A TLAI ZO TA BY HK Renthlei (Completed)

[Ngaia]

A TLAI ZO TA.


Eps - 7



Malsawma in kan chhuahsan chuan zan dar 9 a ri tawh a. In thlen ka huphurh kher mai. Ka pasalin ka haw tlai viau hi engtinnge a lo ngaih dawn lah ka hre hauh silova.

Ka ngaihtuahna hrethiam deuh niawm hian Malsawma chu amah ang lo takin a țawng deuh reng a, ka rilru a la pêng chiang kher mai lah tak a! A kianga awm nuam ka tihzia chu zahthlak zawk tak a ni!

Kan pahniha kan titi barh barh lai chuan kan in kan lo thleng reng tawh mai alo ni a, gate pawnah chuan a car chu tidingin kawngka hawng chuan ka chhuak nghal a, kan in mangțha hnu chuan Malsawma pawh chu a tlan liam ve nghal mai.

Gate bulah chuan ka ding deuh vang vang a, inchhunga luh chu thih hrehin ka hreh a ni.

Inchhung chu alo la eng kalh mai a, meng an la awm a ni ngei ang, kawngka lam pan chuan ka phei chhat chhat a, kawngka ka hawng tur chiah chu tuemaw ni hian min lo hawn khalh a, ka tawlhlet dawrh nghe nghe.

Kawngka rawn hawngtu chu ka rinlâwk ang ngeiin ka pasal a lo ni a, thinrim hmai sen vek hian min lo melh khuih mai a. Ka rilru chuan a hlau ve tho mai.

"Tun ang thleng thleng khawiahnge i kal? I bialpa nen in lengdun ani maw?" A ti khur khur a. Inchhung pawh ka la luh hma hauhva chutiang tehhrepa min ti chu ka lungawi lo ve ngang mai.

"Nang ang lo takin ka nei ve hauh lo tlat!" Ka tih khum salh a. Inchhungah ka lut nghal a.

"Khanglang che chuan; khatianga min ti ngam tur kha i ni lo aw...!"

"Ka ni lova maw? Nang i duh dan dana i awm laiin kei i duh dan zawm turin min ti bik amaw? I hmeinu pawh heta a awm i phalsak ani lawm ni?" Ka thinrim lutuk chuan ka țawngkhum ve ta salh salh a. A duh leh min țhen daih rawh se, pawi ka ti chai hleinem le!

"Ka hmei a ni lo, vawi engzatnge ka sawi dawn,"

"I hmei nisilovin tinge i fa a pai si a?" Ka ti let veleh salh a.

"Awle, tun țum chu ka ngaidam ang che, nidangah khatianga i awm leh chuan ka ngaidam tawh lovang che."

"I ngaihdamna ngai khawpa ka khawsak ka hre love," tih pah chuan ka room pan chuan ka kal hmak a.

Ka room chhung ka luh chuan kawngka ka kalh hmak a, bathroomah ka insil sawk sawk a, mutkawr hak nuam deuh mai ka la chhuak a, khumah inthawlhin ka mu ta kak a.

Khumah chuan muhil thei lovin ka let ka let a, ka phone la in, number ka enkual a, ka u phone number ka lo la nei hlauh a, mahse ala hman leh hman loh ka hre hauh lo mai le! Ka call chhin a, a lo la hmang hlauh ve, ka van lawm tak em!

"Hello...!!!"

"U, nangmah i ni tiraw? I dam em? Tinge min lo call duh miah lohva,"

"Ni e, nangpawhin min biak ngai bik loh kha aw..."

"Keite chu ka buai em alawm, i number ka nei tawh lo emaw ka ti a, mahse hei ka lo la nei hlauh va, ilo thlak hman ka hlau lutuk a,"

"Engvang teh tlatin nge min lo phone a? Ka nu leh pa an dam maw?"

"Dam ang, ka hmu ngai lo," sawi zawm ka duh chiah lo a ni.

"Ka nu leh pa chu i tlawh ngai lo em ni a?"

"Tlawh ngai lo," an mi tihdan ka ngaihtuah let leh khan ka rilru a rawn na leh zawk a, ka u ka han biak takah phei chuan ka lung a chhe tel ta riau mai lehnghal a. Ka mittui a rawn tling nghal piau a, ka u lah chuan ka aw ațangin a rawn hre nghal chat mai reng a!

"Mate, i țap elo! I pasal nen in inkar a țha vak lo em ni a?"

"Nia, chutiang lam deuh chu a ni," tia chhangin thil awmdan chu ka hrilh ta vek a.

"Eng hunah pawh ka kiangah ilo kal thei ang," thinrim takin a ti a.

"Ka tum alawm, mahse hna ka thawk ve tawh a, sum ka inkhawl ngah phawt anga, ka lo kal dawn nia."

"Lo kal ngei ngei ang che," tiin phone chu a dah ta a.

Ka unaupa nena kan inbiak zawh hnu chuan rilru thawveng ve angreng tak chuan ka muhil ve ta siai siai a.

Zinga ka harh meuh chuan ni alo sang tawh viau mai, ka mutna chu ni chuan a rawn chhun lut raih a, zi mar ar ar chung chuan ka nui sak a. Ka rilțam chu ka pum a ri raih raih a.

Ka intihfai hnu chuan choka lam ka pan a, kan awmpuinu pawh alo awm leh tawh a, eirawng alo bawl peih leh diam tawh.

Eitur min chhawp chu ei tumin dawhkan chu ka țhutchilh a, a eitur min chhawp ka han ei tur chu ka pum hi engtin emaw a rawn awm nghulh mai a, ka luak a chhuak em em mai lehnghal. Zing ka thawh khan engtinmah ka awm silova, mak ka ti kher mai.

Bathroom panin ka tlan vat a, ka uak tuar tuar a, ka kam ka țhuah zawh hnu chuan choka lam ka pan leh ta a, kan awmpuinu lah chuan mangan hmel zet hian min lo en a.

"Ka pi, engtin nge i awm a, i țha deuh tawh em? Pu ka hrilh dawn em ni?" A ti chul mai a.

"Hrilh a ngai lovang, vawiinah ka va incheck up ange," ka ti mai a, rilțam hle mahila, ka ei theih tak thlawt loh avang chuan ka kham ta tawp a.

"Malsawm, vawiin chu hna ka rawn kal thei dawn tlat lo mai, min hrethiam mai teh aw," ka va ti ta ringawt a.

"Engtizia nge ni ta a, i chungah enge thleng a?" Min ngaihtuah hmel takzet.

"Damdawiinah kal ka ngai a," ka ti ringawt, engmah ka hrilh duh lem lo.

"Ka kalpui dawn che nia, min lo nghak ang che, ka rawn kal nghal ani mai,"

"Keimahin ka kal mai ang, min kalpui beiseia rawn sawi ka ni hleinem, hnathawhnaah chuan ka pu i ni a, chawlh ka dil tur che ania lawm!"

"Vel a che, i pu ka ni kher lo aw...! Chuan kalpui che ka duh vanga sawi ka ni a, chuvangin min hnial lo mai teh,"

Phone ka dah a, ka hnial duh ta lo mai. A thu a titlang leh dawn tho thova, hnialin awmzia a nei lo.

Insiam turin ka room ka pan a, ka awmdan mak tak mai chu ka ngaihtuah neuh neuh a, naupai lampang phei chu ka rilruah a lut lo hrim hrim.

Ka insiam mek lai chuan Remsangpuia a rawn lut thut a, "Khawnge kal i tum a?" A rawn ti a.

"Ka hnaah lo khawnge ka kal anga," ka ti ve tlat a.

"I hnaa kal i tum lo tih ka hria, kan awmpuinu in i damlo niin min hrilh a," a ti leh a.

Kan awmpuinu chu hrilh lo tur khan ka ti mawlh mawlh si a, alo hrilh chu ka haw reuh kher mai.

"Damdawiinah ka kal dawn, i duhtawk em?" Ka ti hmak a.

"Enge damdawiinah tih ngai a, i dam lo em ni?"

"Dam e, ka lu a hai thut a, ka kal mai mai dawn, khatia min ngaihsak niawm taka țawng vel kha a ngai lo ania,"

"Ka ngaihsak der cheah i ngai anih chuan pawi ka ti khawp ang, ka lo kalpui dawn che ami?"

"Kalpui ka ngai lo, keimahin ka kal mai ang, chulovah i buai kha, Rody kha ngaihven la a țha zawk ang, a naupai a len tawh em kha. Bakah Malsawma'n min kalpui a tum thova," ka tihkhum ve salh a.

"Khapa nen khan eng inzawmna nge in neih a?" A ti khur khur a.

"Nangni ang lo tak leh i ngaih ang zawng khan inzawmna kan nei ve hauh love, chuan ka roomah hian ka phalna lo chuan lo luh tum tawh suh ang che," tih hmak pah chuan ka chhuahsan a. Ka chhuah pah chuan, "Ka room kawngka hi kalh ka duh a..." hawi let pah chuan ka ti leh a. Ngawi rengin a rawn chhuak ve mai a. Engmah sawi tawh lo chuan min kalpel hmak a.

Kei pawh chu in ațang chuan ka chhuak ta nghal a. Gate ka thlen chuan Malsawma pawh alo thleng ve chiah. Car kawngkhar chu hawngin ka lut ve nghal a.

Damdawiin kan thlen chuan Doctor chu Malsawma țhianpa alo ni hlauh a, a phone sa tawh bawk a, kan lut thei nghal mai.

Checkup hrang hrang min tihtir hnu chuan Doctor chuan, "Nau i pai anih hi, ka lawmpui lutuk che, inenkawl țha ang che. Naupai hlim hi chuan inenkawl uluk a ngai ania," a ti a.

Nau ka pai amaw? Mak ka ti kher mai! He ka nau pai hi ka pasalin ka duh lo chung min tihluihna rah anih chuan he naute hi ka pawm thei lovang, ka pasal mahnise, khawvela ka mihuat ber a ni si a, a fa pai phei chu ka duh hauh lo mai.

"Doctor he naute hi ka duh lo," ka ti ringawt a.

Makti zetin Doctor leh Malsawma chuan min en a. Mahse Malsawma chuan ka dinhmun min hriatthiampui hle thung.

