A TLAI ZO TA BY HK Renthlei (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: A TLAI ZO TA BY HK Renthlei (Completed)

Unread post by Ngaia » January 3rd, 2018, 8:05 pm

A TLAI ZO TA

Eps - 13



Ka nu chu Ambulance in kan in lam pan chuan an phur a, ka pa nen chuan a bulah awmin midang awmve pawh an awm lo. Ka va inkhawngaih tehlul em!

Mahse ka beisei loh lutukin kan in khatin mi an lo awm țeuh mai. Engtinnge an lo hriat hman hlawm ni? A țul țul an lo tifel a, inchhung pawh an lo singsa fel vek tawh.

Ka phone a rik chuan ka u a lo ni a. "U, i lo thleng dawn tawh em? Ka nu chuan min kalsan tawh asin, ilo thleng har lutuk a," tih pah chuan phone ațang chuan ka u chu ka țahkhum leh rih a.

Remsangpuia te nupa pawh an rawn kal ve alawm, mahse thinrimna tihlanna chi a ni silova, makti zet hian min rawn en a, a nupui thar mitmei a veng ve ta ngang mai. A hmaa kan inneih laia ka mitmei a ven ngai loh tehreng nen. A nupui chuan a hneh hle a nih dawn hi.

Ka nu ruang bulah chuan țhu in ka nu biang vawt thler mai chu mittui nen ka khawih a, Țah pawh ka țap hleithei tawh lo.

Ka u alo thleng an tih chuan ka tho vat a, ka va kuah chûk chûk mai. Ka u pawh a mittui a tla ve zawih zawih a, A inthiam lo em em mai lehnghal.

"Nu, min ngaidam rawh aw, fapa laktlak loh tak ka lo ni e, i damlo tih hre reng chung pawhin ka rawn kal thei silova, ka hna vang ani," a ti mawlh mawlh mai.

Ka nu pawh kan vui liam ta, ka pa hmel ka en a, a tla ve deuh kuam mai. Ka nu boral chu keini ai pawhin a tuar zawk ngei ang le!

Ka nu kan thlahliam ațanga nithumnaah chuan Masangi a rawn lang hlawl mai.

"I nu boral thu ka hre ve chiah a, ka rawn kal nghal vang vang anih hi, a pawi ka tihpui hle mai che, hei hi a ral nan ka rawn kensak che a," tiin pawisa envelope a tuam chu min pe a.

"I ti lawmawm lutuk, mahse a hma pawhin min pe tawh si a, a ngai tawh kher lo asin."

"Ni lo ve, ka tihtheih tawk a nih hi. Thildang tihsak theih che ka nei silova. A hma a ka card pek che kha ilo ngaihtuah ta em? Hna i mamawh anih chuan ka hnenah i thawk thei reng ania."

"Nia, ka lo ngaihtuah tawh alawm, mahse ka nu damlo nen, tihian kan ni leh ta thut si a, engmah ka rawn sawi hman lo a lawm."

"Ka hrethiam lutuk. Tunah mai chuan ila thei lo pawh ani ang, mahse min rawn be ngei ngei ang che."

"Awle, ka lo tum dawn nia," ka ti ve ta ringawt a.

"Anih kan kal phawt ange, min biak i hreh lo turah ngai ang aw," tih pah chuan an chhuak ta a, an liam thleng chuan ka thlir a, chumi hnuah ka lut ve ta chauh va.

Tlai lamah chuan Remsangpuia chu kan inah a rawn lang leh hlawl mai. Biak pawh ka be lo, ka pa chuan alo be hram a, a hmel ka hmuh hian ka luak a tichhuak hluah hluah.

"Engtikinnge ilo haw a?" Min rawn zawhna chu ka chhang lo țep a ni. Ka pa nen an awm dun reng emaw ka ti a, engtiklaiin nge ka bulah a rawn kal hman ni?

"A la reilo," ka ti mai a.

"Engvanga tlanbo nge i nih reng reng a?"

"Ka duh vang ani mai. Chuan khawngaihin nupui i nei tawh a, min tibuai tawh suh. Nang leh kei hian sawi dun tur kan nei tawh lo. I dawtsawi tam lutuk avanga kan chhungkua min chawhdarh zia te hi ka hre vek. Nangmah vang hian ka nu pawh a damrei loh phah." Ka thinrim in up rei tawh bawk nen, ka an khum ta piap piap a. Tumah inleng dang an awmlo bawk a, min tihhrehawm tamzia ka ngaihtuah chuan ka la insum hle zawk a ni.

"Kha i bialpa kha ila beisei anih chuan i tisual der ang. Bialnu a nei an ti ania, an innei țep tawh mai thei a ni."

"Khawngaihin min chhuahsan mai ta che," ka pa chu a rawn inrawlh ve ta a.

"Khatiangin inlengte an ti ngai lo asin," Remsangpuia chhuah veleh chuan a ti a.

"Pa, ka thinrim em ani, bakah a hmel kha ka hmu peih lo, kan inah hian lo kal tawh lo se ka duh."

Malsawma chanchin min hrilh kha dawt a nih ka ring lo. Hei vang hi anih dawn hi min biak tawh ngai miah loh ni! A pawi hleinem, a duh duh nei thei a ni alawm. Keia lo buai ve na tur a awm hleinem le!

Ka nu boral ațanga thla khat a liam leh hnu chuan Masangi chu ka phone ta ringawt a.

"Ka tihpalh lutuk, keimah zawkin rawn call tur che ka ni asin mawle, ka hnaah hian ka buai thei lutuk a, hna ka kawhhmuh che chu i rawn dil dawn ta em ni? I rawn dil dawn tawh lo emaw ka ti a."

"Nia, ka inthlahrung deuh hlek a," tiin ka nui hak a.

"Inthlahrunna tur a awm hleinem, naktukah lo kal la, i hna tur chu ka kawhhmuh dawn che nia."

"Ka lawm lutuk ringawt, nang ka tawng che hi ka vannei tak zet a ni, naktuk chuan ka lo kal ngei ngei ang." Tiin phone chu ka dah ta a.

Ka thawveng deuh hawk mai, tunah ațang chuan hna ka neih ve leh anih chuan kan dinhmun pawh a zia ve leh deuh tawh ang chu. Ka pa lah ka nu boral ațang hian a hriselna a pan hle mai a. Ka pa enkawl tura hna ka hmu tur chu ka lawm kher mai.

Ka u lah ka nu boral ațanga karkhat hnuah a hna avangin Guwahati ah a kal leh nghal mai si a. Ka pa nen chuan khawhar takin kan awm dun rak rak a, kei ai mah chuan ka pa hi a khawhar zawk dawn tih ka hria, ka khawngaih khawp mai.

A tukah chuan Masangi te hotel ah chuan ka va kal ta a. An hotel ropui zia chu a thu chauhvin ka lo hria a, a hmuna han hmuh meuh chuan alo ropui nangiang mai. Hausa awm reng pawh an lo ni e. Mizoramah chauh lo pawh hotel an lo nei thluah mai.

Chuta thawk nghal tura min ti chu ka lawm kher mai. A hahthlak dawn viau na in, a hlawh a țha hle thung.

A tirah chuan hotel hna chu ka thiam vak lova, amaherawh chu thawhpuite an fel a, min hrilhfiah peih em avangin ka thiam chak ve khawp mai. Nuam pawh ka ti.
Tunah chuan kan dinhmun pawh a zia ve ta viau.

Ka thawhna hotelah chuan țhian țha tak mai, a nu in a boralsan ve tawh tho Mahmingi a awm a, ani nena kan in hmuh phat ațang chuan kan inthlah thei ta reng reng lo. Unau pianpui dang alo nei bik lo a lo ni a. Kan dinhmun a inan deuh em avang chuan thinlung lamah pawh inzawmna kan nei aniang tih tur hialin kan inkawm ngeih nghal.

Kan pahniha inzui chawtin kan bang rual a, Mahmingi hian scooty a nei bawk a, kal lamah chuan kan kal rual thei lo nangin haw lamah erawh chuan a ruala haw turin min phut ngei ngei a, ka inthlahrung zawk hial țhin.

"Mahming, i rual hian min haw tir ve ziah țhin si a, ka inthlahrung riau ania."

"I ho mai mai e a, nang chu ka unaunu ang hiala ka ngaih i ni a, mahnia haw ai chuan ka duh daih zawk. Naktuk chu ka rawn sawm dawn che ania, lo tlai suh ang che."

"Tlai lovang, nangmah zawk hi ania tlai țhin chu ni," tih pah chuan kan infiam zui a, kan nui hawk hawk a.

Chutia kan lo nuih bawk bawk lai chuan Malsawma leh nula pakhat chhe lo zet mai hi hotela an lo lut chu ka hmu ta thut. A kalpuinu lah chu a hmelțha in, a nalh thlarh mai lehnghal a. Keini ang nena tehkhin chi pawh ani lo. A thawmhnaw hak lah chu a inhmehin model niawm tak a ni.

Chutia ka lo en reng lai chuan Malsawma pawh chuan min rawn hmu ve ta a, a meng phawk chiang kher mai. Mahse reiloteah a inthup leh vat a. A hmeichhe kalpuinu lam hawi chuan a phun sap a, kan lam chu a rawn pan a.

"Engtikin nge i rawn haw a?" Kan bul a rawn thlen chuan a ti nghal tawng a.

"A rei leh tawh," ka ti mai a. Ka țhiannu chuan makti zet hian min melh reng tih ka mitsirin ka hmu reng.

"Darling, kan kal tawh dawn em ni ang, kan tlai palh ange," tih pah chuan Malsawma banah chuan a rawn chelh a.

"Awle, kal ila," Ka lam lo hawi leh pah chuan, "Kan la inhmu leh ang chu," tih pah chuan an kal ta nghal a.

"Awi Lalpa leh, a van chhe lo chiang tak em! Kha nu kha a bialnu em ni? An inhmeh dun kher mai." Mahmingi chu a rak chul a. Ka lo nui ringawt.

'Engvanga kan la inhmu leh ang chu' tinge a nih le? Ani hmuh leh kha ka bat a ni hleinem le? Ka hmuh leh nachhan tur ka hre hauh lo.

"Kan haw tawh mai dawn em ni?" Ka han tih chuan, "Haw ila ani mai alawm," tih pah chuan kan inzui chhuak ta nghal a.

