A TLAI ZO TA BY HK Renthlei (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: A TLAI ZO TA BY HK Renthlei (Completed)

Unread post by Ngaia » January 3rd, 2018, 8:07 pm

A TLAI ZO TA

Eps - 19



Malsawma inchhung chu ala ngai reng mai. A nalh in inchhung bungruate chu a changkang hle bawk. A hmaa ka kal ai khan tlemin a danglam deuh tih loh chu danglamna dang tehchiam a awm lo.

"Țhu la, intur ka lo lak ang che." Sofa ah chuan ka țhu nghal a. A rawn kir leh chuan tray hian no pahnih leh bottle pahnih hi a rawn chawi a, pakhat zawk chu theitui a ni a, pakhat chu whisky a ang khawp mai. Zu lampang a in ka hre ngai silova, engtiklai ațangin nge zu lampang hi a lo in ni?

"Engtik ațangin nge zu lampang hi i lo in tak a?" Ka zawt hlawl a.

"Nangman min țhen ațang khan." Teh tawp chuan.

"Chu keimah vangah min puh deuh tihna mi?" Ka ti let salh a.

"Ni love, keimah vang mawle, tumah ka puh lo. Ka rilru nawm nan ka in mai a ni."

"A chhâwk che in i hria em?" Ti el zet hian ka ti leh a.

"I duh leh min nuih rawh. Pawi ka ti lo. Ka pa in company tihlen nan nupui min neih tir a tum a, vawiina i hmuh hmeichhia kha a ni." Tih pah chuan intur chu no ah a thli nghal a, A in nghal pawp.

Kei pawh chuan theitui chu ka inthlit nghal a, ka in zeuh zeuh. "Ka in ang hi i duh ve em?" Makti zet hian ka en a. "Teuh lo mai. Zu ka in ngai lova, zu in mi pawh kawm ka duh lo, pasalah leh ngaihzawngah pawh ka duh lo bur." Ka tihkhum leh hmiah. Ka țawngkam avang chuan alo ner sawk mai.

"Chuti chu zu ka in si a, i duhzawng ka ni lo tihna a ni maw?" A ti leh kher a.

"Aw, ka duhzawng i ni lo."

"Anih khapa kha i duh ami?" Ka en nghal thuai a, ka thil in pawh ka hâk țep.

"Tu chu maw?"

"Restaurant a mipa i bula awm kha, a melh dan che kha ka hmu reng alawm." Ani meuh pawhin a hmuthiam anih chuan Mahmingi sawi kha a dik a nih dawn hi.

"Ni e, a fel khawp mai, min ngaihsak bawk a. Ka la duh mai thei a ni." Eng thu nge ka sawi tak le? Ka sawi zo tawh si.

Thinrim lutuk mitmeng sen vek khawp a min rawn melh chuan ka zâm kher mai. "Eng thu maw i sawi kha, han sawi nawn leh teh." Min rawn pan hnai nghal ruak a, ka lo tawlhsawn ve zel bawk. Tawlhsawnna a awm tawh loh hnu chuan chet pawh ka che ngam tawh lo. A mitmengah chuan min thah mai pawiti lo hmel hian min en run lehnghal.

"Khawngaihin, min kaltir rawh." Ka ti ruai ringawt.

"Teuh lo mai, mipa dang hnenah ka kaltir che anga maw?"

Ka darah nghet takin min vuan a, talchhuah tumin ka theihtawpa țangin a theihna apiangah ka ham bawrh bawrh a. A thil in vang khan a rui deuh tawh bawk nen, pawisak a nei tawh lo kher mai.

"Khawngaihin i inchhir leh na tur tilul suh aw, i rui anih kha," ka ti ta ngawih ngawih.

A tawp a tawpah chuan ka thusawi vang chuan nge, min thlah rang kher mai. Inthiamloh hmel zet hian a indawm kun ta reng mai a.

"Ka tihpalh lutuk, min ngaidam rawh, chân che ka duh loh vang a ni."

"Ka haw dawn, vawikhatmah min hmuh tum leh tawh suh ang che," ka ti hmak. Ka thin te hi ala phu zawih zawih mai a ni.

Chhuah tumin kawngka ka pan nghal a, rang lutuk hian ka banah rawn man bet leh nghal mai a tum chu rum lutuk hian ka lo melh a, a kut chu a la leh zal zal a. A hmel pawh en duh tawh lo chuan ka chhuahsan ta hmak.

Pawna ka chhuah chuan min rawn zui vat a, "Ka lo thlah ang che, hetah ka hruai che a, ka thlah leh tur che a ni alawm," tih pah chuan car chu a rawn la chhuak nghal a.

Amah vanga hawna tur neilo ka nih avang chuan car kawngka a hawnah chuan hnial lovin ka țhu lut ve nghal mai bawk.

Kan tlanchhung chuan reife chu țawng miah lo chuan kan țhu dun a. "Ka tihpalh aw, ka thinrim lutuk ka inthunun hman lova, min ngaidam tur pawhin ka ti lo che. Mahse i ngaihdamna chu ka dil tho che." Inthiamlo ve tak tak pawh a ang ve khawp mai.

"Khatianga rawng taka ka chunga che duh turah ka lo ngai lo che asin. Kan lo ințhianțhat tawhna leh kan chhungkaw chunga thil min tihsak zawng zawng vang khan ka ngaidam hram ang che. Mahse khatianga vawikhat pawh ka chunga i ti leh anih chuan ka ngaidam tawh ngai lovang che."

"Ka lawm e, mipa dang kianga awm tura ka suangtuahna che khan awmdan min hlohtir vek ani. Hloh che hi ka duh lo ani."

"Anih engvangin nge ka rilru tihnat i tum tlat si a?"