"Inngaihtuah chiang leh phawt la, chuta ila duh lo cheu anih chuan kan paih dawn nia," Doctor chuan a ti a.

"Awle,"

"Min lo va chhuahsan lawk la, Țhiana hi kan be lawk anga, ka rei lovang," Malsawma chuan a ti a.

"Awle," ka ti leh mai a. Ka rilru a mang vekin ka hria. Engtia awm tur nge ni ta ang le? Hna ka țan ve chauh si a, ka pasal Remsangpuia ka huatna a nasa sauh lehnghal a. Ani khan min pawngsual lo se chuan nau ka pai hauh lovang.

Reilote hnuah Malsawma chu ka bulah alo kal ve nghal mai a.

"Doctor hnenah khan i dinhmun ka hrilh tawp anih kha, a hriatthiam loh hmel em a, a pawi i ti em?" A rawn ti a.

"Pawi lo e, nia, ka dinhmun diktak a hriatloh chuan min ngai khawlo ang tih pawh a hlauhawm alawm," ka ti ve mai a.

"I țha amaw? I țhatloh hmel riau ania, khawilai restaurant ah emaw kan chawl lawk dawn em ni?" Min ngaihtuah hmel zet hian a ti a. Ka tan chuan țhian diktak a ni ka ti lo theilo.

A car chuan Restaurant chu kan pan ta a, engmah ei pawh ka chak lo, mahse Malsawma min ngaihtuahna tihhlawhtlinloh ka hlauh avangin ka hnial duh lem lo.

Restaurant kawta a car a tihdin hnu chuan kan lut ta a, dawhkan pakhat chu kan kil dun a.

"Enge i ei ang?"

"I duh ang ang kha chah mai rawh, engmah ei chak pawh ka nei lem lo," ka ti mai a.

"Châklo chung pawha i ei a ngai ania, nau i pai tawh kha! Naute tan a țha ngai lo." Tiin eitur chu a chah a.

"He naute hi a pa vang hian ka hua a ni, mahse ka rila rah ani si a, engtinnge maw ka tih dawn ni?"

"Chulam chu ngaihtuah duh suh, rilru tihhah vak kha a țha ngai lo ania," min hnem chu a tum ve khawp mai.

"Ka lawm e, min ngaihtuah a,"

"Englai pawhin ka ngaihtuah che alawm."


<><><><><><>®<><><><><><>

[Ngaia]

A TLAI ZO TA

Eps - 8


Restaurant a kan chawlh lai chuan ka pasal Remsangpuia leh Rody lo lut dun chu ka hmu a, min hmuh hlau tak chuan ka hawisawn daih a.

Anni pahnih hi chu engtikahmah an ințhen ka ring tawh lo. Min țhenin Rody hi nupuiah nei mai se an hlim dun zawk ngei awm si a. Keiin ka țhen dawn lahin min vauna kha a tihhlawhtlin ka duh bawk silo.

Chutia kan țhut lai chuan Rody chuan min lo hmu a, ka pasal Remsangpuia chu a kheuh zeuh a, kan lam a rawn hawi chuan a hmel ah chuan thinrimna a lang chiang kher mai.

Kan lam an rawn pan a, kan dawhkan bul an rawn thlen chuan, "Nangni pahnih hi ka hmu dun zing riau mai che u," Rody chuan a rawn ti ham ham a. Ala nui sawng zui lehnghal.

"Nangni pahnih pawh kan hmu zing ve tho che u alawm," Malsawma chuan alo ti ve vat a.

"Kan lo țhu ve thei angem?" Polite der tih hriat zet hian Rody chuan a ti leh a. Remsangpuia erawh chuan engmah a sawi lo.

"Lo țhu rawh u, mahse pawi khawp mai, kal kan lo tum chiah a, min hrethiam dawn nia," a tih chuan ka lawm ru kher mai.

"Ni e, kan lo ei zo chiah a, kan kalsan mai ang che u, nuam deuh khan hmang rawh u," ka ti ve kher a. Kan kal ta nghal a. Remsangpuia chuan min enzui reng tih ka hria. Mahse engahmah ngai lo niawm tak hian ka kal ngauh ngauh a. Kan chhuah hnu chuan ka thaw huai mai.

Malsawma nena cara ka țhut luh hnu chuan, "I pasal chuan khanu kha ala thlah nange a," a ti a.

"Kan inah a awm alawm, ka pasal fa a pai a, a chhungten an hnawtchhuak niin a insawi a," ka ti ve mai a.

"Chutiang anih te chuan I pasal chuan tinge a țhen mai loh che a."

"Ka țhen anih chuan ka nu leh pa in an tuar tur thu in min vau si alawm," ka ti halh a.

"A van tenawm ve aw...! Kut thlak hial mai ka duh a ni."

Ka nui sak a.


Remsangpuia Pov*

Ka nupui leh Malsawma inzui hi ka hmu tam ta in, ka mit an tikham ta khawp mai. Mahse ka nupui lah hi a luhlul zêk mai si a, Rody'n ka fa a pai tih a hriat ațang phei hi chuan ka lak ațanga tal hran a chak lehzual tih ka hre reng mai si a.

Mahse enginnge min mawlh ka hre lo, ka nupui hi țhen harsa ka ti tawh a ni, Rody hi ka hmangaih țhinin ka hre si a. Ka nupui leh mipa dang awmdun ka hmuh apiang hian, a bik takin, hepa Malsawma phei hi chuan a hmangaih hle tih ka hre si a, țhen chiah ila chuan Malsawma hian nupui atan a nei nghal ngei ang le!

Ka nupuiin min huatzia ka hria a, theihtawpa tihlawm ka tum pawhin engkhaw ka ang thei chuang lo. Mutdun chu sawiloh room hran ve ve ah kan awm dun a, a laka ka chetdan mawi lo zet avang khan a lakah hian inthiamlohna hlirin ka khat a, mahse ka chapo na avangin inthiamlohna nei lo ang hmiahin a lakah chuan ka khawsa țhin.

Ka nupui hi ka hmangaih țha leh ta em ni dawn le? Ani lah chuan min haw hle mai si a.

Rody lah chuan ka fa alo pai veleh tumhrang bawk nen, kan inah rawn chengin a awm ve tlat bawk si a, kan nupa chauhva awm a, ka tihsualte siamțhat ka tum rilruk laiin hetiang hi a thleng ta a ni si a.

Engpawh nise, ka nupui leh Malsawma hi an inngaizawng chiang a ni. Ka la man chhuak em em ang.

End of Remsangpuia Pov*


In ka thlen chuan ka chau kher mai, ka room ah ka lut a, inthlak lovin khumah ka mu nghal tawp mai. Ka chau hle a niang chu ka lo muhil daih a, ka harh leh meuh chuan a lo tlai ruih tawh mai.

Ka tho vat a, ka inthlak hnu chuan choka ah ka lut a, kan awmpuinu Seni chuan rawng alo bawl malh malh a.

"Pi, tukin kha pawi ka ti lutuk, pu in min zawt dilchhut lutuk a, ka hrilh ta mai anih kha," a lo ti vat vat a.

Thinrim hle mahila, tihngaihna awm tawh hek lo le...!

"Pawi love, awmzia a awm tawh chuang hleinem," ka ti mai a. Nuam lo a tih hmel kher mai.

"Rawng i bawl zawh tawh chuan ka va inbual lawk anga, ka rawn ei mai dawn nia, ka ril a țam tlat," tih pah chuan ka room bawk chu ka pan leh ta a.

Bathroomah lutin ka inbual nghal a, he naute hi engtinnge ka tih tak ang le? Hmangaihna avang nilova ka pai hi ka chhung ațanga lo țhanglian turin ka phal bawk silo, ka rilru a insual nasa kher mai. He naute hi ka duh loh vang ringawta ka paih anih chuan tualthat ka ni mai dawn bawk si. Thutlûkna ka siam mai thei lo a ni.

Shower chu off in, bathroom ațang chuan ka chhuak a, ka lu chu towel chuan ka tuam bawk a. Ka inthlak sawk sawk a, thutlûkna siam turin tuemaw min puitu ka mamawh a ni. Mahse tunge ka hrilh tak ang le? Malsawma lah min pui nasa tawh bawk si a, kan nupa inkar thu hre vek mahse hrilh ka duh bawk silo.

Chutia ka ngaihtuah lai tak chuan ka phone alo ri a, ka han lak chuan Malsawma a lo ni a.

"Hello!"

"I țha em? Ka ngaihtuah lutuk che a, eitur te kha ei țha ang che aw. Chuan thilțhalo lam kha ngaihtuah miah suh ang che,"

"Chutiang lam ka ngaihtuah lo, mahse ka rilru ala buai rih," ka ti țha ve mai a.

"Ka hrethiam alawm, mahse naute kha i duh vang ni lo mahse tihtlâk lam te ilo ngaihtuah ange, i pasal pawhin a ngaihsak phah mai thei che asin,"

"Ani min ngaihsak ka ngai lo, tunah hna ka thawk țan ve chauh a ni a, ka lungawi lo mai a ni."

"Chulamah buai a ngai lo, naute leh nangmah in hrisel theih nan khan țha takin inenkawl la ka duh mai chauh a ni," a rawn ti leh a.

"Engvanga min ngaihtuah em em reng nge i nih a?" Ka han tih chuan a nui hak ringawt.

"I țhian ka ni alawm."


Malsawma Pov*


Zorini hospital a ka kalpui khan nau a pai ang tih rin ngaihna reng ka hre lo, he nu hi engvangin ka kalsan theih tlat loh ni? Pasal a nei tih hre reng chung lehnghalin!

A pasal lah hian a ngaihsak lo hle mai si a, hmingchhe deuha a chhuah ka phal hek lo. A dinhmun ka ngaihtuah hian ka thinlung hi chemte hriam tak in na taka a chhun ang mai hian a chhun a.

Țanpui ka duh, mahse ka puihna engtikahmah a duh ngai dawn silo. A țhianah min ngai tih ka hria a, pasal nei lo se chuan ka hmangaih thu hi ka hrilh tawh ngei ang le!

Mahse engpawh nise, ka puih theihna kawng kawngah chuan puih zel ka tum tho a ni. A naupai pawh hi a duh vanga pai a nilo tih ka hria, mahse a rilru tihrehawm lo tura ka fuih reng fo a ngai dawn a ni. A chungah thilțhalo a thlen ka phal ngai lovang.