Mahmingin a scooty a lak hlan chuan hotel kawtah ka lo nghak a, chutihlai tak chuan Malsawma te pahnih car lam pana an kal dun chu ka hmu leh chiah mai a. A bialnu cara a țhutluh tir hnu a kawngka a khar leh pah chuan ka lam a lo hawi thut a, a ban min rawn vai zauh a, Ka hawi let hmak thung.

Chutihlai tak chuan Mahmingi pawh alo thleng ve chiah a, a hnungah chuang nghalin kan tlan chhuak dun ta nghal a. A khalh chak bawk a, karlovah kan inpeng kan thleng ta mai.

"Chaw lo ei la, i riak nghal bawk anga," ka han ti a.

"Nidangah ni mai rawh se, naktuk zan chu concert en ila."

"Hetiang lam hi ka tuipui pha ve lo. Ka kal lo mai ang."

"In tiharh ve teh, hetia awm reng tur pawh a ni lo ania, nula ve lem si, a chut em mai an ti mai tur che ania," nui har har chung hian a han ti a. A ngeiawm viau rual hian a bula awm hi a nuam phian bawk si a.

"Nia, ka lo inngaihtuah dawn nia, ka pa hi ka khawngaih ve deuh alawm, ka nu boral ațang phei hi chuan a khua hi a har zual a. Amah pawh hian a tuar phah hle asin."

"Ka hrethiam lutuk alawm, mahse lo tum ve chhin phawt la aw, ka beisei dawn che ania, naktukah min hrilh leh dawn nia, Mangțha phawt." Tih pah chuan a tlan ta nghal a.

A tlan liam hnu chuan in lam chu ka pan ve ta chhat chhat a, ka hnunglamah hian min zuitu awm hian ka hria a, ka kal chak sauh va, ka bana a rawn vawn beh takah chuan ka țe tuarh a.

"Ka tihpalh, tihhlauh che ka tum miah lo asin," a tih chuan ka en vat a.

"Nang maw? Enge hetah i rawn tih a? Khawnge i bialnu kha a awm tak a?" Thikthu chhe lutuk ang maia zawhna ka zawh duah tak mai chu a!

"Ka thlah haw tawh, nang pawh bialpa i nei ani lawm ni?"

"Engvangin nge hetah ilo kal a? Min diriam turin em ni ilo kal a. Hmuhsit tlak pawh ka nih tawh loh hi. Khawngaihin i bialnu nen chuan hlim takin in awm dawn nia, min hmu turin rawn kal tawh suh, ka țhian pawh i ni tawh lo."

In lam pan chuan chak zetin ka kal hlawk hlawk a, inchhung ka thlen thleng chuan hnunglam pawh ka hawi eih tawh lo.

Ka room ka thlen chuan ka khumah ka bawk thlawp a, ka mittui hi dan rual lohvin a luang nghal zawih zawih. Malsawma ka hmuh hma kha chuan ka rilruah pawh a lang tawh lem lo, mahse tum loh deuhva ka hmuh vang nge ni, ka thinlungah hmun pakhat a lo la luah reng ani tih ka hriatchhuah lehna chuan min tina a ni.

Engvanginnge ani kha ka hmuh leh kher kher ni? Ka tana beisei awm loh tur lakah kei hi ka inham buai leh dawn ta em ni le?


<><><><><><>®<><><><><><>



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:05 pm

A TLAI ZO TA

Eps - 14


Malsawma ka hmuh ațang chuan karhnih a liam leh tawh a, ka sawi angin a awm ta anih pawh ka ring. Min hmu tur pawhin a rawn kal leh tawh lo. Ka lawm viau rualin a hmel ka hmuh loh avang chuan ka thinlung hi a rum vawng vawng thung.

Hna ka thawk nasa sauhva, ka hna ka thawh țhat em avangin bonus pawh ka dawng hial nghe nghe.

Ka pa natna a zual zel a, engtia tih tur nge pawh ka hrethiam lo. Doctor te lahin a natna ber lah an hre bawk silo.

"U, ka pa hi khalamah khan kan entir mai dawn em ni?" Tiin ka u chu ka phone ta tawp a.

"Ilo kalpui thei dawn em ni?" A tih chuan ka inngaihtuah nasa hle mai. Han kalpui loh lah chu kawngah a buai ka hlau bawk si, ka mang a va ang tak em! Kan hna lah tunlai chu kan buai zual lai ani bawk si a. Umm, engpawh nise, ka pa ania lawm, chawlh ka dil mai aniang chu.

"Boss, ka pa a dam țha vak lova, hetah doctor ten a a natna an hre thei silova, Guwahati ah inentir mai kan duh a, khawngaihin chawlh karkhat vel min pe phal em?" Tiin ka dil ta tawp a.

"Kan pi ber ka lo dil ve chhin phawt ange aw," tih pah chuan phone a la a, a be nghal mawlh mawlh a.

"A phalsak che anih chu, i vannei hle mai, pawisa a țanpui che pawh a tum hial ania," a ti a.

"Ka lawm e," tih pah chuan ka chhuak ta nghal a. Ka duh chuan direct pawhin Masangi hnenah ka dil thei reng tih ka hria, mahse a hnuaiah a staff te engemaw zat an awm ve a, hotu bik kan nei țheuh bawk a, Masangi chu kan pi ber a ni bawk nen, direct a va biak chu ka duh bik lo a ni.

Boss office ațanga ka chhuah hnu chuan Mahmingi bulah kalin a hnenah chuan, "Ka hawsan mai ang che aw, ka pa a damțha lo lutuk a, ka u hnenah, Guwahati ah kalpui ka tum a, Boss pawh ka dil vek tawh a, a remti vek tawh." ka ti a.

"Haw hman tawh ila chuan ka thlah leh tur che ania, ka la haw hman ve der silova, zanah tal lo kal ka tum dawn nia."

"Ok, ok, tehreng mai, i rawn riak nghal dawn nia, anih ka kal ani, bye." Tih pah chuan ka chhuahsan ta nghal a.

Kawnga motor ka lo chan lai tak chuan car nalh fahran mai hi ka bulah chuan alo ding chawt mai a. A driver seat ațang chuan Malsawma hi a rawn chhuak hlawl a, makti zetin ka lo melh reng ringawt.

"Lut rawh." Passenger țhutna lampang hawng chung chuan a ti a.

"Engvangin nge i carah ka chuan ringawt anga?"

"Lut ringawt mai rawh, nge ka pawm lut zawk dawn che em ni?"

A tih leh duh tak tak ka rin avang chuan tum bur chung hian ka țhu lut a, kawngkhar chu ka khar tau țhuai lehnghal. Ani lah chu pawisak neihloh hmel zet hian alo nui suk duh chauh. Ngeiawm hian!

A rawn țhutluh hnu chuan chak lutuk hian a tlanchhuak nghal a. Ka hlau lutuk chu ka maimitchhing tawp.

"Tlan muang deuh teh? Min tihhlum i tum em ni a?" Tiin ka ankhum tawn tawn a. Ani lah chuan engahmah ngai lo niawm tak leh ka țawng hre miah lo ang mai hian a ngawi hmak.

"Ka chhuk dawn," tih pah chuan kawngkhar hawnna chu ka vuan a. A la tlanlui cheu anih chuan ka zuangthla mai ang tih rilru ka pu hman hial a ni.

A tawpa tawpah chuan a ding ta hlawl mai a, ka thaw huai ringawt. Ka tha te hi ala khur dar darin ka hria.

Reilote chu ngawi rengin kan țhu a. Chutah a rawn țawngchhuak hmasa a, "I naupai kha engtinnge i tih tak a?" A zawhna avang chuan ka phu deuh zawk a. Nau ka pai tih hretu chu ka u leh Malsawma chiah hi an ni. Kei pawhin engtinnge ka lo theihnghilh theih le?

"Ka chhiat," ka ti sap a.

"Engvanga i kal tur min hrilh lo nge i nih? Ka ngaihtuah zia che i hre lo em ni?" Makti zet hian ka en hau a.

"Ka kalbo chu i tan enge a pawi em em na ka hre ve lo tlat. Ka hrilh nachhan tur che lah ka hre hek lo."

"I ti dik e, ka lo ngaihtuahna chhan tur che a awm lo reng a ni."

"Ni e, chuan kan kir leh thei tawh angem?"

"Engvanga hmanhmawh em em nge i nih a? I bialpa chuan mi nghah a peih vak nange a?" Ti el zet hian a ti a. Ka lo ner sawk thung.

"I hriat kher a ngai lo ve. Min hruai haw dawn lo anih chuan ke pawhin ka haw mai ang," tih pah chuan car kawngkhar chu hawn ka tum a, a la in lock zui.

A lam hawiin min pawt her sawk a, a awm ngheng chuan min kuah bet ta thlap a, A thaw ham ham mai. Ka tal nasat poh leh min kuah nghet ting a ni mai, A lungphu ri dut dut chu ka ngaithla ran a.

"Reilote tihian awm lawk ang,"

"Ka thaw țha thei lo ania," ka tih chuan min thlah ve ta mai a.

"Ka ngai thei lutuk che."

"Engmaw i sawi?" Ka bengchhe ri anih ringin ka han zawt nawn leh sak a.

"Tirawh, haw ang, ka thlah tawh ang che, naktuk enge i tih dawn?" A ti ta daih a.

"Ni e, haw tawh ang, ka pa in min lo ngaihtuah lutuk ang." Thudang a sawi daih chu ka haw ngei mai. A zawhna pawh chhan enah ka en tawh lo.

A motor tinungin kan tlan leh ta nghal a, kan in peng ka thlen chuan rang lutuk hian ka chhuk nghal vat, min biak leh hmain ka tlansan ta dawr dawr a.

Inchhung ka thlen chuan ka hah lutuk chu ka thaw hlawp hlawp mai.

"Khati fahrana i rawn tlan chiam a? Tunge rawn um che?" Ka pa chuan alo ti a.

"Pa, ka tihpalh, ka lo haw tlai deuh pawi ka ti lutuk. Naktuk chuan kan kal thei dawn ta anih chu. Chawlh ka dil kha min phalsak hlauhva." Ka ti zung zung a.

Ka inthlak a, rawng ka bawl nghal sawk sawk a, zanlamah ka insiam tawh mai aniang chu.