"Ka thiamloh vek a ni. Ka pa in kan company tana țha tur a ngaihtuah aleiah ka chân mai ang che tih ka lo ngaihtuah lo a ni. Ka hrilhfiah hunah che i hriatthiam mai ka lo ring a, mahse ka tisual der a ni. Kan company inthlunzawm nan Milly nena inhualna kan hriat miah lovin an lo nei a, kan hriat meuh chuan kan lo inhual der tawh si. Milly pawhin min hmangaih chuang lo, midang hmangaih a nei ve thova, kan pa te bum nan inkawp anga kan lan rih a ngai si a. Engmah ka hrilh lo che kha ka thiamloh vek a ni." Ka ring ngam ang em tih pawh ka la hrethiam rih lo a ni.

"Rin mai che harsa ka la ti rih tlat. Min hrethiam dawn nia."

"Anih khapa kha i duh em ni?"

"Sammy kha maw? Nia, a hmelțha khawp mai. A fel bawk." Ka ti lui ve ngat. Car a break tuar a, hmalamah ka bu dawrh.

"Eng thil....eng thil nge ti a i inhriat a?" Ka ti piap a.

"A hmelțha amaw, a fel bawk maw? Khapa kha i duh tih min hrilh hlek suh. Chuti lo chu...!" Sawi zo duh lo chuan a ngawi leh daih a.

"Chuti lo chu...! engtin maw? Engtinnge i tih anga, ka duh duh ka kawp thei. Nang nen hian inzawmna kan nei tawh hleinem."

"Han sawi leh teh." A lamah min pawt hnai dawrh a, car chhung a chep si a, amah chu ka bawh rawk rawk a, ka khabeah kuai dakin a hmui chuan ka hmui a rawn zawng a, a thaw ham ham mai. Ka hmui a rawn chuktuah nghal a, ka thin a phu nghal dawt dawt. Ka kâ chhunga a lei hman thiam tak mai a rawn hawl luh chuan ka hik mup mupin ka hria. He thil hi a hma ațanga ka lo thlakhlelh em em țhin a ni tih ka hrechiang kher mai. Insum thei bik lo chuan ka lo chhanglet ve nghal tawn tawn a, kan thaw a chham dawn ta hial emaw tih tur khawpa kan infawh hnu chuan kan inthlah ta hram. A chal leh ka chal chu insiktirin kan thaw dun halh halh a.

"Ka mamawhzia che chu i hrethiam tawh em? Chuan nang pawhin kei ang thovin min mamawh ve a ni tih hi pawm mai rawh." A ti dik a ni. Mahse ka chapona hian min pawmtir mai thei lo.

Ka inlahrang nghal vat a, "Haw ka duh tawh." Ka ti a. A lo rum nghut a. A car chu tinungin ngawi rengin a tlan leh ta nghal mai bawk.

In ka thlen meuh chuan khua a thim ruai tawh a. Mahmingi a lungawi lo viau ang chu le! Haw dun turin kan inbe vek tawh a ni si a, Malsawma vang; han ti dawn ila ani puh vek lah chu dik bik silova, mahni inchhung luh pawh ka hreh phah em em ringawt.

Phone ri reng reng ka hre lo, chutia phone ka ngaihtuah chhuah chuan ka bag chu ka en vat a, ka phone a awm miah lo mai, khawiahnge maw ka dah le! Malsawma inah khan ka thlauh a ni mai thei a ni.

Malsawma lah chu a tlan leh daih tawh bawk si, van buaithlak tak em!


Malsawma Pov*

Zorini ka ina ka hruai a, a laka ka awmdan kha a diklo tih ka hria, mahse ka mipatna kaitho tura a țawngkam hman khan ka insumtheihna min hlohtir a, zu ka in lo chu ka ti hauh lo, mahse mahni inthunun theilo tur khawpin ka in lo thung.

Ani kha chuan ka ruiah a ngai mai thei. Mahse ka rui lova, a țawngkam dengkhawng ve tak mai khan ka thinlung a tina in, midangin a taksa an neih ai chuan hnehchhuh hial kha ka tum a ni a, ka awmdan tenawmzia pawh ka hria, a tak ka thlen hmaa ka insum leh hman kha ka lawm kher mai. Chuti nilose a damchhungin min haw tawh anga, keiin ka hmangaih ber ka chân bawk ang.

Damchhunga chân tura ka inngaih hian ka thinlung hi a tawt up up mai țhin. Mipa ka ni tih vang ngawtin ka na theilo ani bik silo. Hetianga awm hi ka duhdan a ni bik lo.

Zorini in ațangin thinrim lutukin a chhuak a, ka inah ka hruai lui a, a chungah tihluihna hman ka la tum zui chu ka zak ngawih ngawih a ni. Mahse ka zahtheihlohna sawmkhawmin amah chu ka zui leh ta nghal vat a.

"Ka va thlah ang che," tih paha car kawngkhar ka hawn sak chuan ka rinloh deuhvin a lo lut ve mai. Ngaihdam ka dil ngei a ngai a ni. Tuna ka dil anih loh chuan hun remchang min pe duh tawh miah lovang.

Cara ngawi renga kan tlan dun fe hnu chuan a chunga ka chetdan avang chuan ngaihdam ka dil ta a. Ngaihdam harsa min ti hle tih a awmdan ațangin ka hre mai. Min ngaidam thei lo ta se....! Ngaihtuah pawh ka ngaihtuah ngam lo zawk. Zorini vang hian ka khawvel a dang zo vek tawh. A tellova awm thei tawh lo hial khawpin ka nunah hian a bet nghet tawh a ni.

Khapa 'Sammy' a kha a han fak vel ania, ka huat tura sawi nge a nih pawh ka hrethiam lo.

Ka lama pawt hnai dawrhin ka fawp nghal hmiah a, ka rinloh lutuka min chhanlet ah chuan reilote ka chawl deuh det a, mahse tun țum hi chu ka tisual tawh lovang. Kan pahnih chuan thawk lakna chang pawh hrelo khawp chuan kan infawp ta a, car chhung a ni si, a chepin ka duh ang pawhin ka che țha thei lo. Ka rooma ka khum chu nise....!