End of Malsawma Pov*

Chaw ei tur chuan choka ka pan a, ka pasal te pawh an lo la haw lo, engemaw an tih chen chen ni? Pawi lo, duh leh lo haw lo daih rawh se, an awm loh hian a nuam daih zawk.

Chaw ka ei kham chuan ka roomah lutin ka thawmhnaw ka remfel a, inngaihtuahna hun nei lek lo chuan mahni buai buaiin ka buai ve a, ka rooma ka pasal lo luh lai pawh ka hre lo.

Han khuh khak khak ri ka hriat chuan ka hawi chhuak vat a. Kawngkhar biang ngheng chuan rui tih hriat tak mitmeng sen rûm chunga min lo melh reng chu ka hmu a, a hmelah thinrimna hlir a lang lehnghal a.

"Vawiin chu nuam i ti hle mai maw?" A ti khauh a.

"Engvanginnge nuam ka tih ngawt anga, nang inih kha nuam ti zawk chu; min puh let hlauh zel suh." Ka ti hmak a.

"Ka kalpui i duh lohna chhan chu khapa khan a kalpui dawn che tih i hriat vang ani em?"

"Hria e, mahse i ngaih ang kha a ni lo, nang pawh Rody bulah bak i awm ngai hleinem, min țhen la, khanu kha nupuiah nei ang che,"

"Zorinsang, heti em em hian em ni min lo huat a, ka nupui i nih hi aw!"

"A hminga i nupui ve mai ka nih hi," ka tih ruala ka hmai sa zawk chu ka hre nghal a. Ka biang ka hup nghal vat bawk.

"Kut min thlak theihna i nei lo aw, chuan he in hi ka chhuahsan bawk ang, chuan ka țhen bawk ang che, nang nupuite bum hmang lutuk mai," ka thinrim lutuk chu ka mittui a tla zawih zawih. Ka room ațang chuan ka tlanchhuak nghal a.

Min rawn umzui vat a, ka banah a rawn man hman a, ka ban a chelhna kut chu paihthlaksak tumin ka țang nasa hle na in, thaah ka hneh ngang silova, room ah bawk chuan min pawt lut leh a.

"Țhu rawh." Ngawi rengin ka țhu ve mai a.

"Ka tihpalh, khatia kutthlak che kha ka tum ani miah lo ania,"

"Thil thleng tur a thleng vek tawh, kut min thlak hma khan inngaihtuah hmasa ta che,"

"Ka tihpalh ka tih chu."

"Awmzia a awm tawh lo. A hma ang khan ka hmangaih thei tawh lo che," ka ti ta khawl a.

A ngawi reng a, min en vang vang hnuah, "I thin ala rim anih kha, naktukah kan sawi țha leh dawn nia," tih pah chuan min chhuahsan ta nghal a.

A chhuah hnu chuan ka rilru ka siam fel ta. Ka phone la in ka u number chu ka dial ta nghal a.

"Hello, bawihi, enge chanchin ni ta?" A rawn ti a.

"U, naktukah i bulah ka lo kal dawn ania," ka ti ringawt a.

"Ka nu leh pa hnenah i sawi em?"

"Sawi lo, an hriat ka duh lo, an hriat chuan an phal dawn chuang lo."

"Chuti chu tumah hrilh lova lo kal i tum amaw?"

"Aw, a ni mai ang chu, tuma hriat ka duh lo alawm, U.. tumah hrilh suh aw."

"I tih tlat chuan le! Anih pawisa i nei em?"

"Tlem a zawng chu ka khawl hman alawm,"

"Anih chuan ilo kal hunah chanchin kan inhrilh zel dawn nia, tunah chuan ka dah rih phawt ange, ka buai deuh a."

"Awle, chanchin ka lo hrilh zel ang che," tiin phone ka dah ta a.

Ka thawveng hawk mai. Mahse ka hna hi engtinnge ka tih ang? Malsawma hnena ka sawi chuan engkim hriat leh vek a tum dawn si a, ka nawmloh chhuanlamin chawlh ka dil mai aniang chu.

Ka phone nghal a, phone a lak veleh chuan engdang sawi lo chuan, "Chawlh rawn dil che ka tum a," ka ti nghal tawng a.

"Ni engzat?" A rawn ti awlsam then a.

"Karhnih vel," ka ti ringawt. A thlaa thla ka dil chuan min rinhlelh ka hlau si a, duh leh ka u bul ka thlen hunah ka dil belh leh mai ang, anih loh pawhin ban ka dil tawh mai aniang chu.

"Ka lo tihsak dawn che nia, rilru tihah duh suh, i damțhat hun hunah i rawn zawm leh mai dawn nia," a ti mai a.

"Ka lawm e, ka tibuai nasa si che a, ka inthlahrung vek alawm,"

"Inthlahrunna tur a awm hleinem, țha takin inenkawl ang che," tih pahin phone a dah nghal a.

Malsawma hi chu ka tan chuan vantirhkoh a ni ringawt mai. A lakah pawh ka inthlahrung ngawih ngawih. Amah lah hi ka duh ngawih ngawih tawh mai si a, ka dinhmunin a zir ngang silova. Duh ngam tur pawh ka nilo tih ka hria, pasal nei lai ka la nih miau avang leh tunah phei chuan nau ka pai tawh lehnghal a, ka kalsan mai a ngai dawn ani. Ka hmuh zin poh leh ka duh zual zel si a.


<><><><><><>®<><><><><><>

[Ngaia]

A TLAI ZO TA

Eps - 9


A tuk zinga kal turin zanah chuan ka insiam mawlh mawlh a, phallo eng ang mahse ka kallui thovang. Kan nupa inkarah hian ser a tam lutuk tawh. Kan damchhung hian kan hlimdun ka ring tawh lo a ni.

Hma tawkah ka mu na in, ka muhil mai thei chuang lo. Nau ka pai thu hi ka u hrilh ni ila chuan a hnena kal a phal hauh lo ang le! Mahse ka thlen hunah ka hrilh tawh mai aniang chu.

Zing thawh hai ka hlauh avangin Alarm ka set a, reilote ka lo muhil ani ngei ang, ka harh leh chuan sana ka en vat a, ka alarm set ka thawhkhalh hlauh mai le!

Ka tho vat a, ka intifai sawk sawk a, ka thawmhnaw ka dahna bag chu la in, thawm dim tawkin ka chhuak ta țhem țhem a.

Khua ala thim vek bawk nen, thawh pawh ala hun lo hrim hrim.

Kawngkapui chu dim tein ka hawng a, ka chhuak ru ta zal zal a, thil tiru tur ka ni bawk a, ka ți duk mai lehnghal a, ka nuih te lam lam a za hial zawk.

Gate ka pelh hnu chuan ka thaw huai mai. Ka țang țung bawk a, ka na vek hmanin ka hria.

Ala hma viau na in, taxi pakhat hi a lo tlan hlauh mai a, ka lo phar vat a, ka kal tumna ka hrilh hnu chuan ka țhu lut a, kan tlan nghal vang vang.

Zanlamah Guwahati pantur sumo ticket ka book lawk tawh avangin hauh hran leh pawh a ngai tawh lo.

In lampang ka ngaihtuah chuan ka kal hmain ka awm lo tih an hre hauh lovang le! Ka la mu emaw an ti thovang.

Guwahati panna tur Sumo stand ka thlen khua a eng deuh det det a, ka phone sana ka en chuan zing dar 5 a lo ri țep a, la nghah rei a ngai dawn khawp mai.

Ka rilțam viau na in dawr inhawng pakhatmah ala awm silova, ala hma ve bawk em a ni.

Min rawn phone ka hlauh avangin ka phone pawh ka swich off daih. Ka u ka hrilh tawh bawk a, min lo chang ngei ang chu; motora ka chuan hunah duh leh ka phone ka on leh mai aniang chu.

Darkar chanve lai ka țhut hnu chuan dawr țhenkhat pawh an rawn hawng ve ta sap sap a. Inhnawhpuarna tur eng engemaw ka lei a, dar ruk chhuak tur anih avangin counter pawh an rawn hawng ve ta a. Ticket pawh ka tifel ta thuai a. Motora ka chuan hma chu hlauhthawnnain ka la khat reng mai. Tunah phei chuan an tho tawh ngei anga, min zawng hial tawh mai thei a ni.

Tunah chuan chhuak turin kan inpeih ta, kan thawmhnaw an hlang fel vek tawh bawk a. Sumo chhungah chuan ka lut nghal a, kan tlan chhuah hma chu ka la thawveng thei chuang lo.

Flight a kal duh hle mahila ka hun neihin a zir miau silova, bakah tuma hriatlohin ka kal thei dawn silova, kawng hla mahse Sumo a kal mai loh chu tihtheih ka nei lo a ni.

Kan chuanna pawh chu a tlan țan ta, Mizoram chhung chu sawi loh, Aizawl khawpui chhung tlanpelh thuai thuai ka nghahhlelh zia lah chu tuman min hriatpui der mai silova.

Ka chuanpuite chu tutenge ni a, eng ang hmel nge an put, tih pawh ka hre lo, ka bula țhu ngei ngei pawh tunge tih ka en chuang lo. Ka maimitchhing hmak a, ka rilru a chawl eih lo. Hlauthawng thaw dep depin ka awm reng a, tuma hriatpui loh hian ka hahin, ka chau ngawih ngawih mai a ni.

Darkar tam tak kan tlan hnu chuan Mizoram chin chu kan pel fel ta. Ka hlauhthawnna zawng zawng chu vawmbo ang duak mai hian a kiang duak a, ka thaw ham ham mai. Tunah chuan ka hlauhthawn a ngai tawh love; ka mit pawh ka meng ve ta țawk a.

Ka țhutpui chu mipa, tlangval anih ngei ka ring, la naupan hmel deuh mai hi a ni a, kei ai pawhin a naupan hmel zawkin a hmelțha phian lehnghal.

In lam ka ngaihtuahna ah chuan a rawn lut zawk a, Malsawma ka ngaihtuahin dawt ka hrilh chu ka inthiam lo ru khawp mai. Amaherawhchu tihtheih ka nei miau silova, min hnialin min dan a tum ngei dawn si a.

