RIDE THE MAN DOWN (Cowboy) (Completed)

[Ngaia]

RIDE THE MAN DOWN
chapter - 19
(Last chapter)

Wade-a chuan lehkha chu chhiar nawn a han tum a, mahse hmuh pawh a hmufiah thei tawh lova, rilru mumal pawh a pu thei tawh chiah lo a ni. A lo ngawi rei lutuk deuh a ni ber mai. Harsa taka a lo tuarna zawng zawng te kha a thlawn a ni zo ta vek a, a han inngaihtuah let leh a, Jacqueline-i chuan amah hi a lo hmangaih ve tak tak anih si chuan outlaw a nih vang te, rangers te um lai anih vang te chuan Jacqueline-i tlansanna tur chhan engmah awm thei tak takin a hre ta lova, thil dang zawng zawng chu pawimawh lo leh engmahlo vek angah a ngai ta zawk a ni.

A rilru a thlak leh hma in Rona leh Kinsey te inhmuhna hmun chu a pan ve ta a. A hmun a va thlen dawn tep lai te chuan Jacqueline-i va hmuh tak tak pawh a la inring ngam ta lo fo a. Mahse a va thlen meuh chuan thla eng hnuaia Jacqueline-i ding chu a va hmu ta a. Tlan chungin a va pan a, "Jacque," tih pahin a va pawm a, "I lo kal duh tak tak a ni maw? I lehkha kha ka lo hmu a, eng atna thil nge ka chunga lo thleng ta ni," a ti a. Nula chu a han pawm nghet sauh a, a sam chu a chul sak a. A hmel te chu thla eng hnuaiah chuan a han en a, nula mitmeng, hmangaihna hlira khat chu a hmuhin Wade-a chuan tlanbo chi rual a ni lo tih a hrechiang ta em em a ni.

Jacqueline-i chuan "Engatinge min hmuh duh lawk loh?" a ti a. Wade-a nghawngah chuan a han kuah a, Wade-a chuan "Chutiang sawi a hun tawh lo, a tlai lutuk ta. Min hmangaih takzet a nih si chuan......." a han ti a, nula chuan "Ka hmangaih luat avang che hian hrehawm nasa tak ka tuar tawh a ni," a ti a. Wade-a chuan "Jacqueline, i rilru a va han tha em....ka....." a ti a, sawi tur pawh chu a theihnghilh zo ta vek a. Nula chuan "Ka rilru chu a tha viau pawh a ni maithei, mahse nangmah ka hmangaih che avangin thil dang reng reng a leng tawh lo," a ti a. Wade-a chuan "Ka fiamthu a ni lo, keia tan chuan thih leh dam tlukin a hlu a, a pawimawh a ni. Ka hmuh tirhte atang che khan ka hmangaih nghal che a, i tan hian thih pawh ka huam a, mahse ka vanneih vang nge ka vanduai vang pawh ka hrelo, min that ta tlat silo a, Jacqueline,.....i in hrechiang tak zet em ni?" a ti a. Nula chuan "Ka hmangaih che a ni tih ka hrechiang ang bawkin nang pawhin min hmangaih ve a ni tih tunah chuan ka hrechiang ta. Kinsey-a thusawi kha ka lo ringhlel tlat thin a ni," a han ti a.
Wade-a chuan,"Thu dik tak a sawi anih kha,"a ti ta a.Nula chuan,"Mahse nangin min hrilh ngai miah si lova,engtinnge ka hriat theih ang?"a ti a.Wade-a chuan,"Ka hrilh ngam lo che ani,"a ti ve tlat bawk si a.Nula chuan,"Tun hmaa i lo khawsak dan te chuan min tibuaiin i ring reng reng em ni?Tunhma lam zawng khan eng ang mi pawh lo ni mahla pawi ka tih i ring em ni?"a ti a.Wade-a chu a han kuah nghet sauh a,"Tunah chuan thil pakhat chauh sawi la khawvela hmeichhe hlim berah min siam tawh mai ang,"a ti ta a.
Chutih hunah pawh chuan a thuruk ril ber, a nihna diktak chu Wade-a chuan a la sawichhuak ngam ta lo fo a. Mahse nula chu a hmangaih tlat bawk si avangin a insum zo ta ngang lova, ti chuan "Min nei duh angem?" tiin a zawt ta nge nge a. Nula chuan,"Darling,nangin min duh phawt chuan ka inpeih e,"a han ti sap a Fawh beisei tak maiin chho zawngin Wade-a chu a en ta a.Wade-a pawh chuan tun hmaa khawhar taka a lo awm tawhna te chu theihnghilhin nula hmuiah chuan a fawp ta a.Thudang engmah sawi ngai tawh lovin an inhmangaihna chu chet danin an lan tir ta zawk a ni.