"Haw ka duh tawh," a tih chuan, Ka taksa thunun tuma ka beih fe a ngai hial mai. Harsa ti tak chungin a thu ka zawm a, chuti anih loh chuan a luhlul ve ropui si a, ka ti lungawi lo leh vek palh ang tih ka hlau a ni. Heti em em a hmeichhia ka duh leh hmangaih hi ka la tawng ngai lo.

An inbul thleng ka thlah a, ka hawsan ta a, kan awmdan ka ngaihtuah a, ka nui leh suk suk. In ka thleng țep tih chuan a țhutna ka han en a, engemaw tla hi ka hmu a, ka en chian chuan phone alo ni a, a thlauh a ni maw, a hre miah lovang le?

A phone chu ka en a, midang phone en ruk hi ka thil duhlo ber a ni a, mahse Zorini phone chu ka en chak riau va, Miscall pawh alo tam ngei mai. Mahmingin vawi sawmhnih dawn a rawn call a, Sammy a tih pawh khan vawi sawm zet a rawn call bawk. Kha Sammy nen khan an inpawh viau em ni le? Mahse amah ka fawh laia min chhan let danah kha chuan min la duh ve ani tih ka hrethiam mai.

Kha Sammy kha a duhlohna tura ka beih a ngai dawn a ni. A phone chu ka off nghal a, ka off veleh chuan call a rawn lut nghal a, ka han en chuan Mahmingi call alo ni a, "Hello, Zorini phone a nia, ka carah a thlauh palh a," ka ti nghal vat.

"Oh, ka lawm lutuk, hmundangah ka tibo anih ka ring hial a. Ka theihnghilh ngai miah lo asin mawle," Zorini zawk a lo ni a. A aw ka hria chu ka thinlung hi a su dup dup hialin ka hria.

"Zanah ka rawn dah dawn nia," tiin phone ka dah ta a. Zanah ka pe ngei ang, amah hmuhna chance a ni mai alawm!


End of Malsawma Pov*


In ka thlen chuan kawngka a lo inhawng tawh a, Mahmingi chuan kan chahbi dahna țhin a hre bawk a, alo hawng ve mai țhin.

"Ka lo haw e," ka tih chuan rang lutuk hian ka hmaah tak a rawn ding nghal a.

"Khawiahnge i kal a, ka rawn phone nasat zia i hria em?" A ti hmarh hmarh.

"Ka phone ka thlauh daih alawm."

"Malsawma bulah i kal tiraw? Ka zawng nasa lutuk che a, ka rawn call a, ila thei bawk silo, engtinnge Malsawma chuan a tih che a?"

"Zawhna i van ngah tak. Engpawh nise, ka number kha han call.lawk teh, Malsawma bula alo awm anih chuan a țha a ni mai." Tih pah chuan Mahmingi phone ațang chuan ka number chu kan call ta a, reiloteah chuan, "Hello, Zorini phone a nia," a rawn tih chuan ka lawm kher mai. Zana rawn dah a tum thu a sawi pah chuan phone a dah ta nghal a.

Ka thaw huai mai, ka phone alo kawl avanga lawm nilovin a bo lo chu ka lawm a ni.

"I u in a lo phone a, naktuka lo haw a tum a ni awm e," Mahmingin a tih chuan ka lawm kher mai. Mahmingi pawh a lungleng tih ka hria a, mahse amah hi a thawven ve em avang hian lungleng miah lo ang hian a awm thei a ni. A chang chuan ka awt thei țhin khawp mai.

"Chaw ei ang hmiang," ka han tih chuan ngeiawm ner nawnga min en chung hian, "Malsawma inah i ei dawn anih ka lo ring asin." Mahmingi ngeiawm thiamzia hi chu!

"Ka u lo haw dawn vangin i lawm teh hawrh anih kha aw!" Ka ti ve thung a, kan pahnih chuan kan insawisa tawn a, kan nui dun kiah kiah mai.

"I u lo haw dawn chuan kan in lama ka awmphei a ngai tawh awm si a, ka ngai ngawt ang che," a ti vei luam.

"Vela che a! Kei aiin ka u i ngaih daih zawk kha."

"Teuh lo mai,"

"Chiah maw? Ka u ka hrilh dawn ania." Ka tih chuan min chum awk.

"Sammy hi engtinnge i tih dawn?"

"Ani chu enge? Kan pahniha kan țhian a ni lawm ni?"

"Țhian chauh maw? Mahse ani kha chuan țhian angin a en ve miah lo che tih ka hria ania, nge Malsawma hian i thinlung alo tituiral leh hman tawh zawk?"

"A ni lo ve ve."

"Ka awih lo em mai a, vawiinah pawh a kiangah i awm reng ani lawm ni?"

"Awm pawh lo ni ta ila, a danglam chuang lo."

"Oh! Taka, i lo haw hma khan Remsangpuia alo kal a, i lo awm silova, ka lo be lem lo bawk nen, a chhuak leh ta daih a."

"Eng a? Enge a rawn la tih fo a, tinge min rawn tihbuai reng mai le?"

"A nupuiah hian a lungawi na tawk a hmu lo aniang," chimawm thiam ania he nu hi chu.

"Huh, chulam pawh va ni suh."

"Enge a nih lohvang? A la beisei reng che aniang chu, chuvangin pasal neih lam hi ngaihtuah vat rawh."

"Teuh lo mai, vawikhat ka tisual tawh a, tihsual nawn leh ka tum tawh lo."

"Malsawma hian a duh hmel em che hi, anih loh pawhin Sammy pawh. An pahnihah i duh i thlang thei," nui har har chung hian min tihkhum a.

"I van ngeiawm zawt zawt tak! Ka u lo haw hunah i chaklo viau ang aw." Tihngaihna hre lo zet hian ka ti ta ringawt a. Ala nui kur kur zui.


<><><><><><>®<><><><><><>



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:07 pm

A TLAI ZO TA

Eps - 20


"Tho tawh teh, tinge mut hi i duh tak em em le? Tih pah chuan ka puansin lai chu Mahmingi chuan a rawn theh hlim țhuai a.