Ka pasal thinrim dan tur pawh ka ngaihtuah vek hman. Mahse enge tihtheih a neih chuan ang ni? Ka kalbo tawh a, a duh leh a hmangaih ber Rody chu nupuiah a nei tawh aniang chu; ka naupai thu hi ka hrilh ta lo bawk a. Hrilh tumna pawh ka neilo, ka pasal ni mahse a nawmchenna ang leka min ngaitu leh min pawngsual hialtu hi ngaihdam tumna rilru ka pu lo a ni.

Ka phone chu ka han on chiah chu ka phone a rawn ri nghal zawt zawt a, miscall message a rawn lut zut zut a. Ka pasal min call na vawi engemaw zat a awm a, Malsawma min call na awm țeuh chu mak ka ti kher mai. A ina ka awm a ring leh em ni dawn le?

Chutia ka phone en paha ka ngaihtuah neuh neuh lai chuan ka phone ri ah chuan ka phu zawk a. Malsawma a lo ni a.

"Hello, enge ni ta?" Ka han ti a.

"Khawiahnge i awm?" A mangan hmel khawp mai.

"Khawiahmah," ka ti ve tlat a.

"Tukinah i pasal alo kal a, ka inah a rawn zawng che a, a thinrim hmel khawp mai. I țha chiah em? Tinge min tih mangan kher hi i tum le?"

"Ka ti mangang che ami?"

"Aw, ka ngaihtuahzia che hi i hre lo em ni?"

"I țhian ka nih vangin maw?"

"Aw, a ni a, a ni lo bawk."

Eng a sawi tumna nge maw ni dawn le?

"Ka dah dawn ania," ka ti a.

"I kalna tur min hrilh phawt rawh."

"Ka hrilh thei rih lo che, ka thlen veleh ka rawn hrilh ang che," tih pah chuan phone chu ka dah ta a.


Malsawma Pov*

Zorini zawng tura Remsangpuia ka ina alo kal khan a thinrim hmel khawp mai.

"Khawiahnge ka nupui i thuhruk?" Tehngawt chuan.

"Engvanginnge i nupui chu ka ina a awm i rin ringawt a."

"A hma pawhin i inah i hruai ani lawm ni? Ka nupui lo hi buaipui tur i nei miah lovem ni?"

"I țawngkam kha fimkhur rawh. Mahni nupui lakah pawh rinawm thei silo, nupui nei reng chungin hmeichhe dang i fa paitu i la kawl zui a, Zorini hi thlah hmak ang che. A tlanbosan che pawh hi mak ka ti nek love."

"Engmaw i sawi a?" Tih pah chuan min rawn hnek a tum a, ka lo thle zeuh a, a mah zawk chu ka hnek thal tawp mai.

"Nang hian min hnek ngam amaw, i van chak lo dawn rua em!" Tih pah chuan min rawn khawih leh a tum chu a hnarah tak chuan ka lo hnek leh siah mai a. A hnar ațang chuan thi a rawn chhuak zawih zawih nghal.

"Vawikhatmah ka inah hian lo kal tawh suh ang che. Ka inchhungah kut min thlak ila tum ngam zawk ania, ka hlatah hian awm la, Zorini hi hlat bawk ang che. Chutilo chu i tan a pawi ang. Dan ang chuan i nupui ala ni mahna, ka hmeichhe hmangaih hi i tihnat vaih chuan tun aia na khan ka khawih tawh ang che," ka ti ta duah a. Ka thinrim kher mai.

Ngawi rengin a chhuak ta hnu hnu a, a chhuah hnu chuan ka phone ka la vat a, Zorini chu call ka tum char char a, ala tlang thei lo zui. Khawiah tehhrep nge a kal ang ni? Ka manganzia leh ka ngaihtuahzia a hre der silo. A tello chuan ka nun hian awmzia a nei lo a ni. A hmel ka hmuh leh a kianga ka awm ringawt pawha ka hlimzia te hi a hre ve der mai silova. Ka thinlunga thuawm te hi hrilh ngam a la ni silo.

Vawi tam call ka tum a, a tlang theihloh hnuah beidawn nan vawikhat chiah ka call leh anga, ala tlang loh fo chuan police hnenah report ka thehlut ang tiin ka ngaihtuah a.

Ka call leh chiah chuan beiseiloh takin a tlang mial a, ka lawm kher mai.

"Hello," a rawn tih chuan ka thaw huai mai.

"Khawiahnge i awm?" Ka ti nghal tawng a.

Min la hrilh țha duh lo zui. Motorah a chuang tih chu ka hria a, mahse eng motorah nge a chuan ka hre thei lo. A kal tumna a thlen huna a awmna min hrilh a tum thu sawiin phone a dah ta daih a.

Ka phone chu ka en reng ringawt a. Engtinnge a awm ang? Min hrilh țha ve thei mai lovem ni le! Hei vang hi ani maw chawlh te kha min lo dil ni. Ka phal dawn lo tih a hriat vangin min lo hrilh ngam lo a ni ngei ang.

End of Malsawma Pov*


Ka mut a chhuak hle na in, motor ka chuan hian ka muhil thei țhak lo hi hrehawm ka ti țhin. Ka chuanpui te ho lah chu an muhil bawrh bawrh hlawm a, kei ve chu nghate rep ang mai ka meng kar mai a, kawng zau nuam chin kan han tlan chiah chu kan motor pawh a chak fia fia ngei mai.

Driver hnung chiah seat ah ka țhu a, tukverh lam ka hawi vauh vauh reng a, ka nu leh pa in engtin tak ngai ang maw? An hnen pan ila chuan Remsangpuia hnenah bawk min tir kir leh ngei dawn si a.

Ka hlimna aia midang hlimna ngaipawimawh ni zawk țhin kha, ka hlimna tur nia ka hriat lam pan chuan ka kal mek chu a ni si a.

Ka kalsan tak lam chuan ka ngaihtuahna a luah reng thung. Ka pasal in ka chenna lo ni hial tawh chu ka ngai lem lo. Mahse ka nu leh pa engmah pawh hrilh ngam lova ka awm chu nuam ka ti lo kher thung.

Ka maimitchhing chial a, ka ngaihtuahna a vak vel ruai a niber mai. Ka phone ri ah chuan ka meng zawk a, tu chu ni ang maw? Ka phone ka han en chuan number ka hriat ngai loh alo ni a, hlauthawng ru deuh tak chuan ka han pick up a.

"Hello...!"

"Engvang tehhrepa tlanbo nge i nih?" Remsangpuia a ni tih ka hria. Phone ka dah leh țep a ni.

"Ka kalbo dawn tih ka hrilh che kha," zawi deuh tak hian ka ti a. Ka bula mite chu ka melh zak zak a. Mahse tumahin ka țawng an hre lo mai thei, an muhil tui hlawm em mai.

"Tunah hian khawiahnge i awm?" A rawn ti leh a.

"Ka awmna maw? I hre lovang, keipawhin ka hre lo, ka buai deuh a, ka dah mai ange," tih pah chuan phone ka off nghal daih a. Min lo biak leh ka hlauh avang chuan ka swich of nghal hmiah bawk.

A thinrim tur zia ka ngaihtuah thiam pha vek. Mi chapo tak a ni a, chuvang tak chuan Amahin min țhen lova, kei zawkin ka chhuahsan hi a la na viau ngei ang le!


Remsangpuia Pov*

Ka nupuiin min chhuahsan chu thawven huai awm tak, ka thawveng hauh lo mai. Zanlamah Rody nen khum kan ințawm a, zan dangah pawh kan ințawm fo. Ka nupui Zorini chuan min ringhlel thovang, mahse engmah a tilang lo.

Țhen mai hi chu ka duh ve reng, mahse ka chapona avang leh mualpho dawn tlata ka inhriat avangin ka țhen thei mai lo a ni. Rody hmangaih a min puhna pawh a dik vek. Kan inneih hma daih ațanga inkawp tawh kan ni tlat a, kan inthlah thei bik lo a ni.

Kut hial ka thlak a, chumi avanga chhuak a nih ka ring. Zing ka thawha a room ka va en chuan a o awm lova, bathroom ah pawh a awm chuang lo. A thawmhnaw ka en a, a lo thawl deuh huai mai a. Ka phone a, a ring thei țhak lo lehnghal a, khawiahnge a kal reuh le? Malsawma inah hial ka va zawng a, ani nen lah hian kan inmil thei țhak lo. A kut lah ka la tuar hrep zui, Hrep tak hian!

Khawihmunah pawh kal mai teh se, ka nupui anihna a bo chuang hleinem le!


End of Remsangpuia Pov*


<><><><><><>®<><><><><><>

[Ngaia]

A TLAI ZO TA

Eps - 10


Darkar sawm pariat zet kan tlan hnu chuan Guwahati chu kan thleng ta hlawl a. Kawngah harsatna em em tawk lovin, kawng lakah kan ding zeuh zeuh tih loh chu kan tlan char char a, kawng a thui bawk a, ka chau ve kher mai.

Ka u chu ka phone lâwk tawh avangin min lo châng a, ka u nen kan han inhmu chu kan inkuah chung chung mai. Kum engzatnge ka hmuh tawh loh pawh ka hre lo,ka pasal neih ah pawh alo kal thei lo a ni a; ka u bula ka kal thei chu ka lawm kher mai.

"Mami, i lo kal chu ka lawm kher mai, i chau awm si a, tirawh, kal ang hmiang."

"Awle," tih pah chuan a auto hire chuan a chenna hmun chu kan pan ta nghal a.

A chenna kan thlen chuan a in luah chu a nuam reuh kher mai. Te fel ran mai hi a ni a, room pahnih mutna tur a awm tel ve thlap mai.

"Ka in luah hi a te deuh na in, mahnia awm nan chuan a tawk lek ka ti a, in dang lian deuh chu a awm tho na in, duh aiin luahman a to deuh si a, heta țang hian ka hnathawhna hmun pawh a hnai zawk a, ka luah ta mai anih hi, i ril a țam tawh viau lo maw?" A ti duah a.

"Țam khawp mai," ka ti ve mai a. U te bul thleng ta chu ka inla pangchang ve deuh hlek.

