Perfect/Inperfect Match BY Mami Chhakchhuak (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Perfect/Inperfect Match BY Mami Chhakchhuak

Unread post by Ngaia » December 20th, 2017, 6:52 pm

Perfect/Inperfect
Match

Mami Chhakchhuak

Chapter 13

Livie chu a sa pup pup a.Guard pa in chelh reng lo se la chuan a kal zel thei hauh lo ang.Nghet deuh maiin Guard pa chuan a kuah a,a kalpui hlawk hlawk a.

Inchhung a luh chuan Mayor nupui chuan a lo lawm vat a,an inchibai vel pawh Livie chuan mumang ang ruai in a hria a.Thil thleng engmah awm lo anga awm luih hram tumin Livie chu a nui lui sang a.

"Grace nen hian in inhria tih ka lo hre lova" an bul maiah chuan Jeanine chu a lo kal a.Mayor nupui nen chuan an inhriat that hmel hle mai.

"Olivia ,i hriat angin Jeanine,Jeanine Leridge " Mrs Bass chuan nuam ti vak lo hmel pu hian a ti a.

Livie chuan mak a ti kher mai,Jeanine chu a mi hmuh chak loh ber te zinga mi a ni ngei ang chutah Mrs.Bass sawi dan lah chu...

Livie hmel buai nak a hmuh chuan Jeanine chu a lo phur sauh a "Mrs.Bass Livie nen hi chuan tihpalh thil thu hian kan inhmu theih zia hi mak i ti ve ngawt ang.Ka unaupa Craig nen an in date lai atang tawhin" pawisawi lo hmel zet chuan a ti a.

Livie chu a hamhaih kher mai,Mrs.Bass lah chuan inthiam hmelpu zetin a en tawp mai si a.A han hawi kual vel a,midang te chuan amah en chungin an lo phun sep sep tih ava hmu thei a.Pawna zawhna thinthawng zet mai a dawn chauh kha a ni ta lo tawp mai,mite chuan engemaw thil hriat an nei a ni.

Mrs.Bass chu a en leh a,bathroom awmna chu a zawt ta vat a.

Bathroom chhung chu a changtlungin an chei dan vel pawh a mawi khawp mai a,darthlalang hma ah chuan dingin a in en a.A hmai chu a dang var pap mai a,a taksa chu a khur dar dar bawk a.

Tuisik chu herh haw in a hmai chu a phih puat a,chutah ding thei lovin chhuatah chuan a thusawp ta niaih a.Tah loh hram tumin a hmui chu a pet fan fan bawk a.

Cary thlawhna a tum chu thlalatute ho chuan anlo ngaihven kher mai,thlalakna chu a de chuai chuai in an lo au luih luih leh a.

Cary chu hmanhmawh zetin inchhungah chuan a lut a,Mrs.Bass chuan mak ti leh lawm takin a lo dawngsawng vat a.

"Khawiah nge a awm?" Cary chuan thudang sawi lo in Mrs Bass chu a zawt hmiah a.

"Ahh..Bathroom.." hamhaih takin Mayor nupui chuan a tih mek laiin Cary chuan "Khawi lamah" a lo ti nghal a.

Mrs.Bass kawhna lamah chuan a tlanin bathroom chu a hmu nghal thuai a,kawngkhar kik a tum chuan a hma a Long Islanda thilthleng kha hrechhuakin kik lovin a hawng a herh a,kawngkhar chu a lo in hawng ve mai a.

Livie chhuata thu sawp niaih a hmuh chuan Cary chu a hlauhthawng kher mai,Livie chuan rawn hmu in arawn en kar mai a.

Tah loh hram tuma a hmui pe fan fan leh a mittui tling pam a hmuh chuan Cary chuan ava pan hnai vat a,a bulah chuan thingthi a."Hey,ka tihpalh lutuk" tiin Livie kut chu a kut veilamin a vawnsak a,dinglamin Livie bek sam chu a benga zeh pahin a biang chu a kutzungpui chuan a chulsak a.