Zanlama ka men rei vangin ka lo muhil rei lutuk a, mut ka la kham lo fo.

Nizanah Malsawma ka phone min rawn pek pahin a leng reng a, kan pahniha awmdunin Mahmingi lahin min mutsan daih si a. Insi rialin sofaah kan țhu dun a, a kianga ka awm apiang hian keimahah hian danglamna a awm ziah, chu danglamna ka neih lah chu a nuam hle mai lehnghal.

Kan taksa innawk ah chuan inthunun harsa ka ti hle a, Malsawma pawh a dang chuang lo. Kan infawp a, kan innuih leh ringawt țhin. Mahse a hma ang khan min tihluih a tum tawh hauh lo; ka zai ngaiin thiam takin min thlem ani ber mai. Ka kawr hak chhana ka hnute a khawih chuan ka thaw hawk a, chumi chu duhtawk mai lo chuan ka kawr hak chu a hlim a, ka hnute bu țha leih lawih, kawh fahran mai a kut lawnga a han khawih chuan nuam tih lutuk vangin ka chhing diar diar a, chuti chung chuan kan infawh a bang chuang lo.

Sofaah chuan ka tlu riai riai a, ka hnute hmur a ka lum hiam maiin duhtawka a han hmuam vel chu nuam tih lutuk avang chuan ka lo er leh ngang ngang țhin. Ani pawh a thawk dan a dik bik lo tih ka hre thei mai. Malsawma pawh chuan a kawr a phelh a, taksa lawng a han indek chu a dan a dang kher mai. Châkna avang chuan ka mûr sung sung thei hial a ni. Hetiang hian vawikhatmah ka la awm ngai lo. Ka pasal Remsangpuia lakah pawh khan ka la awm ngai lo. Malsawma nena hmangaihna chendun chu engang tak ni ang maw? A tawp thlen chakna min neihtir hial a ni. Zahthlak zawk hian.

"Duhtawk ang," ka tih sap chuan a hrethiam ve mai bawk. A insum nasatzia chu a hmai sen țan țan danah chuan a hriattheih mai. Ka hmuiah a fawp leh vang vang a, min thlah ve ta hram a.

"Ka khum chu nise, i him tawh miah lovang mawle, hmangaihna ka chenpui chak zia che hi," a rawn ti sa sa a. Keilah zah vangin ka lo sen țawn țawn mai.

"Zah avanga i han sen țawn țawn hian i hmelțha khawp mai," nui var var chung hian a han ti a. Ka sen nasa zual sauhin ka hria.

"Ka va haw phawt ange, chutilo chu min ning palh ange," ngeiawm thiam ve chiang asin.

Mu tura ka room ka pan pah chuan mi â ang mai hian ka lo nui leh var var țhin. Mahmingi chu alo muhil tawh a, mutkawr ha in a kiangah chuan ka inthawlh ve ta than a.

Ka pa boral ațang hian Mahmingi hian min la awmpui char char a, ka unaunu ang hiala ka ngaih tawh avangin a pa hnenah ka țahawh tawp a, a pa'n alo phal hlauh bawk nen, khawhar lo takin ka awm theih phah a, ka tan chuan țhian mai piah lamah ka u nen an lo induh ve ta bawk nen, ka unau dik tak angin ka ngai hial tawh.

"Ka van mutui em em vele!" Thawh pah chuan ka han ti a.

"Nizan i che țha deuh aniang chu mawle!"

"Teuh lo lutuk ringawt, chetțhatna vak tur a awm ami?" Ka han tih chuan a nui kur kur mai.

"A zep vel a, ka hre reng....."

"Min bihthla a ni maw?" Ka han ti chu a nui ring ngei mai.

"Buichhia laih lohvin a inpuang ta der mai," a la nui kawr kawr zui.

"Hmeli leh! I van chaklo dawn tak!" Tih pah chuan man ka tum a, a tlanchhuak nghal daih a. Choka thleng in umzui pah chuan zing kar karah kan nui dun nasa ngei mai.

"Rawng ka bawl zo vek tawh, mumang thlengin Malsawma i hmu ani ngei ang, i la țawngvai ang nawk nawk a," a la ti zui. He nu tak hi chu tihngaihna thlawt a awm lo.

"Vawiin tlaiah ka u a lo thlen dawn kha aw. Lo inpuahchah rawh." Thudangah ka pakai san daih.

"Enge inpuahchah vak a ngaihna, fai tawkin ka inbual anga, a tawk mai alawm," nui țha chung hian a han ti leh a. Ka nui ve tawp. Ka thusawi apiang fiamthua lak a tum zel tawh mai. A tihtheih thlawt lo.

"Chuti anih leh chaw ei ang, hna kan tlai ange, ka u lo haw dawn bawk nen, tlailam chu haw hma kan ngai awm si a. Mahse zanin kha Party kha a ni si a, engtinnge kan tih tak ang." Ka han ti a.

"Ni dawn tak, ka lo mangnghilh daih. Party naa hak tur thawmhnaw pawh kan ngaihtuah loh ten."

"Keipawh ka nei miah lo. Hetiangah hian ka kal ngai silova, kal pawh ka peih lo khawp mai."

"Khai a, kal e a, nuam deuhin hun kan hmang ang chu. Kan party neihchhan pawh kan hmu ve ang chu. Tlangval hmelțha deuh an ti ania aw." A ti deuh kher a.

"Tlangval hmelțha ah ka buai lo nang angin," ka ti let ve kher bawk.

"Hna a kan kal haw lamah zanina hak tur chu kan enkual mai dawn nia, nalh deuhva lan ka duh ania."

"Awle, chaw ei phawt teh ang, ka rilțam tawh teh ania," ka tih chuan chaw ei kan siam dun mawlh mawlh a, kan pahnih chauh pawh hian awm mahila, tudang hi kan ngai bik lo.

