leh tawh ngai lo. U Muantea pawh rei tawk tak kha chu a han reh vang vang a, mahse an ni chhungkua hi Pathian tih tlat, bel tlat mi an nih avangin a let leh thuai a, Esi erawh backup tu nei lo in a rilru natna chu a tha lo zawngin a hmang ta hlauh mai ani. U Andy hian a sawi ka la hre reng thin, an thianho hian U Muantea chu hmu in Esi hnena let turin an lo ngen ani awm e, “Esi chu ka hmangaih lutuk, a nun a chhiat pawh hi hmuh hrehawm ka ti. Mahse khawvelah hian nu dang ka nei lova, ka nu neihchhun rilru hliam a, na taka siam tu chhungkua nen hian inzawmna neih hi a har a ni. Pathian ruat kan nih chuan kan la inkawp leh mahna”tiin alo thlah ani. Chumi hnu rei vaklo ah chuan an inzui lai hmuh tur an awm leh zeuh zeuh a, mahse a rei hma in Esi nu tawngkam avang bawkin an thlah a, an inthlah hlen ta ani. Hei khatih hun atanga chhiar chuan kum 5 alo liam ve ta der mai a, Pathian bel tlat tu leh ring tlat tu U Muantea chu chawisan in a awm ta zel a, Esi erawh heti hian a nung chho ve ta naw naw anih hi”a ti a. A thusawi chhung zawng chuan ka lo thaw dep dep a, hmeichhe khawngaihthlak ta kava ni chiang em ka ti rilru mawlh mawlh a.
.
“Ka nun hi ka ning ve asin, ka duh dan ani bik reng reng lo, hetianga nung lo thei lo hian min siam ani”Esi te kawt ka thlen chuan inchhung atang chu thawm chu a rawn chhuak a, rei vaklo hnuah Esi chu mit sen ram hian a rawn tlanchhuak a. Min rawn su phei nawk a, “Ka tihpalh”min en chuang miah lo hian a ti a, a kal ta dawr dawr a. Mama hnen atang a chanchin ka hriat tawh avangin khawngaihna lian tak mai hi ka nei a, miten hmusitin a chhungte ngei pawh chuan zahpui mahse a duh vang reng ani bik lo tih a sawi chu ka pawm thlap a ni. Nilengin office ah pawh chuan Esi ringawt chu ka ngaihtuah a, Mama thusawi chu ka han ngaihtuah let neuh neuh a, henu hi hnaih ka duh ani. Engtinnge bul ka tan ang tih chu hre lo mah ila ka hnaih a, ka belhchian hi a ngai ani.
.
Zirna avangin hmundangah ka awm fo a, ngaihzawng neih nan hun ka nei ngai lo. Ka theihtawpa ka zirlai zirchhuah hna tha tak thawh chu ka tum ber a, chumi tur chuan ka bei ve nasa emem thin. Mahse mak tak maiin M.Sc final semester ka zir tum hian hmeichhe duh tak mai ka tawng ve nawlh a. A hmaa lo neih ngai loh chuan rin ai takin neih thiam alo har a, ka rilru zawng zawng hi a luah ngut ngut mai ani. Mizo awm ve thenkhat chuan an sawisel ka hre ve zauh tawh a, mahse ka lo ngai thutak lem lo. A chhan chu ka lakah sihhnip leh mawi lo takin a khawsa ngai lova, a zia zawi dap te chu ka mil zawng tak anih avangin ka duh telh telh zawk ani. Kum chanve vel kan in zui hnu chuan a mizia a dang telh telh a, night club ah a kal thu ka hre ta fo a, a hnuah keimah ngeiin ka man bawk a. Mahse a thianten an hruai lui niin a in sawi ve tlat a, mahse rin harsa ka ti tawh. Chu thil a thlen atanga thla a vei leh hma in mipa ina a riah thu ka dawng a, ka va kalchilh ngat a, chiang takin kan in man chhuak a, a tak ngei a hmuh chuan thinlung hi a na zual a, kut ka thlak lo kha mak ka in ti zawk. Ka tuar na em em a, hmeichhe rinawm lo vanga nat chu ka duh bik hauh lo, mahse ka duh vang ngawtin ka na lo thei chuang silo. Vawi tam tak ngaihdam min dil a, insiamthat a duh thu a sawi reng bawk a, a tellova ka hlim theih chuan loh avangin ka lo pawm leh a. Hun engemawti chhung chu sawiselna tur ka hre lo. A nun chu a insiam tha ve tak takah ka ngai a, ka lawm ve viau nghe nghe. Ka zirlai ka zir zova, ani erawh chuan kumkhat ala nei a, haw mai lovin coaching class ka kal chhunzawm a, tuna ka hna hi an la dawn tih internet atang ka hmu a, exam turin ka haw chho a, ka haw chhung reilote hian a nun ngaiah bawk alo lut leh a, hemi tum hi chuan awlsam takin ka then ve ta ani. Hriatchhuah chang te, han ngaih veng veng changte hi chu ka la nei ve thin, ka duh ve em e, engemaw chen ah hlimna tam tak minpe ve tho a, khang ka hriatrengna khan amah min ngaih ve tir thin. Kat awn fuh loh vang khan midang ka rin loh phah ka hre hran loa, mahse amah anga min hip nghal thlap kha ka la tawn leh loh vangin hmeichhe dang hi ka ngaihsak lo a ni. Hriatchian tum a ka hnaih leh hmasak ber chu nunkawng diklo a zawh tih ka hriat sa leh hmeichhe zu ruih ching, Esther Malsawmzuali hi ani.
.
Ka inkhel tur kal chu nidang zawng aiin ka hmanhmawh a, tlai tin field ko a thu ziah biak hman tumin ka kal a. Khua a nawm loh avangin inkhel chu an tam lo hle a, mahse ka beisei ang ngeiin Esi chu ka hmu a, ka kal chak sauh a. A bulk a va thlen chuan ka zam thar leh riau a, a mitmeng phi sek chuan a normal lo tih a tilang a, a bul ah ka va ding reng a, ka awm ve tih chu hria ang pawhin a lang lo. Ka mitsir chuan ka melh leh thin a, a hmai chu a sam in a zar hnawk deuh nuaih a, a hmai fang tha kalh chu tunah pawh hai theih ala ni lo. Ka aw chu ka han thian a, a rawn hawi zawk a, a hma zawn bawk chu a melh leh a, “Khua chu a vawt hle mai”ka han ti a. Amah biaa sawi ka ni lo bawk a, a tawng ve lem lo, “Esi I ni ang maw?”ka han ti leh a, fiah zet hian min melh a, a lu chu a han bu nghat nghat a, “Estheri… chu ka la ni ve alawm”za lo tak hian a nui a. A mitmengah chuan a rui tih chu hai rual ani lo, mahse mak tak maiin zahawmna a tel tlat,”Hun I neih chuan inkawm ila ka duh khawp mai” “Tutan mah hun ka nei lo”a lo ti hmuk a. Han sawi leh mai tur chu ka hre lo, “I hun I khawhral thlawn mai mai, I hmuh ang hian hmeichhe zu ngawivel pakhat ve mai ka ni, buaipui tlak ka ni lo”amah vek chuan a han ti a. Ka thaw halh a, “In venga ka rawn awmna hi a la rei lo bawk sia, thian pawh ka nei vak lo nen ka kawmngeih chi tak I ni dawn a, ka lawm khawp mai”ka han ti a, min chhan tuma a ka ang chu lo tawng khalh in,”Ruatsanga ka nia, nidangah kan la inkawm fo dawn nia”tih pahin ka kalsawn a, field chhunga ka luh dawn chuan ka han hawilet a, hrilhhai hmel tak chuan min lo en kiau a.
.