"An hria" Livie aw chu a ri chang chang a "Nangpawhin i hria,tu pawhin an hria' a lo insum ve tang tangna chu thiahin a awm a,a rawn tapchhuak hawk a.

Cary chuan lo pawm vatin a awmah chuan a bei tir thlap a,a hnungzang chul sak hauh hauh pahin "Engkim a tha leh vek mai ang,i bulah ka awm e.Engkim a tha leh vek mai ang" tiin a hnem mawlh mawlh a.

Livie a tah chhuak zualpui a reh chuan zo deuh maiin a pawm nawlh a,a chhuapui a.Inchhung a lo awm te chuan an lo en duhin an phun sup sup a,Jeanine pawhin a sir atang chuan a lo thlir ve reng a.

"Engtizia nge Cary? Doctor koh a ngai em?" Mr.Bass chuan a rawn hmu ve chiah a.

"Ngai love" tih hmuk pahin Cary chuan a chhuahpui a,pawnah chuan a Guard hruai te pahnihin an lo pui vat a.Livie chuan engdangah ngaihtuah duh lovin Cary awmah chuan a bei hle hle a.Thlalatute chuan anlo bawr leh luih luihin anlo au leh chiam bawk a.

Thlawhna chhungah Livie chu thut tirin a coat chu a sin tir a.A ni chu chhuk lehin inchhungah chuan a lut leh a.

Mr.leh Mrs Bass te'n an hmuh chuan anlo ngaihven vat a,"Engthil nge thleng a Cary puih theihna che kan nei em?" Mr.Bass chuan a lo ti thuai a.

"Ka ring chiah lo.A nihna takah chuan ka puihna che ka hnukdawk zawk dawn a ni.Ka nupui hual inlo dawnsawn danah hian ka lawm lo hle tih inhriatna'n i campaign puihna atana ka endorsement zawng zawng kha ka sut leh tih lo hria la.Tuna atang chuan ka lak atang eng puihna mah i dawng tawh lo ang" Cary chu a tawng ring hauh lo,mahse Mr
leh Mrs Bass te tan erawh a ring tak a ni.

Cary chu a inher a,a chhuak nghal daih a.Mr.leh Mrs.Bass te chuan an umzui a.Leh hawi tawh miah lo in Cary chu thlawhna ah chuan a chuang a,an thlawk chhuak ta daih a.

Mr.Bass chuan a thlir zui vawng vawng a,thla thar maia inthlan an hmachhawn leh hunah chuan Cary puihna tel lo in engtinnge a chak ang, a chak tawh hauh lo ang le !?

Hamptonah zawk an tum a ni tih a hriat chuan Livie chuan mak a ti kher mai.Thlawhna atanga chhuk a tum chu Cary chuan a pawm leh nawlh a inchhungah chuan a luhpui a,khumah chuan dimte hian a dah a.

"Hei hi ei rawh" damdawi leh tui chu Cary chuan a pe a.

Livie chuan ei in inthlak lovin puan a sin tha nghal a,a bula Cary awm ve reng chuan a ti thlamuang hle bawk a,a ngaihtuahna buai nuaih nuaih chu kawm chungin a muhil ta a.

Zing a thanharh chuan Cary awmah a lo bei a,a ni pawh inthlak lovin a thawmhnaw ngai nen a bulah chuan a lo mu a.

"I tha em?" Cary chuan a rawn ti sup a.Livie chu a chesawn hret a.


"Ka tha e ,nizan khan eng damdawi nge min pek a?" a ti sap a.

"Muthilhna.I tha takzet maw?"

"Tehreng mai"

"Ka hrechiang duh Khatah khan engvanga kal nge i nih a" Cary hmel chu a dam thlup mai a.

"Mi 1000 vel hma a kan inneih dawn te chuan a pawimawh alawm" Livie chuan a ti sap a.

'Enge i sawi awmzia?"