"Chuti chu ei nghal mai ta che, i ei khamah inbual te i duh awm si a, tui ka lo lum sak ang che."

Chaw ei min siam sak a tum chuan hnial pawh ka tum lem lo. Tuna ka chak ber chu chaw ei vat vat a, tui taka muthilh vang vang a ni.

Ah, ka sawi hmaih, ka u hming hi Laltlansanga a ni a, Guwahati ah hian company pakhatah hnathawkin a awm a, thlatin hian ka nu leh pa te a hlawh hi a thawn ve țhin a, nupui neih lam hi a ngaihtuah thlawt lo a ni. A lehlamah chuan ka nu leh pa tan sum lamah a harsat phah lo hlauh zawk a, mahse nupui nei se, fa nei ve tawh se tih hi chu an duh. Mahse a hmaa alo tihsual ve tawh avangin nupui neih lam hi chu a ngaihtuah duh tawh lo a ni.

"U, nupui neih lam hi ngaihtuah ve tawh la,"

"Mami, nupui ka neih daihin tunge ka nu leh pa chawm anga," a tih chuan a ti dik ang reng.

"Mahse, nupui i neih pawhin i chawm thei tho ang chu."

"Nupui neih lam hi chu sawi tawh lovang, i hriat vek kha." Sawi zawm a duh tawh lo tih hriat tak hian a kalsawn hmak a.

Ka eitur chu ka ei ta mial mial a. Ka rilțam tawh bawk nen, ka eitui kher mai. Ka eikham hnu chuan ka u chu alo lut leh a.

"Zanin chauh ka tihfel sak ang che, naktuk ațang chuan i tifel ve tawh anga, eirawng i bawl vek bawk ang," nui rah rah chung hian a ti a.

"Awle awle, i thu vek alawm, mahse i mikhual hi min duat loh vaih chuan aw...!" Ka han ti ve a. Kan hlim dun phian mai.

Ka tihfel vek hnu chuan tuilum sa ver vawr chuan ka inbual ta a, ka hahdam sawng sawngin ka hria.

Ka inthlak fel hnu chuan ka u chuan min lo ko leh a. Ka va phei chuan ani chu ngawi rengin a lo țhu a.

"Enge ni a? Muthilh hmak ka chak tawh asin," ka va ti nghal thawr a.

"Chuti anih leh naktuk lamah ni mai rawh se, ni e, i chau awm si a, thil sawipui che ka duh viau na in muhil phawt mai rawh," a ti leh ta zawk a.

"Nia, naktuk lamah hrilh che ka tum tho alawm, ka zinkawng a thui em a, kalkawngah ka muhil hleithei silova, zanin chu ka mu phawt ange, min hrethiam mai rawh," tih pah chuan ka mutna tur lam chu ka pan ta nghal a.

Khum ka deh rual rual chuan ka muhil nghal hmiah mai. Ka chau tawngkhawng bawk ani ange.

Zing ka han harh chuan ka awmna chu ka hre lawk lo lehnghal a, ka hawi vel a, ka hrechhuak leh nghal thuai tho.

Bathroomah intifai turin ka lut a, ka intihfai zawha ka inthlak pah chuan ka phone chu ka han en a, ka battery a low vek alo ni a. Ka charge nghal chiah chu message a rawn lut nghal zut zut mai. Malsawma message a rawn thleng tam ber a. Remsangpuia miscall na pawh vawi thum vel chu a awm, ka kalbo ta chu a thaw huai dawn anih hi.

Malsawma chu ka call nghal vat a, ka thlen veleha call ka tiam tawh si a, nizan ah lah khan ka theihnghilh mai piah lamah ka battery lo low bawk nen ka call ta lo chu a ni a, a lungawi lo leh ngawt ang chu.

"Hello, i thleng tawh em ni? Vawi tam rawn call che ka tum. Min be peih thlawt lo em ni? Ka ngaihtuah tehreng che nen, engtinnge i awm ang tih ringawt ngaihtuahin hun ka hmang a, nizan pawh ka muhil lo," a rawn ti nghal bawrh bawrh a.

"Ka battery a low daih alawm, tukinah a low tih ka hre chiah, ka charge a, ka rawn call nghal che a nih hi,"

"Khawiah nge i kal reng reng, min hrilh rawh, i awmna tal hria ila, ka ngaihtuahna che a nep deuh mahna."

Tunlaite hian ka laka Malsawma țawngkam hman țhin hi a danglam tawp. Min duh ta mai emaw tihtur hian min ngaihtuahna țawngkam hlir hi a hmang lehnghal a. Mahse kei ang te chu țhian angin min ngaihtuah a ni ve mai.

"Enge i ngaihtuah veng veng a, ka biakna che pakhatmah i hre lo ania," a rawn tih chuan ka ngaihtuahna ka lo kawm leh char char chu niin;

"Engmah ngaihtuah lo ve, min ngaihtuah suh, ka țha lutuk ania."

"Khawiahnge i awm?"

"Ka u bulah ka awm, Guwahati ah," ka tih chuan a thaw huai mai.

"Tehdaih chuan, țha takin min hrilh thei mai lovem ni?"

"Pawi ka ti khawp mai, khatihlai khan ka rilru a buai em a ni. Min hnial ka hlau bawk si a, nau ka pai bawk nen..."

"Eng thu nge i sawi kha?" Tih ri ah chuan ka hawi chhuak zawk a, ka u in maktih hmel zet hian min lo en reng chu niin. Ka phone chu ka dah nghal a.

"U...!" ka ti ringawt a.

"Min hrilh rawh, eng thu nge i sawi kha, tinge min hrilh nghal mai lohva, naupai chungin hei chen hi motorah i rawn chuang ania, Lalpa leh, ka lung i van ti awi lo tak!"

"Ka hrilh vek ang che, mahse thinrim lo hram rawh." Ka ti mawlh mawlh a.

"Sawi rawh, engkim min hrilh vek ang che, zep awm miah lovin," a ti leh nghut a.

"Awle, lo țhu phawt la," ka tih chuan alo țhu ve nghal mai a. Thil awmdan engkim chu zep awm miah lo chuan ka hrilh ta vek a. Ka u chu a thaw huai a, a hmelah engmah a lang lo na in, a lungawi vak lo tih chu ka hre tho.

"Lungngai suh, heti hian ka enkawlna hnuaiah i awm reng dawn nia, naute pawh țha takin i nei dawn nia."

Ka u min țawng thlamuanna chuan min tilawm ngei mai. Ka hlauhthawn tehlul nen, thinrim viau dawn mahse tihngaihna awm tawh miau hek lo le!

Ka u kuah pah chuan, "U, hna ka zawng ve anga, kan pahnihin kan thawk dun dawn alawm," ka han tih chuan a lu a thing mut mut a.

"Ni rih love, tikhan hahdam takin awm phawt rawh."

"Hetia awm ringawt te chu ka peih hleinem,"

"Kan la ngaihtuah dawn nia, ilo thleng ve chauhva, hnathawh lam chu theihnghilh hmiah rawh." A chhuak zui nghal nal nal.

Ka u hian min duatin hna ka thawh phallo hle mahse, ka thawh awm tawk chu ka la zawng ve thovang. Tihbuai lutuk loh hram ka tum a ni.

Ei rawngbawl ka tlai phah ta vek mai. Choka lam ka pan chuan ka u chuan rawng a lo bawl mek a, "Tinge min bawl tir mai lohva," ka va ti a.

"Tukin chu kan bawl leh anga, tlailam ațangin i bawl dawn nia. Hna ka bang tlai thei si a, mahnia awm i hreh lem lovang chu maw?"

"Hreh love, mahse a khawharthlak viau dawn anih hi," ka ti ve mai a.

"Ka bawl peih tawh a, kal hma ka ngai si a, kan ei nghal mai dawn mi?"

"Pawi lo, ni e, ei mai ang," tih pah chuan ka siam nghal a.

Ei pah chuan kan titi mawlh mawlh a. Ka u hi țawng duh ve tak mai a ni a, kawm pawh kan inkawm ngeih hle bawk. Kum li zetin kei aiin a upa a, min duat em em bawk.

"U, Malsawma kha i hria em? School kan kal laia ka țhianpa kha." Ka han ti a.

"Hria e, tuna i biak kha ani nghe nghe lo maw?"

"Engtinnge ka biak kha amah a ni tih i hriat a?" Makti zet hian ka zawt let hau a.

"Ani lo țhian dang nei hek lo che mawle, i pasal i be awm bawk silova," a tih chuan ka nui tawp.

Ni e, țhian ka nei ngai lova, kawm pawh ka kawm ngai hek lo, ka chhuah ve apiangin Malsawma nen kan inzui tawp zel kha a ni a, ka u in alo la hria pawh chu mak ka ti ta lem lo.

"Mate, ka nu leh ka pa tal chu hrilh ve tur che alawm," a tih chuan ka ei lai chu ka hawichhuak zawk a.

"U, an mahni avanga hetianga awm ka nih hi, ka pasalin a bum hneh lutuk tawh a, an fanu hian pawngsual ka tawh phah tih pawh an hre tawp nang. Hrilh ta ila, min dang dawn tih ka hriat vang alawm, tumah hrilh lova hetia ka lo kal ni."

"Ani khawp mai, mahse i pasal khan sum hmang khan a bum hneh em mai a, a hmangaih viau turah che an ngai ani ngei ang. Tunah chuan i rilru ala dam lo pawh ani mahna, nu leh pa an nihna a bo dawn chuang lova, i tana țha tur ngaihtuahah an in ngai pawh a ni mai thei asin. Hriatthiam hun ila nei mai ang," a ti leh bauh a.

"Ni e, ka la hrethiam ve mahna le! Tun atan chuan ka thei rih lo a ni. Sawi tawh lovang."

Kan eikham hnu chuan ka u chu insiam turin a roomah a lut nghal a. Keiin kan eina ka tifel nghal mawlh mawlh bawk.

"Ka kal ania aw, vawiin chu rawn haw hma ka dil dawn nia," tih pah chuan a chhuak ta nghal a.

Kei pawh kan eina ka tihfel hnu chuan ka room ah ka lut a. Ka phone lo ri ral ralah chuan ka han en a, Remsangpuia call alo ni a, ka off hmak a, a beidawng duh hauh lo lehnghal, vawi li a rawn call naah chuan ka la ta hram a.