Thawhtan zan KTP inkhawm ban hnuah Mama chu Esi te ina min kalpui turin ka sawm a, zawhna min zawh ka rin laiin engmah chu a sawi bik lo. An in kan va thlen chuan a nu leh pa leh tlangval pakhat hian tv an lo en a, Mama chu an hriatsa anih avangin an lo be nghal luam a. Esi awm leh awm loh a zawh chuan a awm thu leh a room lama a awm thu a nu chuan a sawi a, tlangval lo awm ve hnenah chuan ko turin a han tir nghal a. Rei vaklo hnuah Esi chu sam pawr phang hian a rawn kal a, min hmuh chuan a ding deuh dat a, “I va mu hma ve a”Mama chuan alo ti bawrh bawrh a. KAn thutna ep chiah sofa ah chuan a thu a, a mitmengah chuan a harhfim lo tih ka hria, chu chuan ka thinlung hi alo ti na vawng vawng a. Engvanga hmeichhe tam tak min buaipuitu an awm laia henu kher hian ka thinlung hneh tih hi ka hrethiam bik lo. A saltanna atanga chhanchhuah ka duh vangah ka han puh ringwt na a, chu aia thuk zawk chuan ka thinlungah hian hmun a chang tlat ani. A nu leh pate nen chuan ka awmna te min zawt a, tha takin ka chhang a, Esi chu ka melh zeuh zeuh a, hnuai lama a bih tlat a, a kuttin chu a khal leh niap niap a, nuam a ti lo tih ka hria. Mama hnenah chuan haw ka han rawt a, kan boruak hrethiam takin a lo bu nghat a, a zankhatna atan chuan a tawk viau in ka hre bawk. Ka haw hnu te chuan thil tam tak ka ngaihtuah a, ka tawngtai bawk a, engtinnge hma ka lak zel ang hre lo ma hila kawng chu a la inhawn zel ka ring ve tlat a ni. An ina kan len atanga karkhat a liam leh hnu tlai khat chu inkhel turin field lam ka pan a. Kan len tuk atang khan field ah hmuh tur a awm ngai tawh lova, mahse chumi tlaiah chuan a thutna hmunah a lo thu khiau a, lawm rilru takin ka pan phei a, min hmuh chuan a lo ding vat a,”I va vang ve a”in la nelawm takin ka nui sang a. A chil a lem khalh a, “Enteh hetah hian he thu hi sawi turin ka lokal, min hnaih hi tum tawh suh, min hnaih thei tak tak chuang lovang. Tumah hi ka mamawh lova, min tanpui pawh ka mamawh hek lo. Chuvang chuan I nundan pangngaiin nung la, zalen takin min awmtir rawh”a ti a. Ka han pan hnai hlek a, “Esi, hetiang hian awm suh, tinge I nun hi a chhe zawng a I hman kher? I chanchin ka lo……” “Aw…. I hriat ang kha ka nihna chu ani, ka danglam bawk lovang, ka chanchin chu I hre hneh viau ang chu… “a lo ti tawn tawn a. Heti mai hi chuan kan sawi fel thei dawn lo tih ka hria, “Es.. khawngaihin ka puih che hi min phalsak rawh, ka beidawn nan reng reng pawh chu chu rem I ti thei lo em ni? Chance min pe duh lo anih chuan ka zar buai reng tho angche”ka ti a, luhlul ka chhuah ve zel dawn ani. Min en hrawk a, ngei hmel zet hian min melh a, a phun nuah nuah a, pai deuh nawk nawk chuan a kal a, chelh pawh ka tum chuang lo, “Ka beidawng ngai lovang”tiin ka phun sap a.
.
Nidang zawng aiin office ah kan buai a, ban hun pangngai pelh rak thleng kan awm a, ka haw dawn meuh chuan khua alo thim der tawh. Ka tlai tawh tho avangin ka hmanhmawh duh lova, kan veng biakin bulk a thleng chuan tan dar a ri chiah a, naupan tet atanga biakin ngaina ka nih avangin ka inkhawm theih loh tum pawh hian hrehawm ka ti thin hle. Ka pa hi kohhran upa ani a, kan unau min enkawl dan pawh hi hei bak chu a awm thei chuang lovang. Ka nu erawh tlemin mahni thu hi a duh ve deuh a, a duh dana min awm tir vek hi a tum thin a, ka pa hian a khap ve reng thin. Kei hi unau mipaah chuan a naupang ber ka ni a, min beiseina a sangin pressure a tam thin hle. Ka unau dangten hna an nei vek chungin midang bulah an chanchin a sawi ka hre ngai lova, kei erawh hna ka neih hma hauh atang ka chanchin hi sawi nuam a ti a, ka nu fapa ngawih ngawih ka ni bik tihna anih chu. Keipawhin a thu hi chu zawm ka tum hram hram thin a, ka ngaihdan a nih vak loh tum pawhin ka hnial duh ngailo. Chutiang thil ngaihtuah chung chuan ka in luah ka thleng ve hlawl a, light a la in on loh avangin alo thim raih a. Hetianga haw tlai tum hian chhungte bula khawsak nawmzia leh hlutzia ka hriat thar phah thin. Kawngkhar sira mihring lo thu reng ka hmuh chuan ka phu zawk a, in chu hawngin pawn light ka on vat a, ka han enchian chuan Esi alo ni reng a. A lo thle lawp lawp a, a dara ka han vawn chuan chiang lo ruaiin min rawn melh a, a then vei sak a, “Ka..ka nghak rei hle mai che”chiang lo nuaih hian alo ti a, “Inchhungah lut ang hmiang a vawt riau mai”ka ti a, amah a din a tum a, ka lo pui vat a, inchhungah kan lut a. thuthlengah chuan a thu a, a thut ngil theih loh vangin ka mut tir ta ringawt a. Rawng ka bawl nghal mawlh mawlh a, a khat tawkin Esi chu a rawn tawngvai leh ruai ruai thin a, a hun tawn hrehawm tak chu a kalsan a hun takzet tawh a ni. Chaw ei ka peih fel hnu chuan ka han kai tho a, tlem chuan a harh ve deuhin ka hria, “Chawei ka peih tawh a, ei ang aw”ka ti a, a lu a thing a, “Tlem tal ei I mamawh alawm”ka ti a, a han hawi kual a, “Engtinnge hetah hian ka awm tih ka hre miah lo, ka ti tak tak”a ti a. Ka lo nui mai a, chaw ka khawrh a, chaw chu a han ei ve tak na a tih tham erawh a ei lo. Chaw kan eikham chuan thei leh thei lo hian kan chaweina chu tihfel a tum a, a duh lo chung thuthlengah ka thut tir a, keiman kan eina vel chu ka ti fel a. Thil reng reng hi ka duh uluk bawk a, kan eina tlem tham pawh ka tihfai chhung a rei leh angreng viau. Ka zawhfel chuan Esi thutna lam ka pan a, a mittui chu alo hru mawlh mawlh a, “Ehe! Tinge I tap em ni?”ka ti a, min chhang lo. A bulah ka thu a, “Ruatsang, ka ruih vanga tap emaw min ti ange aw… a ni lo”a ti tham chal a, “Hetianga min ngaihsakna tak tak rilru pu hi ka la tawn ngai loh vang ania, ka lung hi a chhe em ani”A ti a, a inhnip hlawp hlawp a, ka kuah a, ka awmah hcuan beiin a tap khur ngar ngar a. Rei tawk tak chutia a awm hnuah a in la hrang a, “Ka nun hi ka ning tawh ani, mahse chhuah ngaihna ka hre tawh bawk silo, min pui thei angem?”a ti a. Chu hun chu ka lo nghahhlelh thin em em kha ani a, ka lung te pawh a ti chhe ve lek lek zawk, “A tawp thlengin ka pui ang che”ka ti a. A lungchhe zual a reh hnu chuan a mit bui tak phenah chuan a rawn nui ta sen sen a, a hmelthatzia leh a duhawmzia chu ka hmubelh leh ta.
.