'Kan inneihna ah mi 1000 vel sawm an ngaih tur thu i sawi kha"

"Kha kha maw...min nei turin thutlukna i siam ta a"

"Duhthlan tur ka nei em ni?"

"Nei hauh lo mai"

"Inthlak ka duh a" Livie chu thawh a tum a.

"Ka tihpalh a ni,i duh zawk chuan hriatpuitu mi pahnih te nen court ah kan innei dawn nia" Cary chuan a ti a.Livie tho tur chu a chelh tlat a.

"A tha alawm"

"Livie,ka tihpalh tak tak a ni" Cary chuan thutak fe in a ti a.

"Awle,ngaihdam i ni e" Livie pawh chu a nui ve ta a."Craig chungchang kha..."

'Ka hnenah i in sawi fiah a ngai lo,ka ngai pawimawh lo"

"Tak tak maw?" Livie chuan awih harsa a ti.

"Ni e.Tunah chuan i duh duh min dil rawh le"

"Eng maw?"

"I duh duh min dil tawp rawh,ka pe ang che"

"Hamptona min hruai hmasak ber khan lawnga min la lenpui tur thu kha i sawi a"

"Kha kha maw,vawiin chu lawngin kan leng dawn nia" tih pahin Cary chu a insiamrem a,Livie chalah chuan a fawh sak a.

Tukthuan an eizawh hnu chuan an insiam a,Cary lawng lian zet chuan an leng chhuak ta a.Livie chu a hahdamin lawng bathlar ah chuan a tei kual mai mai a.

Bass chhungkaw in a Cary a hmuh atanga a awmdan leh tawngkam engkim mai te leh tuna an awm mek dan atang hi chuan hun rei tak inngaizawng tawh inneih tum pawh an ang a ti khawp mai.Mahse chu chu duhthusam mai mai a ni.Cary hian a khawngaih vang mai mai ani ang a chungah a that ni.

Nileng chuan hun nuam leh hahdam thlak tak an hmang dun a,an inkawm in an hlim dun hle bawk a,zanriah chu veranda ah an ei mek a.

"Hetianga ka chunga that i chhuah vak hi a ngai lo,ka tha ve tawh lutuk asin" Livie chuan a ti ta nge nge a.

Cary chuan a thil ei lai chu dahthla in Livie chu a en a "I natna vang ringawt a i chunga that chhuahah min ngai a maw?"

"Chu lo engdang nge ni chuang ang ? I hmeichhe duhzawng ka ni lova,i tan ka tha tawk lova,mi hausa..."

"Ngawi tawh rawh Livie" a hmui chu hru in thutthleng hnung chu Cary chuan a ngheng a.

"Ngawi tawh rawh a.Thu hi min pe fo teh suh Cary,i nupui.."

"Ka hmangaih che alawm Livie"

"Hmangaih a,nang hian mi i hmangaih maw? Hmangaihna hi sum leh pai..."

"Hrep taka Livie.Ka hmangaih che ka tih a,ka thinlung ka phawrh lai pawhin i la phun char char a nia" a ti vin tuarh a.

Livie chu a ngawi hmak a.Cary thusawi chu hrethiam ve chiahin mak ti takin a en a.

(Saturday leh sunday ka chawl tih kha min lo hriat sak leh ula )



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 6:52 pm

Perfect/Inperfect
Match

Mami Chhakchhuak

Chapter - 14

Livie chuan sawi mai tur hre lo in a en reng a.Cary thusawi chu dik se a tih rualin rin harsa a ti bawk si.Dawhkana a kut awm chu la thla in a malchungah a dah a,thawk a la hak a.A ngaihna hre lo leh hriatthiam tum takin Cary chu a en a.

Cary chuan mitmeng ngainatawm tak hian a lo en a."Chutiang em em a mak chu a ni em ni?" a ti dam thlup a.

Livie chuan a chil a lem khalh a "Ni e,a ni alawm" ati khur dar dar a.