Kan eina tifela kan insiam peih hnu chuan kan pahnih bawk chuan kan chhuak dun leh ta a, kawngka ka kalh fel chiah tih chuan kan kawtah Remsangpuia a rawn lang hlawl mai.

"In kal tawh dawn em ni?" A rawn ti nghal vat a.

"Aw, kan lo tum chiah a," ka ti ve mai a, biak țhat emaw biak chhiat emaw pawh ka tum lem lo. Enga ang pawhin hnar mahila, engahmah a ngai dawn chuang lo.

"Enge lo tih i tum a? I nupuiin heta ilo kal fo hi a remti em ni?" Ka ti fak a.

"Ka kal duhna ah chuan ani remtihna ka lak kher a ngai lo."

"Nia, i tidik. I la ngai lo țhin reng a ni." Ka ti ve hmak.

"Ka lo thlah dawn che u ami?"

"Thlah kan ngai love, Mahmingi nen kan kal dawn a,"

"Zorin....!" A ngawi leh daih a.

"Enge?" Ka ti bak hlak.

"A, engmah ni love. Mahmingi awm vangin a sawi leh duh lo pawh ani mahna le!

"Kan kal dawn asin, a pawi ka ti khawp mai, biakna hun che ka nei tawh tlat lo." A lakah hian pawitih thute ka la sawi chu ania.

"Chance min pe leh hram rawh." Zaktheilo mah mah.

"Ni love, nang nen hian engtikahmah kan awmdun thei ngai lovang. I nupui kha hlim tak leh hmangaih tak khan enkawl zawk rawh. Fapa i neih tawh kha." Ka ti deuh hrawk a. Min la beisei ngam cheu chu mak ka tiin zahna hi a nei hlawl lo ni maiin ka hria.

Kan kal hnu chuan, "Ka rinaiin a zaktheilo kher mai, nupui neiin fa a nei tawh tho si a, nang lahin i be țha em em ngai bawk silova, tinge le?" Mahmingi chuan a rawn tichhuak hlawl mai.

"Ka hre tawh bik nang. Zahna hi a tlachham ve a nih kha," ka ti mai a.

Kan hnathawhna hmun kan thlen thleng chuan inbe tawh lovin kan tlan char char a, mahni ngaihtuahna ve ve kan kawm a ni ber mai.

Zanlama party na tur kan buaipui nghal char char a, kan tifel thawkhat bawk a, chawlh kan nei thei ta hlauh mai le.

Intiamrual niawm fahran hian Mahmingi nen chuan kan chawl rual leh chiah mai. Party naa hak tur lei tum chuan kan chhuak ta a, hetiang lamah hian ka la kal ngai silova, thawmhnaw hak tur pawh ka hrethiam lo. Mahmingi min hruaina apiangah kal mai ang.

Thuamhnaw lei tur chuan kan chhuak ta nghal a, dawr kan thlen chuan kan lut nghal a. Kawrfual hringduk nalh zet mai hak nuam deuh tur hian ka mit a la nghal zar mai a, ka han en a ka han khawih vel chuan taksa deh nuam zet mai hi a ni a, fual hnalh mai ka duhthusam chiah chiah a ni.

"Kha kha i inhmeh ngawt ang," a zuartu pawh chuan a ti a.

"Ni e, a nalh lutuk, i inhmeh viau ang, han ha chhin teh," Mahmingi pawh chuan a lo ti ve nghal vat a.

"Ni e, han ha chhin teh, khalaiah khan inthlakna room a awm ania," min kawhhmuhna lam chu ka pan a, a chhungah lutin ka in ha chhin a, kawrfual ha chunga ka chhuah leh chuan, "I inhmeh lutuk ringawt, i ta tura țhui niawm tak a ni ringawt alawm," Mahmingin alo tih chuan ka nui ringawt. Darthlalang hma a ding chung chuan ka han inen vel a, inhmeh ka inti ve tho mai.

"Ka la ange," tiin a man ka zawh chuan a to phian lehnghal a, mahse nge maw nile, zanin chu nalh loh kan hlau ve viau alawm le! Kawr rem tur pheikhawk inah ka nei sa thova, pheikhawk chu lei ngai ka ti lem lo.

"I duh i hmu ve tawh em?" Mahmingi hnena ka tih chuan a lu alo bu nghut a, ani lei tum pawh chu a nalh kher mai.

Kan duhtawk kan lei hnu chuan inlam panin kan haw ta nghal a. Ka phone ri ah chuan ka u a nih tawh ngei ka ring. Ka phone ka en chuan a lo ni ngei e. "Hello, ilo thleng tawh ami?" Ka ti nghal a.

"Aw, Lengpui ațangin kan lo tlan mek e,"

"Kan lo nghak reng tawh che ania, anih ka dah phawt ania," tiin phone chu ka dah ta nghal a.

"Ka u a lo thleng țep ania...! Mahse zanin chu kan inah la riak tho rawh aw, naktuk ah duh leh i phei dawn nia," ka tih chuan pawi a ti bik lo kher mai.

In kan thlen chuan kan thawmhnaw lei kan dahfel hnu chuan rawngbawl kan țan dun ta nghal a.

Zana kan party na tur vel sawiin kan nui bawk bawk a, "Kei chu ka lam chak tawh lutuk," Mahmingi chuan a han ti a.

"Ka lam thiam teuh lo mai, hetiang lamah hian vawikhatmah ka la kal ngai lo bawk nen, chinchang ka hre lo khawp mai."

"Ka zirtir dawn che nia," a tih chuan kan nui nasa ngei mai.

"Engtinnge ka u hi kan tih anga, kan hruai ve mai dawn em ni ang?" Ka han ti a.

"A peih te chuan a kal ve anga ni mai lawm, mahnia ina lo awm chu a duh bik lovang."

"A, lo thleng phawt se, kan zawt dawn nia."

Chutia kan titi lai chuan, "Ka lo thleng e," tih ri ah chuan rang lutuk hian kan tlanchhuak dun a.