Ka office kal pahin Esi chu ka tlawh ziah a, ka haw in ka lut kawi ngei ngei bawk. A tirah chuan harsa a ti ve em em a, mahse hlauthawng miah lova tupawh hmachhawn thei turin ka fuih nasa a, rui lova khawvel hmachhawn ngam lo khan harhfimin a hmachhawn ve tan ta. Bible chang chhiar tur ka hnutchhiah ziah a, zanah kan study tlang leh thin. A nu leh pa a unaute pawh ka chungah an tha em em a, a nu phei chu mahni inthiam lohna hlirin a hun alo hmang thin hi alo ni a, a thiltih sual vanga a fanu nungkawng lo chhe ta chuan an chhungkaw hlimna zawng zawng pawh a tichhe tel vek a ni. Chung min hrilh melh melh lai chuan a mittui a hru reng a, a khawngaihthlak zawk hle. Esi chuan nuta ang tak hian min en tih ka hria, a laka ka rilru puthmang erawh farnu ang mai chu ani ve lo. A chang chuan min en dan avang hian ka thinrim ru fo a, nula fing tak ani tih ka hria a, ka awmdanah hian ka rilru pawh a hria ang. Mahse han beisei tur leh han inngaihbel theih tur hian a awm duh miah lova, ka mang a ang ru hle tawh.
.
Hun a lo ral ve zel a, Esi nen kan inhmelhriat atang kum chanve alo liam ve reng tawh a, a tirah chuan han in leh zauh kha a ching a, mahse tunah erawh a thlah fel hmak tawh. A hmel pawh a tha chho sawt sawt a, a ti sen no siah te chu hmuh a nuam in thlir nin a har takmeuh a ni. Amah a hleitling bawk a, puan a han bih phei hi chuan ka lo thlir leh veng veng thin. Biakin kawng ka zawh pui hmasak ber chuan inkhawm kan awm tluan thei lova, amah a zahna leh insitna avangin kan kir leh ringawt a. Rei tak a chhunzawm duh lo nghe nghe. Mahse theihtawpin ka fuih ve reng a, tunah chuan inkhawm tura sawm pawhin min hnial ngai ta mang lo. A tana thil hrehawm tur nia ka hriat pakhat erawh chu a pasal hual hlui Muantea chu kan branch KTP leader ani a, hmachhawn hi a hreh tih ka hria a, KTP inkhawm ah phei chuan a duh lo chung inkhawm pui chu ka tum ngai lo. Nakinah hmachhawn thei tur a chakna a neih hunah chuan nawr luih ngai lovin ala ti ve mai ang tih hi ka ring tlat a ni.
.
Krismas a hnai tial tial a, khawlai titi pawh chu lam hawi vek chu a ni tawh. Kum dang ang bawkin ka pa chuan kan unau hmun hrang hranga hnathawka awm te phone hmangin min chah kim leh vek a. Kum dang ang chu nise ka chhungte hnena haw chu ka chak leh ngawtin ka ring. Tun tum erawh a dan a dang ta daih a, ka hmuh phaklo a Esi a awm tur chuan min ti hrehawm a ni. Ka haw hma zan chuan an inah ka leng a, a nu leh pa te nen rei tawk tak kan inkawm hnuah min mutsan a, Esi nen tv chu kan en a. A khat tawkin a phone a whatsapp msg a dawn chu a reply leh zeuh thin. Anihna takah chuan tunge a biak ka hre lo a, ka thik a ni. A bulah ka insawn a, “Naktukah ka haw dawn ania, min va han ngaihsak lo tak”ka t chhuak hlawl a, min en a, a then sak a, “A awihawm lo e.. “ “Ani reng alawm, I phone ringawt min bihsan a, tunge I biak lah ka hre silo”ka ti a. Chutia ka tih chuan inthiam lo hmel hi a pu deuh a, “Ruatsang, ka tihpalh aw. Nang baka pawimawh hi an awm lo hrim hrim, I thianpa Mama u Andy nen khan kan inbe lawk a, chu chu aalawm”a ti a. Ka thaw hawk a, heti taka thikthu a laka ka lo tichhia chu ka inthiam chiah bik lo. Alaka ka rilru puthmang hi zanin ah hrilh ngei ka duh ani, hlauhthawnna thuk tak erawh ka nei tho a, “Es, thil engemaw hrilh che ka duh ania”ka ti a, min melh kiau a, a duhawmzia chu sawi hian a siak lo. Engtinnge heti khawpa hmeltha leh duhawm hi zu bawih ah khan a lo tan reng zawk, tlangval tam tak hian an ui ve in ka ring ani. Zawhna zawt mitmeng hian min melh a, “I laka ka rilru hi I hria tiraw?”ka han ti a, “Ka tan hian vantirhkoh dik tak I ni Ruatsang, ka unau pa ang tak takin ka en che, nangpawhin I farnu angina min enin ka hria”a ti a. Ka lu chu ka han thing nar nar a, “Chuti piah lamah pawh chuan nang hi ka duh che a, ka hmangaih che ani”ka ti a, mitmeng buai deuh nak hian min en zawk a, “Aih, nilo, chutiang chu ani tur ani lo”A ti sap a. A kut chu ka la a, ka hum a, “Ka thleng thui tawh lutuk ani, let leh thei ka ni tawh hleinem”ka ti a, “Ruatsang, kei hmeichhe pakhat zu rui ve nawk nawk thin kha min tanpui a, nunkawng dik min zawh tir leh hi ka tan chuan hei baka hlu hi a awmtawh ngai lovang. Mahse tunah mai chuan a hmaa nun pangngai tak ang kha tawng leh tur chuan ka la inpeih lo ani. Miten ka chanchin an sawi dan pawh hi ala danglam lova, keimah vanga tuna mi sawina che pawh hi tawrh hrehawm ka ti tawh ania”a ti a, a ngawi ta daih a. Ka thutna atang chuan ka tho a, “Ruatsang, I hrethiam tiraw ka harsatna chu?”a ti leh a, chhan ka tum zet na in ka chhang ta lo. Amah ka dem lova, keimah zawk hi ka in dem ani. Tun leh tuna ka rilru lo phawrh hi a la hun lo tih te hi lo ngaihtuah hmasa tur ka ni a.
.
Krismas zaikhawmna ah thianho kan kal ve a, kum danga nuam ka tih thin nen tun tum chu engmah hi nuam ka ti tak tak lo. Ka haw dawn zana Esi chunga ka awmdan avangin hrehawm ka ti a, min biak pawh chhang duh lovin ka haw ta kha ani a. tun thleng hian ka la be thei lova, message lah a chhang thei silo. Eng rilru pua khami zan a be duh ta tlat lo nge ka nih tih hi ka inhrechhuak zo tawh lo. Engkim chu ka ning ngawih ngawih ani ber a, ka u fate awm lo pheise chuan kan in ngei pawh hi nuam ka tih ka ring lo. Kumthar tukah rin loh takin Esi message ka dawng a, kumthar chibai min bukna alo ni. Chumi ka hmu rinagwt pawh chu ka in perh tho a, ka room ah chuan ka zuang vak vak a, min hmu tu an awm ang tih hlau leh hnuhnawh tak chuan ka han hawi kual a, tumah an awm lem lo. Ka phone chu lek kang in Esi number chu ka hmetchhuak a, msg maia biak chu ka duh khawp lo ani. A ring ral tep tih ah thaw hlawp hlawp hian a rawn hello a, chibai ka han buk chuan aw zangkhai vah hian min lo chhanglet a, ka haw hma zana thil thleng chungchang chu sawi chhuakin ngaihdam ka dil a, “Ka sawi loh tawp tur ka lo sawi avang khan min ngaidam dawnnia”ka ti a. Kha thil vang khan a thian nihna hi tihchhiat ka duh lo ani. Tichuan pangngai takin kan inbia a, ka haw hun turte sawiin min ngaih thu te a sawi a, thian ang chauh in ni mahse ka lawm tawk em em tawh ani. Ka nutei fanu hi beautician zir turin Aizawl ah awm ve a tum a, in luah a lo khawsa tawh ka nih avangin ka bula awm ve mai turin ka ti a, tichuan kan pahnih chuan kan inchhawm thla dun a, ka tan tak pawh office bana buai taka ei rawngbawl leh ngai thin min lo chhawk tur ngawt pawh thlakhlelh tham ani. Ka cousin chu Tei ani a, thenrual kawm thiam leh nelawm zet hi a ni a, kumkhat chuang ka lo awm tawhna vengah chuan kei ai a lar dawn tih ka hre nghal mai. Chutiang chiah chuan thlakhat a awm tling ve tawk tawk a, KTP hruaitute bakah kan veng mi hrim hrim hian an hre lar in an kawmngeih nghal em em a. Esi nen pawh an innel em em a, a hmaa a nunhlui te chu ka sawi lang ngai lova, a laka ka rilru dang lo mahse thian anga min en tlat avangin ka thiannu chanchin chu midang bula sawi chu ka tum lo ani.