Kum khat mai pawh ni lovin a dang te pawh a lo ral ta hial a. Nipui lai a ni a, Cedar Range velah chuan ruahtui a tam tawkin tlangkar leh phairuam velah te chuan hnim hring, bawng peh atana itawm tak mai chu a khat tlat hlawm a. Chunglai vela chengte chuan ruahtui tam tawk dan te, hnim hring that dan te chu an hmuhin an kum that kum a lo thleng dawn a ni tih an hrethiam mai a. An beisei ang ngeiin Pencarrow-a cowboy te chuan bawng note thar hlir 5,000 rual khelah Pencarrow chhinchhiahna C.R.B tih chu an chhu thei ta a. Tin, chunglai vela cheng, bawng vulh tu dangte pawhin an bawng vulh chu an ti pung nasa ve em em bawk a ni.

Chunglai vela lal ang maia lo che tawh thin, bawng ruk hmang, rustlers ho chu an bo zo vek tawh a. Pine Mount khua pawh chu a ram zo vek tawh a. Khua atanga Holsbrook panna kawng pawh chu hnimin a bawh khat zo vek tawh a ni. Harrobin's hole tia an vuah, Harrobin-a leh a hote tawm khawmna phei kha chu "huai a nei e" an tih avangin tumah pawhin an tlawh tha duh tawh lova. Cowboy te pawhin chulai hmun vel chu pumpelh hram an tum zel a, a panna kawng pawh chu an zawh duhlo lui ngat zel a ni.

Arizona hmun hrang hrangah te chuan zana meilum ai pahin cowboy hote chuan rustler ho khaihluma an awm thu te, Randall Blue-a ruang tumahin an khaihlumna thingzar atanga an lak thlak duh loh thu te chu an sawi a. Thu mak pui pui te pawh sawi tur an hre tam hle a. A rei deuh hnu phei chuan an in hriat mak siak hi a ni ngawt tawh zawk a. Engpawh nise chunglai ram velah chuan rustler ho rorelna ni chu a tawp tawh a, Arizona ram chhim lamah te chuan Texas mi tam tak an pem luh belh a, lo nei mi te leh ran vulh mi te an in chenpawlh nasa ta hle a ni.

Tex Brandon-a hming chu a chhe zawng leh a tha zawng pawhin a thang nasa em em mai a, hmingthanna mai pawh niloin Wade-a chuan hausakna nasa tak pawh a hlawh chhuak bawk a. Mi tam takin amah chu an zahin an ngaisang em em a ni. Tin, a tlansan theih tak loh avangin a chunga thil lo thleng chu Wade-a chuan a pawm ta nge nge a. Mahse engemaw chang chuan rilru hahna tak a nei thin a. Sakawra chuangin, tumna mumal pawh nei hran lovin a vak kual vel thin a. A rilru hahna leh hlauhthawnna lian tak a neih thin chu a la bo tak tak theilo a ni.