"U, chawlh chu ka hmu a, naktuk hian ka pa chu ka lo kalpui ang, hospital chu lo be sa la, a țha ang em?" Tiin ka u chu ka han be leh rih a.

"Aw, ka lo be sa dawn nia. Tunah chuan hna laklawh vawiina zawh hman ngei ngei tur ka nei a, phone ka dah phawt ang e."

Rawng ka bawl zawh meuh chuan alo tlai ta hle a, Malsawma vang vek a ni, duh aiin ka tlai phah.

"Pa, i ril a țam tawh em? Ei mai ang aw, a tlai zel hma in."

"Awle, han siam la," a tih chuan chaw ei chu siam nghal sawk sawk a. Ka pa nen chuan dawhkan kil dunin ngawi rengin kan ei dun mawlh mawlh a.

Chaw kan ei kham hnu chuan, "Pa, naktuk kal kan tum sia, mu hma la, i chau lutuk palh ang," ka tih chuan, "Awle," tiin khum lam chu a pan ta nghal a. Ka pa tlakhniam chakzia ka hmuh chuan ka khawngaih kher mai. Tihtheih lah chu ka nei der mai silova.

Keipawh insiam ka ngaih avangin roomah ka kut nghal a, ka pa thawmhnaw ken tur ka siam peih vek tawh a, ka ken tur tlem azawng ka siam veleh a, ka siam zawh hnu chuan la hma viau mahse tihtur dang a awm tawh lo bawk nen, mut mai tuma ka intintuah lai tak chuan kawngka kik ri ka hre thut a, zandangah inleng kan nei ngai silova, tu nge maw ni le?

Kawngka ka han hawn nak chuan pawnah chuan Remsangpuia hi alo ding reng mai a. "Enge i duh?" Țawngkam țha pawh a lakah hian ka chhakchhuak duh lo.

"Ka lo lut thei ang em?" A ruih hmel em em lehnghal. A rim lah chu chhe tak a ni.

"In inah i nupui kiangah haw ta che. Engtin nge helaiah ilo la kal ngam zawk a?" Ka tih khum fak.

"Ka lo kal a ni mai ani, ka nupui ila nih kha aw...!"

"I lo zaktheilo kher mai. Engtiklaimahin I nupui ka nih ka hre lo. I nupui angin min en ngai bawk hek lo. Heta țanga i kal lo anih chuan police ka ko ani mai. Nang nen hian inzawmna pakhatmah kan nei tawh lo. Neih pawh ka duh bawk lo. Chu chu nang leh kei aia hrechiang an awm hek lo." Ka tih khum piap a.

Chutia kan inbiak lai chuan Rody a rawn lut ta thut a. "Nang hian ka pasal hi i lo kherh leh a ni maw? I zaktheilo kher mai." A rawn ti phar phar a.

"I pasal hi hruai haw la, vawikhatmah lo kal tawh lo turin hrilh nghal ang che." Zâm map lo chuan ka tihkhum ve salh a.

Min huat hmel zet hian min melh rawm rawm a, Remsangpuia chu a kai chhuak nghal dawr dawr bawk. Keilah chuan engatanmah ka ti der mai silo. Duh ni ila chuan khang lai hun zawng zawngah khan ka tlanbosan tawp lovang chu mawle!

An chhuah hnu chuan kawngka ka kalh nghal hmiah a, ka mood an ti of vek lehnghal. Ka khumah ka mu nghal hmiah, reiloteah ka lo muhil daih chu niin, ka harh leh chuan ni alo chhuak iar tawh.

Ka tho vat a, bathrooma ka intihfai hnu chuan choka ah ka lut nghal a. Chawhnu lama chhuak tur kan nih avangin hmanhmawh lutuk angai hran lo. Rawng ka bawl peih vat a, ka pa pawh alo tho chhuak harh ve riau mai.

Darkhata thlawk tur kan nih avangin chaw ei kham veleh Lengpui panin kan chhuak ta nghal a. Thlawhna ticket kan tihfel hnu reiloteah kan thlawk chhuak nghal mai dawn a ni.

Ka phone a rawn rik chuan ka en vat a, Malsawma a lo ni a, "Hello, enge ni ta?"

"Khawiahnge i awm?"

"Airport ah"

"Enge i tih dawn? Khawiah nge i kal dawn, a hma ang bawk khan min hrilh miah lohva kal i tum leh ta a ni maw?"

"Hrilh che a țulna ka hre miau lo a ni,"

"Zorinsang, khatia min chhan kher kha a ngai em ni? Țha takin min hrilh thei mai lovem ni?"

"Min vin reng reng suh. I bialnu ka nih loh hi."

"Ka bialnu ni tura sawm che ka lo tum mek a..." a la nui zui.

"Huh, anih vel tak chu! Ka dah dawn, thu ho mai mai ka ngaithla hman lo." Phone ka dah hmak.

Kan thlawhna tur pawh a chhuak dawn ta, kan lut ta diah diah a, kan țhutna tura kan țhut fel hnu chuan, "Pa, i țha em?"

"Țha e, ka țha lutuk. Min ngaihtuah reng reng suh."

Kan thlawh chhuah hnu chuan ka pa pawh chu hahdam hmel zet hian a muhil siai siai a. Ka pa natna hi hrechhuakin dam vat vat se ka duh ber a ni. Ka nu a awm tawh silova, ka pa tal hi chuan min la dampui se tih hi ka duhin ka beisei a ni.


<><><><><><>®<><><><><><>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:06 pm

A TLAI ZO TA

Eps - 15



Guwahati Airport ah chuan ka u in min lo hmuak a, ka u inluah lam pan chuan kan tlan ta vang vang a.

A tuka inentir tura alo book lawk tawh avangin rilru hahdam takin kan awm a. Kan thlen chuan kan intifai sawk sawk a. Chaw kan ei nghal mai bawk.

"U, nupui neih hi ngaihsak ve tawh teh," kan chaw ei lai chuan ka han ti a. Ka u lah chuan min melh rum kher mai.

"Nupui neih hi sawi ve ziah suh. Ka duh lo ka tih tawh kha."

"Ni e, mama ka damlai hian nei ve tawh mai la, tu hmel hmuh pawh ka chak tawh alawm, i nau lah hi a tihsual tawh avangin a ngaihtuah duh tawh der mai silova, nang tal chuan ngaihsak ve deuh la."

"Ka pa, a dik khawp mai, mahse ka enkawl duh zawk che u alawm, nupui ka neih chuan ka enkawl thei tawh dawn lo che asin,"

"Nih chu a ni thova, i nau in kan khawsakna tur chu a thawkchhuak ve tawh tho alawm, i nu pawh khan tu neih a chak ngawih ngawih asin,"

Ka nu chungchang a rawn sawichhuah chuan kan ngawi țhap a. Ka nu chanchin hi a sawichhuak duh ngai lova, tun hi a vawikhat sawichhuahna a ni hial ang chu. Ka ngaih a țha lo hial zawk a ni.

"Pa, ka nu chu kan ngai vek alawm, mahse nang tal chu inenkawl țha ang che aw. I dam hi kan duh ber a ni asin."

"Mambawih, i nu hnena kal ve tawh mai hi ka duh a ni. In unau hian kalsan che u pawh ni ila, in ngaihtuahawm loh tih ka hria a ni."

"Pa, tinge chutiang lam te i sawi a, min kalsan te chuan engtinnge kan awm anga, i dam leh vat dawn alawm." Tih pah chuan ka mittui a tla sawk a, Ka insum hman lo.

A tuka inentir tura kan kal chuan Doctor chuan a han en vel a, test ngai zawng zawng a test vek bawk, result erawh tlaia a lam theih tur thu sawiin, "U, lo lam haw mai rawh aw."

Ka u chu office kal a ngaih avangin min kalsan nghal a, ka pa nen chuan ka u chenna lam pan chuan kan haw ve ta nghal bawk a.

In kan thlen chuan ka pa chu a chauh hmel hle mai a, khumah muttir nghalin reiloteah a muhil nghal mai bawk.

Room ka chhuahsan hnu chuan ka phone lo ri char char chu en in, ka pick up nghal a.

"Hello, țhiannu, khalam chanchin enge ni a?" Ka lo tihkhalh thuai thuai a.

"I phakar lutuk, min rawn phone duh miah lova, ka rawn phone veleh che khatia rawn tih vel kha a ngai hauh lo ania." Thinrim der tih hriat tak hian a rawn ti a. Keilah chuan ka lo nuih tlawn vel bawk.

Eng eng emaw thu ho tete sawiin kan nui tlawrh tlawrh a. Mahmingi bula awm leh biak tawh hi chuan rilru hah te hi a dam huai zel.

"Engtiknge in lo haw theih hun tur a chiang tawh em?" A rawn ti leh a.

"Tlaiah result kan hre phawt anga, chumi ațang chuan hriat theih awm tak chu ania."

"Lungngai reng reng suh, a dam țha leh vat mai ang, upa lam te an ni ve tawh a, i nu boral hi a tuar ve em a nih hi. Anih ka dah phawt ange," tiin phone chu a of a.

Inchhung tihfel ngai te ka tihfel sak a, ka u hi mipa e tilo hian a chefel fai khawp mai. Han tihfai em em tur a awm lo bawk a, ka pa mu chu ka va bih leh zawk a, a la muttui hmel khawp mai. 'A țha e, tui taka a muthilh theih chuan a lawmawm a ni mai.'

Ka phone ri bawk chu: "Hello, Enge ni leh ta?" Vin zet hian ka han ti a.

"I pa chu a țha zel maw? Min hrilh ve mai hi a harsa viau em ni a?" Malsawma chuan a rawn ti chhar chhar a.

"Harsa lo ve, ka pa pawh a zia deuh ve, tunah chuan a muhil a" ka ti țha ve mai.

"I țhiannu zawt lo ila chuan ka hre tawp nang, nanglah hi duh hunah țawngtheilo ang mai, a châng leh i țawng leh chiam zel bawk si...!" A rawn nui huk huk a. Ka van ngei teh kher em!

"Ka dah dawn, thu ho mai mai ka ngaithla hman lo ania," ka ti let hmak. A la rawn nui hak hak a, thinrim țeuhin phone ka dah hmak.