"Enge i la duh fova, min rawn tibuai tawh suh. Min tihbuai loh pawh hian buaina ka ngah tawk ania," ka ti hmak a.

"Zorin, ka tihpalh, i awmna tal min hrilh rawh."

"Engvangin nge ka hrilh ang che. I fa paitu kha nupui atan nei ta che, kei chu min tibuai tawh lo mai rawh."

"Kan ințhenna kan tihfel hma chu nupui dang ka nei thei hleinem," a chhuanlam siam mai mai chu ka van haw tak em!"

"Ințhenna tihfel kher a ngai em ni? I duh chuan i nei thei reng alawm."

"Ni e, i ti dik. In țhen i duh em em na chhan hi kha pa Malsawma kha neih i tum vang chu a ni em lo maw?"

"Nang ang ka ni love aw, i zak theilo kher mai. Vawikhat pawh min rawn tibuai leh tawh suh ang che," tih tuar pah chuan phone chu ka dah hmak a. Ka thinrim lutuk chu ka sa vek hian ka hria.

Remsangpuia thusawi chu ka ngaihtuah zui neuh neuhva, Malsawma chu ka duh tih chu ka pha lo, mahse neih lam chu ka rilruah a lang pha lo hrim hrim. Ani khan keini ang chu min duh lul lovang tih ka hria a ni.

Inchhung tihfai hna chu ka thawk mawlh mawlh a, chu chuan ka ngaihtuahna kalding lutuk tur lakah min veng hlauh zawk a, chawhnu lamah phei chuan ka rilru pawh a zangkhai leh tawh hle.

Chutia ka buai viau lai chuan ka phone ri pawh ka lo hre miah lova, vawi engemaw zat a rik hnu chuan ka hre ta chauhva, ka va en chuan ka beiseiloh lutukin ka pa alo ni a. Ka la ang nge la lovang tih ka ngaihtuah mek lai chuan a tawp hman ta hlauh. An rawn call leh mai ringin ka ngaichang reng a, mahse an rawn call ta mai silova, call let erawh ka tum hauh lo thung.

Ka ngaihtuah reng lai chuan ka phone rawn ri leh thut ah chuan ka phu zawk a. Ka en vat a, ka u a lo ni a, "Hello, enge ni ta?" Ka han ti a.

"Tinge call i lak theih miah lohva? Ka pa in min rawn call a, rawn call che a tum thu a sawi a."

"Ka awmna i hrilh em lovang chu maw?" Hlauthawng tak hian ka ti a.

"Hrilh love, i phalna lo chuan i awmna tumah hrilh ka tum hleinem," Ka u duhtak hi chu a van fel țhin tak em!

"Inchhung ka tifel a, nilenga awm ngawt ngawt mai chu ka thei ngang lova lawm, chuvang aniang phone ri ka hriat loh ni. Anih leh ka pa chuan enge a sawi a."

"I awmna ka hriat leh hriatloh min rawn zawt mawle."

"Thildang a sawi tel em?"

"Ka bulah chuan sawi lo, i phone a ring ral țhak tih a rawn sawi a. Nangmah ngei biak che a duh aniang,"

"Keimah ngei min biak a duhna chhan chu engdang ani lovang, ka ti mualpho lutukah a ngai leh pek ang chu; A fanu ai pawhin sum a duh zawk alawm." Ka ti hmak a.

"Chutiang a ni lo mai thei asin, a rawn phone leh anih chuan vawikhat tal bia ang che aw, keimah vang tal pawhin."

"Awle, ka lo tum dawn nia."

Engvanga ka pa chuan min be duh nge ni ang le? Tlai thleng pawh chuan min rawn phone ta chuang lova. Phone let kher ka tum lo bawk. Min rawn phone leh hunah ka bia anga, a tawk mai.

Malsawma phone pawh a reh hmak mai. Mahse pawi ka ti lo, ka rilru luah tam lutuk lo se a țha zawk ang. Thildang rilru la pêngtu ka zawn a ngai dawn a ni. Ka naupai lai theihnghilh țhaka ka awm chu le!

Ka naupai hi ka duh lo nilovin, a pa hi ka duh loh vang a ni. Ka pum chhunga awmin ka thisen ringin alo țhanglian ve dawn chu a ni si a.

Tlaiah chuan ka u hnathawk pawh alo haw ve ta a. Ei rawng ka bawl peih vek tawh bawk a, a in luah hi a lian lem lo na in, a kim ve biai thova, sitting room thlengin a awm ve vek. Ka u lo haw lai chuan Sofa ah chuan ka lo mu vel mai mai.

"Ka pa chuan a rawn phone chhunzawm che em?" A rawn ti a.

"Aih," ti ringawtin ka chhang.

"Vawikhat tal i inentir tawh em?" a tih chuan ka phawk hra mai. Min zawt teh thut bawk em a ni.

"Ka pai tih ka hriat hnuah ka la inentir lo."

"Chuti chu naktukah kan inentir dawn nia, Doctor hmelhriat ka nei alawm."

"I hman ami?"

"Aw, kan pu ka dil alawm,"

"Awle, chuti chu a remchan hlauh chu. ATM ațangin pawisa ka la chhuak nghal hlauh dawn nia, ka khawl ve hman nual alawm."

"A țhat hlauh chu, mahse in ren hle ang che. Nakinah ila mamawh dawn chauh a nia, nangmaha naute enkawl i tum a nih chuan...!"



<><><><><><>®<><><><><><>

[Ngaia]

A TLAI ZO TA

Eps - 11


A tukah chuan in check up turin ka u nen chuan kan chhuak ta a. A hmelhriat nia a sawi chu a lo be sa diam tawh a. Kan va thlen chuan kan lut nghal mai, test hrang hrang ka tih hnu chuan a dawhkan hmaah chuan ka țhu leh ta a.

"I naupai hi thla khat a ni tawh a, inenkawl țha hle la, eitur pawh a hrisel lam pang hlir ei tam a țha khawp mai. Naute hi thlathum an tlin hma hian ala insiam kim loh avangin indim a pawimawh bawk a, chhiat a hlauhawm zual hle bawk. Nangmah pawh i hrisel țhat a ngai dawn bawk ania," a ti duah a. A fel reuh khawp mai.

Damdawi min chawh lei tur chuan kan chhuak ta nghal a. Damdawi ei chu ka peih lo ngei mai. Kan lei zawh hnu chuan in lam panin kan haw dun ta a.

Tunah chuan Guwahati ah thlahnih lai mai ka awm ve ta. Ka nun pawh a hlimin ka taksa pawh a țha sawt sawt mai. Nau ka pai avangin ka indim ve viau.

Tukkhat ka zing tho chu ka pum a na riai riai mai a, mahse a reh leh mai ka rin avangin ka ngaipawimawh lem lova. Mahse bathroom ka pan tur chu ka lu a hai thut mai, ka tlûk lai pawh hre lo chuan chhuatah ka lo bawksawp reng mai alo ni a.

Ka han harh leh meuh chuan damdawiinah ka lo awm reng mai. Makti zetin ka hawi kual a. Ka u chu chauh hmel tawk hian a lo muthlu bawrh bawrh a. Ka tihbuai nasat zia ka ngaihtuah chuan ka inthiamlo takzet a ni.

A lo harh hlawl mai a, "Mami, tinge min hrilh vat mai lohva, ka chân tawh dawn che emaw ka ti asin, khatiang khan min tihlauthawng tawh suh aw," a ti a.

"Engtinnge ka awm a, ka pumna riai riai leh ka luhai thut kha ka hria a, a bak chu engmah ka hre tawh lo."

"Ka rawn hmuh che chuan thisen nen i lo awm nuaih a, a rang thei ang berin damdawiin ka panpui nghal che alawm, ka mangan zia hman zia chu!"

"Anih chuan naute a țha em?"

"Nau...naute maw?" Sawi hreh hmel deuh hian a ti bah nak. Ka ngaih a țha lo tawp.

"Aw, naute chu a țha tiraw?" Ka ti leh a.

"Mami, naute chu a awm tawh lo. I chhiat alawm!"

Bang lam ka hawi hmak. Ka inthiam lo em em a, ka naute ka duh loh țhin zia te ka ngaihtuah let a, Pathianin nau pai tlâkah min ngai lo a ni ngei ang le! Mahse ka naute kha ka duh țanin ka hmangaih ve țan tawh asin mawle. Ka mittui a luang zawih zawih a. Ka rilruin, ka naute min ngaidam rawh aw... ka ti mawlh mawlh ringawt.

Ka u pawhin min hnem ngaihna a hre bik lo. Kan ngawi dun reng ringawt.

"Mate, chhel takin awm hram hram rawh, Pathianin kan tana țha lo turin ro a rel ngai hleinem. Pawngsual avanga nau i pai hi i pai tluan Pathianin a phallo te pawh a ni zawk mai thei asin."

A dik ve theih tho rualin, ka naupai ka duhloh zia ka chhakchhuak fo si a, ka inthiam thei lo a ni.

Nithum vel damdawiina ka awm leh hnu chuan ka chhuak ve thei ta a. Ka lawm rual rualin hrehawm ka ti tho bawk.

In kan thlen meuh chuan ka chau lutuk chu khumah ka mu nghal tawp.

Guwahati ka lo kal ta kher kher hi ka inchhir rum rum. Kal lo ila chuan ka u hi ka tibuai awm tawp silova. Midang tana hnawksak zawnga awm hi ka thiam ve chhun anih dawn hi.

Ka lo muhil sek aniang, ka phone ri chuan min ti harh zawk a, ka han en chuan ka pa alo ni a.

"Hello," ka han ti a.

"Bawihi, khawiahnge i awm? I chungah thil țhalo a thleng em ni?"

Makti zet hian ka phone chu ka en ringawt a, ka pa țawngkam a va ang ta lo vele! Nidang ang chu ni se, min hrawk leh hrep tawh awm si a.

"Ka țha e, min ngaihtuah suh u," ka ti ringawt. Ka nu leh pa mah nise, an mahni pawh pan ngam lo tur dinhmuna an fanu min dah avang hian ka la ngaidam thei lo a ni.