.
Ka hna avangin karkhat dawn training in Guwahati ah ka kal a, hetih chhung hian Esi hian a nunah harsatna a tawk nasa em em a, a nunhlui chuan a vaw let ve nasa hi alo ni a, nileng lengin training naah ka buai thin bawk nen hrehawm ka ti thei hle. Ka hun awl neihchhun ah erawh ka be reng a, a zu in thin te kha a chak lohna an ni tawh lova, mahse a chhungte nen an inkar a nit hung. Theih ang tawka chhungkua Pathian lama kal pui ve a duh ngawih ngawih a, mahse a unaute ruihtheihloh ti lo mahse Pathian lam hnaih tum lo tak tak te chuan an diriam a, a nunhlui an sawichhuah sak fo thin chuan a tibuai a. A nun sim pawh hi a zahna thlentu a nih tamzia min rawn hrilh zan phei chuan kan inbe rei a, zing lam khawvar dawnah kan inbe zo thei ve hram a ni. A tawp a tawpah keipawh training zo in ka haw a, kawng lakah kan tluang lutuk lova, zan dar 8 velah kan thleng ve thei chauh a. Ka thlen zan hian ka awm loh chhunga Tei lo riahpui thin tu Kimtei chu alo la awm a, ka haw tur ka sawi lem loh avangin an lo hre lo ani. Chaw ei te ka ei zawh hnuah ka inbual a, Esi chu hmu chak viau mah ila a tlai deuh tawh avangin ka kal duh ta lova. Tin, ka motor insawhna ka lo chauh ve deuh avangin mut hma chu ka duh hrim hrim ani. Ka mut dawnah zandanga ka tihdan pangngaiin goodnight message ka thawn a, min chhanna pawh ka nghak lovin ka lo muhil daih a. zanlaiah ka thang harh a, ka phone ka en chuan Esi msg hmuh tur a awm lo. Net pack anei lo pawh ani thei tiin a last seen chu ka han en dawn a, a lo la online reng a! Ka thinlung chu ana deuh sawk in ka hria, ka msg reply lo chung han biak leh chu tlawm ah ka la ve deuh bawk nen ka out a, ka mu leh ta daih a. A tukah chuan office pawh thleng peih lovin ka mu nileng a, hnaa ka hah ve deuh chu thuhran, Esi awmdan danglam chuan min ti buai hneh viau. Tlai lamah chuan ka insum thei ta ngang lova, an in lam panin ka chhuak ta nge nge a. An in ka thlen chuan rawng alo bawl mawlh mawlh a, min hmuh chuan a lo nui deuh sak a, ka tum bur thung a. Ka tlangnel ve tawh em avangin an sofa ah duhdah deuh tak hian ka thu a, thingpui keng chungin a rawn kal vat a, “I lo thleng tluang maw?”a ti a, thingpui min pek chu ka in a, ka lu chu ka bu nghat ringawt a, “Enge min lo hawn a?”a tih leh chuan amah chu ka va melh a, min lo en ve reng a, mahse rei min en ngam lo a kun ta daih a. Ka han thut hnaih deuh a, “Es, min ti buai takzet ani”ka ti a, “Ka ring ani , kei ve hi chu phurrit mai ka ni alawm”a ti a, “Nilo, I hrethiam lo anih kha, nizanah khan engvanga min reply lo nge I nih? Kha kha ka tan buaina tham a tling asin”ka ti a. A darah ka vuan a, “Es, khawngaih takin ka rilru hi min hriatthiamsak rawh. Midang tan hian ka phal lo che ani”ka ti a, “Ruatsang… biak tawh loh che hi ka duh ani”a ti a. Ka vawnna chu ka thlah a, mak ti takin ka en reng a, “A lo la thleng dawn tho, kan nat hma hian inthlah ang”a ti chuai raih a. Hei hi maw a duhdan chu lo ni a? Min hnar nasa tawk viau tawh laawm, kei hian enge ka hriat min duh lo tu hi ka lo la zar buai reng ni? A tawk viau tawh alawm, “I duh dan anih phawt chuan le”tiin ka tho a, hawilet lovin ka kal nal nal a.
.
Ka nundan pangngaia let leh tur chuan a la har pawh ani maithei, hmeichhia ka duhzawng ka tawn apiangin a rem lo zel hi ka hrethiam tawh lo. Esi nen chuan chumi ni atang chuan kan in be ta miah lova, biakina a inkhawm ka hmu ve zeuh zeuh tih loh chu ka hmu ngai mang lo. Office kal nan bike ka lei ve tak avangin an in pawh ka tlanpel fua ringawt tawh a, hmuh tam loh chu ka tan pawh a tha zawk reng reng e. Tei thiannu Kimtei a lo riak fo a, la naupang deuh mahse an kawm ve theih fu a, an thil zirnaa a hotunu Remremi chu min sawipui nasa ve thin hle. Amah chu nula hleitling leh chhe lo zet hi ani a, an picnic dawna Tei an in a ka dah tumin kan in hmu tawh. Mahni kea din tum tlat ani a, an chhungkaw khawsak enin an khawsa nuam ve hle tih ka hria, mahse a nu leh pa chawm hlawm nih mai mai a tum lo. Tei bulah fiamthu deuhin tha min tih thu alo sawi a, chu chu ani Kimtei nen an bawhzui tak chiam hi! Ka duh leh duh loh pawh ka hre chuang lova, mahse an dawrah chuan ka leng lut ve ta fo a, kan innel chinah chuan a fel in kawm nuam ka ti hle. Ka hunawl chu an dawrah ka hnawhkhat hneh hle a, hetiang hi ni mahse Esi chu ka theinghilh ngai lo. Nikhat chu kan ina chawei turin Remremi ka sawm a, bazar ah chawhmeh kan lei hnuah kan inphur haw a, Esi te inbul kan thlen chuan rin loh takin pawn ah alo awm a, ka tlan chak vakloh avangin a hmel pawh ka hmu chiang viau. Min hmuh chuan a hawisan nghal thuai a, engahmah ngaih loh chu ka tum ve viau a mahse ka thinphu dep dep chuan a laka ka rilru la danglam lohzia min hriatthiam thung. Ka boruak a ti danglam nghal vek a, mahse midang chuan nuam lo an ti ang tih ka hlauh avangin ka in sum hram hram a, dar 8 pelh hretah ka thlah a, lenglut tura min sawmna erawh hnialin ka haw tlang ta nghal a. Enginnge min mawlh ka hre lo, Esi te in bul ka thlen chuan ka ding a, second hnih vel ka ding hman ang tih chuan an kawngkhar a rawn in hawng thuai a, Esi nau mipa chu thinrim tak hian a rawn chhuak a, a nu in a rawn zui a, min hmuh chuan an ding ve ve a, Esi nau chu inhnuai lam panin a kal zui nghal a. An chhungkaw boruak tha lo ka tawngchu ti fuh lo hle in ka inhria a, “Ruatsang, I lo lang khat hle mai”a nu chuan a ti a, “Ni e, Esi a awm em?”ka ti a. A awm thu sawiin leng lut turin min sawm a, kan in zui lut a. Esi mitko chu a pa in alo hru mawlh mawlh a, rag zet hian ka pan a, a chhan ka zawh chuan a pa chuan, “Lalnunmawia’n a hnek alawm mawle, kan Nunmawia thin butut lutuk hi chu a hahthlak anih hi”a ti a.