Kawngka kik thawmah chuan ka phu zawk a, ka va hawn nak chuan Malsawma chu kawngka bulah a lo ding reng chu niin!

"Hmela leh! I rawn kal te chuan rawn phone kher a ngai em ni?"

"Enge? Ka duh a ni mai a, ka phone ania, ka duh duhin ka ti ang chu." A van ngeiawm thiam tak em!

Chum awk tumin ka pan hnai a, alo la inveng hman zui, nui hawk hawk chung hian ka darah min vuan a, chuveleh a nui hmel a tawp nghal riai riai a, thutak hmel zet hian min melh ran a.

"Engmah sawi lovin kalbo tawh suh aw...!" A ti ringawt.

Ka lo ka ho ringawt.

"Engvangin maw? I tan enge ka nih a?"

"Mi mawl nu, i hrethiam miah lovem ni?"

"Eng chu nge ka hriatthiam tur awm a!?"

Rang lutuk hian ka hmuiah eng khaw sawi set set lo hian a rawn fawp nghal tawn tawn a. Kei lah chu a ngaihna hre lovin ka ding ngawi reng a, chhanlet nachang pawh hre lo chuan ka dawh mawl tawp.

Reilote hnuah min thlah ve ta hram a. "Tikhan i hrethiam tawh mai em?"

Ka ngawi reng chu a ngaihdan a ni lo a ni ngei ang, "Ka tihpalh, i duh loh zawnga awm ka tum miah lo asin, min ngaidam rawh."

"Oh, ngaihdam i ngaihna a awm hleinem, ka beiseiloh lutuk a nih vang zawk a ni. Mahse kha nu, i bialnu kha...?"

"Ani kha ka bialnu a ni lo, nangmah chauh hi ka duh awmchhun i la ni."

Ka beisei phak loh leh ka lo duh rilruk ve reng a lo ni bawk nen, a hnua min fawh leh na chu ka chhang țha tawh kher mai.

"Oh, tihpalh lutuk!" Tih ri ah chuan kan inthlah nghal vat. Kan hawi vat a, ka u lah chu a lo laih ve hmel em em lehnghal a, engtiklaiin nge a lo luh pawh kan hre lo. A inthlahrun hmel lutuk chuan ka nuih a ti za hial zawk.

"Enge result chu? A țha em?" Ka lo ti vat a.

"Țha lo khawp mai." Tih pah chuan sofa ah a țhuthla hnak a.

"Doctor chuan engtinnge alo tih. Enge a result chu han sawi vat teh." Ka ti leh a.

Kan pathum chuan ngawi rengin sofa ah chuan kan țhu a.

A tawpah chuan, "Mami, ka pa dinhmun hi a ngaihtuahawm khawp mai, Doctor chuan cancer rang ber chi a ni a ti a, rei pawh a daih loh tur thu a sawi." A tih chuan ka mitsulh nghal. Ka nu pawh cancer vangin ka chan tawh a, tunah ka pa pawh a ni leh a, hlim taka hun ka hman ve dawn apiang hian tinge maw harsatna hi ka chungah alo thlen ziah bik le?

Malsawma chuan min lo kuah vat a, ka mittui a tla nghal zawih zawih.

"Insum hram hram rawh, i pa'n a hre palh hlauh ange," a tih chuan rang zetin ka mittui ka hru nghal sawk sawk a. Ka nui lui thei hram ani ber.

"U, engtia tihchi nge ni dawn le? Doctorin inenkawl dan tur engtinnge a sawi?"

"Inenkawl vak ngaihna pawh a awm lo. Naktuka kal leh turin min ti a, Damdawi chawhte a la ngai a." Rilru hah hmel tak hian a ti a.

"Chuti chu heta awm reng pawhin awmzia a neilo tihna a ni maw?"

"A nih hmel ani. In lama inenkawl tawp a ni mai."

Khuanu hian engvanginnge kan chungah hetiang harsatna hi min thlen reng bik le? Eng thilsual nge maw kan tih fahran bik ni? Hlimna hi ka tan a thleng ve thei dawn lo anih chuan keipawh hi ka tan dam hian enge awmzia a neih le?

"U, ka nu kan chân tawh a, ka pa lehzel kan chân chuan engtinnge kan awm anga, nang chu hetah i awm char char zawk a, kei ve thung hi engtinnge ka awm tak ang?"

"Ni e, Mate, kan chunga khuanu rorel dan hi hriatthiam a har a nih hi."

"Enge i lungngaih vak a, ka awm alawm, i pa chu ka enkawl pui dawn che alawm, i kiangah ka awm reng ang." Malsawma țawngkam chuan min hnem kher mai.

"Ni e, hei Malsawma a awm hlauh a, a lawmawm khawp mai. Ka farnu leh ka pa hi i kuta ka dah mai loh chuan kei lah helaiah hna neiin, Ka kalsan thei bawk silo."

"Ni e, lo ngaihtuah reng reng suh, ka lo buaipui vek mai ang."

"A hahdamthlak khawp mai. Tunah chuan ka ngaih pawh a nuam huai mai."

Ka pa ka ngaihtuah chhuak thut a, kan thusawi te kha alo hriat vaih chuan a rilru a hah zual dawn si a. Ka pa chu ka va en vat a, ka hlauh ang ngeiin alo mu tawh miah lo. Khumah chuan ngawi rengin a lo țhu a, a hmelah erawh engmah a lang lo.

"Pa...!"

Ngawi rengin min lo en a.

"Pa, enge i an a?"

"Ka țha alawm, mambawih, in thusawi kha ka lo hria a, mahse min ngaihtuah suh aw. I nu hnena ka kal vat thei tur hi ka lawm zawk."

"Pa, chutiang te engatinge i sawi a? Keini hi min ngaihtuah ve lo em ni?"

"Ngaihtuahawm in nih loh avang tak hian alawm ka rilru a dam vek reng ni!"

"Pa, chutiang ringawt ani lo asin, ka nu a awm tawh bawk silova, nang lehzelin chutiang chuan sawi lul suh." Ka mittui a lo hnai nghal mai.

Ka pa nen chuan kan inkuah a, "Pa nang lehzelin min kalsan chu ka ngaingam lo a ni."

"I rilru a no em mai, Pachang takin awm teh," keimah zawk chu hnem ngai ka ni ta hial zawk mai. Ka pa chuan ka hnungzangah min beng thak thak a.

"Pa, ka tihpalh, ka rilru alo no deuh ani e, rawng ka va bawl ange," tih pah chuan ka mittui hru hul sawk sawkin ka chhuak nghal ta daih a.

"Ei ve nghal rawh aw, ka bawl kep dawn che ania," Malsawma hnenah chuan ka ti a.

"Pawi lo, tihtur dang ka nei chuang lova. Ka lo pui ang che, rawngbawl chu ka thiam ve zawng tak a nia," A ti awlsam ve mai bawk.

Rawng kan bawl dun a, ka rilru tak chuan nuam ka ti phian mai. Ka pa dinhmun hi hetiang hi nilo phei se chu...!


<><><><><><>®<><><><><><>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:06 pm

A TLAI ZO TA

Eps - 16


Tunah chuan Guwahati chhuahsanin Mizoram kan pan leh mek a, ka pa damdawi an chawh tih mai loh chu Doctor pawhin engmah a sawi tawh lo.

In kan thlen meuh chuan ka pa chu a chauh hmel ngei mai. Mahse chauh hmel viau e tilo chuan a hmel a hlim phian thung. Malsawma pawh kan ruala kal ve zelin kan in thleng min thlah thlap a, chaw ei ve mai tura ka sawm erawh chuan min hnial tlat thung.

"Inah ka haw ve phawt ange, zanlamah lo kal leh ka tum zawk dawn nia, mahse ka tiam ngam lo ania, eng eng emaw tihfel ngai ka nei a. Ka rawn hrilh leh dawn che nia." Tih pah chuan a tlan leh ta nghal mai.

"Mambawih i țhianpa chu a fel hle mai, ani kha a awm lovang tih a hlauhawm alawm le." Ka pa chuan a ti ve ngial a.

"Ni e, a fel alawm," ka ti ve mai bawk.

"Ka chau deuh hlek a, ka va mu hahchawl ange," tih pah chuan room lam pana a kal hnak hnak chu ka en zui reng a, ka khawngaih kher mai.

Keipawh kan thawmhnaw ken te phawrhin a bal chu suk nghal turin Machine ah ka dah a. Ka inbual zawha tleuh theih turin ka nuai tir nghal.

Ka inbual zawh chuan ka thawmhnaw suksa pawh chu ka tleuh nghal zung zung a, tihtur a tamin chauh pawh a sawi theih loh a ni.

Rawng ka bawl leh vat vat a, ka pa ka va en leh zeuh zeuh tih loh chu ka buai char char.

"Pa, chaw i ei peih ve angem?" A lo harh chuan ka zawt a. A peih loh thua min chhan hnu chuan keimahin ka ei a, mahnia chaw ei chu eitui a har kher mai. Kâ ah a lut hleithei lo a ni e.

Mi te anga awmpui neih ve ka châk kher mai. Keimah chauhva ka pa enkawl chu a thlaphan awm bawk si. Ka hnaa ka kal hunah engtinnge ka pa ka enkawl tak ang le? Awmpui nula fel tak ka zawn mai loh chuan sum lamin ka pa ka enkawl thei dawn chuang silo, ka rilru a van buai tak!

Ka roomah lutin ka phone ka la a, Mahmingi call tawp mai ang, ani chuan a hre leh mai ang.

"Hello, Mahming, chaw i ei tawh em? Zanin chu min lo riahpui la, zawh duh che ka nei ania."

"Ei tawh e, min zawh tur pawh ka hre mai," tih pah chuan a rawn nui har har a. Eng chu a hria ni maw?

"Eng chu maw? A zawh pawh ka la zawt hauh silo che a!" Ka ti let hau.

"Aw..aw...ka rawn kal dawn nia," la nui har har chung hian a ti leh puat a. He nu tak hi chu, țha taka biak theih reng reng loh mai. Phone ka dah hmak a, A rawn kal tho ang.

Eng chu nge maw a ngaihtuah ni? 'Malsawma pawh chu ka lo phone ang che a ti si a' tia ka lo ngaihtuah mek lai chuan a rawn call ta a, a rawn kal theih dawn loh thu sawiin thupha a rawn chawi luam, Ka rin ang chiah. Mahse pawi chuang lo, Mahmingi alo riak dawn tho alawm le.