June thla a lo thleng a, Jacqueline-i nen an inneihna champha a lo ni tawh a. Naute pawh an lo nei ve ta a. Pencarrow chuan tu a lo neih ve tak avangin a hlim tak zet zet a, a hlim vanglai tak a ni bawk a, a fanu Rona leh Kinsey te inhual tura an ngenna pawh chu a phalsak ta hial a. Kinsey-a farnu kebai pawh chu Kansas rama damdawiinah an dah a. A natna chu an lo tihdam sak ta nghe nghe a. A farnu a hmangaih avang hian Kinsey pawh hian kawng diklo a lo zawh phah kha a ni a, tunah chuan a farnu chu a lo dam leh ta a ni.Kinsey-a farnu chu kum 18 mi a ni tawh a, a hmel tha bawk si a, Pencarrow-a cowboy te chuan an hlim phahin a chang chuan an buai phah hle bawk thin a. Hal-a chu nula lakah chuan thei teuh deuh berin a lang a. Kid Marshall-an Hal hnung a la zui ve leh chhawng a ni.

A vanneihna kawng tam tak te leh a chunga thil lo thleng tam tak te avangin Wade-a tan hlim loh ngawt chu thil harsa a tling zawk a. Mahse a hlim lai ber pawhin a rilru chhungril berah nuam tih lohna, ngaihthatlohna leh engthawl tak tak theih lohna lian tak a awm leh tlat thin a. Chu chuan a nun a tihrehawm em em a. Zanah rei tak tak a men changte chuan engtik niah emaw a thil hlauh ber chu a chungah a lo la thleng ngei dawn tih a ring tlat si a. Mahse chumi hun a lo thlen hma zawng chuan a theih tawpin Jacqueline-i hmangaih let ve a tum a ni.

Vawi tam tak chu mahni thian hlui te kalsan a, gunman leh outlaw pil bo ta daih te chung chang hi Wade-a chuan a ngaihtuah thin a. Chung mi te chanchin chu a chang chuan hriat zui theih hlek lohin a bo hlen daih thin a. Chutiang mi te pawh amah ngei hian tam tak a lo hre tawh a ni. Outlaw hming thang tak te, gunman sual tak tak te pawh a hmuin a hmelhriat ve tawh thin a, a chang chuan chung mi te chu an bo daih a, an chanchin tumah in an hre zui tawh ngailo. Hmanlaia a thil tih sual avang khan tunah hian hmuhchhuaha awmin a nupui hlimna leh lawmna zawng zawng chu lakbo sak ni ta ang se, thil dik a ni thei angem? Wade-a hian a nunhlui chu a sim daih tawh a, hrem a la hmabak fo dawn em ni ang? Heng zawhna te hi amah leh amah a inzawt fo thin a ni.

A fa karhnih a tling chiah tihin tuk khat chu Elwood-a ranch atangin Wade-a chu a lo kir a, Elwood-a bawng chaw alfalfa ton 1,000 vellai leisak ila a tha ang tih te a ngaihtuah neuh neuh a. An in a va thleng a, a sakawr chu huang chhunga a khalh luh laiin an in piah lawk, thing hmuna sakawr engemaw zat inthlung chu a va hmu ta a. Sakawrah chuan a zin te pawh a lo inphah sa vek a. Chu chang nilovin, mihring chuanna nilo, thuam phur chi sakawr te pawh a hmu tel a. Tin, sakawra chuang te pawh chu sir lehlamah cowboy ho nen an lo ding khawm a, titi khawchang sawi khawm ni ngei hian an lang a. An hmel leh an chezia a hmuh atang mai pawhin Texas Rangers an ni tih a hrechiang hle a. Hlauhna leh thinrimna in a rilru a khat thut a, mahse a han inngaihtuah chiang leh thuai a, a nun hlui chu paih hlen tumna lian tak a nei ta zawk a. Tichuan a rilru a siam nghet ta nghal a. Tunhma zawng khan Texas Rangers thisen far khat te pawh a la chhuah ngailo a, tunah pawh hian chhuah a tum ta lo. A chunga thil lo thleng tur chu do let lo a huaisen taka tuar chhuah a tum ta a ni.