.
“Ruatsang, kan chhungkua chu I hmuh ang hi a nia, kan zahpui awm asin”a nui lui sak a. An veranda thlang lamah boruak dawngin kan ding dun a, thlifim chuan min rawn chhem heuh heuh a, “Tu chhungkua mah hi famkim kan awm hleinem. Es, engkim hi ala tha vek mai ang”ka ti a, “Ni e tiraw? A sawi hi a awl deuh mai pawh a”a ti a, “Vawiin ami kha mi I bialnu chu? A hmeltha takzet ani”A mah vek chuan a ti a. Veng thenawm eng iarh chu ka thlir a, kan ngawi dun vang vang a, “Es, I laka ka rilru kha ala pangngai reng, a pangngai reng bawk ang”ka ti ta daih a. A thaw halh a, “Midang nei chung khan maw?”a ti a, “Nilo, tumah ka nei lo, nang lo chu duh dang ka nei thei lo ani”ka ti a, min chhanna chuan beiseina thar min pe tlat a ni. Amah hmachhawn zawngin ka ding a, “Ka mitah hian min en la, min duh loh thu min hrilh ta che”ka ti a, hnuai lam a bih tlat a, “Esther..”ka vin lek lek tawh, a rawn hawi chhuak a, a mitah chuan mittui a tling pam a, rang takin ka kuah a, “Tihpalh… ka tihpalh takzet ani. Rilru naa siam che hi ka duh lo, ka nawr lui ngai lovang che”ka ti a. Ka awmah a hmai a phum a, a tap tih ka hria, a hnung chu ka chul sak a, amaha kalsan ka lo tum hi ka tihsual a ni tih ka hria. A mittui a hru a, a nui lui sak a, “Ruatsang, ka tih hrilhhai che vangin min ngaidam rawh. I rilru min hrilh hmasak khan engtin tak nge ka lawm tih hi I hrethiam phak kher lovang. Mahse maw mahni insitna ka nei lian em em a, I bialnu nih kha ka pawm ngam lo ani. Mi fel tak I ni a, hna zahawm tak I thawk bawk a, kei lah nunhlui tawp tak ka lo nei si, min kalsan ni khan ka tap asin. Engvanginnge nang hi a hma khan ka lo tawn loh che ka ti fo thin, nang hi ka mipa zah em em I ni a, I ni reng tawh bawk ang. I thian leh I farnu angina min en la, chu chu keipawhin nuam ka ti zawk ang”a ti a. Ngawi rengin ka hma lam chu ka thlir reng a, “Keimah vanga zahna I hmachhawn fo tur ka duh lo hi hrethiam la, ka rilru tur hi min hriatthiamsak hram ang che”a ti leh a. A hmel chu ka en thin a, a thusawi chu a ti takzet tih ka hria, “Es, engmah hian I laka ka rilru hi a ti danglam lovang. Min duh ve anih phawt chuan tumah ka care lo, chuvang chuan midang vang mai mai chuan in hrem lo ang.. khawngaih takin.. “ka ti a. A kut chu ka han hum dak a, min lo hnial loh avangin ka kuah leh ta ringawt a, tha takin a awm hle hle a, “ I chhungte pawhin min hriatchian chuan min duh chuang lovang”a ti a, “Chutiang sawi angai lo, engmah hi kan inkar daltuah hman ka tum lo”ka ti a. Chu chu ka rilru tak pawh ani.
.
Esi nen chuan pangngai takin kan inkawp chho a, ka kiangah a hlim a, chutiang bawkin keipawh a kiangah chuan ka hlim thin. Kan in zui theihna tawh phawt ah chuan kan in zui a, ka zah pui lohzia hi a hriat a ngaiin ka hria a, amah pawh inrintawkna chu chuan a pe ang tih ka ring tlat ani. Kohhran ah pawh a phak ang tawk in ke a pen ve zel a, KTP inkhawm pawh a thulh ngai ta mang lo. A rin aiin a member puite pawhin an lo ngaihsak a, tlangnel takin a in hman leh theih phah a. Mi zinga a che reng reng hi chik takin ka lo en thin a, a che vel hi hmuh a nuam takzet a ni. Zankhat chu ruah asur nasat em avangin in ah ka awm a, Tei chuan tv a en a, Esi ka text mawlh mawlh thung, “U… Esi nen in ni mi?”Tei chuan a ti a, chhang lo in ka nui mai mai a. Thuthlenga a mu chu a rawn tho a, “Ka nu in a hriat chuan a lawm hauh lovang..(Ka nu hi tihian an ko ve mai zel a)”a ti a, a tum deuh hmak a. Ka han thu tha ve a, “Engvang ngawt chuan Tebawih?”ka ti a, “ A nunhlui ka hre vek mi hian an sawi nasa lutuk asin. A tirah chuan thian mai in nih thu ka sawi thin a, mahse mi sawi in kai nasat danah hian ka ringhlel tan cheu ani”a ti a. An tana tangkaina awm hauh lova mi chungchang lo sawi thin te hi ka haw hlur a, engtiang takin nge an nunchhuah nan an lo beih ve ang tih pawh hre lova mi that lohna haichhuah tum hi ka haw takzet a ni. Ka mut hmunah chuan ka ngaihtuah neuh neuh a, ka nu hi ka sawi tawh angina mahni thu hi tha ber nia ngai tlat ani a. Kan unau pawh kan kawppui turah a thu tihtlang a tum ngei thin. Keimah ngat phei hi chu fiamthu in nupui min hualsak thu a sawi fo thin a, mahse thutakah ka ngai chuang lo. Hetia ka nau in a rawn sawichhuah takah chuan thil a kal fuh dawn lovin ka hria a, ka pa biak khalh vat a tha in ka hria a ni.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

Mahni buaina chu thuhran nise, khunkhan taka nu leh pa te han titi pui hi thil har tak mai alo ni a, keipawh ka pa biak ka tum atang karkhat a ral leh tawh a. Ka office bang chu inchhunga ka nu lo thu reng ka hmuh chuan min thawng hle a, min hrilh hmasa lovin hetiang hian a awm ngai lova, chuvang chuan mak ka ti reng a ni. A hmelah danglamna awm miah lovin min lo bia a, a rawn kal chhan ka zawh chuan min ngaih thu a sawi leh mai a, mahse chuvang ringawt chu ani lovang tih erawh ka ring. Ka chaweikham len ka tum chu lenglo mai turin min ti a, a rawn thlen zana han chhuahsan chu nuam ka ti chiah lova, mahse Esi bula ka lo tiam tawh avangin chhuahpui ka tum ani. Kal ka tum luih chuan min hnial duh bik lova, tha takin min thlah a, nu a lo tak anih avangin engemaw tak chu a ti tho dawn a, chuvang chuan tun atanga ka thu hi kaltlangpui ve zel ka duh ani. A tukah pawh Esi nen kan chungchang chu engmah kan la sawichhuak lova, hre lo ang maiin a awm lui tlat a, keipawhin sawichhuah ka tum bik lo. Chawlhni tuk ani a,inkhawm tura ka insiam mawlh mawlh lai chuan ka nu chu room ah a rawn lut a, “Bawiha, naktukah haw ka tum tawh sia I thiannu pawh chu lo leng ve se”a han ti a. Ka in her a, a rilru tur awm ang hriat tumin a mitah ka en a, mahse engmah ka hmu thiam lo, “Tlaiah ka rawn hruai dawn nia”ka ti ve mai a, inhmu mahse pawi ka ti lem lo. In atanga ka chhuak chiah chu phone ah tuemaw a be nghal mawlh mawlh a, biakin lam kal pawh a ngaihsak ve lem lo. Ka nu anih avang hian ka hmangaih a, mahse a chang chuan ka pa rawngbawlna a tawiawm tha lo hi hrehawm ka lo ti ve thin. Chawhma inkhawm banah Esi te inah ka chawl a, chawhnu inkhawm tlang nghal kan tum a, chumi hnuah kan in lama phei kan tum ani. Ka nu hmuh chu huphurh viau mahse thil a fel hma zawkna tur anih a ri vangin ka nawr lui a, rem a ti ve chauh a ni. Inkhawm banah muangchangin ka in luah lam pan chuan kan in