Reivaklo hnuah chuan kawngka kik ri ka hre ta a, Mahmingi a ni tawh ngei ang, ka va hawn chuan alo ni reng bawk a. Ani lah chu a rawn ri chûl nghal mai.

"Nanglah hi i ri chul zel mai, ka pa a mu ania,"

"Oh, ka tihpalh, ka lo theihnghilh leh țhin alawm mawle. Sim hi a har ve em anih hi, min hrethiam teh," tih pah chuan a nui ar ar a. A nun hi awh chang ka ngah țhin. Mahse a thawveng leh lutuk hi nin thut chang pawh ka nei tho bawk.

"Tikhan i lo țhu lawk dawn nge ka pa i lo en ve dawn?"

"Aw, ka lo kal ve ange."

Ka pa chu a lo la mutui hle mai a, tihharh hlau tak chuan kan chhuak leh țhem țhem a.

"Tirawh, ka roomah lut nghal mai ang, zawh tur che ka nei ka tih kha." Kan inzui lut nghal a.

"Enge min zawh tur chu ni a, riah meuh a ngaih phahna chu?"

"Chutiang em ema pawimawh pawh a ni chuang lo. Ka sawm ve hrim hrim che. Mahnia awm chu a thlaphan awm deuh em alawm. Chulovah hna kal ka ngaih hunah ka pa ka enkawl hman dawn silova, awmpui fel tak min lo zawnpui teh."

"Ka va hre mai lo e aw...hmm..naktukah ka lo zawnpui dawn che nia. A reng rengah i va lo inzep thei ve a?"

"Eng chu maw?" Ka ti let ha a.

"A hre lo der vel. Guwahati ah pawh a rawn zui che kha." Ka hrethiam chiah.

"Malsawma kha maw? Ani te chu school kan kal lai ațang tawha ka țhian alawm a nih."

"Țhian chauh ani lo deuh a niang, i kalna i hrilh lo em ni? Min zawt dilchhut lutuk a, ka ngaih a țha lo hial zawk mawle. A mangan hmel lutuk a, ka hrilh tawp mai anih kha."

"A lo kal alawm, a țangkai khawp mai." Ka ti mai a.

"Nah, chu ringawt chu! Ka awih lo mange."

"Enge i awih loh?" Ka ti ve tlat.

"Nia, ka awih lo ani tawp mai."

"Naktuk chuan lo zawng tak tak teh aw, ka mamawh teh mai ania," thudang ka sawi san ta daih a.

"Aw aw, nangin i tih te chuan ka hnial ngam nang mawle!"

"Vel che hian a! Mu ang."

A tuk zing nichhuak eng mawi tak maiin ka hmai a rawn chhun chuan ka harh chauhva, ka lo mutui hle aniang, harh miah lova kan muthilh chu le! Mahmingi pawh a lo la muhil barh barh mai.

Ka pa kha! Ka hrechhuak zawk a, ka tho vat a, inphihfai pawh ka ngaihsak hman lo, room ațang chuan ka tlanchhuak vat a, ka va en chu ka thaw huai mai. Engtik emaw lai ațang khan ka pa hian ka hriatloh laiin min kalsan mai ang tih hlauhna ka nei tawh a, Ka veng ru deuh reng mai a ni.

"Pa, i lo harh tawh ani maw? I mutui em? Damdawi ei phawt ang che aw."

"Ka mutui khawp mai, nizan ka mangah i nu ka lo hmu a, ka ngai khawp mai," lunglen hmel zeta a tih chuan ka ngaih a țha lo khawp mai a. Mahse engmah ka sawi lem lo.

"Pa, kan intifai lawk anga, thingpui kan in dawn nia aw."

"Awle." Lunglen hmel zet hian tukverh lam a hawi vang vang a, ka lam pawh a rawn ngaihsak tawh lo. Mittui tling pam chung hian ka chhuahsan ta ringawt.

Ka inphihfai sawk sawk a, thingpui ka lum mek lai chuan Mahmingi pawh alo tho ve ta a.

"Awi leh, i tho tawh a ni maw? Tinge min kaihthawh lohva, ka van mutui em em vele, tiang reng renga muttui hi ka la nei ngai miah lo," a rawn ti nghal bawrh bawrh a.

"Thingpui i duh ve em?"

"Umm, duh ve mai ang, kha, tinge i hmel a dik miah lo a nia, i pa engtinnge a awm a?"

"Ka ngaih a țha thei lo, nizan amangah ka nu a hmuh thu a sawi a, lunglen hmel tawkin tukverh lam hawi reng a, min kalsan a tum hnai a nih ka ring tlat."

"Chuti anih chuan en ngun deuh a ngai dawn anih chu. Vawiin chu ka awmpui nileng mai dawn che emaw ni le? Chawlh ka dil ve mai ang."

"I thei dawn em ni? Ka lawm viau ang, ka rilru a nuam thei thlawt lo."

"Kha, thingpui hi in phawt rawh, ka pa ka va pe ve ange,"

Thingpui ka pa pe tura ka va luh chuan ka chhuahsan lai ang chiah khan a lo la awm a, van lam a lo la thlir char char mai.

"Pa, thingpui ka lo keng asin, in phawt la," Ka țawng ri ah chuan a lo hawi ta hram a.

"Lo dah la, hetah hian lo țhu ve teh." A mutna bula țhutthlengah chuan ka țhu nghal a.

"Mambawih, ka kalsan hunah che chuan lo lungngai reng reng suh ang che aw, i nu ka hmu vat tur hi ka lawm asin."

"Pa, engemaw i sawi le? Khawngaihin chutiang lam chu sawi tawh suh aw, tunah khan nâ i nei em?"

"Nâ ka nei tawh miah lo asin, a mak lutuk, ka dam vek tawh. I nu ka hmuh dawn tawh vang ni ngei ang." A tih leh meuh chuan mittui tla chungin ka tlanchhuak tawp ringawt.

Mahmingi chuan ka awmdanah a lo hrethiam nghal a ni ngei ang, phone in a pa te a be nghal vat a, kan hnathawhna lam a be bawk a.

"Chawlh ka dil chu min phalsak e, vawiin chu inah ka awmpui thei che. Ka pa te pawh ka be tawh a, anni pawh an rawn kal ang." A tih chuan ka thla a muang huai huai mai.

"Ka van lawm tak em! Awm lo ta la, engtinnge ka awm ang le? Aw, taka , ka u kan hrilh ve ange," tih pah chuan ka phone chu la in, ka u ka hrilh nghal a, a ni pawhin chawlh a dil theih thu a rawn sawi chuan ka lawm kher mai.

"U, ka thlaphang riau a nia aw, rawn haw vat vat teh."

"Lo intipachang hram hram teh, vawiin tlai flight ah ka rawn chhuak dawn." A tih chuan ka lawm lutuk chu ka zuang lo chauh. Mahni chauha hmachhawn chu ka zuam hlawl lo ani.

"Rawng ka lo bawl anga, nangin i pa lo awmpui ta che, ka pa te pawh an lo thleng țep tawh ang." Mahmingin a tih chuan hnial lovin ka pa bulah chuan ka kal nghal a. Ka pa chu a mutnaah chuan a lo mu fel diam tawh a. A hmelah chuan hahdam hmel ka hmu nangin a hmel a dik tlat lo.

"Mahming, lo kal vat teh." Ka ko tuar a, a rawn tlan nghal vat.

"Enge ni ta?" Ka pa hmel a hmuh chuan a mar a han khawih a, a lo awm tawh miah lo chu niin; ka țap nghal hawm hawm a.

"Pa, heti mai hian min kalsan dawn tih hria ila chuan i bulah ka awm reng tur ania, ka lo hre lo a ni." Ka mittui ka dang thei lo. Mahmingin phone a biak ngai zawng zawng a be vek a, engmah ka rilruah a lang tawh lo.

Mahmingi pa te pawh an rawn thleng ve nghal a, "A va rang ve mawle," an rawn ti lut a. A hria apiang an rawn tlan khawm nghal sap sap hlawm a. In chhung an singsa nghal sung sung bawk.

"Malsawma ka hrilh dawn em?" Ka beng bulah a rawn ti sa sa a.

"Ka hre lo, i duh duh kha hrilh mai teh, awm i tih ang ang kha a ni mai, engmah ka ngaihtuah thei lo."

Phone la in a chhuahpui nghal a, reiloteah a rawn lut leh nghal mai. Engmah sawi lo chuan ka bulah a rawn țhu veleh nghal mai bawk a. Zinglama boral anih avangin lumen a theih lohva, mahse YMA te min hriatthiamna avangin min lumen sak dawn a ni. Ka u pawh ka pa hmel a rawn hmu ve hman tur chu ka lawm kher mai.

Vawihnih lai mai chhiat kan tawk ta chu a ni a, ka nu boral ai mah pawh khan mi an tam zawk emaw tih mai tur a ni.

Ka pa boral chu Remsangpuia pawh a rawn lang ve leh ta hlawl mai. A hmel ka hmuh chuan huatna pawh ka nei tawh lo, ka pa vanga lo kal a nih ve avangin a rawn la ngaipawimawh ve chu a lawmawm hranpa ve reng reng. Pasal ka nei tawh a ni tih hi Mahmingi'n a hre miah lova, hriattir kher tumna pawh ka nei lo. Pasalah ka lo nei tawh a ni tih phei chu hre lo se ka duh mah zawk.

Malsawma pawh a rawn lang ve a, makpa a ni ta emaw tih mai tur hian tihtur awm apiang chu a lo ti ve zung zung mai a. Ka u hruaina tur pawh motor alo ngaihtuah fel diam mai.

"Remsangpuia hi i hmelhriat em?" Ka beng bula Mahmingin a rawn tih chuan ka phu zawk a.

Ka lu ka bu nghat ringawt.

"A nupui nen an ințhen a, tuna a nupui hian a fa a pai avangin a luahlan an ti asin, mahse tunah hian an ințhen leh ani awm e," a tih chuan makti zetin Mahmingi chu ka en a.

Mahmingi thusawi chu mak ka ti kher mai. An inngeih viau emaw ka lo ti a, engvang nge maw ni le? Á, ka lo ngaihtuah tur a awm love.