Wade-a chuan Jacqueline-i a han ngaihtuah leh phut a, a nihna diktak hmana a lo hrilh lo kha a inchhir ta em em a. Lo hrilh daih tawh chu nise Jacqueline-i chuan a tuar nep deuh ngei ang a, a zah dan pawh a ziaawm deuh tur. Mahse amah a hmuhsit let a hlauh avangin a nihna dik tak chu a zep tlat a, tun thleng hian engmah a la hrilh ngam ta si lo a. Tunah chuan a tlai lutuk ta.

Ranch in tuallaiah chuan sakawr pakhat, a zin phah sa diam, tlanchak hmel deuh hi a ding a. A lakam pawh chu inthlung chuang lovin leiah a uai thla a. Tin, Texas Rangers ho hman chi, rifle pawh sakawr zin sirah chuan a bawmah a inkhung bawk a. Chung zawng zawng chu a hmuhin sakawr chu Texas Ranger ta anih ngei a ring a. Ranch bathlarah chuan a tlan lawn a, thutna pindan chhungah chuan a lut ta nghal a. Pindan laia dawhkan chungah chuan lukhum lian tak mai leh kut kawr hi a awm a, mutna pindan chhung atanga aw lo chhuak te pawh a hre thei ta nghal a. Pencarrow-a aw leh midang pakhat, aw thum deuh hlek, Texas mi awphawi tih hriat deuh mai hi a hre ta a.

Wade-a chu che miahlo in minute khat zet a han ding a, a tan chuan duhthlan tur kawng hnih chiah a awm ta a ni. Pakhatah chuan khawngaihna nei miahlo a amah man tum tu chu thah a ni a, a dang lehah thung chuan Jacqueline-in a beisei leh a lo rin ang ngei a engkim tih zel chu a ni. Chutia mumal neilo taka a din reng lai chuan Jacqueline-i nui ri a hre ta a. Jacqueline-i aw chuan "Naute hian a pa a ang berin ka hria," a han ti a.

Pencarrow -a chuan "Keimah hi min ang ber zawkin ka hria. I nute lam pawh a ang ve lek lek anih hi mawle," fiamthu tih hriat tak hian a han tia.Jacqueline-i chuan,"Ka pa,captain Mahaffey hi chhun chaw ei ve nghal turin sawm ta che.Tex pawh a lo haw thuai tawh ang,"a ti ta a.Captain Mahaffey, 'Man ngei ngei rawh u' tia a hote fuihtu kha tunah hian Wade-a te khum pindan chhungah a awm tihna a nih tak chu!
Wade-a chuan hetiang hun hi a la thleng ngei dawn tih chu a rilru chhung takah chuan a ring tlat thin a. Mahse atthlak takin mahni leh mahni a inhnem chawp a, a lo thlamuang leh mai thin a ni. Engpawh chu nise, a thil tih tawh zawng zawng, Jacqueline-i nupuia a neihna chhan zawng zawng te pawh Wade-a chuan a han chhui kir a, ama hlimna leh lawmna a zawn vang ngawt ni lovin midangte tih lawm a duh vang zawk a thil lo ti tawh a ni tih Wade-a chuan a inhria a. Chu chuan tlemin a rilru a ti nuam deuh hlek a ni. Tun tumah pawh hian captain Mahaffey chuan Wade Holden-a hmu loin Tex Brandon-a a hmu dawn a ni. Chutiang khawp hial chuan Wade-a chuan a nun a thlak chiang tawhin a inhria a ni.

Wade-a chu khum pindanah chuan a lut ve ta a. Jacqueline-i chu lukhamin a in kam thu a, a hmel leh a mitmeng te reng reng chu hlimna hlir hian a khat a. Tukverh atanga ni zung lo lut chuan a sam te chu a rawn chhun a, thliin a han chhem zawng te chuan tle siau siau hian a lang a. Nausen pawh chu a nu bulah chuan a mu a. Hriattham mang siloh hian a rum ve hlat hlat a. Pencarrow chu khum sir lehlamah chuan a ding a, tin, Wade-a dinna atanga hnai berah kawngkhar hnungchhawnin pa dar pharh hlai tak, sam var vek tawh hi a thu a. Texas Rangers captain, misual hmingthang tam tak pawh lo man tawh thin si, kawngkhar hnungchhawn zawnga a han thu tlat mai te chu Wade-a chuan mak tihna tak a nei a. Captain fimkhur loh vang leh fimkhur na chang a hriatloh vang anih chu a ring bawk silo a.