Cary chu a thutna atangin a tho a,Livie sirah chuan a thingthi a.Livie kut tereuhte pahnih chu laksakin a kut hrawl zet lum thur thur chuan a hum sak a.

"Mahse a dik tlat si a ni.Ka hmangaih che" tih sup pahin Livie kut chu a fawp zauh a,chutah a mitah tak chuan a chhanna beiseiin a en a.

Livie chuan sawi tur a hre lo,lawmna leh rinhlelhna in a khat a,a thin chu a phu dawt dawt mai a.

"Thil theih a ni lo" Livie chu a mittui a tling pam a.

Cary chu tlema tho kang deuhin Livie nghawngah chuan a fawp a.

"Ka hmangaih che" a beng bulah chuan a ti mawlh mawlh mai a.Dimte in Livie hmuiah chuan a fawp a,a duhthawh telh telh a.

Livie pawh chuan a thiam ang tawkin a lo chhang let ve a.Cary a inlak hran chuan a thaw ham ham a.

"Min nei rawh.I pa emaw pawisa vang ni lo in.Min nei rawh" Cary chuan a ti sup a.

Livie chu a meng de sar sar mai a "Awle,ka nei ang che Cary Van Der Woodsen.I pawisa vang emaw ka pa vang pawh ni lovin " ati ve ta a.

Cary chuan duhthawh takin a fawp leh a.Engtik laiin nge khum an lo thlen hman Livie chuan a hre lo.Khum puan nem tak a hnungzangin a deh a,Cary taksa hrawl pui maiin a delh chuan a hre ve chauh a.

A mitthla-ah chuan Craig a lo lang zawk a,a rei lo.Cary mitmeng de sar sarin hmangaihna khata a en na chuan a hlauhthawn thin na zawng zawng te kha a ti bo zo a,Cary ang chhungah chuan a him a ni tih a inhre bawk a.Thildang engmah ngaihtuah tawh lo in,a mi hmangaih tak leh amah hmangaihtu tan chuan a engkim a hlan a.

Cary chuan a bula thlamuang taka Livie muhil chu a thlir a,a nunah a vawikhatna atan nula mutpui a inchhir loh ber tum a ni ang.Livie chu a rawn che tiah tiah a.

"Hi" Cary chuan duh leh duat takin a en a.

"Hi" Livie chuan a ve ti sap a.

"Good morning" tih pahin a fawp a.

"Kan chungchang hi kan chhungte hrilh tawh i la tha ang" Cary chuan a ti a.

'Okay"

"Ka pu pawh a tha tawh lutuk a,hospital atangin an chhuak tawh ania"

Livie chu a thawveng huai a,George chu a ngaina hle si a.

"Bualinah min rawn zawm ve dawn nge..." Cary chu a tho a.

"Ka nu leh ka pa ka lo be zawk a nge" Livie chuan chak hle mahse a nu leh pa chu amah ngeiin hrilh a duh tlat.

"Okay,keipawh ka inbual zawh hunah ka rawn bia ang.I nu leh i pa chu min lo chibai sak la"

Cary bathroom a luh chuan Livie chu a tho chhuak ve a.Phone chu la in a chhungte chu bia a.

"Tak tak maw? Engtikah nge in inneih dawn?" a nu chu a phur kher mai.

"A ni tur chu kan la sawifel lo"

"Livie,Hampton chu kan lo thleng vat ang?" a nu chu thu dang pawh sawipui theihloh khawpin a phur a.

Livie-i'n phone a dah chuan a chau hnawk thei hial a,a kutzungtanga Pink Fantasy zungbun lian zet chu a en a,a tuai nauh nauh a.A bul maia remote a hmuh chuan a nui sak a,T.V chu a on a.

Chanchintharah chuan zan hmasa lam thil vel kha a lo lang nasa mai a.