zui a, kan in chhaih kawng tluan a kan hlim tawk ve hle. In kan thlen chuan ka nu chu alo phul hlut a, ka inthlak chhungin Esi nen chuan an lo inkawm a, zawhna chhan nuam vak lo tur a zawh tan chuan thildang ka va sawi pui ta daih a. A tum reng vang ni awm takin ka nu lah chuan a la zawt ta zel a, hun kal tawh eng engemaw tangkaina awm miah tawh lo vang chuan Esi chu zak takin a awm mek a. Chutiang a awm lai chu ka hmu duh lo, ka thutna atang ka tho a, Esi chu ka kai a, chhuahpui ka tum chu ka nu chuan min lo dang a, “Helai hmun ka rawn kal chhan dik tak hi ka han sawi ange”Esi chu a melh kuau a, “Nula, ka fapa nupui tur hi hual ka lo nei tawh ani. Nangni ang nunhlui tawp tak nei tawh nena inkungkaihna in neih hi ka remti ngai reng renglo. I chanchin hi ka lo chhui ve nasa khawp asin, ka fapa tan hian I tling lo ani e”a ti ta pap pap mai a. Esi hmela zahna lo lang chu hmuh hrehawm ka ti, “Eng thu nge I sawi ka nu? Ka nupui tur chu ka duh thu ngeiin ka thlang anga, ka hmangaih chauh ka nei ang. Esi hi chu ka hmangaih awmchhun chu ani bawk. Ni e I sawi dik e, a hun kal tawhah chuan tihsual chu anei ngei tawh lawm. Tunge famkim awm bik chuang? Tun hun hi a pawimawh chu ani zawk dawn lawm ni?”ka ti a. Ka thinrim lutuk chu ka khur ru der der a, “Tun hun a? Eng beiseina nge I la neih cheu a mi mawl pa? hetiang ho hian an nun hi an sim tak tak ngai lo. Remchang an hmuh zawngin an let leh ngei ngei thin”a ti a. Esi chuan ka vawnna chu phelh a tum a, mahse ka vuan nghet sauh a, “Hei hi lo hre ve mai mai teh ka nu, he nula hi ka vuan tawh a, ka vawnna hi ka thlah tawh ngai lovang”ka ti a, “Mi pangngai I nih chuan nang talin I thlah ang chu tiraw? Mi chhungkaw tibuai tu nih chu a nuam lo maithei ania”ka nu chuan a han ti leh hram a. Ka melh hrawk a, Esi chu kaiin ka chhuahpui ta dawr dawr a. Sunday tlai ani a, field ah tumah an awm ngai loh avangin chu lam chu ka pan pui a, a tahchhuak in sum a heh a pet fan fan chuan ka chakna zawng zawng te hi a tichhe vekin ka hria. Field kotlangah chuan kan thu a, a khup ah a khabe a nghat a, a mittui chu a far fap fap a, chet lak ngaihna hre lovin chhum chhah tup chu ka thlir a, kan lungchhiatna min hriatpui ni ve maiin a lang. Thawklehkhatah Esi chu a rawn tho thut a, ka lo in perh tho ve vat a, “Khawnge I kal dawn?”ka han ti a, “Inah ka haw duh”a mittui chu a han hru zeuh a, “Es, ka nu hnena ka sawi kha ka rilru dik tak anih kha”ka ti a. A tahna avangin a mit chu a bui chek a, “Ka phu hauh lo ka lo kawp che tih hi lo ngaihtuah tur ka ni asin. Ruatsang, ka nunhlui kha zahawm lovin mualphothlak hle mahse vawiin a ka zahna nen ngaihtuah chuan engmah danglamna a awm lo. Khatia ruih mai mai khan miten ngaiah min nei a, tumah hian min sawi peih tawh lo. Mahse that tumin ka bei a, zahna tho ka la hmu zel anih hi. Hetiang anih chuan that pawh hi enge sawtna awm chuang?”a ti a. Ka pan hnai a, a dar lehlam lehlamah ka vuan a, “Chutiang chuan vawikhatmah sawi tawh suh, I kiangah ka ding zel dawn alawm”ka ti a, a lu chu a thing a, “Nilo, ka thlah zawk ang che. Nang chu mi tha tak I ni a, ka chunga I thiltih zawng zawng hi ka rul let thei tawh lovang che. Mahse min ngaihtuah suh, hmalam panin ke ka pen zel anga, i tih tha tih hi a thlawnin ka awm tir lovang. Keimah vanga I tawrh hi a ngai lo”a ti a. Ka kut chu a la thla a, “Khawngaihin min kal tir rawh”a nui lui sak a. Tunah hi chuan ka kaltir hi a tha zawk, nakinah ngaihtuahna tea lo fim anga, chutah chuan that akin titi pui ila a fuh zawk ka ring ani.
.
Ngaihtuahna pawh a lo fim a, Esi nen pawh thatakin kan sawi dun a, ka nu vang mai maia kalsan ka tum lohzia leh ka thlah dawn loh thu ka hrilh a, kan khuaah haw in ka pa sawipui ka tum thu thlengin ka hrilh ta vek a. Ani pawhin chu chu tha ati a, min lo nghak tura ka tih chu a pawm ve ani. Chutia tha taka kan awmlai chuan kan khuaah ka haw a, ka pa hnenah ka nu thil tihdan leh Esi chu neih ngei ka tum thu chu ka hrilh vek a. Ka pa chuan ka duhthlanna min zahsak thu leh ka duhzawng apiang nei turin phalna min lo pe hmak a. Lawm takin kan khua chhuahsan in ka haw leh a, Esi hmuh hlan chu ka nghakhlel hle nghe nghe. Ka thlen zan hian bike ka khalh hah deuh avangin ka lengchhuak peih lo a, ka haw thu pawh ka hrilh duh lova, surprise chu ka tum ve ani. A tukah an ina va hmuh ka tum chu min hmuh duh loh thu leh biak pawh min biak duh loh thu ka hre ta mai a, surprise ka tum a, min lo tihkhalh zawk ani. Ka call a la duh lova, an ina ka kal pawhin hmuh tur a awm ngai hek lo.
.
Nihnih chhung kan be thei tawh lova, a phone a switchoff a, a hmaa kan buaina tho chu tuna kan buaina ah pawh ka ngai a. A rilru inpeih hun nghah chu tha zawk in ka hre leh a, karkhat chhung zet ngawi rengin ka nghak a. Chutianga awm ringawt chu ka hahdam phah chuang silo, an in lam panin ka chhuak a, ral atang a inkhawm kal tur ka va hmu hlauh a. Hmanhmawh takin ka tlan let a, ka inthlak sawk sawk a, biakin lam chu ka pan ve nghal a. Inkhawm ban chuan pawnah ka lo nghak reng a, a lo chhuak lawk lo chu ka thinrim hlur tawh. A tawp a tawpah Muantea nen an rawn inzui chhuak a, chumi ka hmuh chuan ka na ngawih ngawih, min hmu lo anga a awm chu ka tuarthei lo,”Esther”ka vin lek lek a, an lo hawi rual thawt a. An pahnih chuan min rawn pan a, “Ka lo nghak reng che a”a aia tawngkam nem deuh chuan ka han ti a, “A pawi ka ti lutuk, hei Muantea nen hian tihtur pawimawh kan nei a”a ti a. A banah chuan ka kai a, “Inbiak lawk kan ngai”ka ti hmuk a, “Ka duh lo..””A pawimawh hle asin”ka lo ti leh a, “Miin an duh loh chuan kal tir mai la, I che mawi lo deuh hlek ania”Muantea chuan alo ti a. Esi ka vawnna chu ka thlah a, Muantea chu ka hmachhawn ran a, “Dinhmun chhe bera a din lai khan kalsan lovin ani hi lo vuan tlat ni la, vawiin ni a miten a chanchin chhia an sawi zawng zawng hi a tawng lo tur. Mipa dik tak niin i inhre ve tho em? Keichuan khang I thil tih sual ang kha thlen tir ka tum ve reng reng lo. Estheri hi ka hmangaih a, ka hmangaih reng bawk ang”ka ti a. An pahnih chuan hnuai lam an bih reng a, rilru na tak chungin ka kalsan ta a. Kha thu kha sawi mah ila min hmangaih let ve tu turin min kalsan a duh tlat bawk si chuan hmangaihna vangin ka kal tir ang nge ka zui zel ang tih chu ka hrethiam chuang lo.