Wade-a hmel a hmuh vang ringawt pawhin Jacqueline-i chu hlim zual sauh hian a lang a. "Hei, a lo thleng ve ta alawm, Darling, Texas ram atanga lo kal inleng kan nei asin. Captain Mahaffey, hei hi ka pasal chu a ni," a ti a. Wade-a leh captain te pahnih chu a inhmelhriat tir ta a. Captain chu a ding a, a leh hawi ta thuai a. A hmel leh a mitmeng te pawh a la pangngai reng a. Hman aia a upat deuh hlek tawh avangin a hmel chu tlemin nelawm lo deuh sawtin a lang a. Wade-a chuan "I dam em captain? Texas ram ka chhuahsanna a la rei tehchiam lo bawk a, i hming hi chu ka la theihnghilh hman em lo asin," a han ti a. Captain chuan "Nang hi Brandon-a chu i lo ni maw? Ka kalna apiangah i hming hi ka hre ve zel a ni. Chibai i han inbuk teh ang," a ti a. Mitmeng danglam deuh tak chungin Wade-a chu a han en a, a kut pawh a phar chhuak bawk a.

Wade-a chuan a rilru in "Captain hian enge tih zel a tum ang aw.....E....dan mawi chu zawmin hmeichhe awmlai chuan min man a duh lo a, pawn chhuah huna min man a tum dawn anih hi," a ti rilru a. Captain chuan "I kut ang hi mi kut pawh ka hmer tawh thinin ka inhria, hmeichhe kut ang maiin a nem a, mahse a pawnlang chauh hi a nem bawk si a. Ka thian hlui, Buck Duane te, Wess Hardin te, King Fisher te kut pawh hetiang vek hi niin ka hria. Hreipui pawh i hmang ngai lova, i kut hi i duat hle niin a lang," a han ti a. Wade-a chuan nui chung hian "Hna rim thawh nan chuan ka kut hi ka la hmang ngailo reng reng a ni. Mahse tunah hi chuan silai chelek lam chu ka bansan ta. Thing te pawh ka la ek in, lei te pawh ka la let maithei, Mahaffey, Billy the Kid nen chibai in inbuk tawh mial lo maw? a ti ta a.

Captain Mahaffey chuan "Ka vanduai ngawt mai, Texas Rangers ni mah ila Billy the Kid hi ngainatna leh ngaihsanna tak ka nei tlat asin. Billy the Kid chu Pat Garrat-an a kaphlum tawh si a, chibai bukna hun remchang chu ka nei dawn ta lo anih hi," a ti a. Chutihlai chuan Jacqueline-i chuan "Silai leh puakruk ringawt in atchilh a, chutiang lam chu ngaihven vak suh u. Naute hi silai ai chuan an pawimawh zawk. Ka nau pawh hi han en ve zawk teh u," a lo ti a.

Captain Mahaffey chu a zu kun hniam a, nausen kut chu duat deuh mai hian a han vuan a. Jacqueline-i hnenah chuan "I ti dik chiah mai, silai ai chuan a let engemaw zatin a pawimawh zawk," a ti a. A han ding mar leh a, nausen kut pawh chu a thlah a. Chutih lai chuan a hmel nelawm lohna te pawh chu a bo zo vek a, a mitmeng te pawh chu nem ta hle hian a lang bawk a. Wade-a hnenah chuan "Brandon, Pencarrow hian i chanchin leh henglai vela i thil tih that zawng zawng min hrilh a, i thawk ropui tak zet a ni. Big Band rama misual pawl khat chu Buck Duane-a khan a ti tiau vek a, a thawk ropui hle. Mahse a taksaah silai mu tam tak a pai phah a, nang erawh hi chuan silai mu pumpelh chu sawi loh, hliam chhete pawh tuar lo in i um bo vek thei a, i vannei tak meuh meuh a ni," a han ti a. Wade-a pawh chuan "Ka vanneih zia hi thilmak a tling a, Jacqueline-i vang vek hi niin ka hria," a lo ti a. Captain chuan "A ni ngei ang. I nupui hlut zia hi i hrethiam phak tak tak em? a ti a. Wade-a chuan "Ka tana Jacqueline-i hlut zia hi chu kei chang nilo, Pathian pawhin a hrechiang ngawt ang. Hetiang thil hlu lutuk hi ka phulo zawk a ni," a ti a.