"Min ngaidam ang che aw. Kan tihsual a ni e, kan hlimna chauh kan lo ngaihtuah vang ani. I nu leh pa hi i tan chuan nu leh pa ni tlak kan ni lo a ni. Ngaihdam tlak loh ni mahila Khawngaihin min ngaidam ang che aw. Lo haw leh lul rawh."

Ka phone ka dah tawp ringawt. Nidanga ka pa țawngkam nen a inan loh em avangin ka mittui a hnai a, ka ngaithla thei tawh ngang lo a ni.

Ka awmna pawh chu ka hrilh ta chuang lo. Rinhlelhnain ka khat a, Remsangpuia tih tir pawh alo ni mai thei asin, ka ring ringawt nghal tur a ni lo. A hma ami ang kha a thleng leh ang tih ka hlau tawh a ni.
Tunah nau ka chhiat a, ka taksa chauh lai ngat phei chuan rilru hahna tur ka mamawh lem lo khawp mai. Țhenkhat te anga thawveng taka awm ve theih hi ka chak țhin.

Tunah chuan ka taksa a dam fel ta bawk a, hnathawh tur ka zawn ve a ngai tawh a ni. Ka u min chawmin ka awm reng thei lovang. Naupai enkawl ngai ka ni tawh lo bawk a, ka duh duhin ka teichhuak thei ve tawh alawm le.

"U, heta ka la awm rau rau chuan hnathawh tur hi ka zawng ve dawn ania."

"I thu thu alawm le, ka zawnpui dawn che nia, ka țhianpa in hnathawhna tur min zawn hmuhpui thei ngei ang, nilenga awm chu ninawm i ti viau ang chu." A tih chuan ka lawm kher mai.

Phone chu phawrhin a țhianpa chu a be ta nghal a. Reivaklo an inbiak hnu chuan a phone chu a dah a.

"Private company pakhatah hnaruak a awm thu a sawi a, a lo sawi chhin dawn anih chu." Ka lawm kher mai.

Hna ka thawk anih chuan ka u pawh ka tibuai nep deuh tawh ang chu.

"Mahse lo hlim viau rih suh, ala chiang lo ania.

"Ni e, ka thawh theih leh siloh khan ka rilru a na palh ange."

Zan ka mu chu ka helhhawlh nge pawh ka hre lo, ka muhil thei reng reng lo mai. Muthilh ka tum poh leh ka harh tulh tulh thung. Ka thova, choka ah lutin tui ka in a, ka mut leh meuh chuan zinglam darhnih alo ri tawh a. Reilote tal pawh ka chhin sek loh chuan ka taksa a chau vek mai ang. Darkar tlemte chu ka lo chhing sek a ni ngei ang, ka harh chuan dar li alo ri tawh a. Muhil thei tawh hek lo i, khum ațanga thovin ka intifai sawk sawk a. Choka ah lutin thingpui ka lum nghal a.

"Mate, i va tho hma ve a, chanchin lawmawm lo deuh a thleng tlat mai. Ka nu a țha vak lo a ni awm e, ka pa'n nizan khan a rawn phone a, nangmah pawh hrilh tur chein min ti a. I mu tawh si a, ka hrilh duh ta lo che anih kha."

"Engtin chiah nge a awm a?" Ka thlaphang nghal ringawt.

"A thin a Cancer tih Doctor ten an hmuchhuak alawm."

"U, ka pa chu kan be ve ange." Tih pah chuan ka phone la in, ka pa chu ka call nghal a.

"Pa, keimah ka nia, ka nu chu engtinnge a awm a?"

"Kan tihdanah che khan a rilru a nuam lo lutuk a, a hma daih ațangin a damlo fo tawh a, i pasal lak ațang khan sum kan hmuh theih zel avang khan i hlimna tur pawh kan lo ngaihtuah duh lova, ka tihpalh ani, min ngaidam ang che aw, chuan i u bulah i awm tih ka hria a, ilo haw theih chuan a lawmawm khawp ang, i nu pawhin a hmu chak lutuk che."

"Pa, keipawh ka tihpalh, ka lo haw ngei ngei ang." Tih pah chuan ka phone chu ka dah a. Ka mittui a tling nghal piau mai.

"U, engtinnge kan tih tak ang?"

"Motora kal chuan kawng a hla si a, ila damkawr bawk si a, flight ticket dar sawmpahnih chhuak kan book mai dawn em ni?"

"Aw, a pawi lo, motora chuang tur chuan ka la infit lo em mai."

Airport lam chu bia in flight ticket chu a va book ta nghal a. Keipawh chuan rawng ka bawl nghal sawk sawk a, ka bawl zawh hnuah ka thawmhnaw ka siam leh nghal.

Kan awmna ațanga a hlat ve deuh avangin kal hma a ngai a, chaw ei kan peih tawh tho bawk nen, kan ei nghal mai.

Ka u erawh chawlh a dil phawt loh chuan ka rualin alo kal ve thei rih dawn lo.

Chaw kan ei kham a ka tihfel vek hnu chuan Airport lam chu kan pan ta a. Airport chu kan thlen chuan kan ticket book tawh sa chu tifelin a chhuah hun kan nghak a.

Suangtuahna ka lo neih ve tawh te chu a thamral dawn chu a ni leh ta mai si a. Ka nun hi tinge pangngai tak hian ka hman ve theih miah lo le!

Hlimna ka tawng ve dawn chauhva, harsatna bawk hian ka nunah hmun a chang leh țhin si. Mizoram pawh thleng ta tehreng ila, harsatna bak ka hmaah min hmuaktu an awm pawhin ka hre lo.

Ka ngaihtuahna kawma ka țhut ngawih reng lai chuan kan chhuah hun a thleng ta. Thlawhna chhungah chuan lutin ka seat turah ka țhu nghal a, ka bul chiahah chuan hmeichhe pakhat, la upa lo tih hriat tak mai hi a lo țhu ve a.

Min hmuh chuan a nui sak a, a hmel chu ka ngainat zawng tak mai a ni.

"Nula, Aizawlah em ni in awm a?" Min be nghal siam siam a.

"Aw ni e, nang zawk?" Ka ti let ve sap a.

"Aw, enge hetah i tih a, hnathawh i nei em ni?"

"Nei love, ka u hnathawkin a awm a, ka tlawh lawk." Ka ti mai a.

"Anih tak chu mawle, eng hna nge i thawh țhin reng reng a?" A ruk tak chuan zawhna min zawt peih lutuk chu ka ning deuh hlek.

"Hnathawh pawh ka nei lo," țha tak chuan ka chhang ve zel tho.

"Anih tak chu mawle, Aizawl kan thlen hunah pawh kan la inhmuh leh ngei ka beisei a ni. Aw taka, ka hming chu Ruatsangi a ni a, 'Masang' tiin min ko mai dawn nia. Nang engtinnge an koh ve che a?"

"Zorinsangi ka nia, 'Zorin' tiin min ko va."

"Ka be buai ta hrep che a, min hrethiam aniang chu. Ka hmelhriat ngailoh chu hetiang hian ka be vak ngai lo a nia, nang chu ka hmuh phat ațang che khan ka ngainat zawng tak i ni. I hmel pawh a țha kher mai." min nuih var var mai.

"Ka lawm e, nang pawh i hmelțha khawp mai," tih pah chuan ka nuih let ve sang a.

Thlawhna a thlawh chhuah dawn chuan inhreng nghet turin an rawn puang a, kan thlawk chhuak ta diai diai mai. Ka mutchhuah em avang chuan ka lo muhil veng veng a, ka bula țhu Masangin min lo ko harh chuan kan lo thleng reng tawh mai alo ni a.

Ka chhungte emaw tuemaw tal min hmuaktu tur an awm lo chu a ruk tak chuan ka hrilhhai kher mai. Mahse tunge maw ka beisei chuan le?

"Tumah hruai tu tur che i nei lovem ni?" A rawn tih chuan ka zak chem chem mai.

"Aw, nia, ka nu a damțha lova, tumah pawh ka beisei lo," ka ti let sap.

"Chuti chu ka rualin lo kal mai rawh, i awmna thleng ka thlah ang dawn che nia," a tih chuan ka hnial duh ta lova.

An motorah lutin Lengpui Airport chu kan tlanchhuahsan leh ta a.

Kawngtluanin kan titi a, a bula awm a nuam kher mai. A fel in, a hawihhawm em em mai lehnghal a. A nu leh pa tan fanu chhuanawm tak a nih ngei ka ring.

"I nu damlohna vangin maw i haw?"

"Aw ni e, ka hriat veleh ka lo haw vang vang a nih hi."

"A pawi ka tihpui hle mai che, i rilru a hah hle dawn anih chu," min khawngaih hmel taka min en chung hian a ti a.

Masangi hi ka hmuh ațangin a hmelțhat ang bawkin mi rilru țha leh tluang tak a nih ka ring reng a ni.


<><><><><><>®<><><><><><>

[Ngaia]

A TLAI ZO TA

Eps - 12


Masangi hi kei aia a upa a nih pawhin a upatna a tam vak ka ring lo. Ka ngaina nghal em em ringawt, a chetdan velah chuan mi hausa chhungkua ațanga seilian anih ngei a rinawm.

A chapo lova, a polite em em bawk, kan inhmuh țanphat ațangin min ngaihsakna a la tilang char char.

Ka tlanbosan tak ngei mai Aizawl khawpui chu ka thleng leh ta, kan hnaih tial tial a, ka huphurh tawlh tawlh bawk.

"I rilru a va nawm loh hmel ve a, tinge a?" Min rawn zawh leh chuan ka hawi chhuak vat a.

"Chutiang lam pawh a ni lo, ka nu ka ngaihtuah deuh alawm mawle," ka ti daih a. Ka chanchin hrilh tur meuh chuan kan inhmelhriatna ala rei lo deuh em mai.

Kan inpêng ka thlen meuh chuan khua a thim tawh ang reng hle a, motor ațanga ka chhuk pah chuan Masangi hnenah chuan, "Ka lawm lutuk, awm lo la chuan ka buai viau mai thei ani," tih pah chuan chuan man chu pek ve ka han tum a, alo duh țhaklo mai.