"Thudik tak hi hriat a har hle.Kan thu lakna chuan Olivia Wardof , kan hriat theuh angin Khawvela mi hausa ber ni mek Cary Woodsen nupui hual chu, Craig Leridge nen hian pawisa leh naupai chungchangah Court ah an inkhing tih a ni a.Court chuan naupai chunchangah Olivia Wardof chu thiam chantirin a pa Mark Wardof chu a thawhna Royce Holding and Trust sum eiruk vanga Jail tantir a ni thung,thubuai hi..."

T.V chu arawn thim hmak a,engtik laiin nge a remote ken lai chu a thlauh a lo hre lo.Cary chuan a lo hum reng tawh a.Livie chuan a melh kar mai a.

"Khatiang kha en tawh suh.Mi ngaihven duh vanga thusawi uar ching annih kha."

"Mahse mi tamtak chuan an awih tho ang,a then kha chu a dik bawk"

"Ni e,an awih tho ang.Chuan ka hmangaih che a,kan innei dawn tih hi a dik ve bawk a.Chu pawh chu an hmu chak ngawt ang" Cary chu Livie bulah chuan thu in a bek sam chu a bengah a zeh sak a.Chutah duat takin a fawp a.

An inneihna tur chu an buatsaih mup mup a.Livie nu leh pa pawh lo thleng tawhin Cary chhungte lam pawh an phur khawp mai.Inneihna chu St.Catheral Church New York ah neih tur a ni a.Mi sang chuang hma ah.

Livie chu a ni telin a dam ve telh telh a,Cary chuan theihtawpa tawiawmin a enkawl bawk a."Hlau suh,i bulah ka awm reng dawn alawm" ati a nih kha.Chuvangin mi sang chuang hma a inneih pawh hlau lo a ni reng a.

Cary sawi lawk ang chiahin media lam ho chuan an ngaihven hle reng a,an thiltih apiang mai chu a hre ber nih tumin Livie chu an in tlawn siak a ni ber mai.

An inneih ni a lo thlen chuan Livie chu a zam leh ta hle mai a.

"Khang te chu thil pangngai alawm.Pasal nei tur tupawh hi an inneihni chuan an zam vek alawm" a nu chuan Livie chu a hnem mawlh mawlh a.Livie chuan kawrfual var thianghlim tak amah rem zaih mai a ha a.An bulah chuan Nina leh Natalie te pawh an lo awm a.

"Ka pa hi khawnge?"

"Hlauthawng suh,amah zawkin biakina hruai luh loh che a hlau teh ania" a nu chuan alo ti leh zung zung a.

Cary chuan biakin a thleng tawh a,'vawiin chu eng thil mah a kalsual tur a ni lo' a tih chu a hnathawk ho te chuan an la zawm tha viau e.Ni te lah chu a eng nuamin boruak a nuam em em bawk a,an inneih tur lo lawmpui ve ang maiin.Thawk la hawkin Biakin maicham pawnah chuan a ding a.

"Call i dawng" a assistant te zinga mi chuan a rawn ti a.

"Tunah ni lo" Cary chuan alo ti hmuk a.

"I hriat ngei duh tur thu a ni ati a"

Cary chuan phun hluk pahin phone chu a la a."Hello"

"Hello,Mr.Woodsen.Joe, Vaughn."

"Ka hria e Joe,Vaughn Private investigator Firm a mi kha" Cary chuan alo tih khalh zung zung a.An hnu chhui ti tawp tura a lo hrilh theihnghilh chu a hrechhuak chauh a.

"Ni e.Report pek tur ka nei a.."

"A pawimawh tawh love Joe,eng pawh lo hmu chhuak la a pawinawh tawh love"

"Hei hi chu i hriat duh ngei ka ring"

Maicham hma a Cary suit nalh tak nena lo ding a hmuh chuan Livie chuan a zamna te chu bo zo ta duak hian a hria a.Cary mitah tak chuan en in hma lam a pan zel a.

Thutiam an chham lai pawhin Cary nen chuan an in melh kar mai a.Livie chuan a nun thara bul a tanna tur chu mitthla a hmu lawkin a nui sang bawk a.