Captain chuan "Brandon, hmeichhe puihna tello chuan mipa hian eng ang nge anih chiah a inhre chhuak tak tak thei lo. Tuna i awm ang hian i damchhungin awm tum tlat ang che," a han ti a. Wade-a chuan engmah pawh a sawichhuak thei tawh lova, Mahaffey bawk chuan "Mrs Brandon, in vaiin dam takin ule. Ka lo kal hma aia tuna ka hmuh hnu che u a ka hlim tak zawk zia hi ka sawi chhuak thiam lo," a ti ta a.
Captain chu pindan atangin a chhuak a, Pencarrow chuan a zui chhuak nghal a. Pawn an chhuah hnu chuan Pencarrow chuan "Captain, chhun chaw ei tur chuan in awm ve hman lovang maw?" a han ti a. Mahaffey chuan "Pawi ka ti ngawt mai. Kan chawl hman tawh lo ang. Tin, i unaupa Glenn-a thihnaah khan inhnamhnawihna engmah ka neih loh zia hrilhna che hun remchang ka nei ta hi ka lawm ngawt mai. In mi ngaih angin keini rangers ho hi....." a ti a, chubak a thusawi dang chu Wade-a te nupa chuan an hre pha ta lo a.

Wade-a chu a nupui mutna khumah chuan a va thu a, an chunga thil lo thleng zawng zawng chu a mumang emaw te a ti rum rum a. Mahse a nilo tih chu a hrechiang em em bawk si. Hrehawm a lo tuar tawh zawng zawng te, rukru anga an khawsak lai te, a pa te pawh khan mumang an ang zo vek tawh a. Harhchhuak leh tur la awm ni te in a inhre hial a. Chutia ngawi renga a inngaihtuah lai chuan a nupui chuan mittui tla chungin a lo en reng a.