Ka u lo thleng chu ka lo kuah vat a, ka lo țahkhum nghal tawng mai. Ka u nen hian inkawm ngeih tak ni mahila, kan awmna a inhlat em avangin duh angin kan inpawh thei lo zawk a ni. A hmelah chuan a inthiamlo hle tih ka hmu thei.

"Mate, ka tihpalh a ni. Ka nu leh pa pawh ngaihsak hman lo khawpin ka hna ka lo ngaipawimawh zawk a, ka thiamloh vek a ni." A mittui a tla ve zawih zawih.

Ka pa hmel a hmuh phei chuan a rilru na lutuk chu a indawm kun ngar mai a, Ka khawngaih kher mai. Ka u kuah pah chuan ka țap ngawih ngawih a, inhnem tur chuang kan awm lo.

Ka pa kan vuiliam hnu ah pawh inleng neuh neuh kan la nei ve zel a, a khawharthlak rih loh khawp mai. Mahse inlengten min ținsan hun tur hi ka huphurh ngawih ngawih.

Ka u pawh a la chhukthla lova, chawlh a dil belh hial a, Mahmingi pawhin min la awmpui ve zel bawk. Ka u nen an inhmuh phata an inmelh dan ațangin an induh tawn ani tih ka hre nghal mai, an pahnih chuan inbe chak si, ngam chiah silo hian an lai dun em em a, ka nuih an ti za dun kher mai.

"U, Mahmingi hi i duhzawng a ni tiraw?" Phawk hra hian min melh a.

"Mate, eng thu nge maw i sawi le?"

A hre lo der vel nia, hepa tak hi chu!


<><><><><><>®<><><><><><>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:06 pm

A TLAI ZO TA

Eps - 17



"Hey! Mut duh nu, tho tawh teh."

Ka meng siar siar a, ka pa boral ațanga ka muttui ber zan ala ni hial ang chu. Sana kan en chu, dar riat a lo ri țep tawh.

"Awi leh, thawh ka hai a ni maw?" Ni chhuak uar chu ka en a, ka room parda lah chu an lo hlim vek tawh lehnghal. Tho vatin ka intifai sawk sawk a, choka ka pan nghal a, Mahmingi chuan rawng alo bawl zo diam tawh a, ka pa boral ațang hian min la awmpui ta char char a, ka u lah a hna avangin a chhukthla leh tawh bawk si, mahni chauhva ka awm tur chu min ngaihtuah ve si a, ka u nen an lo inngaizawng ta bawk nen, ka fiam deuh reng mai a ni.

"Hi! Mo thar rawngbawl chu a tui viau ka ring a ni." Ka han ti a.

"Mo thar ka la ni lo ve aw, ka nih hunah chuan i chaklo viau ang mawle," nui har har chung hian a ti a.

"Tehngawt a, ka mo atan ka duh ringawt dawn che ami?" Min chum awk a.

"Min duh reng kha aw...Oh, taka, khalaiah khan tuemaw ni'n thilpek niawm tak a rawn dah a, a kal leh nghal daih a. I ta tur a ni awm e."

"Eng thil nge ni a?"

"Hre bik nang le! En mai rawh."

Ka en chuan Remsangpuia lo thawn a ni tih ka hre mai. Hepa hi tinge a la beidawn duh miah loh le? Fapa pawh a nei tawh hial si a.

"Tu rawn thawn nge a?" Tih pah chuan Mahmingi chuan lehkha chu min chhuhsak nghal a, makti zetin min en a.

"Remsangpuia maw? Ani nen hian eng inkungkaihna nge in lo neih tawh a?"

"Ka pasal hlui a nia lawm,"

"Maw...!? I ti tak tak em?"

"Aw,"

"Khai leh! A van mak ve le. I bula a chanchin ka sawi lai te khan i lo hre vek tawh si a." Min dem hmel lek leka min en pah chuan a ti a.

"Sawi nuam ka ti lo alawm, tuman ka chanchin hi hre lo se ka duh a ni. Theihnghilh vek ka duh a, nupui a nei tawh chung pawha min la rawn tibuai chhen pawh hi ka ning tawh teh asin."

"Min han hrilh vek teh," a ti a. Ka unaunu tur hial a ka ngaih a nih tawh avangin engmah zep awm lovin ka hrilh ta vek a.

"A van ngam zawk ve a. Anih Malsawman eng angin nge a ngaih?"

"Ani chu tinge i rawn sawi chhuah kher a, a bialnu bulah a awm leh tawh ang chu!"

Mahmingi chu a țhu hnawk a, min kuah pahin, "I van lo tuar nasa em em ve mawle, tun ațang chuan ka unaunu i ni tawh alawm, ka pui zel tawh ang che."

"Ka lawm e, tunah chuan ka u nen hian ka neihchhun in ni tawh a ni. Oh, ka ril a țam tawh khawp mai, hna a kal kan ngaih kha, chaw ei tawh ang."

Chaw ei kham chuan kan insiam a, infiam pah reng chung chuan kan chhuak dun ta a. Mahmingi scooty bawk chuan kan inphur chhuak leh ta a.

Hna kan thawk leh mawp mawp a, chhun pawh chawl hman lo khawpin ka buai nghal char char.

Dar hnih rik hma lawkin Mahmingin chhun chawl turin min lo sawm a, kan thawhna bul lawkah Restaurant a awm a, chumi pan chuan kan kal dun ta a. Dawhkan pakhat kan kil dun a, eitur kan lam hnu chuan titi paha kan ei mawlh mawlh lai chuan, "Ka lo zawm ve che u in phal em?" Rawn titu chu kan en vat a.

"E he! Sammy, nang elo? Engtikah nge i lo haw a?" Mahmingin a tih chul chuan ka lo en dun ringawt.

"Nia, keimah ngei ka nih hi. I țhiannu chu min hmelhriattir dawn nange a?"

"Oh, tihpalh lutuk. Sammy, hei hi ka țhiannu Zorinsangi a nia, chuan Zorin, hei hi Samuela ania, 'Sammy' tiin kan ko țhin a, i duh leh Sammy tih chuan i ko ve mai dawn nia."

"A nih tak chu, i hmelțha kher mai," tih pah chuan țhutna awlah chuan a țhu ve nghal a.

"Enge i ei ve dawn? Kan ei mawlh mawlh tawh asin." Mahmingi bawk chuan a ti leh a. Kei chuan ka la be lo, vawikhat hmelhmuhnaah mi ka be thiam mang tlat țhin lo hian țhian pawh min neih tir theih loh phah fo a ni.

Ka va melh leh zauh țhin a, ani lah chuan min lo en reng chu niin; kan mit a intawng leh zauh țhin a, rang tawkin ka mit ka lasawn leh vat. Ani lah chu a nui suk ringawt.

"Khawiah nge i thawh zel tak a?" Mahmingi bawk chuan a zawt leh a.

"Helai lawka Hotelah hian vawiin ațangin ka rawn thawk țan alawm, hmelhriat lah ka nei silova, ka hmu che u chu ka lawm khawp mai," tih pah chuan min rawn melh zauh va.

"Kan thawhnaah hian maw? A van tihchi dawn ve a, hmelhriat dang han awm veleh chu a nuam phan dawn anih chu," Mahmingi chu a nui har har a.

"Deuh vel a che. Nula pahnih bula awm chu ka luck ve hmel deuh alawm le! Tlangval dang pawi te kan sawi em lawng chu maw!" Min rawn en deuh kher lehnghal.

"Chutiang an awm hauh lo mai, nula dang pawi kan sawi loh hram ka beisei," ka ti ve ngat.

"Wow! Kan inang anih chu! Mahming, min zawnpui tur te hi i hre lo maw? Entirnan, i țhiannu ang te hi!" Mit min siai pah zauh a.

"Kan kal dawn ami?" Ka ti ta daih a.

"Aw, kan kal rual ang chu mawle! Chutia in kalsan bik te chu; hawihhawm loh thlak deuh lo maw?" A la nui zui.

"I duh leh lo kal ve mai rawh," tih pah chuan ka ding nghal a. Ka din veleh chuan an pahnihin an rawn ding ve vat, kan inzui chhuak ta țham țham a.

Restaurant ațanga kan chhuah hnu chuan mahni hna țheuh thawk leh turin kan ințhen ta hlawm a. Sammy chungchang chu ka ngaihtuah chhunzawm a, Nula lamah pawh a tlatlum hle ang tih ka ring a ni.

Sammy lam chu dahțha in, hna ka thawk ta mawlh mawlh a, vawiina ka zawh hman loh chuan naktukah a tam leh sawt dawn si a, chuvangin thildangin ka rilru a luah hman lo a ni.

Tlai ban a lo hun chuan ka zo thei hram a, ka inrem fel nghal zel loh chuan keima hna leh tur tho a ni si a, ka tihfel vek hnu chuan ka hnung kham lutuk chu ka zi ar ar a.

"Haw i hman tawh em ni?" Mahmingin a rawn tih chuan, "Aw, kal ila," ka ti nghal zat.

Chhuah pah chuan, "Sammy khan a duh hmel tlat che in ka hria, be țha deuh la," Mahmingi chuan a rawn ti sap a.

"Awihawm loh a nih chu, keini ang te zawng engatanmah min ti lovang e, kan phu lo em mai."

"Ka ti tak tak, vawiina a melh dan che kha ka hmu ve reng alawm, bialpa pawh i neih theih loh hi."

"Bialpa nei rual pawh ka nih tawh loh hi, ti teh, kal vat teh ang, tuilum sa ver vawra inbual ka chak tawh teh ania, vawiin ka hna chu a hautak teh ania aw, ka hnung kham zia chu a!" Ka tihsan daih.

"Ok, boss! Scooty ka lak chhungin tikhan lo ding rawh."

Chutia Mahmingi ka lo nghah lai chuan, "Haw i tum ami? Tu nen nge in haw dawn?" Rawn titu aw ah chuan ka hawi vat a. Sammy chuan a car nalh fahran mai khalh chung chuan min lo en reng mai alo ni a.

"Aw, Mahmingi nen haw kan lo tum chiah a, scooty a la ka lo nghak lawk a nih hi." Ka ti ve mai a.

"Ka lo thlah zawk dawn che em ni?"