Reception chu Grand Hotelah an nei thung a,chutah chuan mopa leh monu te chuan an lam dunna hmasa ber chu hlim takin an hmang a.

"Khawiah nge honeymoon kan hman dawn ka hre thei tawh ang em?" Livie chuan ati sar sar a.

Cary chuan " Ka Surprise na tur boruak tih chhiat tum suh" alo ti hluk a.Livie chu a nui hak hak a.

Cary chuan kun hniamin a zuk fawp zauh a."Hlim takin awm rawh,engpawh lo thleng se ka hmangaih reng ang che" ati sup a.

Zanrei hma chuan mikhual te chu thlahin car ah chuan an lut a,thlawhna tum hmun lam chu an pan a.Livie chuan khawiah nge Cary-a'n a hruai dawn a hre hauh lo,mahse a ring tawka,hlauhthawn engmah a nei tawh lo.

------------------------------------------------
Lawmthu sawi hi ka thil thiam loh tak mai ni mah se sawi lo thei ka ni lo.Ka thiam ang tawkin ka sawi anga tumah ka ti thinrim em lo ang chu maw...

Perfect/Inperfect Match ka post tan tirh atang thla hnih tep a lo tling ta reng mai a,he thawnthu tawite hi story group pakhat tereuhte atang ka post tan a.Story dangte pawh ka lo post tawh thin a tun tum ang em em hian harsatna ka la tawk ngai lo.He story ka post chhung hian vawi 2 (hnih) ngawt thihna kan chhungkua ah a thleng hman a.Ka regu loh phah zia chu group tereuhte a ka post tantirh atanga chhiar tute'n in hria e.

He thawnthu ngaihnawm ti a min lo chhiarsak tute zawng zawng chungah lawmthu ka sawi a.Lu ka han sun a,chhungkua ah harsatna kan han tawk mawlh mawlh mai chu chhunzawm tawh lo a tawp san mai ka duh a,readers te lakah inthlahrunna nen chhuanlam siam fo pawh zahthlak ka ti a,ka lo post kher kher hi inchhir chang ka nei fo.

Chutiang hun harsa ka tawh a,ka hnual em em lai pawhin min fuih a,min nawr kal zel tute,a bik takin Muani Fanai leh Lalrinsangi ,in chungah ka lawm em em a ni tih hi ka sawi fiah thiam lo zawk.Ka lawm e.

Readers hriatthiamna ngah tak tak min hrethiam thin tute inchungah lawmthu ka sawi mawlh mawlh bawk e.

He thawnthu hi a tira ka tum dan ang tak a la ni lova.Chuti ni mah se tunhnai mai ah chhungkaw harsatna dangin min tlakbuak leh bawk nen ka chhunzawm reng thei dawn si lo,tawpna mumal nei lova tawpsan ringawt tha ka tih bawk si loh avangin chhunzawm leh theih turin ka titawp a.Pathian zarah kan dam anih chuan Season 2 angin kan la chhunzawm leh dawn nia.Min lo chhiarsak leh theuh turin ka sawm nghal che u.

Tunah hian short story "Dingdi" tih chu peih tep sa in ka nei a.Hei erawh hi chu Kumthar lawmna'n rawn tihchhuah hman ka tum ang.Min lo chhiarsak leh theuh dawn nia.Hei bakah hian "The Sultan and the Slave tih chu buatsaih sa ka nei bawk a.Season 2 ka chhuah hma in hemi te pahnih hi ka rawn chhuah hmasak ka ring.

A tawp berah chuan lawmthu sawi leh mi lawm zawng hrim hrim sawi thiam lo zet mai ka ni a.Readers te'n a in comment na te hi lawm viau e ti lo chuan like bak ka thiam miah lo zu nia.Story post thin in hriat tawh zingah chuan biak nuam lo ber pawl pawh ka ni mai thei.In duh ang ka tlin lo na ah ngaihdam ka dil nghal e.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)