.
Ka nu chungah chauh ka lungawi lo ani lova, awlsam lutuka min thlah theih avang chuan Esi chungah pawh ka lungawi lo ani. Remremi te dawr lamah ka leng fo a, ka harsatna ka thlena ber ani a, min hnem ve mawlh mawlh thin. Dawrah chuan beer a case in an inchhawp thin a, nidangah pawh ka hre tho a, makah ka ngai hran lo. In tura min tih pawhin ka in ngai lem lova, nui chungin min sawm ve zel tho a. Esi nen hetianga kan boruak anih hnu hian beer chu tem ve ka ching tan a. Reiloteah mahniin ka kawl vat a, zana muttheih loh hian in ka ching a. Anihna takah chuan Esi laka beidawn chu ka tum lo, mahse hmeichhe lama zei lo lutuk hian tihngaihna dang ka hre silo, awm ti nuam tawk vela beer in chuan min chhawk berin ka hria ani. A chang changin ka la inkhawm ve a, Esi ka hmuh chak em vangin chu chu ka ti thin. Mahse min hlat thei ang berah awm a tum zel si a, chu chu hmuh hrehawm ka ti a ni. Ka nu nen pawh kan inbe ngai lova, ka zah em em thin khan ka nun hi min tihchhiatsak ani. Beer mai ka duhtawk lova, a aia sang ah ka kai chho a, ka nun chu a ho telh telh a, Esi dinhmun kha ka hriatchian phah telh telh bawk a. Zankhat chu rin loh takin ka thianpa Mama a rawn lut a, ani hi hmundanga hna nei anih avangin a rawn haw khat hle a, dawhkana ka thil inchhawp a rawn hmuh chuan mak atihzia a hmelah a lang chhuak a, “Ruatsang, enge thil awmzia?”a ti chul a. Ka bulah a rawn thu a, hmeichhe pakhat vanga nunchhiat phah chu a ho a ti a, ka tan hian a ho ve tlat silo. Thil awmzia ka hrilh vek hnu chuan pawi tih hmel takin min kuah a, “Engatinge I beidawn hma em em a? Hetia tlawm mai tur hi ini lo asin, I tlu hlen tur ani lova, I dingchhuak leh ngei ngei tur ani”a ti a. Ka thianpa thusawi chu ka ngaihtuah chhunzawm a, a dik hle tih pawh ka hria. Ka beidawng tur ani lo, ka hmangaih takzet anih chuan beidawn hi a thiang lo.
.
Ka in met fai a, uluk takin ka inbual fai a, a hun takah ka thiantha Mama alo lang a, ani hi ka nunkawng zawh sual hlen tur min lachhuak tura PATHIAN MIN PEK ANI. Hlim takin ka faifuk hlarh hlarh a, darthlalanga ka hmel lo lang ka hmuh chuan ka nui sak a, hlimna hi mihring nunah hian alo pawimawhzia ka hre thar leh ta. Ka bike chu ka han ti nung a, Esi te in lam pan chuan ka inkhalh chhuak a. Engang pawhin min lo lawm lovin min lo be tha lo mahse ka beidawng mai lovang ti rilru chungin inchhungah chuan ka lut a. An in chu alo reh thiap a, ka han au deuh lawng lawng a, rei vak lo hnuah Esi nu chu room atang a rawn chhuak a. A beisei loh takin min hmu ani ngei ang, a phu deuh zawk a, “Ruatsang, nang I ni maw lo leng thu rawh”tiin thutna min kawhhmuh a. A hmel chu a ngui deuh bar in ka hria a, Esi awm leh awm loh ka zawh chuan a awm loh thu in min chhang a. Thildang engengemaw a sawi luam a, Esi chanchin chu han zawhbelhna turin hun pawh min siamsak lo. Ka haw dawn chuan rem leh rem lo hian Esi awm huna len leh ka duh thu chu ka sawi a, rilru kim lo takin ka haw a. Esi chungah thil tha lo a thleng em ni dawn chu tiin ka ngaihtuah a, mahse chutiang em anih chu ka ring lo. Mama te inah chawei tura min sawm avangin ka office bang chu inah haw lovin ka kal tlang a, an chhungkua hi an rual ve a, a khawharthlak loh viau thin. Mama chuan min hmuh velah min lo kai sawk sawk a, a room lamah min hruai a, a hmelah chuan dik lo a awm tih ka hria, “Ruatsang, phone a sawi chi loh thil hriat thar ka nei, Esi chungchang ania”a ti a, ka thin chu a phu nghal dawt dawt a. A khumah min pawt thu a,”U Andy-a hnen atanga ka hriat ruk ve tho ania, hre angina awm miah suh ang che”a ti a. Chutiang a han ti chuan min ti hlauthawng telh telh a, sawi vat turin ka tur a, “Esi a rai..” “Eng a???!!” ka au thawt a, ni lo, ani thei lo. Mama chu a kawr awmah ka pawt a, “Dawt ani tiraw Mam? A in tihderna chi miah lo ania”ka ti a. Zaidam tak hian min dawngsawng a, tukverh atanga thlifim dawng thei turin chair a dah a, kan thu a, “Vanduaina hi a ta ani ta mai em ni tiin nizan phei chu ka ngaihtuah nasa a, ka khawngaih takzet ani”a ti sap a, “Tu fa nge a pai ? A duh thu ngeiin a ni lo em ni?”ka ti a. Ka thaw in min hnawh a, ka hah ut ut mai a,”Pawngsual a tawk ani”ka thinlungah chuan a thum dup dup a.
.
Ka khumah ka bawk thlawp a, “In khuaa I haw lawk lai a thil thleng ani a, zanah KTP in hla an zir a, zan tir atang a lu a nuam thei lova, an hla zir pawh in awm tluan thei lovin haw a dil a. Hemi zan hian ruah a sur nasa hle a, current a awm lo bawk ni awm tak ani. An in thlen hma kawn ah sawn he vanduaina hi a tawk ta hlauh a ni. Tanpui tu tur au mahse khawpui ri dur dur chuan tu beng mah a thlensak silo, Ruatsang, mangang taka a au vel tur ka ngaihtuah hian ka lainat takzet ani.”a tih te chu ka bengah a rawn ri nawn a, tlangval ruih ching satliah hurna avanga ka hmangaih in chutiang alo tuar chu ka thin a rim a, chupa chungah chuan phuba lak ka duh ani. Engthil pawh thleng dawn mahse ka vawn tawh hi ka thlah mai mai lovang. Ka tho a, in dawm kun hman ka ni lo, Esi te in lam pan chuan ka tlan chhuak nghal vang vang a. An in ka thlen chuan a nu leh pa in tv an lo en a, Esi hmuh ka duh thu chu ka sawi nghal tawng a, a awm loh thu bawk min lo hrilh leh a. Esi room chu ka pan lui a, ka hnungah a nu in min rawn um a, room kawngka chu ka nam hawng a, khuma lo mu dang bei Estheri chu ka melh ta tlawk tlawk a. A mitkhur chu a thuk dak a, a vun nung sen siah chu thisen tlachham ni awm takin a var dang lap a, a bulah chuan ka thu a, ka mittui chu a tla sawk a, Esi nu chuan ka darah a kut a rawn nghat a, “Ruatsang, ka thiltih sual khan min la zui zel anih hi”a tap ta zawih zawih a. Esi hmai chu ka han chul a, “Ka kalsan dawn reng reng lo, eng dinhmunah pawh ding se ka kalsan lovang”ka ti sap a.