Ka u te pahnih inhmu chu ka awm vang nge an lai dun viau lehnghal a, ka nuih an tiza dun ngei mai. Lai rual pawh an ni tawh der silova.

"Inchhungah lut ang u," tih pah chuan ka lut nghal a, min rawn zui ve mai bawk.

"Ka nau ilo awmpui char char a, ka lawm khawp mai."

"Lawmthu sawi kher a ngai hleinem, ka țhian ania, ka unaunu a ni bawk alawm," a lo tih chuan ka u lawm hmel chu ka lo hmu ru reng mai.

"U, zaninah kan hotel ah party an buatsaih dawn a, a neitunu alo kal dawn a, helamah a awm tawh rih dawn loh avangin a aiawhtu lawmna leh a mah thlahna kan nei dawn a, ilo kal ve peih ang em? Nge chau i inti viau?"

"Ka lo kal lo mai ang, nuam deuhin in hmang dawn nia, ka chau deuh a, inah ka lo awm mai ange."

"A pawi loh chu, kan rei vak pawh ka ring lo. Engpawh nise, han intifai phawt teh." Ka ti leh a. Ani pawh chu intifai tur chuan a kal ve nghal mai bawk.

"I u hmelțhatzia hi ka lo theihnghilh țep alawm le," nui har har chung hian Mahmingi chuan a han ti a.

"Ka hrilh dawn," ka lo ti hmanhmawh.

"I hrilh vaih chuan aw...!" Kan nui dun kar kar.

"Ka sam hi engtinnge kan tih dawn?" Ka han ti a.

"Roll ang hmiang, a sei si a, a nalh dawn em mai, khawi ka lo tihsak nghal ang che, chaw ei hma in," Kan han buai leh hnuhnawh. Nalh loh hlau ve miau hek.

Kan zawh meuh chuan ka landan a danglam kher mai. "Wow, nalh lutuk, tinge tihian i tihziah loh?" Mahmingi chuan a ti chul a.

"Ka peih vel lo alawm, inchei hi ka peih thlawt lo a ni," ka ti tawp.

"Tuemaw chu a luangliam chiang leh zual ngawt ang mawle," a han ti vei ham ham a.

"Tu chu maw luangliam ang?" Ka han ti ve nghauh a.

"I hriat reng kha."

"Ehiau, Mate, i sam chu i van inhmeh ve a," ka u veiluam țhin hi.

"Tak tak maw? Min fiam mai mai a ni lo maw?"

"Teuh lo mai. Zanin chu mipa kal ve zawng zawng mit i la ngei ang mawle!"

"Ka u, i ti mah mah." Ka han tih chuan Mahmingi nen chuan an nui ta var var a.

"I lang nalh tak zet alawm, kan fak der miah lo che ania," Mahmingin a tih chuan ka nui ve var var.

Party na a kal tur chuan kan insiam ta mawlh mawlh a, nuam taka hun hman tum ran chung chuan ka inchei mawlh mawlh a, ka inchei lai Mahmingin min hmuh chuan a duhkhawp hauh lo mai. "Ka lo chei ang che, lo țhu rawh."

"Ka inchei ve reng hi," ka ti hlar a.

"Awi leh, khatiang te chuan tu mipa mit mah ila lovang e, tuemaw mit kan ti pawngzawrh dawn alawm," tih pah chuan min chei ta mawlh mawlh a. Min chei zo Darthlalanga ka han inen chu midang daih ka ni ta emaw tih tur khawpin ka landan a danglam hial.

"Hetiang hian ka inchei ngai silova, ka confi lo tawp."

"Hui ha, i hahthlak em mai a, i nalh lutuk ringawt. Kal vat teh ang, kan tlai ang e!"


<><><><><><>®<><><><><><>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:08 pm

A TLAI ZO TA

Eps - 21(Last)
www.storyfb.com mizo story thar englai pawhin chhiar tur a awm reng


Party na hmun pan chuan ka u chu amah chauhva awm tur chuan kan kalsan ta a.

"Ka lo awmpui mai dawn che mi, ilo thleng chiah bawk si a, kan chhuahsan lehnghal daih che chuan..." Mahmingi chuan a ti a.

"Kal rawh u, ka lo awm hahdam ang, in lo haw hunah engemaw sawi tur ka nei ania," a tih chuan kan kalsan ta a.

A hmun kan thlen chuan kal an lo awm ve nual tawh a.

"Ka tih reng kha maw, mipa mit i lak zia hi, an enzui vawng vawng che alawm le," Mahmingi chuan ka beng bulah a rawn ti sar sar a.

"Awihawm loh em mai a! Nalh min tih vanga min enzui an nih loh hi, ka inchei an la hmuh ngailoh vang anih hi."

"I indahhniam lutuk anih kha."

"Hi, nula te u," rawn titu aw ah chuan kan hawi let vat a, Sammy a lo ni a. Ani pawh chu a nalh kher mai. Sammy mitmenga min ngaihsanna lo lang chu ka hmu thei.

"Wow! I van nalh em em ve a, ka hre lo dawn che alawm le!" Tih pah chuan a nui sang a.

"Nang pawh i inhmeh lutuk," ka lo ti ve vat.

"Ka kalsan lawk ang che u, lo țhu rawh u," tiin min kalsan ta nghal a.

Sammy țhutna min kawhhmuhah chuan Mahmingi nen chuan kan țhu ta nghal a. Hunserh țan a hun țep tawh a, Masangi leh a aiawhtu tur an lo la thleng lo a ni ngei ang.

Intur an sem zingah chuan theitui a awm hlauhva, zu lampang ka in ngai silova, Mahmingi nen chuan theitui kan la a, in pah chuan mi chetla vel chu kan thlir mai mai a.

Thawm ri hak ah chuan kawngka lam chu kan hawi phei vat a, maktih vang chuan ka meng kawk. Mahmingi nen chuan kan inen ringawt. Masangi lo hruai chu tudang ni lovin Malsawma ngei a lo ni. Masangi Cousin anih ka lo hre hauh lova.