"A ngai lo, ka lawm thove, tunlai chu kan inah min awmpui rih a, kan haw dun thei nghal zel bawk a," ka tih lai tak chuan Mahmingi pawh alo thleng ve nghal mai bawk.

"Anih kan kalsan phawt mai ang che, mangțha le!" Ti leh in kan tlanchhuak ta nghal a.

"Kha, a hmuh tawh che chuan be lo chein a chhuah theih miah loh kha." Nui hawk hawk chunga a tih chuan a hnungah ka chum awk a.

"Sawi tawh teh suh, kei aia țha a hmu hnem dawn em mai a!"

"I bialpa neih ve te lah hi an laktlak loh thei em mai. A dang neih hmiah chi," a ti hmak hmak a, ka lo nuih ringawt.

"Nui suh, ka thin an tirim teh ania, tikhan an duh hunah an rawn tibuai leh che anga, zah hre lo lutuk hlawm mai. Malsawma reng reng pawh hi ka haw ngawt mai." Scooty khalh chung chuan a ang hmarh hmarh a.

"Duhtawk teh, kan accident phah ange aw...!" Ka han ti chiah mai chu a ngawi chiang teh e. Ka la nuih zui tlawrh tlawrh lehnghal.

"Hmeli, in kan thlen hunah i chaklo viau ang aw..!" A han ti chu kan nui dun ta nghek nghek a. Kawnga motor lo tlan ve te chuan maktih hmel taka min thlir zui chu ka hmu ru reng na in, ka ngaipawimawh peih vel lo. Enge, kan hlim vangin kan nuih a za a ni ve mai a!

Kan inkawt kan thlen thleng chuan kan la nui dun char char mai. He nu bula awm hi chuan hah te hi a dam sawng sawng thei alawm le!

Kan in kawta mipa ding ka hmuh chuan ka nuilai chu ka tawp chiang kher mai. Enge a duh a, ala rawn tih cheu dawn ni?

"Enge i duh a, i rawn tih dawn?" Mahmingi chuan a ti hmak a.

"Nang ni lovin, i țhiannu hi ania ka biak duh."

"I zaktheilo kher mai, i duh hunah i rawn bia anga, i duh hunah hmeichhe dang i kawp leh anga maw? Chutiang a tihkual mai mai theiah i ngai em ni a?" Mahmingi chuan a ti let leh khar khar a. Min thinrimpui viau pawh hi a awm hle a ni. A sawi pawh a dik chiah.

"Ni e, Mahmingi sawi kha a dik chiah, nang nen hian sawi dun tur kan nei lova, kan nei ngai hek lovang. Chuvangin heta i lo kal hi i tisual ani, haw leh mai rawh." Ka ti ve hmak a.

"Sawi dun tur kan nei lova i ngai anih chuan i hresual a nih dawn chu. Sawi dun tur tam tak kan nei zawk niin ka hria asin."

"Malsawm, khawngaihin min kalsan rawh. Ka ring em em che a, ka duh ve hman hial tawh che a. Mahse nang hian engkim i tikhawlo vek a ni. Chuvangin ka rilru hi rawn tihnat belh tawh suh. Bum nih hrehawmzia ila hre ve lo a nih ka ring. Kei chuan ka duhtawk e. Ka ring leh thei tawh bawk lovang che." Ti hmak chungin inchhungah ka luhsan ta daih a.

Ka roomah tlanlut nghalin ka khumah ka bawk thlawp a, ka mittui a tla nghal zawih zawih. Malsawma ka lo hmangaih hmanzia ka hriatchhuah lehna chuan min tina takzet a ni.

Mipa hi ka damchhung hian ka ring leh thei tawh lo hial ang chu! Bum a han awm reng bik mai chu ka zak lutuk hi ka sa vekin ka hria. A hmasain Remsangpuia bumin ka awm phawt a, tunah Malsawma a ni leh a. Ka dinhmun chhiat vang hian bum ka awl pawh a ni ange.

Tun ațang chuan ka hma hun chiah ka ngaihtuah anga, mipa reng reng ngaihzawng lam hawiin ka inhnaihtir tawh lovang. Ka ngaihdan chuan mipa zawng zawng an inang vek.

Mahmingi ka bula a lo kal lai pawh ka lo hre hauh lova, "I rilru tina duh reng reng suh. I hmangaih tih ka hria alawm, tihdan ka hria ania, rawng bawl phawt ila ka hrilh ang che." A tih chuan ka tho a, ka inphihfai thuai thuai a, Mahmingi chu ka zui chhuak ve nghal mai a.

Kan pahnih chuan rawng kan bawl dun a, min tihhlim a tum bawk a, a hlawhtling kher mai. Ka nui leh bawk bawk thei tawh.

"Sammy hi kawp mai rawh, Malsawma thik tur hrim hrim pawhin, a ngeiawm thiam bawk a."

"Tehngawt a, Chutiang ka duh teuh lo mai. Midang rilru tihnat ka duh hleinem, kan bum chuan anmahni ang kan ni ve dawn asin."

"Anih, kawp tak tak la, a la hrilh thuai che ka beisei. A melh danah che khan a duh che tih ka hai lo ania aw, mi â pawhin an hai lovang."

"I uar mah mah. Chutiang em em a awihawm loh lutuk ringawt."

"Ila hre mai dawn alawm, lo ngai reng mah rawh. A rei tawh miah lovang."


<><><><><><>®<><><><><><>

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2018, 8:07 pm

A TLAI ZO TA

Eps - 18



Kan inkawta Malsawma a rawn lan ațang chuan nithum a liam leh tawh a, khami hnu ațang khan ka hmu leh zeuh zeuh tih loh chu ka hmu khatin a chanchin pawh ka ngaihven lo khawp mai.

Mahmingi leh ka u pawh an la inkawp tluang ve zel a. Ka u lah zeilo chi lo ni nen, hahthlak veleh chhawng khawp mai.

"U, hetia awm reng hi in tum em ni a? Mahmingi hi nupuiah nei vat la, tihian kan pahnihin kan awm dun mai dawn alawm, innei mang silova, hetia ka țhiannu anih vanga kan ina awm reng chu a tan pawh a a mawi loh mai bakah a pa te mitmei pawh ven a ngai ve bawk asin," tiin ka hrilhfiah ve ngial a, hrethiam chhunzawm ve em ang chu.

"Ni e, i ti dik khawp mai. Ka lo ngaihtuah ve a, tunah hian chawlh ka dil mek a, ka rawn haw veleh palai ka tir nghal ange, mahse lo hrilh miah suh ang che. Ka lo haw hunah kan hrilh chauh dawn nia." A ti ve ta. Ka hlim ngang mai.

"I tițha lutuk. U, lo haw thuai thuai la, surprise ka chak teh ania aw." Phone dah pahin ka hlim lutuk chu ka nui reng mai.


"Enge maw i hriat a, i nuih reng le? Thil engemaw a awm em ni?" Hna a kan kal pah chuan Mahmingi chuan min zawt ta reng bawk.

"A, engmah a ni lo, ka hlim ve satliah a nih hi." Ka insum deuh loh chuan min zawt chhuak palh ange, ka hrilh chak nasa mai si a.

"Hello! Nula te u, in va hma ve a," Mahmingi nen chuan hotel chhung kan lut dawn chiah tih chuan Sammy chuan min rawn um pha a.

"Kha, nang pawh i thleng hma ve tho alawm, kan thleng rual reng anih hi," Mahmingin a tih chuan ka lo nui sak. Ngeiawm chiangkuang thiam ania.

"A reng thu ah vawiin chu i va nalh ve a, nidang nen inang lo tlat. Engemaw nalh deuh chhan te i nei a ni lo maw?" Mahmingi bawk chuan a ti leh a, min rawn signal zauh lehnghal. He nu tak hi chu ka khawng dawn emaw ni!

"Enge maw i hriat le?" Sammy tih ngaihna hre lo chu kan nuih ta chiam a.

"In van chak dawn lo e aw, vawiin chhun chu ka treat ang che u ka ti ania, mahse midang ka treat mai ang, ngeiawm thiam lutuk mai." A kal nghal nul nul. Mahmingi lah chuan ala nuih zui tlawrh tlawrh a.

"A lai hmel kha i lo hmu em? A zak ve ngei nia mawle, nuihzatthlak zawk hian."

"I ti lutuk deuh lo maw?" Ka lo ti vat.

"Teuh nang, kan infiam nasa thei lutuk alawm, ala zakzum ve reng a nih dawn kha." A ti awlsam leh mai. Thawveng thei bawk sia.

"Hna țan tawh ang, hna a tam leh dawn si a, kan zo hman lo palh ange." mahni hna ve ve thawk turin kan ințhen nghal.

Chawhma chhung chu chawl miah lovin ka thawk leh ngar ngar a. Dar engzatnge ri tawh tih lam pawh ka lo ngaihtuah miah lo. Masangi he hotel neitu kha Delhi ah a awm daih avangin ka hmu tawh ngai lova, a aiawh turin a cousin a rawn dah tih chu ka hria a, ka la hmu hauh lo. Ka ngai khawp mai, amah vanga he hna hi hmu ka ni si a, min duhsakin kawng engkima min puitu a ni ziah lehnghal. A tana theihtawp chhuah hi ka tihtur ah ka ngai ve hmiah tawh.

Chhun chawlh hmang tura Mahmingi nen kan inzui chhuah pah chuan, "Țhiannu, naktuk zanah hian Hotela thawk zawng zawng tan party a awm dawn a, Delhi ațangin kan pi ber pawh a rawn kal dawn ani awm e, helam a enkawl hman vak loh avangin a aiawhtu tur a cousin a rawn dah a, tunge niang le, i hre tawh em?"

"Hre nang, party maw? Kan kal ve ngei a ngai awm si a, ka van peih lo tak!" Ka ti niah niah a.

"Kei chu ka chak tawh teh ania, hetiang party a ka kal lohna rei tawh zia hi, kan kal ngei ang chu mawle, kan thawhna a ni bawk si a."

"Nangni pahnih kha min lo nghak ve teh u."

"Mipa ve si, hmeichhia zui duam duam mai," ka lo ti hlak a.

"Engmaw i sawi kha, han sawi țha leh teh." A lo hre pha reng chu niin;

"Engmah ka sawi lo." Ka inthiam lo leh deuh.