"I ti ang love a, ka puihna ah che ngai hmiah rawh, chuan hei hi la la, i nu damlo ka kan vena atan a ni mai. Thildang tihsak theih che ka neih chuan min hrilh hreh suh aw, ka unaunu ang maiin ka hmuhtirh ațang che khan ka ngai nghal hmiah che ania. Hei hi ka phone number leh ka card a ni a. Hna pawh i mamawh anih chuan min rawn phone tawp dawn nia, anih phawt le," ka hnial hman hma chuan an tlan nghal ta daih a.

A pawisa min pek ka han en chuan a lo tam kher mai. Zahthlak zawk hian. A thlawna pawisa dawn hi ka duh ngailoh thil a ni a, ka thawhchhuah ngei ațangin sum chu ka nei tur ani tih hi ka thupui a ni ve a. Mahse chutiang zat zat mihrang lak ațanga dawn chu zahthlak ka ti kher mai.

A card min pek ka hmuh meuh ka phu zawk hial thei. An hausakzia hrelo hi chu an vang khawp ang le. Chutiang khawpa mi hausa chu ka tawng ta chu ania, ka rin phak bak a ni. Mumangah pawh ka la mang chhin eih lo.

Kan inchhung ka luh dawn meuh chuan ka tim kher mai. A hmaa ka haw lah khan khati tehhrep khan ka nu leh pa khan min țawngkhum tawh bawk si nen, an hriatlohvin ka u hnenah ka kal leh daih bawk si a. Lut mai lova ka tawi deuh hrut hrut chu ka pa chuan min lo hmu hlauh mai.

"Ilo thleng tawh maw? Kan lo hruai thei silo che a, pawi kan ti lutuk, tirawh lo lut ta che." A tih chuan kan inzui lut ta a.

Ka nu chu khumah a lo mu bal mai a, a lo cher tawh zia ka hmuh chuan inthiamlohnain ka khat a. Min hmuh veleh chuan min lo ban țawk țawk a.

"Mambawih, ilo thleng thei ta maw? Min ngaidam ang che aw, i chungah thilțhalo tak i pa nen hian kan lo ti a ni. I hlimna tur aia sum kan lo ngaihhlut zawk avangin kan thiamloh liau liau a ni e."

"Nu, keipawh ka diklo ve tho alawm."

"Ni love, a bik takin i nu hian i dinhmun hrethiam tur che ka ni a, ka lo hrethiam lo che a ni. I thusawi aia i pasal thusawi dik vek tura kan lo ngai kha kan tihsual liau liau a ni. Ani vang leh i nu leh pa vang hian i tuar hnem ta lutuk hi a tawk tawh viau e."

"Nu, inthiamlo duh tawh suh. Hriatlohna vang a nia lawm, hei, ka rawn haw kawngah hmeichhe pakhat ka tawng a, ani chuan i inenkawl nan pawisa min pe a, kan inhmuh vawikhatna a ni lehnghal, a zahthlak rual rualin a lawmawm bawk si a."

"A va tilawmawm ve mawle, engang chhungkua nge maw an nih le!"

"An hausakzia te chu i hriat ka ring. Aizawlah pawh an lar lutuk alawm."

"Anih chu mawle, engpawh nise i chau awm si a, intihfai te pawh i duh ang, va intifai rawh. Ilo haw dawn tih ka hriat vang aniang ka zia lutuk ringawt."

"Anih ka ring a ni, ka beisei ai daihin i harh țha a, ka lawm khawp mai, ka pa in a sawi chauh tehlul che nen. Anih kan intifai lawk ange," tih pah chuan ka room ni țhin lam chu ka pan nghal a.

Ka rooma ka luh chuan ka rilru a kalthui kher mai. He rooma ka chunga thilthleng kha ka hrechhuak lo thei lo a ni.

"U, ka thleng tawh a, ka nu pawh beisei aiin a țha khawp mai." Tiin ka u chu ka bia a.

"Nangmah kha i țha zawk em?"

"Aw, ka țha alawm, min ngaihtuah suh, a nih ka dah ania," tiin phone chu ka dah nghal a.

Inbual tur chuan bathroomah ka lut a, ka inbual zawh chuan kawrfual hnalh mai hak nuam zet tur hi ka inbel a. Ka room ațang chuan ka chhuak nghal a.

"Mambawih, chaw kan ei mai dawn em ni? I siam peih mai em?" Ka pa chuan a ti a.

"Awle, ka nu khan a ei peih dawn em?"

"Peih lovang, i duh leh han zawt chhin la, ilo haw ve si a, tlemte pawh a ei peih ve mai thei asin,"

"Nu, chaw tlem tal ei rawh aw," ka nu mutna bula kal pah chuan ka han ti a.

"Ni e, tlem tal chu ka lo bar ve ange, min han kaitho ta che," a tih chuan khum ațanga kaithovin choka lampan chuan ka kuah phei a.

"I pasal Remsangpuia khan a fa paitu kha nupuiah a nei tih kha i hria em?" Ka nu chuan a ti leh a.

"Hre nang, chutia aneih chuan a țhat hlauh chu," ka ti mai a.

"I vei miah nange a, hmangaih tak ang che khan a awm vel a, a tenawm khawp mai. A mizia kan lo hrechiang lo em a ni. Tunah chuan a zia dik tak a langchhuak ta alawm."

"Sawi tawh suh, engahmah ka ngai tawh lo. Ka rilru pawh a tina pha lo, chaw ei phawt ang u,"

Chaw ei ka siam sawk sawk a, dawhkan kilin kan ei ta mawlh mawlh a.

"Pa, awmpui kha in nei țhin si a, khawiahnge a awm daih a?"

"Kan dinhmun hi a chhe ta em alawm, i nu awmpui a ngai reng ta bawk si a, engmah thawk theiin ka awm tawh bawk silova, i u pawisa min rawn thawn hian kan khawsa ve țawk țawk tawh a ni." A tih chuan ka khawngaih ngei mai.

"Lungngai suh u, hna ka zawng anga, ka hmu te anih chuan kan zia leh em em ang."

"Ni e, i țhian chhar thar chu bia la, a fel hmel em chu. Hna hmuh sak che pawh a tiam che a ni lawm ni?"

"Ni e, min sawi hmuh ngei a, mahse a tih tak tak leh tak tak loh ka hre bik silova lawm, nakinah kan mamawh viau tak leh ka lo be dawn nia." Ka tițha ve mai a.

"I ei tui em?" Thudang ka zawt ta daih a.

"Eitui khawp mai. I lo haw vang a niang," nui var var chung hian a ti a.

Ka nu nui hmel hmuh leh chu a nuam kher mai. Ka pa pawh ka nu awmdan avang chuan a hlim hle tih a lang thei.

Ka nu chu khumah bawk chuan ka kuah phei leh a, a hlim tih hriat tak hian a țawng ve barh barh a. Choka lamah ka pheisan leh ta nghal a, ka tihfel vek hnu chuan ka nu bulah reilote awmin ka room ka pansan ta a.

Ka khumah chuan mu in, ka ngaihtuahna ka kawm vel a, Remsangpuia leh Rody chu an innei ta ngei chu a ni a, An hlim dun hle pawh ka ring.

Malsawma ka ngaihtuah leh a, engvanga min biak tum tawh miah lo nge maw a nih le? Ani hi bialnu a nei anga, kei min buaipui chu a sim ta anih ka ring. Hlim takin nupui neise ka tih rualin keimahah hian diklo a awm tlat si...! Mahse ka phu loh zia hi ka hre reng tur a ni ang.

Ka chauh em avangin ka lo muhil tui hle a ni ngei ang, ka pa in ka lua min sawi dawt dawtah chuan ka harh hlawl mai.

"Enge ni ta?" Hlauthawng tak hian ka han ti a.

"Mambawih, i nu hi damdawiin kan panpui mai a ngaih hmel a ni, a dinhmun a chau thut a, ilo haw si a, a intiharh lui hram hram anih dawn kha."

Ka tho vat a, ka insiam nghal sawk sawk a. "Tinge min kaihthawh vat lohva?" Ka tih chuan ka pa chu a nui suk. Keipawh chuan ka muttui zia ka ngaihtuah chhuak leh hnuhnawh.

Ka pa chuan motor alo ngaihtuah vek tawh avangin ka nu chu damdawiin kan panpui ta nghal a. Hmanhmawh takin Doctorin a en nghal sawk sawk a.

"A dinhmun hi a țha vaklo a nih hi, rei a daih lovang tih a hlauhawm khawp mai." Frank deuh chuan a sawi a.

"U, ka nu dinhmun hi a derthawng riau ania, lo haw tum hram rawh." Ka mangang kher mai.

"Aw, flight ah ka lo chhuak nghal dawn nia."

"Nu, ka u a lo haw dawn asin, lo nghak hram hram rawh aw...!" Ka mittui a luang nghal zawih zawih.

Ka pa pawh chu mipa e tilo chuan a mittui a tla ve fap fap mai. Ka hmuh erawh a hlau hle.

Ka nu chu oxygen nen a thaw țawk țawk a ni ber tawh. Rei kan va awm tlâng hman lo em! Remsangpuia ka huatna a zual leh sauh. A dawt sawi nasat avanga chhungkua kan buai nasat zia ka ngaihtuah chhuah leh chuan ka thinrim thar leh țhin.

Doctor an buai ta mam mam mai chu ka ngaih a țha thei lo, ka nu awmna ward ah lah luh an phal ta bawk hek lo. Doctor lo chhuak tur chu kan lo ngaichang ta ringawt a. A lo chhuah veleh chuan ngui zeta min en in, "Kan chhan hman ta lo a ni e, pawi ka ti khawp mai," atih chuan ka insum hman ta lo. Ward ah chuan ka pa nen kan tlanlut nghal vat a, ka nu chu a hmai an lo khuh vek a, ka țap nghal zawih zawih. Ka pa pawh a insum thei bik lo ani ngei ang, țap ri ngam silo hian a mittui a tla ve zawih zawih mai.

"Nu, kan inhmu leh chauhva, min kalsan leh hma em mai, ka u pawh a lo haw mek asin, nu min ngaidam rawh aw, i bula ka awm rei hman loh avangin." Ka tan chuan țahna tur a van tam tak em!


Remsangpuia vang vek a ni.


<><><><><><>®<><><><><><>