.
Nitin office kal pah leh haw pah in Esi te inah chuan ka kawi ziah a, a harh lai chuan min hmu duh ngai lo. Mahse ka kal ka thulh phah ngai chuang lova, lo beidawng mai lovin lo zui tlat ila chuan hetiang hi a tawn ka ring lo ani. A hmel dang lutuk pawh tunah chuan a ziaawm tawh a, ka biak pawhin min chhang ve ta zeuh zeuh a, nitin ka hmangaihna hi lantir zel ka duh a, atan hian amah vengtu leh enkawltu nih ka duh ani. Thla alo liam leh meuh chuan a taksa pawh alo chak leh tan a, hmuh a nuam leh tan viau. a. Nikhat chu an ina len tumin ka phei a,inah a lo awm lova, ruah chu a sur deuh cherh cherh avang chuan khua a vawt deuh sung a, khua chu a duai deuh ruih bawk a. Alo let mai ka rin ang aiin alo let har a, a nu chuan hmun pakhat pawimawh deuh tlawh lawk duh ka nei a ti anih kha ati a. Nihliap chu ka pharh a, hmanhmawh tajin field kan pan chuan ka kal ta vang vang a. Ka tglen chuan mak tih hmel tak hian min lo en a, ka nui sak a, “Es, kan awmdan tur hi rel a hun tawhin ka hria ani”ka han ti tawl a, bultan dan dang ka hre ngang lo ani. A maimitchhing a, “Engmah rel tur a awm ka hre hleinem”a ti sap a, “Nang leh kei, kan naute te nen kan awmdan tur”fiah tak chuan ka han ti a. A pum chu a dawm vang vang a, a mittui chu a luang ngiai a,”Ruatsang, keimahin min paltlang tir rawh. Ka vanduaina hi I vanduaina ah ka bel thei lo che ani”a ti a, ka kuah thlawp a, “Nangmahin engmah hi I tuar ka phal lo, ka hmangaih che. I hriat phak leh I rin phak bak hian ka hmangaih ang che. Min hnial lo mai rawh, aw .. khawngaih takin”ka ti a. A mittui chu a far zawih zawih a, “Hlimna ka tawng chho ve dawn chauh a, mahse vanduaina chuan min lo la zui reng tho si”a inhnit hlap hlap a, “Chutiang chuan sawi lo hram rawh, I tan I Vantirhkoh ni turin Pathian hian min lo dah reng pawh ani maithei asin”ka ti a. Ni e, chu chu ka rin dan dik tak pawh ani reng a, he hmangaihna hi Pathianin min pek ani tih chiang takin ka hria.
.
“Nakinah I rilru tina pawh ala ni maithei a, I nei duh tak taka kalsan I tum lo anih chuan naute hi kan titla mai dawn em ni?”Esi nu chuan kan hma ngai takin min titi pui a, “Ni love, he naute hi alo piang anga, hmangaih takin ka enkawl ang. Kan vanneihna tura Pathianin min pek pawh ani maithei asin”ka ti a, lawm avanga bianga mittui luang zawih zawihin a nui ve sak a. Esi rilru erawh ka hmin mai thei lova, mahni insitna leh hrehawm tihna thuk tak aneih vangin inthlahrung takin a nung ve thin. A dul pawh a lang ve tial tial a, mi hriat tam hmaa chet lak chu ka duh a, a nu leh pa remtihna in ka hruai haw ve tawp a. Ka nupui ni tura ka hruai haw zan chuan mittui nen hun kan hmang a, ka thlah ngai dawn lo ani tih ka nu hnena ka sawi chu hlenchhuah in a awm mek a ni.
.
Naute tap ri ngak ngak chuan ka hlauhthawnna chu a rawn ti reh nghal duak a , reiloteah ka nu chu rawn chhuakin mipa kan neih thu a rawn sawi a. Ka awm hle hle thei lo, ka hlim lutuk hi ka buai vek ani ber, naute nu pawh a that thu an rawn sawi vat a, Pathian hnenah lawmthu ka sawi mawlh mawlh a. Hetiang taka hlimna hi kan chhungkuaah ala thleng ngai lo, a hmaa ka nupui duh lo ngawih ngawihtu ka nu lah chu a duat ber tu ani a. Ka nu rilru sak tinem theitu ka nupui hi hmeichhe satliah ngawt zawng alo ni lo. Ka fapa hmingah chuan Vanlalmalsawmdawngkima tiin ka phuah a, kan chhungkaw nun tidanglam tura PATHIAN MALSAWMNA A HNEN ATANGA KA DAWN, AMA MIN PEK ANI A, mal min sawm tu hnena lawmthu sawi chu kan tih mai tur a ni.
.
Sawmtea pawh kum nga lai ani tawh a, a chhang neih pawh kan duh viau tawh a, mahse kan nu chuan nau a pai leh ta lawk lo. A chang chuan a rilru a hah thei em em a, a hun takah kan nei mai ang tiin ka hnem thin. Kan thiante thu min rawn angina doctor hnenah kan nupa chuan kan inentir a, test hrang hrang kan neih hnuah kartawpah result lam turin min ti a, hlauhthawnna em em pawh kan nei hran lo. Kartawpa result kan va lam chuan doctor thusawi chuan min ti nghing lawih a, test result atanga a landanin kan nu nilovin keimah zawkin that lohna ka nei a, fa ka nei thei ve ngai dawn lo. Ka thinlung chu a ipik churh a, ka nupui lakah inthlahrung takin ka awm phah a, a rukin hrehawm ka ti ngawih ngawih ani. Keimahin bathlar thlanglamah ka thu a, ka mut theih loh apiangin helaiah hian ka awm thin. Ka bulah Esi chu a rawn thu ve a, za lo takin ka lo nuih sak a, “Ruatsang… I rilru tur chu ka hrethiam alawm, mahse nangmah ngeiin min fuih thin na kha ngaihtuah let la, hetiang mai mai chuan i tlawm thei lovang”a ti a. Esi chu ka han kuah a, “I tan hian tling zo lo ka in ti em ani, fa pawh ka neihpui ve thei dawn silo che a..”ka ti zuai raih a. Ka kawngah min kuah a, “Chutiang chuan vawikhatmah ngaihtuah tawh suh ang che. Nang hi ka tana vantirhkoh ni tura PAthian min pek I ni a…” “Bawiha hi ka tan, kan pahnih tan PAthianin min pek liau liau ani. Engmah hi chak loh nan ka hmang tawh lovang, nang leh Bawiha ka nei a, lungngaihna tur ka nei lo”ka lo tih khalh a.. Min en a, a nui ver a, “Angel thla nei lo, min veng reng tura chung lamin a rawn tirh che chu ilo nih ngei hi”a ti a…. a mitmeng hlim sarh chu ka thlir ning thei mawlh lo, a hmui fawh chakawm taka sen siah chu ka tawk zauh a, ka fawp ta vawng vawng a……………..
.
(Ruihtheihthil bawihah ilo tang tawh anih pawhin hma lam hun eng tak ila nei tih hria ang che, hnaih tur dik hi i hnaih ngam phawt chuan... Pawngsual tawkte hi duh reng vanga tawk an ni bik lo asin. Mahse hei hi hrereng la, i chungah he vanduaina alo thleng anih pawhin beisei tur i la nei tih hi hrereng ang che. Hmangaihtu dik tak Pathianin a pe em em ang che, i nun kha a tha zawnga i hman phal phawt chuan...)
.
Special dedicated to R&A

Mami Dekhenez Chawngthu "THU LeH HLA"'
https://www.facebook.com/groups/140421496333075/