Chutia an ngawih reng lai chuan sakawr tlan thawm an hre ta a. Texas Rangers Captain Mahaffey-a, a ho te hnen a "RIDE THE MAN DOWN" tia fuih thin tu khan Wade-a te in chu a kalsan ta a ni. Thil awmzia chu hriain Jacqueline-i pawh chuan "Wade, tunge i nih a hria che anih kha," zawite hian a han ti a. Chu veleh Wade-a chuan "Eng hmingin nge min koh tak?" a han ti a, mak a tih em avangin mumang ang zual sauh hian a hria a. Mahse mumang anih loh zia hriattir turin Jacqueline-i chu a mutna ngaiah a la mu reng a. A mitmeng te pawh chu hmangaihna mitmeng anih avangin a mawi em em bawk si a. Jacqueline-i chuan "Darling, 'Wade' tiin ka ko che anih chu. Wade Holden i ni alawm. Hmanah khan tleirawl te i nih laiin nichina lo kal, Mahaffey-a kut atangin ka chhanchhuak che anih kha. Kan ranch a i lo kal leh hmasak ber atang khan tunge i nih hi ka hre tawh che a, mahse i hote nen in lo kir leh a, zan thla eng hnuaia puan in kawt a ka hmuh che khan ka hrechiang ta takzet che a ni. Wade darling, ka hai miahlo che asin," a ti a.
Wade-a chu a nupui bulah chuan a thingthi a, "Tunge ka nih hre reng chung siin min hmangaih duhin min nei duh tho amaw?" a ti a. Jacqueline-i chuan zawite in "Ni e, ka hmangaih che a, ka nei ta che anih hi. Mahaffey-a kha lo kal kher lo sela chuan ka thil hriat hi hrilh che ka tum lo reng reng. Zep tlat ka tum a ni.Mahse, Wade,Mahaffey pawh khan a hria che a,man che tumin a lo kal anih kha.Ka hriat che pawh hi a ring bik miah lovin ka hria.Ka pa nen khan i chanchin kan sawi ta zel a,a rilru kha a nem ta tial tial a,man che a tum pawh a thulh ta anih kha.Darling,Wade i ni tih a hre chiang khawp che a sin.A hria che tih kha i hrethiam ve lo a ni maw?"a ti a
Wade-a chuan,"A chet dan atang leh a thusawi hmang a tang khan min hria tih chu ka hai bik lo,"a ti a.Jacqueline-i chuan,"A bula i insum thei kha ka va lawm tehlul em.Thuruk,kan thuruk lian tak hi vawng chungin a kal liam ta anih kha.Chuvangin ka hria che tih pawh hi ka sawi chhuak ta mai a ni.Tun hma lama i thil tih sual tawh zawng zawng man chu i rul tla vek tawh a, Mahaffey-a ngei pawh khan a ngaidam ta che anih kha. Wade, tunah chuan i zalen ve ta," a ti a. Wade-a chuan "Min um tu an awm reng tih ka hriat, outlaw anga ka inngaihna atang kha chuan ka zalen tawh a. Mahse ka pa pawisa min pek, sum thianghlimlo ka hmanna lak atang kha chuan ka rilru a la nuam thei chuang lo. Mi ruk sa, ka pa pawisa min pekin i pa kha ka pui ta si a......" a ti a.

Jacqueline-i chuan "Outlaw i nih chhung zawng te pawhin pawisa chu i khek tlat em ni?" a ti a. Wade-a chuan "Ni e, mahse a neitu dik tak hnena pekkir leh chu thil tih chi rual a ni tawh lo. Tu ta ber nge a nih Pathian chauh lo chuan a hre silo," a ti a. Jacqueline-i chuan "Mahaffey-a puihna tello pawhin chu chu ka theihnghilhin ka ngaidam thei asin. Captain Mahaffey-a kha Dan aiawh a ding a ni a. A ni ber khan a ngaidam tawh si che a, i thil tihsual zawng zawng te kha i thil tih that hian a khuh zo vek a ni. Chu chu a chhanna a ni. Mahaffey-a pawh khan thil dang zawng zawng chu a theihnghilh vek tawh a ni," a ti ta a. Wade-a chuan "Brandon-a hi ka hming laihawl ania, ka nu hming ka chhawm a ni," a ti a. Jacqueline-i chuan "Hming hian awmzia enge a neih? Mahse Jacqueline Pencarrow Brandon tih hming chu a mawi ber niin ka hria. Naute hi han pawm la, tukverh atangin kan ram i thlir dun teh ang, darling," a ti a. Wade-a chuan naute chu a pawm a, tukverh atangin an piah ram zau deuh mai chu a nupui nen an thlir dun a.

Wade-a rilru chu a lo harhchhuak thar a, a pa leh Mahaffey-a nihna te, a nupui te pawh chu a hrethiam ta vek a. A chunga thil lo thleng chu thil tih sual sim a, nun tha zawk leh nunthar a nung te awmdan tur ani tih te pawh Wade-a chuan a hrethiam ta vek a. Mumal neilo taka outlaw anga a khawsak lai pawh khan tuna a nihna tur hian a lo hmuak reng a, a pa hnena a thutiam a hlen tak avang leh a nunhlui chu sim a, nundan tha a lo zawh tak avangin vanneihna sang tak a dawng dawn ta tih Wade-a chuan a hria a. Khingkhatin naute chu a pawm a, lehlamin a nupui chu a kuah bawk a. Tichuan an piah ram mawi deuh mai chu rilru hlim em em chungin an thlir za ta a ni.

A TAWP TA....

(Like tu leh comment tu te, in zavaia chungah ka lawm e).