An țhutna tur an pan dun ta a, mak ka ti kher mai. Malsawman hetah ka thawk tih a hre reng si a, Masangi a hriatthu a sawi hauh silo. Ka en reng ringawt.

Malsawma hawikual velin min rawn hmuh chuan a meng kawk a, mit thim raih hian min rawn en a, "Ka ta i nih kha, mipa dang melh suh," ti hmel pu hian min rawn melh in ka hria. Ka hawisawn ta daih a. A ngaihdan a ni lo leh ang chu aw..!

Masangi a rawn dingchhuak a, "Zaninah hian kan hriat țheuh angin kei hi helaia awm reng thei ka nih loh avangin ka cousin ka aiawh turin ka dah a, amah hmelhriat tirna hun lo nei ila, tunah hian lo hetah lo kal sela, amah lawm nan kut kan lo beng dawn nia," a tih chuan ka rinloh lutukin Sammy a rawn chhuak ta a. Malsawma nen in cousin emaw an nih ka lo ti hman tawh ania, Sammy reng reng pawh chu. A tirah min hrilh țhat ve hle hle awm, kan mawl hmel tawp.

Mahmingi nen chuan kan inkheuh zeuh a, mak kan ti dun kher mai. Mahse, Malsawma hi engvanga lo kal ve nge a nih le?

Sammy lawm nan chuan kut kan beng dar dar a, kan lam rawn hawi pahin mit a rawn siai zauhva, Malsawma lah chuan alo hmu reng mai a, rum lutuk hian min rawn melh lehnghal. Helai hmuna ka kal hi ka tifuh dawn lo a ang hle mai.

Masangi bawk chuan, "Mi pakhat hmelhriattir tur che u ka la nei a, ani pawh hi kan hotel nena inzawmna tunhnai maia kan neihpui ani a, an ni nen hian thawh hona țha tak kan neih ngei ka beisei a ni. He hotel hi a ni leh Sammy hian thawkdunin an enkawl dawn a ni. Ka dintir hunah kut bengin kan lawm leh dawn nia." A tih chuan Malsawma chu a lo ding ta a, kut ben nachang pawh hre lo khawpin ka lo ngaihtuah hman leh pek.

He mi te pahnih hi inhre ngai miah lo angin an lo awmdun ania, ka rei leh! Min lo nuihzat awm mange. He Sammy ker kawr pawh hi a. Ka be tawh miah lovang mawle. Mi mawlah min chhuah lo chauh alawm.

Ka thin a rimin ka zak kher mai. He party a ka lo kal hi ka inchhir ta rum rum hial mai. "Pawnah ka chhuak lawk dawn ania," Mahmingi hnenah chuan ka ti a.

"Lo lut leh thuai rawh aw, lam an țan țep ania," a tih chuan lu bu nghatin ka chhuak ta nghal a.

Pawnah chuan thla a eng nuamin hawi vel pawh a nuam kher mai. Ka nu leh ka pa ka ngaihtuahna ah an rawn lut thut a, ka lung a leng kher mai. Țhutna nuam zetah țhu in, vanlam chu ka thlir ta veng veng a, ka mittui te hi a lo hnai kuar mai. Van ațang chuan ka nu leh pa hian min rawn thlir ve reng niin ka hria a, ka tho thut a, ka kalna pawh ngaihtuah lo chuan ka kal mawp mawp ringawt a.

Ka hminga min au ri ka hriat leh ka hma taka motor eng lo lang thut chu ka hriattheih hnuhnung ber a ni ta. Ka nu leh pa in min lo nuih sen sen ka hmuh chuan ka nui ve var var mai.

"Zorin....!" Min kohna chu hla tak ațangin ka hre ruai ruai a. Ka nu leh pa ka hmuh vangin ka kalna tur pawh ngaihtuah lovin ka kal mawl tawp ringawt.

Ka meng diar diar a, damdawiin ah ka lo awm reng tawh alo ni a. Motorin min su tih chu ka hre chhuak leh ta uai uai a. An țawng ri ka hriat dan chuan ka na hle ani awm e, thisen pawh ka hloh hnemin rei ka daih tawh lo mai thei tih an sawi te chu ka hre thei vek.

Ka bulah chuan Malsawma hi a lo țhu reng a, ka harh tih a hriat chuan lawm hmel zet hian min rawn be nghal a, mahse ka chhang thei hauh lo. Ka rilru chu a harh vek tho si a, ka țawngchhuak thei lo. Damdawiinah chuan engtia rei nge ka awm pawh ka hre hek lo.

"Enge i an? I na em? Dam thuai ang che aw," a ti mawlh mawlh ringawt. A piahah chuan Mahmingi chuan mittui tla zawih zawihin min lo en reng a. Ka u pawh a awm, ka hrechhuak leh chiah, ka u in Mahmingi nupuia nei turin a sawm dawn tak alawm le!

Accident ka tawh dawn vang ani ngei ang, zanina ka nu leh pa ka ngaihtuahnaa an rawn luh a, ka lunglen em em ni. Zan dangah hetiang hian ka awm ngai silova.

Malsawma hmuiin ka chal a rawn sik tir zeuh a, chutah ka beng bulah chuan, "Ka hmangaih che, ka damchhungin ka hmangaih reng ang che." A rawn tih chuan ka thinlung hi a nui ver ver a, ka rilru chuan ka hmangaih thu a sawi ve mawlh mawlh a, mahse a ri chhuak thei silo.

Țawng tumin ka han in sangmar a, a rawn ri chhuak ta hram a, enge ka sawi a hre thei lo. A beng a rawn dawh hnai a, "Enge i sawi ka hre thei lo, i sawi fiah thei deuh em?" A tih chuan ka han insangmar leh zual a, "Ka hmangaih che, ka thih thlengin ka hmangaih ang che, Mahse, 'A TLAI ZO TA'." ka ti zo chiah chu ka taksa hi a ral riai riaiin ka hria. An țawng pawh chu hla taka ri ang maiin ka hre ta hial.