"I sawi ngei kha le! Hmeichhia ka zui duam duam ngai lo aw. Nangni pahnih chauh hi ka hmeichhe zui awmchhun in ni; Wow, min ngaithei vak lo tih ka lo hre lova, ka tihpalh a ni e." Kal mai a tum chu ka inthiam lo lutuk chuan, "Ka tihpalh, kan bula awm hi i ning ang tih ka hlauh vang zawk ania," ka ti ta ringawt.

"Anih chuan ka ngaidam mai ang che. Hmeichhe zui duam duamah kha chuan min puh tawh suh. Hmeichhe ho hian min zui duam duam zawk ania."

"Kei chu ka tel veloh ka beisei." Ka lo ti nghat.

"I telna turin ka bei anga a ni mai alawm, ka duhtawh nei tur chuan ka bei țang țang zel ania, ka beidawng ve mai mai ngai lo bawk." Ka ngawi ta kar mai.

"Oh! Kal ang u, hna kan ngah si a, naktuk zan party na tur buaipui a ngai leh dawn bawk nen, tihtur tam lutuk a nia," Mahmingin a lo tih chuan ka thaw huai mai. Restaurant lam pan chuan kan inzui ta hlawm a.

Kan luh chuan an lo tam ang reng khawp mai. Mahse dawhkan pakhat ruak alo la awm hlauh. Vanneihthlak hian!

Mahmingi nen kan țhu dun a, Sammy amahin a țhu thung. Eitur kan lam a, kan nghah lai chuan kan bul lawkah hian thawm ri hak kan hriat chuan ka hawi vat a. Malsawma nen kan mit a intawng siah mai. Hmeichhe pakhat hmelțha zet leh piannalh fahran mai hi kan chawlhnaah chuan an rawn lut ve hi alo ni a. Chunu hmelțha zet chu hmuh tawhna ka nei tlatin ka hria a, ka ngaihtuah ngial pawhin ka hrechhuak mai thei lo.

Ka hawi let vat a, ka sen awp awpin ka hria. Ka țhian te pahnihin ka hmel an hmu lo hlauh chu ka lawm kher mai.

"Chu pa mai mai chuh," Mahmingi chuan a ti sap a. Sammy chuan a hre pha nge phalo ka hre lo.

Engmh enghelh leh vei nei lo ang hmiah hian kan eitur chah alo thlen chuan ka ei nghal mawlh mawlh a. Ka thinlung chhungril erawh chu a so bulh bulhin ka hria. Mahse ka rilru puthmang hi tuman an hre tur a ni lo.

"A hmelțha kher mai. Mizo a ni lo emaw nile?" Zawh bik pawh neilo hian Mahmingi chuan a ti sap a.

"Ni e, a hmelțha khawp mai, mahse ka mitah chuan Zorini hi a țha daih zawk." Ka melh vat a, ka thil ei ka hak lo chauh a ni.

"Engmaw i sawi kha?" Ka ti bah nak a.

"Ani ai sawn ka mitah chuan i țha daih zawk." Mitmeng fiah kak hian min melh ran a, a thutak kher mai lehnghal.

"I fiamthu a ni lo maw?"

"Fiamthu sawi hmel ka pu em ni?"

"Ka awm ve lai em em hi chuan insum teh u," Mahmingin a rawn tih chuan ka thaw huai mai.

"Mahming, i țhiannu hi lo hrilh ve teh aw,"

"Nangman hrilh la ti nia."

"Ka hrilh reng alawm, a hrethiam duh tlat lo a nih hi."


"Min lo hrethiam lawk thei em?" Kan hawi vat hlawm. Malsawma chuan min lo en run a.

"Enge i duh a? Thil kan la ei laklawh hi." Ka țhiani tak hi chu a va han țangkai țhin tak em!

"Ka be lawk duh che. Min lo zui dawn nge hetah hian kan sawi i duh zawk?" Min en ngar chung hian a ti a.

"Tunge i nih a? Khatia i rawn tih ngawt a?" Sammy chuan alo ti ve vat.

"Tunge ka nih i tan hriat a țangkai lo. Lo inrawlh ve turin tunge i nih zawk a?" A ti khur khur a.

"I duhtawk thei angem? Nang nen hian inbiak ka duh lo ka tih tawh kha, khawngaihin min kalsan rawh." Malsawma lam hawi chuan ka ti a. Restaurant chhunga awm te lah chuan min thlir țhap lehnghal a, ka zak lutuk chu ka tlanchhuak nghal dawr dawr mai.


Malsawma Pov*

Ka awmdan pawh hi ka hrethiam tawh lo. Ka company hum nan ka pa in, nupui nei turin min ti a, mahse ka hmangaih ber chu Zorini a ni si. Min hua se ka duh avangin nula dang a hmuh laiin ka kawp a, mahse ka thlen thui pui ngai lo. Ka thei thlawt lo a ni.

An inkawta ka lo nghah pawhin min biak chu sawiloh, phatsantuah min ngaiin, ka dinhmun hi a hrethiam lo a ni. Hrilhfiahna hun min pek a tum lo kher mai. Hmeichhe luhlul ve tak leh lu zo veh vawh a nihna a lang chiang khawp mai.

Restaurant chhunga Milly nena kan luh khan ka hmuh ka beisei hauh lo. Milly kha ka pa in ka nupui tura a hual a ni a, Delhi ah awm in a pa hian company lian tak tak a nei thluah a, ka pa hian an hausakna zar zo a tum tlat hi ka hrethiam thei lo a ni. Milly pa hi hnamdang a ni a, ka mizo rilruah chuan mizo dik tak lo chu nupuia neih ka tum bau lo.

Milly hi ngaihzawng angin ka en lova, amah pawhin a hre nghe nghe. Ani pawhin hmangaih deuh anei ve thova, a pa bum nan inkawp angin kan lang mai mai a ni. Kan awmna Mizoram hmuh ve a chak avangin vawiin khan alo thleng a, helai hotel hi hotel țha ber a an sawi anih avangin, a thlenna tur ka buaipui a, a tuka kir leh mai a tum avangin ka buaipui lo thei lo a ni.

Restaurant a Zorini ka hmuh khan helaiah hian a thawk ani tih ka hre chiah a. A hma khan a thawhna zawh nachang reng ka hre lo a ni. A kianga mipa țhu lah chuan a duh hmel kher mai lehnghal a, a țhiannu Mahmingi pawh chuan a duhpui hmel hle bawk. An pathum chuan an hlim hle a ni tih ka hmu mai. Ka thinzawnah hian engemaw min vit sawktu awm ang nai hian a na vawt vawt mai. Milly kal hnu chuan ka pan vat a, ka duh aiin ka vin phah lehnghal.

Min biak duh tawh loh thu a sawi khan ka na zawk a, ka thin a rim bawk. A bula mipa țhu lah chuan a thlavang hauh alo tum ve khanglang. Zorini'n duhtawk tur leh amah kalsan tura min tih pah chuan a tlanchhuak nghal daih.

A țhiante pahnih chuan rum tawka min en chung hian an umzui ve nghal vat a, Restaurant chhunga awm ve te chuan min en duh hle ani tih ka hmu chiah. Ka tihzah zia ka hriatchhuah chuan ka inthiamlo ngei mai. Zanah an inah kalin thupha ka chawi tawh mai aniang chu. Kei hi Zorini chân mai thei dinhmunah ka ding tlat.


End of Malsawma Pov*


Restaurant ațanga ka chhuak chu ka kalna pawh ngaihtuah lo chuan ka kal hlawk hlawk a. Mi awmlohna hmun remchang zet mai ka hmuh chuan ka țhu nghal tawp. Malsawma min tihzahzia leh min tih mualpho zia ka hmuhin Ka thinrimin ka zak ngawih ngawih a, khatiang renga mualphona kha ka la tawng ngai lo.

Zawimuang hian hotel lam chu ka pan leh ta a, ka hna pawh ka thawk tui tawh lo. Haw vang vang ka chak ber tawh.

Ka chhuak ta tawp a, hetia ka awm reng chuan ka rilru pik lutuk hi ka â thei mai dawnin ka hria.

"Nang nu hi, kan zawng nasa lutuk che asin, khawilamah nge i kal daih a?" Mahmingi chuan alo ti nghal bawrh bawrh a. Manilomaha rilru hah nakalaia min vin hrep chu ka thin a rim hlur mai.

"Khawiahmah, ka haw dawn ania." Ka ti nghal tawng a.

"Min lo nghak rawh, ka inpeih țep."

"Ka lo va chhuak ange, inchhunga ka awm chuan ka pik zual tlat." Tih pah chuan ka chhuahsan nghal a.

Pawn ka chhuak chiah tih chuan ka banah nghet lutuk hian an rawn man chawt a, ka țe țhawt. Malsawma bawk chu!

A car lam pan chuan min kai dawr dawr a, car kawngkhar a hawng a, "Lut nghal rawh."

"Engvangin?"

"Lut mai rawh, tihluihna ka hman kher ngai lovin."

"I bula kalna chhan tur ka nei lo," ka ti let hmak a.

"A țha e," tih pah chuan car chhungah chuan min nawr lut nghal a, kawngka a khar nghal țhuai. Amah pawh a rawn țhu lut nghal a, chak deuh hian a tlanchhuak nghal a, "I khalh chak lutuk, tlanmuang deuh teh," ka au chul chu a ngaipawimawh lo kher mai.

"Khawiah nge min hruai i tum?" A thinrim hle ani tih a bek pawn țawlh țawlh danah chuan a lang reng mai a, a hmel ka en chuan hlauhna ka nei thut, a ngawi ngul bawk si nen. Ka țawng pawh hre awm in a awm map lo.

A tawpa tawpah chuan a ding ta dawt a, ka han en chuan a inah min hruai a ni tih ka hre nghal.

Car ațang chuan a chhuak a, ngawi rengin ka țhutna lam chu a rawn hawng a, ka chhuak ve nghal mai bawk.

"Engvangin nge hetah hian min hruai a? Ka lak ațang hian enge i duh?"

"Inchhungah lut phawt ila, kan sawi dawn nia." A kal nghal hmiah. Ngawi rengin ka zui ve mai a, zui mai loh chu tihtheih nei hek lo i le!!


<><><><><><>®<><><><><><>

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)