Malsawma Pov*


Party na a kal chu ka phur lo kher mai. Mahse Masangi te nen kan thawk tlang țan dawn chiah a, peih lo chung chungin ka kal ve ta hram a. Zorini thawhna a ni tih ka hriat avanga kal ka ni pakhat bawk.

Khatia Party na a Zorini ka hmuh a, a thawmhnaw hak ka hmuh chuan maktiin ka meng kawk a, hetianga a inthuam lai hi ka vawikhat hmuhna a ni hial. A hmelțhatna a lang chiang leh zual kher mai. Ani pawhin ka kal ve chu mak a ti tih hriat tak hian min en a, Masangin a aiawhtur a koh chhuah chuan makti zet hian a rawn melh reng mai a. Sammy hi he hotel a Masangi aiawhtu a ni dawn tih a hre miah lo niin a lang. Min kohchhuah leh hnu phei chuan maktihna in a khat a ni ber mai.

A tawpah chuan pawnlama a chhuak chu ka hmu a, alo lut leh mai turah ngaiin ka ngeihven lawk lova, inhmelhriattirna leh chibai bukna ka chhan zel a ngai ve bawk nen. Amah umzuia ka chhuahtheih meuh chuan ka tlai ani tih ka hre mai. Ka au ri tuar leh motor ri hrawihah chuan ka tlan vat a, thisen a chhuak hnem hman kher mai. Ka rilruin, "Min kalsan suh aw," tiin ka rum vawng vawng a. Ka bing mup mupin ka hria. Midang an lo tlan khawm zung zung a, Mahmingi nen car chhungah dahin kan țhutpui a, midangin car an khalh a, hetiang chung chuan ka khalh thei hauh lovang.

Zorini kutah chuan chelh tlatin a kutte chu ka fawp mawlh mawlh a. Ka thlaphang a ni. Mipa ka nihna ang pawhin ka lang thei lo. Min kalsan ta se ka nun hi engtinnge ka hman tak ang le tih pawh ka ngaihtuah ngam lo a ni.

Hospital kan thlen chuan Doctor ten an tih theih ang ang an tifel a, an hmel ka en chuan beiseiawm a awm lo tih ka hre thei mai. "Zorin, engtia min awmtir nge i tum le? Min kalsan chuan engtinnge ka nun ka hman tak anga, i tellova damchhung hun hmang tur chuan min kalsan thei lovang," ka ti mawlh mawlh mai.

A harh thei lawk lova, nihnih vel ka awmpui tawh, chauh pawh ka sawi lo, kalsan ka duh lo a ni. Ka awmloh hlanin min kalsan mai ang tih ka hlau a ni.

Nithum ka awmpui hnu chuan a rawn meng ve diar diar a, a harh ve dawn tawh ani ngei ang le. Ka lawm kher mai. Ka be mawlh mawlh a, ka țawng chu a hre vek si a, mahse a țawng a ri chhuak țha thei lo.

Ka beng ka han dawh hnai deuhva, a thusawi chu ka thu hriat a zawnga la mawi ber a ni hial ang chu. Chu thu sawi chu damțha se chuan thih hrehin a hreh ang tih ka hria. Chu thu a sawi chu ka damchhung hian ka theihnghilh tawh lovang. "KA HMANGAIH CHE, KA THIH THLENGIN KA HMANGAIH ANG CHE, MAHSE, 'A TLAI ZO TA'.

A sawi zo chiah chu nui sen sen chung hian min kalsan nghal chu a ni ta mai. Ka mittui hi dan rual lohvin a far zawih zawih a, ka khawvel chu a kehchhe ta vek hian ka hria. Damchhan nei hian ka inhre tawh lo. A kianga awm a, a ruala kal ve nghal mai ka duh hial a ni. Ka thin zawn chu a tawt up up a, ka khawhmuhte hi a phe ruai mai. Zah pawh ka dawn zolo. "Zorin, ka hmangaih che asin, ka duh ang pawha ka hmangaih thu che ka hrilh hman lo che hi hrehawm ka van ti tak em! Min ngaidam rawh aw." Tiin ka thinlung hi a rum vawng vawng mai.

Doctor ten a ruang an singsak lai te chuan a hmel chu ka thlir ngawih ngawih a, a hmui sen siah mai duhthawh tak maia ka fawh țhin chu reiloteah a dâng tial tial dawn si a, a taksa lumna nei tawh lo chu ka kuah ngawih ngawih bawk. Mipa ka ni tih lam a lang thei tawh lo. Ka bulah chuan Zorini u leh Mahmingi an lo țap zawih zawih bawk. Inhnem tur chuang kan awm lo ani.

Min demtu tam tak an awm rualin min khawngaihtu pawh an awm țeuh mai. Ka hmangaih ber hun tawp lamah chuan zahpui miah lovin ka hmangaihna ka tihlan theihna sang ber ka tilang ngei ang. Duh leh ka hmangaihna ka tihlan avanga min nuihzat an awm anih chuan min lo nuihzat mai rawh se. Zorini ka hmangaih avanga mualpho pawh ka huam a ni.

Sammy pawhin kan chanchin alo hriat chuan min khawngaih ve ngang mai.

Zorini an dahna kuang an chhin dawn meuh chuan kei mipa meuh pawh ka țap chhuak hawk mai. A hmel hmu tawh ngai lo tura damchhung hun ka hmang tur hi ka huphurh a ni.

Tunah chuan thlan khur chhung thuk takah an zalh ta. A zalna hmun chu ka in a ni ve tawh mai. In tia sawiah hian haw ka chak hlawl lo a ni. Nakina a hnenah ka kal ve hun tur ngaihtuahin ka haw ve ta hnak hnak a.



*Aw, kohkir theih chang silo,
Nunhlui mualliam hnu,
Luaithli nulin au mahila;
Kir leh hian i mawi silo,
Ngaiin ka au bang dawn lo ve.



THE END.

<><><><><><>®<><><><><><>


Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)